📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

མཧཱརཧནཱིཏི

པཎྜིཏཀཐཱ

༡.

མཧཱརཧརཧཾ ¶ སཀྱ,

མུནིཾ ནཱིཝརཎཱ ཏཎྷཱ;

མུཏྟཾ མུཏྟཾ སུདསྶནཾ,

ཝནྡེ བོདྷིཝརཾ ཝརཾ.

༢.

མུནིནཱ ¶ མུནིནཱགེན,

དུཊྛཔབྦཛྫིཏཱ ཛིཏཱ;

ཡཐཱ ཡཐཱཨསདྡྷམྨ-

པུརཎཱ པུརཎཱདཡོ.

༣.

ཏཐཱ ཏཐཱགཏོཝཱདཱ,

ནུགཏེ ལོཀནཱིཏིཡཾ;

ཀཏཡོགེན ཝིདཱུནཱ,

ཛེཡྻོཝཱནཏྠ ཀཱརིནོ.

༤.

ནིཏཱིདྷ ¶ ཛནྟུནཾ སཱརོ,

མིཏྟཱཙརིཡཱཙ པཱིཏརཱ;

ནཱིཏིམཱ སུབུདྡྷི བྱཏྟོ,

སུཏཝཱ ཨཏྠདསྶིམཱ.

༥.

ཀཝིཧེརཉྙཀཱ ཀཏྭཱ,

སུཏྟཏྟཾ སཏྠཀཉྩནཾ;

གཛྫཔཛྫཱདྱཱལངྐཱརཾ,

ཀརོནྟཱིདྷ མནོརམྨཾ.

༦.

ཝུཏྱཾ ¶ ཝིསདཉཱཎསྶ,

ཉཱཏོ ཨཏྠོཏརསྶ ན;

སུརཔྤབྷཱཡ ཨཱདཱསོ,

ཚཱཡཾ དིསྶེ ན མཱཀརེ.

༧.

མཧཱཏེཛོཔི ཏེཛོཡཾ,

མཏྟིཀཾ ནམུདུཀཾཀརོ;

ཨཱཔོ ཨཱཔེཏི མུདུཀཾ,

སཱདྷུཝཱཙཱཙ ཀཀྑལ༹ཾ.

༨.

མུདུནཱཝ ¶ རིཔུཾ ཛེཏི,

མུདུནཱ ཛེཏི དཱརུཎཾ;

ནོསིདྡྷཾ མུདུནཱ ཀིཉྩི,

ཡཏྭཏོ མུདུནཱ ཛཡེ.

༩.

ཙནྡནཾ སཱིཏལཾ ལོཀེ,

ཏཏོ ཙནྡཾཝ སཱིཏལཾ;

ཙནྡནཙནྡསཱིཏམྷཱ,

ཝཱཀྱཾ སཱདྷུསུབྷཱསིཏཾ.

༡༠.

པཏྟཀལློདིཏཾ ¶ ཨཔྤཾ,

ཝཱཀྱཾ སུབྷཱསིཏཾ བྷཝེ;

ཁུདྡིཏསྶ ཀདནྣཾཔི,

སུཏྟཾ སཱདུརསོ སིཡཱ.

༡༡.

སཏྠཀཱཔི བཧཱུཝཱཙཱ,

ནཱདརཱ བཧུབྷཱཎིནོ;

སོཔཀཱརམུདཱསཱིནཾ,

ནནུདིཊྛཾ ནདཱིཛལཾ.

༡༢.

སཾསཱརཝིསརུཀྑསྶ ¶ ,

དྭཡམེཝཱམཏཾཕལཾ;

སུབྷཱསིཏསྶསཱརཱདོ,

སཱདྷཱུཧིརསམཱགམོ.

༡༣.

པཱསཱཎཚཏྟཾ གརུཀཾ,

ཏཏོ དེཝཱནཙིཀྑནཱ;

ཏཏོ ཝུཌྜྷཱནམོཝཱདོ,

ཏཏོ བུདྡྷསྶ སཱསནཾ;

༡༤.

ཏུལཾ ¶ སལླཧུཀཾ ལོཀེ,

ཏཏོ ཙཔལཛཱཏིཀོ;

ཏཏོནོཝཱདིཀོ ཏཏོ,

ཡཏི དྷམྨེཔམཱདཀོ.

༡༥.

ཨཧ གཙྪཏི ཧཱཡནྟཱི,

སཏྟཱནམིདྷ ཛཱིཝིཏཾ;

ཏསྨཱཧི མཱཔམཏྟཏྭཾ,

གཙྪནྟུ ཛིནསཱསནེ.

༡༦.

པཎྜིཏསྶ པསཾསཱཡ,

དཎྜོབཱལེན དཱིཡཏེ;

པཎྜིཏོ པཎྜིཏེནེཝ,

ཝཎྞིཏོཝ སུཝཎྞིཏོ.

༡༧.

སཏེསུ ¶ ཛཱཡཏེ སཱུརོ,

སཧསྶེསུཙ པཎྜིཏོ;

ཝུཏྟཱ སཏསཧསྶེསུ,

དཱཏཱ བྷཝཏིཝཱ ནཝཱ.

༡༨.

བྷཱུཔཏྟཾཙ པཎྜིཏཏྟཉྩ,

ནེཝཏུལྱཾ ཀདཱཙིཔི;

སདེསེཔཱུཛིཏོ རཱཛཱ,

བུདྡྷོ སབྦཏྠཔཱུཛིཏོ.

༡༩.

ཀྭཱཏིབྷཱརོ ¶ སམཏྠཱནཾ,

ཀིཾདཱུརོ བྱཝཧཱརིནཾ;

ཀོཝིདེསོ སཝིཛྫཱནཾ,

ཀོཔརོ པིཡཝཱདིནཾ.

༢༠.

ནནུ ཏེ ཡེཝསནྟཱ ནོ,

སཱགརཱ ནཀུལཱཙལཱ;

ཨཔྤམྤི མརིཡཱདཾ ཡེ,

སཾཝཊྚེཝི ཛཧནྟིནོ.

༢༡.

པལཡེཏཱིཏམརིཡཱདཱ ¶ ,

བྷཝནྟིཀིར སཱགརཱ;

མརིཡཱདཱཏིཀཾ སཱདྷུ,

ནཨིཙྪནྟི པལཡེཔི.

༢༢.

སཏཾ དཱིགྷཱཡུཀཾ སབྦ,

སཏྟཱནཾ སུཁཀཱརཎཾ;

ཨསཏཾཔན སབྦེསཾ,

དུཀྑཧེཏུ ནསཾསཡོ.

༢༣.

པཱམོཀྑེ ¶ སུཛནེ སནྟེ,

སབྦེཔི སུཛནཱ ཛནཱ;

ཛཱཏེཀསྨིཾསཱརགནྡྷེ,

སབྦེ གནྡྷམཡཱ དུམཱ.

༢༤.

ཨཏྟནཱ ཡདི ཨེཀེན,

ཝིནཏེན མཧཱཛནཱ;

ཝིནཡཾ ཡནྟི སབྦེཔི,

ཀོ ཏཾ ནཱསེཡྻ པཎྜིཏོ.

༢༥.

སརཱིརསྶ ¶ གུཎཱནཉྩ,

དཱུརམཙྩནྟ མནྟརཾ;

སརཱིརཾ ཁཎཝིདྡྷཾསི,

ཀཔྤནྟིཊྛཱཡིནོ གུཎཱ.

༢༦.

ཡདི ནིཙྩམནིཙྩེན,

ནིམལཾ མལཝཱཧིནཱ;

ཡོ སོ ཀཱཡེན ལབྷེཐ,

ཀིཾནལདྡྷཾ བྷཝེ ནུཀིཾ.

༢༧.

དྷམྨཏྠཀཱམམོཀྑཱནཾ,

པཱཎཾ སཾསིདྡྷིཀཱརཎཾ;

ཏནྣིགྷཱཏཱ ཀིནྣཧཏཾ,

རཀྑནཱ ཀིནྣརཀྑིཏཾ.

༢༨.

ཨཏྟཱ ¶ བནྡྷུ མནུསྶསྶ,

རིཔུ ཨཏྟཱཝ ཛནྟུནཾ;

ཨཏྟཱཝ ནིཡཏོ ཉཱཏི,

ཨཏྟཱཝ ནིཡཏོ རིཔུ.

༢༩.

ཨཏྟནོཔརིཙཱགེན,

ཡཾསིཏམནུརཀྑནཾ;

ཀརོནྟི སཛྫནཱཡེཝ,

ན ཏཾ ནཱིཏིམཏཱ མཏཾ.

༣༠.

ཏིཎཱནི ¶ བྷཱུམིརུདཀཾ,

ཙཏུཏྠཱི ཝཱཀྱསུཊྛུཏཱ;

ཨེཏཱནི ཧི སཏཾགེཧེ,

ནོཚིནྡནྟེ ཀདཱཙིཔི.

༣༡.

ཨམྦུཾ པིཝནྟིནོ ནཛྫོ,

རུཀྑོ ཁཱདཏིནོ ཕལཾ;

མེགྷོ ཀྭཙིཔི ནོ སསྶཾ,

པརཏྠཱཡ སཏཾདྷནཾ.

༣༢.

སཏཾ ཕརུསཝཱཙཱཧི,

ནཡཱཏི ཝིཀཏིཾ མནོ;

ཏིཎུཀྐཱཧི ནསཀྐཱཝ,

ཏཱཔེཏུཾ སཱགརེ ཛལཾ.

༣༣.

སམྤཏྱཾ ¶ མཧཏྟཾཙེཏོ,

བྷཝཏྱུཔྤལཀོམལཾ;

ཝིཔྤཏྱཉྩ མཧཱསེལེ,

སིལཱསངྒྷཱདཀཀྐསོ.

༣༤.

ཨཏྠཾ མཧནྟམཱཔཛྫ,

ཝིཛྫཾ སམྤཏྟིམེཝཙ;

ཙརེཡྻཱམཱནཐདྡྷོཡོ,

པཎྜིཏོ སོ པཝུཙྩཏི.

༣༥.

ནཱལབྦྷམབྷིཔཏྠེནྟི ¶ ,

ནཊྛམྤི ནཙསོཙརེ;

ཝིཔྤཏྱཉྩ ནམུཡ྄ཧནྟི,

ཡེནརཱ ཏེཝ པཎྜིཏོ.

༣༦.

གཎྛིཊྛཱནེ ཨེཀཔདེ,

ནཱཏིམཉྙེཡྻ པཎྜིཏོ;

ཀིཾ ཨཀྐོ ཝེལུ༹པབྦྷཱརོ,

ཏིམཧཱདཱིཔབྷཱནུདོ.

༣༧.

གུཎདོསེསུམེཀེན,

ནཏྠི ཀོཙི ཝིཝཛྫིཏོ;

སུཁུམཱལསྶ པདུམསྶ,

ནལཱ༹ བྷཝཏི ཀཀྐསཱ.

༣༨.

སུམཧནྟཱནི ¶ སཏྠཱནི,

དྷཱརཡནྟོ བཧུསྶུཏཱ;

ཚེཏྟཱརོ སཾསཡཱནནྟུ,

ཀིལནྟེ ལོབྷམོཧཏཱ.

༣༩.

དོསམྤི སགུཎེ དིསྭཱ,

གུཎཝཱདཱི ཝདནྟིནོ;

ན ལོཀོ ཝིཛྫམཱནམྤི,

ཙནྡེ པསྶཏི ལཉྪནཾ.

༤༠.

ནིཔུཎེ ¶ སུཏམེསེཡྻ,

ཝིཙིནིཏྭཱ སུཏཏྠིཀོ;

བྷཏྟཾ ཧུཀྑལིཡཾ པཀྐཾ,

བྷཱཛནཾཔི ཏཐཱ བྷཝེ.

༤༡.

གུཎཱ ཀུབྦནྟི དཱུཏཏྟཾ,

དཱུརེཔི ཝསཏཾ སཏཾ;

ཀེཏཀེ གནྡྷ གྷཱསཱཡ,

གཙྪནྟི བྷམརཱ སཡཾ.

༤༢.

པཎྜིཏོ སུཏསམྤནྣོ,

ཡཏྠཨཏྠཱིཏི ཙེསུཏོ;

མཧུསྶཱཧེན ཏཾཋཱནཾ,

གནྟབྦཾ སུཏརེསིནཱ.

༤༣.

སབྦསུཏཾ ¶ མདྷཱིཡེཐ,

ཧཱིནམུཀྐཊྛ མཛ྄ཛྷིམཾ;

སབྦསྶཨཏྠཾ ཛཱནེཡྻ,

ནཙ སབྦཾ པཡོཛཡེ;

ཧོཏི ཏཱདིསཀོཀཱལོ,

ཡཏྠ ཨཏྠཱཝཧཾ སུཏཾ.

༤༤.

ཋིཏོ ཙིརཏྟནཾ ནཱིརེ,

སཀྑརོ ནནྟརཾསུཏོ;

དབྦྷོ ནཱིརནྟིཀེ ཛཱཏོ,

སབྦཀཱལནྟརཾསུཏོ.

༤༥.

ཝསུཾ ¶ གཎྷནྟི དཱུརཊྛཱ,

པབྦཏེ རཏནོཙིཏེ;

ན མིལཀྑཱ སམཱིཔཊྛཱ,

ཨེཝཾ བཱལཱ བཧུསྶུཏེ.

༤༦.

ཧིརཉྙེན མིགཱནཾཝ,

སུསཱིལཾཔི ཨསཱིལིནོ;

ཨདྷམྨིཀསྶ དྷམྨེན,

བཱལཱནཾཔི སུཏེན ཀིཾ.

༤༧.

སུཏེན ¶ ཧདཡཊྛེན,

ཁལོ ནེཝསུསཱིལཝཱ;

མདྷུནཱ ཀོཊརཊྛེན,

ནིམྦོ ཀིཾ མདྷུརཱཡཏེ.

༤༨.

སཀིཾཔི ཝིཉྙུ དྷཱིརེན,

ཀརོཏི སཧསངྒམཾ;

ཨཏྟཏྠཉྩ པརཏྠཉྩ,

ནིབྦཱནནྟཾ སུཁཾ ལབྷེ.

༤༩.

ཧཾསོ མཛ྄ཛྷེ ནཀཱཀཱནཾ,

སཱིཧོ གུནྣཾ ནསོབྷཏི;

གདྲབྷཱནཾ ཏུརངྒོནོ,

བཱལཱནཉྩ ནཔཎྜིཏོ.

༥༠.

ཨཱཀིཎྞོཔི ¶ ཨསབྦྷཱིཝ,

ཨསཾསཊྛོཝ བྷདྡཀོ;

བཧུནཱ སནྣཛཱཏེན,

གཙྪེ ནུམྨཏྟཀེནིདྷ.

༥༡.

ནདཱིཏིརེ ཁཏེཀཱུཔེ,

ཨརཎཱིཏཱལཝཎྚཀེ;

ནཝདེ ཨཱཔཱདི ནཏྠཱིཏི,

མུཁེཙ ཝཙནཾ ཏཐཱ.

༥༢.

སུཏསནྣིཙྩཡཱ ¶ དྷཱིརཱ,

ཏུཎྷིབྷཱུཏཱ ཨཔུཙྪིཏཱ;

པུཎྞཱ སུབྷཱསིཏེནཱཔི,

གྷཎྜཱདྱགྷཊིཏཱཡཐཱ.

༥༣.

ཨཔུཊྛོ པཎྜིཏོ བྷེརཱི,

པཛྫུནྣོ ཧོཏི པུཙྪིཏོ;

བཱལོ པུཊྛོ ཨཔུཊྛོཙ,

བཧུཾ ཝིཀཏྟཏེ སདཱ.

༥༤.

སམྤནྣགུཎཱ ལངྐཱརོ,

སབྦསཏྟ ཧིཏཱཝཧོ;

ནཙརེཡྻ པརཏྟཏྠཾ,

ཀུཏོ སོ པཎྜིཏོ བྷཝེ.

༥༥.

སཔརཏྠཾ ¶ ཙརེ དྷཱིརོ,

ཨསཀྐོནྟོ སཀཾ ཙརེ;

ཏཐཱཔིཙ ཨསཀྐོནྟོ,

པཱཔཱཏྟཱནཾ ཝིཡོཛཡེ.

༥༦.

བཱལེཙུམྨཏྟཀེ བྷཱུཔེ,

གུརུམཱཏཱཔིཏཱུསྭཔི;

ནདོསཾ ཀརིཡཱ པཉྙོ,

སངྒྷེཙ ཛེཊྛབྷཱཏརི.

༥༧.

ཨཏྠནཱསཾ ¶ མནོཏཱཔཾ,

གྷརེདུཙྩརིཏཱནིཙ;

ཝཉྩནཾ ཨཝམཱནཉྩ,

མཏིམཱ ནཔཀཱསཡེ.

༥༨.

པརདཱནཾ ཛནེཏྟཱིཝ,

ལེཊྚུཝ པརདབྦཀཾ;

ཨཏྟཱཝ སབྦབྷཱུཏཱནི,

ཡོ པསྶཏི སོ པསྶཏི.

༥༩.

པརཱུཔཝཱདེ པདྷིརོ,

པརཝཛྫེསྭལོཙནོ;

པངྒུལོ ཨཉྙནཱརཱིསུ,

དུསྶཀཔྤེསྭཙེཏནོ.

༦༠.

སབྦཾ སུཎཱཏི སོཏེན,

སབྦཾ པསྶཏི ཙཀྑུནཱ;

ནཙདིཊྛཾ སུཏཾ དྷཱིརོ,

སབྦཾ ཨུཙྩིཏུམརཧཏི.

༦༡.

ཙཀྑུམསྶ ཡཐཱཨནྡྷོ,

སོཏཝཱ པདྷིརོཡཐཱ;

པཉྙཱཝཱསྶ ཡཐཱམཱུགོ,

བལཝཱ དུབྦལོརིཝ;

ཨཐ ཨཏྠེསམུཔྤནྣེ,

སཡེཐ མཏསཱཡིཏཾ.

༦༢.

པཱཔམིཏྟེ ¶ ཝིཝཛྫེཏྭཱ,

བྷཛེཡྻུ ཏྟམཔུགྒལཾ;

ཨོཝཱདེཙསྶ ཏིཊྛེཡྻ,

པཏྠེནྟོ ཨཙལཾསུཁཾ.

༦༣.

སུསུསཱ སུཏཝཌྜྷནཾ,

སུཏཾ པཉྙཱཡཝཌྜྷནཾ;

པཉྙཱཡ ཨཏྠཾ ཛཱནཱཏི,

ཉཱཏོ ཨཏྠོ སུཁཱཝཧོ.

༦༤.

པཱམོཛྫ ¶ ཀརཎཾ ཋཱནཾ,

པསཾསཱཝཧནཾསུཁཾ;

ཕལཱནིསཾསོ བྷཱཝེཏི,

ཝཧནྟོ པོརིསྶཾདྷུརཾ.

༦༥.

ཨཏིསཱིཏཾ ཨཏིཨུཎྷཾ,

ཨཏིསཱཡ མིདཾཨཧུ;

ཨིཏི ཝིསཊྛ ཀམྨནྟེ,

ཁཎཱ ཨཙྩནྟི མཱཎཝེ.

༦༦.

ཡོཙ ¶ སཱིཏཉྩ ཨུཎྷཉྩ,

ཏིཎཱཏིཡོ ནམཉྙཏི;

ཀརཾ པུརིས ཀིཙྩཱནི,

སོ སུཁཱ ནཝིཧཱཡཏི.

༦༧.

ཡསལཱབྷཾ ཛིགཱིསནྟཾ,

ནརཾ ཝཛྫེནྟི དཱུརཏོ;

ཨཔཏྠེཏྭཱན ཏེ ཏསྨཱ,

ཏཾམགྒཾ མགྒཡེ བུདྷོ.

༦༨.

དེསམོསཛྫ གཙྪནྟི,

སཱིཧཱ སཔྤུརིསཱ གཛཱ;

ཏཏྠེཝ ནིདྷནཾ ཡནྟི,

ཀཱཀཱ ཀཱཔུརིསཱ མིགཱ.

༦༩.

ཡསྨིཾདེསེ ¶ ནསམྨཱརོ,

ནཔིཏི ནཙབནྡྷཝཱ;

ནཙཝིཛྫཱགམོ ཀོཙི,

ནཏཏྠ ཝསཏཱི ཝསྶེ.

༧༠.

དྷནཝཱ གཎཀོ རཱཛཱ,

ནདཱི ཝེཛྫཱ ཨིམེཛནཱ;

ཡཏྠ པཉྩ ནཝིཛྫནྟེ,

ན ཏཏྠཝསཏཱི ཝསེ.

༧༡.

ཨསནཾ ¶ བྷཡམནྟཱནཾ,

མཙྩཱནཾ མརཎཾ བྷཡཾ;

ཨུཏྟམཱནནྟུསབྦེསཾ,

ཨཝམཱནཾ པརཾ བྷཡཾ.

༧༢.

ཨམཱནནཱ ཡཏྠ སིཡཱ,

སནྟཱནཾ ཨཝམཱནནཱ;

ཧཱིནསམཱནནཱཝཱཔི,

ན ཏཏྠཝསཏི ཝསེ.

༧༣.

ཡཏྠཱལསོཙ དཀྑོཙ,

སཱུརོ བྷཱིརུཙ པཱུཛིཏོ;

ན སནྟཱ ཏཏྠ ཝསྶནྟི,

ཨཝིསེསཀརེན ཀོ.

༧༤.

དུཀྑོ ¶ ནིཝཱསོ སམྦཱདྷེ,

ཋཱནེ ཨསུཙིསངྐཊེ;

ཏཏོ རིམྷིཔིཡཱནནྟེ,

ཏཏོཙ ཨཀཏཉྙུནཾ.

༧༥.

སིངྒཱིནཾ པཉྩཧཏྠེན,

སཏེན ཝཱཛིནཾ ཙཛེ;

ཧཏྠཱིནནྟུ སཧསྶེན,

དེསཙཱགེན དུཛྫནེ.

༧༦.

ཙཛེ ¶ ཨེཀཾ ཀུལསྶཏྠཾ,

གཱམསྶཏྠཾ ཀུལཾ ཙཛེ;

གཱམཾ ཛནཔདསྶཏྠཾ;

ཨཏྟཏྠཾ པཐཝཱི ཙཛེ.

༧༧.

ཙལཏྱེཀེནཔཱདེན,

ཏིཊྛཏྱེཀེན པཎྜིཏོ;

ཨསམིཁྱཔརཾཋཱནཾ,

པུབྦམཱཡནཾནཙཛེ.

༧༨.

ཋཱནབྷཊྛཱ ¶ ནསོབྷནྟི,

དནྟཱཀེསཱན ཁཱནརཱ;

མཏིམཱ ཨིཏིཝིཉྙཱཡ,

སཋཱནཾ ནཙཛེ ལཧུཾ.

༧༩.

ཙཛེ དྷནཾ ཨངྒཝརསྶཧེཏུ,

ཨངྒཾ ཙཛེ ཛིཝིཏཾ རཀྑམཱནོ;

ཨངྒཾ དྷནཾ ཛིཝིཏཉྩཱཔི སབྦཾ,

ཙཛེ ནརོ དྷམྨ མནུསྶརནྟོ.

༨༠.

སོཏཾ ¶ སུཏེནེཝ ན ཀུཎྜལེན,

དཱནེན པཱཎཱི ནཏུ ཀངྐཎེན;

ཨཱབྷཱཏི ཀཱཡོ པུརིསུཏྟམསྶ,

པརོཔཀཱརེན ན ཙནྡནེན.

སམྦྷེདཀཐཱ

༨༡.

སཏྠ ¶ ཀཔྤཝིཙཱརེན,

ཀཱལོ གཙྪཏི དྷཱིམཏཾ;

བྱསནེན ཨསཱདྷཱུནཾ,

ནིདྡཱཡ ཀལཧེནཝཱ.

༨༢.

སོཀཋཱནསཧསྶཱནི,

བྷཡཋཱནསཏཱནིཙ;

དིཝསེདིཝསེ མུལ༹ྷཾ,

ཨཱཝཱིསནྟི ནཔཎྜིཏཾ.

༨༣.

ཨཏིདཱིགྷོ ¶ མཧཱམུལ༹ྷོ,

མཛ྄ཛྷིམོཙ ཝིཙཀྑཎོ;

ཝཱསུདེཝཾ པུརཀྑིཏྭཱ,

སབྦེཝཱམནཀཱ སཊྛཱ.

༨༤.

ན ལོཀེ སོབྷཏེ མུལ༹ྷོ,

ཀེཝལཏྟཔསཾསཀོ;

ཨཔི སམྤིཧིཏེ ཀཱུཔེ,

ཀཏཝིཛྫོ པཀཱསཏེ.

༨༥.

མདནྟདམནཾ སཏྠཾ,

ཁལཱནཾ ཀུརུཏེ མདཾ;

ཙཀྑུསངྑཱརཀཾ ཏེཛཾ,

ཨུལུངྐཱན མིཝནྡྷཀཾ.

༨༦.

ཨཏྱཔྤམཔི ¶ སཱདྷཱུནཾ,

སིལཱལེཁེཝ ཏིཊྛཏེ;

ཛལེལེཁེཝ ནཱིཙཱནཾ,

ཡཾ ཀཏཾ ཏཾཔི ནསྶཏི.

༨༧.

དབྦམཔྤཾཔི སཱདྷཱུནཾ,

ཛལཾ ཀཱུཔེཝ ནིསྶཡོ;

བཧུཏྟཾཔི ཨསཱདྷཱུནཾ,

ནཙ ཝཱརིཝ ཨཎྞཝེ.

༨༨.

དུཊྛཙིཏྟོ ¶ པནཱཧིསྶ,

ཀོདྷོ པཱསཱཎལིཀྑིཏོ;

ཀུཛ྄ཛྷིཏབྦེ སུཛནསྶ,

ཛལེལེཁཱ ཙིརཊྛིཏོ.

༨༩.

བཱལསྶ ཛཱིཝིཏཾ པཱཔཾ,

མིཏརསྶི ཏརཾ བྷཝེ;

ཛནཀཱཡསྶ རཱཛཱཝ,

རཱཛདྷམྨོཝ རཱཛུནཾ.

༩༠.

སཔྤཱདཱནཾ བལཱི སཱིཧོ,

པུལཱ༹ཝཀོ ཏཏོ ཀིཔྤཱིལིཀཱ,

ནརཱ ཏཏོ བལཱི རཱཛཱ,

སབྦེས མནྟཀོ བལཱི.

༩༡.

བྷཱུཔོཎྞཝ ¶ གྒི ཐཱི སིཔྤི,

ཨབྷིཛ྄ཛྷཱལུཙཔུགྒལོ;

ཨེཏེསཾཔི མཧིཙྪཱནཾ,

མཧིཙྪིཏཱ ཨནིཙྩཏཱ.

༩༢.

ནིདྡཱལུཀོ ཨསནྟུཊྛོ,

ཨཀཏཉྙཱུཙ བྷཱིརུཀོ;

སཀྐུཎནྟིན སཱཙཱརཾ,

སིཀྑིཏུཾ ཏེ ཀདཱཙིཔི.

༩༣.

ནིདྡཱལུ ¶ ཀཱམརཱམོཙ,

སུཁིཏོ བྷོགཝཱལསོ;

ནིཙྪནྟོ ཀམྨརཱམོ ཙ,

སཏྟེཏེ སཏྠཝཛྫིཏཱ.

༩༤.

སམིདྡྷོ དྷནདྷཉྙེན,

ཀཊྛོ དཀཏིཎགྒིཧི;

སབྦཏོ དུགྒཏེནཊྛོ,

ཏསྨཱ ནདུཀྐཏཾ ཀརེ.

༩༥.

པུཉྙཔཱཔཕལཾ ¶ ཡོ ཙེ,

ནསདྡྷཧཏི སཙྩཏོ;

སོ ཝེ ཁིཔྤཾཝ ཨཏྟཱནཾ,

ཨཱདཱསཏལམཱནཡེ.

༩༦.

སམྤརཱཡིཀམཏྠཾ ཡོ,

ནསདྡྷཧཏི ཙེཔིསོ;

ཨཱཝཱསེ སགྒ གཱམཱིནཾ,

མཱཀྐབྷེ ཀིཾནཔསྶཏི.

༩༧.

མཧནྟཾ ཝཊྚརུཀྑཱདིཾ,

ཁུདྡབཱིཛཾ བཧཱུཕལཾ;

སཀྑིཀཏྭཱ ཨུདིཀྑེཡྻ,

པུཉྙཔཱཔཀརོ ནརོ.

༩༨.

ཡསྶ ¶ སལླཧུཀཾ ཧོཏི,

གུརུསཀྐཱརམཱནནཾ;

ཏསྶ སལླཧུཀཱཡེཝ,

ཝིཛྫཱསམྤཏྟིསམྤདཱ.

༩༩.

ཨུཔཛ྄ཛྷཱཙརིཡཱནཉྩ,

མཱཏཱཔིཏཱུནམེཝཙ;

སཀྐཙྩཾ ཡོནུཔཊྛཱཏི,

སུཏོ ཏསྶཔིཏཱདིསོ.

༡༠༠.

དེསེ དེསེ ཀུལཱནཱིཙ,

དེསེདེསེ ཙ བནྡྷཝོ;

ཏཱདིསཾ སཧཛཱ ཡཏྠ,

དེསཾ པསྶཱམིནེཝཏུ.

༡༠༡.

པུཏྟཾཝཱ ¶ བྷཱཏརཾ དུཊྛཾ,

ཨནུསཱསེཡྻ ནོཛཧེ;

ཀིཾནུ ཚེཛྫཾ ཀརཾཔཱདཾ,

ལིཏྟཾ ཨསུཙིནཱ སིཡཱ;

༡༠༢.

བཧུཔུཏྟེ པིཏཱཨེཀོ,

ཨཝསྶཾ པོསེཏི སདཱ;

བཧུཔུཏྟཱ ནསཀྐོནྟི,

པོསེཏུཾ པིཏརེཀཀཾ.

༡༠༣.

ཨཏིཛཱཏམནུཛཱཏཾ ¶ ,

པུཏྟམིཙྪནྟི པཎྜིཏཱ;

ཨཝཛཱཏཾ ནཨིཙྪནྟི,

ཡོཧོཏི ཀུལགནྡྷནོ.

༡༠༤.

པཉྩཋཱནཱནི སམྤསྶཾ,

པུཏྟམིཙྪནྟི པཎྜིཏཱ;

ཛཱཏོཝཱ ནོ བྷརིསྶཏི,

ཀིཙྩཾཝཱ ནོ ཀརིསྶཏི.

༡༠༥.

ཀུལཝཾསོ ¶ ཙིརཾ ཏིཊྛེ,

དཱཡཛྫཾ པཊིཔཙྩཏི;

ཨཐཝཱཔན པེཏཱནཾ,

དཀྑིཎཾནུཔདསྶཏི.

༡༠༦.

ཨནྟོཛཱཏོ དྷནཀྐཱིཏོ,

དཱསབྱོཔགཏོ སཡཾ;

དཱསཱཀརམརཱནཱིཏོ,

ཙྩེཝནྟེ ཙཏུདྷཱ སིཡུཾ.

༡༠༧.

དཱསཱ པཉྩེཝ ཙོརཡྻ-

སཁཉཱཏྱཏྟསདིསཱ;

ཏཐཱ ཝིཉྙཱུཧི ཝིཉྙེཡྻཱ,

མིཏྟཱདཱརཱཙ བནྡྷཝཱ.

༡༠༨.

ཏཡོཝ ¶ པཎྜིཏཱ སཏྠེ,

ཨཧམེཝཱཏིཝཱདཱིཙ,

ཨཧམཔིཏི ཝཱདཱིཙ,

ནཱཧནྟིཙ ཨིམེཏཡོ.

༡༠༩.

ཝིནཱ སཏྠཾ ནགཙྪེཡྻ,

སཱུརོ སངྐཱམབྷཱུམིཡཾ;

པཎྜིཏདྡྷགཱུ ཝཱཎིཛྫོ,

ཝིདེསགམནོ ཏཐཱ.

༡༡༠.

སམྨཱ ¶ ཨུཔཔརིཀྑིཏྭཱ,

ཨཀྑརེསུ པདེསུཙ;

ཙོརགྷཱཏོ སིཡཱ སིསྶོ,

གུརུ ཙོརཊྚཀཱརཀོ.

༡༡༡.

སཱདྷུཏྟཾ སུཛནསམཱགམཱ ཁལཱནཾ,

སཱདྷཱུནཾ ནཁལསམཱགམཱ ཁལཏྟཾ;

ཨཱམོདཾཀུསུམབྷཝཾདདྷཱཏིབྷཱུམི,

བྷཱུགནྡྷཾ ནཙ ཀུསུམཱནི དྷཱརཡནྟི.

༡༡༢.

སཊྛེན ¶ མིཏྟཾ ཀལུསེན དྷམྨཾ,

པརོཔཏཱཔེན སམིདྡྷིབྷཱཝཾ;

སུཁེན ཝིཛྫཾ ཕརུསེན ནཱརིཾ,

ཨིཙྪནྟི ཡེ ཏེ ནཝཔཎྜིཏཱཝ.

མིཏྟཀཐཱ

༡༡༣.

ཀཏྭཱན ¶ ཀུསལཾཀམྨཾ,

ཀཏྭཱཙཱ ཀུསལཾ པུརེ;

སུཁིཏདུཀྑིཏཱ ཧོནྟི,

སོ བཱལོ ཡོ ནཔསྶཏི.

༡༡༤.

སཡཾཀཏེན པཱཔེན,

ཨནིཊྛཾ ལབྷཏེ ཕལཾ;

ཏེ མེ སོ མེ ཛནེནྟཱིཏི,

པུནཱགུཾ ཀུརུཏེ ཛལོ༹.

༡༡༥.

ཀཱལཁེཔེན ¶ ཧཱཔེཏི,

དཱནསཱིལཱདིཀཾ ཛལོ༹;

ཨཐིརམྤི ཐིརཾ མཉྙེ,

ཨཏྟཱནཾ སསྶཏཱིསམཾ.

༡༡༦.

བཱལོཝ པཱཔཀཾ ཀཏྭཱ,

ནཏཾཚཊྚེཏུམུསྶཧེ;

ཀིཾ བྱགྒྷཏཱདི གཙྪནྟོ,

པདཾ མཀྑེཏུམུསྶཧེ.

༡༡༧.

པརནསྶནཏོ ནཊྛོ,

པུརེཝ པརནཱསཀོ;

སཱིགྷཾཝཱ དསྶནཾ ཡཱཏི,

ཏིཎཾ པཱསཱདཛ྄ཛྷཱཔཀཾ.

༡༡༨.

བྷོཛནཱ ¶ མེཐུནཱ ནིདྡཱ,

གཝེ པོསེཙ ཝིཛྫཏི;

ཝིཛྫཱ ཝིསེསོ པོསསྶ,

ཏཏོཧཱིནོ གོསམོ བྷཝེ.

༡༡༩.

མུལ༹ྷསིསྶོ པདེསེན,

ཀུནཱརཱིབྷརཎེནཙ;

ཁལསཏྠཱུཧིསཾཡོགཱ,

པཎྜིཏོཔྱཝསཱིདཏི.

༡༢༠.

དྭེཙིམེཀཎྚཀཱ ¶ ཏིཀྑཱ,

སརཱིརསོབྷིཏཱ ཀཱམེ;

ནིདྷནོ ཡོཙ ཀཱམེཏི,

ཡོཙཀུཔྤཏྱནིསྶཱརོ.

༡༢༡.

ནིདྷནོཙཱཔི ཀཱམེཏི,

དུབྦལོ ཀལཧཾཔིཡོ;

མནྡསཏྠོ ཝིཝཱདཏྠི,

ཏིཝིདྷཾ མུལ༹ྷལཀྑཎཾ.

༡༢༢.

ཨཔྤསུཏོ སུཏེ ཨཔྤེ,

བཧུཾམཉྙཏི མཱནཝོ;

སིནྡྷུདཀམ པསྶནྟོ,

ཀཱུཔེཏོཡཾཝ མཎྜུཀོ.

༡༢༣.

ཏདམིནཱཔི ¶ ཛཱནཱཏི,

སོབྦྷེསུ པདརེསུཙ;

སུནནྟཱ ཡནྟི ཀུསུམྦྷཱ,

ཏུཎྷཱིཡནྟི མཧོདདྷི.

༡༢༤.

ཡཾ ཨཱུནཀཾ ཏཾ སུནཏི,

ཡཾ པཱུརཾ སནྟམེཝ ཏཾ;

ཨཌྜྷཀུམྦྷཱུཔམོ བཱལོ,

རཧཏོ པཱུརོཝ པཎྜིཏོ.

༡༢༥.

བུདྷེཧིབྷཱསམཱནོཔི ¶ ,

ཁལོ བཧུཏཀེཏཝོ;

གྷཾསིཡམཱནོ ཨངྒཱརོ,

ནིལམཏྟཾ ནགཙྪཏི.

༡༢༦.

ཙཱརུཏཱ པརདཱརཱཡ,

དྷནཾ ལོཀཏཔྤཏིཡཱ;

པསུཏཾ སཱདྷུནཱསཱཡ,

ཁལེ ཁལཏརཱ གུཎཱ.

༡༢༧.

ཨིཏོ ¶ ཧསྶཏརཾ ལོཀེ,

ཀིཉྩི ཏསྶ ནཝིཛྫཏི;

དུཛྫནོཏིཙ ཡཾཨཱཧ,

སཛྫནཾ དུཛྫནོ སཡཾ.

༡༢༨.

རོགཎྜཙངྐུརོ ཏེཛོ,

ཝིསམསྶཏརོ གྷཎོ;

ཨཝིནཱསིཡ སམནྟི,

ན ཁལོཙ སནིསྶཡཾ.

༡༢༩.

ནཝིནཱ ¶ པརཝཱདེན,

རམནྟེ དུཛྫནཱ ཁལུ;

ན སཱ སབྦརསེ བྷུཏྭཱ,

ཝིནཱ ཝཙྩེ ནཏུསྶཏི.

༡༣༠.

ཏཔྤཏེ ཡཱཏི སནྡྷཱནཾ,

དཝོ བྷཝཏི ཝནཏཾ;

མུདུཾ དུཛྫནཙིཏྟཾ ཀིཾ,

ལོཧེན ཨུཔམཱིཡཏེ.

༡༣༡.

ཏསྨཱ དུཛྫནསཾསགྒཾ,

ཨཱསཱིཝིས མིཝོརགཾ;

ཨཱརཀཱ པརིཝཛྫེཡྻ,

བྷཱུཏིཀཱམོ ཝིཙཀྑཎོ.

༡༣༢.

དུཛྫནེན ¶ ཧི སཾསགྒོ,

སཏྟུཏཱཔི ནཡུཛྫཏེ;

ཏཏྟོ དཧཏི ཨངྒཱརོ,

སནྟཱཏུ ཀཱལཏཾཀརོ.

༡༣༣.

དུཛྫནོ ཝཛྫནཱིཡོཝ,

ཝིཛྫཱཡཱལངྐཏོཔི ཙེ;

མཎིནཱ ལངྐཏོ སནྟོ,

སཔྤོ ཀིཾ ནབྷཡངྐརོ.

༡༣༤.

ཨགྒིནོ ¶ དཧཏོ དཱཡཾ,

སཁཱབྷཝཏི མཱལུཏོ;

སོཝ དཱིཔཾཏུ ནཱསེཏི,

ཁལེ ནཏྠེཝ མིཏྟཏཱ.

༡༣༥.

ནསྨསེ ཀཏཔཱཔམྷི,

ནསྨསེ ཨལིཀཝཱདིནི;

ནསྨསེཏྟཏྠཔཉྙམྷི,

ཨཏིསནྟེཔི ནསྨསེ.

༡༣༦.

མཱརེཏུཾ ཀིཏྟཀཱ སཀྐཱ,

དུཛྫནཱ གགཎཱུཔམཱ;

མཱརིཏཱ ཀོདྷཙིཏྟེཏུ,

མཱརིཏོ ཧོནྟི དུཛྫནཱ.

༡༣༧.

བྷཱུམི ¶ ཀཎྚཀསཾཀིཎྞཱ,

ཚཱདིཏུཾ ནེཝསཀྱཏེ;

ཨུཔཱཧན མཏྟཀེན,

ཚནྣཱ བྷཝཏི མེདནཱི.

༡༣༨.

སཏྟཱ སདཱཔསེཝནྟི,

སོདཀཾ ཝཱཔིཨཱདིཀཾ;

སབྷོགཾ སདྷནཉྩེཝཾ,

ཏུཙྪཱཙེ ཏེ ཛཧནྟི ཏེ.

༡༣༩.

དྷནཧཱིནཾ ¶ ཙཛེ མིཏྟོ,

པུཏྟདཱརཱ སཧོདརཱ;

ཨཏྠཝནྟཾཝ སེཝནྟི,

ཨཏྠོ ལོཀེ མཧཱསཁཱ.

༡༤༠.

ན རཱུཔིནཱི ན པཉྙཱཎོ,

ནཀུལཱིནོ པདྷཱནཏཱ;

ཀཱལེ ཝིཔཏྟིསམྤཏྟེ,

དྷནིམཱཝ ཝིསེསཏཱ.

༡༤༡.

ཀལྱཱཎམིཏྟཾ ¶ ཀནྟཱརཾ,

ཡུདྡྷཾ སབྷཱཡཾ བྷཱསིཏུཾ;

ཨསཏྠཱ གནྟུ མིཙྪནྟི,

མུལ༹ྷཱ ཏེཙཏུརོཛནཱ.

༡༤༢.

ཨཧིཏཱ པཊིསེདྷོཙ,

ཧིཏེསུཙ པཡོཛནཾ;

བྱསནེསྭ པརིཙྩཱགོ,

སངྑེཔཱ མིཏྟལཀྑཎཾ.

༡༤༣.

ཨཱཏུརེ བྱསནེཔཏྟེ,

དུབྦྷིཀྑེ སཏྟུ ཝིགྒཧེ;

རཱཛདྭཱརེ སུསཱནེཙ,

ཡོ ཏིཊྛཏི སབནྡྷཝོ.

༡༤༤.

སོ ¶ བནྡྷུ ཡོ ཧིཏེཡུཏྟོ,

སོ པིཏཱ ཡོ ཏུ པོསཀོ;

སོ ཉཱཏི ཡཏྲ ཝིསཱསོ,

སཱ བྷརིཡཱ ཡཏྲ ནིབྦཱུཏི.

༡༤༥.

ཧིཏེསིནོ སུམིཏྟོཙ,

ཝིཉྙཱུཙ དུལླབྷཱ ཛནཱ;

ཡཐོ སདྷཾཙ སཱདུཾཙ,

རོགཧཱརཱིཙ སུཛནོ.

༡༤༦.

ཨགརུཀོ ¶ ཨནཱལསྶོ,

ཨསཊྛོཙ སཙྩཝཱ སུཙི;

ཨལུདྡྷོ ཨཏྠཀཱམོཙ,

ཨེདིསོ སུཧདུཏྟམོ.

༡༤༧.

ཡོ དྷུཝཱནི པརིཙྩཛྫ,

ཨདྷཱུཝཱནྱུཔསེཝཏི;

དྷུཝཱཔི ཏསྶ ནསྶནྟི,

ཨདྷུཝེསུ ཀཐཱཝཀཱ.

༡༤༨.

ལུདྡྷམཏྠེནགཎྷེཡྻ ¶ ,

ཐདྡྷ མཉྫལིཀམྨུནཱ;

ཚནྡཱནུཝཏྟིཡཱ མུལ༹ྷཾ,

ཡཐཱབྷཱུཏེན པཎྜིཏཾ.

༡༤༩.

ཨུཏྟམཾ པཱཎིཔཱཏེན,

སཱུརཾ བྷེདེན ཝིཛཡེ;

ནིཙཾ དབྦཔདཱནེན,

ཝིཀྐམེན སམཾ ཛཡེ.

༡༥༠.

ཡསྶཡསྶ ཧི ཡོབྷཱཝོ,

ཏེནཏེན ཧི ཏཾནརཾ;

ཨནུཔཝིསྶ མེདྷཱཝཱི,

ཁིཔྤམཏྟཝསཾ ནཡེ.

༡༥༡.

ཡེན ¶ ཨིཙྪཏི སམྦནྡྷཾ,

ཏེན ཏཱིཎི ནཀཱརཡེ;

ཝིཝཱད མཏྠསམྦནྡྷཾ,

པརོཀྑེ དཱརདསྶནཾ.

༡༥༢.

ཨཙྩཱབྷིཀྑཎསཾསགྒཱ,

ཨསམྨོསརཎེནཙ;

ཨེཏེན མིཏྟཱ ཛཱིརནྟི,

ཨཀཱལེ ཡཱཙནཱཡཙ.

༡༥༣.

ཏསྨཱ ¶ ནཱབྷིཀྑཎཾ གཙྪེ,

ནཙགཙྪེ ཙིརཱཙིརཾ;

ཀཱལེན ཡཱཙཾ ཡཱཙེཡྻ,

ཨེཝཾ མིཏྟཱ ནཛཱིརཡེ.

༡༥༤.

ཨེཏེ བྷིཡྻོ སམཾ ཡནྟི,

སནྡྷི ཏེསཾ ནཛཱིརཏི;

ཡོ ཨདྷིཔྤནྣཾ སཧཏི,

ཡོཙ ཛཱནཱཏི དེསནཾ.

༡༥༥.

སཙེ སནྟཱ ཝིཝཱདནྟི,

ཁིཔྤཾ སནྡྷིརཡེ པུན;

བཱལཱ པཏྟཱཝ བྷིཛྫནྟི,

ན ཏེ སམཐམཛ྄ཛྷགུཾ.

༡༥༦.

ཡེནམིཏྟེན ¶ སཾསགྒོ,

ཡོགཀྑེམོ ཝིཧཱིཡཏི;

པུབྦེཝ ཛ྄ཛྷཱབྷཝནྟསྶ,

རཀྑེ ཨཀྑིཝ པཎྜིཏོ.

༡༥༧.

ཡེནམིཏྟེན སཾསགྒཱ,

ཡོགཀྑེམོ པཝཌྜྷཏི;

ཀརེཡྻཏྟསམཾ ཝུཏྟི,

སབྦཀིཙྩེསུ པཎྜིཏོ.

༡༥༨.

གུཎོ ¶ སབྦཉྙུཏུལྱོཔི,

སཱིདཏེ ཀོ ཨནིསྶཡོ;

ཨནགྒྷ མཔིམཱཎིཀྐཾ,

ཧེམཾ ནིསྶཱཡ སོབྷཏེ.

༡༥༩.

པབྦེཔབྦེ ཀམེནུཙྪུ,

ཝིསེསརསིཝགྒཏོ;

ཏཐཱ སུམིཏྟིཀོ སཱདྷུ,

ཝིཔརིཏོཝ དུཛྫནོ.

༡༦༠.

ཏེནེཝ མུནིནཱ ཝུཏྟཾ,

ཡེཀེཙིལོཀིཡཱདྷམྨཱ;

ཏཐཱ ནིབྦཱནགཱམཱིནོ,

སནྟི ལོཀུཏྟརཱདྷམྨཱ.

༡༦༡.

ཀལྱཱཎམིཏྟ ¶ ༡ མཱགམྨ,

སབྦེ ཏེ ཧོནྟི པཱཎིནཾ;

ཏསྨཱ ཀལྱཱཎམིཏྟེསུ,

ཀཱཏབྦོ ཨཱདརོ སདཱ.

༡༦༢.

ཡོ ཝེ ཀཏཉྙཱུ ཀཏཝེདིཀོ དྷིརོ,

ཀལྱཱཎམིཏྟོ དལ༹ྷབྷཏྟིཙ ཧོཏི;

དུཀྑིཏསྶ སཀྐཙྩཾ ཀརེཏི ཀིཙྩཾ,

ཏཐཱཝིདྷཾ སཔྤུརིསཱཏི ཝདནྟི.

༡༦༣.

ཡསྶཧི ¶ དྷམྨཾ པུརིསོ ཝིཛཉྙཱ,

ཡེཙསྶ ཀངྑཾ ཝིནཡནྟི སནྟོ;

ཏཉྷིསྶ དཱིཔཉྩ པརཱཡནཉྩ,

ན ཏེན མིཏྟཾ ཛིརཡེཐ པཉྙོ.

ནཱཡཀཀཐཱ

༡༦༤.

ཀསྶཀོ ¶ ཝཱཎིཛོམཙྩོ,

སམཎོ སུཏསཱིལཝཱ;

ཏེསུ ཝིཔུལཛཱཏེསུ,

རཊྛཾཔི ཝིཔུལཾ སིཡཱ.

༡༦༥.

ཏེསུ དུབྦལཛཱཏེསུ,

རཊྛཾཔི དུབྦལཾ སིཡཱ;

ཏསྨཱ རཊྛཾཔི ཝིཔུལཾ,

དྷཱརཡེ རཊྛསཱརཝཱ.

༡༦༦.

མཧཱརུཀྑསྶ ¶ ཕལིནོ,

ཨཱམཾ ཚིནྡཏི ཡོ ཕལཾ;

རསཉྩསྶ ནཛཱནཱཏི,

བཱིཛཉྩསྶ ཝིནསྶཏི.

༡༦༧.

མཧཱརུཀྑུཔམཾ རཊྛཾ,

ཡོ ཨདྷམྨེན སཱསཏི;

རསཉྩསྶ ནཛཱནཱཏི,

རཊྛཉྩཱཔི ཝིནསྶཏི.

༡༦༨.

མཧཱརུཀྑསྶ ཕལིནོ,

པཀྐཾ ཚིནྡཏི ཡོ ཕལཾ;

རསཉྩསྶ ཝིཛཱནཱཏི,

བཱིཛཉྩསྶ ནནསྶཏི.

༡༦༩.

མཧཱརུཀྑུཔམཾ ¶ རཊྛཾ,

དྷམྨེན ཡོ པསཱསཏི;

རསཉྩསྶ ཝིཛཱནཱཏི,

རཊྛཉྩཱཔི ནནསྶཏི.

༡༧༠.

ཛནཔྤདཉྩ ཡོརཱཛཱ,

ཨདྷམྨེན པསཱསཏི;

སབྦོ སདྷིཧི སོརཱཛཱ,

ཝིརུདྡྷོ ཧོཏི ཁཏྟིཡོ.

༡༧༡.

ཏཐེཝ ¶ ནིགམེ ཧིཾསཾ,

ཡེ ཡུཏྟཱ ཀཡཝིཀྐཡེ;

སུངྐདཱནབལཱིཀཱརེ,

ས ཀོསེན ཝིརུཛ྄ཛྷཏི.

༡༧༢.

མཧཱརཝརཁེཏྟེསུ,

སངྒ, མེ ཀཏནིསྶམེ;

ཨུསྶིཏེ ཧིཾསཡཾ རཱཛཱ,

སབལེན ཝིརུཛ྄ཛྷཏི.

༡༧༣.

ཏཐེཝ ཨིསཡོ ཧིཾསོ,

སཾཡམེ བྲཧྨཙཱརིཡོ;

ཨདྷམྨཙཱརི ཁཏྟཱིཡོ,

སོ སགྒེན ཝིརུཛ྄ཛྷཏི.

༡༧༤.

སཡཾཀཏཱ ¶ ནཔརེན,

མཧཱནཛྫོ ཛུཝཀཏཱ;

ཨིསྶརེན ཏཐཱ རཉྙཱ,

སརཊྛེ ཨདྷིཔཙྩཏཱ.

༡༧༥.

པཱཔཾཝཱཔི ཧི པུཉྙཾཝཱ,

པདྷཱནོ ཡཾ ཀརོཏིཙེ;

ལོཀོཔེཝཾ ཀརོཏྱེཝ,

ཏཾ ཝིཛཱནེཡྻ པཎྜིཏོ.

༡༧༦.

ཀཙྪཔཱིནཉྩ ¶ མཙྪཱིནཾ,

ཀུཀྐུཊཱིནཉྩ དྷེནཱུནཾ;

པུཏྟཔོསཱ ཡཐཱཧོཏི,

ཏཐཱ མཙྩེསུ རཱཛཱུནཾ.

༡༧༧.

ཨནཱཡཀཱ ཝིནསྶནྟི,

ནསྶནྟི བཧུནཱཡཀཱ;

ཐཱིནཱཡཀཱ ཝིནསྶནྟི,

ནསྶནྟི སུསུནཱཡཀཱ.

༡༧༨.

བཧུཝོ ¶ ཡཏྠ ནེཏཱརོ,

སབྦེ པཎྜིཏམཱནིནོ;

སབྦེ མཧཏྟམིཙྪནྟི,

ཀཏཾ ནེསཾ ཝིནསྶཏི.

༡༧༩.

ནོདཡཱཡ ཝིནཱསཱཡ,

བཧུནཱཡཀཏཱ བྷཱུསཾ;

ནོམིལནྟི ཝིནསྶནྟི,

པདྨཱ ནྱཀྐེཧིསཏྟཧི.

༡༨༠.

ཨསནྟུཊྛོ ཡཏཱི ནཊྛོ,

སནྟུཊྛོཙ མཧཱིཔཏི;

སལཛྫཱ གཎིཀཱ ནཊྛཱ,

ནིལཛྫཱཏུ ཀུལངྒནཱ.

༡༨༡.

ན ¶ གཎསྶ གྒཏོ གཙྪེ,

སིདྡྷེ ཀམྨེ སམཾཕལཾ;

ཀམྨཝིཔྤཏྟི ཙེཧོཏི,

མུཁརོ ཏཏྲ ཧཉྙཏེ.

༡༨༢.

པདྷིརོ ཙ ཏཔསྶཱིནི,

སཱུརོ རཎཝཎོ ཏཐཱ;

མཛྫཔོ པཏིཐཱི རཱཛཱ,

ཨེཏེ ནསདྡཧཱམཧཾ.

༡༨༣.

ཛཱནེཡྻ ¶ པེསནེ བྷཙྩཾ,

བནྡྷཝཱཔི བྷཡཱགཏེ;

ཨཱཔདཱསུ ཏཐཱ མིཏྟཾ,

དཱརཉྩ ཝིབྷཝཀྑཡེ.

༡༨༤.

རཎཱ པཙྩཱགཏཾ སཱུརཾ,

དྷནཉྩ གྷརམཱགཏཾ;

ཛིཎྞ མནྣཾ པསཾསེཡྻ,

དཱརཉྩ གཏཡོབྦནཾ.

༡༨༥.

སདྡྷཱཔེམེསུ སནྟེསུ,

ནགཎེ མཱསཀཾ སཏཾ;

སདྡྷཱཝེམེསྭ སནྟེསུ,

མཱསཀཾཔི སཏཾ གཎེ.

༡༨༦.

ཨདནྟདམནཾ ¶ དཱནཾ,

དཱནཾ སབྦཏྠསཱདྷཀཾ;

དཱནེན པིཡཝཱཙེན,

ཨུནྣམནྟི ནམནྟིཙ.

༡༨༧.

དཱནཾ སིནེཧབྷེསཛྫཾ,

མཙྪེརཾ དུསྶནོསདྷཾ;

དཱནཾ ཡསསྶབྷོསཛྫཾ,

མཙྪེརཾ ཀཔྤནོསདྷཾ.

༡༨༨.

དུབྦྷིཀྑེ ¶ ཨནྣདཱཏཾཙ,

སུབྷིཀྑེཙ ཧིརཉྙདཾ;

བྷཡེཙཱབྷཡཏཱདཱནཾ,

སགྒེཔི བཧུ མཉྙཏེ.

༡༨༩.

སཏཾཙཀྑུ སཏཾཀཎྞཱ,

ནཱཡཀསྶ སུཏཱ སདཱ;

ཏཐཱཔི ཨནྡྷཔདྷཱིརོ;

ཨེསཱ ནཱཡཀདྷམྨཏཱ.

༡༩༠.

ཁམཱ ཛཱགརིཡུ ཊྛཱནཾ,

སཾཝིབྷཱགོ དཡིཀྑཎཱ;

ནཱཡཀསྶ གུཎཱཨེཏེ,

ཨིཙྪིཏབྦཱ ཧིཏཏྠིནཱ.

༡༩༡.

པརིབྷཱུཏོ ¶ མུདཱུ ཧོཏི,

ཨཏིཏིཀྑོཙ ཝེརཝཱ;

ཨེཏཉྩཨུབྷཡཾ ཉཏྭཱ,

ཨནུམཛ྄ཛྷཾ སམཱཙརེ.

༡༩༢.

ནེཀནྟམུདུནཱ སཀྐཱ,

ཨེཀནྟཏིཁིཎེནཝཱ;

ཨཏྟཾ མཧནྟེ ཋཔེཏུཾ,

ཏསྨཱ ཨུབྷཡ མཱཙརེ.

༡༩༣.

པིཊྛིཏོ ¶ ཀྐཾ ནིསེཝེཡྻ,

ཀུཙྪིནཱཏུ ཧུཏཱསནཾ;

སཱམིཀཾ སབྦབྷཱཝེན,

པརལོཀཾ ཨམཱཡཱཡ.

༡༩༤.

ནསེཝེ ཕརུསཾསཱམིཾ,

ཏཾཔི སེཝེན མཙྪརིཾ;

ཏཏོ པགྒཎྷཀཾསེཝེ,

སེཝེ ནིགྒཎྷཀཾ ཏཏོ;

༡༩༥.

ན སཱ རཱཛཱ ཡོ ཨཛེཡྻཾ ཛིནཱཏི,

ན སོ སཁཱཡོ སཁཱརཾ ཛིནཱཏི;

ན སཱ བྷརིཡཱ པཏིནོ ཝིརོདྷཏི,

ན ཏེ ཝུཏྟཱ ཡེ ནབྷརནྟི ཛིཎྞཀཾ.

༡༩༦.

ན ¶ སཱ སབྷཱ ཡཏྠ ནསནྟི སནྟོ,

ན ཏེ སནྟོ ཡེ ནཝདནྟི དྷམྨཾ;

རཱགཉྩ དོསཉྩ པཧཱཡ མོཧཾ,

དྷམྨཾ བྷཎནྟཱཝ བྷཝནྟི སནྟོ.

༡༩༧.

སུཏསྶ རཀྑཱ སཏཏཱབྷིཡོགོ;

ཀུལསྶ ཝཏྟཾ པུརིསསྶ ཝིཛྫཱ;

རཉྙོ པམཱདོ པསམོདྷནསྶ,

ཐཱིནནྟུ ཛཱནཱམི ན ཛཱཏུ རཀྑཾ.

ཨིཏྠིཀཐཱ

༡༩༨.

ནམཱཏརཱ ¶ དྷཱིཏུཡཱ ཝཱཔི,

བྷགཱིནིཡཱ ཝིཙཀྑཎོ;

ནཝིཝིཏྟཱསནེ མནྟེ,

ནཱརཱི མཱཡཱཝིནཱིནནུ.

༡༩༩.

ཝིཛྫུཏཱནཉྩ ལོལཏྟཾ,

སཏྠཱནཉྩཏིཏིཀྑཎཾ;

སཱིགྷཏཾ ཝཱཡུཏེཛཱནཾ,

ཨནུཀུབྦནྟི ནཱརིཡོ.

༢༠༠.

དྭིགུཎོ ཐཱིན མཱཧཱརོ,

བུདྡྷིཙཱཔི ཙཏུགྒུཎོ;

ཚགུཎོ ཧོཏི ཝཱཡཱམོ,

ཀཱམོཏྭ ཊྛ གུཎོབྷཝེ.

༢༠༡.

ཨེཀམེཀཱཡཨིཏྠཱིཡཱ,

ཨཊྛཊྛཔཏིནོ སིཡུཾ;

སཱུརཱཙ བལཝནྟོཙ,

སབྦཱཀཱམརསཱཧརཱ;

ཀརེཡྻ ནཝམེ ཚནྡཾ,

ཨུནྣཏྟཱ ཧི ནཔཱུརཏི.

༢༠༢.

ལཔནྟི ¶ སདྡྷིམཉྙེན,

པསྶནྟཉྙཾ སཝིབྦྷམཱ;

ཙིཏྟཀཾ ཙིནྟཡནྟཉྙཾ,

ནཱརཱིནཾནཱམ ཀོ པིཡོ.

༢༠༣.

ཛིཝ྄ཧཱསཧསྶིཀོ ཡོ ཧི,

ཛཱིཝེ ཝསྶསཏཾ ནརོ;

ཏེན ནིཀམྨུནོ ཝུཏྟོ,

ཐཱིདོསོ ཀིཾཁཡཾགཏོ.

༢༠༤.

ཨགྒི ཨཱཔོ ཐིཡོ མུལ༹ྷོ,

སཔྤོ རཱཛཀུལཱནིཙ;

པཡཏནཱཔགནྟབྦོ,

མཙྩུཔཱཎཧརཱནིཏི.

༢༠༥.

ཨིཏྠཱིནཾ ¶ དུཛྫནཱ ནཉྩ,

ཝིསཱསོནོཔཔཛྫཏེ;

ཝཱིསསྶ སིངྒིནོ རོག,

ནདཱིརཱཛཀུལསྶཙ.

༢༠༦.

སཏྠཾ སུནིཙྪིཏམཏཱིཔི ཝིཙིནྟནཱིཡཾ,

སྭཱརཱདྷིཏོཔྱ ཝནིཔོ པརིསངྐནཱིཡོ;

ཧཏྠངྒཏཱཔི ཡུཝཏཱིཔརིརཀྑནཱིཡཱ,

སཏྠཱཝནཱིཔཡུཝཏཱིསུ ཀུཏོཝསིཏྠཾ.

༢༠༧.

ཨཡུཏྟཀམྨཱརདྡྷནཾ ཝིརོདྷོ,

སངྒྷསྶ ཡུདྡྷཉྩ མཧཱབལེཧི;

ཝིསྶཱསཀམྨཾ པམཱདཱསུ ནིཙྩཾ,

དྭཱརཱནིམཙྩུསྶ ཝདནྟི པཉྙཱ.

༢༠༨.

ཝཱཏཾ ཛཱལེན ནརོ པརཱམསེ,

ཨོསིཉྩེ སཱགརཾ ཨེཀཔཱཎིནཱ;

སཀེནཏཱལེན ཛནེཡྻ གྷོསཾ,

ཡོ སབྦབྷཱཝཾ པམདཱསུ ཨོསཛེ.

༢༠༩.

ཨིཏྠཱིཔི ¶ ཧི ཨེཀཙྩིཡཱ,

སེཡྻཱ ཝུཏྟཱཝ མུནིནཱ;

བྷཎྜཱན མུཏྟམཾ ཨིཏྠཱི,

ཨགྒུཔཊྛཱཡིཀཱཏིཙ.

༢༡༠.

ཡོ ནཾ བྷརཏི སབྦདཱ,

ནིཙྩཾ ཨཱཏཱཔི ཨུསྶུཀོ;

སབྦཀཱམཧརཾ པོསཾ,

བྷཏྟཱརཾ ནཱཏིམཉྙཏི.

༢༡༡.

ནཱཙཱཔི ¶ སོཏྠི བྷཏྟཱརཾ,

ཨིསྶཱཙཱརེན རོསཡེ;

བྷཏྟུཙ གརུནོསབྦེ,

པཊིཔཱུཛེཏི པཎྜིཏོ.

༢༡༢.

ཨུཊྛཱཡིཀཱ ཨནཱལཱསཱ,

སངྒཧིཏཔརིཛྫནཱ;

བྷཏྟུ མནཱཔཾ ཙརཏི,

བྷཏྟཀཾ ཨནུརཀྑཏི.

༢༡༣.

ཨེཝཾ ཝཏྟཏི ཡཱནཱརཱི,

བྷཏྟུཚནྡཝསཱནུགཱ;

མནཱཔཱནཱམ ཏེདེཝཱ,

ཡཏྠ སཱ ཨུཔཔཛྫཏི.

༢༡༤.

ཀོཀིལཱནཾ ¶ སརོ རཱུཔཾ,

ནཱརཱིརཱུཔཾ པཏིབྦཏཾ;

ཝིཛྫཱ རཱུཔ མརཱུཔཱནཾ,

ཁམཱ རཱུཔཾ ཏཔསྶཱིནཾ.

༢༡༥.

ཨཱནེཡ ཀུལཛཾ པཉྙོ,

ཝིརཱུཔམཔི ཀཉྙཀཾ;

ཧཱིནཱཡཔི སུརཱུཔཱཡ,

ཝིཝཱཧཾསདིསཾ ཀརེ.

༢༡༦.

ཝིསམྷཱམཏམཱདེཡྻ ¶ ,

ཨམཛྫམྷཱཔིཀཉྩནཾ;

ནིཙམྷཱཔྱུཏྟམཱཝིཛྫཱ,

རཏནིཏྠཱིཔིདུཀུལཱ.

༢༡༧.

བཱལིཏྠཱི མཀྑིཀཱཏུཎྜཾ,

ཨིསཱིནཉྩ ཀམཎྜལུཾ;

སེཏམྦུ ཕལཾ ཏམྦུལཾ,

ནོཙྪིཊྛམུཔཛཱཡཏེ.

༢༡༨.

བཱལཀྐོ པཎྞདྷཱུམོཙ,

ཝུདྡྷིཏྠཱི པལླལོདཀཾ;

ཨཱཡུཀྑཡཀརཾ ནིཙྩཾ,

རཏྟོཙ དདྷིབྷོཛནཾ.

༢༡༩.

ཐིཡོ ¶ སེཝེཡྻ ནཙྩནྟཾ,

སཱདུཾ བྷུཉྫེཡྻནཱཧིཏཾ;

པཱུཛཡེ མཱནཡེ ཝུདྡྷེ,

གུརུཾ མཱཡཱཡ ནོབྷཛེ.

༢༢༠.

ཨཱཙཱརོ ཀུལ མཱཁྱཱཏི,

དེས མཱཁྱཱཏི བྷཱསིཏཾ;

སམྦྷཝོ པེམ མཱཁྱཱཏི,

དེཧ མཱཁྱཱཏིབྷོཛནཾ.

༢༢༡.

དེཧཱིཏིཝཙནཱདྭཱརཱ ¶ ,

དེཧཊྛཱཔཉྩདེཝཏཱ;

སཛྫ ནིཡནྟི དྷཱི ཀིཏྟི,

ཧིརཱི སིརཱི མཏཱིཔིཙ.

༢༢༢.

དེཧཱིཏིཝཙནཾ དུཀྑཾ,

ནཏྠཱིཏིཝཙནཾ ཏཐཱ;

ཝཱཀྱཾདེཧཱིཏིནཏྠཱིཏི,

མཱབྷཝེཡྻ བྷཝེབྷཝེ.

༢༢༣.

བོདྷཡནྟི ནཡཱཙནྟི,

དེཧཱིཏི པཙྪིམཱཛནཱ;

པསྶ ཝཏྠུམདཱནསྶ,

མཱབྷཝཏཱུཏི ཨཱིདིསོ.

༢༢༤.

མཧཱ ¶ ཨཏྱཔྤཀཾ ཡཱཏི,

ནིགུཎེ གུཎཝཱཔིཧ;

ཨཊྛཱནཊྛེཡྻབྷཱཝེན,

གཛིནྡོཨིཝ དབྦཀེ.

༢༢༥.

མཧནྟཾ ནིསྶཡཾཀཏྭཱ,

ཁུདྡོཔྱཏིམཧཱ བྷཝེ;

ཧེམཔབྦཏམཱཔཛྫ,

སོཝཎྞཱཀིར པཀྑིནོ.

༢༢༦.

བཧཱུན ¶ མཔྤསཱརཱནཾ,

ཨེཀིབྷཱཝོ ཧིདུཛྫཡོ;

ཏིཎེན ཝཊྚཏེ རཛྫུ,

ཏཱཡ ནཱགོཔི བནྡྷཏེ.

༢༢༧.

ཨསཧཱཡོ སམཏྠོཔི,

ཏེཛསི ཀིཾ ཀརིསྶཏི;

ནིཝཱཏསཎྛིཏོ ཨགྒི,

སཡམེཝཱུཔསམྨཏི.

༢༢༨.

ཁནྟུཾ ཏཔནཛོཏེཛོ,

སཀྐཱཧོཏི ན ཝཎྞཛོ;

བྷཱུཔཱདཱིཧི ཀཏོདཎྜོ,

སཀྐཱཧོཏི ན བྷཙྩཛོ.

༢༢༩.

ཐཱིསཾསགྒེ ¶ ཀུཏོསུདྡྷོ,

མཾསབྷཀྑེ ཀུཏོདཡཱ;

སུརཱཔཱཎེ ཀུཏོསཙྩཾ,

པཀོདྷམྷི ཀུཏོཏཔོ.

༢༣༠.

ཐཱིཡཱ གུཡ྄ཧཾ ནསཾསེཡྻ,

ཨམིཏྟསྶཙ པཎྜིཏོ;

ཡོཙཱ མིསྶེན སཾཧཱིརོ,

ཧདཡཏྠེནོ ཡོནརོ.

༢༣༡.

གུཡ྄ཧམཏྠ ¶

སམྦོདྷཡཏི ཡོནརོ;

མནྟབྷེདབྷཡཱ ཏསྶ,

དཱསབྷཱུཏོ ཏིཏིཀྑཏི.

༢༣༢.

ཝཧེ ཨམིཏྟ ཁནྡྷེན,

ཡཱཝཀཱལེ ཨནཱགཏེ;

ཏམྷེཝ ཙཱགཏེ ཀཱལེ,

བྷིནྡེ གྷཊམི ཝུཔྤལེ.

༢༣༣.

ཁལཾ ¶ སཱལཾ པསུཾ ཁེཏྟཾ,

གནྟྭཱཙསྶ ཨབྷིཀྑཎཾ;

མིཏཾ དྷཉྙཾ ནིདྷཱཔེཡྻ,

མིཏཉྩ པཱཙཡེ གྷརེ.

༢༣༤.

ཀོདྷཾ ལོབྷཾ མདཾ མཱནཾ,

ཏནྡིཾ མིསྶཾ པམཏྟཀཾ;

སོཎྛཾནིདྡྷཱལུཀཾ མཀྑཾ,

མཙྪེརཉྩ ཛཧེ བུདྷོ.

༢༣༥.

ཀོདྷོ ¶ ཨབྦྷནྟརེ ཛཱཏོ,

དྷཱུཝཾ ནཱསེཏི ཀོདྷནཾ;

ཝཏྠཱལངྐཱརཔུཎྞཱཡཾ,

མཉྫཱུསཱཡཾ སིཁཱིཡཐཱ.

༢༣༦.

ཨུཔྤཛྫཏེ སཙེ ཀོདྷོ;

ཨཱཝཛྫེ ཀཀཙཱུཔམཾ;

ཨུཔྤཛྫེ ཙེ རསེ ཏཎྷཱ,

པུཏྟམཾསཱུཔམཾ སརེ.

༢༣༧.

གུཎ མདྡྷིསམཾ མཀྑེ,

པརེན ཀལཧེ སཏི;

ཨདྡྷིསམཾ པཀཱསེཏི,

ཨཎུམཏྟཾཝཝཛྫཀཾ.

༢༣༨.

ཏསྶེཝ ¶ ཏེན པཱཔཱིཡོ,

ཡོ ཀུདྡྷཾ པཊིཀུཛ྄ཛྷཏི;

ཀུདྡྷ མཔཊིཀུཛ྄ཛྷནྟོ,

སངྒཱམཾ ཛེཏི དུཛྫཡཾ.

༢༣༩.

རཱགོནཱམ མནོསལླཾ,

གུཎཏྠཝརཏཀྐརོ;

རཱཧུ ཝིཛྫཱསསངྐསྶ,

ཏཔོདྷནཧུཏཱསནོ.

༢༤༠.

པམཱདོ ¶ ཛཱཡཏེ མདཱ,

པམཱདཱ ཛཱཡཏེ ཁཡོ;

ཁཡཱ པདོསཱ ཛཱཡནྟི,

མདཾ ཀིཾ ནཛཧེ བུདྷོ.

༢༤༡.

ནམནྟི ཕལིནོརུཀྑཱ,

ནམནྟི ཝིབུདྷཱཛནཱ;

སུཀྑཀཊྛཉྩ མུལ༹ྷོཙ,

བྷིཛྫཏེཝ ནནམནྟི.

༢༤༢.

ཋཱནེ ¶ ཝུདྡྷཱན མོཀཱསཾ,

དདེ ཝུདྡྷཱཔཙཱཡིཀོ;

ནནུ ཏཱལོ ཨཛཱིཝོཔི,

སམཱིཔ ཉྙེ པརོནཏོ.

༢༤༣.

གརུཀཱཏབྦཔོསེསུ,

ནིཙྩཝུཏྟིཾ ཀརོཏི ཡོ;

ནིཙཏྟཾ སོ པཧནྟཱན,

ཨུཏྟམཏྟེ པཏིཊྛཏི.

༢༤༤.

ཡཏྠ པོསཾ ནཛཱནནྟི,

ཛཱཏིཡཱ ཝིནཡེན ཝཱ;

ན ཏཏྠ མཱནཾ ཀརིཡཱ,

ཝས མཉྙཱཏཀེཛནེ.

༢༤༥.

ཨཉྙཱཏཝཱསཾ ¶ ཝསཏཱ,

ཛཱཏཝེདསམེནཱཔི;

ཁམིཏབྦཾ སཔཉྙེན,

ཨཔི དཱསསྶ ཏཛྫིཏཾ.

༢༤༦.

དྷནདྷཉྙཱཔཡོགེསུ,

ཏཐཱ ཝིཛྫཱགམེསུཙ;

དཱུཏེཙ བྱཝཧཱརེཙ,

ཙཏྟལཛྫོ སདཱ བྷཝེ.

༢༤༧.

ནཧི ¶ ཀོཙི ཀཏེ ཀིཙྩེ,

ཀཏྟཱརཾ སམྨཔེཀྑཏེ;

ཏསྨཱ སབྦཱནིཀམྨཱནི,

སཱཝསེསཱནི ཀཱརཡེ.

༢༤༨.

ཨིཎསེསོ ཨགྒིསེསོ,

སཏྟུསེསོ ཏཡོཨིམེ;

པུནཔྤུནཾཔི ཝཌྜྷནྟི,

ཏསྨཱ སེསཾ ནཀཱརཡེ.

༢༤༩.

ནཏྠི ཝིཛྫཱསམཾ ཝིཏྟཾ,

ནཏྠི བྱཱདྷིསམོ རིཔུ;

ནཏྠི ཨཏྟསམཾ པེམཾ,

ནཏྠི ཀམྨཔརཾ བལཾ.

༢༥༠.

ཨཏྟནཱ ¶ ཀུརུཏེ ལཀྑཱི,

ཨལཀྑཱིཙཱཔི ཨཏྟནཱ;

ནཧི ལཀྑཱི ཨལཀྑཱིཙ,

ཨཉྙོ ཨཉྙསྶ ཀུརུཏེ.

༢༥༡.

སཡཾ ཨཱཡཾ ཝཡཾ རཉྙཱ,

སཡཾ ཛཉྙཱ ཀཏཱཀཏཾ;

ཨཏྟནཱཝ བྷཝཀྑེཡྻ,

ཀཏཱནི ཨཀཏཱནིཙ.

༢༥༢.

ཨུཔཀཱརཾ ¶ ཧིཏེནེཝ,

སཏྟུནཱ སཏྟུ མུདྡྷརེ;

པཱདལགྒཾ ཀརཊྛེན,

ཀཎྚཀེན ཀཎྚཀཾ.

༢༥༣.

ནམེ ནམནྟསྶ བྷཛེ བྷཛནྟཾ,

ཀིཙྩཱནི ཀྲུཔསྶ ཀརེཡྻ ཀིཙྩཾ;

ནཱ ནཏྠཀཱམསྶ ཀརེཡྻ ཨཏྠཾ,

ཨསམྦྷཛནྟཾཔི ནསམྦྷཛེཡྻ.

༢༥༤.

ཙཛེ ¶ ཙཛནྟཾ ནཝཏཾ ཀརིཡཱ,

ཨཔེཏཙིཏྟེན ནསམྦྷཛེཡྻ;

དིཛོ དུམཾ ཁཱིཎཕལ མཉཏྭཱ,

ཨཉྙཾ སཔེཀྑེཡྻ མཧཱཏི ལོཀོ.