📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

སཱསནཝཾསཔྤདཱིཔིཀཱ

བུདྡྷཾ ¶ སུམཱལཱི དྭིཔདུཏྟམོ ཏམོ,

ཧནྟྭཱན བོདྷེསིདྷ པངྐཛཾ ཀཛཾ;

མགྒགྒསེལམྷི སུཉཊྛིཏོ ཋིཏོ,

སོ མཾ ཙིརཾ པཱཏུ སུཁཾ སདཱ སདཱ.

སཱིཧལ༹དྡཱིཔཏོཡེཝ,

ཨཱགཏེཧི དིསནྟརེ;

བྷིཀྑཱུཧི ཡཱཙིཏོ ཀསྶཾ,

སཱསྣཝཾསཔྤདཱིཔིཀཾ.

ཀཱམཉྩ པོརཱཎེཧི ཡཱ,

སཱསྣཝཾསཔྤདིཔིཀཱ;

ཝིཏྠཱར ཝཱཙནཱམགྒཱ,

ཝིརཙིཏཱ ཝིནིཙྪཡཱ.

སཱ ¶ པན མརམྨབྷཱསཱཡ,

ཀཏཏྟཱཡེཝ ཨེཏེསཾ;

དཱིཔནྟརནིཝཱསིནཾ,

ཝཧཱཏི སུཊྛུནཱཏྠཾ.

ཏསྨཱ ཧི མཱུལབྷཱསཱཡ,

ཀརིསྶཱམི ཨཧཾ ཧཝེ;

སཾསནྡིཏྭཱན གནྠེཧི,

ཏཾ སལླཀྑེནྟུ སཱདྷཝོཏི.

ཏཏྲཱཡཾམཱཏིཀཱ –

༡. ནཝཊྛཱནཱགཏསཱསནཝཾསཀཐཱམགྒོ,

༢. སཱིཧལ༹དཱིཔིཀསཱསནཝཾསཀཐཱམགྒོ,

༣. སུཝཎྞབྷཱུམིསཱསནཝཾསཀཐཱམགྒོ,

༤. ཡོནཀརཊྛསཱསནཝཾསཀཐཱམགྒོ,

༥. ཝནཝཱསཱིརཊྛསཱསནཝཾསཀཐཱམགྒོ,

༦. ཨཔརནྟརཊྛསཱསནཝཾསཀཐཱམགྒོ,

༧. ཀསྨཱིརགནྡྷཱརརཊྛསཱསནཝཾསཀཐཱམགྒོ,

༨. མཧིཾསཀརཊྛསཱསནཝཾསཀཐཱམགྒོ,

༩. མཧཱརཊྛསཱསནཝཾསཝཐཱམགྒོ,

༡༠. ཙིནརཊྛསཱསནཝཾསཀཐཱམགྒོཙཱཏི.

༡. ནཝཊྛཱནཱགཏསཱསནཝཾསཀཐཱམགྒོ

༡. ཏཏྠ ཙ ནཝཊྛཱནཱགཏསཱསནཝཾསཀཐཱམགྒོ ཨེཝཾ ཝེདིཏབྦོ. ཨམྷཱཀཉྷི བྷགཝཱ སམྨཱསམྦུདྡྷོ ཝེནེཡྻཱནཾ ཧིཏཏྠཱཡ ཧཏྠགཏཾ སུཁཾ ཨནཱདིཡིཏྭཱ དཱིཔངྐརསྶ བྷགཝཏོ པཱདམཱུལེ བྱཱཀརཎཾ ནཱམ མཉྫཱུསཀ པུཔྥཾ པིལནྡྷིཏྭཱ ཀཔྤསཏསཧསྶཱདྷིཀཱནི ཙཏྟཱརི ཨསཁྱེ ཡཱནི ཨནེཀཱསུ ཛཱཏཱིསུ ཨཏྟནོ ཁེདཾ ཨནཔེཀྑིཏྭཱ སམཏིཾསཔཱརམིཡོ ¶ པཱུརེཏྭཱ ཝེསྶནྟརཏྟབྷཱཝཏོ ཙཝིཏྭཱ ཏུསིཏཔུརེ དེཝསུཁཾ ཨནུབྷཝི.

ཏདཱ དེཝེཧི ཨུཡྻོཛིཡམཱནོ ཧུཏྭཱ ཀཔིལཝཏྠུམྷི ཧོསམཏརཉྙཱ པབྷུཏི ཨསམྦྷིནྣཱཏྟིཡཝཾསིཀསྶ སུདྡྷོ དྷནསྶནཱམ མཧཱརཉྙོ ཨགྒམཧེསིཡཱ ཨསམྦྷིནྣཱཏྟིཡཝཾ སིཀཱཡ མཱཡཱཡ ཀུཙྪཱིསྨིཾ ཨཱསཱལི༹མཱསསྶ པུཎྞམིཡཾ གུརུཝཱརེ པཊིསནྡྷིཾ གཧེཏྭཱ ཨསམཱསཙྩཡེན ཝེསཱཁམཱསསྶ པུཎྞམིཡཾ སུཀྐཝཱརེ ཝིཛཱཡིཏྭཱ སོལ༹སཝསྶིཀཀཱལེ རཛྫསམྤཏྟིཾ པཏྭཱ ཨེཀཱུནཏིཾསཝསྶཱནི ཨཏིཀྐམིཏྭཱ མངྒལཨུཡྻཱནཾ ནིཀྑམནཀཱལེ དེཝེཧི དསྶིཏཱནི ཙཏྟཱརི ནིམིཏྟཱནི པསྶིཏྭཱ སཾཝེགཾ ཨཱཔཛྫིཏྭཱ མཧཱབྷིནིཀྑམནཾ ནིཀྑམིཏྭཱ ཨནོམཱཡནཱམ ནདིཡཱ ཏཱིརེ བྷམར ཝཎྞསནྣིབྷཱནི ཀེསཱནི ཚིནྡིཏྭཱ དེཝདཏྟིཡཀཱསཱཝཾ པཊིཙྪཱདེཏྭཱ ནེ རཉྫརཱཡནཱམ ནདིཡཱ ཏཱིརེ ཝེསཱཁམཱསསྶ པུཎྞམིཡཾ པཙྩཱུསཀཱལེ སུཛཱཏཱཡནཱམ སེཊྛིདྷཱིཏཱཡ དིནྣཾ པཱཡཱསཾ ཨེཀཱུནཔཎྞཱསཝཱརེན པརིབྷུཉྫིཏྭཱ པུརིམིཀཱནཾ སམྨཱསམྦུདྡྷཱནཾ དྷམྨཏཱཡ སུཝཎྞཔཱཏིཾ ནདིཡཾ ཨོཏཱརེཏྭཱ མཧཱབོདྷིམཎྜཾ ཨུཔསངྐམིཏྭཱ ཨཔརཱཛིཏཔལླངྐེ ནིསཱིདིཏྭཱ ཨནམཏགྒསཾ སཱརཏོ པཊྛཱཡ ཨཏྟཱནཾ ཚཱཡཱ ཝིཡ ཨནུཡནྟཱནཾ ཨནེཀསཏཀིལེསཝེརཱིནཾ སཱིསཾ ཙཏཱུཧི མགྒསཏྠེཧི ཚིནྡིཏྭཱ ཏིལོཀགྒམཧཱདྷམྨརཱཛཏྟཾ པཏྭཱ པཉྩཏཱལཱིསཝསྶཱནཾ ཏེསུ ཏེསུ ཋཱནེསུ ཏེསཾ ཏེསཾ སཏྟཱནཾ མཧཱཀརུཎཱསམཱཔཏྟིཛཱལཾ པཏྠཱརེཏྭཱ དེསནཱཉཱཎཾ ཝིཛམྦྷེཏྭཱ དྷམྨཾ དེསེཏྭཱ སཱསནཾ པཏིཊྛཱཔེསི. པཏིཊྛཱཔེཏྭཱ ཙ པན ཨསཱིཏིཝསྶཱཡུཀཀཱལེ ཝིཛྫོཏཡིཏྭཱ ནིབྦཱཡནཔྤ དཱཔཛཱལཾ ཝིཡ ཨནུཔཱདིསེསནིབྦཱནདྷཱཏུཡཱ པརིནིབྦཱཡི. མཙྩུ དྷམྨསྶ ཙ ནཱམ ཏཱིསུ ལོཀེསུ ཨཏིམམཱཡིཏབྦོ ཨེས, ཨཏིགརུཀཱཏབྦོ ཨེས, ཨཏིབྷཱཡིཏབྦོ ཨེསཱཏི ཝིཛཱནནསབྷཱཝོ ནཏྠི. བྷགཝནྟཾཡེཝ ཏཱཝ ཏིལོཀགྒཔུགྒལཾ ཨཱདཱཡ ¶ གཙྪཏི, ཀིཾམངྒཾ པན ཨམྷེ ཡེཝཱ ཏེཝཱ, ཨཧོཝཏཨཙྪརིཡཱ སངྑཱརདྷམྨོཏི. ཧོནྟི ཙེཏྠ–

མཙྩུདྷམྨོ ཙ ནཱམེས,

ནིལླཛྫོ ཙ ཨནོཏྟཔྤཱི;

ཏིལོཀགྒཾཝ ཨཱདཱཡ,

གཙྪཱི པགེཝ ཨཉྙེསུ.

ཡཐཱ གོགྷཱཏཀོ ཙོརོ,

མཱརེཏུཾཡེཝ ཨཱརབྷི;

གོཎཾ ལདྡྷཱན ལོཀམྷི,

པཡོཛནཾཝ ཨེཏྟཀཾ.

ཏཐེཝ མཙྩུརཱཛཱ ཙ,

ཧིནྡགཱུནཾ གུཎཾ ཨིདྷ;

ན ཝིཛཱནཱཏི ཨེསོ ཧི,

མཱརེཏུཾཡེཝ ཨཱརབྷཱིཏི.

སཏྟཱཧཔརིནིབྦུཏེ ཙ བྷགཝཏི ཨཱཡསྨཱ མཧཱཀསྶཔོ ཏིཡཌྜྷསཏཱདྷིཀེཧི སཧསྶམཏྟེཧི བྷིཀྑཱུཧི སདྡྷི པཱཝཱཏོ ཀུསཱིནཱརཱཡཾ ཨཱགཙྪནྟོ ཨནྟརཱམགྒེ བྷགཝཱ སམྨཱསམྦུདྡྷོ པརིནིབྦུཏོཏི སུཏྭཱ ཨཝཱིཏསོཀ བྷིཀྑཱུ རོདནྟེ དིསྭཱ ཝུདྡྷཔབྦཛིཏོ སུབྷདྡཱནཱམ བྷིཀྑུ ཨེཝཾ ཝདཏི– མཱ ཨཱཝུསོ པརིདེཝིཏྠ, ནཏྠེཏྠ སོཙིཏབྦོནཱམཀོཙི, པུབྦེ མཡཾ བྷཝཱམ སམཎེན གེ,བྷམེན ཨུཔདྡུཏཱ– ཨིདཾ ཀརོཐ ཨིདཾ ཏུམྷཱཀཾ ཀཔྤཏི, མཱ ཨིདཾ ཀརིཏྠ ན ཨིདཾ ཏུམྷཱཀཾ ཀཔྤཏཱིཏི, སེཡྻཐཱཔི ཨིཎསཱདྷིཀེན དཱསོཏི, ཨིདཱནི པན མཡཾ ཡཾ ཡཾ ཨིཙྪཱམ, ཏཾ ཏཾ སཀྐཱ ཀཱཏུཾ, ཡཾ ཡཾ པན ན ཨིཙྪཱམ,ཏཾ ཏཾ སཀྐཱ ཨཀཱཏུནྟི. ཏཾ སུཏྭཱ ཨཱིདིསཾ པན ཝེརཱིཔུགྒལཾ པཊིཙྩ སམྨཱསམྦུདྡྷསྶ བྷགཝཏོ སཱསནཾ ཁིཔྤཾ ཨནྟརདྷཱརེཡྻ, ཨིདཱནི སུཝཎྞཀྑནྡྷསདིསོ སརཱིརོ སཾཝིཛྫམཱནོ ¶ ཡེཝ དུཀྑེན ནིཔྥཱདིཏེ སཱསནེ མཧཱབྷཡཾ ཨུཔྤཛྫི ཙ, ཨཱིདིསོ པུགྒལོ ཨཉྙཾ ཨཱིདིསཾ པུགྒལཾ སཧཱཡཾ ལབྷིཏྭཱ ཝུདྡྷིམཱཔཛྫནྟོ ཧཱཔེཏུཾ སཀྐུཎེཡྻ མཉྙེཏི ཙིཏྟཀྑེདཾ པཏྭཱ དྷམྨསཾཝེགཾ ལབྷིཏྭཱ ཨིམཾ བྷིཀྑུཾ ཨིདྷེཝ སེཏཝཏྠཾ ནིཝཱསཱཔེཏྭཱ སརཱིརེ བྷསྨེན ཝིཀིརིཏྭཱ བཧིདྡྷཱ ཀརིསྶཱམཱིཏི ཙིནྟེསི.

ཏདཱ ཨཱཡསྨཏོ མཧཱཀསྶཔཏྠེརསྶ ཨེཏདཧོསི,– ཨིདཱནི སམཎསྶ གོཏམསྶ སརཱིརཾ སཾཝིཛྫམཱནཾཡེཝ པརིསཱ ཝིཝཱདཾ ཀརོནྟཱིཏི མནུསྶཱ ཨུཔཝདིསྶནྟིཏི. ཏཏོ པཙྪཱ ཨིམཾ ཝིཏཀྐཾ ཝཱུཔསམེཏྭཱ ཁམིཏྭཱ སམྨཱསམྦུདྡྷོ བྷགཝཱ པརིནིབྦཱཡམཱནོཔི ཏེན པན དེསིཏོ དྷམྨོ སཾཝིཛྫཏི, ཏེན དེསིཏསྶ དྷམྨསྶ ཐིརཾ པཏིཊྛཱཔནཏྠཱཡ སངྒཱཡིཡམཱནཾ ཨཱིདིསེཧི པུགྒལེཧི སཱསནཾ ན ཨནྟརདྷཱཡིསྶཏི, ཙིརཾ ཋསྶཏི ཡེཝཱཏི མནསིཀརིཏྭཱ བྷགཝཏོ དིནྣཔཾསུ ཀཱུལཙཱིཝརཱདིཝསེན དྷམྨཱནུགྒཧཾ ཨནུསྶརིཏྭཱ བྷགཝཏོ པརིནིབྦཱནཏོ ཏཏིཡེ མཱསེ ཨཱསཱལི༹མཱསསྶ པུཎྞམིཏོ པཉྩམེ དིཝསེ རཱཛགཧེ སཏྟཔཎྞིགུཧཱཡཾ ཨཱཛཱཏསཏྟུཾནཱམ རཱཛཱནཾ ནིསྶཱཡ པཉྩཧི ཨརཧནྟ སཏེཧི སདྡྷིཾ སཏྟམཱསེཧི པཋམཾ སངྒཱཡནཾ ཨཀཱསི.

ཏདཱ ཨཊྛཙཏྟཱལཱིསཱདྷིཀསཏཀལིཡུགཾ ཨནཝསེསཏོ ཨཔནེཏྭཱ ཀལིཡུགེན སཱསནཾ སམཾ ཀཏྭཱ ཋཔེསི. ཡདཱ པན ཨཛཱཏསཏྟུ རཉྙོ རཛྫཾ པཏྭཱ ཨཊྛཝསྶཱནི ཨཧེསུཾ, ཏདཱ མརམྨརཊྛེ ཏངྐོསངྒཏྭཔུརེ ཛམྦུདཱིཔདྷཛསྶནཱམ རཉྙོ རཛྫཾ པཏྭཱ ཨཏིརེཀཔཉྩཝསྶཱནི ཨཧེསུནྟི.

ཨིམིསྶཉྩ པཋམསངྒཱིཏིཡཾ ཨཱཡསྨཱ མཧཱཀསྶཔོ ཨཱཡསྨཱ ཨུཔཱལི ཨཱཡསྨཱ ཨཱནནྡོ ཨཱཡསྨཱ ཨནུརུདྡྷོ ཙཱཏི ཨེཝམཱདཡོ པཉྩསཏཔྤམཱཎཱ མཧཱཐེརཱ པཋམཾ སངྒཱཡིཏྭཱ སཱསནཾ ཨནུགྒཧེསུཾ. ཨེཝཾ ¶ སུབྷདྡསྶ དུཊྛཔབྦཛིཏསྶ དུཊྛཝཙནཾ སཱསནསྶ ཨནུགྒཧེ ཀཱརཎཾནཱམ ཨཧོསི. སུབྷདྡོ ཙ ནཱམ དུཊྛཔབྦཛིཏོ ཨཱཏུམཱནགརཝཱསཱི ཨཧོསི ཀཔྤཀཀུལིཀོ. སོ ཡདཱ བྷགཝཱ ཨཱཏུམཱནགརཾ གཙྪཏི, ཏདཱ ཨཏྟེནོ པུཏྟེ དྭེ སཱམཎེརེ ཀཔྤཀཀམྨཾ ཀཱརཱཔེཏྭཱ ལདྡྷེཧི ཏཎྜུལཏེལཱདཱིཧི ཝཏྠཱུཧི ཡཱགུཾ པཙིཏྭཱ སསངྒྷསྶ བུདྡྷསྶ ཨདཱསི. བྷགཝཱ པན ཏཱནི ཨཔྤཊིགྒཧེཏྭཱ ཀཱརཎཾ པུཙྪིཏྭཱ ཝིགརཧིཏྭཱ ཨཀཔྤིཡསམཱདཱནདུཀྐཊཱཔཏྟིཾ ཀཔྤཀཔུབྦསྶ བྷིཀྑུསྶ ཁུརདྷཱརཎདུཀྐཊཱཔཏྟིཉྩ པཉྙཱཔེསི. ཏཾ ཀཱརཎཾ པཊིཙྩ ཝེརཾ བནྡྷིཏྭཱ སཱསནཾ ཝིདྡྷཾསིཏུཀཱམཏཱཡ ཏཏྟཀཨཡོགུལ༹ཾ གིལིཏྭཱ ཨུགྒཱིརནྟོ ཝིཡ ཨཱིདིསདུཊྛཝཙནཾ ཝདཱིཏི.

ཨཛཱཏསཏྟུརཱཛཱ ཙ ཏུམྷཱཀཾ དྷམྨཙཀྐཾ ཧོཏུ, མམ ཨཱཎཱཙཀྐཾ པཝཏྟིསྶཱམི, ཝིསྶཊྛཱ ཧུཏྭཱ སངྒཱཡནྟཱུཏི ཨནུགྒཧེསི. ཏེནེས པཋམཾ སཱསནཱནུགྒཧོ རཱཛཱཏི ཝེདིཏབྦོ, མཧཱཀསྶཔཱདཱིནཉྩ ཨརཧནྟཱནཾ པཉྩསཏཱནཾ སིསཱཔརམྤརཱ ཨནེཀཱ ཧོནྟི, གཎནཔཐཾ ཝཱིཏིཝཏྟཱ. ཡམེཏྠ ཨིཏོ པརཾ ཝཏྟབྦཾ, ཏཾ ཨཊྛཀཐཱཡཾ ཝུཏྟནཡེན ཝེདིཏབྦཾ. ཏེ པན མཧཱཐེརཱ སངྒཱཡིཏྭཱ པརིནིབྦཱཡིཾསཱུཏི. ཧོནྟི ཙེཏྠ–

ཨིདྡྷིམནྟོ ཙ ཡེ ཐེརཱ,

པཋམསྶངྒཱིཏིཾ ཀཏྭཱ;

སཱསནཾ པགྒཧིཏྭཱན,

མཙྩཱུཝསཾཝ སམྤཏྟཱ.

ཀིཉྩཱཔི ཨིདྡྷིཡོ སནྟི,

ཏཐཱཔི ཏཱ ཛཧིཏྭཱན;

ནིབྦཱཡིཾསུ ཝསཾ མཙྩུ,

པཏྭཱ ཏེ ཚིནྣཔཀྑཱཝ.

ཀཱ ¶ ཀཐཱཝ ཙ ཨམྷཱཀཾ,

ཨམྷཱཀཾ གཧཎེ པན;

མཙྩུནོ ནཏྠི སཱརོ ཙ,

ཨེཝཾ དྷཱརེཡྻ པཎྜིཏོཏི.

ཨཡཾ པཋམསངྒཱིཏིཀཐཱ སངྑེཔོ.

ཏཏོ པརཾ ཝསྶསཏཾ ཏེསཾ སིསྶཔརམྤརཱ སཱསནཾ དྷཱརེཏྭཱ ཨཱགམཾསུ. ཨཐཱནུཀྐམེན གཙྪནྟེསུ རཏྟིདིཝེསུ ཝསྶསཏཔརིནིབྦུཏེ བྷགཝཏི ཝེསཱལིཀཱ ཝཛྫིཔུཏྟཀཱ བྷིཀྑཱུ ཝེསཱལིཡཾ ཀཔྤཏི སིངྒིལོཎཀཔྤཱ, ཀཔྤཏི དྭངྒུལཀཔྤོ, ཀཔྤཏི གཱམནྟརཀཔྤོ, ཀཔྤཏི ཨཱཝཱསཀཔྤོ, ཀཔྤཏི ཨནུམཏིཀཔྤོ, ཀཔྤཏི ཨཱཙིཎྞཀཔྤོ, ཀཔྤཏི ཨཱམཐིཏཀཔྤོ, ཀཔྤཏི ཛལོ༹གིཾ པཱཏུཾ, ཀཔྤཏི ཨདསཀཾ ནིསཱིདནཾ, ཀཔྤཏི ཛཱཏརཱུཔརཛཏནྟི ཨིམཱནི དསཝཏྠཱུནི དཱིཔེསུཾ.

ཏེསཾ སུསུནཱགཔུཏྟོ ཀཱལཱ༹སོཀོནཱམ རཱཛཱ པཀྑོ ཨཧོསི. ཏེན ཁོ པན སམཡེན ཨཱཡསྨཱ ཡསོ ཀཱཀཎྜཀཔུཏྟོ ཝཛྫཱིསུ ཙཱརིཀཾ ཙརམཱནོ ཝེསཱལིཀཱ ཀིར ཝཛྫིཔུཏྟཀཱ བྷིཀྑཱུ ཝེསཱལིཡཾ དསཝཏྠཱུནི དིཔེནྟཱིཏི སུཏྭཱ ན ཁོ པནེཏཾ པྤཏིརཱུཔཾ, ཡྭཱཧཾ དསབལསྶ སཱསནཝིཔཏྟིཾ སུཏྭཱ ཨཔྤོསྶུཀྐོ བྷཝེཡྻཾ, སནྡྷཱཧཾ ཨདྷམྨཝཱདིནོ ནིགྒཧེཏྭཱ དྷམྨཾ དཱིཔེསྶཱམཱིཏི ཙིནྟཡནྟོ ཡེན ཝེསཱལཱི, ཏདཝསརི. ཏདཱ ཨཱཡསྨཱ མཧཱཡསོ རེཝཏསབྦཀཱམིཨཱདཱིཧི སཏྟསཏེཧི ཨརཧནྟེཧི སདྡྷིཾ སངྒཱཡིསྶཱམཱིཏི ཝེསཱལིཡཾ ཝཱལུཀཱརཱམཾ ཨཱགཙྪི. ཝཛྫིཔུཏྟཀཱཙ བྷིཀྑཱུ ཨུཔཱརམྦྷཙིཏྟཱ ཀཱལཱ༹སོཀཾནཱམ རཱཛཱནཾ ཨུཔསངྐམིཏྭཱ མཡཾ ཁོ མཧཱརཱཛ ཨིམསྨིཾ མཧཱཝནཱརཱམེ གནྡྷཀུཊིཾ རཀྑིཏྭཱ ཝསྶཱམ, ཨིདཱནི མཧཱརཱཛ ཨདྷམྨཝཱདིནོ ཨཉྙེ བྷིཀྑཱུ ཝིལུམྤིཏུཀཱམཱ ཝིདྡྷཾསིཏུཀཱམཱ ཨཱགཏཱཏི ཨཱརོཙེསུཾ. ཀཱལཱ༹སོཀོ ¶ ཙ མཧཱརཱཛཱ ཨཱགནྟུཀཱནཾ བྷིཀྑཱུནཾ ཨཔྤཝིསནཏྠཱཡ ནིཝཱརེཐཱཏི ཨམཙྩེ པེསེསི. ཨམཙྩཱཙ ནིཝཱརེཏུཾ གཙྪནྟཱ དེཝཏཱནཾ ཨཱནུབྷཱཝེན བྷིཀྑཱུ ན པསྶནྟི. ཏདཧེཝ ཙ རཏྟིབྷཱགེ ཀཱལཱ༹སོཀམཧཱརཱཛཱ ལོཧཀུམྦྷཱིནིརཡེ པཏནཱཀཱརེན སུཔིནཾ པསྶི. ཏསྶ རཉྙོ བྷགིནི ནནྡཱནཱམ ཐེརཱི ཨཱཀཱསེན ཨཱགཙྪནྟི དྷམྨཝཱདིནོ མཧཱཐེརེ ནིགྒཎྷིཏྭཱ ཨདྷམྨཝཱདཱིནཾ བྷིཀྑཱུནཾ པགྒཧཎེ དོསབཧུལཏཾ པཀཱསེཏྭཱ སཱསནསྶ པགྒཧཎཏྠཱཡ ཨོཝཱདཾ ཨཀཱསི.

ཀཱལཱ༹སོཀརཱཛཱ ཙ སཾཝེགཔྤཏྟོ ཧུཏྭཱ ཨཱཡསྨནྟཱནཾ མཧཱཡསཏྠེརཱདཱིནཾ ཁམཱཔེཏྭཱ ཨཛཱཏསཏྟུརཱཛཱ ཝིཡ སངྒཱཡནེ པགྒཧཾ ཨཀཱསི.

མཧཱཡསཏྠེརཱདཡོ ཙ ཀཱལཱ༹སོཀཾ རཱཛཱནཾ ནིསྶཱཡ ཝཱལུཀཱརཱམེ ཝཛྫིཔུཏྟཀཱནཾ བྷིཀྑཱུནཾ པཀཱསིཏཱནི ཨདྷམྨཝཏྠཱུནི བྷིནྡིཏྭཱ ཨཊྛཏི མཱསེཧི དུཏིཡསངྒཱཡནཾ ཨཀཾསུ.

ཏདཱ ཙ མཛ྄ཛྷིམདེསེ པཱཏལིཔུཏྟནགརེ སུསུནཱགརཉྙོ པུཏྟབྷཱུཏསྶ ཀཱལཱ༹སོཀརཉྙོ ཨཏིསེཀཾ པཏྭཱ དསཝསྶཱནི ཨཧེསུཾ. པརམྨརཊྛེ པན སིརིཁེཏྟནགརེ དྭཏྟགོངྐསྶནཱམ རཉྙོ ཨབྷིསིཏྟཀཱལཏོ པུརེ ཨེཀཝསྶཾ ཨཧོསི. ཛིནསཱསནཾ པན ཝསྶསཏཾ ཨཧོསི.

ཨིམིསྶཉྩ དུཏིཡསངྒཱིཏིཡཾ མཧཱཡས རེཝཏ སབྦཀཱམིཔྤམུཁཱ སཏྟསཏཔྤམཱཎཱ མཧཱཐེརཱ དུཏིཡཾ སངྑཱཡིཏྭཱ དུཏིཡཾ སཱསནཾ པགྒཧེསུཾ.

ཨཱཡསྨཱ མཧཱཡསཏྠེརོཙནཱམ པཉྩཧི ཨེཏདགྒལཱ༹ནེ ཧི བྷགཝཏཱ ཐོམིཏསྶ ཨཱནནྡཏྠེརསྶ སདྡྷིཝིཧཱརིཀོ ཨཧོསི. ཝཛྫིཔུཏྟཀཱནཾ བྷིཀྑཱུནཾ ཨདྷམྨཝཏྠུདཱིཔནཾ དུཏིཡསངྒཱིཏིཡཾ ཀཱརཎམེཝ. ཀཱལཱ༹སོཀརཱཛཱཙ པགེཝ ཨདྷམྨཝཱདཱིབྷིཀྑཱུནཾ སཧཱཡོཔི སམཱནོ པུན དྷམྨཝཱདིབྷིཀྑཱུནཾ སཧཱཡོ ¶ ཧུཏྭཱ ཨནུགྒཧཾ ཨཀཱསི. ཏསྨཱ དུཏིཡསཱསནཔགྒཧོ རཱཛཱཏི ཝེདིཏབྦོ.

དུཏིཡསངྒཱིཏིཡཾ པན མཧཱཡསཏྠེར རེཝཏ སབྦཀཱམིཔྤམུཁཱནཾ སཏྟསཏཱནཾ མཧཱཐེརཱནཾ སིསྶཔརམྤརཱ ཨནེཀཱ ཧོནྟི, གཎནཔཐཾ ཝཱིཏིཝཏྟཱ. ཡམེཏྠ ཨིཏོ པརཾ ཝཏྟབྦ, ཏཾ ཨཊྛཀཐཱཡཾ ཝུཏྟནཡེན ཝེདིཏབྦཾ. ཏེ པན མཧཱཐེརཱ དུཏིཡཾ སངྒཱཡིཏྭཱ པརིནིབྦཱཡིཾསཱུཏི. ཧོནྟི ཙེཏྠ–

བུདྡྷིམནྟོ ཙ ཡེ ཐེརཱ,

དུཏིཡསྶངྒིཏིཾ ཀཏྭཱ;

སཱསནཾ པགྒཧིཏྭཱན,

མཙྩཱུཝསཾཝ སམྤཏྟཱ.

ཨིདྡྷིམནྟོཔི ཡེ ཐེརཱ,

མཙྩུནོ ཏཱཝ ཝསཾ གམུཾ;

ཀཐཾཡེཝ མཡཾ མུཏྟཱ,

ཏཏོ ཨཱརཀ མུཙྩནཱཏི;

ཨཡཾ དུཏིཡསངྒཱིཏིཀཐཱསངྑེཔོ.

ཏཏོ པརཾ ཨཊྛཏིཾསཱདྷིཀཱནི དྭེཝསྶསཏཱནི སམྨཱསབྦུདྡྷསྶ བྷགཝཏོ སཱསནཾ ནིརཱཀུལཾ ཨཧོསི ནིརབྦུདཾ. ཨཊྛཏིཾསཱདྷིཀེ པན དྭིཝསྶསཏེ སམྤཏྟེ པཱཊལིཔུཏྟ ནགརེ ¶ སིརིདྷམྨཱསོཀསྶནཱམ རཉྙོ ཀཱལེ ནིགྲོདྷསཱམཎེརཾ པཊིཙྩ བུདྡྷསཱསནེ པསཱིདིཏྭཱ བྷིཀྑུསངྒྷསྶ ལཱབྷསཀྐཱརཾ བཱཧུལླཾ ཨཧོསི. ཏདཱ སཊྛིསཧསྶམཏྟཱ ཏིཏྠིཡཱ ལཱབྷསཀྐཱརཾ ཨཔེཀྑིཏྭཱ ཨཔབྦཛིཏཱཔི པབྦཛིཏཱཝིཡ ཧུཏྭཱ ཨུཔཱསཐཔཝཱརཎཱདིཀམྨེསུ པཝིསནྟི, སེཡྻཐཱཔིནཱམ ཧཾསཱནཾ མཛ྄ཛྷེ བཀཱ, ཡཐཱ ཙ གུནྣཾ མཛ྄ཛྷེ གཝཛཱ, ཡཐཱ ཙ སིནྡྷཝཱནཾ མཛ྄ཛྷེ གདྲབྷཱཏི.

ཏདཱ བྷིཀྑུསངྒྷོ ཨིདཱནི ཨཔརིསུདྡྷཱ པརིསཱཏི མནསི ཀརིཏྭཱ ཨུཔོསཐཾ ན ཨཀཱསི. སཱསནེ ཨབྦུདཾ ཧུཏྭཱ སཏྟཝསྶཱནི ཨུཔོསཐཔཝཱརཎཱནི ཚིཛྫནྟི. སིརིདྷམྨཱསོ ཀོ ཙ རཱཛཱ ཏཾ སུཏྭཱ ཏཾ ཨདྷིཀརཎཾ ཝཱུཔསམེཧི ཨུཔོསཐཾ ཀཱརཱཔེཧཱིཏི ཨེཀཾ ཨམཙྩཾ པེསེསི. ཨམཙྩོ ཙ བྷིཀྑཱུ ཨུཔོསཐཾ ཨཀཏྟུཀཱམེ ཀིཾ ཀརིསྶཱམཱིཏི རཱཛཱནཾ པཊིཔུཙྪིཏུཾ ཨཝིསཧཏཱཡ སཡཾ མཱུལོ༹ ཧུཏྭཱ ཨཉྙེན མཱུལེ༹ན མནྠེཏྭཱ སཙེ བྷིཀྑུསངྒྷོ ཨུཔོསཐཾ ན ཀརེཡྻ, བྷིཀྑུསངྒྷཾ གྷཱཏེཏུཀཱམོ མཧཱརཱཛཱཏི སཡཾ མཱུལོ༹ ཧུཏྭཱ མཱུལ༹སྶ སནྟིཀཱ མཱུལ༹ཝཙནཾ སུཏྭཱ ཝིཧཱརཾ གནྟྭཱ ཨུཔོསཐཾ ཨཀཏྟུཀཱམཾ བྷིཀྑུསངྒྷཾ གྷཱཏེསི.

རཱཛཱ ཙ ཏཾ སུཏྭཱ ཨཡཾ བཱལོ མཡཱ ཨནཱཎཏྟོཝ ཧུཏྭཱ ཨཱིདིསཾ ལུདྡཀམྨཾ ཨཀཱསི, ཨཧཾ པཱཔཀམྨཏོ མུཙྩིསྶཱམིཝཱ མཱཝཱཏི དྭལ༹ཀཛཱཏོ ཧུཏྭཱ མཧཱམོགྒལིཔུཏྟ ཏིསྶཏྠེརཾ གངྒཱཡ པཏིསོཏཏོ ཨཱནེཏྭཱ ཏཾ ཀཱརཎཾ ཐེརཾ པུཙྪི. ཐེརོ ཙ དཱིཔཀཏིཏྟིརཛཱཏཀེན ཨཙེཏནཏཱཡ པཱཔཀམྨཏོ མོཙེསྶསིཏི ཝིསྶཛྫེསི, སཏྟཱཧམྤི ཏིཏྠིཡཱནཾ ཝཱདཾ སིརིདྷམྨཱསོཀརཉྙོ སིཀྑཱཔེསི, ཝཱདེན ཝཱདཾ ཏུལཡིཏྭཱ སཊྛིསཧསྶམཏྟེ ཏིཏྠིཡེ སཱསནབཱཧིརཾ ཨཀཱསི. ཏདཱ པན ཨུཔོསཐཾ ཨཀཱསི. བྷགཝཏཱ ཝུཏྟནིཡཱམེནེཝ ཀཐཱཝཏྠུཉྩ བྷིཀྑུསངྒྷམཛ྄ཛྷེ བྱཱཀཱསི ¶ . ཨསོཀཱརཱམེ ཙ སཧསྶམཏྟཱ མཧཱཐེརཱ ནཝཧི མཱསེཧི སངྒཱཡིཾསུཾ.

ཏདཱ མཛ྄ཛྷིམདེསེ པཱཊལིཔུཏྟནགརེ སིརིདྷམྨཱསོཀརཉྙོ རཛྫཾ པཏྭཱ ཨཊྛཱརསཝསྶཱནི ཨཧེསུཾ. མརམྨརཊྛེ པན སིརིཁེཏྟནགརེ རམྦོངྐསྶནཱམ རཉྙོ རཛྫཾ པཏྭཱ དྭཱདས ཝསྶཱནི ཨཧེསུནྟི.

ཨིམིསྶཉྩ ཏཏིཡསངྒཱིཏིཡཾ མཧཱམོགྒལིཔུཏྟཏིསྶཏྠེརོནཱམ དུཏིཡསངྒཱཡཀེཧི མཧཱཐེརེཧི བྲཧྨལོ ཀཾ གནྟྭཱ སཱསནསྶ པགྒཧཎཏྠཾ ཏིསྶནཱམ མཧཱབྲཧྨཱནཾ ཨཱཡཱཙིཏ ནིཡཱམེན ཏཏོ ཙཝིཏྭཱ ཨིདྷ མོགྒལིཡཱནཱམ བྲཱཧྨཎིཡཱ ཀུཙྪིམྷི ནིབྦཏྟསཏྟོ.

ལཱབྷསཀྐཱརཾ ཨཔེཀྑིཏྭཱ སཊྛིསཧསྶམཏཱནཾ ཏིཏྠིཡཱནཾ སམཎཱལཡཾ ཀཏྭཱ ཨུཔོསཐཔཝཱརཎཱདཱིསུ ཀམྨེསུ པཝེསནཾ པརིསཱཡ ཨསུདྡྷཏྟཱ སཏྟཝསྶཱནི ཨུཔོསཐསྶ ཨཀརཎཉྩ སཱསནསྶ པགྒཧཎེ ཀཱརཎམེཝ. མཧཱམོགྒལིཔུཏྟཏིསྶ མཛ྄ཛྷནྟིཀ མཧཱརེཝཔྤམུཁཱ མཧཱཐེརཱ ཏཏིཡཾ སངྒཱཡིཏྭཱ ཏཏིཡཾ སཱསནཾ པགྒཧེསུཾ.

སིརིདྷམྨཱསོཀརཱཛཱ ཙ ཏིཏྠིཡཱནཾ ཝཱདཾ སལླཀྑེཏྭཱ ཏིཏྠིཡེ བཧིསཱསནཀརཎཱདཱིཧི སཱསནསྶ པགྒཧོ རཱཛཱཏི ཝེདིཏབྦོ. མཧཱམོགྒལིཔུཏྟཏིསྶ མཛ྄ཛྷིནྟིཀ མཧཱརེཝཔྤམུཁཱནཾ སཧསྶམཏྟཱནཾ མཧཱཐེརཱནཾ སིསྶཔརམྤརཱ ཨནེཀཱ ཧོནྟི, གཎནཔཐཾ ཝཱིཏིཝཏྟཱ. ཡམེཏྠ ཨིཏོ པརཾ ཝཏྟབྦཾ, ཏཾ ཨཊྛཀཐཱཡཾ ཝུཏྟནཡེན ཝེདིཏབྦཾ. ཏེ པན མཧཱཐེརཱ ཏཏིཡཾ སངྒཱཡིཏྭཱ པརིནིབྦཱཡིཾསཱུཏི. ཧོནྟི ཙེཏྠ–

མཧིདྡྷིཀཱཔི ཡེ ཐེརཱ,

སངྒཱཡིཏྭཱན སཱསནེ;

མཙྩཱུཝསཾཝ གཙྪིཾསུ,

ཨབྦྷགབྦྷཾཝ བྷཱཀརོ.

ཡཐཱ ¶ ཨེཏེཙ གཙྪནྟི,

ཏཐཱ མཡམྤི གཙྪཱམ;

ཀོནཱམ མཙྩུནཱ མུཙྩེ,

མཙྩཱུཔརཱཡནཱ སཏྟཱ.

ཏསྨཱ ཧི པཎྜིཏོ པོསོ,

ནིབྦཱནཾ པན ཨཙྩུཏཾ;

ཏསྶེཝ སཙྪིཀཏྠཱཡ,

པུཉྙཾ ཀརེཡྻ སབྦདཱཏི.

ཨཡཾ ཏཏིཡསངྒཱིཏིཀཐཱསངྑེཔོ.

ཏཏོ པརཾ ཀཏྠ སམྨཱསམྦུདྡྷསྶ བྷགཝཏོ སཱསནཾ སུཊྛུ པཏིཊྛཧིསྶཏཱིཏི ཝིམཾསིཏྭཱ མཧཱམོགྒལིཔུཏྟཏིསྶཏྠེརོ པཙྩནྟདེསེ ཛིནསཱསནསྶ སུཔྤཏིཊྛིཡམཱནབྷཱཝཾ པསྶིཏྭཱ ནཝཊྛཱནཱནི ཛིནསཱསནསྶ པཏིཊྛཱཔནཏྠཱཡ ཝིསུཾ ཝིསུཾ མཧཱཐེརེ པེསེསི. སེཡྻཐིདཾ. མཧཱམཧིནྡཏྠེརཾ སཱིཧལ༹དཱིཔཾ པེསེསི-ཏྭཾ ཨེཏཾ དཱིཔཾ གནྟྭཱ ཏཏྠ སཱསནཾ པཏིཊྛཔེཧཱིཏི, སོཎཏྠེརཾ ཨུཏྟརཏྠེརཉྩསུཝཎྞབྷཱུམིཾ, མཧཱརཀྑིཏཏྠེརཾ ཡོནཀལོཀཾ, རཀྑིཏཏྠེརཾ ཝནཝཱསཱིརཊྛཾ, ཡོནཀདྷམྨརཀྑིཏཏྠེརཾ ཨཔརནྟརཊྛཾ, མཛ྄ཛྷནྟི ཀཏྠེརཾ ཀསྨཱིརགནྡྷཱ རརཊྛཾ, མཧཱརེཝཏྠེརཾ མཧིཾསཀམཎྜལཾ, མཧཱདྷམྨརཀྑིཏཏྠེརཾ མཧཱརཊྛཾ, མཛ྄ཛྷིམཏྠེརཾ ཙཱིནརཊྛནྟི. ཏཏྠ ཙ ཨུཔསམྤདཔཧོནཀེན སངྒྷེན སདྡྷིཾ པེསེསི. ཏེ ཙ མཧཱཐེརཱ ཝིསུཾ ཝིསུཾ གནྟྭཱ སཱསནཾ ཏཏྠ ཏཏྠ པཏིཊྛཱཔེསུཾ. པཏིཊྛཱཔེཏྭཱ ཙ ཏེསུ ཏེསུ ཋཱནེསུ བྷིཀྑཱུནཾ ཀཱསཱཝཔཛྫོཏེན ཝིཛྫོཏམཱནཱ ཨབྦྷཧིམདྷཱུརཛོརཱཧུསངྑཱཏེཧི ཝིམཏྟོ ཝིཡ ནིསཱནཱཐོ ཛིནསཱསནཾ ཨནནྟརཱཡཾ ཧུཏྭཱ པཏིཊྛཱསི.

ཏེསུ པན ནཝསུ ཋཱནེསུ སུཝཎྞབྷཱུམིནཱམ ཨདྷུནཱ སུདྷམྨནགརམེཝ. ཀསྨཱ པནེཏཾ ཝིཉྙཱཡཏཱིཏི ཙེ. མགྒཱནུམཱནཏོ ཋཱནཱནུམཱནཏོ ¶ ཝཱ. ཀཐཾ མགྒཱནུམཱནཏོ. ཨིཏོ ཀིར སུཝཎྞབྷཱུམི སཏྟམཏྟཱནི ཡོཛནསཏཱནི ཧོནྟི, ཨེཀེན ཝཱཏེ ན གཙྪནྟཱི ནཱཝཱ སཏྟཧི ཨཧོརཏྟེཧི གཙྪཏི, ཨཐེཀསྨིཾ སམཡེ ཨེཝཾ གཙྪནྟི ནཱཝཱ སཏྟཱཧམྤི ནདིཡཱ ཝཊྚམཙྪ པིཊྛེ ནེཝ གཏཱཏི ཨཊྛཀཐཱཡཾ ཝུཏྟེན སཱིཧལ༹དཱིཔཏོ སུཝཎྞབྷཱུམིཾ གཏམགྒཔྤམཱཎེན སུཁམྨཔུརཏོ སཱིཧལ༹དཱིཔཾ གཏམགྒཔྤམཱཎཾ སམེཏི. སུདྷམྨེ པུརཏོ ཀིར ཧི ཧིཾསལ༹དཱིཔཾ སཏྟམཏྟཱནི ཡོཛནསཏཱནི ཧོནྟི, ཨུཛུཾ ཝཱཡུཨཱགམནཀཱལེ གཙྪནྟི ཝཱཡུནཱཝཱ སཏྟཧི ཨཧོརཏྟེཧི སམྤཱཔུཎཱཏི. ཨེཝཾམགྒཱནུམཱནཏོ ཝིཉྙཱཡཏི.

ཀཐཾ ཋཱནཱནུམཱནཏོ. སུཝཎྞབྷཱུམི ཀིར མཧཱསམུདྡསམཱིཔེ ཏིཊྛཏི, ནཱནཱཝེརཛྫཀཱནམྤི ཝཱཎིཛཱནཾ ཨུཔསངྐམནཊྛཱནབྷཱུཏཾ མཧཱཏིཏྠཾ ཧོཏི. ཏེནེཝ མཧཱཛནཀཀུམཱརཱདཡོ ཙམྤཱནགརཱདིཏོ སཾཝོཧཱརཏྠཱཡ ནཱཝཱཡ སུཝཎྞབྷཱུམིཾ ཨཱགམཾསཱུཏི. སུདྷམྨཔུརམྤི ཨདྷུནཱ མཧཱསམུདྡསམཱིཔེཡེཝ ཏིཊྛཏི. ཨེཝཾ ཋཱནཱནུམཱསཏོ ཝིཉྙཱཡཏཱིཏི.

ཨཔརེ པན སུཝཎྞབྷཱུམིནཱམ ཧརིབྷུཉྫརཊྛཾཡེཝ, ཏཏྠ སུ ཝཎྞསྶ བཱཧུལླཏྟཱཏི ཝདནྟི. ཨཉྙེ པན སིཡཱམརཊྛཾཡེཝཱཏི ཝདནྟི. ཏཾ སབྦཾ ཝིམཾསིཏབྦཾ.

ཨཔརནྟཾ ནཱམ ཝིསུཾ ཨེཀརཊྛམེཝཱཏི ཨཔརེ ཝདནྟི. ཨཉྙེ པན ཨཔརནྟཾནཱམ སུནཱཔརནྟརཊྛམེཝཱཏི ཝདནྟི. ཏཾ ཡུཏྟམེཝ. ཀསྨཱ ཨཔརནྟཾ ནཱམ སུནཱཔརནྟརཊྛམེཝཱཏི ཝིཉྙཱཡཏཱིཏི ཙེ. ཨཊྛཀཐཱསུ དྭཱིཧི ནཱམེཧི ཝུཏྟཏྟཱ. ཨུཔརིཔཎྞཱསཨཊྛཀཐཱཡཉྷི སལཱ༹ཡཏནསཾཡུཏྟཊྛཀཐཱཡཉྩ ཨཊྛཀཐཱཙརིཡེཧི སུནཱཔརནྟརཊྛེ ཀོཎྜདྷཱནཏྠེརེན སལཱཀཱདཱནཱདྷིཀཱརེ ལདྡྷེཏདགྒཊྛཱནཏཾ དསྶནྟེཧི ཨཔརནྟརཊྛཾ སུན སདྡེན ཡོཛེཏྭཱ ཝུཏྟཾ. དྷམྨཔདཊྛཀཐཱཡཾ པན ཨངྒུཏྟརཊྛཀཐཱཡཉྩ ཏམེཝ རཊྛཾ ཝིནཱ སུནསདྡེན ཝུཏྟཾ. སུནསདྡོ ཙེཏྠ པུཏྟཔརིཡཱཡོ. མནྡྷཱཏུརཉྙོ ཛེཊྛཔུཏྟོ ཙཏུདྡཱིཔཝཱསི ནོ ¶ པཀྐོསིཏྭཱ ཏེསཾ ཝིསུཾ ཝིསུཾ ནིཝཱསཊྛཱནཾ ནིཡྻཱདེསི. ཏཏྠ ཨུཏྟརདཱིཔཝཱསཱིནཾ ཋཱནཾ ཀུརུརཊྛཾནཱམ, པུབྦདཱིཔཝཱསཱིནཾ པན ཝེདེཧརཊྛཾནཱམ, པཙྪིམདཱིཔཝཱསཱིནཾ ཨཔརནྟཾ ནཱམ. བྷཏྟཔཙྪིམདཱིཔེ ཛཱཏཏྟཱ ཏེ སུནསདྡེན ཝུཏྟཱ. ཏཏྲ ཛཱཏཱཔི ཧི ཏེསཾ པུཏྟཱཏིཝཱ སུནཱཏིཝཱ ཝུཏྟཱ, ཡཐཱ ཝཛྫིཔུཏྟཀཱ བྷིཀྑཱུཏི. ཝཏྟིཙྪཱཝསེན ཝཱ ཝཱཙཱསིལིཊྛཝསེན ཙ ཨིདམེཝ སུནསདྡེན ཝིསེསེཏྭཱ ཝོཧརནྟཱིཏི དཊྛབྦཾ.

ཡོནཀརཊྛཾནཱམ ཡཝནམནུསྶཱནཾ ནིཝཱསཊྛཱནམེཝ, ཡཾཛངྒམངྒྷཨིཏི ཝུཙྩཏི.

ཝནཝཱསཱིརཊྛཾནཱམ སིརིཁེཏྟནགརཊྛཱནམོ. ཀེཙི པན ཝནཝཱསཱིརཊྛཾནཱམ ཨེཀཾ རཊྛམེཝ, ན སིརིཁེཏྟནགརཊྛཱནནྟི ཝདནྟི. ཏཾ ན སུནྡརཾ. སིརིཁེཏྟནགརཊྛཱནམེཝ ཧི ཝནཝཱསཱིརཊྛཾ ནཱམ. ཀསྨཱ པནེཏཾ ཝིཉྙཱཡཏཱིཏིཙེ. ཨིམསྶ ཨམྷཱཀཾ རཉྙོ བྷཱཏིཀརཉྙོ ཀཱལེ སིརིཁེཏྟནགརེ གུམྦྷེཧི པཊིཙྪཱདིཏེ ཨེཀསྨིཾ པཐཝིཔུཉྫེ ཨནྟོ ནིམྨུཛྫིཏྭཱ ཋིཏཾ པོརཱཎིཀཾ ཨེཀཾ ལོཧམཡབུདྡྷཔཊིཔིབྦཾ པཊིལབྷི, ཏསྶ ཙ པལླངྐེ ཨིདཾ ཝནཝཱསཱིརཊྛཝཱསཱིནཾ པཱུཛནཏྠཱཡཱཏིཨཱདིནཱ པོརཱཎལེཁནཾ དིསྶཏི, ཏསྨཱ ཡེཝེཏཾ ཝིཉྙཱཡཏཱིཏི.

ཀསྨཱིརགནྡྷཱརརཊྛཾནཱམ ཀསྨཱིརརཊྛཾ གནྡྷཱརརཊྛཉྩ. ཏཱནི པན རཊྛཱནི ཨེཀཱབདྡྷཱནི ཧུཏྭཱ ཏིཊྛནྟི. ཏེནེཝ མཛ྄ཛྷནྟི ཀཏྠེརཾ ཨེཀཾ དྭཱིསུ རཊྛེསུ པེསེསི. ཛནཔདཏྟཱ པན ནཔུཾསཀེཀཏྟཾ བྷཝཏི. ཏདཱ པན ཨེཀསྶ རཉྙོ ཨཱཎཱཡ པཏིཊྛཱནཝིསཡཏྟཱ ཨེཀཏྟཝཙནེན ཨཊྛཀཐཱཡཾ ཝུཏྟནྟིཔི ཝདནྟི.

མཧིཾསཀམཎྜལཾནཱམ ཨནྡྷཀརཊྛཾ, ཡཾ ཡཀྑཔུརརཊྛནྟི ཝུཙྩཏི.

མཧཱརཊྛཾནཱམ མཧཱནགརརཊྛཾ. ཨཱདྷུནཱ ཧི མཧཱརཊྛམེཝ ན གརསདྡེན ཡོཛེཏྭཱ མཧཱནགརརཊྛནྟི ཝོཧརནྟཱིཏི. སིཡཱམརཊྛནྟིཔི ཝདནྟི ཨཱཙརིཡཱ.

ཙིནརཊྛཾནཱམ ¶ ཧིམཝནྟེན ཨེཀཱབདྡྷཾ ཧུཏྭཱ ཋིཏཾ ཙཱིནརཊྛཾ ཡེ ཝཱཏི.

ཨིདཾ སཱསནསྶ ནཝསུ ཋཱནེསུ ཝིསུཾ ཝིསུཾ པཏིཊྛཱནཾ.

ཨིདཱནི ཨཱདིཏོ པཊྛཱཡ ཐེརཔརམྤརཀཐཱ ཝཏྟབྦཱ. སམྨཱསམྦུདྡྷསྶ ཧི བྷགཝཏོ སདྡྷིཝིཧཱརིཀོ ཨུཔཱལིཏྠེ རོ,ཏསྶ སིསྶོ དཱསཀཏྠེརོ, ཏསྶ སིསྶོ སོཎཀཏྠེརོ, ཏསྶ སིསྶོ སིགྒཝཏྠེརོ ཙནྡཝཛྫིཏྠེ རོ ཙ, ཏེསཾ སིསྶོ མོགྒལིཔུཏྟཏིསྶཏྠེརོཏི ཨིམེ པཉྩམཧཱཐེརཱ སཱསནཝཾསེ ཨཱདིབྷཱུཏཱ ཨཱཙརིཡཔརམྤརཱནཱམ. ཏེསཉྷི སིསྶཔརམྤརབྷཱུཏཱ ཐེརཔརམྤརཱ ཡཱཝཛྫཏནཱ ན ཨུཔཙྪིནྡྷནྟི. ཨཱཙརིཡཔརམྤརཱཡ ཙ ལཛྫིབྷིཀྑཱུ ཡེཝ པཝེསེཏྭཱ ཀཐེཏབྦཱ ནོ ཨལཛྫིབྷིཀྑཱུ. ཨལཛྫཱིབྷིཀྑཱུ ནཱམ ཧི བཧུསྶུཏཱཔི སམཱནཱ ལཱབྷགརུལོཀགརུཨཱདིཧི དྷམྨཏནྟི ནཱསེཏྭཱ སཱསནཝརེ མཧཱབྷཡཾ ཨུཔྤཱདེནྟཱིཏི. སཱསནརཀྑནཀམྨཾནཱམ ཧི ལཛྫཱིནཾཡེཝ ཝིསཡོ ནོ ཨལཛྫཱིནཾ. ཏེནཱཧུ པོརཱཎཱ ཐེརཱ, ཨནཱགཏེ སཱསནཾ ཀོ ནཱམ རཀྑིསྶཏཱིཏི ཨནུཔེཀྑིཏྭཱ ཨནཱགཏེ སཱསནཾ ལཛྫིནོ རཀྑིསྶནྟི, ལཛྫིནོ རཀྑིསྶནྟི, ལཛྫིནོ རཀྑིསྶནྟཱིཏི ཏིཀྑཱཏྟུཾ ཝཱཙཾ ནིཙྪཱརེསུཾ. ཨེཝཾ མཛ྄ཛྷིམདེསེཔི ཨལཛྫཱིཔུགྒལཱ བཧུ སནྟཱིཏི ཝེདིཏབྦཱ.

པརིནིབྦཱནཏོ ཧི བྷགཝཏོ ཝསྶསཏཱནཾ ཨུཔརི པུབྦེ ཝུཏྟནཡེནེཝ ཝཛྫིཔུཏྟཀཱ བྷིཀྑཱུ ཨདྷམྨཝཏྠཱུནི དཱིཔེཏྭཱ པཋམསངྒཱིཏིཀཱལེ བཧིཀཏེཧི པཱཔབྷིཀྑཱུཧི སདྡྷིཾ མནྟེཏྭཱ སཧཱཡཾ གཝེསེཏྭཱ མཧཱསངྒཱིཏིཝོཧཱརེན མཧཱཐེརཱ ཝིཡ སངྒཱིཏིཾ ཨཀཾསུ. ཀཏྭཱ ཙ ཝིསུཾ གཎཱ ཨཧེསུཾ. ཨཧོཝཏ ཨིདཾ ཧཱསིཏབྦཀམྨཾ, སེཡྻཐཱཔི ནཱམ ཛརསིངྒཱལོ ཙཏུཔདསཱམཉྙེན མཱནཾ ཛཔྤེཏྭཱ ཨཏྟཱནཾ སཱིཧཾ ཝིཡ མཉྙིཏྭཱ སཱིཧོ ཝིཡ སཱིཧནཱདཾ ནདཱིཏི. ཏེ པཱཝཙནཾ ཡཐཱ བྷཱུཏཾ ¶ ཨཛཱནིཏྭཱ སདྡཙྪཱཡཱམཏྟེན ཡཐཱབྷཱུཏཾ ཨཏྠཾ ནཱམ སིཾསུ. ཀིཉྩི པཱཝཙནམྤཱི ཨཔནེསུཾ. ཏཉྩ སཀགཎེཡེཝ ཧོཏི, ན དྷམྨཝཱདཱིགཎེ. དྷམྨཝིནཡཾ ཝིཀོཔེཏྭཱ ཡཐིཙྪིཏ ཝསེནེཝ ཙརིཾསུ. ཨཡཾ པན མཧཱསངྒཱིཏིནཱམ ཨེཀོ ཨདྷམྨཝཱདཱིགཎོ.

ཏཏོ པཙྪཱ ཀཱལཾ ཨཏིཀྐནྟེ ཏཏོཡེཝ ཨཉྙམཉྙཾ ཝཱདཏོ བྷིཛྫིཏྭཱ གོཀུལིཀོནཱམ ཨེཀོ གཎོ ཨེཀབྱོཧཱརོནཱམ ཨེཀོཏི དྭེ གཎཱ བྷིཛྫིཾསུ. ཏཏོ པཙྪཱ གོཀུལིཀགཎགཎཏོཡེཝ ཨཉྙམཉྙཾ བྷིཛྫིཏྭཱ བཧུསྶུཏིཀོནཱམ ཨེཀོ གཎོ པཉྙཏྟིཝཱདོནཱམ ཨེཀོཏི དྭེ གཎཱ བྷིཛྫིཾསུ. པུནཔི ཏེཧིཡེཝ གཎེཧི ཙེཏིཡཝཱདོནཱམ ཨེཀོ གཎོ བྷིཛྫི.

ཏཏོ པཙྪཱ ཙིརཀཱལཾ ཨཏིཀྐནྟེ དྷམྨཝཱདཱིགཎེཧི ཝིསབྷཱགགཎཾ པཝིསིཏྭཱ མཧིཾསཱསཀོནཱམ ཨེཀོགཎོ ཝཛྫིཔུཏྟཀོནཱམ ཨེཀོཏི དྭེ གཎཱ བྷིཛྫིཾསུ. ཏཏོ པཙྪཱཔི ཝཛྫིཔུཏྟཀགཎཏོཡེཝ ཨཉྙམཉྙཾ བྷིཛྫིཏྭཱ དྷམྨུཏྟརིཀོནཱམ ཨེཀོ གཎོ, བྷདྡཡཱནིཀོནཱམ ཨེཀོ, ཚནྣཱགཱརིཀོནཱམ ཨེཀོ, སམུཏིཀོནཱམ ཨེཀོཏི ཙཏྟཱརོ གཎཱ བྷིཛྫིཾསུ.

པུནཔི མཧིཾསཱསཀགཎཏོ ཨཉྙམཉྙཾ བྷིཛྫིཏྭཱ སབྦཏྠིཝཱདོནཱམ ཨེཀོ གཎོ, དྷམྨགུཏྟིཀོནཱམ ཨེཀོ, ཀསྶཔིཡོནཱམ ཨེཀོ, སངྐནྟིཀོནཱམ ཨེཀོ, སུཏྟཝཱདོ ནཱམ ཨེཀོཏི པཉྩ གཎཱ བྷིཛྫིཾསུ.

ཨེཝཾ མཛ྄ཛྷིམདེསེ དུཏིཡསངྒཱིཏིཾ སངྒཱཡནྟཱནཾ མཧཱཐེརཱནཾ དྷམྨཝཱདཱིཐེརཝཱདགཎཏོ ཝིསུཾ ཝིསུཾ བྷིཛྫམཱནཱ ཨདྷམྨཝཱདཱིགཎཱ སཏྟརས ཨཧེསུཾ. ཏེ ཙ ཨདྷམྨཝཱདཱིགཎཱ སཱསནེ ཐེརཔརམྤརཱཡ ཨནནྟོ གདྷཱ. ཏེ ཧི སཱསནེ ཨུཔཀཱརཱ ན ཧོནྟི, ཐེརཔརམྤརཱཡ ཙ པཝེསེཏྭཱ གཎྷིཏུཾ ན སཀྐཱ, ཡཐཱ ཧཾསགཎེ བཀོ, ཡཐཱ ཙ གོ གཎེ ¶ གཝཛོ, ཡཐཱ ཙ སུཝཎྞགཎེ ཧཱརཀུཊོཏི.

མཧཱཀསྶཔཏྠེརཱདིཏོ པན ཨཱགཏཱ ཐེརཔརམྤརཱ ཨུཔཱལི དཱསཀོ ཙེཝཱཏིཨཱདིནཱ པརིཝཱརཁནྡྷཀེ སམནྟཔཱསཱདིཀཊྛཀཐཱཡཉྩ ཨཱགཏནཡེནེཝ ཝེདིཏབྦཱ.

ཨུཔཱལིཏྠེརཱདཱིནཾ པརིསུདྡྷཱཙཱརཱདཱིནི ཨནུམཱནེཏྭཱ ཡཱཝ མོགྒལིཔུཏྟཏིསྶཏྠེརཱ, ཏཱཝ ཏེསཾ ཐེརཱནཾ པརིསུདྡྷཱ ཙཱརཱདཱིནཱིཏི སཀྐཱ ཉཱཏུཾ, སེཡྻཐཱཔི ནདིཡཱ ཨུཔརིསོཏེ མེགྷཝསྶཱནི ཨནུམཱནེཏྭཱ ཨདྷོསོཏེ ནདིཡཱ ཨུདཀསྶ བཱཧུལླབྷཱཝོ ཝིཉྙཱཏུཾ སཀྐཱཏི ཨཡཾ ཀཱརཎཱནུམཱནནཡོ ནཱམ.

ཡཱཝ པན མོགྒལིཔུཏྟཏིསྶཏྠེརཱ, ཏཱཝ ཐེརཱནཾ པརིསུདྡྷཱཙཱརཱདཱིནི ཨནུམཱནེཏྭཱ ཨུཔཱལིཏྠེརསྶ པརིསུདྡྷཱཙཱརཱདཱིནཱིཏི སཀྐཱ ཉཱཏུཾ, སེཡྻཐཱཔི ནཱམ ཨུཔརིདྷཱུམཾ པསྶིཏྭཱ ཨནུམཱནེཏྭཱ ཨགྒི ཨཏྠཱིཏི སཀྐཱ ཉཱཏུནྟི ཨཡཾ ཕལཱནུམཱནན ཡོ ནཱམ.

ཨདིབྷཱུཏསྶ པན ཨུཔཱལིཏྠེརསྶ ཨཝསཱནབྷཱུཏསྶ ཙ མོགྒལིཔུཏྟཏིསྶཏྠེརསྶ པརིསུདྡྷཱཙཱརཱདཱིནི ཨནུམཱནེཏྭཱ མཛ྄ཛྷེ དཱསཀསོཎསིགྒཝཱདཱིནཾ ཐེརཱནཾ པརིསུདྡྷཱཙཱརཱདཱིནིཏི སཀྐཱ ཉཱཏུཾ, སེཡྻཐཱཔི ནཱམ སིལཱཔཊྚསྶ ཨོརབྷཱགེ པཱརབྷཱགེ ཙ མིགཔདཝལ༹ཉྫནཾ དིསྭཱ ཨནུམཱནེཏྭཱ མཛ྄ཛྷེ ཨཔཱཀཊཾ པདཝལ༹ཉྩནཾ ཨཏྠཱིཏི སཀྐཱ ཉཱཏུནྟི ཨཡཾ མིགཔདཝལ༹ཉྫན ནཡོ ནཱམ.

ཨེཝཾ ཏཱིཧི ནཡེཧི ཨཡཾ ཐེརཝཱདགཎོ དྷམྨཝཱདཱིལཛྫིཔེསལོཏི ཝེདིཏབྦོ. ཨེཝམུཔརིཔི ནཡོ ནེཏབྦོ. ཐེརཔརམྤརཱ ཙ ཡཱཝ པོཏྠཀཱརུལཱ༹ པརིཝཱརཁནྡྷཀེ སམནྟ པཱསཱདིཀཱཡཉྩ ཏཏོ མཧིནྡོ ཨིཊྚིཡོཏིཨཱདིནཱ ཝུཏྟ ནཡེན ཝེདིཏབྦཱཏི.

ཨིཏི སཱསནཝཾསེ ནཝཊྛཱནཱགཏསཱསནཝཾསཀཐཱམགྒོ

ནཱམ པཋམོ པརིཙྪེདོ.

༢. སཱིཧལ༹དཱིཔིཀསཱསནཝཾསཀཐཱམགྒོ

༢. ཨིདཱནི ¶ སཱིཧལ༹དཱིཔསཱསནཀཐཱམགྒཾ ཝཏྟུཾ ཨོཀཱསོ ཨནུཔྤཏྟོ, ཏསྨཱ ཏཾ ཝཀྑཱམི.

སཱིཧལ༹དཱིཔཉྷི སཱསནསྶ པཏིཊྛཱནབྷཱུཏཏྟཱ ཙེཏིཡགབྦྷསདིསཾ ཧོཏི. སམྨཱསམྦུདྡྷོ ཀིར སཱིཧལ༹དཱིཔཾ དྷརམཱནཀཱལེཔི ཏིཀྑཏྟུཾ ཨགམཱསི. པཋམཾ ཡཀྑཱནཾ དམནཏྠཾ ཨེཀཀོཝ གནྟྭཱ ཡཀྑེ དམེཏྭཱ མཡི པརིནིབྦུཏེ སཱིཧལ༹དཱིཔེ སཱསནཾ པཏིཊྛཧིསྶཏཱིཏི ཏམྦཔཎྞིདཱིཔེ ཨཱརཀྑཾ ཀརོནྟོ ཏིཀྑཏྟུཾ དཱིཔཾ ཨཱཝིཉྪི. དུཏིཡཾ མཱཏུལབྷཱགིནེཡྻཱནཾ ནཱགརཱ ཛཱུནཾ དམནཏྠཱཡ ཨེཀཀོཝ གནྟྭཱ ཏེ དམེཏྭཱ ཨགམཱསི. ཏཏིཡཾ པཉྩབྷིཀྑུསཏཔརིཝཱརོ གནྟྭཱ མཧཱཙེཏིཡཊྛཱནེ ཙ ཐཱུཔཱརཱམཙེཏིཡཊྛཱནེ ཙ མཧཱབོདྷིཔཏིཊྛིཏཊྛཱནེ ཙ མཧིཡངྒཎཙེཏིཡཊྛཱནེ ཙ མུདིངྒཎཙེཏིཡཊྛཱནེ ཙ དཱིགྷཝཱཔི ཙེཏིཡཊྛཱནེ ཙ ཀལྱཱཎིཡཙེཏིཡཊྛཱནེ ཙ ནིརོདྷསམཱཔཏྟིཾ སམཱཔཛྫིཏྭཱ ནིསཱིདི.

ཏདཱ ཙ པན སཱསནཾ ཨོགཱཧེཏྭཱན ཏཱཝ ཏིཊྛཏི. པཙྪཱ པན ཡཐཱཝུཏྟཏྠེརཔརམྤརཱཡ སམབྷིནིཝིཊྛེན མཧཱམོགྒལིཔུཏྟཏིསྶཏྠེརེན པེསིཏོ མཧིནྡཏྠེརོ ཛིནཙཀྐེ པཉྩཏིཾསཱདྷིཀེ དྭིསཏེ སམྤཏྟེ དུཏིཡཀཏྟིཀམཱསེ ཨིཊྚིཡེན ཨུཏྟིཡེན སམྦུལེན བྷདྡསཱལེན ཙཱཏི ཨེཏེཧི ཐེརེཧི སདྡྷིཾ སཱིཧལ༹དཱིཔཾ ཨགམཱསི. སོཎུཏྟརཏྠེརཱདཡོ ཛིནཙཀྐེ པཉྩཏིཾསཱདྷིཀེ དྭིསཏེ སམྤཏྟེ དུཏིཡཀཏྟིཀམཱསེཡེཝ སཱསནསྶ པཏིཊྛཱཔནཏྠཱཡ ཨཏྟནོ ཨཏྟནོ སམྤཏྟབྷཱརབྷཱུཏཾ ཏཾ ཏཾ ཋཱནཾ ཨགམཾསུ.

མཧཱམཧིནྡཏྠེརོ པན སཏྟམཱསཱནི ཨཱགམེཏྭཱ ཛིནཙཀྐེ ཚཏྟིཾསཱདྷིཀེ དྭིསཏེ སམྤཏྟེ ཛེཊྛམཱསསྶ པུཎྞམིཡཾ སཱིཧལ༹དཱིཔཾ སཱསནསྶ པཏིཊྛཱཔནཏྠཱཡ ཨགམཱསི. ཏེནེཝ ཏེསུ ནཝསུ ཋཱནེསུ སཱིཧལ༹དཱིཔཾ ཚཏྟིཾསཱདྷིཀེ དྭིས ཏེ ¶ ཨགམཱསི. ཨཉྙཱནི པན ཨཊྛ ཋཱནཱནི པཉྩཏིཾསཱདྷིཀདྭིསཏེཡེཝ ཨགམཱསཱིཏི ཝིསུཾཝ ཝཏྠཔེཏབྦོ.

ཀསྨཱ པན མཧཱམཧིནྡཏྠེརོ སཏྟམཱསཱནི ཨཱགམེཏྭཱ སབྦཔཙྪཱ སཱིཧལ༹དཱིཔཾ གཙྪཏཱིཏི. སཱིཧལ༹དཱིཔེ མུཊབྷིཝོ ནཱམ རཱཛཱ ཛརཱདུབྦལོ ཨཧོཏི, སཱསནཾ པགྒཧེཏུཾ ཨསམཏྠོ, ཏསྶ པན པུཏྟོ དེཝཱནཾ པིཡ ཏིསྶོ ནཱམ རཱཛཀུམཱརོ དཧརོ སཱསནཾ པགྒཧེཏུཾ སམཏྠོ བྷཝིསྶཏི, སོ ཙ དེཝཱནཾ ཝིཡཏིསྶོ རཛྫཾ ཏཱཝ ལབྷཏུ ཝེདིསྶཀགིརིནགརེ མཱཏུཡཱ སདྡྷིཾ ཉཱཏཀེ ཏཱཝ པསྶཱམཱིཏི ཨཔེཀྑིཏྭཱ སཏྟམཱསཱནི ཨཱགམེཏྭཱ ཚཏྟིཾསཱདྷིཀདྭིསཏེཡེཝ ཛིནཙཀྐེ མཧཱམཧིནྡཏྠེརོ སཱིཧལ༹དཱིཔཾ གཙྪཏཱིཏི ཝེདིཏབྦཾ.

མཧཱམཧིནྡཏྠེརོ ཙ ཨིཊྚིཡཱདཱིཧི ཐེརེཧི ཙཏཱུཧི བྷཱགིནེཡྻེན སུམནསཱམཎེརེན བྷཎྜུཀེན ནཱམ ཨུཔཱསཀེ ན ཙཱཏི ཨེཏེཧི སདྡྷིཾ ཚཏྟིཾསཱདྷིཀེ དྭིསཏེ ཛིནཙཀྐེ ཛེཊྛམཱསཔུཎྞམིཡཾ སུཝཎྞཧཾསཱ ཝིཡ ཛེཊྛམཱསེ ནབྷཾ ཨུགྒནྟྭཱ ཨཱཀཱསམགྒེན ཨནུརཱདྷཔུརསྶ པུརཏྠིམདིསཱབྷཱགེ མིསྶ ཀཔབྦཏཀཱུཊེ པཏིཊྛཱསི.

ཛེཊྛམཱསསྶ ཙ པུཎྞམིཡཾ ལངྐཱདཱིཔེ ཛེཊྛམཱུལནཀྑཏྟསབྷཱ ཧུཏྭཱ མནུསྶཱ ཚཎཾ ཨཀཾསུ. ཏེནེཝཱཧ སཱརཏྠདཱིཔནིཡཾ ནཱམ ཝིནཡཌཱིཀཱཡཾ, ཛེཊྛམཱསསྶ པུཎྞམིཡཾ ཛེཊྛནཀྑཏྟཾ མཱུལནཀྑཏྟཾ ཝཱ ཧོཏཱིཏི. ཏཏྠ ཙ པུཎྞམིནཀྑཏྟཾ རཱཛམཏྟནྟེ པུཎྞམིནཀྑཏྟཝིཙཱརཎནཡེན ཝུཏྟནྟི དཊྛབྦཾ.

དེཝཱནཾ པིཡ ཏིསྶོ ཙ རཱཛཱ ནཀྑཏྟཾ ནཱམ གྷོསཱཔེཏྭཱ ཚཎཾ ཀཱརེཐཱཏི ཨམཙྩེ ཨཱཎཱཔེཏྭཱ ཙཏྟཱལཱི སཔུརིསསཧསྶཔརིཝཱརོ ནགརམྷཱ ནིཀྑམིཏྭཱ ཡེན མིསྶ ཀཔབྦཏོ, ཏེན པཱཡཱསི མིགཝཾ ཀཱིལི༹ཏུཀཱམོ. ཨཐ ཏསྨིཾ པབྦཏེ ཨདྷིཝཏྠཱ ཨེཀཱ དེཝཏཱ མིགརཱུཔེན རཱཛཱནཾ ཕལོབྷེཏྭཱ པཀྐོསིཏྭཱ ཐེརསྶ ཨབྷིམུཁཾ ཨཀཱསི.

ཐེརོ ¶ རཱཛཱནཾ ཨཱགཙྪནྟཾ དིསྭཱ མམཾཡེཝ རཱཛཱ པསྶཏུ མཱ ཨིཏརེཏི ཨདྷིཊྛཧིཏྭཱ ཏིསྶ ཏིསྶ ཨིཏོ ཨེཧཱིཏི ཨཱཧ. རཱཛཱ ཏཾ སུཏྭཱ ཙིནྟེསི, ཨིམསྨིཾ དཱིཔེ ཛཱཏོ སཀལོཔི མནུསྶོ མཾ ཏིསྶོཏི ནཱམཾ གཧེཏྭཱ ཨཱལཔིཏུཾ སམཏྠོ ནཱམ ནཏྠི, ཨཡཾ པན བྷིནྣབྷིནྣཔཊདྷརོ བྷཎྜུཀཱསཱཝ ཝསནོ མཾ ནཱམེན ཨཱལཔཏི, ཀོ ནུཁོ ཨཡཾ བྷཝིསྶཏི, མནུསྶོ ཝཱ ཨམནུསྶོ ཝཱཏི. ཐེརོ ཨཱཧ,–

སམཎཱ མཡཾ མཧཱརཱཛ, དྷམྨརཱཛསྶ སཱཝཀཱ;

ཏཝེཝ ཨནུཀམྤཱཡ, ཛམྦུདཱིཔཱ ཨིདྷཱགཏཱཏི.

ཏདཱ ཙ དེཝཱནཾ པིཡཏིསྶོ རཱཛཱ ཨསོཀརཉྙཱ པེསིཏེན ཨབྷིསེཀེན ཨེཀམཱསཱབྷིསིཏྟོ ཨཧོསི. ཝིསཱཁཔུཎྞམཱཡཾ ཧིསྶ ཨབྷིསེཀམཀཾསུ. སོ ཙ ཨསོཀརཉྙཱ པེསིཏེ དྷམྨཔཎྞཱཀཱརེ རཏནཏྟཡགུཎཔྤཊིསཾཡུཏྟཾ སཱསནཔྤཝཏྟིཾ ཨཙིརསུཏཾ ཨནུསྶརམཱནོ ཏཾ ཐེརསྶ སམཎཱ མཡཾ མཧཱརཱཛ, དྷམྨརཱཛསྶ སཱཝཀཱཏི ཝཙནཾ སུཏྭཱ ཨཡྻཱ ནུཁོ ཨཱགཏཱཏི ཏཱཝདེཝ ཨཱཝུདྷཾ ནིཀྑིཔིཏྭཱ ཨེཀམནྟཾ ནིསཱིདི སམྨོདནཱིཡཾ ཀཐཾ ཀཐཡམཱནོ. ཡཐཱཧ,–

ཨཱཝུདྷཾ ནིཀྑིཔིཏྭཱན, ཨེཀམནྟཾ ཨུཔཱཝིསི;

ནིསཛྫ རཱཛཱ སམྨོདི, བཧུཾ ཨཏྠཱུཔསཉྷིཏནྟི.

སམྨོདནཱིཡཾ ཀཐཉྩ ཀུརུམཱནེཡེཝ ཏསྨིཾ ཏཱནིཔི ཙཏྟཱལཱིསཔུརིསསཧསྶཱནི ཨཱགནྟྭཱ སམྤརིཝཱརེསུཾ. ཏདཱཐེརོ ཨིཏརེཔི ཚ ཛནེ དསྶེསི. རཱཛཱ དིསྭཱ ཨིམེ ཀདཱ ཨཱགཏཱཏི ཨཱཧ. མཡཱ སདྡྷིཾཡེཝ མཧཱརཱཛཱཏི. ཨིདཱནི པན ཛམྦུདཱིཔེ ཨཉྙེཔི ཨེཝརཱུཔཱ སམཎཱ སནྟཱིཏི. སནྟི ¶ མཧཱརཱཛ ཨེཏརཧིཛམྦུདཱིཔོ ཀཱལཱཝཔཛྫོཏོ ཨིསིཝཱཏཔཊིཝཱཏོ, ཏསྨིཾ–

ཏེཝིཛྫཱ ཨིདྡྷིཔཏྟཱ ཙ, ཙེཏོཔརིཡཀོཝིདཱ;

ཁཱིཎཱསཝཱ ཨརཧནྟོ, བཧཱུ བུདྡྷསྶ སཱཝཀཱཏི.

བྷནྟེ ཀེན ཨཱགཏཏྠཱཏི. ནེཝ མཧཱརཱཛ ཨུདཀེན, ན ཐལེནཱཏི. རཱཛཱ ཨཱཀཱསེན ཨཱགཏཱཏི ཨཉྙཱསི. ཐེརོ ཨཏྠི ནུཁོ རཉྙོ པསྶཱཝེཡྻཏྟིཀནྟི ཝཱིམཾསནཏྠཱཡ ཨཱསནྣཾ ཨམྦརུཀྑཾ ཨཱརབྦྷ པཉྷཾ པུཙྪི, –

ཀིནྣཱམོ མཧཱརཱཛ ཨཡཾ རུཀྑོཏི. ཨམྦརུཀྑོ ནཱམ བྷནྟེཏི. ཨིམཾ པན མཧཱརཱཛ ཨམྦཾ མུཉྩིཏྭཱ ཨཉྙོ ཨམྦོ ཨཏྠི ཝཱ ནཏྠི ཝཱཏི. ཨཏྠི བྷནྟེ ཨཉྙེཔི བཧཱུ ཨམྦརུཀྑཱཏི. ཨིམཉྩ ཨམྦཾ ཏེ ཙ ཨམྦེ མུཉྩིཏྭཱ ཨཏྠི ནུཁོ མཧཱརཱཛ ཨཉྙེ རུཀྑཱཏི. ཨཏྠི བྷནྟེ, ཏེ པན ན ཨམྦརུཀྑཱཏི. ཨཉྙེ ཙ ཨམྦེ ཨནམྦེ ཙ མུཉྩིཏྭཱ ཨཏྠི པན ཨཉྙོ རུཀྑོཏི. ཨཡམེཝ བྷནྟེ ཨམྦ རུཀྑོཏི. སཱདྷུ མཧཱརཱཛ པཎྜིཏོསཱིཏི.

ཨཏྠི པན མཧཱརཱཛ ཏེ ཉཱཏཀཱཏི. ཨཏྠི བྷནྟེ བཧཱུཛནཱཏི. ཏེ མུཉྩིཏྭཱ ཀེཙི ཨཉྙཱཏཀཱཔི ཨཏྠི མཧཱརཱཛཱཏི. ཨཉྙཱཏཀཱ བྷནྟེ ཉཱཏཀེཧི བཧུཏརཱཏི. ཏཝཉཱཏཀེ ཙ ཨཉྙཱཏཀེ ཙ མུཉྩིཏྭཱ ཨཏྠཉྙོ ཀོཙི མཧཱརཱཛཱཏི. ཨཧམེཝ བྷནྟེཏི. སཱདྷུ མཧཱརཱཛ ཨཏྟཱ ནཱམ ཨཏྟནོ ནེཝ ཉཱཏཀོ ན ཨཉྙཱཏཀོཏི.

ཨཐ ཐེརོ པཎྜིཏོ རཱཛཱ སཀྑིསྶཏི དྷམྨཾ ཨཉྙཱཏུནྟི ཙཱུལ༹ཧཏྠིཔདོཔམསུཏྟཾ ཀཐེསི. ཀཐཱཔརིཡོསཱནེ རཱཛཱ ཏཱིསུ སརཎེསུ པཏིཊྛཧི སདྡྷིཾ ཙཏྟཱལཱིསཱཡ པཱཎསཧསྶེཧཱིཏི. ཏཏོ པརཾ ཡཾ ཡཾ ཝཏྟབྦཾ, ཏཾ ཏཾ སམནྟཔཱསཱདིཀཱདཱིསུ ཝུཏྟནཡེན ཝེདིཏབྦཾ.

ཨིཙྩེཝཾ སཱིཧལ༹དཱིཔེ སཱསནཱནུགྒཧཎ མཧིནྡཏྠེརཏོ ཨཱགཏཱ ¶ སིསྶཔརམྤརཱ བཧཱུ ཧོནྟི, གཎནཔཐཾ ཝཱིཏི ཝཏྟཱ. ཀཐཾ. མཧཱམཧིནྡཏྠེརསྶ སིསྶོ ཨརིཊྛོ ནཱམ ཐེརོ, ཏསྶ སིསྶོ ཏིསྶདཏྟོ, ཏསྶ སིསྶོ ཀཱལ༹སུམནོ, ཏསྶ སིསྶོ དཱིགྷོ, ཏསྶ སིསྶོ དཱིགྷ སུམནོ, ཏསྶ སིསྶོ ཀཱལ༹སུམནོ, ཏསྶ སིསྶོ ནཱགོ, ཏསྶ སིསྶོ བུདྡྷརཀྑིཏོ, ཏསྶ སིསྶོ ཏིསྶོ, ཏསྶ སིསྶོ རེཝོ, ཏསྶ སིསྶོ སུམནོ, ཏསྶ སིསྶོ ཙཱུལ༹ནཱགོ, ཏསྶ སིསྶོ དྷམྨཔཱལི ཨེཏཱ, ཏསྶ སིསྶོ ཁེམོ, ཏསྶ སིསྶོ ཨུཔལིསྶོ, ཏསྶ སིསྶོ ཕུསྶདེཝོ, ཏསྶ སིསྶོ སུམནོ, ཏསྶ སིསྶོ མཧཱཔདུམོ, ཏསྶ སིསྶོ མཧཱསཱིཝོ, ཏསྶ སིསྶོ ཨུཔཱལི, ཏསྶ སིསྶོ མཧཱནཱགོ, ཏསྶ སིསྶོ ཨབྷཡོ, ཏསྶ སིསྶོ ཏིསྶོ, ཏསྶ སིསྶོ སུམནོ, ཏསྶ སིསྶོ ཙཱུལཱ༹བྷཡོ, ཏསྶ སིསྶོ ཏིསྶོ, ཏསྶ སིསྶོ ཙཱུལ༹དེཝོ, ཏསྶ སིསྶོ སཱིཝོཏི. ཨཡཾ ཡཱཝ པོཏྠཀཱརུལ༹སངྑཱཏཱ ཙཏུཏྠསངྒཱིཏིཀཱ, ཏཱཝ ཐེརཔརམྤརཱཏི དཊྛབྦཱ.

ཝུཏྟཉྷེཏཾ ཨཊྛཀཐཱཡཾ,– ཡཱཝཛྫབྷནཱ ཏེསཾཡེཝ ཨནྟེཝཱསིཀཔརམྤརབྷཱུཏཱཡ ཨཱཙརིཡཔརམྤརཱཡ ཨཱབྷཏནྟིཏི ཝེདིཏབྦནྟི.

ཨེཝཾ ཏེསཾ སིསྶཔརམྤརབྷཱུཏཱ ཨཱཙརིཡཔརམྤརཱ ཡཱཝཛྫཏནཱ སཱསནེ པཱཀཊཱ ཧུཏྭཱ ཨཱགཙྪནྟཱིཏི ཝེདིཏབྦ.

སཱསནེ ཝིནཡདྷརེཧི ནཱམ ཏིལཀྑཎསམྤནྣེཧི བྷཝིཏབྦཾ. ཏཱིཎི ཧི ཝིནཡདྷརསྶ ལཀྑཎཱནི ཨིཙྪི ཏབྦཱནི. ཀཏམཱནི ཏཱིཎི. སུཏྟཉྩསྶ སྭཱགཏཾ ཧོཏི སུཔྤཝཏྟི སུཝིནིཙྪིཏཾ སུཏྟཏོ ཨནུབྱཉྫནཏོཏི ཨིདམེཀཾ ལཀྑཎཾ, ཝིནཡེ ཁོ པན ཋིཏོ ཧོཏི ཨསཾཧཱིརོཏི ཨིདཾ དུཏིཡཾ, ཨཱཙརིཡཔརམྤརཱ ཁོ པནསྶ སུགྒཧིཏཱ ཧོཏི སུམནསིཀཏཱ སུཔདྷཱརིཏཱཏི ཨིདཾ ཏཏིཡཾ.

ཏཏྠ ¶ ཨཱཙརིཡཔརམྤརཱ ཁོ པནསྶ སུགྒཧིཏཱ ཧོཏཱིཏི ཐེརཔརམྤརཱ ཝཾསཔརམྤརཱ ཙསྶ སུཊྛུགཧིཏཱ ཧོཏི. སུམནསིཀཏཱཏི སུཊྛུ མནསིཀཏཱ, ཨཱཝཛྫིཏམཏྟེ ཉཛྫལི ཏཔྤདཱིཔོ ཝིཡ ཧོཏི.

སུཔདྷཱརིཏཱཏི སུཊྛུ ཨུཔདྷཱརིཏཱ, པུབྦཱཔརཱནུསནྡྷིཏོ ཨཏྠཏོ ཀཱརཎཏོ ཙ ཨུཔ དྷཱརིཏཱ. ཨཏྟནོ མཏིཾ པཧཱཡ ཨཱཙརིཡསུདྡྷིཡཱ ཝཏྟཱ ཧོཏི, མཡ྄ཧཾ ཨཱཙརིཡོ ཨསུཀཱཙརིཡསྶ སནྟིཀེ ཨུགྒཎྷི, སོ ཨསུཀསྶཱཏི ཨེཝཾ སབྦཾ ཨཱཙརིཡཔརམྤརཾ ཐེར ཝཱདངྒཾ ཨཱཧརིཏྭཱ ཡཱཝ ཨུཔཱལིཏྠེརོ སམྨཱསམྦུདྡྷསྶ སནྟིཀེ ཨུགྒཎྷཱིཏི པཱཔེཏྭཱ ཋཔེཏི. ཏཏོཔི ཨཱཧརིཏྭཱ ཨུཔཱལིཏྠེརོ སམྨཱསམྦུདྡྷསྶ སནྟིཀེ ཨུགྒཎྷི, དཱསཀཏྠེརོ ཨཏྟནོ ཨུཔཛ྄ཛྷཱཡསྶ ཨུཔཱལིཏྠེརསྶ, སོཎཀཏྠེརོ ཨཏྟནོ ཨུཔཛ྄ཛྷཱཡསྶ དོསཀཏྠེརསྶ, སིགྒཝཏྠེརོ ཨཏྟནོ ཨུཔཛ྄ཛྷཱཡསྶ སོཎཀཏྠེརསྶ, མོགྒལིཔུཏྟཏིསྶཏྠེརོ ཨཏྟནོ ཨུཔཛ྄ཛྷཱཡསྶ སིགྒཝཏྠེརསྶ ཙཎྜ ཝཛྫིཏྠེརསྶ ཙཱཏི ཨེཝཾ སབྦཾ ཨཱཙརིཡཔརམྤརཾ ཐེརཝཱདངྒཾ ཨཱཧརིཏྭཱ ཨཏྟནོ ཨཱཙརིཡཾ པཱཔེཏྭཱ ཋཔེཏི. ཨེཝཾ ཨུགྒཧིཏཱ ཧི ཨཱཙརིཡཔརམྤརཱ སུགྒཧིཏཱ ཧོཏི.

ཨེཝཾ ཨསཀྐོནྟེན པན དྭེ ཏཡོ པརིཝཊྚཱ ཨུགྒཧེཏབྦཱ. སབྦཔཙྪིམེན ཧི ནཡེན ཡཐཱ ཨཱཙརིཡོ ཙ ཨཱཙརིཡཱཙརིཡོ ཙ པཱལི༹ཉྩ པརིཔུཉྪཉྩ ཝདནྟི, ཏཐཱ ཉཱཏུཾ ཝཏྟཏཱིཏི.

ཡཐཱ ཝུཏྟཏྠེརཔརམྤརཱ པན བྷགཝཏོ དྷརམཱནཀཱལཏོ པཊྛཱཡ ཡཱཝ པོཏྠཀཱརུལཱ༹ མུཁཔཱཋེནེཝ པིཊཀཏྟཡཾ དྷཱརེསུཾ, པརིཔུཎྞཾ པན ཀཏྭཱ པོཏྠཀེ ལིཁིཏྭཱ ན ཋཔེནྟི. ཨེཝཾ མཧཱཐེརཱ དུཀྐརཀམྨཾ ཀཏྭཱ སཱསནཾ པགྒཎྷིཾསུ. ཏཏྲིདཾ ཝཏྠུ,–

སཱིཧལ༹དཱིཔེ ཀིར ཙཎྜཱལཏིསྶབྷཡེན སངྑུབྦྷིཏྭཱ དེཝོ ¶ ཙ ཨཝསྶིཏྭཱ དུབྦྷིཀྑབྷཡཾ ཨུཔྤཛྫི. ཏདཱ ཨཀྐོ དེཝཱནམིནྡོ ཨཱགནྟྭཱ ཏུམྷེ བྷནྟེ པིཊཀཾ དྷཱརེཏུཾ ན སཀྑིསྶཐ, ནཱཝཾ པན ཨཱརཱུཧིཏྭཱ ཛམྦུདཱིཔཾ གཙྪཐ, སཙེ ནཱཝཱ ཨཔྤཧོནཀཱ བྷཝེཡྻ, ཀཊྛེན ཝཱ ཝེལུ༹ནཱ ཝཱ ཏརཐ, ཨབྷཡཏྠཱཡ པན མཡཾ རཀྑིསྶཱམཱཏི ཨཱཧ.

ཏདཱ སཊྛིམཏྟཱ བྷིཀྑཱུ སམུདྡཏཱིརཾ གནྟྭཱ པུན ཨེཏདཧོསི,– མཡཾ ཛམྦུདཱིཔཾ ན གཙྪིསྶཱམ, ཨིདྷེཝ ཝསིཏྭཱ ཏེཔིཊཀཾ དྷཱརིསྶཱམཱཏི. ཏཏོ པཙྪཱ ནཱཝཱ ཏིཏྠཏོ ནིཝཏྟིཏྭཱ སཱིཧལ༹དཱིཔེཀདེསཾ མལཡཛནཔདཾ གནྟྭཱ མཱུལཕལཱདཱིཧིཡེཝ ཡཱཔེཏྭཱ སཛ྄ཛྷཱཡཾ ཨཀཾསུ. ཚཱཏཀབྷཡེན ཨཏིཔཱིལི༹ཏཱ ཧུཏྭཱ ཨེཝམྤི ཀཱཏུཾ ཨསཀྐོནྟོ ཝཱལུ༹ཀཏལེ ཨུརཾ ཋཔེཏྭཱ སཱིསེན སཱིསཾ ཨབྷིམུཁཾ ཀཏྭཱ ཝཱཙཾ ཨནིཙྪཱརེཏྭཱ མནསཱཡེཝ ཨཀཾསུ. ཨེཝཾ དྭཱདསཝསྶཱནི སདྡྷིཾ ཨཊྛཀཐཱཡ ཏེཔིཊཀཾ རཀྑིཏྭཱ སཱསནཾ ཨནུགྒཧེསུཾ.

དྭཱདསཝསྶེསུ པན ཨཏིཀྐནྟེསུ ཏཾ བྷཡཾ ཝཱུཔསམིཏྭཱ པུབྦེ ཛམྦུདཱིཔཾ གཙྪནྟཱ སཏྟབྷིཀྑུསཏཱ ཨཱགནྟྭཱ སཱིཧལ༹དཱིཔེཀདེསཾ རཱམཛནཔདེ མཎྜལཱརཱམཝིཧཱརཾ ཨཱཔཛྫིཾསུ. ཏེཔི སཊྛིམཏྟཱ བྷིཀྑཱུ ཏམེཝ ཝིཧཱརཾ གནྟྭཱ ཨཉྙམཉྙཾ སམྨནྟེཏྭཱ སཛ྄ཛྷཱཡིཾསུ. ཏདཱ ཨཉྙམཉྙཾ སམེནྟི, ན ཝིརུཛ྄ཛྷནྟི, གངྒཱདཀེན ཝིཡ ཡམུནོདཀཾ སཾསནྡེནྟི. ཨེཝཾ པིཊཀཏྟཡཾ མུཁཔཱཋེནེཝ དྷཱརེཏྭཱ མཧཱཐེརཱ དུཀྐརཀམྨཾ ཀརོནྟཱིཏི ཝེདིཏབྦཱ.

ཡམྤི པརིཡཏྟིཾ ཨེཀཔདམཏྟམྤི ཨཝིརཛ྄ཛྷིཏྭཱ དྷཱརེནྟི, ཏཾ དུཀྐརཀམྨམེཝ.

སཱིཧལ༹དཱིཔེ ཀིར པུནབྦསུཀསྶ ནཱམ ཀུཊུམྦིཀསྶ པུཏྟོ ཏིསྶཏྠེརོ བུདྡྷཝཙནཾ ཨུགྒཎྷིཏྭཱ ཨིམཾ ཛམྦུདཱིཔཾ ཨཱགནྟྭཱ ཡོནཀདྷམྨརཀྑིཏཏྠེརསྶ སནྟིཀེ བུདྡྷཝཙནཾ ཨུགྒཎྷིཏྭཱ གཙྪནྟོ ནཱཝཾ ཨབྷིརཱུཧནཏིཏྠེ ཨེཀསྨིཾ པདེ ཨུཔྤནྣཀངྑོ ཡོཛནསཏམགྒཾ ནིཝཏྟིཏྭཱ ཨཱཙརིཡསྶ སནྟིཀཾ ཨཱགཙྪནྟོ ¶ ཨནྟརཱམགྒེ ཨེཀསྶ ཀུཊུམྦིཀསྶ པཉྷཾ ཀཐེསི. སོ པསཱིདིཏྭཱ སཏསཧསྶགྒྷནཀཾ ཀམྤལཾ ཨདཱསི. སོཔི ཏཾ ཨཱཧརིཏྭཱ ཨཱཙརིཡསྶ ཨདཱསི. ཐེརོ ཝཱ སིཡཱ ཀོཊྚེཏྭཱ ནིསཱིདནཊྛཱནེ པརིབྷཎྜཾ ཀཱརེསི. ཀིམཏྠཱཡཱཏི. པཙྪིམཱཡ ཛནཏཱཡ ཨནུགྒཧཏྠཱཡ. ཨེཝཾ ཀིརསྶ ཨཧོསི,– ཨམྷཱཀཾ གཏམགྒཾ ཨཱཝཛྫིཏྭཱ ཨནཱགཏེ སབྲཧྨཙཱརིནོ པཊིཔཏྟིཾ པཱུརེཏབྦཾ མཉྙིསྶནྟཱིཏི. ཏིསྶཏྠེརོཔི ཨཱཙརིཡསྶ སནྟིཀེ ཀངྑཾ ཚིནྡིཏྭཱ སཱིཧལ༹དཱིཔམེཝ སཀཊྛཱནཾ ཨཱགམཱསཱིཏི. ཨིཙྩེཝཾ པརིཡཏྟིཾ ཨེཀཔདམཏྟམྤི ཨཝིརཛ྄ཛྷིཏྭཱ དྷཱརཎམྤི དུཀྐརཀམྨམེཝཱཏི དཊྛབྦཾ.

ཡམྤི ཡེབྷུཡྻེན པགུཎཾ ན ཀརོནྟི, ཏསྶ ཨནནྟརདྷཱནཏྠཱཡ ཨསམྨོསཏྠཱཡ ཨུགྒཧདྷཱརཎཱདིཝསེན རཀྑནམྤི ཀརོནྟི, ཏཾ དུཀྐརཀམྨམེཝ.

སཱིཧལ༹དཱིཔེཡེཝ ཀིར མཧཱབྷཡེ ཨེཀསྶེཝ བྷིཀྑུནོ མཧཱནིདྡེསོ པགུཎོ ཨཧོསི. ཨཐ ཙཏུནིཀཱཡིཀཏིསྶཏྠེརསྶ ཨུཔཛ྄ཛྷཱཡོ མཧཱཏིཔིཊཀཏྠེརོ ནཱམ མཧཱརཀྑིཏཏྠེརཾཨཱཧ,– ཨཱཝུསོ མཧཱརཀྑིཏ ཨསུཀསྶ སནྟིཀེ མཧཱནིདྡེསཾ གཎྷཱཧཱིཏི. པཱཔོཀིརཱཡཾ བྷནྟེ ན གཎྷཱམཱིཏི. གཎྷཱཝུསོ ཨཧཾ ཏེ སནྟིཀེ ནིསཱིདིསྶཱམཱིཏི. སཱདྷུ བྷནྟེ ཏུམྷེསུ ནིསིནྣེསུ གཎྷིསྶཱམཱིཏི པཊྛཔཏྭཱ རཏྟིནྡིཝཾ ནིརནྟརཾ པརིཡཱཔུཎནྟོ ཨོསཱནདིཝསེ ཧེཊྛཱམཉྩེ ཨིཏྠིཾ དིསྭཱ བྷནྟེ སུཏཾཡེཝ མེ པུབྦེ, སཙཱཧཾ ཨེཝཾ ཛཱནེཡྻཾ, ན ཨཱིདིསསྶ སནྟིཀེ དྷམྨཾ པརིཡཱཔུཎེཡྻནྟི ཨཱཧ. ཏསྶ པན སནྟིཀེ བཧཱུ མཧཱཐེརཱ ཨུགྒཎྷིཏྭཱ མཧཱནིདྡེསཾ པཏིཊྛཱཔེསུཾ. ཨེཝཾ ཡཾ ཡེབྷུཡྻེན པགུཎཾ ན ཀརོནྟི, ཏསྶ ཨནནྟརདྷཱནཏྠཱཡ ཨསམྨོསཏྟཱཡ ཨུགྒཧདྷཱརཎཱདིཝསེན རཀྑནམྤི དུཀྐརཀམྨཾ ཡེཝཱཏི དཊྛབྦཾ.

ཨིཙྩེཝཾ བྷགཝཏོ དྷརམཱནཀཱལཏོ པབྷུཏི ཙིརཀཱལཾ ཡཐཱཝུཏྟམཧཱཐེརཔརམྤརཱ པརིཡཏྟིཾ མུཁཔཱཋེནེཝ དྷཱརེསུཾ ¶ . ཨཧོཝཏ པོརཱཎིཀཱནཾ མཧཱཐེརཱནཾ སཏིཔཉྙཱསམཱདྷིཝེཔུལླཏཱཡ ཧི ཏེ མུཁཔཱཋེནེཝ དྷཱརེཏུ སཀྐཱཏི. མུཁཔཱཋེནེཝ པོརཱཎཀཏྠེརཱནཾ པརིཡཏྟིདྷཱརཎཾ པཉྩནཝུཏཱདྷིཀཱནི ཙཏུསཏཱནི ཨཧོསི.

བྷགཝཏོ པརིནིབྦཱནཏོ མཧཱཝཾསསཱརཏྠསངྒཧེསུ ཨཱགཏནཡེན ཛིནཙཀྐེ པཎྞཱསྶཱདྷིཀེ ཙཏུསཏེ སམྤཏྟེ ཏམྦཔཎྞིདཱིཔེ རཱཛཱུནཾ ཨཊྛཱརསམཀོ’སདྡྷཱཏིསྶསྶ ནཱམ རཉྙོ པུཏྟོ ཝཊྚགཱམཎི ནཱམ རཱཛཱ རཛྫཾ པཏྭཱ ཚཝསྶཀཱལེ ཨནཱགཏེ སཏྟཱ ཧཱིནསཏིཔཉྙཱསམཱདྷིཀཱ ཧུཏྭཱ ན སཀྑིསྶནྟི མུཁཔཱཋེན དྷཱརེཏུནྟི ཨུཔཔརིཀྑིཏྭཱ པུབྦེ ཝུཏྟེཧི མཧཱཐེརེཧི ཨནུཔུབྦེན ཨཱགཏཱ པཉྩམཏྟཱ མཧཱཐེརསཏཱ ཝཊྚགཱམཎིརཱཛཱནཾ ནིསྶཱཡ ཏམྦཔཎྞིདཱིཔེཀདེསེ མལཡཛནཔདེ ཨཱལོཀལེཎེ ཨཊྛཀཐཱཡ སཧཔིཊཀཏྟཡཾ པོཏྠཀེ ཨཱརོཔེསུཾ.

ཏཉྩ ཡཐཱཝུཏྟསངྒཱིཏིཡོ ཨུཔནིདྷཱཡ ཙཏུཏྠསངྒཱིཏིཡེཝ ནཱམཱཏི ཝེདིཏབྦཱ. ཝུཏྟཉྷེཏཾ སཱརཏྠདཱིཔནིཡཾ ནཱམ ཝིནཡཊཱིཀཱཡཾ,– ཙཏུཏྠསངྒཱིཏིསདིསཱ ཧི པོཏྠཀཱརོཧསངྒཱིཏཱིཏི.

སཱིཧལ༹དཱིཔེ པན ཝཊྚགཱམཎིརཱཛཱ མརམྨརཊྛེ སིརིཁེཏྟནགརེ ཨེཀོ ནཱམ ཀུཀྐུཊསཱིསརཱཛཱ ཙ ཨེཀཀཱལེན རཛྫཾ ཀཱརེསི. ཨམརཔུརམཱཔཀསྶ རཉྙོ ཀཱལེ སཱིཧལ༹དཱིཔབྷིཀྑུཧི ཨིདྷ པེསིཏསནྡེསཀཐཱཡཾ པན ཏེཏྟིཾསཱདྷིཀཙཏུསཏེ སམྤཏྟེ པོཏྠཀཱརུལ༹ཾ ཨཀཾསཱུཏི ཨཱགཏཾ. ཝུཏྟཉྷེཏཾ ཏཏྠ,– ཏེཏྟིཾསཱདྷིཀཙཏུཝསྶསཏཔརིམཱཎཀཱལནྟི.

ཨིདཾ སཱིཧལ༹དཱིཔེ ཡཱཝ པོཏྠཀཱརུལ༹ྷཱ

སཱསནསྶ པཏིཊྛཱནཾ.

ཨཐཱཔརཾ ¶ ཛམྦུདཱིཔེ སཱིཧལ༹དཱིཔེ ཙ བྷིཀྑཱུ ཝིསུཾ ཝིསུཾ གཎཝསེན བྷིཛྫིཾསུ, ཡཐཱ ཨནོཏཏྟདཧཏོ ནིཀྑམནནདིཡཱ གངྒཱཡམུནཱདིཝསེན བྷིཛྫནྟཱིཏི. ཏཏྠ ཛམྦུདཱིཔེ གཎཱནཾ བྷིཛྫམཱནཏཾ ཨུཔརིཡེཝ ཝཀྑཱམ.

སཱིཧལ༹དཱིཔེ པན གཎཱནཾ བྷིཛྫམཱནཏཱ ཨེཝཾ དཊྛབྦཱ. ཀཐཾ. སཱིཧལ༹དཱིཔེ ཧི སཱསནསྶ པཏིཊྛམཱནཀཱལཏོ ཨཊྛཱརསཱདྷི ཀདྭིཝསྶསཏེ སམྤཏྟེ ཝཊྚགཱམཎིརཉྙཱ ཀཱརཱཝིཏེ ཨབྷཡགིརིཝིཧཱརེ པརིཝཱརཁནྡྷཀཾ པཱཋཏོ ཙ ཨཏྠཏོ ཙ ཝིཔལླཱསཾ ཀཏྭཱ མཧཱཝིཧཱརཝཱསིགཎཏོ པུཐུ ཧུཏྭཱ ཨེཀོ གཎོ བྷིཛྫི, སོ ཨབྷཡགིརིཝཱསིགཎོ ནཱམ, དྷམྨརུཙིགཎོཏི ཙ ཏསྶེཝ ནཱམཾ.

ཨབྷཡགིརིཝཱསིགཎསྶ བྷིཛྫམཱནཏོ དྭེཙཏྟཱལཱིསཱདྷིཀཏིཝསྶསཏེ སམྤཏྟེ མཧཱསེནེན ནཱམ རཉྙཱ ཀཱརཱཔིཏེ ཛེཏཝནཝིཧཱརེ བྷིཀྑཱུ ཨུབྷཏོཝིསངྒཔཱཋེ ཝིཔརཱིཏཝསེན ཨབྷིསངྑརིཏྭཱ ཨབྷཡགིརིཝཱསིགཎཏོ ཝིསུཾ ཨེཀོ གཎོ ཨཧོསི, སོ ཛེཏཝནཝཱསིགཎོ ནཱམ, སཱགལིཡགཎོཏི ཙ ཏསྶེཝ ནཱམཾ.

ཛེཏཝན ཝཱསིགཎསྶ བྷིཛྫམཱནཀཱལཏོ ཨེཀཔཉྙཱསཝསྶཱདྷིཀཱནཾ ཏིཎྞཾ ཝསྶསཏཱནཾ ཨུཔརི ཀུརུནྡཝཱསིནོ ཙ ཀོལམྦཝཱསིནོ ཙ བྷིཀྑཱུ བྷཱགིནེཡྻཾ དཱཋཱཔཏིཾ ནཱམ རཱཛཱནཾ ནིསྶཱཡ ཨུབྷཏོཝིབྷངྒཔརིཝཱརཁནྡྷཀཔཱཋེ ཝིཔརཱིཏཝསེན ཨབྷིསངྑརིཏྭཱ ཝུཏྟེཧི དྭཱིཧི གཎེཧི ཝིསུཾ ཧུཏྭཱ མཧཱཝིཧཱར ཝཱསིགཎྷཏྟམཾ ཏུལཡིཏྭཱ ཨུཔདྷཱརེཏྭཱ མཧཱཝིཧཱརནཱམཾ གཧེཏྭཱ ཨེཀོ གཎོ བྷིཛྫི. ཨེཝཾ སཱིཧལ༹དཱིཔེ མཧཱམཧིནྡཏྠེརཱདཱིནཾ ཝཾསབྷཱུཏེན མཧཱཝིཧཱརཝཱསི གཎེན སདྡྷིཾ ཙཏྟཱརོ གཎཱ བྷིཛྫིཾསུ.

ཏཏྠ མཧཱཝིཧཱརཝཱསི གཎོཡེཝ ཨེཀོ དྷམྨཝཱདཱི ཨཧོསི, སེསཱ པན ཨདྷམྨཝཱདིནོ. ཏེ ཙ ཏཡོ ཨདྷམྨཝཱདིནོ གཎཱ བྷཱུཏཏྠཾ པཧཱཡ ཨབྷཱུཏཏྠེན དྷམྨཾ ཨགརུཾ ཀཏྭཱ ཙརིཾསཱུཏི ¶ ཝཙནཏོ སཱིཧལ༹དཱིཔེ ཨདྷམྨཝཱདིནོ ཏཡོཔི ཨལཛྫིནོ གཎཱ པརིམཎྜལསུཔྤཊིཙྪནྣཱདིསིཀྑཱཔདཱནི ཨནཱདིཡིཏྭཱ ཝིཙརིཾསུ. ཏཏོ པཊྛཱཡ སཱསནེ ཨེཀཙྩཱནཾ བྷིཀྑཱུནཾ ནཱནཔྤཀཱརཝསེན ནིཝཱསནཔཱརུཔནཱདཱིནི དིསྶནྟིཏི ཝེདིཏབྦཾ.

ཨདྷམྨཝཱདིགཎཱནཾ བྷིཛྫམཱནཀཱལཏོ སཏྟཝཱིསཱདྷིཀཱནཾ པཉྩསཏཱནཾ ཝསྶཱནཉྩ ཨུཔརི སིརིསངྒྷབོདྷི ནཱམ རཱཛཱ མཧཱཝིཧཱར གཎསྶ པཀྑོ ཧུཏྭཱ ཨདྷམྨཝཱདིནཱ ཏཡོ གཎེ ནིགྒཧིཏྭཱ ཛིནསཱསནཾ པགྒཧེསི. སོ ཙ སིརིསངྒྷ བོདྷིརཱཛཱ ཨམྷཱཀཾ མརམྨརཊྛེ ཨརིམནྡནནགརེ ཨནུརུདྡྷེན ནཱམ རཉྙཱ སམཀཱལཝསེན རཛྫསམྤཏྟིཾ ཨནུབྷཝི.

ཏཏོ པཙྪཱ སཱིཧལ༹དཱིཔེ ཝོཧཱརཀཏིསྶསྶ ནཱམ རཉྙོ ཀཱལེ ཀཔིལེན ནཱམ ཨམཙྩེན སདྡྷིཾ མནྟེཏྭཱ མཧཱཝིཧཱར ཝཱསིནོ བྷིཀྑཱུ ནིསྶཱཡ ཨདྷམྨཝཱདིགཎེ ནིགྒཎྷིཏྭཱ ཛིནསཱསནཾ པགྒཎྷཱཏི.

ཏཏོ པཙྪཱ ཙ གོཊྛཱབྷཡསྶ ནཱམ རཉྙོ ཀཱལེ ཨབྷཡགིརི ཝཱསིནོ བྷིཀྑཱུ པརསམུདྡཾ པབྦཱཛེཏྭཱ མཧཱཝིཧཱར ཝཱསིནོ བྷིཀྑཱུ ནིསྶཱཡ སཱསནཾ ཝིསོདྷཡི.

ཏཏོ པཙྪཱཔི གོཊྛཱབྷཡརཉྙོ པུཏྟབྷཱུཏསྶ མཧཱསེནསྶ ནཱམ རཉྙོ ཀཱལེ ཨབྷཡགིརིཝཱསཱིནཾ བྷིཀྑཱུནཾ ཨབྦྷནྟརེ སངྒྷམིཏྟོ ནཱམ ཨེཀོ བྷིཀྑུ རཉྙོ པདྷཱནཱཙརིཡོ ཧུཏྭཱ མཧཱམཧིནྡཏྠེརཱདཱིནཾ ཨརཧནྟཱནཾ ནིཝཱསཊྛཱནབྷཱུཏཾ མཧཱཝིཧཱརཱརཱམཾ ཝིནསྶིཏུཾ མཧཱསེནརཉྙཱ མནྟེཏྭཱ ཨཱརབྷི. ཏདཱ ནཝཝསྶཱནི མཧཱཝིཧཱརེ བྷིཀྑུ སཉྙོ ཨཧོསི. ཨཧོཝཏ མཧཱཐེརཱནཾ མཧིདྡྷིཀཱནཾ ནིཝཱསཊྛཱནཾ ཨལཛྫིནོ བྷིཀྑཱུ ཝིནསྶཱཔེསུཾ, སུཝཎྞཧཾསྶཱནཾ ནིཝཱསཊྛཱནཾ ཀཱཀཱ ཝིཡཱཏི.

ཛེཏཝནཝཱསཱིནཉྩ བྷིཀྑཱུནཾ ཨབྦྷནྟརེ ཨེཀོ ཏིསྶོ ནཱམ བྷིཀྑུ ཏེནེཝ རཉྙཱ མནྟེཏྭཱ མཧཱཝིཧཱརེ སཱིམཾ སམཱུཧནི ¶ . ཨཚེཀཏྟཱ པན ཏེསཾ སཱིམསམཱུཧནཀམྨཾ ན སམྤཛྫཱིཏི. ཨཧོཝཏ དུསྶཱིལཱནཾ པཱཔཀཱནཾ ཀམྨཾ ཨཙྪརིཡཾ, སེཡྻཐཱཔི ནཱམ སཱཁམིགོ ཨགྒགྒྷོ ཀཱསིཝཏྠཾ མཧགྒྷཾ བྷིནྣཏི, ཨེཝམེཝ བྷིནྡིཏབྦཝཏྠུནཱ བྷེདཀཔུགྒལོ ཨཏིཝིཡ དཱུརོ ཨཧོསཱིཏི. བྷཝནྟི ཙེཏྠ, –

ཡཐཱ སཱཁམིགོ པཱཔོ, ཨཔྤགྒྷོཡེཝ ཀཱསིཀཾ;

མཧགྒྷཾ ཀཙྩ བྷིནྣཾབྷིནྣཾ, མཧུསྶཱཧེན ཚིནྡཏི.

ཨེཝཾ ཨདྷམྨཝཱདཱི པཱཔོ, དྷམྨཝཱདིགཎཾ སུབྷཾ;

མཧུསྶཱཧེན བྷིནྡཡི, ཨཧོ ཨཙྪརིཡོ ཨཡཾ.

ཨཱརཀཱ དཱུརཏོ ཨཱསུཾ, བྷིནྡིཏབྦེཧི བྷེདཀཱ;

བྷཱུམིཏོཝ བྷཝགྒནྟོ, ཨཧོ ཀམྨཾ ཨཛཱནཏནྟི.

ཨིཙྩེཝཾ ཨདྷམྨཝཱདིགཎཱནཾ བལཝཏཱཡ དྷམྨཝཱདིགཎོ པརིཧཱཡཏི. ཡཐཱ ཧི གིཛ྄ཛྷསཀུཎསྶ པཀྑཝཱཏེན སུཝཎྞཧཾསཱ པཀཏིཡཱ ཋཱཏུཾ ན སཀྐོནྟི, ཨེཝམེཝ ཨདྷམྨཝཱདཱིནཾ བལཝཏཱཡ དྷམྨཝཱདཱི པརིཧཱཡཏི. བྱགྒྷཝནེ ཝིཡ སུཝཎྞམིགོ ནིལླཡིཏྭཱ གོཙརཾ གཎྷཱཏི, ཡཐཱརུཙིཝསེན དྷམྨཾ ཙརིཏུཾ ཨོཀཱསཾ ན ལབྷི.

སཱིཧལ༹དཱིཔེ སཱསནསྶ པཏིཊྛཱནཏོ དྭིསཏྟཏཱདྷིཀཱནཾ ཙཏུསཏཱནཾ ཝསྶསཧསྶཱནཉྩ ཨུཔརི སམྨཱསམྦུདྡྷསྶ པརིནིབྦཱནཏོ ཨཊྛསཏྟསཏཱདྷིཀཱནཾ ཝསྶསཧསྶཱནཾ ཨུཔརི མཧཱརཱཛཱ ནཱམ བྷཱུཔཱལོ རཛྫཾ ཀཱརེསི. སོ པན རཱཛཱ ཉདུམྦརགིརིཝཱསིཀསྶཔཏྠེརགྒམུཁཱ མཧཱཝིཧཱརཝཱསིནོ བྷིཀྑཱུ ཏམེཝ རཱཛཱནཾ ནིསྶཱཡ སཱསནེ མལཾ ཝིསོདྷེསུཾ, ཡཐཱ ཧེརཉྙིཀོ ཧིརཉྙེ མལནྟི.

མཧཱཝིཧཱརཝཱསིགཎཏོ ཨཉྙེ ཨདྷམྨཝཱདིནཱ ཨུཔྤབྦཱ ཛེཏྭཱ ¶ ཝིསོདྷེསུཾ. སོ ཙ མཧཱརཱཛཱ ཨམྷཱཀཾ མརམྨརཊྛེ ཨརིམདྡནནགརེ ནརཔཏིཙཉྙིསཱུནཱ ནཱམ རཉྙཱ སམཀཱལ ཝསེན རཛྫཾ ཀཱརེསཱིཏི ཝེདིཏབྦོ.

ཏཏོ པཙྪཱ ཝི ཝིཛཡབཱཧུརཱཛཱནཾ པརཀྐམབཱཧུརཱཛཱནཉྩ ནིསྶཱཡ མཧཱཝིཧཱར ཝཱསིནོ བྷིཀྑཱུ སཱསནཾ པརིསུདྡྷཾ ཨཀཾསུ, ཨདྷམྨཝཱདིནོ སབྦེཔི ཨུཔྤབྦཱཛེཏྭཱ མཧཱཝིཧཱརཝཱསིགཎོཡེཝ ཨེཀོ པཏིཊྛཧི, ཡཐཱ ཨབྦྷཱདིཨུཔཀྐིལེསམལེཧི ཝིམུཏྟོ ནིསཱནཱཐོཏི.

སིརིསངྒྷབོདྷིརཱཛཱ ཝོཧཱརིཀཏིསྶརཱཛཱ གོཊྛཱབྷཡརཱཛཱཏི ཨེཏེ རཱཛཱནོ སཱསནཾ ཝིསོདྷེནྟོཔི སབྦེན སབྦཾ ཨདྷམྨཝཱདིགཎཱནཾ ཨཝིནསྶནཏོ སཱསནཾ པརིསུདྡྷཾ ན ཏཱཝ ཨཧོསི. སིརིསངྒྷབོདྷིརཉྙོ མཧཱརཉྙོ ཝིཛཡབཱཧུརཉྙོ པརཀྐམབཱཧུརཉྙོཏི ཨེཏེསཾཡེཝ རཱཛཱུནཾ ཀཱལེ སབྦེན སབྦཾ ཨདྷམྨཝཱདཱིནཾ ཝིནསྶནཏོ སཱསནཾ པརིསུདྡྷཾ ཨཧོསི. ཏདཱ པན ཨདྷམྨཝཱདིནཱ སཱིསམྤི ཨུཊྛཧིཏུཾ ན སཀྐཱ, ཡཐཱ ཨརུཎུགྒེ ཀོསིཡཱཏི.

ཨཔརབྷཱགེ པན ཙིརཾ ཀཱལཾ ཨཏིཀྐནྟེ མིཙྪཱདིཊྛིཀཱནཾ ཝིཛཱཏིཡཱནཾ བྷཡེན ལངྐཱདཱིཔེ སཱསནཾ ཨོསཀྐིཏྭཱ གཎཔཱུརཎམཏྟསྶཔི བྷིཀྑུསངྒྷསྶ ཨཝིཛྫམཱནཏཱཡ མཧཱཝིཛཡབཱཧུརཉྙོ ཀཱལེ རཱམཉྙདེསཏོ སངྒྷཾ ཨཱནེཏྭཱ སཱསནཾ པཏིཊྛཱཔེསི.

ཏཏོ པཙྪཱ ཙ ཝིམལདྷམྨསཱུརིཡསྶ ནཱམ རཉྙོ ཀཱལེ རཀྑཱཔུརརཊྛཏོ སངྒྷཾ ཨཱནེཏྭཱ སཱསནཾ པཏིཊྛཱཔེསི. ཏཏོ པཙྪཱ ཙ ཝིམལསྶ ནཱམ རཉྙོ ཀཱལེ ཏཏོཡེཝ སངྒྷཾ ཨཱནེཏྭཱ སཱསནཾ པཏིཊྛཱཔེསི. ཏཏོ པཙྪཱ ཙ ཀིཏྟིསྶིརིརཱཛསཱིཧསྶ ནཱམ རཉྙོ ཀཱལེ སྱཱམརཊྛཏོ སངྒྷཾ ཨཱནེཏྭཱ ཏཐེཝ ཨཀཱསཱིཏི.

ཨཡཾ སཱིཧལ༹དཱིཔེ སཱསནསྶ ཨོསཀྐནཀཐཱ.

ཏཏོ ¶ པཙྪཱ ཛིནསཱསནེ ནཝུཏཱདྷིཀེ ཨཊྛཝསྶསཏེ སམྤཏྟེ བུདྡྷདཱསསྶ ནཱམ རཉྙོ ཀཱལེ ཨེཀོ དྷམྨ ཀཐིཀཏྠེརོ ཋཔེཏྭཱ ཝིནཡཔིཊཀཾ ཨབྷིདྷམྨཔིཊཀཉྩ ཨཝསེསཾ སུཏྟནྟཔིཊཀཾ སཱིཧལ༹བྷཱསཱཡ པརིཝཏྟིཏྭཱ ཨབྷིསངྑརིཏྭཱ ཋཔེསི. ཏཉྩ ཀཱརཎཾ ཙཱུལ༹ཝཾསེ ཝུཏྟཾ.

ཏསྶ ཀིར བུདྡྷདཱསསྶ རཉྙོ པུཏྟཱ ཨསཱིཏིམཏྟཱ ཨསཱིཏིམཧཱསཱཝཀཱནཾ ནཱམེནེཝ ཝོཧཱརིཏཱ ཨཧེསུཾ. ཏེསུ པུཏྟེསུ སཱརིཔུཏྟཏྠེརསྶ ནཱམེན ཝོཧཱརིཏོ ཨེཀོ ཨུཔཏིསྶོ ནཱམ རཱཛཀུམཱརོ པིཏརི དེཝངྒཏེ དྭེཙཏྟཱལཱིསཝསྶཱནི རཛྫཾ ཀརེསི.

ཏཏོ པཙྪཱ ཀནིཊྛོ མཧཱནཱམོ ནཱམ རཱཛཀུམཱརོ དྭཱཝཱིསཝསྶཱནི རཛྫཾ ཀཱརེསི. ཏསྶ རཉྙོ ཀཱལེ ཛིན ཙཀྐེ ཏེཏྟིཾསཱདྷིཀནཝསཏཝསྶེ སཱིཧལ༹དཱིཔེ ཚསཊྛིམཏྟཱནཾ རཱཛཱུནཾ པཱུརཎཀཱལེ བུདྡྷགྷོསོ ནཱམ ཐེརོ སཱིཧལ༹དཱིཔཾ གནྟྭཱ སཱིཧལ༹བྷཱསཱཡ ལིཁིཏེ ཨཊྛཀཐཱགནྠེ མཱགདྷབྷཱསཱཡ པརིཝཏྟིཏྭཱ ལིཁི.

སོ པན མཧཱནཱམ རཱཛཱ ཨམྷཱཀཾ མརམྨརཊྛེ སིརིཔཙྩཡནགརེ སཝིལཉྙིཀྲོཝི ནཱམཀེན རཉྙཱ སམཀཱལོ ཧུཏྭཱ རཛྫཾ ཀཱརེསི. པརིཏྟནིདྡཱནེ པན བྲཱུམཝི?ཐཱི? ནཱམཀེན རཉྙཱ སམཀཱལོ ཧུཏྭཱ རཛྫཾ ཀཱརེསཱིཏི ཝུཏྟཾ. ཏཾ ན ཡུཛྫཏིཡེཝ.

སཱིཧལ༹དཱིཔེ པན ཀིཏྟིསྶིརིམེགྷོ ནཱམ རཱཛཱ ཧུཏྭཱ ནཝམེ ཝསྶེ ཏསྨིཾཡེཝ དཱིཔེ རཱཛཱུནཾ དྭཱསཊྛིམཏྟཱནཾ པཱུརཎཀཱལེ ཛིནཙཀྐེ ཏིཾསཱདྷིཀེ ཨཊྛསཏཝསྶེ ཛམྦུདཱིཔེ ཀལིངྒཔུརཏོ ཀུཧསིཝསྶ ནཱམ རཉྙོ ཛཱམཱཏཱ དནྟཀུམཱརོ ཧེམམཱལཾ ནཱམ རཱཛདྷཱིཏཾ གཧེཏྭཱ དཱཋཱདྷཱཏུཾ ཐེནེཏྭཱ ནཝཱཡ ཏརིཏྭཱ སཱིཧལ༹དཱིཔཾ ཨགམཱསི. ཛིནཙཀྐེ ཏིཾསཱདྷིཀཨཊྛཝསྶསཏེ ཛེཊྛཏིསྶརཱཛཱ ནཝཝསྶཱནི རཛྫཾ ཀཱརེསི.

བུདྡྷདཱསརཱཛཱ ¶ ཨེཀཱུནཏིཾསཏི ཝསྶཱནི ཨུཔལིསྶརཱཛཱ ཙདྭིཙཏྟཱལཱིསཝསྶཱནི མཧཱནཱམརཱཛཱ དྭཱཝཱིསཝསྶཱནཱིཏི སབྦཱནི སམྤིཎྜིཏྭཱ ཛིནསཱསནཾ དྭཏྟིཾསཱདྷིཀནཝཝསྶསཏཔྤམཱཎཾ ཧོཏི.

ཏསྨིཉྩ ཀཱལེ ཡདཱ དྭཱིཧི ཝསྶེཧི ཨཱུནཾ ཨཧོསི, ཏདཱ མཧཱནཱམརཉྙོ ཀཱལེ ཏིཾསཱདྷིཀནཝཝསྶསཏམཏྟེ སཱསནེ བུདྡྷགྷོསོ ནཱམ ཐེརོ ལངྐཱདཱིཔཾ ཨགམཱསི.

ཨམརཔུརམཱཔཀསྶ རཉྙོ ཀཱལེ སཱིཧལ༹དཱིཔིཀེཧི བྷིཀྑཱུཧི པེསིཏསནྣེསཔཎྞེ པན ཚཔཎྞཱསཱདྷིཀནཝཝསྶསཏཱཏིཀྐནྟེ སཱུཏི ཝུཏྟཾ.

ཨེཏྠ ཋཏྭཱ བུདྡྷགྷོསཏྠེརསྶ ཨཊྛུཔྤཏྟིཾསངྑེཔམཏྟཾ ཝཀྑཱམ. ཀཐཾ. སཱིཧལ༹བྷཱསཀྑརེཧི པརིཝཏྟིཏཾ པརིཡཏྟིསཱསནཾ མཱགདྷསཱསཀྑརེན ཀོ ནཱམ པུགྒལོ པརིཝཏྟིཏུཾ སཀྑིསྶཏཱིཏི མཧཱཐེརཱ ནིམནྟཡིཏྭཱ ཏཱཝཏིཾསབྷཝནཾ གནྟྭཱ གྷོསཾ དེཝཔུཏྟཾ དིསྭཱ སདྡྷིཾ སཀྐེན དེཝཱནམིནྡེན ཏཾ ཡཱཙིཏྭཱ བོདྷིརུཀྑསམཱིཔེ གྷོསགཱམེ ཀེསསྶ ནཱམ བྲཱཧྨཎསྶ ཀེསིཡཱ ནཱམ བྲཱཧྨཎིཡཱ ཀུཙྪིམྷི པཊིསནྡྷིཾ གཎྷཱཔེསུཾ. ཁཱདཐ བྷོནྟོ པིཝཐ བྷོནྟོཏིཨཱདིནཱ བྲཱཧྨཎཱནཾ ཨཉྙམཉྙཾ གྷོསཀཱལེ ཝིཛཱཡནཏྟཱ གྷོསོཏི ནཱམཾ ཨཀཱསི. སཏྟཝསྶིཀཀཱལེ སོ ཏིཎྞཾ ཝེདཱནཾ པཱརགཱུ ཨཧོསི.

ཨཐ ཁོ ཨེཀེན ཨརཧནྟེན སདྡྷིཾ ཝེདཀཐཾ སལླཔནྟོ ཏཾ ཀཐཾ ནིཊྛཱཔེཏྭཱ ཀུསལཱ དྷམྨཱ ཨཀུསལཱ དྷམྨཱ ཨབྱཱཀཏཱ དྷམྨཱཏིཨཱདིནཱ པརམཏྠཝེདཾ ནཱམ བུདྡྷམནྟཾ པུཙྪི. ཏདཱ སོ སུཏྭཱ ཨུགྒཎྷིཏུཀཱམོ ཧུཏྭཱ ཏསྶ ཨརཧནྟསྶ སནྟིཀེ པབྦཛིཏྭཱ དེཝསིཀཾ དེཝསིཀཾ པིཊཀཏྟཡཾ སཊྛིམཏྟེཧི པདསཧསྶེཧི སཛ྄ཛྷཱཡཾ ཨཀཱསི, ཝཱཙུགྒཏཾ ཨཀཱསི. ཨེཀམཱསེནེཝ ཏིཎྞཾ པིཊཀཱནཾ པཱརགཱུ ཨཧོསི.

ཏཏོ ¶ པཙྩཱ རཧོ ཨེཀཀོཝ ནིསིནྣསྶ ཨེཏདཧོསི,– བུདྡྷབྷཱསིཏེ པིཊཀཏྟཡེ མམ ཝཱ པཉྙཱ ཨདྷིཀཱ, ཨུདཱཧུ ཨུཔཛ྄ཛྷཱཡསྶ ཝཱཏི. ཏཾ ཀཱརཎཾ ཉཏྭཱ ཨུཔཛ྄ཛྷཱཙརིཡོ ནིགྒཧཾ ཀཏྭཱ ཨོཝདི. སོ སཾཝེགཔྤཏྟོ ཧུཏྭཱ ཁམཱཔེཏུཾ ཝནྡི. ཨུཔཛ྄ཛྷཱཙརིཡོ ཏྭཾ ཨཱཝུསོ སཱིཧལ༹དཱིཔཾ གནྟྭཱ པིཊཀཏྟཡཾ སཱིཧལ༹སྶཱསཀྑརེན ལིཁིཏཾ མཱགདྷབྷཱསཀྑརེན ལིཁཱཧི, ཨེཝཾ སཏི ཨཧཾ ཁམིསྶཱམཱིཏི ཨཱཧ.

བུདྡྷགྷོསོ ཙ པིཏརཾ མིཙྪཱདིཊྛིབྷཱཝཏོ མོཙེཏྭཱ ཨཱཙརིཡསྶ ཝཙནཾ སིརསཱ པཊིགྒཧེཏྭཱ པིཊཀཏྟཡཾ ལིཁིཏུཾ སཱིཧལ༹དཱིཔཾ ནཱཝཱཡ ཨགམཱསི. ཏདཱ སམུདྡམཛ྄ཛྷེ ཏཱིཧི དིཝསེཧི ཏརནྟེ བུདྡྷདཏྟཏྠེརོ ཙ སཱིཧལ༹དཱིཔཏོ ནཱཝཱཡ ཨཱགཙྪནྟོ ཨནྟརཱམགྒེ དེཝཱན ཨཱནུབྷཱཝེན ཨཉྙམཉྙཾ པསྶིཏྭཱ ཀཱརཎཾ པུཙྪིཏྭཱ ཛཱནི. ཛཱནིཏྭཱ ཙ བུདྡྷདཏྟཏྠེརོ ཨེཝམཱཧ,- མཡཱ ཨཱཝུསོ ཀཏོ ཛིནཱལངྐཱརོ ཨཔྤསྶཱརོཏི མཉྙིཏྭཱ པིཊཀཏྟཡཾ པརིཝཏྟིཏུཾ ལིཁིཏུཾ ཨོཀཱསཾ ནཱདཱསུཾ, ཏྭཾ པན པིཊཀཏྟཡཾ སཾཝཎྞེཧཱིཏི ཝཏྭཱ ཨཏྟནོ སཀྐེན དེཝཱནམིནྡེན དིནྣཾ ཧརིཏཀིཕལཾ ཨཡོམཡལེཁན དཎྜཾ ནིསིཏསིལཉྩ བུདྡྷགྷོསཏྠེརསྶ ཨདཱསི. ཨེཝཾ ཏེསཾ དྭིནྣཾ ཐེརཱནཾ ཨཉྙམཉྙཾ སལླཔནྟཱནཾཡེཝ ནཱཝཱ སཡམེཝ ཨཔནེཏྭཱ གཙྪིཾསུ.

བུདྡྷགྷོསཏྠེརོ ཙ སཱིཧལ༹དཱིཔཾ པཏྭཱ པཋམཾ སངྒྷཔཱལཏྠེརཾ པསྶིཏྭཱ པིཊཀཏྟཡཾ མཱགདྷབྷཱསཀྑརེན པརིཝཏྟེཏུཾ ཨཱགཏོམྷཱིཏི ཀཱརཎཾ ཨཱརོཙེཏྭཱ སཱིཧལ༹བྷིཀྑཱུ ཙ སཱིལེ པཏིཊྛཱཡཱཏིཨཱདིགཱཐཾ ནིཡྻཱདེཏྭཱ ཨིམིསྶཱ གཱཐཱཡ ཨཏྠཾ པིཊཀཏྟཡཾ ཨཱལོལེཏྭཱ སཾཝཎྞེཧཱིཏི ཨུཡྻོཛེསུཾ, ཏསྨིཾཡེཝ དིཝསེ སཱཡནྷཀཱལཏོ པཊྛཱཡ ཡཐཱཝུཏྟགཱཐཾ པམུཁཾ ཀཏྭཱ ཝིསུདྡྷིམགྒཾ ཨཀཱསི. ཀཏྭཱ ཏཾ ཀམྨཾ ནིཔྥཱདེཏྭཱ ཏསྶ ཉཱཎཔྤབྷཝཾ ཝཱིམཾསེཏུཀཱམོ དེཝཱནམིནྡོ ཏཉྩ གནྠཾ ཨནྟརདྷཱཔེསི. པུནཱཔི ཐེརོ ཨཀཱསི ¶ . ཏཐེཝ དེཝཱནམིནྡོ ཨནྟརདྷཱཔེསི. པུནཱཔི ཐེརོ ཨཀཱསི. ཨེཝཾ ཏིཀྑཏྟུཾ ཀཱརཱཔེཏྭཱ པུབྦགནྠེཔི དསྶེསི. ཏིཎྞམྤི གནྠཱནཾ ཨཉྙམཉྙཾ ཨེཀཔདམཏྟེནཔི ཝིསེསཏཱ ནཏྠི སངྒྷཔཱལཏྠེརོ ཙ ཏཾ ཨཱརཱདྷཡིཏྭཱ པིཊཀཏྟཡཾ ནིཡྻཱདེསི. ཨེཝཾ ཝིསུདྡྷིམགྒེ སངྒྷཔཱལཏྠེརསྶ ཡཱཙནཾ ཨཱརབྦྷ ཝིསུདྡྷིམགྒོ ཀཏོཏི ཨཱགཏཾ. བུདྡྷགྷོསུཔྤཏྟིཀཐཱཡཾ པན སངྒྷརཱཛཏྠེརསྶ ཨཱཡཱཙནཾ ཨཱརབྦྷཱཏི ཨཱགཏཾ.

ཨཡཾ བུདྡྷགྷོསུཔྤཏྟིཀཐཱཡཾ ཨཱགཏནཡེན དསྶིཏབུདྡྷགྷོསུཔྤཏྟིཀཐཱསངྑེཔོ.

ཙཱུལ༹ཝཾསེ པནེཝཾ ཨཱགཏོ. བུདྡྷགྷོསཏྠེརོ ནཱམ མཧཱབོདྷིརུཀྑསམཱིཔེ ཨེཀསྨིཾ བྲཱཧྨཎགཱམེ ཝིཛཱཏོ ཏིཎྞམྤི ཝེདཱནཾ པཱརགཱུ ཨཧོསི ཏེསུ ཏེསུ ཝཱདེསུ ཙ ཨཏིཚེཀོ. སོ ཨཉྙེཧི ཙ སདྡྷིཾ པུཙྪཱབྱཱཀརཎཀམྨཾ ཀཏྟུཀཱམོ ཛམྦུནཱིཔཏལེ ཨཱཧིཎྜནྟོ ཨེཀཾ ཝིཧཱརཾ པཏྭཱ ཏསྨིཾ ཝཱ ཨཱགནྟུཀབྷཱཝེན ནིསཱིདི. ཏསྨིཉྩ ཝིཧཱརེ རེཝཏོ ནཱམ ཐེརོ ཝསི. ཏེན ཐེརེན སདྡྷིཾ བྷལླཔནྟོ སོ བྲཱཧྨཎམཱཎཝོ ཏཱིསུ ཝེདེསུ ཨལོལེཏྭཱ པཉྷཾ པུཙྪི. པུཙྪིཏཾ པུཙྪིཏཾ ཐེརོ བྱཱཀཱསི. ཐེརསྶ པན པུཙྪིཏཾ པཉྷཾ མཱཎཝོ ན སཀྐཱ བྱཱཀཱཏུཾ. ཨཐ མཱཎཝོ པུཙྪི,–ཀོ ནཱམཱཡཾ བྷནྟེ མནྟོཏི. བུདྡྷམནྟོ ནཱམཱཡནྟི ཝུཏྟེ ཨུགྒཎྷིཏུཀཱམོ ཧུཏྭཱ ཐེརསྶ སནྟིཀེ པབྦཛིཏྭཱ པིཊཀཏྟཡཾ ཨུགྒཎྷི. ཨཙིརནེཝ ཏིཎྞམྤི པིཊཀཱནཾ པཱརགཱུ ཨཧོསི. བུདྡྷསྶེཝ གྷོསོ ཡསྶ ཨཏྠཱིཏི བུདྡྷགྷོསོཏི ནཱམེན པཱཀཊོ ཨཧོསི.

བུདྡྷགྷོསོ ཙ ཨཱཡསྨཏོ རེཝཏསྶ སནྟིཀེ ནིསཱིདནྟོ ཉཱཎོདཡཾ ནཱམ གནྠཾ ཨཊྛསྶཱལིནིཉྩ ནཱམ གནྠཾ ཨཀཱསི. ཏཏོ པཙྪཱ པརིཏྟཊྛཀཐཾ ཀཏྟུཀཱམོ ཧུཏྭཱ ཨཱརབྷི. ཏདཱ ཨཱཙརིཡོ ཨེཝམཱཧ,– ཛམྦུདཱིཔེ པན ཨཱཝུསོ པཱལི༹མཏྟཾཡེཝ ཨཏྠི, ཨཊྛཀཐཱ པན ནཏྠི, ཨཱཙརིཡཝཱདོ ཙ ¶ བྷིནྣོ ཧུཏྭཱ ཨཏྠི, ཏེནེཝ མཧཱམཧིནྡྷཏྠེརེན ཨཱནིཏཱ ཨཊྛཀཐཱ ཏཱིསུ ཙ སངྒཱིཏཱིསུ ཨཱརུལོ༹ པཱལི༹ཡོ སཱརིཔུཏྟཏྠེརཱདཱིཧི དེསིཏོ ཀཐཱམགྒོ སཱིཧལ༹དཱིཔེ ཨཏྠི, ཏྭཾ གནྟྭཱ མཱགདྷབྷཱསཀྑརེན ལིཁེཧཱིཏི ཨུཡྻོཛིཡམཱནོ བུདྡྷགྷོསཏྠེརོ སཱིཧལ༹དཱིཔཾ གནྟྭཱ ཨནུརཱདྷཔུརེ མཧཱཝིཧཱརཾ པཝིསིཏྭཱ སངྒྷཔཱལཏྠེརསྶ སནྟིཀེ སདྡྷིཾ སཱིཧལ༹ཊྛཀཐཱཡ ཐེརཝཱདེ སུཏྭཱ ཨཊྛཀཐཾ ཀརིསྶམཱིཏི ཨཱརོཙེསི. སཱིཧལ༹བྷིཀྑཱུ ཙ པུབྦེ ཝུཏྟནཡེནེཝ སཱིལེ པཏིཊྛཱཡཱཏིཨཱདི གཱཐཱ ནིཡྻཱདེསུཾ. བུདྡྷགྷོསོ ཙ སདྡྷིཾ ཨཊྛཀཐཱཡ པིཊཀཏྟཡཾ སངྑིཔིཏྭཱ ཝིསུདྡྷིམགྒཾ ཨཀཱསི.

པུབྦེ ཝུཏྟནཡེནེཝ སཀྐོ ཨནྟརདྷཱཔེཏྭཱ ཏིཀྑཏྟུཾ ཀཱརཱཔེསི. སངྒྷཔཱལཏྠེརོཔི ཨརཱདྷཡིཏྭཱ པིཊཀཏྟཡཾ ནིཡྻཱདེསཱིཏི.

ཀིཉྩཱཔི ནཱནཱ གནྠེསུ ནཱནཱཀཱརེཧི བུདྡྷགྷོསུཔྤཏྟི ཨཱགཏཱ, ཏཐཱཔི བུདྡྷགྷོསཏྠེརསྶ སཱིཧལ༹དཱིཔཾ གནྟྭཱ པིཊཀཏྟཡསྶ ལིཁནཾ ཨཊྛཀཐཱནཉྩ ཀརཎམེཝ པམཱཎནྟི མནོཀིལིཊྛཾ ན ཨུཔྤཱདེཏབྦནྟི. བུདྡྷགྷོསཏྠེརོ ཝིཀཊཏྟཡཾ ལིཁིཏྭཱ ཛམྦུདཱིཔཾ པཙྩཱགམཱསི.

ཨིཙྩེཝཾ པཱལི༹བྷཱསཱཡ པརིཡཏྟིཾ པརིཝཏྟིཏྭཱ པཙྪཱ ཨཱཙརིཡཔརམྤརསིསྶཱནུསིསྶཝསེན སཱིཧལ༹དཱིཔེ ཛིནཙཀྐཾ མཛ྄ཛྷནྟི ཀཾསུམཱསཱི ཝིཡ ཨཏིདིབྦཏི, ཨནེཀཀོཊིཔྤམཱཎེཧི སོཏཱཔནྣསཀདཱགཱམིཨནཱགཱམིཨརཧནྟེཧི ལངྐཱདཱིཔཾ ཨཏིསོབྷཏི, སབྦཔཱལིཕུལླེན ཏིཡོཛནིཀཔཱརིཙྪཏྟཀརུཀྑེན ཏཱཝཏིཾསབྷཝནཾ ཝིཡ སཏཔཏྟཔདུམཱདཱིཧི མཧཱཔོཀྑརཎཱི ཝིཡ ཏེསུ ཏེསུ ཋཱནེསུ མགྒམཧཱམགྒཨཱཔཀགྷརདྭཱརཏིཏྠཝནཔབྦཏགུཧམནྡིརཝིཧཱརསཱལཱདཱིསུ ཨལདྡྷམགྒཕལཊྛཱནཾ ནཱམ ཀིཉྩི ནཏྠི, ཐོཀཾ ཨཱགམེཏྭཱ པིཎྜཱཡ པཏིཊྛམཱནཔདེསེཔི མགྒཕལཱནི ལབྷིཾསུཡེཝ.

མགྒཕལཱནི སཙྪིཀརོནྟཱནཾ པུགྒལཱནཾ བཱཧུལླཏཱཡ ཨཡཾ ¶ པུཐུཛྫནོ ཨཡཾ པུཐུཛྫནོཏི ཨངྒུལིཾ པསཱརེཏྭཱ དསྶེཏབྦོ ཧོཏི. ཨེཀསྨིཾ ཀཱལེ སཱིཧལ༹དཱིཔེ པུཐུཛྫན བྷིཀྑུ ནཱམ ནཏྠི. ཏཐཱ ཧི ཝུཏྟཾ ཝིབྷངྒཊྛཀཐཱཡཾ, ཨེཀཝཱརཾ པུཐུཛྫནབྷིཀྑུ ནཱམ ནཏྠཱིཏི.

ཨབྷིཉྙཱལཱབྷཱིནཾ ཀིར མཧིདྡྷིཀཱནཾ གམནཱགམནཝསེན སཱུརིཡོསྶཱསཾ ཨལབྷིཏྭཱ དྷཉྙཀོཊྚཀཱ མཱཏུགཱམཱ དྷཉྙཀོཊྚིཏུཾ ཨོཀཱསཾ ན ལབྷིཾསུ.

དེཝལོཀཏོ སུམནསཱམཎེརོ དཀྑིཎཀྑཀཾ སཱིཧལ༹དཱིཔཾ ཨནེཏྭཱ ཏསྶ པཱཊིཧཱརིཡཾ དསྶནཝསེན ཨུདྡྷཀབིནྡྷཱུཧི ཏིཡོཛནསཏཾ སཀལམྤི ལངྐཱདཱིཔཾ བྱཱཔཏྭཱ བྷགཝཏཱ པརིབྷུཏྟཙེཏིཡངྒཎཾ ཝིཡ ཧུཏྭཱ ནཝཱཡ གཙྪནྟཱ མཧཱསམུདྡེ ཨུདཀཏོ ནཱལི༹ཀེརམཏྟམྤི དིསྭཱ སཀལངྐཱདཱིཔཾ པཱུཛེནྟི, མཧཱམཧིནྡཏྠེརསྶ སནྟིཀེ ཨརིཊྛཏྠེརེན སདྡྷིཾ པཉྩམཏྟཱ བྷིཀྑུསཏཱ པཋམཾ ཏཱཝ ཝིནཡཔིཊཀཾ ཨུགྒཎྷིཾསཱུཏི ཨིམེཧི ཀཱརཎེཧི ལངྐཱདཱིཔཾ ཛིནཙཀྐསྶ པཏིཊྛཱནཾ ཧུཏྭཱ ཝརདཱིཔནྟི ནཱམཾ པཊིལབྷི.

སཱིཧལ༹དཱིཔེཡེཝ པིཊཀཏྟཡཾ པོཏྠཀཱརུལ༹ཝསེན པཏིཊྛཱཔེཏྭཱ ཏཏོ པཙྪཱ ཙོརནཱགསྶ ནཱམ རཉྙོ ཀཱལེ སཀལལངྐཱདཱིཔཾ དུབྦྷིཀྑབྷཡེན པཱིལེ༹ཏྭཱ པིཊཀཏྟཡཾ དྷཱརེནྟཱ བྷིཀྑཱུ ཛམྦུདཱིཔཾ ཨཱགམཾསུ. ཨནཱགནྟྭཱ ཏཏྠེཝ ཋིཏཱཔི བྷིཀྑཱུ ཚཱཏཀབྷཡེན པཱིལེ༹ཏྭཱ ཨུདརཔཊལཾ བནྡྷིཏྭཱ ཀུཙྪིཾ ཝཱལུཀརཱསིམྷི ཋཔེཏྭཱ པིཊཀཏྟཡཾ དྷཱརེསུཾ.

ཀུཊ ཀཎྞཏིསྶསྶ རཉྙོ ཀཱལེཡེཝ དུབྦྷིཀྑབྷཡཾ ཝཱུཔསམིཏྭཱ ཛམྦུདཱིཔཏོ བྷིཀྑཱུ པུན གནྟྭཱ སཱིཧལ༹དཱིཔེ ཋིཏེཧི བྷིཀྑཱུཧི སདྡྷིཾ མཧཱཝིཧཱརེ པིཊཀཏྟཡཾ ཨཝིརོདྷཱཔེཏྭཱ སམསམཾ ཀཏྭཱ ཋཔེསུཾ. ཋཔེཏྭཱ ཙ པན སཱིཧལ༹དཱིཔེཡེཝ སུཊྛུ དྷཱརེསུཾ.

ཏཏྠེཝ ཨཊྛཀཐཱཡོ བུདྡྷགྷོསཏྠེརོ མཱགདྷབྷཱསཱཡ པརིཝཏྟེཏྭཱ ཝིརཙི. པཙྪཱ ཙ ཡེབྷུཡྻེན ཏཏྠེཝ ཨཊྛཀཐཱཊཱིཀཱཨནུམདྷུལཀྑཎགཎྛིགནྠནྟརཱནི ¶ ཨཀཾསུ. པུན སཱསནཾ ནབྷེ རཝིནྡུཝ པཱཀཊནྟི.

ཏཏྠ བུདྡྷཝཾསཊྛཀཐཾ བུདྡྷདཏྟཏྠེརེ ཨཀཱསི. ཨིཏིཝུཏྟོདཱནཙརིཡཱཔིཊཀཐེརཱཐེརཱིཝིམཱནཝཏྠུཔེཏཝཏྠུནེཏྟིཨཊྛཀཐཱཡོ ཨཱཙརིཡདྷམྨཔཱལཏྠེརོ ཨཀཱསི. སོ ཙ ཨཱཙརིཡདྷམྨཔཱལཏྠེརོ སཱིཧལ༹དཱིཔསྶ སམཱིཔེ དམིལརཊྛེ བདརཏིཏྠམྷི ནིཝཱསིཏཏྟཱ སཱིཧལ༹དཱིཔེཡེཝ སངྒཧེཏྭཱ ཝཏྟབྦོ.

པཊིསམྦྷིདཱམགྒཊྛཀཐཾ མཧཱནཱམོ ནཱམ ཐེརོ ཨཱཀཱསི. མཧཱནིདྡེསཊྛཀཐཾ ཨུཔསེནོ ནཱམ ཐེརོ ཨཀཱསི. ཨབྷིདྷམྨཊཱིཀཾ པན ཨཱནནྡཏྠེརོ ཨཀཱསི. སཱ ཙ སབྦཱསཾ ཊཱིཀཱནཾ ཨཱདིབྷཱུཏཏྟཱ མཱུལཊཱིཀཱཏི པཱཀཊཱ.

ཝིསུདྡྷིམགྒསྶ མཧཱཊཱིཀཾ དཱིགྷནིཀཱཡཊྛཀཐཱཡ ཊཱིཀཾ མཛ྄ཛྷིམནིཀཱཡཊྛཀཐཱཡ ཊཱིཀཾ སཾཡུཏྟནིཀཱཡཊྛཀཐཱཡ ཊཱིཀཉྷཱཏི ཨིམཱཡོ ཨཱཙརིཡདྷམྨཔཱལཏྠེརོ ཨཀཱསི.

སཱརཏྠདཱིཔནིཾ ནཱམ ཝིནཡཊཱིཀཾ ཨངྒུཏྟརནིཀཱཡཊཱིཀཉྩ པརཀྐམབཱཧུརཉྙཱ ཡཱཙིཏོ སཱརིཔུཏྟཏྠེརོ ཨཀཱསི. ཝིམཏིཝིནོདནིཾ ནཱམ ཝིནཡཊཱིཀཾ དམིལརཊྛཝཱསིཀསྶཔཏྠེརོ ཨཀཱསི.

ཨནུཊཱིཀཾ པན ཨཱཙརིཡདྷམྨཔཱལཏྠེརོ. སཱ ཙ མཱུལཊཱིཀཱཡ ཨནུཏྟཱནཏྠཱནི ཨུཏྟཱནཱནི སཾཝཎྞིཏཏྟཱ ཨནུཊཱིཀཱ ཏིཝུཙྩཏི.

ཝིསུདྡྷིམགྒསྶ ཙཱུལ༹ཊཱིཀཾ མཁུདཱིཔནིཉྩ ཨཉྙེཏརཱ ཐེརཱ ཨཀཾསུ. སཱ ཙ མཱུལཊཱིཀཱཡ ཨཏྠཱཝསེསཱཏི ཙ ཨནུཏྟཱནཏྠཱཏི ཙ ཀཏྭཱ མཱུལཊཱིཀཱཡ སདྡྷིཾ སཾསནྡིཏྭཱ ཀཏཏྟཱ མདྷུར སཏྟཱ ཙ མདྷུདཱིཔནིནྟི ཝུཙྩཏི. མོཧཝིཙྪེདནིཾ པན ལཀྑཎགནྠཾ ཀསྶཔཏྠེརོ ཨཀཱསི.

ཨཱབྷིདྷམྨཱཝཏཱརཾ པན རུཔཱརཱུཔཝིབྷཱགཾ ཝིནཡཝིནིཙྪཡཉྩ བུདྡྷ དཏྟཏྠེརོ. ཝིནཡསངྒཧཾ སཱརིཔུཏྟཏྠེརོ. ཁུདྡསིཀྑཾ དྷམྨསིརིཏྠེརོ ¶ . པརམཏྠཝིནིཙྪཡཾ ནཱམརཱུཔཔརིཙྪེདཾ ཨབྷིདྷམྨཏྠསངྒཉྩ ཨནུརུདྡྷཏྠེརོ. སཙྩསངྑེཔཾ དྷམྨཔཱལཏྠེརོ. ཁེམཾ ཁེམཏྠེརོ. ཏེ ཙ སངྑེཔཏོ སཾཝཎྞིཏཏྟཱ སུཁེན ཙ ལཀྑཎིཡཏྟཱ ལཀྑཎགནྠཱཏི ཝུཙྩནྟི.

ཏེསཾ པན སཾཝཎྞནཱསུ ཨབྷིདྷམྨཏྠསངྒཧསྶ པོརཱཎཊཱིཀཾ ནཝཝིམལབུདྡྷིཏྠེརོ ཨཀཱསི. སཙྩཾསངྑེཔནཱམརཱུཔཔརིཙྪེདཁེམཱཨབྷིདྷམྨཱཝཏཱརཱནཾ པོརཱཎཊཱིཀཾ ཝཱཙིསྶརམཧཱསཱམིཏྠེརོ. པརམཏྠཝིནིཙྪཡསྶ པོརཱཎཊཱིཀཾ མཧཱབོདྷིཏྠེརོ.

ཨབྷིདྷམཏྠསངྒཧཱབྷིདྷམྨཱཝཏཱརཱབྷིནཝ ཊཱིཀཱཡོ སུམངྒལསཱམིཏྠེརོ. སཙྩསངྑེཔཱབྷིནཝཊཱིཀཾ ཨརཉྙཝཱསིཏྠེརོ. ནཱམརཱུཔཔརིཙྪེདཱབྷིནཝཊཱིཀཾ མཧཱསཱམིཏྠེརོ. པརམཏྠཝིནིཙྪཡཱབྷིནཝཊཱིཀཾ ཨཉྙཏརཏྠེརོ. ཝིནཡཝིནིཙྪཡཊཱིཀཾ རེཝཏཏྠེརོ. ཁུདྡསིཀྑཱཡ པུརཱཎཊཱིཀཾ མཧཱཡསཏྠེརོ. ཏཱཡཡེཝ ཨབྷིནཝཊཱིཀཾ སངྒྷརཀྑིཏཏྠེརོཏི.

ཝཛིརབུདྡྷིཾ ནཱམ ཝིནཡགཎྛིཔདཏྠཾ ཝཛིརབུདྡྷིཏྠེརོ. ཙཱུལ༹གཎྛིཾ མཛ྄ཛྷིམགཎྛིཾ མཧཱགཎྛིཉྩ སཱིཧལ༹དཱིཔཝཱསིནོ ཐེརཱ. ཏེ ཙ པདཀྐམེན ཨསཾཝཎྞེཏྭཱ ཨནུཏྟཱནཏྠཱཡེཝ སཾཝཎྞིཏཏྟཱ གཎྛིཔདཏྠཱཏི ཝུཙྩནྟི.

ཨབྷིདྷཱནཔྤདཱིཔིཀཾ པན མཧཱམོགྒལཱནཏྠེརོ. ཨཏྠབྱཀྑཱནཾ ཙཱུལ༹བུདྡྷཏྠེརོ. ཝུཏྟོདཡཾ སམྦནྡྷཙིནྟནཾ སུབོདྷཱལངྐཱརཉྩ སངྒྷརཀྑིཏཏྠེརོ. བྱཱཀརཎཾ མོགྒལཱནཏྠེརོ.

མཧཱཝཾསཾ ཙཱུལ༹ཝཾསཾ དཱིཔཝཾསཾ ཐཱུཔཝཾསཾ བོདྷིཝཾསཾ དྷཱཏུཝཾ སཉྩ སཱིཧལ༹དཱིཔཝཱསིནོ ཐེརཱ. དཱཋཱདྷཱཏུཝཾསཾ པན དྷམྨཀིཏྟིཏྠེརོ ཨཀཱསི. ཨེཏེ ཙ པཱལི༹མུཏྟཀཝསེན ཝུཏྟཏྟཱ གནྠནྟརཱཏི ཝུཙྩནྟི.

ཨིཙྩེཝཾ བུདྡྷགྷོསཱདཡོ ཐེར ཝརཱ ཡཐཱབལཾ ཡཐཱསཏྟིཾ པརིཡཏྟིཾ སཱསནཾ ཨུཔཏྠམྦྷེཏྭཱ བཧཱུཧི མཱུལེཧི བཧུཧིསཱཁཱཧི བཧཱུཧི ཙ ཝིཊཔེཧི ཨུཔཏྠམྦྷིཡམཱནོ ཝེཔུལླམཱ པཛྫམཱནོ ¶ མཧཱནིགྲོདྷརུཀྑོ ཝིཡ ཐིརཾ ཧུཏྭཱ ཙིརཀཱལཾ ཏིཊྛཏཱིཏི ཝེདིཏབྦཾ.

ཨིདཾ སཱིཧལ༹དཱིཔེ པོཏྠཀཱརུལ༹ྷཏོ པཙྪཱ སཱསནསྶ པཏིཊྛཱནཾ.

ཨེཏེཔི ཙ མཧཱཐེརོ, ཡཐཱསཏྟིཾ ཡཐཱབལཾ;

ཨཊྛཀཐཱདཡོ ཀཏྭཱ, མཙྩུམུཁཾ ཨུཔཱགམུཾ.

སེཡྻཐཱཔི ཙ ལོཀསྨིཾ, ཨོབྷཱསིཏྭཱན ཙནྡིམཱ;

ཨཱཝཧིཏྭཱན སཏྟཱནཾ, ཧིཏཾ ཨཏྠཾཝ གཙྪཏི.

ཨེཝམེཝ མཧཱཐེརཱ, ཉཱཎོབྷཱསེཧི བྷཱསིཡ;

ཨཱཝཧིཏྭཱན སཏྟཱནཾ, ཧིཏཾ ཨཏྠཾཝ གཙྪཏི.

ཨིཏི སཱསནཝཾསེ སཱིཧལ༹དཱིཔིཀསཱསནཝཾསཀཐཱམགྒོ

ནཱམ དུཏིཡོ པརིཙྪེདོ.

༣. སུཝཎྞབྷཱུམིསཱསནཝཾསཀཐཱམགྒོ

༣. ཨིདཱནི ཡཐཱཋཔིཏམཱཏིཀཱཝསེན སུཝཎྞབྷཱུམི རཊྛེ སཱསནཝཾསཀཐཱམགྒསྶ ཝཏྠུཾ ཨོཀཱསོ ཨནུཔྤཏྠོ, ཏསྨཱ སུཝཎྞབྷཱུམིརཊྛསཱསནཝཾསཀཐཱམགྒཾ ཨཱརབྷིསྶཱམི.

ཏཏྠ སུཝཎྞབྷཱུམཱིཏི ཏཱིསུ རཱམཉྙརཊྛེསུ ཨེཀསྶ ནཱམཾ. ཏཱིཎིཧི རཱམཉྙརཊྛཱནི ཧོནྟི ཧཾསཱཝཏཱིམུཏྟིམསུཝཎྞབྷཱུམིཝསེན ཨེཀདེསེན སབྦམྤི རཱམཉྙརཊྛཾ གཧེཏབྦཾ. ཏཏྠ པན ཨུཀྐལཱཔཛནཔདེ ཏཔུསྶབྷལླིཀེ ཨཱདིཾ ཀཏྭཱ བྷགཝཏོ ཨབྷིསམྦུཛ྄ཛྷིཏྭཱ སཏྟསཏྟཱཧེསུ ཨཏིཀྐནྟེསུཡེཝ ཨཱསཱལ༹ྷིམཱསསྶ ཛུཎྷཔཀྑཔཉྩམདིཝསཏོ པཊྛཱཡ རཱམཉྙརཊྛེ སཱསནཾ པཏིཊྛཏི.

ཨིདཾ རཱམཉྙརཊྛེ པཋམཾ སཱསནསྶ པཏིཊྛཱནཾ.

བྷགཝཏོ ¶ ཨབྷིསམྦུདྡྷཀཱལཏོ པུབྦེཡེཝ ཨཔརཎྞཀརཊྛེ སུབྷིནྣནགརེ ཏིསྶརཉྙོ ཀཱལེ ཨེཀསྶ ཨམཙྩསྶ ཏིསྶོ ཛཡོ ཙཱཏི དྭེཔུཏྟཱ ཨཧེསུཾ. ཏེ གིཧིབྷཱཝེ སཾཝེགཾ ལབྷིཏྭཱ མཧཱསམུདྡསྶ སམཱིཔེ གཛྫགིརིམྷི ནཱམ པབྦཏེ ཨིཏྠུསིཔབྦཾ པབྦཛིཏྭཱ ནིསཱིདིསུཾ. ཏདཱ ནཱགིཡཱ ཝིཛྫཱདྷརོ སནྟཝཾ ཀཏྭཱ དྭེ ཨཎྜཱནི ཝིཛཱཡིཏྭཱ སཱ ནཱགཱི ལཛྫཱཡ ཏཱནི ཝིཛཧིཏྭཱ གཙྪི.

ཏདཱ ཛེཊྛོ ཏིསྶཀུམཱརོ ཏཱནི ལབྷིཏྭཱ ཀནིཊྛེན སདྡྷིཾ ཝིབྷཛིཏྭཱ ཨེཀཾ ཨེཀསྶ སནྟིཀེ ཋཔེསི. ཀཱལེ ཨཏིཀྐནྟེ ཏེཧི ཨཎྜེཧི དྭེ མནུསྶཱ ཝིཛཱཡིཾསུ. ཏེ དས ཝསྶཝཡེ སམྤཏྟེ ཀནིཊྛསྶ ཨཎྜཏོ ཝིཛཱཡནདཧརོ ཀཱལཾ ཀཏྭཱ མཛ྄ཛྷིམདེསེ མིཐིལནགརེ གཝཾཔཏི ནཱམ ཀུམཱརོ ཨུཔཛྫི. སོ སཏྟཝསྶིཀཀཱལེ བུདྡྷསྶ བྷགཝཏོ སནྟིཀེ ནིཡྻཱདེཏྭཱ པབྦཱཛེཏྭཱ ཨཙིརེནེཝ ཨརཧཱ ཨཧོསི.

ཛེཊྛསྶ པན ཨཎྜཏོ ཝིཛཱཡནདཧརོ དྭཱདསཝསྶིཀཀཱལེ སཀྐོ དེཝཱནམིནྡོ ཨཱགནྟྭཱ རཱམཉྙརཊྛེ སུདྷམྨཔུརཾ ནཱམ ནགརཾ མཱཔེཏྭཱ སཱིཧརཱཛཱཏི ནཱམེན ཏཏྠ རཛྫཾ ཀཱརཱཔེསི. སིལཱལོནེ པན སིརིམཱསོཀོཏི ནཱམེནཱཏི ཝུཏྟཾ. གཝཾཔཏིཏྠེརོ ཙ ཨཏྟནཱ མཱཏརཾ དཊྛུཀཱམོ མིཐིལནགརཏོ ཨཱགནྟུཾ ཨཱརབྷི. ཏདཱ དིབྦཙཀྑུནཱ མཱཏུཡཱ ཀཱལངྐཏབྷཱཝཾ ཉཏྭཱ ཨིདཱནི མེ མཱཏཱ ཀུཧིཾ ཨུཔྤཛྫཏཱིཏི ཨཱཝཛྫནྟོ བཱཧུལླེན ནེསཱདཀེཝཊྚཱནཾ ནིཝཱསནཊྛཱནབྷཱུཏེ དེསེ ཨུཔྤཛྫཏཱིཏི ཉཏྭཱ སཙཱཧཾ གནྟྭཱ ན ཨོཝཱདེཡྻཾ, མཱཏཱ མེ ཨཔཱཡགམནིཡཾ ཨཔུཉྙཾ ཝིཙིནིཏྭཱ ཙཏཱུསུ ཨཔཱཡེསུ ཨུཔྤཛྫེཡྻཱཏི ཙིནྟེཏྭཱ བྷགཝནྟཾ ཡཱཙིཏྭཱ རཱམཉྙརཊྛཾ ཝེཧཱསམགྒེན ཨཱགཙྪི. རཱམཉྙརཊྛེ སུདྷམྨཔརཾ པཏྭཱ ཨཏྟནོ ¶ བྷཱཏུནཱ སཱིཧརཱཛེན སདྡྷིཾ རཊྛཝཱསཱིནཾ དྷམྨཾ དེསེཏྭཱ པཉྩསུ སཱིལེསུ པཏིཊྛཱཔེསི.

ཨཐ སཱིཧརཱཛཱ ཨཱཧ, ལོཀེསུ བྷནྟེ ཏྭམསི ཨགྒཏརོ པུགྒལོཏི. ན མཧཱརཱཛ ཨཧཾ ཨགྒཏརོ, ཏཱིསུ པན བྷཝེསུ སབྦེསཾ སཏྟཱནཾ མཀུཊསངྐཱསོ གོཏམོ ནཱམ མཡ྄ཧཾ སཏྠཱ ཨཏྠི, ཨིདཱནི མཛ྄ཛྷིམདེསཾ རཱཛགཧཾ པཊིཝསཏཱིཏི. ཨེཝཾ པན བྷནྟེ སཏི ཏུམྷཱཀཾ ཨཱཙརིཡཾ མཡཾ དཊྛུཾ ཨརཧཱམ ཝཱ ནོ ཝཱཏི པུཙྪི. གཝཾཔཏིཏྠེརོཙ ཨཱམ མཧཱརཱཛ ཨརཧཐ བྷགཝནྟཾ དཊྛུཾ, ཨཧཾ ཡཱཙིཏྭཱ ཨཱགཙྪཱམཱིཏི ཝཏྭཱ བྷགཝནྟཾ ཡཱཙི. བྷགཝཱ ཙ ཨབྷིསམྦུཛ྄ཛྷིཏྭཱ ཨཊྛམེ ཝསྶེ སདྡྷིཾ ཨནེཀསཏབྷིཀྑཱུཧི རཱམཉྙརཊྛེ སུཁམྨཔུརཾ ཨཱཀཱསེན ཨཱགམཱསི. རཱཛཝཾསེ པཉྩཧི བྷིཀྑུསཏེཧི ཨཱགམཱསཱིཏི ཝུཏྟཾ. སིལཱལེཁནེ པན ཝཱིསཏིསཧསྶམཏྟེཧི བྷིཀྑཱུཧཱིཏི ཝུཏྟཾ. ཨེཏྠ ཙ ཡསྨཱ བྷགཝཱ སཔརིསོཡེཝ ཨཱགཙྪི, ན ཨེཀཀོཏི ཨེཏྟཀམེཝ ཨིཙྪིཏབྦཾ, ཏསྨཱ ནཱནཱ ཝཱདཏཾ པཊིཙྩ ཙིཏྟསྶཱཀུལིཏཱ ན ཨུཔྤཱདེཏབྦཱཏི.

ཨཐ ཨཱགནྟྭཱ རཏནམཎྜཔེ ནིསཱིདིཏྭཱ སརཱཛིཀཱནཾ རཊྛཝཱསཱིནཾ ཨམཏརསཾ ཨདཱསི. ཏཱིསུ སརཎེསུ པཉྩསུ ཙ སཱིལེསུ པཏིཊྛཱཔེསི. ཨཐ བྷགཝཱ དསྶནཏྠཱཡ ཨཱགཏཱནཾ ཚནྣཾ ཏཱཔསཱནཾ ཚ ཀེསདྷཱཏུཡོ པཱུཛནཏྠཱཡ ཨདཱསི. ཏཏོ པཙྪཱསཏྟཏིཾསཝསྶཱནི པཱུརེཏྭཱ པརིནིབྦཱནཀཱལེཔི བྷགཝཏོ ཨདྷིཊྛཱནཱནུརཱུཔེན ཙིཏཀཊྛཱནཏོ ཏེཏྟིཾས དནྟེ གཧེཏྭཱ གཝཾཔཏིཏྠེརོ སུདྷམྨཔུརཾ ཨཱནེཏྭཱ སཱིཧརཉྙོ དཏྭཱ ཏེཏྟིཾསཙེཏིཡཱནི པཏིཊྛཱཔེསི. ཨེཝཾ བྷགཝཏོ པརིནིབྦཱནཏོ ཨཊྛམེཡེཝ ཝསྶེ གཝཾཔཏིཏྠེརོ རཱམཉྙ རཊྛེ སུདྷམྨཔུརེ སཱསནཾ པཏིཊྛཱཔེསི.

ཨིདཾ རཱམཉྙརཊྛེ དུཏིཡཾ སཱསནསྶ པཏིཊྛཱནཾ.

བྷགཝཏོ ¶ པརིནིབྦུཏཔཉྩཏིཾསཱདྷིཀཱནཾ དྭིནྣཾ སཏཱནཾ ཨུཔརིསུཝཎྞབྷཱུམིཾ ནཱམ རཱམཉྙརཊྛཾ ཨཱགནྟྭཱ སོཎཏྠེརོ ཨུཏྟརཏྠེརོཙཱཏི དྭེ ཐེརཱ པཉྩཝགྒཀམྨཱརཧེཧི བྷིཀྑཱུཧི སདྡྷིཾ སཱསནཾ པཏིཊྛཱཔེསུཾ. ཏེ ཙ ཐེརཱ མཧཱམོགྒལིཔུཏྟཏིསྶཏྠེརསྶ སདྡྷིཝིཧཱརིཀཱཏི ཨཊྛཀཐཱཡཾ ཨཱགཏཱ.

ཏཔུསྶབྷལླིཀེ གཝཾཔཏིཏྠེརཉྩ པཊིཙྩ སཱསནཾ ཏཱཝ པཏིཊྛཧི. ཏཉྩ ན སབྦེན སབྦཾ ཨོགཱཧེཏྭཱ ཡེ ཡེ པན སདྡྷཱ པསནྣཱ, ཏེ ཏེ ཨཏྟནོ ཨིཙྪཱཝསེནེཝ སཱསནཾ པསཱིདིཾསུ. པཙྪཱ པན སོཎུཏྟརཏྠེརཱ མཧུསྶཱཧེན ཨཱཙརིཡ ཨཱཎཏྟིཡཱ སཱསནསྶ པཏིཊྛཱཔནཏྠཱཡ ཨུསྶུཀྐཾ ཨཱཔནྣཱ པཏིཊྛཱཔེསུཾ. ཏེན ཨཊྛཀཐཱཡཾ ཨེཏཾ རཊྛཾ གནྟྭཱ ཨེཏྠ སཱསནཾ པཏིཊྛཱཔེཧཱིཏི ཀཱརིཏཔཙྩཡཝསེན ཨཱཎཏྟིཝིབྷཏྟིཝསེནཙ ཝུཏྟཾ.

ཏདཱ པན སུཝཎྞབྷཱུམིརཊྛེ སུདྷམྨཔུརེ སིརིམཱསོཀོ ནཱམ རཱཛཱ རཛྫཾ ཀཱརེསི. ཏཉྩ སུདྷམྨཔུརཾ ནཱམ ཀེལཱསཔབྦཏམུདྡྷནི དཀྑིཎཱཡ ཨནུདིསཱཡ པུབྦཌྜྷབྷཱགེན པབྦཏམུདྡྷནི ཨཔརཌྜྷབྷཱགེན བྷཱུམིཏལེ ཏིཊྛཏི. ཏཾཡེཝ གུལ༹པཱཙཀཱནཾ མསྶཱནཾ གེཧསདིསཱནི གེཧཱནི ཡེབྷུཡྻེན, ཏེནེཝ གོལ༹མིཏྟིཀ ནཱམེནཱཔི ཝོཧཱརིཡཏི. ཏསྶ པན ནགརསྶ མཧཱསམུདྡསམཱིཔེ ཋིཏཏྟཱ དཀཡཀྑིནཱི སབྦདཱ ཨཱགནྟྭཱ རཱཛགེཧེ ཛཱཏེ ཛཱཏེ ཀུམཱརེ ཁཱདི.

སོཎུཏྟརཏྠེརཱནཾ སམྤཏྟདིཝསཡེཝ རཱཛགེཧེ ཨེཀཾ པུཏྟཾ ཝིཛཱཡི. དཀཡཀྑིནཱིཙ ཁཱདིསྶཱམཱིཏི སཧ པཉྩཧི ཡཀྑིནིསཏེཧི ཨཱགཏཱ. ཏཾ དིསྭཱ མནུསྶཱ བྷཱཡིཏྭཱ མཧཱཝིརཝཾ རཝནྟི. ཏདཱ ཐེརཱ བྷཡཱནཀཾ སཱིཧསཱིསཝསེན ཨེཀསཱིསསརཱིརདྭཡསམྦནྡྷསཎྛཱནཾ མནུསཱིཧརཱུཔཾ མཱཔེཏྭཱ དསྶེཏྭཱ ཏཾ ཡཀྑིནིཾ སཔརིསཾ པལཱཔེསུཾ.

ཐེརཱ ཙ པུན ཡཀྑིནིཡཱ ཨནཱགམནཏྠཱཡ པརིཏྟཾ ཨཀཾསུཏསྨིཉྩ སམཱགམེ ཨཱགཏཱནཾ མནུསྶཱནཾ བྲཧྨཛཱལསུཏྟཾ ཨདེསཡྻུཾ ¶ . སཊྛིམཏྟསཧསྶཱ སོཏཱཔནྣཱདིཔརཱཡནཱ ཨཧེསུཾ. ཀུལདཱརཀཱནཾ ཨཌྜྷུཌྜྷཱནི སཧསྶཱནི པབྦཛིཾསུ. ཀུལདྷཱིཏཱནཾ པན དིགྷཌྜྷསཧསྶཾ. རཱཛཀུམཱརཱནཾ པཉྩསཏཱདྷིཀསཧསྶམཏྟཾ པབྦཛིཾསུ. ཨཝསེསཱཔི མནུསྶཱ སརཎེ པཏིཊྛཧིཾསུ. ཨེཝཾ སོ ཏཏྠ སཱསནཾ པཏིཊྛཱཔེསཱིཏི. ཝུཏྟཉྩ ཨཊྛཀཐཱཡཾ,–

སུཝཎྞབྷཱུམིཾ གནྟྭཱན, སོཎུཏྟརཱ མཧིདྡྷིཀཱ;

པིསཱཙེ ནིདྡྷམིཏྭཱན, བྲཧྨཛཱལེ མདེསིསུནྟི.

ཏཏོ པཊྛཱཡ རཱཛཀུམཱརཱནཾ སོཎུཏྟརནཱམེཧིཡེཝ ནཱམཾ ཨཀཾསུ. ཨཝསེསདྭཱརཀཱནམྤི རཀྑསབྷཡཏོ ཝིམོཙནཏྠཾ ཏཱལཔཏྟབྷུཛཔཏྟེསུ ཐེརེཧི མཱཔིཏཾ མནུསཱིཧརཱུཔཾ དསྶེཏྭཱ མཏྠཀེ ཋཔེསུཾ. མནུསྶཱཙ སིལཱམཡཾ མནུསཱིཧརཱུཔཾ ཀཏྭཱ སུདྷམྨཔུརསྶ ཨེསནྣེ པདེསེ ཋཔེསུཾ. ཏཾ ཡཱཝཛྫཏནཱ ཨཏྠཱིཏི. ཨིཙྩེཝཾ བྷགཝཏོ པརིནིབྦཱནཏོ པཉྩཏིཾསཱདྷིཀེ དྭིཝསྶསཏེ སམྤཏྟེ སོཎུཏྟརཏྠེརཱ ཨཱགནྟྭཱ སཱསནཾ པཏིཊྛཱཔེཏྭཱ སཱསནཾ པཏིཊྛཱཔེཏྭཱ ཨནུགྒཧཾ ཨཀཾསཱུཏི.

ཨིདཾ རཱམཉྙརཊྛེ ཏཏིཡཾ སཱསནསྶ པཏིཊྛཱནཾ.

ཏཏོ པཙྪཱ ཚསཏཱདྷིཀེ སཧསྶེ སམྤཏྟེ པུབྦེ ཝུཏྟེཧི ཏཱིཧི ཀཱརཎེཧི སཱསནསྶ ཨུཔྤཏྟིཊྛཱནབྷཱུཏཾ རཱམཉྙརཊྛཾ དཱམརིཀཙོརབྷཡེན པཛྫརརོགབྷཡེན སཱསནཔཙྩཏྠིཀབྷཡེནཙཱཏི ཏཱིཧི བྷཡེཧི ཨཱཀུལིཏཾ ཨཧོསི. ཏདཱ ཙ ཏཏྠ སཱསནཾ དུབྦལཾ ཨཧོསི, ཡཐཱ ཨུདཀེ མནྡེ ཏཏྲཛཱཏཾ ཨུཔྤལཾ ཨུཔྤལཾ དུབྦལནྟི. ཏཏྠ བྷིཀྑཱུཔི སཱསནཾ ཡཐཱ ཀཱམཾ པཱུརེཏུཾ ན སཀྐཱ.

སཱུརིཡཀུམཱརསྶ ནཱམ མནོཧརིརཉྙོ པན ཀཱལེ སཱསནཾ ཨཏིཝིཡ དུབྦལཾ ཨཧོསི. ཛིནཙཀྐེ ཨེཀཚསཏཱདྷིཀེ ཝསྶསཧསྶེ སམྤཏྟེ ཀལིཡུགེཙ ཨེཀཱུནཝཱིསཏཱདྷིཀེ ¶ ཙཏུཝསྶསཏེ སམྤཏྟེ ཨརིམདྡནནགརེ ཨནུརུདྡྷཱ ནཱམ རཱཛཱ ཏཏོ སཧ པིཊཀེན བྷིཀྑུསངྒྷཾ ཨཱནེསི.

ཏཏོ པཙྪཱ ཛིནཙཀྐེ ནཝཱདྷིཀེ སཏྟསཏེ སཧསྶེ ཙ སམྤཏྟེ ལངྐཱདཱིཔེ སིརིསངྒྷབོདྷིཔརཀྐམབཱཧུམཧཱརཱཛཱ སཱསནཾ སོདྷེསི.

ཏཏོ ཚནྣཾ ཝསྶཱནཾ ཨུཔརི ཀལིཡུགེ དྭཏྟིཾསཱདྷིཀེ པཉྩསཏེ སམྤཏྟེ ཨུཏྟརཱཛཱིཝོ ནཱམ ཐེརོ སཱསནེ པཱཀཊོ ཨཧོསི.

སོ པན རཱམཉྙརཊྛཝཱསིནོ ཨརིཡཱཝཾསཏྠེརསྶ སདྡྷིཝིཧཱརིཀོ. ཨརིཡཱཝཾསཏྠེརོ པན ཀཔྤུངྒནགརཝཱསིནོ མཧཱཀཱལ༹ཏྠེརསྶ སདྡྷིཝིཧཱརིཀོ. མཧཱཀཱལ༹ཏྠེརོ པན སུདྷམྨཔུརཝཱསིནོ པྲཱནདསྶིཏྠེརསྶ སདྡྷིཝིཧཱརིཀོ. ཨཡཾ པན ཨུཏྟརཱཛཱིཝཚཔྤདཏྠེརཱནཾ ཝཾསདཱིཔནཏྠཾ ཝུཏྟཱ.

སོ པན པྲཱནདསྶིཏྠེརོ ལོཀིཡཱབྷིཉྙཱཡོ ལབྷིཏྭཱ ནིཙྩཾ ཨབྷིཎྷཾ པཱཏོཝ མགདྷརཊྛེ ཨུརུཝེལནིགམེ མཧཱབོདྷིཾ གནྟྭཱ མཧཱབོདྷིཡངྒཎཾ སམྨཛྫིཏྭཱ པུན ཨཱགནྟྭཱ སུདྷམྨཔུརེ པིཎྜཱཡ ཙརི. ཨིདཾ ཐེརསྶ ནིབདྡྷཝཏྟུཾ. ཨཡཉྩ ཨཏྠོ སུདྷམྨཔུརཏོ མགདྷརཊྛཾ གནྟྭཱ ཨུརུཝེལནིགམེ ཝཱཎིཛཀམྨཾ ཀརོནྟཱ ཏདཱཀཱརཾ པསྶིཏྭཱ པཙྩཱགམནཀཱལེ སུདྷམྨཔུར ཝཱསཱིནཾ ཀཐེསུཾ, ཏསྨཱ ཝིཉྙཱཡཏི.

ཏསྨིཉྩ ཀཱལེ ཨུཏྟརཱཛཱིཝཏྠེརོ པརིཔུཎྞཝཱིསཏིཝསྶེན ཚཔྤདེན ནཱམ སཱམཎེརེན སདྡྷིཾ སཱིཧལ༹དཱིཔཾ གཙྪི. སཱིཧལ༹དཱིཔཝཱསིནོ ཙ བྷིཀྑཱུ མཡཾ མཧཱམཧིནྡཏྠེརསྶ ཝཾསིཀཱ བྷཝཱམ, ཏུམྷེཔི སོཎུཏྟརཏྠེརཱནཾ ཝཾསིཀཱ བྷཝཐ, ཏསྨཱ མཡཾ ཨེཀཝཾསིཀཱ བྷཝཱམ སམཱན ཝཱདིཀཱཏི ཝཏྭཱ ཚཔྤདསཱམཎེརསྶ ཨུཔསམྤདཀམྨཾ ཨཀཾསུ. ཏཏོ པཙྪཱ ཙེཏིཡ ཝནྡནཱདཱིནི ཀམྨཱནི ནིཊྛཱཔེཏྭཱ ཨུཏྟརཱཛཱིཝཏྠེརོ སདྡྷིཾ བྷིཀྑུསངྑེན ཨརིམདྡནནགརཾ པཙྩཱགམཱཧི.

ཚཔྤདསྶ པན ཨེཏདཧོསི,- སཙཱཧཾ ཨཱཙརིཡེན སཧ ཛམྦུདཱིཔཾ ¶ གཙྪེཡྻཾ, བཧཱུཧི ཉཱཏིབལིབོདྷེཧི པརིཡཏྟུགྒཧཎེ ཨནྟརཱཡོ བྷཝེཡྻ, ཏེན ཧི སཱིཧལ༹དཱིཔེཡེཝ ཝསིཏྭཱ པརིཡཏྟིམུགྒཧེཏྭཱ པཙྩཱགམིསྶཱམཱིཏི.

ཏཏོ ཨཱཙརིཡསྶ ཨོཀཱསཾ ཡཱཙིཏྭཱ སཱིཧལ༹དཱིཔེཡེཝ པཊིཝསི. སཱིཧལ༹དཱིཔེ ཝསིཏྭཱ ཡཱཝ ལདྡྷཏྠེརསམྨུཏིཀཱ པརིཡཏྟིཾ པརིཡཱཔུཎིཏྭཱ པུན ཛམྦུདཱིཔཾ པཙྩཱགནྟུཀཱམོ ཨཧོསི. ཨཐ ཏསྶ ཨེཏདཧོསི,– ཨཧཾ ཨེཀཀོཝ གཙྪནྟོ སཙེ མམ ཨཱཙརིཡོ ནཏྠི, སཙེཔི ཛམྦུདཱིཔཝཱསིནཱ བྷིཀྑུསངྒྷེན སདྡྷིཾ ཝིནཡཀམྨཾ ཀཱཏུཾ ན ཨིཙྪེཡྻཾ, ཨེཝཾ སཏི ཝིསུཾ ཀམྨཾ ཀཱཏུཾ ན སཀྐཱུཎེཡྻཾ, ཏསྨཱ པིཊཀདྷརེཧི ཙཏཱུཧི ཐེརེཧི སདྡྷིཾ གཙྩེཡྻཾ, ཨིཙྩེཏཾ ཀུསལནྟི.

ཨེཝཾ པན ཙིནྟེཏྭཱ ཏཱམལིཏྟིགཱམཝཱསིནཱ སིཝལིཏྠེརེན ཀམྦོཛརཉྙོ པུཏྟབྷཱུཏེན ཏཱམལིནྡཏྠེརེན ཀིཉྩིཔུརཝཱསིནཱ ཨཱནནྡཏྠེརེན རཱཧུལཏྠེརེནཙཱཏི ཨིམེཧི ཙཏཱུཧི ཐེརེཧི སདྡྷིཾ ནཱཝཱཡ པཙྩཱགཙྪི. ཏེ ཙ ཐེརཱ པིཊཀདྷརཱ ཨཧེསུཾ དཀྑཱ ཐཱམསམྤནྣཱ ཙ. ཏེསུ ཝིསེསཏོ རཱཧུལཏྠེརོ ཐཱམསམྤནྣོ. ཀུསིམནགརཾ སམྤཏྟཀཱལེ ཨུཔཀཊྛཝསྶཱུཔགམནཀཱལོ ཧུཏྭཱ ཨརིམདྡནནགརེ ཨཱཙརིཡསྶ སནྟིཀཾ ཨསམྤཱཔུཎིཏྭཱ ཀུསིམནགརཡེཝ ཝསྶཾ ཨུཔགམིཾསུ. ཏེསཾ ཝསྶཱུཔགམནཝིཧཱརཝཏྠུ ཨཱརཱམཔཱཀཱརོ ཙ ཀུསིམནགརསྶ དཀྑིཎདིསཱསཱགེ ཡཱཝཛྫཏནཱ ཨཏྠི.

ཝསྶཾཝུཊྛཀཱལེ པན མཧཱཔཝཱརཎཱཡ པཝཱརེཏྭཱ ཏེ པཉྩ ཐེརཱ ཨརིམདྡནནགརཾ ཨགམཾསུ. ཨུཏྟརཱཛཱིཝཏྠེརོཙ ཨརིམདྡནནགར ཝཱསཱིཧི བྷིཀྑཱུཧི ཝིསུཾ ཧུཏྭཱ སངྒྷཀམྨཱནི ཨཀཱསི. ཀིཉྩཱཔི ཙེཏྠ ཨུཏྟརཱཛཱིཝཏྠེརཱདཡོ སཱིཧལ༹དཱིཔཏོ པཙྩཱགནྟྭཱ ཨརིམདྡནནགརེ ཝསིཏྭཱ སཱསནཾ ཨནུགྒཧེསུཾ, རཱམཉྙརཊྛེ པན ཛཱཏཏྟཱ པུབྦེ ཙ ཏཏྠ ནིཝཱསཏྟཱ ཨིདྷ དསྶིཏཱཏི དཊྛབྦཱ.

ཏསྨིཉྩ ¶ ཀཱལེ དལནགརེ པདཱིཔཛེཡྻགཱམེ ཛཱཏོ སཱརིཔུཏྟོ ནཱམ མཧལླཀསྶམཎེརོ ཨེཀོ ཨརིམདྡནནགརཾ གནྟྭཱ ཨཱནནྡཏྠེརསྶ སནྟིཀེ ཨུཔསམྤཛྫིཏྭཱ པརིཡཏྟི པརིཡཔུཎི. སོ བཧུསྶུཏོ ཨཧོསི དཀྑོ ཐཱམསམྤནྣོ ཙ. ཏམཏྠཾ སུཏྭཱ ནརཔཏིཙཉྙིསཱུརཱཛཱ ཙིནྟེསི,- སཙེསོ ཨངྒཔཙྩངྒསམྤནྣོ བྷཝེཡྻ, ཨཱཙརིཡཾ ཀཏྭཱ ཋཔེསྶཱམི ཨནུགྒཧེསྶཱམཱིཏི. རཱཛཱ ཨེཝཾ ཙིནྟེཏྭཱ རཱཛཔུརིསེ པེསེཏྭཱ ཝཱིམཾསཱཔེསི. རཱཛཔུརིསཱ ཙ ཏསྶ ཚིནྣཔཱདངྒུཊྛགྒཏཾ པསྶིཏྭཱ ཏམཏྠཾ རཉྙོ ཨཱརོཙེསུཾ. རཱཛཱ ཏཾ སུཏྭཱ ཨེཝཾ ཝིཀལངྒཔཙྩངྒོ བྷཝེཡྻ, པདྷཱནཱཙརིཡཊྛཱནེ ཋཔེཏུཾ ན ཡུཏྟོཏི ཀཏྭཱ པདྷཱནཱཙརིཡབྷཱཝཾ ན ཨཀཱསི. པཱུཛཱསཀྐཱ རམཏྟེནེཝ ཨནུགྒཧཾ ཨཀཱསི. ཨེཀསྨིཉྩ ཀཱལེ དྷམྨཝིལཱསོཏི ལཉྪཾ དཏྭཱ རཱམཉྙརཊྛེ སཱསནཾ སོདྷེཏྭཱ པརིསུདྡྷཾ ཀརོཧཱིཏི རཱམཉྙརཊྛཾ པེསེསི.

སོཙ རཱམཉྙརཊྛཾ གནྟྭཱ དལནགརེ བཧུནཾ བྷིཀྑཱུནཾ དྷམྨ ཝིནཡཾ ཝཱཙེཏྭཱ སཱསནཾ པགྒཧེསི. ཏཏྠ ཙ རཱམཉྙམནུསྶཱ ཏསྶ དྷམྨཝིལཱསཏྠེརསྶ སིསྶཱནུསིསྶཱ སཱིཧལ༹བྷིཀྑུ གཎཱཏི ཝོཧཱརནྟི. ཨིཙྩེཝཾ སཱིཧལ༹དཱིཔིཀསྶ ཨཱནནྡཏྠེརསྶ སིསྶཾ དྷམྨཝིལཱསཾ པཊིཙྩ རཱམཉྙརཊྛེ སཱིཧལ༹དཱིཔཏོ སཱསནསྶ ཨཱགཏམགྒོཏི.

ཨིདཾ རཱམཉྙརཊྛེ ཙཏུཏྠཾ སཱསནསྶ པཏིཊྛཱནཾ.

ཏསྨིཉྩ ཀཱལེ མུཏྟིམནགརེ ཨགྒམཧེསིཡཱ ཨཱཙརིཡཱ བུདྡྷཝཾསཏྠེརམཧཱནཱགཏྠེརཱ སཱིཧལ༹དཱིཔཾ གནྟྭཱ མཧཱཧཱརཝཱསིགཎཝཾསབྷཱུཏཱནཾ བྷིཀྑཱུནཾ སནྟིཀེ པུན སིཀྑཾ གཎྷིཏྭཱ མུཏྟིམནགརཾ པཙྩཱགནྟྭཱ མུཏྟིམནགརཝཱསཱིཏི བྷིཀྑཱུཧི ཝིསུཾ ཧུཏྭཱ སངྒྷཀམྨཱནི ཀཏྭཱ སཱསནཾ པགྒཧེསུཾ. ཏེཙ ཐེརེ ¶ པཊིཙྩ རཱམཉྙརཊྛེ པུན སཱིཧལ༹དཱིཔཏོ སཱསནཾ ཨཱགཏནྟི.

ཨིདཾ རཱམཉྙརཊྛེ པཉྩམཾ སཱསནསྶ པཏིཊྛཱནཾ.

ཏཏོ པཙྪཱཙ མུཏྟིམནགརེ སེཏིབྷིནྡསྶ རཉྙོ མཱཏུཡཱ ཨཱཙརིཡོ མེདྷངྐརོ ནཱམ ཐེརོ སཱིཧལ༹དཱིཔཾ གནྟྭཱ སཱིཧལ༹དཱིཔེ ཨརཉྙཝཱསཱིནཾ མཧཱཐེརཱནཾ སནྟིཀེ པུན སིཀྑཾ གཧེཏྭཱ པརིཡཏྟིཾ པརིཡཱཔུཎིཏྭཱ སུཝཎྞརཛཏམཡེ ཏིཔུསཱིསཙྪནྣེ སེཏིབྷིནྡསྶ རཉྙོ མཱཏུཡཱ ཀཱརཱཝིཏེ ཝིཧཱརེ ནིསིདིཏྭཱ སཱསནཾ ཨནུགྒཧེསི. ལོཀདཱིཔཀསཱརཉྩ ནཱམ གནྠཾ ཨཀཱསི. ཨཐཱཔརིམྤི མུཏྟིམནགརེཡེཝ སུཝཎྞསོབྷཎོ ནཱམ ཐེརོ སཱིཧལ༹དཱིཔཾ གནྟྭཱ མཧཱཝིཧཱརཝཱསིགཎཝཾསབྷཱུཏཱནཾ ཐེརཱནཾ སནྟིཀེ པུན སིཀྑཾ གཧེཏྭཱ མུཏྟིམནགརམེཝ པཙྩཱགཙྪི.

སོ པན ཐེརོ ཨརཉྙེཡེཝ ཝསི. དྷུཏངྒདྷརོ ཙ ཨཧོསི ཨཔྤིཙྪོ སནྟུཊྛོ ལཛྫཱི ཀུཀྐུཙྩཀོ སིཀྑཱ ཀཱམོ དཀྑོ ཐཱམསམྤནྣོ ཙ. སཱིཧལ༹དཱིཔེ ཀལམྦུམྷི ནཱམ ཛཱཏསྶརེ ཨུདཀུཀྑེཔསཱིམཱཡཾ ཨཏིརེཀཔཉྩཝགྒེན ཝནརཏནཾ ནཱམ སངྒྷརཱཛཾ ཨུཔཛ྄ཛྷཱཡཾ ཀཏྭཱ རཱཧུལབྷདྡཾ ནཱམ ཝིཛཡབཱཧུརཉྙོ ཨཱཙརིཡབྷཱུཏཾ ཐེརཾ ཀམྨཝཱཙཱཙརིཡཾ ཀཏྭཱ ཨུཔསམྤཛྫི. སོཙ ཐེརོ པུནཱགནྟྭཱ མུཏྟིམནགརེཡེཝ ཝསིཏྭཱ གཎཾ ཝཌྜྷེཏྭཱ སཱསནཾ ཨནུགྒཧེསི. ཨེཏེ ཙ དྭེ ཐེརེ པཊིཙྩ རཱམཉྙརཊྛེ སཱིཧལ༹དཱིཔཏོ སཱསནཾ ཨཱགཏཾ.

ཨིདཾ རཱམཉྙརཊྛེ ཚཊྛཾ སཱསནསྶ པཏིཊྛཱནཾ.

ཏཏོ པཙྪཱ སཱསནཝསེན དྭིཝསྶཱདྷིཀེ དྭིསཧསྶེ ཀལིཡུགཏོ ཨེཀཱསཱིཏིཀེ སམྤཏྟེ ཧཾསཱཝཏཱིནགརེ སིརིཔརམམཧཱདྷམྨརཱཛཱཏི ¶ ལདྡྷནཱམོ དྷམྨཙེཏིཡརཱཛཱ ཀུསིམམཎྜལེ ཧཾསཱཝཏཱིམཎྜལེ མུཏྟིམམཎྜལེ ཙ རཊྛཝཱསིནོ སཔཛཾཝིཡ དྷམྨེན སམེན རཀྑིཏྭཱ རཛྫཾ ཀཱརེསི. སོ ཙ རཱཛཱ ཏཱིསུ པིཊཀེསུ ཙཏཱུསུ ཙ ཝེདེསུ བྱཱཀརཎཙྪནྡཱལངྐཱརཱདཱིསུ ཙ ཚེཀོ སིཀྑིཏནཱནཱསིཔྤོ ནཱནཱབྷཱསཱསུ ཙ པསུཏོ སདྡྷཱསཱིལཱདིགུཎོཔེཏོ ཀུམུདཀུནྡསརདཙནྡིཀཱསམཱནསིཏཔཛཔཏིབྷཱུཏོ ཙ སཱསནེ ཙ ཨཏིཔྤསནྣོ ཨཧོསི.

ཨེཀསྨིཾ ཀཱལེ སོ ཙིནྟེསི, བྷགཝཏོ སཱསནཾ ནཱམ པབྦཛྫཨུཔསམྤདཏཱཝེན སམྦནྡྷཾ, ཨུཔསམྤདབྷཱཝོ ཙ སཱིམཔརིསཝཏྠུ ཉཏྟིཀམྨཝཱཙཱསམྤཏྟཱིཧི སམྦནྡྷོཏི. ཨེཝཉྩ པན ཙིནྟེཏྭཱ སཱིམཝིནིཙྪཡཾ ཏསྶཾ ཝཎྞནཾ ཝིནཡསངྒཧཾ ཏསྶཾཝཎྞནཾ སཱིམཱལངྐཱར སཱིམསངྒཧཉྩ སདྡཏོ ཨཏྠཏོ ཙ པུནཔྤུནཾ ཨུཔཔརིཀྑིཏྭཱ ཨཉྙམཉྙཾ སཾསནྡིཏྭཱ པུབྦཱཔརཾ ཏུལཡིཏྭཱ བྷགཝཏོ ཨདྷིཔྤཱཡོ ཨཱིདིསོ གནྠཀཱརཱནཾ ཨདྷིཔྤཱཡོ ཨཱིདིསོཏི པསྶིཏྭཱ ཨམྷཱཀཾ རཱམཉྙརཊྛེ བདྡྷནདཱིསམུདྡཛཱཏེསྶརཱདཡོ སཱིམཱཡོ བཧུཀཱཔི སམཱནཱ ཨཡཾ པརིསུདྡྷཱཏི ཝཝཏྠཔེཏུཾ དུཀྐརཾ, ཨེཝཾ སཏི སཱིམཔརིསཱཔརིསུདྡྷཱ བྷཝིཏུཾ དུཀྐརཱཏི པཊིབྷཱཏི.

ཏཏོ པཙྪཱ རཱམཉྙརཊྛེ ཏིཔིཊཀདྷརབྱཏྟཔྤཊིབལཏྠེརེཧི མནྟེཏྭཱ རཉྙོ པཊིབྷཱནཱནུརཱུཔཾ སཱིམཔརིསཱ པརིསུདྡྷཱ བྷཝིཏུཾ དུཀྐརཱཏི ཐེརཱ ཝིནིཙྪནིཾསུ.

ཨཐ རཱཛཱ ཨེཝམྤི ཙིནྟེསི,– ཨཧོཝཏ སམྨཱསམྦུདྡྷསྶ སཱསནཾ པཉྩཝསྶསཧསྶཱནི པཏིཊྛཏིསྶཏཱིཏི གནྠེསུ ཝུཏྟོཔི སམཱནོ ཨབྷིསམྦུདྡྷཏོ ཙཏུསཊྛཱདྷིཀདྭིསཧསྶམཏྟེནེཝ ཀཱལེན སཱསནེ མལཾ ཧུཏྭཱ ཨུཔསམྤདཀམྨེ ཀངྑཱཊྛཱནཾ ཏཱཝ ཨུཔྤཛྫི, ཀཐཾ པན པཉྩཝསྶསཧསྶཱནི སཱསནསྶ པཏིཊྛཱནཾ བྷཝིསྶཏཱིཏི. ཨེཝཾ དྷམྨསཾཝེགཾ ཨུཔྤཱདེཏྭཱ པུནཱཔི ཨེཝཾ ཙིནྟེསི,- ཨེཝཾ ཨེཏྟཀཾ སཱསནེ མལཾ དིསྶམཱནོཔི ¶ སམཱནོ ཨུཔསམྤདཀམྨེ ཀངྑཱཊྛཱནཾ དིསྶམཱནོཔི སམཱནོ པརིསུདྡྷཏྠཱཡ ཨནཱརབྷིཏྭཱ མཱདིསོ ཨཔྤོསྶུཀྐོ མཛ྄ཛྷཏྟོ ནིསཱིདིཏུཾ ཨཡུཏྟོ, ཨེཝཉྷི སཏི བྷགཝཏི སདྡྷོ པསནྣོམྷཱིཏི ཝཏྟབྦཏཾ ཨནཱཔཛྫེཡྻཾ, ཏསྨཱ སཱསནཾ ནིམྨལཾ ཀཱཏུཾ ཨཱརབྷིསྶཱམཱིཏི.

ཀུཏོ ནུཁོ དཱནི སཱསནཾ ཨཱཧརིཏྭཱ ཐིརཾ པཏིཊྛཱ པེཡྻནྟི ཨཱཝཛྫནྟོ ཨེཝཾ ཙིནྟེསི,- བྷགཝཏོ ཀིར པརིནིབྦཱནཏོ ཚཏྟིཾསཱདྷིཀེ དྭིསཏེ སམྤཏྟེ མཧཱམོགྒལི པུཏྟཏིསྶཏྠེརོ མཧཱམཧིནྡཏྠེརཾ པེསེཏྭཱ སཱིཧལ༹དཱིཔེ སཱསནཾ པཏིཊྛཱཔེསི, ཏདཱ དེཝཱནཾ པིཡཏིསྶརཱཛཱ མཧཱཝིཧཱརཾ ཀཱརཱཔེཏྭཱ ཨདཱསི, སཱསནཝརཉྩ ཨེཀཱསིཏཱདྷིཀཱནི དྭིཝསྶསཏཱནི ཝིམལཾ ཧུཏྭཱ པཏིཊྛཧི, བྷིཀྑུསངྒྷོཔི མཧཱཝིཧཱར ཝཱསིགཎཝསེན ཨེཀཏོཝ ཨཊྛཱསི, ཏཏོ པཙྪཱ ཨབྷཡགིརིཝཱསིཛེ ཏཝནཝཱསིཝསེན དྭེདྷཱ ཧུཏྭཱ བྷིཛྫི, ཛིནཙཀྐེ ཨཊྛསཏྟསཏཱདྷིཀེ སཧསྶེ སམྤཏྟེ སིརིསངྒྷབོདྷིཔརཀྐམབཱཧུམཧཱརཱཛཱ ཨུདུམྦརགིརིཝཱསི མཧཱཀསྶཔཏྠེརཔྤམུཁཾ མཧཱཝིཧཱར ཝཱསིགཎཾ ཨནུགྒཧེཏྭཱ ཡཐཱཝུཏྟེ དྭེགཎེ ཝིསོདྷེསི, སཱསནཾ ནིམྨལཾ ཨཀཱསི, ཏཏོ པཙྪཱ ཝིཛཡབཱཧུཔརཀྐམབཱཧུརཱཛཱུནཾ དྭིནྣཾ ཀཱལེཔི སཱསནཾ ནིམྨལཾ ཧུཏྭཱཡེཝ ཨཊྛཱསི, ཏེནེཝ བྱཏྟཔྤཊིབལབྷིཀྑཱུ ཨཱཡཱཙིཏྭཱ སཱིཧལ༹དཱིཔཾ གནྟྭཱ པུན སིཀྑཾ གཎྷཱ པེསྶཱམི, ཏེསཾ པན པརམྤརཝསེན པཝཏྟཱནཾ བྷིཀྑཱུནཾ ཝསེན ཨམྷཱཀཾ རཱམཉྙརཊྛེ སཱསནཾ ནིམྨལཾ ཧུཏྭཱ པཏིཊྛཧིསྶཏཱིཏི. ཨེཝཾ པན ཙིནྟེཏྭཱ མོགྒལཱནཏྠེརཾ སོམཏྠེརཉྩ སཱིཧལ༹དཱིཔཾ གམནཏྠཱཡ ཡཱཙི. ཐེརཱཙ སཱསནཔྤཊིཡཏྟཀམྨམིདནྟི མནསིཀརིཏྭཱ པཊིཉྙཾ ཨཀཾསུ.

རཱཛཱ ཙ དཱཋཱདྷཱཏུཔཱུཛནཏྠཱཡ བྷིཀྑུསངྒྷསྶ པཱུཛནཏྠཱཡ བྷཱུཝནེཀབཱཧུརཉྙོ པཎྞཱཀཱརཏྠཱཡ དེཡྻདྷམྨཔཎྞཱཀཱརཝཏྠཱུནི པཊིཡཱདེཏྭཱ ཙིཏྲདཱུཏཾ རཱམདཱུཏནྟི ཨིམེ དྭེ ཨམཙྩེ དྭཱིསུ ནཱཝཱསུ ནཱཡཀཊྛཱནེ ཋཔེཏྭཱ ཀལིཡུགེ སཏྟཏིཾསཱདྷིཀེ ཨཊྛཝསྶསཏེ སམྤཏྟེ མཱགྷམཱསསྶ པུཎྞམིཏོ ཨེཀཱདསམིཡཾ སཱུརཝཱརེ ཙིཏྲདཱུཏཾ སདྡྷིཾ མོགྒལཱནཏྠེརཔྤམུཁེཧི བྷིཀྑཱུཧི ཨེཀཱཡ ནཱཝཱཡ གམཱཔེསི. ཕགྒུཎམཱསསྶ ཨཊྛམིཡཾ སཱིཧལ༹དཱིཔེ ཀལམྦུཏིཏྠཾ པཱཡཱསི.

རཱམདཱུཏཾ པན ཏསྨིཾཡེཝ ཝསྶེ མཱགྷམཱསསྶ པུཎྞམིཏོ དྭཱདསམིཡཾ ཙནྡཝཱརེ སདྡྷིཾ སོམཏྠེརཔྤམུཁེཧི བྷིཀྑཱུཧི ཨེཀཱཡ ནཱཝཱཡ གམཱཔེསི. ཨུཛུཀཾ པན ཝཱཏཾ ཨལབྷིཏྭཱ ཙིཏྲམཱསསྶ ཛུཎྷཔཀྑནཝམིཡཾ སཱིཧལ༹དཱིཔེ ཝལླིགཱམཾ པཱཡཱསི.

ཏཏོ པཙྪཱ ཏེཔི དྭེ ཨམཙྩཱ དྭཱིསུ ནཱཝཱསུ ཨཱབྷཏཱནི དཱཏབྦཔཎྞཱཀཱརཝཏྠཱུནི སནྡེསཔཎྞཱནི ཙ བྷཱུཝནེཀབཱཧུརཉྙོ བྷིཀྑཱུསངྒྷསྶ ཙ ཨདཱསི. རཉྙཱ པེསིཏབྷིཀྑཱུནཉྩ སནྡེསཔཎྞེ ཀཐིཏནིཡཱམེནེཝ ཀལྱཱཎིཡཾ ནཱམ ནདིཡཾ ཨུདཀུཀྑེཔསཱིམཱཡཾ སཱམཎེརབྷཱུམིཡཾ པཏིཊྛཱཔེཏྭཱ པུན ཨུཔསམྤདཀམྨཾ ཨཀཾསུ.

ཨུཔསམྤཛྫིཏྭཱ ཙ བྷཱུཝནེཀབཱཧུརཱཛཱ ནཱནཱཔྤཀཱརེ བྷིཀྑཱུནཾ སཱརུཔྤེ པརིཀྑཱརེ དཏྭཱ ཨིདཾ པན ཨཱམིསདཱནཾ ཡཱཝ ཛཱིཝིཏཔརིཡོསཱནཱཡེཝ པརིབྷུཉྫིཏབྦཾ བྷཝིསྶཏི, ནཱམལཉྪཾ པན ན ཛཱིརིསྶཏཱིཏི ཀཏྭཱ རཱམདཱུཏསྶ ནཱཝཱཡ པཁཱནབྷཱུཏསྶ སོམཏྠེརསྶ སིརིསངྒྷབོདྷིསཱམཱིཏི ནཱམཾ ཨདཱསི. ཨཝསེསཱནཾ པན དསནྣཾ ཐེརཱནཾ ཀིཏྟིསིརིམེགྷསཱམི པརཀྐམབཱཧུསཱམི བུདྡྷགྷོསསཱམི སཱིཧལ༹དཱིཔཝིསུདྡྷསཱམི གུཎརཏནདྷརསཱམཱི ཛིནཱལངྐཱརསཱམི རཏནམཱལིསཱམི སདྡྷམྨཏེཛསཱམི དྷམྨརཱམསཱམི བྷཱུཝནེཀབཱཧུསཱམཱིཏི ནཱམཱནི ཨདཱསི.

ཙིཏྲདཱུཏསྶ ¶ ནཱཝཱཡ པཁཱནབྷཱུཏསྶ མོགྒལཱནཏྠེརསྶ དྷམྨཀིཏྟིལོཀགརུསཱམཱིཏི ནཱམཾ ཨདཱསི. ཨཝསེསཱནཾ པན སིརིཝནརཏནསཱམི མངྒལཏྠེརསྶཱམི ཀལྱཱཎཏིསྶསྶཱམི ཙནྡགིརིསཱམི སིརིདནྟདྷཱཏུསཱམི ཝནཝཱསིཏིསྶསཱམི རཏནལངྐཱརསཱམི མཧཱདེཝསཱམི ཨུདུམྦརགིརིསཱམི ཙཱུལཱ༹བྷཡཏིསྶསཱམཱིཏི ནཱམཱནི ཨདཱསི. བཱཝཱིསཏིཡཱ པན པཙྪཱ སམཎཱནཾ ནཱམཾ ན ཨདཱསི. ཨབྷིནཝསིཀྑཾ པན སབྦེསཾཡེཝ ཨདཱསི.

ཏཏོ པཙྪཱ ཙེཏིཡཔཱུཛནཱདཱིནི ཀཏྭཱ ཏཾཏཾཀིཙྩཾ ནིཔྥཱདེཏྭཱ པུན ཨཱགམཾསུ. བྷཱུཝནེཀབཱཧུརཱཛཱ ཙིཏྲདཱུཏཾ ཨེཝམཱཧ, རཱམཱདྷིཔཏིརཉྙོ པཎྞཱཀཱརཾ པཊིདཱཏུཾ ཨིཙྪཱམི, པཊིདཱུཏཉྩ པེསེཏུཾ ཏཱཝ ཏྭཾ ཨཱགམེཧཱིཏི. ཨེཝཾ པན ཝཏྭཱ པཙྪཱ ཨཱགམནཀཱལེ ཙཎྜཝཱཏབྷཡེན མཧཱསམུདྡམཛ྄ཛྷེ ནཱཝཱ ཨཝགཙྪཏི. ཏེན སཱིཧལ༹རཉྙཱ པེསིཏནཱཝཱཡ སབྦེ སནྣིཔཏིཏྭཱ ཨཱརུཧིཏྭཱ ཨཱགཙྪནྟཱ ཏཱིཎི དིཝསཱནི ཨཏིཀྐམིཏྭཱ པུན ཙཎྜཝཱཏབྷཡེན ཨགམྦྷཱིརཊྛཱནེ སིལཱཡ གྷཊྚེཏྭཱ ལགྒིཏྭཱ གནྟུཾ ཨསཀྐུཎིཏྭཱ ཨེཀཾ ཨུལུ༹མྤཾ བནྡྷིཏྭཱ ཛངྒྷེནེཝ ཨགམཾསུ. སཱིཧལ༹རཉྙོ ཙ དཱུཏོ པཎྞཱཀཱརཾ དཏྭཱ པཙྩཱགམཱསི. བྷིཀྑཱུསུ ཙ བྷིཀྑཱུ ཨནྟརཱམགྒེཡེཝ མཙྩུ ཨཱདཱཡ གཙྪཏི. ཨཧོ ཨནིཙྩཱ ཝཏ སངྑཱརཱཏི. ཧོནྟི ཙེཏྠ,–

ཨིམེསཾ པན ཨཱརདྡྷཾ, ན ཀིཙྩཾ ཡཱཝ ནིཊྛིཏཾ;

ན ཏཱཝ ཨཱདིཡིསྶནྟི, མཙྩུ ནཏྠི ཨཱཔེཀྑནཱ.

ནིཀྐཱརུཎིཀོ ཧི ཨེས, བལཀྐཱརེན ཨཱདིཡ;

རོདམཱནཾཝ ཉཱཏཱིནཾ ཨནིཙྪནྟཾཝ གཙྪཏཱིཏི.

རཱམཱདྷིཔཏིརཱཛཱཙ ཏེསཾ བྷིཀྑཱུནཾ པཏྟཀཱལེ ཧཾསཱཝཏཱིནགརསྶ པཙྪིམསྨིཾ དིསཱབྷཱགེ ནརསཱུརེན ནཱམ ཨམཙྩེན པརིབྷུཏྟེ གཱམཁེཏྟེ པཱལི༹ཨཊྛཀཐཱལཱི༹ཀཱདཡོ པུནཔྤུནཾ པསྶིཏྭཱ ཨུཔཔརིཀྑིཏྭཱ སཱིམསམཱུཧནསཱིམསམྨུཏིཀམྨཱནི ཀཱརཔེསི. སཱིཧལ༹དཱིཔེ བྷགཝཏཱ ནྷཱཡིཏཔུབྦཱཡ ཀལྱཱཎིཡཱ ནཱམ ནདིཡཾ ཨུདཀུཀྑེཔསཱིམཾ ཀཏྭཱ ཏཏྠ མཧཱཝིཧཱརཝཱསཱིནཾ བྷིཀྑཱུནཾ སནྟིཀེ ཨུཔལདྡྷཨུཔསམྤདབྷཱཝེཧི བྷིཀྑཱུཧི ཀཏཏྟཱ ཀལྱཱཎཱིསཱིམཱཏི སམཉྙཾ ཨཀཱསི. ཨིཙྩེཝཾ རཱམཱདྷིཔཏིརཱཛཱ པཏྟལངྐེ བྷིཀྑཱུ ནིསྶཱཡ སཱསནཾ སུཊྛུ པཏིཊྛིཏཾ ཨཀཱསི. ཀལིཡུགསྶ ཨཊྛཏིཾསཱདྷིཀཨཊྛཝསྶསཏཀཱལཏོ ཡཱཝ ཨེཀཙཏྟཱལཱིསཱདྷིཀཨཊྛཝསྶསཏཱ ཏེསཾ བྷིཀྑཱུནཾ ཝཾསེ ཨསཱིཏིམཏྟཱ གཎཔཱམོཀྑཏྠེརཱ ཨཧེསུཾ. ཏེསཾ སིསྶཛཱཏཱནི པན ཚབྦིསཱདྷིཀཱནི དྭིསཏཱནི ཙཏུསཧསྶཱནི དསསཧསྶཱནི ཨཧེསུཾ. ཨེཝཾ བྷགཝཏོ སཱསནཾ རཱམཉྙརཊྛེ ཝུཌྜྷིཾ རཱམཉྙརཊྛེ ཝུཌྜྷིཾ ཝིརཱུལི༹ཾ ཝེཔུལླམཱཔཛྫིཏི.

ཨིདཾ རཱམཉྙརཊྛེ སཏྟམཾ སཱསནསྶ པཏིཊྛཱནཾ.

ཡདཱ པན ཨརིམདྡནནགརེ ཨནུརུདྡྷོ ནཱམ རཱཛཱ སུདྷམྨཔུརཾ སརཱཛིཀཾ ཨབྷིབྷཝིཏྭཱ ཝིདྡྷཾསི, ཏདཱ རཱམཉྙརཊྛཾ རཱཛསུཉྙཾ ཧུཏྭཱ པཏིཊྛཧི. རཱམཉྙརཊྛེ མུཏྟིམནགརེ སོཎུཏྟརཝཾསོ ཨེཀོ གཎོ, སིཝལིཝཾསོ ཨེཀོ, ཏཱམལིནྡཝཾསོ ཨེཀོ, ཨཱནནྡཝཾསོ ཨེཀོ, བུདྡྷཝཾསོ ཨེཀོ, མཧཱནཱགཝཾསོ ཨེཀོཏི ཚགྒཎཱ ཝིསུཾ ཝིསུཾ ཧུཏྭཱ ཨཊྛཾསུ ནཱནཱསཾཝཱསཀཱ ནཱནཱནིཀཱཡཱ.

དྷམྨཙེཏིཡརཉྙཱ པན ཀཱརཱཔིཏསཱསནམྤི ཨབྷིཛྫམཱནཾ ཧུཏྭཱ ཨཊྛཱསི. སམཱནསཾཝཱསོ ཨེཀནིཀཱཡོཡེཝ ཨཧོསི. ཧཾསཱཝཏཱིམུཏྟིམསུཝསེན ཏཱིཎིཔི རཱམཉྙརཊྛཱནི སུནཱཔརནྟ སངྑཱཏེན ཨེཀཱབདྡྷཱནི ཧུཏྭཱ ཏིཊྛནྟི. པུབྦེཙ མརམྨརཊྛིནྡརཱཛཱུནཾ ཨཱཎཱཔཝཏྟནཊྛཱནཱནི ཨཧེསུཾ ¶ . ཏསྨཱ མརམྨརཊྛཏོ ཨེཀཙྩེ བྷིཀྑཱུ རཱམཉྙརཊྛཾ གནྟྭཱ ཀལྱཱཎཱིསཱིམཱཡཾ པུན སིཀྑཾ གཎྷིཾསུ. དྷམྨཙེཏིཡརཉྙཱཀཱརཱཝིཏསཱསནཾ སཀལཾ མརམྨརཊྛམྤི བྱཱཔེཏྭཱ ཨོགཱཧེཏྭཱ ཏིཊྛཏི.

རཱམཉྙརཊྛེ སོཎུཏྟརཏྠེརཱནཾ སཱསནཾ པཏིཊྛཱཔིཏཀཱལཏོ པཊྛཱཡ ཡཱཝ སུདྷམྨཔུརེ མནོཧརིརཉྙཱ ཨརཧནྟཱནཾ སཾཝིཛྫམཱནཏཱ ཝེདིཏབྦཱ. ཏཏོ པཙྪཱ པན ཨུཏྟརཱ ཛཱིཝཱརིཡཱཝཾསམཧཱཀཱལ༹པྲཱནདསྶིཏྠེརཱནཾ ཀཱལེ ལོཀིཡཛ྄ཛྷཱནཱབྷིཉྙཱལཱབྷིཡོཡེཝ སཾཝིཛྫཾསཱུཏི. ཨདྷུནཱ པན ཏཱིསུཔི རཱམཉྙརཊྛེསུ དྷམྨཙེཏིཡརཉྙཱ ཀཱརཱཝིཏསཱསནཾཡེཝ ཏིཊྛཏི. ཨེཏྠཙ ཧེཏུཕལསམྦནྡྷཝསེན ཨཱདིཨནྟཝསེནེ ཙ སཱསནཝཾསཾ པཉྙཱཡ ཏུལཡིཏྭཱ ཨཱདིཏོཝ དསྶིཏེཧི ཏཱིཧི ནཡེཧི ཡཐཱཔཝེཎཱི གྷཊྚིཡཏི, ཏཐཱ གཎྷེཡྻཱཏི. ཨཡཉྩ སཱསནཝཾསོ ལཛྫིཔེསལསིཀྑཱཀཱམཱནཾཡེཝ ཝསེན ཝུཏྟོ, ནཱལཛྫཱིནཾ ཝསེནཱཏི དཊྛབྦོ.

ཏཱཡ ཙ ཐེརཔརམྤརཱཡ མུཏྟིམནགརཝཱསིམེདྷངྐརཏྠེརོ ལོཀདཱིཔཀསཱརཾ ནཱམ གནྠཾ ཨཀཱསི. ཧཾསཱཝཏཱིནགརཝཱསཱི པན ཨཱནནྡཏྠེརོ མདྷུསཱརཏྠདཱིཔནིཾ ནཱམ ཨབྷིདྷམྨཊཱིཀཱཡ སཾཝཎྞནཾ, ཧཾསཱཝཏཱིནགརཝཱསཱིཡེཝ དྷམྨབུདྡྷཏྠེརོ ཀཝིསྶཱརཾ ནཱམ ཚནྡོཝཎྞནཾ, ཧཾསཱཝཏཱིནགརཝཱསཱིཡེཝ སདྡྷམྨཱལངྐཱརཏྠེརོ པཊྛཱནསཱརདཱིཔནིཾ ནཱམ པཀརཎཾ, ཏཐེཝ ཨཉྙཏརོ ཐེརོ ཨཕེགྒུསཱརཾ ནཱམ གནྠཾ ཨཀཱསི. ཨེཝཾ ཨནེཀཔྤཀཱརཱནཾ གནྠཀཱརཱནཾ མཧཱཐེརཱནཾ ཝསནཊྛཱནཾ ཧུཏྭཱ སཱསནཾ ཨོགཱཧེཏྭཱ ཝིརཱུལ༹ཊྛཱནཾཨཧོསཱིཏི.

ཨིཏི སཱསནཝཾསེ སུཝཎྞབྷཱུམིསཱསནཝཾསཀཐཱམགྒཱ ནཱམ

ཏཏིཡོ པརིཙྪེདོ.

༤. ཡོནཀརཊྛསཱསནཝཾསཀཐཱམགྒོ

༤. ཨིདཱནི པན ཡོནཀརཊྛེ སཱསནསྶུཔྤཏྟིཾ ཀཐེསྶཱམི ¶ . བྷགཝཱ ཧི ཝེནེཡྻཧིཏཱཝཧོ ཡོནཀརཊྛེ མམསཱསནཾ ཙིརཀཱལཾ པབྷིཊྛཧིསྶཏཱིཏི ཨཱཔེཀྑིཏྭཱ སདྡྷིཾ བྷིཀྑུ སངྒྷེན དེསཙཱརིཀཾ ཨཱཧིཎྜནྟོ ལབྷུཉྫཾ ནཱམ ནགརཾ ཨགམཱསི. ཏདཱ ཨེཀོ ནེསཱདོ ཧརིཕལཾ དཏྭཱ ཏཾ པརིབྷུཉྫིཏྭཱ ཧརིབཱིཛེ ཁིཔིཏེ པཐཝིཡཾ ཨཔཏིཏྭཱ ཨཱཀཱསེཡེཝ པཏིཊྛཱསི. ཏཾ དིསྭཱ སིཏཾ པཏྭཱཀཱསི. ཏམཏྠཾ དིསྭཱ ཨཱནནྡཏྠེརོ པུཙྪི. ཨནཱགཏེ ཁོ ཨཱནནྡ ཨིམསྨིཾ ཋཱནེ མམ དྷཱཏུཙེཏིཡཾ པཏིཊྛཧིསྶཏི, སཱསནཾ ཝིརཱུལ༹མཱཔཛྫིསྶཏཱིཏི བྱཱཀཱསི. བྷགཝཏཱ པན ཧརིཕལསྶ བྷུཉྫིཏཊྛཱནཏྟཱཧརིབྷུཉྫོཏི ཏསྶ རཊྛསྶ ནཱམཾ ཨཧོསི. དྭིནྣཾ ཏཱཔསཱནཾ ཋཔིཏཾ ཛལསུཏྟིཀཾ པཊིཙྩ ཡོནཀཱནཾ བྷཱསཱཡ ལབྷུཉྫོཏི ནཱམཾ ཨཧོསི.

ཏདཱ ཏཏྠ མཔིནྣཱཡ ནཱམ ཨེཀིསྶཱ མཱཏིཀཱཡ སམཱིཔེ ནིསིནྣོ ཨེཀོ ལཝཀུལིཀཛེཊྛཀོ ཨཏྟནོ པུཏྟཾ སཏྟཝསྶིཀཾ བྷགཝཏོ ནིཡྻཱདེཏྭཱ པབྦཱཛེསི. ཀམྨཊྛཱནཱནུཡོགཝསེན ཨཙིརེནེཝ ཨརཧཏྟཾ པཱཔུཎི. སཏྟཝསྶི ཀསྶཙ སཱམཎེརསྶ ཨརཧཏྟཾ སཙྪིཀཏཊྛཱནཏཾ པཊིཙྩ ཡོནཀབྷཱསཱཡ ཨེཏཾ ཋཱནཾ ཙངྒམངྒྷ ཨིཏི ཝུཙྩཏི. ཙིརཀཱལ ཝསེན ཛངྒམངྒྷ ཨིཏི ཝུཙྩཏི. ཏཏོ པཊྛཱཡཡེཝ ཡོནཀརཊྛེ སཱསནཾ པཏིཊྛཱཏཱིཏི.

ཨིདཾ ཡོནཀརཊྛེ པཋམཾ སཱསནསྶ པཏིཊྛཱནཾ.

སཱསནེ པན པཉྩཏིཾསཱདྷིཀེ དྭིཝསྶསཏེ སམྤཏྟེ མཧཱརཀྑིཏཏྠེརོ ཡོནཀརཊྛཾ གནྟྭཱ ཀམྦོཛཁེམཱཝར ཧརིབྷུཉྫཱཡུདྡྷཡཱདཱིསུ ཨནེཀེསུ རཊྛེསུ སཱསནཾ པཏིཊྛཱཔེཏི. ཏཱནི ཧི སབྦཱནི རཊྛཱནི སངྒཧེཏྭཱ དསྶེནྟེཧི ཨཊྛཀཐཱཙརིཡེཧི ཡོནཀལོཀནྟི ཨོཀཱསཀཱལོཀཝཱཙཀེན སཱམཉྙསདྡེན ཝུཏྟཾ. པཀཏི ཧེསཱ གནྠཀཱརཱནཾ ཡེན ¶ ཀེནཙཱཀཱརེན ཨཏྠནྟརསྶ ཝིཉྙཱཔནཱཏི.

མཧཱརཀྑིཏཏྠེརོ ཙ སདྡྷིཾ པཉྩཧི བྷིཀྑཱུཧི པཱཊལིཔུཏྟཏོ ཨནིལཔཐམགྒེན ཡོནཀལོཀཾ ཨཱགནྟྭཱ ཀཱལ༹ཀཱརཱམསུཏྟེན ཡོནཀེ པསཱདེསི. སཏྟཏིསཧསྶཱདྷིཀཔཱཎསཏསཧསྶཾ མགྒཕལཱལངྐཱརཾ ཨདཱསི. སནྟིཀེ ཙསྶ དསསཧསྶཱནི པབྦཛིཾསུ. ཨེཝཾ སོ ཏཏྠསཱསནཾ པཏིཊྛཱཔེསི. ཏཐཱ ཙ ཝུཏྟཾ ཨཊྛཀཐཱཡཾ,–

ཡོནཀརཊྛཾ ཏདཱ གནྟྭཱ, སོ མཧཱརཀྑིཏོ ཨིསི;

ཀཱལ༹ཀཱརཱམསུཏྟེན, ཏེ པསཱདེསི ཡོནཀེཏི.

ཏཏོ པཊྛཱཡ ཏེསཾ སིསྶཔརམྤརཱ བཧཱུ ཧོནྟི, གཎནཔཐཾ ཝཱིཏིཝཏྟཱ.

ཨིདཾ ཡོནཀརཊྛེ མཧཱརཀྑིཏཏྠེརཱདཡོ པཊིཙྩ

དུཏིཡཾ སཱསནསྶ པཏིཊྛཱནཾ.

ཡོནཀརཊྛེ ལཀུནྣནགརེ ཛིནཙཀྐེ པཉྩཝསྶསཏེ མཎིམཡཾ བུདྡྷཔྤཊིམཾ མཱཔེཏྭཱ ཝིསུཀམྨདེཝཔུཏྟོ ནཱགསེནཏྠེརསྶ ཨདཱསི. ནཱགེསེནཏྠེརོ ཙ ཏསྨིཾ པཊིམམྷི དྷཱཏུ ཨཱགནྟྭཱ པཏིཊྛཱཏཱུཏི ཨདྷིཊྛཱསི. ཨདྷིཊྛཱནཝསེནེཝ སཏྟདྷཱཏུཡོ ཨཱགནྟྭཱ ཏཏྠ པཏིཊྛཧིཏྭཱ པཱཊིཧཱརིཡཾ དསྶེསུནྟི རཱཛཝཾསེ ཝུཏྟཾ.

ཏཉྩ ཝཙནཾ མམ པརིནིབྦཱནཏོ པཉྩཝསྶསཏེ ཨཏིཀྐནྟེ ཨེཏེ ཨུཔྤཛྫིསྶནྟཱིཏི མིལིནྡཔཉྷཱཡཾ ཝུཏྟཝཙནེན ཀཱལཔརིམཱཎཝསེན ཙ སམེཏི. ཡོནཀརཊྛེ མིལིནྡརཉྙོ ཀཱལེ ཛིནཙཀྐེ པཉྩཝསྶསཏེཡེཝ ནཱགསེནཏྠེརཾ པཊིསྶ ཛིནཙཀྐཾ ཝིརཱུལ༹ཾ ཧུཏྭཱ པཏིཊྛཱསི.

ཨིདཾ ཡོནཀརཊྛེ ནཱགསེནཏྠེརཾ པཊིཙྩ ཏཏིཡཾ

སཱསནསྶ པཏིཊྛཱནཾ.

ཀལིཡུགེ ¶ པཉྩསཊྛིཝསྶེལབྷུཉྫནགརཏོ སངྐམིཏྭཱ ཀྱུངྒརནགརེ མཱཔིཀསྶ བཉྙཱཙོམངྒར ནཱམཀསྶ རཉྙོ ཀཱལེ མཛ྄ཛྷིམདེསཏོ ཀསྶཔཏྠེརོ པཉྩཧི ཐེརེཧི སདྡྷིཾ ཨཱགཙྪི.

ཏདཱ སོ རཱཛཱ ཝིཧཱརཾ ཀཏྭཱ ཏེསཾ ཨདཱསི. སཱིཧལ༹དཱིཔཏོ ཙ དྷཱཏུཡོ ཨཱནེཏྭཱ ཨེཀོ ཐེརོ ཨཱགཙྪི. དྷཱཏུཏོ པཱཊིཧཱརིཡཾ དིསྭཱ པསཱིདིཏྭཱ ལབྷུཉྫཙེཏིཡ ནིདྷཱནཾ ཨཀཱསི. ཏེ ཙ ཐེརེ པཊིཙྩ ཡོནཀརཊྛེ སཱསན ཝཾསོ ཨཱགཏོ.

ཨིདཾ ཡོནཀརཊྛེ ཙཏུཏྠཾ སཱསནསྶ པཏིཊྛཱནཾ.

ཀལིཡུགེ དྭཱསཊྛཱདྷིཀེ སཏྟསཏེ སམྤཏྠེ ཙིནརཊྛིནྡོ རཱཛཱ ཨབྷིབྷཝིཏྭཱ སཀལམྤི ཡོནཀརཊྛཾ སངྑུབྦྷིཏཾ ཧོཏི. ཏདཱ མཧཱདྷམྨགམྦྷཱིརཏྠེརོ མཧཱམེདྷངྐརཏྠེ རོཙཱཏི དྭེ ཐེརོ ཡོནཀརཊྛཏོ སདྡྷིཾ བཧཱུཧི བྷིཀྑཱུཧི སཱིཧལ༹དཱིཔཾ ཨགམཾསུ. ཏདཱ ཙ སཱིཧལ༹དཱིཔེ དུབྦྷིཀྑབྷཡེན ཨབྷིབྷཱུཏོ ཧུཏྭཱ ཏཏོ སྱཱམརཊྛེ སོཀྐཏཡནགརཾ པུན ཨགམཾསུ.

ཏཏོ པཙྪཱ ལཀུནྣནགརཾ གནྟྭཱ སཱསནཾ པགྒཎྷནྟཱནཾ ལཛྫིཔེསལཱནཾ བྷིཀྑཱུནཾ སནྟིཀེ པུན སིཀྑཾ གཎྷིཾསུ. ཏེ ཙ ཐེརོ སྱཱམརཊྛེ ཡོནཀརཊྛེ ཙ སབྦཏྠ སཱསནཾ པཏིཊྛཱཔེསུནྟི.

ཨིདཾ ཡོནཀརཊྛེ པཏྟལངྐེ དྭེ ཐེརེ པཊིཙྩ པཉྩམཾ

སཱསནསྶ པཏིཊྛཱནཾ.

ཀལིཡུགེ པཉྩཝཱིསཱདྷིཀེ ཨཊྛཝསྶསཏེ སམྤཏྟེ སིརིསདྡྷམྨལོཀཔཏིཙཀྐཝཏྟིརཱཛཱ ལབྷུཉྫཙེཏིཡཾ པུན མཧནྟཾ ཀཏྭཱ ¶ ཏསྶ ཙེཏིཡསྶ སམཱིཔེ ཙཏྟཱརོ ཝིཧཱརེ ཀཱརཱཔེཏྭཱ མཧཱམེདྷངྐརཏྠེརསྶ སཱརིཔུཏྟཏྠེརསྶ ཙ ཨདཱསི. ཏདཱཔི ཏེ དྭེ ཐེརཱ སཱསནཾ པརིསུདྡྷཾ ཀཏྭཱ པཏིཊྛཱཔེསུནྟི.

ཨིདཾ ཡོནཀརཊྛེ མཧཱམེདྷངྐརསཱརིཔུཏྟཏྠེརེ

པཊིཙྩ ཚཊྛཾ སཱསནསྶ པཏིཊྛཱནཾ.

ཀལིཡུགེ ཏེཙཏྟཱལཱིསཱདྷིཀེ ནཝཝསྶསཏེ སམྤཏྟེ ཧཾསཱཝཏཱིནགརེ ཨནེཀསེཏིབྷིནྡོ ནཱམ རཱཛཱ ཡོནཀརཊྛཾ ཨབྷིབྷཝིཏྭཱ ཨཏྟནོ ཧཏྠགཏཾ ཀཏྭཱ བལི བྷུཉྫནཏྠཱཡ ཛེཊྛཔུཏྟསྶ ཨནུརུདྡྷསྶ ནཱམ རཱཛཀུམཱརསྶ དཏྭཱ བཧཱུཧི ཨམཙྩེཧི སདྡྷིཾ ཏཏྠ གནྟྭཱ ཨནུརཱཛཏཱཝེན རཛྫཾ ཀཱརཱཔེསི. སཱསནཉྩ ཝིསོདྷཱཔེཏུཾ སདྡྷམྨཙཀྐསཱམིཏྠེརཾ ཏེན སདྡྷིཾ པཧིཎི.

ཨནེཀསེཏིབྷིནྣོ ཀིར རཱཛཱ ཡོནཀརཊྛཾ ཝིཛཡཀཱལེ པཋམཾ སཱསནསྶ པཏིཊྛཱནབྷཱུཏམིདནྟི ཀཏྭཱ ཏཾརཊྛཝཱསིནོ ཀརམརཱནཱིཏབྷཱཝེན ན ཨགྒཧེསཱིཏི.

ཡཐཱཝུཏྟཏྠེརཝཾསེསུ ཙ ཨེཀོ ལཀུནྣནགརེ ཨརཉྙཝཱསཱི ཐེརོ ཏཏྠ ནགརེ ཨཛྫ ཨསུཀསྨིཾ ཋཱནེ ཨེཀོ མཏོཏི གིཧཱིནཾ ཀཐེཏྭཱ ཡཐཱཀཐིཏཾ བྷཱུཏཾ ཧུཏྭཱ ཨཡཾ ཨབྷིཉྙཱལཱབྷཱིཏི པཱཀཊོ ཨཧོསི.

ཏསྨིཾཡེཝ ཙ ནགརེ མཧཱམངྒལོ ནཱམ ཐེརོ ཨནེཀསེཏིབྷིནྡསྶ རཉྙོ ཡུཛ྄ཛྷིཏུཾ ཨཱགཏཀཱལེ ཨནེཀསེཏིབྷིནྡོ རཱཛཱ མཾ པཀྐོསིསྶཏི, སམཱནཛཱཏིཀཾ དཱུཏཾ པེསྶེསྶཏཱིཏི པཀྐོསིཏཀཱལཏོ པཋམམེཝཝདི. ཡཐཱཝུཏྟནིཡཱམེནེཝ པཀྐོསནཏོ ཨཡཾ ཨབྷིཉྙཱ ལཱབྷཱིཏི ཀིཏྟི གྷོསོ ཨཧོསི.

ཏཏྠ ནགརེ ཉཱཎཝིལཱསཏྠེརོ སངྑྱཱཔཀཱསཀཾ ནཱམ ¶ པཀརཎཾ ཨཀཱསི. ཏཾལཱི༹ཀཾ པན པཏྟལངྐཏྠེརསྶ ཝིཧཱརེ ཝསནྟོ སིརིམངྒལོནཱམ ཐེརོ ཨཀཱསི.

ཝིསུདྡྷིམགྒདཱིཔནིཾ པན སཾཉྙྭཏྟཨརཉྙཝཱསཱི ཨུཏྟརཱརཱམོ ནཱམ ཨེཀོ ཐེརོ. མངྒལདཱིཔནིཾ སིརིམངྒལཏྠེརོ. ཨུཔྤཱཏསནྟིཾ ཨཉྙཏརོ ཐེརོ. ཏཾ ཀིར ཨུཔྤཱཏསནྟིཾ སཛ྄ཛྷཱཡིཏྭཱ ཙཱིནརཉྙོ སེནཾ ཨཛིནཱིཏི. ཨིཙྩེཝཾ ཡོནཀརཊྛེ ཨབྷིཉྙཱལཱབྷཱིནཾ གནྠཀཱརཱནཉྩ ཐེརཱནཾ ཨཱནུབྷཱཝེན ཛིནསཱསནཾ པརིསུདྡྷཾ ཧུཏྭཱ པཏིཊྛཱཏི. ཨེཝཾ ཧེཏུཕལསམྦནྡྷཝསེན ཨཱདི ཨནྟ སམྦནྡྷཝསེན ཙ ཡཐཱཝུཏྟེཧི ཏཱིཧི ནཡེཧི ཐེརཔརམྤརཱ གྷཊྚེཏྭཱ གཧེཏབྦཱ.

ཨིཏི སཱསནཝཾསེ ཡོནཀརཊྛསཱསནཝཾསཀཐཱ

མགྒོ ནཱམ ཙཏུཏྠོ པརིཙྪེདོ.

༥. ནཝཝཱསཱིརཊྛསཱསནཝཾསཀཐཱམགྒོ

༥. ཨིདཱནི ཝནཝཱསཱིརཊྛེ སིརིཁེཏྟནགརསཱསནཝཾསཾ ཝཀྑཱམི. ཛིནཙཀྐེ ཧི ཨེཀཱདྷིཀེ ཝསྶསཏེ སམྤཏྟེ ཛཊིལོ སཀྐོ ནཱགོ གརུལོ༹ ཀུམྦྷཎྜོ ཙནྡཱི པརམཱིསྭརོཙཱཏི ཨིམེ སཏྟ སིརིཁེཏྟཾ ནཱམ ནགརཾ མཱཔེསུཾ. ཏཏྠ དྭཏྟཔོངྐོ ནཱམ རཱཛཱ རཛྫཾ ཀཱརེསི. ཏསྶ ཀིར ཏཱིཎི ཨཀྑཱིནི སནྟཱིཏི. ཏདཱ བྷགཝཏོ སཱཝཀཱ ཨརཧནྟཱ ཏིསཧསྶམཏྟཱ ཏཏྠ ཝསིཾསུ. སོ རཱཛཱ ཏེསཾ ཨརཧནྟཱནཾ དེཝསིཀཾ ཙཏཱུཧི པཙྩཡེཧི ཨུཔཏྠམྦྷི. ཚ སརཱིརདྷཱཏུཡོ ཙ ཨེཀེཀཾ ཨེཀེཀསྨིཾ ནིདཧིཏྭཱ ཚ ཙེཏིཨིཡཱནི ཀཱརཱཔེསི. དཀྑིཎབཱཧུཾ པན ནིདཧིཏྭཱ ཨེཀམྤི ཙེཏིཡཾ ཀཱརཱཔེསི.

ཨུཎྷཱིསདྷཱཏུཾ པན ཀངྒརནྣགརཏོ ཨཱནེཏྭཱ ཨེཀམྤི ཙེཏིཡཾ ཀཱརཱཔེསི. ཏཾ པན ཏཱཝ ན ནིཊྛིཏཾ. པཙྪཱ ཨནུརུདྡྷརཱཛཱ གཧེཏྭཱ ཨརིམདྡནནགརཾ ཨཱནེཏྭཱ ཙཉྙིངྑུ ནཱམ ཙེཏིཡེ ནིདྷཱནཾ ¶ ཨཀཱསི. ཏསྨཱ རཀྑིཏཏྠེརསྶ ཨཱགམནཏོ པུབྦེཔི སཱསནཾ པཏིཊྛཱསཱིཏི དཊྛབྦཾ. ཏཏོ པཙྪཱ སཱསནཾ དུབྦལཾ ཧུཏྭཱ ཨཊྛཱསི.

ཨིདཾ ཝནཝཱསཱིརཊྛེ པཋམཾ སཱསནསྶ པཏིཊྛཱནཾ.

མཧཱམོགྒལིཔུཏྟཏིསྶཏྠེརེན པན པེསིཏོ རཀྑིཏཏྠེརོ ཝནཝཱསཱིརཊྛཾ གནྟྭཱ ཨཱཀཱསེ ཋཏྭཱ ཨནམཏགྒཔརིཡཱཡཀཐཱཡ ཝནཝཱསིཀེ པསཱདེསི. ཀཐཱཔརིཡོསཱནེ པནསྶ སཊྛིསཧསྶཱནཾ དྷམྨཱབྷིསམཡོ ཨཧོསི. སཏྟཏིསཧསྶམཏྟཱ པབྦཛིཾསུ. པཉྩཝིཧཱརསཏཱནི པཏིཊྛཱཔེསུཾ. ཨེཝཾ སོ ཏཏྠ སཱསནཾ པཏིཊྛཱཔེསི. ཏེནེཝ ཨཊྛ ཀཐཱཡཾ –

གནྟྭཱན རཀྑིཏཏྠེརོ,

ཝནཝཱསིཾ མཧིདྡྷིཀོ;

ཨནྟལིཀྑེ ཋིཏོ ཏཏྠ,

དེསེསི ཨནམཏགྒིཡནྟི ཝུཏྟཾ.

ཨེཝཾ ཝནཝཱསཱིརཊྛེ པུབྦེཡེཝ སཱསནཾ ཨོགཱཧེཏྭཱ པཏིཊྛཧི. ན པན ཏཱཝ སཀལཾ བྱཱཔེཏྭཱ པཏིཊྛཧི.

ཨིདཾ ཏཱཝ ཝནཝཱསཱིརཊྛེ སིརིཁེཏྟནགརེ དུཏིཡཾ

སཱསནསྶ པཏིཊྛཱནཾ.

ཛིནཙཀྐེ པན ཏེཏྟིཾསཱདྷིཀེ ཙཏུཝསྶསཏེ ཀུཀྐུཊ སཱིསོ ནཱམ ཨེཀོ རཱཛཱ རཛྫཾ ཀཱརེསི. ཏསྶ རཉྙོ ཀཱལེ བྷགཝཏོ སཱཝཀཱ ཨརཧནྟཱ པཉྩསཏམཏྟཱ ཨཧེསུཾ. ཏེསམྤི སོ རཱཛཱ དེཝསིཀཾ ཙཏཱུཧི པཙྩཡེཧི ཨུཔཏྠམྦྷེསི. སོཏཱཔནྣསཀདཱགཱམིཨནཱགཱམིནོ པན གཎནཔཐཾ ¶ ཝཱིཏིཝཏྟཱ ཨཧེསུཾ.

ཨིདཾ ཝནཝཱསཱིརཊྛེ སིརིཁེཏྟནགརེ པརམྤརཱབྷཏཝསེན

ཏཏིཡཾ སཱསནསྶ པཏིཊྛཱནཾ.

ཨིཙྩེཝཾ ཝནཝཱསཱིརཊྛེ ཨནེཀསཏེཧི ཨརཧནྟཏྠེརེཧི སཱསནཾ པུཎྞིནྡུསངྐཱསཾ ཧུཏྭཱ ཨཏིཝིཡ ཝིཛྫོཏེསི. སཱསནིཀ གནྠཀཱརཱ པན མཧཱཐེརཱ ཏཏྠ ན སནྡིསྶནྟི. ཨརཧནྟཏྠེརཱ པན རཱཛཱུནཾ ཨཱཡཱཙནཾ ཨཱརབྦྷ དྷམྨསཏྠཾ ཨེཀཾ ཝིརཙཡིཾསཱུཏི པོརཱཎཱ ཝདནྟཱིཏི. ཨིཙྩེཝཾ–

ཏེཙ ཐེརཱ མཧཱཔཉྙཱ,

པགྒཧེཏྭཱན སཱསནཾ;

སཱུརིཡོ ཝིཡ ཨཏྠངྒོ,

ཨུཔགཱ མཙྩུསནྟིཀཾ.

ཏསྨཱ ཧི པཎྜིཏོ པོསོ,

ཡཱཝ མཙྩུ ནཙཱགཏོ;

ཏཱཝ པུཉྙཾ ཀརེ ནིཙྩཾ,

མཱ པམཛྫེཡྻ སབྦདཱཏི.

ཨིཏི སཱསནཝཾསེ ཝནཝཱསཱིརཊྛསཱསནཝཾསཀཐཱམགྒོ

ནཱམ པཉྩམོ པརིཙྪེདོ.

༦. ཨཔརནྟརཊྛསཱསནཝཾསཀཐཱམགྒོ

༦. ཨིདཱནི པན མརམྨམཎྜལེ ཨཔརནྟརཊྛེ སཱསནཝཾསཾ ཝཀྑཱམི. ཨམྷཱཀཉྷི མརམྨརཊྛེ སུཔྤཱདཀཏིཏྠེ ཝཱཎིཛགཱམེ ཝསནྟེ ཙཱུལ༹པུཎྞ མཧཱཔུཎྞེདྭེ བྷཱཏིཀེ པཊིཙྩ བྷགཝཏོ དྷརམཱནསྶེཝ ཨཏིརེཀཝཱིསཏིཝསྶཀཱལཏོ པབྷུཏི སཱསནཾ པཏིཊྛཱསི. ན པན ཏཱཝ བྱཱཔེཏྭཱ པཏིཊྛཱསི. ཏེནེཝ པུན སཱསནསྶ པཏིཊྛཱཔནཏྠཱཡ མཧཱམོགྒལིཔུཏྟཏིསྶཏྠེརོ ¶ ཡོནཀདྷམྨརཀྑིཏཏྠེརཾ པེསེསཱིཏི.

བྷགཝཱ པན ལོཧིཏཙནྡནཝིཧཱརཾ པཊིགྒཧེཏྭཱ སཏྟསཏྟཱཧཱནི ནིསཱིདིཏྭཱ སམཱགཏཱནཾ དེཝམནུསྶཱནཾ དྷམྨརསཾ ཨདཱསི. སཏྟཱཧེསུ ཙ ཨེཀསྨིཾ ཨཧུ ཙཏུརཱསཱིཏིཔཱཎསཧསྶཱནཾ དྷམྨཱབྷིསམཡོ ཨཧོསི. པཉྩསཏམཏྟེཧི ཙ པཱསཱདེཧི ཨཱགཙྪནྟོ ཨནྟརཱམགྒེ སཙྩབནྡྷཔབྦཏེ ནིསིནྣསྶ སཙྩབནྡྷསྶ ནཱམ ཨིསིནོ དྷམྨཾ དེསེཏྭཱ ཚཧི ཨབྷིཉྙཱཧི སདྡྷིཾ ཨརཧཏྟཾ པཱཔེསི. ཝཱཎིཛགཱམེ ཙ ཨིསིདིནྣསེཊྛི ཨཱདཱིནམྤི དྷམྨརསཾ པཱཡེསི. ཨིཙྩེཝཾ སཙྩབནྡྷཨིསིདིནྣམཧཱཔུཎྞཱདཡོ པཊིཙྩ ཨམྷཱཀཾ མརམྨམཎྜལེ སཱསནཾ པཏིཊྛཱསི.

ཨིདཾ མརམྨམཎྜལེ ཨཔརནྟརཊྛེ པཋམཾ སཱསནསྶ

པཏིཊྛཱནཾ.

བྷགཝཏོ པརིནིབྦུཏཏོ པཉྩཏིཾསཱདྷིཀེ དྭིཝསྶསཏེ སམྤཏྟེ ཏཏིཡསངྒཱིཏིཾ སངྒཱཡིཏྭཱ ཨཝསཱནེ མཧཱམོགྒལིཔུཏྟཏིསྶཏྠེརོ ཨཏྟནོ སདྡྷིཝིཧཱརིཀཾ ཡོནཀདྷམྨརཀྑིཏཏྠེརཾ སདྡྷིཾ ཙཏཱུཧི བྷིཀྑཱུཧི ཨཔརནྟརཊྛཾ པེསེསི. ཨཔརནྟརཊྛཉྩ ནཱམ ཨམྷཱཀཾ མརམྨམཎྜལེ སུནཱཔརནྟརཊྛམེཝ. ཏམཏྠཾ པན ཧེཊྛཱ ཨཝོཙུམྷཱ.

ཡོནཀདྷམྨརཀྑིཏཏྠེརོཔི ཨཔརནྟརཊྛཾ ཨཱགནྟྭཱ ཨགྒིཀྑནྡྷོཔམསུཏྟེན རཊྛཝཱསཱིནཾ པསཱདེསི. སཏྟཏིམཏྟཱནཾ པཱཎསཧསྶཱནཾ དྷམྨརསཾ པཱཡེསི. རཊྛཝཱསིནོ ཙ བཧཝོ སཱསནེ པབྦཛིཾསུ. རཱཛཀུལཏོཔི སཧསྶམཏྟཱ པབྦཛིཾསུ. ཨིཏྠཱིནཾ པན ཨཏིརེཀསཊྛིསཧསྶམཏྟཱ པབྦཛིཾསུ. ཏཉྩ ན ཨགྒིཀྑནྡྷོཔམསུཏྟནྟཾ སུཏྭཱ པབྦཛནྟཱིནཾ ཨིཏྠཱིནཾ ཝསེན ཝུཏྟཾ, ཨཐ ཁོ ཨཱདིཏོ པཊྛཱཡ ཡཱཝཙིརཀཱལཱ སཱསནཾ པསཱིདིཏྭཱ པབྦཛནྟཱིནཾ ཨིཏྠཱིནཾ ཝསེན ཝུཏྟནྟི དཊྛབྦཾ. ཀསྨཱཏི ཙེ, ཨིཏྠཱིནཾ བྷིཀྑུནཱིནཾ སནྟིཀེཡེཝ པབྦཛིཏུཾ ཡུཏྟཏྟཱ ཡོནཀདྷམྨརཀྑིཏཏྠེརེན ¶ ཙ སདྡྷིཾ བྷིཀྑུནཱིནཾ ཨནཱགཏཏྟཱ. ཨེཝཾ ཙིརཀཱལཾ ཨཏིཀྐམིཏྭཱ པཙྪཱ བྷིཀྑུནིཡོ ཨཱགནྟྭཱ ཏཱསཾ སནྟིཀེ པབྦཛིཏཱནཾ ཝསེན ཝུཏྟནྟི དཊྛབྦཾ. སཱིཧལ༹དཱིཔེ ཨནུལཱ༹དེཝིཡོ པབྦཛིཏཀཱལེ མཧཱམཧིནྡཏྠེརསྶ སངྒྷམིཏྟཱཐེརིཡཱ པཀྐོསནཏཱ ཨིདྷ ཉཱཔཀཱཏི. ཨེཝཾ ཡོནཀདྷམྨརཀྑིཏཏྠེརཾ པཊིཙྩ ཨཔརནྟརཊྛེ སཏྟཱནཾ བཧུཔཀཱརོ ཨཧོསི. ཏེནེཝཊྛཀཐཱཡཾ–

ཨཔརནྟཾ ཝིགཱཧིཏྭཱ, ཡོནཀོ དྷམྨརཀྑིཏོ;

ཨགྒིཀྑནྡྷཱུཔམེནེཏྠ, པསཱདེསི ཛནེ བཧཱུཏི.

ཏཏྠཱཡཾ ཨདྷིཔྤཱཡ ཝིསེསོ གཧེཏབྦོ. ཀཐཾ. ཨགྒིཀྑནྡྷོཔམསུཏྟནྟཾ ནཱམ བྷིཀྑཱུནཾ པཊིཔཏྟིཝསེན ཝུཏྟཾ, ཏཾ བྷིཀྑཱུནཾཡེཝ དེསེཏུཾ ཝཊྚཏི, ཐེརོཔི ཏཏྠ ཏཾ དེསེསི, ཏསྨཱ པུཎྞསཙྩབནྡྷཱདཡོ པཊིཙྩ བྷགཝཏོ དྷརམཱནསྶ ཝཱིསཏིཝསྶཀཱལེཡེཝ སཱསནཾ ཨཔརནྟརཊྛེ པཏིཊྛཧིཏྭཱ ཀསྨིཉྩི ཀསྨིཉྩི ཋཱནེ བྷིཀྑཱུནཾ སཾཝིཛྫམཱནཏྟཱ ཏེསཾ བྷིཀྑཱུནཾ སངྒཧེཏྭཱ དེསེཏུཾ པཙྪཱ ཨཱགཏཱནཉྩ བྷིཀྑཱུནཾ པརིསུདྡྷཱཙཱརཏཾ ཝིཉྙཱཔེཏུཾ ཨགྒིཀྑནྡྷོཔམསུཏྟཾ ཐེརོ དེསེསཱིཏི. ཨེཝཉྩ སཏི ཨརིམདྡནནགརེ སམཎཀུཏྟཀཱནཾ སཾཝིཛྫམཱནབྷཱཝཾ ཝཀྑམཱནེན ཝཙནེན སམེཏི.

ཨིདཾ མརམྨམཎྜལེ ཨཔརནྟརཊྛེ དུཏིཡཾ

སཱསནསྶ པཏིཊྛཱནཾ.

ཡསྨཱ པན བུདྡྷེ, བྷགཝཱ པུཎྞཏྠེརསྶ ཡཱཙནམཱརབྦྷ ཨཔརནྟརཊྛཾ ཨཱགནྟྭཱ ཝཱཎིཛེ ཧི ཀཱརིཏེ ཙནྡནཝིཧཱརེ ཝསིཏྭཱ ཨེཀསྨིཾ སམཡེ ཨཱནནྡེན པཙྪཱསམཎེན ཏམྦདཱིཔརཊྛམྤི དེསཙཱརིཀཾ ཨཱཧིཎྜི. ཨཱཧིཎྜིཏྭཱ ཨརིམདྡནནགརཊྛཱནསམཱིཔཾ པཏྭཱ པབྦཏམུདྡྷནི ཋཏྭཱ ཨནཱགཏེ ཁོ ཨཱནནྡ ཨིམསྨིཾ པདེསེ སམྨུཏི ནཱམ རཱཛཱ ཨརིམདྡནཾ ནཱམ ནགརཾ མཱཔེསྶཏི ¶ , ཏསྨིཉྩ ནགརེ མམ སཱསནཾ ཝིརཱུལ༹ཾ ཧུཏྭཱ པཏིཊྛཧིསྶཏཱིཏི བྱཱཀཱསི. ཨཡམཏྠོ པོརཱཎཝེདཔཱཏྠཀེསུ ཝུཏྟོ.

ཡོནཀདྷམྨརཀྑིཏཏྠེརོ ཙ ཨཔརནྟརཊྛཾ ཨཱགནྟྭཱ ཏམྦདཱིཔརཊྛམྤི ཨཱཧིཎྜིཏྭཱ ཏམྦདཱིཔརཊྛཝཱསཱིནམྤི དྷམྨརསཾ པཱཡེསིཡེཝ. ཨཡམཏྠོ ཁཏྟིཡཀུལཏོ ཨེཝ པུརིསསཧསྶཱནི པབྦཛིཾསཱུཏི ཨཊྛཀཐཱཡཾ ཝུཏྟཏྟཱ ཝིཉྙཱཡཏི. ཏདཱ ཧི ཨཔརནྟརཊྛེ ཁཏྟིཡོ ནཏྠི, ཏམྦདཱིཔརཊྛིནྡོཡེཝ ཏཾ ཨནུསཱསེཏྭཱ ཨཏི ཝསཏི, ཁཏྟིཡེ ཙ ཨཱསནྟེ ཀུཏོ ཁཏྟིཡཀུལཱནི བྷཝིསྶནྟི, ཏེནེཝ ཏམྦདཱིཔརཊྛཏོ པུརིསསཧསྶཱནི པབྦཛིཾསཱུཏི ཝིཉྙཱཏབྦཾ. ཏསྨཱ ཏམྦདཱིཔིཀསཱསནཝཾསམྤི ཨིདྷ ཝཏྟུཾ ཡུཛྫཏི.

ཏེནིདཱནི ཏམྦདཱིཔིཀཱསཱསནཝཾསཾ པཝཀྑཱམི. ཨམྷཱཀཉྷི མརམྨམཎྜལེ ཏམྦདཱིཔརཊྛེ ཨརིམདྡནནགརེ སམྨུཏིརཱཛཱ ནཱམ བྷཱུཔཱལོ རཛྫཾ ཀརེསི. ཏཏོ པཊྛཱཡ ཡཱཝ ཨནུརུདྡྷརཉྙཱ སམཐི ནཱམཀེ དེསེ ནིསིནྣཱནཾ ཏིཾསམཏྟཱནཾ སམཎཀུཏྟཀཱནཾ སཊྛིསཧསྶམཏྟཱནཾ སིསྶཱནཾ ཨོཝཱདཾ དཏྭཱ ཙརིཾསུ.

ཏེསཾ པན སམཎཀུཏྟཀཱནཾ ཨཡཾ ཝཱདོ,- སཙེ ཡོ པཱཎཱཏིཔཱཏཾ ཀརེཡྻ, སོ ཨཱིདིསཾ པརིཏྟཾ བྷཎནྟོ ཏམྷཱ པཱཔཀམྨཱ པརིམུཙྩེཡྻ, སཙེ པན ཡོ མཱཏཱཔིཏརཾ ཧནྟྭཱ ཨནནྟརིཡཀམྨཏོ པརིམུཙྩིཏུཀཱམོ བྷཝེཡྻ, ཨཱིདིསཾ པརིཏྟཾ བྷཎེཡྻ, སཙེཔི པུཏྟདྷིཏཱནཾ ཨཱཝཱཧཝིཝཱཧཀམྨཾ ཀཏྟུཀཱམོ བྷཝེཡྻ, ཨཱཙརིཡཱནཾ པཋམཾ ནིཡྻཱདེཏྭཱ ཨཱཝཱཧཝིཝཱཧཀམྨཾ ཀཱཏབྦཾ, ཡོ ཨིདཾ ཙཱརིཏྟཾ ཨཏིཀྐམེཡྻ, བཧུ ཨཔུཉྙཾ པསཝེཡྻཱཏི ཨེཝམཱདཱིཧི མིཙྪཱཝཱདེཧི ཨཏྟནོ ཨཏྟནོ ཨུཔགཏཱནཾ ཨོཝཱདཾ ཨདཾསུ. ཏམཏྠཾ སུཏྭཱ ཨནུརུདྡྷརཱཛཱ པརིཙིཏཔུཉྙོ ཏེསཾ ཝཱདཾ ན རུཙི. ཨཡཾ ཏེསཾ མིཙྪཱཝཱདོཏི.

ཏདཱ ¶ ཙ ཨརིམདྡནནགརེ ཨརཧནྟོ ནཱམ ཐེརོ ཨཱགནྟྭཱ སཱསནཾ པཏིཊྛཱཔེསི. ཨཡཾ ཨརཧནྟཏྠེརསྶ ཨཊྛུཔྤཏྟི,– རཱཛཝཾསཱགཏཔརིཏྟནིདཱནཱགཏསཱསནཔྤཝེཎིཡཱགཏཝསེན ཏིཝིདྷཱ ཧོཏི.

ཏཏྠཱཡཾ རཱཛཝཾསཱགཏཊྛུཔྤཏྟི,– ཏདཱ ཧི སུནཱཔརནྟཏམྦདཱིཔརཊྛེསུ སབྦེན སབྦཾ སབྦདཱ ཐིརཾ སཱསནཾ ན ཏཱཝ པཏིཊྛཱསི. ཏེནེཝ བྷགཝཏོ བྱཱཀཏནིཡཱམེན སཱསནཾ པཏིཊྛཱཔེསྶཱམཱཏི ཙིནྟེཏྭཱ མཧཱཐེརཱ སཀྐསྶ དེཝཱནམིནྡསྶ སནྟིཀཾ གནྟྭཱ སཱསནཾ ཨནུགྒཧིཏུཾ སམཏྠཾ པུགྒལཾ དེཧཱིཏི ཡཱཙིཾསུ. སཀྐོཙ དེཝཱནམིནྡོ ཏཱཝཏིཾསབྷཝནེ ཨེཀཾ དེཝཔུཏྟཾ ཡཱཙིཏྭཱ ཨེཀིསྶཱ བྲཱཧྨཎིཡཱ ཀུཙྪིམྷི པཊིསནྡྷིཾ གཎྷཱཔེསི. དསམཱསཙྩཡེན ཝིཛཱཡནཀཱལེ སཱིལབུདྡྷི ནཱམ ཐེརོ ཨནུརཀྑིཏྭཱ ཝཡེ སམྤཏྟེ པབྦཱཛེསི. ཏཱིསུ པིཊཀེསུ ཨཏིཝིཡ ཚེཀོ ཧུཏྭཱ ཨརཧཏྟཾ པཱཔུཎི. ཨརཧནྟོཏི ནཱམེན པཱཀཊོ ཨཧོསི.

སོཙ ཐེརོ མརམྨམཎྜལེ ཛིནསཱསནཾ ཝིཛྫོཏཱཔེཏུཾ ཨརིམདྡནནགརཾ ཨཱགནྟྭཱ ནགརཏོ ཨཝིདཱུརེ ཨེཀསྨིཾ ཨརཉྙེ ནིསཱིདི. ཏདཱ སཀྐོ དེཝཱནམིནྡོ ཨེཀཾ ནེསཱདཾ པལོབྷེཏྭཱ ཏསྶ ཐེརཾ དསྶེསི. ཨཐ ནེསཱདསྶ ཨེཏདཧོསི,– ཨཡཾ པན ཨམནུསྶོ ཡཀྑོ བྷཝེཡྻ, སཙེ པན མནུསྶོ བྷཝེཡྻ, ཨེཝཾ སཏི མིལཀྑུཛཱཏིཀོ བྷཝེཡྻཱཏི. ཨེཝཾ པན ཙིནྟེཏྭཱ རཉྙོ དསྶནཏྠཱཡ ནགརཾ ཨཱནེསི. ཐེརོ ཙ ཨཊྛཔརིཀྑཱརེ གཧེཏྭཱ ཨནུགཙྪི. ནེསཱདཱ ཙ ཐེརཾ ཨཱནེཏྭཱ རཉྙོ དསྶེསི.

རཱཛཱ དིསྭཱ སནྟིནྡྲིཡོ ཨཡཾ, ན མིལཀྑུཛཱཏིཀོ, ཨིམསྶ ཨབྦྷནྟརེ སཱརདྷམྨོ ཨཏྠི མཉྙེཏི ལདྡྷསཱུརིཡོབྷཱསཾཝིཡ པདུམཾ ཕུལླཙིཏྟཾ ཧུཏྭཱ ཝཱིམཾསེཏུཀཱམོ ཐེརཾ ཨཱཧ,– ཨཏྟནོ སཱརུཔྤཾ ཨཱསནཾ ཉཏྭཱ ནིསཱིདཱཧཱིཏི.

ཐེརོ ཙ རཱཛཔལླངྐཾ ཨཱརུཧིཏྭཱ ནསཱིདི. རཱཛཱ ཙ ཨཡཾ ཨགྒཱསནེ ¶ ནིསཱིདི, ཨཝསྶཾ ཨགྒཔུགྒལོ བྷཝེཡྻཱཏི ཙིནྟེཏྭཱ ཏྭཾ ཀསྶ ཉཱཏི, ཀསྶ བྷིསྶོ, ཀུཏོ ཨཱགཏོསཱིཏི པུཙྪི. ཐེརོ ཙ ཨེཝམཱཧ,– ལོཀསྨིཾ ཡོ ནཝགུཎསམྤནྣོ བྷགཝཱ སམྨཱསམྦུདྡྷོ, ཏསྶཱཧཾ ཉཱཏི, སོབྷགཝཱཡེཝ མམཱཙརིཡོ, བྷིཀྑུསངྒྷསྶ ནིསིནྣཊྛཱནཏོ ཨཱགཏོམྷཱིཏི.

རཱཛཱ ཙ སོམནསྶཔྤཏྟོ ཧུཏྭཱ ཨཱཧ, ཏཝ ཨཱཙརིཡེན དེསིཏཾ དྷམྨཾ ཨེཀདེསཏོ དེསེཧཱིཏི. ཨཐ ཡཐཱ སིརིདྷམྨཱསོཀརཉྙོ ནིགྲོདྷསཱམཎེརེན ཨཔྤམཱདདྷམྨོ དེསིཏོ, ཨེཝཾ ཨཔྤམཱདདྷམྨཾཡེཝ ཐེརོ དེསེསི.

རཱཛཱ ཙ པུན ཨཱཧ,– ཀུཧིཾ དཱནི སམྨཱསམྦུདྡྷོ ནིསཱིདཏི, ཏེན པན དེསིཏོ དྷམྨོ ཀཏིཔྤམཱཎོ, ཏསྶ སཱཝཀཱ པན ཀཏིཔྤམཱཎཱ, ཏུམྷཱདིསཱ ཨཉྙེ ཨཏྠི ཝཱ མཱ ཝཱཏི. ཨིདཱནི ཨམྷཱཀཾ ཨཱཙརིཡོ སམྨཱསམྦུདྡྷོ པརིནིབྦུཏོ, དྷཱཏུཡོཡེཝ ཨིདཱནི ཨཏྠི, ཏེན པན དེསིཏོ དྷམྨོ ཙཏུརཱསཱིཏིདྷམྨཀྑནྡྷསཧསྶཔྤམཱཎོ, སུདྷམྨཔུརེ པིཊཀཏྟཡཾ ཡུགལ༹ཝསེན ཏིཾསཝིདྷཱ ཨཏྠི, མཡཱ ཨཉྙོ པརམཏྠ སམྨུཏིཝསེན དུཝིདྷོཔི སངྒྷོ ཨཏྠཱིཏི.

ཏཾ སུཏྭཱ རཱཛཱ བྷིཡྻོསོམཏྟཱཡ པསནྣོ ཧུཏྭཱ པུན ཨཱརོཙེསི,– མམ བྷནྟེ ཨིམསྨིཾ པཙྩཀྑེ ནཏྠི ཏཡཱ ཨཉྙོ ནཱཐོ, ཨཛྫབྷགྒེ པཱཎུཔེཏཾ མཾ ཨུཔཱསཀོཏི དྷཱརེཧི, ཏཝ ཨོཝཱདཾ ཨཧཾ སིརསཱ པཊིགྒཎྷིསྶཱམཱིཏི.

ཏཏོ པཙྪཱ ཨརཉྙཀངྒཱརཧེ ཋཱནེ ཝིཧཱརཾ ཀཱརཱཔེཏྭཱ ཨདཱསི. སམཎཀུཏྟཀཱནམྤི ཝཱདཾ བྷིནྡི, ཡཐཱ པན སུཝཎྞཔཱཏིཾ ལབྷིཏྭཱ སུཝཎྞབྷཱཛནཾ ལབྷིཏྭཱ མཏྟིཀཱབྷཱཛནནྟི. སཀལེཔི ཙ རཊྛེ སམཎཀུཏྟཀཱནཾ ཝཱདཾ ཛཧཱཔེསི. ཏསྨིཉྩ ཀཱལེ སམཎཀུཏྟཀཱ ཧཱིནལཱབྷཱ ཧུཏྭཱ ཐེརསྶ ཨུཔནཱཧཾ བནྡྷིཾསུ. ཏེ པན སམཎཀུཏྟཀཱ ཨརཉྙེ ནིསྶཱམིཀཱཝིཡ ¶ ཀོལེཡཀཱ སུནཁཱ ཨནཱཐཱ ཧུཏྭཱ ཀཱཡིཀཙེཏསིཀདུཀྑཾ ལབྷིཾསུ.

རཱཛཱ ཙ ཏམཏྠཾ ཉཏྭཱ ཡཐཱ སམཎཀུཏྟཀཱ ནཱབྷིབྷཝནྟི, ཏཐཱ ཨཱརཀྑཾ ཋཔེསི. ཏེ ཙ སམཎཀུཏྟཀེ སེཏཝཏྠཾ ནིཝཱསཱཔེཏྭཱ ཨཱཝུདྷགཱཧཡོདྷབྷཱཝེན རཱཛཀམྨེ ནིཡོཛཱཔེསི. ཐེརོ ཙ སཱསནེ པསནྣེ ཛནེ པབྦཱཛེཏྭཱ ཨུཔསམྤཱདེཏྭཱ སཱསནཾ ཝིསོདྷཱཔེསི. རཱཛཱ ཙ ཨིམསྨིཾ རཊྛེ པོརཱཎིཀཱ རཱཛཱནོ སམཎཀུཏྟཀཱནཾ ཝཱདཾ གཧེཏྭཱ རཛྫཾ ཀཱརེསུཾ, སཙེ ཧི པན ཏེསཾ ཨནཏྠཀརཛྫཾ པུན གཎྷཱཔེཏུཾ སཀྐུཎེཡྻཾ, ཨེཝཾ སཏི ཨཧཾ ཏེསཾ ཨནཏྠཀརཛྫཾ ཨཔནེཏྭཱ སཱཏྠཀརཛྫཾ གཎྷཱཔེཏུམིཙྪཱམཱིཏི ཨནུསོཙཱིཏི.

ཨཡཾ པན པརིཏྟནིདཱནཱགཏཊྛུཔྤཏྟི, –

སཱིཧལ༹དཱིཔེ ཀིར ཝིཔྤཝཱསཱིནགརེ ནིསིནྣོ ཨེཀོ བྷིཀྑུཨུཔདྭཱརཱཝཏཱིནགརཾ གནྟྭཱ པརིཡཏྟིཾ ཨུགྒཎྷི. ཏཏོ པཙྪཱ སུདྷམྨ པུརཾ གནྟྭཱ པརིཡཏྟིཾ ཨུགྒཎྷི. ཏསྨིཉྩ ཀཱལེ སིརིཁེཏྟནགརེ པཱཊལིརུཀྑེ ཨེཀོ གནྠོ ཨཏྠཱིཏི སུཏྭཱ སུདྷམྨཔུརཏོ སིརིཁེཏྟནགརཾ ཨགམཱསི. ཨནྟརཱམགྒེ ལུདྡྷཀོ ཐེརཾ པསྶིཏྭཱ ཨཡཾ ཡཀྑོཏི མཉྙིཏྭཱ གཧེཏྭཱ ཨནུརུདྡྷརཉྙོ དསྶེསི.

ཏདཱ རཱཛཱ ཐེརཾ པུཙྪི,– ཀོ པན ཏྭནྟི. ཨཧཾ མཧཱརཱཛ གོབྷམསྶ སཱཝཀོཏི. པུན རཱཛཱ པུཙྪི,–ཏིཎྞཾ པན རཏནཱནཾ ཀཱིདིསོཏི. ཐེརོ ཨཱཧ,– མཧོསདྷཔཎྜིཏོཝིཡ མཧཱརཱཛ བུདྡྷོ དཊྛབྦོ, ཨུམངྒོཝིཡ དྷམྨོ, ཝིདེཧསེནཱ ཝིཡ སངྒྷོཏི. ཨེཝཾ ཨུཔམཱཧི པཀཱསིཏོ རཱཛཱ པུན པུཙྪི,–ཀིཾ ནུཁོ ཨིམེ གོཏམསྶ སཱཝཀཱཏི. ན ཁོ མཧཱརཱཛ ཨིམེ གོཏམསྶ སཱཝཀཱ, ཨིམེ པན ཨམྷེཧི ཝིསབྷཱགཱ སམཎཀུཏྟཀཱཡེ ཝཱཏི. ཨེཝཾ ཝུཏྟེ ཏཏོ པཊྛཱཡ ཏེ སམཎཀུཏྟཀེ ཝིཛཧི, ཏིཎཾ ཝིཡ ནཱཏིམཉྙི. པཱཊལིརུཀྑསུ སིརཏོཔི ¶ ལདྡྷཾ ཏེསཾ གནྠཾ ལདྡྷཊྛཱནེཡེཝ ཨགྒིནཱ ཛྷཱཔེསི. ཏམྤི ཋཱནཾ ཡཱཝཛྫཏནཱ ཨགྒིཛྷཱཔནཐལནྟི པཱཀཊནྟི.

ཐེརོ ཙ ཝིམཱན ཝཏྠུཾ རཉྙོ དེསེསི. རཱཛཱ ཙ པསཱིདིཏྭཱ སིརིཁེཏྟནགརཏོ ཨརིམདྡནནགརཾ པཙྩཱགམནཀཱལེ ཨཱནེསི.

ཨིདཾ པན པཱཊལིསུསིརེ ལདྡྷགནྠསྶ ཀཱརཎཾ,- ཏེསཉྷི སམཎཀུཏྟཀཱནཾ ཨབྦྷནྟརེ ཨེཀོ ཨུཔཱཡཙྪེཀོ སམཎཀུཏྟཀོ ཨཏྟནོ ཝཱདཱནུརཱུཔཾ གནྠཾ ཀཏྭཱ སིརིཁེཏྟནགརེ དྭཏྟིཾསརཏནཀྑནྡྷསྶ པཱཊལིརུཀྑསྶ སུསིརེ པཝེསེཏྭཱ པུནཔྤུནཾ ཨུདཀེན ཏེམེཏྭཱ མཏྟིཀཱཡ ལིམྤེཏྭཱ པུན ཏཙཾ ཨུཔྤཱདེཏྭཱ ཨུཊྛཱཔེསི. ཏདཱ མཡཾ སུཔིནེ པཱཊལིརུཀྑེ སཱརགནྠོ ཨཏྠབྱཉྫནསམྤནྣོ ཨེཀོ ཨཏྠཱིཏིཨི པསྶཱམཱཏི ཀོལཱཧལཾ ཨུཔྤཱདེསུཾ. ཏཾ སུཏྭཱ རཱཛཱ སིརིཁེཏྟནགརཾ གནྟྭཱ ཏཾ པཱཊལིརུཀྑཾ བྷིནྡིཏྭཱ གཝེསེནྟོ ཏཾ གནྠཾ ལབྷི. གནྠེ པན སཀཝཱདཝསེན སམཎཀུཏྟཀསཱམཉྙཏཱ ཨཱིདིསཱཡེཝ, ཨེཏེ གོཏམཱསཱཝཀཱ ཧོནྟིཨི, ཨེཏེསཾཡེཝ ཨཱཙཱརོ སགྒམགྒཔཐབྷཱུཏོཏི ཨེཝམཱདཱིཧི ཀཱརཎེཧི ཝུཏྟཾ. རཱཛཱ ཙ པསཱིདིཏྭཱ སམཎཀུཏྟཀཱནཾ བཧཱུནི དཱཏབྦཱནི ཨདཱསི. ཏཏོ པཙྪཱ ཐེརསྶ དྷམྨཀཐཾ སུཏྭཱ ཏཾ ཨགྒིནཱ ཛྷཱཔེསཱིཏི ཨེཝཾ སམཎཀུཏྟཀཱནཾ ཝཙནཾ སུཏྭཱ སིརིཁེཏྟནགརཾ གནྟྭཱ ཨརིམདྡནནགརཾ པཙྩཱགཙྪནྟོ ཐེརཾ ཨཱནེསཱིཏི དཊྛབྦཾ. ཨརིམདྡནནགརཾ སམྤཏྟཀཱལེ ཛེཏཝནཾ ནཱམ ཝིཧཱརཾ ཀཱརཱཔེཏྭཱ ཨདཱསི. ཐེརོ ཙ ཏཏྠ སཱསཱནཾ ཝིསོདྷེཏྭཱ ནིསཱིདི. རཱཛཱ དེཝསིཀཾ ཨུདཀཾ ཨཱནེཏྭཱ ཨགྒམཧེསཱི པན དེཝསིཀཾཡེཝ པིཎྜཔཱཏཾ ཨཱནེཏྭཱ བྷོཛེསི. ཨུཔྤནྣཀངྑཱ ཀཱལེཔི ཏཾཏཾཀངྑཱཊྛཱནཾ པུཙྪཱིཏི.

ཨཡཾ པན སཱསནཔྤཝེཎིཡཱགཏཊྛུཔྤཏྟི,–

སུདྷམྨཔུརེ ཧི སམཱཔཏྟིལཱབྷཱི ཨནོམདསྶཱི ནཱམ ཐེརོ ¶ སོཎུཏྟརཏྠེརཱནཾ ཝཾསཱནུརུཀྑཎཝསེན སདྡྷིཾ པཉྩཧི བྷིཀྑུ སཏེཧི ནིསཱིདི. ཏསྶ པན པདྷཱནསིསྶོ ཨདྷིསཱིལོནཱམ, ཏསྶ པདྷཱནསིསྶོ པྲཱནདསྶཱི ནཱམ, ཏསྶ པདྷཱནསིསྶོ ཀཱལོ༹ ནཱམ, ཏསྶ པདྷཱནསིསྶོ ཨརཧནྟོ ནཱམ, ཏསྶ པདྷཱནསིསྶོ ཨརིཡཝཾསོ ནཱམཱཏི.

ཨིདཉྩ ཝཙནཾ-ཀོ པནེས ཨུཏྟརཱཛཱིཝམཧཱཐེརོཏི. ཨཡཉྷི ཐེརོ རཱམཉྙདེསིཡཔུཏྟོ ཨརིཡཝཾསཏྠེརསྶ སིསྶོ. ཨརིཡཝཾསཏྠེརོ པན ཀཔྤུངྒནགརཝཱསཱི མཧཱཀཱལ༹ཏྠེརསྶ སིསྶོ. སོ པན སུདྷམྨནགརཝཱསིནོ པྲཱནདསྶཱི མཧཱཐེརསྶ སིསྶོཏི ཀལྱཱཎཱི སིལཱལེཁནེ ཝུཏྟཝཙནེན ན སམེཏི. ཨེཝམྤི སཏི ཡཐིཙྪིཏ ཨདྷིཔྤཱཡོ ན ནསྶཏཱིཏི དཊྛབྦཾ.

ཨེཝཾ ནཱནཱཙརིཡཱནཾ ཝཱདོ ནཱནཱཀཱརེན དིསྶམཱནོཔི ཨརཧནྟཏྠེརསྶ ཨརིམདྡནནགརེ སཱསནཾ ཨནུགྒཧེཏྭཱ པཏིཊྛཱནཏཱཡེཝེཏྠ པམཱཎནྟི ཀཏྭཱ ནཱཝམཉྙིཏབྦོ. སབྦེསཉྷི ཨཱཙརིཡཱནཾ ཝཱདེཔི ཨརཧནྟཏྠེརོ ཨརིམདྡནནགརཾ ཨཱགནྟྭཱ སཱསནཾ པཏིཊྛཱཔེསཱིཏི ཨཏྠོ ཨིཙྪིཏབྦོཡེཝཱཏི.

ཨརཧནྟཏྠེརོ པན མཱུལནཱམེན དྷམྨདསྶཱིཏི པཱཀཊོ སུདྷམྨཔུརཝཱསཱི སཱིལབུདྡྷིཏྠེརསྶ སིསྶོཏི དཊྛབྦོ. སོ ཙ ཐེརོ པུབྦེཝ པབྦཛྫཀཱལཏོ ཙཏཱུསུ ཝེདེསུ སིཀྑིཏསིཔྤོ. པབྦཛིཏྭཱ པན སཱལ༹ཀཐཾ པིཊཀཏྟཡཾ ཨུགྒཎྷིཏྭཱ པཱརཾ གནྟྭཱ སབྦཏྠ པཱཀཊོ. སོཀྐཏཡནགརཾ ཨནེཏྭཱ མནུསྶཱ པཱུཛེནྟི. ཏཏྠ དསཝསྶཱནི ཝསིཏྭཱ པུན སུདྷམྨཔུརཾ ཨཱགནྟྭཱ ཨརཉྙཝཱསཾ སམཱདིཡི.

ཏཏོ པཙྪཱ ཛིནཙཀྐེ ཨེཀསཊྛཱདྷིཀེ པཉྩསཏེ སཧསྶེཙ སམྤཏྟེ ཀལིཡུགེ ཨེཀཱུནཱསཱིཏཱདྷིཀེ ཏིསཏེ སམྤཏྟེ ཨནུརུདྡྷརཱཛཱ རཛྫཾ པཱཔུཎི. ཏདཱ ཨརིམདྡནནགརེ སམཎཀུཏྟཀཱ ¶ མཡཾ གོཏམསཱཝཀཱཏི ཝཏྭཱ ཏིཾསཏིཾསཝགྒཱ ཧུཏྭཱ ནིསཱིདིཾསུ. ཝགྒཝསེན ཀིར སཧསྶམཏྟཱཏི. ཨནུརུདྡྷརཱཛཱ ཙ ཏེསཾ སམཎཀུཏྟཀཱནཾ ཨཱགཱརིཡཱབྲཧྨཙརིཡཱདཱིནི སུཏྭཱ ན པསཱིདི. ཨེཝམྤི པཝེཎིཡཱ ཨཱགབྷཏྟཱ ན པཛཧི. ཨརཧནྟཾ པན ཐེརཾ པསྶིཏྭཱ ཏཏོ པཊྛཱཡ ཏེསཾ སམཎཀུཏྟཀཱནཾ ནིབདྡྷཝཏྟཱནི བྷིནྡིཏྭཱ སཱསནེ པསཱིདི.

ཨིདཾ མརམྨམཎྜལེ ཏམྦདཱིཔརཊྛེ ཨརིམདྡནནགརེ ཨརཧནྟཾ.

ནཱམ ཐེརཾ པཊིཙྩ ཏཏིཡཾ སཱསནསྶ པཏིཊྛཱནཾ.

ཏསྨིཉྩ ཀཱལེ ཨརཧནྟཏྠེརོ ཨནུརུདྡྷརཱཛཱནཾ ཨཱཧ,-ཏཱིསུ སཱསནེསུ པརིཡཏྟིསཱསནེ ཏིཊྛནྟེཡེཝ པཊིཔཏྟི སཱསནཾ ཏིཊྛཏི, པཊིཔཏྟིསཱསནེ ཏིཊྛནྟེཡེཝ པཊིཝེདྷསཱསནཾ ཏིཊྛཏི, ཡཐཱ ཧི གུནྣཾ སཏེཔི སཧསྶེཔི ཝིཛྫམཱནེ པཝེཎིཔ,ལིཀཱཡ དྷེནུཡཱ ཨསཏི སོ ཝཾསོ སཱཔཝེཎཱི ན གྷལཱི༹ཡཏིཨི, ཨེཝམེཝཾ དྷུཏངྒདྷརཱནཾ བྷིཀྑཱུནཾ སཏེཔི སཧསྶེཔི ཝིཛྫམཱནེ པརིཡཏྟིཡཱ ཨནྟརཧིཏཱཡ པཊིཝེདྷོ ནཱམ ན ཧོཏི, ཡཐཱ པན ནིམིཀུམྦྷིཡོ ཛཱནནཏྠཱཡ པཱསཱཎ པིཊྛེ ཨཀྑརེསུ ཋཔིཏེསུ ཡཱཝ ཨཀྑརཱནི དྷརནྟི, ཏཱཝ ནིདྷིཀུམྦྷིཡོ ནཊྛཱ ནཱམ ན ཧོནྟི, ཨེཝམེཝཾ པརིཡཏྟིཡཱ དྷརམཱནཱཡ སཱསནཾ ཨནནྟརཧིཏཾ ནཱམ ཧོཏི, ཡཐཱ ཙ མཧཏོ ཏལཱ༹ཀསྶ པཱལི༹ཡཱ ཐིརཱཡ ཨུདཀཾ ན ཋསྶཏཱིཏི ན ཝཏྟབྦཾ, ཨུདཀེ སཏི པདུམཱདཱིནི པུཔྥཱནི ན པུཔྥིསྶནྟཱིཏི ན ཝཏྟབྦཾ, ཨེཝམེཝཾ མཧཱཏལཱ༹ཀསྶ ཐིརཔཱལི༹སདིསེ ཏེཔིཊཀེ བུདྡྷཝཙནེ སཏི ཨུདཀསདིསཱ པཊིཔཏྟིཔཱུརཀཱ ཀུལཔུཏྟཱ ནཏྠཱིཏི ན ཝཏྟབྦཾ, ཏེསུ སཏི པདུམཱདིཔུཔྥསདིསོ པཊིཝེདྷོ ནཏྠཱིཏི ན ཝཏྟབྦཾ, ཨེཝཾ ཨེཀནྟཏོ པརིཡཏྟིམེཝ པམཱཎཾ, ཏསྨཱ ཨནྟམསོ དྭཱིསུ པཱཏིམོཀྑསུ ཝཏྟམཱནེསུཔི སཱསནཾ ཨནནྟརཧིཏམེཝ, པརིཡཏྟིཡཱ ཨནྟརཧིཏཱཡ སུཔྤཊིཔནྣསྶཱཔི དྷམྨཱབྷིསམཡོ ནཏྠི, ཨནནྟརཧིཏཱཡ ཨེཝ དྷམྨཱབྷིསམཡོ ཨཏྠི ¶ , ཨིདཱནིཔི ཨམྷཱཀཾ པརིཡཏྟིསཱསནཾ པརིཔུཎྞཾ ནཏྠི, སརཱིརདྷཱཏུཡོ ཙ ནཏྠི, ཏསྨཱ ཡཏྠ པརིཡཏྟིསཱསནཾ སརཱིརདྷཱཏུཡོ ཙ ཨཏྠི, ཏཏྠ པཎྞཱཀཱརེན སདྡྷིཾ དཱུཏཾ པེསེཏྭཱ ཨཱནེཏབྦཱ, ཨེཝཾ སཏི ཨམྷཱཀཾ རཊྛེ ཛིནསཱསནཾ ཙིརཀཱལཾ པཏིཊྛཧིསྶཏཱིཏི.

ཨེཝཾ པན བྷནྟེ སཏི ཀཏྠ ཡཱཙིསྶཱམཱཏི. སུཝཎྞབྷཱུམིརཊྛེ མཧཱརཱཛ སུདྷམྨཔུརེ ཏཱིཧི ཝཱརེཧི པིཊཀཏྟཡཾ ལིཁིཏྭཱ ཋཔེསི, སརཱིརདྷཱཏུཡོ ཙ བཧཱུ ཏཏྠ ཨཏྠཱིཏི. རཱཛཱ ཨེཝཾ བྷནྟེཏི པཊིགྒཎྷིཏྭཱ བཧཱུ པཎྞཱཀཱརེ པཊིཡཱདེཏྭཱ རཱཛལེཁནཾ ལིཁིཏྭཱ ཨཊྛངྒསམནྣཱགཏཾ ཨེཀཾ ཨམཙྩཾ དཱུཏཾ ཀཏྭཱ པེསེསི.

སུདྷམྨཔུརིནྡོ མནོཧརི ནཱམ རཱཛཱཔི མཙྪེརཙིཏྟོ ཧུཏྭཱ ཏུམྷཱདིསཱནཾ མིཙྪཱདིཊྛཱིནཾ ཋཱནེ པིཊཀཏྟཡཾ སརཱིརདྷཱཏུཡོ ཙ པཧིཎིཏུཾ ན ཡུཏྟཱ, ཏིལོཀགྒསྶ ཧི སམྨཱསམྦུདྡྷསྶ སཱསནཾ སམྨཱདིཊྛཱིནཾ ཋཱནེཡེཝ པཏིཊྛཧིསྶཏི, ཡཐཱ ནཱམ ཀེསརསཱིཧརཱཛསྶ ཝསཱ སུཝཎྞཔཱཏིཡཾཡེཝ, ན མཏྟིཀཱབྷཱཛནེཏི.

དཱུཏཱ པཙྩཱགནྟྭཱ ཨནུརུདྡྷརཉྙོ ཏམཏྠཾ ཨཱརོཙེསུཾ. ཏཾ སུཏྭཱ ཨནུརུདྡྷརཱཛཱ ཀུཛ྄ཛྷི, ཏཏྟཀཀཔཱལེ པཀྑིཏྟཏིལཾཝིཡ ཏཊ ཏཊཱཡི.

ཨཐ རཱཛཱ ནདཱིམགྒེན ནཱཝཱནཾ ཨསཱིཏིསཏསཧསྶེཧི ནཱཝིཀཱནཾ ཡོདྷཱནཾ ཨཊྛཀོཊཱིཧི སེནཾ བྱཱུཧིཏྭཱ ཐལམགྒེན སདྡྷིཾ ཙཏཱུཧི མཧཱཡོདྷནཱཡཀེཧི ཧཏྠཱིནཾ ཨསཱིཏི སཧསྶེཧི ཨསྶཱནཾ ནཝུཏིཨིསཏསཧསྶེཧི ཡོདྷཱནཾ ཨསཱིཏིཀོཊིཡཱ སེནཾ བྱཱུཧིཏྭཱ སཡམེཝ ཡུཛ྄ཛྷིཏུཾ སུདྷམྨཔརཾ གཙྪི.

ཏཾ སུཏྭཱ མནོཧརིརཱཛཱ སཱིཏཏསིཏོ ཧུཏྭཱ ཨཏྟནོ ¶ བཧཱུ ཡོདྷེ སཾཝིདཧིཏྭཱ སུདྷམྨཔུརཡེཝ པཊིསེནཾ ཀཏྭཱ ནིསཱིདི.

ཨཐ ཨཐབྦཎཝེདེ ཨཱགཏཔྤཡོགཝསེན པུནཔྤུནཾ ཝཱཡམནྟཱཔི ནགརམཱུལཾ ཨུཔསངྐམིཏུཾ ན སཀྐཱ. ཏདཱ རཱཛཱ ཝེདཉྙུནོ པུཙྪི,–ཀསྨཱ པནེཏྠ ནགརམཱུལཾ ཨུཔསངྐམིཏུཾ ན སཀྐོམཱཏི. ཝེདཉྙུནོ ཨཱཧཾསུ,-ཨཐབྦཎཝེདཝིདྷཱནཾ མཧཱརཱཛ ཨཏྠི མཉྙེཏི. ཨཐ རཱཛཱ པཐཝིཡཾ ནིདཧིཏྭཱ མཏཀལེ༹ཝརཾ ཨུདྡྷརིཏྭཱ མཧཱསམུདྡེ ཁིཔེསི.

ཨེཀཾ ཀིར མནུསྶཾ ཧིནྡུཀུལཾ ཛེངྒུནཱམཀཾ ཀཱིཊཾ ཁཱདཱཔེཏྭཱ ཏཾ མཱརེཏྭཱ ཧཏྠཔཱདཱདཱིནི ཨངྒཔཙྩངྒཱནི གཧེཏྭཱ ཚིནྣཚིནྣཱནི ཀཏྭཱ ནགརསྶ སཱམནྟཱ པཐཝིཡཾ ནདཧིཏྭཱ ཋཔེསི. ཏདཱ པན ནགརཾ ཨུཔསངྐམིཏུཾ སཀྐཱ. ནགརཉྩ པཝིསིཏྭཱ ཨནུརུདྡྷརཱཛཱ མནོཧརིརཱཛཱནཾ ཛཱིཝགྒཱཧཾ གཎྷི. སུདྷམྨཔུརེ པོརཱཎིཀཱནཾ རཱཛཱུནཾ པཝེཎཱིཨཱགཏཝསེན རཏནམཡམཉྫཱུསཱཡཾ ཋཔེཏྭཱ པཱུཛིཏཾ སཧདྷཱཏཱུཧི པིཊཀཏྟཡཾ གཧེཏྭཱ མནོཧརིརཉྙོ སནྟཀཱནཾ དྭཏྟིཾསཧཏྠཱིནཾ པིཊྛིཡཾ ཨཱརོཔེཏྭཱ ཨཱནེསི.

ཨརིམདྡནནགརཾ པན པཏྭཱ དྷཱཏུཡོ རཏནམཡམཉྫཱུསཱཡཾ ཋཔེཏྭཱ སིརིསཡནགབྦྷེ རཏནམཉྩེ སཱིསོཔདེསསྶ སམཱིཔེ ཋཔེསི. པིཊཀཏྟཡམྤི རཏནམཡེ པཱསཱདེ ཋཔེཏྭཱ བྷིཀྑུསངྒྷསྶ ཨུགྒཧདྷཱརཎཱདིཨཏྠཱཡ ནིཡྻཱདེསི. ཏཏོ ཀིར ཨཱནཱིཏཾ པིཊཀཏྟཡཾ ཨུགྒཎྷནྟཱནཾ ཨརིཡཱནཾ སཧསྶམཏྟཾ ཨཧོསཱིཏི.

སུདྷམྨནགརཾ ཝིཛཡིཏྭཱ པིཊཀེན སདྡྷིཾ བྷིཀྑུསངྒྷཾ ཨཱནེཏྭཱ སཱསནསྶ པཏིཊྛཱཔནཾ ཛིནཙཀྐེ ཨེཀཱདྷིཀེ ཚསཏེ ཝསྶསཧསྶེ ཀལིཡུགེ ཙ སོལ༹སཱདྷིཀེ ཙཏུསཏེ སམྤཏྟེཏི སིལཱལེཁནེསུ ཝུཏྟཾ.

ཨནུརུདྡྷརཉྙོ ཀཱལེ པུཉྙཱནུབྷཱཝེན ཏིཨིཎྞཾ རཏནཱནཾ པརིཔུཎྞཏྟཱ ¶ པུཎྞགཱམོཏི སམཉྙཱ ཨཧོསི. ཙིརཀཱལཾ ཨཏིཀྐནྟེ ཎྞཀཱརཾ ལོཔཝསེན མཀཱརསྶ ཙ ནིགྒཧིཏ ཝསེན པུགམཱིཏི མརམྨབྷཱསཱཡ ཝོཧཱརཱིཡཏཱིཏི ཨནཱགཏཝཾསརཱཛཝཾསེསུ ཝུཏྟཾ.

ཨནུརུདྡྷརཱཛཱཡེཝ ཙཏྟཱརོ མཧཱཡོདྷེ སཱིཧལ༹དཱིཔཾ པེསེཏྭཱ ཏཏོཔི པིཊཀཏྟཡཾ ཨཱནེསི. སཱིཧལ༹དཱིཔཏོ ཨཱནཱིཏཔིཊཀཏྟཡེན སུདྷམྨཔུརཏོ ཨཱནཱིཏཔིཊཀཏྟཡཾ ཨཉྙམཉྙཾ ཡོཛེཏྭཱ སཾསནྡེཏྭཱ ཨརཧནྟཏྠེརོ ཝཱིམཾསེསི. ཏདཱ གངྒཱདཀེནཝིཡ ཡམུནོདཀཾ ཨཉྙམཉྙཾ ཨནཱུནཾ ཨནདྷིཀཾ ཨཧོསི. ཏེཧི པིཊཀེཧི ཨཉྙཱནིཔི ཝཌྜྷེཏྭཱ ཏིཔིཊཀགབྦྷེ ཋཔེཏྭཱ པཱུཛེསི. ཏེསུ ཏེསུ ཋཱནེསུཔི པཏིཊྛཱཔེསི.

མནོཧརིརཱཛཱནམྤི མྲངྐཔཱ ནཱམ དེསེ ཨུཔཊྛཱཀེཧི སཧ ཋཔེསི. ཏསྶ ཙ ཀིར རཉྙོ མུཁཾ ཝིརཝིཏྭཱ ཀཐཾ སལླཱཔེནྟསྶ མུཁཏོ ཨོབྷཱསོ པཛྫལིཏྭཱ ནིཀྑམི. སོ ཀདཱཙི ཀདཱཙི ཨནུརུདྡྷརཉྙོ སནྟིཀཾ ཨཱགནྟྭཱ གཱརཝཝསེན ཝནྡནཱདཱིནི ཨཀཱསི. ཏདཱ ཨནུརུདྡྷརཉྙོ ལོམཧཾསོ ཨུཔྤཛྫི ཨུབྦིགྒོ ཙ. ཏསྨཱ ཏསྶ རཉྙོ ནིཏྠེཛཏྠཱཡ བུདྡྷརཱུཔསྶ ཙེཏིཡསྶ བྷཏྟཾ པཱུཛེཏྭཱ ཏཾ གཧེཏྭཱ མནོཧརིརཉྙོ བྷཱཛེསི. ཏདཱ ཏསྶ ཏདཱནུབྷཱཝོ ཨནྟརདྷཱཡི. མནོཧརིརཱཛཱ སཾཝེགཾ ཨཱཔཛྫིཏྭཱ སཾསཱརེ སཾསརནྟོ ཡཱཝ ནིབྦཱནཾ ན པཱཔུཎཱམི, ཏཱཝ པརཝསེ ནཱནུཝཏྟེཡྻནྟི པཏྠནཾ ཨཀཱསི. སུདྷམྨཔུརཏོ ཨཱབྷཏཾ ཨཏྟནོ སནྟཀཾ མནོམཡ མཎིཾ ཨེཀསྶ སེཊྛིནོ སནྟིཀེ ཝིཀྐིཎིཏྭཱ ལདྡྷམཱུལེན པཉྩཝཱཧརཛཏེན ཨབྷུཛིཏཔལླངྐཝསེན ཨེཀཾ མཧནྟཾ བུདྡྷ བིམྦཾ པརིནིབྦཱནཱཀཱརེན ཨེཀནྟི དྭེ བུདྡྷཔྤཊིབིམྦཱནི ཀཱརཱཔེསི. ཡཱཝཛྫཏནཱ ཏཱནི སནྟཱིཏི. ཨིཙྩེཝཾ ཨནུརུདྡྷརཱཛཱ སུདྷམྨཔུརཏོ ¶ སཱིཧལ༹དཱིཔཏོ ཙ སཱསནཾ ཨཱནེཏྭཱ ཨརིམདྡནནགརེ པཏིཊྛཱཔེསཱིཏི.

ཨིདཾ ཨམྷཱཀཾ མརམྨམཎྜལེ ཏམྦདཱིཔརཊྛེ ཨརིམདྡནནགརེ

ཨནུརུདྡྷརཱཛཱནཾ པཊིཙྩ ཙཏུཏྠཾ སཱསནསྶ པཏིཊྛཱནཾ.

ཨུཏྟརཱཛཱིཝཏྠེརོཔི སོཎུཏྟརཱནཾ ཝཾསཏོ སཱསནཾ གཧེཏྭཱ སུདྷམྨཔུརཏོ ཨརིམདྡནནགརཾ ཨཱགནྟྭཱ སཱསནཾ པཏིཊྛཱཔེསི.

ཨིདཾ ཨམྷཱཀཾ མརམྨམཎྜལེ ཏམྦདཱིཔརཊྛེ ཨརིམདྡནནགརེ ཨུཏྟརཱཛཱིཝཏྠེརཾ པཊིཙྩ པཉྩམཾ སཱསནསྶ པཏིཊྛཱནཾ.

ཨུཏྟརཱཛཱིཝཏྠེརསྶ སཱིཧལ༹དཱིཔཾ གཏཀཱལེ ཏེན སདྡྷིཾ གཏཾ ཚཔྤདཾ ནཱམ སཱམཎེརཾ སཱིཧལ༹དཱིཔེཡེཝ སཱིཧལ༹དཱིཔིཀཱ པབྦཛིཾསུ. པབྦཛིཏྭཱ ཙ ཚཔྤདསཱམཎེརོ པརིཡཏྟིཾ ཨུགྒཎྷིཏྭཱ དསཝསྶཾ ཏཏྠ ཝསིཏྭཱ ཨརིམདྡནནགརཾ པཙྩཱགཙྪི. སིཝལིཏྠེརཉྩ ཏཱམལིནྡཏྠེརཉྩ ཨཱནནྡཏྠེརཉྩ རཱཧུལཏྠེ རཉྩ ཨནེསི. ཏེ པན ཐེརཱ ཏིཔིཊཀདྷརཱ ཧོནྟི བྱཏྟཱ དཀྑཱ ཙ. ཨཡཉྩཏྠོ ཝིཏྠཱརེན ཧེཊྛཱ ཝུཏྟོ.

ཨརིམདྡནནགརཾ པཏྭཱ ཨརིམདྡན ཝཱསཱིཧི བྷིཀྑཱུཧི སདྡྷིཾ ཝིནཡཀམྨཱནི ཨཀཏྭཱ པུཐུ ཧུཏྭཱ ནིསཱིདིཾསུ. ནརཔཏིརཱཛཱ ཙ ཏེསུ ཐེརེསུ ཨཏིཝིཡ པསཱིདི. ཨེརཱཝཏཱིནདིཡཾ ཨུལུ༹མྤཾ བནྡྷིཏྭཱ ཏཏྠེཝ ཨུཔསམྤདཀམྨཾ ཀཱརཱཔེསི. ཙིརཀཱལཾ ཨཏིཀྐམིཏྭཱ སོ གཎོ ཝུཌྜྷི ཧུཏྭཱ ཨུཔྤཛྫི.

ནརཔཏིརཱཛཱ ཙ ཏེ ཐེརེ སདྡྷིཾ སངྒྷེན ནིམནྟེཏྭཱ མཧཱདཱནཾ ཨདཱསི. ཏདཱ ཚཎེ ཨཱཀཔྤསམྤནྣཾ རཱུཔསོབྷགྒཔྤཀྐཾ ཨེཀཾ ནཱཊཀིཏྟིཾ དིསྭཱ རཱཧུལཏྠེརོ པཊིབདྡྷཙིཏྟོ ལེཔེ ལགྒིཏཝཱནརོཝིཡ ཀདྡམེ ལགྒིཏམཱཏངྒོཝིཡ ཙ ཀཱམ གུཎལེཔཀདྡམེསུ ལགྒིཏོ སཱསནེ ཝིརམིཏྭཱ ཧཱི ནཱཡཱཝཏྟཱིཏུཾ ཨཱརབྷི. མརཎནྟི ཀརོགེན ཨབྷིབྷཱུཏོ ཝིཡ ¶ ཨཏེཀིཙྪོ ཧུཏྭཱ སེསཏྠེརེསུ ཨོཝཱདཾ དིནྣེསུ པིནཱདིཡི. ཏདཱ སེསཏྠེརཱ ཏཾ ཨེཝམཱཧཾསུ,-མཱ ཏྭཾ ཨེཀཾ ཏཾ པཊིཙྩ སབྦེཔི ཨམྷེ ལཛྫཱཔེཏུཾ ན ཨརཧསི, མཱ ཨིདྷ ཧཱིནཱཡཱ ཝཏྟེཧི, མལླཱརུདཱིཔཾ གནྟྭཱ ཡཐཱརུཙིཾ ཀརོཧཱིཏི པེསེསུཾ. རཱཧུལཏྠེརོ ཙ ཀུསིམཏིཏྠཏོ ནཱཝཾ ཨཱརུཡ྄ཧ མལླཱརུདཱིཔཾ ཨགམཱསི. མལླཱརུདཱིཔཾ པཏྟཀཱལེ མལླཱརུརཱཛཱ ཝིནཡཾ ཛཱནིཏུཀཱམོ སཧ ཊཱིཀཱཡ ཁུདྡསིཀྑཱཔཀརཎཾ ཏསྶ སནྟིཀེ ཨུགྒཎྷིཏྭཱ ཨེཀཔཏྟམཏྟཾ མཎིཾ ཨདཱསི. སོཙ ཏཾ ལབྷིཏྭཱ ཧཱིནཱཡཱཝཏྟཱིཏི. ཧོནྟི ཙེཏྠ,-

ཨཏིདཱུརེཝ ཧོཏབྦཾ, བྷིཀྑུནཱ ནཱམ ཨིཏྠིབྷི;

ཨིཏྠིཡོ ནཱམ བྷིཀྑཱུནཾ, བྷཝནྟི ཨིདྷ ཝེརིནོ.

ཏཱཝ ཏིཊྛནྟུ དུཔྤཉྙཱ, མཡཾ པོརཱཎིཀཱཔི ཙ;

མཧཱཔཉྙཱ ཝིནཱསཾ, པཏྟཱ ཧརིཏཙཱདཡོ.

ཏསྨཱ ཧི པཎྜིཏོ བྷིཀྑུ, ཨནྟམསོཝ ཨིཏྠིབྷི;

ཝིསྶཱསཾ ན ཀརེ ལོཀེ, རཱགོ ཙ དུཔྤཝཱརིཏོཏི.

སེསེསུ ཙ ཐེརེསུ ཚཔྤདོ ནཱམ ཐེརོ པཋམཾ ཀཱལངྐཏོ. སིཝལིཏཱམལིནྡཱནནྡཏྠེརཱཡེཝ ཏཡོ པརིཡཏྟིཨུགྒཧཎདྷཱརཎཱདིཝསེན སཱསནཾ ཨུཔཏྠམྦྷེཏྭཱ ཨརིམདྡནནགརེ ནིསཱིདིཾསུ. ཨེཀསྨིཉྩ ཀཱལེ རཱཛཱ ཏེསཾ ཏིཎྞཾ ཐེརཱནཾ ཨེཀེཀཾ ཧཏྠིཾ ཨདཱསི. སིཝལིཏཱམལིནྡཏྠེརཱ པཊིགྒཧེཏྭཱ ཝནེ ཝིསྶཛྫཱཔེསུཾ. ཨཱནནྡཏྠེརོ པན ཀིཉྩིཔུརནགརཾ པཧིཎིཏྭཱ ཉཱཏཀཱནཾ དེཧཱིཏི ཀུསིམཏིཏྠཾ གནྟྭཱ ནཱཝཾ ཨཱརོཔེསི. ཏཾ ཀཱརཎཾ ཉཏྭཱ སིཝལིཏཱམལིནྡཏྠེརཱཏཾ ཨེཝམཱཧཾསུ,– མཡཾ པན ཨཱཝུསོ ཧཏྠཱིནཾ སུཁཏྠཱཡ ཝནེ ཝིསྶཛྫེམ,ཏྭཾ པན ཨདྷམྨིཀཾ ཀརོསཱིཏི. ཀིནྣཱམ བྷནྟེ ཉཱབྷཀཱནཾ སངྒཧོ ན ཝཊྚཏི, ནནུ ཉཱཏཀཱནཉྩ སངྒཧོཏི བྷགཝཏཱ ཝུཏྟནྟི.

ཐེརཱ ¶ ཨཱཧཾསུ,-སཙེ ཏྭཾ ཨམྷཱཀཾ ཝཙནཾ ནཀརེཡྻཱསི,བྷཝ ཨིཙྪཱནུརཱུཔཾ ཀརོཧི, མཡཾ པན ཏཡཱ སདྡྷིཾ སཾཝཱསཾ ན ཀརིསྶཱམཱཏི ཝིསུཾ ནིསཱིདིཾསུ.

ཏཏོ པཊྛཱཡ དྭེ གཎཱ བྷིཛྫིཾསུ. ཏཏོ པཙྪཱཀཱལེ ཨཏིཀྐནྟེ ཏཱམལིནྡཏྠེརོ བཧུསྶུཏཱནཾ བྱཏྟིབལཱནཾ སིསྶཱནཾ ཨནུགྒཧཏྠཱཡ གཧཊྛཱནཾ སནྟིཀེ ཨཡཾ བཧུསྶུཏོ ཨཡཾ མཧཱཔཉྙོཏི ཨེཝམཱདིནཱ ཝཙཱིཝིཉྙཏྟིཾ སམུཊྛཱཔེཏི, ཨེཝཾ ཀཏེ ཀུལཔུཏྟཱ སུལབྷཔཙྩཡཝསེན སཱསནསྶ ཧིཏཾ ཨཱཝཧིབྷུཾསཀྑིསྶནྟཱིཏི ཀཏྭཱ. ཏཾ ཀཱརཎཾ སུཏྭཱ སིཝལིཏྠེརོ ཨེཝམཱཧ,- ཀསྨཱ ཏྭཾ ཝཙཱིཝིཉྙཏྟིཾ སམུཊྛཱཔེཏྭཱ བུདྡྷཔྤཊིཀུཙྪིཏཾ ཀམྨཾ ཀརོསཱིཏི. བྷགཝཏཱ ཨཏྟནོ ཨཏྠཱཡཡེཝ ཝཙཱིཝིཉྙཏྟིཾ པཊིཀྑིཏྟཱ, ཨཧཾ པན པརེསཾཡེཝ ཨཏྠཱཡ ཝཙཱིཝིཉྙཏྟིཾསམུཊྛཱཔེམི, ནཱཏྟནོ ཨཏྠཱཡ, སཱསནསྶ ཧི ཝེཔུལླཏྠཱཡ ཨེཝཾ ཝཙཱིཝིཉྙཏྟིཾསམུཊྛཱཔེམི. སིཝལིཏྠེརོཔི ན ཏྭཾ མམ ཝཙནཾ ཀརོསི, ཡཾ ཡཾ ཏྭཾ ཨིཙྪསི, ཏཾ ཏཾ ཀརོཧི, ཨཧཾ པན ཏཡཱ སདྡྷིཾ སཾཝཱསཾ ནཀརིསྶཱམཱིཏི ཝིསུཾ ཧུཏྭཱ སདྡྷིཾ སཀཔཀྑེན ནིསཱིདི. ཏཏོ པཊྛཱཡ ཏཡོ གཎཱ བྷིཛྫིཾསུ.

ཨེཝཾ ཨརིམདྡནནགརེ ཨརཧནྟཏྠེརསྶ ཨེཀོ ཝཾསོ, སིཝལིཏྠེརསྶ ཨེཀོ, ཏཱམལིནྡཏྠེརསྶ ཨེཀོ, ཨཱནནྡཏྠེརསྶ ཨེཀོཏི ཙཏྟཱརོ གཎཱ ཨཧེསུཾ.

ཏེསུ ཨརཧནྟཏྠེརགཎོ སུདྷམྨཔུརཏོ པཋམཾ ཨཱགཏཏྟཱ པུརིམགཎོཏི ཝོཧཱརིཡཏི, ཨཉྙེ པན པཙྪཱ ཨཱགཏཏྟཱ པཙྪཱགཎཱཏི.

སིཝལིཏྠེརོ ཨརིམདྡནནགརེ ཡཱཝཱིཛཱིཝཾ སཱསནཾ པགྒཎྷིཏྭཱ ཀལིཡུགེ ནཝུཏཱདྷིཀེ པཉྩཝསྶསཏེ ཀཱལེ ཀཱལམཀཱསི.

ཨཱནནྡཏྠེརོ པན ཨརིམདྡནནགརེཡེཝ ཙཏུཙཏྟཱལཱིས ཝསྶཱནི ¶ སཱསནཾ པགྒཎྷིཏྭཱ ཚནཝུཏཱདྷིཀེ པཉྩཝསྶསཏེ ཀཱལེ ཀཱལམཀཱསི.

ཏཱམལིནྡཏྠེརོཔི ཡཱཝཛཱིཝཾ སཱསནཾ པགྒཎྷིཏྭཱ ཨཊྛན ཝུཏཱདྷིཀེ པཉྩཝསྶསཏེ ཀཱལེ ཀཱལམཀཱསཱིཏི. ཨཧོ སངྑཱརསབྷཱཝོཏི.

སེཡྻཐཱཛགརསྶེཝ, ནཱབྷིཡཱ ཙཀྐམཎྜལེ;

ལགྒོ སསོ སམིཏྭཱཔི, དིསཾ གཙྪཏི ཏཾ མུཁཾ.

ཏཐེཝ སབྦསཏྟཱཔི, མཙྩུཙཀྐེསུ ལགྒིཏཱ;

ཡཱཝཛཱིཝམྤི དྷཱཝིཏྭཱ, མཙྩུམུཁཾ ཨུཔཱགམུནྟི.

ཨིཙྩེཝཾ ཨརིམདྡནཔུརེ ཨརཧནྟེཧི ཙ གནྠཀཱརེཧི ཙ པུཐུཛྫནེཧི ཛིནསཱསནཾ ནབྷེ ཙནྡོཝིཡ ཝིཛྫོཏཏི.

ཏཏྠ ཧི ཡདཱ ཨནུརུདྡྷརཱཛཱ སུདྷམྨཔུརཏོ སཱསནཾ ཨཱནེསི, ཏདཱ ཨརཧནྟཱ ཚསཏསཧསྶམཏྟཱ ཨཱགཏཱ, སོཏཱཔནྣསཀདཱགཱམིཨནཱགཱམིནོ པན གཎནཔཐཾ ཝཱིཏི ཝཏྟཱཏི.

ཚཏྟགུཧིནྡསྶ ནཱམ རཉྙོ ཀཱལེཔི ཧིམཝནྟེ གནྡྷམཱདནཔབྦཏཏོ ཨཊྛ ཨརཧནྟཱ པིཎྜཱཡ རཱཛགེཧཾ ཨཱགམཾསུ. རཱཛཱ ཙ པཏྟཾ གཧེཏྭཱ པིཎྜཔཱཏེན བྷོཛེཏྭཱ ཨིདཱནི ཀུཏོ ཨཱགཏཏྠཱབྷི པུཙྪི. ཧིམཝནྟེ མཧཱརཱཛ གནྡྷ མཱདནཔབྦཏཏོཏི. ཨཐ རཱཛཱ ཨཏིཔྤསནྣོ ཧུཏྭཱ ཨིདྷ ཏེམཱསཾ ཝསྶཾ ཨུཔགཙྪཐཱཏི ཡཱཙིཏྭཱ ཝིཧཱརཾ ཀཱརཱཔེཏྭཱ ཨདཱསི. ཏེམཱསམྤི ཨནྟོགེཧེ ནིམནྟེཏྭཱ པིཎྜཔཱཏེན བྷོཛེསི.

ཨེཀཾ སམཡཾ ཨརཧནྟཱནཾ གནྡྷམཱདནཔབྦཏེ ནནྡམཱུལགུཧཾ ཝིཡ ཨེཀཾ གུཧཾ མཱཔེཏྭཱ དསྶེཧཱིཏི ཡཱཙི. ཏེ ཙ ཨརཧནྟཱ ནནྡམཱུལགུཧཾཝིཡ ཨེཀཾ གུཧཾ ཨིདྡྷིཡཱ མཱཔེཏྭཱ དསྶེསུཾ ¶ . རཱཛཱ ཙ ཏཱཡ གུཧཱཡ སདིསཾ ཨེཀཾ གུཧཾ ཀཱརཱཔེསི. ནནྡམཱུལགུཧཱཀཱརེན པན ཀཏཏྟཱ ནནྡཱཏི ནཱམམྤི ཨཀཱསི. ཨིཙྩེཝཾ ཚཏྟགུཧིནྡསྶ རཉྙོ ཀཱལེ གནྡྷམཱདནཔབྦཏེ ནནྡམཱུལགུཧཏོ ཨཱགནྟྭཱ ཨརཧནྟཱ སཱསནཾ པཏིཊྛཱཔེསུཾ.

ཨརཧནྟབྷཱཝོ ཙ ནཱམེས ཡཐཱབྷཱུཏཾ ཛཱནིཏུཾ དུཀྐརོ, ཨནུཔསམྤནྣཱནཾ ཨུཏྟརིམནུསྶདྷམྨདསྶནསྶ པཊིཀྑིཏྟཏྟཱ, ཨརཧཏྟཾ ཝཱ པཏྭཱཔི ཝཱསནཱཡ ཨཔྤཛཧིཏཏྟཱ. ཨརཧཱཔི ཧི སམཱནོ ཨཧཾ ཨརཧཱཏི ཨནུཔསམྤནྣཱནཾ ཀཐེཏུཾ ན ཝཊྚཏི, ཨརཧཏྟཾ པཏྭཱཔི ཨེཀཙྩོ ཝཱསནཾ པཛཧིཏུཾ ན སཀྐཱ, པིལིནྡཝཙྪཏྠེརཝཏྠུཙེཏྠ ཉཱཔཀཾ. ཨེཝཾ ལོཀེ ཨརཧནྟ བྷཱཝོ ཛཱནིཏུཾ དུཀྐརོ. ཏེནེཝ མཧཱཀསྶཔཏྠེརསྶ ཨུཔཊྛཱཀོ ཨེཀོ བྷིཀྑུ ཨཏྟནོ ཨུཔཛ྄ཛྷཱཡསྶ མཧཱཀསྶཔཏྠེརསྶ སནྟིཀེ ཝསིཏྭཱཔི ཏསྶ ཨརཧནྟ བྷཱཝཾ ན ཛཱནི.

མཧཱཀསྶཔཏྠེརཉྷི ཨེཀེན སདྡྷིཝིཧཱརིཀེན སདྡྷིཾ ཨརཉྙཝིཧཱརཏོ གཱམཾ པིཎྜཱཡ ཙརནྟཾ ཨནྟརཱམགྒེ པཏྟཱ དིཔརིཀྑཱརེ གཧེཏྭཱ པཙྪཱ གཙྪནྟོཡེཝ ཨེཀོསདྡྷི ཝིཧཱརིཀོ ཨེཝམཱཧ,–ལོཀསྨིཾ བྷནྟེ ཨརཧཱ ཨརཧཱཏི པཱཀཊོ, སུཏམཏྟོཝཱཧཾ བྷཝཱམི, ན ཀདཱཙི དིཊྛཔུབྦོཏི. ཏཾ སུཏྭཱ ཐེརོ པཙྪཱ པརིཝཏྟཏྭཱ ཨོལོཀེནྟོ པརིཀྑཱརེ ཨཱཝུསོ གཧེཏྭཱ ཨརཧནྟསྶ པཙྪཱགཙྪནྟོཡེཝ ཨརཧནྟབྷཱཝཾ ན ཛཱནཱཏཱིཏི ཨཱཧཱཏི.

ཨརིམདྡནནགརེཔི སཱིལབུདྡྷིཔོལློངྐསུམེདྷཏྠེརཱདཡོཔི ཨརཧནྟཱཡེཝ ཨཧེསུཾ. ནརཔཏིརཱཛཱ ཧི ཁཎིཏྟི པཱདཔབྦཏཾ གནྟྭཱ པཙྩཱགམནཀཱལེ ཨནྟརཱམགྒེ ཨེཀིསྶཱ མཱཏིཀཱཡ མཎོབྷཱསཾ དིསྭཱ ཨིདྷ པུཉྙཾ ཀཱརེཏུཀཱམོ སཀྐོ དསྶེཏི མཉྙེཏི མནསིཀརིཏྭཱ ཙེཏིཡཾ ཀཱརཱཔེསྶཱམཱིཏི ¶ ཏཏྠ རཊྛཝཱསཱིཏི སམཾ བྷཱུམིབྷཱགཾ ཀཱརཱཔེསི.

ཨཐ ཨེཀོ སཱིལབུདྡྷི ནཱམ ཐེརོ ཨེཝམཱཧ,– པུཉྙཾ མཧཱརཱཛ ཀརིསྶམཱིཏི ཨིདཾ བྷཱུམིཔརིཀམྨཾ ཀཱརཱཔེསི, ཨེཝཾ ཀཱརཱཔེནྟསྶ ཏེ ཨཔུཉྙཾཡེཝ བྷཝཏི, ནོཔུཉྙནྟི ཝཏྭཱ བཧཱུ སཏྟཱ མཱ ཀིལམནྟཱུཏི མནསིཀཏྭཱ རཉྙོ དཎྜཀམྨེན ཏཛྫནཏྠཱཡ རཉྙཱ དིནྣཾ པིཎྜཔཱཏཾ ནབྷུཉྫི. རཱཛཱ ཙ སཙེ ཏྭཾ མཡཱ དིནྣཾ པིཎྜཔཱཏཾ ཨབྷུཉྫིཏུཀཱམོ བྷཝེཡྻཱསི, མམ ཝིཛིཏེ ཝསནྟོཡེཝ ཏྭཾ མམ པིཎྜཔཱཏཱ ན མུཙྩེཡྻཱསི, རཊྛཝཱསཱིཧིཔི དིནྣཔིཎྜཔཱཏོ མཡ྄ཧམེཝ སནྟཀོ, ནནུ ནཱམ མམ པིཎྜཔཱཏཾཡེཝ ཏྭཾ བྷུཉྫསཱིཏི ཨཱཧ.

སཱིལབུདྡྷིཏྠེརོཔི སཙེ ཨཧཾ ཨེཝཾ བྷཝེཡྻཱམི, སཱིཧལ༹དཱིཔཾ གནྟྭཱ ཝསིསྶཱམཱིཏི ཙིནྟེཏྭཱ ཨརཉྙེ ཝསི.

ཨཐ ཏམཏྠཾ ཛཱནིཏྭཱ ནགརདྭཱརེ ཨཱརཀྑོ ཨེཀོ ཡཀྑོ རཉྙོ ཨཱགཏཀཱལེ ཨབྷིམུཁཾ ཋིཏོཝ བྷཡཱནཀརཱུཔཾ ནིསཱིདི. ཨཐ ནཱནཱཝིཛྫཱཀམྨེཧི ཨཔནེནྟོཔི ན སཀྐཱ ཨཔནེཏུཾ.

ཨཐ རཱཛཱ ནིམིཏྟཔཱཋཀེ པཀྐོསཱཔེཏྭཱ པུཙྪི,-ཀེན ཀཱརཎེན ཨཡཾ ཡཀྑོ ཨིདྷ ནིསིནྣོཏི. ཏྭཾ མཧཱརཱཛ སཱིལབུདྡྷིཏྠེརཾ ཨགཱརཝཝསེན པུབྦེ ཀཐེསི, ཡཀྑཱཔི ཐེརེ ཨཏིཝིཡ པསནྣཱཏི ཨམྷེཧི སུཏཔུབྦཱ, ཏཾ པཊིཙྩ ཡཀྑོ བྷཡཱནཀརཱུཔཾ དསྶེཏྭཱ ནིསིནྣོ བྷཝིསྶཏཱིཏི ཨཱཧ.

རཱཛཱཔི ཨམཙྩེ ཨཱཎཱཔེསི ཐེརཾ པཀྐཱསཐཱཏི. ཐེརོ ནཱགཙྪི. སཱིཧལ༹དཱིཔཾཡེཝ གམིསྶཱམཱིཏི ཨཱརབྷི. ཏམཏྠཾ སུཏྭཱ རཱཛཱ ཨེཀཾ ཙཏུརངྒཔཙྩཡཾ ནཱམ ཨམཙྩཾ པཀྐོསཱཔེཏྭཱ ཏྭཾ གནྟྭཱ ཐེརཾ པཀྐོསཱཧཱིཏི པེསེསི. ཙཏུརངྒཔཙྩཡོ ཙ ཚེཀཏཱཡ ཨེཀཾ སུཝཎྞམཡཾ བུདྡྷཔྤཊིབིམྦཾ ནཱཝཱཡ ཋཔེཏྭཱ མཧཱསམུདྡཏིཏྠཾ ཨགམཱསི. ཨཐ ཐེརཾ སམྤཱཔུཎིཏྭཱ ¶ ཨིདཱནི ཨིདྷ བྷགཝཱ སམྨཱསམྦུདྡྷོ ཨགམཱསི, སཱིལབུདྡྷིཏྠེརོ བྷགཝཏོ སམྨཱསམྦུདྡྷསྶ དསྶནཏྠཱཡ ཨཱགཙྪཏཱུཏི དཱུཏཾ པེསེསི. ཐེརོཔི བྷགཝཏོ སམྨཱསམྦུདྡྷསྶ དསྶནཏྠཱཡ ཨཱགཙྪཏཱུཏི ཝཙནཾ པཊིཀྑིཔིཏུཾ བུདྡྷགཱརཝཝསེན ཨཝིསཧཏཱཡ ཨཱགཙྪཱིཏི.

པོརཱཎིཀཱནཾཝ ཐེརཱནཾ, བུདྡྷེ སགཱརཝཾ ཨིདྷ;

པཎྜིཏོ གཱརཝཾ བུདྡྷེ, ཀརེ པསནྣཙེཏསཱཏི.

ནཱཝཾ ཨབྷིརཱུཧིཏྭཱ ཐེརོ བྷགཝཏོ སམྨཱསམྦུདྡྷསྶ ཝནྡནཱམཱནཔཱུཛཱསཀྐཱརདཱིནི ཨཀཱསི. ཐེརསྶ ཨེཝཾ ཝནྡནཱམཱནཔཱུཛཱསཀྐཱརཱདཱིནི ཀརོནྟསྶེཝ ཝེགེན ནཱཝཾ ཨཱནེཏྭཱ གཙྪི. ཨཐ ཙཏུརངྒཔཙྩཡོ ཨེཝམཱཧ,– ཨིདཱནི བྷནྟེ ཏུམྷཱཀཾ ཨཱཙརིཡསྶ སམྨཱསམྦུདྡྷསྶ སཱསནཾ པགྒཎྷིཏུཾ ཡུཏྟོཏི. རཱཛཱ ཙ ཨམཙྩེཧི པརིཝཱརིཏོ པཙྩུགྒཙྪི. ནཱཝཱཡ ཐེརསྶ ཧཏྠེ གཧེཏྭཱ རཱཛགེཧཾ ཨཱནེསི. དྭཱརཾ པཏྟཀཱལེ ཡཀྑོ པཐཝིཡཾ ནིསཱིདིཏྭཱ ཐེརཾ ཝནྡི.

རཱཛཱ རཱཛགེཧཾ པཏྭཱ ཐེརཾ ནཱནཱབྷོཛནེཧི བྷོཛེསི. ཨེཝཉྩ ཨཝོཙ,–ཨཛྫཏགྒེ བྷནྟེ ཏྭམསི མམཱཙརིཡོ, བྷགཝཏོཝ ཨོཝཱདཾ སིརསཱ པཊིགྒཧེཏྭཱ ཨནུཝཏྟིསྶཱམཱཏི ཨཏྟནོ པཉྩཔུཏྟེཔི ཐེརསྶ ཨདཱསི. ཏེ ཙ པཉྩཀུམཱརཱ ཐེརེན སདྡྷིཾ ཨནུཝཏྟིཾསུ. ཐེརོ ཏེ པཀྐོསེཏྭཱ ཝིཧཱརཾ ཨགམཱསི. ཨནྟརཱམགྒེ ཀཔྤིཡཔཐཝིཡཾ པཉྩ པརིམཎྜལཱཀཱརཱནི ལིཁིཏྭཱ ཏེསཾ རཱཛཀུམཱརཱནཾ དསྶེཏྭཱ ནིཝཏྟཱཔེསི. རཱཛཀུམཱརཱ པཊིནིཝཏྟིཏྭཱ ཏཾ ཀཱརཎཾ རཉྙོ ཨཱརོཙེསུཾ. རཱཛཱ ཙ ཏུམྷཱཀཾ པུཉྙཾ ཀཱརཱཔནཏྠཱཡ དསྶེཏཱིཏི ཝཏྭཱ ཏུལཱཝསེན ཏེཧི རཱཛཀུམཱརེཧི སུཝཎྞཾ སམཾ ཀཏྭཱ ཏེན སུཝཎྞེན མཱུལཾ ཀཏྭཱ བྷགཝཏོ དྷརམཱནཀཱལེ ¶ པསྶེནདིཀོསལརཉྙཱ ཀཱརཱཔིཏཾ ཙནྡནཔྤཊིབིམྦཾཝིཡ ཝིསུཾ ཝིསུཾ པཊིབིམྦཾ ཀཱརཱཔེསི.

ཏེསཾ ནིདྷཱནཊྛཱནབྷཱུཏཱནི པཉྩ ཙེཏིཡཱནིཔི སཀྐོ ཀམྨ ཝིདྷཱཡཀོ ཧུཏྭཱ པཏིཊྛཱཔེསི. ཨེཏྠ ཙ པུབྦེ རཉྙཱ པསཱིདིཏྭཱ ཐེརསྶ རཱཛཀུམཱརཱ དིནྣཱ, མཱུལཾ རཏནཏྟཡསྶ དཏྭཱ པུན རཱཛཀུམཱརེ བྷཱུཛིསྶེ ཀཱརེཏུཀཱམཏཱཡ ཐེརོ ཨེཝཾ སཉྙཾ ཨདཱསཱིཏི དཊྛབྦཾ.

སོ ཙ སཱིལབུདྡྷིཏྠེརོ ཨརཧནྟགཎཝཾསོཏི དཊྛབྦོ.

ཨརིམདྡནནགརེཡེཝ ནརཔཏི རཉྙོ ཀཱལེ ཀསྶཔོ ནཱམ ཐེརོ དེསཙཱརིཀཾ ཙརམཱནོ པོལློངྐནཱམཀཾ དེསཾ, ཏདཝསརི. ཨཐ དྭེ མཧལླཀཔོལློངྐཱ མནུསྶཱ ཐེརེ ཨཏིཔྤསནྣཏཱཡ དྭེ པུཏྟེ ཨུཔཊྛཱཀཏྠཱཡ ནིཡྻཱདེསུཾ.

པོལློངྐམནུསྶཱནཾ ཨཏིཔྤསནྣཏཾ པཊིཙྩ ཐེརོཔི པོལློངྐཏྠེརོཏི ཝོཧཱརིཡཏི. ཡདཱ ཙ པན སོ ཐེརོ སཱིཧལ༹དཱིཔཾ གནྟུཀཱམོ ཨཧོསི, ཏདཱ སཀྐོ དེཝཱནམིནྡོ བྱགྒྷརཱུཔཾ མཱཔེཏྭཱ པིཊྛིཡཱ ཡཱཝ མཧཱསམུདྡཏཱིརཾ ཨཱནེསི. མཧཱསམུདྡཏཱིརཾ པན པཏྭཱ ནཱཝཾ ཨབྷིརཱུཧིཏྭཱ ཝཱཎིཛེཧི སདྡྷིཾ ཏརི.

མཧཱསམུདྡམཛ྄ཛྷེ པན པཏྭཱ སཱ ནཱཝཱ ན གཙྪི, ནིཙྩལཱཝ ཨཊྛཱསི. ཨཐ ཝཱཎིཛཱ མནྟེསུཾ,-ཨམྷཱཀཾ ནཱཝཱཡ ཨལཀྑཱི པཱཔཛནོ ཨཏྠི མཉྙེཏི. ཨེཝཾ པན མནྟེཏྭཱ སལཱཀཱདཱནཾ ཨཀཾསུ. ཡཱཝ ཏཏིཡམྤི ཐེརསྶེཝ ཧཏྠེ སལཱཀཱ པུབྦེ ཀཏཀམྨཝིཔཱཀཝསེན ནིཔཏི. ཨིདཾ པན ཐེརསྶ པུབྦེ ཀཏཀམྨཾ,-ཐེརོ ཧི ཏཏོ ཨཏྟབྷཱཝཏོ སཏྟམེ བྷཝེ ཨེཀསྨིཾ གཱམེ ཀུལདཱརཀོ ཧུཏྭཱ ཀཱིལ༹ནཏྠཱཡ ཨེཀཾ སུནཁཾ ནདིཡཾ ཨོཏཱརེཏྭཱ ཨུདཀེ ཀཱིལ༹མཱཔེསི. ཨེཝཾ ཀཱིལ༹མནྟཾ སུནཁཾ སཡམེཝ ཨུརེན ཨུགྒཧེཏྭཱ ཏཱིརཾ ཨཱནེསཱིཏི ཨེཝཾ ¶ པུབྦེ ཀཏཀམྨཝིཔཱཀཝསེན ཐེརསྶེཝ ཧཏྠེ སལཱཀཱ ནིཔཏི.

ཏདཱ ཝཱཎིཛཱ ཨུདཀཔིཊྛེ ཁིཔིཾསུ. ཨཐ སཀྐོ དེཝཱནམིནྡོ ཀུམྦྷཱིལརཱུཔཾ མཱཔེཏྭཱ པིཊྛིཡཾ ཨཱརོཔེཏྭཱ ཨཱནེསི. ཐེརོ ཡཀྑདཱིཔཾ པཏྭཱ ཨནྡྷཙཀྑུཀཱནཾ ཡཀྑཱནཾ མེཏྟཱནུབྷཱཝེན ཙཀྑུཾ ལབྷཱཔེསི. ཡཀྑཱ ཙ ཐེརསྶ གུཎཾ ཉཏྭཱ དྭེ ཡཀྑབྷཱཏིཀེ ཨདཾསུ. ཐེརོ ཙ སཱིཧལ༹དཱིཔཾ གནྟྭཱ མཧཱཙེཏིཡརཱུཔཾ ལོཧཔཱསཱདརཱུཔཾ སརཱིརདྷཱཏུཾ མཧཱབོདྷིབིཛཱནི ཙ ཨཱནེཏྭཱ པཙྩཱགམཱསཱིཏི.

སུམེདྷཏྠེརོ ཙ ཧལངྐསྶ ནཱམ ནགརསྶ དཀྑིཎདིསཱབྷཱགེ མྷཏྟིཔཱམེ པུརཏྠིམཱཡ ཨནུདིསཱཡ དིནྣནཱམིཀེ ཝིཧཱརེ ཝསི. ཋཱནསྶ པན ནཱམཝསེན ཐེརསྶོཔི དིནྣཝིཧཱརོ ཏྭེཝ ནཱམཾ ཨཧོསི. སོཔི ཐེརོ པཾསུཀཱུལིཀོ ལཛྫཱིཔེསལོ སིཀྑཱཀཱམོ ཛྷཱནལཱབྷཱི ཨརཧཱཡེཝ. སོ ཧི དེཝསིཀཾ དེཝསིཀཾ ཨཊྛནཝཡོཛནཔྤམཱཎེ པཱདཙེཏིཡཾ གནྟྭཱ ཝནྡི. ཙེཏིཡངྒཎཝཏྟཉྩ ཨཀཱསི. ཏཏོ ཨཱགནྟྭཱ མྷཏྟིགཱམེ པིཎྜཱཡ ཙརི. ཨིདཾ ཐེརསྶ ནིབདྡྷཝཏྟཾ.

ཨཔརཱནིཔི ཝཏྠཱུནི བཧཱུནི སནྟི, སབྦཱནི པན ཏཱནི ཝིཏྠཱརེཏྭཱ ཝཏྟབྦཱནིཔི གནྠཔཱརཝབྷཡེན ན ཝཀྑཱམ. སབྦཱནིཔི ཧི ཝུཙྩམཱནཱནི ཨཡཾ སཱསནཝཾསཔྤདཱིཔིཀཱ ཨཏིཔྤཔཉྩཱ བྷཝིསྶཏི.

སམྨཱསམྦུདྡྷསྶ ཧི པརིནིབྦཱནཏོ ཡཱཝཛྫཏནཱ ཐེརཱནཾ པརམྤརཝསེན སངྒྷཊྚེཏྭཱ ཨཱནཡནམེཝེཏྠ ཨདྷིཔྤེཏཾ. ཡཐཱཝུཏྟཱནི པན ཝཏྠཱུནི ཨདྷུནཱ ཨབྷིཉྙཱལཱབྷཱིནཾ པུགྒལཱནཾ ཨཁེཏྟབྷཱཝེན པསངྒཉཱཎཔྤཊིབཱཧཎཏྠཾ ཨརིམདྡནནགརེ ཙ བཧཱུནཾ ཨབྷིཉྙཱལཱབྷཱིནཾ པུགྒལཱནཾ ནིཝཱསཊྛཱནཏཱ དསྶནཏྠཾ ཝུཏྟཱནི. ཝུཏྟཉྩེཏཾ བྷིཀྑུནཱིཁནྡྷཀཊྛཀཐཱཡཾ,–

པཊིསམྦྷིདཱཔཏྟེཧི ཝསྶསཧསྶཾ སུཀྑཝིཔསྶཀེཧི ཝསྶསཧསྶཾ ¶ ཨནཱགཱམཱིཧི ཝསྶསཧསྶཾ སཀདཱགཱམཱིཧི ཝསྶསཧསྶཾ སོཏཱཔནྣེཧི ཝསྶསཧསྶནྟི ཨེཝཾ པཉྩཝསྶསཧསྶཱནི པཊིཝེདྷདྷམྨོ ཋསྶཏཱིཏི.

དཱིགྷནིཀཱཡཊྛཀཐཱཡཾ པན སཾཡུཏྟནིཀཱཡཊྛཀཐཱཡཉྩ པཊིསམྦྷིདཱཔཏྟེཧི ཝསྶསཧསྶཾ ཚལཱ༹བྷིཉྙེཧི ཝསྶསཧསྶཾ ཏེཝིཛྫེཧི ཝསྶསཧསྶཾ སུཀྑཝིཔསྶཀེཧི ཝསྶསཧསྶཾ པཱཏིམོཀྑེན ཝསྶསཧསྶནྟི ཝུཏྟཾ.

ཨངྒུཏྟརནིཀཱཡཊྛཀཐཱཡཾ པན ཝིབྷངྒཀཐཱཡཉྩ བུདྡྷཱནཾ པརིནིབྦཱནཏོ ཝསྶསཧསྶམེཝ པཊིསམྦྷིདཱ ནིབྦཏྟེཏུཾ སཀྐོནྟི, ཏཏོ པརཾ ཚ ཨབྷིཉྙཱ, ཏཏོཔི ཨསཀྐོནྟཱ ཏིསྶོ ཝིཛྫཱ ནིབྦཏྟིཾསུ. གཙྪནྟེ ཀཱལེ ཏཱཔི ནིབྦཏྟེཏུཾ ཨསཀྐོནྟཱ སུཀྑཝིཔསྶཀཱ ཧོནྟི. ཨེཏེནེཝ ནཡེན ཨནཱགཱམིནོ སཀདཱགཱམིནོ སོཏཱཔནྣཱཏི ཝུཏྟཾ.

ཨེཝཾ ནཱནཱནཡེཧི ཨཊྛཀཐཱཡཔི ཨཱགཏཏྟཱ ཨདྷུནཱ ལོཀེ ཨརིཡཔུགྒལཱ བྷཝིཏུཾ ན སཀྐཱཏི ན ཝཏྟབྦཾ. ཨརིཡཱནམེཝ ཁེཏྟསྶ ཨདྷུནཱཔི སམྦྷཝཏོ, སཙེ ཨཱརདྡྷཝིཔསྶཀོ བྷཝེཡྻ སོ ཨརཧཱ བྷཝིཏུཾ སཀྐཱཡེཝཱཏི ནིཊྛམེཏྠཱཝགནྟབྦཾ. ཨཊྛཀཐཱསུ པན ནཱནཱབྷཱཎཀཏྠེརཱནཾ ནཱནཱཝཱདཝསེན ཝུཏྟནྟི དཊྛབྦཾ. ཨེཏྟཀེནེཝ པན ནཱནཱཀཱརེན ཝཱདོ བྷིནྣོཔི སཱསནཾ བྷིཛྫཏིཡེཝ. སཱསནསྶ ཨབྷིནྣཾཡེཝ ཧི ཨེཏྠ པམཱཎནྟི.

ཨེཝཾ མརམྨམཎྜལེ ཨརིམདྡནནགརེ ཨནེཀེཧི ཨརཧནྟསཏེཧི སཱསནཾ ཝིཛྫོཏཏི. བྷགཝཏོ པན པརིནིབྦཱནཏོ ཏིཾསཱདྷིཀཱནཾ ནཝཝསྶསཏཱནཾ ཨུཔརི པརམྨརཊྛེ སེཉིལཉྙིཀྲོདྷིནཱམེན རཉྙཱ སམཀཱལཝསེན སཱིཧལ༹དཱིཔེ རཛྫཾ པཏྟསྶ མཧཱནཱམརཉྙོ ཀཱལེ བུདྡྷགྷོསབུདྡྷདཏྟཏྠེརེཧི པབྷུཏི ཏེཏེམཧཱཐེརཱ ཏེཏེགནྠེ ཨཀཾསུ.

ཏཏོ པཙྪཱ སཏིསམཱདྷིཔཉྙཱམནྡཝསེན སུཁཱཝབོདྷནཏྠཾ ¶ ཊཱིཀཱཡོ ཨཀཾསུ. ཨརིམདྡནནགརེ ཛིནཙཀྐེསཏྟནཝུཏཱདྷིཀེ ཚསཏེ སཧསྶེ ཙ སམྤཏྟེ ཏིཎྞཾ པིཊཀཱནཾ མཱུལབྷཱུཏེསུ སདྡནཡེསུ སོཏཱརཱནཾ ཚེཀཏྠཱཡ མཧཱསམུདྡེཝིཡ ཨཱནནྡོ ནཱམ མཧཱམཙྪོ ཏཱིསུ པིཊཀེསུ སཱཊྛཀཐེསུ ཝིལོལེཏྭཱ ཨགྒཝཾསོ ནཱམ ཐེརོ སདྡནཱིཏིཔྤཀརཎཾ ཨཀཱསི. ཨརིམདྡནནགརེ ཧི ཨུཏྟརཱཛཱིཝཏྠེརཱདཱིནཾ སཱིཧལ༹དཱིཔཾ གམནཏོ པུབྦེཡེཝ ཏཡོ མཧཱཐེརཱ པརིཡཏྟིཝིསཱརདཱ, མཧཱཨགྒཔཎྜིཏོ, ཏསྶ སདྡྷིཝིཧཱརིཀོ དུཏིཡཨགྒཔཎྜིཏོ, ཏསྶ བྷཱགིནེཡྻོ ཏཏིཡཨགྒཔཎྜིཏོཏི. ཏཏིཡཨགྒཔཎྜིཏོ པན ཨགྒཝཾསོཏིཔི ཝོཧཱརིཡཏི.

ཏསྨིཉྩ ཀཱལེ ཨརིམདྡནནགརཝཱསིནོ སདྡཀོཝིདཱ བཧཝོ སནྟཱིཏི ཡཱཝ ལངྐཱདཱིཔཱ ཀིཏྟིགྷོསོ པཏྠརི. ཏསྨཱ སཱིཧལ༹དཱིཔིཀཱ སདྡཀོཝིདཱ ཝཱིམཾསེཏུཀཱམཱ ཧུཏྭཱ ཨརིམདྡནནགརཾ ཨཱགམཾསུ. ཏདཱ ཨརིམདྡནནགརཝཱསིནོ བྷིཀྑཱུ སདྡནཱིཏིཔྤཀརཎཾ དསྶེསུ.

སཱིཧལ༹དཱིཔིཀཱ ཙ ཏཾ དིསྭཱ ཨུཔདྷཱརེནྟཱ སདྡཝིསཡེ ཨཡཾ གནྠོཝིཡ སཱིཧལ༹དཱིཔེ གནྠོ ཨིཏྠི, ཨིམསྨིཾ པཀརཎེ ཨཱགཏཝིནིཙྪཡམྤི སཀལཾ ན ཛཱནིམྷཱཏི ནཱནཱཔྤཀཱརེཧི ཐོམེསུནྟི ཡཱཝཛྫབྷནཱ ཀཐཱམགྒོ ན ཨུཔཙྪིནྣོཏི.

ཨརིམདྡནནགརེ སཱིཧལ༹དཱིཔཾ གནྟྭཱ པཙྩཱགཏོ ཚཔྤདོ ནཱམ སདྡྷམྨཛོཏིཔཱལཏྠེརོ སདྡནཡེ ཚེཀཏཱཡ སུཏྟནིདྡེསཾ ཨཀཱསི. པརམཏྠདྷམྨེ ཙ ཚེཀཏཱཡ སངྑེཔཝཎྞནཾ ནཱམཙཱརདཱིཔཀཉྩ. ཝིནཡེ ཚེཀཏཱཡ ཝིནཡགཱུལ༹ཏྠདཱིཔནིཾ སཱིམཱལངྐཱརཉྩ ཨཀཱསི. ཨཏྟནཱ ཀཐཱནཾ གནྠཱནཾ ནིགམེ སདྡྷམྨ ཛོཏིཔཱལོཏི མཱུལནཱམེན ཝུཏྟཾ. ཀུསིམནགརེ པན ཚཔྤད གཱམེ ཛཱཏཏྟཱ ཋཱནསྶ ནཱམེན ཚཔྤདོཏི པཱཀཊོ.

ཀུཁནནགརེ པན ཚཔྤདོཏི ཝོཧཱརིཏོཔི ཨེཀོ ཐེརོ ཨཏྠི. སོ ཨལཛྫཱི དུསྶཱིལོ. ཨེཀཙྩེ པན ནཱམསཱམཉྙལེསམཏྟེན པཏྟལངྐཾ སཱིལཝནྟཾ པེསལཾ སིཀྑཱཀཱམཾ ཚཔྤདཏྠེརཾ ཨལཛྫིདུསྶཱིལབྷཱཝེན ཨུཔཝདནྟི, ཡཐཱ ནཱམ སཱམཉྙལེསམཏྟེན མལླཔུཏྟཾ ཨཱཡསྨནྟཾ དབྦཾ ཨསམཱཙཱརེནཱཏི.

ཨརིམདྡནནགརཡེཝ ཨལོངྒཙཉྙིསཱུནཱམཀསྶ རཉྙོ ཀཱལེ མཧཱཝིམལབུདྡྷིཏྠེརོ ཙཱུལ༹ཝིམལབུདྡྷིཏྠེརོཏི དྭེ ཐེརཱ པརིཡཏྟིཝིསཱརདཱ ཨཧེསུཾ. ཏེསུ མཧཱཝིམལབུདྡྷིཏྠེརོ ཀཙྩཱཡནསྶ སཾཝཎྞནཾ ནྱཱསགནྠམཀཱསི.

ཀེཙི པན སཱིཧལ༹དཱིཔཝཱསཱི ཝིམལབུདྡྷིཏྠེརོ ཏམཀཱསཱིཏི ཝདནྟི. ཙཱུལ༹ཝིམལབུདྡྷིཏྠེརོ པན ཝུཏྟོདཡསྶ པོརཱཎཊཱིཀམཀཱསི. ཚནྡོསཱརཏྠཝིཀཱསིནིཾ སདྡྷམྨཉཱཎཏྠེརོ ཨཀཱསི. ཝཙནཏྠཛོཏིཾ པན ཝེཔུལླཏྠེརོ ཨཀཱསི. ནྱཱསགནྠསྶཔོརཱཎཊཱིཀཾ ནརཔཏིརཉྙོ ཀཱལེ ཨེཀོ ཨམཙྩོ ཨཀཱསི.

སོ ཧི རཉྙོ ཨེཀཾ ཨོརོདྷཾ པཊིཙྩ ཛཱཏཾ ཨེཀཾ དྷཱིཏརཾ དིསྭཱ ཝཱནརོཝིཡ ལེཔེ ལགྒིཏོ ཏིསྶཾ པཊིབནྡྷཙིཏྟོ ཧུཏྭཱ ལགྒི. ཏམཏྠཾ ཛཱནིཏྭཱ རཱཛཱ ཨེཝམཱཧ,– སཙེ ཨེཏཾ ཨིཙྪེཡྻཱསི, ཨེཀཾ གནྠཾ པརིཔུཎྞཝིནིཙྪཡཾ གཱུལ༹ཏྠཾ ཀརོཧི, སཙེ ཏྭཾ ཏཱདིསཾ གནྠཾ ཀཱཏུཾ སཀྐུཎེཡྻཱསི, ཨེཏཾ ལབྷིསྶསཱིཏི. ཨཐ སོ ནྱཱསསྶ སཾཝཎྞནཾ པོརཱཎཊཱིཀཾ ཨཀཱསི.

ཏཏོ པཙྪཱ ཧཱིནཱཡཱཝཏྟིཏྭཱ དྷཱིཏརཾ དཏྭཱ རཛྫུགྒཱཧཱམཙྩཊྛཱནེ ཋཔེསི, ཡཾ མརམྨཝོཧཱརེན སཾཔྱངྒཨིཏི ཝུཙྩཏི. ཏེན པན ཀཏཏྟཱ སོཔི གནྠོ ཏཾ ནཱམེན ཝུཙྩཏི. ཀཱརིཀཾ ཏསྶཱ ཙ སཾཝཎྞནཾ ཚཏྟགུཧིནྡསྶ ནཱམ རཉྙོ ཀཱལེདྷམྨསེནཱཔཏིཏྠེརོ ཨཀཱསི. ཏེན ཀིར ཀཱརཔིཏེ ནནྡགུཧཱཡ སམཱིཔེ ནནྡཝིཧཱརེ ནིསཱིདིཏྭཱ ཨཀཱསི.

ཏསྨིཉྩཀཱལེ ¶ གནྠམཱདནཔབྦཏེ ནནྡམཱུལགུཧཏོ ཨརཧནྟཱ ཨཱགནྟྭཱ ཏསྨིཾ ཝིཧཱརེ ཝསྶཾ ཨུཔགཙྪིཾསུ. ཏེསཾ སམྨུཁེ ཀཏཏྟཱ ཏེ ཙ གནྠཱ པཎྜིཏེཧི སཱརཏོ པཙྩེཏབྦཱཏི ཨཱཙརིཡཱ ཝདནྟི.

ཝཱཙྩཝཱཙཀཾ པན དྷམྨདསྶཱི ནཱམ སཱམཎེརོ ཨཀཱསི.

སདྡཏྠབྷེདཙིནྟཾ པན ཨརིམདྡནནགརསམཱིཔེ ཋིཏསྶ ཁཎིཏྟིཔཱདཔབྦཏསྶ སམཱིཔེ ཨེཀསྨིཾ གཱམེ ཝསནྟོ སདྡྷམྨསིརི ནཱམ ཐེརོ ཨཀཱསི. སོཡེཝ ཐེརོ བྲཧཛཾ ནཱམ ཝེདསཏྠམྤི མརམྨབྷཱསཱཡ པརིཝཏྟེསི.

ཨེཀཀྑརཀོསཾ པན སདྡྷམྨཀིཏྟིཏྠེརོ ཨཀཱསི. སོ ཧི ཀལིཡུགེ སཏྟཱསཱིཏཱདྷིཀེ ཨཊྛསཏེ སམྤཏྟེ མིཙྪཱ དིཊྛིཀཱནཾ ཛལུམསཉྙིཏཱནཾ ཀུལཱནཾ བྷཡེན སཀལེཔི ཏམྦདཱིཔརཊྛེ སཱསནོབྷཱསོ མིལཱཡཏི. བཧཱུནིཔི པོཏྠཀཱནི ཨགྒིབྷཡེན ནསྶེསུཾ.

ཏདཱ ཏཾ པཝཏྟིཾ པསྶིཏྭཱ སཙེ པརིཡཏྟིདྷམྨོཝིནསྶེཡྻ, པཊིཔཏྟིདྷམྨོཔི ནསྶིསྶཏི, པཊིཔཏྟིདྷམྨེ ནསྶནྟེ ཀུཏོ པཊིཝེདྷདྷམྨོ བྷཝིསྶཏཱིཏི སཾཝེགཾ ཨཔཛྫིཏྭཱ ཨིམཾ གནྠཾ ཨཀཱསཱིཏི ཏཊྚིཀཱཡཾ ཝུཏྟཾ.

མུཁམཏྟསཱརཾ སཱགརཏྠེརོ ཨཀཱསི.

ཀལིཡུགེ ཨེཀཱསཱིཏཱདྷིཀེ པཉྩསཏེ སམྤཏྟེ ཨེཀཾ དཧརཔུཏྟཾ ཀཱལངྐཏཾ པཊིཙྩ སཾཝེགཾ ཨཱཔཛྫིཏྭཱ པཙྩེཀབུདྡྷཏྟཾ པཏྠཡནྟསྶ ཛེཡྻསིངྑནཱམཀསྶ རཉྙོ པུཏྟོ ཀྱཙྭཱནཱམཀོ རཱཛཱ རཛྫཾ ཀཱརེསི. དྷམྨརཱཛཱཏིཔི ནཱམལཉྪཾ པཊིགྒཎྷི. ཏཱིསུ པན པིཊཀེསུ ཡཐཱབྷཱུཏཾ ཝིཛཱནཀཏཱཡ མརམྨཝོཧཱརེན ཀྱཙྭཱཏི ཝོཧཱརིཡཏི.

སོ ཙ ཀིར རཱཛཱ པཱལི༹ཨཊྛཀཐཱཊཱིཀཱགནྠནྟརེསུ ཨཏིཚེཀཏཱཡ པིཊཀཏྟཡེ སཱཀཙྪམཏྟམྤི ཀཱཏུཾ སམཏྠོ ¶ ནཱམ ནཏྠཱིཏི ཨུགྒཧིཏཏིཔིཊཀོ ཧུཏྭཱ བྷིཀྑུསངྒྷམྤི དིཝསེ སཏྟཧི ཝཱརེཧི གནྠཾ ཝཱཙེཏི.

ཁཎིཏྟིཔཱདཔབྦཏསྶ སམཱིཔེཔི ཨེཀཾ ཏལཱ༹ཀཾ ཀཱརཱཔེཏྭཱ ཏཏྠ རཱཛཱགཱརཾ ཀཱརཱཔེཏྭཱ ཏཏྠ ནིསཱིདིཏྭཱ གནྠཾ ཝཱཙེཏི. སབྦཱནི པན རཱཛཱུནཾ ཀིཙྩཱནི པུཏྟསྶེཝ ཨུཔརཱཛསྶ ནིཡྻཱདེསི. གནྠཾ ཨུགྒཎྷནྟཱནཾ ཨོརོདྷཱནམཏྠཱཡ སངྑེཔཏོ སདྡབིནྡུཾ ནཱམ པཀརཎཾ པརམཏྠབིནྡུཉྩ ནཱམ པཀརཎཾ ཨཀཱསི. ཏསྶ ཧི ཙིཏྟཾ པརིཡཏྟིཡཾཡེཝ རམཏི. ཨཉྙཾ པན རཱཛཀིཙྩཾ སུཎིཏུམྤི ན ཨིཙྪི. ཨནུརུདྡྷརཱཛཱ ཨནཱགཏེ ཨཧཾ རཱཛཱ བྷཝེཡྻཱམི, ཏདཱཡེཝ ཨིམཱནི ཏཱལི༹བཱིཛཱནི ཨུཊྛཧནྟཱུཏི ཨདྷིཊྛཧིཏྭཱ རོཔེསི. ཏཱནི ཏསྶ རཉྙོ ཀཱལེ ཨུཊྛཧིཾསུ. ཏེནེཝ ཨནུརུདྡྷརཱཛཱཡེཝཱཡནྟི རཊྛཝཱསིནོ སཉྫཱནིཾསུ. སམྨུཏིརཱཛཱ ཧི ཨནུརུདྡྷརཱཛཱ ཀྱཙྭཱརཱཛཱཏི ཨིམེ ཏཡོ ཨེཀསནྟཱནཱཏི ཝདནྟི.

སོ རཱཛཱ ཨེཀམྤི ཙེཏིཡཾ ཨཀཱསི, ན ཏཾ ནིཊྛཾ ཨགམཱསི, པརིཡཏྟིཡཾཡེཝ པརིཙཱརཀཏྟཱཏི རཱཛཝཾསེ ཨཱགཏཾ. ལོཀསམྨུཏིཝསེན ཀཀྑལ༹དིནེ ཨིཊྛཀཱནི ཀཱརཱཔེཏྭཱ ཏསྨིཾཡེཝ དིནེ བྷཱུམིསམཾ ཀཏྭཱ ཏསྨིཾཡེཝ དིནེ ཨཉྙམྤི སབྦཾ ཀཱརཱཔེསི. ཏེན མརམྨཝོཧཱརེན པྲསྶདཱ ཙེཏིཡནྟི ཡཱཝཛྫབྷནཱ པཱཀཊཾ.

ཏསྶ རཉྙོ ཨེཀཱ དྷིབྷཱ ཝིབྷཏྱཏྠཾ ནཱམ གནྠཾ ཨཀཱསཱིཏི.

པུབྦེ ཀིར ཨརིམདྡནནགརེ ཨུགྒཧདྷཱརཎཱདིཝསེན སཱསནཾ ཨཏིཝིཡ ཝིརཱུལ༹མཱཔཛྫི. ཨརིམདྡནནགརེཡེཝ ཧི ཨེཀོ ཝུཌྜྷཔབྦཛིཏོ བྷིཀྑུ གནྠཾ ལིཁིཏུཾ སིལཱལེཁནདཎྜེན ཨིཙྪནྟོ རཱཛགེཧཾ པཱཝིསི. རཱཛཱ ཀེན ཨཱགཏོསཱིཏི པུཙྪི. གནྠཾ ལིཁིཏུཾ སིལཱལེཁནདཎྜེན ཨིཙྪནྟོ ཨཱགཏོ མྷཱིཏི. ཨེཝཾ མཧལླཀོ ཏྭཾ གནྠཾ མཧུསྶཱཧེན པརིཡཱཔུཎནྟོཔི ¶ གནྠེསུ ཚེཀསྶ ཨོཀཱསཾ ན པསྶཱམི, སཙེ ཧིམུསལོ ཨངྐུརཾ ཨུཊྛཱཔེཏྭཱ རཱུཧེཡྻ, ཨེཝཾ སཏི ཏྭཾ གནྠེསུ ཚེཀཏཾ ཨཱཔཛྫེཡྻཱསཱིཏི ཨཱཧ.

ཏཏོ པཙྪཱ ཝིཧཱརཾ གནྟྭཱ དེཝསིཀཾ དེཝསིཀཾ ཨེཀདནྟཀཊྛཔྤམཱཎཏྟཾ ལེཁནཾ ཨུགྒཧེཏྭཱ ཀཙྩཱཡནཨབྷིདྷམྨེཏྠསངྒཧཔྤཀརཎཾ ཨཱདིཾ ཀཏྭཱ ཨཱཙརིཡསྶ སནྟིཀེ ཨུགྒཎྷི. སོ ཨཙིརེནེཝ གནྠེསུ ཚེཀཏཾ པཏྭཱ མུསལེ ཛམྦུརུཀྑངྐུརཾ བནྡྷིཏྭཱ ཨུསྶཱཔེཏྭཱ རཱཛགེཧཾ པཱཝིསི.

ཨཐ ཏཾ རཱཛཱ པུཙྪི,-ཀེནཨཱགཏོསཱིཏི. ཨཡཾ མཧཱརཛ མུསལོ ཨངྐུརཾ ཨུཊྛཱཔེཏྭཱ རཱུཧཏཱིཏི ཨཱཙིཀྑིཏུཾ ཨཱགཏོམྷཱིཏི ཝུཏྟེ རཱཛཱ ཨེཏསྶ གནྠེསུ ཚེཀཏཾ པཏྟོམྷཱིཏི ཝུཏྟཾ ཧོཏཱིཏི ཛཱནཱསི. ཏཾ སཙྩཾ ཝཱ ཨལིཀཾ ཝཱཏི ཝཱིམཾསནཏྠཱཡ མཧཱཐེརཱནཾ སནྟིཀཾ པཧིཎི. མཧཱཐེརཱཔི གཱུལ༹ཊྛཱནཾ པུཙྪིཾསུ. སོཔི པུཙྪིཏཾ པུཙྪིཏཾ བྱཱཀཱསི.

ཨཐ སོ བྷིཀྑུ མཧཱཐེརེ ཨེཝམཱཧ,-ཏུམྷེ བྷནྟེ མཾ བཧཱུ པུཙྪཐ, ཨཧམྤི ཏུམྷེ པུཙྪིཏུཾ ཨིཙྪཱམི, ཨོཀཱསཾ དེཐཱཏི ཡཱཙིཏྭཱ ཨཉྙསམཱནཙེཏསིཀནྟི ཨེཏྠ ཨཉྙསདྡསྶ ཨཝདྷྱཱཔེཀྑཏྟཱ ཨཝདྷིཔདཾ ཨུདྡྷརིཏྭཱ དསྶེཐཱཏི པུཙྪི. མཧཱཐེརཱཔི པུབྦེ ཨམནསིཀཏཏྟཱ སཱིགྷཾ ཝིསྶཛྫིཏུཾ ན སཀྑིཾསུ. རཱཛཱ ཏམཏྠཾ སུཏྭཱ ཏུཊྛཙིཏྟོ ཧུཏྭཱ དིསཱ པཱམོཀྑནམེན ཨཱཙརིཡཊྛཱནེ ཋཔེསི. སོ པན བྷིཀྑུ ཨགནྠཀཱརཀོཔི གནྠཀཱརཀོཝིཡ པཙྪིམཱནཾ ཛནཏཱནཾ དིནྣོཔདེསཝསེན ཨུཔཀཱརཾ ཀཏྭཱ སཱསནེ ཨུཔྤཛྫཱིཏི. ཧོནྟི ཙེཏྠ,–

ཨཧཾ མཧལླཀོ ཧོམི, དུཔྤཉྙོ པརིཡཏྟིཀཾ;

ཨུགྒཧཾ མཧུསྶཱཧེན, ན སཀྑིསྶཱམི ཛཱནིཏུཾ.

ཨེཝཉྩ ¶ ནཱཏིམཉྙེཡྻ,

ནཱཔྤོསྶུཀྐཏམཱཔཛྫེ;

སདྡྷམྨེ ཚེཀཀཱམོཝ,

ཨུསྶཱཧཾཝ ཀརེ པོསོ.

ཝུཌྜྷཔབྦཛིཏོ བྷིཀྑུ,

མཧལླཀོཔི དུཔྤཉྙོ;

ཨཱཔཛྫི ཚེཀཏཾ དྷམྨེ,

ཏམཔེཀྑནྟུ སོཏཱརོཏི.

པུབྦེ ཀིར ཨརིམདྡནནགརེ མཱཏུགཱམཱཔི གནྠཾ ཨུགྒཎྷིཾསུ. ཡེབྷུཡྻེན ཨུགྒཧདྷཱརཎཱདིཝསེན པརིཡཏྟིསཱསནཾ པགྒཧེསུཾ. མཱཏུགཱམཱ ཧི ཨཉྙམཉྙཾ པསྶནྟཱ ཏུམྷེ ཀིཏྟཀཾ གནྠཾ ཨུགྒཎྷཐ, ཀིཏྟཀཾ གནྠཾ ཝཱཙུགྒཏཾ ཀརོཐཱཏི པུཙྪི སུནྟི.

ཨེཀོ ཀིར མཱཏུགཱམོ ཨེཀཾ མཱཏུགཱ,མཾ པུཙྪི,-ཏྭཾ ཨིདཱནི ཀིཏྟཀཾ གནྠཾ ཝཱཙུགྒཏཾ ཀརོསཱིཏི. ཨཧཾ པན ཨིདཱནི དཧརཔུཏྟེཧི བལིབོདྷཏྟཱ བྱཱཀུལཾ པཏྭཱ བཧུཾ གནྠཾ ཝཱཙུགྒཏཾ ཀཱཏུཾ ནསཀྐཱ,སམནྟམཧཱཔཊྛཱནེ པན ཀུསལཏྟིཀམཏྟཾཝ ཝཱཙུགྒཏཾ ཀརོམཱིཏི ཨཱཧཱཏི.

ཨིདམྤི ཨརིམདྡནནགརཝཱསཱིནཾ མཱཏུགཱམཱནམྤི པརིཡཏྟུགྒཧཎེ ཨེཀཾ ཝཏྠུ,–

ཨེཀཾ ཀིར བྷིཀྑུཾ པིཎྜཱཡ ཙརནྟཾ ཨེཀཱ དྭཱདསཝསྶིཀཱ དཧརིཏྠཱི པུཙྪི,-ཀིནྣཱམོསི ཏྭཾ བྷནྟེཏི. ཁེམཱནཱམཱཧནྟི. ཀཐཉྷི བྷནྟེ པུམཱཝ སམཱནོ ཨིཏྠིལིངྒེན ནཱམཾ ཨཀཱསཱིཏི ཨཱཧ. ཨཐ ཨནྟོགེཧེ ནིསིནྣཱ མཱཏཱ སུཏྭཱ དྷཱིཏརཾ ཨཱཧ,-ཏྭཾ རཱཛཱདིགཎསྶ ལཀྑཎཾ ན ཛཱནཱསཱིཏི. ཨཱམ ཛཱནཱམི, ཨཡཾ པན ཁེམསདྡོ ན རཱཛཱདིགཎཔཀྑཾ བྷཛཏཱིཏི. ཨཐ ¶ མཱཏཱ ཨེཝམཱཧ,-ཨཡཾ པན ཁེམསདྡོ ཨེཀདེསེནེཝ རཱཛཱདིགཎཔཀྑཾ བྷཛཏཱིཏི.

ཨཡཾ པནེཏྠ དྷཱིཏུ ཨདྷིཔྤཱཡོ,-ན རཱཛཱདིསདྡོ ཀདཱཙི རཱཛོཏི པཙྩཏྟཝཙནཝསེན ཨོཀཱརནྟོ དིསྶཏི ཝིནཱ དེཝརཱཛོཏིཨཱདིསམཱསཝིསཡཾ, ཁེམསདྡོ པན ཀཏྠཙི ཁེམོཏི ཙ ཁེམནྟི ཙ ལིངྒནྟརཝསེན རཱུཔནྟརཾ དིསྶཏི, ཏེནེཝ ཁེམསདྡོ ན རཱཛཱདིགཎོཏི ཝེདིཏབྦོཏི.

ཨཡཾ པན མཱཏུ ཨདྷིཔྤཱཡོ,-ཁེམསདྡོ ཨབྷིདྷེཡྻལིངྒཏྟཱ ཏིལིངྒཀོ,ཡདཱ པན སཉྙཱསདྡཱདྷིཀཱརེ པཙྩཏྟཝཙནཝསེན ཁེམཱཏི ཨཱཀཱརནྟོ དིསྶཏི, ཏདཱ ཨེཀདེསེན ཁེམསདྡོ རཱཛཱདིགཎཔཀྑཾ བྷཛཏཱིཏི.

ཨིདམྤི ཨེཀཾ ཝཏྠུ,–

ཨརིམདྡནནགརེ ཀིར ཨེཀསྶ ཀུཊུམྦིཀསྶ ཨེཀོ པུཏྟོ དྭེ དྷཱིཏརོ ཨཧེསུཾ. ཨེཀསྨིཉྩ ཀཱལེ གྷམྨཱབྷིབྷཱུཏཏྟཱ གེཧསྶ ཨུཔརིཏལེ ནཧཱཡིཏྭཱ ནིསཱིདི. ཨཐ ཨེཀཱ དཱསཱི གེཧསྶ ཧེཊྛཱ ཋཏྭཱ ཀིཉྩི ཀམྨཾ ཀརོནྟཱི ཏསྶ ཀུཊུམྦིཀསྶ གུཡ྄ཧཊྛཱནཾ ཨོལོཀེསི. ཏམཏྠཾ ཛཱནིཏྭཱ ཀུཊུམྦིཀོ སཱཁཾ ཨོལོཀེསཱིཏི ཨེཀཾ ཝཱཀྱཾ བནྡྷིཏྭཱ པུཏྟསྶ དསྶེསི,ཨིམསྶ ཨཏྠཡོཛནཾ ཀརོཧཱིཏི. ཨཐ པུཏྟོ ཨཏྠཡོཛནཾ ཨཀཱསི,-སཱཁཾ རུཀྑསཱཁཾ ཨོལེཀེསི ཨུདིཀྑཏཱིཏི. ཨཐ པཙྪཱ ཨེཀཱཡ དྷཱིཏུཡཱ དསྶེསི, ཨིམསྶ ཨཏྠཡོཛནཾ ཀརོཧཱིཏི. སཱཔི ཨཏྠཡོཛནཾ ཨཀཱསི,- སཱ སུནཁོ ཁཾ ཨཱཀཱསཾ ཨོལོཀེསི ཨུདིཀྑཏཱིཏི. ཨཐ པཙྪཱ ཨེཀཱཡ དྷཱིཏུཡཱ དསྶེསི, ཨིམསྶ ཨཏྠ ཡོཛནཾ ཀརོཧཱིཏི. སཱཔི ཨཏྠཡོཛནཾ ཨཀཱསི,-སཱ ཨིཏྠཱི ཁཾ ཨངྒཛཱཏཾ ཨོལོཀེསི མུཁཾ ཨུདྡྷཾ ཀཏྭཱ ཨོལོཀེསཱིཏི.

ཨིདམྤི ཨེཀཾ ཝཏྠུ,–

ཨེཀོ ཀིར སཱམཎེརོ རཏནཔཱུརཝཱསཱི ཨརིམདྡནནགརེ མཱཏུགཱམཱཔི ¶ སདྡནཡེསུ ཨཏིཀོཝིདཱཏི སུཏྭཱ ཨཧཾ ཏཏྠ གནྟྭཱ ཛཱནིསྶཱམཱིཏི ཨརིམདྡནནགརཾ གཏོ. ཨཐ ཨནྟརཱམགྒེ ཨརིམདྡནནགརསྶ སམཱིཔེ ཨེཀཾ དཧརིཏྠིཾ ཀཔྤཱསཝཏྠུཾ རཀྑིཏྭཱ ནིསིནྣཾ པསྶི. ཨཐ སཱམཎེརོ ཏསྶཱ སནྟིཀཾ མགྒཔུཙྪནཏྠཱཡ གཙྪི. ཨཐ དཧརིཏྠཱི སཱམཎེརཾ པུཙྪི,-ཀུཏོ ཨཱགཏོསཱིཏི.

སཱམཎེརོ ཨཱཧ,-རཏནཔཱུརཏོ ཨཧཾ ཨཱགཙྪཏཱིཏི. ཀུཧིཾ གཏོསཱིཏི ཝུཏྟེ ཨརིམདྡནནགརཾ གཙྪཏཱིཏི ཨཱཧ. ཨཐ དཧརིཏྠཱི ཨེཝམཱཧ,-ཏྭཾ བྷནྟེ སདྡཡོགཝིནིཙྪཡཾ ཨནུཔདྷཱརེཏྭཱ ཀཐེསི, ཨམྷཡོགཊྛཱནེ ཧི ཏྭཾ ནཱམ ཡོགསདྡེན ཡོཛེཏྭཱ ཀཐེསི, ནནུ པཎྜིཏཱནཾ ཝཙནེན ནཱམ པརིཔུཎྞཏྠེན ཨཝིརུདྡྷསདྡནཡེན པུཎྞིནྡུསངྐཱསེན བྷཝིཏབྦནྟི. ཨཐ སཱམཎེརོ ཁེཏྟཝཏྠཱུནི རཀྑནྟཱི དུགྒཏཱ དཧརིཏྠཱིཔི ཏཱཝ སདྡནཡཀོཝིདཱ ཧོཏི, ཀིམངྒཾ པན བྷོགསམྤནྣཱ མཧལླཀིཏྠིཡོཏི ལཛྫིཏྭཱ ཏཏོཡེཝ པཊིནིཝཏྟིཏྭཱ པཙྩཱགམཱསཱིཏི.

ཨིདཾ མརམྨམཎྜལེ ཏམྦདཱིཔརཊྛེ ཨརིམདྡནནགརེ ཐེརཔརམྤརཝསེན སཱསནསྶ པཏིཊྛཱནཾ.

ཨིདཱནི མརམྨམཎྜལེཡེཝ ཛེཡྻཝཌྜྷནརཊྛེ ཀེཏུམཏཱིནགརེ སཱསནཝཾསཾ ཝཀྑཱམི.

ཀལིཡུགེ ཧི དྭིསཏྟཏཱདྷིཀེ ཨཊྛཝསྶསཏེ སམྤཏྟེ ཛེཡྻཝཌྜྷནརཊྛེ ཀེཏུམཏཱིནགརེ མཧཱསིརིཛེཡྻསཱུརོ ནཱམ རཱཛཱ རཛྫཾ ཀཱརེསི. ཨེཀཾ ཨཏིཚེཀཾ དེཝནཱག ནཱམཀཾ ཨེཀཾ ཧཏྠིཾ ནིསྶཱཡ ཝིཛིཏཾ ཝིཏྠཱརམཀཱསི. ཏསྶ པན རཉྙོ ཀཱལེ ཀལིཡུགེ དྭིནཝུཏཱདྷིཀེ ཨཊྛཝསྶསཏེ སམྤཏྟེ མཧཱཔརཀྐམོ ནཱམ ཐེརོ སཱིཧལ༹དཱིཔཏོ ནཱཝཱཡ ཨཱགནྟྭཱ ཀེཏུམཏཱིནགརཾ སམྤཏྟོ. རཱཛཱ ཙ དྭཱརཱ ཝཏཱིནགརསྶ ¶ དཀྑིཎདིསཱབྷཱགེ མཧཱཝིཧཱརཾ ཀཱརཱཔེཏྭཱ ཏསྶ ཨདཱསི ནིཙྩབྷཏྟམྤི. ཏསྨིཉྩ ཝིཧཱརེ སཱིམཾ སམྨནྣིཏྭཱ ཏིསྶཾ སཱིམཱཡཾ ཏུལཱཝསེན ཨཏྟནཱ སམཾ ཀཏྭཱ ལོཧམཡབུདྡྷཔྤཊིབིམྦཾ ཀཱརཱཔེསི. ཏཉྩ བུདྡྷཔྤཊིབིམྦིཾ སམྤཏྟལངྐཱདཱིཔནྟི ནཱམེན པཱཀཊཾ ཨཧོསི.

ཏསྶ རཉྙོ ཀཱལེ སུརཱམེརཡསིཀྑཱཔདཾ པཊིཙྩ ཝིཔཱདོ ཨཧོསི. ཀཐཾ. བཱིཛཏོ པཊྛཱཡཱཏི སམྦྷཱརེ པཊིཡཱ དེཏྭཱ ཙཱཊིཡཾ པཀྑིཏྟཀཱལཏོ པཊྛཱཡ ཏཱལནཱལིཀེརཱདཱིནཾ པུཔྥརསོ པུཔྥཏོ གལིཏཱབྷིནཝཀཱལཏོ པཊྛཱཡ ཙ ན པཱཏབྦོཏི ཀངྑཱཝིཏརཎཱིཊཱིཀཱདཱིསུ ཝུཏྟཝཙནེ ཨདྷིཔྤཱཡཾ ཝིཔལླཱསཏོ གཧེཏྭཱ ཏཱལནཱལིཀེརཱདཱིནཾ རསོ གལིཏཱབྷིནཝཏོ པཊྛཱཡ པིཝིཏུཾ ན ཝཊྚཏཱིཏི ཨེཀཙྩེ ཝདནྟི. ཨེཀཙྩེ པན ཨེཝཾ ཝདནྟི,–ཏཱལནཱལིཀེརཱདཱིནཾ རསོ གལིཏཱབྷིནཝཀཱལེ པིཝིཏུཾ ཝཊྚཏཱིཏི.

ཏཏྠ པུབྦཔཀྑེ ཨཱཙརིཡཱནཾ ཨཡམདྷིཔྤཱཡོ,–

བཱིཛཏོ པཊྛཱཡཱཏི ཨེཏྠ སམྦྷཱརེ པཊིཡཱདེཏྭཱ ཙཱཊིཡཾ པཀྑིཏྟཀཱལཏོ པཊྛཱཡ ན པཱཏབྦོ. ཏཱལནཱལིཀེརཱདཱིནཾ པུཔྥརསོ ཙ གལིཏཱབྷིནཝཀཱལཏོཡེཝ ན པཱཏབྦོཏི.

ཨཡཾ པན ཨཔརཔཀྑེ ཨཱཙརིཡཱནམདྷིཔྤཱཡོ,–

བཱིཛཏོ པཊྛཱཡཱཏི ཨེཏྠ སམྦྷཱརེ པཊིཡཱདེཏྭཱ ཙཱཊིཡཾ པཀྑིཏྟཀཱལཏོ པཊྛཱཡ ན པཱཏབྦོ. ཏཱལནཱལིཀེརཱདཱིནཾ སམྦྷཱརེཧི པཊིཡཱདིཏོ པུཔྥརསོ པུཔྥཏོ གལིཏཱབྷིནཝཀཱལཏོ ན པཱཏབྦོཏི.

ཨེཝཾ ཏཱལནཱལིཀེརཱདཱིནཾ རསོ གལིཏཱབྷིནཝཀཱལཏོ པཊྛཱཡ པཱཏུཾ ཝཊྚཏི ན ཝཊྚཏཱིཏི ཝིཝཱདཾ ཀརོནྟཱནཾ མཛ྄ཛྷེ ནིསཱིདིཏྭཱ སམྤཏྟལངྐོ མཧཱཔརཀྐམཏྠེརོ ཏཱདིསོ པིཝིཏུཾ ཝཊྚཏཱིཏི ཝིནིཙྪིནྡི, སུརཱཝིནིཙྪཡཉྩ ནཱམ གནྠཾ ཨཀཱསི ¶ . ཨེཝཾ ཀེཏུམཏཱིནགརཾ མཱཔེནྟཾ མཧཱསིརིཛེཡྻསཱུརཾ ནཱམ རཱཛཱནཾ ནིསྶཱཡ ཀེཏུམཏིཡཾ སཱསནཾ པཏིཊྛཧི.

ཨིདཾ མརམྨམཎྜལེཡེཝ ཀེཏུམཏཱིནགརེ

སཱསནསྶ པཏིཊྛཱནཾ.

ཨིདཱནི མརམྨམཎྜལེ ཏམྦདཱིཔརཊྛེཡེཝ ཁནྡྷཔུརསཱསནཝཾསཾ ཝཀྑཱམི.

ཀལིཡུགེ ཧི ཙཏུསཊྛཱདྷིཀེ ཚཝསྶསཏེ ཏཡོ བྷཱཏིཀཱ ཀིཏྟིཏརནཱམཀཾ རཱཛཱནཾ རཛྫཏོ ཙཱཝེཏྭཱ ཁནྡྷཔུརནགརེ རཛྫཾ ཀཱརེསུཾ. ཏདཱ ཀིཏྟིཏརནཱམཀསྶ རཉྙོ ཨེཀོ པུཏྟོ ཙཱིནརཊྛིནྡརཱཛཱནཾ ཡཱཙིཏྭཱ བཧཱུཧི སེནངྒེཧི ཁནྡྷཔུརནགརཾ སམྤརིཝཱརེཏྭཱ ཨཊྛཱསི. ཨཐ ཏཱིསུ པིཊཀེསུ ཚེཀཾ ཨེཀཾ མཧཱཐེརཾ པཀྐོསེཏྭཱ མནྟེསུཾ. ཐེརོ ཨེཝམཱཧ,– ཛནཔདཱཡཏྟམིདཾ ཀམྨཾ སམཎཱནཾ ན ཀཔྤཏི ཝིཙཱརེཏུཾ, ཨཧམྤི སམཎོ, ནཱཊཀེཧི པན སདྡྷིཾ མནྟེཐཱཏི. ཨཐ ནཱཊཀེ པཀྐོསེཏྭཱ མནྟེསུཾ. ནཱཊཀཱཔི སཙེ ཀཱརཎཾ ནཏྠི, ཨེཝཾ སཏི ཕལཾ ན བྷཝེཡྻ, སཙེ པཱུཏི ནཏྠི, མཀྑིཀཱ ན སནྣིཔཏེཡྻུནྟི གཱིཏཾ གཱཡིཏྭཱ ཨུདཀེ ཀཱིལ༹ནྟི.

ཨཐ ཏེཙ ཏཡོ བྷཱཏིཀཱ ཏཾ སུཏྭཱ ཀིཏྟིཏརནཱམཀཾ རཱཛཱནཾ བནྡྷནཱགཱརཏོ གཧེཏྭཱ མཱརེཏྭཱ ཨིདཱནི ཡཾ རཛྫེ ཋཔཡིསྶཱམཱཏི ཙིནྟེཏྭཱ ཏུམྷེ གཙྪཐ, ཨཡཾ ཏསྶ སཱིསོ, ཨིདཱནི ཨེས པརལོཀཾ གཏོཏི སཱིསཾ དསྶེསུཾ. ཨཐ ཙཱིནརཊྛསེནཱཡོཔི ཨིདཱནི རཱཛཝཾསིཀོ ནཏྠི, ཏེ ནཧི ཡུཛ྄ཛྷིཏུཾ ན ཨིཙྪཱམ, ཡཾ རཛྫེ ཋཔཡིསྶཱམཱཏི ཀཏྭཱ མཡཾ ཨཱགཏཱ, ཨིདཱནི སོ ནཏྠཱིཏི ཝཏྭཱ ནིཝཏྟེཏྭཱ ཨགམཾསུ.

སོ ཙ ཐེརོ ནཱཊཀེཧི སདྡྷིཾ མནྟེཐཱཏི ཨེཏྟཀམེཝ ཝུཏྟཏྟཱ བྷིཀྑུབྷཱཝཏོ ན མོཙེཏཱིཏི དཊྛབྦཾ. ཝུཏྟཉྩེཏཾ,–

པརིཡཱཡོཙ ཨཱཎཏྟི, ཏཏིཡེ དུཏིཡེ པན;

ཨཱཎཏྟིཡེཝ སེསེསུ, དྭཡམེཏཾ ན ལབྦྷཏཱིཏི.

ཏསྨིཾ པན ཁནྡྷཔུརེ ཨརིམདྡནནགརེ ཨརཧནྟགཎཝཾསིཀཱ ཚཔྤདགཎཝཾསིཀཱ ཨཱནནྡ གཎཝཾསིཀཱ ཙ ཐེརཱ བཧཝོ ཝསནྟི. ཏེཧི པན ཀཏགནྠོ ནཱམ ཀོཙི ནཏྠཱིཏི.

ཨིདཾ ཁནྡྷཔུརེ སཱསནསྶ པཏིཊྛཱནཾ.

ཨིདཱནི མརམྨམཎྜལེ ཏམྦདཱིཔརེཊྛེཡེཝ ཝིཛཡཔུརེ སཱསནཝཾསཾ ཝཀྑཱམི.

ཀལིཡུགེ ཧི ཙཏུསཏྟཏཱདྷིཀེ ཚཝསྶསཏེ སཱིཧསཱུརོ ནཱམ རཱཛཱ ཝིཛཡཔུརཾ མཱཔེསི. ཏཏོ པཙྪཱ དྭཱིསུ སཾཝཙྪརེསུ ཨཏིཀྐནྟེསུ ཙམུཾནདིཡཾ མཏསེཏིབྷཾ ཨེཀཾ ལབྷིཏྭཱ ཨེཀསེཏིབྷིནྣོཏི ཏསྶ ནཱམཾ པཱཀཊཾ ཨཧོསི. ཏསྶ རཉྙོ ཀཱལེ ཝིཛཡཔུརེ སཱིལཝནྟཱ ལཛྫཱིཔེསལཱ བྷིཀྑཱུ བཧཝོ ནཏྠི. ཨརིམདྡནནགརཏོ ཨནུརུདྡྷརཱཛཀཱལེ རཱཛབྷཡེན ནིལཱིཡིཏྭཱ ཨཝསེསཱ སམཎཀུཏྟཀཱཡེཝ བཧཝོ ཨཏྠི. པཙྪཱ ཙཱུལ༹ཨརཧནྟཏྠེརདིབྦཙཀྑུཏྠེརཱནཾ ཨཱགཏཀཱལེཡེཝ ལཛྫཱིཔེསལཱ བྷིཀྑཱུ བལཝནྟཱ ཧུཏྭཱ གཎཾ ཝཌྜྷཱཔེསུཾ. རཱཛཱ ཙ དིབྦཙཀྑུཏྠེརཾ ཨནྟེཔུརཾ པཝེསེཏྭཱ དེཝསིཀཾ པིཎྜཔཱཏེན བྷོཛེསི. ཨནུརུདྡྷརཉྙཱ ཏམྦུལམཉྫཱུསཱཡཾ ཋཔེཏྭཱ པཱུཛིཏཱ སཏྟ དྷཱཏུཡོ ལབྷིཏྭཱ ཏཱསཾ པཉྩདྷཱཏུཡོ ཙཉྙིངྑུཙེཏིཡེ ནིདྷཱནཾ ཨཀཱསི. ཨཝསེསཱ པན དྭེ དྷཱཏུཡོ པུཉྙསྶ ནཱམ ཨམཙྩསྶ པཱུཛནཏྠཱཡ ནིཡྻཱདེསི. སོཙ ཨམཙྩོ ཛེཡྻཔུརེ པུཉྙཙེཏིཡེ ནིདྷཱནཾ ཨཀཱསི.

ཏདཱ ཙ ཀིར སམཎཀུཏྟཀཱ གཧཊྛཱཝིཡ རཱཛརཱཛམཧཱམཏྟཱནཾ ¶ སནྟིཀེ ཨུཔཊྛཱནཾ ཨཀཾསུ. ཀལིཡུགེ ཙཏུཨསཱིཏཱདྷིཀེ ཚཝསྶསཏེ སམྤཏྟེ སཱིསསཱུརརཉྙོ ཛེཊྛ པུཏྟོ ཨུཛནོ ནཱམ རཱཛཱ རཛྫཾ ཀཱརེསི. སོ པན ཨཝཔངྐྱཱ ནཱམཀེ དེསེ ཙམྤཀཀཊྛམཡེ སཏྟཝིཧཱརེ ཀཱརཱཔེསི. དྭི ཝསྶཱདྷིཀེ སཏྟཝསྶསཏེ ཀཱལེ ཏེ ཝིཧཱརཱ ནིཊྛཾ ཨགམཾསུ.

ཏེསུ ཝིཧཱརེསུ ཙམྤཀཾ ནཱམ པདྷཱནཝིཧཱརཾ ཨམཙྩཔུཏྟསྶ སུདྷམྨམཧཱསཱམིཏྠེརསྶ ཨདཱསི. སོ པན ཐེརོ ཨརིམདྡནནགརེ ཨརཧནྟཏྠེརསྶ ཝཾསིཀོཏི དཊྛབྦོ.

ཝེལཱུ༹ཝནཾ ནཱམ པརིཝཱརཝིཧཱརཾ པན ཨཱབྷིདྷམྨིཀསྶ ཉཱཎདྷཛསྶ ནཱམ ཐེརསྶ ཨདཱསི. སོཔི ཨརཧནྟཏྠེརསྶ ཝཾསིཀོ.

ཛེཏཝནཾ ནཱམ པརིཝཱརཝིཧཱརཾ པན སཀལཝིནཡཔིཊཀཾ ཝཱཙུགྒཏཾ ཀརོནྟསྶ གུཎཱརཱམཏྠེརསྶ ཨདཱསི. སོ པན ཐེརོ ཨརིམདྡནནགརེཡེཝ ཨཱནནྡཏྠེརསྶ ཝཾསིཀོ.

ཀུལཝིཧཱརཾ ནཱམ པརིཝཱརཝིཧཱརཾ ཨཱདིཙྩརཾསིནོ ནཱམ ཐེརསྶ ཨདཱསི. སོཔི ཨཱནནྡཏྠེརསྶ ཝཾསིཀོཡེཝ.

སུཝཎྞཝིཧཱརཾ ནཱམ པརིཝཱརཝིཧཱརཾ སུདྷམྨཱལངྐཱརསྶ ནཱམ ཐེརསྶ ཨདཱསི. སོཔི ཨཱནནྡཏྠེརཝཾསིཀོཡེཝ.

ནཱིཙགེཧཾ ནཱམ པརིཝཱརཝིཧཱརཾ ཝརཔཏྟསྶ ནཱམ ཐེརསྶ ཨདཱསི. སོ པན སུདྷམྨམཧཱསཱམིཏྠེརསྶ ཨནྟེཝཱསིཀོ.

དཀྑིཎཀོཊིཾ ནཱམ པརིཝཱརཝིཧཱརཾ སིརིཔུཉྙཝཱསིནོ ནཱམ ཐེརསྶ ཨདཱསི. སོཔི སུདྷམྨམཧཱསཱམིཏྠེརསྶ ཨནྟེཝཱསིཀོཏི.

ཏེསཾ ཝིཧཱརཱནཾ ཨེསནྣཊྛཱནེ རཱཛཱ སཡམེཝ ཧཏྠེན གཧེཏྭཱ མཧཱབོདྷིརུཀྑཾ རོཔེསི. ཏེསཾ ཝིཧཱརཱནཾ པཊི ཛགྒནཏྠཱཡ བཧཱུནིཔི ཁེཏྟཝཏྠཱུནི ཨདཱསི ཨཱརཱམགོཔཀ ཀུལཱནི ཙ.

ཏེསཾ ¶ པན ཐེརཱནཾ སུདྷམྨཔུརཱརིམདྡནཔུརབྷིཀྑུཝཾསིཀཏྟཱལཛྫིཔེསལཏཱ ཝིཉྙཱཏབྦཱ. ཏེནེཝ ཝིཛཡཔུརེ སཱསནཾ ཨཏིཝིཡ པརིསུདྡྷཾ ཨཧོསཱིཏི དཊྛབྦཾ.

ཏེསམྤི སིསྶཔརམྤརཱ ཨནེཀསཧསྶཔྤམཱཎཱ ཨཧེསུཾ. ཨེཝཾ ལཛྫཱིཔེསལཱནཾཡོ བྷིཀྑཱུནཾ སནྟིཀཱ ཀེཙི སདྡྷིཝིཧཱརིཀཱ ཀཱིཊཱགིརིམྷི ཨསྶཛིཔུནབྦསུཀཱཝིཡ ཨལཛྫཱི དུསྶཱིལཱ ཨུཔྤཛྫིཾསུ, སེཡྻཐཱཔི ནཱམ མདྷུརམྦརུཀྑཏོ ཨམྦིལཕལནྟི. ཏེ པན བཧུཨནཱཙཱརཾ ཙརིཾསུཡེཝ. ཨིདཾ པན ཏེསཾ མཱུལཨུཔྤཏྟི དསྶནཾ.

རཱཛཱ ཧི ཏདཱ ཏེསཾ ཝིཧཱརཱནཾ པཊིཛགྒནཏྠཱཡ བཧཱུནི ཁེཏྟཝཏྠཱུནི ཨདཱསི. ཏེསུ ཁེཏྟཝཏྠཱུསུ བལིཝིཙཱརཎཏྠཱཡ སུདྷམྨམཧཱསཱམིཏྠེརོ ཨེཀཙྩེ བྷིཀྑཱུ ཨཱརཀྑཎཊྛཱནེ ཋཔེསི. ཨཱརཀྑཎབྷིཀྑཱུ པན དྷམྨཱནུལོམཝསེན ཀསྶཀཱནཾ ཨོཝཱདཱཔེསི, ཁེཏྟཝཏྠུསཱམིབྷཱགམྤི པཊིགྒཎྷཱཔེསི. ཏསྨིཉྩ ཀཱལེ ཁེཏྟཝཏྠཱུནི པཊིཙྩ བྷིཀྑཱུ ཝིཝཱདཾ ཨཀཾསུ. ཨཐ ཏཾ ཝིཝཱདཾ སུཏྭཱ སཱསནདྷརཏྠེརོ ཙ དྭེ པརཀྐམཏྠེརཱ ཙ ཏཏོ ནིཀྑམིཾསུ. ནིཀྑམིཏྭཱ སཱསནདྷརཏྠེརོ ཁཎིཏྟི པཱདཔབྦཏེ ནིསཱིདི. དྭེ པརཀྐམཏྠེརཱ ཙ ཙངྒཀིངྒཔབྦཏཀནྡརེ ནིསཱིདིཾསུ. ཏེསཉྷི ནིཝཱསཊྛཱནཏྟཱ ཡཱཝཛྫཏནཱ ཏཾ ཋཱནཾ པརཀྐམཊྛཱནནྟི པཱཀཊཾ ཨཧོསི. ཏེ པན ཐེརཱ ཨེཀཙཱརཱཏི ཝོཧཱརིཾསུ. ཨཝསེསཱ པན བྷིཀྑཱུ གཱམཝཱསཱིབཧུཙཱརཱཏི ཝོཧཱརིཾསུ. ཏཏོ པཊྛཱཡ ཨརཉྙཝཱསཱིགཱམཝཱསཱིཝསེན ཝིསུཾ གཎཱ ཧོནྟི. ཝིཧཱརསྶ ནིནྣཱནཾ ཁེཏྟཝཏྠཱུནཾ བལིཔྤཊིགྒཱཧཀབྷིཀྑཱུནམྤི སངྒྷཛཱཏིསམཉྙཱ ཨཧོསི.

ཀལིཡུགེ ཙཏུཝསྶཱདྷིཀེ སཏྟསཏེ ཨུཛནསྶ རཉྙོ དྷརམཱནསྶེཝ ཀནིཊྛབྷཱཏིཀོ ཀྱེཙྭཱ ནཱམ རཱཛཱ ཀུམཱརོ རཛྫཾ གཎྷི.

ཨཡཾ པན ཏསྶ ཨཊྛུཔྤཏྟི,– ཨུཛནོ ནཱམ རཱཛཱ ཏྭཾ སམུདྡམཛ྄ཛྷཾ ¶ ནཱམ གཱམཾ གནྟྭཱ ཏཏྠ ནིསཱིདིཏྭཱ ཏཏྲུཔྤཱདབལིཾ བྷུཉྫཱཧཱིཏི ནིཡྻཱདེསི. སོ པན རཱཛཀུམཱརོ ལུདྡཀམྨེསུཡེཝ ཨབྷིརམྨཎསཱིལོ. ཨེཀསྨིཾ སམཡེ པིགཝཾ གནྟྭཱ པཙྩཱགཏཀཱལེ རཏྟིཡཾ སུཔིནཾ པསྶི,– སཀྐོ དེཝཱནམིནྡོ ཨཱགནྟྭཱ ཨུཔོསཐསཱིལཾ སམཱདིཡཱཧི, ཨེཝཾ སཏི ཨཙིརེནེཝ སེཏིབྷེ ལབྷིསྶསཏཱིཏི ཝཏྭཱ ཏཱཝཏིཾསབྷཝནཾ པུན གཏོཏི.

སོཙ རཱཛཀུམཱརོ ཏཏོ པཊྛཱཡ ཨུཔོསཐསཱིལཾ སམཱདིཡི. པཙྪཱ ཀཱལེཔི ཨཏྟནོ ཧཏྠེ གུཐེན ཀིལིནྣཾ བྷཝཏཱིཏི པུན སུཔིནཾ པསྶི. སོ ཨཙིརེནེཝ པཉྩ སེཏིབྷེ ལབྷི. ཨཐ ཨེཀོ ཨམཙྩོ གནྟྭཱ རཉྙོ ཏམཏྠཾ ཨཱརོཙེསི. རཱཛཱ ཏུཊྛཙིཏྟོ ཧུཏྭཱ མམ ཀིར བྷོནྟོ ཀནིཊྛབྷཱཏིཀོ པཉྩ སེཏིབྷེ ལབྷཱིཏི རཱཛཔུརིསཱནཾ མཛ྄ཛྷེ སཾཝཎྞེསི. ཨམཙྩོ པུན རཱཛཀུམཱརསྶ སནྟིཀཾ གནྟྭཱ ཏམཏྠཾ ཨཱརོཙེསི. རཱཛཀུམཱརོཔི མམ བྷཱཏིཀོ རཱཛཱ ཨཀཐིཏཔུབྦཾ ཝཱཙཱཔེཡྻཾ ཝདཏཱིཏི ཨཱརཱདྷཡིཏྭཱ པུན གནྟྭཱ ཏམཏྠཾ རཉྙོ ཨཱརོཙཱཔེསི. རཱཛཱཔི ཏཐེཝ ཝདཏཱིཏི. ཏཾ སུཏྭཱ རཱཛཀུམཱརོ བྷིཡྻོསོ པསཱིདི.

ཀསྨཱ པན ཨུཛནོ རཱཛཱ ཀིཏྟིཏརཾ ནཱམ རཱཛཀུམཱརཾ ཀནིཊྛཝོཧཱརེན ན ཝདཏཱིཏི. ཨེཀསེཏིབྷིནྡོ ཧི རཱཛཱ ཨཔརསྶ རཉྙོ དེཝིཾ གབྦྷིནིཾ ཨཱནེཏྭཱ ཨགྒམཧེསིཊྛཱནེ ཋཔེསི, ཋཔེཏྭཱ ཨཙིརེནེཝ ཨུཛནཾ ཝིཛཱཡི, ཏེནེཝ ན ཨུཛནོ ཨེཀསེཏིབྷིནྡསྶ པུཏྟོ, ཀིཏྟིཏརོ ནཱམ རཱཛཀུམཱརོཡེཝ ཨེཀསེཏིབྷིནྡསྶ པུཏྟོ, ཏསྨཱ ཏཾ ཀཱརཎཾ པཊིཙྩ སོ ཏཾ ཀནིཊྛཝོཧཱརེན ན ཝདཏཱིཏི.

ཀནིཊྛོ པཉྩསེཏིབྷེ ལབྷཏཱིཏི སུཏྭཱ རཱཛཱ བྷཱཡིཏྭཱ ཀནིཊྛསྶ རཛྫཾ ཨུཔནིཡྻཱདེསི. རཱཛཱ རཱཛགེཧསྶ པཙྪིམདྭཱརེན ནིཀྑམི. ཀནིཊྛོ པུརིམདྭཱརེན པཱཝིསི. པཉྩནྣཾ པན སེཏིབྷཱནཾ ལདྡྷཏྟཱ པཉྩསེཏིབྷིནྡོཏི པཱཀཊོ. མཱུལནཱམཾ པནསྶ ¶ སཱིཧསཱུརོཏི དཊྛབྦཾ. ཏསྶ རཉྙོ ཀཱལེ བཧཱུ ཨལཛྫིནོ གཱམསཱམནྟ ཝིཧཱརེ ཝསིཏྭཱ ཨནེཀཝིདྷཾ ཨཱནཱཙཱརཾ ཙརིཾསུ. སུདྷམྨཔུརཨརིམདྡནཔུརཏོ པརམྤརཝསེན ཨཱགཏཱ བྷིཀྑཱུཔི བཧཱུ ལཛྫིནོ སིཀྑཱཀཱམཱ སནྟི.

ཨཐ ཏསྶ རཉྙོ བྷཏྟཾ པརིབྷུཉྫནཀཱལེ ཨེཀོ སམཎཀུཏྟཀོ ཨཊྛ པརིཀྑཱརེ གཧེཏྭཱ ཨཱགནྟྭཱ རཉྙོ སམྨུཁེ ཨཊྛཱསི. ཀིམཏྠཱཡ ཨཱགཏོསཱིཏི པུཙྪིཏེ པིཎྜཔཱཏཏྠཱཡ ཨཱགཏོམྷཱིཏི ཨཱཧ. ཨཐ རཱཛཱ སཡཾ བྷུཉྫིསྶཱམཱིཏི ཨཱརབྷིཏྭཱཔི ཨཏིཔྤསནྣཏཱཡ པན སུཝཎྞཔཱཏིཡཱ པཊིཡཱདིཏཾ སཀལམྤི བྷཏྟཾ ཨདཱསི. ཨཐ རཱཛཱ ཨེཝཾ ཙིནྟེསི,– ཨཡཾ བྷིཀྑུ པིཎྜཔཱཏཏྠཱཡ ཨུཔམཛ྄ཛྷནྟི ཀཡེཝ ཨཱགནྟྭཱ ཨཊྛཱསི, ན སོ པུཐུཛྫནབྷིཀྑུ, ཨཐ ཁོ ཨབྷིཉྙཱལཱབྷཱི ཨརཧཱ བྷཝེཡྻ, མམ པུཉྙཏྠཱཡ ཨཱགཏོ བྷཝེཡྻ མཾ ཨནུཀམྤཾ ཨུཔཱདཱཡཱཏི.

ཨེཝཾ པན ཙིནྟེཏྭཱ ཨེཀཾ རཱཛཔུརིསཾ ཨཱཎཱཔེསི ཏསྶ པཙྪཱ ཨནུགནྟྭཱ ཨོལོཀེཏུཾ. སོ པན སམཎཀུཏྟཀོ སཡཾ ཨལཛྫིབྷཱུཏཏྟཱཝ ཨཏྟནོ བྷརིཡཱ པཙྩུགྒནྟྭཱ པཏྟཾ གཎྷི. ཏཾ དིསྭཱ རཱཛཔུརིསོ རཉྙོ སནྟིཀཾ གནྟྭཱ པཋམམེཝ ཨེཝཾ ཙིནྟེསི,– སཙེ ཡཐཱབྷཱུཏཾ ཨཱརོཙེཡྻཾ, རཉྙོ པསཱདོ ཝིནསྶེཡྻ, ཨེཝཾ པན ཨནཱརོཙེཏྭཱ ཡཐཱ རཉྙོ པསྶཱདོ བྷིཡྻོསོམཏྟཱཡ བྷཝེཡྻ, མཡ྄ཧམྤི ལཱབྷོ ཨུཔྤཛྫེཡྻ, སམཎཀུཏྟཀོཔི རཱཛཔརཱདྷཏོ ཝིམུཙྩེཡྻ, ཨེཝཾ ཨཱརོཙེསྶཱམཱིཏི. ཨེཝཾ པན ཙིནྟེཏྭཱ ཨཧཾ མཧཱརཱཛ ཏཾ ཨནུགནྟྭཱ ཨོལོཀེསི, ཨཐ མམ ཨེཝཾ ཨོལོཀེནྟསྶཝ ཨནྟརདྷཱཡཱིཏི ཨཱརོཙེསི. རཱཛཱ བྷིཡྻོསོམཏྟཱཡ པསཱིདིཏྭཱ ཧཏྠཾ པསཱརེཏྭཱ ཡཐཱཧཾ མཉྙམི, ཏཐཱ ཨཝིརཛ྄ཛྷནམེཝཏནྟི ཏིཀྑཏྟུཾ ཝཱཙཾ ནིཙྪཱརེསི, རཱཛཔུརིསསྶ ཙ དཱཏབྦཾ ཨདཱསི.

ཏསྨིཾཡེཝ དིཝསེ ཨེཀོ ཨམཙྩོ རཉྙོ པཎྞཱཀཱརཏྠཱཡ ¶ ཝེལཱཧཀཾ ནཱམ ཨེཀཾ ཏུརངྒམཾ ཨདཱསི. ཨཐ རཱཛཱ མམ པུཉྙཱནུབྷཱཝེན ཨེས ལདྡྷོཏི སམྤཧཾསི. ཏཾ པན ཏུརངྒམཾ ཨཱརོཧིཏྭཱ ཨེཀཾ ཧཏྠཱརོཧཾ པཱཛཱཔེསི. ཨཐ མཧཱཛནསྶ ཨོལོཀེནྟསྶ ཧཏྠཱརོཧསྶ སཱིསེཝེཊྛནདུསྶཾཡེཝ པསྶིཏྭཱ ཨཱཀཱསེ པཀྑནྡྷོ བཀོཝིཡ པཉྙཱཡཏི. སོ པན ཏུརངྒམོ པཱཏོཝ ཝིཛཡཔུརཏོ གཙྪནྟོ པབྦཏབྦྷནྟརནགརཾ སཱཡནྷསམཡེ པཱཔུཎི. ཨབྦྷ ཝིཛབྦྷནཨསྶོཏིཔི ནཱམཾ ཨཀཱསི.

ཨིཙྩེཝཾ སམཎཀུཏྟཀཱ དཱརམྤི པོསེསུཾ, པགེཝ ཨིཏརཾ ཨནཱཙཱརཾ. ཏེནེཝ ཏེ སམཎཀུཏྟཀཱ རཉྙོ མལླརངྒམྤི པཝིསིཏྭཱ མལླཾ ཡུཛ྄ཛྷེསུཾ. ཏེསུ པན སམཎཀུཏྟཀེསུ ཨོཝིཙངྒཱཁུཾསངྒྷཛོ ནཱམ སམཎཀུཏྟཀོ མལླཀམྨེ ཨཏིཝིཡ ཚེཀོ ཨདྷིཀོ. སོ ཀིར སཾཝཙྪརེ སཾཝཙྪརེ རཉྙོ མལླརངྒེ ཛཡིཏྭཱ པནྣརས ཝཱ ཝཱིསཏི ཝཱ ཨསྶེ པཊིལབྷཱིཏི.

རཏནཔཱུརནགརེ མལླཀམྨེ ཨཏིཚེཀོ ཨདྷིཀོ ཨེཀོ ཀམྦོཛཀུལོ ཨཏྠི. སོ རཏནཔཱུརནགརེ ཛེཡྻཔུརནགར ཙ ཨཏྟནཱ སམཐཱམཾ མལླཔུརིསཾ ཨསབྷིཏྭཱ ཝིཛཡ པུརཾ ཨཱགནྟྭཱ ཙམྤཀཝིཧཱརསྶ དྭཱརསམཱིཔེ མལླསབྷཱམཎྜཔེ པཝིསིཏྭཱ མལླཀམྨཾ ཀཱཏུཾ ཨིཙྪཱམཱིཏི རཉྙོ ཨཱརོཙེསི. ཨཐ རཱཛཱ ཏཾ སངྒྷཛཾ ཨཱམནྟེཏྭཱ ཨེཝམཱཧ,- ཨིདཱནི བྷོ ཏྭཾ ཨིམིནཱ སདྡྷིཾ མལླཡུདྡྷཾ ཀཱཏུཾ སཀྑིསྶསཱིཏི. ཨཱམམཧཱརཱཛ པུབྦེ ཨཧཾ དཧརེ ཧུཏྭཱ ཀཱིལ༹ནཏྠཱཡཡེཝ མལླཀམྨཾ ཨཀཱསིཾ, ཨིདཱནི པན ཨེཀཱུནསཏྟཏིཝསྶོ ཨཧཾ ཨིཏོ པཙྪཱ མལླཡུདྡྷཾ ཀཱཏུཾ སཀྑིསྶཱམི ཝཱ མཱ ཝཱཏི ན ཛཱནཱམི, ཨིདཱནི པརཔཀྑཾ མལླཔུརིསཾ མལླཀམྨེན མཱརེསྶཱམཱིཏི ཝདཏི.

ཨཐ རཱཛཱུནཾ མལླཀམྨཾ ནཱམ ཀཱིལ༹ནཏྠཱཡཡེཝ བྷཝཏི, མཱ མཱརེཏུཾ ཨུསྶཱཧཾ ཀརོཧཱིཏི ཝཏྭཱ ཨཉྙམཉྙཾ མལླཡུདྡྷཾ ཀཱརཱཔེསི ¶ . སཔརིསསྶ རཉྙོ ཨོལོཀེནྟསྶེཝ ཏེ མལླཱཀཱརེན ནཙྩིཏྭཱ ཨཉྙམཉྙཾ སམཱིཔཾ ཨུཔགཙྪིཾསུ. ཨཐ སངྒྷཛོ མལློ ཀམྦོཛམལླསྶ པཱདེན པཧརཎཱཀཱརཾ དསྶེཏྭཱ དཀྑིཎཧཏྠམུཊྛིནཱ ཀཔཱལེ པཧཱརཾ ཨདཱསི. ཨཐ ཀམྦོཛམལླསྶ མུཁཾ པཙྪཏོ ཨཧོསི. ཏདཱ སཔརིསོ རཱཛཱ ཨཱིདིསཱ པན ཝིམུཁཏོ མརཎམེཝ སེཡྻོ ཨིདཱནི པན ཨིམཾ པསྶིཏུཾ ན ཝིསཧཱམཱིཏི ཝདཏི. པུན སངྒྷཛོ ཝཱམཧཏྠ མུཊྛིནཱ པཧཱརཾ ཨདཱསི. ཨཐ ཀམྦོཛམལླསྶ མུཁཾ པརིཝཊྚེཏྭཱ ཡཐཱ པུབྦེ, ཏཐཱ པཏིཊྛཱསི.

ཏསྨིཉྩ ཀཱལེ སཔརིསོ ཁཏྟིཡོ ཏཾ ཨཙྪརིཡཾ དིསྭཱ དྭེ ཨསྶེ ཏིཾསམཏྟཱནི ཝཏྟཱནི སཏཀཧཱཔཎཉྩ ཨདཱསཱིཏི. ཨིདཉྩ ཝཙནཾ པོརཱཎཔོཏྠཀེསུ ཨཱགཏཏྟཱ སཱདྷུཛནཱནཉྩ སཾཝེཛནིཡཊྛཱནཏྟཱ ཝུཏྟཾ. ཋཔེཏྭཱ ཧི སཾཝེགལཱབྷཾ ནཏྠི ཨཉྙཾ ཀིཉྩི པཡོཛནནྟི.

ཀལིཡུགེ ཏེརསཱདྷིཀེ སཏྟཝསྶསཏེ ཝིཛཡཔུརེཡེཝ ཏསྶ པུཏྟོ ཀིཏྟིཏརནཱམཀོ རཱཛཱ རཛྫཾ ཀཱརེསི. ཝིཏརཱ སདིསནཱམཝསེནེཝ སཱིཧསཱུརོཏི ནཱམཾ པཊིགྒཎྷི. པིཏུ རཉྙོ ཀཱལེ ལདྡྷེསུ པཉྩསུ སེཏིཧེསུ ཙཏུནྣཾཡེཝ ཨཝསེསཏྟཱ ཙཏུསེཏིབྷིནྡོཏི ནཱམཾ པཱཀཊཾ. ཏེནེ ཝཱཧ ཨབྷིདྷཱནཔྤདཱིཔིཀཱཊཱིཀཱཡཾ ཙཏུསེཏིབྷིནྡོཏི. ཏསྶ རཉྙོ ཀཱལེ ཙཏུརངྒབལོ ནཱམ མཧཱཨམཙྩོ གནྠཀོཝིདོ ཨབྷིདྷཱནཔྤདཱིཔིཀཱསཾ ཝཎྞནཾ ཨཀཱསི. སོ པན སཀལབྱཱཀརཎཝནཱསངྒཉཱཎཱཙཱརཱི ཨཧོསི.

ཨེཀསྨིཉྩ སམཡེ རཱཛཱ ཨེཀཾ མཧནྟཾ ཝིཧཱརཾ ཀཱརཱཔེཏྭཱ ཨསུཀརཉྙཱ ཨཡཾ ཝིཧཱརོ ཀཱརཱཔིཏོ, ཨིམསྨིཾ ཝིཧཱརེ སཱིལཝནྟཱཡེཝ ནིསཱིདནྟཱུཏི ཀོལཱཧལཾ ཨུཔྤཱདེསི. ཨཐ སཱཙཉྙིནཱམགཱམཝཱསཱི ཨེཀོ ཐེརོ ཨཱགནྟྭཱ ནིསཱིདི.

ཨཡཾ ¶ པན ཏསྶ ཐེརསྶ ཨཊྛུཔྤཏྟི,–

སཱཙཉྙིགཱམེ ཀིར ཨེཀོ གཧཔཏི ཨཏྟནོ པུཏྟཾ སིཔྤུགྒཧཎཏྠཱཡ ཝིཧཱརེ ཨེཀསྶ བྷིཀྑུསྶ སནྟིཀེ ནིཡྻཱདེསི. པུཏྟསྶ པན ཝིཧཱརཾ ཨགནྟུཀཱམསྶ ཏཛྫནཏྠཱཡ སཀཎྚཀགཙྪསྶ ཨུཔརི ཁིཔཏི. སོ ཙ དཧརོ ནིཀྑམིཏྭཱ གེཧཾ ཨནཱགཏྭཱ ཝིཧཱརེཡེཝ ནིསཱིདི. མཱཏཱཔིཏཱུནཾ སནྟིཀཾ ཨནཱགནྟྭཱ ཐོཀཾ ཐོཀཾ དཱུརཾ གནྟྭཱ སཱམཎེར བྷཱུམིཏོ ཨུཔསམྤདབྷཱུམིཾ པཏྭཱ ཨརིམདྡནནགརཾ གཙྪི. ཨཏིཔཉྙཝནྟཏཱཡ པན པཏྟཔྤཏྟཊྛཱནེ མཧཱཐེརོ སངྒཎྷིཾསུ. ཏེནེཝེས སཀལམརམྨརཊྛེ པཱཀཊོ ཨཧོསི. ཨཐ མཱཏཱཔིཏརོ པུཏྟསྶ ཨཱགམནཾ ཨཔེཀྑིཏྭཱཡེཝ ནིསཱིདིཾསུ. ཏམཏྠཾ པན སུཏྭཱ ཨེས ཨམྷཱཀཾ པུཏྟོ བྷཝིསྶཏི ཝཱ ནོ ཝཱཏི ཝཱིམཾསིཏུཀཱམོ པིཏཱ ཨནུགཙྪི. ཨརིམདྡནནགརེ ཏཾ སམྤཱཔུཎིཏྭཱ ཨུཔཊྛཔེཏྭཱ ནིསཱིདི. སོཔི བྷིཀྑུ ཡཐཱཨུཔཊྛཱནེནེཝ སནྟཔྤེཏྭཱ གནྠཾ ཨུགྒཎྷི. ཨཔརསྨིཾ པན ཀཱལེསོ བྷིཀྑུ ཨཛྫ སཱུཔོ ཨཔྤལོཎོཏིཨཱདིནཱ པུནཔྤུནཾ བྷཎཏི.

ཨཐ པིཏཱ ཨེཝམཱཧ,- ན པུབྦེ པིཡཔུཏྟཀ ཏཡཱ ཨཱིདིསཾ ཝཙནཾ ཀཐིཏཾ, ཨིདཱནི པན ཏྭཾ ཨབྷིཎྷཾ ཨཱིདིསཾ ཝཙནཾ ཚཎསི, ཀཱརཎམེཏྠ ཀིནྟི པུཙྪི. པུབྦེ གནྠེསུ ཚེཀཏྟཾ ཨཔྤཏྭཱ གནྠེསུ ཚེཀཏྠཾ བྱཱཔནྣཙིཏྟཏཱཡ ན ཝུཏྟཾ, ཨིདཱནི པན མཡཱ ཨིཙྪིཏོ ཨཏྠོ མཏྠཀཾ པཏྟོ, ཏསྨཱ ཀཱཡབལཔརིགྒཧཎཏྠཱཡ མཡཱ ཨཱིདིསཾ ཝཙནཾ ཝུཏྟནྟི ཝདཏི. ཏཾ ཝཙནཾ སུཏྭཱ པིཏཱ མཱཏུཡཱ སནྟིཀཾ གམནཏྠཱཡ ཨོཀཱསཾ ཡཱཙིཏྭཱ པིཏརཱ སདྡྷིཾ སཀཊྛཱནཾ ཨཱགཙྪནྟོ ཝིཛཡཔུརཾ ཙེཏིཡཝནྡནཏྠཱཡ པཱཝིསི.

ཏདཱ རཉྙཱ ཝུཏྟཝཙནཾ སུཏྭཱ ཏསྨིཾ ཝིཧཱརེ ཨརུཧིཏྭཱ ནིསཱིདི ¶ . ཨཱརཀྑཔུརིསཱ ཙ ཏཾ བྷིཀྑུཾ ཝིཧཱརེ ནིསིནྣཾ དིསྭཱ ཏམཏྠཾ རཉྙོ ཨཱརོཙེསུཾ. རཱཛཱ ཙ ཙཏུརངྒབལཾ ཨམཙྩཾ ཨཱཎེཔེསི,-གནྟྭཱ ཏསྶ བྷིཀྑུསྶ ཉཱཎཐཱམཾ ཨུཔདྷཱརེཧཱིཏི. ཙཏུརངྒབལོ ཙ གནྟྭཱ ཏཾ བྷིཀྑུཾ གཱུལ༹གཱུལ༹ཊྛཱནཾ པུཙྪི. སོཔི པུཙྪིཏཾ པུཙྪིཏཾ ཝིསྶཛྫེསི. ཙཏུརངྒབལོ ཙ ཏམཏྠཾ རཉྙོ ཨཱརོཙེསི. རཱཛཱ ཏུཊྛཙིཏྟོ ཧུཏྭཱ ཏཾ ཝིཧཱརཾ ཏསྶ བྷིཀྑུསྶ ཨདཱསི. ཏསྶ པན བྷིཀྑུསྶ དཧརཀཱལེ སཀཎྚཀགཙྪེ པིཏུནོ ཁིཔནཾ པཊིཙྩ ཀཎྜཀཁིཔཏྠེརོཏི སམཉྙཱ ཨཧོསི, མཱུལནཱམཾ པནསྶ ནཱགིཏོཏི. སོཏསྨིཾ ཝིཧཱརེ ནིསཱིདིཏྭཱ སདྡསཱརཏྠཛལིནིཾ ནཱམ གནྠཾ ཨཀཱསི. ཏསྶ ཀིར ཐེརསྶ ཀཱལེ ཏསྨིཾ ནགརེ ཨཱརདྡྷ ཝིཔསྶནཱདྷུརཱ མཧལླཀཱ བྷིཀྑཱུ སཧསྶམཏྟཱ ཨཧེསུཾ. ཨཱརདྡྷགནྠདྷུརཱ པན དཧརབྷིཀྑཱུ གཎནཔཐཾ ཝཱིཏིཝཏྟཱ.

ཏསྶ པན པིཏརམྤི སེཊྛིཊྛཱནེ ཋཔེསི. ཏེནེཝ ཏཾ གཱམཾ སེཊྛིགཱམོཏི ནཱམེན ཝོཧརིཾསུ.

ཀཙྩཱཡནཝཎྞནཾ པན ཝིཛཡཔུརེཡེཝ ཨབྷཡགིརིཔབྦཏེ ནིསིནྣོ མཧཱཝིཛིཏཱཔཱི ནཱམ ཐེརོ ཨཀཱསི. ཝཱཙཀོ པདེསམྤི སོཡེཝ ཨཀཱསི. སདྡཝུཏྟིཾ པན སདྡྷམྨགུརུཏྠེརོ ཨཀཱསི.

ཨིཙྩེཝཾ ཝིཛཡཔུརེ ཨནེཀེཧི གནྠཀཱརེཧི སཱསནཾ ཝིཔུལཾ ཨཧོསི.

ཀལིཡུགེ པན པཉྩཱསཱིཏཱདྷིཀེ ཚཝསྶསཏེ སམྤཏྟེ ཨསངྑཡཱཙོཡོནྣཱམཀོ རཱཛཱ ཛེཡྻཔུརནགརཾ མཱཔེཏྭཱ ཏཏྠ རཛྫཾ ཀཱརེསི. ཏཏྠ པན རཱཛཱུནཾ ཀཱལེ ཐེརེཧི ཀཏགནྠོ ནཱམ ནཏྠི.

ཀལིཡུགེ ཚབྦིསཱདྷིཀེ སཏྟཝསྶསཏེ ཝེསཱཁམཱསེ ཛེཡྻཔུརནགརཾ ཝིནསྶི. ཏསྨིཾཡེཝ སཾཝཙྪརེ ཛེཊྛམཱསེ ཝིཛཡཔུརཾ ཝིནསྶི. ཏསྨིཾཡེཝ སཾཝཙྪརེ ཕགྒུནམཱསེ སཏྭིཝརཱཛཱ ¶ རཏནཔཱུརཾ ནཱམ ནགརཾ མཱཔེཏྭཱ རཛྫཾ ཀཱརེསཱིཏི.

ཨིདཾ ཝིཛཡཔུརཛེཡྻཔུརེསུ སཱསནསྶ པཏིཊྛཱནཾ.

ཨིདཱནི མརམྨམཎྜལེ ཏམྦནཱིཔརཊྛེཡེཝ རཏནཔཱུརནགརེ སཱསནཝཾསཾ ཝཀྑཱམི.

ཀལིཡུགེ ཧི ཨཊྛཱསཱིཏཱདྷིཀེ སཏྟཝསྶསཏེ ནརཔཏིརཉྙོ དྷིཏཱཡ སདྡྷིཾ ཨལོངྒཙཉྙིསཱུརཉྙོ པུཏྟོ ཨཱནནྡསཱུརིཡོ ནཱམ སནྠཝཾ ཀཏྭཱ ཨེཀཾ (སིདྡྷིཀཾ ནཱམ པུཏྟཾ ཝིཛཱཡི. སོ ཝཡེ སམྤཏྟེ རཛྫསམྤཏྟིཾ ལབྷི. ཏཏོ པབྷུཏི ཡཱཝ མྲེནཙོདིགྷཱ རཉྙཱ ཨརིམདྡནནགརེ རཛྫཾ ཨཀཾསུ). ཏཏོ པཙྪཱ སིརིསུདྷམྨརཱཛཱདྷིཔཏཱིཏི ལདྡྷནཱམོ སཏྭིཝརཱཛཱ རཏནཔཱུརནགརེ རཛྫཾ ཀཱརེསི. ཏསྶ རཉྙོ ཀཱལེ ཀལིཡུགེ ཨེཀནཝུཏཱདྷིཀེ སཏྟཝསྶསཏེ སམྤཏྟེ ལངྐཱདཱིཔཏོ སིརིསདྡྷམྨཱལངྐཱརཏྠེརོ སཱིཧལ༹མཧཱསཱམིཏྠེརོཙཱཏི ཨིམེ དྭེ ཐེརཱ པཉྩ སརཱིརདྷཱཏུཡོ ཨཱནེཏྭཱ ནཱཝཱཡ ཀུསིམཏིཏྠཾ པཱཔུཎིཏྭཱ རཱམཉྙརཊྛེ བཉྙཱརནི ནཱམེན རཉྙཱ ནིཝཱརིཏཱ ཨནིསཱིདིསྭཱ ཏཏོ སོཡེཝ རཱཛཱ ཐེརེ ཡཱཝ སིརིཁེཏྟནགརཱ པཧིཎི. ཏམཏྠཾ ཉཏྭཱ རཏནཔཱུརིནྡོ རཱཛཱ ཙཏྟཱལཱིསཱཡ ནཱཝཱཧི ཡཱཝ སིརིཁེཏྟནགརཾ པཙྩུགྒནྟྭཱ ཨཱནེསི. ཨཱནེཏྭཱ ཙ མཧཱནཝགཱམཾ པཏྟཀཱལེ སཧ ཨོརོདྷེཧི ཨམཙྩེཧི ཙ སཡམེཝ རཱཛཱ པཙྩུགྒཙྪི. རཏནཔཱུརཾ པྤན པཏྟཀཱལེ མཧཱཔཐཝཱི ཙལི, པཊིནཱདཉྩ ནདི. ཏདཱ རཱཛཱ སམྨཱསམྦུདྡྷསྶ ཏིལོཀགྒསྶ སཱསནཾ པགྒཎྷིསྶཱམཱིཏི ཙིནྟེཏྭཱ སརཱིརདྷཱཏུཾ ཨཱནེཏྭཱ ཨིདྷ པཏྟཀཱལེ ཨཡཾ མཧཱཔཐཝཱི ཙལཏི, པཊིནཱདཉྩ ནདཏི, ཨིདཾ ¶ ཨམྷཱཀཾ རཊྛེ ཛིནསཱསནསྶ ཙིརཀཱལཾ པཏིཊྛཱནབྷཱཝེ པུབྦནིམིཏྟནྟི སཡམེཝ ནིམིཏྟཔཱཋཾ ཨཀཱསི.

ཏཱཝ ཏིཊྛཏུ ཛཱིཝམཱནསྶ སམྨཱསམྦུདྡྷསྶ ཨཱནུབྷཱཝོ, ཨཧོཝཏ སརཱིརདྷཱཏུཡཱཡེཝ ཨནུབྷཱཝོཏི བཧུརཊྛ ཝཱསིནོ པསིདིཾསུ. ཧོནྟི ཙེཏྠ, –

སརཱིརདྷཱཏུཡཱ ཏཱཝ, མཧནྟོཙྪརིཡོ ཧོཏི;

ཀཱ ཀཐཱ པན བུདྡྷསྶ, ཛཱིཝམཱནསྶ སེཊྛསྶ.

ཨེཝཾ ཨནུསྶརིཏྭཱན, ཨུཔྤཱདེཡྻ པསཱདཀཾ;

བུདྡྷགུཎེསུ བཱཧུལླཾ, གཱརཝཉྩཾ ཀརེ ཛནོཏི.

ཀལིཡུགེ དྭེནཝུཏཱདྷིཀེ སཏྟཝསྶསཏེ ཏཱ པཉྩ དྷཱཏུཡོ ནིདཧིཏྭཱ ཛེཡྻཔུརནགརཏོ པཙྪིམདིསཱབྷཱགེ སམབྷཱུམིབྷཱགེ ཙེཏིཡཾ པཏིཊྛཱཔེསི. ཏཉྩ ཙེཏིཡཾ རཏནཙེཏིཡནྟི པཉྙཱཔེསི, ཧཏྠིརཱུཔབཱཧུལླཏཱཡ པན ཨནེཀིབྷིནྡོཏི པཱཀཊཾ ཧོཏི. ཏཱིཧི སིརིགབྦྷེཧི སཏྟཧི དྭཱརེཧཱི ཙ ཨལངྐཏཾ ནཱམ མཧཱཝིཧཱརཾ ཀཱརཱཔེཏྭཱ དྭིནྣཾ སཱིཧལ༹དཱིཔིཀཏྠེརཱནཾ ཨདཱསི. ཏཏོ པཙྪཱ ཏེསུ མཧནྟཏྠེརོ སཀཝིཧཱརསམཱིཔེ པབྦཏམུདྡྷནི ཨཏྟནོ སིསྶེཔི ཨཔྤཝེསེཏྭཱ ལཛྫཱིཔེསལབཧུསྶུཏསིཀྑཱཀཱམེཧི སབྦེཧི ཏཱིཧི ཐེརེཧི སདྡྷིཾ སཱིམཾ སམྨནྣཏི. ཨིཙྩེཝཾ སཱིམསམྨུཏིཔརིཡཏྟིཝཱཙནཱདིཀམྨེཧི མརམྨརཊྛེ སཱསནཾ ཝིརཱུལ༹ཾ ཀཏྭཱ པཏིཊྛཱཔེསི.

ཨིདཾ མརམྨམཎྜལེ རཏནཔཱུརནགརེ སཱིཧལ༹དཱིཔིཀེ

དྭེ ཐེརེ པཊིཙྩ པཋམཾ སཱསནསྶ པཏིཊྛཱནཾ.

ཀལིཡུགེ ཚབྦཱིསཱདྷིཀེ སཏྟཝསྶསཏེ སམྤཏྟེ ཕགྒུནམཱསེ སཏྭཝརཱཛཱ རཏནཔཱུརནགརཾ མཱཔེསི. ཏསྶ རཉྙོ ¶ ཀཱལེ ཛེཡྻཔུརནགརེ ཨེཀཱ པཱུཔིཀཱ ཨིཏྠཱི ཨལཛྫིནོ ཨེཀསྶ བྷིཀྑུསྶ སནྟིཀེ དྷནཾ ཨུཔནིདཧི. ཨཔརབྷཱགེསཱ ཏཾ དྷནཾ ཡཱཙི. ཨཐ སོ བྷིཀྑུ ཏཝ དྷནཾ ཨཧཾ ན པཊིགྒཎྷཱམཱིཏི མུསཱ བྷཎཏི. ཨེཝཾ ཝིཝཱདཾ ཀཏྭཱ ཏཾ ཀཱརཎཾ རཉྙོ ཨཱརོཙེསི. རཱཛཱ པཀྐོསཱཔེཏྭཱ སཡམེཝ ཏཾ བྷིཀྑུཾ པུཙྪི,-ཏྭཾ བྷནྟེ ཏསྶཱ ཨིཏྠིཡཱ དྷནཾ པཊིགྒཎྷཱསི ཝཱ མཱ ཝཱཏི. ཨཧཾ མཧཱརཱཛ སམཎོ ཨལིཀཾ བྷཎིཏུཾ ན ཝཊྚཏི, ན པཊིགྒཎྷཱམཱིཏི ཝདཏི. ཏཾ ཀཱརཎཾ རཱཛཱ ཙ པུནཔྤུནཾ པུཙྪིཏྭཱ ཝཱིམཾསནྟོ བྷིཀྑུསྶ ཀེརཱཊིཀབྷཱཝཾ ཛཱནིཏྭཱ ཏཾ སམཎོ སམཱནོ བྷགཝཏོ པཉྙཏྟཾ སིཀྑཱཔདཾ ཨཀྐམིཏྭཱ མུསཱ བྷཎཏཱིཏི ཀུཛ྄ཛྷིཏྭཱ སཡམེཝ ཨཔརཱདྷཱནུརཱུཔཾ སཱིཡཾ ཚིནྡིཏྭཱ རཱཛགེཧཏོ ཧེཊྛཱ ཁིཔི.

ཏཉྩ ཀཱརཎཾ སཀལམརམྨརཊྛེ པཱཀཊཾ. ཨལཛྫཱིབྷིཀྑཱུཔི ཨཉྙེ པཱཔཀམྨཾ ཀཱཏུཾ ན ཝིསཧིཾསུ. རཉྙཱ བྷཱཡིཏྭཱཡེཝ སིཀྑཱཔདཾ ན ཨཀྐམེསུཾ.

ཀལིཡུགེ ཏིཾསཱདྷིཀེ སཏྟཝསྶསཏེ སམྤཏྟེ མངྒཀྲིཙྭཱཙོངྐ ནཱམ རཱཛཱ རཛྫཾ ཀཱརེསི. སོ པན རཱཛཱ རཊྛཝཱསཱིནཾ སུཁཏྠཱཡ ནིམིཏྟཾ གཧེཏྭཱ ཏཱལཝཎྚཾ གཧེཏྭཱ རཱཛགེཧཾ པཊིགྒཎྷི. སོ ཙ རཱཛཱ སཀྐརཱཛེ པཉྩཙཏྟཱལཱིསཱདྷིཀེ སཏྟཝསྶསཏེ སམྤཏྟེ ཙཉྙིངྑུཾ ནཱམ ཙེཏིཡཾ པཏིཊྛཱཔེསི. ཡངྒརནཱམཀསྶ སིལཱཔབྦཏསྶ སམཱིཔེ པོརཱཎིཀཾ ཨེཀཾ ཙེཏིཡཾ ནདཱིཨུདཀཾ བྷིནྡི. ཏདཱ སཀརཎྜཀཱ པཉྩ དྷཱཏུཡོ ཨུདཀེ ནིམྨུཛྫནྟིཡོ ཨེརཱཔཐོ ནཱམ ནཱགོ གཧེཏྭཱ པཙྪཱ ཙཉྙིངྑུཾ ནཱམ ཙེཏིཡཾ པཏིཊྛཱཔེསྶཱམཱིཏི རཉྙཱ ཨཱརདྡྷཀཱལེཡེཝ དཱཋཱནཱགསྶ ནཱམ ཐེརསྶ སཧ ཀརཎྜཀེན པཉྩ དྷཱཏུཡོ ནིཡྻཱདེསི. སོ ཙ ཐེརོ རཉྙོ ཨདཱསི. རཱཛཱ དྭེ དྷཱཏུཡོ མུཊྛོཙེཏིཡེ ནིདྷཱནཾ ཨཀཱསི. ཏིསྶོ པན ཙཉྙིངྑུཾ ཙེཏིཡེཏི པོརཱཎཔོཏྠཀེསུ ཝུཏྟཾ.

སོ ¶ རཱཛཱ ཀུམཱརཀཱལེ སིཀྑཱཔཀསྶ ཨཱཙརིཡསྶ སེཏཙྪཏྟཾ དཏྭཱ སངྒྷནཱཡཀཊྛཱནཾ ནིཡྻཱདེསི. ཁེམཱཙཱརོ ནཱམ ཨེཀོ ཐེརོ རཏྟིབྷཱགེ མཛ྄ཛྷནྟིཀཀཱལེ ཙེཏིཡངྒཎེ ཨོལམྦེཏྭཱ ཋཔིཏཾ བྷེརིཾ ཨནེཀཝཱརཾ པཧརི. ཨཐ རཱཛཱ རཱཛགེཧཏོཡེཝ སུཏྭཱ ཡཐཱཋཔིཏནྟིཡཱམཝསེན ཝིཧཱརེ ཀོཙི བྷིཀྑུ ཀཱལཾ ཀཏོ བྷཝེཡྻཱཏི མཉྙིཏྭཱ ཝིཧཱརཾ གནྟྭཱ པུཙྪཱཧཱིཏི དཱུཏཾ པེསེསི. དཱུཏོ ཝིཧཱརཾ གནྟྭཱ ཀཱརཎཾ པུཙྪི. བྷིཀྑཱུ ཙ ཨེཝམཱཧཾསུ,- ན ཨམྷེསུ ཀཱལངྐཏབྷིཀྑུ ནཱམ ཨཏྠི, ཨཐ ཁོ སཀྐོ དེཝཱནམིནྡོ ཨིདཱནི ཀཱལངྐཏོཏི བཧཱུནཾ མནུསྶཱནཾ ཉཱཔནཏྠཱཡ བྷེརིཾ པཧརིམྷཱཏི. པུན རཱཛཱ བྷིཀྑཱུ པཀྐོསཱཔེཏྭཱ པུཙྪི,-ཀསྨཱ པན བྷནྟེ ཏུམྷེ སཀྐསྶ དེཝཱནམིནྡསྶ ཀཱལངྐཏབྷཱཝཾ ཛཱནཱཐཱཏི. ཨཐ བྷིཀྑཱུ ཨེཝམཱཧཾསུ,-བྷགལཏོ པརིནིབྦཱནཀཱལེ སཱསནཾ རཀྑིསྶཱམཱིཏི སཀྐོ དེཝཱནམིནྡོ པཊིཉྙཾ ཀཏྭཱཔི ཨིདཱནི སཱསནེ ཝསནྟཱནཾ ཨམྷཱཀཾ ཨནུཔཱལནཀམྨཾ ནཱམ ཀིཉྩི ན ཨཀཱསི, སཙེ པན སཀྐོ དེཝཱནམིནྡོ ཛཱིཝམཱནོ བྷཝེཡྻ, སམྨཱསམྦུདྡྷསྶ སནྟིཀེ པཊིཉྙཾ དལ༹ཾ ཀཏྭཱ ཨིདཱནི ཨཔྤོསྶུཀྐོ ན བྷཝེཡྻ. ཨིདཱནི པན སཀྐསྶ དེཝཱནམིནྡསྶ ཨཱརཀྑཎཀམྨཾ ནཱམ ཀིཉྩི ན དིསྶཏི, ཏསྨཱ ཨིདཱནི སཀྐོ དེཝཱནམིནྡོ ཀཱལངྐཏོཏི ཛཱནིམྷཱཏི.

རཱཛཱ ཏཾ སུཏྭཱ ཁེམཱཙཱརཏྠེརསྶ པསཱིདིཏྭཱ ཝིཧཱརཾ ཀཱརཱཔེཏྭཱ ཨདཱསི. སོ ཙ ཐེརོ སུདྷམྨཔུརཝཱསཱིནཾ སཱིཧལ༹ཝཾསིཀཱནཾ མཧཱཐེརཱནཾ ཝཾསེ བྷཝཏི ལཛྫཱི པེསལོ ཧོཏཱིཏི.

རཏནཔཱུརནགརེཡེཝ ཨདྷིཀརཉྙོ ཀཱལེ རཏནཔཱུརནགརསྶ དཀྑིཎདིསཱབྷཱགེ མཧཱསེཏུཾ ཀཱརཱཔེསི. ཏསྶ ¶ པན ཨཱཙརིཡོ སངྒྷརཱཛཱ ལཛྫཱིཔཀྑཾ ན བྷཛཏི. ཏེནེཝ ཐེརཔརམྤརཱཡ ཨེས ན སངྒཧིཏབྦོ.

ཏསྶ རཉྙོ ཀཱལེ ཚསཊྛཱདྷིཀེ སཏྟཝསྶསཏེ ཀལིཡུགེ རཱཛཱདྷིརཱཛཱ ནཱམ རཱམཉྙརཊྛིནྡོ བྷཱུཔཱལོཏི སཧསྶཔྤམཱཎཱསུ ནཱཝཱསུ སཊྛིསཏསཧསྶེཧི ཡོདྷེཧི སདྡྷིཾ ནདཱིམགྒེན ཡུཛ྄ཛྷནཏྠཱཡ རཏནཔཱུརཱབྷིམུཁཾ ཨཱགཏོ.

ཨཐ ཨདྷིཀརཱཛཱ བཧཝོ ཨམཙྩེཙ བྷིཀྑཱུ ཙ སནྣིཔཱཏཱཔེཏྭཱ མནྟེསི,-ཨིདཱནི རཱམཉྙརཊྛིནོ རཱཛཱ ཡུཛ྄ཛྷནཏྠཱཡ ཨིདྷ ཨཱགཙྪཏི, ཡུདྡྷཾ ཨཀཏྭཱ ཀེནུཔཱཡེན ཏཾ པཊིནིཝཏྟཱཔེཏུཾ སཀྑིསྶཱམཱཏི. ཨཐ སབྦེ ཀིཉྩི ཨཀཐེཏྭཱ ཏུཎྷཱིབྷཱཝེནེཝ ནིསཱིདིཾསུ.

ཨཐ ཛཱཏཝསྶེན ཨེཀཏྟིཾསཝསྶིཀོ ཨུཔསམྤདཱཝསེན པན ཨེཀཱདསཝསྶིཀོ ཨེཀོ བྷིཀྑུ ཨེཝམཱཧ,-ཨེཀོ པན རཱམཉྙརཊྛིནྡོ རཱཛཱདྷིརཱཛཱ ཏཱཝ ཏིཊྛཏུ, སཙེ སཀལེཔི ཛམྦུདཱིཔེ སབྦེ རཱཛཱནོ ཨཱགཙྪེཡྻུཾ, ཨེཝམྤི ཀཐཱསལླཱཔེནེཝ ཡུདྡྷཾ ཨཀཏྭཱ པཊིནིཝཏྟཱཔེསུཾ སཀྐོམཱིཏི.

ཨཐ ཨདྷིཀརཱཛཱ ཏུཊྛཙིཏྟོ ཧུཏྭཱ ཨཱཧ,- ཡཐཱ བྷནྟེ ཏྭཾ སཀྐོསི རཱཛཱདྷིརཱཛཾ ཡཐཱསལླཱཔེན པཊིནི ཝཏྠཱཔེཏུཾ, ཏཐཱ ཀརོཧཱིཏི.

ཨཐ སོ བྷིཀྑུ མེཏྟཱསནྡེསཔཎྞཾ པེསེཏྭཱ ཨོཀཱསཾ ཡཱཙི ཏསྶ རཱཛཱདྷིརཱཛསྶ སནྟིཀཾ པཝིསིཏུཀཱམོ. རཱཛཱདྷིརཱཛཱ ཙ ཏསྶ བྷིཀྑུསྶ མེཏྟཱསནྡེསཔཎྞཾ པསྶིཏྭཱ ཏཾ བྷིཀྑུཾ སཱིངྒྷཾ ཨཱནེཐཱཏི དཱུཏཾ པེསེསི. དཱུཏོ ཨཱནེཏྭཱ རཉྙོ དསྶེསི. ཨཐ སོ བྷིཀྑུ རཱཛཱདྷིརཱཛཾ དྷམྨདེསནཱཡ ཨོཝཱདཾ དཏྭཱ སཀཊྛཱནཾ པཊིནིཝཏྟཱཔེསི. ཨཡཉྩ ¶ བྷིཀྑུ ཨརིམདྡནནགརེ ཙཏཱུསུ གཎེསུ ཨརཧནྟགཎཝཾསོ སིཀྑཱཀཱམོ ལཛྫཱི པེསལོ. ཨརིམདྡནནགརེ ཙཱགཧེ ནཱམ དེསེ པན ཛཱཏཏྟཱ ཙཱགྲུཧི བྷིཀྑཱུཏི ཝོཧཱརིཡཏི.

ཀལིཡུགེ ཨཊྛཱསཱིཏཱདྷིཀེ སཏྟཝསྶསཏེ སམྤཏྟེ མིཉྙྷངྒ དྷམྨརཱཛཱ རཏནཔཱུརེཡེཝ རཛྫཾ སམྤཏྟོ. ཏསྶ རཉྙོ ཀཱལེ སཱིཧལ༹དཱིཔཏོ དྭེ མཧཱཐེརཱ རཏནཔཱུརཾ ཨཱགནྟྭཱ སཱསནཾ ཨནུགྒཧེཏྭཱ ནིསཱིདིཾསུ.

ཏདཱ ཀལིཡུགེ ཨཊྛསཏེ སམྤུཎྞེ པོརཱཎཀཾ ཀལིཡུགཾ ཨཔནེཏྭཱ ཨབྷིནཝཾ ཋཔེཏུཾ ཨོཀཱསོ ཨནུཔྤཏྟོ. ཨཐ ཙཱགྲིཧི ཐེརོ ཙ རཱཛཝིཧཱརཝཱསིཏྠེརོ ཙ ཨེཝམཱཧཾསུ,- ཨཔནཱིཏབྦཀཱལེ མཧཱརཱཛ སམྤཏྟེ ཨནཔནེཏུཾ ན ཝཊྚཏཱིཏི.

ཨཐ རཱཛཱ པུན ཨེཝམཱཧ,-ཨཔནཱིཏབྦེ སམྤཏྟེ ཨནཔནེཏྭཱ ཨཛ྄ཛྷུཔེཀྑིཏྭཱ ཝསནྟསྶ ཀོ དོསོཏི. སཙེ ཨཔནཱིཏབྦེ སམྤཏྟེ ཨནཔནེཏྭཱ ཨཛ྄ཛྷུཔེཀྑིཏྭཱ ནིསཱིདེཡྻ, རཊྛཝཱསཱིནཾ དུཀྑཾ བྷཝིསྶཏཱིཏི ཝེདསཏྠེསུ ཨཱགཏཾ, སཀྐརཱཛཾ ཨཔནེནྟོཔི རཱཛཱ ཏསྨིཾཡེཝ ཝསྶེ དིཝངྒཏོ བྷཝེཡྻཱཏི ཨཱཧཾསུ.

ཨཐ རཱཛཱ སཏྟཱནཾ སུཁཾ ལབྷཱིཡམཱནཏཾ ཛཱནནྟོཡེཝ མཱདིསོ ཨཏྟནོ བྷཡཾ ཨཔེཀྑིཏྭཱ ཨཔནཱིཏབྦཾ ཨནཔནེཏྭཱ ནིསཱིདིཏུཾ ན ཝཊྚཏི, ཀམྨཾ ཁཱིཡིཏྭཱཔི མམ ཨགུཎཾ ལོཀེ པཏྠརིཏྭཱ པཏིཊྛཧིསྶཏཱིཏི མནསིཀརིཏྭཱ སཀྐརཱཛེ ཨཊྛཝསྶསཏེ སམྤུཎྞེ བསྱུཚིདྲམུནིསཁྱཾ ཨཔནེཏྭཱ ཙམྨཱཝསེསཾ ཋཔེསི. ཨཐ མཧཱམཎྜཔཾ ཀཱརཱཔེཏྭཱ མཧཱཚཎཾ ཀཏྭཱ མཧཱདཱནམྤི ཨདཱསི.

ཙཱགྲིཧིཐེརོ རཱཛཝིཧཱར ཝཱསིཏྠེརོཙཱཏི ཨརིམདྡན ནགརེ ¶ ཨརཧནྟགཎཱཾསིཀོ ལཛྫཱི པེསལོ སིཀྑཱཀཱམོ.

ཨཱིདིསཾ པན ཝཙནཾ སཱསནཔྤཊིཡཏྟཏྟཱ ཙ རཊྛཝཱསིཀཱཡཏྟཏྟཱ ཙ དྷམྨཱནུལོམཝསེན ཝུཏྟཾ.

ཀལིཡུགེ ཙཏུཝསྶཱདྷིཀེ ཨཊྛསཏེ མཧཱནརཔཏི རཱཛཱ རཏནཔཱུརནགརེ རཛྫཾ ཀཱརེསི. སོ ཙ རཱཛཱ ཐཱུཔཱརཱམཙེཏིཡཾ ཀཱརཱཔེསི. ཏསྶ པན ཨཱཙརིཡོ མཧཱསཱམིཏྠེརོ ནཱམ. སོ པན ཐེརོ སཱིཧལ༹དཱིཔཾ གནྟྭཱ སཱིཧལི༹ནྡསྶ རཉྙོ ཨཱཙརིཡསྶ སཱརིཔུཏྟཏྠེརསྶ སནྟིཀེ སིཀྑཾ གཧེཏྭཱ པཙྩཱགཏཏྠེརཝཾསིཀོཏི དཊྛབྦོ. ཏསྶ རཉྙོ ཀཱལེ རཏནཔཱུརནགརེ མཧཱཨརིཡཝཾསོ ནཱམ ཨེཀོ ཐེརོ ཨཏྠི. སོ པན པརིཡཏྟིཝིསཱརདོ ཨརིམདྡནནགརེ ཚཔྤདགཎཏོ ཨཱགཏཝཾསིཀོ.

ཨེཀསྨིཾ སམཡེ ཛེཡྻཔུརནགརཾ གནྟྭཱ རེངྒ ཨིཏི པཱཀཊསྶ མཧཱཐེརསྶ སནྟིཀེ སདྡནཡཾ ཨུགྒཎྷིཏྭཱ ནིསཱིདི. སོ པན ཀིར མཧཱཐེརོ ཨཉྙེཧི སདྡྷིཾ ཡཾཝཱ ཏཾཝཱ ཀཐཾ ཨསལླཔིཏུཀཱམཏཱཡ མུཁེ ཨུདཀཾ ཋཔེཏྭཱ ཡེབྷུཡྻེན ནིསཱིདཏི. ཏེནེཝེས མརམྨཝོཧཱརེན རེངྒུ ཨིཏི པཱཀཊོ ཨཧོསི.

སོ ཀིར ཨརིཡཝཾསཏྠེརོ རེངྒུཾ ཐེརསྶ སནྟིཀཾ གནྠཾ ཝཱཙཱཔེཏུ ཨོཀཱསཾ ཡཱཙིསྶཱམཱིཏི ཨུཔགཙྪནྟོཔི ཀཐཱསལླཱཔཾ ཨཀཏྭཱ དྭེ ཨཧཱནི ཝཏྟཾ པརིཔཱུརེཏྭཱཡེཝ པཙྩཱགཙྪི. ཏཏིཡདིཝསེ པན ཙམྨཁཎྜཾ ཨཱཀོཊུནཏྟཱ སདྡཾ སུཏྭཱ མུཁཏོ ཨུདཀཾ ཨུགྒིརིཏྭཱ ཀཱརཎཾ པུཙྪི. གནྠཾ ཨུགྒཧཎཏྠཱཡ ཨཱགཏབྷཱཝཾ ཨཱརོཙེསི.

ཨཐ ཐེརོ ཨེཝམཱཧ,-ཨཧཾ ཨཱཝུསོ དིཝསེ དིཝཝསེ ཏིཀྑཏྟུཾ གནྠཾ ཝཱཙེམི, མཛ྄ཛྷནྟི ཀཱཏིཀྐམཀཱལེཔི པཉྙཙེཏིཡཾ གནྟྭཱ ཙེཏིཡངྒཎེ སམྨཛྫནཀིཙྩཾ ཀརོམི, ཨོཀཱསཾ ¶ ན ལབྷཱམི, ཨེཝམྤི ཏྭཾ བཧཱུགནྠེ ཨུགྒཧེཏྭཱཔི ཨཱཙརིཡེཧི དིནྣོཔདེསཾ ཨལབྷིཏྭཱ པུན མམ སནྟིཀཾ ཨཱགཙྪསི, ཏསྨཱཡངྒཎེ སམྨཛྫནཝཏྟཾ ཏཱཝཀཱལིཀཾ ཝིཀོཔེཏྭཱ གནྠུགྒཧཎཏྠཱཡ ཨོཀཱསཾ དསྶཱམཱིཏི ཝཏྭཱ ཨབྷིདྷམྨཏྠཝིསཱཝིནིཾ ནཱམ ལཀྑཎཊཱིཀཾ ཨུགྒཎྷཱཔེསི. ནཱནཱནཡེཧི ཨུཔདེསཾ དཏྭཱ ཝཱཙེསི. ཝཱཙེཏྭཱ ཙ ཏཏིཡདིཝསེ ཨཱཙརིཡསྶ སནྟིཀཾ ནཱགཙྪི. མཧཱཐེརོཔི ཀཱརཎཾ ཨཀལླཏཱཡ ཨནཱགཏོ བྷཝེཡྻཱཏི མཉྙིཏྭཱ པུཙྪནཏྠཱཡ བྷིཀྑཱུ པེསེསི.

ཨརིཡཝཾསཏྠེརོཙ ཨཱཙརིཡསྶ སནྟིཀཾ གམིསྶཱམཱིཏི ཨཱགཏོ, ཨནྟརཱམགྒེཡེཝ དཱུཏབྷིཀྑཱུ པསྶིཏྭཱ ཏེཧི སདྡྷིཾ མཧཱཐེརསྶ སནྟིཀཾ ཨཱགམཾསུ. ཨཱཙརིཡསྶ སནྟིཀཾ པཏྭཱ ཨཱཙརིཡཱ ཨརིཡཝཾསཏྠེརཾ པུཙྪི,-ཀསྨཱ པན ཏྭཾ ན ཨུགྒཧཎཏྠཱཡ ཨཱགཏོསཱིཏི. ཨཧཾ བྷནྟེ ཏུམྷེཧི དིནྣོཔདེསཾ ནིསྶཱཡ ཨིདཱནི སབྦཾ ནཡཾ ཛཱནཱམཱིཏི. ཨཐ ཨཱཙརིཡོ ཨཱཧ, ཡཾ པན གནྠཾ ནིསྶཱཡ ཏྭཾ ཚེཀཏཾ པཏྟོསི, ཏསྶ སཾཝཎྞནཾ ཀཏྭཱ ཨུཔཀཱརཾ ཀརོཧཱིཏི. ཨཐ ཨརིཡཝཾསཏྠེརོ ཨཱཙརིཡསྶ ཝཙནཾ སིརསཱ པཊིགྒཧེཏྭཱ ཨབྷིདྷམྨཏྠཝིབྷཱཝིནིཡཱ མཎིསཱརམཉྫཱུསཾ ནཱམ ཨནུསཾཝཎྞནཾ ཨཀཱསི. ནིཊྛིཏནིཊྛིཏཔཱལ༹ཾ ཨུཔོསཐདིཝསེ ཨུཔོསཐདིཝསེ པུཉྙཙེཏིཡསྶ ཙེཏིཡངྒཎེ བྷིཀྑུསངྒྷཾ སནྣིཔཱཏཱཔེཏྭཱ བྷིཀྑུསངྒྷསྶ མཛ྄ཛྷེ ཝཱཙཱཔེཏྭཱ སུཎཱཔེསི,- སཙེ ཀོཙི དོསོ ཨཏྠི, ཏཾ ཝདཐཱཏི.

ཨཐ ཨརིམདྡནནགརཏོ ཙེཏིཡཝནྡནཏྠཱཡ ཨེཀོ བྷིཀྑུ ཨཱགནྟྭཱ པརིསཀོཊིཡཾ སུཎིཏྭཱ ནིསཱིདི. ཨཐ སོ བྷིཀྑུ དྭེ ཝཱརཾ ཨེཨེཨིཏི སདྡཾ ཨཀཱསི. ཏཾ ཋཱནཾ སལླཀྑེཏྭཱ ཋཔེསི. ནིཝཱསནཊྛཱནཉྩ པུཙྪི. ཨརིཡཝཾསཏྠེརོཔི སཀཝིཧཱརཾ པཏྭཱ ཏསྨིཾ ཋཱནེ ཨུཔདྷཱརོནྟོ ཨེཀསྨིཾ ཋཱནེ ཨེཀསྶ ཨཏྠསྶ དྭིཀྑཏྟུཾ ཝུཏྟཏྟཱ པུནརུཏྟིདོསོ དིསྶཏི, ཨེཀསྨིཾ ¶ ཋཱནེ ཨིམཾ གནྠནྟི པུལླིངྒརཱུཔེན ཝཏྟབྦཊྛཱནེ ཨིདཾ གནྠནྟི ནཔུཾསཀལིངྒེན ཝུཏྟཏྟཱ ལིངྒཝིརོདྷིདོསོ དིསྶཏི.

ཨཐ ཏཾ པུགྒལཾ པཀྐོསཱཔེཏྭཱ ཨེཝམཱཧ,-ཨཧཾ ཨཱཝུསོ ཨིམཾ གནྠཾ མཧུསྶཱཧེན ཀརོམི, ཏཉྩ ཝིཝེཀཀཱལེ རཏྟིབྷཱགེཡེཝ པོཏྠཀཾ པཏྠརིཏྭཱ ལིཁཱམི, ཨེཝཾ མཧུསྶཱཧེན ཀརོནྟམྤི ཏྭཾ ཨརུཙྩནཱཀཱརེན སདྡཾ ཀརོསི, ཀཱིདིསཾ པན དོསཾ སུཏྭཱ ཨེཝཾ ཀརོསཱིཏི པུཙྪི. ཨཐ སོ བྷིཀྑུ ཨེཝམཱཧ,- ཏཡོ བྷནྟེ མཧུསྶཱཧེན ཀཏེ གནྠེ དོསཝསེན བཧུཝཏྟབྦཊྛཱནཾ ནཏྠི, སདྡཏོཙེཝ ཨཏྠཏོ ཙ པརིཔུཎྞོཡེཝེས གནྠོ, ཨཐ ཁོ པན ཨེཀསྨིཾ ཋཱནེ ཨེཀསྶ ཨཏྠསྶ དྭིཀྑཏྟུཾ ཝུཏྟཏྟཱ པུརནུཏྟིདོསོ དིསྶཏི, ཨེཀསྨིཾ པན ཨིམཾ གནྠནྟི པུལླིངྒེན ཝཏྟབྦཊྛཱནེ ཨིདཾ གནྠནྟི ནཔུཾསཀལིངྒེན ཝུཏྟཏྟཱ ལིངྒཝིརོདྷིདོསོ དིསྶཏི, ཨེཝཾ ཨེཏྟཀཾཡེཝ དོསཾ དིསྭཱ ཨཱིདིསཾ ཨརུཙྩནཱཀཱརཾ དསྶེམཱིཏི.

ཨཐ ཨརིཡཝཾསཏྠེརོ ཏུཊྛཙིཏྟོ ཧུཏྭཱ ཨཏྟནོ སརཱིརཔཱརུཔིཏཾ དུཔཊྚཙཱིཝརཾ ཨིམིནཱཧཾ ཏཝ ཉཱཎཾ པཱུཛེམཱིཏི ཝཏྭཱ ཨདཱསི. པཙྪཱཀཱལེ ཨདྷིཀརཱཛཱ ཏམཏྠཾ སུཏྭཱ ནཱམ ལཉྪཾ ཨདཱསི.

སོ ཙ ཨརིཡཝཾསཏྠེརོ མཎིདཱིཔཾ ནཱམ གནྠཾ གནྠཱ བྷརཎཉྩེཝ ཛཱཏཀཝིསོདྷནཉྩ པཱལི༹བྷཱསཱཡ ཨཀཱསི. ཨནུཊཱིཀཱཡ པན ཨཏྠཡོཛནཾ མརམྨབྷཱསཱཡ ཨཀཱསི.

ཨེཀཾ སམཡཾ ཨདྷིཀརཱཛཱ ཝིཧཱརཾ གནྟྭཱ དྷམྨཾ སུཎི. ཐེརོ དྷམྨཾ དེསེཏྭཱ ནིཊྛིཏཀཱལེ ཡཱནབལིཾ སུཁཏྠཱཡ ཡཱཙི. རཱཛཱ ཨདཏྭཱ ནཱཝཾ ཨབྷིརཱུཧིཏྭཱ པཙྩཱགཙྪི. ཨནྟརཱམགྒེ ནཱཝཱཡ ཕིཡཾ ཨེཀོ སཾསུམཱརོ མུཁེན གཎྷིཏྭཱ ནིཙྩལཾ ཀཏྭཱ ཋཔེསི. ཐེརེན ཡཱཙིཏཾ ཡཱནབལིཾ དདཱམཱིཏི མཧཱསདྡཾ ཀཏྭཱ རཱཛཔུརིསེ ཏིཀྑཏྟུཾ ནིཙྪཱརེསི. ཨཐ སཾསུམཱརོ ནཱཝཾ མུཉྩིཏྭཱ གཙྪི. ཨེཀསྨིཉྩ ཀཱལེ རཱཛཱ ཝིཧཱརཾ ནིཀྑམི. ཨཐ ¶ ཨེཀོ ཧཏྠིནཱི ཝིཧཱརསམཱིཔེ བནྡྷིཏྭཱ ཋཔེསི. སཱ བོདྷིརུཀྑསཱཁཾ ཚིནྡིཏྭཱ ཁཱདི. སཱ ཏཏྠེཝ བྷཱུམིཡཾ པཏི. ཨཐ ཐེརོ སཙྩཀིརིཡཾ ཀཏྭཱ མེཏྟཱབྷཱཝནཾ བྷཱཝེཏྭཱ མེཏྟོདཀེན བྷིཉྩི. ཏཾ ཁཎཉྙེཝ སཱ ཨུཊྛཧི. རཱཛཱ ཙ ཏཾ ཨཙྪརིཡཾ དིསྭཱ ཏསྶཱ ཨགྒྷནཀམཱུལཾ དཏྭཱ ཝིཧཱརཏོ ནདཱི ཏིཏྠཾ གམནམགྒེ སིལཱཔཊྚཾ ཙིནིཏྭཱ སེཏུཾ ཨཀཱསཱིཏི.

སདྡྷམྨཀིཏྟིཏྠེརོ པན ཨརིཡཝཾསཏྠེརསྶ སདྡྷིཝིཧཱརིཀོ ཛེཏཝནཝིཧཱརཝཱསཱི. ཏེ པན ཐེརཱ ཚཔྤདགཎཝཾསིཀཱཏི དཊྛབྦཱ.

ཀལིཡུགེ དྭེཙཏྟཱལཱིསཱདྷིཀེ ཨཊྛཝསྶསཏེ སམྤཏྟེ རཏནཔཱུརནགརེཡེཝ སིརིསུདྷམྨརཱཛཱདྷིཔཏི ནཱམ དུཏིཡཱདྷིཀརཱཛཱ རཛྫཾ ཀཱརེསི. ཏསྨིཉྩ ཀཱལེ པབྦཏབྦྷནྟརནགརཏོ མཧཱསཱིལཝཾསོ ནཱམ ཐེརོ པཉྩཙཏྟཱལཱིསཱདྷིཀེ ཨཊྛཝསྶསཏེ སམྤཏྟེ སུམེདྷཀཐཾ ཀབྱཱལངྐཱརཝསེན བནྡྷིཏྭཱ བུདྡྷཱལངྐཱརཉྩ ནཱམ ཀབྱཱལངྐཱརཾ པབྦཏབྦྷནྟརཔྤཊིསཾཡུཏྟཉྩེཝ ཀབྱཱལངྐཱརཾ བནྡྷིཏྭཱ ཏེ གཧེཏྭཱ རཏནཔཱུརནགརཾ ཨཱགཙྪི.

ཨཐ རཱཛཱ ཐཱུཔཱརཱམཙེཏིཡསྶ ཨེསནྣཊྛཱནེ རཏནཝིམཱནཝིཧཱརེ ནིསཱིདཱཔེསི. སོ ཙ ཐེརོ ཏཏྠ སོཏཱརཱནཾ པརིཡཏྟིཾ ཝཱཙེཏྭཱ ནིསཱིདི. སོ ཙ ཐེརོ ཏཏྠ ནིསིནྣཱནཾ ཐེརཱནཾ ཨཊྛམཀོ ཧོཏི. སོ ཙ མཧཱསཱིལཝཾསཏྠེརོ ཀལིཡུགསྶ པནྣརསཱདྷིཀེ ཨཊྛཝསྶསཏེ ཛཱཏོ. ཏིཾསཝསྶཀཱལེ རཏནཔཱུརནགརཾ ཨཱགཏོཏི པོརཱཎཔོཏྠཀེསུ ཝུཏྟཾ. སོ པན ཐེརོ ནེཏྟིཔཱལི༹ཡཱ ཨཏྠ ཡོཛནཾ མརམྨབྷཱསཱཡ ཨཀཱསི པཱརཱཡནཝཏྠུཉྩ.

རཏནཔཱུརནགརེཡེཝ རཊྛསཱརོ ནཱམ ཨེཀོ ཐེརོ ཨཏྠི, མཧཱསཱིལཝཾསཏྠེརེན སམཉྙཱཎཐཱམོ. སོ པན རཏནཔཱུརནགརེཡེཝ ¶ ཀལིཡུགསྶ ཏིཾསཱདྷིཀེ ཨཊྛཝསྶསཏེ ཀཱལེ ཛཱཏོ. བྷཱུརིདཏྟཛཱཏཀཾ ཧཏྠིཔཱལཛཱཏཀཾ སཾཝརཛཱཏཀཉྩ ཀབྱཱལངྐཱརཝསེན བནྡྷི ཨཉྙཉྩ ཨནེཀཝིདྷཾ ཀབྱཱལངྐཱརཾ. ཏེ པན དྭེ ཐེརཱ ཀབྱཱལངྐཱརཀཱ རཀཱཏི ཐེརཔརམྤརཱཡ པཝེསེཏྭཱ ན གཎེནྟི པོརཱཎཱ.

ཨེཏྠ ཙ ཀིཉྩཱཔི སམཎཱནཾ ཨུཔོསཐིཀཱནཉྩ ཀབྱཱལངྐཱརཾ བནྡྷིཏུཾ ཝཱཙེཏུཾ ཝཱ ཀཔྤཱཀཔྤཝིཙཱརཎཾ ཝཏྟུཾ ཨོཀཱསོ ལདྡྷོ, སཱསནཝཾསཾ པན ཝཏྟུཾ ཨོཀཱསསྶ ཨཏིཝིཏྠཱརོཝསེསཏྟཱ ཏཾ ཨཝཏྭཱ ཨཛ྄ཛྷུཔེཀྑིསྶཱམ. ཨུཔོསཐཝིནིཙྪཡེ པན ནཙྩགཱིཏཱདིསིཀྑཱཔདསྶ ཝིསཡེ ཝིཏྠཱརེན མཡཾ ཨཝོཙུམྷཱ.

ཀལིཡུགསྶ གཏེ ཏེསཊྛཱདྷིཀེ ཨཊྛཝསྶསཏེ རཏནཔཱུརནགརེཡེཝ སིརིཏྲིབྷཝནཱདིཏྱནརཔཏིཔཝརམཧཱདྷམྨ རཱཛཱདྷིཔཏིརཱཛཱ རཛྫཾ ཀཱརེསི. ཏསྶ རཉྙོ ཀཱལེཏིསཱསནདྷཛོ ནཱམ བྷིཀྑུ སདྡྷམྨཀིཏྟིཏྠེརསྶ སནྟིཀེ གནྠཾ ཨུགྒཎྷི. ཨཐ ཨརིམདྡནནགརཏོ ཨེཀོ མཧཱཐེརོསོཏུནཾ ཝཱཙིཏྭཱ རཏནཔཱུརནགརེ ནིསཱིདིསྶཱམཱིཏི ཨཱགཏོ. ཨཐ སདྡྷམྨཀིཏྟིཏྠེརསྶ གནྠཾ ཝཱཙེནྟསྶེཝ ཝིཧཱརསྶ ཧེཊྛཱ ནིསཱིདིཏྭཱ སོ མཧཱཐེརོ སདྡཾ སུཎིཏྭཱ ཨེཝཾ ཙིནྟེསི,-ཨེཏསྶ སནྟིཀེ ཨཧཾ ནཝཀཊྛཱནེ ཋཏྭཱ ཐོཀཾ གནྠཾ ཨུགྒཎྷིསྶཱམཱིཏི. ཨཐ སོ མཧཱཐེརོ སདྡྷམྨཀིཏྟིཏྠེརསྶ སནྟིཀཾ པཝིསིཏྭཱ གནྠཾ ཝཱཙཱཔེཏུཾ ཨོཀཱསཾ ཡཱཙི. ཨཐ སདྡྷམྨཀིཏྟིཏྠེརོ ཝསྶཔམཱཎཾ པུཙྪིཏྭཱ ཏྭཾ བྷནྟེ མཡཱ ཝུཌྜྷཏརོསཱིཏི ཨཱཧ. ཨཧཾ ཏཡཱ ཝུཌྜྷཏརོཔི སམཱནོ ནཝཀཊྛཱནེ ཋཏྭཱ གནྠཾ ཨུགྒཎྷིསྶཱམཱིཏི ཨཱཧ. ཨཐ སདྡྷམྨཀིཏྟིཏྠེརོ ཏསྶ གནྠཾ ཝཱཙེསི. ཨཏིཔསཱིདིཏྭཱ པན ཏཾ མཧཱཐེརཾ མཧཱསཱདྷུཛྫནོཏི ནཱམེན ཝོཧཱརཏི.

ཨཐ ¶ པཙྪཱ མརམྨརཊྛཾ ཀལིཡུགསྶ པཉྩཱསཱིཏཱདྷིཀཨཊྛསཏཀཱལཏོ པཊྛཱཡ ཡཱཝ ཨཊྛཱསཱིཏཱདྷིཀཨཊྛསཏཝསྶཀཱལཾ ནཱནཱབྷཡེཧི སངྑུབྦྷིཏཾ ཨཧོསི. ཏདཱ ཀམྦོཛརཊྛཏོ སིཧནིསྭཱ ནཱམ བྷིནྣཀུཏོ ཨཱགནྟྭཱ རཏན པཱུརནགརེ རཛྫཾ གཎྷི. ཨཐ སོ ཨེཝཾ ཙིནྟེསི,- བྷིཀྑཱུ ཨདཱརཱ ཨཔུཏྟིཀཱ ཧུཏྭཱ པུན སིསྶེ པོསེཏྭཱ པརིཝཱརཾ གཝེསནྟི, སཙེ བྷིཀྑཱུ པརིཝཱརཾ ཝིཙིནིཏྭཱ རཱཛབྷཱཝཾ གཎྷེཡྻུཾ, ཨེཝཾ སཏི རཛྫཾ གཧེཏུཾ སཀྑིསྶནྟི, ཨིདཱནེཝ བྷིཀྑཱུ གཧེཏྭཱ མཱརེཏུཾ ཝཊྚཏཱིཏི. ཨེཝཾ པན ཙིནྟེཏྭཱ ཏོཝིསཱིལཱུ ནཱམཀེ ཁེཏྟཝནེ བཧཱུ མཎྜཔེ ཀཱརཱཔེཏྭཱ གོམཧིསཀུཀྐུཊསཱུཀརཱདཡོ མཱརཱཔེཏྭཱ བྷིཀྑཱུ བྷོཛེསྶཱམཱིཏི ཝཏྭཱ ཛེཡྻཔུརཝིཛཡཔུརརཏནཔཱུརནགརེསུ སབྦེ མཧཱཐེརེ བཧཱུཧི ཨནྟེཝཱསིཀེཧི སདྡྷིཾ པཀྐོསཱཔེཏྭཱ ཏེསུ མཎྜཔེསུ ནིསཱིདཱཔེཏྭཱ ཧཏྠིཨསྶཱདིསེནངྒེཧི པརིཝཱརེཏྭཱ མཱརེསི. ཏདཱ ཀིར ཏིསཧསྶཔྤམཱཎཱ བྷིཀྑཱུ མརིཾསཱུཏི. བྷིཀྑཱུ ཙ མཱརེཏྭཱ བཧཱུཔི པོཏྠཀེ ཨགྒིནཱ ཛྷཱཔེསི, ཙེཏིཡཱནིཔི བྷེདཱཔེསི. ཨཧོཝཏ པཱཔཛནསྶ པཱཔཀམྨནྟི. ཧོནྟི ཙེཏྠ,-

སཱསནཾ ནཱམ རཱཛཱནཾ, ནིསྶཱཡ ཏིཊྛཏེ ཨིདྷ;

མིཙྪཱདིཊྛིཀརཱཛཱནོ, སཱསནཾ དཱུསེནྟི སཏྠུནོ.

སམྨཱདིཊྛཱི ཙ རཱཛཱནོ, པགྒཎྷནྟེཝ སཱསནཾ;

ཨེཝཉྩ སཏི ཨཱཀཱསེ, ཨུལཱུརཱཛཱཝ དིབྦཏཱིཏི.

ཨཐ ཀལིཡུགེ ཨེཀཝསྶཱདྷིཀེ ནཝཝསྶསཏེ སམྤཏྟེ ཨཱཀཱསེ བཧཱུཧི ཏཱརཀཱཧི དྷཱུམཱ ནིཀྑམིཾསུ. ཙཉྙིངྑུཙེཏིཡེཔི བུདྡྷཔྤཊིབིམྦསྶ ཨཀྑིཀཱུཔཏོ ཨུདཀདྷཱརཱནེཏྟཛལཱནིཝིཡ ནིཀྑམིཾསཱུཏི རཱཛཝཾསེ ཝུཏྟཾ.

ཨཐ ¶ སདྡྷམྨཀིཏྟིཏྠེརོ སདྡྷིཾ མཧཱསཱདྷུཛྫནཏིསཱཡ ནདྷཛཏྠེརེཧི ཀེཏུམཏཱིནགརཾ ཨགམཱསི. རཊྛསཱརཏྠེརོཔི སིརིཁེཏྟནགརཾ སཡམེཝ ཨགམཱསཱིཏི པོརཱཎཔོཏྠཀེསུ ཝུཏྟཾ. ཏཾ པན རཱཛཝཾསེ སིརིཁེཏྟནགརིནྡོ སཏྭ ཝརཱཛཱ ཏཾ ཨཱནེསཱིཏི ཝུཏྟཝཙནེན ན སམེཏི.

སདྡྷམྨཀིཏྟིཏྠེརོཔི ཀེཏུམཏཱིནགརེ ཀཱལངྐཏོ. ཏཏོ པཙྪཱ ཐོཀཾ ཀཱལཾ ཨཏིཀྐམིཏྭཱ མཧཱསཱདྷུཛྫནཏྠེརོ ཏཏྠེཝ ཀཱལམཀཱསི.

ཏིསཱསནདྷཛཏྠེརོ པན ཀལིཡུགེ དྭཱདསཱདྷིཀེ ནཝཝསྶསཏེ སམྤཏྟེ ཧཾསཱཝཏཱིནགརེ ཨནེཀསེཏིབྷིནྡསྶ རཉྙོ ཀཱལེ ཀེཏུམཏཱིནགརཏོ ཧཾསཱཝཏཱིནགརཾ ཨགམཱསི.

ཏཏོ པཙྪཱ ཏིཙཏྟཱལཱིསཝསྶིཀོ ཧུཏྭཱ ཀལིཡུགེ ཏེརསཱདྷིཀེ ནཝཝསྶསཏེ མིངྒྷ བྲཧྨནརཔཏིརཉྙོཀཱལེ པུན ཛེཡྻཔུརནགརཾ སམྤཏྟོ ཧུཏྭཱ ཛེཏཝནཝིཧཱརསམཱིཔེ ཨེཀིསྶཾ གུཧཱཡཾ དིསཱིདི. མཧཱཨརིཡཝཾསགཎིཀསྶ ཛེཏཝནཏྠེརསྶ སནྟིཀེ ཨུཔསངྐམི.

ཏསྨིཉྩ ཀཱལེ ཛེཏཝནཏྠེརོ གིལཱནོ ཧུཏྭཱ མཡི ཀཱལངྐཏེ མམ ཋཱནཾ ཨདྷུནཱ ཧཾསཱཝཏཱིནགརཏོ ཨཱགཏོ ཏིསཱསནདྷཛོ ནཱམ ཐེརོ པརིགྒཎྷིཏུཾ སམཏྠོ བྷཝིསྶཏི, ཏསྶ ནིཡྻཱདེསྶཱམཱིཏི ཙིནྟེསི. ཏསྨིཾ ཁཎེ ཏིསཱསནདྷཛཏྠེརོ པུརིམཡཱམེ སུཔིནཾ མསྶི,– མཏཀལེ༹ཝརཾ སམཱིཔཾ ཨཱགཙྪཏཱིཏི, མཛ྄ཛྷིམཡཱམེ པན ཏཾ མཏཀལེ༹ཝརཾ གུཧཱཡཾ པཝིསཏཱིཏི, པཙྪིམཡཱམེ མཏཀལེ༹ཝརསྶ མཾསཾ སཏྠེན ཚིནྡཏཱིཏི. ཨཐ སུཔིནཾ པསྶིཏབྷཱཝཾ ཨཏྟནོ སམཱིཔེ སཡནྟསྶ ཨེཀསྶ སཱམཎེརསྶ ཨཱརོཙེསི. ཨཱརོཙེཏྭཱ ཙ པརིཏྟཾ བྷཎེཏྭཱ ནིསཱིདནྟསྶེཝ ཛེཏཝནཏྠེརོ ཏཾ པཀྐོསིཏྭཱ ཛེཏཝནཝིཧཱརཾ ཏསྶ ནིཡྻཱདེསི. ཏིསཱསནདྷཛཏྠེརོ ཙ ཛེཏཝནཝིཧཱརེ ནིསཱིདིཏྭཱ ¶ གནྠཾ ཝཱཙེཏྭཱ ནིསཱིདི. མིངྒྷ བྲཧྨནརཔཏིརཱཛཱ ཙ ཏསྶ ཨནུགྒཧིཏཾ ཨཀཱསི.

པཙྪཱ ཀལིཡུགེ སོལ༹སཱདྷིཀེ ནཝཝསྶསཏེ སམྤཏྟེ ཧཾསཱཝཏཱིནགརིནྡོ ཨནེཀསེཏིབྷིནྡོ ནཱམ རཱཛཱ རཏནཔཱུརནགརཾ ཝིཛཡིཏྭཱ ཨེཀཾ ཝིཧཱརཾ ཀཱརཱཔེཏྭཱ ཏསྶ ཨདཱསི.

སོ ཙ ཏིསཱསནདྷཛཏྠེརོ ཨརིམདྡནནགརེ ཨརཧནྟ གཎཝཾསིཀོཏི དཊྛབྦོ.

ཏསྶ པན སིསྶཱ ཨནེཀསཏཔྤམཱཎཱ ལཛྫིནོ ཨཧེསུཾ. ཏེསུ པན སིསྶེསུ ཝརབཱཧུཏྠེརོ བྷཱུམིནིཁཱནེན གརཝཱསིཏྠེརོ མཧཱརཊྛགཱམཝཱསིནོ ཏཡོ མཧཱཐེརཱཏི ཨིམེ པཉྩ ཐེརཱ ཝིསེསཏོ པརིཡཏྟིཀོཝིདཱཏི.

ཏིསཱསནདྷཛཏྠེརོ ཙ མཧལླཀཀཱལེ ཨནཱཔཱན སཏིཀམྨཊྛཱནཾ གཧེཏྭཱ ཨརཉྙཾ པཝིསིཏྭཱ ཝིཝེཀཊྛཱནཾ གཎྷི. ཏདཱ ཛེཏཝནགཎཱདཡོ ཨརཧནྟ གཎཝཾསཱཡེཝ. ཨཔརབྷཱགེཡེཝ ཏེསཾ སིསྶཱནུསིསྶཔརམྤརཱསུ ཀེཙི བྷིཀྑཱུ སིརཙྪཱདནཾ ནཱནཱཝཎྞཔྤཊིམཎྜིཏཉྩ ཏཱལཝཎྚཾ གཧེཏྭཱ ཨཱཙཱརཝིཀཱརཾ ཨཱཔཛྫིཾསུ.

ཀལིཡུགེ ཨེཀཝསྶཱདྷིཀེ སཧསྶེ སམྤཏྟེ ཨུཀྐཾསིཀོ ནཱམ རཱཛཱ ཝིཧཱརཾ ཀཱརཱཔེཏྭཱ ཏིསཱསནདྷཛཏྠེརསྶ སིསྶབྷཱུཏསྶ ཝརབཱཧུཏྠེརསྶ སིསྶབྷཱུཏསྶ མཧཱརཏནཱཀརསྶ ནཱམ ཐེརསྶ ཨདཱསི.

སོ ཙ མཧཱརཏནཱཀརཏྠེརོ ཨུཀྐཾསིཀརཉྙོ སིརིསུདྷམྨརཱཛཱམཧཱདྷིཔཏཱིཏི ནཱམལཉྪཾ ཚནྡཱལངྐཱརསདྡནེཏྟི ནཡེཧི ཨལངྐརིཏྭཱ དསྶིཏཾ རཛིནྡརཱཛནཱམཱབྷིདྷེཡྻཱདཱིཔནིཾ ནཱམ གནྠཾ ཨཀཱསི.

ཏཉྩ གནྠཾ པརིཝིསོདྷནཏྠཱཡ ཏིརོཔབྦཏཱབྷིདྷེཡྻསྶ མཧཱཐེརསྶ ནིཡྻཱདེསི. ཏིསཱསནདྷཛཏྠེརསྶ སིསྶབྷཱུཏེསུ ¶ མཧཱརཊྛགཱམཝཱསཱིསུ ཏཱིསུ བྷཱཏིཀཏྠེརེསུ ཛེཊྛོ ཏིཾསགུཧཱསུཝསནྟོ པརིཡཏྟིཾ ཝཱཙེཏྭཱ ནིསཱིདི. སཏྭཝརཱཛཱ ཙ ཏསྨིཾ ཐེརེ ཨཏིཝིཡ པསནྣོ ཨཧོསི. ཉྙོངྐརམི ནཱམཀསྶ རཉྙོ ཀཱལེཔི ཙཱུལ༹པིཏཱ ཨེཀཾ ཝིཧཱརཾ ཀཱརཱཔེཏྭཱ ཏསྶེཝ ཨདཱསི. ཨུཀྐཾསིཀརཉྙོ ཀཱལེཔི མངྒཝཾནཱམཀེ པབྦཏེ ཝིཧཱརཾ ཀཱརཱཔེཏྭཱ ཏསྶེཝ ཨདཱསི.

ཏེསུ མཧཱརཊྛགཱམཝཱསིཏྠེརེསུ མཛ྄ཛྷིམཏྠེརོཔི ཏིསཱསནདྷཛཏྠེརསྶ ཛེཊྛབྷཱཏིཀཏྠེརསྶ ཙ ནིཝཱསཊྛཱནབྷཱུཏེ ཛེཏཝནཝིཧཱརེཡེཝ གནྠཾ ཝཱཙེཏྭཱ ནིསཱིདི. ཀནིཊྛཏྠེརོཔི ཏེསཾ ནིཝཱསཊྛཱནབྷཱུཏེསུཡེཝ ཝིཧཱརེསུ གནྠཾ ཝཱཙེཏྭཱ ནིསཱིདི. ཨེཏྠ ཙ ཏིསཱསནདྷཛཏྠེརོ ནཱམ ལཛྫིཨལཛྫིཝསེན དུབྦིདྷོ. ཡཐཱཝུཏྟཏྠེརོ པན ལཛྫཱིཡེ ཝཱཏི དཊྛབྦོ. ཨལཛྫཱི པན ཨིམསྨིཾ ཐེརཔརམྤརཱདསྶནེ ན ཨིཙྪི ཏབྦོ. ཨལཛྫཱིབྷཱུཏསྶ པན ཏིསཱསནདྷཛཏྠེརསྶ ཝཏྠུཾ ཨིདྷ ཨཝཏྭཱ ཨཛ྄ཛྷུཔེཀྑིསྶཱམ, པཡོཛནཱབྷཱཝཱ གནྠསྶ ཙ པཔཉྩཱུཔགམནཏྟཱཏི.

ཡོགིརངྒ ནཱམཀསྶ རཉྙོ ཀཱལེ ཛེཡྻཔུརེ སུཝཎྞགུཧཝཱསཱི མཧཱཐེརོ དཀྑིཎཱརཱམཝིཧཱརཝཱསཱི མཧཱཐེརོ ཙཏུབྷཱུམིཀཝིཧཱརཝཱསཱི མཧཱཐེརོ ཏོངྒབྷཱིལཱུ ཝིཧཱརཝཱསཱི མཧཱཐེརོ ཙ ཏིསཱསནདྷཛམཧཱཐེརསྶ སདྡྷིཝིཧཱརིཀཱཡེཝ. ཏེསཾ པན ཝཏྠུམྤི གནྠཝིཏྠཱརབྷཡེན ན ཝདཱམ. ལཛྫིགཎཝཾསིཀཱ ཨེཏེཏི ཝིཛཱནནམེཝ ཧེཏྠ པམཱཎནྟི.

ཀལིཡུགེ ཨེཀསཊྛཱདྷིཀེ ནཝཝསྶསཏེ སམྤཏྟེ ཕགྒུནམཱསསྶ ཛུཎྷཔཀྑདུཏིཡདིཝསེ སུཀྐཝཱརེ རཏནཔཱུརནགརཾ དུཏིཡཾ མཱཔེཏྭཱ ཉྙོགཱིརངྒ ནཱམ རཱཛཱ རཛྫཾ ཀཱརེསི. སཱིཧསཱུརདྷམྨརཱཛཱཏིཔི ནཱམལཉྪཾ པཊིགྒཎྷི. ཏོཙབྷཱིལཱུ ཝིཧཱརཝཱསཱིམཧཱཐེརཾ ¶ ཨུདྡིསྶ ཙཏུབྷཱུམིཀཝིཧཱརཾ ཀཱརཱཔེསི. ཙཏྟཱརི མཧཱམུནིཙེཏིཡཱནིཔི ཀཱརཱཔེསི. ཝིཧཱར ཙེཏིཡེསུ ཨནིཊྛིཏེསུཡེཝ སིནྣཱིནགརཾ ནིཀྑམིཏྭཱ ཏཏྠ ཝེརཾ ཝཱུཔསམཱཔེཏྭཱ པཙྩཱགཏཀཱལེ སངྑཱརསབྷཱཝཾ ཨནཏིཀྐམནཏོ དིཝངྒཏོ ཨཧོསི. ཨཧོཝཏ སངྑཱརདྷམྨཱཏི. ཧོནྟི ཙེཏྠ,–

སེཡྻཐཱ ཝཱཎིཛཱནཾཝ, གྷརགོལི༹ཀརཱུཔཀཾ;

ཏཾཏཾདིསཾ བྷམིཏྭཱཝ, སཱིསཾ ཋཔེཏི ཨུཏྟརཾ;

ཨེཝཾ ལོཀམྷི སཏྟཱ ཙ, སནྡྷིཙུཏཱིནམནྟརེ;

ཡཐཱ ཏཐཱ བྷམིཏྭཱཝ, ཨནྟེ ཋཔེནྟི སནྟནུནྟི;

ཀལིཡུགེ སཏྟསཊྛཱདྷིཀེ ནཝཝསྶསཏེ ཕགྒུནམཱསསྶ ཀཱལ༹པཀྑཏེརསམིཡཾ ཏསྶ ཛེཊྛཔུཏྟོ པིཏུ སནྟཀཾ རཛྫཾ གཎྷི. མཧཱདྷམྨརཱཛཱཏི ནཱམལཉྪམྤི པཊིགྒཎྷི. པིཏུ ཀཱལེ ཨནིཊྛིཏཱནི ཙེཏིཡཱནི པུན ཀཱརཱཔེསི. ཙཏུབྷཱུམིཀཝིཧཱརཉྩ ནིཊྛཾ གམཱཔེཏྭཱ ཏོཝིབྷཱིལཱུ མཧཱཐེརསྶ པརལོཀཾ གནྟྭཱ ཨཝིཛྫམཱནཏཱཡ ཙཏུབྷཱུམིཀཝིཧཱརཝཱསཱི མཧཱཐེརསྶ དསྶཱམཱིཏི ཨནྟེཔུརཾ པཀྐོསཱཔེསི. ཐེརོ དྭེ ཝཱརཱནི པཀྐོསིཡམཱནོཔི ནཱགཙྪི. ཏཏིཡ ཝཱརེ པན བཧཱུ སདྡྷིཝིཧཱརིཀཱ ཨནྟེཔུརཾ གནྟྭཱ པཝིསཐ, ན ཧི སཀྐཱ རཉྙཱ པཀྐོསིཏེ པཊིཀྑིཔིཏུནྟི ཨཱཧཾསུ.

ཨཐ ཐེརོ ཨེཝམཱཧ,- ཨཧཾ ཨཱཝུསོ རཊྛཔཱིལ༹ནཔིཎྜཔཱཏཾ བྷུཉྫིཏུཾ ན ཨིཙྪཱམི, ཨེཝམྤི སཙེ ཏུམྷེ ཨིཙྪཐ རཉྙོ སནྟིཀཾ གནྟུཾ, ཨེཝཾ སཏི ཨིདཱནི རཉྙོ སནྟིཀཾ ཨཧཾ གམིསྶཱམཱིཏི ཨནྟེཔུརཾ པཱཝིསི. པཝིསིཏྭཱ རཉྙཱ སདྡྷིཾ སལླཱཔཾ ཀཏྭཱ ཨཡཾ ཝིཧཱརོ ཨརཉྙཝཱསཱིནཾ བྷིཀྑཱུནཾ ཨསཔྤཱཡོཏི པཊིཀྑིཔི. ཨེཝཾ པན བྷནྟེ སཏི ཏསྨིཾ ཝིཧཱརེ ནིསཱིདིཡམཱནཾ ཐེརཾ ཨུཔདིསྶཐཱཏི ¶ . ཁཎིཏྟིཔཱདཝིཧཱརཝཱསཱི མཧཱརཱཛ ཐེརོ པརིཡཏྟིཝིསྶཱརདོ སིཀྑཱཀཱམོ, ཏསྶ དཱཏུཾ ཝཊྚཏཱིཏི. ཨཐ རཱཛཱ ཏསྶ ཝིཧཱརཾ ཨདཱསི. མཧཱསངྒྷནཱཐོཏི ནཱམལཉྪམྤི ཨདཱསི. སོ ཏཏྠ པརིཡཏྟིཾ ཝཱཙེཏྭཱ ནིསཱིདི.

ཏསྶ པན ཝིཧཱརསྶ པརིཝཱརབྷཱུཏེསུ ཙཏྟཱལཱིསཱཡ ཝིཧཱརེསུ ཨུཏྟརཱཡ ཨནུདིསཱཡ ཨེཀསྨིཾ ཝིཧཱརེ ཝསནྟོ ཝརཱབྷིསངྒྷནཱཐོ ནཱམ ཐེརོ མཎིཀུཎྜལཝཏྠུཾ མརམྨབྷཱསཱཡ ཨཀཱསི. པཙྪིམཱཡ ཨནུདིསཱཡ ཨེཀསྨིཾ ཝིཧཱརེ ཝསནྟོ ཨེཀོ ཐེརོ སཏྟརཱཛདྷམྨཝཏྠུཾ ཨཀཱསི.

ཏསྨིཉྩ ཀཱལེ བྷཱམཨངྐྱོ ཨཱཙཱརཨངྐྱོཏི དྭིནྣཾ བྷིཀྑཱུནཉྩ ལོཀདྷམྨེསུ ཚེཀཏཱཡ དྭེ ཝིཧཱརེ ཀཏྭཱ ཨདཱསི. ཏེ པན དྭེ ཐེརཱ ཝེདསཏྠཀོཝིདཱ, པརིཡཏྟིཔཊིཔཏྟཱིསུ པན མནྡཱ, རཱམཉྙརཊྛཏོ ཨཱགཏཱ. ཏེ པན ཐེརཔརམྤརཱཡ ན གཎནྟི པོརཱཎཱ.

ཀལིཡུགེ ཏིསཏྟཏཱདྷིཀེ ནཝཝསྶསཏེ སམྤཏྟེ མཧཱམུནིཙེཏིཡསྶ པུརཏྠིམདིསཱབྷཱགེ ཙཏྟཱརོ ཝིཧཱརེ ཀཱརཱཔེཏྭཱ ཙཏུནྣཾ ཐེརཱནཾ ཨདཱསི. ཏེ ཙ ཐེརཱ ཏཏྠ ནིསཱིདིཏྭཱ སཱསནཾ པགྒཎྷིཾསུ.

ཏསྨིཾཡེཝ ཀཱལེ བདརཝནཝཱསཱི ནཱམ ཨེཀོཔི ཐེརོ ཨཏྠི. སོཔི པརིཡཏྟིཝིསཱརདོ ཚཔྤདཝཾསིཀོ. སོ ཙ ཐེརོ ཡཱཝཛཱིཝཾ ཡཐཱབལཾ སཱསནཾ པགྒཎྷིཏྭཱ དུཏིཡབྷཝེ ཙལངྒནགརེ ཨེཀིསྶཱ ཨིཏྠིཡཱ ཀུཙྪིམྷི པཊིསནྡྷིཾ གཎྷི. དསམཱསཙྩཡེན ཀལིཡུགེ ཙཏྟཱལཱིསཱདྷིཀེ ནཝཝསྶསཏེ སམྤཏྟེ བུདྷཝཱརེ ཝིཛཱཡིཏྭཱ ཏེརསཝསྶིཀཀཱལེ སཱསནེ པབྦཛིཏྭཱ པརིཡཏྟིཾ ཨུགྒཎྷི. སིརིཁེཏྟནགརིནྡོ རཱཛཱ སིརིཁེཏྟནགརཾ ཨཱནེཏྭཱ སིརིཁེཏྟནགརེ སཱམཎེརོཏི ནཱམེན པཱཀཊོ ཧུཏྭཱ ཀལིཡུགེ ཙཏུཔཎྞཱསཱདྷིཀེ ¶ ནཝཝསྶསཏེ སམྤཏྟེ པནྣརསཝསྶིཀཀཱལེ ཝེསྶནྟརཛཱབྷཀཾ ཀབྱཱལངྐཱརཝསེན བནྡྷི. པརིཔུཎྞཝཱིསཏིཝསྶཀཱལེ སིརིཁེཏྟནགརེཡེཝ སིརིཁེཏྟནགརིནྡོ ཝེརཝིཛཡོ ནཱམ རཱཛཱ ཨནུགྒཧེཏྭཱ ཨུཔསམྤདབྷཱུམིཡཾ པཏིཊྛཱཏི. པཙྪིམཔཀྑཱདྷིཀོ ནཱམ རཱཛཱ སིརིཁེཏྟནགརཾ ཨཏྟནོ ཧཏྠགཏཾ ཨཀཱསི. ཏསྨིཉྩ ཀཱལེ ཏཾ ཐེརཾ ཨཱནེཏྭཱ རཏནཔཱུརནགརེ ཝསཱཔེསི. སཱུརཀིཏྟི ནཱམ རཉྙོ ཀནིཊྛབྷཱཏིཀོ ཨེརཱཝཏཱིནདཱིཏཱིརེ ཙཏུབྷཱུམིཀཝིཧཱརཾ ཀཱརཱཔེཏྭཱ ཏསྶ ཐེརསྶ ཨདཱསི. རཱཛཱ ཙ ཏིཔིཊཀཱལངྐཱརོཏི ནཱམལཉྪཾ ཨདཱསི.

ཀལིཡུགེ ཝསྶསཧསྶེ སམྤཏྟེ ཕགྒུནམཱསསྶ པུཎྞམིཡཾ སཊྛིཝསྶིཀོ ཧུཏྭཱ ཏིརིཡཔབྦཏཾ གནྟྭཱ ཨརཉྙཝཱསཾ ཝསི. དྭེ ཝསྶཱདྷིཀེ ཝསྶསཧསྶེ རཱཛཱ ཏསྨིཾ ཝིཧཱརཾ ཀཱརཱཔེཏྭཱ ཏསྶེཝ ཐེརསྶ ཨདཱསི. སོ པན ཏིཔིཊཀཱལངྐཱརཏྠེརོ སིརིཁེཏྟནགརེ ནཝངྒཀནྡརེ པཏྟལངྐསྶ ཨཏུལཝཾསཏྠེརསྶ ཝཾསིཀོ. སིརིཁེཏྟནགརེ ནཝངྒཀནྡརེ སུཝཎྞཝིཧཱརེ ཝསནྟསྶ ཐེརསྶ ཀིཏྟིགྷོསོ སབྦཏྠ པཏྠརི. ཛེཡྻཔུརེ ཨེརཱཝཏཱིནདཱིཏཱིརེ ཙཏུབྷཱུམིཀཝིཧཱརེ ཝསནཀཱལེ ཨཊྛསཱལིནིཡཱ ཨཱདིཏོ ཝཱིསཏི གཱཐཱནཾ སཾཝཎྞནཾ ཨཀཱསི. སཱུརཀིཏྟིནཱམཀསྶ ཀནིཊྛབྷཱཏིཀསྶ ཡཱཙནམཱརབྦྷ ཡསཝཌྜྷནཝཏྠུཉྩ ཨཀཱསི. ཏིརིཡཔབྦཏེ ཝསནཀཱལེ ཝིནཡཱལངྐཱརཊཱིཀཾ ཨཀཱསི. པཙྪིམཔཀྑཱདྷིཀརཉྙོ ཀཱལེ མཧཱསངྒྷནཱཐཏྠེརཾ སངྒྷརཱཛབྷཱཝེ ཋཔེསི. སོ ཙ སངྒྷརཱཛཱ ཨཏིཝིཡ པརིཡཏྟི ཝིསཱརདོ. ཏསྨིཉྩ ཀཱལེ རཏནཔཱུརནགརེཔི ཨརིཡཱལངྐཱརཏྠརོ ནཱམ ཨེཀོ ཨཏྠི. སོ པན ཏིཔིཊཀཱལངྐཱརཏྠེརེན སམཉྙཱཎཐཱམོ. ཝཡསཱཔི སམཱནཝསྶིཀཱ.

ཏེསུ ཏིཔིཊཀཱལངྐཱརཏྠེརོ གནྠནྟརབཧུསྶུཏཊྛཱནེ ¶ ཨདྷིཀོ, ཨརིཡཱལངྐཱརཏྠེརོ པན དྷཱཏུཔཙྩཡཝིབྷཱགཊྛཱནེ ཨདྷིཀོཏི དཊྛབྦོ. པཙྪཱ པན ཨུཀྐཾསིཀརཉྙོཀཱལེ ཏེཔི དྭེ ཐེརཱ རཉྙོ ཨཱཙརིཡཱ ཧུཏྭཱ སཱསནཾ པགྒཎྷིཾསུ. ཏེསུ ཨརིཡཱལངྐཱརཏྠེརོ ཨཔརབྷཱགེ ཀཱལངྐརིཏྭཱ ཏསྶ ཐེརསྶ སདྡྷིཝིཧཱརིཀསྶ དུཏིཡཱརིཡཱལངྐཱརཏྠེརསྶ རཱཛམཎིཙཱུལ༹ཙེཏིཡསྶ སམཱིཔེ དཀྑིཎཝནཱརཱམཾ ནཱམ ཝིཧཱརཾ ཀཱརཱཔེཏྭཱ ཨདཱསི.

ཨུཀྐཾསིཀོ ནཱམ རཱཛཱ པན སཱསནེ བཧུཔྤཀཱརོ. སོ ཙ ཀལིཡུགེ ཚནཝུཏཱདྷིཀེ ནཝཝསྶསཏེ རཛྫཾ པཏྟོ. རཛྫཾ པན པཏྭཱ སིརིདྷམྨཱསོཀརཱཛཱཝིཡ ཙཏྟཱརི ཝསྶཱནི ཨཏིཀྐམིཏྭཱ མུདྡྷཱབྷིསེཀཾ པཊིགྒཧེཏྭཱ སིརིསུདྷམྨ རཱཛཱམཧཱདྷིཔཏཱིཏི ནཱམལཉྪམྤི པཊིགྒཎྷི. ཨེཀསྨིཾ པན སམཡེ ཧཾསཱཝཏཱིནགརཾ གནྟྭཱ ཏཏྠ ནིསཱིདི. ཨཐ རཱམཉྙརཊྛཝཱསིནོ ཨེཝམཱཧཾསུ,- མརམྨིཀབྷིཀྑཱུ ནཱམ པརིཡཏྟིཀོཝིདཱ ཝེདསཏྠཉྙུནོ ནཏྠཱིཏི. ཏཾ སུཏྭཱ རཱཛཱ ཙཏུབྷཱུམིཀཝིཧཱརཝཱསིཏྠེརསྶ སནྟིཀཾ སཱསནཾ པེསེསི,-ཏིཾསཝསྶིཀཱ ཙཏྟཱལཱིསཝསྶིཀཱ ཝཱ པརིཡཏྟིཀོཝིདཱ ཝེདསཏྠཉྙུནོ བྷིཀྑཱུ རཱམཉྙརཊྛཾ མམ སནྟིཀཾ པེསེཐཱཏི. ཨཐ ཙཏུབྷཱུམི ཀཝིཧཱརཝཱསིཏྠེརོ ཏིཔིཊཀཱལངྐཱརཾ ཏིལོཀཱལངྐཱརཾ ཏིསཱསནཱལངྐཱརཉྩ སདྡྷིཾ ཏིཾསམཏྠེཧི བྷིཀྑཱུཧི པེསེསི. ཧཾསཱཝཏཱིནགརཾ པན པཏྭཱ མོདྷོཙེཏིཡསྶ པུརཏྠིམབྷཱགེ ཝིཧཱརེ ཀཱརཱཔེཏྭཱ ཏེསཾ ཨདཱསི.

ཨུཔོསཐདིཝསེསུ སུདྷམྨསཱལཱཡཾ རཱམཉྙརཊྛཝཱསིནོ པརིཡཏྟིཀོཝིདེ ཝེདསཏྠཉྙུནོ སནྣིཔཱཏཱཔེཏྭཱ ཏེཧི ཏཱིཧི ཐེརེཧི སདྡྷིཾ ཀཐཱསལླཱཔཾ ཀཱརཱཔེསི. ཨཐ རཱམཉྙརཊྛཝཱསིནོ བྷིཀྑཱུ ཨེཝམཱཧཾསུ,– པུབྦེ པན མཡཾ མརམྨརཊྛེ པརིཡཏྟིཀོཝིདཱ ཝེདསཏྟཉྙུནོ ནཏྠཱིཏི མཉྙཱམ, ཨིདཱནི མརམྨརཊྛཝཱསིནོ ཨཏིཝིཡ པརིཡཏྟི ཀོཝིདཱ ¶ ཝེདསཏྠཉྙུནོཏི. ཨཔརབྷཱགེ ཀལིཡུགེ ཚནཝུཏཱདྷིཀེ ནཝཝསྶསཏེ སམྤཏྟེ རཱཛཱ རཏནཔཱུརནགརཾ པཙྩཱགཙྪི.

ཏེཔི ཐེརཱ པཙྩཱགནྟུཀཱམཱ རཱམཉྙརཊྛེ པདྷཱནབྷཱུཏསྶ ཏིལོཀགརཱུཏི ནཱམདྷེཡྻསྶ མཧཱཐེརསྶ སནྟིཀཾ ཝནྡནཏྠཱཡ ཨགམཾསུ.

ཏདཱ ཏིལོཀགརུཏྠེརོཔི ཏེཧི སདྡྷིཾ སལླཱཔཾ ཀཏྭཱ ཨེཝམཱཧ,-ཏུམྷེསུ པན ཏིཔིཊཀཱལངྐཱརཏྠེརོ པཋམཾ ཨཱཝཱསཝིཧཱརཾ ལབྷིསྶཏཱིཏི. ཀསྨཱ པན བྷནྟེ ཨེཝམ ཝོཙཱཏི ཝུཏྟེ ཨཡཾ པན པིཎྜཱཡ ཙརནྟོཔི ཨནྟརཱམགྒེ ཝེལུ༹ཝེཏྟཱདཱིནི ལབྷིཏྭཱ གཧེཏྭཱ ཝིཧཱརེ པཊིསངྑརཎཾ ཨཀཱསི, ཏསྨཱཧཾ ཨེཝཾ ཝདཱམི, ལོཀེ ཝིཧཱརེ པཊིསངྑརཎསཱིལཱ བྷིཀྑཱུ སཱིགྷམེཝ ཨཱཝཱསཝིཧཱརཾ ལབྷནྟཱིཏི ཧི པོརཱཎཏྠེརཱ ཨཱཧཾསཱུཏི ཨཱཧ.

ཏེཔི རཏནཔཱུརནགརཾ པཙྩཱགཙྪིཾསུ. ཏིལོཀགརུཏྠེརསྶ ཝཙནཱནུརཱུཔམེཝ ཏིཔིཊཀཱལངྐཱརཏྠེརོ སབྦཔཋམཾ ཨཱཝཱསཝིཧཱརཾ ལབྷཱིཏི.

ཀལིཡུགེ པན ནཝཝསྶཱདྷིཀེ ཝསྶསཧསྶེ སམྤཏྟེ རཉྙོ ཀནིཊྛོ ཀཱལམཀཱསི. ཨཐཾ རཉྙོ པུཏྟོ ཨུཙྩནགརབྷོཛཀོ བཱལཛནེཧི སནྠཝཾ ཀཏྭཱ ཏེསཾ ཝཙནཾ ཨཱདིཡིཏྭཱ པཙྩཱུསཀཱལེ པིཏརཾ གྷཱཏེཏུཀཱམོ ཨནྟེཔུརཾ སཧསཱ པཱཝིསི.

རཱཛཱཝ ཨནགྒྷཾ མུདྡིཀཾ གཧེཏྭཱ ནནྡཛེཡྻེན ནཱམ ཨམཙྩེན རཱཛཡོདྷེན ནཱམ ཨམཙྩེནཙ སདྡྷིཾ ཨཉྙཏརཝེསེན ནགརཏོ ནིཀྑམིཏྭཱ རཛཏཝཱལུཀནདིཾ སམྤཏྟོ.

ཏསྨིཉྩ ཀཱལེ ཨེཀོ སཱམཎེརོ མཱཏཱཔིཏཱུནཾ གེཧེ པིཎྜཔཱཏཾ ཨཱནེསྶཱམཱིཏི ཁུདྡཀནཱཝཱཡ ནདིཡཾ ཨཱགཙྪི. ཨཐ ¶ ཏཾ སཱམཎེརཾ དིསྭཱ རཱཛཱ ཨེཝམཱཧ,- ཨམྷེ བྷནྟེ པརཏཱིརཾ ནཱཝཱཡ ཨཱནེཧཱིཏི. སཱམཎེརོ ཙ ཨཱཧ,-སཙེ ཨུཔཱསཀ ཏུམྷེ པརཏཱིརཾ ཨཱནེཡྻཾ, བྷཏྟཀཱལཾ ཨཏིཀྐམེཡྻནྟི. ཨཐ རཱཛཱ ཨམྷེཡེཝ སཱིགྷཾ ཨཱནེཧི, ཨིམཾ མུདྡིཀཾ དསྶཱམཱིཏི ཨསྶཱསེཏྭཱ ཨཱནེཏུཾ ཨོཀཱསཾ ཡཱཙི. ཨཐ སཱམཎེརོ ཀཱརུཉྙཔྤཏྟཾ ཝཙནཾ སུཏྭཱ པརཏཱིརཾ ཨཱནེསི.

ཨཐ ཙཏུབྷཱུམིཀཝིཧཱརཾ པཏྭཱ ཏསྨིཾ ཝིཧཱརེ ཐེརསྶ སབྦམྤི ཀཱརཎཾ ཨཱརོཙེཏྭཱ ཨེཝམཱཧ,-སཙེ བྷནྟེ ཨམྷེ གཎྷིཏུཾ ཨཱགཙྪཡྻ, ཏེ ནིཝཱརེཐཱཏི. ཐེརོཙ མཡཾ མཧཱརཱཛ སམཎཱ ན སཀྐཱ ཨེཝཾ ནིཝཱརེཏུཾ, ཨེཝམྤི ཨེཀོ ཨུཔཱཡོ ཨཏྠི,-ནིསིནྣཝིཧཱརཝཱསིཏྠེརོ པན གིཧིཀམྨེསུ ཨཏིཝིཡ ཚེཀོ, ཏཾ པཀྐོསེཏྭཱ ཀཱརཎཾ ཙིནྟེཏུཾ ཡུཏྟནྟི. ཨཐ ཏཾ པཀྐོསེཏྭཱ ཏམཏྠཾ ཨཱརོཙེཏྭཱ རཱཛཱ ཨིདམཝོ ཙ,- སཙེ བྷནྟེ ཨམྷེ གཎྷིཏུཾ ཨཱགཙྪེཡྻུཾ, ཨཐ ཀེནཙིདེཝ ཨུཔཱཡེན ཏེ ནིཝཱརེཐཱཏི. ཨཐ སོ ཐེརོ ཨེཝམཱཧ,-ཏེན ཧི མཧཱརཱཛ མཱ ཀིཉྩི སོཙི མཱབྷཱཡི ཝིཧཱརམཛ྄ཛྷེ སིརིགབྦྷཾ པཝིསིཏྭཱ ནིསཱིདཐཱཏི ཝཏྭཱ པིཎྜཱཡ ཨཙརནྟེ བྷིཀྑུསཱམཎེརེ སནྣིཔཱཏཱཔེཏྭཱ ཝིསུཾ ཝིསུཾ དཎྜཧཏྠཱ ཧུཏྭཱ ཨེཀསྶཔི པུརིསསྶ ཝིཧཱརཾ པཝིསིཏུཾ ཨོཀཱསཾ མཱ དེཐཱཏི ཝཏྭཱ སེནཾཝིཡ བྱཱུཧེསི. སཱམནྟཝིཧཱརེསུཔི ཝསནྟེ བྷིཀྑུསཱམཎེརེ པཀྐོསི. ཏདཱ ཀིར ཨཱགནྟྭཱ སནྣིཔཱཏཱནཾ བྷིཀྑུསཱམཎེརཱནཾ ཨཏིརེཀསཧསྶམཏྟཾ ཨཧོསི. ཐེརོ ཏེ ཝིཧཱརེ དྭཱརཀོཊྛཀེསུ ཨཱགཏམགྒེ ཙ ཝིསུཾ ཝིསུཾ དཎྜཧཏྠཱ ཧུཏྭཱ ཨཱརཀྑཎཏྠཱཡ ཋཔེསི, ཡཐཱ ཝཌྜྷཀཱི སཱུཀརོ བྱགྒྷསྶ ནིཝཱརཎཏྠཱཡ ཝིསུཾ ཝིསུཾ སཱུཀརེ སཾཝིདྷཱཡ ཋཔེསཱིཏི. ཨཐ པུཏྟསྶ ཡོདྷཱཔི རཱཛཱནཾ གཧེཏུཾ ན སཀྐཱ, བྷིཀྑུ སཱམཎེརཱནཾ ¶ གཱརཝཝསེན བལཀྐཱརེན མཱརེཏྭཱ པཝིསིཏུཾ ན ཝིསཧནྟི, བྷིཀྑུ སཱམཎེརཱནཾ བཱཧུལླཏཱཡ ཙ.

ཏསྨིཾཡེཝ སཾཝཙྪརེ ཨསྶཡུཛམཱསསྶ ཀཱལ༹པཀྑཔཉྩམིཏོ ཡཱཝ ཀཏྟིཀམཱསསྶ ཀཱལ༹པཀྑཔཉྩམཱི ཝིཧཱརེཡེཝ རཱཛཱ ནིལཱིཡིཏྭཱ ནིསཱིདི. ཨཐ ཨནྟེཔུརཝཱསིཀཱ ཨམཙྩཱ པུཏྟཾ ཨཔནེཏྭཱ རཱཛཱནཾ ཨཱནེཏྭཱ རཛྫེ ཋཔེསུཾ. རཱཛཱ ཙ པུན རཛྫཾ པཏྭཱ ཝིཧཱརེ ནིསིནྣཀཱལེ མཱ བྷཱཡི མཧཱརཱཛ ཏྭཾ ཛིནེསྶཏཱིཏི རཉྙོ ཨཱརོཙེནྟསྶ ཝེདསཏྠཉྙུནོ ཨེཀསྶ བྷིཀྑུསྶ ཙཉྙིངྑུཙེཏིཡསྶ ཨེསནྣཊྛཱནེ ཨེཀཾ ཝིཧཱརཾ ཀཱརཱཔེཏྭཱ ཨདཱསི. དྷམྨནནྡརཱཛགུརཱུཏི ནཱམལཉྪམྤི ཨདཱསི. ཏསྶ པན ཝིཛཱཏཊྛཱནབྷཱུཏཾ གཱམཾ ནིསྶཱཡ མརམྨཝོཧཱརེན ‘ཡེ ནེ ནཱ སེ ཡཱཾ ཝ’ ཨིཏི སམཉྙཱ ཨཧོསི.

རཱཛཱ ཙ པུན རཛྫཾ པཏྭཱ ཏསྨིཾཡེཝ སཾཝཙྪརེ ཀཏྟིཀམཱསསྶ ཀཱལ༹པཀྑཙུདྡསམིཡཾ སབྦེཔི མཧཱཐེརེ ནིམནྟེཏྭཱ རཱཛགེཧཾ པཝེསེཏྭཱ པིཎྜཔཱཏེན བྷོཛེསི. ཨཐ རཱཛཱ ཨེཝམཱཧ,-ཙཏུབྷཱུམིཀཝིཧཱརཝཱསིཏྠེརོ སམྤརཱཡིཀཏྠཱཝཧོ ཨཱཙརིཡོ, ནིསིནྣཝིཧཱརཝཱསིཏྠེརོ པན དིཊྛདྷམྨིཀཏྠཱཝཧོཏི ཨེཝཾ རཱཛཱཝཾསེ ཝུཏྟཾ. པོརཱཎཔོཏྠཀེསུ པན ཙཏུབྷཱུམིཀཝིཧཱར ཝཱསིཏྠེརོ ཨེཀནྟསམཎོ ཨཱཙརིཡོ, ནིསིནྣཝིཧཱརཝཱསིཏྠེརོ པན ཡོདྷཱརཧོ ཡོདྷཀམྨེ ཚེཀོཏི རཱཛཱ ཨཧཱཏི ཝུཏྟཾ. རཱཛཱ ཀིར སམྤརཱཡིཀཏྠཾ ཨནུཔེཀྑིཏྭཱ དིནྣཀཱལེ ནིསིནྣཝིཧཱརཏྠེརསྶ ན ཨདཱསི, ཀདཱཙི ཀདཱཙི པན དིཊྛདྷམྨིཀཏྠཾ ཨནུཔྤེཀྑིཏྭཱ ཏསྶ ཝིསུཾ ཨདཱསཱིཏི. ཨེཏྠ ཙ ཡསྨཱ ནིསིནྣཝིཧཱར ཝཱསིཏྠེརོ རཉྙོ བྷཱིཡེཧི ནིཝཱརཎཏྠཱཡ ཨཱརཀྑཾ ཨཀཱསི, ན པརེསཾ ཝིཧེཋནཏྠཱཡ, ཨཱཎཏྟིཀཔྤཡོགཱ ཙ ན དིསྶཏི, ཏསྨཱ ནཏྠི ཨཱཔཏྟིདོསོ. སདྡྷཱཏིསྶརཉྙོ བྷཡེཧི ¶ ནིཝཱརཎཏྠཾ ཨརཧནྟེཧི ཐེརེཧི ཀཏཔྤཡོགོཝིཡ དཊྛབྦོ.

ཙཏུབྷཱུམིཀཝིཧཱར ཝཱསིཏྠེརོ པན ཁཎིཏྟིཔཱདགཱམེ ཛཱཏོ, ཨརིམདྡནཔུརེ ཨརཧནྟཏྠེརགཎཔྤབྷཝོ, ཡཏྠ ཀཏྠཙི གནྟྭཱ ཨཉྙེསཾ བྷིཀྑཱུནཾ ཨཱཙཱརཾ ཡཐཱབྷཱུཏཾ ཛཱནིཏྭཱ ཏེཧི ཙཏུཔཙྩཡསམྦྷོགོ ན ཀབྷཔུབྦོ, ཨནྟམསོ ཨུདཀམྤི ན པིཝིཏཔུབྦོ, ཏཾཏཾཊྛཱནམྤི ཙམྨཁཎྜཾ གཧེཏྭཱཡེཝ གམནསཱིལོ. ཨུཀྐཾསིཀརཱཛཱ པན སིརིཁེཏྟནགརེ དྭཏྟཔོངྐརཉྙཱ ཀཱརཱཝིཏཙེཏིཡསཎྛཱནཾ གཧེཏྭཱ རཱཛམཎིཙཱུལ༹ཾ ནཱམ ཙེཏིཡཾ ཨཀཱསི. ཏཾ པན ཙེཏིཡཾ པརིམཎྜལཏོ ཏིཧཏྠསཏཔྤམཱཎཾ, ཨུབྦེདྷཏོཔི ཨེཏྟཀམེཝ. ཏསྶ པན ཙེཏིཡསྶ ཙཏཱུསུ པསྶེསུ ཙཏྟཱརོ ཝིཧཱརེཔི ཀཱརཱཔེསི, པུརཏྠིམཔསྶེ པུབྦཝནཱརཱམོ ནཱམ ཝིཧཱརོ, དཀྑིཎཔསྶེ པན དཀྑིཎཝནཱརཱམོ ནཱམ, པཙྪིམཔསྶེ པཙྪིམཝནཱརཱམོ ནཱམ, ཨུཏྟརཔསྶེ ཨུཏྟརཝནཱརཱམོ ནཱམ. ཏེསུ ཙཏཱུསུ ཝིཧཱརེསུ ཨུཏྟརཝནཱརཱམོ ནཱམ ཝིཧཱརོ ཨསནིཔཱབྷགྒིནཱ ཌཡ྄ཧིཏྭཱ ཝིནསྶི. ཨཝསེསེ པན ཏཡོ ཝིཧཱརེ པརིཡཏྟིཀོཝིདཱནཾ ཏིཎྞཾ མཧཱཐེརཱནཾ ཨདཱསི. ནཱམ ལཉྪམྤི ཏེསཾ ཨདཱསི. པཙྪིམསྶ རཉྙོ ཀཱལེཡེཝ ཨུཏྟརཔསྶེ ཝིཧཱརཾ ཀཱརཱཔེསི.

ཏསྨིཾ པན ཙེཏིཡེ ཚཏྟཾ ཨནཱརོཔེཏྭཱཡེཝ སོ རཱཛཱ དིཝངྒཏོ. ཏེསུ པན ཙཏཱུསུ ཝིཧཱརེསུ ནིསིནྣཱནཾ ཐེརཱནཾ དཀྑིཎཝནཱརཱམཝིཧཱརཝཱསཱིམཧཱཐེརོ ཀཙྩཱཡནགནྠསྶ ཨཏྠཾ ཚབྦིདྷེཧི སཾཝཎྞནཱནཡེཧི ཨལངྐརིཏྭཱ མརམྨབྷཱསཱཡ སཾཝཎྞེསི. པཙྪིམཝནཱརཱམཝིཧཱར ཝཱསིཏྠེརོ པན ནྱཱསསྶ སཾཝཎྞནཾ ཚཧི ནཡེཧི ཨལངྐརིཏྭཱ ཨཀཱསི.

ཀལིཡུགེ པན དསཝསྶཱདྷིཀེ སཧསྶེ སམྤཏྟེ ཏསྶ ¶ རཉྙོ པུཏྟོ སིརིནནྡསུདྷམྨརཱཛཱཔཝརཱདྷཱིཔཏི རཛྫཾ ཀཱརེསི. པིཏུནོ རཱཛགེཧཾ བྷིནྡིཏྭཱ ཝིཧཱརཾ ཀཱརཱཔེཏྭཱ ཏིལོཀཱལངྐཱརསྶ ནཱམ མཧཱཐེརསྶ ཨདཱསི. ཏིལོཀཱལངྐཱརཏྠེརོ ཙ ནཱམ ཏིཔིཊཀཱལངྐཱརཏྠེརེན སམཉྙཱཎཐཱམསྶ ཨརིཡཱལངྐཱརཏྠེརསྶ སིསྶོཏི དཊྛབྦོ. ཨཡཉྩཏྠོ ཧེཊྛཱ དསྶིཏོ. ཛེཡྻཔུརེ ཙཏུབྷཱུམིཀཨཏུལཝིཧཱརཾ ཀཱརཱཔེཏྭཱ དཱཊྛཱནཱགརཱཛགུརུཏྠེརསྶ ཨདཱསི. སོ ཙ ཐེརོ ནིརུཏྟིསཱརམཉྫཱུསཾ ནཱམ ནྱཱསསཾཝཎྞནཾ ཨཀཱསཱི.

ཀལིཡུགེ དྭཱདསཱདྷིཀེ ཝསྶསཧསྶེ སམྤཏྟེ ཕགྒུནམཱསེ སོཏཱཔནྣཱ ནཱམ ཨཱརཀྑདེཝཏཱ ཨཉྙཏྠ གམིསྶཱམཱཏི ཨཱཧཾསཱུཏི ནགརཱ སུཔིནཾ པསྶནྟཱ ཧུཏྭཱ བཧཱུསནྣིཔཏིཏྭཱ དེཝཔཱུཛཾ ཨཀཾསུ. དེཝཏཱནཾ པན སངྐམནཾ ནཱམ ནཏྠི, པུབྦནིམིཏྟམེཝཏནྟི དཊྛབྦཾ.

ཏསྨིཉྩ ཀཱལེ ཙིནརཉྙོ ཡོདྷཱ ཨཱགནྟྭཱ མརམྨརཊྛཾ དཱུསེསུཾ. སཱསནཾ ཨབྦྷཔྤཊིཙྪནྣོ ཝིཡ ཙནྡོ དུབྦལཾ ཨཧོསི.

ཀལིཡུགེ ཏེཝཱིསཱདྷིཀེ ཝསྶསཧསྶེ སམྤཏྟེ ཏསྶ རཉྙོ ཀནིཊྛོ མཧཱཔཝརདྷམྨརཱཛཱལོཀཱདྷིཔཏི ནཱམ རཱཛཱ རཛྫཾ ཀཱརེསི. ཏསྨིཉྩ ཀཱལེ ལོཀསངྐེཏཝསེན པུཉྙཾ མནྡཾ བྷཝིསྶཏཱིཏི ཝེདསཏྠཉྙཱུཧི ཨཱརོཙིཏཏྟཱ ལོཀསངྐེཏཝསེནེཝ ཨབྷིནཝཔུཉྙུཔྤཱདནཏྠཾ ཁནྡྷཝཱརགེཧཾ ཀཱརཱཔེཏྭཱ ཏཱཝཀཱལིཀཝསེན སངྐམིཏྭཱ ནིསཱིདི. ཏཏོ ཨཔརབྷཱགེ ཨུཏྟརགེཧཾ བྷིནྡིཏྭཱ ཏསྨིཾཡེཝ ཋཱནེ ཝིཧཱརཾ ཀཱརཱཔེཏྭཱ ཨེཀསྶ མཧཱཐེརསྶ ཨདཱསི.

དཀྑིཎགེཧཾ པན ནགརསྶ པུརཏྠིམདིསཱབྷཱགེ ཝིཧཱརཾ ཀཱརཱཔེཏྭཱ ཨགྒཎམྨཱལངྐཱརཏྠེརསྶ ཨདཱསི. སོ ཙ ཐེརོ ཀཙྩཱཡནགནྠསྶཙེཝ ཨབྷིདྷམྨཏྠསངྒཧསྶ ཙ མཱཏིཀཱདྷཱཏུཀཐཱཡམཀཔཊྛཱནཱནཉྩ ¶ ཨཏྠཾ མརམྨབྷཱསཱཡ ཡོཛེསི.

ཨུཔརཱཛཱ ཙ མཧཱསེཏུནོ པམུཁེ ཋཱནེ སོཝཎྞམཡཝིཧཱརཾ ཀཱརཱཔེཏྭཱ ཨུཏྟརགེཧཝིཧཱར ཝཱསིཏྠེརསྶ ཨནྟེཝཱསིཀསྶ ཛིནཱརཱམཏྠེརསྶ ཨདཱསི. ཏསྨིཾཡེཝ ཋཱནེ ནཱནཱརཏནཝིཙིཏྲཾ ཝིཧཱརཾ ཀཱརཱཔེཏྭཱ ཏསྶེཝ ཐེརསྶ ཨནྟེཝཱསིཀསྶ གུཎགནྡྷཏྠེརསྶ ཨདཱསི.

སོ པན ཐེརོ ‘ཚིན ཝྜིན’ གཱམེ ཝིཛཱཏོ. ཝཡེ པན སམྤཏྟེ རཏནཔཱུརནགརཾ གནྟྭཱ པརིཡཏྟིཾ ཨུགྒཎྷིཏྭཱ ཏཏོ པུན ནིཝཏྟིཏྭཱ བདུནནགརེ བདརགཱམེ ནིསཱིདིཏྭཱ པཙྪཱ ‘ཚིན ཝྜིན’ གཱམེ ཙཏཱུཧི པཙྩཡེཧི ཀིལམཐོ ཧུཏྭཱ ཝསཏི. ཏསྨིཉྩ ཀཱལེ གཱམེ མོཀྑསྶ ནཱམ པུརིསསྶ སནྟིཀེ ཨེཀཾ ཨནགྒྷཾ མཎིཾ རཱཛཱ ལབྷིཏྭཱ ཨཏིཝ མམཱཡི. ‘ཚིན ཝྜིན’ མོཀྑམཎཱིཏི པཱཀཊོ ཨཧོསི.

ཨཐ ཨུཏྟརགེཧཝིཧཱརཝཱསིཏྠེརོ ཨཱཧ,- ‘ཚིན ཝྜིན’ གཱམཀེ ན མཎིཡེཝ ཨནགྒྷཾ, ཨཐ ཁོ ཨེཀོཔི ཐེརོ གུཎགནྡྷོ ནཱམ པརིཡཏྟིཀོཝིདོ ཨནགྒྷོཡེཝཱཏི.

ཨཐ ཏཾ སུཏྭཱ རཱཛཱ ཏཾ པཀྐོསེཏྭཱ ཙཏཱུཧི པཙྩཡེཧི ཨུཔཏྠམྦྷེཏྭཱ པཱུཛཾ ཨཀཱསི.

སཧསྶོརོདྷགཱམེ གུཎསཱརོ ནཱམ ཐེརོ པལིཎགཱམེ སུཛཱཏོ ནཱམ ཐེརོ ཙ གུཎགནྡྷཏྠེརསྶ སིསྶཱཡེཝ ཨཧེསུཾ.

ཨེཀསྨིཉྩ ཀཱལེ ཏིརིཡཔབྦཏཝིཧཱརཝཱསཱིམཧཱཐེརོ བྷིཀྑུསངྒྷམཛ྄ཛྷེ ཨགྒདྷམྨཱལངྐཱརཏྠེརཾ ཀཱིལ༹ནཝསེན ཨེཝམཱཧ,- ཨམྷེསུ ཨཱཝུསོ ཨནྟརདྷཱརཡམཱནེསུ ཏྭཾ ལོཀེ ཨེཀོ གནྠཀོཝིདཏྠེརོ བྷཝིསྶསི མཉྙེཏི. ཨཐ ཨགྒདྷམྨཱལངྐཱརོ ཙ ཨེཝམཱཧ,-ཏུམྷེསུ བྷནྟེ ཨནྟརདྷཱརཡམཱནེསུ མཡཾ གནྠཀོཝིདཱན བྷཝེཡྻཱམཀོ ནཱམ ¶ པུགྒལོ ལོཀེ གནྠཀོཝིདོ བྷཝིསྶཏཱིཏི. པོརཱཎཔོཏྠཀེསུ པན ཨརིཡཱལངྐཱརཏྠེརོ ནནུ པནིདཱནི མཡཾ གནྠཀོཝིདཱ ན ཏཱཝ བྷཝཱམཱཏི ཨེཝམཱཧཱཏི ཝུཏྟཾ. སོ ཨགྒདྷམྨཱལངྐཱརཏྠེརོཡེཝ རཉྙཱ ཡཱཙིཏོ རཱཛཝཾས. སངྑེཔམྤི ཨཀཱསི. སོ པྤན ཐེརོ ཨམཙྩཔུཏྟོ.

ཨེཀསྨིཉྩ ཀཱལེ ཧཱིནཱཡཱཝཏྟཀོ ཨེཀོ མཧཱཨམཙྩོ རཉྙོ སནྟིཀཱ ཨཏྟནཱ ཨུཔལདྡྷཔརིབྷོགཾ སབྦཾ གཧེཏྭཱ ཝིཧཱརཾ ཨཱགནྟྭཱ ཨགྒདྷམྨཱལངྐཱརཏྠེརེན སདྡྷིཾ སལླཱཔཾ ཨཀཱསི. སལླཱཔཾ པན ཀཏྭཱ སབྦཾ པརིབྷོགཾ ཐེརསྶ དསྶེཏྭཱ སཙེ བྷནྟེ ཏྭཾ གིཧི བྷཝེཡྻཱསི, ཨེཏྟཀཾ པརིབྷོགཾ ལབྷིསྶཏཱིཏི ཨཱཧ. ཐེརོཔི ཨེཝམཱཧ,-ཏུམྷཱཀཾ པན ཨེཏྟཀོ པརིབྷོགོ ཨམྷཱཀཾ སམཎཱནཾ ཝཙྩཀུཊིཾ ཨསུབྷབྷཱཝནཾ བྷཱཝེཏྭཱ པཝིསནྟཱནཾ པུཉྙཾ ཀལཾ ནཱགྒྷཏི སོལ༹སིནྟི. ཀིཉྩཱཔི ཨིདཉྩ པན ཝཙནཾ སཱསནཝཾསེ ཨཔྤདྷཱནཾ ཧོཏི, པུབྦཱཙརིཡསཱིཧེཧི པན ཝུཏྟ ཝཙནཾ ཡཱཝ ཨཔཱཎཀོཊིཀཱ སརིཏབྦམེཝཱཏི མནསིཀརོནྟེན ཝུཏྟནྟི.

ཀལིཡུགེ པན ཙཏུཏྟིཾསཱདྷིཀེ ཝསྶསཧསྶེ སམྤཏྟེ ཏསྶ པུཏྟོ ནརཱཝརོ ནཱམ རཱཛཱ རཛྫཾ ཀཱརེསི. མཧཱསཱིཧསཱུརདྷམྨརཱཛཱཏི ནཱམལཉྪཾ པཊིགྒཎྷི. ཏསྶ རཉྙོ ཀཱལེ ‘སཱི ཁོཾ’ ཙེཏིཡསྶ སམཱིཔེ ཛེཏཝནཝིཧཱརེ གནྠཾ ཨུགྒཎྷནྟོ ཨེཀོ དཧརབྷིཀྑུ གནྠཚེཀོཔི སམཱནོ བཱལཀཱལེ བཱལཙིཏྟེན ཨཱཀུལིཏོ ཧུཏྭཱ ཝཙྩཀཱུཔེ ཝཱཏཱཏཔེཧི བཧིསུཀྑབྷཱཝེན པཊིཙྪཱདིཏེ དཎྜེན ཨཱལུལིཏྭཱ དུགྒནྡྷོཝིཡ ཙིཏྟསནྟཱནེ པརིཡཏྟིཝཱཏཱཏཔེཧི བཧིསུཀྑབྷཱཝེན པཊིཙྪཱདིཏེ ཀེནཙིདེཝ རཱུཔཱརམྨཎཱདིནཱ ཨཱལུལིཏྭཱ ཀིལེསསཏྟིསངྑཱཏོ དུགྒནྡྷོ ཝཱཡིཏྭཱ ཧཱིནཱཡཱཝཏྟིསྶཱམཱིཏི ཙིནྟེཏྭཱ གིཧིཝཏྠཱནི གཧེཏྭཱ སདྡྷིཾ སཧཱཡབྷིཀྑུཧི ནདཱིཏིཏྠཾ ཨགམཱསི. ཨནྟརཱམགྒེ ¶ ཏཱཝ བྷིཀྑུབྷཱཝེནེཝ ཙེཏིཡཾ ཝནྡིསྶཱམཱིཏི གིཧིཝཏྠཱནི སཧཱཡཀཱནཾ ཧཏྠེ ཋཔེཏྭཱ ཙེཏིཡཔྤམུཁེ ལེཎཾ པཝིསིཏྭཱ ཝནྡིཏྭཱ ནིསཱིདི. ཨཐ ཨེཀཱ དཧརིཏྠཱི ཙེཏིཡངྒཎཾ ཨཱགནྟྭཱ བཧི ལེཎཾ ནིསཱིདིསྭཱ ཨུདཀཾ སིཉྩིཏྭཱ པཏྠནཾ ཨཀཱསི,-ཨིམིནཱ པུཉྙཀམྨེན སབྦེཧི ཨཔཱཡཱདིནུཀྑེཧི མོཙེཡྻཱམི, བྷཝེ བྷཝེ ཙ ཧཱིནཱཡཱཝཏྟཀསྶ པུརིསསྶ པཱདཙཱརིཀཱ ན བྷཝེཡྻཱམཱིཏི.

ཨཐ ཏཾ སུཏྭཱ དཧརབྷིཀྑུ ཨེཝཾ ཙིནྟེསི,-ཨིདཱནི ཨཧཾཧཱིནཱཡཱཝཏྟིསྶཱམཱིཏི ཙིནྟེཏྭཱ ཨཱགཏོ, ཨཡམྤི དཧརིཏྠཱི ཧཱིནཱཡཱཝཏྟཀསྶ པུརིསསྶ པཱདཙཱརིཀཱ ན བྷཝེཡྻཱ མཱིཏི པཏྠནཾ ཨཀཱསི, ཨིདཱནི ཏཾ དཧརིཏྠིཾ ཀཱརཎཾ པུཙྪིསྶཱམཱིཏི. ཨེཝཾ པན ཙིནྟེཏྭཱ བཧི ལེཎཾ ནིཀྑམིཏྭཱ ཏཾ དཧརིཏྠིཾཀཱརཎཾ པུཙྪི,-ཀསྨཱ པན ཏྭཾ ཧཱིནཱཡཱཝཏྟཀསྶ པུརིསསྶ པཱདཙཱརིཀཱ ན བྷཝེཡྻཱམཱིཏི པཏྠནཾ ཀརོསཱིཏི. ཧཱིནཱཡཱཝཏྟཀསྶ བྷནྟེ པུརིསསྶ པཱདཙཱརིཀཱ ན བྷཝེཡྻཱམཱིཏི ཝུཏྟཝཙནཾ བཱལཔུརིསསྶ པཱདཙཱརིཀཱ ན བྷཝེཡྻཱམཱིཏི ཝུཏྟཝཙནེན ནཱནཱ ན ཧོཏི, སདིསཏྠཀམེཝཱཏི ནནུ ཧཱིནཱཡཱ ཝཏྟཀོ བཱལོཡེཝ ནཱམ, སཙེ པན བྷནྟེ ཧཱིནཱཡཱཝཏྟཀོ བཱལོ ནཱམ ན བྷཝེཡྻ, ཀོ ནཱམ ལོཀེ བཱལོ བྷཝེཡྻ, བྷིཀྑུ ནཱམ ཧི པརེཧི དིནྣཾ ཙཱིཝརཔིཎྜཔཱཏསེནཱསནཾ པརིབྷུཉྫིཏྭཱ སུཁཾ ཝསཏི, སཙེ གནྠཾ ཨུགྒཎྷིཏུ ཀཱམོ བྷཝེཡྻ, ཡཐཱཀཱམཾཡེཝ གནྠཾ ཨུགྒཎྷིཏུཾ ཨོཀཱསཾ ལབྷཏི, ཨེཝཾ པན ཨཧུཏྭཱ ཨལསིཀོཡེཝ བྷུཉྫིཏྭཱ སཡིཏྭཱ ནིསཱིདིཏུཾ ཨིཙྪེཡྻ, ཨེཝམྤི ཡཐཱཀཱམཾ བྷུཉྫིཏུཾ སཡིཏུཾ ཨོཀཱསཾ ལབྷཏི, ཨེཝམྤི སམཱནོ པརསྶ དཱསོ བྷཝིསྶཱམི, དཱརསྶ ཀིཾཀརོ བྷཝིསྶཱམཱིཏི ཨཀཐེནྟོཔི ཀཐེནྟོཝིཡ ཧུཏྭཱ ཧཱིནཱཡཱཝཏྟེཡྻ, སོ ལོཀེ ཨཉྙེཧི བཱལེཧི ཨདྷིཀོ བཱལོཏི ཨཧཾ མཉྙཱམི, སཙེ པན བཱལཏརསྶ བྷརིཡཱ བྷཝེཡྻ, ཨཧཾ བཱལཏརཱི བྷཝེཡྻནྟི ¶ ཝུཏྟེ སོ དཧརབྷིཀྑུ སཾཝེགཾ ཨཱཔཛྫིཏྭཱ བཧིནགརདྭཱརཾ ནིཀྑམིཏྭཱ ཝཱནརགཎེན ཝིནཱ ཛྷཱཡནྟོཝིཡ ཝཱནརོ ཛྷཱཡིཏྭཱ ནིསཱིདི.

ཨཐ སཧཱཡཀཱ ཨཱགནྟྭཱ གིཧིཝཏྠཱནི གཎྷཱཧཱིཏི པཀྐོསིཾསུ. ཏསྨིཾ ཀཱལེ སོ དཧརབྷིཀྑུ ཨཱགཙྪཐ བྷཝནྟོཏི ཝཏྭཱ སབྦཾ ཀཱརཎཾ ཏེསཾ ཨཱཙིཀྑིཏྭཱ ཨིདཱནི པན བྷཝནྟོ ཧཱིནཱཡཱཝཏྟེཧཱིཏི སཙེ ཡོ ཀོཙི ཨཱགནྟྭཱ མམ སཱིསཾ མུགྒརེན པཧཱརེཡྻ, ཨེཝཾ སནྟེཔི ཧཱིནཱཡཱཝཏྟིཏུཾ ན ཨིཙྪཱམི, ཨིཏོ པཊྛཱཡ ཡཱཝ ཛཱིཝིཏཔརིཡནྟཱ ཧཱིནཱཡཱཝཏྟིཏུཾ མནསཱཔི ན ཙིནྟཡིསྶཱམཱིཏི ཝཏྭཱ ཨེརཱཝཏཱིནཾདིཾ ཏརིཏྭཱ ཛེཡྻཔུརཾ ཨགམཱསི. ཏདཱ ཀིར དཧརིཏྠཱི དེཝལཱབྷཝཡྻ, ན མནུསྶིཏྠཱིཏི ཝདནྟི པཎྜིཏཱཏི.

ཛེཡྻཔུརཾ པན པཏྭཱ པརིཡཏྟིཀོཝིདཱནཾ མཧཱཐེརཱནཾ སནྟིཀེ ནཡཾ གཧེཏྭཱ པུཉྙཙེཏིཡསྶ དཀྑིཎདིསཱབྷཱགེ ཨེཀསྨིཾ ཝིཧཱརེ ནིསཱིདི. པརིཡཏྟིཾ ཝཱཙེཏྭཱ ཨཐ ཀམེན ཏཾཏཾདིསཱཧི བྷིཀྑུསཱམཎེརཱ ཨཱགནྟྭཱ ཏསྶ སནྟིཀེ པརིཡཏྟིཾ ཨུགྒཎྷིཾསུ. ཨཱཝཱསཾ པན ཨལབྷིཏྭཱ ཀེཙི བྷིཀྑུསཱམཎེརཱ ཚཏྟཱནིཔི ཚཱདིཏྭཱ ནིསཱིདིཾསུ.

ཨེཀསྨིཾ ཀཱལེ རཱཛཱ ནིཀྑམིཏྭཱ པུཉྙཙེཏིཡཾ ཝནྡིསྶཱམཱིཏི ཙེཏིཡངྒཎཾ པཱཝིསི. ཨཐ ཚཏྟཱནི ཚཱདེཏྭཱ ནིསིནྣེ བྷིཀྑཱུ དིསྭཱ གུཧཱཡ སདྡྷིཾ ཝིཧཱརཾ ཀཱརཱཔེཏྭཱ ཏསྶ བྷིཀྑུསྶ ཨདཱསི. ཏིལོཀགརཱུཏིཔི ནཱམལཉྪཾ ཨདཱསི. སུཁཝོཧཱརཏྠཾ པན ཀཀཱརལོཔཾ ཀཏྭཱ ཏིལོགརཱུཏི ཝོཧརིཾསུ.

ཏསྶ པན སདྡྷིཝིཧཱརིཀོ སཏྟཝསྶིཀོ ཏེཛོདཱིཔོ ནཱམ བྷིཀྑུ པརིཏྟཊཱིཀཾ ཨཀཱསི. ཨཔརབྷཱགེ པན ཏིལོཀཱལངྐཱརོཏི ནཱམལཉྪཾ ཨདཱསི. ཨེཝཾ ཏེཛེདཱིཔོ ནཱམ བྷིཀྑུ ནརཱཝརརཉྙོ ཀཱལེ པརིཏྟཊཱིཀཾ ཨཀཱསཱིཏི དཊྛབྦཾ. ཀེཙི པན པཙྪིམཔཀྑཱདྷིཀརཉྙོ ཀཱལེཏི ཝདནྟི.

ཨེཀསྨིཾ ¶ པན ཀཱལེ ཏིརིཡཔབྦཏཝིཧཱརཝཱསཱིམཧཱཐེརོ པཱདཙེཏིཡཾ ཝནྡནཏྠཱཡ གནྟྭཱ པཙྩཱགཏཀཱལེ ཀུཁནནགརེ སུཝཎྞགུཧཱཡཾ ཛམྦུདྷཛཏྠེརསྶ སནྟིཀཾ པཝིསིཏྭཱ ཏེན སདྡྷིཾ སལླཱཔཾ ཨཀཱསི. ཏེ ཙ མཧཱཐེརཱ ཨཉྙམཉྙཾ པསྶིཏྭཱ སལླཔིཏྭཱ ཨཏིཝིཡ པམོདིཾསུ. ལོཀསྨིཉྷི བཱལོ བཱལེན པཎྜིཏོ པཎྜིཏེན སདྡྷིཾ ཨཏིཝིཡ པམོདཏཱིཏི. ཏེ ཙ དྭེ ཐེརཱ སམཱནཝསྶིཀཱ. ཏིརིཡཔབྦཏཝིཧཱར ཝཱསཱིམཧཱཐེརོ ཏེན སདྡྷིཾ སལླཱཔཾ ཀཏྭཱ པཙྩཱགཙྪི. ཛམྦུདྷཛཏྠེརོ ཙ མགྒཾ ཨཙིཀྑིཏུཾ ཨནུགཙྪི. ཨཐ ཏིརིཡཔབྦཏཝིཧཱརཝཱསཱིམཧཱཐེརོ ཛམྦུདྷཛཏྠེརཾ ཨཱཧ,- ཨཧཾ བྷནྟེ རཱཛཝལླབྷོ ཧོམི རཱཛགུརུ,ཏྭཾཡེཝ མམ པུརཏོ གཙྪཱཧཱིཏི. ཨཐ ཛམྦུདྷཛཏྠེརོཔི ཏིརིཡཔབྦཏཝིཧཱརཝཱསིཏྠེརཾ ཨཱཧ,-ཏྭཾ བྷནྟེ རཱཛཝལླབྷོ བྷཝསིརཱཛགུརུ, ལོཀེ རཱཛགུརུ ནཱམ པདྷཱནབྷཱཝེ ཋིཏོ, ཏསྨཱ ཏྭཾཡེཝ མམ པུརཏོ གཙྪཱཧཱིཏི. ཨེཏྠ ཙ དྭེཔི མཧཱཐེརཱ ཨཉྙམཉྙཾ གཱརཝཝསེན ལོཀཝཏྟཾ ཨཔེཀྑིཏྭཱ ཨེཝམཱཧཾསཱུཏི དཊྛབྦཾ. ཏིརིཡཔབྦཏཝིཧཱརཝཱསཱིམཧཱཐེརོཔི རཏནཔཱུརནགརཾ པཏྭཱ རཱཛཝཾསཔབྦཏཾ གནྟྭཱ ཨརཉྙཝཱསཾ ཝསི.

ཨཐ ཨུཀྐཾསིཀརཱཛཱ ཀནིཊྛེན སཱུརཀིཏྟིནཱམེན སདྡྷིཾ མནྟེསི,-སཙེ ཏྭཾ ཝནེ ཐེརཾ པཋམཾ པསྶསི, ཏྭཾཡེཝ ཝིཧཱརཾ ཀཱརཱཔེཏྭཱ ཐེརསྶ དདཱཧི, སཙེ པནཱཧཾ པཋམཾ པསྶེཡྻ, ཨཧཾ ཝིཧཱརཾ ཀཱརཱཔེཏྭཱ དདཱམཱིཏི.

ཨཐ ཀནིཊྛཱ པཋམཾ པསྶིཏྭཱ ཏིརིཡཔབྦཏཀནྡརེ ཛེཏཝནཾ ནཱམ ཝིཧཱརཾ ཀཱརཱཔེཏྭཱ ཨདཱསི. ཨིདཉྩ ཝཙནཾ སཱདྷུཛྫནཱནཾ གུཎཾ ཨེཝཀཱརཾ པཱིཏིསོམནསྶཾ ཨུཔྤཛྫི, ཏེན པུཉྙཀམྨེན ཏེན པཱིཏིསོམནསྶེན སཏྟཀྑཏྟུཾ དེཝརཛྫསམྤཏྟིཾ སཏྟཀྑཏྟུཾ མནུསྶརཛྫསམྤཏྟིཾ པཊིལབྷཱིཏི ཝུཏྟཏྟཱ སཱདྷུཛྫནཱནཾ གུཎཾ ཨནུསྶརིཏྭཱ པུཉྙཝིསེསལཱབྷཏྠཱཡ ཝུཏྟཾ.

ཏིརིཡཔབྦཏཝིཧཱརཝཱསཱིམཧཱཐེརོ ཙ ཛམྦུདྷཛཏྠེརསྶ ¶ གུཎཾ ཨུཀྐཾསིཀརཉྙོ ཨཱརོཙེསི. རཱཛཱ ཙ ཨཏིཝིཡ པསཱིདིཏྭཱ ཛམྦུདྷཛོཏི མཱུལནཱམེ དཱིཔསདྡེན ཡོཛེཏྭཱ ཛམྦུདཱིཔདྷཛོཏི ནཱམལཉྪཾ ཨདཱསི.

ཛམྦུདྷཛཏྠེརོ ཙ ནཱམ དྷམྨནནྡཏྠེརསྶ སདྡྷིཝིཧཱརིཀཱ. དྷམྨནནྡཏྠེརོ ཙ ཛོཏིཔུཉྙཏྠེརསྶ སདྡྷིཝིཧཱརིཀོ. ཏེ ཙ ཐེརཱ ཨརཧནྟགཎཝཾསིཀཱ.

ཛམྦུདྷཛཏྠེརོ པན ཝིནཡཔཱལི༹ཡཱ ཨཊྛཀཐཱཡ ཙ ཨཏྠ ཡོཛནཾ མརམྨབྷཱསཱཡ ཨཀཱསི. མཎིརཏནོ ནཱམ པན ཐེརོ ཨཊྛསཱལིནཱིསམྨོཧཝིནོདནཱིཀངྑཱཝིཏརཎཱིཨཊྛཀཐཱནཾ ཨབྷིདྷམྨཏྠཝིབྷཱཝནཱིསངྑཔཝཎྞནཱལཱི༹ཀཱནཉྩ ཨཏྠཾ མརམྨ བྷཱསཱཡ ཡོཛེསི.

མཱུལཱཝཱསགཱམེ ཙ པུབྦཱརཱམཝིཧཱརཝཱསིཏྠེརོ གཱུལ༹ཏྠ དཱིཔནིཾ ནཱམ གནྠཾ ཝིསུདྡྷིམགྒགཎྛིཔདཏྠཉྩ མཱུལབྷཱསཱཡ ཨཀཱསི, ནེཏྟིཔཱལི༹ཡཱ ཙ ཨཏྠཾ མརམྨབྷཱསཱཡ ཡོཛེསི. སོ པན ཐེརོ པུབྦེ གཱམཝཱསཱི ཧུཏྭཱ སཱིསཝེཋནཏཱལཔཏྟཱནི གཧེཏྭཱ ཨཱཙརིཡཔྤཝེཎཱིཝསེན ཝིནཡཝིལོམཱཙཱརཾ ཙརི. པཙྪཱ པན ཏཾ ཨཱཙཱརཾ ཝིསྶཛྫིཏྭཱ ཨརཉྙཝཱསཾ ཝསི. སོཔི ཐེརོ གམྦྷཱིརཉཱཎིཀོ སདྡཏྠནཡེསུ ཨཏིཝིཡ ཚེཀོ.

ཀལིཡུགེ པན པཉྩཏིཾསཱདྷིཀེ ཝསྶསཧསྶེ སམྤཏྟེ ཀནིཊྛོ སིརིཔཝརམཧཱདྷམྨརཱཛཱ ནཱམ བྷཱུཔཱལོ རཛྫཾ ཀཱརེསི. དབྦིམུཁཛཱཏསྶརེ པན གེཧཾ ཀཱརཱཔེཏྭཱ ནིསཱིདནཏོ དབྦིམུཁཛཱཏསྶརོཏི ནཱམཾ པཱཀཊཾ ཨཧོསི. ཏསྨིཾ པན ཛཱཏསྶརེ ཛེཡྻབྷཱུམིཀིཏྟིཾ ནཱམ ཝིཧཱརཾ ཀཱརཱཔེཏྭཱ སིརིསདྡྷམྨཔཱལཏྠེརསྶ ཨདཱསི. བཧཱུནམྤི གཱམཝཱསཱི ཨརཉྙཝཱསཱི བྷིཀྑཱུནཾ ཨནུགྒཧཾ ཨཀཱསི. རཏནཔཱུརནགརསྨིཉྷི དསསུ ‘ཉྱ྄ौཾ ཡཱཾ’ རཱཛཱཾསེསུ པྤཙྪིམཱ པཉྩ རཱཛཱནོ ཨཝིཙིནིཏྭཱཡེཝ ཨལཛྫཱིལཛྫཱིམིསྶཀཝསེན སཱསནཾ པགྒཎྷིཾསུ. ཏདཱ ¶ ཛིནསཱསནཾ ཨབྦྷནྟརེ ཙནྡོཝིཡ ཨཏིཔརིསུདྡྷཾ ན ཨཧོསི. ཨེཝམྤི ལཛྫིནོ ཨཏྟནོ ཨཏྟནོ ཝཾསཱནུརཀྑཎཝསེན དྷམྨཾ པཱུརེཏུཾ ཨནིཝཱརིཏཏྟཱ ལཛྫཱིགཎཝཾསོ ན ཚིཛྫཏི. ཏཐཱ ཨལཛྫིནོཔི ཨཏྟནོ ཨཏྟནོ ཨཱཙརིཡཔྤཝེཎཱིཝསེན ཝིཙརིཾསུ, ཏེན ཨལཛྫཱིགཎཝཾསོཔི ན ཚིཛྫཏཱིཏི དཊྛབྦཾ. ཏསྶ རཉྙོ ཀཱལེ དེཝཙཀྐོབྷཱསོ ནཱམ ཨེཀོ ཐེརོ ཨཏྠི, ཝེདསཏྠཉྙཱུ པིཊཀེསུ པན མནྡོཏི.

ཀལིཡུགེ པན ཨཊྛཏིཾསཱདྷིཀེ ཝསྶསཧསྶེ སམྤཏྟེ ཝེསཱཁམཱསསྶ ཀཱལ༹པཀྑཨཊྛམིཏོ པཊྛཱཡ ལོཀསངྐེཏཝསེན ཨུཔྤཛྫམཱནཾ བྷཡཾ ནིཝཱརེཏུཾ ནཝགུཧཱཡཾ ཏེན དེཝཙཀྐོབྷཱསཏྠེརེན ཀཐིཏནིཡཱམེན པཋམཾ མརམྨིཀབྷིཀྑཱུ པཊྛཱནཔྤཀརཎཾ ཝཱཙཱཔེསི. ཏཏོ པཙྪཱ ཛེཊྛམཱསསྶ ཛུཎྷཔཀྑཔཱཊིཔདདིཝསཏོ རཱམཉྙརཊྛཝཱསིཀེ བྷིཀྑཱུ པཊྛཱནཔྤཀརཎཾ ཝཱཙཱཔེསི. མཧཱཚཎཉྩ ཀཱརཱཔེསི. རཊྛཝཱསིནོཔི བཧུཔཱུཛཱསཀྐཱརཾ ཀཱརཱཔེསི. ཏསྶ ཀིར རཉྙོ ཀཱལེ པོཏྠཀཾ ཨཊྛིབྷལླིཀརུཀྑནིཡྻཱསེཧི པརིམཊྛཾ ཀཏྭཱ མནོསིལཱཡ ལིཁིཏྭཱ སུཝཎྞེན ལིམྤེཏྭཱ པིཊཀཾ པཏིཊྛཱཔེསི. ཏཏོ པཊྛཱཡ ཡཱཝཛྫཏནཱ ཨིདཾ པོཏྠཀཀམྨཾ མརམྨརཊྛེ ཨཀཾསཱུཏི.

ཀལིཡུགེ སཊྛཱདྷིཀེ ཝསྶསཧསྶེ སམྤཏྟེ (ཨསྶཡུཛམཱསསྶ ཀཱལ༹པཀྑཚཊྛམིཡཾ ཨངྒཱརཝཱརེ) ཏསྶ པུཏྟོ རཛྫཾ ཀཱརེསི. སིརིཧཱསཱིཧསཱུརསུདྷམྨརཱཛཱཏི ནཱམལཉྪམྤི པཊིགྒཎྷི. པིཏུ རཉྙོ གེཧཊྛཱནེ ཙེཏིཡཾ ཀཱརཱཔེསི. ཏསྶ པན མཱརཛེཡྻརཏནནྟི སམཉྙཱ ཨཧོསི. ཏསྶ པན རཉྙོ ཀཱལེ སལླཱཝཏིཡཱ ནཱམ ནདིཡཱ པཙྪིམབྷཱགེ ཏུནྣནཱམཀེ གཱམེ གུཎཱབྷིལངྐཱརོ ནཱམ ཐེརོ སཱམཎེརཱནཾ གཱམགྒཝེསནཀཱལེ ཨེཀཾསཾ ཨུཏྟརཱསངྒཾ ཀཱརཱཔེཏྭཱ ¶ སཱིསཝེཋནཏཱལཔཏྟཱནི པན ན གཎྷཱཔེཏྭཱ ཏཱལཝཎྚམེཝ གཎྷཱཔེསི. ཨེཀོ གཎོ ཧུཏྭཱ སཔརིཝཱརེན སདྡྷིཾ ཏུནྣགཱམེ ནིསཱིདི. ཏུནྣགཎོཏི ཏསྶ སམཉྙཱ ཨཧོསི. སོ པན ཐེརོ པཱལི༹ཨཊྛཀཐཱཊཱིཀཱགནྠནྟརེསུ ཨདྷིཔྤཱཡཾ ཡཐཱབྷཱུཏཾ ན ཛཱནཱཏི, ཨབྷིདྷམྨཔིཊཀཾཡེཝ སིསྶཱནཾ ཝཱཙེཏྭཱ ནིསཱིདི.

ཏསྨིཉྩ ཀཱལེ ཀེཏུམཏཱིནགརེ ནིསིནྣཱ བདྡྷནྣཱ བུདྡྷངྐུརཏྠེར ཙིཏྟཏྠེརཱ, དཱིཔཡངྒནགརེ ཨུལུ༹གཱམེ ནིསིནྣོ སུནནྡཏྠེརོ, ཏལུཔྤནགརེ ཛེཡྻབཧུཨནྡྷགཱམེ ཀལྱཱཎཏྠེརོཏི ཨིམེ ཙཏྟཱརོ ཐེརཱ སཱམཎེརཱནཾ གཱམཔྤཝེསནཀཱལེ ཨེཀཾསཾ ཨུཏྟརཱསངྒཾ ཨཀཱརཱཔེཏྭཱ སཱིསཝེཋནཏཱལཔཏྟཱནི ཨགྒཎྷཱཔེཏྭཱ ཙཱིཝརཾ པཱརུཔཱཔེཏྭཱ ཏཱལཝཎྚཾ གཎྷཱཔེཏྭཱ སཀལཀགཎཾ ཨོཝཱདཾ ཀཏྭཱ ནིསཱིདིཾསུ. ཏེ པན ཐེརཱ པཱལི༹ཨཊྛཀཐཱཊཱིཀཱགནྠནྟརེསུ ཨདྷིཔྤཱཡཾ ཡཐཱབྷཱུབྷཾ ཛཱནིཾསུ, ཏཱིསུཔི པིཊཀེསུ ཀོཝིདཱ ཨཧེསུཾ. ཨིཙྩེཝཾ སིརིམཧཱསཱིཧསཱུརསུདྷམྨརཉྙོ ཀཱལེ པཱརུཔནབྷིཀྑཱུཧི ནཱནཱ ཧུཏྭཱ ཝིརཱུཔཾ ཨཱཔཛྫིཏྭཱ ཨེཀཾསིཀགཎོ ནཱམ ཝིསུཾ བྷིཛྫི, ཡཐཱ པན ཨཡམལཾ ཨཡཏོ ཨུཊྛཧིཏྭཱ ཝིསདིསཾ ཧུཏྭཱ ཝིརུདྡྷཾ ཧོཏཱིཏི. ཨེཝཾ བྷིཛྫམཱནཱཔི གཎཱ རཱཛཱ པམཱདོ ཨནུསྶུཀྐོ ཧུཏྭཱ ཨཏྟནོ ཨཏྟནོ རུཙིཝསེནེཝ ཙརིཏྭཱ ནིསཱིདིཾསུ.

ཏེསུ ཙ དྭཱིསུ གཎེསུ པཱརུཔནགཎེ ཐེརཱ པཱལི༹ཨཊྛཀཐཱཊཱིཀཱགནྠནྟརེསུ ནཱིཏཏྠཝསེན ཝུཏྟཾ ཝཙནཾ ནིསྶཱཡ ནིཀྐངྑཱ ནིདྡོསཱཝ ཧུཏྭཱ ནིསཱིདིཾསུ. ཨེཀཾསིཀགཎེ པན ཐེརཱ ཨཏྟནོ ཨཏྟནོ ཝཱདོ ན པཱལི༹ཡཾ ན ཙ ཨཊྛཀཐཱསུ ནེཝ ཊཱིཀཱསུ ནཱཔི གནྠནྟེརེསུ དིསྶཏི, ཨིམམཏྠཾ ཨཛཱནནྟཱ ཨིདམེཝ སཙྩཾ མོགྷམཉྙནྟི ཝཏྭཱ ཀེཙི པན སཀསཀསིསྶཱནཾ ཨོཝཱདཾ ཨདཾསུ. ཨེཝརཱུཔཱཔི སིསྶཱ ཨོཝཱདཾ པཊིགྒཎྷིཾསུ.

ཀེཙི པན པཱལི༹ཡཱདཱིསུ སཀཝཱདསྶ ཨནཱགཏབྷཱཝཾ ཉཏྭཱཡེཝ ¶ ཨཔརིསུདྡྷཙིཏྟཱ ཧུཏྭཱ སམྨཱསམྦུདྡྷསྶ བྷགཝཏོ མུཁཾ ཨནོལོཀེཏྭཱ སམྨཱསམྦུདྡྷསྶེཝ བྷགཝཏོ གུཎཾ ཨནུསྶརིཏྭཱ སཀཝཱདེ ཨཱཀཱསེ པསཱརིཏ ཧཏྠོཝིཡ ཨཔྤཏིཊྛཱནོཏི ཛཱནིཏྭཱཡེཝ ཨམྷཱཀཾ ཝཱདོ སམྤཏྟལངྐསྶ སདྡྷམྨཙཱརིཏྠེརསྶ ཝཾསཔྤབྷཝོཏི ཨནིསྶཱཡབྷཱུབྷམྤི ནིསྶཡཾ ཨཀཾསུ. ཨབྷཱུཏེན མཧཱཐེརཾ སཱིལཝནྟཾ ཨབྦྷཱཙིཀྑིཾསུ. ཕྱསཱིནཱམཀེ གཱམེ དིཊྛདྷམྨིཀསམྤརཱཡི ཀཏྠཾ ཨནཔེཀྑནྟསྶ ཧཱིནཱཡཱཝཏྟཀསྶ དུསྶཱིལསྶ ཨུཔཱསཀསྶ ལཉྫཾ དཏྭཱ ཨམྷཱཀཾ ཝཱདཱནུརཱུཔཾ ཨེཀཾ གནྠཾ ཀརོཧཱིཏི ཨུཡྻོཛེཏྭཱ ཨནཱགཏེ ཨནུབྷཝིཡམཱནདུཀྑཏོ ཨབྷཱཡིཏྭཱ ནིསྶཡཾ གཝེསིཾསཱུཏི.

ཏསྨིཾཉྩ ཀཱལེ ནིགྲོདྷཔཱལི༹སུཝཎྞཝིཧཱརཝཱསིཏྠེརོ གཱམཝཱསཱིབྷིཀྑུ གཎཾ སམིཏིཾ ཀཏྭཱ ཏསྶ ནཱཡཀོ ཧུཏྭཱ སཱིསཝེཋནཾ ཨདྷཱརེནྟཱ ཨམངྒལབྷིཀྑཱུ སཱསནེ མཱཏིཊྛནྟཱུཏི ཨརཉྙཝཱསཱིནཾ བྷིཀྑཱུནཾ གནྠཾ ཝིཀོཔེཏྭཱ ཏཏོ ཏཏོ པབྦཛེསུཾ. ཨཐ ཧཏྠིསཱལགཱམསྶ པུརཏྠིམཱཡ ཨནུདིསཱཡ སེཊྛིཏལཱ༹ཀསྶ དཀྑིཎཱཡ ཨནུདིསཱཡ ཝིཧཱརེ ནིསིནྣེ ཨཏིརེཀཔཎྞཱསབྷིཀྑཱུཔི པབྦཱཛེསྶཱམཱསི ཙིནྟེཏྭཱ གཱམཝཱསཱིབྷིཀྑཱུ སནྣཧིཏྭཱ ཨགམཱསི. ཨཐ རཱཛཱ ཏམཏྠཾ སུཏྭཱ གཱམཝཱསཱིགཎོཔི ཨེཀོ, ཨརཉྙཝཱསཱིགཎོཔི ཨེཀོ, གཱམཝཱསཱིབྷིཀྑཱུ ཨརཉྙཝཱསཱིབྷིཀྑཱུ ཝིཧེཋེསུཾ ན སཀྐཱ, སཀསཀཝཱདཝསེན སཀསཀཊྛཱནེ ནིསཱིདི ཏབྦནྟི རཱཛལེཁནཾ པེསེསི. ཨཐ ཨརཉྙཝཱསཱིབྷིཀྑཱུ སུཁཾ ཝསིཏུཾ ཨོཀཱསཾ ལབྷིཾསུ.

ཀལིཡུགེ ཚསཏྟཏཱདྷིཀེ ཝསྶསཧསྶེ སམྤཏྟེ ཏསྶ རཉྙོ པུཏྟོ མཧཱསཱིཧསཱུརདྷམྨརཱཛཱདྷིརཱཛཱ ནཱམ རཛྫཾ ཀཱརེསི. སོཡེཝ སཱུརཛྫརཱཛཱཏི ཙ སེཏིབྷིནྡོཏི ཙ ཝོཧཱརིཡཏི.

ཏསྶ ¶ རཉྙོ ཀཱལེ སུཝཎྞཡཱནོལོཀནགཱམཝཱསཱིཨུཀྐཾསམཱལཾ ནཱམ ཐེརཾ ཨནྟོཡུདྷནཱཡཀོ ཨེཀོ ཨམཙྩོ ཨཱནེཏྭཱ རཏནཔཱུརནགརཾ པཏྭཱ སུཝཎྞཀུཀྐུཊཱཙལེ ཝིཧཱརཾ ཀཱརཱཔེཏྭཱ ཋཔེསི.

སོ པཱལི༹ཨཊྛཀཐཱཊཱིཀཱགནྠནྟརེསུ ཨཏིཝིཡ ཚེཀོ. ཝཎྞབོདྷནཾ ནཱམ ལིཁནནཡཉྩ ཨཀཱསི. ཏསྶ གཱམསྶ རཱཛཱུཧི དིནྣཝསེན ཙེཏིཡཛགྒནཀམྨེ ཡུཏྟཀུལཏྟཱ པན རཉྙོ ཨཱཙརིཡཊྛཱནེ ཨཊྛཔེཏྭཱ ཨནྟོཡུདྷནཱཡ ཀསྶེཝ པཱུཛནཏྠཱཡ ནིཡྻཱདེསི. ཏསྶཱཔི རཉྙོ ཀཱལེ སཱམཎེརེཧི གཱམཔྤཝསནཀཱལེ པཱརུཔེཏྭཱ པཝིསིཏབྦནྟི ཨེཀཙྩེ ཝདིཾསུ. ཨེཀཙྩེ པན ཨེཀཾསཾ ཨུཏྟརཱསངྒཾ ཀཏྭཱ པཝིསིཏབྦནྟི ཝདིཾསུ. ཨེཝཾ ཨཉྙམཉྙཾ ཀལཧཾ ཨཀཾསུ.

ཏཏྠ ཨུཀྐཾསམཱལཱནཱམཀོ ཐེརོ པཱརུཔནགཎེ པདྷཱནོ ཧུཏྭཱ ནཱནཱགནྠེསུ པཱརུཔནཝཏྟམེཝ ཨཱགཏནྟི པཀཱསིཾསུ. ཨེཀཾསིཀགཎེ པན ཏིརིཡཔབྦཏཝིཧཱརཝཱསཱིམཧཱཐེརཱ ཨཱཙརིཡཔྤཝེཎཱིདསྶནཝསེན པཱརུཔནཝཱདཾ པཊིཀྑིཔིཾསུ.

ཨཐ རཱཛཱ ཙ ཕལིཀཁཙིཏཝིཧཱརཝཱསིཏྠེརཾ མེགྷུཙྩནཝིཧཱརཝཱསིཏྠེརཾ སུཧཏྠཏྠེརཾ བུདྡྷངྐུརཏྠེརཉྩཱཏི ཨིམེ ཙཏྟཱརོ ཐེརེ ཝིནཡཝིནིཙྪཀཊྛཱནེ ཋཔེཏྭཱ དྭེ པཀྑཱ ཨཏྟནོ ཨཏྟནོ ཝཱདཾ དསྶེནྟཱུཏི ཨཱཧ.

ཏེ ཙ ཙཏྟཱརོ ཐེརཱ པཱལི༹ཨཊྛཀཐཱཊཱིཀཱགནྠནྟརེསུ ཨཀོཝིདཱ. ཏེསཉྷི ཋཔེཏྭཱ རཱཛཝལླབྷམཏྟཾ ཨཉྙོ ཀོཙི གུཎཝིསེསོ ནཏྠི རཱཛགུརུབྷཱཝཏྠཱཡ, ཡཐཱ བྱགྒྷཱ རུཀྑགཙྪལཏཱདིཔྤཊིཙྪནྣེ དུགྒཊྛཱནེ ནིསིནྣེ མིགེ ཁུདྡཀཏྟཱ དུབྦལེཔི གཎྷེཏུཾ ན སཀྐོནྟི, ཨེཝམེཝ ཏེ ཨེཀཾསིཀཏྠེརེ ¶ རཱཛཱནཾ ནིསྶཱཡ ཋིཏེ གནྠེསུ ཨནཱགཏཏྟཱ དུབྦལེཔི ཝཱདཝསེན ཨབྷིབྷཝིཏུཾ ན སཀྑིཾསུ. ཏེནེཝ པརསེནཱཡ བལཝཏཾ ཛཱནིཏྭཱ ནིཔཙྩཀཱརཾ དསྶེཏྭཱ ཝེརཾ སམེཏྭཱ ནིསིནྣོ པཎྜིཏཡོདྷོཝིཡ ཝཱདཾ ནིཊྛཾ ཨཔྤཱཔེཏྭཱཡེཝ པཱརུཔནགཎཱ ནིསཱིདིཾསཱུཏི.

ཀལིཡུགེ པན པཉྩནཝུཏཱདྷིཀེ ཝསྶསཧསྶེ སམྤཏྟེ ཏསྶ པུཏྟོ མཧཱརཱཛཱདྷིཔཏི ནཱམ རཛྫཾ ཀཱརེསི. པཙྪཱ པན ཀཱལེ ཏེརསཱདྷིཀེ སཏེ ཝསྶསཧསྶེ ཙ སམྤཏྟེ རཱམཉྙརཊྛིནོ རཱཛཱ ཏཾ ཨབྷིབྷཝིཏྭཱཝ ཨནཱིཏཏྟཱ པཏྟཧཾསཱཝཏཱིཏི པཱཀཊཾ ཨཧོསི.

ཏསྶ རཉྙོ ཀཱལེ ཀུཁནནགརེ ཛཱལཡུཏྟ གཱམཏོ ཉཱཎཝརཾ ནཱམ ཐེརཾ ཨཱནེཏྭཱ ཨཱཙརིཡཊྛཱནེ ཋཔེསི. སོ པན ཐེརོ པཱལི༹ཨཊྛཀཐཱཊཱིཀཱགནྠནྟརེསུ ཨཏིཝིཡ ཚེཀོ. སུདྷམྨསབྷཱཡཾ པརིཡཏྟིཝཱཙཀཱནཾ སོཏཱརཱནཾ ཨཏྠཱཡ ཨབྷིདྷམྨཏྠསངྒཧཔྤཀརཎསྶ གཎྛིཔདཏྠཾ པཋམཾ ཨཀཱསི. ཏཏོ པཙྪཱ ཨཊྛསཱལིནིཡཾ གཎྛིཔདཏྠཾ སུརཱཝིནིཙྪཡཉྩ ཨཀཱསི. ཏཏོ པཙྪཱ ཏེན རཉྙཱ ཡཱཙིཏོ ཨབྷིདྷཱནཔྤཊཱིཔིཀཱཡ ཨཏྠཾ མརམྨབྷཱསཱཡ ཡོཛེསི. རཉྙོ ནཱམལཉྪཾ ཚནྡོལངྐཱརསདྡནེཏྟིཝིདགྒདཎྜཱིབྱཉྫཱིནནཡེཧི ཨལངྐརིཏྭཱ རཱཛཱདྷིརཱཛནཱམཏྠཔྤཀཱསིནིཾ ནཱམ གནྠམྤི ཨཀཱསི.

རཱཛཱ ཧཏྠིསཱལནཱམཀེ དེསེ ཀཱརཱཔིཏགེཧཾ བྷིནྡིཏྭཱ སཏཔྤམཱཎེ ཝིཧཱརེ ཀཱརཱཔེཏྭཱ སབྦེསམྤི ཝིཧཱརཱནཾ ཀིཏྟིཛེཡྻཝཱསཊྛཱཔནནྟི ནཱམཱནི པཉྙཱཔེཏྭཱ ཏསྶེཝ ཐེརསྶ ཨདཱསི. ཝིཧཱརནཱམེནེཝ ཙ ཐེརསྶཱཔི ཏཾསམཉྙཱ ཨཧོསི.

ཏསྨིཉྩ ཀཱལེ ཨཀྱཀརཉྙོ པིཏུརཉྙོ ཙ ཀཱལེ ཏེསཾ ¶ དྭིནྣཾ གཎཱནཾ ཝིཝཱདཝསེན ཨཝིཔྤཀཏཝཙནཾ པུན ཝིཝཱདསྶ ཝཱུཔསམནཏྠཱཡ ཨཏྟནོ ཨཏྟནོ ཝཱདཾ ཀཐཱཔེསི. པཱརུཔནགཎེ སོ ཐེརོ པདྷཱནོ ཧུཏྭཱ ཨེཀཾསིཀགཎེ པན པཱསཾསཏྠེརོ པདྷཱནོ ཧུཏྭཱ ཡཐཱཡུདྡྷཾ ཨཀཱསི. ཨཐ རཱཛཱ ཨཏིཝིཡ རཱཛཝལླབྷཾ ཛེཡྻབྷཱུམིསུཝཎྞཝིཧཱརཝཱསིཏྠེརཾ ཏེསཾ ཝཱདསྶ ཝིནིཙྪིནྡནཏྠཱཡ ཝིནཡཙརེཊྛཱནེ ཋཔེསི.

ཀིཉྩཱཔི སོ པན ཐེརོ པཱལི༹ཨཊྛཀཐཱཊཱིཀཱགནྠནྟརེསུ ཐོཀཾཡེཝ ཛཱནཀཏྟཱ པརིཡཏྟིཀོཝིདེསུ ཨབྦོཧཱརིཀོཡེཝ ཨཧོསི, རཱཛཝལླབྷཏྟཱ པན རཱཛཱ ཡཐཱབྷཱུཏཾ ཨཛཱནིཏྭཱ ཝིནཡདྷརཊྛཱནེ ཋཔེསི. ཡཐཱ པན ཨཡཾ པུརཏྠིམདིསཱ, ཨཡཾ པན པཙྪིམདིསཱབྷི ཨེཝམཱདིནཱ དིསཱཝཝཏྠཱནམཏྟཾཡེཝ ཀཱཏུཾ སམཏྠཾ ནངྒལཀོཊིཡཱ སཾཝཌྜྷནྟཾ པརིསུཾ རཱཛཱགཱརེ དྷམྨཝིནིཙྪཀཱམཔཙྩཊྛཱནེ ཋཔེཏི, ཨེཝམེཝ རཱཛཱ ཨཡཾ ཨཱིདིསོ ཨཡཾ ཨཱིདིསོཏི ཨཛཱནིཏྭཱ ཝིནཡདྷརཊྛཱནེ ཋཔིཏཏྟཱ སོ ཛེཡྻབྷཱུམིསུཝཎྞཝིཧཱརཝཱསིཏྠེརོ ཏེསཾ དྭིནྣཾ པཀྑཱནཾ དྭཱིསུ ཝཱདེསུ ཨཡཾ བྷཱུཏོ ཨཡཾ ཨབྷཱུཏོཏི ཝཏྟུཾ ན སཀྐཱ, ཨདྭཱརགྷརེ པཝིཊྛཀཱལེཝིཡ ཏདཱ ཨཧོསི. སེཡྻཐཱཔི ནཱམ མཧིསོ ཨཏྟནོ སམཱིཔེ ཋཏྭཱ དེཝགཱིཏཾ གཱཡིཏྭཱ དེཝཝཱིཎཾ ཝཱདེནྟསྶ དེཝགནྡྷབྦསྶ ཝེལུ༹སལཱཀཾ པཧརནྟསྶ ཙ གཱམདཱརཀསྶ སདྡེསུ ཀིཉྩི ཝིསེསཾ ན ཛཱནཱཏི, ཨེཝམིདཾ སམྤདཾ དཊྛབྦཾ. ཨཐ རཱཛཱ མམ ཝིཛིཏེ ཡེཡེབྷིཀྑཱུ ཡཾཡཾཨིཙྪནྟི, ཏེཏེབྷིཀྑཱུ ཏཾཏཾཙརིཏྭཱ ཡཐཱཀམྨཾ ནིསཱིདནྟཱུཏི རཱཛལེཁནཾ ཋཔེསི. ཏེསཾ ཝིཝཱདོ ཏདཱ ན ཝཱུཔསམི.

ཨཔརབྷཱགེ ཏེརསཱདྷིཀེ སཏེ སཧསྶེ ཙ སམྤཏྟེ རཏནཔཱུརནགརཾ ཝིནསྶི.

ཏཏོ པཙྪཱ དུཏིཡེ སཾཝཙྪརེ རཏནསིཁནགརམཱཔཀོ རཱཛཱ རཱམཉྙརཊྛིནྡསྶ རཉྙོ སེནཾ ཡཝཁེཏྟཏོ ཙཱཏཀསཀུཎཾཝིཡ ¶ ཨཏྟནོ པུཉྙནུབྷཱཝེན མརམྨརཊྛཏོ ནཱིཧརིཏྭཱ སཀལམྤི རཱམཉྙརཊྛཾ ཨཏྟནོ ཧཏྠགཏཾ ཀཏྭཱ རཛྫཾ ཀཱརེསི.

ཏསྨིཉྩ ཀཱལེ སཀལམརམྨརཊྛཝཱསཱིནཾ ཙིཏྟཾ པསཱདེསི, ཡཐཱ ནཱམ སཱུརིཡཱཏཔེན མིལཱཡནྟཱནཾ ཀུམུདཱནཾ ཨནོཏཏྟོདཀེན སིཉྩིཏྭཱ ཧརིཏཏྟཾ པཱཔེཏི, ཨེཝམེཝ རཱམཉྙརཊྛིནྡསྶ སེནཱབལཱཏཔེཧི དུཀྑཔྤཏྟཱནཾ མརམྨརཊྛཝཱསཱིནཾ གཧཊྛཱནཉྩེཝ བྷིཀྑཱུནཉྩ ཨཏྟནོ པུཉྙཱནོཏཏྟོདཀེན ཚིཉྩིཏྭཱ ཀཱཡིཀཙེཏསིཀཝསེན དུཝིདྷམྤི སུཁཾ ཨུཔྤཱདེསི.

སཀལམརམྨརཊྛཝཱསིནོ ཙ ཨཡཾ ཨམྷཱཀཾ རཱཛཱ བོདྷིསཏྟོཏི ཝོཧཱརིཾསུ. ཨཐ ཨེཀསྨིཾ མཱསེ ཙཏཱུསུ ཨུཔོསཐདིཝསེསུ བྷིཀྑུསངྒྷཾ ནིམནྟེཏྭཱ ཨནྟེཔུརེ པཝེསེཏྭཱ པིཎྜཔཱཏེན བྷོཛེསི. རཱཛོརོདྷཱམཙྩེཧི སདྡྷིཾ ཨུཔོསཐཾ ཨུཔཝསི. སབྦེསམྤི རཱཛོརོདྷཱམཙྩཱནཾ གུཎཏྟཡཔཱཋཾ སཧ ཨཏྠཡོཛནཱནཡེན ཝཱཙགྒཏཾ ཀཱརཱཔེསི.

ཨཐ བེལུཝགཱམཝཱསཱིཡསཏྠེརཾ ཨནེཏྭཱ ཨཏྟནོ ཨཱཙརིཡཊྛཱནེ ཋཔེསི. མཧཱཨཏུལཡསདྷམྨརཱཛགུརཱུཏི ནཱམལཉྪམྤི ཨདཱསི. ཏཏོ པཊྛཱཡ པན ཨཏུལཏྠེརོཏི ནཱམེན པཱཀཊོ ཨཧོསི. ཏསྨིཉྩ ཀཱལེ པཱརུཔནགཎཔཀྑཱཔལིཎགཱམཝཱསཱིསུཛཱཏཏྠེརཱདཡོ སཱམཎེརཱནཾ གཱམཔྤཝེསནཀཱལེ ཙཱིཝརཾ པཱརུཔིཏྭཱ པཝིསིཏབྦནྟི ཨཀྑརཾ ལིཁིཏྭཱ རཉྙོ སནྟིཀཾ སནྡེསཔཎྞཾ པཝེསེཏི.

ཨཐ ཨེཀཾསིཀགཎཔཀྑཱཔི ཨཏུལཏྠེརཱདཡོ པུབྦེསཾ རཱཛཱུནཾ ཀཱལེ ཨདྷིཀརཎཾ ཝཱུཔསམི, ཨིདཱནི ཝཱུཔསམིཏཀམྨཾ པུན ན ཨུཔྤཱདེཏབྦནྟི ལེཁནཾ ལིཁིཏྭཱ རཉྙོ སནྟིཀཾ པེསེསི.

ཨཐ རཱཛཱ དྭིནྣཾ པཀྑཱནཾ སཀསཀཝཱདཾ ཀཐེཏུཀཱམོཔི ¶ ཨིདཱནི རཱཛཔྤཊིསཾཡུཏྟཾ ཀམྨཾ བཧུ ཨཏྠི, ཏིཊྛསུ ཏཱཝ སཱསནཔྤཊིསཾཡུཏྟཾ ཀམྨཾ, རཱཛཔྤཊིསཾཡུཏྟམེཝ ཀམྨཾ པཋམཾ ཨཱརབྷིསྶཱམི, པཙྪཱ སཱསནཔྤཊིསཾཡུཏྟཾ ཀམྨཾ ཀརིསྶཱམཱིཏི རཱཛལེཁནཾ ཋཔེསི. ཨཔརབྷཱགེ པན རཱཛཱ ཨེཝཾ ཨཱཎཾ ཋཔེསི,-ཨིདཱནི མམ ཝིཛིཏེ སབྦེཔི བྷིཀྑཱུ མམ ཨཱཙརིཡསྶ མཏིཾ ཨནུཝཏྟིཏྭཱ ཙརནྟཱུཏི.

ཨཐ པཱརུཔནགཎབྷིཀྑཱུཔི ཨེཀཾསིཀགཎཾ ཨནུཝཏྟེསུཾ རཉྙོ ཨཱཎཱཝསེན. སཧསྶོརོདྷགཱམེ པན དྭེ མཧཱཐེརཱ ཨཏྟནོ པརིསཾ པཱརུཔནཝསེནེཝ གཱམཔྤཝེསནཝཏྟཾ པརིཔཱུརིཏབྦནྟི ཨོཝདིཏྭཱ ནིསཱིདིཾསུ.

ཏདཱ རཉྙོ ཨཱཙརིཡོ ཡསཏྠེརོ ཏམཏྠཾ སུཏྭཱཏེ པཀྐོསཱཔེསི. ཏེ ཙ ཨཱགནྟྭཱ ནགརཾ སམྤཏྟཀཱལེ ཨེཀོ ཨུཔཱསཀོ པསནྣོ ཧུཏྭཱ ཏེསཾ ཐེརཱནཾ པིཎྜཔཱཏེན ཨུཔཊྛཧི. ཨཐ ཨཏུལཏྠེརོ ཏེ མཧཱཐེརེ དཱུརཊྛཱནཏོ ཝཱལུཀཾ ཨཱནེཏྭཱ ཏསྶ ཨུཔཱསཀསྶ གེཧསམཱིཔེ ཨོཀིརཱཔེསི. ཨིདཾ ཝིནཡདྷམྨསྶ ཨནནུལོམཝསེན ཙརནྟཱནཾ དཎྜཀམྨནྟི ཀོལཱཧལམྤི ཨུཔྤཱདེསི. ཨཐ ཏེསཾ ཝཱལུཀཾ ཨཱཧརནྟཱནཾཡེཝ ཨཉྙམཉྙཾ སལླཔེསུཾ,-ཨིདཱནི བྷནྟེ ཝིནཡདྷམྨཱནུལོམཝསེན ཨཱཙརནྟཱནཾ ཨམྷཱཀཾ ཨཱིདིསཾ ཀམྨཾ ཨསཱརུཔྤཾ, ཨཧོ ཨཙྪརིཡདྷམྨོ ལོཀོཏི ཨེཀོ ཐེརོ ཨཱཧ. ཨཐ པན ཨེཀོ ཐེརོ ཨེཝམཱཧ,-ཨིདཱནི ཨཱཝུསོ ལོཀཔཱལཱ དེཝཱ ཨཱིདིསཾ ཨདྷམྨཀམྨཾ དིསྭཱཡེཝ ཨཛ྄ཛྷུཔེཀྑིཏྭཱ ཨཔྤོསྶུཀཱ ནིསཱིདིཏུཾ ན སཀྐཱ, ཨིདཱནི ལོཀཔཱལཱ དེཝཱ པམཛྫིཏྭཱ ནིསཱིདནྟི མཉྙེཏི.

ཏསྨིཾཡེཝ ཁཎེ ཝེགེན མེགྷོ ཨུཊྛཧིཏྭཱ ཨཏུལཏྠེརསྶ ཝིཧཱརེ རཱཛགེཧེ ཙ ཨེཀཀྑཎེ ཨསནིཡོ ནིཔཏིཾསུ. ཨེཝཾ སམཱནོཔི སོ ཐེརོ ཨཏིམཱནཐདྡྷཏཱཡ སཏིཾ ན ལབྷི.

པུན ¶ རཱཛཱ ཨིདཱནི མམ ཝིཛིཏེ སབྦེཔི བྷིཀྑཱུ མམ ཨཱཙརིཡསྶ མཏིཾ ཨནུཝཏྟནྟི ཝཱ མཱ ཝཱཏི ཨམཙྩེ པུཙྪི. ཨམཙྩཱཔི ཨེཝཾ རཉྙོ ཨཱརོཙེསུཾ,-ཨིདཱནི མཧཱརཱཛ ཀུཁནནགརེ ནཱིཔགཱམེ ནིསིནྣོ ཨེཀོ མཧཱཐེརོ མུནིནྡགྷོསོ ནཱམ ཨཏྠི, སོ པཱརུཔནཝསེན ཨཏྟནོ པརིསཾ ཨོཝཱདེཏྭཱ བཧུགུཎཾ ཨུཔྤཱདེཏྭཱ ནིསཱིདཏཱིཏི.

ཨཐ རཱཛཱ ཨེཝམཱཧ,-ཏཾ པཀྐོསེཏྭཱ སུདྷམྨསསཱཡཾ མཧཱཐེརེ སནྣིཔཱབྷཱཔེཏྭཱ ཏསྶ ཐེརསྶ ཝིནཡ པཎྞཏྟིཾ ཡཐཱབྷཱུཏཾ ཨཛཱནནྟསྶ ཡཐཱབྷཱུཏཾ སབྷཱཝཾ དསྶེཏྭཱ ཨོཝཱདེནྟཱུཏི.

ཨཐ ཨམཙྩཱ ཏཐཱ ཨཀཾསུ. མཧཱཐེརཱ ཙ སུདྷམྨསསྶཡཾ སནྣིཔཏིཏྭཱ ཏཾ པཀྐོསེཏྭཱ ཨོཝདིཾསུ. ཏེསུ པན མཧཱཐེརེསུ ཨེཀོ ཐེརོ བྷཱུཔཱལསྶ སངྒྷརཉྙོ ཙ མུཁཾ ཨོལོཀེཏྭཱ བྷགཝཏོ པན སམྨཱསམྦུདྡྷསྶ མུཁཾ ཨནོལོཀེཏྭཱ མུནིནྡགྷོསཏྠེརཾ ཨེཝམཱཧ,- ཨིདཱནི ཨཱཝུསོ ཨིམསྨིཾ མརམྨརཊྛེ སབྦེཔི བྷིཀྑཱུ བྷཱུཔཱལསྶ སངྒྷསྶ རཉྙོ ཙ ཨཱཎཾ ཨནུཝཏྟིཏྭཱ ཨེཀཾསིཀཱཡེཝ ཨཧེསུཾ, ཏྭཾཡེཝ ཨེཀོ སདྡྷིཾ པརིསཱཡ པཱརུཔནཝཏྠཾ ཙརིཏྭཱ ནིསཱིདསི, ཀསྨཱ པན ཏྭཾ མཱནཐདྡྷོ ཧུཏྭཱ ཨཱིདིསཾ ཨནཱཙཱརཾ ཨཝིཛཧིཏྭཱ ཏིཊྛསཱིཏི.

ཨཐ མུནིནྡགྷོསཏྠེརོ ཏསྶ ཐེརསྶ མུཁཾ ཨུཛུཀཾ ཨོལོཀེཏྭཱ ཨེཝམཱཧ,- ཏྭཾ ལཛྫཱིཔེསལོ སིཀྑཱཀཱམོཏི པུབྦེ མཡཱ སུཏཔུབྦོ, ཨཱིདིསོ པན པུགྒལོ ཨཱིདིསཾ ཝཙནཾ ཝཏྟུནཾ ཡུཏྟོ,ཨཱིདིསསྶ ཧི པུགྒལསྶ ཨཱིདིསཾ ཝཙནཾ ཨསྶཱརུཔྤཾ, སཙེ ཏྭཾ ཨཡཾ ཨཔྤཔུཉྙོ ནིཏྟེཛོ ཨནཱཐོཏི མཾ མཉྙིཏྭཱ ཨགཱརཝཝསེན ཝཏྟུཾ ཨིཙྪེཡྻཱསི, ཨེཝཾ སནྟེཔི མམཱཙརིཡསྶ མུཁཾ ཨོལོཀེཏྭཱ མམཱཙརིཡསྶ གུཎཾ ཛཱནིཏྭཱ ཏསྶ སིསྶོཡནྟི ཨནུསྶརིཏྭཱ ཨཱིདིསཾ ཝཙནཾ ཨདྷམྨིཀཾ ཝཏྟུཾ ན སཀྐཱཏི.

ཨཐ ¶ སོ ཐེརོ ཏཾ པུཙྪི,-ཀོ པན ཏཝཱཙརིཡོཏི. ཨཐ སུཁམྨསབྷཱཡཾ ཋཔིཏཾ བུདྡྷརཱུཔཾ ཝདྡིཏྭཱ ཨཡཾ མམཱཙརིཡོཏི ཨཱཧ. མམཱསརིཡོཏི ཝཏྭཱ པན བྷིཀྑུསངྒྷམཛ྄ཛྷེ ཨུཊྛཧིཏྭཱ ཨེཀཾསཾ ཨུཏྟརཱསངྒཾ ཀཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཨཧཾ བྷནྟེ ཡཱཝ ཛཱིཝིཏཔརིཡོསཱནཱ མམ ཛཱིཝིཏཾཡེཝ པརིཙྩཛིསྶཱམི, བྷགཝཏོ པནཏི ལོཀགྒསྶ སིཀྑཱཔདཾ ན ཝིཛཧིསྶཱམཱིཏི ཨཱརོཙེསི.

ཨཐ རཱཛཱ ཏམཏྠཾ སུཏྭཱ མཱནཐདྡྷོ ཨེསོ མམ ཝིཛིཏེ ནིསཱིདཱཔེཏུཾ ཝཊྚཏི, རཊྛནྟརཾ པབྦཱཛེཏབྦོཏི རཱཛཱཎཱཡ རཊྛནྟརཾ པེསེསི.

རཱཛཔུརིསཱ ཙ ཏཾ པཀྐོསེཏྭཱ རཊྛནྟརཾ ཨཱནེསི. བཧངྒཾ ནཱམ དེསཾ པཏྭཱ བཧངྒནཱཡཀོ པུརིསོ རཱཛཔུརིསཱནཾ ལཉྫཾ དཏྭཱ ཨེཝམཱཧ,- ཨཡཾ པན བྷོནྟོ མརམྨརཊྛསྶ པརིཡནྟཔྤདེསོ, ཨིདྷེཝ ཋཔེཏྭཱ ཏུམྷེ ནིཝཏྟཐཱཏི.

རཱཛ པུརིསཱཔི ལཉྫཾ གཧེཏྭཱ ཏཏྠེཝ ཋཔེཏྭཱ ནིཝཏྟིཾསུ. ཐེརོཔི ཙཏཱུཧི དིསཱཧི ཨཱགཏཱནཾ བྷིཀྑུསཱམཎེརཱནཾ པཱརུཔནཝསེན ཨོཝཱདཾ དཏྭཱ པརིཡཏྟིཾ ཝཱཙེཏྭཱ ཏཏྠ ནིསཱིདི. ཨབྷིདྷམྨཏྠསངྒཧགནྠསྶ ཨཏྠཡོཛནམྤི མརམྨབྷཱསཱཡ ཨཀཱསི.

ཨཔརབྷཱགེ རཱཛཱ ཏམཏྠཾ སུཏྭཱ ཨིདཱནི སོ ཐེརོ མམ ཝིཛིཏཔརིཡནྟེཡེཝ ནིསཱིདིཏྭཱ ཨམྷེཧི ཨནིཙྪིཏཾ ནིཝཱརིཏཾ ཀམྨཾ ཀཏྭཱ ནིསཱིདི, ཏཾ པཀྐོསཐཱཏི ཨཱཧ.

རཱཛདཱུཏཱ ཙ ཏཏྠ གནྟྭཱ པཀྐོསིཾསུ. ཐེརོ ཙ ཨིདཱནི མཾ རཱཛཱ མཱརེཏུཀཱམོཏི མཉྙིཏྭཱ སིཀྑཾ པཙྩཀྑིཏྭཱ གིཧིཝཏྠཾ ནིཝཱསེཏྭཱ ཏེཧི སདྡྷིཾ ཨཱགཙྪི. ནགརཾ པན ཨཱགནྟྭཱ པཏྟཀཱལེ རཉྙོ སནྟིཀཾ ཨཱནེསི.

ཨཐ རཱཛཱ ཨེཝམཱཧ,-ཏྭཾ བྷིཀྑུ ཧུཏྭཱ གཎཾ ཝཌྜྷཱཔེཏྭཱ ནིསཱིདསཱིཏི མཡཱ སུཏཾ, ཀསྨཱ པནིདཱནི གིཧི བྷཝསཱིཏི. སཙེ ¶ ཏྭཾ མཧཱརཱཛ མཾ མཱརེཏུཀཱམོ པཀྐོསེཡྻཱསི, ཨེཝཾ སཏི ཡདི སིཀྑཾ ཨཔྤཙྩཀྑཱཡ ཋིཏཾ མཾ མཱརེཡྻཱསི, ཏཝ བྷཱརིཡཾ ཀམྨཾ བྷཝིསྶཏཱིཏི མནསིཀརིཏྭཱ ཏཝ ཀམྨསྶ ཨབྷཱརིཡཏྠཱཡ སིཀྑཾ པཙྩཀྑིཏྭཱ ཨཱགཏོམྷི, སཙེ མཾ མཱརེཏུཀཱམོསི, མཱརེཧཱིཧི. རཱཛཱ ཙ ཏཾ བནྡྷནཱགཱརེ ཋཔེཏྭཱ སྱཱམརཊྛཾ ཡུཛ྄ཛྷནཏྠཱཡགཙྪི. ཡཛ྄ཛྷནཏྠཱཡ པན གནྟྭཱ པཙྩཱགཏཀཱལེ ཨནྟརཱམགྒེཝ དིཝངྒཏོ ཨཧོསཱིཏི.

ཀལིཡུགེ པན དྭཱཝཱིསཱདྷིཀེ ཝསྶསཏེ སཧསྶེ ཙ སམྤཏྟེ ཏསྶ ཛེཊྛཔུཏྟོ སིརིཔཝརམཧཱདྷམྨརཱཛཱ ནཱམ རཛྫཾ ཀཱརེསི. རཏནསིཁནགརཏོ སངྐམེཏྭཱ ཛེཡྻཔུརཾ དུཏིཡཾ མཱཔིཏཏྟཱ ཛེཡྻཔུརམཱཔེཀོ རཱཛཱཏིཔི ཏསྶ སམཉྙཱ ཨཧོསི. ཏསྨིཉྩ ཀཱལེ མཧཱཔབྦཏབྦྷནྟརནགརཝཱསིཾ ཉཱཎཏྠེརཾ ཨཱནེཏྭཱ ཨཱཙརིཡཊྛཱནེ ཋཔེསི. སོཀིར ཐེརོ གམྦྷཱིརཔཉྙོ ཨེཀསྨིཾ དིཝསེ ནཝ ཝཱ དས ཝཱ བྷཱཎཝཱརེ ཝཱཙུགྒཏཾ ཀཱཏུཾ སམཏྠོ ཨཧོསི. ཨབྷིནཝོཔསམྤནྣཀཱལེཡེཝ པདཝིབྷཱགགནྠཾ ནྱཱསསཾ ཝཎྞནཾ ཡམཀསཾཝཎྞནཾ མཧཱཔཊྛཱནསཾཝཎྞནཉྩ མརམྨབྷཱསཱཡ ཨཀཱསི. རཱཛཱ མཧཱབྷཱུམིརམྨཎིཡཝིཧཱརཾ ནཱམ ཀཱརཱཔེཏྭཱ ཏསྶེཝ ཨདཱསི. ཉཱཎཱལངྐཱརམཧཱདྷམྨརཱཛགུརཱུ ཏིཔི ནཱམལཉྪཾ ཨདཱསི.

ཏསྨིཉྩ ཀཱལེ པཱརུཔནགཎེ ཐེརཱ ཨེཝཾ ཙིནྟེསུཾ,- ཨིདཱནི པན ཨམྷཱཀཾ པཀྑིཀོ ཐེརོ རཉྙོ ཨཱཙརིཡོ ཨཧོསི, ཨིདཱནི མཡཾ པཏིཊྛཱནཾ ལབྷཱམཱཏི. ཨེཝཾ པན ཙིནྟེཏྭཱ སཱམཎེརཱནཾ གཱམཔྤཝེསནཀཱལེ ཙཱིཝརཾ པཱརུཔེཏྭཱ པཝིསིཏབྦནྟི སནྡེསཔཎྞཾ རཉྙོ སནྟིཀཾ པཝེསེསི. ཨཐ ཨཏུལཏྠེརོ པུབྦེ ཝུཏྟནཡེན ཝཱུཔསམིཏཾ ཀམྨམིདནྟི སནྡེསཔཎྞཾ རཉྙོ སནྟིཀཾ པཝེསེསི. ཏེནེཝ ཨཉྙམཉྙཾ པཊིཝཙནཝསེན དསྶེཏུཾ ཨོཀཱསཾ ན ལབྷིཾསཱུཏི.

ཏཏོ པཙྪཱ ཀལིཡུགེ པཉྩཝཱིསཝསྶཱདྷིཀེ སཏེ སཧསྶེ ¶ ཙ སམྤཏྟེ ཏསྶ རཉྙོ སིརིཔཝརསུདྷམྨམཧཱརཱཛིནྡཱདྷིཔཏི ནཱམ རཛྫཾ ཀཱརེསི. རཏནཔཱུརཾ པན ཏཏིཡཾ མཱཔཀཏྟཱ རཏནཔཱུརམཱཔཀོཏི ཨེཀསྶ པན ཚདྡནྟནཱགརཱཛསྶ སཱམིབྷཱུཏཏྟཱ སེཏིབྷིནྡོཏི ཙ སམཉྙཱ ཨཧོསི. ཙརཙྩ གཱམཝཱསཱིཙནྡཱཝརཾ ནཱམ ཐེརཾ ཨཱནེཏྭཱ ཨཏྟནོ ཨཱཙརིཡཊྛཱནེ ཋཔེསི. སཱུམིཀིཏྟིཨཏུལཾ ནཱམ ཝིཧཱརཾ ཀཱརཱཔེཏྭཱ ཏསྶ ཨདཱསི. ཛམྦུདཱིཔཨནནྟདྷཛམཧཱདྷམྨརཱཛགུརཱུཏིཔི ནཱམལཉྪཾ ཨདཱསི. ཏསྶ རཉྙོ ཀཱལེ ཨེཀཙྩེ མནུསྶཱ དིཊྛིཝིཔལླཱསཱ ཨཧེསུཾ, ཏེཔི པཀྐོསཱཔེཏྭཱ སམྨཱདིཊྛིཾ གཎྷཱཔེསི. ཏསྶ པན རཉྙོ ཀཱལེ ཨེཀཾསིཀགཎཾ ཨབྷིབྷཝིཏུཾ ཨོཀཱསཾ ན ལབྷིཾསཱུཏི.

ཏཏོ པཙྪཱ ཀལིཡུགེ ཨཊྛཏིཾསཱདྷིཀེ ཝསྶསཏེ སཧསྶེ ཙ སམྤཏྟེ ཏསྶ རཉྙོ པུཏྟོ མཧཱདྷམྨེ རཱཛཱདྷིརཱཛཱ ནཱམ རཛྫཾ ཀཱརེསི. ནགརསྶ དཀྑིཎདིསཱབྷཱགེ པཉྩབྷཱུམིཀཝིཧཱརཾ ཀཱརཱཔེཏྭཱ ཛེཡྻབྷཱུམིཝཱསཱཏུལནཱམེན པཉྙཱཔེཏྭཱ མཱརཱཝཊྚནསྶ ནཱམ ཐེརསྶ ཨདཱསི. གུཎམུནིནྡཱབྷིསཱསནདྷཛམཧཱདྷམྨརཱཛཱདྷིརཱཛགུརཱུཏིཔི ནཱམལཉྪཾ ཨདཱསི.

ཏསྨིཉྩ ཀཱལེ ནནྡམཱལོ ནཱམ ཐེརོ ཙལངྒནགརསྶ པུརཏྠིམདིསཱབྷཱགེ ཝིཧཱརེ ནིསཱིདིཏྭཱ བཧཱུནཾ བྷིཀྑུསཱམཎེརཱནཾ གནྠཾ ཝཱཙེསི. སཱམཎེརཱནཾ གཱམཔྤཝེསནཀཱལེ པཱརུཔནཝཏྟམེཝ པརིཔཱུརེཏྭཱ པཝིསིཏབྦཾ, ཨེཀཾསིཀཝཏྟཾ པན ནེཝ པཱལི༹ཡཾ ན ཨཊྛཀཐཱཡཾ ན ཙ ཊཱིཀཱསུ ནཱཔི གནྠནྟརེསུ དིསྶཏི, ན དྷམྨཱནུལོམནྟི ཨོཝཱདཾ ཨབྷིཎྷཾ ཨདཱསི. པཱལི༹ཨཊྛཀཐཱདཱིསུ ཨཱགཏཝིནིཙྪཡཾ དསྶེཏྭཱ ཨེཀམྤིགནྠཾ ཨཀཱསི.

ཨཐ ཨེཀཾསིཀགཎིཀཱ བྷིཀྑཱུ ཏཾ གནྠཾ རཉྙོ སནྟིཀཾ པཝེསིཾསུ དོསཱཝིཀརཎཏྠཱཡ. ཏསྨིཉྩ ཀཱལེ རཱཛཱ ཨེཝརཱུཔཾ སུཔིནཾ པསྶི, -སཀྐོ ཧི དེཝརཱཛཱ སེཏཝཏྠཾ ནིཝཱསེཏྭཱ ¶ སེཏཱལངྐཱརེཧི ཨལངྐརིཏྭཱ སེཏཀུསུམཱནི པིལནྡིཏྭཱ རཉྙོ སནྟིཀཾ ཨཱགནྟྭཱ ཨེཝམཱཧ,- ཨཔརནྟརཊྛེཧི མཧཱརཱཛ ནམྤདཱནདཱིཏཱིརེ པཱདཙེཏིཡེ བཧཱུནི ཏིཎཱནི ཨུཊྛཧིཏྭཱ ཨཉྙམཉྙཾ མཱུལེན མཱུལཾ ཁནྡྷེན ཁནྡྷཾ པཏྟེན པཏྟཾ སམྤནྡྷིཏྭཱ པཊིཙྪཱདེཏྭཱ ཋིཏཱནི, ཏཱནི པན པུབྦརཱཛཱུཧི ཡཐཱབྷཱུཏཾ ཨཛཱནནྟེཧི ཨཝིསོདྷིཏཱནི, ཨིདཱནི པན ཏཡཱ ཡཐཱབྷཱུཏཾ ཛཱནནྟེན པརིསུདྡྷཾ ཀཏྟུཀཱམེན ཝིསོདྷིཏབྦཱནི, ཏཏྠཙ ཨེཀོ བྷིཀྑུ ཨཱགནྟྭཱ ཨུཔདེསནཡཾ དསྶཏཱིཏི.

ཨེཝཾ པན སུཔིནཾ པསྶིཏྭཱ ནནྡམཱལཾ ནཱམ ཐེརཾ པཀྐོསཱཔེཏྭཱ རཏནཔཱུརནགརསྶ ཨེསནྣཊྛཱནེ ཨུདཀཀཱིལ༹ནཏྠཱཡ ཀཱརཱཔིཏེ རཱཛགེཧེ ཝསཱཔེསི.

ཨཐ ཐེརོ སཱམཎེརཱནཾ གཱམཔྤཝེསནཀཱལེ པཱརུཔནཝསེན པཝིསིཏབྦནྟི པཱལི༹ཨཊྛཀཐཱཊཱིཀཱགནྠནྟརེཧི རཱཛཱནཾ ཛཱནཱཔེསི, ཡཐཱ མཧཱམོགྒལིཔུཏྟཏིསྶཏྠེརོ སིརིདྷམྨཱསོཀརཱཛཱནཾ སམྨཱཝཱདནྟི. ཨཐ རཱཛཱ པརིཙིཏ པཱརམཱིཔུཉྙསམྦྷཱརོ མཧཱཉཱཎོ ཛཱནཱསི,-པཱརུཔནཝཱདོཡེཝ པཱལི༹ཨཊྛཀཐཱཊཱིཀཱགནྠནྟརེསུ ཨཱགཏོ, ཨེཀཾསིཀཝཱདོ པན ཏེསུ ཀཏྠཙིཔི ན ཨཱགཏོཏི. ཨེཝཾ པན ཛཱནིཏྭཱ རཉྙོ གེཧེ དྭེ པཀྑེ ཐེརེ སནྣིཔཱཏཱཔེཏྭཱ ཨཏྟནོ ཨཏྟནོ ཝཱདཾ ཀཐཱཔེསི.

ཨཐ ཨེཀཾསིཀཏྠེརོ ཨེཝམཱཧཾསུ,-ཏུམྷཱཀཾ པཱརུཔནཝཱདོ ཀཏྠ ཨཱགཏོཏི. ཏདཱ པཱརུཔནཏྠེརཱ པརིམཎྜལཾ པཱརུཔིསྶཱམཱིཏིཨཱདིནཱ ནཡེན པཱལི༹ཨཊྛཀཐཱཊཱིཀཱགནྠནྟརེསུ པཱརུཔནཝཱདོ ཨཱགཏོཏི ཨཱཧཾསུ. ཏཏོ པཙྪཱ པཱརུཔནཏྠེརཱ ཨེཝམཱཧཾསུ,-ཏུམྷཱཀཾ པན ཨེཀཾསིཀཝཱདོ ཀཏྠ ཨཱགཏོཏི. ཏདཱ ཏེ ཨེཀཾསིཀཏྠེརཱ ཨདྭཱརགྷརཾ པཝིཊྛཀཱལོཝིཡ རཏྟིབྷཱགེ མཧཱཝནམགྒེ གམནཀཱལོཝིཡ ཙ ཧུཏྭཱ ཀིཉྩི ཝཏྟུཾ ན སཀྐཱ. མུཁཾ ནཱམ ཀཐནཏྠཱཡ བྷུཉྫནཏྠཱཡ ཧོཏཱིཏི ¶ ཝུཏྟཏྟཱ ཡཾ ཝཱ ཏཾ ཝཱ ཝདནྟཱཔི རཱཛཱནཾ ཨཱརཱདྷེཏུཾ ན སཀྑིཾསུ.

རཱཛཱ ཙ ཐེརཾ ནིསྶཱཡ ཝིནཡེ ཀོསལླཏཱཡ པཱལི༹ཡཾ ཨཱིདིསོཡེཝ ཨཱགཏོ, ཨཊྛཀཐཱདཱིསུ ཨཱིདིསོཡེཝཱཏི ཝཏྭཱ ཏུམྷཱཀཾ ཨེཀཾསིཀཝཱདོ པཱལི༹ཨཊྛཀཐཱཊཱིཀཱགནྠནྟརེསུ ན དིསྶཏི, ཨེཝམྤི སམཱནཱ ཀསྨཱ ཨཱིདིསཾ ཝཏྟཾ ཨཀཾསཱུཏི པུཙྪི. ཨཐ ཏེ ཨེཀཾསིཀཏྠེརཱ ཙཏུཧཏྠགབྦྷེ སཧོཌྜེན གཧིཏཙོརཱཝིཡ མནུསྶེཧི གཏིཏཀཱཀཱཝིཡ ཙ ཀིཉྩི ཝཏྟུཾ ཨསཀྐུཎེཡྻཏཱཡ སབྦདིསཱསུ ཨོལོཀེཏྭཱཡེཝ ཨམྷཱཀཾ ཙཱརིཏྟཾ པཱལི༹ཨཱདཱིསུ ན དིཊྛཔུབྦཾ, ཨཐ ཁོ པན ཨཱཙརིཡཔྤཝེཎཱིཝསེནེཝ ཙརིམྷཱཏི ཝཏྭཱ པརཱཛཡཾ པཏྭཱ པཱརུཔནཔཀྑེཡེཝ པཝིསིཾསཱུཏི. རཱཛཱ ཙ ཨིཏོ པཊྛཱཡ བྷིཀྑཱུ པཱརུཔནཝཏྟམེཝ ཀཱརཱཔེཏུཾ སཱམཎེརཱནཾ ཨོཝདནྟཱུཏི རཱཛཱཎཾ ཋཔེསི. ཏཏོ པཊྛཱཡ ཨེཀཾསིཀཔཀྑཱཐེརཱ ཨརུཎུགྒམནཀཱལེ ཀོསིཡཱཝིཡ སཱིསཾ ཨུཊྛཧིཏུམྤི ན སཀྐཱཏི.

སོཀསརབྷཱུམཧཱཙེཏིཡསྶ པུརཏྠིམདིསཱབྷཱགེ དྭཱིཧི པཱསཱདེཧི ཨལངྐཏཾ ཙཏུབྷཱུམིཀཾ བྷཱུམིཀིཏྟིཝིརཱམཾ ནཱམ ཝིཧཱརཾ ཀཱརཱཔེཏྭཱ ནནྡམཱལཏྠེརསྶ ཨདཱསི, ནརིནྡཱབྷིདྷཛམཧཱདྷམྨརཱཛཱདྷིརཱཛགུརཱུཏི ནཱམལཉྪམྤི ཨདཱསི. སོ པན ཐེརོ ཚཔྤདཝཾསིཀོཏི དཊྛབྦོ. ཨབྷིནཝོཔསམྤནྣཀཱལེཡེཝ ཝིནཡཝིནིཙྪཡསྶ སུཏྟསངྒཧསྶ མཧཱཝགྒཊྛཀཐཱཡ ཙ ཨཏྠཡོཛནཾ མརམྨབྷཱསཱཡ ཨཀཱསི, སཱསནསུདྡྷིདཱིཔིཀཾ ནཱམ གནྠམྤི ཨཀཱསཱིཏི.

ཏཏོ པཙྪཱ ཀལིཡུགེ ཏེཙཏྟཱལཱིསཱདྷིཀེ ཝསྶསཏེ སཧསྶེ ཙ སམྤཏྟེ ཕགྒུནམཱསསྶ ཀཱལ༹པཀྑཔནྣ རསམིཡཾ རཏནསིཁམཱཔཀསྶ རཉྙོ མཛ྄ཛྷིམཔུཏྟོ རཛྫཾ ཀཱརེསི ¶ .

ཏདཱ རཱཛཱ ཨེཝཾ ཙིནྟེསི,-ཨེཀཾསིཀཔཱརུཔནཝསེན ཨུཔྤནྣོ ཝིཝཱདོ པུབྦེསཾ རཱཛཱུནཾ ཀཱལེ ཝཱུཔསམིཏུཾ ན སཀྐཱ, སིརིཔཝརསུདྷམྨམཧཱརཱཛིནྡཱདྷིཔཏིནོ ཀཱལེཔི རཱཛགེཧེ སནྣིཔཱཏཱཔེཏྭཱ རཉྙོ སམྨུཁེ ཀཐཱཔིཏཏྟཱ ཝིསྶཊྛེན ཀཐེཏུཾ ཨོཀཱསསྶ ཨལདྡྷཏྟཱ ཡཐཱཀཱམཾ ཝཏྟུཾ ཨཝིསཧཏྟཱ པརཱཛཡོ ཨཧོསཱིཏི ལེསཾ ཨོཌྜཏུཾ ཨོཀཱསོ བྷཝེཡྻམཡ྄ཧཾ པན ཀཱལེ ཨཱིདིསཾ ཨཀཏྭཱ ཏེསཾ ཏེསཾ ཐེརཱནཾ ཝིཧཱརེ དཱུཏཾ པེསེཏྭཱ སཀསཀཝཱདཾ ཀཐཱ པེསྶཱམི, ཨེཝཉྷི སཏི ཏེཏེཐེརཱ ཝིསྶཊྛཱ ཧུཏྭཱ ཀཐེསྶནྟཱིཏི.

ཨེཝཾ པན ཙིནྟེཏྭཱ ཨནྟོཡུདྷནཱཡཀཾ ཨམཙྩཾ པདྷཱནཾ ཀཏྭཱ ཏེསཾ ཏེསཾ ཐེརཱནཾ སནྟིཀཾ གནྟྭཱ ཨཱརོཙཱཔེསི,-སཀསཀཝཱདཾ ཝིསྶཊྛཱ ཧུཏྭཱ ཝདཐཱཏི. ཨཐ ཨེཀཾསིཀགཎིཀཱ ཐེརཱ ཨམྷེཧི ཝུཏྟཝཙནཾ པཱལི༹ཨཱདཱིསུ ན དིསྶཏི, ཨཐ ཁོ པན ཨཱཙརིཡཔྤཝེཎཱིཝསེནེཝ མཡཾ ཙརིམྷཱཏི ཨནུཛཱནིཾསུ.

མཧཱརཱཛཱ ཙ ཨེཝཾ ཐེརཱནཾ ཨནུཛཱནནེ སཏི ཀིཉྩི ཀཏྟབྦཾ ནཏྠི, ཨིདཱནི པརིམཎྜལསུཔྤཊིཙྪནྣསིཀྑཱཔདཱནི ཨཝིཀོཔེཏྭཱ སཱམཎེརཱ གཱམཾ པཝིསནྟཱུཏི རཱཛལེཁནཾ ཏཏྠ ཏཏྠ པེསེསི.

ཨཔརབྷཱགེ པན སཧསྶོརོདྷགཱམཏོ ཨུཔསམྤདཱ ཝསྶེན སཏྟཝསྶིཀཾ ཉཱཎཾ ནཱམ བྷིཀྑུཾ ཨཱནེཏྭཱ ཨནྟོཡུདྷཝིཧཱརཾ ནཱམ ཀཱརཱཔེཏྭཱ ཏསྶ ཨདཱསི, ཉཱཎཱབྷིསཱསནདྷཛམཧཱདྷམྨརཱཛགུརཱུཏི ནཱམལཉྪམྤི ཨདཱསི. ཨཐ རཉྙཱ ཡཱཙིཏོ རཱཛཱབྷིསེཀགནྠཾ པརིསོདྷེཏྭཱ མརམྨབྷཱསཱཡ ཨཏྠཾ ཡོཛེསི.

ཨཔརབྷཱགེ བྷགཝཱ དྷརམཱནོཡེཝ ཨཱགནྟྭཱ ཙཏུནྣཾ ཡཀྑཱནཾ དམེཏྭཱ ཏེཧི དིནྣཾ མཾསོདནཾ པཊིགྒཧེཏྭཱ པབྦཏསཱམནྟདེསཾ ¶ གནྟྭཱ པརིབྷུཉྫིཏྭཱ ཏཾ ཋཱནཾ ཨོལོཀེཏྭཱ སིཏཾ པཱཏྭཱཀཱསི. ཨཐ ཨཱནནྡཏྠེརོ ཀཱརཎཾ པུཙྪི. ཨནཱགཏེ ཁོ ཨཱནནྡ ཨིམསྨིཾ དེསེ མཧཱནགརཾ བྷཝིསྶཏི, ཙཏྟཱརོ ཙ ཨིམེ ཡཀྑཱ ཏསྨིཾ ནགརེ རཱཛཱནོ བྷཝིསྶནྟཱིཏི བྱཱཀཱསི.

ཡཐཱབྱཱཀཏནིཡཱམེནེཝ ཀལིཡུགེ ཙཏུཙཏྟཱལཱིསཱདྷིཀེ ཝསྶསཏེ སཧསྶེ ཙ སམྤཏྟེ མཱགྷམཱསསྶ ཀཱལ༹པཀྑདྭཱདསམིཡཾ ཨངྒཱརཝཱརེ ཨུཏྟརཕགྒུནཱིནཀྑཏྟེན ཡོགེ ཨམརཔུརཾ ནཱམ མཧཱརཱཛཊྛཱནཱིནགརཾ མཱཔེསི.

སིརིཔརཝིཛཡཱནནྟཡསཏྲིབྷཝནཱདིཏྱཱདྷིཔཏིཔཎྜིཏམཧཱདྷམྨརཱཛཱདྷིརཱཛཱཏི ནཱམལཉྪམྤི པཊིགྒཎྷི.

ཨགྒམཧེསིཡཱ ཀཱརཱཔིཏཾ ཛེཡྻབྷཱུམིཝིཧཱརཀིཏྟིནཱམཀཾ ཝིཧཱརཾ གུཎཱབྷིལངྐཱརསདྡྷམྨམཧཱདྷམྨརཱཛཱདྷིརཱཛགུརུཏྠེརསྶ ཨདཱསི, ཡོ ‘མེ ཨོ སཡཱཌོ’ ཨིཏི ཝུཙྩཏི.

ཀནྣཱིནགརབྷོཛཀཱཡ རཱཛཀཉྙཱཡ ཀཱརཱཔིཏཾ ཝིཧཱརརམཎཱིཡཝིརཱམཾ ནཱམ ཝིཧཱརཾ གུཎམུནིནྡཱདྷིཔཏི མཧཱདྷམྨརཱཛཱདྷིརཱཛགུརུཏྠེརསྶ ཨདཱསི, ཡོ ‘མཱཾ ལེ སཡཱཌོ’ ཨིཏི ཝུཙྩཏི.

ཨུཔརཉྙོ དེཝིཡཱ ཀཱརཱཔིཏཾ མངྒལཱཝིརཱམཾ ནཱམ ཝིཧཱརཾ ཏིཔིཊཀསདྡྷམྨསཱམིམཧཱདྷམྨརཱཛཱདྷིརཱཛགུརུཏྠེརསྶ ཨདཱསི, ཡོ ‘སོཾ ཋཱ སཡཱཌོ’ ཨིཏི ཝུཙྩཏི.

མཛ྄ཛྷིམགེཧཝཱསིདེཝིཡཱ ཀཱརཱཔིཏཾ མངྒལཱཝཱསཱཏུལཾ ནཱམ ཝིཧཱརཾ ཉཱཎཛམྦུདཱིཔཨནནྟདྷཛམཧཱདྷམྨརཱཛཱདྷིརཱཛགུརུཏྠེརསྶ ཨདཱསི, ཡོ ‘མེཾ ཛྭཱ སཡཱཌོ’ ཨིཏི ཝུཙྩཏི.

ཨིམེ པྤན ཙཏྟཱརོ མཧཱཐེརེ སངྒྷརཱཛཊྛཱནེ ཋཔེསི.

ཨུཏྟརགེཧཝཱསིདེཝིཡཱ ཀཱརཱཔིཏཾ མངྒལབྷཱུམིཀིཏྟིཾ ནཱམ ¶ ཝིཧཱརཾ ཀཝིནྡཱབྷིསདྡྷམྨདྷརདྷཛམཧཱདྷམྨརཱཛགུརུཏྠེརསྶ ཨདཱསི, ཡོ ‘ཉྱོཾ ཀཱཾ སཡཱཌོ’ ཨིཏི ཝུཙྩཏི.

སིརིཁེཏྟནགརབྷོཛཀེན རཱཛཀུམཱརེན ཀཱརཱཔིཏཾ ཨཏུལབྷཱུམིཝཱསཾ ནཱམ ཝིཧཱརཾ ཀཝིནྡཱབྷིསདྡྷམྨཔཝརམཧཱདྷམྨ རཱཛགུརུཏྠེརསྶ ཨདཱསི, ཡོ ‘སྭེ ཊོཾ སཡཱཌོ’ ཨིཏི ཝུཙྩཏི.

ཨནྟོཨམཙྩེན ཨེཀེན ཀཱརཱཔིཏཾ ཝིཧཱརཾ ཉཱཎཱལངྐཱརསདྡྷམྨདྷཛམཧཱདྷམྨརཱཛགུརུཏྠེརསྶ ཨདཱསི, ཡོ ‘སེཾ ཊེ སཡཱཌོ’ ཨིཏི ཝུཙྩཏི.

ཝཱམབལནཱཡཀེནཱམཙྩེན ཀཱརཱཔིཏཾ ཝིཧཱརཾ པརམསིརིཝཾསདྷཛམཧཱདྷམྨརཱཛགུརུཏྠེརསྶ ཨདཱསི, ཡོ ‘མེ ཋཱི སཡཱཌོ’ ཨིཏི ཝུཙྩཏི.

དྷམྨཝིནིཙྪཀེན ཨེཀེནཱམཙྩེན ཀཱརཱཔིཏཾ ཝིཧཱརཾ ཀཝིནྡ སཱརདྷཛམཧཱདྷམྨརཱཛཱདྷིརཱཛགུརུཏྠེརསྶ ཨདཱསི, ཡོ ‘ལོཀཱ མྷཱཾ ཀེཾ སཡཱཌོ’ ཨིཏི ཝུཙྩཏི.

ཨིཙྩེཝཾ པརིཡཏྟིཀོཝིདཱནཾ ཨནེཀཱནཾ མཧཱཐེརཱནཾ སདྡྷིཾ ནཱམལཉྪེན ཝིཧཱརཾ དཏྭཱ ཨནུགྒཧཾ ཨཀཱསི. ཡསྨཱ པན སབྦེསཾ ཐེརཱནཾ ནཱམཾ ཨུདྡྷརིཏྭཱ ཝིསུཾ ཝིསུཾ ཀཐིཏེ ཨཡཾ སཱསནཝཾསཔྤདཱིཔིཀཀཐཱ ཨཏིཔྤཔཉྩཱ བྷཝིསྶཏི, ཏསྨཱ ཨིདྷ ཨཛ྄ཛྷུཔེཀྑིཏྭཱ ཝཏྟབྦམེཝ ཝཀྑཱམཱཏི.

པཙྪཱབྷཱགེ ཙཏྟཱརོ མཧཱཐེརཱ རཱཛཱདུབྦལཏཱཡ ཡཐཱཀཱམཾ སཱསནཾ ཝིསོདྷེཏུཾ སཀྑིསྶནྟཱིཏི མཉྙིཏྭཱ པུན ཨཊྛ ཐེརེ ཨེཏེཧི ཙཏཱུཧི མཧཱཐེརེཧི སདྡྷིཾ སཱསནཾ ཝིསོདྷཱཔེཏུཾ སངྒྷནཱཡཀཊྛཱནེ ཋཔེསི. སེཡྻཐིདཾ, ཀཝིནྡཱབྷིསདྡྷམྨཔཝརམཧཱདྷམྨརཱཛགུརུཏྠེརོ, ཏིཔིཊཀཱལངྐཱརདྷཛམཧཱདྷམྨརཱཛགུརུཏྠེརོ, ཙཀྐིནྡཱབྷིདྷཛམཧཱདྷམྨརཱཛགུརུཏྠེརཱ, པརམསིརིཝཾསདྷཛམཧཱདྷམྨརཱཛགུརུཏྠེརོ, ཛནིནྡཱབྷིཔཝརམཧཱདྷམྨརཱཛགུརུཏྠེརོ, མཧཱཉཱཎཱབྷིདྷཛམཧཱདྷམྨརཱཛགུརུཏྠེརོ ¶ , ཉཱཎཱལངྐཱརསདྡྷམྨདྷཛམཧཱདྷམྨརཱཛགུརུཐེརོ, ཉཱཎཱབྷིསཱསནདྷཛམཧཱདྷམྨརཱཛགུརུཏྠེརོཏི.

ཨཐ ཨརཧཱཔི སམཱནོ ནིསྶཡམུཙྩཀངྒཝིཀལོ ཝིནཱནིསྶཡཱཙརིཡེན ཝསིཏུཾ ན ཝཊྚཏཱིཏི ཛཱནིཏྭཱ ནིསྶཡཱ ཙརིཡཔྤཧོནཀཱནཾ ཐེརཱནཾ ནིསྶཡངྒཱནི ནིསྶཡམུཙྩཀཱརཧཱནཾ ནིསྶཡམུཙྩཀངྒཱནི པརིཔཱུརཱཔེཏྭཱ ནིསྶིཏཀཱནཾ ནིསྶཡཾ གཎྷིཏྭཱཝ ནིསཱིདཱཔེསི.

ཏཏོ པཙྪཱ ཀལིཡུགེ པཉྙཱསཱདྷིཀེ ཝསྶསཏེ སཧསྶེཝ སམྤཏྟེ ཉཱཎཱབྷིསཱསནདྷཛམཧཱདྷམྨརཱཛགུརུཏྠེརཾཡེཝ ཨེཀཾ སངྒྷརཱཛཊྛཱནེ ཋཔེསི. ཏཏོ པཊྛཱཡ སོཡེཝ ཨེཀོ སངྒྷནཱཡཀོ ཧུཏྭཱ སཱསནཾ ཝིསོདྷཡི.

ཏཏོ པཙྪཱ ཨེཀཔཎྞཱསཱདྷིཀེ ཝསྶསཏེ སཧསྶེ ཙ སམྤཏྟེ ཕགྒུནམཱསེ མཧཱམུནིཙེཏིཡསྶ དཀྑིཎདིསཱབྷཱགེ དྭཱིཧི ཨིཊྛཀམཡེཧི པཱཀཱརེཧི པརིཀྑིཏྟཾ པཉྩབྷཱུམིཀཾ ཨསོཀཱརཱམེ རཏནབྷཱུམིཀིཏྟིཾ ནཱམ ཝིཧཱརཾ ཨཏིམཧནྟཾ ཀཱརཱཔེཏྭཱ ཉཱཎཱབྷིསཱསནདྷཛམཧཱདྷམྨརཱཛགུརུཏྠེརསྶ ཨདཱསི. ཉཱཎཱབྷིཝཾསདྷམྨསེནཱཔཏིམཧཱདྷམྨརཱཛཱདྷིརཱཛགུརཱུཏི ནཱམལཉྪམྤི པུན ཨདཱསི. ཏཏོ ཨཉྙཱནི ཛེཡྻབྷཱུམིཝིཧཱརཀིཏྟིམངྒལཝིརཱམཱདཡོ ཨནེཀེཔི ཝིཧཱརེ ཏསྶེཝ ཨདཱསི.

སོ པན ཏེསུ ཝིཧཱརེསུ ཝཱརེན ནིསཱིདིཏྭཱ པརིཡཏྟིཾ ཝཱཙེསི. ཨུབྷཏོཝིབྷངྒཱནིཔི ཝཱཙུགྒཏཾ ཨཀཱསི. ནིཙྩཾཡེཝ ཨེཀཱསནིཀདྷུཛངྒཾ སམཱདིཡི.

སོ པན ཐེརོ ཨུཔསམྤདཱཝསྶེན པཉྩཝསྶིཀོ ཧུཏྭཱ པུབྦེཝ སངྒྷརཱཛབྷཱཝཏོ པེཊཀཱལངྐཱར ནཱམ ནེཏྟིསཾཝཎྞནཾ ཨབྷིནཝཊཱིཀཾ ཨཀཱསི. ཨཊྛཝསྶིཨིཀཀཱལེ སངྒྷརཱཛཱ ཨཧོསི. སངྒྷརཱཛཱ ཧུཏྭཱ སཱདྷུཛྫནཝིལཱསིནིཾ ནཱམ ¶ དཱིགྷནིཀཱཡཊཱིཀཾ ཨཀཱསི. ཨརིཡཝཾསཱལངྐཱརཾ ནཱམ གནྠཉྩ ཨཀཱསི. མཧཱདྷམྨརཉྙཱ ཡཱཙིཏོ ཛཱཏཀཊྛཀཐཱཡ ཨཏྠཡོཛནཾ ཙཏུསཱམཎེརཝཏྠུཾ རཱཛོཝཱདཝཏྠུཾ ཏིགུམྦྷཐོམནཾ ཚདྡནྟནཱགརཱཛུཔྤཏྟིཀཐཾ རཱཛཱདྷིརཱཛ ཝིལཱསིནིཾ ནཱམ གནྠཉྩཱཏི ཨེཝམཱདཡོཔི ཨཀཱསི.

ཀལིཡུགེ པན དྭཱསཊྛཱདྷིཀེ ཝསྶསཏེ སཧསྶེ ཙ སམྤཏྟེ སཱིཧལ༹དཱིཔཏོ ཨམྤགཧཔཏིསྶོ, མཧཱདམྤོ, ཀོཙྪ གོདྷོ, བྲཱཧྨཎཝཏྟོ, བྷོགཧཝཏྟོ, ཝཱཏུརགམྨོཏི ཨིམེ ཚ སཱམཎེརཱ དས དྷཱཏུཡོ དྷམྨཔཎྞཱ ཀཱརཏྠཱཡ ཨཱནེཏྭཱ ཨམརཔུརཾ ནཱམ མཧཱརཱཛཊྛཱནཱིནགརཾ ཨཱགཏཱ སདྡྷིཾ ཨེཀེན ཨུཔཱསཀེན.

ཨཐ ཉཱཎཱབྷིཝཾསདྷམྨསེནཱཔཏིམཧཱདྷམྨརཱཛཱདྷིརཱཛགུརུནཱ སངྒྷརཉྙཱ ཨུཔཛ྄ཛྷཱཡེན ཀཝིནྡཱབྷིསདྡྷམྨདྷརདྷཛམཧཱདྷམྨརཱཛགུརུཏྠེརེན ཛནིནྡཱབྷིདྷཛམཧཱདྷམྨརཱཛགུརུཏྠེརེན མུནིནྡགྷོསམཧཱདྷམྨརཱཛགུརུཏྠེརེནཱཏི ཨེཝམཱདཱིཧི རཱཛགུརུཏྠེ རེཧི ཀམྨཝཱཙརིཡེཧི ཧཏྠིརཛྫུསུཝཎྞགུཧསཱིམཱཡཾ ཨུཔསམྤདཀམྨཾ ཀཱརཱཔེསི, ཨུཔཱསཀཉྩ སཱམཎེརབྷཱུམིཡཾ པཏིཊྛཱཔེསི, ཏཏོ པཙྪཱ ཙ ཨནེཀཝཱརཾ ཨཱགཏཱནཾ བྷིཀྑཱུནཾ པུན སིཀྑཾ གཎྷཱཔེསི, སཱམཎེརཱནཉྩ ཨུཔསམྤདཀམྨཾ ཀཱརཱཔེསི, ཨུཔཱསཀཱནཉྩ པབྦཛྫཀམྨནྟི.

ཨཔརབྷཱགེ པན ཀལིཡུགེ ཚཙཏྟཱལཱིསཱདྷིཀེ ཝསྶསཏེ སཧསྶེ ཙ སམྤཏྟེ པིཏུརཉྙོ ཨཱཙརིཡཔུབྦོ ཨཏུལོ ནཱམ ཐེརོ ཙཱིཝརཔཊལཾ ཨུཔརིསངྒྷཱཊིཾ ཀཏྭཱ ཨུརབནྡྷནཝཏྠཾ བནྡྷིཏབྦནྟི ཙཱུལ༹གཎྛིཔདེ ཝུཏྟཏྟཱ སཱམཎེརཱནཾ གཱམཔྤཝསེནཀཱལེ ཨེཀཾསཾ ཨུཏྟརཱསངྒཾ ཀཏྭཱ ཨུརབནྡྷནཝཏྠཾ བནྡྷིཏྭཱཡེཝ པཝིསིཏབྦནྟི དལ༹ཾ ཀཏྭཱ རཉྙོ སནྟིཀཾ ལེཁནཾ པཝེསེསི.

ཨཐ རཱཛཱ ཏཾ སུཏྭཱ མཧཱཐེརེ སུདྷམྨསབྷཱཡཾ སནྣིཔཱཏཱཔེཏྭཱ ¶ ཨཏུལཏྠེརེན སདྡྷིཾ སཱཀཙྪཾ ཀཱརཱཔེསི. ཨཐ ཨཏུལཏྠེརོ ཙཱིཝརཔཊལཾ ཨུཔརིསངྒྷཱཊིཾ ཀཏྭཱ ཨུརབནྡྷནཝཏྠཾ བནྡྷིཏབྦནྟི ཙཱུལ༹གཎྛིཔདེ ཨཱགཏཔཱཋཾ དསྶེཏྭཱ སཱམཎེརཱནཾ གཱམཔྤཝེསནཀཱལེ ཨེཀཾསཾ ཨུཏྟརཱསངྒཾ ཀཏྭཱ ཨུརབནྡྷནཝཏྠཾ བནྡྷིཏྭཱ པཝིསིཏབྦནྟི ཨཱཧ.

ཨཐ མཧཱཐེརཱ ཏཾ པུཙྪིཾསུ,-ཨཱིདིསོ ཨདྷིཔྤཱཡོ ཨཉྙཏྠ དིསྶཏི ཝཱ མཱ ཝཱཏི. ཨཐ ཨཏུལཏྠེརོ ཨེཝམཱཧ,-ཨཉྙཏྠ པན ཨཱིདིསོ ཨདྷིཔྤཱཡོ ན དིསྶཏཱིཏི. ཨེཝཾ ཧོཏུ, ཨཡཾ གནྠོ ཀེན ཀཏོཏི. སཱིཧལ༹དཱིཔེ ཨནུརཱདྷཔུརསྶ དཀྑིཎདིསཱབྷཱགེ པོཀྐནྟི གཱམེ ཨརཧནྟེན མོགྒལཱནཏྠེརེནཱཏི. ཨཡམཏྠོ ཀཐཾ ཛཱནིཏབྦོཏི. པིཊཀཏྟཡལཀྑཎགནྠེ ཨཱགཏཏྟཱཏི. ཨཡཉྩ པིཊཀཏྟཡ ལཀྑཎགནྠོ ཀུཏོ ལདྡྷོཏི. བུདྡྷགྷོསཏྠེརེན ཀིར སཱིཧལ༹དཱིཔཏོ ཨཱནཱིཏཏྟཱ ཏཏོ, ཨཡཉྷི གནྠོ སཱིཧལ༹དཱིཔཏོ ཨཏྟནཱ ཨཱནཱིཏེསུ གནྠེསུ ཨསུཀོ གནྠོ ཨསུཀེན ཐེརེན ཀཏོཏི ཝིཉྙཱཔནཏྠཱཡ བུདྡྷགྷོསཏྠེརེན ཀཏོ, ཨིདཱནཱཡཾ གནྠོ ཨམྷཱཀཾ ཧཏྠེ སཾཝིཛྫཏཱིཏི. སཙེ ཨིདཱནཱཡཾ གནྠོ ཏུམྷཱཀཾ ཧཏྠེ སཾཝིཛྫཏི, ཨམྷཱཀཾ དསྶེཧཱིཏི. པསྶཐཱཝུསོ ཨཡམམྷཱཀཾ ཧཏྠེ གནྠོཏི དསྶེསི. ཨཐ མཧཱཐེརེཧི སངྒྷརཱཛཔྤམུཁེཧི ཏསྨིཾ གནྠེ པསྶིཏེ ཝིནཡགཎྛིཔདཾ སཱིཧལ༹དཱིཔེ པརཀྐམབཱཧུརཉྙོ ཀཱལེ མོགྒལཱནཏྠེརོ ཨཀཱསཱིཏི ཨཱགཏཾ, ན ཙཱུལ༹གཎྛིཔདཾ སཱིཧལ༹དཱིཔེ ཨནུརཱདྷཔུརསྶདཀྑིཎདིསཱབྷཱགེ པོཀྐནྟིགཱམེ ཨརཧཱ མོགྒལཱནཏྠེརོ ཨཀཱསཱིཏི.

ཨཐ ཐེརཱ ཨེཝམཱཧཾསུ,-ཀསྨཱ པན པིཊཀཏྟཡལཀྑཎགནྠེ ཨནཱགཏམྤི ཨཱགཏཾཝིཡ ཀཏྭཱ མུསཱ ཝདཐ, ན ནུ ཏུམྷཱཀམྤི ཨེཀཾསིཀབྷིཀྑཱུནཾ མུསཱཝཱདསིཀྑཱཔདཾ ཨཏྠཱིཏི. ཨཐ ཨཏུལཏྠེརོ ཨུཏྟརིཾ ཝཏྟུཾ ཨསཀྐུཎེཡྻཏྟཱ ལུདྡཀསྶ ¶ ཝཱཀུརེ བནྡྷམིགོཝིཡ ཕནྡམཱནོ ཧུཏྭཱ ཨཊྛཱསི, སཧོཌྜེན གཧིཏོཝིཡ ཙོརོ སཧམུསཱཝཱདཀམྨེན སོ ཐེརོ གཧིཏོ ཨཧོསཱིཏི.

ཨིདཾ ཨིམསྶ ཨཏྠསྶ ཨཱཝིབྷཱཝཏྠཱཡ ཝཏྠུ, –

ཨིམསྨིཾ ཀིར རཊྛེ ཨེཀོ ཛནཔདཝཱསཱིཔུརིསོ ཀེནཙིདེཝ ཀརཎཱིཡེན ཨམརཔུརཾ ནཱམ མཧཱརཱཛཊྛཱནཱིནགརཾ ཨཱགཙྪི. ཨཱགནྟྭཱ ཙ པཙྩཱགཏཀཱལེ ཨནྟརཱམགྒེ པཱཐེཡྻཾ ཁཡཾ ཨཧོསི. ཨཐསྶ ཨེཏདཧོསི,- ཨིདཱནི མམ པཱཐེཡྻཾ ཁཡཾ ཨཧོསི, ཨིམསྨིཾ ཀིར རཊྛེ སཧསྶོརོདྷགཱམེ ལདྡྷཝརོ ནཱམ མཧཱསེཊྛི སབྦཏྠ བྷཱུཏལེ ཨཏིཝིཡ པཱཀཊོ. ཏསྶཱཧཾ ཉཱཏཱིཏི ཝཉྩེཏྭཱ ཀཐེསྶཱམི, ཨེཝཾ སཏི ཏེན མཧཱསེཊྛིནཱ མིཏྟསནྠཝཾ ཀཱཏུཾ ཏེཏེགཱམིཀཱ མནུསྶཱ མམ བཧུ ལཱབྷཾ དསྶནྟི, ཏདཱ པཱཐེཡྻེན ཨཀིཙྪོ བྷཝིསྶཱམཱིཏི. ཨེཝཾ པན ཙིནྟེཏྭཱ ཨནྟརཱམགྒེ སམྤཏྟསམྤཏྟགཱམེསུ མཧཱབྷོགཱནཾ གེཧཾ ཝིཙིནེཏྭཱ མཧཱབྷོགཱནཾ སནྟིཀཾ པཝིསིཏྭཱ ཀཐཱསལླཱཔཾ ཨཀཱསི.

ཨཐ ཏེཏེགཱམིཀཱ ཏྭཾ ཀུཏོ ཨཱགཏོ, ཀུཧིཾ གམིསྶསི, ཀསྶ ཉཱཏི,ཀོ ཝཱ ཏྭནྟི པུཙྪིཾསུ. ཨམརཔཱུརམཧཱརཱཛཊྛཱནཱིནགརཏོ ཨཱགཏོ, སཧསྶོརོདྷགཱམཾ གམིསྶཱམི, སཧསྶོརོདྷགཱམེ ལདྡྷཝརསྶ ནཱམ མཧཱསེཊྛིནོ ཛཱམཱཏཱ དྷནཝཌྜྷཀོ ནཱམཱཧནྟི ཨཱཧ.

ཨཐ ཏེཏེགཱམིཀཱ ལདྡྷཝརེན མཧཱསེཊྛིནཱ མིཏྟསནྠཝཾ ཀཱཏུཾ ནཱནཱབྷོཛནེཧི བྷོཛེསུཾ. ཨཉྙེཧིཔི བཧཱུཧི པཎྞཱཀཱརེཧི སངྒཧཾ ཨཀཾསུ. ཨིམིནཱཝ ནཡེན སམྤཏྟ སམྤཏྟགཱམེསུ ཝཉྩེཏྭཱ ཨཏྟནོ གུཎཾ ཀཐེཏྭཱ ཨདྡྷཱན མགྒཾ ཏརི. པཙྪཱ པན སཧསྶོརོདྷགཱམཾ སམྤཏྟོ. སོ སཧསྶོརོདྷགཱམཾ ན སམྤཏྟཔུབྦོ. ལདྡྷཝརོ མཧཱསེཊྛི ཏེན ན དིཊྛཔུབྦོ. སཧསྶོརོདྷགཱམཾ སམྤཏྟེཡེཝ ཨཡཾ ཀིཾ ནཱམ གཱམོཏི ཨཔུཙྪིཏྭཱཡེཝ ཏསྨིཾ གཱམེ མཧཱབྷོགཏརསྶ ¶ མཧཱགེཧཾ ཝིཙིནནྟོ ཏསྶེཝ ལདྡྷཝརསྶ སེཊྛིནོ མཧནྟཾ གེཧཾ པསྶིཏྭཱ ལདྡྷཝརསྶ སེཊྛིནོ སནྟིཀཾ པཝིསིཏྭཱ ཏེན སདྡྷིཾ ཀཐཱསལླཱཔཾ ཨཀཱསི.

ཨཐ མཧཱསེཊྛི ཏཾ པུཙྪི,-ཏྭཾ ཀུཏོ ཨཱགཏོ, ཀུཧིཾ གམིསྶསི, ཀསྶ ཉཱཏི,ཀོ ཏྭནྟི. ཨམརཔུརམཧཱརཱཛཊྛཱནཱིནགརཏོ སཱམི ཨཱགཏོ, སཧསྶོརོདྷགཱམཾ གམིསྶཱམི, སཧསྶོརོདྷགཱམེ ལདྡྷཝརསྶ ནཱམ མཧཱསེཊྛིནོ ཛཱམཱཏཱ, དྷནཝཌྜྷཀོ ནཱམཱཧནྟི ཨཱཧ.

ཨཐ མཧཱསེཊྛི ཏསྶ མུཁཾ ཨུཛུཾ ཨོལོཀེཏྭཱ ཨཡཾ མཱཎཝ སཧསྶོརོདྷགཱམོཡེཝ, ཨཧམྤི ལདྡྷཝརོ ནཱམ མཧཱསེཊྛི, མམ དྷཱིཏརོ སནྟི, ཏཱཔི སསྶཱམིཀཱཡེཝ ཧོནྟི, ཨིདཱནི ཏཱ སཀསཀསྶཱམིཀཱནཾཡེཝ སནྟིཀེ ཝསནྟི, ན ཏྭཾ ཀདཱཙི མཡཱ དིཊྛཔུབྦོ, ཀེན ཀཱརཎེན ཀུཏོ ཨཱགནྟྭཱ མམ ཛཱམཱཏཱ བྷཝསཱིཏི པུཙྪི.

ཨཐ སོ མྨནུསྶེཧི ཨནུབནྡྷིཡམཱནོཝིཡ མིགོ སཀལམྤི ཀཱཡཾ ཕནྡཱཔེཏྭཱ ཀིཉྩི ཝཏྟབྦཾ ཝཙནཾ ཨཛཱནིཏྭཱ ཨལདྡྷཔྤཏིཊྛཱནཏཱཡ ཨེཝཾ སཏི ཀུཏོ ཨཱགཏོ, ཀུཧིཾ གམིསྶཱམི, ཀསྶ ཉཱཏི, ཀོ ཝཱ ཨཧནྟི ཨིདཱནི ན ཛཱནཱམི, སབྦདིསཱ སམྨུཡ྄ཧཱམི, ཁམཱཧི མམ ཨཔརཱདྷཾ, ཨིཏོ པཊྛཱཡ ཡཱཝ ཛཱིཝིཏཔརིཡོསཱནཱ ན ཝཉྩེསྶཱམི, ཝཉྩེཏུཾ ན ཝིསཧཱམི, ཨིདཱནི ཨཏིཝིཡ བྷཱཡཱམི, མཱ ཀིཉྩི དཎྜཀམྨཾ ཀརོཧཱིཏི ཝཏྭཱ ཝེགེན ཨུཊྛཧིཏྭཱ པལཱཡཱིཏི.

ཨིཙྩེཝཾ ཨཏུལཏྠེརོ དུམྨུཁོ ཧུཏྭཱ ཡཾཝཱཏཾཝཱ མུཁཱརཱུལ༹ཾ ཝིལཔིཏྭཱ སངྒྷམཛ྄ཛྷེ ནིསཱིདི.

ཨཡཾ ཨཏུལཏྠེརསྶ པཋམོ པརཱཛཡོ.

ཏཏོ པཙྪཱ ཁལིཏྭཱ ཀདྡམེ པཏིཏཾ པུརིསཾ པུན ཨུཔརི ཨཀྐམནྟཱཝིཡ པུན མཧཱཐེརཱ ཨེཝཾ པུཙྪིཾསུ,-ཨིདཾ བྷནྟེ ཏཝ ཙཱུལ༹གཎྛིཔདཾ ནཱམ ཏཱིསུ ཝིནཡམཧཱཊཱིཀཱསུ སཱདྷཀཝསེན དསྶིཏཾ ¶ ཙཱུལ༹གཎྛིཔདཾ ཨུདཱཧུ ཨཔརནྟི. ཏཱིསུ ཝིནཡམཧཱཊཱིཀཱསུ སཱདྷཀཝསེན དསྶིཏཾ ཙཱུལ༹གཎྛིཔདཾཡེཝ ཨིདནྟི. ཨེཝཾསཏི ཀསྨཱ ཏཝ ཙཱུལ༹གཎྛིཔདེཡེཝ ཝུཏྟཉྷི ཝཛིརབུདྡྷིཊཱིཀཱཡཾ, ཝུཏྟཉྷི སཱརཏྠདཱིཔནཱིཊཱིཀཱཡཾ, ཏཐཱ ཧི ཝུཏྟཾ ཝིམཏི ཝིནོདནཱིཊཱིཀཱཡནྟི ཏཱསཾ ཝིནཡམཧཱཊཱིཀཱནཾ པཙྪཱ ཧུཏྭཱ ཏིསྶོ ཝིནཡམཧཱཊཱིཀཱཡོ སཱདྷཀཝསེན དསྶིཏཱཏི. ཨེཝཾ པན པུཙྪནྟོ སོ མཡཱ པུབྦེ ཝུཏྟཾ ཏཱིསུ ཝིནཡམཧཱཊཱིཀཱསུ སཱདྷཀཝསེན དསྶིཏཾ ཙཱུལ༹གཎྛིཔདཾཡེཝ ཨིདནྟི ཝཙནཾ སཙྩམེཝཱཏི མུཁཱསུཉྙཏྠཱཡ པུནཔྤུནཾ ཝདི.

ཨིདཉྩ ཨིམསྶ ཨཏྠསྶ ཨཱཝིབྷཱཝཏྠཱཡ ཝཏྠུ, –

ཨེཀོ ཀིར པུརིསོ ཨེཀེན སཧཱཡེན སདྡྷིཾ པུཏྟདཱརཔོསནཏྠཱཡ རཉྙོ བྷཏིཾ གཧེཏྭཱ ཡུདྡྷཀམྨཾ ཀཱཏུཾ སངྒཱམཾ གཙྪཏི. ཨཐ པརསེནཱཡ ཡུཛ྄ཛྷིཏྭཱ པརསེནཱ ཨབྷིབྷཝིཏྭཱ སབྦེ མནུསྶཱ ཨཏྟནོ ཨཏྟནོ ཨབྷིམུཁཊྛཱནཾ པལཱཡིཾསུ. ཨཐ སོཔི པུརིསོ ཏེན སཧཱཡེན སདྡྷིཾ ཨཏྟནོ ཨབྷིམུཁཊྛཱནཾ པལཱཡི. ཏོཀཾ པལཱཡིཏྭཱ ཨནྟརཱམགྒེ པརསེནཱཧི པཧརིཏདཎྜེན མུཙྪིཏོ ཧུཏྭཱ སོ པུརིསོ ཏེན སདྡྷིཾ གནྟུཾ ན སཀྐཱ, ཨནྟམསོ ནིསཱིདིཏུམྤི ན སཀྐཱ.

ཨཐ སཧཱཡསྶ ཨེཏདཧོསི,-ཨིདཱནི ཨཡཾ ཨཏིཝིཡ བཱལ༹གིལཱནོ ཧོཏི མརཎཱསནྣོ, སཙཱཧཾ ཏསྶ ཨུཔཊྛཧིཏྭཱ ཨིདྷེཝ ནིསཱིདེཡྻཾ, ཝེརིནོ ཨཱགནྟྭཱ མཾ གཎྷིསྶནྟཱིཏི. ཨེཝཾ པན ཙིནྟེཏྭཱ གིལཱནསྶ སནྟཀཱནི ཀཧཱཔཎཝཏྠཱདཱིནི གཧེཏྭཱ ཏཾ ཏཏྠེཝ ཋཔེཏྭཱ གཙྪཏི. སཀཊྛཱནསམཱིཔཾ པན པཏྟསྶ ཏསྶ ཨེཏདཧོསི,- སཙེ ཏཾ ཨནྟརཱམགྒེ ཋཔེཏྭཱ ཨཱགཙྪཱམཱིཏི ཝདེཡྻཾ, ཏསྶ ཉཱཏཀཱ མམ ཨུཔརི དོསཾ རོཔེསྶནྟི, ཨིདཱནི སོ མརིཏྭཱ ཨཧཾ ཨེཀཀོཝ ཨཱགཙྪཱམཱིཏི ཝདིསྶཱམཱིཏི. སཀཊྛཱནཾ པན པཏྭཱ ཏསྶ བྷརིཡཱ ཏསྶ སནྟིཀཾ ཨཱགནྟྭཱ མཡ྄ཧཾ པན སཱམིཀོ ¶ ཀུཧིཾ གཏོ, ཀཏྠ ཋཔེཏྭཱ ཏྭཾ ཨེཀཀོཝ ཨཱགཙྪསཱིཏི པུཙྪི. ཏཝ ཨཡྻེ སཱམིཀོ པརེསཾ ཨཱཝུདྷེན པཧརིཏྭཱ ཀཱལངྐཏོ, ཨིམཱནི ཏཝ སཱམིཀསྶ སནྟཀཱནཱིཏི ཝཏྭཱ ཀཧཱཔཎཝཏྠཱདཱིནི དཏྭཱ མཱ སོཙི མཱ པརིདེཝི, ཨིདཱནི མཏཀབྷཏྟཾ དཏྭཱ པུཉྙབྷཱགཾཡེཝ བྷཱཛེཧཱིཏི སམསྶཱསེསི. ཨཐ སཱ ཏཱནི གཧེཏྭཱ རོདིཏྭཱ མཏཀབྷཏྟཾ དཏྭཱ པུཉྙབྷཱགཾ བྷཱཛེསི.

ཨཔརབྷཱགེ པན ཐོཀཾ ཀཱལཾ ཨཏིཀྐནྟེ གིལཱནཱ ཝུཊྛིཏོ སཀགེཧཾ ཨཱགཙྪཏི. བྷརིཡཱཔི ཏཾ ན སདྡཧི. ཨཧཾ ན ཀཱལངྐཏོ, གིལཱནཾཡེཝ མཾ ཋཔེཏྭཱ སོ མམ སནྟཀཱནི གཧེཏྭཱ གཏོ, སཙེ མཾ ཏྭཾ ན སདྡཧསི, ཨཧཾ ཨནྟོགབྦྷེ ནིལཱིཡིཏྭཱ ནིསཱིདིསྶཱམི, ཏཾ པཀྐོསེཏྭཱ པུཙྪཱཧཱིཏི ཨཱཧ.

ཨཐ སཱ ཏཾ པཀྐོསེཏྭཱ བཧི གབྦྷེ ནིསཱིདིཏྭཱ པུཙྪི,-མམ སཱམི སཱམིཀོ ཀཱལངྐཏོཏི ཏཾ སཙྩཾ ཝཱ ཨལིཀཾ ཝཱཏི. སཙྩམེཝེཏཾ, ཡཾ ཏཝ སཱམིཀོ ཀཱལངྐཏོཏི.

ཨཐ སོ པུརིསོ བཧི གབྦྷཾ ནིཀྑམིཏྭཱ ཨངྒུལིཾ པསཱརེཏྭཱ ན ཨིདཱནི བྷོསམྨ ཨཧཾ ཀིཉྩི མཏྟོཔི མརཱམི, ཀསྨཱ པན ཨམརནྟཾཡེཝ མཾ མཏོ ཨེསོཏི ཝདེསཱིཏི. ཨཐ ཀིཉྩི ཝཏྟབྦསྶ ཀཱརཎསྶ ཨདིསྶནཏོ མུཁཱསུཉྙཏྠཱཡ ཨངྒུལིཾ པསཱརེཏྭཱ ཨུཛུཾ ཨོལོཀེཏྭཱ ཨིདཱནི ཏྭཾ ཨིདྷ ཨཱགནྟུཾ སམཏྠོཔི མཏོཡེཝ, མཏོཏི མཡཱ ཝུཏྟ ཝཙནཾ སཙྩཾཡེཝ, ནཱཧཾ ཀིཉྩི ཨལིཀཾ ཝདཱམཱིཏི ཨཱཧ. ཨེཝཾ སོ པུནཔྤུནཾ ཝདནྟོཔི ཛཱིཝམཱནཀསྶ སཾཝིཛྫམཱནཏྟཱ པཙྩཀྑེཡེཝ ཙ ཏསྶ ཋིཏཏྟཱ ཀོཙིཔི ཏསྶ ཝཙནཾ ན སདྡཧི, པརཱཛཡཾཡེཝ སོ པཏྟོཏི.

ཨིཙྩེཝཾ ¶ ཨཏུལཏྠེརོ མུཁཱསུཉྙཏྠཱཡ ཝདནྟོཔི ཀོཙི ན སདྡཧི, པརཱཛཡཾཡེཝ སོ པཏྟོཏི.

ཨཡཾ ཨཏུལཏྠེརསྶ དུཏིཡོ པརཱཛཡོ.

པུནཔི སེཡྻཐཱཔི ལུདྡཀོ ཀུཉྫརཾ དིསྭཱ ཨེཀེན ཝཱརེན ཨུསུནཱ ཝིཛ྄ཛྷིཏྭཱ པཏནྟམྤི ཀུཉྫརཾ པུན ཨནུཊྛཱཧནཏྠཱཡ ཀཏིཔཡཝཱརེཧི ཨུསཱུཧི ཝིཛ྄ཛྷཏི, ཨེཝམེཝ ཨེཀཝཱརེནེཝ པརཱཛཡཾ པཏྟཾ པན ཝཱདསྶ ཨནུཀྑིཔནཏྠཱཡ ཀཏིཔཡཝཱརེཧི པརཱཛཡཾ པཱཔེཏུཾ པཱརུཔནཝཱདིནོ མཧཱཐེརཱ ཨེཝམཱཧཾསུ,- ཏཝ ཙཱུལ༹གཎྛིཔདེཡེཝ སཱམཎེརཱནཾ པརིམཎྜལསུཔྤཊིཙྪནྣཱདཱིནི ཝཏྟཱནི ཨབྷིནྡིཏྭཱཡེཝ པཝིསིཏབྦོཏི པུབྦེ ཝཏྭཱ ཙཱིཝརཔཊལཨུཔརིསངྒྷཱཊིཾ ཀཏྭཱ ཨུརབནྡྷནཝཏྠཾ བནྡྷིཏབྦནྟི པན ཝུཏྟཾ, ཀསྨཱ པན པུབྦེན ཨཔརཾ ཨསཾསནྡིཏྭཱ ཝུཏྟཾ, ཏུམྷཱཀཾ ཝཱདེ པཊིསརཎབྷཱུཏཱནཾ པཱལི༹ཨཊྛཀཐཱཊཱིཀཱགནྠནྟརཱནཾ ནཏྠིཏཱཡ ཨམྷཱཀཾ པཊིསརཎབྷཱུཏཾ ཙཱུལ༹གཎྛིཔདནྟི ཝདཐ, ཏུམྷཱཀཾ པཊིསརཎབྷཱུཏཱ ཙཱུལ༹གཎྛིཔདཏོཡེཝ བྷཡཾ ཨུཔྤཛྫཏཱིཏི ཝཏྭཱ སཧ ནིལཱིཡནཊྛཱནེན གཧིཏཾ ཙོརཾ ཝིཡ སཧ ནིསྶཡེན ཨདྷམྨཝཱདིནོ གཎྷིཾསུ.

ཨིདཾ ཨིམསྶ ཨཏྠསྶ ཨཝིབྷཱཝཏྠཱཡ ཝཏྠུ, –

ཨཏཱིཏེ ཀིར བཱརཱཎསིཏོ ཨཝིདཱུརེ ནདཱིཏཱིརེ གཱམཀེ པཱཊལི ནཱམ ནཊམཙྩོ ཝསཏི. སོ ཨེཀསྨིཾ ཨུསྶཝ དིཝསེ བྷརིཡམཱདཱཡ བཱརཱཎསིཾ པཝིསིཏྭཱ ནཙྩིཏྭཱ ཝཱིཎཾ ཝཱདིཏྭཱ གཱཡིཏྭཱ དྷནཾ ལབྷིཏྭཱ ཨུསྶཝཔརིཡོསཱནེ བཧུ སུརཱབྷཏྟཾ གཱཧཱཔེཏྭཱ ཨཏྟནོ གཱམཾ གཙྪནྟོ ནདཱིཏཱིརཾ པཏྭཱ ནཝོདཀཾ ཨཱགཙྪནྟཾ དིསྭཱ བྷཏྟཾ བྷུཉྫནྟོ སུརཾ ཝིཝནྟོ ནིསཱིདིཏྭཱ མཏྟོ ཧུཏྭཱ ཨཏྟནོ བལཾ ཨཛཱནནྟོ མཧཱཝཱིཎཾ གཱིཝཱཡ བནྡྷིཏྭཱ ནདིཾ ཨོཏརིཏྭཱ གམིསྶཱམཱིཏི བྷརིཡཾ ཧཏྠེ གཧེཏྭཱ ནདིཾ ཨོཏརི. ཝཱིཎཱཚིདྡེཧི ཨུདཀཾ ¶ པཱཝིསི. ཨཐ ནཾ སཱ པཱིཎཱ ཨུདཀེ ཨོསཱིདཱཔེསི. བྷརིཡཱ པནསྶ ཨོསཱིདནབྷཱཝཾ ཉཏྭཱ ཏཾ ཝིསྶཛྫིཏྭཱ ཨུཏྟརིཏྭཱ ནདཱིཏཱིརེ ཨཊྛཱསི. ནཊཔཱཊལི སཀིཾ ཨུམྨུཛྫཏི, སཀིཾ ནིམྨུཛྫཏི, ཨུདཀཾ པཝིསིཏྭཱ ཨུདྡྷུམཱཏཨུདརོ ཨཧོསི. ཨཐསྶ བྷརིཡཱ ཙིནྟེསི,-མཡ྄ཧཾ སཱམིཀོ ཨིདཱནི མརིསྶཏི, ཨེཀཾ གཱིཏཾ ཡཱཙིཏྭཱ པརིསམཛ྄ཛྷེ ཏཾ གཱཡནྟཱི ཛཱིཝིཏཾ ཀཔྤེསྶཱམཱིཏི ཙིནྟེཏྭཱ སཱམི ཏྭཾ ཨུདཀེ ནིམྨུཛྫསི, ཨེཀཾ མེ གཱིཏཾ དེཧི, ཏེན ཛཱིཝིཏཾ ཀཔྤེསྶཱམཱིཏི ཝཏྭཱ–

བཧུསྶུཏཾ ཙིཏྟཀཐཾ, གངྒཱ ཝཧཏི པཱཊལིཾ;

ཝུཡ྄ཧམཱནཀཾ བྷདྡནྟེ, ཨེཀཾ མེ དེཧི གཱཐཀནྟི.

ཨཐ ནཾ ནཊཔཱཊལི བྷདྡེ ཀཐཾ ཏཝ གཱིཏཾ དསྶཱམི, ཨིདཱནི མཧཱཛནསྶ པཏིསརཎབྷཱུཏཾ ཨུདཀཾ མཾ མཱརེཏཱིཏི ཝཏྭཱ–

ཡེན སིཉྩནྟི དུཀྑིཏཾ, ཡེན སིཉྩནྟི ཨཱཏུརཾ;

ཏསྶ མཛ྄ཛྷེ མརིསྶཱམི, ཛཱཏཾ སརཎཏོ བྷཡནྟི.

ཨཐ ཨཏུལཏྠེརོ ཨཏྟནོ པཏིསརཎབྷཱུཏཱ ཙཱུལ༹གཎྛིཔདཏོ བྷཡཾ ཨུཔྤཛྫིཏྭཱ ཀིཉྩི ཝཏྟབྦཾ ཨཛཱནིཏྭཱ ཨདྷོམུཁོ ཧུཏྭཱ པརཱཛཱཡཾ པཏྟོཏི.

ཨཡཾ ཨཏུལཏྠེརསྶ ཏཏིཡོ པརཱཛཡོ.

ཨཐ རཱཛཱ ཏེསཾ དྭིནྣཾ པཀྑཱནཾ ཝཙནཾ སུཏྭཱ ཙཱུལ༹གཎྛིཔདསྶ པུབྦཱཔརཝིརོདྷིདོསཧི ཨཱཀུལཏྟཱ སུཏྟསུཏྟཱནུལོམཱདཱིསུ ཨཔྤཝིཊྛཏྟཱ ཨཱགམསུདྡྷིཡཱ ཙ ཨབྷཱཝཏོ པརོཝསྶསཏཾ ཙིརཾ ཋིཏསྶ གེཧསྶཝིཡ ཨཏིདུབྦལཝསེན ཨཐིརཏཾ ཛཱནིཏྭཱ ཨིདཱནི སཱསནཾ པརིསུདྡྷཾ བྷཝིསྶཏཱིཏི སོམནསྶཔྤཏྟོ ཧུཏྭཱ མམ ཝིཛིཏེ སབྦེཔི བྷིཀྑཱུ པཱརུཔནཝསེན སམཱནཝཱདིཀཱ ཧོནྟཱུཏི ཨཱཎཾ ཋཔེསི. ཏཏོ ¶ པཊྛཱཡ ཡཱཝཛྫཏནཱ སཀལེཔི མརམྨརཊྛེ པཱརུཔནཝསེན སམཱནཝཱདིཀཱ བྷཝནྟཱིཏི.

ཨཡམེཏྠ སངྑེཔོ,-ཏེསཉྷི དྭིནྣཾ པཀྑཱནཾ སནྣིཔཏིཏྭཱ ཝཙནཔྤཊིཝཙན ཝསེན ཝིཝཱདཀཐཱ ཝིཏྠཱརེན ཝུཙྩམཱནཱ ཚཔཉྩསཱཎཝཱརམཏྟམྤི པཏྭཱ ནིཊྛཾ ན པཱཔུཎེཡྻ. ཡསྨཱ པན སབྦཾ ཨནཝསེསེཏྭཱ ཝུཙྩམཱནཾ ཨཡཾ སཱསནཝཾསཔྤཊཱིཔིཀཱ ཨཏིཔྤཔཉྩཱ བྷཝིསྶཏི, ཏསྨཱ ཨེཏྠ ཨིཙྪིཏམཏྟམེཝ དསྶཡིཏྭཱ ཨཛ྄ཛྷུཔེཀྑཱམཱཏི.

ཉཱཎཱབྷིཝཾསདྷམྨསེནཱཔཏིམཧཱདྷམྨརཱཛཱདྷིརཱཛ གུརུ པན སངྒྷརཱཛཱ མཧཱཐེརོ སཱིཧལ༹དཱིཔེ ཨམརཔུརནིཀཱཡིཀཱནཾ བྷིཀྑཱུནཾ ཨཱདིབྷཱུཏོ ཨཱཙརིཡོ བཧཱུཔཀཱརོ. ཨམརཔུརནིཀཱཡོཏི ཏཏྠེརཔྤབྷཝོཏི.

ཀལིཡུགེ པན ཨེཀཱསཱིཏཱདྷིཀེ ཝསྶསཏེ སཧསྶེ ཙ སམྤཏྟེ ཏསྶ རཉྙོ ནཏྟཱ སིརིཏྲིབྷཝནཱདིཏྱཔཝརཔཎྜིཏམཧཱདྷམྨརཱཛཱདྷིརཱཛཱ ནཱམ རཛྫཾ ཀཱརེསི. སོ པན ཨམརཔུརཏོ སངྐམིཏྭཱ རཏནཔཱུརཾ ཙཏུཏྠཾ མཱཔེསི. ཏསྶ རཉྙོ ཀཱལེ གུཎམུནིནྡཱདྷིཔཏིམཧཱདྷམྨརཱཛཱདྷིརཱཛགུརུཏྠེརསྶ སཱིསྶཾ སཛཱིཝགཱམཝཱསིཾ སཱིལཱཙཱརཾ ནཱམ ཐེརཾ ཨརཉྙཝཱསཱིནཾ བྷིཀྑཱུནཾ པཱམོཀྑཊྛཱནེ ཋཔེསི. རཱཛཱགཱརནཱམཀེ དེསེ ཝིཧཱརཾ ཀཱརཱཔེཏྭཱ ཏསྶེཝ ཨདཱསི.

ཀལིཡུགེ ཨེཀཱསཱིཏཱདྷིཀེ ཝསྶསཏེ སཧསྶེ ཙ སམྤཏྟེ ཙལངྒཔུརཏོ པཉྙཱསཱིཧཾ ནཱམ ཐེརཾ ཨཱནེཏྭཱ ཨསོཀཱརཱམེ རཏནབྷཱུམིཀིཏྟིཝིཧཱརེ པཏིཊྛཱཔེསི, མུནིནྡཱབྷིསིརིསདྡྷམྨདྷཛམཧཱདྷམྨརཱཛཱདྷིརཱཛགུརཱུཏི ནཱམལཉྪམྤི ཨདཱསི.

ཀལིཡུགེ ཙཏཱུསཱིསཱདྷིཀེ ཝསྶསཏེ སཧསྶེ ཙ སམྤཏྟེ མུནིནྡཱབྷིཝཾསདྷམྨསེནཱཔཏིམཧཱདྷམྨརཱཛཱདྷིརཱཛགུརཱུཏི ནཱམལཉྪཾ དཏྭཱ མཧཱཛེཡྻབྷཱུམིཝིཧཱརརམྨཎཱིཡཾ ནཱམ ཝིཧཱརཾ ¶ དཏྭཱ ཏཾཡེཝ མཧཱཐེརཾ སངྒྷརཱཛཊྛཱནེ ཋཔེསི.

ཨེཀསྨིཉྩ སམཡེ མཧཱཐེརེ རཱཛཱ པུཙྪི,-ཙཏསྶོ དཱཋཱ ནཱམ ཙཏྟཱལཱིསཱཡ དནྟེསུ ཨནྟོགདྷཱ ཝཱ, ཨུདཱཧུ ཙཏྟཱལཱིསཱཡ དནྟེཧི ཝིསུཾ བྷཱུཏཱཏི པུཙྪི.

ཨཐ ཨེཀཙྩེ ཐེརཱ ཨེཝམཱཧཾསུ,-ཙཏསྶོ དཱཋཱ ནཱམ ཙཏྟཱལཱིསཱཡ དནྟེསུ ཨནྟོགདྷཱཏི. ཨེཀཙྩེ པན ཙཏསྶོ དཱཋཱ ནཱམ ཙཏྟཱལཱིསཱཡ དནྟེཧི ཝིསུཾ བྷཱུཏཱཏི ཨཱཧཾསུ. ཨཐ རཱཛཱ གནྠཾ ཨཱཧརཐཱཏི ཨཱཧ. ཨཐ ཨནྟོགདྷཝཱདིཀཱ ཐེརཱ གནྠཾ ཨཱཧརིཾསུ,- ཨཉྙེསཾ པརིཔུཎྞདནྟཱནམྤི དྭཏྟིཾསདནྟཱ ཧོནྟི, ཨིམསྶ པན ཙཏྟཱལཱིསཾ བྷཝིསྶནྟཱིཏི ཙ.

དནྟཱཏི པརིཔུཎྞདནྟསྶ དྭཏྟིཾསདནྟཊྛིཀཱནི. ཏེཔི ཝཎྞཏོ སེཏཱ, སཎྛཱནཏོ ཨནེཀསཎྛཱནཱ. ཏེསཉྷི ཧེཊྛིམཱཡ ཏཱཝ དནྟཔཱལི༹ཡཱ མཛ྄ཛྷེ ཙཏྟཱརོ དནྟཱ མཏྟིཀཱཔིཎྜེ པཊིཔཱཊིཡཱ ཋཔིཏཨཱལཱབུབཱིཛསཎྛཱནཱ, ཏེསཾ ཨུབྷོསུ པསྶེསུ ཨེཀེཀོ ཨེཀམཱུལཀོ ཨེཀཀོཊིཀོ མལླིཀམཀུལ༹སཎྛཱནོ, ཏཏོ ཨེཀེཀོ དྭིམཱུལཀོ དྭིཀོཊིཀོ ཡཱནཀཨུཔཏྠམྥིནིསཎྛཱནོ, ཏཏོ དྭེ དྭེ ཏིམཱུལཀཱ ཏིཀོཊིཀཱ, ཏཏོ དྭེ དྭེ ཙཏུམཱུལཀཱ ཙཏུཀོཊིཀཱཏི. ཨུཔརིམཱཡ དནྟཔཱལི༹ཡཱཔི ཨེསེཝ ནཡོཏི ཙ.

ཏསྶ ཀིར ཨུཏྟརོཊྛཨཔྤཀཏཱཡ ཏིརིཡཾ ཕཱལེཏྭཱ ཨཔནཱིཏདྡྷཾཝིཡ ཁཱཡཏི, ཙཏྟཱརོ དནྟེ དྭེ ཙ དཱཋཱ ན ཚཱདེཏི, ཏེན ནཾ ཨོཊྛདྡྷོཏི ཝོཧརནྟཱིཏི ཙ.

ཏཏྠ ཏསྶཱཏི ལིཙྪཝིནོ ནཱམ རཱཛཀུམཱརསྶ, ཨུཏྟརོཊྛཨཔྤཀཏཱཡཱཏི ཨུཔརི ཨོཊྛསྶ ཨཔྤཀཏཱཡ. ཨཔནཱིཏདྡྷཾ ཝིཡཱཏི ཨུཔརི ཨོཊྛསྶ ཨུཔཌྜྷབྷཱགཾ ཨཔནཱིཏཾ ཝིཡ ཁཱཡཏཱིཏི ཨཏྠོ. ན ཚཱདེཏཱིཏི ཨུཔརི ཨོཊྛསྶ ཨུཔཌྜྷབྷཱགེ པན ན པཊིཙྪཱདེཏི. ཏེནཱཧི ཡེན ཙཏྟཱརོ དནྟེ དྭེ ཙ དཱཋཱ ན ཚཱདེཏི, ཏེན ནཾ ལིཙྪཝཱིརཱཛཀུམཱརཾ ཨོཊྛདྡྷོཏི ཝོཧརནྟཱིཏི ¶ . ཨེཝཾ ཨནྟོགདྷཝཱདེཧི ཐེརེཧི གནྠཾ ཨཱཧརིཏྭཱ དསྶིཏེ སབྦེཔི ཏསྨིཾ ཝཱདེ པཏིཊྛཧིཾསཱུཏི.

ཨེཀསྨིཉྩ ཀཱལེ རཱཛཱ མནྟིནིཾ ཨམཙྩཾ པུཙྪི,-པུབྦརཱཛཱུཧི ཝིཧཱརསྶ ཙེཏིཡསྶ ཝཱ དིནྣཱནི ཁེཏྟཝཏྠུཨཱདཱིནི པཙྪིམརཱཛཱུནཾ ཀཱལེ ཡཐཱདིནྣཾ ཏཱནི པཏིཊྛཧནྟི ཝཱ མཱ ཝཱཏི.

ཨཐ མནྟིནིཨཱམཙྩོ ཨེཝཾ ཀཐེསི,- སངྒྷིཀཱཡ བྷཱུམིཡཱ པུགྒལིཀཱནི བཱིཛཱནི རོཔཡནྟི, བྷཱགཾ དཏྭཱ པརིབྷུཉྫིཏབྦཱནཱིཏི དསཀོཊྛཱསེ ཀཏྭཱ ཨེཀོ ཀོཊྛཱསོ བྷཱུམིསྶཱམིཀཱནཾ དཱཏབྦོཏི ཙ ཝིནཡཔཱལི༹ཨཊྛཀཐཱསུ ཝུཏྟཏྟཱ པུབྦེ ཨེཀེན རཉྙཱ དིནྣཱནི ཁེཏྟཝཏྠུཨཱདཱིནི པཙྪཱ ཨེཀསྶ རཉྙོ ཀཱལེ ཡཐཱདིནྣཾ ཋིཏཱནི. ཨེཏྠ ཧི སངྒྷིཀཱཡ བྷཱུམིཡཱཏི ཝུཏྟཏྟཱ ལཱབྷསཱིམཱཡཾཝིཡ བལིཾཡེཝ ཨདཏྭཱ སཧ བྷཱུམིཡཱ དིནྣཏྟཱ པཝེཎཱིཝསེན སངྒྷིཀཱ བྷཱུམི ཨཏྠཱིཏི ཝིཉྙཱཡཏི. ཨེཏྠཙ པཊིགྒཱཧཀེསུ མཏེསུ ཏདཉྙོ ཙཏུདྡིསསངྒྷོ ཨནཱགཏསངྒྷོ ཙ ཨིསྶརོ, ཏསྶ སནྟཀོ, ཏེན ཝིཙཱརེཏབྦོཏི.

ཙེཏིཡ པདཱིཔཏྠཱཡ པཊིསངྑཱརཎཏྠཱཡ ཝཱ དིཨིནྣཨཱརཱམོཔི ཛགྒིཏབྦོ, ཝེཏྟནཾ ཨཏྭཱཔི ཛགྒཱཔེཏབྦོཏི ཙེཏིཡེ ཚཏྟཾ ཝཱ ཝེདིཀཾ ཝཱ ཛིཎྞཾ ཝཱ པཊིསངྑརོནྟེན སུདྷཱཀམྨཱདཱིནི ཝཱ ཀརོནྟེན ཙེཏིཡསྶ ཨུཔནིཀྑེཔཏོ ཀཱརེཏབྦནྟི ཙ ཨཊྛཀཐཱཡཾ ཝུཏྟཏྟཱ པུབྦརཱཛཱུཧི ཙེཏིཡསྶ དིནྣཱནི ཁེཏྟཝཏྠུཨཱདཱིནི པཙྪིམརཱཛཱུནཾ ཀཱལེཔི ཙེཏིཡསནྟཀསཱཝེནེཝ ཋིཏཱནཱིཏི ཝེདིཏབྦཱནི.

ཨཐཱཔརམྤི པུཙྪི,- ཀདཱ ཀསྶ རཉྙོ ཀཱལེ ཨཱདིཾ ཀཏྭཱ ཁེཏྟཝཏྠུཨཱདཱིནི ཝིཧཱརསྶ ཙེཏྱསྶ ཝཱ དིནྣཱནཱིཏི.

ཨཐ མནྟིནམཙྩོ ཨེཝམཱཧ,-པུརིམཀཔྤེསུ པུརིམཱནཾ རཱཛཱུནཾ ཀཱལེཔི ཝིཧཱརསྶ ཙེཏིཡསྶ ཝཱ དིནྣཱནཱིཏི ཝེདིཏབྦཱནི, ཏེནེཝ སུཛཱཏསྶ ནཱམ བྷགཝཏོ ཨམྷཱཀཾ བོདྷིསཏྟོ ¶ ཙཀྐཝཏྟིརཱཛཱ སདྡྷིཾ སཏྟཧི རཏནེཧི དྭིསཧསྶེ ཁུདྡཀདཱིཔེ ཙཏྟཱརོ མཧཱདཱིཔེ ཙ ཨདཱསི, རཊྛཝཱསིནོ ཙ ཨཱརཱམགོཔཀཀིཙྩཾ ཀཱརཱཔེསཱིཏི གནྠེསུ ཨཱགཏཾ, ཏསྨཱ ཙིརཀཱལཏོཡེཝ པཊྛཱཡ པུབྦརཱཛཱུཧི ཁེཏྟཝཏྠུཨཱདིནི དིནྣཱནཱིཏི ཝེདིཏབྦཱནི.

རཱཛཝཾསེསུཔི བྷགཝཏོ པརིནིབྦཱནཏོ ཝསྶསཏཱནཾ ཨུཔརི སིརིཁེཏྟནགརེ ཨེཀཱཡ ཨཱཔཱུཔིཀཱཡ པཉྩཀརཱིས མཏྟཾ ཁེཏྟཾ ཨེཀསྶ ཐེརསྶ དིནྣཾ, ཏཾ དྭཏྟཔོངྐོ ནཱམ རཱཛཱ ཝིལུམྤིཏྭཱ གཎྷི. ཨཐ པཧཱརགྷཎྚབྷེརིཡོ པཧརིཏཱཔི སདྡཾ ན ཨཀཾསུ. རཉྙོ ཀུནྟཙཀྐམྤི ཡཐཱ པུབྦེ, ཏཐཱ པེསིཏཊྛཱནཾ ན གཙྪི. ཨཐ ཏཾ ཀཱརཎཾ ཉཏྭཱ ཨཱཔཱུཔིཀཱཡ ཡཐཱདིནྣམེཝ ཐེརསྶ ནིཡྻཱདེསཱིཏི.

ཀལིཡུགེ པན ནཝནཝུཏཱདྷིཀེ ཝསྶསཏེ སཧསྶེ ཙ སམྤཏྟེ ཏསྶ ཀནིཊྛོ སིརིཔཝརཱདིཏྱལོཀཱཔེཏི ཝིཛཡམཧཱདྷམྨརཱཛཱདྷིརཱནཱ རཛྫཾ ཀཱརེསི, སོ པན རཱཛཱ རཏནཔཱུརཏོ སངྐམིཏྭཱ ཨམརཔུརཾ དུཏིཡཾ མཱཔེསི. ཏསྶ རཉྙོ རཛྫཾ པཏྟསཾཝཙྪརེཡེཝ ཛེཊྛམཱསསྶ ཛུཎྷཔཀྑཔཉྩམིཡཾ རཏནཔཱུརནགརེ མཱརཝིཛཡརཏནསུདྷམྨཱཡ ནཱམ པིཊཀསཱལཱཡ སཱུརིཡཝཾསསྶ ནཱམ ཐེརསྶ པརིསམཛ྄ཛྷེ རཱཛལེཁནཾ ཝཱཙཱཔེཏྭཱ སངྒྷརཛྫཾ ནིཡྻཱདེསི. སཱུརིཡཝཾསཱབྷིསིརིཔཝརཱལངྐཱརདྷམྨསེནཱཔཏིམཧཱདྷམྨརཱཛཱདྷིརཱཛགུརཱུཏི ནཱ མལཉྪམྤི ཨདཱསི.

སོ པན ཐེརོ ཀལིཡུགེ པཉྩཝཱིསཱདྷིཀེ ཝསྶསཏེ སཧསྶེ ཙ སམྤཏྟེ མིགསིརམཱསསྶ ཛུཎྷཔཀྑསཏྟམིཡཾ སུཏྟཝཱརེ ཝཱལུཀཝཱཔིགཱམེ པཊིསནྡྷིཡཱ ཝིཛཱཏོཏིསཏྟཏིཝཡཾ སམྤཏྟེ སངྒྷརཛྫཾ པཏྟོ སནྟིནྡྲིཡོ ཁནྟཱི དྷམྨོ སིཀྑཱཀཱམོ པརིཡཏྟིཝིཧཱརདོ ཏིཔིཊཀཱལངྐཱརམཧཱདྷམྨརཱཛགུརུཏྠེརསྶ སིསྶོ. སོ པན ཀལིཡུགེ པནྣརསཱདྷིཀེ ¶ དྭིཝསྶསཏེ སཧསྶེཙ སམྤཏྟེ ཏསྶ རཉྙོ ཀཱལེཡེཝ མཙྩུཝསཾ པཏྟོ.

ཨཐ རཱཛཱ ཨནེཀསཧསྶེཧི པཱསཱདེཧི ཨབྷཱུཏཔུབྦེཧི ཨཙྪརིཡཀམྨེཧི སརཱིརཛྷཱཔནཀིཙྩཾ ཨཀཱསི. ཨཐ ཀལིཡུགེ སེལ༹སཱདྷིཀེ ཝསྶསཏེ སཧསྶེཙ སམྤཏྟེ ཏསྶ མཧཱཐེརསྶ སིསྶཾ ཉེཡྻདྷམྨཾ ནཱམ ཐེརཾ པུན སངྒྷརཱཛཊྛཱནེ ཋཔེསི. པཋམཾ ཉེཡྻདྷམྨཱལངྐཱརདྷམྨ སེནཱཔཏིམཧཱདྷམྨརཱཛཱདྷིརཱཛགུརཱུཏི ནཱམལཉྪཾ ཨདཱསི. ཏཏོ པཙྪཱ དུཏིཡཾ ཉེཡྻདྷམྨཱབྷིཝཾསསིརིཔཝརཱལངྐཱརདྷམྨསེནཱཔཏིམཧཱདྷམྨརཱཛཱདྷིརཱཛ- གུརཱུཏི ནཱམལཉྪཾ ཨདཱསི.

སོ པན ཐེརོ ཀལིཡུགེ ཨེཀསཊྛཱདྷིཀེ ཝསྶསཏེ སཧསྶེཙ དེཝསཱུརགཱམེ པཊིསནྡྷིཡཱ ཝིཛཱཏོ ཧུཏྭཱ ཨསཱིཏཱདྷིཀེ ཝསྶསཏེ སཧསྶེཙ པཋམཨཱསཱལི༹མཱསསྶ ཛུཎྷཔཀྑཙུདྡསམིཡཾ ཨུཔསམྤདབྷཱུམིཾ པཏྟོ.

ཏསྶ རཉྙོ ཀཱལེ ཀལིཡུགེ ནཝནཝུཏཱདྷིཀེ ཝསྶསཏེ སཧསྶེཙ སམྤཏྟེ སཱིཧལ༹དཱིཔཏོ པཉྙཱཏིསྶོ ནཱམ ཐེརོ སདྡྷིཾ སུནནྡེན ནཱམ བྷིཀྑུནཱ ཨིནྡསཱརེན ནཱམ སཱམཎེརེན ཨེཀེན ཨུཔཱསཀེན ཨེཀེན དཱརཀེནཙ ཨམརཔུརཾ ནཱམ ནགརཾ སམྤཏྟོ. ཨཐ སངྒྷརཱཛཱ ཏེསཾ པཙྩཡཱནུགྒཧེན དྷམྨཱནུགྒཧེཙ ཨནུགྒཧེསི. ཏེསུ ཨཔརབྷཱགེ ཀལིཡུགེ དྭིཝསྶཱདྷིཀེ དྭིསཏེ ཝསྶསཧསྶེཙ སམྤཏྟེ པཉྙཱཏིསྶཏྠེརོ ཛརརོགེན ཨབྷིབྷཱུཏཏྟཱ སངྑཱརདྷམྨཱནཾ སབྷཱཝཾ ཨནཏིཝཏྟཏྟཱ ཀཱལམཀཱསི. ཏསྶ པུན སིཀྑཾ གཎྷིསྶཱམཱིཏི པརིཝིཏཀྐོ མཏྠཀཾ ཨཔྤཏྟོ ཧུཏྭཱ ཝིནསྶཡི. ཏེནཱཧབྷགཝཱ, –

ཨཙིནྟིཏམྤི ¶ བྷཝཏི, ཙིནྟི ཏམྤི ཝིནསྶཏི;

ན ཧི ཙིནྟཱམཡཱ བྷོགཱ, ཨིཏྠིཡཱ པུརིསསྶ ཝཱཏི.

ཨིམསྨིཾ པན ལོཀེ པཎྜིཏོ པུཉྙཾ ཀཏྟུཀཱམོ ཨབྷིཏྠརེཝ ཀརེཡྻ. ཀོ ནཱམ ཛཉྙཱ ཨཛྫེ ཝཱ སུཝེ ཝཱ པརསུཝེ ཝཱ མརཎཾ བྷཝིསྶབྷཱིཏི. ཏེནཱཧ བྷགཝཱ, –

ཨབྷིཏྠརེཐ ཀལྱཱཎེ, པཱཔཱ ཙིཏྟཾ ནིཝཱརཡེ;

དནྡཉྷི ཀརཏོ པུཉྙཾ, པཱཔསྨིཾ རམཏཱི མནོཏི.

ཨཐ མཧཱརཱཛཱ ཏསྶ སརཱིརཛྷཱཔནཀིཙྩཾ བཧཱུཧི སཱདྷུཀཱིལ༹ནསབྷཱཡེཧི ཨཀཱསི. ཏཏོ པཙྪཱ སུནནྡསྶ ནཱམ བྷིཀྑུསྶ པུན སིཀྑཾ ཨདཱསི. སཱམཎེརཾ པན ཨུཔསམྤདབྷཱུམིཡཾ པཏིཊྛཱཔེསི. དཱརཀཉྩ སཱམཎེརབྷཱུམིཡནྟི.

ཏེ པན མཧཱརཱཛཱ ཀལིཡུགེ ཏིཝསྶཱདྷིཀེ དྭིསཏེ སཧསྶེཙ སམྤཏྟེ མཱགྷམཱསེ བཧཱུཧི པཙྩཡེཧི ཨུཔཏྠམྦྷེཏྭཱ ཏཱནིཏཱནི སབྦཱནི ཀམྨཱནི ཏཱིརེཏྭཱ ཀུསིམནགརཛེཊྛསྶ ཨེཀསྶ ཨམཙྩསྶ བྷཱརཾ ཀཏྭཱ ཏསྶེཝ སབྦཱནི ཀིཙྩཱནི ནིཡྻཱདེཏྭཱ སཱིཧལ༹དཱིཔཾ པཧིཎཱིཏི.

སངྒྷརཱཛཱམཧཱཐེརོ པན སཱསནསྶ ཙིརཊྛིཏཏྠཱཡ སོཏཱརཱནཾ སུཁཔྤཊིབོདྷནཏྠཱཡ ནཱནཱགནྠེཧི པཱཋཾ ཝིསོདྷེཏྭཱ སདྡྷམྨཔྤཛྫོཏིཀཱཡ ནཱམ མཧཱནིདྡེསཊྛཀཐཱཡ ཨཏྠཡོཛནཾ མརམྨབྷཱསཱཡ ཨཀཱསི. བཧཱུནཾ སིསྶཱནཾ པརིཡཏྟིཝཱཙནཝསེན ཛིནསཱསནསྶ ཨནུགྒཧཾ ཨཀཱསཱིཏི.

ཨཔརབྷཱགེ ཀལིཡུགེ ཨཊྛཝསྶཱདྷིཀེ དྭིསཀེ སཧསྶེཙ སམྤཏྟེ མིགསིརམཱསསྶ ཛུཎྷཔཀྑཨཊྛམིཡཾ ཏསྶ པུཏྟོ སཱིརིཔཝརཱདིཏྱཝིཛཡཱནནྟཡསམཧཱདྷམྨརཱཛཱདྷིརཱཛཱ ནཱམ རཛྫཾ ཀཱརེསི. ཏདཱ སཱུརིཡཝཾསཱབྷིསིརིཔཝརཱལངྐཱརདྷམྨསེནཱཔཏིམཧཱདྷམྨརཱཛཱདྷིརཱཛགུརུ- མཧཱཐེརསྶ སིསྶཾ པཉྙཱཛོཏཱབྷིདྷཛམཧཱདྷམྨརཱཛཱདྷིརཱཛགུརུཏྠེརཾ ¶ སངྒྷརཱཛཊྛཱནེ ཋཔེསི.

སོཔི སཱིལཝཱ པརིཡཏྟིཀོཝིདོ སིཀྑཱཀཱམོ ལཛྫཱིཔེསལོ. ཨངྒུཏྟརནིཀཱཡཔཱལི༹ཡཱ ཏདཊྛཀཐཱཡཙ ཨཏྠ ཡོཛནཾ མརམྨབྷཱསཱཡ ཨཀཱསི.

ཏསྶ རཉྙོ ཀཱལེ ཉེཡྻདྷམྨཱབྷིཝཾསསིརིཔཝརཱལངྐཱརདྷམྨསེནཱཔཏིམཧཱདྷམྨརཱཛཱདྷིརཱཛ- གུརུཏྠེརོ སདྡྷམྨཝིལཱསིནིཡཱ ནཱམ པཊིསམྦྷིདཱམགྒཊྛཀཐཱཡ ཨཏྠཡོཛནཾ མརམྨབྷཱསཱཡ ཨཀཱསི.

མཎིཛོཏསདྡྷམྨཱལངྐཱརམཧཱདྷམྨརཱཛཱདྷིརཱཛགུརུཏྠེརོསཾཡུཏྟ- ནིཀཱཡཔཱལི༹ཡཱ ཏདཊྛཀཐཱཡཙ ཨཏྠཡོཛནཾ མརམྨབྷཱསཱཡ ཨཀཱསི.

མེདྷཱབྷིཝཾསསདྡྷམྨདྷཛམཧཱདྷམྨརཱཛཱདྷིརཱཛགུརུཏྠེརོ དཱིགྷནིཀཱཡཔཱལི༹ཡཱ ཏདཊྛཀཐཱཡཙ ཨཏྠཡོཛནཾ མརམྨབྷཱསཱཡ ཨཀཱསི.

ཉེཡྻདྷམྨཱབྷིཝཾསསིརིཔཝརཱལངྐཱརདྷམྨསེནཱཔཏིམཧཱ དྷམྨརཱཛཱདྷིརཱཛགུརུཏྠེརསྶ སིསྶོ ཨུཔསམྤདཱཝསེན པཉྩཝསྶིཀོ པཉྙཱསཱམི ནཱམཱཧཾ སདྡཏྠབྷེདཙིནྟཱནཱམཀསྶགནྠསྶ གཎྛིཔདཏྠཝཎྞནཾ མརམྨབྷཱསཱཡ ཨཀཱསིཾ. དསཝསྶིཀཀཱལེ པན ཨབྷིདྷཱནཔྤདཱིཔིཀཱསཾཝཎྞནཱཡ ཨཏྠཡོཛནཾ མརམྨབྷཱསཱཡ ཨཀཱསིཾ. ཏསྶཱཙ པཱཋཾ བཧཱུཧི གནྠེཧི སཾསདྡིཏྭཱ ཝིསོདྷེསིནྟི.

ཨཔརབྷཱགེ སཀྐརཱཛེ ཙུདྡསཱདྷིཀེ དྭིསཏེ སཧསྶེཙ སམྤཏྟེ ཨཡཾ ཨམྷཱཀཾ དྷམྨིཀོ རཱཛཱ ཨནེཀསཏཛཱཏཱིསུ ཨུཔཙིཏཔུཉྙཱནུབྷཱཝེན ཛིནསཱསནསྶ པགྒཎྷནཏྠཱཡ སམྨཱདེཝལོཀཔཱལེཧི ཨུཡྻོཛིཡནོཝིཡརཛྫསམྤཏྟིཾ པཊིལབྷི. དསབལསྶསཱསནཾ པགྒཎྷིཏུཀཱམསྶ དྷམྨརཱཛསྶ མནོརཐོ མཏྠཀཾ པཏྟོ ཨཧོསི. མརིཡཱདཾ བྷིནྡིཏྭཱ དིནྣཀཏམགྒཾཝིཡ ཨུདཀཾ ལདྡྷོཀཱསཏཱཡ སདྡྷཱ མཧོགྷོ ¶ ཨཝཏྠརིཏྭཱ ཏིཊྛཏི. ཙཏྟཱརིཙ ཝསྶཱནི ཨཏིཀྐམིཏྭཱ བེསཱཁམཱསེ པཉྩཀཀུདྷབྷཎྜཱདཱིཧི ཨནེཀེཧི རཱཛབྷོགྒབྷཎྜེཧི པརིཝཱརེཏྭཱ ཨུདུམྦརབྷདྡཔིཊྛེ སདྡྷིཾ མཧེསིཡཱ ཨབྷིསེཀཾ པཏྟོ. ཏེནཱཝོཙུམྷཱ ནཱགརཱཛུཔྤཏྟིཀཐཱཡཾ,-

མཧཱཔུཉྙོཝ རཱཛཱཡཾ, ཀཊྛཊགྷེཝ ཨཱགཏེ;

སཀྐརཱཛེ ཧི སམྤཏྟིཾ, པཏྭཱ དཱནེ རཏོ ཝཏེ.

ཏདཱ ཙཏྟཱརི ཝསྶཱནི, ཨཏིཀྐམིཏྭཱ ཝིསཱདྷིཀེ;

སདྡྷིཾ མཧེསིཡཱ སེཀཾ, པཏྟོ ཧུཏྭཱ མཧཱཏལེ.

ཛིནཙཀྐཉྩ ཛོཏེསི, མཧཱསོཀཱདཡོ ཡཐཱ;

ཨལཛྫིནོཙ ནིགྒཡ྄ཧ, པགྒཧེཏྭཱན ལཛྫིནོ.

རཊྛེཙ དཱནསཱིལེསུ, བྷཱཝནཱཡཱབྷིཡུཉྩཡེ;

ནིམིརཱཛཱདཡོ ཡཐཱཏི.

ཏདཱ ཡསྨཱ ཨལཛྫིནོ ནིགྒཧིཏབྦཔུགྒལེ ཨཝཱིཙིནརཀེ ནིཀྑིཔནྟོཝིཡ ནིགྒཧཀམྨཾ ཨཀཱསི, ཏསྨཱ ཏེ ཨལདྡྷོཀཱསཱ ནིལཱིཡནྟི, ཡཐཱ ཨརུཎུགྒམནཀཱལེ ཀོསིཡཱཏི. ཏེནཱཝོཙུམྷཱ ནཱགརཱཛུཔྤཏྟིཀཐཱཡཾ,-

ཏདཱ པན ཛིནཙཀྐཾ, ནབྷེ ཙནྡོཝ པཱཀཊཾ;

ཨལཛྫིནོ ནིལཱིཡནྟི, ཨརུཎུགྒེཝ ཀོསིཡཱཏི.

ཡསྨཱཙ ལཛྫིནོ པགྒཧིཏབྦཔུགྒལེ བྷཝགྒེཨུཀྑིཔནྟོཝིཡ པགྒཧཀམྨཾ ཀརོཏི, ཏསྨཱ ཏེ ལདྡྷོཀཱསཱ ཨུཊྛིཏསཱིསཱ ནིརཱསངྐཱ ཧུཏྭཱ ཏིཊྛནྟི, ཡཐཱ ཙནྡིམསཱུརིཡཱལོཀཱནཾ པཊིལདྡྷཀཱལེ ཨཱདིཀཔྤིཀཱཏི. ཏེནཱཝོཙུམྷཱ, –

ཏདཱཔིཙ ¶ ཛིནཙཀྐཾ, ཁེ བྷཱཎུམཱཝ པཱཀཊཾ;

ལཛྫིནོཔི ཨུཊྛཧནྟི, ཨོབྷཱལདྡྷེཝ ཀཔྤིཀཱཏི.

ཏེཔིཊཀམྤི ནཝངྒཾ བུདྡྷཝཙནཾ ཙིརཊྛིཏིཀཾ ཀཏྟུཀཱམོ པརིཡཏྟིཝིསྶརདེཧི མཧཱཐེརེཧི ཝིསོདྷཱཔེཏྭཱ ལེཁཀཱནཾ བྷཏིཾ དཏྭཱ ཀཎྛཛམུདྡྷཛཱདིཝིདྷཱནཾ སིཐིལདྷནིཏཱདིཝིདྷཱནཉྩ པུནཔྤུནཾ ཝིཙཱརེཏྭཱ ཨནྟམསོ པརིཙྪེདལེཁམཏྟམྤི ཨཝིརཱདྷེཏྭཱ ཨནྟེཔུརཾ པཝིསེཏྭཱ སུཝཎྞམཡེསུ ལོཧམཡེསུཙ པོཏྠཀེསུ ལིཁཱཔེསི. ཉཱཎཐཱམསམྤནྣེཙ བྷིཀྑཱུ ཝིཙིནེཏྭཱ ཡཐཱབལཾ ཝིནཡཔིཊཀཾ ཝིསུཾ ཝིསུཾ དྷཱརེཏི ཝཱཙུགྒཏཾ ཀཱརཱཔེཏི. ཨགྒམཧེསིཾ ཨཱདིཾ ཀཏྭཱ སཀལ ཨོརོདྷཱདཡོ བཧཱུ རཱཛསེཝཀཱ ཨམཙྩཱདཡོ ནཱགརིཀེཙ ཡཐཱབལཾ སུཏྟནྟཔིཊཀཾ ཨབྷིདྷམྨཔིཊཀཉྩ ཝིསུཾ ཝིསུཾ ཨེཀེཀསུཏྟམཱཏིཀཱཔདབྷཱཛནཱིཙིཏྟཝཱརཱདིཝསེན ཝིབྷཱཛེཏྭཱ དྷཱརེཏི ཝཱཙུགྒཏཾ ཀཱརཱཔེཏི. སཡཉྩ ཨནཏྟལཀྑཎཱདིཀཾ ཨནེཀཝིདྷཾ སུཏྟཾ དེཝསིཀཾ སཛ྄ཛྷཱཡཾ ཀརོཏི. ཛིནསཱསནསྶ ཙིརཊྛིཏཏྠཱཡསཀལཝིཛིཏེཙ ཨརཉྙཝཱསཱིནཾ བྷིཀྑཱུནཾ ཨསྶམསྶ སམནྟཏོ པཉྩདྷནུསཏཔྤམཱཎེ ཋཱནེཐལདཀཙརཱནཾ སབྦེསཾ སཏྟཱནཾ ཨབྷཡཾ ཨདཱསི. པརིཡཏྟི ཝིསཱརདཱནཉྩ ཐེརཱནུཐེརཱནཾ མཱཏཱཔིཏཱདཡོ ཉཱཏཀེ སབྦརཱཛཀིཙྩཏོ བལིཀམྨཏོཙ མོཙཱཔེཏྭཱ ཡཐཱསུཁཾ ཝསཱཔེཏི. ཨེཀཱཧེནེཝཱཔི སཧསྶམཏྟེ ཀུལཔུཏྟེ པབྦཛཱུཔསམྤདབྷཱུམཱིསུ པཏིཊྛཱཔེཏྭཱ སཱསནཾ པགྒཎྷི. ཨཉྙཱནིཔི བཧཱུནི པུཉྙཀམྨཱནི ཀརོཏི. ཀཏྭཱཙ ཝིཝཊྚམེཝ པཏྠེཏི, ནོ ཝཊྚཾ. ཨཉྙེཙ ཨོརོདྷཱདཡོ ཏུམྷེ ཡཱནི ཀཱནིཙི པུཉྙཀམྨཱནི ཀཏྭཱ ཝིཝཊྚམེཝ པཏྠེཏ, མཱ ཝཊྚནྟི ཨབྷིཎྷཾ ཨོཝདཏི. ཨནིཙྩལཀྑཎཱདིསཾཡུཏྟཱཡ དྷམྨཀཐཱཡ ནིཙྩཾ ཨོཝདཏི. སཡམྤི སམཐཝིཔསྶནཱསུ ནིཙྩཱརདྡྷཾ ཨཀཱསི. རཱཛཱུནཾ པན རཊྛསཱམིཀཱནཾ དྷམྨཏཱཡ ཀིཙྩབཱཧུལླཏཱཡ ཀདཱཙི ཀདཱཙི ཨོཀཱསཾ ན ལབྷཏི ཀམྨཊྛཱནམནུཡུཉྫིཏུཾ, ཨེཝམྤི སམཱནོ སརཱིརམལཔརིཛགྒནཀཱལེཔི ཀམྨཊྛཱནམནུཡུཉྫཏིཡེཝ, ན མོགྷཝསེན ཀཱལཾ ཁེཔེཏི. ལོཀེ ཧི ཨམངྒལསམྨཏཱནིཔི མནུསྶསཱིསཀཔཱལཊྛིཨཱདཱིནི སུསཱསནཏོ ཨཱནེཏྭཱ དནྟཀཊྛཱདཱིནི ཝཱ ཏཾསདིསཱནི ཀཱརཱཔེཏྭཱ ཨཏྟནོ སམཱིཔེ ཋཔེཏྭཱ ཨཊྛིཀཱདིབྷཱཝནཱམཡཔུཉྙཾ ཝིཙིནཱཏི.

ཏདཱ པན ཨམྷཱཀཾ ཨཱཙརིཡཝརཾ པརིཡཏྟིཝིསཱརདཾ ཏིཀྑ ཛཝནགཙྪིརཱདིཉཱཎོཔེཏཾ ཝིཙིཏྲདྷམྨདེསནཱཀཐཾ སཀལ མརམྨིཀབྷིཀྑཱུནཾ ཨོནམིཏཊྛཱནབྷཱུཏཾ ཝུདྡྷཱཔཙཱཡིཾ རཱུཔསོབྷགྒཔཏྟཾ ཡུཏྟཝཱདིཀཾ ཉེཡྻདྷམྨཱབྷིམུནིཝརཉཱཎཀིཏྟིསིརིདྷཛདྷམྨསེནཱཔཏི- མཧཱདྷམྨརཱཛཱདྷིརཱཛགུརཱུཏི ཏཏིཡཾ ལདྡྷལཉྪཾ ཏཾ བྷིཀྑུསངྒྷཱནཾ སཀལརཊྛཝཱསཱིནཾ པཱམོཀྑབྷཱཝེ པཏིཊྛཱཔེསི ཨསོཀམཧཱརཱཛཱཝིཡ མཧཱམོགྒལིཔུཏྟཏིསྶཏྠེརཾ. ཏེནཱཝོཙུམྷཱ ནཱགརཱཛུཔྤཏྟིཀཐཱཡཾ,–

ཏདཱཙ བྷིཀྑུསངྒྷཱནཾ, ཐེརཾ པཱམོཀྑབྷཱཝཀེ;

ཉེཡྻཱདིལདྡྷལཉྪཾ ཏཾ, པཏིཊྛཱཔེསི སཱདྷུཀནྟི.

ཏདཱཙ ཨམྷཱཀཾ དྷམྨིཀམཧཱརཱཛཱ སཀྐརཱཛེ ཨེཀཱུནཝཱིསཏཱདྷིཀེ སཧསྶེ དྭིསཏེཙ སམྤཏྟེ མནྟལཱཁྱཱཏཱཙལསྶ སམཱིཔེ སུབྷཱུམིལཀྑཎོཔེཏཾ ཨེཀནིཔཱཏཏིཏྠམིཝ བཧུཛནནཡནཝིཧངྒཱནཾ སབྦནགརཱལངྐཱརེཧི པརིཀྑིཏྟཾ མནུསྶཱནཾ ཙཀྑུལོལཏཱཛནཀཾ ནཱནཱརཏནེཧི སམྤུཎྞཾ ནཱནཱ ཝེརཛྫཝཱཎིཛཱནཾ པུཊབྷེདནཊྛཱནབྷཱུཏཾ རཏནཔུཎྞནཱམཀཾ མཧཱརཱཛཊྛཱནིཀཾ མཱཔེསི, མནྡྷཱཏུཝིཡ རཱཛགཧཾ, སུདསྶནོ ཝིཡཙ ཀུསཱཝཏཱིནགརནྟི. ཏེནཱཝོཙུམྷཱ ནཱགརཱཛུཔྤཏྟིཀཐཱཡཾ,–

ཏདཱ ཀཊྛཊཛྷེ སམྤཏྟེ, མནྟལཱཁྱཱཙལསྶཙ;

ཨེརཱཝཏཱིཏི ནཱམཱཡ, མཱཔེསི སམཱིཔེ ནགརཾ.

སུབྷཱུམིལཀྑཎོཔེཏཾ ¶ , རཏནཔུཎྞནཱམཀཾ;

རཱཛགཧཾཝ མནྡྷཱཏུ, ཨཀིརམྨཎིཡཾ སུབྷནྟི.

སེཡྻཐཱཔི ནཱམ ལོཀེ ཨཱལོཀཏྠིཀཱནཾ སཏྟཱནཾ པཱིཏིསོམནསྶཾ ཨུཔྤཱདེནྟོ ཨུཔཀརོནྟོ ཨུདཡཔབྦཏཏོ སཧསྶརཾསཱི དིཝཱཀརོ ཨུཊྛཧཏི, ཨེཝམེཝཾ མརམྨརཊྛིཀཱནཾ ལཛྫཱིཔེསལཱནཾ སིཀྑཱཀཱམཱནཾ བྷིཀྑཱུནཾ གིཧཱིནཉྩ པཱིཏིསོམནསྶཾ ཨུཔྤཱདེནྟོ ཨུཔཀཱརོནྟོ ཨཡཾ དྷམྨིཀོརཱཛཱ ཨིམསྨིཾ མརམྨརཊྛེ ཨུཔྤཛྫཏི.

ཨིམཉྩ དྷམྨིཀརཱཛཱནཾ ནིསྶཱཡ མརམྨརཊྛེ སམྨཱསམྦུདྡྷསྶ སཱསནཾ ཨཏིཝིཡ ཛོཏེཏི. ཝུཌྜྷིཾ ཝིརཱུལི༹ཾ ཝེཔུལླཾ ཨཱཔཛྫཏི.

སཱསནཉྩ ནཱམེཏཾ རཱཛཱནཾ ནིསྶཱཡ ཏིཊྛཏཱིཏི. ཨཡཾ དྷམྨིཀརཱཛཱཡེཝ ན སཱསནསྶཱུཔཀཱརོ དྷམྨཙཱརཱི དྷམྨམཱནཱི, ཨཔིཙ ཁོ དྷམྨིཀརཱཛཱནཾ ནིསྶིཏཱཔི སབྦརཊྛཝཱསིཀཱ སཱསནསྶཱུཔཀཱརཱཡེཝ དྷམྨཙཱརིནོ དྷམྨམཱནིནོ རཱཛཱནུགཏཱ ཧུཏྭཱ. ཏེནེཝཱཧ མཧཱབོདྷིཛཱཏཀཱདཱིསུ, –

གཝཉྩེ ཏརམཱནཱནཾ, ཨུཛུཾ གཙྪཏི པུངྒཝོ;

སབྦཱ གཱཝཱི ཨུཛུཾ ཡནྟི, ནེཏྟེ ཨུཛུཾ གཏེ སཏི.

ཨེཝམེཝ མནུསྶེསུ, ཡོ ཧོཏི སེཊྛསམྨཏོ;

སོ ཙེཔི དྷམྨཾ ཙརཏི, པགེཝ ཨིཏརཱ པཛཱ;

སབྦརཊྛཾ སུཁཾ སེཏི, རཱཛཱ ཙེ ཧོཏི དྷམྨིཀོཏི.

ཝིསེསཏོ པན དུཏིཡཾ ཨམརཔུརཾ མཱཔེནྟསྶ མཧཱདྷམྨརཉྙོ ཨགྒམཧེསིཡཱ ཨཛྫཝམདྡཝསོཧཛྫཱདིགུཎཡུཏྟཱཡ དྷིཏཱ ཨམྷཱཀཾ རཉྙོ ཨགྒམཧེསཱི སམྨཱཙཱརིནཱི པཏིབྦཏཱ. སབྦནཱརཱིནཾ ཨགྒབྷཱཝཾ པཏྟཱཔི སམཱནཱ ཀཱམགུཎསངྑཱཏེན སུརཱམདེན ཨཔྤམཛྫིཏྭཱ པུཉྙཀམྨེསུ ཨཔྤམཱདཝསེན ནིཙྩཱརདྡྷཝཱིརིཡཱ ཧོཏི. ནིཙྩཾ པརིཡཏྟིཡཱ ཨུགྒཧཎཾ ཨཀཱསི. ཝེདཔཱརགཱུཙ ¶ ཨཧོསི. སམྨཱསམྦུདྡྷསཱསནེ ཨཏིཝིཡ པསནྣཱ ཨཉྙཱཔི ཨོརོདྷཱདཡོ མཧཱདྷམྨརཉྙོ ཨོཝཱདེ ཋཏྭཱ དྷམྨཾ ཙརིཾསུ. སཱསནཾ པསཱིདིཾསུཡེཝ. ཨུཔརཱཛཱཔི མཧཱདྷམྨརཱཛསྶ ཨེཀམཱཏཱཔཱིཏིཀོ མཧཱདྷམྨརཱཛིཙྪཱཡ ཨཝིརོདྷེཏྭཱཡེཝ སཀལརཊྛཝཱསཱིནཾ གིཧཱིནཾ བྷིཀྑཱུནཉྩ ཨཏྠཧིཏམཱཝཧཏི, སེཡྻཐཱཔི ཙཀྐཝཏྟིརཉྙོ སནྟིཀེ ཛེཊྛཔུཏྟོ ཐཱམཛཝསམྤནྣོ ཨཏིསཱུརོ ཨུཊྛཱནཝཱིརིཡོ. ཨཉྙེཔི ཨམཙྩཱ ཨནེཀསཧསྶཔྤམཱཎཱ མཧཱདྷམྨརཉྙཱ ལདྡྷེསུ ལདྡྷེསུ ཋཱནནྟརེསུ ཋིཏཱ མཧཱདྷམྨརཉྙོ ཏཾ ཏཾ ཀིཙྩམཱཝཧནྟི པུཉྙཀམྨེསུ ཨབྷིརམནྟི. སཀལརཊྛཝཱསིནོཙ མནུསྶཱ དཱནསཱིལབྷཱཝནཱསུཡེཝ ཙིཏྟཾ ཋཔེནྟི. བྷིཀྑཱུཙ སངྒྷརཱཛཔྤམུཁཱདཡོ ཐེརནཝམཛ྄ཛྷིམཱ གནྠདྷུརཝིཔསྶནཱདྷུརེསུ ཨབྷིཡུཉྫནྟི.

ཨེཝམེཀསྶ སཱདྷུཛྫནསྶ གུཎཾ མཧནྟེན ཨུསྶཱཧེན ཀཐེནྟོཔི དུཀྐརཾཏཱཝ ནིཊྛཾ པཱཔེཏུཾ, བྷགཝཏོ པན ཏིལོཀགྒསྶ ཨནེཀསཧསྶཔཱརམིཏཱནུབྷཱཝེན པཝཏྟཾ གུཎཾ ཀོ ནཱམ པུགྒལོ སཀྑིསྶཏི ནིཊྛཾ པཱཔེཏྭཱ ཀཐེཏུནྟི. ཨེཝཾ མཧཱདྷམྨརཱཛསྶཙ ཨགྒམཧེསིཡཱཙེཝ ཨུཔརཱཛཱདཱིནཉྩ གུཎེ ཝིསྶཊྛེན ཝིཏྠཱརཏོ ཀཐིཡམཱནེ ཨིམིསྶཱ སཱསནཝཾསཔྤདཱིཔིཀཱཡ ཨནེཀསཏབྷཱཎཝཱརམཏྟམྤི པཏྭཱ པརིཡནྟོ ན པཉྙཱཡེཡྻ, ཡསྨཱཙ ཨཏིཔྤཔཉྩཱ བྷཝེཡྻ, ཏསྨཱ སངྑེཔེནེཝཱཡཾ ཀཐིཏཱ སཱདྷུཛྫནཱནཾ མཧཱཔུཉྙམཡཱཡ པཱིཏིཡཱ ཨནུམོདནཏྠཱཡ. ཨིདཉྷི སུཎནྟེཧི སཱདྷུཛྫནེཧི ཨནུམོདིཏབྦཾ,- ཨསུཀསྨིཾ ཀིར ཀཱལེ ཨསུཀསྨིཾ རཊྛེ ཨསུཀོ ནཱམ རཱཛཱ སཱསནཾ པགྒཎྷིཏྭཱ ཝུཌྜྷིཾ ཝིརཱུལི༹ཾ ཝེཔུལླམཱཔཛྫི, སེཡྻཐཱཔི ནཱམ རུཀྑོ བྷཱུམོདཀཱནཾ ནིསྶཱཡ ཝུཌྜྷིཾ ཝིརཱུལི༹ཾ ཝེཔུལླམཱཔཛྫཱིཏི.

ཨིམསྶ རཉྙོ ཀཱལེ ཉེཡྻདྷམྨཱབྷིམུནིཝརཉྙཱཎཀིཏྟི སིརིདྷཛདྷམྨསེནཱཔཏིམཧཱདྷམྨརཱཛཱདྷིརཱཛགུརུ ནཱམ སངྒྷརཱཛཱ ¶ མཧཱཐེརོ རཉྙཱ ཨབྷིཡཱཙིཏོ སུརཱཛམགྒདཱིཔནིཾ ནཱམ གནྠཾ ཨཀཱསི. མཛ྄ཛྷིམནིཀཱཡཊྛཀཐཱཡ ཨཏྠཾ སིསྶཱནཾ ཝཱཙེཏྭཱ ཡཐཱཝཱཙིཏནིཡཱམེན ཨཏྠཡོཛནཱནཡཾ པོཏྠཀེ ཨཱརོཔཱཔེསི.

མེདྷཱབྷིཝཾསསདྡྷམྨདྷཛམཧཱདྷམྨརཱཛཱདྷིརཱཛགུརུ ནཱམ མཧཱཐེརོ ཛཱཏཀཔཱལི༹ཡཱ ཨཏྠཡོཛནཱནཡཾ མརམྨབྷཱསཱཡ ཨཀཱསི.

སངྒྷརཱཛསྶ སིསྶོ པཉྙཱསཱམིསིརིཀཝིདྷཛམཧཱདྷམྨརཱཛཱདྷིརཱཛགུརཱུཏི རཉྙཱ ལདྡྷནཱམལཉྪོ སོཡེཝཱཧཾ དྷམྨ རཉྙཱ ཨགྒམཧེསིཡཱཙ ཨབྷིཡཱཙིཏོ སཱིལཀཐཾ ནཱམ གནྠཾ ཨུཔཱཡཀཐཾ ནཱམ གནྠཉྩ ཨཀཱསིཾ. རཉྙོ ཨཱཙརིཡབྷཱུཏེན དིསཱཔཱམོཀྑེན ནཱམ ཨུཔཱསཀེན ཨབྷིཡཱཙིཏོ སོཡེཝཱཏཾ ཨཀྑརཝིསོདྷནིཾ ནཱམ གནྠཾ ཨཱཔཏྟིཝིནིཙྪཡཾ ནཱམ གནྠཉྩ. ཏཐཱ སངྒྷརཉྙཱ ཙོདིཏོ སོཡེ ཝཱཧཾ ནཱགརཱཛུཔྤཏིཀཐཾ ཝོཧཱརཏྠབྷེདཉྩ ཝིཝཱདཝིནིཙྪཡཉྩ ཨཀཱསིཾ. ཏཐཱ པཉྩཛམྦུགཱམབྷོཛཀེན ལེཁཀཱམཙྩེན དྭཱིཧིཙ ཨཱརོཙནལེཁཀཱམཙྩེཧི ཨབྷིཡཱཙིཏོ སོ ཡེཝཱཧཾ རཱཛསེཝཀདཱིཔནིཾ ནཱམ གནྠཾ ཨཀཱསིཾ. ཏཐཱ དཱིགྷནཱཝཱནགརབྷོཛཀེན མཧཱཨམཙྩེན ཨབྷིཡཱཙིཏོ སོཡེཝཱཧཾ ནིརཡཀཐཱདཱིཔཀཾ ནཱམ གནྠཾ ཨཀཱསིཾ. ཏཐཱ སིལཱལེཌྜུཀནཱམཀེན ཨུཔཱསཀེན ཨབྷིཡཱཙིཏོ སོཡེཝཱཧཾ ཨུཔོསཐཝིནིཙྪཡཾ ནཱམ གནྠཾ ཨཀཱསིཾ. ཏཐཱ བཧཱུཧི སོཏུཛནེཧི ཨབྷིཡཱཙིཏོ སོཡེཝཱཧཾ སདྡནཱིཏིཡཱ སཾཝཎྞནཾ པཱལི༹བྷཱསཱཡ ཨཀཱསིནྟི.

ཨེཀསྨིཉྩ སམཡེ ཀལིཡུགེ ཝཱིསཱདྷིཀེ དྭིསཏེ སཧསྶེཙ སམྤཏྟེ རཉྙོ ཨེཏདཧོསི,- ཨིདཱནི བུདྡྷསྶ བྷགཝཏོ སཱསནེ ཀེསཉྩི བྷིཀྑཱུནཾ སཱམཎེརཱནཉྩ ཀུལདཱུསནཱདིཨསཱརུཔྤཀམྨེཧི ཨུཔྤཱདིཏཱ ཙཏྟཱརོ པཙྩཡཱ བཧཱུ དིསྶནྟི ¶ , ཀེཙིཔི ཨལཛྫཱི པུགྒལཱ ཛཱཏརཱུཔཱདིནིསྶགྒིཡཝཏྠུམྤིསཱདིཡནྟི, ཀེཙིཔི ཝིནཱ པཙྩཡཾ ཝིཀཱལེ ཏམྦུལཾ ཁཱདནྟི, སནྣིདྷིཉྩ ཀཏྭཱ དྷཱུམཱནིཙ པིཝནྟི, ཨགིལཱནཱ ཧུཏྭཱ སཨུཔཱཧནཱ གཱམཾ པཝིསནྟི, ཚཏྟཾ དྷཱརེནྟི, ཨཉྙེཔི ཨཝིནཡཱནུལོམཱཙཱརེ ཙརནྟི, ཨིདཱནི བྷིཀྑཱུནཾ སཱམཎེརཱནཉྩ བུདྡྷསྶ སམྨུཁེ བུདྡྷཾ སཀྑིཾ ཀཏྭཱ ཨིམེ ཨནཱཙཱརེ ན ཙརིསྶཱམཱཏི པཊིཉྙཾ ཀཱརཱཔེཏྭཱ བྷགཝཏོ སིཀྑཱཔདཱནི རཀྑཱཔེཏུཾ ཝཊྚཏི, ཨེཝཉྩ སཏི བྷིཀྑཱུ སཱམཎེརཱཙ མཡཾ བུདྡྷསྶ སམྨུཁེ ཨེཝཾ པཊིཉྙཾ ཀརོམ, པཊིཉྙཉྩ ཀཏྭཱ ཝིཀཱརཾ ཨཱཔཛྫནྟཱནཾ ཨམྷཱཀཾ ཨིམསྨིཾཡེཝ ཨཏྟབྷཱཝེ ཨིམསྨིཾཡེཝ པཙྩཀྑེ ཀིཉྩི བྷཡཾ ཨུཔྤཛྫེཡྻཱཏི པཙྩཀྑབྷཡཾ ཨཔེཀྑིཏྭཱ ཏེ སིཀྑཱཔདཾ རཀྑིསྶནྟཱིཏི. ཨེཝཾ པན ཙིནྟེཏྭཱ བྷིཀྑཱུནཾ སཱམཎེརཱནཉྩ ཨེཝཾ པཊིཉྙཾ ཀཱརཱཔེཏུཾ ཡུཛྫཏི ཝཱ མཱ ཝཱཏི མཡཾ ན ཛཱནཱམ, ཨིདཱནི སངྒྷརཱཛཱདཡོ མཧཱཐེརེ སནྣིཔཱཏཱཔེཏྭཱ པུཙྪིསྶཱམཱིཏི པུན ཙིནྟེསི.

ཨཐ སབྦེཔི མཧཱཐེརེ སངྒྷརཱཛསྶ ཝིཧཱརེ སནྣིཔཱཏཱཔེཏྭཱ ཨིམཾ ཀཱརཎཾ པུཙྪཐཱཏི ཨམཙྩེ ཨཱཎཱཔེསི. ཨཐ ཨམཙྩཱ མཧཱཐེརེ སནྣིཔཱཏཱཔེཏྭཱ པུཙྪིཾསུ,-ཨིདཱནི བྷནྟེ སཱསནེ བྷིཀྑཱུནཾ སཱམཎེརཱནཉྩ ཨཝིནཡཱནུལོམཱཙཱརཱནི དིསྭཱ བུདྡྷསྶ སམྨུཁེ བུདྡྷཾ སཀྑིཾ ཀཏྭཱ རཱཛཱ ཡཐཱ ཨིམེ ཨནཱཙཱརེ ན ཙརིསྶཱམཱཏི པཊིཉྙཾ ཀཱརཱཔེཏྭཱ བྷགཝཏོ སིཀྑཱཔདཱནི རཀྑཱཔེཏུཾ ཨིཙྪཏི, ཏཐཱ ཀཱརཱཔེཏུཾ ཡུཛྫཏི ཝཱ མཱ ཝཱཏི.

ཨཐ སངྒྷརཱཛཔྤམུཁཱདཡོ མཧཱཐེརཱ ཨེཝམཱཧཾསུ,- ཡསྨཱ སཱསནསྶ པརིསུདྡྷབྷཱཝཾ ཨིཙྪནྟོ ཨེཝཾ ཀརོཏི, ཏསྨཱ ཏཐཱ ཀཱརཱཔེཏུཾ ཡུཛྫཏཱིཏི.

པཎྜིཏཱབྷིདྷཛམུནིནྡགྷོསམཧཱདྷམྨརཱཛགུརུཏྠེརཱདཡོ པན ཀཏིཔཡཏྠེརཱ ཨེཝམཱཧཾསུ, – ཨིདཱནི བྷིཀྑཱུ ནཱམ སདྡྷཱབལཱདཱིནཾ ¶ ཐོཀཏཱཡ བྷགཝཏོ ཨཱཎཱསངྑཱཏཾ སཙིཏྟཀཱཙིཏྟཀཱཔཏྟིཨིཾ ཨཱཔཛྫིཏྭཱ བྷགཝཏཱཡེཝ ཨནུཉྙཱཏེཧི དེསནཱཝུཊྛཱནཀམྨེཧི པཊིཀརིཏྭཱ སཱིལཾ པརིསུདྡྷཾ ཀཏྭཱ ལཛྫཱིཔེསལབྷཱཝཾ ཀརོནྟི, ན ཀདཱཙི ཨཱཔཏྟིཾ ཨནཱཔཛྫིཏྭཱ, ཏསྨཱ བྷགཝཏཱ པཊིཀྑིཏྟཾ ཀམྨཾ སཉྩིཙྩན ཝཱིཏིཀྐམིསྶཱམཱཏི བུདྡྷསྶ སམྨུཁེ པཊིཉྙཱཀརཎཾ ཨཏིབྷཱརིཡཾ ཧོཏི, སཙེཔི པུབྦེ པཊིཉྙཾ ཀཏྭཱ པཙྪཱ ཝིསཾཝཱདེཡྻ, ཨེཝཾ སཏི པཊིསྶཝཝིསཾཝཱདེ སུདྡྷཙིཏྟསྶ དུཀྐཊཾ པཊིསྶཝཀྑཎེཨེཝ པཱཙིཏྟི ཨིཏརསྶཙཱཏི ཝཙནཏོ ཏཾ ཏཾ ཨཱཔཏྟིཾ པཊིསྶཝཝིསཾཝཱདནདུཀྐཔེཏྟིཡཱ སཧེཝ ཨཱཔཛྫེཡྻ, ཨཐ པཊིཉྙཱཀརཎཏོཡེཝ ཨཱཔཏྟིབཧུལཏཱ བྷཝེཡྻ, ཡཐཱ པན རོགཾ ཝཱུཔསམིཏུཾ ཨསཔྤཱཡབྷེསཛྫཾ པཊིསེཝཏི, ཨཐསྶ རོགོ ཨཝཱུཔསམིཏྭཱ ཨཏིཀྐམེཡྻ, ཨེཝཾ ཨཱཔཏྟིཾ ཨནཱཔཛྫིཏུཀཱམོ བུདྡྷསྶ སམྨུཁེ པཊིཉྙཾ ཀརོཏི, ཨཐསྶ ཨཱཔཏྟིབཧུལཱཡེཝ བྷཝེཡྻཱཏི, ཀིཉྩ བྷིཡྻོ ཨབྷཡདསྶཱཝིནོ བྷིཀྑཱུ ཨནེཀསཏབུདྡྷསྶ སམྨུཁེ ཨནེཀསཏཝཱརཱནིཔི པཊིཉྙཾ ཀཏྭཱ སིཀྑཱཔདཾ ཝཱིཏིཀྐམིཏུཾ ཝིསཧིསྶནྟིཡེཝཱཏི.

ཨཐ སངྒྷརཱཛཱ མཧཱཐེརོ ཨཏྟནོ སིསྶཾ པཉྙཱསཱམིསིརིཀཝིདྷཛམཧཱདྷམྨརཱཛཱདྷིརཱཛགུརུཾ ནཱམ མཾ ཨུཡྻོཛེསི, ཏསྶ ཐེརསྶ ཝཙནེ པཊིཝཙནཾ དཱཏུཾ.

ཨཐཱཧཾ ཨེཝཾ ཝདཱམི,- དྭེ པུགྒལཱ ཨབྷབྦཱ སཉྩིཙྩ ཨཱཔཏྟིཾ ཨཱཔཛྫིཏུཾ བྷིཀྑཱུཙ བྷིཀྑུནིཡོཙ ཨརིཡཱ པུགྒལཱ, དྭེ པུགྒལཱ སབྦཱ སཉྩིཙྩ ཨཱཔཏྟིཾ ཨཱཔཛྫིཏུཾ བྷིཀྑཱུཙ བྷིཀྑུནིཡོཙ པུཐུཛྫནཱཏི པརིཝཱརཔཱལི༹ཡཾ ཝུཏྟཏྟཱ ཨརིཡཔུགྒལཱནཾཝིཡ པུཐུཛྫནཱནཾ ཝིསྶཊྛེན པཊིཉྙཾ ཀཱཏུཾ ན ཝཊྚཏཱིཏི མནསིཀརིཏྭཱ པུཐུཛྫནབྷིཀྑཱུནཾ པཊིཉྙཱཀརཎཾ ཨཏིབྷཱརིཡནྟི ཝེདེཡྻཙེ, སབྦེཧིཔི ཨརིཡཔུཐུཛྫནེཧི བྷིཀྑཱུཧི ཨུཔསམྤདཱམཱལ༹ཀེ ཨཱདིཏོཝ ¶ ཙཏྟཱརི ཨཀརཎཱིཡཱནི ཨཱཙིཀྑིཏབྦཱནཱིཏི ཝུཏྟེསུ ཙཏཱུསུ ཨཀརཎཱིཡེསུ ཨནྟམསོ ཏིཎསལཱཀཾ ཨུཔཱདཱཡ ཡོ བྷིཀྑུ པཱདཾ ཝཱ པཱདཱརཧཾ ཝཱ ཨཏིརེཀཔཱདཾ ཝཱ ཨདིནྣཾ ཐེཡྻསངྑཱཏཾ ཨཱདིཡཏི, ཨསྶམཎོ ཧོཏི ཨསཀྱཔུཏྟིཡོཏི, ཨནྟམསོ ཀུནྟཀིཔིལླིཀཾ ཨུཔཱདཱཡ ཡོ བྷིཀྑུ སཉྩིཙྩ མནུསྶཝིགྒཧཾ ཛཱིཝིཏཾ ཝོརོཔེསི, ཨནྟམསོ གབྦྷཔཱཏནཾ ཨུཔཱདཱཡ ཨསྶམཎོ ཧོཏི ཨསཀྱཔུཏྟིཡོཏི, ཨནྟམསོ སུཉྙཱགཱརེ ཨབྷིརམཱམཱིཏི ཡོ བྷིཀྑུཔཱཔིཙྪོ ཨིཙྪཱཔཀཏོ ཨསནྟཾ ཨབྷཱུཏཾ ཨུཏྟརིམནུསྶདྷམྨཾ ཨུལླཔཏི, ཨསྶམཎོ ཧོཏི ཨསཀྱཔུཏྟིཡོཏིཙ ཨུཔཛ྄ཛྷཱཙརིཡེན ཨོཝདིཡམཱནེཧི ཨབྷིནཝོཔསམྤནྣེཧི ཨཱམ བྷནྟེཏི པཊིཉྙཱཀཐཱཡེཝ. སཱམཎེརེཧིཔི པབྦཛྫཀྑཎེཡེཝ ཨུཔཛ྄ཛྷཱཡསྶ སནྟིཀེ པཱཎཱཏིཔཱཏཱཝེརམཎིསིཀྑཱཔདཾ སམཱདིཡཱམཱིཏིཨཱདིནཱ པཋམཾ པཊིཉྙཱ ཀཏཱཡེཝ. ཏཐཱ བྷིཀྑཱུཧི ཏཾཏཾཨཱཔཏྟིཾ ཨཱཔཛྫིཏྭཱ དེསནཱཡ པཊིཀརཎཀཱལེ སཱདྷུ སུཊྛུ བྷནྟེ སཾཝརིསྶཱམཱིཏི ཨབྷིཎྷཾ པཊིཉྙཱ ཀཏཱཡེཝ. སཱམཎེརེཧིཔི ཨུཔཛ྄ཛྷཱཙརིཡསྶ སནྟིཀེ སིཀྑཱགྒཧཎཀཱལེཔི པཱཎཱཏིཔཱཏཱཝེར མཎིསིཀྑཱཔདཾ སམཱདིཡཱམཱིཏིཨཱདིནཱ ཨབྷིཎྷཾ པཊིཉྙཱ ཀཏཱཡེཝ. ཏཱཧི པན པཊིཉྙཱཧི ཨབྷཱཡིཏྭཱ ཨིཏོཡེཝ བྷཱཡཱམཱིཏི ཝུཏྟཝཙནཾ ཨཙྪརིཡཾཝིཡ ཧུཏྭཱ ཁཱཡཏི. ཨིམཱཡ ཧི པཊིཉྙཱཡ ཏཱསཾ པཊིཉྙཱནཾ ཝིསེསཏཱ ན དིསྶཏཱིཏི.

ཨཡཾ པནེཏྠ སནྣིཊྛཱནཏྠོ,- པཊིསྶཝདུཀྐཊཱཔཏྟི ནཱམ སཱཝཏྠིཡཾ པསྶེནདིཀོསལརཉྙཱ ཨིམསྨིཾ ཝིཧཱརེ ཝསྶཾ ཨུཔགཙྪཱཧཱིཏི ཨཱཡཱཙིཏེ སཱདྷཱུཏི པཊིཛཱནིཏྭཱ ལཱབྷབཧུལཏཾ པཊིཙྩ ཨནྟརཱམགྒེ ཨཉྙསྨིཾ ཝིཧཱརེ ཝསྶཾ ཨུཔགནྟྭཱ པཊིསྶཝཝིསཾཝཱདནཔཙྩཡཱ ཨུཔནནྡཾ ནཱམ བྷིཀྑུཾ ཨཱརབྦྷ པཉྙཏྟཱ. སམནྟཔཱསཱདིཀཉྩ ནཱམ ཝིནཡཊྛཀཐཱཡ ཝསྶཱུཔནཱཡིཀཀྑནྡྷཀཝཎྞནཱཡཾ ¶ པཊིསྶཝེཙ ཨཱཔཏྟི དུཀྐཊསྶཱཏི ཨེཏྠ ན ཀེཝལཾ ཨིམཾ ཏེམཱསཾ ཨིདྷ ཝསྶཾ ཝསཐཱཏི ཨེཏསྶེཝ པཊིསྶཝེ ཨཱཔཏྟི, ཨིམཾ ཏེམཱསཾ བྷིཀྑཾ གཎྷཐ, ཨུབྷོཔི མཡཾ ཝསྶཾ ཝསིསྶཱམ, ཨེཀཏོ ཨུདྡིསྶཱཔེསྶཱམཱཏི ཨེཝམཱདིནཱཔི ཏསྶ ཏསྶ པཊིསྶཝེ དུཀྐཊཾ, ཏཉྩ ཁོ པཋམཾ སུདྡྷཙིཏྟསྶ པཙྪཱ ཝིསཾཝཱདནཔཙྩཡཱ, པཋམམྤི ཨསུདྡྷ ཙིཏྟསྶ པན པཊིསྶཝེ པཱཙིཏྟིཡནྟི ཝུཏྟཾ.

ཨིཙྩེཝཾ བྷིཀྑཱུནཾ ཨཉྙམཉྙཾ དཱཡཀེཧིཙ སདྡྷིཾ པཊིཛཱནིཏྭཱ ཝིསཾཝཱདནཔཙྩཡཱ ཨཉྙེསཾ ཨཏྠཧིཏབྷེདེཡེཝ དུཀྐཊཱཔཏྟི ཝུཏྟཱ, ན ཨཏྟནོ ཨིཙྪཱཝསེན སཡམེཝ ཨཧཾ བྷུཉྫིསྶཱམི སཡིསྶཱམཱིཏི ཨེཝམཱདིནཱ ཝཏྭཱ ཡཐཱཝུཏྟཱནུརཱུཔཾ ཨཀཏྭཱ ཝིསཾཝཱདནེཏི. སཙེ པན བྷིཀྑུསཱམཎེརཱནཾ པཋམམེཝ ཨཱམ བྷནྟེཏིཨཱདིནཱ པཊིཉྙཾ ཀཏྭཱ པཙྪཱ ཀེནཙིདེཝ ཀརཎཱིཡེན ཏཾཏཾཨཱཔཏྟིཾ ཨཱཔཛྫནྟོ སཧ པཊིསྶཝཝིསཾཝཱདེན དུཀྐཊཱཔཏྟིཡཱ ཨཱཔཛྫེཡྻ, ཨེཝཾ སཏི ཏཏྠ ཏཏྠ སིཀྑཱཔདེསུ དྭེ དྭེ ཨཱཔཏྟིཡོ པཉྙཱཔེཡྻ, ན ཙ ཨེཝམྤི པཉྙཏྟཱ, ཏེནེཝ པཊིསྶཝདུཀྐཊཱཔཏྟི ནཱམ པརེསཾ སནྟིཀེ པརེསཾ མཏིཾ གཧེཏྭཱ པཊིཛཱནིཏྭཱ ཝིསཾཝཱདནཊྛཱནེཡེཝ པཉྙཏྟཱཏི དཊྛབྦཱ.

ཨིདཱནི རཱཛཱ སཱསནསྶ སུདྡྷིཾ ཨིཙྪནྟོ ཨིམིནཱ ཨུཔཱཡེན བྷིཀྑུསཱམཎེརཱནཾ སཱིལཾ སཾཝརཱཔེནྟོ པཙྩཀྑསམྤརཱཡིཀབྷཡཾ ཨནུཔེཀྑིཏྭཱ སཾཝརཾ ཨཱཔཛྫེཡྻུནྟི ཙིནྟེཏྭཱ བུདྡྷསྶ སམྨུཁེ པཊིཉྙཾ ཀཱརཱཔིཏཏྟཱ ན ཀོཙི དོསོ དིསྶཏི. བྷིཀྑུསཱམཎེརཱནམྤི བྷིཡྻོསོམཏྟཱཡསཱིལཾ སཾཝརིཏྭཱ སཱིལཔརིསུདྡྷི བྷཝེཡྻཱཏི. ཨཐ རཱཛཱ སབྦེསཾ བྷིཀྑུསཱམཎེརཱནཾ བུདྡྷསྶ སམྨུཁེ པཊིཉྙཾ ཀཱརཱཔེཏྭཱ སཱིལཾ རཀྑཱཔེསཱིཏི.

ཨིཙྩེཝཾ ཨིམསྶ རཉྙོ ཀཱལེ པུབྦེ ཨལཛྫིནོཔི སམཱནཱ བྷཡཾ ཨནུཔེཀྑིཏྭཱ ཡེབྷུཡྻེན ལཛྫིནོཝ བྷཝནྟཱིཏི.

བུདྡྷསྶ ¶ བྷགཝཏོ པརིནིབྦཱནཏོ ཏིསཏཱདྷིཀཱནཾ དྭིཝསྶསཧསྶཱནཾ ཨུཔརི ནཝུཏིམེ སཾཝཙྪརེ བཧིནདཱིཏཱིརེ གཱམསཱིམཏོ པཊྛཱཡ ཡཱཝ ཨནྟོཨུདཀུཀྑེཔཱ, ཏཱཝ ཀམྨཾ ཀརོནྟཱནཾ བྷིཀྑཱུནཾ སུཁེན གམནཏྠཱཡ གཧཊྛཱ གཱམསཱིམཱཡ ཨུདཀུཀྑེཔསཱིམཾ སམྦནྡྷིཏྭཱ སེཏུཾ ཨཀཾསུ.

ཨཐ ཏཏྠ ཉཱཎཱལངྐཱརསུམནམཧཱདྷམྨརཱཛགུརུགཎཱ ཙརིཡནཱམཀོ ཐེརོ ཨུཔསམྤདཱདིཝིནཡཀམྨཱནི ཀཏིཔཡ ཝསྶེསུ ཨཀཱསི.

དྷཱིརཱནནྡཏྠེརོ པན ཏཏྠ སངྐརདོསོ ཧོཏཱིཏི ཀམྨཾ ཀཱཏུཾ ན ཨིཙྪཏི. ཏཐཱ པཊྛཱཡ ཡེ ཡེ ཉཱཎཱལངྐཱརསུམནམཧཱདྷམྨརཱཛགུརུགཎཱཙརིཡསྶ མཏིཾ རུཙྩནྟི, ཏེ ཏེ ཏསྶ པཀྑིཀཱ བྷཝནྟི. ཡེ ཡེ པན དྷཱིརཱནནྡཏྠེརསྶམཏིཾ རུཙྩནྟི, ཏེཏེ ཏསྶ པཀྑིཀཱ བྷཝནྟི. ཨེཝཾལངྐཱདཱིཔེ ཨམརཔུརནིཀཱཡིཀཱ བྷིཀྑཱུ. དྭེདྷཱ བྷིནྡིཏྭཱ ཏིཊྛནྟི.

ཨཐ དྷཱིརཱནནྡཔཀྑེ བྷིཀྑུ ཏཔྤཀྑིཀསྶ སཱིལཀྑནྡྷཏྠེརསྶ སིསྶེ དྷམྨཀྑནྡྷཝནརཏནབྷིཀྑཱུ ཨམྷཱཀཾ ཛམྦུདཱིཔེ རཏནཔུཎྞནགརཾ པེསེསུཾ སངྒྷརཱཛམཧཱཐེརསྶ སནྟིཀེ ཨོཝཱདསྶ པཊིགྒཱཧཎཏྠཱཡ. ཏེ ཙ ཀལིཡུགེ ཨཊྛཱརསཱདྷིཀེ དྭིཝསྶསཏེ སཧསྶེཙ སམྤཏྟེ ཀཏྟིཀམཱསསྶ ཛུཎྷཔཀྑཨཊྛམིཡཾ སཱིཧལ༹དཱིཔཏོ ནིཀྑམིཏྭཱ ཨཱགཙྪནྟཱ ཨེཀཱུནཝཱིསཱདྷིཀེ དྭིཝསྶསཏེ སཧསྶེཙ སམྤཏྟེ ཕགྒུནམཱསསྶ ཛུཎྷཔཀྑསཏྟམིཡཾ རཏནཔུཎྞནགརཾ སམྤཏྟཱ.

ཨཐ དྷམྨརཱཛཱ སངྒྷརཱཛསྶ ཨཱརཱམེ ཙཏུབྷཱུམིཀཾ ཝིཧཱརཾ ཀཱརཱཔེཏྭཱ ཏཏྠ ཏེ ཝསཱཔེསི. ཙཏཱུཧི པཙྩཡེཧིཙ སངྒཧཾ ཨཀཱསི. སངྒྷརཱཛཱཙ ཏེསཾ དྭིནྣཾ པཀྑིཀཱནཾ ཝཙནཾ སུཏྭཱ བཧཱུཧི གནྠེཧི སཾསནྡིཏྭཱ ཝིཝཱདཾ ཝིནིཙྪིནྡི. ཏཱདིསེ ཋཱནེ སངྐརདོསསྶ ཨཏྠིབྷཱཝཾ པཀཱསེཏྭཱ སནྡེསཔཎྞམྤི ཏེསཾ ཨདཱསི.

མཧཱདྷམྨརཱཛཱཙ ¶ ཏེསཾ པུན སིཀྑཾ སངྒྷརཱཛསྶ སནྟིཀེ གཎྷཱཔེཏྭཱ པིཊཀཏྟཡཔོཏྠཀཱདཱིནི དཱཏབྦཝཏྠཱུནི དཏྭཱ ཏསྨིཾཡེཝ སཾཝཙྪརེ པཋམཨཱསཱལི༹མཱསསྶ ཀཱལ༹པཀྑདསམིཡཾ ནཱཝཱཡ ཏེ པེསེསི.

ཏཏོ པཙྪཱཙ ཉཱཎཱལངྐཱརསུམནམཧཱདྷམྨརཱཛགུརུགཎཱཙརིཡཔཀྑེ བྷིཀྑཱུཔི ཏཔྤཀྑིཀསྶ པཉྙཱམོལིཏྠེརསྶ སིསྶེ ཝིམལཛོཏིདྷམྨནནྡབྷིཀྑཱུ པེསེསུཾ སདྡྷིཾ ཨརིཡཱལངྐཱརེན ནཱམ སཱམཎེརེན ཙཏཱུཧིཙ ཨུཔཱསཀེཧི. ཏེཙ ཀལིཡུགེ ཝཱིསཱདྷིཀེ དྭིསཏེ སཧསྶེཙ སམྤཏྟེ ཀཏྟིཀམཱསསྶ ཛུཎྷཔཀྑཔཉྩམིཡཾ སམྤཏྟཱ.

ཏདཱཔི སངྒྷརཱཛསྶ ཨཱརཱམེཡེཝ ཨེཀཾ ཝིཧཱརཾ ཀཱརཱཔེཏྭཱ ཏེ ཝསཱཔེསི. ཙཏཱུཧི པཙྩཡེཧིཙ སངྒཧཾ ཨཀཱསི. སངྒྷརཱཛཱཔི པུན ཝིནིཙྪཡཾ ཨདཱསི ཡཐཱཝུཏྟནཡེན. དྷམྨརཱཛཱ ཏེསམྤི བྷིཀྑཱུནཾ སངྒྷརཱཛསྶ སནྟིཀེ པུན སིཀྑཾ གཎྷཱཔེཏྭཱ སཱམཎེརཉྩ ཨུཔསམྤཱདེཏྭཱ ཙཏཱུཧི པཙྩཡེཧི སངྒཧཾ ཀཏྭཱ པཧིཎི.

ཏཏོ པཙྪཱཙ ཀལིཡུགེ བཱཝཱིསཱདྷིཀེ དྭིཝསྶསཏེ སཧསྶེཙ སམྤཏྟེ མཱགྷམཱསསྶ ཀཱལ༹པཀྑཨེཀཱདསམིཡཾ སཱིཧལ༹དཱིཔཏོཡེཝ དྭེ བྷིཀྑཱུ ཏཡོ སཱམཎེརཱ ཙཏྟཱརོ ཨུཔཱསཀཱ སརཛཏསུཝཎྞཀརཎྜཀཾ སརཛཏསུཝཎྞཙེཏིཡདཱཏུཾ ཧཏྠིདནྟམཡཾ བུདྡྷརཱུཔཾ མཧཱབོདྷིཔཏྟཱནི མཧཱབོདྷིཏཙཾ མཧཱབོདྷིཔཏིཊྛཱནསཱུམིཾ སཱིཧལ༹དཀྑིཎསཱཁཱབོདྷིཔཏྟཱནི དུཏིཡསཏྟཱཧཨནིམིསཊྛཱནབྷཱུམིཉྩ དྷམྨཔཎྞཱཀཱརཏྠཱཡ གཧེཏྭཱ རཏནཔུཎྞཾ ནཱམ མཧཱརཱཛཊྛཱནཱིནགརཾ སམྤཏྟཱ. ཏེསམྤི དྷམྨརཱཛཱ ཙཏཱུཧི པཙྩཡེཧི སངྒཧཾ ཀཏྭཱ སངྒྷརཉྙོ ཨཱརཱམེ ཝསཱཔེསི. བྷིཀྑུནཉྩ པུན སིཀྑཾ གཎྷཱཔེསི. སཱམཎེརཱནཉྩ ཨུཔསམྤདཀམྨཾ གཧཊྛཱནཉྩ པབྦཛྫཀམྨཾ གཎྷཱཔེསི.

ཨིཙྩེཝཾ མརམྨརཊྛེ བྷགཝཏོ པརིནིབྦཱནཏོ པཊྛཱཡ ཡཱཝཛྫཏནཱ ¶ སཱསནསྶ ཐེརཔརམྤརཝསེན པཏིཊྛཱནཏཱ ཝེདིཏབྦཱ.

ཨིཙྩེཝཾ མརམྨམཎྜལེ ཨརིམདྡནཔུརེ ཨརཧནྟཏྠེརགཎོ ཨུཏྟརཱཛཱིཝཏྠེརཚཔྤདཏྠེརགཎོ སིཝལིཏྠེརགཎོ ཨཱནནྡཏྠེརགཎོ ཏཱམལིནྡཏྠེརགཎོཏི པཉྩ གཎཱ ཨཧེསུཾ.

ཨིདཱནི ཨརིམདྡནནགརེ པཉྩགཎཏོ པཊྛཱཡ ཝིཛཡཔུརཛེཡྻཔུརརཏནཔཱུརེསུ ཐེརཔརམྤརཝསེན སཱསནསྶ ཨནུཀྐམེན ཨཱགཏབྷཱཝཾ དསྶཡིསྶཱམི. སིརིཁེཏྟནགརེ ཧི ‘སོ ཡཱཾ ནོཾ’ ནཱམ རཱཛཱ པརཀྐམཝཾསིཀསྶ སཱརདསྶིཏྠེརསྶ ཨནྟེཝཱསིཀཾ སདྡྷམྨཊྛིཏིཏྠེརཾ ཨཏྟནོ ཨཱཙརིཡཾ ཀཏྭཱ པཱུཛེསི.

ཀལིཡུགསྶ ཙཏུཝསྶཱདྷིཀཨཊྛསཏཀཱལེ སིརིཁེཏྟནགརཏོ ཨཱགནྟྭཱ སོ རཏནཔཱུརེ རཛྫཾ ཀཱརེསི. ཨཐ ཨཏྟནོ པུཏྟཾ ཨནེཀིབྷཾ ནཱམ རཱཛཀུམཱརཾ མཧཱརཱཛ ནཱམེན སིརིཁེཏྟནགརཾ བྷུཉྫཱཔེསི. དཀྑིཎདིསཱབྷཱགེ ‘ཀཱུ ཝྛེ ཊ-ཡོ མོ’ ནགརཾ, པཙྪིམདིསཱབྷཱགེ ‘ཕོ ཁོཾ’ ནཱམ ཋཱནཾ, ཨུཏྟརདིསཱབྷཱགེ ‘མ ལོཾ’ ནགརཾ, པུརཏྠིམདིསཱབྷཱགེ ‘ཀོཾ ཁོཾ’ ནཱམ ཋཱནཾ, ཨེཏྠནྟརེ ནིསིནྣཱནཾ གིཧཱིནཾ མམ པུཏྟསྶ ཨཱཎཱ པཝཏྟཏུ, བྷིཀྑཱུནཾ མམཱཙརིཡསྶ སདྡྷམྨཊྛིཏིཏྠེརསྶ ཨཱཎཱ པཝཏྟཏཱུཏི ནིཡྻཱདེསི.

ཏསྶཙ སདྡྷམྨཊྛིཏིཏྠེརསྶ ཨརིཡཝཾསཏྠེརོ མཧཱསཱམིཏྠེརོཏི དྭེ སིསྶཱ ཨཧེསུཾ. ཏེསུ མཧཱསཱམིཏྠེརོ པུབྦེ ཝུཏྟནཡེན སཱསནཝཾསཾ ཨཱནེསྶཱམཱིཏི སཱིཧལ༹དཱིཔཾ གནྟྭཱ སཱིཧལ༹དཱིཔཏོ སདྡྷིཾ པཉྩཧི བྷིཀྑཱུཧི སདྡྷམྨཙཱརིཾ ནཱམ ཐེརཾ ཨཱནེཏྭཱ ཨབྷིནཝསིཀྑཾ གཎྷིཏྭཱ སིརིཁེཏྟནགརེ སཱིཧལ༹དཱིཔཝཾསིཀཾ སཱསནཾ ཝཌྜྷཱཔེཏྭཱ ནིསཱིདི. ཏསྶ མཧཱསཱརིཏྠེརསྶ སིསྶོ ཨཏུལཝཾསོ ནཱམ ཐེརོ ཙཏཱུསུ དིསཱསུ ཨཧིཎྜིཏྭཱ པརིཡཏྟིཾ ཨུགྒཎྷིཏྭཱ སིརིཁེཏྟནགརེཡེཝ ¶ ཏམྦུལབྷུཉྫམཱཏིཀཱསམཱིཔེ སཱསནཾ པགྒཎྷིཏྭཱ ནིསཱིདི. ཏསྶ ཨཏུལཝཾསཏྠེརསྶ སིསྶོ རཏནརཾསཱི ནཱམ ཐེརོཙ པརིཡཏྟིཝེསཱརཛྫཾ པཏྭཱ སིརིཁེཏྟནགརེཡེཝ སཱསནཾ པགྒཎྷིཏྭཱ ནིསཱིདི. ཏསྶཙ རཏནརཾ སིཏྠེརསྶ སིསྶོ སཏྭཝདྷམྨརཱཛསྶ ཨཱཙརིཡོ ཨབྷིསངྐེཏོ ནཱམ ཐེརོ པརིཡཏྟིཝེསཱརཛྫཾ པཏྭཱ སིརིཁེཏྟནགརཡེཝ སཱསནཾ པགྒཎྷིཏྭཱ ནིསཱིདི. ཏསྶ པན སིསྶོ མུནིནྡགྷོསོ ནཱམ ཐེརོ ཨཏྠི. ཀལིཡུགེ སཏྟཏཱདྷིཀེ ནཝསཏེ སམྤཏྟེ པཙྪིམཔཀྑཱདྷིཀརཱཛཱ སིརིཁེཏྟནགརཾ ཨབྷིབྷཝིཏྭཱ ནནྡཡོདྷེན ནཱམ ཨམཙྩེན སདྡྷིཾ ཏཾ མུནིནྡགྷོསཏྠེརཾ ཨཱནེཏྭཱ རཏནཔཱུརེ པཏིཊྛཱཔེསི.

སོ ཀིར པཙྪིམཔཀྑཱདྷིཀརཱཛཱ ཨེཝཾ ཀཐེསི,- ཨཧཾ སིརིཁེཏྟནགརཾ ལབྷིཏྭཱ ཨེཀཾཡེཝ བྷིཀྑུཾ ཨེཀཾཡེཝ གིཧིཾ ལབྷཱམཱིཏི.

སོ པན ཐེརོ སཱམཎེརནཱམེན མུནིནྡགྷོསོ ནཱམ. ཨུཔསམྤནྣཀཱལེ པན མཱཏུལབྷཱུཏསྶ ཐེརསྶ ནཱམེན ཨུཔཱལི ནཱམ. དིནྣནཱམེན པན ཏིཔིཊཀཱལངྐཱརོ ནཱམ. ཏིརིཡཔབྦཏཝིཧཱརེ པན ཝཱསཏྟཱ ཋཱནནཱམེན ཏིརིཡཔབྦཏཏྠེརོ ནཱམ.

སོ ཀིར ཨེརཱཝཏཱིནདཱིཏཱིརེ ཙཏུབྷཱུམིཀཝིཧཱརེ པཋམཾ ནིསཱིདིཏྭཱ པཙྪཱ ཀལིཡུགསྶ ཝསྶསཧསྶེ ཀཱལེསཊྛིཝསྶཱཡུཀོ ཧུཏྭཱ ཏིརིཡཔབྦཏཝིཧཱརེ ནིསཱིདི. སཱམཎེརཀཱལེ སོ ཛལུམསྱཱམབྷཡེན རཏནཔཱུརཏོ ནིཀྑམིཏྭཱ ཀེཏུམཏཱིནགརཾ པཏྭཱ ཏཏྠ ཏིསཱསནདྷཛཏྠེརསྶ སིསྶབྷཱུཏསྶ དྷམྨརཱཛགུརུཏྠེརསྶ སནྟིཀེ གནྠཾ ཨུགྒཎྷིཾ. པཱལི༹ཨཊྛཀཐཱཊཱིཀཱསུ ཨཏིཚེཀཏཱཡ དཧརཀཱལེཡེཝཙ ཝེསྶནྟརཛཱཏཀཾ ཀབྱཱལངྐཱརེན བནྡྷིཏྭཱ ཀཐནཏོ ཨཏིཝིཡ པཱཀཊོ ཨཧོསི. ཏསྶ པན ¶ ཐེརསྶ སིསྶོ ཨུཙྩནགརཝཱསཱི མཧཱཏིསྶཏྠེརོཏི སངྒིརཛནཔདེ ཨརཉྙཝཱསཾ ཝསིཏྭཱ པརིཡཏྟིཾ ཝཱཙེཏྭཱ སཱསནཾ པགྒཎྷི. ཏསྶ པན སིསྶོ རེམིནགཱམེ གཱམཝཱསཱི ཙནྡཏྠེརོ ནཱམ. ཏསྶ སིསྶོ ཏཾགཱམཝཱསཱི གུཎསིརིཏྠེརོ ནཱམ. ཏསྶ སིསྶོ ཏཾགཱམཝཱསཱི ཀལྱཱཎདྷཛཏྠརོ ནཱམ. སོ པན ཐེརོ པདུམནགརེ སཧསྶོརོདྷབོདྷོདདྷིགཱམེསུ པརིཡཏྟིཾ ཝཱཙེཏྭཱ ནིསཱིདི. ཏསྶ སིསྶོ བོདྷོདདྷིགཱམཝཱསིནོ ཨིནྡོབྷཱསཀལྱཱཎཙཀྐཝིམལཱཙཱརཏྠེརཱ སཧསྶོརོདྷགཱམཝཱསིནོ གུཎསཱརཙནྡསཱརཏྠེརཱ ཝཾཏུམགཱམཝཱསཱི ཝརཨེསིཏྠེརོ ཀནྣིནགརེ ཛརརཱཛགཱམ ཝཱསཱི གུཎསིརིཏྠེརོཙཱཏི ཨིམེ ཐེརཱ ཀལྱཱཎདྷཛཏྠེརསྶ སནྟིཀེ པུན སིཀྑཾ གཧེཏྭཱ པརིཡཏྟིཾ ཨུགྒཎྷིཏྭཱ ཀོཝིདཱ ཨཧེསུཾ.

ཏསྶེཝ ཀལྱཱཎདྷཛཏྠེརསྶ སིསྶོ སངྒིརཛནཔདེ སམིཝནགཱམེ ནིསིནྣོ དྷམྨདྷརོ ནཱམ ཐེརོ མཧལླཀཀཱལེ པདུམནགརེ ཀུསུམམཱུལགཱམེ ནིསཱིདིཏྭཱ གནྠཾ ཝཱཙེཏྭཱ སཱསནཾ པགྒཎྷི.

ཏེསུ གུཎསིརིཏྠེརོ ཨམརཔུརམཱཔཀསྶ རཉྙོ ཀཱལེ གུཎཱབྷིལངྐཱརསདྡྷམྨམཧཱརཱཛཱདྷིརཱཛགུརཱུཏི ནཱམལཉྪཾ གཎྷིཏྭཱ ཛེཡྻབྷཱུམིཝཱསཀིཏྟིཝིཧཱརེ པཊིཝསི.

ཏསྶ པན ཐེརསྶ སིསྶོ ཉཱཎཱབྷིཝཾསདྷམྨསེནཱཔཏིམཧཱདྷམྨརཱཛཱགུརུ ནཱམ མཧཱཐེརོ. ཏསྶེཝ རཉྙོ ཀཱལེ སངྒྷརཱཛཱ ཨཧོསི. སོ པན ཐེརོ སཱིཧལ༹དཱིཔེ ཨམརཔུརནིཀཱཡིཀཱནཾ པབྷཝོ. གུཎཱབྷིལངྐཱརསདྡྷམྨམཧཱདྷམྨརཱཛཱདྷིརཱཛགུརུཏྠེརསྶེཝ སིསྶོ ཏིཔིཊཀཱལངྐཱརམཧཱདྷམྨརཱཛགུརུ ནཱམ ཐེརོ. ཏསྶ སིསྶོ སཱུརིཡཝཾསཱབྷིསིརིཔཝརཱལངྐཱརདྷམྨསེནཱཔཏི མཧཱདྷམྨརཱཛཱདྷིརཱཛགུརུ ནཱམ ཐེརོ ཨམརཔུརདུཏིཡམཱཔཀསྶ རཉྙོ ཀཱལེ ¶ སངྒྷརཱཛཱ ཨཧོསི. ཏསྶ པན སིསྶོ ཉེཡྻ དྷམྨཱབྷིཝཾསམུནིཝརཉཱཎཀིཏྟིསིརིཔཝརཱལངྐཱརདྷམྨསེནཱཔཏི- མཧཱདྷམྨརཱཛཱདྷིརཱཛགུརུ མཧཱཐེརོ དུཏིཡཾ ཨམརཔུརམཱཔཀསྶ རཏནཔུཎྞམཱཔཀསྶཙ རཉྙོ ཀཱལེསུ སངྒྷ རཱཛཱ ཨཧོསི. སོ པན ཉཱཎཱབྷིཝཾསདྷམྨསེནཱཔཏིམཧཱདྷམྨརཱཛཱདྷིརཱཛགུརུཏྠེརསྶ སངྒྷརཉྙོ སིསྶོཔི ཝརཨེསིཏྠེརསྶ སིསྶོཙ ཨཧོསི.

ཨཡཾ སཱིཧལ༹དཱིཔཏོ སབྦཔཙྪིམཱགཏེཧི སདྡྷམྨཙཱརཱིམཧཱསཱམིཏྠེརེཧི ཡཱཝ ཨམྷཱཀཾ ཨཱཙརིཡཱ ཐེརཔརམྤརཱ དསྶནཀཐཱ.

ཨཡམྤི ཨཔརཱ ཐེརཔརམྤརཱ ཝེདིཏབྦཱ. ཚཔྤདཏྠེརཝཾསིཀོ སདྡྷམྨཀིཏྟི ནཱམ ཐེརོ ཛེཡྻཔུརཾ ཨཱགནྟྭཱ ཙཏུདཱིཔབྷཱུམིཊྛཱནེ ནིསཱིདིཏྭཱ མཧཱཨརིཡཝཾསཏྠེརསྶ སནྟིཀེ པརིཡཏྟིཾ ཨུགྒཎྷིཏྭཱ ཏཏོ པཙྪཱ ཛེཏཝནཝིཧཱརཾ སངྐམིཏྭཱ ཏཏྠ ནིསཱིདིཏྭཱ པརིཡཏྟིཾ ཝཱཙེཏྭཱ སཱསནཾ པགྒཎྷི.

ཏསྶ སདྡྷམྨཀིཏྟིཏྠེརསྶ སིསྶོ ཏིསཱསནདྷཛོ ནཱམ. ཏསྶ སིསྶོ དྷམྨརཱཛགུརུ ནཱམ. ཏསྶ སིསྶོ མུནིནྡགྷོསོ ནཱམ. ཏསྶ སིསྶོ མཧཱཏིསྶོ ནཱམ. ཏསྶ སིསྶོ ཙནྡཔཉྙོ ནཱམ. ཏསྶ སིསྶོ གུཎསིརི ནཱམ. ཏསྶ སིསྶོ ཉཱཎདྷཛོ ནཱམ. ཏསྶ སིསྶོ དྷམྨདྷརོ ནཱམ. ཏསྶ སིསྶོ ཨིནྡོབྷཱསོ ནཱམ. ཏཏོ པཊྛཱཡ ཀལྱཱཎཙཀྐ ཝིམལཱཙཱར གུཎསཱར ཙནྡསཱར ཝརཨེསཱི གུཎསིརི ཉཱཎཱབྷིཝཾས ཉེཡྻདྷམྨཱབྷིཝཾསཏྠེརཱནཾ ཝསེན སཱསནཝཾསོ ཝེདིཏབྦོཏི.

ཨཡཾ པཏྟལངྐསྶ ཚཔྤདཏྠེརསྶ སིསྶབྷཱུཏཱ སདྡྷམྨཀིཏྟིཏྠེརཏོ པཊྛཱཡ ཐེརཔརམྤརདསྶནཀཐཱ.

ཨིདཾ རཏནཔུཎྞནགརེ སཱསནསྶ པཏིཊྛཱནཾ.

ཨེཝཾ ཨཔརནྟརཊྛསངྑཱཏེན ཨེཀདེསེན སཀལམྤི མརམྨརཊྛཾ ¶ གཧེཏྭཱ སཱསནཝཾསོ དསྶེཏབྦོ. བྷགཝཱཔི ཧི ཨཔརནྟརཊྛེ ཙནྡནཝིཧཱརེ ཝསིཏྭཱ ཏམྦདཱིཔརཊྛེ ཏཾཏཾདེསམྤི ཨིདྡྷིཡཱ ཙརིཏྭཱ སཏྟཱནཾ དྷམྨཾ དེསེསིཡེཝཱཏི.

ཨིཏི སཱསནཝཾསེ ཨཔརནྟརཊྛསཱསནཝཾསཀཐཱམགྒོ

ནཱམ ཚཊྛོ པརིཙྪེདོ.

༧. ཀསྨིརགནྡྷཱརརཊྛསཱསནཝཾསཀཐཱམགྒོ

༧. ཨིདཱནི ཡཐཱཝུཏྟམཱཏིཀཱཝསེན ཀསྨཱིརཝནྡྷཱརརཊྛསཱསནཝཾསཀཐཱམགྒཾ ཝཏྟུཾ ཨོཀཱསོ ཨནུཔྤཏྟོ, ཏསྨཱ ཏཾ ཝཀྑཱམི.

ཏཏིཡསངྒཱིཏཱཝསཱནེ ཧི མཧཱམོགྒལིཔུཏྟཏིསྶཏྠེརོ མཛ྄ཛྷནྟི ཀཏྠེརཾ ཀསྨཱིརགནྡྷཱརརཊྛཾ པེསེསི,-ཏྭཾ ཨེཏཾ རཊྛཾ གནྟྭཱ ཨེཏྠ སཱསནཾ པབྷིཊྛཱཔེཧཱིཏི. ཨེཏྠ ཙ ཀསྨཱིརགནྡྷཱརརཊྛཾ ནཱམ ཙཱིནརཊྛསམཱིཔེ ཏིཊྛཏི. ཏེནེཝ ཧི ཨདྷུནཱ ཀསྨཱིརགནྡྷཱརརཊྛཝཱསིནོ ཙིནརཊྛཝཱསིནོཙ མནུསྶཱ ཨརཝཱལ༹སྶ ནཱམ ནཱགརཱཛསྶ ཨུཔྤཛྫནཀཱལཏོ པཊྛཱཡ ཡཱཝཛྫཏནཱ ནཱགརཱུཔཾ ཀཏྭཱ མཱནེནྟི པཱུཛེནྟི སཀྐརོནྟི, ཝཏྠབྷཱཛནཱདཱིསུཔི ནཱགརཱུཔམེཝ ཏེ ཡེབྷུཡྻེན ཀརོནྟཱིཏི.

སོཙ མཛ྄ཛྷནྟིཀཏྠེརོཔི ཙཏཱུཧི བྷིཀྑཱུཧི སདྡྷིཾ ཨཏྠ པཉྩམོ ཧུཏྭཱ པཱཊལིཔུཏྟཏོ ཝེཧཱསཾ ཨབྦྷུགྒནྟྭཱ ཧིམཝཏི ཨརཝཱལ༹དཧསྶ ཨུཔརི ཨོཏརི. ཏེན ཁོ པན སམཡེན ཀསྨཱིརགནྡྷཱརརཊྛེ སསྶཔཱཀསམཡེ ཨརཝཱལོ༹ ནཱམ ནཱགརཱཛཱ ཨརཝཱལ༹དཧེ ནིསཱིདིཏྭཱ ཀརཀཝསྶཾ ནཱམ ཝསྶཱཔེཏྭཱ སསྶཾ ཧརཱཔེཏྭཱ མཧཱསམུདྡཾ པཱཔེསི. ཏེརོཙ ཨརཝཱལ༹དཧསྶ ཨུཔརི ཨོཏརིཏྭཱ ཨརཝཱལ༹དཧཔིཊྛིཀཾ ཙངྐམཏིཔི ཏིཊྛཏིཔི ནིསཱིདཏིཔི སེཡྻམྤི ཀཔྤེཏི. ནཱགམཱཎཝཀཱ ཏཾ དིསྭཱ ཨརཝཱལ༹སྶ ནཱགརཱཛསྶ ཨཱརོཙེསུཾ, - མཧཱརཱཛ ཨེཀོ ཚིནྣབྷིནྣཔཊདྷརོ བྷཎྜུཀཱསཱཝཝསནོ ཨམྷཱཀཾ ཨུདཀཾ དཱུསེཏཱིཏི. ཏདཱ པན ཐེརོ ཨཏྟཱནཾཡེཝ ¶ ནཱགཱནཾ དསྶེཏི. ནགརཱཛཱ ཏཱཝདེཝ ཀོདྷཱབྷིབྷཱུཏོ ནིཀྑམིཏྭཱ ཐེརཾ དིསྭཱ མཀྑཾ ཨསྶཧམཱནོ ཨནྟལིཀྑེ ཨནེཀཱནི བྷིཾསནཀཱནི ནིམྨིནི. ཏཏོ ཏཏོ བྷུསཱཝཱཏཱ ཝཱཡནྟི, རུཀྑཱ ཚིཛྫནྟི, པབྦཏཀཱུཊཱ པཏནྟི མེགྷཱགཛྫནྟི, ཝིཛྫུཾལཏཱ ནིཙྪརནྟི, ཨསནིཡོ ཕལནྟི, བྷིནྣཾ ཝིཡ གགནཾ ཨུདཀཾ པགྒྷརཏི, བྷཡཱནཀརཱུཔཱ ནཱགཀུམཱརཱ སནྣིཔཏནྟི, སཡམྤི དྷཱུམཱཡཏི པཛྫལཏི, པཧརཎཝུཊྛིཡོ ཝིསྶཛྫེཏི, ཀོ ཨཡཾམུཎྜཀོ ཚིནྣབྷིནྣཔཊདྷརོཏིཨཱདཱིཧི ཕརུསཝཙནེཧི ཐེརཾ སནྟཛྫེཏི, ཨེཐ གཎྷཐ ཧནཐ ནིདྡྷམཐ ཨིམཾ སམཎནྟི ནཱགབལཾ ཨཱཎཱཔེསི.

ཐེརོ སབྦཾ ཏཾ བྷིཾསནཀཾ ཨཏྟནོ ཨིདྡྷིབལེན པཊིབཱཧིཏྭཱ ནཱགརཱཛཱནཾ ཨཱཧ,–

སདེཝཀོཔི ཙེ ལོཀོ, ཨཱགནྟྭཱ ཏཱསཡེཡྻ མཾ;

ན མེ པཊིབལོ ཨསྶ, ཛནེཏུཾ བྷཡབྷེརཝཾ.

སཙེཔི ཏྭཾ མཧིཾ སབྦ, སསམུདྡཾ སཔབྦཏཾ;

ཨུཀྑིཔིཏྭཱ མཧཱནཱག, ཁིཔེཡྻཱསི མམཱུཔརི.

ནེཝ མེ སཀྐུཎེཡྻཱསི, ཛནེཏུཾ བྷཡབྷེརཝཾ;

ཨཉྙདཏྠུ ཏཝེཝསྶ, ཝིགྷཱཏོ ཨུརགཱདྷིཔཱཏི.

ཨེཝཾ ཝུཏྟེ ནཱགརཱཛཱ ཝིཧཏཱནུབྷཱཝོ ནིཔྥལཝཱཡཱམོ དུཀྑཱི དུམྨནོ ཨཧོསི.

ཏཾ ཐེརོ ཏངྑཎཱནུརཱུཔཱཡ དྷམྨིཡཱ ཀཐཱཡ སནྡསྶེཏྭཱ སམཱདཔེཏྭཱ སམུཏྟེཛེཏྭཱ སམྤཧཾསེཏྭཱ ཏཱིསུ སརཎེསུ པཉྩསུཙ སཱིལེསུ པཏིཊྛཱཔེསི སདྡྷིཾ ཙཏུརཱསཱིཏིཡཱ ནཱགསཧསྶེཧི. ཨཉྙེཔི བཧཱུ ཧིམཝནྟཝཱསིནོ ཡཀྑཱཙ གནྡྷབྦཱཙ ཀུམྦྷཎྜཱཙ ཐེརསྶ དྷམྨཀཐཾ སུཏྭཱ སརཎེསུཙ སཱིལེསུཙ པཏིཊྛཧིཾསུ. པཉྩཀོཔི ཡཀྑོ སདྡྷིཾ བྷརིཡཱཡ ཡཀྑིནིཡཱ པཉྩཧིཙ པུཏྟསཏེཧི པཋམེ ¶ ཕལེ པཏིཊྛིཏོ. ཨཐཱཡསྨཱ མཛ྄ཛྷནྟི ཀཏྠེརོ སབྦེནཱགཡཀྑརཀྑསེ ཨཱམནྟེཏྭཱ ཨེཝམཱཧ,-

མཱདཱནི ཀོདྷཾ ཛནཡིཏྠ, ཨིཏོ ཨུདྡྷཾ ཡཐཱ པུརེ;

སསྶགྷཱཏཉྩ མཱ ཀཏྠ, སུཁཀཱམཱ ཧི པཱཎིནོ;

ཀརོཐ མེཏྟཾ སཏྟེསུ, ཝསནྟུ མནུཛཱ སུཁནྟི.

ཏེ སབྦེཔི སཱདྷུ བྷནྟེཏི ཐེརསྶ ཝཙནཾ པཊིསྶུཎིཏྭཱ ཡཐཱནུསིཊྛཾ པཊིཔཛྫིཾསུ. ཏཾ དིཝསམེཝ ནཱགརཱཛསྶ པཱུཛཱསམཡོ ཧོཏི. ཨཐ ནཱགརཱཛཱ ཨཏྟནོ རཏནམཡཾ པལླངྐཾ ཨཱཧརཱཔེཏྭཱ ཐེརསྶ པཉྙཔེསི. ནིསཱིདི ཐེརོ པལླངྐེ. ནཱགརཱཛཱཔི ཐེརཾ བཱིཛཡམཱནོ སམཱིཔེ ཨཊྛཱསི. ཏསྨིཾ ཁཎེ ཀསྨཱིརགནྡྷཱརརཊྛཝཱསིནོ ཨཱགནྟྭཱ ཐེརཾ དིསྭཱ ཨམྷཱཀཾ ནཱགརཱཛཏོཔི ཐེརོ མཧིདྡྷིཀཏརོཏི ཐེརམེཝ ཝནྡིཏྭཱ ནིསིནྣཱ. ཐེརོ ཏེསཾ ཨཱསིཝིསོཔམསུཏྟཾ ཀཐེསི. སུཏྟཔརིཡོསཱནེ ཨསཱིཏིཡཱཔཱཎསཧསྶཱནཾ དྷམྨཱབྷིསམཡོ ཨཧོསི. ཀུལསཏསཧསྶཉྩ པབྦཛི. ཏཏོ པབྷུཏི ཙ ཀསྨཱིརགནྡྷཱརོ ཡཱཝཛྫེཏནཱ ཀཱསཱཝཔཛྫོཏཱ ཨིསིཝཱཏཔཊིཝཱཏཱཨེཝ.

གནྟྭཱ ཀསྨཱིརགནྡྷཱརཾ, ཨིསི མཛ྄ཛྷནྟིཀོ ཏདཱ;

དུཊྛཾ ནཱགཾ པསཱདེཏྭཱ, མོཙེསི བནྡྷནཱ བཧཱུཏི.

ཨདྷུནཱ པན ཀསྨཱིརགནྡྷཱརརཊྛེ སཱསནསྶ ཨཏྠངྒཏསྶཝིཡ སཱུརིཡསྶ ཨོབྷཱསོ ན པཉྙཱཡཏི, ཏསྨཱ ཏཏྠ སཱསནསྶ པཏིཊྛཱནེ ཝིཏྠཱརེན ཝཏྟབྦཀིཙྩཾ ནཏྠཱིཏི.

ཨིཏི སཱསནཝཾསེ ཀསྨཱིརགནྡྷཱརརཊྛསཱསནཝཾསཀཐཱམགྒོ

ནཱམ སཏྟམོ པརིཙྪེདོ.

༨. མཧིཾསཀརཊྛསྶཱསནཝཾསཀཐཱམགྒོ

༨. ཨིདཱནི ¶ ཡཐཱཝུཏྟམཱཏིཀཱཝསེན མཧིཾསཀརཊྛསཱསནཝཾསཀཐཱམགྒཾ ཝཏྟུཾ ཨོཀཱསོ ཨནུཔྤཏྟོ, ཏསྨཱ ཏཾ ཝཀྑཱམི.

ཏཏིཡསངྒཱིཏཱཝསཱནེ ཧི མཧཱམོགྒལིཔུཏྟཏིསྶཏྠེརོ མཧཱརེཝཏྠེརཾ མཧིཾསཀམཎྜལཾ པེསེསི,- ཏྭཾ ཨེཏཾ རཊྛཾ གནྟྭཱ ཨེཏྠ སཱསནཾ པཏིཊྛཱཔེཧཱིཏི.

སོཙ ཨཏྟཔཉྩམོ ཧུཏྭཱ མཧིཾསཀམཎྜལཾ ཨགམཱསི པཙྩནྟིམེསུ ཛནཔདེསུ པཉྩཝགྒོ གཎོ ཨལཾ ཨུཔསམྤདཀམྨཱཡཱཏི མཉྙམཱནོ. ཐེརོ མཧིཾསཀམཎྜལཾ གནྟྭཱ དེཝདཱུཏསུཏྟཾ ཀཐེསི. སུཏྟཔརིཡོསཱནེ ཙཏྟཱལཱིསཔཱཎསཧསྶཱནི དྷམྨཙཀྑུཾ པྤཊིལབྷིཾསུ. ཙཏྟཱལཱིསཾཡེཝ པཱཎསཧསྶཱནི པབྦཛིཾསུ.

གནྟྭཱན རཊྛཾ མཧིཾསཾ, མཧཱརེཝོ མཧིདྡྷིཀོ;

ཙོདེཏྭཱ དེཝདཱུཏེཧི, མོཙེསི བནྡྷནཱ བཧཱུཏི.

ཨདྷུནཱ པན ཏཏྠ སཱསནསྶ ཨབྦྷེཧིཝིཡ པཊིཙྪནྣསྶ སཱུརིཡསྶ ཨོཀཱསོ དུབྦལོ ཧུཏྭཱ པཉྙཱཡཏི.

ཨིཏི སཱསནཝཾསེ མཧིཾསཀརཊྛསཱསནཝཾསཀཐཱམགྒོ

ནཱམ ཨཊྛམོ པརིཙྪེདོ.

༩. མཧཱརཊྛསཱསནཝཾསཀཐཱམགྒོ

༩. ཨིཏོ པརཾ མཧཱརཊྛསཱསནཝཾསཀཐཱམགྒཾ ཀཐཡིསྶཱམི ཡཐཱཝུཏྟམཱཏིཀཱཝསེན.

ཏཏིཡསངྒཱིཏཱཝསཱནེ ཧི མཧཱམོགྒལིཔུཏྟཏིསྶཏྠེརོ མཧཱདྷམྨརཀྑིཏྠེརཾ མཧཱརཊྛཾ པེསེསི,-ཏྭཾ ཨེཏཾ རཊྛཾ གནྟྭཱ ཨེཏྠ སཱསནཾ པཏིཊྛཱཔེསཱིཏི.

མཧཱདྷམྨརཀྑིཏཏྠེརོཙ ཨཏྟཔཉྩམོ ཧུཏྭཱ མཧཱརཊྛཾ གནྟྭཱ མཧཱནཱརདཀསྶཔཛཱཏཀཀཐཱཡ མཧཱརཊྛཀེ པསཱདེཏྭཱ ¶ ཙཏུརཱསཱིཏིཔཱཎསཧསྶཱནི མགྒཕལེསུ པཏིཊྛཱཔེསི. ཏེརསསཧསྶཱནི པབྦཛིཾསུ. ཨེཝཾ སོ ཏཏྠ སཱསནཾ པཏིཊྛཱཔེསི.

མཧཱརཊྛཾ ཨིསི གནྟྭཱ, སོ མཧཱ དྷམྨརཀྑིཏོ;

ཛཱཏཀཾ ཀཐཡིཏྭཱན, པསཱདེསི མཧཱཛནནྟི.

ཏཏྠ ཀིར མནུསྶཱ པུབྦེ ཨགྒིཧུཏཱདིམིཙྪཱཀམྨཾ ཡེབྷུཡྻེན ཨཀཾསུ. ཏེནེཝ ཐེརོ མཧཱནཱརདཀསྶཔཛཱཏཀཀཐཾ དེསེསི. ཏཏོ པཊྛཱཡ ཏཏྠ མནུསྶཱ ཛཱཏཀ ཀཐཾ ཡེབྷུཡྻེན སོཏུཾ ཨཏིཝིཡ ཨིཙྪནྟི. བྷིཀྑཱུཙ ཡེབྷུཡྻེན གཧཊྛཱནཾ ཛཱཏཀཀཐཾཡེཝ དེསེནྟི. ཝིསེསཏོ པན ཝསྶནྟརཛཱཏཀཀཐཾ ཏེ མནུསྶཱ བཧཱུཧི དཱཏབྦཝཏྠཱུཧི པཱུཛེཏྭཱ སུཎནྟི.

ཏཉྩ མཧཱརཊྛཾ ནཱམ སྱཱམརཊྛསམཱིཔེ ཋིཏཾ, ཏེནེཝ སྱཱམརཊྛཝཱསིནོཔི བྷིཀྑཱུ གཧཊྛཱཙ ཡེབྷུཡྻེན སོཏུཾ ཨིཙྪནྟཱིཏི. མཧཱདྷམྨརཀྑིཏཏྠེརོཔི མཧཱརཊྛཝཱསཱིཧི སདྡྷིཾ སཀལསྱཱམརཊྛཝཱསཱིནཾ དྷམྨཾ དེསེསི, ཨམཏརསཾ པཱཡེསི, ཡཐཱ ཡོནཀདྷམྨརཀྑིཏཏྠེརོ ཨཔརནྟརཊྛཾ གནྟྭཱ སཀལམརམྨརཊྛཝཱསཱིནནྟི.

ཡཾ པན ཡོནཀརཊྛསཱསནཝཾསཀཐཱཡཾ ཝུཏྟཾ, ཏམྤི སབྦཾ ཨེཏྠཱཔི དཊྛབྦཾཡེཝ, ཏེཧི ཏསྶ ཨེཀསདིསཏྟེན ཋིཏཏྟཱཏི. ཏཐཱ ཧི ནཱགསེནཏྠེརོཔི ཡོནཀརཊྛེ ཝསིཏྭཱ སྱཱམརཊྛཱདཱིསུཔི སཱསནཾ པཏིཊྛཱཔེསི. ཡོནཀརཊྛཝཱསིནོ མཧཱདྷམྨགམྦྷཱིརཏྠེརམཧཱམེདྷངྐརཏྠེརཱཙ སདྡྷིཾ བཧཱུཧི བྷིཀྑཱུཧི སཱིཧལ༹དཱིཔཾ གནྟྭཱ ཏཏོ པུནཱགནྟྭཱ སྱཱམརཊྛེ སོཀྐཏཡནགརཾ པཏྭཱ ཏཏྠ ནིསཱིདིཏྭཱ སཱསནཾ པགྒཎྷིཏྭཱ པཙྪཱ ལཀུནྣནགརེ ནིསཱིདིཏྭཱ སཱསནཾ པགྒཎྷི. ཨེཝཾ ཡོནཀརཊྛེ སཱསནཾ ཋིཏཾ སྱཱམཱདཱིསུཔི ཋིཏཾཡེཝཱཏི དཊྛབྦཾ.

བུདྡྷསྶ བྷགཝཏོ པརིནིབྦཱནཏོ དྭིསཏཱདྷིཀཱནཾ དྭིནྣཾ ཝསྶསཧསྶཱནཾ ¶ ཨུཔརི ནཝུཏིམེ ཝསྶ སཱིཧལ༹དཱིཔེ རཛྫཾ པཏྟསྶ ཀིཏྟིསྶིརིརཱཛསཱིཧམཧཱརཱཛསྶ ཨབྷིསེཀཏོ ཏཏིཡེ ཝསྶེ ཏེནེཝ ཀིཏྟིསྶིརིརཱཛསཱིཧམཧཱརཉྙཱ པཧིཏཔཎྞཱཀཱརསཱསནཾ ཨཱགམྨ སརཱམཱདྷིཔཏིདྷམྨིཀམཧཱརཱཛཱདྷིརཱཛེནཱཎཏྟེཧི ལངྐཱདཱིཔཾ ཨཱགཏེཧི ཨུཔཱལིཏྠེ རཱདཱིཧི པཏིཊྛཱཔིཏོ ཝཾསོ ཨུཔཱལིཝཾསོཏི པཱཀཊོ. སོཙ དུཝིདྷོ པུབྦཱརཱམཝིཧཱརཝཱསཱིཨབྷཡགིརིཝིཧཱརཝཱསཱིཝསེནཱཏི. ཨེཝཾ མཧཱནགརཡོནཀལྱཱམརཊྛེསུ སཱསནཾ ཐིརཾ ཧུཏྭཱ ཏིཊྛཏཱིཏི ཝེདིཏབྦནྟི.

ཨིཏི སཱསནཝཾསེ མཧཱརཊྛསཱསནཝཾསཀཐཱམགྒོ ནཱམ

ནཝམོ པརིཙྪེདོ.

༡༠. ཙིནརཊྛསཱསནཝཾསཀཐཱམགྒོ

༡༠. ཏཏོ པརཾ པཝཀྑཱམི ཙཱིནརཊྛསཱསནཝཾསཀཐཱམགྒཾ ཡཐཱཊྛཝིཏམཱཏིཀཱཝསེན.

ཏཏིཡསངྒཱིཏཱཝསཱནེ ཧི མཧཱམོགྒལིཔུཏྟཏིསྶཏྠེརོ མཛ྄ཛྷིམཏྠེརཾ ཙིནརཊྛཾ པེསེསི,-ཏྭཾ ཨེཏཾ རཊྛཾ གནྟྭཱ ཨེཏྠ སཱསནཾ པཏིཊྛཱཔེཧཱིཏི.

མཛ྄ཛྷིམཏྠེརོཙ ཀསྶཔགོཏྟརེན ཨལ༹ཀརེཝཏྠེརེན དུནྡབྷིཡཏྠེརེན མཧཱརེཝཏྠེརེནཙ སདྡྷིཾ ཧིམཝནྟཔྤདེསེ པཉྩཙཱིནརཊྛཾ གནྟྭཱ དྷམྨཙཀྐཔྤཝཏྟནསུཏྟནྟཀཐཱཡཏཾ དེསཾ པསཱདེཏྭཱ ཨསཱིཏིཔཱཎཀོཊིཡོ མགྒཕལརཏནཱནི པཊིལཱབྷེསི. པཉྩཔིཙ ཏེ ཐེརཱ པཉྩརཊྛཱནི པསཱདེསུཾ. ཨེཀམེཀསྶ སནྟིཀེ སཧསྶམཏྟཱ པབྦཛིཾསུ. ཨེཝཾ ཏེ ཏཏྠ སཱསནཾ པཏིཊྛཱཔེསུཾ.

གནྟྭཱ མཛ྄ཛྷིམཏྠེརོ, ཧིམཝནྟཾ པསཱདཡི;

ཡཀྑསེནཾ པཀཱསེནྟོ, དྷམྨཙཀྐཔྤཝཏྟནནྟི.

ཏཏྠ ཀིར མནུསྶཱ ཡེབྷུཡྻེན ཙནྡཱིཔརམཱིསྭཱརཱནཾ ཡཀྑཱནཾ པཱུཛཾ ¶ ཀརོནྟི. ཏེནེཝ ཏེ པཉྩ ཐེརཱ ཏེསཾ ཡཀྑསེནཾ པཀཱསཡིཏྭཱ དྷམྨཾ དེསེསུཾ. ཀསྨཱིརགནྡྷཱརརཊྛཾ པན ཀདཱཙི ཀདཱཙི ཙཱིནརཊྛིནྡསྶ ཝིཛིཏཾ ཧོཏི, ཀདཱཙི ཀདཱཙི པན ཝིསུཾ ཧོཏི. ཏདཱ པན ཝིསུཾཡེཝ ཨཧོསཱིཏི དཊྛབྦཾ.

ཙཱིརནཊྛེ པན བྷགཝཏོ སཱསནཾ དུབྦལཾཡེཝ ཧུཏྭཱ ཨཊྛཱསི, ན ཐིརཾ ཧུཏྭཱ. ཏེནེཝ ཨིདཱནི ཏཏྠ ཀཏྠཙིཡེཝ སཱསནཾ ཚཱཡཱམཏྟཾཝ པཉྙཱཡཏི, ཝཱཏཝེགེན ཝིཀིཎྞཨབྦྷཾཝིཡ ཏིཊྛཏཱིཏི.

ཨིཏི སཱསནཝཾསེ ཙཱིནརཊྛསཱསནཝཾསཀཐཱམགྒོ ནཱམ

དསམོ པརིཙྪེདོ.

ཨེཝཾ སབྦེན སབྦཾ སཱསནཝཾསཀཐཱམགྒོ ནིཊྛིཏོ.

ཨེཏྟཱཝཏཱཙ –

ལངྐཱགཏེན སནྟེན, ཙིཏྲཉཱཎེན བྷིཀྑུནཱ;

སརཎངྐརནཱམེན, སདྡྷམྨཊྛིཏིཀཱམིནཱ.

དཱུརཏོཡེཝ དཱིཔམྷཱ, སུམངྒལེན ཛོཏིནཱ;

ཝིསུདྡྷསཱིལིནཱཙེཝ, དཱིཔནྟརཊྛབྷིཀྑུནཱ.

ཨཉྙེཧིཙཱབྷིཡཱཙིཏོ, པཉྙཱསཱམཱིཏི ནཱམཀོ;

ཨཀཱསིཾ སུཊྛུཀཾ གནྠཾ, སཱསནཝཾསཔྤདཱིཔིཀཾ.

དྭིསཏེཙ སཧསྶེཙ, ཏེཝཱིསཱདྷིཀེ གཏེ;

པུཎྞཱཡཾ མིགསཱིརསྶ, ནིཊྛཾ གཏཱཝ སབྦསོ.

ཀོཙི ཨེཏྠེཝ དོསོ ཙེ, པཉྙཱཡཏི སུཙིཏྟཀཱ;

ཏཾ ཁམནྟུ ཙ སུདྡྷིཡཱ, གཎྷནྟུ ཡུཏྟིཀཾ ཧཝེཏི.