📜
ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ
ཙཏུརཱརཀྑདཱིཔནཱི
ཀཱཡཔཙྩཝེཀྑཎཱ
པཎཱམཔཊིཉཱ
ཙཀྐཝཱལ༹ ¶ ནཧུཏཱ ག, དེཝཱལི གཎ ཙུམྦིཏོ;
བུདྡྷ པཱདམྦུཛོ ཋཱཏུ, སཱིསེ དཡཱ ཏིགནྡྷཛོ.
ནནྟ ¶ ཙཀྐཝཱལ༹ བྦྷུགྒ, གུཎ སནྣིཙྩིཏཾ ཛིནཾ;
ཝནྡེ ཏཔྤཱུཛིཏཾ དྷམྨཾ, ཏཛྫཾ སངྒྷཉྩ ནིམྨལཾ.
ཝཀྑཱམི ¶ ཙཏུརཱརཀྑཾ, སམྦུདྡྷ ཝཙན ནྭཡཾ;
ཨཔྤམཱདཱཝཧཾ ཨེཏཾ, སོཏྟབྦཾ བྷཝབྷཱིརུཧི.
བུདྡྷཱནུསྶཏི ¶ མརཎཱ, བྷུབྷཱ མེཏྟཱཙ བྷཱཝནཱ;
ཨཔྤམཱདཱཡ ཨཱརཀྑཱ, ཙཏསྶོ མཱནིཏཱ སཏཾ.
བུདྡྷོཝཱདཾ ¶ སརིཏྭཱཝ, མཙྩུབྦིགྒཱ སུཁེསིནོ;
སཱིཏཱ སཱིཏཏརཾ ཡནྟི, སུབྷམེཏྟམྦུསི-ཊྛིཏཱ.
མརཎགྒི ཝཱརཎམྦུ, སམྦུདྡྷཝཙནཾ ཡིདཾ;
བཧཱུ ཏདགྒི སནྟཏྟཱ, སཱིཏཱཝཱསུཾ ཏདམྦུནཱ.
སདྡྷཾ ¶ བུདྡྷེན ཏེཛེཏྭཱ, མཱནཾ མརཎཙིནྟཡཱ;
ཨསུབྷཱཡ ཧནེ རཱགཾ, དོསཾ མེཏྟཱཡ པཉྙཝཱ.
༡. བུདྡྷཱནུསྶཏི ནིདྡེས
ཨརཧཾ ¶ སམྨཱསམྦུདྡྷོ, ཝིཛྫཀྑི ཙརཎཔྤདོ;
སུགཏོ སུགདོ སཏྠཱ, སབྦཉྙཱུ བྷགཝཱདམོ.
ཨཱརཀཏྟཱརིཧནྟཏྟཱ ¶ , པཱཔཱཀཱརཀཏོརཧོ;
ཧཏ ཙཀྐཱརཏོ པཱུཛཱ, རཧཏྟཱ ཙཱརཧཾ ནམེ.
སམུཏྟེ ¶ ཛིཡ གིཧཱིནཾ, ཨནུཔུབྦིཀཐོ ཛིནོ;
ཨདཱསི པརམཾ ཏུཊྛིཾ, སཙྩཱནི དསྶཡཾ དིཝཱ.
བྷིཀྑཱུནཾ ¶ པཋམེ ཡཱམེ, པཱཡེསི ཨམཏཱགདཾ;
ཛཱཏིཁེཏྟཱག དེཝཱནཾ, ཀངྑཙྪེདོ ས མཛ྄ཛྷིམེ;
ཨཱདོ ཕལསུཁཾ ཝེདི, མཛ྄ཛྷེ སེཡྻ མཀཱ ཛིནོ;
ཝེནེཡྻོ ལོཀནཾ ཨནྟེ, པཙྪིམེཔི ཏིདྷཱ ཀཏེ.
ཁེདཾ ¶ ཨགཎཡཾ ནཱཐོ, པཉྩ བུདྡྷཀཏཾ ཝཧཾ;
སཏྠསིདྡྷོ པརཏྠཾཝ, བྱཱཝཊོ སུམཧཱདཡོ.
ཙངྐམིཏྭཱ ནིསཱིདིཏྭཱ, རཏྟིཾདིཝཉྩ ཛྷཱཡིཏུཾ;
སུཔིཏུཾ མཛ྄ཛྷཡཱམེཝ, བུདྡྷོ བྷིཀྑཱུན མོཝདི.
ནཱལ ¶ མཱལསིཏུཾ ཏསྶ, མཧཱཝཱིརསྶ སཱསནེ;
པམཱདཱཡ མུནིནྡསྶ, ཀཏཉྙཱུ སཱདྷུ སམྨཏོ.
ཨནཉྙཱཏསྶ ཉཱཏཱཡ, ཨཔཏྟསྶཙ པཏྟིཡཱ;
ཨཱརབྷེཏུཾཝ ནོ ཡུཏྟོ, ཨཔྤམཏྟོ རཧོགཏོ.
ཨཱརབྦྷཐ ¶ ནིཀྐམཐ, ཡུཉྫཐ བུདྡྷསཱསནེ;
དྷུནཱཐ མཙྩུནོ སེནཾ, ནལཱ༹གཱརཾཝ ཀུཉྫརོ.
ཡོ ¶ ཨིམསྨིཾ དྷམྨཝིནཡེ, ཨཔྤམཏྟོ ཝིཧིསྶཏི;
པཧཱཡ ཛཱཏི སཾསཱརཾ, དུཀྑསྶནྟཾ ཀརིསྶཏི;
ཨིཏི ¶ ཨུཡྻོཛནཾ མྷཱཀཾ, མུཏྟསྶ མུཏྟིཡཱ སརཾ;
ནཡུཏྟོཝ པམཱདཱཡ, མཧཱདཡསྶ སཏྠུནོ.
སུཏྟེན དུབྦིཏཀྐེན, ཨཀིཙྩ ཀརཎེནཝཱ;
མོགྷ ཀཱལཀྑཡོ མནྡོ, དུཀྑསྶནྟཾ ཀཐཾཀརེ.
ཨཱཀཱསཾ ¶ ཙཀྐཝཱལ༹ཉྩ, སཏྟཱ བུདྡྷགུཎཱ པིཙ;
ཨནནྟཱནཱམ ཙཏྟཱརོ, པརིཙྪེདོ ནཝིཛྫཏི.
ཡཐཱཔི ནབྷ མཱཀཱསཾ, ཨངྒུལརཛྫུཡཊྛིབྷི;
མིནེཏུཾ ནེཝ སཀྐོཏི, ཨེཝཾ ཀེནཙི ཏགྒུཎཾ.
༢. མརཎསྶཏིནིདྡེས
མརཎསྶཏི ¶ མིཙྪནྟོ, ཏཱཝ བུདྡྷཝཙོ སུཎ;
ཨཝིཀྑིཏྟེན ཙིཏྟེན, སམྦུདྡྷ ཝཙནཾ ཧིདཾ.
ཨནིམིཏྟ ¶ མནཉྙཱཏཾ, མཙྩཱནཾ ཨིདྷ ཛཱིཝིཏཾ;
ཀསིརཉྩ པརིཏྟཉྩ, ཏཉྩ དུཀྑེན སཾཡུཏཾ.
ན ཧི སོ པཀྐམོ ཨཏྠི, ཡེན ཛཱཏཱ ནམིཡྻརེ;
ཛརམྤི པཏྭཱ མརཎཾ, ཨེཝཾདྷམྨཱ ཧི པཱཎིནོ.
ཕལཱན ¶ མིཝ པཀྐཱནཾ, པཱཏོ པཏནཏོ བྷཡཾ;
ཨེཝཾ ཛཱཏཱན མཙྩཱནཾ, ནིཙྩཾ མརཎ ཏོ བྷཡཾ.
ཡཐཱཔི ཀུམྦྷཀཱརསྶ, ཀཏཱ མཏྟིཀབྷཱཛནཱ;
སབྦེ བྷེདཔརིཡནྟཱ, ཨེཝཾ མཙྩཱན ཛཱིཝིཏཾ.
དཧརཱཙ ¶ མཧནྟཱཙ, ཡེབཱལཱ ཡེཙ པཎྜིཏཱ;
སབྦེ མཙྩུཝསཾ ཡནྟི, སབྦེ མཙྩུཔརཱཡནཱ.
ཏེསཾ མཙྩུཔརེཏཱནཾ, གཙྪཏཾ པརལོཀཏོ;
ནཔིཏཱ ཏཱཡཏེ པུཏྟཾ, ཉཱཏིཝཱཔན ཉཱཏཀེ;
པེཀྑཏཉྙེཝ ¶ ཉཱཏཱིནཾ, པསྶ ལཱལཔྤཏཾ པུཐུ;
ཨེཀམེཀོཝ མཙྩཱནཾ, གོ ཝཛ྄ཛྷོཝིཡ ནིཡྻཏི.
ཨེཝ མབྦྷཱཧཏོ ལོཀོ, མཙྩུནཱཙ ཛརཱཡཙ;
ཏསྨཱ དྷཱིརཱ ནསོཙནྟི, ཝིདིཏྭཱ ལོཀ པརིཡཱཡཾ.
ཨཉྙེཔི ¶ པསྶ གམནེ, ཡཐཱ ཀམྨུཔགེ ནརེ;
མཙྩུནོ ཝསམཱགམྨ, ཕནྡནྟེཝིདྷ པཱཎིནོ.
ཡེན ཡེནཧི མཉྙནྟི,
ཏཏོཏསྶ ཧི ཨཉྙཐཱ;
ཨེཏཱདིསོ ཝིནཱབྷཱཝོ,
པསྶ ལོཀསྶ པརིཡཱཡནྟི.
[སུལླ སུཏྟེ ཝུཏྟཾ.]
ཡཐཱཔི ¶ སེལཱ ཝིཔུལཱ,
ནབྷཾ ཨཱཧཙྩ པཙྩཏཱ;
སམནྟཱ ཨནུཔརི ཡེཡྻུཾ,
ནིཔྤོཐེནྟཱ ཙཏུདྡིསཱ.
ཨེཝཾ ཛརཱཙ མཙྩུཙ,
ཨདྷིཝཏྟནྟི པཱཎིནེ;
ཁཏྟིཡེབྲཱཧྨཎེ ཝེསྶེ,
སུདྡེ ཙཎྜཱལ པཀྐུསེ;
ནཀིཉྩི པརིཝཛྫེཏི,
སབྦམེཝཱ བྷིམདྡཏི.
ན ¶ ཏཏྠ ཧཏྠི ནཾ བྷུམྨི, ན རཐཱནཾ ནཔཏྟིཡཱ;
ན ཙཱཔི མནྟཡུདྡྷེན, སཀྐཱ ཛེཏུཾ དྷནེནཝཱ.
ཏསྨཱཧི ¶ པཎྜིཏོ པོསོ,
སམྤསྶཾ ཨཏྠ མཏྟནོ;
བུདྡྷེ དྷམྨེ ཙ སངྒྷེཙ,
དྷཱིརོ སདྡཾ ནིཝེསཡེ.
ཡོ དྷམྨཙཱརཱི ཀཱཡེན, ཝཱཙཱཡ ཨུད ཙེཏསཱ;
ཨིདྷེཝནཾ པསཾསནྟི, པཙྩསགྒེ པམོདཏཱིཏི.
[པབྦཏཱུ མམ སུཏྟེ ཝུཏྟཾ.]
ཡཐཱ ¶ ཝཱརིཝཧོ པཱུརོ, ཝཧེ རུཀྑེ པཀཱུལཛེ;
ཨེཝཾ ཛརཱམརཎེན, ཝུཡ྄ཧནྟེ སབྦ པཱཎིནོ.
དཧརཱཔི ཧི མིཡྻནྟི,
ནརཱཙ ཨཐནཱརིཡོ;
ཏཏྠ ཀོ ཝིསཱསེཔོསོ,
དཧརོ མྷཱིཏིཛཱིཝིཏེ.
སཱཡ ¶ མེཀེ ནིདིསྶནྟི, པཱཏོ དིཊྛཱ བཧུཛྫནཱ;
པཱཏོ ཨེཀེ ནདིསྶནྟི, སཱཡཾ དིཊྛཱ བཧུཛྫནཱ.
ཨཛྫེཝ ཀིཙྩཾ ཨཱཏཔྤཾ, ཀོ ཛཉྙཱ མརཎཾ སུཝེ;
ནཧི ནོ སངྐརཾ ཏེན, མཧཱསེནན མཙྩུནཱཏི.
[ཛཱཏཀེསུཝུཏྟཾ.]
ནཏྠེཏྠཉྙོ ¶ ནུསཱསནྟོ, སཡཾཝཏྟཱན མོཝད;
ཛིནེརིཏཱ ནུསཱརེན, བྷིཀྑུ སཾསཱར བྷཱིརུཀོ.
ཨཧིཝཱཔི ¶ མཾ ཌཾསེཡྻ, ཨཉྙེཔི ཝིསདྷཱརིནོ;
ཨཔིཡཱཔིཙ གྷཱཏེཡྻུཾ, ཨུཔྤཛྫེཡྻུཾ རུཛཱཔིམེ.
མཙྩུསེནཱ ཝུདྷཱསངྑྱཱ, བཱཧིརཛ྄ཛྷཏྟུ པདྡཝཱ;
ཏེཧཱཡུ པཱིལི༹ཏཾཚེཛྫཾ, མརིསྶ མཛྫཝཱ སུཝེ.
ཨལ༹ཀྐཱ ¶ ཧི གཝཱདཱིཧི, ཙོརཱདཱིཧི ཨརཱིཧིཔི;
ཨབྷིཎྷ སནྣིཔཱཏེཧི, རུཛཱ ཚནཝུཏཱིཧིཔི.
བཧཱུན མུཔཀཱརེཧི, ཨནྣོདཀཱདིཀེཧིཔི;
མརིསྶཾ པཱིལི༹ཏོ ནིཙྩཾ, ནིརུཛ྄ཛྷེཡྻཱཡུ ཨཛྫཝཱ.
བཧྭཱཝུདྷེ ¶ ཝིསཛྫེཏི, ནིལླེཎཾ མཙྩུནིདྡཡོ;
ཝསནྟཾ བྷཝསངྒཱམེ, ནམུཏྟོ ཀོཙི ཨཱཝུདྷཱ;
མཧབྦལཱ མཧཱཔཉྙཱ, མཧིདྡྷིཀཱ མཧདྡྷནཱ;
ནམུཏྟཱ སམྨཱསམྦུདྡྷོ, སབྦལོཀཱདྷིཔོ ཨཔི;
མཡཱ ¶ སམཱ ནཝཱ ཝུདྡྷཱ, ཏདཱཝུདྷེཧི ཏེ མཏཱ;
ཏཐཱ ཧམྤི མརིསྶཱམི, ལེཎཾ པུཉྙཾཝ མེ ཀཏཾ.
པཐབྱཱཔཱདཡོ དྷཱཏྠཱུ,
ཨཱཧཱརཱ བྷོཛནཱདཡོ;
སཱིཏུཎྷ མུཏུནཱམེཏཾ,
དོསཱ པིཏྟསེམྷཱནིལཱ.
དྷཱཏྭཱཧཱརུ ¶ ཏུདོསཱནཾ, སམཏྟེ ཝཱཡུ ཏིཊྛཏི;
ཝིསམེ ཏངྑཎཉྙེཝ, ཚེཛྫ མཔྤཾ པརཱདྷིནཾ.
དྷཱཏྭཱ ཧཱརུཏུ དོསཱནཾ, ཝིསམཱ སྭེཔྱཀལླཀོ;
ཨུསྶཱཧེ ཀལླཀཱལེཝ, ཀིཾཀརེཡྻཨཀལླཀོ;
ཨུཔྤཛྫེཡྻུཾ ¶ རུཛཱ སྭེཔི, ཨསཱཏོ དུཀྑམཱ ཁརཱ;
པུརེཏརཾཝ ཨཱརབྦྷེ, མཱཔཙྪཱ ཨནུཏཱཔནཾ.
སཏྟཱནཾ ¶ ནཱིཙཀམྨཱནཾ, སརཎོཔི བྷཡངྐརོ;
ནཱིཙཱནཱིཙཾ ནཛཱནཱམི, མརཎཱསནྣཏམྤིཙ.
ཀམྨ པཱིལི༹ཏ སཏྟཱནཾ, ཏངྑཎམྤི བྷཡུབྦྷཝོ;
མརེཡྻ མཛྫཝཱ སྭེཝཱ, ནཡུཏྟོཝ པམཛྫིཏུཾ.
པུཉྙཀྑཱིཎཱ པཛཱ ཁིཔྤཾ, ཨཧེཏུནཱཔི ནསྶཡེ;
སུདྡྷཙིཏྟོ མརིསྶཱམི, ན ཀིལིཊྛེན ཙེཏསཱ.
ཨུཔཙྪེདཱཔི ¶ མེ སནྟི, བྷཝཱབྷཝཙིཏཱ བཧཱུ;
ཚེཛྫཾ ཏེཧཱཡུ ཨཛྫཱཔི, སཱདྷྭཱསུམཱརབྷེ མཏཾ;
ཀམྨཱ པརཱདྷ སཏྟཱནཾ, ཝིནཱསེ པཙྩུཔཊྛིཏེ;
ཨནཡོ ནཡརཱུཔེན, བུདྡྷིམཱཀམྱ ཏིཊྛཏི.
མརཎཱསནྣ ¶ ཏཉྙེཝ, ཙིནྟེཡྻ པཉྙཝཱ སཏོ;
ཨེཝཾ ཙིནྟཡནྟོ སནྟོ, ནཔཱཔཾ ཀཏྟུ མུསྶཧེ.
མརཎཱསནྣ ཏཉྙེཝ, ཙིནྟེཡྻ བུདྡྷསཱཝཀོ;
ཨེཝཾ ཙིནྟཡནྟོ སནྟོ, ཀདཱཙིཔི ཨནུཎྞཏོ.
ཨདྡྷཱག ¶ མརཎཾ པཉྙོ, པུརེཏརཾཝ ཙིནྟཡེ;
ཀརེ ཀཱཏབྦ ཀམྨཉྩ, ཨེཝཾ སོ ནཱནུསོཙཏི.
མརཎཱསནྣ སཉྙཱི སོ, ཨཔྤམཏྟོ ཝིཙཀྑཎོ;
པཏྟེཔི མརཎེ ཀཱལེ, ན སམྨུལ༹ྷོ ནསོཀཝཱ.
མརཎཱ ¶ སནྣསཉྙཱི སོ, སོདྷེཏི ཨཏྟནོ མལཾ;
ནིམྨལེན ཙུཏོ བྷིཀྑུ, ནཏྭེཝཱ པཱཡ གཱམིཀོ.
སཏི ཨཱསནྣ མརཎེ,
དཱུརསཉྙཱི པམཱད ཝཱ;
ཡོ ཀརོཏི ཨཀཱཏབྦཾ,
ཏདཱ སོ ཨཏིསོཙཏི.
སཏི ¶ ཨཱསནྣམརཎེ, དཱུརསཉྙཱི པམཱདཝཱ;
ཨཱཀིཎྞོ པཱཔདྷམྨེཧི, པཛ྄ཛྷཱཡི དུམྨནོ ཏདཱ.
སཏི ཨཱསནྣ མརཎེ, དུཊྛོ དོསོཏི ཐདྡྷཝཱ;
ཨབྷིནནྡཏི སཱདེཏི, ཏདཱསོ ཨཏིདུཀྑིཏོ.
སཏི ¶ ཨཱསནྣམརཎེ, ཏུཝཊཾ ན ཙིཀིཙྪཏི;
སཉྩིཙྩཱཔཏྟི མཱཔནྣོ, ཏདཱ སོ པརིདེཝཏི.
སཏི ཨཱསནྣ མརཎེ, གིཧཱིཧི ནཝཀེཧིཙ;
སཾསཊྛོ ན ནུལོམེཧི, སྭཏིཝསྶུ མུཁོ ཏདཱ.
སཏི ¶ ཨཱསནྣ མརཎེ, ཀུཧཀོ ཀུལདཱུསཀོ;
མིཙྪཱཛཱིཝ སམཱཔནྣོ, དུནྣིམིཏྟོཝ སོ ཙུཏོ.
སསོཀཱི ¶ སཧནནྡཱིཙ, དུཀྑེ དུཀྑོ སུཁེ སུཁོ;
གིཧིཀམྨེསུ ཨུསྶུཀྐོ, པསྶཾ གིཛ྄ཛྷཀཱུཊཾ ཙུཏོ.
མརིསྶནྟི ཨནཱཝཛྫ, ཀིལེསཱཏུར པཱིལི༹ཏོ;
ཀིམིཁཛྫཝཎོ སཱཝ, བྷནྟོ ཀིཾ སུགཏིཾ ཝཛེ.
མརིསྶནྟི ¶ ཨནཱཝཛྫ, དྷུརདྭཡཾ ན པཱུརཏི;
གནྠཾ ཝིཔསྶནཾ ཏནྡཱི, ཀཱརུཉྙོཡེཝ སོ ཙུཏོ.
མརིསྶནྟི ཨནཱཝཛྫ, ཀིལེསཱནཾ ཝསཱནུགོ;
སམྦུདྡྷཱ-ཎཾ ཝཱིཏིཀྐནྟོ, ཀཱརུཉྙོ ནཏྠི ཏསྶམོ.
མརིསྶནྟི ¶ ཨནཱཝཛྫཾ, དྷནམེསཱི ཨདྷམྨཏོ;
པུཉྙེ ཙིནྟཱཔི ནུཔྤཛྫི, ནིརཡཾ སོ མནཾ གཏོ.
མརེཡྻནྟི ཨནཱཝཛྫཾ, དྷནཾ ཙིནི ཨདྷམྨཏོ;
ཙིཏཾ ཙིཏཾ ཨིཧེཝེཏཾ, ཏསྨིཾགིདྡྷོ ས པེཏྟིཀོ.
ཨཏྠཱ ¶ གེཧེ ནིཝཏྟནྟེ, སུསཱནེ མིཏྟབནྡྷཝཱ;
སུཀཏཾ དུཀྐཏཾ ཀམྨཾ, གཙྪནྟ མནུགཙྪཏི.
མརེཡྻནྟི ཨནཱཝཛྫཾ, ཨིཧཏྠཾ ཝཱ ནུཡུཉྫཏི;
སམྤརཱཡ མནཔེཀྑོ, སུཛུཾ ཝཱ པཱཡགཱམིཀོ.
མརེཡྻནྟི ¶ སམཱཝཛྫ, དྷམྨཏོ དྷན མེསཏི;
པུཉྙཀཱརཱི སུལདྡྷེན, མརཎེཔི ས མོདཏི.
པཉྩསཱིལ སདཱརཀྑོ, ཡཐཱབལཉྩ དཱཡཀོ;
ཀཱལེ ཨུཔོསཐཱཝཱསོ, སོ ནིཙྩཾ སུགཏིཾ ཝཛྫེ.
དྷོཝཱཔཏྟིམལཾ ¶ ཁིཔྤཾ, མཙྩུ ཨདྡྷཱ གམིསྶཏི;
མིཙྪཱཝིཏཀྐ མུཙྪིཛྫ, ཀར ཀཱཏབྦབྷཱཝནཾ.
ཨཏིཀྐནྟཱ བཧཱུ རཏྱོ, ཁེཔེཏྭཱ མམ ཛཱིཝིཏཾ;
མནྡཱཡུནཱ པམཱདེན, ཡུཏྟོ ཝིཧརིཏུཾ ཀཐཾ.
ཧཱསནྟཾ ¶ ནནྡི མཏྟཱནཾ, མཙྩུསནྡྷཱིཧི ཏཙྪཡེ;
ཀུཙྪི མེཡྻཙུཏོ ཨཛྫ, ཀོ ཧཱསནནྡིཏབྦཀོ.
མཙྩུསེནཱཝུདྷཱ སངྑྱཱ, མརཎཱབྷིམུཁོ ཨཧཾ;
ཨཙྩཱཡིཏབྦ ཀཱལོ ཡཾ, ཨིཀྑིཏབྦ མུདིཀྑཏུ.
པུརེམརཱམི ¶ དཊྛབྦཾ,
དཀྑེཡྻཾ མཙྩུ ཨེསྶཏི;
ཨཙྩཱཡིཏབྦ ཀཱལོ ཡཾ,
ནོཀཱསོ ཧཱསཏུཊྛིཡཱ.
ཨཱཀིཎྞམཙྩུསེནཱནཾ ¶ , ཨཛྫ སྭེཝཱ ཝིནཱསིནཾ;
ཨདྡྷཱ པཧཱཡ གཱམཱིནཾ, ཀིཾ པམཱད ཝིཧཱརིནཱ.
ཁཎམཏྟོཝ པཙྩཀྑོ, ཨཛྫ སྭེཝཱ ཨཏིསྶཏི;
སམྤརཱཡོ ཨཏིདཱིགྷོ, པརམྤརོ ཨནནྟིཀོ.
ཁཎམཏྟོཝ ¶ པཙྩཀྑོ, མཙྩུནཱ ཏཾ ཛཧིསྶཏི;
པཧཱཡ གམནཱིཡེ-སྨིཾ, མཧུསྶཱཧོ ནིརཏྠཀོ.
སམྤརཱཡོ ཨཏིདཱིགྷོ, ཨཔཱཐེཡྻེ སུདུཏྟརོ;
མཧུསྶཱཧེན ཀཱཏབྦོ, ཏདཏྠོ དཱིགྷདསྶིནཱ.
སདྡྷཱ ¶ བནྡྷཏུ པཱཐེཡྻཾ, ཏདེསནཾ ཨིཧེཝ ཧི;
བྷཝནྟརེ ནལབྦྷེཡྻ, ཨཔཱཐེཡྻ ཏིདུཀྑིཏོ.
སཾསཱར ཏརཎཏྠཱཡ, མཧོལུམྤཱནི བནྡྷཐ;
བྷཱཝནཱ དཱན སཱིལེཧི, ཏིཝིཏྟིཎྞོ བྷཝཎྞཝོ.
བྷུཉྫཾ ¶ བྷུཉྫཾ ཛནཾ ཀཱམེ,
ཀཱལཱཀཱལཱ-བུདྷོནྟཀོ;
ཀནྟེཀནྟེཏི མཾསཱསོ,
པིཝཾཔིཝཾཝ ཀཾ མིགཾ.
ཀཱམེ ཀཱམེསནཱཡེཡྻ,
ཀཱལོཀཱལོ མཏེཊྛིཡཱ;
པཱུརེ པཱུརེཏབྦཾ དྷམྨཾ,
ཨདྡྷཱ ཨདྡྷཱན སཾསརཾ.
མརེཡྻནྟི ¶ ཨནུབྦིགྒོ, པཱཔཀཾ ཀཏྟུམུསྶཧེ;
ཀརེཡྻ ཧཱསནནྡིཉྩ, ཙཱཔལླཉྩ པམཱད ཝཱ.
མརེཡྻམིཏི ¶ སཾཝིགྒོ, ལེཎམེཝ གཝེསཏི;
ན ཧཱསི ནེཝནནྡཱིཙ, ན ཙཱཔལློ ཀདཱཙིཔི.
ཨཙྩུཊྛིཏ རུཛགྒཱིཧི, ཨཙྩཱཡཱསེ བྷཡཱནཀེ;
ནོསདྷེ མརཎཱསནྣེ, ཀཏཔུཉྙཾཝ སཱཏ-དཾ.
ཉཱཏིསངྒྷཱ ¶ ཝིཡོཛེནྟཱ, མརཎནྟ བྷུསཱཏུརཱ;
སབྦཾ པཧཱཡ གནྟཱཔི, ནནྡིཏབྦཱནི པུཉྙིནོ.
པསྶནྟཱ སུནིམིཏྟཱནི, པཱཀཊཱནི སཀམྨུནཱ;
སུཁནྟི མརཎེ ཀཱལེ, ནུམོདནྟཱ ཀཏཱནིཙ.
སཱཏ-དཱཏཱནི ¶ པུཉྙཱནི, ཨེཝཾ མཧབྦྷཡེ ཨཔི;
སུགཏིཾ ལཧུནེཏཱནི, ཀཱཏབྦཱནི པུརེཏརཾ.
དེཝདཱུཏེ ¶ པཀཱསེཏྭཱ, ཡམཔུཊྛོ སཡཾཀཏཾ;
པུཉྙཾ སརཏི ཙེ སཏྟོ, ཏདེཝ སུགཏིཾ ཝཛེ.
པཱཔ ¶ ཀཌྜྷམྤི ནིརཡེ, མནཾ དུཀྑགཏཾ པཛཾ;
དུཀྑཱ མོཙེཏི ཡཾཔུཉྙཾ, སདཱ ཀཱཏབྦམེཝ ཏཾ.
པཧཱཡཀཾཝ པུཉྙཉྷི, པཧཱཏབྦཾཝ པཱཔཀཾ;
ཏཾ པདཱིཔནྡྷཀཱརཾཝ, དྭཡཾ ཨོཏྭཱ ཁུཀཾ ཝིཡ.
ཉཱཏིསངྒྷཱ ¶ ཝིཡོཛེནྟཱ, མརཎནྟ བྷུསཱཏུརཱ;
སབྦཾ པཧཱཡ གནྟཱརོ, བྷཡཱནཀཱནི པཱཔིནོ.
པསྶནྟཱ དུནྣིམིཏྟཱནི, པཱཀཊཱནི སཀམྨུནཱ;
མརཎེ ཨཏིདུཀྑནྟི, ནུཏཱཔེནྟཱ ཀཏཱནིཙ.
པཊིཔཱིལཱ༹ནི ¶ པཱཔཱནི, ཨེཝཾ མཧབྦྷཡེ སཏི;
དུགྒཏིཾ ལཧུནེཏཱནི, ཡུཏྟོཝ པརིཝཛྫིཏུཾ.
དེཝདཱུཏེ ¶ པཀཱསེཏྭཱ, ཡམརཱཛེན པུཙྪིཏོ;
པམཱདསྶནྟི ཙིཀྑནྟོ, མཧགྒིམྷི ཏུརཾ པཏི.
པུཉྙཾ ཨཀརིཝཱ མཱཝཱ, ཡམརཱཛིནྡ པུཙྪིཏོ;
པམཱདསྶནྟི ཙིཀྑནྟོ, མཧཱདུཀྑཾ ཏུརཾ གམི.
པཱཔཾ ¶ ཨཀརིཝཱ མཱཝཱ, པུཙྪིཏོ ཡམསཱམིནཱ;
པམཱདསྶནྟི ཙིཀྑནྟོ, ཏཏྟཾ གུལ༹ཾ ཏུརཾ གིལི.
ཛཱཏམཏྟཱ ཏིཛིཎྞཱཙ, ཨཱཏུརཱཙ མཏཱ ཝུདྷཱ;
དེཝདཱུཏེ ཨིམེ པཉྩ, དིསྭཱ སཾཝིགྒཏཾ ཝཛེ.
ཙོདིཏཱ ¶ དེཝདཱུཏེཧི, ཡེ པམཛྫནྟི མཱནཝཱ;
ཏེ དཱིགྷརཏྟཾ སོཙནྟི, ཧིན ཀཱཡཱུ པགཱནརཱ.
དྷུརདྭཡ ¶ མནཱརབྦྷ, གིཧིཀམྨཱདིཀེ རཏོ;
ཀཐཾ གིཛ྄ཛྷཀཱུཊཾ སེསཾ, པེཏཱཝཱསཾ ཨཏིསྶཏི.
པརིཡཏྟི མསིཀྑནྟོ,
ནཱརདྡྷོ པཊིཔཏྟིཡཾ;
ཨལསོ དུབྦིཏཀྐོ སོ,
ཀིཾ ཏཾསེལཾ ཨཏིསྶཏི.
མོཙནཏྠཱཡ ¶ པབྦཛྫ, སཾཀིལིཊྛཱ པམཱདིནོ;
སུགཏྱཱཔིཙ ཏེ བྷཊྛཱ, ཨཏིདཱུརཱཝ མུཏྟིཏོ.
སཱིདནྟེཝ ¶ ཛལེ ཁིཏྟཱ, སིལཱ མཧཱཝ ཁུདྡཀཱ;
པཏནྟི ཁུདྡཀེནཱཔི, ཨཔཱཡཾ པཱཔ ཀམྨུནཱ.
པཏནྟཱ ཁུདྡཀེནེཝ, བཧཱུཧི པུན པཱིལི༹ཏཱ;
མོཀྑོཀཱསཾ ནཝིནྡནྟི, པཱཔཾ ཁུདྡམྤི ནཱཙརེ.
ཛེགུཙྪིཏྠཱུདརཱགམྨ ¶ , པུནཱཔི ཏཏྠ ནིཙྩགཱུ;
དུཀྑཱཏི དུཀྑ སཾཀིཎྞོ, ཧཊྛུཾ ཏུཊྛུཾ ནསཀྐུཎེ.
ཨཏིབྱཱཔིགུཎོ ¶ པུཉྙོ,
མཧཱཡསོ སིརིནྡྷརོ;
ཀུཙྪིཡཾ རེཏསི ཝཱསོ,
ཨཏཱིཝ ལཛྫིཏབྦཀོ.
མཙྩུདུཀྑཾ ཁཎཾཡེཝ, ཨཏིདུཀྑཾ ཏདུཏྟརི;
མཱཏུགཱམུདརེ སནྡྷི, པཏིཊྛཱནཾ བྷཡཱནཀཾ.
མཙྩུདུཀྑཾ ¶ ཁཎཾཡེཝ, ཨཏིདུཀྑཾ ཙིརཏྟནཾ;
ཨཱམ པཀྐནྟརེ སནྡྷི, པཏིཊྛཱནཾ བྷཡཱནཀཾ.
དུགྒཏྱཾཋཱཏུ ཏཾདུཀྑཾ, སུཎ ཨུཙྩཀུལེཨཔི;
ཀུཙྪིཡཾ ཨཏིསམྦཱདྷེ, ཛལཱབུམྷི ཛིགུཙྪིཏེ.
མིལ༹ྷ སེམྷཱདི སཾཀིཎྞེ, ཨཏི དུགྒནྡྷ ཝཱསིཏེ;
གཱུཐཀཱུཔེ ཀིམཱིཝིཡ, ཏམེཛཱ མཱུལཀམྨཏོ.
པརམཱཎུཀཱཡོ ཋཱཏི, དུཀྑཱི ནེརཡིཀོ ཝིཡ;
དྷུཝཱཏུརོ སུཁཱམིསྶོ, ཨཱམ པཀྐཱསཡནྟརེ;
ཝེདནཊྚོཝ སཾཝཌྜྷོ, ཨཙིཏྟོཝིཡ ནིཙྩལོ;
དསམཱསནྟརེ ཀཙྩེ, བཧཱུ མརནྟི པཱཎིནོ.
པརིཔཀྐོ ¶ པམུཉྪོ སོ,
ཨཏིསམྦཱདྷ ཡོནིཏོ;
མལཱཀིཎྞེན གཏྟེན,
ཨཙྩཱཡཱསོ ཝིཛཱཡཏི.
ཨེཝཾ ¶ མཙྩུཉྩ སནྡྷིཉྩ, ཝིཛཱཡནཉྩ བྷེརཝཾ;
པསྶཾ ནིབྦིནྡནྟོ སནྟོ, ཝིརཛྫེཡྻ བྷཝནྡུཀེ.
ཨེཝཾ མཙྩུཉྩ སནྡིཉྩ, ཨནུསྶར མབྷིཎྷསོ;
རཱཛསེཊྛི བྷཝཱདིམྤི, ནཨིཙྪེཡྻ ཏདནྭིཏཾ.
བྷཝེ ¶ དུཀྑ མཙིནྟེཏྭཱ, བྷཝཱསཱཡ པཝཏྟིཏཾ;
པུཉྙཾ པུནཔྤུནཾ དེཏི, སནྡྷིཾ ན ནིབྦུཏིཾ ཝརཾ.
བྷཝེ དུཀྑཾ ཝིབྷཱཡིཏྭཱ, ནིབྦིནྡེན པཝཏྟིཏཾ;
པུཉྙཾ བྷཝ མཏིཀྐམྨ, ནིབྦཱནཾ དེཏི ནིབྦུཏིཾ.
བྷཝེ ¶ དུཀྑཾ སརིཏྭཱན, མཙྩུསནྡྷི སཡཱདིཀཾ;
ཏིབྷཝེསུ ཝིརཛྫེཡྻཱ, དིཏྟ གེཧེཝ སཱམིཀོ.
སནྟོ པུཉྙཱནི ཀརོནྟོ, སནྡྷིདུཀྑ མནུསྶརཾ;
ནིབྦིནྡ ཡུཏྟ ཙིཏྟེན, ཝཛྫེཡྻ བྷཝསཱཏ ཏོ.
པུཉྙ ¶ ནིབྦཏྟ ཋཱནེཔི, ཛེགུཙྪེ སནྡྷིསམྦྷཝོ;
བྷཝ སཱཏ ཝསཱ ཏསྨཱ, དྷཱིརོ ཏཾ ལགྒནཾ ཙཛེ.
༣. ཨསུབྷབྷཱཝནཱ ནིདྡེས
སིརིམཾ ¶ གཎིཀཾ དིསྭཱ, དམེཏུཾ རཏྟཙེཏསཾ;
དསྶེཏྭཱ མཏསཱརཱིརཾ, ཏསྶཱ ཛིནོ ཨིདཾ བྲཝི.
ཙརཾཝཱ ¶ ཡདིཝཱ ཏིཊྛཾ, ནིསིནྣོ ཨུདཝཱ སཡཾ;
སམཉྪེཏི པསཱརེཏི, ཨེསཱ ཀཱཡསྶ ཨིཉྫནཱ.
ཨཊྛི ནྷཱརཱུཧི སཾཡུཏྟོ, ཏཙ མཾསཱཝ ལེཔནོ;
ཚཝིཡཱ ཀཱཡོ པཊིཙྪནྣོ, ཡཐཱབྷཱུཏཾ ནདིསྶཏི.
ཨནྟཔཱུརོ ¶ དརཔཱུརོ, ཡཀན པེལ༹སྶ ཝཏྠིནོ;
ཧདཡསྶ པཔྥཱསསྶ, ཝཀྐསྶ པིཧཀསྶཙ.
སིངྒྷཱནིཀཱཡ ཁེལ༹སྶ, སེདསྶཙ མེདསྶཙ;
ལོཧིཏསྶ ལསིཀཱཡ, པིཏྟསྶཙ ཝསཱཡཙ.
ཨཐསྶ ¶ ནཝཧི སོཏེཧི, ཨསུཙི སཝཏི སབྦདཱ;
ཨཀྑིམྷཱ ཨཀྑིགཱུཐཀོ, ཀཎྞམྷཱ ཀཎྞགཱུཐཀོ.
སིངྒྷཱནིཀཱཙ ནཱསཏོ, མུཁཏོ ཝམཏི ཨེཀདཱ;
པིཏྟཾ སེམྷཉྩ ཝམཏི, ཀཱཡམྷཱ སེདཛལླིཀཱ.
ཨཐསྶ ¶ སུསིརཾ སཱིསཾ,
མཏྠལུངྒསྶ པཱུརིཏཾ;
སུབྷཏོ ནཾ མཉྙཏི བཱལོ,
ཨཝིཛྫཱཡ པུརཀྑཏོ.
ཡདཱཙ སོ མཏོ སེཏི,
ཨུདྡྷུམཱཏོ ཝིནཱིལཀོ;
ཨཔཝིདྡྷོ སུསཱནསྨིཾ,
ཨནཔེཀྑཱ ཧོནྟི ཉཱཏཡོ.
ཁཱདནྟི ¶ ནཾ སུཝཱནཱཙ, སིངྒཱལཀཱཙ ཀིམིཡོ;
ཀཱཀཱ གིཛ྄ཛྷཱཙ ཁཱདནྟི, ཡེཙཉྙེ སནྟི པཱཎཀཱ.
སུཏྭཱན ¶ བུདྡྷཝཙནཾ, བྷིཀྑུ པཉྙཱཎཝཱ ཨིདྷ;
སོཁོ ནཾ པརིཛཱནཱཏི, ཡཐཱབྷཱུཏཉྷི པསྶཏི.
ཡཐཱཨིདཾ ཏཐཱཨེཏཾ, ཡཐཱཨེཏཾ ཏཐཱཨིདཾ;
ཨཛ྄ཛྷཏྟཉྩ བཧིདྡྷཱཙ, ཀཱཡེ ཚནྡཾ ཝིརཱཛཡེ.
ཚནྡ ¶ རཱག ཝིརཏྟོ སོ, བྷིཀྑུ པཉྙཱཎཝཱ ཨིདྷ;
ཨཛ྄ཛྷགཱ ཨམཏཾ སནྟིཾ, ནིབྦཱནཾ པད མཙྩུཏཾ.
དྭིཔཱདཀོ ཡཾ ཨསུཙི, དུགྒནྡྷོ པརིཧཱརཏི;
ནཱནཱཀུཎཔ པརིཔཱུརོ, ཝིསྶཝནྟོ ཏཏོཏཏོ.
ཨེཏཱདིསེན ¶ ཀཱཡེན, ཡོ མཉྙེ ཨུནྣམེཏཝེ;
པརཾཝཱ ཨཝཛཱནེཡྻ, ཀིམཉྙཏྲ ཨདསྶནཱཏི;
ཀཱཡ ཝིཙྪནྡནཱིཡསུཏྟཾ, ཝིཛཡསུཏྟནྟིཔི ཝཏྟབྦཾ.
ར-ཨཀྑརོ ¶ སིཡཱགྒིམྷི, རོཝ ཨགྒིཝ ཨཱགཏོ;
ཏསྨཱ རཱགོཏི ཝཏྟབྦོ, ཏཎྷཱཝ ནིཙྩཏཱཔིཀཱ.
ཨབྷིཎྷམེཝ རཱགགྒི, དཡ྄ཧཏེ སུབྷསཉྙིནཾ;
ཀིམིཁཛྫཝཎོ སཱཝ, དུཀྑཱི རཱགཱི ས སབྦདཱ.
དུཀྑཱི ¶ པིཡ མལདྡྷཱན, ལདྡྷཱཔྱ པརིཔུཎྞཏོ;
ནཏྠི རཱགགྒིཁནྡྷསྶ, པིཡིནྡྷེན ཧི པུཎྞཏཱ.
ནཏྠི ¶ རཱགསམོ ཨགྒི,
ཨིཏི ཝུཏྟཾ མཧེསིནཱ;
ཏེན རཱགགྒིནཱ དཌྜྷོ,
སབྦོ ལོཀོ ཏིདུཀྑིཏོ.
ཨེཀསྶ པིཝིཏཾ ཁཱིརཾ, ཙཏཱུ དདྷི ཛལཱ བཧུ;
རཱགཧེཏུ བྷཝེ སནྡྷི, ཊྛཱནཾ ཨནམཏགྒིཀཾ.
ཙཏཱུདམི ¶ ཛལཱ བྷིཡྻོ, སཱིསཙྪེདན ལོཧིཏཾ;
རཱགཧེཏུ བྷཝེ མཙྩ, བྷཡཾ ཨནམཏགྒིཀཾ.
ཨེཀསྶ རུདཏོ ཨསྶུ, ཙཏཱུ དདྷི ཛལཱ བཧུ;
དུཀྑཾ ཨནམཏགྒཾཝ, ཏཾཧེཏུ པརིདེཝནཾ.
ཏཏྟཱཡོ ¶ གུལ༹ གིལིཏ, ཝདྷགྒི དཡ྄ཧནཱ དིཀཾ;
ཨསངྑྱེཡྻཾ མཧཱདུཀྑཾ, ཏཾཧེཏུ ནིརཡེ ལབྷི.
ཨེཀ དྭིཏྟི ཙཏུ པཉྩ, བུདྡྷུཔྤཱདེཔྱ མོཙིཏཾ;
ཁུཔྤིཔཱསིཏ ནིཛ྄ཛྷཱམཾ, ལབྷི ཏཾཧེཏུ པེཏྟིཀཾ.
ཏིརཙྪཱནེ ¶ ཨསཱུརེཙ, དུཀྑཾ ནཱནཱཝིདྷཾ ལབྷི;
ནམཏགྒིཀ སཾསཱརེ, སབྦནྟཾ རཱགཧེཏུཀཾ.
ཨེཀསྶེཀེན ཀཔྤེན, པུགྒལསྶཊྛི སཉྩཡོ;
སཙེ སཾཧཱརིཏོ ཨསྶ, ཝེཔུལླ པབྦཏཱདྷིཀོ.
ཨེཀ ཀཔྤེ ཨིདཾ དུཀྑཾ, ནཱདིཀཔྤེསུ ཀཱཀཐཱ;
རཱགོ ནནུ མཧཱཝེརཱི, བཱལོ ཛནོ ཏ མིཙྪཏི.
རཱགསུདྡྷི ¶ ཨསོཀོཙ, ནིདྡུཀྑོ ཉཱཡཔཏྟིཙ;
ནིབྦཱནཾ པཉྩ པཙྩཀྑཱ, ཨསུབྷཱཡ ཕལཱ མཏཱ.
ཨསུབྷགྒཧཎཾ ¶ ཛྷཱཡཱི, མིཏཱ སིནྡྲིཡ སཾཝརོ;
སོམིཏྱ མུཀྐཊྛཱཝཱཙཱ, ཚལི༹མེ རཱག སུདྡྷིཡཱ.
ནིཙྩུགྒརཱག རོགཱིནཾ, ཨསུབྷཱ ཝཱཏུལོསདྷཱ;
རཱགཡཀྑཱབྷི གཡ྄ཧཱནཾ, ཨསུབྷཱ མནྟ མུཏྟརཾ.
སཛཱིཝཀཱཙ ¶ ནིཛྫཱིཝཱ, ཨསུབྷཱ དུཝིདྷཱ མཏཱ;
སཛཱིཝཱ ཀེསལོམཱདི, དསེཝིམེ ཨཛཱིཝཀཱ.
ཨུདྡྷུམཱཏཀ ¶ ཝཱིནཱིལཾ, ཝིཔུབྦཀཾ ཝིཚིདྡཀཾ;
ཝིཀྑཱཡིཏཀ ཝིཀྑིཏྟཾ, ཧཏིཝིཀྑིཏྟ ལོཧིཏཾ.
པུལུ༹ཝ ཊྛིཀ མིཙྩེསུ, ལདྡྷཱ ཨཉྙཏརཾ སཏོ;
རཏན ཝཱནཔསྶེཡྻ, ཡཐཱ ཙེཏསི པཱཀཊཾ.
མཏཾ ¶ ཁཛྫཾ ས མཾསཉྩ, ནིལོཧིཏཾ ནིམཾསཀཾ;
ཝིཀྑིཏྟཾ སེཏ པུཉྫཊྛིཾ, ནཝདྷཱ པུཏིམིཀྑཡེ.
མཙྩུཏོ ¶ པརིམུཙྩཱམི, པཊིཝཏྟི ཡིམཱ ཡིཏི;
པཡོཛན སམཱཝཛྫ, མོདིཏབྦཾ ཛིགུཙྪཀེ.
སཛཱིཝཀེ ཛིགུཙྪཏྠཾ, ནིཛྫཱིཝཱ སུབྷ མཱིརིཏཾ;
ཏཐཱུཔམོ ཨཡཾཀཱཡོ, ཨེཝམེཝ བྷཝིསྶཏི.
ཨེཝཾདྷམྨོ ¶ ཨཡཾཀཱཡོ, ཨེཝཾབྷཱཝཱི ནཏིཀྐམོ;
ཨིཙྩུཔ སཾཧརེ དིསྭཱ, ཨེཀདྭིཧ མཏཱདིཀཾ.
ཡཐཱ ¶ ཨིདཾ ཏཐཱཨེཏཾ, ཡཐཱཨེཏཾ ཏཐཱ ཨིདཾ;
ཛེགུཙྪཾ པཊིཀཱུལྱཉྩ, ཀཱཡེ ཨིཙྩུཔ སཾཧརེ.
ཨུདྡྷུམཱཏ ཝིནཱིལཱདི,
པཊིཀཱུལྱོ ཛིགུཙྪིཏོ;
ཏཐེཝཱཡམྤི མེ ཀཱཡོ,
ཝིསེསོ ནཱཡུ-སཱཡུཝ.
ཨུདྡྷུམཱཏ ¶ ཝིནཱིལཱདོ, སོབྷཎཾ ནཏྠི ཀིཉྩིཔི;
ཨིམསྨིཾཔི མེ ཀཱཡེ, གཝེསནྟོཔི སབྦསོ.
པཊིཀཱུལཝསཱ དྷཱཏུ, ཝསཱཙ དྭིཔྤཀཱརཏོ;
པཙྩཝེཀྑེཡྻིམཾ ཀཱཡཾ, ཨིཙྪཾ ཝིརཱག མཏྟནི.
ཝཎྞ ¶ སཎྛཱན གནྡྷེཧི, ཨཱསཡོ ཀཱསཏོཔིཙ;
ཛེགུཙྪ པཊིཀཱུལྱཱཙ, ཀེསཱ ན ཏུཊྛམཱནིཏཱ.
ཨིཏི ཀེསེསུ ཨིཀྑེཡྻ,
ལོམཱ དཱིསུཔྱཡཾ ནཡོ;
དྭཏྟིཾསེཝཉྷི ཀོཊྛཱསེ,
པཙྩཝེཀྑེ ཝིསུཾཝིསུཾ.
ཀཱཡཏོ ¶ བཧིནིཀྑནྟཾ, པཊིཀཱུལྱཾ ཛིགུཙྪིཏཾ;
ཨནིཀྑནྟམྤི ཛེགུཙྪཾ, པཊིཀཱུལྱཾཝ ཏསྶམཾ.
སངྑཏམྤི ཡཐཱ ཝཙྩཾ, མནུཉྙཏཾ ན པཱཔུཎེ;
ཨུཔཀྐམ སཧསྶེཧི, ཨེཝཾ ཀེསཱདིཀམྤིཙ.
སབྷཱཝ ¶ པཊིཀཱུལྱཾཝ, ཨེཀམྤི ཝཙྩ པུཉྫཀཾ;
ནནུ ཛེགུཙྪིཏཱ བྷིཡྻོ, དྭཏྟིཾས ཝཙྩཔུཉྫཀཱ.
པཙྩེཀམྤི ¶ པཊིཀཱུལྱཾ, ཀེསཱདིཀཾ སབྷཱཝཏོ;
ཀེསཱདིདྭཏྟིཾས པུཉྫོ, བྷིཡྻོ ཛེགུཙྪིཏོ ནནུ.
པུཉྫིཏེསྭེཝ ཀནྟེསུ, ཀནྟོཧོཏི ས པུཉྫཀོ;
པུཉྫིཏེསུ ཨཀནྟེས, ཨཀནྟོཝ ས པུཉྫཀོ.
པཙྩེཀཾ ¶ ཝིནིབྷུཏྟེས, ཀེས ལོམ ནཁཱདིསུ;
ནཏྠི ཏཉྙཱ ཀུམཱརཱིཝཱ, མུཁཧཏྠཱདིཀཱནིཝཱ.
སམྤིཎྜི ཏེསུ ཏེསྭེཝ,
ཀུཏོ ཏཱ ཏཱནི ཨཱགཏཱ;
པཉྙཏྟི མཏྟ མེཝེསཱ,
ཛིགུཙྪཉྙཱ ན ཀཱཙིཔི.
སནྟཾ ¶ ཙིནྟེཡྻ ནཱསནྟཾ, སནྟ ཙིནྟཡཏོ སུཁཾ;
ཨསནྟཾ པརིཀཔྤེནྟོ, ནཱནཱདུཀྑེཧི ཏཔྤཏི.
ནཱཝཛྫ སནྟཛེགུཙྪཾ, སཉྙཾ ཨསཏི ཀཱཏུན;
སུབྷཱ ཨིཏྠཱིཏི གཱརགྒི, ཨུཔྤཛྫི སུབྷསཉྙིནོ.
ཨསནྟཾཝ ¶ ཨབྷཱུཏཾཝ, པསྶེ རཱགགྒིཛོཏིཡཱ;
ཏཱཡ སནྟཉྩ བྷཱུཏཉྩ, ན པསྶཏི ཀདཱཙིཔི.
ཨེཀསྶ ¶ པིཝིཏཾ ཁཱིརཾ, སཱིསཙྪེདན ལོཧིཏཾ;
རུདཏོ ཨསྶུ ཏཾཧེཏུ, ཙཏཱུདདྷི ཛལཱ བཧུ.
ཨཱཡཏིམྤི ཨཏཱིཏེཝ, སཾསརནྟསྶ ཧེསྶཏི;
རཱགཾ ཧནྟུ མནཱིཧོཙེ, ཁཱིརཾ ཨསྶུཙ ལོཧིཏཾ.
སུབྷསཉྙཱཡ ¶ སོ ཝཌྜྷོ,
ཏདབྷཱཝེ ས ནསྶཏི;
ཐིརཾ ཧནྟུཾ ན ཏཾསཉྙཾ,
སཀྐཱ སིཐིལ ཝཱིརིཡོ.
ཨུསྶོལ༹ྷི ¶ ཝཱིརིཡོ ཧུཏྭཱ, བྲཱུཧེཡྻཱསུབྷ བྷཱཝནཾ;
སུབྷསཉྙཱཔྤ ཧཱནཱཡ, པརིཙྩཛྫཱཔི ཛཱིཝིཏཾ.
ཨཉྙཀིཙྩ མུཔེཀྑཱཡ, བྲཱུཧེཡྻཱསུབྷ བྷཱཝནཾ;
མནྡི ཧུཏྭེཧ རཱགགྒི, ནིབྦཱཡིསྶཏི ཨཱཡཏིཾ.
ཀིཙྩཾ མེ ཨིདམེཝེཏི, བྲཱུཧེཡྻཱསུབྷ བྷཱཝནཾ;
དཱནི མནྡགྒི ཧུཏྭཱན, པཱམོཛྫཾ ཝེ ལབྷིསྶཏི.
ཀཱཡེ ¶ དཊྛབྦ ཛེགུཙྪཾ, ཨཔསྶནྟོ པམཱདཝཱ;
ཨལདྡྷཱ ཀིཉྩི པཱམོཛྫཾ, པབྦཛྫམྤི ན མོདཏི.
པུརེ མརཱམི ཀཱཡེ སྨིཾ, པསྶཱ མི པསྶིཏབྦཀཾ;
ཨིཙྩཱ རདྡྷོ ཝཱིཏིཾལདྡྷཱ, པབྦཛྫཾ ཨཏིམོདཏི.
ཀཱཡེ ¶ དཊྛབྦ ཛེགུཙྪཾ, ཨཔསྶནྟོ པམཱད ཝཱ;
མོགྷཾཝ དུལླབྷཱཏཱིཏོ, མཧཱཛཱནཱིཡཏཾ གཏོ.
སནྟཾ བྷཱུཏཉྩ ཛེགུཙྪཾ, རཱགགྒིནཱ ཨཔསྶིཡཾ;
པཉྙཱཔདཱིཔཛོཏེན, སམིཀྑེཡྻ ཨབྷིཎྷསོ.
སནྟཾ ¶ བྷཱུཏཉྩ ཀཱཡེ སྨིཾ, དཊྛུཀཱམོ སདཱསཏོ;
པཉྙཱཔདཱིཔཀེནེཝ, དཀྑེ ན རཱགཱིསཱིཁིནཱ.
ཛེགུཙྪིཏེན ཀཱཡེན, ནིཀྑནྟེན ཛིགུཙྪཏོ;
ཨཛྫ སྭེཝཱ ཝིནཊྛེན, ནཱལ མུནྣམིཏུཾ སཏོ.
ཀཱིདིསཾ ¶ མཾ ཏུཝཾ མཉྙི, ཨཧཾ སབྦ ཛེགུཙྪཀོ;
ཛེགུཙྪཏོཙ ནིཀྑནྟོ, ཨིཙྩེཝ ཝཏྟུ མརཧཏི.
ཀཱཡེ ཛེགུཙྪསཉྙཾཝ, ཀརེ སབྦིརིཡཱ པཐེ;
ཏསྨིཾ ཏུཊྛབྦཀཾ ནཏྠི, པིཡཱཡིཏཾ མམཱཡིཏཾ.
སུབྷཱཡ ¶ ནཝ མཏྟཱནཾ, ཨསུབྷཱ པརིཔཱཙཡེ;
སནྟོ པཀྐསྶ སཾསཱརོ, ནནྟོ ནཝསྶ རཱགིནོ.
ཀཱཡེ ཨསུབྷ སཉྙཱཡ, པརིཔཀྐ སབྷཱཝིནོ;
ཨཱལམྦེསུ ཨཙཱཔལླཱ, ཐིརཱ སམྦུདྡྷ སཱསནེ.
ཨནྟོ ¶ གོཙརིཀཱ པཀྐཱ, བཧི གོཙརིཀཱ ནཝཱ;
པཀྐཱ ནཱསཱཡ ཨུཙྩཱ ཏེ, ནཱིཙཱཡེཝ ནཝཱ སིནོ.
ནཝཱནཝཱ ¶ སུབྷཱབྷོགཱི, ནཱིཙཱནཱིཙཱ བྷིགཱམིནོ;
པཀྐཱ པཀྐཱཝ དྷཱིཛྷཱཡཱི, སནྟཱསནྟཱ ཝིརཱགིནོ.
སཀྐཱ སཀྐཱ ན དསྶེཏུཾ, སུབྷཾསུབྷཾ སཏཾསཏཾ;
དྷཱིརཱདྷཱིརཱག མུཛ྄ཛྷནྟི, ཀཱཡེ ཀཱཡེ ཀྲིཡེཀྲིཡེ.
སཀྐཱ ¶ སཀྐཱཔི ཏཾ ཀཱཏུཾ, སུབྷཾསུབྷཾ ན དྷཱིམཡཾ;
སནྟོསནྟོཛིགུཙྪཉྙཱུ, ན ཝཱནཝཱ སུབྷེསཀོ.
དུཀཱཡཾ ¶ སུཏི ཙིནྟེཏྭཱ, མམཱཡནྟཱ མཧཱཏཔཱ;
ཏཔཾ ནིབྦཱཡིཏུཾ ཨིཙྪཾ, དུཀཱཡཾ དུཏི ཙིནྟཡེ.
ཡྭཱསུབྷཾ སུབྷཏོ མཉྙི, ཀོནུབཱལོཏདུཏྟརི;
ཨནྡྷོ ཨུམྨཏྟཀོཝཱ སོ, ནཏྟཱནཾ མཉྙཏེ ཏཐཱ.
སརིཏབྦཀ ¶ མེཝེཏཾ, ཀཱཡེ ཛེགུཙྪ པུཉྫཏཾ;
མནྡརཱགོ མནོསཱིཏཾ, ལབྷེཡྻ ཏམནུསྶནཾ.
གིཧིབྷཱཝེ ཨཔཱཡེཙ, རཱགཡཀྑནྡྷ ནིནྣིཏཱ;
མཾཔི ནེསྶཏི སོཡཀྑོ, སཱདེམིཙེ ཏདཱགཏཾ.
ཨབྷིཎྷ ¶ གཱཧིནཾ རཱག, ཡཀྑཾ ཨནནྟ དུཀྑ དཾ;
ཨསུབྷཱ ཏུལ མནྟེན, ཝཱརེཧི ཏཾ ས བྷཱཡཏི.
རཱགཡཀྑོ བཧུམཱཡོ, སདྡྷཱམེཏྟཱ དིཝེསཝཱ;
རཱགམྤི ཀུསལཾ མཉྙི, ཛནོ ཏེནེཝ ཝཉྩིཏོ.
ཨཱཏུརཾ ¶ ཨསུཙིཾ པུཏིཾ, པསྶ ནནྡེ སམུསྶཡཾ;
ཨུགྒྷརནྟཾ པགྒྷརནྟཾ, བཱལཱནཾ ཨབྷིཔཏྠིཏཾ.
སུབྷཏོ ནཾ མཉྙཏི བཱལོ, ཨཝིཛྫཱཡ པུརཀྑཏོ;
ཨིཙྩཱཧ བྷགཝཱ ནིནྡི, བཱལོཏི སུབྷསཉྙིནཾ.
ནྷཱརུཊྛི ¶ ཏཙ མཾསཱནི, སརཾ སཏཾ ན ནིནྡིཏོ;
བུདྡྷནིནྡཱཡ མོཙེཏུཾ, ཏཱནཱརབྦྷ ཨནུསྶརེ.
མཉྙིཏྭཱ ཨཏྟནོ བཱལྱཾ, ཨསུབྷེ སུབྷདསྶིནོ;
ཝཱཡཱམེཡྻ ཨབཱལཱཡ, ཀཱཡཾ ཨསུབྷཏོ སརཾ.
ཨཏྟཱནཾ ¶ གརཧིཏྭཱན, བཱལཾ ཝིཔརིདསྶིནཾ;
སུབྷསཉྙཾ པཧིནྣེཡྻ, ཀརེཡྻཱསུབྷ སཉྙིཏཾ.
ཝིས བྷེསཛྫརུཀྑཊྛོ, ཨཧི ཌཾསེཡྻསོསཏོ;
ཡཐཱ ཏསྶེཝ པཎྞཱདིཾ, ཁཱདེཏྭཱ ཝིས མུཛྫཧེ.
ཨེཝཾ རཱགོ སམུཔྤཛྫེ, ཀཱཡེ གནྡྷཱདི ཝཱསིཏེ;
ཨནྟོ ཏསྶེཝ ཛེགུཙྪཾ, ཙིནྟེཏྭཱ རཱག མུཛྫཧེ.
ཛིགུཙྪིཏེན ¶ ཀཱཡེན, ཨཔསྶནྟོ ཛིགུཙྪཏཾ;
ཨུནྣམེཏི ཨཝཉྙཱཏི, ཨཝིཛྫཱཡ པུརཀྑཏོ.
ཨཱཡཏིཾ ¶ མགྒལཱབྷཱཡ, བཱིཛཾ ཀརེཡྻ བྷཱཝནཾ;
བཱིཛཱ བྷཱཝེ ཀུཏོ མགྒོ, མགྒབཱིཛཱ ཧི བྷཱཝནཱ.
མགྒབཱིཛོ ཨཔཱཡེཔི, ནིམྨུགྒོ སམཡེ གཏེ;
ཨུམྨུཛྫིཏྭཱཝ བུདྡྷཱནཾ, མགྒཾ ལབྷེཡྻ སནྟིཀེ.
ཨཛཱིཛསྶ ¶ ཏུ སཾསཱརོ, དཱིགྷོཡེཝ ཨནནྟིཀོ;
ཏསྨཱཧི བྷཱཝནཱབཱིཛཾ, ཀརེཡྻ མོཙནཏྠིཀོ.
ཨབྷིཎྷ པཱིལི༹ཏཾ རཱགཾ, ཨསུབྷཱཡ ནིཝཱརཡེ;
མནྡཱིཧུཏྭཱ པཧཱིཡེཡྻ, རཱགོ ཨསུབྷ བྷཱིརུཀོ.
མཱཛེགུཙྪཾ ¶ མམཱཡེཐ, སཱཝ ཛེགུཙྪམཱམཀོ;
ཨནནྟ དུཀྑ མཱཔཱདི, ཛེགུཙྪིཏ མམཱཡནཱ.
མཾསལགྒོ ཏཙཙྪནྣོ,
ནྷཱརུབནྡྷོ ཊྛིཔུཉྫཀོ;
མོཧེཏི ཚཝིཡཱ ལོཀཾ,
མཧཱདུཀྑོ ས མོཧིཏོ.
ནྷཱརུཊྛི ¶ ཏཙ མཾསེཧི, རཱགཝཌྜྷཀི སངྑཏེ;
གེཧེ རོགཱ པུཏཱི པཱཔཱ, ཝསནྟི ཀུཙྪིཏཱ སདཱ.
ལུངྒནྟཱ ཝཱིས བྷཱུདྷཱཏཱུ, པིཏྟཱདཱི དྭཱདསམྦུཝ;
ཏཱཔཾ ཛིརཾ དཧཾ པཀྐཾ, ཙཏུརགྒི ཚཝཱཡུཀཱ.
ཨདྷོདྡྷཾ ཀུཙྪི ཀོཊྛཱསཱ,
ཨངྒཙཱརཱིཙ པཱཎཀཱ;
དྷཱཏུཡོཡེཝ ཀཱཡེསྨིཾ,
དྭིཏཱལཱིས ཨནཉྙཀཱ.
ཡཐཱ ¶ བཧི ཏཐཱ ཨཛ྄ཛྷཏྟཾ, དྷཱཏཱུ བྷྭཱཔཱ ནལཱནིལཱ;
ནམེ ནཱཧཾ ནཨཏྟཱཏི, སཾམསེཡྻ པུནཔྤུནནྟི.
༤. མེཏྟཱབྷཱཝནཱནིདྡེས
མེཏྟཱ ¶ བྷཱཝན མིཙྪམྤི, སུཎ བུདྡྷཝཙོ ཡིདཾ;
དོས ནིགྒཧཎཏྠཱཡ, དོསོ མེཏྟཱཡཝེརིཧི.
ཨཀྐོཙྪིམཾ ཨཝདྷིམཾ, ཨཛིནིམཾ ཨཧཱསིམེ;
ཡེཙ ཏཾ ཨུཔནཡ྄ཧནྟི, ཝེརཾ ཏེསཾ ནསམྨཏི.
ཨཀྐོཙྪིམཾ ¶ ཨཝདྷིམཾ, ཨཛིནིམཾ ཨཧཱསིམེ;
ཡེཙཏཾ ནུཔནཡ྄ཧནྟི, ཝེརཾ ཏེསཾ ཨུཔསམྨཏི.
ནཧིཝེརེན ཝེརཱནི, སམྨནྟིདྷ ཀུདཱཙན;
ཨཝེརེནཙ སམྨནྟི, ཨེསདྷམྨོ སནནྟནོ.
པརེཙ ¶ ནཝིཛཱནནྟི, མཡ མེཏྠ ཡམཱམསེ;
ཡེཙ ཏཏྠ ཝིཛཱནནྟི, ཏཏོ སམྨནྟི མེདྷགཱ.
ཀུདྡྷོ ཨཏྠཾ ནཛཱནཱཏི, ཀུདྡྷོ དྷམྨཾ ནཔསྶཏི;
སདཱ ཨནྡྷཏམཾ ཧོཏི, ཡཾཀོདྷོ སཧཏེནརཾ.
ཨུབྷིནྣ ¶ མཏྠཾ ཙརཏི, ཨཏྟནོཙ པརསྶཙ;
པརཾ སཾཀུཔྤིཏཾ ཉཏྭཱ, ཡོ སཏོ ཨུཔསམྨཏི.
ཏསྶེཝ ཏེན པཱཔིཡྻོ, ཡོ ཀུདྡྷཾ པཊིཀུཛ྄ཛྷཏི;
ཀུདྡྷཾ ཨཔཊིཀུཛ྄ཛྷནྟོ, སངྒཱམཾ ཛེཏི དུཛྫཡཾ.
ཁནྟཱི ¶ པརམཾ ཏཔོ ཏིཏིཀྑཱ,
ནིབྦཱནཾ པརམཾ ཝདནྟི བུདྡྷཱ;
ནཧི པབྦཛིཏོ པརཱུཔགྷཱཏཱི,
ནསམཎོ ཧོཏི པརཾ ཝིཧེཋཡནྟོ.
ཨཀོདྷེན ཛིནེ ཀོདྷཾ, ཨསཱདྷུཾ སཱདྷུནཱ ཛིནེ;
ཛིནེ ཀདརིཡཾ དཱནེན, སཙྩེནཱ ལིཀཝཱདིནཾ.
ཡོ ¶ ཝེ ཨུཔྤཏིཏཾ ཀོདྷཾ, རཐཾ བྷནྟཾཝ ཝཱརཡེ;
ཏ མཧཾ སཱརཐཱི བྲཱུམི, རསྨིགྒཱཧོ ཨིཏརོཛནོ.
པུརིསསྶ ¶ ཧི ཛཱཏསྶ, ཀུདྷཱརཱི ཛཱཡཏེ མུཁེ;
ཡཱཡ ཚིནྡཏི ཨཏྟཱནཾ, བཱལོ དུབྦྷཱསིཏཾབྷཎཾ.
སེལོ ཡཐཱ ཨེཀགྒྷནོ, ཝཱཏེན ནསམཱིརཏི;
ཨེཝཾ ནིནྡཱ པསཾསཱསུ, ནསམིཉྫནྟི པཎྜིཏཱ.
སམཱནབྷཱགཾ ¶ ཀྲུབྦེཐ, གཱམེ ཨཀྐུཊྛ ཝནྡིཏཾ;
མནོཔདོསཾ རཀྑེཡྻ, སནྟོ ཨནུཎྞཏོ སིཡཱ.
ནཔརོ པརཾ ནིཀུཔྤེཐ, ནཱཏིམཉྙེཐ ཀཏྠཙི ནཀིཉྩི;
བྱཱརོསནཱ པཊིགྷསཉྙཱ, ནཉྙམཉྙསྶ དུཀྑ མིཙྪེཡྻ.
མཱཏཱ ¶ ཡཐཱ ནིཡཾ པུཏྟ,
མཱཡུསཱ ཨེཀཔུཏྟ མནུརཀྑེ;
ཨེཝམྤི སབྦ བྷཱུཏེསུ,
མཱནསཾ བྷཱཝཡེ ཨཔརིམཱཎཾ.
སུཏྭཱན དུསིཏོ བཧུཾ ཝཱཙཾ,
སམཎཱནཾཝཱ པུཐུཛནཱནཾ;
ཕརུསེན ཧི ན པཊིཝཛྫཱ,
ན ཧི སནྟོ པཊིསེནིཾ ཀརོནྟི.
སཙྩཾ ¶ བྷཎེ ནཀུཛ྄ཛྷེཡྻ, དཛྫཱ ཨཔྤམྤི ཡཱཙིཏོ;
ཨེཏེཧི ཏཱིཧི ཋཱནེཧི, གཙྪེ དེཝཱན སནྟིཀེ.
ན པརེསཾ ཝིལོམཱནི, ན པརེསཾ ཀཏཱཀཏཾ;
ཨཏྟནོཝ ཨཝེཀྑེཡྻ, ཀཏཱནི ཨཀཏཱནིཙ.
སུ ¶ དསཾ ཝཛྫམཉྙེསཾ, ཨཏྟནོ པན དུདྡསཾ;
པརེསཉྷི སོ ཝཛྫཱནི, ཨོཕུནཱཏི ཡཐཱ བྷུསཾ;
ཨཏྟནོ པན ཚཱདེཏི, ཀལིཾཝ ཀིཏཝཱ སཊྛོ.
ནིདྷཱིནཾཝ ¶ པཝཏྟཱནཾ, ཡཾ པསྶེ ཝཛྫདསྶིནཾ;
ནིགྒཡ྄ཧཝཱདིཾ མེདྷཱཝིཾ, ཏཱདིསཾ པཎྜིཏཾ བྷཛེ.
ཏཱདིསཾ བྷཛམཱནསྶ,
སེཡྻོཧོཏི ནཔཱཔིཡོ;
ཨིཏི ཝུཏྟཾ མུནིནྡེན,
ཏིལོཀགྒེན སཏྠུནཱ.
མེཏྟཱ ¶ གནྡྷེན ཝཱསེནྟོ,
དོསཾ དཱུརེཀརེ བུདྷོ;
དཱུརཱསནྣེསུ སབྦེསུ,
ཨཏྟནོ ཝེརིཀེསུཔི.
ཧནེ དོསཱུ པནཱཧཱནི, ཨནཏྠ ཀཱརཀཱནི ཧི;
ཏེསྭ སནྟེསུ སབྦེསུ, མེཏྟཱཧོཏི སུནིམྨལཱ.
སཏཾ ¶ དུཛྫན ཝཱཀྱེཧི, ནམནོ ཡཱཏི ཝིཀྲིཡཾ;
ནཧིཏཱཔཡིཏུཾ སཀྐཱ, གངྒཱནདིཾ ཏིཎུཀྐཡཱ.
ནཧི ནིནྡཱ པསཾསཱཧི, སཏཾ མནོཝིཀཱརཏཱ;
ན ཀདཱཙིཔི ཀམྤེཡྻ, ཝཱཏེཧི སེལཔབྦཏོ.
ནདིཡཾ ¶ ཁུདྡཀཱ ནཱཝཱ, ཝིཙཱིཧི ཨུནྣཏོནཏཱ;
མཧཱནཱཝཱ ནཀམྤནྟི, མཧནྟཱིཧི ཝིཙཱིཧིཔི.
ལོཀེ པསཾས ནིནྡཱཧི, དུཛྫནོཝུནྣཏོནཏོ;
སནྟོཔཉྙོ ནཙལཏི, མཧཱནིནྡཱ ཐུཏཱིཧིཔི.
སེལོསེལོ ¶ ནིལེཧེཝ,
ཝཎྞཱཝཎྞཱ ཨསསྶཏཱ;
ལཱབྷཱལཱབྷཱ སུཁཱདུཀྑཱ,
ཡསཱཡསཱ ནཀམྤཏི.
ཁམཱདྷགྒ ཀརེཏསྶ, དུཛྫནོ ཀིཾ ཀརིསྶཏི;
ཨཏིཎེ པཏིཏོ ཨགྒི, སཡམེཝ པསམྦྷཏི.
སཡམེཝ ¶ སཀཏྟཱནཾ, མཙྩུབྦྷཡེན ཏཙྪཏུ;
མཱཉྙེ ཏཙྪཏུ དོསེན, ཀིམཏྠཾ ཨཉྙཏཙྪནཾ.
མཱཉྙེ ཏཙྪ ཏུདོསེན, ནསེཡྻོ ཨཉྙཏཙྪནཾ;
མཱཉྙོ ཏཾ ཨཧིབྱགྒྷེཝ, དོམནསྶེན བྷཱཡཏུ.
ནིསྶཱཡ ¶ གརུཀཱཏབྦཾ, བཧཱུནཾ པཱཔམོཙནཾ;
ཨཙཱཔལླེན སནྟེན, གརུཀཱཏབྦཏཾ ཝཛེ.
ནིསྶཱཡ གརུཀཱཏབྦཾ, བཧཱུནཾ པུཉྙཝཌྜྷནཾ;
གརུཀཱཏབྦཏཾ གཙྪེ, དྷཱིཏིཡཱ སཱིལ གུཏྟིཡཱ.
སནྟཾ ¶ ཧི སཱིལཝཾ དྷཱིཏིཾ, ཧིརོཏྟཔྤེན བྷཱཡཏི;
དུཛྫནཾ དོམནསྶེན, ཨཧིབྱགྒྷེཝ བྷཱཡཏི.
ནཕརུསཱཡ ཝཱཙཱཡ, ཨཉྙེ དམེཡྻ པཎྜིཏོ;
ཨཏྟཱནཾཝ དམེཏྭཱན, ཨཉྙེ སཎྷེན ཨོཝདེ.
ཙིཏྟེ ¶ སཎྷེ ཨསཎྷཱཔི, ནཝཱཙཱཕརུསཱ བྷཝེ;
ཏསྨཱ ཨོཝཱ དནཱདཱིསུ, རཀྑེཡྻ ཐདྡྷཙིཏྟཏོ.
ཨཏྟཱན མོཝདཏྠཱཡ, སིཀྑེཡྻ བུདྡྷབྷཱསིཏཾ;
པརམྤི ཨནུཀམྤཱཡ, ཨིཙྪནྟོ ཨནུསཱསཡེ.
ཨཉྙཾ ནནིགྒཧེ ཀིཉྩི, སུཏེན པཊིཔཏྟིཡཱ;
ཨཏྟནིགྒཧཎཾ སེཡྻོ, ནུནྣམེཡྻ ཛིནོརསོ.
ནཱཝཱིཀརེཡྻ ¶ དོསཾཝཱ, ལོབྷཾ མཱནཾ སཀཾམལཾ;
མཱཉྙེ མཉྙནྟུ ཏཾ དིསྭཱ, ཙིརཔྤབྦ ཛིཏོ ནུཏི.
ཀཀཙེན ཏྟཚེདེནྟེ, ཝེརིཀེཔིནདོསཡེ;
ཨིཙྩོཝཱདཾ མུནིནྡསྶ, སམྤཊིཙྪ ཛིནོརསོ.
ཝེརཱི ¶ ཨཙྩུཔནཱཧཱིཔི, རཱུཔེཝ དུཀྑཀཱརཀོ;
ན ཏྭ ཏབྦིསཡེ ནཱམེ, དུཀྑཾ མཱཀརི ཙེཏསི.
ཝེརཱི ཏིབནྡྷ ཝེརོཔི, ཨིཧེཝ དུཀྑཀཱརཀོ;
བྷཝནྟརཾ ནཨནྭེཏི, སཀམྨུནཱ གཏོ ཧིསོ.
དོསོཏུ ¶ ཨིཧ པཱིལེ༹ཏྭཱ,
དུཀྑཱཝཧོ བྷཝེབྷཝེ;
མཧཱནཏྠ ཀརཾ དོསཾ,
ཀསྨཱ ཝཌྜྷེཏི ཙེཏསི.
མེཏྟཱསཱིཏམྦུསེཀེན, ཛིནོཝཱད མནུསྶརཾ;
མཧཱ ནཏྠ ཀརཾ དོསཾ, ནིབྦཱཡཏུ ས ཙེཏསི.
ཚདྡནྟོ ¶ ལུདྡཀཾ པཱཔཾ, བྷཱུརིདཏྟོཧི ཏུཎྜིཀཾ;
དྷམྨཔཱལོ ཁམི ཏཱཏཾ, ཀཔིནྡོ ཀནྡརོ པཏཾ.
ཨསངྑྱེཡྻ ཏྟབྷཱཝེསུ, པརཝཛྫཾ ཏིཏིཀྑཏོ;
ནཱཐསྶ པཱརམིཾ ཁནྟིཾ, སརཾ དྷཱིརོ ཏིཏིཀྑཏུ.
སཱསནེ ¶ ཙིརཝཱསེན, ཨེཝཾ ནིདྡོསཀཱ ཨིཏི;
ཏུཝཾ པཊིཙྩ མཉྙནྟུ, སཱསནེ སཔྤཡོཛནཾ.
སཱསནེ ཙིར ཝཱསཱཔི, མཱདིསཱཝ ཨིམེ ཨིཏི;
ཏམཱགམྨ ནམཉྙནྟུ, སཱསནེ ནིཔྤཡོཛནཾ.
དྭེ ཨུསེཏཱིཏི དོསོ སོ, སཔརཾ དཡ྄ཧཏེ དྭཡཾ;
པཧཱཏབྦོ ས སབྦེསུ, པརཏྠ སཏྠ མིཙྪཏཱ.
པརདིནྣེཧི ¶ ནོཨཱཡུ, ཏིཊྛཏེ ནཱཏྟནོ ཝསཱ;
པརཝཛྫཾ ཁམེཏབྦཾ, ནསཱདྷུ ཨཉྙཝིརོདྷིཏོ.
ཛེགུཙྪ ¶ ཀྐོས ནིནྡཱནི, བཱལོ གཎྷཱཏི ཨཀྑམོ;
ཁམནྟོཏུ ནགཎྷཱཏི, ཛཱནཾ ཛེགུཙྪིཏཱནིཏི.
པརདིནྣཱནི ཝཙྩཱནི, པཱབྷཏནྟི ནཀོཙིཔི;
གཎྷེཡྻེཝཾ དུརུཏྟཱནི, ཨགཎྷནྟོ ཁམེ སཏོ.
ནདི ¶ ཀལློལ ཝིཙིཡོ, ཏཱིརཾ པཏྭཱ སམནྟིདྷ;
སབྦེ ཨུཔྤཏིཏཱ དོསཱ, ཁནྟིཔཏྭཱ སམནྟི ཏེ.
དོསུམྨཏྟཀ ཝཱཙཱཡ, ནུམྨཏྟོ ཀིཾཀརིསྶཏི;
བྷཝེ ཡྻུམྨཏྟཀོ སོཝ, ཏཱདིསཾ ཝཙནཾ བྷཎཾ.
ཀོདྷནོ ཨཀྑམོ ཨཉྙ, དུཊྛསཉྙཱི བྷཡཱལུཀོ;
གཱམམཛ྄ཛྷེ ཨལ༹ཀྐོཝ, ཏཐཱ མཱཧོཧི ཏཾ ཛཧ.
མེཏྟཱལུཀོ ¶ ཁམཱསཱིལོ,
སབྦཊྛཱནེསུནིབྦྷཡོ;
པརཏྠ སཏྠ མིཙྪནྟོ,
ཁནྟི མེཏྟཉྩ བྷཱཝཡེ.
པརཀྐོསཱནི ནིནྡཱནི, ཏཾཝ པཙྩེནྟི ནཱཉྙགཱུ;
ཁིཏྟཾཔཾསུཝ ཝཱཏུདྡྷཾ, གརུཀཾ ཀིཾ ཁམཱཡཏེ.
ཨཀྐོསནྟོཙ ¶ ནིནྡཱིཙ, པཱིལི༹ཏོ སཀ ཀམྨུནཱ;
ཨིདྷ པེཙྩཙ ནཱིཙེཡྻོ, ནཾནཡཾ གཎྷི ཨཀྑམོ.
ཨཀྐོསོ ¶ མཾ ནཨཱགཙྪི,
ཏསྶེཝཱ ནཏྠཀཱརཀོ;
ཨིཏི ཉཏྭཱཝ སཔྤཉྙོ,
ཨཀྐོསཾ ན གརུཾ ཀརེ.
ཝིཀཱརཱཔཏྟི མིཙྪནྟོ, ཝེརཱི བཧུ མུཔཀྐམི;
མཱམིཏྟཝས མནྭེཧི, ནིབྦིཀཱརོ ཏུཝཾབྷཝ.
མེཏྟམྦུནཱ སདྡོསོཙ, པརདོསོཙ སམྨཏི;
མེཏྟཱསེཀེན སབྦེསུ, སབྦཏོགྒིཾ ནིཔཱརཡེ.
སདོས ¶ པརདོསགྒིཾ, སབྦཏོ དིསཏོ ཊྛིཏཾ;
མེཏྟཱ ཏོཡེན ཝཱརེཡྻ, སིཡཱ ནིབྦུཏི སབྦདྷི.
ནགམེ ཨཏྟནོ ཨགྒིཾ, པརགྒིཾཝཱཔི ནཱགམེ;
མེཏྟམྦུནཱཝ ནིབྦཱཏུ, སཔརགྒི དྭཡཾ བྷུསཾ.
གུཎཱི ¶ གུཎཱི ནནྡིནྡཱཡ, པསཾསཱཡ གུཎཱི གུཎཱི;
ནིནྡཾནིནྡཾ ནཀུཔྤེཡྻ, ནསཱདིཡེ ཐུཏིཾ ཐུཏིཾ.
གུཎཾ ནིནྡཱཡ ནཱསེཏུཾ, ནསཀྐཱ ཀོཙི ཀུསྶཀོ;
ཝཌྜྷེཏུཾཝཱ པསཾསཱཡ, གརུཾཀརེ ན ཏཾདྭཡཾ.
དོསབྦྷཱ ¶ མལ སཉྪནྣོ, མེཏྟཱཙནྡོ ན རོཙཏི;
ཏཾམུཏྟསྶ ཏུ ཨེཏསྶ, ཨཏིསྶཡ པབྷཱཝཏོ.
སུ སུཏྟ བུདྡྷ སུཔིནཱ, དྭེཔིཡཱ གུཏྟི ནཱཀྐམོ;
སམཱདྷི སུམུཁཱ མུལ༹ྷཱ, བྲཧྨཱ ཏྱེཀཱ དས གྒུཎཱ.
སཱིཏཾ ¶ ཀརོཏུ མེཏྟཱཡ, ཙཀྑུཾ ལཱབྷེཏུ པཉྙཱཡ;
མཱཀཱསིནིཔྤབྷེ ཙཉྙེ, ཙནྡོ ཧོཧི གཏེགཏེ.
དཱུརཱསནྣེསུ ¶ སབྦེསུ, མེཏྟཾ པེསེཏུ པཱབྷཏཾ;
དྷམྨཾ དེསེཏུ པཏྟཱནཾ, ཙནྡོ ཧོཧི གཏེགཏེ.
སམྤཏྟཱནཾ མལཾ དྷོཝ, སཱིཏཾཀརེ སདཱདཡོ;
ཨུཙྩནཱིཙེ ནཝིསེསེ, ཛལསྶམོ གཏེགཏེ.
ཨསཨསྶཏེསུ ¶ ཕུཊྛེསུ, ལོཀདྷམྨེསུ ཨཊྛསུ;
པཏིཊྛོ ནིབྦིཀཱརོ ཏྭཾ, པཐཝཱིསདིསོ བྷཝ.
ནཱཀཱསི ཀལཧཾ སིལཱ, སདཱ ཀེནཙི ནིཙྩལཱ;
མེཏྟཱཡནྟོ ཁམཱཡནྟོ, མཧཱསིལཾ གུརུཾཀརེ.
སིལཱཝ ¶ སཱིལཝཱ ཧོཏུ, དུརུཏྟཱནི ཏིཏིཀྑཏུ;
པཙྩུཏྟེ དོསསཾཝཌྜྷོ, ཨནུཏྟོཝ པསམྦྷཏི.
སབྦེ ཨཧཾཝ ཨིཙྪནྟི, སཏྟཱ སུཁནྟི ཉཱཏུན;
བྷཱཝེཡྻ ཀམཏོ མེཏྟཾ, པིཡ མཛ྄ཛྷཏྟ ཝེརིཀེ.
སབྦེ ¶ ཏསནྟི དཎྜསྶ, སབྦེ བྷཱཡནྟི མཙྩུནོ;
ཨཏྟཱནཾ ཨུཔམཾ ཀཏྭཱ, ནཧནེཡྻ ནགྷཱཏཡེ.
སུཁ ཀཱམཱནི བྷཱུཏཱནི,
ཡོདཎྜེན ཝིཧིཾསཏི;
ཨཏྟནོ སུཁ མེསཱནོ,
པེཙྩ སོ ནལབྷེསུཁཾ.
ཨཝེརཱ ¶ བྱཱཔཛྫཱ ནཱིགྷོ, སུཁཱི ཙསྶཾ ཨཧཾཝ མེ;
ཧིཏཀཱམཱ ཏཐཱ ཨསྶུ, མཛ྄ཛྷཏྟཱ ཝེརིནོཔིཙ.
མཱཏརོ ¶ བྷཱཏརོ ཉཱཏཱི, དཱཡཀོ པཱསཀཱཔིཙ;
སུཁཱིཧོནྟཱུཏི བྷཱཝེཡྻ, ཙཛེ ཏེསུཙ ལགྒནཾ.
དོསོ མེཏྟཱཡ དཱུརཱརི, ཏཎྷཱ ཨཱསནྣ ཝེརིཀཱ;
ཏཎྷཾ པིཡེསུ ཝཱརེཡྻ, དོསཾ ཝེརཱིསུ མེཏྟིཀོ.
ཨེཀུདྡེསེ ¶ ཀཀམྨཱཙ, སིསྶཱ ཨཱཙརིཡཱ སུཁཱི;
ཧོནྟུ སབྲཧྨཙཱརཱིཙ, ཏེཙ ཉྙོཉྙ ཧིཏཱཝཧཱ.
རཱཛཱནོཙ ཨམཙྩཱཙ, གཱམེ ཨིསྶརིཡཱ སུཁཱི;
བྷཝནྟུ དེཝཏཱཡོཙ, ཏེཧི སུརཀྑིཏོ སུཁོ.
མཡཾ ¶ ཡེན སུགུཏྟཱཝ,
སུཁིཏཱ རཊྛཝཱསིནོ;
སུཁཱི ཀལླ ཏྠུ སོརཱཛཱ,
ཏེཛཝནྟོ ཙིརཱཡུཀོ.
རཊྛ ¶ པིཎྜེན ཛཱིཝཱམ, རཊྛཝཱསཱི སུཁནྟུཏི;
བྷཱཝེཡྻེཝཾ ཨམོགྷཾཝ, རཊྛཔིཎྜཾ སུབྷུཉྫཏི.
ཨཱཔཱཡིཀཱ བཧཱུ སནྟི, མཱཏཱཔིཏཱདི པུབྦཀཱ;
ཏེཙཉྙེཙ སུཁཱིནཱིགྷཱ, སྶྭ བྱཱཔཛྫཱ ཨཝེརིནོ.
སཏྟཱ ¶ བྷཱུཏཱཙ པཱཎཱཙ, པུགྒལཱ ཨཏྟབྷཱཝིཀཱ;
ཐཱི པཱུ རིཡཱ ནརིཡཱཙ, དེཝཱནརཱ ནིཔཱཏིཀཱ.
ཨཝེརཱ ཧོནྟུ བྱཱཔཛྫཱ, ཨནཱིགྷཱཙ སུཁཱི ཨིམེ;
ཨཏྟཱནཾ པརིཧཱརནྟུ, ཙཏུདྷཱ ཨིཏི བྷཱཝཡེ.
པུརཏྠིམཱཡ ¶ དིསཱཡ, སབྦེསཏྟཱ ཨཝེརིནོ;
ཨབྱཱཔཛྫཱ སུཁཱིནཱིགྷཱ, ཧོནྟཱུཏི ཏཱཝ བྷཱཝཡེ.
པུརཏྠིམཱཡ དིསཱཡ, སབྦེཔཱཎཱཏིཨཱདིནཱ;
དྭཱདསཀྑཏྟུཾ བྷཱཝེཡྻ, སེསཱསུཔི ཨཡཾནཡོ.
ཙཏུདྡིསཱ ¶ ནུདིསཱ དྷོ, ཨུདྡྷཾ སཏྟཱཙ པཱཎིནོ;
བྷཱུཏཱཙ པུགྒལཱ ཨཏྟ, བྷཱཝཱི སབྦེ ཐི པཱུརིསཱ.
ཨརིཡཱ ཨརིཡཱ དེཝཱ, ནརཱཙ ཝིནིཔཱཏིཀཱ;
ཨཝེརཱ བྱཱཔཛྫཱ ནཱིགྷཱ, སུཁཏྟཱཙ བྷཝནྟུ ཏེ.
ཙཏུདྡིསཱ ¶ ནུདིསཱ དྷོ, ཨུདྡྷནྟི དསཀེདིསི;
དྭཱདསེ ཏེ པརིཙྪིཛྫ, བྷཱཝེཡྻ པུགྒལེ བུདྷོ.
མེཏྟཱ ¶ ཝསྶེན ཏེམེཏུ, པཛྫུནྟོཝིཡ སབྦདྷི;
མཱཀིཉྩི པརིཝཛྫེཧི, ཨེཝཾ མེཏྟཱ སུབྷཱཝིཏཱ.
པཉྩཱ ནོདྷི སཏྟོདྷིསཱ, སིཡུཾ དྭཱདསཔུགྒལཱ;
ནྟུ ཙཏཱུཧེསུ བྷཱཝེཏྭཱ, ཨཊྛཏཱལཱིསཀཱ སིཡུཾ.
དསཀེདིསི ¶ ཏཱམེཏྟཱ, ཙཏུསྶཏ ཨསཱིཏིཡོ;
ཨཊྛཏཱལཱིསཱཧི པཉྩ, སཏཱ ཊྛཝཱིས སཱདྷིཀཱ.
དུཀྑིཏེ ¶ ཀརུཎཾ བྲཱུཧེ, མུདིཏཾ སུཁིཏེ ཛནེ;
མེཏྟཱཙེཝ ཨུཔེཀྑཱཙ, ཨུབྷོ ཨུབྷོསུ བྷཱཝིཏཱ.
བྲཧྨཝཱསཱིཏི ཝཏྟབྦོ, ཏེསྭཉྙཏར ཝཱསིཏོ;
གནྡྷབྷཱུཏེསུ སོ ལོཀེ, བྲཧྨཱཝིཡ ཝིརོཙཏི.
ཨཔྤམཱདཱཝཧ པཀིཎྞཀནིདྡེས
སཾཝིཛྫནྟི ¶ དྷ ལོཀསྨིཾ,
བཧཱུ ཛཱིཝིཏཀཔྤནཱ;
གཧེཏྭཱ པཏྟ མུཉྪོ ཡོ,
ཛཱིཝིཀཱནཾ ས ལཱམཀོ.
སུཀུལཱཙ ཏདུཔགཱ, ཀཱམབྷོགཱ ནཔེཀྑིནོ;
ན བྷཡཊྚཱ ན ཨིཎཊྚཱ, ནེཝ ཨཱཛཱིཝ ཀཱརཎཱ.
ནཱལཾཝ ¶ གིཧིནཱ བྲཧྨ, ཙརིཡཱཡ ཨཁཎྜིཏཾ;
གྷརཱཝཱསོ ཏིསམྦཱདྷོ, པབྦཛྫཱཝ ནིརཱལཡཱ.
བྷཝཔངྐཱ ¶ པམུཙྩཱམ, ཏིཝིཏྟིཎྞཱ བྷཡཱནཀཱ;
པཊིཔཏྟི ཡིམཱཡཱཏི, ཀཏྭཱ ཏདུཔགཱ ཨིམེ.
ཨུཏྟིཊྛེ ནཔྤམཛྫེཡྻ, དྷམྨཾ ཙརིཏཾ སུཙརེ;
དྷམྨཙཱརཱི སུཁཾསེཏི, ཨསྨིཾལོཀེ པརམྷིཙ.
སྭཱགཏཱ ¶ ཝཏ ཏེབྷིཀྑཱུ, པཏྟཱ སམྦུདྡྷཔུཏྟ ཏཾ;
གིཧི བནྡྷན པུཙྪིཛྫ, སུཁིཏཱ སཱསནེ རཏཱ.
ཀཏཔུཉྙ ཝིསེསཱཝ, ཨེཏེ སུལདྡྷ དུལླབྷཱ;
ཚཊྚེཏྭཱཔི མཧཱརཛྫཾ, ནེདིསཾ ལདྡྷ མཉྙདཱ.
སྭཱགཏཱ ¶ སུགཏཱི ཧོནྟུ, མཱདུགྒཏཱི པམཱདིནོ;
དུསྶཱིལཱ ཙེ གམིསྶནྟི, ཨཔཱཡཾ ཏིབྷཡཱནཀཾ.
གིཧིབྷོགཱ ¶ པརཱིཧིནྣོ, སཱམཉྙཏྟཉྩ དཱུབྷཏོ;
པརིདྷཾསམཱནོ པཀིརེཏི, ཚཝཱལཱཏཾཝ ནསྶཏི.
ཀུསོ ཡཐཱ དུགྒཧིཏོ, ཧཏྠམེཝཱ ནུཀནྟཏི;
སཱམཉྙཾ དུཔྤརཱམཊྛཾ, ནིརཡཱ ཡུཔ ཀཌྜྷཏི.
ཡཾཀིཉྩི ¶ སིཐིལཾ ཀམྨཾ, སཾཀིལིཊྛཉྩ ཡཾཀཏཾ;
སངྐསྶརཾ བྲཧྨཙརིཡཾ, ནཏཾཧོཏི མཧཔྥལཾ.
ཀརིཡཱཙེ ཀརིཡཱ ཝེནཾ, དལ༹ྷམེནཾ པརཀྐམེ;
སིཐིལོཧི པརིབྦཛོ, བྷིཡྻོ ཨཱཀིརཏེ རཛཾ.
ཨིཏི ¶ ཝུཏྟཾ མུནིནྡེན, ནུསྶརཾ ཨནི ཝཏྟིཏོ;
སདཱ ཨལིན ཙིཏྟེན, ཙརེཡྻ བུདྡྷསཱཝཀོ.
རཱགཾ ཨསུབྷཙིནྟཱཡ, དོསཾ མེཏྟཱཡ ཝཱརཡེ;
མརཎེན དྷཛཾམཱནཾ, སམྦུདྡྷེ ཏིཀྑ སདྡྷིཀོ.
ཨསུབྷཱ ཀཱམཝིཏཀྐཾ, མེཏྟཱ བྱཱཔཱད ཏཀྐིཏཾ;
ཝིཧིཾསཾ ཀརུཎཱཡེཝ, ནིཝཱརེཡྻ སདཱསཏོ.
བུདྡྷཱཎཏྟི ¶ སདཱཏཱིཏོ, མིཙྪཱཝིཏཀྐ པཱིལི༹ཏོ;
པཱཔདྷམྨེཧི སཾཀིཎྞོ, སོནིཙྩཱཔཱཡ གཱམིཀོ.
དྷོཝིཏྭཱ པཏྟིམལཱནི, པུནཱཏིཀྐམ སཾཝུཏོ;
མིཙྪཱཝིཏཀྐ སཉྪེདཱི, དཱུརོ ཨཔཱཡ གཱམིཏོ.
ཁཱིཎཱསཝཏྟ ¶ བུདྡྷཏྟཾ, ནིཡྻཱནིཀ ནྟརཱ ཡིཀཾ;
སཱིཧནཱདཾ ཙཏུཊྛཱནེ, ཝེསཱརཛྫོ ཛིནོ ནདི.
སཱིལཾ ¶ ནིཡྻཱནིཀཾ ནཱམ, ཨཱཔཏྟི ཨནྟརཱཡིཀཾ;
ཨནྟརཱཡ མནཱཔཛྫ, ནིཡྻཱནེཝ པཏིཊྛཏུ.
ནིཡྻཱནིཀཱཙ ¶ ཨསུབྷཱ, སུབྷསཉྙཱ ནྟརཱཡིཀཱ;
ཨནྟརཱཡ མནཱཔཛྫ, ནིཡྻཱནེཝ པཏིཊྛཏུ.
ནཱནཱཔཏྟི ¶ པཀིཎྞོཔི, པཱརཱཛིཀཱ ཝསེསཀོ;
སོ མིཏྱཏྟ པཎཱིདྷཱིཧི, ལཛྫཱིཡེཝ ཝིསོདྷཀོ.
ཨལཛྫཱིཀམྨ ཀིཎྞོཔི,
སཾཝེཛེཏྭཱ སུམིཏྟིཀོ;
ལཛྫཱིཡེཝ ཝིསོདྷེནྟོ,
མཏཀོཝ ཨསོདྷཀོ.
ཡོ ¶ པུབྦེཝ པམཛྫིཏྭཱ, པཙྪཱསོ ནཔྤམཛྫཏི;
སོམཾ ལོཀཾ པབྷཱསེཏི, ཨབྦྷཱམུཏྟོཝཙནྡིམཱ.
དྷུརཾཀཏྭཱ ¶ དྷིཔཏཡོ, ཡོ པུཉྙེསུ པརཀྐམེ;
ཏསྶ ནིཡྻཱནིཀཾ ཀམྨཾ, ཀིཾནཱམཀཾ ནསིཛ྄ཛྷཏེ.
པཙྩཏེ ¶ མུནིནོ བྷཏྟཾ, ཐོཀཾཐོཀཾ གྷརེགྷརེ;
པིཎྜིཀཱཡེཝ ཛཱིཝནྟུ, མཱཔཛྫནྟུ ཨནེསནཾ.
དྷོཝེཡྻཱ པཏྟིམགཱནི, ཝུཊྛཱན དེསནམྦུཧི;
སཾཝརིསྶནྟི ཙིཏྟེན, སཱིལཾ དྷོཏསྶ ནིམྨལཾ.
བུདྡྷཱཎཱཏིཀྐམཱཔཏྟི ¶ , ནིགྒཧེ རཱགདོསཀེ;
ནཏྠི སཉྩིཙྩ ཨཱཔཏྟི, ལཛཱིཝ སོ པཝུཙྩཏི.
ཝཱཎིཛྫ ཀསིཀཱདཱིཧི, ནཱཧཱརེཊྛི དྷསཱསནེ;
དྷུར དྭཡཾཝ ཀིཙྩཾ ཏཾ, ནཱཉྙཀིཙྩེཧི ཧཱཔཡེ.
ནིགྒཎྷེཡྻ ¶ སཀཾཙིཏྟཾ, ཀིཊྛཱདིཾ ཝིཡ དུཔྤསུཾ;
སཏིམཱ སམྤཛཱནོཙ, ཙརེ སབྦིརིཡཱཔཐེ.
ཡཐཱ ¶ ཐམྦྷེ ནིབནྡྷེཡྻ, ཝཙྪཾ དམཾ ནརོ ཨིདྷ;
བནྡྷེཡྻེཝཾ སཀཾཙིཏྟཾ, སཏིཡཱ རམྨཎེ དལ༹ྷཾ.
ཨདྷིསཱིལཱདྷིཙིཏྟཱནཾ, ཨདྷིཔཉྙཱཡ སིཀྑནཾ;
བྷིཀྑུ ཀིཙྩཏྟཡཾ ཨེཏཾ, ཀརོནྟོཝ སུབྷིཀྑུཀོ.
པཉྩཱཊྛ ¶ དས སཱིལཱནི, ནཱདྷིསཱིལཾ ཏདུཏྟརི;
པཱཏིམོཀྑཾ ཨདྷིསཱིལཾ, པབྦཏཱ དྷིཀ མེརུཝ.
པཱཏིམོཀྑཾ ¶ ཝིསོདྷེནྟོ, ཨཔྤེཝ ཛཱིཝིཏཾ ཛཧེ;
པཉྙཏྟཾ ལོཀནཱཐེན, ནབྷིནྡེ སཱིལསཾཝརཾ.
སཱིལེནཱ ཏིཀྐམཾ ཐུལླཾ, པརིཡུཊྛཾ སམཱདྷིནཱ;
པཉྙཱཡཱ ནུསཡཾ སཎྷཾ, ཀིལེསཾ བྷིཀྑུ བྷིནྡཏི.
སཱསནསྶཱདི ¶ སཱིལཾཝ, མཛ྄ཛྷེ ཏསྶ སམཱདྷིཝ;
པཉྙཱཝ པརིཡོསཱནཾ, ཀལྱཱཎཱཝ ཨིམེཏཡོ.
མཧཱཔུཉྙེ ¶ ཋིཏཾ སཱིལཾ, སམཱདྷི ཨཔྤནཱ གཏཾ;
ཙཏུམགྒ ཡུཏཱ པཉྙཱ, ཨེཏཾ སིཀྑཏྟཡཾ མཏཾ.
སཱིལནལཀྑཎཾ སཱིལཾ, དུསྶཱིལྱ དྷཾསནཾ རསཾ;
ཧིརོཏྟཔྤ པདཊྛཱནཾ, སུཙི པཙྩུཔཊྛཱནཀཾ.
སསཱིལགུཏྟི ¶ ནཱཐོཙ, དུནྣིགཧོ ཝིསཱརདོ;
དྷམྨཊྛཱིཏཱིཏི པཉྩེཏེ, གུཎཱ ཝེནཡིཀེ མཏཱ.
ཨཱདི ¶ ཀལྲཱཎ སཾཝེདཱི, སཱིལམཏྟཊྛ བྷིཀྑཝོ;
ཨུདྡྷཾ ཀལྱཱཎ ལཱབྷཱཡ, ཨལིནོ ཨནིཝཏྟིཀོ.
དྷོཝིཏྭཱ པཏྟིམལཱནི, ཝུཊྛཱན དེསན མྦུཧི;
སུདྡྷསཱིལེ ཋིཏོཡེཝ, ཨེཝཾ ཙིནྟེཡྻ པཉྙཝཱ.
སམྤུདྡྷོརས ¶ པུཏྟཱཝ, བུདྡྷུརོཛཱ ནུསྶཱཝནཱ;
སམྦྷཱུཏཱ པིཏུ དཱཡཱདཱ, པུཏྟཱནཱམ སབྷཱཝཏོ.
ཁཱིརཾ པིཏྭཱཝ ཛཱིཝནྟི, ཛཱཏཱཔི ཨིདྷ པུཏྟཀཱ;
པརིཡཏྟི ཛིནཀྑཱིརཾ, པིཏྭཱཝ ཛིནཔུཏྟཀཱ.
དཱཡོཙ ¶ ནཱམ བུདྡྷསྶ, དྷམྨཱམིས ཝསཱདྭིདྷཱ;
མགྒཉཱཎཱ དཡོ དྷམྨོ, ཙཏྟཱརོ པཙྩཡཱམིསཱ.
ཙིར མཱམིས དཱཡཱདཱ, རཱཛཔཱུཛཱདི གཱཧིནོ;
དཱཡཱ མིསྶགྒཧཾ ནིཙྪི, སདྡྷམྨ གརུཀོ ཛིནོ.
ལཀྑ ¶ ཀཔྤ ཙཏུསྶངྑྱ, ཀཱལཾ ཝིཙིཏ ནིཙྩིཏཾ;
དྷམྨདཱཡཾ ནཝིནྡམྷཱ, བུདྡྷཔུཏྟཱཔི ཡེམཡཾ.
བུདྡྷཝཱརིཏ དཱཡཱདཱ, སདྡྷམྨདཱཡ བཱཧིརཱ;
པུཏྟཱཔི སཏྠུདཱསཱབྷཱ, བྷུཏྟམཏྟཱ ཧི དཱསཀཱ.
བྷདྡནྟ ¶ རཱཧུལསྶེཝ, དཱཡཾ ནོཔི ཨདཱ ཛིནོ;
ནཱདིཡིམྷཱ པམཱདཱཡ, ཏཾ དཱཡཾ ཀུསལནྟཀཾ.
དྷམྨདཱཡཱདཱ མེབྷིཀྑཝེ ཏུམྷེབྷཝཐ,
མཱཨཱམིས དཱཡཱདཱ;
ཨིཏི ཝུཏྟཾ མུནིནྡེན,
སཱཝཀེསུ དཡཱཝཏཱ.
ཨིམཱཡ ¶ བུདྡྷཝཱཙཱཡ, བུདྡྷསནྟཀ ཏཾ སརེ;
དྭིནྣཾ ཨཱམིསཨ དཱཡཱད, བྷཱཝསྶཙ ནིཝཱརཎཾ.
རཛྫེ ཙཎྜཱལཔུཏྟཱཝ, སདྡྷམྨཙཀྐ ཝཏྟིནོ;
པུཏྟཱ ཧོནྟཱཔི དཱཡེསྨིཾ, ནིརཱསཱ ཏིཝ ནིནྡིཏཱ.
མིཙྪཱཛཱིཝ ¶ སམཱཔནྣཱ, ཨཙྩཱསཱ པཙྩཡཱམིསེ;
མཧཱཛཱནཱིཡ སམྤཏྟཱ, མོགྷཀཏྭཱ ཏིདུལླབྷཾ.
གིཧིཀཱམེ ¶ པཧཱཡཱགོ, པརཝནྟོསུ ལགྒིཏོ;
གངྒཱཏིཎྞོ ཏལཱ༹ཀམྷི, ནིམུགྒོཝཱ ཏིནིནྡིཏོ.
ཙཱིཝརེ ¶ པིཎྜཔཱཏེཙ, པཙྩཡེ སཡནཱསནེ;
ཨེཏེསུ ཏཎྷ མཱཀཱསི, མཱལོཀཾ པུནརཱགམི.
ཨིཏིཝུཏྟཱ ནུསཱརེན, པཙྩཝེཀྑཎ སུདྡྷིཡཱ;
ཨཱམིསེསུ ཧནེ ཨཱསཾ, པུཏྟམཾསུ པམཾ སརཾ.
སེཡྻོ ¶ ཨཡོགུལོ༹ བྷུཏྟོ,
ཏཏྟོ ཨགྒིསིཁཱུཔམོ;
ཡཉྩེ བྷུཉྫེཡྻ དུསྶཱིལོ,
རཊྛཔིཎྜཾ ཨསཉྙཏོ.
ཨིཏིཝུཏྟཾ ¶ ནུཙིནྟེནྟོ, ཝཛྫེ དུསྶཱིལ བྷཱཝཏོ;
སཱིལེ ཋིཏོཝ བྷུཉྫེཡྻ, མཱདིཏྟ གུལ༹ཀཾ གིལི.
ཨནྣཱན མཐོ པཱནཱནཾ,
ཁཱདནཱིཡཱན མཐོཔི ཝཏྠཱནཾ;
ལདྡྷཱན སནྣིདྷིཾ ཀརིཡཱ,
ནཙ པརིཏྟསེ ཏཱནི ཨལབྷམཱནོ.
ཨཉྙཱཧི ¶ ལཱབྷུཔནིསཱ, ཨཉྙཱ ནིབྦཱན གཱམིནཱི;
སཀྐཱརཾ ནཱབྷིནནྡེཡྻ, ཝིཝེཀ མནུབྲཱུཧཡེ.
ཨཀཏྭཱ ¶ ཨཱམིསེ ཨཱསཾ,
སདྡྷམྨེཡེཝ ཨཱསིཀོ;
ཨཔྤམཏྟོ སམཱརདྡྷོ,
དྷམྨདཱཡཾ ལབྷིསྶཏི.
པརིཡཏྟིཾ ཝིནཱ སེཡྻཾ, ནལབྷནྟི བུདྷཱཨཔི;
སེཡྻཏྠིཀོཝ སིཀྑེཡྻ, ནེཝ པཱུཛཱདི ཀཱརཎཱ.
བྷཝནིསྶརཎཏྠཾཝ ¶ , སིཀྑེ ནཱ ལགྒདཱུཔམོ;
ཏཐཱུཔམཱཡ སིཀྑནྟོ, ཨཔཱཡེསུ པཏིསྶཏི.
སིཀྑིཏེན ཨམཱནཏྠཾ, ནསཱདྷུ མཱནཐདྡྷིཀོ;
མུདུབྷཱཝཱཡ སིཀྑིཏྭཱ, དམེནྟོ མུདུཀོ བྷཝེ.
རཱགཾ ¶ དོསཾ དྷཛཾམཱནཾ, སིཀྑནྟོཔི ཝིཝཛྫཡེ;
དཧརཱཔི ཧི མིཡྻནྟི, ནཏྠི ཝསྶགྒཏོ མཏཾ.
སདྡྷཾཏིཀྑེཡྻ བུདྡྷེན, རཱགཾ ཨསུབྷ ཙིནྟཡཱ;
མརཎེན དྷཛཾམཱནཾ, དོསཾ མེཏྟཱཡ ཝཱརཡེ.
ཨེཏེཧི ¶ ཙཏུརཀྑེཧི, གནྠཾ སིཀྑེཡྻ སཾ ཝུཏོ;
སིཀྑནྟསྶེཧི རཀྑེཧི, ནཀོཙི སཾཀིལེསིཀོ.
བུདྡྷཝཱཙམྤི ¶ སཛ྄ཛྷཱཡ, ཨེཏེཔི མནསཱིཀར;
ཝུཏྟོ དྷམྨཝིཧཱརཱིཏི, ཨེདིསོ སཱསནེ ཝརོ.
གརཱུན མུཔདེསེན,
ཙཏུརཀྑོ སུསཱིལཝཱ;
ཨཔྤསྶུཏོཔི པཱསཾསོ,
བྷིཡྻོཡེཝ བཧུསྶུཏོ.
སཱཏཾ ¶ སེཝཀྑཎེཝཔྤཾ, ཏཾཧེཏྭཱ ནནྟཱདུཀྑནྟི;
དྷཱིརོ ཨཱསཾ ཧནེ ཀཱམེ, ཁུརདྷཱརམདྷཱུཔམེ.
ཡོདྷ ཀཱམེ སུཁཾམཉྙི,
ན སོ དུཀྑཱ ཝིམུཙྩཏི;
མཱཏཱཧི བྱགྒྷ མནྭེནྟོ,
ཝཚོ མུཏྟོ ཀཐཾབྷཡཱ.
ཏིརཙྪཱ ¶ པེཏ ལདྡྷབྦེ, ནཱསཾ ཀཱམསུཁེ ཀརེ;
བྷཱཡིཏབྦ སུཁཾ ཏཉྷི, ཏསྨིཾ ལགྒཱ མཧཱཏཔཱ.
ལདྡྷཱ ཀཱམསུཁཾ བཱལཱ, པམོདནྟི ནཔཎྜིཏཱ;
པསུཔཀྑཱིབྷི ལདྡྷབྦཾ, ཨནནྟདུཀྑ ཀཱརཎཾ.
ལདྡྷཱ ¶ དྷམྨརཏིཾཝིཉྙཱུ, མོདནྟི ན ཨཔཎྜིཏཱ;
ཨནོམ སཏྟ པརིབྷོགཾ, བྷགནིསྶརཎཱཝཧཾ.
ཧཱིནཀམྨཾ ¶ པཊིཙྪནྣཾ, ཀཱམསྶཱདཾ ནཔཏྠཡེ;
དྷམྨེ པཱིཏིཉྩ པཱམོཛྫཾ, པཏྠེཡྻ སཱདྷུསམྤཏོ.
པརིགྒཎྷནྟི ཡེཀཱམེ, ཧིཾ སནྟིཏེ ཏདཏྠིཀཱ;
པརིཙྩཏྟཾ ན ཧིཾ སནྟི, མུཏྟཾ ཝཎྞེནྟི སཱདྷཝོ.
ནིཙྩུཔཀྐམྨ ¶ པུཊྛོཔི, ཀཱཡོ ཝེརཱིཝསཱ ནུགོ;
ཨཙིརཾཡེཝ བྷཱུསཱཡཱི, ཡུཏྟོཝ ཏ མུཔེཀྑིཏུཾ.
རཀྑིཏོཔི ཨགུཏྟོཝ, ཀཱཡོ བྷཡམུཁེ ཋིཏོ;
ཏསྨཱ ཀཱཡ མུཔེཀྑིཏྭཱ, ཙརེདྷམྨ མཚམྦྷིཏོ.
པུཊྛོ ¶ པུཊྛོཔི ཡཾཀཱཡོ, བྷུཝི རོགཱསཡཱིསཡཱི;
ཀཏཾཀཏཾ མུདྷཱཏོ ན, ཏདཏྠཾ དུཙྩརེ ཙརེ.
པཱཔཾ ¶ ཀརོཏི ཡོབཱལོ,
པུཊྛུཾ ཀཱཡཾ ཏིདུབྦྷརཾ;
བྷཱུམྱཾ ཀཱཡཾ ཋཔེཏྭཱན,
ཨནཱཐོ སོ ཨཔཱཡིཀོ.
ཝེརཱིཝསཱ ནུགཾ ཀཱཡཾ,
བཱལོ པོསེཏི དུཙྩརོ;
པོསེནྟོ ནིརཡེ པཀྐོ,
ཀཱཡོ བྷཱུམྱཾ ཝིཀཱརགཱུ.
པཱཔཾ ¶ མཱཀར ཀཱཡཏྠཾ, ཀཱཡོ ཝེརཱི ཝསཱནུགོ;
བྷཱུམྱཾ སེསྶཏི ཝེཀཱརཱི, པཱཔིཀོ ནིརཡཾ གཏོ.
ཨམཡ྄ཧཾ མཡ྄ཧསཉྙཱཡ,
ཀཱཡཾ རོགཝསཱནུགཾ;
པོསཾ པཏྟོ མཧཱཛཱནིཾ,
ནོཀཱསོ དྷམྨ མིཀྑིཏུཾ.
ཀཱཡཱཔེཀྑཱཡ ¶ ནོཀཱསོ,
དྷམྨཾ དཊྛུཾ རཧོགཏོ;
ཨུཔེཀྑཱཡེཝ ཨོཀཱསོ,
དུཀྑིཏཱ མྷ ཨཔེཀྑཡཱ.
ཙིཏྟ ¶ སཾསོདྷཀཱ པཀྐཱ, ཀཱཡསཾསོདྷཀཱ ནཝཱ;
སོདྷེ ཙིཏྟཾཝ པཀྐཏྠཾ, ནཀཱཡཾ བྷཝབྷཱིརུཀོ.
ཙིཏྟསངྑརཎཾ ¶ སཱདྷུ, ཏཾ སངྑཏཾ པབྷསྶརཾ;
ནསཱདྷུ ཀཱཡསངྑཱརོ, སངྑཏོཔྱསུབྷོཝ སོ.
སབྷཱཝ མལིནཾ ཀཱཡཾ, ནིམྨལཱཡ ཀཐཾ ཀརེ;
ཨཱགནྟུམལིནཾ ཙིཏྟཾ, སཀྐཱ ཀཱཏུཾ སུནིམྨལཾ.
ཨཱདྷིབྱཱདྷི ¶ པརོཏཱཡ, ཨཛྫསྭེཝཱ ཝིནཱསིནཱ;
ཀོཧིནཱམ སརཱིརཱཡ, དྷམྨཱཔེཏཾ སམཱཙརེ.
སབྷཱཝཛེགུཙྪཾ ཀཱཡཾ, སོབྷེཏུཾནེཝསཀྐུཎེ;
ཙིཏྟཾ ཝཱ ལངྐཏཾ སོབྷཾ, སཱིལཱདི གནྡྷཝཱསིཏཾ.
སཙེ ¶ བྷཱཡཐ དུཀྑསྶ, སཙེ ཝོ དུཀྑ མཔྤིཡཾ;
མཱཀཏྠ པཱཔཀཾ ཀམྨཾ, ཨཱཝིཝཱ ཡདིཝཱ རཧོ.
ཀིལེསཱ གནྟུམལཾཙིཏྟཾ, པབྷསྶར སབྷཱཝིཀཾ;
ཏདཱགནྟུམལཾ དྷོཝ, ཙིཏྟཾ དྷོཏེ པབྷསྶརཾ.
ཀིལེསཱ ¶ གནྟུམལཾཙིཏྟཾ, ཨུཔཀྐམེན སོདྷཡེ;
སུཝིསུདྡྷ མནཱཡེཝ, ཨུཏྟརིཾསུ བྷཝཎྞཝཱ.
ཀཱཡེ མལམུཔེཀྑཱཡ, ཙིཏྟེ མལཾཝ དྷོཝཏུ;
ཙིཏྟེ ཧི ནིམྨལེསནྟོ, པཱུཏིཀཱཡོཔི པཱུཛིཏོ.
ཀཱཡརོགཾ ¶ ཏིཏིཀྑཱཡ, ཙིཏྟརོགཾ ཙིཀིཙྪཏུ;
སུཁིཏོ ཀཱཡརོགཱིཔི, ཙིཏྟེ ནིརཱམཡེ སཏི.
ཀཱཡརོགེ བཧཱུ ཝེཛྫཱ, བུདྡྷུཏྟིཝ མནོགདེ;
ཨིདྷཱཔི ཀཱཡིཀོ སནྟོ, ཨནནྟཱཝ མནོརུཛཱ.
སཱིསདཌྜྷ ¶ མུཔེཀྑཱཡ, ནིབྦཱཏུ རཱགཔཱཝཀཾ;
ཁིཔྤཾ ཨསུབྷ སཉྙཱཡ, ནིཙྩདཌྜྷཾ བྷཝེབྷཝེ.
སུབྷཱཡ ཨུཊྛིཏཾ རཱགཾ, ཨསུབྷཱཡ ནིཝཱརཡེ;
སོརཱགོ སཱདིཏཾ ཛནྟུཾ, ཙཏྭཱཔཱཡཾ ནཡིསྶཏི.
པཎྜིཏཱནཾ ¶ མལཾ མཱནོ, སོཏྟུཀྐཾསེན པཱཀཊོ;
མཱཁོ ཨཏྟཱན མུཀྐཾསེ, མཱཝིབྷཱཝེ སཀཾམལཾ.
གུཎཾ པཊིཙྩ གུཎཱིནཾ, ཨཧཾམཱནོ སམུཊྛཧེ;
མརཎཾ ཨནུཙིནྟཱཡ, དྷཛཾམཱནཾ ནིཔཱཏཡ.
ཨེཀོ ¶ ཀཱཡཝིཝེཀེསཱི, ཀཏྭཱ ཀིལེསནིགྒཧཾ;
ཝསེ ཙིཏྟཝིཝེཀེསཱི, ཨུབྷོ པདྷི ཝིཝེཀཱདཱ.
ཨདིཊྛེ ཨསུཏེ ཋཱནེ, ཝསེཡྻ མོཙནཏྠིཀོ;
ཨསྶཱདཾཧི ནིཝཱརེཏུཾ, དིཊྛེ སུཏེ ཏིདུཀྐརཾ.
ཨདིཊྛེ ¶ ཨསུཏེ རཉྙེ, ཝསེཡྻི ནྡྲིཡགོཔཀོ;
ཝཱརེཏུཾ ཝིསཡཱཀིཎྞེ, ཙཀྑུསོཏཾ ཏིདུཀྐརཾ.
རཱགཾ ཨསཏི ཨུཔྤནྣཾ, སནྟཱབྷུཛེན ཝཱརཡེ;
བཱཧིརེ རཱག མུཔྤནྣཾ, ཨནྟོ ཨསུབྷཙིནྟཡཱ.
རཱགཾ ¶ ཚིནྡཱཏི བུདྡྷཱཎཾ, སརཾ བྷིཀྑུ རཧོགཏོ;
པསྶཾ ཀཱཡེདྷ ཛེགུཙྪཾ, ལབྷེཡྻཱ སིཊྛམོཙནཾ.
ཀཱཡཾ ཨསུབྷཏོཔསྶ, ཀལླཀཱལེཝ དསྶནཾ;
མོགྷཾ ཀཱལཾ ནཁཱིཡེཡྻ, བྷཝེཡྻུཾསྭེཔིཨཱཏུརཱ.
ཀཱཡཾ ¶ ཛེགུཙྪཏོཔསྶ, བཱལྱནྟོ པཙྩཝེཀྑིཡ;
ཨཱདོ ཀིཉྩི ཛིགུཙྪཱཡ, ཛིགུཙྪེཡྻཱཡཏིཾ བྷུསཾ.
ཀཱཡཱདིནཝ མིཀྑེཡྻ, དཱནི ཀིཉྩིཔི དསྶནཾ;
ཨཱཡཏིཾ མགྒལཱབྷཱཡ, བྷཝེཡྻ ཨུཔནིསྶ ཡོ.
ཨིཏྠཱིན ¶ མངྒམངྒཱནི, ནཔསྶེཡྻ ནཙིནྟཡེ;
ཏདཱསཱ ཨུབྷཏོ བྷཊྛཱ, སུགཏྱཱ སཱསནཱཔིཙ.
ཨིཏྠིརཱུཔ སརཱཀཌྜྷཱ, བྷཊྛཱ བཧཱུཝ སཱསནཱ;
ཨིཧཱཔི དུཀྑིཏཱ ཧུཏྭཱ, ཏེ པེཙྩ ཨཏིདུཀྑིནོ.
པུཾམནོ ¶ པརིཡཱདཱཡ, ཨིཏྠིརཱུཔསརཱ ཋིཏཱ;
ཏསྶམ མཉྙ མེཀམྤི, ནཝིཛྫཏེཝ སབྦདྷི.
སལླཔེ ¶ ཨསིཧཏྠེན, པིསཱཙེནཱཔི སལླཔེ;
ཨཱསདེ ཨཱསིཝིསེཔི, ཨགྒིཀྑནྡྷེཔི ཨཱསདེ;
ནཏྭེཝ མཱཏུགཱམེན, ཨེཀེཀཱཡ སུཔེསལོ.
ཀཱམཾ ཨསུབྷཙིནྟཱཡ, བྱཱཔཱདཾ སྣེཧཙེཏསཱ;
ཝིཧིཾསཾ ཀརུཎཱཡེཧི, ཝིཏཀྐགྒཱི ཏཡོསམེ.
ཨསམེཏ ¶ ཝིཏཀྐགྒཱི, ཐུསརཱསིམྷི ཁཱཎུཝ;
ཨཐིརཱ སཱསནེ ཏཱཔཱི, ཏེཔཙྪཱཨཏིཏཱཔིནོ.
ཨསུབྷཱ ¶ པགམེ ལོཀཱ, ཏཾ མེཏྟཱཡུཔསངྐམེ;
སུབྷཱཝིཏཱཧི ཨེཏཱཧི, ཛཧེལོཀེ པིཡཱཔིཡཾ.
གཏཊྛིཏཱདོ ཨུཔྤནྣེ, ཝིཏཀྐགྒཱི ཏཡོ སམེ;
ཨཱཏཱཔཱི པཧིཏཏྟོཏི, ཨེཝཾབྷཱུཏོ པཝུཙྩཏི.
ཝིཝཱདཔྤཏྟོ ¶ དུཏཱིཡོ, ཀེནེཀོ ཝིཝདིསྶཏི;
ཏསྶཏེ སགྒཀཱམསྶ, ཨེཀཏྟ མུཔརོཙིཏཾ.
སིནིཧཔྤཏྟོ དུཏཱིཡོ, ཀམེཀཱ སིནིཧིསྶཏི;
ཏསྶཏེ མོཀྑཀཱམསྶ, ཨེཀཏྟ མུཔརོཙིཏཾ.
པུརཏོ ¶ པཙྪཏོཝཱཔི, ཨཔརོ ཙེ ནཝིཛྫཏི;
ཏསྶེཝ ཕཱསུ བྷཝཏི, ཨེཀསྶ ཝསཏོ ཝནེ.
སུཁཉྩ ཀཱམ མཡིཀཾ, དུཀྑཉྩ པཝིཝེཀིཀཾ;
པཝིཝེཀཾ དུཀྑཾ སེཡྻོ, ཡཉྩེ ཀཱམམཡཾ སུཁཾ.
ཡོཙ ¶ ཝསྶསཏཾ ཛཱིཝེ, ཨཔསྶཾ ཨུདཡབྦཡཾ;
ཨེཀཱཧཾ ཛཱིཝིཏཾ སེཡྻོ, པསྶཏོ ཨུདཡབྦཡཾ.
སུཉྙཱགཱརཾ ¶ པཝིཊྛསྶ, སནྟཙིཏྟསྶ བྷིཀྑུནོ;
ཨམཱནུསྶཱི རཏི ཧོཏི, སམྨཱདྷམྨཾ ཝིཔསྶཏོ.
ཡཏོཡཏོ ¶ སམྨསཏི, ཁནྡྷཱནཾ ཨུདཡབྦཡཾ;
ལབྷཏི པཱིཏིཔཱམོཛྫཾ, ཨམཏཾ ཏཾ ཝིཛཱནཏཾ.
ཨིཙྩུཏྟཾ དྷམྨཔཱམོཛྫཾ, ཝིཝེཀཛཾ རསཱདྷིཀཾ;
ཨིཙྪནྟོ སཱིལཝཱ བྷིཀྑུ, ཨནིཝཏྟིཏ ཝཱིརིཡོ.
ཝནཱ ཝཱསེ ཝསིཏྭཱན, ཨཔྤིཙྪཱདིགུཎཱཝཧོ;
པལི བོདྷེ སམུཙྪིཛྫ, བྷཱཝེཡྻེཝཾརཧོགཏོ.
ཀཱཡེ ¶ ཛེགུཙྪཔུཉྫཱནི, རཱུཔཾ རུཔྤནབྷཱཝཏོ;
ཏསྶིཏཱ ཝེདནཱ སཉྙཱ, སངྑཱརཱཙ ཏཏོཔརེ.
ཝིཉྙཱཎཉྩ ཨིམེཔཉྩ, ཁནྡྷཱ རཱསཏྠཏོ མཏཱ;
ཏེཙཱནིཙྩ དུཀྑཱ ནཏྟཱ, ཨུཔཱདཱ ཝཡདྷམྨིནོ.
ཕེཎཔིཎྜཱུ ¶ པམཾ རཱུཔཾ, ཝེདནཱ པུཔྥུལཱུ༹པམཱ;
མརཱིཙིཀཱུཔམཱ སཉྙཱ, སངྑཱརཱ ཀདལཱུཔམཱ.
མཱཡཱུཔམནྟི ཝིཉྙཱཎཾ, དསྶིཏེ སབྦ དསྶིནཱ;
ཨུཔམཱཧི སམསྶེ ཡྻ, པཉྩཀྑནྡྷེ ཨསཱརཀེ.
ཡཱཝ ¶ བྱཱཏི ནིམྨིསྶཏི,
ཀོཊིལཀྑཱཏཧིཾཁཎེ;
ཁནྡྷཱ བྷིཛྫནྟི ཧུཏྭཱན,
ཨནིཙྩཱནཱམ ཏེ ཏཏོ.
བྷཡ པཱིལི༹ཏཏོ དུཀྑཱ, ཨནཏྟཱ ཨཝིདྷེཡྻཏོ;
ཁནྡྷཱཝ ཧོནྟི བྷིཛྫནྟི, ཨཉྙོ ཀོཙི ནལབྦྷཏི.
ཁནྡྷཱ ¶ ནིཙྩཱ ཁཡཊྛེན, བྷཡཊྛེན དུཁཱཙཏེ;
ཨནཏྟཱ སཱརཀཊྛེན, ཨིཏི པསྶེ པུནཔྤུནཾ.
བྷཱཎཱུདཡེ ཀཡཾ ཨེནྟི, ཧེམནྟེ པཏིཏུསྶཝཱ;
རཱགཱ མཱནཱཙ སབྦེཝཾ, སཏྱཱ ནིཙྩཱནུཔསྶནེ.
སཱིཧནཱདཾ ¶ ཝནེསུཏྭཱ, སཾཝེཛེནྟི སསོཏཀཱ;
ཝེཧཔྥལཱཔི ལོཀེཝཾ, ཛིནེརིཏ ཏིལཀྑཎཾ.
ཝེདནཱདཱིནི ¶ ནཱམཱནི, ནཱམརཱུཔདྭཡཾཝ ཏེ;
ཏཎྷཱཝིཛྫཱཙ ཀམྨཱདི, ནཱམརཱུཔསྶ པཙྩཡཱ.
ནཱམརཱུཔཾ པརིགྒཡ྄ཧ, ཏཏོ ཏསྶཙ པཙྩཡཾ;
ཧུཏྭཱ ཨབྷཱཝཏོ ནིཙྩཱ, ཨུདཡབྦཡ པཱིལ༹ནཱ.
དུཀྑཱ ཨཝསཝཏྟིཏྟཱ, ཨནཏྟཱཏིཏིལཀྑཎཾ;
ཨཱརོཔེཏྭཱཝ སངྑཱརེ, སམྨསནྟོ པུནཔྤུནཾ.
པཱཔུཎེཡྻཱ ¶ ནུཔུབྦེན,
སབྦསཾཡོཛན ཀྑཡཾ;
ཏམྤཏྟོ ཨརཧཱ བྷིཀྑུ,
བྷཝཏིཎྞོ སུནིབྦུཏོ.
ནཏུམྷཾ ¶ བྷིཀྑཝེ རཱུཔཾ, ཏཾ ཛཧེཐཱཏི ཝུཏྟཏོ;
མེམེཏནྟི ཨུཔཱདཱནཾ, པཉྩཀྑནྡྷེ ཝིནཱསཡེ.
པུཏྟཱ མཏྠི དྷནཱ མཏྠི, ཨིཏི བཱལོ ཝིཧཉྙཏི;
ཨཏྟཱཔི ཨཏྟནོ ནཏྠི, ཀུཏོཔུཏྟོཀུཏོདྷནཾ.
ཨིཙྩུཏྟ མནུཙིནྟཱཡ, ཨཏྟཱཏི ཨཏྠིམེཏིཝཱ;
སཉྙཾ ནཱསེཡྻ ཁནྡྷཱཝ, ཨཏྠཱིཏི ཨཱབྷུཛེ བུདྷོ.
ཁནྡྷནཱས ¶ མནཱབྷུཛྫ, མཏོ མེ པུཏྟཀོ ཨིཏི;
སོཙནྟི པརིདེཝནྟི པུཏྟོནཏྠི ནསོམཏོ.
བྷིཛྫམཱནེསུ ¶ ཁནྡྷེསུ, ཨཏྟསཉྙཱི ཨནཏྟེསུ;
ནཱདིཀཱལ ཝིཔརིཏཱ, མཧཱཛཱནཱིཡཏཾ གཏཱ.
བྷིཛྫམཱནེསུ ཁནྡྷེསུ, ལགྒཱ རཏྟཱ མམཱཡིཏཱ;
ནཱརཱིཔུམཱདི སཉྙཱཡ, ཝིཔརེཏཱ ཨནཱདིཀེ.
ནཱདིཀཱལ ¶ ཝིཔརིཏོ, ཨཏྟསཉྙཱི ཨནཏྟནི;
བྷིཛྫམཱནེསུ ཁནྡྷེསུ, ཛཧ ཏྟཱཏི མམཱཡནཾ.
ཨབྷིཎྷུཔྤཏྟིཡཱཡེཝ, བྷིཛྫམཱནོ ནཉྙཡཏི;
ཨནིཙྩལཀྑཎཾ ཚནྣཾ, ཏཾ ཙིནྟེཡྻ སུཔཉྙཝཱ.
ཨསནྟེཡེཝ ¶ ལགྒནྟཱ, ནམུཙྩནྟི བྷཝཏྟཡཱ;
ནཏྠི སནྟེསུ ལགྒནྟཱ, རཱུཔཀྑནྡྷཱ དིཀེ སྭིདྷ.
ཏཎྷཱ གིཛ྄ཛྷཏི མེཏནྟི, མཱནོ ཨཧནྟི མཉྙཏི;
དིཊྛི གཎྷཱཏི ཨཏྟཱཏི, ཨེཏེ པཔཉྩཀཱ ཏཡོ.
མམེ ¶ ཏ མཧ མཏྟཱཏི, པཔཉྩཱནཾ ཝསཱནུགོ;
གཎྷནྟོ བྷཝ པངྐམྷི, ནིམྨུགྒོཝ བྷཡཱནཀེ.
ནམེ ནཱཧཾ ནཨཏྟཱཏི, ཨེཏེཧི ཝིཝདཾ ཀརེ;
ཝིཝདནྟཱཝ མུཙྩནྟི, བྷཝཔངྐཱ བྷཡཱནཀཱ.
ནམེ ¶ ནཱཧཾ ནཨཏྟཱཏི, དཊྛབྦནྟི ཛིནེརིཏཾ;
ཏཐེཝ སབྦདཱ མཉྙེ, མཱ པཔཉྩ ཝསཱནུགོ.
ལོཀོ ཝིཝདི བུདྡྷེན, ནལོཀེན ཀདཱཙིསོ;
ཨནཏྟཱཏི ཛིནུདྡིཊྛཾ, ལོཀོ ཨཏྟཱཏི མཉྙཏི.
མོ ¶ ལོཀེན སམོ ཧོཏུ,
ཏསྶམོ ཀིཾཏདུཏྟརེ;
ཨནྡྷིབྷཱུཏོ ཨཡཾལོཀོ,
སམྦུདྡྷསྶ ཝིརོདྷིཀོ.
སམྦུདྡྷསྶ ཝསཾ ནྭེཏུ, སནྫྷཱདི བྷཡཏཛྫིཏོ;
ཏབྦསཾཡེཝ ཨནྭེནྟོ, བྷཝཏིཎྞོ བྷཝིསྶཏི.
ཨནཏྟཱཏི ¶ གིརཱ སཙྩཱ, ཨཏྟཱཏི ཝཙནཾ མུསཱ;
མུསཱཡ ཝིཝདེ ལོཀོ, བུདྡྷེན སཙྩ ཝཱདིནཱ.
ཏུརངྒཝཛགཱམམྷཱ, པུརིམེ ཙམཀྱ ཀཱནནེ;
ཝསཏཱ ཨགྒདྷམྨེན, ཐེརེན རཙིཏོ ཨཡཾ.
ཨརིམཏྟེཡྻ བུདྡྷསྶ,
དྷམྨ སྶུཏཀྑཎེ བྷཝེ;
ཁཱིཎཱསཝོ མཧཱཔཉྙོ,
པུཉྙེན ཏེན སཱཝཀོཏི.
ཀཱཡཔཙྩཝེཀྑཎཱ
ནཱདིཀཱལ ¶ ཝིཔརིཏ, ཛན བྷཱུཏཏྠ དསྶིནོ;
དཱཏུམེ ཀནྟིཀསྶཱདཾ, སཏྠུ པཱདོ ཏིམཱནིཏོ.
སཱིསེ ¶ པིལནྡིཡཱ མོདཱི, སམྦུདྡྷ ཙརཎ མྦུཛཾ;
སཱདྷུ ཏུཊྛིཀརཾ བྲཱུམི, སུཀཱཡ པཙྩཝེཀྑཎཾ.
ཡོནིསོ མནསཱིཀཏྭཱ, ནཱདཱ ཝིརུདྡྷ མཉྙིཏཾ;
སཱདྷཝོ ཏ མུདིཀྑནྟུ, མཡཱཔི མནྡབུདྡྷིནོ.
ཨིཙྪིཏབྦཱན ¶ མཱཡཏྟཱ, ཏེསཉྩ ཙཡབྷཱཝཏོ;
ཏདཱཀཱརེན ཝཏྟིཏཱ, ཀཱཡོ ཛེགུཙྪ པུཉྫཀོ.
པུནཔྤུནཾཝ ཨོཀྐམ, ཉཱཎ མནྟོ པཝེསིཡ;
བཱཧིརཾཝ ཨནཱལམྦ, ཨིཀྑཎཱ པཙྩཝེཀྑཎཱ.
མཾསཙྪནྣ ¶ ཊྛིརཱུཔེཝ, མནོཛ ཝཱཡུ ཙཱལིཏེ;
ནཱརཱི གཏཱཏི ཡཱཙིནྟཱ, ནེཝ སཱཔཙྩཝེཀྑཎཱ.
སཉྙཱདིཊྛིཙ ཙིཏྟཉྩ, ཝིཔལླཱསཱ ཨིམེཏཡོ;
ཏ དཱཀཱརེན ཝཏྟནྟི, ཨཝིཛྫོ ཏྠརིཏཱ བྷུསཾ.
ཨཱསཱ ¶ ཝིཔརིཏེ ཡེསཾ,
ཝིཔལླཱསཱཏི ཏེམཏཱ;
ཨཱསཱ ཨཱསིསནཱ ཝུཏྟཱ,
ཏཎྷཱཡེཝ སབྷཱཝཏོ.
ཨསུབྷེཝ སུབྷམིཏི, ཨནིཙྩེཨེཝ ནིཙྩཏོ;
དུཀྑེཡེཝ སུཁཾཝཱཏི, ཨནཏྟནིཝ ཨཏྟཏོ.
སཉྙཱཎཾ དསྶནཾ ཙིནྟཱ,
དྭཱདསཱ ཀཱརཏོ ཏཡོ;
དིཊྛིསཱ ཙཱདི མགྒེན,
སེསཱ སེསེཧི ཝཛ྄ཛྷིཏཱ.
ཏཎྷཱ ¶ ཏསྶི མམེཏནྟི, མཱནོ མཉྙི ཨཧནྟིཙ;
ཡསྶི དིཊྛིཙ ཨཏྟཱཏི, པཔཉྩཱ ནཱམིམེ ཏཡོ.
པཔཉྩནྟི སཾསཱརཾ, ཏསྨཱ པཔཉྩནཱམཀཱ;
བྷཝཡནྟེ པཡོཛེནྟཱ, མོཀྑཾ ནཱདཾསུ ཏེ ཙིརཾ.
བྷཝཔངྐེ ནི མུཛྫནྟཱ, པཔཉྩཱནཾ ཝསཱནུགཱ;
ཙིརསྶཾ དུཀྑིཏཱ ཧོནྟི, ཨཱརཱ ནིབྦཱནཏོ ཏིཝ.
ནམེ ¶ ནཱཧཾ ནཨཏྟཱཏི, ཨེཏེཧི ཝིཝདཾ ཀརེ;
བྷཎྜནྟཱ ཝིཝདནྟཱ ཏེ, ནིབྦཱནཏོ ཨདཱུརིནོ.
ཝིཔལླཱསེ པཔཉྩེཙ, དྭེཔིཨེཏེ པཧཱཏཝེ;
སོཔཙྩཝེཀྑིཏབྦེ ཝཾ, ཀཱཡོ ཛེགུཙྪཔུཉྫཀོ.
ཀེསཱ ¶ ལོམཱ ནཁཱདནྟཱ,
ཏཎྷཱཡཱཔིཙ གོཙརཱ;
ཏསྨཱ ཏེ དཊྛུཀཱམེན,
ཏཎྷཱ ནིཝཱརིཏཱ སདཱ.
ལགྒིཀཱ ཚཝིཡཾཡེཝ, ཏཎྷཱ བཱཧིརགོཙརཱ;
ཏསྨཱ ཨེཏྠ ཏཙོཝཱཧ, སམྦུདྡྷོ ན བཧིཙྪཝིཾ.
ཨེསཱ ¶ ཏཙཔརིཡནྟ, པདེནཱཔི ནིཝཱརིཏཱ;
ཨཏོ ཚཝི མནཱལམྦ, ཏཙསཱིཝ མནེཀརེ.
ཛིགུཙྪིཏཱནི ཚཱདེཏི, ཨཊྛི མཾས ཏཙཱདིནི;
ཉཱཎེན ཚིནྡི ཏབྦཱཙ, ཏསྨཱ ཚཝཱིཏི ཝུཙྩཏི.
ཚཝིཾ ¶ ཚེཏྭཱ ཏཙཾ པསྶེ,
ཏཾ ཚེཏྭཱ མཾསཀཱདཡོ;
གབྦྷེཝཏྠཱུནི དཱིཔེན,
ཡཐཱ པཉྙཱཔདཱིཔིཀོ.
ཛེགུཙྪོ ཚཝིཡཱ ཀཱཡོ,
ཨསུབྷོཝ སུབྷཱཡཏེ;
ནིཙྪཝཱ ཏཙམཏྟེན,
ཀཐཾ སུབྷཱཡཏེ ཨཡཾ.
ནྷཱརུབནྡྷོ ¶ ཊྛིསངྒྷཱཏོ, མཾསལོཧི ཏ ལིམྤིཏོ;
ཚཝིཡཱཝ ཝིམོཧེཏི, ཏཙཙྪནྣོ ཨིམཾ པཛཾ.
ཝཎྞ སཎྛཱན ཏོཙེཝ,
གནྡྷོ ཀཱསཱ སཡེཧིཙ;
ཛེགུཙྪཱ པཊིཀུལྱཱཙ,
ཀེསཱནཱམ ན མེཔིཡཱ.
ཨེཀེཀཾ ¶ མནསཱིཀཏྭཱ, ནཡེ ནིཙྩེཝ མཱདིནཱ;
བྷཱཝེཏབྦཱ སམཱརམྦྷ, ཡཐཱཔཉྙཱཡཏེ ཏཐཱ.
པཱུརིཏཾ མཏྠལུངྒསྶ, སཱིསཊྛིཔི ཛིགུཙྪིཏཾ;
མུཁ ནཱསཀྑི ཀཎྞཱདི, ཚིདྡཱ ཝཚིདྡ དུདྡསཾ.
པཱུཏི ¶ ཝཱཡུ ཝིཙརིཏ, ཀུཙྪིཊྛནྟཱནི ལོཧིཏཾ;
པིཏྟཾ སེམྷཉྩ པཔྥཱསཾ, ཧདཡཾ ཡཀནམྤི དྷཱི.
ཨནྣ པཱནཾ མནུཉྙམྤི, ཁེལ༹ ཏིནྟ མདྷོཔརི;
དནྟེཧི པིསིཏཾ སྭཱན, ཝམཐཱུཝ ཛིགུཙྪིཏཾ.
ཡཱཝཏཱཡུ ¶ ཨདྷོཏེཝཱ, མཱསཡེ གིལིཏཾ ཋིཏཾ;
ཀིམིཀཱུལ སམཱཀིཎྞེ, ཏཧིམེཝཱ སིཏཱསིཏཾ.
ཨེཏཾ ཨུདརིཡཾ ནཱམ, ཏམྷཱ པཀྐཱསཡཾ གཏཾ;
དིནཙྩཡེ ཀརཱིསནྟཾ, སཱ སཡཾ ཏཾདྭཡམྤི དྷཱི.
པཀཱསེཏྭཱ ¶ པཝེསེཏི, ཨནྣཔཱནཾ མཧཱརཧཾ;
པཊིཙྪནྣོ ནིཧརཏི, ཏམེཝ ནྟོ ཋིཏཾ ཛནོ.
པཝེསེ ཏཾ པརིཝཏོ,
ནིཧརེཀོ རཧོ ལིནོ;
མནུཉྙཾཝ པཝཱིསནྟེ,
ནིཀྑམནྟེ ཛིགུཙྪིཏཾ.
ཛེགུཙྪ ¶ པཊིཀུལྱཱནི, མཾསནྷཱརུ ཏཙཊྛིནི;
ནཔིཡཱནི ན ཏུཊྛཱནི, ནེཝཨིཏྠཱི ནཔཱུཔིསོ.
ཧཏྠ པཱད མུཁཱདཱིནི,
ནཏྠཉྙཱནི ཛིགུཙྪིཏཱ;
ཏཏྠཱ ཀུམཱརིཀཱ ཀཉྙཱ,
མོཧེན ཨཏྠིསཉྙིཏཱ.
པཙྩེཀཾ ¶ ཝིནིབྷུཏྟེས, ཀེས ལོམ ནཁཱདིསུ;
ནཏྠིཀཉྙཱ ཀུམཱརཱིཝཱ, སམྤིཎྜིཏེསུ སཱ ཀུཏོ.
ཨཱཀཱསོཡེཝ ¶ ཀཱཡཱངྑྱོ,
ཏཙཱདི པརིཝཱརིཏོ;
ཏཐཱསཱིསཾ མུཁཾཧཏྠོ,
པཱདོརུ ཀཊིཨཱདཡོ.
ཐམྦྷཱདཱིསྭིཝ གེཧོཏི,
པིཎྜིཏེ སྭེསུ སམྨུཏི;
ཀཱཡོཏི ཨིཏྠིཔོསོཏི,
སཾམུལ༹ྷོ ཏཱཡརཛྫཏི.
སནྟཾ ¶ ཙིནྟེཡྻ ནཱསནྟཾ, སནྟཾ ཙིནྟཡཏོ སུཁཾ;
ཨསནྟཾ ཨནུཙིནྟེནྟོ, ནཱནཱདུཀྑེཧི ཏཔྤཏི.
ཛཝཏྱཱ ཝིཛྫམཱནེཝ, ནཱཝིཛྫཱ ཝིཛྫམཱནཀེ;
ཏསྨཱཏཾནཱམཀོ མོཧོ, ཏཎྷཱཔིཙ ཏདནྭིཏཱ.
པུཾཀཱཡོཝཱཐཱིཀཱཡོཝཱ ¶ , མལཱསུཙིཛིགུཙྪིཏོ;
ཏསྶམཾ ནཏྠིགཱརཡ྄ཧཾ, ཡྭཱམལམྤི མལཾཀརེ.
ནཏྠི ¶ ཀཱཡསམོཝེརཱི,
མཧཱནཏྠཀརོ ཙཱིརཾ;
ནཏྠི ཀཱཡསམོ ཝཉྩོ,
ཨསུབྷོཝ སུབྷཱཡཏེ.
ཐཱིཔུཾ སཔརཀཱཡོཏི, པསྶཏིཔི ནཔསྶཏི;
ཛེགུཙྪ པཊིཀུལྱོཏི, སམྨཱ པསྶཏི པསྶཏི.
སུབྷོསུབྷོཏི ¶ མཉྙནྟཱ,
དྷཱིཏི དྷཱིཏི ཛིནེརིཏེ;
ལོཀཱལོཀཱ ནདྷཱིཡེསཾ,
བྷཝཱ བྷཝཱ ཝཙཱརིནོ.
བྷིཡྻོབྷིཡྻོཝ རཱགགྒི,
སུབྷོསུབྷོཏིཔསྶཏོ;
མནྡོམནྡོཝ སོཨགྒི,
དྷཱིཝདྷཱིཝཝིཔསྶཏོ.
བཧུསྶུཏོཔི ¶ བཱལོཝ, ཨསུབྷེ སུབྷམཉྙཀོ;
ཨསུབྷོཏི ཝིཔསྶནྟོ, ཨཔྤསྶུཏོཔིཔཎྜིཏོ.
ཡོཙ སིཔྤཱནི ཛཱནེཡྻ, སཏཱནི སཧསྶཱནིཔི;
ཀཱཡེཀཛཱནནཾ སེཡྻོ, ཡཉྩེ ཨཉྙ ཝིཛཱནཾནཾ.
ཀཱཡམེཀམྤི ¶ ནཉྙཱམི, བུདྡྷཱལདྡྷནཡོ ཨཔི;
སུཏཱཙ པཎྜིཏཱཏྱམྷཱ, ཡུཏྟོཡེཝཱ ཏིལཛྫིཏུཾ.
སུབྷཏོཡེཝ མཉྙཱམི, ཨེཝཾ ཛིགུཙྪིཏམྤིནཾ;
མཉྩ ཉེ པཎྜིཏོ ཏྱཱཧུ, ཨལམེཝཱཏིལཛྫིཏུཾ.
ཀཱཡེ ¶ ཨསུབྷསཉྙཾཡོ, ནལབྷཱམི ཀདཱཙིཔི;
སུལདྡྷ སུགཏོ ཝཱདོ, སྭཱརཧོཝཱཏིལཛྫིཏུཾ.
ཀཱཡེན སཾསརནྟོཔི, ཏདཱཀཱརཾ ཡཐཱཏཐཾ;
བྷཝེབྷཝེ ཨཛཱནནྟོ, མམཱཡིཏྭཱཝ ཏཾ ཙཛིཾ.
ཀཱཡེན ¶ སཾསརནྟོཔི, ནཉྙཱ ཀཱཡ ཛིགུཙྩཏཾ;
ནིཙྩུཔཱདཱ མམཱཡནྟོ, པིཡཱཡིཏྭཱཝ ཏཾ ཙཛིཾ.
ཀུབྷཱརཾ སཱརསཉྙཱཡ, པིཡཱཡིཏྭཱཝ ཧིཾསཀཾ;
ཨནནྟདུཀྑ མཱཔཱདིཾ, ཝིཔལླཱསོ བྷཝེབྷཝེ.
མཧཱཛཱནཱིཡ ¶ པཏྟོཏི, སཾཝེཛེཏྭཱ སཀཾམནཾ;
དིརོཀཏ ཛིནོཝཱདོ, ཨནིཝཏྟིཏ ཝཱིརིཡོ.
ཨདིཊྛཔུབྦ མེཏསྶ, ཏཐཱཀཱརཾཝ པསྶཏུ;
ཀིཙྩ མཉྙ མུཔེཀྑཱཡ, སཾསཱར བྷཡ བྷཱིརུཀོ.
ཡཉྷིཀིཙྩཾ ¶ ཨཔཝིཊྛཾ, ཨཀིཙྩཾ པན ཀཡིརཱ;
ཨུནྣལཱ༹ནཾ པམཏྟཱནཾ, ཏེསཾ ཝཌྜྷནྟི ཨཱསཝཱ.
ཡེསཉྩ སུསམཱརདྡྷཱ, ནིཙྩཾ ཀཱཡགཏཱ སཏི;
ཨཀིཙྩཾ ཏེ ནསེཝནྟི, ཀིཙྩེ སཱཏཏ ཀཱརིནོ;
སཏཱནཾ སམྤཛཱནཱནཾ, ཨཏྠཾ གཙྪནྟི ཨཱསཝཱཏི.
ཐོམེནྟཱ ¶ སོཎྞཾ ཀཱཡོར,
མུཁཀྑི ཏྱཱདིནཱ ཨིམཾ;
རཏྟེ མུཊྛེ ཀརོནྟེཏེ,
ཨཉྙེཛནེ སཡཾཝིཡ.
ཀཱཡསོབྷྱ པཀཱསེཏཱ,
ཝཱཙཱ ཝེ མཱརདེསནཱ;
ཏདསོབྷྱ པཀཱསེཏཱ,
ཝཱཙཱ སམྨུདྡྷ དེསནཱ.
ཨསུབྷོཏི ¶ ཛིནུདྡིཊྛཾ, ཀཱཡཾ སུབྷོཏི གཱཧིནོ;
སཾམུལ༹ྷཱཏེ ན མུཙྩནྟི, བྷཝཱ བུདྡྷ ཝིརོདྷིནོ.
ཨསུབྷོཏི ཛིནུདྡིཊྛཾ, ཀཱཡཾ ཏཐེཝ གཱཧིནོ;
པཎྜིཏཱ ཏེཝ མུཙྩནྟི, བྷཝཱ བུདྡྷམཏཱནུགཱ.
སོདྷེནྟེལངྐརོནྟེཝ ¶ , མལཱསཝནྟིཀཱཡཏོ;
ཨལཾ ཀཱཡཝིསོདྷེན, བཱལོཝ ཏཾ གརུཾ ཀརོ.
གོཔེནྟེཝ ཨརོགཱཡ,
ཀཱཡོ རོགེནསཾཝསེ;
གཱཡགུཏྟཾ མུདྷཱཡེཝ,
ཙིཏྟགུཏྟཾཝ སཱཏྠཀཾ.
ཙནྡནཱདི ¶ ཝིལིཏྟོཔི,
མུཏྟོམཎི ཝིབྷཱུསིཏོ;
ཏཾསབྷཱཝོཝ སོཀཱཡོ,
ཝིསྶཝནྟོ ཏཏོཏཏོ.
པཏིཏེཙ ¶ ཨཔཏིཏེ,
ཝིསེསོ ནཏྠི ཀིཉྩིཔི;
ཀཱཡོ ཙེམནུཉྙོ ཏམྷཱ,
པཏིཏོཔི ཏཐཱསིཡཱ.
ཀཱཡོ མནུསྶཛཱཏཱིནཾ, ཏིརཙྪཱན ཏྟབྷཱཝཏོ;
ཛེགུཙྪིཏ ཏརོཧོཏི, དུབྦིསོདྷོཙ དུབྦྷརོ.
ཡཐཱཛཱཏེན ¶ ཀཱཡེན, སཀྐཱ ཝིཧརིཏུཾ ནཙ;
པཙྩཧཾ སོདྷནཱིཡོཙ, དྷོཝན མཛྫནཱདིབྷི.
རཏྟཾ པཱཏུཾ ཚཝིཾ ཚེཏྭཱ, སཀྐཱ ཌཾསཱདཡོཔིནཾ;
ཚེཏྭཱ མཾས ཊྛིཀཱདཱིནི, དྷཱིརོ ནཱལམྦིཏུཾ ཀཐཾ.
ལགྒནྟི ¶ ཚཝིམཏྟེ ཡེ, མཀྑིཀཱ སེདཔཱ ཡཐཱ;
ཐཱིཔུཾ མུཁཱདི སཉྙཱཡ, ཏེ པམུལ༹ྷཱ མཧཱཏཔཱ.
ཙཱརཱི ཨགོཙརེ ཀཱམེ, ལགྒཱལེཔེ ཀཔཱིརིཝ;
བཧཱུཧི པཱིལི༹ཏཱ རཱིཧི, མརནྟི ཨཏིདུཀྑིནོ.
རཱགཱརིཾ ¶ དུཛྫཡཾ ཛེཡྻུཾ, ཛཡབྷུམྨཱསུབྷེ ཙརཱ;
སཱིཏཱནིསྶིཏ ལཊུཀཱི, སེནཀཾཝ མཧབྦལཾ.
ཀཱཡདྷི ¶ གྒོཙརོ ཝེསོ,
ཛཡབྷཱུབུདྡྷ དུཏྟིཡཱ;
ཨེཏྠེཝ གོཙརཱ ཧོནྟུ,
མཱབྷོ ཀཱམེ ཛཡཏྠིཀཱ.
ཀཱཡཱ ¶ སུབྷཾ ཝིཔསྶནྟུ, དིབྦ ཀྑིནཱཔྱ པསྶིཡཾ;
ཨཱཡཏིཾ མགྒལཱབྷཱཡ, ཏཾ དསྶནཾ བྷཝིསྶཏི.
དྷཱིཙཀྑུནཱཝ དྷིཀྐཱཡཾ, པསྶེ ན མཾསཙཀྑུནཱ;
ཨུམྨིལིཏྭཱཝ དྷཱིཙཀྑུཾ, ཝིཝེཀཊྛོ ཨུདིཀྑཏུ.
པཉྩངྒཱནི ¶ ཡཐཱ ཀུམྨོ, ཙཀྑཱདཱིནི ནིགཱུཧཡེ;
ཝེརཱི ལབྷཏུ མོཀཱསཾ, པཉྩདྭཱརཱ ཨརཀྑིཏཱ.
ཙཀྑུརཱུཔེན ¶ སཾཝཱསཱ, རཱགཔུཏྟཾ ཝིཛཱཡཏི;
མཧཱནཏྠཀརོ སོཙ, སཾཝཱསཾ ཏེན ཝཱརཡེ.
རཱུཔཱདཱིསུསཉྫནྟཱིཏི, སཏྟཱ ཨིཏྠྱཱདི སཉྙཱཡ;
ནཏྭེཝ ཁནྡྷསཉྙཱཡ, ཏཾསཉྙིཧི ཝིརཱགིནོ.
སཀཱཡེཔརཀཱཡེཙ ¶ ,
ཨཱསཾ ཚིནྡེཡྻ པཎྜིཏོ;
ཨཱསཾ ཚེཏྭཱ སུཁཾསེཏི,
ཨཱསཱཡ དུཀྑིཏཱ པཛཱ.
དསྶནེ སཝནེ ཀཱཡ,
སཾསགྒེ མེཐུནེཔིཙ;
ནིརཱསོ སུཁིཏོ ཧོཏི,
ཨནིརཱསོཏིདུཀྑིཏོ.
བཧཱིཝ ¶ སོདྷིཏཾ ཡསྶ, ན ཝནྟོ ཛེགུཙྪ པུཉྫཀཾ;
ཏཾཀཱཡཾ ཨསུཏཾཛཱན, ཏནུརཱགོ སིཡཱཏྟནི.
ཀཱཡེཝིརཱག མིཙྪནྟོ, ནུཔསྶེཡྻ ཏདནྟརཾ;
ཨནྟོདསྶཱི ཨཏཔྤནྟོ, ལབྷེ སཾསཱརམོཙནཾ.
སཏྟཱ ¶ སཏྟཱ བཧིཊྛེཝཱ, སཱརཾསཱརཾ མམཱཡིནོ;
སནྟོསནྟོ ཝིཔསྶནྟོ, ནཝཱནཝཱཡཏིཾབྷཝེ.
ཨལཾ ¶ ཨལཾ ཀཏྭཱ ཀཱཡཾ, མལཱམལཱསཝནྟིཏོ;
སོབྷཾ སོབྷཾ ནཡེ ཋཱནཾ, མནཾ མནཾ པྱལཾ ཀཏཾ.
སཾསགྒཛཱཏསྶ བྷཝནྟི སྣེཧཱ,
སྣེཧཱནྭཡཾ དུཀྑ མིདཾ པཧོཏི;
ཨཱདིནཝཾ སྣེཧཛཾཔེཀྑ མཱནོ,
ཨེཀོ ཙརེཁགྒ ཝིསཱཎ ཀཔྤོ.
ཁིཊྚཱ ¶ རཏི ཧོཏི སཧཱཡ མཛ྄ཛྷེ,
པུཏྟེསུཙ ཝིཔུལཾ ཧོཏི པེམཾ;
པིཡཝིཔྤཡོགཾ ཝིཛིགུཙྪམཱནོ,
ཨེཀོ ཙརེ ཁགྒཝིསཱཎ ཀཔྤོ.
ཝཾསོ ¶ ཝིསཱལོཡཐཱ ཝིསཏྟོ,
པུཏྟེསུ དཱརེསུཙ ཡཱཨཔེཀྑཱ;
ཝཾསཀལི༹རོཝ ཨསཛྫམཱནོ,
ཨེཀོ ཙརེ ཁགྒཝིསཱཎ ཀཔྤོ.
ཀཱམཾ ¶ ཀཱམཡ མཱནསྶ, ཏསྶཙེཏཾ སམིཛ྄ཛྷཏི;
ཨདྡྷཱ པཱིཏིམནོ ཧོཏི, མཙྩོ ལདྡྷཱ ཡདིཙྪཏི.
ཏསྶཙེ ཀཱམཡཱནསྶ, ཚནྡཛཱཏསྶ ཛནྟུནོ;
ཏེཀཱམཱ པརིཧཱཡནྟི, སལླཝིདྡྷོཝ རུཔྤཏི.
ཡོཀཱམེ ¶ པརིཝཛྫེཏི, སཔྤསྶེཝ པདཱ སིརོ;
སོམཾ ཝིསཏྟིཀཾ ལོཀེ, སཏོ སམཏིཝཏྟཏི.
ཁེཏྟཾ ཝཏྠུཾ ཏལཱ༹ཀཾཝཱ, གཝསྶཾ དཱསཔོརིསཾ;
ཐིཡོ བནྡྷཱུ པུཐུཀཱམེ, ཡོནརོ ཨནུགིཛ྄ཛྷཏི.
ཨབལཱ ནཾ བལཱིཡནྟི, མདྡནྟེནཾ པརིསྶཡཱ;
ཏཏོནཾ དུཀྑམནྭེཏི, ནཱཝཾ བྷིནྣ མིཝོདཀཾ.
ཏསྨཱཛནྟུ ¶ སདཱསཏོ, ཀཱམཱནི པརིཝཛྫཡེ;
ཏེ པཧཱཡ ཏརེ ཨོགྷཾ, ནཱཝཾ སིཏྭཱཝ པཱརགཱུ.
ཀཱམཏོ ¶ ཛཱཡཏེ སོཀོ,
ཀཱམཏོ ཛཱཡཏེ བྷཡཾ;
ཀཱམཏོ ཝིཔྤམུཏྟསྶ,
ནཏྠི སོཀོ ཀུཏོ བྷཡཾ.
སུབྷཱནུཔསྶིཾ ¶ ཝིཧརནྟཾ, ཨིནྡྲིཡེསུ ཨསཾཝུཏཾ;
བྷོཛནམྷི ཨམཏྟཉྙུཾ, ཀུསིཏཾ ཧཱིན ཝཱིརིཡཾ;
ཏཾཝེ པསཧཏི མཱརོ, ཝཱཏོ རུཀྑཾཝ དུབྦལཾ.
ཨསུབྷཱནུཔསྶིཾ ཝིཧརནྟཾ, ཨིནྡྲིཡེསུ སུསཾཝུཏཾ;
བྷོཛནམྷིཙ མཏྟཉྙུཾ, སདྡྷཾ ཨཱརདྡྷ ཝཱིརིཡཾ;
ཏཾཝེ ནཔྤསཧཏི མཱརོ, ཝཱཏོ སེལཾཝ པབྦཏཾ.
ཡཐཱ ¶ ཨགཱརཾ དུཙྪནྣཾ, ཝུཊྛི སམཏི ཝིཛ྄ཛྷཏི;
ཨེཝཾ ཨབྷཱཝིཏཾ ཙིཏྟཾ, རཱགོ སམཏིཝིཛ྄ཛྷཏི.
ཏདེཝཾ ¶ པཙྩཝེཀྑནྟི, ཡེ ཏེ རཱགགྒིདུབྦལཱ;
པཏིཊྛཾ སཱསནེ ལདྡྷཱ, ནུཀྐཎྛཱ ནལསཱ རཏཱ.
བུདྡྷཱཝཱདཾ ¶ ལབྷིཏྭཱཔི, ནཱཧཾསཀྐཱ ནཝོམྷིཏི;
དོསཾ ཏཎྷཾ ཨནཱསེནྟོ, པརིཔཀྐོ ཀདཱབྷཝེ;
པུཉྙཀམྨཾ ཨཀརོནྟོ, པརཝཛྫཾ ཨཁམནྟོ.
ཀཱཡ སངྑཱརིཀཱ ཏཎྷཱ, ནཱིཙཱནཱིཙཀརཱཙ སཱ;
ཙིཏྟསངྑཱརིཀཱ སདྡྷཱ, ཨུཙྩཱ ཨུཙྩཀརཱཙ སཱ.
དསྶནཱིཡེ ¶ རཏཱ ཏཎྷཱ, སདྡྷཱསྭཱཙཱརབྷཏྟིཀཱ;
ཝིཀིཎྞཙཱརིཀཱ ཏཎྷཱ, སདྡྷཱ ཝིསདཙཱརིནཱི.
མནོཀིལེསིཀཱ ཏཎྷཱ, སཱནུགཱནནྟ དུཀྑདཱ;
ཙིཏྟཔྤསཱདིཀཱ སདྡྷཱ, ཨཏྟཱནུག སུཁཱཝཧཱ.
ཏཎྷཱ ¶ སདྡྷཱན མིཙྩེཝཾ, ཝིསེསཾ ཛཱན ཏཏྭཏོ;
ཉཏྭཱ ཏཎྷཾ ཝིནཱསེཡྻ, སདྡྷཾབྷཱཝེཡྻ ཙེཏསི.
ཨུཙྪུཀཾ ཡནྟཔཏྟམྤི, སཉྩུཎྞིཏམྤི ཙནྡནཾ;
མདྷུརཾཝ སུགནྡྷཾཝ, མེཏྟིཝ ཧིཾསིཏོཔི སཾ.
ཨཏྟཙྪེདམྤི ¶ ཝཱསེཏི, སུགནྡྷེནིཝ ཙནྡནཾ;
སནྟོ མེཏྟཱསུགནྡྷེན, ཨཏྟཧིཾསམྤི ཝཱསཡེ.
ཀདཱཙིཔི ན དུགྒནྡྷི, སུཀྑཾ ཙུཎྞམྤི ཙནྡནཾ;
ཏཐེཝ དུཀྑཔཏྟོཔི, ན སནྟོ པཱཔཀཱརཀོ.
ཁམེ ¶ ཝཛྫཾ ཀརེཡྻཏྠཾ, བུདྡྷཁནྟི མནུསྶརཾ;
མེཏྟཱཏིནྟེན ཝེརཱིཔི, ནུཔནཱཧོ སིཡཏྟནི.
ནགཙྪཏི ཏ མཀྐོསོ, མམེཝཱ ནཏྠཀཱརཀོ;
ཨིཏི ཉཏྭཱཝ སཔྤཉྙོ, ནེཝ ཀྐོསེཡྻ ཀིཉྩནཾ.
ཨཀྐོསོ ¶ མཾ ནཨཱགཙྪེ,
ཏསྶེཝཱ ནཏྠཀཱརཀོ;
ཨིཏི ཉཏྭཱ ཏིཏིཀྑེཡྻ,
ན པཙྩཀྐོསནཾ ཀརེ.
ཨཀྐོསཀ ནཡཾ གཎྷི,
པཙྩཀྐོསོ ན སོ ཝརོ;
བུདྷོ ཏཾ ནཱནུགཱཧེཡྻ,
མཱ སོཝ པཱཔིཡོ བྷཝེ.
ཏཎྷཱཝིཛྫཱཙ ¶ མཱུལཱདྭེ, སཾསཱརཝིསཔཱདཔེ;
སབྦྷཏྟི སདྡྷམྨསྶུཏཾ, དྭེཡེཝ མདྷུརཱ ཕལཱ.
སོདྷེ ཙིཏྟ མུཔཀྐམྨ, སུདྡྷཾ ཨུཔཀྐམེན ཏཾ;
ཝཧེ སུཁཾ ཨསངྑེཡྻཾ, དུཀྑཾ ཨསོདྷིཏཾ མལི.
སོདྷིཏཾ ¶ སུགཏིཾནེཏི, དུགྒཏིཾཝ ཨསོདྷིཏཾ;
ཙིཏྟཾ སོདྷེཏུ མཱལིམྤེ, རཱགདོས མལེཧི ཏཾ.
དོསེཛཱ ནཱསིཏཱ ཡེན,
སཱསནེཝཏྠི སོནཡོ;
ནཏྠཉྙཏྠ ཏམཱདཱཡ,
བུདྷོ ནཱསེཏུ ཏཾདྭཡཾ.
རནཀུནཝཱསི ¶ ཀཏཱཝཱསེ, དགུཾཙེཏཱི པུརཏྠིམེ;
ཝསཏཱ ཨགྒདྷམྨེན, ཐེརེན རཙིཏོ ཨཡནྟི.