📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

སཱུརསྶཏཱིནཱིཏི

པཋམོ བྷཱགོ

པཎཱམགཱཐཱ

༡.

མུཁམྷཱ བྷགཝནྟསྶ,

སུགནྡྷཀམལཱ སུབྷཱ;

སཉྫཱཏཾ ཨུཏྟམཾ ཝཱཎིཾ,

ཝནྡཱམི ཝིཏྟམཱནསཱ.

༢.

སམཛ྄ཛྷིཊྛོ རཙིསྶཱམི,

དཀྑེན རཱཛམནྟིནཱ;

ནཱམེན སནྟེན,

ནཱིཏིཾ ལོཀཧིཏཱཝཧཾ;

སཱལངྐཱརཾ སོཔདེསཾ,

ནཱམེནཱཧཾ སྭརསྶཏིཾ.

༣.

པེཀྑནྟྭིམཾ ནཱིཏིཾ སནྟཱ,

མཉྫཱུསརུཀྑསནྣིབྷཾ;

ནཱནོཔདེསསཾཔུཎྞཾ,

སདཏྠཀུསལཱ སདཱ.

སཱུརསྶཏཱིནཱིཏི

༡.

ཀཏཉྙུཏཱ ཙ སཙྩཉྩ,

ལོཀསཱརཱ ཧི ཏེ དུཝེ;

ལོཀཱཔི ཏེཧི ཏིཊྛནྟི,

རཊྛཾ ཨཀཾསུ ཨིསྶརཾ.

༢.

ཀཱཀཱཙ དུཛྫནཱ ལོཀེ,

མལཱིབྷཱུཏཱཝ སབྦདཱ;

ཨིཊྛཾ གུཎཾ ནཱསཡནྟི,

ཏེ ཝེ ལོཀསྶ ཝེརིནོ.

མིགཱནཾ སིངྒཱལོ ཨནྟོ,

པཀྑཱིནཾ པན ཝཱཡསོ.

ཨཀཱརཎཝེརཱི ཧོནྟི,

མཙྪཱནཾ དྷཱིཝརཱ ཡཐཱ;

གུཎཱིནཾ སཛྫནཱནཉྩ,

དུཛྫནཱ ནིཙྩཝེརིནོ.

༣.

སིརིཾ བྷོནྟོ སུཔོསེཐ,

སིརི མཱུལཱ ཧི སམྤདཱ;

སིརིཡ ཨིདྷ ཛོཏནྟི,

སིརཱི སཱ སབྦསིདྡྷིཀཱ.

༤.

མུསཱ ཏམོཀརཱ ལོཀེ,

སཙྩཾ མཱིདིཏིཀཱརཀཾ;

མུསཱཏམེན དུཀྑནྟི,

སཙྩཱབྷཱཡ སུཁནྟིཝེ.

སུཝིཛཱནཾ སིངྒཱལཱནཾ,

སཀུཎཱནཉྩ ཝསྶིཏཾ;

མནུསྶཝསྶིཏཾ རཱཛ,

དུབྦིཛཱནཏརཾ ཏཏོ.

༥.

ཀཔྤགྒིསདིསཱ ཨིསྶཱ,

ཛྷཱཔེཏི སབྦསམྤདཾ;

མུདིཏཱ ཀཔྤམེགྷོཝ,

རོཔེཏི སབྦསམྤདཾ.

༦.

ཡཐཱ ཨསནྠིརཱ ཐམྦྷཱ,

ཐུསརཱསིམྷི ཨུསྶིཏཱ;

ཏཐེཝ ཀཔིཙིཏྟཱནཾ,

ཀམྨནྟཱ ཙཉྩལངྒཏཱ.

ཧལིདྡིརཱགཾ ཀཔིཙིཏྟཾ;

པུརིསཾ རཱགཝིརཱགིནཾ,

ཨེདིསཾ ཏཱཏ མཱསེཝི;

ནིམྨནུསྶམྤི ཙེ སིཡཱ.

༧. [ཀ]

པུཔྥཙུམྦི ཙིཏྟཔཏྟཱི,

སཀཝཎྞེན མཛྫིཏོ;

ཝིཀྐམཱི པུཔྥཏོ པུཔྥཾ,

ནསྶཱགཱརཾ ན སངྒམོ.

[ཁ]

ཀིཔྤིལིཀཱ དུབྦཎྞཱཔི,

སམགྒཱཙ པརཀྐམཱ;

མཱ ཧོཐ པུཔྥཙུམྦཱིཝ,

ཧོཐ ཝོ པཙིཀཱ ཡཐཱ.

༡.

ཡེ མརནྟི ཀཱིལ༹ནྟཱ ཏེ,

སྭཱནཱ ཨཉྙོཉྙམོདིཏཱ;

དིསྭཱན ཚཊྚིཏཾ བྷཏྟཾ,

སཱིགྷཝེརཱི ཝིཧིཾསརེ.

༢.

ཏཐེཀེཔི ཛནཱ དཱནི,

སམགྒཱ ཉྙོཉྙམོདིཏཱ;

དྷནཧེཏུ ཝིཧིཾསནྟི,

དྷཱིརཏྠུ སཱིགྷཝེརིཀཱ.

༩.

ཝསནྟེ ཧེམནྟེ གིམྷེ;

ནེཝ ཏཱལཱ ཝིསེསིནོ;

ཐིརཙིཏྟཱ ཛནཱ སནྟཱ;

སུཁདུཀྑེསུ ནིཙྩལཱ.

༡༠.

ཡཐཱ པཝཊྚམཱནམྷི,

སུཊྛུ ཏིཊྛཏི གེཎྛུཀེ;

ཨཔྤཝཊྚེ བྷཱུམྱཾ སེཏི,

ཏཐེཝ གེཎྛུཀོ ཛནོ.

༡༡.

ཨགྒྷཱཔེཏུཾ ནསཀྐོནྟི,

ཀཱལཉྷི ཀཱལིཀཱ ཛནཱ;

ཝཛིརཱདིཉྩ སཀྐོནྟི,

ཏེན ཀཱལོ ཨནགྒྷིཀོ.

༡༢. [ཀ]

ཨསནོ ཧི དཱིགྷདྡྷཱནོ,

སཱརསཱརོ སུགནྡྷིཀོ;

ནིགྒནྡྷོ ཏྭེཝ ནིསྶཱརོ,

དཱིགྷདྡྷཱནོཔི སིམྦལཱི.

[ཁ]

ཏཐེཝེཀེ ཛནཱ ལོཀེ,

དཱིགྷདྡྷཱནཱ སུསཱརཀཱ;

ནིསྶཱརཱ ཀེཙི ཕེགྒཱུཝ,

དཱིགྷདྡྷཱནཱཔི གོཡཐཱ.

༡༣.

ཨུཔཀཱརོ ཙཱཔཀཱརོ,

ཡསྨིཾ གཙྪཏི ནཊྛཏཾ;

པཱསཱཎཧདཡསྶསྶ,

ཛཱིཝཏཱིཏྱཱ བྷིདྷཱམུདྷཱ.

པསཱདོ ནིཔྥལོ ཡསྶ,

ཀོཔོཙཱཔི ནིརཏྠཀོ;

ན ཏཾ སངྒནྟུ མིཙྪེཡྻ,

ཐཱིཔུམཱཝ ནཔུཾསཀཾ.

༡༤.

ཨུཔཙཱརོ ཧི ཀཱཏབྦོ,

ན ཡཱཝ སོཧདཾ བྷཝེ;

ཨུཔཙཱརོ སུམིཏྟམྷི,

མཱཡཱ ཙ ཧོཏི ཀོཊིལཾ.

༡༥.

ཀམེན ཨགྒཏོ ཨུཙྪུ,

རསོ སཱདུཏརོ ཡཐཱ;

ཏཐེཝ སུམིཏྟོ ལོཀེ,

དུམྨིཏྟོ པན ནེདིསོ.

༡༦.

སོཀཱརཱཏི པརིཏྟཱཎཾ,

ཝིསྶཱསཔཱིཏིབྷཱཛནཾ;

རཏནཱབྷིརཏནཾ ཨིཙྪེ,

སུམིཏྟཾ ཨཀྑརཏྟཡཾ.

༡༧.

དམྤཏཱིནཾ སུམིཏྟཱནཾ,

མུཁཾ ཨཉྙོཉྙདཔྤཎཾ,

སུཁེ སུཁཾ དུཀྑེ དུཀྑཾ,

པཊིཙྪཱཡེཝ དཔྤཎེ.

ཀཐཾ ནུ ཏཱསཾ ཧདཡཾ,

སུཁརཱཝཏ ཨིཏྠིཡོ;

ཡཱསཱམིཀེ དུཀྑིཏམྷི,

སུཁམིཙྪནྟི ཨཏྟནོ.

༡༨.

ནིཝཱཏཉྩ པུརེ ཀཏྭཱ,

མཱནཾ ཀཏྭཱན པཙྪཏོ;

སཀཏྠཾ དྷཱརཡེ དྷཱིརོ,

ཨཏྠབྷཉྫོ ཧི མུལ༹ྷཏཱ.

༡༩.

པུརེཙཱརཾ སཏིཾ ཀཏྭཱ,

སདྡྷཾ ཀརེཡྻ པཙྪཏོ;

ཏུརཾ ན སདྡཧེ དྷཱིརོ,

སཱིགྷསདྡྷོ ཧི མནྡཀོ.

༢༠.

ཝནེ ༠.༠༠༩༩ བཧཱུནི ཀཊྛཱནི;

དུལླབྷཾ རཏྟཙནྡནཾ;

ཏཐཱ ཛནཱ བཧཱུ ལོཀེ;

པུམཱ ཛཉྙོ སུདུལླབྷོ.

༢༡.

ཏིཎཀཊྛཔལཱསེཧི;

སུཀྑེཧི དཡ྄ཧཏེ ཝནཾ;

ཨེཏཱདཱིཧི ཨསཱརེཧི;

ལོཀོ ཛནེཧི དཡ྄ཧཏེ.

༢༢.

ཨནྟོཝསྶེ ཏིམཱསམྷི,

པུཉྙཀམྨེན མོདིཏཱ;

སུཁཾ ཝསིཾསུ པོརཱཎཱ,

བུདྡྷསཱསནམཱམཀཱ.

༢༣.

མིགམདེན ཨེཀེན,

ཏཾ ཝནཾ སུརབྷིགནྡྷིཀཾ;

ཏཐཱ ཛནེན ཏཾ རཊྛཾ,

གུཎིནཱ ཧི སིརཱིམཏཱ.

སརཱིརཾ ཁཎཝིདྡྷཾསཱི,

ཀཔྤནྟཊྛཱཡིནོ གུཎཱ.

༢༤.

ཁརཱནཾ སཱིཧབྱགྒྷཱནཾ,

སངྒམོ ནོ ཧིསབྦདཱ;

ཏཐེཝ བྱགྒྷཙིཏྟཱནཾ,

སཛཱཏིཀཱ ཁཡོནཏཱ.

༢༥.

སཀ སཱདྷུཔི ནོ སཱདྷཱུ,

ཡོ ཙེཉྙ དུཊྛཀཱརཀོ;

བཧཱུནཾ སཱདྷཱུ པཱཡེན,

ས ཝེ སཱདྷཱུཏི ཝུཙྩཏེ.

༢༦.

བཧཱུདཀེ སམུདྡེཔི,

ཛལཾ ནཏྠེཝ པཱཏཝེ;

ཁུདྡཀེ ཁཏཀཱུཔམྷི,

སཱདུཾ ཨཏྠི བཧུཾ དཀཾ.

༢༧.

མཱ སཱིགྷཾ ཝིཝརེཡྻཱཐ,

ནིནྡིཏུཉྩ པསཾསིཏུཾ;

མུཁཉྷི ཝོ ཀཐཱདྭཱརཾ,

ནིརུནྡྷེཡྻཱཐ སབྦདཱ.

༢༨.

མཱ སཱིགྷཾ ཝིཝརེཡྻཱཐ,

ཙཀྑུཾ ཝོ དསྶིཏུཾ པིཡཾ;

སཎིཀཉྷི པིཡལཱབྷཾ,

དྷནལཱབྷཾ ཏུརཾ ཀརེ.

༢༩.

ཨནཱརམྦྷོ ཧི ཀམྨཱནཾ,

པཋམཾ བུདྡྷིལཀྑཎཾ;

ནིཊྛངྒཏཾ ཨཱརདྡྷསྶ,

དུཏིཡཾ བུདྡྷིལཀྑཎཾ.

ཨསམེཀྑིཏཀམྨནྟཾ,

ཏུརིཏཱབྷིནིཔཱཏིནཾ;

སཱནི ཀམྨཱནི ཏཔྤེནྟི,

ཨུཎྷཾ ཝཛ྄ཛྷོཧཊཾ མུཁེ.

༣༠.

ཨཕལཱནི དུརནྟཱནི,

ཛནཏཱ ནིནྡིཏཱནི ཙ;

ཨསཀྱཱནི ཙ ཀམྨཱནི,

ནཱརབྷེཐ ཝིཙཀྑཎོ.

༣༡.

ཨཏིཝིརོདྷབྷཱིཏཱནཾ,

སངྐིཏཱནཾ པདེ པདེ;

པརཔྤཝཱདཏཱསཱནཾ,

དཱུརཏོ ཡནྟི སམྤདཱ.

སདྡམཏྟཾ ན བྷེཏབྦཾ,

ལོཀོ སདྡསྶ གོཙརོ;

ཡོ ཙ སདྡཔརིཏྟཱསོ,

ཝནེ བྷནྟམིགོ ཧི སོ.

༣༢.

དྭིནྣཾ ཏཎྜུལཐཱུསཱནཾ,

ཝིསེསོ སུཊྛུ ཁཱཡཏི;

རནྡྷིཏོཔི སིནིདྡྷོ ནོ,

ཐུསོ ཝིརསཕཱརུསོ;

ཏཎྜུལཾ སིནིདྡྷཾ རསཾ,

ཨེཝཾ ལོཀེཔི ཉཱཡཏེ.

༣༣.

ཨེརཎྜཾ ནིསྶིཏཱ ཝལླི,

རུཧཏེ ཀིཾ ཡཐཱབལཾ;

མཧཱསཱལཾ སུནིསྶཱཡ,

རུཧཏེ བྲཧཏཾ གཏཱ.

༣༤.

མེཏྟཱ ཧི སཱིམསམྦྷེདཱ,

པཀྑཔཱཏ ཝིགྷཱཏིཀཱ;

པཀྑཔཱཏེན དུཀྑནྟི,

ནིཔྤཀྑོ ཝསཏེ སུཁཾ.

༣༥.

ནརཱ པཉྙཱ ཙ ལངྐཱརཱ,

ཡཐཱཋཱནེ ནིཡུཛྫརེ;

ནོ ཧི ཙཱུལཱ༹མཎི པཱདེ,

པཱདུཀཱ ཙ སིརོཔརི.

ཨུཀྐུཊྛེ སཱུར མིཙྪནྟི;

མནྟཱིསུ ཨཀུཏཱུཧལཾ;

ཝིཡཉྩ ཨནྣཔཱནམྷི;

ཨཏྠེ ཛཱཏེ ཙ པཎྜིཏཾ.

༣༦.

པམཱདོ ཧི ཏམོ ལོཀེ,

ཀཱལོ ཙོརོ བྷཡཱནཀོ;

ཀཱཡགེཧཾ བཧུཚིདྡཾ,

ཀཱལཙོརསྶ ཙོརིཏཾ.

༣༧.

ཙཉྩལོ ཀཱལདཱསོ ཧི,

དྷཱིཏིམཱ ཀཱལཨིསྶརོ;

ཀཱལིསྶརོ རཊྛིསྶརཾ,

ཨཏིཝཏྟཏི སབྦསོ.

༣༨.

ཝིལུཔྤནྟི ༨ དྷནཾ ཨེཀེ,

ཀཱལམེཀེ ཨནེཀྑཀཱ;

ཏེསུ ཀཱལཝིལོཔཱཝ,

བྷཡཱནཀཱ ཏིཀཀྑལཱ༹.

༣༩.

རཉྙཱ རཊྛཧིཏཾ ཀཏྟཱ,

རཉྙོ ཧིཏཾ ཛནེཧི ཝེ;

དེསྶོ ཨཏྟཧིཏཾ དསྶཱི,

གཱརཡ྄ཧོ ཀིནྣུ ཀཱརཀོ.

ཨཏྟདཏྠཾ པརཏྠེན;

བཧུནཱཔི ན ཧཱཔཡེ.

༤༠.

ཡསྶ ཨུཔཀཱརོ དིནྣོ,

ཨུཔཀཱརཾ དདེ པུན;

ཏཏོ པཀཱརཾ ནིཙྪེཡྻ,

ཀཏཉྙཱུ དུལླབྷོ ཨིདྷ.

སཙྩཾ ཀིརེཝ མཱཧཾསུ,

ནརཱ ཨེཀཙྩིཡཱ ཨིདྷ;

ཀཊྛཾ ནིཔླཝིཏཾ སེཡྻོ,

ནཏྭེཝེ ཀཙྩིཡོ ནརོ.

༤༡.

ཀཱརུཀོ སཀཔཉྙཱཡ,

མཧགྒྷཾ དཱརུཀཾ ཀརེ;

ཏཐཱ ཛནོཔི ཨཏྟཱནཾ,

མཧགྒྷོ ལོཀམཱནིཏོ.

༤༢.

ཨཔྤགྒྷོ ཧི ཨཡོ ཧེམཾ,

མཧགྒྷཾ ཚིནྡཏེ ཡཐཱ;

ནིགྒུཎོ སགུཎཾ ལོཀེ,

ཨལཀྑཱིཙ སིརིཾ ཏཐཱ.

སཱུརསྶཏཱིནཱིཏི

དུཏིཡོ བྷཱགོ

༡.

དྷནསྶ དུབྦིདྷཾ ཀིཙྩཾ,

པཱཔེཏི ཨུཎྞཏཾ དྷནིཾ;

ཨདྷནིཾ ཨོཎཏཾ ལོཀེ,

སཉྩིནེ ཏེན ཏཾ དྷནཾ.

༢.

ཝཊྚཏེ སཏཏཾ སཱིགྷཾ,

ཀཱལཙཀྐཾ ཨཝཱརིཏཾ;

ཏེན གྷཊཱི དིནཾ མཱསོ,

ཝསྶོ བྷཝཏྱ ཙཱིརཏོ.

༣.

སཏྟུནཱ ན ཧི སནྡྷེཡྻ,

ཨེཀདཱ སོ བྷཡཾ ཀརོ;

སུཏཏྟམཔི པཱནཱིཡཾ,

སམཡཏེ ནུ པཱཝཀཾ.

༤.

ཝིཛཧཾ པཀཏིཾ ཡོ ཧི,

ཝིཀཏིཾ པུན གཙྪཏི;

སབྷཱཝེན ཨཱཀཱརེན,

ཝིཔྤལླཱསཾ ས གཙྪཏི;

སཾསུམཱར གཏཱ གོདྷཱ,

ཡཐཱ ཐཱི པུམཝེསིཀཱ.

༥.

པཀྑཾ ལདྡྷཱན ཨུཌྜེནྟི,

ཨུཔཙིཀཱ ཧི ཝམྨིཀཱ;

ནིཀྑནྟཱ མརཎཾ ཡནྟི,

ཨུཔྤཏཱ ནིཔྤཏཾ གཏཱ.

༦.

སབྦཾཔིཡསྶ དཛྫེཡྻ,

ནིསྶེསཾ པིཡམཱནསཾ;

སདྡྷཱཙིཏྟཾ ཏུ ནོ ཝིཉྙཱུ,

སདྡྷཱཡིཀོ པཀྑལིཏོ.

༧.

སཀྐོཏི ལངྒྷིཏུཾ བྱཱམཾ,

མཧུསྶཱཧེན ཡོ ཧི སོ;

ཏདཌྜྷཾ ཨནུསྶཱཧེན,

ནོསྶཱཧོ ཏེསུ ཐོམིཏོ;

མཧུསྶཱཧོ དུཀྑོ ལོཀེ,

ཨནུསྶཱཧོ སདཱ སུཁོ.

༨.

དུཀྑམཾ ཨཀྑམནྟོ ཡོ,

པིཊྛིཀཱརཱིཙ དུཀྐརཾ,

ཀདཱ ལབྷེཡྻ སོ ལོཀེ,

སུཁམཾ སུཀརཾ མུདྷཱ;

པཙྩཀྑཉྷི སོ ཀརེཡྻ,

དུཀྑམཉྩཱཔི དུཀྐརཾ.

༩.

ཨནགྒྷོ མནུསྶོ ལོཀེ,

ཏོསནཱཔོསནཱདིནཱ;

ཏེན སོ མཧགྒྷཾ ཀམྨཾ,

ཀརེ ལོཀཧིཏཱཡུཏཾ.

༡༠.

ཝཱཏེན ནཔྤབྷིཛྫནྟི,

ནིནྣཱ ཝེལཱུ༹ ཀསཱ ནལཱ༹;

ཡཐཱཝཱཏཾ ནགཙྪནྟི,

ཏཐཱ ཙརེ ཛནེ ཀདཱ.

༡༡.

པུརཏོ ཙ པཙྪཏོ ཙེ,

ནིསྶཡོ ནཏྠི པསྶཏོ;

ཨདྷིཀཾ ཝཱིརིཡཾ ཧོཏི,

ཨཏྟནཱཐོ ཏདཱ བྷཝེ.

༡༢.

ཁཎཾ ཨཱཁུབིལཾ སཱིཧོ,

པཱསཱཎསཀལཱཀུལཾ;

པཔྤོཏི ནཁབྷངྒཾཝཱ,

ཕལཾཝཱ མཱུསིཀོ བྷཝེ.

༡༣.

མགྒམུལ༹ྷཱ ཛནཱ ཨནྡྷཱ,

ཨམགྒཱ མགྒསཉྙིནོ;

ཏཐེཝ དུཔྤཉྙཱ མུལ༹ྷཱ,

ཏཐཏྠཾ ནཱཝ བུཛ྄ཛྷརེ.

༡༤.

པིཡརཱུཔཾ ཝཱིརརཱུཔཾ,

དུཝིདྷཱ རཱུཔསམྤདཱ,

ནཱརིཾ ཨིཙྪེ པིཡརཱུཔིཾ,

པུརིསཾ ཝཱིརརཱུཔཀཾ.

༡༥.

པཛྫལནྟི ཧི ཁཛྫོཏཱ,

པཀྑཙཱལནཀམྨུནཱ;

ཀུསིཏཱ སུཔིཏཱ ནེཏེ,

ཏཐཱ ཛནཱཔི ཀམྨིཀཱ.

༡༦.

ཀུམྨསངྐོཙམོཔམྱ,

ནིགྒཧམཔི སཾཁམེ;

པཏྟཀཱལེ ཏུ ནཱིཏིཉྙོ,

ཀཎྷསཔྤོཝ ཨུཊྛཧེ.

༡༧.

བྷཀྑསེསཾ ནཁཱདནྟི,

སཱིཧཱ ཨུནྣཏཙེཏསཱ;

པརཾཔི ནཔཎཱམེནྟི,

ཝུདྡྷིཀཱམཱ ཏཐཱ ཙརེ.

༡༨.

ན ཝ ཝསྶོ སམུཔྤནྣོ,

ཁཱིཎོ པུརཱཎཧཱཡནོ;

ནཝཝསྶེ ནཝཱ མེཏྟཱ,

བྷཱཝིཏབྦཱ ཧིཏེསིནཱ.

༡༩.

སནྟཱཔཡནྟི ཀམཡཱཔྱབྷུཛཾ ན རོགཱ,

དུམྨནྟིནཾ ཀམུཔཡནྟི ན ནཱིཏིདོསཱ;

ཀཾ སྲཱི ན མཱནཡཏི ཀཾ ན ཙ ཧནྟི མཙྩུ,

ཀཾ ཐཱིཀཏཱ ན ཝིསཡཱ པརིཔཱིལ༹ཡནྟི.

(ཝསནྟཏིལཀཱགཱཐཱ.)

༢༠.

(ཀ) བྱཱམམཏྟེན དཎྜེན,

ཡོལུམྦྱ ཨུདཀཾ མིནེ;

ཨགམྦྷཱིརཾ གམྦྷཱིརཾཝཱ,

ཨགཱདྷེ མཉྙི གམྦྷཱིརཾ.

(ཁ)

ཏཐཱ མནྡོ སཉྙཱཎེན,

ཨགཱདྷེ མཉྙི པཎྜིཏཾ;

སམཱསམཾ ན ཛཱནཱཏི,

བཧྭཔྤཾ ཏིཀྑམནྡཏཾ.

༢༡.

དུཊྛཀམྨེ སངྒམནྟི,

ཚེཀཀམྨེ ཙ ནོ ཨིདྷ;

མཙྩུཾ ཝཧནྟི སཱིསེན,

ཏེ མུལ༹ྷཱ མུལ༹ྷསངྒམཱ.

༢༢.

དུཝིདྷོ སངྒམོ ལོཀེ,

ཨུཛུཀོ ཀུཊིལོ བྷཝེ;

ཨུཛུཀོཝ པསཾསེཡྻོ,

ནོཧྱཉྙོ སཱཛསངྒམོ.

ཏེ ཨིམིནཱ ཨུཔཱཡེན སམགྒཱ སམྨོདམཱནཱ མཧཱ བྷིཏྟིཔིཊྛིཀཱཡ ཝསནྟི. (མཧོསདྷཛཱཏཀ ཨཊྛཀཐཱ)

༢༣.

ཡཱུཐིཀཱ པུཔྥཏེ ནོཧི,

སིཉྩིཏཱཔི པུནཔྤུནཾ;

པུཔྥཏེ སམྤཏྟེ ཀཱལེ,

ཨེཝཾ དྷཱརེཐ ཝཱིརིཡཾ.

༢༤.

དྷནུཙྩཡོ དྷནཀྑེཔོ,

དུཝིདྷཱ ཧི དྷནཱཀཏི;

དྷནུཙྩཡེ ནཡོ ཨཏྠི,

དྷནཀྑེཔམྷི ནོ ཨིདྷ.

༢༥.

ཨམཱཏཱ པིཏརསཾ ཝཌྜྷཾ,

ཛཱུཏཀཱརཉྩ ཙཉྩལཾ;

ནཱལཔེཡྻ ཝིསེསཉྙཱུ,

ཡདིཙྪེ སིདྡྷི མཏྟནོ.

ཧལིདྡིརཱགཾ ཀཔིཙིཏྟཾ,

པུརིསཾ རཱགཝིརཱགིནཾ;

ཨེདིསཾ ཏཱཏ མཱསེཝི,

ནིམྨནུསྶཾཔི ཙེ སིཡཱ.

༢༦.

གུཎཱ གུཎཉྙཱུསུ གུཎཱ བྷཝནྟི,

ཏེ ནིགྒུཎཾ པཏྭཱ བྷཝནྟི དོསཱ;

ཨཱསཱདྱཏོཡཱ པབྷཝནྟི ནཛྫོ,

སམུདྲམཱསཛྫ བྷཝནྟྱཔེཡྻཱ.

(ཨུཔཛཱཏིགཱཐཱ)

༢༧.

སིལཱརཱུཔཾ ནིམྨིནནྟི,

ཀོཊྚེཏྭཱན པུནཔྤུནཾ;

ཀོཊྚཀོཝ ཏཐཱ བཱལཱ,

སཱདྷུཾ ཨོཝཛྫ ནིམྨིཏཱ.

ཙཱཎཀྱནཱིཏིལཱ གཱཐཱ

ལཱལནེ བཧཝོ དོསཱ,

ཏཱལ༹ནེ བཧཝོ གུཎཱ;

ཏསྨཱ པུཏྟཉྩ སིསྶཉྩ,

ཏཱལ༹ཡེ ན ཙ ལཱལཡེ.

༢༨.

ཨཏཱིཏསྶ ཧི མིཏྟསྶ,

ཡོ ཙེ དོསཾ པཀཱསཡེ;

སོ ཧཝེ པཙྩུཔྤནྣསྶ,

དོསཾ བྷཱསེཏི ཉཱཡཏི.

༢༩.

ལཏཱཝིཡ སེཝཀཱ ཏེ,

ཡེ ནིསྶཡཾ པལམྦརེ;

ནིསྶཡསྶ ཝིནཱསེན,

བྷཱུམྱཾ སེནྟི ཨནཱཐཀཱ.

༣༠.

དོསསིངྒེཧི ཝིཛ྄ཛྷནྟོ,

མཱནཁཱུརེཧི ཨཀྐམཾ;

བྷཡཾ ཀརོཏི ལོཀམྷི,

གོཝ བཱལོ ཝིཧིཾསཀོ.

༣༡.

ཨཱདོ ཨུཔརི ལོཀོཡཾ,

ཨུཛུལེཁཱཡ ཏིཊྛཏི;

མུསཱཝཱཏེཧི ཏཾལོཀཾ,

ནིཔཱཏེསི ཨནཛྫཝཾ.

༣༢.

སུགྷཊཾ ཀུམྦྷཀཱརེན,

ནཱརཧོ པརིབྷུཉྫིཏུཾ;

ཏཐཱུཔམཱཡ ཝེཀྑེཡྻ,

སཀམྨཔརཀམྨནི.

༣༣.

ཨནནྟརཾསཱི སཱུརོཔི,

ནསཀྐོཏི གྷནཾ ཏམཾ;

ཝིཛ྄ཛྷིཏུཾ རཾསིཡཱ ལོཀེ,

ཏཐཱ མདནམོཧིཏཱ;

ནསཀྐོནྟི མདཾ བྷེཏྭཱ,

པཉྙཱབྷཱཡ པབྷཱསིཏུཾ.

༣༤.

ཁེདཝེརཾ དལིདྡམྷི,

བྷོགིམྷི རོགུཔདྡཝཾ;

དེསྶཝེརཉྩ ཨཱཎིམྷི,

པསྶེ ལོཀསྶ ཝེརིཏཾ.

༣༥.

སཾལདྡྷེན སུབྷོགེན,

ཛཱིཝཾ སུདྡྷཾ ཀརེ ནིཛཾ;

སེཊྛོ སོ ཏེན ཛཱིཝེན,

ཛེགུཙྪོ མལཛཱིཝིཀོ.

༣༦.

ཝཛིར པུཔྥརཱགཱནཾ,

ཝིསེསཾ ཡོ ནབུཛ྄ཛྷཏི;

ཀཐཉྷི སོ ཝིཀྐཱིཎེཡྻ,

ཀཱིཎེཡྻ ཝཱ ཡཐཱཏཐཾ.

༣༧.

ཀིཔྤཱིལི ཀོཔི ཙིནྟེཏྭཱ,

པབྦཏཾ བྷེཏྟུ མུསྶཧཾ;

ཨབལཱ ཏནུམཛ྄ཛྷཏྟཱ,

ཙིནྟཱ ཧསྱཱཝ སཱ མུདྷཱ.

༣༨.

ཛཱཏམཏྟཾ ན ཡོ སཏྟུཾ,

རོགཉྩཱུཔསམཾ ནཡེ;

མཧཱབལོཔི ཏེནེཝ,

ཝུདྡྷིཾཔཏྭཱ ས ཧཉྙཏེ.

༣༩.

སཛཱིཝམཾསབྷཀྑེཧི,

སདཱཋཱིཧི མུཁེཧི བྷོ;

བིལཱ༹རབྱགྒྷསཱིཧཱནཾ,

ནིཧཱིནཱནི ཨནེཀདྷཱ;

ཏིཀྑཱནི ཁརཝཱདཱནི,

མནུསྶཱནཾ མུཁཱནི ཝེ.

༤༠.

ཝིལུཔྤནྟཱ ཝིདྷཱཝནྟི,

སཛཱིཝཝུཏྟིཀམྨུནཱ;

ཛནཱ ཏེན ཝིཧཉྙནྟི,

ཙརནྟི དྷམྨཝེམུཁཱ.

༤༡.

སུལབྷཾ ལོཀིཡཾ ལོཀེ,

སཱསནཱིཡཾཝ དུལླབྷཾ;

དུལླབྷཾ ཏཾ ཝམཉྙནྟོ,

ཨེསོ བཱལཏམོ བྷཝེ.

༤༢.

ཡོ པཏིཏྠ ཨགྱཱཝཱཊཾ,

མོཧཱ ཏཾ ཨུཔཀཱརིཏུཾ;

ཨཉྙོརོཧི ཏདཱ ཝཱཊཾ,

དུཏཱིཡོ མུལ༹ྷམུལ༹ྷཀོ.

༤༣.

བྱགྒྷོ ཨཱཝུདྷཝིདྡྷོ ཧི,

ཨཀཱ དུཊྛཱནི ནིནྣདཾ;

ཏཐེཝ སཱདྷུསཏྠེན,

ཝིདྡྷོ བཱལོ པཀུཔྤིཏོ.

༤༤.

པིཝནྟི ལོཧིཏཾ ཌཾསཱ,

ཨནྟོ ཏུཎྜེན མཀྑིཀཱ;

བཧིདྡྷཱ པརིཝཱརེནྟི,

ཛནོ ཏེན ཌཾསཱཡཡེ.

༤༥.

ཨདྷནསྶ ཁཎོ ཨཔྤོ,

སདྡྷམྨོ ཨཔྤཀཱལིནོ;

ཨཔྤཀོ ཏེན ཡུཉྫེཡྻུཾ,

ཁཎཾ བཧུཾ ལབྷེཏཝེ.