📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

སུཏྟནྟནཱིཏི

༡.

པརཱ ¶ བྷཝནྟཾ པུརིསཾ,

མཡཾ པུཙྪཱམ གོཏམཾ;

བྷཝནྟཾ པུཊྛུ མཱགམྨ,

ཀིཾ པརཱབྷཝཏོ མུཁཾ.

༢.

སུཝིཛཱནོ ¶ བྷཝཾཧོཏི,

དུཝིཛཱནོ པརཱབྷཝོ;

དྷམྨཀཱམོ བྷཝཾ ཧོཏི,

དྷམྨདེསྶཱི པརཱབྷཝོ.

༣.

ཨིཏིཧེ ¶ ཏཾ ཝིཛཱནཱམ,

པཐམོ སོ པརཱབྷཝོ;

དུཏཱིཡཾ བྷགཝཱ བྲཱུཧི,

ཀིཾ པརཱབྷཝཏོ མུཁཾ.

༤.

ཨསནྟསྶ ¶ པིཡོ ཧོཏི,

སནྟེ ན ཀུརུཏེ པིཡཾ;

ཨསཏཾ དྷམྨཾ རོཙེཏི,

ཏཾ པརཱབྷཝཏོ མུཁཾ.

ཀམྨཱཔརཱདྷསཏྟཱནཾ ¶ ,

ཝིནཱསེ པཙྩུཔཊྛིཏེ;

ཨནཡོ ནཡརཱུཔེན,

བུདྡྷིམཱཀམྱ ཏིཊྛཏི.

༥.

ནིདྡཱསཱིལཱི ¶ སབྷཱསཱིལཱི,

ཨནུཊྛཱཏཱ ཙ ཡོ ནརོ;

ཨལསོ ཀོདྷཔཉྙཱཎོ,

ཏཾ པརཱབྷཝཏོ མུཁཾ.

༦.

ཡོ ¶ མཱཏརཾ པིཏརཾ ཝཱ,

ཛིཎྞཀཾ གཏཡོབྦནཾ;

པཧུསནྟོ ན བྷརཏི,

ཏཾ པརཱབྷཝཏོ མུཁཾ.

༧.

ཡོ ¶ བྲཱཧྨཎཾ སམཎཾ ཝཱ,

ཨཉྙཾ ཝཱཔི ཝཎིབྦཀཾ;

མུསཱཝཱདེན ཝཉྩེཏི,

ཏཾ པརཱབྷཝཏོ མུཁཾ.

༨.

པཧུཏཝིཏྟོ ¶ པུརིསོ,

སཧིརཉྙོ སབྷོཛནོ;

ཨེཀོ བྷུཉྫཏི སཱདཱུནི,

ཏཾ པརཱབྷཝཏོ མུཁཾ.

༩.

ཛཱཏིཐདྡྷོ ¶ དྷནཐདྡྷོ,

གོཏྟཐདྡྷོ ཙ ཡོ ནརོ;

སཉཱཏིཾ ཨཏིམཉྙེཏི,

ཏཾ པརཱབྷཝཏོ མུཁཾ.

༡༠.

ཨིཏྠིདྷུཏྟོ ¶ སུརཱདྷུཏྟོ,

ཨཀྑདྷུཏྟོ ཙ ཡོ ནརོ;

ལདྡྷཾལདྡྷཾ ཝིནཱསེཏི,

ཏཾ པརཱབྷཝཏོ མུཁཾ.

ན ¶ བཱལ༹ྷཾ ཨིཏྠིཾ གཙྪེཡྻ,

སམྤསྶཾ ཏེཛསངྑཡཾ;

ཀཱསཾ སཱསཾ དརཾ བཱལྱཾ,

ཁཱིཎམེདོ ནིགཙྪཏི.

(ཀ)

མཱཡཱཙེཏཱ ¶ མརཱིཙཱི ཙ,

སོཀོ རོགོ ཨུཔདྡཝོ;

ཁརཱ ཙ བནྡྷནཱཙེཏཱ,

མཙྩུཔཱསོ གུཧཱསཡོ.

(ཁ)

བལཝནྟོ དུབྦལཱ ཧོནྟི,

ཐཱམཝནྟོཔི ཧཱཡརེ;

ཙཀྑུམཱ ཨནྡྷཀཱ ཧོནྟི,

མཱཏུགཱམཝསཾགཏཱ.

(ག)

གུཎཝནྟོ ¶ ནིགྒུཎཱ ཧོནྟི,

པཉྙཝནྟོཔི ཧཱཡརེ;

པམུཏྟཱ བནྡྷནཱ སེནྟི,

མཱཏུགཱམཝསཾགཏཱ.

(གྷ)

ཡསཾ ¶ ཀིཏྟིཾ དྷིཏིཾ སཱུརཾ;

བཱཧུསྶཙྩཾ པཛཱནནཾ;

ཧཱཔཡནྟི པམཏྟསྶ;

ཀཊྛཔུཉྩཾཝ པཱཝཀོ.

༡༡.

སེཧི ¶ དཱརེཧི སནྟུཊྛོ,

ཝེསིཡཱསུ པདུསྶཏི;

དུསྶཏི པརདཱརེསུ,

ཏཾ པརཱབྷཝཏོ མུཁཾ.

(ཀ)

མཡཉྩ ¶ བྷརིཡཾ ནཱཏིཀྐམཱམ,

ཨམྷེཙ བྷརིཡཱ ནཱཏིཀྐམནྟི;

ཨཉྙཏྲ ཏཱཧི བྲཧྨཙརིཡཾ ཙརཱམ,

ཏསྨཱ ཧི ཨམྷཾ དཧརཱ ན མིཡྻརེ.

(ཁ)

ཨེཏཱསུ ¶ ཛཱཡརེ སུཏྟམཱསུ,

མེདྷཱཝིནོ ཧོནྟི པཧུཏཔཉྙཱ;

བཧུསྶུཏཱ ཐེརགུཎཱ ཙ ཧོནྟི,

ཏསྨཱ ཧི ཨམྷཾ དཧརཱ ན མིཡྻརེ.

༡༢.

ཨཏཱིཏཡོབྦནོ ¶ པོསོ,

ཨཱནེཏི ཏིམྦརུཏྠནིཾ;

ཏསྶ ཨིསྶཱ ན སུཔཏི,

ཏཾ པརཱབྷཝཏོ མུཁཾ.

(ཀ)

ན ¶ དུཀྑཾ ཨཧིནཱ དཊྛཾ,

ན དུཀྑཾ སཏྟིཡཱ ཧཏཾ;

ཏཉྩ དུཀྑཉྩ ཏིབྦཉྩ,

ཡཾ པསྶེ ཛིཎྞཀཾ པཏིཾ.

(ཁ)

ནཏྠི ¶ ཁིཊྚཱ ནཏྠི རཏི,

ཛིཎྞེན པཏིནཱ སཧ;

ནཏྠི ཨལླཱཔསལླཱཔོ,

ཛགྒྷིཏུཾཔི ན སོབྷཏི.

(ག)

ཡདཱ ཙ དཧརོ དཧརཱི,

མནྟཡིཾསུ རཧོགཏཱ;

སབྦེ སོཀཱ ཝིནསྶནྟི,

ཡེཀེཙི ཧདཡསྶིཏཱ.

༡༣.

ཨིཏྠིཾ ¶ སོཎྜིཾ ཝིཀིརཎིཾ,

པུརིསཾ ཝཱཔི ཏཱདིསཾ;

ཨིསྶརིཡསྨིཾ ཐཔེཏི,

ཏཾ པརཱབྷཝཏོ མུཁཾ.

༡༤.

ཨཔྤབྷོགོ ¶ མཧཱཏཎྷོ,

ཁཏྟིཡེ ཛཱཡཏེ ཀུལེ;

སོ ཙ རཛྫཾ པཏྠཡཏི,

ཏཾ པརཱབྷཝཏོ མུཁཾ.

‘‘སུཝིཛཱནོ ¶ བྷཝཾཧོཏི,

དུཝིཛཱནོ པརཱབྷཝོ’’;

ཨཔྤབྷོགོ མཧཱཏཎྷོ.

༡༥.

ཨེཏེ ¶ པརཱབྷཝེ ལོཀེ,

པཎྜིཏོ སམཝེཀྑིཡ;

ཨརིཡོ དསྶནསམྤནྣོ,

ས ལོཀཾ བྷཛཏེ སིཝཾ.

ཝསལསུཏྟ

༡.

ཀོདྷནོ ¶ ཨུཔནཱཧཱིཙ,

པཱཔམཀྑཱི ཙ ཡོ ནརོ;

ཝིཔནྣདིཊྛཱི མཱཡཱཝཱི,

ཏཾ ཛཉྙཱ ཝསལོ ཨིཏི.

༢.

ཨེཀཛཾ ¶ ཝཱ དྭིཛཾ ཝཱཔི,

ཡོདྷ པཱཎཾ ཝིཧིཾསཏི;

ཡསྶ པཱཎེ དཡཱ ནཏྠི,

ཏཾ ཛཉྙཱ ཝསལོ ཨིཏི.

༣.

ཡོ ¶ ཧནྟི ཨུཔརུནྡྷཏི,

གཱམཱནི ནིགམཱནི ཙ;

ནིགྒཱཧཀོ སམཉྙཱཏོ,

ཏཾ ཛཉྙཱ ཝསལོ ཨིཏི.

༤.

གཱམེ ¶ ཝཱ ཡདི ཝཱ རཉྙེ,

ཡཾ པརེསཾ མམཱཡིཏཾ;

ཐེཡྻཱ ཨདིནྣཾ ཨཱདེཏི,

ཏཾ ཛཉྙཱ ཝསལོ ཨིཏི.

༥.

ཡོ ¶ ཧཝེ ཨིཎམཱདཱཡ,

ཝུཙྩམཱནོ པལཱཡཏི;

ན ཧི ཏེ ཨིཎམཏྠཱིཏི,

ཏཾ ཛཉྙཱ ཝསལོ ཨིཏི.

༦.

ཡོདྷ ཀིཉྩིཀྑཀམྱཏཱ,

པཐསྨིཾ ཝཛཏཾ ཛནཾ;

ཧནྟྭཱ ཀིཉྩིཀྑ མཱདེཏི;

ཏཾ ཛཉྙཱ ཝསལོ ཨིཏི.

༧.

ཡོ ¶ ཨཏྟཧེཏུ པརཧེཏུ,

དྷནཧེཏུ ཙ ཡོ ནརོ;

སཀྑིཔུཊྛོ མུསཱབྲཱུཏི,

ཏཾ ཛཉྙཱ ཝསལོ ཨིཏི.

༨.

ཡོ ¶ ཉཱཏཱིནཾ སཁཱིནཾ ཝཱ,

དཱརེསུ པཊིདིསྶཏི;

སཧསཱ སམྤིཡེན ཝཱ,

ཏཾ ཛཉྙཱ ཝསལོ ཨིཏི.

༩.

ཡོ ¶ ༤ མཱཏརཾ པིཏརཾ ཝཱ,

ཛིཎྞཀཾ གཏཡོབྦནཾ;

པཧུསནྟོ ན བྷརཏི,

ཏཾ ཛཉྙཱ ཝསལོ ཨིཏི.

༡༠.

ཡོ ¶ མཱཏརཾ པིཏརཾ ཝཱ,

བྷཱཏརཾ བྷགིནིཾ སསྶུཾ;

ཧནྟི རོསེཏི ཝཱཙཱཡ,

ཏཾ ཛཉྙཱ ཝསལོ ཨིཏི.

༡༡.

ཡོ ¶ ཨཏྠཾ པུཙྪིཏོ སནྟོ,

ཨནཏྠ མནུསཱསཏི;

པཊིཙྪནྣེན མནྟེཏི,

ཏཾ ཛཉྙཱ ཝསལོ ཨིཏི.

༡༢.

ཡོ ¶ ཀཏྭཱ པཱཔཀཾ ཀམྨཾ,

མཱམཾ ཛཉྙཱཏི ཨིཙྪཏི;

ཡོ པཊིཙྪནྣཀམྨནྟོ,

ཏཾ ཛཉྙཱ ཝསལོ ཨིཏི.

༡༣.

ཡོ ¶ ཝེ པརཀུལཾ གནྟྭཱ,

བྷུཏྭཱན སུཙིབྷོཛནཾ;

ཨཱགཏཾ ནཔྤཊིཔཱུཛེཏི,

ཏཾ ཛཉྙཱ ཝསལོ ཨིཏི.

༡༤.

ཡོ ¶ སམཎཾ ཝཱ བྲཱཧྨཎཾ,

ཨཉྙཾ ཝཱཔི ཝཎིབྦཀཾ;

མུསཱཝཱདེན ཝཉྩེཏི,

ཏཾ ཛཉྙཱ ཝསལོ ཨིཏི.

༡༥.

ཡོ སམཎཾ ཝཱ བྲཱཧྨཎཾ,

བྷཏྟཀཱལེ ཨུཔཊྛིཏཾ;

རོསེཏི ཝཱ ན ཙ དེཏི,

ཏཾ ཛཉྙཱ ཝསལོ ཨིཏི.

༡༦.

ཨསནྟཾ ¶ ཡོདྷ པབྲཱུཏི,

མོཧེན པལིགུཎྛིཏོ;

ཀིཉྩནཾ ནིཛིགཱིསཱནོ,

ཏཾ ཛཉྙཱ ཝསལོ ཨིཏི.

༡༧.

ཡོཙཏྟཱནཾ ¶ སམུཀྐཾསེ,

པརེཙ མཝཛཱནཱཏི;

ནིཧཱིནོ སེན མཱནེན,

ཏཾ ཛཉྙཱ ཝསལོ ཨིཏི.

༡༨.

རོསཀོ ¶ ཀདརཱིཡོ ཙ,

པཱཔིཙྪོ མཙྪརཱི སཋོ;

ཨཧིརཱིཀོ ཨནོཏྟཔྤཱི,

ཏཾ ཛཉྙཱ ཝསལོ ཨིཏི.

༡༩.

ཡོ ¶ བུདྡྷཾ པརིབྷཱསཏི,

ཨཐཝཱ ཏསྶ སཱཝཀཾ;

པརིབྦཛཾ གཧཊྛཾ ཝཱ,

ཏཾ ཛཉྙཱ ཝསལོ ཨིཏི.

ཨཊྛཧི ¶ བྷིཀྑཝེ ཨངྒེཧི སམྤནྣཱགཏསྶ ཨུཔཱསཀསྶ པཏྟོ ནིཀུཛྫིཏབྦོ. བྷིཀྑཱུནཾ ཨལཱབྷཱཡ པརིསཀྐཏི, བྷིཀྑཱུནཾ ཨནཏྠཱཡ པརིསཀྐཏི, བྷིཀྑཱུནཾ ཨནཱཝཱསཱཡ པརིསཀྐཏི, བྷིཀྑཱུནཾ ཨཀྐོསཏི པརིབྷཱསཏི, བྷིཀྑཱུབྷིཀྑཱུཧི བྷེདེཏི, བུདྡྷསྶ ཨཝཎྞཾ བྷཱསཏི, དྷམྨསྶ ཨཝཎྞཾ བྷཱསཏི, སངྒྷསྶ ཨཝཎྞཾ བྷཱསཏི, ཨནུཛཱནཱམི བྷིཀྑཝེ ཨིམེཧི ཨཊྛཧི ཨངྒེཧི སམྤནྣཱགཏསྶ ཨུཔཱསཀསྶ པཏྟཾ ནིཀུཛྫིཏུཾ.

༢༠.

ཡོ ¶ ཨནརཧཾ སནྟོ,

ཨརཧཱཏི པཊིཛཱནཱཏི;

ཙོརོ སབྲཧྨཀེ ལོཀེ,

ཏཾ ཛཉྙཱ ཝསལོ ཨིཏི.

༢༡.

ཨེཏེ ¶ ཁོ ཝསལཱ ཝུཏྟཱ,

མཡཱ ཡེ ཏེ པཀཱསིཏཱ;

ན ཛཙྩཱ ཝསལོ ཧོཏི,

ན ཛཙྩཱ ཧོཏི བྲཱཧྨཎོ.

༢༢.

ཀམྨུནཱ ཝསལོ ཧོཏི,

ཀམྨུནཱ ཧོཏི བྲཱཧྨཎོ.

༢༣.

ཏདམིནཱཔི ¶ ཛཱནཱཐ,

ཡཐཱཧེཏཾ ནིདསྶནཾ;

ཙཎྜཱལཔུཏྟོ སོཔཱཀོ,

མཱཏངྒོ ཨིཏི ཝིསྶུཏོ.

༢༤.

སོ ¶ ཡསཾ པརམཾ པཏྟོ,

མཱཏངྒོ ཡཾ སུདུལླབྷཾ;

ཨཱགཙྪུཾ ཏསྶུཔཊྛཱནཾ,

ཁཏྟིཡཱ བྲཱཧྨཎཱ བཧཱུ.

༢༥.

སོ ¶ དེཝཡཱནཾ ཨབྷིརུཡ྄ཧ,

ཝིརཛཾ སོ མཧཱཔཐཾ;

ཀཱམརཱགཾ ཝིརཱཛེཏྭཱ,

བྲཧྨལོཀཱུཔགོ ཨཧུ.

གིརིཾ ¶ ནཁེན ཁཎསི,

ཨཡོ དནྟེབྷི ཁཱདསི;

ཛཱཏཝེདཾ པདཧསི,

ཡོ ཨིསིཾ པརིབྷཱསཏི.

ཨཱཝེལིཏཾ ¶ པིཊྛིཏོ ཨུཏྟམངྒཾ,

བཱཧུཾ པསཱརེཏི ཨཀམྤཎེཡྻཾ;

སེཏཱནི ཨཀྑཱིནི ཡཐཱ མཏསྶ,

ཀོ མེ ཨིམཾ པུཏྟམཀཱསི ཨེཝཾ.