ཨཉྙ > བྱཱཀརཎ གནྠ-སངྒཧོ > སུབོདྷཱལངྐཱརཔཱཋ

MMR Vol 0

Misc. Paragraph

སུབོདྷཱལངྐཱརོ

༡. དོསཱཝབོདྷ-པཋམཔརིཙྪེད

༢. དོསཔརིཧཱརཱཝབོདྷ-དུཏིཡཔརིཙྪེད

༣. གུཎཱཝབོདྷ-ཏཏིཡཔརིཙྪེད

༤. ཨཏྠཱལངྐཱརཱཝབོདྷ-ཙཏུཏྠཔརིཙྪེད

༥. བྷཱཝཱཝབོདྷ-པཉྩམཔརིཙྪེད

ཋཱཡཱིབྷཱཝ ནིདྡེས རཏིཊྛཱཡཱིབྷཱཝ

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

མུནིནྡཝདནམྦྷོཛ, གབྦྷསམྦྷཝསུནྡརཱི;

སརཎཾ པཱཎིནཾ ཝཱཎཱི, མཡ྄ཧཾ པཱིཎཡཏཾ མནཾ.

རཱམ, སམྨཱ’དྱ’ལངྐཱརཱ, སནྟི སནྟོ པུརཱཏནཱ;

ཏཐཱཔི ཏུ ཝལ༹ཉྫེནྟི, སུདྡྷམཱགདྷིཀཱ ན ཏེ.

ཏེནཱ’པི ནཱམ ཏོསེཡྻ, མེཏེ ལངྐཱརཝཛྫིཏེ;

ཨནུརཱུཔེནཱ’ལངྐཱརེ, ནེ’ས མེསོ པརིསྶམོ.

ཡེསཾ ན སཉྩིཏཱ པཉྙཱ, ནེཀསཏྠནྟརོ’ཙིཏཱ;

སམྨོཧ’བྦྷཱཧཏཱ ཝེ’ཏེ, ནཱཝབུཛ྄ཛྷནྟི ཀིཉྩིཔི.

ཀིཾ ཏེཧི པཱདསུསྶཱུསཱ, ཡེསཾ ནཏྠི གརཱུནི’ཧ;

ཡེ ཏཔྤཱདརཛོཀིཎྞཱ, ཏེ’ཝ སཱདྷཱུ ཝིཝེཀིནོ.

ཀབྦ, ནཱཊཀནིཀྑིཏྟ, ནེཏྟཙིཏྟཱ ཀཝིཛྫནཱ;

ཡཾཀིཉྩི རཙཡནྟེ’ཏཾ, ན ཝིམྷཡཀརཾ པརཾ.

ཏེཡེ’ཝ པཊིབྷཱཝེནྟོ, སོ’ཝ བནྡྷོ སཝིམྷཡོ;

ཡེན ཏོསེནྟི ཝིཉྙཱུ ཡེ, ཏཏྠ པྱ’ཝིཧིཏཱ’དརཱ.

བནྡྷོ ¶ ཙ ནཱམ སདྡ,ཏྠཱ, སཧིཏཱ དོསཝཛྫིཏཱ;

པཛྫ གཛྫ ཝིམིསྶཱནཾ, བྷེདེནཱ’ཡཾ ཏིདྷཱ བྷཝེ.

ནིབནྡྷོ ཙཱ’ནིབནྡྷོ ཙ, པུན དྭིདྷཱ ནིརུཔྤཏེ;

ཏཾ ཏུ པཱཔེནྟྱ’ལངྐཱརཱ, ཝིནྡནཱིཡཏརཏྟནཾ.

ཨནཝཛྫཾ མུཁམྦྷོཛ [‘‘ཨམྦྷོཛ’’ནྟི པདཾ པཱལི༹ཡཾ ནཏྠི, ཝཱརིཛཝཱཙཀཾ, སཀྐཊགནྠཏོ ཨནཱིཏཾ], མནཝཛྫཱ ཙ བྷཱརཏཱི;

ཨལངྐཏཱ’ཝ སོབྷནྟེ, ཀིཾ ནུ ཏེ ནིར’ལངྐཏཱ?

ཝིནཱ གརཱུཔདེསཾ ཏཾ, བཱལོ’ལངྐཏྟུ མིཙྪཏི;

སམྤཱཔུཎེ ན ཝིཉྙཱུཧི, ཧསྶབྷཱཝཾ ཀཐཾ ནུ སོ?

གནྠོཔི ཀཝིཝཱཙཱན, མལངྐཱར’པྤཀཱསཀོ;

ཡཱཏི ཏབྦཙནཱིཡཏྟཾ, ཏ’བྦོཧཱརཱུ’པཙཱརཏོ.

དྭིཔྤཀཱརཱ ཨལངྐཱརཱ, ཏཏྠ སདྡ, ཏྠབྷེདཏོ;

སདྡཏྠཱ བནྡྷནཱམཱ’ཝ, ཏཾསཛྫིཏ ཏདཱཝལི.

གུཎཱལངྐཱརསཾཡུཏྟཱ, ཨཔི དོསལཝ’ངྐིཏཱ;

པསཾསིཡཱ ན ཝིཉྙཱུཧི, སཱ ཀཉྙཱ ཝིཡ ཏཱདིསཱི.

ཏེན དོསནིརཱསོ’ཝ, མཧུསྶཱཧེན སཱདྷིཡོ;

ནིདྡོསཱ སབྦཐཱ སཱ’ཡཾ, སགུཎཱ ན བྷཝེཡྻ ཀིཾ?

སཱ’ལངྐཱརཝིཡུཏྟཱ’པི, གུཎཡུཏྟཱ མནོཧརཱ;

ནིདྡོསཱ དོསརཧིཏཱ, གུཎཡུཏྟཱ ཝདྷཱུ ཝིཡ.

པདེ ཝཱཀྱེ ཏདཏྠེ ཙ, དོསཱ ཡེ ཝིཝིདྷཱ མཏཱ;

སོ’དཱཧརཎ མེཏེསཾ, ལཀྑཎཾ ཀཐཡཱམྱ’ཧཾ.

ཝིརུདྡྷཏྠནྟརཱ, ཛྷཏྠ, ཀིལིཊྛཱནི, ཝིརོདྷི ཙ;

ནེཡྻཾ, ཝིསེསནཱཔེཀྑཾ, ཧཱིནཏྠཀ མནཏྠཀཾ.

དོསཱ པདཱན ཝཱཀྱཱན, མེཀཏྠཾ བྷགྒརཱིཏིཀཾ;

ཏཐཱ བྱཱཀིཎྞ གཱམྨཱནི, ཡཏིཧཱིནཾ ཀམཙྩུཏཾ;

ཨཏིཝུཏྟ མཔེཏཏྠཾ, སབནྡྷཕརུསཾ ཏཐཱ.

ཨཔཀྐམོ’ ¶ , ཙིཏྱཧཱིནཾ, བྷགྒརཱིཏི, སསཾསཡཾ;

གཱམྨཾ དུཊྛཱལངྐཏཱིཏི, དོསཱ ཝཱཀྱཏྠནིསྶིཏཱ.

ཝིརུདྡྷཏྠནྟརཾ ཏཉྷི, ཡསྶ’ཉྙཏྠོ ཝིརུཛ྄ཛྷཏི;

ཨདྷིཔྤེཏེ ཡཐཱ མེགྷོ, ཝིསདོ སུཁཡེ ཛནཾ.

ཝིསེསྱ མདྷིཀཾ ཡེནཱ, ཛྷཏྠ མེཏཾ བྷཝེ ཡཐཱ;

ཨོབྷཱསིཏཱ’སེསདིསོ, ཁཛྫོཏོ’ཡཾ ཝིརཱཛཏེ.

ཡསྶ’ཏྠཱ’ཝགམོ དུཀྑོ, པཀཏྱཱ’དིཝིབྷཱགཏོ;

ཀིལིཊྛཾ ཏཾ ཡཐཱ ཏཱཡ, སོ’ཡ མཱལིངྒྱཏེ པིཡཱ.

ཡཾ ཀིལིཊྛཔདཾ མནྡཱ, བྷིདྷེཡྻཾ ཡམཀཱདིཀཾ;

ཀིལིཊྛཔདདོསེ’ཝ, ཏམྤི ཨནྟོ ཀརཱིཡཏི.

པཏཱིཏསདྡརཙིཏཾ, སིལིཊྛཔདསནྡྷིཀཾ;

པསཱདགུཎསཾཡུཏྟཾ, ཡམཀཾ མཏ མེདིསཾ.

ཨབྱཔེཏཾ བྱཔེཏ’ཉྙ, མཱཝུཏྟཱ’ནེཀཝཎྞཛཾ;

ཡམཀཾ ཏཉྩ པཱདཱན, མཱདི, མཛ྄ཛྷ, ནྟ, གོཙརཾ.

སུཛནཱ’སུཛནཱ སབྦེ, གུཎེནཱཔི ཝིཝེཀིནོ;

ཝིཝེཀཾ ན སམཱཡནྟི, ཨཝིཝེཀིཛནནྟིཀེ.

ཀུསལཱ’ཀུསལཱ སབྦེ, པབལཱ’པབལཱ ཐཝཱ;

ནོ ཡཱཏཱ ཡཱཝ’ཧོསིཏྟཾ, སུཁདུཀྑཔྤདཱ སིཡུཾ;

ཨབྱཔེཏ པཋམ དུཏིཡ ཏཏིཡཔཱདཱདི ཡམཀཾ.

སཱདརཾ སཱ དརཾ ཧནྟུ, ཝིཧིཏཱ ཝིཧིཏཱ མཡཱ;

ཝནྡནཱ ཝནྡནཱམཱན, བྷཱཛནེ རཏནཏྟཡེ.

ཀམལཾ ཀ’མལཾ ཀཏྟུཾ, ཝནདོ ཝནདོ’མྦརཾ;

སུགཏོ སུགཏོ ལོཀཾ, སཧིཏཾ ས ཧིཏཾ ཀརཾ.

ཨབྱཔེཏཱདིཡམཀ ¶ , སྶེསོ ལེསོ ནིདསྶིཏོ;

ཉེཡྻཱནི’མཱཡེཝ དིསཱ, ཡ’ཉྙཱནི ཡམཀཱནིཔི.

ཨཙྩནྟབཧཝོ ཏེསཾ, བྷེདཱ སམྦྷེདཡོནིཡོ;

ཏཐཱཔི ཀེཙི སུཀརཱ, ཀེཙི ཨཙྩནྟདུཀྐརཱ.

ཡམཀཾ ཏཾ པཧེལཱི [པཧེལི༹ (ཀ.)] ཙ, ནེཀནྟམདྷུརཱནི’ཏི;

ཨུཔེཀྑིཡནྟི སབྦཱནི, སིསྶཁེདབྷཡཱ མཡཱ.

དེསཀཱལཀལཱལོཀ, ཉཱཡཱགམཝིརོདྷི ཡཾ;

ཏཾ ཝིརོདྷིཔདཾ ཙེ’ཏ, མུདཱཧརཎཏོ ཕུཊཾ.

ཡ དཔྤཏཱིཏ མཱནཱིཡ, ཝཏྟབྦཾ ནེཡྻ མཱཧུ ཏཾ;

ཡཐཱ སབྦཱཔི དྷཝལཱ, དིསཱ རོཙནྟི རཏྟིཡཾ.

ནེདིསཾ བཧུ མཉྙནྟི, སབྦེ སབྦཏྠ ཝིཉྙུནོ;

དུལླབྷཱ’ཝགཏཱི སདྡ, སཱམཏྠིཡཝིལངྒྷིནཱི.

སིཡཱ ཝིསེསནཱཔེཀྑཾ, ཡཾ ཏཾ པཏྭཱ ཝིསེསནཾ;

སཱཏྠཀཾ ཏཾ ཡཐཱ ཏཾ སོ, བྷིཡྻོ པསྶཏི ཙཀྑུནཱ.

ཧཱིནཾ ཀརེ ཝིསེསྱཾ ཡཾ, ཏཾ ཧཱིནཏྠཾ བྷཝེ ཡཐཱ;

ནིཔྤབྷཱི ཀཏ ཁཛྫོཏོ, སམུདེཏི དིཝཱཀརོ.

པཱདཔཱུརཎམཏྟཾ ཡཾ, ཨནཏྠམིཏི ཏཾ མཏཾ;

ཡཐཱ ཧི ཝནྡེ བུདྡྷསྶ, པཱདཔངྐེརུཧཾ པི ཙ.

སདྡཏོ ཨཏྠཏོ ཝུཏྟཾ, ཡཏྠ བྷིཡྻོཔི ཝུཙྩཏི;

ཏ མེཀཏྠཾ ཡཐཱ’བྷཱཏི, ཝཱརིདོ ཝཱརིདོ ཨཡཾ.

ཏིཏྠིཡངྐུརབཱིཛཱནི, ཛཧཾ དིཊྛིགཏཱནི’ཧ;

པསཱདེཏི པསནྣེ’སོ, མཧཱམུནི མཧཱཛནེ.

ཨཱརདྡྷཀྐམཝིཙྪེདཱ, བྷགྒརཱིཏི བྷཝེ ཡཐཱ;

ཀཱཔི པཉྙཱ, ཀོཔི པགུཎོ, པཀཏཱིཔི ཨཧོ ཏཝ.

པདཱནཾ ¶ དུབྦིནིཀྑེཔཱ, བྱཱམོཧོ ཡཏྠ ཛཱཡཏི;

ཏཾ བྱཱཀིཎྞནྟི ཝིཉྙེཡྻཾ, ཏདུདཱཧརཎཾ ཡཐཱ.

བཧུགུཎེ པཎམཏི, དུཛྫནཱནཾ པྱཡཾ ཛནོ;

ཧིཏཾ པམུདིཏོ ནིཙྩཾ, སུགཏཾ སམནུསྶརཾ.

ཝིསིཊྛཝཙནཱ’པེཏཾ, གཱམྨཾ’ཏྱ’བྷིམཏཾ ཡཐཱ;

ཀཉྙེ ཀཱམཡམཱནཾ མཾ, ན ཀཱམཡསི ཀིཾནྭི’དཾ?

པདསནྡྷཱནཏོ ཀིཉྩི, དུཔྤཏཱིཏིཀརཾ བྷཝེ;

ཏམྤི གཱམྨཾ ཏྱ’བྷིམཏཾ, ཡཐཱ ཡཱབྷཝཏོ པིཡཱ.

ཝུཏྟེསུ སཱུཙིཏེ ཊྛཱནེ, པདཙྪེདོ བྷཝེ ཡཏི;

ཡཾ ཏཱཡ ཧཱིནཾ ཏཾ ཝུཏྟཾ, ཡཏིཧཱིནནྟི སཱ པན.

ཡཏི སབྦཏྠཔཱདནྟེ, ཝུཏྟཌྜྷེ ཙ ཝིསེསཏོ;

པུབྦཱཔརཱནེཀཝཎྞ, པདམཛ྄ཛྷེཔི ཀཏྠཙི.

ཏཾ ནམེ སིརསཱ ཙཱམི, ཀརཝཎྞཾ ཏཐཱགཏཾ;

སཀལཱཔི དིསཱ སིཉྩ, ཏིཝ སོཎྞརསེཧི ཡོ.

སརོ སནྡྷིམྷི པུབྦནྟོ, ཝིཡ ལོཔེ ཝིབྷཏྟིཡཱ;

ཨཉྙཐཱ ཏྭ’ཉྙཐཱ ཏཏྠ, ཡཱ’དེསཱདི པརཱ’དི’ཝ.

ཙཱདཱི པུབྦཔདནྟཱ’ཝ, ནིཙྩཾ པུབྦཔདསྶིཏཱ;

པཱདཡོ ནིཙྩསམྦནྡྷཱ, པརཱདཱིཝ པརེན ཏུ.

ནམེ ཏཾ སིརསཱ སབྦོ, པམཱ’ཏཱིཏཾ ཏཐཱགཏཾ;

ཡསྶ ལོཀགྒཏཾ པཏྟ, སྶོ’པམཱ ན ཧི ཡུཛྫཏི.

མུནིནྡཾ ཏཾ སདཱ ཝནྡཱ, མྱ’ནནྟམཏི མུཏྟམཾ;

ཡསྶ པཉྙཱ ཙ མེཏྟཱ ཙ, ནིསྶཱིམཱཏི ཝིཛམྦྷཏི.

ཙཱདིཔཱདཱིསུ པཙྩུདཱཧརཎཱནི ཡཐཱ

མཧཱམེཏྟཱ མཧཱཔཉྙཱ, ཙ ཡཏྠ པརམོདཡཱ;

པཎམཱམི ཛིནཾ ཏཾ པ, ཝརཾ ཝརགུཎཱ’ལཡཾ.

པདཏྠཀྐམཏོ མུཏྟཾ, ཀམཙྩུཏ མིདཾ ཡཐཱ;

ཁེཏྟཾ ཝཱ དེཧི གཱམཾ ཝཱ, དེསཾ ཝཱ མམ སོབྷནཾ.

ལོཀིཡཏྠ ¶ མཏིཀྐནྟཾ, ཨཏིཝུཏྟཾ མཏཾ ཡཐཱ;

ཨཏིསམྦཱདྷ མཱཀཱས, མེཏིསྶཱ ཐནཛམྦྷནེ.

སམུདཱཡཏྠཏོ’པེཏཾ, ཏཾ ཨཔེཏཏྠཀཾ ཡཐཱ;

གཱཝིཔུཏྟོ བལིབདྡྷོ, ཏིཎཾ ཁཱདཱི པིཝཱི ཛལཾ.

བནྡྷེ ཕརུསཏཱ ཡཏྠ, ཏཾ བནྡྷཕརུསཾ ཡཐཱ;

ཁརཱ ཁིལཱ པརིཀྑཱིཎཱ, ཁེཏྟེ ཁིཏྟཾ ཕལཏྱ’ལཾ.

ཉེཡྻཾ ལཀྑཎ མནྭཏྠ, ཝསེནཱ’པཀྐམཱདིནཾ;

ཨུདཱཧརཎ མེཏེསཾ, དཱནི སནྡསྶཡཱམྱ’ཧཾ.

བྷཱཝནཱ, དཱན, སཱིལཱནི, སམྨཱ སམྤཱདིཏཱནི’ཧ;

བྷོག, སགྒཱདི, ནིབྦཱན, སཱདྷནཱནི ན སཾསཡོ.

པཱུཛནཱིཡཏརོ ལོཀེ, ཨཧ མེཀོ ནིརནྟརཾ;

མཡེཀསྨིཾ གུཎཱ སབྦེ, ཡཏོ སམུདིཏཱ ཨཧུཾ.

ཡཱཙིཏོ’ཧཾ ཀཐཾ ནཱམ, ན དཛྫཱམྱ’པི ཛཱིཝིཏཾ;

ཏཐཱཔི པུཏྟདཱནེན, ཝེདྷཏེ ཧདཡཾ མམ.

ཨིཏྠཱིནཾ དུཛྫནཱནཉྩ, ཝིསྶཱསོ ནོཔཔཛྫཏེ;

ཝིསེ སིངྒིམྷི ནདིཡཾ, རོགེ རཱཛཀུལམྷི ཙ.

མུནིནྡཙནྡིམཱ ལོཀ, སརལོལཝིལོཙནོ;

ཛནོ’ ཝཀྐནྟཔནྠོ’ཝ, གོཔདསྶནཔཱིཎིཏོ.

ཝཱཀྱཏྠཏོ དུཔྤཏཱིཏི, ཀརཾ གཱམྨཾ མཏཾ ཡཐཱ;

པོསོ ཝཱིརིཡཝཱ སོ’ཡཾ, པརཾ ཧནྟྭཱ ན ཝིསྶམཱི.

དུཊྛཱལངྐརཎཾ ཏེཏཾ [ཏྭེཐཾ (?)], ཡཏྠཱ’ལངྐཱརདཱུསནཾ;

ཏསྶཱ’ལངྐཱརནིདྡེསེ, རཱུཔ མཱཝི བྷཝིསྶཏི.

ཨིཏི སངྒྷརཀྑིཏམཧཱསཱམིཝིརཙིཏེ སུབོདྷཱལངྐཱརེ

༢. དོསཔརིཧཱརཱཝབོདྷ-དུཏིཡཔརིཙྪེད

ཀདཱཙི ཀཝིཀོསལླཱ, ཝིརོདྷོ སཀལོ པྱ’ཡཾ;

དོསསངྑྱ མཏིཀྐམྨ, གུཎཝཱིཐིཾ ཝིགཱཧཏེ.

ཏེན ཝུཏྟཝིརོདྷཱན, མཝིརོདྷོ ཡཐཱ སིཡཱ;

ཏཐཱ དོསཔརིཧཱརཱ, ཝབོདྷོ དཱནི ནཱིཡཏེ.

ཏཏྠ ཝིརུདྡྷཏྠནྟརསྶ པརིཧཱརོ ཡཐཱ

ཝིནྡནྟཾ པཱཀསཱལཱིནཾ, སཱལཱིནཾ དསྶནཱ སུཁཾ;

ཏཾ ཀཐཾ ནཱམ མེགྷོ’ཡཾ, ཝིསདོ སུཁཡེ ཛནཾ?

ཝིནཱཡཀོཔི ནཱགོ སི, གོཏམོཔི མཧཱམཏི;

པཎཱིཏོཔི རསཱ’པེཏོ, ཙིཏྟཱ མེ སཱམི ཏེ གཏི.

ཀཐཾ ཏཱདིགུཎཱབྷཱཝེ, ལོཀཾ ཏོསེཏི དུཛྫནོ?

ཨོབྷཱསིཏཱསེསདིསོ, ཁཛྫོཏོ ནཱམ ཀིཾ བྷཝེ?

པཧེལིཀཱཡ [པཧེལི༹ཀཱཡ (ཀ.)] མཱརུལ༹ྷཱ, ན ཧི དུཊྛཱ ཀིལིཊྛཏཱ;

པིཡཱ སུཁཱ’ལིངྒིཏཾ ཀ, མཱལིངྒཏི ནུ ནོ ཨིཏི.

ཡམཀེ ནོ པཡོཛེཡྻ, ཀིལིཊྛཔད མིཙྪིཏེ;

ཏཏོ ཡམཀ མཉྙཾ ཏུ, སབྦ མེཏཾམཡཾ ཝིཡ.

བོདྷིསཏྟཔྤབྷཱཝེན ¶ , ཐལེཔི ཛལཛཱནྱ’ཧུཾ;

ནུདནྟཱནི’ཝ སུཙིརཱ, ཝཱསཀླེསཾ ཏཧིཾ ཛལེ.

མཧཱནུབྷཱཝ པིསུནོ, མུནིནོ མནྡ མཱརུཏོ;

སབྦོཏུཀམཡཾ ཝཱཡི, དྷུནནྟོ ཀུསུམཾ སམཾ.

ནིམུགྒམཱནསོ བུདྡྷ, གུཎེ པཉྩསིཁསྶཔི;

ཏནྟིསྶར ཝིརོདྷོ སོ, ན སམྤཱིཎེཏི ཀཾ ཛནཾ?

གཎཡེ ཙཀྐཝཱལ༹ཾ སོ, ཙནྡནཱཡཔི སཱིཏལཾ;

སམྦོདྷི སཏྟ ཧདཡོ, པདིཏྟ’ངྒཱརཔཱུརིཏཾ.

པརིཙྩཏྟབྷཝོཔི ཏྭ, མུཔནཱིཏབྷཝོ ཨསི;

ཨཙིནྟྱགུཎསཱརཱཡ, ནམོ ཏེ མུནིཔུངྒཝ.

ནེཝཱ’ལཔཏི ཀེནཱ’པི, ཝཙཱིཝིཉྙཏྟིཏོ ཡཏི;

སམྤཛཱནམུསཱཝཱདཱ, ཕུསེཡྻཱ’པཏྟིདུཀྐཊཾ.

མརཱིཙིཙནྡནཱ’ལེཔ, ལཱབྷཱ སཱིཏམརཱིཙིནོ;

ཨིམཱ སབྦཱཔི དྷཝལཱ, དིསཱ རོཙནྟི ནིབྦྷརཾ.

མནོནུརཉྫནོ མཱར, ངྒནཱསིངྒཱརཝིབྦྷམོ;

ཛིནེནཱ’སམནུཉྙཱཏོ, མཱརསྶ ཧདཡཱ’ནལོ.

ཨཔཡཱཏཱ’པརཱདྷམྤི, ཨཡཾ ཝེརཱི ཛནཾ ཛནོ;

ཀོདྷཔཱཊལབྷཱུཏེན, བྷིཡྻོ པསྶཏི ཙཀྑུནཱ.

ཨཔྤཀཱནམྤི པཱཔཱནཾ, པབྷཱཝཾ ནཱསཡེ བུདྷོ;

ཨཔི ནིཔྤབྷཱཏཱ’ནཱིཏ, ཁཛྫོཏོ ཧོཏི བྷཱཎུམཱ.

ན ¶ པཱདཔཱུརཎཏྠཱཡ, པདཾ ཡོཛེཡྻ ཀཏྠཙི,

ཡཐཱ ཝནྡེ མུནིནྡསྶ, པཱདཔངྐེརུཧཾ ཝརཾ.

བྷཡཀོདྷཔསཾསཱདི, ཝིསེསོ ཏཱདིསོ ཡདི;

ཝཏྟུཾ ཀཱམཱིཡཏེ དོསོ, ན ཏཏྠེ’ཀཏྠཏཱཀཏོ.

སཔྤོ སཔྤོ! ཨཡཾ ཧནྡ, ནིཝཏྟཏུ བྷཝཾ ཏཏོ,

ཡདི ཛཱིཝིཏུཀཱམོ’སི, ཀཐཾ ཏ མུཔསཔྤསི?

ཡོཀོཙི རཱུཔཱ’ཏིསཡོ, ཀནྟི ཀཱཔི མནོཧརཱ;

ཨབྱཱམོཧཀརཾ བནྡྷཾ, ཨབྱཱཀིཎྞཾ མནོཧརཾ;

ཨདཱུརཔད ཝིནྱཱསཾ, པསཾསནྟི ཀཝིསྶརཱ.

ནཱིལུཔྤལཱ’བྷཾ ནཡནཾ, བནྡྷུཀརུཙིརོ’དྷརོ;

ནཱསཱ ཧེམ’ངྐུསོ ཏེན, ཛིནོ’ཡཾ པིཡདསྶནོ.

སམཏིཀྐནྟ གཱམྨཏྟཾ, ཀནྟ ཝཱཙཱ’བྷིསངྑཏཾ;

བནྡྷནཾ རསཧེཏུཏྟཱ, གཱམྨཏྟཾ ཨཏིཝཏྟཏི.

དུནོཏི ཀཱམཙཎྜཱལོ, སོ མཾ སདཡ ནིདྡཡོ;

ཨཱིདིསཾ བྱསནཱ’པནྣཾ, སུཁཱིཔི ཀི མུཔེཀྑསེ?

ཡཏིཧཱིནཔརིཧཱརོ, ན པུནེ’དཱནི ནཱིཡཏེ;

ཡཏོ ན སཝནུ’བྦེགཾ, ཧེཊྛཱ ཡེསཾ ཝིཙཱརིཏཾ.

ཨུདཱརཙརིཏོ’སི ཏྭཾ, ཏེནེ’ཝཱ’རཱདྷནཱ ཏྭཡི;

དེསཾ ཝཱ དེཧི གཱམཾ ཝཱ, ཁེཏྟཾ ཝཱ མམ སོབྷནཾ.

མུནིནྡཙནྡསམྦྷཱུཏ, ཡསོརཱསིམརཱིཙིནཾ;

སཀལོཔྱ’ཡ མཱཀཱསོ, ནཱ’ཝཀཱསོ ཝིཛམྦྷནེ.

ཝཱཀྱཾ ¶ བྱཱཔནྣཙིཏྟཱནཾ, ཨཔེཏཏྠཾ ཨནིནྡིཏཾ;

ཏེནུ’མྨཏྟཱདིཀཱནཾ ཏཾ, ཝཙནཱ’ཉྙཏྲ དུསྶཏི.

སམུདྡོ པཱིཡཏེ སོ’ཡ, མཧ’མཛྫ ཛརཱཏུརོ;

ཨིམེ གཛྫནྟི ཛཱིམཱུཏཱ, སཀྐསྶེ’རཱཝཎོ པིཡོ.

སུཁུམཱལཱ’ཝིརོདྷིཏྟ, དིཏྟབྷཱཝཔྤབྷཱཝིཏཾ;

བནྡྷནཾ བནྡྷཕརུས, དོསཾ སཾདཱུསཡེཡྻ ཏཾ.

པསྶནྟཱ རཱུཔཝིབྷཝཾ, སུཎནྟཱ མདྷུརཾ གིརཾ;

ཙརནྟི སཱདྷཱུ སམྦུདྡྷ, ཀཱལེ ཀེལི༹པརམྨུཁཱ.

བྷཱཝནཱ, དཱན, སཱིལཱནི, སམྨཱ སམྤཱདིཏཱནི’ཧ;

ནིབྦཱན, བྷོག, སགྒཱདི, སཱདྷནཱནི ན སཾསཡོ.

ཨུདྡིཊྛཝིསཡོ ཀོཙི, ཝིསེསོ ཏཱདིསོ ཡདི;

ཨནུ’དྡིཊྛེསུ ནེཝ’ཏྠི, དོསོ ཀམཝིལངྒྷནེ.

ཀུསལཱ’ཀུསལཾ ཨབྱཱ, ཀཏ’མིཙྩེསུ པཙྪིམཾ;

ཨབྱཱཀཏཾ པཱཀདཾ ན, པཱཀདཾ པཋམདྭཡཾ.

སགུཎཱནཱ’ཝིཀརཎེ, ཀཱརཎེ སཏི ཏཱདིསེ;

ཨོཙིཏྱཧཱིནཏཱ’པཏྟི, ནཏྠི བྷཱུཏཏྠསཾསིནོ.

ཨོཙིཏྱཾ ནཱམ ཝིཉྙེཡྻཾ, ལོཀེ ཝིཁྱཱཏ མཱདརཱ;

ཏཏྠོ’པདེསཔབྷཝཱ, སུཛནཱ ཀཝིཔུངྒཝཱ.

ཝིཉྙཱཏོཙིཏྱཝིབྷཝོ, ཙིཏྱཧཱིནཾ པརིཧརེ;

ཡོ མཱརསེན མཱསནྣ, མཱསནྣཝིཛཡུ’སྶཝོ;

ཏིཎཱཡཔི ན མཉྙིཏྠ, སོ ཝོ དེཏུ ཛཡཾ ཛིནོ.

ཨཱརདྡྷཀཏྟུཀམྨཱདི, ཀམཱ’ཏིཀྐམལངྒྷནེ;

བྷགྒརཱིཏིཝིརོདྷོ’ཡཾ, གཏིཾ ན ཀྭཱ’པི ཝིནྡཏི.

སུཛན’ཉྙཱན མིཏྠཱིནཾ, ¶ ཝིསྶཱསོ ནོ’པཔཛྫཏེ;

ཝིསསྶ སིངྒིནོ རོག, ནདཱིརཱཛཀུལསྶ ཙ.

བྷེསཛྫེ ཝིཧིཏེ སུདྡྷ, བུདྡྷཱདིརཏནཏྟཡེ;

པསཱད མཱཙརེ ནིཙྩཾ, སཛྫནེ སགུཎེཔི ཙ.

མུནིནྡཙནྡིམཱ’ལོཀ, རས ལོལ ཝིལོཙནོ;

ཛནོ’ཝཀྐནྟཔནྠོ’ཝ, རཾསིདསྶནཔཱིཎིཏོ.

སཾསཡཱཡེ’ཝ ཡཾཀིཉྩི, ཡདི ཀཱིལཱ༹དིཧེཏུནཱ;

པཡུཛྫཏེ ན དོསོ’ཝ, སསཾསཡསམཔྤིཏོ.

ཡཱཏེ དུཏིཡཾ ནིལཡཾ, གརུམྷི སཀགེཧཏོ;

པཱཔུཎེཡྻཱམ ནིཡཏཾ, སུཁ’མཛ྄ཛྷཡནཱ’དིནཱ.

སུབྷགཱ བྷགིནཱི སཱ’ཡཾ, ཨེཏསྶི’ཙྩེཝམཱདིཀཾ;

ན ‘གཱམྨ’མིཏི ནིདྡིཊྛཾ, ཀཝཱིཧི སཀལེཧིཔི.

དུཊྛཱ’ལངྐཱརཝིགམེ, སོབྷནཱ’ལངྐཏིཀྐམོ;

ཨལངྐཱརཔརིཙྪེདེ, ཨཱཝིབྷཱཝཾ གམིསྶཏི.

ཝིཉྙཱཡི’མཾ གརུཝརཱན’དྷིཀ’པྤསཱདཱ,

ཨིཏི སངྒྷརཀྑིཏམཧཱསཱམིཝིརཙིཏེ སུབོདྷཱལངྐཱརེ

སམྦྷཝནྟི ¶ གུཎཱ ཡསྨཱ, དོསཱནེ’ཝ’མཏིཀྐམེ;

དསྶེསྶཾ ཏེ ཏཏོ དཱནི, སདྡེ སམྦྷཱུསཡནྟི ཡེ.

པསཱདོ’ཛོ, མདྷུརཏཱ, སམཏཱ, སུཁུམཱལཏཱ;

སིལེསོ’དརཏཱ, ཀནྟི, ཨཏྠབྱཏྟི, སམཱདྷཡོ.

གུཎེཧེ’ཏེཧི སམྤནྣོ, བནྡྷོ ཀཝིམནོཧརོ;

སམྤཱདིཡཏི ཀཏྟཱུནཾ, ཀིཏྟི མཙྩནྟནིམྨལཾ.

ཨདཱུརཱཧིཏསམྦནྡྷ, སུབྷགཱ ཡཱ པདཱ’ཝལི;

སུཔསིདྡྷཱ’བྷིདྷེཡྻཱ’ཡཾ, པསཱདཾ ཛནཡེ ཡཐཱ.

ཨལངྐརོནྟཱ ཝདནཾ, མུནིནོ’དྷརརཾསིཡོ;

སོབྷནྟེ’རུཎརཾསཱི’ཝ, སམྤཏནྟཱ’མྦུཛོ’དརེ.

ཨོཛོ སམཱསབཱཧུལྱ, མེསོ གཛྫསྶ ཛཱིཝིཏཾ;

མུནིནྡ མནྡ སཉྫཱཏ, ཧཱས ཙནྡན ལིམྤིཏཱ;

པལླཝཱ དྷཝལཱ ཏསྶེ, ཝེཀོ ནཱ’དྷརཔལླཝོ.

པདཱ’བྷིདྷེཡྻཝིསཡཾ, སམཱས བྱཱས སམྦྷཝཾ;

ཡཾ པཱརིཎཏྱཾ ཧོཏཱི’ཧ, སོཔི ཨོཛོ’ཝ ཏཾ ཡཐཱ.

ཛོཏཡིཏྭཱན སདྡྷམྨཾ, སནྟཱརེཏྭཱ སདེཝཀེ;

ཛལིཏྭཱ ཨགྒིཁནྡྷོ’ཝ, ནིབྦུཏོ སོ སསཱཝཀོ.

མཏྠཀཊྛཱི མཏསྶཱ’པི, རཛོབྷཱཝཾ ཝཛནྟུ མེ;

ཡཏོ པུཉྙེན ཏེ སེནྟུ, ཛིན པཱད’མྦུཛདྭཡེ.

ཨིཙྩཏྲ ¶ ནིཙྩཔྤཎཏི, གེདྷོ སཱདྷུ པདིསྶཏི;

ཛཱཡཏེ’ཡཾ གུཎོ ཏིཀྑ, པཉྙཱནམབྷིཡོགཏོ.

མདྷུརཏྟཾ པདཱསཏྟི, ར’ནུཔྤཱསཝསཱ དྭིདྷཱ;

སིཡཱ སམསུཏི པུབྦཱ, ཝཎྞཱ’ཝུཏྟི པརོ ཡཐཱ.

ཡདཱ ཨེསོ’བྷིསམྦོདྷིཾ, སམྤཏྟོ མུནིཔུངྒཝོ;

ཏདཱ པབྷུཏི དྷམྨསྶ, ལོཀེ ཛཱཏོ མཧུ’སྶཝོ.

མུནིནྡམནྡཧཱསཱ ཏེ, ཀུནྡ སནྡོཧཝིབྦྷམཱ;

དིསནྟ མནུདྷཱཝནྟི, ཧསནྟཱ ཙནྡཀནྟིཡོ.

སབྦཀོམལཝཎྞེཧི, ནཱ’ནུཔྤཱསོ པསཾསིཡོ;

ཡཐཱ’ཡཾ མཱལཏཱིམཱལཱ, ལིན ལོལཱ’ལིམཱལིནཱི.

མུདཱུཧི ཝཱ ཀེཝལེཧི, ཀེཝལེཧི ཕུཊེཧི ཝཱ,

མིསྶེཧི ཝཱ ཏིདྷཱ ཧོཏི, ཝཎྞེཧི སམཏཱ ཡཐཱ.

ཀོཀིལཱ’ལཱཔསཾཝཱདཱི, མུནིནྡཱ’ལཱཔཝིབྦྷམོ;

ཧདཡངྒམཏཾ ཡཱཏི, སཏཾ དེཏི ཙ ནིབྦུཏིཾ.

སམྦྷཱཝནཱིཡསམྦྷཱཝཾ, བྷགཝནྟཾ བྷཝནྟགུཾ;

བྷཝནྟསཱདྷནཱ’ཀངྑཱི, ཀོ ན སམྦྷཱཝཡེ ཝིབྷུཾ.

ལདྡྷཙནྡནསཾསགྒ, སུགནྡྷི མལཡཱ’ནིལོ;

མནྡ མཱཡཱཏི བྷཱིཏོ’ཝ, མུནིནྡམུཁམཱརུཏཱ.

ཨནིཊྛུར’ཀྑར’པྤཱཡཱ, སབྦཀོམལ ནིསྶཊཱ;

ཀིཙྪམུཙྩཱརཎཱ’པེཏ, བྱཉྫནཱ སུཁུམཱལཏཱ.

པསྶནྟཱ རཱུཔཝིབྷཝཾ, སུཎནྟཱ མདྷུརཾ གིརཾ;

ཙརནྟི སཱདྷཱུ [སཱདྷུ (སཱི-ཚནྡྷཱནུརཀྑཎཏྠཾ)] སམྦུདྡྷ, ཀཱལེ ཀེལི༹པརམྨུཁཱ.

ཨལངྐཱརཝིཧཱིནཱ’པི, སཏཾ སམྨུཁཏེ’དིསཱི;

ཨཱརོཧཏི ཝིསེསེན, རམཎཱིཡཱ ཏ’དུཛྫལཱ.

རོམཉྩ ¶ པིཉྪ རཙནཱ, སཱདྷུ ཝཱདཱཧིཏདྡྷནཱི;

ལལ༹ནྟི’མེ མུནིམེགྷུ, མྨདཱ སཱདྷུ སིཁཱཝལཱ.

སུཁུམཱལཏྟ མཏྠེ’ཝ, པདཏྠཝིསཡམྤི ཙ;

ཡཐཱ མཏཱདིསདྡེསུ, ཀིཏྟིསེསཱདིཀིཏྟནཾ.

སིལིཊྛ པད སཾསགྒ, རམཎཱིཡ གུཎཱ’ལཡོ;

སབནྡྷགཱརཝོ སོ’ཡཾ, སིལེསོ ནཱམ ཏཾ ཡཐཱ.

བཱལི’ནྡུཝིབྦྷམ’ཙྪེདི, ནཁརཱ’ཝལི ཀནྟིབྷི;

སཱ མུནིནྡཔད’མྦྷོཛ, ཀནྟི ཝོ ཝལིཏཱ’ཝཏཾ.

ཨུཀྐཾསཝནྟོ ཡོཀོཙི, གུཎོ ཡདི པཏཱིཡཏེ;

ཨུདཱརོ’ཡཾ བྷཝེ ཏེན, སནཱཐཱ བནྡྷཔདྡྷཏི.

པཱདམྦྷོཛ རཛོ ལིཏྟ, གཏྟཱ ཡེ ཏཝ གོཏམ;

ཨཧོ! ཏེ ཛནྟཝོ ཡནྟི, སབྦཐཱ ནིརཛཏྟནཾ.

ཨེཝཾ ཛིནཱ’ནུབྷཱཝསྶ, སམུཀྐཾསོ’ཏྲ དིསྶཏི;

པཉྙཝཱ ཝིདྷིནཱ’ནེན, ཙིནྟཡེ པར མཱིདིསཾ.

ཨུདཱརོ སོཔི ཝིཉྙེཡྻོ, ཡཾ པསཏྠ ཝིསེསནཾ;

ཡཐཱ ཀཱིལཱ༹སརོ ལཱིལཱ, ཧཱསོ ཧེམངྒདཱ’དཡོ.

ལོཀིཡ’ཏྠཱ’ན’ཏིཀྐནྟཱ, ཀནྟཱ སབྦཛནཱནཔི;

ཀནྟི ནཱམཱ’ཏིཝུཏྟསྶ, ཝུཏྟཱ སཱ པརིཧཱརཏོ.

སཱ’ཡཾ ཏདུབྷཡཱ ནེཡྻ, པརིཧཱརེ པདསྶིཏཱ;

ཡཐཱ མརཱིཙིཙྩཱདི ཙ, མནོནུརཉྫནོཙྩཱདི.

སབྷཱཝཱ’མལཏཱ དྷཱིར, མུདྷཱ པཱདནཁེསུ ཏེ;

ཡཏོ ཏེ’ཝནཏཱ’ནནྟ, མོལི༹ཙྪཱཡཱ ཛཧནྟི ནོ.

‘བནྡྷསཱརོ’ཏི མཉྙནྟི, ཡཾ སམགྒཱཔི ཝིཉྙུནོ;

དསྶནཱ’ཝསརཾ པཏྟོ, སམཱདྷི ནཱམ’ཡཾ གུཎོ.

ཨཉྙདྷམྨོ ཏཏོ’ཉྙཏྠ, ལོཀསཱིམཱ’ནུརོདྷཏོ;

སམྨཱ ཨཱདྷཱིཡཏེ’ཙྩེ’སོ, ‘སམཱདྷཱི’ཏི ནིརུཙྩཏི.

ཨཔཱཎེ ¶ པཱཎཱིནཾ དྷམྨོ, སམྨཱ ཨཱདྷཱིཡཏེ ཀྭཙི,;

ནིརཱུཔེ རཱུཔཡུཏྟསྶ, ནིརསེ སརསསྶ, ཙ.

ཨདྲཝེ དྲཝཡུཏྟསྶ, ཨཀཏྟརིཔི ཀཏྟུཏཱ,;

ཀཋིནསྶཱ’སརཱིརེ,པི, རཱུཔཾ ཏེསཾ ཀམཱ སིཡཱ.

ཨུཎྞཱ པུཎྞི’ནྡུནཱ ནཱཐ! དིཝཱཔི སཧ སངྒམཱ;

ཝིནིདྡཱ སམྤམོདནྟི, མཉྙེ ཀུམུདིནཱི ཏཝ.

དཡཱརསེསུ མུཛྫནྟཱ, ཛནཱ’མཏརསེསྭི’ཝ;

སུཁིཏཱ ཧཏདོསཱ ཏེ, ནཱཐ! པཱད’མྦུཛཱ’ནཏཱ.

མདྷུརེཔི གུཎེ དྷཱིར, ན’པྤསཱིདནྟི ཡེ ཏཝ;

ཀཱིདིསཱི མནསོཝུཏྟི, ཏེསཾ ཁཱརགུཎཱན བྷོ’.

སབྦཏྠསིདྡྷ! ཙཱུལ༹ཀ, པུཊཔེཡྻཱ མཧཱགུཎཱ;

དིསཱ སམནྟཱ དྷཱཝནྟི, ཀུནྡསོབྷཱ ས ལཀྑཎཱ.

མཱརཱ’རིབལཝིསྶཊྛཱ, ཀུཎྛཱ ནཱནཱཝིདྷཱ’ཡུདྷཱ;

ལཛྫམཱནཱ’ཉྙཝེསེན, ཛིན! པཱདཱ’ནཏཱ ཏཝ.

སདྡྷམྨརཾསིནཱ བྷཱཏི, བྷིནྡ མནྡཏམཾ པརཾ.

ཝམནུ’གྒིརནཱདྱེ’ཏཾ, གུཎཝུཏྱ’པརིཙྩུཏཾ;

ཨཏིསུནྡར མཉྙཾ ཏུ, ཀཱམཾ ཝིནྡཏི གཱམྨཏཾ.

ཀནྟཱིནཾ ཝམནབྱཱཛཱ, མུནིཔཱདནཁཱ’ཝལཱི;

ཙནྡཀནྟཱི པིཝནྟཱི’ཝ, ནིཔྤབྷཾ ཏཾ ཀརོནྟིཡོ.

ཨཙིཏྟཀཏྟུཀཾ ¶ རུཙྱ [རུཙྩ (སཱི.)], མིཙྩེཝཾ གུཎཀམྨཏཾ;

སཙིཏྟཀཏྟུཀཾ པེ’ཏཾ, གུཎཀམྨཾ ཡདུ’ཏྟམཾ.

ཨུགྒིརནྟོ’ཝ སསྣེཧ, རསཾ ཛིནཝརོ ཛནེ;

བྷཱསནྟོ མདྷུརཾ དྷམྨཾ, ཀཾ ན སཔྤཱིཎཡེ ཛནཾ.

ཚནྡོཨལངྐཏིསུ ནིཙྩཀཏཱ’བྷིཡོགོ;

སོ’ཡཾ ཀཝིཏྟཝིཀལོཔི ཀཝཱིསུ སངྑྱ,

མོགྒཡ྄ཧ ཝིནྡཏི ཧི ཀིཏྟི’ མམནྡརཱུཔཾ.

ཨིཏི སངྒྷརཀྑིཏམཧཱསཱམིཝིརཙིཏེ སུབོདྷཱལངྐཱརེ

༤. ཨཏྠཱལངྐཱརཱཝབོདྷ-ཙཏུཏྠཔརིཙྪེད

ཨཏྠཱལངྐཱརསཧིཏཱ, སགུཎཱ བནྡྷཔདྡྷཏི;

ཨཙྩནྟཀནྟཱ ཀནྟཱ [ཡཏོ ཨཙྩནྟཀནྟཱ (ཀ.)] ཝ ཝུཙྩནྟེ ཏེ ཏཏོ’དྷུནཱ.

སབྷཱཝ, ཝངྐཝུཏྟཱིནཾ, བྷེདཱ དྭིདྷཱ ཨལཾཀྲིཡཱ;

པཋམཱ ཏཏྠ ཝཏྠཱུནཾ, ནཱནཱཝཏྠཱ’ཝིབྷཱཝིནཱི.

ལཱིལཱ ཝིཀནྟི སུབྷགོ, དིསཱ ཐིར ཝིལོཀནོ;

བོདྷིསཏྟངྐུརོ བྷཱསཾ, ཝིརོཙི ཝཱཙ མཱསབྷིཾ.

ཝུཏྟི ཝཏྠུསབྷཱཝསྶ, ཡཱ’ཉྙཐཱ སཱ’པརཱ བྷཝེ;

ཏསྶཱ’ནནྟཝིཀཔྤཏྟཱ, ཧོཏི བཱིཛོ’པདསྶནཾ.

ཏཏྠཱ’ཏིསཡ, ཨུཔམཱ, རཱུཔཀཱ, ཝུཏྟི, དཱིཔཀཾ,;

ཨཀྑེཔོ, ཏྠནྟརནྱཱསོ, བྱཏིརེཀོ, ཝིབྷཱཝནཱ.

ཧེཏུ ¶ , ཀྐམོ, པིཡཏརཾ, སམཱས, པརིཀཔྤནཱ;

སམཱཧིཏཾ, པརིཡཱཡ, ཝུཏྟི, བྱཱཛོཔཝཎྞནཾ.

ཝིསེས, རུལ༹ྷཱཧངྐཱརཱ, སིལེསོ, ཏུལྱཡོགིཏཱ;

ནིདསྶནཾ, མཧནྟཏྟཾ, ཝཉྩནཱ, པྤཀཏཏྠུཏི,.

ཨེཀཱཝལི, ཨཉྙམཉྙཾ, སཧཝུཏྟི, ཝིརོདྷིཏཱ;

པརིཝུཏྟི, བྦྷམོ, བྷཱཝོ, མིསྶ, མཱསཱི, རསཱི, ཨིཏི.

ཨེཏེ བྷེདཱ སམུདྡིཊྛཱ, བྷཱཝོ ཛཱིཝིཏ མུཙྩཏེ;

ཝངྐཝུཏྟཱིསུ པོསེསི, སིལེསོ ཏུ སིརིཾ པརཾ.

པཀཱསཀཱ ཝིསེསསྶ, སིཡཱ’ཏིསཡཝུཏྟི ཡཱ;

ལོཀཱ’ཏིཀྐནྟཝིསཡཱ, ལོཀིཡཱ,ཏི ཙ སཱ དྭིདྷཱ.

པཊིཔཱདཱིཡཏེ ཏྭ’ཛྫ, ལོཀཱཏིཀྐནྟགོཙརཱ.

པིཝནྟི དེཧཀནྟཱི ཡེ, ནེཏྟཉྫལིཔུཊེན ཏེ;

ནཱ’ལཾ ཧནྟུཾ ཛིནེ’སཾ ཏྭཾ, ཏཎྷཾ ཏཎྷཱཧརོཔི ཀིཾ?

ཨུཔམཱནོ’པམེཡྻཱནཾ, སདྷམྨཏྟཾ སིཡོ’པམཱ;

སདྡ, ཏྠགམྨཱ, ཝཱཀྱཏྠ, ཝིསཡཱ,ཏི ཙ སཱ བྷིདྷཱ.

སམཱས, པཙྩཡེ, ཝཱ’དཱི, སདྡཱ ཏེསཾ ཝསཱ ཏིདྷཱ;

སདྡགམྨཱ སམཱསེན, མུནིནྡོ ཙནྡིམཱ’ནནོ.

ཨཱཡཱདཱི པཙྩཡཱ ཏེཧི, ཝདནཾ པངྐཛཱཡཏེ;

མུནིནྡནཡན དྭནྡཾ, ནཱིལུཔྤལདལཱིཡཏི.

ཨིཝཱདཱི ཨིཝ, ཝཱ, ཏུལྱ, སམཱན, ནིབྷ, སནྣིབྷཱ;

ཡཐཱ, སངྐཱས, ཏུལིཏ, པྤཀཱས, པཏིརཱུཔཀཱ.

སརཱི, སརིཀྑ, སཾཝཱདཱི, ཝིརོདྷི, སདིསཱ, ཝིཡ;

པཊིཔཀྑ, པཙྩནཱིཀཱ, སཔཀྑོ, པམིཏོ, པམཱ.

པཊིབིམྦ, པཊིཙྪནྣ, སརཱུཔ, སམ, སམིཏཱ;

སཝཎྞཱ, བྷཱ, པཊིནིདྷི, སདྷམྨཱ, དི སལཀྑཎཱ.

ཛཡཏྱ ¶ , ཀྐོསཏི, ཧསཏི, པཏིགཛྫཏི, དཱུབྷཏི;

ཨུསཱུཡཏྱ, ཝཛཱནཱཏི, ནིནྡཏི, སྶཏི, རུནྡྷཏི.

ཏསྶ ཙོརེཏི སོབྷགྒཾ, ཏསྶ ཀནྟིཾ ཝིལུམྤཏི;

ཏེན སདྡྷིཾ ཝིཝདཏི, ཏུལྱཾ ཏེནཱ’དྷིརོཧཏི.

ཀཙྪཾ ཝིགཱཧཏེ, ཏསྶ, ཏ མནྭེཏྱ, ནུབནྡྷཏི;

ཏཾསཱིལཾ, ཏཾནིསེདྷེཏི, ཏསྶ ཙཱ’ནུཀརོཏི, མེ.

ཨུཔམཱནོ’པམེཡྻཱནཾ, སདྷམྨཏྟཾ ཝིབྷཱཝིབྷི;

ཨིམེཧི ཨུཔམཱབྷེདཱ, ཀེཙི ནིཡྻནྟི སམྤཏི.

ཝིཀཱསིཔདུམཾ’ཝཱ’ཏི, སུནྡརཾ སུགཏཱ’ནནཾ;

ཨིཏི དྷམྨོཔམཱ ནཱམ, ཏུལྱདྷམྨནིདསྶནཱ.

དྷམྨཧཱིནཱ ‘‘མུཁ’མྦྷོཛ, སདིསཾ མུནིནོ’’ཨིཏི;

ཝིཔརཱིཏོ’པམཱ ‘‘ཏུལྱ, མཱནནེན’མྦུཛཾ ཏཝ’’.

ཏཝཱ’ནན’མིཝ’མྦྷོཛཾ, ཨམྦྷོཛ’མིཝ ཏེ མུཁཾ;

ཨཉྙམཉྙོཔམཱ སཱ’ཡཾ, ཨཉྙམཉྙོཔམཱནཏོ.

‘‘ཡདི ཀིཉྩི བྷཝེ’མྦྷོཛཾ, ལོཙན’བྦྷམུཝིབྦྷམཾ;

དྷཱརེཏུཾ མུཁསོབྷཾ ཏཾ, ཏཝེ’’ཏི ཨབྦྷུཏོཔམཱ.

‘‘སུགནྡྷི སོབྷཱ སམྦནྡྷཱི, སིསིརཾ’སུ ཝིརོདྷི ཙ;

མུཁཾ ཏཝ’མྦུཛཾཝེ’ཏི’’, སཱ སིལེསོཔམཱ མཏཱ.

སརཱུཔསདྡཝཱཙྩཏྟཱ, སཱ སནྟཱནོཔམཱ ཡཐཱ;

བཱལཱ’ཝུ’ཡྻཱནམཱལཱ’ཡཾ, སཱ’ལཀཱ’ནནསོབྷིནཱི.

ཁཡཱི ཙནྡོ, བཧུརཛཾ, པདུམཾ, ཏེཧི ཏེ མུཁཾ;

སམཱནམྤི སམུཀྐཾསི, ཏྱ’ཡཾ ནིནྡོཔམཱ མཏཱ.

ཨསམཏྠོ མུཁེནི’ནྡུ, ཛིན! ཏེ པཊིགཛྫིཏུཾ;

ཛལོ༹ ཀལངྐཱི’ཏི ཨཡཾ, པཊིསེདྷོཔམཱ སིཡཱ.

‘‘ཀཙྪཾ ཙནྡཱརཝིནྡཱནཾ, ཨཏིཀྐམྨ མུཁཾ ཏཝ;

ཨཏྟནཱ’ཝ སམཾ ཛཱཏ’’, མིཏྱ’སཱདྷཱརཎོཔམཱ.

‘‘སབྦ’མྦྷོཛ’པྤབྷཱསཱརོ, རཱསིབྷཱུཏོ’ཝ ཀཏྠཙི;

ཏཝཱ’ནནཾ ཝིབྷཱཏཱི’’ཏི, ཧོཏཱ’བྷཱུཏོཔམཱ ཨཡཾ.

པཏཱིཡཏེ’ཏྠགམྨཱ ཏུ, སདྡསཱམཏྠིཡཱ ཀྭཙི;

སམཱས, པྤཙྩཡེ, ཝཱདི, སདྡཡོགཾ ཝིནཱ ཨཔི.

བྷིངྒཱནེ’མཱནི ¶ ཙཀྑཱུནི, ནཱ’མྦུཛཾ མུཁ’མེཝི’དཾ;

སུབྱཏྟསདིསཏྟེན, སཱ སརཱུཔོཔམཱ མཏཱ.

‘‘མཡེ’ཝ མུཁསོབྷཱ’སྶེ, ཏྱལ’མིནྡུ! ཝིཀཏྠནཱ;

ཡཏོ’མྦུཛེཔི སཱ’ཏྠཱིཏི’’, པརིཀཔྤོཔམཱ ཨཡཾ.

‘‘ཀིཾ ཝཱ’མྦུཛ’ནྟོབྷནྟཱལི, ཀིཾ ལོལནཡནཾ མུཁཾ;

མམ དོལཱཡཏེ ཙིཏྟ’’, མིཙྩ’ཡཾ སཾསཡོཔམཱ.

ཀིཉྩི ཝཏྠུཾ པདསྶེཏྭཱ, སདྷམྨསྶཱ’བྷིདྷཱནཏོ;

སཱམྱཔྤཏཱིཏིསབྦྷཱཝཱ, པཏིཝཏྠུཔམཱ ཡཐཱ.

ཛནེསུ ཛཱཡམཱནེསུ, ནེ’ཀོཔི ཛིནསཱདིསོ;

དུཏིཡོ ནནུ ནཏྠེ’ཝ, པཱརིཛཱཏསྶ པཱདཔོ.

ཝཱཀྱཏྠེནེ’ཝ ཝཱཀྱཏྠོ, ཡདི ཀོཙཱུ’པམཱིཡཏེ;

ཨིཝཡུཏྟཱ, ཝིཡུཏྟཏྟཱ, སཱ ཝཱཀྱཏྠོཔམཱ དྭིདྷཱ.

ཛིནོ སཾཀླེསཏཏྟཱནཾ, ཨཱཝིབྷཱུཏོ ཛནཱན’ཡཾ;

གྷམྨསནྟཱཔཏཏྟཱནཾ, གྷམྨཀཱལེ’མྦུདོ ཝིཡ.

མུནིནྡཱནན མཱབྷཱཏི, ཝིལཱསེཀམནོཧརཾ;

ཨུདྡྷཾ སམུགྒཏསྶཱ’པི, ཀིཾ ཏེ ཙནྡ ཝིཛམྦྷནཱ.

སམུབྦེཛེཏི དྷཱིམནྟཾ, བྷིནྣལིངྒཱདིཀཾ ཏུ ཡཾ;

ཨུཔམཱདཱུསནཱཡཱ’ལ, མེཏཾ ཀཏྠཙི ཏཾ ཡཐཱ.

ཧཾསཱི’ཝཱ’ཡཾ སསཱི བྷིནྣ, ལིངྒཱ, ཀཱསཾ སརཱནི’ཝ;

ཝིཛཱཏི ཝཙནཱ, ཧཱིནཱ, སཱ’ཝ བྷཏྟོ བྷཊོ’དྷིཔེ.

‘‘ཁཛྫོཏོ བྷཱཎུམཱལཱི’ཝ, ཝིབྷཱཏི’’ཏྱདྷིཀོཔམཱ;

ཨཕུཊྛཏྠཱ ‘‘བལམྦོདྷི, སཱགརོ ཝིཡ སཾཁུབྷི.’’

‘‘ཙནྡེ ཀལངྐོ བྷིངྒོ’ཝེ’, ཏྱུ’པམཱཔེཀྑིནཱི ཨཡཾ;

ཁཎྜིཏཱ ཀེརཝཱ’ཀཱརོ, སཀལངྐོ ནིསཱཀརོ.

ཨིཙྩེཝམཱདིརཱུཔེསུ, བྷཝནྟི ཝིགཏཱ’དརཱ;

ཀརོནྟི ཙཱ’དརཾ དྷཱིརཱ, པཡོགེ ཀྭཙི དེ’ཝ ཏུ.

ཨིཏྠཱིཡཾ’ཝཱ’ཛནོ ཡཱཏི, ཝདཏྱེ’སཱ པུམཱ ཝིཡ;

པིཡོ པཱཎཱ ཨིཝཱ’ཡཾ མེ, ཝིཛྫཱ དྷན’མིཝ’ཙྩིཏཱ.

བྷཝཾ ¶ ཝིཡ མཧཱིཔཱལ, དེཝརཱཛཱ ཝིརོཙཏེ;

ཨལ’མཾསུམཏོ ཀཙྪཾ, ཏེཛསཱ རོཧིཏུཾ ཨཡཾ.

ཨུཔམཱནོ’པམེཡྻཱནཾ, ཨབྷེདསྶ ནིརཱུཔནཱ;

ཨུཔམཱ’ཝ ཏིརོབྷཱུཏ, བྷེདཱ རཱུཔཀ མུཙྩཏེ.

ཨསེས ཝཏྠུ ཝིསཡཾ, ཨེཀདེས ཝིཝུཏྟི [ཝིཝཏྟི (ཊཱིཀཱ)], ཙ;

ཏཾ དྭིདྷཱ པུན པཙྩེཀཾ, སམཱསཱདིཝསཱ ཏིདྷཱ.

ཨངྒུལིདལ སཾསོབྷིཾ, ནཁདཱིདྷིཏི ཀེསརཾ;

སིརསཱ ན པིལནྡྷནྟི, ཀེ མུནིནྡ པད’མྦུཛཾ.

རཏནཱནི གུཎཱ བྷཱུརཱི, ཀརུཎཱ སཱིཏལཾ ཛལཾ;

གམྦྷཱིརཏྟ མགཱདྷཏྟཾ, པཙྩཀྑོ’ཡཾ ཛིནོ’མྦུདྷི.

ཙནྡིཀཱ མནྡཧཱསཱ ཏེ, མུནིནྡ! ཝདནི’ནྡུནོ;

པབོདྷཡཏྱ’ཡཾ སཱདྷུ, མནོ ཀུམུད ཀཱནནཾ.

ཨསེསཝཏྠུཝིསཡེ, པབྷེདོ རཱུཔཀེ ཨཡཾ;

ཨེཀདེསཝིཝུཏྟིམྷི, བྷེདོ དཱནི པཝུཙྩཏི.

ཝིལཱས ཧཱས ཀུསུམཾ, རུཙིརཱ’དྷར པལླཝཾ;

སུཁཾ ཀེ ཝཱ ན ཝིནྡནྟི, པསྶནྟཱ མུནིནོ མུཁཾ.

པཱདདྭནྡཾ མུནིནྡསྶ, དདཱཏུ ཝིཛཡཾ ཏཝ;

ནཁརཾསཱི པརཾ ཀནྟཱ, ཡསྶ པཱཔཛཡདྡྷཛཱ.

སུནིམྨལཀཔོལསྶ, མུནིནྡ ཝདནི’ནྡུནོ;

སཱདྷུ’པྤབུདྡྷ ཧདཡཾ, ཛཱཏཾ ཀེརཝ ཀཱནནཾ.

རཱུཔཀཱནི ¶ བཧཱུནྱེ’ཝ [ཊཱིཀཱཡཾ ཨུདྡྷཊཾ ཡུཏྟརཱུཔཀཾ སིཏཔུཔྥུཛལཾ ལོལ, ནེཏྟབྷིངྒ ཏཝཱ’ནནཾ; ཀསྶ ནཱམ མནོ དྷཱིར, ནཱཀཌྜྷཏི མནོཧརཾ;], ཡུཏྟཱ, ཡུཏྟཱདིབྷེདཏོ;

ཝིསུཾ ན ཏཱནི ཝུཏྟཱནི, ཨེཏྠེ’ཝ’ནྟོགདྷཱནི’ཏི.

‘‘ཙནྡིམཱ’ཀཱསཔདུམ’’, མིཙྩེཏཾ ཁཎྜརཱུཔཀཾ;

དུཊྛ, ‘‘མམྦོརུཧཝནཾ, ནེཏྟཱནི’ཙྩཱ’’དི སུནྡརཾ.

པརིཡནྟོ ཝིཀཔྤཱནཾ, རཱུཔཀསྶོ’པམཱཡ ཙ;

ནཏྠི ཡཾ ཏེན ཝིཉྙེཡྻཾ, ཨཝུཏྟ མནུམཱནཏོ.

པུནཔྤུན མུཙྩཱརཎཾ [པུནཔྤུནུཙྩཱརཎཾ ཡཾ (སཱི. ཀ.)], ཡམཏྠསྶ, པདསྶ ཙ;

ཨུབྷཡེསཉྩ ཝིཉྙེཡྻཱ, སཱ’ཡ’མཱཝུཏྟི ནཱམཏོ.

མནོ ཧརཏི སབྦེསཾ, ཨཱདདཱཏི དིསཱ དས;

གཎྷཱཏི ནིམྨལཏྟཉྩ, ཡསོརཱསི ཛིནསྶ’ཡཾ.

ཝིབྷཱསེནྟི དིསཱ སབྦཱ, མུནིནོ དེཧཀནྟིཡོ;

ཝིབྷཱ སེནྟི ཙ སབྦཱཔི, ཙནྡཱདཱིནཾ ཧཏཱ ཝིཡ.

ཛིཏྭཱ ཝིཧརཏི ཀླེས, རིཔུཾ ལོཀེ ཛིནོ ཨཡཾ;

ཝིཧརཏྱ’རིཝགྒོ’ཡཾ, རཱསིབྷཱུཏོ’ཝ དུཛྫནེ.

ཨེཀཏྠ ཝཏྟམཱནམྤི, སབྦཝཱཀྱོ’པཀཱརཀཾ;

དཱིཔཀཾ ནཱམ ཏཾ ཙཱདི, མཛ྄ཛྷ, ནྟཝིསཡཾ ཏིདྷཱ.

ཨཀཱསི བུདྡྷོ ཝེནེཡྻ, བནྡྷཱུན མམིཏོ’དཡཾ;

སབྦཔཱཔེཧི ཙ སམཾ, ནེཀཏིཏྠིཡམདྡནཾ.

དསྶནཾ མུནིནོ སཱདྷུ, ཛནཱནཾ ཛཱཡཏེ’མཏཾ;

ཏད’ཉྙེསཾ ཏུ ཛནྟཱུནཾ, ཝིསཾ ནིཙྩོ’པཏཱཔནཾ.

ཨཙྩནྟ ¶ ཀནྟ ལཱཝཎྱ, ཙནྡཱ’ཏཔ མནོཧརོ;

ཛིནཱ’ནནི’ནྡུ ཨིནྡུ ཙ, ཀསྶ ནཱ’ནནྡཀོ བྷཝེ.

ཧོཏཱ’ཝིཔྤཊིསཱརཱཡ, སཱིལཾ, པཱམོཛྫཧེཏུ སོ;

ཏཾ པཱིཏིཧེཏུ, སཱ ཙཱ’ཡཾ, པསྶདྡྷྱཱ’དི པསིདྡྷིཡཱ.

ཨིཙྩཱ’དིདཱིཔཀཏྟེཔི, པུབྦཾ པུབྦ མཔེཀྑིནཱི;

ཝཱཀྱམཱལཱ པཝཏྟཱཏི, ཏཾ མཱལཱདཱིཔཀཾ མཏཾ.

ཨནེནེ’ཝ’པྤཀཱརེན, སེསཱན མཔི དཱིཔཀེ;

ཝིཀཔྤཱནཾ ཝིདྷཱཏབྦཱ, ནུགཏི སུདྡྷབུདྡྷིབྷི.

ཝིསེས ཝཙནི’ཙྪཱཡཾ, ནིསེདྷཝཙནཾ ཏུ ཡཾ;

ཨཀྑེཔོ ནཱམ སོཡཉྩ, ཏིདྷཱ ཀཱལཔྤབྷེདཏོ.

ཨེཀཱཀཱི’ ནེཀསེནཾ ཏཾ, མཱརཾ ས ཝིཛཡཱི ཛིནོ;

ཀཐཾ ཏ མཐཝཱ ཏསྶ, པཱརམཱིབལ མཱིདིསཾ.

ཀིཾ ཙིཏྟེ’ཛཱསམུགྒྷཱཏཾ, ཨཔཏྟོ’སྨཱིཏི ཁིཛྫསེ;

པཎཱམོ ནནུ སོ ཡེ’ཝ, སཀིམྤི སུགཏེ གཏོ.

སཙྩཾ ན ཏེ གམིསྶནྟི, སིཝཾ སུཛནགོཙརཾ;

མིཙྪཱདིཊྛི པརིཀྐནྟ [པརིཀནྟ (ཀ.)], མཱནསཱ ཡེ སུདུཛྫནཱ.

ཉེཡྻོ ཨཏྠནྟརནྱཱསོ, ཡོ, ཉྙཝཱཀྱཏྠསཱདྷནོ;

སབྦབྱཱཔཱི ཝིསེསཊྛོ, ཧིཝིསིཊྛ’སྶ བྷེདཏོ.

ཏེཔི ལོཀཧིཏཱ སཏྟཱ, སཱུརིཡོ ཙནྡིམཱ ཨཔི;

ཨཏྠཾ པསྶ གམིསྶནྟི, ནིཡམོ ཀེན ལངྒྷྱཏེ.

སཏྠཱ དེཝམནུསྶཱནཾ, ཝསཱི སོཔི མུནིསྶརོ;

གཏོ’ཝ ནིབྦུཏིཾ སབྦེ, སངྑཱརཱ ན ཧི སསྶཏཱ.

ཛིནོ ¶ སཾསཱརཀནྟཱརཱ, ཛནཾ པཱཔེཏི [པཱཔེསི (ཀ.)] ནིབྦུཏིཾ;

ནནུ ཡུཏྟཱ གཏི སཱ’ཡཾ, ཝེསཱརཛྫ སམངྒིནཾ.

སུརཏྟཾ ཏེ’དྷརཕུཊཾ, ཛིན! རཉྫེཏི མཱནསཾ;

སཡཾ རཱགཔརཱིཏཱ ཧི, པརེ རཉྫེནྟི སངྒཏེ.

ཝཱཙྩེ གམྨེ ཐ ཝཏྠཱུནཾ, སདིསཏྟེ པབྷེདནཾ;

བྱཏིརེཀོ’ཡ’མཔྱེ’ཀོ, བྷཡབྷེདཱ ཙཏུབྦིདྷོ.

གམྦྷཱིརཏྟ མཧཏྟཱདི, གུཎཱ ཛལདྷིནཱ ཛིན!;

ཏུལྱོ ཏྭ མསི བྷེདོ ཏུ, སརཱིརེནེ’དིསེན ཏེ.

མཧཱསཏྟཱ’ཏིགམྦྷཱིརཱ, སཱགརོ སུགཏོཔི ཙ;

སཱགརོ’ཉྫནསངྐཱསོ, ཛིནོ ཙཱམཱིཀརཛྫུཏི.

ན སནྟཱཔཱཔཧཾ ནེཝི, ཙྪིཏདཾ མིགལོཙནཾ;

མུནིནྡ! ནཡནདྭནྡཾ, ཏཝ ཏགྒུཎ བྷཱུསིཏཾ.

མུནིནྡཱནན མམྦྷོཛ, མེསཾ ནཱནཏྟ མཱིདིསཾ;

སུཝུཏྟཱ’མཏསནྡཱཡཱི, ཝདནཾ ནེ’དིས’མྦུཛཾ.

པསིདྡྷཾ ཀཱརཎཾ ཡཏྠ, ནིཝཏྟེཏྭཱ’ ཉཱཀཱརཎཾ;

སཱབྷཱཝིཀཏྟ མཐཝཱ, ཝིབྷཱབྱཾ སཱ ཝིབྷཱཝནཱ.

ཨནཉྫིཏཱ’སིཏཾ ནེཏྟཾ, ཨདྷརོ རཉྫིཏཱ’རུཎོ;

སམཱནཏཱ བྷམུ ཙཱ’ཡཾ, ཛིནཱ’ནཱཝཉྩིཏཱ ཏཝ.

ན ཧོཏི ཁལུ དུཛྫནྱ, མཔི དུཛྫནསངྒམེ;

སབྷཱཝནིམྨལཏརེ, སཱདྷུཛནྟཱུན ཙེཏསི.

ཛནཀོ ¶ , ཉཱཔཀོ ཙེཏི, དུཝིདྷཱ ཧེཏཝོ སིཡུཾ;

པཊིསངྑརཎཾ ཏེསཾ, ཨལངྐཱརཏཱཡོ’དིཏཾ.

བྷཱཝཱ’བྷཱཝ ཀིཙྩཝསཱ, ཙིཏྟཧེཏུཝསཱཔི ཙ;

བྷེདཱ’ནནྟཱ ཨིདཾ ཏེསཾ, མུཁམཏྟ ནིདསྶནཾ.

མུནིནོ དེསནཱ’ཡཾ མེ, ཀཱམཾ ཏོསེཏི མཱནསཾ.

དྷཱིརེཧི སཧ སཾཝཱསཱ, སདྡྷམྨསྶཱ’བྷིཡོགཏོ;

ནིགྒཧེནི’ནྡྲིཡཱནཉྩ, དུཀྑསྶུ’པསམོ སིཡཱ.

མུནིནྡ’ཙནྡ སཾཝཱདི, ཀནྟབྷཱཝོ’པསོབྷིནཱ;

མུཁེནེ’ཝ སུབོདྷཾ ཏེ, མནཾ པཱཔཱ’བྷིནིསྶཊཾ.

སཱདྷུཧཏྠཱ’རཝིནྡཱནི, སངྐོཙཡཏི ཏེ ཀཐཾ;

མུནིནྡ! ཙརཎདྭནྡ, རཱགབཱལཱ’ཏཔོ ཕུསཾ?

སངྐོཙཡནྟི ཛནྟཱུནཾ, པཱཎིཔངྐེརུཧཱནི’ཧ;

མུནིནྡ! ཙརཎདྭནྡ, ནཁ ཙནྡཱན’ མཾསཝོ.

ཨུདྡིཊྛཱནཾ པདཏྠཱནཾ, ཨནུདྡེསོ ཡཐཱཀྐམཾ;

‘སངྑྱཱན’མིཏི ནིདྡིཊྛཾ, ཡཐཱསངྑྱཾ ཀམོཔི ཙ.

ཨཱལཱཔ ཧཱས ལཱིལཱ༹ཧི, མུནིནྡ! ཝིཛཡཱ ཏཝ;

ཀོཀིལཱ ཀུམུདཱནི ཙོ, པསེཝནྟེ ཝནཾ ཛལཾ.

སིཡཱ པིཡཏརཾ ནཱམ, ཨཏྠརཱུཔསྶ ཀསྶཙི;

པིཡསྶཱ’ཏིསཡེནེ’ཏཾ, ཡཾ ཧོཏི པཊིཔཱདནཾ.

པཱིཏིཡཱ མེ སམུཔྤནྣཱ, སནྟ! སནྡསྶནཱ ཏཝ;

ཀཱལེནཱ’ཡཾ བྷཝེ པཱིཏི, ཏཝེ’ཝ པུན དསྶནཱ.

ཝཎྞིཏེནོ’པམཱནེན, ཝུཏྱཱ’དྷིཔྤེཏ ཝཏྠུནོ;

སམཱསཝུཏྟི ནཱམཱ’ཡཾ, ཨཏྠ སངྑེཔ རཱུཔཏོ.

སཱ’ཡཾ ¶ ཝིསེསྱམཏྟེན, བྷིནྣཱ’བྷིནྣཝིསེསནཱ;

ཨཏྠེ’ཝ ཨཔརཱ པྱ’ཏྠི, བྷིནྣཱ’བྷིནྣཝིསེསནཱ.

ཝིསུདྡྷཱ’མཏསནྡཱཡཱི, པསཏྠརཏནཱ’ལཡོ;

གམྦྷཱིརོ ཙཱ’ཡ’ མམྦོདྷི, པུཉྙེནཱ’པཱདིཏོ མཡཱ.

ཨིཙྪིཏ’ཏྠཔདོ སཱརོ, ཕལཔུཔྥོ’པསོབྷིཏོ;

སཙྪཱཡོ’ཡ’མཔུབྦོཝ ཀཔྤརུཀྑོ སམུཊྛིཏོ.

སཱགརཏྟེན སདྡྷམྨོ, རུཀྑཏྟེནོ’དིཏོ ཛིནོ;

སབྦེ སཱདྷཱརཎཱ དྷམྨཱ, པུབྦཏྲཱ’ཉྙཏྲ ཏུ’ཏྟཡཾ.

ཝཏྠུནོ’ཉྙཔྤཀཱརེན, ཋིཏཱ ཝུཏྟི ཏད’ཉྙཐཱ;

པརིཀཔྤཱིཡཏེ ཡཏྠ, སཱ ཧོཏི པརིཀཔྤནཱ.

ཨུཔམཱ’བྦྷནྟརཏྟེན, ཀིརིཡཱདིཝསེན ཙ;

ཀམེནོ’དཱཧརིསྶཱམི, ཝིཝིདྷཱ པརིཀཔྤནཱ.

ཨིཙྪཱབྷངྒཱ’ཏུརཱ’སཱིནཱ, ཏཱ’ཏིནིཙྩལ མཙྪརཱ;

ཝསཾ ནེནྟི’ཝ དྷཱིརཾ ཏཾ, ཏདཱ ཡོགཱ’བྷིཡོགཏོ.

གཛཾ མཱརོ སམཱརུལ༹ྷོ, ཡུདྡྷཱཡ’ཙྩནྟ’མུནྣཏཾ;

མགྒ མནྭེསཏཱི ནཱུན, ཛིནབྷཱིཏོ པལཱཡིཏུཾ.

མུནིནྡ! པཱདདྭནྡེ ཏེ, ཙཱརུ རཱཛིཝ སུནྡརེ;

མཉྙེ པཱཔཱ’བྷི’སམྨདྡ, ཛཱཏསོཎེན སོཎིམཱ.

མཉྙེ, སངྐེ, དྷུཝཾ, ནཱུན, མིཝ, མིཙྩེཝ མཱདིཧི;

སཱ’ཡཾ བྱཉྫཱིཡཏེ ཀྭཱ’པི, ཀྭཱ’པི ཝཱཀྱེན གམྱཏེ.

དཡཱ སཉྫཱཏ སརསཱ, དེཧཱ ནིཀྑནྟཀནྟིཡོ;

པཱིཎེནྟཱ ཛིན! ཏེ སཱདྷུ, ཛནཾ སརསཏཾ ནཡུཾ.

ཨཱརབྦྷནྟསྶ ¶ ཡཾཀིཉྩི, ཀཏྟུཾ པུཉྙཝསཱ པུན;

སཱདྷན’ནྟརལཱབྷོ ཡོ, ཏཾ ཝདནྟི སམཱཧིཏཾ.

མཱརཱ’རིབྷངྒཱ’བྷིམུཁ, མཱནསོ ཏསྶ སཏྠུནོ;

མཧཱམཧཱི མཧཱརཝཾ, རཝཱི’ཡ’མུཔཀཱརིཀཱ.

ཨཝཏྭཱ’བྷིམཏཾ ཏསྶ, སིདྡྷིཡཱ དསྶན’ཉྙཐཱ;

ཝདནྟི ཏཾ ‘པརིཡཱཡ, ཝུཏྟཱི’ཏི སུཙིབུདྡྷཡོ.

ཝིཝཊ’ངྒཎནིཀྑིཏྟཾ, དྷན’མཱརཀྑ ཝཛྫིཏཾ;

དྷནཀཱམ! ཡཐཱཀཱམཾ, ཏུཝཾ གཙྪ ཡདིཙྪསི.

ཐུཏིཾ ཀརོཏི ནིནྡནྟོ, ཝིཡ ཏཾ བྱཱཛཝཎྞནཾ;

དོསཱ’བྷཱསཱ གུཎཱ ཨེཝ, ཡནྟི སནྣིདྷི མཏྲ ཧི.

སཉྩཱལེཏུ མལཾ ཏྭཾ’སི, བྷུསཾ ཀུཝལཡཱ’ཁིལཾ;

ཝིསེསཾ ཏཱཝཏཱ ནཱཐ!, གུཎཱནཾ ཏེ ཝདཱམ ཀིཾ?

ཝིསེསི’ཙྪཱཡཾ དབྦསྶ, ཀྲིཡཱ, ཛཱཏི, གུཎསྶ ཙ;

ཝེཀལླདསྶནཾ ཡཏྲ, ཝིསེསོ ནཱམ ཡཾ བྷཝེ.

ན རཐཱ, ན ཙ མཱཏངྒཱ, ན ཧཡཱ, ན པདཱཏཡོ;

ཛིཏོ མཱརཱརི མུནིནཱ, སམྦྷཱརཱཝཛྫནེན ཧི.

ན བདྡྷཱ བྷཱུཀུཊི, ནེཝ, ཕུརིཏོ དསནཙྪདོ;

མཱརཱརིབྷངྒཾ ཙཱ’ཀཱསི, མུནི ཝཱིརོ ཝརོ སཡཾ.

ཏཐཱཔྱ’ནྡྷཏམཧརཾ, པརཾ སཱདྷུསུབྷཱསིཏཾ.

ན ཁརཾ, ན ཧི ཝཱ ཐདྡྷཾ, མུནིནྡ! ཝཙནཾ ཏཝ;

ཏཐཱཔི གཱལ༹ྷཾ ཁཎཏི, ནིམྨཱུལཾ ཛནཏཱམདཾ.

དསྶཱིཡཏེ’ཏིརིཏྟཾ ¶ ཏུ, སཱུརཝཱིརཏྟནཾ ཡཧིཾ;

ཝདནྟི ཝིཉྙཱུཝཙནཾ, རུལ༹ྷཱཧངྐཱར མཱིདིསཾ.

དམེ ནནྡོཔནནྡསྶ, ཀིཾ མེ བྱཱཔཱརདསྶནཱ?

པུཏྟཱ མེ པཱདསམྦྷཏྟཱ, སཛྫཱ སནྟེ’ཝ ཏཱདིསེ.

སིལེསོ ཝཙནཱ’ནེཀཱ, བྷིདྷེཡྻེ’ཀཔདཱཡུཏཾ;

ཨབྷིནྣཔདཝཱཀྱཱདི, ཝསཱ ཏེདྷཱ’ཡ མཱིརིཏོ.

ཨནྡྷཏམཧརོ ཧཱརཱི, སམཱརུལ༹ྷོ མཧོདཡཾ;

རཱཛཏེ རཾསིམཱལཱི’ཡཾ, བྷགཝཱ བོདྷཡཾ ཛནེ.

སཱརདཱ’མལཀཱ’བྷཱསོ, སམཱནཱིཏ པརིཀྑཡོ;

ཀུམུདཱ’ཀརསམྦོདྷོ, པཱིཎེཏི ཛནཏཾ སུདྷཱི.

སམཱཧིཏ’ཏྟཝིནཡོ, ཨཧཱིན མད མདྡནོ;

སུགཏོ ཝིསདཾ པཱཏུ, པཱཎིནཾ སོ ཝིནཱཡཀོ.

ཝིརུདྡྷཱ, ཝིརུདྡྷཱ, བྷིནྣ, ཀམྨཱ, ནིཡམཝཱ, པརོ;

ནིཡམ’ཀྑེཔཝཙནོ, ཨཝིརོདྷི, ཝིརོདྷྱ’པི.

ཨོཙིཏྱ སམྤོསཀཱདི, སིལེསོ, པདཛཱ’དི [པདཛཱཏི (ཀ.)] པི;

ཨེསཾ ནིདསྶནེསྭེ’ཝ, རཱུཔ མཱཝི བྷཝིསྶཏི.

སཝསེ ཝཏྟཡཾ ལོཀཾ, ཨཁིལཾ ཀལླཝིགྒཧོ;

པརཱབྷཝཏི མཱརཱརི, དྷམྨརཱཛཱ ཝིཛམྦྷཏེ.

སབྷཱཝམདྷུརཾ པུཉྙ ཝིསེསོ’དཡ སམྦྷཝཾ;

སུཎནྟི ཝཱཙཾ མུནིནོ, ཛནཱ པསྶནྟི ཙཱ’མཏཾ.

ཨནྡྷཀཱརཱ’པཧཱརཱཡ ¶ , སབྷཱཝ མདྷུརཱཡ ཙ;

མནོ པཱིཎེཏི ཛནྟཱུནཾ, ཛིནོ ཝཱཙཱཡ བྷཱཡ ཙ.

ཀེས’ཀྑཱིནཾ’ཝ ཀཎྷཏྟཾ, བྷམཱུནཾཡེཝ ཝངྐཏཱ;

པཱཎིཔཱདཱ’དྷརཱནཾ’ཝ, མུནིནྡསྶཱ’བྷིརཏྟཏཱ.

པཱཎིཔཱདཱ’དྷརེསྭེ’ཝ, སཱརཱགོ ཏཝ དིསྶཏི;

དིསྶཏེ སོ’ཡ མཐཝཱ, ནཱཐ! སཱདྷུགུཎེསྭ’པི.

སལཀྑཎོ’ཏིསུབྷགོ, ཏེཛསྶཱི ནིཡཏོ’དཡོ;

སདཡོ པྱ’དཡོ པཱཔེ, ཙིཏྟཱ’ཡཾ མུནིནོ གཏི.

སཾསཱརདུཀྑོ’པཧཏཱ, ཝནཏཱ ཛནཏཱ ཏྭཡི;

སུཁ མིཙྪིཏ མཙྩནྟཾ, ཨམཏནྡད! ཝིནྡཏི.

གུཎཡུཏྟེཧི ཝཏྠཱུཧི, སམཾ ཀཏྭཱན ཀསྶཙི;

སཾཀིཏྟནཾ བྷཝཏི ཡཾ, སཱ མཏཱ ཏུལྱཡོགིཏཱ.

སམྤཏྟསམྨདོ ལོཀོ, སམྤཏྟཱ’ལོཀསམྤདོ;

ཨུབྷོཧི རཾསིམཱལཱི ཙ, བྷགཝཱ ཙ ཏམོནུདོ.

ཨཏྠནྟརཾ སཱདྷཡཏཱ, ཀིཉྩི ཏཾ སདིསཾ ཕལཾ;

དསྶཱིཡཏེ ཨསནྟཾ ཝཱ, སནྟཾ ཝཱ ཏཾ ནིདསྶནཾ.

ཨུདཡཱ ¶ སམཎིནྡསྶ, ཡནྟི པཱཔཱ པརཱབྷཝཾ;

དྷམྨརཱཛཝིརུདྡྷཱནཾ, སཱུཙཡནྟཱ དུར’ནྟཏཾ.

སིརོ ནིཀྑིཏྟ ཙརཎོ, ཙྪརིཡཱན’མྦུཛཱན’ཡཾ;

པརམ’བྦྷུཏཏཾ ལོཀེ, ཝིཉྙཱཔེཏ’ཏྟནོ ཛིནོ.

ཝིབྷཱུཏིཡཱ མཧནྟཏྟཾ, ཨདྷིཔྤཱཡསྶ ཝཱ སིཡཱ;

པརམུཀྐཾསཏཾ ཡཱཏཾ, ཏཾ མཧནྟཏྟ མཱིརིཏཾ.

ཀིརཱིཊ རཏན’ཙྪཱཡཱ, ནུཝིདྡྷཱ’ཏཔ ཝཱརཎོ;

པུརཱ པརཾ སིརིཾ ཝིནྡི, བོདྷིསཏྟོ’ བྷིནིཀྑམཱ.

སཏྟོ སམྦོདྷིཡཾ བོདྷི, སཏྟོ སཏྟཧིཏཱཡ སོ;

ཧིཏྭཱ སྣེཧརསཱབནྡྷ, མཔི རཱཧུལམཱཏརཾ.

གོཔེཏྭཱ ཝཎྞནཱིཡཾ ཡཾ, ཀིཉྩི དསྶཱིཡཏེ པརཾ;

ཨསམཾ ཝཱ སམཾ ཏསྶ, ཡདི སཱ ཝཉྩནཱ མཏཱ.

པུརཏོ ན སཧསྶེསུ, ན པཉྩེསུ ཙ ཏཱདིནོ;

མཱརོ པརེསུ ཏསྶེ’སཾ, སཧསྶཾ དསཝཌྜྷིཏཾ.

ཝིཝཱད མནུཡུཉྫནྟོ, མུནིནྡཝདནི’ནྡུནཱ;

སམྤུཎྞོ ཙནྡིམཱ ནཱ’ཡཾ, ཚཏྟ མེཏཾ མནོབྷུནོ.

པརཱནུཝཏྟནཱདཱིཧི, ནིབྦིནྡེནི’ཧ ཡཱ ཀཏཱ;

ཐུཏི ར’པྤཀཏེ སཱ’ཡཾ, སིཡཱ ཨཔྤཀཏཏྠུཏི.

སུཁཾ ཛཱིཝནྟི ཧརིཎཱ, ཝནེསྭ’པརསེཝིནོ;

ཨནཱཡཱསོ པལཱབྷེཧི, ཛལདབྦྷངྐུརཱདིབྷི.

ཨུཏྟརཾ ཨུཏྟརཾ ཡཏྠ, པུབྦཔུབྦཝིསེསནཾ;

སིཡཱ ཨེཀཱཝལི སཱ’ཡཾ, དྭིདྷཱ ཝིདྷི, ནིསེདྷཏོ.

པཱདཱ ¶ ནཁཱལི རུཙིརཱ, ནཁཱལི རཾསི བྷཱསུརཱ;

རཾསཱིཏམོཔཧཱནེ’ཀ, རསཱ སོབྷནྟི སཏྠུནོ.

ནཱ’ལཡོ ཡོ ས ཛནྟཱུནཾ, ནཱ’ནནྟ བྱསནཱ ཝཧོ.

ཡཧིཾ བྷཱུསིཡ བྷཱུསཏྟཾ, ཨཉྙམཉྙཾ ཏུ ཝཏྠུནཾ;

ཝིནཱ’ཝ སདིསཏྟཾ ཏཾ, ཨཉྙམཉྙཝིབྷཱུསནཾ.

བྱཱམཾ’སུ མཎྜལཾ ཏེན, མུནིནཱ ལོཀབནྡྷུནཱ;

མཧནྟིཾ ཝིནྡཏཱི ཀནྟིཾ, སོཔི ཏེནེཝ ཏཱདིསིཾ.

ཀཐནཾ སཧབྷཱཝསྶ, ཀྲིཡཱཡ ཙ, གུཎསྶ ཙ;

‘སཧཝུཏྟཱི’ཏི ཝིཉྙེཡྻཾ, ཏ’དུདཱཧརཎཾ ཡཐཱ.

ཛལནྟི ཙནྡརཾསཱིཧི, སམཾ སཏྠུ ནཁཾ སཝོ;

ཝིཛམྦྷཏི ཙ ཙནྡེན, སམཾ ཏམྨུཁཙནྡིམཱ.

ཛིནོ’དཡེན མལཱིནཾ, སཧ དུཛྫན ཙེཏསཱ;

པཱཔཾ དིསཱ སུཝིམལཱ, སཧ སཛྫན ཙེཏསཱ.

ཝིརོདྷཱིནཾ པད’ཏྠཱནཾ, ཡཏྠ སཾསགྒདསྶནཾ;

སམུཀྐཾསཱ’བྷིདྷཱནཏྠཾ, མཏཱ སཱ’ཡཾ ཝིརོདྷིཏཱ.

གུཎཱ སབྷཱཝ མདྷུརཱ, ཨཔི ལོཀེ’ཀ བནྡྷུནོ;

སེཝིཏཱ པཱཔ སེཝཱིནཾ, སམྤདཱུསེནྟི མཱནསཾ.

ཡསྶ ཀསྶ ཙི དཱནེན, ཡསྶ ཀསྶ ཙི ཝཏྠུནོ;

ཝིསིཊྛསྶ ཡ མཱདཱནཾ, ‘པརིཝུཏྟཱི’ཏི སཱ མཏཱ.

པུརཱ པརེསཾ དཏྭཱན, མནུཉྙཾ ནཡནཱདིཀཾ;

མུནིནཱ སམནུཔྤཏྟཱ, དཱནི སབྦཉྙུཏཱསིརཱི [མུནིནྡ! སམནུཔྤཏྟོ, དཱནི སབྦཉྙུཏཱསིརིཾ (ཀ.)].

ཀིཉྩི ¶ དིསྭཱན ཝིཉྙཱཏཱ, པཊིཔཛྫཏི ཏཾསམཾ;

སཾསཡཱ’པགཏཾ ཝཏྠུཾ, ཡཏྠ སོ’ཡཾ བྷམོ མཏོ.

སམཾ དིསཱསུ’ཛྫལཱསུ, ཛིན པཱད ནཁཾ’སུནཱ;

པསྶནྟཱ ཨབྷིནནྡནྟི, ཙནྡཱ’ཏཔ མནཱ ཛནཱ.

པཝུཙྩཏེ ཡཾ ནཱམཱདི, ཀཝཱིནཾ བྷཱཝབོདྷནཾ;

ཡེན ཀེནཙི ཝཎྞེན, བྷཱཝོ ནཱམཱ’ཡ མཱིརིཏོ.

ནནུ ཏེཡེ’ཝ སནྟཱནོ, སཱགརཱ ན ཀུལཱཙལཱ;

མནམྤི མརིཡཱདཾ ཡེ, སཾཝཊྚེཔི ཛཧནྟི ནོ.

ཨངྒངྒི བྷཱཝཱ སདིས, བལབྷཱཝཱ ཙ བནྡྷནེ;

སཾསགྒོ’ལངྐཏཱིནཾ ཡོ, ཏཾ ‘མིསྶ’ནྟི པཝུཙྩཏི.

པསཏྠཱ མུནིནོ པཱད, ནཁ རཾསི མཧཱནདཱི;

ཨཧོ! གཱལ༹ྷཾ ནིམུགྒེཔི, སུཁཡཏྱེ’ཝ ཏེ ཛནེ.

ཝེསོ སབྷཱཝ མདྷུརོ, རཱུཔཾ ནེཏྟ རསཱཡནཾ;

མདྷཱུ’ཝ མུནིནོ ཝཱཙཱ, ན སམྤཱིཎེཏི ཀཾ ཛནཾ.

ཨཱསཱི ནཱམ སིཡཱ’ཏྠསྶ, ཨིཊྛསྶཱ’སཱིསནཾ ཡཐཱ;

རས’པྤཏཱིཏི ཛནཀཾ, ཛཱཡཏེ ཡཾ ཝིབྷཱུསནཾ;

‘རསཝནྟ’ནྟི ཏཾ ཉེཡྻཾ, རསཝནྟ ཝིདྷཱནཏོ.

རཱགཱ’ནཏ’བྦྷུཏ སརོཛ མུཁཾ དྷརཱཡ,

པཱདཱ ཏིལོཀགརུནོ’དྷིཀ བནྡྷརཱགཱ;

ཨཱདཱཡ ནིཙྩསརསེན ཀརེན གཱལ༹ྷཾ,

ཨིཙྩཱ’ནུགམྨ ¶ པུརིམཱཙརིཡཱ’ནུབྷཱཝཾ,

བྷེདོ’པརཱུཔརི ཀཝཱིཧི ཝིཀཔྤིཡཱནཾ,

ཨིཏི སངྒྷརཀྑིཏམཧཱསཱམི ཝིརཙིཏེ སུབོདྷཱལངྐཱརེ

པཊིབྷཱནཝཏཱ ལོཀ, ཝོཧཱར’མནུསཱརིནཱ;

ཏཏོ’ཙིཏྱ སམུལླཱས, ཝེདིནཱ ཀཝིནཱ པརཾ.

ཋཱཡིསམྦནྡྷིནོ བྷཱཝ, ཝིབྷཱཝཱ སཱ’ནུབྷཱཝཀཱ;

སམྦཛ྄ཛྷནྟི ནིབནྡྷཱ ཏེ, རས’སྶཱདཱཡ སཱདྷུནཾ.

ཙིཏྟ ཝུཏྟི ཝིསེསཱ ཏུ, བྷཱཝཡནྟི རསེ ཡཏོ;

རཏྱཱདཡོ ཏཏོ བྷཱཝ, སདྡེན པརིཀིཏྟིཏཱ.

ཝིརོདྷིནཱ’ཉྙབྷཱཝེན, ཡོ བྷཱཝོ ན ཏིརོཧིཏོ;

སཱིལེན ཏིཊྛཏི’ཙྩེསོ, ‘ཋཱཡཱིབྷཱཝོ’ཏི སདྡིཏོ.

ཛིགུཙྪཱ, ཝིམྷཡོ, ཙེཝ, སམོ ཙ ནཝ ཋཱཡིནོ.

ཏིརོབྷཱཝཱ, ཝིབྷཱཝཱ’དི, ཝིསེསནཱ’བྷིམུཁྱཏོ;

ཡེ ཏེ ཙརནྟི སཱིལེན, ཏེ ཧོནྟི བྱབྷིཙཱརིནོ.

སཏི, སྶཱ, ཝིསཱདཱ, བཧིཏྠཱ [བཧིདྡྷཱ (ཀ.)];

ཙཔལཏཱ [སཙཔལཱ (ཀ.)], བྱཱདྷི, ཏེཏྟིཾས མེཏེ.

སམཱཧིཏ’ཏྟ’པྤབྷཝཾ, སཏྟཾ [སཏྭཾ (ཀ.)] ཏེནོ’པཔཱདིཏཱ;

སཏྟིཀཱ [སཱཏྭིཀཱ (ཀ.)] པྱ’ནུབྷཱཝཏྟེ, ཝིསུཾ བྷཱཝཱ བྷཝནྟི ཏེ.

ཐམྦྷོ, པལ༹ཡ, རོམཉྩཱ, ཏཐཱ སེད, སྶུ, ཝེཔཐུ;

ཝེཝཎྞིཡཾ, ཝིསརཏཱ, བྷཱཝཱ’ཊྛེ’ཏེ ཏུ སཏྟིཀཱ.

ཡདཱ རཏྱཱདཡོ བྷཱཝཱ, ཋིཏིསཱིལཱ ན ཧོནྟི ཙེ;

ཏདཱ སབྦེཔི ཏེ བྷཱཝཱ, བྷཝནྟི བྱབྷིཙཱརིནོ.

ཝིབྷཱཝོ ཀཱརཎཾ ཏེསུ, པྤཏྟིཡུ’དྡཱིཔནེ ཏཐཱ;

ནེཀཧེཏུཾ མནོཝུཏྟི, ཝིསེསཉྩ ཝིབྷཱཝིཏུཾ;

བྷཱཝཾ ཝིབྷཱཝཱ’ནུབྷཱཝཱ, ཝཎྞིཡཱ བནྡྷནེ ཕུཊཾ.

སཝིབྷཱཝཱ’ནུབྷཱཝེཧི, བྷཱཝཱ ཏེ ཏེ ཡཐཱརཧཾ;

ཝཎྞནཱིཡཱ ཡཐོ’ཙིཏྱཾ, ལོཀརཱུཔཱ’ནུགཱམིནཱ.

ཙིཏྟ ¶ ཝུཏྟི ཝིསེསཏྟཱ, མཱནསཱ སཏྟིཀཱ’ངྒཏོ;

བཧི ནིསྶཊ སེདཱདི, ཨནུབྷཱཝེཧི ཝཎྞིཡཱ.

སཱམཱཛིཀཱན མཱནནྡོ, ཡོ བནྡྷཏྠཱ’ནུསཱརིནཾ;

རསཱིཡཏཱིཏི ཏཉྙཱུཧི, རསོ ནཱམཱ’ཡ’མཱིརིཏོ.

སཝིབྷཱཝཱ, ནུབྷཱཝེཧི, སཏྟིཀ,བྱབྷིཙཱརིབྷི;

ཨསྶཱདིཡཏྟ མཱནཱིཡ, མཱནོ ཋཱཡེ’ཝ སོ རསོ.

སིངྒཱར,ཧསྶ,ཀརུཎཱ, རུདྡ,ཝཱིར,བྷཡཱནཀཱ;

བཱིབྷཙྪ,བྦྷུཏ,སནྟཱ, ཙ, རསཱ ཋཱཡཱིན ནུཀྐམཱ.

དུཀྑརཱུཔེ’ཡ’ མཱནནྡོ, ཀཐཾ ནུ ཀརུཎཱདིཀེ?

ཋཱཡཱིབྷཱཝ ནིདྡེས རཏིཊྛཱཡཱིབྷཱཝ

རམྨ,དེས, ཀལཱ, ཀཱལ, ཝེསཱདི, པཊིསེཝནཱ;

ཡུཝཱན’ཉྙོཉྙརཏྟཱནཾ, པམོདོ རཏི རུཙྩཏེ.

ཡུཏྱཱ བྷཱཝཱནུབྷཱཝཱ ཏེ, ནིབནྡྷཱ པོསཡནྟི ནཾ;

སོཔྱ’ཡོག, ཝིཔྤཡོག, སམྦྷོགཱནཾ ཝསཱ ཏིདྷཱ.

ཝིཀཱརཱ’ཀཏིཨཱདཱིཧི, ཨཏྟནོ ཐ པརསྶ ཝཱ;

ཧསྶོ ནིདྡཱ, སམཱ’ལསྱ, མུཙྪཱདི,བྱབྷིཙཱརིབྷི;

པརིཔོསེ སིཡཱ ཧསྶོ, བྷིཡྻོ’ཏྠིཔབྷུཏཱིནཾ སོ.

ཀིཉྩཱ’ལཀྑིཡ དིཛཾ ཏུ ཏཾ ཧསིཏཾ;

མདྷུརསྶརཾ ཝིཧསིཏཾ, ཨཾསསིརོཀམྤམུཔཧསིཏཾ.

ཨཔཧསིཏཾ ¶ སཛལ’ཀྑི, ཝིཀྑིཏྟངྒཾ བྷཝཏྱ’ཏིཧསིཏཾ;

ཛེཊྛེ [མཛ྄ཛྷེ’དྷམེཏི ཨེཏྠ མཛ྄ཛྷེ ཨདྷམེཏི པདཙྪེདོ] མཛ྄ཛྷེ’དྷམེ ཙ ཀམསོ.

སོཀརཱུཔོ ཏུ ཀརུཎོ, ནིཊྛཔྤཏྟི’ཊྛ ནཱསཏོ;

ཏཏྠཱ’ནུབྷཱཝཱ རུདིཏ, པལ༹ཡ,ཏྠམྦྷཀཱདཡོ;

ཝིསཱདཱ,ལསྱ,མརཎ, ཙིནྟཱ’དཱི བྱབྷིཙཱརིནོ.

ཀོདྷོ མཙྪརིཡཱ’དཱིཧི, པོསེ ཏཱས, མདཱདིབྷི;

ནཡནཱ’རུཎཏཱདཱིཧི, རུདྡོ ནཱམ རསོ བྷཝེ.

པཏཱཔ, ཝིཀྐམཱ’དཱིཧུ, སྶཱཧོ ‘ཝཱིརོ’ཏི སཉྙིཏོ;

རཎ,དཱན,དཡཱཡོགཱ, ཝཱིརོ’ཡཾ ཏིཝིདྷོ བྷཝེ;

ཏེཝཱ’ནུབྷཱཝཱ དྷིཏི,མ, ཏྱཱ’དཡོ བྱབྷིཙཱརིནོ.

ཝིཀཱརཱ,སནི,སཏྟཱ’དི, བྷཡུ’ཀྐཾསོ བྷཡཱནཀོ;

སེདཱ’དཡོ ནུབྷཱཝེ’ཏྠ, ཏཱསཱ’དཱི བྱབྷིཙཱརིནོ.

ཛིགུཙྪཱ རུདྷིརཱ’དཱིཧི, པཱུཏྱཱ’དཱིཧི ཝིརཱགཏོ;

བཱིབྷཙྪོ ཁོབྷནུ’བྦེགཱི, ཀམེན ཀརུཎཱཡུཏོ;

ནཱསཱ ཝིཀཱུཎནཱདཱིཧི, སངྐཱདཱིཧི’སྶ པོསནཾ.

ཨཏི ལོཀ པདཏྠེཧི, ཝིམྷཡོ’ཡཾ རསོ’བྦྷུཏོ;

ཏསྶཱ’ནུབྷཱཝཱ སེད,སྶུ, སཱདྷུཝཱདཱ’དཡོ སིཡུཾ;

ཏཱསཱ,ཝེག,དྷིཏི,པྤཉྙཱ, ཧོནྟེ’ཏྠ བྱབྷིཙཱརིནོ.

ཋཱཡཱིབྷཱཝོ སམོ མེཏྟཱ, དཡཱ,མོདཱ’དི སམྦྷཝོ;

བྷཱཝཱདཱིཧི ཏ’དུཀྐཾསོ, སནྟོ སནྟ ནིསེཝིཏོ.

ཨིཏི སངྒྷརཀྑིཏ མཧཱསཱམིཝིརཙིཏེ སུབོདྷཱལངྐཱརེ