📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ནཱིཏིམཉྫརཱི

༡.

ཀུལཀྑཡེ ¶ ཝིནསྶནྟི,

ཀུལདྷམྨཱ སནནྟནཱ;

དྷམྨེ ནཊྛེ ཀུལཾ སབྦཾ,

ཨདྷམྨོ ཨབྷིབྷཱུ ཁལཾ.

༢.

ཨདྷམྨཱབྷིབྷཝཱ དནྟཱ,

པདུསྶནྟི ཀུལིཏྠིཡོ;

ཐཱིསུ དུཊྛཱ སྭ དྷམྨེན,

ཛཱཡཏེ ཝཎྞསངྐརོ.

༣.

པིཡཾ ¶ བྷཱསེ གུཎགྒཱཧོ,

སཱུརོ སིཡཱ ཝིཀནྟནོ;

དཱཏཱ ཙནྡསམཱ ནཱརཱི,

དིཊྛཾ དིཊྛཾ ནཧཱསཡེ.

༤.

ཀུཏོཏྠི ¶ ཀུམིཏྟེ སཙྩཾ,

ཀུདཱརེ རཏིཝཌྜྷནཾ;

ཀུདེསམྷི མནོ རམྨཾ,

ཀུརཱཛེ བྷོགསམྤདཾ.

སངྐེཏེཝ ¶ ཨམིཏྟསྨིཾ,

མིཏྟསྨིཾ པི ནཝིསྶསེ;

ཨབྷཡཱ བྷཡ མུཔྤནྣཾ,

ཨཔི མཱུལཱནི ཀནྟཏི.

ཨདིཊྛོཝ ¶ པརོ སེཡྻོ,

དུམྨིཏྟོ ནོ ཝིསྶཱསིཀོ.

ཨགྒིཧོམཕལཾ ¶ ཝེདོ,

སཏྠཾསཱིལཕལཾ མཏཾ;

རཏིཔུཏྟཕལཾ ནཱརཱི,

དཱནབྷུཏྟིཕལཾ དྷནཾ.

ཨསཙྩཾ ¶ སཱཧསཾ མཱཡཱ,

མཱུལ༹ྷཏྟ མ ཏིལོབྷཏཱ;

ཨསོཙཾ ནིདྡཡཏྟཉྩ,

ཐཱིནཾ དོསཱ སབྷཱཝཛཱ.

ཛཱཡཱཡ ¶ བྷཏྟུནོ བྷཱརོ,

སིསྶེན གུརུནོ ཀཏོ;

ཨམཙྩཀེཧི རཱཛསྶ,

པིཏརཱནཾ ནིཛེནཙ.

༥.

ཨུཡྻམེན ¶ ཧི སིཛ྄ཛྷནྟི,

ཀམྨཱནི ན མནོརཐཱ;

ན ཧི སུཏྟསྶ སཱིཧསྶ,

པཝཱིསནྟི མུཁེ མིགཱ.

ཨཏིསཱིཏཾ ¶ ཨཏིཨུཎྷཾ,

ཨཏིསཱཡམིདཾ ཨཧུ;

ཨིཏི ཝིསཊྛཀམྨནྟེ,

ཁཎཱ ཨཙྩེནྟི མཱཎཝེ.

ཨཱདཱནསྶ པདཱནསྶ,

ཀཏྟབྦསྶ ཙ ཀམྨུནོ;

ཁིཔྤཾ ཨཀཡྻམཱནསྶ,

ཀཱལེ པིཝཏི སམྤདཾ.

ནཱདབྦེ ¶ ནིཧིཏཱ ཀཱཙི,

ཀྲིཡཱ ཕལཝཏཱི བྷཝེ;

ནབྱཱཔཱརསཏེནཱཔི,

སུཀོཝ པཱཋཏེ བཀོ.

ཡོ ¶ དནྡྷཀཱལེ ཏརཏི,

ཏརཎཱིཡེ ཙ དནྡྷཡེ;

སུཀྑཔཎྞཾ ཝ ཨཀྐམྨ,

ཨཏྠཾ བྷཉྫཏི ཨཏྟནོ.

༦.

ཡཾ ¶ དདཱཏི ཡཾ བྷུཉྫཏི,

ཏདེཝ དྷནིནོ དྷནཾ;

ཨཉྙེ མཏསྶ ཀཱིལ༹ནྟི,

དཱརེཧིཔི དྷནེཧིཔི.

དཱནོཔབྷོགཧཱིནེན ¶ ,

དྷནེན དྷནིནོ སུཁཾ;

ཀོ ཝིསེསོ དལིདྡསྶ,

ཨདྷིཀཾ དྷནརཀྑཎཾ.

ནིཛསོཁྱཾ ¶ ནིརུནྡྷནྟོ,

ནཱིཙབྷོགོ མིཏམྤཙོ;

དྷནཾ སཉྩཡཏེ ཡོ སོ,

པརབྷཱརཝཧོ པསུ.

ཡཾ ¶ ཨུསྶུཀཱ སངྑརོནྟི,

ཨལཀྑིཀཱ བཧུཾ དྷནཾ;

སིཔྤཝནྟོ ཨསིཔྤཱཝཱ,

ལཀྑི ཝཱ ཏཱནི བྷུཉྫཏི.

༧.

སམྤཏྱཾ ¶ མཧཏཾ ཙིཏྟཾ,

བྷཝེ ཨུཔྤལེ ཀོམལཾ;

ཝིཔཏྱཾཙ མཧཱསེལ,

སིལཱསངྒྷཱཏཀཀྐསཾ.

༨.

ཨསམྦྷབྱགུཎཾ ¶ ཐུཏྭཱ,

ཁེདོ མུདྷཱཝ ཛཱཡཏེ;

ཨཝ྄ཧཱཡཾ ཙནྡ མུ ལློཀྱ,

ནཙནྡོཏ མུ པཱགམཱི.

༩.

སཙྩཾ ¶ མུཁམྷི དྷཱརེཡྻ,

ཀཎྞེ སུཏཾ བྷུཛེ ཛཡཾ;

ཧདཡམྷི ཁམཾ ཝཱིརཾ,

ལོཀཱདཱསཾཙ ལོཙནེ.

སདྡམཏྟཾ ¶ ནཕནྡེཡྻ,

ཨཉྙཏྭཱ སདྡཀཱརཎཾ;

སདྡཧེཏུཾ པརིཉྙཱཡ,

པམོདོ ཝཱ བྷཡོ ཏཐཱ.

སབྦསུཏ ¶ མ དྷཱིཡེཡྻ,

ཧཱིནམུཀྐཊྛམཛ྄ཛྷིམཾ.

༡༠.

དུནྣཱརིཡཱ ¶ ཀུལཾ སུདྡྷཾ,

པུཏྟོ ནསྶཏི ལཱལནཱ;

སམིདྡྷི ཨནཡཱ བནྡྷུ,

པཝཱསཱ མདནཱ ཧིརཱི.

ལཱལཡེ ¶ པཉྩཝསྶཱནི,

དསཝསྶཱནི ཏཱལཡེ;

པཏྟེཏུ སོལ༹སེཝསྶེ,

པུཏྟཾ མིཏྟཾཝ ཨཱཙརེ.

ལཱལནེ བཧཝོ དོསཱ,

ལཱལནེ བཧཝོ གུཎཱ.

པཱཔཱ ¶ ནིཝཱརཡཏི ཡོཛཡཏེ ཧིཏཱཡ,

གུཡ྄ཧཱནི གཱུཧཏི གུཎཾ པཀཊཱིཀརོཏི;

ཨཱཔཏྟིཀཉྩ ནཛཧཱཏི དདཱཏི ཀཱལེ,

སམྨིཏྟ ལཀྑཎམིདཾ པཝདནྟི སནྟོ.

༡༡.

དུཛྫནོ ¶ ཛཱིཡཏེ ཡུཏྱཱ,

ནིགྒཧེན ནདྷཱིམཏཱ;

ནིཔཱཏྱཏེ མཧཱརུཀྑོ,

ཏསྶམཱིཔ ཁཏིཀྑཡཱ.

ཝནེ ¶ མིགཱཙ ལུདྡྷཱནཾ,

དུཛྫནཱནཉྩ སཛྫནཱ;

ཨཀཱརཎཝེརཱི ཧོནྟི,

ཏིཎབྷཀྑཱ སུཔེསལཱ.

པཱདལགྒཾ ¶ ཀརཊྛེན,

ཀཎྜཀེནེཝ ཀཎྜཀཾ.

བཱལཾ ¶ ནཔསྶེ ནསུཎེ,

ནཙབཱལེན སཾཝསེ;

བཱལེནཱལླཱཔསལླཱཔཾ,

ནཀརེ ནཙརོཙཡེ.

༡༢.

ཨུཔ ཀཏྟུཾ ཡཐཱ ཁུདྡོ,

སམཏྠོ ནཏཐཱམཧཱ;

ཀཱུཔོ ཧི ཧནྟི པིཔཱསཾ,

ནཏུ པཱཡོ མཧམྦུདྷི.

༡༣.

ཨཱདཱནསྶ ¶ པདཱནསྶ,

ཀཏྟབྦསྶཙ ཀམྨུནོ;

ཁིཔྤཾ ཨཀརམཱནསྶ,

ཀཱལོ བྷཀྑཏི ཏཾ རསཾ.

ནཀྑཏྟཾ ¶ པཊིམཱནེནྟཾ,

ཨཏྠོ བཱལཾ ཨུཔཛ྄ཛྷགཱ;

ཨཏྠོ ཨཏྠསྶ ནཀྑཏྟཾ,

ཀིཾ ཀརིསྶནྟི ཏཱརཀཱ.

ཨཛརཱམརོཝ ¶ པཉྙོ,

ཝིཛྫམཏྠཉྩ ཙིནྟཡེ;

གཧིཏོཝིཡ ཀེསེསུ,

མཙྩུནཱ དྷམྨམཱཙརེ.

༡༤.

ཝཛྫཱ གུརཱུཙ མནྟཱིཙ,

ཏཡོ རཊྛཱབྷིསངྑཏཱ;

ཛཱིཝཱིཏ དཀྑ ཀོསཱནཾ,

ཝཌྜྷནཱ ནཱསནཱཙ ཏེ.

༡༥.

ཐིརེན ¶ ཀམྨཾ ཝཌྜྷཏི,

ཨཐིརེན ཏུརེན ནོ;

ཕལནྟི སམཡེ རུཀྑཱ,

སིཏྟཱཔི བཧུཝཱརིནཱ.

ཝཱཡཱམེཐེཝ ¶ པུརིསོ,

ནནིབྦིནྡེཡྻ པཎྜིཏོ.

པཡཏནོ ¶ ཏཱདིསོ ནེཝ,

ཀཡྻོ ཡེན ཕལཾ ནཧི;

སེལགྒེ ཀཱུཔཁཎནཱ,

ཀཐཾ ཏོཡསམཱགམོ.

ཉཱཎངྐུསེན ¶ སམྨགྒཾ,

ནིཡྻཏྱུསྶཱཧཀུཉྫརོ.

ཨསམེཀྑིཏཀམྨནྟཾ,

ཏུརིཏཱབྷི ནིཔཱཏིནཾ;

ཏཱནིཀམྨཱནི ཏཔྤེནྟི,

ཨུཎྷཾ ཝ ཛ྄ཛྷོཧིཏཾ མུཁེ.

༡༦.

ཚདྡོསཱ ¶ པུརིསེནེཧ,

ཧཱཏབྦཱ བྷཱུཏིམིཙྪནྟཱ;

ནིདྡཱ མཛྫཾ བྷཡཾ ཀོདྷོ,

ཨཱལསྱཾ དཱིགྷསུཏྟཏཱ.

ན ¶ དིཝཱ སུཔྤསཱིལེན,

རཏྟིམུཊྛཱནདེསྶིནཱ;

ནིཙྩསོཎྜེན མཏྟེན,

སཀྐཱ ཨཱཝསིཏུཾ གྷརཾ.

ཨབྷེཏབྦམྷི ¶ བྷཱཡནྟི,

བྷཱཡིཏབྦེ ནབྷཱཡརེ;

བྷཡཱབྷཡ ཝིམུལ༹ྷཱ ཏེ,

ཛིམྷཱནུགཱ ཨུཛུཉྫཧཱ.

ཡསྶ ¶ མནུསྶབྷཱུཏསྶ,

ནཏྠི བྷོགཱཙ སིཔྤཀཾ;

ཀིཾ ཕལཾ ཏསྶ མཱནུསྶཾ,

དྭིཔཱདཊྛོ ཧི སོ མིགོ.

༡༧.

ནཱནོཔཱཡོཝ ¶ ཀཏྟབྦོ,

སཙེ བྷཝེཡྻ ཨཏྟནོ;

ཨཏྠསིདྡྷི ཡཐཱཀཱམཾ,

ཨུཔཱཡོ ཧི ཧིཏཉྫསོ.

ལཉྫདཱནབཱལིསེན ¶ ,

ཀཱུཊཌྜཀཱརདྷཱིཝརཱ;

ཝིནིཙྪཡམཧཱམཙྪཾ,

ཨོཊྚེནྟི ལོབྷསཱགརེ.

ཡསྶེཏེ ཙཏུརོ དྷམྨཱ,

ཝཱནརིནྡ ཡཐཱཏཝ;

སཙྩཾ དྷམྨོ དྷཱིཏི ཙཱགོ,

དིཊྛཾ སོ ཨཏིཝཏྟཏི.

༡༨.

ཝིདྭཱཙ ¶ རཏནཾ ནཱརཱི,

ཝཱིཎཱ སཱཏྠཾ གིརཾམཧཱི;

གུཎཝིསེས མཱགམྨ,

གུཎཱནི ཨགུཎཱནིཙ.

དྷནཝཱ ¶ བལཝཱ ལོཀེ,

དྷནཱ བྷཝཏི པཎྜིཏོ.

སུམནེ ¶ ནིསྶིཏོ ཀཱིཊོ,

ནིགྒུཎོ ཧཱིནཀོ སཡཾ;

ཏཾ པུཔྥེཧི མཎྜེནྟཱནཾ,

རཉྙཾ སིརོཔི རོཧཏི.

ཨལཀྑིཀེཧི ¶ སཉྩཱིཏཱ,

དྷནབྷོགཱཙ ཙིནྟིཏཱ;

ལཀྑིཀསྶ བྷཝནྟེཏེ,

ལཀྑིཝཱ སུཊྛུབྷུཉྫཏི.

ཁཏྟིཡོ ¶ སེཊྛོ ཛནེ ཏསྨིཾ,

ཡོ གོཏྟཔཊིསཱརིནོ;

ཝིཛྫཱཙརཎསམྤནྣོ,

སོ སེཊྛོ དེཝམཱནུསེ.

ཝིསཱཔི ¶ ཨམཏཾ གཎྷེ,

གཱུཐཏོ མཎིམུཏྟམཾ;

ཀཎྚཀཔཱདཔཱ པུཔྥཾ,

ཐིརཏཾ དུཀྐུལཱ ཝརཾ.

དྷནིསྶརཱདིགུཎོམྨི ¶ -

ཝེགེན ཝཱཧིཏཱ པཛཱ.

༡༩.

ཡསྶ ཏྠི སཏཏཾ མེཏྟཱ,

སབྦལོཀསུཝལླབྷཱ;

ཀཱུཔཱཡཏེ སམུདྡོཔི,

ཨགྒི ཏསྶ ཛལཱཡཏེ.

༢༠.

སཀྑརཱཡཏི མེརཱུཔི,

ཝིསབྷཀྑོ སུདྷཱཡཏེ;

སསཱཡཏེ མིགརཱཛ,

བྱཱལོ མཱལཱགུཎཱཡཏེ;

དོལཱཡཏེ ཚམཱཙཱལོ,

ནཱནཱཝུདྷཱ ཏིཎཱཡརེ.

༢༡.

སམེཝ ¶ སཏི ཨུསྶཱཧེ,

སུཁཝཱཧོ ཧིཏངྐརོ;

ཨཱུནེ-དྷིཀེ ཏཐཱ ནོཧི,

མཛ྄ཛྷགོ སཱདྷུ སབྦདཱ.

སཱདྷུ ¶ ཁོ པཎྜིཏོནཱམ,

ནཏྭེཝ ཨཏིཔཎྜིཏོ.