📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ལོཀནཱིཏི

༡. པཎྜིཏཀཎྜོ

༡.

ལོཀནཱིཏིཾ ¶ པཝཀྑཱམི,

ནཱནཱསཏྠསམུདྡྷཊཾ;

མཱགདྷེནེཝ སངྑེཔཾ,

ཝནྡིཏྭཱ རཏནཏྠཡཾ.

༢.

ནཱིཏིལོཀེ པུརིསསྶ སཱརོ,

མཱཏཱ པིཏཱ ཨཱཙརིཡོཙ མིཏྟོ;

ཏསྨཱ ཧི ནཱིཏིཾ པུརིསོ ཝིཛཉྙཱ,

ཉཱཎཱི མཧཱ ཧོཏི བཧུསྶུཏོཙ.

༣.

ཨལསསྶ ཀུཏོ སིཔྤཾ,

ཨསིཔྤསྶ ཀུཏོ དྷནཾ;

ཨདྷནསྶ ཀུཏོ མིཏྟཾ,

ཨམིཏྟསྶ ཀུཏོ སུཁཾ;

ཨསུཁསྶ ¶ ཀུཏོ པུཉྙཾ,

ཨཔུཉྙསྶ ཀུཏོ ཝརཾ.

༤.

སིཔྤཱ སམཾ དྷནཾ ནཏྠི,

སིཔྤཾ ཙོརཱ ནགཎྷརེ;

ཨིདྷ ལོཀེ སིཔྤཾ མིཏྟཾ,

པརལོཀེ སུཁཱཝཧཾ.

༥.

ཨཔྤཀཾ ནཱཏིམཉྙེཡྻ,

ཙིཏྟེ སུཏཾ ནིདྷཱཔཡེ;

ཝམྨིཀོདཀབིནྡཱུཝ,

ཙིརེན པརིཔཱུརཏི.

༦.

ཁུདྡོཏི ནཱཏིམཉྙེཡྻ,

ཝིཛྫཾ ཝཱ སིཔྤམེཝ ཝཱ;

ཨེཀམྤི པརིཡོདཱཏཾ,

ཛཱིཝིཏཀཔྤཀཱརཎཾ.

༧.

སེལེ སེལེ ན མཱཎིཀཾ,

གཛེ གཛེ ན མུཏྟིཀཾ;

ཝནེ ཝནེ ན ཙནྡནཾ,

ཋཱནེ ཋཱནེ ན པཎྜིཏཾ.

༨.

པཎྜིཏོ སུཏསམྤནྣོ,

ཡཏྠ ཨཏྠཱིཏི ཙེ སུཏོ;

མཧུསྶཱཧེན ¶ ཏཾ ཋཱནཾ,

གནྟབྦཾཝ སུཏེསིནཱ.

༩.

སིནེ སིཔྤཾ སིནེ དྷནཾ,

སིནེ པབྦཏམཱརུཧཾ;

སིནེ ཀཱམསྶ ཀོདྷསྶ,

ཨིམེ པཉྩ སིནེ སིནེ.

༡༠.

སུཏི སམྨུཏི སངྑྱཱཙ,

ཡོགཱ ནཱིཏི ཝིསེསཀཱ;

གནྡྷབྦཱ གཎིཀཱ ཙེཝ,

དྷནུ བེདཱ ཙ པཱུརཎཱ.

༡༡.

ཏིཀིཙྪཱ ཨིཏིཧཱསཱ ཙ,

ཛོཏི མཱཡཱ ཙ ཚནྡཏི;

ཀེཏུ མནྟཱ ཙ སདྡཱ ཙ,

སིཔྤཱཊྛཱརསཀཱ ཨིམེ.

༡༢.

ཨཔུཊྛོ པཎྜིཏོ བྷེརཱི,

པཛྫུནྣོ མེ ཧོཏི པུཙྪིཏོ;

བཱལོ པུཊྛོ ཨཔུཊྛོཔི,

བཧུམྤི བྷཎཏེ སདཱ.

༡༣.

པོཏྠཀེསུ ཙ ཡཾ སིཔྤཾ,

པརཧཏྠེསུ ཡཾ དྷནཾ;

ཡཐཱཀིཙྩེ ¶ སམུཔྤནྣེ,

ན ཏཾ སིཔྤཾ ན ཏཾ དྷནཾ.

༡༤.

ཛལཔྤམཱཎཾ ཀུམུདྡནཱལཾ,

ཀུལཔྤམཱཎཾ ཝིནཡོ པམཱཎཾ;

བྱཏྟིཔྤམཱཎཾ ཀཐཱིཏཝཱཀྱཾ,

པཐཝིཡཱ པམཱཎཾ ཏིཎ མིལཱཏཾ.

༡༥.

ཨཔྤསྶུཏོ སུཏཾ ཨཔྤཾ,

བཧུཾ མཉྙཏི མཱནཝཱ;

སིནྡྷཱུདཀཾ ཨཔསྶནྟོ,

ཀཱུཔེ ཏོཡཾཝ མཎྜུཀོ.

༡༦.

པཐམཾ པརཱཛཡེ སིཔྤཾ,

དུཏིཡཾ པརཱཛཡེ དྷནཾ;

ཏཏིཡཾ པརཱཛཡེ དྷམྨཾ,

ཙཏུཏྠཾ ཀིཾ ཀརིསྶཏི.

༡༧.

བྱཏྟ པུཏྲ ཀིམལསོ,

ཨབྱཏྟོ བྷཱརཧཱརཀོ;

བྱཏྟཀོ པཱུཛིཏོ ལོཀེ,

བྱཏྟ པུཏྲ དིནེ དིནེ.

༡༨.

མཱཏཱ ཝེརཱི པིཏཱ སཏྲུ,

ཀེན བཱལེ ན སིཀྑིཏཱ;

སབྷཱམཛ྄ཛྷེ ¶ ན སོབྷནྟི,

ཧཾསམཛ྄ཛྷེ བཀོཡཐཱ.

༡༩.

ཀཎྚཀཾ གིརི ཀོ ཏིཀྑཏི,

ཀོ ཨཉྫནཾ མིགཀྑིཀཾ;

ཨུཔྤཐཾ པལླལེ ཀོ སུགནྡྷཾ,

ཀུལ-པུཏྟ-རཱུཔོ ཀོ པཝཏྟཏི;

སཱམཾ-བྷཱཝོ.

༢༠.

ན རསཾ ཨཀོཏམྦུལཾ,

ཨདྷནསྶ, ལངྐཏམྤི;

ཨལོནཀནྟུ བྱཉྫནཾ,

བྱཱཀརཎཾ ཨསིཔྤསྶ.

༢༡.

སུསྶུསཱ སུཏསམྤནྣོ,

སུཏཱཔཉྙཱཡ པཝཌྜྷཏི;

པཉྙཱཡ ཨཏྠཾ ཛཱནཱཏི,

ཉཱཏོ ཨཏྠོ སུཁཱཝཧོ.

༢༢.

བྷོཛནཾ མེཐུནཾ ནིདྡཱ,

གོཎེ པོསེཔི ཝིཛྫཏི;

ཝིཛྫཱ ཝིསེསོ པོསསྶ,

ཏཾ ཧཱིནོ གོསམོ བྷཝེ.

༢༣.

ནཏྠི ཝིཛྫཱསམཾམིཏྟཾ,

ནཙ བྱཱདྷིསམོ རིཔུ;

ནཙ ¶ ཨཏྟསམཾ པེམཾ,

ནཙ ཀམྨསམཾ བལཾ.

༢༤.

ཧཾསོ མཛ྄ཛྷེ ན ཀཱཀཱནཾ,

སཱིཧོ གུནྣཾ ན སོབྷཏེ;

གདྲབྷམཛ྄ཛྷེ ཏུརངྒོ,

བཱལམཛ྄ཛྷེ ཙ པཎྜིཏོ.

༢༥.

ཡཱཝཛཱིཝམྤི ཙེ བཱལོ,

པཎྜིཏཾ པཡིརུཔཱསཏི;

ན སོ དྷམྨཾ ཝིཛཱནཱཏི,

དབྦི སཱུཔརསཾ ཡཐཱ.

༢༦.

མུཧུཏྟམཔི ཙེ ཝིཉྙཱུ,

པཎྜིཏཾ པཡིརུཔཱསཏི;

ཁིཔྤཾ དྷམྨཾ ཝིཛཱནཱཏི,

ཛིཝ྄ཧཱ སཱུཔརསཾ ཡཐཱ.

༢༧.

ཝིནཱ སཏྠཾ ན གཙྪེཡྻ,

སཱུརོ སངྒཱམབྷཱུམིཡཾ;

པཎྜིཏྭཱདྡྷགཱུ ཝཱཎིཛོ,

ཝིདེསགམནོ ཏཐཱ.

༢༨.

དྷནནཱསཾ མནོཏཱཔཾ,

གྷརེ དུཙྩརིཏཱནི ཙ;

ཝཉྩནཉྩ ¶ ཨཝམཱནཾ,

པཎྜིཏོ ན པཀཱསཡེ.

༢༩.

པཏྟཱནུརཱུཔཀཾ ཝཱཀྱཾ,

སབྷཱཝརཱུཔཀཾ པིཡཾ;

ཨཏྟཱནུརཱུཔཀཾ ཀོདྷཾ,

ཡོ ཛཱནཱཏི ས པཎྜིཏོ.

༣༠.

ཨ-དྷནསྶ རསཾ ཁཱདཱ,

ཨ-བལསྶ ཧཐཱ ནརཱ;

ཨ-པཉྙསྶ ཝཱཀྱ-ཀཐཱ,

ཨུམྨཏྟཀ-སམཱ ཨིམེ.

༣༡.

ཨནཝ྄ཧཱཡཾ གམཡནྟོ,

ཨ-པུཙྪཱ བཧུ-བྷཱསཀོ;

ཨཏྟ-གུཎཾ པཀཱསེནྟོ,

ཏི-ཝིདྷཾ ཧཱིན-ལཀྑཎཾ.

༣༢.

ཨཔྤ-རཱུཔོ བཧུཾ བྷཱསོ,

ཨཔྤ-པཉྙོ པཀཱསིཏོ;

ཨཔྤ-པཱུརོ གྷཊོ ཁོབྷེ,

ཨཔྤ-ཁཱིརཱ གཱཝཱི ཙཐེ.

༣༣.

མཎྜཱུཀེཔི ཨུཀྲེ སཱིཧེ,

ཀཱཀགྒཧེ པིཡེ པིཡེ;

ཨ-པཎྜཱིཔི ¶ པཎྜཱི ཧུཏྭཱ,

དྷཱིརཱ པུཙྪེ ཝཡེ ཝཡེ.

༣༤.

མཎྜཱུཀེཔི ཨུཀྲེ སཱིཧེ,

སཱུཀརེཔི ཨུཧེ དཱིཔེ;

བིལཱ༹རེ སདིསེ བྱགྒྷེ,

སབྦ དྷཱིརེ སིཔྤ-སམེ.

༣༥.

ན ཏིཏྟི རཱཛཱ དྷནམྷི,

པཎྜིཏོཔི སུ-བྷཱསིཏེ;

ཙཀྑུཾཔི པིཡ-དསྶནེ,

ཛལེ སཱགརོ ན ཏིཏྟི.

༣༦.

རཱུཔ-ཡོབྦན-སམྤནྣཱ,

ཝིསཱཐ-ཀུཐ-སམྦྷཝཱ;

ཝིཛྫཱ-ཧཱིནཱ ན སོབྷནྟི,

ནིགནྡྷཱ ཨིཝ ཀིཾསུཀཱ.

༣༧.

ཧཱིནེ པུཏྟོ རཱཛཱམཙྩོ,

བཱལ-པུཏྟོ ཙ པཎྜིཏོ;

ཨ-དྷནསྶ དྷནཾ བཧུ,

པུརིསཱནཾ ན མཉྙཐ.

༣༨.

ཡོ སིཔྤ-ལོབྷེན,

བཧུཾ གཎྷཱཏི ཏཾ སིཔྤཾ;

མཱུགོཝ ¶ སུཔིནཾ པསྶཾ,

ཀཐེཏུམྤི ན ཨུསྶཧེ.

༣༩.

བྷིཛྫེཏུཾ ཀུམྦྷཀཱརོ,

སོབྷེཏུཾ ཀུམྦྷ གྷཊྚཏི;

ན ཁིཔིཏུཾ ཨཔཱཡེསུ,

སིསྶཱནཾ ཝུཌྜྷི-ཀཱརཎཱ.

༤༠.

ཏགྒརཉྩ པལཱསེན,

ཡོ ནརོ ཨུཔནཡ྄ཧཏི;

པཏྟཱཔི སུརབྷི ཝཱཡནྟི,

ཨེཝཾ དྷཱིརཱུཔསེཝནཱ.

པཎྜིཏཀཎྜོ ནིཊྛིཏོ.

སུཛནཀཎྜོ

༤༡.

སབྦྷིརེཝ སམཱསེཐ,

སབྦྷི ཀུབྦེཐ སནྠཝཾ;

སཏཾ སདྡྷམྨམཉྙཱཡ,

སེཡྻོ ཧོཏི ན པཱཔིཡོ.

༤༢.

ཙཛ དུཛྫན སཾསགྒཾ,

བྷཛ སཱདྷུ སམཱགམཾ;

ཀར པུཉྙམཧོརཏྟིཾ,

སར ནིཙྩམནིཙྩཏཾ.

༤༣.

ཡཐཱ ¶ ཨུདུམྦརཔཀྐཱ,

བཧིརཏྟཀམེཝཙ;

ཨནྟོ ཀིམཱིཧི སམྤུཎྞཱ,

ཨེཝཾ དུཛྫནཧདྡཡཱ.

༤༤.

ཡཐཱཔི པནསཱཔཀྐཱ,

བཧི ཀཎྜཀམེཝ ཙ;

ཨནྟོ ཨམཏསམྤནྣཱ,

ཨེཝཾ སུཛནཧདཡཱ.

༤༥.

སུཀྑོཔི ཙནྡནཏརུ ན ཛཧཱཏི གནྡྷཾ,

ནཱགོ གཏོ ནརམུཁེ ན ཛཧཱཏི ལཱིལ༹ཾ;

ཡནྟཱགཏོ མདྷུརསཾ ན ཛཧཱཏི ཨུཙྪུ,

དུཀྑོཔི པཎྜིཏཛནོ ན ཛཧཱཏི དྷམྨཾ.

༤༦.

སཱིཧོ ནཱམ ཛིགྷཙྪཱཔི,

པཎྞཱདཱིནི ན ཁཱདཏི;

སཱིཧོ ནཱམ ཀིསོཙཱཔི,

ནཱགམཾསཾ ན ཁཱདཏི.

༤༧.

ཀུལ-ཛཱཏོ ཀུལ-པུཏྟོ,

ཀུལ-ཝཾས-སུརཀྑཏོ;

ཨཏྟནཱ དུཀྑ-པཏྟོཔི,

ཧཱིན-ཀམྨཾ ན ཀཱརཡེ.

༤༨.

ཙནྡནཾ ¶ སཱིཏལཾ ལོཀེ,

ཏཏོ ཙནྡཾཝ སཱིཏལཾ;

ཙནྡ-ཙནྡནསཱིཏམྷཱ,

སཱདྷུ ཝཱཀྱཾ སུབྷཱསིཏཾ.

༤༩.

ཨུདེཡྻ བྷཱཎུ པཙྪིམེ,

མེརུརཱཛཱ ནམེཡྻཔི;

སཱིཏལཱ ནརཀགྒིཔི,

པབྦཏགྒེ ཙ ཨུཔྤལཾ.

ཝིཀསེ ན ཝིཔརཱིཏཾ,

སཱདྷུཝཱཡྻཾ ཀུདཱཙནཾ.

༥༠.

སུཁཱ རུཀྑསྶ ཚཱཡཱཝ,

ཏཏོ ཉཱཏི མཱཏཱ པིཏུ;

ཏཏོ ཨཱཙརིཡོ རཉྙོ,

ཏཏོ བུདྡྷསྶནེཀདྷཱ.

༥༡.

བྷམརཱ པུཔྥམིཙྪནྟི,

གུཎམིཙྪནྟི སུཛནཱ;

མཀྑིཀཱ པཱུཏིམིཙྪནྟི,

དོསམིཙྪནྟི དུཛྫནཱ.

༥༢.

མཱཏཱཧཱིནསྶ དུབྦྷཱསཱ,

པིཏཱཧཱིནསྶ དུཀྲིཡཱ;

ཨུབྷོ ¶ མཱཏཱ པིཏཱ ཧཱིནཱ,

དུབྦྷསཱཙ དུཀཱིརིཡཱ.

༥༣.

མཱཏཱ སེཊྛསྶ སུབྷཱསཱ,

པིཏཱ སེཊྛསྶ སུཀྲིཡཱ;

ཨུབྷོ མཱཏཱ པིཏཱ སེཊྛཱ,

སུབྷཱསཱཙ སུཀཱིརིཡཱ.

༥༤.

སངྒཱམེ སཱུར-མིཙྪནྟི,

མནྟཱིསུ ཨཀཱུཏཱུཧལཾ;

པིཡཉྩ ཨནྣཔཱནེསུ,

ཨཏྠེ ཛཱཏེ ཙ པཎྜིཏཾ.

༥༥.

སུནཁོ སུནཁཾ དིསྭཱ,

དནྟཾ དསྶེཏི ཧིཾསིཏུཾ;

དུཛྫནོ སུཛནཾ དིསྭཱ,

རོསཡཾ ཧིཾསམིཙྪཏི.

༥༦.

མཱ ཙ ཝེགེན ཀིཙྩཱནི,

ཀརོསི ཀཱརཱཔེསི ཝཱ;

སཧསཱ ཀཱརིཏཾ ཀམྨཾ,

མནྡོ པཙྪཱནུཏཔྤཏི.

༥༧.

ཀོདྷཾ ཝིཧིཏྭཱ ན ཀདཱཙིནསོཙེ,

མཀྑཔྤཧཱནཾ ཨིསཡོ ཨཝཎྞཡུཾ;

སབྦེས ¶ ཕཱརུས-ཝཙཾ ཁམེཐ,

ཨེཏཾ ཁནྟིཾ ཨུཏྟམམཱཧུ སནྟོ.

༥༨.

དུཀྑོ ནིཝཱསོ སམྦཱདྷེ,

ཋཱནེ ཨསུཙིསངྐཏེ;

ཏཏོ ཨརིམྷི ཨཔྤིཡེ,

ཏཏོཔི ཨཀཏཉྙུནཱ.

༥༩.

ཨོཝཱདེཡྻཱནུསཱསེཡྻ,

གཱཔཀཱ ཙ ནིཝཱརཡེ;

སཏཉྷི སོ པིཡོ ཧོཏི,

ཨསཏཾ ཧོཏི ཨཔྤིཡོ.

༦༠.

ཨུཏྟམཏྟནིཝཱཏེན,

སཱུརཾ བྷེདེན ནིཛྫཡེ;

ནཱིཙཾ ཨཔྤཀ དཱནེན,

ཝཱིརིཡེན སམཾ ཛཡེ.

༦༡.

ན ཝིསཾ ཝིསམིཙྩཱཧུ,

དྷནཾ སངྒྷསྶ ཨུཙྩཏེ;

ཝིསཾ ཨེཀཾཝ ཧནཏི,

སབྦཾ སངྒྷསྶ སནྟཀཾ.

༦༢.

ཛཝནེ བྷདྲཾ ཛཱནནྟི,

བལིདྡཉྩ ཝཱཧེནཱ;

དུཧེན ¶ དྷེནུཾ ཛཱནནྟི,

བྷཱསམཱནེན པཎྜིཏཾ.

༦༣.

དྷནམཔྤམྤི སཱདྷཱུནཾ,

ཀཱུཔེ ཝཱརིཝ ནིསྶཡོ;

བཧུཾ ཨཔི ཨསཱདྷཱུནཾ,

ནཙ ཝཱརཱིཝ ཨཎྞཝེ.

༦༤.

ནཛྫོ པིཝནྟི ནོ ཨཱཔཾ,

རུཀྑཱ ཁཱདནྟི ནོ ཕལཾ;

ཝསྶནྟི ཀྭཙི ནོ མེགྷཱ,

པརཏྠཱཡ སཏཾ དྷནཾ.

༦༥.

ཨཔཏྠེཡྻཾ ན པཏྠེཡྻ,

ཨ ཙིནྟེཡྻཾ ན ཙིནྟཡེ;

དྷམྨམེཝ སུཙིནྟེཡྻ,

ཀཱལཾ མོགྷཾ ན ཨཙྩཡེ.

༦༦.

ཨཙིནྟིཏམྤི བྷཝཏི,

ཙིནྟིཏམྤི ཝིནསྶཏི;

ན ཧི ཙིནྟཱམཡཱ བྷོགཱ,

ཨིཏྠིཡཱ པུརིསསྶཝཱ.

༦༧.

ཨསནྟསྶ པིཡོ ཧོཏི,

སནྟེ ན ཀུརུཏེ པིཡཾ;

ཨསཏཾ ¶ དྷམྨཾ རོཙེཏི,

ཏཾ པརཱབྷཝཏོ མུཁཾ.

སུཛནཀཎྜོ ནིཊྛིཏོ.

༤. བཱལདུཛྫནཀཎྜོ

༦༨.

ཨཏིཔྤིཡོ ན ཀཱཏབྦོ,

ཁལོ ཀོཏཱུཧལཾ ཀརོ;

སིརསཱ ཝཧྱམཱནོཔི,

ཨཌྜྷཔཱུརོ གྷཊོ ཡཐཱ.

༦༩.

སཔྤོ དུཊྛོ ཁལོ དུཊྛོ,

སཔྤོ དུཊྛཏརོ ཁལོ;

མནྟོསདྷེཧི སོ སཔྤོ,

ཁལོ ཀེནུཔསམྨཏི.

༧༠.

ཡོ བཱལོ མཉྙཏི བཱལྱཾ,

པཎྜིཏོ ཝཱཔི ཏེན སོ;

བཱལོཝ པཎྜིཏམཱནཱི,

སོ ཝེ བཱལོཏི ཝུཙྩཏི.

༧༡.

མདྷུཾཝ མཉྙཏཱི བཱལོ,

ཡཱཝ པཱཔཾ ན པཙྩཏི;

ཡདཱཙ ¶ པཙྩཏཱི པཱཔཾ,

ཨཐ དུཀྑཾ ནིགཙྪཏི.

༧༢.

ན སཱདྷུ བལཝཱ བཱལོ,

སཧསཱ ཝིནྡཏེ དྷནཾ;

ཀཱཡསྶ བྷེདཱ དུཔྤཉྙོ,

ནིརཡཾ སོཔཔཛྫཏི.

༧༣.

གྷརེ དུཊྛོ ཙ མཱུསཱིཀོ ཙ,

ཝནེ དུཊྛོ ཙ ཝཱནརོ;

སཀུཎེ ཙ དུཊྛོ ཀཱཀོ,

ནརེ དུཊྛོཙ བྲཱཧྨཎོ.

༧༤.

དཱིགྷཱ ཛཱགརཏོ རཏྟི,

དཱིགྷཾ སནྟསྶ ཡོཛནཾ;

དཱིགྷོ བཱལཱན སཾསཱརོ,

སདྡྷམྨཾ ཨ-ཝིཛཱནཏཾ.

༧༥.

ཏིལ མཏྟཾ པརེསཾཝ,

ཨཔྤ དོསཉྩ པསྶཏི;

ནཱལི༹ཀེརམྤི སདོསཾ,

ཁལ-ཛཱཏོ ན པསྶཏི.

༧༦.

ནཏྟདོསཾ པརེ ཛཉྙཱ,

ཛཉྙཱ དོསཾ པརསྶཏུ;

གུཡ྄ཧེ ¶ ཀུམྨོ ཨངྒཱནི,

པར དོསཉྩ ལཀྑཡེ.

༧༧.

པཎྜིཏསྶ པསཾསཱཡ,

དཎྜོ བཱལེན དཱིཡཏེ;

པཎྜིཏོ པཎྜིཏེནེཝ,

ཝཎྞིཏོཝ སུཝཎྞིཏོ.

༧༨.

ལུདྡྷཾ ཨཏྠེན གཎྷེཡྻ,

ཐདྡྷཾ ཨཉྫལི ཀམྨུནཱ;

ཚནྡཱནུཝཏྟིཡཱ མཱུལ༹ྷཾ,

ཡཐཱབྷཱུཏེན པཎྜིཏཾ.

བཱལདུཛྫནཀཎྜོ ནིཊྛིཏོ.

༤. མིཏྟཀཎྜོ

༧༩.

ཧིཏཀཱརོ པརོ བནྡྷུ,

བནྡྷཱུཔི ཨཧིཏོ པརོ;

ཨ ཧིཏོ དེཧཛོ བྱཱདྷི,

ཧིཏཾ ཨརཉྙམོསདྷཾ.

༨༠.

པརོཀྑེ གུཎ-ཧནྟཱརཾ,

པཙྩཀྑེ པིཡཝཱདིནཾ;

ཝཛྫེཡྻ ¶ ཏཱདིསཾ མིཏྟཾ,

ཝིསཀུམྦྷེ ཡཐཱ མདྷུཾ.

༨༡.

དྷནཧཱིནེ ཙཛེ མིཏྟོ,

པུཏྟདཱརཱ སཧོདརཱ;

དྷནཝནྟཾཝ སེཝནྟི,

དྷནཾ ལོཀེ མཧཱ སཁཱ.

༨༢.

ཛཱནེཡྻ པེསེན བྷཙྩཾ,

བནྡྷུཾ ཝཱཔི བྷཡཱགཏེ;

ཨཔྤཀཱསུ ཏཐཱ མིཏྟཾ,

དཱརཉྩ ཝིབྷཝཀྑཡེ.

༨༣.

སོ བནྡྷུ ཡོ ཧིཏེ ཡུཏྟོ,

པིཏརོ ཧོནྟི པོསཀོ;

ཏཾ མིཏྟཾ ཡཏྠ ཝིསྶཱསོ,

སཱ བྷརིཡཱ ཙ ཡསྶ ནིབྦཱུཏི.

༨༤.

ན ཝིསྶསེ ཨ-ཝིསྶཏྟཾ,

མིཏྟཉྩཱཔི ན ཝིསྶསེ;

ཀདཱཙི ཀུཔིཏོ མིཏོ,

སབྦཾ དོསཾ པཀཱསཡེ.

༨༥.

སཀིཾ དུཊྛཉྩ ཡོ མིཏྟཾ,

པུན སནྡྷིཏུམིཙྪཏི;

སོ ¶ མཙྩུཾ ཨུཔགཎྷཱཏི,

གབྦྷམསྶཏརཱི ཡཐཱ.

༨༦.

ཝཧེ ཨ-མིཏྟཾ ཁནྡྷེན,

ཡཱཝ ཀཱལོ ཨནཱགཏོ;

ཏམེཝ ཨཱགཏེ ཀཱལེ,

སེལེ བྷིནྡེ གྷཊཾ ཨིཝ.

༨༧.

ཨིཎསེསོ ཨགྒིསེསོ,

སཏྲུསེསོ ཏཐེཝ ཙ;

པུནཔྤུནཾ ཝིཝཌྜྷནྟི,

ཏསྨཱ སེསཾ ན ཀཱརཡེ.

༨༨.

པདུམཾཝ མུཁཾ ཡསྶ,

ཝཱཙཱ ཙནྡན སཱིཏལཱ;

ཏཱདིསཾ ནོཔསེཝེཡྻ,

ཧདཡེཏུ ཧལཱཧལཾ.

༨༩.

ན སེཝེ ཕརུསཾ སཱམིཾ,

ནཙ སེཝེཡྻ མཙྪརིཾ;

ཏཏོ ཨཔགྒཎྷཾ སཱམིཾ,

ནེཝ ནིགྒཧིཏཾ ཏཏོ.

༩༠.

སིངྒཱི པཉྙཱས ཧཏྠེན,

ཝཛྫེ སཏེན ཝཱཛིནཾ;

ཧཏྠིཾ ¶ དནྟིཾ སཧསྶེན,

དེས ཙཱགེན དུཛྫནཾ.

༩༡.

ཀུདེསཉྩ ཀུམིཏྟཉྩ,

ཀུཀུལཉྩ ཀུབནྡྷཝཾ;

ཀུདཱརཉྩ ཀུདཱསཉྩ,

དཱུརཏོ པརིཝཛྫཡེ.

༩༢.

རོགཱཏུརེ ཙ དུབྦྷིཀྑེ,

བྱསནེ སཏྟུ ཝིགྒཧེ;

རཱཛདྭཱརེ སུསཱནེ ཙ,

ཡེ ཏིཊྛནྟི སུམིཏྟཀཱ.

༩༣.

སཱིཏཝཱཙོ བཧུམིཏྟོ,

ཕརུསོ ཨཔྤམིཏྟཀོ;

ཨུཔམཾ ཨེཏྠ ཉཱཏབྦཱ,

ཙནྡ-སཱུརིཡ-རཱཛཱུནཾ.

མིཏྟཀཎྜོ ནིཊྛིཏོ.

༥. ཨིཏྠིཀཎྜོ

༩༤.

ཀོཀིལཱནཾ སདྡཾ རཱུཔཾ,

ནཱརཱིརཱུཔཾ པཏིབྦཏཱ;

ཝིཛྫཱ ¶ རཱུཔཾ ཨ-རཱུཔཱནཾ,

ཁམཱ རཱུཔཾ ཏཔསྶིནཾ.

༩༥.

ཨིཏྠཱིནཉྩ དྷནཾ རཱུཔཾ,

པུརིསཱནཾ ཝིཛྫཱ དྷནཾ;

བྷིཀྑཱུནཉྩ དྷནཾ སཱིལཾ,

རཱཛཱནཉྩ དྷནཾ བལཾ.

༩༦.

ཏཔསྶིནོ ཀིསཱ སོབྷཱ,

ཐཱུལཱ སོབྷཱ ཙཏུཔྤདཱ;

པུརིསཱ ཝིཛྫཝཱ སོབྷཱ,

ཨིཏྠཱི སོབྷཱས སཱམིཀཱ.

༩༧.

པཉྩ རཏྱཱ སུགནྡྷབྦཱ,

སཏྟ རཏྱཱ དྷནུགྒཧཱ;

ཨེཀ མཱསཱ སུབྷརིཡཱ,

ཨཌྜྷ མཱསཱ སིསྶཱ མལཱ.

༩༨.

ཧིཾ རམཏི པང,

ཧང རམཏི པོཀ.

ཐཱི རམཏི པུ,

ཁུ རམཏི དྷཾ.

༩༩.

ཛིཎྞམནྣཾ པསཾསེཡྻ,

དཱརཉྩ གཏཡོབྦནཾ;

རཎཱ པུནཱགཏཱ སཱུརཾ,

སསྶཉྩ གེཧམཱགཏཾ.

༡༠༠.

དྭཏྟི-པཏིཀཱ ¶ ནཱརཱི ཙ,

བྷིཀྑུ དྭཏྟི-ཝིཧཱརིཀོ;

དྭཏྟི-པཱས-མུཏྟོ པཀྑཱི,

ཀཏ-མཱཡཱ བཧཱུཐརཾ.

༡༠༡.

དུཛྫནཾ པཧཱརཱདམེ,

མིཏྟཾ དམེ ཨ-བྷཱཎིཀཱ;

ཨིཏྠིཉྩ བྱསནཱ དམེ,

རཱགིནཾ ཨཔྤ བྷོཛནཱ.

༡༠༢.

ན རཏྟི ཝིནཱ ཙནྡིམཱ,

ཝཱིཙིཾ ཝིནཱ ཙ ཨཎྞཝོ;

ཧཾསཾ ཝིནཱ པོཀྑརཎཱི,

པཏིཾ ཀཉྙཱཙ སོབྷཏེ.

༡༠༣.

པཏིནཱ ཛནིཏོ བྷོགོ,

ཨིཏྠིཡཱཝ སཾགོཔྤིཏོ;

པུརིསོཝ ཧི པདྷཱནོ,

ཨིཏྠཱི སུཏྟཾཝ སཱུཙིཡཱ.

༡༠༤.

སབྦཱནདཱི ཝངྐནདཱི,

སབྦེ ཀཊྛམཡཱ ཝནཱ;

སབྦིཏྠིཡོ ཀརེ པཱཔཾ,

ལབྷམཱནེ ནིཝཱཏཀེ.

༡༠༥.

ཝིཝཱདསཱིལིཾ ¶ ཨུསཱུཡབྷཱཎིནིཾ,

སམྤསྶཏཎྷིཾ བཧུཔཱཀབྷུཏྟིནིཾ;

ཨགྒནྟབྷུཏྟིཾ པརགེཧཝཱསིནིཾ,

ནཱརིཾ ཙཛེ པུཏྟསཏམྤི པཱུམཱ.

༡༠༦.

བྷུཏྟེསུ མཎྜེསུ ཛནཱིཝ ཀནྟིནཱི,

གུཡ྄ཧེཙ ཋཱནེ བྷགིནཱིཝ ཧིརིཎཱི;

ཀམྨེསུ པཏྟེསུ ཀརོཏི དཱསཱིཝ,

བྷཡེསུ མནྟཱི སཡནེསུ རཱམཡེ;

རཱུཔཱིསུ སིཀྑཱི ཀུཔནེསུ ཁནྟིནཱི,

སཱ ནཱརཱི སེཊྛཱཏི ཝདནྟི པཎྜིཏཱ;

ཀཱཡསྶ བྷེདཱཙ དིཝེབྷཝེཡྻ སཱ.

༡༠༧.

སཱམཱ མིགཀྑཱི ཏནུམཛ྄ཛྷགཏྟཱ,

སཱུརཱུ སུཀེསཱི སམདནྟཔནྟཱི;

གམྦྷཱིརནཱབྷཱི ཡུཝཏཱི སུསཱིལཱི,

ཧཱིནེ ཀུལེ ཛཱཏཱཔི ཝིཝཱཧྱཱ.

༡༠༨.

སརདཾརཏུ-ཀཱལཱནཾ,

བྷརིཡཱནཾ རཱུཔཝཏཱི;

ཛེཊྛོ པདྷཱནཾ པུཏྟཱནཾ,

དིསཱནཾ ཨུཏྟརཱདིསཱ.

༡༠༩.

ཡཱ ཨིཙྪེ པུརིསོ ཧོཏུཾ,

ཛཱཏི ཛཱཏི པུནཔྤུནཾ;

སཱམིཀཾ ¶ ཨཔཙཱཡེཡྻ,

ཨིནྡཾཝ པཱརིཙཱརིཀཱ.

༡༡༠.

ཡོ ཨིཙྪེ པུརིསོ ཧོཏུཾ,

ཛཱཏི ཛཱཏི པུནཔྤུནཾ;

པརདཱནཾ ཝིཝཛྫེཡྻ,

དྷོཏཔཱདོཝ ཀདྡམཾ.

༡༡༡.

ཨཏིཀྐནྟ ཝཡོ པོསོ,

ཨཱནེཏི ཏིམྦརུཏྟནིཾ;

ཏསྶཱ ཨིསྶཱ ཨསདྡྷཱཏི,

ཏཾ པརཱབྷཝཏོ མུཁཾ.

ཨིཏྠིཀཎྜོ ནིཊྛིཏོ.

༦. རཱཛཀཎྜོ

༡༡༢.

ཨེཀཡཱམཾ སཡེ རཱཛཱ,

དྭིཡཱམཉྙེཝ པཎྜིཏོ;

གྷརཱཝཱསོ ཏིཡཱམཾཝ,

ཙཏུཡཱམཾ ཏུ ཡཱཙཀོ.

༡༡༣.

དྷནཝཱ སུཏཝཱ རཱཛཱ,

ནདཱི ཝེཛྫོ ཙིམེཔཉྩ;

ཡཏྠ ¶ དེསེ ན ཝིཛྫནྟི,

ན ཏཏྠ དིཝསཾ ཝསེ.

༡༡༤.

ཡསྨིཾ པདེསེ ན མཱནོ,

ན པེམཾ ནཙ བནྡྷཝཱ;

ནཙ ཝིཛྫཱགམོ ཀོཙི,

ན ཏཏྠ དིཝསཾ ཝསེ.

༡༡༥.

ཨཔུཏྟཀཾ གྷརཾ སུཉྙཾ,

རཊྛཾ སུཉྙཾ ཨརཱཛཀཾ;

ཨ སིཔྤསྶ མུཁཾ སུཉྙཾ,

སབྦ སུཉྙཾ དལིདྡཀཱ.

༡༡༦.

དྷནམིཙྪེཡྻ ཝཱཎིཛྫོ,

ཝིཛྫམིཙྪེ བྷཛེསུཏཾ;

པུཏྟམིཙྪེ ཏརུཎིཏྠིཾ,

རཱཛཱམཙྩཾ ཝསཾ གམེ.

༡༡༧.

ནཊྛོཡཏི ཨསནྟུཊྛོ,

སནྟུཊྛོ ཙ མཧཱིཔཏི;

ལཛྫཱ ཙ གཎིཀཱ ནཊྛཱ,

ནིལླཛྫཱ ཀུལདྷཱིཏིཀཱ.

༡༡༨.

པཀྑཱིནཾ བལམཱཀཱསོ,

མཙྪཱནམུདཀཾ བལཾ;

དུབྦལསྶ ¶ བལཾ རཱཛཱ,

ཀུམཱརཱནཾ རུདཾ བལཾ.

༡༡༩.

ཁམཱ ཛཱགརིཡུཊྛཱནཾ,

སཾཝིབྷཱགོ དཡིཀྑཎཱ;

ནཱཡཀསྶ གུཎཱ ཨེཏེ,

ཨིཙྪིཏབྦཱ སཏཾ གུཎཱ.

༡༢༠.

སཀིཾ ཝདནྟི རཱཛཱནོ,

སཀིཾ སམཎབྲཱཧྨཎཱ;

སཀིཾ སཔྤུརིསཱ ལོཀེ,

ཨེས དྷམྨོ སནནྟནོ.

༡༢༡.

ཨལསོ གིཧཱི ཀཱམབྷོགཱི ན སཱདྷུ,

ཨསཉྙཏོ པབྦཛིཏོ ན སཱདྷུ;

རཱཛཱ ཨནིསམྨཀཱརཱི ན སཱདྷུ,

པཎྜིཏོ ཀོདྷནོ ཏཾཔི ན སཱདྷུ.

༡༢༢.

བཧཝོ ཡཏྠ ནེཏྟཱརོ,

སབྦེ པཎྜིཏམཱནིནོ;

སབྦེ མཧཏྟམིཙྪནྟི,

ཏེསཾ ཀམྨཾ ཝིནསྶཏི.

༡༢༣.

ཨཱཡཾ ཁཡཾ སཡཾ ཛཉྙཱ,

རཱཛཱ སཡཾ ཀཏཱཀཏཾ;

ནིགྒཧེ ¶ ནིགྒཧེཏབྦཾ,

པགྒཧེ པགྒཧཱརཧཾ.

༡༢༤.

པིཊྛིཏོཀྐཾ ནིསེཝེཡྻ,

ཀུཙྪིནཱཝ ཧུཏཱསནཾ;

སཱམིཀཾ སབྦབྷཱགེན,

པརལོཀཾ ཨམོཧཝཱ.

༡༢༥.

ཨགྒི ཨཱཔོ ཨིཏྠིམཱུལ༹ྷོ,

སཔྤོ རཱཛ-ཀུལཱནིཙ;

ཨཔཡནྟེན གནྟབྦཱ,

ཨཙྩེཀ-པཱཎཧཱརཀཱ.

༡༢༦.

པདུཊྛ-བྷརིཡ-སཾཝཱསོ,

པདུཊྛ ཙིཏྟ དཱསཀོ;

ས-སཔྤེ ཙ གྷརེ ཝཱསོ,

མཙྩུ ཨེཝ ན སཾསཡོ.

༡༢༧.

མཱུལ༹ྷ སིསྶོ པདེསེན,

ཀུནཱརཱི བྷརཎེན ཙ;

ཨསཏཱ སམྤཡོགེན,

པཎྜིཏོཔྤཝསཱིདཏི.

༡༢༨.

མཱཏཱ པུཏྟཀརཾ པཱཔཾ,

སིསྶཔཱཔཾ གུརུཀཏཱ;

རཱཛཱ ¶ རཊྛཀརཾ པཱཔཾ,

རཱཛཔཱཔཾ པུརོཧིཏོ.

༡༢༩.

ཨཀོདྷེན ཛིནེ ཀོདྷཾ,

ཨསཱདྷུཾ སཱདྷུནཱ ཛིནེ;

ཛིནེ མཙྪརིཾ དཱནེན,

སཙྩེནཱལཱིཀཝཱདིནཾ;

༡༣༠.

ཨདནྟཾ དམནཾ དཱནཾ,

དཱནཾ སབྦཏྠ སཱདྷཀཾ;

དཱནེན པིཡ ཝཱཙཱཡ,

ཨུནྣམནྟི ནམནྟི ཙ;

༡༣༡.

དཱནཾ སིནེཧབྷེསཛྫཾ,

མཙྪེརཾ དོསནོསདྷཾ;

དཱནཾ ཡསསྶཱི བྷེསཛྫཾ,

མཙྪེརཾ ཀཔཎོསདྷཾ.

༡༣༢.

བཧཱུནམཔྤསཱརཱནཾ,

སཱམགྒིཡཱ ཛཡཾ ཛཡེ;

ཏིཎེཧི ཝཏྟཏེ ཡོཏྟཾ,

ཏེན ནཱགོཔི བཛ྄ཛྷཏེ.

༡༣༣.

སཧཱཡོ ཨསམཏྠོཔི,

ཏེཛསཱ ཀིཾཀརིསྶཏི;

ནིཝཱཏེ ¶ ཛལིཏོ ཨགྒི,

སཡམེ ཝཱུཔསམྤཏི.

༡༣༤.

ན རཉྙཱ སམཀཾ བྷུཉྫེ,

ཀཱམབྷོགཾ ཀུདཱཙནཾ;

ཨཱཀཔྤཾ རས བྷུཏྟིཾཝཱ,

མཱལཱ གནྡྷ ཝིལེཔནཾ;

ཝཏྠཾ སབྦཨལངྐཱརཾ,

ན རཉྙཱ སདིསཾ ཀརེ.

༡༣༥.

ན མེ རཱཛཱ སཁཱ ཧོཏི,

ན རཱཛཱ ཧོཏི མེཐུནོ;

ཨེསོ སཱམིཀོ མཡ྄ཧནྟི,

ཙིཏྟེ ནིཊྛཾ སུཐཱཔཡེ.

༡༣༦.

ནཱཏིདཱུརེ བྷཛེ རཉྙོ,

ནཱཙྩཱསནྣོཔཝཱཏཀེ;

ཨུཛུཀེ ནཱཏིནིནྣེ ཙ,

ན བྷཛེ ཨུཙྩམཱསནེ.

ཚདོསེ ཝཛྫེ སེཝཀོ,

ཏིཊྛེ ཨགྒིཾཝ སཾཡཏོ.

༡༣༧.

གུཎཱི སབྦཉྙུ ཏུལྱོཔི,

ནསོབྷཏི ཨནིསྶཡོ;

ཨནགྒྷམོཔི ¶ མཎིསེཊྛོ,

ཧེམཾ ནིསྶཱཡ སོབྷཏི.

རཱཛཀཎྜོ ནིཊྛིཏོ.

༧. པཀིཎྞཀཀཎྜོ

༡༣༨.

ཨིཏྠིམིསྶེ ཀུཏོསཱིལཾ,

མཾས བྷཀྑེ ཀུཏོདཡཱ;

སུརཱ པཱནེ ཀུཏོསཙྩཾ,

མཧཱལོབྷེ ཀུཏོཧིརཱི;

མཧཱཏནྡེ ཀུཏོསིཔྤཾ,

མཧཱ ཀོདྷེ ཀུཏོདྷནཾ.

༡༣༩.

སུརཱ ཡོགོ ཝིཀཱལོ ཙ,

སམཛྫ ཙརཎཱལསཾ;

ཁིཌྜཱདྷུཏྟོ པཱཔམིཏྟོ,

བྷོགནཱསམུཁཱ ཨིམེ.

༡༤༠.

དིཝཱ ནཱདིཀྑཱ ཝཏྟབྦཾ,

རཏྟོ ནཱཝཙནེན ཙ;

སཉྩརེཡྻ བྷཡཱ བྷཱིཏོ,

ཝནེ ཝནཙརཱི ཡཐཱ.

༡༤༡.

ཛཱིཝནྟཱཔི མཏཱཔཉྩ,

བྱཱསེན པརིཀིཏྟིཏཱ;

དུཀྑིཏོ ¶ བྱཱདྷིཏོམཱུལ༹ྷོ,

ཨིཎཝཱ ནིཏྱསེཝཀོ.

༡༤༢.

ཨནཱགཏཾ བྷཡཾ དིསྭཱ,

དཱུརཏོ པརིཝཛྫཡེ;

ཨཱགཏཉྩ བྷཡཾ དིསྭཱ,

ཨ བྷཱིཏོ ཧོཏི པཎྜིཏོ.

༡༤༣.

ནིདྡཱལུཀོ པམཏྟོཙ,

སུཁཏྟོ རོགཝཱལསོ;

མཧིཙྪོ ཀམྨཱརཱམོཙ,

སཏྟེ ཏེ སཏྠཝཛྫིཏཱ.

༡༤༤.

དུགྒཏཾ གཙྪ ཧེ ལཱབྷ,

ལཱབྷཱི ལཱབྷེན པཱུརཏི;

ཐལེ པཝསྶ པཛྫུནྣ,

སིནྡྷུ ཨཱཔེན པཱུརཏི;

ནཏྠིདཾ ཀམྨཔྤདྷཱནཀཾ.

༡༤༥.

ན ཧི ཀོཙི ཀཏེ ཀིཙྩེ,

ཀཏྟཱརཾ སམུཔེཀྑཏེ;

ཏསྨཱ སབྦཱནི ཀིཙྩཱནི,

སཱཝ སེསེན ཀཱརཡེ.

༡༤༦.

ཏཱུལཾ སལླཧུཀཾ ལོཀེ,

ཏཏོ ཙཱཔལླ-ཛཱཏིཀོ;

ཏཏོ ¶ ཝུཌྜྷ མནོཝཱདོ,

པམཏྟོ བུདྡྷསཱསནེ.

༡༤༧.

པཱསཱཎཚཏྟཾ གརུཀཾ,

ཏཏོ དེཝཱནཙིཀྑཎཾ;

ཏཏོ ཝུཌྜྷཱནམོཝཱདོ,

ཏཏོ བུདྡྷསྶ སཱསནཾ.

༡༤༨.

ཀཱཡསྶ དཀྑིཎ ཧཏྠོ,

དོསོ ཨེཏྠ ཀནིཊྛཀོ;

ཀཎྞ གྷཱནཱན-མཀྑཱིནཾ,

ཝཱམོ ཏུ པཱད-པཱསཀོ.

༡༤༩.

ཏམྦཱུལསྶ མཛ྄ཛྷ པཏྟེ,

ཀུཝེརོ རཀྑཏཱི སདཱ;

མཱུལམྷི རཀྑཏི ཡཀྑོ,

ཨགྒམྷི ཀཱལཀཎྞིཀཱ;

ཏཱནི བྷུཉྫེཡྻ ཚིནྡིཏྭཱ,

སིརཱི ཨེཝཾ པཝཌྜྷཏི.

༡༥༠.

སམྤུཎྞརཀྑོ བྲཧྨཱཝ,

ཨཙྩུརཀྑོ ཙ བིསྶཎོ;

ཏསྨཱ ཧི ཏེ པཱུཛཡནྟུ,

སདཱ མཱནེནྟི ཏཾ ནརཾ.

༡༥༡.

གོཎཱ ¶ ཧི སབྦགིཧཱིནཾ,

པོསཀཱ བྷོགདཱཡཀཱ;

ཏསྨཱ ཧི མཱཏཱ པིཏཱུཝ,

མཱནཡེ སཀྐརེཡྻ ཙ.

༡༥༢.

ཡེཙ ཁཱདནྟི གོམཾསཾ,

མཱཏུ མཾསཾཝ ཁཱདརེ;

མཏེསུ ཏེསུ གིཛ྄ཛྷཱནཾ,

དདེ སོཏེ ཙ ཝཱཧཡེ.

༡༥༣.

གུརུསིདྡྷོ སིཔྤཱརམྦྷོ,

རཝི སོཀྲཱ ཙ མཛ྄ཛྷིམོ;

ན སིཔྤོ བུདྡྷཙནྡརོ,

སོརཱི ཨངྒཱཙ མརཎཾ.

༡༥༤.

ཨཊྛམིཡཾ གུརུཾ ཧནྟི,

སིསྶཾ ཧནྟི ཙཏུདྡསིཾ;

སིཔྤཾ ཧནྟི དས སིཔྤཾ,

མཱཏཱཔིཏཱ ཙ པུཎྞམིཾ.

༡༥༥.

ནཱལི༹ཀཾ སཏྟ ནབྷུཉྫེ,

ན ལཱབུཾ ནཝམཾ ཏཐཱ;

དྭཱདས པྲིནྣཾཏྲིམིནཾ,

བྷུཉྫེ སིཔྤཾ ཝིནསྶཏི.

༡༥༦.

ཨེཀཾ ¶ ཙཛེ ཀུལཨཏྠཾ,

གཱམསྶཏྠཾ ཀུཝཾ ཙཛེ;

གཱམ ཙཛེ ཛནཔདཏྠཾ,

ཨཏྟཏྠཾ པཐཝིཾ ཙཛེ.

༡༥༧.

དེསཾ ཨོསྶཛྫ གཙྪནྟི,

སཱིཧོ སཔྤུརིསོ གཛོ;

ཏཏྠེཝ ནིདྷནཾ ཡནྟི,

ཀཱཀོ ཀཱཔུརིསོ མིགོ.

༡༥༨.

ཡམྷི པདེསེ ན མཱནོ,

ན པེམཾ ན ཙ བནྡྷཝཱ;

ན ཙ ཝིཛྫཱགཱཧོ ཀོཙི,

ན ཏཏྠ ཝསནཾ ཀརེ.

༡༥༩.

ཙརཏྱེཀེན པཱདེན,

ཏིཊྛཏྱེཀེན པཎྜིཏོ;

ཨ ནིསམྨ པརཾ ཋཱནཾ,

ན པུབྦམཱལཡཾ ཛཧེ.

༡༦༠.

དྷན དྷཉྙ པཡོགེསུ,

ཏཐཱ ཝིཛྫཱགམེསུ ཙ;

དཱུཏེསུ ཨཔཙཱརེསུ,

ཙཛྫཱ ལཛྫཱ ཏདཱ བྷཝེ.

༡༦༡.

དྭི ¶ གུཎོ ཐཱིནམཱཧཱརོ,

བུདྡྷིཙཱཔི ཙཏུགྒུཎོ;

ཚགྒུཎོ ཧོཏི ཝཱཡཱམོ,

ཀཱམོཏྭཊྛ-གུཎོ བྷཝེ.

༡༦༢.

པབྦེ པབྦེ ཀམེནུཙྪུ,

ཝིསེསརསཝཱགྒཏོ;

ཏཐཱ སུམེཏྟིཀོ སཱདྷུ,

ཝིཔརཱིཏོཝ དུཛྫནོ.

༡༦༣.

ཀསྶཀོ ཝཱཎིཛོ མཙྩོ,

སམཎོ སུཏ སཱིལཝཱ;

ཏེསུ ཝིཔུལ ཛཱཏེསུ,

རཊྛམྤི ཝིཔུལཾ སིཡཱ.

༡༦༤.

ཨསཛ྄ཛྷཱཡ མལཱ མནྟཱ,

ཨནུཊྛཱན མལཱ གྷརཱ;

མལཾ ཝཎྞསྶ ཀོསཛྫཾ,

པམཱདོ རཀྑཏོ མལཾ.

༡༦༥.

ཧཱིནཱནཾ གཙྪཏེ ཝིཏྟཾ,

ཝཱིརཱནཾ སནྟཀཏྟནཾ;

ཝདནྟི ཙ ཧཱིནཱ ཛནཱ,

པུབྦ-ཀམྨཔྤདྷཱནཀཱ.

༡༦༦.

ན ¶ ཝདནྟི ཙེཝཾདྷཱིརཱ,

ཝཱཡམིཾསུ སབྦཀམྨེ;

ན ཙེ སིཛ྄ཛྷཏི ཏཾ ཀམྨཾ,

ཨ-ཕལཾ ཨེཝ ཀོ དོསོ.

༡༦༧.

ནཱིཙཾ ཀུལཾ ནིཔཉྙཾ ཝཱ,

ནིརཱུཔཾ ནིབལཾ སམཾ;

ཨིམཾ ཀཱལཾ ཚུཏྟཀཱལཾ,

དྷནམེཝ ཝིསེསཀཾ.

པཀིཎྞཀཀཎྜོ ནིཊྛིཏོ.

པཎྜིཏོ སུཛནོ ཀཎྜོ,

དུཛྫནོ མིཏྟ-ཨིཏྠི ཙ;

རཱཛཱ པཀིཎྞཀོ ཙཱཏི,

སཏྟ-ཀཎྜ-ཝིབྷཱུསིཏཾ.

ཝིསུདྡྷཱ ཙཱར-ཐེརེན,

ཝིསུདྡྷཱརཱམ-ཝཱསིནཱ;

སབྦ-ཀུལཱནམཏྠཱཡ,

ཝིསོདྷིཏཾ པཐཀྑཡེ.