📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ.

སུབོདྷཱལངྐཱརཊཱིཀཱ

གནྠཱརམྦྷཀཐཱ

ཡོ ¶ པཱདནཱིརཛཝརོདརརཱདྷིཏེན […རཱདིཀེན (ཀ.)],

ལོཀཏྟཡེན’ཝིཀལེན ནིརཱཀུལེན;

ཝིཉྙཱཔཡཱི ནིརུཔམེཡྻཏམཏྟནོ ཏཾ,

ཝནྡེ མུནིནྡམབྷིཝནྡིཡ ཝནྡནཱིཡཾ.

པཏྟོ སཔཏྟཝིཛཡོ ཛཡབོདྷིམཱུལེ,

སདྡྷམྨརཱཛཔདཝིཾ ཡདནུགྒཧེན;

སཏྟཱཔསཏྟ [སཏྟཔྤསཏྠ (ཀ.)] ཝིཔུལཱམལསགྒུཎསྶ,

སདྡྷམྨསཱརརཏནསྶ ནམཏྠུ ཏསྶ.

ཡོ བྷཱཛནཏྟམབྷིསམྦྷུཎི སགྒུཎསྶ,

ཏསྶཱཔི དྷམྨརཏནསྶ མཧཱརཧསྶ;

སམྦྷཱཝིཏཾ སསིརསཱཧིཏསནྣཏེཧི,

སམྦྷཱཝཡཱམི སིརསཱ གཎམུཏྟམཾ ཏཾ.

ཡེ’ནནྟཏནྟརཏནཱཀརམནྠནེན,

མནྠཱ’ཙལོལླསིཏཉཱཎཝརེན ལདྡྷཱ;

སཱརཱ མཏཱཏི སུཁིཏཱ སུཁཡནྟི ཙཉྙེ,

ཏེ མེ ཛཡནྟི གུརཝོ གུརཝོ གུཎེཧི.

༡. དོསཱཝབོདྷ པཋམཔརིཙྪེད

རཏནཏྟཡཔྤཎཱམཝཎྞནཱ

༡.

མུནིནྡཝདནམྦྷོཛ-གབྦྷསམྦྷཝསུནྡརཱི;

སརཎཾ པཱཎིནཾ ཝཱཎཱི, མཡ྄ཧཾ པཱིཎཡཏཾ མནཾ.

༡. ཨཐཱཡཾ ¶ གནྠཀཱརོ གནྠཱརམྦྷེ པུབྦཔཡོགཱནུབནྡྷསབྷཱཝསིདྡྷིཀཝིགུཎོཔེཏཱནཾ ཡཏིཔོཏཱནཾ ཏདུཔཱཡནྟརཝིརཏཱ ཀམནྟརཱཔེཏཔརཀྐམསམྦྷཝེནཱདྷིགཏབྱསནསཏམུཔལབྦྷ དཡཱསཉྫཱཏརསརསཧདཡཏཱཡ ཏདུཔཱཡབྷཱུཏཾ བནྡྷལཀྑཎཾ ཝིརཙཡིཏུཀཱམོབྷིམཏསིདྡྷིནིམིཏྟམཏྟནོདྷིགཏསདྡྷམྨདེཝཏཱནུསྶརཎཾ ཏཱཝ དསྶེཏུམཱཧ ‘‘མུནིནྡེ’’ཙྩཱདི. ནནུ ‘‘བནྡྷལཀྑཎཾ ཝིརཙཡིཏུཀཱམོ’’ཏི ཝུཏྟཾ, ཀིམེཏྠ ལཀྑཎཀརཎེན ཨདིཊྛལཀྑཎཱཔི དིསྶནྟི བནྡྷནྟཱཏི? སཙྩཾ, ཏཐཱཔི ཏེ གྷུཎཀྑརཔྤཀཱསཱ ཏབྦིདཱུནཾ པཡོགཱནུསཱརིནོ ཝཱ སིཡུཾ, པུབྦེ ཀཏསཏྠཔརིཙཡཱ ཝཱ སིཡུནྟི ཝིཉྙེཡྻཾ. ཝཱཎཱི མཡ྄ཧཾ མནཾ པཱིཎཡཏནྟི སམྦནྡྷོ. ཝཱཎཱིཏི ཝཱ སརསྶཏྱཔརནཱམདྷེཡྻཱ ཀཱཙི དེཝཏཱ, སཱ སབྦཱཝདཱཏཱ ཡཐིཙྪིཏཏྠསཱདྷནཔུཎྜརཱིཀགབྦྷེ ནིསཱིདཏཱིཏི ལོཀཝཱདོ. ཝཱཎཱིཏི པན པཙྩུཧཝིརཧེནཱབྷིམཏསིདྡྷིནིབནྡྷནེཀཏཱཎོ སམྨཱསམྦུདྡྷབྷཱསིཏོ སདྡྷམྨོ, ཏཏོཡེཝཱཡཾ དེཝཏཱ རུཔྤཏེ. ཏཏྠ སརསྶཏིཡཱ ཡཐཱ’སཏྟཱ ཛཱཏཱཡ མནོསམྤཱིཎནནྟི ལོཀོ, སདྡྷམྨདེཝཏཱཡ ཏུ མནོཔཱིཎནཾ, ཏསྶཱ སབྦཝཛྫརཧིཏཱཡཙྩནྟནིམྨལཱཡ ནིརནྟརཏྠནེཀཏཱཎཔྤཝཏྟིཡཱ མནསོ སམྤཱིཎནཾ. ཏེན ཙ པསྶདྡྷི, ཏཱཡ པན སུཁཾ, ཏེནཱཔི སམཱདྷི, སམཱདྷིསམྦྷཝེན ཡཐཱབྷཱུཏཱཝབོདྷསམྦྷཝཏོ ཝིཙིཏྟཱནེཀསདྡཏྠཝིསེསཱ པཊིབྷནྟྱནཱཡཱསེན, ཏཏོ ཙ ཡཐིཙྪིཏསིདྡྷིནིཔྥཏྟཱིཏི ཝངྐཝུཏྟིཡཱ ཏཔྤསཱདམཱསཱིསཏི.

ཀིཾཝིསིཊྛོཙྩཱཧ ¶ ‘‘མུནིནྡེ’’ཙྩཱདི. ཨུབྷོ ལོཀེ མུནཱཏི ཛཱནཱཏཱིཏི མུནི, ཨིནྡཏི པརམིསྶརིཡཾ པཝཏྟེཏི སབྦཏྠཱཏི ཨིནྡོ, མུནི ཙ སོ ཨིནྡོ ཙ, མུནཱིནཾ ཨིནྡོཏི ཝཱ མུནིནྡོ, སམྨཱསམྦུདྡྷོ. ཏཏོཡཾ ཏསྶ ནིམིཏྟཀསཉྙཱ. ཝིཛྫམཱནེསུཔི པརིཡཱཡསདྡེསྭཉྙེསུ ཀཝིཀཱམིཏསྶཏྠསྶེཀནྟཝཱཙཀཏྟེནོ’ ཙིཏྱསམྤོསཀོཡཾ མུནིནྡསདྡོ, ཏཐཱ ཧི ཡོ ཨུབྷཡལོཀཛཱནནེན མུནཱིནཾ པརམིསྶརིཡཔུགྒལཱནམྤི པརམིསྶརིཡཾ ཝཏྟེཏི, སོ པརཾ པཱིཎེཏི ཧེཏུབྷཱཝེན’ཏྲེ’ཏྱུ’ཙིཏམེཝ, ཏཐཱ པདནྟརཱནམྤི ཨོཙིཏྱཾ པོསེཏི. ཏཐཱ ཧི ཏཱདིསསྶ ཝདནཱརཝིནྡོདརེ སམྦྷཝཱ སུནྡརཱི, ཏཏོཡེཝ པཊིསརཎཾ, ཏསྨཱ ཙ མནོ པཱིཎེཏཱིཏི. ཏསྶ ཝདནཾ, ཏམིཝ མུནིནྡཝདནཾ, ཨམྦྷོཛཾ. ཏམེཝ ཝཱ ལཀྑིསཾཡོགིཏཱདིསདྷམྨེན’མྦྷོཛཾ, པདུམཾ. ཏསྶ གབྦྷོ. ཏཏྠ སམྦྷཝེན པཝཏྟིཡཱ, ཨུཔྤཏྟིཡཱ ཝཱ སུནྡརཱི ནིརཝཛྫཱ དེཝཏཱ. ཝཱཙཱ པན དོསལེསེནཱཔ’སམྥུཊྛཱཝ ནིརཝཛྫཱ, ཏཐཱ ཙ ཝཀྑཏི ‘‘གུཎཱལངྐཱརསཾཡུཏྟཱ’’ [སུབོདྷཱལངྐཱར ༡༤ གཱཐཱ] ཨིཙྩཱདི. ཏཏོཝཱཡཾ སརཎཾ པཱཎིནཾ སཏྟཱནཾ པཊིབྷཱནཱདིགུཎཝིསེསཱཝཧཏྟམཏྟེན པཊིསརཎབྷཱུཏཱ དེཝཏཱ. ཝཱཙཱ པན སབྦུཔདྡཝནིཝཱརཎེན སབྦཧིཏསུཁསམྤདཱསམྤཱདནེནཙྩནྟཔཊིསརཎབྷཱུཏཱ. སབྷཱཝནཔུཾསཀཏྟཱ ཙེཏྠ ན ལིངྒཔརིཝཏྟནཾ. མཡ྄ཧནྟི ཨེཀཝཙནེནཏྟནོ ནིརབྷིམཱནཏ’མཱནེཏི སཛྫནམཱཙཱརཾ. ཨབྷིནྣཔདསིལེསོ ཙཱཡཾ, སབྦཏྠེཝཱཝཱིཀཏསདྡཔྤཡོགཏོ. སིལེསོ ཙཱཡཾ ཝངྐཝུཏྟིཡཱ སབྦཏྠ སིརིཾ པོསེཏི. ཏཐཱ ཙ ཝཀྑཏི ‘‘ཝངྐཝུཏྟཱིསུ པོསེཏི, སིལེསོ ཏུ སིརིཾ པར’’ནྟི [སུབོདྷཱལངྐཱར ༡༧༢ གཱཐཱ]. ཨཡམེཏྠ སངྑེཔེན ནཡེན ཨཏྠཝཎྞནཱ. ཝིཏྠཱརནཡེན པན ནཱནཔྤཀཱརེནཏྠོ སཾཝཎྞེཏུཾ སཀྐཱ. ཏཐཱ སཏི གནྠགཱརཝོཔི སིཡཱཏི པཀཱརོཡམེཝབྦྷུཔགཏོ.

༡. སུཔརིསུདྡྷབུདྡྷིགོཙརཔརམཝིཙིཏྟགནྠཀཱརཀོཡམཱཙརིཡ- སངྒྷརཀྑིཏམཧཱསཱམིཔཱདོ ¶ སཔིཊཀཏྟཡསབྦསཏྠཔཱརཱཝཏརཎེན སཉྫཱཏཱནཔྤཀཔཱིཏིསུཁམནུབྷཝཾ པཊིཔཏྟིཔཊིཝེདྷསཱསནདྭཡསྶ པརིཡཏྟིམཱུལཀཏྟཱ ཡེན ཀེནཙི པརིཡཱཡེན ཏསྶཱ པརིཡཏྟིཡཱ ཨཏྠཱཝབོདྷེན ‘‘ཨཔྤེཝ ནཱམ སཱདྷུཛནཾ པརིཏོསེཡྻ’’མིཏི ཏདདྷིགམོཔཱཡབྷཱུཏམིདཾ པཀརཎམཱརབྷནྟོ གནྠཱརམྦྷེ ཨིཊྛདེཝཏཱཡ པཎཱམཀརཎཾ སཏཱཙཱརཱནུརཀྑཎཏྠཾ [སདཱཙཱརཱནུརཀྑཎཏྠཾ (ཀ.)], ཝིསེསཏོ ཨབྷིམཏགནྠསྶཱནནྟརཱཡེན པརིསམཏྟིཡཱ ཙ ཀཱརཎམིཏི ཨིཊྛདེཝཏཱནུསྶརཎཾ, གནྠནྟརཱརམྦྷཔཊིཀྑེཔཀཛནཔཊིབཱཧནཔུབྦཀཱནི ཨབྷིདྷཱནཱབྷིདྷེཡྻཀརཎཔྤཀཱརཔཡོཛནཱནི ཙ དསྶེནྟོ ‘‘མུནིནྡཝདནམྦྷོཛ…པེ… པརིསྶམོ’’ཏི གཱཐཏྟཡམཱཧ. ཨེཏྠ པཋམགཱཐཱཡ ཨིཊྛདེཝཏཱསངྑཱཏརཏནཏྟཡཔྤཎཱམོ དསྶིཏོ, དུཏིཡགཱཐཱཡ ཨཱརམྦྷཔཊིཀྑེཔཀཛནཱ ནིསེདྷིཏཱ, ཏཏིཡགཱཐཱཡ ཨབྷིདྷཱནཱདིཀཾ དསྶིཏཾ. ཏཐཱ ཧི ལོཀུཏྟརདྷམྨནིསྶིཏཔརིཡཏྟིསངྑཱཏསབྦཉྙུབྷཱརཏིཡཱ མནོསམྤཱིཎནཱསཱིསནཱཔདེསེན ཨཏྟནོ ནིསྶེསདྷམྨརཏནེ པསཱདོ པཀཱསིཏོ. སོ པན དྷམྨཔྤསཱདོ ཏདཝིནཱབྷཱཝཏོ བུདྡྷསངྒྷེསུཔི སིདྡྷོཏི རཏནཏྟཡཝིསཡཾ པཎཱམཾ ཝངྐཝུཏྟིཡཱ དསྶེཏི. སོ ཧི ཨཏྠཏོ པཎཱམཀྲིཡཱབྷིནིཔྥཱདིཀཱ ཀུསལཙེཏནཱ. ཨེཏྠ ཕལཾ ཧེཊྛཱ ཝུཏྟམེཝ.

པུན སནྟེསུ རཱམསམྨཱདྱལངྐཱརེསུ པིཊྛཔིསནཾ ཝིཡ ཧོཏཱིདཾ ཨལངྐཱརཀརཎནྟི ཝདནྟཱ ཝིརུདྡྷཝཱདིནོ རཱམསམྨཱདཱིནམཏྠིབྷཱཝཾ ཨུབྦྷཱཝེཏྭཱ [ཨབྷྱུཔགམེཏྭཱ (ཀ.)] ཏེ སུདྡྷམཱགདྷིཀཱ ན ཝལ༹ཉྫེནྟཱིཏི ཨིམིནཱ པཊིསིདྡྷཱ. ནིརཱཀརཎཕལཉྷི གནྠསྶ ནིདྡོསབྷཱཝོཝ. ཨཔིཙ སདྡཱལངྐཱརཨཏྠཱལངྐཱརདཱིཔཀེན ཨལངྐཱརསདྡེན ¶ གནྠསརཱིརསངྑཱཏསཉྙིནོ སཉྙཱསངྑཱཏཨབྷིདྷཱནཉྩ ཨལངྐཱརསདྡསྶ སདྡཱལངྐཱརཱདྱབྷིདྷེཡྻཉྩ སུདྡྷམཱགདྷིཀཏྟཾ ཝཏྭཱ ཨལངྐཱརསདྡསྶ ཝིསེསནབྷཱུཏཨནུརཱུཔསདྡོཔཱདཱནེན བུདྡྷཝཙནསྶ ཨུཔཡོགཏྟཾ མཱགདྷིཀཝོཧཱརེན བྷཝཏཱིཏི གམྱམཱནཏྟཱ ཀརཎཔྤཀཱརཉྩ ཨལངྐཱརགནྠཔྤཝཏྟིཡཱ ཨཏྠཱལངྐཱརཱདིནིསྶིཏཏྟཱ ཨིམིནཱ ཨལངྐཱརསདྡེནེཝ ཨལངྐཱརསངྑརཎསངྑཱཏཔྤཡོཛནཉྩ དསྶེཏི.

སཏྠཔྤཡོཛནཱནཾ སཱདྷྱསཱདྷནལཀྑཎོ སམྦནྡྷོ པན སམྦནྡྷསྶ ནིསྶཡབྷཱུཏསཏྠཔྤཡོཛནཱནཾ དསྶནེནེཝ ཏནྣིསྶིཏཏྟཱ སཡམྤི ཝུཏྟོ ཧོཏི. ཝུཏྟཾ ཧི–

‘‘སཏྠཾ པཡོཛནཉྩེཝ, ཨུབྷོ སམྦནྡྷནིསྶཡཱ;

ཝུཏྟཱ ཏཾཝུཏྟིཡཱཡེཝ, ཝུཏྟོ ཏནྣིསྶིཏོཔི སོ’’ཏི.

ཏསྶཏྠོ– སམྦནྡྷནིསྶཡཱ སམྦནྡྷསྶ ཨཱདྷཱརབྷཱུཏཱ སཏྠཾ, པཡོཛནཉྩ ཨུབྷོ ཝུཏྟཱ, ཏཾཝུཏྟིཡཱཡེཝ ཏེསཾ ཨུབྷིནྣཾ ཀཐནེནེཝ ཏནྣིསྶིཏོ ཏེ ནིསྶཱཡ པཝཏྟོ སོཔི སམྦནྡྷོ ཝུཏྟོ བྷཝཏཱིཏི.

ཨེཏྠ ཨབྷིདྷཱནཀཐནཾ ཝོཧཱརསུཁཏྠཾ, ཨབྷིདྷེཡྻཱདིཀཐནཾ པན ཏེཧི ཡུཏྟཱནཾཡེཝ གནྠཱནཾ སུབུདྡྷིཔུབྦཀཱདཱིནཾ ཨུཔཱདེཡྻཏྟཉྩ ཏབྦིཔརཱིཏཱནཾ ཨུམྨཏྟཀཝཙནཱདཱིནམིཝཨནུཔཱདེཡྻཏྟཉྩ པཀཱསནཏྠནྟི ཝེདིཏབྦཾ. ཝུཏྟཉྷི –

‘‘སམྦནྡྷཱནུགུཎོཔཱཡཾ [སམྦནྡྷྱནུགུཎོཔཱཡཾ (ཀ.)], པུརིསཏྠཱབྷིདྷཱཡཀཾ;

ཝཱིམཾསཱདྷིགཏཾ [ཝཱིམཾསཱདྷིཀཏཾ (སཱི.)] ཝཱཀྱ-མཏོནདྷིགཏཾ […ནདྷིཀཏཾ (སཱི.)] པར’’ནྟི.

ཏསྶཏྠོ– སམྦནྡྷཱནུགུཎོཔཱཡཾ སཱདྷིཡསཱདྷནལཀྑཎསམྦནྡྷསྶ ནིསྶཡབྷཱུཏཝཱཙྩཝཱཙཀཱནཾ སམྦནྡྷིབྷཱུཏཱནཾ ཨཉྙམཉྙཱནུརཱུཔགུཎཔརིཛཱནནེ ཀཱརཎབྷཱུཏཾ པུརིསཏྠཱབྷིདྷཱཡཀཾ ཙཏུབྦིདྷདྷམྨཨཏྠཀཱམམོཀྑསངྑཱཏཱནཾ པུརིསཏྠཱནཾ ཝཱཙཀབྷཱུཏཾ ¶ ཝཱཀྱཾ ‘‘ཨེཀཱཁྱཱཏོ པདཙྩཡོ, སིཡཱ ཝཱཀྱཾ སཀཱརཀོ’’ཏི [ཨབྷིདྷཱནཔྤདཱིཔིཀཱ ༡༠༦ གཱཐཱ] ཝུཏྟལཀྑཎམཛ྄ཛྷཔཏིཏཝཱཀྱསམུདཱཡོཔེཏཾ མཧཱཝཱཀྱསརཱུཔསཏྠཾ ཝཱིམཾསཱདྷིགཏཾ ཉཱཎགཏིལཀྑཎཨུཔཔརིཀྑཱཡ ཨདྷིགཏཾ ཨདྷིཔྤེཏཾ, ཨཏོ པརཾ ཝུཏྟལཀྑཎསཏྠཏོ ཨཉྙཾ ཨནདྷིགཏཾ ནཱདྷིཔྤེཏནྟི. ཨིདཾ པནེཏྠ གཱཐཱནཾ ནིཀྑེཔཔྤཡོཛནཾ.

ལོཀེ པདུམགབྦྷེ ཝསནྟིཡཱ སབྦངྒདྷཝལཱཡ ཡཐིཙྪིཏཏྠསཱདྷིཀཱཡ སརསྶཏཱིནཱམིཀཱཡ དེཝཏཱཡ ‘‘ཝཱཎཱི’’ཏི ཝོཧཱརཏོ ཨིམིནཱ ཨཏྠེན ཡོཛེཏྭཱ ཨབྷིནྣཔདསིལེསཱལངྐཱརཝསེན ཝུཏྟཏྟཱ པདཏྠོ ཨེཝཾ ཝེདིཏབྦོ – མུནིནྡསྶ སོབྷཱསུགནྡྷཱདིགུཎཡོགཏོ མུཁསདིསསྶ, ནོ ཙེ མུཁསངྑཱཏཨམྦྷོཛསྶ གབྦྷེ ཨུདརེ སམྦྷཝེན པཝཏྟིཡཱ ཨུཔྤཏྟིཡཱ ཝཱ སུནྡརཱི ནིདྡོསཱ, སོབྷནཱ ཝཱ པཱཎིནཾ སརཎཾ ཨཏོཡེཝ ཨཧིཏཱཔནཡནཧིཏཱཝཧཏྠེན སབྦསཏྟཱནཾ པཊིསྶརཎབྷཱུཏཱ ཝཱཎཱི ཡཐཱཝུཏྟགུཎོཔེཏཱ སརསྶཏཱིདེཝཏཱ, ནོ ཙེ སབྦཉྙུབྷཱརཏཱིཏི ཝུཏྟསདྡྷམྨརཏནཾ མཡ྄ཧཾ མནཾ གནྠཝིརཙནེ བྱཱཝཊསྶ མེ ཙིཏྟཾ པཱིཎཡཏཾ ཨབྷིམཏཏྠསམྤཱདནེན པཱིཎཡཏཱུཏི.

ཨུབྷཡལོཀཛཱནནཏོ མུནི ཙ སོ ཨིནྡབྷཱཝཔཝཏྟནཏོ ཨིནྡོ ཙེཏི ཀམྨདྷཱརཡེན ཝཱ, ཨགཱརིཡམུནིཨནགཱརིཡམུནིསེཁམུནིཨསེཁམུནཱིནཾ ཙཏུནྣཾ པཉྩམོ ཧུཏྭཱ ཨིནྡོཏི ཚཊྛཱིཏཔྤུརིསེན ཝཱ མུནིནྡོ. དེཝཏཱཔཀྑེ ཝདནམིཝ ཝདནནྟི ཨམྦྷོཛེ, སདྡྷམྨཔཀྑེ ཨམྦྷོཛམིཝ ཨམྦྷོཛནྟི ཝདནེ ཙ ཨུཔཙཱརེན གཧིཏེ ཀམྨདྷཱརཡོ. མུནིནྡསྶ ཝདནམྦྷོཛམིཏི ཙ, ཏསྶ གབྦྷོཏི ཙ, ཏསྨིཾ སམྦྷཝོཏི ཙ, ཏེན སུནྡརཱིཏི ཙ ཝཱཀྱཾ. ཝཱཎིཡཱ ཝིསེསནཏྟེཔི ཨེཀནྟནཔུཾསཀཏྟཱ སརཎསདྡསྶ ན ལིངྒཔརིཝཏྟནབྷཱཝོ. པཱཎིནནྟི རསྶཏྟཾ, དཱིགྷསྶ བྱབྷིཙཱརཏྟཱ. མཡ྄ཧནྟི ཨེཀཝཙནེན ཨཏྟནོ སཱདྷུགུཎོདཡཀཱརཎཾ ¶ ནིརཏིམཱནཏཾ དཱིཔེཏི. སནྟེསུཔི ཨཉྙེསུ ཛིནཔརིཡཱཡེསུ མུནིནྡསདྡོ ཨིཊྛམནོསམྤཱིཎནཨམྦྷོཛཏུལྱཏཱསུནྡརིཏྟསརཎཏྟསངྑཱཏཱནཾ ཨཏྠནྟརཱནཾ ཨོཙིཏྱཾ པོསེཏཱིཏི པཡུཏྟོ. ཏཐཱ ཧི ཏཱདིསསྶ མུཁཾ ཨམྦྷོཛཏུལྱཾ, ཏསྨིཾ མུཁོདརེ སམྦྷཝཱ སུནྡརཱི, ཏཏོཡེཝ པཱཎིནཾ སརཎཾ. ཏསྨཱཡེཝ མནོསམྤཱིཎནེ པཊུཏྟཾ སུབྱཏྟམིཏི ཨོཙིཏྱཾ ཧོཏི. ལོཀེ པཏྠཊམིདམོཙིཏྱམཱདརཎཱིཡཾ ཧོཏི. ཏསྨིཉྷི ཨུཏྟམཀཝཡོཡེཝ ཨུཔདེསཀཱཏི. ཝུཏྟཉྷི –

‘‘ཨོཙིཏྱཾ ནཱམ ཝིཉྙེཡྻཾ, ལོཀེ ཝིཁྱཱཏམཱདརཱ;

ཏཏྠོཔདེསཔྤབྷཝཱ, སུཛནཱ ཀཝིཔུངྒཝཱ’’ཏི [སུབོདྷཱལངྐཱར ༡༠༤ གཱཐཱ].

ནིམིཏྟཝཎྞནཱ

༢.

རཱམསམྨཱདྱལངྐཱརཱ, སནྟི སནྟོ པུརཱཏནཱ;

ཏཐཱཔི ཏུ ཝལ༹ཉྫེནྟི, སུདྡྷམཱགདྷིཀཱ ན ཏེ.

༢. ཨཐེཝམབྷིགཏཱམིཏསིདྡྷིསམྤདཱཔཱདནེཀཙཏུརཔརམིཊྛདེཝཏཱ- བྷཱཝརཱུཔིཏསདྡྷམྨརཏནསྶོ’ པདསྶིཏནིཔཙྩཀཱརེན ཨིཊྛདེཝཏཱཔཱུཛཾ དསྶེཏྭཱ ‘‘ནནུ བནྡྷལཀྑཎམཏྠིཡེཝ པུབྦཀཾ, ཏསྨཱ ཀིམནེན པིཊྛཔིསནེནེ’’ཏི ལཀྑཎནྟརཱརམྦྷཔཊིཀྑེཔཀཛནཔཊིབཱཧནཔུབྦཀམབྷིདྷེཡྻཔྤཡོཛན- སམྦནྡྷེ དསྶེཏུམཱཧ ‘‘རཱམསམྨེ’’ཙྩཱདི. རཱམསམྨཱདཱིནཾ རཱམསམྨཔབྷུཏཱིནཾ པུབྦཱཙརིཡཱནཾ, རཱམསམྨཱདཡོ ཝཱ ཏཾསམྦནྡྷཏོ. བྷཝཏི ཧི ཏཾསམྦནྡྷཏོ ཏབྦོཧཱརོ ཡཐཱ ཀིཉྩིཔི ཝེཛྫསཏྠཾ ‘‘བིམྦིསཱརོ’’ཏི. ཨལངྐཱརཱ བྷཱུསཱཝིསེསཱ, བནྡྷཱལངྐཱརཔཊིཔཱདཀཏྠེན ཨལངྐཱརཁྱཱ གནྠཝིསེསཱ ཝཱ. སནྟོ སོབྷནཱ. དྭེཔི པུརཱ པུབྦཀཱལེ བྷཝཱ པུརཱཏནཱ, པོརཱཎིཀཱ. ཨུབྷོཔི སནྟི. ཡཛྫཔི སཾཝིཛྫནྟི. ཏཐཱཔི ཏཱུཏི ནིཔཱཏསམུདཱཡོཡཾ ¶ ཝིསེསཱབྷིདྷཱནཱརམྦྷེ. ཨེཝཾ སནྟེཔཱིཏི ཨཏྠོ. སུདྡྷམཱགདྷིཀཱཏི མགདྷེསུ བྷཝཱ, ཏཏྠ ཝིདིཏཱ ཝཱ མགདྷཱ, སདྡཱ. ཏེ ཨེཏེསཾ སནྟི, ཏེསུ ཝཱ ནིཡུཏྟཱཏི མཱགདྷིཀཱ. སུདྡྷཱ ཙ སཀྐཊཱདིབྷཱསིཏཀཱལུསིཡཱབྷཱཝེན ཝིསུདྡྷཱ, ཨསམྨིསྶཱ ཝཱ ཨཔརིཙིཏཏྟཱ ཏེ མཱགདྷིཀཱ ཙཱཏི སུདྡྷམཱགདྷིཀཱ, ཡཏིཔོཏཱ. ཏེ ཡཐཱཝུཏྟེ ཨལངྐཱརེ ཨཱབྷརཎཝིསེསེ ན ཝལ༹ཉྫེནྟི, པསཱདྷནཝིསེསེ ནཱནུབྷཝནྟི. གནྠཝིསེསེ པན ཨུགྒཧཎདྷཱརཎཱདིཝསེན ཨཏྟནོ སུདྡྷམཱགདྷིཀཏྟཱ, རཱམསམྨཱདཱིནཉྩ སཀྐཊཱདིབྷཱཝཏོཏི ཨཡམེཏྠ སདྡཏྠོ. བྷཱཝཏྠལེསོཔེཏྠ པརིཔཱུརཏི, ཏཐཱཝིདྷཔཏཱིཏིཡོགཏོ. སུདྡྷམཱགདྷིཀཱ ཨཏྟནོ པརིསུདྡྷབྷཱཝེན པུབྦེ སོབྷནཱཔི ཏེ ཨལངྐཱརཱ ཨིདཱནི མལགྒཧིཏབྷཱཝཔྤཏྟཱ ‘‘ཀིཾ ཏེཧི མལགྒཧིཏེཧི ཨམྷཱདིསཱནཾ སུདྡྷསཏྟཱན’’ནྟི ན ཝལ༹ཉྫེནྟཱིཏི.

‘‘པཏཱིཡམཱནཾ པན ཀིཉྩི ཝཏྠུ,

ཨཏྠེཝ ཝཱཎཱིསུ མཧཱཀཝཱིནཾ;

ཡཾ ཏཾ པསིདྡྷཱཝཡཝཱཏིརིཏྟ-

མཱབྷཱཏི ལཱཝཎྱམིཝངྒནཱསཱུ’’ཏི.

ཧི ཝུཏྟཾ.

༢. སནྟོ ཝིཉྙཱུཧི པསཏྠཏྟཱ སོབྷནཱ པུརཱཏནཱ པུབྦཀཱལསམྦྷཱུཏཱ རཱམསམྨཱདྱལངྐཱརཱ རཱམསམྨཱདཱིཧི ཨཱཙརིཡེཧི ཝིརཙིཏཏྟཱ, ཏེསཾ ཏཾསམྦནྡྷཏོ ཏབྦོཧཱརསདིསནཱམཏྟཱ ཝཱ རཱམསམྨཱདཡོ ནཱམ ཨལངྐཱརཱ ཀིསྨིཉྩི ཝེཛྫསཏྠེ ‘‘བིམྦིསཱརོ’’ཏི ཝོཧཱརོ ཝིཡ. ཨལངྐཱརཱ བྷཱུསཱཝིསེསཱ, ཨལངྐཱརཏྟཔཊིཔཱདནཏོ ཨལངྐཱརནཱམིཀཱ གནྠཝིསེསཱ ཝཱ སནྟི ཀིཉྩཱཔི ཝིཛྫནྟི, ཏཐཱཔི ཏུ ཨེཝཾ སནྟེཔི སུདྡྷམཱགདྷིཀཱ སཀྐཊཔཱཀཏཱདཱིསུ ཨཉྙབྷཱསཱསུ པརིཙཡཱབྷཱཝཏོ ཀེཝལམཱགདྷིཀཱ ཏེ རཱམསམྨཱདིཀེ ཨལངྐཱརེ ན ཝལ༹ཉྫེནྟི པསཱདྷནཝསེན, ཨུགྒཧཎདྷཱརཎཱདིཝསེན ¶ ན སེཝནྟི. མགདྷེསུ བྷཝཱ, ཏེསུ ཝཱ ཝིདིཏཱ མགདྷཱ, སདྡཱ. ཏེ ཨེཏེསཾ ཨཏྠི, ཏེསུ ནིཡུཏྟཱཏི ཝཱ མཱགདྷིཀཱ. སུདྡྷསདྡོ མགདྷཝིསེསནོ, མཱགདྷིཀཝིསེསནོ ཝཱ ཧོཏི. སདྡཱནཾ ཏཱདིསཔཏཱིཏིཝིསེསཡོགཏོ བྷཱཝཏྠལེསོཔི ཨིདྷ དིཔྤཏི. ཏཐཱ ཧི སུདྡྷམཱགདྷིཀཱ ཨཏྟནོ སུདྡྷཏྟཱ ཏེསཾ ཝིནྱཱསེན སོབྷནཏྟེ སཏིཔི བྷཱསཱཡ པུརཱཏནཏྟཱ ཨཔརིསུདྡྷོཏི ཨཝམཉྙམཱནཱ ན ཝལ༹ཉྫེནྟཱིཏི. ཝཏྟིཙྪིཏསྶཏྠསྶ ཨུཔཏྠམྦྷཀབྷཱུཏོ བྷཱཝཏྠལེསོཔི མཧཱཀཝཱིནཾ ཝཙནེསུཡེཝ ལབྦྷཏཱིཏི དཊྛབྦོ. ཝུཏྟཾ ཧི–

‘‘པཏཱིཡམཱནཾ པན ཀིཉྩི ཝཏྠུ,

ཨཏྠེཝ ཝཱཎཱིསུ མཧཱཀཝཱིནཾ;

ཡཾ ཏཾ པསིདྡྷཱཝཡཝཱཏིརིཏྟ-

མཱབྷཱཏི ལཱཝཎྱམིཝངྒནཱསཱུ’’ཏི.

ཏསྶཏྠོ – མཧཱཀཝཱིནཾ པཱུཛིཏཀཝཱིནཾ ཝཱཎཱིསུ ཝཙནཝིསེསེསུ པཏཱིཡམཱནཾ གམྨམཱནཾ ཡཾ ཀིཉྩི ཝཏྠུ ཡོ ཀོཙི ཨཏྠལེསོ ཨཏྠེཝ ཨཏྠི ཨེཝ, ཏཾ ཝཏྠུ ཨངྒནཱསུ ཝནིཏཱསུ པསིདྡྷཱཝཡཝཱཏིརིཏྟཾ ཧཏྠཔཱདཱདིཔཱཀཊསརཱིརཱཝཡཝཏོ ཨདྷིཀཾ ལཱཝཎྱམིཝ མནོགོཙརཱིབྷཱུཏསུནྡརཏྟཾ ཝིཡ པསིདྡྷཱཝཡཝཱཏིརིཏྟཾ པཀཱསསདྡཱཝཡཝཏོ ཨདྷིཀཾ ཧུཏྭཱ ཨཱབྷཱཏི དིཔྤཏཱིཏི.

ཨབྷིདྷཱནཱདིཝཎྞནཱ

༣.

ཏེནཱཔི ནཱམ ཏོསེཡྻ-མེཏེ’ལངྐཱརཝཛྫིཏེ;

ཨནུརཱུཔེནཱ’ལངྐཱརེ-ནེ’སམེསོ པརིསྶམོ.

༣. ཏེནེཙྩཱདི. ཡེན ཏེ ཨལངྐཱརེ ན ཝལ༹ཉྫེནྟི, ཏེན ཀཱརཎེན ཨལངྐཱརཝཛྫིཏེ ཨཱབྷརཎེཧི, གནྠཝིསེསེཧི ཝཱ རཧིཏེ, ཨལངྐཱརཱ ཝཱ ཡཐཱཝུཏྟཝཛྫིཏཱ ཡེཧི ¶ ཏེ, ཨེཏེ ཡཏིཔོཏེ ཨེསཾ ཡཏིཔོཏཱནཾ ཨནུརཱུཔེན ཨིདཱནི ཝིརཙིཡམཱནཏྟཱབྷིནཝབྷཱཝཏོ, དསབལཝདནཀམལམཛ྄ཛྷཝཱསིཏབྷཱསིཏཝིརཙིཏབྷཱཝཏོ ཙ ཨནུཙྪཝིཀེན ཨལངྐཱརེན ཨཱབྷརཎེན, ཨལངྐཱརསཏྠེན ཝཱ ཏོསེཡྻཾ ཨཔིནཱམ ཡཐིཙྪིཏཔསཱདྷནཝསེན, སཝནདྷཱརཎཱདིཝསེན ཝཱ ཝལ༹ཉྫནེན སནྟུཊྛེ ཀརེཡྻཾ ཨཔྤེཝ ནཱམ ཡནྣཱུནཱཏི ཨེསོ པརིསྶམོ ཨཡཾ ཨམྷཱཀཾ ཏཱདིསསནྟུཊྛིཛནཀཱལངྐཱརཔཀརཎཔྤཡོགོ.

ཨལངྐརོནྟི ཨཏྟབྷཱཝམནེནཱཏི ཨལངྐཱརོ, ཨཱབྷརཎཾ ཧཱརཀེཡཱུརཱདི. ཨལངྐརོནྟི བནྡྷསརཱིརམནེནཱཏི ཨལངྐཱརོཏིམིནཱ པན ཨལངྐཱརསདྡེན པསཱདཱདཡོ སདྡཱལངྐཱརཱ, སབྷཱཝཝུཏྱཱདཡོ ཙ ཨཏྠཱལངྐཱརཱ ནཱནཔྤཀཱརཱ སངྒཧིཏཱ, ཡེཧི སདྡཏྠསངྑཱཏཾ བནྡྷསརཱིརཾ སོབྷཏེ, ཡཐཱ ཧི པུརིསསརཱིརེ ཧཱརཀེཡཱུརཱདྱལངྐཱརོ ནྱསྱཏེ, ཡེན སོབྷཏེ, ཏཐཱ བནྡྷསརཱིརེཔི སདྡཱལངྐཱརཱ, ཨཏྠཱལངྐཱརཱ ཙ ནིཀྑིཔཱིཡནྟི, ཡཏོ སོབྷཏེ. ཏེནེཝ ཝཀྑཏི ‘‘ཏཾ ཏུ པཱཔེནྟུལངྐཱརཱ, ཝིནྡནཱིཡཏརཏྟན’’ནྟི [སུབོདྷཱལངྐཱར ༩ གཱཐཱ] ཙ, ‘‘ཨཏྠཱལངྐཱརསཧིཏེ’’ཙྩཱདིཀཉྩ [སུབོདྷཱལངྐཱར ༡༦༤ གཱཐཱ].

ཨལངྐཱརཝིདྷཱནབྷཱཝེན ཏུ བནྡྷསརཱིརམྤི ཏདཏྠིཡཱ ཨལངྐཱརོ, ཏཐཱ ཏཔྤཊིཔཱདཀཾ སུབོདྷཱལངྐཱརནཱམདྷེཡྻསཏྠཾ ཨལངྐཏཔཊིཔཱདཀཏྟེན མངྒལསུཏྟནྟི ཝིཡ. ཝཀྑཏི ཧི ‘‘གནྠོཔི ཀཝིཝཱཙཱན-མལངྐཱརཔྤཀཱསཀོ’’ [སུབོདྷཱལངྐཱར ༡༢ གཱཐཱ] ཙྩཱདི. ཨཏྲ ཨུཙྩཏེ –

‘‘མུཁྱོལངྐཱརསདྡོཡཾ, སདྡཏྠཱལངྐཏིསྶིཏོ;

སཱམཏྠིཡཱ ཏྭདྷིཊྛཱནེ, ཏཐཱ སཏྠེཔི ཏབྦཏཱི’’ཏི.

ཨནེནསྶཱབྷིདྷེཡྻཱདཱིནི ¶ ཝུཙྩནྟི. ཨབྷིདྷཱིཡཏེ ཨིཏི ཨབྷིདྷེཡྻཾ, སམུདིཏེན སཏྠེན ཝཙནཱིཡཏྠོ. སོ ཙ སརཱིརཱལངྐཱརཝིབྷཱགཀཔྤནཱཡ ཏེསཾ པཊིཔཱདནཾ. སུབོདྷཱལངྐཱརེན ཧི ཏེ པཊིཔཱདཱིཡནྟི. ཡེན ཙ ཡོ པཊིཔཱདཱིཡཏི, ཏསྶཱཡམཏྠོ བྷཝཏཱིཏི ཨབྷིདྷེཡྻསཏྠོཔི. དསྶིཏམེཝ ཏུ སརཱིརཱལངྐཱརསངྑརཎཾ པཡོཛནཾ, ཏཾ ནིསྶཱཡ སུབོདྷཱལངྐཱརཔྤཝཏྟིཏོ. ཡསྶ ཧི ཡམུདྡིསྶ པཝཏྟི ཧོཏི, ཏཾ ཏསྶ པཡོཛནཾ, ཏཾ པན ཀཝིཏྟཀིཏྟིཔསིདྡྷཱདིལཀྑཎཾ, པརམྤརཱཡ ཏདཏྠཏཱཡ སུབོདྷཱལངྐཱརསངྑརཎསྶ. སཏྠཔཡོཛནཱནཾ, སཱདྷིཡསཱདྷནལཀྑཎོ སམྦནྡྷོ ཏུ ནིསྶཡཔདསྶིནཱ དསྶིཏོཡེཝ. ཡཐཱཧ –

‘‘སཏྠཾ པཡོཛནཉྩེཝ, ཨུབྷོ སམྦནྡྷནིསྶཡཱ;

ཝུཏྟཱཏཾཝུཏྟིཡཱཡེཝ, ཝུཏྟོ ཏནྣིསྶིཏོཔི སོ’’ཏི.

ཨབྷིདྷེཡྻཱདིཀཐནཉྩ ཏཾསམངྒིསྶེཝ ཙ ཝཱིམཾསཱཝིསེསསམངྒཱིནམུཔཱདཱིཡམཱནཏྟཱ, ཨཉྙཱདིསསྶ པན ཨུམྨཏྟཀཝཙནཱདིནོ ཝིཡ ཧེཡྻཏྟཱ. ཝུཏྟཉྷེཏཾ –

‘‘སམྦནྡྷཱནུགུཎོཔཱཡཾ, པུརིསཏྠཱབྷིདྷཱཡཀཾ;

ཝཱིམཾསཱདྷིགཏཾ ཝཱཀྱ-མཏོནདྷིགཏཾ པར’’ནྟི.

ཝཱཀྱནྟི ཙེཏྠ ཝཱཀྱལཀྑཎོཔེཏམནྟརཝཱཀྱསནྣིཙཡཾ མཧཱཝཱཀྱསརཱུཔཾ སཏྠམེཝཱདྷིཔྤེཏཾ.

༣. ཡེན ཏེ ཏེ ཨལངྐཱརེན ཝལ༹ཉྫེནྟི, ཏེན ཀཱརཎེན ཨལངྐཱརཝཛྫིཏེ ཨཱབྷརཎཝིསེསེཧི, གནྠཝིསེསེཧི ཝཱ ཝཛྫིཏེ, ཏེ ཝིརཧིཏེ ཡེཧི ཨེཏེ སུདྡྷམཱགདྷིཀེ ཨེསཾ སུདྡྷམཱགདྷིཀཱནཾ ཨནུརཱུཔེན ཨབྷིནཝབྷཱཝཏོ མཱགདྷིཀསརཱུཔཾ ཨནུགཏརཱུཔེན, དསབལབྷཱསིཏཝིརཙིཏཏྟཱ ཝཱ ཨནུཀཱུལེན ཨལངྐཱརེན ཨཱབྷརཎཝིསེསེན, གནྠཝིསེསེན ཝཱ ཏོསེཡྻཾ ཨལངྐཱརཝལ༹ཉྫཱཔནེན, གནྠཝིསེསེ [གནྠཝིསཡེ (ཀ.)] ཨུགྒཧཎདྷཱརཎཱདིཀཱརཱཔནེན ¶ ཝཱ སནྟུཊྛེ ཀརེཡྻཾ ཨཔིནཱམ ཡཾནཱུན སུནྡརམིཏི, ཨེསོ པརིསྶམོ ཨཡཾ མམ ཨལངྐཱརཔཀརཎཔྤཡོགོ. ཨཔིནཱམཱཏི ཨེཏྠ ཨིཏིསདྡོ གམྱམཱནོ.

ཨལངྐཱརེཧི ཝཛྫིཏཱ, ཨལངྐཱརཱ ཝཛྫིཏཱ ཡེཧི ཝཱཏི ཙ. རཱུཔསྶ ཨནུ ཨནུརཱུཔཾ, རཱུཔཾ ཨནུགཏཾ ཨནུརཱུཔཾ ཝཱ, ཏེན ཨནུརཱུཔེན. ཨལངྐརོནྟི ཨཏྟབྷཱཝམནེནེཏི ཨལངྐཱརོ, ཧཱརཀེཡཱུརཱདི ཨཱབྷརཎཔཀྑེ, གནྠཔཀྑེ ཏུ ཨལངྐརོནྟི བནྡྷསརཱིརམནེནེཏི ཨལངྐཱརོ. ཨིམིནཱ མུཁྱབྷཱཝེན པསཱདཱདིསདྡཱལངྐཱརཱ ཙ སབྷཱཝཝུཏྱཱདིཨཏྠཱལངྐཱརཱ ཙ པཝུཙྩནྟི. ཨམུཁྱཏོ པན ཨིམེསཾ དྭིནྣཾ ཨལངྐཱརཱནམདྷིཊྛཱནབྷཱུཏབནྡྷསརཱིརམྤི, ཏཐཱ མངྒལསུཏྟརཏནསུཏྟཱདིཝོཧཱརོ ཝིཡ ཨལངྐཱརཔཀཱསཀཾ ‘‘སམྨཱ བུཛ྄ཛྷནྟི དྭིཔྤཀཱརཱ ཨལངྐཱརཱ ཨནེནེ’’ཏི ཨིམིནཱ ཨཏྠེན ལདྡྷསུབོདྷཱལངྐཱརཝརནཱམདྷེཡྻསཏྠམྤི ཝུཙྩཏི. ཝུཏྟམིདམེཝ –

‘‘མུཁྱོལངྐཱརསདྡོཡཾ, སདྡཏྠཱལངྐཏིསྶིཏོ;

སཱམཏྠིཡཱ ཏྭདྷིཊྛཱནེ, ཏཐཱ སཏྠེཔི ཏབྦཏཱི’’ཏི.

ཨེཏྠ སཱམཏྠིཡཾ ནཱམ ཏདཱདྷཱརཏཔྤཊིཔཱདཀཏྟཝོཧཱརཏོ ཏདཱདྷེཡྻཏཔྤཊིཔཱདནཱིཡཾ ན བྷཝཏི ཙེ, ཨཉྙཾ ཀིཾ བྷཝཏཱིཏི ཨཉྙཐཱནུཔཔཏྟིལཀྑཎམེཝཱཏི.

༤.

ཡེསཾ ན སཉྩིཏཱ པཉྙཱ-ནེཀསཏྠནྟརོཙིཏཱ;

སམྨོཧབྦྷཱཧཏཱཝེ’ཏེ, ནཱཝབུཛ྄ཛྷནྟི ཀིཉྩིཔི.

༥.

ཀིཾ ཏེཧི པཱདསུསྶཱུསཱ, ཡེསཾ ནཏྠི གུརཱུནཱི’ཧ [གརཱུནིཧ (ཀ.)];

ཡེ ཏཔྤཱདརཛོཀིཎྞཱ, ཏེ’ཝ སཱདྷཱུཝིཝེཀིནོ.

༤-༥. ཨེཝཾ ལཀྑཎཱརམྦྷཔཊིཀྑེཔཀཛནཔཊིབཱཧནཔུབྦཀམབྷིདྷེཡྻཱདིཀཾ དསྶེཏྭཱ ཨིདཱནི སཏྠཏོཝ སབྦཏྠ གུཎདོསཝིཝེཙནཾ. ཨཏོཡེཝ ཝུཙྩཏི –

‘‘སབྦཏྠ ¶ སཏྠཏོཡེཝ, གུཎདོསཝིཝེཙནཾ;

ཡཾ ཀརོཏི ཝིནཱ སཏྠཾ, སཱཧསཾ ཀིམཏོདྷིཀ’’ནྟི.

ཏསྨཱ གུཎདོསཝིབྷཱགཝིཙཱརཎཾ ནཱམ ཏབྦིདཱུནཾཡེཝ, ནཱསཏྠཉྙཱུནཾ པུརིསཔསཱུནཾ. ཏཐཱ ཙཱཧ –

‘‘གུཎདོསམསཏྠཉྙཱུ, ཛནོ ཝིབྷཛཏེ ཀཐཾ;

ཨདྷིཀཱརོ ཀིམནྡྷསྶ, རཱུཔབྷེདོཔལདྡྷིཡ’’ནྟི [ཀཱབྱཱདཱས ༡.༨].

ཡེནེཝཾ, ཏེནེཏྠ གུཎདོསདསྶནེ པསནྣཱནེཀསཏྠཙཀྑུཡེཝཱདྷིགཏོ, ནཉྙོ ཏབྦིཔརཱིཏོཏྱནྭཡབྱཏིརེཀཝསེན དསྶེནྟོ ‘‘ཡེས’’ནྟིཨཱདིགཱཐཱདྭཡམཱཧ. ཏཏྠ ཡེསནྟི ཨནིཡམུདྡེསོ, ཡེཧཱིཏི ཨཏྠོ. ཡེཧི ན སཉྩིཏཱ ན རཱསིཀཏཱ, ནཱནཱསནྟཱནཝུཏྟིནཱིཔི ཨེཀཏྟནཡེན ཨེཀསྨིཾ སནྟཱནེ ན ཝཱསིཏཱ ནཔརིབྷཱཝིཏཱཏི ཝུཏྟཾ ཧོཏི. ཀཱ སཱ? པཉྙཱ ཧེཡྻོཔཱདེཡྻཝིཝེཀརཱུཔཱ. ཀཱིདིསཱིཏི ཨཱཧ ‘‘ཨནེཀསཏྠནྟརོཙིཏཱ’’ཏི. ཨནེཀསྨིཾ ཏིཔིཊཀཏཀྐབྱཱཀརཎཱལངྐཱརསཏྠཱདིཀེ སཏྠནྟརེ ཨུཙིཏཱ སཝནདྷཱརཎཱདིཝསེན པརིཙིཏཱ སཱཡཾ པཉྙཱ ཡེསཾ ན སཉྩིཏཱཏི པཀཏཾ. ཨེཏེཏི ཡཐཱཨུདྡིཊྛཱནཾ ནིཡམཝཙནཾ. སམྨོཧབྦྷཱཧཏཱཏི ཡཐཱཝུཏྟཱཡཱཏིསཡཝཏིཡཱ པཉྙཱཡཱབྷཱཝཏོ བལཔྤཏྟེན མོཧེན ཨབྦྷཱཧཏཱ ཝིསེསེན པཧཏཱ, ཨེཝསདྡིཏཱ ཧོནྟཱིཏི ཨདྷིཔྤཱཡོ. ཡཏོ ཨེཝཾ, ཏསྨཱཔི ཀིཉྩིཔི ཧེཡྻོཔཱདེཡྻརཱུཔཾ ཡཾ ཀིཉྩིདེཝ ཨཊྛཱནཱནིཡོཛཀཏཱདིསགུརུཔཱདསུསྶཱུསཱནིསྶཡཔཊིལདྡྷཝིཝེཀཔཉྙཱཏི- སཡཱལཱབྷེན ནཱཝབུཛ྄ཛྷནྟི, ན ཛཱནནྟཱིཏྱཏྠོ. ཡཏོ ཨཱལསིཡཱདིདོསལེསཔརིགྒཧོཔི སཏཏཱཙརིཡསེཝནཝསེན སིརོཝིཀིཎྞཏཱདིསགུརུཔཱདཔངྐཛམྦུཛཔརཱཡནོ ཙིརེནཔི ཀཱལེན ནཱནཱཝིདྷསཏྠནྟརཀཏཔརིཙཡབལེན པཔྤོཏི ཏཱདིསཾ པཉྙཱཝེཡཏྟིཡཾ. ཏེནེཝཱཧ བྷགཝཱ –

‘‘ནིཧཱིཡཏི ¶ པུརིསོ ནིཧཱིནསེཝཱི,

ན ཙ ཧཱཡེཐ ཀདཱཙི ཏུལྱསེཝཱི;

སེཊྛམུཔནམཾ ཨུདེཏི ཁིཔྤཾ,

ཏསྨཱ’ཏྟནོ ཨུཏྟརིཏརཾ བྷཛེཐཱ’’ཏི [ཨ. ནི. ༣.༢༦].

ཏཏོ ཨེཏཱདིསོ པཉྙཝཱཡེཝེཏྠ གུཎདོསཝིབྷཱགཝིཝེཙནེ ཨདྷིཀཱརཱི, ནཉྙོ ཏབྦིཔརཱིཏོ པུརིསཔསཱུཏི ཨཡམེཏྠཱདྷིཔྤཱཡོ. རུལ༹ྷོ ཨཏྠཝིསེསོ. ཏེནཱཧ ‘‘ཀིཾ ཏེཧི པཱདསུསྶཱུསཱ, ཡེསཾ ནཏྠི གུརཱུནིཧཱ’’ཏི. ཨིཧཱཏི ཨིམསྨིཾ ལོཀེ ཡེསཾ ཛནཱནཾ གུརཱུནཾ ཀཱཏབྦཱ པཱདསུསྶཱུསཱ པཱདཔརིཙརིཡཱ ནཏྠི, ཏེཧི ཛནེཧི ཡཐཱཝུཏྟནཡེན པཉྙཱཝེཡཏྟིཡརསཱནབྷིཉྙེཧི ཀིཾ པཡོཛནཾ, ལེསམཏྟམྤི ནཏྠི, ཨནདྷིགཏཱཡེཝེཏྠ ཨེཏེཏི ཨདྷིཔྤཱཡོ. ཨིདཱནི བྱཏིརེཀམུཁེན ཨཱཧ ‘‘ཡེ’’ཏིཨཱདི. ཡེ པུབྦེ ཀཏཔུཉྙཏཱདིསམྤཏྟིསམྤནྣཱ ཏཔྤཱདརཛེཧི ཏེསཾ གུརཱུནཾ པཱདདྷཱུལཱིཧི ཨོཀིཎྞཱ ཨོནདྡྷཱ གཝཙྪིཏཱ, ཏེཝ སཱདྷཱུ ཡཐཱཝུཏྟནཡེན པཉྙཱཝེཡཏྟིཡེན ཨབྷིཉྙཱཏཱ སཛྫནཱ ཨེཝ ཝིཝེཀིནོ ཧེཡྻོཔཱདེཡྻགུཎདོསཝིབྷཱགནིཡམནཔཉྙཱསམྤཏྟིསམངྒིནོ ཧོནྟི, ཏེཡེཝེཏྠ གུཎདོསཝིཝེཙནེ ཨདྷིགཏཱཏི ཨདྷིཔྤཱཡོ. སཱ ཙཱཡཾ གུརུཔཱདསུསྶཱུསཱ ཝིསིཊྛཱདརེན ཀརཎཱིཡཱཏི ཝངྐཝུཏྟིཡཱ ཏདབྷྱཱསེ སཱདྷུཛནེ ནིཡོཛེཏི.

༤-༥. ཡེ སཀལསཏྠཔརིཙིཏཉྙཱཎཔཱཊཝཱ ཡདི དོསམཱརོཔཡནྟི, ཏེསཾ ཏདྡོསནིརཱཀརཎཾ ཝིནཱ པདེསཱཝབོདྷནམཏྟེན པཎྜིཏམཱནཱིནཾ ཝཙནསྶཱགུརུཀརཎཾ ཝངྐཝུཏྟིཡཱ དསྶེནྟོ ཙ ཏཾདྭཱརེནེཝ ཨཏྟནོ ཨནཉྙསཱདྷཱརཎགུརུགཱརཝཏཾ སཱདྷུཛནེཧི པརམཱདརེན སམྤཱདེཏབྦམིཏི དསྶེཏུཾ ‘‘ཡེསཾ…པེ… ཀིནོ’’ཏི གཱཐཱདྭཡམཱཧ. ཨནེཀསཏྠཱནཾ ¶ ཏིཔིཊཀཏཀྐབྱཱཀརཎཱདཱིནཾ ཨནེཀེསཾ གནྠཱནཾ ཨནྟརེ ཏཏྭཏྠསངྑཱཏཨབྦྷནྟརེ ཨུཙིཏཱ སཝནཨུགྒཧཎདྷཱརཎཱདིཝསེན པརིཙིཏཱ པཉྙཱ སུཏམཡཱ པཉྙཱ ཡེསཾ ཡེཧི ན སཉྩིཏཱ, དྭིནྣམེཀཀྑཎེ པཝཏྟིཡཱབྷཱཝེཔི ཨུཔཙིཏསམཱུཧབྷཱཝཏོ, པུབྦཀཱལིཀཔཉྙཱཡ ཨཔརཀཱལིཀཔཉྙཱཡ ཨནནྟརཨཱསེཝནཱདིཔཙྩཡལཱབྷཏོ ཨཝཏྠབཱཧུལླཔཝཏྟིཏོ ཝཱ སཉྩིཏབྦཱཔི ན རཱསིཀཏཱ. ཨེཏེ ཨཱིདིསཔཉྙཱཔཱཊཝརཧིཏཱ ཨིམེ སམྨོཧབྦྷཱཧཏཱ པཉྙཱཔཱཊཝཱབྷཱཝཏོ བལཔྤཏྟེན མོཧེན ཝིསེསེན པཧཏཱ ཨེཝ ཀིཉྩིཔི ཧེཡྻོཔཱདེཡྻཾ ནཱཝབུཛ྄ཛྷནྟི. ན ཨེཀེ ཨནེཀེཏི ཙ, ཏེ ཙ ཏེ སཏྠཱ ཙེཏི ཙ, ཏེསམནྟརམིཏི ཙ, ཏསྨིཾ ཨུཙིཏཱཏི ཙ སམྨོཧེན ཨབྦྷཱཧཏཱཏི ཙ ཝིགྒཧོ. ཏེན ཝུཏྟཾ–

‘‘གུཎདོསམསཏྠཉྙཱུ, ཛནོ ཝིབྷཛཏེ ཀཐཾ;

ཨདྷིཀཱརོ ཀིམནྡྷསྶ, རཱུཔབྷེདོཔལདྡྷིཡ’’ནྟི [ཀཱབྱཱདཱས ༡.༨].

ཏསྶཏྠོ – ཨསཏྠཉྙཱུ ཛནོ གུཎདོསཾ ཀཐཾ ཝིབྷཛཏེ. ཏཐཱ ཧི རཱུཔབྷེདོཔལདྡྷིཡཾ ནཱིལཔཱིཏཱདིརཱུཔཝིསེསཱཝབོདྷནེ ཨནྡྷསྶ ཨདྷིཀཱརོ ཨབྷིམུཁཀརཎཾ ཀིཾ ཧོཏི, ན བྷཝཏྱེཝ, ཏསྨཱ ཨནེཀསཏྠནྟརགཏསུཔྤསནྣཔཉྙཱཙཀྑུནཱ ཨེཝ གུཎདོསཝིཝེཙནཾ བྷཝཏི, ཏདབྷཱཝེ ན བྷཝཏྱེཝ. ཨིདམེཝ ཝུཙྩཏེ–

‘‘སབྦཏྠ སཏྠཏོཡེཝ, གུཎདོསཝིཝེཙནཾ;

ཡཾ ཀརོཏི ཝིནཱ སཏྠཾ, སཱཧསཾ ཀིམཏོདྷིཀ’’ནྟི.

ཏསྶཏྠོ – སབྦཏྠ གུཎདོསཝིཝེཙནཾ སཏྠཏོཡེཝ ཧོཏི, སཏྠཾ ཝིནཱ སཏྠོཙིཏཏཱདིསཔཉྙཾ ཝིནཱ ཡཾ ཀརོཏི གུཎཱགུཎཝིབྷཱགཾ ཀརོཏི, ཡཾ ཀརཎཾ ཨཏྠི, ཨཏོདྷིཀཾ སཱཧསཾ ཀིཾ ཨཱསུཾ ཀིརིཡཱ ཨནུཔཔརིཀྑནཀིརིཡཱ ནཏྠེཝ.

ཨིཧ ¶ ཨིམསྨིཾ ལོཀེ ཡེསཾ ཨཀཏཔུཉྙཱནཾ ཛནཱནཾ གུརཱུནཾ

‘‘པིཡོ གརུ བྷཱཝནཱིཡོ,

ཝཏྟཱ ཙ ཝཙནཀྑམོ;

གམྦྷཱིརཉྩ ཀཐཾ ཀཏྟཱ,

ནོ ཙཱ’ཊྛཱནེ ནིཡོཛཀོ’’ཏི [ཨ. ནི. ༧.༣༧].

ནིདྡིཊྛགུཎོཔེཏཱནཾ ཨཱཙརིཡཱནཾ ཀཱཏབྦཱ པཱདསུསྶཱུསཱ པཱདཔརིཙརིཡཱ ནཏྠི, ཏེཧི ཀིཾ པཡོཛནཾ. ཡེ ཀཏཔུཉྙཱ ཛནཱ ཏཔྤཱདརཛོཀིཎྞཱ ཏེསཾ གུརཱུནཾ པཱདརཛེཧི གཝཙྪིཏཱ, ཏེཝ སཱདྷཱུ ཛནཱ ཨེཝ ཝིཝེཀིནོ ཀལྱཱཎམིཏྟགུརུཔཱསནཱཧི ཨདྷིགཏཝིསིཊྛཝིཝེཀབུདྡྷིནོ བྷཝནྟི, ཏེ ཨེཝ ཝིཝེཀཾ ཛཱནནྟཱིཏི བྷཱཝོ. སོཏུམིཙྪཱ སུསྶཱུསཱ, ཏཾ ནིསྶཱཡ ཀཏྟབྦཔཱདཔརིཙརིཡཱཔི ཏདཏྠིཡཱ སུསྶཱུསཱ ནཱམ ཧོཏི. པཱདེསུ སུསྶཱུསཱཏི ཙ, ཏེསཾ པཱདཱཏི ཙ, ཏེསུ རཛཱནཱིཏི ཙ, ཏེཧི ཨོཀིཎྞཱཏི ཙ ཝིགྒཧོ. སིསྶཱནཾ སཀལཱབྷིབུདྡྷིཡཱ གུརུཔཊིབདྡྷཏྟཱ ཨཏྟནོ གུཎཏོ ཨདྷིཀཏརཱཡེཝ སེཝིཏབྦཱ. ཝུཏྟཉྷི བྷགཝཏཱ –

‘‘ནིཧཱིཡཏི པུརིསོ ནིཧཱིནསེཝཱི,

ན ཙ ཧཱཡེཐ ཀདཱཙི ཏུལྱསེཝཱི;

སེཊྛམུཔནམཾ ཨུདེཏི ཁིཔྤཾ,

ཏསྨཱ’ཏྟནོ ཨུཏྟརིཏརཾ བྷཛེཐཱ’’ཏི [ཨ. ནི. ༣.༢༦].

༦.

ཀབྦནཱཊཀནིཀྑིཏྟ-ནེཏྟཙིཏྟཱ ཀཝིཛྫནཱ;

ཡཾཀིཉྩི རཙཡནྟེ’ཏཾ, ན ཝིམྷཡཀརཾ པརཾ.

༧.

ཏེཡེ’ཝ པཊིབྷཱཝནྟོ, སོ’ཝ བནྡྷོ སཝིམྷཡོ;

ཡེན ཏོསེནྟི ཝིཉྙཱུཡེ, ཏཏྠཱཔྱ’ཝིཧིཏཱདརཱ.

༦-༧. ཨེཝམེཏྠཱནྭཡབྱཏིརེཀཝསེནཱདྷིགཏེ དསྶེཏྭཱ ཨིདཱནི ‘‘ཀིཾ ཨམྷཱཀཾ ཀབྦནཱཊཀཔརིཙཡཱབྷཱཝེརཙནཱཝིསེསཱབྷིཡོགོཔཛནིཏཔརིསྶམེནཱ’’ཏི ཨོལཱིནཝུཏྟིནོ སོཏུཛནེ སམུསྶཱཧེཏི ¶ ‘‘ཀབྦནཱཊཀཱ’’ཏིཨཱདིནཱ. ཀཝིཔྤཡོགསངྑཱཏོ བནྡྷོཝ ཀཝིནོ ཨིདནྟི ཀབྦཾ. མུཏྟཀཱདིཝཱཀྱསྭམུཏྟིཀཱདྱཝཡཝསབྷཱཝཱ ཨནྟརཝཱཀྱསམུདཱཡསམྤནྣཾ ཝུཏྟཛཱཏིབྷེདབྷིནྣཾ པཛྫམཡཾ གཛྫམཡཾ པཛྫགཛྫམཡཾ ཙམྤཱུནཱམཀཉྩ, མཧཱཝཱཀྱརཱུཔཾ མཧཱཀབྦཉྩ, ཏཾ པན མཧཱཀབྦཾ སགྒེཧི སགྒནཱམཀེཧི པརིཙྪེདཝིསེསེཧི བནྡྷྱཏེ ཀརཱིཡཏཱིཏི སགྒབནྡྷོཏི པཝུཙྩཏི. ཏསྶ ཏུ ལཀྑཎཾ ‘‘སགྒབནྡྷསྶ མུཁཾ ཨིཊྛཱསཱིསནཾ སིཡཱ པཎཱམོ ཝཱ བནྡྷསམྦནྡྷིནོ ཀསྶཙི ཨཏྠསྶ ནིདྡེསོ ཝཱ’’ཏིཨཱདིནཱ ཨནེཀདྷཱ ཝཎྞེནྟི. ཏཾ ཡཐཱ?

‘‘སགྒབནྡྷོ མཧཱཀབྦ-མུཙྩཏེ ཏྭསྶ ལཀྑཎཾ;

པཎཱམོ ཝཏྠུནིདྡེསོ, ཨཱསཱིསཱཔི ཙ ཏམྨུཁཾ.

ཨིཏིཧཱསཀཐུབྦྷཱུཏཾ, སནྟསནྣིསྶཡམྤི ཝཱ;

ཙཏུཝགྒཕལཱཡཏྟཾ, ཙཏུརོདཱཏྟནཱཡཀཾ.

པུརཎྞཝུཏུསེལིནྡུ-སཝིཏཱུདཡཝཎྞནཾ;

ཨུཡྻཱནསལིལཀྐཱིལཱ༹, མདྷུཔཱནརཏུསྶཝཾ.

ཝིཔྤལམྦྷཝིཝཱཧེཧི, ཀུམཱརོདཡཝཌྜྷིཧི;

མནྟདཱུཏཔྤཡཱནཱཛི-ནཱཡཀཱབྷྱཱུདཡེཧིཔི.

ཨལངྐཏམསཾཁིཏྟ-རསབྷཱཝནིརནྟརཾ;

ནཱཏིཝིཏྠིཎྞསགྒེཧི, པིཡཝུཏྟསུསནྡྷིབྷི.

སབྦཏྠ བྷིནྣསགྒནྟེ-ཧུཔེཏཾ ལོཀརཉྫཀཾ;

ཀབྦཾ ཀཔྤནྟརཊྛཱཡི, ཛཱཡཏེ སཱདྷྭལངྐཏཱི’’ཏི [ཀཱབྱཱདཱས ༡.༡༤ – ༡༩ གཱཐཱ].

ཏཏྠ ཨིཏིཧཱསཀཐུབྦྷཱུཏནྟི པུརཱཝུཏྟཀཐཱསནྣིསྶཡཾ. སནྟསནྣིསྶཡནྟི ཨིཏརསོབྷནཱདྷིཀརཎགུཎརཱཛཙརིཏཱདིནིསྶཡཾ ཝཱ. ཙཏུཝགྒཕལཱཡཏྟནྟི དྷམྨཱདིཙཏུཝགྒཕལཱཡཏྟཾ. དྷམྨོ ¶ ནཱམ ཨབྦྷཱུདཡནིབྦཱནཧེཏུཀོ. ཨཏྠོ ནཱམ ཝིཛྫཱབྷུམྱཱདཱིནཾ ཡཐཱཉྙཱཡམཛྫནཾ, ཨཛྫིཏཱནཉྩ རཀྑཎཾ. ཀཱམོ ནཱམ ནིརཡོ ཝིསཡོ པཡོགོ. མོཀྑོ ནཱམ སབྦསཾསཱརདུཀྑནིཝཏྟི. ཙཏུརོདཱཏྟནཱཡཀནྟི ཨུསྶཱཧསཏྟིམནྟསཏྟིཔབྷཱུསཏྟིཡོགེན ཙཏུརོ ཀུསལོ ཙཱགཱཏིསཡཱདིཡོགེན ཨུདཱཏྟོ ཨུདཱརོ ནཱཡཀོ ཝིཔཀྑོ, པཊིཔཀྑོ ཙ ཡཏྠ, ཏཾ. མདྷུ ནཱམ སུརཱ. ཝིཔྤལམྦྷོ ཝིརཧོ. མནྟོ ནཱིཏིཝེདཱིཧི སཧ ཀཱརཱིཡནིཙྪཡོ. དཱུཏོ སནྡྷཱནཔྤཝཏྟོ པུརིསོ. པཡཱནཾ སངྒཱམཱདིནིམིཏྟགམནཾ. ཨཱཛི སནྡྷྱཱབྷཱཝེ ཝིགྒཧོ. ཨསངྑཏྟརསབྷཱཝནིརནྟརནྟི ཨསཾཁིཏྟཱ བཧུཏྟཱ རསཱ སིངྒཱརཝཱིརཱདཡོ, བྷཱཝཱ རཏིཨུསྶཱཧཱདཡོ, ཏེཧི ནིརནྟརཾ པཏྠཊཾ. པིཡཝུཏྟསུསནྡྷིབྷཱིཏི པིཡཱནི སུཏིསུབྷགཱནི ཝུཏྟཱནི ཨིནྡཝཛིརཱདཱིནི ཨཉྙམཉྙསམྦནྡྷསཾསགྒཏཱཡ སོབྷནོ སནྡྷི ཨཉྙམཉྙསངྒཧཱ ཡེསཾ སགྒཱནཾ, ཏེཧཱིཏི.

པུནཔི ཡཐཱཝུཏྟེསུ ཨངྒེསུ ནགརཝཎྞནཱདཱིསུ ཀིཉྩ ཡཐཱསམྦྷཝཾ མདྷུཔཱནཱདིརཧིཏམྤི ཏཉྙཱུནཾ མནོ རཉྫེཏི ཨུཔཱདིཡཏེཝ སབྦྷཱིཏི དསྶེཏུམཱཧ–

‘‘ཀབྦཾ ན དུསྶཏངྒེཧི, ནྱཱུནམཔྱཏྲ ཀེཧིཙི;

བནྡྷངྒསམྤདཱ ཏཉྙཱུ, ཀཱམམཱརཱདྷཡནྟི ཙེ’’ཏི [ཀཱབྱཱདཱས ༡.༢༠].

པུནཔི –

‘‘གུཎཏོ པཋམཾ ཝཏྭཱ, ནཱཡཀཾ ཏེན སཏྟུནོ;

ནིརཱཀརཎམིཙྩེས, མགྒོ པཀཏིསུནྡརོ.

ཝཾསཝཱིརསུཏཱདཱིནི, ཝཎྞཡིཏྭཱ རིཔུསྶཔི;

ཏཛྫཡཱ ནཱཡཀུཀྐཾས-ཀཐནཉྩ སུཁེཏི ནོ’’ཏི [ཀཱབྱཱདཱས ༡.༢༡ ༢༢ གཱཐཱ] ཨཱཧུ.

སབྦམྤེཏཾ ¶ སདྡྷམྨཱམཏརསཔཱནསརསཧདཡཱནཾ སམྥཔྤལཱཔཝིཔུལཝིསཔྤཝེསོཔདྡུཏཀབྦནཱཊཀཔརམྨུཁཱནཾ སཏཏཙརིཏསཉྩརིཏརཏནབྷཱཛནཱནཾ སཔྤུརིསཱནཾ ཀིཾ ཧདཡཁེདོཔཛནིཏཔརིསྶམེནེཏི ཏདནུརཱུཔམེཝོཔདསྶིཏནྟི.

ནཱཊཀཾ ནཱམ བྷརཏཱདིནཱཊྱསཏྠེ ནཱནཔྤཀཱརནིརཱུཔིཏརཱུཔཾ ཀཔྤཾ, ཏཾལཀྑཎེཀདེསབྷཱུཏལཀྑཎཱནི པཀརཎཱདཱིནི ནཝ རཱུཔཀཱནི. ནཱཊིཀཱ ཙ ཨེཏྠེཝཱཝརུམྦྷནྟི. ཀབྦཉྩ ནཱཊཀཉྩ, ཏེསུ ནིཀྑིཏྟཾ ཋཔིཏཾ ནེཏྟཉྩ ཙིཏྟཉྩ ཡེཧཱིཏི ཝིགྒཧོ. ཀེ ཏེ? ཀཝིནོ. ཏཏྠ ནིཀྑིཏྟནེཏྟཙིཏྟཝཙནེན སུཏསྶ ཙིནྟནཉྩ ཨཱུཧཱཔོཧམུཁེན ཡཐུགྒཧིཏནིཡཱམཾ, ཨཝིཔརཱིཏཏྠནིཙྪཡནཾ, ནིཙྪིཏསྶ བྷཱཝནཱ, ནིརནྟརཱབྷིཡོགོ ཙ དསྶིཏོ. ཀབྦནཱཊཀཝཙནེན སུཏཾ, ཙིནྟིཏཾ, བྷཱཝིཏཉྩ དསྶིཏཾ. སུཏེ དསྶིཏེ ཏནྣིསྶཡཾ སུཏམཡཉཱཎམྤི དསྶིཏམེཝ སིཡཱཏི. ‘‘ཀབྦནཱཊཀནིཀྑིཏྟནེཏྟཙིཏྟཱ’’ཏི ཨིམིནཱ སུཏཙིནྟཱབྷཱཝནཱནུཀྐམེན སམྤཱདིཏཔཉྙཱཔཱཊཝཱནཾ ཀབྦརཙནཱཡ སཱམཏྠིཡཾ དསྶེཏི. ཧོཏི ཧི ཏཱདིསཱནཾ ཏཾསུཏཱདི བནྡྷནཀཱརཎཾ. ཝུཏྟཉྷི –

‘‘སཱབྷཱཝིཀཱི ཙ པཊིབྷཱ,

སུཏཉྩ བཧུ ནིམྨལཾ;

ཨམནྡོ ཙཱབྷིཡོགོཡཾ,

ཧེཏུ ཧོཏིཧ བནྡྷནེ’’ཏི [ཀཱབྱཱདཱས ༡.༡༠༣ གཱཐཱ].

ཡཾཀིཉྩཱིཏི ཨཏྟནོ ཙིཏྟཱརུལ༹ྷཾ ཡཾཀིཉྩི བནྡྷཛཱཏཾ. ཨིམིནཱ པན ཨནིཡམཝཙནེན ཨཏྟནོ ཏཏྠ ཨཱདརཱབྷཱཝཾ དཱིཔེཏི. རཙཡནྟི ཀརོནྟི. ཨེཏཾ ཏེཧི རཙིཏཾ བནྡྷཛཱཏཾ པརཾ ཨཙྩནྟམེཝ ཝིམྷཡཀརཾ ན ཧོཏི, ཏཱདིསོཔཱཡསམྤཏྟིསམྤནྣསྶ ཨུཔེཡྻསམྤཏྟིསབྦྷཱཝཏོ ཨནཙྪརིཡམེཝཱཏི ཨདྷིཔྤཱཡོ. ཏཏྠ ཏེསུ ཀབྦནཱཊཀེསུ རཙནཱཝིསེསཨེཀནྟོཔཱཡབྷཱུཏེསུ ཨཝིཧིཏཱདརཱཨཔི སུཏཱདིཝསེན ཨཀཏཱདརཱཔི ¶ ཡེ སཔྤུརིསཱ པཉྙཝནྟོ ཡེན བནྡྷཝིསེསེན ཝིཉྙཱུ གུཎདོསཝིདུནོ སཏྠཉྙུནོ པཎྜིཏཛནེ ཏོསེནྟི པཱིཎེནྟི. ཏོསེནྟིཡེཝ ཧི ཏེ ཏཱདིསེ སཱབྷཱཝིཀིཔཊིབྷཱཝིརཧེཔི ཨེཏཱདིསེསུ ཨཏྠེསུ སུཏཙིནྟཱབྷཱཝནཱཝསེན ཝཱཡམནྟཱ. ཝུཏྟཉྷི –

‘‘ན ཝིཛྫཏཱི ཡཛྫཔི པུབྦཝཱསནཱ-

གུཎཱནུབནྡྷི པཊིབྷཱནམབྦྷུཏཾ;

སུཏེན ཝཱཙུ’སྶཧནེནུཔཱསིཏཱ,

དྷུཝཾ ཀརོཏྱེཝ ཀམཔྱནུགྒཧ’’ནྟི [ཀཱབྱཱདཱས ༡.༡༠༤ གཱཐཱ].

པཊིབྷཱཝནྟོ ཧེཡྻོཔཱདེཡྻཔརིཙྪེདལཀྑཎཔཉྙཱཡ པཉྙཝནྟོ ནཱམ, ཏེཡེཝ སཔྤུརིསཱ. སཝིམྷཡོ ‘‘ཀཱིདིསཱཡཾ, ཏཱདིསོཔཱཡནྟརརཧིཏཱནམྤི ཨེཏཱདིསོ བནྡྷོ སིཡཱ’’ཏི ཝིམྷཡེན སཧ ཝཏྟམཱནོཔི. སོཝ བནྡྷོ ཏམེཝ བནྡྷནཾ ཏཱདིསོཔཱཡསམྤཏྟིཝིརཧེནོཔེཡྻསམྤཏྟིཡཱ སབྦྷཱཝཏོ, ནཱཉྙོཏི.

༦-༧. ཨིདཱནི ཀབྦནཱཊཀེསུ ཨཔརིཙིཏཱནམམྷཱཀཾ གནྠརཙནཱསབྷཱཝཱཝབོདྷོཝ ཀུཏོཏི ཨོསཀྐནྟེ ‘‘ཀབྦནཱཊཀཱ’’དིགཱཐཱདྭཡེན སམུསྶཱཧེཏི. ཀབྦནཱཊཀནིཀྑིཏྟནེཏྟཙིཏྟཱ ཀབྦནཱཊཀེསུ སུཏཱནུལོཀནཙིནྟཱབྷཱཝནཱཝསེན ཋཔིཏནེཏྟཙིཏྟཱ ཀཝིཛྫནཱ ཀབྦཀཱརཀཱ ཡཾ ཀིཉྩི ཨཏྟནོ ཨབྷིམཏཾ རཙཡནྟི ཀརོནྟི, ཨེཏཾ བནྡྷནཾ པརཾ ཨཏིསཡེན ན ཝིམྷཡཀརཾ ཨཙྪརིཡཀརཾ ན ཧོཏི, ནིརནྟརཱབྷིཡོགཏོ སིདྡྷོཔཱཡམཱུལཔཉྙཱསམྤདཱཡ ཨུཔེཡྻབྷཱུཏགནྠསངྑརཎཾ བྷཝཏྱེཝཱཏི ཨདྷིཔྤཱཡོ. ཀཝིནོ ཨིདཾ ཀབྦནྟི ཙ, ནཊཀསྶ ཨིདཾ ནཱཊཀཾ, ནཙྩགཱིཏཱདི. ཨིདྷ པན ཏཔྤཊིཔཱདཀཀཐཱཔཀཱསཀགནྠོ ནཱཊཀཾ ནཱམ. ཀབྦཉྩ ནཱཊཀཉྩཱཏི ཙ, ཀབྦནཱཊཀེསུ ནིཀྑིཏྟཾ ནེཏྟཙིཏྟཾ ཡེཧཱིཏི ཙ ¶ ཝིགྒཧོ. ཡེ ཛནཱ ཏཏྠ ཏེསུ ཀབྦནཱཊཀེསུ ཨཝིཧིཏཱདརཱཔི སཝནདྷཱརཎཱདིཝསེན ཨཀཏསམྦྷམཱ ཨེཝ ཝིཉྙཱུ ཡེན གནྠརཙནཱཝིསེསེན ཏོསེནྟི པཱིཎེནྟི, ཏེཡེཝ པཊིབྷཱཝནྟོ པཊིབྷཱནསངྑཱཏཔཉྙཝནྟོ བྷཝནྟི. སོཝ བནྡྷོ སཝིམྷཡོ ཨཉྙེསཾ ཨུཔྤཛྫམཱནཝིམྷཡེན སཧིཏོ. པཊིབྷཱ ཨེཏེསཾ ཨཏྠཱིཏི ཙ, སཧ ཝིམྷཡེན ཝཏྟཏཱིཏི ཙ, ཨཝིཧིཏོ ཨཱདརོ ཡེཧཱིཏི ཙ ཝིགྒཧོ. བཱཧིརསཏྠཱབྷིཡོགཱབྷཱཝེཔི པུབྦཝཱསནཱབྷཱཝེཔི ཨིཧ ནིརནྟརཱབྷིཡོགཾ ཀརོནྟོ ཏཱདིསསཱམཏྠིཡཾ སཱདྷེཏཱིཏི ཝུཏྟཾ ཧོཏི. ཝུཏྟཉྷི –

‘‘ན ཝིཛྫཏཱི ཡཛྫཔི པུབྦཝཱསནཱ-

གུཎཱནུབནྡྷི པཊིབྷཱནམབྦྷུཏཾ;

སུཏེན ཝཱཙུ’སྶཧནེནུཔཱསིཏཱ,

དྷུཝཾ ཀརོཏྱེཝ ཀམཔྱནུགྒཧ’’ནྟི [ཀཱབྱཱདཱས ༡.༡༠༤ གཱཐཱ].

ཏསྶཏྠོ – ཡདི པུབྦཝཱསནཱགུཎཱནུབནྡྷཱི ཨཏཱིཏཛཱཏིཡཱ པརིཙཡཝཱསནཱགུཎསྶ ཨནུབལཔྤདཱནཝསེན ཨནུབནྡྷོ ཡསྶཏྠི, ཏཱདིསཾ ཨབྦྷུཏཾ པཊིབྷཱནཾ ན ཝིཛྫཏིཔི, ཏཐཱཔི སུཏེན སཝནེན ཨུསྶཧནེན པགུཎཀརཎཱདིཝཱཙུསྶཧནེན ཝཱ ཨུཔཱསིཏཱ ཀཏགུརུཔཱསནཱ ཝཱཙཱ ཀམཔི ཨནུགྒཧཾ ཀིཉྩིཔི པཉྙཱཔཱཊཝཾ དྷུཝཾ ཨེཀནྟེན ཀརོཏི ཨེཝཱཏི.

ཨེཏྠ ཀབྦཾ ནཱམ མུཏྟཀཀུལཀཱདིཝཱཀྱཝསེན ཙ ཨཝཡཝསབྷཱཝེཧི ཏེསཾཡེཝ ཨནྟརཝཱཀྱཱཝཡཝསམཱུཧེཧི པརིཔུཎྞཾ ཝུཏྟཝིསེསེཧི པབྷེདགཏཾ ཀེཝལཾ པཛྫམཡཾ ཝཱ གཛྫམཡཾ ཝཱ ཙམྤཱུཏིཁྱཱཏཔཛྫགཛྫམཡཾ ཝཱཏི མཧཱཝཱཀྱསབྷཱཝེན ཙ ཏིཊྛཏི. ནཱཊཀཾ ནཱམ བྷརཏཱདིནཊསཏྠགཏནཱནཔྤཀཱརདསྶིཏསབྷཱཝཾ. ཀབྦཉྩ ཨིདྷེཝ དསྶིཏལཀྑཎཏོ ཨེཀདེསཡུཏྟཔྤཀརཎཱདིནཝརཱུཔཀཱནི ཙ ནཱཊིཀཱ ཙ བྷཝནྟི. ཀབྦལཀྑཎཾ པན ཨེཝཾ དཊྛབྦཾ–

‘‘སགྒབནྡྷོ ¶ མཧཱཀབྦ-མུཙྩཏེ ཏྭསྶ ལཀྑཎཾ;

པཎཱམོ ཝཏྠུནིདྡེསོ, ཨཱསཱིསཱཔི ཙ ཏམྨུཁཾ.

ཨིཏིཧཱསཀཐུབྦྷཱུཏཾ, སནྟསནྣིསྶཡམྤི ཝཱ;

ཙཏུཝགྒཕལཱཡཏྟཾ, ཙཏུརོདཱཏྟནཱཡཀཾ.

པུརཎྞཝུཏུསེལིནྡུ-སཝིཏཱུདཡཝཎྞནཾ;

ཨུཡྻཱནསལིལཀྐཱིལཱ༹, མདྷུཔཱནརཏུསྶཝཾ.

ཝིཔྤལམྦྷཝིཝཱཧེཧི, ཀུམཱརོདཡཝཌྜྷིཧི;

མནྟདཱུཏཔྤཡཱནཱཛི-ནཱཡཀཱབྷྱཱུདཡེཧིཔི.

ཨལངྐཏམསཾཁིཏྟ-རསབྷཱཝནིརནྟརཾ;

ནཱཏིཝིཏྠིཎྞསགྒེཧི, པིཡཝུཏྟསུསནྡྷིབྷི.

སབྦཏྠ བྷིནྣསགྒནྟེ-ཧུཔེཏཾ ལོཀརཉྫཀཾ;

ཀབྦཾ ཀཔྤནྟརཊྛཱཡི, ཛཱཡཏེ སཱདྷྭལངྐཏཱི’’ཏི [ཀཱབྱཱདཱས ༡.༡༤ – ༡༩ གཱཐཱ].

ཏསྶཏྠོ – སགྒབནྡྷོ སགྒསངྑཱཏེཧི པརིཙྪེདཝིསེསེཧི བནྡྷོ ‘‘མཧཱཀབྦ’’ནྟི ཨུཙྩཏེ. ཨསྶ ལཀྑཎཾ ཏུ ཝུཙྩཏེཏི སམྦནྡྷོ ཀཱཀཀྑིགོལ༹ཀནཡེན ཏམྨུཁཾ ཏསྶ ཀབྦསྶ ཨཱདི པན པཎཱམོ དེཝཏཱནམསྶནཾ ཝཱ, ཝཏྠུནིདྡེསོ –

‘‘ཨསྟྱུཏྟརསྱཱཾ དིགི དེཝཏཱཏྨ,

ཧིམཱལཡོ ནཱམ ནགཱདྷིརཱཛ?;

པཱུཝཱཔརེང ཝཱརིནིདྷཱི ཝིགཱཧྱ,

སྠིཏ? པཐིཛྷཱ ཨིཝ མཱནདཎྜ?’’ [ཀུམཱརསམྦྷཝ ༡.༡.].

ཨིཙྩཱདིབནྡྷསམྦནྡྷིནོ ཀསྶཙི ཝཏྠུནོ དསྶནཾ, ཨཱསཱིསཱཔི ‘‘མཡ྄ཧཾ པཱིཎཡཏཾ མན’’ མིཙྩཱདིཨིཊྛཱསཱིསནཾ ཝཱ བྷཝཏི.

ཨིཏིཧཱསཀཐུབྦྷཱུཏཾ པུརཱཝུཏྟཀཐཱསནྣིསྶཡཾ ཝཱ སནྟསནྣིསྶཡམྤི སོབྷནཱནམྤི རཱཛཙརིཡཱདིནིསྶཡཾ ཝཱ ཙཏུཝགྒཕལཱཡཏྟཾ ¶ ལོཀིཡལོཀུཏྟརསུཁཀཱརཎཾ དྷམྨོ, ཝིཛྫཱབྷཱུམིཨཱདཱིནཾ སཉྩཡོ, སཉྩིཏཱནཾ རཀྑཱ ཙ ཨཏྠོ, ཨཔཱཡསཾཝཏྟནིཀཔཉྩཀཱམགུཎསངྑཱཏོ ཀཱམོ, སབྦདུཀྑཱ ནིཝཏྟིཧེཏུ མོཀྑོ ཙཱཏི ཙཏུཝགྒཕལཱདྷཱིནཾ ཙཏུརོདཱཏྟནཱཡཀཾ ཨུསྶཱཧསཏྟིམནྟསཏྟིཔབྷཱུསཏྟིཡོགཏོ ཙཏུརོ དཀྑོ ཙཱགཱཏིསཡཱདིཡོགེན ཨུདཱཏྟོ ཨུལཱ༹རོ སཔཀྑོ, ཝིཔཀྑོ ཝཱ ནཱཡཀོ ཡཏྠ, ཏཾ ཡཐཱཝུཏྟཾ པུརཎྞཝུཏུསེལིནྡུ-སཝིཏཱུདཡཝཎྞནཾ པུརཾ ནགརཾ, ཨཎྞཝཾ སཱགརཾ, ཨུཏུ ཧེམནྟཝསནྟཱདིཨུཏུ, སེལཾ པབྦཏོ, ཨིནྡུསཝིཏཱུདཡོ ཙནྡསཱུརིཡཱནཾ ཨུདཡོ ཙཱཏི ཨིམེསཾ ཝཎྞནཾ ཡཏྠ, ཏཾ. སཝིཏཱཏི ཨེཏྠ ཏུཔཙྩཡནྟོ. ཨུཡྻཱནསལིལཀྐཱིལཱ༹མདྷུཔཱནརཏུསྶཝཾ ཨུཡྻཱནཀཱིལཱ༹སུརཱཔཱནརཏིཀཱིལཱ༹སངྑཱཏོ ཨུསྶཝོ ཡཏྠ, ཏཾ ཝིཔྤལམྦྷཝིཝཱཧེཧི དཱརཱཝིཡོགདཱརཔརིགྒཧེཧི ཙ ཀུམཱརོདཡཝཌྜྷིཧི ཀུམཱརུཔྤཏྟིཀུམཱརཝཌྜྷཱིཧི ཙ མནྟདཱུཏཔྤཡཱནཱཛིནཱཡཀཱབྷྱཱུདཡེཧི ནཱིཏིཛཱནནཔཉྙཱ མནྟོ, སནྡྷཱནཀཱརཀོ དཱུཏོ, ཡུདྡྷཱབྷིགམནཾ པཡཱནཾ, ཡུདྡྷསངྑཱཏོ ཨཱཛི, སཔཀྑནཱཡཀསྶ ཨབྷིཝཌྜྷིསངྑཱཏོ ཨབྷྱཱུདཡོ ཙཱཏི ཨིམེཧི ཨལངྐཏཾ སཛྫིཏཾ ཨསཾཁིཏྟ…པེ… ནྟརཾ ཨསཾཁིཏྟཱ ཝིཏྠཱརཱ རསཱ སིངྒཱརཱདཡོ ཨཊྛ བྷཱཝཱ རཏིཨུསྶཱཧཱདཡོ ཙཱཏི ཨིམེཧི ནིརནྟརཾ ཝིཏྠིཎྞཾ པིཡཝུཏྟསུསནྡྷིབྷི སུཏིསུབྷགེཧི ཨིནྡཝཛིརཱདཱིཧི ཝུཏྟེཧི པུབྦཱཔརསམྦནྡྷཔརིཙྪེདཏཱཡ སོབྷནཱ སནྡྷི ཡེསཾ སགྒཱནཾ, ཏེཧི སབྦཏྠ སབྦསྨིཾ པརིཙྪེདེ བྷིནྣསགྒནྟེཧི བྷིནྣསགྒཱ པརིཡོསཱནཱ ཡེསཾ, ཏེཧི ནཱཏིཝིཏྠིཎྞསགྒེཧི ནཱཏིཝིཏྠཱརསགྒསངྑཱཏེཧི པརིཙྪེདེཧི ཨུཔེཏཾ ཡུཏྟཾ སཱདྷྭལངྐཏི སོབྷནཱལངྐཱརཝནྟཾ ཀབྦཾ ལོཀརཉྫཀཾ ཏཾ སམཱནཾ ཀཔྤནྟརཊྛཱཡི ཀཔྤནིརནྟརཊྛཱཡི ཀཔྤནྟརེ ཋཱཡི ཝཱ ཛཱཡཏེ. ཨེཏྠ མདྷུཔཱནཱདིརཧིཏཔུརཝཎྞནཱདཡོཔི ཏཉྙཱུནཾ ཙིཏྟཾ ཨཱརཱདྷེཏི ཙེ, ཏཾཔྱདུཊྛཾ. ཝུཏྟཉྷི –

‘‘ཀབྦཾ ¶ ན དུསྶཏངྒེཧི, ནྱཱུནམཔྱཏྲ ཀེཧིཙི;

བནྡྷངྒསམྤདཱ ཏཉྙཱུ, ཀཱམམཱརཱདྷཡནྟི ཙེ’’ཏི.

ཏསྶཏྠོ – ཨཏྲ ཨིམེསུ ཀབྦངྒེསུ མཛ྄ཛྷེ ཀེཧིཙི ཨངྒེཧི ཀེཧིཙི ཨཝཡཝེཧི ནྱཱུནམཔི ཨཱུནམཔི, ནིསདྡོཏྲཏབྦྷཱཝེ. ཀབྦཾ ན དུསྶཏི, ཏཾ པན ཨདུསྶནཾ བནྡྷངྒསམྤདཱ རཙིཏཔུརཝཎྞནཱདིཨངྒསམྤདཱ ཏཉྙཱུ ཀབྦཉྙཱུ ཛནེ ཀཱམཾ ཨིཙྪཱནུརཱུཔཾ ཙེ ཨཱརཱདྷཡནྟི, ཨེཝཾ སནྟེ བྷཝཏི. པུནཔི ནཱཡཀཝཎྞནཱསུ སཔཀྑནཱཡཀཾ ཝཎྞེཏྭཱ ཏེན ནིརཱཀརཎབྷཱཝམྤི. ནོ ཙེ, པཙྩཏྠིཀཾ ཝཎྞེཏྭཱ ཨཏྟནོ ནཱཡཀེན ཏསྶཱབྷིབྷཝནམྤི ཝཎྞེཏུཾ ཝཊྚཏི. ཝུཏྟཉྷི –

‘‘གུཎཏོ པཋམཾ ཝཏྭཱ, ནཱཡཀཾ ཏེན སཏྟུནོ;

ནིརཱཀརཎམིཙྩེས, མགྒོ པཀཏིསུནྡརོ.

ཝཾསཝཱིརསུཏཱདཱིནི, ཝཎྞཡིཏྭཱ རིཔུསྶཔི;

ཏཛྫཡཱ ནཱཡཀུཀྐཾས-ཀཐནཉྩ སུཁེཏི ནོ’’ཏི.

༨.

བནྡྷོ ཙ ནཱམ སདྡཏྠཱ, སཧིཏཱ དོསཝཛྫིཏཱ;

པཛྫགཛྫཝིམིསྶཱནཾ, བྷེདེནཱ’ཡཾ ཏིདྷཱ བྷཝེ.

༨. ཨེཝམེཏེཧི སོཏུཛནསམུསྶཱཧནཾ དསྶེཏྭཱ ཨིདཱནི ཀཏྟུམིཙྪིཏབནྡྷོཏི ཝུཏྟཾ བནྡྷསྶ ལཀྑཎཾ ཀཏྟུམཱརབྷཏེ ‘‘བནྡྷོ ཙཱ’’ཏིཨཱདི. དོསཝཛྫིཏཱ དོསེཧི སདྡནིསྶིཏེཧི, ཨཏྠནིསྶིཏེཧི ཙ ཝིརོདྷེཧི ཝཛྫིཏཱ པརིཙྩཏྟཱ, ཏེ ཝཱ ཝཛྫིཏཱ ཡེཧི, སདྡཏྠཱ སཧིཏཱ ཨེཀཱིབྷཱུཏཱ. ཝུཏྟལཀྑཎཱ ཡེཧི ཏེ པུབྦཱཙརིཡེཧི སཧིཏཱ ཝུཙྩནྟི. སཧིཏཱནཾ བྷཱཝོ སཧདཡཧིལཱདཀཱརཎཾ སཱདྷྱཾ སཱཧིཙྩཾ. ཨིཏི དོསཝཛྫིཏེ སཧིཏེ སདྡཏྠེ པསིདྡྷབྷཱཝེན ཨནུཝདིཏྭཱ བནྡྷོ ནཱམ སབྷཱཝཝུཏྟིཝངྐཝུཏྟིཨལངྐཱརཝུཏྟིཝསེན ཏིཝིདྷོཔཱིཏི ཨཔྤསིདྡྷཾ བནྡྷསརཱིརཾ ཝིདྷཱིཡཏེ ཡཐཱ ‘‘ཡོ ཀུཎྜལཱི, སོ དེཝདཏྟོ’’ཏི. ཙསདྡོཝཏྟབྦནྟརསྶ སམུཙྩཡོ, ཀིཉྩཱིཏི ཨཏྠོ.

ཏཏྠ ¶ ཛཱཏིགུཎཀྲིཡཱདབྦལཀྑཎོ སདྡཱནམཏྠོ མུཁྱོ ཙཏུབྦིདྷོ ཧོཏི. མུཁྱསྶཏྠསྶ ཙཏུབྦིདྷཏྟཱ ཏིཝིདྷེསུ སདྡེསུ ཏབྦཱཙཀོ ཙཏུབྦིདྷོ ཧོཏི ཛཱཏིསདྡོ གུཎསདྡོ ཀྲིཡཱསདྡོ དབྦསདྡོཏི. ཏིཝིདྷོ ཧི སདྡོ ཝཱཙཀོ ལཀྑཎིཀོ བྱཉྫཀོཏི བྱཱཔཱརབྷེདེན. བྱཱཔཱརོ ཙ ནཱམ སདྡསྶ’ཏྠཔྤཏཱིཏིཀཱརིཏྟམེཝ. སོ ཧི ཏིཝིདྷོ མུཁྱོ ལཀྑཎོ བྱཉྫནསབྷཱཝོ ཙེཏི. ཏཏྠ ཛཱཏྱཱདིནིརནྟརཏྠཝིསཡོ སདྡབྱཱཔཱརོ མུཁྱོ. སོཡེཝ ཨབྷིདྷཱཏི ཨུཙྩཏེ. ཏཾབྱཱཔཱརཝཱ ཨབྱཝཧིཏཛཱཏྱཱདིསཀེཧི ཏམཏྠཾ མུཁྱབྷཱཝེན ཡོ ཝདཏི གོཨཱདིཀོ, སོ ཝཱཙཀོ. སདྡནྟརཏྠཝིསཡནིདྡིཊྛོ སདྡབྱཱཔཱརོ ལཀྑཎོ. སཱ དུཝིདྷཱ སུདྡྷཱ, ཨུཔཙཱརམིསྶཱ ཙེཏི. ཏཏྠ སུདྡྷཱ ཡཐཱ ‘‘གོ མུཙྩཏུ, མཉྩཱ ཨུགྒྷོསེནྟི, གངྒཱཡཾ གྷོསོ’’ཏི. ཨེཏྠ གོསདྡེན ཝིསེསནཾ གོཏྟསཱམཉྙམེཝོཙྩཏེ, ན ཏུ གོབྱཏྟི. ཝུཏྟཉྷི –

‘‘ཝིསེསྱཾནཱབྷིདྷཱ གཙྪེ, ཁཱིཎསཏྟི ཝིསེསནེ’’ཏི [ཀཱབྱཔྤཀཱསེ དུཏིཡཨུལླཱསེ ཨཱགཏནྱཱཡོ’ཡཾ].

སཱམཉྙསྶ བྱཱཔཀཏྟཱ, ཨསརཱིརཏྟཱ ཙ. ཏཏྠ བནྡྷནམོཙནཱནི ན སམྦྷཝནྟཱིཏི ཨཏྟནོ ནིསྶཡབྷཱུཏཱ གོབྱཏྟི ཨཱཀཌྜྷཱིཡཏེ, ཏཐཱ མཉྩཱནམུགྒྷོསནཾ ན སམྦྷཝཏཱིཏི ཨཏྟནོ ཨུགྒྷོསནཀྲིཡཱསིདྡྷྱཏྠཾ མཉྩསམངྒིནོ པུརིསཱ ཨཱཀཌྜྷཱིཡནྟི. ཏཐཱ གངྒཱསདྡཝཱཙྩསྶ ཛལཔྤཝཱཧསྶ གྷོསཔྤཏྱཱཀརཏཱ ན སམྦྷཝཏཱིཏི གངྒཱསདྡོ ཨཏྟནོབྷིདྷེཡྻསྶོདཀཔྤཝཱཧསྶ ནིཀཊཾ ཏཊཾ ལཀྑེཏི. ཨུཔཙཱརསྶཱནེཀཔྤཀཱརཏྟཱ ཨུཔཙཱརམིསྶཱ ལཀྑཎཱཔྱནེཀདྷཱ སིཡཱ. ཡཐཱ ཀཏྠཙི ཀཱརཎེ ཀཱརཱིཡམུཔཙརིཡཏེ, ཡཐཱ ‘‘ཨཱཡུ གྷཏ’’ནྟི. ཀཏྠཙི ཀཱརཎཀཱརིཡཱནམབྷེདོ ཡཐཱ ‘‘ཨཱཡུཡེཝེད’’ནྟི. ཀཏྠཙི ¶ ཨུཔམཱནེ ཨུཔམེཡྻམུཔཙརཱིཡཏེ, ཡཐཱ ‘‘གོ བཱཧིཀོ’’ཏི. ཀཏྠཙི ཨབྷེདོ ཏེསཾ, ཡཐཱ ‘‘གོཡེཝཱཡ’’ནྟི. ཀཏྠཙི ཏདཱདྷཱརཏཱཡ [ཏདཏྠཏཱཡ (ཀ.)] ཏཾབྱཔདེསོ, ཡཐཱ ‘‘པདཱིཔཊྛཱ ཀཔལླིཀཱ པདཱིཔོ’’ཏི. ཀཏྠཙི ཏཾཀམྨསམྦནྡྷཱ ཏཾབྱཔདེསོ, ཡཐཱ ‘‘ཨཝཌྜྷཀཱིཔི ཝཌྜྷཀཱི ཨཡ’’ནྟི. ཀཏྠཙི སཾསཱམིསམྦནྡྷཱ, ཡཐཱ ‘‘རཱཛསམྦནྡྷཱི པུརིསོ རཱཛཱཡ’’ནྟི. ཀཏྠཙི ཨཝཡཝེ སམུདཱཡབྱཔདེསོ, ཡཐཱ ‘‘པཊེཀདེསེ པཊསདྡོ’’ ཨིཙྩཱདི.

ལཀྑཎཱཡ ནིསྶཡོ སདྡོ ལཀྑཎིཀོ. བྱཉྫནསབྷཱཝོ པན པརཔརིཡཱཡོ སདྡསྶ ཏཏིཡོ བྱཱཔཱརོ. ཏསྶ ནིསྶཡོ སདྡོ བྱཉྫནཀོ. ཨིཙྩེཏཾ ཏིཎྞཾ སདྡཱནཾ ཝསེན ཨཏྠོཔི ཏིཝིདྷོ ཧོཏི ཝཱཙྩོ ལཀྑཎིཡོ བྱངྒྱོཏི. ཏཏྠ བྱངྒྱོཡེཝཏྠོ བནྡྷསཏྠཱ ཝུཙྩཏེ. ཏེནེཝ པདྷཱནབྱངྒྱོ བནྡྷོ ཨུཏྟམོ, ཨཔདྷཱནབྱངྒྱོ མཛ྄ཛྷིམོ, ཨབྱངྒྱོ ཨདྷམོ, བྱངྒྱེན ཝིནཱ བནྡྷོ ནིཛྫཱིཝོ སིཡཱཏི པུབྦཱཙརིཡཱནཾ པཝཏྟི, སབྷཱཝཝུཏྟི བནྡྷོཔི ཏུ ནིཛྫཱིཝོཏི ནཱསངྐནཱིཡོ. ཡསྨཱ ཀཝཱིནཾ ལོཀཝོཧཱརཀོསལླཾ སབྷཱཝཝུཏྟིཡེཝ གམེཏི. ཡོ ཧི སཀལལོཀཊྛིཏིཾ ན ཛཱནཱཏི, སོ ཀཝིཡེཝ ན ཧོཏཱིཏི.

ཨཐེཏྠ ཏིཝིདྷམྤི ཨཏྠཾ ཏཱདིསཛནཱཝབོདྷཏྠཾ སམུདཱཧརིསྶཱམ ‘‘མུནིནྡཝདནམྦྷོཛེ’’ཏྱཱདི. ཨེཏྠ ཝཱཎཱིསདྡསྶ སདྡྷམྨསངྑཱཏོ ཨཏྠོ ཝཱཙྩཏྠོ. ཝཱཎཱི ནཱམ ཙེཏནཱ, ཏསྶཾ ཡཱཝ དེཝཏཏྠཾ ནཱརོཔྱཏེ, ཏཱཝ ཏཔྤཏཱི ཨཏྟནོ མནོསམྤཱིཎནཨཱསཱིསནཱ ན སཾགཙྪཏཱིཏི ཝཱཀྱསཱམཏྠིཡཱཡེཝ ཝཱཎིཡཾ སཱཡམོཙིཏྱབྷེདེན དེཝཏཱསདྡསྶ ཨཱརོཔིཏོཏྠོ ལཀྑཎིཡོ. ཏཐཱ ཝདནསདྡསྶཱཔི མུཁཾ ཝཱཙྩཏྠོ. ཨམྦྷོཛསདྡསྶ སམཱརོཔིཏོཏྠོ ལཀྑཎིཡོ. མནོསམྤཱིཎནསྶ ཏུ ཨཉྙཐཱ ཨནུཔཔཏྟིཡཱ པསྶདྡྷྱཱདིཀྐམེན ཡཐཱབྷཱུཏཱཝབོདྷསམྦྷཝཱ ཨནཱཡཱསེན ¶ ཝིཙིཏྟཱནེཀསདྡཏྠཔཊིབྷཱནེན གནྠཔརིསམཏྟིསངྑཱཏཱ ཡཐིཙྪིཏཏྠནིཔྥཏྟི ཧོཏེཝ, ཨཡཾ བྱངྒྱཏྠོ. ཏབྦཱཙཀཱ སདྡཱ ཝཱཙཀལཀྑཎིཀབྱཉྫཀཱ ཧོནྟཱིཏི ཨེཝཾ སབྦཏྠ སདྡཏྠཝིཙཱརོ གནྟབྦོ.

ཏམེཝཾ ཡཐཱཝུཏྟབནྡྷསརཱིརཾ ཀཏིཝིདྷམིཙྩཱཧ ‘‘པཛྫེ’’ཙྩཱདི. ཨཡཾ ཡཐཱཝུཏྟོ བནྡྷོ བནྡྷསརཱིརཾ ཏིདྷཱ བྷཝེ ཏིཔྤཀཱརེན སིཡཱ, ནཱདྷིཀཾ ནཱཔྱཱུནཾ. ཀཐཾ? པཛྫགཛྫཝིམིསྶཱནཾ བྷེདེན པཛྫསབྷཱཝཱདཱིནཾ ཝིསེསེན ཏིདྷཱ བྷཝེཏི པཀཏཾ. ཏཏྠ པཛྫཾ ནཱམ ཨམྷེཧིཡེཝ ཝིརཙིཏཝུཏྟོདཡཱཁྱེ ཚནྡསི ནིརཱུཔིཏཱ ཝུཏྟཛཱཏིཔྤབྷེདཱ ཙཏུཔྤདིཀཏྠཱ ནིརཱུཔིཏོ མུཏྟཀཱདིཔི ཝུཏྟཛཱཏིཔྤཀཱརོཡེཝ. ཏེནེཝེཏྠ ཏེསམདསྶནཾ. ཏེསུ ཨེཀགཱཐཱ ནིཊྛིཏཏྠཱ སཔྤདྷཱནཱ གཱཐནྟརཱནིརཔེཀྑཱ མུཏྟཀཾ, ཨེཀཀྲིཡཱདཱནེན ཨཉྙམཉྙསཱཔེཀྑཱ ནིཊྛིཏཏྠཱ པཙྩེཀཾ ཨནིཊྛིཏཏྠཱ གཱཐཱ ཀུལཀཾ, ནཱནཱབྷིཏྟིཡོ བྷིནྣཀིརིཡོ སཔྤདྷཱནཱ གཱཐཱ ཀོསོ ཝིཡ ཋཔིཏཱ ཀོསོ, ཨེཀབྷིཏྟིཔདོསཱདིཀཾ ཝཎྞེཏུཾ སམུདཱཡེན པཝཏྟཱ བྷིནྣཀྲིཡཱ གཱཐཱ སངྒྷཱཏོ, སོཔི ཙཏུབྦིདྷོ པཛྫཔྤཀཱརོ ཡཐཱཝུཏྟསགྒབནྡྷོཝཱཏི ཝིཉྙཱཏབྦཾ. གཛྫཾ ནཱམ པཱདསནྣིཊྛཱནརཧིཏོ སྱཱདྱནྟཏྱཱདྱནྟཔྤབནྡྷོ. ཏསྶ ཏུ དྭེ པཀཱརཱ ཨཱཁྱཱཡིཀཱ, ཀཐཱཏི. ཝིམིསྶཾ པཛྫགཛྫམཡཾ ནཱཊཀཔྤཀརཎཱདི, ཙམྤཱུ ཛཱཏཀམཱལཱདིཀཱ ཙ.

༨. ཨིདཱནི སཉྫཱནནཱབྷིལཱསཱིནཾ ཨལངྐཱརནིསྶིཏཾ བནྡྷསརཱིརཾ, སོཝ བནྡྷོཏི ཨདྷིཀཏཾ, ‘‘ཡོ ཀུཎྜལཱི, སོ དེཝདཏྟོ’’ཏི པསིདྡྷཀུཎྜལིཏྟཱནུཝཱདེན ཨཔྤསིདྡྷསྶ དེཝདཏྟཏྟཝིདྷཱནཾ ཝིཡ དསྶེནྟོ ‘‘བནྡྷོ’’ཙྩཱདིམཱཧ. ཏཏྠ བནྡྷོ ནཱམ ཙ བནྡྷནཾ པན. དོསཝཛྫིཏཱ སདྡཏྠནིསྶིཏདོསེཧི པརིཙྩཏྟཱ, ཏེ ཝཱ ཝཛྫིཏཱ ཨེཏེཧི ཏཱདིསཱ. སཧིཏཱ ཨཉྙམཉྙཱནུརཱུཔཏྠེན སཧབྷཱཝཾ གཏཱ. སདྡཏྠཱ སདྡོ, ¶ ཨཏྠོ ཙ. ཨེཝཾཔཀཱརེཧི ཏུ ཨཱིདིསསདྡཏྠཱནཾ ཝིཉྙཱུནཾ ཏུཊྛིཛནཀཨཉྙམཉྙཱནུརཱུཔགུཎསཧིཏཱནཾ བྷཱཝོཏི ཝཙནཏྠེན ‘‘སཱཧིཙྩ’’མིཏི ཝདནྟི. སདྡཏྠཱཏི ཨེཏྠ སདྡཏྠཱནཾ ཀིཾ ནཱནཱཀརཎནྟི? སདྡོ པན ཨཏྠཔྤཏཱིཏིཡཾ ཨཏྟནོ མུཁྱབྱཱཔཱརཾ ལཀྑཎབྱཱཔཱརཾ བྱཉྫནསབྷཱཝབྱཱཔཱརཉྩེཏི ཏིཝིདྷཾ བྱཱཔཱརབྷེདེན. ཀམཏོ ཝཱཙཀོ ལཀྑཎིཀོ བྱཉྫནཀོ ཙེཏི ཏིཝིདྷོ. ཏཐཱ ཨཏྠོཔི ཝཱཙྩོ ལཀྑཎིཡོ བྱངྒྱོ ཙེབྷི ཏིཝིདྷོ. ཨཏྲ ཏུ ཝཱཙཀོ སདྡོ ཨཏྟནཱ དཱིཔེཏབྦམུཁྱཏྠསྶ ཛཱཏིགུཎཀྲིཡཱདབྦབྷེདེན ཙཏུབྦིདྷཏྟཱ སཡམྤི ཛཱཏིགུཎཀྲིཡཱདབྦསདྡཝསེན ཙཏུབྦིདྷོ. ཝཱཙཀསདྡསྶ མུཁྱབྱཱཔཱརོ ‘‘ཨབྷིདྷཱ’’ཏི ཙ ཝོཧརཱིཡཏི. སོ མུཁྱབྱཱཔཱརོ ཛཱཏྱཱདཱིཧི ཨབྱཝཧིཏཏྠེཝ ཝཏྟཏེ. ཏཐཱ ཧི ‘‘གོ ནཱིལཾ པཱཙཀོ ཝིསཱཎི’’ཙྩཱདོ གོཨཱདིསདྡཱནཾ མུཁྱབྱཱཔཱརོ གོཔིཎྜནཱིལཔཊཔཱཙཀཀཏྟུསིངྒཱིཏི དབྦཱནཾ ཝིསེསནབྷཱུཏཛཱཏིགུཎཀྲིཡཱདབྦེསྭེཝ པཝཏྟཏི, ན པན ཛཱཏྱཱདཱིནཾ ནིསྶཡབྷཱུཏགོཔིཎྜཱདཱིསཱུཏི. ཝུཏྟཾ ཧི–

‘‘ཝིསེསྱཾ ནཱབྷིདྷཱ གཙྪེ, ཁཱིཎསཏྟི ཝིསེསནེ’’ཏི [ཀཱབྱཔྤཀཱསེ དུཏིཡཨུལླཱསེ ཨཱགཏནྱཱཡོ’ཡཾ].

ཏསྶཏྠོ – ཝིསེསནེ ཝིསེསནབྷཱུཏཛཱཏྱཱདིམྷི ཁཱིཎསཏྟི ཁཱིཎབྱཱཔཱརཝཏཱི ཨབྷིདྷཱ མུཁྱབྱཱཔཱརོཝ ཝིསེསྱཾ དབྦཾ ན གཙྪེ ན པཱཔུཎཱཏཱིཏི.

ཛཱཏྱཱདཱིནཾ ནིསྶཡགོཔིཎྜཱདིཀཾ ཨབྷིདྷཱ ན ཝདཏི ཙེ, ཨེཝཉྩ སཏི ‘‘གོ གཙྪཏི, ནཱིལཾ ནིཝཱསེཏི, པཱཙཀོ ཨཱགཙྪཏི, སིངྒཱི དྷཱཝཏི’’ཙྩཱདཱིསུ ཛཱཏྱཱདིཝིསིཊྛགོཔིཎྜཱདཱིནཾ གོཨཱདིསདྡསྶ ཀཐཾ ཝཱཙཀཏྟཾ ཡུཛྫཏཱིཏི? དབྦཱདྷཱིནཛཱཏིགུཎཱདཱིསུ ཝུཏྟེསུ ཏབྦིསིཊྛསྶ དབྦསྶ པརིཡཱཡཏོ ཝཱཙཀཏྟཱ. ནིཔྤརིཡཱཡཏོ པན སུདྡྷལཀྑཎབྱཱཔཱརསྶེཝ ཝིསཡོ. ལཀྑཎབྱཱཔཱརོཔི སུདྡྷོ ཨུཔཙཱརམིསྶོཏི དུཝིདྷོ. ¶ ཏཏྠ སུདྡྷོ ལཀྑཎབྱཱཔཱརོ ཛཱཏྱཱདིཝཛྫིཏཏྠཝིསཡོ. ཏཐཱ ཧི ‘‘གོ གཙྪཏི, ནཱིལཾ ནིཝཱསེཏི, པཱཙཀོ ཨཱགཙྪཏི, སིངྒཱི དྷཱཝཏི, མཉྩཱ ཨུགྒྷོསེནྟི, གངྒཱཡཾ གྷོསོ’’ཏྱཱདཱིསུ ཛཱཏིགུཎཀྲིཡཱསིངྒདབྦམཉྩགངྒཱདཱིནཾ གམནཱདཱིཧི ཡོགཱསམྦྷཝཏོ ཛཱཏིགུཎཱདཡོ ཨཏིཀྐམྨ ཡཐཱཀྐམཾ གམནནིཝཱསནཨཱགམནདྷཱཝནཨུགྒྷོསནགྷོསཱདཱིནཾ ནིསྶཡབྷཱུཏགོཔིཎྜཱདཡོ པརཱམསཏི.

མིསྶོ ཏུ ཨུཔཙཱརབྷེདེན བཧུཝིདྷོ. ཏཐཱ ཧི ཀཏྠཙི ཀཱརཎེ ཀཱརིཡམུཔཙརཱིཡཏེ, ཡཐཱ ‘‘ཨཱཡུགྷཏ’’ནྟི, ཨེཏྠ ཨཱཡུཝཌྜྷནཀཱརཎབྷཱུཏེ གྷཏེ ཀཱརིཡབྷཱུཏཨཱཡུནོ ཝོཧཱརོ ཨཱརོཔིཏོ ཧོཏི. ཨུཔརིཔི ཨུཔཙཱརོ ཡཐཱཡོགཾ ཡོཛེཏབྦོ. ཨཏཾསབྷཱཝེ ཧི ཏཾསབྷཱཝཱརོཔནཾ ཨུཔཙཱརོ. ཀཏྠཙི ཀཱརཎཀཱརིཡཱནམབྷེདོ, ཡཐཱ ‘‘ཨཱཡུཡེཝ གྷཏ’’ནྟི. ཀཏྠཙི ཨུཔམེཡྻཨུཔམཱནོཔཙཱརོ, ཡཐཱ ‘‘གོ བཱཧིཀོ’’ཏི. ཀཏྠཙི ཨུཔམཱནཨུཔམེཡྻཱནམབྷེདོ, ཡཐཱ ‘‘གོཡེཝཱཡཾ བཱཧིཀོ’’ཏི. ཀཏྠཙི ཏདཱདྷཱརཏཱཡ ཏདཱུཔཙཱརོ, ཡཐཱ ‘‘པདཱིཔཊྛཱ ཀཔལླིཀཱ པདཱིཔོ’’ཏི. ཀཏྠཙི ཀྲིཡཱསམྦནྡྷེན ཏཾབྱཔདེསོ, ཡཐཱ ‘‘ཨཝཌྜྷཀཱིཔི ཝཌྜྷཀཱི ཨཡ’’ནྟི. ཀཏྠཙི སཾསཱམིསམྦནྡྷེན ཏཾབྱཔདེསོ, ཡཐཱ ‘‘རཱཛཝལླབྷོཔི རཱཛཱ ཨཡ’’ནྟི. ཀཏྠཙི ཨཝཡཝེ སམུདཱཡབྱཔདེསོ, ཡཐཱ ‘‘པཊོ དཌྜྷོ’’ཏི. ཨིམིནཱ མུཁེན ཨུཔཙཱརབྷེདོ དཊྛབྦོ. བྱཉྫནསབྷཱཝབྱཱཔཱརོ ཨེཝ ‘‘དྷན’’ནྟི ཙ ཝུཙྩཏི, ཏསྶ ཏཏིཡབྱཱཔཱརསྶ ཝིསཡོ ཏཱདིསཝཱཀྱམེཝ ཝཱཏི དཊྛབྦོ.

ཨེཏྠ བྱངྒྱཏྠཾ བནྡྷསྶ ཛཱིཝིཏམིཏི ཙ, བྱངྒྱཏྠཔདྷཱནཾ བནྡྷམུཏྟམནྟི ཙ, བྱངྒྱཏྠཔདྷཱནརཧིཏཾ མཛ྄ཛྷིམནྟི ཙ, ཨབྱངྒྱབནྡྷཾ ཨདྷམམིཏི ཙ ཝདནྟི. ཧོནྟི ཙེཏྠ –

ཨཏྠཔྤཏཱིཏིཡཾ སདྡ-བྱཱཔཱརོ ཏིཝིདྷོ བྷཝེ;

མུཁྱོ ལཀྑཎབྱཉྫན-སབྷཱཝོ ཙཱཏི ཨེཏྠ ཏུ.

ཨབྷིདྷཱཔརཔརིཡཱཡོ, ¶ བྱཱཔཱརོ པཋམོ བྷཝེ;

དྷནནྟཱཔརཔརིཡཱཡོ, བྱཱཔཱརོ ཏཏིཡོ པུན.

མུཁྱོ ནིརནྟརཏྠེསུ, ལཀྑཎཱ ཏུ ཏིརོཧིཏེ;

ཨཏྠེ’ཏརོ ཏུ ཝཱཀྱསྶ, ཨཏྠེཡེཝ པཝཏྟཏི.

བྱཱཔཱརསྶ པབྷེདེན, ཏིདྷཱ སདྡོཔི ཝཱཙཀོ;

ལཀྑཎིཀོ བྱཉྫཀོཏི, ཏདཏྠོཔི ཏིདྷཱ མཏོ.

ཝཱཙྩོ ལཀྑཎིཡོ བྱངྒྱོ-ཙྩེཝཾ སདྡེསུ ཝཱཙཀོ;

ཛཱཏིགུཎཀྲིཡཱདབྦ-བྷེདེན སོ ཙཏུབྦིདྷོ.

ཝཱཙྩཏྠསྶ ཙཏུདྡྷཱཝ, བྷིནྣཏྟཱ ཛཱཏིཨཱདིཏོ;

ཛཱཏྱཱདཱིནཾ པབྷེདེན, ཏཐཱ ལཀྑཎིཀོ མཏོ.

ཨུཔཙཱརབཧུཏྟེན, བྷེདེ སཏིཔི ཏསྶ ཏུ;

བྱཉྫཀོ ཏུ ཨནཉྙཏྟཱ, ཝིསུཾ ཏེཧི ན ཝུཙྩཏཱིཏི.

ལཀྑཎཏོ ཨེཝཾ ཝེདིཏབྦཾ – ‘‘མུནིནྡཝདནམྦྷོཛེ’’ ཏྱཱདིགཱཐཱཡཾ ཝདནསདྡསྶ མུཁཏྠོ ཝཱཙྩཏྠོ, ཨཱརོཔིཏཨམྦྷོཛཏྠོ ལཀྑཎིཡཏྠོ. ཨམྦྷོཛསདྡསྶ པདུམཏྠོ ཝཱཙྩཏྠོ, ཨུཔཙརིཏམུཁཏྠོ ལཀྑཎིཡཏྠོ. ཝཱཎིསདྡསྶ སདྡྷམྨསངྑཱཏོ ཨཏྠོ ཝཱཙྩཏྠོ, ཨཱརོཔིཏདེཝཏཱཨཏྠོ ལཀྑཎིཡཏྠོ. ཨེཏྠ ཨཱསཱིསནཱ ནཱམ ཡཐཱཝུཏྟནཡེན པུཉྙཱཏིསཡཏཱ, ཏཏོ ཨིདྷ ཨབྷིམཏཏྠབཱདྷཀཱཀུསལནིཝཱརཎཉྩ ཀུསལཱནམནུབལཔྤདཱནཉྩ ཏཏོ ཀཱཡཙིཏྟཔཱིལཱ༹ཝིགམོ ཙ ཏཏོ སུཁཔྤཊིལཱབྷོ ཙ ཏཏོ ཙིཏྟསམཱདྷཱནཉྩ ཏཏོཡེཝ ཨནེཀཝིདྷཏྠཱཝབོདྷོ ཙ ཏཏོ ཨབྷིམཏགནྠཔརིསམཏྟི ཙ བྷཝཏཱིཏྱཡཾ ཝཱཀྱསཱམཏྠིཡཏོ ལདྡྷཏྠོ བྱངྒྱཏྟོ. ཏཾཏཾཨཏྠཔྤཀཱསཀཱ སདྡཱ ཝཱཙཀལཀྑཎིཀབྱཉྫནཀཱ ནཱམ བྷཝནྟི. ཨེཝཾ སདྡསདྡཏྠཝིཙཱརོ ཝེདིཏབྦོ.

ཨིདཱནི ¶ པཀཱསིཏབནྡྷསྶ བྷེདཾ ཝདཏི ‘‘པཛྫཱ’’དིནཱ. ཨཡཾ ཝུཏྟལཀྑཎོ བནྡྷོ པཛྫགཛྫཝིམིསྶཱནཾ བྷེདེན གཱཐཱཙུཎྞིཡཏདུབྷཡམིསྶཱནཾ ཝསེན ཏིདྷཱ བྷཝེ. སདྡོ ཙ ཨཏྠོ ཙེཏི ཙ, སཧབྷཱཝཾ ཨིཏཱ པཏྟཱཏི ཙ, དོསེཧི ཝཛྫིཏཱ, དོསེ ཝཱ ཝཛྫིཏཱ ཡེཧཱིཏི ཙ, པཛྫཉྩ གཛྫཉྩ ཝིམིསྶཉྩེཏི ཙ ཝིགྒཧོ. ཨིཧ པཛྫཾ ནཱམ མུཏྟཀཀུལཀཀོསཀསངྒྷཱཏཝསེན ཙཏུཔྤབྷེདཾ ཚནྡསི ནིདྡིཊྛཝུཏྟཝིསེསཝིརཙིཏཾ ཙཏུཔྤདིཀགཱཐཱབནྡྷཾ. ཏཏྠ མུཏྟཀཾ ནཱམ ནིཊྛིཏཏྠཱ སཔྤདྷཱནཱ ཨེཀཱ གཱཐཱ, ཀུལཀཾ ནཱམ པཙྩེཀམནིཊྛིཏཏྠཱ ཨཉྙམཉྙསཱཔེཀྑཱ ཨེཀཀྲིཡཱདྭཱརིཀཱ ནཱནཱགཱཐཱ, ཀོསཀོ ནཱམ ནཱནཱཝིདྷཝཎྞནཱབྷཱུམིཀཱ བྷིནྣཀྲིཡཱདྭཱརཔྤཝཏྟཱ སཔྤདྷཱནཱ གཱཐཱརཱསི, སངྒྷཱཏོ ནཱམ སཉྩྱཱཀཱལཱདིཨེཀཝཎྞནཱབྷཱུམིནིསྶིཏཱ བྷིནྣཀྲིཡཱསམུདཱཡེན པཝཏྟཱ གཱཐཱ. གཛྫཾ ནཱམ ཨནིཡཏཔདོ ཨཱཁྱཱཡིཀཱཀཐཱཝསེན དྭིཔྤབྷེདོ སྱཱདྱནྟཏྱཱདྱནྟོ ཝཙནཔྤབནྡྷོ. མིསྶོ པན ཨིམེཧི དྭཱིཧི སཾམིསྶོ ནཱཊཀཔཀརཎཱདི ཙ ཛཱཏཀམཱལཱདིཙམྤཱུ ཙ.

༩.

ནིབནྡྷོ ཙཱ’ནིབནྡྷོ ཙ, པུན དྭིདྷཱ ནིརུཔྤཏེ;

ཏཾ ཏུ པཱཔེནྟྱ’ལངྐཱརཱ, ཝིནྡནཱིཡཏརཏྟནཾ.

༩. ཨེཝཾ ཏིཔྤཀཱརཾ བནྡྷསརཱིརཾ ཝཏྭཱ ཨིདཱནི ཨཉྙཐཱཔི དསྶེཏུམཱཧ ‘‘ནིབནྡྷོཙཱ’ནིབནྡྷོ ཙ, པུན དྭིདྷཱ ནིརུཔྤཏེ’’ ཨིཏི. པུན བྷིཡྻོ ཡཐཱཝུཏྟོ པཛྫམཡབནྡྷོ དྭིདྷཱ དྭིཔྤཀཱརེན ནིརུཔྤཏེ ནིཙྪཱིཡཏེ. ཀཐཾ? ནིབནྡྷོ ཙ ཏདེཀདེསབྷཱུཏེཧི མུཏྟཀཱདཱིཧི ཙཏཱུཧི སགྒབནྡྷཱདིཝསེན བནྡྷོ ཙ ཨནིབནྡྷོ ཙ ཀེཝལཾ མུཏྟཀཝསེནཱཏི ཨེཝཾ དྭིདྷཱ ནིརུཔྤཏེ ཨིཏི པཀཏཾ. ནནུ ཏསྶེཏསྶ ཡཐཱཝུཏྟཝཱཏིམཡསྶ སཀྐཊཾ པཱཀཏཾ ཨཔབྦྷཾསོ པེསཱཙིཀཾ མིསྶཉྩེཏི པཉྩཝིདྷཏྟཾ ཝཏྭཱ ‘‘སཀྐཊཾ ནཱམ དེཝཏཱབྷཱསཱ. པཱཀཏཾ ཙཏུབྦིདྷཾ སཀྐཊེཧི ཝཎྞཉྙཏྟམཏྟེན ཨུཔྤནྣཏྟཱ ¶ མཧིནྡསིནྡྷཝཱདི ཏབྦྷཝཾ, ཏསྶམཾ ཧིརིཧརཀམལཱདི, མཧཱརཊྛཱདིདེསཔསིདྡྷཾ དེསཱིཡཾ, ཏབྦྷཝཱདཱིཧི སམྨིསྶཾ མིསྶཾ. ཨཱབྷཱིརཱདཱིནཾ ཝཱཙཱ ཨཔབྦྷཾསོ, སོ ཙ པཱཀཏཾ ཝིཡ ཙཏུབྦིདྷོ, ཏིཝིདྷོ ཙ ནཱགརཨུཔནཱགརཝུདྡྷབྷེདེན. པིསཱཙཱནཾ ཝཙནཾ པེསཱཙིཀཾ. སབྦེསཾ ཝསེན མིསྶ’’ནྟི སཀྐཊཱདཱིནཾ ལཀྑཎཾ ཝུཏྟཾ. ཏཐཱ ‘‘སིངྒཱརཔྤདྷཱནནཙྩསངྑཱཏལཱསྱཱདཱིནཾ པཊིཔཱདཀཏྠེན ལཱསྱཱདིཀམབྷིནཡཔྤདྷཱནཏྟཱ དསྶནཱིཡཾ, ཨིཏརཾ ཀབྦཾ སཝནཱིཡ’’ནྟི དུཝིདྷཾ ཝུཏྟཾ, ཨེཝཾ པུབྦཱཙརིཡེཧི བྷཱསཱབྷེདེན ཝུཏྟཾ པཉྩཝིདྷཏྟཾ, ཝིནིཡོགབྷེདེན ཝུཏྟཾ དུཝིདྷཏྟཉྩ ཨིདྷ ཀསྨཱ ན ཝུཏྟནྟི? སཙྩཾ, ཏཐཱཔི ཏདེཝམིདྷཱནུཔཡོགིཏཱཡ ན ཝུཏྟནྟི ཝེདིཏབྦཾ.

ཨེཝམལངྐཱརཱདྷིཊྛཱནབྷཱཝེན པཋམཾ བནྡྷསརཱིརཾ དསྶེཏྭཱ ཨིདཱནི ཧཱརཀེཡཱུརཱདིནཱ པུརིསསརཱིརམིཝ བནྡྷསརཱིརཾ སདྡཱལངྐཱརཨཏྠཱལངྐཱརེཧི ཝིནྡནཱིཡཏརཾ ཧོཏཱིཏི དསྶེཏུམཱཧ ‘‘ཏཾ ཏུ’’ ཨིཙྩཱདི. ཏུསདྡོ ཝིསེསཝཙནིཙྪཱཡཾ. ཏཾ བནྡྷསརཱིརཾ ཏུ ཨལངྐཱརཱ ཨལངྐརིཡཏི ཏཾ བནྡྷསརཱིརམེཏེཧཱིཏི པསཱདཱདཡོ སདྡཱལངྐཱརཱ, སབྷཱཝཝུཏྱཱདཡོ ཨཏྠཱལངྐཱརཱ ཙ ཝིནྡནཱིཡཏརཏྟནཾ ཨཏིསཡེན ཝིནྡནཱིཡབྷཱཝཾ ཨསྶཱདནཱིཡབྷཱཝཾ པཱཔེནྟི ནཡནྟི. སབྦཐཱ ནིདྡོསབྷཱུཏཱནཾ སདྡཏྠཱནཾ ཨཉྙམཉྙཱནུརཱུཔཏོ སཧིཏབྷཱཝེན པརམཱཡ ཝཎྞཔོཀྑརཏཱཡ སམནྣཱགཏཾ ཏཱདིསཔུརིསསརཱིརམིཝ ཝིནྡནཱིཡམྤི སམཱནཾ ཨལངྐཱརེཧི པསཱདྷིཏེ སཏི ཨཙྩནྟམེཝ ཝིནྡནཱིཡཾ སིཡཱཏི ཨདྷིཔྤཱཡོ.

༩. པུནཔི ཏསྶེཝ བནྡྷསྶ བྷེདཾ ཀཐེཏུཾ ‘‘ནིབནྡྷོ ཙཱ’’དིམཱཧ. པུན ནིབནྡྷོ ཙ མུཏྟཀཱདཱིཧི ཙཏཱུཧི ཨཝིནཱབྷཱཝཏོ མཧཱཀབྦཱདིསབྷཱཝེན ནིརནྟརཾ ཀཏྭཱ བནྡྷོ ཙ ཨནིབནྡྷོ ཙ ཀེཝལཾ མཧཱཀབྦཱདིསབྷཱཝེན མུཏྟཀཏྟཱ ཨནིརནྟརཾ ཀཏྭཱ བནྡྷོ ཙཱཏི སོཝ བནྡྷོ དྭིདྷཱ ནིརུཔྤཏེ ནིཙྪཱིཡཏེ. ¶ པུནཔི སོ བནྡྷོ སཀྐཊཔཱཀཏཨཔབྦྷཾ སཔེསཱཙིཀམིསྶབྷཱསཱབྷེདེན པཉྩཝིདྷོ. སིངྒཱརཔདྷཱནནཙྩསངྑཱཏལཱསྱཱདཱིནཾ དསྶནཔྤདྷཱནཏྟཱ ཏཱདིསཾ ནཙྩཾདསྶནཱིཡཾ, ཏདཉྙཾ ཀབྦཾ སཝནཱིཡམིཏི ཝལ༹ཉྫནབྷེདཏོ དུཝིདྷོ ཙ ཧོཏི. སོ སབྦོཔི པཡོཛནཱབྷཱཝཏོ ཨིཧ ན གཧིཏོ. ཏཏྠ སཀྐཊཾ ནཱམ དེཝཏཱབྷཱསཱ. ཏཏོ ཀེཧིཙི ཨཀྑརེཧི བྷིནྣཾ པཱཀཏཾ ནཱམ. ཏཾ པན ཏབྦྷཝཏསྶམདེསིཡམིསྶཝསེན ཙཏུབྦིདྷཾ ཧོཏི. ཏཏྠ སཀྐཊཏོ ཝཎྞཉྙཏྟམཏྟེན ནིབྦཏྟཾ ཏབྦྷཝཾ ནཱམ, ཏཾ མཧིནྡསིནྡྷཝཱདི. ཏསྶམཾ ཧིརིཧརཀམལཱདི. དེསེ པསིདྡྷཾ དེསིཡཾ. མིསྶཾ ནཱམ ཏབྦྷཝཱདཱིཧི སམྨིསྶཾ. ཨཔབྦྷཾསོ ནཱམ གོཔཱལཀཱདཱིནཾ ཝཱཙཱ, སོ ཙ ཏབྦྷཝཱདཱིཧི ཙཏུབྦིདྷོ, ནཱགརཨུཔནཱགརཝུདྡྷབྷེདེན ཏིཝིདྷོ ཙ ཧོཏི. པིསཱཙཱནཾ ཝཙནཾ པེསཱཙིཀཾ. ཏེཧི སཀྐཊཱདཱིཧི སམྨིསྶཾ མིསྶཾ ནཱམ ཧོཏི. ཨིདཱནི ཨཱིདིསཔྤབྷེདཝནྟབནྡྷསྶ ཨལངྐཱརེན སོབྷནཏྟཾ ཝཏྟུཾ ‘‘ཏཾ ཏུ’’ཙྩཱདིམཱཧ. ཏཾ ཏུ ཏཾ པན ཝུཏྟཔྤཀཱརཾ བནྡྷསརཱིརཾ ཨལངྐཱརཱ པསཱདཱདིསདྡཱལངྐཱརཱ, སབྷཱཝཝུཏྱཱདིཨཏྠཱལངྐཱརཱ ཙ ཝིནྡནཱིཡཏརཏྟནཾ ཨཏིསཡཔསཱདནཱིཡཏྟཾ པཱཔེནྟི. ནིརནྟརཾ བནྡྷོ ནིབནྡྷོཏི ཙ, ན ནིབནྡྷོ ཨནིབནྡྷོཏི ཙ, ཨཏིསཡེན ཝིནྡནཱིཡོ ཝིནྡནཱིཡཏརོ, ཏསྶ བྷཱཝོ ཝིནྡནཱིཡཏརཏྟནནྟི ཙ ཝིགྒཧོ.

༡༠.

ཨནཝཛྫཾ མུཁམྦྷོཛ-མནཝཛྫཱ ཙ བྷཱརཏཱི;

ཨལངྐཏཱཝ སོབྷནྟེ, ཀིཾ ནུ’ཏེ ནིརལངྐཏཱ?

༡༠. ཏམེཝ སམཏྠེཏི ‘‘ཨནཝཛྫ’’ མིཙྩཱདིནཱ. ཨནཝཛྫཾ ཨཉྙམཉྙཱནུརཱུཔཱདྷིཀཏནེཏྟཀཎྞཱདིཨཝཡཝེན པིལ༹ཀཏིལཀཀཱལ༹ཀཱདྱནཱཧཏཱཡ ཙ སུནྡརབྷཱཝཏོ ཨགརཧིཏཾ མུཁམྦྷོཛཾ ཝདནཱརཝིནྡཉྩ ཏཐཱ ཨནཝཛྫཱ པདཱདིདོསཱནབྷིབྷཱུཏཱཡ སུནྡརབྷཱཝེན ཨགརཧིཏཱ བྷཱརཏཱི ཙ ཝཱཎཱི ཨུཔཙཱརཏོ ཏཔྤཊིཔཱདནཱིཡོ ཨཏྠོ ཙཱཏི ཨེཏེ ཨལངྐཏཱཝ ¶ མུཁཾ ཏིལཀཏཱཌངྐཱདིནཱལངྐཱརེན, སདྡཏྠཱ སདྡཱལངྐཱརཨཏྠཱལངྐཱརེཧི པསཱདྷིཏཱ སཛྫིཏཱ ཨེཝ, ནིརལངྐཏཱ ཏཐཱ ཨཔསཱདྷིཏཱ ཨསཛྫིཏཱ སོབྷནྟེ ཀིཾ ནུ, ན སོབྷནྟེཝཱཏི ཝིཏཀྐེམཱིཏི ཨཏྠོ. ནུཨིཏི ཝིཏཀྐེ.

༡༠. ཏམེཝ ‘‘ཨནཝཛྫ’’ མིཙྩཱདིནཱ སམཏྠེཏི. ཝཎྞསཎྛཱནཱདིཨཝཡཝསམྤཏྟིཡཱ ཙ པིལ༹ཀཏིལཀཀཱལ༹ཀཱདིདོསརཧིཏཏྟཱ ཙ ཨནིནྡིཏཾ མུཁམྦྷོཛཉྩ ཨནཝཛྫཱ པདདོསཝཱཀྱདོསཨཏྠདོསེཧི ཨམིསྶཏྟཱ ཨགརཧིཏཱ བྷཱརཏཱི ཝཱཎཱི ཙ ཨབྷེདོཔཙཱརེན ཏཔྤཊིཔཱདནཱིཡཏྠོ ཙཱཏི ཨིམེ ཨལངྐཏཱཝ ཀུཎྜལཏིལཀཱདིཨཱབྷརཎེཧི ཙ སདྡཱལངྐཱརཨཏྠཱལངྐཱརེཧི ཙ སཛྫིཏཱ ཨེཝ, ནིརལངྐཏཱ ཏེཧི ཨཝིབྷཱུསིཏཱ སོབྷནྟེ ཀིཾ ནུ, ན སོབྷནྟེཏི མཉྙེ. ནཏྠི ཨཝཛྫམསྶཱཏི ཙ, མུཁམེཝ ཨམྦྷོཛམིཏི ཙ ཝིགྒཧོ. ཀིམིཏི པཊིསེདྷེ, ནུཨིཏི ཝིཏཀྐེཏི.

༡༡.

ཝིནཱ གུརཱུཔདེསཾ ཏཾ, བཱལོ’ལངྐཏྟུམིཙྪཏི;

སམྤཱཔུཎེ ན ཝིཉྙཱུཧི, ཧསྶབྷཱཝཾ ཀཐཾ ནུ སོ?

༡༡. ཨལངྐརཎཉྩ ཏེསཾ ཝིནཱ གུརཱུཔདེསེན ཀརོནྟོ ཝིནཱ པཧཱསཾ ནཱཔརཾ ཝིསེསམདྷིགཙྪཏཱིཏི དསྶེཏུཾ སིལེསཱལངྐཱརམཱཧ ‘‘ཝིནཱ’’ཏིཨཱདི. གུརཱུནཾ པསཱདྷནོཔཱཡོཔདེསཀཱནཾ, ཨལངྐཱརཀཱརཎོཔཱཡོཔདེསཀཱནཾ ཝཱ ཨུཔདེསཾ ‘‘ཨེཏྠ ཨེཝཾ ཀཏེ སོབྷེཡྻཱ’’ཏི ཨུཔདིསནཾ ཝིནཱ པརིཙྩཛྫ མུཁསྶ, བནྡྷསྶ ཙ ཨལངྐརཎཱནབྷིཉྙཏཱཡ བཱལོ ཨཉྙཱཎཀོ ཡོ ཀོཙི པུགྒལོ ཏཾ མུཁཾ, བནྡྷཾ ཝཱ ཨལངྐཏྟུཾ ཨནུརཱུཔཝསེན སཛྫེཏུཾ ཨིཙྪཏི ཨདྷིཔྤེཏི, སོ ཏཱདིསོ ཨཉྙཱཎཔུགྒལོ ཝིཉྙཱུཧི ཏབྦིདཱུཧི པཎྜིཏཛནེཧི ཧསྶབྷཱཝཾ ཨཝཧཱསཾ ཀཐཾ ཀེན ¶ པཀཱརེན ན སམྤཱཔུཎེཡྻ. ‘‘ཀིམིདཾ ཨཉྙཱཎཔུརིསེན ཀརིཡཏཱི’’ཏི ཧསནྟེཝཱཏི ཨདྷིཔྤཱཡོ. ནུཨིཏི ཝིཏཀྐེ.

༡༡. ཨིདཱནི པདཱདིདོསརཧིཏབནྡྷསརཱིརསྶ ཨལངྐཱརེཧི བྷཱུསནམཔི གུརཱུཔདེསསཧིཏམེཝ སེཊྛནྟི དསྶེཏུཾ ‘‘ཝིནཱ གུརཱུཔདེས’’ མིཙྩཱདིསིལེསཱལངྐཱརམཱཧ. བཱལོ མུཁཱདིསརཱིརཱལངྐཱརེ, བནྡྷཱལངྐཱརེ ཝཱ ཨསམཏྠོ ཡོ ཀོཙི གུརཱུཔདེསཾ ཝིནཱ སརཱིརཱལངྐཱརཀརཎསྶ, བནྡྷཱལངྐཱརཀརཎསྶ ཝཱ ཨནུརཱུཔོཔདེསམནྟརེན ཏཾ སརཱིརཾ, བནྡྷཾ ཝཱ ཨལངྐཏྟུཾ ཏིལཀཏཱཌངྐཱདཱིཧི, སདྡཱལངྐཱརཨཏྠཱལངྐཱརེཧི ཝཱ སཛྫེཏུཾ ཨིཙྪཏི ཙེ, སོ ཝིཉྙཱུཧི ཏདུབྷཡཉྙཱུཧི ཧསྶབྷཱཝཾ ཨཝཧསིཏབྦཏཾ ཀཐཾ ན སམྤཱཔུཎེ, པཱཔུཎཱཏྱེཝ, ཏསྨཱ གུརཱུཧི སཱདརཏོ ཨུགྒཎྷིཏྭཱ ཀཏྟབྦནྟི བྷཱཝོ.

༡༢.

གནྠོཔི ཀཝིཝཱཙཱན-མལངྐཱརཔྤཀཱསཀོ;

ཡཱཏི ཏབྦཙནཱིཡཏྟཾ, ཏབྦོཧཱརཱུཔཙཱརཏོ.

༡༢. ནནུ སདྡགམྨཱ, ཨཏྠགམྨཱ ཙ ཨལངྐཱརཱཏི གནྠོ ཀཐནྟི ཨཱཧ ‘‘གནྠོཔཱི’’ཏིཨཱདི. ཀཝིཝཱཙཱནཾ ཀཝིཔྤཡོགཱནཾ སམུདཱཡརཱུཔཱནཾ, པཊིཔཱདནཱིཡཏཱཡ ཏབྦཙནཱིཡཱནཉྩ ཨཏྠཱནཾ ཨལངྐཱརཔྤཀཱསཀོ ཨལངྐཱརཱནཾ ཡཐཱཝུཏྟཱནཾ ཝིབྷཱཝིཏོ གནྠོཔི ཀིརིཡཱཀཔྤསངྑཱཏཾ སཏྠམྤི ཏབྦཙནཱིཡཏྟཾ ཏེན ཨལངྐཱརསདྡེན ཝཱཙྩཏཾ ཡཱཏི ཨུཔགཙྪཏི. ཀིནྟི ཨཱཧ ‘‘ཏབྦོཧཱརཱུཔཙཱརཏོ’’ཏི. ཏསྶ ཀཏཝོཧཱརསྶ ཨལངྐཱརསདྡསྶ, ཏསྨིཾ ཝཱ མཎྜནཝིསེསེ པཝཏྟསྶ ཨལངྐཱརཝོཧཱརསྶ ཨུཔཙརཎཾ སོཡམིཏྱབྷེདེན པརིཀཔྤནཾ ཨུཔཙཱརོ. ཀསྨཱ? པཊིཔཱདནཱིཡཔཊིཔཱདཀཱནཾ ཨབྷེདཝསེན ཀཱརཎེ ཀཱརཱིཡསྶ ཨུཔཙརིཡཏོཏི ཨདྷིཔྤཱཡོ.

༡༢. ཨིདཱནི ¶ སདྡཱལངྐཱརཨཏྠཱལངྐཱརགནྠོ ཀཐམལངྐཱརོཏི ཨཱཧ ‘‘གནྠོ’’ཙྩཱདི. ཀཝིཝཱཙཱནཾ ཀཝཱིཧི ཝུཏྟཝཱཀྱསངྑཱཏཱནཾ, ཨུཔཙཱརཏོ ཏཔྤཊིཔཱདནཱིཡཨཏྠསངྑཱཏཱནཉྩ ཀཝིཔྤཡོགཱནཾ ཨལངྐཱརཔྤཀཱསཀོ སདྡཏྠཱལངྐཱརཔྤཀཱསཀོ གནྠོཨཔི ཀིརིཡཱཀཔྤསངྑཱཏཾ སཏྠམྤི ཏབྦོཧཱརཱུཔཙཱརཏོ ཏསྶ ཨལངྐཱརོཏི ཀཏཝོཧཱརསྶ ཨལངྐཱརསདྡསྶ ཀཱརཎེ ཀཱརཱིཡཱུཔཙཱརེན ཏབྦཙནཱིཡཏྟཾ ཏེན ཨལངྐཱརསདྡེན ཝཏྟབྦཏཾ ཡཱཏི. ཨཔིསདྡོ ཨལངྐཱརམཔེཀྑཏི. ཨལངྐཱརེ པཀཱསེཏི, ཨལངྐཱརཱནཾ ཝཱ པཀཱསཀོཏི ཙ, ཏེན ཝཙནཱིཡོ, ཏསྶ བྷཱཝོཏི ཙ ཝིགྒཧོ. ཨེཏྠ བྷཱཝོཏི ཝཱཙྩཝཱཙཀསམྦནྡྷོ. ཏསྶ སདྡཱདིཨལངྐཱརསྶ ཝོཧཱརོཏི ཙ, ཏབྦོཧཱརསྶ ཨལངྐཱརསདྡསྶ ཨུཔཙཱརོཏི ཙ ཝཱཀྱནྟི.

༡༣.

དྭིཔྤཀཱརཱ ཨལངྐཱརཱ, ཏཏྠ སདྡཏྠབྷེདཏོ;

སདྡཏྠཱ བནྡྷནཱམཱཝ, ཏཾསཛྫིཏཏདཱཝལི.

༡༣. ཨིདཱནི ཡཐཱཝུཏྟཨལངྐཱརཱནཾ པབྷེདཾ, ཏཔྤསངྐཉྩ ཏཾབནྡྷསརཱིརཉྩ ཧེཊྛཱ ཝུཏྟམྤི ཨེཀཏོ སམྦནྡྷེཏྭཱ དསྶེཏུཾ ‘‘དྭིཔྤཀཱརཱ’’དི ཨཱརདྡྷཾ. ཏཏྠ ཏསྨིཾ ཀིརིཡཱཀཔྤསངྑཱཏེ གནྠེ, ཏསྨིཾ ཝཱ བནྡྷཱལངྐཱརཱདྷིཀཱརེ ཨལངྐཱརཱ ཡཐཱཝུཏྟཱ དྭིཔྤཀཱརཱ ཧོནྟི. ཀཐཾ? སདྡབྷེདཏོ, ཨཏྠབྷེདཏོ ཙ, སདྡཱལངྐཱརཱ ཨཏྠཱལངྐཱརཱཏི ཨལངྐཱརཱ དྭིཔྤཀཱརཱ ཧོནྟཱིཏི ཨཏྠོ. ཡེསཾ བྷེདེན ཏེ དྭིཔྤཀཱརཱ, ཏེ སདྡཱ, ཨཏྠཱ ཙ. ‘‘བནྡྷོ’’ ཨིཏི ཝུཏྟཾ ནཱམཾ ཡསྶཱ ཨཱཝལིཡཱ སཱ བནྡྷནཱམཱ ཨེཝ. ཏཾསཛྫིཏཏདཱཝལི ཏེཧི ཨལངྐཱརེཧི སཛྫིཏཱ པཀཱསིཏཱ ཏཾསཛྫིཏཱ, ཏེསཾ སདྡཏྠཱནཾ ཨཱཝལི སམུདཱཡཱ, མཧཱཝཱཀྱཾ, ཨནྟརཝཱཀྱཾ ཝཱ. པརིཔུཎྞོ བནྡྷོ མཧཱཝཱཀྱཾ, མུཏྟཀཱདཡོཝཡཝཱ ཨནྟརཝཱཀྱཱནི, ཏཾསཛྫིཏཏདཱཝལིཀཾ པསིདྡྷབྷཱཝེན ཨནུཝདིཏྭཱ ཨཔྤསིདྡྷཱ སདྡཏྠཱ ཝིདྷཱིཡནྟེ.

༡༣. ཨིདཱནི ¶ ཡཐཱཝུཏྟཨལངྐཱརཱནཾ ཨཝུཏྟབྷེདཉྩ ཏདཱདྷཱརཱདྷིཀཏཾ ཡཐཱཝུཏྟབནྡྷསརཱིརཉྩ ཨེཀཏོ དསྶེཏུཾ ‘‘དྭིཔྤཀཱརེ’’ཙྩཱདིམཱཧ. ཏཏྠ ཏསྨིཾ ཀིརིཡཱཀཔྤསངྑཱཏེ ཨལངྐཱརགནྠེ, ནོ ཙེ, ཨལངྐཱརཱདྷིཀཱརེ ཝཱ ཨལངྐཱརཱ ཝཀྑམཱནཱལངྐཱརཱ སདྡཏྠབྷེདཏོ སདྡཱལངྐཱརཨཏྠཱལངྐཱརབྷེདེན དྭིཔྤཀཱརཱ ཧོནྟི, ཡེསཾ བྷེདེན ཨལངྐཱརཱ བྷིནྣཱ, ཏེ སདྡཏྠཱ བནྡྷནཱམཱཝ. ཏཾསཛྫིཏཏདཱཝལི ཏེཧི སདྡཏྠཱལངྐཱརེཧི ཨལངྐཏཱ, ཏེསཾ སདྡཏྠཱནཾ མཧཱཀབྦཱདིསམུདཱཡརཱུཔཱ པཊིཔཱཊིབནྡྷོཏི ཝུཏྟཾ ཧོཏི. ‘‘བནྡྷོ’’ ཨིཏི ནཱམཾ ཡསྶེཏི ཙ, ཏེཧི སདྡཏྠཱལངྐཱརེཧི སཛྫིཏཱཏི ཙ, ཏེསཾ སདྡཏྠཱནཾ ཨཱཝལཱིཏི ཙ སམཱསོ.

༡༤.

གུཎཱལངྐཱརསཾཡུཏྟཱ, ཨཔི དོསལཝངྐིཏཱ;

པསཾསིཡཱ ན ཝིཉྙཱུཧི, སཱ ཀཉྙཱ ཝིཡ ཏཱདིསཱི.

༡༤. ཨེཝཾ གུཎེན ཨལངྐཱརེན སཛྫིཏཱཔི སཱ སདྡཏྠཱཝལི ཨཔྤཀེནཔི དོསེན སཾཡུཏྟཱ སཏཱི ཨསམྥུསིཏབྦཱཝ ཝིཉྙཱུཧི སིཡཱཏི དསྶེཏུམཱཧ ‘‘གུཎ’’ ཨིཙྩཱདི. སདྡཱལངྐཱརཱཁྱེན གུཎེན, ཨཏྠཱལངྐཱརེན ཙ སཾཡུཏྟཱཔི ཝིསེསེན སཛྫིཏཱཔི སདྡཏྠཱཝལི དོསལཝེན དོསལེསེནཱཔི ཨངྐིཏཱ ཨབྷིལཉྪིཏཱ སཏཱི ཝིཉྙཱུཧི གུཎདོསཝིབྷཱགཝིདཱུཧི པཎྜིཏཔུརིསེཧི ན པསཾསིཡཱ ནེཝ པསཾསིཏབྦཱ. ཀཱཝིཡཱཏི ཨཱཧ ‘‘ཀཉྙཱ ཝིཡཏཱདིསཱི’’ཏི. ཡཐཱ ཧི ཀཉྙཱ དསཝསྶིཀཱ སནྣདྡྷཡོབྦནཱབྷིམུཁབྷཱཝེན ཛནནཡནམནོཝིལུབྦྷིནཱིགུཎེན, ཨཱབྷརཎཝིསེསེན ཙཱལངྐཏཱ ཀེནཙི ཀུཊྛདོསལེསེན ཨངྐིཏཱ ཝིཉྙཱུནཾ ཨསམྥུསནཱིཡཱ སིཡཱ, པགེཝཱཔརཱ, ཨེཝམེཝ སདྡཏྠཱཝལིཔི ཨཔྤཀེནཔི སདྡརཱུཔེན, ཨཏྠལཀྑཎེན ཙ དོསེན ཀུཊྛཀཔྤེན ཝཛྫནཱིཡཱ ཨེཝ ཝིཉྙཱུནཾ, པགེཝ བཧུནཱཏི ཝུཏྟཾ ཧོཏི.

༡༤. ཨེཝཾ ¶ སདྡཏྠཱནཾ གུཎཱིབྷཱུཏེཧི ཨལངྐཱརེཧི སཛྫིཏཱ སདྡཏྠཱཝལི ཀེནཙི པདཱདིདོསེན ཨབྷིལཀྑིཏཱ ཙེ, ཨཔྤསཏྠཱཏི དསྶེནྟོ ‘‘གུཎཱལངྐཱརི’’ཙྩཱདིམཱཧ. གུཎཱལངྐཱརསཾཡུཏྟཱ ཨཔི སདྡཱལངྐཱརསངྑཱཏགུཎེན, ཨཏྠཱལངྐཱརེན ཙ ཝིསེསེན ཡུཏྟཱཔི སཱ སདྡཏྠཱཝལི དོསལཝངྐིཏཱ པདདོསཱདིནཱ ཨཎུམཏྟེནཔི དོསེན ཨངྐིཏཱ ཡུཏྟཱ སཧིཏཱ ཏཱདིསཱི གུཎཱལངྐཱརསཾཡུཏྟཱཔི དོསལཝངྐིཏཱ ཀཉྙཱ ཝིཡ དསཝསྶིཀཱ ཡོབྦནཔྤཏྟཱ ཝནིཏཱཝ ཝིཉྙཱུཧི གུཎདོསཔརིཀྑཀེཧི ན པསཾསིཡཱ ན པསཾསིཏབྦཱ. ཡཐཱ ཧི དསཝསྶིཀཱ ཨིཏྠཱི པིཡསབྷཱཝསཎྛིཏཱ མནུཉྙེཧི གུཎེཧི, སོབྷནཱནུརཱུཔགཱིཝེཡྻཱདིཨཱབྷརཎཝིསེསེཧི ཡུཏྟཱཔི དིསྶམཱནེན ཀེནཙི སེཏཀུཊྛལཝེན ཡུཏྟཱ སམཱནཱ གུཎདོསཔརིཀྑཀེཧི དསྶནཱིཡཱ ན ཧོཏི, ཨེཝཾ ཝུཏྟཔྤཀཱརཱཔི བནྡྷཔདྡྷཏི ཀུཊྛཏུལྱེན ཀེནཙི པདཱདིདོསེན ཡུཏྟཱ ཝིཉྙཱུཧི ཨསྶཱདནཱིཡཱཏི ཨདྷིཔྤཱཡོ. དོསཱནཾ ལཝོ, ཏེན ཨངྐིཏཱཏི ཙ, སཱ ཝིཡ དིསྶཏཱིཏི ཏཱདཱིསཱིཏི ཙ ཝིགྒཧོ.

༡༥.

ཏེན དོསནིརཱསོཝ, མཧུསྶཱཧེན སཱདྷིཡོ;

ནིདྡོསཱ སབྦཐཱ སཱ’ཡཾ, སགུཎཱ ན བྷཝེཡྻ ཀིཾ.

༡༥. ཡཏོ ཨེཝཾ, ཏེན ཏསྨཱ ཀཱརཎཱ མཧུསྶཱཧེན མཧཏཱ ཝཱཡཱམེན དོསཱནཾ པདདོསཱདཱིནམནཏྠནིམིཏྟཱནཾ ནིརཱསོཝ སཏྠདིཊྛིཡཱ སཏྠཔྤབྷཱཝཏོ པརིཙྩཱགོཡེཝ སཱདྷིཡོ སཱདྷེཏབྦོ, ‘‘ཝིཉྙཱུཧཱི’’ཏི སེསོ. ཨེཝཾ དོསནིརཱསེ ཀོ གུཎོ ཨུཔལབྦྷཏཱིཏི ཙེ. སབྦཐཱ སབྦཔྤཀཱརེན ནིདྡོསཱ དོསེཧི ནིགྒཏཱ སཱཡཾ སདྡཏྠཱཝལི སགུཎཱ སདྡཱལངྐཱརསངྑཱཏེཧི གུཎེཧི སཧིཏཱ ན བྷཝེཡྻ ཀིཾ, བྷཝཏྱེཝ, གུཎརཧིཏཾ ཏཾཨལངྐཏམནུཔཱདེཡྻཾ སིཡཱཏི ཨདྷིཔྤཱཡོ.

༡༥. ཏེན ¶ ཡཏོ དོསཡུཏྟཱ ཝིཉྙཱུཧི ཨནུཔཱདེཡྻཱ, ཏསྨཱ མཧུསྶཱཧེན ཨདྷིཀཝཱཡཱམེན དོསནིརཱསོཝ པདདོསཱདཱིནཾ ནིརཱཀརཎམེཝ སཱདྷིཡོ ཨནེཀསཏྠཝིསཡཱཡ པཉྙཱཡ ཝིཉྙཱུཧི སཱདྷེཏབྦོ, ཨེཝཾ སཏི སབྦཐཱ སབྦཱཀཱརེན ནིདྡོསཱ དོསརཧིཏཱ སཱ ཨཡཾ སདྡཏྠཱཝལི སགུཎཱ སདྡཱལངྐཱརསངྑཱཏེཧི གུཎེཧི ཡུཏྟཱ ན བྷཝེཡྻ ཀིཾ, གུཎཡུཏྟཱ བྷཝེཡྻཱཏི ཨདྷིཔྤཱཡོ. དོསཱནཾ ནིརཱསོཏི ཙ, ནཏྠི དོསཱ ཨེཏིསྶཱ, ནིགྒཏཱ དོསེཧི ཝཱཏི ཙ, སཧ གུཎེཧི ཝཏྟམཱནཱཏི ཙ ཝིགྒཧོ.

༡༦.

སཱ’ལངྐཱརཝིཡུཏྟཱཔི, གུཎཡུཏྟཱ མནོཧརཱ;

ནིདྡོསཱ དོསརཧིཏཱ, གུཎཡུཏྟཱ ཝདྷཱུ ཝིཡ.

༡༦. ཀིཾཀཱརཎམེཝཾབྷཱུཏོ དོསཔརིཙྩཱགེན གུཎཱདཱནེན བནྡྷོཏི ཨཱཧ ‘‘སཱ’ལངྐཱརེ’’ཙྩཱདི. སཱ སདྡཏྠཱཝལི ཨལངྐཱརེཧི ཝིཡུཏྟཱཔི སཏཱི ནིདྡོསཱ སབྦཔྤཀཱརེན དོསེཧི ནིགྒཏཱ གུཎེཧི སདྡཱལངྐཱརསངྑཱཏེཧི སཾཡུཏྟཱ ཛནཱནམཱནནྡསནྡོཧཱབྷིསནྡནེཀཧེཏུཏཱཡ མནོ ཧརཏི ཨཏྟནོ སནྟིཀམཱཀཌྜྷཏཱིཏི མནོཧརཱ ཧོཏཱིཏི. ཏཏྠོདཱཧརཎམཱཧ ‘‘དོསརཧིཏཱ གུཎཡུཏྟཱ ཝདྷཱུ ཝིཡཱ’’ཏི. ཡཐཱ ཡེན ཀེནཙིཔི དོསེན ཝིརཧིཏཱ ཝདྷཱུ མནཱཔཙཱརིཏཱདཱིཧི གུཎཝིསེསེཧི སཾཡུཏྟཱ སཏཱི ཀེནཙི ཨཱབྷརཎེན ཨམཎྜིཏཱ ཨཔསཱདྷིཏཱཔི ཀིནྣཱམ མདྷུརཱ ཀཝཱིནཾ པསཱདྷནཾ ཀིནྣཱམ མནོཧརཱ ཧོཏི, ཨེཝམཡཾ སདྡཏྠཱཝལིཔི མནོཧརཱ ཧོཏཱིཏི ཨཏྠོ.

༡༦. ཨིདཱནི དོསཔརིཙྩཱགེན གུཎཱདཱནེ པཡོཛནཾ དསྶེཏི ‘‘སཱ’ལངྐཱརཝིཡུཏྟེ’’ཙྩཱདིནཱ. སཱ སདྡཏྠཱཝལི ཨལངྐཱརེཧི ཝིཡུཏྟཱ སཏཱིཔི ནིདྡོསཱ སབྦཔྤཀཱརེན དོསརཧིཏཱ གུཎཡུཏྟཱ ཏཏོཡེཝ གུཎཱིབྷཱུཏཱ སདྡཱལངྐཱརེན ཡུཏྟཱ དོསརཧིཏཱ དུབྦཎྞདུསྶཎྛཱནཱདིདོསེཧི ¶ པརིཙྩཏྟཱ གུཎཡུཏྟཱ ཧདཡངྒམགུཎཡུཏྟཱ ཝདྷཱུ ཝིཡ ཨངྒནཱ ཝིཡ མནོཧརཱ སཱདྷུཛནེ ཨཱརཱདྷེཏི.

༡༧.

པདེ ཝཱཀྱེ ཏདཏྠེ ཙ, དོསཱ ཡེ ཝིཝིདྷཱ མཏཱ;

སོདཱཧརཎམེཏེསཾ, ལཀྑཎཾ ཀཐཡཱམྱ’ཧཾ.

༡༧. ཡཏོ ཨེཝཾ གུཎཱལངྐཱརསཾཡུཏྟཱཡཔི དོསལཝངྐིཏཱཡ ཝིཉྙཱུནམནཱདརཎཱིཡཏཱ, ཨལངྐཱརཝིཡུཏྟཱཔི དོསཱབྷཱཝེན གུཎཡུཏྟཱཡ མནོཧརཏཱ, ཨེཝམནཏྠཱཝཧསྶཱཔི དོསསྶ པརིཧརིཏབྦཏཱ སཏྠདིཊྛིཡཱ, ཏསྨཱ ཏེ དོསེ དསྶེཏུཾ པཊིཛཱནཱཏི ‘‘པདེ’’ཏིཨཱདིནཱ. ཏེསཾ པདཱནཾ ཝཱཀྱཱནཾ ཨཏྠོ ཏདཏྠོ, ཏསྨིཾ. ཨུདཱཧརཱིཡཏི ལཀྑྱབྷཱཝེནཱཏི ཨུདཱཧརཎཾ, སཧ ཨུདཱཧརཎེཧཱིཏི སོདཱཧརཎཾ. ལཀྑིཡཏི ལཀྑིཡམནེནཱཏི ལཀྑཎཾ.

༡༧. ཨེཝཾ ཨལངྐཱརཡུཏྟཱཔི ཨཔྤཀེན དོསེན ཡུཏྟབནྡྷསྶ ཨནུཔཱདེཡྻཏྟཱ, ཨལངྐཱརཨལངྐརཎེ ཨསཏིཔི དོསརཧིཏེ ཝིཉྙཱུཧི ཨུཔཱདེཡྻཏྟཱ ཙ མུཁྱསྶ དོསཔརིཧཱརསྶ ཨཝསྶཾ ཀཏྟབྦཏྟཱ ཨིདཱནི ཨདྷིགཏདོསེ དསྶེཏུཾ པཊིཛཱནཱཏི ‘‘པདེ ཝཱཀྱེ’’ཙྩཱདིནཱ. པདེ ནཱམཱདིཙཏུབྦིདྷཔདེ ཙ, ཝཱཀྱེ ‘‘སྱཱདྱནྟཏྱཱདྱནྟཱནཾ ཙཡོ ཝཱཀྱཾ སཀཱརཀཀིརིཡཱ’’ཏི ཝུཏྟལཀྑཎེ ཝཱཀྱེ ཙ, ཏདཏྠེ ཙ ཏེསཾ པདཝཱཀྱཱནཾ ཨཏྠེ ཙ ཝིཝིདྷཱ ཨནེཀཔྤཀཱརཱ ཡེ དོསཱ ཝིཉྙཱུཧི དོསབྷཱཝེན མཏཱ ཉེཡྻཱ, ཨེཏེསཾ པདཱདིདོསཱནཾ སོདཱཧརཎཾ ཨུདཱཧརཎསཧིཏཾ ལཀྑཎཾ ཨཧཾ ཀཐཡཱམི. ཨེཏྠ ཙ–

‘‘པདཾ ཙཏུབྦིདྷཾ ཝུཏྟཾ, ནཱམཱཁྱཱཏོཔསགྒིཀཾ;

ནིཔཱཏཀཉྩ ཏཉྙཱུཧི, ཨསྶོ ཁལྭཱབྷིདྷཱཝཏཱི’’ཏི [རཱུཔབྷིདྡྷིཊཱིཀཱཡཾ ནཱམཀཎྜེ].

ཝུཏྟནིཡཱམེན པདཾ ཏཱཝ དཊྛབྦཾ. ཨུདཱཧརཱིཡནྟི ལཀྑིཡབྷཱཝེནཱཏི ཨུདཱཧརཎཱནཱིཏི ཙ, སཧ ཨུདཱཧརཎེནཱཏི སོདཱཧརཎནྟི ¶ ཙ, ལཀྑཱིཡཏི ལཀྑིཡམནེནཱཏི ཙ ཝིགྒཧོ.

པདདོསཨུདྡེས

༡༨.

ཝིརུདྡྷཏྠནྟརཱཛྷཏྠ-ཀིལིཊྛཱནི ཝིརོདྷི ཙ;

ནེཡྻཾ ཝིསེསནཱཔེཀྑཾ, ཧཱིནཏྠཀམནཏྠཀཾ.

ཝཱཀྱདོསཨུདྡེས

༡༩.

དོསཱ པདཱན, ཝཱཀྱཱན-མེཀཏྠཾ བྷགྒརཱིཏིཀཾ;

ཏཐཱ བྱཱཀིཎྞགཱམྨཱནི, ཡཏིཧཱིནཾ ཀམཙྩུཏཾ;

ཨཏིཝུཏྟམཔེཏཏྠཾ, སབནྡྷཕརུསཾ ཏཐཱ

ཝཱཀྱཏྠདོསཨུདྡེས

༢༠.

ཨཔཀྐམོ’ཙིཏྱཧཱིནཾ, བྷགྒརཱིཏི སསཾསཡཾ;

གཱམྨཾ དུཊྛཱལངྐཏཱིཏི, དོསཱ ཝཱཀྱཏྠནིསྶིཏཱ.

པདདོསཱདིཨུདྡེསཝཎྞནཱ

༡༨-༡༩-༢༠. ཨིདཱནི ཡཐཱཔཊིཉྙཱཏེ དོསེ ཨུདྡིསཏི ‘‘ཝིརུདྡྷཏྠནྟར’’ ཨིཙྩཱདིནཱ. ཝིརུདྡྷཾ ཨཏྠནྟརཾ ཡསྶ ཏཾ ཝིརུདྡྷཏྠནྟརཾ. ཀིཾ ཏཾ? པདཾ. ཨེཝམུཔརིཔི ཡཐཱཡོགཾ. ཨདྷིཀོ ཨཏྠོ ཝིསེསྱསྶ ཡེན ཏཾ ཨདྷྱཏྠཾ. ནཱིཡཏི ཨཝུཏྟོ ཧེཏུ ཨེཏྠ ཨཱནཱིཡཏཱིཏི ནེཡྻཾ. དོསཱ པདཱནནྟི ཡེཧི དོསེཧི པདཱནི དུཊྛཱནི, ཏེ ཝིརུདྡྷཏྠནྟརཏཱདཡོ པདཱནཾ དོསཱཏི ཨཏྠོ. ཨེཝམུཔརིཔི ཡཐཱཡོགཾ. ཝཱཀྱཱནཾ དོསཱཏི སམྦནྡྷོ. བྷགྒཱ རཱིཏི ཀམོ ཡསྨིཾ ཏཾ བྷགྒརཱིཏིཀཾ, ཝཱཀྱཾ. ཨཔཀྐམཏཱདཡོ ཝཱཀྱཏྠདོསཱ, ཝཱཀྱཏྠཱནཾ དོསཏོ. ཝཱཀྱཾ དུཊྛཾ སིཡཱཏི ཝཱཀྱམེཝ ཝིསེསྱཏེ. ཏེན སབྦཏྠ ནཔུཾསཀལིངྒེན ནིདྡེསོ.

༡༨-༡༩-༢༠. ཨིདཱནི ཀཐེཏབྦབྷཱཝེན པཊིཉྙཱཏེ དོསེ ཨུདྡིསནྟོ ‘‘ཝིརུདྡྷ…པེ… ནིསྶིཏཱ’’ཏི ཨཱཧ. ཀཝཱིཧི ཨིཙྪིཏཏྠཏོ ¶ ཝིརུདྡྷོ ཨཉྙཏྠོ ཡསྶ པདསྶཱཏི ཏཾ ཝིརུདྡྷཏྠནྟརཾ ནཱམ. ཝིསེསྱསྶ ཨདྷིཀཏྠབྷཱཝཀརཎཏོ ཨཛྷཏྠཾ ནཱམ. ཀཝཱིཧི ཨིཙྪིཏཏྠསྶཱཝཱིཀརཎེ ཨཝིསདཏྟཱ ཀིལིཊྛཾ ནཱམ. དེསཀཱལཀལཱདཱིནཾ ཝིརུདྡྷཏྟཱ ཝིརོདྷི ནཱམ. ཨཉྙམཱཧརིཏྭཱ ཝཏྟབྦཏོ ནེཡྻཾ ནཱམ. ཝིསེསནཾ པཏྭཱཝ སཱཏྠཀབྷཱཝཔྤཏྟིཏོ ཝིསེསནཱཔེཀྑཾ ནཱམ. ཝིསེསྱསྶ ཧཱིནཏཱཔཱདནཏོ ཧཱིནཏྠཀཾ ནཱམ. ཨཏྠརཧིཏཏྟཱ ཨནཏྠཀཾ ནཱམཱཏི ཨིམེ ཨཊྛ པདནིསྶིཏཏྟཱ པདདོསཱ ནཱམ.

ཝུཏྟཏྠསྶེཝ པུན ཝཙནཏོ ཨེཀཏྠཾ ནཱམ. བྷིནྣཀྐམཏྟཱ བྷགྒརཱིཏིཀཾ ནཱམ. ཏཐཱ སམྨོཧཀཱརཎཏྟཱ བྱཱཀིཎྞཾ ནཱམ. ཝིསིཊྛཝཙནཝིརཧཏོ གཱམྨཾ ནཱམ. ཡཏིསམྤཏྟིཝིརཧཏོ ཡཏིཧཱིནཾ ནཱམ. པདཏྠཀྐམཏོ ཙུཏཏྟཱ ཀམཙྩུཏཾ ནཱམ. ལོཀིཡཾ ཝོཧཱརམཏིཀྐམྨ ཝུཏྟཏྟཱ ཨཏིཝུཏྟཾ ནཱམ. སམུདཱཡཏྠཏོ ཨཔགཏཏྟཱ ཨཔེཏཏྠཾ ནཱམ. བནྡྷཕརུསཡུཏྟཏྟཱ བནྡྷཕརུསཾ ནཱམ, ཏེན སཧིཏཾ སབནྡྷཕརུསནྟི ཨིམེ ནཝ ཝཱཀྱཱནཾ ཏཐཱ དོསཱ ནཱམ. ཨེཏྠ ཏཐཱསདྡོ ‘‘དོསཱ’’ཏི པདཾ ཨུཔསཾཧརཏི.

ཨཔགཏཀྐམཏྟཱ ཨཔཀྐམཾ ནཱམ. ཨུཙིཏབྷཱཝསྶ པརིཧཱིནཏྟཱ ཨོཙིཏྱཧཱིནཾ ནཱམ. བྷིནྣཝིབྷཏྟིཀྐམཏྟཱ བྷགྒརཱིཏི ནཱམ. སཾསཡཛནནཏོ སསཾསཡཾ ནཱམ. དུཔྤཏཱིཏིཀརཏྟཱ གཱམྨཾ ནཱམ. དཱུསིཏཱལངྐཱརཏྟཱ དུཊྛཱལངྐཏི ནཱམཱཏིམེ ཚ ཝཱཀྱཏྠནིསྶིཏཏྟཱ ཝཱཀྱཏྠདོསཱ ནཱམ.

ཨཉྙོ ཨཏྠོ ཨཏྠནྟརོ. ཝིརུདྡྷོ ཨཏྠནྟརོ ཡསྶཱཏི ཝིགྒཧོ. དོསཔཀཱསཀཔདམྤི དོསཏོ ཨབྱཏིརིཏྟཏྟཱ དོསོ ནཱམ. ཨེཝཾ སནྟེཔི སམཱསེན པདསྶ གཧིཏཏྟཱ ནཔུཾསཀཾ ཧོཏི. ཨེསེཝནཡོ ཨིཏོ པརེསུཔི. ཝིསེསྱསྶ ཨདྷིཀོ ཨཏྠོ ཡསྶ ཏཾ, ཀིལིཊྛཾ ཝིཡ ཀིལིཊྛཾ. ཡཐཱ ཧི མལགྒཧིཏོ ཨཱདཱསོ ཨཏྟནོ ཀིལིཊྛཏྟཱ ¶ མུཁཱདཱིནཾ པཀཱསནེ ཨཝིསདོ ཧོཏི, ཨེཝམདྷིཔྤེཏཏྠཔྤཀཱསནེ ཨསམཏྠཾ པདཾ ཀིལིཊྛཾ ནཱམ. ཝིརོདྷོ ཨསྶ ཨཏྠཱིཏི ཝིརོདྷི. ནཱིཡཏི ཨཝུཏྟོ ཧེཏུ ཨེཏྠཱཏི ནེཡྻཾ. ཝིསེསནེ ཨཔེཀྑཱ ཡསྶ ཏཾ. ཧཱིནོ ཝིསེསྱསྶ ཨཏྠོ ཡེན ཏཾ. ནཏྠི ཨཏྠོ ཡསྶ ཏནྟི ཝིགྒཧོ.

པདདོསཱནཾ ཨནཉྙཏྟེཔི ཝིཀཔྤནཱབྷེདཏོ ‘‘པདཱནཾ དོསཱ’’ཏི ཝུཏྟཾ, ཡཐཱ ‘‘སིལཱཔུཏྟཀསྶ སརཱིར’’ནྟི. ཝཱཀྱཱནཾ དོསཱཏི ཨེཏྠཱཔི ཨེསེཝ ནཡོ. ཨེཀོ ཨཏྠོ ཡསྶ ཏཾ. བྷགྒཱརཱིཏི ཀམོ ཡསྶ ཏཾ. ཝིསུཾ ཝིསུཾ ཨཱཀིཎྞཾ བྱཱཀིཎྞཾ. གཱམེ བྷཝོ གཱམྨོ, ཨབྱཏྟཱནཾ ཝོཧཱརོ. ཏཔྤཀཱསཀཔདམྤི ཨུཔཙཱརཏོ གཱམྨཾ ནཱམ. ཡཏི ཧཱིནཱ ཨེཏྠཱཏི ཡཏིཧཱིནཾ. ཀམཏོ ཙུཏཾ ཀམཙྩུཏཾ. ཨཏིཀྐམྨ ཝུཏྟཾ ཨཏིཝུཏྟཾ. ཨཏྠཏོ ཨཔེཏཾ ཨཔེཏཏྠཾ. བནྡྷེ ཕརུསཾ ཕརུསཏཱ ཡཏྠ ཏཾ. ཨཔགཏོ ཀམོ ཡསྨཱ ཏཾ. ཨོཙིཏྱཾ ཧཱིནཾ ཡཏྠ ཏཾ. བྷགྒཱ རཱིཏི ཡཏྠ ཏཾ. སཧ སཾསཡེན ཝཏྟཏཱིཏི ཏཾ. གཱམྨཾ ཝུཏྟནཡམེཝ. དུཊྛཱ དཱུསིཏཱ ཨལངྐཏི ཨལངྐཱརོ ཡཏྠ ཏཾ. ཝཱཀྱཱནཾ ཨཏྠོ, ཏནྣིསྶིཏཱ ཝཱཀྱཏྠནིསྶིཏཱཏི ཝིགྒཧོ. ཨེཏྠ ཨནཏྠཀཱཔེཏཏྠདོསདྭཡཾ པདཝཱཀྱཏོ བྷིནྣཾ, ཨཉྙཾ བྷགྒརཱིཏིདོསདྭཡཾ, གཱམྨདྭཡཾ, ཀམཙྩུཏཨཔཀྐམདྭཡཉྩ ཝཱཀྱཝཱཀྱཏྠཏོ བྷིནྣཾ.

པདདོསནིདྡེསཝཎྞནཱ

༢༡.

ཝིརུདྡྷཏྠནྟརཾ ཏཉྷི, ཡསྶ’ཉྙཏྠོ ཝིརུཛ྄ཛྷཏི;

ཨདྷིཔྤེཏེ ཡཐཱ མེགྷོ, ཝིསདོ སུཁཡེ ཛནཾ.

༢༡. ཨཐོདྡེསཀྐམེན པདཱདིདོསེ ཨུདཱཧརཏི ‘‘ཝིརུདྡྷི’’ ཙྩཱདིནཱ. ཧི ཡསྨཱ ཀཱརཎཱ, པསིདྡྷིཡཾ ཝཱ ཧིསདྡོ. ཡསྶ པདསྶ ཨཉྙོ ཨདྷིཔྤེཏཏོ ཨཔརོ ཨཏྠོ ཨདྷིཔྤེཏེ ཝཏྟུམིཙྪིཏེ ཨཏྠེ ཝིརུཛ྄ཛྷཏཱིཏི ཨནུཝདིཏྭཱ ཏསྨཱ ¶ ཏཾ ‘‘ཝིརུདྡྷཏྠནྟར’’ནྟི ཝིདྷཱིཡཏེ. ‘‘ཡཐེ’’ཏྱུདཱཧརཏི. ཡཐཱ ཨིདཾ ཝིརུདྡྷཏྠནྟརཾ, ཏཐཱ ཨཉྙམྤི ཏཱདིསཾ དཊྛབྦཾ. ན ཏྭིདམེཝེཏི ཡཐཱསདྡསྶ ཨཏྠོ. མེགྷོ ཝིསདོ སུཁཡེ ཛནནྟི. ཝིསཾ ཨུདཀཾ, ཏཾ དདཱཏཱིཏི ཝིསདོ མེགྷོ ཝཱརིཝཧོ ཛནཾ ལོཀཾ སུཁཡེ སུཁཡཏཱིཏི ཀཝིཙྪིཏཏྠོ. ཝིསསདྡོ གརལ༹སྶ ཙ ཝཱཙཀོ སིཡཱཏི གརལ༹དོ མེགྷོ མཱརཡཏི, ན པན སུཁཡཏཱིཏི ‘‘ཝིསདོ’’ཏི ཝིསེསནཔདསྶ ཝིརུདྡྷཏཱ.

༢༡. ཨིདཱནི ཨུདྡིཊྛཱནུཀྐམེན ཝིརུདྡྷཏྠནྟརཱདཱིནཾ སལཀྑཎལཀྑིཡཾ དསྶེནྟོ ‘‘ཝིརུདྡྷི’’ཙྩཱདིམཱཧ. ཡསྶ པདསྶ ཨཉྙཏྠོ ཀཝིཙྪིཏཏྠཏོ ཨཉྙོ ཨཏྠོ ཨདྷིཔྤེཏེ ཨིཙྪིཏཏྠེ ཧི ཡསྨཱ ཝིརུཛ྄ཛྷཏི, ཏསྨཱ ཏཾ པདཾ ཝིརུདྡྷཏྠནྟརཾ ནཱམ. པསིདྡྷིཡཾ ཝཱ ཧིསདྡོ. ཏཐཱ ཧེས ཨཔྤསིདྡྷཾ ཝིརུདྡྷཏྠནྟརཾ ‘‘ཡསྶ ཨཉྙཏྠོ ཨདྷིཔྤེཏེ ཝིརུཛ྄ཛྷཏཱི’’ཏི པཀཱསེཏྭཱ ཏསྨིཾ པཀཱསིཏཏྠཝིསཡེ ཝཏྟཏི. ‘‘ཏཾ ཧཱི’’ཏི ཡོཛིཏཏྟཱ ‘‘ཡསྶ ཨཉྙཏྠོ ཨདྷིཔྤེཏེ ཝིརུཛ྄ཛྷཏཱི’’ཏི ལཀྑཎཾ པསིདྡྷབྷཱཝེན ཨནུཝདིཏྭཱ ཏཾ ཝིརུདྡྷཏྠནྟརནྟི ཨནུཝདིཏབྦཨཔྤསིདྡྷཝིརུདྡྷཏྠནྟརཾ ཝིདྷཱིཡཏེ, ཡཐཱ ‘‘ཡོ ཀུཎྜལཱི, སོ དེཝདཏྟོ’’ཏི. ཨུཔརི པསིདྡྷཱནུཝཱདེན ཨཔྤསིདྡྷཝིདྷཱནམེཝ དཊྛབྦཾ. ‘‘ཡཐཱ…པེ… ཛན’’ནྟི ཨུདཱཧརཎཾ ལཀྑིཡཾ དསྶེཏི. ཡཐཱ ‘‘མེགྷོ ཝིསདོ’’ཙྩཱདི ཝིརུདྡྷཏྠནྟརསྶ ཨུདཱཧརཎཾ, ཨེཝམཱིདིསམཉྙམྤི ཨིམསྶུདཱཧརཎཾ, ན ཀེཝལཾ ‘‘མེགྷོ’’ཙྩཱདིམེཝ བྷཝཏཱིཏི ཝུཏྟཾ ཧོཏི. ཡཐཱསདྡོ ཙེཏྠ ཨིཝསདྡཔརིཡཱཡཏྠེཔི ཨུདཱཧརཎཏྠོ དཊྛབྦོ, ཨུཔརིཔྱེཝཾ. མེགྷོ ཨམྦུདྷརོ ཝིསདོ ཝིསསངྑཱཏཾ ཛལཾ དདནྟོ ཛནཾ སུཁཡེ སུཁཡཏཱིཏི ཀཝཱིཧི ཨདྷིཔྤེཏཏྠོ. ཨེཏྠ ཝིསསདྡསྶ གརལ༹སངྑཱཏསཔྤཝིསཝཱཙཀཏྟཱ, ‘‘ཝིསཾ དདཱཏཱིཏི ཝིསདོ’’ཏི ཨེཏྠ ཝིསསྶ ཨུདཀཝིསཱནཾ སཱདྷཱརཎཏྟཱ ཝིསདཱཡཀོ མེགྷོ ནཱསེཏིཡེཝ, ན སུཁཡཏཱིཏི ཀཝིནཱ ¶ ཨདྷིཔྤེཏསྶ སུཁཀཱརཎསྶ མེགྷཝིསེསནཝིསསདྡསྶ ཝིརུདྡྷཨཉྙཏྠཏཱཏི ཝིསཔདཾ ཝིརུདྡྷཏྠནྟརདོསེན དུཊྛནྟི.

༢༢.

ཝིསེསྱམདྷིཀཾ ཡེནཱ’-

དྷྱཏྠམེཏཾ བྷཝེ ཡཐཱ;

ཨོབྷཱསིཏཱསེསདིསོ,

ཁཛྫོཏོ’ཡཾ ཝིརཱཛཏེ.

༢༢. ཡེན པདེན ཝིསེསྱཾ ཝིསེསིཏབྦཾ ཨཔརཾ པདཾ ཨཏྠཝསེན ཨདྷིཀཾ བྷཝཏཱིཏྱནུཝདིཏྭཱ ཨེཏཾ ཨཛྷཏྠཾ བྷཝེཏི ཝིདྷཱིཡཏེ. ‘‘ཡཐེ’’ཏྱུདཱཧརཏི ‘‘ཨོབྷཱསིཏེ’’ཙྩཱདི. ཨེཝམུཔརིཔི སུཝིཉྙེཡྻཾ. ཨོབྷཱསིཏཱ དཱིཔིཏཱ ཨསེསཱ ནིཁིལཱ དིསཱཡེན སོཡཾ ཁཛྫོཏོ ཝིརཱཛཏེ དིཔྤཏི. ཨེཏྠ ཁཛྫོཏསྶཱཁིལདིསཱབྷཱགཱཝབྷཱསནམཏིཝུཏྟཱིཏི ཨདྷིཀཏྠཾ.

༢༢. ཡེན ཝིསེསནཔདེན ཝིསེསྱཾ ཝིསེསིཏབྦཾ པདཾ ཨཏྠཝསེན ཨདྷིཀཾ ཧོཏི, ཨེཏཾ ཡཐཱཝུཏྟལཀྑཎོཔེཏཾ པདཾ ཨཛྷཏྠཾ བྷཝེ ཨཛྷཏྠཾ ནཱམ པདདོསོ བྷཝེ. ཡཐཱ ཏསྶུདཱཧརཎམེཝཾ. ཨོབྷཱསིཏཱསེསདིསོ ཛོཏིཏསབྦདིསོ ཨཡཾ ཁཛྫོཏོ ཨཡཾ ཛོཏིརིངྒཎོ ཝིརཱཛཏེ དིཔྤཏི. ཨེཏྠ ཝིསེསྱསྶ ཁཛྫོཏསྶ སཀལདིསོབྷཱསནསྶ ཨཛྷཏྠཏྟཱ [ཨཏྱུཏྟཏྟཱ (ཀ.)] ‘‘ཨོབྷཱསིཏཱསེསདིསོ’’ཏི ཝིསེསནཔདཾ ཨཛྷཏྠཔདདོསོ ནཱམ. ཨོབྷཱསིཏཱ ཨསེསདིསཱ ཡེནཱཏི ཝིགྒཧོ.

༢༣.

ཡསྶ’ཏྠཱཝགམོ དུཀྑོ,

པཀཏྱཱདིཝིབྷཱགཏོ;

ཀིལིཊྛཾ ཏཾ ཡཐཱ ཏཱཡ,

སོ’ཡམཱལིངྒྱཏེ པིཡཱ.

༢༣. པཀཏྱཱདིཝིབྷཱགཏོཏི ¶ པཙྩཡཱ པཋམཾ ཀརཱིཡཏཱིཏི པཀཏི. ཨཱདིསདྡེན པཙྩཡཱདཱིནཾ པརིགྒཧོ. པཀཏྱཱདཱིནཾཝིབྷཱགཏོ ཝིབྷཛནཏོ, ‘‘ཨཡཾ པཀཏི, ཨཡཾ པཙྩཡོ, ཨཡམཱདེསོ’’ཏིཨཱདིནཱ པཀཏིཔཙྩཡཝིབྷཱགཀཔྤནཏོཏི ཝུཏྟཾ ཧོཏི. པཱིཎེཏཱིཏི པཱི, ཏཱཡ པིཡཱ ཝལླབྷཱཡ སོཡཾ སཱམཱི ཨཱལིངྒྱཏེ སིལིསྶཏེ. ཨེཏྠ ‘‘པིཡཱ’’ཏི ཀིལིཊྛཾ.

༢༣. ཡསྶ པདསྶ ཨཏྠཱཝགམོ ཨཏྠཱཝབོདྷོ པཀཏྱཱདིཝིབྷཱགཏོ ‘‘ཨཡཾ པཀཏི, ཨཡཾ པཙྩཡོ, ཨཡམཱདེསོ’’ཏིཨཱདིནཱ པཀཏྱཱདཱིནཾ ཝིབྷཛནཛཱནནེན, ‘‘པཀཏྱཱདི ནཱམ ཀི’’ནྟི གཝེསནཏོ ཝཱ དུཀྑོ, ཏཾ ཀིལིཊྛཾ ནཱམ. ཡཐཱ ཏསྶུདཱཧརཎམེཝཾ. ཏཱཡ པིཡཱ ཝནིཏཱཡ སོ ཨཡཾ ཝལླབྷོ ཨཱལིངྒྱཏེ སིལིསྶཏེ. པཙྩཡཱ པཋམཾ ཀརཱིཡཏཱིཏི པཀཏི. སཱ ཨཱདི ཡེསཾ པཙྩཡཱནཾ, ཏེསཾ ཝིབྷཱགོཏི ཝཱཀྱཾ. པཱིཎེཏཱིཏི པཱི, ནཱརཱི. ཏཱཡ པིཡཱ ཨེཏྠ པིཡཱསངྑཱཏཱཡ ཝལླབྷཱཡ ཀཐནེ པཱིསདྡསྶ ཨཝིསདཏྟཱ ‘‘པིཡཱ’’ཏི པདཾ ཀིལིཊྛཾ.

༢༤.

ཡཾ ཀིལིཊྛཔདཾ མནྡཱ-བྷིདྷེཡྻཾ ཡམཀཱདིཀཾ;

ཀིལིཊྛཔདདོསེཝ, ཏམྤི ཨནྟོ ཀརཱིཡཏི.

༢༤. ཨིདཱནི ཡམཀཱདིཀམནདྷིཔྤེཏམྤི ཀིལིཊྛེཡེཝ ཨནྟོགདྷཾ དསྶེཏུམཱཧ ‘‘ཡ’’ནྟིཨཱདི. ཏཏྠ ཡནྟི ཨནིཡམཝཙནཾ, ཏསྶ ནིཡམཝཙནཾ ཡམཀཱདིཀནྟི. ཡམཀམཱདི ཡསྶ པཧེལི༹ཀཱཛཱཏསྶ ཏཾ ཡམཀཱདིཀཾ. ཀཱིདིསནྟི ཨཱཧ ‘‘ཀིལིཊྛཔད’’ནྟིཨཱདི. ཀིལིཊྛཱནི ཨཔྤཏཱིཏདོསསབྷཱཝེ ཋིཏཏཱཡ མལིཏཱནྱཝིསདཱནི པདཱནི ཡསྶ ཏཾ ཀིལིཊྛཔདཾ. མནྡོ ཨཔྤཀོ ཨབྷིདྷེཡྻོ ཨཏྠོ ཡསྶ ཏཾ མནྡཱབྷིདྷེཡྻཾ, ཏཱདིསཾ ཏམྤི ཡམཀཱདིཀཾ ཀིལིཊྛཔདདོསེཡེཝ ཡཐཱཝུཏྟེ ཨནྟོ ཨབྦྷནྟརེ ཀརཱིཡཏི ཝིདྷཱིཡཏི ¶ ཏཏྠེཝ པཀྑིཔཱིཡཏི, ཀིལིཊྛཔདདོསཏོ ན བྱཏིརིཙྩཏཱིཏི ཨདྷིཔྤཱཡོ.

༢༤. ཨིདཱནི ཨནདྷིཔྤེཏམཔི ཡམཀཱདིཾ ཀིལིཊྛདོསེཡེཝ ཨནྟོཀརཎབྱཱཛེན ཨཱཝཱིཀརོནྟོ ཨཱཧ ‘‘ཡཾ ཀིལིཊྛེ’’ཙྩཱདི. ཀིལིཊྛཔདཾ ཨཔྤཏཱིཏདོསེན མིསྶཀཏྟཱ ཨཝིསདཔདཾ མནྡཱབྷིདྷེཡྻཾ ཨཔྤཀཱབྷིདྷེཡྻཾ ཡཾ ཡམཀཱདིཀཾ ཡཾ ཡམཀཔྤཧེལི༹ཀཱཛཱཏམཏྠི, ཏམྤི ཀིལིཊྛཔདདོསེཡེཝ ཡཐཱཝུཏྟཀིལིཊྛཔདདོསེཡེཝ ཨནྟོ ཀརཱིཡཏི ཨབྦྷནྟརེ ཀརཱིཡཏི, ཀིལིཊྛཔདདོསཏོ ཨབྱཏིརིཏྟནྟི ཨདྷིཔྤཱཡོ. ཀིལིཊྛཱནི པདཱནི ཡསྶ, མནྡོ ཨབྷིདྷེཡྻོ ཡསྶ, ཡམཀཾ ཨཱདི ཡསྶ པཧེལི༹ཀཱཛཱཏསྶ, ཀིལིཊྛཔདཱནཾ དོསོཏི ཝིགྒཧོ.

༢༥.

པཏཱིཏསདྡརཙིཏཾ, སིལིཊྛཔདསནྡྷིཀཾ;

པསཱདགུཎསཾཡུཏྟཾ, ཡམཀཾ མཏ’མེདིསཾ.

༢༥. ཧོཏུ ཀཱམམནབྷིམཏམེདིསཾ ཡམཀཱདིཀཾ, ཀིཉྩརཧི ཨབྷིམཏནྟི ཨཱཧ ‘‘པཏཱིཏི’’ཙྩཱདི. ཨཏྟནོ ཝཙནཱིཡཏྠཔྤཏཱིཏཝསེན ཝཱཙཀཱཔི སདྡཱ པཏཱིཏཱཡེཝ ནཱམཱཏི པཏཱིཏེཧི པསིདྡྷེཧི སདྡེཧི པཱཊིཔདིཀེཧི རཙིཏཾ ཀཏཾ པཏཱིཏསདྡརཙིཏཾ. སིལིཊྛཱ ཨཉྙམཉྙཱལིངྒནེན མཊྛཱ པདཱནཾ སྱཱདྱནྟཱདཱིནཾ སནྡྷཡོ སནྡྷནཱ ཡསྶ ཏཾ སིལིཊྛཔདསནྡྷིཀཾ. པཏཱིཏསདྡརཙིཏཏྟཱཡེཝ པསཱདསངྑཱཏེན གུཎེན སདྡཱལངྐཱརེན སཾཡུཏྟཾ སམྨདེཝོཔེཏཾ ཨེདིསཾ ཡཐཱཝུཏྟགུཎཱསཡཾ རམཎཱིཡཾ ཡམཀཾ མཏཾ ཨབྷིམཏནྟི ཨཏྠོ.

༢༥. ཨིདཱནི ཨདྷིགཏེསུ ཡམཀེསུ ཨཱིདིསཾ ཡམཀམིཊྛམིཏི སིསྶཱནཾ ཨུཔདིསནྟོ ཨཱཧ ‘‘པཏཱིཏེ’’ཙྩཱདི. པཏཱིཏསདྡརཙིཏཾ ‘‘ཨིམསྶཏྠསྶཱཡཾ ཝཱཙཀོ’’ཏི པཏཱིཏེཧི པསིདྡྷེཧི སདྡེཧི རཙིཏཾ པཱཊིཔདིཀེཧི ཀཏཾ སིལིཊྛཔདསནྡྷིཀཾ སིལིཊྛཱ སྱཱདྱནྟཱདིཔདཱནཾ སནྡྷཡོ ཡསྶ ཏཾ ¶ པསཱདགུཎསཾཡུཏྟཾ པཏཱིཏསདྡརཙིཏཏྟཱཡེཝ པསཱདསངྑཱཏེན སདྡཱལངྐཱརགུཎེན སཾཡུཏྟཾ ཨཱིདིསཾ ཨེཝཾབྷཱུཏཾ གུཎཱདྷིཀཏོ རམཎཱིཡཾ ཨུཔརི ཝཀྑམཱནཡམཀསདིསཾ ཡམཀཾ མཏཾ ཝིཉྙཱུཧི ཨབྷིམཏཾ. པཏཱིཏཱ ཙ ཏེ སདྡཱ ཙ, ཏེཧི རཙིཏཾ, སིལིཊྛཱ པདཱནཾ སནྡྷཡོ ཡསྶ, པསཱདོཏི གུཎོ སདྡཱལངྐཱརོ, ཏེན སཾཡུཏྟནྟི ཝིགྒཧོ.

༢༦.

ཨབྱཔེཏཾ བྱཔེཏ’ཉྙ-མཱཝུཏྟཱནེཀཝཎྞཛཾ;

ཡམཀཾ ཏཉྩ པཱདཱན-མཱདིམཛ྄ཛྷནྟགོཙརཾ.

༢༦. ཨིདཱནི ཏཾ ཡཐཱཝུཏྟམབྷིམཏཾ དསྶེཏུམུཔཀྐམཏེ ‘‘ཨབྱཔེཏེ’’ཙྩཱདིནཱ. ཨཱཝུཏྟཱ ཨདྷིཝུཏྟཱ པུནཔྤུནུཙྩཱརཎུཔེཏཱ ཨནེཀེསཾ པཏིརཱུཔཏྟཱ, བཧུཝཎྞཱ སརབྱཉྫནརཱུཔཱ, ན ཨེཀོ ཝཎྞོ ཏསྶཱནུཔྤཱསཏྟཱ, ཏཐཱ ཙ ཝཀྑཏི ‘‘ཝཎྞཱཝུཏྟི པརོ ཡཐཱ’’ཏི [སུབོདྷཱལངྐཱར ༡༢༧ གཱཐཱ], ཏེཧི ཛཱཏཾ ཡམཀནྟི ཝིཉྙཱཡཏེ. ཀཏིཝིདྷཾ ཏཾ ཝིཀཔྤཱིཡཏཱིཏི ཨཱཧ ‘‘ཨབྱཔེཏཾ བྱཔེཏཉྙ’’ནྟི. ཏཏྠ ཡཾ ཝཎྞནྟརཱབྱཝཧིཏཾ ཝཎྞསམུདཱཡེན ཝུཏྟཾ. ཏདབྱཔེཏཾ ཡམཀཾ. ཡཾ ཏུ བྱཝཧིཏཾ, ཏཾ བྱཔེཏཾ. ཡཾ པན ཨུབྷཡམིསྶཾ, ཏཾ ཨཉྙཾ ཨཔརཾ ཨབྱཔེཏབྱཔེཏནྟི ཏིདྷཱ ཡམཀཾ ཏཱཝ ཝིཀཔྤཱིཡཏེ. ཏམེཏཾ ཏིཝིདྷཾ ཡམཀཾ ཝིསཡཝིབྷཱགནིརཱུཔནཱཡཾ ཨཱདི ཙ མཛ྄ཛྷོ ཙ ཨནྟོ ཙ གོཙརོ ཝིསཡོ ཡསྶེཏི ཨཱདིམཛ྄ཛྷནྟགོཙརཾ ཝིཉྙེཡྻཾ. ཀེསཾ པཱདཱནཾ? པཙྩེཀཾ ཙཏུནྣཾགཱཐཱཝཡཝཱནཾ. སཱཔེཀྑཏྟེཔི སམཱསོ གམྨཀཏྟཱ.

ཏཏྠ པཱདཙཏུཀྐསྶ ཨཱདིམཛ྄ཛྷནྟབྷཱཝཱིནཾ ཡམཀཱནཾ ཡཱཝནྟོ པཀཱརཱ སམྦྷཝནྟི, ཏེ མཱུལཱ སཏྟ. ཀཐཾ? ཨེཀསྨིཾཡེཝ པཱདེ ཀྭཙི ཨཱདིཡམཀཾ, ཀྭཙི མཛ྄ཛྷཡམཀཾ, ཀྭཙི ཨནྟཡམཀཾ, ཀྭཙི མཛ྄ཛྷནྟཡམཀཾ, ཀྭཙི མཛ྄ཛྷཱདིཡམཀཾ, ཀྭཙི ཨཱདྱནྟཡམཀཾ, ཀྭཙི སབྦཡམཀནྟི. ཨེཝཾ པཙྩེཀཾ མཱུལབྷཱུཏཱ སཏྟཱཏི ¶ ཙཏཱུསུ ཨཊྛཝཱིསཏི ཧོནྟི. པཱདཱདིཡམཀཉྩ པཋམཔཱདཱདིཡམཀམབྱཔེཏཾ ཏཐཱ དུཏིཡཏཏིཡཙཏུཏྠཔཱདཱདིཡམཀམབྱཔེཏཾ པཋམདུཏིཡཔཱདཱདིཡམཀམབྱཔེཏཾ པཋམཏཏིཡཔཱདཱདིཡམཀམབྱཔེཏཾ པཋམཙཏུཏྠཔཱདཱདིཡམཀམབྱཔེཏནྟིཨཱདིནཱ ཨནེཀདྷཱ པསཾསནྟི. ཡདཱ ཙ སབྦཏོཡམཀཾ, ཏདཱ མཧཱཡམཀཱདཡོ ཝིཀཔྤཱ ཛཱཡནྟཱིཏི ཝེདིཏབྦཾ.

༢༦. ཨིདཱནི ཨབྷིམཏཡམཀཾ དཱིཔེཏི ‘‘ཨབྱཔེཏེ’’ཙྩཱདིནཱ. ཨཱཝུཏྟེཧི པུནཔྤུནཾ ཝུཏྟེཧི ཨནེཀཝཎྞེཧི སམུདཱཡརཱུཔཏྟཱ ཨནེཀེཧི སརབྱཉྫནསརཱིརེཧི ཝཎྞེཧི ཛཱཏཾ ཡམཀཾ ཨཉྙེཧི ཝཎྞེཧི ཨབྱཝཧིཏཏྟཱ ཨབྱཔེཏཾ, ཝཎྞནྟརེཧི བྱཝཧིཏཏྟཱ བྱཔེཏཾ, ཨུབྷཡམིསྶཀཏྟཱ ཏེཧི ཨཉྙཾ ཨབྱཔེཏབྱཔེཏཉྩཱཏི ཏིཝིདྷཾ ཧོཏི. ཏཉྩ ཡམཀཾ ཝིསཡཝིབྷཱགནིཡམེན གཱཐཱཔཱདཱནཾ ཨཱདིགོཙརཾ མཛ྄ཛྷགོཙརཾ ཨནྟགོཙརམིཏི ཏིཝིདྷཾ ཧོཏི. ཨེཏྠ ཙསདྡོ ཝཏྟབྦནྟརེ པཝཏྟཏི, ཝཏྟབྦནྟརཾ ནཱམ ཡཐཱཝུཏྟཨབྱཔེཏཱདིབྷེདཏོ ཨཉྙཾ ཝཏྟབྦཏཱཡ སམུཁཱིབྷཱུཏཾ པཱདཱནཾ ཨཱདིམཛ྄ཛྷཱཝསཱནནྟརཾ, ཨུཔནྱཱསོ ཝཱཀྱཱརམྦྷོཏི ཙ ཨེཏསྶེཝ ནཱམཾ. ཝིསདིསེན ཝཎྞེན ཨཔེཏཾ བྱཔེཏཾ. ཏབྦིཔརཱིཏམབྱཔེཏཾ. ཨབྱཔེཏཉྩ བྱཔེཏཉྩ ཨཉྙཉྩཱཏི སམཱཧཱརདྭནྡོ. ཨནེཀེ ཙ ཏེ ཝཎྞཱ ཙ, ཨཱཝུཏྟཱཡེཝ ཨནེཀཝཎྞཱ, ཏེཧི ཛཱཏཾ, ཨཱདི ཙ མཛ྄ཛྷོ ཙ ཨནྟོ ཙ, ཏེ གོཙརཱ ཡསྶཱཏི ཝིགྒཧོ.

ཏཏྠ པཱདཙཏུཀྐསྶ ཨཱདིམཛ྄ཛྷཱཝསཱནེསུ ལབྦྷམཱནཡམཀབྷེདཱ ཨེཀེཀསྨིཾ པཱདེ སཏྟ སཏྟ བྷཝནྟི. ཀཐཾ? པཱདཱདིཡམཀཾ པཱདམཛ྄ཛྷཡམཀཾ པཱདནྟཡམཀཾ མཛ྄ཛྷནྟཡམཀཾ མཛ྄ཛྷཱདིཡམཀཾ ཨཱདྱནྟཡམཀཾ སབྦཏོཡམཀནྟི ཨེཝཾ པཙྩེཀཾ སཏྟ སཏྟ ཀཏྭཱ ཙཏཱུསུ མཱུལབྷཱུཏཡམཀཱ ཨཊྛཝཱིས ¶ བྷཝནྟི. ཨེཏྠ པཱདཱདིཡམཀཱདིཀམྤི ཨབྱཔེཏཔཋམཔཱདཱདིཡམཀཾ ཏཐཱ དུཏིཡཏཏིཡཙཏུཏྠཔཱདཱདིཡམཀམིཏི ཙ ཨབྱཔེཏཔཋམདུཏིཡཔཱདཱདིཡམཀཾ ཏཐཱ པཋམཏཏིཡཔཱདཱདིཡམཀཾ པཋམཙཏུཏྠཔཱདཱདིཡམཀམིཏི ཙ ཨབྱཔེཏདུཏིཡཏཏིཡཔཱདཱདིཡམཀཾ ཏཐཱ དུཏིཡཙཏུཏྠཔཱདཱདིཡམཀམིཏི ཙ ཨབྱཔེཏཏཏིཡཙཏུཏྠཔཱདཱདིཡམཀམིཏི ཙ ཨེཝམབྱཔེཏཔཱདཱདིཡམཀཱ དས ཧོནྟི. ཏཐཱ བྱཔེཏཱཔི དསཱཏི ཝཱིསཏི, ཨབྱཔེཏཔཋམཔཱདམཛ྄ཛྷཡམཀཾ ཏཐཱ དུཏིཡཔཱདམཛ྄ཛྷཡམཀམིཙྩཱདིནཱ མཛ྄ཛྷཡམཀམྤི ཝཱིསཏིཝིདྷཾ ཧོཏི. ཨབྱཔེཏཔཋམཔཱདནྟཡམཀཾ ཏཐཱ དུཏིཡཔཱདནྟཡམཀམིཙྩཱདིནཱ ཨནྟཡམཀམྤི ཝཱིསཏིཝིདྷཾ. སཾསགྒབྷེདཏོ པན ཨནེཀཝིདྷཾ ཧོཏི.

ཨབྱཔེཏཔཋམཔཱདཱདིཡམཀཝཎྞནཱ

༢༧.

སུཛནཱ’སུཛནཱ སབྦེ, གུཎེནཱཔི ཝིཝེཀིནོ;

ཝིཝེཀཾ ན སམཱཡནྟི, ཨཝིཝེཀིཛནནྟིཀེ.

༢༧. ‘‘སུཛནཱ’’ཨིཙྩཱདི. སུཛནཱ སཛྫནཱ, ཨསུཛནཱ ཨསཛྫནཱཏི ཨེཏེ སབྦེ ཨུབྷཡཔཀྑཔཱཏིནོ ཝིསེསཱ ཛནཱ གུཎེན སཱིལཱདིནཱ ཀརཎབྷཱུཏེན, ཧེཏུབྷཱུཏེན ཝཱ ཝིཝེཀིནོཔི སཱདྷཱུསུ ལབྦྷམཱནཱནམསཱདྷཱུསྭནུཔལབྦྷནཏོ པུཐུབྷཱུཏཱཔི ཨཝིཝེཀཱིནཾ ཛནཱནཾ ཨནྟིཀེ སམཱིཔེ ཏེསཾ སནྣིདྷཱནེ ཝིཝེཀཾ ཝིབྷཱགཾ ན སམཱཡནྟི ནཔཱཔུཎནྟི, ཝིབྷཱགཝིཛཱནནཔཉྙཱཝེཀལླེན ཙ ཝིཝེཀིནོཔི ཛནཱ ཏེ ཨེཀཏོ ཀཏྭཱ པསྶནྟཱིཏི. ཨིདཾ པཋམཔཱདཱདིཡམཀམབྱཔེཏཾ.

༢༧. ཨིདཱནི ཨབྱཔེཏཔཋམཔཱདཱདིཡམཀསྶ མུཁམཏྟཾ དསྶེཏུམཱཧ ‘‘སུཛནི’’ཙྩཱདི. སུཛནཱ སཱདྷུཛནཱ, ཨསུཛནཱ ཨསཱདྷུཛནཱ ཙེཏི སབྦེ ཨུབྷཡཔཀྑིཀཱ སཱིལཱདིནཱ, པཱཎཱཏིཔཱཏཱདིནཱ གུཎེན ཧེཏུནཱ ཝིཝེཀིནོ ཨཔི སཱདྷཱུསུ ¶ པཱཎཱཏིཔཱཏཱདཱིནཾ, ཨསཱདྷཱུསུ སཱིལཱདཱིནཾ ཨཔྤཝཏྟིཏོ གུཎེན པུཐུབྷཱུཏཱཔི ཨཝིཝེཀིཛནནྟིཀེ ཝིཝེཀཉཱཎརཧིཏཱནཾ ཛནཱནཾ སནྟིཀེ ཝིཝེཀཾ ཝིབྷཱགཾ ན སམཱཡནྟི ན པཱཔུཎནྟི. ཝིཝེཀོ ཝིནཱབྷཝནམེཏེསམཏྠཱིཏི ཝིཝེཀིནོ. ཨེཏྠ ཝིསཡོཔཙཱརེན ཝིཝེཀོཏི པཉྙཱ, ན ཝིཝེཀིནོཏི ཨཝིཝེཀིནོ, ཏེཡེཝ ཛནཱ, ཏེསཾ ཨནྟིཀམིཏི ཙ ཝིགྒཧོ. ཨིདཾ ཨབྱཔེཏཔཋམཔཱདཱདིཡམཀཾ.

ཨབྱཔེཏཔཋམདུཏིཡཔཱདཱདིཡམཀཝཎྞནཱ

༢༨.

ཀུསལཱ’ཀུསལཱ སབྦེ, པབལཱ’པབལཱ’ཐཝཱ;

ནོ ཡཱཏཱ ཡཱཝ’ཧོསིཏྟཾ, སུཁདུཀྑཔྤདཱ སིཡུཾ.

༢༨. ‘‘ཀུསལཱ’’ཨིཙྩཱདི. པབལཱ ཨཱསེཝནཔྤཊིལཱབྷཝསེན བལཝནྟོ ཙ. ཨཐཱཏི ཨནནྟརཏྠེ ནིཔཱཏོ. ཨཔབལཱ ཏདབྷཱཝཏོ དུབྦལཱ ཙ སབྦེ ཀུསལཱཀུསལཱ དྷམྨཱ ཡཱཝ ཡཏྟཀཾ ཀཱལཾ ཨཧོསིཏྟཾ ཝིནཱ ཨུཔྤཏྟིམཏྟཾ ཕལདཱནཱསམྦྷཝཏོ ཀེཝལཾ ‘‘ཨཧོསཱི’’ཏི ཝཙནཱིཡཏྠནིམིཏྟམཏྟཀམྨབྷཱཝེན ཨཧོསིཀམྨཏྟཾ ནོ ཡཱཏཱ ན སམྤཏྟཱ, ཏཱཝ ཏཏྟཀཾ ཀཱལཾ སུཁཉྩ དུཀྑཉྩ ཏཾ པདནྟཱིཏི སུཁདུཀྑཔྤདཱ སིཡུཾ. ཡཱཝ སཾསཱརཔཝཏྟི, ཏཱཝ སུཁདུཀྑདཱཡཀཱ ཧོནྟཱིཏི. ཨིདཾ པཋམདུཏིཡཔཱདཱདིཡམཀམབྱཔེཏཾ.

༢༨. པབལཱ ཨཱསེཝནཱདིཔཙྩཡལཱབྷེན བལཝནྟོ ཝཱ ཨཐ ཨཔབལཱ ཏདབྷཱཝེན དུབྦལཱ ཝཱ སབྦེ ཀུསལཱཀུསལཱ ཨཧོསིཏྟཾ ཕལདཱནཱབྷཱཝཏོ པཝཏྟིམཏྟཏཾ ཡཱཝ ཡཏྟཀཾ ཀཱལཾ ནོ ཡཱཏཱ ཨཔྤཏྟཱ, ཏཱཝ ཏཏྟཀཾ སུཁདུཀྑཔྤདཱ ཡཐཱཀྐམཾ སུཁདུཀྑཔདཱཡིནོ སིཡུཾ བྷཝནྟི. ཨིདཾ ཨབྱཔེཏཔཋམདུཏིཡཔཱདཱདིཡམཀཾ. ཀུསལཔཊིཔཀྑཱ ཨཀུསལཱ. ‘‘ཨཧོསཱི’’ཏི ཝཏྟབྦསྶ བྷཱཝོ ཨཧོསིཏྟཾ. ‘‘ཨེཧིཔསྶིཀོ’’ཏིཨཱདཱིསུ ཝིཡ ཀྲིཡཱཔདཏོཔི ཎཱདིཔཙྩཡཱ ཧོནྟི.

ཨབྱཔེཏཔཋམདུཏིཡཏཏིཡཔཱདཱདིཡམཀཝཎྞནཱ

༢༩.

སཱདརཾ སཱ དརཾ ཧནྟུ, ཝིཧིཏཱ ཝིཧིཏཱ མཡཱ;

ཝནྡནཱ ཝནྡནཱམཱན-བྷཱཛནེ རཏནཏྟཡེ.

༢༩. ‘‘སཱདར’’མིཙྩཱདི. ¶ ཝནྡནཱ དྭཱརཏྟཡོཔདསྶིཡམཱནཱ མཱནོ ཙ པཱུཛཱ, ཏེསཾ བྷཱཛནེ ཨཱདྷཱརབྷཱུཏེ རཏིཛནནཱདིནཱ ཨཏྠེན རཏནསངྑཱཏཱནཾ བུདྡྷཱདཱིནཾ ཏཡེ སམཱུཧབྷཱུཏེ རཏནཏྟཡེ སཱདརཾ ཨཱདརསཧིཏཾ ཀཏྭཱ མཡཱ ཝིཧིཏཱ ཀཏཱ, ཝིཧིཏཱ ཨལཾསཾསཱརདུཀྑཝིསཊནིརཱཀརཎཏོ ཝིསེསེན ཧིཏཱ པདྷྱཱ སཱ ཝནྡནཱ སོ པཎཱམོ དརཾ དརཐཾ ཀཱཡཙིཏྟཔརིལཱ༹ཧཾ ཧནྟུ ཧིཾསཏུ. མཡཱཏི ཝུཏྟཏྟཱ མེཏི ཨཏྠཏོ ཝིཉྙཱཡཏི. ཨིདཾ པན པཋམདུཏིཡཏཏིཡཔཱདཱདིཡམཀམབྱཔེཏཾ.

༢༩. ཝནྡནཱམཱནབྷཱཛནེ དྭཱརཏྟཡེན ཝིདྷིཡམཱནཔཎཱམཔཱུཛཱནཾ ཨཱདྷཱརབྷཱུཏེ རཏནཏྟཡེ རཏིཛནནཱདིཨཏྠེན རཏནསངྑཱཏཱནཾ བུདྡྷཱདཱིནཾ ཏཡེ མཡཱ ཡཱ ཝནྡནཱ སཱདརཾ ཨཱདརསཧིཏཾ ཝིཧིཏཱ ཀཏཱ, ཝིཧིཏཱ ལོཀིཡ ལོཀུཏྟར སམྤཏྟིསཱདྷནཏོ ཝིསེསེན ཧིཏཱ སཱ ཝནྡནཱ དརཾ མཡ྄ཧཾ ཀཱཡཙིཏྟདརཐཾ ཧནྟུ ཝིནཱསེཏུ. ཨིདཾ ཨབྱཔེཏཔཋམདུཏིཡཏཏིཡཔཱདཱདིཡམཀཾ. སཧ ཨཱདརེན ཝཏྟམཱནཾ སཱདརཾ, ཀྲིཡཱཝིསེསནཾ. ཨེཏྠ ཀྲིཡཱ ནཱམ ཝིཧིཏཱསདྡེན ནིདྡིཊྛཀརཎཾ. ཀརཎཉྷི ཝིཧིཏཱསདྡསྶ ཝུཏྟཀམྨཏྟེཔི ཨཉྙཐཱནུཔཔཏྟིལཀྑཎསཱམཏྠིཡཏོ བྷིཛྫིཏྭཱ ཝིཛྫམཱནཾ ‘‘ཨཀཱསི’’ནྟི ཀྲིཡཱཡ སམྦནྡྷམུཔེནྟཾ ཀམྨཉྩ ཧོཏི, བྷཱཝེ ཝིཧིཏསྶ ཡུཔཙྩཡནྟསྶ ནཔུཾསཀཏྟཱ ནཔུཾསཀཉྩ, སཏྟཱཡ ཨེཀཏྟཱ ཨེཀཝཙནཉྩ ཏབྦིསེསནཏྟཱ སཱདརསདྡོཔི ནཔུཾསཀདུཏིཡེཀཝཙནོ ཧོཏི.

‘‘ཝིསེསྱེ ¶ དིསྶམཱནཱ ཡཱ,

ལིངྒསངྑྱཱཝིབྷཏྟིཡོ;

ཏུལྱཱདྷིཀརཎེ བྷིཡྻོ,

ཀཱཏབྦཱ ཏཱ ཝིསེསནེ’’ཏི [སམྦནྡྷཙིནྟོ ༡༥ གཱཐཱ བྷེདཙིནྟཱ ༡༩༤ གཱཐཱ].

ཧི ཝུཏྟཾ. ཨེཝཾ ཀྲིཡཱཝིསེསནེ གཧིཏེ སཱམཏྠིཡཏོ ‘‘མཡཱ’’ཏི ཏཏིཡནྟསྶ པཋམནྟཏྟཾ, ‘‘ཝནྡནཱ’’ཏི པཋམནྟསྶ ཚཊྛུནྟཉྩ ཧོཏི. ཝནྡནཱ ཙ མཱནོ ཙ, ཏེསཾ བྷཱཛནཾ. ཏིཎྞཾ སམཱུཧོ ཏཡཾ, རཏནཱནཾ ཏཡནྟི ཙ ཝིགྒཧོ.

ཨབྱཔེཏཙཏུཀྐཔཱདཱདིཡམཀཝཎྞནཱ

༣༠.

ཀམལཾ ཀ’མལཾ ཀཏྟུཾ-ཝནདོ ཝནདོ’མྦརཾ;

སུགཏོ སུགཏོ ལོཀཾ, སཧིཏཾ སཧིཏཾ ཀརཾ.

༣༠. ‘‘ཀམལ’’མིཙྩཱདི. ཀམལཾ ཨརཝིནྡཾ ཀཾ ཛལཾ ཨལངྐཏྟུཾ སཛྫནཏྠཱཡ ཧོཏི, ཝིཀསིཏཱརཝིནྡསནྡོཧསམྦྷཱཝིཏོདཀསྶ ཝཱཔཱདཱིསུ ཏཱདིསརམཎཱིཡཏྟསམྤཏྟིསམྦྷཝཏོ, ཨཝནཾ རཀྑཾ དདཱཏི སསྶསམྤཏྱཱདིཀཱརཎབྷཱཝེནཱཏི ཨཝནདོ. ཝནཾ ཛལཾ དདཱཏི ན ཏུཙྪོཏི ཝནདོ མེགྷོ ཨམྦརཾ ཨཱཀཱསཾ ཛལདྷཱརབྷཱརབྷརིཏམྦརཀུཧརསྶ དསྶནཱིཡཏཱགུཎཡོགཏོ ཨལཾཀཏྟུནྟི ཨདྷིཀཏཾ. སཧིཏཾ སམྤུཎྞཾ ཧིཏཾ ཨབྷིཝུདྡྷིཾ ཀརཾ ཀརོནྟོ སུཊྛུ གདཏཱིཏི སུགཏོ མཉྫུབྷཱཎཱི པུབྦབུདྡྷཱ ཝིཡ ནེཀྑམྨཱདིནཱ ཀཱམཙྪནྡཱདིཀེ པཛཧནྟོ གནྟྭཱ ཨརཧཏྟམགྒེན སཝཱསནསཀལཀིལེསེ སམུཙྪིནྡིཏྭཱ སོབྷནཾ ནིབྦཱནཔུརཾ གཏོཏི ཝཱ སུགཏོཏི ཝུཏྟོ སོ མཧཱམུནི ཨཏྟནོ ཨཔརིམིཏཔཱརམིཏཱསིམྤཀཙགལིཏཏིལཀབྷཱཝེན ལོཀཾ ལོཀཏྟཡཾ, སཧིཏཾ ལོཀནྟི ཝཱ ཡོཛནཱིཡཾ ཨལངྐཏྟུཾ ཨལཾཀརཎཱཡཱཏི. ཨིདཾ པཱདཙཏུཀྐཱདིཡམཀམབྱཔེཏཾ.

༣༠. ཀམལཾ ¶ པདུམཾ ཀཾ ཛལཾ ཨལངྐཏྟུཾ པཉྩཝིདྷཔདུམསཉྪནྣསྶ ཨུདཀསྶ རམཎཱིཡཏྟཱ སཛྫེཏུཾ ཧོཏི. ཨཝནདོ ཀཱལེ ཝུཊྛིསམྤདཱཡ སསྶསམྤདཱདཱིནཾ ཀཱརཎཏྟཱ ཨཱརཀྑཾ དེནྟོ ཝནདོ མེགྷོ ཨམྦརཾ ཨཱཀཱསཾ ཨལངྐཏྟུཾ ཛལདྷཱརབྷཱརབྷརིཏམྦརཀུཙྪིཡཱ དསྶནཱིཡཏྟཱ སཛྫེཏུཾ ཧོཏི, སཧིཏཾ སམྤུཎྞཾ ཧིཏཾ ཨབྷིཝུཌྜྷིཾ ཀརཾ ཀརོནྟོ སུགཏོ ཙིཏྲཀཐཱི སུནྡརཾ ནིབྦཱནཾ གཏོ ཝཱ སོ སུགཏོ སོ ཏཐཱགཏོ ལོཀཾ ལོཀཏྟཡཾ, སཧིཏཾ ལོཀཾ ཝཱ ཨལངྐཏྟུཾ ཙིཏྲཀཐཱདིཀཱརཎེཧི ཏཱདིསསྶ ཨཉྙསྶ ཙ ལོཀརཱམཎེཡྻསྶཱབྷཱཝཱ སཛྫེཏུཾ ཧོཏི. སབྦཔདཏྠཱནཾ སཏྟཱབྱབྷིཙཱརིཏྟཱ ཧོཏཱིཏི གམྨཾ. ཏཏོཡེཝ སབྦེ པཋམནྟབྷཝནཀྲིཡཱཡ ཡུཛྫནྟཱིཏི ཝདནྟི. ཨིདཾ ཨབྱཔེཏཙཏུཀྐཔཱདཱདིཡམཀཾ.

༣༡.

ཨབྱཔེཏཱདིཡམཀ-སྶེསོ ལེསོ ནིདསྶིཏོ;

ཉེཡྻཱནི’མཱཡེཝ དིསཱ-ཡ’ཉྙཱནི ཡམཀཱནིཔི.

༣༡. ཨིཙྩེཝམབྷིམཏཡམཀེ ཨབྱཔེཏཔཱདཱདིཡམཀསྶ དིསཱམཏྟཾ དསྶེཏྭཱ ཨུཔསཾཧརཏི ‘‘ཨབྱཔེཏེ’’ཙྩཱདིནཱ. ཨབྱཔེཏསྶ ཨབྱཝཧིཏསྶ ཙཏུནྣཾ པཱདཱནཾ ཨཱདོ, ཨཱདིབྷཱུཏསྶ ཝཱ ཡམཀསྶ ཨེསོ ཡཐཱཝུཏྟོ ལེསོ ཀོཙིདེཝ བྷེདོ ནིདསྶིཏོ ཝིཀཔྤིཏོ. ཨཔརཱནིཔི ཀིཾ ན ཝིཀཔྤིཡནྟཱིཏིཙེཏི ཨཱཧ ‘‘ཉེཡྻཱནི’’ཙྩཱདི. ཨིམཱཡ དིསཱཡ ཨིམིནཱ ཨུཔཱཡེན མགྒེནེཝ ཨཉྙཱནི ཝུཏྟཏོ ཨཔརཱནི དུཏིཡཔཱདཱདིཡམཀཏཏིཡཔཱདཱདིཡམཀཙཏུཏྠཔཱདཱདིཡམཀཱདཱིནི ཨབྱཔེཏཱནིཔི པཋམདུཏིཡཔཱདཱདིཡམཀཔཋམཏཏིཡཔཱདཱདིཡམཀཱནིཔི བྱཔེཏཱནི, པཋམཙཏུཏྠདུཏིཡཏཏིཡཔཱདཱདིཡམཀཱདཱིནིཔི ཨབྱཔེཏབྱཔེཏཱནི, ཏཐཱ མཛ྄ཛྷནྟཔཱདཡམཀཱནི ཉེཡྻཱནི ཛཱནིཏབྦཱནི, ཝིཉྙཱུནཾ ཏཱདིསཱཡ དིསཱཡ དསྶིཏཏྟཱཏི. ཏཏྠ ཙ –

‘‘གུཎཱགུཎེན ¶ སཧ ཏེ, སཱདྷཝོ’སཱདྷཝོ ཛནཱ;

ཝིགཱཧནྟེ སམཾ ནཱཐ, ཙིཏྟཾ ཙིཏྟེ ཀཐཾ ནུ ཏེ’’.

ཨིཙྩཱདིནཱ དུཏིཡཔཱདཱདིཡམཀཱདཱིནི ཨབྱཔེཏཱནི,

‘‘པིཡེན ཝཙསཱ སབྦེ,

པིཡེན’པྤིཡབྷཱཎིནོ;

པཱདཱནཏེ ཛིནོཀཱསི,

སོ དྷམྨོ ཧནྟུ ཝོ’པྤིཡཾ’’.

ཨིཙྩཱདིནཱ པཋམདུཏིཡཔཱདཱདིཡམཀཱདཱིནི ཨབྱཔེཏཱནི,

‘‘ས’མལཾ སམལཾ ཀཏྟུཾ, སུཙིརཾསུཙི རཾཛཡེ;

སུཙིརཾ སུཙིརཾགཾ ཏཾ, ས’མལཾ སམལཾབྷི ཡོ’’.

ཨིཙྩཱདིནཱ པཋམཙཏུཏྠདུཏིཡཏཏིཡཔཱདཱདིཡམཀཱདཱིནི ཨབྱཔེཏབྱཔེཏཱནི,

‘‘མནོཧར ཧར ཀླེསཾ, ཛིན ཙེཏོབྷཝཾ མམ;

ནནུ ཏྭཾ པཱརམཱིསཱརཱ-མཏབྷཱཝིཏམོསདྷཾ’’.

ཨིཙྩཱདིནཱ མཛ྄ཛྷཔཱདཡམཀཱནི,

‘‘སཱདྷུནཱ རཾཛཡ ཛཡ-དྡྷནིནཱ’པཱུརཡི མཧིཾ;

ཡོ ཏཾ ཛིནཝརཾ དྷཱིར-མཏྠཀཱམོསི ཙེ ཏུཝཾ’’.

ཨིཙྩཱདིནཱ ཨནྟཔཱདཡམཀཱནི ཛཱནིཏབྦཱནི.

༣༡. ཨེཝཾ ཨབྷིམཏཡམཀེན ཨབྱཔེཏཡམཀཱནམུཔཱཡཱདཱིནི ནིགམེནྟོ ཨཱཧ ‘‘ཨབྱཔེཏི’’ཙྩཱདི. ཨབྱཔེཏཱདིཡམཀསྶ ཝིསདིསཝཎྞེཧི ཨབྱཝཧིཏཱདིཡམཀསྶ, ཨབྱཔེཏཔཱདཱདིཡམཀསྶ ཝཱ ཨེསོ ལེསོ ‘‘སུཛནི’’ཙྩཱདིཀོ ཨཔྤཀོདཱཧརཎནཡོ ནིདསྶིཏོ ནིདྡིཊྛོ. ཨཉྙཱནི ཡམཀཱནིཔི ཨིམཱཡེཝ དིསཱཡ ཨིམིནཱ ནཡེནེཝ ཉེཡྻཱནི ཝིཉྙཱུཧི ཉཱཏབྦཱནི. ཨཱདོ ཡམཀཾ, ཨཱདིབྷཱུཏཾ ཝཱ ཡམཀཾ, ཨབྱཔེཏཉྩ ཏཾ ཨཱདིཡམཀཉྩཱཏི ཝཱཀྱཾ. ཨེཝཾ དསྶིཏེན ¶ ཨིམིནཱ ཀམེན ཨབྱཔེཏདུཏིཡཔཱདཱདིཡམཀཱདཡོ ཉཱཏབྦཱཏི ཨདྷིཔྤཱཡོ.

ཏཏྠ ཨབྱཔེཏདུཏིཡཔཱདཱདིཡམཀམེཝཾ ཝེདིཏབྦཾ –

གུཎཱགུཎེན སཧ ཏེ, སཱདྷཝོ’སཱདྷཝོ ཛནཱ;

ཝིགཱཧནྟེ སམཾ ནཱཐ, ཙིཏྟཾ ཙིཏྟེ ཀཐཾ ནུ ཏེ.

བྷོ ནཱཐ ཏེ ཏུཡ྄ཧཾ ཙིཏྟེ སཱདྷཝོ ཨསཱདྷཝོ ཏེ ཛནཱ གུཎཱགུཎེན སཀསཀགུཎེན ཨགུཎེན ཙ སཧ སམཾ ཨེཀཛ྄ཛྷཾ ཀཐཾ ནུ ཝིགཱཧནྟེ, ཙིཏྟཾ ཨཙྪརིཡཾ སུཛནདུཛྫནེསུ སམམེཏྟཱ ཨཙྪརིཡཱཏི ཨདྷིཔྤཱཡོ.

ཨབྱཔེཏཔཋམདུཏིཡཔཱདཱདིཡམཀམེཝཾ དཊྛབྦཾ –

པིཡེན ཝཙསཱ སབྦེ, པིཡེན’པྤིཡབྷཱཎིནོ;

པཱདཱནཏེ ཛིནོཀཱསི, སོ དྷམྨོ ཧནྟུ ཝོ’པྤཱིཡཾ.

ཛིནོ ཨཔྤིཡབྷཱཎིནོཔི སབྦེ ཛནེ པིཡེན ཡེན ཝཙསཱ པཱདཱནཏེ ཨཀཱསི, སོ དྷམྨོ ཝོ ཨཔྤིཡཾ ཧནྟུ. ཨེཏྠ ཨཔིསདྡཔརིཡཱཡསྶ པིསདྡསྶ གཧིཏཏྟཱ ཡཏིབྷངྒོ ནཏྠི.

པཋམཙཏུཏྠདུཏིཡཏཏིཡཔཱདཱདིཨབྱཔེཏབྱཔེཏཡམཀམེཝཾ དཊྛབྦཾ –

ས’མལཾ སམལཾ ཀཏྟུཾ, སུཙིརཾསུཙི རཾཛཡེ;

སུཙིརཾ སུཙིརཾགཾ ཏཾ, ས’མལཾ སམལཾབྷི ཡོཏི.

ཨེཏྠ ‘‘སམལཾ སམལཾ, སུཙིརཾ སུཙིར’’ནྟི ཝིསདིསཝཎྞེཧི ཨབྱཝཧིཏཏྟཱ ཨབྱཔེཏཾ, ‘‘སམལཾ སམལ’’ནྟི པུབྦཔརཡུགལ༹ཾ [པུབྦཔརཡུགལ༹དྭཡཾ (ཀ.)] ‘‘ཀཏྟུ’’མིཏི བྷིནྣཝཎྞེཧི, ‘‘སུཙིརཾ སུཙིར’’ནྟི པུབྦཔརཡུགལ༹ཾ [པུབྦཔརཡུགལ༹དྭཡཾ (ཀ.)] ‘‘ཛཡེ’’ཏི བྷིནྣཝཎྞེཧི ཙ བྱཝཧིཏཏྟཱ བྱཔེཏཉྩ ཧོཏི. སུཙིརཾསུཙི སོབྷནརཾསིནཱ ཨུཙི ཡུཏྟོ ཡོ ཛིནོ སཾ ¶ སནྟིཾ ནིབྦཱནཾ སམལཾབྷི ཨལབྷི, ཨལཾ ཨཙྩནྟཾ ཨཏིསཡེན སུཙིརཾགཾ ཝིསུདྡྷདེཧཾ ཏཾ ཛིནཾ སམལཾ ཛལླིཀཱསངྑཱཏེན, རཱགཱདིཀུཙྪིཏསངྑཱཏེན ཝཱ མལེན སཧིཏཾ སཾ ཨཏྟཱནཾ ཨལཾཀཏྟུཾ ནིམྨལཾ ཀཏྭཱ སཛྫེཏུཾ སུཙིརཾ སུཙིརཀཱལཾ རཾཛཡེ ཨཏྟནི ཨབྷིརམཱཔེཡྻ.

པཱདམཛ྄ཛྷཡམཀམེཝཾ དཊྛབྦཾ –

མནོཧར ཧར ཀླེསཾ, ཛིན ཙེཏོབྷཝཾ མམ;

ནནུ ཏྭཾ པཱརམཱིསཱརཱ-མཏབྷཱཝིཏམོསདྷནྟི.

མནོཧར ཛིན མམ ཙེཏོབྷཝཾ ཀླེསཾ སནྟཱཔཾ ཧར ཨཔནཡ, ཏྭཾ པཱརམཱིསཱརཱམཏབྷཱཝིཏཾ ཨོསདྷཾ དིབྦོསདྷཾ ནནུ.

པཱདནྟཡམཀམེཝཾ དཊྛབྦཾ –

སཱདྷུནཱ རཾཛཡ ཛཡ-དྡྷནིནཱ’པཱུརཡི མཧིཾ;

ཡོ ཏཾ ཛིནཝརཾ དྷཱིར-མཏྠཀཱམོསི ཙེ ཏུཝནྟི.

ཡོ ཛིནཝརོ སཱདྷུནཱ ཛཡདྡྷནིནཱ ཝེནེཡྻཛཡགྷོསེན མཧིཾ ཨཱཔཱུརཡི, དྷཱིརཾ ཏཾ ཛིནཝརཾ ཏུཝཾ སཔྤུརིས ཙེ ཨཏྠཀཱམོ ཨསི, རཾཛཡ ཨབྷིརམཱཔེཧི. ཨིམིནཱ ནིདྡིཊྛཡམཀེཧེཝ ཨཝསེསཱ ཏཏིཡཔཱདཱདིཡམཀཱདཡོ ཝིཉྙེཡྻཱ.

༣༢.

ཨཙྩནྟབཧཝོ ཏེསཾ,

བྷེདཱ སམྦྷེདཡོནིཡོ;

ཏཏྠཱཔི ཀེཙི སུཀརཱ,

ཀེཙི ཨཙྩནྟདུཀྐརཱ.

༣༢. ཀིཾ པན སཱཀལླེན ན ཝིཀཔྤིཏཱནཱིཏི ཨཱཧ ‘‘ཨཙྩནྟི’’ཙྩཱདི. ཏེསཾ ཝིཀཔྤཱནཾ སམྦྷེདོ སངྐརོ མིསྶཏྟམུཙྩཱརཎཔྤཀཱརོ ཡོནི པབྷཝོ ཡེསཾ ཏེ སམྦྷེདཡོནིཡོ, བྷེདཱ པཀཱརཱ ཨཙྩནྟབཧཝོ ཨཏིསཡེན བཧུལཱ ཡཐཱཝུཏྟནཡེན སམྦྷཝནྟི, ཏཏྠཱཔི ཏེསུ ཝིཀཔྤེསུཔི ཀེཙི ཝིཀཔྤཱ སུཁེན ཀརཱིཡནྟི པཡུཛྫནྟཱིཏི ¶ སུཀརཱ, ཏབྦིཔརཱིཏོ ཙ ཀེཙི ཝིཀཔྤཱ ཨཙྩནྟདུཀྐརཱ. ཨིཏི དྭིདྷཱ སངྒཡ྄ཧནྟི, ཏེསུ སུཀརཱནཾ ཀེསཉྩི ཨབྷིམཏཡམཀཱནཾ མུཁམཏྟཾ དསྶིཏཾ. ཨིདཱནི དུཀྐརཱནཾ ཀེསཉྩི མུཁམཏྟཾ ན སབྦམེཝཾ ཝེདིཏབྦཾ.

སམུནྣཏེན ཏེ སཏཱ,

ཀཐཾ ན ཏེ ན ཏེ སིཡུཾ;

ཡཏོ ནཏེནཏེཔི’ཏོ,

སིཡུཾ ན ཏེ ནཏེ སུབྷཱ.

ཨིདཾ པཱདཙཏུཀྐམཛ྄ཛྷཡམཀམབྱཔེཏབྱཔེཏམེཀརཱུཔཾ དུཀྐརཾ.

ན བྷཱསུརཱ ཏེཔི སུརཱ ཝིབྷཱུསིཏཱ,

ཏཐཱསུརཱ བྷཱུརི སུརཱཔརཱཛིཏཱ;

སབྷཱསུ རཱཛཱཔི ཏཐཱ སུརཱཛིཏོ,

ཡཐཱ སུརཱཛནྟི སུརཱཝིནིསྶཊཱ.

ཨིདཾ ཙཏུཀྐཔཱདམཛ྄ཛྷཡམཀམེཀརཱུཔབྱཔེཏཾ.

༣༢. སབྦམིདམནུདྡིསིཏྭཱ ལཀྑཎཱཏིདེསེན ནིགམནཾ ཀིམཏྠམིཙྩཱསངྐཱཡམཱཧ ‘‘ཨཙྩནྟེ’’ཙྩཱདི. ཏེསཾ ཡམཀཱནཾ སམྦྷེདཡོནིཡོ པབྷེདུཔྤཏྟིཀཱརཎབྷཱུཏཱ བྷེདཱ ཨུཙྩཱཝཙཔཀཱརཱ ཨཙྩནྟབཧཝོ, ཏཏྠཱཔི ཏེསུཔི ཀེཙི ཡམཀཱ སུཀརཱ སུསཱདྷིཡཱ, ཀེཙི ཨཙྩནྟདུཀྐརཱ ཨཏིསཡེན དུསྶཱདྷིཡཱ. སམྦྷེདོ ཡོནི ཡེསནྟི ཝིགྒཧོ.

ཨིཧ སུཀརསྶ ཨུཔདིསིཏཏྟཱ དུཀྐརཡམཀཔཝེསོཔཱཡམཏྟམུཔདིསཱིཡཏེ –

‘‘མནཾ མནཾ སཏྠུ དདེཡྻ ཙེ ཡོ,

མནཾ མནཾ པཱིཎཡཏ’སྶ སཏྠུ;

མནཾ མནཾ ཏེན དདེཡྻ ཙེ ན,

མནཾ མནཾཔ’སྶ ན སཱདྷུཔུཛྫ’’ནྟི.

ཨིདཾ པཱདཙཏུཀྐཱདིཡམཀམེཀརཱུཔཾ ཨབྱཔེཏབྱཔེཏཾ.

ཡོ ¶ པུགྒལོ མནཾ ཨཏྟནོ ཙིཏྟཾ སཏྠུ ཛིནསྶ མནཾ ཁཎམཏྟམྤི དདེཡྻ ཙེ, སཏྠུ མུནིནྡསྶ མནཾ ཙིཏྟཾ ཨསྶ པུགྒལསྶ མནཾ ཙིཏྟཾ པཱིཎཡཏི སམྤཱིཎེཏི, ཏེན ཏསྨཱ མནཾ མནཾ ཙིཏྟཾ ཙིཏྟཾ དདེཡྻ ཙེ ན ཡདི ནོ དདེཡྻ, ཨསྶ པུགྒལསྶ མནཾ ཙིཏྟཾ མནཾཔི མུཧུཏྟམྤི སཱདྷུཔུཛྫཾ སཱདྷཱུཧི པཱུཛིཏབྦཾ ན བྷཝཏི.

‘‘སམུནྣཏེན ཏེ སཏཱ,

ཀཐཾ ན ཏེ ན ཏེ སིཡུཾ;

ཡཏོ ནཏེ’ནཏེཔི’ཏོ,

སིཡུཾ ན ཏེ ནཏེ སུབྷཱ’’ཏི.

ཨིདཾ པཱདཙཏུཀྐམཛ྄ཛྷཡམཀམེཀརཱུཔམབྱཔེཏབྱཔེཏཾ.

ཡཏོ ཡེན ཀཱརཎེན ཏེ ཏུཡ྄ཧཾ སཏཱ སོབྷནེན སམུནྣཏེན སམྨཱ ཨུནྣཏེན ཧེཏུནཱ ནཏེཔི ཨཝནཏེཔི ཨནཏེཔི ཨནཝནཏེཔི ཏེ ཏེ སུབྷཱ ཏེ ཏེ སོབྷནཱ ན ན སིཡུཾ, བྷཝནྟེཝ, ཨཏོ ཏེན ཀཱརཎེན ཏེ སུབྷཱ ཏེ སོབྷནཱ ནཏེ ཨཝནཏེ ཀཐཾ ན སིཡུཾ, བྷཝནྟེཝ.

‘‘ཛིནཾ པཎཱམོནཏསཛྫནཾ ཛནཾ,

གུཎེ ནིཝེསེནྟམསཛྫནཾ’ཛནཾ;

ཝེནེཡྻནེཏྟེ གུཎབྷཱཛནཾ ཛནཾ,

ནམེ མམེནྟཾ ཁལུ སཛྫནཾཛན’’ནྟི.

ཨིདཾ པཱདཙཏུཀྐནྟཡམཀམེཀརཱུཔམབྱཔེཏབྱཔེཏཡམཀཾ དུཀྐརཾ.

པཎཱམོནཏསཛྫནཾ པཎཱམིཏུཀཱམོནཏསཱདྷུཛནཝནྟཾ ཛནཾ ཝེནེཡྻཛནཾ ཨསཛྫ པམཱདམཀཏྭཱ གུཎེ སཱིལཱདིགུཎེ ནིཝེསེནྟཾ ནིཡོཛེནྟཾ ཝེནེཡྻནེཏྟེ ཨཉྫནཾ ཨཉྫནབྷཱུཏཾ གུཎབྷཱཛནཾ གུཎཱནམཱདྷཱརབྷཱུཏཾ སཛྫནཾཛནཾ ཨིམིནཱ ཀཱརཎེན སཱདྷུཛནཱནཾ ཨཉྫནབྷཱུཏཾ ཛནཾ སཱདྷུཛནཾ ཁལུ ཨེཀནྟེན མམེནྟཾ མམཱཡནྟཾ ནཾ ཛིནཾ ནམེ ནམཱམི.

‘‘སཱབྷཱསུ ¶ སཱབྷཱ བྷུཝནེ ཛིནསྶ,

སཱབྷཱཡ སཱ བྷཱསཏིཡེཝ ཛཱཏུ;

སཱབྷཱཡ སཱ བྷཱཏི ན ཙེ ཀཐཾ ན,

སཱབྷཱ སསཱབྷཱནམཏིཙྩ བྷཱཏཱི’’ཏི.

ཨིདཾ པཱདཙཏུཀྐཱདིཡམཀེཀརཱུཔབྱཔེཏཾ.

བྷུཝནེ སཏྟལོཀེ སཱབྷཱསུ ཝིཛྫམཱནཱབྷཱསུ ཛིནསྶ སཱབྷཱ སོབྷནཱ ཨཱབྷཱ སཱབྷཱཡ ཝིཛྫམཱནཱཡ, སོབྷནཱཡ ཝཱ ཨཱབྷཱཡ ཨཱབྷཱཏོ ཛཱཏུ ཨེཀནྟེན བྷཱསཏིཡེཝ དིཔྤཏེཝ, སཱ ཛིནཱབྷཱ སཱབྷཱཡ ཝིཛྫམཱནཱབྷཱཏོ ཨདྷིཀཱ ཧུཏྭཱ ཙེ ན བྷཱཏི ཡདི ན བྷཱསཏི, སསཱབྷཱནཾ ཝིཛྫམཱནསོབྷནཱབྷཱནཾ བྲཧྨཱདཱིནཾ སཱབྷཱ སོབྷནཱབྷཱཡོ ཨཏིཙྩ ཨཏིཀྐམྨ ཀཐཾ ན བྷཱཏི, བྷཱསཏིཡེཝ.

‘‘ན བྷཱསུརཱ ཏེཔི སུརཱ ཝིབྷཱུསིཏཱ,

ཏཐཱསུརཱ བྷཱུརི སུརཱཔརཱཛིཏཱ;

སབྷཱསུ རཱཛཱཔི ཏཐཱ སུརཱཛིཏོ,

ཡཐཱ སུརཱཛནྟི སུརཱཝིནིསྶཊཱ’’ཏི.

ཨིདཾ པཱདཙཏུཀྐམཛ྄ཛྷཡམཀེཀརཱུཔབྱཔེཏཾ.

སུརཱཝིནིསྶཊཱ སུརཱཔཱནཏོ ཨཔགཏཱ ཛནཱ ཡཐཱ སུརཱཛནྟི, ཏཐཱ ཝིབྷཱུསིཏཱ ཝིསེསེན ཨལངྐཏཱ ཏེཔི སུརཱ ཏེ དེཝཱ ཨཔི ན བྷཱསུརཱ སོབྷམཱནཱ ན ཧོནྟི, ཏཐཱ ཨེཝཾ སུརཱཔརཱཛིཏཱ སུརཱཔཱནཧེཏུ པརཱཛིཏབྷཱཝཾ པཏྟཱ བྷཱུརི ཨསུརཱ བཧཝོ ཝེཔཙིཏྟིཨཱདཡོ ཨསུརཱཔི ན བྷཱསུརཱ ན སོབྷནྟི, ཏཐཱ ཨེཝཾ སུརཱཛིཏོ སུཊྛུ ཨལངྐཏོ རཱཛཱཔི སབྷཱསུ ན བྷཱསུརོ.

‘‘ཛིནཱཎཏྟིཡཾ ¶ ཡོ’ཧིཏཱསཱ སིཏཱསཱ,

ཨཝསྶཾཝ ཏེ ཧོནྟྱ’ཏཱསཱ ཧཏཱསཱ;

ཨཏོ སབྦཔཱཔེ སཏཱསཱ ཝཏཱསཱ,

ཀརོནྟེཝ སནྟིསྶིཏཱ སཱམིཏཱསཱ’’ཏི.

ཨིདཾ པཱདཙཏུཀྐནྟཡམཀམེཀརཱུཔབྱཔེཏཾ.

ཡེ སཔྤུརིསཱ ཛིནཱཎཏྟིཡཾ བུདྡྷསྶ ཝིནཡཔཉྙཏྟིསངྑཱཏཱཎཏྟིཡཾ ཨོཧིཏཱསཱ ཨཝཱིཏིཀྐམཝསེན པཏིཊྛིཏཨཱསཱ ཧོནྟི སིཏཱསཱ པརིསུདྡྷཱསཱ, ཏེ སཱདྷཝོ ཧཏཱསཱ ཨནུཀྐམེན ཧཏཏཎྷཱ ཨཝསྶཾཝ ཨེཀནྟེནེཝ ཨཏཱསཱ བྷཡརཧིཏཱ ཡཏོ ཧོནྟི, ཨཏོ ཏསྨཱ སབྦཔཱཔེ སབྦཱཀུསལེ སཏཱསཱ བྷཡསཧིཏཱ ཝཏཱསཱཝ ནིརཝཛྫཝཏཱབྷིལཱསཝནྟོ སཱདྷུཛནཱ སནྟིསྶིཏཱ སནྟིནིསྶིཏཱཡོ སཱམིཏཱསཱ སཱམིབྷཱཝཱསཱཡོ ཀརོནྟེཝ.

༣༣.

ཡམཀཾ ཏཾ པཧེལཱི༹ ཙ, ནེཀནྟམདྷུརཱནི’ཏི;

ཨུཔེཀྑིཡནྟི སབྦཱནི, སིསྶཁེདབྷཡཱ མཡཱ.

༣༣. ནནུ ཡམཀཾ ནཱམ ཀཝཱིནཾ སཱམཏྠིཡཝིསེསསཱུཙཀནྟི ཏཏྠ ཏཾ སོཔཡོགཾ, པཧེལི༹ཀཱ ཙ སོཔཡོགཱ ཀཱིལཱ༹ཝིནོདནེ སམྦཱདྷཊྛཱནམནྟནེ པརབྱཱམོཧནེ [པརམབྱཱམོཧནེ (ཀ.), ཀཱབྱཱདཱས ༣.༩༧] ཙ, ཏསྨཱ ཏཏྠ ཀཐམུཔེཀྑཱ བྷཝཏོཏི ཨཱཧ ‘‘ཡམཀ’’ནྟིཨཱདི. ཏཾ ཡཐཱཝུཏྟཾ ཡམཀཉྩ སུཀརདུཀྐརཔྤབྷེདཾ. པཧེལི༹ཀཱ པན པུབྦཱཙརིཡེཧི སོལ༹ས ནིདྡིཊྛཱ སམཱགཏཱཝཉྩིཏཱདིཀཱ. ཏཏྠིདཾ ལཀྑཎཾ –

སམཱགཏཱ ནཱམ སིཡཱ, གུལ༹ྷཏྠཱ པདསནྡྷིནཱ;

ཝཉྩིཏཱཉྙཏྠ རུལ༹ྷེན, ཡཏྠ སདྡེན ཝཉྩནཱ.

ཨུཀྐནྟཱཏིབྱཝཧིཏ-པྤཡོགཱ ¶ མོཧཀཱརིནཱི;

སིཡཱ པམུསྶིཏཱ ཡསྶཱ, དུབྦོདྷཏྠཱ པདཱཝལི.

སམཱནརཱུཔཱ’མུཁྱཏྠཱ-རོཔཱཧིཏཔདཱ སིཡཱ;

ཕརུསཱ པཙྩཡཱདཱིཧི, ཛཱཏསདྡཱ ཀཐཉྩིཔི.

སངྑྱཱཏཱ ནཱམ སངྑྱཱནཾ, ཡཏྠ བྱཱམོཧཀཱརཎཾ;

ཨཉྙཐཱ’བྷཱསཏེ ཡཏྠ, ཝཱཀྱཏྠོ སཱ པཀཔྤིཏཱ.

སཱ ནཱམནྟརིཀཱ ཡསྶཱ, ནཱམེ ནཱནཏྠཀཔྤནཱ;

ནིབྷཱུཏཱ’ཝཊྛིཏཉྙཏྠཱ, ཏུལྱཏྠསུཏིཧེཏུཏོ.

སམཱནསདྡཱ སཱ ཨིཊྛ-སདྡཔརིཡཱཡསཱདྷིཏཱ;

སམྨུལ༹ྷཱ མཱུལ༹ྷཏཱཡེཝ, ནིདྡིཊྛཏྠཱཔི སཱདྷུཀཾ.

ཡསྶཱ སམྦནྡྷབཱཧུལྱཱ, ནཱམཾ སཱ པཱརིཧཱརིཀཱི;

ཨེཀཙྪནྣཱ བྷཝེ བྱཉྫཱ-དྷེཡྻཾ ནིསྶཡགོཔནཱ.

སཱ བྷཝེ ཨུབྷཡཙྪནྣཱ, ཡསྶཱ ཨུབྷཡགོཔནཱ;

སཾཀིཎྞཱ ནཱམ སཱ ཡསྶཱ, ནཱནཱལཀྑཎསངྐརོཏི.

དོསཏྟེཔི ཙེསཾ སབྦེསཾ ཨུཀྐནྟཱདཱིསུ དོསབྷཱཝེ ནཱརོཔིཏབྦཱ. ཨེསཱ ཧི [མནསོཏི (ཀ.)] ‘‘བཧུགུཎེ པཎམཏི’’ཙྩཱདིནཱ [སུབོདྷཱལངྐཱར ༤༤ གཱཐཱ] ཝཱཀྱསཾཀིཎྞནཱམེན ན ཝུཏྟཱ, པཀཔྤིཏཱ ཙ སཾསཡདོསཔརིཧཱརེན ‘‘ཡཱཏེ དུཏིཡཾ ནིལཡ’’ནྟི [སུབོདྷཱལངྐཱར ༡༡༢ གཱཐཱ] ཨཱདིནཱ ནིདྡིཊྛཱ.

‘‘པབྷཝཱ’ནཏཝིཏྟིཎྞཱ, ཏཝཱ’ཎཱ མཧཏཱི སཏི;

ཙིརཱཡ ཛཡཏཾ ནཱཐ, པཧུཏཕལསཱདྷནཱི’’ཏི.

ཨཡཾ སམཱགཏཱ.

‘‘བྷདྡམེཝོ’པསེཝེཡྻ, ¶ ཝིདྷཱུཏམདཀིབྦིསཾ;

སམྤཱཔཡེ པུརཾ ཁེམཾ, ས དནྟོ’ཏྟནིསེཝིན’’ནྟི.

ཨཡཾ ཝཉྩིཏཱ.

པམུསྶིཏཱདཡོ ཏུ ལཀྑཎཱནུསཱརེན, ཏཏྠོདཱཧརཎཱནུསཱརེན ཙ ཝེདིཏབྦཱ.

ཨེཝཾ པུབྦཱཙརིཡེཧི པརིཀཔྤིཏཱ པཧེལི༹ཀཱ ཙེཏི ཨེཏཱནི སབྦཱནི ཨེཀནྟེན ནིཡམེན ན མདྷུརཱནི ཨཏྠརསསྶ ཝཱ སདྡརསསྶ ཝཱ ཀསྶཙི ཨབྷཱཝེན ཨསྶཱདིཏབྦཱནི ན ཧོནྟཱིཏི ཨིམིནཱ ཀཱརཎེན སིསྶཱནམུཔྤནྣོ ཁེདོཡེཝ བྷཡཾ ཏཏོ ཏེསཾ ཁེདཏོ ཝཱ ཨུཔྤནྣབྷཡཏོ མཡཱ ཨུཔེཀྑིཡནྟཱིཏི སམྦནྡྷནཱིཡཾ.

༣༣. ཨེཝཾ སུཀརདུཀྐརཝསེན དུཝིདྷཏྟཾ ཝཏྭཱ ཀཝཱིནཾ སཱམཏྠིཡཔྤཀཱསནེ སཔྤཡོཛནཡམཀཱནཉྩ, ཀཱིལཱ༹ཝིནོདནེ སམྦཱདྷཊྛཱནསམྨནྟནེ པརབྱཱམོཧནེ ཙཱཏི ཨིམེསུ སཔྤཡོཛནཱནཉྩ པཧེལི༹ཀཱནམཝཙནེ ཀཱརཎཾ ནིདྡིསཏི ‘‘ཡམཀ’’མིཙྩཱདིནཱ. ཏཾ ཡམཀཾ ཡཐཱཝུཏྟཾ སུཀརདུཀྐརཱདིབྷེདཾ ཡམཀཛཱཏཉྩ པཧེལི༹ ཙ པུབྦཱཙརིཡེཧི ནིདྡིཊྛཱ སམཱགབྷཱདིཀཱ པཧེལི༹ཀཱ ཙ ཨིཏི ཨིམཱནི སབྦཱནི ཨེཀནྟམདྷུརཱནི ན ཨིཏི ཨསྶཱདེཏབྦསྶ ཨཏྠརསསྶ, སདྡརསསྶ ཝཱ ནིཡམཏོ ཨབྷཱཝཱ ཨེཀནྟེན ཨམདྷུརཱནི, ཨིཏི ཨིམིནཱ ཀཱརཎེན ཙ སིསྶཁེདབྷཡཱ སིསྶཱནཾ ཨསཧནསངྑཱཏཱཡ ཨསཧནེན ཛཱཏཱཡ ཝཱ བྷཱིཏིཡཱ ཙ མཡཱ ཨུཔེཀྑཱིཡནྟི. སིསྶཱནཾ ཁེདོཡེཝ བྷཡཾ, སིསྶཁེདཏོ ཨུཔྤནྣཾ ཝཱ བྷཡཾ, ཏཏོཏི ཝིགྒཧོ.

ཨེཏྠ པཧེལི༹ཀཱ ཨེཝཾ དཊྛབྦཱ –

སམཱགཏཱ ཙ ཝཉྩིཏུ-ཀྐནྟཱ པམུསྶིཏཱཔི ཙ;

སམཱནརཱུཔཱ ཕརུསཱ, སངྑྱཱཏཱ ཙ པཀཔྤིཏཱ.

ཨཐོཔི ¶ ནཱམནྟརིཀཱ, ནིབྷཱུཏཱ ཙ པཧེལི༹ཀཱ;

ཨཐོ སམཱནསདྡཱ ཙ, སམྨུལ༹ྷཱ པཱརིཧཱརིཀཱི;

ཨེཀཙྪནྣོབྷཡཙྪནྣཱ, སཾཀིཎྞཱཏི ཙ སོལ༹སཱཏི.

ཏཏྲིདཾ ལཀྑཎཾ –

སམཱགཏཱ ནཱམ སིཡཱ, གུལ༹ྷཏྠཱ པདསནྡྷིནཱ;

ཝཉྩིཏཱཉྙཏྠ རུལ༹ྷེན, ཡཏྠ སདྡེན ཝཉྩནཱ.

ཨུཀྐནྟཱཏིབྱཝཧིཏ-པྤཡོགཱ མོཧཀཱརིནཱི;

སིཡཱ པམུསྶིཏཱ ཡསྶཱ, དུབྦོདྷཏྠཱ པདཱཝལི.

སམཱནརཱུཔཱ’མུཁྱཏྠཱ-རོཔཱཧིཏཔདཱ སིཡཱ;

ཕརུསཱ པཙྩཡཱདཱིཧི, ཛཱཏསདྡཱ ཀཐཉྩིཔི.

སངྑྱཱཏཱ ནཱམ སངྑྱཱནཾ, ཡཏྠ བྱཱམོཧཀཱརཎཾ;

ཨཉྙཐཱ’བྷཱསཏེ ཡཏྠ, ཝཱཀྱཏྠོ སཱ པཀཔྤིཏཱ.

སཱ ནཱམནྟརིཀཱ ཡསྶཱ, ནཱམེ ནཱནཏྠཀཔྤནཱ;

ནིབྷཱུཏཱ’ཝཊྛིཏཉྙཏྠཱ, ཏུལྱཏྠསུཏིཧེཏུཏོ.

སམཱནསདྡཱ སཱ ཨིཊྛ-སདྡཔརིཡཱཡསཱདྷིཏཱ;

སམྨུལ༹ྷཱ མཱུལ༹ྷཏཱཡེཝ, ནིདྡིཊྛཏྠཱཔི སཱདྷུཀཾ.

ཡསྶཱ སམྦནྡྷབཱཧུལྱཱ, ནཱམཾ སཱ པཱརིཧཱརིཀཱི;

ཨེཀཙྪནྣཱ བྷཝེ བྱཉྫཱ-དྷེཡྻཾ ནིསྶཡགོཔནཱ.

སཱ བྷཝེ ཨུབྷཡཙྪནྣཱ, ཡསྶཱ ཨུབྷཡགོཔནཱ;

སཾཀིཎྞཱ ནཱམ སཱ ཡསྶཱ, ནཱནཱལཀྑཎསངྐརོཏི.

ཨཡཾ པནེཏྠ ཨཏྠོ – པདསནྡྷིནཱ པདཱནཾ སནྡྷཱནཏོ གུལ༹ྷཏྠཱ ཨཔཱཀཊཏྠཱ སམཱགཏཱ ནཱམ སིཡཱ. གུལ༹ྷཏྠཱཏི པསིདྡྷཱནུཝཱདེན ཨཔསིདྡྷཱ སམཱགཏཱ ཝིདྷཱིཡཏེ. ཨིཏོ པརམྤི ཨནུཝཱདཱནུཝཱདྱབྷཱཝོ ཨེཝཾ ཝེདིཏབྦོ. ཡཏྠ པཧེལི༹ཀཱཡཾ ཨཉྙཏྠ རུལ༹ྷེན སདྡེན ཨཉྙསྨིཾ ཨཏྠེ པསིདྡྷེན རུལ༹ྷིསདྡེན ཝཉྩནཱ ཝཉྩིཏཱ ནཱམ སིཡཱ.

ཨཏིབྱཝཧིཏཔྤཡོགཱ ¶ ཨཏིསཡེན ཨནྟརིཏཔཡུཛྫམཱནཔདཡུཏྟཱ ཏཏོཡེཝ མོཧཀཱརིནཱི སམྨོཧཀཱརིཀཱ པཧེལི༹ཀཱ ཨུཀྐནྟཱ ནཱམ. ཡསྶཱ པཧེལི༹ཀཱཡ པདཱཝལི པདཔནྟི དུབྦོདྷཏྠཱ དུརནུབོདྷཱབྷིདྷེཡྻཱ, སཱ པམུསྶིཏཱ ནཱམ.

ཨམུཁྱཏྠཱརོཔཱཧིཏཔདཱ ཨཔྤདྷཱནཏྠེ མུཁྱཏྠཔཀཱསཀསདྡཱནཾ ཀིཉྩི སདྷམྨཾ ནིསྶཱཡ ཨཱརོཔནཏོ ཨུཔཊྛིཏཔདཡུཏྟཱ སམཱནརཱུཔཱ ནཱམ སིཡཱ. པཙྩཡཱདཱིཧི པཙྩཡཱདེསཱདཱིཧི ཀཐཉྩིཔི ཡེན ཀེནཙི པཀཱརེན ཛཱཏསདྡཱ ནིཔྥནྣསདྡཱ ཕརུསཱ ནཱམ.

ཡཏྠ ཡསྶཾ པཧེལི༹ཀཱཡཾ སངྑྱཱནཾ གཎནཾ ཝུཏྟམཔི བྱཱམོཧཀཱརཎཾ ཧོཏི, སཱ པཧེལི༹ཀཱ སངྑྱཱཏཱ ནཱམ སིཡཱ. ཡཏྠ ཡསྶཾ པཧེལི༹ཀཱཡཾ ཝཱཀྱཏྠོ སམུདཱཡཏྠོ ཨཉྙཐཱ ཨཉྙེན པཀཱརེན ཨཱབྷཱསཏེ ཝིཉྙཱཡཏེ, སཱ པཀཔྤིཏཱ ནཱམ.

ཡསྶཱ པཧེལི༹ཀཱཡ ནཱམེ པཡུཏྟཱབྷིདྷཱནེ ནཱནཏྠཀཔྤནཱ ཝིཝིདྷཱབྷིདྷེཡྻཀཔྤནཱ སམྦྷཝཏི, སཱ པཧེལི༹ཀཱ ནཱམནྟརིཀཱ ནཱམ. ཏུལྱཏྠསུཏིཧེཏུཏོ སམཱནཏྠསདྡཱནཾ པཡོགཧེཏུཡཱ ཨཝཊྛིཏཉྙཏྠཱ པཏིཊྛིཏཨཉྙཏྠཱ ཧོཏི, སཱ ནིབྷཱུཏཱ ནཱམ.

ཡཱ པཧེལི༹ཀཱ ཨིཊྛསདྡཔརིཡཱཡསཱདྷིཏཱ ཨིཙྪིཏཏྠསདྡསྶ ཝེཝཙནེཧི ནིཔྥཱདིཏཱ ཧོཏི, སཱ སམཱནསདྡཱ ནཱམ. སཱདྷུཀཾ ནིདྡིཊྛཏྠཱཔི དསྶིཏཨཏྠཡུཏྟཱཔིཡཱ མཱུལ༹ྷཏཱཡེཝ སམྨོཧབྷཱཝཏྠཾ ཨེཝ བྷཝཏི, སཱ སམྨུལ༹ྷཱ ནཱམ.

ཡསྶཱ པཧེལི༹ཀཱཡ ཝིརཙནེ ནཱམཾ དསྶིཡམཱནཾ ནཱམཾ སམྦནྡྷབཱཧུལྱཱ སམྦནྡྷསྶ བཧུལབྷཱཝཏོ བྷཝཏི, སཱ པཱརིཧཱརིཀཱི ནཱམ. ཡསྶཱ ཨཱདྷེཡྻཾ བྱཉྫ ཨབྷིབྱཉྫིཡ པཀཱསེཏྭཱ ¶ ནིསྶཡགོཔནཱ ཨཱདྷཱརགུཏྟི བྷཝཏི, སཱ ཨེཀཙྪནྣཱ ནཱམ.

ཡསྶཱ པཡོགེ ཨུབྷཡགོཔནཱ ཨུབྷིནྣམཱདྷཱརཱདྷེཡྻཱནཾ གོཔནཱ བྷཝཏི, སཱ ཨུབྷཡཙྪནྣཱ ནཱམ. ཡསྶཱ ནཱནཱལཀྑཎསངྐརོ སམཱགཏཱདིནཱནཱཝིདྷལཀྑཎཱནཾ སངྐརོ ཧོཏི, སཱ སཾཀིཎྞཱ ནཱམ སིཡཱ.

ཨིདཱནི སམཱགཏཱདཱིནཾ ལཀྑིཡཾ ཀམེན ཨེཝཾ ཉཱཏབྦཾ –

‘‘པབྷཝཱ’ནཏཝིཏྟིཎྞཱ, ཏཝཱ’ཎཱ མཧཏཱི སཏཱི;

ཙིརཱཡ ཛཡཏཾ ནཱཐ, པཧུཏཕལསཱདྷིནཱི’’ཏི.

ཨཡཾ སམཱགཏཱ.

ནཱཐ ཏཝ པབྷཝཏོ པཊྛཱཡ ནཏཝིཏྟིཎྞཱ ཨོཎཏཝསེན པཏྠཊཱ, ཨེཝཾ སཏི ནདཱི ཝིཡ དིསྶཏི. པབྷཝ པཀཊྛཏྟ སོབྷཱཝནྟ. བྷོ ནཱཐ ཏཝ ཏུཡ྄ཧཾ མཧཏཱི སཏཱི མཧནྟཱི སམཱནཱ ཨཱཎཱ ཨཱནཏཝིཏྟིཎྞཱ ཨཏྟནི ནཏེསུ ཛནེསུ པཏྠཊཱ པཧུཏཕལསཱདྷིནཱི བཧུལཏྠནིཔྥཱདནཱི ཙིརཱཡ ཙིརཀཱལཾ ཛཡཏཾ ཨུཀྐཾསབྷཱཝེན པཝཏྟཏུ. ཨེཏྠ པབྷཝཨཱནཏཨིཏིསནྡྷིནཱ ཨཏྠོ གུལ༹ྷོ.

‘‘བྷདྡམེཝོ’པསེཝེཡྻ, ཝིདྷཱུཏམདཀིབྦིསཾ;

སམྤཱཔཡེ པུརཾ ཁེམཾ, ས དནྟོ’ཏྟནིསེཝིཏ’’ནྟི.

ཨཡཾ ཝཉྩིཏཱ.

ཝིདྷཱུཏམདཀིབྦིསཾ ཝིནཱསིཏམདདོསཾ བྷདྡམེཝ མནྡཔིཡ [པིནྡཔིསྶ (ཀ.)] – བྷདྡཛཱཏིཀེསུ ཧཏྠཱིསུ བྷདྡཛཱཏིཀཧཏྠིམེཝ ཨུཔསེཝེཡྻཱཏི ཝུཏྟཾ ཝིཡ དིསྶཏི. བྷདྡམེཝ ཨུཏྟམཔུརིསམེཝ སེཝེཡྻཱཏི ཨཏྠོ. སེཝནཾ ཀིམཏྠནྟི ཙེ? ཧཏྠིཔཀྑེ དནྟོ སིཀྑིཏོ སོ ཧཏྠི ཨཏྟནིསེཝིཏཾ ཨཏྟཱནཾ བྷཛིཏཾ ཛནཾ ཁེམཾ ནིབྦྷཡཾ པུརཾ ནགརཾ སམྤཱཔེཏི. པུརིསཔཀྑེ པན ¶ དནྟོ དམིཏོ སོ ཨརིཡཔུགྒལོ ཨཏྟནིསེཝིཏཾ ཨཏྟཱནམུཔསེཝིཏཾ ཛནཾ ཁེམཾ ནིདྡུཀྑཾ པུརཾ ནིབྦཱནཔུརཾ པཱཔེཏི. ཨེཏྠ ཀཝིཙྪིཏཨུཏྟམཏྠཏོ ཨཉྙེན ཧཏྠིཨཏྠེ རུལ༹ྷེན སདྡེན ཝཉྩནཱ ནཱམ.

‘‘བཧུགུཎེ པཎམཏི, དུཛྫནཱནཾཔྱཡཾ ཛནོ;

ཧིཏཾ པམུདིཏོ ནིཙྩཾ, སུགཏཾ སམནུསྶར’’ནྟི.

ཨཡཾ ཨུཀྐནྟཱ. ཨིམསྶཏྠོ ཨུཔརི ཨཱགམིསྶཏི.

བྱཱཀིཎྞདོསཏྟེ སཏིཔི པཧེལི༹ཀཱརུལ༹ྷཏྟཱ ཨེསཱ ཨིཊྛཱ. ཝུཏྟཉྷི ‘‘པཧེལི༹ཀཱཡམཱརུལ༹ྷཱ, ན ཧི དུཊྛཱ ཀིལིཊྛཏཱ’’ཏི. ཨིཧ སམྦནྡྷཱིཔདཱནཾ ཨཊྛཱནཊྛཱཔནེན བྱཝཧིཏཏྟཾ ཧོཏི.

‘‘མུཁཕུལླཾ གིངྒམཀཾ, ནིཡུརུགྒཏྠནུནྣཏཾ;

པཊཙྩརཱི ཝརཾ པོསོ, བྷཱིརུཡཱ དྷཱརཡནྟིཡཱ’’ཏི.

ཨཡཾ པམུསྶིཏཱ.

མུཁཕུལླཾ ཏིལཀཱདིཾ གིངྒམཀཾ ཨེཝཾནཱམཀཾ པསཱདྷནཾ ནིཡུརུགྒཏྠནུནྣཏཾ ནིཡུརཾ ཝལཡཾ, ཨུགྒཏྠནཾ པཡོདྷརཔཊཾ, ཨུནྣཏཾ ནལཱཊཔཊཱདིཀཾ, མུཁཏོ ཨུནྣཏཱབྷརཎཉྩ དྷཱརཡནྟིཡཱ བྷཱིརུཡཱ ཨིཏྠིཡཱ པཊཙྩརཱི ཛིཎྞཝཏྠནིཝཱསཱི པོསོ པུརིསོ ཝརཾ ཨུཏྟམོ. ཨེཏྠ བཧུཔཡོགརཧིཏེཧི སདྡེཧི རཙིཏཏྟཱ ཨཏྠསྶ དུརཝབོདྷཏཱ.

‘‘ནཝ’གྒརཏནཱན’སྨིཾ, དིསྶནྟི རཏནཱཀརེ;

པུརིསཱནེཏྠ ཨཊྛནྣཾ, ཨཊྛཱ’སཱདྷཱརཎཱ’པར’’ནྟི.

ཨཡཾ སམཱནརཱུཔཱ.

ཨསྨིཾ རཏནཱཀརེ ཨགྒརཏནཱནི ནཝ དིསྶནྟི, ཨེཏྠ ཨིམེསུ རཏནེསུ ཨཊྛ རཏནཱནི ཨཊྛནྣཾ པུརིསཱནཾ ཨསཱདྷཱརཎཱནི, ཨཔརཾ རཏནཾ སཱདྷཱརཎཾ. ཨིམཱནི ནཝ ལོཀུཏྟརཱནི ཙིཏྟཱིཀཏཱདིཨཏྠེན ‘‘རཏནཱནཱི’’ཏི ཙ ཏཔྤབྷཝོ སམྨཱསམྦུདྡྷོ ¶ ‘‘ཨཱཀརོ’’ཏི ཙ ཀཔྤིཏོཏི ཨམུཁྱཏྠེསུ རཏནཱདིསདྡཱནམཱརོཔནཾ ཧོཏི.

‘‘ཝིནྡནྟི དེཝགནྡྷབྦཱ, ཧིམཝནྟམཧཱཏལེ;

རསཝནྟེ སརེ སཏྟ, ན ནཱགཱཔི ཨུཔོསཐཱ’’ཏི.

ཨཡཾ ཕརུསཱ.

ཧིམཝནྟམཧཱཏལེ ཧིམཱལཡསྶ མཏྠཀེ རསཝནྟེ སོདཀེ སཏྟ སརེ ཨནོཏཏྟཱདིཀེ དེཝགནྡྷབྦཱ ཝིནྡནྟི སེཝནྟི, ཨུཔོསཐཱ ནཱགཱཔི ན ཝིནྡནྟི. ཨཡམཔརཏྠོ. ཧིམཝནྟམཧཱཏལེ ཙནྡརཾསིཡུཏྟེ མཧཱཔཱསཱདཏལེ དེཝགནྡྷབྦཱ ཀཱིལ༹མཱནཱ གནྡྷབྦཱ རསཝནྟེ མདྷུརགུཎཡུཏྟེ སཏྟ སརེ ཝཱིཎཱཡ ཚཛྫཱདིཀེ སཏྟ སརེ ཝིནྡནྟི, ནཱགཱཔི ཨརིཡཱཔི ཨུཔོསཐཱཔི ཨུཔཝུཏྠཱཔི ན ཝིནྡནྟི ནཱནུབྷཝནྟི. ཨེཏྠ དིབྦནྟཱིཏི དེཝཱ. ཨུཔོསཐོ ཨེཏེསམཏྠཱིཏི ཨུཔོསཐཱཏི ཝིགྒཧོ. ལཀྑཎཀྐམཏོ པསིདྡྷཔཙུརཔཡོགཏོ ཨཉྙདཏྠཱ ཡེན ཀེནཙི ལེསེན པཙྩཡཱདཱིནཾ ཛཱཏསདྡསྶ ཨཏྠིཏཱ.

‘‘གཱིཏསདྡེ སརཱ དྭེ དྭེ, དྭེ ཚཛྫཉྙཏྲ ཚསྶརཱ;

པཉྩཝཎྞཾ ཡཐཱ ཙཀྑུ, ཚབྦཎྞཱ ནཱསིཀཱ ཏཐཱ’’ཏི.

ཨཡཾ སངྑྱཱཏཱ.

གཱིཏསདྡེ སརཱ དྭེ ཧོནྟི, ཚཛྫ’ཉྙཏྲ ཚཛྫཏོ ཨཉྙཏྲ ཚཛྫཾ ཝཛྫེཏྭཱ ཨུསབྷོ གནྡྷཱརོ མཛ྄ཛྷིམོ པཉྩམོ དྷེཝཏོ ནིསཱདོཏི. ཨེཏྠ ཡུགལ༹ཏོ དྭེ དྭེ ཚསྶརཱ ཚསརཝནྟོ. ཡཐཱ ཙཀྑུ པཉྩཝཎྞཾ ཧོཏི, ཏཐཱ ཨེཝཾ ནཱསིཀཱ ཚབྦཎྞཱ ཧོཏི, གཱིཏསདྡེ ཨཱིཀཱརཨཀཱརསརདྭཡསབྦྷཱཝཏོ ཙ ཚཛྫཾ ཋཔེཏྭཱ ཨུསབྷཱདཱིསུ སརཱནཾ ཏིཝིདྷཏྟཱ ཙ ‘‘ཙཀྑཱུ’’ཏི སརབྱཉྫནཝསེན པཉྩཝཎྞཱནཾ སབྦྷཱཝཏོ ཙ ‘‘ནཱསིཀཱ’’ཏི ཚནྣཾ སབྦྷཱཝཏོ ཙ ཨེཝཾ ཝུཏྟཾ. ཨེཏྠ ཝུཏྟསངྑྱཱགཱིཏཱདིསདྡསནྣིཊྛཱནཏོ སམྨོཧཀཱརིནཱི ཧོཏི.

‘‘པཱཏུ ¶ ཝོ ཨུདིཏོ རཱཛཱ, སིརིམཱ རཏྟམཎྜལོ;

སཀནྟིགཧནཀྑཏྟ-སངྒྷཡུཏྟོ སུལཀྑཎོ’’ཏི.

ཨཡཾ པཀཔྤིཏཱ.

སིརིམཱ སིརིམནྟོ རཏྟམཎྜལོ ཨནུརཏྟཛནཔདམཎྜལོ, ཨནུརཏྟཨམཙྩམཎྜལོ ཝཱ སཀནྟིགཧནཀྑཏྟསངྒྷཡུཏྟོ སཀསྶ ཨཏྟནོ ཨནྟེ སམཱིཔེ གཧནེཧི ཨཝིརལེ༹ཧི ཁཏྟསངྒྷེཧི ཁཏྟིཡསམཱུཧེཧི ཡུཏྟོ སཾཡུཏྟོ སུལཀྑཎོ པསཏྠཔུརིསལཀྑཎོ ཨུདིཏོ པསིདྡྷོ རཱཛཱ ནརིནྡོ ཝོ ཏུམྷེ པཱཏུ རཀྑཏཱུཏི ཨཡཾ ཨནདྷིཔྤེཏཏྠོ. སིརིམཱ ‘‘ལཀྑིཡཱ ཝཱསཊྛཱནཏྟཱ’’ཏི ཝུཏྟཏྟཱ སིརིམནྟོ རཏྟམཎྜལོ ཨུགྒམནེ རཏྟམཎྜལོ སཀནྟིགཧནཀྑཏྟསངྒྷཡུཏྟོ ཀནྟིསཧིཏེཧི གཧནཀྑཏྟཏཱརགཎེཧི ཡུཏྟོ སུལཀྑཎོ སུཊྛུ སསལཀྑཎོ ཨུདིཏོ ཨུགྒཏོ རཱཛཱ ཙནྡོ ཝོ ཏུམྷེ པཱཏཱུཏི ཨུབྷཡཔཀྑསྶ སཱདྷཱརཎགུཎགུཎཱིཔདཔརིགྒཧེན ཨིདྷ ཝཱཀྱཏྠསྶ ཨཉྙཐཱ དིསྶམཱནཏཱ ཧོཏི.

‘‘ཝུཙྩཏཱ’དོ ཨིསིཏྱེ’ཀོ, སུམཧནྟོཔཀཱརཝཱ;

སནཱཏནོ ཙ ན ཨིསི, ན སཁཱ ན སནཱཏནོ’’ཏི.

ཨཡཾ ནཱམནྟརིཀཱ.

ཨེཀོ ཨཱདོ པུབྦེ ‘‘ཨིསཱི’’ཏི ཝུཙྩཏི, སུམཧནྟོཔཀཱརཝཱ ཨཏིམཧནྟོཔཀཱརསམནྣཱགཏོ སནཱཏནོ ཙ སསྶཏོ ཙ ཧོཏི, ཏཐཱཔི ན ཨིསི ཨིསི ནཱམ ན ཧོཏི, ན སཁཱ མིཏྟོཔི ན ཧོཏི, ན སནཱཏནོ སསྶཏོཔི ན ཧོཏི, ཨཡཾ གམྱམཱནཏྠོ. སུམཧཱ ཨཏིམཧནྟོ ཨེཀོ ཨཱདོ ནཱམཱདིམྷི ཨིསཱིཏི ཝུཙྩཏི, ཨནྟོ མཛ྄ཛྷེ པཀཱརཝཱ པ-ཀཱརེན སམནྣཱགཏོ, སནཱཏནོ ཙ སསྶཏོ ཙ ཧོཏི, ཨིསིཔི ནཱམ ན ཧོཏི, མིཏྟོཔི ན ཧོཏི, སོ ནཱཏནོ ཏནཨིཏི ཨཀྑརདྭཡརཧིཏོ ན ¶ ཧོཏི. ཨཱདིམཛ྄ཛྷཱནཾ ཝུཏྟཏྟཱ ཨནྟེཏི ཉཱཡཏི, ‘‘ཨིསིཔཏནཝིཧཱརོ’’ཏི གཧེཏབྦཾ. ཏཏྠ ཨིསིཔཏནནཱམེན ཨིསིཨཱདཱིནཾ གམྱམཱནཏྠཏྟཱ ནཱནཏྠཀཔྤནཱ ཧོཏི.

‘‘དྷཱཝནྟཾ ཨུདཡཱ ཨཏྠཾ, མུཧུཏྟཾ ན ནིཝཏྟཏི;

ན ཙནྡམཎྜལཾ ཨེཏཾ, ནཱཔི ཨཱདིཙྩམཎྜལ’’ནྟི.

ཨཡཾ ནིབྷཱུཏཱ.

ཨུདཡཱ ཨུདཡཏོ པབྷུཏི ཨཏྠཾ ཡཱཝ ཨཏྠཾ དྷཱཝནྟཾ ཛཝནྟཾ མུཧུཏྟཾ མུཧུཏྟཀཱལཾ ན ནིཝཏྟཏི ན པུནཱཝཏྟཏི. ཨེཏཾ ཙནྡམཎྜལམྤི ན ཧོཏི, ཨཱདིཙྩམཎྜལམྤི ན ཧོཏི. ཨུདཡཱ པཊིསནྡྷིཏོ ཨཏྠཾ ཡཱཝཙུཏི. དྷཱཝནྟནྟི ཨཱཡུཀིཙྩཏོ ཨཱཡུཙནྡཱདཱིནམཏྠཱནཾ, ཏཔྤཀཱསཀསདྡཱནཉྩ ཏུལྱཏྟཱ ཨེཏྠ པཏིཊྛིཏཙནྡཱདིཨཏྠནྟརཱནཾ སམྦྷཝོ.

‘‘དེཝིཾ ཀིཏྟིམཧཱིནཱམཾ, ཀལཱ༹རཏྠཝ྄ཧཡཾ པུརིཾ;

ཧིཏྭཱ ན སརི སོ དྷཱིརོ, ཀརོནྟོཔྱུ’ཡྻམཝ྄ཧཡ’’ནྟི [ཀརོནྟོམུཏྟམཝ྄ཧཡནྟི (ཀ.)].

ཨཡཾ སམཱནསདྡཱ.

ཀིཏྟིམཧཱིནཱམཾ ཀིཏྟིམཧཱིནཾ དྭིནྣཾ ནཱམེན སམནྣཱགཏཾ དེཝིཾ ཨགྒམཧེསིཾ ཀལཱ༹རཏྠཝ྄ཧཡཾ པུརིཾ ཀལཱ༹རཨཏྠཱནཾ དྭིནྣཾ ནཱམེན སམནྣཱགཏཾ པུརིཾ ནགརཉྩ སོ དྷཱིརོ ཧིཏྭཱ པརིཙྩཛིཏྭཱ ཨུཡྻམཝ྄ཧཡཾ ཨུཡྻམནཱམེན སམནྣཱགཏཾ ཀརོནྟོ ཨཔི ན སརི སམྤཏྟིཾ ནཱནུསརི, ཡསོདྷརཱདེཝིཉྩ ཀཔིལཝཏྠུཔུརིཉྩ ཧིཏྭཱ ཝཱིརིཡསངྑཱཏཔདྷཱནཾ ཀརོནྟོ མཧཱསཏྟོ སམྤཏྟིཾ ན སརི, ཨེཏྠཱབྷིམཏཡསོདྷརཱདིསདྡཱནཾ པརིཡཱཡེཧི ཀིཏྟིམཧཱིསདྡཱདཱིཧི རཙིཏཏཱ.

‘‘ཙཏུདྡིསཱམུཁཱ བནྡྷཱ, ཙཏྟཱརོ སིནྡྷཝཱ སཡཾ;

པརིབྷུཉྫནྟི ནིཀྑིཏྟཾ, ཏིཎཾ མཛ྄ཛྷེ ཡཐཱསུཁ’’ནྟི.

ཨཡཾ སམྨུལ༹ྷཱ.

སིནྡྷཝཱ ¶ ཙཏྟཱརོ ཨསྶཱ ཙཏུདྡིསཱམུཁཱ ཡཐཱ ཙཏུདྡིསཱསམྨུཁཱ ཧོནྟི, ཏཐཱ བནྡྷཱ མཛ྄ཛྷེ ནིཀྑིཏྟཾ ཏིཎཾ སཡཾ ཡཐཱསུཁཾ པརིབྷུཉྫནྟི, ཨཉྙམཉྙཾ པིཊྛིཾ ཀཏྭཱ བནྡྷཱ ཝིཡ ཁཱཡཏི, ཏེ པན སམྨུཁཾ ཀཏྭཱ བནྡྷཱ ཧོནྟི. ཨེཏྠ ‘‘ཙཏུདྡིསཱམུཁཱབནྡྷཱ’’ཏི ནིདྡིཊྛཏྟཱ པིཊྛིཾ ཀཏྭཱ བནྡྷཱཏི སམྨུལ༹ྷཏཱ ཧོཏི.

‘‘ཛནོ ཛཱིཝནཛཱནནྡ-ཀརབནྡྷུསྶ བྷཱསིཏཾ;

སཀྐརོནྟོཝ པཔྤོཏི, པུཉྙཱརིཀྑཡགོཙརེ’’ཏི.

ཨཡཾ པཱརིཧཱརིཀཱི.

ཛཱིཝནཛཱནནྡཀརབནྡྷུསྶ ཛཱིཝནཏོ ཨུདཀཏོ ཛཱཏཱནཾ པདུམཱནཾ ཨཱནནྡཀརསྶ སཱུརིཡསྶ བནྡྷུསྶ སམྨཱསམྦུདྡྷསྶ བྷཱསིཏཾ ཝཙནཾ སཀྐརོནྟོ པཱུཛེནྟོ ཛནོ པུཉྙཱརིཀྑཡགོཙརེ པུཉྙཱནཾ པཊིཔཀྑཏྟཱ པུཉྙཱརིསངྑཱཏཱནཾ ཨཀུསལཱནཾ ཁཡསྶ ནིམིཏྟབྷཱུཏཾ ནིབྦཱནམཱརམྨཎཾ ཀཏྭཱ ཨུཔྤནྣེ མགྒཕལེ པཔྤོཏི པཱཔུཎཱཏི. ཨེཏྠ ཛཱིཝནཛཱནཾ ཨཱནནྡཀརསྶ བནྡྷུསྶེཏི ཙ, པུཉྙཱརཱིནཾ ཁཡནིམིཏྟཾ ཨཱརམྨཎཾ ཀཏྭཱ པཝཏྟེཏི ཙ ཨིམིནཱ བུདྡྷོ མགྒཕལཱ ཙ པཱརམྤརིཡེན སམྦནྡྷེན ཝུཏྟཱཏི སམྦནྡྷཱནཾ བཱཧུལླབྷཱཝོ.

‘‘ན གཎྷཱཏི མཧནྟམྤི, སདྡཾ ན ཙ ཝིབྷཱུསནཾ;

ཙཏུཔྤདསྶ ཀསྶཱཔི, ཀཎྞོཡཾ ན ཀིལཱཕལོ’’ཏི.

ཨཡཾ ཨེཀཙྪནྣཱ.

ཀསྶཱཔི ཙཏུཔྤདསྶ ཀཎྞོ མཧནྟམྤི སདྡཾ ན གཎྷཱཏི, ཨཱརམྨཎཾ ན ཀརོཏི, ཝིབྷཱུསནམྤི ན གཎྷཱཏི. ཏཐཱཔི ཨཡཾ ཀཎྞོ ཨཕལོ ན ཀིལ, སཕལཏོ ནིཔྥལོ ན ཧོཏི ཀིར. ཨསྶཀཎྞོ རུཀྑོ. ཨེཏྠ ཀཎྞོཏི ཨཱདྷེཡྻཾ ཀཏྭཱ ཏདཱདྷཱརསྶ ཨཝཙནཏོ ནིསྶཡགུཏྟི.

‘‘ཨལངྐརོནྟོ ¶ བྷུཝནཾ, སསྶིརིཀོ སདེཝཀཾ;

ཀསྨིཾ སཉྫཱཏསཾཝདྡྷོ, ཀོ ཀེན ནུཔལིམྤཏཱི’’ཏི.

ཨཡཾ ཨུབྷཡཙྪནྣཱ.

སསྶིརིཀོ སདེཝཀཾ བྷུཝནཾ ཨལངྐརོནྟོཏི བུདྡྷོ ཝིཡ ཁཱཡཏི. བྷུཝནཾ བྷུཝནསངྑཱཏཾ ཀཾ ཛལཾ སདཱ ཨེཝ ཨལངྐརོནྟོ སསྶིརིཀོ ལཀྑིཡསམནྣཱགཏོ ཀསྨིཾ ཛལེ སཉྫཱཏསཾཝདྡྷོ ཀོ ཀཏརོ ཀེན ཛལེན ན ཨུཔལིམྤཏི ན ལིམྤཏི. པདུམོཏི ཝིསཛྫནཾ. པདུམོ ཧི པུཾནཔུཾསཀལིངྒོ. ཨིཧ ཛལཔདུམཱནཾ དྭིནྣམྤི ཚཱདིཏཏྟཱ ཨུབྷཡཙྪནྣཱ ནཱམ.

‘‘ཨཱདོ སོཡེཝ ཡོ ཨནྟེ, མཛ྄ཛྷིམསྶཱདི མཛ྄ཛྷིམོ;

སིདྡྷནྟཱདཱིསུ ཝཏྟནྟཾ, ཨསངྑཏཔདཾ ཝདཱ’’ཏི.

ཨཡཾ སཾཀིཎྞཱ.

ཨནྟེ ཨཝསཱནེ ཡོ ཧོཏི, ཨཱདོཔི སོཡེཝ ཧོཏི, མཛ྄ཛྷིམསྶ ཨཱདིབྷཱུཏོ མཛ྄ཛྷིམོ ཨེཝ ཧོཏི, སིདྡྷཾ ནིཔྥནྣཾ ཏཱདཱིསུ ཨརིཡེསུ ཝཏྟནྟཾ ཨསངྑཏཔདཾ ཝད ཀཐེཧཱིཏི ཨཡམཔརཏྠོ. ཨཱདོ ཨཱདིམྷི སོཡེཝ སཀཱརོ ཨེཝ ཨནྟེ པརིཡོསཱནེ ཡོ ཡཀཱརོཡེཝ, མཛ྄ཛྷིམོ མཛ྄ཛྷིམཝཎྞོ མཛ྄ཛྷིམསྶ སདྡསྶ ཨཱདི མཀཱརོ, སིདྡྷནྟཱདཱིསུ མཏསམཡཀཱལཱདཱིསུ ཝཏྟནྟཾ ཝཱཙཀབྷཱཝེན པཝཏྟནྟཾ ཨསངྑཏཔདཾ སངྑཏཏོ ཨཉྙཏྟཱ ཨསངྑཏབྷཱུཏཾ པཉྙཏྟིཾ ཝད ཀཐེཧཱིཏི. སམཡསདྡོ ཧི ནཱམཔཉྙཏྟི. ཨེཏྠ སིདྡྷནྟསདྡེན ཨཱདིསདྡསྶ སངྒཧིཏཏྟཱ ཏཱདིཨཏྠོ ལབྦྷཏཱིཏི ཨཏྠསྶ གུལ༹ྷཏཱཡ སམཱགཏཱལཀྑཎེན ཙ ‘‘སོ’’ཏི ‘‘ཡོ’’ཏི ‘‘ཨསངྑཏཔད’’ནྟི ཨཉྙཏྠརུལ༹ྷསདྡེན ཝཉྩིཏཏྟཱ ཝཉྩིཏཱལཀྑཎེན ཙ སམཡསདྡེ ནཱནཏྠཀཔྤནཏོ ནཱམནྟརིཀཱལཀྑཎེན ཙཱཏི ཏཱིཧིཔི ལཀྑཎེཧི མིསྶིཏོཏི. སེསེསུཔི སཾཀིཎྞཏྟཾ ཨེཝམེཝ ¶ ཝེདིཏབྦཾ. ཏཏྠ ཏཏྠ ཝུཏྟལཀྑཎཱནུསཱརེནེཝ སམཱགཏཱདཱིནཾ ཨནྭཏྠསཉྙཏཱ ཝེདིཏབྦཱ.

༣༤.

དེསཀཱལཀལཱལོཀ-ཉཱཡཱགམཝིརོདྷི ཡཾ;

ཏཾ ཝིརོདྷིཔདཾ ཙེ’ཏ-མུདཱཧརཎཏོ ཕུཊཾ.

༣༤. ‘‘དེསི’’ཙྩཱདི. དེསོ ཐལཛལདེསཱདི. ཀཱལོ རཏྟིནྡིཝོ. ཀལཱ ནཙྩགཱིཏཱདཡོ. ལོཀོ ཙརཱཙརབྷཱུཏཔྤཝཏྟི. ཉཱཡོ ཡུཏྟི. ཨཱགམོ ཨིདྷ བུདྡྷཝཙནཾ. ཨཉྙཏྠ ཏུ སུཏིདྷམྨསཾཧིཏཱ, ཏེ ཙ. ཏེཧི ཝིརོདྷོ ཨསྶ ཨཏྠཱིཏི དེས…པེ… ཝིརོདྷི. ཡནྟི ཨནུཝདིཏྭཱ. ཏཾ ཝིརོདྷིཔདནྟི ཝིདྷཱིཡཏེ. ཨེཏཉྩ པདཾ ཨུདཱཧརཎཏོ ལཀྑིཡཏོ ཕུཊཾ པཱཀཊཾ. ཡཏོ ཛལཛཱདཱིནཾ ཐལཱདཱིསུ པཱཏུབྷཱཝཱདི, རཏྱཱདཱིསུ སམྦྷཝནྟཱནཾ ཀུསུམཱདཱིནཾ དིཝཱདཱིསུ སམྦྷཝོ ཙ, ‘‘ནཙྩགཱིཏཱདིཙཏུསཊྛིཡཱ ཀལཱསུ བྷིནྣཚཛྫོ ནཱམ སཏྟསརོ’’ཏིཨཱདིནཱ ཀལཱསཏྠཱབྷིཧིཏལཀྑཎཱཏིཀྐམཝིརོདྷོ ཙ, ‘‘ཨགྒིསཱིཏལོ, ནིསྶཱརོ ཁདིརོ’’ཏིཨཱདིནཱ ལོཀསཱིམཱཏིཀྐམོ ཙ, ཝུཏྟཱཡཔཱ’ནརུཔྤཏྟསམུཔྤཏྟིཡཱ མིདྡྷསྶ རཱུཔབྷཱཝཱཔཱདནཱདིཉཱཡཝིརོདྷོ ཙ, ཡཐཱསཀམཱགམེན ཝིརོདྷོ ཙ སུཁེན ཙ སཀྐཱ པཱཀཊཏྟཱ ཝིཉྙཱཏུཾ, ཏཏོ སབྦམེཏཾ ནོདཱཧཊནྟི ཨདྷིཔྤཱཡོ.

༣༤. ཨེཝཾ ཡམཀཔཧེལི༹ཀཱནམདསྶནེ ཀཱརཎཾ ཝཏྭཱ ཨིདཱནི ཨུདྡེསཀྐམེན སམྤཏྟཝིརོདྷིདོསཾ ‘‘དེསཀཱལི’’ཙྩཱདིནཱ ཝདཏི. ཡཾ པདཾ དེསོ ཐལཛལཔབྦཏཱདི. ཀཱལོ རཏྟིནྡིཝོ ཧེམནྟཱདིཝསེན ཏིཝིདྷོ, ཝསནྟཱདིཝསེན ཚབྦིདྷོ. ཀལཱ ནཙྩགཱིཏཱདིཙཏུསཊྛི. ལོཀོ ཐཱཝརཛངྒམབྷཱུཏཔཝཏྟིསངྑཱཏོ. ཉཱཡོ ཡུཏྟི. ཨཱགམོ ཨིཧ བུདྡྷཝཙནཾ, ཨཉྙཏྠ པན སུཏིདྷམྨསཾཧིཏོ ཙ. ཏེཧི ཝིརོདྷོ ཨསྶ ཨཏྠཱིཏི དེས…པེ… ཝིརོདྷི. ཏཾ ཝིརོདྷིཔདཾ ནཱམ. ¶ ཨེཏཾ ཝིརོདྷིཔདཾ ཨུདཱཧརཎཏོ ལཀྑིཡཏོ ཕུཊཾ པརིབྱཏྟཾ. ཝསྶིཀཛཱཏིསུམནཱདཱིནཾ ཛལཛཱདིབྷཱཝོ ཙ, པདུམཀུམུདཱདཱིནཾ ཐལཛཱདིབྷཱཝོ ཙ, རཏྟིཨཱདཱིསུ ལབྦྷམཱནཱནཾ ཀུམུདཱདཱིནཾ དིཝཱདཱིསུ སམྦྷཝོ ཙ, ནཙྩགཱིཏཱདིཙཏུསཊྛིཡཱ ཀལཱསུ ‘‘ཚཛྫོ ཨུསབྷོ གནྡྷཱརོ མཛ྄ཛྷིམོ པཉྩམོ དྷེཝཏོ ནིསཱདོ’’ཏི དསྶིཏསཏྟསརཱནམེཀདེསསྶ ཚཛྫསྶ བྷིནྣསཏྟསརོ ཚཛྫོ ནཱམཱཏི སམུདཱཡཝསེན ཝོཧཱརཀརཎཱདཱིཧི སཏྠཱགཏཏཾ, ལཀྑཎཱཏིཀྐམཉྩ, ‘‘ཨགྒི སཱིཏལོ, ཙནྡནཾ ཨུཎྷཾ, ཁདིརརུཀྑོ ནིསྶཱརོ, ཨེརཎྜོ སསཱརོ’’ ཨིཙྩཱདིནཱ ལོཀམརིཡཱདཱཏིཀྐམོ ཙ, མིདྡྷསྶ ཨརཱུཔབྷཱཝུཔཔཏྟིཡཱ ཝུཏྟཱཡཔི རཱུཔབྷཱཝསཱདྷནསདིསཡུཏྟིཝིརོདྷིཀཐནཉྩ, ཡཐཱསཀམཱགམམཏིཀྐམྨ ཀཐནཉྩཱཏི སབྦེསཾ ཝིརུདྡྷསབྷཱཝསྶ པཱཀཊཏྟཱ ཨུདཱཧརཎཾ ན དསྶཡིསྶཱམཱཏི ཨདྷིཔྤཱཡོ. ཨིམེསམེཝ དེསཱདིཝིརོདྷཱིནམཝིརུདྡྷཏྟཾ ཨེཏྠེཝ ཝིརོདྷིཔདདོསཔརིཧཱརེ ‘‘བོདྷིསཏྟཔྤབྷཱཝེནཱ’’ཏིཙྩཱདིནཱ དིསྶཏི. དེས…པེ… གམེཧི ཝིརོདྷོ, སོ ཨསྶ ཨཏྠཱིཏི དེས…པེ… ཝིརོདྷི. ནིནྡཱཡཾ ཨཡམསྶཏྠཱིཏི ཝིཝཙྪིཏཱ.

༣༥.

ཡ’དཔྤཏཱིཏ’མཱནཱིཡ, ཝཏྟབྦཾ ནེཡྻམཱཧུ ཏཾ;

ཡཐཱ སབྦཱཔི དྷཝལཱ, དིསཱ རོཙནྟི རཏྟིཡཾ.

༣༥. ‘‘ཡ’’མིཙྩཱདི. ཨཔྤཏཱིཏཾ སདྡཏོ, ཨཏྠཏོ ཝཱ ཨནདྷིགཏཾ ནཧྱཉྙཐཱཝགམོ གནྠནྟརཱབྷཱཝཏོ. ཝཀྑཏི ཧི ‘‘དུལླབྷཱཝགཏཱི སདྡ-སཱམཏྠིཡཝིལངྒྷིནཱི’’ཏི. ཡཾ ཀིཉྩི པདཾ སམཱནཱིཡ ཨཱནེཏྭཱ ཝཏྟབྦཾ, ཏཾ ནེཡྻམཱཧུ. ཡཐེཏྱུདཱཧརཏི. སབྦཱཔི སཀལཱཔི དིསཱ པུབྦདིསཱདཡོ དས དིསཱ རཏྟིཡཾ རཛནྱཾ དྷཝལཱ ཨུཛྫལཱ རོཙནྟི དིཔྤནྟཱིཏི ཨེཏྟཀེ ནིདྡིཊྛེ ཙནྡམརཱིཙིནོ ཨེཏྠ ནེཡྻཏྟཾ.

༣༥. ཨིདཱནི ནེཡྻདོསམུདཱཧརཏི ‘‘ཡ’’མིཙྩཱདིནཱ. ཡཾ པདཾ ཨཔྤཏཱིཏཾ པདནྟརེན, ཏེནཱབྷིཧིཏཏྠེན ཝཱ ‘‘ཨིམསྶཏྠོཡ’’མིཏི ¶ ཨཝིཉྙཱཏཾ ཨཱནཱིཡ ཝཏྟབྦཾ, ཏཏོཡེཝ པདནྟརམཱནཱིཡ ཝཏྟབྦཾ ཧོཏི, ཏཾ ནེཡྻམཱཧུ ‘‘ནེཡྻདོསོ’’ཏི པོརཱཎཱ ཨཱཧུ. ཡཐཱ ཏཏྠོདཱཧརཎམཱིདིསཾ ‘‘སབྦཱཔི དྷཝལཱ དིསཱ རོཙནྟི རཏྟིཡ’’ནྟི. སབྦཱཔི དིསཱ པུབྦདཀྑིཎཱདཡོ དས དིསཱ དྷཝལཱ སེཏཱ རཏྟིཡཾ རཛནྱཾ རོཙནྟི དིཔྤནྟི. ཨེཏྠ དིསཱཡ ཝིསེསནཾ དྷཝལགུཎཾ ཀེལཱསཀཱུཊསུདྷཱབྷིཏྟིཙནྡརཾསིཨཱདཱིསུ ཀུཏོ སཉྫཱཏམིཏི ཨནིཙྪིཏཏྟཱ ཨཉྙནིཝཏྟནཏྠཾ ཙནྡཀིརཎཱདིཝཱཙཀཔདཾ ཨཱནེཏྭཱ དྷཝལཏཱ ཨིམིནེཏི ཝཏྟབྦཏྟཱ དྷཝལ པདཾ ནེཡྻདོསེན དུཊྛཾ ཧོཏི. པཏཱིཏཾ ཝིཉྙཱཏཾ, ན པཏཱིཏཾ ཨཔྤཏཱིཏཾ. ཨེཏྠ ཨཀཱརོ པསཛྫཔཊིསེདྷེ.

༣༦.

ནེདིསཾ བཧུ མཉྙནྟི, སབྦེ སབྦཏྠ ཝིཉྙུནོ;

དུལླབྷཱ’ཝགཏཱི སདྡ-སཱམཏྠིཡཝིལངྒྷིནཱི.

༣༦. ཨཔྤཏཱིཏཾ ནིཙྪནྟི ཝིཉྙཱུཏི དསྶེཏུམཱཧ ‘‘ནེ’’ཏིཨཱདི. ཨཱིདིསཾ ཨནནྟརེ ཝུཏྟཔྤཀཱརཾ ནེཡྻཾ སབྦེཔི ཝིཉྙུནོ ཉེཡྻཝིདཱུ སབྦཏྠ གཛྫཱདིཀེ ན བཧུ མཉྙནྟི ན སམྦྷཱཝེནྟི ནཔྤཡུཛྫནྟི. ཀིཾ ན བཧུམཉྙནྟཱིཏི ཙེ ཨཱཧ ‘‘དུལླབྷཱ’’ཏིཨཱདི. ཏཐཱ ཧི ཨཝགཏཱི ཨཏྠཱཝགམོ སདྡཾ ཝཱཙཀཾ, སཱམཏྠིཡཉྩ ཉཱཡཾ ཝིལངྒྷཡཏི ཙཛཏི ཨནུཔདསྶནཏོཏི སདྡསཱམཏྠིཡཝིལངྒྷིནཱི དུལླབྷཱ ན ལབྷྱཏེ. ཉཱཡོཔཏྠོ ཝཱ སདྡོཔཏྠོ ཝཱ ཡོཏྠོ ན ཧོཏི. སོ ནཔྤཏཱིཡཏེ ཡཐཱ མནསི ཨཝཊྛིཏམཏྟེནཱཏི ཨཏྠོ. ཏསྨཱ སདྡཏོ, ཨཏྠཏོ ཝཱ པཏཱིཏབྦམནེཡྻཾ, ཏབྦིཔརཱིཏཾ ནེཡྻནྟི ཝིཉྙེཡྻཾ.

༣༦. ཨིམཾ ཨཔྤཏཱིཏཔདཾ ཝིཉྙཱུཧི ནཱབྷིམཏནྟི དསྶེནྟོ ཨཱཧ ‘‘ནེདིས’’མིཙྩཱདི. ཨཱིདིསཾ ཡཐཱཝུཏྟཔྤཀཱརཾ ནེཡྻཾ སབྦེ ཝིཉྙུནོ སབྦཏྠ གཛྫཔཛྫཱདིཀེ ན བཧུ མཉྙནྟི ན སམྦྷཱཝེནྟི ནཔྤཡོཛེནྟི. ཨཝགཏཱི ཨཏྠཱཝབོདྷོ སདྡསཱམཏྠིཡཝིལངྒྷིནཱི ¶ སདྡསངྑཱཏཝཱཙཀཉྩ སཱམཏྠིཡསངྑཱཏཉཱཡཉྩ ཨཏིཀྐམྨ པཝཏྟིནཱི དུལླབྷཱ ཏཱདིསཔཡོགཱབྷཱཝཏོ དུལླབྷཱ ཧོཏི. ཡོ ཨཏྠོ སདྡཱགཏོ, ཉཱཡཱགཏོ ཝཱ ན ཧོཏི, སོ ཀཏྟུནོ མནསི པཏིཊྛིཏམཏྟེན པཏཱིཏོ ན ཧོཏཱིཏི ཏཾ པདཾ ནེཡྻདོསམིཏི སབྦེ ཀཝིནོ པརིཧརནྟཱིཏི ཨདྷིཔྤཱཡོ. བཧུམཱནཾ ཀརོནྟཱིཏི ཝཱཀྱེ བཧུམཉྙནྟཱིཏི ནཱམདྷཱཏུ. སདྡསཱམཏྠིཡཾ ཝིལངྒྷཡཏི སཱིལེནཱཏི སདྡསཱམཏྠིཡཝིལངྒྷིནཱི.

༣༧.

སིཡཱ ཝིསེསནཱཔེཀྑཾ,

ཡཾ ཏཾ པཏྭཱ ཝིསེསནཾ;

སཱཏྠཀཾ ཏཾ ཡཐཱ ཏཾ སོ,

བྷིཡྻོ པསྶཏི ཙཀྑུནཱ.

༣༧. ‘‘སིཡཱ’’ཨིཙྩཱདི. ཡཾ པདཾ ཝིསེསནཾ པཏྭཱ ཨཏྠེན སཧ ཝཏྟཏཱིཏི སཱཏྠཀཾ. ནིབྦིསེསནནྟུ ཝུཏྟཏྠམེཝ ཧོཏི. ཏཾ ཝིསེསནཱཔེཀྑཾ སིཡཱ. ‘‘ཏཾ ཡཐེ’’ཏྱཱདིནཱ ཨུདཱཧརཏི. ‘‘པསྶཏཱི’’ཏི ཝུཏྟེ ‘‘ཙཀྑུནཱ’’ཏི ལབྦྷཏེཝ.

༣༧. ‘‘སིཡཱ’’མིཙྩཱདི. ཡཾ པདཾ ཝིསེསནཾ པཏྭཱ སཱཏྠཀཾ ཨཏྠསཧིཏཾ, ཏདབྷཱཝེ ནིརཏྠཀཾ ཧོཏི, ཏཾ ཝིསེསནཱཔེཀྑཾ ནཱམ སིཡཱ. ཏཾ ཡཐཱ ཏསྶོདཱཧརཎམེཝཾ ‘‘ཏཾ སོ བྷིཡྻོ པསྶཏི ཙཀྑུནཱ’’ཏི. སོ པུརིསོ ཏཾ པུརིསཾ བྷིཡྻོ ཡེབྷུཡྻསཱ ཙཀྑུནཱ པསྶཏི. ཨེཏྠ ‘‘པསྶཏཱི’’ཏི ཝུཏྟེཡེཝ ‘‘ཙཀྑུནཱ’’ཏི ཉཱཡཏི. ཙཀྑུནཱཏི ཝིསེསྱཔདཾ ཝིསེསནཾ ལདྡྷཱཝ སཱཏྠཀཾ ཧོཏི. ཝིསེསནེ ཨཔེཀྑཱ ཨསྶཱཏི ཙ, སཧ ཨཏྠེན ཝཏྟམཱནཾ སཱཏྠཀམིཏི ཙ སམཱསོ.

༣༨.

ཧཱིནཾ ཀརེ ཝིསེསྱཾ ཡཾ, ཏཾ ཧཱིནཏྠཾ བྷཝེ ཡཐཱ;

ནིཔྤབྷཱིཀཏཁཛྫོཏོ, སམུདེཏི དིཝཱཀརོ.

༣༨. ‘‘ཧཱིན’’མིཙྩཱདི ¶ . ཡཾ ཝིསེསནཔདཾ ཝིསེསྱཾ ཝིསེསིཏབྦཾ ཧཱིནཾ ལཱམཀཾ ཀརེ ཀརེཡྻ, ཏཾ ཝིསེསནཔདཾ ཧཱིནཏྠཾ ཧཱིནོ ཨཏྠོ ཡསྶ ཏཾ ཧཱིནཏྠཾ ནཱམ བྷཝེཡྻ. ‘‘ཡཐཱ’’ཨིཏྱཱདིནཱ ཨུདཱཧརཏི. ནིཔྤབྷཱིཀཏོ ཁཛྫོཏོ ཡེན སོ དིཝཱཀརོ པབྷཱཀརོ སམུདེཏི ཨུཔགཙྪཏཱིཏི. ཨེཏྠ ཁཛྫོཏཔྤབྷཱཔཧརཎེ ན ཐུཏི དིཝཱཀརསྶཱཏི.

༣༨. ‘‘ཧཱིནཾ ཀརེ’’ཙྩཱདི. ཡཾ པདཾ ཝིསེསྱཾ ཧཱིནཾ ཀརོཏི, ཏཾ ཧཱིནཏྠཾ བྷཝེ. ཡཐཱ ཏཏྠོདཱཧརཎམེཝཾ ‘‘ནིཔྤབྷཱིཀཏཁཛྫོཏོ, སམུདེཏི དིཝཱཀརོ’’ཏི. པབྷཱརཧིཏཀཏཱ ཁཛྫོཏཱ ཡེན སོ དིཝཱཀརོ སཱུརིཡོ སམུདེཏི ཨུགྒཙྪཏི. ‘‘ནིཔྤབྷཱིཀཏཁཛྫོཏོ’’ཏི ཨིམིནཱ ཝིསེསནེན ལཱམཀཱལོཀལདྡྷཡུཏྟསྶ ཁཛྫོཔནཀསྶ ཨབྷིབྷཝནཔྤཀཱསནཾ སཧསྶརཾསིནོ ནིནྡཱཡེཝ, ན ཐུཏཱིཏི ཝིསེསྱཾ ཧཱིནཏྠཾ ཧོཏི. ཧཱིནོ ཨཏྠོ ཡསྶེཏི ཙ, ནཏྠི པབྷཱ ཨེཏེསནྟི ཙ, ནིཔྤབྷཱ ཀཏཱཏི ཙ, ནིཔྤབྷཱིཀཏཱ ཁཛྫོཏཱ ཡེནཱཏི ཙ ཝིགྒཧོ.

༣༩.

པཱདཔཱུརཎམཏྟཾ ཡཾ, ཨནཏྠམིཏི ཏཾ མཏཾ;

ཡཐཱ ཧི ཝནྡེ བུདྡྷསྶ, པཱདཔངྐེརུཧམྤིཙ.

༣༩. ཧི ཨཔི ཙསདྡཱནཾ པཱདཔཱུརཎམཏྟཏྟཱ ཨནཏྠཀཏྟཾ. ཝིསེསནཝིསེསྱཔདདོསོ.

༣༩. ‘‘པཱདཔཱུརཎི’’ཙྩཱདི. ཡཾ པདཾ པཱདཔཱུརཎམཏྟཾ ཙཏུཏྠཾསསངྑཱཏསྶ པཱདསྶ པཱུརཎམཏྟམེཝ ཧོཏི, ཏཾ ཨནཏྠམིཏི མཏཾ ཉཱཏཾ. ཡཐཱསདྡོ ཝུཏྟཏྠོ. བུདྡྷསྶ པཱདཔངྐེརུཧཾ པཱདམྦུཛཾ ཝནྡེཏི. ཨེཏྠ ཧི ཨཔིཙཱཏི ཨིམེསཾ སམཏྟནཱདིཨཏྠེསུ ཨཔྤཝཏྟིཏོ ཀེཝལཾ པཱདཔཱུརཎམཏྟཏོ ཨནཏྠཀཏྟཾ. མཏྟསདྡོ ཨཝདྷཱརཎེ. ཝིསེསནཝིསེསྱཔདདོསོ.

པདདོསནིདྡེསཝཎྞནཱ ནིཊྛིཏཱ.

ཝཱཀྱདོསནིདྡེསཝཎྞནཱ

༤༠.

སདྡཏོ ཨཏྠཏོ ཝུཏྟཾ, ཡཏྠ བྷིཡྻོཔི ཝུཙྩཏི;

ཏམེཀཏྠཾ ཡཐཱ’བྷཱཏི, ཝཱརིདོཝཱརིདོ ཨཡཾ.

༤༠. ‘‘སདྡཏོ’’ཨིཙྩཱདི. སདྡཏོ ཝཱཙཀེན ཏསྨིཾཡེཝཏྠེ ཏསྶེཝ སདྡསྶ པུན པཡོགཏོ ཨཏྠཏོ ཨབྷིདྷེཡྻེན པུབྦཔཊིཔཱདིཀསྶེཝ ཝཏྠུསྶཱཝིསེསེན པུན པཊིཔཱདནཏོ ཝུཏྟཾ པཡུཏྟཾ ཡཾ པདཏྠརཱུཔཾ ཡཏྠ ཡསྨིཾ ཝཱཀྱེ བྷིཡྻོཔི ཝུཙྩཏི པུནཔི པཡུཛྫཏེ, ཏམེཀཏྠནྟི ཨནུཝདིཏྭཱ ‘‘ཡཐེ’’ཙྩཱདིནཱ ཝིདྷཱིཡཏེ. ཝཱརིཾ དདཱཏཱིཏི ཝཱརིདོ. ཨཡཾ ཝཱརིདོ མེགྷོ ཨཱབྷཱཏི དིཔྤཏཱིཏི. ཛལདཱནམཏྟཱཔེཀྑཱཡ ཨིདཾ སདྡཏོ ཨེཀཏྠཾ.

༤༠. ཨིདཱནི ཨུདྡིཊྛཀྐམེན ཝཱཀྱདོསཾ ནིདྡིསཏི ‘‘སདྡཏོ’’ཙྩཱདིནཱ. སདྡཏོ ཝཱཙཀེན ཨཏྠཏོ ཨབྷིདྷེཡྻེན ཝུཏྟཾ པཡུཏྟཾ ཡཾ པདཏྠརཱུཔཾ ཡཏྠ ཡསྨིཾ ཝཱཀྱེ བྷིཡྻོཔི པུནཔི ཝུཙྩཏི ཡུཛྫཏེ, ཏཾ ཝཱཀྱཾ ཨེཀཏྠཾ ནཱམ དོསོ. ཨུདཱཧརཎཾ ‘‘ཡཐི’’ཙྩཱདི. ཝཱརིདོ ཛལདཱཡཀོ ཨཡཾ ཝཱརིདོ མེགྷོ ཨཱབྷཱཏི དིཔྤཏི. སམྤཏྟིསཱདྷཀཾ ‘‘ཛལདཱཡཀོ’’ཙྩཱདིཝིསེསནཾ ཝིནཱ ཛལདཱནམཏྟསྶ ཝུཏྟཏྟཱ སདྡཏོ ཨེཀཏྠཾ ནཱམ ཧོཏི.

ཡཐཱ ཙ

༤༡.

ཏིཏྠིཡངྐུརབཱིཛཱནི, ཛཧཾ དིཊྛིགཏཱནི’ཧ;

པསཱདེཏི པསནྣེ སོ, མཧཱམུནི མཧཱཛནེ.

༤༡. ཏིཏྠིཡསངྑཱཏཱནཾ ཨངྐུརཱནཾ བཱིཛཱནི ཨུཔྤཏྟིཧེཏུབྷཱུཏཱནི དིཊྛིགཏཱནི དྭཱསཊྛི དིཊྛིཡོ ཛཧཾ ཛཧནྟོ དཱུརཱིཀརོནྟོ སོ མཧཱམུནི སམྨཱསམྦུདྡྷོ ཨིཧ ལོཀེ ཨཏྟནི པསནྣེ པསཱདབཧུལེ མཧཱཛནེ པསཱདེཏཱིཏི ཨཔརམུདཱཧརཎཾ. ¶ པསཱདསངྑཱཏསྶ ཨཏྠསྶ ‘‘པསནྣེ པསཱདེཏཱི’’ཏི ཝུཏྟཏྟཱ ཨིདམཏྠཏོ ཨེཀཏྠཾ.

༤༡. ‘‘ཏིཏྠིཡི’’ཙྩཱདི. སོ མཧཱམུནི ཏིཏྠིཡངྐུརབཱིཛཱནི ཏིཏྠིཡསངྑཱཏཱནཾ ཨངྐུརཱནཾ ཨུཔྤཏྟིཀཱརཎབྷཱུཏཱནི དིཊྛིགཏཱནི སསྶཏཱདིབྷེདབྷིནྣཱ དྭཱསཊྛིདིཊྛིཡོ ཛཧཾ ཛཧནྟོ ཨཔནེནྟོ ཨིཧ ལོཀེ པསནྣེ ཨཏྟནི པསནྣེ མཧཱཛནེ པསཱདེཏི. པསནྣསདྡེན ཝུཏྟཔྤསཱདསངྑཱཏསྶ ཨཏྠསྶ པསཱདེཏཱིཏི ཀྲིཡཱཔདེནཔི ཝུཏྟཏྟཱ སདྡེ བྷིནྣེཔི ཨཏྠཏོ ཨེཀནྟི ཨཏྠཏོ ཨེཀཏྠསྶུདཱཧརཎཾ. ཏིཏྠིཡཱ ཨེཝ ཨངྐུརཱནི, ཏེསཾ བཱིཛཱནི, དིཊྛཱིསུ གཏཱནི, དིཊྛིཡོ ཨེཝ གཏཱནཱིཏི ཝཱ ཝིགྒཧོ.

༤༢.

ཨཱརདྡྷཀྐམཝིཙྪེདཱ, བྷགྒརཱིཏི བྷཝེ ཡཐཱ;

ཀཱཔི པཉྙཱ, ཀོཔི གུཎོ, པཀཏཱིཔི ཨཧོ ཏཝ.

༤༢. ཨཱརདྡྷོ ཝཏྟུམུཔཀྐམནྟོ, ཀམོ ཝཙནཔཊིཔཱཊི. ཏསྶ ཝིཙྪེདོ བྷངྒོ, ཏཏོ. ‘‘ཡཐེ’’ཏིཨཱདིནཱ ཨུདཱཧརཏི. ཨཝུཏྟསྶཔི པསཱདཝསཱ ཨཛ྄ཛྷཱཧཱརོཏི. མཧཱམུནི ཏཝ ཏེ པཉྙཱ ཀཱཔི སཱཏིསཡཏྟཱ ཨནིདྡྷཱརིཏཾ སབྷཱཝཝིསེསཱ ཀཱཙིཡེཝ, ཨཧོ པཝཏྟམཱནཱཡཔི ཝསབྷཱཝསྶཱནིདྡྷཱརིཏཏྟཱ ཨཙྪརིཡནྟི ཨཏྠོ. ཨེཏྠ ཀཱཔི ཀོཔཱིཏི སབྦནཱམཔདཀྐམསྶ པཀཏཱིཏི ཨེཏྠ ཝིཙྪིནྣཏྟཱ བྷགྒརཱིཏི.

༤༢. ‘‘ཨཱརདྡྷཀྐམི’’ཙྩཱདི. ཨཱརདྡྷཀྐམཝིཙྪེདཱ ཝཏྠུམཱརདྡྷཔདཀྐམསྶ ཝིཙྪེདཧེཏུ བྷགྒརཱིཏི བྷཝེ བྷགྒརཱིཏིཝཱཀྱདོསོ བྷཝཏི. ཨུདཱཧརཏི ‘‘ཡཐི’’ཙྩཱདི. མཧཱམུནི ཏཝ ཏུཡ྄ཧཾ པཉྙཱ སཱཏིསཡབྷཱུཏཱ པཉྙཱ ཀཱཔི ཝཙནཝིསཡཱཏིཀྐནྟཏྟཱ ཀཱཔིཡེཝ. གུཎོ སཱིལསམཱདྷིཨཱདིཨནཉྙསཱདྷཱརཎགུཎསམཱུཧོ ཀོཔི པམཱཎཔརིགྒཧསྶ ཀེནཙི ¶ ལེསེནཔི ཀཏྟུམསཀྐུཎེཡྻཏྟཱ ཀོཔིཡེཝ. པཀཏཱིཔི ཨཙིནྟེཡྻབྷཱུཏཱ པཀཏཱིཔི ཨེཝམེཝ ཨཧོ ཝིཛྫམཱནཱནཾཡེཝ པཉྙཱདཱིནཾ སབྷཱཝཱཝབོདྷསྶ དུཀྐརཏཱ ཨཙྪརིཡཱ. ཀཱཔི ཀོཔཱིཏི པདཀྐམསྶ ‘‘པཀཏཱི’’ཏི ཨེཏྠ སུཉྙཏྟཱ རཱིཏིབྷངྒོ. ཨཱརདྡྷོཡེཝ ཀམོ, ཏསྶ ཝིཙྪེདོ, བྷགྒཱ རཱིཏི ཨསྶ, ཨེཏྠ ཝཱཏི ཝིགྒཧོ.

༤༣.

པདཱནཾ དུབྦིནིཀྑེཔཱ, བྱཱམོཧོ ཡཏྠ ཛཱཡཏི;

ཏཾ བྱཱཀིཎྞནྟི ཝིཉྙེཡྻཾ, ཏདུདཱཧརཎཾ ཡཐཱ.

༤༣. ‘‘པདཱན’’མིཙྩཱདི. ཡཏྠ ཡསྨིཾ ཝཱཀྱེ པདཱནཾ སྱཱདྱནྟཱཁྱཱཏིཀཱནཾ དུབྦིནིཀྑེཔཱ དུཊྛཔནཏོ བྱཱམོཧོ སཾམུལ༹ྷཏཱ ཛཱཡཏི ཨུཔྤཛྫཏི, ཏཾ ཝཱཀྱཾ བྱཱཀིཎྞནྟི ཝིཉྙེཡྻཾ ཉཱཏབྦཾ. ཏསྶ བྱཱཀིཎྞསྶ ཨུདཱཧརཎཾ ལཀྑིཡཾ ‘‘ཡཐེ’’ཏི དསྶེཏི. ཡཐཱ ཨིདཾ, ཏཐཱ ཨཉྙམྤཱིཏི ཨཏྠོ.

༤༣. ‘‘པདཱནི’’ཙྩཱདི. པདཱནཾ སྱཱདྱནྟཏྱཱདྱནྟཔདཱནཾ དུབྦིནིཀྑེཔཱ དུཊྛཔནཏོ ཡཏྠ ཝཱཀྱེ བྱཱམོཧོ སཾམོཧོ ཛཱཡཏི, ཏཾ བྱཱཀིཎྞདོསོཏི ཝིཉྙེཡྻཾ. ཏདུདཱཧརཎཾ ཏསྶ བྱཱཀིཎྞདོསསྶ ལཀྑིཡཾ ཡཐཱ ཨིམིནཱ ཝཀྑམཱནནཡེན.

༤༤.

བཧུགུཎེ པཎམཏི, དུཛྫནཱནཾ པྱཡཾ ཛནོ;

ཧིཏཾ པམུདིཏོ ནིཙྩཾ, སུགཏཾ སམནུསྶརཾ.

༤༤. བཧུཨནནྟཏྟཱ བཧུབྷཱུཏེ གུཎེ སཱིལཱདིཀེ སམནུསྶརཾ སམྨདེཝ ཨུཊྛཱཡ སམུཊྛཱཡ ཨནུསྶརནྟོ གུཎཝིསཡསཏིཾ པཙྩུཔཊྛཱཔེནྟོ ཏེནེཝ ཀཱརཎེན པམུདིཏོ ཧཊྛཔཧཊྛོ ཨཡཾ ཛནོ སབྦོཔི ལོཀོ དུཛྫནཱནཾ སུཛནེཏརཱནམྤི དེཝདཏྟཱདཱིནཾ ནིཙྩཾ ཀཱལཾ ཧིཏཾ སུགཏཾ སམྨཱསམྦུདྡྷཾ པཎམཏི ནམསྶཏཱིཏི ཨཡཾ ཨཏྠོ ཀཝིཝཉྩིཏོ. ཏཏྠ ‘‘བཧུགུཎེ པཎམཏཱི’’ཏྱཱདི བྱཝཧིཏཔདཔྤཡོགཱ མོཧོ ཛཱཡཏཱིཏི བྱཱཀིཎྞཾ.

༤༤. ‘‘བཧུགུཎེ’’ཙྩཱདི. ¶ བཧུགུཎེ ཨནནྟཏྟཱ བཧུབྷཱུཏེ སཱིལསམཱདྷིཨཱདིགུཎེ སམནུསྶརཾ ཝིསེསཏོ ཨནུསྶརནྟོ པམུདིཏོ ཏཏོཡེཝ པཧཊྛོ ཨཡཾ ཛནོ སཏྟནིཀཱཡོ དུཛྫནཱནམྤི ཨསཔྤུརིསཱནམྤི ནིཙྩཾ སཏཏཾ ཧིཏཾ མིཏྟབྷཱུཏཾ སུགཏཾ སབྦཉྙུཾ པཎམཏི ཝནྡཏི. ཨེཏྠ པདཱནཾ ཨཊྛཱནཔཡོགཏོ བྱཱཀིཎྞཏྟཾ པདཏྠཱནུསཱརེནེཝ གམྱཏེ.

༤༥.

ཝིསིཊྛཝཙནཱ’པེཏཾ, གཱམྨཾ’ཏྱ’བྷིམཏཾ ཡཐཱ;

ཀཉྙེ ཀཱམཡམཱནཾ མཾ, ན ཀཱམཡསི ཀིཾ ནྭི’དཾ.

༤༥. ཝིསིཊྛསྶ ཀསྶཙི ཨཏྠསྶ ཝཙནཏོ ཀཐནཏོ ཨཔེཏཾ པརིཙྩཏྟཾ. ཀཉྙེཨིཏྱཱམནྟནཾ. ཨཧཾ ཏཾ ཨིཙྪཱམི, ཏཱདིསཾ མཾ ཏྭཾ ཀསྨཱ ནིཙྪསི, ཨིདཾ ཀིཾ ནུ ཨིཏི གཱམིཀཛནཝཙནཏྟཱ ‘‘ཀཉྙི’’ཙྩཱདིཀཾ གཱམྨཾ.

༤༥. ‘‘ཝིསིཊྛེ’’ཙྩཱདི. ཝིསིཊྛཝཙནཱཔེཏཾ པིཡབྷཱུཏེན ཨུཏྟིཝིསེསེན ཝིསེསིཏབྦསྶ ཀཐནཏོ པརིཧཱིནཾ ཝཱཀྱཾ ‘‘གཱམྨདོས’’ནྟི ཀཝཱིཧི ཨབྷིམཏཾ. ཨུདཱཧརཏི ‘‘ཡཐི’’ཙྩཱདི. ཀཉྙེ ཧེ ཀཉྙེ ཀཱམཡམཱནཾ མཾ ཏུཝཾ ཨིཙྪཡམཱནཾ མཾ ན ཀཱམཡསི ཏྭཾ ན ཨིཙྪསི, ཨིདཾ ཀིཾ ནུ. ཨཱིདིསེ ཨིཙྪཱཝིགྷཱཏེ ཝུཙྩམཱནེ ཨེཝཾ–

‘‘ཡཱཙནཱ མདཱིཡཱ ཏཝ ཀཱརཎཱཡཾ,

དིནེ དིནེ ནིཔྥལཏཾ ཨུཔེཏི;

དཀྑོ སདཱ མཱནིནིམཱནབྷངྒེ,

ས མནྨཐོནྱཏྲ གཏོ མཏོ ནུ’’ཨིཏི ཝིཡ.

པིཡཏྠསྶ ཀཐནཱབྷཱཝཏོ ‘‘ཀཉྙེ’’ཏྱཱདིཀཾ ཝཙནཾ མིལཀྑུཀཱནཾ ཝཙནཏྟཱ གཱམྨཾ. ཨེཏྠ ཀཉྙཱསདྡོ དསཝསྶིཀཱཡ ཝཏྟཏཱིཏི ནིཡམོ ནཏྠི. ཝིསིཊྛསྶ ཨཏྠསྶ ཝཙནཏོ ཨཔེཏནྟི ཝཱཀྱཾ.

༤༦.

པདསནྡྷཱནཏོ ཀིཉྩི, དུཔྤཏཱིཏིཀརཾ བྷཝེ;

ཏམྤི གཱམྨཾཏྱ’བྷིམཏཾ, ཡཐཱ ཡཱབྷཝཏོ པིཡཱ.

༤༦. ‘‘པདེ’’ཙྩཱདི. པདསནྡྷཱནཏོ པུབྦཱཔརཱནཾ པདཱནཾ སནྡྷིཝསེན ཡཾ ཀིཉྩི ཝཱཀྱཾ དུཊྛུ ཨསུཏིསུབྷགཾ པཏཱིཏིམཝབོདྷཾ ཀརོཏཱིཏི ཀརཾ བྷཝེ, ཏམྤི ཡཐཱཝུཏྟཾ གཱམྨནྟྱབྷིམཏཾ. ཡཐཱཏྱུདཱཧརཏི. བྷཝཏོ ཡཱ ཀཱཙི ཝནིཏཱ པིཡཱ ཧོཏཱིཏི ཨེཀོཏྠོ. ཡབྷ མེཐུནེ. ཡབྷནཾ ཡཱབྷོ. སོ ཝིཛྫཏེ ཡསྶ སོ ཡཱབྷཝཱ. ཏསྶ ཡཱབྷཝཏོ པིཡཱཨིཏྱཔི བྷཝཏི.

༤༦. ‘‘པདསནྡྷཱནི’’ཙྩཱདི. ཀིཉྩི ཝཱཀྱཾ པདསནྡྷཱནཏོ པུབྦཱཔརཔདཱནཾ གྷཊནཏོ དུཔྤཏཱིཏིཀརཾ བྷཝེ ཨསབྦྷབྷཱུཏདུཊྛཏྠསྶ པཀཱསཀོ ཧོཏི, ཏམྤི གཱམྨནྟི ཡཐཱཝུཏྟགཱམྨདོསེན དཱུསིཏནྟི [དུཔྤསིཏནྟི (ཀ.)] སབྦེཧི ཀཝཱིཧི ཨབྷིམཏཾ ཉཱཏཾ. ཡཐཱཏི ཨུདཱཧརཏི. བྷཝཏོ བྷཝནྟསྶ ཡཱ ཀཱཙི ཨིཏྠཱི པིཡཱ བྷཝཏཱིཏི ཨཡཾ ཀཝིནཱ ཨིཙྪིཏཏྠོ. ཡཱབྷཝཏོ མེཐུནཝནྟསྶ པིཡཱཏིཔི ཨཏྠོ. ‘‘ཡབྷ མེཐུནེ’’ཏི ཧི དྷཱཏུ. ཡབྷནཾ ཡཱབྷོ, སོ ཨསྶ ཨཏྠཱིཏི ཡཱབྷཝཱ, ཏསྶ ཡཱབྷཝཏོཏི གཧིཏེ ཨསོཏབྦཏྟཱ དུཔྤཏཱིཏིཀརཏཱ. དུཊྛཱཡེཝ པཏཱིཏི ཨཝབོདྷོ, ཏཾ ཀརོཏཱིཏི ཝིགྒཧོ.

༤༧.

ཝུཏྟེསུ སཱུཙིཏེ ཋཱནེ, པདཙྪེདོ བྷཝེ ཡཏི;

ཡཾ ཏཱཡ ཧཱིནཾ ཏཾ ཝུཏྟཾ, ཡཏིཧཱིནནྟི སཱ པན.

༤༧. ‘‘ཝུཏྟེསྭི’’ཙྩཱདི. ཝུཏྟེསུ ཚནྡོསཏྠཔརིནིདྡིཊྛེསུ ཨནུཊྛུབྷཱདཱིསུ སཱུཙིཏེ ཋཱནེ ‘‘ཨེཏྠཡཏཱི’’ཏི ཚནྡོཝིཙིཏིཡཱ པཀཱསིཏཊྛཱནེ པདཱནཾ སྱཱདྱནྟཱནཾ ཚེདོ ཝིཙྪིཏི ཝིབྷཱགོ ཨནུཝཱདོ ཡཾ ཡཏི བྷཝེཏི ཝིདྷཱིཡཏི. ཏཱཡ ¶ ཡཏིཡཱ ཧཱིནཾ པརིཧཱིནཾ ཝིརུདྡྷཾ ཡཾ ཝཱཀྱཾ, ཏཾ ཡཏིཧཱིནནྟི ཝུཏྟཾ, ‘‘ཡམནཾ ཝིརཱམོ ཡཏི, སཱ ཧཱིནཱ ཨེཏྠཱ’’ཏི ཀཏྭཱ. པནཱཏི ཝིསེསེ, སཱ ཡཏི པནཱཏི སམྦནྡྷོ.

༤༧. ‘‘ཝུཏྟེསྭ’’ཙྩཱདི. ཝུཏྟེསུ ཚནྡོསཏྠེ ནིདྡིཊྛཨནུཊྛུབྷཱདཱིསུ སཱུཙིཏེ ཋཱནེ ‘‘ཨཡམེཏྠ ཡཏཱི’’ཏི པཀཱསིཏེ ཋཱནེ པདཙྪེདོ སྱཱདྱནྟཏྱཱདྱནྟཱདཱིནཾ པདཱནཾ ཝིཙྪེདོ ཡཏི ནཱམ བྷཝེ, ཏཱཡ ཡཏིཡཱ ཡཾ ཝཱཀྱཾ ཧཱིནཾ ཨབྷིམཏཊྛཱནེ ཝཎྞཝིཙྪེདེན པརིཧཱིནཾ, ཏཾ ཝཱཀྱཾ ཡཏིཧཱིནནྟི ཡཏིཧཱིནདོསེན དུཊྛནྟི ཝིཉྙཱུཧི ཝུཏྟཾ.

༤༨.

ཡཏི སབྦཏྠ པཱདནྟེ, ཝུཏྟཌྜྷེ ཙ ཝིསེསཏོ;

པུབྦཱཔརཱནེཀཝཎྞ-པདམཛ྄ཛྷེཔི ཀཏྠཙི.

༤༨. ‘‘ཡཏི’’ཙྩཱདི. སབྦཏྠ པཱདནྟེ སབྦསྨིཾ ཙཏུཏྠཾསསངྑཱཏཱནཾ གཱཐཱཔཱདཱནཾ ཨནྟེ ཨཝསཱནེ ཙ ཝིསེསཏོ ཝིསེསེན ཨེཀནྟེན ཝུཏྟཌྜྷེ ཙ ཝུཏྟཱནཾ པཱདདྭཡསངྑཱཏེ ཨཌྜྷེ ཙ, ཏདཝསཱནེ ཙཱཏི ཨདྷིཔྤཱཡོ. ‘‘སིཡཱ’’ཏི སེསོ. ནནུ ‘‘པདཙྪེདོ’’ཏི ཝུཏྟཏྟཱ པདམཛ྄ཛྷེ ཡཏི ན ཧོཏེཝཱཏི ཙེཏི ཨཱཧ ‘‘པུབྦ’’ཨིཙྩཱདི. ཀཏྠཙི ཀིསྨིཉྩི ཋཱནེ, ན སབྦཏྠ. པུབྦཱཔརཱནེཀཝཎྞཔདམཛ྄ཛྷེཔི ཡཏཱིཏི སམྦནྡྷོ. པུབྦེ ཙ ཨཔརེ ཙ པུབྦཱཔརེ. ཨནེཀེ ཝཎྞཱ ཨནེཀཝཎྞཱ. པུབྦཱཔརེ ཨནེཀཝཎྞཱ ཡསྶ ཏཾ ཏཐཱ. ཏཉྩ ཏཾ པདཉྩ, ཏསྶ མཛ྄ཛྷེཔི.

༤༨. ཨིདཱནི ཡཏིམྷི ལབྦྷམཱནཾ སབྦཝིསཡཾ དསྶེཏི ‘‘ཡཏི’’ཙྩཱདིནཱ. སཱ པན ཡཏི སབྦཏྠ པཱདནྟེ ཙཏུཏྠཾསསངྑཱཏགཱཐཱཔཱདཱནཾ ཨནྟེ ཙ ཝིསེསཏོ ནིཡམཏོ ཝུཏྟཌྜྷེ ཙ ཝུཏྟཱནཾ པཱདདྭཡསངྑཱཏེ ཨཌྜྷེ ཙ, ཏདཝསཱནེ ཙཱཏི ཨདྷིཔྤཱཡོ. ཀཏྠཙི ཀིསྨིཉྩི ཋཱནེ པུབྦཱཔརཱནེཀཝཎྞཔདམཛ྄ཛྷེཔི པུབྦཱཔརབྷཱུཏཨནེཀཝཎྞསམནྣཱགཏཔདཱནཾ མཛ྄ཛྷེ ¶ ཙ སིཡཱ. པདཙྪེདསྶ ‘‘ཡཏཱི’’ཏི ཝུཏྟཏྟཱ པདམཛ྄ཛྷེ ན ཧོཏཱིཏི སངྐཱཔརིཧརཎཏྠཾ ‘‘པུབྦཱཔརཱནེཀཝཎྞཔདམཛ྄ཛྷེ’’ཏི ཝུཏྟཾ. ཨེཏྠ པཱདནྟོ, ཝུཏྟཌྜྷོ, པདམཛ྄ཛྷཉྩ ཡཏིཊྛཱནནྟི. པདམཛ྄ཛྷེཡེཝ ལབྦྷམཱནཱ ཡཏི ཀཏྠཙི ཧོཏི, དྭཀྑརཏྱཀྑརཔདམཛ྄ཛྷེ པན ན ཧོཏི.

ཏཏྠོདཱཧརཎཔཙྩུདཱཧརཎཱནི ཡཐཱ –

༤༩.

ཏཾ ནམེ སིརསཱ ཙཱམཱི-ཀརཝཎྞཾ ཏཐཱགཏཾ;

སཀལཱཔི དིསཱ སིཉྩ-ཏཱིཝ སོཎྞརསེཧིཡོ.

༤༩. ཨུདཱཧརཱིཡཏཱིཏི ཨུདཱཧརཎཾ. པཊིཔཀྑམུདཱཧརཎཾ པཙྩུདཱཧརཎཾ. ཙཱམཱིཀརསྶེཝ སུཝཎྞསྶ ཝིཡ ཝཎྞོ ཡསྶ ཏཾ ཏཐཱགཏཾ སིརསཱ ནམཱམི. ཀཱིདིསཾ? ཡོ ཏཐཱགཏོ སཀལཱཔི དིསཱ སབྦཱཡེཝ དས དིསཱ སོཎྞརསེཧི ཙཱམཱིཀརཝཎྞཏྟཱ རསེཧི སུཝཎྞརསེཧི སིཉྩཏཱིཝ སིཉྩཏཱིཏི མཉྙེ, ཏཾ ཏཐཱགཏནྟི ཨཔེཀྑཏེ. ཨེཏྠ པུབྦཔཱདནྟེ ཝུཏྟཌྜྷེ ཙ ནིཡཏཱ ཡཏི. ཙཱམཱིཀརསདྡོ ཙེཏྠ ཙཏུརཀྑརོ. ཏཏྠ ཙཱམཱིཨིཏི པུབྦབྷཱགོ, ཀརཨིཏི པརོ. ཨེཏྠ པུབྦཱཔརཱནེཀཝཎྞཔདམཛ྄ཛྷེ ཡཏི. སིཉྩཏཱིཏི ཨེཏྠ པན པུབྦཱཔརཱནེཀཝཎྞཔདམཛ྄ཛྷཏྟཱབྷཱཝཱ སིཉྩཨིཏྱཏྲ ཡཏི དུཊྛཱཏི. ཨིདཾ པཙྩུདཱཧརཎཾ.

༤༩. ཏཏྠ པཱདནྟཝུཏྟཌྜྷེསུ ཡཏིཡཱ པཱཀཊཏྟཱ ཏསྨིཾ པདམཛ྄ཛྷེ ཡཏིཡཱ ཨུདཱཧརཎཔཙྩུདཱཧརཎཱནི ཨིཊྛོདཱཧརཎཔཊིཔཀྑོདཱཧརཎཱནི ཡཐཱ. ‘‘ཏཾ ནམེ’’ཙྩཱདི. ཡོ ཏཐཱགཏོ སཀལཱཔི དིསཱ སོཎྞརསེཧི སུཝཎྞརསདྷཱརཱཧི སིཉྩཏཱིཝ སིཉྩཏི མཉྙེ, ཨིཝསདྡོ ཝིཏཀྐེ. ཙཱམཱིཀརཝཎྞཾ སུཝཎྞཝཎྞསདིསཚཝིཝཎྞཾ ཏཾ ཏཐཱགཏཾ སིརསཱ ནམེ. ཨེཏྠ ‘‘ཙཱམཱིཀརཝཎྞ’’ནྟི ཡཏིཡཱ ཙཱམཱིཏི ཨཀྑརདྭཡམཏིཀྐམྨ ཋིཏཏྟཱ ཨནྟེཔི ཀརཨིཏི ཨཀྑརདྭཡེནཱནཱུནཏྟཱ ¶ པདཙྪེདསྶ པུབྦཱཔརཝཎྞཱནམནེཀཏྟམིཏིཊྛོདཱཧརཎཾ. སིཉྩཏཱིཏི པདེ སིཉྩཱཏི ཝཎྞདྭཡམཏིཀྐམྨ ཡཏིཡཱ དིསྶམཱནཏྟེཔི ཏིཨིཏི པརབྷཱགེ ཨེཀཝཎྞཏྟཱ ཨནེཀཝཎྞཱབྷཱཝོཏི པཙྩུདཱཧརཎཾ. ཨེཏྠ ཨནེཀཝཎྞཏྟཾ པདཝསེནེཝ ཉཱཏབྦཾ. ཙཱམཱིཀརསྶ ཝཎྞོ ཝིཡ ཝཎྞོ ཡསྶ སོཏི ཝིགྒཧོ.

༥༠.

སརོ སནྡྷིམྷི པུབྦནྟོ, ཝིཡ ལོཔེ ཝིབྷཏྟིཡཱ;

ཨཉྙཐཱ ཏྭ’ཉྙཐཱ ཏཏྠ, ཡཱདེསཱདི པརཱདི’ཝ.

༥༠. ‘‘སརོ’’ཙྩཱདི. ཝིབྷཏྟིཡཱ ལོཔེ སཏི སནྡྷིམྷི སཾཧིཏཱཡཾ ཀཏཱཡཾ སརོ པརཔདཱདིབྷཱུཏོ པུབྦནྟོ ཝིཡ པུབྦཔདསྶ ཨནྟབྷཱུཏོ ཡོ སརོ, སོ ཝིཡ ཧོཏི, ཨནེཀཝཎྞཏྟཱབྷཱཝེཔི ཏཏོ ཝིཧིཏཡཏིཡཱ ནེཝཏྠི བྷངྒོཏི ཨདྷིཔྤཱཡོ. ཨཉྙཐཱ ཏུ ཝིབྷཏྟིཡཱ ཨལོཔེ ཏུ སཏི སཾཧིཏཱཡཾ ཀཏཱཡཾ པུབྦཔདནྟབྷཱུཏོ སརོ ཙེ, ཨཉྙཐཱ ཨཉྙེན པཀཱརེན ཧོཏི, པརཔདསྶཱདིསརོ ཝིཡ ཧོཏཱིཏི ཨཏྠོ. ཏཾ ཝིབྷཏྟིཡཱ སདྡྷིཾ ཝིཧཱཡ ཀཏཡཏིཡཱ ནཏྠི བྷངྒོཏི ཨདྷིཔྤཱཡོ. ཏཏྠ ཏསྶཾ ཡཏིཡཾ ཡཱདེསཱདི ཨིཝཎྞཱདཱིནཾ ཀཱཏབྦོ ཡཀཱརཱདེསཱདི པརཱདིཝ པརཔདསྶ ཨཱདིསརོ ཝིཡ ཧོཏི. ཀཏཡཱདེསཱདིསཧིཏཾ བྱཉྫནཾ ཝིཧཱཡ ཀཏཱཡ ཡཏིཡཱ ནཏྠི བྷངྒོཏི ཨདྷིཔྤཱཡོ.

༥༠. ཨིདཱནི ཧེཊྛཱ ཝུཏྟསྶ ཝིརུདྡྷཏྟེཔི ཡཏིབྷངྒཱབྷཱཝཾ དསྶེནྟོ ཨཱཧ ‘‘སརོ’’ཙྩཱདི. ཝིབྷཏྟིཡཱ ལོཔེ སནྡྷིམྷི སཏི སརོ སནྡྷིསརོ པུབྦནྟོ ཝིཡ པུབྦཔདསྶ ཨནྟོ ཝིཡ ཧོཏི, ཨཉྙཐཱ ཏུ ཝིབྷཏྟིཡཱ ཨལོཔེ སཾཧིཏཱཡཾ ཀཏཱཡཾ ཨཉྙཐཱ ཧོཏི, པུབྦཔདནྟབྷཱུཏོ སརོ པརཔདསྶ ཨཱདིསརོ ཝིཡ ཧོཏི. ཏཏྠ ཡཏིཡཾ ཡཱདེསཱདི ¶ ཨིཝཎྞཱདཱིནཾ ཀཏྟབྦཡཀཱརཱདེསཱདི པརཱདིཝ པརཔདསྶ ཨཱདིསརོ ཝིཡ ཧོཏི, པུབྦནྟསདིསསརམཏིཀྐམིཏྭཱཔི པརཔདཱདིསརསདིསཝཎྞམཱགམྨ ཏཾ ཨནཏིཀྐམིཏྭཱཔི པརཔདཱདིསརསདིསཡཱདེསཱདིམཏིཀྐམིཏྭཱཔི ཡཏིཡཱ པཡུཏྟཱཡ སཏི ཨནེཀཝཎྞཏྟཱབྷཱཝེཔི ཡཏིབྷངྒོ ན ཧོཏཱིཏི ཨདྷིཔྤཱཡོ. པུབྦསྶ ཨནྟོཏི ཙ, ཡོ ཙ སོ ཨཱདེསོ ཙ, སོ ཨཱདི ཡསྶ མཀཱརཱདིནོཏི ཙ, པརསྶ ཨཱདཱིཏི ཙ ཝཱཀྱཾ.

༥༡.

ཙཱདཱི པུབྦཔདནྟཱཝ, ནིཙྩཾ པུབྦཔདསྶིཏཱ;

པཱདཡོ ནིཙྩསམྦནྡྷཱ, པརཱདཱིཝ པརེན ཏུ.

༥༡. ནིཙྩཾ ཨནཝརཏཾ པུབྦཔདཾ སིཏཱ ནིསྶིཏཱ ཙཱདཱི ཙཀཱརཱདཡོ ནིཔཱཏཱ པུབྦསྶ པདསྶ ཨནྟཱ ཨཝཡཝཱ ཝིཡ ཧོནྟི, ཏེ ཨནྟོ ཀཏྭཱ ཡཏི ཀཱཏབྦཱཏི ཨདྷིཔྤཱཡོ. པརེན པརཔདེན ནིཙྩསམྦནྡྷཱ སཏཏཡོགིནོ, ཏུསདྡོ ཨཊྛཱནཔྤཡུཏྟོ, པཱདཡོ ཏུ པརཱདཱིཝ པརཔདསྶ ཨཱདཱི ཨཝཡཝཱ ཝིཡ ཧོནྟི, ཏཾ ཝིཧཱཡ པུབྦཔདནྟེ ཡཏི ཀཱཏབྦཱཏི ཨདྷིཔྤཱཡོ.

༥༡. ‘‘ཙཱདི’’ཙྩཱདི. ནིཙྩཾ སཏཏཾ པུབྦཔདསྶིཏཱ པུབྦཔདཾ ནིསྶཱཡ པཝཏྟཱ ཙཱདཱི ཙཀཱརཱདིནིཔཱཏཱ པུབྦཔདནྟཱཝ པུབྦཔདསྶ ཨནྟཱ ཨཝཡཝཱ ཝིཡ ཧོནྟི, པརེན པརཔདེན ནིཙྩསམྦནྡྷཱ ནིརནྟརཡོགིནོ པཱདཡོ ཏུ པཱདིཨུཔསགྒཱ པན པརཱདཱིཝ པརཔདསྶ ཨཱདཱི ཨཝཡཝཱཝིཡ ཧོནྟི. ཙཱདཡོ ཨཱགམྨ ཏེ བཧི ཀཏྭཱཔི པཱདཡོ ཨཱགམྨ ཏེ ཨནྟོ ཀཏྭཱཔི པཝཏྟོ ཝིརཱམོ ཡཏིབྷངྒོཏི ཨདྷིཔྤཱཡོ. ཙོཨཱདི ཡེསནྟི ཙ, པུབྦཔདཾ སིཏཱཏི ཙ, པོ ཨཱདི ཡེསནྟི ཙ, ནིཙྩཾ སམྦནྡྷཱཏི ཙ ཝིགྒཧོ. ཨེཏྠ ཙ ཏགྒུཎསཾཝིཉྙཱཎཏྟཱ ཙཀཱརཔཀཱརཱདཱིནམྤི པརིགྒཧོ.

སབྦཏྠོདཱཧརཎཱནི ཡཐཱ

༥༢.

ནམེ ཏཾ སིརསཱ སབྦོ-པམཱཏཱིཏཾ ཏཐཱགཏཾ;

ཡསྶ ལོཀགྒཏཾ པཏྟ-སྶོ’པམཱ ན ཧི ཡུཛྫཏི.

༥༣.

མུནིནྡཾ ཏཾ སདཱ ཝནྡཱ-མྱ’ནནྟམཏི’མུཏྟམཾ;

ཡསྶ པཉྙཱ ཙ མེཏྟཱ ཙ, ནིསྶཱིམཱཏི ཝིཛམྦྷཏི.

༥༢-༥༣. སབྦཏྠཱཏི ¶ པུབྦནྟསདིསཱདཱིསུ. ‘‘ནམེཏ’’ནྟིཨཱདིགཱཐཱདྭཡེ པདཏྠོ པཱཀཊོ, ཨདྷིཔྤཱཡོ ཏུ ཡཏོ ལོཀགྒཏཾ པཏྟོ, ཏཏོ སབྦོཔམཱཏཱིཏོ, ཡཏོ པཉྙཱམེཏྟཱ ལོཀེ ནིརནྟརམིཝ ཝཏྟནྟི, ཏཏོ ཨནནྟམཏི, ཨུཏྟམོ ཙཱཏི. ཨེཏྠ ‘‘སབྦཱ ཨུཔམཱ’’ཏི སམཱསཾ ཀཏྭཱ ཝིབྷཏྟིལོཔེ སཾཧིཏཱཡཉྩ ཀཏཱཡཾ པརཔདཱདིཨུཀཱརོ པུབྦཔདནྟབྦཀཱརཊྛཨཀཱརོ ཝིཡ ཧོཏཱིཏི སབྦོ ཨིཙྩཏྲ པཱདནྟཡཏི. པཏྟསྶོཔམཱ ཨིཙྩཏྲ ཡཀཱརཱདེསསྶ པརཱདིསདིསབྷཱཝོ ཝིཡ ཧོཏི, ཝིབྷཏྟིཡཱ ཨལོཔེ སཾཧིཏཱཡཾ ཀཏཱཡཾ སཝིབྷཏྟིཡཱ ཨཀཱརོ པརཔདཱདི ཨུཀཱརོ ཝིཡ ཧོཏཱིཏི ཏཾཝིབྷཏྟིཡཱ པསིདྡྷཾ ཝིཧཱཡ པཏྟཨིཙྩཏྲ པཱདནྟཡཏི. ཏཐཱ ཝནྡཱམྱནནྟཨིཙྩཏྲ ཡཀཱརཱདེསསྶ པརཱདིསདིསབྷཱཝོ ཝིཧིཏོཏི མྱསདྡཾ ཝཛྫེཏྭཱ ཝནྡཱཨིཙྩཏྲ པཱདནྟཡཏི. པུབྦཔདསྶིཏཱནཾ ཙཱདཱིནཾ པུབྦཔདནྟསདིསཏཱ ཝུཏྟཱཏི མེཏྟཱ ཙཱཏི ཙསདྡཏོ ཡཏི, ཨཔརཔདསམྦནྡྷཱ པཱདཡོ པརཔདཱདིསདིསཱ ཧོནྟཱིཏི ནིསྶཱིམཱཏི ཨེཏྠ ནིསདྡཾ ཝིཧཱཡ ཏཏོ ཨཱདིམྷི ཡཏི.

༥༢-༥༣. སབྦཏྠ ཡཐཱཝུཏྟཔུབྦནྟསདིསསརཱདཱིསུ པཉྩསུ ཨུདཱཧརཎཱནིཡཐཱ. ‘‘ནམེ ཏ’’མིཙྩཱདི, ལོཀགྒཏཾ པཏྟསྶ ཡསྶ བུདྡྷསྶ ཨུཔམཱ ན ཧི ཡུཛྫཏི སཀལཔདཏྠཱནཾ ཨཏིཀྐམྨ ཋིཏཏྟཱ ན ཧི ཡུཛྫཏི. སབྦོཔམཱཏཱིཏཾ ཏཾ ཏཐཱགཏཾ སིརསཱ ནམེ ནམཱམི. སབྦོཏི ཨེཏྠ ཨོཀཱརསྶ པུབྦཔདནྟསརསདིསཏྟཱ ཏཏོ པརཱཡ ཡཏིཡཱ ཙ སྶོཔམཱཏི པརཔདཱདིསདིསཾ ¶ ཝཎྞམནཏིཀྐམྨ ཋིཏཱཡ ཡཏིཡཱ ཙ ཨུདཱཧརཎཾ.

‘‘མུནིནྡེ’’ཙྩཱདི. ཡསྶ སམྦུདྡྷསྶ པཉྙཱ ཙ མེཏྟཱ ཙནིསྶཱིམཱ ཨནནྟསཏྟཨནནྟཉེཡྻཝིསཡཀརཎཏོ སཱིམཱརཧིཏཱ ཨཏིཝིཛམྦྷཏི. ཨནནྟམཏིཾ ཨུདཡབྦཡསམྦྷཝེཔི ཉེཡྻསྶཱནནྟཏྟཱ ཝིསཡིམྷི ཝིསཡཝོཧཱརེན ཨནནྟཔཉྙཱཡ སམནྣཱགཏཾ ཨུཏྟམཾ ཏཏོ ཨེཝ པཝརཾ ཏཾ མུནིནྡཾ སདཱ ཝནྡཱམི, ཡཱདེསསྶ པརཱདིསདིསཏྟཱ ཏམནཱགམྨ ཡཏི བྷཝཏི. མེཏྟཱཙནིསྶཱིམཱཏི ཨེཏྠ ཙཱདཱིནཾ པུབྦཔདནྟསདིསཏྟཱཙ པཱདཱིནཾ པརཔདཱདིསདིསཏྟཱ ཙ ‘‘ཙཱ’’ཏི ‘‘ནཱི’’ཏི ཨིམེསམྤི ཡཏི བྷཝཏི.

ཙཱདིཔཱདཱིསུ པཙྩུདཱཧརཎཱནི ཡཐཱ

༥༤.

མཧཱམེཏྟཱ མཧཱཔཉྙཱ, ཙ ཡཏྠ པརམོདཡཱ;

པཎམཱམི ཛིནཾ ཏཾ པ-ཝརཾ ཝརགུཎཱལཡཾ.

༥༤. ‘‘མཧཱ’’ཨིཙྩཱདི. ཡཏྠཱཏི ཡསྨིཾ ཛིནེ. པརམོདཡཱཏི མཧཱམེཏྟཱདཡོ ཨུཀྐཊྛཱབྷིཝུཌྜྷིཡོ. ཏཏོཡེཝ ཝརགུཎཱལཡཾ, ཏེནེཝ པཝརཾ ཨུཏྟམཾ ཏཾ ཛིནནྟི སམྦནྡྷོ. ཨེཏྠ པུབྦཔདནིསྶིཏཾ ཙཀཱརཾ པརཔདཱདིབྷཱུཏཾ ཀཏྭཱ ཏཏོ པུབྦེ ཀཏཱ ཡཏི ཙ, པརཔདཱདིསམྦནྡྷཔཀཱརཾ པུབྦཔདནྟབྷཱུཏཾ ཀཏྭཱ པཀཱརཏོ པརཾ ཀཏཱ ཡཏི ཙ ཝིརུདྡྷཱཏི ཨུབྷཡཏྠ པཙྩུདཱཧརཎཾ.

༥༤. ཙཱདིཔཱདཱིསུ ཝིསཡབྷཱུཏེསུ པཙྩུདཱཧརཎཾ ཡཐཱ. ‘‘མཧཱམེཏྟི’’ཙྩཱདི. ཡཏྠ ཡསྨིཾ ཛིནེ མཧཱམེཏྟཱ ཙ མཧཱཔཉྙཱ ཙ ཨིམཱ པརམོདཡཱ ཨུཀྐཊྛཱབྷིཝུཌྜྷིཡོ ཧོནྟི. ཝརགུཎཱལཡཾ ཨུཏྟམགུཎཱཀརཾ པཝརཾ ཏཏོཡེཝ ཨུཏྟམཾ ཏཾ ཛིནཾ པཎམཱམི. ཨེཏྠ ཙཀཱརཾ པརཔདཱདིཾ ཀཏྭཱ པཀཱརཾ པུབྦཔདནྟཾ ཀཏྭཱ ཡཏིཡཱ པཝཏྟཏྟཱ ‘‘ཙ ཡཏྠ, ཏཾ པཱ’’ཏིདྭཡམཔི པཙྩུདཱཧརཎཾ.

༥༥.

པདཏྠཀྐམཏོ ¶ མུཏྟཾ, ཀམཙྩུཏམིདཾ ཡཐཱ;

ཁེཏྟཾ ཝཱ དེཧི གཱམཾ ཝཱ, དེསཾ ཝཱ མམ སོབྷནཾ.

༥༥. ‘‘པད’’ཨིཙྩཱདི. པདཱནཾ ཨཏྠཀྐམཏོ མུཏྟཾ གལི༹ཏཾ ཀམཙྩུཏམིདནྟི ཝིདྷཱིཡཏེ. ཁེཏྟཾ ཝཱ ཨིཙྩཱདིནཱ ཨརུཙིཏོཡཾ ཡཱཙནཀྐམོ ཝཏྟུནོ ཨཝིཉྙུཏཾ གམེཏི. ཡོ ཧི ཁེཏྟམྤི དཱཏུཾ ནིཙྪཏི, ཀཐཾ སོ གཱམཱདིཀཾ དསྶཏཱིཏི.

༥༥. ‘‘པདཏྠི’’ཙྩཱདི. པདཏྠཀྐམཏོ པདཱནཾ ཨཏྠཀྐམཏོ མུཏྟཾ གལི༹ཏཾ ཨིདཾ ཝཱཀྱཾ ཀམཙྩུཏཾ ནཱམ. ཨུདཱཧརཏི ‘‘ཡཐི’’ཙྩཱདི. མམ སོབྷནཾ ཁེཏྟཾ ཝཱ གཱམཾ ཝཱ དེསཾ ཝཱ ཛནཔདཾ ཝཱ དེཧི. ཨེཏྠ ཁེཏྟམིཙྩཱདི ཡཱཙནཀྐམོ ཝཏྟུནོ ཨཝིཉྙུབྷཱཝཾ ཝིནཱ ཨུཙིཏཔདཏྠཀྐམཾ ནཔྤཀཱསེཏི, ཏཐཱ ཧི ཁེཏྟམཔི དཱཏུམནིཙྪནྟོ གཱམནིགམཛནཔདཱདིཾ ཀཐཾ དསྶཏཱིཏི ཀམཧཱནི.

༥༦.

ལོཀིཡཏྠ’མཏིཀྐནྟཾ, ཨཏིཝུཏྟཾ མཏཾ ཡཐཱ;

ཨཏིསམྦཱདྷ’མཱཀཱས-མེཏིསྶཱ ཐནཛམྦྷནེ [ཐནཛུམྦྷནེ (སཱི.)].

༥༦. ‘‘ལོཀི’’ཙྩཱདི. ལོཀེ ཝིདིཏོ ལོཀིཡོ, ཏཾ ལོཀིཡཏྠམབྷིདྷེཡྻཾ ཨཏིཀྐནྟཾ ཨནནུཝུཏྟཾ ཡཾ ཏཾ ཨཏིཝུཏྟཾ མཏནྟི ཝིདྷཱིཡཏེ. ཡཐེཏྱཱདིནཱ ཨུདཱཧརཏི. ཨེཏིསྶཱ ཝནིཏཱཡ ཐནཱནཾ པཡོདྷརཱནཾ ཛམྦྷནེ བྱཱཔནེ ཨཱཀཱསཾ གགནཾ ཨཏིསམྦཱདྷཾ ཨཙྩནྟཔྤཀཾ.

༥༦. ‘‘ལོཀིཡཏྠི’’ཙྩཱདི. ལོཀིཡཏྠཾ ལོཀེ པསིདྡྷམབྷིདྷེཡྻཾ ཨཏིཀྐནྟཾ ཀཐནཱཀཱརེན ཨཏིཀྐམིཏཾ ཝཱཀྱཾ ཨཏིཝུཏྟམིཏི མཏཾ. ཨུདཱཧརཏི ‘‘ཡཐི’’ཙྩཱདི. ཨེཏིསྶཱ ཐནཛམྦྷནེ ཐནཱནཾ ཝིཛམྦྷནེ ཨཱཀཱསཾ ཨཏིསམྦཱདྷཾ ཨནོཀཱསཾ. ཨེཏྠ པཡོདྷརཱནཾ མཧནྟཏྟཾ ཝདཱམཱཏི ལོཀེ མཧནྟནྟི ¶ པསིདྡྷཾ གགནམཔི ཨཏིཀྐནྟཏྟཱ ཝཱཀྱམཏིཝུཏྟདོསེན དཱུསིཏཾ.

༥༧.

སམུདཱཡཏྠཏོ’པེཏཾ, ཏཾ ཨཔེཏཏྠཀཾ ཡཐཱ;

གཱཝིཔུཏྟོ བལཱིབདྡྷོ, ཏིཎཾ ཁཱདཱི པིཝཱི ཛལཾ.

༥༧. ‘‘སམུདཱཡི’’ཙྩཱདི. སམུདཱཡསྶ པཀརཎཏོ པདསནྡྷིནོ ཝཱཀྱསྶ ཨཏྠོ ཨབྷིདྷེཡྻཾ ཨངྒངྒིབྷཱུཏཾ ཀྲིཡཱཀཱརཀསམྦནྡྷཱིཝིསེསལཀྑཎཾ སཾཝོཧཱརིཀཾ, ཏཏོ ཨཔེཏཾ ཨཔགཏཾ སུཉྙཾ, ཝིནཱ [ན (ཀ.)] པདཏྠམཏྟེན ཏསྶ ཀཏྠཙི བྱབྷིཙཱརཱབྷཱཝཏོ ཨེཏཱདིསཾ ཡཾ ཏམཔེཏཏྠཀནྟི ཝིདྷི. ན ཧི ‘‘གཱཝིཔུཏྟོ’’ཙྩཱདཱིསུ སམུདཱཡཏྠོ སམྦྷཝཏི.

༥༧. ‘‘སམུདཱཡི’’ཙྩཱདི. སམུདཱཡཏྠཏོ ཝིསེསནཝིསེསྱབྷཱུཏཀྲིཡཱཀཱརཀསམྦནྡྷེཧི ཡུཏྟཝཱཀྱསངྑཱཏཔདསམུདཱཡསྶ སམྦནྡྷཔདཏྟཱ ཝོཧཱརཱནུརཱུཔཨཏྠཏོ ཨཔེཏཾ ཨཔགཏཾ, ཨཝཡཝཏྠམཏྟསྶ ཝཱ སབྦཏྠ ལབྦྷམཱནཏྟཱ སམུདཱཡཏྠཏོ སུཉྙཾ, ཏཾ ཝཱཀྱཾ ཨཔེཏཏྠཀཾ ནཱམ. ཡཐིཙྩཱདིནཱ ཨུདཱཧརཏི ‘‘གཱཝིཔུཏྟོ བལཱིབདྡྷོ ཨུསབྷོ ཏིཎཾ ཁཱདི, ཛལཾ པིཝཱི’’ཏི. ཨེཏྠ ཨཝཡཝཏྠམཏྟེན ཝིནཱ སམུདཱཡེན གམྱམཱནསྶ ཀསྶཙི ཝིསེསཏྠསྶ ཨབྷཱཝཱ སམུདཱཡཏྠཏོ ཨཔགཏཾ ནཱམ ཧོཏི.

༥༨.

བནྡྷེ ཕརུསཏཱ ཡཏྠ, ཏཾ བནྡྷཕརུསཾ ཡཐཱ;

ཁརཱ ཁིལཱ པརིཀྑཱིཎཱ, ཁེཏྟེ ཁིཏྟཾ ཕལཏྱ’ལཾ.

༥༨. ‘‘བནྡྷེ’’ཙྩཱདི. ¶ ཁརཱཨིཙྩཱདིཀཾ བནྡྷཕརུསཾ སུཏིསུབྷགཏྟཱབྷཱཝཏོ ཁརཱ ཀཀྐསཱ ཁིལཱ ཁཱཎུཀཱདཡོ པརིཀྑཱིཎཱ ཁཡཾ པཏྟཱ ཡཏོ, ཏསྨཱ ཁེཏྟེ ཀེདཱརེ ཁིཏྟཾ ཝུཏྟཾ ཨལམཙྩནྟཾ ཕལཏི ནིཔྥཛྫཏི. ཝཱཀྱདོསོ.

༥༨. ‘‘བནྡྷེ’’ཙྩཱདི. བནྡྷེ བནྡྷསརཱིརེ ཕརུསཏཱ སུཏིསུཁཏཱབྷཱཝཏོ ཕརུསབྷཱཝོ ཡཏྠ ཝཱཀྱེ བྷཝཏི, ཏཾ ཝཱཀྱཾ བནྡྷཕརུསཾ ནཱམ ཧོཏི. ཡཐཱཏི ཨུདཱཧརཏི. ཁརཱ ཀཀྐསཱ ཁིལཱ ཁཱཎུཀཱདཡོ པརིཀྑཱིཎཱ ཡསྨཱ ཁཱིཎཱ ཧོནྟི, ཏསྨཱ ཁེཏྟེ ཁིཏྟཾ ཝུཏྟཾ བཱིཛཾ ཨལཾ ཨཏིསཡེན ཕལཏི ནིཔྥཛྫཏི.

ཝཱཀྱདོསནིདྡེསཝཎྞནཱ ནིཊྛིཏཱ.

ཝཱཀྱཏྠདོསནིདྡེསཝཎྞནཱ

༥༩.

ཉེཡྻཾ ལཀྑཎམནྭཏྠ-ཝསེནཱ’པཀྐམཱདིནཾ;

ཨུདཱཧརཎམེཏེསཾ, དཱནི སནྡསྶཡཱམྱ’ཧཾ.

༥༩. ‘‘ཉེཡྻ’’མིཙྩཱདི. ཨཔཀྐམཱདཱིནཾ ཡཐཱཨུདྡིཊྛཱནཾ ལཀྑཱིཡཏི ཨུདཱཧརཎམནེནཱཏི ཨཏྠེན ལཀྑཎཾ ཨནྭཏྠཝསེན ཨཔགཏོ ཀམོ ཡཏྠ ཏཾ ཨཔཀྐམནྟིཨཱདིནཱ ཨཏྠཱནུགམནཝསེན ཉེཡྻཾ ཝིཉྙཱཏབྦཾ. ཨིདཱནི ཝཱཀྱདོསེ ནིདྡིསིཏྭཱ ཨཝསརཔྤཏྟེ ཨིམསྨིཾ ཀཱལེ ཨེཏེསཾ ཨཔཀྐམཱདཱིནཾ ཨུདཱཧརཎཾ ལཀྑིཡཾ ཨཧཾ སནྡསྶཡཱམི པཀཱསེསྶཱམི.

༥༩. ཨིདཱནི ཨུདྡིཊྛཱནུཀྐམེན ཨཔཀྐམཱདིཨཏྠདོསཱནི ཝིབྷཱཝེཏི ‘‘ཉེཡྻ’’མིཙྩཱདིནཱ. ཨཔཀྐམཱདཱིནཾ ཨཔཀྐམོཙིཏྱཧཱིནཱདཱིནཾ ལཀྑཎཾ ཨཔཀྐམཱདིཝིསཡབུདྡྷིཡཱ ཨཝིཔརཱིཏཝུཏྟིཡཱ པཝཏྟིཀཱརཎཾ ཨནྭཏྠཝསེན ཨཔགཏོ ཀམོ ཡཏྠིཙྩཱདིཝཙནཏྠཱནུགཏཉཱཎཝསེན ཉེཡྻཾ ཉཱཏབྦཾ, ཝིསུཾ ལཀྑཎཾ ན ཝདཱམཱཏི ཝུཏྟཾ ཧོཏི. ཨིདཱནི ཨཧཾ ཨེཏེསཾ ཨཔཀྐམཱདཱིནཾ ཨུདཱཧརཎཾ ལཀྑིཡཾ སནྡསྶཡཱམི. ཨཏྠཱནུགཏམནྭཏྠཾ ཨནྭཏྠསྶ ཉཱཎསྶ ཝསོཏི ཝིགྒཧོ.

ཏཏྠཱཔཀྐམཾ ཡཐཱ

༦༠.

བྷཱཝནཱདཱནསཱིལཱནི, སམྨཱ སམྤཱདིཏཱནི’ཧ;

བྷོགསགྒཱདིནིབྦཱན-སཱདྷནཱནི ན སཾསཡོ.

༦༠. ‘‘བྷཱཝནཱ’’ཨིཙྩཱདི. ¶ སམྨཱ ཨལོབྷཱདིཧེཏུསམྤཏྟིཡཱ སཀྐཙྩཾ སམྤཱདིཏཱནི ནིཔྥཱདིཏཱནི. ཨེཏྠ བྷོགསགྒཱདིནིབྦཱནཱནཾ ཧེཏཝོ ཡཐཱཀྐམཾ དཱནསཱིལབྷཱཝནཱཡོ, ན ཏུ བྷཱཝནཱདཱནསཱིལཱནི.

༦༠. ཏཏྠ ཏེསུ ཨཔཀྐམཱདཱིསུ ཨཔཀྐམཾ ཡཐཱ ཨཔཀྐམསྶོདཱཧརཎམེཝཾ. ཨོཙིཏྱཧཱིནཾ ཡཐཱཏྱཱདཱིསུཔི ཨེཝམཏྠོ ཝེདིཏབྦོ. ‘‘བྷཱཝནི’’ཙྩཱདི. ཨིཧ ཨིམསྨིཾ ཨཏྟབྷཱཝེ སམྨཱ སམྤཱདིཏཱནི ཨལོབྷཱདིཧེཏུསམྤཏྟིཡཱ སཀྐཙྩཾ སམྤཱདིཏཱནི རཱསིཀཏཱནི བྷཱཝནཱདཱནསཱིལཱནི བྷོགསགྒཱདིནིབྦཱནསཱདྷནཱནི ཨུཔབྷོགཔརིབྷོགཱནི, སགྒུཔྤཏྟིཨཱཡུཨཱརོགྱཱདཱིནི, ནིབྦཱནཉྩེཏི ཨེཏེསཾ སཱདྷཀཱནི. ན སཾསཡོ སདིསཝིསདིསཝིཔཱཀདཱནེ སཾསཡོ ནཱམ ནཏྠི. ཨེཏྠ བྷོགསགྒནིབྦཱནཱནཾ ཧེཏུབྷཱུཏཱ པན ཀམཏོ དཱནསཱིལབྷཱཝནཱཡོ བྷཝནྟཱིཏི ཕལཀྐམསྶ ཧེཏུཀྐམཾ ཝིརུདྡྷམིཏི ཀམཱཔེཏཾ ནཱམ ཧོཏི.

ཨོཙིཏྱཧཱིནཾ ཡཐཱ

༦༡. པཱུཛནཱིཡཏརོ ལོཀེ, ཨཧ’མེཀོ ནིརནྟརཾ.

མཡེཀསྨིཾ གུཎཱ སབྦེ, ཡཏོ སམུདིཏཱ ཨཧུཾ.

༦༡. ‘‘པཱུཛནཱིཡི’’ཙྩཱདི. ཡཏོ ཡསྨཱ ཀཱརཎཱ སབྦེ གུཎཱ སཱིལཱདཡོ ཨེཀསྨིཾ ཀེཝལེ མཡི ཨེཝ སམུདིཏཱ རཱསིབྷཱུཏཱ ཨཧུཾ ཨཧེསུཾ, ཏསྨཱ ཀཱརཎཱ ཨིམསྨིཾ སཏྟལོཀེ ཨེཀོ ཀེཝལོ ཨཧམེཝ ནིརནྟརཾ སཏཏཾ པཱུཛནཱིཡཏརོ ཨཏིསཡེན པུཛྫོཏི. ཨེཝམཏྟཔསཾསནམརུཙིཏཾ སཔྤུརིསསྶ.

༦༡. ‘‘པཱུཛནཱིཡཏརེ’’ཙྩཱདི. ¶ ཡཏོ ཡསྨཱ སབྦེ གུཎཱ སཱིལཱདཡོ ཨེཀསྨིཾ མཡི ཨདུཏིཡེ མཡི ཨེཝ སམུདིཏཱ རཱསིབྷཱུཏཱ ཨཧུཾ ཨཧེསུཾ, ཏསྨཱ ལོཀེ སཏྟལོཀེ ཨེཀོ ཨདུཏིཡོ ཨཧམེཝ ནིརནྟརཾ སཏཏཾ པཱུཛནཱིཡཏརོ ཨཏིསཡེན པཱུཛནཱིཡོ. ཨེཝཾ ཨཏྟཔྤསཾསནཏོ ཨུཙིཏཏཱཡ པརིཧཱནཱིཏི ཨོཙིཏྱཧཱིནཾ ནཱམ.

ཡཐཱ ཙ

༦༢.

ཡཱཙིཏོཧཾ ཀཐཾ ནཱམ, ན དཛྫཱམྱཔི ཛཱིཝིཏཾ;

ཏཐཱཔི པུཏྟདཱནེན, ཝེདྷཏེ ཧདཡཾ མམ.

༦༢. ‘‘ཡཱཙིཏོ’’ཨིཙྩཱདི. ཨེཏྠ ‘‘ཡདི ཡཱཙིཾསུ, ཛཱིཝིཏམྤི ཡཱཙཀཱནཾ དཛྫཱམཱི’’ཏི དསྶིཏོདཱརཏཱཡཱནུཙིཏཾ པུཏྟདཱནེ ཧདཡཔཝེདྷནཀཐནཾ ཝེསྶནྟརསྶ ཡཛྫེཝམཝོཙ.

༦༢. ཡཐཱ ཙ, ཨེཝམྤི ཨོཙིཏྱཧཱིནསྶ ཨུདཱཧརཎཾ དཊྛབྦཾ ‘‘ཡཱཙིཏོ’’ཙྩཱདི. ཡཱཙིཏོ ཡཱཙཀེཧི ཡཱཙིཏོ ཨཧཾ ཛཱིཝིཏམཔི ཀཐཾ ནཱམ ན དཛྫཱམི, ཏཐཱཔི ཨེཝཾ དཱནཛ྄ཛྷཱསཡེ སཏིཔི པུཏྟདཱནེན མམ ཧདཡཾ ཝེདྷཏེ ཀམྤཏེ. ཨེཏྠ ཝེསྶནྟརསྶ ‘‘ཡདི ཡཱཙེཡྻུཾ, ཛཱིཝིཏམཔི ཡཱཙཀཱནཾ དཛྫཱམཱི’’ཏི ཀཏཔཊིཉྙཱཡ པུཏྟདཱནེན ཧདཡཀམྤནསྶ ཀཐནཾ ཙཱགཱཏིསཡཡོགསངྑཱཏཨུདཱརགུཎསྶ ཨནནུཙྪཝིཀནྟི ཨོཙིཏྱཧཱིནཾ.

བྷགྒརཱིཏི ཡཐཱ

༦༣.

ཨིཏྠཱིནཾ དུཛྫནཱནཉྩ, ཝིསྶཱསོ ནོཔཔཛྫཏེ;

ཝིསེ སིངྒིམྷི ནདིཡཾ, རོགེ རཱཛཀུལམྷཱི ཙ.

༦༣. ‘‘ཨིཏྠཱིན’’མིཙྩཱདི. ནོཔཔཛྫཏེ ན ཡུཛྫཏི. ཨེཏྠ སམྦནྡྷེ ཚཊྛིཡཱ པརིཙྩཱགེན ཝིསེཨིཙྩཱདིནཱ ཨཱདྷཱརེ སཏྟམཱིནིདྡེསོ ¶ ཨཏྠརཱིཏིཡཱ བྷངྒོ. ཨཱདོ མཛ྄ཛྷེ ཙ ཙཀཱརཔརིཙྩཱགཱ སདྡརཱིཏིཡཱ བྷངྒོ, རཱིཏཱིནཾ ཨནནྟཏྟཱ བྷངྒཱཔྱནནྟཱ. ཨུདཱཧརཎཾ ཏུ དིསཱམཏྟཾ.

༦༣. ‘‘ཨིཏྠཱིན’’མིཙྩཱདི. ཨིཏྠཱིནཉྩ དུཛྫནཱནཉྩ ཝིསྶཱསོ སཧཝཱསཱདཱིཧི ཝིསྶཱསོ ནོཔཔཛྫཏེ ཨནཏྠསཾསཡཱནིཝཏྟིཀཱརཎཏྟཱ ན ཡུཛྫཏི. ཝིསེ གརལེ༹ ཙ སིངྒིམྷི སིངྒཝཏི མཧིཾ སཱདོ ཙ ནདིཡཉྩ རོགེ ཝཌྜྷམཱནཀེ རོགེ ཙ རཱཛཀུལམྷི ཙ ཝདྷབནྡྷནཱདིཀཱརཀེ རཱཛཀུལེ ཙ ཝིསྶཱསོ ནོཔཔཛྫཏེ. ཨེཏྠ ཨཱདོ སམྦནྡྷེ ཚཊྛིཡཱ ཨཱརབྷིཏྭཱ ཏཾ པཧཱཡ སཏྟམིཡཱ ཝུཏྟཏྟཱ ཨཏྠརཱིཏི ཙ, ཨཱདིམཛ྄ཛྷེསུ ཙསདྡཔརིཙྩཱགཏོ སདྡརཱིཏི ཙ བྷིནྣཱ. ཙསདྡཾ པཡུཉྫནྟེན ཨཱདོ ཨེཝ ཝཱ ཨནྟེ ཨེཝ ཝཱ པཙྩེཀཾ ཝཱ ཡོཛེཏབྦཾ ཧོཏི. ཨཱིདིསོ པཡོགོ རཱིཏིབྷངྒོ ནཱམ ཧོཏི. རཱིཏཱིནཾ བཧུཏྟཱ རཱིཏིབྷངྒདོསཱཔི བཧུཝིདྷཱ. ཨིདཾ པན མུཁམཏྟནིདསྶནཾ.

སསཾསཡཾ ཡཐཱ

༦༤.

མུནིནྡཙནྡིམཱལོཀ-རསལོལཝིལོཙནོ;

ཛནོ’ཝཀྐནྟཔནྠོ’ཝ, གོཔདསྶནཔཱིཎིཏོ.

༦༤. ‘‘མུནིནྡི’’ཙྩཱདི. ¶ ཙནྡིམཱ ཝིཡ ཙནྡིམཱ, མུནིནྡོཡེཝ ཙནྡིམཱ, ཏསྶ ཨཱལོཀནཾ དསྶནཾ, ཨཱལོཀོ པཀཱསོ ཝཱ, ཏསྨིཾ རསོ ཨནུརཱགོ, ཏེན ལོལཱནི ཙཔལཱནི ལོཙནཱནི ཨཀྑཱིནི ཡསྶ སོ ཛནོ ཨཝཀྐནྟོ ཨོཀྐནྟོ པཝིཊྛོ པནྠོ མགྒོ ཡེན ཨཝཀྐནྟཔནྠོ ཨེཝ གུནྣཾ རཾསཱིནཾ, ཨིཊྛཏྠནིཔྥཏྟིསཱུཙཀབྷཱཝེན གོཔདཏྠསྶ ཝཱ པདསྶནེན པཱིཎིཏོ མུདིཏོཏི ཨེཏྠ གོརཱུཔསྶ པདསྶནེནཱཏིཔི ཝིཉྙཱཡཏཱིཏི སནྡེཧོ.

༦༤. ‘‘མུནིནྡི’’ཙྩཱདི. མུནིནྡཙནྡིམཱལོཀརསལོལཝིལོཙནོ མུནིནྡསངྑཱཏསྶ ཙནྡིམསྶ ཨཱལོཀེ དསྶནེ པཱཏུབྷཱཝེ ཝཱ རསེན ཨཱལཡེན ཙཉྩལནེཏྟོ ཛནོ ཨཝཀྐནྟཔནྠོཝ ཨོཏིཎྞམགྒོཝ བུདྡྷསྶ དསྶནཏྠཱཡ མགྒམོཏིཎྞོཏི ཨདྷིཔྤཱཡོ. གོཔདསྶནཔཱིཎིཏོ གོསངྑཱཏརཾསིཔདསྶནེན, ཨབྷིམངྒལསམྨཏགོཔདསྶནེན ཝཱ སནྟུཊྛོ ཧོཏི. ཨེཏྠ གོཔདསྶནེནཱཏི ཙ ཨཏྠསྶ གམྱམཱནཏྟཱ ཝིཉྙཱཏུཾ སཾསཡོ ཨུཔྤཛྫཏཱིཏི སསཾསཡཾ ནཱམ. ཨཝཀྐནྟོ པནྠོ ཡེནཱཏི ཙ, གུནྣཾ རཾསཱིནཾ, གཱཝསྶ ཝཱ པདསྶནནྟི ཙ, གོཔདསྶནེན པཱིཎིཏོཏི ཙ ཝིགྒཧོ.

༦༥.

ཝཱཀྱཏྠཏོ དུཔྤཏཱིཏི-ཀརཾ གཱམྨཾ མཏཾ ཡཐཱ;

པོསོ ཝཱིརིཡཝཱསོ’ཡཾ, པརཾ ཧནྟྭཱན ཝིསྶམི.

༦༥. ‘‘ཝཱཀྱ’’ཨིཙྩཱདི. པརཾ སཏྟུཾ ཧནྟྭཱན པཧརིཏྭཱ ཝཱིརིཡཝཱ སཱུརོ སོཡཾ པོསོ པུརིསོ ཝིསྶམི ཝིསྶཏྠོ. ཨཡམཏྠོ ཏཱཝ ན དུཔྤཏཱིཏོ. པརཾ ཨཙྩནྟཾ ཧནྟྭཱན ཝཱིརིཡཝཱ ཨུཙིཏསམྦྷཝོ སོཡཾ པོསོ ཝིསྶམཱིཏི དུཔྤཏཱིཏོཡམཏྠོ.

༦༥. ཨནྭཏྠཝསེན ལཀྑཎསྶ ཨཔཱཀཊཏྟཱ སལཀྑཎཾ ལཀྑིཡམུདཱཧརཏི ‘‘ཝཱཀྱཏྠཏོ’’ཙྩཱདིནཱ. ཝཱཀྱཏྠཏོ དུཔྤཏཱིཏིཀརཾ ཝིརུདྡྷཔྤཀཱསཀཾ གཱམྨནྟི མཏཾ. ཡཐཱཏི ཨུདཱཧརཏི. པརཾ སཏྟུཾ ཧནྟྭཱན མཱརེཏྭཱན ཝཱིརིཡཝཱ སཱུརོ སོ ཨཡཾ པོསོ ཝིསྶམི ཝིགཏཔརིསྶམོ ཨཧོསི, ཨཡམཏྠོ ཨིཊྛོ. པརཾ ཨཏིསཡེན ཧནྟྭཱན ཝཱིཏིཀྐམཾ ཀཏྭཱ ཝཱིརིཡཝཱ ཨུཔཙིཏསམྦྷཝོ ཨུཔཙིཏསུཀྐོ སོ ཨཡཾ པུརིསོ ཝཱཡཱམེན ཝིསྶམི ཝིགཏཝཱཡཱམོ ཨཧོསཱིཏི. ཨིམསྶཏྠསྶ ཨསབྦྷཱརཧཏྟཱ གཱམྨཏྟཾ. ཝཱིརིཡཾ ཨུསྶཱཧོ སམྦྷཝོ ཝཱ ཨསྶ ཨཏྠཱིཏི ཝིགྒཧོ.

༦༦.

དུཊྛཱལངྐརཎཾ ¶ ཏེཏཾ, ཡཏྠཱལངྐཱརདཱུསནཾ;

ཏསྶཱལངྐཱརནིདྡེསེ, རཱུཔམཱཝཱིབྷཝིསྶཏི.

༦༦. ‘‘དུཊྛཱ’’ཨིཙྩཱདི. ཡཏྠ ཡསྨིཾ ཝཱཀྱེ ཨལངྐཱརཱནཾ དཱུསནཾ ཝིཀཊཏཱ, ཨེཏནྟུ དུཊྛཱལངྐརཎཾ དུཊྛཱལངྐརཎཾ ནཱམ, ཏསྶ དུཊྛཱལངྐཱརསྶ རཱུཔཾ སརཱུཔཾ ཨལངྐཱརནིདྡེསེ ཏཾནཱམཀེ པརིཙྪེདེ ཨཱཝཱིབྷཝིསྶཏི པཀཱསིསྶཏི, ཏཏྠེཝ ཏཾ དསྶཡིསྶཱམཱིཏི ཨདྷིཔྤཱཡོ.

༦༦. ‘‘དུཊྛཱལངྐརི’’ཙྩཱདི. ཡཏྠ ཝཱཀྱེ ཨལངྐཱརདཱུསནཾ ཨལངྐཱརཱནཾ ཝིརོདྷོ ཧོཏི, ཨེཏཾ ཝཱཀྱཏྠནིསྶིཏཾ ཨེཏཾ ཝཱཀྱཾ དུཊྛཱལངྐརཎཾ དུཊྛཱལངྐཱརོ ནཱམ, ཏསྶ དུཊྛཱལངྐརཎདོསོཔལཀྑིཏཝཱཀྱསྶ རཱུཔཾ སརཱུཔཾ ལཀྑིཡཾ ཨལངྐཱརནིདྡེསེ ཨལངྐཱརཱནཾ ནིདསྶནཊྛཱནབྷཱུཏེ པརིཙྪེདེ ཨཱཝཱིབྷཝིསྶཏི. ཨེཏྠ ཝུཏྟེཔི པུན ཏཏྠཱཔི ཝཏྟབྦཾ སིཡཱཏི ན ཝུཏྟནྟི ཨདྷིཔྤཱཡོ. ཨུདྡེསེ ‘‘དུཊྛཱལངྐཏཱི’’ཏི ཝཏྭཱ ཨིདཱནི ‘‘དུཊྛཱལངྐརཎ’’ནྟི ཝཙནཾ ཨལངྐཏི ཨལངྐརཎཨལངྐཱརསདྡཱནཾ ཏུལྱཏྠཏྟཱ ན ཝིརུཛ྄ཛྷཏི.

༦༧.

ཀཏོ’ཏྲ སངྑེཔནཡཱ མཡཱ’ཡཾ,

དོསཱནམེསཾ པཝརོ ཝིབྷཱགོ;

ཨེསོ’ཝ’ལཾ བོདྷཡིཏུཾ ཀཝཱིནཾ,

ཏམཏྠི ཙེ ཁེདཀརཾ པརམྤི.

ཨིཏི སངྒྷརཀྑིཏམཧཱསཱམིཔཱདཝིརཙིཏེ སུབོདྷཱལངྐཱརེ

དོསཱཝབོདྷོ ནཱམ

པཋམོ པརིཙྪེདོ.

༦༧. ཨེཝཾ ‘‘སོདཱཧརཎམེཏེསཾ, ལཀྑཎཾ ཀཐཡཱམྱཧ’’ནྟི ཀཏཔཊིཉྙཱནུརཱུཔཾ པཊིཔཛྫ དཱནི ‘‘ཀཏོཏྲི’’ཙྩཱདིནཱ ནིཀྑིཔནནཡཾ སངྑིཔཏི. ཨཏྲ ཨིམསྨིཾ ཨདྷིཀཱརེ, པརིཙྪེདེ ¶ ཝཱ ཨེསཾ ཡཐཱཝུཏྟཱནཾ དོསཱནཾ པདདོསཱདཱིནཾ པཝརོ ཨུཏྟམོ ཝིབྷཱགོ ཝིབྷཛནཾ སངྑེཔནཡཱ སངྑེཔཀྐམེན, ན ཝིཏྠཱརཏོ, ཡཏོ ཨཔརིསངྑྱེཡྻཱནཾ ནཏྠི པརིཡནྟོ མཡཱ ཀཏོ ནིཊྛཱཔིཏོ. ནནུ ‘‘སངྑེཔནཡཱ’’ཏི ཝུཏྟཏྟཱ པུརཱཏནེཧི [པུརཱཏརེཧི (ཀ.)] དཱིཔིཏཱ སནྟི བཧཱུ དོསཱ, ཏེ པརིཙྩཏྟཱ སིཡུནྟི? ཨེཏྠ ཝུཙྩཏེ, ཝིཏྠཱརཀྐམསྶ ཨནདྷིཔྤེཏཏྟཱ ‘‘སངྑེཔནཡཱ’’ཏི ཝུཏྟཾ, ན པན སབྦཐཱ པརིཙྩཱགེན. ཏཐཱ ཧི–

‘‘ནིཧནྟུ སོཡཾ ཛལིཏཾ, པཏངྒོ ཨརིཔཱཝཀ’’ནྟིཨཱདཱིནཾ

ཨཀྑམཏྠནྟརཱདིཀཾ ཝིརུདྡྷཏྠནྟརཱནུགཏནྟི ཙ. ཨེཏྠ ཧི པཏངྒསདྡེན ཛོཏིརིངྒཎསངྑཱཏམཏྠནྟརམསམཏྠམིཙྪིཏཏྠེ ‘‘ཝཙནྟི གཎྜཱ’’ཏྱེཝམཱདིཀཾ ཨམངྒལཨཔཡུཏྟཔདཱདིཀཾ ཀིལིཊྛེ ཨནྟོགདྷནྟི ཙ.

གཛཧེསཱདི སམྦནྡྷདཱུསིཏཾ ལོཀཝིརོདྷི, སོགཏཱགམཱདཱིསུ པསིདྡྷཾ རཱུཔཀྑནྡྷཱདིཀམཉྙཏྲ ཝུཏྟཾ ཨཔྤཏཱིཏཾ ནཱམ. ཨིདཾ ཨཱགམཝིརོདྷིཨིཏི, སམྦནྡྷདཱུསིཏཔྤཏཱིཏཱདིཀཾ ཝིརོདྷིམྷི པཝིཊྛནྟི ཙ, ཨཱནེཏབྦཧེཏུཏྟཱ ཧེཏྭཔེཀྑཾ ནེཡྻཏོ ན བྱཏིརིཙྩཏཱིཏི ཙ.

‘‘དེཝོ ཝོཧརཏུ ཀླེསཾ, རཱཧུཁིནྣོ དིཝཱཀརོ’’

ཨིཙྩཱདིཀཾ ཨསཱམཏྠྱཱབྷིདྷེཡྻཱདིཀཾ ཨོཙིཏྱཧཱིནེ སངྒཧིཏནྟི ཙ. ཛིགུཙྪཨསབྦྷསཾསཱུཙཀཨཏྠནྟརཀཉྩ གཱམྨཾ དུཔྤཏཱིཏིཀརེ སངྒཡ྄ཧཏཱིཏི ཙ. ( ) [(དུརུཙྩཱརཎཾ)?] སབནྡྷཕརུསམེཝེཏི ཙ.

ཨེཏྠ པན ཨོཙིཏྱཧཱིནདུཔྤཏཱིཏིཀརཱནཾ ཝཱཀྱཏྠདོསཏྟེཔི ཕནྡྷཕརུསསྶ ཙ ཝཱཀྱདོསཏྟེ པདཔདཏྠཱནཾ དོསཏོ ཝཱཀྱམེཝ དུཊྛཾ སིཡཱ, ཝཱཀྱཉྩ པདེཧི ཝིརིཙྩཏེ, པདེ དུཊྛེ ཝཱཀྱཏྠོ ཙ དུཊྛོ སིཡཱ. པདདོསཏོ ཝཱཀྱཝཱཀྱཏྠཱནཾ ནཱནཱབྷཱཝཱབྷཱཝཉཱཔནཏྠཾ ཨསཱམཏྠིཡཱབྷིདྷེཡྻཱདིཀཾ པདཾ ཨོཙིཏྱཧཱིནཱདིཝཱཀྱཏྠདོསཱདཱིསུ ¶ ཨནྟོ ཀཐིཏཾ. ཏཐཱ ཧི པུརཱཏནེཧི ཝིརུདྡྷཏྠནྟརཱདཱིཧི པདེཧི ཝིརཙིཏཾ ཝཱཀྱཾ ཝིརུདྡྷནྟིཨཱདིནཱ བཧཱུནི དུཊྛཱནི ཝཱཀྱཱནི དསྶིཏཱནི. ‘‘ཧརིསམཱནཡཱི’’ཏི ཨེཏྠ ཧཔུབྦཾ རིས’མཱནཡཱིཏི ཨིཙྪིཏཏྠཱ པརི བྷཊྛཾ བྷཊྛཾ. ནཱནཏྠམཔྤསིདྡྷེཧི ཡུཏྟཾ གུལ༹ྷཾ, ཡཐཱ ‘‘སཀྐོ སཧསྶགཱུ’’ཏི. ཨིཏི བྷཊྛགུལ༹ྷཏྠཱདཡོ པསཱདཱལངྐཱརཝིརུདྡྷཱཏི ཙ.

ཝཱཀྱེཔི ཝིསནྡྷིཀམིཧཱནུཔཡོགཱིཏི ཙ, ཝཱཀྱནྟརོཔགཏཾ ཝཱཀྱཾ ཝཱཀྱགབྦྷཾ, ཝཱཀྱནྟརཔདསམྨིསྶཾ ‘‘ཨཔཱཐྱམེསོ དིསྶཏི, ཝེཛྫཾ ཁཱདཏྱནཱརཏ’’མིཙྩཱདིཀཾ ཝཱཀྱསཾཀིཎྞཉྩ བྱཱཀིཎྞེ སམོཧིཏནྟི ཙ.

‘‘ཀཱཙུཡྻཱནེ མཡཱ དིཊྛཱ, ཝལླརཱི པཉྩཔལླཝཱ;

པལླཝེ པལླཝེ མུདྷཱ, ཡསྶཱ ཀུསུམམཉྩརཱི’’ཏི.

ཨིདམཝཱཙཀཾ པཧེལི༹ཀཱཡ པམུསྶིཏཱསནྣིསྶིཏནྟི ཙ, ཏཏྠ ཙ ཀཝིནཱ ཨུཡྻཱནསདྡེན གེཧཾ, ལཏཱཝཱཙིནཱ ཝལླརཱིསདྡེན ཨངྒནཱ, པལླཝསདྡེན ཀརཙརཎདསནཙྪདཱ, མཉྩརཱིསདྡེན ནཁསོབྷཱ དནྟཀནྟིཡོ ཙ ཝཏྟུམིཙྪིཏཱ, ཝཱཀྱཏྠེཔི པདུམིནཱིནཾ རཏྟིཡམུནྣིདྡཏཱདིཀཾ ཝིརུདྡྷཾ ཝིརོདྷིནིལཱིནནྟི ཙ ནཱཏྱནུཉྙཱཏཱ, ན ཏུ སབྦཐཱ པརིཙྩཱགེན. ཨེསོཝ ཨེཝཾ ཡཐཱཝུཏྟནཡེན ནིཊྛཱཔིཏོ ཨཡཾ སངྑེཔནཡོ ཨེཝ ཀཝཱིནཾ པཎྜིཏཛནཱནཾ ཁེདཀརཾ ‘‘ཀཐཾ ནཱམ བནྡྷེཔཱིདིསཾ སཏི སནྟཱི’’ཏི ཨེཝམཱསུཧནོཔཛནཾ པརཾ པདདོསེ ཨསཱདྷུསནྡིདྡྷཔརིཡཱཡ ཉེཡྻཨཔྤཏཱིཏཏྠཨཔྤཡོཛཀ དུབྦོདྷདེསིཡཱདིཀཾ, ཝཱཀྱདོསེ ཨདྷིཀཨཱུནབྷགྒཙྪནྡཱདིཀཾ, ཝཱཀྱཏྠདོསེ ཨུཔཀྐམོཔསཾཧཱརཝིསམཉྩེཏི ཨིཙྩེཝམཱདིཀམཔརམྤི དཱུསནཾ ཨཏྠི ཙེ ཡདི བྷཝེཡྻ, ཏམྤི བོདྷཡིཏུམཝགམེཏུཾ ཨལཾ སམཏྠཾ ཡཐཱཝུཏྟདོསཱནུསཱརེན བུདྡྷིམནྟེཧི སཀྐཱ ཨཱུཧིཏུནྟི.

ཨེཝཾ ¶ ཝདཏོ ཙ གནྠཀཱརསྶཱཡམདྷིཔྤཱཡོ – ཡེ དོསཱ ཝིབྷཱགསོ ན ཝུཏྟཱ, ཏེ མཡཱ གནྠགཱརཝབྷཡཱ སངྑེཔིཏཱ, ལཀྑཎཏོ ཏུ སངྒཧིཏཱ. ན ཧི ཏེསམནྟཾ ཀོ ཛཧཱཔེཏི.

ཏཏྠ སདྡསཏྠཝིརུདྡྷམསཱདྷུ. ཡཾ ཀྲིཡཱདིནིམིཏྟམུཔཱདཱཡ ཨཏྠནྟརེཔི ཝཏྟཏེ, ཏཾ སཉྙཱབྷཱཝེནེཝ པཡུཏྟཾ སནྡིདྡྷཾ, ཡཐཱ ‘‘རཝིམྷིཧིམཧཱ’’ཏི, ཨིདཾ པན ཝིསེསནཏྠེ སཱདྷུ ཧོཏི. པསིདྡྷསཉྙཱསདྡསྶ པརིཡཱཡནྟརེན པརིཀཔྤིཏཔདཾ པརིཡཱཡཉེཡྻཾ, ཡཐཱ ‘‘ཝལ༹ཝཱམུཁེནེ’’ཏི ཨེཏྠ ‘‘ཨསྶཝནིཏཱནནེན’’ ཨིཏི. ཡཾ ཨཙྩནྟཱབྱབྷིཙཱརཱིབྷཱཝེན ཝིསེསྱསྶ གུཎཾ ཝདཏི, ཏཾ ཨཔྤཏཱིཏཏྠཾ, ཡཐཱ ‘‘ཀཎྷམསཱི’’ཏི. ཨདྷིགཏཏྠཱནུཔཡོགཾ ཨཔྤཡོཛཀཾ, ཡཐཱ ‘‘ཨཏིཕེནིལཾ སཱགརམལངྒྷཱི’’ཏི. ‘‘མནུཉྙདྡྷནཡོ པཱདེ, ཁཱདཡོ ཀནི བྷནྟི ཏེ’’ ཨིཙྩཱདིཀོ དུབྦོདྷོ, ཀནི ཀཉྙེ ཁཱདཡོ གགྒྷརིཀཱ. ‘‘ཨིམེ ལཱཝཎྱཏལླཱ ཏེ, གལླཱ ལོལཝིལོཙནེ’’ཨིཙྩཱདིཀོ དེསིཡོ, ཏལློ ཛལཱསཡཝིསེསོ, གལློ ཀཔོལོ. ‘‘སགྒསེཝཱིནཾ རིཔཱུནམིཏྠཱིནམཀངྐཎོ པཱཎི. ནེཏྟམནཉྫན’’ནྟིཨཱདིཀཾ ཨདྷིཀཾ. ‘‘ཨཀངྐཎོ པཱཎཱི’’ཏིཨཱདིནཱ ཝེདྷབྱསྶ གམྨམཱནཏྟཱ ‘‘སགྒསེཝཱིན’’ནྟི ཨདྷིཀནྟི. ཡཏྠ ཝཏྟབྦསྶ ཨཱུནཏཱ, ཏཾ ཨཱུནཾ, ཡཐཱ ‘‘ཏིལོཀཏིལཀཾ མུནི’’ནྟིཨཱདི. ཨེཏྠ ‘‘ཝནྡཱམཱི’’ཏི ཨཱུནཾ, ཚནྡོབྷངྒཱནྭིཏཾ ཝཙོ བྷགྒཙྪནྡཾ པཱཀཊཾ. ཨཱརམྦྷཱཝསཱནེན ཝིསམཾ ཨུཔཀྐམོཔསཾཧཱརཝིསམཾ, ཏཾ པན ཨཱརདྡྷཀྐམཔརིཙྩཱགེནཱཔརེན ནིཀྑིཔནཾ ཝེདིཏབྦཾ.

ཨིཏི སུབོདྷཱལངྐཱརེ མཧཱསཱམིནཱམིཀཱཊཱིཀཱཡཾ

དོསཱཝབོདྷཔརིཙྪེདོ.

༦༧. ཨེཝཾ ‘‘སོདཱཧརཎམེཏེསཾ, ལཀྑཎཾ ཀཐཡཱམྱཧ’’ནྟི ཀཏཔཊིཉྙཱནུརཱུཔཾ སམྤཱདེཏྭཱ ཨིདཱནི ‘‘ཀཏོཏྲེ’’ཙྩཱདིནཱ ནིགམེནྟོ དོསེ སངྑིཔཏི. ཨཏྲ ཨིམསྨིཾ ཨདྷིཀཱརེ, ¶ པརིཙྪེདེ ཝཱ ཨེསཾ དོསཱནཾ ཡཐཱཝུཏྟཔདདོསཱདཱིནཾ པཝརོ ལཀྑཎཱཝིརོདྷལཀྑིཡཏོ ཨུཏྟམོ ཝིབྷཱགོ ཨསངྐརཏོ ཝིབྷཛནཾ སངྑེཔནཡཱ ཝིཏྠཱརཱཔནིཡསངྑེཔཀྐམེན མཡཱ ཀཏོ ཝུཏྟོ ཨེསོཝ ཡཐཱཝུཏྟོ ཨེསོ སངྑེཔཀྐམོ ཨེཝ ཀཝཱིནཾ ཝིརཙཡནྟཱནཾ ཁེདཀརཾ བནྡྷསརཱིརེ ཨཱིདིསཾ ཨཱིདིསཔྤཡོགཾ ཀཐཾ ནཱམ ཀརོམཱིཏི ཨེཝཾ པཝཏྟཁེདམུཔྤཱདཡནྟཾ པརམྤི ཨསཱདྷུསནྡིདྡྷཱདི ཨཉྙམྤི དཱུསནམཏྠི ཙེ, ཏཾ སབྦཾ བོདྷཡིཏུཾ བོདྷེཏུཾ ཨལཾ སམཏྠོ ཧོཏི. ནིཡཏི ཨཝུཏྟོཔི ཨཏྠོ ཨེཏེནཱཏི ཙ, སངྑེཔོ ཙ སོ ནཡོ ཙཱཏི ཝིགྒཧོ.

ཨིཧཱནིདྡིཊྛཾ

‘‘ནིཧནྟུ སོཡཾ ཛལིཏཾ, པཏངྒོ ཨརིཔཱཝཀ’’ནྟིཨཱདིཀཾ

ཨཀྑམཏྠནྟརཱདིཀཾ ཝིརུདྡྷཏྠནྟརེ ཨནུཔཏཏྟཱ ན ཝུཏྟཾ, ཨེཏྠ སཱུརིཡཝཱཙཀོ པཏངྒསདྡོ ཛོཏིརིངྒཎཝཱཙཀོཔི ཧོཏཱིཏི ཝཏྟུམིཙྪིཏཨམིཏྟགྒིཝིནཱསེ ཨསམཏྠཉྙཏྠོ ཧོཏི.

‘‘ཝཙནྟི གཎྜི’’ཙྩཱདིཀཾ ཨཱགམེ ཨཔྤསིདྡྷཾ ལཀྑཎམཏྟེན སཱདྷིཡཾ. ཨཔྤཡུཏྟཔདཱདིདོསོ ཀིལིཊྛཔདདོསེ ཨནྟོགདྷོ ཧོཏཱིཏི ན ཝུཏྟོ.

གཛཧེསཱཏུརངྒཀོཉྩནཱདཱདིསམྦནྡྷདཱུསིཏཉྩ. ཛིནཱགམཱདཱིསུ པསིདྡྷརཱུཔཀྑནྡྷཱདིཀམཉྙཏྲ པཡུཏྟམཔྤཏཱིཏནྣཱམཱཏཱིདཾ དྭཡཾ ཡཐཱཀྐམཾ ལོཀཝིརོདྷམཱགམཝིརོདྷཉྩ ཧོཏཱིཏི ཝིརོདྷིཔདེ ཨནྟོགདྷཾ ཧོཏི. ཧེཏྭཔེཀྑཾ ཨཱནེཏབྦཧེཏུཏྟཱ ནེཡྻེ ཨནྟོགདྷནྟི ན ཝུཏྟཾ.

‘‘དེཝོ ཝོཧརཏུ ཀླེསཾ, རཱཧུཁིནྣོ དིཝཱཀརོ’’

ཨིཙྩཱདིཀཾ ཨསམཏྠཱབྷིདྷཱཡིཙྩཱདི ཨོཙིཏྱཧཱིནེ ཨནྟོགདྷནྟི ན ཝུཏྟཾ. ཨེཏྠ དིཝཱཀརོ སཡཾ རཱཧུགཧིཏོ ཨཉྙེསཾ ཀིལེསཱཔནཡནེ ¶ ཨསམཏྠོཏི ཏམསཱམཏྠིཡཾ ཝིསེསནབྷཱུཏེན ‘‘རཱཧུཁིནྣོ’’ཏི པདེན ཉཱཡཏི.

ཛིགུཙྪཱཝམངྒལཨསབྦྷཱནཾ ཏིཎྞམཉྙཏྲསྶ ཛོཏཀཾ ཝཱཙཀཾ ཝཱ ཨཏྠནྟརཾ ཝཱ གཱམྨཾ དུཔྤཏཱིཏིཀརཏྟཱ ཝཱཀྱཏྠགཱམྨདོསེཡེཝ ཨནྟོགདྷནྟི ན ཝུཏྟཾ. དུརུཙྩཱརཎབྷཱུཏལཀྑཎཾ ཀཊྛཾ བནྡྷཕརུསཏོ ཨབྱཏིརིཏྟནྟི ན ཝུཏྟནྟི. ‘‘ཧརིསམཱནཡཱི’’ཏི ཝཏྟབྦེ ཧཔུབྦཾ རིས’མཱནཡིཨིཙྩཱདིཀཾ ཨིཙྪིཏཏྠཏོ པརིབྷཊྛཏྟཱ བྷཊྛཉྩ ‘‘སཀྐོ སཧསྶགཱུ’’ཨིཙྩཱདིཀཾ ཨཔསིདྡྷཝིསཡེ པརིཡུཏྟགུལ༹ྷཉྩེཏི ཨིམེ ཨཏྠགུལ༹ྷཱདཡོ པསཱདཱལངྐཱརཝིརུདྡྷཏྟཱ པསཱདགུཎཱདཱནེནེཝ པརིཙྩཏྟཱཏི ན ཝུཏྟཾ. ཨེཏྠ ཧི སཧསྶཾ གཱཝོ ཙཀྑཱུནི ཨསྶཱཏི སཧསྶགཱུཏི སཀྐསྶ ནཱམཾ གུལ༹ྷཾ ནཱམ ཧོཏི.

ཝཱཀྱདོསེཔི ཝིསནྡྷིཝཱཀྱཾ ཨིདྷ ཨནུཔཡོགིཏྟཱ ན ཝུཏྟཾ. ཝཱཀྱམཛ྄ཛྷཔཏིཏཝཱཀྱཡུཏྟཾ ཝཱཀྱགབྦྷཉྩ, ཝཱཀྱནྟརཔདསམྨིསྶཾ.

‘‘ཨཔཱཐྱམེསོ དིསྶཏི, ཝེཛྫཾ ཁཱདཏྱནཱརཏཾ’’

ཨིཙྩཱདིཀཾ ཝཱཀྱསཾཀིཎྞཉྩ བྱཱཀིཎྞེ ཨནྟོགདྷནྟི ན ཝུཏྟཾ. ཨེཏྠ ཨེསོ བྷིསཀྐོ ཨནཱརཏཾ ནིཙྩཾ ཨཔཱཐྱཾ རོགསྶ ཨཧིཏཾ དིསྶཏི ཝདཏི. ཨེསོ རོགཱི ཨནཱརཏཾ སཏཏཾ ཨཔཱཐྱཾ ཨཧིཏཾ ཁཱདཏི. ཝེཛྫཾ བྷིསཀྐཾ དིསྶཏི ཀུཛ྄ཛྷཏི. ཨེཝཾ ཨནེཀཝཱཀྱེཧིཔི སནྡྷིཝཱཀྱཾ སཾཀིཎྞཾ ནཱམ.

‘‘ཀཱཙུཡྻཱནེ མཡཱ དིཊྛཱ, ཝལླརཱི པཉྩཔལླཝཱ;

པལླཝེ པལླཝེ མུདྷཱ, ཡསྶཱ ཀུསུམམཉྩརཱི’’ཏི.

ཨིདམཝཱཙཀཾ པཧེལི༹ཀཱསུ པམུསྶིཏཱསནྣིསྶིཏམིཏི ན ཝུཏྟཾ. ནནུ ཙེཏྠ ཨཏྟནཱ པཧེལི༹ཀཱཡ ཨདསྶིཏཏྟཱ ཨཝཱཙཀསྶ པམུསྶིཏཱཡ ཨནྟོགདྷཀརཎཾ ཨསིདྡྷེན ཨསིདྡྷསཱདྷནནྟི? ནཡིདམེཝཾ, ‘‘ཨུཔེཀྑིཡནྟི སབྦཱནི, སིསྶཁེདབྷཡཱ མཡཱ’’ཏི ཙ ཨུཔརི ཀིལིཊྛཔདདོསཔརིཧཱརེ ‘‘པཧེལི༹ཀཱཡམཱརུལ༹ྷཱ, ན ཧི དུཊྛཱ ཀིལིཊྛཏཱ’’ཏི ཙེཏི ཨིམིནཱ ¶ པུརཱཏནེཧི ནིདྡིཊྛསོལ༹སཔཧེལི༹ཀཱཡོཔི དསྶིཏཱཏི སིདྡྷེན ཨསིདྡྷསཱདྷནཾ ཧོཏི. ཏཏྠ ཀཝིནཱ ཨུཡྻཱནསདྡེན གེཧཉྩ ལཏཱཔརིཡཱཡཝལླརཱིསདྡེན ཨངྒནཱ ཙ པལླཝསདྡེན ཀརཙརཎཱདྷརཱ ཙ མཉྩརཱིསདྡེན ནཁདནྟཀནྟིཡོ ཙ ཝཏྟུམིཙྪིཏཱ.

ཝཱཀྱཏྠདོསེཔི པདུམིནཱིནཾ རཏྟིཡཾ པབུཛ྄ཛྷནཱདིཀཾ ཝིརུདྡྷཾ ཝིརོདྷིཔདེཡེཝ ཨནྟོགདྷཏྟཱ ན ཝུཏྟནྟི དསྶེཏུཾ ‘‘ཀཏོཏྲ སངྑེཔནཡཱ’’ཏི ཝུཏྟཾ, ན པན ཏེསཾ སབྦཐཱ པརིཙྩཏྟཏྟཱཏི. ཨེཏྠ ཨོཙིཏྱཧཱིནདུཔྤཏཱིཏིཀརཱནཾ དྭིནྣཾ ཝཱཀྱཏྠདོསཏྟེ སཏི བནྡྷཕརུསསྶ ཝཱཀྱདོསཏྟེ སཏི ཝིརོདྷིནོ པདདོསཏྟེ སཏི ‘‘ཨསམཏྠཱབྷིདྷཱཡི’’ཨཱདིཔདཾ, ‘‘ཛིགུཙྪཱདིཏྟཡཔཀཱསཀཱ’’དིཔདཾ, ཀཊྛཔདཾ, པདུམིནཱིནཾ རཏྟིཡཾ ཕུལླཏཱདི [དུནྣིདྡཏཱདི (ཀ.)] ཝཱཀྱཏྠཉྩེཏི ཨིམེ ཙཏྟཱརོ དོསཱ བྷིནྣཛཱཏིཀེསུ ཨོཙིཏྱཱདཱིསུ ཀཐཾ སངྒཧིཏཱཏི? སཙྩཾ, ཏཐཱཔི པདཱནཾ དུཊྛཏྟེ སཏི ཝཱཀྱཝཱཀྱཏྠཱནམདུཊྛཏཱ ནཱམ ནཏྠཱིཏི པདདོསེན སནྡྷིཝཱཀྱཝཱཀྱཏྠདོསཱནམནཉྙཏྟཾ སིསྶཱནཾ ཉཱཔནཏྠཾ པདདོསཱདིཀཾ ཝཱཀྱཏྠདོསཱདཱིསུ སངྒཧིཏནྟི ཝེདིཏབྦཾ. ཨིམིནཱཡེཝ པུརཱཏནེཧི ཝིརུདྡྷཏྠནྟརཱདིཔདེཧི ཝིཙརིཏཾ ཝཱཀྱཾ ཝིརུདྡྷནྟིཨཱདིནཱ དུཊྛཱནི བཧཱུནི ཝཱཀྱཱནི དསྶིཏཱནཱིཏི དཊྛབྦཾ.

ཨིམཱཡེཝ [ཨིམིསྶཱཡེཝ (ཀ.)] གཱཐཱཡ ‘‘ཏམཏྠི ཙེ ཁེདཀརཾ པརམྤཱི’’ཏི ཨེཏྠ པརསདྡེནཨསཱདྷུསནྡིདྡྷཔརིཡཱཡཉེཡྻཱཔྤཏཱིཏཏྠཨཔྤཡོཛཀ- དུབྦོདྷདེསིཡཱདིཔདདོསེ ཙ ཨདྷིཀཨཱུནབྷགྒཙྪནྡཱདིཝཱཀྱདོསེ ཙ ཨུཔཀྐམོཔསཾཧཱརཝིསམསངྑཱཏེ ཝཱཀྱཏྠདོསེ ཙ པརིགྒཎྷཱཏི. ཨེཏྠ སདྡསཏྠཝིརུདྡྷམསཱདྷུ ནཱམ. ཀྲིཡཱནིཔྥཏྟིཀཱརཎམུཔཱདཱཡ ཨཏྠནྟརེ པཝཏྟནཱམཾ ཝིསེསནཏྠེན ཝིནཱ སཉྙཱབྷཱཛནེ པཡུཏྟཾ སནྡིདྡྷཾ ནཱམ, ཡཐཱ ‘‘རཝིམྷི ཧིམཧཱ’’ཏི. ཨེཏྠ ཧིམཧཱ རཝཱིཏི ཝིསེསནེ ཀཏེ དོསོ ¶ ནཏྠི. པསིདྡྷསཉྙཱསདྡསྶ པརིཡཱཡནཱམེན ཀཔྤིཏཔདཾ པརིཡཱཡཉེཡྻཾ ནཱམ, ཡཐཱ ‘‘ཝལ༹ཝཱམུཁསྶ ཨསྶཝནིཏཱནན’’ནྟི. ཨཏིསཡཱ ཝིནཱ བྷཱཝིཏཏྠེན ཝིསེསྱསྶ གུཎཝཱཙཀཾ པདཾ ཨཔྤཏཱིཏཏྠཾ ནཱམ, ཡཐཱ ‘‘ཀཎྷམསཱི’’ཏི. ཨདྷིགཏཏྟཱནུཔཡོགིཔདཾ ཨཔྤཡོཛཀཾ ནཱམ, ཡཐཱ ‘‘ཨཏིཕེནིལཾ སཱགརམལངྒྷཱི’’ཏི. ཨཔྤསིདྡྷཝཙནཾ དུབྦོདྷཾ ནཱམ, ཡཐཱ–

‘‘མནུཉྙདྡྷནཡོ པཱདེ, ཁཱདཡོ ཀནི བྷནྟི ཏེ’’ཏི.

ཀནི ཧེ ཀཉྙེ ཏེ ཏཝཔཱདེ མནུཉྙདྡྷནཡོ མནོཧརསདྡསམནྣཱགཏཱ ཁཱདཡོ གགྒྷརིཀཱ བྷནྟི དིབྦནྟཱིཏི. ཀིསྨིཉྩི དེསེཡེཝ སིདྡྷནཱམཾ དེསིཡཾ ནཱམ. ཡཐཱ–

‘‘ཨིམེ ལཱཝཎྱཏལླཱ ཏེ, གལླཱ ལོལཝིལོཙནེ’’ཏི.

ཧེ ལོལཝིལོཙནེ ཏེ ཏཝ ཨིམེ གལླཱ ཀཔོལཱ ལཱཝཎྱཏལླཱ མནུཉྙཏལླཱ ཛལཱསཡཝིསེསཱ བྷཝནྟི. ཀེནཙི ལེསེན པཀཱསིཏམཏྠམུཔཱདཱཡ པཡུཏྟམདྷིཀཾ ནཱམ. ཡཐཱ–

‘‘ཏྭཡི རཱཛཏི རཱཛིནྡ, རིཔཱུནཾ སགྒསེཝིནཾ;

ཐཱིནཾ ཨཀངྐཎོ པཱཎི, སིཡཱ ནེཏྟམནཉྫན’’ནྟི.

ཨེཏྠ ‘‘ཨཀངྐཎོ པཱཎི, ནེཏྟམནཉྫན’’ནྟི ཨིམིནཱཡེཝཐཱིནཾ ཝིདྷཝཏྟཾ གམྱམཱནཾ ཧོཏཱིཏི ཏཔྤཀཱསནཏྠཾ པཡུཏྟཾ ‘‘སགྒསེཝིན’’ནྟི ཨིདཾ ཨདྷིཀཾ ནཱམ. ཝཏྟབྦཡུཏྟཏོ ཨཱུནཾ ཝཱཀྱཾ ཨཱུནཾ ནཱམ. ‘‘ཏིལོཀཏིལཀཾ མུནི’’ནྟི ཨེཏྠ ‘‘ཝནྡཱམཱི’’ཏི ཝཏྟབྦསྶ ཨཝུཏྟཏྟཱ ཨཱུནཾ. ཚནྡོཧཱནིསཾཡུཏྟཾ བྷགྒཙྪནྡཾ ནཱམ. ཨིདཾ ཏེསཾ ཏེསཾ ཚནྡཱནཾ ཨཀྑརགཎནཏོ ཨཱུནཱདྷིཀཝསེན པཱཀཊཾ ཧོཏི. ཨཱདྱནྟཏོ ཝིསམཾ ཨུཔཀྐམོཔསཾཧཱརཝིསམཾ ནཱམ. ཨིདཾ ཨཱརདྡྷཀྐམཾ པརིཙྩཛིཏྭཱ ཀམནྟརེན ནིཡམནྟི ཝེདིཏབྦཾ.

ཨིཏི སུབོདྷཱལངྐཱརནིསྶཡེ

པཋམོ པརིཙྪེདོ.

༢. དོསཔརིཧཱརཱཝབོདྷཔརིཙྪེདཝཎྞནཱ

༦༨.

ཀདཱཙི ཀཝིཀོསལླཱ, ཝིརོདྷོ སཀལོཔྱ’ཡཾ;

དོསསངྑྱམཏིཀྐམྨ, གུཎཝཱིཐིཾ ཝིགཱཧཏེ.

༦༩.

ཏེན ཝུཏྟཝིརོདྷཱན-མཝིརོདྷོ ཡཐཱ སིཡཱ;

ཏཐཱ དོསཔརིཧཱརཱ-ཝབོདྷོ དཱནི ནཱིཡཏེ.

༦༨-༦༩. ཨིཙྩེཝཾ ¶ དོསཝིབྷཱགཾ པརིཙྪིཛྫ ཨིདཱནི ཡཐཱཝུཏྟདོསཔརིཧཱརཀྐམམུཔདིསིཏུམཱཧ ‘‘ཀདཱཙཱི’’ཏྱཱདི. སཀལོཔི ཨཡཾ ཝིརོདྷོ ཝིརུདྡྷཏྠནྟརཱདིཀཏོ ན ཀོཙི ཨེཀོ ཨེཝ དོསེསུ, དོསཱནཾ ཝཱ སངྑྱཾ གཎནཾ དོསབྷཱཝཾ ཨཏིཀྐམྨ པརིཙྪིཛྫ གུཎཱནཾ ཝཱིཐིཾ པདཝིཾ གུཎསབྷཱཝཏཾ ཝིགཱཧཏེ ཨབྦྷུཔགཙྪཏི ཀདཱཙི, ན སབྦདཱ. ཀཝིནོ པཡུཛྫཀསྶ ཀོསལླཱ ཏཱདིསཝིསཡཔརིགྒཧལཀྑཎནེཔུཉྙཀཱརཎཱ, ན ཏུ ཡཐཱ ཏཐཱ ཙེཏི. ‘‘ཏེནེ’’ཙྩཱདི. ཡེནེཝཾ, ཏེན ཀཱརཎེན ཝུཏྟཱནཾ ཝིརུདྡྷཏྠནྟརཱདཱིནཾ ཝིརོདྷཱནཾ ཡཐཱ ཡེན པཀཱརེན ཨཝིརོདྷོ ནིདྡོསཏཱ སིཡཱ བྷཝེཡྻ, ཏཐཱ ཏེན པཀཱརེན དོསཱནཾ པརིཧཱརོ དཱུརཱིཀརཎཾ ཨཝབུཛ྄ཛྷཏི ཉཱཡཏི ཨེཏེནཱཏི ཨཝབོདྷོ, ཏསྶ ཨཝབོདྷོ, ཏནྣཱམིཀོ པརིཙྪེདོ ཨིདཱནི ནཱིཡཏེ ཨཱནཱིཡཏེ ཝུཙྩཏེཏི ཨཏྠོ.

༦༨-༦༩. ཨེཝཾ དོསཝིབྷཱགཾ པརིཙྪིནྡིཏྭཱ ཨིདཱནི ཡཐཱཝུཏྟདོསཱནཾ པརིཧཱརཏྠམཱརབྷནྟོ ‘‘ཀདཱཙཱི’’ཏྱཱདིམཱཧ. སཀལོཔི ཨཡཾ ཝིརོདྷོ པདདོསཱདིཀོ དོསསངྑྱཾ དོསཱནཾ, དོསེསུ ཝཱ གཎནཾ དོསབྷཱཝཾ ཨཏིཀྐམྨ ཀདཱཙི ཀཝིཀོསལླཱ ཀཝིནོ བྱཱཀརཎཱབྷིདྷཱནཚནྡོཨལངྐཏིཨཱདཱིསུ པརིཙཡལཀྑཎེན པཉྙཱཔཱཊཝེན ཡཏོ གུཎཝཱིཐིཾ གུཎཔདཝིཾ ཀེཝལཾ གུཎསབྷཱཝཾ ཝིགཱཧཏེ ཨབྦྷུཔགཙྪཏི, ཏེན ཀཱརཎེན ཝུཏྟཝིརོདྷཱནཾ ཡཐཱཝུཏྟཔདདོསཱདིཝིརོདྷཱནཾ ཨཝིརོདྷོ ཨཝིརུདྡྷཏཱ ཡཐཱ ¶ སིཡཱ ཡེན པཀཱརེན བྷཝེཡྻ, ཏཐཱ ཏེན པཀཱརེན དོསཔརིཧཱརཱཝབོདྷོ ཡཐཱཝུཏྟཔདདོསཱདིསམྦནྡྷིནོ པརིཧརཎཀྐམསྶ ཨཝབོདྷཀཱརཎཏྟཱ ཏནྣཱམིཀཔརིཙྪེདོ ཨིདཱནི ལདྡྷཱཝསརེ ནཱིཡཏེ ཝུཙྩཏེ. ཡཐཱཝུཏྟདོསཱ ཀཝིསཱམཏྠིཡེན ནིདྡོསཏྟཾ བྷཛནྟི, ཏསྶ སཱམཏྠིཡསྶ ཨུཔདེསཾ དསྶཱམཱཏི ཨདྷིཔྤཱཡོ.

པདདོསཔརིཧཱརཝཎྞནཱ

ཏཏྠ ཝིརུདྡྷཏྠནྟརསྶ པརིཧཱརོ ཡཐཱ –

༧༠.

ཝིནྡནྟཾ པཱཀསཱལཱིནཾ, སཱལཱིནཾ དསྶནཱ སུཁཾ;

ཏཾ ཀཐཾ ནཱམ མེགྷོ’ཡཾ, ཝིསདོ སུཁཡེ ཛནཾ.

༧༠. ‘‘ཝིནྡནྟ’’མིཙྩཱདི. པཱཀེན པརིཎཏབྷཱཝེན སཱལཱིནཾ ཡུཏྟཱནཾ, མནུཉྙཱནཾ ཝཱ སཱལཱིནཾ རཏྟསཱལིཨཱདཱིནཾ སཱལིཛཱཏཱིནཾ དསྶནཱ སུཁཾ ཙེཏསིཀཾ སོམནསྶཾ ཝིནྡནྟཾ ཏཾ ཛནཾ ཝིསདོ ཨཡཾ མེགྷོ ཨམྦུདོ ཀཐཾ ནཱམ སུཁཡེཏི. ཨེཏྠ ཏཱདིསསྶ ཛནསྶ ཨསུཁཔྤདཱནཾ གརལ༹སྶ མེགྷསྶཱནུརཱུཔནྟི ཝིརུདྡྷཏྠནྟརཏཱ པརིཧཊཱ.

༧༠. ཏཏྠ ཝིརུདྡྷཏྠནྟརསྶ པརིཧཱརོ ཡཐཱ ཨེཝཾ. ‘‘ཝིནྡནྟི’’ཙྩཱདི. པཱཀསཱལཱིནཾ པརིཎཱམེན ཡུཏྟཱནཾ, མནུཉྙཱནཾ ཝཱ སཱལཱིནཾ རཏྟསཱལིཨཱདཱིནཾ དསྶནཱ དསྶནཧེཏུ སུཁཾ ཙེཏསིཀསོམནསྶཾ ཝིནྡནྟཾ ཨནུབྷོནྟཾ ཏཾ ཛནཾ ཏཾ ཀསྶཀཛནཾ ཝིསདོ ཛལདཱཡཀོ ཨཡཾ མེགྷོ ཀཐཾ ནཱམ སུཁཡེ, ན སུཁཡཏེཝ. ཏཱདིསསྶ ཛནསྶ དུཀྑདཱནཾ གརལ༹དཱཡཀསྶ མེགྷསྶཱཔི ཨནུརཱུཔམིཏི ཝིརུདྡྷཉྙཏྠོ ཨཔནཱིཏོ ཧོཏི. པཱཀེན སཱལིནོཏི ཝིགྒཧོ. སུཁཾ ཀརོཏཱིཏི སུཁཡེཏི ནཱམདྷཱཏུ.

ཡཐཱ ཝཱ –

༧༡.

ཝིནཱཡཀོཔི ¶ ནཱགོསི,

གོཏམོཔི མཧཱམཏི;

པཎཱིཏོཔི རསཱཔེཏོ,

ཙིཏྟཱ མེ སཱམི ཏེ གཏི.

༧༡. ‘‘ཝིནཱཡཀོཔི’’ཙྩཱདི. ཝཱིནཾ པཀྑཱིནཾ ནཱཡཀོ, གརུལོ༹, སཏྟེ ཝིནེཏཱིཏི ཝིནཱཡཀོ, ཝུདྡྷོ, བྷགཝཱ ཙ. ཏཏྠ ཡདཱ ཝིནཱཡཀོ གརུལོ༹, ཏདཱ ཏུ ནཱགོ པནྣགོསཱིཏི ཝིརུདྡྷཾ, པཀྑནྟརེ ཏྭཝིརུདྡྷཾ བྷགཝཏོ ཨཱགུསྶ རཱགཱདིནོ ཨབྷཱཝཏོ. ཨིམེསཾ གུནྣཾ ཨཏིསཡེན གོ གོཏམོ ཧཱིནཔསུ, གོཏམཝཾསཱཝཏིཎྞཏྟཱ གོཏམོ བྷགཝཱ ཙ. ཧཱིནཔསུ ཙ ཏྭཾ མཧཱམཏི ཨསཱིཏི ཝིརུདྡྷཾ ཨཙྩནྟཧཱིནཔསུནོ མཧཏིཡཱ པཉྙཱཡ ཨབྷཱཝཏོ. པཀྑནྟརེ ཏུ ན བྱཱགྷཱཏོ. པཎཱིཏོ མདྷུརོ རསོ, ཨུཏྟམོ ཙ སུགཏོ. ཏཏྠ མདྷུརརསཏོ ཨཔེཏོ ཨཔགཏོསཱིཏི ཝིརུཛ྄ཛྷཏི, བྷགཝཏོ ཏུ རསེཧི སིངྒཱརཱདཱིཧི ཨཔེཏོཏི ཡུཛྫཏི. མེ མམ. སཱམཱིཏི ཨཱམནྟནཾ. ཏེ ཏཝ གཏི པཝཏྟི ཙིཏྟཱ ཨབྦྷུཏཱཏི. ཨེཏྠ ཝིརུདྡྷཏྠནྟརཾ ཝིརོདྷཱལངྐཱརཾ སིལཱགྷནཱིཡནྟི ཏེན ཏཾ པརིཧཊཾ.

༧༡. ཡཐཱ ཝཱ ཨུཏྟདོསསྶ པརིཧཱརོ ཨཱིདིསོ ཝཱ. ‘‘ཝིནཱཡཀོ’’ཙྩཱདི. ཧེ སཱམི ཏྭཾ ཝིནཱཡཀོཔི གརུལོ༹པི ནཱགོསི པནྣགོ ཨསི. ནོ ཙེ, ཝིནཱཡཀོཔི སཏྟེ ཝིནེནྟོ ཨེཝ ནཱགོསི ནིཀྐིལེསོ ཨསི. གོཏམོཔི པསུཏམོཔི མཧཱམཏི མཧཱཔཉྙཝཱསི. ནོ ཙེ, གོཏམོཔི གོཏྟཏོ གོཏམོཡེཝ མཧཱམཏི མཧཱཔཉྙཝཱསི. པཎཱིཏོཔི མདྷུརོཔི རསཱཔེཏོ མདྷུརརསཏོ ཨཔགཏོསི. ནོ ཙེ, པཎཱིཏོཔི ཨུཏྟམོ ཨེཝ རསཱཔེཏོ སིངྒཱརཱདིརསཏོ ཨཔགཏོསི. ཏེ ཏུཡ྄ཧཾ གཏི པཝཏྟི མེ མཡ྄ཧཾ ཙིཏྟཱ ཨཙྪརིཡཱ. ¶ ཨེཏྠ གརུལ༹སྶ ནཱགཏྟཉྩ པསུཏམསྶ པཉྙཝནྟཏྟཉྩ པཎཱིཏསྶ ནིརསཏྟཉྩ ཝིརུདྡྷཾ, ཏཐཱཔི ཨཉྙཔཀྑསྶ ཨཝིརུདྡྷཏྟཱ ཝིརུདྡྷཏྠནྟརདོསོ པསཏྠེན ཝིརུདྡྷཱལངྐཱརེན ནིརཱཀཏོ. ཝཱིནཾ པཀྑཱིནཾ ནཱཡཀོ, གརུལོ༹. སཏྟེ ཝིནེཏཱིཏི ཝིནཱཡཀོ, བུདྡྷོ. ནཏྠི ཨཱགུ [ཨགོ (ཀ.)] ཨེཏསྶཱཏི ནཱགོ, བུདྡྷོ. གུནྣམཏིསཡེན གོཏམོ, པསུ. མཧཏཱི མཏི ཨསྶཱཏི མཧཱམཏི, བུདྡྷོ. པདྷཱནཏྟཾ ནཱིཏོ པཎཱིཏོ, མདྷུརོ རསོ. རསཏོ ཨཔེཏོཏི རསཱཔེཏོ, བུདྡྷོཏི ཝིགྒཧོ.

ཨཛྷཏྠསྶ ཡཐཱ –

༧༢.

ཀཐཾ ཏཱདིགུཎཱབྷཱཝེ,

ལོཀཾ ཏོསེཏི དུཛྫནོ;

ཨོབྷཱསིཏཱསེསདིསོ,

ཁཛྫོཏོ ནཱམ ཀིཾ བྷཝེ.

༧༢. ‘‘ཀཐ’’མིཙྩཱདི. དུཛྫནོ ཏཱདིནོ གུཎཱ ལོཀཾ ཏོསེནྟི, ཏཱདཱིནཾ གུཎཱནཾ ཨཏྟནི ཨབྷཱཝེ སཏི ལོཀཾ སཏྟལོཀཾ ཀཐཾ ཏོསེཏི, ན ཏོསེཏཱིཏི ཨཏྠོ. ཝུཏྟམེཝཏྠནྟརེན སཱདྷེཏི ‘‘ཁཛྫོཏོ ནཱམ ཨོབྷཱསིཏཱ དཱིཔིཏཱ ཨསེསདིསཱ ཡེན ཏཐཱཝིདྷོ ཀིཾ བྷཝེ, ན བྷཝེཡྻ ཏཱདིནོ གུཎསྶ ཨབྷཱཝཏོ’’ཏི. ཨེཏྠ ཁཛྫོཏསྶ ཨདྷིཀཏྠབྷཱཝེན སིཏོ ཨོབྷཱསིཏཱསེསདིསཏྟདོསོ ‘‘ཀཐཾ ཏཱདིགུཎཱབྷཱཝེ’’ཏིཨཱདིཝཙོབྷངྒིཡཱ པརིཧཊོ.

༧༢. ཨཛྷཏྠསྶ ཡཐཱཏི ཨེཏྠ པརིཧཱརོ ཨཛ྄ཛྷཱཧཱརོ, ཨེཝམུཔརིཔི. ‘‘ཀཐི’’ཙྩཱདི. དུཛྫནོ གུཎཧཱིནཛནོ ཏཱདིགུཎཱབྷཱཝེ སནྟོསཛནནཀཱརཎཱནཾ ཏཱདིསཱནཾ སཱིལཱདིགུཎཱནཾ ¶ ཨཏྟནི ཨཝིཛྫམཱནཏྟེ སཏི ལོཀཾ སཏྟལོཀཾ ཀཐཾ ཏོསེཏི, ན ཏོསེཏིཡེཝ, ཏཐཱ ཧི ཁཛྫོཏོ ནཱམ ཨོབྷཱསིཏཱསེསདིསོ ཀིཾ བྷཝེ, ན བྷཝཏྱེཝ. ཨེཏྠ ཁཛྫོཏསྶ སཀལདིསོབྷཱསནསངྑཱཏམདྷིཀཏྠདོསོ ‘‘ཀཐཾ ཏཱདིགུཎཱབྷཱཝེ’’ཙྩཱདིཝཱཀྱལཱིལཱཡ ནིརཱཀཏོ. ཏཱདཱི ཙ ཏེ གུཎཱ ཙེཏི ཝིགྒཧོ.

༧༣.

པཧེལི༹ཀཱཡམཱརུལ༹ྷཱ, ན ཧི དུཊྛཱ ཀིལིཊྛཏཱ;

པིཡཱ སུཁཱ’ལིངྒིཏཾ ཀ-མཱལིངྒཏི ནུ ནོ ཨིཏི.

༧༣. ‘‘པཧེལི༹ཀཱཡཾ’’ཨིཙྩཱདི. ཀིལིཊྛཏཱ ཀིལིཊྛཔདདོསོ པཧེལི༹ཀཱཡ ཝིསཡེ ཨཱརུལ༹ྷཱ སཧཱི ན ཧི ནོ དུཊྛོ སིཡཱ. ཀཱིདིསཱིཏི ཨཱཧ ‘‘པིཡེ’’ཙྩཱདི. ཨིཏཱིཏི ནིདསྶནེ. པིཡཱ ཝལླབྷཱཡ ཨཱལིངྒིཏཾ ཀཾ ཛནཾ སུཁཾ ཀཱཡིཀཾ ཙེཏསིཀཉྩ ནོ ཨཱལིངྒཏི ན སཾཡུཛྫཏི ནུ. ནུཨིཏི པརིཝིཏཀྐེ ནིཔཱཏོ. ཨེཏྠ པིཡཱཏི ཀིལིཊྛཾ པཧེལི༹ཀཱཡ སམཱརོཔེན པརིཧཊཾ.

༧༣. ‘‘པཧེལི༹ཀེ’’ཙྩཱདི. ཀིལིཊྛཏཱ ཀིལིཊྛཔདདོསསངྑཱཏཱ པཧེལི༹ཀཱཡཾ ཝིསཡེ ཨཱརུལ༹ྷཱ ཙེ, ན ཧི དུཊྛཱ དུཊྛཱ ན ཧོཏི. ཀིམུདཱཧརཎཾ? པིཡཱ སུཁཱལིངྒིཏཾ ཀམཱལིངྒཏི ནུ ནོ ཨིཏི, ཨིཏིསདྡསྶ ནིདསྶནཏྠཏྟཱ སེསཨུདཱཧརཎཱནམེཏམུཔལཀྑཎནྟི ཉཱཏབྦཾ. ནོ ཙེ, ཨེཝཾཔཀཱརཱནམུདཱཧརཎཱནམཔརིགྒཧེཏབྦཏྟཱ ཨིཏིསདྡོ པཀཱརཏྠོཏི. པིཡཱ ཝལླབྷཱཡ ཨཱལིངྒིཏཾ ཨུཔགུཧིཏཾ ཀཾ ནཱམ ཛནཾ སུཁཾ ཀཱཡིཀམཱནསིཀཾ ནོ ཨཱལིངྒཏི ནུ, ཨཱལིངྒཏེཝཱཏི. ཨེཏྠ པིཡཱཏི ཀིལིཊྛཔདཾ པཧེལི༹ཀཱཡམཱརོཔནེན ནིརཱཀཏཾ ཧོཏི.

༧༤.

ཡམཀེ ནོ པཡོཛེཡྻ, ཀིལིཊྛཔད’མིཙྪིཏེ;

ཏཏོ ཡམཀ’མཉྙཾ ཏུ, སབྦམེཏཾམཡཾ ཝིཡ.

༧༤. ‘‘ཡམཀེ’’ཙྩཱདི. ¶ ཏཏོ ཨཉྙནྟི ཨིཙྪིཏཡམཀཏོ ཨཉྙཾ. ཏུཨིཏི ཝིསེསཛོཏཀོ. ཨེཏཾམཡཾ ཝིཡཱཏི ཨེཏེན ཀིལིཊྛཔདེན ནིབྦཏྟཾ ཝིཡ.

༧༤. ‘‘ཡམཀེ’’ཙྩཱདི. ཀིལིཊྛཔདཾ ཨིཙྪིཏེ ཡམཀེ ཨིཊྛཡམཀེ ནོ པཡོཛེཡྻ ནཔྤཡུཛྫེཡྻ, ཏཏོ ཨིཊྛཡམཀཏོ ཨཉྙཾ སབྦཾ ཡམཀཾ པན ཨེཏཾམཡཾ ཝིཡ ཨིམིནཱ ཀིལིཊྛཔདདོསེན ཀཏཾ ཝིཡ ཧོཏི. ཨེཏྠ ཨིཊྛཡམཀཾ ཝུཏྟནཡེན ཉཱཏབྦཾ, ཨེཏེན ནིབྦཏྟཾ ཨེཏཾམཡནྟི ཝིགྒཧོ.

དེསཝིརོདྷིནོ ཡཐཱ –

༧༥.

བོདྷིསཏྟཔྤབྷཱཝེན, ཐལེཔི ཛལཛཱནྱ’ཧུཾ;

ནུདནྟཱནི’ཝ སུཙིརཱ-ཝཱསཀླེསཾ ཏཧིཾ ཛལེ.

༧༥. ‘‘བོདྷིསཏྟེ’’ཙྩཱདི. བོདྷིསཏྟསྶ མཱཡཱདེཝིཡཱ སུཏསྶ ཝཀྑམཱནསྶ ཝིསེསསྶ ཏདུཔྤནྣདིནེ སམྦྷཝཱ པབྷཱཝེན པུཉྙཔྤབྷཱཝཏོ ཛལཛཱནི ཨམྦུཛཱནི ཐལེཔི ཨཧུཾ ཨཧེསུཾ ཨཙིནྟནཱིཡཏྟཱ པུཉྙཔྤབྷཱཝསྶ. ཀིཾ པན ཝཱཔྱཱདཱིསུ ཀིཾ ཀརོནྟཱཝ ཏཧིཾ ཏསྨིཉྩ ཛལེ སུཙིརཾ སབྦདཱཝ ཨཱཝསནམཱཝཱསོ ཏེན ཛཱཏོ ཀླེསོ ཏཾ ནུདནྟཱནིཝ དཱུརཏོ ཛཧནྟཱནིཝེཏི. ཨཙིནྟནཱིཡཏྟཱ པུཉྙཔྤབྷཱཝསྶ ཨཱིདིསམྤི ཨཙྪརིཡམཧོསཱིཏི ན དེསཝིརོདྷོ.

༧༥. བོདྷིསཏྟཔྤབྷཱཝེན བོདྷིསཏྟསྶ ཨཙིནྟེཡྻཱནུབྷཱཝེན ཛལཛཱནི ཛལཛསདིསཏྟཱ ཏནྣཱམཀཱནི པདུམཀེརཝཱདཱིནི ཏཧིཾ ཛལེ ཝིསཡཏྟེན པསིདྡྷེ ཏསྨིཾ ཨུདཀེ སུཙིརཱཝཱསཀླེསཾ ཨཏིཙིརཾ ནིཝཱསཏོ ཛཱཏཨཱཡཱསཾ ནུདནྟཱནི ཨིཝ ཙཛནྟཱནི ཨིཝ ཐལེཔི ཨཧུཾ ཨཧེསུཾ, ཝཱཔིཨཱདཱིསུ ཀཱ ཀཐཱ. ཨེཏྠ ཛལཛཱནཾ ཐལུཔྤཏྟིཀཐནསངྑཱཏཾ དེསཝིརོདྷཾ ཨཙིནྟེཡྻཔུཉྙཔྤབྷཱཝེན ཨཱིདིསཱནཾ ¶ ཨཙྪརིཡཱནཾ པཱཏུབྷཱཝཏོ ‘‘བོདྷིསཏྟཔྤབྷཱཝེནཱ’’ཏི ཨིམིནཱ ནིརཱཀརོཏི. བོདྷིཡཾ ཙཏུམགྒཔཉྙཱཡཾ སཏྟོཏི ཙ, ཏསྶ པབྷཱཝོཏི ཙ, སུཙིརཾ ཨཱཝཱསོཏི ཙ, ཏེན བྷཱུཏོ ཀླེསོཏི ཙ ཝཱཀྱཾ.

ཀཱལཝིརོདྷིནོ ཡཐཱ –

༧༦.

མཧཱནུབྷཱཝཔིསུནོ, མུནིནོ མནྡམཱརུཏོ;

སབྦོཏུཀམཡཾ ཝཱཡི, དྷུནནྟོ ཀུསུམཾ སམཾ.

༧༦. ‘‘མཧཱ’’ཨིཙྩཱདི. མནྡོ མུདུབྷཱུཏོ མཱརུཏོ ཨཡཾ སབྦོཏུཀཾ སབྦེསུ ཨུཏཱུསུ པུཔྥནཀཾ ཀུསུམཾ པུཔྥཾ སམཾ ཨེཀཏོ ཀཏྭཱ དྷུནནྟོ ཝིཀིརནྟོ མུནིནོ མུནིསདིསཏྟཱ བྷཝིསྶནྟམུནིབྷཱཝེན ཙ བོདྷིསཏྟསྶ, མུནིནོཡེཝ ཝཱ སམྨཱསམྦོདྷིསམདྷིགམསམཡེ མཧཱནུབྷཱཝསྶ པིསུནོ སཱུཙཀོ ཝཱཡི པཝཱཡཏཱིཏི. ཨེཏྠ ཡདྱཔེཀདཱ སབྦོཏུཀཱསམྦྷཝོ ནཱནཱཨུཏཱུསུ ནཱནཱཀུསུམསྶ སམྦྷཝཱ, ཏཐཱཔི བྷགཝཏོ མཧཱནུབྷཱཝཔིསུནམཱིདིསམེཀཔདིཀཾ སམྦྷཝཏཱིཏི ཀཱལཝིརོདྷོ ཨིམིནཱ པརིཧཊོ.

༧༦. ‘‘མཧཱནུབྷཱཝེ’’ཙྩཱདི. ཨཡཾ མནྡམཱརུཏོ ཨཙཎྜསམཱིརཎོ སབྦོཏུཀཾ ཝསནྟཱདཱིསུ སབྦཨུཏཱུསུ ཝིཀསནྟཾ ཀུསུམཾ པུཔྥཛཱཏཾ སམཾ ཨེཀཏོ ཀཏྭཱ དྷུནནྟོ ཀམྤེནྟོ མུནིནོ ཨེཀནྟབྷཱཝིཏྟཱ མུནིསངྑཱཏསྶ བོདྷིསཏྟསྶ, སམྨཱསམྦོདྷིསམདྷིགམསམཡེ བྷཱུཏཏྟཱ མུནིནོ སབྦཉྙུནོ ཝཱ མཧཱནུབྷཱཝཔིསུནོ མཧནྟཾ པུཉྙཔྤབྷཱཝཾ པཀཱསེནྟོ ཝཱཡི སམྤཝཱཡཱིཏི. ཨེཏྠ ནཱནཱཀཱལེ སམྦྷཝནྟཱནམྤི ཀུསུམཱནཾ ཨེཀཀཱལེ སམྦྷཝསྶ ཀཱལཝིརོདྷཏྟེཔི བྷགཝཏོ པུཉྙཱནུབྷཱཝོ ཏཱདིསམཙྪརིཡམེཀཀྑཎེ ཛནེཏུཾ སམཏྠོཏི ཀཱལཝིརོདྷཾ ‘‘མཧཱནུབྷཱཝཔིསུནོ’’ཏི ཨིམིནཱ ནིརཱཀརོཏི. མཧཱནུབྷཱཝསྶ, མཧཱནུབྷཱཝཾ ཝཱ པིསུནོཏི ཝཱཀྱཾ.

ཀལཱཝིརོདྷིནོ ཡཐཱ –

༧༧.

ནིམུགྒམནསོ ¶ བུདྡྷ-གུཎེ པཉྩསིཁསྶཔི;

ཏནྟིསྶརཝིརོདྷོ སོ, ན སམྤཱིཎེཏི ཀཾ ཛནཾ.

༧༧. ‘‘ནིམུགྒི’’ཙྩཱདི. བུདྡྷསྶ གུཎེ སཱིལཱདིཀེ ཨཔརིམཱཎེ ནིམུགྒཾ ཨོགཱལ༹ྷཾ མནཾ ཙིཏྟཾ ཡསྶ ཏསྶ པཉྩསིཁསྶ གནྡྷབྦདེཝཔུཏྟསྶཔི ཝཱིཎཱཡ ཏནྟིཡཱ སརོ ཀིརིཡཱཀཱལམཱནལཀྑཎཝིལམྦིཏདུཏམཛ྄ཛྷབྷེདབྷིནྣོ ཚཛྫཱདིཀོ ཏསྶ ཝིརོདྷོ ཀལཱསཏྠཔརིནིདྡིཊྛཀམཝེསམཾ ཀཾ ཛནཾ ན སམྤཱིཎེཏི, པཱིཎེཏིཡེཝ. སམྨཱསམྦུདྡྷསྶ ལོཀིཡགུཎཱནུབནྡྷབུདྡྷཱིནཾ ཝིཀྑེཔཔྤཝཏྟིཔི ཏཐཱཝིདྷཾ པཱིཎེཏཱིཏི. ‘‘བུདྡྷགུཎེ ནིམུགྒམནསོ’’ཏི ཨིམིནཱ ཀལཱཝིརོདྷོ པརིཧཊོ.

༧༧. ‘‘ནིམུགྒི’’ཙྩཱདི. བུདྡྷགུཎེ སབྦཉྙུནོ ཝིམྷཡཛནཀསཱིལཱདིགུཎསམྦྷཱརེ ནིམུགྒམནསོ ཨོཏིཎྞཙིཏྟསྶ པཉྩསིཁསྶཔི གནྡྷབྦདེཝཔུཏྟསྶཱཔི སོ ཏནྟིསྶརཝིརོདྷོ ཝཱིཎཱཡ ཏནྟིཡཱ གྷཊྚནཀིརིཡཱ, ཨདྡྷམཏྟིཀཱདིཀཱལོ, ཧཏྠཱདཱིནཾ སནྣིཝེསལཀྑཎོ མཱནོཏི ཨིམེཧི ཏཱིཧི ལཀྑཎེཧི ཡུཏྟསྶ མནྡསཱིགྷམཛ྄ཛྷིམཔྤམཱཎེཧི བྷིནྣསྶ ཚཛྫཱདིསཏྟསརསྶ ཀལཱསཏྠཱགཏཀྐམསྶ ཝིནཱསསངྑཱཏོ ཝིརོདྷོ ཀཾ ཛནཾ ན སམྤཱིཎེཏི, སམྤཱིཎེཏི ཨེཝ. ཨེཏྠ ཨཀནྟིཡཱ ཀཱརཎབྷཱུཏོ ཀལཱསཏྠཱགཏཀྐམབྷངྒོ ལོཀུཏྟརབུདྡྷགུཎཱནུགཏབུདྡྷིཡཱ ཛཱཏོཏི སོ བྷངྒོ ‘‘ནིམུགྒམནསོ བུདྡྷགུཎེ’’ཏི ཝུཏྟཏྟཱ པཱིཏིཡཱ ཀཱརཎམེཝེཏི ན ཝིརོདྷོ. ནིམུགྒོ མནོ ཨསྶཱཏི ཙ, ཏནྟིཡཱ སརོཏི ཙ, ཏེསཾ ཝིརོདྷོཏི ཙ ཝཱཀྱཾ.

ལོཀཝིརོདྷིནོ ཡཐཱ –

༧༨.

གཎཡེ ¶ ཙཀྐཝཱལ༹ཾ སོ, ཙནྡནཱཡཔི སཱིཏལཾ;

སམྦོདྷིསཏྟཧདཡོ, པདིཏྟངྒཱརཔཱུརིཏཾ.

༧༨. ‘‘གཎཡེ’’ཙྩཱདི. ཙནྡནཱཡ ཨཔི སཱིཏལཾ གཎཡེ ཙིནྟེསི. ཀིནྟཾ? པདིཏྟངྒཱརཔཱུརིཏཾ ཙཀྐཝཱལ༹ཾ. ཀོ སོ? སམྦོདྷིཡཾ སབྦཉྙུཏཉྙཱཎེ སཏྟཾ པརིབདྡྷཾ ཧདཡཾ ཙིཏྟཾ ཡསྶ སོ. སབྦཉྙུཏཉྙཱཎཱནུབནྡྷབུདྡྷིནོ ཧི ཏཱདིསོ མནོབནྡྷོཏི ན ལོཀཝིརོདྷོ.

༧༨. ‘‘གཎཡེ’’ཙྩཱདི. སམྦོདྷིསཏྟཧདཡོ སབྦཉྙུཏཉྙཱཎེ ཨཱསཏྟཙིཏྟོ སོ བོདྷིསཏྟོ པདིཏྟངྒཱརཔཱུརིཏཾ ཨཱདིཏྟངྒཱརེཧི པརིཔུཎྞཾ ཙཀྐཝཱལ༹ཾ ཙཀྐཝཱལ༹གབྦྷཾ ཙནྡནཱཡཔི ཙནྡནཏོ ཨཔི སཱིཏལཾ ཨཏིསཱིཏལཾ ཀཏྭཱ གཎཡེ ཙིནྟེཡྻཱཏི. ཨིཊྛཏྠལུདྡྷསྶ ཙིཏྟཔྤཝཏྟིཡཱ ཨཱིདིསཏྟཱ ཨགྒིནོ ཙནྡནཏོཔི ཨདྷིཀསཱིཏཏྟཀཔྤནཱ ‘‘ཙནྡནཾ སཱིཏལཾ, ཨགྒི ཨུཎྷོ’’ཏི པཝཏྟལོཀསཱིམཱཡ ཝིརུདྡྷཱ ན ཧོཏི. སམྦོདྷིཡཾ སཏྟཧདཡཾ ཡསྶེཏི ཙ, པདིཏྟཱནི ཨངྒཱརཱནཱིཏི ཙ, ཏེཧི པཱུརིཏནྟི ཙ ཝིགྒཧོ.

ཉཱཡཝིརོདྷིནོ ཡཐཱ –

༧༩.

པརིཙྩཏྟབྷཝོཔི ཏྭ-མུཔནཱིཏབྷཝོ ཨསི;

ཨཙིནྟྱགུཎསཱརཱཡ, ནམོ ཏེ མུནིཔུངྒཝ.

༧༩. ‘‘པརིཙྩཏྟེ’’ཙྩཱདི. མུནིཔུངྒཝ མུནཱིནཾ ཨུཏྟམ པརིཙྩཏྟོ ཝིསཊྛོ བྷཝོ སུགཏིདུགྒཏིསངྑཱཏོ ཡེནཱཏི པརིཙྩཏྟབྷཝོཔི ཏྭཾ ཨུཔནཱིཏོ ཨཱནཱིཏོ པཝཏྟིཏོ བྷཝོ ཝུཌྜྷི ཡེནཱཏི ཨུཔནཱིཏབྷཝོ ཨསི. ཏསྨཱ ཀཱརཎཱ ཨཙིནྟྱགུཎསཱརཱཡ ཏེ ནམོ ཨཏྠཱུཏི སེསོ. ཨཱིདིསཾ ན ཉཱཡཝིརུདྡྷམེཝཾཝིདྷཏྟཱ མུནིཔུངྒཝསྶ.

༧༩. ‘‘པརིཙྩཏྟེ’’ཙྩཱདི. མུནིཔུངྒཝ མུནིསེཊྛ ཏྭཾ པརིཙྩཏྟབྷཝོཔི ཨཔནཱིཏསུགཏིདུགྒཏིབྷཝོཔི ཨུཔནཱིཏབྷཝོ ལོཀསྶཱནཱིཏཨབྷིཝུདྡྷིཀོ ཨསི བྷཝསི, ཨཙིནྟྱགུཎསཱརཱཡ ཏཏོ ཨེཝ ཙིནྟཱཝིསཡཱཏིཀྐནྟསཱརགུཎསྶ ཏེ ཏུཡ྄ཧཾ ནམོ ཨཏྠཱུཏི སབྦཱཀཱརཏོ བྷཝསྶ པརིཙྩཏྟཏྟཱ ཨཏྟནི ཨཝིཛྫམཱནཾ ¶ སུགཏིབྷཝཾ ལོཀསྶ དེཏཱིཏི ཨེཏཾ ཉཱཡཱགཏཾ ན ཧོཏཱིཏི པཊིབྷཱཏི, ཏཐཱཔི ཙ སབྦཉྙཱུནཾ པཝཏྟི ཨཱིདིསཱཡེཝཱཏི ཉཱཡཝིརོདྷོ ནིརཱཀཏོ. ཨཙིནྟྱཱ གུཎསཱརཱ ཡསྨིནྟི ཝིགྒཧོ.

ཨཱགམཝིརོདྷིནོ ཡཐཱ –

༨༠.

ནེཝཱལཔཏི ཀེནཱཔི, ཝཙཱིཝིཉྙཏྟིཏོ ཡཏི;

སམྤཛཱནམུསཱཝཱདཱ, ཕུསེཡྻཱཔཏྟིདུཀྐཊཾ.

༨༠. ‘‘ནེཝེ’’ཏིཨཱདི. ཡཏཱིཏི བྷིཀྑུ ཀེནཱཔི སཧ ནེཝཱལཔཏི ན ཝདཏྱེཝ, ཏཐཱཔི ཝཙཱིཝིཉྙཏྟིཏོ ཙོཔནཝཱཙཱསངྑཱཏེན ཝཙཱིཝིཉྙཏྟིཧེཏུནཱ པཝཏྟིཏོ སམྤཛཱནནྟསྶ མུསཱཝཱདཏོ ཀཱརཎཱ ཨཱཔཏྟིདུཀྐཊཾ ‘‘སམྤཛཱནམུསཱཝཱདསྶ ཧོཏཱི’’ཏི ཝུཏྟདུཀྐཊཱཔཏྟི ཕུསེཡྻ ཨཱཔཛྫཏཱིཏི. ཨེཏྠ ཨནཱལཔཏོ ཝཙཱིཝིཉྙཏྟིཡཱ ཀཐཾ མུསཱཝཱདོཏི ཨབྷིདྷམྨཱཔནྣཝིརོདྷོ ནཏྠི, ཨཔརཝཙནཏྠེ ཏྭཱིདིསོ ཝིརུཛ྄ཛྷཏཱིཏི.

༨༠. ‘‘ནེཝི’’ཙྩཱདི. ཡཏི སམཎོ ཀེནཱཔི ཀེནཙི སདྡྷིཾ ནེཝཱལཔཏི ནོ བྷཱསཏི, ཏཐཱཔི ཝཙཱིཝིཉྙཏྟིཏོ ཙོཔནཝཱཙཱསངྑཱཏཝིཉྙཏྟིཀཱརཎཱ པཝཏྟནཏོ སམྤཛཱནམུསཱཝཱདཱ སམྤཛཱནནྟསྶ མུསཱབྷཎནཏོ ཨཱཔཏྟིདུཀྐཊཾ དུཀྐཊཱཔཏྟིཾ ཕུསེཡྻ ཨཱཔཛྫེཡྻཱཏི. ཨེཏྠ ཨནཱལཔནྟསྶ ཝཙཱིཝིཉྙཏྟིཏོ མུསཱཝཱདོ ཀཐཾ སམྦྷཝཏཱིཏི ཨབྷིདྷམྨཱཔནྣཝིརོདྷོ, ‘‘སནྟིཾ ཨཱཔཏྟིཾ ནཱཝིཀརེཡྻ, སམྤཛཱནམུསཱཝཱད’སྶ ཧོཏཱི’’ཏི ནིདཱནུདྡེསེ ནིདྡིཊྛཝཙཱིདྭཱརེ ཨཀིརིཡསམུཊྛཱནཱ དུཀྐཊཱཔཏྟི ཧོཏཱིཏི ཨཱགམཝིརོདྷོ ནིརཱཀཏོ. མུསཱབྷཎནཾ ཝིནཱ ཨཱཔཏྟི ཀཐཾ བྷཝཏཱིཏི? ཡཐཱ ཀཱལེ ཨཝསྶམཱནམེགྷཏོ སཉྫཱཏདུབྦྷིཀྑཾ ‘‘མེགྷཀཏཾ དུབྦྷིཀྑ’’ནྟི ཝཏྟབྦཾ ཧོཏི, ཨེཝཾ ཀཐེཏབྦཀཱལེ ཨཀཐནཏོ སཉྫཱཏཱ ཝཙཱིདྭཱརེ ཨཀིརིཡསམུཊྛཱནཱ དུཀྐཊཱཔཏྟིཔི ¶ ཏཏོ སཉྫཱཏཱཏི ཝཏྟབྦཱ ཧོཏི. སམྤཛཱནནྟསྶ མུསཱཝཱདོཏི ཙ, ཨཱཔཏྟིཡེཝ དུཀྐཊནྟི ཙ ཝཱཀྱཾ.

ནེཡྻསྶ ཡཐཱ –

༨༡.

མརཱིཙིཙནྡནཱལེཔ-ལཱབྷཱ སཱིཏམརཱིཙིནོ [སིཏམརཱིཙིནོ (སཱི.)];

ཨིམཱ སབྦཱཔི དྷཝལཱ, དིསཱ རོཙནྟི ནིབྦྷརཾ.

༨༡. ‘‘མརཱིཙཱི’’ཏྱཱདི. སཱིཏམརཱིཙིནོ ཙནྡསྶ མརཱིཙིཡོ དཱིདྷིཏིཡོ ཨེཝ ཙནྡནཾ, ཏསྶ ཨཱལེཔོ ཨུཔདེཧོ, ཏསྶ ལཱབྷེན ཨིམཱ སབྦཱཔི དིསཱ ནིབྦྷརམཏིསཡཾ དྷཝལཱ སེཏཱ རོཙནྟཱིཏི ནཏྠེཏྠ ནེཡྻཏཱ མརཱིཙིཡཱ སདྡོཔཱཏྟཏྠཱཡ ཏུ.

༨༡. ‘‘མརཱིཙི’’ཙྩཱདི. སཱིཏམརཱིཙིནོ ཙནྡསྶ མརཱིཙིཙནྡནཱལེཔལཱབྷཱ མརཱིཙིསངྑཱཏཙནྡནཱལེཔསྶ པཊིལཱབྷཏོ ཨིམཱ སབྦཱཔི དིསཱ ནིབྦྷརམཏིསཡཾ དྷཝལཱ སེཏཱ རོཙནྟི དིབྦནྟཱིཏི. དིསཱནཾ དྷཝལཀཱརཎསྶ ‘‘མརཱིཙིཙནྡནཱལེཔལཱབྷཱ སཱིཏམརཱིཙིནོ’’ཏི ཝུཏྟཏྟཱ ནེཡྻདོསོ ན པཏིཊྛཱཏི, ཙནྡནམིཝ ཙནྡནཾ, མརཱིཙིཡོཡེཝ ཙནྡནམིཏི ཙ, ཏསྶ ཨཱལེཔོཏི ཙ, ཏསྶ ལཱབྷོཏི ཙ ཝིགྒཧོ.

ཡཐཱ ཝཱ –

༨༡.

མནོནུརཉྫནོ མཱར-ངྒནཱསིངྒཱརཝིབྦྷམོ;

ཛིནེནཱ’སམནུཉྙཱཏོ, མཱརསྶ ཧདཡཱནལོ.

༨༢. ‘‘མནོ’’ཙྩཱདི. མནཾ པསྶནྟཱནམནུསྶརནྟཱནཉྩ ཙིཏྟཾ ཨནུརཉྫེཏཱིཏི མནོནུརཉྫནོ, མཱརངྒནཱནཾ སིངྒཱརཀཏོ ཝིབྦྷམོ ཝིལཱསོ ཛིནེན ཨསམནུཉྙཱཏོ ཨབྦྷུཔགཏོ མཱརསྶ ཝསཝཏྟིནོ ཧདཡཱནལོ ཧདཡགྒི ཛཱཏོ. སོཀོ ཙེཏྠ ཨནལཏྠེ ནིརུཔྤིཏོ ཏསྶ ¶ ཏཱདིསཏྠཱནཏིཝཏྟནཏོ, ཀཱརཎནྟུཔཙཱརེནཱཏི. ཨེཏྠ ཡཛྫཔི མཱརངྒནཱཔརཱཛཡོ ན སདྡོཔཱཏྟཏྠོ, ཏཐཱཔི ‘‘སིངྒཱརཝིབྦྷམོ མཱརསྶ ཧདཡགྒཱི’’ཏི ཝུཏྟེ སཱམཏྠིཡཱ མཱརངྒནཱཔརཱཛཡོ གམྱཏེ, ཏཐཱཝིདྷསྶ མཱརསོཀསྶ མཱརངྒནཱཔརཱཛཡཱབྱབྷིཙཱརཏོ. ནེཝེདིསསྶ ནེཡྻཏཱ, ཝངྐཝུཏྟཱིདིསཱི གུཎོཡེཝ བནྡྷསྶ.

༨༢. ཝཏྟབྦསྶ ཉཱཡོཔཱཏྟཏྟཱ ནེཡྻདོསཔརིཧཱརཏྠམུདཱཧརཏི ‘‘མནོ’’ཙྩཱདི. མནོནུརཉྫནོ དསྶནསཝནཱནུསྶརཎཾ ཀརོནྟཱནཾ ཛནཱནཾ ཙིཏྟམཏྟནི ཨནུརཉྫནྟོ མཱརངྒནཱསིངྒཱརཝིབྦྷམོ མཱརཝདྷཱུནཾ རཏིཀཱིལཱ༹ཧེཏུབྷཱུཏཀཱམཔཏྠནཱསངྑཱཏསིངྒཱརེན ཀཏལཱིལཱ ཛིནེན ཛིཏཔཉྩམཱརེན སཏྠུནཱ ཨསམནུཉྙཱཏོ ཨནབྦྷུཔགཏོ ཨསམྤཊིཙྪིཏོ མཱརསྶ ཝསཝཏྟིནོ ཧདཡཱནལོ ཧདཡགྒི ཨཧོསཱིཏི. ཨནལཏྟེན ཀཔྤིཏཀཱརིཡབྷཱུཏོ སོཀོ མཱརངྒནཱསིངྒཱརཝིབྦྷམསངྑཱཏཀཱརཎེན སདྡྷིཾ ཨབྷེདཀཔྤནཱཡ [ཨནལཏྟཀཔྤནཱཡ (ཀ.)] ‘‘གུལོ༹ སེམྷཾ, ཏིཔུསཾ ཛརོ’’ཏིཨཱདཱིསུ ཝིཡ ཏུལྱཱདྷིཀརཎབྷཱཝེན ཝུཏྟོ ཧོཏི. ཨེཏྠ ཀིཉྩཱཔི མཱརངྒནཱནཾ པརཱཛཡཝཱཙཀོ སདྡོ ནཏྠི, ཏཐཱཔི ‘‘སིངྒཱརཝིབྦྷམོ མཱརསྶ ཧདཡཱནལོ’’ཏི ཝུཏྟེ མཱརངྒནཱཔརཱཛཡཾ ཝིནཱ ཏཱདིསསོཀུཔྤཏྟིཀཱརཎསྶ ཨནདྷིགཏཏྟཱ ཨཉྙཐཱནུཔཔཏྟིལཀྑཎསཱམཏྠིཡེན ཏཱསཾ པརཱཛཡོ པཀཱསིཏོ ཧོཏཱིཏི ཨཱིདིསཝངྐཝུཏྟིཡཱ བནྡྷགུཎཏྟཱ ནེཡྻདོསོ ནིརཱཀཏོ ཧོཏཱིཏི. མནོ ཨནུརཉྫེཏཱིཏི ཙ, མཱརངྒནཱནཾ སིངྒཱརོཏི ཙ, ཏེན ཀཏོ ཝིབྦྷམོཏི ཙ ཝཱཀྱཾ.

ཝིསེསནཱཔེཀྑསྶ ཡཐཱ –

༨༣.

ཨཔཡཱཏཱཔརཱདྷམྤི, ཨཡཾ ཝེརཱི ཛནཾ ཛནོ;

ཀོདྷཔཱཊལབྷཱུཏེན, བྷིཡྻོ པསྶཏི ཙཀྑུནཱ.

༨༣. ‘‘ཨཔཡཱཏེ’’ཙྩཱདི. ¶ ཨཡཾ ཝེརཱི ཛནོ ཨཔཡཱཏཱཔརཱདྷམྤི ཛནནྟི སམྦནྡྷོ. ཨཔཡཱཏོ ཨཔགཏོ ཨཔརཱདྷོ ཡསྶ ཏཾ, ཀོདྷེན པཱཊལབྷཱུཏེན སེཏརཏྟེན. ཨིམིནཱ ཝིསེསནཱཔེཀྑདོསོ པརིཧཊོ.

༨༣. ‘‘ཨཔཡཱཏི’’ཙྩཱདི. ཨཡཾ ཝེརཱི ཛནོ ཨཔཡཱཏཱཔརཱདྷམྤི ཨཔགཏཱཔརཱདྷམྤི ཛནཾ ཀོདྷཔཱཊལབྷཱུཏེན ཀོདྷེན བྷཱུཏསེཏལོཧིཏཝཎྞཡུཏྟེན ཙཀྑུནཱ བྷིཡྻོ ཡེབྷུཡྻེན པསྶཏཱིཏི. ‘‘པསྶཏཱི’’ཏི ཝཙནསྶ ཝིཛྫམཱནཏྟེཔི ‘‘ཙཀྑུནཱ’’ཏི ཝིསེསྱཝཙནཾ ‘‘ཀོདྷཔཱཊལབྷཱུཏེནཱ’’ཏི ཝིསེསནསྶ ལབྦྷམཱནཏྟཱ སཱཏྠཀཾ ཧོཏཱིཏི ཝིསེསནཱཔེཀྑདོསོ ནིརཱཀཏོཏི. ཨཔཡཱཏོ ཨཔགཏོ ཨཔརཱདྷོ ཨསྨཱཏི ཙ, ཀོདྷེན པཱཊལབྷཱུཏནྟི ཙ ཝིགྒཧོ.

ཧཱིནཏྠསྶ ཡཐཱ –

༨༤.

ཨཔྤཀཱནམྤི པཱཔཱནཾ,

པབྷཱཝཾ ནཱསཡེ བུདྷོ;

ཨཔི ནིཔྤབྷཏཱནཱིཏ-

ཁཛྫོཏོ ཧོཏི བྷཱཎུམཱ.

༨༤. ‘‘ཨཔྤཀཱན’’མིཙྩཱདི. བུདྷོ པཎྜིཏཔོསོ ཨཔྤཀཱནཾ པཱཔཱནམྤི ཀིམུཏམདྷིཀཱནཾ པབྷཱཝཾ ཨཱནུབྷཱཝཾ ནཱསཡེ ཨཔྤཝཏྟིཾ པཱཔེཡྻ. ཏཾ ཨཏྠནྟརནྱཱསེན སཱདྷེཏི. བྷཱཎུམཱ སཱུརིཡོ ནིཔྤབྷཏཾ ཨཱནཱིཏོ ཁཛྫོཏོ ཡེན ཏཐཱཝིདྷོ ཨཔི ཧོཏི. ‘‘མནྡཔྤབྷོ ཨཡ’’ནྟི ཛོཏིརིངྒཎམྤི ནོཔེཀྑཏི ཙཀྐཝཱལ༹ཀུཧརཱནུཙརིཏམཧཱནུབྷཱཝོཔཱིཏི. ཨེཏྠ ཨཔཱིཏྱཱདིནཱ ཝཙོབྷངྒིཡཱ ཧཱིནཏྠདོསོ པརིཧཊོ.

༨༤. ‘‘ཨཔྤཀཱནི’’ཙྩཱདི. བུདྷོ པཉྙཝཱ ཨཔྤཀཱནམྤི ཨཏིམནྡཱནམྤི པཱཔཱནཾ ཨཀུསལཱནཾ པབྷཱཝཾ ཝིཔཱཀདཱནསཱམཏྠིཡསངྑཱཏཱནུབྷཱཝཾ ནཱསཡེ ཨཧོསིཀམྨཏཱཔཱདནེན ནཱསེཡྻ, ¶ བཧཱུནཾ པཱཔཱནཾ ཝཏྟབྦམེཝ ནཏྠི. ཏམཏྠམཏྠནྟརནྱཱསཱལངྐཱརེན སམཏྠེཏི ཨཔིཙྩཱདི. བྷཱཎུམཱ སཱུརིཡོ ནིཔྤབྷཏཱནཱིཏཁཛྫོཏོ ཨཔི ནིཔྤབྷཏམཱཔཱདིཏཛོཏིརིངྒཎེཧི སམནྣཱགཏོཔི ཧོཏཱིཏི. ཧཱིནཔབྷཱཝོ ཧོཏི ཁཛྫོཔནཀེ པཧཱཡ ཨཏྟནོ ཨཱལོཀཾ ཀརོནྟོ ན ཧོཏཱིཏི ཨདྷིཔྤཱཡོ. ཨེཏྠ ཨཔི ནིཔྤབྷཏིཙྩཱདིཝཙནཝིལཱསཝསེན ཧཱིནཔཀྑཾ གཧེཏྭཱཔི སཱུརིཡཨུདཱརཏྟསྶེཝ པོསིཏཏྟཱ ‘‘ནིཔྤབྷཏཱནཱིཏཁཛྫོཏོ’’ཏི ཝིསེསནཔདཾ ཧཱིནཏྠདོསཾ ན ནིསྶཡཏི. ནཏྠི པབྷཱ ཡེསནྟི ཙ, ཏེསཾ བྷཱཝོཏི ཙ, ཏཾ ཨཱནཱིཏཱ ཁཛྫོཏཱ ཡེནེཏི ཙ ཝིགྒཧོ.

ཨནཏྠསྶ ཡཐཱ –

༨༥.

ན པཱདཔཱུརཎཏྠཱཡ, པདཾ ཡོཛེཡྻ ཀཏྠཙི;

ཡཐཱ ཝནྡེ མུནིནྡསྶ, པཱདཔངྐེརུཧཾ ཝརཾ.

༨༥. ‘‘ན པཱདེ’’ཙྩཱདི. ཨེཏྠ ཝནྡེཨིཙྩཱདོ ཧེཊྛཱ ཝིཡ པཱདཔཱུརཎསྶ ཀསྶཙི ཨབྷཱཝེན ཨནཏྠཱབྷཱཝོ.

༨༥. ‘‘ན པཱདི’’ཙྩཱདི. པཱདཔཱུརཎཏྠཱཡ གཱཐཱཔཱདཱནཾ པཱུརཎསངྑཱཏཔཡོཛནཏྠཱཡ པདཾ ནཱམཱདིཀཾ ཀཏྠཙི ན ཡོཛེཡྻ ཝིཉྙཱུཏི, ཡཐཱ ནིརཏྠཀཔདཱཡོཛནེ ཨུདཱཧརཎམེཝཾ ‘‘མུནིནྡསྶ ཝརཾ པཱདཔངྐེརུཧཾ ཝནྡེ’’ཏི. ཧེཊྛཱ དུཊྛོདཱཧརཎེ ཝིཡ པཱདཔཱུརཎཏྠཾ ཀསྶཙི པདསྶ ཨཡོཛིཏཏྟཱ སཱཏྠཀཔདེཧི ནིརཏྠཀདོསོ ནིརཱཀཏོཏི. མུདུནིམྨལསོབྷཱདིསཱདྷཱརཎགུཎཡོགཏོ པངྐེརུཧསདིསཾ ཨུཔཙཱརཏོ པངྐེརུཧཾ ནཱམ. པཱདམེཝ པངྐེརུཧནྟི ཝིགྒཧོ. ཝིསེསནཝིསེསྱཔདདོསཔརིཧཱརོ.

༨༦.

བྷཡཀོདྷཔསཾསཱདི-

ཝིསེསོ ཏཱདིསོ ཡདི;

ཝཏྟུཾ ཀཱམཱིཡཏེ དོསོ,

ན ཏཏྠེ’ཀཏྠཏཱཀཏོ.

༨༦. ‘‘བྷཡེ’’ཙྩཱདི. ¶ བྷཡཉྩ ཙིཏྟུཏྲཱསོ ཀོདྷོ ཙ དོསོ པསཾསཱ ཙ ཐུཏི, ཏཱ ཨཱདི ཡསྶ ཏུརིཏཱདིནོ སོ ཏཱདིསོ ཝིསེསོ ཡདི ཝཏྟུཾ ཀཱམཱིཡཏེ ཨིཙྪཱིཡཏེ, ཏཏྠ ཏསྨིཾ བྷཡཱདིཝིསེསེ ཝིསཡེ ཨེཀཏྠཏཱཡ ཨེཀཏྠབྷཱཝེན ཀཏོ དོསོ ནཏྠི.

༨༦. ཨིདཱནི ཝཱཀྱདོསཔརིཧཱརཏྠམཱརབྷཏི ‘‘བྷཡཀོདྷེ’’ཙྩཱདི. བྷཡཀོདྷཔསཾསཱདི ཙིཏྟུཏྲཱསཔཊིགྷཐུཏིཨཱདཱིཧི སམནྣཱགཏོ ཏཱདིསོ ཝིསེསོ ཝཏྟུཾ ཡདི ཀཱམཱིཡཏེ ཙེ ཝིཉྙཱུཧི ཨིཙྪཱིཡཏེ, ཏཏྠ བྷཡཀོདྷཱདིཀེ ཝིསེསེ ཨེཀཏྠཏཱཀཏོ ཨེཀཏྠབྷཱཝེན ཀཏོ དོསོ ཝཱཀྱདོསོ ན བྷཝཏི. བྷཡཱདིཝིསེསེ ཝཏྟུམིཙྪིཏེ པུབྦུཙྩཱརིཏཔདསྶ པུནུཙྩཱརཎེ ཨེཀཏྠདོསོ ན ཧོཏཱིཏི ཨདྷིཔྤཱཡོ. བྷཡཉྩ ཀོདྷོ ཙ པསཾསཱ ཙཱཏི ཙ, ཏཱ ཨཱདི ཡསྶ ཏུརིཏཀོཏཱུཧལཨཙྪརཱཧཱསསོཀཔསཱདསངྑཱཏསྶ ཨཏྠཝིསེསསྶེཏི ཙ ཝིགྒཧོ. ཏགྒུཎསཾཝིཉྙཱཎཨཉྙཔདཏྠསམཱསཏྟཱ བྷཡཱདཱིསུ ཀཐིཏམཔི གཧེཏྭཱ པུནཔྤུནཾ ཀཐནམཝིརོདྷཾ. ཨེཀོ ཨཏྠོ ཡེསཾ པདཱདཱིནཾ ཏེ ཨེཀཏྠཱ, ཏེསཾ བྷཱཝོ ཨེཀཏྠཏཱ, ཏཱཡ ཀཏོཏི ཝིགྒཧོ.

ཡཐཱ –

༨༧.

སཔྤོ སཔྤོ ཨཡཾ ཧནྡ, ནིཝཏྟཏུ བྷཝཾ ཏཏོ;

ཡདི ཛཱིཝིཏུཀཱམོ’སི, ཀཐཾ ཏམུཔསཔྤསི.

༨༧. ‘‘ཡཐེ’’ཏྱུདཱཧརཏི ‘‘སཔྤོ’’ཨིཙྩཱདི. ‘‘ཨཡཾ སཔྤོ སཔྤོ’’ཏི བྷཡེནཱམེཌིཏཾ ཧནྡཱཏི ཁེདེ ཏཏོ ཏམྷཱ ཋཱནཱ, སཔྤཏོ ཝཱ བྷཝཾ བྷཝནྟོ ནིཝཏྟཏུ གཏམགྒཱབྷིམུཁོ ཨཱཝཏྟཏུ. ཏཾ ཋཱནཾ, སཔྤཾ ཝཱ. ནཏྠེཏྠ ཨེཀཏྠཏཱདོསོ བྷཡེནཱམེཌིཏཔྤཡོགཏོ.

༨༧. ‘‘སཔྤོ’’ཙྩཱདི. ¶ ཧནྡ ནཊྛོ ཝཏ, ཨཡཾ སཔྤོ སཔྤོ བྷཝཾ ཏཏོ ཋཱནཏོ, སཔྤཏོ ཝཱ ནིཝཏྟཏུ ཨཱཝཏྟཏུ ཡདི ཛཱིཝིཏུཀཱམོ ཨསི, ཏཾ ཋཱནཾ, སཔྤཾ ཝཱ ཀཐམུཔསཔྤསི ཀཐམུཔགཙྪསཱིཏི. བྷཡེ ཨཱམེཌིཏཝཙནཏྟཱ ཨེཀཏྠཏཱདོསོ ནཏྠི, ཛཱིཝིཏུཀཱམོསཱིཏི ཨེཏྠ བིནྡུལོཔོ.

པདདོསཔརིཧཱརཝཎྞནཱ ནིཊྛིཏཱ.

ཝཱཀྱདོསཔརིཧཱརཝཎྞནཱ

བྷགྒརཱིཏིནོ ཡཐཱ –

༨༨.

ཡོ ཀོཙི རཱུཔཱཏིསཡོ,

ཀནྟི ཀཱཔི མནོཧརཱ;

ཝིལཱསཱཏིསཡོ ཀོཔི,

ཨཧོ བུདྡྷམཧོདཡོ.

༨༨. ‘‘ཡོ’’ཨིཙྩཱདི. རཱུཔསྶ ཨནུབྱཉྫནེཧི ཨནུབྱཉྫིཏབཱཏྟིཾསཝརཔུརིསལཀྑཎོཔསོབྷིཏསྶ བྱཱམཔྤབྷཱཀེཏུམཱལཱཝིརཱཛིཏསྶ ཨཏིསཡོ ཨཱདྷིཀྐཾ ཝཱཙཱགོཙརབྷཱཝཱཏིཀྐམེན ཨཝཙནཱིཡཏྟཱ ཡོ ཀོཙིཡེཝ. མནོ ཨནེཀལོཀསྶ ཙིཏྟཾ ཧརཏཱིཏི མནོཧརཱ ཙིཏྟམཝཧརནྟཱི ཀནྟི སོབྷཱ ཀཱཔི ཨཝཙནཔཐཱ ཀཱཔིཡེཝ. ཝིལཱསསྶ གཏྱཱདིནོ ཨཏིསཡོ ཝཙནཔཐཱཏིཀྐནྟོ ཀོཔིཡེཝ, ཏསྨཱ བུདྡྷསྶ མཧནྟོ ཨུདཡོ ཨབྷིཝུཌྜྷི ཨཧོ ཨབྦྷུཏོཏི. ཨེཏྠ ཀིཾསདྡེནཱརདྡྷཱ རཱིཏི ན ཀཏྠཙི བྷགྒཱ.

༨༨. ‘‘ཡོ ཀོཙི’’ཙྩཱདི. རཱུཔཱཏིསཡོ སུཔྤཧིཊྛིཏཔཱདཏཱདིདྭཏྟིཾསཔུརིསལཀྑཎེཧི སོབྷིཏསྶ ཙིཏྟངྒུལིཏཱདིཨསཱིཏིཨནུབྱཉྫནེཧི ¶ ཨལངྐཏསྶ བྱཱམཔྤབྷཱཀེཏུམཱལཱཧི ཨུཛྫལསྶ རཱུཔཀཱཡསྶ ཨཱདྷིཀྱཾ ཡོ ཀོཙིཡེཝ མནོགོཙརབྷཱཝཾ ཝིནཱ ཝཙནཝིསཡཱཏིཀྐནྟཏྟཱ ཡོ ཀོཙིཡེཝ. མནོཧརཱ ལོཀསྶ ཙིཏྟཾ ཧརནྟཱི ཀནྟི སོབྷཱ ཀཱཔིཡེཝ ཝཙཱིཝིསཡཱཏིཀྐནྟཏྟཱ ཀཱཔིཡེཝ. ཝིལཱསཱཏིསཡོ ཝིསཡབྷཱུཏཔིཡབྷཱཝསངྑཱཏསྶ གམནཱདིཝིལཱསསྶ ཨཱདྷིཀྱམྤི ཀོཔིཡེཝ ཝུཏྟཀཱརཎེནེཝཀོཔིཡེཝ. ཏཏོ བུདྡྷམཧོདཡོ བུདྡྷསྶ མཧཱབྷིཝུདྡྷིསངྑཱཏོ ཨུདཡོ ཨཧོ ཨཙྪརིཡོཏི. ཨེཏྠ སབྦནཱམིཀེན ཀིཾ སདྡེན ཝཏྟུམཱརདྡྷཀྐམོ ན ཀཏྠཙི བྷིནྣོཏི བྷགྒརཱིཏིདོསོ ནཏྠཱིཏི.

༨༩.

ཨབྱཱམོཧཀརཾ བནྡྷཾ, ཨབྱཱཀིཎྞཾ མནོཧརཾ;

ཨདཱུརཔདཝིནྱཱསཾ, པསཾསནྟི ཀཝིསྶརཱ.

༨༩. ‘‘ཨབྱཱམོཧ’’ཨིཙྩཱདི. ནཏྠི དཱུརམེསནྟི ཨདཱུརཱནི, ཏཱནིཡེཝ པདཱནི, ཏེསཾ ཝིནྱཱསོ ཡཱཐཱཝཏོ ཋཔནཾ ཡསྶ ཏཾ. ཏཏོཡེཝ ཨབྱཱཀིཎྞོ ཨསམྨིསྶོ ཙ. སོ ཨབྱཱཀིཎྞཏཱཡ ཨེཝ མནོཧརོ ཙཱཏི ཨབྱཱཀིཎྞཾ མནོཧརཾ. ཏེནེཝ ‘‘ཨཡམེཏྠ ཨཏྠོ ཨཡཾ ཝཱ’’ཏི ཨེཝཾ བྱཱམོཧཾ ན ཀརོཏཱིཏི ཨབྱཱམོཧཀརོ, ཏཾ. པསཱདཱལངྐཱརཱལངྐིཏཾ བནྡྷཾ. ཀཝཱིནཾ ཨིསྶརཱ པདྷཱནཱ. ཡེ ཀནིཊྛངྒུལིགཎནཱནིཊྛཱ, ཏེ པསཾསནྟི ཐུཝནྟི ཏཱདིསབནྡྷགུཎསྶཱཏིསཡཔསཾསཱརཧབྷཱཝེན.

༨༩. ‘‘ཨབྱཱམོཧེ’’ཙྩཱདི. ཨདཱུརཔདཝིནྱཱསཾ ནཱམཱདིཔདཱནཾ ཝོཧཱརཀཱལེ ཨདཱུརསམྦནྡྷོ ཡཐཱ སིཡཱ, ཏཐཱ པཊིཔཱཊིཡཱ པདཊྛཔནེན སམནྣཱགཏཾ ཨབྱཱཀིཎྞཾ, ཏཏོཡེཝ ཨཉྙསམྦནྡྷཱིཔདེཧི ཨསམྨིསྶཾ མནོཧརཾ, ཏཏོཡེཝ ཝིཉྙཱུནཾ ཙིཏྟམཱརཱདྷེནྟཾ ཨབྱཱམོཧཀརཾ ‘‘ཨིམསྶཏྠོ ཨིམསྶཏྠོ ཨེསོ ཨེསོ ཝཱ’’ཏི སཾསཡམནུཔྤཱདེནྟཾ བནྡྷཾ པསཱདཱལངྐཱརསཾཡུཏྟཾ བནྡྷནཾ ཀཝིསྶརཱ ཀཝཱིནཾ ¶ པདྷཱནཱ པཎྜིབྷཛནཱ, ཀནིཊྛངྒུལིཡཱ གཎིཏབྦཱ ཨགྒཀཝིནོཏི ཨདྷིཔྤཱཡོ. པསཾསནྟི ཐོམེནྟི. བྱཱམོཧཾ ན ཀརོཏཱིཏི ཨབྱཱམོཧཀརོ. ཝི ཨཱཀིཎྞོ བྱཱཀིཎྞོ, ན བྱཱཀིཎྞོ ཨབྱཱཀིཎྞོ. ནཏྠི དཱུརཾ ཡེསཾ, ཏཱནིཡེཝ པདཱནི, ཏེསཾ ཝིནྱཱསོ ཋཔནཾ ཡསྶ བནྡྷསྶཱཏི ཝིགྒཧོ.

ཡཐཱ –

༩༠.

ནཱིལུཔྤལཱབྷཾ ནཡནཾ,

བནྡྷུཀརུཙིརོ’དྷརོ;

ནཱསཱ ཧེམངྐུསོ ཏེན,

ཛིནོཡཾ པིཡདསྶནོ.

༩༠. ‘‘ཡཐེ’’ཏྱུདཱཧརཏི ‘‘ནཱིལུཔྤལཱབྷ’’མིཙྩཱདི. ཡསྶ ཛིནསྶ ནཡནཾ ནེཏྟཾ ནཱིལུཔྤལཱབྷཾ ཨིནྡཱིཝརདྭཡནིབྷཾ, ཨདྷརོ ཨདྷརོཊྛོ བནྡྷུཀམིཝ བནྡྷུཀཀུསུམམིཝ རུཙིརོ ཀནྟོ, ནཱསཱ ནཱསིཀཱ སཡཾ ཧེམངྐུསོ སུཝཎྞངྐུསོཡེཝ, ཏེན ཀཱརཎེན ཨཡཾ ཛིནོ པིཡཾ མདྷུརཾ དསྶནམསྶཱཏི པིཡདསྶནོ. ཨཱིདིསོ ན བྱཱཀིཎྞདོསོ, ཨབྱཱཀིཎྞོ པསཱདོཡེཝཱཏི.

༩༠. ཨིདཱནི བྱཱཀིཎྞདོསཔརིཧཱརཾ པརིཧརཏི ‘‘ནཱིལུཔྤལི’’ཙྩཱདིནཱ. ནཡནཾ ཡསྶ ནེཏྟཡུགལ༹ཾ ནཱིལུཔྤལཱབྷཾ ནཱིལུཔྤལདལསདིསཾ, ཨདྷརོ ཨདྷརོཊྛོ བནྡྷུཀརུཙིརོ བནྡྷུཀཔུཔྥམིཝ མནུཉྙོ, ནཱསཱ ནཱསིཀཱ ཧེམངྐུསོ སུཝཎྞངྐུསོཡེཝ, ཏེན ཀཱརཎེན ཨཡཾ ཛིནོ པིཡདསྶནོ མནུཉྙདསྶནོ ཧོཏཱིཏི. ཨེཏྠ པསཱདཱལངྐཱརེན ཡུཏྟཏྟཱ ན བྱཱཀིཎྞདོསོ. ཨཱབྷཱསདྡོ ནིབྷཱསདྡོ ཝིཡ ཨིཝཏྠོ. ནོ ཙེ, པབྷཱཔརིཡཱཡོ ཝཱ ཧོཏི. བནྡྷུཀམིཝ རུཙིརོཏི ཙ, པིཡཾ དསྶནཾ ཡསྶེཏི ཙ ཝིགྒཧོ. ཨིཧ དསྶནསྶ ཀཏྟུབྷཱུཏསཱདྷུཛནསམྦནྡྷཏྟེཔི ཝིསཡཏྟེནེཝ ¶ ཛིནསམྦནྡྷོ ཧོཏཱིཏི ཨཉྙཔདཏྠེན ཏཐཱགཏོ གཧིཏོཏི.

༩༡.

སམཏིཀྐནྟགཱམྨཏྟ-ཀནྟཝཱཙཱབྷིསངྑཏཾ;

བནྡྷནཾ རསཧེཏུཏྟཱ, གཱམྨཏྟཾ ཨཏིཝཏྟཏི.

༩༡. ‘‘སམཏིཀྐནྟི’’ཙྩཱདི. སམྨཱ ཨཏིཀྐནྟཾ ནིགྒཏཾ. གཱམྨསྶ བྷཱཝོ གཱམྨཏྟཾ. ཡཱསཾ ཀནྟཱནཾ མདྷུརཱནཾ ཝཱཙཱནཾ ཏཱཧི ཨབྷིསངྑཏཾ རཙིཏཾ བནྡྷནཾ རསསྶ མཱདྷུརིཡསྶ ཧེཏུཏྟཱ ཀཱརཎབྷཱཝེན གཱམྨཏྟཾ ཡཐཱཝུཏྟཾ ཨཏིཝཏྟཏི ཨཏིཀྐམཏི.

༩༡. ‘‘སམཏི’’ཙྩཱདི. སམཏིཀྐནྟགཱམྨཏྟཀནྟཝཱཙཱབྷིསངྑཏཾ ཝིསེསཏོ ཨཏིཀྐནྟགཱམྨབྷཱཝཱཧི ཀནྟཝཱཙཱཧི རཙིཏཾ བནྡྷནཾ མུཏྟཀཱདིབནྡྷནཾ རསཧེཏུཏྟཱ པཎྜིཏཱནཾ པཱིཏིརསསྶ ཀཱརཎཏྟཱ ཡཐཱཝུཏྟགཱམྨདོསཾ ཨཏིཝཏྟཏི ཨཏིཀྐམྨ པཝཏྟཏཱིཏི. སམྨཱ ཨཏིཀྐནྟཾ གཱམྨཏྟཾ ཡཱསཾ, ཏཱཧིཡེཝ ཀནྟཝཱཙཱཧི ཨབྷིསངྑཏནྟི ཙ, རསསྶ ཧེཏུ, ཏསྶ བྷཱཝོཏི ཙ ཝིགྒཧོ.

ཡཐཱ –

༩༢.

དུནོཏི ཀཱམཙཎྜཱལོ,

སོ མཾ སདཡ ནིདྡཡོ;

ཨཱིདིསཾ བྱསནཱཔནྣཾ,

སུཁཱིཔི ཀིམུཔེཀྑསེ.

༩༢. ‘‘ཡཐེ’’ཏྱུདཱཧརཏི. ཀཱམཱཏུརཱ ཀཱཙི ཝནིཏཱ ཨཏྟནོ པིཡཾ པཏིཾ ཝིརཝཏི ‘‘དུནོཏི’’ཙྩཱདིནཱ. དཡཱཡ སཧ པཝཏྟཱིཏི སདཡཨིཏི ཨནུནཡཝསེན པིཡསྶ ཨཱམནྟནཾ, སཱནུནཡཱམནྟནཉྷི ཏཏོནུགྒཧཱབྷིཀངྑཱཡམཙྩནྟམུཙིཏཾ, སོ ཀཱམོ ཀནྡཔྤོ ཨེཝ ཙཎྜཱལོ ཨཀཎྜོ ¶ ཝཱ ཨསཡ྄ཧོཔཏཱཔཱཝཧཏྟཱ. ཀཱམེ ཙཎྜཱལཏྟཱརོཔནཉྩ ཨུཙིཏམེཝ ཡཏོནེན ཀཡིརམཱནམསཧནམུཔཏཱཔམསཧམཱནཱ ཏཾ པརིབྷཝནྟཾ ཝིཔྤལཔཏི, ནིདྡཡོ ནིཀྐརུཎོ, ཨིདམཔི ཨུཙིཏམུཔཏཱཔེ ནིཀྐརུཎཱནཾ ཏཱདིསཱི གཏཱིཏི. མཾ དུནོཏི ཨདྷིཀམུཔཏཱཔེཏི ནིདྡཡཏྟཱ, ན བྷཝནྟཾ, ཏེནེཝ བྷཝཾ སུཁཱི. ཨིམིནཱ ཨཉྙཱསཏྟཏཾ ཏསྶ དཱིཔེཏི. ཡདི ནཱཉྙཱསཏྟོསི, ནཱཧམེཀཱཀིནཱི བྷཝཱམི. ཨསཧཱཡཱནཉྷི པཊིསཏྟཝོ ཧོནྟི. ཨེཀཱཀིཏྟཱཡེཝཱཧམཔྤཊིསརཎཏྟཱནེན དུསཱམཱིཏི [དུཉྙཱམཱིཏི (?)] ཏཝ ཀཱམཾ ཏྭཾ སུཁཱི ཧོསི. སནཱཐཱནཾ ཏཱདིསཱི ཝུཏྟཱིཏི ཨེཝཾ སུཁཱིཔི ཏྭཾ ཨཱིདིསཾ བྱསནམཱཔནྣཾ ཀིཾ ཀསྨཱ ཨུཔེཀྑསེཏི. ཨེཝམཡཾ ཝངྐཝུཏྟིཡཱ ཨཏྟནོ, ཏཾ ཝིསཡམནུབྷཝནྟསྶ ཙ ཝིམུཁཏྟཾ ནིདསྶེཏཱིཏཱིདིསཾ ན གཱམྨཾ.

༩༢. གཱམྨདོསཔརིཧཱརེ ལཀྑིཡཾ དསྶེཏི ‘‘དུནོཏི’’ཙྩཱདི. ཀཱམཏཎྷཱབྷིབྷཱུཏཱ ཨངྒནཱ ཨཏྟནོ ཝལླབྷཾ ནིསྶཱཡ ཨེཝཾ ཝིལཔཏི ‘‘སདཡ ཧེ ཀཱརུཎིཀ སོ ཀཱམཙཎྜཱལོ སོ ཨནངྒནཱིཙོ ནིདྡཡོ ནིཀྐཱརུཎིཀོ མཾ དུནོཏི པཱིལེ༹ཏི, སུཁཱིཔི མམ ཝིཡ ཨནཱཐབྷཱཝཱབྷཱཝཏོ སུཁིཏོཔི ཏྭཾ ཨཱིདིསཾ བྱསནཱཔནྣཾ ཨེཝཾ ཀཱམཙཎྜཱལེན ཨཀཱརུཎེན ཀཏཨསཡ྄ཧསནྟཱཔསངྑཱཏབྱསནམནུཔྤཏྟཾ མཾ ཀིམུཔེཀྑསེ ཀསྨཱ ཨུདཱསཱིནོསཱི’’ཏི. ཨཏྟནོ དུཀྑཱཏུརཏྟཱ དུཀྑདཱུརཱིཀརཎཾ ཀཱརུཎིཀཱནཾཡེཝ ཝིསཡནྟི ‘‘སདཡེ’’ཏི ཨནུནཡཝསེན ཨཱམནྟནུཙིཏཾ ཨཏྟནོ དུཀྑཱཏུརཏཾ པོསེཏུཾ པཱིལཱ༹ཀཱརཀེ ཀཱམེ ཙཎྜཱལཏྟཱརོཔནཉྩ ནིདྡཡཏྟཀཐནཉྩ ཨུཙིཏམེཝ ཨཏྟནི ཨུཔེཀྑཀཏྟཱ. སུཁཱིཔཱིཏི ཨིམིནཱ ཏསྶ པརཝིསཡཱསཏྟཏཱཡ ཨཏིཙཱརཾ ཨབྦྷུཔགམེཏི. ཨེཝཾ ཝངྐཝུཏྟིཡཱ ཨཏྟནོ ཝལླབྷེ སཱནུརཱགཏྟཉྩ ཨཏྟནི ཏསྶ ཏདབྷཱཝཏྟཉྩ དསྶེཏཱིཏི. ‘‘ཀཉྙེ ཀཱམཡམཱནཾ མཾ, ན ཀཱམཡསི ཀིཾནྭིད’’ནྟི ཨེཏྠ ཝིཡ ཨིཧ གཱམྨདོསོ ནཏྠཱིཏི ¶ གཱམྨདོསཔརིཧཱརམིདཾ. ཀཱམོཡེཝ ཙཎྜཱལོ ཀཱམཙཎྜཱལོ, སཧ དཡཱཡ ཡོ ཝཏྟཏཱིཏི ཙ, ནཏྠི དཡཱ ཨསྶེཏི ཙ, སུཁམསྶ ཨཏྠཱིཏི ཙ ཝིགྒཧོ. ཨཔིསདྡོ ཨཀྑམེ.

༩༣.

ཡཏིཧཱིནཔརིཧཱརོ, ན པུནེ’དཱནི ནཱིཡཏེ;

ཡཏོ ན སཝནུབྦེགཾ, ཧེཊྛཱ ཡེཏཾ ཝིཙཱརིཏཾ.

༩༣. ‘‘ཡཏི’’ཙྩཱདི. ཝིཙཱརིཏནྟི ‘‘ཏཾ ནམེ སིརསཱ ཙཱམཱི-ཀརཝཎྞཾ ཏཐཱགཏ’’ནྟིཨཱདིནཱ ཧེཊྛཱ པཀཱསིཏནྟི ཨཏྠོ.

༩༣. ‘‘ཡཏིཧཱིནི’’ཙྩཱདི. ཡཏོ ཡསྨཱ སཝནུབྦེགཾ ‘‘དོསཱནམུདྡེསཀྐམེན དོསཔརིཧཱརཀྐམོ ན ཝུཏྟོ’’ཏི ཨེཝཾ ཝིཉྙཱུནམུཔྤཛྫམཱནཾ ཨིམསྶ གནྠསྶ སཝནཱསཧནཾ ནཏྠི, ཏཏོ ཡཏིཧཱིནཔརིཧཱརོ ཡཏིཧཱིནདོསསྶ པརིཧརཎཝསེན པཝཏྟམུདཱཧརཎཾ ཨིདཱནི པུན ན ནཱིཡཏེ ནཱཧརཱིཡཏེཏི. ཨིམིནཱདྷིགཏམཱདོ ཝུཏྟཏྠམེཝ སམཏྠེཏི. ཧེཊྛཱ ཡེཏཾ ཝིཙཱརིཏནྟི ཨེཝཾ ཡཏིཧཱིནདོསཔརིཧརཎཾ ཧེཊྛཱ ཨནནྟརཔརིཙྪེདེ ཝིཙཱརིཏཾ ‘‘ཏཾ ནམེ སིརསཱ ཙཱམཱི-ཀརཝཎྞཾ ཏཐཱགཏ’’ནྟིཨཱདིནཱ པཀཱསིཏནྟི. ཨཱདོ ཡཏིཧཱིནདོསཔཱཏུབྷཱཝེཡེཝ པརིཧཱརཀྐམསྶཱཔི དསྶིཏཏྟཱ ཨིཧཱདསྶནེཔི གནྠསྶ ཨཱུནཏཱ ནཏྠཱིཏི ཨདྷིཔྤཱཡོ. ཡཏི ཧཱིནཱ ཨེཏྠེཏི ཙ, ཏསྶ པརིཧཱརོཏི ཙ, སཝནེ ཨུབྦེགནྟི ཙ ཝིགྒཧོ.

ཀམཙྩུཏསྶ ཡཐཱ –

༩༤.

ཨུདཱརཙརིཏོ’སི ཏྭཾ, ཏེནེཝཱ’རཱདྷནཱ ཏྭཡི;

དེསཾ ཝཱ དེཧི གཱམཾ ཝཱ, ཁེཏྟཾ ཝཱ མམ སོབྷནཾ.

༩༤. ‘‘ཨུདཱར’’ཨིཙྩཱདི. ཨུདཱརཾ ཨུདཱརཏྟཾ ཙཱགཱཏིསཡསམྦནྡྷཏོ ཙརིཏཾ ཨཏིགུཎཔཝཏྟི ཡསྶཱཏི ཝིགྒཧོ. ཨེཏྠ ཨུཙིཏཏྟཱ ¶ དེསཱདཱིནཾ ཡཱཙནཀྐམསྶ ཀམཙྩུཏསྶ པརིཧཱརོཡཾ.

༩༤. ‘‘ཨུདཱརི’’ཙྩཱདི. ཏྭཾ པུཉྙཝནྟ ཨུདཱརཙརིཏོསི ཙཱགཱཏིསཡཡོགཏོ ཝིསཱརདཔཝཏྟིཡུཏྟོསི, ཏེནེཝ ཏེན ཀཱརཎེནེཝ ཨཱརཱདྷནཱ མམ ཡཱཙནཱ ཏྭཡི ཧོཏི. དེསཾ ཝཱཛནཔདཾ ཝཱ, ནོ ཙེ, གཱམཾ ཝཱ སཾཝསཐཾ ཝཱ, ནོ ཙེ, སོབྷནཾ ཁེཏྟཾ ཝཱ ཀེདཱརཾ ཝཱ མམ དེཧཱིཏི ཨནུཔུབྦཾ ཧཱིནཔདཏྠཡཱཙནཱ དཱཡཀསྶ དཱནསྶཱཔི ཡཱཙཀསྶ ཨིཙྪིཏཏྠཔཊིལཱབྷསྶཱཔི ཨནུརཱུཔཏྟཱ ཀམཙྩུཏདོསམཔནེཏི. ཨུདཱརཾ ཙརིཏཾ ཨསྶཱཏི ཝིགྒཧོ.

ཨཏིཝུཏྟསྶ ཡཐཱ –

༩༥.

མུནིནྡཙནྡསམྦྷཱུཏ-

ཡསོརཱསིམརཱིཙིནཾ;

སཀལོཔྱ’ཡམཱཀཱསོ,

ནཱ’ཝཀཱསོ ཝིཛམྦྷནེ.

༩༥. ‘‘མུནིནྡ’’ཨིཙྩཱདི. མུནིནྡོཡེཝ ཙནྡོ, ཏཏོ སམྦྷཱུཏཱ པཱཏུབྷཱུཏཱ, ཡསོརཱསཱི ཨེཝ མརཱིཙིཡོ, ཏཱསཾ. ཨཡཾ སཀལོ ཨཱཀཱསོཔི གགནམེཝ, ན ཏསྶེཀོ པདེསོ. ཝིཛམྦྷནེ བྱཱཔནེ ནཱཝཀཱསོ ཏཱདིསཏྟཱ ཏཱསཾ མརཱིཙིནནྟི ནཱཏིཝུཏྟཾ.

༩༥. ‘‘མུནིནྡི’’ཙྩཱདི. མུནིནྡཙནྡསམྦྷཱུཏཡསོརཱསིམརཱིཙིནཾ མུནིནྡསངྑཱཏཙནྡཏོ པཱཏུབྷཱུཏཱནཾ ཀིཏྟིསམཱུཧསངྑཱཏཀིརཎཱནཾ ཝིཛམྦྷནེ བྱཱཔནེ ཨཡཾ སཀལོཔི ཨཱཀཱསོ ནཱཝཀཱསོ ན ཨོཀཱསོ ཧོཏཱིཏི. ཧེཏུཕལཱདིཨེཀེཀཀཱརཎེནཱཔི ཨཔྤམེཡྻཱནཾ སབྦཉྙུགུཎཱནཾ པཝཏྟིཡཱ ཨཔྤམེཡྻསཱམཉྙབྷཱུཏཱཀཱསསྶ ནིརཝཀཱསསྶ ཨིཝ ཀཐནམུཙིཏནྟི ཨཏིཝུཏྟདོསོ ཨིཧ ན བྷཝཏི. ཙནྡོ ཨིཝ ¶ ཙནྡོ, མུནིནྡོ ཨེཝ ཙནྡོ, ཏཏོ སམྦྷཱུཏཱནཾཡེཝ ཡསཱནཾ རཱསཱི ཙ ཏཱ མརཱིཙིཡོ ཙཱཏི ཝིགྒཧོ.

༩༦.

ཝཱཀྱཾ བྱཱཔནྣཙིཏྟཱནཾ, ཨཔེཏཏྠཾ ཨནིནྡིཏཾ;

ཏེནུ’མྨཏྟཱདིཀཱནཾ ཏཾ, ཝཙནཱ’ཉྙཏྲ དུསྶཏི.

༩༦. ‘‘ཝཱཀྱ’’མིཙྩཱདི. བྱཱཔནྣཾ ནཊྛཾ ཨཡཐཱཔཝཏྟཾ ཙིཏྟཾ ཡེསཾ, ཏེསཾ. ཝཱཀྱཾ ཝཱཀྱལཀྑཎོཔེཏཾ. ཨཔེཏོ ཨཔགཏོ སུཉྙོ ཨཏྠོ ཨབྷིདྷེཡྻཾ སཾཝོཧཱརིཀཾ ཡསྶ, ཏཾ. ཨནིནྡིཏཾ ཨཧཱིལི༹ཏཾ. ཏེན ཡཐཱཝུཏྟེན ཀཱརཎེན. ཏཾ ཝཱཀྱཾ ཨུམྨཏྟོ དྷཱཏུཀྑོབྷཱདིནཱ ཁིཏྟཙིཏྟོ, སོ ཨཱདི ཡེསཾ བཱལཱདཱིནཾ ཏེསཾ ཝཙནཱ ཨསངྒཏཱཡ ཝཱཙཱཡ ཨཉྙཏྲ ཨཉྙསྨིཾ ཨབྱཱཔནྣཙིཏྟཝིསཡེ དུསྶཏི དུཊྛཾ ཛཱཡཏེ, ཨུམྨཏྟཱདཱིནཾཡེཝ ཏཐཱཝིདྷཱཡ ཝཱཙཱཡ ཨུཙིཏཏྟཱཏི.

༩༦. ‘‘ཝཱཀྱ’’མིཙྩཱདི. བྱཱཔནྣཙིཏྟཱནཾ ཝིརུདྡྷབྷཱཝམཱཔནྣཙིཏྟཱནཾ ཝཱཀྱཾ སྱཱདྱནྟཏྱཱདྱནྟཔདསམུདཱཡརཱུཔཾ ཝཱཀྱཾ ཨཔེཏཏྠཾ ཨཔགཏསམུདཱཡཏྠཾ ཨནིནྡིཏཾ ཝིཉྙཱུཧི གརཧིཏཾ ན ཧོཏི, ཏེན ཀཱརཎེན ཨུམྨཏྟཱདིཀཱནཾ ཨུམྨཏྟཝེདནཊྚཱདཱིནཾ ཝཙནཱཉྙཏྲ ཝཙནཾ ཝིནཱ ཨནུམྨཏྟཱདིཝཙནེ ཏཾ སམུདཱཡཏྠསམྦནྡྷརཧིཏཾ ཝཙནཾ དུསྶཏི དོསདུཊྛཾ ཧོཏི. བྱཱཔནྣཾ ཙིཏྟཾ ཡེསནྟི ཙ, ཨཔེཏོ ཨཏྠོ ཨསྶཱཏི ཙ, ཨུམྨཏྟོ ཨཱདི ཡེསནྟི ཙ ཝིགྒཧོ.

ཡཐཱ –

༩༧.

སམུདྡོ པཱིཡཏེ སོ’ཡ-མཧ’མཛྫ ཛརཱཏུརོ;

ཨིམེ གཛྫནྟི ཛཱིམཱུཏཱ, སཀྐསྶེ’རཱཝཎོ པིཡོ.

༩༧. ‘‘ཡཐེ’’ཏྱུདཱཧརཏི ‘‘སམུདྡོ’’ཨིཙྩཱདི. ན ཧེཏྠ ‘‘སམུདྡོ པཱིཡཏེ’’ཨིཙྩཱདིནོ པདསམུདཱཡསྶ ཀོཙི ཨེཀོ ཨཏྠོ གཡ྄ཧཏི, ཡོ སོ བནྡྷཏྠོ སིཡཱ. ཨཝཡཝཏྠཱ ¶ ཨེཝ ཏུ ཨཡོསལཱཀཱཀཔྤཱཔཊིབྷནྟཱིཏི ཨཱིདིསམཔེཏཏྠམནིནྡིཏཾ ཝིཉྙེཡྻཾ བྱཱཔནྣཙིཏྟཱནཾ.

༩༧. ‘‘སམུདྡོ’’ཙྩཱདི. སོ ཨཡཾ སམུདྡོ པཱིཡཏེ ཡེན ཀེནཙི པཱིཡཏེ, ཨཧཾ ཨཛྫ ཛརཱཏུརོ ཛརརོགཱབྷིབྷཱུཏོ, ཨིམེ ཛཱིམཱུཏཱ མེགྷཱ གཛྫནྟི ཐནཡནྟི. སཀྐསྶ ཨེརཱཝཎོ པིཡོཏི. ཨིདཾ ནིནྡིཏཱནིནྡིཏཱནཾ དྭིནྣམུདཱཧརཎཾ. ཨིདཾ ཝཱཀྱཾ ཨཝཡཝཏྠམནྟརེན སམུདཱཡཏོ གམྱམཱནཏྠསྶཱབྷཱཝཱ ཨཔེཏཏྠཾ ནཱམ ཧོཏི. ཨཱིདིསཾ ཝཱཀྱཾ ཨུམྨཏྟཀཱདཱིཧི ཝུཏྟམཔྤཱིཏིཀརཾ ན ཧོཏི, ཨཉྙེཧི ཝུཏྟཾ པན ཀཎྞེ ཨཡོསལཱཀཱ ཝིཡ ཨཔྤཱིཏིཀརཾ. ཛརཱཡ ཨཱཏུརོཏི ཝཱཀྱཾ.

༩༨.

སུཁུམཱལཱཝིརོདྷིཏྟ-དིཏྟབྷཱཝཔྤབྷཱཝིཏཾ;

བནྡྷནཾ བནྡྷཕརུས-དོསཾ སཾདཱུསཡེཡྻ ཏཾ.

༩༨. ‘‘སུཁུམཱལི’’ཙྩཱདི. ན ཝིརུཛ྄ཛྷཏི སཱིལེནཱཏི ཨཝིརོདྷཱི, ཏསྶ བྷཱཝོ ཨཝིརོདྷིཏྟཾ. སུཁུམཱལསྶ ཨཝིརོདྷིཏྟཾ ཡསྶ སོ དིཏྟབྷཱཝོ, ཏེན པབྷཱཝིཏཾ ཝཌྜྷིཏཾ སཾཡུཏྟཾ ཏཾ བནྡྷནཾ བནྡྷཕརུསདོསཾ སཾདཱུསཡེཡྻ ནཱསཡེཏི ཨཏྠོ.

༩༨. ‘‘སུཁུམཱལི’’ཙྩཱདི. སུཁུམཱལཱཝིརོདྷིཏྟདིཏྟབྷཱཝཔྤབྷཱཝིཏཾ ‘‘ཨནིཊྛུརཀྑརཔྤཱཡེ’’ཙྩཱདིནཱ ཝུཙྩམཱནསུཁུམཱལགུཎསྶ ཨཝིརུདྡྷབྷཱཝསམནྣཱགཏེན ཝཎྞཱནཾ ཨཉྙམཉྙསངྒབྷིལཀྑཎེན དིཏྟབྷཱཝེན པིཡབྷཱཝེན ཨནུབྲཱུཧིཏཾ ཏཾ བནྡྷནཾ བནྡྷཕརུསདོསཾ བནྡྷཕརུསསངྑཱཏདོསཾ སཾདཱུསཡེཡྻ ནཱསེཡྻ, ཏཾ བནྡྷཕརུསདོསནྟི ཝཱ སམྦནྡྷོཏི. ན ཝིརུཛ྄ཛྷཏི སཱིལེནཱཏི ཨཝིརོདྷཱི, ཏསྶ བྷཱཝོཏི ཙ, སུཁུམཱལསྶ ཨཝིརོདྷིཏྟཾ ཡསྶཱཏི ཙ, སོཡེཝ དིཏྟསྶ བྷཱཝོཏི ཙ, ཏེན པབྷཱཝིཏནྟི ཙ ཝཱཀྱཾ.

ཡཐཱ –

༩༩.

པསྶནྟཱ ¶ རཱུཔཝིབྷཝཾ, སུཎནྟཱ མདྷུརཾ གིརཾ;

ཙརནྟི སཱདྷཱུ སམྦུདྡྷ-ཀཱལེ ཀེལི༹པརམྨུཁཱ.

༩༩. ‘‘ཡཐེ’’ཏྱུདཱཧརཏི ‘‘པསྶནྟཱ’’ཨིཙྩཱདི. ཀེལི༹ཡཱ ཀཱིལཱ༹ཡ པརམྨུཁཱ ཝིགཏཙྪནྡཱ ཙརནྟཱིཏི སམྦནྡྷོ.

༩༩. ‘‘པསྶནྟེ’’ཙྩཱདི. སཱདྷཱུ སཛྫནཱ སམྦུདྡྷཀཱལེ སམྦུདྡྷསྶ དྷརམཱནཀཱལེ རཱུཔཝིབྷཝཾ ཏསྶ རཱུཔསམྤཏྟིཾ པསྶནྟཱ ཙཀྑུཾ སནྟཔྤེཏྭཱ ཨོལོཀེནྟཱ མདྷུརཾ གིརཾ ཏསྶེཝ བྷགཝཏོ ཨཊྛངྒསམནྣཱགཏཾ མདྷུརཝཙནཾ སུཎནྟཱ ཀེལི༹པརམྨུཁཱ ཀཱིལཱ༹ཡ ཝིམུཁཱ ཀཱིལཱ༹བྷིརཏིརཧིཏཱ ཙརནྟི གཙྪནྟི པཝཏྟནྟཱིཏི. ཀེཝལཾ ཕརུསསིཐིལཝཎྞེཧི ཝིནཱ སུཁུཙྩཱརཎཱིཡཝཎྞེཧི སམྦྷཱུཏསུཁུམཱལགུཎཱཝིརོདྷཨཉྙམཉྙསངྒཏཝཎྞཝིསདཔྤཝཏྟགུཎཡུཏྟཏྟཱ ཨེཏྠ བནྡྷཕརུསདོསོ ནཏྠི. ཀེལི༹ཡཱ པརཱནི པརིཝཏྟིཏཱནི མུཁཱནི ཨེཏེསནྟི ཝིགྒཧོ. ཨེཏྠ ཀཱལོཏི ཀིརིཡཱ. སཱ ཙ ཨཏྠཏོ ཏདཱཀཱརཔྤཝཏྟསམྦནྡྷོཡེཝ. ལོཀོ པན ཝིསུཾ ཨེཀོ པདཏྠོཡེཝཱཏི ཝོཧརཏི. ཝཱཀྱདོསཔརིཧཱརོ.

ཝཱཀྱདོསཔརིཧཱརཝཎྞནཱ ནིཊྛིཏཱ.

ཝཱཀྱཏྠདོསཔརིཧཱརཝཎྞནཱ

ཨཔཀྐམསྶ ཡཐཱ –

༡༠༠.

བྷཱཝནཱདཱནསཱིལཱནི, སམྨཱ སམྤཱདིཏཱནི’ཧ;

ནིབྦཱནབྷོགསགྒཱདི-སཱདྷནཱནི ན སཾསཡོ.

༡༠༠. ‘‘བྷཱཝནཱ’’ཨིཙྩཱདི. ཨེཏྠ བྷཱཝནཱདཱིནི ནིདྡིསིཏྭཱ ཡཐཱཀྐམཾ ནིབྦཱནཱདཱིནཾ ནིདྡེསེན ཨཔཀྐམདོསོ པརིཧཊོ.

༡༠༠. ‘‘བྷཱཝནེ’’ཙྩཱདི. ¶ ཨིཧ མནུསྶལོཀེ སམྨཱ སམྤཱདིཏཱནི ཀམྨཕལཾ སདྡཧིཏྭཱ ཡཐཱཝིདྷི སམྤཱདིཏཱནི ཨཏྟནོ སནྟཱནེ པཝཏྟཱཔིཏཱནི བྷཱཝནཱདཱནསཱིལཱནི ནིབྦཱནབྷོགསགྒཱདིསཱདྷནཱནི ཡཐཱཀྐམཾ ནིབྦཱནཨུཔབྷོགཔརིབྷོགསམྤཏྟིསགྒུཔྤཏྟིཨཱདཱིནཾ ཧེཏུབྷཱཝེན སཱདྷཀཱནི ཧོནྟི, ཨེཏྠ སཱདྷནེ ན སཾསཡོ ཧོཏཱིཏི. ཨིཧ བྷཱཝནཱདཡོ ཨུདྡིསིཏྭཱ ཨུདྡེསཀྐམཾ ཨནཏིཀྐམྨ ནིབྦཱནཱདཱིནམནུདྡེསསྶ ཀཏཏྟཱ ཨཔཀྐམཝཱཀྱཏྠདོསསྶ ཨོཀཱསོ ན ཧོཏི.

༡༠༡.

ཨུདྡིཊྛཝིསཡོ ཀོཙི [ཀོཔི (ཀ. སཱི.)], ཝིསེསོ ཏཱདིསོ ཡདི;

ཨནུདྡིཊྛེསུ [ཨནུདིཊྛེསུ (?)] ནེཝ’ཏྠི, དོསོ ཀམཝིལངྒྷནེ.

༡༠༡. ‘‘ཨུདྡིཊྛེ’’ཙྩཱདི. ཨུདྡིཊྛཱ པཋམཾ ཡུཏྟཱ ཨཏྠཱ ཝིསཡོ གོཙརོ ཡསྶ ཨུདྡེསཱནུདྡེསསམྦནྡྷཝིཛཱནནལཀྑཎསྶ ཝིསེསསྶ སོ ཏཱདིསོ ཀོཙི ཝིསེསོ ཨནུདྡིཊྛེསུ ཡཐཱཀྐམམུདྡེསཀམཱནམཏིཀྐམེན པུན ཨཏྠནྟརནིསྶཡེན པརཱམཊྛེསུ ཡདི བྷཝེཡྻ, ཀམསྶ ཡཐོདྡིཊྛེསུ ཨནུཀྐམསྶ ཝིལངྒྷནེ ཨཏིཀྐམེ དོསོ ནེཝཏྠི.

༡༠༡. ‘‘ཨུདྡིཊྛེ’’ཙྩཱདི. ཨུདྡིཊྛཝིསཡོ པཋམཾ པཡུཏྟཏྠཝིསཡོ ཏཱདིསོ ཀོཙི ཝིསེསོ ཨུདྡེསཱནུདྡེསཱནཾ ‘‘ཨིདམསྶ པུབྦཀཐནཾ, ཨིདམསྶ པཙྪཱཀཐན’’ནྟི ཨེཝཾ ཨཉྙམཉྙཱཔེཀྑལཀྑཎསམྦནྡྷཔརིཛཱནནལཀྑཎོ ཝིསེསོ ཨནུདྡིཊྛེསུ ཨཏྠནྟརཾ ནིསྶཱཡ པུན ཝུཏྟེསུ ཡདི ‘‘བྷཝེཡྻཱ’’ཏི སེསོ. ཀམཝིལངྒྷནེ ཨུདྡེསཱནུདྡེསཱནཾ ཀམཱཏིཀྐམེ དོསོ སཏྠཉྙཱུནཾ སུཏིཀཱལེ ཨསཧནཀཱརཎཾ ནེཝཏྠཱིཏི. ཨུདྡིཊྛཱ པཋམུཙྩཱརིཏཱ ཨཏྠཱ ཝིསཡོ གོཙརོ ཨསྶེཏི ཙ, ཀམསྶ ཝིལངྒྷནནྟི ཙ ཝཱཀྱཾ.

ཡཐཱ –

༡༠༢.

ཀུསལཱཀུསལཾ ¶ ཨབྱཱ-ཀཏ’མིཙྩེསུ པཙྪིམཾ;

ཨབྱཱཀཏཾ པཱཀདཾ ན, པཱཀདཾ པཋམདྭཡཾ.

༡༠༢. ‘‘ཡཐེ’’ཏྱུདཱཧརཏི ‘‘ཀུསལེ’’ཙྩཱདི. ཀུསལཾ ཀཱམཱཝཙརཱདིཀམེཀཝཱིསཏིཝིདྷཾ, ཨཀུསལཉྩ དྭཱདསཝིདྷཾ, ཨབྱཱཀཏཾ ཝིཔཱཀཀྲིཡཱསངྑཱཏམིཏི ཨེཏེསུ ཏཱིསུ པཙྪིམཾ ཨབྱཱཀཏཾ, པཱཀཾ ཝིཔཱཀཾ དདཱཏཱིཏི པཱཀདཾ. ནེཏི ནིཔཱཏཔདཾ. པཋམདྭཡཾ ཀུསལཱཀུསལཾ པཱཀཾ དདཱཏཱིཏི པཱཀདནྟི. ཨེཏྠ ཨཔཱཀདཏྟཾ ཨབྱཱཀཏསྶེཝ, པཱཀདཏྟཾ ཏེསམེཝ དྭིནྣནྟི ཝིསེསོ དཊྛབྦོ.

༡༠༢. ‘‘ཀུསལེ’’ཙྩཱདི. ཀུསལཾ ཀཱམཱཝཙརཱདིཨེཀཝཱིསཏིཀུསལཉྩ ཨཀུསལཾ དྭཱདསཝིདྷཾ ཨཀུསལཉྩ ཨབྱཱཀཏཾ ཝིཔཱཀཀྲིཡཱརཱུཔནིབྦཱནཝསེན ཙཏུབྦིདྷམབྱཱཀཏཉྩ ཨིཙྩེསུ ཨེཝམེཏེསུ ཏཱིསུ པཙྪིམཾ ཨུདྡེསཀྐམེན པཙྪིམམབྱཱཀཏཾ པཱཀདཾ ན ཝིཔཱཀདཱཡཀཾ ན ཧོཏི, པཋམདྭཡཾ ཀུསལཱཀུསལཾ པཱཀདཾ ཡཐཱསཀཾ ཝིཔཱཀདཱཡཀཾ ཧོཏཱིཏི. ‘‘ཡཐཱསངྑྱམནུདེསོ སམཱན’’ནྟི [པཱཎིནི ༡.༣.༡༠ སུཏྟམིདཾ. ཨནུདིསྶཏེ ཨིཏི ཨནུདེསོ, པཙྪཱ ཨུཙྩཱརིཏོ ཨིཙྩཏྠོ ‘‘སམཱནཾ’’ཨིཏི སམྦནྡྷེཚཊྛཱི (ཀཏྭབོདྷིནཱི)] ཝུཏྟཏྟཱ ཨུདྡིཊྛེཧི སམཱནམནུདྡིཊྛཱནམེཝ སམསངྑྱཱཡ ལབྦྷམཱནཏྟཱ སངྑྱཱཡཱནཏིཀྐམོ ཧོཏི. ཨེཏྠ པན ཀུསལཱདིསབྷཱཝཏོ ཏིཝིདྷཏྟེཔི ཝིཔཱཀདཱནཱདཱནཝསེན དུཝིདྷཀུསལཱཀུསལཱདིཝིསཡབྷཱུཏཝིསེསསྶ པཝཏྟིཡཱ ཝཏྟིཙྪཱཏོ པཋམཾ ཝཏྟབྦཏཾ ཝིནཱ ཀམེན ནིསྶཡནཾ ནཱམ ནཏྠཱིཏི ཨཔཀྐམདོསོ ན ཧོཏཱིཏི.

༡༠༣.

སགུཎཱནཱ’ཝིཀརཎེ, ཀཱརཎེ སཏི ཏཱདིསེ;

ཨོཙིཏྱཧཱིནཏཱཔཏྟི, ནཏྠི བྷཱུཏཏྠསཾསིནོ.

༡༠༣. ‘‘སགུཎཱན’’མིཙྩཱདི. ¶ སོཏཱུནཾ ཨཏྟཏྠནིཔྥཱདནཱདིཀེ ཏཱདིསེ ཀཱརཎེ ཧེཏུམྷི སཏི བྷཱུཏཾ ཡཐཱཔཝཏྟཾ ཨཏྠཾ ཨཏྟནོ ཙརིཏལཀྑཎཾ སཾསིནོ ཝདནྟསྶ སསྶ ཨཏྟནོ, སཱནཾ ཝཱ གུཎཱནཾ ཨཱཝིཀརཎེ ཨདྷིཀཱརཝསེན ‘‘པཱུཛནཱིཡཏརོ ལོཀེ’’ཨིཙྩཱདིཀཐནེ ཨོཙིཀྱཧཱིནཏཱཡ ཨཱཔཏྟི པཱཔུཎནཾ སམྦྷཝོ ནཏྠི.

༡༠༣. ‘‘སགུཎི’’ཙྩཱདི. ཏཱདིསེ ཀཱརཎེ སཏི སོཏཱུནཾ ཨཏྟཏྠནིཔྥཱདནཱདིཀེ ཏཱདིསེ ཧེཏུམྷི ཝིཛྫམཱནེ བྷཱུཏཏྠསཾསིནོ ཨཏྟནི ཝིཛྫམཱནཀཱཡཱདིསཾཝརལཀྑཎགུཎསངྑཱཏམཏྠཾ ‘‘པཱུཛནཱིཡཏརོ ལོཀེ ཨཧམེཀོ’’ཨིཙྩཱདིནཱ ཏཱདིསཱཝསརེ ཝདནྟསྶ སགུཎཱནཾ སསྶ ཨཏྟནོ, སཱནཾ ཝཱ སཀཱནཾ གུཎཱནཾ ཨཱཝིཀརཎེ པཱཀཊཱིཀརཎེ ཨོཙིཏྱཧཱིནཏཱཔཏྟི ཨོཙིཏྱཧཱིནསངྑཱཏདོསསྶཱཔཏྟི ནཏྠཱིཏི. སསདྡསྶ ཨཏྟཨཏྟནིཡཝཱཙཀཏྟཱ སསྶ ཨཏྟནོ གུཎཱ སེ ཙ ཏེ གུཎཱ ཙེཏི ཝཱ ཝིགྒཧོ. བྷཱུཏོཡེཝ ཨཏྠོ, ཏཾ སཾསཏི ཝདཏི སཱིལེནཱཏི ཝིགྒཧོ.

༡༠༤.

ཨོཙིཏྱཾ ནཱམ ཝིཉྙེཡྻཾ, ལོཀེ ཝིཁྱཱཏམཱདརཱ;

ཏཏྠོ’པདེསཔབྷཝཱ, སུཛནཱ ཀཝིཔུངྒཝཱ.

༡༠༤. ‘‘ཨོཙིཏྱ’’མིཙྩཱདི. ལོཀེ སཏྟལོཀེ ཝིཁྱཱཏཾ པསིདྡྷཾ ཨཱབཱལཛནཾ [ཨཱབཱལཛནཱནཾ (ཀ.)] ཡཐཱསཀམནུརཱུཔཾ ཝིཛཱནནཏོ ཨོཙིཏྱཾ ཨུཙིཏབྷཱཝོ ནཱམེཏི པསིདྡྷིཡཾ ཨཱདརཱ ཨཱདརེན ཨུསྶཱཧེན ཏཏོ པརམཱདརཎཱིཡསྶཱབྷཱཝཏོ, ན ཧི ཨནུཙིཏཾ ཀིཉྩི ཀེནཱཔྱཱདརཎཱིཡཾ སབྦཐཱ ཨནསྶཱདནཱིཡཏྟཱ, ཝིཉྙེཡྻཾ ‘‘སོཏཱུན’’ནྟི སེསོ. ཏཏྠ ཏསྨིཾ ཨོཙིཏྱེ ཨུཔདེསསྶ པཋམུཙྩཱརཎསྶ ཨུགྒཎྷཱཔནཝསེན པཝཏྟསྶ པབྷཝཱ ཨུཔྤཏྟིཊྛཱནབྷཱུཏཱ སུཛནཱ སུཊྛུཛནཱ ཀཝིཔུངྒཝཱ ཨུཏྟམཱ, [ཀཝིཨུཏྟམཱ (?)] ཀཝིསེཊྛཱཏི ཝུཏྟཾ ཧོཏི.

༡༠༤. ‘‘ཨོཙིཏྱེ’’ཙྩཱདི. ¶ ལོཀེ སཏྟལོཀེ ཝིཁྱཱཏཾ ཨཱབཱལཔསིདྡྷཾ ཨོཙིཏྱཾ ནཱམ ཨཱདརཱ གཱརཝེན ཝིཉྙེཡྻཾ ཝིཉྙཱུཧི ཉཱཏབྦཾ ཧོཏི, ཏཏྠ ཨོཙིཏྱཝིསཡེ ཨུཔདེསཔབྷཝཱ པཋམུཙྩཱརཎསྶ ཨུཔྤཏྟིཊྛཱནབྷཱུཏཱ སུཛནཱ སཱདྷུཛནབྷཱུཏཱ ཀཝིཔུངྒཝཱ ཨུཏྟམཀཝཡོ བྷཝནྟཱིཏི, པསིདྡྷཨོཙིཏྱཔདེན ཡུཏྟཏྟཱ ཨེཏྠ ནཱམསདྡོ པསིདྡྷིཡཾ. ཨུཔདེསསྶ པབྷཝཱཏི ཙ, པུམཱནོ ཙ ཏེ གཱཝོ ཙེཏི ཙ, ཀཝཱིནཾ པུངྒཝཱཏི ཙ ཝཱཀྱཾ.

༡༠༥.

ཝིཉྙཱཏོཙིཏྱཝིབྷཝོ-

ཙིཏྱཧཱིནཾ པརིཧརེ;

ཏཏོ’ཙིཏྱསྶ སམྤོསེ,

རསཔོསོ སིཡཱ ཀཏེ.

༡༠༥. ‘‘ཝིཉྙཱཏ’’མིཙྩཱདི. ཝིཉྙཱཏོ ཨཝབུདྡྷོ ཡཐཱཝུཏྟཀཝིཝརཔསཱདཱ ཨོཙིཏྱམེཝ ཝིབྷཝོ སམྤཏྟི ཡེན སོ ཨོཙིཏྱཧཱིནཾ ནཱམ དཱུསནཾ པརིཧརེ པརིཝཛྫེཡྻ. ཏཏོ ཏསྨཱ པརིཧཱརཏོ ཧེཏུཏོ ཨོཙིཏྱསྶ སམྤོསེ སུཊྛུ ཝཌྜྷིབྷཱཝེ ཝཌྜྷནེ ཀཏེ རསསྶ ཨསྶཱདིཏབྦཏཱསངྑཱཏསྶ མཱདྷུརིཡསྶ སམྤོསོ སིཡཱ བྷཝེཡྻ.

༡༠༥. ‘‘ཝིཉྙཱཏེ’’ཙྩཱདི. ཝིཉྙཱཏོཙིཏྱཝིབྷཝོ ཏཱདིསཀཝཱིནམནུགྒཧེན ཝིཉྙཱཏཨོཙིཏྱསངྑཱཏསམྤཏྟིསམནྣཱགཏོ ཀཝི ཨོཙིཏྱཧཱིནཾ ནཱམ དཱུསནཾ པརིཧརེ ནིརཱཀརེཡྻ, ཏཏོ དོསཔརིཧཱརཏོ ཨོཙིཏྱསྶ སམྤོསེ ཨུཔབྲཱུཧནེ ཀཏེ སཏི རསཔོསོ མཱདྷུརིཡསངྑཏསྶ ཨསྶཱདེཏབྦསྶ པཱུརཎཾ སིཡཱ བྷཝེཡྻཱཏི. ཨོཙིཏྱམེཝ ཝིབྷཝོཏི ཙ, ཝིཉྙཱཏོ ཨོཙིཏྱཝིབྷཝོ ཡེནེཏི ཙ, རསསྶ པོསོ པུཊྛབྷཱཝོ [ཝུདྡྷབྷཱཝོ (ཀ.)] པོསེཏབྦབྷཱཝོཏི ཙ ཝཱཀྱཾ.

ཡཐཱ –

༡༠༦.

ཡོ ¶ མཱརསེནམཱསནྣ-མཱསནྣཝིཛཡུསྶཝོ;

ཏིཎཱཡཔི ན མཉྙིཏྠ, སོ ཝོ དེཏུ ཛཡཾ ཛིནོ.

༡༠༦. ‘‘ཡཐེ’’ཏྱུདཱཧརཏི ‘‘ཡོ’’ཨིཙྩཱདི. ཝིཛཡོ པརཱབྷིབྷཝོ ཨཱསནྣོ ཝིཛཡོ ཨེཝ ཨུསྶཝོ ཨབྦྷུདཡོ ནིཔྤཊིཔཀྑཱ པཝཏྟི ཡསྶ ཨེདིསོ ཡོ ཨཱསནྣཾ ཨཏྟནོ སམཱིཔམུཔགཏཾ མཱརསེནཾ ཏིཎཱཡཔི ན མཉྙིཏྠ ཏིཎམྤི ན མཉྙིཏྠ, ཏིཎཏོཔི ཧཱིནཾ མཉྙིཏྠ, སོ ཛིནོ མཱརཛི ཝོ ཏུམྷཱཀཾ ཛཡཾ དེཏཱུཏི ཝིདདྷཱཏུ. ཨེཏྠ ཛཡཱསཱིསནཱ ‘‘ཛིནོ’’ཏི ཨཙྩནྟམུཙིཏཾ, ཡོ ཨཛིནི པཉྩམཱརེཏི ཛིནོ པརཱབྷིབྷཝེཀརསོ, ཏསྶ པརེསཾ ཝིཛཡཔྤདཱནེ སཱམཏྠིཡེཀཡོགོ སིཡཱཏི. ‘‘མཱརསེནམཱསནྣཾ ཏིཎཱཡཔི ན མཉྙིཏྠཱ’’ཏི ཨིདཾ པནེཏྠ ཨཏིསམུཙིཏཾ ཡཏོ སམཱིཔམུཔགཏམྤི ཏཱདིསཾ མཱརསེནཾ ཏིཎཏོཔི ཧཱིནཾ མཉྙི, ཏེནསྶ པརེསཾ ཝིཛཡཔྤདཱནེཀརསཏཱ ཝིསེསཏོ ཡུཏྟཱཏི.

༡༠༦. ཨིཧ སཏྠེ སབྦཏྠ སངྑེཔཀྐམམིཙྪནྟོཔི ཨཱཙརིཡོ ཨོཙིཏྱཾ ནཱམ ཨཱདརེན སགྒརཱུཧི ཨུགྒཎྷིཏྭཱ པཡུཛྫིཏབྦམིཙྩེཝཾ ཝིཏྠཱརེན སིསྶེ ཨནུསཱསིཏྭཱ ཨིདཱནི ཨོཙིཏྱཧཱིནཔརིཧརཎཏྠཾ ‘‘ཡོ མཱརསེནམཱསནྣེ’’ཙྩཱདིནཱ ལཀྑིཡམུདཱཧརཏི. ཨཱསནྣཝིཛཡུསྶཝོ ཨདཱུརསཏྟུཝིཛཡསངྑཱཏཨུསྶཝོ, ཨཐ ཝཱ ཨཙྩཱསནྣཔཊིཔཀྑཝིརཧཔྤཝཏྟིསངྑཱཏཨབྷིཝུདྡྷིཡཱ སམནྣཱགཏོ ཡོ ཛིནོ ཨཱསནྣཾ ཨནེཀཔྤཀཱརབྷིཾསནཀརཱུཔེན ཨཏྟནོ སམཱིཔམཱགཏཾ མཱརསེནཾ མཱརབལཾ ཏིཎཱཡཔི ཏིཎལཝཾ ཀཏྭཱཔི ན མཉྙིཏྠ སལླཀྑཎཾ ནཱཀཱསི, སོ ཛིནོ སོ ཛིཏཔཉྩམཱརོ ཝོ ཏུམྷཱཀཾ ཛཡཾ དེཏཱུཏི. ཨེཏྠ ཡོ པཉྩམཱརེ ཛིཏཏྟཱ ཛིནོ ནཱམ ཧོཏི, སོ པརཱབྷིབྷཝནེ ཨསཧཱཡཀིཙྩཏྟཱ པརེསཾ ཛཡདཱནེ སཱམཏྠིཡཡུཏྟོཏི ‘‘ཛཡཾ དེཏཱུ’’ཏི ཀཏཾ ཛཡཱསཱིསནམཏིཨུཙིཏཾ ¶ ཧོཏི, ཛཡདཱནེ སཱམཏྠིཡསྶེཝ པོསཀཏྟཱ. ‘‘མཱརསེནམཱསནྣཾ ཏིཎཱཡཔི ན མཉྙིཏྠཱ’’ཏི ཨིདཾ ཝཏྟབྦམེཝ ནཏྠཱིཏི. ཨེཝཾ ཨཙྩནྟཨུཙིཏཔཡོགེན ཨོཙིཏྱཧཱིནདོསོ ནིརཱཀཏོཏི. ཝིཛཡོ ཨེཝ ཨུསྶཝོ, ཨཱསནྣོ ཝིཛཡུསྶཝོ ཡསྶེཏི ཝིགྒཧོ.

༡༠༧.

ཨཱརདྡྷཀཏྟུཀམྨཱདི-ཀམཱཏིཀྐམལངྒྷནེ;

བྷགྒརཱིཏིཝིརོདྷོ’ཡཾ, གཏིཾ ན ཀྭཱཔི ཝིནྡཏི.

༡༠༧. ‘‘ཨཱརདྡྷ’’ཨིཙྩཱདི. ཀཏྟཱ ཙ ཀམྨཉྩ ཏཱནི ཨཱདཱིནི ཡེསཾ ཀརཎཱདཱིནཾ ཨཱརདྡྷཱནི ཝཏྟུཾ པཊྛཔིཏཱནི ཀཏྟུཀམྨཱདཱིནི ཏེསཾ ཀམོ ཏསྶ ཨཏིཀྐམོ པརིཙྩཱགོ ཏསྶ ལངྒྷནེ སཏི, ཝཏྟུམཱརདྡྷཀཏྟུཀམྨཱདིཀམཱནཏིཀྐམེཏི ཝུཏྟཾ ཧོཏི. ཨཡཾ ཡཐཱཝུཏྟོ བྷགྒརཱིཏིཝིརོདྷོ ཀྭཱཔི ཀཏྠཙིཔི ཋཱནེ གཏིཾ ན ཝིནྡཏི པཏིཊྛཾ ན ལབྷཏེ.

༡༠༧. ‘‘ཨཱརདྡྷི’’ཙྩཱདི. ཨཱརདྡྷཀཏྟུཀམྨཱདིཀམཱཏིཀྐམལངྒྷནེ ཝཏྟུམཱརདྡྷཀཏྟུཀམྨཱདཱིནཾ ཀམཔརིཙྩཱགསྶཱཏིཀྐམེ ཨཡཾ ཡཐཱཝུཏྟབྷགྒརཱིཏིཝིརོདྷོ ཀྭཱཔི ཀཏྠཙིཔི ཋཱནེ གཏིཾ པཏིཊྛཾ ན ཝིནྡཏི ན ལབྷཏེཏི. ཨཱརདྡྷཱནི ཙ ཏཱནི ཀཏྟུཀམྨཱདཱིནི ཡེསཾ ཀརཎཱདཱིནཾ ཏེསཾ ཀམསྶ ཨཏིཀྐམོ ཏསྶ ལངྒྷནནྟི ཝིགྒཧོ.

ཡཐཱ –

༡༠༨.

སུཛནཉྙཱན’མིཏྠཱིནཾ, ཝིསྶཱསོ ནོ’པཔཛྫཏེ;

ཝིསསྶ སིངྒིནོ རོག-ནདཱིརཱཛཀུལསྶ ཙ.

༡༠༩.

བྷེསཛྫེ ཝིཧིཏེ སུདྡྷ-བུདྡྷཱདིརཏནཏྟཡེ;

པསཱད’མཱཙརེ ནིཙྩཾ, སཛྫནེ སགུཎེཔི ཙ.

༡༠༨-༡༠༩. ཨེཏྠ ཙ ‘‘སུཛན’’མིཙྩཱདིཀེ ‘‘བྷེསཛྫེ’’ཨིཙྩཱདིཀེ ཙ གཱཐཱདྭཡེ ཚཊྛིཡཱ, སཏྟམིཡཱ ཙ ཨཔརིཙྩཱགེན ནཱཏྠརཱིཏིཡཱ བྷངྒོ, ཙཀཱརསྶེཀསྶ ཀཏཏྟཱ ན སདྡརཱིཏིཡཱ ¶ བྷངྒོ. བཧཱུནམཏྠཱནཉྷི སམུཙྩཡཏྠཾ ཝཱཀྱེ ཨེཀོ ཝཱ ཙཀཱརོ ཀཱཏབྦོ པཊིཔདཾ ཝཱ.

༡༠༨. ‘‘སུཛནེ’’ཙྩཱདི. སུཛནཉྙཱནཾ སཛྫནེཧི ཨཉྙེསཾ དུཛྫནཱནཉྩ ཨིཏྠཱིནཉྩ ཝིསསྶ ཛཱིཝིཏཧརཎསམཏྠསྶ སིངྒིནོ ཝིསཱཎཝཏོ ཙ རོགནདཱིརཱཛཀུལསྶ ཙ ཝིསྶཱསོ སཾསགྒོ ན ཨུཔཔཛྫཏེ ཀིཉྩིཀཱལེ ཝིརུཛ྄ཛྷནཏོ ན ཡུཛྫཏེཏི. ཨེཏྠ ཨཱརདྡྷསྶ ཚཊྛུནྟཀྐམསྶ སབྦཏྠ ཨཔརིཙྩཱགཏོ ཨཏྠརཱིཏིབྷངྒོ ཙ, ཡུཏྟཊྛཱནེ ཨེཀསྶེཝ ཙཀཱརསྶ ཡུཏྟཏྟཱ སདྡརཱིཏིབྷངྒོ ཙ ནཏྠི. ཙསདྡསྶ ཨནེཀཏྠསམུཙྩཡཏྟཱ ‘‘སུཛནཉྙཱནཉྩཱ’’ཏིཨཱདིམྷི ཝཱ, ཨིཧ ཝུཏྟནིཡཱམེན ཨཝསཱནེ ཝཱ, སབྦཏྠ ཝཱ ཡོཛནམརཧཏི.

༡༠༩. ‘‘བྷེསཛྫེ’’ཙྩཱདིགཱཐཱཡམྤི ཨེསེཝ ནཡོ སཏྟམཱིམཏྟམེཝ ཝིསེསོ. ཝིཧིཏེ པཐྱེ བྷེསཛྫེ ཨོསདྷེ ཙ སུདྡྷབུདྡྷཱདིརཏནཏྟཡེ ཙ སཛྫནེ སཱདྷུཛནེ ཙ ཨཔི པུནཔི སགུཎེ ཝིཛྫམཱནགུཎེ ཙ པསཱདཾ ཨཏྟནོ ཙིཏྟཔསཱདཾ ནིཙྩཾ སཏཏཾ ཨཱཙརེ སཔྤུརིསོ ཀརེཡྻ སེཝེཡྻཱཏི.

སསཾསཡསྶ ཡཐཱ –

༡༡༠.

མུནིནྡཙནྡིམཱལོཀ-

རསལོལཝིལོཙནོ;

ཛནོ’ཝཀྐནྟཔནྠོ’ཝ,

རཾསིདསྶནཔཱིཎིཏོ.

༡༡༠. ‘‘མུནིནྡེ’’ཙྩཱདི. ཨེཏྠ རཾསིསདྡོ སསཾསཡཾ པརིཧརཏི.

༡༡༠. སསཾསཡཔརིཧཱརལཀྑིཡབྷཱུཏཱ ‘‘མུནིནྡི’’ཙྩཱདིགཱཐཱ ཨནནྟརཔརིཙྪེདེ ཝུཏྟཏྠཱཝ. རཾསིསདྡོཡེཝ ཧི ཝིསེསོ, ཨེཏྠ རཾསིསདྡེན སུཎནྟཱནཾ ཨུཔྤཛྫམཱནསཾསཡེན སསཾསཡབྷཱུཏཾ བནྡྷདོསམོཧཏཱིཏི.

༡༡༡.

སཾསཡཱཡེཝ ¶ ཡཾ ཀིཉྩི, ཡདི ཀཱིལཱ༹དིཧེཏུནཱ;

པཡུཛྫཏེ ན དོསོ’ཝ, སསཾསཡསམཔྤིཏོ.

༡༡༡. ‘‘སཾསཡེ’’ཙྩཱདི. ཀཱིལཱ༹དཱིཏི ཨཱདིསདྡེན ཨཱཀིཎྞསམྨནྟནཱདིཾ སངྒཎྷཱཏི, ཀཱིལཱ༹དིཧེཏུནཱ ཡཾ ཀིཉྩི སཾསཡཱཡེཝ ཡདི པཡུཛྫཏེཏི སམྦནྡྷོ.

༡༡༡. ‘‘སཾསཡཱཡེཝེ’’ཙྩཱདི. ཀཱིལཱ༹དིཧེཏུནཱ ཀཱིལཱ༹སམྦཱདྷསམྨནྟནཱདིཀཱརཎེན ཡཾ ཀིཉྩི སཾསཡུཔྤཱདནསམཏྠཾ ཡཾ ཀིཉྩི པདཾ སཾསཡཱཡ ཨེཝ སོཏཱུནཾ ཨུཔྤཛྫམཱནསཾསཡཏྠམེཝ ཡདི པཡུཛྫཏེ ཏསྨིཾ བནྡྷནེ ཝཏྟཱརེཧི པཡུཛྫཏེ ཙེ, སསཾསཡསམཔྤིཏོ སསཾསཡདོསསཧིཏོ བནྡྷོ ན དོསོཝ ཨདུཊྛོཝཱཏི. སསཾསཡེན སམཔྤིཏོཏི ཝིགྒཧོ.

ཡཐཱ –

༡༡༢.

ཡཱཏེ དུཏིཡཾནིལཡཾ, གུརུམྷི སཀགེཧཏོ;

པཱཔུཎེཡྻཱམ ནིཡཏཾ, སུཁ’མཛ྄ཛྷཡནཱདིནཱ.

༡༡༢. ‘‘ཡཱཏེ’’ཙྩཱདི. གུརུམྷི ཨཛ྄ཛྷཱཔཀེ སཀགེཧཏོ ཨཏྟནོ མཱུལནིལཡཏོ དུཏིཡཾ ནིལཡཾ དུཏིཡཾ གྷརཾ ཡཱཏེ སཏི ནིཡཏམེཀནྟམཛ྄ཛྷཡནཱདིནཱ སུཁཾ པཱཔུཎེཡྻཱམཱཏི ཨཡམནིཙྪིཏཏྠོ. གུརུམྷི སུརཱཙརིཡེ [སུརཙྩཱཙརིཡེ (ཀ.)] སཀགེཧཏོ ཨཏྟནོ ཛཱཏརཱསིཏོ དུཏིཡཾ ནིལཡཾ དུཏིཡཾ རཱསིཾ ཡཱཏེ སཏི ནིཡཏམཛ྄ཛྷཡནཱདིནཱ སུཁཾ པཱཔུཎེཡྻཱམཱཏི ཨཡམེཏྠ ཨིཙྪིཏཏྠོ.

༡༡༢. ‘‘ཡཱཏེ’’ཙྩཱདི. གུརུམྷི ཨཱཙརིཡེ སཀགེཧཏོ ཨཏྟནོ ཝཱསཱགཱརཏོ དུཏིཡཾ ནིལཡཾ དུཏིཡཾ གྷརཾཡཱཏེ སཏི, ཨཡམནིཙྪིཏཏྠོ. གུརུམྷི སུརཱཙརིཡེ སཀགེཧཏོ ཨཏྟནོ ཛཱཏརཱསིཏོ དུཏིཡཾ ནིལཡཾ དུཏིཡཾ ¶ རཱསིཾ ཡཱཏེ གཏེ སཏི ཨནུཀཱུལཏྟཱ ནིཡཏམེཀནྟེན ཨཛ྄ཛྷཡནཱདིནཱ ཨུགྒཧཎཱདིནཱ སུཁཾ མཱནསིཀསུཁཾ, ནོ ཙེ སུཁཀཱརཎཾ གནྠཔརིསམཏྟིཾ པཱཔུཎེཡྻཱམཱཏི. ཨུབྷཡཔཀྑསྶཱཔི ཨཔརཏྠེ ཨཏྠོ སཱདྷཱརཎོ ཧོཏི. ཨེཏྠ ཨཛ྄ཛྷཡནསདྡསནྣིདྷཱནེན པཡུཏྟགུརུསདྡསྶ ཨཱཙརིཡཏྠཝཱཙཀཏྟེཔི ཨིཙྪིཏཏྠགོཔནཏྠཾ པཡུཏྟཏྟཱ ཨདུཊྛོཏི.

༡༡༣.

སུབྷགཱ བྷགིནཱི སཱ’ཡཾ, ཨེཏསྶི’ཙྩེཝམཱདིཀཾ;

ན ‘‘གཱམྨ’’མིཏི ནིདྡིཊྛཾ, ཀཝཱིཧི སཀལེཧིཔི.

༡༡༣. ‘‘སུབྷགཱ’’ཨིཙྩཱདི. ཨིཙྩེཝམཱདིཀཾ བྷགིནཱིཨིཙྩེཝམཱདིཀཾ.

༡༡༣. ‘‘སུབྷགེ’’ཙྩཱདི. ཨེཏསྶ པུརིསསྶ སཱ ཨཡཾ བྷགིནཱི སུབྷགཱ སུནྡརཱཏི ཨིཙྩེཝམཱདིཀཾ སཀལེཧི ཀཝཱིཧི ཨཔི ན གཱམྨམིཏི གཱམྨདོསེན ན དུཊྛམིཏི ནིདྡིཊྛནྟི. སུབྷཾ སུནྡརབྷཱཝཾ གཏཱཏི ‘‘སུབྷགཱ’’ཏི ཨགྒཧེཏྭཱ བཧུབྦཱིཧིསམཱསེ ཀཏེ ལབྦྷམཱནཏྠསྶ ཨསབྦྷབྷཱཝེཔི ཀཝཱིནཾ ཙིཏྟཁེདཾ ན ཛནེཏཱིཏི ཨདྷིཔྤཱཡོ. ཨིཏི ཨེཝཾ ཨཡཾ པཀཱརོ ཨཱདི ཨསྶ ཨཱིདིསསྶ ཝཱཀྱསྶཱཏི ཝཱཀྱཾ.

༡༡༤.

དུཊྛཱལངྐཱརཝིགམེ, སོབྷནཱལངྐཏིཀྐམོ;

ཨལངྐཱརཔརིཙྪེདེ, ཨཱཝིབྷཱཝཾ གམིསྶཏི.

༡༡༤. ‘‘དུཊྛ’’ཨིཙྩཱདི. དུཊྛཱལངྐཱརསྶ དོསདཱུསིཏསྶ ཨལངྐཱརསྶ ཝིགམེ ཨཔགམེ སཏི.

༡༡༤. ‘‘དུཊྛི’’ཙྩཱདི. དུཊྛཱལངྐཱརཝིགམེ དོསདུཊྛསྶ ཨལངྐཱརསྶ ཨཔགམེ སཏི སོབྷནཱལངྐཏིཀྐམོ པསཏྠཱནམལངྐཱརཱནཾ པཝཏྟིཨཱཀཱརོ ཨལངྐཱརཔརིཙྪེདེ ཨལངྐཱརཔཀཱསཀཏྟཱ ཏནྣཱམཀེ པརིཙྪེདེ ཨཱཝིབྷཱཝཾ པཀཱསཏྟཾ གམིསྶཏི པཱཔུཎིསྶཏཱིཏི. པརིཙྪིཛྫཏཱིཏི པརིཙྪེདོ. ཨལངྐཱརཔཀཱསཀཏྟཱ ཏདཏྠེན ཨལངྐཱརོ ཙ སོ པརིཙྪེདོ ཙེཏི ཝིགྒཧོ.

༡༡༥.

དོསེ ¶ པརཱིཧརིཏུམེས ཝརོ’པདེསོ,

སཏྠནྟརཱནུསརཎེན ཀཏོ མཡེཝཾ;

ཝིཉྙཱཡི’མཾ གུརུཝརཱན’དྷིཀཔྤསཱདཱ,

དོསེ པརཾ པརིཧརེཡྻ ཡསོབྷིལཱསཱི.

ཨིཏི སངྒྷརཀྑིཏམཧཱསཱམིཔཱདཝིརཙིཏེ

སུབོདྷཱལངྐཱརེ

དོསཔརིཧཱརཱཝབོདྷོ ནཱམ

དུཏིཡོ པརིཙྪེདོ.

༡༡༥. ‘‘དོསེ’’ཨིཙྩཱདི. དོསེ ཡཐཱཝུཏྟེ པདདོསཱདིཀེ པརིཧརིཏུཾ པརིཙྩཛིཏུཾ ཨེསོ ཝརོ ཨུཏྟམོ ཨུཔདེསོ སཏྠནྟརཱནཾ བཧཱུནཾ ཨནུསརཎེན ཨནུགམེན [ཨནུཔགམེན (ཀ.)] མཡཱ ཨེཝཾ ཀཏོ ནིཔྥཱདིཏོ, ཨིམཾ ཨུཔདེསཾ གུརུཝརཱནཾ ཨདྷིཀཔྤསཱདཱ མཧཏཱ པསཱདེན ན ཨཔྤཀེན, ཏཐཱཝིདྷེན ཏཱདིསསྶ མཧཏོ ཨཏྠསྶ ཨཔསིཛ྄ཛྷནཏོ, ཝིཉྙཱཡ ཛཱནིཏྭཱ ཨཱདརཏོ ཀརེཡྻ དོསེ ཡཐཱཝུཏྟེ དོསེ ཡསོ པརིསུདྡྷབནྡྷནཾ ཀྲིཡཱལཀྑཎཏོ ཨེཀནྟེན ཀིཏྟིཧེཏུཏྟཱ, ཏཾསབྦྷཱཝཱ ཀིཏྟི ཝཱ, ཏཾ ཨབྷིལསཏི སཱིལེནེཏི ཡསོབྷིལཱསཱི པརཾ ཨཙྩནྟམེཝ པརིཧརེཡྻ དཱུརཏོ ཀརེཡྻ.

ཨིཏི སུབོདྷཱལངྐཱརེ མཧཱསཱམིནཱམིཀཱཡཾ ཊཱིཀཱཡཾ

དོསཔརིཧཱརཱཝབོདྷཔརིཙྪེདོ དུཏིཡོ.

༡༡༥. ‘‘དོསེ’’ཙྩཱདི. དོསེ ཡཐཱཝུཏྟཔདདོསཱདིཀེ པརིཧརིཏུམཔནེཏུཾ ཝརོ ཨུཏྟམོ ཨེསོ ཨུཔདེསོ སཏྠནྟརཱནུསརཎེན བཧཱུནཾ བཱཧིརསཏྠཱནཾ ཨནུསྶཏིཡཱ མཡཱ ཨེཝཾ ཨནནྟརུདྡིཊྛཀྐམེན ཀཏོ ཝིརཙིཏོ, ཨིམཾ ཨུཔདེསཾ གུརུཝརཱནཾ ཨདྷིཀཔྤསཱདཱ ཨདྷིཀཔྤསཱདེན ཝིཉྙཱཡ སབྷཱཝཏོ ཉཏྭཱ ཡསོབྷིལཱསཱི ཡསཔཊིལཱབྷཀཱརཎཏྟཱ ¶ ཀཱརཎེ ཀཱརིཡོཔཙཱརེན དོསཱཔགམེན པརིསུདྡྷབནྡྷནཾ ཝཱ ཏཱདིསབནྡྷནཧེཏུ ཨུཔྤཛྫམཱནཀིཏྟིཾ ཝཱ ཨིཙྪནྟོ པཉྙཝཱ དོསེ ཡཐཱཝུཏྟདོསེ པརཾ ཨཏིསཡེན པརིཧརེཡྻ དཱུརཏོ ཀརེཡྻཱཏི. ཨེཏྠ པུབྦདྡྷེན དོསཔརིཧཱརཔརིཙྪེདསྶ པསཏྠབྷཱཝོ དསྶིཏོ, ཨཔརདྡྷེན སིསྶཛནཱནུསཱསནཾ དསྶིཏཾ ཧོཏི. ཏཐཱ པུབྦདྡྷེན ཀརུཎཱཔུབྦངྒམཔཉྙཱཀིཙྩཾ དསྶིཏཾ, ཨཔརདྡྷེན པཉྙཱཔུབྦངྒམཀརུཎཱཀིཙྩཾ དསྶིཏཾ. ཏཐཱ པུབྦདྡྷེན ཨཏྟཧིཏསམྤཏྟི, ཨཔརདྡྷེན པརཧིཏསམྤཏྟི དསྶིཏཱཏི. ཨེཝམནེཀཱཀཱརདཱིཔིཀཱཡ ཨིམཱཡ གཱཐཱཡ པརིཙྪེདཾ ནིགམེཏི. ཨཉྙེ སཏྠཱ སཏྠནྟརཱ, ཨནྟརསདྡོ ཧི ཨཉྙསདྡཔརིཡཱཡོ. ཡཐཱ ‘‘གཱམནྟརཾ ན གཙྪེཡྻཱ’’ཏི. ཡསཾ ཨབྷིལསཏི སཱིལེནཱཏི ཝཱཀྱཾ.

ཨིཏི སུབོདྷཱལངྐཱརནིསྶཡེ

དུཏིཡོ པརིཙྪེདོ.

༣. གུཎཱཝབོདྷཔརིཙྪེད

ཨནུསནྡྷིཝཎྞནཱ

༡༡༦.

སམྦྷཝནྟི གུཎཱ ཡསྨཱ,

དོསཱནེ’ཝ’མཏིཀྐམེ;

དསྶེསྶཾ ཏེ ཏཏོ དཱནི,

སདྡེ སམྦྷཱུསཡནྟི ཡེ.

༡༡༦. ཨེཝཾ དོསཔརིཧཱརོཔདེསཾ དསྶེཏྭཱ ཨིདཱནི དོསཔརིཧཱརཱ སམུཔགཏགུཎཾ ཨུཔདསྶིཏུམདྷིཀཱརཾ ཝིརཙཡནྟོ ཨཱཧ ‘‘སམྦྷཝནྟི’’ཨིཙྩཱདི. དོསཱནཾ ཡཐཱཝུཏྟཱནཾ པདདོསཱདཱིནཾ ཨེཝཾ ཡཐཱཝུཏྟནཡེན ཨཏིཀྐམེ སཏི གུཎཱ དྷམྨཱ ¶ སདྡཱལངྐཱརསབྷཱཝཱ པསཱདཱདཡོ ཡསྨཱ ཀཱརཎཱ སམྦྷཝནྟི སིཛ྄ཛྷནྟི, ཏཉྩ ‘‘པསཱདོ ཀིལིཊྛཱདཱིནཾ ཝཛྫནཱ སམྦྷཝཏཱི’’ཏྱཱདིནཱ ཡཐཱཡོགཾ ཝིཉྙེཡྻཾ, ཏཏོ ཏསྨཱ ཀཱརཎཱ ཡེ གུཎཱ སདྡེ སམྦྷཱུསཡནྟི ཨལངྐརོནྟི, ཏེ སདྡཱལངྐཱརསངྑཱཏེ གུཎེ ཨིདཱནི དསྶེསྶཾ ཨུཔདིསིསྶཱམི.

༡༡༦. ཨེཝཾ དོསཔརིཧཱརཔཝེསོཔཱཡཾ དསྶེཏྭཱ ཨིདཱནི ཡཐཱཝུཏྟདོསཱནཾ པརིཧཱརེན ‘‘བནྡྷནིསྶིཏགུཎཱ ཨེཏེ’’ཏི དསྶེཏུཾ པུབྦཱཔརཔརིཙྪེདཱནཾ སམྦནྡྷཾ གྷཊེནྟོ ‘‘སམྦྷཝནྟི’’ཙྩཱདིགཱཐམཱཧ. དོསཱནཾ ནིདྡིཊྛཔདདོསཱདཱིནཾ ཨེཝཾ ཨནནྟརཔརིཙྪེདེ ནིདྡིཊྛཀྐམེན ཨཏིཀྐམེ སཏི གུཎཱ པསཱདཱདིསདྡཱལངྐཱརསངྑཱཏཱ པསཱདཱདཡོ སདྡདྷམྨཱ ཡསྨཱ སམྦྷཝནྟི, ཏཏོ ཡེ སདྡདྷམྨཱ སདྡེ སམྦྷཱུསཡནྟི སཛྫནྟི, ཏེ སདྡདྷམྨེ དསྶེསྶཾ པཀཱསིསྶཱམཱིཏི. ཨེཏྠ ཀིལིཊྛདོསབྱཱཀིཎྞདོསཔརིཧཱརེཧི པསཱདཱལངྐཱརོ སིཛ྄ཛྷཏི, སེསཱཔི ཡཐཱལཱབྷཏོ ཉཱཏབྦཱ.

སདྡཱལངྐཱརཨུདྡེསཝཎྞནཱ

༡༡༧.

པསཱདོ’ཛོ མདྷུརཏཱ,

སམཏཱ སུཁུམཱལཏཱ;

སིལེསོ’དཱརཏཱ ཀནྟི,

ཨཏྠབྱཏྟིསམཱདྷཡོ.

༡༡༧. ཨིདཱནི ཏེ ཝིབྷཛཏི ‘‘པསཱདོ’’ཨིཙྩཱདིནཱ པསཏྠི པསཱདོ པཀཱསཏྠཏཱ, ཨོཛོ སམཱསཝུཏྟིབཱཧུལླཾ ཨཏྠཔཱརིཎཏྱཉྩ, མདྷུརཏཱ སདྡཱནཾ རསཝནྟཏཱ, སམཏཱ པཛྫཱཔེཀྑཱཡ ཙཏུནྣཾ པཱདཱནམེཀཛཱཏིཡསམྦནྡྷཏཱ, གཛྫཱཔེཀྑཱཡ ཏུ པདཱནཾ, སུཁུམཱལཏཱ ཨཕརུསཀྑརབཱཧུལླཾ, སིལེསནཾ སིལེསོ བནྡྷགཱརཝཾ, ཨུདཱརཏཱ ཨུཀྐཾསཏཱ ཀེནཙི ཨཏྠེན སནཱཐཏཱ ཝིསིཊྛཝིསེསནཡུཏྟཏཱ ཙ, ཀནྟི སབྦལོཀམནོཧརཏཱ, ཨཏྠབྱཏྟི སིདྡྷེན ¶ ཉཱཡེན ཝཱ ཨབྷིདྷེཡྻསྶ གཧཎཾ, སམཱདྷི ལོཀཔྤཏཱིཏྱནུསཱརིཨམུཁྱཏྠཏཱ, ཏེསུ ཨོཛཨུདཱརཏཱ སདྡཏྠགུཎཱ, སམཱདྷི ཨཏྠགུཎོ, ཨཏྠཱནུགཱམིཏྟཱ ཨེཏྠ སདྡཱནཾ, ཨཉྙེ ཏུ སདྡགུཎཱཝ.

༡༡༧. ཨིདཱནི ‘‘པསཱདོཛོ’’ཨིཙྩཱདིནཱ ཏེ སདྡཱལངྐཱརེ ཀམེན ཝིབྷཛིཏུཾ ཨུདྡིསཏི. པསཱདོ པསནྣཕལི༹ཀཱཝལི ཨཏྟནི ཨཱཝུནིཏརཏྟཀམྦལསུཏྟམིཝ སདྡཱནཾ ཨཏྠསྶ པསཱདནསངྑཱཏོ པསཱདཱལངྐཱརོ ཙ, ཨོཛོ སམཱསཝུཏྟིབཱཧུལྱཨཏྠཔཱརིཎཏྱསངྑཏོ སདྡཏྠཱནཾ གུཎོ ཙ, མདྷུརཏཱ སདྡཱནཾ རསཝནྟབྷཱཝསངྑཱཏཀཎྞམདྷུརཏཱ ཙ, སམཏཱ པཛྫེ པཱདསྶ སུཏིཏོ སདིསཏཱ ཙ, གཛྫེ པདཱནཾ ཏཐེཝ སདིསཏཱཏི ཨེཝཾ པཱདཱནཾ པདཱནཉྩ ཏུལྱགུཎཏཱ ཙ, སུཁུམཱལཏཱ ཝཎྞཱནཾ ཨཏིཕརུསཨཏིསིཐིལབྷཱཝཾ ཝིནཱ སམཔྤམཱཎམུདུགུཎོ ཙ, སིལེསོ ཋཱནཀརཎཱདིསམྦྷཱུཏསབྷཱགཝཎྞསུཏཱིཧི ཨཙྪིདྡགུརུགུཎོ ཙ, ཨུདཱརཏཱ ཨུཀྐཊྛེན ཀེནཙི ཨཏྠེན བནྡྷསྶ སཛྫིཏབྷཱཝོ ཙ, ཝིསིཊྛཝིསེསནཔདེན ཡུཏྟཏཱ ཙ, ཀནྟི སབྦེསཾ པིཡགུཎཏཱ ཙ, ཨཏྠབྱཏྟི ཨིཙྪིཏཏྠསྶ སིདྡྷེན ཝཱ ནྱཱཡེན ཝཱ སུཔཱཀཊབྷཱཝོ ཙ, སམཱདྷཡོ ལོཀཔྤཏཱིཏིཨནཏིཀྐནྟཨཉྙདྷམྨཱརོཔནེན ཨམུཁྱཏྠཏཱ ཙཱཏི ཨིམེ སདྡཏྠགུཎཱ དས ཧོནྟི. ‘‘སམཱདྷཡོ’’ཏི ཏསྶེཝ བཧུཏྟཾ དཱིཔེཏི, ཨིམེསུ དསསུ ཨོཛོདཱརཏཱཏི དྭེ སདྡཏྠགུཎཱ, སམཱདྷི ཨཏྠགུཎོ པརིཡཱཡེན ཏདཏྠཛོཏཀསདྡགུཎོཔི, སེསཱ སཏྟ སདྡགུཎཱ ཨེཝ, ཨེཏེ སབྦེཔི ཨལངྐརོནྟི བནྡྷམནེནཱཏི ཝཱཀྱེན ཨལངྐཱརཱ ནཱམ.

སདྡཱལངྐཱརཔཡོཛནཝཎྞནཱ

༡༡༨.

གུཎེཧེ’ཏེཧི སམྤནྣོ, བནྡྷོ ཀཝིམནོཧརོ;

སམྤཱདཡཏི ཀཏྟཱུནཾ, ཀིཏྟིམཙྩནྟནིམྨལཾ.

༡༡༨. ‘‘གུཎེཧི’’ཙྩཱདི. ¶ ཨེཏེཧིཡེཝ ཝུཏྟེཧི དསཧི གུཎེཧི དྷམྨེཧི སདྡཱལངྐཱརསབྦྷཱཝེཧི སམྤནྣོ ཡུཏྟོ སམིདྡྷོ ཝཱ ཀཝཱིནཾ མནོ ཧརཏི སཝསེ ཝཏྟེཏཱིཏི ཀཝིམནོཧརོ ཀཝིཧདཡཧིལཱདཀཱརཱི བནྡྷོ ཀཏྟཱུནཾ བནྡྷནྟཱནཾ ཀཝཱིནཾ ཨཙྩནྟནིམྨལཾ ཨཏིསཡཔརིསུདྡྷཾ ཨགུཎལེསེནཱཔ’ནཱལིམྤཏྟཱ ཀིཏྟིཾ གུཎགྷོསཾ སམྤཱདཡཏི ནིཔྥཱདེཏི.

༡༡༨. ‘‘གུཎེ’’ཙྩཱདི. ཨེཏེཧི གུཎེཧི ཨིམེཧི སདྡཱལངྐཱརསངྑཱཏདསཝིདྷསདྡདྷམྨེཧི སམྤནྣོ སམནྣཱགཏོ སམིདྡྷོ ཝཱ བནྡྷོ པཛྫཱདིབནྡྷོ ཀཝིམནོཧརོ ཨཏྟནོ ནིརཝཛྫཏྟཱ ཀཝཱིནཾ ཙིཏྟཾ པཱིཎེནྟོ ཀཏྟཱུནཾ རཙཡནྟཱནཾ ཨཙྩནྟནིམྨལཾ ཨཔྤཀདོསེནཱཔི ཨསམྨིསྶཏྟཱ ཨཏིཔརིསུདྡྷཾ ཀིཏྟིཾ བནྡྷནཝིསཡབྷཱུཏཡསོརཱསིཾ སམྤཱདཡཏི ནིཔྥཱདེཏཱིཏི. ཨིམིནཱ ཀཱརཎེན བནྡྷསྶ ཡཐཱཝུཏྟདསཝིདྷགུཎཔརིགྒཧོ སཨུསྶཱཧཾ ཀཱཏབྦོཏི ཨདྷིཔྤཱཡོ. མནོ ཧརཏཱིཏི མནོཧརོ, ཀཝཱིནཾ མནོཧརོ ཀཝིམནོཧརོཏི ཝིགྒཧོ.

སདྡཱལངྐཱརནིདྡེསཝཎྞནཱ

༡༡༩.

ཨདཱུརཱཧིཏསམྦནྡྷ-སུབྷགཱ ཡཱ པདཱཝལི;

སུཔསིདྡྷཱབྷིདྷེཡྻཱ’ཡཾ, པསཱདཾ ཛནཡེ ཡཐཱ.

༡༡༩. ཨིདཱནི ཡཐོདྡེསཱནམེསཾ ནིདྡེསཾ སོདཱཧརཎཾ ཀརོནྟོ ཨཱཧ ‘‘ཨདཱུར’’ཨིཙྩཱདི. ཨདཱུརེ ཨཱསནྣེ ཨདཱུརེན ཝཱ ཨདཱུརཱཧིཏཀྲིཡཱཀཏྟུཀམྨཱདིཔདཝསེན ཨཱཧིཏོ ཋཔིཏོ ཀཏོ སམྦནྡྷོ ཨནྭཡོ, ཏེན སུབྷགཱ མནོཧརཱ སུཔསིདྡྷོ སུཔྤཀཱསོ སུགམྨོ ཨབྷིདྷེཡྻོ ཨཏྠོ ཡསྶཱ སཱཏི ཏཐཱ, ན ཏུ བྷཱཝཏྠོ ཏསྶ སབྷཱཝགམྦྷཱིརཏྟཱ. ཝུཏྟཉྷི –

‘‘ཀཝཱིན’དྷིཔྤཱཡ’མསདྡགོཙརཾ,

¶ པདེ ཕུརནྟཾ མུདུཀམྷི ཀེཝལཾ;

ཝིསནྟི བྷཱཝཱཝགམཱ ཀཏསྶམཱ,

པཀཱསཡནྟྱཱ’ཀཏིཡོ ཏུ ཏཱདིསཱ’’ཏི.

ཏཱདིསཱ ཡཱ པདཱཝལི པདཔནྟི ཨཡཾ པསཱདཾ ཏནྣཱམཀཾ གུཎཾ ཛནཡེ ཨུཔྤཱདཡཏི. ཡཐཱཏི ཏམུདཱཧརཏི.

༡༡༩. ཨིདཱནི ཨུདྡེསཀྐམེན ཨེཏེསཾ སདྡཱལངྐཱརཱདཱིནཾ ནིདྡེསཾ སོདཱཧརཎཾ དསྶེནྟོ ཨཱཧ ‘‘ཨདཱུརཱཧིཏེ’’ཙྩཱདི. ཨདཱུརེ ཨཱསནྣཔདེསེ ཏདུཔཙཱརེན ཨཱསནྣེ ཝཱ ཨཱཧིཏོ ཀྲིཡཱཡ, ལདྡྷཀྲིཡཱཡོགཀཏྟུཀམྨཱདིཔདཱནཾ ཝསེན ཙ ཀཏོ, ནོ ཙེ ཝིནྱཱསཝསེན ཋཔིཏོ ཝཱ སམྦནྡྷོ ཨིཙྪིཏཏྠཔཏཱིཏིཀྐམེན ཨཉྙམཉྙཱཔེཀྑལཀྑཎཀྲིཡཱཀཱརཀཡོགོ ཏེན སུབྷགཱ མནོཧརཱ, སུཔསིདྡྷོ པསིདྡྷཏྠཝིསཡེ སདྡཔཡོགཏོ ཨཏིཔཱཀཊོ ཨབྷིདྷེཡྻོ སདྡཏྠོ ཡསྶཱ སཱ ཨཡཾ པདཱཝལི པདཔནྟི པསཱདཾ པསཱདནཱམཀཾ གུཎཾ ཛནཡེ ཨུཔྤཱདཡཏི. ཡཐཱཏི ལཀྑིཡཾ དསྶེཏི. ཨདཱུརེ ཨཱཧིཏོཏི ཝཱ, ཨུཔཙརིཏཏྟཱ ཨདཱུརོ ཙ སོ ཨཱཧིཏོ ཙཱཏི ཝཱ, སོ ཙ སོ སམྦནྡྷོ ཙེཏི ཙ, ཏེན སུབྷགཱཏི ཙ, སུ ཨཏིསཡེན པསིདྡྷོཏི ཙ, སོ ཨབྷིདྷེཡྻོ ཨསྶེཏི ཙ ཝཱཀྱཾ. ཨེཏྠ སུཔསིདྡྷོ ནཱམ སདྡཏྠོ, ཨདྷིཔྤཱཡཏྠོ པན པཀཏིགམྦྷཱིརོ. ཝུཏྟཉྷི –

‘‘ཀཝཱིན’དྷིཔྤཱཡ’མསདྡགོཙརཾ,

པདེ ཕུརནྟཾ མུདུཀམྷི ཀེཝལཾ;

ཝིསནྟི བྷཱཝཱཝགམཱ ཀཏསྶམཱ,

པཀཱསཡནྟྱཱ’ཀཏིཡོ ཏུ ཏཱདིསཱ’’ཏི.

ཏསྶཏྠོ – ཨསདྡགོཙརཾ སདྡསྶ ཨཝིསཡཾ ཧུཏྭཱ མུདུཀམྷི པདེ ཀེཝལཾ ཝིསུཾ ཕུརནྟཾ ཙཱཔེནྟཾ ཀཝཱིནདྷིཔྤཱཡཾ ཀཝཱིནམཛ྄ཛྷཱསཡཾ ¶ ཀཏསྶམཱ སདྡཏྠཝིསཡེ ཀཏཔརིཙཡཱ པཎྜིཏཱ བྷཱཝཱཝགམཱ པདཏྠཱཝབོདྷེན ཝིསནྟི པཝིསནྟི, ཏཱདིསཱ ཨཱཀཏིཡོ ཏུ སདྡསདྡཏྠཱནཾ ཨཱཀཱརཱ པཀཱསཡནྟི ཨདྷིཔྤཱཡཏྠཾ ཛོཏེནྟཱིཏི.

༡༢༠.

ཨལངྐརོནྟཱ ཝདནཾ, མུནིནོ’དྷརརཾསིཡོ;

སོབྷནྟེ’རུཎརཾསཱི’ཝ, སམྤཏནྟཱ’མྦུཛོདརེ.

༡༢༠. ‘‘ཨལངྐརོནྟཱ’’ཨིཙྩཱདི. མུནིནོ སམྨཱསམྦུདྡྷསྶ ཝདནཾ སབྷཱཝམདྷུརཔཀཏིམུཁཾ ཨལངྐརོནྟཱ སཛྫནྟཱ སོབྷཡམཱནཱ ཨདྷརཱནཾ རཾསིཡོ སུཔཀྐབིམྦཕལོཔམཨོཊྛཡུགལ༹ཝིནིསྶཊབཧུཏརཀནྟིཙྪིཏཱབྷཱ མུནིནོཏི ཝིཉྙཱཡཏི སུཏཏྟཱ. ཨམྦུཛོདརེ ཏཱ ཀཱལོཔནཏཔུཔྥཀཱསརམཎཱིཡེ པདུམབྦྷནྟརེ སམྤཏནྟཱ པཝཏྟམཱནཱ ཨརུཎརཾསཱིཝ བཱལསཱུརིཡརཾསིཡོ ཝིཡ སོབྷནྟེ ཝིརཱཛནྟི.

༡༢༠. ‘‘ཨལངྐརོནྟེ’’ཙྩཱདི. མུནིནོ ཝདནཾ པཀཏིསུནྡརམུཁཾ ཨལངྐརོནྟཱ སཛྫནྟཱ ཨདྷརརཾསིཡོ ཏསྶེཝ མུནིནོ ཨོཊྛདྭཡཏོ ནིཀྑནྟཀནྟིསམཱུཧཱ ཨམྦུཛོདརེ ཝིཀསནཱནུརཱུཔཀཱལཱབྷིམུཁེ པདུམགབྦྷེ ཨུཔཌྜྷཝིཀསིཏེཏི ཝུཏྟཾ ཧོཏི. སམྤཏནྟཱ པཝཏྟམཱནཱ ཨརུཎརཾསཱི ཨིཝ བཱལསཱུརིཡརཾསཱིཝ སོབྷནྟེ དིབྦནྟཱིཏི. ཨེཏྠ ཨདཱུརསམྦནྡྷཾ པསིདྡྷཏྠཉྩ ནིསྶཱཡ པསཱདགུཎོ པཱཀཊོ. ཨདྷརརཾསཱིནཾ མུནིསམྦནྡྷོ སུཏཱནུམིཏསམྦནྡྷེསུ སུཏསམྦནྡྷསྶ བལཝཏྟཱ [སུཏཱནུམིཏེསུ སུཏསམྦནྡྷོ བལཝཱ (པརིབྷཱསེནྡུསེརེ ༡༡༢)], ཀཱཀཀྑིགོལ༹ཀནཡེན ཝཱ ལབྦྷཏཱིཏི. ཨདྷརེ རཾསཱིཏི ཙ, ཨམྦུཛསྶ ཨུདརནྟི ཙ ཝཱཀྱཾ.

༡༢༡.

ཨོཛོ སམཱསབཱཧུལྱ-

མེསོ གཛྫསྶ ཛཱིཝིཏཾ;

པཛྫེཔྱ’ནཱཀུལོ སོ’ཡཾ,

ཀནྟོ ཀཱམཱིཡཏེ ཡཐཱ.

༡༢༡. ‘‘ཨོཛོ’’ཨིཙྩཱདི. ¶ སམཱསསྶ ཨེཀཏྠཝུཏྟིཡཱ བཱཧུལྱཾ བྷིཡྻོབྷཱཝོ ཨིཏྱནུཝདིཏྭཱ པུན ཨོཛོ ཝིདྷཱིཡཏེ, ཨེསོ ཨོཛོ སམཱསབཱཧུལླལཀྑཎོ གཛྫསྶ ཝུཏྟིརཱུཔསྶ ཛཱིཝིཏཾ ཧདཡཾ སཱརཾ ཏཔྤདྷཱནཏྟཱ གཛྫསྶ, ན པཛྫསྶ, སོཡཾ ཨོཛོ ཨནཱཀུལོ ཨགཧནོ ཨཏོཡེཝ ཀནྟོ ཧདཡངྒམོ, པཛྫེཔི ན ཀེཝལཾ གཛྫེ ཀཱམཱིཡཏེ པཡུཛྫཏེ. ཡཐེཏྱུདཱཧརཏི.

༡༢༡. ཨིདཱནི ཨོཛགུཎཾ དསྶེཏི ‘‘ཨོཛོ’’ཙྩཱདིནཱ. ཨོཛོ ནཱམ སམཱསབཱཧུལྱཾ བྷིནྣཏྠེསུ པཝཏྟསདྡཱནཾ ཨེཀཏྠཔཝཏྟིལཀྑཎསྶ སམཱསསྶ བཧུལཏཱ, ཨེསོ ཨོཛོ གཛྫསྶ གཛྫབནྡྷསྶ ཛཱིཝིཏཾ ཧདཡཾ, ཛཱིཝིཏསཱིསེན ཧདཡསངྑཏཾ ཙིཏྟཾ ཝུཏྟནྟི ཝེདིཏབྦཾ. སོ ཨཡཾ ཨོཛོ ཨནཱཀུལོ ནིབྱཱཀུལོ ཀནྟོ ཏཏོཡེཝ ཝིཉྙཱུནཾ པིཡབྷཱུཏོ པཛྫེཔི པཛྫབནྡྷེཔི ཀཱམཱིཡཏེ ཀཝཱིཧི པཡུཛྫཏེཏི. བཧུལསྶ བྷཱཝོ བཱཧུལྱཾ, སམཱསསྶ བཱཧུལྱནྟི ཝིགྒཧོ. གཛྫབནྡྷཱདྷིཀཱརསྶཱབྷཱཝཱ པཛྫཝིསཡསྶ ཨོཛགུཎསྶ ལཀྑིཡཾ དསྶེཏི ‘‘ཡཐེ’’ཙྩཱདིནཱ.

༡༢༢.

མུནིནྡམནྡསཉྫཱཏ-ཧཱསཙནྡནལིམྤིཏཱ;

པལླཝཱ དྷཝལཱ ཏསྶེ-ཝེཀོནཱ’དྷརཔལླཝོ.

༡༢༢. ‘‘མུནིནྡ’’ཨིཙྩཱདི. མུནིནྡསྶ མནྡཾ ཨཱིསཀཾ སཉྫཱཏོ པཝཏྟོ ཏཾསབྷཱཝཏྟཱ བྷགཝཏོ ཧཱསསྶ [ཡསསྶ (ཀ.)] ཧཱསོ ཧསིཏཾ སོཝ ཙནྡནམིཝ ཙནྡནཾ དྷཝལཏྟརཱུཔཏྟཱ, ཏེན ལིམྤིཏཱ ཨུཔདེཧིཏཱ པལླཝཱ སབྦཱནི ཀིལསཡཱནི ‘‘ཨིདམེཝེ’’ཏི ནིཡམཱབྷཱཝཏོ, དྷཝལཱ པཀཏིཝཎྞཔརིཙྩཱགེན སུཀྐཱ ཨཧེསུཾ གཱཧཱཔིཏཏྟཱ སགུཎསྶ ཏཱདིསཝིསིཊྛསྶ པཊིལཱབྷཏོ, ཨེཝཾ སནྟེཔི ཏསྶ མུནིནྡསྶེཝ ཨེཀོ ཨཉྙསྶ ཏཱདིསསྶཱབྷཱཝཱ ཨདྷརཔལླཝོ ན དྷཝལོ ¶ དྷཝལོ ནཱཧོསི. ཨཙྩཱསནྣདེསིཡོཔི བཧུམནྟབྦོ’ཡ’མསྶཱནུབྷཱཝོཏི.

‘‘པེམཱཝབནྡྷཧདཡེ སདཡེ ཛིནསྨིཾ,

ཏསྨིཾ ནུ ཀིཾ ཀུམཏཡོ བྷཝཐ’པྤསནྣཱ;

ཀིཾ ཏེན ཝོ ན ཝིཧིཏཾ ཧིཏ’མུགྒདུགྒ-

སཾསཱརསཱགརསམུཏྟརཎཱཝསཱནཾ’’.

ཨིཙྩཔརམུདཱཧརཎཾ. ཨེཝམེཏཱདིསོ ཨནཱཀུལོ ཀནྟོ ཨོཛོ ཛཱནིཏབྦོཏི. ནནུ ཙ ཡ-ཏསདྡཱནཾ ནིཙྩོ སམྦནྡྷོ, ཏསྨཱ ཀཐཾ ‘‘ཏསྶེཝེཀོ ནཱདྷརཔལླཝོ’’ཏི ཨེཏྠ ཡསདྡཱབྷཱཝོཏི? སཙྩཾ, ཀིནྟུ པཀྐནྟཝིསཡོ, ཏཐཱ པསིདྡྷཝིསཡོ, ཨནུབྷཱུཏཝིསཡོ ཙ ཏསདྡོ ཡསདྡཾ ནཱཔེཀྑཏེ. ཡཐཱ –

‘‘སཝཱསནེ ཀིལེསེ སོ, ཨེཀོ སབྦེ ནིགྷཱཏིཡ;

ཨཧུ སུསུདྡྷསནྟཱནོ, པཱུཛཱནཉྩ སདཱརཧོ’’.

ཨིཙྩཱདི. ཨེཏྠ བུདྡྷོ ‘‘བུདྡྷཱནུསྶཏིམཱདིཏོ’’ཏི པཀྐནྟོ.

པསིདྡྷཝིསཡོ ཡཐཱ –

‘‘ཨགྒིཾ པཀྑནྡ’ ཨཐ ཝཱ, ‘པབྦཏགྒཱ པཏེ’ཏི ཝཱ;

ཡདི ཝཀྑཏི ཀཏྟབྦཾ, ཉཱཏཀཱརཱིཧི སོ ཛིནོ’’.

ཨིཙྩཱདི.

ཨནུབྷཱུཏཝིསཡོ ཡཐཱ –

‘‘ཨཏཱིཏཾ ནཱནུསོཙཱམི, ནཔྤཛཔྤཱམ’ནཱགཏཾ;

པཙྩུཔྤནྣེན ཡཱཔེམི, ཏེན ཝཎྞོ པསཱིདཏི’’.

ཨིཙྩཱདི.

ཡསདྡོ ཏུཏྟརཝཱཀྱཊྛོ པུབྦཝཱཀྱེ ཏསདྡམེཝ གམཡཏི. ཡཐཱ –

‘‘བོདྷིཾ ¶ ནམཱམི ནཏིབྷཱཛནམཙྩུལཱ༹རཾ,

པུཉྙཱཀརཾ བྷུཝནམཎྜལསོཏྠིབྷཱུཏཾ;

ཡོ ཙཀྑུསོཏསཏིགོཙརཏཾ སམེཏོ,

དོསཱརིདཔྤམཐནེ’ཀརསོ བུདྷཱནཾ’’.

ཨིཙྩཱདི.

པུབྦཝཱཀྱོཔཱཏྟོ ཏུ ཡསདྡོ ཨུཏྟརཝཱཀྱེཏསདྡོཔཱདཱནཾ ཝིནཱ སཱཀངྑེ ཝཱཀྱསྶ ཨཱུནཏྟཾ ཛནེཏི. ཨེཏྠ པཀྐནྟཝིསཡོ ཏསདྡོ.

༡༢༢. མུནིནྡསྶ མནྡཾ ཨཱིསཀཾ སཉྫཱཏོ པཝཏྟོ ཧཱསོཡེཝ སིཏཾ ཙནྡནཙུཎྞམིཝ ཏེན ལིམྤིཏཱ ཨཱལེཔིཏཱ པལླཝཱ རུཀྑལཏཱདཱིནཾ པཀཏིརཏྟཱནི ཀིསལཡཱནི དྷཝལཱ སགུཎཔརིཙྩཱགེན སེཏཱ ཨཧེསུཾ, ཏཐཱཔི ཏསྶེཝ ཏཐཱགཏསྶ ཨེཀོ ཨཏུལོ ཨསཧཱཡོ ཝཱ ཨདྷརཔལླཝོ དནྟཱཝརཎསངྑཱཏཔལླཝོ ན རཾསིསཾསཊྛོཔི སམཱིཔཊྛོཔི དྷཝལོ སེཏོ ནཱཧོསི. ཨེཝམེཏྠ ཨགཧནསམཱསབཱཧུལྱཾ དཱིཔིཏཾ ཧོཏི.

‘‘པེམཱཝབནྡྷཧདཡེ སདཡེ ཛིནསྨིཾ,

ཏསྨིཾ ནུ ཀིཾ ཀུམཏཡོ བྷཝཐ’པྤསནྣཱ;

ཀིཾ ཏེན ཝོ ན ཝིཧིཏཾ ཧིཏ’མུགྒདུགྒ-

སཾསཱརསཱགརསམུཏྟརཎཱཝསཱན’’ནྟི.

ཨཔརམུདཱཧརཎཾ. ཏསྶཏྠོ – ཀུམཏཡོ ཧེ ཨཉྙཱཎཱ! པེམཱཝབནྡྷཧདཡེ སབྦེསུ ཏུམྷེསུ ནིཙྩཾ པཝཏྟིཏདལ༹ྷཔེམཱནུབནྡྷཙིཏྟེ སདཡེ ཏཏོཡེཝ དཡཱསཧིཏེ ཏསྨིཾ ཛིནསྨིཾ ཝིསཡབྷཱུཏེ ཀིཾ ནུ ཀསྨཱ ཨཔྤསནྣཱ བྷཝཐ, ཏཐཱ ཧི ཝོ ཏུམྷཱཀཾ ཏེན ཛིནེན ཨུགྒོ དཱརུཎོ ཙ, དུགྒོ གནྟུམསཀྐུཎེཡྻོ ཙ, སོཡེཝ སཾསཱརསཱགརོ ཏསྶ སམུཏྟརཎཾ པརིཡནྟཔྤཏྟིཡེཝ ཨཝསཱནཾ ཡསྶ ཏཾ ན ཝིཧིཏཾ ཨཀཏཾ ཧིཏཾ ཝུདྡྷི ནཱམ ཀིཾ ཧོཏི, ན ¶ ཧོཏེཝ. ཨེཏྠཱཔི སམཱསསྶ པཱཀཊཏྟཱ ཨོཛོ གུཎོ ཀནྟོ ཧོཏཱིཏི.

ནནུ ཡ-ཏསདྡཱནཾ ནིཙྩསམྦནྡྷོཏི ཀཐཾ ‘‘ཏསྶེཝེཀོ’’ཏི ཙ ‘‘ཏསྨིཾ ནུ ཀིཾ ཀུམཏཡོ’’ཏི ཙ ཨིཙྩཱདཱིསུ ཧེཊྛཱ ཝུཏྟཡསདྡོ ནཏྠཱིཏི? སཙྩཾ, ཏཐཱཔི པཀྐནྟཏྠཝིསཡོ, པསིདྡྷཏྠཝིསཡོ, ཨནུབྷཱུཏཏྠཝིསཡོ ཝཱ ཏསདྡོ ཡསདྡཾ ནཱཔེཀྑཏི. ཏཐཱ ཧི –

‘‘སཝཱསནེ ཀིལེསེ སོ, ཨེཀོ སབྦེ ནིགྷཱཏིཡ;

ཨཧུ སུསུདྡྷསནྟཱནོ, པཱུཛཱནཉྩ སདཱརཧོ’’ཏི.

ཨེཝམཱདཱིསུ ‘‘སོ’’ཏི ནིདྡིཊྛཏསདྡོ ‘‘བུདྡྷཱནུསྶཏིམཱདིཏོ’’ཏི ཨེཏྠ ཨཏཱིཏེན བུདྡྷསདྡེན ཝཙནཱིཡཝིསཡོ ཧོཏི.

‘‘ཨགྒིཾ པཀྑནྡ’ ཨཐཝཱ, ‘པབྦཏགྒཱ པཏེ’ཏི ཝཱ;

ཡདི ཝཀྑཏི ཀཏྟབྦཾ, ཉཱཏཀཱརཱིཧི སོ ཛིནོ’’ཏི.

ཨེཝམཱདཱིསུ ཏསདྡོ ཉཱཏཀཱརཱིཧི ཀཏྟབྦཏྟཱ པསིདྡྷབུདྡྷཔདཏྠཝིསཡོ.

‘‘ཨཏཱིཏཾ ནཱནུསོཙཱམི, ནཔྤཛཔྤཱམ’ནཱགཏཾ;

པཙྩུཔྤནྣེན ཡཱཔེམི, ཏེན ཝཎྞོ པསཱིདཏཱི’’ཏི.

ཨེཝམཱདཱིསུ ཏསདྡོ ཨནནུསོཙནནཔྤཛཔྤནཡཱཔནསངྑཱཏཝིཛཱནནཝསེན ཨནུབྷཱུཏཏྠཝིསཡོ, ཏསྨཱ ཏཱིསུཔི ཋཱནེསུ ཏསདྡོ ཡསདྡཾ ནཱཔེཀྑཏེ. ཨེཏྠ པན པཀྐནྟཝིསཡོ ཏསདྡོ ཨདྷིཔྤེཏོ. ཨཔིཙ ཨུཏྟརཝཱཀྱེ ཋིཏོ ཡསདྡོ པུབྦཝཱཀྱེ ཏསདྡེ ཨསཏིཔི ཏམེཝ དཱིཔེཏི. ཏཐཱ ཧི –

བོདྷིཾ ནམཱམི ནཏིབྷཱཛནམཙྩུལཱ༹རཾ,

པུཉྙཱཀརཾ བྷུཝནམཎྜལསོཏྠིབྷཱུཏཾ;

ཡོ ཙཀྑུསོཏསཏིགོཙརཏཾ སམེཏོ,

དོསཱརིདཔྤམཐནེ’ཀརསོ བུདྷཱནནྟི.

ཡོ ¶ བུདྷཱནཾ ཙཀྑུསོཏསཏཱིནཾ གོཙརཏཾ ཝིསཡབྷཱཝཾ སམེཏོ པཏྟོ, ཏེསཾཡེཝ དོསཱརཱིནཾ ཀིལེསཔཙྩཏྠིཀཱནཾ དཔྤམཐནེ དཔྤམདྡནེ ཨེཀརསོ པདྷཱནཀིཙྩོ སམིདྡྷིཝནྟོ ཝཱ ཧོཏི, ཏཾ བོདྷིཾ ནམཱམཱིཏི སམྦནྡྷོ. པུབྦཝཱཀྱེ པཡོཛིཏོ ཡསདྡོ ཨུཏྟརཝཱཀྱེ ཏསདྡོཔཱདཱནེ ཨསཏི སཾསཡམུཔྤཱདཡམཱནོ ཝཱཀྱསྶ ཨཱུནཏྟཾ ཀརོཏི. ཨུདཱཧརཎཾ པན པཱཀཊཾ.

༡༢༣.

པདཱབྷིདྷེཡྻཝིསཡཾ,

སམཱསབྱཱསསམྦྷཝཾ;

ཡཾ པཱརིཎཏྱཾ ཧོཏི’ཧ,

སོཔི ཨོཛོཝ ཏཾ ཡཐཱ.

༡༢༣. ‘‘པདི’’ཙྩཱདི. པདསྶ ཨབྷིདྷེཡྻོ ཨཏྠོ སོ ཝིསཡོ ཡསྶ. ཡཏྠ པཙུརསདྡཱབྷིདྷེཡྻོ ཨཏྠོ སཾཁིཏྟཔདེཧི ཝུཙྩཏེ, སོ སམཱསོ. ཡཏྠཔྤཀེཧི པདེཧི ཨབྷིདྷེཡྻཏྠོ པཙུརཔདེཧི ཝུཙྩཏེ, སོ བྱཱསོ. ཏཏོ སམཱསབྱཱསཏོ སམྦྷཝོ ཡསྶ. ཏཾ ཏཐཱཝིདྷཾ ཡཾ པཱརིཎཏྱཾ པརིཎཏབྷཱཝོ ཧོཏཱིཏི ཨནུཝདིཏྭཱ སོཔི ཨིཧ སསཏྠེ ཨོཛོཝཱཏི ཝིདྷཱིཡཏེ. ཏཾ ཡཐེཏྱུབྷཡམྤི ཨུདཱཧརཏི.

༡༢༣. ‘‘པདེ’’ཙྩཱདི. པདཱནཾ བཧཱུནཾ ཨཔྤཀཱནཾ ཝཱ པདཱནཾ ཨབྷིདྷེཡྻཝིསཡཾ ཝིཏྠཱརསཾཁིཏྟཏྠཝིསཡཝནྟཾ སམཱསབྱཱསསམྦྷཝཾ ཡཐཱཀྐམཾ སངྑེཔཝིཏྠཱརདྭཡེན ནིཔྥནྣཾ ནིཔྥཏྟིཝནྟཾ ཝཱ ཡཾ པཱརིཎཏྱཾ ཀཏྟཱུནཾ གནྠཝིསཡེ པརིཎཏིཔྤཀཱསཀོ ཡོ སདྡདྷམྨོ ཨཏྠདྷམྨོ ཧོཏི, སདྡགུཎོ ཨཏྠགུཎོཏི ཝུཏྟཾ ཧོཏི, སོཔི ཨིཧ སུབོདྷཱལངྐཱརེ ཨོཛོ ནཱམ སདྡགུཎོ ཨཏྠགུཎོ. ཏཾ ཡཐཱཏི དྭཱིསུ ལཀྑིཡཾ དསྶེཏི, པདཱནཾ ཨབྷིདྷེཡྻོ ཝིསཡོ ཡསྶ པཱརིཎཏྱསྶེཏི ཙ, སམཱསོ ཙ བྱཱསོ ཙཱཏི ཙ, ཏཏོ སམྦྷཝནྟི ཙ, ཏཏོ སམྦྷཝོ ཨསྶཱཏི ཙ, པརིཎཏསྶ ¶ ཀཏྟུནོ གནྠསྶ ཨེཝ ཝཱ བྷཱཝོཏི ཙ ཝིགྒཧོ. ཀཏྟུ པཱརིཎཏྱཔཀྑེ ཏཔྤཀཱསཀགནྠསྶ ཏདཏྠེན པཱརིཎཏྱཾ སིདྡྷཾ.

༡༢༤.

ཛོཏཡིཏྭཱན སདྡྷམྨཾ,

སནྟཱརེཏྭཱ སདེཝཀེ;

ཛལིཏྭཱ ཨགྒིཁནྡྷོ’ཝ,

ནིབྦུཏོ སོ སསཱཝཀོ.

༡༢༤. ‘‘ཛོཏཡིཏྭཱནེ’’ཙྩཱདི. ཨིམིནཱ ཧེཊྛཱ པཙུརཔདཱབྷིཧིཏོ བུདྡྷཝཾསོ སངྑེཔརཱུཔེན ཝུཏྟོ.

༡༢༤. ‘‘ཛོཏཡི’’ཙྩཱདི. སོ ཏཐཱགཏོ སདྡྷམྨཾ སཔརིཡཏྟིཀཾ ནཝལོཀུཏྟརསདྡྷམྨཾ ཛོཏཡིཏྭཱན ཉཱཎཱལོཀེན ཨོབྷཱསེཏྭཱ སདེཝཀེ སཏྟེ སནྟཱརེཏྭཱ སཾསཱརསཱགརཔརིཡནྟམུཔནེཏྭཱ ཨགྒིཁནྡྷོཝ མཧཱཏེཛེན ཨགྒིཀྑནྡྷོ ཝིཡ ཛལིཏྭཱ ཨནཉྙསཱདྷཱརཎརཱུཔཀཱཡསམྤཏྟིཡཱ པཛྫལིཏྭཱ ཨནྟེ སསཱཝཀོ སཱཝཀེཧི སཧ ནིབྦུཏོ ཁནྡྷཔརིནིབྦཱནེན པརིནིབྦུཏོཏི. ཨིམིནཱ སཀལབུདྡྷཝཾསེ བཧཱུཧི པདེཧི ཝུཏྟཏྠོ སངྑེཔཀྐམེན ཝུཏྟོ. སཏཾ དྷམྨོ, སནྟོ སཾཝིཛྫམཱནོ ཝཱ དྷམྨོཏི ཙ, སཧ དེཝེཧི ཝཏྟམཱནཱཏི ཙ, སཧ སཱཝཀེཧི ཝཏྟམཱནོཏི ཙ ཝིགྒཧོ.

༡༢༥.

མཏྠཀཊྛཱི མཏསྶཱཔི, རཛོབྷཱཝཾ ཝཛནྟུ མེ;

ཡཏོ པུཉྙེན ཏེ སེནྟི [སེནྟུ (ཀ.)], ཛེནཔཱདམྦུཛདྭཡེ.

༡༢༥. ‘‘མཏྠཀཊྛཱི’’ཨིཙྩཱདི. མཏསྶཱཔི མརཎམཱཔནྣསྶཱཔི མེ མཏྠཀེ མུདྡྷནི ཨཊྛཱི རཛོབྷཱཝཾ དྷཱུལིཏྟཾ ཝཛནྟུ པཱཔུཎནྟུ. ཀསྨཱཏི ཙེ? ཡཏོ ཡསྨཱ ཀཱརཎཱ པུཉྙེན ཀུསལེན ཀམྨེན ཧེཏུནཱ ཏེ རཛཱ ཛིནསྶ ཨིམེ ཛེནཱ, པཱདཱ, ཏེཡེཝ ཨམྦུཛཱནིཝ ཨམྦུཛཱནི, ཏེསཾ དྭཡེ ¶ སེནྟི པཝཏྟནྟི, ཏཐཱ ཧོཏུ ཝཱ མཱ ཝཱ, པཎཏིགེདྷེནེཝ ཝདཏི. ཨེཏྠ ‘‘ཀཐམཧཾ བྷགཝཏོ པཱདེ ནིཙྩཾ སིརསཱ པཎམཱམཱི’’ཏྱདྷིཔྤཱཡོ ཝིཏྠཱརེན ཝུཏྟོ.

༡༢༥. ‘‘མཏྠཀི’’ཙྩཱདི, མཏསྶཱཔི མེ མཡ྄ཧཾ མཏྠཀཊྛཱི མུདྡྷནི ཨཊྛཱིནི རཛོབྷཱཝཾ ཨཏིསུཁུམརཛཏྟཾ ཝཛནྟུ པཱཔུཎནྟུ. ཀསྨཱ ཨཱསཱིསནཾ ཀརོཏཱིཏི ཙེ? ཡཏོ ཡསྨཱ ཀཱརཎཱ པུཉྙེན མཡ྄ཧཾ ཏཐཱཝིདྷེན ཀུསལཀམྨེན ཧེཏུནཱ ཏེ རཛཱ ཛེནཔཱདམྦུཛདྭཡེ ཛིནཔཊིབདྡྷཙརཎཔདུམཡུགལེ༹ སེནྟི པཝཏྟནྟི, བུདྡྷསྶ སིརིཔཱདེ ཀིཉྩིཔི རཛོཛལླཾ ན ཨུཔལིམྤཏེཝ, ཏཐཱཔི ཝནྡནཱབྷིལཱསེན ཨེཝཾ ཝུཏྟཾ. ཨེཏྠ ‘‘ཀཐམཧཾ བྷགཝཏོ སིརིཔཱདེ མུདྡྷནཱ ནིཙྩཾ པཎམཱམཱི’’ཏྱབྷིལཱསོ ཝིཏྠཱརེན ཝུཏྟོ. མཏྠཀེ ཨཊྛཱིཏི ཙ, རཛསོ བྷཱཝོཏི ཙ, ཛིནསྶ ཨིམེཏི ཙ, ཛེནཱ ཙ ཏེ པཱདཱ ཙེཏི ཙ, ཏེཡེཝ ཨམྦུཛཱནཱིཏི ཙ, ཏེསཾ དྭཡནྟི ཙ ཝིགྒཧོ.

༡༢༦.

ཨིཙྩཏྲ ནིཙྩཾཔཎཏི-གེདྷོ སཱདྷུ པདིསྶཏི;

ཛཱཡཏེ’ཡཾ གུཎོ ཏིཀྑ-པཉྙཱན’མབྷིཡོགཏོ.

༡༢༦. བྱཱསཏྟམེཝསྶ ཝིཝརཏི ‘‘ཨིཙྩཏྲི’’ཙྩཱདིནཱ. ཨིཙྩེཝཾ ཨཏྲ གཱཐཱཡཾ པཎཏིཡཾ པཎཱམེ གེདྷོ ཨདྷིཀཙྪནྡོ སཱདྷུ སུནྡརཾ པདིསྶཏི ཝིཉྙཱཡཏེ, ཨཡཾ ཡཐཱཝུཏྟོ ཨོཛོ གུཎོ པརིཎཏབྷཱཝསངྑཱཏོ ཏིཀྑཔཉྙཱནཾ སཱཏིསཡམཏཱིནཾ ཨེཝཾ སནྟེཔི ཨབྷིཡོགཏོ པུནཔྤུནཔྤཝཏྟིཏཔརིཙཡབལེན ཛཱཡཏེ ཨུཔྤཛྫཏི.

༡༢༦. ཨིདཱནི སཾཁིཏྟསྶཏྠསྶ ཝིཏྠཱརེན པཀཱསིཏབྷཱཝཾ ‘‘ཨིཙྩཏྲ’’ཨིཙྩཱདིནཱ ནིདྡིསཏི. ཨིཏི ཨིམིནཱ ཨནནྟརགཱཐཱཡཾ ཝུཏྟཀྐམེན ཨཏྲ ཨིམིསྶཾ གཱཐཱཡཾ ནིཙྩཾཔཎཏིགེདྷོ ནིརནྟརཔཎཱམེ ཨདྷིཀཀཏྟུཀཱམཏཱཀུསལཙྪནྡོ སཱདྷུ ཝིབྷཱུཏོ ཝིབྷཱུཏཾ ཝཱ པདིསྶཏི པཉྙཱཡཏི, ཨཡཾ ¶ གུཎོ ཡཐཱཝུཏྟོ ཨཡཾ པརིཎཏབྷཱཝསངྑཱཏོ ཨོཛོ ནཱམ སདྡཏྠགུཎོ ཏིཀྑཔཉྙཱནཾ སུཁུམབུདྡྷིམནྟཱནཾ ཨབྷིཡོགཏོ གནྠཝིསཡབྷཱུཏེན ནིརནྟརཱབྷྱཱསེནེཝ ཛཱཡཏེ སིཛ྄ཛྷཏི, ཝཏྟུ པཱརིཎཏྱེནེཝ བྷཝནཏོ ཡེསཾ ཀེསཉྩི ཡེན ཀེནཙི པཀཱརེན ན སིཛ྄ཛྷཏཱིཏི. ནིཙྩཾ པཝཏྟཱ པཎཏཱིཏི ཙ, ཏསྶཾ གེདྷོཏི ཙ, ཏིཀྑཱ པཉྙཱ ཡེསནྟི ཙ, ཨབྷི པུནཔྤུནཾ ཡོགོ ཡུཉྫནནྟི ཙ ཝིགྒཧོ.

༡༢༧.

མདྷུརཏྟཾ པདཱསཏྟི-རནུཔྤཱསཝསཱ དྭིདྷཱ;

སིཡཱ སམསུཏི པུབྦཱ, ཝཎྞཱཝུཏྟི པརོ ཡཐཱ.

༡༢༧. མཱདྷུརིཡམཝདྷཱརཡམཱཧ ‘‘མདྷུརཏྟ’’མིཙྩཱདི. སཝནཱིཡཏྟེན མནོཧརཏྟཾ མདྷུརཏྟཾ. ཏཾ པདཱནི ཝཱཀྱཱལངྐཱརཱནི སམཱནཱནི ཨུཏྟརུཏྟརེཧི, ཏེསཾ ཨཱསཏྟི ཋཱནཱདིནཱཡཐཱཀཐཉྩི སམསུཏཱིནཾ ཨཱསནྣཏཱ པདཱསཏྟི, པཋམཔྤཡུཏྟསྶཀྑརསྶ པཙྪཱ པཱསོ པཀྑེཔོ ཨནུཔྤཱསོ, པདཱསཏྟི ཙ ཨནུཔྤཱསོ ཙ, ཏེསཾ ཝསེན དྭིདྷཱ ཧོཏི. ‘‘ཀཱིདིསཱ ཏེ’’ཏི ཨཱཧ ‘‘སིཡཱ’’ཏིཨཱདི. པུབྦཱ པཋམཱབྷིཧིཏཱ པདཱསཏྟི སམཱ ཡེན ཀེནཙི ཋཱནམཏྟཱསཾཡོགཱདིནཱ པདནྟརེན སུཏི ཝཎྞོ ཡསྶཱ སཱ སིཡཱ བྷཝེཡྻ, པརོ པཙྪིམོ ཨནུཔྤཱསོ ཏུ ཝཎྞསྶ སརབྱཉྫནལཀྑཎསྶ ཨཱཝུཏྟི པུནཔྤུནུཙྩཱརཎཾ སིཡཱཏི. ཨེཝཾ ཀཏྠཙི བནྡྷེ སམཱནཔདཱསཏྟི ཀཏྠཙི ཨནུཔྤཱསོ ཀཏྠཙི ཏདུབྷཡཾ, དྭཡེན རཧིཏོ ཝིརསོ བནྡྷོ ནསྶཱདཱིཡཏེ ཀཝཱིཧི, ཏཱདིསཾ མདྷུརཏྟཾ དུཝིདྷཾ པཊིཔཛྫིཏབྦཾ, སིལེསསམཏཱནྭིཏནྟུཙྩནྟམེཝ རམཎཱིཡཾ སིཡཱཏི ལཀྑཎཾ དསྶེཏྭཱ ‘‘ཡཐེ’’ཏི ལཀྑིཡམུབྷཡཏྠོདཱཧརཏི ‘‘ཡདེ’’ཙྩཱདིནཱ, ‘‘མུནིནྡི’’ཙྩཱདིནཱ ཙ.

༡༢༧. ཨིདཱནི མདྷུརགུཎཾ དསྶེཏི ‘‘མདྷུརི’’ཙྩཱདིནཱ. མདྷུརཏྟཾ སཝནཱིཡབྷཱཝཏོ མནོཧརཏྟཾ མདྷུརགུཎཾ, པདཱནཾ ཝཱཀྱཱཝཡཝསངྑཱཏཱནཾ སྱཱདྱནྟཱདཱིནཾ ཨུཔརཱུཔརིཔདེཧི སམཱནཱནཾ ¶ ཨཱསཏྟི ཋཱནཀརཎཱདིནཱ ཡེན ཀེནཙི པཀཱརེན ཨཉྙམཉྙཾ ཨཱསནྣཏཱ, ཨནུཔྤཱསོ པུབྦུཙྩཱརིཏཝཎྞཱནཾ པུན པཀྑིཔནཉྩཱཏི དྭིནྣཾ ཝསཱ ཝིབྷཱགེན དྭིདྷཱ ཧོཏི. ཏཏྠ པུབྦཱ པདཱསཏྟི སམསུཏི སིཡཱ, པུབྦཱཔརཝཎྞཱནཾ ཋཱནམཏྟཱཀརཎཱདཱིཧི ཨཱསནྣསུཏིསངྑཏཝཎྞཝུཏྟི ཧོཏི, པརོ ཨནུཔྤཱསོ པན ཝཎྞཱཝུཏྟི སརབྱཉྫནསབྷཱཝཱནཾ པུབྦུཙྩཱརིཏཝཎྞཱནཾ པུནཔྤུནུཙྩཱརཎཾ སིཡཱཏི. ཡཐཱཏི དྭཱིསུ ཨུདཱཧརཎམཱདིསཏི. ཨེཝཾ ཀཏྠཙི བནྡྷེ པདཱསཏྟི ཀཏྠཙི ཨནུཔྤཱསོ ཀཏྠཙི ཏདུབྷཡཾ, དྭཱིཧི ཝིནིམུཏྟོ པན བནྡྷོ ཝིཉྙཱུཧི ཨསྶཱདནཱིཡོ ན ཧོཏི. ཨུཔརི ཝཀྑམཱནཱཧི སིལེསསམཏཱཧི ཡུཏྟཾ མདྷུརཏྟཾ པན ཝིསེསཏོ ཨསྶཱདནཱིཡཾ ཧོཏཱིཏི. མདྷུརསྶ བནྡྷསྶ བྷཱཝོཏི ཙ, པདཱནཾ ཨཱསཏྟཱིཏི ཙ, ཨནུ པཙྪཱ པཱསོ པཀྑེཔོཏི ཙ, པདཱསཏྟི ཙ ཨནུཔྤཱསོ ཙཱཏི ཙ, ཏེསཾ ཝསོ བྷེདོཏི ཙ, སམཱ སུཏི ཝཎྞོ ཡསྶཱཏི ཙ, ཝཎྞསྶ ཨཱཝུཏྟཱིཏི ཙ ཝིགྒཧོ.

༡༢༨.

ཡདཱ ཨེསོ’བྷིསམྦོདྷིཾ,

སམྤཏྟོ མུནིཔུངྒཝོ;

ཏདཱ པབྷུཏི དྷམྨསྶ,

ལོཀེ ཛཱཏོ མཧུསྶཝོ.

༡༢༨. ཨེསོ མུནིཔུངྒཝོ ཡདཱ ཡཏོ པབྷུཏི ཨབྷིསམྦོདྷིཾ སབྦཉྙུཏཉྙཱཎཾ སམྤཏྟོ སམདྷིགཏོ, ཏདཱ པབྷུཏི ཏཏོ ཨཱརབྦྷ དྷམྨསྶ ཙཏུསཏིཔཊྛཱནཱདིབྷེདསྶ སཏྟཏིཾསབོདྷིཔཀྑིཡསངྑཱཏསྶ མཧུསྶཝོ མཧནྟོ ཨབྦྷུདཡོ ནིཔྤཊིཔཀྑཱ པཝཏྟི ལོཀེ ཏིཝིདྷེ ཛཱཏོ ཨཧོསཱིཏི. ཨིཧ ཀྭཙི དཱིགྷཏཱཀཏཾ སདིསཏྟཾ, ཀྭཙི ཋཱནཀཏཾ, ཀྭཙི སཾཡོགཀཏཾ, ཀྭཙི ཨཉྙཐཱ, ཏེནཱཧ ‘‘སིཡཱ སམསུཏི པུབྦཱ’’ཏི.

༡༢༨. ‘‘ཡདི’’ཙྩཱདི. ¶ ཨེསོ མུནིཔུངྒཝོ ཡདཱ ཨབྷིསམྦོདྷིཾ སབྦཉྙུཏཾ སམྤཏྟོ སསནྟཱནེ ཨུཔྤཱདནཝསེན སམྤཱཔུཎི, ཏདཱ པབྷུཏི ཏཏོ པཊྛཱཡ དྷམྨསྶ ཀཱཡཱནུཔསྶནཱསཏིཔཊྛཱནཱདིཔབྷེདསྶ སཏྟཏིཾསབོདྷིཔཀྑིཡདྷམྨསྶ མཧུསྶཝོ མཧཱབྷིཝུདྡྷི ལོཀེ ཀཱམཱདིལོཀཏྟཡེ ཛཱཏོཏི. ཨིཧ ‘‘ཡདཱ ཨེསོ’’ཏི དཱིགྷཀཱལཝསེན ཨཱསནྣཏཱ, ‘‘ཡ ཨེ’’ཏི ཋཱནཝསེན ཨཱསནྣཏཱ, ‘‘ཨབྷིསམྦོདྷིཾ སམྤཏྟོ’’ཏི སཾཡོགཝསེན ཨཱསནྣཏཱ, ‘‘བྷི དྷི’’ནྟི དྷནིཏཏོ ཨཱསནྣཏཱཏི ཨིཙྩཱདིནཱ པདཱསཏྟི དཊྛབྦཱ. ཨབྷིསམྦུཛ྄ཛྷཏི ཨེཏཱཡཱཏི ཙ, པུམཱ ཙ སོ གོཙེཏི ཙ, མུནཱིནཾ པུངྒཝོཏི ཙ, མཧནྟོ ཙ སོ ཨུསྶཝོ ཙཱཏི ཙ ཝིགྒཧོ.

༡༢༩.

མུནིནྡམནྡཧཱསཱ ཏེ, ཀུནྡསནྡོཧཝིབྦྷམཱ;

དིསནྟ’མནུདྷཱཝནྟི, ཧསནྟཱ ཙནྡཀནྟིཡོ.

༡༢༩. ཀུནྡཱནཾ ཀུསུམཱནཾ སནྡོཧོ སམཱུཧོ, ཏསྶ ཝིབྦྷམོ ཡེསཾ ཏེ, མུནིནྡསྶ མནྡཧཱསཱ མནུཉྙཱ ཧསིཏཱནི ཙནྡསྶ ཀནྟིཡོ སོབྷཱཡོ ཧསནྟཱ ཝིཌམྦཡནྟཱ དིསནྟམནུདྷཱཝནྟི ཨནུཝིཙརནྟི. ཨིཙྩཏྲ ནཀཱརསཧིཏསྶ དཀཱརསྶ, ཏཀཱརསྶ ཙཱནུཝཏྟནཾ.

‘‘ཨིནྡནཱིལདལདྭནྡ-སུནྡརཾ སིརིམནྡིརཾ;

མུནིནྡནཡནདྭནྡཾ, ཝིནྡཏི’ནྡཱིཝརཛྫུཏིཾ’’.

ཨིཙྩཔརམུདཱཧརཎཾ.

༡༢༩. ‘‘མུནིནྡི’’ཙྩཱདི. ཀུནྡསནྡོཧཝིབྦྷམཱ སུཔུཔྥིཏཀུནྡཀུསུམརཱསིསདིསལཱིལཱཝནྟཱ ཏེ མུནིནྡམནྡཧཱསཱ བུདྡྷསྶ མནུཉྙཱ ཧསིཏཱ ཙནྡཀནྟིཡོ ནིམྨལཙནྡཀིརཎེ ཧསནྟཱ ནིནྡནྟཱ དིསནྟཾ ཏཾ ཏཾ དིསཾ, དིསཱཔརིཡནྟཾ ཝཱ ཨནུདྷཱཝནྟི ཝིདྷཱཝནྟཱིཏི. ཨེཏྠ ནཀཱརསཧིཏདཀཱརསྶ, ནཀཱརསཧིཏཏཀཱརསྶ ཙ ཨཱཝུཏྟི དཊྛབྦཱ. མནྡཱ ཙ ཏེ ཧཱསཱ ཙེཏི ¶ ཙ, མུནིནྡསྶ མནྡཧཱསཱཏི ཙ, ཀུནྡཱནཾ སནྡོཧོཏི ཙ, ཏསྶ ཝིབྦྷམོ ཡེསནྟི ཙ, དིསཱཡེཝ དིསནྟཾ, དིསཱནཾ ཝཱ ཨནྟནྟི ཙ ཝིགྒཧོ.

‘‘ཨིནྡནཱིལདལདྭནྡ-སུནྡརཾ སིརིམནྡིརཾ;

མུནིནྡནཡནདྭནྡཾ, ཝིནྡཏི’ནྡཱིཝརཛྫུཏི’’ནྟི.

ཨིདམྤི ནཀཱརསཧིཏདཀཱརཝཎྞཱཝུཏྟིཡཱ ཨཔརམུདཱཧརཎཾ.

ཏཏྠ ཨིནྡནཱིལདལདྭནྡསུནྡརཾ ཨིནྡནཱིལམཎིསཀལིཀཱཡུགལ༹མིཝ མནོཧརཾ སིརིམནྡིརཾ ཏཏོཡེཝ སོབྷཱཡ ནིཝཱསཊྛཱནབྷཱུཏཾ མུནིནྡནཡནདྭནྡཾ ཨིནྡཱིཝརཛྫུཏིཾ ནཱིལུཔྤལཀནྟིཾ ཝིནྡཏི ཨནུབྷོཏི, ཨིནྡཱིཝརཛྫུཏིསམཱནཱཏི ཨདྷིཔྤཱཡོ.

༡༣༠.

སབྦཀོམལཝཎྞེཧི, ནཱ’ནུཔྤཱསོ པསཾསིཡོ;

ཡཐཱ’ཡཾ མཱལཏཱིམཱལཱ, ལིནལོལཱལིམཱལིནཱི.

༡༣༠. ཡེཧི ཀེཧིཙི ཨཱཝུཏྟིཏོ ཨནུཔྤཱསོཏི ཙེ? ནེཏྱཱཧ ‘‘སབྦ’’ཨིཙྩཱདི. སབྦེཧི ཀོམལེཧི སུཀུམཱརེཧི ཝཎྞེཧི ཨཀྑརེཧི ཨནུཔྤཱསོ ན པསཾསིཡོ སིལཱགྷནཱིཡོ ན ཧོཏི སིལེསཝིརོདྷིཏྟཱ. ‘‘ཡཐེ’’ཏི ཏཾ ཨུདཱཧརཏི. ཨཡཾ མཱལཏཱིམཱལཱ ཛཱཏིཀུསུམདཱམཾ ལིནཱནཾ བྱཱདྷིཏཱནཾ ལོལཱནཾ ¶ ཀུསུམརསཱརབྦྷ ལོལུཔཱནཾ ཨལཱིནཾ བྷམརཱནཾ མཱལཱ པནྟི སཱ ཨསྶཱ ཨཏྠཱིཏི ལིནལོལཱལིམཱལིནཱི.

༡༣༠. ཝུཏྟཱནུཔྤཱསོཔི སབྦཀོམལཝཎྞེཧི ཝིརཙིཏོ ན པསཾསིཡོཏི དསྶེཏུཾ ‘‘སབྦཀོམལཝཎྞེཧཱི’’ཏིཨཱདིམཱཧ. སབྦཀོམལཝཎྞེཧི སབྦེཧི སུཀུམཱརཀྑརེཧི ཀཏོ ཨནུཔྤཱསོ ཝཎྞཱཝུཏྟིལཀྑཎོ ན པསཾསིཡོ སིལེསཱལངྐཱརཝིརུདྡྷཏྟཱ པསཏྠོ ན ཧོཏི. ‘‘ཡཐཱ’’ཏི ཏམུདཱཧརཏི. ཨཡཾ མཱལཏཱིམཱལཱ ཨེསཱ ཛཱཏིསུམནམཱལིཀཱ ལིནཱནཾ བྱཱཝཊཱནཾ པཏནྟཱནཾ ལོལཱནཾ གནྡྷལུདྡྷཱནཾ ཨལཱིནཾ བྷམརཱནཾ མཱལིནཱི པནྟིཡུཏྟཱཏི. ཨེཏྠ ལཀཱརསྶེཝ པུནཔྤུནཔྤཡོགེན ཀོམལཝཎྞཱཝུཏྟི. མཱལཏཱིནཾ མཱལཱཏི ཙ, ལོལཱ ཙ ཏེ ཨལཡོ ཙཱཏི ཙ, ལིནཱ ཙ ཏེ ལོལཱལཡོ ཙཱཏི ཙ, ཏེསཾ མཱལཱཏི ཙ, སཱ ཨསྶ ཨཏྠཱིཏི ཙ ཝིགྒཧོ.

༡༣༡.

མུདཱུཧི ཝཱ ཀེཝལེཧི,

ཀེཝལེཧི ཕུཊེཧི ཝཱ;

མིསྶེཧི ཝཱ ཏིདྷཱ ཧོཏི,

ཝཎྞེཧི སམཏཱ ཡཐཱ.

༡༣༡. སམཏཾ སམྦྷཱཝེཏི ‘‘མུདཱུཧི’’ཙྩཱདིནཱ. ཀེཝལེཧི ཀེཝལཕུཊཱདིབྷཱཝཱཔཝཏྟེཧི སཀལེཧི མུདཱུཧི ཙཏཱུསུཔི པཱདེསུ སཛཱཏིཡེཧི ཨསིཐིལཀོམལེཧི ཝཱ ཀཀཱརཱདཱིཧི ཝཱ སིཐིལཀོམལསྶ སིལེསཔཊིཔཀྑཏྟཱ ཀེཝལེཧི ཕུཊེཧི ཝཱ ཨདྷིམཏྟསུཏཱིཧི བྷཀཱརཱདཱིཧི [རཱགཱདཱིཧི (ཀ.)] ཝཱ ཨཀིཙྪཝཙནཱིཡེ ཀིཙྪཝཙནཱིཡསྶ སུཁུམཱལཝིཔརིཡཡཏྟཱ མིསྶེཧི ཝཱ མཛ྄ཛྷིམསུཏཱིཧི མུདུབྷཱུཏསཾསཊྛེཧི ཝཱ ཝཎྞེཧི ཨཀྑརེཧི ཀརཎབྷཱུཏེཧི སམཏཱ ཏིདྷཱ ཧོཏི གཛྫེ པཛྫེ ཝཱ. ‘‘ཡཐེ’’ཏི ཏིཝིདྷམུདཱཧརཏི.

༡༣༡. ཨིདཱནི སམཏཾ ཝིབྷཱཝེཏུཾ ‘‘མུདཱུཧི’’ཙྩཱདིམཱཧ. ཀེཝལེཧི ཕུཊམིསྶེཧི ཨཉྙཏྟཱ སཀལེཧི མུདཱུཧི སིཐིལཀོམལེཧི ཝཎྞེཧི ཀཀཱརཱདཱིཧི ཝཱ ཀེཝལེཧི ཕུཊེཧི ཀེཝལཀོམལཝཎྞརཧིཏཏྟཱ སཀལེཧི ཨཀིཙྪུཙྩཱརཎཱིཡེཧི ཨདྷིམཏྟསུཏཱིཧི བྷཀཱརཱདཱིཧི ཝཎྞེཧི ཝཱ མིསྶེཧི ཡཐཱཝུཏྟམུདུཕུཊསམྨིསྶེཧི ཝཎྞེཧི ཝཱ ཀརཎབྷཱུཏེཧི སམཏཱ གཛྫེ ཝཱ པཛྫེ ཝཱ ཏིདྷཱ ཧོཏཱིཏི. ཡདི སིཐིལཀོམལཝཎྞེཧི ཝིཙརིཏཾ སིལེསཱལངྐཱརསྶ, ཀིཙྪུཙྩཱརཎཱིཡེཧི ཕུཊཝཎྞེཧི ཀཏཾ སུཁུམཱལཱལངྐཱརསྶ ¶ ཙ ཝིརུཛ྄ཛྷཏཱིཏི. ‘‘ཡཐཱ’’ཏི ཏིཝིདྷམུདཱཧརཏི.

ཀེཝལམུདུསམཏཱ

༡༣༢.

ཀོཀིལཱལཱཔསཾཝཱདཱི,

མུནིནྡཱལཱཔཝིབྦྷམོ;

ཧདཡངྒམཏཾ ཡཱཏི,

སཏཾ དེཏི ཙ ནིབྦུཏིཾ.

༡༣༢. ‘‘ཀོཀིལེ’’ཙྩཱདི. ཀོཀིལཱནཾ ཀརཝཱིཀསཀུཎཱནཾ ཨཱལཱཔོ ཀཱུཛིཏཾ, ཏཾ སཾཝདཏི པཀཱསཏི སཱིལེནཱཏི ཀོཀིལཱལཱཔསཾཝཱདཱི, ཏཾསདིསོཏི ཨཏྠོ, མུནིནྡསྶ ཨཱལཱཔོ ཝིསཊྛཱདིཨཊྛངྒིཀོ སརོ ཏསྶ ཝིབྦྷམོ ཝིལཱསོ སཏཾ སཔྤུརིསཱནཾ ཧདཡངྒམཏཾ མནོནུསཱརིཏཾ མདྷུརབྷཱཝཾ ཡཱཏི, ནིབྦུཏིཾ ནིབྦཱནཉྩ ཏེསཾ དེཏི.

༡༣༢. ‘‘ཀོཀིལི’’ཙྩཱདི. ཀོཀིལཱནཾ ཀརཝཱིཀསཀུཎཱནཾ ཨཱལཱཔཾ ནཱདལཱིལཾ སཾཝཱདཱི པཀཱསནསཱིལོ, ཏཾསདིསོཏི ཨདྷིཔྤཱཡོ, མུནིནྡསྶ སབྦཉྙུནོ ཨཱལཱཔསྶ ཝིསཊྛཱདིཨཊྛངྒིཀནཱདསྶ ཝིབྦྷམོ ཝིལཱསོ སཏཾ སཔྤུརིསཱནཾ ཧདཡངྒམཏཾ ཙིཏྟཱརཱདྷིཏབྷཱཝཾ ཡཱཏི ཙ, ནིབྦུཏིཾ སུཏསམྦནྡྷེན ཏེསཾཡེཝ སཱདྷཱུནཾ ནིབྦཱནཾ དེཏི ཙ དེནྟོཔི ཧོཏཱིཏི. ཨེཏྠ ཀོཀིལཱལཱཔསདྡེན ནིསྶིཏེ ནིསྶཡཝོཧཱརེན ལཱིལཱ གཧིཏཱ.

ཀེཝལཕུཊསམཏཱ

༡༣༣.

སམྦྷཱཝནཱིཡསམྦྷཱཝཾ,

བྷགཝནྟཾ བྷཝནྟགུཾ;

བྷཝནྟསཱདྷནཱཀངྑཱི,

ཀོ ན སམྦྷཱཝཡེ ཝིབྷུཾ.

༡༣༣. ‘‘སམྦྷཱཝནཱིཡེ’’ཙྩཱདི. ¶ སམྦྷཱཝནཱིཡོ ཨཱདརཎཱིཡོ. སདེཝཀེ ལོཀེ སནྟོ སོབྷནོ བྷཱཝོ ཨདྷིཔྤཱཡོ ཡསྶ ཏཾ. བྷཝནྟཾ ནིབྦཱནཾ གཏོཏི བྷཝནྟགུ, ཏཾ ཝིབྷུཾ. བྷགཝནྟཾ སམྨཱསམྦུདྡྷཾ. བྷཝསྶ སཾསཱརསྶ ཨནྟོ ཨཝསཱནཾ ནིབྦཱནཾ, ཏསྶ སཱདྷནཾ སམྤཱདནམཱཀངྑཏི སཱིལེནཱཏི བྷཝནྟསཱདྷནཱཀངྑཱི, ཀོ ནཱམ སཾསཱརཝཏྟིཛནོ. ན སམྦྷཱཝཡེ ཨཱདརཾ ན ཀརེཡྻ, ཀརོཏྱེཝཱཏི ཨཏྠོ.

༡༣༣. ‘‘སམྦྷཱཝནཱིཡི’’ཙྩཱདི. སམྦྷཱཝནཱིཡསམྦྷཱཝཾ སདེཝཀེན ལོཀེན ཨཱདརཎཱིཡསོབྷནཱདྷིཔྤཱཡཾ བྷཝནྟགུཾ བྷཝསྶ ཨནྟསངྑཱཏཾ ནིབྦཱནཾ གཏཾ ཝིབྷུཾ པབྷུཾ བྷགཝནྟཾ སམྨཱསམྦུདྡྷཾ བྷཝནྟསཱདྷནཱཀངྑཱི ནིབྦཱནསཱདྷནཱབྷིལཱསཱི ཀོ ཀཏམོ སཾསཱརཝཏྟིཛནོ ན སམྦྷཱཝཡེ ཨཱདརཾ ན ཀརེཡྻ, ཀརོཏྱེཝ. སནྟོ ཙ སོ བྷཱཝོ ཙཱཏི ཙ, སམྦྷཱཝནཱིཡོ སམྦྷཱཝོ ཡསྶེཏི ཙ, བྷཝསྶ ཨནྟནྟི ཙ, བྷཝནྟཾ གཏོཏི ཙ, ཏསྶ སཱདྷནནྟི ཙ, ཏཾ ཨཱཀངྑཏི སཱིལེནཱཏི ཙ ཝིགྒཧོ.

མིསྶཀསམཏཱ

༡༣༤.

ལདྡྷཙནྡནསཾསགྒ-སུགནྡྷིམལཡཱནིལོ;

མནྡ’མཱཡཱཏི བྷཱིཏོཝ, མུནིནྡམུཁམཱརུཏཱ.

༡༣༤. ‘‘ལདྡྷི’’ཙྩཱདི. ལདྡྷོ ཙནྡནཏརཱུནཾ སཾསགྒོ པརིཙཡོ ཏེན སོབྷནོ གནྡྷོ ཨསྶཱཏི སུགནྡྷཱི སུརབྷི མལཡཱནིལོདཀྑིཎཔཝམཱནོ མུནིནྡསྶ མུཁམཱརུཏཱ བྷཱིཏོཝ ཏཱདིསམུདུཏྟསཱིཏལཏྟསུགནྡྷསམྤཏྟིཡཱ ཨཏྟནོ དཱུརཏརཏྟཱ ཨཱཡཱཏི ཨནུཝཏྟཏི. མནྡནྟི ཨཱགམནཀྲིཡཱཝིསེསནཾ.

༡༣༤. ‘‘ལདྡྷི’’ཙྩཱདི. ¶ ལདྡྷཙནྡནསཾསགྒསུགནྡྷིམལཡཱནིལོ པཊིལདྡྷཙནྡནཏརུསཱརསམཝཱཡེན སོབྷནགནྡྷསམནྣཱགཏོ མལཡདེསཏོ ཨཱགཙྪམཱནམཱལུཏོ མུནིནྡམུཁམཱརུཏཱ བུདྡྷསྶ མུཁསུརབྷིཝཱསིཏཔཝནཏོ བྷཱིཏོ ཨིཝ ཏཱདིསམུདུསུརབྷིསཱིཏལཏྟསྶ ཨཏྟནི ཨསམྦྷཝཏོ བྷཱིཏོཝ མནྡཾ སཎིཀཾ ཡཱཏི ཨབྷིམུཁམེཏཱིཏི. ཙནྡནཱནཾ སཾསགྒོཏི ཙ, ལདྡྷོ ཙ སོ ཙནྡནསཾསགྒོཏི ཙ, སོབྷནོ གནྡྷོ ཡསྶཱཏི ཙ, ལདྡྷཙནྡནསཾསགྒེན སུགནྡྷཱིཏི ཙ, མལཡཏོ ཨཱགཏོ ཨནིལོཏི ཙ, མུནིནྡམུཁཏོ ནིཀྑནྟོ མཱརུཏོཏི ཙ ཝིགྒཧོ. མནྡནྟི ཀྲིཡཱཝིསེསནཾ. ཨེཏྠ ཏིཝིདྷསམཏཱཡཾ ‘‘ཀོཀིལཱལཱཔསཾཝཱདི’’ཙྩཱདིཏིཝིདྷལཀྑིཡསྶཱཔི ‘‘མུདཱུཧི ཝཱ ཀེཝལེཧི’’ཙྩཱདིནཱ དསྶིཏལཀྑཎཏྟཡེན ཏུལྱཏཱ སུཔཱཀཊཱཝཱཏི.

༡༣༥.

ཨནིཊྛུརཀྑརཔྤཱཡཱ, སབྦཀོམལནིསྶཊཱ;

ཀིཙྪམུཙྩཱརཎཱཔེཏ-བྱཉྫནཱ སུཁུམཱལཏཱ.

༡༣༥. སུཁུམཱལཏཱ ཀཐཱིཡཏི ‘‘ཨནིཊྛུརཀྑརེ’’ཙྩཱདིནཱ. ཨནིཊྛུརཱནི ཨཕརུསཱནི ཨཀྑརཱནི ཝཎྞཱནི པཱཡཱནི བཧཱུནི ཡསྶཱ སཱ ཏཐཱ, ‘‘ནིཊྛུརཱནི ཨཔྤཀཱནཱི’’ཏི པཱཡགྒཧཎེན སཱུཙིཏཾ, ཏཏོཡེཝ སབྦེཧི ཀེཝལེཧི ཀོམལེཧི སིཐིལེཧི ལགྷཱུཧི ཨཀྑརེཧི ནིསྶཊཱ ནིགྒཏཱ ཀིཙྪེན དུཀྑེན ཨུཙྩཱརཎཱ ཏཏོ ཨཔེཏཱནི ཨཔགཏཱནི བྱཉྫནཱནི ཡསྶཱ སཱཏི ཨནུཝདིཏྭཱ སུཁུམཱལཏཱ ཝིདྷཱིཡཏེ.

༡༣༥. ཨིདཱནི སུཁུམཱལཏཾ དསྶེཏི ‘‘ཨནིཊྛུརེ’’ཙྩཱདིནཱ. ཨནིཊྛུརཀྑརཔྤཱཡཱ ཨཀཀྐསཝཎྞབཧུལཱ སབྦཀོམལནིསྶཊཱ ཨནིཊྛུརཀྑརཱནཾ ཡེབྷུཡྻགྒཧཎཏོཡེཝ སཀལསིཐིལཝཎྞཝིརཧིཏཱ ཀིཙྪམུཙྩཱརཎཱཔེཏབྱཉྫནཱ དུཀྑུཙྩཱརཎཱིཡཝཎྞེཧི ཝིགཏཨཀྑརསམནྣཱགཏཱ སུཁུམཱལཏཱ ནཱམཱཏི. ཨནིཊྛུརཱནི ཨཀྑརཱནི པཱཡཱནི བཧཱུནི ཡསྶནྟི ཙ, སབྦེ ཙ ཏེ ཀོམལཱ ཙེཏི ཙ, ཏེཧི ནིསྶཊཱཏི ¶ ཙ, ཀིཙྪེན ཨུཙྩཱརཎཱཏི ཙ, ཏེཧི ཨཔེཏཱནཱིཏི ཙ, ཏཱནི བྱཉྫནཱནི ཡསྶཱཏི ཙ ཝིགྒཧོ. ནིགྒཧཱིཏཱགམོ.

༡༣༦.

པསྶནྟཱ རཱུཔཝིབྷཝཾ, སུཎནྟཱ མདྷུརཾ གིརཾ;

ཙརནྟི སཱདྷཱུ སམྦུདྡྷ-ཀཱལེ ཀེལི༹པརམྨུཁཱ.

༡༣༦. ཨུདཱཧརཏི ‘‘པསྶནྟཱ’’ཨིཙྩཱདི. རཱུཔཝིབྷཝཾ རཱུཔསམྤཏྟིཾ པསྶནྟཱ མདྷུརཾ གིརཾ ཝཱཙཾ སུཎནྟཱ སཱདྷཝོ ཀེལི༹པརམྨུཁཱ ཀཱིལཱ༹ཡ ནིཙྪནྟཱ ཙརནྟཱིཏི སམྦནྡྷོ. ཀཏྠཱཏི ཨཱཧ ‘‘སམྦུདྡྷཀཱལེ’’ཏི.

༡༣༦. ‘‘པསྶནྟི’’ཙྩཱདིནཱ ལཀྑིཡམུདཱཧརཏི, ཏཾ ཝུཏྟཏྠམེཝ.

༡༣༧.

ཨལངྐཱརཝིཧཱིནཱཔི, སཏཾ སམྨུཁཏེ’དིསཱི;

ཨཱརོཧཏི ཝིསེསེན, རམཎཱིཡཱ ཏདུཛྫལཱ.

༡༣༧. ཝིསིཊྛསྶཱཉྙདྷམྨསྶ ཨབྷཱཝེཔིམིནཱཝོཔཱདེཡོ བནྡྷོཏི ཨཱཧ ‘‘ཨལངྐཱརེ’’ཙྩཱདི. ཨལངྐཱརེཧི ཝིཧཱིནཱཔི ཨེདིསཱི སུཁུམཱལཏཱ སཏཾ པཎྜིཏཛནཱནཾ སམྨུཁཏཾ ཨབྷིམུཁབྷཱཝཾ ཝཱཙཱགོཙརཏྟཾ ཨཱརོཧཏི ཨུཔགཙྪཏི, ཀིམུཏཨཏྠཱལངྐཱརཱལངྐིཏེཏྱཔིསདྡོ. ཏེན སབྷཱཝཝུཏྱཱདིནཱ ཨལངྐཱརེན ཨུཛྫལཱ དིཏྟཱ པན ཝིསེསེནཱཏིསཡེན རམཎཱིཡཱ མནུཉྙཱཏི.

༡༣༧. ‘‘ཨལངྐཱརེ’’ཙྩཱདི. ཨེདིསཱི ཨེཝཾཝིདྷཱ སུཁུམཱལཏཱ ཨལངྐཱརཝིཧཱིནཱཔི ཨཏྠཱལངྐཱརཝིརཧིཏཱཔི སཏཾ པཉྙཝནྟཱནཾ སམྨུཁཏཾ ཨབྷིམུཁབྷཱཝཾ ཏེསཾ ཝཙནཝིསཡབྷཱཝནྟི ཨཏྠོ ཨཱརོཧཏི པཱཔུཎཱཏི. ཏདུཛྫལཱ ཏེན སབྷཱཝཝུཏྟིཝངྐཝུཏྟིསམྦྷཱུཏེན ཨཏྠཱལངྐཱརེན ཛོཏམཱནཱ ཝིསེསེན ཨཏིསཡེན རམཎཱིཡཱ མནུཉྙཱ ཧོཏི. ཨལངྐཱརེཧི ཝིཧཱིནཱཏི ཙ, ཏེན ཨུཛྫལཱཏི ཙ ཝིགྒཧོ.

༡༣༨.

རོམཉྩཔིཉྪརཙནཱ, ¶ སཱདྷུཝཱདཱཧིཏདྡྷནཱི;

ལལ༹ནྟི’མེ མུནཱིམེགྷུ-མྨདཱ སཱདྷུ སིཁཱཝལཱ.

༡༣༨. ཏམུདཱཧརཏི ‘‘རོམཉྩེ’’ཙྩཱདིནཱ. རོམཉྩཱ ལོམཧཾསཱ ཨིཝ རོམཉྩཱ ཨེཝ ཝཱ, པིཉྪཱནི བརིཧཱནི [པརིཧཱརཱནི (ཀ.)] ཏེསཾ རཙནཱ ཚཏྟཱཀཱརེན ཝིདྷཱནཾ ཡེསཾ ཏེ ཏཐཱ, ‘‘སཱདྷཱུ’’ཏི ཝཱདོ ཝཙནཾ ཏཾསདིསོཡེཝ ཝཱ, ཨཱཧིཏོ དྷནི ཀེཀཱསངྑཱཏོ ཡེསཾ ཏེ ཏཐཱ, མུནིམེགྷེན མུནིསདིསེན མུནིསངྑཱཏེན ཝཱ ཝཱརིདེན ཨུམྨདཱ མཏྟཱ སཱདྷུསདིསཱ སཱདྷུ ཨེཝ ཝཱ སིཁཱཝལཱ མཡཱུརཱ ལལ༹ནྟི ལཱིལོཔེཏཱ ཝིཙརནྟི, ཨཉྙམཉྙཾ རམནྟཱིཏི ཨཏྠོ.

༡༣༨. ཨཏྠཱལངྐཱརཡུཏྟསུཁུམཱལཏམུདཱཧརཏི ‘‘རོམེ’’ཙྩཱདིནཱ. རོམཉྩཔིཉྪརཙནཱ ལོམཧཾསསདིསཱ རོམཱ ཨེཝ ཝཱ པིཉྪཱནཾ བརིཧཱནཾ རཙནཱ ཚཏྟཱཀཱརེན ཝིཏྠཱརཝནྟཱ སཱདྷུཝཱདཱཧིཏདྡྷནཱི ‘‘སཱདྷཱུ’’ཏི ཝཙནསདིསེཧི སཱདྷུཝཱདེཧི ཝཱ པཝཏྟཀེཀཱནིནྣཱདེཧི སམནྣཱགཏཱ མུནིམེགྷུམྨདཱ མུནིསདིསེན མུནིསངྑཱཏེན ཝཱ མེགྷེན སཉྫཱཏམདཱ ཨིམེ སཱདྷུསིཁཱཝལཱ སཛྫནསདིསཱ སཱདྷུནོ ཨེཝ ཝཱ མཡཱུརཱ ལལ༹ནྟི ལཱིལོཔེཏཱ བྷཝནྟཱིཏི. ཨིདཾ ཨསེསཝཏྠུཝིསཡཾ སམཱསརཱུཔཀཾ ཨམུཁྱཔཀྑེ ‘‘རོམཉྩཱ ཝིཡ སཱདྷུཝཱདོ ཝིཡ མུནི ཝིཡ སཱདྷཝོ ཝིཡཱ’’ཏི ཙ, མུཁྱཔཀྑེ ‘‘པིཉྪརཙནཱ ཝིཡ ཨཱཧིཏདྡྷནཱི ཝིཡ མེགྷོ ཝིཡ སིཁཱཝལཱ ཝིཡཱ’’ཏི ཨུཔཙརིཏབྦཾ. རོམཉྩཱ ཨེཝ པིཉྪཱནཱིཏི ཙ, ཏེསཾ རཙནཱ ཡེསནྟི ཙ, ‘‘སཱདྷུ’’ཨིཏི ཝཱདོཏི ཙ, ཨཱཧིཏོ ཙ སོ དྷནི ཙེཏི ཙ, སཱདྷུཝཱདོ ཨཱཧིཏདྡྷནི ཡེསནྟི ཙ, མུནི ཨེཝ མེགྷོཏི ཙ, ཏེན ཨུམྨདཱཏི ཙ, སཱདྷཝོ ཨེཝ སིཁཱཝལཱཏི ཙ ཝཱཀྱཾ. ‘‘མུནཱིམེགྷོ’’ཏི ཨེཏྠ དཱིགྷཏྟཾ ཚནྡཱནུརཀྑཎཏྠཾ.

༡༣༩.

སུཁུམཱལཏྟམཏྠེཝ, པདཏྠཝིསཡམྤི ཙ;

ཡཐཱ མཏཱདིསདྡེསུ, ཀིཏྟིསེསཱདིཀིཏྟནཾ.

༡༣༩. ན ¶ ཀེཝལཾ སུཁུམཱལཏཱ སདྡེཝ, ཨཏྠེཔཱིཏི དསྶེཏུམཱཧ ‘‘སུཁུམཱལཏྟ’’མིཙྩཱདི. ཨཏྠེཝཱཏི ཝིཛྫཏེཝ, ཏཾ ཏུ ཨནོཙིཏྱགཱམྨཱདིཝཛྫནཱ སམྦྷཝཏི. ‘‘ཡཐེ’’ཏི ཏམུདཱཧརཏི. མཏཱདིསདྡེསུ ཝཏྟབྦེསུ ཀིཏྟིསེསཱདཱིནཾ སདྡཱནཾ ཀིཏྟནཾ ཀཐནཾ.

༡༣༩. ཨཡཾ སུཁུམཱལཏཱ ན ཀེཝལཾ སདྡེཝ, ཨཏྠེཔཱིཏི དསྶེཏུཾ ཨཱཧ ‘‘སུཁུམཱལཏྟ’’མིཙྩཱདི. སུཁུམཱལཏྟམཏྠེཝ པདཏྠཝིསཡམྤི ཙ པདཱབྷིདྷེཡྻགོཙརམྤི སུཁུམཱལཏྟཾ ཨཏྠེཝ, ཏཉྩ ཨོཙིཏྱཧཱིནགཱམྨདོསཔརིཧཱརེན སིཛ྄ཛྷཏི. ‘‘ཡཐཱ’’ཏི ཏམུདཱཧརཏི. མཏཱདིསདྡེསུ ཝཏྟབྦེསུ ཀིཏྟིསེསཱདིསདྡཱནཾ ཀིཏྟནཾ ཀཐནནྟི. མཏོ ཨིཏིཨཱདི ཡེསཾ ‘‘ཛཱིཝིཏཀྑཡཾ པཏྟོ’’ ཨིཙྩཱདཱིནམིཏི ཙ, ཀིཏྟིསེསོ ཨིཏིཨཱདིཡེསཾ ‘‘དེཝཏྟཾ གཏོ, སགྒཀཱཡམལངྐརཱི’’ཏྱཱདཱིནམིཏི ཙ ཝིགྒཧོ.

༡༤༠.

སིལིཊྛཔདསཾསགྒ-

རམཎཱིཡགུཎཱལཡོ;

སབནྡྷགཱརཝོ སོ’ཡཾ,

སིལེསོ ནཱམ ཏཾ ཡཐཱ.

༡༤༠. སིལེསཾ དསྶེཏི ‘‘སིལིཊྛེ’’ཙྩཱདིནཱ. སིལིཊྛཱནཾ བནྡྷལཱགྷཝཱབྷཱཝེན ཨཉྙམཉྙཾ སིལིཊྛཱནཾ པདཱནཾ སཾསགྒེན རམཎཱིཡོ མནུཉྙོ གུཎོ ཏསྶ ཨཱལཡོ པཝཏྟིཊྛཱནཾ. བནྡྷསྶ རཙནཱཡ གཱརཝོ ཨསིཐིལཏཱ, སཧ ཏེན ཝཏྟཏཱིཏི སབནྡྷགཱརཝོཏི ཨནུཝདིཏྭཱ སོཡཾ སིལེསོ ནཱམཱཏི ཝིདྷཱིཡཏེ. ‘‘ཏཾ ཡཐེ’’ཏྱུདཱཧརཏི. ཡཐཱ ཨཡཾ སིལེསོ, ཏཐཱ ཨཉྙོཔི ཏཱདིསོ དཊྛབྦོ, ན ཏྭཡམེཝེཏི ‘‘ཏཾ ཡཐཱ’’ སདྡསྶཏྠོ.

༡༤༠. ཨིདཱནི སིལེསཾ ནིདྡིསཏི ‘‘སིལིཊྛེ’’ཙྩཱདིནཱ. སིལིཊྛཔདསཾསགྒརམཎཱིཡགུཎཱལཡོ ཋཱནཀརཎཱདཱིཧི ཨཱསནྣཝཎྞཱནཾ ¶ ཝིནྱཱསཧེཏུ ཨཉྙམཉྙནིསྶིཏཱནཾ པདཱནཾ སམཝཱཡེན མནུཉྙགུཎསྶ པཝཏྟིཊྛཱནབྷཱུཏོ སབནྡྷགཱརཝོ བནྡྷགཱརཝསངྑཱཏརཙནཱཡ ཨསིཐིལབྷཱཝེན སཧ པཝཏྟོ སོ ཨཡཾ བནྡྷོ སིལེསོ ནཱམཱཏི. སིལེསོ ནཱམ བནྡྷགཱརཝོ, ཏཔྤཊིཔཱདཀབནྡྷོཔྱེཏྠ སིལེསོཏི ཝུཙྩཏི. སིལིཊྛཱ ཙ ཏེ པདཱ ཙེཏི ཙ, ཏེསཾ སཾསགྒོཏི ཙ, ཏེན རམཎཱིཡོཏི ཙ, སོ ཨེཝ གུཎོཏི ཙ, ཏསྶ ཨཱལཡོཏི ཙ, བནྡྷསྶ གུརུནོ བྷཱཝོཏི ཙ, ཏེན སཧ པཝཏྟཏཱིཏི ཙ ཝཱཀྱཾ. ཏཾ ཡཐཱ ‘‘བཱལིནྡུ’’ཨིཙྩཱདི.

༡༤༡.

བཱལིནྡུཝིབྦྷམཙྪེདི-ནཁརཱཝལིཀནྟིབྷི;

སཱ མུནིནྡཔདམྦྷོཛ-ཀནྟི ཝོ ཝལིཏཱ’ཝཏཾ.

༡༤༡. ‘‘བཱལིནྡུ’’ཨིཙྩཱདི. བཱལིནྡུནོ པཉྩམཱི [པཉྩམཱིཙནྡསྶ (?)] པཉྩདསཀལསྶ ཝིབྦྷམོ མནོཧརཏྟཾ, ཏཾ ཚིནྡཏི སཱིལེནཱཏི བཱལིནྡུཝིབྦྷམཙྪེདིཡོ པཉྩམཱིཙནྡསྶ ཀལཱསནྣིབྷཱནཾ ནཁརཱནཾ ནཁཱནཾ ཨཱཝལིཡོ ཏཱསཾ ཀནྟིབྷི སོབྷཱཧི སཧ ཝལིཏཱ སཾཡུཏྟཱ སཱ, མུནིནྡསྶ པདཱནིཡེཝ ཨམྦྷོཛཱནི པདུམཱནི ཏེསཾ ཀནྟི. ཝོ ཏུམྷེ སཱམཉྙེན ཝདཏི. ཨཝཏཾ པཱལཡཏུ.

༡༤༡. བཱལིནྡུ…པེ… ཀནྟིབྷི ཏརུཎཙནྡཝིལཱསཝིནཱསནསབྷཱཝསམནྣཱགཏནཁཔནྟིསོབྷཱཧི སཧ ཝལིཏཱ སཾཡུཏྟཱ སཱ མུནིནྡཔདམྦྷོཛཀནྟི སཱ སམྦུདྡྷཔཱདཔདུམསོབྷཱ ཝོ ཏུམྷེ ཨཝཏཾ རཀྑཏཱུཏི. བཱལོ ཙ སོ ཨིནྡུ ཙཱཏི ཙ, ཏསྶ ཝིབྦྷམོཏི ཙ, ཏཾ ཚིནྡཏི སཱིལེནཱཏི ཙ, ནཁཱནཾ ཨཱཝལིཡོཏི ཙ, ཏཱསཾ ཀནྟཱིཏི ཙ, བཱལིནྡུཝིབྦྷམཙྪེདིཡོ ཙ ཏཱ ནཁརཱཝལིཀནྟིཡོ ཙཱཏི ཙ, མུནིནྡསྶ པདཱནཱིཏི ཙ, ཏཱནིཡེཝ ཨམྦྷོཛཱནཱིཏི ཙ, ཏེསཾ ཀནྟཱིཏི ཙ ཝིགྒཧོ.

༡༤༢.

ཨུཀྐཾསཝནྟོ ¶ ཡོ ཀོཙི,

གུཎོ ཡདི པཏཱིཡཏེ;

ཨུདཱརོ’ཡཾ བྷཝེ ཏེན,

སནཱཐཱ བནྡྷཔདྡྷཏི.

༡༤༢. ཨུདཱརཏྟམཝདྷཱརཡམཱཧ ‘‘ཨུཀྐཾསཝནྟོ’’ཨིཙྩཱདི. ཡོ ཀོཙི ‘‘ཨིདམེཝེ’’ཏི ནིཡམཱབྷཱཝཱ གུཎོ ཙཱགཱཏིསཡཱདིཀོ ཨུཀྐཾསཝནྟོ ཨདྷིམཏྟོ ཡདི པཏཱིཡཏེ ཝིཉྙཱཡཏེ བནྡྷེཏི ཝིཉྙཱཡཏི ‘‘བནྡྷཔདྡྷཏཱི’’ཏི ཝཀྑམཱནཏྟཱ, ཨཡཾ ཨུདཱརོ བྷཝེཏི ཝིདྷི. ཨུདཱརོཡཾ ཧོཏུ, ཀིཾ ཏཏོ སིཡཱཏི ཨཱཧ ‘‘ཏེནི’’ཙྩཱདི. ཏེན ཨུཀྐཾསཝཏཱ གུཎེན བནྡྷཔདྡྷཏི རཙནཀྐམོ ནཱཐབྷཱུཏེན ཨུདཱརགུཎེན སཧ ཝཏྟཏཱིཏི སནཱཐཱ, སམྤདཱཝཱཏི [སམྤདཱཝཏཱིཏི (?)] ཝུཏྟཾ ཧོཏི.

༡༤༢. ཨིདཱནི ཨུདཱརཏྟམུདྡིསཏི ‘‘ཨུཀྐཾསེ’’ཙྩཱདིནཱ. ཨུཀྐཾསཝནྟོ ཨཏིསཡཝཱ ཡོཀོཙི གུཎོ ཙཱགཱཏིསཡཱདིཀོ སདྡཱཝལིཡཱ པཊིཔཱདནཱིཡོ ཨཱནུབྷཱཝོ ཡདི པཏཱིཡཏེ སཙེ ཀཏྠཙི བནྡྷེ ཝིཉྙཱཡཏེ, ཨཡཾ ཡཐཱཝུཏྟགུཎོ ཨུདཱརོ ནཱམ བྷཝེ. ཏེན ཀིཾ པཡོཛནནྟི ཙེ? བནྡྷབནྡྷཏི པདཱཝལི ཏེན ཨུཀྐཾསཝཏཱ གུཎེན སནཱཐཱ སཔྤཏིཊྛཱ ཧོཏི. ཨུཀྐཾསོ ཨསྶ ཨཏྠཱིཏི ཙ, ནཱཐེན སཧ ཝཏྟཏཱིཏི ཙ, བནྡྷསྶ པདྡྷཏཱིཏི ཙ ཝིགྒཧོ.

༡༤༣.

པཱདམྦྷོཛརཛོལིཏྟ-གཏྟཱ ཡེཏཝ གོཏམ;

ཨཧོ ཏེ ཛནྟཝོ ཡནྟི, སབྦཐཱ ནིརཛཏྟནཾ.

༡༤༣. ཏམུདཱཧརཏི ‘‘པཱདེ’’ཙྩཱདིནཱ. གོཏམཱཏི བྷགཝནྟཾ གོཏྟེན ཨཱལཔཏི. ཏཝ བྷགཝཏོ པཱདམྦྷོཛཱནཾ རཛཱནི རེཎཝོ, ཏེཧི ལིཏྟཱནི ཨུཔདེཧིཏཱནི གཏྟཱནི ཡེསནྟི ཝིགྒཧོ. ཡེ ཛནཱ ཏེ ཛནྟཝོ སབྦཔྤཀཱརེན རཛོལཝེནཱཔྱནུཔལིཏྟཏྟཱ རཛེཧི ཀིལེསསངྑཱཏེཧི ¶ ནིགྒཏཱ ནིརཛཱ, ཏེསཾ བྷཱཝོ ནིརཛཏྟནཾ ནིཀྐིལེསབྷཱཝཾ ཡནྟི པཱཔུཎནྟི. ཨཧོ ཨཙྪརིཡཾ ཡཏོ རཛསཱ ལིཏྟཱ ནཱམ སཾཀིལིཊྛཱཡེཝ སིཡུཾ, བྷཝཾ པན པཱདརཛསཱ ཝིལེཔནེ ཛནེ ནིརཛེ ཀརོཏི. ཨཙྪརིཡཾ བྷཝཏོ ཨིདནྟི ཨཏྠོ.

༡༤༣. ཨིདཱནི ཨུདཱཧརཏི ‘‘པཱདམྦྷོཛེ’’ཙྩཱདིནཱ. བྷོ གོཏམ ཡེ སཏྟཱ ཏཝ ཏུཡ྄ཧཾ པཱདམྦྷོཛརཛོལིཏྟགཏྟཱ པཱདཔདུམརེཎུལིཏྟམཏྠཀནལཱཊཱདིསརཱིརཱཝཡཝཡུཏྟཱ ཏེ ཛནྟཝོ སཏྟཱ སབྦཐཱ ཀིལེསསངྑཱཏརཛོཛལླེཧི ཨནུཔལིཏྟཏྟཱ སབྦཔྤཀཱརེན ནིརཛཏྟནཾ ཝིགཏཀིལེསརཛོབྷཱཝཾ ཡནྟི པཱཔུཎནྟི, ཨཧོ ཨཙྪརིཡཾ. རཛོལིཏྟཱ ནཱམ སཾཀིལིཊྛཱ སིཡུཾ, ཏྭཾ པན པཱདརཛསཱ ཨུཔལིཏྟེཔི སཏྟེ ནིརཛེ ཀརོསཱིཏི བྷཱཝོ. ཨིཧ བྷགཝཏོ ཨུཀྐཾསགུཎོ དཱིཔིཏོ ཧོཏི. པཱདཱནིཡེཝ ཨམྦྷོཛཱནཱིཏི ཙ, ཏེསཾ རཛཱནཱིཏི ཙ, ཏེཧི ལིཏྟཱནི གཏྟཱནི ཡེསནྟི ཙ, རཛེཧི ཀིལེསེཧི ནིགྒཏཱཏི ཙ, ཏེསཾ བྷཱཝོཏི ཙ ཝཱཀྱཾ.

༡༤༤.

ཨེཝཾ ཛིནཱནུབྷཱཝསྶ, སམུཀྐཾསོ’ཏྲདིསྶཏི;

པཉྙཝཱ ཝིདྷིནཱ’ནེན, ཙིནྟཡེ པརམཱིདིསཾ.

༡༤༤. ཀོ པནེཏྠ ཨུཀྐཾསཝནྟོ གུཎོ ཡེན བནྡྷོ སནཱཐོ སིཡཱཏི ཙེ? ཨཱཧ ‘‘ཨེཝ’’མིཙྩཱདི. ཨེཝམིཏི ཛིནཱནུབྷཱཝསྶ སམྨཱསམྦུདྡྷཔབྷཱཝསྶ སམུཀྐཾསོ ཨཏིསཡོ དིསྶཏི པདིསྶཏེ ཨཏྲ བནྡྷེ, ཏསྨཱ ཛིནཱནུབྷཱཝེན ཨུཀྐཾསཝཏཱ གུཎེན བནྡྷོ སནཱཐོ སིཡཱཏི. པཀཱརམིམམཉྙཏྲཔིཨཏིདིསནྟོ ཨཱཧ ‘‘པཉྙཝཱ’’ཏིཨཱདི. པཉྙཝཱ པཉྙཱསམྤནྣོ ཨནེན ཝིདྷིནཱ ཨིམིནཱ པཀཱརེན ཨེདིསཾ ཨེཝརཱུཔཾ པརཾ ཨཉྙཾ ཙིནྟཡེ ཝིཏཀྐེཡྻ.

༡༤༤. ཨིདཱནི ¶ ཡཐཱཝུཏྟགུཎནིདསྶནཉྩ སིསྶཱནུསཱསནཉྩ དསྶེཏི ‘‘ཨེཝ’’མིཙྩཱདིནཱ. ཨཏྲ ཨིམིསྶཾ ཨནནྟརགཱཐཱཡཾ ཨེཝཾ ཡཐཱཝུཏྟཀྐམེན ཛིནཱནུབྷཱཝསྶ ཏཐཱགཏཔྤབྷཱཝསྶ སམུཀྐཾསོ ཨཱདྷིཀྐཾ དིསྶཏི པདིསྶཏེ, ཏསྨཱ ཛིནཱནུབྷཱཝསངྑཱཏེན ཨུཀྐཾསཝཏཱ གུཎེན བནྡྷོ སནཱཐོ བྷཝེཡྻ. པཉྙཝཱ པསཏྠཉཱཎཝནྟོ ཨནེན ཝིདྷིནཱ ཨིམིནཱ ཀམེན ཨཱིདིསཾ པརཾ ཨཉྙཾ ཙིནྟཡེ ཀཔྤེཡྻ.

༡༤༥.

ཨུདཱརོ སོཔི ཝིཉྙེཡྻོ,

ཡཾ པསཏྠཝིསེསནཾ;

ཡཐཱ ཀཱིལཱ༹སརོ ལཱིལཱ-

ཧཱས [ཧཱསོ (ཀ.)] ཧེམངྒདཱདཡོ.

༡༤༥. ཨཔརམུདཱརཔྤཀཱརཾ དསྶེཏུམཱཧ ‘‘ཨུདཱརོ’’ཨིཙྩཱདི. ཡཾ པསཏྠཾ སིལཱགྷནཱིཡཾ ཝིསེསནཾ ཨུཔཱདིཡཏི, སོཔི ན པན ཡཐཱཝུཏྟོཝ ཨུདཱརོ ཝིཉྙེཡྻོ. ‘‘ཡཐེ’’ཏྱུདཱཧརཏི. ཀཱིལཱ༹ཡ ཀཱིལ༹ཏྠཾ སརོ, ལཱིལཱཡ ཡུཏྟོ ཧཱསོ, ཧེམཾ ཧེམམཡམངྒདནྟི སམཱསོ, ཏཾ ཨཱདི ཡེསནྟི བཱཧིརཏྠོ. ཨཱདིསདྡེན ཀུསུམདཱམམཎིམེཁལཱདཱིནཾ སངྒཧོ. ཨཡཾ ཏུ བནྡྷཕརུསགཱམྨཔརིཙྩཱགཱ སམྦྷཝཏི.

༡༤༥. ཨཉྙམཔི ཨུདཱརཾ དསྶེཏི ‘‘ཨུདཱརོ’’ཙྩཱདིནཱ. ཡཾ པསཏྠཝིསེསནཾ པསཾསནཱིཡཝིསེསནཾ ཧོཏི, སོཔི ཨུདཱརོཏི ཝིཉྙེཡྻོ. ‘‘ཡཐཱ’’ཏི ཏམུདཱཧརཏི. ཀཱིལཱ༹སརོ ཀཱིལཱ༹ཡ ཀཏོ སརོ. ལཱིལཱཧཱསོ ལཱིལཱཡ ཡུཏྟོ ཧཱསོ. ཧེམངྒདཱདཡོ སུཝཎྞཀེཡཱུརཱཨིཙྩཱདཡོཏི. ཀཱིལ༹ཏྠཱཡ སརོཏི ཙ, ལཱིལཱཡ ཡུཏྟོ ཧཱསོཏི ཙ, ཧེམཾ ཧེམམཡཾ ཨངྒདནྟི ཙ, ལཱིལཱཧཱསོ ཙ ཧེམངྒདཉྩཱཏི ཙ, ཏཱནི ཨཱདཱིནི ཡེསཾ ཀུསུམདཱམམཎིམེཁལཱདཱིནནྟི ཙ ཝིགྒཧོ. ཨཡམུདཱརོ བནྡྷཕརུསགཱམྨཱདིདོསཔརིཙྩཱགེན སིཛ྄ཛྷཏི.

༡༤༦.

ལོཀིཡཏྠཱནཏིཀྐནྟཱ,

¶ ཀནྟཱ སབྦཛནཱནཔི;

ཀནྟི ནཱམཱ’ཏིཝུཏྟསྶ,

ཝུཏྟཱ སཱ པརིཧཱརཏོ.

ཡཐཱ ‘‘མུནིནྡ’’ཨིཙྩཱདི.

༡༤༦. ཀནྟིཾ ཀཐཡཏི ‘‘ལོཀིཡི’’ཙྩཱདིནཱ. ལོཀེ ཝིདིཏོ ལོཀིཡོ, ཏཾ ལོཀིཡཾ ཨཏྠཾ ཨབྷིདྷེཡྻཾ ཨནཏིཀྐནྟཱ ཨནཏཱིཏཱ སབྦེསཾ ཀཝཱིནམིཏརེསཾ ཝཱ ཛནཱནཾ ཨེཝ ཀནྟཱ མནོཧརཱ ཀནྟི ནཱམཱཏི ཝུཙྩཏི. ཨཡཾ པན སདྡགུཎོ ཨཏིཝུཏྟསྶ ཝཱཀྱདོསསྶ པརིཙྩཱགེན སམྦྷཝཏི. ཏེནཱཧ ‘‘ཨཏིཝུཏྟསྶཱ’’ཏིཨཱདི. ཨུདཱཧརཎཏྠོ ཧེཊྛཱ ཝུཏྟོཡེཝ.

༡༤༦. ཨིདཱནི ཀནྟིཾ དསྶེཏི ‘‘ལོཀིཡི’’ཙྩཱདིནཱ. ལོཀིཡཏྠཱནཏིཀྐནྟཱ ལོཀེ པསིདྡྷསདྡཏྠམནཏིཀྐནྟཱ སབྦཛནཱནཾ སཀལཀཝཱིནཾ ཀནྟཱ མནུཉྙཱ ཀནྟི ནཱམ ཝུཙྩཏེ, སཱ ཨཏིཝུཏྟསྶ ཨཏིཝུཏྟདོསསྶ པརིཧཱརཏོ ཝུཏྟཱ དོསཔརིཧཱརཔརིཙྪེདེ ཀཐིཏཱ ཧོཏི. ཨཏིཝུཏྟདོསཔརིཧཱརཏོ ཨེཝ ཀནྟིཡཱ སིདྡྷཏྟཱ ཏསྶ ལཀྑིཡོ ཨེཝ ཨེཏིསྶཱ ཧོཏཱིཏི ཨདྷིཔྤཱཡོ. ལོཀེ ཝིདིཏོཏི ཙ, སོ ཙ སོ ཨཏྠོ ཙེཏི ཙ ཝིགྒཧོ. ‘‘ཡཐཱ’’ཏི ཀནྟིཡཱ ཨུདཱཧརཎཾ དསྶེཏི ‘‘མུནིནྡ’’ཨིཙྩཱདི. ཏཾ ཝུཏྟམེཝ.

༡༤༧.

ཨཏྠབྱཏྟཱ’བྷིདྷེཡྻསྶཱ-

ནེཡྻཏཱ སདྡཏོ’ཏྠཏོ;

སཱ’ཡཾ ཏདུབྷཡཱ ནེཡྻ-

པརིཧཱརེ པདསྶིཏཱ.

ཡཐཱ ‘‘མརཱིཙི’’ཙྩཱདི ཙ, ‘‘མནོནུརཉྫནོ’’ཙྩཱདི ཙ.

༡༤༧. ཨཏྠབྱཏྟིཾ ¶ བྱཉྫཡཏི ‘‘ཨཏྠབྱཏྟཱབྷིདྷེཡྻི’’ཙྩཱདིནཱ. ཨབྷིདྷེཡྻསྶ སམྦནྡྷཨཏྠསྶ སདྡཏོ ཨཏྠཏོ ཝཱ སཱམཏྠིཡཏོ ཝཱ ཨནེཡྻཏཱ པཏཱིཏི ཨཉྙཐཱ ཝགམོ གཏྱནྟརཱབྷཱཝཱ, ཡཏོ ཝུཏྟཾ ‘‘དུལླབྷཱཝགཏཱི སདྡ-སཱམཏྠིཡཝིལངྒྷིནཱི’’ཏི. ཏམནུཝདིཏྭཱ ཨཏྠབྱཏྟི ཝིདྷཱིཡཏེ. སཱ པན བྱཱཀིཎྞནེཡྻཱདིདོསཝཛྫནཱཡ ཛཱཡཏེ. ཏདུབྷཡཱ ཛཱཏཱ སཱཡཾ ཨནེཡྻཏཱ ནེཡྻཔརིཧཱརེ པདསྶིཏཱ པཀཱསིཏཱ. པཋམདུཏིཡོདཱཧརཎསྶཏྠོ ཝུཏྟོ.

༡༤༧. ཨིདཱནི ཨཏྠབྱཏྟིཾ དསྶེཏི ‘‘ཨཏྠབྱཏྟི’’ཙྩཱདིནཱ. ཨབྷིདྷེཡྻསྶ ཨཏྠསྶ སདྡཏོ ཨཏྠཏོ ཨཏྠསཱམཏྠིཡཏོ ཙ ཨནེཡྻཏཱ ཏཏྠེཝ ཝིཛྫམཱནཏྟཱ སདྡསྶ ཨཏྠསྶ ཝཱ ཨཱཧརིཏྭཱ ཝཏྟབྦསྶ ཨབྷཱཝོ ཨཏྠབྱཏྟི ནཱམ, ཏདུབྷཡཱ ཏེཧི དྭཱིཧི ཛཱཏཱ སཱ ཨཡཾ ཨནེཡྻཏཱསངྑཏཱ ཨཏྠབྱཏྟི ནེཡྻཔརིཧཱརེ ནེཡྻདོསཔརིཧཱརཔདེསེ པདསྶིཏཱ པཀཱསིཏཱཏི. ‘‘དུལླབྷཱཝགཏཱི སདྡ-སཱམཏྠིཡཝིལངྒྷིནཱི’’ཏི ཝུཏྟཏྟཱ ཨཏྠཔཏཱིཏི པན ཝིནཱ སདྡཉྩ སཱམཏྠིཡཉྩ ཨཉྙཐཱནུཔལབྦྷཏཱིཏི ཨིཧ ‘‘སདྡཏོ ཨཏྠཏོ’’ཏི ཝུཏྟཾ. ཨཏྠསྶ བྱཏྟི པཏཱིཏཱིཏི ཙ, ནཏྠི ནེཡྻཾ ཨཱཧརིཏབྦཾ ཨསྶ ཨབྷིདྷེཡྻསྶཱཏི ཙ, ཏསྶ བྷཱཝོཏི ཙ, ཏེ ཙ ཏེ ཨུབྷོ སདྡཏྠཱ ཙཱཏི ཙ, ཏེ ཨཝཡཝཱ ཨེཏིསྶཱཏི ཙ, ནེཡྻསྶ པརིཧཱརོཏི ཙ ཝཱཀྱཾ. ཨིདཱནི ‘‘ཡཐེ’’ཙྩཱདིནཱ དྭིཔྤཀཱརཱཡ ཨཏྠབྱཏྟིཡཱ ཡཐཱཀྐམཾ ཨུདཱཧརཎམནུསྶཱརེཏི ‘‘མརི’’ཙྩཱདིགཱཐཱདྭཡེན, ཏཾ ཧེཊྛཱ ཝུཏྟམེཝ.

པུན ཨཏྠེན ཡཐཱ –

༡༤༨.

སབྷཱཝཱམལཏཱ དྷཱིར,

མུདྷཱ པཱདནཁེསུ ཏེ;

ཡཏོ ཏེ’ཝནཏཱནནྟ-

མོལི༹ཙྪཱཡཱ ཛཧནྟི ནོ.

༡༤༨. པུན ¶ དུཏིཡེ ཏུ དྷཱིརཱཏི ཨཱམནྟནཾ. ཏེ ཏཝ པཱདནཁེསུ སབྷཱཝཱམལཏཱ པཀཏིཔརིསུདྡྷཏཱ མུདྷཱ ཏུཙྪཱ. ཀསྨཱཏི ཙེ? ཡཏོ ཡསྨཱ ཀཱརཎཱ ཏེ པཱདནཁཱ ཨཝནཏསྶ སནྣཏསྶ ཨནནྟསྶ ནཱགརཱཛསྶ མོལི༹ནོ ཀིརཱིཊསྶ ཨཝནཏཱནཾ ཝཱ ནརམརཱནཾ ཨནནྟཱནཾ མོལཱི༹ནཾ ཚཱཡཱ ཚཝིཡོ ནོ ཛཧནྟི ན པརིཙྩཛནྟི, སཉྪཝིཡོ པན ཛཧནྟཱིཏི. ཨེཏྠ ནཁེསུ སཉྪཝིཏྟཱ པཱདནཁསྶ མོལཱི༹ནཾ ནིརནྟརཔྤཎཱམཱབྱབྷིཙཱརཱནརམརཱདཱིནཾ བྷགཝཏོ པཱདཱརཝིནྡཝནྡནཾ སཱམཏྠིཡཱ ཕུཊཾ གམྱཏེ.

༡༤༨. ‘‘པུན ཨཏྠེན ཡཐཱ སབྷཱཝི’’ཙྩཱདི. དྷཱིར ཏེ ཏཝ པཱདནཁེསུ སབྷཱཝཱམལཏཱ པཀཏིཔརིསུདྡྷཏཱ མུདྷཱ ཏུཙྪཱ. ཀསྨཱཏི ཙེ? ཡཏོ ཡསྨཱ ཏེ ཙརཎནཁཱ ཨཝནཏཱནནྟམོལི༹ཙྪཱཡཱ པཱདཱནཏསྶ ཨནནྟནཱགརཱཛསྶ ཀིརཱིཊསྶ སམྦནྡྷིནཱི, ཨཝནཏཱནཾ ཝཱ ཨནནྟཱནཾ དེཝམནུསྶཱནཾ མོལཱི༹ནཾ ཚཱཡཱ ཀནྟིཡོ ནོ ཛཧནྟི ན ཝིཛཧནྟི, པཀཏིཝཎྞཾ པཧཱཡ ཀིརཱིཊཀནྟིསདིསཱ ཏེ ཧོནྟི, ཏསྨཱ ཨེཏྠ ཙནྡཀིརཎསནྣིབྷཱནཾ ནཁརཾསཱིནཾ སམཱིཔེ མོལཱི༹ནཾ ནཁརཾསཱིཧི ཨམདྡིཏསཀཀནྟིཡུཏྟབྷཱཝམཱཔཛྫནཾ ཏཱདིསཱནཾ ནིརནྟརཔྤཎཱམཱབྷཱཝཱབྷཱཝཏོ ཁཏྟིཡཱདཱིནཾ མུནིནྡཔཱདཱརཝིནྡདྭནྡེ ནིརནྟརཔྤཎཱམོ སཱམཏྠིཡཱ ཝིབྷཱུཏཾ གམྱཏེ. སསྶ བྷཱཝོཏི ཙ, ཏེན ཨམལཱཏི ཙ, ཏེསཾ བྷཱཝོཏི ཙ, པཋམཔཀྑེ ཨཝནཏོ ཙ སོ ཨནནྟོ ཙཱཏི ཙ, ཏསྶ མོལཱི༹ཏི ཙ, ཏསྶ ཚཱཡཱཡོཏི ཙ, དུཏིཡཔཀྑེ ཨནནྟཱ ཙ ཏེ མོལཱི༹ ཙེཏི ཙ, ཨཝནཏཱནཾ ཨནནྟམོལཱི༹ཏི ཙ, ཏེསཾ ཚཱཡཱཡོཏི ཙ ཝཱཀྱཾ.

༡༤༩.

‘‘བནྡྷསཱརོ’’ཏི མཉྙནྟི, ཡཾ སམགྒཱཔི ཝིཉྙུནོ;

དསྶནཱཝསརཾ པཏྟོ, སམཱདྷི ནཱམ’ཡཾ གུཎོ.

༡༤༩. སམཱདྷིཕལཾ ཀིཙྩཱཧ ‘‘བནྡྷེ’’ཙྩཱདི. ཡནྟི ཡཾ སམཱདྷིཾ བནྡྷསྶ གཛྫཔཛྫམིསྶབྷཱཝསྶ སཱརོཏི སབྦསྶ ཛཱིཝིཏཾ ¶ ཏཔྤརཱཡཏྟཱ བནྡྷསྶ སམགྒཱཔི ཝིཉྙུནོ སབྦེཔི ཀཝིནོ མཉྙནྟི ཙིནྟེནྟི ཛཱནནྟི, ཨཡཾ སམཱདྷི ནཱམ སམཱདྷིཁྱོ གུཎོ དསྶནེ པཀཱསནེ ཨཝསརཾ ཨོཀཱསཾ ཨནོཏྟརཏྟཱ པརསྶ སམྤཏྟོ ཨུདྡིཊྛཱནུཀྐམེནཱཏི.

༡༤༩. ཨིདཱནི སམཱདྷཡོ ནིདྡིསཏི ‘‘བནྡྷི’’ཙྩཱདིནཱ. སམགྒཱ ཨཔི ཝིཉྙུནོ སབྦེཔི ཀཝཡོ ཡཾ སམཱདྷིཾ ‘‘བནྡྷསཱརོ’’ཏི པཛྫགཛྫཝིམིསྶསངྑཱཏསྶ བནྡྷསྶ ཛཱིཝིཏམིཏི མཉྙནྟི, ཨཡཾ སམཱདྷི ནཱམ གུཎོ དསྶནཱཝསརཾ པཏྟོ ཨུདྡིཊྛཱནུཀྐམེན དསྶནོཀཱསཾ པཏྟོ ཧོཏི. བནྡྷསྶ སཱརོཏི ཙ, དསྶནེ ཨཝསརནྟི ཙ, ཏཾ པཏྟོཏི ཙ ཝིགྒཧོ.

༡༥༠.

ཨཉྙདྷམྨོ ཏཏོ’ཉྙཏྠ,

ལོཀསཱིམཱནུརོདྷཏོ;

སམྨཱ ཨཱདྷཱིཡཏེ’ཙྩེ’སོ,

སམཱདྷཱིཏི ནིརུཙྩཏི.

༡༥༠. ཀཐམཡཾ སདྡཝོཧཱརོ བནྡྷེ ‘‘སམཱདྷཱི’’ཏི ཝུཙྩཏཱིཏྱཱཧ ‘‘ཨཉྙེ’’ཙྩཱདི. ཨཉྙསྶ ཝཏྠུནོ པཀཏཱཔེཀྑཱཡ དྷམྨོ གུཎོ པསིདྡྷོ, ཏཏོ ཏསྨཱ མུཁྱཝིསཡཱ ཨཉྙཏྠ ཨམུཁྱེ ཝིསཡེ ལོཀསཱིམཱནུརོདྷཏོ ལོཀཔྤཏཱིཏྱནུཝཏྟནེན སམྨཱ སཱདྷུ ལོཀསཱིམཱནུཝཏྟནམེཝེཧ སཱདྷུཏྟཾ ཨཱདྷཱིཡཏེ ཨཱརོཔྱཏེ, ཨིཏི ཨིམིནཱ ཀཱརཎེན ཨེསོ ཨེཝཾཝིདྷོ དྷམྨོ ‘‘སམཱདྷཱི’’ཏི ནིརུཙྩཏཱིཏིདྷ སམྨཱ ཨཱདྷཱིཡཏཱིཏི ཨེཝཾ ནཱིཧརིཏྭཱ ཝུཙྩཏཱིཏི ཨཏྠོ.

༡༥༠. ‘‘སམཱདྷཱི’’ཏི ཨཡཾ ཝོཧཱརོ བནྡྷཝིསཡེ ཀཐཾ པཝཏྟཏཱིཏི ཨཱསངྐཱཡཾ པཋམཾ ནིབྦཙནཾ དསྶེཏུཾ ཨཱཧ ‘‘ཨཉྙི’’ཙྩཱདི. ཡསྨཱ ཨཉྙདྷམྨོ སམཱདྷཱནསྶ ཝིསཡབྷཱུཏཨམུཁྱཏོ ཨཉྙསྶ མུཁྱཝཏྠུནོ པསིདྡྷགུཎོ, ཏཏོ ¶ མུཁྱཝིསཡཏོ ཨཉྙཏྠ ཨམུཁྱཝིསཡེ ལོཀསཱིམཱནུརོདྷཏོ ལོཀཝོཧཱརམརིཡཱདཱཝིརོདྷབྷཱཝེན ལོཀཔྤཏཱིཏྱནུཝཏྟནེནེཝ སམྨཱ ཨཱདྷཱིཡཏི ཋཔཱིཡཏི, ཨིཏི ཨིམིནཱ ཀཱརཎེན ཨེསོ ཡཐཱཝུཏྟགུཎོ ‘‘སམཱདྷཱི’’ཏི ནིརུཙྩཏི ཝུཙྩཏཱིཏི. ཨཉྙསྶ དྷམྨོཏི ཙ, ལོཀསྶ སཱིམཱཏི ཙ, ཏསྶཱ ཨནུརོདྷོཏི ཙ ཝིགྒཧོ.

སམཱདྷིཨུདྡེས

༡༥༡.

ཨཔཱཎེ པཱཎིནཾ དྷམྨོ, སམྨཱ ཨཱདྷཱིཡཏེ ཀྭཙི;

ནིརཱུཔེ རཱུཔཡུཏྟསྶ, ནིརསེ སརསསྶ ཙ.

༡༥༢.

ཨདྲཝེ དྲཝཡུཏྟསྶ, ཨཀཏྟརིཔི ཀཏྟུཏཱ;

ཀཋིནསྶཱ’སརཱིརེཔི, རཱུཔཾ ཏེསཾ ཀམཱ སིཡཱ.

༡༥༡-༡༥༢. སམཱདྷཱནཝིསཡམཱཧ ‘‘ཨཔཱཎེ’’ཨིཙྩཱདི. ཀྭཙི ཋཱནེ པཱཎིནཾ པཱཎཝནྟཱནཾ པདཏྠཱནཾ དྷམྨོ གུཎོ ཨཔཱཎེ པཱཎཝིརཧིཏེ ཝཏྠུནི སམྨཱ ལོཀཔཏཱིཏྱནུཝཏྟནེན ཨཱདྷཱིཡཏེ ཨཱརོཔྱཏེ, ཨེཝམུཔརིཔི ཡཐཱནུརཱུཔཾ. ནིརཱུཔེཏི རཱུཔཝིརཧིཏེ ཝཏྠུནི, ཀྭཙཱིཏི སབྦཏྠ ཨནུཝཏྟཏི. ཨསརཱིརེ ཨགྷནེ ཨསཾཧཏེ ཝཏྠུནི ཀཋིནསྶ དལ༹ྷསྶ, ཏེསཾ ཡཐཱཝུཏྟཱནཾ སམཱདྷཱིནཾ རཱུཔཾ ཨུདཱཧརཎཾ ཀམཱ ཨུདྡིཊྛཱནུཀྐམེན.

༡༥༡-༡༥༢. ཨུདྡེསེ ‘‘སམཱདྷཡོ’’ཏི བཧུཝཙནེན ནིདྡིཊྛཱནཾ སམཱདྷཱིནཾ ཝིསཡམུཔདསྶེཏི ‘‘ཨཔཱཎེ’’ཙྩཱདིནཱ. ཀྭཙི ཀིསྨིཉྩི ཋཱནེ པཱཎིནཾ དྷམྨོ ཨིནྡྲིཡབདྡྷཱནཾ གུཎོ ཨཔཱཎེ པཱཎརཧིཏཝཏྠུམྷི སམྨཱ ལོཀཔཏཱིཏིཨནུསཱརེན ཨཱདྷཱིཡཏེ ཨཱརོཔྱཏེ, ཀྭཙི རཱུཔཡུཏྟསྶ རཱུཔཝནྟཝཏྠུནོ དྷམྨོ ནིརཱུཔེ རཱུཔརཧིཏཝཏྠུམྷི, ཀྭཙི སརསསྶ རསཝནྟསྶ ཝཏྠུནོ དྷམྨོ ནིརསེ རསརཧིཏེ ཙ, ཀྭཙི དྲཝཡུཏྟསྶ དྲཝཝནྟཝཏྠུནོ དྷམྨོ ཨདྲཝེ དྲཝརཧིཏེ ཙ, ¶ ཀྭཙི ཀཏྟུཏཱ ཀཏྟུགུཎོ ཨཀཏྟརིཔི, ཀྭཙི ཀཋིནསྶ ཐདྡྷསྶ ཝཏྠུནོ དྷམྨོ ཨསརཱིརེཔི སརཱིརརཧིཏེཔི སམྨཱ ཨཱདྷཱིཡཏེ. ཏེསཾ ཚནྣཾ སམཱདྷཱིནཾ རཱུཔཾ ཨུདཱཧརཎཾ ཀམཱ ‘‘ཨཔཱཎེ པཱཎིན’’ནྟི ཨུདྡིཊྛཱནུཀྐམེན སིཡཱ བྷཝེཡྻཱཏི. ན སནྟི པཱཎཱ ཨསྶེཏི ཙ, རཱུཔཱ ནིགྒཏོཏི ཙ, རཱུཔེན ཡུཏྟོཏི ཙ, རསཱ ནིགྒཏོཏི ཙ, རསེན སཧ ཝཏྟམཱནོཏི ཙ, དྲཝཱཨཉྙོཏི ཙ, དྲཝེན དྲཝབྷཱཝེན ཡུཏྟོཏི ཙ, ཀཏྟུཏོ ཨཉྙོཏི ཙ, ཀཏྟུནོ བྷཱཝོཏི ཙ, ནཏྠི སརཱིརཾ ཨསྶཱཏི ཙ ཝིགྒཧོ.

སམཱདྷིནིདྡེས

ཨཔཱཎེ པཱཎིནཾ དྷམྨོ

༡༥༣.

ཨུཎྞཱཔུཎྞིནྡུནཱ ནཱཐ, དིཝཱཔི སཧ སངྒམཱ;

ཝིནིདྡཱ སམྤམོདནྟི, མཉྙེ ཀུམུདིནཱི ཏཝ.

༡༥༣. ‘‘ཨུཎྞཱ’’ཨིཙྩཱདི. ནཱཐཱཏི ལོཀཏྟཡེཀཔཊིསརཎབྷཱུཏཏཱཡ བྷགཝནྟཾ ཨཱལཔཏི. ཏཝ ཨུཎྞཱརོམདྷཱཏུསངྑཱཏེན པུཎྞིནྡུནཱ སཧ སངྒམཱ སཾཡོགེན ཀུམུདིནཱི ཀུམུདིནིཡོ ཀུམུདཱཀརཱ དིཝཱཔི ཝིནིདྡཱ ཝིགཏསོཔྤཱ སམྤམོདནྟི མཉྙེ སུཊྛུཡེཝ པམོདནྟཱིཏི པརིཀཔྤེམཱིཏི. ཨེཏྠ པཱཎིདྷམྨསྶ སུརཏརཱུཔསྶ སངྒམསྶ ཝིནིདྡཱཡ སམྤཱིཎནསྶ ཙ ཨཔཱཎིནི ཨཱརོཔིཏཔུམྦྷཱཝེ ཨུཎྞཱཔུཎྞིནྡུམྷི, ཏཐཱ ཨཱརོཔིཏཨིཏྠིབྷཱཝཱསུ ཀུམུདིནཱིསུ ལོཀསཱིམཱནུརོདྷེན སམཱདྷཱནཏོ སོཡཾ པསིདྡྷོ དྷམྨོ ‘‘སམཱདྷཱི’’ཏི ཝུཙྩཏི. ཏདབྷིདྷཱཡཱི སདྡོ ཙ ཨུཔཙཱརཏོ ཨཏྠཱནུགཱམིཏྟཱ སདྡིཀཝོཧཱརཾ དསྶེཏི, ཨེཝམུཔརིཔི ཡཐཱཡོགཾ.

༡༥༣. ཏེསུ པཱཎིདྷམྨསམཱདྷིནོ ཨུདཱཧརཎམཱདིསཏི ‘‘ཨུཎྞཱ’’ཨིཙྩཱདིནཱ. ནཱཐ ཏཝ ཏུཡ྄ཧཾ ཨུཎྞཱཔུཎྞིནྡུནཱ ཨུཎྞཱརོམམཎྜལསངྑཱཏཔུཎྞཙནྡེན སཧ སངྒམཱ ཨཉྙམཉྙསམཝཱཡཧེཏུནཱ ཀུམུདིནཱི ཀེརཝཱཀརསངྑཱཏཱ ཀུམུདིནིཡོ དིཝཱཔི ¶ ཝིནིདྡཱ ཝིཀསིཏཱ སམྤམོདནྟི མཉྙེ ཨཏིསནྟུཊྛཱ ཧོནྟཱིཏི ཀཔྤེམཱིཏི ཨིནྡུསམྤམོདོ སཧསདྡེན ཉཱཡཏེ. ཨེཏྠ པཱཎིདྷམྨསངྑཱཏོ སུརཏསངྒམོ ཙ ནིདྡཱཔགམོ ཙ སམྤམོདནཉྩཱཏི ཏིཎྞཾ ཨུཎྞཱཔུཎྞིནྡུཀུམུདིནཱིསངྑཱཏེསུ ཨཔཱཎེསུ ལོཀཝོཧཱརཱནཏིཀྐམྨ བུདྡྷིཡཱ ཨཱརོཔནེན པཱཎིདྷམྨཏོ པསིདྡྷཱ ཏཡོ ཨཏྠཱ ཨིདྷ སམཱདྷཡོ ནཱམ, ཏཔྤཊིཔཱདཀགནྠོཔི ཨཏྠཱནུགཱམིཏྟཱ ཏདུཔཙཱརེན སམཱདྷཱིཏི དཊྛབྦོ. པུཎྞོ ཙ སོ ཨིནྡུ ཙེཏི ཙ, ཨུཎྞཱ ཨེཝ པུཎྞིནྡུ ཙཱཏི ཙ, ཝིགཏཱ ནིདྡཱ ཡེཧཱིཏི ཙ ཝིགྒཧོ.

ནིརཱུཔེ རཱུཔཡུཏྟསྶ

༡༥༤.

དཡཱརསེསུ མུཛྫནྟཱ, ཛནཱ’མཏརསེསྭི’ཝ;

སུཁིཏཱ ཧཏདོསཱ ཏེ, ནཱཐ པཱདམྦུཛཱནཏཱ.

༡༥༤. ‘‘དཡཱ’’ཨིཙྩཱདི. ནཱཐ ཏེ པཱདམྦུཛེསུ ཨཱནཏཱ པཎཱམཝསེན ཛནཱ ཏིལོཀཀུཧརཔཝཏྟིནོ སཏྟཱ ཨམཏརསེསྭིཝ པཱིཡཱུསརསེསུ ཝིཡ དཡཱརསེསུ ཀརུཎཱརསེསུ གུཎེསུ. ‘‘སིངྒཱརཱདོ ཝིསེ ཝཱིརིཡེ, གུཎེ རཱགེ དྲཝེ རསོ’’ཏི [ཨམརཀོས ༣.༣.༢༢༦] ཧི ནིགྷཎྚུ. མུཛྫནྟཱ ནིམུཛྫམཱནཱ ཧཏཱ ནཊྛཱ དོསཱ ཝཱཏཱདཡོ ཨམཏཔཀྑེ, ཨཉྙཏྠ ཏུ ཧཏཱ ནཊྛཱ དོསཱ རཱགཱདཡོ ཡེསནྟི ཝིགྒཧོ, ཏཏོཡེཝ སུཁིཏཱ སུཁཾ ཀཱཡིཀཙེཏསིཀསུཁཾ ཨིཏཱ པཏྟཱ གཏཱཏི ཨཏྠོ.

༡༥༤. ཨིདཱནི རཱུཔདྷམྨསམཱདྷིནོ ཨུདཱཧརཎཾ ཨུདྡིསཏི ‘‘དཡཱ’’ཨིཙྩཱདིནཱ. ནཱཐ ཏེ ཏཝ པཱདམྦུཛཱནཏཱ ཙརཎཔདུམེ པཎཏཱ ཛནཱ དེཝམནུསྶཱ ཨམཏརསེསུ ཨིཝ སུདྷཱཛལེསུ ཝིཡ དཡཱརསེསུ ཨནཉྙསཱདྷཱརཎཀརུཎཱགུཎེསུ མུཛྫནྟཱ ནིམུཛྫམཱནཱ ཧཏདོསཱ ཝིནཊྛཝཱཏཔིཏྟཱདཡོ ཝིནཊྛརཱགཱདིདོསཱ ཝཱ སུཁིཏཱ ཏཏོཡེཝ ཨཛརཱམརསངྑཱཏསུཁཾ ¶ ཨིཏཱ པཏྟཱཏི. ཨེཏྠ རཱུཔཡུཏྟཛལེ ལབྦྷམཱནཾ མུཛྫནཾ ནིརཱུཔེ དཡཱགུཎེ ཨཱརོཔིཏཾ ཧོཏི. དཡཱ ཨེཝ རསཱ གུཎཱཏི ཙ, ཨམཏཱ ཨེཝ རསཱཏི ཙ, ཧཏཱ ཝཱཏཱདཡོ རཱགཱདཡོ ཝཱ དོསཱ ཡེསནྟི ཙ, པཱདཱནི ཨེཝ ཨམྦུཛཱནཱིཏི ཙ, ཏེསུ ཨཱནཏཱཏི ཙ ཝིགྒཧོ.

‘‘སིངྒཱརཱདོཝིསེ ཝཱིརིཡེ, གུཎེ རཱགེ དྲཝེརསོ’’ཏི [ཨམརཀོས ༣.༣.༢༢༦] ཨེཏྠ རསསདྡོ གུཎཛལེསུ ཝཏྟཏི.

ནིརསེ སརསསྶ

༡༥༥.

མདྷུརེཔི གུཎེ དྷཱིར, ནཔྤསཱིདནྟི ཡེ ཏཝ;

ཀཱིདིསཱིམནསོ ཝུཏྟི, ཏེསཾ ཁཱརགུཎཱནབྷོ [ཧེ (སཱི.)].

༡༥༥. ‘‘མདྷུརེ’’ཙྩཱདི. དྷིཡཱ ཨཱིརཏཱིཏི དྷཱིརོ, བྷོ དྷཱིར ཏཝ མདྷུརེཔི མནོཧརེཔི གུཎེ ཀརུཎཱདིཀེ ཡེ ནཔྤསཱིདནྟི པསཱདཾ ན ཀརོནྟི, ཁཱརགུཎཱནཾ ཨམདྷུརགུཎཱནཾ ཏེསཾ ཛནཱནཾ མནསོ ཝུཏྟི ཙིཏྟཔྤཝཏྟི ཀཱིདིསཱིཏི ཀིམིཝ དིསྶཏི, ན ཝིཉྙཱཡཏེ ‘‘ཨཱིདིསཱི’’ཏི. ཡཏོ ཏཱདིསགུཎཱཝབོདྷཔརམྨུཁཱ མོཧནྡྷཀཱརསམྦནྡྷིཏཱཏི.

༡༥༥. ཨིདཱནི སརསདྷམྨསམཱདྷིནོ ཨུདཱཧརཎམུདྡིསཏི ‘‘མདྷུརི’’ཙྩཱདིནཱ. བྷོ དྷཱིར ཏཝ ཏེ མདྷུརེ ཨཔི གུཎེ པཀཏིསུནྡརེ ཀརུཎཱཔཉྙཱགུཎེཔི ཡེ ཧཱིནཱདྷིམུཏྟིཀཱ ཛནཱ ནཔྤསཱིདནྟི, ཁཱརགུཎཱནཾ ཨམདྷུརགུཎཱནཾ ཏེསཾ ཛནཱནཾ མནསོ ཝུཏྟི ཙིཏྟཔྤཝཏྟི ཀཱིདིསཱི ཀཐཾ རུཧཏི. དྷིཡཱ ཨཱིརཏི པཝཏྟཏཱིཏི ཙ, ཀཱ ཝིཡ སཱ དིསྶཏཱིཏི ཙ, ཁཱརཱ གུཎཱ ཡེསནྟི ཙ ཝིགྒཧོ. ཨེཏྠ སམཱདྷི ནཱམ རསཧཱིནེ ཨཱརོཔིཏརསཡུཏྟདྷམྨབྷཱུཏཾ མདྷུརཁཱརགུཎདྭཡཾ.

ཨདྲཝེ དྲཝཡུཏྟསྶ

༡༥༦.

སབྦཏྠསིདྡྷ ¶ ཙཱུལ༹ཀ-པུཊཔེཡྻཱ མཧཱགུཎཱ;

དིསཱ སམནྟཱ དྷཱཝནྟི, ཀུནྡསོབྷཱསལཀྑཎཱ.

༡༥༦. ‘‘སབྦཏྠསིདྡྷི’’ཙྩཱདི. སབྦཏྠསིདྡྷསྶ མཧཱམུནིནོ ཙཱུལ༹ཀཔུཊེན པེཡྻཱ པཱཏབྦཱ ཀུནྡསོབྷཱསལཀྑཎཱ ཀུནྡཀུསུམསྶ སོབྷཱསཝནྟཱ ཛུཏིཝིཛམྦྷིནོ མཧཱགུཎཱ སམནྟཱ པརིཏོ དིསཱ དིསནྟཱནི དྷཱཝནྟི.

༡༥༦. ཨིདཱནི དྲཝཡུཏྟསམཱདྷིནོ ཨུདཱཧརཎམུདྡིསཏི ‘‘སབྦཏྠི’’ཙྩཱདིནཱ. སབྦཏྠསིདྡྷ སབྦཀིཙྩེ པརིནིཔྥནྣ, ནིཔྥནྣེཧི སབྦཏྠེཧི ཝཱ སམནྣཱགཏ ཧེ ཏཐཱགཏ ཏཝ ཙཱུལ༹ཀཔུཊཔེཡྻཱ ཙཱུལ༹ཀཔུཊེན པཱཏབྦཱ ཀུནྡསོབྷཱསལཀྑཎཱ ཀུནྡསོབྷཱཧི སམཱནལཀྑཎཱ ཀུནྡསོབྷཱསདིསཱ ཝཱ མཧཱགུཎཱ སངྑྱཱམཧནྟཏྟཱ ཨཱནུབྷཱཝམཧནྟཏྟཱ ཝཱ མཧནྟཱ ཝཱ ཨརཧཏྟཱདཡོ གུཎཱ སམནྟཱ སམནྟཏོ དིསཱ དསདིསཱསུ དྷཱཝནྟཱིཏི. ཨེཏྠ དྲཝཡུཏྟགུཎབྷཱུཏོ ཙཱུལ༹ཀཔུཊཔེཡྻབྷཱཝོ དྲཝརཧིཏེ གུཎེ ཨཱརོཔིཏོ སམཱདྷི ནཱམ ཧོཏི. སབྦེ ཙ ཏེ ཨཏྠཱ ཙེཏི ཙ, ཏེ སིདྡྷཱ ཡསྶེཏི ཙ, ཙཱུལ༹ཀམེཝ པུཊམིཏི ཙ, ཏེན པེཡྻཱཏི ཙ, མཧནྟཱ ཙ ཏེ གུཎཱ ཙེཏི ཙ, ཀུནྡཱནཾ སོབྷཱཏི ཙ, ཏཱཧི སམཱནཾ ལཀྑཎཾ ཡེསནྟི ཙ ཝིགྒཧོ.

ཨཀཏྟརི ཀཏྟུཏཱ

༡༥༧.

མཱརཱརིབལཝིསྶཊྛཱ, ཀུཎྛཱ ནཱནཱཝིདྷཱ’ཡུདྷཱ;

ལཛྫམཱནཱ’ཉྙཝེསེན, ཛིན པཱདཱནཏཱ ཏཝ.

༡༥༧. ‘‘མཱརཱ’’ཨིཙྩཱདི. མཱརོཡེཝ ཨརི སཏྟཱུཏི མཱརཱརཱི, ཏེན, བལེན ཨཏྟནོ སཏྟིཡཱ, ཏསྶ ཝཱ བལེན སེནཱཡ ཝིསྶཊྛཱ ཨབྷིམུཁཾ ཚཌྜིཏཱ ནཱནཱཝིདྷཱ ཨནེཀཔྤཀཱརཱ ¶ ཨཱཡུདྷཱ བྷིནྡིཝཱལཱ༹དཡོ ཀུཎྛཱ [བྷེཎྜིཝཱལཱདཡོ (ཀ.)] པརིཙྩཏྟཏིཁིཎབྷཱཝཱ ཏཱཡེཝ ཀུཎྛབྷཱཝཔྤཏྟིཡཱ ལཛྫམཱནཱ ‘‘ལོཀཔྤཏཱིཏཱནུབྷཱཝཱནམམྷཱཀམྤི ཨེཝརཱུཔཾ ཛཱཏ’’ནྟི ལཛྫནྟཱ ཨཉྙཝེསེན ‘‘ཀཐཾ ནཱམ པརེ ཨམྷེ ན ཛཱནེཡྻུ’’ནྟི ཨཏྟནོ ཨཱཝུདྷཝེསཾ པརིཝཏྟིཏྭཱ ཀུསུམཝེསེན, ཛིནཱཏི ཨཱམནྟནཾ, ཏཝ པཱདཱནཏཱ པཱདེསུ སནྣཏཱ.

༡༥༧. ཨིདཱནི ཀཏྟུདྷམྨསམཱདྷིནོ ཨུདཱཧརཎམུདྡིསཏི ‘‘མཱརཱརི’’ཙྩཱདིནཱ. ཧེ ཛིན མཱརཱརིབལཝིསྶཊྛཱ མཱརསཏྟུནཱ ཨཏྟནོ སཏྟིཡཱ ཝིསྶཊྛཱ, མཱརཱརིནོ ཝཱ སེནཱཡ ཝིསྶཊྛཱ ཨབྷིམུཁེ པཱཏིཏཱ ནཱནཱཝིདྷཱཡུདྷཱ ཨནེཀཔྤཀཱརབྷིནྡིཝཱལ༹ཨུསུསཏྟིཏོམརཱདཡོ ཨཱཝུདྷཱ ཀུཎྛཱ ཨཏིཁིཎཱ ལཛྫམཱནཱ ‘‘ཀསྨཱ ཨེཝཾ ལོཀཔསིདྡྷཱནུབྷཱཝཱནམམྷཱཀམྤི ཨཱིདིསཾ ཝིཔྤཀཱརམཧོསཱི’’ཏི ལཛྫནྟཱ ཨཉྙཝེསེན ‘‘ཀཐམམྷེ པརེ ན ཛཱནེཡྻུ’’ནྟི ཨཱཝུདྷཝེསཾ ཧིཏྭཱ ཏདཉྙབྷཱུཏེན པུཔྥཝེསེན ཏཝ པཱདཱནཏཱ པཱདསམཱིཔེ ནཏཱ ཨཧེསུནྟི. ཨེཏྠ ཀཏྟུདྷམྨབྷཱུཏཾ ལཛྫནཉྩ ཨཉྙཝེསེན པརིཝཏྟནཉྩ ཨཱནཏཉྩེཏི ཨིམེ ལཛྫནཱདཱིནཾ ཨཀཏྟུབྷཱུཏེསུ ཝིསཡེསུ ཨཱརོཔིཏཱ སམཱདྷཡོ ནཱམ ཧོནྟི. མཱརོ ཨེཝ ཨརཱིཏི ཙ, བལེན ཝིསྶཊྛཱཏི ཙ, མཱརཱརིནཱ བལཝིསྶཊྛཱཏི ཙ མཱརཱརིནོ བལཾ སེནཱཏི ཙ, ཏེན ཝིསྶཊྛཱཏི ཙ, ནཱནཱ ཨནེཀཝིདྷཱ པཀཱརཱ ཡེསནྟི ཙ, ཨཉྙེསཾ ཝེསོཏི ཙ, ཨཉྙོ ཙ སོ ཝེསོ ཙཱཏི ཙ, པཱདེསུ ཨཱནཏཱཏི ཙ ཝིགྒཧོ.

ཀཋིནསྶ ཨསརཱིརེ

༡༥༨.

མུནིནྡབྷཱཎུམཱ ཀཱལོ-

དིཏོ བོདྷོདཡཱཙལེ;

སདྡྷམྨརཾསིནཱ བྷཱཏི,

ཨིནྡམནྡྷཏམཾ པརཾ.

༡༥༨. ‘‘མུནིནྡ’’ཨིཙྩཱདི. ¶ བོདྷོ སབྦཉྙུཏཉྙཱཎསདིསོ སོཡེཝ ཝཱ ཨུདཡཱཙལོ ཨུདཡཔབྦཏོ ཏསྨིཾ ཀཱལེ རཏྟིཔརིཡནྟེ ཨབྷིནིཀྑནྟསམཡེ ཨུདིཏོ པཱཏུབྷཱུཏོ མུནིནྡོ མུནིནྡསདིསོ སོཡེཝ ཝཱ བྷཱཎུམཱ སཱུརིཡོ ཨནྡྷཏམཾ ཨནྡྷཀཱརཾ མོཧཾ ཝཱ པརཾ ཨཙྩནྟམེཝ སདྡྷམྨརཾསིནཱ སདྡྷམྨསདིསེན སདྡྷམྨསངྑཏེན ཝཱ རཾསིནཱ བྷིནྡཾ པདཱལེནྟོ བྷཱཏི སོབྷཏཱིཏི.

༡༥༨. ཨིདཱནི ཀཋིནདྷམྨསམཱདྷིནོ ཨུདཱཧརཎམུདྡིསཏི ‘‘མུནིནྡི’’ཙྩཱདིནཱ. བོདྷོདཡཱཙལེ སབྦཉྙུཏཉྙཱཎསདིསེ སབྦཉྙུཏཉྙཱཎསངྑཱཏེ ཝཱ ཨུདཡཔབྦཏེ ཀཱལོདིཏོ རཏྟིཀྑཡེ མཱརཔརཱཛིཏསམཡེ ཝཱ ཨུདིཏོ པཱཏུབྷཱུཏོ མུནིནྡབྷཱནུམཱ མུནིནྡསདིསོ མུནིནྡོཡེཝ ཝཱ སཱུརིཡོ ཨནྡྷཏམཾ པཀཏིགྷནནྡྷཀཱརཾ བཧལམོཧནྡྷཀཱརཾ སདྡྷམྨརཾསིནཱ སདྡྷམྨསདིསེན སདྡྷམྨབྷཱུཏེན ཝཱ ཀིརཎེན པརམཏིསཡེན བྷིནྡཾ པདཱལེནྟོ བྷཱཏི སོབྷཏཱིཏི. ཨེཏྠ ཐདྡྷདྷམྨབྷཱུཏཾ བྷེདནཾ ཨསརཱིརབྷཱུཏེ ཨནྡྷཀཱརེ བུདྡྷིཡཱ ཨཱརོཔིཏཾ སམཱདྷི ནཱམ ཧོཏི. མུནཱིནཾ ཨིནྡོཏི ཙ, སོཡེཝ བྷཱནུམཱཏི ཙ, བོདྷོ ཨེཝ ཨུདཡཱཙལོཏི ཙ, སདྡྷམྨོ ཨེཝ རཾསཱིཏི ཙ ཝིགྒཧོ.

༡༥༩.

ཝམནུགྒིརནཱདྱེ’ཏཾ, གུཎཝུཏྱཔརིཙྩུཏཾ;

ཨཏིསུནྡརམཉྙཾ ཏུ, ཀཱམཾ ཝིནྡཏི གཱམྨཏཾ.

༡༥༩. ཀོཙི དྷམྨོ ཨམུཁྱཝིསཡེ བནྡྷེ སོབྷཏེ, ན མུཁྱཝིསཡེཏི དསྶནྟོ ཨཱཧ ‘‘ཝམནཾ’’ཨིཙྩཱདི. ཝམནཉྩ ཨུགྒིརནཉྩ, ཨཱདིསདྡེན ཝིརེཙནཱདིཔརིགྒཧོ. ཨེཏཾ ཡཐཱཝུཏྟཾ གུཎཱ པདྷཱནེཏརཱ པསིདྡྷཝིསཡཱ ཝིསཡནྟརཔརིགྒཧལཀྑཎཱ ཝུཏྟི པཡོགརཱུཔཱ, ཏཏོ ཨཔརིཙྩུཏཾ ཨཔརིགལི༹ཏཾ སནྟཾ ཨམུཁྱབྷཱུཏཾ ཨཏིསུནྡརཾ ཨཙྩནྟམནོཧརམལངྐཱརརཱུཔཏྟཱ, ཨཉྙཾ ཏུ ཨིཏརཾ པན མུཁྱནྟི ཝུཏྟཾ ཧོཏི. ཀཱམཾ ཨེཀནྟེན ¶ གཱམྨཏཾ ཨསབྦྷསབྷཱཝཾ བནྡྷེ ཏསྶཱནུཙིཏབྷཱཝཏོ ཝིནྡཏི པཊིལབྷཏི པསཝཏཱིཏི ཨཏྠོ.

༡༥༩. ཨིདཱནི ཨིམེསུཡེཝ པཱཎིདྷམྨཱདཱིསུ ཀོཙི དྷམྨོ ཨམུཁྱཝིསཡེ པཡུཏྟོ པསཏྠོ, མུཁྱཝིསཡེ པཡུཏྟོ ཨཔསཏྠོཏི དསྶེནྟོ ‘‘ཝམནུགྒི’’ཙྩཱདིམཱཧ. ཨེཏཾ ཝམནུགྒིརནཱདི ཝམནཨུགྒིརནཝིརེཙནཱདིཀཾ གུཎཝུཏྱཔརིཙྩུཏཾ ཨམུཁྱཔཡོགཏོ ཨགལི༹ཏཾ ཨམུཁྱབྷཱུཏཾ ཨཏིསུནྡརཾ སབྦེསཾ ཨཏིཔིཡཾ ཧོཏི, ཨཉྙཾ ཏུ ཨུཏྟཏོ བྱཏིརེཀཾ མུཁྱཝིསཡེ པཡུཏྟཾ ཝམནུགྒིརནཱདིཀཾ པན ཀཱམཾ ཨེཀནྟེན གཱམྨཏཾ སབྷཱཝཨཔྤིཡགཱམྨདོསཏཾ ཝིནྡཏི སེཝཏཱིཏི. ཝམནཉྩ ཨུགྒིརནཉྩེཏི ཙ, ཏཱནི ཨཱདཱིནི ཡསྶེཏི ཙ, གུཎཱ ཨཔྤདྷཱནཱ ཝུཏྟཱིཏི ཙ, ཏཏོ ཨཔརིཙྩུཏནྟི ཙ ཝིགྒཧོ.

༡༦༠.

ཀནྟཱིནཾ ཝམནབྱཱཛཱ, མུནིཔཱདནཁཱཝལཱི;

ཙནྡཀནྟཱི པིཝནྟཱིཝ, ནིཔྤབྷཾ ཏཾ ཀརོནྟིཡོ.

༡༦༠. ཨུདཱཧརཏི ‘‘ཀནྟཱིན’’མིཙྩཱདི. མུནིནོ སམྨཱསམྦུདྡྷསྶ པཱདནཁཱནཾ ཨཱཝལཱི སེཎིཡོ ཀནྟཱིནཾ ཨཏྟནོ ནིརནྟརཾ ནིསྶརནྟཱིནཾ སོབྷཱཝིསེསཱནཾ ཝམནབྱཱཛཱ ཨུགྒིརནལེསེན ཙནྡཀནྟཱི ཙནྡཙྪཝིཡོ སབྦཏྠ པཏྠཊཏྟཱ པིཝནྟཱིཝ པཱནཾ ཀརོནྟཱིཏི ཏཀྐེམི. ཀཱིདིསཱི ཝིཡཱཏི པརིཀཔྤནཱབཱིཛམཱཧ ‘‘ནིཔྤབྷ’’ནྟིཨཱདི. ཏཾ ཙནྡཾ ནིཔྤབྷཾ པབྷཱཝིརཧིཏཾ ཀརོནྟིཡོ ཝིདཧམཱནཱ. ཨིདཉྷི ཀཔྤནཱབཱིཛཾ ཡཏོ ནཁསོབྷཱལིངྒནེན ཙནྡསྶ སོབྷཱཝཏོ ནིཔྤབྷཏྟཾ པསྶིཏྭཱ མཧཏྟཉྩ ཏསྶཱ ནཁཱཝལིཡོ ཙནྡཀནྟཱི པིཝནྟཱིཏི པརིཀཔྤེཏི ཀནྟཱིནཉྩ ཝམནབྱཱཛཾ.

༡༦༠. ཨིཊྛཝིསཡེ པཡུཏྟཝམནུགྒིརནཱདཱིནམུདཱཧརཎམུདྡིསཏི ‘‘ཀནྟཱིན’’མིཙྩཱདིནཱ. མུནིཔཱདནཁཱཝལཱི མུནིཔཱདནཁསེཎིཡོ ཀནྟཱིནཾ ཨཏྟནོ ཙནྡམརཱིཙིསདིསསོབྷཱནཾ ཝམནབྱཱཛཱ ཨུགྒིརནལེསེན ཏཾ ནིམྨལཙནྡཾ ནིཔྤབྷཾ ཀརོནྟིཡོ ཨཏྟནོ སབྦཏྠ པཏྠཊཏྟཱ ནིཔྤབྷཾ ཀརོནྟིཡོ ཙནྡཀནྟཱི ཙནྡརཾསིཡོ ¶ པིཝནྟི མཉྙེ. ནཁརཾསཱིནཾ སབྦཏྠ པཏྠཊཏྟཱ སཔྤབྷསྶཱཔི ཙནྡསྶ ནིཔྤབྷཏྟཉྩ ནཁརཾསཱིནཾ ཨདྷིཀཏྟཉྩ དིསྭཱ ཙནྡཀནྟཱི པིཝནྟི ཨིཝེཏི ནཁཱཝལཱིནཾ ཙནྡཀནྟིཔིཝནཉྩ སཀཀནྟིཝམནཉྩ པཀཏི ན ཧོཏི, བྱཱཛམིཏི ཀཝིནཱ པརིཀཔྤིཏཾ ཧོཏི. ཨེཏྠ བྷཏྟསིཏྠཱདིམུཁྱཝིསཡཏོ ཨཉྙཀནྟིསངྑཏཨམུཁྱཝིསཡེ པཡུཏྟཾ ཝམནཾ གུཎཝུཏྟཱིཏི ཉཱཏབྦཾ. ཝམནམེཝ བྱཱཛམིཏི ཙ, མུནིནོ པཱདཱཏི ཙ, ཏེསུ ནཁཱཏི ཙ, ཏེསཾ ཨཱཝལིཡོཏི ཙ, ཙནྡསྶ ཀནྟིཡོཏི ཙ, ནིགྒཏོ པབྷཱཧཱིཏི ཙ ཝིགྒཧོ.

༡༦༡.

ཨཙིཏྟཀཏྟུཀཾ རུཛྷ-མིཙྩེཝཾ གུཎཀམྨ ཏཾ [གུཎཀམྨཀཾ (སཱི.)];

སཙིཏྟཀཏྟུཀཾ པེ’ཏཾ, གུཎཀམྨཾ ཡདུ’ཏྟམཾ.

༡༦༡. ཡཐཱཝུཏྟཾ ནིགམེཏི ‘‘ཨཙིཏྟ’’ཨིཙྩཱདིནཱ. ཨིཙྩེཝཾ ཨཙིཏྟོ ཀཏྟཱ ཡསྶ ཏཾ ཨཙིཏྟཀཏྟུཀཾ. གུཎོ ཀམྨཾ ཡསྶ ཏཾ གུཎཀམྨཾ. ཏཉྩ ཝམནཱདི རུཛྷམཏིམནོཧརཾ བྷཝཏི བནྡྷོཙིཏཏྟཱ. ནཁཱཝལིཡོ ཧི ཨཙིཏྟཀཏྟཱརོ, ཀནྟིཡོ གུཎཀམྨནྟི ཝམནམཏྲཱཏིསུནྡརཾ. ནེདམེཝ རུཛྷནྟི ཨཱཧ ‘‘སཙིཏྟ’’ཨིཙྩཱདི. ཨེཏཾ ཝམནཱདིཀཾ སཙིཏྟཀཏྟུཀམྤིཡདིགུཎཀམྨཾ, ཨུཏྟམཾ སེཊྛཾ བནྡྷོཙིཏཏྟཱ.

༡༦༡. ཨནནྟརོདཱཧརཎསྶ པསཏྠཏྟཉྩ ཀམྨནི གུཎེ སཏི སཙིཏྟཀཏྟུཀཝམནཱདིཀཉྩ ཨིཊྛམིཏི དསྶེནྟོ ‘‘ཨཙིཏྟཀཏྟུཀ’’མིཙྩཱདིམཱཧ. ཨིཙྩེཝཾ ཨིམིནཱ པཀཱརེན ཨཙིཏྟཀཏྟུཀཾ ནཁཱཝལིསངྑཱཏཨཝིཉྙཱཎཀཀཏྟུཝནྟཾ གུཎཀམྨཾ ནཁཀནྟིསངྑཱཏཨཔྤདྷཱནཀམྨཝནྟཾ ཝམནཱདིཀཾ རུཛྷཾ རཙནཱཡ ཨུཙིཏཏྟཱ རུཙིཛནཀཾ ཧོཏི, ཨེཏཾ ཝམནཱདིཀཾ སཙིཏྟཀཏྟུཀམྤི སཝིཉྙཱཎཀཀཏྟུཝནྟམྤི ཡདི གུཎཀམྨཾ ཨམུཁྱཀམྨཾ ཙེ, ཨུཏྟམཾ ཝིསིཊྛམེཝ, ‘‘ཀནྟཱིན’’ནྟི བྷཱཝསམྦནྡྷེ ཚཊྛིཡཱ སཏིཔི ཝམནཀྲིཡཱཡ ཀམྨཏྟཾ ནཱཏིཝཏྟཏི. ནཏྠི ཙིཏྟཾ ཡེསནྟི ཙ, ཨཙིཏྟཱ ཀཏྟཱརོ ཡསྶཱཏི ཙ, གུཎོ ཀམྨཾ ཡསྶེཏི ཙ, སཧ ¶ ཙིཏྟེན ཝཏྟམཱནོཏི ཙ ཝཱཀྱཾ. ཨིཏི ནིདསྶནེ ཨེཝཾ པཀཱརེ ནིཔཱཏོ, ཨཐ ཝཱ ཝཙནཝཙནཱིཡཱནཾ [ཝཙནཝཙནཱིཡཱདཱིནཾ (ཀ.)] ནིགམཱརམྦྷེ ནིཔཱཏསམུདཱཡོ.

༡༦༢.

ཨུགྒིརནྟོཝ ས སྣེཧ-རསཾ ཛིནཝརོ ཛནེ;

བྷཱསནྟོ མདྷུརཾ དྷམྨཾ, ཀཾ ན སམྤཱིཎཡེ ཛནཾ.

༡༦༢. ཏདུདཱཧརཏི ‘‘ཨུགྒིརནྟོཝཱ’’ཏིཨཱདིནཱ. སོ ཛིནཝརོ ཛནེ སཀལསཏྟནིཀཱཡེ སྣེཧརསཾ ཨཏྟནོ པེམསངྑཱཏཾ ཨནུརཱགཾ ཨུགྒིརནྟོཝ ཝམནྟོ ཝིཡ མདྷུརཾ ཨཏིཔཎཱིཏཾ དྷམྨཾ བྷཱསནྟོ ཀཾ ཛནཾ ན སམྤཱིཎཡེ, སབྦམེཝ སམྤཱིཎེཏི. ཨེཏྠ ཛིནཝརོ ཀཏྟཱ སཙིཏྟོ, སྣེཧརསོ གུཎཀམྨཾ.

༡༦༢. ཨིདཱནི སཙིཏྟཀཀཏྟུཔཀྑེ ཨུདཱཧརཎམུདྡིསཏི ‘‘ཨུགྒིརནྟོ’’ཙྩཱདིནཱ. སོ ཛིནཝརོ ཛནེ སཀལསཏྟནིཀཱཡེ སྣེཧརསཾ ཨཏྟནོ པེམསངྑཱཏཨནུརཱགཾ ཨུགྒིརནྟོ ཨིཝ ཝམནྟོ ཝིཡ མདྷུརཾ ཨཱདིཀལྱཱཎཱདིབྷཱཝེན པཎཱིཏཾ དྷམྨཾ སདྡྷམྨཾ བྷཱསནྟོ དེསེནྟོ ཡཐཱསཡཾ ཝདནྟོ ཀཾ ཛནཾ ཀཱིདིསཾ པུགྒལཾ ན སམྤཱིཎཡེ, པཱིཎེཏི ཨེཝཱཏི. ཨེཏྠ ཨུགྒིརནཾ ཛིནཝརསངྑཏསཙིཏྟཀཀཏྟུཝནྟམྤི སྣེཧརསསངྑཱཏཨམུཁྱཀམྨཡུཏྟཏྟཱ པསཏྠཾ ཧོཏི. སྣེཧོ ཨེཝ རསོ ཨནུརཱགོཏི ཝིགྒཧོ.

༡༦༣.

ཡོ སདྡསཏྠཀུསལོ ཀུསལོ ནིགྷཎྚུ-

ཚནྡོཨལངྐཏིསུ ནིཙྩཀཏཱབྷིཡོགོ;

སོ’ཡཾ ཀཝིཏྟཝིཀལོཔི ཀཝཱིསུ སངྑྱ-

མོགཡ྄ཧ ཝིནྡཏི ཧི ཀིཏྟི’མམནྡརཱུཔཾ.

ཨིཏི སངྒྷརཀྑིཏམཧཱསཱམིཔཱདཝིརཙིཏེ

སུབོདྷཱལངྐཱརེ

གུཎཱཝབོདྷོ ནཱམ ཏཏིཡོ པརིཙྪེདོ.

༡༦༣. གནྠནྟརཱཧིཏཝཱསནཱཡ, ¶ ཏདནུབནྡྷཔཊིབྷཱནེ ཙཱཝིཛྫམཱནེཔི སུཏེན ཨབྷིཡོགབལེན ཀཝིཏཱ ཀིཏྟི ཙ ཏདནུགཏཱ སམུཔལབྦྷཏཱིཏི སམནུསཱསཏི ‘‘ཡོ’’ཨིཙྩཱདིནཱ. སདྡསཏྠེ བྱཱཀརཎེ ཀིསྨིཉྩི ‘‘ཨིདམེཝེ’’ཏི ནིཡམཱབྷཱཝཱ ཀུསལོ ཚེཀོ ནིགྷཎྚུམྷི ཨབྷིདྷཱནསཏྠེ ཙ ཚནྡསི ཝུཏྟིཛཱཏིཔྤཔཉྩཔཀཱསཀཚནྡོཝིཙིཏིསཏྠེ ཙ ཨལངྐཏིསུ ཨལངྐཱརསཏྠེ ཙ ཀུསལོ ན ཀེཝལཾ སདྡསཏྠེཡེཝ, ཨཐ ཙ པན ནིཙྩམནཝརཏཾ དིཝཱ ཙ རཏྟོ ཙ ཀཏོ ཨབྷིཡོགོ ཝཱཡཱམོ རཙནཱཝིསཡེ ཡསྶ སོཡཾ ཀཝིཏྟཝིཀལོཔི བནྡྷཀརཎསངྑཱཏཀཝིགུཎཔརིཧཱིནོཔི ཀཝཱིསུ ཀཝིགུཎོཔེཏེསུ སངྑྱཾ གཎནཾ ཨོགཡ྄ཧ པཊིལབྷིཏྭཱ ཨམནྡརཱུཔཾ ཨཏིབཧུཾ ཀིཏྟིཾ པརིསུདྡྷབནྡྷརཙནཱལཀྑཎཾ ཏཔྤབྷཝཾ ཁྱཱཏཾ ཝིནྡཏི པཊིལབྷཏེཝཱཏི.

ཨིཏི སུབོདྷཱལངྐཱརེ མཧཱསཱམིནཱམིཀཱཡཾ

སུབོདྷཱལངྐཱརཊཱིཀཱཡཾ

གུཎཱཝབོདྷཔརིཙྪེདོ ཏཏིཡོ.

༡༦༣. ཨིདཱནི ཨུདྡེསཀྐམེན སདྡཱལངྐཱརེ ནིདྡིསིཏྭཱ བྱཱཀརཎནིགྷཎྚུཚནྡོཔརིཝཱརིཏེ ཨིམསྨིཾ ནིརནྟརཱབྷིཡོགོ ཨིཧལོཀིཡཱདིམཧནྟཡསསྶ ཀཱརཎམིཏི སིསྶཱནམནུསཱསནྟོ ‘‘ཡོ སདྡསཏྠཀུསལོ’’ཙྩཱདིམཱཧ. ཡོ ཐེརནཝམཛ྄ཛྷིམེསུ ཀོཙི སདྡསཏྠཀུསལོ སདྡཱནུསཱསནབྱཱཀརཎཝིསཡེ པཀཏིཔཙྩཡཱདིཝིབྷཱགཀཔྤནཱཡ ཚེཀོ ནིགྷཎྚུཚནྡོཨལངྐཏཱིསུ ཨབྷིདྷཱནཚནྡོཨལངྐཱརསཏྠེསུཔི ཀུསལོ ཏཾཏཾཝིབྷཱགབུདྡྷཱིནཾ པཊིཔཱདནེན ཚེཀོ ནིཙྩཀཏཱབྷིཡོགོ དྷཱརཎམནསིཀཱརཝསེན ནིཙྩཾ ཀཏུསྶཱཧོ ཧོཏི. སོ ཨཡཾ ཨཔྤམཱདཱི ཀཝིཏྟཝིཀལོཔི པཀཏིསིདྡྷཀབྦརཙནགུཎརཧིཏོཔི ཀཝཱིསུ སངྑྱཾ ཀབྦཀཏྟཱུསུ གཎནཾ ཨོགཡ྄ཧ ཀབྦཀརཎཊཱིཀཱཀརཎཱདིཔཀཱརེན ཨོགཱཧེཏྭཱ ཏཾ གཎནཾ པཱཔུཎིཏྭཱ ¶ ཨམནྡརཱུཔཾ ཨནཔྤཀསབྷཱཝཾ ཨཏིབཧུཾ ཀིཏྟིཾ ནིདྡོསཾ སཏྠརཙནལཀྑཎཾ པུཉྙསཉྩཡཾ, ཏཔྤབྷཝཾ པསིདྡྷིཾ ཝཱ ཝིནྡཏི ལབྷཏེཝཱཏི. ཡཐཱཝུཏྟསཏྠེསུ ཨབྷིཡོགོ བནྡྷསྶ ཨེཀནྟཀཱརཎམེཝ. ཝུཏྟཾ ཧི–

‘‘སཱབྷཱཝིཀཱི ཙ པཊིབྷཱ,

སུཏཉྩ བཧུནིམྨལཾ;

ཨམནྡོ ཙཱབྷིཡོགོ’ཡཾ,

ཧེཏུ ཧོཏི’ཧ བནྡྷནེ’’ཏི [ཀཱབྱཱདཱས ༡.༡༠༣].

ཏཏྠ སཱབྷཱཝིཀཱི སབྷཱཝསིདྡྷཱ པཊིབྷཱ ཙ པཉྙཱ ཙ བཧུ ནིམྨལཾ ཨནཔྤཀཾ ནིཛྫཊཾ སུཏཉྩ ཨམནྡོ ཨབྷིཡོགོ ཙ ཨནཔྤཀོ ཨབྷྱཱསོ ཙེཏི ཨཡམེསོ སབྦོཔི ཨིཧ བནྡྷནེ ཨིམིསྶཾ ཀབྦརཙནཱཡཾ ཧེཏུ ཧོཏི ཀཱརཎཾ བྷཝཏཱིཏི. སདྡེ སཱསཏི ཨེཏྠ ཨེཏེནཱཏི ཨིམསྨིཾ ཨཏྠེ ཏཔྤཙྩཡཉྩ ཏསྶ ཐཱདེསཉྩ ཀཏྭཱ སདྡསཏྠནྟི ཉཱཏབྦཾ, སདྡསཏྠེ ཀུསལོཏི ཙ, ནིགྷཎྚུ ཙ ཚནྡོ ཙ ཨལངྐཏི ཨལངྐཱརཉྩེཏི ཙ ཝིགྒཧོ, ཨེཏྠ ཨལངྐཏིསདྡོ སཏྠཱཔེཀྑཱཡ ནཔུཾསཀོ ཧོཏི, ནིཙྩཾ ཀཏོ ཨབྷིཡོགོ ཨསྶེཏི ཙ, ཀཝིནོ བྷཱཝོཏི ཙ, ཏེན ཝིཀལོཏི ཙ, ཨམནྡཾ རཱུཔཾ སབྷཱཝོ ཡསྶེཏི ཙ ཝཱཀྱཾ.

ཨིཏི སུབོདྷཱལངྐཱརནིསྶཡེ

ཏཏིཡོ པརིཙྪེདོ.

༤. ཨཏྠཱལངྐཱརཱཝབོདྷཔརིཙྪེད

༡༦༤.

ཨཏྠཱལངྐཱརསཧིཏཱ, སགུཎཱ བནྡྷཔདྡྷཏི;

ཨཙྩནྟཀནྟཱ ཀནྟཱཝ [ཡཏོཨཙྩནྟཀནྟཱཝ (ཀ.)], ཝུཙྩནྟེཏེ ཏཏོ’དྷུནཱ.

༡༦༤. ཨེཝཾ ¶ སདྡཱལངྐཱརེ པརིཙྪིཛྫ སམྤཏྱཏྠཱལངྐཱརཾ བོདྷཡིཏུམཱཧ ‘‘ཨཏྠཱལངྐཱར’’ཨིཙྩཱདི. སགུཎཱ ཡཐཱཝུཏྟེཧི པསཱདཱདཱིཧི སདྡགུཎེཧི སཧིཏཱ བནྡྷཔདྡྷཏི ཀབྦརཙནཾ. ཨལངྐརཱིཡཏི ཀནྟིཾ ནཱིཡཏི བནྡྷོ ཨེཏེཧི སརཱིརམིཝ ཧཱརཱདཱིཧཱིཏི ཨལངྐཱརཱ, ཏེཧི ཨཏྠཱལངྐཱརེཧི ཛཱཏྱཱདིལཀྑཎེཧི སཧིཏཱ སཾཡུཏྟཱ སཏཱི སགུཎཱ པཏིབྦཏཱདིགུཎོཔེཏཱ ཨཏྠེན དྷནེན ཨལངྐཱརེན ཨཱབྷརཎེན སཧིཏཱ ཡུཏྟཱ ཀནྟཱཝ ཨངྒནཱ ཝིཡ. ཡཏོ ཨཙྩནྟཀནྟཱ ཨཏིསཡརམཎཱིཡཱ སིཡཱ, ཏཏོ ཏེན ཀཱརཎེན ཡེ ཨཏྠཱལངྐཱརཱ ཨཝསརཾ པཏྟཱ, ཏེ ཨདྷུནཱ ཨིདཱནི ཝུཙྩནྟེ ཀཐཱིཡནྟི.

༡༦༤. ཨེཝཾ སདྡཱལངྐཱརཝིབྷཱགཾ དསྶེཏྭཱ ཨིདཱནི ཏནྣིསྶཡཾཡེཝ ཨཏྠཱལངྐཱརབནྡྷམཱརབྷནྟོ ‘‘ཨཏྠཱལངྐཱརི’’ཙྩཱདིམཱཧ. སགུཎཱ ཡཐཱཝུཏྟཔསཱདཱདིསདྡགུཎཡུཏྟཱ བནྡྷཔདྡྷཏི པཛྫགཛྫཱདིཔབྷེདཱ རཙནཱཝལི ཨཏྠཱལངྐཱརསཧིཏཱ སབྷཱཝཝུཏྟིཝངྐཝུཏྟིསངྑཱཏེན ཨཏྠཱལངྐཱརེན སཾཡུཏྟཱ སགུཎཱ ཨཏྠཱལངྐཱརསཧིཏཱ ཀནྟཱ ཨིཝ པཏིབྦཏཱདཱིཧི གུཎེཧི ཡུཏྟཱ སུཝཎྞརཛཏམཎིམུཏྟཱདིདྷནེཧི གཱིཝེཡྻཀཊཀནཱུཔུརཱདཱིཧི ཨཱབྷརཎེཧི ཙ ཡུཏྟཱ ཨངྒནཱཝ ཨཙྩནྟཀནྟཱ ཡཏོ ཨཏིསཡེན རམཎཱིཡཱ, ཏཏོ ཏསྨཱ ཏེ ཨཏྠཱལངྐཱརཱ ཨདྷུནཱ དཱནི ཝུཙྩནྟེ. ཨལངྐརོནྟི བནྡྷཾ སརཱིརཾ ཝཱ ཨེཏེཧཱིཏི ཙ, ཨཏྠསྶ ཨལངྐཱརཱཏི ཙ, ཏེཧི སཧིཏཱཏི ཙ, གུཎེཧི སཧ ཝཏྟཏཱིཏི ཙ, བནྡྷསྶ པདྡྷཏཱིཏི ཙ, ཨཙྩནྟཾ ཨཏིསཡེན ཀནྟཱཏི ཙ ཝིགྒཧོ.

༡༦༥.

སབྷཱཝཝངྐཝུཏྟཱིནཾ, བྷེདཱ དྭིདྷཱ ཨལཾཀྲིཡཱ;

པཋམཱ ཏཏྠ ཝཏྠཱུནཾ, ནཱནཱཝཏྠཱཝིབྷཱཝིནཱི.

༡༦༥. ཀཏིཔྤབྷེདཱ ཏེ ཨིཙྩཱཧ ‘‘སབྷཱཝ’’ཨིཙྩཱདི. སབྷཱཝཝུཏྟི ཝངྐཝུཏྟཱིཏི ཨིམེསཾ བྷེདཱ པབྷེདེན ཨལཾཀྲིཡཱ ཨཏྠཱལངྐཱརཱདྭིདྷཱདྭིཔྤཀཱརཱ. ¶ ཏེསུ སབྷཱཝཝུཏྟི ཀཱིདིསཱིཏི ཨཱཧ ‘‘པཋམཱ’’ཏིཨཱདི. ཏཏྠ ཏཱསུ པཋམཱ སབྷཱཝཝུཏྟི ཝཏྠཱུནཾ པདཏྠཱནཾ ཛཱཏིགུཎཀྲིཡཱདབྦསབྷཱཝཱནཾ ནཱནཱ ཝིཙིཏྟཱ, ན དྭེཀཱཝ ཨཝཏྠཱ ཨཝསརཱ ཝིབྷཱཝིནཱི པཀཱསིཀཱ ཝིཉྙེཡྻཱ. ཛཱཏྱཱདཱིནཾ པདཏྠཱནཾ ཡཐཱསབྷཱཝམནེཀཔྤཀཱརཾ སམྨདེཝ ཝིཝརནྟཱི སབྷཱཝཾ པདཏྠཱནཾ ཝིཙིཏྟཾ ཝདཏཱིཏི སབྷཱཝཝུཏྟི ནཱམཱཏི ཨདྷིཔྤཱཡོ, སཱཝ ཛཱཏིཡཱ པདཏྠསརཱུཔསྶ ཏཐཱཏཐཱཔཊིཔཱདཀཏྟེན ཝུཏྟིཡཱ [དཏྟིཡཱ (ཀ.)] ཛཱཏིཔི ཝུཙྩཏི.

༡༦༥. པསཏྠཱལངྐཱརཱ [པསཏྠཱདིཨལངྐཱརཱ (ཀ.)] པབྷེདཏོ ཨེཏྟཀཱཏི དསྶེནྟོ ‘‘སབྷཱཝི’’ཙྩཱདིམཱཧ. ཨལཾཀྲིཡཱ ཨཏྠཱལངྐཱརཱ སབྷཱཝཝངྐཝུཏྟཱིནཾ བྷེདཱ པབྷེདཏོ དྭིདྷཱ དྭིཔྤཀཱརཱ ཧོནྟི. ཏཏྠ ཏཱསུདྭཱིསུ པཋམཱ སབྷཱཝཝུཏྟི ཝཏྠཱུནཾ ཛཱཏིགུཎཀྲིཡཱདབྦལཀྑཎཱནཾ པདཏྠཱནཾ ནཱནཱཝཏྠཱཝིབྷཱཝིནཱི ཨནེཀཔྤཀཱརསྶ པཀཱསིནཱི ཧོཏི. ཨེཏྠ ཛཱཏྱཱདཱིནཾ པདཏྠཱནཾ ཨནེཀཔྤཀཱརསབྷཱཝཔཀཱསིནཱི སབྷཱཝཝུཏྟི ནཱམ. ཨེསཱཝ ཛཱཏི གུཎཱདིཙཏུབྦིདྷཔདཏྠཱནཾ སརཱུཔསངྑཱཏཛཱཏིཡཱ ཏེཧི ཨཱཀཱརེཧི པཊིཔཱདནཏོ ཨུཔཙཱརཏོ ཛཱཏི ནཱམ ཧོཏི. ཛཱཏྱཱདིཔདཏྠཱནཾཡེཝ ཡཐཱསབྷཱཝཾ ཧིཏྭཱ ཝཏྠུཔརིཀཔྤིཏཨཏིསཡོཔམཱརཱུཔཀཱདིསརཱུཔསངྑཱཏཾ ཝངྐསབྷཱཝཾ པཀཱསེནྟཱི ཝངྐཝུཏྟི ནཱམ. ཡབྷཱཝོ ཙ ཝངྐོ ཙཱཏི ཙ, ཏེསཾ ཝུཏྟཱིཏི ཙ, ཨལཾཀརོནྟི ཨེཏཱཧཱིཏི ཙ, ནཱནཱ ཨནེཀཱ ཙ སཱ ཨཝཏྠཱ ཙཱཏི ཙ ཝཱཀྱཾ.

ཡཐཱ –

༡༦༦.

ལཱིལཱཝིཀནྟིསུབྷགོ,

དིསཱཐིརཝིལོཀནོ;

བོདྷིསཏྟངྐུརོ བྷཱསཾ,

ཝིརོཙི ཝཱཙམཱསབྷིཾ.

༡༦༦. ‘‘ཡཐེ’’ཏི ཏཾ ཨུདཱཧརཏི. ལཱིལཱཡ ཝིལཱསེན ཝིཧིཏཱཡ ཝིཀནྟིཡཱ གམནེན སཏྟཔདཝཱིཏིཧཱརསངྑཱཏེན སུབྷགོ སུནྡརོ དིསཱསུ དསསུ ཐིརམཙལཾ ཝིལོཀནཾ ཡསྶ སོ བོདྷིསཏྟངྐུརོ ཏདཧུཛཱཏོ མཧཱབོདྷིསཏྟོ ཨཱསབྷིཾ ཝཱཙཾ ‘‘ཨགྒོཧམསྨཱི’’ཏིཨཱདིཀམུཏྟམཾ ནིབྦྷཡཝཙནཾ བྷཱསཾ ཝདནྟོ ཝིརོཙི ཝིསེསེན རམཎཱིཡཏྟཾ པཏྟོ. ཨཡཾ སབྷཱཝཝུཏྟི. ཨེཝཾ ཛཱཏིསབྷཱཝཝུཏྱཱདཡོཔི པརིཀཔྤནཱིཡཱ.

༡༦༦. ཨིདཱནི སབྷཱཝཝུཏྟིཡཱ ཨུདཱཧརཎཾ ཨཱཧ ‘‘ཡཐཱ – ལཱིལཱཝིཀནྟི’’ཙྩཱདི. ལཱིལཱཝིཀནྟིསུབྷགོ ཝིལཱསགམནེན སཏྟཔདཝཱིཏིཧཱརེན སུནྡརོ དིསཱཐིརཝིལོཀནོ དསདིསཱསུ ཨཙལཨོལོཀནོ བོདྷིསཏྟངྐུརོ མཧཱབོདྷིསཏྟངྐུརོ ཨཱསབྷིཾ ཝཱཙཾ ‘‘ཨགྒོཧམསྨཱི’’ཏིཨཱདིནཱ ཨབྷཱིཏཝཙནཾ བྷཱསཾ ཝདནྟོ ཝིརོཙི ཨསོབྷཱིཏི. ཨིཧ བོདྷིསཏྟསངྑཱཏསྶ དབྦསྶ ལཱིལཱཝིཀནྟིདིསཱཐིརཝིལོཀནཝཙོནིཙྪཱརཎསངྑཏཱནཾ ཨཝཏྠཱནཾ པཀཱསིཏཏྟཱ དབྦསབྷཱཝཝུཏྟཱིཏི ཉཱཏབྦཱ. ཨེསཱཡེཝ དབྦགཏགཏྱཱདིཝིཙིཏྲསརཱུཔཾ ཨལངྐརཎཏོ ཨལངྐཱརོ ནཱམ, དབྦགཏགཏྱཱདཡོ པན ཨལཾཀིརིཡམཱནཏྟཱ ཨལཾཀིརིཡཱ ནཱམ. ཛཱཏིགུཎཀྲིཡཱསབྷཱཝཝུཏྟིཡོཔི ཨེཝམེཝ དཊྛབྦཱ. ལཱིལཱཡ ཡུཏྟཱ ཝིཀནྟཱིཏི ཙ, ཏཱཡ སུབྷགོཏི ཙ, དིསཱསུ ཐིརཾ ཝིལོཀནཾ ཡསྶེཏི ཙ, བོདྷིཡཱ པཉྙཱཡ སཏྟོཏི ཙ, སོཡེཝ ཨངྐུརོཏི ཙ, ཨུསབྷསྶ བྷཱཝོཏི ཙ ཝཱཀྱཾ. ཨུསབྷསྶ བྷཱཝསངྑཱཏཱ ཨཀམྤནཱིཡཱ ཋིཏི ཨཱསབྷཾ ནཱམ, ཨཀམྤབྷཱཝཏོ ཏེན སམཱཔི ཝཱཙཱ ཨུཔཙཱརཏོ ཨཱསབྷཱི ནཱམ ཧོཏི.

༡༦༧.

ཝུཏྟི ཝཏྠུསབྷཱཝསྶ, ཡཱ’ཉྙཐཱ སཱ པརཱབྷཝེ;

ཏསྶཱ’ནནྟཝིཀཔྤཏྟཱ, ཧོཏི བཱིཛོཔདསྶནཾ.

༡༦༧. དུཏིཡམཱཧ ¶ ‘‘ཝུཏྟི’’ཙྩཱདིནཱ. ཝཏྠུནོ ཛཱཏྱཱདིརཱུཔསྶ པདཏྠསྶ སབྷཱཝོ ཡསྶཾ ཨཝཏྠཱཡཾ ཡཱདིསཾ རཱུཔཾ ཏསྶ ཨཉྙཐཱབྷཱཝེན ཏསྶ རཱུཔསྶ ཏཐེཏཾ དབྦཱཔནེན ཝུཏྟི ཝཙནཾ. པརཱ བྷཝེ ཨཉྙཱ ཝངྐཝུཏྟི ནཱམ སིཡཱ. ཀིཾ སཱ སཱཀལླེན ཝཏྟུཾ སཀྐཱཏི ཨཱཧ ‘‘ཏསྶཱ’’ཨིཙྩཱདི. ཏསྶཱ ཝངྐཝུཏྟིཡཱ ཨནནྟཝིཀཔྤཏྟཱ ཨཔརིམིཏབྷེདཀཏྟཱ བཱིཛསྶ ཀཱརཎཏྟཱ སཀལབྱཏྟིབྱཱཔིསཱམཉྙརཱུཔསྶ ཡཏོ པརེ ཝིཙིཏྟཱལངྐཱརཱ པསཝནྟི, ཨུཔདསྶནཾ ཀཐནཾ ཧོཏི ནིརཝསེསཱབྷིདྷཱནསྶ ཀེནཱཔྱསཀྐུཎེཡྻཏྟཱ.

༡༦༧. ཨིདཱནི ཝངྐཝུཏྟིཾ དསྶེཏི ‘‘ཝུཏྟི’’ཙྩཱདིནཱ. ཝཏྠུསབྷཱཝསྶ ཛཱཏྱཱདིཔདཏྠསམྦནྡྷིནོ ཏཱསུ ཏཱསུ ཨཝཏྠཱསུ ཡོ སབྷཱཝོ ཝིཛྫཏི, ཏསྶ སབྷཱཝསྶ ཨཉྙཐཱ ཝིཛྫམཱནཱཀཱརཾ ཧིཏྭཱ ཝཏྟུཔརིཀཔྤིཏེན ཨཏིསཡཨུཔམཱརཱུཔཀཱདིཨཉྙཔཀཱརེན ཡཱ ཝུཏྟི ཡཾ ཀཐནཾ ཨཏྠི, སཱ པརཱབྷཝེ སབྷཱཝཝུཏྟིཏོ ཨཉྙཱ ཝངྐཝུཏྟི ནཱམ སིཡཱ. ཏསྶཱ ཝངྐཝུཏྟིཡཱ ཨནནྟཝིཀཔྤཏྟཱ ཨཔྤམཱཎཔཀྑཏྟཱ ཀཐནེན པརིསམཱཔེཏུཾ ཨསཀྐུཎེཡྻཏྟཱ ནཡཏོ ཏསྶ ཨནནྟཔཀྑསྶ པརིགྒཧཎཏྠཾ བཱིཛོཔདསྶནཾ ཀཱརཎམཏྟསྶ ནིདསྶནཾ ཧོཏི. ཝཀྑམཱནབྷེདཏོ ཨེཀམེཀམྤི ཨཏྟནཱ སདིསཾ ཨནནྟབྷེདཔརིགྒཧཛཱནནཏྠཾ པཧོཏཱིཏི ཨདྷིཔྤཱཡོ. ཝཏྠཱུནཾ སབྷཱཝོཏི ཙ, ཨནནྟཱ ཝིཀཔྤཱ ཡསྶ སབྷཱཝསྶེཏི ཙ, ཏསྶ བྷཱཝོཏི ཙ, བཱིཛསྶ ཨུཔདསྶནནྟི ཙ ཝིགྒཧོ.

ཝངྐཝུཏྟིཨཏྠཱལངྐཱརཨུདྡེསཝཎྞནཱ

༡༦༨.

ཏཏྠཱ’ཏིསཡཨུཔམཱ-

རཱུཔཀཱཝུཏྟིདཱིཔཀཾ;

ཨཀྑེཔོ’ཏྠནྟརནྱཱསོ,

བྱཏིརེཀོ ཝིབྷཱཝནཱ.

༡༦༩.

ཧེཏུཀྐམོ ¶ པིཡཏརཾ, སམཱསཔརིཀཔྤནཱ;

སམཱཧིཏཾ པརིཡཱཡ-ཝུཏྟིབྱཱཛོཔཝཎྞནཾ.

༡༧༠.

ཝིསེས རུལ༹ྷཱཧངྐཱརཱ,

སིལེསོ ཏུལྱཡོགིཏཱ;

ནིདསྶནཾ མཧནྟཏྟཾ,

ཝཉྩནཱ’པྤཀཏཏྠུཏི.

༡༧༡.

ཨེཀཱཝལི ཨཉྙམཉྙཾ, སཧཝུཏྟི ཝིརོདྷིཏཱ;

པརིཝུཏྟིབྦྷམོབྷཱཝོ, མིསྶ’མཱསཱི རསཱི ཨིཏི.

༡༧༢.

ཨེཏེ བྷེདཱ སམུདྡིཊྛཱ, བྷཱཝོ ཛཱིཝིཏམུཙྩཏེ;

ཝངྐཝུཏྟཱིསུ པོསེཏི, སིལེསོ ཏུ སིརིཾ པརཾ.

༡༦༨-༡༧༢. ཡཐོདྡེསཾ ནིདྡིསིཏུཀཱམོ ཨུདྡིསཏི ‘‘ཏཏྠེ’’ཙྩཱདི. ཏཏྠཱཏི ཏསྶཾ ཝངྐཝུཏྟིཡཾ ‘‘ཨེཏེ བྷེདཱ སམུདྡིཊྛཱ’’ཏི ཨིམིནཱ སམྦནྡྷོ. སམུདྡིཊྛཱཏི སངྑེཔནཡེན ཝུཏྟཱ. ཨཏིསཡོ ཨུཔམཱ རཱུཔཀཾ ཨཱཝུཏྟི དཱིཔཀཉྩ, སམཱསོ སམཱསཝུཏྟི པརིཀཔྤནཱ ཙ, ཝིསེསོ རུལ༹ྷཱཧངྐཱརོ ཙ, ཛཱིཝིཏམུཙྩཏེཏི ཏདབྷཱཝེ བནྡྷསྶ ཚཝསྶེཝ ཧེཡྻཏྟཱ ཝུཏྟཾ, སིལེསོ ཏུ ཝངྐཝུཏྟཱིསུ སབྷཱཝཝུཏྟིཾ ཧིཏྭཱ ཝཏྠུསབྷཱཝཏོ ཨཉྙཐཱ ཡཐཱ ཏཐཱ པརིཀཔྤནརཱུཔཱསུ ཨཏིསཡཱདཱིསུ ཝུཏྟཱིསུ པརཾ སིརིཾ ཀནྟིཾ པོསེཏི ཏཾ པཱུརེཏི ཨཱཝཧཏཱིཏི.

༡༦༨-༡༧༢. བྷེདཝནྟཱནཾ པདཏྠཱནཾ སབྷཱཝཀཐནཾ ཨུདྡེསཀྐམེན པཱཀཊཾ ཧོཏཱིཏི ཝཏྟམཱནེཧི ཨལངྐཱརེཧི ཨུདྡིསནྟོ ‘‘ཏཏྠཱཏིསཡ…པེ… རསཱི’’ཏི གཱཐཱཙཏུཀྐམཱཧ. ཏཏྠ ཏཏྠཱཏི ཏིསྶཾ ཝངྐཝུཏྟིཡཾ ཨིཏི ཨེཝཾ ཨེཏེ པཉྩཏིཾས བྷེདཱ སམུདྡིཊྛཱ སངྑེཔེན ཝུཏྟཱཏི. ཨེཏེསཾ པན པདཱནཾ ཨཏྠོ ནིདྡེསེ ཨཱཝིབྷཝིསྶཏི. ཨིམིནཱ བྷཱཝོ ཙ སིལེསོ ཙ ཨཏིཔྤསཏྠོཏི དཱིཔེཏི. བྷཱཝོ བྷཱཝཱལངྐཱརོ ཛཱིཝིཏཾ བནྡྷསྶ པཱཎབྷཱུཏོཏི ཝུཙྩཏེ, ¶ བྷཱཝརཧིཏསྶ བནྡྷསྶ ཚཝསརཱིརསྶ ཝིཡ ཨནུཔཱདེཡྻཏྟཱ, སིལེསོ ཏུ སིལེསཱལངྐཱརོ པན ཝངྐཝུཏྟཱིསུ ཨཏིསཡོཔམཱདིཝངྐཝུཏྟཱིསུ པརམུཀྐཾསབྷཱུཏཾ སིརིཾ སོབྷཾ པོསེཏི པཱུརེཏི.

ནིདྡེསཝཎྞནཱ

༡༧༣.

པཀཱསིཀཱ ཝིསེསསྶ,

སིཡཱ’ཏིསཡཝུཏྟི ཡཱ;

ལོཀཱཏིཀྐནྟཝིསཡཱ,

ལོཀིཡཱཏི ཙ སཱ དྭིདྷཱ.

༡༧༣. ཏཏྠཱཏིསཡཝུཏྟཱིནཾ ཏཱཝ ནིདྡིསནྟོ ཨཱཧ ‘‘པཀཱསིཀཱ’’ཨིཙྩཱདི. ཝིསེསསྶ ཝཏྠུགཏསྶཱཏིམཏྟསྶ པཀཱསིཀཱཡཱཏི ཨནུཝདིཏྭཱ སཱ ཨཏིསཡཝུཏྟི སིཡཱཏི ཝིདྷཱིཡཏེ, ཨཏིསཡསྶ ཝཏྠུནོ ཨུཀྐཾསསྶ པཊིཔཱདིཀཱ ཝུཏྟི ཨཏིསཡཝུཏྟི. སཱ ཙ དུཝིདྷཱཏི ཨཱཧ ‘‘ལོཀ’’ཨིཙྩཱདི. ལོཀཾ ལོཀཔྤཏཱིཏིཾ ཨཏིཀྐནྟོ ཝིསཡོ གོཙརོ ཡསྶཱ སཱ ལོཀཱཏིཀྐནྟཝིསཡཱ ཙ ལོཀེ བྷཝཱ ལོཀཋིཏིམནཏིཀྐནྟཏྟཱཏི ལོཀིཡཱ ཙཱཏི ཨཏིསཡཝུཏྟི དྭིདྷཱ དྭིཔྤཀཱརཱ བྷཝཏི.

༡༧༣. ཨིདཱནི ཨུདྡེསཀྐམེན ཨཏིསཡཝུཏྟིཾ དསྶེཏི ‘‘པཀཱསི’’ཙྩཱདིནཱ. ཝིསེསསྶ ཛཱཏྱཱདིཔདཏྠགཏཨདྷིཀཝིསེསསྶ ཡཱ ཝུཏྟི པཀཱསིཀཱ, སཱ ཨཏིསཡཝུཏྟི ནཱམ སིཡཱ, སཱ ཨཏིསཡཝུཏྟི ལོཀཱཏིཀྐནྟཝིསཡཱ ཙ ཛཱཏྱཱདིཔདཏྠཱནཾ ཡཐཱསབྷཱཝསངྑཏལོཀཋིཏྱཱཏིཀྐནྟཝིསཡཏྟཱ ལོཀཱཏིཀྐནྟ ཝིསཡཱཏི ཙ ལོཀིཡཱཏི ཙ ཡཐཱཝུཏྟལོཀམནཏིཀྐམྨ པཝཏྟནཏོ ལོཀིཡཱཏི ཙེཝཾ དྭིདྷཱ དྭིཔྤཀཱརཱ ཧོནྟི. ཝདཏཱིཏི ཝུཏྟི, ཨཏིསཡསྶ ཝུཏྟཱིཏི ཙ, ལོཀཾ ཨཏིཀྐནྟོ ཝིསཡོ ཨེཏིསྶཱཏི ཙ, ལོཀེ བྷཝཱཏི ཙ ཝིགྒཧོ. ‘‘ཝིསེསསྶ པཀཱསིཀཱ’’ཏི པསིདྡྷགུཎཱནུཝཱདེན ¶ སཱ ཨཏིསཡཝུཏྟི སིཡཱཏི ཨཔསིདྡྷཾ ཨཏིསཡཝུཏྟིཝིདྷཱནཾ ཀརོཏི, ཡཐཱ ‘‘ཡོ ཀུཎྜལཱི, སོ དེཝདཏྟོ’’ཏི. ཨནུཝཱདཀཨནུཝཱདནཱིཡབྷེདོ ཨུཔརིཔྱེཝམེཝ དཊྛབྦོ.

༡༧༤.

ལོཀིཡཱཏིསཡསྶེ’ཏེ,

བྷེདཱ ཡེ ཛཱཏིཨཱདཡོ;

པཊིཔཱདཱིཡཏེ ཏྭ’ཛྫ,

ལོཀཱཏིཀྐནྟགོཙརཱ.

༡༧༤. ཨཡཾ དྭིཔྤཀཱརཱ ཨཏིསཡཝུཏྟི སབྷཱཝཝུཏྱཱདཱིཧི བྷིནྣཱཏི ཙེ? ཨཱཧ ‘‘ལོཀ’’ཨིཙྩཱདི. ཛཱཏིཨཱདཡོ ཡཏོ པདཏྠསྶ ཝིཙིཏྟཾ སརཱུཔཾ ཝདཏཱིཏི ཝིཙིཏྟསརཱུཔཔཊིཔཱདིཀཱ སབྷཱཝཝུཏྟིཔི ཨལངྐཱརོ, ཨལངྐཱརིཡཾ ཏུ ཝཏྠུམཏྟཾ, ཏཏོ སབྷཱཝཝུཏྱཱདཡོ ཡེ བྷེདཱ ཝིསེསཱ, ཨེཏེ ལོཀིཡཱཏིསཡསྶ བྷེདཱ, ཡཐཱ སརཱིརེ ཡཾ སཧཛཾ སུནྡརཏྟཾ, ཏསྶ པོསཀཱཔི མུཏྟཱཝལིཔྤབྷུཏི ཨལངྐཱརོཏི ཝུཙྩཏི, ཨེཝཾ བནྡྷེཔྱལངྐཱརིཡཝཏྠུནིམིཏྟཾ དྷམྨཏྟཾ ཡཱཡ ཨུཀྐཾསཱིཡཏི, སཱ ཨུཀྐཾསོཏི ཝུཙྩཏི. སཱ ཙ ཝུཏྟི ཨལངྐཱརསདྡེན ཝུཙྩཏེ. སཱ པན ཨཏིསཡཝུཏྟིཡེཝ. ཏེནེཝཱཧ ‘‘ལོཀིཡཱཏིསཡསྶེཏེ, བྷེདཱ ཡེ ཛཱཏིཨཱདཡོ’’ཏི. ཡཏོ ཨེཝཾ, ཏཏོ ལོཀཱཏིཀྐནྟཝིསཡཱ ཙ ཝིསུཾ དསྶནཱིཡཱཏི ཨཱཧ ‘‘པཊཱི’’ཏིཨཱདི. ཏུསདྡོ བྷེདེ. ཨཛྫ ཏུ ཨིདཱནི པན ལོཀཱཏིཀྐནྟགོཙརཱ པཊིཔཱདཱིཡཏེཏི སམྦནྡྷོ.

༡༧༤. ཨིདཱནི ཨེསཱ དྭིཔྤཀཱརཱཔི ཨཏིསཡཝུཏྟིསབྷཱཝཝུཏྱཱདཱིཧི ཨནཉྙཱཏི དསྶེཏུཾ ‘‘ལོཀིཡེ’’ཙྩཱདིམཱཧ. ཛཱཏིཨཱདཡོ ཛཱཏིགུཎཱདིཔདཏྠགཏཝིཙིཏྟསརཱུཔསྶ པཀཱསནཏོ ནིསྶཡཝོཧཱརེན ‘‘ཛཱཏྱཱདཡོ’’ཏི ནིདྡིཊྛཱ ཛཱཏིསབྷཱཝཝུཏྟིགུཎསབྷཱཝཝུཏྱཱདཡོ ཡེ བྷེདཱ ¶ ཝིསེསཱ, ཨེཏེ ལོཀིཡཱཏིསཡསྶ ལོཀིཡཱཏིསཡཝུཏྟིཡཱཡེཝ བྷེདཱ ཨཝཡཝཱ. ཏཏྠ ལོཀིཡཱཏིསཡཝུཏྟི ནཱམ ཛཱཏིསབྷཱཝཝུཏྟིགུཎསབྷཱཝཝུཏྱཱདཡོཡེཝཱཏི. ཨེསཱཡེཝ ཝིཙིཏྲརཱུཔཔཊིཔཱདིཀཱ ཨུཀྐཾསཱཏི ཙ ཝུཙྩཏི. ཨེཝཾ ལོཀིཡཱཏིསཡཝུཏྟིཡཱ ‘‘ལཱིལཱཝིཀནྟིསུབྷགོ’’ཏི ཨུདཱཧརཎསྶ གམྱམཱནཏྟཱ ཝཀྑམཱནཾ པཊིཛཱནཱཏི ‘‘པཊིཔཱདཱིཡཏེ’’ཙྩཱདིནཱ. ཨཛྫ ཏུ ཨིདཱནི པན ལོཀཱཏིཀྐནྟགོཙརཱ ཨཏིསཡཝུཏྟི པཊིཔཱདཱིཡཏེ ཨུདཱཧརཎཏོ ནིཔྥཱདཱིཡཏི. ལོཀེ བྷཝོཏི ཙ, ཏསྶ ཨཏིསཡོ ཨཱདྷིཀྐམིཏི ཙ ཝཱཀྱཾ.

༡༧༥.

པིཝནྟི དེཧཀནྟཱི ཡེ,

ནེཏྟཉྫལིཔུཊེན ཏེ;

ནཱ’ལཾ ཧནྟུཾ ཛིནེ’སཾ ཏྭཾ,

ཏཎྷཾ ཏཎྷཱཧརོཔི ཀིཾ.

༡༧༥. ཏམུདཱཧརཏི ‘‘པིཝནྟི’’ཙྩཱདིནཱ. ཛིན ཏེ དེཧཀནྟཱི སརཱིརསོབྷཱཡོ ཡེ ཛནཱ ནེཏྟཉྫལིཔུཊེན ཨཏྟནོ ནཡནདྭནྡསངྑཱཏེན ཨཉྫལིཔུཊེན པིཝནྟི, ཨེསཾ ཛནཱནཾ ཏཎྷཾ པིཔཱསཾ ལོབྷམེཝ ཝཱ ཧརཏི ཨནུཔཏཏི [ཨཔནཡཏི (?)]. ཏཎྷཱཧརོཔི སམཱནོ ཏྭཾ ཧནྟུཾ ནིཝཏྟིཏུཾ ཀིཾ ནཱལཾ ཀསྨཱ ཨསམཏྠོསི. ཏཎྷཱཧརཱ ནཱམ ཏཎྷམེཝ ནུདནྟི. ཨཏྲ ཧནནྟཱམཔིཧ སམྤནུདཏི ལོཀཋིཏིཾ ཨཏིཀྐམྨ དེཧཀནྟིཡཱ བཧུཏྟནདྷམྨོ ཝུཏྟོ.

༡༧༥. ཨིདཱནི པཊིཉྙཱཏཱནུསཱརེན པཊིཔཱདེཏི ‘‘པིཝནྟི’’ཙྩཱདིནཱ. བྷོ ཛིན ཏེ ཏུཡ྄ཧཾ དེཧཀནྟཱི སརཱིརསོབྷཱཡོ ཡེ ཛནཱ ནེཏྟཉྫལིཔུཊེན ནེཏྟསངྑཱཏེན ཧཏྠཔུཊེན པིཝནྟི, ཨེསཾ སཱདྷུཛནཱནཾ ཏཎྷཾ པིཔཱསཾ ལོབྷམེཝ ¶ ཝཱ ཏཎྷཱཧརོཔི ཏྭཾ སབྦེསཾ ཏཎྷཱཝིནཱསཀོཔི ཧནྟུཾ ནིཝཱརེཏུཾ ཀིཾ ནཱལཾ ཀསྨཱ ཨསམཏྠོསཱིཏི. ཨེཏྠ པིཝནཾ ནཱམ པིཔཱསཾ ཝིནེཏཱིཏི ལོཀསབྷཱཝོ. ཏཎྷཾ ཧནྟུཾ ནཱལམིཏི ལོཀསབྷཱཝམཏིཀྐནྟཏྠོ. ཀནྟཱིནཾ ཨདྷིཀཔིཡཏཱ ཨཏིསཡདྷམྨོ, ཏསྶ ཝུཏྟི པན ཏཎྷཾ ཧནྟུཾ ནཱལམིཏི ལོཀཱཏིཀྐནྟཨཏྠཾ ཝིསཡཾ ཀཏྭཱ པཝཏྟོ ཧོཏི. སཱ པན ཀཐེཏུམིཙྪིཏཾ ཀནྟཱིནཾ ཨདྷིཀཔིཡཏཾ ཏཎྷཱཧནནེ ཨསམཏྠཾ ཝཏྭཱ དཱིཔེཏཱིཏི ཝངྐཝུཏྟི ནཱམ. ཝུཙྩམཱནཱནཾ ཨུཔམཱརཱུཔཀཱདཱིནམྤི ཝངྐཝུཏྟིཏཱ ཨིཙྪིཏཏྠསྶ པཀཱརནྟརེན པཀཱསནཏོཡེཝ. ཡཐཱ ནཱམ སརཱིརསཧཛཾ པཱིནཏྟཱདིསུནྡརཏྟཾ ཨུདྡཱིཔནཱཀཱརེན ཋིཏཱ ཀཊཀཨུཎྷཱིསཧཱརཱདཡོ ཨལངྐཱརཱ ནཱམ བྷཝནྟི, ཨེཝཾ བནྡྷསརཱིརསངྑཱཏེ ཨལངྐརཎཱིཡཝཏྠུམྷི ཝིཛྫམཱནཨཏིཔིཡཏཱདིམེཝ ཨུདྡཱིཔེཏྭཱ ཨལངྐུརུམཱནཱ ‘‘ཏཎྷཱཧརོསི ཏྭཾ ཨེསཾ ཀནྟཱི པིཝནྟཱནཾ ཏཎྷཾ ཧནྟུཾ ནཱལ’’མིཏི ཝཱཙཱབྷངྒཱི ཨལངྐཱརོ ནཱམ. ཨལངྐཱརིཡཾ ནཱམ ཨལངྐཱཏབྦཀནྟིཔིཡཏཱཡ བཧུཏྟནྟི. ཨུཏྟརིཔི ཨལངྐཱརཨལངྐཱརིཡཝིབྷཱགོ ཙ ཨནུརཱུཔཏོ ཡོཛནཀྐམོ ཙ ཨེཝམེཝ དཊྛབྦོ. དེཧེ ཀནྟཱིཏི ཙ, ཨཉྫལཱིཡེཝ པུཊོཏི ཙ, ནེཏྟཱནིཡེཝ ཨཉྫལིཔུཊོཏི ཙ, ཏཎྷཾ ཧརཏཱིཏི ཙ ཝིགྒཧོ.

༡༧༦.

ཨུཔམཱནོཔམེཡྻཱནཾ, སདྷམྨཏྟཾ སིཡོ’པམཱ;

སདྡཏྠགམྨཱ ཝཱཀྱཏྠ-ཝིསཡཱཏི ཙ སཱ ཏིདྷཱ.

༡༧༦. ཨུཔམཾ ནིདྡིསཏི ‘‘ཨུཔམཱནེ’’ཙྩཱདིནཱ. ཨུཔམཱིཡཏེ ཨནེནཱཏི ཨུཔམཱནཾ, པདུམཱདིཀཝཏྠུ. པདུམཱདིཀོ ཏུ སདྡོ ཨུཔམཱནཝཱཙཀོ. ཨུཔམཱིཡཏཱིཏི ཨུཔམེཡྻཾ, མུཁཱདིཀཝཏྠུ. མུཁཱདིཀོ སདྡོ ཏུ ཨུཔམེཡྻཝཱཙཀོ. ཏེསཾ ཨུཔམཱནོཔམེཡྻཱནཾ པདུམཱདིམུཁཱདིཝཏྠཱུནཉྩ. སདྷམྨཏྟནྟི སམཱནོ དྷམྨོ ཀནྟིམནྟཏཱ ཡསྶ སོ སདྷམྨོ, ཏསྶ བྷཱཝོ སདྷམྨསདྡསྶ པཝཏྟིནིམིཏྟསམཱནེན དྷམྨེན སཧ སམྦནྡྷོ སདྷམྨཏྟཾ ¶ ཨུཔམཱནོཔམེཡྻཔཏིཊྛིཏཾ ཨུཔམཱ སིཡཱ, ཨུཔམཱིཡཏི ཡཐཱཝུཏྟོ སམྦནྡྷོཏི ཀཏྭཱ. སཱ པནཱལངྐཱརིཡསྶ དྷམྨསྶཱཏིསཡཔཊིཔཱདནཔྤཀཱརོ. ཀཏིཝིདྷཱ སཱཏི ཨཱཧ ‘‘སདྡ’’ཨིཙྩཱདི. སདྡོ ཙ ཨཏྠོ ཙ, ཏེཧི གམྨཱ པཏཱིཡམཱནཱ སདྡཏྠགམྨཱ. ཝཱཀྱཾ པདསམུདཱཡོ. ཏསྶ ཨཏྠོ ཝིསཡོ གོཙརོ ཡསྶཱ ཝཱཀྱཏྠཝིསཡཱཏི ཙ སཱ ཨུཔམཱ ཏིཝིདྷཱ སདྡགམྨཨཏྠགམྨཝཱཀྱཏྠཝིསཡཱཏི ཏིདྷཱ ཧོཏི.

༡༧༦. ཨིདཱནི ཨུཔམཱལངྐཱརཾ ནིདྡིསཏི ‘‘ཨུཔམཱནོ’’ཙྩཱདིནཱ. ཨུཔམཱནོཔམེཡྻཱནཾ ཙནྡནཱིལུཔྤལདལཱབྷཱདཱིནཾ ཨཱནནནཡནཱདཱིནཉྩ པདཏྠཱནཾ སདྷམྨཏྟཾ ཀནྟིམནྟཏཱཔཱིནཏཱདིཏུལྱདྷམྨསམྦནྡྷོ ཨུཔམཱ ནཱམ སིཡཱ, སཱ ཨལངྐརཎཱིཡཝཏྠུནོ ཨཱདྷིཀྐཔཊིཔཱདནཔྤཀཱརཱ ཨུཔམཱ སདྡཏྠགམྨཱ སདྡགམྨཱ ཙ ཨཏྠགམྨཱ ཙ ཝཱཀྱཏྠཝིསཡཱ ཙ, ཨིཏི ཨེཝཾ ཏིདྷཱ ཏིཔྤཀཱརཱ ཧོཏི. ཨེཏྠ ཨུཔམཱནོཔམེཡྻབྷཱུཏཱནཾ ཙནྡཱནནཱདིཔདཏྠཱནཾ སདྷམྨསངྑཏོ ཨཉྙམཉྙཏུལྱཀནྟིམནྟཏཱཔཱིནཏཱདིདྷམྨཡོགོ པདཏྠཱནཾ ཨུཔམཏྠསྶ པཏིཊྛིཏཏྟཱ ཨུཔཊྛཱནཏཱཡ ཨུཔམཱ ནཱམ ཧོཏི, ཏནྣིསྶཡཙནྡཱདཡོ པན ནིསྶིཏཝོཧཱརེན ཨུཔམཱ ནཱམ ཧོཏི, ཨུཔམཱནབྷཱུཏཙནྡཱདིཨཏྠཔཊིཔཱདཀོ ཙནྡིམཱདིསདྡོཔི ཏདཏྠེན ཨུཔམཱ ནཱམ ཧོཏི, ཨུཔམེཡྻུཔམེཡྻནིསྶཡཏཔྤཊིཔཱདཀཱནམྤི ཨུཔམེཡྻབྷཱཝོ ཨེཝམེཝ དཊྛབྦོ. ཨུཔམཱིཡཏེ ཨནེནཱཏི ཨུཔམཱནནྟི ཀཏྭཱ ཙནྡཱདི ཨུཔམཱནཾ ཝུཙྩཏི, ཨུཔམཱིཡཏཱིཏི ཨུཔམེཡྻཾ, ཨཱནནཱདི, ཨུཔམཱནཉྩ ཨུཔམེཡྻཉྩཱཏི ཙ, སམཱནོ ཙ སོ དྷམྨོ ཙེཏི ཙ, ཏསྶ བྷཱཝོཏི ཙ, སདྡོ ཙ ཨཏྠོ ཙཱཏི ཙ, ཏེཧི གམྨཱཏི ཙ, ཝཱཀྱསྶ ཨཏྠོཏི ཙ, སོ ཝིསཡོ ཡསྶཱ ཨུཔམཱཡཱཏི ཙ ཝཱཀྱཾ.

༡༧༧.

སམཱསཔཙྩཡེཝཱདཱི, སདྡཱ ཏེསཾ ཝསཱ ཏིདྷཱ;

སདྡགམྨཱ སམཱསེན, མུནིནྡོ ཙནྡིམཱནནོ.

༡༧༧. ཏཏྠ ¶ སདྡགམྨཱཔི ཏིདྷཱ སིཡཱཏི དསྶེཏུམཱཧ ‘‘སམཱས’’ཨིཙྩཱདི. སམཱསོ ཙ པཙྩཡོ ཙ ཨིཝཱདི ཙ, ཏེ སདྡཱ ནཱམ, སདྡསདྡེན སམཱསཱདཡོ ཝཏྟུམདྷིཔྤེཏཱཏི ཨཏྠོ. ཏེསཾ སམཱསཱདཱིནཾ ཝསཱ སདྡགམྨཱ ཏིདྷཱ ཧོཏི སམཱསསདྡགམྨཱ པཙྩཡསདྡགམྨཱ ཨིཝཱདིསདྡགམྨཱཏི, སམཱསེན སམཱསསདྡེན གམྨཱ ཨུཔམཱ ཝུཙྩཏཱིཏི སེསོ. ཨུདཱཧརཏི ‘‘མུནིནྡོ ཙནྡིམཱནནོ’’ཏི, ཙནྡིམཱ ཝིཡ རུཙིརམཱནནཾ མུཁཾ ཡསྶ སོ ཙནྡིམཱནནོ. ཨེཏྠ ཙ ཙནྡིམཾ ཨུཔམཱནཾ, ཨཱནནཾ ཨུཔམེཡྻཾ, རུཙིརཏྟཾ དྷམྨོ, ཙནྡིམཱནནཱནཾ སམཱནདྷམྨསམྦནྡྷིཛོཏཀོ ཝིཡསདྡོ, ཏེསུ སཱདྷཱརཎདྷམྨཝཱཙཀསྶ ཝིཡསདྡསྶ ཙོཔམཱཛོཏཀསྶཱཔྤཡོགོ སམཱསེནེཝ ཝུཏྟཏྟཱ, ཨེཏྠ པན ཝིཡསདྡོ ཙནྡིམཱསདྡེན ཨུཔམཱནཝཱཙཀེན སམྦནྡྷམུཔགཏོ ཙནྡགཏམེཝ སདིསཏྟཾ ཝདཏི, མུཁགཏཾ པན སཱམཏྠིཡཱ པདཱིཡཏེ, ཨེཝམཱིདིསཾ དཊྛབྦཾ.

༡༧༧. ཏེསུ ཡཐཱཝུཏྟེསུ སདྡགམྨསྶ ཏིཝིདྷཏྟཾ དསྶེཏུཾ ཨཱཧ ‘‘སམཱསེ’’ཙྩཱདི. སམཱསཔཙྩཡེཝཱདཱི སམཱསོ, ཨཱཡཱདིཔཙྩཡཱ, ཨིཝཱདཡོ ཙ སདྡཱ ནཱམ, ཏེསཾ སམཱསཱདཱིནཾ ཝསཱ བྷེདེན སདྡགམྨཱ ཏིདྷཱ སམཱསསདྡགམྨཱ པཙྩཡསདྡགམྨཱ ཨིཝཱདིསདྡགམྨཱཏི ཏིཝིདྷཱ ཧོཏི. སམཱསེན སམཱསསདྡེན གམྨོཔམཱ ཝུཙྩཏི ‘‘མུནིནྡོ ཙནྡིམཱནནོ’’ཏི. མུནིནྡོ སམྨཱསམྦུདྡྷོ ཙནྡིམཱནནོ ཙནྡསམཱནམནོཧརམུཁམཎྜལེན ཡུཏྟོ ཧོཏི, སམཱསོ ཙ པཙྩཡོ ཙ ཨིཝཨིཏི ཨིདཾ ཨཱདི ཡེསཾ ཝཱདཱིནནྟི ཙ, སདྡེན གམྨཱཏི ཙ, མུནཱིནཾ ཨིནྡོཏི ཙ, ཙནྡིམཱ ཝིཡ རུཙིརཾ ཨཱནནཾ མུཁཾ ཡསྶེཏི ཙ ཝིགྒཧོ. ཨེཏྠ ‘‘ཙནྡིམཱ’’ཏི ཨུཔམཱནཾ, ‘‘ཨཱནན’’ནྟི ཨུཔམེཡྻཾ, རུཙིརཏྟཾ ཨུཔམཱནོཔམེཡྻཱནཾ སཱདྷཱརཎདྷམྨོ, ‘‘ཝིཡཱ’’ཏི སདྡོ ཙནྡཱནནཱནཾ དྭིནྣཾ ཨཱནནགཏརུཙིརཏྟཾ ཙནྡེ ཙ, ཙནྡགཏརུཙིརཏྟཾ ཨཱནནེ ཙ ཨཏྠཱིཏི སམཱནདྷམྨསམྦནྡྷཾ ¶ ཛོཏེཏི, ཨིཧ སཱདྷཱརཎདྷམྨཝཱཙཀསྶ རུཙིརསདྡསྶ, ཏུལྱདྷམྨསངྑཱཏོཔམཱཛོཏཀསྶ ཝིཡསདྡསྶ ཙ ཨཔྤཡོགོ ཏེསཾ ཨཏྠཱནཾ སམཱསེན ཝུཏྟཏྟཱ. ཨེཏྠ ཨུཔམཱནཝཱཙཀེན ཙནྡིམཱསདྡེན ཡུཏྟོ ཝིཡ སདྡོ ཙནྡགཏསདིསཏྟཾ ཛོཏེཏི, མུཁགཏསདིསཏྟཾ པན སཱམཏྠིཡཱ པཏཱིཡཏེ. ཏཐཱ ཧི མུཁཾ ཙནྡསམཱནམཱགཙྪནྟཾ ཙནྡསྶ མུཁསདིསཏྟཾ ཝིནཱ ན བྷཝཏཱིཏི ཨཉྙཐཱནུཔཔཏྟི སཱམཏྠིཡནྟི.

༡༧༨.

ཨཱཡཱདཱི པཙྩཡཱ ཏེཧི, ཝདནཾ པངྐཛཱཡཏེ;

མུནིནྡནཡནདྭནྡཾ, ནཱིལུཔྤལདལཱིཡཏི.

༡༧༨. ཨིདཱནི པཙྩཡསདྡགམྨཾ དསྶེཏི ‘‘ཨཱཡཱདི’’ཙྩཱདིནཱ. ཨཱཡཱདཱིཏི ཨཱཡཨཱིཡཀཔཙྩཡཱདཡོ པཙྩཡཱ པཙྩཡསདྡཱ ནཱམ, ཏེཧི པཙྩཡསདྡེཧི གམྨཱ ཨུཔམཱ ཝུཙྩཏི. ཨུདཱཧརཏི ‘‘ཝདན’’མིཙྩཱདི. པངྐཛམིཝ རུཙིརམཱཙརཏི པངྐཛཱཡཏེ. ཨེཏྠཱཔི པངྐཛམུཔམཱནཾ, ཨཱཙརཎཀྲིཡཱཡ ཀཏྟུབྷཱུཏཾ ཨཱནནམུཔམེཡྻཾ, རུཙིརཏྟཾ སདྷམྨོ, པངྐཛཱནནཱནཾ སམཱནདྷམྨསམྦནྡྷཛོཏཀོ ཨིཝསདྡོ. ཏཏྠ རུཙིར ཨིཝསདྡཱནཾ པུབྦེ ཝིཡཱཔྤཡོགོ པཙྩཡེན ཝུཏྟཏྟཱཏི སབྦཏྠ ཝིཉྙེཡྻཾ. ཨེཝམུཔརིཔི.

༡༧༨. ཨིདཱནི པཙྩཡསདྡགམྨོཔམཾ ནིདསྶེཏི ‘‘ཨཱཡཱདི’’ཙྩཱདིནཱ. ཨཱཡཱདཱི ‘‘ཨཱཡ ཨཱིཡ ཀ’’ཨིཏིཨཱདཡོ པཙྩཡཱ པཙྩཡསདྡཱ ནཱམ, ཏེཧི པཙྩཡསདྡེཧི གམྨོཔམཱ ཝུཙྩཏི ‘‘ཝདནཾ…པེ… དལཱིཡཏཱི’’ཏི. ཝདནཾ མུཁཾ པངྐཛཱཡཏེ པདུམམིཝ རུཙིརཾ ཨཱཙརཏི. མུནིནྡནཡནདྭནྡཾ སབྦཉྙུནོ ནེཏྟཡུགལ༹ཾ ནཱིལུཔྤལདལཱིཡཏི ནཱིལུཔྤལཔཏྟམིཝ རུཙིརམཱཙརཏི. ཨཱཡོ ཨཱདི ཡེསཾ ཨཱིཡཱདཱིནནྟི ཙ, པངྐཛམིཝ རུཙིརམཱཙརཏི པཝཏྟཏཱིཏི ཙ, མུནིནྡསྶ ནཡནདྭནྡམིཏི ཙ, ནཱིལུཔྤལསྶ དལམིཏི ཙ, ཏམིཝ རུཙིརམཱཙརཏཱིཏི ཙ ཝཱཀྱཾ. ཨེཏྠ ‘‘པངྐཛ’’མིཏི ཙ ‘‘ནཱིལུཔྤལ’’མིཏི ཙ ཨུཔམཱནཾ, ཨཱཙརཎཀྲིཡཱཡ ཀཏྟུབྷཱུཏཾ ཝདནཾ ¶ ནཡནདྭནྡཉྩ ཨུཔམེཡྻཾ, རུཙིརཏྟཾ ཨུཔམཱནོཔམེཡྻཱནཾ སདྷམྨོ, ཨུཔམཱནོཔམེཡྻཱནཾ སམཱནདྷམྨཛོཏཀོ ཨིཝསདྡོ, ཏེསཾ ཨཏྠཱནཾ པཙྩཡེན ཝུཏྟཏྟཱ ཏེསམཔྤཡོགོ. ཨེཝརཱུཔེསུ ཨཉྙེསུཔི ཨེཝམེཝ ཝེདིཏབྦོ.

༡༧༩.

ཨིཝཱདཱི ཨིཝ ཝཱ ཏུལྱ-སམཱན ནིབྷ སནྣིབྷཱ;

ཡཐཱསངྐཱས ཏུལིཏ-པྤཀཱས པཏིརཱུཔཀཱ.

༡༨༠.

སརཱིསརིཀྑ སཾཝཱདཱི, ཝིརོདྷཱི སདིསཱ ཝིཡ;

པཊིཔཀྑཔཙྩནཱིཀ-སཔཀྑོ’པམིཏོ’པམཱ.

༡༨༡.

པཊིབིམྦ པཊིཙྪནྣ-སརཱུཔ སམ སམྨིཏཱ;

སཝཎྞཱ’བྷཱ པཊིནིདྷི, སདྷམྨཱདི སལཀྑཎཱ.

༡༨༢.

ཛཡཏྱ’ཀྐོསཏི ཧསཏི, པཏིགཛྫཏི དཱུབྷཏི;

ཨུསཱུཡཏྱ’ཝཛཱནཱཏི, ནིནྡཏི’སྶཏི རུནྡྷཏི.

༡༨༣.

ཏསྶ ཙོརེཏི སོབྷགྒཾ, ཏསྶ ཀནྟིཾ ཝིལུམྤཏི;

ཏེན སདྡྷིཾ ཝིཝདཏི, ཏུལྱཾ ཏེནཱདྷིརོཧཏི.

༡༨༤.

ཀཙྪཾཝིགཱཧཏེ ཏསྶ, ཏམནྭེཏྱ’ནུབནྡྷཏི;

ཏཾསཱིལཾ, ཏཾ ནིསེདྷེཏི, ཏསྶ ཙཱནུཀརོཏི’མེ.

༡༧༩-༡༨༤. ཨིཝཱདཱི ཨིཝཱདཡོ ནཱམ ཨིམེཏི སམྦནྡྷོ. ཨིཝོ ཙ ཝཱ ཙ ཏུལྱོ ཙ སམཱནོ ཙ ནིབྷོ ཙ སནྣིབྷོ ཙཱཏི དྭནྡེ ཨིཝ…པེ… སནྣིབྷཱ. སདྡམཔེཀྑིཡ པུལླིངྒཏཱ. ཨེཝམུཔརིཔི ཡཐཱཡོགཾ. ‘‘སདྷམྨཱདཱི’’ཏི ཨཱདིསདྡེན སཱདྷཱརཎསཙྪཱཡཱདཱིནཾ པརིགྒཧོ. ཛཡཏིཙྩཱདཱིསུ ཀམྨཾ.

༡༧༩- ༡༨༤. ཨིཝཱདིསདྡགམྨོཔམཱདྷིཀཱརེ པཋམཾ ཏཱཝ ‘‘ཨིཝཱདཡོ ནཱམ ཨེཏེ’’ཏི དསྶེཏི ‘‘ཨིཝཱདི’’ཙྩཱདིནཱ. ཨིཝཱདཱིཏི པདསྶ ཚཊྛམགཱཐཱཡ ཨིམེཏི ཨིམིནཱ སམྦནྡྷོ, ཏསྶ ཙཱཏི ཙསདྡཾ ཡུཛྫནཊྛཱནེ ཡོཛེཏྭཱ སནྣིབྷཱ ཙཱཏིཨཱདཡོ ཡོཛེཏབྦཱ. ‘‘སདྷམྨཱདཱི’’ཏིཨཱདིསདྡེན སཱདྷཱརཎསཙྪཱཡཱདཡོ གཧིཏཱ. ནིནྡཏི ཨིསྶཏཱིཏི པདཙྪེདོ, ཨིམེ ¶ དྭེཔཉྙཱས ཨིཝཱདཡོ ནཱམ. ‘‘ཛཡཏི ཨཀྐོསཏི ཧསཏི’’ཨིཙྩཱདིཀཾ ཏཾཏཾཀྲིཡཱཔདསངྑཏཨནུཀཱརིཡཱནཾ ཨནུཀརཎནྟི ཀཏྭཱ དྭནྡོཡེཝ, ‘‘སནྡྷིསམཱསཱ ཨདྡྷསྶཱ’’ཏི [སནྡྷིསམཱསོ ཏདདྡྷསྶཱཏི (ཀ.)] ཝུཏྟཏྟཱ སནྡྷིསམཱསཱནཾ གཱཐདྡྷསྶ ཝིནཱ ཨུབྷཡདྡྷམཛ྄ཛྷེ ཨལབྦྷནཏོ དཱུབྷཏིཔདཏོ པུབྦེཡེཝ སམཱསོ ཀཱཏབྦོ, ནོ ཙེ, ཨསམཱསོཏི གཧེཏབྦོ. ཏསྶ ཙོརེཏི སོབྷགྒམིཙྩཱདིཀམྤི ཝཱཀྱཱནུཀརཎནྟི ཀཏྭཱ ཏཏྠ སམཱསོ, ཝཱཀྱེ ཀེཝལཔདཱནཱིཏི ཝཱ གཧེཏབྦོ. ཨིམེསཾ སབྦེསམྤི ཨིཝ སདྡཔརིཡཱཡཏྟཱ སདིསཏྠཱཏི སབྦཏྠ བྷཱཝཏྠོ, ཨཝཡཝཏྠོ པན པཱཀཊོཡེཝ.

༡༨༥.

ཨུཔམཱནོཔམེཡྻཱནཾ, སདྷམྨཏྟཾ ཝིབྷཱཝིཧི;

ཨིམེཧི ཨུཔམཱབྷེདཱ, ཀེཙི ནིཡྻནྟི སམྤཏི.

༡༨༥. ཨིཝཱདཱིནཾ ཝིནིཡོགཝིསཡཾ དསྶེཏྭཱ ཨུཔམཱབྷེདཾ དསྶེཏུཾ པཊིཛཱནཱཏི ‘‘ཨུཔམཱན’’ཨིཙྩཱདི. ཀེཙཱིཏི ཨིམིནཱ ཨཔརིཡནྟཏྟམེསཾ [ཨཔརིཡནྟཔབྷེདཾ (ཀ.)] དསྶེཏི. ཏཐཱ ཙ ཝཀྑཏི ‘‘པརིཡནྟོ ཝིཀཔྤཱན’’ནྟིཨཱདི. ནིཡྻནྟི ཨུདཱཧརཱིཡནྟི.

༡༨༥. ཨིདཱནི ཨིཝཱདིསདྡགམྨོཔམཾ དསྶེཏུཾ པཊིཛཱནཱཏི ‘‘ཨུཔམཱནོ’’ཙྩཱདིནཱ. ཨུཔམཱནོཔམེཡྻཱནཾ སདྷམྨཏྟཾ སམཱནདྷམྨསམྦནྡྷོ. ཝིབྷཱཝིཧི པཀཱསཀེཧི. ཨིམེཧི ཨིཝཱདཱིཧི སདྡེཧི ཛཱནིཏབྦཱ ཀེཙི ཨུཔམཱབྷེདཱ ཨཔརིཡནྟཏྟཱ སམྤཏི དཱནི ལདྡྷཱཝསརེ ནིཡྻནྟི ཨུདཱཧརཎམཏྟེན པཊིཔཱདཱིཡནྟི.

༡༨༦.

ཝིཀཱསིཔདུམཾ’ཝཱ’ཏི-སུནྡརཾ སུགཏཱནནཾ;

ཨིཏི དྷམྨོཔམཱ ནཱམ, ཏུལྱདྷམྨནིདསྶནཱ.

༡༨༦. ‘‘ཝིཀཱསི’’ཙྩཱདི. སུགཏཱནནཾ མུནིནྡསྶ ཝདནཾ ཨཏིསུནྡརཾ ཨཙྩནྟརམཎཱིཡཾ. ཀིམིཝ? ཝིཀཱསིཔདུམཾཝ པབུཛ྄ཛྷམཱནཔདུམཾཝིཡ. ཨིཏི ཨཡམེཝཾཝིདྷཱ དྷམྨོཔམཱ ནཱམ ཧོཏི. ཀསྨཱ? ¶ ཨཱནནཔདུམཱནཾ སམཱནསྶ དྷམྨསྶ གུཎསྶ སུནྡརསྶ ལཀྑཎསྶ ནིདསྶནཱ སུནྡརཏྟནྟི པཊིཔཱདནཏོ.

༡༨༦. ཨུདཱཧརཎམཱཧ ‘‘ཝིཀཱསི’’ཙྩཱདིནཱ. སུགཏཱནནཾ བྷགཝཏོ མུཁཾ ཝིཀཱསིཔདུམཾཝ བུཛ྄ཛྷམཱནཔངྐཛམིཝ ཨཏིསུནྡརཾ ཧོཏི. ཨིཏི ཨཱིདིསཱ ཨུཔམཱ ཏུལྱདྷམྨནིདསྶནཱ ཨཏིསུནྡརམིཏི སམཱནགུཎདསྶནེན དྷམྨོཔམཱ ནཱམ ཧོཏི. པདུམཱནནཱནཾ སཱདྷཱརཎགུཎསྶ པཀཱསནཏོ ཨཏིསུནྡརམིཏི ཏུལྱདྷམྨོ ནཱམ ཧོཏི. ཨེཏྠ པདུམགཏཏུལྱདྷམྨསམྦནྡྷསངྑཱཏཱཡ ཨུཔམཱཡ ཨིཝསདྡེན ཛོཏིཡམཱནཏྟེཔི ཨཏིསུནྡརནྟི ཝུཏྟཏྟཱ ཡཐཱཝུཏྟོཔམཱཡ དྷམྨེན ཡུཏྟཏྟཱ དྷམྨོཔམཱ ནཱམ ཧོཏཱིཏི ཨདྷིཔྤཱཡོ.

༡༨༧.

དྷམྨཧཱིནཱ མུཁ’མྦྷོཛ-སདིསཾ མུནིནོ ཨིཏི;

ཝིཔརཱིཏོཔམཱ ཏུལྱ-མཱནནེན’མྦུཛཾ ཏཝ.

༡༨༧. ‘‘དྷམྨ’’ཨིཙྩཱདི. མུནིནོ སམྨཱསམྦུདྡྷསྶ མུཁཾ ཨམྦྷོཛེན པདུམེན སདིསཾ སམཱནཾ. ཨིཏི ཨཡཾ དྷམྨཧཱིནོཔམཱ ནཱམ སུནྡརསངྑཱཏསྶ གུཎསྶ ཨནིདྡིཊྛཏྟཱ, སཱ ཏུ ཨཏྠཝསཱ གམྱཏེ. ཀཐམཉྙཐཱ ཡུཛྫཏཱིཏི? ཨེཏྠ པན སདིསསདྡོ ཨུཔམེཡྻསྶ མུཁསྶ ཝིསེསནནྟི མུཁགཏམེཝ སདིསཏྟཾ ཝདཏི, ཨམྦྷོཛགཏཾ ཏུ སཱམཏྠིཡཱ གམྱཏེ. ཨེཝམཱིདིསཾ ཉེཡྻཾ. ‘‘ཝིཔརཱིཏེ’’ཙྩཱདི. མུནཱིཏི གམྱཏེ སུཏཏྟཱ, བྷོ མུནི ཏཝ ཨཱནནེན མུཁེན ཨམྦུཛཾ ཏུལྱནྟི ཨཡཾ ཝིཔརཱིཏོཔམཱ. དྷམྨཧཱིནཏྟེཔི པསིདྡྷིཝིཔརིཡཡེནཱབྷིཧིཏཏྟཱ ཏནྣཱམེནེཝ ཝུཏྟཱ. ཨེཝམུཔརིཔི.

༡༨༧. ‘‘དྷམྨཧཱིནེ’’ཙྩཱདི. ‘‘མུཁམྦྷོཛསདིསཾ མུནིནོ’’ཏྱཡཾ ཨུཔམཱ. དྷམྨཧཱིནཱ ཏུལྱདྷམྨཔཀཱསཀསུནྡརཱདིསདྡཧཱིནཏྟཱ དྷམྨཧཱིནཱ ནཱམ. ཝཱཙཀཱབྷཱཝེ ཏུལྱདྷམྨོ ཀཐཾ པཏཱིཡཏཱིཏི ཙེ? མུནིནོ མུཁཾ ཝདནཾ ཨམྦྷོཛསདིསཾ པདུམསདིསམིཏི. ཨེཏྠ མུཁསྶ ཨམྦྷོཛསམཱནཏྟཾ མུཁམྦྷོཛཱནཾ སཱདྷཱརཎདྷམྨེ ཨསཏི ¶ ཀཐཾ བྷཝཏཱིཏི? ཨཉྙཐཱནུཔཔཏྟིལཀྑཎསཱམཏྠིཡཱཏི, ཨིཝཔརིཡཱཡོ སདིསསདྡོ མུཁསྶ ཝིསེསནཾ ཡསྨཱ ཧོཏི, ཏསྨཱ མུཁགཏསདིསཏྟཾ ཝདཏི, ཨམྦྷོཛགཏསདིསཏྟཾ པན སཱམཏྠིཡཱ ཨེཝ ཝིཉྙཱཡཏེ. ཧེ མུནི ཏཝ ཏུཡ྄ཧཾ ཨཱནནེན ཨམྦྷོཛཾ ཏུལྱཾ སམཱནནྟི ཨཡཾ ཝིཔརཱིཏོཔམཱ. ‘‘ཨམྦུཛེན ཨཱནནཾ ཏུལྱ’’ནྟི ལོཀཔྤསིདྡྷིཡཱ ཝིཔརིཡཡེན ‘‘ཨཱནནེན ཨམྦུཛཾ ཏུལྱ’’ནྟི ཝུཏྟཏྟཱ དྷམྨཧཱིནཏྟེ སཏིཔི ཝིཔརཱིཏོཔམཱ ནཱམ ཧོཏི. ‘‘སུཏཱནུམིཏེསུ སུཏསམྦནྡྷོ བལཝཱ’’ཏི [པརིབྷཱསེནྡུསེཁར ༡༡༢] ཝུཏྟཏྟཱ ཨེཏྠ ‘‘མུནཱི’’ཏི ཨཝིཛྫམཱནེཔི པུབྦདྡྷེ ‘‘མུནིནོ’’ཏི སུཏཏྟཱ ལབྦྷམཱནོ ‘‘ཏཝཱ’’ཏི ཏུམྷསདྡསནྣིདྷཱནེན ཨཱམནྟནཏྠོ ཝིཉྙཱཡཏི. ཨེཏྠ ཨིཝཔརིཡཱཡོ ཏུལྱསདྡོ ཨམྦུཛཝིསེསནབྷཱུཏོ ཨམྦུཛགཏསདིསཏྟཾ ཝདཏི, ཨཱནནགཏསདིསཏྟཉྩ ཨམྦུཛཱནནཱནཾ སཱདྷཱརཎདྷམྨོ ཙ སཱམཏྠིཡཱ ཉཱཡཏིཙྩཱདིཀཾ ཝུཏྟནཡེན ཉཱཏབྦཾ. ཨུཔརིཔི པཱཀཊཊྛཱནཾ ཡཐཱརཧཾ ཡོཛེཏབྦཾ.

༡༨༨.

ཏཝཱནན’མིཝ’མྦྷོཛཾ, ཨམྦྷོཛ’མིཝ ཏེ མུཁཾ;

ཨཉྙམཉྙོཔམཱ སཱ’ཡཾ, ཨཉྙམཉྙོཔམཱནཏོ.

༡༨༨. ‘‘ཏཝ’’ཨིཙྩཱདི. ཨཉྙམཉྙོཔམཱནཏོཏི ཨཉྙམཉྙསྶ མུཁསྶ ཨམྦྷོཛསྶ ཙ ཨཉྙམཉྙེན ཏཾདྭཡེན ཨུཔམཱནཏོ.

༡༨༨. ‘‘ཏཝཱནནི’’ཙྩཱདི. ‘‘ཨམྦྷོཛཾ ཏཝཱནནམིཝ, ཏེ མུཁཾ ཨམྦྷོཛམིཝཱ’’ཏི ཨཡམུཔམཱ. ཨཉྙམཉྙོཔམཱནཏོ ཨཉྙམཉྙསྶ ཨུཔམཱནཏྟཱ ཨཉྙམཉྙོཔམཱ ནཱམ ཧོཏི. ཨཉྙམཉྙསྶ ཨུཔམཱཏི ཙ, ཨཉྙམཉྙསྶ ཨུཔམཱནནྟི ཙ ཝིགྒཧོ. ཝིགྒཧདྭཡེཔི པུབྦཝིབྷཏྟིལོཔོ. སབྦཱདཱིནཾ བྱཏིཧཱརལཀྑཎེན ཨུཏྟརཝིབྷཏྟིལོཔོ. སམཱསལཀྑཎེན ཨཉྙཏྠསྶ ཨཔེཀྑཱསིདྡྷཏྟཱ ¶ མུཁཱཔེཀྑཱཡ ཨཉྙཾ ཨམྦྷོཛཉྩ, ཨམྦྷོཛཱཔེཀྑཱཡ ཨཉྙཾ མུཁཉྩ ཀམེན ཨུཔམེཡྻཱ ནཱམ. ཨམྦྷོཛཱཔེཀྑཱཡ ཨཉྙཾ མུཁཉྩ, མུཁཱཔེཀྑཱཡ ཨཉྙཾ ཨམྦྷོཛཉྩ ཨུཔམཱནཾ ནཱམ.

༡༨༩.

ཡདི ཀིཉྩི བྷཝེ’མྦྷོཛཾ,

ལོཙནབྦྷམུཝིབྦྷམཾ;

དྷཱརེཏུཾ མུཁསོབྷཾ ཏཾ,

ཏཝེ’ཏི ཨབྦྷུཏོཔམཱ.

༡༨༩. ‘‘ཡདི’’ཙྩཱདི. ལོཙནཱནི ཙ བྷམུཡོ ཙ, ཏཱསཾ ཝིབྦྷམོ ཡསྨིཾ, ཏཾ, ཏཱདིསམམྦྷོཛཾ ཀིཉྩི ཀིམཔི ཡདི བྷཝེ. ཏམཱིདིསམམྦྷོཛཾ ཏཝ མུཁསོབྷཾ ཝདནཀནྟིཾ དྷཱརེཏུཾ ནིསིཛ྄ཛྷཏེ. ཀིཾ ནྭཙྪརིཡམཱིདིསནྟི ཨབྦྷུཏཏྠཝིབྷཱཝནེན ཝདནམམྦུཛེནོཔམཱིཡཏཱིཏི ཨཡམབྦྷུཏོཔམཱ ཉཱཏབྦཱཏི.

༡༨༩. ‘‘ཡདི’’ཙྩཱདི. ལོཙནབྦྷམུཝིབྦྷམཾ ལོཙནབྷམཱུནཾ ལཱིལཱཝནྟཾ ཀིཉྩི ཨམྦྷོཛཾ ཀིཉྩི ཨཙྪརིཡཾ པདུམཾ ཡདི བྷཝེ ཙེ སིཡཱ, ཏམམྦྷོཛཾ ཏཝ མུཁསོབྷཾ ཝདནཀནྟིཾ དྷཱརེཏུཾ སམཏྠོ ཧོཏི. ཨིཏི ཨཱིདིསཱི ཨུཔམཱ ཨབྦྷུཏོཔམཱ ཨབྦྷུཏདྷམྨཔཀཱསཀཏྟཱ ཨབྦྷུཏོཔམཱ ནཱམ. ཨེཏྠ ཨཝིཛྫམཱནོཔི ཝིཛྫམཱནཏྟེན པརིཀཔྤིཏོ པདུམགཏོ ལོཙནབྦྷམུཝིབྦྷམསམྦནྡྷོ ཨམྦྷོཛཝིསེསནེན ‘‘ལོཙནབྦྷམུཝིབྦྷམ’’ནྟི ཨིམིནཱ ཛོཏིཏོ. ཏསྨཱ ཨམྦྷོཛཾ ལོཙནབྦྷམུཝིབྦྷམསམྦནྡྷསངྑཏཨུཔམཱཡ ཛོཏཀཏྟཱ ནིསྶིཏཝོཧཱརེན ཨུཔམཱ, མུཁཾ ཨུཔམེཡྻནྟི མུཁགཏོ ལོཙནབྦྷམུཝིབྦྷམསམྦནྡྷོ ཡདི མུཁེ ན བྷཝེཡྻ, ཏཱདིསཾ མུཁསོབྷཾ དྷཱརེཏུཾ ཀཐཾ སམཏྠོཏི སཱམཏྠིཡཱ ཉཱཡཏི. ལོཙནབྦྷམུཝིབྦྷམསངྑཱཏསཱདྷཱརཎདྷམྨོ པན ‘‘ལོཙནཱནི ཙ བྷམུཡོ ཙེཏི ཙ, ཏཱསཾ ཝིབྦྷམོ ཡསྨི’’ནྟི ཙ ཝིགྒཧེ ནིཔྥནྣེན ¶ བྷིནྣཱདྷིཀརཎཨཉྙཔདཏྠསམཱསེན གུཎཱིབྷཱུཏསྶཔི གཧིཏཏྟཱ ཝིཉྙཱཡཏི [གཧཎསྶ ཝིཉྙཱཡམཱནཏྟཱ (ཀ.)].

༡༩༠.

སུགནྡྷི སོབྷསམྦནྡྷི, སིསིརཾསུཝིརོདྷི ཙ;

མུཁཾ ཏཝ’མྦུཛཾཝེ’ཏི, སཱ སིལེསོཔམཱ མཏཱ.

༡༩༠. ‘‘སུགནྡྷི’’ཙྩཱདི. ཏཝ མུཁཾ ཨམྦྷོཛམིཝ སིསིརཾསུནོཙནྡསྶ ཝིརོདྷི པཙྩནཱིཀཾ, མུཁཾ ཏཾསམཱནཀནྟིཏྟཱ ཨམྦུཛཉྩ ཏདུདཡེ སངྐོཙབྷཛནཏོ. སོབྷསམྦནྡྷི ཀནྟིཡུཏྟཾ, མུཁམམྦུཛཉྩ. སུགནྡྷོ ཨསྶ ཨཏྠཱིཏི སུགནྡྷི ཙ དྭཡམཔཱིཏི ཨེཝཾ སིལེསཔརིགྒཧེན མུཁམྦུཛཱནཾ ཨུཔམཱཡོགཏོ སཱ ཡཐཱཝུཏྟཱ སིལེསོཔམཱ མཏཱ.

༡༩༠. ‘‘སུགནྡྷི’’ཙྩཱདི. ཏཝ མུཁཾ ཨམྦྷོཛམིཝ སིསིརཾསུཝིརོདྷི ཙནྡསྶ ཝིརུདྡྷཾ ཧོཏི ཏུལྱཏྟཱ. པདུམཾ པན ཙནྡོདཡེན ཨཏྟནོ སངྐོཙནཏྟཱ ཏསྶ ཝིརུདྡྷཾ ཧོཏི. སོབྷསམྦནྡྷི ཙ ཨནཉྙསཱདྷཱརཎམུཁགཏཀནྟིསམྦནྡྷཡུཏྟཉྩ ཧོཏི. པདུམཾ པན པདུམགཏཀནྟིསམྦནྡྷིནཱ ཡུཏྟཾ ཧོཏི. སུགནྡྷི ཙ ཙཏུཛྫཱཏིསུགནྡྷཝཧནཏོ […ཝམནཏོ (ཀ.)] སུགནྡྷི ཙ ཧོཏི. ཨམྦུཛཾ པན པདུམསུགནྡྷེནེཝ ཡུཏྟཾ ཧོཏི. ཨིཏི ཨཱིདིསཱི ཨུཔམཱ སིལེསོཔམཱ ཨེཀཔདཱཏིཧིཏཨུབྷཡཏྠལཀྑཎེན སིལེསཝསེན ཝུཏྟཏྟཱ སིལེསོཔམཱ ནཱམ ཧོཏི. སིསིརཱ སཱིཏལཱ ཨཾསུ ཀནྟི ཨསྶེཏི ཙ, ཏསྶ ཝིརུཛ྄ཛྷཏི སཱིལེནེཏི ཙ, པཙྩཡསཱམཏྠིཡཝསེན དྭིནྣཾ དྭིནྣཾ ཨཏྠཱནཾ ལབྦྷནཏོ སིལིསྶཏི ཨཔརོཔི ཨཏྠོ ཨེཏྠ ཨལངྐཱརེཏི ཙ, སིལེསཝསེན ཝུཏྟཱ ཨུཔམཱཏི ཙ ཝིགྒཧོ. ཨེཏྠ སུགནྡྷོ ཙ སོཏསམྦནྡྷོ ཙ སིསིརཾསུཝིརོདྷིཏྟཉྩེཏི ཨིམེ ཨུཔམཱནོཔམེཡྻཱནམམྦུཛམུཁཱནཾ ཏུལྱདྷམྨོ, ཏེསུ ཨམྦུཛགཏཏུལྱདྷམྨསམྦནྡྷོ སདྷམྨཏྟཱ ཨུཔམཱ ནཱམ ཧོཏི, སཱ ཨམྦུཛསམྦནྡྷིནཱ ཨིཝསདྡེན ཛོཏིཏཱ, ¶ མུཁགཏཏུལྱདྷམྨོ པན ཨསྶཏྠིཏསྶཱིལཏྠེ ཀཏཔཙྩཡེ སཏིཔི སཱམཏྠིཡཱཡེཝ གམྱཏེ.

༡༩༡.

སརཱུཔསདྡཝཱཙྩཏྟཱ, སཱ སནྟཱནོཔམཱ ཡཐཱ;

བཱལཱ’ཝུ’ཡྻཱནམཱལཱ’ཡཾ, སཱལཀཱནནསོབྷིནཱི.

༡༩༡. ‘‘སརཱུཔ’’ཨིཙྩཱདི. ཨཡམུཡྻཱནམཱལཱ བཱལཱཝ ཨིཏྠཱི ཝིཡ. ཀཐཾ? སཱལཀཱནནསོབྷིནཱི བཱལཱ ཏཱཝ སཧཱལཀེན ཀེསསནྣིཝེསཝིསེསེན ཝཏྟཏེ སཱལཀམཱནནཾ ཏེན སོབྷཏེ. སཱལཀཱནནསོབྷིནཱི ཨུཡྻཱནམཱལཱཔི སཱལཱནཾ རུཀྑཝིསེསཱནཾ ཀཱནནེན གཧནེན སོབྷཏེ, ཨེཝརཱུཔཱ སཱ ཏཱདིསཱི སནྟཱནོཔམཱ ཨཱཁྱཱཡཏེ, ཀསྨཱ? སིལེསོཔམཏྟསབྷཱཝེཔི སརཱུཔེན སདིསེན སདྡེན ‘‘སཱལཀཱནནསོབྷིནཱི’’ཏྭེཝཾཝིདྷེན སདྡསནྟཱནེན ཝིསེསབྷཱུཏེན ཝཱཙྩཏྟཱ པཀཱསིཡཏྟཱ ཏསྶཱཨིཏི གམྱཏེ. ཡཐེཏི ནིདསྶནེ.

༡༩༡. ‘‘སརཱུཔེ’’ཙྩཱདི. སརཱུཔསདྡཝཱཙྩཏྟཱ ཏུལྱསུཏིཡཱ ཨཙྪིནྣསམྦནྡྷཝཙནམཱལཱཡ ཝུཙྩམཱནཏྟཱ སཱ ཨུཔམཱ སནྟཱནོཔམཱ ནཱམ ཧོཏི, སིལེསཏྟེ སཏིཔི ཀཏསམཱསེཧི པདསནྟཱནེཧི ཝུཙྩམཱནཏྟཱ སནྟཱནོཔམཱ ནཱམ ཧོཏཱིཏི ཨདྷིཔྤཱཡོ. ‘‘ཡཐེ’’ཏི ཨུདཱཧརཏི. ཨཡཾ ཨུཡྻཱནམཱལཱ ཨེསཱ ཨུཡྻཱནཔནྟི སཱལཀཱནནསོབྷིནཱི ཨལཀསངྑཱཏཀེསསནྣིཝེསསཧིཏེན མུཁེན སོབྷམཱནཱ བཱལཱཝ ཨངྒནཱ ཨིཝ སཱལཀཱནནསོབྷིནཱི སཱལཝནེཧི སོབྷམཱནཱ ཧོཏི. ཨུཔམཱནོཔམེཡྻཱནཾ སམཱནཾ རཱུཔཾ ཡེསནྟི ཙ, སརཱུཔཱ ཙ ཏེ སདྡཱ ཙེཏི ཙ, ཏེཧི ཝཱཙྩཱ ཨུཔམཱཏི ཙ, ཏསྶཱ བྷཱཝོཏི ཙ, སནྟཱནེན ཡུཏྟཱ ཨུཔམཱཏི ཙ, ཨུཡྻཱནཱནཾ མཱལཱཏི ཙ, སཧ ཨལཀེན ཝཏྟམཱནནྟི ཙ, ཏཉྩ ཏཾ ཨཱནནཉྩཱཏི ཙ, ཏེན སོབྷཏི སཱིལེནཱཏི ཙ, སཱལཱནཾ ཀཱནནནྟི ཙ, ཏེན སོབྷཏི སཱིལེནཱཏི ཙ ཝཱཀྱཾ.

༡༩༢.

ཁཡཱི ¶ ཙནྡོ བཧུརཛཾ, པདུམཾ ཏེཧི ཏེ མུཁཾ;

སམཱནམྤི སམུཀྐཾསཱི-ཏྱ’ཡཾ ནིནྡོཔམཱ མཏཱ.

༡༩༢. ‘‘ཁཡཱི’’ཨིཙྩཱདི. ཙནྡོ ཁཡཱི ཁཡོ ཨཙྩཡོ ཡསྶེཏི, པདུམཾ བཧུརཛཾ བཧཱུནི རཛཱནི པརཱགཱཝཡཝཱ ཡསྨིནྟི, ཏེཧི ཨེཝཾབྷཱུཏེཧི ཙནྡཔདུམེཧི ཀནྟིཨཱདིནཱ སམཱནམྤི སདིསམྤི སནྟཾ ཏཝ མུཁཾ སམུཀྐཾསི པརམུཀྐཾསཝནྟཾ, ཁཡསདྡསྶ ཙ རཛསྶ ཙ དོསེཔི ཝཏྟནཏོ, སདྡཙྪལེན ཁཡསྶ དོསརཱུཔསྶ བཧུརཛཏྟསྶ ཙ ཏཏྠཱབྷཱཝཏོཏི. ཨིཏི ཨེཝརཱུཔཱ ཨཡཾ ནིནྡོཔམཱ མཏཱ ནིནྡིཏེན ཙནྡཱདིནཱ ཁཡསྶོཔམིཏཏྟཱ.

༡༩༢. ‘‘ཁཡི’’ཙྩཱདི. ཙནྡོ ཁཡཱི པཱཊིཔདཏོ པཊྛཱཡ དིནེ དིནེ ཨེཀམེཀཱཡ ཀལཱཡ སཱུརིཡསྶ ཨཱསནྣཧེཏུ ཁཱིཡནསབྷཱཝཡུཏྟོ ཧོཏི, པདུམཾ བཧུརཛཾ བཧུརེཎུསམནྣཱགཏཾ ཧོཏི, ཏེཧི ཙནྡཔདུམེཧི སམཱནམྤི ཀནྟིསུགནྡྷཱདཱིཧི སདིསམྤི ཏེ མུཁཾ ཏཝཱནནཾ སམུཀྐཾསི ཁཡརཛསདྡེཧི དོསསྶཱཔི ཝཱཙྩཏྟཱ སདྡཙྪལེཧི གམྱམཱནསྶ ཏཱདིསསྶ དོསསྶ མུཁེ ཨཝིཛྫམཱནཏྟཱ ཨདྷིཀུཀྐཾསགུཎཝནྟཾ ཧོཏི, ཨིཏི ཨཱིདིསཱི ཨཡཾ ཨུཔམཱ ནིནྡོཔམཱ ནིནྡིཏཱནཾ ཙནྡཔདུམཱནཾ མུཁསྶ ཨུཔམིཏཱཏི ནིནྡོཔམཱ ནཱམ ཧོཏི, མུཁཝིསེསནེན ཨིཝསདྡཔརིཡཱཡེན སམཱནསདྡེན མུཁགཏསདྷམྨོ ཛོཏིཏོ ཧོཏི, ཨུཔམཱསངྑཏཙནྡཔདུམགཏསདྷམྨོཔི དྭཱིསུ ཏུལྱདྷམྨོཔི སཱམཏྠིཡཱ གམྱཏེ, ཨཔིསདྡོ ཙེཏྠ ཝཏྟབྦནྟརསམུཙྩཡེ, སམུཀྐཾསོཏི ཝཏྟབྦནྟརོ.

༡༩༣.

ཨསམཏྠོ མུཁེནི’ནྡུ, ཛིན ཏེ པཊིགཛྫིཏུཾ;

ཛལོ༹ ཀལངྐཱི’ཏི ཨཡཾ, པཊིསེདྷོཔམཱ སིཡཱ.

༡༩༣. ‘‘ཨསམཏྠོ’’ཨིཙྩཱདི. ཛིན ཏེ མུཁེན ཛལོ༹ སཱིཏོ ཨཀུསལོ ཙ ཀལངྐོ མིགལཉྪནལཀྑཎོ དོསོ ¶ ཨསྶ ཨཏྠཱིཏི ཀལངྐཱི. སདྡཙྪལེན དོསཀཐནཾ. ཏཱདིསོ ཨིནྡུ ཙནྡོ པཊིགཛྫིཏུཾ ཝིཝདིཏུཾ ཨསམཏྠོ, མུཁནྟུ ཝིསདཾ ཨལངྐཏཉྩེཏི ཀཐམནེནཱཡཾ སདིསོཏི ནིསེདྷདྭཱརེན སདྷམྨཏཱཝ གམྨཏེ, ཨཡཾ པཊིསེདྷོཔམཱ སིཡཱ.

༡༩༣. ‘‘ཨསམཏྠོ’’ཙྩཱདི. ཧེ ཛིན ཏེ ཏུཡ྄ཧཾ མུཁེན པཊིགཛྫིཏུཾ ཝིཝདིཏུཾ ཛལོ༹ སཱིཏལོ ཨཝིསདོ ཀལངྐཱི སསལཀྑཎོ ཝཱ སདོསོ ཝཱ ཨིནྡུ ཙནྡོ ཨསམཏྠོ ཧོཏཱིཏི, ཨཡཾ ཨེདིསཱི ཨུཔམཱ པཊིསེདྷོཔམཱ ནཱམ. ཀལངྐོ ཨསྶ ཨཏྠཱིཏི ཝཱཀྱཾ. ཨེཏྠ ཝིསདེན ཀལངྐརཧིཏེན མུཁེན སཱིཏལོ ཨཝིསདོ སདོསོ ཙནྡོ སམཱནོ བྷཝིཏུམསམཏྠོཏི ཨེཝཾ པཊིསེདྷདྭཡེན ཨིནྡམུཁསངྑཱཏཱནཾ ཨུཔམཱནོཔམེཡྻཱནཾ ཏུལྱདྷམྨསམྦནྡྷསྶ པཀཱསིཏཏྟཱ སཏིཔི ནིནྡོཔམཱབྷཱཝེ པཊིསེདྷོཔམཱ ནཱམ ཧོཏཱིཏི ཨདྷིཔྤཱཡོ. ‘‘པཊིགཛྫིཏུ’’ནྟི ཨིདཾ ཙནྡསྶ ཝིསེསནཏྟཱ ཙནྡགཏསདྷམྨཾ ཛོཏེཏི.

༡༩༤.

ཀཙྪཾ ཙནྡཱརཝིནྡཱནཾ, ཨཏིཀྐམྨ མུཁཾ ཏཝ;

ཨཏྟནཱཝ སམཾ ཛཱཏ-མིཏྱ’སཱདྷཱརཎོཔམཱ.

༡༩༤. ‘‘ཀཙྪ’’མིཙྩཱདི. ཙནྡསྶ ཨརཝིནྡསྶ ཙ ཀཙྪཾ པདཝིཾ ཨཏིཀྐམྨ ཨཝཏྠརིཡ ཏེས’མཝཀཾསཏོ [ཨཝཏྠུཡཏེསམཎཾསཏོ (ཀ.)], ཏཝ མུཁཾ ཨཏྟནོ སརཱུཔེནེཝ སམཾ ཛཱཏམིཏི ཨེཝརཱུཔཱ ཨསཱདྷཱརཎཏཱབྷིདྷཱནེན སདིསཏྟཔཏཱིཏིཡཱ ཨསཱདྷཱརཎོཔམེཏི ནིགདྱཏེ.

༡༩༤. ‘‘ཀཙྪ’’མིཙྩཱདི. ཧེ མུནི ཏཝ མུཁཾ ཙནྡཱརཝིནྡཱནཾ ལོཀཔཱུཛིཏཱནཾ སསིཨམྦུཛཱནཾ ཀཙྪཾ པདཝིཾ ཨཝཏྠཾ ཝཱ ཨཏིཀྐམྨ ཨཏྟནོ ཨཏུལྱཏྟེན ཨཏྟནཱ ཨེཝ སམཱནཏྟཝཏྠུནོ ཨབྷཱཝཱ སམཾ ཛཱཏཾ, ཨིཏི ཨཱིདིསཱ ཨུཔམཱ ཨསཱདྷཱརཎོཔམཱ ¶ ཨཏུལྱདྷམྨབྷཱཝསྶ པཀཱསནཏོ ཨསཱདྷཱརཎོཔམཱ ནཱམ ཧོཏི. ཨིཧ ཨུཔམཱབྷཱུཏཱནཾ ཙནྡཱརཝིནྡཱནཾ མུཁསྶ ཧཱིནབྷཱཝཔཊིཔཱདནདྭཱརེན ཙནྡཱརཝིནྡེཧི མུཁཾ ཏུལྱནྟི པཉྙཱཔནཏོ ཙནྡཱརཝིནྡཱ ཨསཱདྷཱརཎོཔམཱ ནཱམ ཧོཏི. སམསདྡོ མུཁགཏསྶ སཱདྷཱརཎདྷམྨཾ ཛོཏེཏི. སེསཾ སུཝིཉྙེཡྻཾ.

༡༩༥.

སབྦམྦྷོཛཔྤབྷཱསཱརོ, རཱསིབྷཱུཏོཝ ཀཏྠཙི;

ཏཝཱ’ནནཾ ཝིབྷཱཏཱིཏི, ཧོཏཱ’བྷཱུཏོཔམཱ ཨཡཾ.

༡༩༥. ‘‘སབྦ’’ཨིཙྩཱདི. ཀཏྠཙི ཨེཀཊྛཱནེ རཱསིབྷཱུཏོ སབྦེསམམྦྷོཛཱནཾ པབྷཱསཱརོཝ ཏཝཱནནཾ ཝིབྷཱཏཱིཏི ཨེཝཾབྷཱུཏཱ ཨཡཾ ཨབྷཱུཏོཔམཱ ཧོཏི.

༡༩༥. ‘‘སབྦ’’མིཙྩཱདི. ཀཏྠཙི ཋཱནེ རཱསིབྷཱུཏོ སབྦམྦྷོཛཔྤབྷཱསཱརོཝ སཀལཔདུམཱནཾ ཨུཏྟམཀནྟིཔུཉྫོ ཝིཡ ཏཝཱནནཾ ཝིབྷཱཏི ཝིསེསེན པབྷཱཏི, ཨིཏི ཨཱིདིསཱི ཨུཔམཱ ཨབྷཱུཏོཔམཱ ཨཝིཛྫམཱནཝཏྠུནོ ཨུཔམིཏཏྟཱ ཨབྷཱུཏོཔམཱ ནཱམ ཧོཏི. ཨརཱསི རཱསིབྷཱུཏོཏི ཝིགྒཧོ. ཨེཏྠ ཡོཛནཱཝིབྷཱུཏོ ཏཱདིསཔབྷཱསཱརཱབྷཱཝཏོ ཨཝིཛྫམཱནཏྠེན པརིཀཔྤིཏོ.

༡༩༦.

པཏཱིཡཏེ’ཏྠགམྨཱ ཏུ, སདྡསཱམཏྠིཡཱ ཀྭཙི;

སམཱསཔྤཙྩཡེཝཱདི-སདྡཡོགཾ ཝིནཱ ཨཔི.

༡༩༦. ཨཏྠགམྨོཔམཾ དསྶེཏི ‘‘པཏཱིཡཏེ’’ཨིཙྩཱདི. ཨཏྠགམྨཱ ཏུ’པམཱ ཀྭཙི ཀིསྨིཉྩི ཋཱནེ སམཱསཱདིསདྡཱནཾ ཡོགཾ ཝིནཱ ཨཔི སདྡཱནཾ པཡོགཝིསེསཱདིགཱལ༹ྷེན ཨཉྙཐཱནུཔཔཏྟིལཀྑཎེན སཱམཏྠིཡེན པཏཱིཡཏེ.

༡༩༦. ཏིཝིདྷཾ སདྡགམྨོཔམཾ དསྶེཏྭཱ ཨིདཱནི ཨཏྠགམྨོཔམཾ དསྶེཏི ‘‘པཏཱིཡཏེ’’ཏྱཱདིནཱ. ཨཏྠགམྨཱ ཏུ ཨཏྠགམྨོཔམཱ ¶ པན ཀྭཙི ཋཱནེ སམཱསཔཙྩཡེཝཱདིསདྡཡོགཾ ཝིནཱཔི ཏེསཾ སདྡཱནཾ སམྦནྡྷཾ ཧིཏྭཱཔི སདྡསཱམཏྠིཡཱ སམྦནྡྷེ པཡུཏྟཱཝསེསསདྡཱནཾ ཨཏྠསཏྟིཡཱ པཏཱིཡཏེ. སདྡཱནཾ སཱམཏྠིཡནྟི ཝིགྒཧོ.

༡༩༧.

བྷིངྒཱནེ’མཱནི ཙཀྑཱུནི, ནཱ’མྦུཛཾ མུཁ’མེཝི’དཾ;

སུབྱཏྟསདིསཏྟེན, སཱ སརཱུཔོཔམཱ མཏཱ.

༡༩༧. ཨུདཱཧརཏི ‘‘བྷིངྒེ’’ཙྩཱདིནཱ. ན བྷིངྒཱ ཨེཏེ, ཀིཉྩརཧི ཙཀྑཱུནིམཱནི, ནམྦུཛམེཏཾ, ཀིནྟུ མུཁམེཝིདནྟི ཨེཝརཱུཔཱ སཱ སརཱུཔོཔམཱ མཏཱ བྷིངྒཱདཱིནམཝིཔརཱིཏསརཱུཔསྶ དཱིཔནཏོ. ཏེནཱཧ ‘‘སུབྱཏྟེ’’ཏྱཱདི. སུབྱཏྟེན བྷིངྒཙཀྑཱུནཾ ཨམྦུཛམུཁཱནཉྩ པརིཕུཊེན སདིསཏྟེན ཙཉྩལཏྟཀནྟྱཱདིལཀྑཎེན ཏེནེཝཱབྷེདསངྐཱཔུབྦམེཝ ཝིཝེཙིཏཾ ཨཉྙཏྲ ཙཀྑཱདཱིསུ ཡཾ བྷིངྒཱདིཉྙཱཎམུཔྤནྣཾ, ཏསྶ པཙྩཀྑཱནཏོ ཨུཔམཱཛོཏཀཱནམིཝཱདཱིནམབྷཱཝེཔི བྷིངྒལོཙནཱདཱིནཾ སདིསཏྟཾ པཏཱིཡཏེ སཱམཏྠིཡཏོ. ཨེཝམུཔརིཔི ཡཐཱཡོགཾ.

༡༩༧. ཨིདཱནི ཨུདཱཧརཎམཱཧརཏི ‘‘བྷིངྒཱནི’’ཙྩཱདིནཱ. ཨིམཱནི བྷིངྒཱནི བྷམརཱ ན བྷཝནྟི, ཀིཉྩརཧི ཙཀྑཱུནི. ཨམྦུཛཾ ན ཨིདཾ པདུམཾ ན ཧོཏི, ཀིནྟུ མུཁམེཝཱཏི. ཨཱིདིསཱི སཱ ཨུཔམཱ སུབྱཏྟསདིསཏྟེན སུཔཱཀཊེན བྷིངྒལོཙནཱནཾ ཨམྦུཛམུཁཱནཉྩ ཏུལྱབྷཱཝེན སརཱུཔོཔམཱ ནཱམ ཧོཏི. ཨེཏྠ སམཱསཔཙྩཡཨིཝཱདིསདྡཔཡོགཱབྷཱཝེཔི ‘‘བྷིངྒཱནེམཱནི ཙཀྑཱུནི’’ཙྩཱདིནཱ ཙཀྑུམུཁེསུ བྷིངྒཨམྦུཛནྟི ཝིཔརཱིཏཔཝཏྟབུདྡྷིཾ པཊིསེདྷེཏྭཱ ཙཀྑུམུཁཝིདྷཱནཏོ ཙཉྩལཏྟཀནྟིམཏྟཱདཱིསུ སུབྱཏྟཾ ཏུལྱཏྟཾ ཝིནཱ ཙཀྑུམུཁེསུ བྷིངྒམྦུཛབུདྡྷིཾ ཀཱིདིསམུཔྤཛྫཏཱིཏི ཨཉྙཐཱནུཔཔཏྟིལཀྑཎསཱམཏྠིཡཱ ཨུཔམཱནབྷཱུཏཱནཾ བྷིངྒམྦུཛཱནཾ ཨུཔམེཡྻབྷཱུཏཱནཾ ཙཀྑུམུཁཱནཉྩ སདིསཏྟཾ ཉཱཡཏི. སུཊྛུ བྱཏྟཾ པཱཀཊནྟི ཙ, ཏཉྩ ཏཾ སདིསཏྟཉྩཱཏི ཙ, སམཱནཾ རཱུཔཾ སབྷཱཝོ ཡསྶཱ ཨུཔམཱཡཱཏི ཙ, སཱ ཙ སཱ ཨུཔམཱ ཙཱཏི ཙ ཝཱཀྱཾ.

༡༩༨.

མཡེཝ ¶ མུཁསོབྷཱ’སྶེ-ཏྱལ’མིནྡུ ཝིཀཏྠནཱ;

ཡཏོ’མྦུཛེཔིསཱ’ཏྠཱིཏི, པརིཀཔྤོཔམཱ ཨཡཾ.

༡༩༨. ‘‘མཡེཝི’’ཙྩཱདི. ཨིནྡུ ཙནྡ, ཨསྶ མུནིནོ མུཁསོབྷཱ ཝདནཛུཏི མཡེཝ, ནཱཉྙཏྲཱཏི ཨེཝརཱུཔཱ ཝིཀཏྠནཱ ཨཏྠཔསཾསནེན ཨལམིཏི པཊིསེདྷོ. ཀིམིཏི? ཡཏོ ཡསྨཱ ཀཱརཎཱ སཱ མུཁསོབྷཱ ཨམྦུཛེཔི ན ཀེཝལམིནྡུམྷི ཨཏྠི, ནོ ནཏྠཱིཏི ཨསཏོཔི ཏཐཱ ཝིཀཏྠནསྶ པརིཀཔྤནཏོ ཝདནམིནྡུནོཔམཱིཡཏཱིཏི ཨེཝརཱུཔཱ ཨཡཾ པརིཀཔྤོཔམཱ.

༡༩༨. ‘‘མཡེ’’ཙྩཱདི. ཧེ ཨིནྡུ ཨསྶ ཨིམསྶ ལོཀསཱམིནོ མུཁསོབྷཱ ཝདནཀནྟི ཨེཀཀེ མཡི ཨེཝ, ཨཱིདིསཱི ཝིཀཏྠནཱ ཨཏྟསིལཱགྷེན ཨལཾ ནིཔྤཡོཛནཾ. ཀསྨཱཏི ཙེ? ཡཏོ སཱ མུཁསོབྷཱ ཨམྦུཛེཔི ཨཏྠི, ཏསྨཱཏི. ཨིཏི ཨཱིདིསཱ ཨཡཾ ཨུཔམཱ པརིཀཔྤོཔམཱ ནཱམ ཧོཏི. ཡཏོཏི ཨནིཡམནིདྡིཊྛཀཱརཎཾ པན ཨམྦུཛེཔི སཱ ཨཏྠཱིཏི དསྶིཡམཱནཾ པདུམེཔི ཏསྶ ཨཏྠིཏྟམེཝ. པརིཀཔྤནཱཡ ཝུཏྟཱ ཨུཔམཱཏི ཝིགྒཧོ. ཨིདྷ ཙནྡསྶ ཨཝིཛྫམཱནཝིཀཏྠནསྶ ཝིཛྫམཱནཏྟེན པརིཀཔྤནཏོ སདྷམྨཛོཏཀསདྡནྟརེ ཨསཏིཔི ཨུཔམཱནབྷཱུཏཨིནྡུནོ ཙ ཨུཔམེཡྻབྷཱུཏམུཁསྶ ཙ སདིསཏྟཾ ཨིམེསཾ དྭིནྣཾ སདིསཏྟཾ ཝིནཱ ཝཏྟུནོ ཏཱདིསཀཔྤནཱ ཀཐཾ ཧོཏཱིཏི ཨིམཱཡ ཨཏྠསཏྟིཡཱ གམྱཏེ.

༡༩༩.

ཀིཾ ཝཱ’མྦུཛ’ནྟོབྷནྟཱལི,

ཀིཾ ལོལནཡནཾ མུཁཾ;

མམ དོལཱཡཏེ ཙིཏྟ-

མིཙྩ’ཡཾ སཾསཡོཔམཱ.

༡༩༩. ‘‘ཀིཾ ཝཱ’’ཨིཙྩཱདི. ཨནྟོ བྷནྟཱ ཨལཱི བྷམརཱ ཡསྨིཾ, ཏམཱིདིསམམྦུཛཾ ཀིཾ ཝཱ. ལོལཱནི ཙཔལཱནི ནཡནཱནི ཡསྨིཾ, ཏཱདིསཾ ཝཱ. ཛིན ཏཝེདཾ མུཁཾ ཀིནྟི མམ ཙིཏྟཾ དོལཱཡཏེ ¶ དོལེཝཱཙརཏི. ཨེཝཾ པཀྑདྭཡཔརིགྒཧེན སཾསཡཏཱིཏི ཨཏྠོ. ཨིཙྩཡམཱིདིསཱི སཾསཡཝེསེན ཨམྦུཛམུཁཱནམོཔམཱཝགམཱ སཾསཡོཔམཱ.

༡༩༩. ‘‘ཀིཾ ཝཱ’མྦུཛེ’’ཙྩཱདི. ཨནྟོབྷནྟཱལི ཨབྦྷནྟརེ བྷམམཱནབྷམརཝནྟཾ ཨམྦུཛཾ ཀིཾ ཝཱ, ཏུཡ྄ཧཾ ལོལནཡནཾ ཙཉྩལནེཏྟཾ མུཁཾ ཀིཾ ཝཱཏི མམ ཙིཏྟཾ དོལཱཡཏེ ཨུབྷཡསམྦྷམཛནནཏོ དོལཱ ཝིཡ ཧོཏི. ཨིཏི ཨཡཾ ཨེཝརཱུཔཱ ཨུཔམཱ སཾསཡོཔམཱ དྭིནྣཾ སདིསཏྟསྶ སཾསཡེན པཀཱསིཏཏྟཱ སཾསཡོཔམཱ ནཱམ ཧོཏི. ཨནྟོ བྷནྟཱ ཨལཱི ཡསྨིནྟི ཙ, ལོལཱནི ནཡནཱནི ཡསྨིནྟི ཙ, དོལཱ ཝིཡ ཨཱཙརཏཱིཏི ཙ, སཾསཡེན ཝུཏྟཱ ཨུཔམཱཏི ཙ ཝིགྒཧོ. ཨིཧཱཔི སདྷམྨཔཀཱསཀེ སདྡནྟརེ ཨསཏིཔི ཡཐཱཝུཏྟཝིསེསནདྭཡེན ཝིསིཊྛཱནཾ དྭིནྣཾ ཨམྦུཛམུཁཱནཾ སཾསཡནིམིཏྟེ ཏུལྱཏྟེ ཨསཏི ཀཐཾ སཾསཡོ ཨུཔྤཛྫཏཱིཏི ཨིམིནཱ སཱམཏྠིཡེནེཝ ཏུལྱདྷམྨསམྦནྡྷོ གམྱཏེ.

༢༠༠.

ཀིཉྩི ཝཏྠུཾ པདསྶེཏྭཱ,

སདྷམྨསྶཱ’བྷིདྷཱནཏོ;

སཱམྱཔྤཏཱིཏིསབྦྷཱཝཱ,

པཏིཝཏྠཱུཔམཱ ཡཐཱ.

༢༠༠. ‘‘ཀིཉྩི’’ཨིཙྩཱདི. ཀིཉྩི ཝཏྠུམིཙྪིཏཾ སམྦུདྡྷཱདིཀཾ ཨུཔདསྶེཏྭཱ སདྷམྨསྶ ཏེན ཝཏྠུནཱ ཀེནཙི ཨཱཀཱརེན སདིསསྶ ཨཉྙསྶ ཝཏྠུནོ ཨབྷིདྷཱནཏོ སཱམྱསྶ ཏེསཾ དྭིནྣཾ སདིསཏྟསྶ པཏཱིཏིཡཱ ཨཝསཱཡསྶ སམྦྷཱཝཱ ཝིཛྫམཱནཏྟེན པཏིཝཏྠཱུཔམཱ ཝུཙྩཏེ. པཏིཝཏྠུནཱ ཏཐཱཝིདྷེནཱདྷིགཏསྶ ཝཏྠུནོ ཏུལྱཏཱ པཊིཔཱདིཏཱ. ཡཐེཏྱུདཱཧརཏི.

༢༠༠. ‘‘ཀིཉྩི’’ཙྩཱདི. ཀིཉྩི ཝཏྠུམིཙྪིཏཾ ཛིནཱདིཀིཉྩིཔདཏྠཾ ཨུཔདསྶེཏྭཱ པཋམཾ ནིདསྶེཏྭཱ སདྷམྨསྶ པཊིཔཱདནཱིཡཨཏྠེན སཧ ¶ ཀིཉྩི ཨཱཀཱརེན སདིསབྷཱཝསྶ ཀསྶཙི ཝཏྠུནོ ཨབྷིདྷཱནཏོ ཀཐནཏོ སཱམྱཔྤཏཱིཏིསབྦྷཱཝཱ སདིསཏཱསམྦནྡྷིནོ པརིཛཱནནསྶ ཝིཛྫམཱནཏྟཱ པཏིཝཏྠཱུཔམཱ ཝཏྠུནོ ཨུཔཊྛིཏསྶ ཛིནཱདིཔདཏྠསྶ ཏུལྱཏྠཔཀཱསནཏོ ནཱམེན པཏིཝཏྠཱུཔམཱ ནཱམ. སམཱནོ དྷམྨོ ཡསྶ ཝཱ པཱརིཛཱཏཱདིནོ ཨིཏི ཙ, སམཱནཱནཾ ཏུལྱཱནཾ ཨུཔམཱནོཔམེཡྻཱནཾ བྷཱཝོཏི ཙ, སཱམྱསྶ པཏཱིཏི ཙ, སཱམྱཔྤཏཱིཏིཡཱ སབྦྷཱཝོཏི ཙ, པཏིཝཏྠུནཱ ཝུཏྟཱ ཨུཔམཱཏི ཙ ཝཱཀྱཾ. ཡཐཱཏི ཨུདཱཧརཏི.

༢༠༡.

ཛནེསུ ཛཱཡམཱནེསུ,

ནེ’ཀོཔི ཛིནསཱདིསོ;

དུཏིཡོ ནནུ ནཏྠེཝ,

པཱརིཛཱཏསྶ པཱདཔོ.

༢༠༡. ‘‘ཛནེསུ’’ཙྩཱདི. ཛཱཡམཱནེསུ ཛནེསུ མཛ྄ཛྷེ ཨེཀོཔི ཛནོ གུཎཝཱ ཛིནསཱདིསོ སམྨཱསམྦུདྡྷསམཱནོ ན ཝིཛྫཏཱིཏྱེཀཾ ཏཱཝ ཝཏྠུ ཨུཔདསྶིཏཾ, དུཏིཡོ ཨིཙྩཱདི པཏིཝཏྠཱུཔམདསྶནཾ, ནནཱུཏྱནུམཏིཡཾ, པཱརིཛཱཏསྶ དིབྦརུཀྑཝིསེསསྶ དུཏིཡོ སམཱནོ པཱདཔོ ནཏྠེཝ. པཱརིཛཱཏོཡེཝ རུཀྑཛཱཏཱིསུ ཨུཏྟམོ, ཏཐཱ ཛིནོ ཛནེསཱུཏི.

༢༠༡. ‘‘ཛནེསུ’’ཙྩཱདི. ཛཱཡམཱནེསུ ཛནེསུ ཨེཀོཔི ཛིནསཱདིསོ སམྦུདྡྷསདིསོ ནཏྠི, པཱརིཛཱཏསྶ རུཀྑསྶ དུཏིཡོ ཏེན སམོ དུཏིཡོ པཱདཔོ རུཀྑོ ནཏྠི ཨེཝ ནནུ, ནནཱུཏི ཨནུཉྙཱཡཾ. ཏེན སབྦཉྙུནོ ཨཉྙེན ཨཏུལྱབྷཱཝཾ ཨནུཛཱནཱཏི. ཨིཧ པཱརིཛཱཏརུཀྑསྶ ཨཉྙེཧི རུཀྑེཧི ཨུཏྟམཏྟཉྩ བུདྡྷསྶ ཨཉྙེསུ སཏྟེསུ ཨུཏྟམཏྟཉྩཱཏི ཨིདཾ དྭཡཾ ཨུཔམཱནོཔམེཡྻབྷཱུཏཱནཾ དྭིནྣཾ ཝཏྠཱུནཾ སཱམྱཾ ནཱམ, ཨེཏཾ སཱམྱཾ ཝུཏྟཏྠསྶ སམཏྠནཝསེན པཏིཝཏྠུབྷཱུཏཔཱརིཛཱཏསྶ རུཀྑེཧི ཨསམཱནཏྟཀཐནེནེཝ ཛོཏིཏཾ ཧོཏི.

༢༠༢.

ཝཱཀྱཏྠེནེཝ ¶ ཝཱཀྱཏྠོ,

ཡདི ཀོཙྱུ’པམཱིཡཏེ;

ཨིཝཡུཏྟཝིཡུཏྟཏྟཱ,

སཱ ཝཱཀྱཏྠོཔམཱ དྭིདྷཱ.

༢༠༢. ཝཱཀྱཏྠཝིསཡོཔམཾ དསྶེཏི ‘‘ཝཱཀྱཏྠེནེཝི’’ཙྩཱདིནཱ. ཝཱཀྱཏྠོ ཀྲིཡཱཀཱརཀསམྦནྡྷཝིསེསོ, ཏེནེཝ, ན པདཏྠམཏྟེན ཝཱཀྱཏྠོ ཝུཏྟལཀྑཎོ ཀོཙི ཝཏྟུམིཙྪིཏོ ཀོཙི ཡདི ཨུཔམཱིཡཏེ སདིསོ ཀཐྱཏེ, སཱ ཝཱཀྱཏྠོཔམཱ དྭིདྷཱ བྷིཛྫཏེ. ཀཐཾ? ཡུཏྟཱ ཙ ཝིཡུཏྟཱ ཙ ཡུཏྟཝིཡུཏྟཱ, ཨིཝེན ཨཏྠནིདྡེསོཡཾ ཡུཏྟཝིཡུཏྟཱ ཨུཔམཱ, ཏསྶཱ བྷཱཝཱ ཀཱརཎཱ དྭིདྷཱཏི ཨདྷིཀཏཾ.

༢༠༢. ཨིདཱནི ཝཱཀྱཏྠཝིསཡོཔམཾ དསྶེཏི ‘‘ཝཱཀྱཏྠེ’’ཙྩཱདིནཱ. ཝཱཀྱཏྠེནེཝ ཀྲིཡཱཀཱརཀསམྦནྡྷཝིསེསསངྑཏསམུདཱཡབྷཱུཏེན ཝཱཀྱཏྠེན ཀོཙི ཝཏྟུམིཙྪིཏོ ཡོ ཀོཙི ཝཱཀྱཏྠོ ཝུཏྟལཀྑཎོ ཡདི ཨུཔམཱིཡཏེ སདིསབྷཱཝེན ཀཐཱིཡཏེ, སཱ ཨུཔམཱ ཝཱཀྱཏྠོཔམཱ ནཱམ ཧོཏི. ཨིཝཡུཏྟཝིཡུཏྟཏྟཱ ཨིཝཡུཏྟཝིཡུཏྟཝསེན དྭིདྷཱ དྭིཔྤཀཱརཱ. ཨེཏྠ ‘‘ཨིཝཱ’’ཏི ཨིཝཱདཱིནམཏྠསྶ གཧིཏཏྟཱ ཨིཝསདྡོཔི ཏཔྤརིཡཱཡསདྡཱཔི གཡ྄ཧནྟེ.

ཨིཝཡུཏྟ

༢༠༣.

ཛིནོ སཾཀླེསཏཏྟཱནཾ,

ཨཱཝིབྷཱུཏོ ཛནཱན’ཡཾ;

གྷམྨསནྟཱཔཏཏྟཱནཾ,

གྷམྨཀཱལེ’མྦུདོ ཝིཡ.

༢༠༣. ཨུདཱཧརཏི ‘‘ཛིནོ’’ཨིཙྩཱདི. སཾཀླེསེཧི དསཝིདྷེཧི ཏཏྟཱནཾ སནྟཱཔཾ ཨནུཔྤཏྟཱནཾ ཛནཱནཾ ཨཡཾ ཛིནོ སམྨཱསམྦུདྡྷོ ¶ ཨཱཝིབྷཱུཏོ ཀཏཀིཙྩཏྟཱ སམྨཱསམྦོདྷཱདྷིགམེན ལོཀེ པཱཏུབྷཱུཏོ. ཨེཀཾ ཏཱཝ ཝཱཀྱམུཔམེཡྻབྷཱུཏཾ. ཀིམིཝེཏྱཱཧ ‘‘གྷམྨེ’’ཙྩཱདི. གྷམྨསནྟཱཔེན ཏཏྟཱནཾ ཛནཱནཾ གྷམྨཀཱལེ གིམྷཱནསམཡེ ཨམྦུདོ མེགྷོ ཝིཡཱཏི དུཏིཡཝཱཀྱམུཔམཱནབྷཱུཏམིཏྱཡམིཝཡུཏྟཱ ཝཱཀྱཏྠོཔམཱ. ཨེཏྠ པུབྦུཏྟརཝཱཀྱཏྠཱནཾ ཝིསེསྱཝིསེསནབྷཱཝོ ཨེཀཝཱཀྱཏྠཏྟཱཝ ཝེདིཏབྦོ. ཨེཝམུཔརིཔི.

༢༠༣. ཨུདཱཧརཏི ‘‘ཛིནོ’’ཙྩཱདིནཱ. ཨཡཾ ཛིནོ ཨེསོ ཛིཏཔཉྩམཱརོ སཏྠཱ སཾཀླེསཏཏྟཱནཾ ཨནེཀཔྤཀཱར ཀིལེསསནྟཱཔཏཏྟཱནཾ ཛནཱནཾ ཨཱཝིབྷཱུཏོ ཀཏཀིཙྩོ ཧུཏྭཱ སབྦཉྙུཏཉྙཱཎཱདྷིགམེན ལོཀེ ཨུཔཊྛིཏོ. ཀེན སནྟཏྟསྶ ཀསྶཙི ཀིམིཝེཏི ཙེ? གྷམྨསནྟཱཔཏཏྟཱནཾ ཛནཱནཾ གྷམྨཀཱལེ གིམྷསམཡེ ཨམྦུདོཝིཡ མེགྷོ ཨིཝ. ཨིཧ ཨུཏྟརཝཱཀྱཏྠོ བྷེདཀཏྟཱ ཝིསེསནཾ ཧོཏི, པུབྦཝཱཀྱཏྠོ པན བྷེདྱཏྟཱ ཝིསེསྱོ ཧོཏི. ཨེཝཾ ཝཱཀྱབྷེདེ སཏིཔི ཝཱཀྱཏྠོ ཨེཀོཝེཏི དཊྛབྦོ. ཨེཝམུཏྟརཏྲཱཔི. ཨུཏྟརཝཱཀྱེ ཨིཝསདྡོ ཏསྨིཾཡེཝ གུཎགུཎཱིཔདཏྠཱནཾ སདིསཏྟཾ དཱིཔེཏི, པུབྦཝཱཀྱེ གུཎགུཎཱིནཾ སདིསཏྟཾ པན ཨུཏྟརཝཱཀྱཏྠསྶ པུབྦཝཱཀྱེན སམཱནཏྟཾ ཝིནཱ ཨཉྙཐཱནུཔཔཏྟིཡཱ ཉཱཡཏི. སཾཀླེསེཧི ཏཏྟཱཏི ཙ, གྷམྨོ ཨེཝ སནྟཱཔོཏི ཙ, ཏེན ཏཏྟཱཏི ཙ, གྷམྨོ ཨེཝ ཀཱལོཏི ཙ ཝཱཀྱཾ.

ཨིཝཝིཡུཏྟ

༢༠༤.

མུནིནྡཱནན’མཱབྷཱཏི, ཝིལཱསེཀམནོཧརཾ;

ཨུདྡྷཾ སམུགྒཏསྶཱཔི, ཀིཾ ཏེ ཙནྡ ཝིཛམྦྷནཱ.

༢༠༤. དུཏིཡམཱཧ ‘‘མུནིནྡ’’ཨིཙྩཱདིནཱ. ཝིལཱསེན ཨེཀམཏུལྱཾ མནོཧརཾ དུཏིཡསྶ ཏཱདིསསྶཱབྷཱཝཏོ མུནིནྡཱནནཾ ¶ ཨཱབྷཱཏི ཨཏིསཡེན སོབྷཏེཏི ཨེཀཾ ཏཱཝ ཝཱཀྱམུཔམེཡྻབྷཱུཏཾ. བྷོ ཙནྡ ཨུདྡྷཾ གགནཏལཾ སམུགྒཏསྶཱཔི ཨབྦྷུཊྛིཏསྶཱཔི ཏེ ཏཝ ཝིཛམྦྷནཱ སཱཧཾཀཱརཔརིབྦྷམནེན ཀིཾ པཡོཛནཾ ན ཀིཾཔི, ཏཾསདིསསོབྷཱསམྤཏྟིཡཱབྷཱཝཏོ. ཨསདིསཏྟཾ མུནིནྡཱནནསྶ ཏསྶ ཏཏོཔི ཨུདྡྷམུགྒཙྪཏོ ཝིལཱསམཏྟམེཝ [པིཡཱསམཏྟམེཝ (ཀ.)] ཕལསམྦྷཝཏོཏི དུཏིཡཝཱཀྱམུཔམཱནབྷཱུཏཾ. ཏཐཱ ཧེཏྠ སབྦཐཱ སདིསཏཱཔཏཱིཏིཡཱ ཀརིཡམཱནཱནམུགྒམནཝིཛམྦྷནཱནཾ པཊིཀྑེཔེན ཀཐཉྩིཔི མུཁཙནྡཱནཾ སཱདྷམྨཔཏཱིཏི ཨུཔམཱཝགམོཏི ཨཡམིཝཝིཡུཏྟཝཱཀྱཏྠོཔམཱ.

༢༠༤. ཨིདཱནི ཨིཝཝིཡུཏྟཝཱཀྱཏྠོཔམཾཡེཝ ཨུདཱཧརཏི ‘‘མུནིནྡཱནནི’’ཙྩཱདིནཱ. ཝིལཱསེཀམནོཧརཾ ལཱིལཱཡ ཨཏུལྱཾ ཏཏོཡེཝ མནོཧརཾ མུནིནྡཱནནཾ སབྦཉྙུནོ ཝདནཾ ཨཱབྷཱཏི ཨཏིདིབྦཏི, ཏསྨཱ ཧེ ཙནྡ ཨུདྡྷཾ ཨུཙྩཾ ནབྷཾ སམུགྒཏསྶཱཔི ཏེ ཏུཡ྄ཧཾ ཝིཛམྦྷནཱ ཨཧཾཀཱརེན པརིབྦྷམནེན ཀིཾ པཡོཛནཾ. ཨིཧ པུབྦཝཱཀྱཏྠསྶ ཨུཏྟརཝཱཀྱཏྠོ ཨིཝཝིཡུཏྟོཔམཱ ནཱམ ཧོཏི. ཏཐཱ ཧི ‘‘སབྦཐཱ མུཁེན སདིསོ བྷཝཱམཱི’’ཏི མཱནཾ ཀརོནྟསྶ ཙནྡསྶ གགནཏལཱརོཧོཔི ཝིཛམྦྷནཉྩེཏི ཨིམེསཾ དྭིནྣཾ པཊིཀྑེཔེན མུཁཙནྡཱནཾ ཝིལཱསེཀམནོཧརཏྟཾ ཀནྟིམཏྟསངྑཱཏསདིསཏྟཾ ཨིཝཱདཱིནམབྷཱཝེཔི ཝིཉྙཱཡཏཱིཏི ཀཏྭཱ ཨུཏྟརཝཱཀྱཏྠོ པུབྦཝཱཀྱཏྠསྶ ཨུཔམཱ ཙ ཝིསེསནཉྩ ཧོཏི. ཝིལཱསེན ཨེཀམཏུལྱནྟི ཙ, ཏཉྩ ཏཾ མནོཧརཉྩཱཏི ཙ ཝིགྒཧོ. ཨཔིསདྡོ སམྦྷཱཝནཏྠོ.

༢༠༥.

སམུབྦེཛེཏི དྷཱིམནྟཾ, བྷིནྣལིངྒཱདིཀཾ ཏུ ཡཾ;

ཨུཔམཱདཱུསནཱཡཱ’ལ-མེཏཾ ཀཏྠཙི ཏཾ ཡཐཱ.

༢༠༥. དོསཔརིཙྪེདེ ¶ དུཊྛཱལངྐཏཱིཏིམུཔམཱལངྐཱརདཱུསནཾ དསྶེཏུམཱཧ ‘‘སམུབྦེཛེཏི’’ཙྩཱདི. ཡཾ བྷིནྣལིངྒཱདིཀཾ ཏུ, ཨཱདིསདྡེན བྷིནྣཝཙནཧཱིནཏཱཨདྷིཀཏཱདཱིནཾ པརིགྒཧོ. ཏུསདྡོ ཨཏྠཛོཏཀོ, ཏཐཱཔཱིཏི ཨཏྠོ. དྷཱིམནྟཾ མེདྷཱཝིཾ སམུབྦེཛེཏི ན པཱིཎེཏི, ཨེཏཾ བྷིནྣལིངྒདིཀཾ ཀཏྠཙི ན སབྦཏྠ ཨུཔམཱདཱུསནཱཡ ཝིརོདྷཏྠཾ ཨལཾ སམཏྠཾ. ‘‘ཏཾ ཡཐེ’’ཏི ཨུདཱཧརཏི.

༢༠༥. དོསཔརིཙྪེདེ དོསཱནམནུདྡེསཱཝསཱནེ ནིདྡིཊྛཱཡ དུཊྛཱལངྐཏིཡཱ དསྶེཏབྦཨུདཱཧརཎེ –

‘‘དུཊྛཱལངྐརཎཾ ཏེཏཾ, ཡཏྠཱལངྐཱརདཱུསནཾ;

ཏསྶཱལངྐཱརནིདྡེསེ, རཱུཔམཱཝིབྷཝིསྶཏཱི’’ཏི.

ཀཏཔཊིཉྙཱནུསཱརེན ཨིདཱནི དསྶེཏུམཱཧ ‘‘སམུབྦེཛེཏི’’ཙྩཱདི. ཡཾ བྷིནྣལིངྒཱདིཀཾ ཏུ ཝཀྑམཱནཾ ཡཾ བྷིནྣལིངྒཝཙནཱདིཀཾ པན དྷཱིམནྟཾ པཉྙཝནྟཾ ཀཝིཾ སམུབྦེཛེཏི ‘‘ཨེཝཾ ནཱམ ཝཏྟབྦཾ སིཡཱ’’ཏི ཨུབྦེགཾ ཛནེཏི, ཨེཏཾ བྷིནྣལིངྒཱདིཀཾ ཨུཔམཱདཱུསནཱཡ ཡཐཱཝུཏྟཨུཔམཱཝིནཱསནཏྠཾ ཀཏྠཙི ‘‘ཨིཏྠཱིཝཱཡཾ ཛནོ ཡཱཏི’’ཨིཙྩཱདིཝཏྟབྦཝིསཡཏོ ཨཉྙཏྠ ཨལཾ སམཏྠཾ. ‘‘ཏཾ ཡཐཱ’’ཏི ཨུདཱཧརཏི. བྷིནྣཾ ཝིསདིསཉྩ ཏཾ ལིངྒཉྩེཏི ཙ, ཏཾ ཨཱདི ཡསྶ ཝིསདིསཝཙནཱདིནོཏི ཙ, ཨུཔམཱཡ དཱུསནམིཏི ཙ ཝཱཀྱཾ.

༢༠༦.

ཧཾསཱིཝཱ’ཡཾ སསཱི བྷིནྣ-

ལིངྒཱ’ཀཱསཾ སརཱནིཝ;

ཝིཛཱཏིཝཙནཱ ཧཱིནཱ,

སཱ’ཝ བྷཏྟོ བྷཊོ’དྷིཔེ.

༢༠༦. ‘‘ཧཾསཱིཝཱཡ’’ནྟི ཨཡཾ སསཱི ཙནྡོ ཧཾསཱིཝ ཧཾསཱིསདིསོ. བྷིནྣལིངྒཱ བྷིནྣལིངྒོཔམཱ. ‘‘ཨཱཀཱསཾ སརཱནིཝཱ’’ཏི ཝིཛཱཏིཝཙནཱ ཝིསདིསཝཙནོཔམཱ. ‘‘བྷཊོ ཨདྷིཔེ སཱམིནི སཱཝ ¶ བྷཏྟོ’’ཏི ཧཱིནཱ ཧཱིནོཔམཱ ཀུཀྐུརསྶ ཧཱིནེན ཛཱཏྱཱདིནཱ ཨདྷིཀསྶ ཨུཔམིཏཏྟཱ.

༢༠༦. ‘‘ཧཾསི’’ཙྩཱདི. ཨཡཾ སསཱི ཙནྡོ ཧཾསཱི ཨིཝ ཧཾསིདྷེནཱུཝ ཧོཏི. ཨིཙྩཱདིཀོཔམཱ བྷིནྣལིངྒཱ ཨུཔམེཡྻཏོ བྷིནྣལིངྒཏྟཱ བྷིནྣལིངྒོཔམཱ ནཱམ ཧོཏི. ཨཱཀཱསཾ ནབྷཾ སརཱནིཝཱཏི ཨཡཾ ཝིཛཱཏིཝཙནཱ ཨུཔམེཡྻེན ཝིསདིསཝཙནཏྟཱ ཝིཛཱཏིཝཙནོཔམཱ ནཱམ ཧོཏི. ཨདྷིཔེ སཱམིནི བྷཊོ སེཝཀོ སཱཝ སུནཁོ ཨིཝ བྷཏྟོཏི ཨཡཾ ཧཱིནཱ ཛཱཏིཧཱིནེན སུནཁེན ཨུཏྟམསྶ པུརིསསྶ ཨུཔམིཏཏྟཱ ཧཱིནོཔམཱ ནཱམ ཧོཏི. བྷིནྣཾ ལིངྒམེཏིསྶཱཏི ཙ, ཝིཝིདྷཱ ཛཱཏི སབྷཱཝོ ཨསྶེཏི ཙ, ཝིཛཱཏི ཝཙནཾ ཨསྶཱ ཨུཔམཱཡཱཏི ཙ ཝིགྒཧོ.

༢༠༧.

ཁཛྫོཏོ བྷཱནུམཱལཱིཝ,

ཝིབྷཱཏཱིཏྱདྷིཀོཔམཱ;

ཨཕུཊྛཏྠཱ བལམྦྷོདྷི,

སཱགརོ ཝིཡ སཾཁུབྷི.

༢༠༧. ‘‘ཁཛྫོཏོ’’ཨིཙྩཱདི. ཁཛྫོཏོ བྷཱནུམཱལཱིཝ སཱུརིཡོ ཝིཡ ཝིབྷཱཏཱིཏྱདྷིཀོཔམཱ ཨདྷིཀེན ཧཱིནསྶ ཨུཔམིཏཏྟཱ. བལམྦྷོདྷི སེནཱསཱགརོ སཱགརོ ཝིཡ སཾཁུབྷཱིཏི ཨཕུཊྛཏྠོཔམཱ ‘‘བལམྦྷོདྷཱི’’ཏི རཱུཔཀེན སེནཱཡ མཧནྟཏྟཱཝགམཏོ པུན ‘‘སཱགརོ ཝིཡཱ’’ཏི ཨུཔམཱཡ ཀསྶཙི ཝིསེསཏྠསྶ ཨསཾཕུཊྛཏྟཱ.

༢༠༧. ‘‘ཁཛྫོཏོ’’ཙྩཱདི. ‘‘ཁཛྫོཏོ བྷཱནུམཱལཱིཝ ཝིབྷཱཏཱི’’ཏི ཨཡཾ ཨདྷིཀོཔམཱ ཨདྷིཀཱཡ ཨུཔམཱཡ ཨུཔམིཏཏྟཱ ཨདྷིཀོཔམཱ ནཱམ ཧོཏི. ‘‘བལམྦྷོདྷི སེནཱསམུདྡོ སཱགརོ ཝིཡ སཾཁུབྷཱི’’ཏི ཨཡཾ ཨཕུཊྛཏྠཱ སེནཱཡ མཧཏྟཾ ‘‘བལམྦྷོདྷཱི’’ཏི ཏིརོབྷཱུཏཨུཔམཱཡེཝ ཨཝགཏཾ, ¶ ཏསྨཱ པུན ‘‘སཱགརོ ཝིཡཱ’’ཏི ཨུཔམཱཡ ཕུསིཏབྦཏྠསྶཱབྷཱཝཱ ཨཕུཊྛཏྠོཔམཱ ནཱམ ཧོཏི. ཨཕུཊྛོ ཨཏྠོ ཨེཏིསྶཱཏི ཙ, བལཾ ཨེཝ ཨམྦྷོདྷཱིཏི ཙ ཝཱཀྱཾ.

༢༠༨.

ཙནྡེ ཀལངྐོ བྷིངྒོཝེ-

ཏྱུ’པམཱཔེཀྑིནཱི ཨཡཾ;

ཁཎྜིཏཱ ཀེརཝཱཀཱརོ,

སཀལངྐོ ནིསཱཀརོ.

༢༠༨. ‘‘ཙནྡེ’’ཨིཙྩཱདི. ཀལངྐོ བྷིངྒོ ཝིཡཱཏྱཡམུཔམཱ ‘‘ཙནྡེ ཀུསུམགཙྪསདིསེ’’ ཨིཏྱུཔམནྟརམཔེཀྑཏེཏི ཡཏོ ཙནྡེ བྷིངྒོ ན སམྦྷཝཏི, པུཔྥགཙྪེ ཏུ སམྦྷཝཏཱིཏི ཨཡམུཔམཱ ཨུཔམཱཔེཀྑིནཱི. སཀལངྐོ སསལཀྑཎོ ནིསཱཀརོ ཙནྡོ ཀེརཝཱཀཱརོ ཀུམུདསནྣིབྷོཏི ཁཎྜིཏོཔམཱ ཀེརཝསྶ ཨནྟོཀཎྷཏྟཾ པཊིཔཱདེཏུཾ ‘‘སབྷིངྒཀེརཝཱཀཱརོ’’ཏི ཝཏྟབྦཏྟཱ.

༢༠༨. ‘‘ཙནྡེ’’ཙྩཱདི. ‘‘ཙནྡེ ཀལངྐོ བྷིངྒོ ཨིཝཱ’’ཏི ཨཡཾ ཨུཔམཱཔེཀྑིནཱི ཙནྡསྶཨུཔམཱབྷཱུཏཔུཔྥགཙྪཀཱདིཨཔེཀྑནཏོ ཨུཔམཱཔེཀྑིནཱི ནཱམ ཧོཏི. ཙནྡེ བྷིངྒཔཝཏྟིཡཱ ཨབྷཱཝཏོ ཏསྶ ཝིསཡབྷཱུཏཔུཔྥགཙྪཀཱདི ཙནྡསྶ ཨུཔམཏྟེན གཧེཏྭཱ ཨཝུཏྟཏྟཱ དུཊྛཱཏི ཨདྷིཔྤཱཡོ. སཀལངྐོ ཀལངྐསཧིཏོ ནིསཱཀརོ ཙནྡོ ཀེརཝཱཀཱརོ ཀུམུདསདིསོཏི ཨཡཾ ཁཎྜིཏཱ ཙནྡགཏཾ ཀཎྷཏྟཾ པཀཱསེཏུཾ ‘‘སབྷིངྒཀེརཝཱཀཱརོ’’ཏི ཝཏྟབྦེ བྷིངྒོཔམཱབྷཱཝསྶ ཁཎྜིཏཏྟཱ ཁཎྜིཏོཔམཱ ནཱམ ཧོཏི. ཨུཔམཾ ཨཔེཀྑཏཱིཏི ཙ, ཁཎྜཾ ཨིཏཱ གཏཱཏི ཙ, ཁཎྜེན ཨིཏཱ ཡུཏྟཱ ཝཱཏི ཙ, ཀེརཝསྶཱཀཱརོ ཨསྶེཏི ཙ, སཧ ཀལངྐེན ཝཏྟཏཱིཏི ཙ ཝཱཀྱཾ.

༢༠༩.

ཨིཙྩེཝམཱདིརཱུཔེསུ, བྷཝནྟི ཝིགཏཱདརཱ;

ཀརོནྟི ཙཱ’དརཾ དྷཱིརཱ, པཡོགེ ཀྭཙིདེཝ ཏུ.

༢༠༩. ཝུཏྟཾ ¶ ནིགམེཏི ‘‘ཨིཙྩེཝ’’མཱདིནཱ. རཱུཔེསུ པཡོགེསུ. ཝིགཏོ ཨཔགཏོ ཨཱདརོ སམྦྷཱཝནཱ ཡེསཾ ཏཐཱ བྷཝནྟི. ཀིཾ བྷིནྣལིངྒཱདིཀཾ ནིཡམེནཱནཱདརཎཱིཡམེཝ, ཨནིཡམེནེཏི [ནིཡམེནེཏི (ཀ.)] ཙེ གཡ྄ཧཱུཔགམྤི ཨཏྠཱིཏི ཨཱཧ ‘‘ཀརོནྟི’’ཙྩཱདིཾ. ཀྭཙིདེཝ ཏུ པཡོགེ དྷཱིརཱ ཀཝཡོ ཨཱདརཾ ཀརོནྟི ཙཱཏི. ཙསདྡོ ཝཏྟབྦནྟརཏྠཾ སམུཙྩིནོཏི.

༢༠༩. ‘‘ཨིཙྩེ’’ཙྩཱདི. ཨིཏི ཨནནྟརཾ ནིདྡིཊྛེསུ ཨེཝམཱདིརཱུཔེསུ པཡོགེསུ དྷཱིརཱ ཝིགཏཱདརཱ བྷཝནྟི. ཨིམེཡེཝ དྷཱིརཱ ཀྭཙིདེཝ ཏུ པཡོགེ བྷིནྣལིངྒཱདིཀེ ཨཱདརཾ ཀརོནྟི ཙ. ཨིཏི ཨེཝཾ ཨཡཾ པཀཱརོ ཨཱདི ཡེསམིཏི ཙ, ཏཱནི ཙ ཏཱནི རཱུཔཱནི ཙེཏི ཙ, ཝིགཏོ ཨཱདརོ ཡེསམིཏི ཙ ཝིགྒཧོ. ཙསདྡོ ཝཱཀྱནྟརསམུཙྩཡེ. ཏསྨཱ ཝིགཏཱདརཏྠེན ཨཉྙམཱདརཀརཎཾ ཝུཙྩམཱནཀཐཱསནྟཏིཾ ཨཱཀཌྜྷཏི.

༢༡༠.

ཨིཏྠཱིཝཱ’ཡཾ ཛནོ ཡཱཏི,

ཝདཏྱེསཱ པུམཱ ཝིཡ;

པིཡོ པཱཎཱ ཨིཝཱ’ཡཾ མེ,

ཝིཛྫཱ དྷནམིཝ’ཙྩིཏཱ.

༢༡༠. ཨུདཱཧརཏི ‘‘ཨིཏྠི’’ཙྩཱདི. ཨཡཾ ཛནོ ཨིཏྠཱིཝ ཡཱཏི ཀྲིཡཱནུཝཏྟིཏོ. ཨེསཱ ཨིཏྠཱི པུམཱཝ པུརིསོ ཝིཡ ཝདཏི ཏཱདིསསྶ པཱགབྦྷིཡཡོགཏོ. ཨེཏྠ ལིངྒནཱནཏྟམུཔམཱནོཔམེཡྻཱནཾ. ཨཡམིཙྪིཏོ ཀོཙི མེ པཱཎཱ ཨིཝ པིཡོ ཨིཊྛོ, ཝིཛྫཱ བྱཱཀརཎཱདཡོ དྷནམིཝ ཨཙྩིཏཱ རཱསིཀཏཱཏི ཝཙནབྷེདོ.

༢༡༠. ཨིདཱནི བྷིནྣལིངྒཱནཾ གཧེཏབྦཝིསཡཾ དསྶེཏི ‘‘ཨིཏྠཱིཝཱ’ཡ’’མིཙྩཱདིནཱ. ཨཡཾ ཛནོ ཨིཏྠཱིཝ ཨཝིསདགམནེན མཧིལཱ ¶ ཝིཡ ཡཱཏི. ཨེསཱ ཨིཏྠཱི པུམཱ ཝིཡ ཏཱདིསཔཱགབྦྷིཡཡུཏྟཏྟཱ པུརིསོ ཝིཡ ཝདཏཱིཏི. ཨིཧ དྭིནྣཾ ཨུཔམཱནོཔམེཡྻཱནཾ ལིངྒབྷེདེ སཏིཔི ཀཝཡོ ཨཱདརཾ ཀརོནྟི. ཨཡཾ པུརིསོ མེ མམ པཱཎཱ ཨིཝ [པཱཎཱ ཨིཝ ཛཱིཝོ ཨིཝ (ཀ.)] ཨཱཡཝོཝ པིཡོ. ཨཙྩིཏཱ སཉྩིཏཱ ཝིཛྫཱ བྱཱཀརཎནིགྷཎྚུཨཱདཡོ དྷནམིཝ ཧོནྟཱིཏི. ཨེཏྠ ཨུཔམཱནོཔམེཡྻཱནཾ ཝཙནཏོ ཝིསེསཏྟེ སཏིཔི ཨིཊྛམེཝ.

༢༡༡.

བྷཝཾ ཝིཡ མཧཱིཔཱལ, དེཝརཱཛཱ ཝིརཱཛཏེ;

ཨལ’མཾསུམཏོ ཀཙྪཾ, ཏེཛསཱ རོཧིཏུཾ ཨཡཾ.

༢༡༡. ཧཱིནཱདྷིཀམུཏྟམུདཱཧརཎམཱཧ ‘‘བྷཝཾ ཝིཡི’’ཙྩཱདི. མཧཱིཔཱལེཏྱཱམནྟནཾ, དེཝརཱཛཱ བྷཝཾ ཝིཡ ཝིརཱཛཏེ. ཨིཏི ཧཱིནེནཱཔི ཧོཏི. ཨེཝཾཝིདྷེ སམུཙིཏེ ཝིསཡེ ལིངྒཝཙནབྷེདཱདིཀཾ ནོཔམཾ དཱུསེཏཱིཏི [དསྶེཏཱིཏི (ཀ.)].

༢༡༡. ‘‘བྷཝ’’མིཙྩཱདི. མཧཱིཔཱལ བྷོ རཱཛ, དེཝརཱཛཱ སཀྐོ དེཝརཱཛཱ བྷཝཾ ཝིཡ ཝིརཱཛཏེཏི. ཨེཏྠ སཀྐམུཔཱདཱཡ ‘‘བྷཝཾ ཝིཡཱ’’ཏི ཧཱིནཏྟེཔི ཨིཊྛམེཝ. ཨཡཾ རཱཛཱ ཨཾསུམཏོ སཱུརིཡསྶ ཀཙྪཾ པདཝིཾ ཏེཛསཱ ཨཱརོཧིཏུཾ པཏྟུཾ ཨལཾ སམཏྠོཏི. ཨེཏྠ ཏེཛསཱ ཨདྷིཀོཔི སཱུརིཡོ ཨུཔམཱབྷཱུཏོ ཨིཊྛོཝ, ‘‘ཀཙྪཾ ཨཱརོཧིཏུ’’ནྟི ཨིཝསདྡཔརིཡཱཡོ. ཨཱིདིསཾ བྷིནྣལིངྒཱདིཀོཔམཱདིཀཾ ཨུཔམཱདཱུསནཾ ན ཀརོཏི.

༢༡༢.

ཨུཔམཱནོཔམེཡྻཱནཾ, ཨབྷེདསྶ ནིརཱུཔནཱ;

ཨུཔམེཝ [ཨུཔམཱཝ (སཱི. ཀ.)] ཏིརོབྷཱུཏ-བྷེདཱ རཱུཔཀམུཙྩཏེ.

༢༡༢. རཱུཔཀཾ ནིརཱུཔཡཏི ‘‘ཨུཔམཱནེ’’ཙྩཱདིནཱ. ཨུཔམཱནོཔམེཡྻཱནཾ ཡཐཱཝུཏྟཱནཾ ཨབྷེདསྶ ནཱནཏྟཱབྷཱཝསྶ ནིརཱུཔནཱ ཨཱརོཔནེན ཨུཔམཱནོཔམེཡྻཱནམབྷེདཾ རཱུཔཡཏི དསྶེཏཱིཏི ¶ རཱུཔཀམུཙྩཏེ. ཨུཔམཱནསྶ ཨུཔམཱནོཔམེཡྻཱནམབྷེདཱརོཔནེན ཏིརོབྷཱུཏོ ཨཔཱཀཊོ བྷེདོ ནཱནཏྟཾ ཡསྶཱཏི ཏཱདིསཱི ཨུཔམེཝ ཡཐཱཝུཏྟལཀྑཎཱ རཱུཔཀམུཙྩཏེ ‘‘རཱུཔཀ’’ནྟི. ‘‘པདམྦུཛ’’ནྟི ཨེཏྠ པདམེཝ ཨམྦུཛསདིསཏྟཱ ཨམྦུཛཾ རུཔྱཏེ. ཨིཏྱུཔམེཡྻོཔམཱནབྷཱུཏཱནཾ པདམྦུཛཱནམབྷེདཱརོཔནེན ཨུཔམཱནོཔམེཡྻགཏསཱདྷམྨསངྑཱཏཱཡཔི ཨུཔམཱཡ བྷེདོ ཝིཛྫམཱནོཔི ཏིརོཧིཏོ. ན ཏུ ཨཱཝིབྷཱུཏོ [ཨབྦྷུཏོ (ཀ.)] ‘‘པདཾ ཨམྦུཛམིཝེ’’ཏི. སཱ ཙོཔམཱ ཏཐཱཝིདྷཱ ཨུཔམཱནོཔམེཡྻཱནམབྷེདམཱཡཱཏི ནཱམཱཏི རཱུཔཀམུཙྩཏེཏི ཨདྷིཔྤཱཡོ.

༢༡༢. ཨིདཱནི ཨུདྡིཊྛཀྐམེན རཱུཔཀཱལངྐཱརཾ དསྶེཏི ‘‘ཨུཔམཱནོ’’ཙྩཱདིནཱ. ཨུཔམཱནོཔམེཡྻཱནཾ ཨནནྟརནིདྡིཊྛཨུཔམཱནོཔམེཡྻཱནཾ ཨབྷེདསྶ སབྷཱཝཏོ བྷེདེ སཏིཔི ཝིབྷཱུཏསདིསཏྟཾ ནིསྶཱཡ ‘‘སོ ཨེསོ, ཨེསོ སོ’’ཏི ཝཏྟཱརེཧི པརིཀཔྤིཏསྶ ཨབྷེདསྶ ནིརཱུཔནཱ ཨུཔམཱནོཔམེཡྻཔདཏྠེསུ བུདྡྷིཡཱ ཨཱརོཔནཾ ནིསྶཱཡ ཏིརོབྷཱུཏབྷེདཱ ‘‘པདཾ ཨམྦུཛམིཝཱ’’ཏི ཨེཝཾ པཱཀཊནཱནཏྟཾ ཝིནཱ ‘‘པདམྦུཛ’’ནྟི ཏིརོཧིཏབྷེདཱ ཨུཔམེཝ པདཏྠཱནཾ སཱདྷམྨསངྑཱཏཱ ཨུཔམཱ ཨེཝ རཱུཔཀཾ ཨིཏི ཝུཙྩཏེ. ཝིབྷཱུཏསདིསཏྟཾ ནིསྶཱཡ ཨུཔམཱནོཔམེཡྻཝཏྠཱུནི ཨབྷེདེན གཡ྄ཧནྟི. ཏེསམབྷེདགྒཧཎེནེཝ ཏེ ནིསྶཱཡ པཝཏྟམཱནབྷིནྣསཱདྷམྨསངྑཱཏཱཡ ཨུཔམཱཡཔི བྷེདོ ཏིརོཧིཏོ ཧོཏི. ཨེཝཾ ཏིརོབྷཱུཏནཱནཏྟཝནྟསཱདྷམྨསངྑཱཏཱ ཨུཔམཱ ཨེཝ ཝཏྠཱུནམབྷེདཾ དཱིཔེཏཱིཏི རཱུཔཀཾ ནཱམ ཧོཏཱིཏི ཨདྷིཔྤཱཡོ. ཏིརོབྷཱུཏོ བྷེདོ ཡསྶེཏི ཙ, ཨབྷེདཾ རཱུཔཡཏི པཀཱསེཏཱིཏི ཙ ཝཱཀྱཾ.

༢༡༣.

ཨསེསཝཏྠུཝིསཡཾ, ཨེཀདེསཝིཝཏྟི ཙ;

ཏཾ དྭིདྷཱ པུན པཙྩེཀཾ, སམཱསཱདིཝསཱ ཏིདྷཱ.

༢༡༣. ཏསྶ ¶ བྷེདཾ ནིདྡིསཏི ‘‘ཨསེས’’ཨིཙྩཱདིནཱ. ཨསེསཝཏྠུ ཝིསཡོ ཡསྶ ཏཾ ཏཐཱཝིདྷཉྩ, ཨེཀདེསེ ཨཝཡཝེ ཝིཝཏྟཏཱིཏི ཨེཀདེསཝིཝཏྟི ཙེཏི ཏཾ རཱུཔཀཾ དྭིདྷཱ, པུན པཙྩེཀཾ ཝིསུཾ ཝིསུཾ སམཱསཱདིཝསཱ ཨུཔམཱནོཔམེཡྻཱནཾ ཀཏསམཱསཏྟཱ སམཱསརཱུཔཀ ཨསམཱསརཱུཔཀ སམཱསཱསམཱསརཱུཔཀཝསེན ཏིདྷཱ སིཡཱ.

༢༡༣. ‘‘ཨསེསི’’ཙྩཱདི. ཏཾ རཱུཔཀཾ ཨསེསཝཏྠུཝིསཡཾ ཨེཀདེསཝིཝཏྟི ཙཱཏི དྭིདྷཱ ཧོཏི, པུན པཙྩེཀཾ ཏཾ དྭཡམྤི སམཱསཱདིཝསཱ སམཱསརཱུཔཀཾ ཨསམཱསརཱུཔཀཾ སམཱསཱསམཱསརཱུཔཀཉྩེཏི ཨིམེསཾ བྷེདེན ཏིདྷཱ ཧོཏི. ཨསེསཾ ཝཏྠུ ཝིསཡོ ཨསྶེཏི ཙ, ཨེཀདེསེ ཝིཝཏྟཏཱིཏི ཙ, ཨེཀཾ ཨེཀཾ པཏཱིཏི ཙ, སམཱསོ སམཱསརཱུཔཀཾ ཨཱདི ཡེསམིཏི ཙ, ཏེསཾ ཝསོ བྷེདོཏི ཙ, ཏཱིཧི པཀཱརེཧཱིཏི ཙ ཝིགྒཧོ.

ཨསེསཝཏྠུཝིསཡསམཱས

༢༡༤.

ཨངྒུལཱིདལསཾསོབྷིཾ, ནཁདཱིདྷིཏིཀེསརཾ;

སིརསཱ ན པིལ༹ནྡྷནྟི, ཀེ མུནིནྡཔདམྦུཛཾ.

༢༡༤. ཨུདཱཧརཏི ‘‘ཨངྒུལི’’ཙྩཱདི. ཨངྒུལཱིཧིཡེཝ ཨུཔམཱནགམྨཏྟཱ སིནིདྡྷཏམྦཱཧི དལེཧི པཏྟེཧི སཾསོབྷིཾ ཨཙྩནྟཾ ཝིརོཙམཱནཾ ནཁཱནཾ དཱིདྷིཏིཡོ ཀིརཎཱ ཨེཝ ཀེསརཱནི ཡཏྠ ཏཱདིསཾ མུནིནྡསྶ པདམེཝ ཨམྦུཛཾ སིརསཱ མུདྡྷནཱ ཀེ ནཱམ ཛནཱ ན པིལ༹ནྡྷནྟི པསཱདྷནཝསེན ན དྷཱརེནྟཱིཏི. ཨིདམསེསཝཏྠུཝིསཡཾ སམཱསརཱུཔཀཾ ཨངྒིནོ པདསྶ ཨངྒཱནམངྒུལྱཱདཱིནམསེསཱནཾ རཱུཔནཏོ. ཨེཝམུཔརིཔི ཡཐཱཡོགཾ.

༢༡༤. ཨིདཱནི ཨུདཱཧརཏི ‘‘ཨངྒུལི’’ཙྩཱདི. ཨངྒུལཱིདལསཾསོབྷིཾ ཨངྒུལིསངྑཏེཧི པཏྟེཧི སཾསོབྷིཾ ནཁདཱིདྷིཏིཀེསརཾ ནཁརཾསིསངྑཏཀེསརཾ མུནིནྡཔདམྦུཛཾ སིརསཱ ཀེ ¶ ན པིལ༹ནྡྷནྟི. ཝིསེསྱབྷཱུཏཾ ཙརཎཾ ཝིསེསནབྷཱུཏཱ ཨངྒུལཱི ནཁདཱིདྷིཏི ཙེཏི ཨིམེསཾ ཨུཔམཱབྷཱུཏེཧི ཨམྦུཛདལཀེསརེཧི ཨབྷེདཀཔྤནཱཡ ཨེཀཏྟཾ གཧེཏྭཱ སམཱསེནེཝ ནིདྡིཊྛཏྟཱ ཨིདཾ ཨསེསཝཏྠུཝིསཡསམཱསརཱུཔཀཾ ནཱམ. ཨངྒུལིཡོ ཨེཝ དལཱནཱིཏི ཙ, ཏེཧི སཾསོབྷཱིཏི ཙ, ནཁེསུ དཱིདྷིཏིཡོཏི ཙ, ཏཱ ཨེཝ ཀེསརཱནི ཨསྶེཏི ཙ ཝཱཀྱཾ.