📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཙཱཎཀྱནཱིཏིཔཱལི༹

༡.

ནཱནཱསཏྠོ ¶ དྡྷཏཾ ཝཀྑེ,

རཱཛ ནཱིཏི སམུཙྩཡཾ;

སབྦ བཱིཛ མིདཾ སཏྠཾ,

ཙཱཎཀྱཾ སཱརསངྒཧཾ.

༢.

མཱུལསུཏྟཾ པཝཀྑཱམི,

ཙཱཎཀྱེན ཡཐོདིཏཾ;

ཡསྶ ཝིཉྙཱན མཏྟེན,

མཱུལ༹ྷོ བྷཝཏི པཎྜིཏོ.

༣.

ཝིདུཏྟཾ ¶ ནརཔཙྩཉྩ,

ནེཝཏུལྱཾ ཀུདཱཙནཾ;

སདེསེ པུཛྫཏེ རཱཛཱ,

ཝིདཱུ སབྦཏྠ པུཛྫཏེ.

༤.

པཎྜིཏེ ¶ ཙ གུཎཱ སབྦེ,

མཱུལ༹ྷེ དོསཱ ཧི ཀེཝལཾ;

ཏསྨཱ མཱུལ༹ྷསཧསྶེསུ,

པཉྙོ ཨེཀོ ཝིསིསྱཏེ.

༥.

མཱཏརིཝ ¶ པརདཱརེསུ,

པརདབྦེསུ ལེཊྚུཝ;

ཨཏྟནིཝ སབྦབྷཱུཏེསུ,

ཡོ པསྶཏི སཔཎྜིཏོ.

༦.

ཀིཾཀུལེན ཝིསཱལེན,

གུཎཧཱིནོ ཏུ ཡོནརོ;

ཨཀུལིནོཔི སཏྠཉྙོ,

དེཝཏཱཧིཔི པུཛྫཏེ.

༧.

རཱུཔཡོབྦནསམྤནྣཱ ¶ ,

ཝིསཱལཀུལསམྦྷཝཱ;

ཝིཛྫཱཧཱིནཱ ནསོབྷནྟེ,

ནིགྒནྡྷཱ ཨིཝ ཀིཾསུཀཱ.

༨.

ཏཱརཱནཾ ¶ བྷཱུསཎཾ ཙནྡོ,

ནཱརཱིནཾ བྷཱུསཎཾ པཏི;

པུཐབྱཱ བྷཱུསཎཾ རཱཛཱ,

ཝིཛྫཱ སབྦསྶ བྷཱུསཎཾ.

༩.

མཱཏཱ སཏྟུ པིཏཱ ཝེརཱི,

ཡེན བཱལོ ནཔཱཊྛིཏོ;

ན སོབྷཏེ སབྷཱམཛ྄ཛྷེ,

ཧཾསམཛ྄ཛྷེ བཀོཡཐཱ.

༡༠.

ཝརམེཀོ ¶ གུཎཱི པུཏྟོ,

ན ཙ མཱུལ༹ྷསཏེཧིཔི;

ཨེཀོ ཙནྡོ ཏམོ ཧནྟི,

ན ཙ ཏཱརགཎེཧིཔི.

༡༡.

ལཱལཡེ ¶ པཉྩཝསྶཱནི,

དསཝསྶཱནི ཏཱལཡེ;

པཏྟེ ཏུ སོལ༹སེ ཝསྶེ,

པུཏྟཾ མིཏྟཾཝ ཨཱཙརེ.

༡༢.

ལཱལནེ ¶ བཧཝོ དོསཱ,

ཏཱལནེ བཧཝོ གུཎཱ;

ཏསྨཱ པུཏྟཉྩ སིསྶཉྩ,

ཏཱལཡེ ན ཏུ ལཱལཡེ.

༡༣.

ཨེཀེནཱཔི ¶ སུཝཀྑེན,

པུཔྥིཏེན སུགནྡྷིནཱ;

ཝཱསིཏསྶ ཝནཾ སབྦཾ,

སུཔུཏྟེན ཀུལཾཡཐཱ.

༡༤.

ཨེཀསྶཱཔི ¶ ཀུཝཀྑསྶ,

ཀོཊརཊྛེན ཨགྒིནཱ;

དཡ྄ཧཏེ ཧི ཝནཾ སབྦཾ,

ཀུཔུཏྟེན ཀུལཾ ཡཐཱ.

༡༥.

དཱུརཏོ སོབྷཏེ མཱུལ༹ྷོ,

ལམྦམཱན པཊཱཝུཏོ;

ཏཱཝཉྩ སོབྷཏེ མཱུལ༹ྷོ,

ཡཱཝ ཀིཉྩི ནབྷཱསཏེ.

༡༦.

ཝིསཏོ ¶ ཨམཏཾ གཱཡ྄ཧཾ,

ཨམེཛ྄ཛྷཱཨཔི ཀཉྩནཾ;

ནཱིཙཏོ ཨུཏྟམཱ ཝིཛྫཱ,

ཐཱིརཏྣཾ དུཀྐུལཱཨཔི.

༡༧.

ཨུསྶཝེ ¶ བྱསནེཙེཝ,

དུབྦྷིཀྑེ སཏྟུཝིགྒཧེ;

རཱཛདྭཱརེ སུསཱནེཙ,

ཡོ ཏིཊྛཏི སབནྡྷཝོ.

༡༨.

པརོཀྑེ ཀིཙྩཧནྟཱརཾ,

པཙྩཀྑེ པིཡཝཱདིནཾ;

ཝཛྫཡེ ཏཱདིསཾ མིཏྟཾ,

ཝིསཀུམྦྷཾ པཡོམུཁཾ.

༡༩.

སཀིཾ ¶ དུཊྛཉྩ མིཏྟཾ ཡོ,

པུན སནྡྷཱཏུ མིཙྪཏི;

སམཙྩུ མུཔགཎྷཱཏི,

གབྦྷ མསྶཏརཱི ཡཐཱ.

༢༠.

ན ¶ ཝིསྶསེ ཨཝིསྶཏྠཾ,

མིཏྟཉྩཱཔི ན ཝིསྶསེ;

ཀདཱཙི ཀུཔིཏཾ མིཏྟཾ,

སབྦདོསཾ པཀཱསཡེ.

༢༡.

ཛཱནིཡཱ ¶ པེསནེ བྷཙྩེ,

བནྡྷཝེ བྱསནཱགམེ;

མིཏྟཉྩཱ པདིཀཱལེཙ,

བྷརིཡཉྩ ཝིབྷཝཀྑཡེ.

༢༢.

ཨུཔཀཱརགྒཧིཏེན,

སཏྟུནཱསཏྟུམུདྡྷརེ;

པཱདལགྒཾ ཀརཊྛེན,

ཀཎྚཀེནེཝ ཀཎྚཀཾ.

༢༣.

ན ¶ མིཏྟཾ ཀོཙི ཀསྶཙི,

ན ཀོཙི རིཔུ ཀསྶཙི;

ཀཱརཎེན ཧི ཉཱཡཏི,

མིཏྟཱནི ཙ རིཔཱུ ཏཐཱ.

༢༤.

དུཛྫནོ ¶ པིཡཝཱདཱི ཙ,

ནེཏཾ ཝིསྶཱསཀཱརཎཾ;

མདྷུ ཏིཊྛཏི ཛིཝ྄ཧགྒེ,

ཧདཡེ ཏུ ཧལཱཧལཾ.

༢༥.

དུཛྫནོ པརིཧནྟབྦོ,

ཝིཛྫཱཡཱ ལངྐཏོཔི སཾ;

མཎིནཱ བྷཱུསིཏོ སཔྤོ,

ཀིམེ སོ ནབྷཡཾ ཀརོ.

༢༦.

སཔྤོ ¶ ཀཱུརོ ཁལོ ཀཱུརོ,

སཔྤཱ ཀཱུརཏརོ ཁལོ;

མནྟོ སདྷིཝསོ སཔྤོ,

ཁལོ ཀེན ནིཝཱཡྻཏེ.

༢༧.

ནཁཱིནཉྩ ¶ ནདཱིནཉྩ,

སིངྒཱིནཾ སཏྠཔཱཎིནཾ;

ཝིསྶཱསོ ནེཝཀཱཏབྦོ,

ཐཱིསུ རཱཛཀུལེསུ ཙ.

༢༨.

ཧཏྠཱི ¶ ཧཏྠསཧསྶེན,

སཏཧཏྠེན ཝཱཛིནོ;

སིངྒིནོ དསཧཏྠེན,

ཋཱནཙཱགེན དུཛྫནོ.

༢༩.

ཨཱཔདཏྠཾ ¶ དྷནཾ རཀྑེ,

དཱརཾ རཀྑེ དྷནེཧིཔི;

ཨཏྟཱནཾ སཏཏཾ རཀྑེ,

དཱརེཧིཔི དྷནེཧིཔི.

༣༠.

པརདཱརཾ པརདབྦཾ,

པརིཝཱདཾ པརསྶ ཙ;

པརིཧཱསཾ གུརུཊྛཱནེ,

ཙཱཔལྱཉྩ ཝིཝཛྫཡེ.

༣༡.

ཙཛེ ¶ ཨེཀཾ ཀུལསྶཏྠེ,

གཱམསྶཏྠེ ཀུལཾ ཙཛེ;

གཱམ ཛནཔདསྶཏྠེ,

ཨཏྟཏྠེ པཐཝིཾ ཙཛེ.

༣༢.

ཙལཏྱེཀེན ¶ པཱདེན,

ཏིཊྛ ཏྱེཀེན བུདྡྷིམཱ;

ནཱསམིཀྑྱ པརཾ ཋཱནཾ,

པུབྦམཱཡཏནཾ ཙཛེ.

༣༣.

ལུདྡྷ མཏྠེན གཎྷེཡྻ,

ཐདྡྷ མཉྫལཱི ཀམྨུནཱ;

མཱུལ༹ྷཾ ཚནྡོ ནུཝཏྟེན,

ཏཐཱ ཏཐེན པཎྜིཏཾ.

༣༤.

ཨཏྠནཱསཾ ¶ མནོཏཱཔཾ,

གེཧེ དུཙྩརིཏཱནི ཙ;

ཝཉྩནཉྩ པམཱཎཉྩ,

མཏིམཱ ན པཀཱསཡེ.

༣༥.

དྷནདྷཉྙཔྤཡོགེསུ ¶ ,

ཏཐཱ ཝིཛྫཱགམེསུ ཙ;

ཨཱཧཱརེ བྱཝཧཱརེ ཙ,

ཙཏྟལཛྫོ སདཱ བྷཝེ.

༣༦.

དྷནིནོ སོཏྠིཡོ རཱཛཱ,

ནདཱི ཝེཛྫོ ཏུ པཉྩམོ;

པཉྩ ཡཏྲ ནཝིཛྫནྟེ,

ཏཏྲ ཝཱསཾ ནཀཱརཡེ.

༣༧.

ཡསྨིཾདེསེ ¶ ན སམྨཱནཾ,

ན པཱིཏི ནཙ བནྡྷཝཱ;

ན ཙ ཝིཛྫཱགམོ ཀོཙི,

ཏཾདེསཾ པརིཝཛྫཡེ.

༣༨.

མནསཱ ¶ ཙིནྟིཏཾ ཀམྨཾ,

ཝཙསཱ ནཔཀཱསཡེ;

ཨཉྙལཀྑིཏ ཀཱརིཡསྶ,

ཡཏོ སིདྡྷི ནཛཱཡཏེ.

༣༩.

ཀུདེསཉྩ ¶ ཀུཝུཏྟིཉྩ,

ཀུབྷརིཡཾ ཀུནདིཾ ཏཐཱ;

ཀུདབྦཉྩ ཀུབྷོཛྫཉྩ,

ཝཛྫཡེ ཏུ ཝིཙཀྑཎོ.

༤༠.

ཨིཎསེསོགྒི སེསོ ཙ,

བྱཱདྷིསེསོ ཏཐེཝ ཙ;

པུན ཙ ཝཌྜྷཏེ ཡསྨཱ,

ཏསྨཱ སེསཾ ནཀཱརཡེ.

༤༡.

ཙིནྟཱ ¶ ཛརོ མནུསྶཱནཾ,

ཝཏྠཱནཾ ཨཱཏཔོ ཛརོ;

ཨསོབྷགྱཾ ཛརོ ཐཱིནཾ,

ཨསྶཱནཾ མེཐུནཾ ཛརོ.

༤༢.

ཨཏྠི ¶ པུཏྟོ ཝསེ ཡསྶ,

བྷཙྩོ བྷརིཡཱ ཏཐེཝ ཙ;

ཨབྷཱཝེ པྱཏིསནྟོསོ,

སགྒཊྛོ སོ མཧཱིཏལེ.

༤༣.

དུཊྛཱ བྷརིཡཱ སཋཾ མིཏྟཾ,

བྷཙྩོ ཙུཏྟརདཱཡཀོ;

ས སཔྤེཙ གཧེ ཝཱསོ,

མཙྩུརེཝ ནསཾསཡོ.

༤༤.

མཱཏཱ ¶ ཡསྶ གེཧེ ནཏྠི,

བྷརིཡཱཙཱ པིཡཝཱདིནཱི;

ཨརཉྙཾ ཏེན གནྟབྦཾ,

ཡཐཱ རཉྙཾ ཏཐཱགཧཾ.

༤༥.

ཨིཎཀཏྟཱ ¶ པིཏཱ སཏྟུ,

མཱཏཱ ཙ བྱབྷིཙཱརིནཱི;

བྷརིཡཱ རཱུཔཝཏཱི སཏྟུ,

པུཏྟོ སཏྟུ ཨཔཎྜིཏོ.

༤༦.

ཀོཀིལཱནཾ ¶ སརོ རཱུཔཾ,

ནཱརཱི རཱུཔཾ པཏིབྦཏཱ;

ཝིཛྫཱ རཱུཔཾ ཀུརཱུཔཱནཾ,

ཁམཱ རཱུཔཾ ཏཔསྶིནཾ.

༤༧.

ཨཝིཛྫཾ ཛཱིཝནཾ སུཉྙཾ,

དིསཱ སུཉྙཱ ཨབནྡྷཝཱ;

པུཏྟཧཱིནཾ གཧཾ སུཉྙཾ,

སབྦསུཉྙཱ དལིདྡཏཱ.

༤༨.

ཨདཱཏཱ ¶ ཝཾསདོསེན,

ཀམྨདོསཱ དལིདྡཏཱ;

ཨུམྨཱདཱ མཱཏུདོསེན,

པིཏུདོསེན མཱུལ༹ྷཏཱ.

༤༩.

གུརུ ¶ ཨགྒི དྭིཛཱདཱིནཾ,

ཝཎྞཱནཾ བྲཱཧྨཎོ གུརུ;

པཏི རེཀོ གུརུཏྠཱིནཾ,

སབྦསྶཱབྷྱཱགཏོ གུརུ.

༥༠.

ཨཏིདབྦེ ¶ ཧཏཱ ལངྐཱ,

ཨཏིམཱནེ ཙ ཀོརཝཱ;

ཨཏིདཱནེ བལཱིབདྡྷོ,

སབྦམཙྩནྟ གཧིཏཾ.

༥༡.

ཝཏྠཧཱིནོ ¶ ཏྭལངྐཱརོ,

གྷཏཧཱིནཉྩ བྷོཛནཾ;

ཐནཧཱིནཱ ཙ ཡཱནཱརཱི,

ཝིཛྫཱཧཱིནཉྩ ཛཱིཝནཾ.

༥༢.

བྷོཛྫཾ བྷོཛནསཏྟི ཙ,

རཏིསཏྟི ཝརཱ ཐིཡོ;

ཝིབྷཝོ དཱནསཏྟི ཙ,

ནཱཔྤསྶ ཏཔསོ ཕལཾ.

༥༣.

པུཏྟཔྤཡོཛནཱ ¶ དཱརཱ,

པུཏྟོ པིཎྜཔྤཡོཛནོ;

ཧིཏཔྤཡོཛནཾ མིཏྟཾ,

དྷནཾ སབྦཔྤཡོཛནཾ.

༥༤.

དུལླབྷཾ ¶ པཱཀཏིཀཾ ཝཱཀྱཾ,

དུལླབྷོ ཁེམཀརོ སུཏོ;

དུལླབྷཱ སདིསཱི ཛཱཡཱ,

དུལླབྷོ སཛནོ པིཡོ.

༥༥.

སེལེསེལེ ¶ ནམཱཎིཀྐཾ,

མུཏྟིཀཾ ན གཛེགཛེ;

སཱདྷཝོ ན ཧི སབྦཏྲ,

ཙནྡནཾ ན ཝནེཝནེ.

༥༦.

ཨསོཙོ ¶ ནིདྡྷནོ པཉྙོ,

ཨསོཙོ པཎྜིཏབནྡྷཝོ;

ཨསོཙཱ ཝིདྷཝཱ ནཱརཱི,

པུཏྟནཏྟ པཏིཊྛིཏཱ.

༥༧.

ཨཝིཛྫོ པུརིསོ སོཙོ,

སོཙཾ མེཐུན མཔྤཛཾ;

ནིརཱཧཱརཱ པཛཱ སོཙཱ,

སོཙཾ རཛྫ མརཱཛཀཾ.

༥༨.

ཀུལེཧི ¶ སཧ སམྤཀྐཾ,

པཎྜིཏེཧི ཙ མིཏྟཏཾ;

ཉཱཏཱིབྷི ཙ སམཾ མེལཾ,

ཀུབྦཱནོ ནཝིནསྶཏི.

༥༩.

ཀཊྛཱ ¶ ཝུཏྟི པརཱདྷིནཱ,

ཀཊྛོ ཝཱསོ ནིརཱསཡོ;

ནིདྡྷནོ བྱཝསཱཡོ ཙ,

སབྦཀཊྛཱ དལིདྡཏཱ.

༦༠.

ཏཀྐརསྶ ཀུཏོ དྷམྨོ,

དུཛྫནསྶ ཀུཏོ ཁམཱ;

ཝེསིཡཱ ཙ ཀུཏོ སྣེཧོ,

ཀུཏོ སཙྩཉྩ ཀཱམིནཾ.

༦༡.

པེསིཏསྶ ¶ ཀུཏོ མཱནཾ,

ཀོཔནསྶ ཀུཏོ སུཁཾ;

ཐཱིནཾ ཀུཏོ སཏིཏྟཉྩ,

ཀུཏོ མེཏྟཱི ཁལསྶ ཙ.

༦༢.

དུབྦལསྶ ¶ བལཾ རཱཛཱ,

བཱལཱནཾ རོདནཾ བལཾ;

བལཾམཱུལ༹ྷསྶ མོནིཏྟཾ,

ཙོརཱནཾ ཨཏཐཾ བལཾ.

༦༣.

ཡོ ¶ དྷུཝཱནི པརིཙྩཛྫ,

ཨདྷུཝཾ པརིསེཝཏི;

དྷུཝཱནི ཏསྶ ནསྶནྟི,

ཨདྷུཝཾ ནཊྛམེཝ ཙ.

༦༤.

སུཀྐཾ མཾསཾ ཐིཡོ ཝུདྡྷཱ,

བཱལཀྐ ཏརུཎཾ དདྷི;

པབྷཱཏེ མེཐུནཾ ནིདྡཱ,

སཛྫུ པཱཎཧརཱནི ཚ;

༦༥.

སཛྫུ ¶ མཾསཾ ནཝནྣཉྩ,

བཱལཱ ཐཱི ཁཱིརབྷོཛནཾ;

གྷཏམུཎྷོདཀཉྩེཝ,

སཛྫུ པཱཎཀརཱནི ཚ.

༦༦.

སཱིཧཱདེཀཾ ¶ བཀཱདེཀཾ,

ཚ སུནཱ ཏཱིཎི གདྲབྷཱ;

ཝཱཡསཱ ཙཏུ སིཀྑེཐ,

ཙཏྟཱརི ཀུཀྐུཊཱདཔི.

༦༧.

པབྷཱུཏམཔྤཀིཙྩཾ ¶ ཝཱ,

ཡོནརོ ཀཏྟུམིཙྪཏི;

སཾཡཏནེན ཀཏྟབྦཾ,

སཱིཧཱདེཀཾ པཀིཏྟིཏཾ.

༦༨.

སབྦིནྡྲིཡཱནི སཾཡམ,

བཀོཝ པཏིཏོ ཛནོ;

ཀཱལདེསོཔཔནྣཱནི,

སབྦཀིཙྩཱནི སཱདྷཡེ.

༦༩.

བཧྭཱསཱི ¶ སཱཔྤསནྟུཊྛོ,

སུནིདྡོ སཱིགྷཙེཏནོ;

པབྷུབྷཏྟོ ཙ སཱུརོ ཙ,

ཉཱཏབྦཱ ཚ སུནཱ གུཎཱ.

༧༠.

ཨཝིསྶཱམཾ ¶ ཝཧེ བྷཱརཾ,

སཱིཏུཎྷཉྩ ནཝིནྡཏི;

ས སནྟོསོ ཏཐཱ ནིཙྩཾ,

ཏཱིཎི སིཀྑེཐ གདྲབྷཱ.

༧༡.

གུལ༹ྷམེཐུནདྷམྨཉྩ,

ཀཱལེཀཱལེ ཙ སངྒཧཾ;

ཨཔྤམཱདམནཱལསྱཾ,

ཙཏུ སིཀྑེཐ ཝཱཡསཱ.

༧༢.

ཡུདྡྷཉྩ ¶ པཱཏརུཊྛཱནཾ,

བྷོཛནཾ སཧ བནྡྷུཧི;

ཐིཡཾ ཨཱཔདགྒཏཾ རཀྑེ,

ཙཏུ སིཀྑེཐ ཀུཀྐུཊཱ.

༧༣.

ཀོཏིབྷཱརོ ¶ སམཏྠཱནཾ,

ཀིཾདཱུརཾ བྱཝསཱཡིནཾ;

ཀོ ཝིདེསོ སཝིཛྫཱནཾ,

ཀོ པརོ པིཡཝཱདིནཾ.

༧༤.

བྷཡསྶ ཀཐིཏོ པནྠོ,

ཨིནྡྲིཡཱནམསཾཡམོ;

ཏཛྫཡོ སམྤདཱམགྒོ,

ཡེནིཊྛཾ ཏེན གམྱཏེ.

༧༥.

ན ¶ ཙ ཝིཛྫཱསམོ བནྡྷུ,

ན ཙ བྱཱདྷིསམོ རིཔུ;

ནཙཱཔཙྩསམོ སྣེཧོ,

ན ཙ དེཝཱ པརཾ བལཾ.

༧༦.

སམུདྡཱཝརཎཱ ¶ བྷཱུམི,

པཱཀཱརཱཝརཎཾ གཧཾ;

ནརིནྡཱཝརཎཱ དེསཱ,

ཙཱརིཏྟཱཝརཎཱ ཐིཡོ.

༧༧.

གྷཏཀུམྦྷསམཱ ནཱརཱི,

ཏཏྟངྒཱར སམོ པུམཱ;

ཏསྨཱ གྷཏཉྩ ཨགྒིཉྩ,

ནེཀཏྲ ཐཔཡེ བུདྷོ.

༧༨.

ཨཱཧཱརོ ¶ དྭིགུཎོ ཐཱིནཾ,

བུདྡྷི ཏཱསཾ ཙཏུགྒུཎོ;

ཚགུཎོ བྱཝསཱཡོ ཙ,

ཀཱམོཙཊྛགུཎོ མཏོ.

༧༩.

ཛིཎྞམནྣཾ ¶ པསཾསེཡྻ,

བྷརིཡཾ གཏཡོབྦནཾ;

རཎཱ པཙྩཱགཏཾ སཱུརཾ,

སསྶཉྩ གེཧམཱགཏཾ.

༨༠.

ཨསནྟུཊྛཱ ¶ དྭིཛཱ ནཊྛཱ,

སནྟུཊྛཱཨིཝ པཱཐིཝཱ;

སལཛྫཱ གཎིཀཱ ནཊྛཱ,

ནིལླཛྫཱ ཙ ཀུལིཏྠིཡོ.

༨༡.

ཨཝཾསཔཏིཏོ རཱཛཱ,

མཱུལ༹ྷཔུཏྟོ ཙ པཎྜིཏོ;

ཨདྷནེན དྷནཾ པཱཔྱ,

ཏིཎཾཝ མཉྙཏེ ཛནཾ.

༨༢.

བྲཧྨཧཱཔི ¶ ནརོ པུཛྫོ,

ཡསྶཏྠི ཝིཔུལཾ དྷནཾ;

སསིནོ ཏུལྱཝཾསོཔི,

ནིདྡྷནོ པརིབྷཱུཡཏེ.

༨༣.

པོཏྠཀཊྛཱ ¶ ཏུ ཡཱཝིཛྫཱ,

པརཧཏྠགཏཾ དྷནཾ;

ཀིཙྩཀཱལེ སམུཔྤནྣེ,

ན སཱཝིཛྫཱ ན ཏདྡྷནཾ.

༨༤.

པཱདཔཱནཾ བྷཡཾ ཝཱཏཱ,

པདྨཱནཾ སིསིརཱ བྷཡཾ;

པབྦཏཱནཾ ཝཛཱིརམྷཱ,

སཱདྷཱུནཾ དུཛྫནཱ བྷཡཾ.

༨༥.

པཉྙེ ¶ ནིཡུཛྫམཱནེ ཏུ,

སནྟི རཉྙོ ཏཡོགུཎཱ;

ཡསོ སགྒནིཝཱསོ ཙ,

ཝིཔུལོ ཙ དྷནཱགམོ.

༨༦.

མཱུལ༹ྷེ ¶ ནིཡུཛྫམཱནེཏུ,

ཁཏྟིཡསྶཱགུཎཱ ཏཡོ;

ཨཡསོ ཙཏྠནཱསོ ཙ,

ནརཀེ གམནཾ ཏཐཱ.

༨༧.

བཧཱུམཱུལ༹ྷསངྒྷཱཏེཧི,

ཨཉྙོཉྙཔསུཝུཏྟིབྷི;

པཙྪཱདྱནྟེ གུཎཱ སབྦེ,

མེགྷེཧིཝ དིཝཱཀརོ.

༨༨.

ཡསྶ ཁེཏྟཾ ནདཱིཏཱིརེ,

བྷརིཡཱཔི པརཔྤིཡཱ;

པུཏྟསྶ ཝིནཡོ ནཏྠི,

མཙྩུརེཝ ནསཾསཡོ.

༨༩.

ཨསམྦྷཱབྱཾ ¶ ནཝཏྟབྦཾ,

པཙྩཀྑམཔི དིསྶཏེ;

སིལཱ ཏརཏི པཱནཱིཡཾ,

གཱིཏཾ གཱཡཏི ཝཱནརོ.

༩༠.

སུབྷིཀྑཾ ¶ ཀསཀེ ནིཙྩཾ,

ནིཙྩཾ སུཁ མརོགིཀེ;

བྷརིཡཱ བྷཏྟུ པིཡཱ ཡསྶ,

ཏསྶ ནིཙྩོསྶཝཾ གཧཾ.

༩༡.

ཧེལསྶ ཀམྨནཱསཱཡ,

བུདྡྷིནཱསཱཡ ནིདྡྷནཾ;

ཡཱཙནཱ མཱནནཱསཱཡ,

ཀུལནཱསཱཡ བྷོཛནཾ.

༩༢.

སེཝིཏབྦོ ¶ མཧཱཝཀྑོ,

ཕལཙྪཱཡཱ སམནྭིཏོ;

ཡདི དེཝཱ ཕལཾ ནཏྠི,

ཚཱཡཱ ཀེན ནིཝཱརཡེ.

༩༣.

པཋམེ ¶ ནཛྫིཏཱ ཝིཛྫཱ,

དུཏཱིཡེ ནཛྫིཏཾ དྷནཾ;

ཏཏཱིཡེ ནཛྫིཏཾ པུཉྙཾ,

ཙཏུཏྠེ ཀིཾཀརིསྶཏི.

༩༤.

ནདཱིཀཱུལེཙ ཡེ ཝཀྑཱ,

པརཧཏྠགཏཾ དྷནཾ;

ཀིཙྩཾ ཐཱིགོཙརཾ ཡསྶ,

སབྦཾ ཏཾ ཝིཕལཾ བྷཝེ.

༩༥.

ཀུདེསམཱསཛྫ ¶ ཀུཏོཏྠསཉྩཡོ,

ཀུཔུཏྟམཱསཛྫ ཀུཏོ ཛལཉྫལཱི;

ཀུགེཧིནིཾ པཱཔྱ གཧེ ཀུཏོ སུཁཾ,

ཀུསིསྶམཛ྄ཛྷཱཔཡཏོ ཀུཏོ ཡསོ.

༩༦.

ཀཱུཔོདཀཾ ¶ ཝཊཙྪཱཡཱ,

སཱམཱ ཐཱིཙིཊྛཀཱལཡཾ;

སཱིཏཀཱལེ བྷཝེ ཨུཎྷཾ,

གིམྷཀཱལེ ཙ སཱིཏལཾ.

༩༧.

ཝིསཾ ¶ ཙངྐམནཾ རཏྟིཾ,

ཝིསཾ རཉྙོནུཀུལཏཱ;

ཝིསཾ ཐཱིཔི ཨཉྙཱསཏྟཱ,

ཝིསཾ བྱཱདྷི ཨཝེཀྑིཏོ.

༩༨.

དུརདྷཱིཏཱ ¶ ཝིསཾ ཝིཛྫཱ,

ཨཛིཎྞེ བྷོཛནཾ ཝིསཾ;

ཝིསཾ གོཊྛཱི དལིདྡསྶ,

ཝུདྡྷསྶ ཏརུཎཱི ཝིསཾ.

༩༩.

པདོསེ ¶ ནིཧཏོ པནྠོ,

པཏིཏཱ ནིཧཏཱ ཐིཡོ;

ཨཔྤབཱིཛཾ ཧཏཾ ཁེཏྟཾ,

བྷཙྩདོསཱ ཧཏོ པབྷཱུ.

༡༠༠.

ཧཏམསོཏྟིཡཾ སདྡྷཾ,

ཧཏོ ཡཉྙོ ཏྭདཀྑིཎོ;

ཧཏཱ རཱུཔཝཏཱི ཝཉྫྷཱ,

ཧཏཾ སེནམནཱཡཀཾ.

༡༠༡.

ཝེདཝེདངྒ ¶ ཏཏྟཉྙོ,

ཛཔཧོམཔརཱཡནོ;

ཨཱསཱིཝཱདཝཙོཡུཏྟོ,

ཨེས རཱཛཔུརོཧིཏོ.

༡༠༢.

ཀུལསཱིལགུཎོཔེཏོ,

སབྦདྷམྨཔརཱཡནོ;

པཝཱིཎོ པེསནཱདྱཀྑོ,

དྷམྨཱདྱཀྑོ ཝིདྷཱིཡཏེ.

༡༠༣.

ཨཡུབྦེདཀཏཱབྷྱཱསོ,

སབྦེསཾ པིཡདསྶནོ;

ཨརིཡསཱིལགུཎོཔེཏོ,

ཨེས ཝཛྫོ ཝིདྷཱིཡཏེ.

༡༠༤.

སཀིཾདུཏྟ ¶ གཧིཏཏྠོ,

ལཧུཧཏྠོ ཛིཏཀྑརོ;

སབྦསཏྠ སམཱལོཀཱི,

པཀཊྛོ ནཱམ ལེཁཀོ.

༡༠༥.

སམཏྟནཱིཏིསཏྟཉྙོ,

ཝཱཧནེ པཱུཛིཏསྶམོ;

སཱུརཝཱིརགུཎོཔེཏོ,

སེནཱདྷྱཀྑོ ཝིདྷཱིཡཏེ.

༡༠༦.

སུཙཱི ¶ ཝཱཀྱཔཊུཔྤཉྙོ,

པརཙིཏྟོཔལཀྑཀོ;

དྷཱིརོ ཡཐཱཏྠ ཝཱདཱི ཙ,

ཨེས དཱུཏོ ཝིདྷཱིཡཏེ.

༡༠༧.

པུཏྟནཏྟ གུཎོཔེཏོ,

སཏྠཉྙོ པིཊྛཔཱཙཀོ;

སཱུརོ ཙ ཀཐིནོཙེཝ,

སཱུཔཀཱརོ ས ཨུཙྩཏེ.

༡༠༨.

ཨིངྒིཏཱ ¶ ཀཱརཏཏྟཉྙོ,

བལཝཱ པིཡདསྶནོ;

ཨཔྤམཱདཱི སདཱ དཀྑོ,

པཏིཧཱརོ ས ཨུཙྩཏེ.

༡༠༩.

ཡསྶ ¶ ནཏྠི སཡཾ པཉྙཱ,

སཏྠཾ ཏསྶ ཀརོཏི ཀིཾ;

ལོཙནེཧི ཝིཧཱིནསྶ,

དཔྤཎོ ཀིཾཀརིསྶཏི.

༡༡༠.

ཀིཾཀརིསྶནྟི ཝཏྟཱརོ,

སོཏཾ ཡཏྠ ནཝིཛྫཏེ;

ནགྒཀཔཎཀེ དེསེ,

རཛཎོ ཀིཾཀརིསྶཏི.