📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ.

རསཝཱཧིནཱི

པཎཱམཱདིཀཐཱ

༡.

སཏྠུཔྤསཏྠཙརཎཾ ¶ སརཎཾ ཛནཱནཾ,

བྲཧྨཱདིམོལི༹ མཎིརཾསི སམཱཝཧནྟཾ,

པངྐེརུཧཱབྷམུདུཀོམལཙཱརུཝཎྞཾ;

ཝནྡཱམི ཙཀྐཝརལཀྑཎམཱདདྷཱནཾ.

༢.

སིདྡྷཾ ཛིནེན ཙིརཀཱལམཏནྡིཏེན,

ཡཾ བྷཱཝཀོ སམདྷིགཙྪཏི ཁེམམགྒཾ;

ཡཾ ཀཔྤརུཀྑ རུཙིདཱན མཎིཝ བྷཱཏི,

ཏཾ དྷམྨམགྒ མསམཾ པཎམཱམི ནིཙྩཾ.

༣.

སནྟིནྡྲིཡཾ སུགཏསཱུནུཝརཾ ཝིསུདྡྷཾ,

ཡཾ དཀྑིཎེཡྻམཏདཾ སུཙིཔུཉྙཁེཏྟཾ;

ཏཱཎེསིནཾ སརཎམུཛ྄ཛྷིཏསབྦདུཀྑཾ,

ཝནྡཱམི སངྒྷ མནགྷཾ སིརསཱ མཧགྒྷཾ.

༤.

ཡམྤཏྟམེཏྠ རཏནཏྟཡཐོམནེན,

པུཉྙེན ཏེན དུརིཏཾ སཀལཾ པཎུཛྫ,

ཝཀྑཱམཧཾ སུམདྷུརཾ རསཝཱཧིནིནྟཾ,

བྷོ བྷོ སུཎནྟུ སུཛནཱ བྷིམུདཱཝཧཱ སཱ.

༥.

ཏཏྠཏཏྠཱུཔཔནྣཱནི, ¶ ཝཏྠཱུནི ཨརཧཱ པུརེ;

ཨབྷཱསུཾ དཱིཔབྷཱསཱཡ, ཋཔེསུཾ ཏཾ པུརཱཏནཱ.

༦.

མཧཱཝིཧཱརེ ཏངྒུཏྟ, ཝངྐཔརིཝེཎཝཱསིཀོ;

རཊྛཔཱལོཏི ནཱམེན, སཱིལཱཙཱར གུཎཱཀརོ.

༧.

ཧིཏཱཡ པརིཝཏྟེསི, པཛཱནཾ པཱལི༹བྷཱསཏོ;

པུནརུཏྟཱདིདོསེཧི, ཏམཱསི སབྦམཱཀུལཾ;

ཨནཱཀུལཾ ཀརིསྶཱམི, ཏཾ སུཎཱཐ སམཱཧིཏཱ.

༨.

ཝིཏརཱགཱ པུརེ ཝོཙུཾ, ཡསྨཱ ཏསྨཱ ཧི བྷཱསིཏཾ;

ཨེཏམཱདརཎཱིཡཉྷི, སཱདྷུ སཱདྷཱུཧི སབྦདཱཏི.

ཛམྦུདཱིཔུཔྤཏྟི ཝཏྠཱུནི.

དྷམྨསོཎྜཀཝགྒོ

༡. དྷམྨསོཎྜཀསྶ ཝཏྠུམྷི ཨཡམཱནུཔུབྦཱིཀཐཱ

ཏཏྠ ཏེསཾ ཝཏྠཱུན མུཔྤཏྟིཡོ དྭིདྷཱ བྷཝནྟི ཛམྦུདཱིཔེ སཱིཧལ༹དཱིཔེཙཱཏི, ཏཏྠ ཛམྦུདཱིཔེ ཏཱལཱི༹ས, སཱིཧལ༹དཱིཔེ ཏེསཊྛི, ཏེསུ ཏཱཝ ཛམྦུདཱིཔུཔྤཏྟིཝཏྠཱུནི ཨཱཝི བྷཝིསྶནྟི, ཏཏོཔི དྷམྨསོཎྜཀསྶ ཝཏྠུ ཨཱདི, ཀཐཾ, ཨམྷཱཀཾ ཀིར བྷགཝཏོ པུབྦེ ཨིམསྨིཾཡེཝ བྷདྡཀཔྤེ ཀསྶཔོནཱམ སཏྠཱ ལོཀེ ཨུདཔཱདི, ཏསྶ ཁོ པན བྷགཝཏོ སཱསནནྟརདྷཱནཏོ ན ཙིརེནེཝ ཀཱལེན ཨམྷཱཀཾ བོདྷིསཏྟོ བཱརཱཎསཱིརཉྙོ ཨགྒམཧེསིཡཱ ཀུཙྪིསྨིཾ ནིབྦཏྟི, ཏསྶུ པྤཏྟི ཀཱལསམནནྟརམེཝ སབྦསཏྟཱནཾ མནསི དྷམྨསཉྙཱ ཨུདཔཱདི, ཏསྨཱསྶ དྷམྨསོཎྜོཏིནཱམ མཀཾསུ, སོ པནེསོ ཀུམཱརོ མཧནྟེན པརིཝཱརེན ཝཌྜྷེནྟོ སབྦསིཔྤེསུ ནིཔྥཏྟིཾ པཏྭཱ པིཏརཱ ཨུཔརཛྫེན པཱུཛིཏོ ཧུཏྭཱ དཱནཱདཡོ དསཀུསལཀམྨཔཐེ པཱུརེནྟོ པིཏུཨཙྩཡེནཱམཙྩེཧི ¶ རཛྫེནཱབྷིསིཉྩིཏོ ཨཧོསི, སོ པནེས དྷམྨསོཎྜཀམཧཱརཱཛཱ དེཝནགརསདིསེ བཱརཱཎསཱིནགརེ ཙཀྐཝཏྟིསདིསཾ བཱརཱཎསཱིརཛྫཾ ཀཱརེནྟོ མཱསདྡྷམཱསཙྩཡེན སིརིསཡནགཏོ ཨེཝཾ ཙིནྟེསི, མམེཝཾ རཛྫསིརིམནུབྷཝནཾ ན སོབྷཏི དྷམྨཝིཡོགེན, དིཝཱཀར ཝིརཧིཏོ ནབྷོ ཝིཡཱཏིཨཱདིནཱ ནཱནཱཀཱརཎཾ ཙིནྟེསི, ཏེནེཏྠ.

༡.

པུཉྙེན སཱིལཱདིམཡེན པུབྦེ,

ཀཏེན པཏྟོསྨི ཨཏནྡིཏེན,

མསཀྐསཱརེ ཝིཡ དེཝརཱཛཱ;

རཱཛཏྟམིདྡྷེ པུརམུཏྟམམྷི.

༢.

རཱུཔེན ཧཱརཱིནཡནུསྶཝེན,

སདྡེན སམྨཱ སཝཎཱམཏེན,

གནྡྷེན གྷཱནུསྶཝསོབྷནེན,

རསཉྙཔུཉྙེན རསེནཙཱཔི.

༣.

ཕསྶེན གཏྟསྶ སུཕསྶདེན,

སམིདྡྷིཔཏྟོསྨི མཧིདྡྷིཀོཧཾ,

ནེཝེཏྟཀེནེཝ པམཱདབྷཱཝ,

མཱ པཛྫིཏུཾ ཡུཏྟརཱུཔནྟི ཉཏྭཱ.

༤.

དསྶཱམི ཨངྒཨཔི ཛཱིཝིཏཉྩ,

དྷཉྙཾ དྷནཾ ཙཱཔི པསནྣཙིཏྟོ,

སོསྶཱམི དྷམྨཾ སིཝམཱདདྷཱནཾ,

ཛིནེརིཏཾ ཛཱཏིཛརཱཔཧཱཎཾ.

༥.

ན སོབྷཏི ཡཐཱཀཱསཾ, ཛལཾ དྷཱམཔཏིཾཝིནཱ,

རཛྫཀརཎཾ ཏཐཱ མཡ྄ཧཾ, ཝིནཱ དྷམྨཱ ན སོབྷཏི.

༦.

ན སོབྷཏི ཧཐཱ རཏྟི, ནིསཱནཱཐཾ ཝིནཱ སདཱ,

རཛྫཀརཎཾ ཏཐཱ མཡ྄ཧཾ, ཝིནཱ དྷམྨཱ ན སོབྷཏི.

༧.

ཨལངྐཏོཔི ¶ ཙེ ཧཏྠཱི, ཝིནཱ དཱཋཱ ན སོབྷཏི,

རཛྫཀརཎཾ ཏཐཱ མཡ྄ཧཾ, ཝིནཱ དྷམྨཱ ན སོབྷཏི.

༨.

ཡཐཱ ཀལློལམཱལཱིཡཾ,

ཝིནཱ ཝེལཱ ན སོབྷཏི,

རཛྫཀརཎཾ ཏཐཱ མཡ྄ཧཾ,

ཝིནཱ དྷམྨཱ ན སོབྷཏི.

༩.

ཡཐཱ སུམཎྜིཏོ རཱཛཱ,

ཀུཔཊོ ནེཝ སོབྷཏི,

རཛྫཀརཎཾ ཏཐཱ མཡ྄ཧཾ,

ཝིནཱ དྷམྨཱ ན སོབྷཏི.

༡༠.

དྷམྨམེཝ སུཎིསྶཱམི, དྷམྨེ མེ རམཏཱི མནོ,

ན ཧི དྷམྨཱ པརཾ ཨཏྠི, དྷམྨམཱུལཾ ཏིསམྤདནྟི.

ཨེཝཾ ཙིནྟེཏྭཱ པཱཏོཝ སིརིགབྦྷཱ ནིཀྑམྨ སུསཛྫིཏེ སམུསྶིཏསེཏཙྪཏྟེ རཱཛཔལླེངྐེ ཨམཙྩགཎ པརིཝུཏོ ནིསཱིདི དེཝརཱཛཱཝིཡ ཝིརོཙམཱནོ, ནིསིནྣོ པན རཱཛཱ ཨམཙྩེ ཨེཝམཱཧ, ཡོ པནེཏྠ བྷོནྟོ བུདྡྷབྷཱསིཏེསུ དྷམྨེསུ ཀིཉྩིདྷམྨཾ ཛཱནཱཏི, སོ བྷཱསཏུ, སོཏུམིཙྪཱམིདྷམྨནྟི, ཏེ སབྦེཔི མཡཾ དེཝ ན ཛཱནཱམཱཏི ཨཱཧཾསུ, ཏཾ སུཏྭཱ ཨ ན ཏྟ མ ནོ རཱཛཱ ཨེཝཾ ཙིནྟེསི, ཡནྣཱུནཱཧཾ ཧཏྠིཀྑནྡྷེ སཧསྶཾ ཋཔེཏྭཱ ནགརེ བྷེརིཾཙརཱཔེཡྻཾ, ཡཾ ཨཔྤེཝནཱམ ཀོཙི དྷནལོབྷེན ཙཱཏུཔྤདིཀཱཡཔི གཱཐཱཡ དྷམྨཾ དེསེཡྻ. ཏཾ མེ དཱིགྷརཏྟཾ ཧིཏཱཡ སུཁཱཡ བྷཝིསྶཏཱིཏི, ཏཏོ སོ ཏཐཱ ཀཏྭཱཔི དྷམྨདེསཀཾ ཨལབྷནྟོ པུན དྭིསཧསྶཾ ཏིཙཏུཔཉྩསཧསྶནྟིཡཱཝཀོཊིཔྤཀོཊིཾདམྨཱིཏི, ཏཏོ གཱམ ནིགམ ཛནཔདེ, ཏཏོ སེཊྛིཊྛཱནཾ སེནཱཔཏི ཨུཔརཱཛཊྛཱནཱ དཡོཔི, པུན སེཏཙྪཏྟཾ དམྨི, རཱཛཝེསཾ པཧཱཡ ཨཏྟཱནཾ དཱསཾ སཱཝེཏྭཱ དྷམྨདེསེནྟསྶ དམྨིཏི ཝཏྭཱ བྷེརི ཙརཱཔེཏྭཱཔི དྷམྨ དེསཀམལབྷིཏྭཱ སཾཝིགྒོ ¶ ཀིམྨེ དྷམྨཝིཡོགེན རཛྫེནཱཏི ཨམཙྩཱནཾ རཛྫཾ ནཱིཡྻཱཏེཏྭཱ སདྡྷམྨགཝེསཀོ དྷམྨསོཎྜཀམཧཱརཱཛཱ མཧཱཝནཾ པཱཝིསི གཱམ ནིགམ རཱཛདྷཱནི པརམྤརཱཡ, ཏེནེཏྠ.

༡༡.

པུརེ བྷེརིཾ ཙརཱཔེཏྭཱ,

དྷམྨསོཎྜོ ནརཱདྷིཔོ;

སདྡྷམྨཛ྄ཛྷེསཀཾ སཏྠུ,

ཨལདྡྷཱ དྷནཀོཊིཧི.

༡༢.

དཱསོ ཧོམི པཧཱཡཱཧཾ,

རཱཛཏྟཾ དེསཀསྶ མེ;

ཨིཙྩཱཧ སོ མཧཱིཔཱལོ,

ཨཧོ དྷམྨེསུ ལོལཏཱ.

༡༣.

རཛྫཾ ནཱིཡྻཱཏཡིཏྭཱན, ཨམཙྩཱནཾ མནོརམཾ,

ཝནཾ པཱཝིསི སོ རཱཛཱ, གཝེསཾ དྷམྨམུཏྟམནྟི.

མཧཱཝནཾ པཝིཊྛཀྑཎེ པན མཧཱསཏྟསྶ པུཉྙཏེཛེན སཀྐསྶཱསནཾ ཨུཎྷཱཀཱརཾ དསྶེསི, ཨཐ དེཝརཱཛཱ ཙིནྟེསི ཨཀཱམཾ མེ པཎྜུཀམྦལ སིལཱསནཾ ཨུཎྷམཧོསི, ཀིནྣུཁོ ཀཱརཎནྟི ལོཀཾ ཨོལོཀེནྟོ སཀྐོ དེཝརཱཛཱ དྷམྨསོཎྜཀ མཧཱརཱཛཱནཾ སཀལཛམྦུདཱིཔཾ ཝིཙིནིཏྭཱ སདྡྷམྨཛ྄ཛྷེསཀཾ ཨལབྷིཏྭཱ ཝནཾ པཝིཊྛབྷཱཝཾ ཨདྡས, དྷམྨསོཎྜཀམཧཱརཱཛཱ སདྡྷམྨཏྠཱཡ རཛྫ དྷན བནྡྷུ ཛཱིཝིཏམྤི པཧཱཡ ཨརཉྙཾ པཝིཊྛོ, ན སོ ཝཏཱཡཾ ཡོཝཱ སོཝཱ སཏྟོ, ཨིམསྨིཾཡེཝ ཀཔྤེ བུདྡྷོ བྷཝིསྶཏི, བུདྡྷབོདྷིསཏྟོ ཙཱཡཾ ཨཛྫེཝ མཧཱརཉྙཾ པཝིཊྛོ སདྡྷམྨཾ ཨལདྡྷཱ མཧཱདུཀྑཾ པཱཔུཎེཡྻ, ན ཙེཏཾ ཡུཏྟཾ, ཨཛྫ མཡཱ ཏཏྠ གནྠབྦཾ དྷམྨཱམཏརསེན ཏམབྷིསིཉྩིཏྭཱ རཛྫེ པཧིཊྛཱཔེཏུནྟི ཙིནྟེཏྭཱ ཨཏྟབྷཱཝཾ ཝིཛཧིཏྭཱ བྷཡཱནཀཾ མཧནྟཾ རཀྑསཝེསཾ ནིམྨིཎིཏྭཱ མཧཱསཏྟཱབྷིམུཁོ ཨཝིདཱུརེ ཨཏྟཱནཾ དསྶེསི, ཏེནེཏྠ.

༡༤.

བྱགྒྷཙྪསཱིཧམཧིསོ ¶ རགཧཏྠིདཱིཔི,

མིགཱཀུལཾ ཀཎྚཀསེལརུཀྑཾ;

ནརཱནམིནྡོ པཝིསིཏྭཀཱནནཾ,

ཨིཏོཙིཏོ ཝིབྦྷམི དྷམྨཀཱམོ.

༡༥.

ཏསྶཱནུབྷཱཝེན པུརིནྡདསྶ,

སིལཱསནཾ ཨུཎྷམཧོསི ཀཱམཾ;

ཏེནེཝ སོ ལོཀམུདིཀྑམཱནོ,

ཨདྡཀྑི དྷཱིརཾ ཝིཔིནེ ཙརནྟཾ.

༡༦.

མཡཛྫ ཏཾ དྷམྨརསེན སམྨཱ,

སནྟཔྤཡིཏྭཱ གམནཾ ཝརནྟི;

མནྟྭཱ སུབྷཱིམཉྫནཀཱུཊཝཎྞཾ,

མཧཱམུཁཾ ནིགྒཏ བྷཱིམདཱཋཾ.

༡༧.

དིཏྟགྒིསངྐཱས ཝིསཱལནེཏྟཾ,

མཛ྄ཛྷེན བྷགྒཾ ཙིཔིཊགྒནཱསཾ;

ཁརཏམྦདཱཋིཾ གྷནམསྶུཝནྟཾ,

ནཱིལོདརཾ གཛྫིཏབྷཱིམགྷོསཾ.

༡༨.

ཀརོརུཧཾ ཏིཀྑསལོཧིཏཱཡཏཾ,

ཝིསཱལདྷོཏཱཡཏཁགྒཧཏྠཾ;

གདཱཡུདྷེནངྐིཏམཉྙབཱཧུཾ,

དཊྛོཊྛབྷཱིམཾ སཝལཱིལལཱཊཾ.

༡༩.

མནུསྶམཾསཱདནརཏྟཔཱནཾ,

བྷཡཱནཀཾ ཀཀྑལཡཀྑཝཎྞཾ;

སུམཱཔཡིཏྭཱན ཝནནྟརསྨིཾ,

དསྶེསི ཨཏྟཾ ས ནརཱདྷིཔསྶཱཏི.

ཨཐ མཧཱསཏྟོ ཨཏྟནོ ཨཝིདཱུརེ ཋིཏཾ རཀྑསཾ ཨདྡཀྑི, ཏཾ དིསྭཱནཱསྶ བྷཡཾཝཱ ཚམྦྷིཏཏྟཾཝཱ ཙིཏྠུཏྲཱསམཏྟཾཝཱ ནཱཧོསི, ཀིམཏྲ ཙིནྟེསི, ཨཔིནཱམ ཨེཝརཱུཔོ པིརཀྑསོ དྷམྨཾ ¶ ཛཱནེཡྻ, ཡནྣཱུནཱཧཾ ཏསྶ སནྟིཀེ དྷམྨཾ སུཎིསྶཱམི, ཏམྨེ དཱིགྷརཏྟཾ ཧིཏཱཡ སུཁཱཡ བྷཝིསྶཏཱིཏི ཙིནྟེསི. ཙིནྟེཏྭཱ ཙཔན ཨཛྫ མཡཱ ཏམུཔསངྐམྨ པུཙྪིཏཾ ཝཊྚཏཱིཏི གནྟྭཱ རཀྑསེན སདྡྷིཾ སལླཔནྟོ ཨཱཧ.

༢༠.

ཨསྨིཾ ཝནསྨིཾ ཏརུསཎྜ མཎྜིཏེ;

སུཕུལླིཏཱནེཀལཏཱཀུལཱཀུལེ;

ཨདྷིགྒཧཱིཏོ སི མཧཱནུབྷཱཝ,

པུཙྪཱམི ཏཾ དེཝ ཝདེཧི ཀངྑཾ.

༢༡.

དྷམྨཾ གཝེསཾ ཝནམཱགཏོམྷི,

པཧཱཡ རཛྫཾ ཨཔི ཉཱཏིསངྒྷཾ;

ཛཱནཱསི ཙེ སམྨ ཝདེཧི མཡ྄ཧཾ,

ཨེཀམྤི གཱཐཾ སུགཏེན དེསིཏཾ.

ཏཏོ ཡཀྑོ ཨཱཧ.

༢༢.

དྷམྨཾ པཛཱནཱམཧམེཀདེསཾ,

ཛིནེརིཏཾ སཱདྷུཏརཾ རསཱནཾ,

དེསེམི ཙེཧཾ ཏཝ དྷམྨ མགྒཾ,

ཏུཝཉྷི ཀིཾ ཀཱཧསི དེསཀསྶཱཏི.

ཨཐ མཧཱསཏྟོ ཨཱཧ.

༢༣.

རཛྫེ ཋིཏོ ཨསྶམཧཾ སཙེ བྷོ,

ཨནཔྤརཱུཔཾ པཀརོམི པཱུཛཾ;

ཨིདཱནི ཨེཀོ ཝནམཛ྄ཛྷཔཏྟོ,

ཀརོམི ཀིཾ དེཧམིམཾ ཋཔེཏྭཱ.

༢༤.

ཡདིཙྪསི ཏྭཾ མམ མཾསལོཧིཏཾ,

ཀརོམཧཾ སངྒཧམཛྫ ཏེན,

ན ཙཏྠི ཨཉྙཾ ཏཝ ཨཙྩནཱིཡཾ,

དེསེཧི དྷམྨཾ སུགཏ པྤསཏྠནྟི.

ཏཏོ ¶ ཡཀྑོ ཨཱཧ.

༢༥.

བྷུཏྭཱན མཾསཾ སུཧིཏོཝ སནྟོ,

ཧནྟྭཱ པིཔཱསཾ རུདྷིརཾ པིཝིཏྭཱ;

དྷམྨཾ ཀཐེཏུཾ པབྷཝཱམི ཏུཡ྄ཧཾ,

ཝཏྟུཾ ན སཀྐོམི ཁུདཱཔརེཏོཏི.

ཨཐ མཧཱསཏྟོ ཨཱཧ.

༢༦.

བྷུཏྭཱ ཏུཝཾ མཾ པཐམཉྷི ཡཀྑ,

པཙྪཱ ཏུ དེསེསྶསི ཀསྶ དྷམྨཾ;

དྷམྨསྶ མཡ྄ཧཾ ཏཝ མཾསལཱབྷཾ,

ཏྭམེཝ ཛཱནཱཧི ཡཐཱ བྷཝེཡྻཱཏི.

ཨེཝཾ ཝུཏྟེ སཀྐོ དེཝཱནམིནྡོ སཱདྷུ མཧཱརཱཛ ཨཧམེཝ ཡུཏྟཾ ཛཱནཱམཱིཏི ཝཏྭཱ ཏསྶཱཝིདཱུརེ ཏིགཱཝུཏུབྦེདྷཾ ཨཉྫནཝཎྞཾ མཧནྟཾ པབྦཏཾ མཱཔེཏྭཱ མཧཱརཱཛ ཨིམམཱརུཡ྄ཧ པབྦཏམུདྡྷནིཊྛིཏོ མམ མུཁེ པཏཏུ, ཨཧཾ པཏནྠསྶ ཏེ དྷམྨཾ དེསེསྶཱམི, ཨེཝཾ སནྟེ ཏུཡ྄ཧཾ དྷམྨཔཊིལཱབྷོ, མཡ྄ཧཾཙ མཾསཔཊིལཱབྷོ བྷཝིསྶཏཱིཏི. ཏཾ སུཏྭཱ མཧཱསཏྟོ ཨནམཏགྒེ སཾསཱརེ སཾསརཏོ མེ སཱིཧབྱགྒྷཙྪམཙྪཀཙྪཔཝིཧངྒཱདཱིནཾ བྷཀྑབྷཱུཏསྶ ཛཱཏཱིསུ པམཱཎཾ ནཏྟི, ཨཛྫ མཡཱ སམྦུདྡྷསྶ དྷམྨཏྠཱཡ ཛཱིཝིཏཾ པརིཙྩཛིཏུཾ ཝཊྚཏཱིཏི ཙིནྟེཏྭཱ ཨེཝམཱཧ.

༢༧.

སཾསཱརཝཊྚེསུ ཝིཝཊྚམཱནཱ,

པཔྤོནྟི དུཀྑཾ ཛནཏཱ ཨནེཀཱ;

ཨེཏཉྷི བྷོ ཨཏྟནོ ཝཱ པརསྶ,

ཨཏྠཱཡ ནཱཧོསི ཨཧོསི ཏུཙྪཾ.

༢༨.

ཏྭམདིནྣཧཱརཱི ཏིཙ པཱརདཱརིཀོ,

པཱཎཱཏིཔཱཏཱིསི མུསཱ ཨབྷཱསི;

ཏྭ མཛྫཔཱཡཱིཏི ཨཀཱསི དོསཾ,

པགྒཡ྄ཧ དུཀྑཾ བཧུསོ དདནྟི.

༢༩.

ཨེཏཉྷི ¶ བྷོ ཨཏྟནོ ཝཱ པརསྶ,

ཨཏྠཱཡ ནཱཧོསི ཨཧོསི ཏུཙྪཾ;

རུཀྑཱ པཔཱཏཱ པཔཏིཏྭཀེཙི,

དུབྦནྡྷིཡཱ དུགྒཝིསཱདནེན.

༣༠.

བྱཱདྷཱིཧི ནཱནཱཁརཝེདནཱཧི,

མརནྟི སཏྟཱ ཨུཏུཝེདནཱཧི;

ཨེཏཉྷི བྷོ ཨཏྟནོ ཝཱ པརསྶ,

ཨཏྠཱཡ ནཱཧོསི ཨཧོསི ཏུཙྪཾ.

༣༡.

བྱགྒྷཙྪམཙྪོ རགཀུཙྪིཡཉྷི,

མཏསྶ མེ ནཏྠི པམཱཎསངྑཱ;

ཨེཏཉྷི བྷོ ཨཏྟནོ ཝཱ པརསྶ,

ཨཏྠཱཡ ནཱཧོསི ཨཧོསི ཏུཙྪཾ.

༣༢.

ཨེཏཛྫ མེ དུཙྩ ཛ མཏྟདཱནཾ,

ན ཧོཏི དེཝིསྶརིཡཱདིཀཱཡ;

སབྦཉྙུབྷཱཝཾ པན པཱཔུཎིཏྭཱ,

སཾསཱརཏོ ནིཏྟརཎཱཡ སཏྟེ.

༣༣.

ཏྭཾ སམྨ མཡ྄ཧཾ བཧུསོ པཀཱརཱི,

ཏསྨཱ ཏཝེཏཾ ཝཙནཾ ཀརོམི;

ཨསཾཀིཏོ དེསཡ མཡ྄ཧདྷམྨཾ,

སམིཛ྄ཛྷཏེ དཱནི མནོརཐོ ཏེཏི.

ཨེཝཉྩ པན ཝཏྭཱ མཧཱསཏྟོ པབྦཏམཱརུཡ྄ཧ ཋིཏོ ཨཱཧ, ཨཧམཛྫ རཛྫེན སདྡྷིཾ ཛཱིཝིཏཉྩ སརཱིརམཾསཉྩ སདྡྷམྨཏྠཱཡ དམྨཱིཏི སོམནསྶཔྤཏྟོ ཧུཏྭཱ སམྨ དྷམྨཾ དེསེཧཱིཏི ཝཏྭཱ ཏསྨིཾ མཧཱདཱཋཾ མཧཱམུཁཾ ཝིཝརིཏྭཱ ཋིཏེ ཏསྶཱབྷིམུཁོ ཨུཔཔཏི. ཨཐ སཀྐོ དེཝཱནམིནྡོ སོམནསྶོ ཨཙྪརིཡཔྤཏྟོ ཨཏྟབྷཱཝཾ ཝིཛཧིཏྭཱ ཨལངྐཏདིབྦཏྟབྷཱཝཾ མཱཔེཏྭཱ ཨཱཀཱསེ ¶ ཏརུཎསུརིཡོ ཝིཡ ཨོབྷཱསམཱནོ ཨཱཀཱསཏོ པཏནྟཾ མཧཱསཏྟཾ ཨུབྷོཧི ཧཏྠེཧི དལ༹ྷཾ པཏིགཎྷིཏྭཱ དེཝལོཀཾ ནེཏྭཱ པཎྜུཀམྦལ སིལཱསནེ ནིསཱིདཱཔེཏྭཱ དིབྦམཡེཧི གནྡྷམཱལཱདཱིཧི པཱུཛེཏྭཱ སཡཾ དྷམྨཾ སུཏྭཱ པསནྣོ པསནྣཱཀཱརཾ ཀཏྭཱ ཀསྶཔདསབལེན དེསིཏཱཡ ཨནིཙྩཱདིཔརིདཱིཔིཀཱཡ.

༣༤.

ཨནིཙྩཱཝ ཏ སངྑཱརཱ, ཨུཔྤཱདཝཡདྷམྨིནོ;

ཨུཔྤཛྫིཏྭཱ ནིརུཛ྄ཛྷནྟི, ཏེསཾ ཝཱུཔསམོ སུཁོཏི.

གཱཐཱཡ དྷམྨདེསནེན ཏསྶ མནོརཐཾ མཏྠཀཾ པཱཔེཏྭཱ དེཝལོཀེ མཧནྟཾ སིརིཝིབྷཝཾ དསྶེཏྭཱ ཨཱནེཏྭཱ སཀརཛྫེཡེཝ པཏིཊྛཱཔེཏྭཱ ཨཔྤམཏྟོ ཧོཏི མཧཱརཱཛཱཏི ཨོཝདིཏྭཱ དེཝལོཀམེཝ ཨགམཱསཱིཏི.

༣༥.

ཨིཏི ཨམིཏསིརིཾ ཝཱ ཛཱིཝིཏཾ ཝཱཔི སནྟོ,

ན སུམརིཡ པསཏྠཾ དྷམྨམེཝཱ ཙརནྟི;

ཏནུཏར ཝིབྷཝཱནཾ ཨཔྤམཱཡཱུནམམྦྷོ,

ཨིཧ ཀུསལཔམཱདོ ཀོ ནུ ཏུམྷཱདིསཱནནྟི.

དྷམྨསོཎྜཀཝཏྠུཾ པཋམཾ.

༢. མིགལུདྡཀསྶ ཝཏྠུམྷི ཨཡམཱནུཔུབྦིཀཐཱ

ཨིཏོ ཀིར ཨེཀ ཏིཾསཏིམེ ཀཔྤེ སིཁཱིནཱམ སམྨཱསམྦུདྡྷོ སམཏིཾས པཱརམིཡོ པཱུརེཏྭཱ པརམཱཏིསམྦོདྷིཾ པཏྭཱ སདེཝཀཾ ལོཀཾ སཾསཱརཀནྟཱརཱ ཨུཏྟཱརེནྟོ དྷམྨརཏནཝསྶཾ ཝསྶཱཔེནྟོ དྷམྨབྷེརིཾཔཧརནྟོ དྷམྨཀེཏུཾ ཨུསྶཱཔེནྟོ ཨེཀསྨིཾ སམཡེ ཝིཝེཀ མནུབྲཱུཧནྟོ ཨརཉྙཱཡཏནཾ པཱཝིསི, ¶ པཝིསིཏྭཱ ཙཔན སུཔུཔྥིཏནཱགཔུནྣཱགཱདིནཱནཱཏརུསཎྜམཎྜིཏེ སུཕུལླསུམནམཱལཏིཔྤབྷུཏིནཱནཱལཏཱཀུལེ ཨནེཀཝིདྷདིཔདཙཏུཔྤདསངྒྷནིསེཝིཏེ རམཎཱིཡེ སཱིཏལསིལཱཏལེ ཙཏུགྒུཎཾ སངྒྷཱཊིཾཔཉྙཔེཏྭཱ ནིསཱིདི ཚབྦཎྞརཾསཱིཧི དིསཾ པཱུརཡནྟོ, ཏདཱ ཏཏྠ དེཝབྲཧྨནཱགསུཔཎྞཱདཡོ སནྣིཔཏིཏྭཱ དིབྦམཡེཧི གནྡྷམཱལཱདཱིཧི བྷགཝནྟཾ པཱུཛཡམཱནཱ ཐོམཡམཱནཱ ནམསྶམཱནཱ ཨཊྛཾསུ, ཏསྨིཾ པནསམཱགམེ བྷགཝཱ མདྷུརསྶརཾ ནིཙྪཱརེནྟོ བྲཧྨགྷོསེན ཙཏུསཙྩཔཊིསཾཡུཏྟཾ དྷམྨཾ དེསེཏི ཨམཏཝསྶཾ ཝསྶཱཔེནྟོཝིཡ. ཏདཱ ཨེཀོ མིགལུདྡཀོ ཝནཾ པཝིཊྛོ མིགསཱུཀརེ ཧནྟྭཱ མཾསཾ ཁཱདནྟོ ཏཾ ཋཱནཾ པཏྭཱ ཨདྡས བྷགཝནྟཾ དྷམྨཾ དེསེནྟཾ. དིསྭཱ ཨེཀམནྟཾ ཋིཏོ དྷམྨཾ སུཏྭཱ ཙིཏྟཾ པསཱདེཏྭཱ ཏཏོ ཙུཏོ དེཝལོཀེ ནིབྦཏྟིཏྭཱ ཚསུ ཀཱམསགྒེསུ མནུསྶེསུཙ ཨཔརཱཔརཾ ཨིསྶརིཡཾ ཨནུབྷཝནྟོ ཨིམསྨིཾ བུདྡྷུཔྤཱདེ སཱཝཏྠིཡཾ ཀུལགེཧེ ནིབྦཏྟིཏྭཱ ཝིཉྙུཏཾ པཏྟོ བྷགཝཏོ སཱསནེ པབྦཛིཏྭཱ ཨེཀདིཝསཾ དྷམྨཾ དེསེནྟསྶ བྷགཝཏོ ཙཏུསཙྩཔཏི སཾཡུཏྟཾ དྷམྨཀཐཾ སུཏྭཱ ཙཏུཔཊིསམྦྷིདཱཧི ཨརཧཏྟཾ པཏྭཱ ཨེཀདིཝསཾ བྷིཀྑུསངྒྷམཛ྄ཛྷགཏོ ཨཏྟནོ ཀཏཀམྨཔྤཀཱསནེན པཱིཏིཝཱཙམུདཱཧརི.

༡.

ཨེ ཀ ཏིཾ སེ ཨིཏོ ཀཔྤེ,

ལོཀེ ཨུཔྤཛྫི ནཱཡཀོ;

པཏྟིཾས ལཀྑཎཱཏིཎྞོ,

སམྦུདྡྷོ ས སིཁཱིཝ྄ཧཡོ.

༢.

ཛལནྟོ དཱིཔརུཀྑོཝ, སཱུརིཡོཝ ནབྷ མུགྒཏོ;

མེརུརཱཛཱཝ སམྦུདྡྷོ, ཛནེསགྒོ པཏཱཔཝཱ.

༣.

པཱུརེཏྭཱ དྷམྨནཱཝཱཡཾ, ས ནཱཐོ སཀལཾ པཛཾ;

པཏིཊྛཔེནྟོ སཾསཱར, ཀནྟཱརཱ སནྟིབྷཱུམིཡཾ.

༤.

དྷམྨཀེཏུཾ ¶ སམུསྶེནྟོ, ཧནནྟོ དྷམྨདུནྡུབྷིཾ;

སཏྟེ དུཀྑཱ པམོཙེནྟོ, ཝསཱི ཏཏྠ ཛིནོ ཝསཱི.

༥.

ཨེཀསྨིཾ སམཡེ ནཱཐོ,

ལོཀཔཛྫོཏཀོ ཛིནོ;

ཝིཝེཀཀཱམོ སམྦུདྡྷོ,

སུརམྨཾ ཀཱནནཾ གཏོ.

༦.

པུནྣཱགནཱགཔཱུགཱདི, ནཱནཱཔཱདཔསཾཀུལཾ;

ལཏཱ ལིངྒིཏསཱཁཱཧི, སཱ མོདཀུསུམཱཡུཏཾ.

༧.

ཀུསུམཱ མོདསམྨཏྟ, ཚཔྤདཱལི ནིསེཝིཏཾ;

ནཱནཱམིག གཎཱཀིཎྞཾ, མཡཱུརགཎ ནཙྩིཏཾ.

༨.

སཱིཏལཙྪོདིཀཱསཱདྷུ, སུཔཏིཏྠཛལཱསཡཾ;

ཨཱསཱར སཱརདྷཱརཱཧི, ནིཛ྄ཛྷརཱསཏ སཾཀུལཾ.

༩.

གནྟྭཱན སོ མཧཱརཉྙཾ,

སཱིཏལཾ སིཀཏཱཏལཾ;

སིལཱཏལེ ནིསིནྣོསི,

ཝིསྶཛྫེནྟོ ཚརཾསིཡོ.

༡༠.

དེཝཱ ཏཏྠ སམཱགནྟྭཱ, པཱུཛེསུཾ དྭིཔདུཏྟམཾ;

དིབྦེཧི གནྡྷམཱལཱཧི, ནཙྩེཧི ཏུརིཡེཧིཙ.

༡༡.

དེཝདེཝོ ཏདཱ དེཝ, སངྒྷམཛ྄ཛྷེ ནིསཱིདིཡ;

ཙཏུསཙྩ མདེསེསི, ནིཙྪརཾ མདྷུརཾ གིརཾ.

༡༢.

ཏདཱཧཾ ལུདྡཀོ ཨཱསིཾ, མིགསཱུཀརམཱརཀོ;

མིགམཾསེན ཛིཝཱམི, ཏེན པོསེམི དཱརཀེ [པོསེནྟོཔུཏྟདཱརཀེ ཨིཏིཀཏྠཙི].

༡༣.

ཏདཱཧཾ ¶ མིགཝཾ ཡཱཏོ,

སབཱཎོ སསརཱསནོ;

ཨདྡསཾ ཝིརཛཾ བུདྡྷཾ,

དེཝསངྒྷཔུརཀྑཏཾ.

༡༤.

ཙནྡཾཝ ཏཱརཀཱཀིཎྞཾ, མེརུཾཝཎྞཝམཛ྄ཛྷགཾ;

ཝིརོཙམཱན མཱསཱིནཾ, ཙཏུསཙྩཔྤཀཱསཀཾ.

༡༥.

ཨེཀཔསྶེ ཋིཏོ ཏཏྠ, ཨསྶོསིཾ དྷམྨམུཏྟམཾ;

ཏཏྠ ཙིཏྟཾ པསཱདེཏྭཱ, སོམནསྶཾ པཝེདཡིཾ.

༡༦.

ཨེཀཏིཾསེ ཨིཏོ ཀཔྤེ,

ཡཾ པུཉྙཾ པསུཏཾ མཡཱ;

ཏེནཱཧཾ པུཉྙཀམྨེན,

ཛཱཏོསིཾ དེཝཡོནིཡཾ.

༡༧.

སམྤཏྟིམནུབྷུཏྭཱན, ཚཀཱམགྒེ པརཱཔརཾ;

དེཝསངྒྷཔརིབྦཱུལ༹ྷོ, ཝིམཱནེ རཏནཱམཡེ.

༡༨.

མནུསྶེསུཙ ཡཾ ཨགྒཾ, ཏསྶ བྷཱགཱི བྷཝཱམཧཾ;

བྷོགེ མེ ཨཱུནཏཱ ནཏྠི, སདྡྷམྨསཝཎེ ཕལཾ.

༡༩.

ཨིམསྨིཾ བྷདྡཀེ ཀཔྤེ,

སཱཝཏྟིཔུརམུཏྟམེ;

ཨཌྜྷེ མཧདྡྷནེ སཱལེ,

ཛཱཏོཧཾ ཨུདིཏེ ཀུལེ.

༢༠.

མཧཏཱ པརིཝཱརེན, པཏྟོ ཝུདྡྷིཾཙ ཝིཉྙུཏཾ;

ཙཱརིཀཾ ཙརམཱནོཧཾ, པཏྟོ ཛེཏཝནཾ ཝརཾ.

༢༡.

ཨདྡསཾ སཧ སིསྶེཧི, ནིསིནྣཾ སུགཏཾ ཏདཱ;

ཨསྶོསིཾ མདྷུརཾ དྷམྨཾ, ཙཏུསཙྩཔྤཀཱསཀཾ.

༢༢.

སུཏྭཱན མདྷུརཾ དྷམྨཾ, པབྦཛིཏྭཱན སཱསནེ;

ཨ ཛརཱ མརཾ སཱིཏིབྷཱུཏཾ, པཏྟོ ནིབྦཱཎམུཏྟམཾ.

༢༣.

སུཏཾ ¶ ཨེཀམུཧུཏྟཾ མེ, ཏདཱ དྷམྨཾ སུདེསིཏཾ;

ཏེནམྷི ཙཏུརཱཔཱཡེ, ན ཛཱཏོ ན ཀུཏོབྷཡཾ.

༢༤.

ཀརམུཀྑིཔྤ ཝཀྑཱམི, ཀརོཐེ ཀགིརཾ མམ;

མམོ པམཾ ཀརིཏྭཱན, དྷམྨཾ སུཎཱཐ སཱདྷུཀནྟི.

ཨེཝཉྩ པན ཝཏྭཱ སཏྟེ དྷམྨསཝཎེ ནིཡོཛེསཱིཏི.

༢༥.

ཨིཏི ཏནུཏརཀཱལཾ སཱདྷུ དྷམྨཾ སུཎིཏྭཱ,

ཨདྷིགཏཝིབྷཝཱནཾ ཨཱནུབྷཱཝཾ སུཎིཏྭཱ;

བྷཝཝིབྷཝསུཁཾ བྷོ པཏྠཡནྟཱ ཀུསཱིཏཾ,

ཛཧཐ སུཎཐ དྷམྨཾ དུལླབྷཾ དུལླབྷསྶཱཏི.

མིགལུདྡཀསྶ ཝཏྠུཾ དུཏིཡཾ.

༣. ཏིཎྞཾཛནཱནཾ ཝཏྠུམྷི ཨཡམཱནུཔུབྦཱིཀཐཱ

ཛམྦུདཱིཔསྨིཾ ཀིར པུབྦེ མཧཱནིདཱགྷོ ཨཧོསི, ཏདཱ ནིདཱགྷསུརིཡེན སཀིརཎཀརཱ ཝཱཔི པོཀྑརཎི ནདཱི གིརིཀནྡརནིཛ྄ཛྷརཱདཱིསུ ཨུདཀཾ ནིསྶེསཾ ཀཏྭཱ པཱིཏམིཝ ཨུདཀེ པརིཀྑཱིཎེ མཙྪཀཙྪཔཱདཡོ ཡེབྷུཡྻེན ཝིནཱསཾ པཏྟཱ. ཨཐ མཧཱརཉྙབྷཱུམིཡཾ རུཀྑཏིཎལབྷཱདཡོ ཨཏཱིཝ མིལཱཏཱ ཨཧེསུཾ. མིགཔཀྑིནོཔིགྷམྨཱབྷིཏཏྟཱ པིཔཱསིཏོ མརཱིཙིཾ ཏོཡནྟིམཉྙམཱནཱ ཨིཏོཙིཏོཙ དྷཱཝནྟཱ མཧཱདུཀྑཔྤཏྟཱ ཨཧེསུཾ. ཏདཱ ཨེཀོ སུཝཔོཏཀོ པིཔཱསིཏོ ཏཏྠ ཏཏྠ པཱནཱིཡཾ པརིཡེསནྟོ མཧཱརཉྙེ ཨེཀསྨིཾ པཱུཏིཔཱདཔེ སཊྛིརཏནེ ནརཀཱཝཱཊེ པཱནཱིཡགནྡྷཾ གྷཱཡིཏྭཱ ལོབྷེན པཱཏུཾ ཨོཏིཎྞོ ཨཏིཔཱནེན བྷཱརོ ཏཏྠེཝ པཏིཏྭཱ ཨུགྒནྟུཾ ནཱསཀྑི. ཨཐཱཔརོཔི སཔྤོཙ མནུསྶོཙཱཏི དྭེ ཛནཱ ཏཏྠེཝ པཏིཾསུ, སཔྤཱནཱམ ཝིཝེཀཾ ལདྡྷཱཝ ཨཏྟཾ ཝིཛཧནྟི. ཏསྨཱཡཾ ཨལདྡྷཱ ¶ ཝིཝེཀཏྟཾ ཨུགྒནྟུཾ ནཱསཀྑི. ཨནཱལམྦཏྟཱ མནུསྶོཔི. ཏེ ཨུགྒནྟུཾ ཨསཀྐོནྟཱ མརཎབྷཡབྷཱིཏཱ ཨཉྙམཉྙ མཝིཧེཋེནྟཱ ཏཏྠེཝ ཝསིཾསུ. ཨཐེཀོ བརཱཎསཱིཝཱསིཀོ མནུསྶོ ཝནཾ པཝིཊྛོ ཏཐེཝ པཱནཱིཡཾ པརིཡེསམཱནོ ཏཾ ཋཱནཾ པཏྭཱ ཏེ ཏཡོཔི དིསྭཱ ཀམྤམཱནཧདཡོ ཝལླིཡཱ པིཊཀཾ བནྡྷིཏྭཱ སིཀྐཱཡ པཀྑིཔིཏྭཱ ཨོཏཱརེཏྭཱ ཏེ ཏཡོཔི ཨུདྡྷརི, ཨཐཱནེན ཏེ ཨམྷཱཀཾ ཛཱིཝིཏཾ དིནྣནྟི སོམནསྶཱ ཏསྶེཝམཱཧཾསུ, སཱམི མཡཾ ཏུམྷེ ནིསྶཱཡ ཛཱིཝིཏཾ ལབྷིམྷ, ཏུམྷེ ཨིཏོ པཊྛཱཡ ཨམྷཱཀཾ སཧཱཡོ, མཡམྤི ཏེ སཧཱཡཱ, ཨམྷཱཀཾ ཝསནཊྛཱནཱནི ཨཱགནྟུཀཱམཱཏི ཝཏྭཱ ཏེསུ ཏཱཝ སུཝཔོཏཀོ ཨཱཧ, སཱམི བཱརཱཎསིཡཾ དཀྑིཎདྭཱརེ མཧཱནིགྲོདྷོ ཨཏྠི, ཏཏྠཱཧཾ ཝསཱམི, ཏཝ ཏཐཱརཱུཔེ ཀིཙྩེ སཏི མམ སནྟིཀམཱགམྨ སུཝཱཏི སདྡཾཀརོཧཱིཏི ཝཏྭཱ མེཏྟིཐིརཾ ཀཏྭཱ པཀྐཱམི, སཔྤོཔི སམྨཱཧཾ ཏསྶེཝ ནིགྲོདྷསྶཱ ཝིདཱུརེ མཧནྟཾ ཝམྨིཀཾ ཨཏྠི, ཏཏྠ ཝསཱམི, ཏཝཏྠེ སཏི ཏཏྠཱགནྟྭཱ དཱིགྷཱཏིསདྡཾ ཀརོཧཱིཏི ཝཏྭཱ ཏཐེཝཔཀྐཱམི, མནུསྶོཔི བཱརཱཎསིཡཾ ཨསུཀཱཡནཱམ ཝཱིཐིཡཱ ཨསུཀགེཧེ ཝསཱམི, ཏཝཏྠེ སཏི མམ སནྟིཀཾ ཨཱགཙྪཱཏི ཝཏྭཱ པཀྐཱམི, ཨཐཱ པརབྷཱགེ སོ ཨུཔཀཱརཀོ པུརིསོ ཨཏྟནོ ཀིཙྩེ སཉྫཱཏེ མམ སཧཱཡཱནཾ སནྟིཀཾ གམིསྶཱམཱིཏི སངྐེཏཱནུསཱརེན གནྟྭཱ ནིགྲོདྷམཱུལེ ཋིཏོ སུཝསྶ སདྡམཀཱསི, ཏཾ སུཏྭཱ སུཝཔོཏཀོ ཝེགེནཱགནྟྭཱ ཏེན སདྡྷིཾ པཊིསམྨོདིཏྭཱསམྨ ཙིརེནཱ གཏོསི, ཨཱགཏཀཱརཎཾ མེ ཨཱཙིཀྑཱཏི ཨཱཧ. སོཔཱཧ སམྨཱཧཾ ཛཱིཝིཏུ མསཀྐོནྟོ པུཏྟདཱརཀེ ཉཱཏཱིནཾ པཊིཔཱདེཏྭཱ ཏཝ སནྟིཀམཱགཏོམྷིཏི, སུཝཔོཏཀོཔི སཱདྷུ སམྨ ཏཡཱ ཀཏཾ མམ སནྟིཀམཱགཙྪནྟེན, ཏཡཱ མམ ཛཱིཝིཏཾ དིནྣཾ, མཡཱཔི ཏཝ ཛཱིཝནུཔཱཡཾ ཀཱཏུཾ ཝཊྚཏི, ཡཱཝཱཧཾ ཨཱགཙྪཱམི, ཏཱཝེཏྠ ཐོཀཾ ཝིསྶམཱཏི ཝཏྭཱ པཀྐཱམི ཛཱིཝནུཔཱཡཾ པརིཡེསམཱནོ, ¶ ཏསྨིཾ ཀིར སམཡེ བཱརཱཎསཱིརཱཛཱ ནགརཏོ ནིཀྑམྨ སུསཛྫིཏུཡྻཱནཾ པཝིསིཏྭཱ སཔརིསོ ཀཱིལི༹ཏྭཱ མཛ྄ཛྷནྟིཀསམཡེ སུཕུལླིཏཾ པཉྩཔདུམསཉྪནྭཾ མངྒལཔོཀྑརཎིཾ དིསྭཱ ནཧཱཡིཏུཀཱམོ སབྦཱབྷརཎཱནི ཨོམུཉྩིཏྭཱ རཱཛཔུརིསེ པཊིཔཱདེཏྭཱ ནཧཱཡིཏུཾ ཨོཏརི, ཏདཱ སུཝཔོཏཀོ ཏཾ ཋཱནཾ པཏྟོ སཱཁནྟརེ ནིལཱིནོ རཱཛཔུརིསཱནཾ པམཱདཾ དིསྭཱ རཉྙོ མུཏྟཱཧཱརཾ ཌསིཏྭཱ ཨཱཀཱསཾ པཀྑནྡིཏྭཱ ཝེགེནཱགནྟྭཱ ཨཏྟནོ སཧཱཡསྶ དཏྭཱ ཨཔྤམཏྟོ ཨིམཾ ཝལཉྫེཧི སམྨཱཏི ཝཏྭཱ ཨདཱསི, ཏཏོ སོ ནཾ གཧེཏྭཱ ཨིམཾ ཀུཧིཾ པཊིསཱམེསྶཱམཱིཏི ཙིནྟོནྟོ མམེཀོ སཧཱཡཀོ ཨནྟོནགརེ ཝསཏི, ཏསྨིཾ ཋཔེསྶཱམཱིཏི ཙིནྟེཏྭཱ ཡཐཱསངྐེཏམུཔགམྨ ཏཾ དིསྭཱ པཊིསནྠཱརཾ ཀཏྭཱ སུཝཔོཏཀེན ཀཏོ པཀཱརཾ པཀཱསེཏྭཱ ཨིམཾ མུཏྟཱཧཱརཾ སཱདྷུཀཾ ཋཔེཧཱིཏི ཝཏྭཱ ཨདཱསི, ཏཾཁཎེ རཱཛཱ ནཧཱཏྭཱནུལིཏྟོ ཨཱབྷརཎཱནི པིལནྡྷེནྟོ མུཏྟཱཧཱརཾ ནཱདྡས. ཏཏོ རཱཛཔུརིསཱ ཨནྟོཙ བཧིཙ པརིཛནེ ཨུཔཔརིཀྑིཏྭཱ མུཏྟཱཧཱརཾ ཨཔསྶནྟཱ ནགརེ བྷེརིཾ ཙརཱཔེསུཾ, ཡོ མུཏྟཱཧཱརཾ པསྶཏི, ཏསྶ རཱཛཱ མཧནྟཾ ཡསཾ དསྶཏཱིཏི. ཏཾ སུཏྭཱ སོ མིཏྟདཱུབྷཱི ཨེཝཾ ཙིནྟེསི, ཨཧཾཙམྷི དུཀྑིཏོ, ཡནྣཱུནཱཧཾ མུཏྟཱཧཱརཾ རཉྙོ དསྶེཏྭཱ སུཁེན ཝསེཡྻཾ, ཀིམྨེ ཨེཏེནཱཏི ཏེན ཀཏཾ ཏཐཱརཱུཔཾ ཨུཔཀཱརཾ ཨསལླཀྑེནྟོ མཧཱམིཏྟདཱུབྷཱི པུརིསོ རཱཛཔུརིསེ ཨུཔསངྐམྨ མུཏྟཧཱརཾ ཨཏྟནོ སནྟིཀེ ཋཔིཏབྷཱཝཾ ཀཐེསི, བྷོ མམ སནྟིཀེ ཨེཀོ པུརིསོ མུཏྟཧཱརཾ ཋཔེསཱིཏི. ཨེཝཾ ཨསཔྤུརིསསཾསགྒོཏི, ཏཐཱཧི.

༡.

ཡཐཱ སཾཝཌྜྷིཏོ ནིམྦོ, མདྷུཁཱིརོ དསིཉྩནཱ;

ན ཡཱཏི མདྷུརཾ ཏཾ ཝོ, པཀཱར མསཏཾ ཀཏཾ.

༢.

སཱིསེནུ དཀ མཱདཱཡ, ཝཌྜྷིཏོཔི ནུཧཱིཏརུ;

ན ཡཱཏི མདྷུརཾ ཏཾཝོ, པཀཱརམསཏཾ ཀཏཾ.

༣.

ནིཙྩཾ ¶ ཁཱིརོདཔཱནེན, ཝཌྜྷིཏོ སིཝིསོ ཡཐཱ;

ཝིསཾཝ པརིཝཏྟེཏི, ཏཐཱ ནཱིཙོཔཀཱརཀཾ.

༤.

ཡཐཱཏྟནཱ ཀཏོ ཨགྒི, སཱིཏལཾ ན དདེ ཁལུ;

ཏཐཱ ནཱིཙེ ཀཏཾ ཀཱརཾ, ཨགྒཱིཝ དཧཏེ ཏནུཾ.

༥.

ཏསྨཱ ཨུཔཔརིཀྑིཏྭཱ, ཧཱཝབྷཱཝེན བུདྡྷིཡཱ;

ཀཱཏབྦཱ མེཏྟི ཛནྟཱུཧི, ནཱམིཏྟོ ལབྷཏེསུཁནྟི.

ཨཐསྶ མིཏྟདུབྷིནོ ཝཙནེན རཱཛཔུརིསཱ མུཏྟཱཧཱརཾཙཏཾཙ གཧེཏྭཱ སབྷཎྜཀཾ པུརིསཾ དསྶེསུཾ. ཨཐ རཱཛཱ སབྷཎྜཀཾ ཙོརཾ དིསྭཱ ཀུདྡྷོ ཨིམཾ ནེཏྭཱ དཀྑིཎདྭཱརེ ཛཱིཝསཱུལེ ཨུཏྟཱསེཐཱཏི ཨཱཎཱཔེསི, རཱཛཔུརིསཱ ཏསྶ རཱཛཱཎཾ ཀརོནྟོ ཨགམཾསུ, ཏེཧི ནཱིཡམཱནོ པུརིསོ དཀྑིཎདྭཱརཱ ནིཀྑམྨ སཔྤསཧཱཡཾ སརིཏྭཱ ཨཔྤེཝནཱམེ ཏསྶ སནྟིཀཱ ཀིཉྩི སོཏྠི བྷཝེཡྻཱཏི པུབྦེ ཝུཏྟསངྐེཏཱ ནུསཱརེན ཝམྨིཀཾ དིསྭཱ སམྨ དཱིགྷཱཏི སདྡམཀཱསི, སོ ཝམྨིཀཱ ནིཀྑམྨཏཾ ཏཐཱ ནིཡམཱནཾ དིསྭཱ སཾཝིགྒོ དུཀྑཔྤཏྟོ སཧཱཡསྶམེ ཨཛྫ ཨཝསྶཡེན ཨུཔཏྠམྦྷཾ བྷཝིཏུཾ ཝཊྚཏཱིཏི ཏཾ སམསྶཱསེཏྭཱ ཨཏྟབྷཱཝཾ ཝིཛཧིཏྭཱ ཨཉྙཏརཝེསེན རཱཛཔུརིསེ ཨུཔསངྐམྨ ཨིམཾ པུརིསཾ མུཧུཏྟཾམཱ མཱརེཐཱཏི དལ༹ྷཾ ཝཏྭཱ མུཧུཏྟེན རཉྙོ ཨགྒམཧེསིཡཱ ཝསནཊྛཱནཾ གནྟྭཱ སཔྤཝཎྞེན དེཝིཾ ཌསིཏྭཱ ཏཱཡ ཝིསེན མུཙྪིཏཀཱལེ མནུསྶཝཎྞེན ཝཛ྄ཛྷཔྤཏྟོ ཝིསོསདྷཾ ཛཱནཱཏིཏཱི ཝཏྭཱ ཏཾཁཎེཝ སཧཱཡསྶ སནྟིཀཾ གནྟྭཱ རཉྙཱ ཏཝ པཀྐོ སིཏཀཱལེ གནྟྭཱ ཨུདཀཔྤསཏེན དེཝིཡཱ སརཱིརེ པཧརིཏྭཱ ནིབྦིསཾ ཀརཱཧཱིཏི ཝཏྭཱ པཀྐཱམི, ཨཐ རཱཛཱ ཝིསཝེཛྫ པརིཡེསནྟོ ཏཾ པཝཏྟིཾ སུཏྭཱ ཝཛ྄ཛྷཔྤཏྟཾ ཨཱནེཐཱཏི ཨཱཎཱཔེཏྭཱ དེཝིཡཱ ནིབྦིསཾ ཀརོཐཱཏི ཨཱཧ, སོ ནཱགརཱཛེན ཝུཏྟནཡེན ནིབྦིསམཀཱསི, སཱ སུཁིཏཱ ཨརོགཱ ཨཧོསི, རཱཛཱ ཏཾ དིསྭཱ ཏུཊྛོ ཏསྶ ཁེཏྟཝཏྠུཡཱནཝཱཧནཱདིདཱནེན ¶ མཧཱསཀྐཱརམཀཱསི, ཨཐ སོ རཱཛཱནཾ ཨུཔསངྐམྨ ཨཏྟནཱ ཀཏཾ སབྦཾ པཀཱསེསི. ཏེན ཝུཏྟཾ.

༦.

ཨེཀདཱཧཾ མཧཱརཱཛ, ཝནཾ ཀམྨེན ཀེནཙི;

གཏོདྡསཾ མཧཱཝཱཊེ, པཏིཏཾ སུཝཔོཏཀཾ.

༧.

ཨཐོ རགཾ མནུསྶཾཙ;

དུཀྑཔྤཏྟེ ཁུདཱཔརེ;

ཨུཀྑིཔིཾ ཀརུཎཱཡཱཧཾ;

ཏེ མེ ཝོཙུཾ ཏདཱ ཏཡོ.

༨.

ཨདཱསི ཛཱིཝམམྷཱཀཾ, ཨུཔཀཱརོསི ནོ ཏུཝཾ;

ཏཝ ཀིཙྩེ སམུཔྤནྣེ, ཨམྷཱཀཾ ཨེཧི སནྟིཀཾ.

༩.

ཨེཝཾ ཏེཧི པཝུཏྟོཧཾ, ཨགཉྪིཾ སུཝསནྟིཀཾ;

ཏེན ཀཏཱུཔཀཱརོཧཾ, མནུསྶསྶཱཔི སནྟིཀཾ.

༡༠.

ཏེནཱཧཾ མརཎཔྤཏྟོ, ཨདྡསཾ ཨུརགཱདྷིཔཾ;

སོདཱསི ཛཱིཝིཏཾ མཡ྄ཧཾ, ཨལཏྠཾ [ཨལདྡྷ ཨིཏིསབྦཏྠ] ཝིཔུལཾ དྷནཾ.

༡༡.

སུཛནོ ནཱཝམནྟབྦོ, ཁུདྡཀོཏི ནརཱདྷིཔ;

སུཝོཙ ཨུརགོཙེཏེ, མིཏྟདྷམྨེ པཏིཊྛིཏཱ.

༡༢.

ཀཱརཎཉྙཱུ མནུསྶེསོ,

ཨམྷེཧི སམཛཱཏིཀོ;

ཀཏཱུཔཀཱརོ ཨེཝམྤི,

དིསོ ཛཱཏོ ནརཱདྷམོ.

༡༣.

ཨཀསྨཱ དེཝ ཀུཔྤནྟི, པསཱིདནྟིནིམིཏྟཏོ;

སཱིལཾ ཧེཏམསཱདྷཱུནཾ, བཱལཱནམཝིཛཱནཏཾ.

༡༤.

མནུསྶཱཔི མཧཱརཱཛ, ཀེཙི ཝིསྶཱསིཡཱ ན ཝེ;

ཏིརཙྪཱནཱཔི ཧོནྟེཝ, ཨཛིམྷམནསཱསཋཱཏི.

ཨེཝཾ ¶ སོ ཨཏྟནོ པཝཏྟིཾ ཀཐེསི, རཱཛཱ ཏཾ སུཏྭཱ པསནྣོ ཨིམསྶ པུརིསསྶ མཧནྟཾ གེཧཾ ཀཏྭཱ མཧཱཔརིཧཱརཾ ཀརོཐཱཏི ཨཱཎཱཔེསི, སོ པན མམ གེཧཾ ནིགྲོདྷསྶ ཙ ཝམྨིཀསྶ ཙ ཨནྟརེ ཀརོཐཱཏི ཝཏྭཱ ཏཐཱ ཀཱརེཏྭཱ ཏཏྠ ཝསནྟོ རཱཛཱུཔཊྛཱནཾ ཀརོནྟོ ཏེཧི སཧཱཡེཧི སདྡྷིཾ སམྨོདམཱནོ ཡཱཝཛཱིཝཾ ཝསིཏྭཱ ཨཱཡུ པརིཡོསཱནེ ཏེཧི སདྡྷིཾ ཡཐཱཀམྨཾ གཏོཏི.

༡༥.

ཨིཏི པཏིཏསུཁམྷཱ ཨངྒཏོ ཝཱ དྷནམྷཱ,

པརམཏརཔཏིཊྛཱ ཧོནྟི མིཏྟཱ སཁཱནཾ;

ཝིརཧིཏསཁིནཾ བྷོ ནཏྠི ཡསྨཱབྷིཝུདྡྷི,

ཙིཎུཐ ཀུསལདྷམྨཾ མིཏྟཝནྟཱ མཧནྟཾ.

ཏིཎྞཾ ཛནཱནཾ ཝཏྠུཾ ཏཏིཡཾ.

༤. བུདྡྷེནིཡཱ ཝཏྠུམྷི ཨཡམཱནུཔུབྦཱིཀཐཱ

ཛམྦུདཱིཔེ ཀིར པུབྦེ པཱཊལིཔུཏྟནགརེ སཏྟཱསཱིཏཱིཀོཊིནིཧིཏདྷནཾ ཨེཀཾ སེཊྛིཀུལཾ ཨཧོསི, ཏསྶ པན སེཊྛིནོ ཨེཀཱཡེཝ དྷཱིཏཱ ཨཧོསི ནཱམེན བུདྡྷེནིནཱམ, ཏསྶཱ སཏྟཝསྶིཀཀཱལེ མཱཏཱཔིཏརོ ཀཱལམཀཾསུ, ཏསྨིཾ ཀུལེ སབྦཾ སཱཔཏེཡྻཾ ཏསྶཱཡེཝ ཨཧོསི, སཱ ཀིར ཨབྷིརཱུཔཱ པཱསཱདིཀཱ པརམཱཡ ཝཎྞཔོཀྑརཏཱཡ སམནྣཱགཏཱ དེཝཙྪརཔཊིབྷཱགཱ པིཡཱཙ ཨཧོསི མནཱཔཱ, སདྡྷཱ པསནྣཱ རཏནཏྟཡམཱམིཀཱ པཊིཝསཏི, ཏསྨིཾ པན ནགརེ སེཊྛིསེནཱཔཏིཨུཔརཱཛཱདཡོ ཏཾ ཨཏྟནོ པཱདཔརིཙཱརིཀཾ ཀཱམཡམཱནཱ མནུསྶེ པེསེསུཾ པཎྞཱཀཱརེཧི སདྡྷིཾ, སཱ ཏཾ སུཏྭཱ ཙིནྟེསི, མཡ྄ཧཾ མཱཏཱཔིཏརོ སབྦཾ ཝིབྷཝཾ པཧཱཡ མཏཱ, མཡཱ པན ཏཐཱ ཨགནྟབྦཾ, ཀིཾ མེ པཏིཀུལེན, ཀེཝལཾ ¶ ཝིཏྟཝིནཱསཱཡ བྷཝཏི, མཡཱ པནི མཾ དྷནཾ བུདྡྷསཱསནེཡེཝ ནིདཧིཏུཾ ཝཊྚཏཱིཏི ཙིནྟེསི, ཙིནྟེཏྭཱ ཙ པན ཏེསཾ ན མཡ྄ཧཾ པཏིཀུལེནཏྠོཏི པཊིཀྑིཔི, སཱ ཏཏོ པཊྛཱཡ མཧཱདཱནཾ པཝཏྟེནྟཱི སམཎབྲཧྨཎེ སནྟཔྤེསི, ཏེནེཏྠ.

༡.

ཙཏུདྡིསཱཡཱཏཛིནཏྲཛཱནཾ,

ཨཱཔཱནབྷཱུཏཾ གྷརམཱསི ཏསྶཱ;

ཡདིཙྪིཏ པྤཙྩཡལཱབྷ ཧེཏུ,

དེཝདྡུམོཝཱསི མཧཱནུབྷཱཝོ.

༢.

པུཔྥཱུཔཧཱརཱདི ཝིཏཱནལངྐཏཱ,

པདཱིཔ པཉྙཏྟ སུབྷཱསནཱཝལཱི;

སུཁཱསནཱསཱིན ཝསཱིཧིལངྐཏཱ,

ཏསྶཱསི ཏསྨིཾ ཝརདཱནསཱལཱ.

༣.

སུདྷོཏཧཏྠཱ སུཙིཔུཉྙཙིཏྟཱ,

སདཱདརཱ རཀྑིཏཔཉྩསཱིལཱ;

བུདྡྷེནིནཱམཱ ཀརུཎཱ གུཎགྒཱ,

ཨདཱ མཧཱདཱནཝརཾ པསཏྠནྟི.

ཨཐཱཔརབྷཱགེ ཨེཀོ ཨསྶཝཱཎིཛཀོ ཨསྶ-ཝཱཎིཛྫཱཡ པུབྦནྟཱཔརནྟཾ གཙྪནྟོ ཨཱགམྨ ཨིམིསྶཱ གེཧེ ནིཝཱསཾ གཎྷི, ཨཐ སོ ཝཱཎིཛོ ཏཾ དིསྭཱ དྷཱིཏུསིནེཧཾ པཏི ཊྛཱ པེ ཏྭཱ གནྡྷམཱལཝཏྠཱལངྐཱརཱདཱིཧི ཏསྶཱ ཨུཔཀཱརཀོ ཧུཏྭཱ གམནཀཱལེ ཨམྨ ཨེཏེསུ ཨསྶེསུ ཏཝ རུཙྩནཀཾ ཨསྶཾ གཎྷཱཧཱིཏི ཨཱཧ, སཱཔི ཨསྶེ ཨོལོཀེཏྭཱ ཨེཀཾ སིནྡྷཝཔོཏཀཾ དིསྭཱ ཨེཏཾ མེ དེཧཱིཏི ཨཱཧ, ཝཱཎིཛོ ཨམྨ ཨེསོ སིནྡྷཝཔོཏཀོ, ཨཔྤམཏྟཱ ཧུཏྭཱ པཊིཛགྒཱཧཱིཏི ཝཏྭཱ ཏཾ པཊིཔཱདེཏྭཱ ཨགམཱསི. སཱཔི ཏཾ པཊིཛགྒམཱནཱ ཨཱཀཱསགཱམིབྷཱཝཾ ཉཏྭཱ སམྨཱ པཊིཛགྒནྟཱི ཨེཝཾ ཙིནྟེསི, པུཉྙཀརཎསྶ ¶ མེ སཧཱཡོ ལདྡྷོཏི, ཨགཏཔུབྦཱཙ མེ བྷགཝཏོ སམཱརཾ མཱརབལཾ ཝིདྷམེཏྭཱ བུདྡྷབྷཱུཏསྶ ཛཡམཧཱབོདྷིབྷཱུམི, ཡནྣཱུནཱཧཾ ཏཏྠ གནྟྭཱ བྷགཝཏོ ཛཡམཧཱབོདྷིཾ ཝནྡེཡྻནྟི ཙིནྟེཏྭཱ བ ཧཱུ རཛཏསུཝཎྞམཱལཱདཡོ ཀཱརཱཔེཏྭཱ ཨེཀདིཝསཾ ཨསྶ མབྷིརུཡ྄ཧ ཨཱཀཱསེན གནྟྭཱ བོདྷིམཱལཀེ ཋཏྭཱ ཨཱགཙྪནྟུཨཡྻཱ སུཝཎྞམཱལཱ པཱུཛེཏུཾཏི ཨུགྒྷོསེསི. ཏེནེཏྠ.

༤.

ཡཏོ པཊྛཱཡཧཾ བུདྡྷ, སཱསནེ སུདྡྷམཱནསཱ;

པསནྣཱ ཏེན སཙྩེན, མམཱནུགྒཧབུདྡྷིཡཱ.

༥.

ཨཱགཙྪནྟུ ནམསྶནྟུ, བོདྷིཾ པཱུཛེནྟུ སཱདྷུཀཾ;

སོཎྞམཱལཱཧི སམྦུདྡྷ, པུཏྟཱ ཨརིཡསཱཝཀཱ.

༦.

སུཏྭཱ ཏཾ ཝཙནཾ ཨཡྻཱ, བཧཱུ སཱིཧལ༹ཝཱསིནོ;

ཨཱགམྨ ནབྷསཱ ཏཏྠ, ཝནྡིཾ སུཙ མཧིཾསུཙཱཏི.

ཏཏོ པྤཏུཏི སཱ ཀུམཱརིཀཱ བུདྡྷསཱསནེ ཨཏཱིཝ པསནྣཱ ནིཙྩམེཝ ཨསྶ མབྷིརུཡ྄ཧ ཨཱགནྟྭཱ ཨརིཡེཧི སདྡྷིཾ མཧཱབོདྷིཾ སུཝཎྞམཱལཱཧི པཱུཛེཏྭཱ གཙྪཏི, ཨཐ པཱཊལིཔུཏྟནགརོཔཝནེ ཝནཙརཱ ཏསྶཱ ཨབྷིཎྷཾ གཙྪནྟིཡཱ ཙ ཨཱགཙྪནྟིཡཱ ཙ རཱུཔསམྤཏྟིཾ དིསྭཱ རཉྙོ ཀཐེསུཾ. མཧཱརཱཛ ཨེཝརཱུཔཱ ཀུམཱརིཀཱ ཨསྶ མབྷིརུཡ྄ཧ ཨཱགནྟྭཱ ནིབདྡྷཾ ཝནྡིཏྭཱ གཙྪཏི. དེཝསྶཱནུརཱུཔཱ ཨགྒམཧེསཱི བྷཝིཏུནྟི, རཱ ཛཱ ཏཾ སུཏྭཱ ཏེནཧི བྷཎེ གཎྷཐ ནཾ ཀུམཱརིཾ, མམ ཨགྒམཧེསིཾ ཀརོམཱིཏི པུརིསེ པཡོཛེསི, ཏེན པཡུཏྟཔུརིསཱ བོདྷིཔཱུཛཾ ཀཏྭཱ ཨཱགཙྪནྟིཾ གཎྷཱམཱཏི ཏཏྠ ནིལཱིནཱ གཧཎསཛྫཱ ཨཊྛཾསུ, ཏདཱ སཱ ཀུམཱརིཀཱ ཨསྶ མབྷིརུཡ྄ཧ མཧཱབོདྷིམཎྜཾ གནྟྭཱ ཝཱིཏརོགེཧི སདྡྷིཾ པུཔྥཔཱུཛཾ ཀཏྭཱ ཝནྡིཏྭཱ ནིཝཏྟི, ཨཐ ཏེསུ ཨེཀོ དྷམྨརཀྑིཏ ཏྠེརོནཱམ ཏསྶཱ ཨེཝ མཱཧ, བྷགིནི ཏཾ ཨནྟརཱམགྒེ ཙོརཱ གཎྷིཏུཀཱམཱ ཋིཏཱ, ཨསུཀཊྛཱནཾ པཏྭཱ ཨཔྤམཏྟཱ ¶ སཱིགྷཾ གཙྪཱཏི, སཱཔི གཙྪནྟཱི ཏཾ ཋཱནཾ པཏྭཱ ཙོརེཧི ཨནུབནྡྷིཏཱ ཨསྶསྶ པཎྷིཡཱ སཉྙཾ དཏྭཱ པཀྐཱམི, ཙོརཱ པཙྪཏོ པཙྪཏོ ཨནུབནྡྷིཾསུ. ཨསྶོ ཝེགཾ ཛ ནེ ཏྭཱ ཨཱཀཱས མུལླངྒྷི, ཀུམཱརིཀཱ ཝེགཾ སནྡྷཱརེཏུཾ ཨསཀྐོནྟཱི ཨསྶསྶ པིཊྛིཏོ པརིགལིཏྭཱ པཏནྟཱི མཡཱ ཀཏཱུཔཀཱརཾ སར པུཏྟཱཏི ཨཱཧ, སོ པཏནྟིཾ དིསྭཱ ཝེགེནཱ གནྟྭཱ པིཊྛིཡཾ ནིསཱིདཱཔེཏྭཱ ཨཱཀཱསཏོ ནེཏྭཱ ས ཀ ཊྛཱ ནེ ཡེཝ པཏིཊྛཱཔེསི. ཏསྨཱ.

༧.

ཏིརཙྪཱནགཏཱཔེཝཾ, སརནྟཱ ཨུཔཀཱརཀཾ;

ན ཛཧནྟཱིཏི མནྟྭཱན, ཀཏཉྙཱུ ཧོནྟུ པཱཎིནོཏི.

ཏཏོ སཱ ཀུམཱརིཀཱ སཏྟཱ སཱིཏིཀོཊིདྷནཾ བུདྡྷསཱསནེཡེཝ ཙཛིཏྭཱ ཡཱཝཛཱིཝཾ སཱིལཾ རཀྑིཏྭཱ ཨུཔོསཐཀམྨཾ ཀ ཏྭཱ ཏ ཏོ ཙུཏཱ སུཏྟ པྤབུདྡྷོ ཝིཡ དེཝལོཀེ ནིབྦཏྟཱིཏི.

༨.

ཨཏིཏརུཎཝཡཱ བྷོ མཱཏུགཱམཱཔི ཨེཝཾ,

ཝིཝིདྷཀུསལཀམྨཾ ཀཏྭ སགྒཾ ཝཛནྟི;

ཀུསལཕལམཧནྟཾ མཉྙམཱནཱ བྷཝནྟཱ,

བྷཝཐ ཀཐ མུཔེཀྑཱ དཱནམཱནཱདིཀམྨེ.

བུདྡྷེནིཡཱ ཝཏྠུཾ ཙཏུཏྠཾ.

༥. ཨཧིཏུཎྜིཀསྶ ཝཏྠུམྷི ཨཡམཱནུཔུབྦཱིཀཐཱ

ཨིམསྨིཾ ཀིར བྷདྡཀཔྤམྷི ཨམྷཱཀཾ ཀིར བྷགཝཏོ པུབྦེ ཀསྶཔོནཱམ སཏྠཱ ལོཀེ ཨུཔྤཛྫིཏྭཱ སདེཝཀཾ ལོཀཾ སཾསཱརསཱགརཱ ཏཱརེཏྭཱ སབྦབུདྡྷཀིཙྩཱནི ནིཊྛཔེཏྭཱ ཨཏྠཾ གཏོ དིཝསཀརོཝིཡ སེཏབྱམྷི ཨནུཔཱདིསེསཱཡ ནིབྦཱཎདྷཱཏུཡཱ པརིནིབྦཱཡི, ཏདཱ སཀལཛམྦུདཱིཔཝཱསིནོ མནུསྶཱ སནྣིཔཏིཏྭཱ ¶ ཨེཀེཀཾ སུཝཎྞིཊྛཀཾ ཀོཊིཨགྒྷནཀཾ རཏནཝིཙིཏྟཾ བཧིཙིནནཏྠཱཡ ཨེཀེཀཾ ཨཌྜྷཀོཊིཨགྒྷནཀཾ ཨབྦྷནྟརཱུཔཔཱུརཎཏྠཾ མནོསིལཱཡ མཏྟིཀཱཀིཙྩཾ ཀརོནྟཱ ཡོཛནབྦེདྷཾ ཐཱུཔཾ ཀཏྭཱ མཧནྟཾ སཀྐཱརཾ ཀརོནྟི. ཏདཱ ཨེཀོ ཨཧིཏུཎྜིཀོ གཱམནིགམརཱཛདྷཱནཱིསུ སཔྤེ ཀཱིལཱ༹པེཏྭཱ ཛཱིཝིཀཾ ཀཔྤེནྟོ ཨེཀཾ གཱམཀཾ པཏྭཱ ཏཏྠ སཔྤེ ཀཱིལཱ༹པེཏྭཱ སནྟུཊྛེཧི གཱམཝཱསཱིཧི དིནྣཝིཝིདྷོཔཱཡནོ ཁཱདནཱིཡབྷོཛནཱིཡཾ ཁཱ དི ཏྭཱ བྷུཉྫིཏྭཱ ཏཏྠེཝ ནིཝཱསཾ གཧེཏྭཱ ནིསཱིདི. ཏསྨིཾ ཀིར གཱམཀེ མནུསྶཱ ཡེབྷུཡྻེན རཏནཏྟཡམཱམཀཱ. ཏསྨཱ ཏེ རཏྟིབྷཱགེ སཡནྟཱ ‘‘ནམོ བུདྡྷཱཡཱཏི’’ ཨེཝམཱདིཾ ཝདནྟི. སོ པན ཨཧིཏུཎྜིཀོ མིཙྪཱདིཊྛིཀོ ཏིཎྞཾ རཏནཱནཾ གུཎཾ ན ཛཱནཱཏི. ཏསྨཱ ཏེསཾ ཏཾ ཝཙནཾ སུཏྭཱ སཡམྤི ཀེ ལི༹ཾ ཀུརུམཱནོ པརིཧཱསཝསེན ‘‘ནམོ བུདྡྷཱཡཱཏི’’ ཝདཏི, ཨཐེཀདིཝསཾ སོ ཨཏྟནོ ཀཱིལཱ༹པནསམཏྠཾ ཨེཀཾ སཔྤཾ བྷཏྠ ཏཏྠ པརིཡེསམཱནོ ཨཱཧིཎྜཏི. ཏདཱ ཨེཀོ ནཱགརཱཛཱ ཀསྶཔདསབལསྶ ཐཱུ པཾ ག ནྟྭཱ ཝནྡིཏྭཱ ཨེཀཾ ཝམྨིཀཾ པཝིསཏི. ཏཾ དི སྭཱ ཨཧིཏུཎྜིཀོ ཝེགེནཱ གནྟྭཱ ནཱགརཱཛཾ གཎྷིཏུཾ མནྟཾ པརིཛཔི, སོ མནྟཾ སུཏྭཱ ཀུཛ྄ཛྷིཏྭཱ ཏཾ མཱརེཏུཀཱམོ ཨནུབནྡྷི, ཏཾ དི སྭཱ ཨཧིཏུཎྜིཀོ ཝེ གེ ན པལཱཡནྟོ ཨེཀསྨིཾ པཱསཱཎེ པཀྑལིཏྭཱ པཏམཱནོ པུབྦེཝུཏྟཔརིཧཱས ཝཙནཔརིཙཡེན ‘‘ནམོ བུདྡྷཱཡཱཏི’’ ཝདནྟོ པཏི. ཏསྶ ཏཾ ཝཙནཾ ཨནུབནྡྷནྟསྶ ནཱགརཉྙོ སོཏཔཐེ ཨམཏཾཝིཡ པཏི. ཨཐ སོ རཏནཏྟཡགཱརཝེན ཏསྨིཾ ཀོདྷཾ ནིབྦཱཔེཏྭཱ སམྨ མཱ བྷཱཡི. ཨཧཾ རཏནཏྟཡམནྟཱནུབྷཱཝཔཱསེན བདྡྷོ. ཏསྨཱ ཏུ ཝཾ ཌསིཏུཾ མཡ྄ཧཾ ཨནནུརཱུཔཾ. ཨཛྫ ཏ ཡི པསནྣོམྷི, པཎྞཱཀཱརཾ ཏེདམྨི, གཎྷཱཏི ཏཱིཎི སུཝཎྞཔུཔྥཱནི ཨདཱསི. ཨེཝཾ རཏནཏྟཡཾ ནཱམ གྷོརཱསིཝིསཱནམྤི སཔྤཱནཾ མནཾ པཱིཎེཏི. ཧོནྟི ཙེཏྠ.

༡.

བུདྡྷོཏི ¶ ཝཙནཾ སེཊྛཾ, བུདྡྷོཏི པད མུཏྟམཾ;

ནཏྠི ཏེན སམཾ ལོཀེ, ཨཉྙཾ སོཏརསཱཡནཾ.

༢.

དྷམྨོཏིཝཙནཾ སེཊྛཾ, དྷམྨོཏི པདམུཏྟམཾ;

ནཏྠི ཏེན སམཾ ལོཀེ, ཨཉྙཾ སོཏརསཱཡནཾ.

༣.

སངྒྷོཏི ཝཙནཾ སེཊྛཾ, སངྒྷོཏི པདམུཏྟམཾ;

ནཏྠི ཏེན སམཾ ལོཀེ, ཨཉྙཾ སོཏརསཱཡནཾ.

༤.

ཏསྶ མུཁཾ མུཁཾ ནཱམ, ཡཾ ཝཏྟཏི མུཁེ སདཱ;

དུལླབྷཾ བུདྡྷཝཙནཾ, སབྦསམྤཏྟིདཱཡཀཾ.

༥.

ཏསྶ མནོ མནོ ནཱམ, ཡཾ ཙེ མནསི ཝཏྟཏི;

དུལླབྷཾ བུདྡྷཝཙནཾ, སབྦསམྤཏྟིདཱཡཀཾ.

༦.

ཏམེཝ ཀཝཙཾ དེཧེ, ཏམེཝ མཎི ཀཱམདོ;

ཏམེཝ སུརབྷཱི དྷེནུ, ཏམེཝ སུརཔཱདཔོ.

༧.

ཏསྶེཝ སོཏཾ སོཏཾཝ, ཡཾ སུཎཱཏི ཛནོ ཨཡཾ

དུལླབྷཾ བུདྡྷཝཙནཾ, སབྦསམྤཏྟིདཱཡཀཾ.

༨.

ཨེཝཾ ཝིདྷོ རགོ གྷོརོ, ཧལཱ༹ཧལ༹ཝིསོ སདཱ;

བུདྡྷོཏི ཝཙནཾ སུཏྭཱ, སནྟུཊྛོ དཱསི ཛཱིཝིཏཾ.

༩.

སོཎྞཔུཔྥཏྟཡཾཙཱཔི, མཧགྒྷཾ བཧལཾ ཨདཱ;

པསྶ བུདྡྷོཏི ཝཱཙཱཡ, ཨཱནུབྷཱཝམཧནྟཏནྟི.

ཨཐ ནཱགརཱཛཱ ཏསྶ ཏཱནི སུཝཎྞཔུཔྥཱནི དཏྭཱ ཨེཝམཱཧ. སམྨ ཨེཏེསུ ཨེཀཾ ཏཝ པུཉྙཏྟཱཡ ཨེཀཾ མམ པུཉྙཏྠཱཡ པཱུཛེཧི. ཨིཏརེན ཡཱཝཛཱིཝཾ སུཁེན ཛཱིཝནྟོ པུཏྟདཱརེ པོསེནྟོ དཱནཱདཱིསུ ཨཔྤམཛྫནྟོ ཛཱིཝིཀཾ ཀཔྤེཧི. མཱ ཧཱིནཀམྨེ བྱཝཊོ ཧོཧི, མིཙྪཱདིཊྛིཉྩ པཛཧཱཏི ཨོཝདིཏྭཱ པཀྐཱམི. ཨཧིཏུཎྜིཀོཔི སོམནསྶཔྤཏྟོ ཏེན ཝུཏྟནཡེནེཝ དྭིཧི པུཔྥེཧི ཙེཏིཡཾ པཱུཛེཏྭཱ ཨེཀེན ས ཧ སྶཾ ལབྷིཏྭཱ ཏེ ན པུཏྟདཱརེ ¶ པོསེནྟོ ཀཔཎདྡྷིཀཝཎིབྦཀཱདཱིནཾ དཱནཾ དེནྟོ ཨཧིཏུཎྜིཀཀམྨཾ པཧཱཧ ཀུསལམེཝ ཨུཔཙིནནྟོ ཨཱཡུཔརིཡོསཱནེ སགྒཔརཱཡནོ ཨཧོསི.

༡༠.

ཨིཏི ཨཝིདིཏསཏྟོ ཀིཉྩི བུདྡྷཱནུབྷཱཝཾ,

ལབྷཏི དྷནཝིསེསཾ ཡསྶ ནཱམཔྤཀཱསཱ;

ཝིདིཏཛནནིཀཱཡོ ཀིནྣུ ཏསྶཱནུབྷཱཝཾ,

ན ལཔཏི ཛིནནཱམཾ ཀིཙྩ མཉྙཔྤཧཱཡཱཏི.

ཨཧིཏུཎྜིཀསྶ ཝཏྠུཾ པཉྩམཾ.

༦. སརཎཏྠེརསྶ ཝཏྠུམྷི ཨཡམཱནུཔུབྦཱིཀཐཱ

སཱཝཏྠིཡཾ ཀིར སུམནོ ནཱམེ ཀོ གཧཔཏི ཨཧོསི. ཏསྶ བྷརིཡཱ སུཛམྤཏིཀཱ ནཱམ. ཏེ ཨགཱརཾ ཨཛ྄ཛྷཱཝསནྟཱ ཨཔརབྷཱགེ པུཏྟཾཙ དྷཱིཏརཾཙ ལབྷིཾསུ. ཨཐ ཏེསཾ དཧརཀཱལེཡེཝ མཱཏཱཔིཏརོ ཀཱལཾ ཀརོནྟཱ ཛེཊྛཀཾཔཀྐོསིཏྭཱ མཡཾ པུཏྟ ཏུཝཾ པཏིརཱུཔེ ཋཱནེ ནིཝེསིཏུཾ ནཱསཀྑིམྷ, ཡཾ ནོ གྷརེ ཝིབྷཝཾ, སབྦཾ ཏཾ གཎྷ. ཨིམཱཡཙ ཏེ ཀཎིཊྛིཀཱཡ ཝུདྡྷིཾཏྭམེཝ ཛཱནཱཧཱིཏི ཝཏྭཱ ཛེཊྛཀསྶ ཧཏྠེ ཀཎིཊྛིཀཱཡ ཧཏྠཾ ཋཔེཏྭཱ ཀཱལམཀཾསུ. ཨཐ སོ མཱཏཱཔིཏུནྣཾ ཨཙྩཡེན ཨཱལཱ༹ཧནཀིཙྩཾ ཀཏྭཱ ཝསནྟོ ཀཱལནྟརེན ཀཎིཊྛིཀཾ པཏིརཱུཔེན ཀུལེན སམྦནྡྷིཏྭཱ སཡམྤི དཱརཔརིགྒཧམཀཱསི. ཨཐཱཔརབྷཱགེ ཏསྶ ཀཎིཊྛིཀཱ གབྦྷིནཱི ཧུཏྭཱ ཨེཀདིཝསཾ སཱམིཀཾ ཨཱཧ, སཱམི མམ བྷཱཏརཾ དཊྛུཀཱམཱམྷཱིཏི. སོཔི སཱདྷུ བྷདྡེཏི ཨནུརཱུཔེན པཎྞཱཀཱརེན ཏཱཡ སདྡྷིཾ ནིཀྑམི. ཏདཱ པན བྷགཝཱ སུནིཝཏྠོ སུཔཱརུཏོ བྷིཀྑུསངྒྷཔརིཝུསོ པིཎྜཱཡ ནགརཾ པཱཝིསི ཚབྦཎྞགྷནབུདྡྷརཾསིཡོ ཝིསྶཛྫེནྟོ, ཏ ཏོ ཏེ བྷགཝནྟཾ དིསྭཱ པསནྣཙིཏྟཱ པཉྩཔཏིཊྛིཏེན ¶ ཝནྡིཏྭཱ ཨཊྛཾསུ, ཨཐ སཏྟཱ ཏེསཾ ཛཡམྤཏིཀཱནཾ ཨུཔནིསྶཡསམྤཏྟིཾདིསྭཱ ཏེ སརཎེསུཙ སཱིལེསུཙ པཏིཊྛཱཔེཏྭཱ ཨེཝམཱཧ, ཀདཱཙི ཝོ དུཀྑེ ཨུཔྤནྣེ ཏཐཱགཏོ ཨནུསྶརིཏབྦོཏི. ཏཐཱཧི.

༡.

ཡཾཀིཉྩི བྷཡམུཔྤནྣཾ, རཱཛཙོརཱདིསམྦྷཝཾ;

ཏདཱ སརེཡྻ སམྦུདྡྷཾ, ནིཙྪནྟོཏ དུཔདྡཝཾ.

༢.

ཡཾ ཝེ ཨུཔདྡཝཾ ཧོཏི, ཡཀྑཔེཏཱ དིསམྦྷཝཾ;

ཏདཱ སརེཡྻ སམྦུདྡྷཾ, ནིཙྪནྟོ ཏདུཔདྡཝཾ.

༣.

སཱིཧབྱགྒྷཏརཙྪཱདི, པུཎྜརཱིཀཱདིསམྦྷཝཾ;

ཏདཱ སརེཡྻ སམྦུདྡྷཾ, ནིཙྪནྟོ ཏདུཔདྡཝཾ.

༤.

ཡམཱཏཔགྒི ཝཱཏཱདི, ཨུདཀཱསནིསམྦྷཝཾ;

ཏདཱ སརེཡྻ སམྦུདྡྷཾ, ནིཙྪནྟོ ཏདུཔདྡཝཾ.

༥.

པཛྫརཱདཱིཧི རོགེཧི, ཝིསམོ ཏུཧིསམྦྷཝཾ;

ཏདཱ སརེཡྻ སམྦུདྡྷཾ, ནིཙྪནྟོ ཏདུཔདྡཝཾ.

༦.

མཙྩུནཱ ཙེ ཡདཱ ཡུདྡྷཾ, ཀརེ ཏེནཱཔི ཛནྟུནཱ;

སརིཏབྦོ ཏདཱ བུདྡྷོ, པཏྠེནྟེནཏྟནོ ཛཡནྟི.

ཏཏོ ཏེ བྷགཝཏོ ཝཙནཾ པཊིནནྡིཏྭཱ ཝནྡིཏྭཱ ཨགམཾསུ. ཨཐ ཛེཊྛཀོ ཨཱགཏེ ཏེ དིསྭཱ ཡཐཱནུརཱུཔཾ སཀྐཱར མཀཱསི. ཏསྶཱ སཱམིཀོ ཀཏིཔཱཧཾ ཏཏྠ ཝསིཏྭཱ བྷརིཡཾ ཛེཊྛཀསྶ པཊིཔཱདེཏྭཱ མམ གཱམེ ཀིཙྩཾ ཨཏྠཱིཏི ཝཏྭཱ པཀྐཱམི. ཨཐསྶཱ བྷཱཏཱ བྷརིཡཾ པཀྐོསིཏྭཱ ཨཱཧ བྷདྡེ ཨིམིསྶཱ སབྦཾ ཀཏྟབྦཾ ཀརོཧཱིཏི. སཱ ཏཏོ པཊྛཱཡ ཏསྶཱ ཨུདཀནྣ པཱནཱ དིནཱ ཝེཡྻཱཝཙྩཾ ཀུརུམཱནཱ ཨེཏིསྶཱ ཧཏྠཔཱདགཱིཝཱུཔགེསུ ཨཱབྷརཎེསུ ལོབྷཾ ཨུཔྤཱདེཏྭཱ ཏཾ ཝཱུཔསམེཏུཾ ཨསཀྐོནྟཱི ཨཱཧཱརཱུ པཙྪེདཾ ཀཏྭཱ གིལཱནཱཝིཡ མཉྩཀཾ ཨུཔགཱུཧིཏྭཱ ནིཔཏི. ཨཐ སོ གེཧཾ གནྟྭཱ ཏཾ ཏཐཱ སཡིཏཾ ¶ དིསྭཱ མཉྩཀེ ནིསིནྣོ ཀིཾ བྷདྡེ ཨཕཱསུཀནྟི པུཙྪི, སཱ ཏུཎྷཱི ཧུཏྭཱ ཀཏིཔཡཝཱརེ པུཙྪིཏཱ ན སཀྐཱ ཀཐེཏུནྟི ཨཱཧ. པུན སཱམིཀེན གཱལ༹ྷཾ ནིབནྡྷིཏེ སཱ ཙིནྟེསི, ཨུཛུཀཾ མཡཱ ཏསྶཱ པིལ༹ནྡྷནཾ པཏྠེམཱིཏི ཝུཏྟེ ན པྤཏིརུཔཾ, ཏསྶཱ པཉྩམདྷུར མཾསཾ པཏྠེམཱིཏི ཝུཏྟེ ཏཾ མཱརེསྶཏི, ཏདཱ པིལ༹ནྡྷནཱནི མཡ྄ཧམེཝཱཏི, ཏཏོ སཱམི ཏཝ ཀཎིཊྛིཀཱཡ པཉྩམདྷུརམཾསཾ པཏྠེམི, ཨལབྷམཱནཱཡ མེ ཛཱིཝིཏཾ ནཏྠཱིཏི ཨཱཧ, ཏཾ སུཏྭཱ སོ ཨནེཀཔརིཡཱཡེན མནུསྶམཱརཎཾ ནཱམ བྷཱརིཡནྟི ཝཏྭཱ ནིཝཱརེནྟོཔི ནིཝཱརེཏུཾ ནཱསཀྑི, ཨཐ ཏཱཡ པཊིབདྡྷཙིཏྟོ ཀཱམམུཙྪིཏོ མོཧམཱུལ༹ྷོ ཧུཏྭཱ སཱདྷུ ལབྷིསྶསཱིཏི ཏསྶཱ ཝཙནཾ སམྤཊིཙྪི. ཏཐཱཧི.

༧.

ཧཱཡནྟི ཨིདྷལོཀཏྠཱ, ཧཱཡནྟི པཱརལོཀིཀཱ;

ཧཱཡནྟི མཧཏཱ ཨཏྠཱ, ཡེ ཨིཏྠཱིནཾ ཝསངྒཏཱ.

༨.

ཨེསཱ མཱཏཱ པིཏཱ ཨེསོ, བྷགིནཱི བྷཱཏརོ ཨིམེ;

གརུཏབྦེ ན ཛཱནནྟི, ཡེ ཨིཏྠཱིནཾ ཝསངྒཏཱ.

༩.

ཀཱརཎཱཀཱརཎནྟེཏཾ, ཀཏྟབྦཾཝཱ ན ཝཱ ཨིདཾ;

ཀཱམནྡྷཏྟཱ ན ཛཱནནྟི, ཡེ ཨིཏྠཱིནཾ ཝསངྒཏཱ.

༡༠.

པཱཎཾ ཝཱ ཨཏིཔཱཏེནྟི, ཧོནྟི ཝཱ པཱརདཱརིཀཱ;

བྷཱསནྟི ཨལིཀཾ ཝཱཙཾ, ཡེ ཨིཏྠཱིནཾ ཝསངྒཏཱ.

༡༡.

སནྡྷིཙྪེདཱདིཀཾ ཐེཡྻཾ, མཛྫཔཱནཾཙ པེསུནཾ;

ཀརོནྟི སཱཧསཾ སབྦཾ, ཡེ ཨིཏྠཱིནཾ ཝསངྒཏཱ.

༡༢.

ཨཧོ ཨཙྪརིཡཾ ལོཀེ, སརནྟཱནཾ བྷཡཱ ཝཧཾ;

བྷརིཡཱཡ ཝསཾ གནྟྭཱ, སོདརིཾཧནྟུམིཙྪཏཱིཏི.

ཨཐ སོ སཱཧསིཀོ པུརིསོ བྷགིནི ཨེཝ མཱཧ, ཨེཧི ཨམྨ ཨམྷཱཀཾ མཱཏཱཔིཏུནྣཾ ཨིཎཾ སཱདྷེསྶཱམ, ཨཔྤེཝནཱམ ནོ དིསྭཱ ཨིཎཱཡིཀཱ ཨིཎཾ དསྶནྟཱིཏི, ཏཾ སུཏྭཱ ཏཱཡ སམྤཊིཙྪིཏེ ¶ སུཁཡཱནཀེ ནིསཱིདཱཔེཏྭཱ ཨིཎཱཡིཀཱནཾ གཱམཾ གཙྪནྟོ ཝིཡ མཧཱཨཊཝིཾཔཏྭཱ ཡཱནཾ མགྒཱ ཨོཀྐམྨ ཋཔེཏྭཱ ཝིརཝནྟིམེཝ ནཾ ཧཏྠེ གཧེཏྭཱ ཚིནྡིསྶཱམཱིཏི ཙིནྟེཏྭཱ ཀེསེ གཧེཏྭཱ བྷཱུམིཡཾ པཱཏེསི, ཏསྨིཾ ཁཎེ ཏསྶཱ ཀམྨཛཝཱཏཱ ཙལིཾསུ. སཱ བྷཱཏུལཛྫཱཡ སཱམི ཀམྨཛཝཱཏཱ མེ ཙལིཾསུ, ཡཱ ཝཱ ཧཾ ཝིཛཱཡཱམི, ཏཱཝ ཨུཔདྷཱརེཧཱིཏི ཝདནྟཱིཔི ཨཔནེཏུཾ ཨསཀྐོནྟཱི པུཏྟཾ ཝིཛཱཡི, ཨཐ སོ ཏཾ སམཱིཔེ ཝཊརུཀྑམཱུལེ མཱརེསྶཱམཱིཏི ཙིཀུརེ གཧེཏྭཱ ཨཱཀཌྜྷི, ཏསྨིཾ ཀཱལེ སཱ སཱམི ཏཝ བྷཱགིནེཡྻསྶ མུཁཾ ཨོལོཀེཏྭཱ ཏསྶ སིནེཧེནཱཔི མཾ ན མཱརེཧཱིཏི ཝདནྟཱི ཡཱཙི, ཨཐ སོ ཀཀྑལོ༹ ཏསྶཱ ཏཾ ཀཱརུཎིཀཝཙནཾ ཨསུཎནྟོ ཝིཡ མཱརེཏུཾ ཨུསྶཧཏེཝ, ཏཏོ སཱ ཀུམཱརིཀཱ ཨཏྟནོ ཨསརཎཱ ཙིནྟེསི, མམ སདྡེནཱ གནྟྭཱ ཡོ ཀོཙི མམ བྷཱཏུ ཨནཡཾ ཀརེཡྻ, ཏཾ ན པྤཏིརཱུཔནྟི བྷཱཏུསིནེཧེན ནིསྶདྡཱ ཨཏྟནཱ གཏིཏསརཎཾ ཨཱཝཛྫམཱནཱ ནིཔཛྫི, ཨཐསྶཱ བྷཱ ཏ རི མེཏྟཱནུབྷཱཝེནཙ ཨནུསྶརིཏསརཎཱནུབྷཱཝེནཙ ཏསྨིཾ ནིགྲོདྷེ ཨདྷིཝཏྠཱ དེཝཏཱ ཨེཝརཱུཔོ མཱཏུགཱམོ ཨེཏྠ མཱརིཏཱ ཨབྷཝིསྶཱ, ཨདྡྷཱཧཾ དེཝསམཱགམཾ པཝིསིཏུཾ ན ལབྷིསྶཱམཱིཏི ཙིནྟེཏྭཱ ཨེཏིསྶཱ སཱ མི ཀོ ཝིཡ ཏཾ ཏ ཛྫེ ཏྭཱ པལཱཔེཏྭཱ ཏྭཾ མཱ བྷཱཡཱིཏི སམསྶཱསེཏྭཱ ཡཱ ན ཀེ ས པུ ཏྟཾ ཀུམཱརིཾ ནིསཱིདཱཔེཏྭཱ ཏཾ དིཝསམེཝ སཱཝཏྠིམཱགམྨ ཨནྟོནགརེ སཱ ལཱ ཡ ནཾ ནིཔཛྫཱཔེཏྭཱ ཨནྟརདྷཱཡི. ཏཐཱཧི.

༡༣.

སབྦསམྤཏྟིདཱཏཱརཾ, སབྦལོཀེཀནཱཡཀཾ;

མནསཱཔི ཡོ ཝིབྷཱཝེཏི, ཏཾ ཝེ པཱལེནྟི དེཝཏཱ.

༡༤.

མུཧུཏྟམྤིཙ ཡོ མེཏྟཾ, བྷཱཝེཏི ཡདི སཱདྷུཀཾ;

ཏཾ ཝེ པཱལེནྟི དེཝཱཔི, ཏོསཡནྟི ཨུཔཱཡནཱཏི.

ཏཏོ ¶ ཏསྶཱ པན སཱམིཀོ ནགརཱ ནིཀྑམྨ གཙྪནྟོ ཨཏྟནོ བྷརིཡཾ དིསྭཱ ཏྭཾ ཀདཱ ཨཱགཏཱ, ཀེནཱནཱིཏཱསཱིཏི པུཙྪི. སཱ དེཝཏཱཡ ཨཱནཱིཏབྷཱཝཾ ཨཛཱནནྟཱི ཀིཾ ཏྭཾ བྷཎསི, ནནུ ཏཡཱ ཨཱནཱིཏཱམྷཱིཏི, སོཔི ཀིཾབྷོཏི བྷཎསི, ཏཝ བྷཱཏུགཱམེ དིཊྛཀཱལཏོ པྤཏུཏི ཨཛྫ ཙཏྟཱརོ མཱསཱ ཛཱཏཱ, ཨེཏྟཀཾ ཀཱལཾ ཏྭཾ ན དིཊྛཔུབྦཱ, ཀཐཾ ཏྭཾ མཡཱ སདྡྷིཾཨཱགཏཱཏི པུཙྪི. སཱ ཏཾ སུཏྭཱ ཏེནཧི མཱཉྙསྶ ཨིམཾ རཧསྶཾ ཀཐེཧི སཱམཱིཏི ཝཏྭཱ བྷཱ ཏ རཱ ཨཏྟནོ ཀཏཾ སབྦཾ ཝིཏྠཱརེན ཀཐེསི. ཏཾ སུཏྭཱ ཏསྶ སཱམིཀོ སཾཝིགྒོ བྷཡཔྤཏྟོ ཧུཏྭཱ ཏཾ ཨཏྟནོ གེཧཾ པཱཔེསི, ཏཏོ ཀཏིཔཱཧཾ ཏཱཡ ཝིསྶམིཏེ ཏེ ཨུབྷོཔི སཏྠཱརཾ ནིམནྟེཏྭཱ མཧཱདཱནཾ དཏྭཱ ཝནྡིཏྭཱ ཨེཀམནྟེ ནིསཱིདིཾསུ, ཨཐ སཱ བྷགཝཏོ སརཎསཱིལཱནུབྷཱཝེན ཨཏྟནོ ཛཱིཝིཏཔཊིལཱབྷཾ པཀཱསེཏྭཱ ཨཏྟནོ པུཏྟཾ བྷགཝནྟཾ ཝནྡཱཔེཏྭཱ སརཎོཏིནཱམམཀཾསུ, སཏྠཱ ཏེ སཾ ཨཛ྄ཛྷཱསཡཾ ཉཏྭཱ ཏདནུརཱུཔཾ དྷམྨཾ དེསེསི, དེསནཱཝསཱནེ ཨུབྷོཔི སོཏཱཔནྣཱ ཨཧེསུཾ, ཨཐསྶཱ པུཏྟོ སརཎཀུམཱརོ ཝཱིསཏིམེ ཝསྶེ བུདྡྷསཱསནེ པབྦཛིཏྭཱ ཝིཔསྶནཾ ཝཌྜྷེཏྭཱ ཨརཧཏྟཾ པཏྟོ སརཎཏྠེརོནཱམ པཉྙཱཡཱིཏི.

༡༥.

ཁཎམཔི མནསེཝཾ དེཝདེཝཾ སརནྟཱ,

པརམཏརཔཏིཊྛཾ པཱཔུཎནྟཱིཏི མནྟྭཱ;

བྷཝགཏི གུཎརཱསིཾ ཛཱནམཱནཱ ཛནཱ བྷོ;

བྷཛཐ སརཎསཱིལཾ སབྦཐཱ སབྦཀཱལནྟི.

སརཎཏྠེརསྶ ཝཏྠུཾ ཚཊྛམཾ.

༧. ཝེསྶཱམིཏྟཱཡ ཝཏྠུམྷི ཨཡམཱནུཔུབྦཱིཀཐཱ

ཛམྦུདཱིཔེ ¶ ཀིར ཀོསམྦིནགརེ ཀོསམྦིརཉྙོ ཝེསྶཱམིཏྟཱནཱམ ཨགྒམཧེསཱི ཨཧོསི. ཏདཱ བྷགཝཱ ཀོསམྦིཡཾ པཊིཝསཏི མཧཏཱ བྷིཀྑུསངྒྷེན སདྡྷིཾ ཙཱརིཀཾ ཙརམཱནོ. ཏསྨིཾ སམཡེ སཱ རཉྙཱ སདྡྷིཾ ཝིཧཱརཾ གནྟྭཱ ཨནོཔམཱཡ བུདྡྷལཱིལཱ༹ཡ མདྷུརེན སརེན དེསེནྟསྶ བྷགཝཏོ དྷམྨཾ སུཏྭཱ པསནྣཱ སརཎེསུ པཏིཊྛཱཡ བུདྡྷམཱམིཀཱ ཧུཏྭཱ ཝིཧརཏི. ཨཐཱ པརབྷཱགེ ཏསྶ རཉྙོ རཛྫཏྠཱཡ པཙྩནྟརཱཛཱ ཡུདྡྷསཛྫོ རཛྫཾ ཝཱ དེཏུ, ཡུདྡྷཾཝཱཏི པཎྞཾ པཧིཎི. ཏཾ སུཏྭཱ རཱཛཱ མཧཏིཡཱ སེནཱཡ པརིཝུཏོ ཡུདྡྷབྷཱུམིཾ གཙྪནྟོ མཧེསིཡཱ སདྡྷིཾ གནྟྭཱ ཁནྡྷཱཝཱརཾ ནིཝཱསེཏྭཱ ཏསྶཱ ཨེཝམཱཧ. བྷདྡེ སངྒཱམསཱིསེ ཛཡཔརཱཛཡོ ནཱམ ན སཀྐཱ ཝིཉྙཱཏུཾ. སཙེ མེ པརཱཛཡོ ཨབྷཝིསྶ, པུརེཏརམེཝ རཏྟཔཏཱཀཾ ཨུསྶཱཔེསྶཱམི, ཏེན ཨབྷིཉྙཱཎེན ཏྭཾ ཀོསམྦིམེཝ གཙྪཱཧཱིཏི ཨནུསཱསིཏྭཱ སངྒཱམ མཎྜལཾ གནྟྭཱ མཧཱརཎཾ ཀརོནྟོ ཨཏྟནོ པརཱཛཡབྷཱཝཾ ཉཏྭཱ མཱཏུགཱམཾ སརིཏྭཱ རཏྟདྡྷཛཾ ཨུསྶཱཔེཏྭཱ ཡུཛ྄ཛྷནྟོ རཎེ པཏི. ཨཐ སཱ རཏྟཔཏཱཀཾ དིསྭཱ པརཱཛིཏོ ནཱུན མེ སཱམིཀོཏི བྷཡེན པལཱཡིཏུམཱརབྷི. ཨཐ ཏཾ ཙོརརཉྙོ མནུསྶཱ དིསྭཱ ནཱུནཱཡཾ རཉྙོ ཨགྒམཧེསཱིཏི ཉཏྭཱ ཨཏྟནོ རཱཛཱནཾ དསྶེསུཾ, རཱཛཱ ཏཾ དིསྭཱ པཊིབདྡྷཙིཏྟོ མམེཏཾ ཨབྷིསེཀཾ ཀརོཐཱཏི ཨམཙྩེ ཨཱཎཱཔེསི. ཨམཙྩཱ ཏཾ ཨབྷིསེཀཏྠཱཡ ཡཱཙིཾསུ, སཱ ན མེ བྷཎེ ཨབྷིསེཀེནཏྠོཏི ན ཨིཙྪི. ཨམཙྩཱ ཏམཏྠཾ རཉྙོ ཨཱརོཙེསུཾ. རཱཛཱ ནཾ པཀྐོསཱཔེཏྭཱ ཀསྨཱ ན ཨིཙྪསཱིཏི པུཙྪི. སཱ ཨེཝམཱཧ.

༡.

སུཎོཧི སཱདྷུཀཾ དེཝ, བྷཱསམཱནཱཡ མེ ཝཙོ;

བྷཏྟཱ མཡ྄ཧཾ མཏོ ཨཛྫ, སབྦསམྤཏྟིདཱཡཀོ.

༢.

ཀཏྭཱན ¶ སོབྷིསེཀཾ མཾ, ཨཏྟནོ ཧདཡཾ ཝིཡ;

པཱལེཏི ཏཾ སརནྟསྶཱ, སོཀགྒི དཧཏེ མནཾ.

༣.

མཧཱརཱཛ སཙཉྙསྶ, ཨསྶ མགྒམཧེསིཀཱ;

ཏམྷཱ དུཀྑཱ ན མུཙྩཱམི, ཏེནཱཧཾ ཏཾ ན པཏྠཡེ.

༤.

སོཀགྒིནཱ པདིཏྟཱཧཾ, སོཀེ སོཀཾ ཀཐཾ ཁིཔེ;

ཛལནྟགྒིམྷཱི ཀོ ནཱམ, པལཱལཾ པཀྑིཔེ བུདྷོ.

༥.

པིཡཝིཔྤཡོགདུཀྑཾ, ཏཾ ཙིནྟཡནྟཱི པུནཔྤུནཾ;

ཏམྷཱ དུཀྑཱ ན མུཙྩཱམི, ཏསྨཱཧཾ ཏཾ ན པཏྠཡེཏི.

ཏཾ སུཏྭཱ རཱཛཱ ཀོདྷེནཱབྷིབྷཱུཏོ སཙེ ནཱབྷིསིཉྩིསྶསི, ཨགྒིམྷི ཏཾ པཀྑིཔིསྶཱམཱིཏི ཝཏྭཱ མཧནྟཾ དཱརུཙིཏཀཾ ཀཱརཱཔེཏྭཱ ཨགྒིཾ དཏྭཱ ཨེཀཔཛྫོཏེ ཛཱཏེ ཨེཏྟ པཝིསཱཏི ཨཱཧ. ཨཐ སཱ ཡཱཙནྟཱི རཱཛཱནཾ ཨཱཧ.

༦.

པཱཔོ ནིཔྤཱཔིནཾ རཱཛ, པཱཏནཾ ཁལུ པཱཝཀེ;

ཧོཏི པཱཔཕལཾ ཏསྶ, པཙྩཏྟེཙ པརཏྠཙ.

༧.

པུརཱཏནེཧི བྷཱུཔཱལ, སམཎབྲཧྨཎེསུཙ;

མཱཏཱཔིཏུསུ བཱལེསུ, རོགེནཱ ཏུརཨིཏྠིསུ;

ནཔྤསཏྠོ ཝདྷོ དེཝ, ཏསྨཱཧཾ ན ཝདྷཱརཧཱཏི.

ཏཾ སུཏྭཱཔི རཱཛཱ ཨསདྡཧནྟོ མནུསྶེ ཨཱཎཱཔེསི. ཨེཏཱཡ ཧཏྠཔཱདེ གཧེཏྭཱ ཨགྒིམྷི པཀྑིཔཐཱཏི ཏེ ཏཐཱ ཀརིཾསུ, ཨཐ སཱ ཨགྒིམྷི པཀྑིཔམཱནཱ ནཏྠེཏྠ མེ ཀོཙི པཊིསརཎོཏི སརཎམེཝ སརཎཾ ཀརོམཱིཏི ཙིནྟེཏྭཱ ‘‘བུདྡྷཾ སརཎཾ གཙྪཱམི, དྷམྨཾ སརཎཾ གཙྪཱམི, སངྒྷཾ སརཎཾ གཙྪཱམཱིཏི’’ ཝདནྟཱི མནསཱཙ ཨནུསྶརནྟཱི ཨགྒིམྷི པཏི, ཏཐཱཝིདྷོཔི ཨགྒི ཏསྶཱ སརཱིརེ ལོམཀཱུཔམཏྟམྤི ཨུཎྷཱཀཱརཾ ཀཱཏུཾ ནཱསཀྑི. པདུམགབྦྷཾ པཝིཊྛཱ ཝིཡ སཱིཏིབྷཱུཏསརཱིརཱ ཨཧོསི. རཱཛཱ ཏཾ ཨཙྪརིཡཾ ¶ དིསྭཱ སཾཝིགྒོ ལོམཧཊྛཛཱཏོ ཝེགེན ཏཾ ཨུཔསངྐམིཏྭཱ ཨུབྷོཧི ཧཏྠེཧི པགྒཡ྄ཧ ཨུརེ ནིཔཛྫཱཔེཏྭཱ རཱཛཱསནེ ནིསཱིདཱཔེཏྭཱ ཨཉྫལིཾ གགྒཡ྄ཧ ཋིཏོ ཀསྨཱ ཏེ ཏཾ ཨགྒི སརཱིརཾ མཱ པརིདཧཱིཏི པུཙྪི. སཱ ཏཾ ཀཱརཎཾ ཀཐེནྟཱི ཨེཝ མཱཧ.

༨.

མཱཏཱ པིཏཱཙ ཉཱཏཱིཙ, པརིཝཱརཱཙ སོཧདཱ;

མནྟོ སདྷཱདཡོཙཱཔི, མཧེསཀྑཱཙ དེཝཏཱ.

༩.

ཨེཏེཙ ཉྙེཙ བྷཱུཔཱལ, སཏྟཱནཾ བྷཡ མཱགཏེ;

རཀྑིཏུཾ ནེཝ སཀྐོནྟི, ཧིཏྭཱན སརཎཏྟཡཾ.

༡༠.

ཨགཱཧཾ བུདྡྷཾ སརཎཾ, བུདྡྷོ མེ སརཎཾ ཨིཏི;

ཏེན ཏེཛེན མཾ རཱཛ, ཛལནྟོ ཨགྒི ནོ དཧི.

༡༡.

ཨགཱཧཾ དྷམྨཾ སརཎཾ, དྷམྨོ མེ སརཎཾ ཨིཏི;

ཏེན ཏེཛེན མཾ རཱཛ, ཛལནྟོ ཨགྒི ནོ དཧི.

༡༢.

ཨགཱཧཾ སངྒྷཾ སརཎཾ, སངྒྷོ མེ སརཎཾ ཨིཏི;

ཏེན ཏེཛེན མཾ རཱཛ, ཛལནྟོ ཨགྒི ནོ དཧི.

༡༣.

ཨེཝཾ མཧཱནུབྷཱཝནྟཾ, པཙྩཀྑཾ ཨེཧིཔསྶིཀཾ;

ནཱནོ པདྡཝ ཝིདྡྷཾསིཾ, ནཱནཱསམྤཏྟིདཱཡཀཾ.

༡༤.

སརཎཏྟཡཉྷི ཡོ སཏྟོ, ན སམཱདཱཡ གཎྷཏི;

ཨིདྷཝཱ པརཏྠཝཱ ལོཀེ, སོ སུཁཾ ནཱནུབྷོསྶཏི.

༡༥.

སརཎཏྟཡཉྷི ཡོ སཏྟོ, སུསམཱདཱཡ གཎྷཏི;

ཨིདྷཝཱཔརཏྠཝཱ ལོཀེ, སོ སུཁཱ ན ཝིཧཱཡཏི.

༡༦.

ཏསྨཱ ཏུཝམྤི བྷཱུཔཱལ, གཎྷཱཧི སརཎཏྟཡཾ;

ཏཾ ཏེ བྷཝཏི སབྦཏྠ, ཏཱཎཾ ལེཎཾ པརཱཡཎནྟི.

ཏཾ སུཏྭཱ རཱཛཱ ཨཏིཝིཡ པསནྣམཱནསོ ཏཾ ཁམཱཔེཏྭཱ མཧནྟཾ སཀྐཱརསམྨཱནཾ ཀཏྭཱ ཨཛྫཔྤཊྛཱཡ ཏྭཾ མམ མཱཏཱཏི ཏཾ མཱཏུཊྛཱནེ ཋཔེཏྭཱ སརཎ མགམཱསི. ཏསྨིཾ སནྣིཔཏིཏྭཱ ཋིཏམཧཱཛནཱ ཏཾ པཱཊིཧཱརིཡཾ དིསྭཱ སརཎེསུཙ སཱིལེསུཙ པཏིཊྛཱཡ དཱནཱདཱིནི པུཉྙཀམྨཱནི ཀཏྭཱ ཡཐཱཀམྨཾ གཏཱཏི.

༡༧.

ཨིཏི ¶ སརཎཝརཾ སཱ ཀེཝལཾ ཨུགྒཧེཏྭཱ,

ཛལིཏདཧནམཛ྄ཛྷེ སཱིཏིབྷཱཝཾ ཨལཏྠ;

པརམསརཎསཱིལཾ པཱལཡནྟཱ ཀཐཾ ཝོ,

ན ལབྷཐ བྷཝབྷོགཾ ནིབྦུཏིཉྩཱཔི ཨནྟེཏི.

ཝེསྶཱམིཏྟཱཔ ཝཏྠུཾ སཏྟམཾ.

༨. མཧཱམནྡྷཱཏུཝཏྠུམྷི ཨཡམཱནུཔུབྦཱིཀཐཱ

ཨིཏོ ཀིར ཨེཀནཝུཏིཀཔྤམཏྠཀེ ཝིཔསྶཱིནཱམ སམྨཱསམྦུདྡྷོ ལོཀེ ཨུཔྤཛྫིཏྭཱ པཝཏྟཝརདྷམྨཙཀྐོ སདེཝཀེཧི ལོཀེཧི པཱུཛིཡམཱནོ བནྡྷུམཏཱིནགརེ པཊིཝསཏི. ཏདཱ སོ མནྡྷཱཏཱ ཏསྨིཾ ནགརེ ཏུནྣཀཱརོ ཧུཏྭཱ ནིབྦཏྟི. ཏུནྣཀཱརཀམྨེན ཛཱིཝིཀཾ ཀཔྤེནྟོ ཝིཧརཏི. ཏདཱ སཀལནགརཝཱསིནོ བུདྡྷཔམུཁཾ བྷིཀྑུསངྒྷཾ ནིམནྟེཏྭཱ མཧཱདཱན མདཾསུ. ཨཐ སོ ཨེཝཾ ཙིནྟེསི, སབྦེཔིམེ ནགརཝཱསིནོ དཱནཾ དདནྟི. ཨཧམེཀོཝ སེསོ དུགྒཏཏྟཱ, ཡཛྫཱཧམཛྫ བཱིཛཾ ན རོཔེམི, ཨིམམྷཱ དུཀྑཱ ན པརིམུཙྩིསྶཱམཱིཏི. སོ ཝེགེན ཏུནྣཀཱརཀམྨཾ པརིཡེསིཏྭཱ ཀིཉྩིམཱུལཾ ལབྷིཏྭཱ ཏེན ཨེཀསྶཱཔི དཱནཾ དཱཏུཾ ཨོཀཱས མལདྡྷཱ ཨཱཔཎཾ གནྟྭཱ རཱཛམཱསཀེ གཧེཏྭཱ ཙངྐོཊཀཾ པཱུརེཏྭཱ ཨཱདཱཡ བུདྡྷཔམུཁསྶ བྷིཀྑུསངྒྷསྶ བྷཏྟགྒཾ གནྟྭཱ ཋིཏོ ཨེཝཾ ཙིནྟེསི, ནཏྠི དཱནི ཨོཀཱསཾ ཨེཀསྶཱཔི བྷིཀྑུནོ པཏྟེ ཨོཀིརིཏུཾ, ཨདྡྷཱཧཾ ཨིམེ ཨཱཀཱསེ ཝིཀིརིསྶཱམཱིཏི ཨཔྤེཝནཱམ པཏམཱནཱནཾ ཨེཀསྶཱཔི བྷིཀྑུནོ པཏྟེ ཨེཀམྤི པཏེཡྻ, ཏཾ མེ བྷཝིསྶཏི དཱིགྷརཏྟཾ ཧིབྷཱཡ སུཁཱཡཱཏི པསནྣམཱནསོ ཨུདྡྷཾ ཁིཔི, ཏ ཏོ པཏམཱནཱ ཏེ པརིཝཱརིཀདེཝཏཱནཉྩ བྷགཝཏོ ཨཱནུབྷཱཝེནཙ བཧི ཨཔཏིཏྭཱ བྷགཝནྟམཱདིཾ ཀཏྭཱ སབྦེསཾ བྷིཀྑཱུནཾ ¶ པཏྟེཡེཝ པཏིཾསུ. ཨཐ སོ ཏཾ ཨཙྪརིཡཾ དིསྭཱ པསནྣམཱནསོ སིརསི ཨཉྫལིཾ པགྒཡ྄ཧ ཋིཏོ ཨེཝཾ པཏྠནམཀཱསི.

༡.

ཨིམིནཱ མེ ཨདྷིཀཱརེན, པསཱདེན ཡཏིསྶརེ;

ཀཱམབྷོགཱིནཧཾ ཨགྒོ, བྷཝེཡྻཾ ཛཱཏིཛཱཏིཡཾ.

༢.

པཧརིཏྭཱ ཡདཱ པཱཎིཾ, ཨོལོཀེམི ནབྷོཏལཾ;

སཏྟརཏནསམྤནྣཾ, ཝསྶཾ ཝསྶཏུ སབྦདཱཏི.

སོ ཏཏོ པཊྛཱཡ དེཝམནུསྶེསུ སཾསརནྟོ མཧནྟཾ དིབྦསམྤཏྟིཾ ཨནུབྷཝིཏྭཱ ཨིམསྨིཾ བྷདྡཀཔྤེ ཨཱདིམྷི མཧཱསམྨཏོ ནཱམ རཱཛཱ ཨཧོསི. ཏསྶ པུཏྟོ རོཛོ ནཱམ. ཏསྶ པུཏྟོ ཝརརོཛོ ནཱམ, ཏསྶ པུཏྟོ ཀལྱཱཎོ ནཱམ, ཏསྶ པུཏྟོ ཝརཀལྱཱཎོ ནཱམ. ཝརཀལྱཱཎསྶ པུཏྟོ ཨུཔོསཐོ ནཱམ. ཨུཔོསཐསྶ པུཏྟོ མནྡྷཱཏཱ ནཱམ ཧུཏྭཱ ནིབྦཏྟི. སོ སཏྟཧི རཏནེཧི ཙཏཱུཧི ཙ ཨིདྡྷཱིཧི སམནྣཱགཏོ ཙཀྐཝཏྟིརཛྫཾ ཀཱརེསི, ཏསྶ ཝཱམཧཏྠཾ སམྨིཉྫིཏྭཱ དཀྑིཎཧཏྠེན ཨཔྤོཊྛིཏེ ཨཱཀཱསཏོ དིབྦམེགྷཱ ཝིཡ ཛཎྞུཔྤམཱཎཾ སཏྟརཏནཝསྶཾ ཝསྶཏི. ཨེཝརཱུཔོ ཨཙྪརིཡོ ཨཧོསི. སོ ཙཏུརཱསཱིཏིཝསྶསཧསྶཱནི ཀུམཱརཀཱིལ༹ཾ ཀཱིལི༹. ཙཏུརཱསཱིཏིཝསྶསཧསྶཱནི ཨོཔརཛྫཾ ཀཱརེསི. ཙཏུརཱསཱིཏིཝསྶསཧསྶཱནི ཙཀྐཝཏྟིརཛྫཾ ཀཱརེསི, ཨཱཡུ པནསྶ ཨསངྑྱེཡྻཾ ཨཧོསི. སོ ཨེཀདིཝསཾ ཀཱམཏཎྷཾ པཱུརེཏུཾ ཨསཀྐོནྟོ ཨུཀྐཎྛིཏཱཀཱརཾ དསྶེསི, ཨམཙྩཱ དེཝ ཀིནྣཁོ ཨུཀྐཎྛཱ སཱིཏི པུཙྪིཾསུ. སོ བྷཎེ མཡ྄ཧཾ པུཉྙཀམྨེ ཨོལོཀིཡམཱནེ ཨིམཾ རཛྫཾ ནཔྤཧོཏི, ཀཏརནྣུ ཁོ ཋཱནཾ རམཎཱིཡནྟི. དེཝལོཀོ མཧཱརཱཛཱཏི. སོ ཙཀྐརཏནཾ ཨབྦྷུཀྐིརིཏྭཱ པརིསཱཡ སདྡྷིཾ ཙཱཏུམཧཱརཱཛིཀདེཝལོཀཾ ཨགམཱསི, ཨཐསྶ ཙཏྟཱརོ མཧཱརཱཛཱནོ དིབྦམཱལགནྡྷ- ཧཏྠཱ ¶ དེཝགཎཔརིཝུཏཱ པཙྩུགྒམནཾ ཀཏྭཱ ཏཾ ཨཱདཱཡ ཙཱཏུམཧཱརཱཛིཀདེཝལོཀཾ གནྟྭཱ རཛྫཾ ཨདཾསུ, ཏསྶ པརིསཱཡ པརིཝུཏསྶ ཏསྨིཾ རཛྫཾ ཀརོནྟསྶ དཱིགྷོ ཨདྡྷཱ ཝཱིཏིཝཏྟོ. སོ ཏཏྠཔི ཏཎྷཾ པཱུརེཏུ མསཀྐོནྟོ ཨུཀྐཎྛིཏཱ ཀཱརཾ དསྶེསི. ཏཏོ ཙཏྟཱརོ མཧཱརཱཛཱནོ ཀིནྣུཁོ མཧཱརཱཛ ཨུཀྐཎྛིཏོཏི པུཙྪིཾསུ. ཨིམམྷཱ དེཝལོཀཱ ཀཏརནྣུ ཁོ ཋཱནཾ རམཎཱིཡནྟི, དེཝ པརེསཾ ཨུཔཊྛཱཀམནུསྶསདིསཱ མཡཾ. ཏཱཝཏིཾསདེཝལོཀོ ཨིཏོ སཏགུཎེན རམཎཱིཡོཏི. མནྡྷཱཏཱ ཙཀྐརཏནཾ ཨབྦྷུཀྐིརིཏྭཱ ཨཏྟནོ པརིསཔརིཝུཏོ ཏཱཝཏིཾསཱབྷིམུཁོ པཱཡཱསི, ཨཐསྶ སཀྐོ དེཝརཱཛཱ དིབྦམཱལགནྡྷཧཏྠོ དེཝགཎཔརིཝུཏོ པཙྩུགྒམནཾ ཀཏྭཱ ཏཾ ཧཏྠེ གཧེཏྭཱ ཨིཏོ ཨེཧི མཧཱརཱཛཱཏི ཨཱཧ. ཏཏོ རཉྙོ དེཝགཎཔརིཝུཏསྶ གམནཀཱལེ པརིཎཱཡཀརཏནཾ ཙཀྐརཏནཾ ཨཱདཱཡ སདྡྷིཾཔརིསཱཡ མནུསྶཔཐཾ ཨོཏརིཏྭཱ ཨཏྟནོ གྷརཾ པཱཝིསི. སཀྐོ མནྡྷཱཏུཾ སཀྐབྷཝནཾ ནེཏྭཱ དེཝཏཱ དྭེ ཀོཊྛཱསེ ཀཏྭཱ ཨཏྟནོ རཛྫཾ མཛ྄ཛྷེ བྷིནྡིཏྭཱ ཨདཱསི. ཏཏོ པཊྛཱཡ དྭེཔི རཱཛནོ རཛྫཾ ཀཱརེསུཾ. ཨེཝཾ ཀཱལེ གཙྪནྟེ སཀྐོ སཊྛིསཏསཧསྶཱདྷིཀཱནི ཏིསྶོཙ ཝསྶཀོཊིཡོ ཨཱཡུཾ ཁེཔེཏྭཱ ཙཝི. ཨཉྙོ སཀྐོ ནིབྦཏྟི, སོཔི ཏཐེཝ དེཝརཛྫཾ ཀཱརེཏྭཱ ཨཱཡུཀྑཡེན ཙཝི, ཨེཏེནུ པཱཡེན ཚཏྟིཾས སཀྐཱ ཙཝིཾསུ, མནྡྷཱཏཱ པན མནུསྶཔརིཧཱརེན དེཝརཛྫཾ ཀཱརེསིཡེཝ, ཏསྶེཝཾ ཀཱལེ གཙྪནྟེ བྷཱིཡྻོསོ མཏྟཱཡ ཀཱམཏཎྷཱ ཨུཔྤཛྫི, སོ ཀིམྨེ ཨུཔཌྜྷརཛྫེན. སཀྐཾ མཱརེཏྭཱ ཨེཀརཛྫཾ ཀརིསྶཱམཱིཏི ཙིནྟེསི. སཀྐཾ པན མཱརེཏུཾ ན སཀྐཱ, ཀཱམཏཎྷཱ པནེསཱ ཝིཔཏྟིམཱུལཱ. ཏཐཱཧི.

༣.

ཝརམཏྲ སུཁནྟྱཏྲ, ཨཏྲིཙྪཱཝིཧཏོ ནརོ;

ཨིདྷཝཱ པརཏྠཝཱ ཀིཉྩི, ན སཱཏཾ ཝིནྡཏེ སདཱ.

༤.

ཏཎྷཱཡ ¶ ཛཱཡཏེ སོཀོ,

ཏཎྷཱཡ ཛཱཡཏེ བྷཡཾ;

ཏཎྷཱཡ ཝིཔྤམུཏྟསྶ,

ནཏྠི སོཀོ ཀུཏོ བྷཡཾ.

༥.

ཏཎྷཱདཱསོ ནརོ ཨེཏྠ, རཱཛཙོརཱདིསམྦྷཝཾ;

ཧཏྟཙྪེདཱདིཀཾ དུཀྑཾ, པཱཔུཎཱཏི ཝིཧཉྙཏི.

༦.

ཡེན ལོབྷེན ཛཱཏེན, སདཱ ཛཱིཡནྟི པཱཎིནོ;

ཁེཏྟཾ ཝཏྠུཾ ཧིརཉྙཾཙ, གཝཱསྶཾ དཱསཔོརིསཾ;

སབྦཏྠཱམེན སོ ལོབྷོ, པཧཱཏབྦོཝ ཝིཉྙུནཱཏི.

ཏཏོ ཨཏྲིཙྪཱཝིཧཏསྶ ཏསྶ ཨཱཡུསངྑཱརོ པརིཧཱཡི, ཛརཱ སརཱིརཾ པཧརི, མནུསྶསརཱིརཉྷི ནཱམ ན དེཝལོཀེབྷིཛྫཏི, ཏཐ སོ དེཝལོཀཱ བྷསྶིཏྭཱ བནྡྷུམཏཱིནགརུཡྻཱནཾ པཱཝིསི, ཨུཡྻཱནཔཱལོ ཏསྶ ཨཱགཏབྷཱཝཾ རཱཛཀུལཾ ནིཝེདེསི. རཱཛཱ རཱཛཀུལཱ ཨཱགནྟྭཱ ཨུཡྻཱནེཡེཝ ཨཱསནཾ པཉྙཱཔེསི. ཏཏོ མནྡྷཱཏཱ ཨུཡྻཱནེ པཉྙཏྟཝརཱསནེ ནིཔནྣོ ཨནུཊྛཱནསེཡྻཾ ཀཔྤེསི. ཏཏོ ཨམཙྩཱ དེཝ ཏུམྷཱཀཾ པརཏོ ཀིནྣུ ཀཐེསཱམཱཏི པུཙྪིཾསུ, མམ པརཏོ ཏུམྷེ ཨིམཾ སཱསནཾ མཧཱཛནསྶ ཀཐེཡྻཱཐ, མནྡྷཱཏུམཧཱརཱཛཱ དྭིསཧསྶདཱིཔཔརིཝཱརེསུ ཙཏཱུསུ མཧཱདཱིཔེསུ ཙཀྐཝཏྟིརཛྫཾ ཀཱརེཏྭཱ ཙཱཏུམཧཱརཱཛིཀེསུ རཛྫཾ ཀཱརེཏྭཱ ཚཏྟིཾསསཀྐཱནཾ ཨཱཡུཔརིམཱཎེན དེཝལོཀེ རཛྫཾ ཀཱརེཏྭཱ ཀཱལམཀཱསཱིཏི. སོ ཨེཝཾ ཝཏྭཱ ཀཱལཾཀཏྭཱ ཡཐཱཀམྨཾ གཏོཏི ཨིམམཏྠཾ པཀཱསེཏུཾ བྷགཝཱ ཙཏུམཧཱཔརིསམཛ྄ཛྷེ ཨིམཱ གཱཐཱཡོ ཨཱཧ.

༧.

ཡཱཝཏཱ ཙནྡིམསུརིཡཱ, པརིཧརནྟི དིསཱ བྷནྟི ཝིརོཙནཱ;

སབྦེཝ དཱསཱ མནྡྷཱཏཱ, ཡེ པཱཎཱ པཐཝིནིསྶིཏཱ.

༨.

ན ¶ ཀཧཱཔཎཝསྶེན, ཏིཏྟི ཀཱམེསུ ཝིཛྫཏི;

ཨཔྤསྶདཱ དུཁཱ ཀཱམཱ, ཨིཏི ཝིཉྙཱཡ པཎྜིཏོ.

༩.

ཨཔི དིབྦེསུ ཀཱམེསུ, རཏིཾསོ ནཱདྷིགཙྪཏི;

ཏཎྷཱཀྑཡརཏོ ཧོཏི, སམྨཱསམྦུདྡྷསཱཝཀོཏི.

ཏཾ སུཏྭཱ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

༡༠.

ཨིཏི གཏིནིཡཏཱནཾ བོདྷིཡཱ ཨུཏྟམཱནཾ;

སཀཝསམུཔནེཏྭཱ དེཏི དུཀྑཱཏིཏཎྷཱ;

ཨནིཡཏགཏིཀཱནཾ ཀཱ ཀཐཱ མཱདིསཱནཾ;

ཛཧཐ ཏམིཏི མནྟྭཱ བྷོ བྷཛཝ྄ཧོ ཏིཝཏྠུཾཏི.

མཧཱམནྡྷཱཏུཝཏྠུཾ ཨཊྛམཾ.

༩. བུདྡྷཝམྨཝཱཎིཛཀཝཏྠུམྷི ཨཡམཱནུཔུབྦཱིཀཐཱ

ཛམྦུདཱིཔེ ཀིར པཱཊལིཔུཏྟནགརེ བུདྡྷཝམྨོ ནཱམ ཝཱཎིཛཀོ ཨཧོསི ཝཱཎིཛཀཀམྨེན ཛཱིཝམཱནོ. སོ ཨཔརབྷཱགེ སཏྠཝཱཧེཧི སདྡྷིཾ གཱམནིགམཛནཔད རཱཛདྷཱནཱིསུ ཝཱཎིཛྫཾ པཡོཛཡམཱནོ ཝིཙརཏི, ཏསྨིཾ སམཡེ བྷགཝཱནེཀབྷིཀྑུསཧསྶཔརིཝུཏོ ཛནཔདཙཱརིཀཾ ཙརཏི བཧཱུ དེཝམནུསྶེ སཾསཱརཀནྟཱརཱ ཨུཏྟཱརེནྟོ. ཏདཱ སོ བྷགཝནྟཾ ཨདྡས དྭཏྟིཾསལཀྑཎཱནུབྱཉྫནཔཏིམཎྜིཏཾ ཛལམཱནསུཝཎྞམེརུཾ ཝིཡཝིརོཙམཱནཾ མཧཱབྷིཀྑུསངྒྷཔརིཝུཏཾ, དིསྭཱ པརམཔཱིཏིཡཱ ཕུཊསརཱིརོ ཨཉྫལིཾ པགྒཡ྄ཧ བྷགཝནྟཾ ཨུཔསངྐམིཏྭཱ ཝནྡིཏྭཱ སཱཡཎྷེ བྷགཝནྟཾ བྷཏྟེན ནིམནྟེསི བུདྡྷསཱསནེ ཨཔརིཙིཏབྷཱཝེན. ཨཐསྶ བྷགཝཱ ཝིཀཱལབྷོཛནཱ པཊིཝིརཏཱ ཏཐཱགཏཱཏི ཨཱཧ. ཨཐ སོ བྷགཝནྟཾ ཝནྡིཏྭཱ ཀིཾ བྷནྟེ བྷགཝནྟཱ ཝིཀཱལེ བྷུཉྫིསྶནྟཱིཏི, ཨཐསྶ ཀཐཾ པཊིཙྩ བྷགཝཱ ¶ ཨཊྛཝིདྷཾ པཱནཾ ཏཐཱགཏཱནཾ ཝིཀཱལེ བྷུཉྫིཏུཾ ཀཔྤཏི. སེཡྻཐིདཾ, ཨམྦཔཱནཾ ཛམྦུཔཱནཾ ཙོཙཔཱནཾ མོཙཔཱནཾ ཕཱརུསཀཔཱནཾ མདྷུཔཱནཾ མུདྡིཀཔཱནཾ སཱལཱུཀཔཱནནྟི. ཏཾ སུཏྭཱ ཝཱཎིཛོ སཧསཀྐཱརཱརསེཧི མུདྡིཀཔཱནཾ ཀཏྭཱ བུདྡྷཔམུཁསྶ བྷིཀྑུསངྒྷསྶ ཨདཱསི, སབྷིཀྑུསངྒྷོ སཏྠཱ པརིབྷུཏྟཔཱནཱིཡརསོ ཏསྶ དྷམྨཾ དེསེཏྭཱ ཛནཔདཙཱརིཀཾ པཀྐཱམི. སོཔི པསནྣམཱནསོ ཧུཏྭཱ ནིཝཏྟོ སདྡྷིཾ ཝཱཎིཛཀེཧི ཏེསུ ཏེསུ ཛནཔདེསུ ཝཱཎིཛྫཾ པཡོཛེནྟོ མཧཱཝཏྟནཱིཡཾནཱམ ཀནྟཱརཾ པཱཔུཎི, ཏཏྟ ཏེསཾ སབྦེསུཡེཝ སཀཊེསུ པཱནཱིཡཾ པརིཀྑཡམགམཱསི. ཏཏྠ སབྦམནུསྶཱནཾཙ བལཱིཝདྡཱནཾཙ པཱནཱིཡཾ ནཱཧོསི. ཨཐ སོ ཝཱཎིཛོ པིཔཱསཱབྷིབྷཱུཏོ ཏེསུ ཏེསུ སཀཊེསུ པཱནཱིཡཾ པརིཡེསནྟོ ཝིཙརཏི. ཨཐེཀསྨིཾ སཀཊེ མནུསྶཱ ཏཾ དིསྭཱ ཀཱརུཉྙེན ཨེཏྠཱགཙྪ, ཨིམསྨིཾ ཀོལ༹མྦེ ཐོཀཾ པཱནཱིཡཾ ཨཏྠི པིཝཱཏི ཝདིཾསུ. ཏ ཏོ སོ གནྟྭཱ པཱནཱིཡཾ པིཝི. ཏསྶ ཏཾ རསཾ མུདྡིཀཔཱནརསསདིསཾ ཨཧོསི, པིཝནྟོཝ སོ ཨེཝཾ ཙིནྟེསི. སམྨཱསམྦུདྡྷསྶ ཏདཱ མེ དིནྣམུདྡིཀཔཱནསྶ ནིསྶནྡོ ཨཛྫ སམྤཏྟོ བྷཝིསྶཏཱིཏི ཨཙྪེརབྦྷུཏཙིཏྟོ སོམནསྶཛཱཏོ གནྟྭཱ སཡམེཝ ཙཱཊིཡཱ པིདྷཱནཾ ཝིཝརི. སཀལཱཔི སཱ ཙཱཊི མུདྡིཀཔཱནེན པརིཔུཎྞཱ ཨཧོསི. ཏཏོ སོ ར སཝ ནྟཾ ཨོཛཝནྟཾ ཨཔརིཀྑཡཾ དིབྦཔཱནསདིསཾ པཱནཱིཡཾ དིསྭཱ པརམཱཡ པཱིཏིཡཱ ཕུཊསརཱིརོ ཨུགྒྷོསེསི སབྦེ པཱནཱིཡཾ པིཝནྟཱུཏི. ཏཾ སུཏྭཱ སབྦེ སནྣིཔཏིཏྭཱ པཱནཱིཡཾ དིསྭཱ ཨབྦྷུཏཙིཏྟཱ ཛཱཏཱ. ཝཱཎིཛོ ཏེསཾ མཛ྄ཛྷེ བུདྡྷཱནུབྷཱཝཾ པཀཱསེནྟོ ཨཱཧ.

༡.

པསྶཐེདཾ བྷཝནྟོ བྷོ, ཨཱནུབྷཱཝཾ མཧེསིནོ;

ཨཙིནྟནཱིཡམཙྪེརཾ, སནྡིཊྛིཀ མཀཱལིཀཾ.

༢.

པསནྣམནསཱ བུདྡྷེ, དིནྣཾ པཱནཱིཡཀཾ མཡཱ;

ཝིཔཙྩཏི ཨིདཱནེཝ, ཏཾ དཱནཾ མུནིཝཱཧསཱ.

༣.

ཨོཛཝནྟཾ ¶ སུཁནྣཾཝ, སཱིཏལཾ མདྷུརོ དཀཾ;

དིབྦཔཱནཾཝ དེཝཱནཾ, ཛཱཏམབྦྷུཏམཀྑཡཾ.

༤.

སཱིལཝནྟེསུ ཀོ ནཱམ, ན དདེཡྻ ཝིཙཀྑཎོ;

ཨིདྷ ལོཀེ པརཏྟེཙ, སུཁདཾ དཱན མུཏྟམཾ.

༥.

ཡཐི ཙྪིཏཾ གཧེཏྭཱན, པིཝནྟུ མདྷུརོ དཀཾ;

བྷཱཛནཱནིཙ པཱུརེཏྭཱ, ཡནྟུ སབྦེ ཡཐིཙྪིཏནྟི.

ཨེཝཉྩ པན ཝཏྭཱ སབྦེ མནུསྶེཙ བལཱིཝདྡེཙ མུདྡིཀརསེནེཝ སནྟཔྤེསི. ཏཏོ ཏཏོ ཨཱགཏཱཔི པཱནཱིཡཾ པིཝནྟོཙ པཱནཱིཡཾ ཨཀྑཡཾ ཨཧོསི. ཏཏོ ཝཱཎིཛོ སཏྠཝཱཧེཧི སདྡྷིཾ ཝཱཎིཛྫཾ པཡོཛེཏྭཱ སཀནགརཾ ཨཱགཙྪནྟོ བྷགཝནྟཾ པསྶིཏྭཱ གམིསྶཱམཱིཏི ཝེལུ༹ཝནཾ གནྟྭཱ སཏྠཱརཾ ཝནྡིཏྭཱ ཀཏཱནུཉྙོ ཨེཀམནྟེ ནིསཱིདི. སཏྠཱཔི ཏེན སདྡྷིཾ མདྷུརཔཊིསནྠཱརམཀཱསི. ཨུཔཱསཀོཔི བྷནྟེ ཏུམྷཱཀཾ པཱཊིཧཱརིཡཾ དིསྭཱ པསནྣོ ཝནྡིཏྭཱ གམིསྶཱམཱིཏི ཨཱགཏོམྷི, ཨེཝཉྩེ ཝཉྩ པཱཊིཧཱརིཡནྟི ཝིཏྠཱརེན ཀཐེསི. ཨཐསྶ བྷགཝཱ དྷམྨཾ དེསེསི. སོ དྷམྨཾ སུཏྭཱན སཏྠཱརཾ སྭཱཏནཱཡ ནིམནྟེཏྭཱ མཧཱདཱནཾ དཏྭཱ ཨཏྟནོ གེཧམེཝ ཨགམཱསི. སོ ཏཏོ པཊྛཱཡ དཱནཱདཱིནི པུཉྙཱནི ཀཏྭཱ ཏཏོ ཙུཏོ དེཝལོཀེ དྭཱདསཡོཛནིཀེ ཀནཀཝིམཱནེ དེཝཙྪརཱཔརིཝུཏོ དེཝིསྶརིཡསམནྣཱགཏོ ནིབྦཏྟི. ཏསྶ པུབྦཀམྨཔཀཱསནཏྠཾ ཏཏྠ ཏཏྠ རཏནབྷཱཛནེསུ དིབྦམཡེཧི མུདྡིཀཔཱནེཧི པརིཔུཎྞཾ ཨཧོསི. པཱནཱིཡཾ པིཝིཏྭཱ དེཝཱ ནཙྩནྟི ཝཱདེནྟི ཀཱིལ༹ནྟཱིཏི.

༦.

ན ཝིཔུལཛིནསཱརཾ ཛཱནམཱནོ ཛནེཝཾ,

ལབྷཏི ཝིཔུལབྷོགཾ ཏོཡམཏྟསྶ དཱནཱ;

ཝིདིཏགུཎགཎཱ བྷོ ཏཱིསུ ཝཏྠཱུསུ ཏུམྷེ,

ལབྷཐ ཁལུ ཝིསེསཾ སཱིལཝནྟེསུ དཱནཱཏི.

བུདྡྷཝམྨཝཱཎིཛཀསྶ ཝཏྠུཾ ནཝམཾ.

༡༠. རཱུཔདེཝིཡཱ ཝཏྠུམྷི ཨཡམཱནུཔུབྦཱིཀཐཱ

ཨཏཱིཏེ ¶ ཀིར ཝིཔསྶིསྶ བྷགཝཏོ ཀཱལེ ཏསྨིཾ ནགརེ ཨེཀཱ གཱམདཱརིཀཱ ཝིཧཱརེ ཨཱཧིཎྜནྟཱི ཨེཀཾ གིལཱནབྷིཀྑུཾ དིསྭཱ ཀམྤམཱནཧདཡཱ ཨུཔསངྐམིཏྭཱ ཝནྡིཏྭཱ བྷནྟེ ཀོཏེ ཨཱབཱདྷོ སརཱིརཾ པཱིལེ༹ཏཱིཏི པུཙྪི. ཏེནཱཔི བྷགིནི ཁརཱབཱདྷོ མེ པཱིལེ༹ཏཱིཏི ཝུཏྟེ སཱ ཏེནཧི བྷནྟེ ཨཧཾ ཏཾ རོགཾ ཝཱུཔསམེསྶཱམཱིཏི ནིམནྟེཏྭཱ གེཧཾ གནྟྭཱ ཏཾ པཝཏྟིཾ མཱཏཱཔིཏུནྣཾ ཀཐེཏྭཱ ཏེཧི ཨནུཉྙཱཏཱ པུན དིཝསེ ནཱནགྒརསེན བྷེསཛྫཱཧཱརཾ སམྤཱདེསི, ཏཏོ སོ བྷིཀྑུ པུནདིཝསེ ཙཱིཝརཾ པཱརུཔིཏྭཱ བྷིཀྑཱཡ ཙརནྟོ ཏསྶཱ གེཧཾ གནྟྭཱ ཨཊྛཱསི. སཱ ཐེརཾ ཨཱགཏཾ དིསྭཱ སོམནསྶཛཱཏཱ པཏྟཾ གཧེཏྭཱ ཨཱསནཾ པཉྙཱཔེཏྭཱ ཨདཱསི. ཏཏྠ ནིསིནྣཾ ཏཾ ཨཱཧཱརེན སཱདྷུཀཾ པརིཝིསིཏྭཱ སཀྐཱར མཀཱསི. ཨཐསྶཱ སདྡྷཱབལེན བྷུཏྟམཏྟེཡེཝ སོ ཨཱབཱདྷོ ཝཱུཔསམི. ཏཏོ སོ ཝཱུཔསནྟརོགོ དུཏིཡདིཝསེ ཏསྶཱ གེཧཾ ནཱ གམཱསི. ཨཐ སཱ ཝིཧཱརཾ གནྟྭཱ ཏཾ ཝནྡིཏྭཱ ཀསྨཱནཱགཏཏྠཱཏི པུཙྪིཏྭཱ ཏེན མེ བྷགིནི བྱཱདྷི ཝཱུཔསམི, ཏསྨཱ ནཱགཏོསྨཱིཏི ཝུཏྟེ སཱ སཱདྷུ བྷནྟེཏི སོམནསྶཛཱཏཱ གེཧམེཝ ཨགམཱསི. སཱ ཏེན པུཉྙཀམྨེན ཀཱལཾ ཀཏྭཱ དེཝལོཀེ ནིབྦཏྟི. ཏསྶཱ ཏཏྠ དྭཱདསཡོཛནིཀཾ ཀནཀཝིམཱནཾ ནིབྦཏྟི. སཱ ཏཏྠ དེཝིསྶརིཡཾ ཨནུབྷཝནྟཱི ཚབུདྡྷནྟརཾ ཁེཔེཏྭཱ ཨམྷཱཀཾ བྷགཝཏོ ཀཱལེ ཛམྦུདཱིཔེ དེཝཔུཏྟནགརེ ཨུདིཙྩབྲཧྨཎཀུལེ ཛེཊྛབྲཱཧྨཎསྶ བྷརིཡཱཡ ཀུཙྪིམྷི པཊིསནྡྷིཾ གཎྷི, སཱ པརིཔཱཀ མནྭཱཡ མཱཏུཀུཙྪིཏོ ནིཀྑམི. ཏསྶཱ མཱཏུཀུཙྪིཏོ ནིཀྑནྟཀཱལཏོ པཊྛཱཡ དིཝསེ དིཝསེ ཨཊྛཊྛནཱལིམཏྟཾ ཏཎྜུལཾ ནིབྦཏྟཏི. ཏསྶཱ རཱུཔསམྤཏྟིཾ དིསྭཱ པསནྣཱ མཱཏཱཔིཏརོ རཱུཔདེཝཱིཏི ནཱམ མཀཾསུ. པཙྪཱ ཏཾ པཏིརཱུཔེན དཱརཀེན ནིཡོཛེསུཾ. ཨཐསྶཱ ཏཎྜུལ- ནཱལིམཏྟཾ ¶ གཧེཏྭཱ པཙིཏུཾ ཨཱརདྡྷེ ཨིཙྪིཏིཙྪིཏམཾསཱདིབྱཉྫནཉྫ སཔྤིནཝནཱིཏདདྷིཁཱིརཱདིགོརསཉྩ ཛཱིརམརིཙཱདིཀཊུཀབྷཎྜཉྩ ཀདལིཔནསམདྷུགུལཱ༹དིཨུཔཀརཎཉྩ བྷཱཛནཱནི པཱུརེཏྭཱ ནིབྦཏྟཏི, ཏཱཡ ཧཏྠེན གཧིཏཾ ཀིཉྩི ཁཱདནཱིཡཾ བྷོཛནཱིཡཾཝཱ པཱུཏིབྷཱཝཾ ན གཙྪཏི, བྷཏྟུཀྑལིཾ གཧེཏྭཱ སཀལནགརཝཱསིནོ བྷོཛེནྟིཡཱཔི ཨེཀཀཊཙྪུམཏྟཾ བྷཏྟཾ གཧིཏཊྛཱནཾ ན པཉྙཱཡཏི. ཨེཝཾ ཨཔརིཀྑཡཔུཉྙཱ ཨཧོསི, སཀལདེཝཔུཏྟནགརེ ཙནྡསུརིཡཱཝ པཱཀཊཱ ཨཧོསི, ཨཐ སཱ པཉྩསཏབྷིཀྑཱུ ནིམནྟེཏྭཱ ནིཙྩཾ སཀནིཝེསནེཡེཝ བྷོཛེཏི, ཏདཱ ཏེསཾ ཨནྟརེ པཊིསམྦྷིདཱཔཏྟོ མཧཱསངྒྷརཀྑིཏཏྠེརོནཱམ ཨིམིསྶཱ པུཉྙཱནུབྷཱཝཾ དིབྦཙཀྑུནཱ དིསྭཱ ན ཛཱནཱཏི ཨེསཱ ཨཏྠནཱ པུབྦེ ཀཏཀམྨཾ. ཡནྣཱུནཱཧཾ ཨསྶཱ པཀཱསེཡྻནྟི ཨེཀདིཝསཾ ཏསྶཱ ནིཝེསནེ བྷུཉྫིཏྭཱ ཨནུམོདནཾ ཀརོནྟོ ཛཱནཱསི བྷགིནི ཏཡཱ པུབྦེ ཀཏཀམྨནྟི པུཙྪི, ན ཛཱནཱམི བྷནྟེ. སོཏུམིཙྪཱམཱིཏི, ཨཐསྶཱ སོ པུབྦཀམྨཾ པཀཱསེནྟོ.

༡.

ཨེཀནཝུཏེ ཨིཏོ ཀཔྤེ,

ཝིཔསྶཱིནཱམ ནཱཡཀོ;

ཨཧོསི ལོཀེ ལོཀེཀ,

ནཱཡཀོ ཚིནྣབནྡྷནོ.

༢.

ཏདཱ ཏསྨིཾ པུརེ རམྨེ, ཨཱསི ཏྭཾ གཱམདཱརིཀཱ;

ཨཱཧིཎྜནྟཱི ཝིཧཱརསྨིཾ, ཨདྡཀྑི ཛིནསཱཝཀཾ.

༣.

རོགཱཏུརཾ ཀིསཾ པཎྜུཾ, ཨསྶསནྟཾ མུཧུཾ མུཧུཾ;

དིསྭཱན ཀམྤིཏཱ ཙིཏྟཱ, ནིམནྟེཏྭཱན ཏཾ མུནིཾ.

༤.

བྷེསཛྫཉྩེཝ བྷཏྟཉྩ, ཨདཱ ཏྭཾ ཏེན སོ ཡཏི;

ཨབྱཱབཱདྷོ ཨནཱིགྷོཙ, ཨཧོསི ཨནུཔདྡཝོ.

༥.

ཏཏོ ཏྭཾ ཏེན ཀམྨེན, སུཀཏེན ཏཏོ ཙུཏཱ;

ཛཱཏཱསི དེཝལོཀསྨིཾ, སབྦཀཱམསམིདྡྷིནཱི.

༦.

ཏཏྠ ¶ ཏེ པུཉྙཏེཛེན, པཱསཱདོ རཏནཱམཡོ;

མཎིཐཱུཔིསཏཱཀིཎྞོ, ཀཱུཊཱགཱརེཧི ལངྐཏོ.

༧.

ནེཀགབྦྷསཏཱཀིཎྞོ, སཡནཱསནམཎྜིཏོ;

ཨཙྪརཱསཏསཾཀིཎྞོ, ནཙྩགཱིཏཱདིསཾཀུལོ.

༨.

རམྦྷཱམྦཛམྦུསནྣཱིར, པཱུགཔུནྣཱགཔཱཊལཱི;

ནཱགཱདིཏརུསཎྜེཧི, མཎྜིཏུཡྻཱནཔནྟིཧི.

༩.

པདུམུཔྤལཀལཱ༹ར, ཀུནྡཀཱནནམཎྜིཏེ;

མདྷུམཏྟཱལིཔཱལཱིཧི, སཱརསཱིསརསཾཀུལེ.

༡༠.

དེཝཔུཏྟེཧི ནེཀེཧི, ཏཐཱ དེཝཙྪརཱཧིཙ;

ནིཙྩུསྶཝེ མཧཱབྷོགེ, ཝིམཱནེ མནནནྡནེ.

༡༡.

ཏྭམེཝཾ དེཝལོཀམྷི, ཝིནྡམཱནཱ མཧཱཡསཾ;

ཨདྡྷཱནཾ ཝཱིཏིནཱམེཏྭཱ, ནིབྦུཏེ གོཏམེ ཛིནེ.

༡༢.

ཛམྦུདཱིཔེ ཨིདཱནི ཏྭཾ, ནིབྦཏྟཱ ཨུདིཏེ ཀུལེ;

པུཉྙཔཉྙཱགུཎཱཝཱསཱ, རཱུཔེནགྒཱ པིཡཾཝདཱ.

༡༣.

ཨེཏཾ ཏེ དེཝལོཀསྨིཾ, དེཝིསྶརིཡམབྦྷུཏཾ,

ཨིམཾ ཏེ ཨིདྷ ལོཀསྨིཾ, སབྦཾ མཱནུསིཀཾ སུཁཾ.

༡༤.

ཝིཔསྶིམུནིནོ ཀཱལེ, ཏྭཾ ཏསྶེཀསྶ བྷིཀྑུནོ;

ཨདཱ དཱནཾ གིལཱནསྶ, ཏསྶ ཏཾ ཕལམཱིདིསཾ.

༡༥.

ཀཱཏབྦཉྷི སདཱ པུཉྙཾ, ཨིཙྪནྟེན སུཁཔྤདཾ;

ཏསྨཱ ཏྭཾ སབྦདཱ བྷདྡེ, ཨུསྶུཀྐཱ ཀུསལེ བྷཝཱཏི.

ཨེཝཾ སོ ཏསྶ པུརིམཏྟབྷཱཝེ ཀཏཀམྨཾ པཀཱསེཏྭཱ ཨིདཱནི པུཉྙཀམྨེ ཨཔྤམཱདཱ བྷཝཱཏི ཨནུསཱསི. སཱ ཐེརསྶ དྷམྨདེསནཾ སུཏྭཱ པརམསོམནསྶཱ ཏཏོ པཊྛཱཡ དཱནཱདཱིསུ ནིརཏཱ པུཉྙཱནི ཀརོནྟཱི ཏེནེཝ སོམནསྶེན སོཏཱཔནྣཱ ཨརིཡསཱཝིཀཱ ཨཧོསཱིཏི.

༡༦.

ཨིཏི ¶ ཏརུཎཀུམཱརཱི པུཉྙཀམྨེསུ སཱརཾ,

ཨཝིདིཏགུཎམཏྟཱ དཏྭ བྷིཀྑུསྶ དཱནཾ;

དིཝིམནུཛསུཁཾ སཱལཏྠ ཏུམྷེ བྷཝནྟཱ,

ཝིདིཏཀུསལཔཱཀཱ ཀིཾ ན ལབྦྷེཐ སནྟིཾ.

རཱུཔདེཝིཡཱ ཝཏྠུཾ དསམཾ.

དྷམྨསོཎྜཀཝགྒོ པཐམོ.

ནནྡིཡརཱཛཝགྒོ

༡༡. ནནྡིཡརཱཛསྶ ཝཏྠུམྷི ཨཡམཱནུཔུབྦཱིཀཐཱ

ཨིཏོ ¶ ཀིར ཀཔྤསཏསཧསྶམཏྠཀེ པདུམུཏྟརོ ནཱམ སཏྠཱ ལོཀེ ཨུདཔཱདི སདེཝཀཾ ལོཀཾ སཾསཱརཀནྟཱརཱ ཨུཏྟཱརེནྟོ. ཏསྨིཾ ཀིར སམཡེ ཨེཀོ ཀུཊུམྦིཀོ སཏྠུ དྷམྨདེསནཾ སུཏྭཱ པསནྣམཱནསོ བུདྡྷཔམུཁཾ བྷིཀྑུསངྒྷཾ ནིམནྟེཏྭཱ མཧཱདཱནཾ སཛྫེཏྭཱ ཨཏྟནོ བྷཝནཾ དེཝབྷཝནམིཝ ཨལངྐརིཏྭཱ བུདྡྷཱརཧཾ མཧཱསནཾ པཉྙཱཔེཏྭཱ གནྟྭཱ བྷགཝནྟཾ ཡཱཙི ཀཱལོཡཾ བྷནྟེ བྷགཝཏོ བྷཏྟགྒསྶ ཨུཔསངྐམནཱཡཱཏི. ཨཐ བྷགཝཱ བྷིཀྑུསངྒྷཔརིཝུཏོ མཧཏཱ བུདྡྷཱནུབྷཱཝེན གནྟྭཱ ནིསཱིདི པཉྙཏྟཝརབུདྡྷཱསནེ, ཏཏོ ཀུཊུམྦིཀོ ཧཊྛོ ཨུདགྒོ སཔརིསོ བྷགཝནྟཾ པརིཝིསཏི ཨནེཀེཧི མདྷུརནྣཔཱནཱདཱིཧི. ཏདཱ ཏསྶ བྷགཝཏོ སཱསནེ དྷུཏངྒདྷརཱནཾ ཨགྒོ ཝསབྷཏྠེརོནཱམ མཧཱསཱཝཀོ སཔདཱནཝཏྟེན པིཎྜཱཡ ཙརམཱནོ ཏསྶ ཀུཊུམྦིཀསྶ གེཧདྭཱརེ ཨཊྛཱསི, ཨཐ སོ ཐེརཾ དིསྭཱ བྷནྟེ སཏྠཱ ཨནྟོགེཧེ ནིསིནྣོ, ཏུམྷེཔི པཝིསཐཱཏི ཡཱཙི, ཐེརོ ཨཔཝིསིཏྭཱཝ ཨགམཱསི, ཀུཊུམྦིཀོ བྷགཝནྟཾ ཨུཔསངྐམིཏྭཱ ཏམཏྟཾ ཝཏྭཱ ཀིཾ བྷནྟེ སདེཝཀེ ལོཀེ བྷགཝཏཱཔི ཨུཏྟརིཏརོ གུཎེན སཾཝིཛྫཏཱིཏི ཨཱཧ. ཨཐསྶ སཏྠཱ པུཏྟོཔམཾ དསྶེཏྭཱ ཐེརསྶ གུཎེ ཝཎྞེནྟོ ཨེཝམཱཧ.

༡.

པཱལེནྟི ནིམྨལཾ ཀཏྭཱ, པཱཏིམོཀྑཱདིསཾཝརཾ;

སམཱདིནྣདྷུཏངྒཱཙ, ཨཔྤིཙྪཱ མུནིསཱུནཝོ.

༢.

ནིཙྩ མནྟཀཡུདྡྷམྷི, ནདྡྷཱ ཡོདྷཱཝ དཔྤིཏཱ;

པུཉྙཱནཾ ཝཏྠུབྷཱུཏཱ ཏེ, དེཝམཱནུསཀཱ དིནཾ.

༣.

དྷཱརེམཧཾ ཝཎྞཝནྟཾ, སཱིཝེཡྻམྤིཙ ཙཱིཝརཾ;

བུདྡྷཔུཏྟཱ མཧཱནཱགཱ ན དྷཱརེནྟི ཏཐཱཝིདྷཾ.

༤.

དྷཱརེནྟི ¶ ཏེ པཾསུཀཱུལཾ, སངྒྷཱཊེཏྭཱ པིལོཏིཀེ;

ཝཎཙྪཱདནཙོལཾཝ, ཨིཙྪཱལོབྷ ཝིཝཛྫིཏཱ.

༥.

སཱདིཡཱམི སདཱ ཧམྦྷོ, ཨུཔཱསཀནིམནྟནཾ;

ནེཝ སཱདེནྟི སམྦུདྡྷ, པུཏྟོ པཱསཀཡཱཙནཾ.

༦.

སཔདཱནེན ཡཾ ལདྡྷཾ, ལཱུཁཾཝཱཔི པཎཱིཏཀཾ;

ཏེན ཏུསྶནྟི མེ པུཏྟཱ, རསགེདྷཝིཝཛྫིཏཱ.

༧.

ནིཔཛྫཱམི ཨཧཾ སཱདྷུ, སནྠཏེ སཡནེ སུབྷེ;

ན ཏེ སེཡྻཾ པཀཔྤེནྟི, སཾསཱརབྷཡབྷཱིརུཀཱ.

༨.

ཋཱནཱ སནགམནེན, ཀཔྤེནྟི ཨིརིཡཱཔཐཾ;

ནེཀབྷཱུམིསམཱཀིཎྞ, པཱསཱདེསུ ཝསཱམཧཾ.

༩.

བུདྡྷཔུཏྟཱ ཏཐཱཙྪནྣཾ, ན ཀདཱ པཝིསནྟི ཏེ;

རུཀྑམཱུལེ སུསཱནསྨིཾ, ཨབྦྷོཀཱསེ རམནྟི ཏེ.

༡༠.

བྷཱཝེཏྭཱ བྷཝནཱསཱཡ, ཧེཏུཾ བྷཱཝནམུཏྟམཾ;

ཨཧཾ གཱམེ ཝསིསྶཱམི, པཱཔེནྟོ ཛནཏཾ སིཝཾ.

༡༡.

རམནྟི མམ པུཏྟཱ ཏེ, པནྟསེནཱསནེ ཀཀཱ;

ཏེསཾ མཧཏྟརོ སནྟོ, ཐེརོཡཾ ཝསབྷོ མཧཱ;

དྷུཏཔཱཔོ དྷུཏངྒགྒོ, ཉཱཏོཡཾ མམ སཱསནེཏི.

ཨེཝཾ བྷགཝཱ ཧཏྠཾ ཨུཀྑིཔིཏྭཱ ཙནྡམཎྜལེ པཧརནྟོ ཝིཡ ཐེརསྶ གུཎེ པཀཱསེསི, ཏཏོ སོ ཏསྶ གུཎཀཐཾ སུཏྭཱ སཡམྤིཏཾ ཋཱནནྟརཾ ཀཱམཡམཱནོ ཡནྣཱུནཱཧཾ ཨནཱགཏེ ཨཉྙཏརསྶ སམྨཱསམྦུདྡྷསྶ སཱསནེ དྷུཏངྒདྷརཱནཾ ཨགྒོ བྷཝིསྶཱམཱིཏི ཏཾ ཋཱནནྟརཾ པཏྠེནྟོ བྷགཝཏོ པཱདམཱུལེ ནིཔཛྫི, སཏྠཱ ཏཾ ཀཱརཎཾ ཨུཔཔརིཀྑིཏྭཱ ཨིཏོ ཀཔྤསཏསཧསྶམཏྠཀེ གོཏམོ ནཱམ སཏྠཱ ཨུཔྤཛྫིསྶཏི. ཏྭཾ ཏདཱ དྷུཏངྒདྷརཱནཾ ཨགྒོ ཧུཏྭཱ ཀསྶ པོཏི པཉྙཱཡིསྶཏཱིཏི བྱཱཀརཎ ¶ མདཱསི. ཏཏོ པཊྛཱཡ སོ སོམནསྶོ པུཉྙཀམྨཾ ཀཏྭཱ ཏཏོ ཙུཏོ དེཝམནུསྶེསུ དེཝིསྶརིཡཾ ཨནུབྷཝནྟོ ཝིཔསྶཱིསམྨཱསམྦུདྡྷཀཱལེ ཨེཀསཱཊཀོ ནཱམ བྲཱཧྨཎོ ཧུཏྭཱ མཧཱདཱནཾ ཨདཱསི. ཏཏོ ཙུཏོ ཀསྶཔསམྨཱསམྦུདྡྷེ པརིནིབྦུཏེ བཱརཱཎསཱིནགརེ བཱརཱཎསཱིསེཊྛི ཧུཏྭཱ ནིབྦཏྟོ དཱནཱདཱིནི པུཉྙཱནི ཀཏྭཱ ཏཏོ ཙཝིཏྭཱ སཾསཱརེ སཾསརནྟོ དསཝསྶསཧསྶཱ ཡུཀེསུ མནུསྶེསུ བཱརཱཎསིཡཾ ཨེཀོ ཀུཊུམྦིཀོ ཧུཏྭཱ ནིབྦཏྟི. སོ པནཱཡཾ ཀུཊུམྦིཀོ ཨརཉྙེ ཛངྒྷཱཝིཧཱརཾ ཨནུཝིཙརནྟོ པཙྩནྟིམེ ཛནཔདེ ཨརཉྙཱཡཏནེ ཨཉྙཏརཾ པཙྩེཀབུདྡྷཾ ཨདྡས. སོ ཙ པཙྩེཀབུདྡྷོ ཏཏྠ ཙཱིཝརཀམྨཾ ཀརོནྟོ ཨནུཝཱཏེ ཨཔྤཧོནྟེ སཾཧརིཏྭཱ ཋཔེཏུཾ ཨཱརདྡྷོ. ཀུཊུམྦིཀོ ཏཾ དིསྭཱ བྷནྟེ ཀིཾ ཀརོཐཱཏི པུཙྪི. སོ པཙྩེཀབུདྡྷོ ཨཔྤིཙྪཏཱཡ ཏེན པུཊྛོ ན ཀིཉྩི ཝུཏྟོ ཧོཏི. སོ ཙཱིཝརདུསྶཾ ནཔྤཧོཏཱིཏི ཉཏྭཱ ཨཏྟནོ ཨུཏྟརསཱཊཀཾ པཙྩེཀབུདྡྷསྶ པཱདམཱུལེ ཋཔེཏྭཱ ཨགམཱསི. པཙྩེཀབུདྡྷོ ཏཾ གཧེཏྭཱ ཨནུཝཱཏཀཾ ཨཱརོཔེནྟོ ཙཱིཝརཾ ཀཏྭཱ པཱརུཔི. ཀུཊུམྦིཀོ ཛཱིཝིཏཔརིཡོསཱནེ ཀཱལཾ ཀཏྭཱ ཏཱཝཏིཾསབྷཝནེ ནིབྦཏྟིཏྭཱ ཏཏྠ ཡཱཝཏཱཡུཀཾ དིབྦསམྤཏྟིཾ ཨནུབྷཝིཏྭཱ ཏཏོ ཙཝིཏྭཱ བཱརཱཎསིཏོ ཏིཡོཛནམཏྟཀེ ཋཱནེ ཨཉྙཏརསྨིཾ ནགརེ ནིབྦཏྟི, ཏསྶ མཱཏཱཔིཏརོ ནནྡིཡོཏི [ནནྡཱིཏིནཱམཾ ཨིཏིསབྦཏྠ] ནཱམཾ ཨཀཾསུ, ཏསྶ སཏྟ བྷཱཏརོ ཨཧེསུཾ, སེསཱ ཚ བྷཱཏརོ ནཱནཱཀམྨནྟེསུ བྱཱཝཊཱ མཱཏཱཔིཏུནྣཾ པོསེནྟི. ནནྡིཡོ པན ཨཀམྨསཱིལོ གེཧེཡེཝ ཝསཏི. ཏསྨཱ ཏསྶ སེསཱ ཀུཛ྄ཛྷནྟི. མཱཏཱཔིཏརོཔི ནནྡིཡཾ ཨཱམནྟེཏྭཱ ཨོཝདནྟི. སོ ཏུཎྷཱི ཧོཏེཝ. ཨཐཱཔརསྨིཾ སམཡེ གཱམེ ནཀྑཏྟཾ སངྒྷུཊྛཾ, ཏདཱ སོ མཱཏརཾ ཨཱཧ. ཨམྨ སཱཊཀཾ དེཧི, ནཀྑཏྟཾ ཀཱིལི༹སྶཱམཱིཏི, སཱ དྷོཏ- ཝཏྠཾ ¶ ནཱིཧརིཏྭཱ ཨདཱསི, ཨམྨ ཐཱུལཾ ཨིདནྟི, སཱ ཨཉྙཾ ནཱིཧརིཏྭཱ ཨདཱསི, ཏམྤི པཊིཀྑིཔི. ཨཐ ནཾ མཱཏཱ ཨཱཧ. ཏཱཏ ཡཱདིསེ མཡཾ གེཧེ ཛཱཏཱ, ནཏྠི ཨིཏོ སུཁུམཏརསྶ པཊིལཱབྷཱཡ པུཉྙནྟི, ལབྷནཊྛཱནཾ གམིསྶཱམི ཨམྨཱཏི. པུཏྟ ཨཧཾ ཨཛྫེཝ ཏཝ བཱརཱཎསཱིནགརེ རཛྫཔཊིལཱབྷཾ ཨིཙྪཱམཱིཏི ཨཱཧ. སོ སཱདྷུ ཨམྨཱཏི མཱཏརཾ ཝནྡིཏྭཱ པདཀྑིཎཾ ཀཏྭཱ པཀྐཱམི. མཱཏུཡཱ པནསྶ ཨེཝཾ ཨཧོསི. ཀཧཾ སོ གམིསྶཏི, པུབྦེཝིཡ ཨིདྷཝཱ ཨེཏྠཝཱ གེཧེ ནིསཱིདིཏྭཱ ཨཱགཙྪཏཱིཏི, སོ པན པུཉྙནིཡཱམེན ཙོདིཡམཱནོ གཱམཏོ ནིཀྑམིཏྭཱ བཱརཱཎསིཾ གནྟྭཱ སེནགུཏྟསྶ གེཧེ པཊིཝསཏི, ཨཐེཀདིཝསཾ སོ ཏསྶ ཀམྨཀཱརེཧི སདྡྷིཾ སལླཔནྟོ ནིསཱིདིཏྭཱ པཙལཱཡནྟོ སུཔིནཾ ཨདྡས. མུཁེན ཨནྟཾ ནིཀྑམིཏྭཱ སཀལཛམྦུདཱིཔེ པཏྠརིཏྭཱ ཨནྟོཀུཙྪིམེཝ པཱཝིསི. པབུདྡྷོ སོ བྷཱིཏོ མཧཱསདྡམཀཱསི. ཨཐ ནཾ མཧཱསེནགུཏྟོ པུཙྪི. ནནྡིཡོ སུཔིནཾ ཨདྡསནྟི ཨཱཧ. ཨཐ ཏེན ཀཱིདིསནྟི པུཊྛོ ཀཐེསི, ཏཏོ སེནགུཏྟོ ཏཾ ཨཏྟནོ ཀུལཱུཔགཾ པརིབྦཱཛིཀཾ པུཙྪི ཀོ ཏསྶ ཝིཔཱཀོཏི. པརིབྦཱཛིཀཱ ཡདི བྷོ ཨིཏྠཱི པསྶཏི. སཏྟདིཝསབྦྷནྟརེཡེཝ ཨབྷིསེཀཾ ལབྷཏི, ཡདི པུརིསོ པསྶཏི, ཏཐེཝ རཱཛཱ ཧོཏཱིཏི ཀཐེསི. སེནགུཏྟོ ཏསྶཱ ཏཾ ཀཐཾ སུཏྭཱ ཨིམཾ མམ ཉཱཏིཾ ཀརོམཱིཏི ཨཏྟནོ སཏྟ དྷཱིཏརེ པཀྐོསིཏྭཱ པཊིཔཱཊིཡཱ པུཙྪི. ནནྡིཡསྶ སནྟིཀེ ཝསཐཱཏི, སེསཱ སབྦཱ ན ཨིཙྪིཾསུ, ན མཡཾ ཛཱནཱམ ཨེཏཾ ཨདྷུནཱགཏཾ ཀུལཝནྟཾ ཝཱ དུཀྐུལཝནྟཾཝཱཏི. ཨཐ ཀཎིཊྛིཀཾ པུཙྪི. སཱ ཡསྶ མཾ མཱཏཱཔིཏརོ དསྶནྟི. ཏེསཾ ཝཙནཾ ན བྷིནྡིསྶཱམཱིཏི སམྤཊིཙྪི, ཨཐ སེནགུཏྟོ ནནྡིཡཾ པཀྐོསིཏྭཱ ཨཏྟནོ དྷཱིཏརཾ དཏྭཱ ཏསྶ མཧཱསམྤཏྟི མདཱསི. ཏཏོ སཏྟམེ དིཝསེ ནནྡིཡོ ཏཏྠ ཏཏྠ ཨཱཧིཎྜནྟོ རཉྙོ མངྒལུཡྻཱནཾ པསྶིསྶཱམཱིཏི གནྟྭཱ དྷངྒལསིལཱཔཊྚེསསཱིསཾ པཱརུཔིཏྭཱ ནིཔཛྫི, སོ ཙ བཱརཱཎསཱིརཉྙོ ཀཱལངྐཏསྶ སཏྟམོ ¶ དིཝསོ ཧོཏི. ཨམཙྩཱཙ པུརོཧིཏོཙ རཉྙོ སརཱིརཀིཙྩཾ ཀཱརེཏྭཱ རཱཛངྒཎེ ནིསཱིདིཏྭཱ མནྟཡིཾསུ. རཉྙོ ཨེཀཱཝ དྷཱིཏཱ ཨཏྠི, པུཏྟོ པནསྶ ནཏྠི. ཨརཱཛིཀཾ རཛྫཾ ན ཏིཊྛཏི. ཕུསྶརཐཾ ཝིསྶཛྫེསྶཱམཱཏི. ཏེ ཀུམུདཔཏྟཝཎྞེ ཙཏྟཱརོ སིནྡྷཝེ ཡོཛེཏྭཱ སེཏཙྪཏྟཔམུཁཾཔཉྩཝིདྷརཱཛཀཀུདྷབྷཎྜཾ རཐསྨིཾཡེཝ ཋཔེཏྭཱ རཐཾ ཝིསྶཛྫེཏྭཱ པཙྪཏོ ཏུརིཡཱནི པགྒཎྷཱཔེསུཾ. རཐོ པཱཙཱིདྭཱརེན ནིཀྑམིཏྭཱ ཨུཡྻཱནཱབྷིམུཁོ ཨཧོསི. པརིཙཡེན ཨུཡྻཱནཱབྷིམུཁོ གཙྪཏི. ནིཝཏྟེམཱཏི ཀེཙི ཨཱཧཾསུ. པུརོཧིཏོ མཱ ནིཝཱརཡིཏྠཱཏི ཨཱཧ. རཐོ ཀུམཱརཀཾ པདཀྑིཎཾ ཀཏྭཱ ཨཱརོཧཎསཛྫོ ཧུཏྭཱ ཨཊྛཱསི. པུརོཧིཏོ པཱརུཔཎཀཎྞཾ ཨཔནེཏྭཱ པཱདཏལཱནི ཨོལོཀེནྟོ ཏིཊྛཏུ ཨཡཾ དཱིཔོ. དྭིསཧསྶདཱིཔ པརིཝཱརེསུ ཙཏཱུསུ མཧཱདཱིཔེསུ ཨེཀརཛྫཾ ཀཱཏུཾ སམཏྠོཏིཝཏྭཱ ཏསྶ དྷིཏིཾ ཨུཔདྷཱརེཏུཾ ཏིཀྑཏྟུཾ ཏུརིཡཱནི པགྒཎྷཱཔེསི. ཨཐ ཀུམཱརོ མུཁཾ ཝིཝརིཏྭཱ ཨོལོཀེཏྭཱ ཀེན ཀཱརཎེན ཨཱགཏཏྠཱཏི ཨཱཧ, དེཝ ཏུམྷཱཀཾ རཛྫཾ པཱཔུཎཱཏཱིཏི, རཱཛཱ ཀཧནྟི, དེཝཏྟཾ གཏོ སཱམཱིཏི, ཀཏི དིཝསཱ ཨཏིཀྐནྟཱཏི, ཨཛྫ སཏྟམོ དིཝསོཏི. པུཏྟོ ཝཱ དྷཱིཏཱ ཝཱ ནཏྠཱིཏི, དྷཱིཏཱ ཨཏྠི དེཝ. པུཏྟོ ན ཝིཛྫཏཱིཏི, ཏེནཧི ཀརིསྶཱམི རཛྫནྟི, ཏེ ཏཱཝདེཝ ཨབྷིསེཀམཎྜཔཾ ཀཱརེཏྭཱ རཱཛདྷཱིཏརཾ སབྦཱལངྐཱརེཧི ཨལངྐཱརིཏྭཱ ཨུཡྻཱནཾ ནེཏྭཱ ཀུམཱརསྶ ཨབྷིསེཀཾ ཨཀཾསུ, ཨཐསྶ ཀཏཱབྷིསེཀསྶ སཏསཧསྶགྒྷནཀཾ ཝཏྠཾ ཨཱནེསུཾ, སོ ཀིམིདཾ ཏཱཏཱཏི ཨཱཧ, ནིཝཱསནཝཏྠཾ དེཝཱཏི, ནནུ ཏཱཏཱ ཐཱུལཾཏི, མནུསྶཱནཾ པརིབྷོགཝཏྠེསུ ཨིཏོ སུཁུམཏརཾ ནཏྠི དེཝཱཏི, ཏུམྷཱཀཾ རཱཛཱ ཨེཝརཱུཔཾ ནིཝཱསེསཱིཏི, ཨཱམ དེཝཱཏི. ན མཉྙེ པུཉྙཝཱ ཏུམྷཱཀཾ རཱཛཱཏི ཝཏྭཱ ཧནྡ སུཝཎྞབྷིངྐཱརཾ ཨཱཧརཐ, ལབྷིསྶཱམ ཝཏྠནྟི, ཏེ སུཝཎྞབྷིངྐཱརཾ ཨཱཧརིཾསུ, སོ ཨུཊྛཱཡ ཧཏྠེ དྷོཝིཏྭཱ མུཁཾ ཝིཀྑཱལེཏྭཱ ཧཏྠེན ཨུདཀཾ ཨཱདཱཡ པུརཏྠིམདིསཱཡ ཨབྦྷུཀྐིརི, ¶ ཏཱཝདེཝ གྷནཔཐཝིཾ བྷིནྡིཏྭཱ སོལ༹སཀཔྤརུཀྑཱ ཨུཊྛཧིཾསུ, པུན ཨུདཀཾ ཧཏྠེན གཧེཏྭཱ དཀྑིཎཾ པཙྪིམཾ ཨུཏྟརནྟི ཨེཝཾ ཙཏསྶོཔི དིསཱ ཨབྦྷུཀྐིརི, སབྦདིསཱསུ སོལ༹ས སོལ༹ས ཧུཏྭཱ ཙཏུསཊྛིཀཔྤརུཀྑཱ ཨུཊྛཧིཾསུ, སོ ཨེཀཾ དིབྦདུསྶཾ ནིཝཱསེཏྭཱ ཨེཀཾ པཱརུཔིཏྭཱ ནནྡིཡརཉྙོ ཝིཛིཏེ སུཏྟཀནྟིཀཱ ཨིཏྠིཡོ མཱ སུཏྟཾ ཀནྟནྟཱུཏི བྷེརིཾ ཙརཱཔེཐཱཏི ཝཏྭཱ ཚཏྟཾ ཨུསྶཱཔེཏྭཱ ཨལངྐཏཔཊིཡཏྟོ ཧཏྠིཀྑནྡྷཝརགཏོ ནགརཾ པཝིསིཏྭཱ པཱསཱདམབྷིརུཡ྄ཧ མཧཱསམྤཏྟིཾ ཨནུབྷཝི. ཨཧོ ཏདཱ པཙྩེཀབུདྡྷསྶ དིནྣཱནུཝཱཏཀསྶ ཝིཔཱཀོ. ཏེནཱཧུ པོརཱཎཱ.

༡༢.

ཡཐཱ སཱསཔམཏྟམྷཱ, བཱིཛཱ ནིགྲོདྷཔཱདཔོ;

ཛཱཡཏེ སཏསཱཁཌྜྷོ, མཧཱནཱིལམྦུདོཔམོ.

༡༣.

ཏཐེཝ པུཉྙཀམྨམྷཱ, ཨཎུམྷཱ ཝིཔུལཾ ཕལཾ;

ཧོཏཱིཏི ཨཔྤཔུཉྙནྟི, ནཱཝམཉྙེཡྻ པཎྜིཏོཏི.

ཨེཝཾ གཙྪནྟེ ཀཱལེ ཨེཀདིཝསཾ དེཝཱི རཉྙོ སམྤཏྟིཾ དིསྭཱ ཨཧོ ཏཔསྶཱིཏི ཀཱརུཉྙཱཀཱརཾ དསྶེསི. ཀིམིདཾ དེཝཱིཏི ཙ པུཊྛཱ ཨཏིམཧཏཱི ཏེ དེཝ སམྤཏྟི. ཨཏཱིཏམདྡྷཱནཾ ཀལྱཱཎཾ ཀཏཏྟཱ. ཨིདཱནི ཨནཱགཏསྶཏྠཱཡ ཀུསལཾ ཀརོཐཱཏི ཨཱཧ. ཀསྶ དསྶཱམ. སཱིལཝནྟཱ ནཏྠཱིཏི. ཨསུཉྙོ དེཝ ཛམྦུདཱིཔོ ཨརཧནྟེཧི, ཏུམྷེ དཱནཾ སཛྫེཐ, ཨཧཾ ཨརཧནྟེ ལཙྪཱམཱིཏི ཨཱཧ. པུནདིཝསེ རཱཛཱ མཧཱརཧཾ དཱནཾ སཛྫཱཔེསི. དེཝཱི སཙེ ཨིམིསྶཱ དིསཱཡ ཨརཧནྟོ ཨཏྠི, ཨིདྷཱ གནྟྭཱ ཨམྷཱཀཾ བྷིཀྑཾ གཎྷནྟཱུཏི ཨུཏྟརཧིམཝནྟཱབྷིམུཁཱི པུཔྥཱནི ཨུདྡྷཾ ཁིཔིཏྭཱ ཨུརེན ནིཔཛྫི. ཨཐ ཏཱནི པུཔྥཱནི ཨཱཀཱསཏོ གནྟྭཱ ཧིམཝནྟཔདེསེ ཝསནྟཱནཾ པདུམཝཏིཡཱ པུཏྟཱནཾ པཉྩསཏཱནཾཔཙྩེཀབུདྡྷཱནཾ ཛེཊྛཀམཧཱཔདུམཔཙྩེཀབུདྡྷསྶ པཱདམཱུལེ པཏིཾསུ. ཏཐཱཧི.

༡༤.

ཨཧོ ¶ པསྶཐ བྷོ དཱནི, ཝིམྷཡཾ པུཉྙཀམྨུནོ;

ཨཙེཏནཱཔི པུཔྥཱནི, དཱུཏཀིཙྩེསུ བྱཱཝཊཱ.

༡༥.

ཀཏྟུཀཱམེན ལོཀསྨིཾ, སཀལཾ ཨཏྟནོ ཝསཾ;

སབྦཏྠཱམེན ཀཏྟབྦཾ, པུཉྙཾ པཉྙཝཏཱ སདཱཏི.

ཏཏོ མཧཱཔདུམཔཙྩེཀབུདྡྷོ ཏཾ ཉཏྭཱ སེསབྷཱཏརེ ཨཱམནྟེསི. མཱརིསཱ ནནྡིཡརཱཛཱ ཏུམྷེ ནིམནྟེསི. ཨདྷིཝཱསེཐ ཏསྶ ནིམནྟནནྟི. ཏེ ཨདྷིཝཱསེཏྭཱ ཏཱཝདེཝ ཨཱཀཱསེནཱ གནྟྭཱ ཨུཏྟརདྭཱརེ ཨོཏརིཾསུ. མནུསྶཱ པཉྩསཏཱ དེཝ པཙྩེཀབུདྡྷཱ ཨཱགཏཱཏི རཉྙོ ཨཱརོཙེསུཾ, རཱཛཱ སདྡྷིཾ དེཝིཡཱ གནྟྭཱ ཝནྡིཏྭཱ པཏྟེ གཧེཏྭཱ པཙྩེཀབུདྡྷེ པཱསཱདཾ ཨཱརོཔེཏྭཱ ཏཏྠ ཏེསཾ དཱནཾ དཏྭཱ བྷཏྟཀིཙྩཱཝསཱནེ རཱཛཱ སངྒྷཏྠེརསྶ དེཝཱི སངྒྷནཝཀསྶ ཙ པཱདམཱུལེ ནིཔཛྫིཏྭཱ ཨཡྻཱ པཙྩཡེཧི ན ཀིལམིསྶནྟུ, མཡཾ པུཉྙེན ན ཧཱཡིསྶཱམ, ཨམྷཱཀཾ ཨིདྷ ཝཱསཱཡ པཊིཉྙཾ དེཐཱཏི པཊིཉྙཾ ཀཱརེཏྭཱ ཨུཡྻཱནེ ནིཝཱསཊྛཱནཱདཡོ ཀཱརེཏྭཱ ཡཱཝཛཱིཝཾ པཙྩཀབུདྡྷེ ཨུཔཊྛཧིཏྭཱ ཏེསུ པརིནིབྦུཏེསུ སཱདྷུཀཱིལ༹ནཾ ཀཱརེཏྭཱ ཙནྡནཱ གརུཨཱདཱིཧི སརཱིརཀིཙྩཾ ཀཱརེཏྭཱ དྷཱཏུཡོ གཧེཏྭཱ ཙེཏིཡཾ པཏིཊྛཱཔེཏྭཱ ཨེཝརཱུཔཱནམྤི མཧཱནུབྷཱཝཱནཾ མཧེསཱིནཾ མརཎཾ བྷཝིསྶཏི, ཀིམངྒཾ པན མཱདིསཱནནྟི སཾཝེགཛཱཏོ ཛེཊྛཔུཏྟཾ རཛྫེ པཏིཊྛཱཔེཏྭཱ སཡཾ པབྦཛཾ པབྦཛི, དེཝཱིཔི རཉྙེ པབྦཛིཏེ ཨཧཾ ཀིཾཀརིསྶཱམཱིཏི པབྦཛིཏྭཱ དྭེཔི ཨུཡྻཱནེ ཝསནྟཱ ཛྷཱནཱབྷིཉྙཾ ནིབྦཏྟེཏྭཱ ཛྷཱནསུཁེན ཝཱིཏིནཱམེནྟཱ ཨཱཡུཔརིཡོསཱནེ བྲཧྨལོཀེ ནིབྦཏྟིཾསུ. ཏེ ཨམྷཱཀཾ བྷགཝཏོ ཀཱལེ བྲཱཧྨཎཀུལེ ནིབྦཏྟིཏྭཱ བུདྡྷསཱསནེ པབྦཛིཾསུ, ཏདཱ ནནྡིཡརཱཛཱ དྷུཏངྒདྷརཱནཾ ཨགྒོ མཧཱཀསྶཔཏྠེརོནཱམ ཧུཏྭཱ ཙནྡོ ཝིཡ སུརིཡོ ཝིཡཙ ལོཀེ པཱཀཊོ ཧུཏྭཱ བྷགཝཏི པརི- ནིབྦུཏེ ¶ བུདྡྷསཱསནཾ ཨཏིཝིཡ སོབྷེཏི. བྷརིཡཱཔིསྶ བྷདྡཀཱཔིལཱ༹ནཱི ནཱམ ཨཧོསཱིཏི.

༡༦.

དཏྭཱ པུརེཀོ ཝིཔིནེ ཙརནྟོ,

པཙྩེཀབུདྡྷསྶནུཝཱཏམཏྟཾ;

ཀཏྭཱ སརཊྛཾ ཀུརུདཱིཔསོབྷཾ,

མཧཱནུབྷཱཝོ ཝསུདྷཱ དྷིཔོསི.

༡༧.

ཏུམྷེཙ བྷོནྟོ ཁལུ སཱིལཝནྟེ,

དདཱཐ དཱནཱནི ཨནཔྤཀཱནི;

ཏཾ ཝོ པཏིཊྛཱཙ བྷཝནྟརསྨིཾ,

ཙིནྟཱམཎིཾ ཀཔྤཏརུཾཝ སཱརནྟི.

ནནྡིཡརཱཛསྶ ཝཏྠུཾ པཐམཾ.

༡༢. ཨཉྙཏརམནུསྶསྶ ཝཏྠུམྷི ཨཡམཱནུཔུབྦཱིཀཐཱ

ཨམྷཱཀཾ བྷགཝཏི པརིནིབྦུཏེ པཱཊལིཔུཏྟསམཱིཔེ ཨཉྙཏརསྨིཾ གཱམེ ཨཉྙཏརོ དུགྒཏམནུསྶོ ཝསཏི, སོ པནེཀདིཝསཾ ཨཉྙཏརཾ གཱམཾ གཙྪནྟོ དྭེ སཱཊཀེ ནིཝཱསེཏྭཱ མཧནྟཾ ཨཊཝིཾཔཱཔུཎི, ཏདེཝཾ གཙྪནྟཾ དིསྭཱ ཨེཏསྶ ཝཏྠཾ གཎྷིསྶཱམཱིཏི ཨེཀོ ཙོརོ ཨནུབནྡྷི, སོ དཱུརཏོཝ ཨཱགཙྪནྟཾ ཙོརཾ དིསྭཱ ཙིནྟེསི, ཨཧམེཏསྨཱ པལཱཡིཏུཾ ཝཱ ཏེན སདྡྷིཾཡུཛ྄ཛྷིཏུཾ ཝཱ ན སཀྐོམི, ཨཡམཱགནྟྭཱ ཨཝསྶཾ ཨནིཙྪནྟསྶཱཔི མེ ཝཏྠཾ གཎྷིསྶཏི. མཡཱཔིསྶ ནིརཏྠཀེན ཧརིཏུཾ ན སཀྐཱ, དཱནཝསེནསྶ དསྶཱམཱིཏི སནྣིཊྛཱན མཀཱསི, ཨཐ ཙོརོ ཨཱགནྟྭཱ ཝཏྠཀཾ པརཱམསི, ཨཐ སོ པུརིསོ ཙིཏྟཾ པསཱདེཏྭཱ ཨིམཾ མམ ཝཏྠདཱནཾ བྷཝབྷོགསུཁཏྠཱཡ པཙྩཡོ ཧོཏཱུཏི ཝཏྠཾ དཏྭཱ དུཙྪཱདིཏཏྟཱ མཧཱམགྒཾ པཧཱཡ ཨཉྙེན ཛངྒྷཱམགྒེན གཙྪནྟོ ཨཱསིཝིསེན དཊྛོ ཀཱལཾ ཀཏྭཱ ཧིམཝནྟཔྤདེསེ ¶ དྭཱདསཡོཛནིཀེ ཀནཀཝིམཱནེ ནེཀཙྪརཱསཧསྶཔརིཝུཏོ ནིབྦཏྟི. ཝིམཱནཾ པནསྶ པརིཝཱརེཏྭཱ ཏིཡོཛནིཀེ ཋཱནེ ཀཔྤརུཀྑཱ ནིབྦཏྟིཾསུ, སོ མཧནྟཾ དིབྦསམྤཏྟིཾ དིསྭཱ སོམནསྶཾ པཝེདེནྟོ ཨཱཧ.

༡.

པརིཎཱམིཏམཏྟེན, དཱནསྶ སཀསནྟཀཾ;

དདཱཏི ཝིཔུལཾ བྷོགཾ, དིབྦམིསྶརིཡཾ ཝརཾ.

༢.

དྭཱདསཡོཛནུབྦེདྷཾ, དུདྡིཀྑཾ ཙཀྑུམཱུསནཾ;

ཀཱུཊཱ གཱརཝརུཔེཏཾ, སབྦསོཝཎྞཡཾ སུབྷཾ.

༣.

མམ པུཉྙེན ནིབྦཏྟཾ, ནེཀརཱགདྡྷཛཱཀུལཾ,

ཏཐེཝ པརིསུདྡྷེཧི, ཝིཏཱནེཧི ཙ ལངྐཏཾ.

༤.

པཱསཱདཔརིཡནྟམྷི, དིབྦཝཏྠཱནི ལམྦརེ;

ཝཱཏེརིཏཱ ཏེ སོབྷནྟི, ཨཝ྄ཧེནྟཱཝ སུདྷཱསིནོ.

༥.

པཱསཱདསྶ སམནྟཱ མེ, བྷཱུམིབྷཱགེ ཏིཡོཛནེ;

ཨིཙྪིཏིཙྪིཏདཱཏཱརོ, ཛཱཏཱསུཾ སུརཔཱདཔཱ.

༦.

ཏཏྠ ནཙྩེཧི གཱིཏེཧི, ཝཱདེཧི ཏུརིཡེཧི ཙ;

ནེ ཀཙྪརཱསཧསྶེཧི, མོདཱམི བྷཝནེ མམ.

༧.

ན སམྨཱ དིནྣཝཏྠསྶ, ཨཀྑེཏྟེ ཕལམཱི དིསཾ;

ཁེཏྟེ སམྨཱ དདནྟསྶ, ཀོ ཕལཾ ཝཎྞཡིསྶཏཱིཏི.

༨.

ཨེཝཾ ཝིདྷམྤི ཀུསལཾ མནུཛོ ཀརིཏྭཱ,

པཔྤོཏི དིབྦཝིབྷཝཾ མུནིཝཎྞནཱིཡཾ;

མནྟྭཱན བྷོ དདཐ དཱནཝརཾ སུསཱིལེ,

སདྡྷཱཡ སུདྡྷམནསཱསྶ ཝིསེསབྷཱགཱིཏི.

ཨཉྙཏརམནུསྶསྶ ཝཏྠུཾ དུཏིཡཾ.

༡༣. ཝིསམལོམཀུམཱརསྶ ཝཏྠུམྷི ཨཡམཱནུཔུབྦཱིཀཐཱ

ཨཏཱིཏེ ¶ ཀིར ཨིམསྨིཾ ཛམྦུདཱིཔེ ཀསྶཔོ ནཱམ སམྨཱསམྦུདྡྷོ པཱརམིཡོ པཱུརེཏྭཱ སབྦཉྙུཏཾ པཏྟོ ལོཀསྶ དུཀྑཱཔནུདོ སུཁཱཝཧོ པཊིཝསཏི ལོཀཾ ནིབྦཱཎམཧཱནགརཝརེ པརིཔཱུརེནྟོ. ཏསྨིཾ སམཡེ ཨཉྙཏརོ པུརིསོ སཏྠུ དྷམྨདེསནཾ སུཏྭཱ པསནྣོ བྷིཀྑུསངྒྷསྶ དཱནཾ དེནྟོ སཱིལཾ རཀྑནྟོ ཨུཔོསཐཀམྨཾ ཀརོནྟོ ནཱནཱཝིདྷཱནི པུཉྙཀམྨཱནི ཀཏྭཱ སུཏྟཔྤབུདྡྷོཝིཡ གནྟྭཱ དེཝལོཀེ ནིབྦཏྟི སབྦརཏནམཡེ དིབྦཝིདྷཱནེ དེཝཙྪརཱསཧསྶཔརིཝུཏོ. ཏཏྠ ཡཱཝཏཱཡུཀཾ ཋཏྭཱ ཏཏོ ཙུཏོ ཨམྷཱཀཾ བྷགཝཏི པརིནིབྦུཏེ ཛམྦུདཱིཔེ པཱཊལིཔུཏྟནགརེ ཨཱཎཱཙཀྐཝཏྟིདྷམྨཱསོཀམཧཱནརིནྡསྶ ཨགྒམཧེསིཡཱ ཀུཙྪིམྷི ནིབྦཏྟི. ཏསྶ ནཱམཾ ཀརོནྟོ སཱིསེ ལོམཾ ཝིསམཾ ཧུཏྭཱ ཛཱཏཏྠཱ ཝིསམལོམཀུམཱརོཏི སཉྫཱནིཾསུ. སོ ཀམེན ཝིཉྙུཏཾ པཏྟོ བལསམྤནྣོ ཨཧོསི. མཧཱཐཱམོ ཨབྷིརཱུཔོཙ ཨཧོསི. དསྶནཱིཡོ པཱསཱདིཀོ ཡསཔརིཝཱརསམྤནྣོ པཊིཝསཏི. ཏཏོ ཨཔརེན སམཡེན དྷམྨཱསོཀམཧཱནརིནྡོ ཙཏུརཱསཱིཏིསཧསྶརཱཛཔརིཝུཏོ ཨནནྟབལཝཱཧནོ ཀཱི ལཱ༹ པ རོ ཧིམཝནྟཾ གནྟྭཱ ཡཐཱབྷིརནྟཾ ཀཱིལི༹ཏྭཱ ཨཱགཙྪནྟོ ཙནྡབྷཱགཾ ནཱམ གངྒཾ སམྤཱཔུཎི. སཱ པན ཡོཛནཝིཏྠཏཱ ཏིགཱཝུཏགམྦྷཱིརཱ ཨཧོསི. ཏདཱ སཱ ཨདྷུནཱགཏེཧི ཨོགྷེཧི མཧཱཕེཎསམཱཀུལཱ བཧཱུམིཡོ ཨུབྷོཀཱུལེ ཨུཏྟརནྟཱི མཧཱཝེགཱ [མཧཱཝེགཱགཙྪནྟཱི ཨིཏིསབྦཏྠ] གཙྪནྟི. ཏདཱ རཱཛཱ གངྒཾ དིསྭཱ ཀོ ནཱམེཏྠ པུརིསོ ཨེཝཾཝིདྷཾ མཧཱགངྒཾ ཏརིཏུཾ སམཏྠོ བྷཝིསྶཏཱིཏི ཨཱཧ. ཏཾ སུཏྭཱ ཝིསམལོམ ཀུམཱརོ ཨཱགནྟྭཱ ཝནྡིཏྭཱ ཨཧཾ དེཝ གངྒཾ ཏརིཏྭཱ གནྟུཉྩ ཨཱགནྟུཉྩ སཀྐོམཱིཏི ཨཱཧ. རཱཛཱ སཱདྷཱུཏི སམྤཊིཙྪི. ཨཐ ཀུམཱརོ གཱལ༹ྷཾ ནིཝཱསེཏྭཱ མཀརདནྟིཡཱ ¶ ཀེསེ བནྡྷིཏྭཱ གངྒཱཀཱུལེ ཋིཏོ ཨཊྛཱརསཧཏྠཾ ཨབྦྷུགྒནྟྭཱ ཨུསབྷམཏྟཊྛཱནེ པཏིཏྭཱ ཏརིཏུ མཱརབྷི. ཏཏོ ཙཎྜསོཏཾ ཚིནྡིཏྭཱ ཏརནྟོ གམནཱ གམནཀཱལེ གཎྷནཏྠཱཡ ཨཱགཏེ ཙཎྜསུཾསུམཱརེ པཱཎིནཱ པཧརིཏྭཱ ཙུཎྞཝིཙུཎྞཾ ཀརོནྟོ ཝཱིསསཏཾ མཱརེཏྭཱ ཨུཏྟཱརེཏྭཱ ཏལམུགྒམྨ རཱཛཱནཾ ཝནྡིཏྭཱ ཨཊྛཱསི. རཱཛཱ ཏཾ ཀཱརཎཾ དིསྭཱ བྷཡཔྤཏྟོ ཨེསོ ཁོ མཾ མཱརེཏྭཱ རཛྫམྤི གཧིཏུཾ སམཏྠོ. ཨེཏཾ མཱརེཏུཾ ཝཊྚཏཱིཏི ཙིནྟེཏྭཱ ནགརཾ སམྤཏྟོ ཀུམཱརཾ པཀྐོསཱཔེཏྭཱ ཨམཙྩེ ཨཱཧ. ཨིམཾ བྷཎེ བནྡྷནཱགཱརེ ཀརོཐཱཏི. ཏེ ཏཐཱ ཀརིཾསུ, ཨཐསྶ བནྡྷནཱགཱརེ ཝསནྟསྶ ཙཏྟཱརོ མཱསཱ ཨཏིཀྐནྟཱ. ཏཏོ རཱཛཱ ཙཏུམཱསཙྩཡེན དཱིགྷཏོ སཊྛིཧཏྠཔྤམཱཎེ སཊྛིཝེལུ༹ཀལཱཔེ ཨཱཧརཱཔེཏྭཱ གཎྛིཡོ སོདྷཱཔེཏྭཱ ཨནྟོ ཨཡོསཱརཾ པཱུརེཏྭཱ རཱཛངྒཎེ ཋཔཱཔེཏྭཱ ཝིསམལོམཀུམཱརཾ བནྡྷནཱགཱརཏོ ཨཱཧཱརཱཔེཏྭཱ [ཨཱཎཱཔེཏྭཱ ཨིཏིསབྦཏྠ] ཨམཙྩེ ཨེཝམཱཧ. བྷཎེ སྭཱཡཾ ཀུམཱརོ ཨིམིནཱ ཁགྒེན ཨིམེ ཝེལུ༹ཀལཱཔེ ཙཏུརངྒུལཾ ཀཏྭཱ ཚིནྡཏུ. ནོ ཙེ ཚིནྡིཏུཾ སཀྐོཏི. ཏཾ མཱརེཐཱཏི ཨཱཧ, ཏཾ སུཏྭཱ ཀུམཱརོ ཨཧཾ བནྡྷནཱགཱརེ ཙི ར ཝུ ཏྠོ ཛིགྷཙྪཱཔཱིལི༹ཏོ ཨཱཧཱརེན ཀིལམིཾ, ཡནྣཱུནཱཧཾ ཨཱཧཱརཾ བྷུཉྩིཏྭཱ ཚིནྡེཡྻནྟི. ཏེ ནཏྠི དཱནི ཏུཡ྄ཧཾ ཨཱཧཱརནྟི ཨཱཧཾསུ. ཏེནཧི པོཀྑརཎིཡཱ པཱནཱིཡཾ པིཝིསྶཱམཱིཏི ཨཱཧ. ཏེ སཱདྷཱུཏི པོཀྑརཎིཾ ནེསུཾ. ཀུམཱརོ པོཀྑརཎིཾ ཨོཏརིཏྭཱ ནཧཱཡིཏྭཱ ནིམུགྒོ ཡཱཝདཏྠཾ ཀལལཾ བྷུཉྩིཏྭཱ པཱནཱིཡཾ པིཝིཏྭཱ ཨུཊྛཱཡ ཨསིཔཏྟཾ གཧེཏྭཱ མཧཱཛནཱནཾ [མཧཱཛནཱནཾཔསྶནྟམེཝ ཨིཏིསབྦཏྠ] པསྶནྟཱནམེཝ ཨཊྛཱསཱིཏིཧཏྠཊྛཱནཾ ཨཱཀཱསཾ ཨུལླངྒྷིཏྭཱ སབྦཝེལུ༹ཀལཱཔེ ཙཏུརངྒུལམཏྟེན ཁཎྜཱཁཎྜཾ ཀུརུམཱནོ ཨོཏརིཏྭཱ མཱུལེ ཐཱུལཨཡསལཱཀཾ པཏྭཱ ཀིཎཱིཏི སདྡཾ སུཏྭཱ ཨསིཔཏྟཾ ཝིསྶཛྫེཏྭཱ རོདམཱནོ ཨཊྛཱསི. ཏཏོ རཱཛཔུརིསེཧི ཀིམཏྟཾ རོདསཱིཏི ཝུཏྟེ ¶ ཨེཏྟཀཱནཾ པུརིསཱནམནྟརེ མཡ྄ཧཾ ཨེཀོཔི སུཧདོ ནཏྟི. སཙེ བྷཝེཡྻ, ཨིམེསཾ ཝེལུ༹ཀལཱཔཱནམནྟརེ ཨཡོ སཱརཾ ཨཏྠིབྷཱཝཾ ཀཐེཡྻ, ཨཧཾ པན ཛཱནམཱནོ ཨིམེ ཝེལུ༹ ཀལཱཔེ ཨངྒུལངྒུལེསུ ཚིནྡེཡྻནྟི ཨཱཧ. ཏཏོ རཱཛཱ ཀུམཱརེན ཀཏཀམྨཾ ཨོལོཀེཏྭཱ པསནྣོ ཨུཔརཱཛཊྛཱནཾ བཧུཉྩ ཝིབྷཝཾ དཱཔེསི, ཨེཝམསྶ བལསམྤཏྟིལཱབྷོ ནཱམ ན ཛཱཏིགོཏྟཀུལཔདེསཱདཱིནཾ བལཾ. ན པཱཎཱཏིཔཱཏཱདིདུཙྩརིཏཱནཾ བལཾ. ཀསྶེཏཾ བལནྟི. ཀསྶཔསམྨཱསམྦུདྡྷཀཱལེ བྷིཀྑུསངྒྷསྶ དིནྣདཱནཱདིསུཙརིཏཀམྨཝིཔཱཀཾ. ཏེན ཝུཏྟཾ.

༡.

ཀསྶཔསྶ མུནིནྡསྶ, ཀཱལེ ཨཉྙཏརོ ནརོ;

སམྦུདྡྷམུཔསཾཀམྨ, སུཏྭཱ དྷམྨཾ སུདེསིཏཾ.

༢.

པཊིལདྡྷསདྡྷོ ཧུཏྭཱ, སཱིལཝནྟཱན བྷིཀྑུནཾ;

མདྷུརནྣཔཱནེ པཙུརེ, ཨདཱསི སུམནོ ཏདཱ.

༣.

ཨདཱསི ཙཱིཝརེ པཏྟེ, ཏཐེཝ ཀཱཡབནྡྷནེ;

ཨདཱ ཁཱིརསལཱཀཉྩ, བཧཱུ ཀཏྟརཡཊྛིཡོ.

༤.

ཨདཱ སུཔསྶཡཾ དཱནཾ, མཉྩཔཱིཋཱདིཀཾ ཏཐཱ;

པཱཝཱར ཀམྦལཱདཱིནི, ཨདཱ སཱིཏནིཝཱརཎེ.

༥.

ཨདཱ བྷེསཛྫདཱནཱནི, ཨཱརོགྱཏྠཱཡ བྷིཀྑུནཾ;

ཨེཝཾ ནཱནཱཝིདྷཾ པུཉྙཾ, ཀཏྭཱན ཏིདིཝཾ གཏོ.

༦.

ཏཏྠ དིབྦཝིམཱནམྷི, ཨུཔྤནྣོ སོ མཧིདྡྷིཀོ;

དེཝཙྪརཱཔརིཝུཏོ, དེཝསེནཱཔུརཀྑཏོ.

༧.

དིབྦེཧི ནཙྩགཱིཏེཧི, དིབྦཝཱདིཏཏནྟིཧི;

མོདམཱནོ ཨནེཀེཧི, དིབྦསམྤཏྟིཡཱ སཧ.

༨.

ཡཱཝཏཱཡུཾ ཏཧིཾ ཋཏྭཱ, ཛམྦུདཱིཔེ མནོརམེ;

པུརེ པཱཊལིཔུཏྟམྷི, དྷམྨཱསོཀསྶ རཱཛིནོ.

༩.

པུཏྟོ ¶ ཧུཏྭཱན ནིབྦཏྟི, མཧཱཐཱམོ མཧཱབལོ;

མཧཱཡསོ མཧཱབྷོགོ, ཨཱསི བུདྡྷཱདིམཱམཀོ.

༡༠.

ཀཱཏབྦཾ ཀུསལཾ ཏསྨཱ, བྷཝསམྤཏྟི མིཙྪཏཱ;

པཱལེཏབྦ མཐོ སཱིལཾ, བྷཱཝེཏབྦཉྩ བྷཱཝནནྟི.

ཏཏོ ཀུམཱརོ ཨུཔརཱཛཊྛཱནཾ ལབྷིཏྭཱ སམྤཏྟིཾཨནུབྷཝམཱནོ མོགྒལིཔུཏྟཏིསྶཏྠེརམཱདིཾ ཀཏྭཱ མཧཱབྷིཀྑུསངྒྷསྶ ཙཱིཝརཔིཎྜཔཱཏསེནཱསནགིལཱནཔཙྩཡདཱནཱ དིཝསེན སཀྐཱརཾ ཀཏྭཱ སཱིལཾ རཀྑིཏྭཱ ཨུཔོསཐཀམྨཾ ཀཏྭཱ ཨཱཡུཔརིཡོསཱནེ ཡཐཱཀམྨཾ གཏོཏི.

༡༡.

ཨེཝཾཝིདྷཾ སུཙརིཏཾ སུམནོ ཀརིཏྭཱ,

བྷཱགིསྶ ནེཀཝིབྷཝསྶ བྷཝཱབྷཝེསུ;

ཏུམྷེཔི བྷོ སུཙརིཏཾ ཝིབྷཝཱནུརཱུཔཾ,

ཀཏྭཱན ནིབྦུཏིཔདཾ ཀརགཾ ཀརོཐཱཏི.

ཝིསམལོམཀུམཱརསྶ ཝཏྠུཾ ཏཏིཡཾ.

༡༤. ཀཉྩནདེཝིཡཱ ཝཏྠུམྷི ཨཡམཱནུཔུབྦཱིཀཐཱ

ཛམྦུདཱིཔེ ཀིར དེཝཔུཏྟནགརཾ ནཱམ དསྶནཱིཡཾ ཨེཀཾ ནགརཾ ཨཧོསི. ཏསྨིཾ སམཡེ མནུསྶཱ ཡེབྷུཡྻེན པཏྟམཧཾ ནཱམ པཱུཛཾ ཀརོནྟི, བྷགཝཏཱ པརིབྷུཏྟཔཏྟཾ གཧེཏྭཱ ཀཏཱནེཀཔཱུཛཱཝིདྷཱནཱ ཨུསྶཝཾ ཀརོནྟི. ཏཾ པཏྟམཧནྟི ཝུཙྩཏི. ཏསྨིཾ སམཡེ དེཝཔུཏྟནགརེ རཱཛཱ སབྦརཏནམཡཾ རཐཾ སབྦཱལངྐཱརེཧི ཨལངྐཱརཱཔེཏྭཱ ཀུམུདཔཏྟཝཎྞེ ཙཏྟཱརོ སིནྡྷཝེ ཡོཛེཏྭཱ སུསིཀྑིཏསིཔྤཱཙརིཡེཧི སཏྟརཏནཔརིནིཊྛིཏེ ཨསཱིཏིཧཏྠཝེལ༹གྒེ སཏྠུནཱ པརིབྷུཏྟཾ སེལམཡཔཏྟཾ མུཏྟཱཛཱལཱདཱིཧི ཨལངྐརིཏྭཱ ཝེལ༹གྒཾ ཨཱརོཔེཏྭཱ ཝེལུ༹ཾ ¶ རཐེ ཋཔཱཔེཏྭཱ ནགརཾ དེཝནགརཾ ཝིཡ ཨལངྐརིཏྭཱ དྷཛཔཏཱཀཱདཡོ ཨུསྶཱཔེཏྭཱ ཏོརཎགྒྷ ཀཔནྟིཡོཙ པུཎྞགྷཊདཱིཔམཱལཱདཡོཙ པཏིཊྛཱཔེཏྭཱ ཨནེཀེཧི པཱུཛཱཝིདྷཱནེཧི ནགརཾ པདཀྑིཎཾ ཀཱརེཏྭཱ ནགརམཛ྄ཛྷེ སུསཛྫིཏརཏནམཎྜཔེ པཏྟདྷཱཏུཾ ཋཔེཏྭཱ སཏྟམེ དིཝསེ མཧཱདྷམྨསཝཎཾ ཀཱརཱཔེསི. ཏདཱ ཏསྨིཾ ཛནཔདེ བཧཱུ མནུསྶཱཙ དེཝཏཱཙ ཡཀྑརཀྑསནཱགསུཔཎྞཱདཡོཙ མནུསྶཝེསེན ཡེབྷུཡྻེན ཏཾ སམཱགམཾ ཨོཏརནྟི, ཨེཝམཙྪརིཡཾ ཏཾ པཱུཛཱཝིདྷཱནཾ ཨཧོསི.

ཏདཱ ཨེཀོ ནཱགརཱཛཱ ཨུཏྟམརཱུཔདྷརཾ ཨགཏཔུབྦཔུརིསཾ ཨེཀཾ ཀུམཱརིཀཾ དྷམྨཔརིསནྟརེ ནིསིནྣཾ དིསྭཱ ཏསྶཱ པཊིབདྡྷཙིཏྟོ ཨནེཀཱཀཱརེཧི ཏཾ ཡཱ ཙི ཏྭཱ ཏསྶཱ ཨལདྡྷམཱནོ ཀུཛ྄ཛྷིཏྭཱ ནཱསཱཝཱཏཾ ཝིསྶཛྫེསི ཨིམཾ མཱརེསྶཱམཱིཏི. ཏཾ ཏསྶཱ སདྡྷཱབལེན ཀིཉྩི ཨུཔདྡཝཾ ཀཱཏུཾ སམཏྠོ ནཱཧོསི. ཨཐསྶཱ ནཱགོ པཱདཏོ པཊྛཱཡ ཡཱཝསཀལསརཱིརཾ བྷོགེན ཝེཋེཏྭཱ སཱིསེ ཕཎཾ ཀཏྭཱ བྷཱཡཱཔེནྟོ ཨཊྛཱསི. ཨནཉྙཝིཧིཏཱཡ ཏཱཡ དྷམྨསཝཎབལེན ཨཎུམཏྟམྤི དུཀྑཾ ནཱཧོསི. པབྷཱཏཱཡ རཏྟིཡཱ ཏཾ དིསྭཱ མནུསྶཱ ཀིམེཏནྟི ཀཱརཎཾ པུཙྪིཾསུ, སཱཔི ཏེསཾ ཀཐེཏྭཱ ཨེཝཾ སཙྩཀིརིཡམཀཱསི. ཏཐཱཧི.

༡.

བྲཧྨཙཱརཱི ཨཧོསཱཧཾ, སཉྫཱཏཱ ཨིདྷ མཱནུསེ;

ཏེན སཙྩེན མཾ ནཱགོ, ཁིཔྤམེཝ པམུཉྩཏུ.

༢.

ཀཱམཱཏུརསྶ ནཱགསྶ, ནོཀཱསམཀརིཾཡཏོ;

ཏེན སཙྩེན མཾ ནཱགོ, ཁིཔྤམེཝ མུཉྩཏུ.

༣.

ཝིསཝཱཏེན ཁིཏྟསྶ, ཀུཔིཏསྶོརགསྶཧཾ;

ཨཀུདྡྷཱ ཏེན སཙྩེན, སོ མཾ ཁིཔྤཾ པམུཉྩཏུ.

༤.

སདྡྷམྨཾ སུཎམཱནཱཧཾ, གརུགཱརཝབྷཏྟིཡཱ;

ཨསྶོསིཾ ཏེན སཙྩེན, ཁིཔྤཾ ནཱགོ པམུཉྩཏུ.

༥.

ཨཀྑརཾཝཱ ¶ པདཾཝཱཔི, ཨཝིནཱསེཏྭཱཝ ཨཱདིཏོ;

ཨསྶོསིཾ ཏེན སཙྩེན, ཁིཔྤཾ ནཱགོ པམུཉྩཏཱུཏི.

སཙྩཀིརིཡཱཝསཱནེ ནཱགརཱཛཱ ཏསྶཱ ཨཏཱིཝ པསནྣོ བྷོགཾ ཝིནིཝེཋེཏྭཱ ཕཎསཏཾ མཱཔེཏྭཱ ཏཾ ཕཎགབྦྷེ ནིསཱིདཱཔེཏྭཱ བཧཱུཧི ནཱགམཱནཝཀེཧི སདྡྷིཾ ཨུདཀཔཱུཛཾ ནཱམ པཱུཛ མཀཱསི, ཏཾ དིསྭཱ བཧཱུ ནགརཝཱསིནོ ཨཙྪརིཡབྦྷུཏཛཱཏཱ ཨཊྛཱརསཀོཊིདྷནེན པཱུཛ མཀཾསུ. ཏཐཱཧི.

༦.

ནཏྠི སདྡྷཱསམོ ལོཀེ, སུཧདོ སབྦཀཱམདོ;

པསྶཐསྶཱ བལཾ སདྡྷཱ, པཱུཛེནྟེཝཾ ནརོ རགཱ.

༧.

ཨིདྷ ལོཀེཝ སཱལཏྠ, བྷཝབྷོག མནཔྤཀཾ;

ཏསྨཱ སདྡྷེན ཀཱཏབྦཾ, རཏནཏྟཡགཱརཝནྟི.

ཨཐེཝཾ སཱ པཊིལདྡྷམཧཱཝིབྷཝཱ ཡཱཝཛཱིཝཾ ཀོམཱརིཡ བྲཧྨཙཱརིཎཱི ཧུཏྭཱ ཨཱཡུཔརིཡོསཱནེ ཀཱལཾ ཀཏྭཱ ཏསྨིཾཡེཝ ནགརེ རཉྙོ ཨགྒམཧེསིཡཱ ཀུཙྪིམྷི པཊིསནྡྷིཾ གཎྷིཏྭཱ དསམཱསཙྩཡེན མཱཏུཀུཙྪིཏོ ནིཀྑམི. ནིཀྑནྟདིཝསེ པནསྶཱ སཀལདེཝཔུཏྟནགརེ རཏནཝསྶཾ ཝསྶི. ཏེནསྶཱ ཀཉྫནདེཝཱིཏི ནཱམཾ ཀརིཾསུ. སམནྟཔཱསཱདིཀཱ ཨཧོསི. ཨབྷིརཱུཔཱ དེཝཙྪརཔཊིབྷཱགཱ. མུཁཏོ ཨུཔྤལགནྡྷོ ཝཱཡཏི. སརཱིརཏོ ཙནྡནགནྡྷོ ཝཱཡཏི. སཀལསརཱིརཏོ བཱལསུརིཡོ ཝིཡ རཾསིཡོ ནིཙྪཱརེནྟཱི ཙཏུརཏནགབྦྷེ པདཱིཔཀིཙྩཾ ནཱམ ནཏྠི. སབྦོ གབྦྷོ སརཱིརཱ ལོཀེན ཨེཀོ བྷཱསོ ཧོཏི, ཏསྶཱ རཱུཔསམྤཏྟི སཀལཛམྦུདཱིཔེ པཱཀཊཱ ཨཧོསི. ཏཏོ སཀལཛམྦུདཱིཔཝཱསཱི རཱཛཱནོ ཏསྶཱ ཨཏྠཱཡ པིཏུརཉྙོ པཎྞཱཀཱརཱནི པཧིཎིཾསུ. སཱ པན པཉྩཀཱམེ ཨནནུལིཏྟཱ པིཏརཾ ཨནུཛཱནཱཔེཏྭཱ བྷིཀྑུནཱུ པསྶཡཾ གནྟྭཱ པབྦཛིཏྭཱ ཝིཔསྶནཾ ཝཌྜྷེཏྭཱ སཧ པཊིསམྦྷིདཱཧི ཨརཧཏྟཾ པཱཔུཎཱིཏི.

༨.

སུཏྭཱན ¶ སཱདརཝསེན ཀུམཱརིཀེཝཾ;

དྷམྨཉྷི སཱིལམམལཾ པརིཔཱལཡནྟཱི;

ལདྡྷཱན ནེཀཝིབྷཝཾ ཝིབྷཝཾ པཡཱཏཱ,

མཱ བྷོ པམཛྫཐ སདཱ ཀུསལཔྤཡོགེཏི.

ཀཉྩནདེཝིཡཱ ཝཏྠུཾ ཙཏུཏྠཾ.

༡༥. བྱགྒྷསྶ ཝཏྠུམྷི ཨཡམཱནུཔུབྦཱིཀཐཱ

ཛམྦུདཱིཔེ ཙཱུལརཊྛཱ སནྣེ བཱརཱཎསཱིནགརེ ཨེཀཾ པཾསུཔབྦཏཾ ཝིནིཝིཛ྄ཛྷིཏྭཱ མཧཱམགྒོ ཧོཏི, ཏཏྠ ཝེམཛ྄ཛྷེ ཨེཀོ བྱགྒྷོ ཨཏྟནོ ཨནྡྷཔིཏརཾ པབྦཏགུཧཱཡཾ ཀཏྭཱ པོསེནྟོ ཝསཏི. ཏསྶེཝ པབྦཏསྶ ཝནདྭཱརེ ཏུཎྜིལོ ནཱམ ཨེཀོ སུཝཔོཏཀོ རུཀྑསྨིཾ ཝསཏི. ཏེ ཨུབྷོཔི ཨཉྙམཉྙཾ པིཡསཧཱཡཱ ཨཧེསུཾ, ཏསྨིཾ སམཡེ པཙྩནྟགཱམཝཱསཱི ཨེཀོ མནུསྶོ ཨཏྟནོ མཱཏུགཱམེན སདྡྷིཾ ཀལཧཾ ཀཏྭཱ བཱརཱཎསིཾ གཙྪནྟོ ཏཾ ཝནདྭཱརཾ སམྤཱཔུཎི. ཨཐ སུཝཔོཏཀོ པརིཧཱིནཏྟབྷཱཝཾ དུཀྑིཏཾ ཏཾ དིསྭཱ ཀམྤམཱནཧདཡོ ཏཾ པཀྐོསིཏྭཱ བྷོ ཀུཧིཾ གཙྪསཱིཏི ཨཱཧ, ཏེན པརཁཎྜཾ གཙྪཱམཱིཏི ཝུཏྟེ ཏུཎྜིལོ བྷོ ཨིམསྨིཾ ཝནཁཎྜམཛ྄ཛྷེ ཨེཀོ བྱགྒྷོ ཝསཏི. ཀཀྑལོ ཕརུསོ སམྤཏྟསམྤཏྟེ མཱརེཏྭཱ ཁཱདཏི. མཱ ཏྭཾ ཏེན གཙྪཱཏི ཨཱཧ. སྭཱཡཾ དུབྦྷགོ མནུསྶོ ཧིཏཀཱམསྶ ཏསྶ ཝཙནཾ ཨནཱདིཡིཏྭཱ གཙྪཱམེཝཱཏི ཨཱཧ. ཏུཎྜིལོ ཏེནཧི སམྨ ཡདི ཨནིཝཏྟམཱནོ གཙྪསི. ཨེསོ བྱགྒྷོ མམ སཧཱཡོ. མེ ཝཙནཾ ཏཝ སནྟིཀཱ སུཏྭཱ ན གཎྷཱཏཱིཏི. ཏསྶ ཏཾ ཨནཱདིཡནྟོ སོ སུཝརཱཛེ པདུཊྛཙིཏྟོ མུགྒརེན པཧརིཏྭཱ མཱརེཏྭཱ ཨརཎིཾ ཨགྒིཾ ཀཏྭཱ མཾསཾ ཁཱདི. ཨསཔྤུརིསསཾསགྒོ ནཱམེ ས ཨིདྷ ལོཀཔརལོཀེསུ དུཀྑཱཝཧོཡེཝ. ཏཐཱཧི.

༡.

མཡཱ ¶ ཀཏཾ མཡ྄ཧམིདཾ, ཨིཏི ཝེསྶཱནརཾ ནརོ;

སམཱལིངྒཏི སཔྤེམོ, དཧཏེཝསྶ ཝིགྒཧཾ.

༢.

མདྷུཁཱིརཱདིདཱནེན, པེམསཱ པརིཔཱལིཏོ;

སོརགོ ཀུཔིཏོཝསྶ, ཌསཏེཝསྶ ཝིགྒཧཾ.

༣.

ཨེཝཾ ནིཧཱིནཛཙྩེན, པཱཔེན ཨཀཏཉྙུནཱ;

ནརཱ དྷམེན དཱིནེན, ཀཏོཔི ཁཎསངྒམོ.

༤.

ཨསཱདྷུཀོ ཨཡཾཏེཝཾ, ཛཱནམཱནེན ཛནྟུནཱ;

མུཧུཏྟམྤི ན ཀཱཏབྦོ, སངྒམོ སོ ཨནཏྠདོཏི.

ཏཏོ སོ ཨསཔྤུརིསོ མཾསཾ ཁཱདིཏྭཱ གཙྪནྟོ ཝནཁཎྜམཛ྄ཛྷཾ སམྤཱཔུཎི. ཨཐ བྱགྒྷོ ཏཾ དིསྭཱ མཧཱནཱདཾ ཀརོནྟོ གཧཎཏྠཱཡ ཨུཊྛཱསི. སོ བྱགྒྷཾ དིསྭཱ བྷཡཔྤཏྟོ ཏུཎྜིལསྶ ཝཙནཾ སརིཏྭཱ ཨཧཾ བྷོ ཏཝ སཧཱཡཏུཎྜིལསྶ སནྟིཀཱ ཨཱགཏོམྷཱིཏི ཨཱཧ, ཏཾ སུཏྭཱ བྱགྒྷོ ཨཏྟམནོ ཨེཧི སམྨཱཏི ཏཾ པཀྐོསིཏྭཱ ཨཏྟནོ ཝསནཊྛཱནཾ ནེཏྭཱ ཁཱདིཏབྦཱཧཱརེན ཏཾ སནྟཔྤེཏྭཱ པིཏུསནྟིཀེ ནིསཱིདཱཔེཏྭཱ པུན ཝནཁཎྜ མགམཱསི. ཨཐསྶ པིཏཱ པུཏྟསྶ གཏཀཱལེ ཏེན སདྡྷིཾ སལླཔནྟོ ཏསྶ ཝཙནཱནུསཱརེན ཏུཎྜིལཾ མཱརེཏྭཱ ཁཱདིཏབྷཱཝཾ ཨཉྙཱསི. ཏཏོ སོ པུཏྟསྶ ཨཱགཏཀཱལེ ཏཝ སཧཱཡོ ཏེན མཱརིཏོཏི ཨཱཧ. ཏཾ སུཏྭཱ བྱགྒྷོ ཨནཏྟམནོ ཝེགེན ཏསྶ ཝསནཊྛཱནཾ གནྟྭཱ སམྨ ཏུཎྜིལཱཏི སདྡཾ ཀཏྭཱ ཨཔསྶནྟོ ལུཉྩིཏཔཏྟཾཙསྶ དིསྭཱ ནིསྶཾསཡཾ ཏེན མཱརིཏོ མེ སཧཱཡོཏི སོཙནྟོ པརིདེཝནྟོ ཨཱགཉྪི. ཨཐ སོ ཨསཔྤུརིསོ ཏསྨིཾ ཏཏྠ གཏེ ཏསྶ པིཏརཾ པཱསཱཎེན པཧརིཏྭཱ མཱརེཏྭཱ བྱགྒྷཾཙ དཱནི མཱརེསྶཱམཱིཏི བྱགྒྷཱགམནམགྒཾ ཨོལོཀེནྟོ ནིལཱིནོ ཨཊྛཱསི. ཏསྨིཾ ཁཎེ བྱགྒྷོཔི ཨཱགཉྪི. སོ ཏསྶཱ གཏཀཱལེ ཏསྶ ཏེཛེན བྷཱིཏོ གནྟྭཱ ¶ ཛཱིཝིཏཾ མེ སཱམི དེཧཱིཏི པཱདམཱུལེ ཨུརེན ནིཔཛྫི, བྱགྒྷོ པན ཏེན ཀཏཀམྨཾ དིསྭཱ ཏསྨིཾ ཙིཏྟཾ ནིབྦཱཔེཏྭཱ མམ སཧཱཡསྶ སཱསནམཱདཱཡཱགཏསྶ དུབྦྷིཏུཾ ན ཡུཏྟནྟི ཙིནྟེནྟོ ཏཾ སམསྶཱསེཏྭཱ གཙྪ སམྨཱཏི སུཁཾ པེསེསི. ཨེཝཉྷི སཔྤུརིསསམཱགམོ ནཱམ ཨིདྷ ལོཀཔརལོཀེསུ སུཁཱཝཧོཡེཝ, ཝུཏྟཾཧི.

༥.

སབྦྷིརེཝ སམཱསེཐ, སབྦྷི ཀུབྦེཐ སནྠཝཾ;

སབྦཏྠ སནྠཝོ ཏེན, སེཡྻོ ཧོཏི ན པཱཔིཡོ.

༦.

སུཁཱཝཧོ དུཀྑནུདོ, སདཱ སབྦྷི སམཱགམོ;

ཏསྨཱ སཔྤུརིསེཧེཝ, སངྒམོ ཧོཏུ ཛནྟུནཾ.

ཏཏོ སོ བྱགྒྷོ ཏེན མེཏྟཙིཏྟཱནུབྷཱཝེན ཀཱལཾ ཀཏྭཱ སགྒེ ནིབྦཏྟོཏི.

༧.

ཨེཝཾཝིདྷོཔི ཕརུསོ པརམཾསབྷོཛཱི;

བྱགྒྷོ དཡཱཡུཔགཏོ སུགཏིཾ སུམེདྷོ;

ཏསྨཱ ཀརོཐ ཀརུཎཾ སཏཏཾ ཛནཱནཾ,

ཏཾ ཝོ དདཱཏི ཝིབྷཝཉྩ བྷཝེསུ བྷོགནྟི.

བྱགྒྷསྶ ཝཏྠུཾ པཉྩམཾ.

༡༦. ཕལཀཁཎྜདིནྣསྶ ཝཏྠུམྷི ཨཡམཱནུཔུབྦཱིཀཐཱ

སཱཝཏྠིཡཾ ཀིརེཀོ མནུསྶོ ཨུཏྟརཱཔཐཾ གཙྪཱམཱིཏི ཨདྡྷཱནམགྒཔཊིཔནྣོ གིམྷཱནམཱསེ མཛ྄ཛྷཎྷེ བཧལཱཏཔེན ཀིལནྟོ ཧུཏྭཱ རུཀྑཙྪཱཡཾ པཝིསིཏྭཱ ཏམྦུལཾ ཁཱདནྟོ ཕལཀེ ནིསཱིདི. ཨཐ ཨུཏྟརཱཔཐེནཱགཙྪཱནྟོ ཨེཀོ ཏཐེཝ ཨཱཏཔེན ཀིལནྟོ ཨཱགནྟྭཱ པུརིམསྶ སནྟིཀེ ནིསཱིདིཏྭཱ བྷོ པཱནཱིཡཾ ཨཏྠཱིཏི པུཙྪི. ཨིཏརོ པཱནཱིཡཾ ནཏྠཱིཏི ཨཱཧ. ཨཐསྶ ¶ སོ མཡ྄ཧམྤི བྷོ ཏམྦུལཾ དེཧི པིཔཱསིཏོམྷིཏི ཝཏྭཱཔི ན ལབྷི. ཙཏུཀཧཱཔཎེན ཨེཀཾ ཏམྦུལཔཎྞཾ ཀིཎིཏྭཱ ལདྡྷོ ཏཏྠེཝ ནིསཱིདིཏྭཱ ཁཱདིཏྭཱ པིཔཱསཾ ཝིནོདེཏྭཱ ཏེན ཨུཔཀཱརེན ཏསྶ སིནེཧཾ ཀཏྭཱ ཨཏྟནོ གམནཊྛཱན མགམཱསི, ཨཐཱ པརབྷཱགེ སོ པཊྚནཾ གནྟྭཱ ནཱཝཱཡ ཝཎིཛྫཏྠཱཡ གཙྪནྟོ སམུདྡམཛ྄ཛྷཾ པཱཔུཎི. ཏཏོ སཏྟམེ དིཝསེ ནཱཝཱ བྷིཛྫི. མནུསྶཱ མཙྪཀཙྪཔཱནཾ བྷཀྑཱ ཛཱཏཱ. སོ ཨེཝ པུརིསོ ཨརོགོ ཧུཏྭཱ ཨེཀཾ ཕལཀཁཎྜཾ ཨུརེ ཀཏྭཱ སམུདྡཾ ཏརཏི. ཨཐེ ཏརོཔི ཏཐེཝ ནཱཝཱཡ བྷིནྣཱཡ སེསོ ཧུཏྭཱ སམུདྡཾ ཏརནྟོ པུརིམེན སམཱགམི. ཨཐ ཏེ སཏྟདིཝསཾ སམུདྡེ ཏརནྟཱ ཨཉྙམཉྙཾ སཉྫཱནིཾསུ. ཏེསུ ཀཧཱཔཎེ དཏྭཱ ཏམྦུལཾ གཧིཏོ ཨེཀཾ ཕལཀཁཎྜཾ ཨུརེ ཀཏྭཱ ཏརཏི. ཨིཏརསྶེཏཾ ནཏྠི. ཨཐ སོ ཀཧཱཔཎེ གཧེཏྭཱ དིནྣཏམྦུལམཏྟསྶོ པཀཱརཾ སརིཏྭཱ ཨཏྟནོ ཕལཀཁཎྜཾ ཏསྶ ཨདཱསི. སོ ཏསྨིཾ སཡིཏྭཱ ཏརནྟོ ཏཾ པཧཱཡ ཨགམཱསི, ཨཔརོ ཨནཱདྷཱརཀེན ཏརནྟོ ཨོསྶཊྛཝིརིཡོ ཨུདཀེ ཨོསཱིདིཏུམཱརཏི. ཏསྨིཾ ཁཎེ སམུདྡེ ཨདྷིཝཏྠཱ མཎིམེཁལཱ ནཱམ དེཝདྷཱིཏཱ ཨོསཱིདནྟཾ ཏཾ དིསྭཱ སཔྤུརིསོཏི ཏསྶ གུཎཱནུསྶརནྟཱི ཝེགེནཱ གནྟྭཱ ཏཾ ཨཏྟནོ ཨཱནུབྷཱཝེན སམུདྡཏཱིརཾ པཱཔེསི. ཨིཏརཾཔི སཱ ཨེཏསྶེཝ གུཎཱནུབྷཱཝེན ཏཱིརཾ པཱཔེསི. ཨཐ ཕལཀེནོཏིཎྞཔུརིསོ ཏཾ དིསྭཱ ཝིམྷིཏོ ཀཐཾ པུརཏོ ཨཧོསི སམྨཱཏི པུཙྪི. སོ ན ཛཱནཱམི. ཨཔིཙ ཁོ སུཁེནེཝ ཏཱིརཾ པཏྟོསྨཱིཏི ཨཱཧ. ཨཐ དེཝདྷཱིཏཱ དིསྶམཱནཀསརཱིརེནེཝ ཨཏྟནཱ ཨཱནཱིཏབྷཱཝཾ ཨཱརོཙེནྟཱི ཨཱཧ.

༡.

ཡོ མཱཏརཾ པིཏརཾཝཱ, དྷམྨེན ཨིདྷ པོསཏི;

རཀྑནྟི ཏཾ སདཱ དེཝཱ, སམུདྡེ ཝཱ ཐལེཔི ཝཱ.

༢.

ཡོ ཙེ བུདྡྷཉྩ དྷམྨཉྩ, སཾགྷཉྩ སརཎཾ གཏོ;

རཀྑནྟི ཏཾ སདཱ དེཝཱ, སམུདྡེ ཝཱ ཐལེཔི ཝཱ.

༣.

པཉྩཝིདྷཾ ¶ ཨཊྛཝིདྷཾ, པཱཏིམོཀྑཉྩ སཾཝརཾ;

པཱལེཏི ཡོ ཏཾ པཱལེནྟི, དེཝཱ སབྦཏྠ སབྦདཱ.

༤.

ཀཱཡེན ཝཱཙཱ མནསཱ, སུཙརིཏྟཾ ཙརཏཱི དྷ ཡོ;

པཱལེནྟི ཏཾ སདཱ དེཝཱ, སམུདྡེ ཝཱ ཐལེཔི ཝཱ.

༥.

ཡོ སཔྤུརིསདྷམྨེསུ, ཋིཏོ དྷ ཀཏཝེདིཀོ;

པཱལེནྟི ཏཾ སདཱ དེཝཱ, སམུདྡེ ཝཱ ཐལེཔི ཝཱ.

ཏཏོ སོ ཨཱཧ.

༦.

ནེཝ དཱནཾ ཨདཱསཱཧཾ, ན སཱིལཾ པརིཔཱལཡིཾ;

ཀེན མེ པུཉྙཀམྨེན, མམཾ རཀྑནྟི དེཝཏཱ;

པུཙྪཱམི སཾསཡཾ ཏུཡ྄ཧཾ, ཏཾ མེ ཨཀྑཱཧི དེཝཏེཏི.

དེཝཏཱ ཨཱཧ.

༧.

ཨགཱདྷཱ པཱརགེ བྷཱིམེ, སཱགརེ དུརིཏཱ ཀརེ;

བྷིནྣནཱཝོ ཏརནྟོ ཏྭཾ, ཧདཡེ ཀཏྭཱ ཀལིངྒརཾ.

༨.

ཋཏྭཱ སཔྤུརིསེ དྷམྨེ, ཨཏྟཱན མནཝེཀྑིཡ;

ཁཎསནྠཝསྶ པུརིསསྶ, ཨདཱསི ཕལཀཾ སཀཾ.

༩.

ཏཾ ཏུཡ྄ཧཾ མིཏྟདྷམྨཉྩ, དཱནཉྩ ཕལཀསྶ ཏེ;

པཏིཊྛཱསི སམུདྡསྨིཾ, ཨེཝཾ ཛཱནཱཧི མཱརིསཱཏི.

ཨེཝཉྩ ཝཏྭཱ སཱ ཏེ དིབྦཱཧཱརེན སནྟཔྤེཏྭཱ དིབྦཝཏྠཱལངྐཱརེཧི ཨལངྐརིཏྭཱ ཨཏྟནོ ཨཱནུབྷཱཝེན སཱཝཏྠིནགརེཡེཝ ཏེ པཏིཊྛཱཔེསི. ཏཏོ པཊྛཱཡ ཏམེཝ ཨཱརམྨཎཾ ཀཏྭཱ ཏེ དཱནཾ དདནྟཱ སཱིལཾ རཀྑནྟཱ ཨུཔོསཐཀམྨཾ ཀརོནྟཱ ཨཱཡུཔརིཡོསཱནེ སགྒཔརཱཡཎཱ ཨཧེསུཾ.

༡༠.

ཨེཝཾ པརིཏྟཀུསལེནཔི སཱགརསྨིཾ,

སཏྟཱ ལབྷནྟི སརཎཾ ཁལུ དེཝཏཱཧི;

ཏུམྷེཔི སཔྤུརིསཏཾ ན ཝིནཱསཡནྟཱ,

མཱ བྷོ པམཛྫཐ སདཱ ཀུསལཔྤཡོགེཏི.

ཕལཀཁཎྜདིནྣསྶ ཝཏྠུཾ ཚཊྛམཾ.

༡༧. ཙོརསཧཱཡསྶ ཝཏྠུམྷི ཨཡམཱནུཔུབྦཱིཀཐཱ

ཨམྷཱཀཾ ¶ བྷགཝཏི པརིནིབྦུཏེ ཛམྦུདཱིཔེ དེཝདཧནགརེ ཨེཀོ མནུསྶོ དུཀྑིཏོ ཏཏྠ ཏཏྠ ཝིཙརནྟོ པཙྩནྟེ ཨཉྙཏརཾ གཱམཾ གནྟྭཱ ཏཏྠ ཨེཀསྨིཾ ཀུལགེཧེ ནིཝཱསཾ ཀཔྤེསི. ཏཏྠ མནུསྶཱ ཏསྶ ཡཱགུབྷཏྟཾ དཏྭཱ པོསེསུཾ, ཏཏོ སོ ཏཏྠ མནུསྶེཧི མིཏྟསནྠཝཾ ཀཏྭཱ ཀཏིཔཱཧཾ ཏཏྠ ཝསིཏྭཱ ཨཉྙཊྛཱནཾ གནྟྭཱ ཨཔརབྷཱགེ ཙོརཀམྨཾ ཀརོནྟོ ཛཱིཝིཀཾ ཀཔྤེཏི. ཨཐེཀདིཝསཾ ཙོརེནྟཾ ཏཾ རཱཛཔུརིསཱ གཧེཏྭཱ རཉྙོ དསྶེསུཾ. རཱཛཱ ཏཾ བནྡྷནཱགཱརེ ཀརོཐཱཏི ཨཱཎཱཔེསི, ཏེ ཏཾ བནྡྷནཱགཱརཾ ནེཏྭཱ སངྑལིཀཱཧི བནྡྷིཏྭཱ ཨཱརཀྑཀཱནཾ པཊིཔཱདེཏྭཱ ཨགམཾསུ, བནྡྷནཱགཱརེ ཝསནྟསྶ ཏསྶ དྭཱདསསཾཝཙྪརཱནི ཨཏིཀྐནྟཱནི. ཏཏོ ཨཔརབྷཱགེ ཏསྶ པུབྦསཧཱཡོ པཙྩནྟགཱམཝཱསཱི མནུསྶོ ཀེནཙི ཀམྨེན དེཝདཧ མཱགཏོ ཏཏྠ ཏཏྠ ཨཱཧིཎྜནྟོ བནྡྷནཱགཱརེ བདྡྷཾ ཏཾ ཨདྡས. དིསྭཱ ཏསྶ ཧདཡཾ ཀམྤི, སོ རོདིཏྭཱ པརིདེཝིཏྭཱ ཀིཾ ཏེ མཡཱ ཀཏྟབྦཾ སམྨཱཏི པུཙྪི. ཏཏོ ཏེན སམྨ བནྡྷནཱགཱརེ ཝསནྟསྶ མེ ཨིདཱནི དྭཱདསསཾཝཙྪརཱནི ཨཏིཀྐནྟཱནི, ཨེཏྟཀཾ ཀཱལཾ དུབྦྷོཛནཱདིནཱ མཧཱདུཀྑཾ ཨནུབྷོམི. ཡཱཝཱཧཾ ཨཱཧཱརཾ པརིཡེསིཏྭཱ བྷུཉྫིཏྭཱ ཨཱགམིསྶཱམི. ཏཱཝ མཾ ཨིཏོ མུཉྩནུཔཱཡཾ ཛཱནཱཧཱིཏི ཝུཏྟེ སོ སཔྤུརིསོ.

༡.

རཱུཔེན ཀིནྟུ གུཎསཱིལཝིཝཛྫིཏེན,

མིཙྪཱལཡསྶ ཀིཏཝསྶ དྷིཡཱ ཀིམཏྠཾ;

དཱནཱ དིཙཱགཝིགཏེན དྷནེན ཀིཾ ཝཱ;

མིཏྟེན ཀིཾ བྱསནཀཱལཔརམྨུཁེནཱཏི.

ཨེཝཉྩ པན ཝཏྭཱ སཱདྷུ སམྨ ཀརོམི ཏེ ཝཙནནྟི ཨཱརཀྑཀཱནཾ སནྟིཀཾ གནྟྭཱ བྷོནྟོ ཡཱཝེསོ བྷཏྟཾ བྷུཉྫིཏྭཱ ཨཱགཙྪཏི. ཏཱཝཱཧཾ ཏསྶ པཱཊིབྷོགོ བྷཝིསྶཱམི. ཝིསྶཛྫེཐ ¶ ནནྟི ཨཱཧ, ཏེཧི ན སཀྐཱ བྷོ ཨེཏཾ ཝིསྶཛྫེཏུཾ, ཨཔི ཙ ཁོ ཡཱཝཱཡཾ ཨཱགཙྪཏི. ཏཱཝ ཏྭཾ ཨཡསངྑལིཀཱཡ བདྡྷོ ནིསཱིདིསྶསི, ཨེཝཾ ཏཾ ཝིསྶཛྫེསྶཱམ, ནོ ཙེ ན སཀྐཱཏི ཨཱཧཾསུ, སོ ཨེཝམྤི ཧོཏུ སམྨཱཏི ཝཏྭཱ ཏསྶ པཱདཏོ སངྑལིཀཾ མུཉྩིཏྭཱ ཨཏྟནོ པཱདེ ཀཏྭཱ བནྡྷནཱགཱརཾ པཝིསིཏྭཱ ཨིཏརཾ མུཉྩཱཔེསི. སོཔི ཨསཔྤུརིསོ བནྡྷནཱ མུཏྟོ ན པུན ཏཾ ཋཱན མགམཱསི, ཨཧོ ཨཀཏཉྙུནོ པཀཏིཾ ཉཱཏུཾ བྷཱརིཡཾ. ཡཐཱཧ.

༢.

ཝཱརིཔཱུརེ ཡཐཱ སོབྦྷེ, ནེཝནྟོ ཝིསམཾ སམཾ;

པཉྙཱཡཏེཝཾསཱདྷུསྶ, བྷཱཝཾ མནསི སམྦྷཝཾ.

༣.

བྷཱསནྟི མུཁཏོ ཨེཀཾ, ཙིནྟེནྟི མནསཱ པརཾ;

ཀཱཡེནེཀཾ ཀརོནྟེཝཾ, པཀཏཱཡམསཱདྷུནཾ.

༤.

ཏེསཾ ཡོ བྷཱཝམཉྙཱསི, སོཝ པཎྜིཏཛཱཏིཀོ;

བཧུསྶུཏོཔི སོཡེཝ, པརཙིཏྟཝིདཱུཔི སོ.

ཨཐསྶ བནྡྷནཱགཱརེ ཝསནྟསྶ དྭཱདསསཾཝཙྪརཱནི ཨཏིཀྐནྟཱནི. ཨེཏྟཀཾ ཀཱལཾ ཛིགྷཙྪཱཔཱིལི༹ཏེན ཏེན ཨཱཧཱརཏྟཱཡ པརོ ན ཡཱཙིཏཔུབྦོ, ཨནུཙྪིཊྛཱཧཱརཾ ལབྷནདིཝསཏོ ཨལབྷནདིཝསཱཡེཝ བཧུཏརཱ ཧོནྟི, ཨཐ དྭཱདསསཾཝཙྪརཱཏིཀྐམེ རཉྙོ པུཏྟོ ནིབྦཏྟི. ཏདཱ རཱཛཱ ཨཏྟནོ ཝིཛིཏེ སབྦབནྡྷནཱགཱརཱནི ཝིཝརཱཔེསི. ཨནྟམསོ མིགཔཀྑིནོཔི བནྡྷནཱ མུཉྩཱཔེསི. དྭཱརེ ཝིཝཊམཏྟེཡེཝ བནྡྷནཱགཱརེ མནུསྶཱ ཨིཙྪིཏིཙྪིཏཊྛཱནཾ ཨགམཾསུ. སོ པནེཀོཝ ཏེཧི སདྡྷིཾ ཨགནྟྭཱ ཨོཧཱིཡི. ཨཱརཀྑཀེཧི ཏྭཾ བྷོ ཀསྨཱ ན གཙྪསཱིཏི ཝུཏྟེ ཨཧཾ བྷོ པཉྙཱཏབྷཱཝེན ཨིདཱནི ན གམིསྶཱམི. ཨཏཱིཝ པརིཧཱིནགཏྟོསྨི. ཨནྡྷཀཱརེ གམིསྶཱམཱིཏི ཝཏྭཱ ཨནྡྷཀཱརེ ཨཱགཏེ ནིཀྑམྨ ཨནྟོནགརེ ཝིསྶཱསིཀཱནཾ ཨབྷཱཝེན ཀུཏོ ཨཱཧཱརཾ ལབྷིསྶཱམཱིཏི ཙིནྟེནྟོ ནིཀྑམྨ རཏྟནྡྷཀཱརེ ཨཱམཀསུསཱན ¶ མགམཱསི. ཨེཏྠཱཧཱརཾ ལབྷིསྶཱམཱིཏི. ཏཏྠ སོ ཨདྷུནཱ ནིཀྑིཏྟམཏམནུསྶཾ དིསྭཱ མནུསྶཊྛིནཱ མཾསཾ ཚིནྡིཏྭཱ སཱིསཀཔཱལེ པཀྑིཔིཏྭཱ ཏཱིཧི མནུསྶསཱིསེཧི ཀཏཨུདྡྷནེ ཋཔེཏྭཱ ཙིཏཀཏོ ཨོམུཀྐཨལཱཏེཧི ཨགྒིཾ ཀཏྭཱ སུསཱནཾ ནིབྦཱཔནཏྠཱཡཱ བྷཏཨུདཀེན མནུསྶཊྛིནཱ ཨཱལོལེནྟོ མཾསཾ པཙིཏྭཱ ཨོཏཱརེཏྭཱ སཱཁཱབྷངྒེན ཧིརིཀོཔཱིཎཾ པཊིཙྪཱདེཏྭཱ ནིཝཏྠཔིལོཀིཀཾ ཝཱཏཱཝརཎཾ ཀཏྭཱནིསཱིདི. ཏསྨིཾ ཁཎེ ཏཏྠ པིཔྤལཱིརུཀྑེ ཨདྷིཝཏྠཱ དེཝཏཱ ཏསྶ ཏཾ ཀིརིཡཾ དིསྭཱ པུཙྪིསྶཱམི ཏཱཝ ནནྟི ཏཾ ཨུཔསངྐམིཏྭཱ ཨེཝམཱཧ. བྷོ ཏྭཾ གྷནཏརཏིམིརཱཀུལེ མཧཱརཏྟིཡཾ ཏཏྠ ཏཏྠ ཝིཀིཎྞནརཊྛིསམཱཀིཎྞེ སོཎསིགཱལཱདིཀུཎཔཱདཀཱཀུལེ མནུསྶམཾསབྷཀྑཡཀྑརཀྑསཱཀུལེ ཏཏྠ ཏཏྠ པཛྫལནྟཱནེཀཙིཏཀབྷཡཱནཀེ སུསཱནེ མནུསྶམཾསཾ པཙིཏྭཱ ཀིཾཀརོསཱིཏི པུཙྪནྟཱི ཨཱཧ.

༥.

རཏྟནྡྷཀཱརེ ཀུཎཔཱདཀེཧི,

སམཱཀུལེ སཱིཝཐིཀཱཡ མཛ྄ཛྷེ;

མནུསྶམཾསཾ པཙསཱི དྷ སཱིསེ,

ཝདེཧི ཀིཾ ཏེན པཡོཛནཾ ཏེཏི.

ཨཐ སོ ཨཱཧ.

༦.

ན ཡཱགཧེཏུ ན ཙ དཱནཧེཏུ,

སུསཱནམཛ྄ཛྷམྷི པཙཱམི མཾསཾ;

ཁུདཱསམཾ ནཏྠི ནརསྶ ཨཉྙཾ,

ཁུདཱཝིནཱསཱཡ པཙཱམིམམྦྷོཏི.

ཏཏོ དེཝཏཱ ཏཾ ཏཐཱ ཧོཏུ, ཨིམིནཱ པིལོཏིཀེན ཝཱཏཱཝརཎཾ ཀརོསི. ཀིམཏྠམེཏནྟི པུཙྪནྟཱི.

༧.

ནིཝཏྠསཱཁོ ¶ ཧིརིསཾཝརཱཡ,

པིལོཏིཀཾ ཏཏྠ པསཱརཡནྟོ;

ཀརོསི ཝཱཏཱཝརཎཉྩ སམྨ,

ཀིམཏྠམེཏཾ ཝད པུཙྪིཏོ མེཏི.

སོ ཏསྶཱ ཙིཀྑནྟོ ཨཱཧ.

༨.

སུབྷཱ སུབྷཱམིསྶིཏསཱིཏཝཱཏོ,

སཡཾ ཨཙིཏྟོཝ ཨཙིཏྟབྷཱཝཱ;

དེཧཾ ཕུསིཏྭཱན ཨསཱདྷུཀསྶ,

ཨཀཏཉྙུནོ མིཏྟཔདྷཾསཀསྶ.

༩.

སམཱཝཧནྟོ ཡདི མེ སརཱིརེ,

ཕུསཱཏི [ཕུསཱཏིསཱསངྒཏིམཛྫདཱནི ཨིཏིཀཏྟཙི] ཏཾ ཝཱཡུ མམཱ ཝིསིཏྭཱ;

དུཀྑཾ དདཱཏཱིཏི ཝིསཾཝ ཏཾ བྷོ,

པརིཝཛྫིཏུཾ བདྡྷམིམཾ ཀུཙེལནྟི.

དེཝཏཱ ཨཱཧ.

༡༠.

ཀི མཀཱསི བྷོ སོ ཀཏནཱསཀོ ཏེ,

དྷནཉྩ དྷཉྙཾ ཏཝ ནཱསཡཱི ཙ;

མཱཏཱ པིཏཱ བནྡྷཝོ ཁེཏྟ ཝཏྠཱུ,

ཝིནཱསིཏཱ ཏེན ཝདེཧི ཀིཾ ཏེཏི.

ཏཏོ སོ ཨཱཧ.

༡༡.

ཡཾ རཱཛཏོ ཧོཏི བྷཡཾ མཧནྟཾ,

སབྦསྶ ཧརཎཱདིཝདྷཱདིཀཉྩ;

ཨཀཏཉྙུནཱ སཔྤུརིསེན ཧོཏི,

ཨཱརཱཝ སོ བྷོ པརིཝཛྫནཱིཡོ.

༡༢.

ཡམཏྠི ¶ ཙོརཱརིབྷཡཉྷི ལོཀེ,

ཨཐོ དཀེནཱཔི ཙ པཱཝཀེན;

ཨཀཏཉྙུནཱ ཏཾ སཀལམྤི ཧོཏི,

ཨཱརཱཝ སོ བྷོ པརིཝཛྫནཱིཡོ.

༡༣.

པཱཎཱཏིཔཱཏམྤི ཨདིནྣདཱནཾ,

པརསྶ དཱརཱུཔགམཾ མུསཱ ཙ;

མཛྫསྶ པཱནཾ ཀལཧཉྩ པེསུནཾ,

སམྥཾ གིརཾ དྷུཏྟཛནེཧི [ཨཀྑདྷུཏྟཱདིཡོགཾ ཨིཏིཀཏྠཙི] ཡོགཾ.

༡༤.

སབྦཾ ཨནཏྠཾ ཨསིཝཾ ཨནིཊྛཾ,

ཨཔཱཡིཀཾ [ཨཔཱཡིཀཾ ཨིཏིཀཏྠཙི] དུཀྑམནནྟ མཉྙཾ;

ཨཀཏཉྙུནཱ སཔྤུརིསེན ཧོཏི;

ཨཱརཱཝ སོ བྷོ པརིཝཛྫནཱིཡོཏི.

ཝཏྭཱ ཨཏྟནཱ ཨསཔྤུརིསསཾསགྒེནཱནུབྷཱུཏཾ སབྦཾ དུཀྑཾ ཀཐེསི, ཏཏོ དེཝཏཱ ཨཧམྤི བྷོ སཏྠུནོ མངྒལསུཏྟདེསནཱདིཝསེ ཨིམསྨིཾཡེཝ རུཀྑེ ནིསིནྣོ.

ཨསེཝནཱ ཙ བཱལཱནཾ, པཎྜིཏཱནཉྩ སེཝནཱ;

པཱུཛཱ ཙ པཱུཛནཱིཡྻཱནཾ, ཨེཏཾ མངྒལ མུཏྟམནྟི.

གཱཐཱཡ བཱལསྶ དོསེ ཨསྶོསིཾཏི ཝཏྭཱ ཏསྶ པསནྣོ ཏཾ ཨཏྟནོ ཝིམཱནཾ ནེཏྭཱ ནཧཱཔེཏྭཱ དིབྦཝཏྠཱལངྐཱརེཧི ཨལངྐརིཏྭཱ དིབྦནྣཔཱནཾ དཏྭཱ མཧནྟཾ སཀྐཱརསམྨཱནཾ ཀཏྭཱ ཨཏྟནོ ཨཱནུབྷཱཝེན ཏསྨིཾ ནགརེ རཛྫེ ཨབྷིསིཉྩཱཔེསི. སོ ཏཏྠ རཛྫཾ ཀརོནྟོ དཱནཱདཱིནི པུཉྙཱནི ཀཏྭཱ ཨཱཡུཔརིཡོསཱནེ ཡཐཱཀམྨཾ གཏོཏི.

༡༥.

ཨེཝཾ ¶ ཨསཱདྷུཛནསངྒམསནྣིཝཱསཾ,

སཉྩཛྫ སཱདྷུསུཙིསཛྫནསངྒམེན;

དཱནཱདི ནེཀཀུསལཾ པརིཔཱུརཡནྟཱ,

སགྒཱ པཝགྒཝིབྷཝཾ ཨབྷིསམྦྷུནཱཐཱཏི.

ཙོརསཧཱཡསྶ ཝཏྠུཾ སཏྟམཾ.

༡༨. མརུཏྟབྲཱཧྨཎསྶ ཝཏྠུམྷི ཨཡམཱནུཔུབྦཱིཀཐཱ

ཛམྦུདཱིཔེ ཙནྡབྷཱགཱ ནཱམ གངྒཱཏཱིརེ ཧོམགཱམཾ ནཱམ ཨཏྠི. ཏསྨིཾ ཨེཀོ མརུཏྟོ ནཱམ བྲཱཧྨཎོ པཊིཝསཏི. ཏདཱ སོ ཝོཧཱརཏྠཱཡ ཏཀྐསཱིལཾ གནྟྭཱ གེཧཾ ཨཱགཙྪནྟོ ཨནྟརཱམགྒེ ཨེཀཱཡ སཱལཱཡ ཀུཊྛརོགཱ ཏུརཾ སུནཁཾ དིསྭཱ ཏསྨིཾ ཀཱརུཉྙེན ནཱིལཝལླིཏཀྐམྦིལེན མདྡིཏྭཱ པཱཡེསི. སུནཁོ ཝཱུཔསནྟརོགོ པཱཀཏིཀོ ཧུཏྭཱ བྲཱཧྨཎེན ཨཏྟནོ ཀཏཱུཔཀཱརཾ སལླཀྑེནྟོ ཏེནེཝ སདྡྷིཾ ཨགམཱསི. ཨཔརབྷཱགེ བྲཱཧྨཎསྶ བྷརིཡཱ གབྦྷཾ པཊིལབྷི, པརིཔུཎྞགབྦྷཱཡ ཏཱཡ ཝིཛཱཡནཀཱལེ དཱརཀོ ཏིརིཡམྤཏིཏྭཱ ཨནྟོགབྦྷེཡེཝ མཏོ. ཏདཱ ཏཾ སཏྠེན ཁཎྜཱཁཎྜིཀཾ ཚིནྡིཏྭཱ ནཱིཧརིཾསུ, ཨཐ བྲཱཧྨཎོ ཏཾ དིསྭཱ ནིབྦིནྡཧདཡོ གྷརཱཝཱསཾ པཧཱཡ ཨིསིཔབྦཛྫཾ པབྦཛིཏྭཱ ཨརཉྙེ ཝིཧརཏི. ཨཐསྶ བྷརིཡཱ ཨཉྙེན སདྡྷིཾ སཾཝསནྟཱི ཨཡཾ མཾ པཧཱཡ པབྦཛིཏོཏི བྲཱཧྨཎེ པདུཊྛཙིཏྟཱ བྷོ བྲཱཧྨཎཾ མཱརེཧཱིཏི སཱམིཀེན སདྡྷིཾ མནྟེསི. ཏེསཾ མནྟནཾ སུནཁོ སུཏྭཱ བྲཱཧྨཎེནེཝ སདྡྷིཾ ཙརཏི. ཨཐེཀདིཝསཾ ཏསྶཱ སཱམིཀོ ཏཱ པ སཾ མཱརེསྶཱམཱིཏི དྷནུ ཀལཱཔཾ གཧེཏྭཱ ནིཀྑམི, ཏདཱ ཏཱཔསོ ཕལཱཕལཏྠཱཡ ཨརཉྙཾ གཏོ. སུ ན ཁོ ཨསྶམེཡེཝ ཨོ ཧཱི ཡི. པུརིསོ ཏཱཔསསྶཱགམནམགྒཾ ཨོལོཀེནྟོ གཙྪནྟརེ ¶ ནིལཱིནོ ཨཙྪི. སུནཁོ ཏསྶ པམཱདཾ ཨོལོཀེཏྭཱ དྷནུནོ གུཎཾ ཁཱདིཏྭཱ ཚིནྡི. སོ པུན གུཎཾ པཱཀཏིཀཾ ཀཏྭཱ ཨཱརོཔེསི. ཨེཝཾ སོ ཨཱརོཔིཏཾ ཨཱརོཔིཏཾ ཁཱདཏེཝ, ཨཐ སོ པཱཔཔུརིསོ ཏཱཔསསྶཱགམནཾ ཉཏྭཱ ཏཾ མཱརེསྶཱམཱིཏི དྷནུནཱ སདྡྷིཾ ཨགམཱསི. ཨཐསྶ སུནཁོ པཱདེ ཌསིཏྭཱ པཱཏེཏྭཱ ཏསྶ མུཁཾ ཁཱདིཏྭཱ དུབྦལཾ ཀཏྭཱ བྷུངྐཱརམཀཱསི, ཨེཝཉྷི སཔྤུརིསཱ ཨཏྟནོ ཨུཔཀཱརཀཱནཾ པཙྩུཔཀཱརཾ ཀརོནྟི. ཝུཏྟཉྷི.

༡.

ཨུཔཀཱརཾ ཀརོནྟོ སོ, སུནཁོ ཀཏཝེདིཀོ;

སཏྟཱུཔགྷཱཏཀཾ ཀཏྭཱ, ཨིསིནོ དཱསི ཛཱིཝིཏཾ.

༢.

ཏིརཙྪཱནཱཔི ཛཱནནྟི, གུཎམཏྟནི ཀཏཾ སདཱ;

ཨིཏི ཨུཏྭཱན མེདྷཱཝཱི, ཀཏཉྙཱུ ཧོནྟུ པཱཎིནོཏི.

ཏཏོ ཏཱཔསོ སུནཁསྶ སདྡེནཱ གནྟྭཱ ཏསྶ ཏཾ ཝིཔྤཀཱརཾ དིསྭཱ ཀཱརུཉྙེན པཊིཛིགྒིཏྭཱ ཝཱུཔསནྟཝཎཾ བལཔྤཏྟཾ པོསེཏྭཱ ཏཏྠེཝ ཝསནྟོ ཛྷཱནཱབྷིཉྙཾ ནིབྦཏྟེཏྭཱ ཨཱཡུཔརིཡོསཱནེ བྲཱཧྨལོཀཔརཱཡཎོ ཨཧོསཱིཏི.

༣.

སུཏྭཱན སཱདྷུ སུནཁེན ཀཏཱུཔཀཱརཾ,

མེཏྟིཾདིསསྶ པཀཏཾ ཨིསིནཱ ཙ སུཏྭཱ;

སམྨཱ ཀརོཐ ཀརུཎཉྩ པརཱུཔཀཱརཾ,

ཏཾ སབྦདཱ བྷཝཏི ཝོ བྷཝབྷོགཧེཏཱུཏི.

མརུཏྟབྲཱཧྨཎསྶ ཝཏྠུཾ ཨཊྛམཾ.

༡༩. པཱནཱིཡདིནྣསྶ ཝཏྠུམྷི ཨཡམཱནུཔུབྦཱིཀཐཱ

ཛམྦུདཱིཔེ ¶ ཨཉྙཏརསྨིཾ ཛནཔདེ ཀིརེ ཀོ མནུསྶོ རཊྛཏོ རཊྛཾ ཛནཔདཏོ ཛནཔདཾ ཝིཙརནྟོ ཨནུཀྐམེན ཙནྡབྷཱགཱནདཱིཏཱིརཾ པཏྭཱ ནཱཝཾ ཨབྷིརུཧིཏྭཱ པརཏཱིརཾ གཙྪཏི. ཨཐཱཔརཱ གབྦྷིནིཏྠཱི ཏཱཡ ཨེཝ ནཱཝཱཡ གཙྪཏི, ཨཐ ནཱཝཱ གངྒཱམཛ྄ཛྷཔྤཏྟཀཱལེ ཏསྶཱ ཀམྨཛཝཱཏཱ ཙལིཾསུ. ཏཏོ སཱ ཝིཛཱཡིཏུམསཀྐོནྟཱི ཀིལནྟཱ པཱནཱིཡཾ མེ དེཐ, པིཔཱསིཏཱམྷིཏི མནུསྶེ ཡཱཙི. ཏེ ཏསྶཱ ཝཙནཾ ཨསུཎནྟཱ ཝིཡ པཱནཱིཡཾ ནཱདཾསུ, ཨཐ སོ ཛཱནཔདིཀོ ཏསྶཱ ཀརུཎཱཡནྟོ [ཀརུཎཱཡཔཱནཱིཡཾ, ཀརུཎཱཡནྟོཔཱནཱིཡཾ, ཀརུཎཱཡཏོཡཾ ཨིཏིཙཀཏྠཙི] ཏོཡཾ གཧེཏྭཱ མུཁེ ཨཱསིཉྩི, ཏསྨིཾ ཁཎེ སཱ ལདྡྷསྶཱསཱ སུཁེན དཱརཀཾ ཝིཛཱཡི, ཨཐ ཏེ ཏཱིརཾ པཏྭཱ ཀཏིཔཡདིཝསེན ཨཏྟནོ ཨཏྟནོ ཋཱནཾ པཱཔུཎིཾསུ. ཨཐཱཔརབྷཱགེ སོ ཛཱནཔདིཀོ ཨཉྙཏརཀིཙྩཾ པཊིཙྩ ཏསྶཱ ཨིཏྠིཡཱ ཝསནནགརཾ པཏྭཱ ཏཏྠ ཏཏྠ ཨཱཧིཎྜནྟོ ནིཝཱསནཊྛཱནཾ ཨལབྷིཏྭཱ ནགརདྭཱརེ སཱལཾ གནྟྭཱ ཏཏྠ ནིཔཛྫི. ཏསྨིཾཡེཝ དིཝསེ ཙོརཱ ནགརཾ པཝིསིཏྭཱ རཱཛགེཧེ སནྡྷིཾ ཚིནྡིཏྭཱ དྷནསཱརཾ གཧེཏྭཱ གཙྪནྟཱ རཱཛཔུརིསེཧི ཨནུབནྡྷཱ གནྟྭཱ ཏཱཡེཝ སཱལཱཡ ཚཌྜེཏྭཱ པལཱཡིཾསུ. ཨཐ རཱཛཔུརིསཱ ཨཱགནྟྭཱ ཙོརེ ཨཔསྶནྟཱ ཏཾ ཛཱནཔདིཀཾ དིསྭཱ ཨཡཾ ཙོརོཏི གཧེཏྭཱ པཙྪཱབཱཧཾ གཱལ༹ྷཾ བནྡྷིཏྭཱ པུན དིཝསེ རཉྙོ དསྶེསུཾ. རཉྙཱ ཀསྨཱ བྷཎེ ཙོརཀམྨ མཀཱསཱིཏི པུཙྪིཏོ ནཱཧཾ དེཝ ཙོརོ, ཨཱགནྟུཀོམྷཱིཏི ཝུཏྟེ རཱཛཱ ཙོརེ པརིཡེསིཏྭཱ ཨལབྷནྟོ ཨཡམེཝ ཙོརོ, ཨིམཾ མཱརེཐཱཏི ཨཱཎཱཔེསི. རཱཛཔུརིསེཧི ཏཾ གཱལ༹ྷཾ བནྡྷིཏྭཱ ཨཱགྷཱཏནཾ ནཱིཏེ སཱ ཨིཏྠཱི ཏཾ ཏཐཱ ནཱིཡམཱནཾ དིསྭཱ སཉྫཱནིཏྭཱ ཀམྤམཱནཧདཡཱ མུཧུཏྟེན རཉྙོ སནྟིཀཾ གནྟྭཱ ཝནྡིཏྭཱ དེཝ ཨེསོ ¶ ན ཙོརོ ཨཱགནྟུཀོ མུཉྩཐེཏཾ དེཝཱཏི ཨཱཧ. རཱཛཱ ཏསྶཱ ཀཐཾ ཨསདྡཧནྟོ ཡཛྫེཏཾ མོཙེཏུ མིཙྪསི. ཏསྶགྒྷནཀཾ དྷནཾ དཏྭཱ མུཉྩཱཔེཧཱིཏི, སཱ སཱམི མམ གེཧེ དྷནཾ ནཏྠི. ཨཔིཙ མམ སཏྟཔུཏྟེཧི སདྡྷིཾ མཾ དཱསིཾ ཀརོཧི, ཨེཏཾ མུཉྩ དེཝཱཏི ཨཱཧ, ཨཐ རཱཛཱ ཏྭཾ ཨེཏཾ ཨདྷུནཱགཏོཏི ཝདསི. ཨེཏཾ ནིསྶཱཡ པུཏྟེཧི སདྡྷིཾ ཨཏྟཱནཾ དཱསཏྟཾ སཱཝེསི. ཀིམེསོ ཏེ ཉཱཏི ཝཱ, ཨུདཱཧུ ཨུཔཀཱརཀོཏི པུཙྪནྟོ ཨཱཧ.

༡.

ཀིཾཏེ བྷོཏི ཨཡཾ པོསོ, ཏུཝཾ པུཙྪཱམི སཾསཡཾ;

བྷཱཏཱ ཝཱ ཏེ པིཏཱ ཧོཏི, པཏི ཝཱ དེཝརོ ཏཝ.

༢.

ཉཱཏི སཱལོཧིཏོ ཀིནྣུ, ཨུདཱཧུ ཨིཎདཱཡཀོ;

ཨཐོཔཀཱརཀོ ཀིནྣུ, ཀསྨཱསྶ དེསི ཛཱིཝིཏཾཏི.

ཏཏོ སཱ ཨཱཧ.

༣.

ཨེསོ མེ པུརིསོ དེཝ, ཀཏཔུབྦོཔཀཱརཀོ;

ཨཏཱཎམེཀིཀཾ [ཨཏྟཱནམེཀིཀཾ ཨིཏིཀཏྠཙི] ཙེསོ, དུཀྑིཏཾ མརཎེ ཋིཏཾ.

༤.

ཝིཛཱཡིཏུ མསཀྐོནྟིཾ, གབྦྷིནིཾ དུཀྑཝེདིནིཾ;

ཏོཡེན མཾ ཨུཔཊྛཱསི, ཏེནཱཧཾ སུཁིཏཱ ཏདཱ.

༥.

བྷངྒཀལློལམཱལཱཡ, ཨུཏྟརནྟཾ མཧཎྞཝཾ;

པཧཱཡ པཱཏུཾ ཀཱུཔསྶ, ཡཱཏི ལོཀོ པིཔཱསིཏོ.

༦.

ཏཐེཝ ཝིཛྫམཱནེསུ, ཛནེསུ མནུཛཱདྷིཔ,

ཨེཀསྶེཝ མནསྨིཾཧི, གུཎཾ ཏིཊྛཏི སཱདྷུཀཾ.

༧.

པཧཏྭཱན མཏཾ ཧཏྠིཾ, མཾསཏྠཱི ཀེཙི ཛནྟུནོ;

ཨནུབནྡྷནྟི མཾསཏྠཾ, སསཾ དྷཱཝནྟ མེཀཀཾ.

༨.

ཏཐེཝ ¶ ཝིཛྫམཱནེསུ, ཛནེསུ མནུཛཱདྷིཔ;

གུཎཝནྟ མནུབནྡྷནྟི, སཔྤུརིསཾ ཀཏཝེདིཀཾ.

༩.

ཏསྨཱ སཔྤུརིསེ དྷམྨེ, པཏིཊྛཱསྨི ནརཱདྷིཔ;

ཨནུསྶརནྟི ཨེཏེན, ཀཏཔུབྦཱུ པཀཱརཀཾ.

༡༠.

ཨཧཉྩ མམ པུཏྟཱ ཙ, ཨེཏེནམྷ སུཁཱཔིཏཱ;

ཛཱིཝིཏམྤི པརིཙྩཛྫ, མུཙྩནཱིཡོ ཨཡཾ མཡཱཏི.

ཏཏོ རཱཛཱ དོཝཱརིཀཾ པཀྐོསིཏྭཱ ཏམྤི པུཙྪིཏྭཱ ཨདྷུནཱགཏབྷཱཝཾ ཉཏྭཱ ཏསྶཱ སཔྤུརིསདྷམྨེ སནྟུཊྛོ ཏེསཾ ཨུབྷིནྣམྤི མཧནྟཾ ཡསཾ ཨནུཔྤདཱསི. ཏེ ལདྡྷཡསཱ ཏ ཏོ པཊྛཱཡ དཱནཱདཱིནི པུཉྙཀམྨཱནི ཀཏྭཱ སགྒཔརཱཡཎཱ ཨཧེསུནྟི.

༡༡.

དྷམྨེ པཏིཊྛིཏམནཱ ཨཔི མཱཏུགཱམཱ,

ཨེཝཾ ལབྷནྟི ཝིབྷཝཉྩ པསཾསནཉྩ;

དྷམྨཉྩ སཱདྷུཙརིཏཾ མནསཱིཀརོནྟོ,

དྷམྨེསུ ཝཏྟཐ སདཱ སུཙིསཛྫནཱཏི.

པཱནཱིཡདིནྣསྶ ཝཏྠུཾ ནཝམཾ.

༢༠. སཧཱཡསྶ པརིཙྩཏྟཛཱིཝིཏཀསྶ ཝཏྠུམྷི ཨཡམཱནུཔུབྦཱིཀཐཱ

བྷགཝཏི པརིནིབྦུཏེ སཱཝཏྠིཡཾ སོམབྲཱཧྨཎོ སོམདཏྟབྲཱཧྨཎོཏི དྭེ བྲཱཧྨཎཱ ཝསནྟི. ཏཏྠ སོམདཏྟབྲཱཧྨཎེན སདྡྷིཾ སོམབྲཱཧྨཎོ ཡེབྷུཡྻེན དཱུཏཾ ཀཱིལ༹ཏི. ཨཐེཀདིཝསཾ སོམདཏྟོ སོམབྲཱཧྨཎཾ ཏེན པརཱཛེཏྭཱ ཏསྶ ཨུཏྟརཱསངྒཉྩ ལཉྪནམུདྡིཀཉྩ གཧེཏྭཱ ཨཏྟནོ གེཧཾ གཙྪནྟོ སོམབྲཱཧྨཎསྶ ཨེཧི གེཧཾ གཙྪཱ- མཱཏི ¶ ཨཱཧ. ཏཏོ སོམོ ནཱཧཾ སམྨ ཨེཀསཱཊཀོ ཧུཏྭཱ ཨནྟརཝཱིཐིཾ ཨོཏརིཏུཾ སཀྐོམི. གམནཏོ ཨེཏྠེཝ མེ ཋཱནཾ ཝརཏརནྟི ཨཱཧ, སོམདཏྟེན ཨེཝཾ སཏི སམྨ ཨིམཾ ཨུཏྟརཱསངྒཾ གཎྷཱཏི ཏསྶ ཏཾ དཏྭཱ ཨིདཱནི སམྨ ཨེཧཱིཏི ཝུཏྟོཔི ནཱགཙྪཏི. པུན ཏེན བྷོ ཀསྨཱ ནཱགཙྪསཱིཏི པུཊྛོ སམྨ མམ ཧཏྠེ མུདྡིཀཾ ཨཔསྶནྟཱ མེ པུཏྟདཱརཱདཡོ མཡཱ སདྡྷིཾ ཀལཧཾ ཀརོནྟཱིཏི ཨཱཧ, ཨཐ སོ ཨེཝཾ སནྟེ ཡདཱ ཏེ པཧོཏི. ཏདཱ མཡ྄ཧཾ དེཧཱིཏི མུདྡིཀམྤི དཏྭཱ ཏཾ གཧེཏྭཱ གེཧཾ ཨགམཱསི. ཨཐ ཏེ ཨེཏྟཀེན སཧཱཡཱ ཨཧེསུཾ. ཨཔརབྷཱགེ སོམདཏྟབྲཱཧྨཎཾ ཨཡཾ པརདཱརཀམྨཾ ཨཀཱསཱིཏི མནུསྶཱ གཧེཏྭཱ རཉྙོ དསྶེསུཾ. རཱཛཱ ཏསྶ རཱུཔསམྤཏྟིཾ དིསྭཱ རཱཛཱཎཾ ཨཀཏྭཱ མཱ བྷོ པུན ཨེཝམཀཱསཱིཏི ཨོཝདིཏྭཱ ཝིསྶཛྫེསི. རཱཛཱ ནཾ ཡཱཝཏཏིཡཝཱརཾ ཨོཝདནྟོ ཝིསྶཛྫེཏྭཱ ཙཏུཏྠེཝཱརེ གཙྪཐེཏཾ ཨཱགྷཱཏནཾ ནེཏྭཱ མཱརེཐཱཏི ཨཱཎཱཔེསི. ཨེཝཾ པཱཔཀམྨེ ནིརཏཱ ཨནེཀཱཀཱརེན ཨོཝདནྟཱཔི ན སཀྐཱ ནིཝཱརེཏུཾ. ཏཐཱཧི.

༡.

སོཎཱ ཙེཝ སིགཱལཱ ཙ, ཝཱཡསཱ ནཱིལམཀྑིཀཱ;

ཨིཙྩེཏེ ཀུཎཔེ སཏྟཱ, ན སཀྐཱ ཏེ ནིསེདྷིཏུཾ.

༢.

ཏཐཱ པཱཎཱཏིཔཱཏེསུ, པརདཱརེ སུརཱཡ ཙ;

མུསཱཝཱདེསུ ཐེཡྻེསུ, སཏྟསཏྟཱ ན ཝཱརིཡཱཏི.

ཏཏོ རཱཛཔུརིསཱ ཏཾ བནྡྷིཏྭཱ པཀྐམིཾསུ. ཏདཱ སོམབྲཱཧྨཎོ སོམདཏྟཾ ཏཐཱ ནཱིཡམཱནཾ དིསྭཱ ཀམྤམཱནཧདཡོ རཱཛཔུརིསཱནཾ སནྟིཀཾ གནྟྭཱ ཨིམཾ བྷོ མུཧུཏྟཾ མཱ མཱརེཐ. ཡཱཝ རཱཛཱནཾ ཛཱནཱཔེསྶཱམཱིཏི ཝཏྭཱ རཉྙོ སནྟིཀཾ གནྟྭཱ ཝནྡིཏྭཱ ཋིཏོ དེཝ མམ ཛཱིཝིཏཾ སོམདཏྟསྶ བྲཱཧྨཎསྶ དསྶཱམི. ཨེཏཾ མུཉྩཐ. ཡདི མཱརེཏུཀཱམཱ, མཾ མཱརེཐཱཏི ཨཱཧ. རཱཛཱ ཏུཎྷཱི [ཏུཊྛོ ཨིཏིཀཏྠཙི] ཨཧོསི, རཱཛཔུརིསཱ སོམདཏྟཾ མུཉྩིཏྭཱ ¶ སོམབྲཱཧྨཎཾ ཨཱགྷཱཏནཾ ནེཏྭཱ མཱརེསུཾ, ཨཧོ ཀཏཉྙུནོ ཀཏཝེདིཏཱ.

ཧོཏི ཙེཏྠ.

༣.

ཀཀཱུཔཀཱར མཏྟཱནཾ, སརནྟཱ ཀེཙི མཱནུསཱ;

ཛཱིཝིཏཾ དེནྟི སོམོཝ, སོམདཏྟསྶ ཨཏྟནོཏི.

སོ ཏེན ཛཱིཝིཏདཱནེན དེཝལོཀེ ནིབྦཏྟིཏྭཱ མཧནྟེ ཀནཀཝིམཱནེ དེཝཙྪརཱསཧསྶཔརིཝུཏོ དིབྦསམྤཏྟིམནུབྷོནྟོ པཊིཝསཏི. ཏདཱ སོམདཏྟབྲཱཧྨཎོ ཨེསོ མཾ མརཎཔྤཏྟཾ མོཙེསཱིཏི ཝཏྭཱ ཏསྶཏྠཱཡ དཱནཾ དཏྭཱ པཏྟིཾ ཨདཱསི. ཏཱཝདེཝསྶ ཏཏོ བཧུཏརཾ དེཝིསྶརིཡཾ ཨཧོསི དེཝཱནུབྷཱཝཉྩ. ཏཏོ སོ སོམདེཝོ ཨཏྟནོ དེཝིསྶརིཡཾ ཨོལོཀེནྟོ སཧཱཡསྶ ཨཏྟནོ ཛཱིཝིཏདཱནཾ ཨདྡས. དིསྭཱ ཨཏྟབྷཱཝཾ ཝིཛཧིཏྭཱ མཱཎཝཀཝཎྞེན སོམདཏྟབྲཱཧྨཎཾ ཨུཔསངྐམིཏྭཱ པཊིསནྠཱརཾ ཀཏྭཱ ཨཏྟཱནཾ དེཝལོཀེ ནིབྦཏྟབྷཱཝཾ པཀཱསེཏྭཱ ཏཾ གཧེཏྭཱ ཨཏྟནོ ཨཱནུབྷཱཝེན དེཝལོཀཾ ནེཏྭཱ ཡཐཱཀཱམཾ སམྤཏྟི མནུབྷཝཱཏི ཝཏྭཱ སཏྟཱཧཾ དེཝསྶརིཡཾ དཏྭཱ སཏྟམེ དིཝསེ ནེཏྭཱ ཏསྶ གེཧེཡེཝ པཏིཊྛཱཔེསི. ཏཏྠ ཧི དིབྦསམྤཏྟི མནུབྷཱུཏསྶ མནུསྶསམྤཏྟི པཊིཀྐུལཱ ཧོཏི. ཏཏོ སོ དིབྦསམྤཏྟིམནུསྶརནྟོ ཀིསོ དུབྦལོ ཨུཔྤཎྜུཔྤཎྜུཀཛཱཏོ ཨཧོསི. ཨཐེཀདིཝསཾ དེཝཔུཏྟོ ཏཾ ཨོལོཀེནྟོ ཏཐཱ དུཀྑཔྤཏྟཾ དིསྭཱ ན སཀྐཱ མནུསྶེན དིབྦསམྤཏྟིམནུབྷཝིཏུནྟི ཨིཙྪིཏིཙྪིཏསམྤཏྟིདཱཡཀཾ ཨེཀཾ ཙིནྟཱམཎིཾ དཏྭཱ ཏསྶ བྷརིཡམྤི ཨཏྟནོ ཨཱནུབྷཱཝེན རཱུཔཝནྠཾ ཡསཝནྟཾ ཝཎྞཝནྟཾ ཨཏིཀྐནྟམནུསྶིཏྠིཝཎྞཾ ཨཀཱསི, ཨཔརབྷཱགེ ཏེ ཛཡམྤཏིཀཱ པཙྩཀྑཏོ དིཊྛདིབྦསམྤཏྟིཝིབྷཝཱ དཱནཾ དཏྭཱ སཱིལཾ རཀྑིཏྭཱ སཧཱཡདེཝཔུཏྟསྶ སནྟིཀེཡེཝ ནིབྦཏྟིཾསཱུཏི.

༤.

མནྡེན ¶ ནནྡིཏམནཱ ཨུཔཀཱརཀེན,

པཱཎམྤི དེནྟི སུཛནཱ ཨིཏི ཙིནྟཡིཏྭཱ;

མིཏྟདྡུ མཱ བྷཝཐ བྷོ ཨུཔཀཱརཀསྶ;

པཱསཾསིཡཱ བྷཝཐ སཱདྷུཛནེཧི ནིཙྩཾཏི.

སཧཱཡསྶ པརིཙྩཏྟཛཱིཝིཏཀསྶ ཝཏྠུཾ དསམཾ.

ནནྡིཡརཱཛཝགྒོ དུཏིཡོ.

ཡཀྑཝཉྩིཏཝགྒོ

༢༡. ཡཀྑཝཉྩིཏ ཝཏྠུམྷི ཨཡམཱནུཔུབྦཱིཀཐཱ

བྷགཝཏི ¶ པརིནིབྦུཏམྷི ཀོསལརཉྙོ ཀིར ཛནཔདེ ཏུཎྜགཱམོནཱམ ཨཧོསི. ཏཏྠེཀོ བུདྡྷདཱསོ ནཱམ མནུསྶོ ‘‘ཡཱཝཛཱིཝཾ བུདྡྷཾ སརཎཾ གཙྪཱམི. བུདྡྷོ མེ སརཎཾ ཏཱཎཾ ལེཎཾ པརཱཡཎནྟི’’ ཨེཝཾ ཛཱིཝིཏཔརིཡནྟཾ བུདྡྷཾ སརཎཾ གཏོ པཊིཝསཏི, ཏསྨིཾ སམཡེ ཨེཀོ ཛནཔདཝཱསིཀོ ཏཏྠ ཏཏྠ ཨཱཧིཎྜནྟོ ཏཾ ཏུཎྜགཱམཾ པཏྭཱ ཏསྶེཝ གྷརེ ནིཝཱསཾ ཀཔྤེསི, ཏསྶ པན ཛཱནཔདིཀསྶ སརཱིརེ ཨེཀོ ཡཀྑོ ཨཱཝིསིཏྭཱ པཱིལེ༹ཏི, ཏདཱ ཏསྶ གཱམསྶ པཝིསནཀཱལེ ཡཀྑོ བུདྡྷདཱསོ པཱསཀསྶ གུཎཏེཛེན ཏསྶ གེཧཾ པཝིསིཏུཾ ཨསཀྐོནྟོ ཏཾ མུཉྩིཏྭཱ བཧིགཱམེ སཏྟཱཧཾ ཨཊྛཱསི ཏསྶཱགམནཾ ཨོལོཀེནྟོ. ཏཏོ སོ ཛཱནཔདིཀོ སཏྟདིཝསཾ ཏཏྠ ཝསིཏྭཱ སཏྟམེ དིཝསེ སཀརཊྛཾ གནྟུཀཱམོ གཱམཱ ནིཀྑམི. ཨཐ ཏཾ ཏཐཱ ནིཀྑནྟཾ དིསྭཱ ཡཀྑོ ཨགྒཧེསི, ཨཐ སོ ཏཾ ཨེཏྟཀཾ ཀཱལཾ ཀུཧིཾགཏོསཱིཏི པུཙྪི. ཡཀྑོ བྷོ ཏཝཏྠཱཡ ཨེཏྠ ཝསནྟསྶ མེ སཏྟཱཧཾ ཨཏིཀྐནྟནྟི. ཏཏོ སོ ཀོ ཏེ མཡཱ ཨཏྠོ, ཀིཾ ཏེ དམྨཱིཏི, ཨཐ ཡཀྑེན བྷོ ཨཧཾ ཁུདཱཡ པཱིལི༹ཏོ བྷཏྟེན མེ ཨཏྠོཏི ཝུཏྟོ སོ ཨེཝཾ སཏི ཀསྨཱ མཾ ཨནྟོགེཧེ ཝསནྟཾ ན གཎྷཱིཏི ཨཱཧ. ཡཀྑེན བྷོ ཏསྨིཾ གྷརེ བུདྡྷཾ སརཎཾ གཏོ ཨེཀོ ཨུཔསཀོ ཨཏྠི, ཏསྶ སཱིལཏེཛེན གེཧཾ པཝིསིཏུམསཀྐོནྟོ ཨཊྛཱསིནྟི ཝུཏྟོ ཛཱནཔདིཀོ སརཎཾ ནཱམ ཀིནྟི ཨཛཱནནྟོ ཀིནྟི ཝཏྭཱ སོ སརཎཾ ཨགྒཧེསཱིཏི ཡཀྑཾ པུཙྪི. ཡཀྑོ ‘‘བུདྡྷཾ སརཎཾ གཙྪཱམཱི’’ཏི ཝཏྭཱ སརཎཾ ཨགྒཧེསཱིཏི ཨཱཧ. ཏཾ སུཏྭཱ ཛཱནཔདིཀོ ཨིདཱནི ཨིམཾ ཝཉྩེསྶཱམཱིཏི ཙིནྟེཏྭཱ ཏེནཧི ཡཀྑ ཨཧམྤི བུདྡྷཾ སརཎཾ གཙྪཱམཱིཏི ཨཱཧ. ཨེཝཾ ཝུཏྟམཏྟེཡེཝ ཡཀྑོ མཧཱསདྡཾ ཀརོནྟོ བྷ ཡེ ན བྷམནྟོ ¶ པལཱཡི, ཨེཝཾ སམྨཱསམྦུདྡྷསྶ སརཎཾ ཨིདྷལོཀེ བྷཡོ པདྡཝ ནིཝཱརཎཏྠཾ ཧོཏི, པརལོཀེ སགྒམོཀྑཱཝཧཾ. ཏཐཱཧི.

༡.

བུདྡྷོཏི ཝཙནཾ ཨེཏཾ, ཨམནུསྶཱནཾ བྷཡཱཝཧཾ;

བུདྡྷབྷཏྟིཀཛནྟཱུནཾ, སབྦདཱ མུདམཱཝཧཾ.

༢.

སབྦོཔདྡཝནཱསཱཡ, པཙྩཀྑདིབྦམོསདྷཾ;

དིབྦམནྟཾ མཧཱཏེཛཾ, མཧཱཡནྟཾ མཧབྦྷུཏཾ.

༣.

ཏསྨཱ སོ དཱརུཎོ ཡཀྑོ,

དིསྭཱ ཏཾ སརཎེ ཋིཐཾ;

ཨུབྦིགྒོ ཙ བྷཡཔྤཏྟོ,

ལོམཧཊྛོ ཙ ཚམྦྷཱིཏོ.

༤.

བྷམནྟོ དྷཱཝིཏཾ དིསྭཱ, ཏིམིརོཝ སུརིཡུགྒཏེ,

སིམྦལིཏཱུལབྷཊྛཾཝ, ཙཎྜཝཱཏེན ཁཎྜིཏཾ.

༥.

ཡཾ དུཀྑཾ རཱཛཙོརཱརི, ཡཀྑཔེཏཱ དིསམྦྷཝཾ;

ནིཙྪནྟེན མནུསྶེན, གནྟབྦཾ སརཎཏྟཡཾཏི.

ཏཏོ ཛཱནཔདིཀོ སརཎཱགམནེ མཧཱགུཎཾ མཧཱནིསཾསཾ ཨོལོཀེཏྭཱ བུདྡྷེ སགཱརཝོ སཔྤེམོ ‘‘ཛཱིཝིཏཔརིཡནྟཾ བུདྡྷཾ སརཎཾ གཙྪཱམཱི’’ཏི སརཎཾ གནྟྭཱ ཏེནེཝ སརཎཱགམནཱནུབྷཱཝེན ཛཱིཝིཏཔརིཡོསཱནེ སུཏྟཔྤབུདྡྷོཝིཡ དེཝལོཀེ ནིབྦཏྟཱིཏི.

༦.

དིསྭཱན ཨེཝཾ སརཎཾ གཏཾ ཏཾ,

ཨཔེནྟི ཡཀྑཱཔི མཧབྦྷཡེན;

པཱལེཐ སཱིལཾ སརཎཉྩ ཏསྨཱ,

ཛཧཱཐ དུརིཏཾ སུགཏིཾ བྷཛཝ྄ཧོཏི.

ཡཀྑཝཉྩིཏཝཏྠུཾ པཐམཾ.

༢༢. མིཙྪདིཊྛིཀསྶ ཝཏྠུམྷི ཨཡམཱནུཔུབྦཱིཀཐཱ

བྷགཝཏི ¶ དྷརམཱནེ རཱཛགཧནགརེ ཀིར ཨེཀོ བྲཧྨབྷཏྟིཀོ མིཙྪཱདིཊྛིཀོ པཊིཝསཏི, ཏཏྠེཝ སམྨཱདིཊྛིཀོཔི. ཏེསཾ ཨུབྷིནྣམྤི དྭེ པུཏྟཱ ཨཧེསུཾ. ཏེ ཨེཀཏོ ཀཱིལ༹ནྟཱ ཝཌྜྷནྟི. ཨཐཱཔརབྷཱགེ གུལ༹ཀཱིལ༹ཾཀཱིལ༹ནྟཱནཾ སམྨཱདིཊྛིཀསྶ པུཏྟོ ‘‘ནམོ བུདྡྷཡཱ’’ཏི ཝཏྭཱ གུལ༹ྷཾ ཁིཔནྟོ དིཝསེ དིཝསེ ཛིནཱཏི. མིཙྪཱདིཊྛིཀསྶ པུཏྟོ ‘‘ནམོ བྲཧྨུནོ’’ཏི ཝཏྭཱ ཁིཔནྟོ པརཱཛེཏི, ཏཏོ མིཙྪཱདིཊྛིཀསྶ པུཏྟོ ནིཙྩཾ ཛིནནྟཾ སམྨཱདིཊྛིཀཾ ཀུམཱརཾ དིསྭཱ སམྨ ཏྭཾ ནིཙྩམེཝ ཛིནཱསི, ཀིཾ ཝཏྭཱ གུལ༹ཾ ཁིཔསཱིཏི པུཙྪི. སོཧཾ སམྨ ‘‘ནམོ བུདྡྷཱཡཱ’’ཏི ཝཏྭཱ ཁིཔཱམཱིཏི ཨཱཧ. སོཔི ཏཏོ པཊྛཱཡ ‘‘ནམོ བུདྡྷཱཡཱ’’ཏི ཝཏྭཱ ཁིཔཏི, ཨཐ ཏེ ཡེབྷུཡྻེན དཱུཏེ སམསམཱཝ ཧོནྟི. ཨཔརབྷཱགེ མིཙྪཱདིཊྛིཀསྶ པུཏྟོ པིཏརཱ སདྡྷིཾ དཱརཱུནམཏྠཱཡ ཝནཾ གནྟྭཱ སཀཊེན དཱརུཾ གཧེཏྭཱ ཨཱགཙྪནྟོ ནགརདྭཱརསམཱིཔེ སཀཊཾ ཝིསྶཛྫེཏྭཱ ཏིཎེ ཁཱདནཏྠཱཡ གོཎེ ཝིསྶཛྫེསི, གོཎཱ ཏིཎཾ ཁཱདནྟོ ཨཉྙེཧི གོརཱུཔེཧི སདྡྷིཾ ཨནྟོནགརཾ པཝིསིཾསུ. ཨཐསྶ པིཏཱ གོཎེ པརིཡེསནྟོ སཀཊཾ ཨོལོཀེཧཱིཏི པུཏྟཾ ནིཝཏྟེཏྭཱ ནགརཾ པཝིཊྛོ ཨཧོསི, ཨཐ སཱཡཎྷེ ཛཱཏེ མནུསྶཱ ནགརདྭཱརཾ པིདཧིཾསུ, ཏཏོ ཀུམཱརོ བཧིནགརེ དཱརུསཀཊསྶ ཧེཊྛཱ སཡནྟོ ནིདྡཱུཔགཏོ ཨཧོསི. ཨཐ ཏསྶཱ རཏྟིཡཱ སམྨཱདིཊྛིཀོ ཙ མིཙྪཱདིཊྛིཀོ ཙཱཏི དྭེ ཡཀྑཱ གོཙརཾ པརིཡེསམཱནཱ སཀཊསྶ ཧེཊྛཱ ནིཔནྣཾ ཀུམཱརཾ ཨདྡསཾསུ, ཏེསུ མིཙྪཱདིཊྛིཀོ ཨིམཾ ཁཱདཱམཱིཏི ཨཱཧ. ཨཐཱཔརོ མཱ ཨེཝ མཀཱསི, ‘‘ནམོ བུདྡྷཱཡཱ’’ཏི ཝཱཙཀོ ཨེསོཏི, ཁཱདཱམེཝེཏནྟི ཝཏྭཱ ཨིཏརེན ཡཱཝཏཏིཡཾ ཝཱརིཡམཱནོཔི གནྟྭཱ ཏསྶ པཱདེ གཧེཏྭཱ ཨཱཀཌྜྷི. ཏསྨིཾ ཁཎེ དཱརཀོ པུབྦཔརིཙཡེན ‘‘ནམོ བུདྡྷཱཡཱ’’ཏི ཨཱཧ ཏཾ སུཏྭཱ ཡཀྑོ བྷཡཔྤཏྟོ ལོམཧཊྛོ ¶ ཧཏྠཾ ཝིསྶཛྫེཏྭཱ པཊིཀྐམྨ ཨཊྛཱསི. ཨཧོ ཨཙྪརིཡཾ བུདྡྷཱནུབྷཱཝཾ ཨབྦྷུཏཾ, ཨེཝཾ ཨཏྟཾ ཨནཱིཡྻཱཏེཏྭཱ པརིཙཡེན ‘‘ནམོ བུདྡྷཱཡཱ’’ཏི ཝུཏྟསྶཔི བྷཡཾ ཚམྦྷིཏཏྟཾ ཨུཔདྡཝཾ ཝཱ ན ཧོཏི. པགེཝ ཨཏྟཾ ནཱིཡྻཱཏེཏྭཱ ཡཱཝཛཱིཝཾ བུདྡྷཾ སརཎཾ གཏསྶཱཏི. ཝུཏྟཉྷི.

༡.

ཡཐཱཔི སིཁིནོ ནཱདཾ, བྷུཛངྒཱནཾ བྷཡཱཝཧཾ;

ཨེཝཾ བུདྡྷོཏི ཝཙནཾ, ཨམནུསྶཱནཾ བྷཡཱཝཧཾ.

༢.

ཡཐཱ མནྟསྶ ཛཔྤེན, ཝིལཡཾ ཡཱཏི ཀིབྦིསཾ;

ཨེཝཾ བུདྡྷོཏི ཝཙནེན, ཨཔཡནྟི [པཧཱཡནྟི ཨིཏིསབྦཏྠ] པིསཱཙཀཱ.

༣.

ཨགྒིཾ དིསྭཱ ཡཐཱ སིཏྠཾ, དཱུརཏོཝ ཝིལཱིཡཏི;

དིསྭཱནེཝཾ སརཎགཏཾ, པེཏཱ པེནྟིཝ [པེཏཱཔེནྟཱཝ ཨིཏིཀཏྠཙི] དཱུརཏོ.

༤.

པཝརཾ བུདྡྷཨིཙྩེཏ, མཀྑརདྭཡམབྦྷུཏཾ;

སབྦོ པདྡཝནཱསཱཡ, ཐིརཔཱཀཱར མུགྒཏཾ.

༥.

སཏྟརཏནཔཱསཱདཾ, ཏམེཝ ཝཛིརཾ གུཧཾ;

ཏམེཝ ནཱཝཾ དཱིཔཾ ཏཾ, ཏམེཝ ཀཝཙཾ སུབྷཾ.

༦.

ཏམེཝ སིརསི བྷཱསནྟཾ, ཀིརཱིཊཾ རཏནཱམཡཾ;

ལལཱཊེ ཏིལཀཾ རམྨཾ, ཀཔྤཱུརཾ ནཡནདྭཡེ.

༧.

ཏཱཌངྐཾ ཀཎྞཡུགལེ, སོཎྞམཱལཱ གལེ སུབྷཱ;

ཨེཀཱཝལི༹ ཏཱརཧཱར, བྷཱརཱ ཛཏྟུསུ ལངྐཏཱ.

༨.

ཨངྒདཾ བཱཧུམཱུལསྶ, ཀརགྒེ ཝལཡཾ ཏཐཱ;

ཨངྒུལིསྭངྒུལིཡཉྩ, ཁགྒཾ མངྒལསམྨཏཾ.

༩.

སོཎྞཱ ཏཔཏྟ མུཎྷཱིསཾ, སབཱཎཾཝ སརཱསནཾ;

ཏམེཝ སབྦཱལངྐཱརཾ, ཏམེཝ དུརིཏཱཔཧཾ.

༡༠.

ཏསྨཱ ¶ ཧི པཎྜིཏོ པོསོ,

ལོཀལོཙནསཏྠུནོ;

སརཎཾ ཏསྶ གནྟེཝ,

གུཎནཱམཾ ཨེཧིཔསྶིཀཾ.

༡༡.

ནམོཏི ཝཙནཾ པུབྦཾ, བུདྡྷཱཡེཏི གིརཾ ཏདཱ;

སུཔནྟེན ཀུམཱརེན, མིཙྪཱདིཊྛིཀསཱུནུནཱ.

༡༢.

སུཏྭཱ ཝུཏྟཾ པིསཱ ཙཱཔི, མནུསྶཀུཎཔེ རཏཱ;

ན ཧིཾསནྟི ཨཧོ བུདྡྷ, གུཎསཱརམཧནྟཏཱཏི.

ཨཐ སམྨཱདིཊྛིཀཡཀྑོ མིཙྪཱདིཊྛིཀསྶ ཡཀྑསྶ ཨེཝམཱཧ, ཨཡུཏྟཾ བྷོ ཏཡཱ ཀཏཾ. བུདྡྷགུཎེ པཧཱརོ དིནྣོ, དཎྜཀམྨཾ ཏཡཱ ཀཱཏབྦཾཏི, ཏེན ཀིཾམཡཱ སམྨ ཀཱཏབྦནྟི ཝུཏྟེ བུབྷུཀྑིཏསྶ ཨཱཧཱརཾ དེཧཱིཏི ཨཱཧ. ཏཏོ སོ སཱདྷཱུཏི ཝཏྭཱ ཡཱཝཱཧཾ ཨཱགཙྪཱམི, ཏྭཾ ཏཱཝེཏྠ ཝཙྪཱཧཱིཏི ཝཏྭཱ བིམྦིསཱརརཉྙོ ཀཉྩནཏཊྚཀེ ཝཌྜྷིཏཾ རསབྷོཛནཾ ཨཱཧརིཏྭཱ ཀུམཱརསྶ པིཏུཝཎྞེན དཱརཀཾ བྷོཛེཏྭཱ པུན ཀུམཱརེན ཝུཏྟབུདྡྷཝཙནཉྩ ཨཏྟནཱ ཀཏཝཱཡཱམཾ ཙཱཏི སབྦཾ ཏཊྚཀེ ལིཁིཏྭཱ ཨིདཾ རཉྙོཡེཝ པཉྙཱཡཏཱུཏི ཨདྷིཊྛཱཡ ཨགམཾསུ, ཨཐ པབྷཱཏཱཡ རཏྟིཡཱ རཉྙོ བྷོཛནཀཱལེ རཱཛཔུརིསཱ ཏཏྠ ཏཊྚཀཾ ཨདིསྭཱ ནགརཾ ཨུཔཔརིཀྑནྟཱ སཀཊེ དཱརཀཉྩ ཏཊྚཀཉྩ དིསྭཱ ཏཊྚཀེན སདྡྷིཾ ཏཾ གཧེཏྭཱ རཉྙོ དསྶེསུཾ. རཱཛཱ ཏཊྚཀེ ཨཀྑརཱདཱིནི དིསྭཱ ཝཱཙེཏྭཱ ཏསྶ གུཎེ པསནྣོ མཧནྟེན ཡསེན སདྡྷིཾ སེཊྛིཊྛཱནམདཱསི.

༡༣.

ཛིནསྶ ནཱམཾ སུཔིནེན པེཝཾ,

ན ཧོཏི བྷཱིཏིཾ ལཔནེན ཡསྨཱ;

ཏསྨཱ མུནིནྡཾ སཏཏཾ སརཱཐ,

གུཎེ སརནྟཱ སརཎཉྩ ཡཱཐཱཏི.

མིཙྪཱདིཊྛིཀསྶ ཝཏྠུཾ དུཏིཡཾ.

༢༣. པཱདཔཱིཋིཀཱཡ ཝཏྠུམྷི ཨཡམཱནུཔུབྦཱིཀཐཱ

ཛམྦུདཱིཔེ ¶ མཧཱབོདྷིཏོ ཀིར དཀྑིཎཔསྶེ ཨེཏཾ པཙྩནྟནགརཾ ཨཧོསི. ཏཏྠ སདྡྷཱསམྤནྣོ རཏནཏྟཡམཱམཀོ ཨེཀོ ཨུཔཱསཀོ པཊིཝསཏི. ཏདཱ ཨེཀོ ཁཱིཎཱསཝོ བྷགཝཏཱ པརིབྷུཏྟཾ པཱདཔཱིཋཾ ཐཝིཀཱཡ པཀྑིཔིཏྭཱ གཏགཏཊྛཱནེ པཱུཛེནྟོ ཨནུཀྐམེན ཏཾ ནགརཾ སམྤཱཔུཎིཏྭཱ སུནིཝཏྠོ སུཔཱརུཏོ པཏྟཾ གཧེཏྭཱ ཨནྟརཝཱིཐིཾ པཊིཔཛྫི ཡུགམཏྟདསོ པབྦཛྫཱལཱིལཱཡ ཛནཾ པརིཏོསེནྟོ. ཨཐ སོ ཨུཔཱསཀོ ཏཐཱ གཙྪནྟཾ ཐེརཾ དིསྭཱ པསནྣམཱནསོ ཨུཔགནྟྭཱ པཉྩཔཏིཊྛིཏེན ཝནྡིཏྭཱ པཏྟཾ གཧེཏྭཱ བྷོཛེཏྭཱ ནིབདྡྷཾ མམ གེཧཾ ཨཱགམནམིཙྪཱམི, མམཱནུཀམྤཱཡ ཨེཏྠེཝ ཝསཐ སཱམཱིཏི ཡཱཙིཏྭཱ ནགརཱསནྣེ རམཎཱིཡེ ཝནསཎྜེ ནདཱིཀཱུལེ པཎྞསཱལཾ ཀཏྭཱ ཐེརསྶ ཏཾ ནཱིཡྻཱཏེཏྭཱ ཙཏུཔཙྩཡེཧི པཊིཛགྒནྟོ མཱནེནྟོ པཱུཛེནྟོ ཝསཏི. ཐེརོཔི ཏཏྠ ཕཱསུཀཊྛཱནེ བྷགཝཏཱ པརིབྷུཏྟཔཱདཔཱིཋདྷཱཏུཾ ནིདྷཱཡ ཝཱལུཀཱཧི ཐཱུཔཾ ཀཏྭཱ ནིཙྩཾ གནྡྷདྷཱུཔདཱིཔཔུཔྥཔཱུཛཱདཱིཧི པཱུཛཡམཱནོ ཝཱསཾ ཀཔྤེཏི. ཏསྨིཾ སམཡེ ཏསྶོ པཱསཀསྶ ཨནནྟརགེཧཝཱསིཀོ ཨེཀོ ཨིསྶརབྷཏྟིཀོ ཨཏྟནོ དེཝཏཾ ནིབདྡྷཾ ནམསྶཏི. ཏཾ དིསྭཱསྶ ཨུཔཱསཀོ བུདྡྷགུཎེ ཝཏྭཱ ཨཁེཏྟེ སམྨ མཱ ཝིརིཡཾ ཀརོཧི. པཛཧེཏཾ དིཊྛིཾཏི ཨཱཧ. ཏཏོ སོ ཀེརཱཊིཀོ ཨིསྶརབྷཏྟིཀོ ཀོ ཏེ སཏྠུ གུཎཱནུབྷཱཝོ, ཨམྷཱཀཾ ཨིསྶརསྶ གུཎོཝ མཧནྟོཏི ཝཏྭཱ ཏསྶ ཨགུཎཾ གུཎནྟི ཀཐེནྟོ ཨཱཧ.

༡.

ཏིཔུརཾ སོ ཝིནཱསེསི, ལལཱཊནཡནགྒིནཱ;

ཨསུརེཙ ཝིནཱསེསི, ཏིསཱུལེན མཧིསྶརོ.

༢.

ཛཊཱཀལཱཔམཱཝཏྟཾ, ནཙྩཏཱི དིནསནྡྷིཡཾ;

ཝཱདེཏི བྷེརིཝཱིཎཱདིཾ, གཱིཏཾཙཱཔི ས གཱཡཏི.

༣.

བྷརིཡཱཡོ ¶ ཏསྶ ཏིསྶོ, ཛཊཱཡེཀཾ སམུབྦཧེ;

ཨེཀམེཀེན པསྶེན, པསྶམཱནོ ཙརེཀཀཾ.

༤.

ཧཏྠིཙམྨམྦརདྷརོ, ཏེནེཝ ཝཱརིཏཱ ཏཔོ;

ཨསཱདིསེཧི པུཏྟེཧི, རཱུཔེན ཙ སུཔཱཀཊོ.

༥.

རཏིཡཱ ཙ མདྷུཔཱནེ ཙ, བྱཱཝཊོ སབྦདཱ ཙ སོ;

མནུསྶཊྛིདྷརོ སཱིས, ཀཔཱལེནེས བྷུཉྫཀི.

༦.

ན ཛཱཏོ ན བྷཡཾ ཏསྶ, མརཎཾ ནཏྠི སསྶཏོ;

ཨཱིདིསོ མེ མཧཱདེཝོ, ནཏྠཉྙསྶཱིདིསོ གུཎོཏི.

ཏཾ སུཏྭཱ ཨུཔཱསཀོ སམྨ ཏུཡ྄ཧཾ ཨིསྶརསྶ ཨེཏེ གུཎཱ ནཱམ ཏཱཝ ཧོནྟུ. ཨགུཎཱ ནཱམ ཀིཏྟཀཱ ཧོནྟཱིཏི ཝཏྭཱ བྷགཝཏོ སཀལགུཎེ སཾཧརིཏྭཱ ཀཐེནྟོ ཨཱཧ.

༧.

ལོཀེ སབྦསཝནྟཱིནཾ, ཨཱདྷཱརོ སཱགརོ ཡཐཱ;

སབྦེསཾ གུཎརཱསཱིནཾ, ཨཱདྷཱརོཝ ཏཐཱགཏོ.

༨.

ཙརཱཙརཱནཾ སབྦེསཾ, ཨཱདྷཱརཱཝ དྷརཱ ཨཡཾ;

ཏཐཱ གུཎཱནཾ སབྦེསཾ, ཨཱདྷཱརོཝ ཏཐཱགཏོ.

༩.

ཨེཝཾ སནྟོ ཝིཡཏྟོཙ [ཝིཡནྟོ ཨིཏིཀཏྠཙི], ཨེཝཾ སོ ཀརུཎཱཔརོ;

ཨེཝ མིདྡྷིཝིདྷཱ ཏསྶ, ཨེཝམེཝཾ གུཎཱ ཨིཏི.

༡༠.

བུདྡྷོཔི སཀྐོཏི ན ཡསྶ ཝཎྞེ,

ཀཔྤམྤི ཝཏྭཱ ཁཡཏཾ གམེཏུཾ;

པགེཝ ཙ བྲཧྨསུརཱ སུརེཧི,

ཝཏྟུཾ ན ཧཱནནྟགུཎསྶ ཝཎྞནྟི.

ཨེཝཾ ཝདནྟཱ པན ཏེ ཨུབྷོཔི ཨམྷཱཀཾ དེཝོ ཨུཏྟམོ ཨམྷཱཀཾ དེཝོ ཨུཏྟམོཏི ཀལཧཾ ཝཌྜྷེཏྭཱ རཉྙོ སནྟིཀམགམཾསུ, རཱཛཱ ¶ ཏེསཾ ཀཐཾ སུཏྭཱ ཏེནཧི ཏུམྷཱཀཾ དེཝཏཱནཾ མཧནྟབྷཱཝཾ ཨིདྡྷིཔཱཊིཧཱརིཡེན ཛཱནིསྶཱམ. དསྶེཐ ཏེཧི ནོ ཨིདྡྷིཾཏི ནགརེ བྷེརིཾ ཙརཱཔེསི. ཨིཏོ ཀིར སཏྟཱཧཙྩཡེན ཨིམེསཾ དྭིནྣཾ སཏྠཱརཱནཾ པཱཊིཧཱརིཡཱནི བྷཝིསྶནྟི. སབྦེ སནྣིཔཏནྟཱུཏི ཏཾ སུཏྭཱ ནཱནཱདིསཱསུ བཧཱུ མནུསྶཱ སམཱགམིཾསུ, ཨཐ མིཙྪཱདིཊྛིཀཱ ཨཛྫ ཨམྷཱཀཾ དེཝསྶ ཨཱནུབྷཱཝཾ པསྶཱམཱཏི མཧནྟཾ པཱུཛཾ ཀརོནྟོ ཏཏྠ སཱརཾ ནཱདྡསཾསུ, སམྨཱདིཊྛིཀཱཔི ཨཛྫ ཨམྷཱཀཾ བྷགཝཏོ ཨཱནུབྷཱཝཾ པསྶིསྶཱམཱཏི ཝཱལུ༹ཀཱཐཱུཔཾ གནྟྭཱ གནྡྷམཱལཱདཱིཧི པཱུཛེཏྭཱ པདཀྑིཎཾ ཀཏྭཱ ཨཉྫལིམྤགྒཡ྄ཧ ཨཊྛཾསུ. ཨཐ རཱཛཱཔི བལཝཱཧནཔརིཝུཏོ ཨེཀམནྟེ ཨཊྛཱསི. ནཱནཱསམཡཝཱདིནོཔི ཨཛྫ ཏེསཾ པཱཊིཧཱརིཡཾ པསྶིསྶཱམཱཏི མཉྩཱཏིམཉྩཾ ཀཏྭཱ ཨཊྛཾསུ. ཏེསཾ སམཱགམེ སམྨཱདིཊྛིཀཱ ཝཱལུ༹ཀཱཐཱུཔ མབྷིམུཁཾ ཀཏྭཱ ཨཉྫལིམྤགྒཡ྄ཧ སཱམི ཨམྷཱཀཾ བྷགཝཱ སབྦབུདྡྷཀིཙྩཱནི ནིཊྛཱཔེཏྭཱ ཨནུཔཱདིསེསཱཡ ནིབྦཱཎདྷཱཏུཡཱ པརིནིབྦཱཡི. སཱརིཔུཏྟམཧཱམོགྒལླཱནཱདཡོ ཨསཱིཏིམཧཱསཱཝཀཱཔི པརིནིབྦཱཡིཾསུ, ནཏྠེཏྠ ཨམྷཱཀཾ ཨཉྙཾ པཊིསརཎནྟི ཝཏྭཱ སཙྩཀིརིཡཾ ཀརོནྟཱ ཨཱཧཾསུ.

༡༡.

ཨཱཔཱཎཀོཊིཾ བུདྡྷསྶ, སརཎཾ ནོ གཏཱ ཡདི;

ཏེན སཙྩེན ཡཾ དྷཱཏུ, དསྶེཏུ པཱཊིཧཱརིཡཾ.

༡༢.

ཨཱཔཱཎཀོཊིཾ དྷམྨསྶ, སརཎཾ ནོ གཏཱ ཡདི;

ཏེན སཙྩེན ཡཾ དྷཱཏུ, དསྶེཏུ པཱཊིཧཱརིཡཾ.

༡༣.

ཨཱཔཱཎཀོཊིཾ སངྒྷསྶ, སརཎཾ ནོ གཏཱ ཡདི;

ཏེན སཙྩེན ཡཾ དྷཱཏུ, དསྶེཏུ པཱཊིཧཱརིཡཾ.

༡༤.

རཱམཀཱལེ མུནིནྡསྶ, པཱདུཀཱ ཙཱསི ཨབྦྷུཏཱ;

ཏེན སཙྩེན ཡཾ དྷཱཏུ, དསྶེཏུ པཱཊིཧཱརིཡཾ.

༡༥.

ཚདྡནྟཀཱལེ ¶ མུནིནོ, དཱཋཱ ཚརཾསིརཉྫིཏཱ;

ཏེན སཙྩེནཡཾ དྷཱཏུ, ནིཙྪཱརེཏུ ཚ རཾསིཡོ.

༡༦.

ཛཱཏམཏྟོ ཏདཱ བུདྡྷོ, ཋིཏོ པངྐཛམུདྡྷནི;

ནིཙྪཱརེསཱསབྷིཾཝཱཙཾ, ཨགྒོ སེཊྛོཏིཨཱདིནཱ;

ཏེན སཙྩེནཡཾ དྷཱཏུ, དསྶེཏུ པཱཊིཧཱརིཡཾ.

༡༧.

ནིམིཏྟེ ཙཏུརོ དིསྭཱ, ནིཀྑནྟོ ཨབྷིནིཀྑམཾ;

ཏེན སཙྩེན ཡཾ དྷཱཏུ, དསྶེཏུ པཱཊིཧཱརིཡཾ.

༡༨.

མཱརསེནཾ པལཱཔེཏྭཱ, ནིསིནྣོ བུཛ྄ཛྷི བོདྷིཡཾ;

ཏེན སཙྩེན ཡཾ དྷཱཏུ དསྶེཏུ པཱཊིཧཱརིཡཾ.

༡༩.

དྷམྨཙཀྐཾ པཝཏྟེསི, ཛིནོ སིཔཏནེ ཏདཱ;

ཏེན སཙྩེན ཡཾ དྷཱཏུ, དསྶེཏུ པཱཊིཧཱརིཡཾ.

༢༠.

ནནྡོཔནནྡབྷོགིནྡཾ, ནཱགཾ ནཱལཱགིརིཝ྄ཧཡཾ;

ཨཱལ༹ཝཀཱ དཡོ ཡཀྑེ, བྲཧྨཱནོ ཙ བཀཱ དཡོ.

༢༡.

སཙྩཀཱདིནིགཎྛེཙ, ཀཱུཊདནྟཱ དཡོ དྭིཛེ;

དམེསི ཏེན སཙྩེན, དསྶེཏུ པཱཊིཧཱརིཡཾཏི.

ཨེཝཉྩ པན ཝཏྭཱ ཨུཔཱསཀཱ ཨམྷཱཀཾ ཨནུཀམྨཾ པཊིཙྩ མཧཱཛནསྶ མིཙྪཱདིཊྛིབྷེདནཏྟཾ པཱཊིཧཱརིཡཾ དསྶེཐ སཱམཱིཏི ཨཱརཱདྷེསུཾ. ཨཐ བུདྡྷཱནུབྷཱཝཉྩ ཐེརཱནུབྷཱཝཉྩ ཨུཔཱསཀཱནཾ སཙྩཀིརིཡཱནུབྷཱཝཉྩ པཊིཙྩ ཝཱལུ༹ཀཱཐཱུཔཾ དྭིདྷཱ བྷིནྡིཏྭཱ པཱདཔཱིཋདྷཱཏུ ཨཱཀཱས མབྦྷུགྒནྟྭཱ ཚབྦཎྞརཾསིཡོ ཝིསྶཛྫེནྟཱི ཝིལཱསམཱནཱ ཨཊྛཱསི. ཨཐ མཧཱཛནཱ ཙེལུཀྑེཔསཧསྶཱནི པཝཏྟེནྟཱ སཱདྷུཀཱིལ༹ྷཾ ཀཱིལ༹ནྟཱ མཧཱནཱདཾ པཝཏྟེནྟཱ མཧནྟཾ པཱུཛམཀཾསུ. མིཙྪཱདིཊྛིཀཱཔི ཨིམཾ ཨཙྪརིཡཾ དིསྭཱ ཝིམྷིཏམཱནསཱ མིཙྪཱདིཊྛིཾ བྷིནྡིཏྭཱ རཏནཏྟཡཔརཱཡཎཱ སརཎ མགམཾསཱུཏི.

༢༢.

ཕུཊྛོཔི ¶ པཱདེན ཛིནསྶ ཨེཝཾ,

ཀལིངྒརོ པཱ སི མཧཱནུབྷཱཝོ;

ལོཀེཀནཱཐསྶ ཨནཱསཝསྶ,

མཧཱནུབྷཱཝོ ཧི ཨཙིནྟནཱིཡོཏི.

པཱདཔཱིཋིཀཱཡ ཝཏྠུཾ ཏཏིཡཾ.

༢༤. ཨུཏྟརསཱམཎེརསྶ ཝཏྠུམྷི ཨཡམཱནུཔུབྦཱིཀཐཱ

སོ ཀིར པུརིམབུདྡྷེསུ [པུརིམབུདྡྷེ ཨིཏིསབྦཏྠ] ཀཏཱདྷིཀཱརོ ཏཏྠ ཏཏྠ བྷཝེ ཝིཝཊྚཱུཔནིསྶཡཾ པུཉྙཾ ཨུཔཙིནནྟོ སུམེདྷསྶ བྷགཝཏོ ཀཱལེ ཝིཛྫཱདྷརོ ཧུཏྭཱ ཧིམཝཏི པཊིཝསཏི. ཏདཱ སུམེདྷོ ནཱམ སམྨཱསམྦུདྡྷོ ཝིཝེཀ མནུབྲཱུཧནྟོ ཧིམཝནྟཾ གནྟྭཱ རམཎཱིཡེ པདེསེ པལླངྐཾ ཨཱབྷུཛིཏྭཱ ནིསཱིདི. ཏདཱ ཝིཛྫཱདྷརོ ཨཱཀཱསེན གཙྪནྟོ ཚབྦཎྞརཾསཱིཧི ཝིརཱཛམཱནཾ བྷགཝནྟཾ དིསྭཱ ཏཱིཧི ཀཎིཀཱརཔུཔྥེཧི པཱུཛེསི, པུཔྥཱནི བུདྡྷཱནུབྷཱཝེན སཏྠུ ཨུཔརི ཚཏྟཱཀཱརེན ཨཊྛཾསུ, སོ ཏེན བྷཱིཡྻོསོ མཏྟཱཡ པསནྣཙིཏྟོ ཧུཏྭཱ ཨཔརབྷཱགེ ཀཱལཾཀཏྭཱ ཏཱཝཏིཾསབྷཝནེ ནིབྦཏྟིཏྭཱ ཨུལཱ༹རཾ དིབྦསམྤཏྟིམནུབྷཝནྟོ ཡཱཝཏཱཡུཀཾ ཏཏྠ ཋཏྭཱ ཏཏོ ཙུཏོ དེཝམནུསྶེསུ སཾསརནྟོ ཨིམསྨིཾ བུདྡྷུཔྤཱདེ རཱཛགཧནགརེ བྲཱཧྨཎམཧཱསཱལསྶ པུཏྟོ ཧུཏྭཱ ནིབྦཏྟི. ཨུཏྟརོཏིསྶ ནཱམཾ ཨཧོསི. སོ ཨུཏྟམརཱུཔདྷརོ ཝིཉྙུཏཾ པཏྟོ བྲཱཧྨཎཝིཛྫཱསུ ནིཔྥཏྟིཾ པཏྭཱ ཛཱཏིཡཱ རཱུཔེན ཝིཛྫཱཡ སཱིལཱཙཱརེན ཙ ལོཀསྶ མཧནཱིཡོ ཛཱཏོ, ཏསྶ ཏཾ པཉྙཱསམྤཏྟིཾདིསྭཱ ཝསྶཀཱརོ མགདྷམཧཱམཏྟོ ཨཏྟནོ དྷཱིཏརཾ དཱཏུཀཱམོ ཧུཏྭཱ ཨཏྟནོ ཨདྷིཔྤཱཡཾ པཝེདེསི. སོ ནིསྶརཎཛ྄ཛྷཱསཡཏཱཡ ཏཾ པཊིཀྑིཔིཏྭཱ ཀཱལེནཀཱལཾ དྷམྨསེནཱཔཏིཾ པཡིརུཔཱསནྟོ ཏསྶ ¶ སནྟིཀེ དྷམྨཾ སུཏྭཱ པཊིལདྡྷསདྡྷོ པབྦཛིཏྭཱ ཝཏྟསམྤནྣོ ཧུཏྭཱ ཐེརཾ ཨུཔཊྛཧཏི. ཏེན ཙ སམཡེན ཐེརསྶ ཨཉྙཏརོ ཨཱབཱདྷོ ཨུཔྤནྣོ ཧོཏི, ཏསྶ བྷེསཛྫཏྠཱཡ ཨུཏྟརསཱམཎེརོ པཱཏོཝ པཏྟཙཱིཝར མཱདཱཡ ཝིཧཱརཏོ ནིཀྑམྨ ཨནྟརཱམགྒེ ཏལཱ༹ཀསྶ ཏཱིརེ པཏྟཾ ཋཔེཏྭཱ ཨུདཀསམཱིཔཾ གནྟྭཱ མུཁཾ དྷོཝཏི, ཏདཱ ཨཉྙཏརོ ཨུམྨགྒཙོརོ ཀཏཀམྨོ ཨཱརཀྑཔུརིསེཧི ཨནུབདྡྷོ ཨགྒདྭཱརེནེཝ ནགརཏོ ནིཀྑམིཏྭཱ པལཱཡནྟོ ཨཏྟནཱ གཧིཏཾ རཏནབྷཎྜིཀཾ སཱམཎེརསྶ པཏྟེ པཀྑིཔིཏྭཱ པལཱཡི. སོ སཱམཎེརོཔི པཏྟསམཱིཔཾ [སཏྟུསམཱིཔཾ ཨིཏིཔི ཀཏྠཙི] ཨུཔགཏོ ཧོཏི, ཙོརཾ ཨནུབནྡྷནྟཱ རཱཛཔུརིསཱ སཱམཎེརསྶ པཏྟེ བྷཎྜིཀཾ དིསྭཱ ཨཡཾ ཙོརོ, ཨིམིནཱ ཙོརིཡཾ ཀཏནྟི སཱམཎེརཾ པཙྪཱབཱཧཾ བནྡྷིཏྭཱ ཝསྶཀཱརསྶ བྲཱཧྨཎསྶ དསྶེསུཾ. ཝསྶཀཱརོ ཙ ཏདཱ རཉྙོ ཝིནིཙྪཡེ ནིཡུཏྟོ ཧུཏྭཱ ཚེཛྫབྷེཛྫཾ ཨནུསཱསཏི. སོ ཨེསོ པུབྦེ མམ ཝཙནཾ ནཱདིཡི. སུདྡྷཔཱསཎྜིཡེསུ པབྦཛཱིཏི ཙ བདྡྷཱགྷཱཏཏྟཱ ཏཾ ཀམྨཾ ཨསོདྷེཏྭཱཝ ཛཱིཝནྟམེཝེཏཾ སཱུལེ ཨུཏྟཱསེཐཱཏི ཨཱཎཱ པེསི, རཱཛཔུརིསཱ ཏཾ ནིམྦསཱུལེ ཨུཏྟཱསེསུཾ. སཱམཎེརོ སཱུལགྒེ ནིསིནྣོ ཨུཔཛ྄ཛྷཱཡསྶ མེ ཀོ བྷེསཛྫཾ ཨཱཧརིསྶཏཱིཏི སཱརིཔུཏྟཏྠེརཾ སརི. ཏཏོ ཐེརོ ཏཾ པཝཏྟིཾ ཉཏྭཱ སམྨཱསམྦུདྡྷསྶ ཀཐེསི, བྷགཝཱཔི མཧཱསཱཝཀཔརིཝུཏོ ཏསྶ ཉཱཎཔརིཔཱཀཾ ཨོལོཀེཏྭཱ ཏཾ ཋཱནམགམཱསི. ཏཏོ བྷགཝཏོ ནིཀྑནྟབྷཱཝཱ སཀལནགརེ ཀོལཱཧལཾ ཨཧོསི, མཧཱཛནཀཱཡོ སནྣིཔཏི. ཨཐ བྷགཝཱ ཝིཔྥུརནྟཧཏྠཏལེ ནཁམཎིམཡཱུཁསམྦྷིནྣཔཱིཏཱབྷཱསཏཱཡ པགྒྷརནྟཛཱཏིཧིངྒུལཀསུཝཎྞརསདྷཱརཱཝིཡ ཛཱལཱཝགུཎྛིཏམུདུཏལུནངྒུལཾ ཧཏྠཾ ཨུཏྟརསྶ སཱིསེ ཋཔེཏྭཱ ཨུཏྟར ཨིདཾ ཏེ པུབྦེ ཀཏཔཱཔཀམྨསྶ ཕལཾ ཨུཔྤནྣཾ, ཏཏྠ ཏཡཱ པཙྩཝེཀྑཎབལེན ཨདྷིཝཱསནཱ ཀཱཏབྦཱཏི ཨཱཧ. ཏེནེཝ ཨཱཧ.

༡.

ཨཏཱིཏེ ¶ ཀིར ཨེཀསྨིཾ, གཱམེ ཏྭ མསི དཱརཀོ;

དཱརེཀེཧི སམཱགམྨ, ཀཱིལ༹ནྟོ ཀེལི༹མཎྜལེ.

༢.

གཧེཏྭཱ སུཁུམཾ སཱུཀཾ, ཏདཱ ཏྭཾ ནིམྦཛལླིཡཱ;

ཨུཏྟཱསེསི ཏཏྠ སཱུལེ, ཛཱིཝམཱནཀམཀྑིཀཾ.

༣.

ཨཔརམྤི ཏེ པཱཔཀམྨཾ, པཝཀྑཱམི སུཎོཧི མེ;

ཨོཝདནྟིཾ ཧིཏེན ཏྭཾ, ཨཏཱིཏེ སཀམཱཏརཾ.

༤.

ཛཱིཝསཱུལེ ནིསཱིདཱཏི, ཀོཔེནཱབྷིསཔཱི ཏུཝཾ;

ཨིམེཧི དྭཱིཧི པཱཔེཧི, སརཾ སཾསཱརསཱགརེ.

༥.

པཉྩཛཱཏིསཏེ ཨཙྪི, ཛཱིཝསཱུལམྷི ནིམྦཛེ;

ཨཡཾ ཏེ ཙརིམཱ ཛཱཏི, ཨེཏྠཱཔིཙ ཝིཔཙྩི སོཏི.

ཨེཝམཱདིནཱ ནཡེན ཏསྶ ཨཛ྄ཛྷཱསཡཱནུརཱུཔེན དྷམྨཾ དེསེསི, ཨུཏྟརོ ཨམཏཱབྷིསེཀསདིསེན སཏྠུནོ ཧཏྠསམྥསྶསཉྫཱཏཔསཱདསོམནསྶཏཱཡ ཨུལཱ༹རཾ པཱིཏིཔཱམོཛྫཾ པཊིལབྷིཏྭཱ ཡཐཱཔརིཙིཏཾ ཝིཔསྶནཱམགྒཾ སམཱརཱུལ༹ྷོ ཉཱཎསྶ པརིཔཱཀཾ གཏཏྟཱ སཏྠུ དེསནཱཝིལཱསེན མགྒཔཊིཔཱཊིཡཱ སབྦཀིལེསེ ཁེཔེཏྭཱ ཚལ༹བྷིཉྙོ ཨཧོསི. དྷམྨཾ སུཏྭཱ ཏཏྠ སམཱགཏཱནཾ དེཝམནུསྶཱནཾ ཙཏུརཱསཱིཏིཔཱཎསཧསྶཱནཾ དྷམྨཱབྷིསམཡོ ཨཧོསཱིཏི ཝདནྟི. ཨུཏྟརོ པན ཚལ༹བྷིཉྙོ ཧུཏྭཱ སཱུལཏོ ཨུཊྛཧིཏྭཱ ཨཱཀཱསེ ཋཏྭཱ པཱཊིཧཱརིཡཾ དསྶེསི. མཧཱཛནཱ ཨཙྪརིཡབྦྷུཏཙིཏྟཱ ཛཱཏཱ ཨཧེསུཾ. ཏཱཝདེཝསྶ ཝཎོརུནྡྷི, སོ བྷིཀྑཱུཧི ཨཱཝུསོ ཏཱདིསཾ དུཀྑཾ ཨནུབྷཝནྟོ ཀཐཾ ཏྭཾ ཝིཔསྶནཾ ཨནུཡུཉྫིཏུཾ སཀྑཱིཏི པུཊྛོ པགེཝ མེ ཨཱཝུསོ སཾསཱརེ ཨཱདཱིནཝོ སངྑཱརཱནཉྩ སབྷཱཝོ སུདིཊྛོ. ཏསྨཱཧཾ ཏཱདིསཾ དུཀྑཾ ཨནུབྷཝནྟོཔི ཨསཀྑིཾ ཝིཔསྶནཾ ཝཌྜྷེཏྭཱ ཝིསེསཾ ཨདྷིགནྟུཾཏི ཨཱཧ. ཨཐཱཔརབྷཱགེ སོ བྷིཀྑུསངྒྷམཛ྄ཛྷེ ཨཏྟནོ པུབྦཙརིཏཱ པདཱནཾ པཀཱསེནྟོ ཨིམཱ གཱཐཱ ཨབྷཱསི.

༦.

སུམེདྷོ ¶ ནཱམ སམྦུདྡྷོ, དྭཏྟིཾསཝརལཀྑཎོ;

ཝིཝེཀཀཱམོ སམྦུདྡྷོ, ཧིམཝནྟ མུཔཱགམི.

༧.

ཨཛ྄ཛྷོགཧེཏྭཱ ཧིམཝནྟཾ, ཨགྒོ ཀཱརུཎིཀོ མུནི;

པལླངྐཾ ཨཱབྷུཛིཏྭཱན, ནིསཱིདི པུརིསུཏྟམོ.

༨.

ཝིཛྫཱདྷརོ ཏདཱ ཨཱསིཾ, ཨནྟལིཀྑཙརོ ཨཧཾ;

ཏིསཱུལཾ སུཀཏཾ གཡ྄ཧ, གཙྪཱམི ཨམྦརེ ཏདཱ.

༩.

པབྦཏགྒེ ཡཐཱ ཨགྒི, པུཎྞམཱསེཝ ཙནྡིམཱ;

ཝནཾ ཨོབྷཱསཏེ བུདྡྷོ, སཱལརཱཛཱཝ ཕུལླིཏོ.

༡༠.

ཝནགྒཱ ནིཀྑམིཏྭཱན, བུདྡྷརཾསཱི ཝིདྷཱཝརེ;

ནལགྒིཝཎྞསངྐཱསཱ, དིསྭཱ ཙིཏྟཾ པསཱདཡིཾ.

༡༡.

ཝིཙིནཾ ཨདྡསཾ པུཔྥཾ, ཀཎིཀཱརཾ དེཝགནྡྷིཀཾ;

ཏཱིཎི པུཔྥཱནི ཨཱདཱཡ, བུདྡྷསེཊྛཾ ཨཔཱུཛཡིཾ.

༡༢.

བུདྡྷསྶ ཨཱནུབྷཱཝེན, ཏཱིཎི པུཔྥཱནི མེ ཏདཱ;

ཨུདྡྷཝཎྚཱ ཨདྷོཔཏྟཱ, ཚཱཡཾ ཀུབྦནྟི སཏྠུནོ.

༡༣.

ཏེན ཀམྨེན སུཀཏེན, ཙེཏནཱཔཎིདྷཱིཧིཙ;

ཛཧིཏྭཱ མཱནུསཾ དེཧཾ, ཏཱཝཏིཾསམགཉྪཧཾ.

༡༤.

ཏཏྠ མེ སུཀཏཾ བྱམྷཾ, ཀཎིཀཱརཱིཏི ཉཱཡཏི;

སཊྛིཡོཛན མུབྦེདྷཾ, ཏིཾསཡོཛནཝིཏྠཏཾ.

༡༥.

སཧསྶཁཎྜཾ སཏབྷེཎྜུ, དྷཛཱལུ ཧརིཏཱམཡཾ;

སཏསཧསྶཱནི བྱཱུཧཱནི, བྱམྷེ པཱཏུརཧཾསུ མེ.

༡༦.

སོཎྞམཡཱ མཎིམཡཱ, ལོཧིཏངྐམཡཱ པིཙ;

ཕལིཀཱ པིཙ པལླངྐཱ, ཡདིཙྪཀ ཡདིཙྪཀཱ.

༡༧.

མཧཱརཧཉྩ སཡནཾ, ཏཱུལིཀཾ ཝིཀཏཱིཡཀཾ;

ཨུདྡལོམིཀཨེཀནྟཾ, བིམྦོཧནསམཱཡུཏཾ.

༡༨.

བྷཝནཱ ¶ ནིཀྑམིཏྭཱན, ཙརནྟོ དེཝཙཱརིཀཾ;

ཡདཱ ཨིཙྪཱམི གམནཾ, དེཝསཾགྷཔུརཀྑཏོ.

༡༩.

པུཔྥསྶ ཧེཊྛཱ ཏིཊྛཱམི, ཨུཔརིཙྪདནཾ མམ;

སམནྟཱ ཡོཛནསཏཾ, ཀཎིཀཱརེཧི ཚཱདིཏཾ.

༢༠.

སཊྛིཏུརིཡསཧསྶཱནི, སཱཡཾ པཱཏཾ ཨུཔཊྛཧུཾ;

པརིཝཱརེནྟི མཾ ནིཙྩཾ, རཏྟིནྡིཝམཏནྡིཏཱ.

༢༡.

ཏཏྠ ནཙྩེཧི གཱིཏེཧི, ཏཱལེཧི ཝཱདིཏེཧི ཙ;

རམཱམི ཁིཌྜཱརཏིཡཱ, མོདཱམི ཀཱམཀཱམཧཾ.

༢༢.

ཏཏྠ བྷུཏྭཱ ཙ པིཏྭཱ ཙ, མོདཱམི ཏིདསེ ཏདཱ;

ནཱརཱིགཎེཧི སཧིཏོ, མོདཱམི བྱམྷམུཏྟམེ.

༢༣.

སཏཱནཾ པཉྩཀྑཏྟུཉྩ, དེཝརཛྫ མཀཱརཡིཾ;

སཏཱནཾ ཏཱིཎིཀྑཏྟུཾཙ, ཙཀྐཝཏྟཱི ཨཧོསཧཾ;

པདེསརཛྫཾ ཝིཔུལཾ, གཎནཱཏོ ཨསཾཁིཡཾ.

༢༤.

བྷཝཱབྷཝེ སཾསརནྟོ, མཧཱབྷོགཾ ལབྷཱམཧཾ;

བྷོགེ མེ ཨཱུནཏཱ ནཏྠི, བུདྡྷཔཱུཛཱཡི དཾ ཕལཾ.

༢༥.

དྭེ མེ བྷཝེ སཾསརཱམི, དེཝཏྟེ ཨཐ མཱནུསེ;

ཨཉྙཾ གཏིཾ ན ཛཱནཱམི, བུདྡྷཔཱུཛཱཡིདཾ ཕལཾ.

༢༦.

དྭེ མེ ཀུལེ པཛཱནཱམི, ཁཏྟིཡེ ཙཱཔི བྲཱཧྨཎེ;

ནཱིཙེ ཀུལེ ན ཛཱནཱམི, བུདྡྷཔཱུཛཱཡིདཾ ཕལཾ.

༢༧.

ཧཏྠིཡཱནཾ ཨསྶཡཱནཾ, སིཝིཀཾ སནྡམཱནིཀཾ;

ལབྷཱམི སབྦམེཝེ ཏཾ, བུདྡྷཔཱུཛཱཡིདཾ ཕལཾ.

༢༨.

དཱསཱིགཎཾ དཱསགཎཾ, ནཱརིཡོ ཙ ཨལངྐཏཱ;

ལབྷཱམི སབྦ མེཝེ ཏཾ, བུདྡྷཔཱུཛཱཡིདཾ ཕལཾ.

༢༩.

ཀོསེཡྻཀམྦལིཡཱནི, ཁོམཀཔྤཱསིཀཱནིཙ;

ལབྷཱམི སབྦམེཝེཏཾ, བུདྡྷཔཱུཛཱཡིདཾ ཕལཾ.

༣༠.

ནཝཝཏྠཾ ¶ ནཝཕལཾ, ནཝགྒརསབྷོཛནཾ;

ལབྷཱམི སབྦམེཝེཏཾ, བུདྡྷཔཱུཛཱཡིདཾ ཕལཾ.

༣༡.

ཨིམཾ ཁཱད ཨིམཾ བྷུཉྫ, ཨིམམྷི སཡནེ སཡ;

ལབྷཱམི སབྦམེཝེཏཾ, བུདྡྷཔཱུཛཱཡིདཾ ཕལཾ.

༣༢.

སབྦཏྠ པཱུཛིཏོ ཧོམི, ཡསོ ཨཙྩུགྒཏོ མམ;

མཧེསཀྑོ གྷདཱ ཧོམི, ཨབྷེཛྫཔརིསོ སདཱ;

ཉཱཏཱིནཾ ཨུཏྟམོ ཧོམི, བུདྡྷཔཱུཛཱཡིདཾ ཕལཾ.

༣༣.

སཱིཏཾ ཨུཎྷཾ ན ཛཱནཱམི, པརིལཱ༹ཧོ ན ཝིཛྫཏི;

ཨཐོ ཙེཏསིཀཾ དུཀྑཾ, ཧདཡེ མེ ན ཝིཛྫཏི.

༣༤.

སུཝཎྞཝཎྞོ ཧུཏྭཱན, སཾསརཱམི བྷཝཱབྷཝེ;

ཝེཝཎྞིཡཾ ན ཛཱནཱམི, བུདྡྷཔཱུཛཱཡིདཾ ཕལཾ.

༣༥.

དེཝལོཀཱ ཙཝིཏྭཱན, སུཀྐམཱུལེན ཙོདིཏོ;

སཱཝཏྠིཡཾ པུརེ ཛཱཏོ, མཧཱསཱལེ སུཨཌྜྷཀེ.

༣༦.

པཉྩཀཱམགུཎེ ཧིཏྭཱ, པབྦཛིཾཨནགཱརིཡཾ;

ཛཱཏིཡཱ སཏྟཝསྶོཧཾ, ཨརཧཏྟམཔཱཔུཎིཾ.

༣༧.

ཨུཔསམྤཱདཡཱི བུདྡྷོ, གུཎམཉྙཱཡ ཙཀྑུམཱ;

ཏརུཎོཝ པཱུཛནཱིཡོ ཧཾ, བུདྡྷཔཱུཛཱཡིདཾ ཕལཾ.

༣༨.

དིབྦཙཀྑུཾ ཝིསུདྡྷཾ མེ, སམཱདྷིཀུསལོ ཨཧཾ;

ཨབྷིཉྙཱཔཱརམིཔྤཏྟོ, བུདྡྷཔཱུཛཱཡིདཾ ཕལཾ.

༣༩.

པཊིསམྦྷིདཱ ཨནུཔྤཏྟོ, ཨིདྡྷིཔཱདེསུ ཀོཝིདོ;

སདྡྷམྨེ པཱརམིཔྤཏྟོ, བུདྡྷཔཱུཛཱཡིདཾ ཕལཾ.

༤༠.

ཏིཾསཀཔྤསཧསྶམྷི, ཡཾ བུདྡྷམབྷིཔཱུཛཡིཾ;

དུགྒཏིཾ ནཱབྷིཛཱནཱམི, བུདྡྷཔཱུཛཱཡིདཾ ཕལཾ.

༤༡.

ཀིལེསཱ ཛྷཱཔིཏཱ མཡ྄ཧཾ, བྷཝཱ སབྦེ སམཱུཧཏཱ;

ནཱགོཝ བནྡྷནཾ ཚེཏྭཱ, ཝིཧརཱམི ཨནཱསཝོ.

༤༢.

སྭཱགཏཾ ¶ ཝཏ མེ ཨཱསི, བུདྡྷསེཊྛསྶ སནྟིཀཾ;

ཏིསྶོ ཝིཛྫཱ ཨནུཔྤཏྟོ, ཀཏཾ བུདྡྷསྶ སཱསནཾ.

༤༣.

པཊིསམྦྷིདཱ ཙཏསྶོ ཙ, ཝིམེཀྑཱ པིཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾཏི;

ཏཾ སུཏྭཱ བཧཱུ ཀུསལཀམྨཔརཱཡཎཱ ཨཧེསུཾ.

༤༤.

སཧེཏུཀཱ པཙྪིམིཀཱཔི སཏྟཱ,

པཱཔཾ ན སཀྐོནྟི ཛཧཱཏུམེཝཾ;

ཨནིཙྪམཱནེཧི ཛནེཧི དུཀྑཾ,

ཨཱརཱཝ པཱཔཾ པརིཝཛྫནཱིཡཾཏི.

ཨུཏྟརསཱམཎེརསྶ ཝཏྠུཾ ཙཏུཏྠཾ.

༢༥. ཀཝཱིརཔཊྚན ཝཏྠུམྷི ཨཡམཱནུཔུབྦཱིཀཐཱ

ཛམྦུདཱིཔེ ཀིར ཙོལ༹རཊྛེ ཀཱཝཱིརཔཊྚནཾ ནཱམ ཨཧོསི. ཏཏྠ མཱཧིསྶརིཀཱ བཧཱུ མིཙྪཱདིཊྛིཀཱ ཝསནྟི. ཏཏྠེཀསྨིཾ དེཝཱལཡེ ཙིཏྟཀམྨཾ ཀརོནྟཱ ཨེཀསྨིཾ ཕལཀེ ཨིསྶརསྶ ཨོནམིཏྭཱ ཝནྡནཱཀཱརཾ བྷགཝཏོ རཱུཔཾ ཨཀཾསུ. ཏསྨིཾ སམཡེ ཏཏྠ བཧཱུ ཨུཔཱསཀཱ ཏཾ དེཝཀུལཾ གནྟྭཱ ཏཏྠ ཏཏྠ ཙིཏྟཀམྨཱནི ཨོལོཀེནྟཱ ཏསྨིཾ ཕལཀེ ཏཾ ཙིཏྟཀམྨཾ ཨདྡསཾསུ. དིསྭཱན ཏེ ཨཧོ ཨམྷེཧི ཨཔསྶིཏབྦཾ པསྶིཏཾ. སདེཝཀེ ལོཀེ སམཱརཀེ སབྲཧྨཀེ སསྶམཎབྲཱཧྨཎིཡཱསདེཝམནུསྶཱཡ པཛཱཡ ཙ ཨཔརིམཱཎེསུ ཙཀྐཝཱལེ༹སུ བྷགཝཏོ ཨུཏྟརིཏརཾ ཋཔེཏྭཱ སམསམོཔི ནཏྠི. སཀལེཧི སཏྟནིཀཱཡེཧི ཝནྡནཱིཡོ པཱུཛནཱིཡོ བྷགཝཱ. ཨནནུརཱུཔཾ ཏསྶ ཨེཏེཧི ཀཏཾཏི རོདནྟཱ པརིདེཝནྟཱ རཱཛདྭཱརཾ གནྟྭཱ ཨུགྒྷོསེསུཾ, ཏཾ སུཏྭཱ རཱཛཱ ཏེ པཀྐོསཱཔེཏྭཱ ཀསྨཱ ཏུམྷེ ¶ ཨུགྒྷོསེཐཱཏི པུཙྪི, ཏེ ཨེཝ མཱཧཾསུ. དེཝ ཨམྷཱཀཾ བྷགཝཱ དེཝཱཏིདེཝོ སཀྐཱཏིསཀྐོ བྲཧྨཱཏིབྲཧྨཱ མེརུཝ ཨཙལོ སཱགརོ གམྦྷཱིརོ ཨཱཀཱསོཝ ཨནནྟོ པཐཝཱིཝ པཏྠཊོཏིཨཱདཱིཧི བྷགཝཏོ གུཎཾ ཝཎྞེསུཾ. ཏེན ཝུཏྟཾ ཨཔདཱནེ.

༡.

བཏྟིཾསལཀྑཎདྷརོ, སུནཀྑཏྟོཝ ཙནྡིམཱ;

ཨནུབྱཉྫནསམྤནྣོ, སཱལརཱཛཱཝ ཕུལླིཏོ.

༢.

རཾསིཛཱལཔརིཀྑིཏྟོ, དིཏྟོཝ ཀནཀཱཙལོ;

བྱཱམཔྤབྷཱཔརིཝུཏོ, སཏརཾསི དིཝཱཀརོ.

༣.

སོཎྞཱ ནནོ ཛིནཝརོ, སམཎཱིཝ སིལུཙྩཡོ;

ཀརུཎཱཔུཎྞཧདཡོ, ཝིཝཊྚོ ཝིཡ སཱགརོ.

༤.

ལོཀཝིསྶུཏཀིཏྟཱིཝ, སིནེརུཝ ནགུཏྟམོ;

ཡསསཱ ཝིཏཏོ དྷཱིརོ, ཨཱཀཱསསདིསོ མུནི.

༥.

ཨསངྒཙིཏྟོ སབྦཏྠ, ཨནིལོ ཝིཡ ནཱཡཀོ;

པཏིཊྛཱ སབྦབྷཱུཏཱནཾ, མཧཱིཝ མུནིསུཏྟམོ.

༦.

ཨནཱུཔལིཏྟོ ལོཀེན, ཏོཡེན པདུམཾ ཡཐཱ;

ཀུཝཱདགཙྪདཧནོ, ཨགྒིཀྑནྡྷོཝ སོབྷཏི.

༧.

ཨགདོ ཝིཡ སབྦཏྠ, ཀིལེསཝིསནཱསཀོ;

གནྡྷམཱདནསེལོཝ, གུཎགནྡྷཝིབྷཱུསིཏོ.

༨.

གུཎཱནཾ ཨཱཀརོ དྷཱིརོ, རཏནཱནཾཝ སཱགརོ;

སིནྡྷཱུཝ ཝནརཱཛཱིནཾ, ཀིལེསམལཧཱརཀོ.

༩.

ཝིཛཡཱིཝ མཧཱཡོདྷོ, མཱརསེནཔྤམདྡནོ;

ཙཀྐཝཏྟཱིཝ སོ རཱཛཱ, བོཛ྄ཛྷངྒརཏནིསྶརོ.

༡༠.

མཧཱབྷིསཀྐསངྐཱསོ, དོསབྱཱདྷིཏིཀིཙྪཀོ;

སལླཀཏྟོ ཡཐཱ ཝེཛྫཱ, དིཊྛིགཎྜཝིཕཱལཀོ.

༡༡.

སཏྠཱ ¶ ནོ བྷགཝཱ དེཝ, མཧཱབྲཧྨེཧི ཝནྡིཏོ;

དེཝིནྡསུརསིདྡྷེཧི, ཝནྡནཱིཡོ སདཱ དརཱ.

༡༢.

སབྦེསུ ཙཀྐཝཱལེ༹སུ, ཡེ ཨགྒཱ ཡེ ཙ པཱུཛིཏཱ;

ཏེསམགྒོ མཧཱརཱཛ, བྷགཝཱ ནོ པཏཱཔཝཱཏི.

ཨཡུཏྟཾ དེཝ དེཝཀུལེཧི ཀཏཾཏི ཨཱཧཾསུ. ཏཾ སུཏྭཱ རཱཛཱ བྷོ སབྦེཔི མནུསྶཱ ཨཏྟནོ ཨཏྟནོ དེཝཏཱནཾ མཧནྟབྷཱཝཾ ཀཐེནྟི. ཏུམྷཱཀཾ པན སཏྠུནོ མཧནྟབྷཱཝཾ ཀཐཾ ཨམྷཱཀཾ ཛཱནཱཔེཐཱཏི, ཨུཔཱསཀཱ ན གརུ ཏྭཾ མཧཱརཱཛ ཕལཀཾ ཨཱཧརཱཔེཏྭཱ སུདྡྷཝཏྠེན ཝེཋེཏྭཱ ཏཾ ཨཏྟནོ མུདྡིཀཱཡ ལཉྪིཏྭཱ སུརཀྑིཏསུགོཔིཏེ ཨེཀསྨིཾ དེཝཀུལེ ཋཔེཏྭཱ སཏྟཱཧཙྩཡེན ཨཱཧརཱཔེཏྭཱ ཏཾ ཨོལོཀེཐ, ཏདཱ ནོ སཏྠུནོ མཧནྟཱནུབྷཱཝཾ ཛཱནཱཐཱཏི ཨཱཧཾསུ, ཨཐ རཱཛཱ ཏེསཾ ཝུཏྟནིཡཱམེནེཝ ཀཱརཱཔེཏྭཱ ཨནྟོདེཝཀུལེ ཋཔེཏྭཱ སབྦདྭཱརཱནི པིདཧིཏྭཱ ལཉྪེཏྭཱ རཀྑེཡྻཱཐཱཏི ནིཡོཛེསི. ཏཏོ ཏེ ཨུཔཱསཀཱ སབྦེ སནྣིཔཏིཏྭཱ སཏྟཱཧཾ དཱནཾ དེནྟཱ སཱིལཾ རཀྑནྟཱ ཨུཔོསཐཀམྨཾ ཀརོནྟཱ སབྦསཏྟེསུ མེཏྟིཾ བྷཱཝེནྟཱ སབྦསཏྟཱནཾ ཨཏྟནཱ ཀཏཔུཉྙེསུ པཏྟིཾ དེནྟཱ ཏིཎྞཾ རཏནཱནཾ པཱུཛཾ ཀརོནྟཱ ཨེཝཾ ཨུགྒྷོསེསུཾ. ཨམྷཱཀཾ ཀཏཀུསལནིསྶནྡེན ལོཀེ མཧིདྡྷིཀཱ མཧཱནུབྷཱཝཱ སབྦེ དེཝཱ ཙ ལོཀཾ པཱལེནྟཱ ཙཏྟཱརོ མཧཱརཱཛཱནོ ཙ ཨམྷཱཀཾ སཏྠུནོ ཨུཔཊྛཱནཱཡ [ཨུཔཊྛཱཡ ཨིཏིསབྦཏྠ] ཋིཏབྷཱཝཾ དསྶེནྟཱུཏི སཙྩཀིརིཡཾ ཨཀཾསུ. ཨཐ ཏེསཾ པུཉྙཱནུབྷཱཝེན ཏསྨིཾ ཁཎེ སཀྐསྶ དེཝརཉྙོ པཎྜུཀམྦལསིལཱསནཾ ཨུཎྷཱཀཱརཾ དསྶེསི. ཏཏོ སོ མནུསྶལོཀཾ ཨོལོཀེནྟོ མིཙྪཱདིཊྛཱིཧི ཀཏཾ ཏཾ ཝིཔྤཀཱརཾ དིསྭཱ སཾཝིགྒོ ཨཱགནྟྭཱ ཨིསྶརཾ བྷགཝཏོ པཱདེ ཝནྡིཏྭཱ སཡིཏཱཀཱརཾ ¶ ཀཏྭཱ ཏཾ པཝཏྟིཾ ཨུཔཱསཀཱནཾ ཀཐེཏྭཱ སཀཊྛཱནམེཝ ཨགམཱསི. ཏཏོ སཏྟམེ དིཝསེཔཱཏོཝ ཏེ སབྦེཔི རཉྙོ སནྟིཀཾ གནྟྭཱ ཝནྡིཏྭཱ ཨེཝམཱཧཾསུ. དེཝ ཨིསྶརོ ཨམྷཱཀཾ བྷགཝཏོ པཱདེ སིརསཱ ཝནྡིཏྭཱ ནིཔནྣོཏི. ཨཐ རཱཛཱ ཏེསཾ ཀཐཾ སུཏྭཱ ནགརེ བྷེརིཾ ཙརཱཔེཏྭཱ མཧཱཛནེ སནྣིཔཱཏེཏྭཱ ཏེཧི པརིཝུཏོ དེཝཀུལཾ གནྟྭཱ ལཉྪཾ བྷིནྡཱཔེཏྭཱ དྭཱརཾ ཝིཝརིཏྭཱ ཕལཀཾ ཨཱཧརཱཔེཏྭཱ ཝེཋིཏསཱཊཀེ མོཙཱཔེསི. ཨཐ རཱཛཱ ཙ མཧཱཛནོ ཙ ཏཾ མཧནྟཾ པཱཊིཧཱརིཡཾ དིསྭཱ མིཙྪཱདིཊྛིཾ པཧཱཡ སབྦེ སཏྠུནོ སརཎ མགམཾསུ. ཨཐ རཱཛཱ ཏཾ དེཝཀུལཾ བྷིནྡཱཔེཏྭཱ མཧནྟཾ རམཎཱིཡཾ ཝིཧཱརཾ ཀཱརཱཔེཏྭཱ ཡཱཝཛཱིཝཾ པུཉྙཀམྨཾ ཀཏྭཱ དེཝལོཀེ ནིབྦཏྟི.

༡༣.

ཨནབྦྷུཏཾ སཏྠུ དྷརཱིཡམཱནེ,

ཀརོནྟི དིསྭཱ ཀུསལཱནི ཨིདྡྷིཾ;

ཡེ ཏཾ མུནིནྡེ པརིནིབྦུཏམྷི,

ཀརོནྟི པུཉྙཱནི མཧབྦྷཱུཏཾ ཡེཏི.

ཀཱཝཱིརཔཊྚནཝཏྠུཾ པཉྩམཾ.

༢༦. ཙོརགྷཱཏཀཝཏྠུམྷི ཨཡམཱནུཔུབྦཱིཀཐཱ

ཨེཀསྨིཾ ཀིར སམཡེ ཨམྷཱཀཾ བྷགཝཱ སཱཝཏྠིཡཾ ཨུཔནིསྶཱཡ ཛེཏཝནེ ཝིཧརཏི དྷམྨདེསནཱཡ མཧཱཛནསྶ སགྒམོཀྑསམྤདཾ དདམཱནོ. ཏསྨིཾསམཡེ པཉྩསཏཱ ཙོརཱ ཨཊཝིཏོ ནགརཾ ཨཱགནྟྭཱ རཏྟིབྷཱགེ ཙོརཀམྨཾ ཀཏྭཱ ཏེན པུཏྟདཱརེ པོསེནྟི. ཨཐེཀདིཝསཾ ཙོརཱ ཙོརཀམྨཏྠཱཡ ནགརཾ པཝིསནྟཱ ནགརདྭཱརེ ཨེཀཾ དུཀྑིཏཾ ཛནཔདམནུསྶཾ པསྶིཏྭཱ ཧམྦྷོ ¶ ཀཏྠ ཝསཏཱིཏི པུཙྪིཾསུ, སོ ཨཏྟཛནཱ ཛནཔདཝཱསིབྷཱཝཾ པཀཱསེསི. ཨཐསྶ ཏེ ཀསྨཱ བྷོ ཨིམིནཱ དུཀྑཝཱསེན ཝསིསྶསི, ཨེཧི ཨམྷེཧི སདྡྷིཾ ཙོརཀམྨཾ ཀརོནྟོ ཝཏྠཱལངྐཱརསམྤནྣོ པུཏྟདཱརཾ པོསེཧི. ཨིམིནཱ ཀཔཎཝཱསེན ན ཝསཱཏི ཨཱཧཾསུ. སོ པནིམེ ཡུཏྟཾ ཀཐེནྟཱིཏི ཏེསཾ ཝཙནཾ སམྤཊིཙྪི. ཨཐ ཏེ ཨེཝཾ སཏི ཨམྷེཧི སདྡྷིཾ ཨཱགཙྪཱཧཱིཏི ཝཏྭཱ ནཾ གཧེཏྭཱ ཨནྟོནགརཾ པཝིཊྛཱ ཏཏྠ ཏཏྠ ཝིལུམྤནྟཱ ཙོརཀམྨཾ ཨཀཾསུ. ཏདཱ ཛཱནཔདིཀོ ལདྡྷཝིབྷཝོ ཨིམམེཝ ཝརཏརནྟི ཏེཧི སདྡྷིཾ ཙོརཀམྨཾ ཀརོནྟོ ཛཱིཝིཀཾ ཀཔྤེསི, ཨཐེཀདིཝསཾ རཱཛཔུརིསཱ ཀཏཀམྨེ ཏེ སབྦེཝ གཧེཏྭཱ པཙྪཱབཱཧཾ གཱལ༹ྷཾ བནྡྷིཏྭཱ ཀོསལརཉྙོ དསྶེསུཾ, རཱཛཱ ཏེ དིསྭཱ ཨེཝམཱཧ, བྷཎེ ཏུམྷཱཀཾ ཨནྟརེ ཡོ ཨེཏེསཾ མཱརེཏྭཱ ཛཱིཝིཏཀྑཡཾ པཱཔེསྶཏི, ཏསྶ ཛཱིཝིཏདཱནཾ དམྨཱིཏི, ཏཾ སུཏྭཱ ཏེ ཙོརཱ སབྦེ ཨཉྙམཉྙཉཱཏིསུཧདསམྦནྡྷབྷཱཝེན ཏཾ ན ཨིཙྪིཾསུ. སོ པན ཛནཔདཝཱསཱི མནུསྶོ ཨཧམེཏེ སབྦེ མཱརེསྶཱམཱིཏི རཉྙོ ཝཏྭཱ ཏེནཱནུཉྙཱཏོ ཏེ སབྦེ མཱརེསི. ཏཾ དིསྭཱ ཏུཊྛོ རཱཛཱ ཏསྶ ཙོརགྷཱཏཀམྨཾ ཨདཱསི. སོ ཙོརེ ཙ ཝཛ྄ཛྷཔྤཏྟེ ཙ མཱརེནྟོ པཉྩཝཱིསཏིཝསྶཱནི ཝསནྟོ ཨཔརབྷཱགེ མཧལླཀོ ཨཧོསི. ཨཐ སོ མནྡབལཏྟཱ ཀཏིཔཡཔཧཱརེནཱཔི ཙོརཾ མཱརེཏུཾ ན སཀྐོཏི, རཱཛཱ ཏཾ ཉཏྭཱ ཨཉྙསྶ ཙོརགྷཱཏཀམྨཾ ཨདཱསི. ཨཐ སོ ཙོརགྷཱཏཀམྨཱ [ཙོརགྷཱཏཀམྨ ཨིཏིཔིཀཏྠཙི] པརིཧཱིནོ ཨཏྟནོ གེཧེ ཝསཏི. ཏདཱ ཨཉྙཏརོ མནུསྶོ མནྟཾ པརིཝཏྟེཏྭཱ ནཱསཱཝཱཏེན མནུསྶམཱརཎཀམནྟཾ ཛཱནཱཏི. ཏཐཱཧི ཧཏྠཔཱདཀཎྞནཱསསཱིསཱདཱིསུ ཡཾཀིཉྩི ཚེཛྫབྷེཛྫཾ ཀཏྟུཀཱམོ མནྟཾ པརིཝཏྟེཏྭཱ ནཱསཱཝཱཏཾ ཝིསྶཛྫེཏི. ཏཾ ཏཾ ཋཱནཾ ཚིཛྫཏི བྷིཛྫཏི, ཨེཝཾ མཧཱནུབྷཱཝོ སོ མནྟོ, ཨཐ སོ ཏཾ པུརིསཾ ཨུཔཊྛཧིཏྭཱ མནྟཾ ལབྷིཏྭཱ རཉྙོ སཱསནཾ པེསེསི ¶ . ཨཧཾ ཨིཏོ པུབྦེ མཧལླཀཏྟཱ ཙོརཱནཾ ཧཏྠཔཱདཱདཡོ དུཀྑེན ཚེཛྫ བྷེཛྫཾ ཀརོམི, མཱརེཏབྦེཔི དུཀྑེན མཱརེམི. ཨིདཱནི པནཱཧཾ ཏཐཱ ན ཀརོམི, མམ མནྟཱནུབྷཱཝེན ཚེཛྫབྷེཛྫཀམྨཾ ཀརིསྶཱམཱིཏི. རཱཛཱ ཏཾ སཱསནཾ སུཏྭཱ སཱདྷཱུཏི ཏཾ པཀྐོསཱཔེཏྭཱ ཋཱནནྟརཾ ཏསྶེཝ པཱཀཏིཀ མཀཱསི. སོ ཏཏོ པཊྛཱཡ ཏཾ ཀམྨཾ ཀརོནྟོ པུན པཉྩཝསྶཱནི ཨཏིཀྐཱམེསི. སོ མཧལླཀོ ཁཱིཎཱཡུཀོ དུབྦལོ མརཎམཉྩཔརཱཡཎོ ཧུཏྭཱ མརཎཝེདནཱདུཀྑེན མཧནྟེན བྷཡཱནཀེན སདྡེན ཝིསྶརཾ ཝིརཝནྟོ ནིམཱིལིཏེན ཙཀྑུནཱ བྷཡཱནཀཾ ནརཀགྒིཛཱལཱཔཛྫལནྟཨཡཀཱུཊམུགྒརདྷརེ ནིརཡཔཱལེ ཙ པསྶནྟོ ནིཔནྣོ ཧོཏི, ཏཏོ ཏསྶ པཊིཝིསྶཀགེཧེ མནུསྶཱ ཏསྶ བྷཡཱནཀསདྡསཝཎེན གེཧཾ ཚཊྚེཏྭཱ པལཱཡིཾསུ. ཏསྨིཾ ཀིར དིཝསེ མཧཱསཱརིཔུཏྟཏྠེརོ དིབྦཙཀྑུནཱ ལོཀཾ ཨོལོཀེནྟཱ ཏཾ ཙོརགྷཱཏཀཾ ཏདཧེཝ ཀཱལཾཀཏྭཱ ནིརཡེ ནིབྦཏྟམཱནཾ དིསྭཱ མཡི ཏཏྠ གཏེ པནེས མཡི པསཱདེན སགྒེ ནིབྦཏྟཏཱིཏི ཉཏྭཱ ཨཛྫ མཡཱ ཏསྶཱནུགྒཧཾ ཀཱཏུཾ ཝཊྚཏཱིཏི པུབྦཎྷསམཡཾ ནིཝཱསེཏྭཱ ཏསྶ གྷརདྭཱར མགམཱསི. ཨཐ སོ ཐེརཾ དིསྭཱ ཀུདྡྷོ ཀོཔེན ཏཊཏཊཱཡམཱནདེཧོ ཨཛྫ ཏཾ ཝིཛ྄ཛྷིཏྭཱ ཕཱལེཏྭཱ མཱརེསྶཱམཱིཏི ནིཔནྣོཝ མནྟཾ པརིཝཏྟེཏྭཱ ནཱསཱཝཱཏཾ ཝིསྶཛྫེསི, ཐེརོ ཏསྨིཾ ཁཎེ ནིརོདྷསམཱཔནྣོ ནིརོདྷཱ ཝུཊྛཱཡ སུརིཡོ ཝིཡ ཝིརོཙམཱནོ ཨཊྛཱསི, ཨཐ སོ ཐེརསྶ ཏཡོ ཝཱརེ ཏཐེཝ ཀཏྭཱ ཀིཉྩི ཀཱཏུཾ ཨསཀྐོནྟོ ཨཏིཝིཡ ཝིམྷིཏཙིཏྟོ ཐེརེ ཙིཏྟཾ པསཱདེཏྭཱ ཨཏྟནོ པཊིཡཏྟཾ པཱཡསཾ ཐེརསྶ དཱཔེསི, ཐེརོ མངྒལཾ ཝཌྜྷེཏྭཱ ཝིཧཱརམེཝ ཨགམཱསི, ཙོརགྷཱཏཀོ ཐེརསྶ དིནྣདཱནཾ ཨནུསྶརནྟོ ཏསྨིཾ ཁཎེ ཀཱལཾ ཀཏྭཱ སགྒེ ནིབྦཏྟི. ཨཧོ ཝཱིཏརཱགཱནཾ བུདྡྷཔུཏྟཱནཾ ཨཱནུབྷཱཝོ. ཨེཝཾ ནརཀེ ནིབྦཏྟམཱནོཔིསྶ བལེན སགྒེ ནིབྦཏྟོཏི. ཏཐཱཧི.

༡.

དཱནཾ ¶ ཏཱཎཾ མནུསྶཱནཾ, དཱནཾ དུགྒཏིཝཱརཎཾ;

དཱནཾ སགྒསྶ སོཔཱནཾ, དཱནཾ སནྟིཀརཾ པརཾ.

༢.

ཨིཙྪིཏིཙྪིཏདཱནེན, དཱནཾ ཙིནྟཱམཎཱི ཝིཡ;

ཀཔྤརུཀྑོཝ སཏྟཱནཾ, དཱནཾ བྷདྡགྷཊོཝིཡ.

༣.

སཱིལཝནྟསྶ དཱནེན, ཙཀྐཝཏྟིསིརིམྤི ཙ;

ལབྷནྟི སཀྐསམྤཏྟིཾ, ཏཐཱ ལོཀུཏྟརཾ སུཁཾ.

༤.

པཱཔཀམྨེསུ ནིརཏོ, ཋིཏོཡཾ ནརཀཱཡནེ [ནརཀཱཝནེ ཨིཏིཔིཀཏྠཙི];

སཱརིཔུཏྟསྶ ཐེརསྶ, པིཎྜཔཱཏསྶ ཝཱཧསཱ.

༥.

ཨཔཱཡཾ པརིཝཛྫེཏྭཱ, ནེཀདུཀྑསམཱཀུལཾ;

དེཝསངྒྷཔརིབྦཱུལ༹ྷོ, གཏོ དེཝཔུརཾ ཝརཾ.

༦.

ཏསྨཱ སུཁེཏྟེ སདྡྷཱཡ, དེཐ དཱནཱནི ཀཱམདཾ;

དཱནཾ དེནྟེཧི སཱིལམྤི, པཱལནཱིཡཾཏིསུནྡརནྟི [པཱལནཾཙཱཏིསུནྡརཾ ཨིཏིཔིཀཏྠཙི].

ཨཐ བྷིཀྑཱུ དྷམྨསབྷཱཡཾ སནྣིཔཏིཏྭཱ ནིསིནྣཱ བྷགཝནྟཾ པུཙྪིཾསུ, ཀིཾབྷནྟེ སོ པཱཔོ ཙཏཱུསུ ཨཔཱཡེསུ ཀཏརསྨིཾ ནིབྦཏྟོཏི. ཨཐ སཏྠཱ ཨཛྫེས བྷིཀྑཝེ སཱརིཔུཏྟསྶ དིནྣདཱནཱནུབྷཱཝེན དེཝལོཀེ ནིབྦཏྟོ, ཏསྶེཝ ནིསྶནྡེན ཨནཱགཏེ པཙྩེཀབུདྡྷོ བྷཝིསྶཏཱིཏི བྱཱཀཱསཱིཏི.

༧.

བྷོ སཱརིཔུཏྟེ ནིཧིཏཔྤདཱནཾ,

ཁཎེན པཱཔེཏི ཧི སགྒམགྒཾ;

ཏསྨཱ སུཁེཏྟེསུ དདཱཐ དཱནཾ,

ཀཱམཏྠ ཙེ སགྒམོཀྑཾ པརཏྠ.

ཙོརགྷཱཏཀཝཏྠུཾ ཚཊྛམཾ.

༢༧. སདྡྷོཔཱསཀསྶ ཝཏྠུམྷི ཨཡམཱནུཔུབྦཱིཀཐཱ

ཨཏཱིཏེ ¶ ཀིར ཀསྶཔདསབལསྶ ཀཱལེ ཨེཀོ པུརིསོ སདྡྷོ རཏནཏྟཡེསུ པསནྣོ ཨུཙྪུཡནྟཀམྨེན ཛཱིཝིཀཾ ཀཔྤེནྟོ པཊིཝསཏི. ཨཐ སོ ཨེཀཾ གིལཱནབྷིཀྑུཾ དིསྭཱ ཏསྶ ཨུལུ༹ངྐམཏྟཾ སཔྤིཾ ཨདཱསི, ཏཐེཝེཀསྶ བྷིཀྑུསྶ ཨེཀཾ གུལ༹པིཎྜཾ ཨདཱསི, ཨཐཱཔརསྨིཾདིཝསེ ཨེཀཾ ཚཱཏཛ྄ཛྷཏྟཾ སུནཁཾ དིསྭཱ ཏསྶ བྷཏྟཔིཎྜེན སངྒཧ མཀཱསི, ཨཐེཀསྶ ཨིཎཊྛཀསྶ ཨེཀཾ ཀཧཱཔཎཾ ཨདཱསི, ཨཐེཀདིཝསཾ དྷམྨཾ སུཎམཱནོ དྷམྨདེསཀསྶ བྷིཀྑུསྶ སཱཊཀཾ པཱུཛེསི, སོ ཨེཏྟཀཾ པུཉྙཀམྨཾ ཀཏྭཱ བྷཝེསུ ཙརམཱནོཧཾ སམུདྡཔབྦཏཱདཱིསུཔི ཡཾ ཡཾ ཨིཙྪཱམི. ཏཾ ཏཾ སམིཛ྄ཛྷཏཱུཏི པཏྠནཾ ཨཀཱསི, སོ ཨཔརབྷཱགེ ཀཱལཾ ཀཏྭཱ ཏེཧེཝ ཀུསལམཱུལེཧི སུཏྟཔྤབུདྡྷོ ཝིཡ དེཝལོཀེ ནིབྦཏྟིཏྭཱ ཏཏྠ མཧནྟཾ དིབྦསམྤཏྟིཾ ཨནུབྷཝིཏྭཱ ཏཏོ ཙུཏོ ཨམྷཱཀཾ བྷགཝཏོ ཀཱལེ སཱཝཏྠིཡཾ མཧདྡྷནེ མཧཱསཱལཀུལེ ནིབྦཏྟིཏྭཱ ཏཏོ སོ ཝིཉྙུཏཾ པཏྟོ ཀཱལེན ཀཱལཾ དྷམྨཾ སུཎནྟོ གྷརཱཝཱསེ ཨཱདཱིནཝཾ པབྦཛྫཱཡ ཙ ཨཱནིསཾསཾ སུཏྭཱ པབྦཛིཏོ ན ཙིརེནེཝ ཨརཧཏྟཾ པཱཔུཎི. སོ ཨཔརབྷཱགེ སཏྠཱརཾ ཝནྡིཏྭཱ པཉྩསཏབྷིཀྑུཔརིཝཱརོ ཨུགྒནགརཾ ཨགམཱསི, ཏཏྠ སེཊྛིནོ བྷརིཡཱ སདྡྷཱ ཨཧོསི པསནྣཱ. སཱ ཐེརཾ པཉྩཧི བྷིཀྑུསཏེཧི སདྡྷིཾ བྷིཀྑཱཡ ཙརནྟཾ དིསྭཱ ཏུརིཏཏུརིཏཱ གནྟྭཱ ཐེརསྶ པཏྟཾ གཧེཏྭཱ སདྡྷིཾ པཉྩསཏེཧི བྷིཀྑཱུཧི བྷོཛེཏྭཱ ཐེརཾ ཏཏྠ ནིབདྡྷཝཱསཏྠཾ ཡཱཙིཏྭཱ པཉྩསཏཀཱུཊཱགཱརཱནི ཀཱརཱཔེཏྭཱ ཨལངྐརིཏྭཱ པཉྩསཏབྷིཀྑཱུ ཏཏྠ ཝཱསེནྟཱི ནིབདྡྷཾ ཙཏུཔཙྩཡེཧི ཨུཔཊྛཱནམཀཱསི. ཏཏོ ཐེརོ ཏཾ པཉྩསུ སཱིལེསུ པཏིཊྛཱཔེཏྭཱ ཏཏྠ ཡཐཱབྷིརནྟཾ ཝིཧརིཏྭཱ ཨཉྙཏྟ གནྟུཀཱམོ ཨནུཔུབྦེན པཊྚནགཱམཾ ཨགམཱསི, ཏཏྠ ཝསིཏྭཱ ཏཏོ ནཱཝཾ ཨབྷིརུཡ྄ཧ པཉྩསཏབྷིཀྑཱུཧི པརིཝུཏོ སམུདྡཔིཊྛེན གཙྪཏི, སམུདྡཾ ཏརནྟསྶ ¶ ཏསྶ སཱགརམཛ྄ཛྷེ ཨུདརཝཱཏོ སམུཊྛཧིཏྭཱ པཱིལེ༹ཏི, ཏཾ དིསྭཱ བྷིཀྑཱུ བྷནྟེ ཨིདཾ པུབྦེ ཀེན ཝཱུཔསམེསྶཏཱིཏི པུཙྪིཾསུ, ཐེརོ པུབྦེ མེ ཨཱཝུསོ ཨུལུངྐམཏྟེ སཔྤིཔཱིཏེ རོགོ ཝཱུཔསམྨཏཱིཏི ཨཱཧ, བྷིཀྑཱུ བྷནྟེ སམུདྡཔིཊྛེ ཀཐཾ སཔྤིཾ ལབྷིསྶཱམ, ཨདྷིཝཱསེཐཱཏི ཨཱཧཾསུ, ཏཾ སུཏྭཱ ཐེརེན [ཐེརོནནོཨཱཡསྨནྟཱ ཨིཏིསབྦཏྠ] ན ནོ ཨཱཡསྨནྟཱ སཔྤི དུལླབྷཱ, མམ པཏྟཾ གཧེཏྭཱ སམུདྡོདཀཾ ཨུདྡྷརིཏྭཱ ཨཱནེཐཱཏི ཝུཏྟེ བྷིཀྑཱུ ཏཐཱ ཨཀཾསུ. ཨུདྡྷཊམཏྟམེཝ ཏཾཨུདཀཾ པརིཝཏྟེཏྭཱ སཔྤི ཨཧོསི, ཨཐ བྷིཀྑཱུ ཏཾ དིསྭཱ ཨཙྪརིཡབྦྷུཏཙིཏྟཱ ཛཱཏཱ ཐེརསྶ སཔྤིཾ ཨུཔནཱམེསུཾ, ཐེརེན སཔྤིནོ [སཔྤིནཱ ཨིཏིསབྦཏྠ] པཱིཏམཏྟེ སོ ཨཱབཱདྷོ ཝཱུཔསམི, ཨཐསྶ བྷིཀྑཱུཧི ཀི མེཏཾ བྷནྟེ ཨཙྪརིཡཾ, ན ནོ ཨིཏོ པུབྦེ ཨེཝརཱུཔཾ དིཊྛཔུབྦཾཏི ཝུཏྟེ ཐེརོ ཏེནཧི ཀཏཔུཉྙཱནཾ པུཉྙཝིཔཱཀཾ པསྶིསྶཐཱཏི ཝཏྭཱ སམུདྡཾ ཨོལོཀེསི ཨིདཾ སཔྤི ཧོཏཱུཏི. ཨཐསྶ ཙཀྑུཔཐེ སམུདྡེ སབྦོདཀཾ པརིཝཏྟེཏྭཱ སཔྤི ཨཧོསི. ཨཐསྶ བྷིཀྑཱུ ཨབྦྷུཏཙིཏྟཱ ཨཉྙམྤི ཨཱིདིསཾ པུཉྙཾ ཨཏྠི བྷནྟེཏི པུཙྪིཾསུ, ཏཏོ ཐེརོ ཏེནཧི པསྶཐཱཡསྨནྟཱ མམ པུཉྙནྟི ཝཏྭཱ སམནྟཱ ཏཏྠ ཏཏྠ གྷནསེལཔབྦཏེ ཨོལོཀེསི, སབྦཱནི ཏཱནི གུལ༹པིཎྜཱནི ཨཧེསུཾ, ཏཏོ ཙཀྑུཔཐེ སམནྟཱ བྷཏྟབྷཱཛནཱནི དསྶེསི སབྱཉྫནཾ སོཔཀརཎཾ. ཏཏོ ཧིམཝནྟཾ ཨོལོཀེསི, སབྦཾ ཏཾ སུཝཎྞམཡཾ ཨཧོསི. ཨཐཱབྷིམུཁཊྛཱནེ མཧནྟཾ ཝནསཎྜཾ ཨོལོཀེསི, སཀལཝནསཎྜཾནཱནཱཝིརཱགཝཏྠེཧི སཉྪནྣཾ ཨཧོསི, བྷིཀྑཱུ ཏཾ ཏཾ པཱཊིཧཱརིཡཾ དིསྭཱ ཨཏཱིཝ ཝིམྷིཏཱ བྷནྟེ ཀེན ཏེ པུཉྙཀམྨེན ཨེཏཱདིསཱནི པཱཊིཧཱརིཡཱནི བྷཝིསྶནྟཱིཏི པུཙྪིཾསུ, ཐེརོ ཀསྶཔདསབལསྶ ཀཱལེ ཨཏྟནཱ ཀཏཾ སབྦཾ ཏཾ ཀུསལཾ པཀཱསེསི. ཏེནེཏྠ.

༡.

ཨིམསྨིཾ ¶ བྷདྡཀེ ཀཔྤེ, ཀསྶཔོ ནཱམ ནཱཡཀོ;

སབྦལོཀཧིཏཏྠཱཡ, ལོཀེ ཨུཔྤཛྫི ཙཀྑུམཱ.

༢.

ཏདཱཧཾ ཨུཙྪུཡནྟམྷི, ནིཡུཏྟོ གུལ༹ཀཱརཀོ;

ཏེན ཀམྨེན ཛཱིཝཱམི, པོསེནྟོ པུཏྟདཱརཀེ.

༣.

ཀིལནྟིནྡྲིཡམདྡཀྑིཾ, བྷིཀྑུཾ རོགཱཏུརཾ ཏདཱ;

བྷིཀྑཱཙཱརཀཝཏྟེན, གྷཏཏྠཾ [གྷཏམཏྟམུཔཱགཏཾ ཨིཏིསབྦཏྠ] སམུཔཱགཏཾ.

༤.

ཨུལུངྐམཏྟཾ སཔྤིསྶ, ཨདདཾ ཏསྶ བྷིཀྑུནོ;

སདྡཧནྟོ དཱནཕལཾ, དཡཱཡུ དགྒམཱནསོ.

. ༥

ཏེན ཀམྨེན སཾསཱརེ, སཾསརནྟོ བྷཝཱབྷཝེ;

ཡཏྠིཙྪཱམི གྷཏཾ ཏཏྠ, ཨུཔྤཛྫཏི ཨནཔྤཀཾ.

༦.

ཨིཙྪཱམཧཾ སམུདྡསྨིཾ, ཕལམྤི གྷཏམཏྟནོ;

ཏཾ ཏཾ སབྦཾ གྷཏཾ ཧོཏི, གྷཏདཱནསྶིདཾ ཕལཾ.

༧.

སུཎཱཐ མཡ྄ཧཾ ཨཉྙམྤི, པུཉྙཀམྨཾ མནོརམཾ;

ཏདཱ དིསྭཱནཧཾ བྷིཀྑུཾ, རོགེན པརིཔཱིལི༹ཏཾ.

༨.

གུལ༹པིཎྜཾ གཧེཏྭཱན, པཏྟེ ཏསྶ སམཱཀིརིཾ;

ཏེན སོ སུཁིཏོ ཨཱསི, རོགཾ བྱཔགཏཾ ཏདཱ.

༩.

ཏེན མེ གུལ༹དཱནེན, སཾསརཾ དེཝམཱནུསེ;

ཡཏྠཏྠོསྨི གུལེ༹ནཱཧཾ, ཏཏྠ ཏཾ སུལབྷཾ མམ.

༡༠.

སེལཱཙ ཝིཔུལཱ མཡ྄ཧཾ, ཧོནྟི ཙིཏྟཱནུཝཏྟཀཱ;

མཧནྟགུལ༹པིཎྜཱཝ, གུལ༹དཱནེ ཨིདཾ ཕལཾ.

༡༡.

ཨཐཱཔི མེ ཀཏཾ པུཉྙཾ, སུཎཱཐ སཱདྷུ བྷིཀྑཝོ;

ཚཱཏཛ྄ཛྷཏྟཾ ཕནྡམཱནཾ, དིསྭཱན སུནཁཾ ཏདཱ.

༡༢.

བྷཏྟཔཱིཎྜེན ¶ སངྒཎྷིཾ, ཏམྤི དཱནཾ ཕལཱཝཧཾ;

ཏཏོ པཊྛཱཡ ནཱཧོསི, ཨནྣཔཱནེན ཨཱུནཏཱ.

༡༣.

སུལབྷནྣཔཱནོ སུཁིཏོ, ཨཧོསིཾཛཱཏིཛཱཏིཡཾ;

ཨཛྫཱཔི ཡདི ཨིཙྪཱམི, བྷོཛནེན པཡོཛནཾ.

༡༤.

ཙཀྑུཔཐེ སམནྟཱ མེ, ཛཱཡནྟུཀྑལིཡོ བཧཱུ;

ཨཐཱཔརམྤི ཀུསལཾ, ཨཀཱསིཾཏཾ སཎཱཐ མེ.

༡༥.

ཨིཎཊྛཀསྶ པོསསྶ, ཨདཱསེཀཾ ཀཧཱཔཎཾ;

ཏེན མེ པུཉྙཀམྨེན, ཨནོམབྷཝསམྤདཾ.

༡༦.

པཙུརཾ ཛཱཏརཱུཔཉྩ, ལབྷཱམི ཛཱཏིཛཱཏིཡཾ;

སཙཛྫ དྷནཀཱམོཧཾ, གྷནསེལོཔི པབྦཏོ;

ཧོཏི ཧེམམཡཾ སབྦཾ, ཨིཎཏོ མོཙནེ ཕལཾ.

༡༧.

ཨཉྙམྤི མམ པུཉྙཾ བྷོ, སུཎཱཐ སུཏིསོབྷནཾ;

ཀསྶཔསྶ བྷགཝཏོ, སཱསནེཀཾ བཧུསྶུཏཾ.

༡༨.

དེསེནྟཾ མུནིནོ དྷམྨཾ, སུཏྭཱ པཱིཎིཏམཱནསོ;

པཱུཛེསིཾསཱཊཀཾ མཡ྄ཧཾ, དྷམྨསྶ དྷམྨསཱམིནོ.

༡༩.

ཏེནཱཧཾ པུཉྙཀམྨེན, སཾསརཾ དེཝམཱནུསེ;

ལབྷཱམི པཙུརཾ ཝཏྠཾ, ཡཾ ལོཀསྨིཾ ཝརཾ པརཾ.

༢༠.

ཨིཙྪམཱནོ སཙེ ཨཛྫ [ཛཱནམཱནོཔཧཾཨཛྫ; ཛཱནདྷཱནོཙཧཾཨཛྫ ཨིཏིཀཏྠཙི], ཧིམཝནྟམྤི པབྦཏཾ;

ནཱནཱཝིརཱགཝཏྠེཧི, ཚཱདཡིསྶཾ སམནྟཏོ.

༢༡.

སཙེ ཨིཙྪཱམི ཨཛྫེཝ, ཝཏྠེནཙྪཱདཡཱ མིཏེ;

ཛནྟཝོ ཙཏུདཱིཔསྨིཾ, ཝཏྠདཱནསྶིདཾ ཕལཾ.

༢༢.

ཨེཏེསཾ པུཉྙཀམྨཱནཾ, ཝཱཧསཱ ཀཱམབྷཱུམིཡཾ;

སམྤཏྟི མནུབྷུཏྭཱན, སཱཝཏྠིཔུར མུཏྟམེ.

༢༣.

ཛཱཏོ ཀུལེ མཧཱབྷོགེ,

ཝུདྡྷིཔྤཏྟོ སུཁེདྷིཏོ;

ཏསྶ དྷམྨཾ སུཎིཏྭཱན,

པབྦཛིཏྭཱན སཱསནེ.

༢༤.

ལོཀུཏྟརཾ ཨགྒརསཾ, བྷུཉྩནྟོ མུནིཝཱཧསཱ;

ཀིལེསེ པཛཧིཏྭཱན, ཨརཧཏྟམཔཱཔུཎིཾ.

༢༥.

ཀུསལཾ ནཱ ཝམནྟབྦཾ, ཁུདྡཀནྟི ཀདཱཙིཔི;

ཨནནྟཕལདཾ ཧོཏི, ནིབྦཱཎམྤི དདཱཏི ཏཾ.

ཨཐསྶ དྷམྨདེསནཾ སུཏྭཱ བྷིཀྑཱུ ཙ མཧཱཛནོ ཙ དཱནཱདིཀུསལཀམྨཾ ཀཏྭཱ ཡེབྷུཡྻེན སགྒཔརཱཡཎཱ ཨཧེསུཾཏི.

༢༦.

མནོཔསཱདེནཔི ཨཔྤཔུཉྙཾ,

ཨེཝཾ མཧནྟཾ བྷཝཏཱིཏི ཉཏྭཱ;

མཱ ཨཔྤཔུཉྙནྟི པམཛྫཐམྦྷོ;

སརཱཐ དེཝིཾ ཨིདྷ ལཱཛདཱཡིཾ.

སདྡྷོཔཱསཀསྶ ཝཏྠུཾ སཏྟམཾ.

༢༨. ཀཔཎསྶ ཝཏྠུམྷི ཨཡམཱནུཔུབྦཱིཀཐཱ

ཨམྷཱཀཾ བྷགཝཏི པརིནིབྦུཏེ བཱརཱཎསཱིནགརཝཱསཱི ཨེཀོ དུགྒཏཔུརིསོ པརགེཧེ བྷཏིཾཀཏྭཱ ཛཱིཝིཀཾ ཀཔྤེཏི, ཏསྨིཾ སམཡེ ནགརཝཱསིནོ ཡེབྷུཡྻེན ཏསྨིཾ ཏསྨིཾ ཋཱནེ མཎྜཔཱདཡོ ཀཱརཱཔེཏྭཱ མཧཱདཱནཾ དེནྟི, ཏཾ དིསྭཱ དུགྒཏོ ཨེཝཾ ཙིནྟེསི, ཨཧཾ པུབྦེ ཨཀཏཔུཉྙཏྟཱ པརགེཧེ བྷཏིཾ ཀཏྭཱ ཀིཙྪེན ཀསིརེན ཛཱིཝཱམི. ནིཝཱསནཔཱརུཔནམྤི ཝཱསཊྛཱནམཏྟམྨི དུཀྑཏོ ལབྷཱམི. ཨིདཱནི བུདྡྷུཔྤཱདོ ཝཏྟཏི བྷིཀྑུསངྒྷོཔི.

སབྦེ ¶ ཨིམེ དཱནཾ དཏྭཱ སགྒམགྒཾ སོདྷེནྟི. མཡཱཔི དཱནཾ དཱཏུཾ ཝཊྚཏི. ཏམྨེ དཱིགྷརཏྟཾ ཧིཏཱཡ སུཁཱཡ བྷཝིསྶཏི. ཨཔི ཙ མཡ྄ཧཾ ཏཎྜུལནཱལིམཏྟམྤི ནཏྠི, ཨཀཏཝཱིརིཡེན ཏཾ མཏྠཀཾ པཱཔེཏུཾ ན སཀྐཱ, ཨེཏདཏྠཱཡཱཧཾ ཨུཡྻོགཾ ཀཏྭཱ དཱནཾ དསྶཱམཱིཏི ཙིནྟེཏྭཱ ཏཏོ པཊྛཱཡ བྷཏིཾ པརིཡེསམཱནོ གནྟྭཱ ཏཏྠ ཏཏྠ བྷཏིཾ ཀཏྭཱ ལདྡྷནིཝཱཔེ ཙ བྷིཀྑཱཙརིཡཱཡ ལདྡྷཏིལཏཎྜུལཱདཡོ ཙ ཨེཀཏྠ སཾཧརིཏྭཱ མནུསྶེ སམཱདཱཔེཏྭཱ ཏསྨིཾ མཎྜཔཾ ཀཱརཱཔེཏྭཱ ཝནཀུསམཱདཱིཧི ཏཾ ཨལངྐརིཏྭཱ བྷིཀྑཱུ ནིམནྟེཏྭཱ མཎྜཔེ ནིསཱིདཱཔེཏྭཱ སབྦེསཾ པཱཡསཾ [པཱཡཱསཾ ཨིཏིསབྦཏྠ] པཊིཡཱདེཏྭཱ བྷོཛེསི. ཨཐ སོ མརཎཀཱལེ ཨཏྟནཱ ཀཏཾ ཏཾ དཱནཝརཾ ཨནུསྶརི. སོ ཏེན ཀུསལཀམྨེན སུཏྟཔྤབུདྡྷོ ཝིཡ དེཝལོཀེ ནིབྦཏྟི. ཏསྨིཾ ཏེན ཀཏཔུཉྙཱནུརཱུཔཾ མཧནྟཾ ཀནཀཝིམཱནཾ ནིབྦཏྟི. སམནྟཱ ཏིགཱཝུཏཊྛཱནེ དེཝཏཱ ནཱནཱ ཝིདྷཱནི ཏུརིཡཱནི གཧེཏྭཱ ཨུཔཧཱརཾ ཀརོནྟི. ནིཙྩཾ དེཝཙྪརཱསཧསྶཱནི [དེཝཙྪརཱསཧསྶཾ ཨིཏིསབྦཏྠ] ཏཾ པརིཝཱརེཏྭཱ ཏིཊྛནྟི. ཨེཝཾ སོ མཧནྟཾ སམྤཏྟིཾ ཨནུབྷཝཏི. ཨཐེཀདིཝསཾ སུཝཎྞསེལཝིཧཱརཝཱསཱི མཧཱསངྒྷརཀྑིཏཏྠེརོ པཏྟཔཊིསམྦྷིདོ དེཝཙཱརིཀཾ ཙརམཱནོ ཏཾ དེཝཔུཏྟཾ ཨནུཔམཱཡ དེཝསམྤཏྟིཡཱ ཝིརོཙམཱནཾ དིསྭཱ ཨུཔསངྐམྨ ཋིཏོ ཏེན ཀཏཀམྨཾ པུཙྪི. སོཔིསྶ ཡཐཱབྷཱུཏཾ བྱཱཀཱསི, ཏེནཏྠ.

༡.

སབྦསོཝཎྞཡོ ཨཱསི, པཱསཱདོ རཏནཱམཡོ;

སོཎྞསིངྒསཏཱཀིཎྞོ, དུདྡིཀྑོ ཙ པབྷསྶརོ.

༢.

ཀཱུཊཱགཱར སཏཱཀིཎྞོ, སོཎྞམཱལཱསམཱཀུལོ;

མུཏྟཱཀལཱཔཱལམྦནྟི, ཏཏྠ ཏཏྠ མནོརམཱ.

༣.

ནེཀགབྦྷསཏཱཀིཎྞོ, སཡནཱསནམཎྜིཏོ;

ཝིབྷཏྟོ བྷབྦབྷཱགེཧི, པུཉྙཝཌྜྷཀིནཱ ཀཏོ.

༤.

ནཙྩནྟི ¶ པམདཱ ཏཏྠ, བྷེརིམཎྜལམཛ྄ཛྷགཱ;

གཱཡནྟི ཀཱཙི ཀཱིལ༹ནྟི, ཝཱདེནྟི ཀཱཙི ཏནྟིཡོ.

༥.

ཏཏོ ཏིགཱཝུཏེ ཋཱནེ, པཱསཱདསྶ སམནྟཏོ;

སཧཙྪརཱ དེཝཔུཏྟཱ, གཧེཏྭཱ ཨཱཏཏཱདཡོ.

༦.

མོདནྟི པརིཝཱརེཏྭཱ, ནཙྩགཱིཏཱདིནཱ སདཱ;

ཨུལླངྒྷནྟིཙ སེལེནྟི, སིལཱགྷནྟི སམནྟཏོ.

༧.

ཨེཝཾ མཧིདྡྷིཀོ དཱནི, ཏུཝཾ ཝནྡོཝ བྷཱསཏི;

པུཙྪཱམི ཏཾ དེཝཔུཏྟ, ཀིཾ ཀམྨམཀརཱི པུརཱ.

དེཝཔུཏྟོ ཨཱཧ.

༨.

ཨཧོསིཾ དུགྒཏོ པུབྦེ, བཱརཱཎསཱིཔུརུཏྟམེ;

དཱནཾ དེནྟི ནརཱ ཏཏྠ, ནིམནྟེཏྭཱན བྷིཀྑཝོ.

༩.

ཛཱིཝནྟོ བྷཏིཡཱ སོཧཾ, དཱནཾ དེནྟེ མཧཱཛནེ;

ཏུཊྛཧཊྛེ པམུདིཏེ, ཨེཝཾ ཙིནྟེསཧཾ ཏདཱ.

༡༠.

སམྤནྣཝཏྠཱལངྐཱརཱ, དཱནཾ དེནྟི ཨིམེ ཛནཱ;

པརཏྠཔི པཧཊྛཱཝ, སམྤཏྟིམནུབྷོནྟི ཏེ.

༡༡.

བུདྡྷུཔྤཱདོ ཨཡཾ དཱནི, དྷམྨོ ལོཀེ པཝཏྟཏི;

སུསཱིལཱ དཱནི ཝཏྟནྟི, དཀྑིཎེཡྻཱ ཛིནོརསཱ.

༡༢.

ཨནཱཝཊྛིཏོ [ཨཝཊྛིཏོཙ; ཨནྡྷཊྛིཏོཙ ཨིཏིཔིཀཏྟཙི] སཾསཱརོ, ཨཔཱཡཱ ཁལུ པཱུརིཏཱ;

ཀལྱཱཎཝིམུཁཱ སཏྟཱ, ཀཱམཾ གཙྪནྟི དུགྒཏིཾ.

༡༣.

ཨིདཱནི དུཀྑིཏོ ཧུཏྭཱ, ཛཱིཝཱམི ཀསིརེནཧཾ;

དལིདྡོ ཀཔཎོ དཱིནོ, ཨཔྤབྷོགོ ཨནཱལཡོ.

༡༤.

ཨིདཱནི བཱིཛཾ རོཔེམི, སུཁེཏྟེ སཱདྷུསམྨཏེ;

ཨཔྤེཝནཱམ ཏེནཱཧཾ, པརཏྠ སུཁིཏོ སིཡཱ.

༡༥.

ཨིཏི ཙིནྟིཡ བྷིཀྑིཏྭཱ, བྷཏིཾ ཀཏྭཱན ནེཀདྷཱ;

མཎྜཔཾ ཏཏྠ ཀཱརེཏྭཱ, ནིམནྟེཏྭཱན བྷིཀྑཝོ.

༡༦.

ཨཱཡཱསེན ¶ ཨདཱསཱཧཾ, པཱཡསཾ ཨམཏཱཡ སོ;

ཏེན ཀམྨཝིཔཱཀེན, དེཝལོཀེ མནོརམེ.

༡༧.

ཛཱཏོམྷི དིབྦཀཱམེཧི, མོདམཱནོ ཨནེཀདྷཱ;

དཱིགྷཱཡུཀོ ཝཎྞཝནྟོ, ཏེཛསྶཱིཙ ཨཧོསཧནྟི.

ཨེཝཾ དེཝཔུཏྟོ ཨཏྟནཱ ཀཏཔུཉྙཀམྨཾ ཝིཏྟཱརེན ཀཐེསི, ཐེརོཔི མནུསྶལོཀཾ ཨཱགནྟྭཱ མནུསྶཱནཾ ཨཏྟནཱ པཙྩཀྑཏོ དིཊྛདིབྦསམྤཏྟིཾ པཀཱསེསི. ཏཾ སུཏྭཱ མཧཱཛནོ ཀུསལཀམྨཾ ཀཏྭཱ ཡེབྷུཡྻེན སགྒེ ནིབྦཏྟོཏི.

༡༨.

ཨནཱལཡོ དུགྒཏདཱིནཀོཔི,

དཱནཾ དདནྟོ དྷིགཏོ ཝིསེསཾ;

སགྒཱ པཝགྒཾ ཡདི པཏྠཡཝ྄ཧོ,

ཧནྟྭཱན མཙྪེརམལཾ དདཱཐཱཏི.

ཀཔཎསྶ ཝཏྠུཾ ཨཊྛམཾ.

༢༩. དེཝཔུཏྟསྶ ཝཏྠུམྷི ཨཡམཱནུཔུབྦཱིཀཐཱ

ཨིཏོ པུབྦེ ནཱརདསྶ ཀིར སམྨཱསམྦུདྡྷསྶ ཀཱལེ ཨཡཾ དཱིཔོ ཨཉྙཏརེན ནཱམེན པཱཀཊོ ཨཧོསི, སོ པནེཀསྨིཾ ཀཱལེ དུབྦྷིཀྑོ ཨཧོསི དུསྶསྶོ, མཧཱཚཱཏཀབྷཡཾ སཏྟེ པཱིལེ༹ཏི. ཏསྨིཾ སམཡེ ནཱརདསྶ བྷགཝཏོ ཨེཀོ སཱསནིཀོ སཱཝཀོ ཨཉྙཏརསྨིཾ གཱམེ པིཎྜཱཡ ཙརིཏྭཱ ཡཐཱ དྷོཏཔཏྟོཝ ནིཀྑམི. ཨཐཉྙཏརསྨིཾ གེཧེ མནུསྶཱ ཨེཀཾ ཏཎྜུལནཱལི༹ཾཔོཊལིཀཱཡ བནྡྷིཏྭཱ ཨུདཀེ པཀྑིཔིཏྭཱ པཙིཏྭཱ ཨུདཀཾ གཧེཏྭཱ པིཝནྟོ ཛཱིཝནྟི, ཏདཱ ཐེརཾ དིསྭཱ ཝནྡིཏྭཱ པཏྟཾ གཧེཏྭཱ ཏེན ཏཎྜུལེན བྷཏྟཾ པཙིཏྭཱ པཏྟེ པཀྑིཔིཏྭཱ ཐེརསྶ ཨདཾསུ. ཨཐ ¶ ཏེསཾ སདྡྷཱབལེན སཱ ཨུཀྑལི བྷཏྟེན པརིཔུཎྞཱ ཨཧོསི, ཏེ ཏཾ ཨབྦྷུཏཾ དིསྭཱ ཨཡྻསྶ དིནྣདཱནེ ཝིཔཱཀོ ཨཛྫེཝ ནོ དིཊྛོཏི སོམནསྶཛཱཏཱ མཧཱཛནཾ སནྣིཔཱཏེཏྭཱ ཏེ བྷཏྟཾ བྷོཛེཏྭཱ པཙྪཱ སཡཾ བྷུཉྫིཾསུ. བྷཏྟསྶ གཧིཏགཧིཏཊྛཱནཾ པཱུརཏེཝ. ཏཏོ པཊྛཱཡ ཏེ སམྤཏྟམཧཱཛནསྶ དཱནཾ དདནྟཱ ཨཱཡུཔརིཡོསཱནེ དེཝལོཀེ ནིབྦཏྟིཾསུ, ཨཐ སོ ཐེརོ བྷཏྟཾ ཨཱདཱཡ གནྟྭཱ ཨཉྙཏརསྨིཾ རུཀྑམཱུལེ ནིསཱིདིཏྭཱ བྷུཉྫིཏུམཱརཏི. ཏསྨིཾ ཀིར རུཀྑེ ནིབྦཏྟོ ཨེཀོ དེཝཔུཏྟོ ཨཱཧཱརེན ཀིལནྟོ བྷུཉྫམཱནཾ ཐེརཾ དིསྭཱ ཨཏྟབྷཱཝཾ ཝིཛཧིཏྭཱ མཧལླཀཝེསེན ཏསྶ སམཱིཔེ ཨཊྛཱསི. ཐེརོ ཨནཱཝཛྫིཏྭཱཝ བྷུཉྫཏི. དེཝཔུཏྟོ ཙརིམཱལོཔཾ ཋཔེཏྭཱ བྷུཏྟཀཱལེ ཨུཀྐཱསིཏྭཱ ཨཏྟཱནཾ ཋིཏབྷཱཝཾ ཛཱནཱཔེསི. ཐེརོ ཏཾ དིསྭཱ ཝིཔྤཊིསཱརི ཧུཏྭཱ ཙརིམཾ བྷཏྠཔིཎྜཾ ཏསྶ ཧཏྠེ ཋཔེསི, ཏཏོ སོ བྷཏྟཔིཎྜཾ གཧེཏྭཱ ཋིཏོ ཙིནྟེསི. ཨིཏོ ཀིར མཡཱ པུབྦེ སམཎབྲཱཧྨཎཱནཾ ཝཱ ཀཔཎདྡྷིཀཱནཾ ཝཱ ཨནྟམསོ ཀཱཀསུནཁཱ དཱིནམྤི ཨཱཧཱརཾ ཨདིནྣཔུབྦཾ བྷཝིསྶཏི, ཏེནཝཱཧཾ དེཝོ ཧུཏྭཱཔི བྷཏྟཾ ན ལབྷཱམི. ཧནྡཱཧཾ ཨིམཾ བྷཏྟཔིཎྜཾ ཐེརསྶེཝ དསྶཱམི, ཏཾ མེ བྷཝིསྶཏི དཱིགྷརཏྟཾ ཧིཏཱཡ སུཁཱཡ ཙཱཏི. ཨེཝཉྩ པན ཙིནྟེཏྭཱ བྷཏྟཔིཎྜེ ཨཱསཾ པཧཱཡ ཐེརཾ ཨུཔསངྐམྨ སཱམི དཱསསྶ ཝོ ཨལཾ ཨིདྷ ལོཀེན སངྒཧཾ. པརལོཀེན མེ སངྒཧཾ ཀརོཐཱཏི ཝཏྭཱ ཏསྶ པཏྟེ ཨོཀིརི. ཨཐསྶ བྷཏྠཔིཎྜཾ [བྷཏྠཔིཎྜཾ ཨིཏིསབྦཏྠ] པཏྟེ པཏིཏམཏྟེཡེཝ ཏིགཱཝུཏཊྛཱནེ དིབྦམཡཱནི བྷཏྟབྷཱཛནཱནིཔཉྙཱཡིཾསུ. དེཝཔུཏྟོ ཐེརཾ པཉྩཔཏིཊྛིཏེན ཝནྡིཏྭཱ ཏཏོ དིབྦབྷོཛནཾ གཧེཏྭཱ པཐམཾ དཱནཾ དཏྭཱ པཙྪཱ སཡཾ བྷུཉྩི. ཏཏོ དེཔུཏྟོ དུཏིཡདིཝསཏོ པཊྛཱཡ ཐེརསྶ ཙ སམྤཏྟམཧཱཛནསྶ ཙ མཧཱདཱནཾ དེནྟོ ཨཱཡུཔརིཡོསཱནེ ¶ ༠ དེཝལོཀེ ནིབྦཏྟིཏྭཱ ཚསུ ཀཱམསགྒེསུ ཨཔརཱཔརཾ དིབྦསམྤཏྟི མནུབྷཝམཱནོ པདུམུཏྟརསྶ བྷགཝཏོ ཀཱལེ ཏཏོ ཙུཏོ བཱརཱཎསིཡཾ ཨནེཀཝིབྷཝསྶ མིཙྪཱདིཊྛིཀསྶ ཀུཊུམྦིཀསྶ གེཧེ ནིབྦཏྟི. དེཝོཏིསྶ ནཱམཾ ཨཀཾསུ. ཨཔརབྷཱགེ ཝིཉྙུཏཾ པཏྟསྶ ཏསྶ མཱཏཱཔིཏརོ ཀཱལམཀཾསུ. སོཝཎྞམཎིམུཏྟཱདིཔཱུརིཏཀོཊྛཱགཱརཱདཡོ ཨོལོཀེཏྭཱ མམ མཱཏཱཔིཏརོ མིཙྪཱདིཊྛིཀཏྟཱ ཨིཏོ དཱནཱདིཀིཉྩིཀམྨཾ ཨཀརིཏྭཱ པརལོཀཾ གཙྪནྟཱ ཀཱཀཎིཀམཏྟམྤི ཨགཧེཏྭཱ གཏཱ, ཨཧཾ པན ཏཾ གཧེཏྭཱཝ གམིསྶཱམཱིཏི སནྣིཊྛཱནཾ ཀཏྭཱ བྷེརིཾ ཙརཱཔེཏྭཱ ཀཔཎདྡྷིཀཝནིབྦཀེ སནྣིཔཱཏེཏྭཱ སཏྟཱཧབྦྷནྟརེ སབྦཾ སཱཔཏེཡྻཾ དཱནམུཁེན དཏྭཱ ཨརཉྙཾ པཝིསིཏྭཱ ཨིསིཔྤབྦཛྫཾ པབྦཛིཏྭཱ ཀསིཎཔརིཀམྨཾ ཀཏྭཱ པཉྩ བྷིཉྙཱ ཨཊྛ སམཱཔཏྟིཡོ ནིབྦཏྟེཏྭཱ ཨཱཀཱསཙཱརཱི ཨཧོསི. ཨཐ ཏསྨིཾསམཡེ པདུམུཏྟརོ ནཱམ བྷགཝཱ ཧཾསཝཏཱིནགརེ པཊིཝསནྟོ དེཝབྲཧྨཱདིཔརིཝུཏོ ཙཏུསཙྩཔཊིསཾཡུཏྟཾ དྷམྨཾ དེསེནྟོ ནིསིནྣོ ཧོཏི, ཏདཱ སོ ཏཱཔསོ ཨཱཀཱསེན གཙྪནྟོ མཧཱཛནསམཱགམཉྩ བྷགཝཏོ སརཱིརཏོ ནིཀྑནྟཚབྦཎྞརཾསིཡོ ཙ དིསྭཱ ཀིམེཏཾཏི ཝིམྷིཏོ ཨཱཀཱསཱ ཨོཏརིཏྭཱ མཧཏིཡཱ བུདྡྷལཱིལཱ༹ཡ ནིསཱིདིཏྭཱ དྷམྨཾ དེསེནྟཾ བྷགཝནྟཾ དིསྭཱ པསནྣམཱནསོ པརིསནྟརེ ནིསིནྣོ དྷམྨཾ སུཏྭཱ བྷགཝནྟཾ ཝནྡིཏྭཱ ཨཏྟནོ ཨསྶམམེཝ ཨགམཱསི. ཨཐ སོ ཏཏྠ ཡཱཝཏཱཡུཀཾ ཋཏྭཱ ཨཱཡུཔརིཡོསཱནེ ཏཱཝཏིཾསབྷཝནེ ནིབྦཏྟོ ཏིཾསཀཔྤེ དིབྦསམྤཏྟིམནུབྷཝནྟོ ཚསུ ཀཱམསགྒེསུ ཨཔརཱཔརིཡཝསེན སཾསརི. ཨེཀཔཉྙཱསཨཏྟབྷཱཝེ སཀྐོ དེཝརཱཛཱ ཨཧོསི, ཨེཀཀཝཱིསཏིཨཏྟབྷཱཝེ ཙཀྐཝཏྟི ཧུཏྭཱ མནུསྶསམྤཏྟི མནུབྷཝིཏྭཱ ཨིམསྨིཾབུདྡྷུཔྤཱདེ བྷགཝཏི པརིནིབྦུཏེ སཱཝཏྠིཡཾ ཨཉྙཏརསྨིཾ ཀུལགེཧེ ནིབྦཏྟིཏྭཱ སཏྟཝསྶིཀོ ཨེཀཾ བྷིཀྑུཾ དྷམྨཾ དེསེནྟཾ ཨདྡས. དིསྭཱ ཏཾ ཨུཔསངྐམིཏྭཱ དྷམྨཾ སུཏྭཱ ཨནིཙྩསཉྙཾ ¶ པཊིལབྷིཏྭཱ ཏཏྠ ནིསིནྣོཝ ཨརཧཏྟཾ པཱཔུཎི, ཏཏོ སོ པཏྟཔཊིསམྦྷིདོ ཨཏྟནཱ ཀཏཔུཉྙཀམྨཾ ཨོལོཀེནྟོ ཏཾ པུབྦཙརིཡཾ བྷིཀྑཱུནཾ མཛ྄ཛྷེ པཀཱསེནྟོ ཨཱཧ. ཏསྨཱ.

༡.

ནཱརདོ ཀིར སམྦུདྡྷོ, པུབྦེ ཨཱསི ནརུཏྟམོ;

ལོཀཾ དུཀྑཱ པམོཙེནྟོ, དདནྟོ ཨམཏཾ པདཾ.

༢.

ཏསྨིཾ ཏུ སམཡེ ཏསྶ, སཱཝཀོ ཚིནྣབནྡྷནོ;

བྷིཀྑིཏྭཱ དཱིཔཀེ ལདྡྷ, མཱཧཱརཾ པརིབྷུཉྫིཏུཾ.

༣.

རུཀྑམཱུལ མུཔཱ གཉྪི, ཏཏྠཱསིཾ རུཀྑདེཝཏཱ;

བུབྷུཀྑིཏཱ ཨུདིཀྑནྟཱི, ཨཊྛཱསིཾ ཏསྶ སནྟིཀེ.

༤.

ཨདཱསི མེ བྷཏྟཔིཎྜཾ, ཀརུཎཱཔཱུརིཏནྟརོ;

གཧེཏྭཱན ཋིཏོ པིཎྜཾ, སཧམཱནོ ཁུདཾ ཏདཱ.

༥.

ཨདིནྣཏྟཱ མཡཱ པུབྦེ, ཀིཉྩི དཱནཾ སུཔེསལེ;

ཛིགྷཙྪཱཔཱིལི༹ཏོ ཧོམི, ཛཱཏོཔི དེཝཡོནིཡཾ.

༦.

ཨཛྫ ཁེཏྟཾ སུལདྡྷཾམེ, དེཡྻདྷམྨོཔི ཝིཛྫཏི;

བཱིཛམེཏྠ ཙ རོཔེམི, བྷཝཏོ པརིམུཏྟིཡཱ.

༧.

ཨིཏི ཙིནྟིཡ ཝནྡིཏྭཱ, དཱསསྶ སཱམི ཝོ ཨལཾ;

སངྒཧཾ ཨིདྷ ལོཀསྨིཾ, ཀརོཐ པཱརལོཀིཀཾ.

༨.

ཨིཏི ཝཏྭཱ ཨདཱསཱཧཾ, བྷུཉྩི སོཔི དཡཱཔརོ;

ཏེནཱཧཾ པུཉྙཀམྨེན, སུདྷནྣམལབྷིཾ ཁཎེ.

༩.

ཏཏོ ཙུཏོ ཚདེཝེསུ, ཝིནྡནྟོ མཧཏིཾསིརིཾ;

ཙིརཀཱལཾ ཝསིཾ ཏཏྠ, དེཝིདྡྷཱིཧི སམངྒིཏཱ.

༡༠.

སཏསཧསྶེ ཨིཏོ ཀཔྤེ, པདུམུཏྟརནཱམཀོ;

ཨུཔྤཛྫི ལོཀནཱཡཀོ, དྷམྨརཱཛཱ ཏཐཱགཏོ.

༡༡.

མཧིདྡྷིཀོ ¶ ཏདཱ ཨཱསིཾ, ཏཱཔསོ ཀཱནནེ ཝནེ;

སམྤཏྟཔཉྩཱ བྷིཉྙཱཎོ, ཨཱཀཱསེན ཙརཱམཧཾ.

༡༢.

ཏདཱ ཀཱསེན གཙྪནྟོ, རམྨེ ཧཾསཝཏཱིཔུརེ;

བུདྡྷརཾསིཔརིཀྑིཏྟཾ, ཀེཏུམཱལཱཝིལཱསིཏཾ.

༡༣.

དེཝསངྒྷཔརིབྦཱུལ༹ྷཾ, དེསེནྟཾ ཨདྡསཾ ཛིནཾ;

སོ ཏཾ དིསྭཱན ནབྷསཱ, ཋིཏོཧཾ པརིསནྟརེ.

༡༤.

དྷམྨཾ སུཏྭཱ ཨུདགྒོཧཾ, ཀཱལཾ ཀཏྭཱན སཏྠུནོ;

ཏཏོ ཙུཏོ པཔནྣོསྨི, ཏཱཝཏིཾསེ མནོརམེ.

༡༥.

ཏིཾསཀཔྤསཧསྶཱནི, ཙརནྟོ དེཝམཱནུསེ;

དུགྒཏིཾ ནཱབྷིཛཱནཱམི, ལབྷཱམི ཝིཔུལཾ སུཁཾ.

༡༦.

ཨེཀཔཉྙཱསཏིཀྑཏྟུཾ, དེཝརཛྫམཀཱརཡིཾ;

ཨཐེཀཝཱིསཏིཀྑཏྟུཾ, ཙཀྐཝཏྟཱི ཨཧོསཧཾ.

༡༧.

པདེསརཛྫཾ ཀཱསཱཧཾ, བཧུཀྑཏྟུཾ ཏཧིཾ ཏཧིཾ;

ཨིམསྨིཾ བྷདྡཀེ ཀཔྤེ, ནིབྦུཏེཏུ [ནིབྦུཏེསུ ཨིཏིསབྦཏྠ] ཏཐཱགཏེ.

༡༨.

ཙོདིཏོ པུཉྙཀམྨེན, སཱཝཏྠིཔུརམུཏྟམེ;

ཨུཔྤཛྫིཏྭཱ ཀུལེ སེཊྛེ, ཛཱཏིཡཱ སཏྟཝསྶིཀོ.

༡༩.

སུཏྭཱ དྷམྨཾ ཀཐེནྟསྶ, བྷིཀྑུསྶཉྙཏརསྶཧཾ;

བྷཝསྶནྟཾ ཀརིཏྭཱན, ཨརཧཏྟམཔཱཔུཎིཾ.

༢༠.

སུདིནྣཾ མེ ཏདཱ དཱནཾ, སུསྶུཏཾ དྷམྨམུཏྟམཾ;

དུཀྑསྶནྟཾ ཨཀཱསཱཧཾ, ཏསྶ ཀམྨསྶ ཝཱཧསཱཏི.

ཨེཝཉྩ པན ཝཏྭཱ བཧཱུ ཛནེ ཀུསལཀམྨེ ནིཡོཛེསཱིཏི.

༢༡.

དཱནེནཔེཝཾ ¶ ཙརིམཱཡ པིཎྜིཡཱ,

སཝཎཱཡ དྷམྨསྶ མུཧུཏྟཀེན;

ལབྷནྟི སཏྟཱ ཏིཝིདྷམྤི སམྤདཾ,

ཕལཾ ཝདེ ཀོ བཧུདཱཡཀསྶ བྷོ.

དེཝཔུཏྟསྶ ཝཏྠུཾ ནཝམཾ.

༣༠. སཱིཝལིཏྠེརསྶ ཝཏྠུམྷི ཨཡམཱནུཔུབྦཱིཀཐཱ

ཨིཏོ ཀིར ཀཔྤསཏསཧསྶམཏྠཀེ པདུམུཏྟརོ ནཱམ སཏྠཱ ལོཀེ ཨུདཔཱདི དྷམྨདེསནཱཡ སཏྟེ ཨམཏམཧཱནིབྦཱཎཾ པཱཔེནྟོ, ཏསྨིཾ སམཡེ བྷགཝཱ ཧཾསཱཝཏིཡཾ སརཱཛིཀཱཡ པརིསཱཡ མཛ྄ཛྷེ ཨེཀཾ བྷིཀྑུཾ ལཱབྷཱིནཾ ཨགྒཊྛཱནེ ཋཔེསི. ཏདཱ རཱཛཱ ཏཾ དིསྭཱ ཏཾ ཋཱནཾ ཀཱམཡམཱནོ བུདྡྷཔམུཁསྶ སངྒྷསྶ མཧཱདཱནཾ དཏྭཱ བྷགཝཏོ པཱདམཱུལེ སིརསཱ ནིཔཛྫི, ཏདཱསྶ བྷགཝཱ ཨནཱགཏེ གོཏམསྶ བྷགཝཏོ སཱསནེ ཏཾ ཋཱནཾ ལབྷིསྶསཱིཏི ཝཏྭཱ བྱཱཀཱསི. ཏཾ སུཏྭཱ མུདིཏོ རཱཛཱ པུཉྙཱནི ཀཏྭཱ དེཝལོཀེ ནིབྦཏྟི. ཏཏོ ཨཔརབྷཱགེ བཱརཱཎསིཡཾ སེཊྛིཔུཏྟོ ཧུཏྭཱ པཙྩེཀབུདྡྷསཧསྶཾ ཙཏུཔཙྩཡདཱནེན ཡཱཝཛཱིཝཾ པཊིཛགྒིཏྭཱ དེཝལོཀེ ནིབྦཏྟོ མཧནྟཾ སམྤཏྟི མནུབྷཝིཏྭཱ ཏཏོ ཙུཏོ ཝིཔསྶིསྶ བྷགཝཏོ ཀཱལེ བནྡྷུམཏཱིནགརེ ཨཉྙཏརསྨིཾ ཀུལགེཧེ ནིབྦཏྟི. སོ ཏསྨིཾ སམཡེ སེནགུཏྟཊྛཱནེ ཋཏྭཱ རཉྙོ ཀམྨཾ ཀརོཏི, ཏདཱ ནགརཝཱསིནོ ཨུཔཱསཀགཎཱ ཝིཔསྶཱིསམྨཱསམྦུདྡྷཾ ཨུཔསངྐམྨ ཝནྡིཏྭཱ བྷགཝཱ བྷནྟེ སསཱཝཀོ ཨམྷཱཀཾ ཨནུགྒཧཾ ཀརོཏཱུཏི སྭཱཏནཱཡ ནིམནྟེཏྭཱ མཧཱདཱནཾ དཏྭཱ སབྦེ ཨེཀཙྪནྡཱ བྷགཝནྟ མུདྡིསྶ མཧཱརཧཾ མཧཱཔརིཝེཎཾ ཀཱརཱཔེཏྭཱ པརིཝེཎམཧེ མཧཱདཱནཾ དདནྟཱ དཱནགྒེ ཨསུཀཾ ནཱམ ¶ ནཏྠཱིཏི ན ཝཏྟབྦནྟི ཝཏྭཱ དཱནཾ པཊིཡཱདེཏྭཱ དཱནགྒཾ ཨོལོཀེནྟཱ ནཝདདྷིཉྩ པཊལམདྷུཉྩ ཨཔསྶནྟཱ པུརིསེ པཀྐོསིཏྭཱ སཧསྶཾ དཏྭཱ དདྷིམདྷུཾ ཁིཔྤཾ པརིཡེསིཏྭཱ ཨཱནེཐཱཏི པེསེསུཾ, ཏེ སཧསྶཾ གཧེཏྭཱ དདྷིམདྷུཾ ཨུཔདྷཱརེཏུཾ ཏཏྠ ཏཏྠ ཝིཙརནྟཱ དྭཱརནྟརེ ཨཊྛཾསུ, ཏདཱ ཨཡཾ སེནགུཏྟོ རཉྙོ སབྷཏྟཾ དདྷིམདྷུཾ ཨཱདཱཡ གཙྪནྟོ མཧཱདྭཱརཾ སམྤཱཔུཎི, ཨཐ ཏེ དདྷིམདྷུཾ དིསྭཱ བྷོ ཀཧཱཔཎཾ གཧེཏྭཱ ཨིམཾ དེཧཱིཏི ཡཱཙིཾསུ. ཏེན [ཏེནདསྶཱམི ཨིཏིཔིཀཏྟཙི] ན དསྶཱམཱིཏི ཝུཏྟེ ཡཱཝསཧསྶཾ ཝཌྜྷེཏྭཱ ཡཱཙིཾསུ. ཏཏོ སེནགུཏྟོ ཨིམཾ ཨཔྤགྒྷཾ སཧསྶེན ཡཱཙཐ, ཀི མནེན ཀརོཐཱཏི པུཙྪི, ཏེཧི སམྦུདྡྷཏྠཱཡཱཏི ཝུཏྟེ ཏེནཧི ཨཧམེཝ དསྶཱམཱིཏི ཛཱིརམརིཙཱདཱིཧི སཀྑརམདྷུཕཱཎིཏཱདཡོ ཡོཛེཏྭཱ དཱནགྒཾ ཨུཔནཱམེསི. ཏཾ སཏྠུ ཨཱནུབྷཱཝེན བུདྡྷཔམུཁསྶ ཨཊྛསཊྛིབྷིཀྑུསཏསཧསྶསྶ པཧོཎཀཾ ཨཧོསི. ཏཏོ སོ ཏེན པུཉྙཀམྨེན དེཝམནུསྶལོཀེསུ སམྤཏྟི མནུབྷཝིཏྭཱ ཨཔརབྷཱགེ ཨམྷཱཀཾ བྷགཝཏོ ཀཱལེ ཀོལིཡནགརེ མཧཱལིལིཙྪཝིརཉྙོ ཨུཔནིསྶཱཡ སུཔྤིཡཱཡ ནཱམ ཨགྒམཧེསིཡཱ ཀུཙྪིསྨིཾ པཊིསནྡྷིཾ གཎྷི. སོ སཏྟམཱསསཏྟསཾཝཙྪརཱནི མཱཏུཀུཙྪིཡཾ ཝསིཏྭཱ སཏྟདིཝསཱནི མཱུལ༹ྷགབྦྷོ དུཀྑམནུབྷཝི. མཱཏུཀུཙྪིཏོ ནིཀྑམནྟསྶ ཏསྶ མཱཏཱཔིཏརོ སཱིཝལཱིཏི ནཱམ མཀཾསུ. ཨེཝཾ མཧཱཔུཉྙསྶ ཨེཏྟཀཾ ཀཱལཾ མཱཏུཀུཙྪིམྷི དུཀྑཱནུབྷཝནཾ ཨཏྟནཱཝ ཀཏེན པཱཔབལེན ཨཧོསི, སོ ཀིར ཨཏཱིཏེ རཱཛཱ ཧུཏྭཱ ཨཏྟནོ སཔཏྟརཉྙཱ སདྡྷིཾ སངྒཱམེནྟོ མཱཏརཱ སདྡྷིཾ མནྟེསི. སཱ ནགརཾ རུནྡྷིཏྭཱ ཨམིཏྟེ གཎྷིཏུཾ སཀྐཱཏི ཨུཔཱཡ མདཱསི, སོཔི ཏསྶཱ ཝཙནེན ནགརཾ རུནྡྷིཏྭཱ སཏྟམེ དིཝསེ ཨགྒཧེསི, ཏེན པཱཔཀམྨབལེན མཱཏཱཔུཏྟཱནཾ ཨེཝཾ མཧནྟཾ དུཀྑཾ ཨཧོསཱིཏི. ཏཏོ ¶ སཱ པུཏྟཾ ཝིཛཱཡནཀཱལེ སཏྟམེ དིཝསེ བྷགཝནྟཾ ཨནུསྶརིཏྭཱ སུཁེན བྷཱརཾ མུཉྩི. ཏུཊྛཱ སཱ སཏྟམེ དིཝསེ བུདྡྷཔམུཁསྶ བྷིཀྑུསངྒྷསྶ མཧཱདཱནཾ ཨདཱསི, ཨཐསྶཱ པུཏྟོ སཏྟཝསྶིཀཀཱལེ གེཧཱ ནིཀྑམྨ སཏྠཱརཾ དིསྭཱ པབྦཛྫཾ ཡཱཙི. སཏྠཱ སཱརིཔུཏྟཏྠེརསྶ ནིཡོཛེསི, ཏཏོ སཱརིཔུཏྟཏྠེརེན ཨུཔཛ྄ཛྷཱཡེན མོགྒལླཱནམཱཙརིཡཾ ཀཏྭཱ པབྦཛི, ཨཐ སོ ཁུརགྒེཡེཝ ཨརཧཏྟཾ པཏྭཱ བུདྡྷསཱསནཾ སོབྷེསི, སོ པུབྦེ ཀཏཔུཉྙཱནུབྷཱཝེན མཧཱཔུཉྙོ ཨཧོསི ལཱབྷཱིནཉྩ ཨགྒོ. ཨཐེཀསྨིཾ སམཡེ བྷགཝཱ རེཝཏཏྠེརཾ དསྶནཱཡ ཁདིརཝནཝིཧཱརཾ གཙྪནྟོ ཏིཾསབྷིཀྑུསཧསྶེཧི སདྡྷིཾ ཏིཾསཡོཛནིཀཾ ཚཊྚིཏཀནྟཱརཾ སམྤཱཔུཎི ནིརཱུདཀཾ ཨཔྤབྷཀྑཾ. ཡེབྷུཡྻེན དེཝཏཱ སཱིཝལིཏྠེརེ པསནྣཱ. ཏསྨཱ བྷགཝཱ སཱིཝལིཏྠེརཾ པུརཏོ ཙཱརིཀཾ ཀཏྭཱ དེཝཏཱཧི ཀཱརཱཔིཏེ ཝིཧཱརེ ཝསནྟོ དེཝཏཱཧི སཛྫིཏདཱནཾ པརིབྷུཉྫནྟོ རེཝཏཏྠེརཾ སཾཔཱཔུཎིཏྭཱ གཏཀམྨཾ ནིཊྛཱཔེཏྭཱ ཛེཏཝནམཱགམྨ ལཱབྷཱིནཾ ཨགྒཊྛཱནེ ཏཾ ཋཔེསཱིཏི. ཏེན ཝུཏྟཾ ཨཔདཱནེ.

༡.

པདུམུཏྟརོ ནཱམ ཛིནོ, སབྦདྷམྨེསུ ཙཀྑུམཱ;

ཨིཏོ སཏསཧསྶམྷི, ཀཔྤེ ཨུཔྤཛྫི ནཱཡཀོ.

༢.

སཱིལཾ ཏསྶ ཨསངྑྱེཡྻཾ, སམཱདྷི ཝཛིརཱུཔམོ [ཝཛིརཱུཔམཱ ཨིཏིཀཏྠཙི];

ཨསཾཁིཡཾ ཉཱཎཝརཾ, ཝིམུཏྟི ཙ ཨནོཔམཱ.

༣.

མནུཛཱམརནཱགཱནཾ, བྲཧྨཱནཉྩ སམཱགམེ;

སམཎབྲཱཧྨཎཱཀིཎྞེ, དྷམྨཾ དེསེཏི ནཱཡཀོ.

༤.

སསཱཝཀཾ མཧཱལཱབྷིཾ, པུཉྙཝནྟཾ ཛུཏིནྡྷརཾ,

ཋཔེསི ཨེཏདགྒམྷི, པརིསཱསུ ཝིསཱརདོ.

༥.

ཏདཱཧཾ ¶ ཁཏྟིཡོ ཨཱསིཾ, པུརེ ཧཾསཝཏཱིཝ྄ཧཡེ [ཧཾསཱཝཏཝ྄ཧཡེ ཨིཏིསབྦཏྠ];

སུཏྭཱ ཛིནསྶ ཏཾ ཝཱཀྱཾ, སཱཝཀསྶ གུཎཾ བཧུཾ.

༦.

ནིམནྟཡིཏྭཱ སཏྟཱཧཾ, བྷོཛཡིཏྭཱ སསཱཝཀཾ;

མཧཱདཱནཾ དདིཏྭཱན, ཏཾ ཋཱནམབྷིཔཏྠཡིཾ.

༧.

ཏདཱ མཾ ཝིནཏཾ པཱདེ, དིསྭཱན པུརིསཱསབྷོ;

སོ སརེན མཧཱཝཱིརོ, ཨིམཾ ཝཙནམབྲཝཱི.

༨.

ཏཏོ ཛིནསྶ ཝཙནཾ, སོཏུཀཱམཱ མཧཱཛནཱ;

དེཝདཱནཝགནྡྷབྦཱ, བྲཧྨཱནོཙ མཧིདྡྷིཀཱ.

༩.

སམཎབྲཱཧྨཎཱ ཙཱཔི, ནམསྶིསུཾ ཀཏཉྫལཱི;

ནམོ ཏེ པུརིསཱཛཉྙ, ནམོ ཏེ པུརིསུཏྟམ.

༡༠.

ཁཏྟིཡེན མཧཱདཱནཾ, དིནྣཾ སཏྟཱཧཀམྤི [སཏྟཱཧཀཾཔིཏོ ཨིཏིཔིཀཏྠཙི] ནོ;

སོཏུཀཱམཱ ཕལཾ ཏསྶ, བྱཱཀརོཧི མཧཱམུནེ.

༡༡.

ཏཏོ ཨཝོཙ བྷགཝཱ, སུཎོཐ མམ བྷཱསིཏཾ;

ཨཔྤམེཡྻམྷི བུདྡྷསྨིཾ, གུཎམྷི སུཔྤཏིཊྛིཏཱ.

༡༢.

དཀྑིཎཱ དཱཡཀཾ པཏྭཱ, ཨཔྤམེཡྻཕལཱཝཧཱ;

ཨཔི ཙེ ས མཧཱབྷོགོ, ཋཱནཾ པཏྠེཏི མུཏྟམཾ.

༡༣.

ལཱབྷཱི ཝིཔུལལཱབྷཱིནཾ, ཡཐཱ བྷིཀྑུ སུདསྶནོ;

ཏཐཱཧཾཔི བྷཝེཡྻནྟི, ལཙྪཏེ ཏཾ ཨནཱགཏེ.

༡༤.

སཏསཧསྶིཏོ ཀཔྤེ, ཨོཀྐཱཀཀུལསམྦྷཝོ;

གོཏམོནཱམ ནཱམེན, སཏྠཱ ལོཀེ བྷཝིསྶཏི.

༡༥.

ཏསྶ དྷམྨེསུ དཱཡཱདོ, ཨོརསོ དྷམྨནིམྨིཏོ;

སཱིཝལི ནཱམ ནཱམེན, ཧེསྶཏི སཏྠུསཱཝཀོ.

༡༦.

ཏེན ¶ ཀམྨེན སུཀཏེན, ཙེཏནཱཔཎིདྷཱིཧི ཙ;

ཛཧིཏྭཱ མཱནུསཾ དེཧཾ, ཏཱཝཏིཾསཱུཔགོ ཨཧཾ.

༡༧.

ཏཏོཔརསྨིཾསམཡེ, བཱརཱཎསིཔུརུཏྟམེ;

སེཊྛིཔུཏྟོ ཨཧཾ ཨཱསིཾ, ཨཌྜྷཔྤཏྟོ མཧཱདྷནོ.

༡༨.

སཧསྶམཏྟེ པཙྩེཀ, ནཱཡཀེ ཙ ནིམནྟིཡ;

མདྷུརེནནྣཔཱནེན, སནྟཔྤེསིཾཏདཱདརོ.

༡༩.

ཏཏོ ཙུཏོ ཚཀཱམགྒེ, ཨནུབྷོསིཾམཧཱཡསཾ;

དེཝཙྪརཱཔརིཝུཏོ, པཱསཱདེ རཏནཱམཡེ.

༢༠.

ཨེཝཾ ཨཙིནྟིཡཱ བུདྡྷཱ, བུདྡྷདྷམྨཱ ཨཙིནྟིཡཱ;

ཨཙིནྟིཡེ པསནྣཱནཾ, ཝིཔཱཀོཔི ཨཙིནྟིཡོ.

༢༡.

ཨེཀནཝུཏིཏོ ཀཔྤེ, ཝིཔསྶཱིནཱམ ནཱཡཀོ;

ཨུཔྤཛྫི ཙཱརུནཡནོ, སབྦདྷམྨཝིཔསྶཀོ.

༢༢.

ཏདཱཧཾ བནྡྷུམཏིཡཱ, ཀུལསྶཉྙཏརསྶ ཙ;

དཡིཏོ པཏྠིཏོ པུཏྟོ, ཨཱསིཾ ཀམྨནྟབྱཱཝཊོ.

༢༣.

ཏདཱ ཨཉྙཏརོ པཱུགོ, ཝིཔསྶིསྶ མཧེསིནོ;

པརིཝེཎཾ ཨཀཱརེསི, མཧནྟ མིཏི ཝིསྶུཏཾ.

༢༤.

ནིཊྛིཏེ ཙ མཧཱདཱནཾ, དདཾ ཁཛྫཀསཾཡུཏཾ;

ནཝཾ དདྷི མདྷུཉྩེཝ, ཝིཙིནཾ ན ཙ མདྡས.

༢༥.

ཏདཱཧཾ ཏཾ གཧེཏྭཱན, ནཝཾ དདྷི མདྷུམྤིཙ,

ཀམྨསཱམིགྷརཾ གཙྪཾ, ཏམེནཾ [ཏམེསཾ ཨིཏིསབྦཏྠ] དཱན མདྡསཾ.

༢༦.

སཧསྶམྤི ཙ དཏྭཱན, ན ལཏིཾསུ ཙ ཏཾ དྭཡཾ;

ཏཏོ ཨེཝཾ ཝིཙིནྟེསིཾ, ནེཏཾ ཧེསྶཏི ཨོརཀཾ.

༢༧.

ཡཐཱ ¶ ཨིམེ ཛནཱ སབྦེ, སཀྐརོནྟི ཏཐཱགཏཾ;

ཨཧམྤི ཀཱརཾ ཀསྶཱམི, སསངྒྷེ ལོཀནཱཡཀེ.

༢༨.

ཏདཱཧམེཝཾ ཙིནྟེཏྭཱ, དདྷིཾམདྷུཉྩ ཨེཀཏོ;

ཡོཛེཏྭཱ ལོཀནཱཐསྶ, སསངྒྷསྶ ཨདཱསཧཾ.

༢༩.

ཏེན ཀམྨེན སུཀཏེན, ཙེཏནཱཔཎིདྷཱིཧི ཙ;

ཛཧིཏྭཱ མཱནུསཾ དེཧཾ, ཏཱཝཏིཾས མགཉྪཧཾ.

༣༠.

པུནཱཧཾ བཱརཱཎསིཡཾ, རཱཛཱ ཧུཏྭཱ མཧཱཡསོ;

སཏྟུཀསྶ ཏདཱ རུདྡྷོ, དྭཱརརོདྷཾ ཨཀཱརཡིཾ.

༣༡.

ཏཏོ སཔཏྟིནོ [སམྤཏྟིནོ; སཔཏྟཱནོ ཨིཏིཙཀཏྠཙི] རུདྡྷཱ, ཨེཀཱཧཾ རཀྑིཏཱ ཨཧུཾ;

ཏཏོ ཏསྶ ཝིཔཱཀེན, པཱཔུཎིཾ ནིརཡཾ བྷུསཾ.

༣༢.

པཙྪིམེ ཙ བྷཝེ དཱནི, ཛཱཏོཧཾ ཀོལིཡེ པུརེ;

སུཔྤཝཱསཱ ཙ མེ མཱཏཱ, མཧཱལི ལིཙྪཝཱི པིཏཱ.

༣༣.

ཁཏྟིཡེ པུཉྙཀམྨེན, དྭཱརརོདྷསྶ ཝཱཧསཱ;

སཏྟམཱསེ སཏྟཝསྶེ, ཝསིཾཀུཙྪིམྷི དུཀྑིཏོ.

༣༤.

སཏྟཱཧཾ དྭཱརམཱུལ༹ྷོཧཾ, མཧཱདུཀྑསམཔྤིཏོ;

མཱཏཱ མེ ཚནྡདཱནེན, ཨེཝ མཱསི སུདུཀྑིཏཱ.

༣༥.

སུཝཏྠིཏོཧཾ ནིཀྑནྟོ, བུདྡྷེན ཨནུཀམྤིཏོ;

ནིཀྑནྟདིཝསེཡེཝ, པབྦཛིཾ ཨནགཱརིཡཾ.

༣༦.

ཨུཔཛ྄ཛྷཱ སཱརིཔུཏྟོ མེ, མོགྒལླཱནོ མཧིདྡྷིཀོ;

ཀེསེ ཨོརོཔཡནྟོ མེ, ཨནུསཱསི མཧཱམཏི.

༣༧.

ཀེསེསུ ཚིཛྫམཱནེསུ [ཚནྣམནེསུ ཨིཏིཔིཀཏྠཙི], ཨརཧཏྟམཔཱཔུཎཱིཾ;

དེཝོ ནཱགཱ མནུསྶཱ ཙ, པཙྩཡཱནུ པནེནྟི མེ.

༣༨.

པདུམུཏྟརནཱམཉྩ, ཝིཔསྶིཾཙ ཝིནཱཡཀཾ;

སཾཔཱུཛཡིཾ པམུདིཏོ, པཙྩཡེཧི ཝིསེསཏོ.

༣༩.

ཏཏོ ¶ ཏེསཾ ཝིཔཱཀེན, ཀམྨཱནཾ ཝིཔུལུཏྟམཾ;

ལཱབྷཾ ལབྷཱམི སབྦཏྠ, ཝནེ གཱམེ ཛལེ ཐལེ.

༤༠.

རེཝཏཾ དསྶནཏྠཱཡ, ཡདཱ ཡཱཏི ཝིནཱཡཀོ;

ཏིཾསབྷིཀྑུསཧསྶེཧི, སཧ ལོཀགྒནཱཡཀོ.

༤༡.

ཏདཱ དེཝོ པནཱིཏེཧི [པཎཱིཏེཧི ཨིཏིསབྦཏྠ], མམཏྠཱཡ མཧཱམཏི;

པཙྩཡེཧི མཧཱཝཱིརོ, སསངྒྷོ ལོཀནཱཡཀོ.

༤༢.

ཨུཔཊྛིཏོ མཡཱ བུདྡྷོ, གནྟྭཱ རེཝཏམདྡས;

ཏཏོ ཛེཏཝནཾ གནྟྭཱ, ཨེཏདགྒེ ཋཔེསིམཾ.

༤༣.

ལཱབྷཱིནཾ སཱིཝལི ཨགྒོ, མམ སིསྶེསུ བྷིཀྑཝོ;

སབྦེལོཀཧིཏོ སཏྠཱ, ཀིཏྟཡཱི པརིསཱསུམཾ.

༤༤.

ཀིལེསཱ ཛྷཱཔིཏཱ མཡ྄ཧཾ, བྷཝཱ སབྦེ སམཱུཧཏཱ;

ནཱགོཝ བནྡྷནཾ ཚེཏྭཱ, ཝིཧརཱམི ཨནཱསཝོ.

༤༥.

སྭཱགཏཾ ཝཏ མེ ཨཱསི, བུདྡྷསེཊྛསྶ སནྟིཀཾ;

ཏིསྶོ ཝིཛྫཱ ཨནུཔྤཏྟོ, ཀཏཾ བུདྡྷསྶ སཱསནཾ.

༤༦.

པཊིསམྦྷིདཱ ཙཏསྶོཔི, ཝིམོཀྑཱ པིཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནནྟི.

ཨིཏྠཾ སུདཾ ཨཱཡསྨཱ སཱིཝལིཏྠེརོ ཨིམཱ གཱཐཱཡོ ཨབྷཱསིཏྠཱཏི.

༤༧.

སུཏྭཱན ཨེཏཾ ཙརིཏཾ མཧབྦྷུཏཾ,

པུཉྙཱནུབྷཱཝཉྩ སིརིཾ སིརཱིམཏཾ;

ཧིཏྭཱ ཀུསཱིཏཾ ཀུསལཾ ཀརོཐ,

ཀཱམཱཏྠ ཀཱམཾ བྷཝབྷོགནིབྦུཏིཾ.

སཱིཝལིཏྠེརསྶ ཝཏྠུཾ དསམཾ.

ཡཀྑཝཉྩིཏཝགྒོ ཏཏིཡོ.

མཧཱསེནཝགྒོ

༣༡. མཧཱསེནརཉྙོ ཝཏྠུམྷི ཨཡམཱནུཔུབྦཱིཀཐཱ

བྷགཝཏི ¶ པརིནིབྦུཏེ པཱཊལིཔུཏྟནགརེ མཧཱསེནོ ནཱམ རཱཛཱ རཛྫཾ ཀཱརེསི དྷམྨིཀོ དྷམྨརཱཛཱ. སོ པན པིཏུཔིཏཱམཧཱདཱིནཾ དྷནརཱསིཾ ཨོལོཀེཏྭཱ ཨིམེ ཨིམཾ སཱཔཏེཡྻཾ པཧཱཡ མཙྩུནོ མུཁམུཔགཏཱ. ཨཧོ སཾསཱརིཀཱནཾ ཨཉྙཱཎཏཱ. དྷནཾ ཋཔེཏྭཱ ཨཏྟནོ ཝིནཱསཉྩ ཨཏྟཱནཾ ཋཔེཏྭཱ དྷནཝིནཱསཉྩ ན ཛཱནནྟཱིཏི སམྤཏྟིཡཱ ཨདྷིགམཉྩ ཝིནཱསཾ ཙཱཏི སབྦཾ ཙིནྟེཏྭཱ དྷམྨཉྩ སུཏྭཱ པཊིལདྡྷསདྡྷོ དིཝསེ དིཝསེ དསསཧསྶཱནཾ བྷིཀྑཱུནཾ མདྷུརེན ཨནྣཔཱནེན སནྟཔྤེནྟོ ཨནེཀཱནི པུཉྙཱནི ཨུཔཙིནནྟོ ཨེཀདིཝསཾ རཧོ པཊིསལླིནོ ཨེཝཾ ཙིནྟེསི. ཨེཝཾ རཱཛནིཡོགེན ཛནསྶ པཱིལ༹ནཾ ཀཏྭཱ དིནྣདཱནཏོ སཧཏྠེན ཀམྨཾ ཀཏྭཱ ལདྡྷེན དིནྣདཱནཾ མཧཔྥལཾ མཧཱནིསཾསཾ བྷཝིསྶཏི, ཨེཝཾ མཡཱ ཀཱཏབྦནྟི སོ སུཧདཱ མཙྩསྶ རཛྫཾ ནཱིཡྻཱཏེཏྭཱ ཨཏྟནོ ཀཎིཊྛིཀཾ ཨཱདཱཡ ཀིཉྩི ཨཛཱནཱཔེཏྭཱ ཨཉྙཏརཝེསེན ནགརཱ ནིཀྑམྨ ཨུཏྟརམདྷུརཾ ནཱམ ནགརཾ ཨགམཱསི, ཏཏྠ མཧཱཝིབྷཝོ ཨེཀོ སེཊྛི པཊིཝསཏི, ཏེ སེཊྛིནོ སམཱིཔ མུཔགམྨ ཋིཏཱ. ཏེན ཀིམཏྠཱཡཱགཏཱཏི ཝུཏྟེ རཱཛཱ ཏཝ གེཧེ བྷཏིཡཱ ཀམྨཾ ཀརིསྶཱམཱིཏི ཝཏྭཱ ཏེནཱནུཉྙཱཏོ ཏཱིཎི ཝསྶཱནི ཀམྨ མཀཱསི, ཏཏོ ཨེཀདིཝསཾ སེཊྛི ཏེ དིསྭཱ པཀྐོསིཏྭཱ ཨཏཱིཝ ཏུམྷེ སུཁུམཱལཏརཱ. ཏཐཱཔི ཨིམསྨིཾ གེཧེ ཀམྨཀརཎེན ཙིརཾ ཝསིཏྠ, ཨེཏྟཀཾ ཀཱལཾ ཀིསྨིཉྩི ཀམྨེཔི ཀུསཱིཏཏྟཾ ན པཉྙཱཡཏི. པགེཝ ཨནཱཙཱརམྤི, ཡཱགུབྷཏྟཾ ཋཔེཏྭཱ ཨཉྙཾ ཨུཔཀཱརམྤི མམ སནྟིཀཱ ནཏྠི, ཀེནཏྠེན ཀམྨཾ ཀརོཐཱཏི པུཙྪི. རཱཛཱ ཏསྶ ཝཙནཾ སུཏྭཱ ཨིམསྨིཾ ཛནཔདེ སཱལིནོ མནཱཔབྷཱཝོ བཧུསོ སཱུཡཏི. ཏསྨཱ སཱལཱིནམཏྠཱཡ ཨིདྷཱ གཏམྷཱཏི ཨཱཧ, ཏཾ སུཏྭཱ ཏེསཾ ཏུཊྛོ སེཊྛི སཱལཱིནཾ སཀཊསཧསྶཾ ཨདཱསི, རཱཛཱ སཱལིཾལབྷིཏྭཱ སེཊྛིནོ ¶ ཨེཝམཱཧ, བྷོ ཨིམཾ ཨམྷཱཀཾ ནགརཾ པཱཔེཐཱཏི, ཏཾ སུཏྭཱ སེཊྛི སཱདྷཱུཏི ཝཏྭཱ སཱལིཔརིཔུཎྞསཀཊསཧསྶཾ རཉྙོ ནགརཾ པཱཔེསི, རཱཛཱ ནགརཾ གནྟྭཱ སེཊྛིསྶ ནཱནཱཝཎྞཝཏྠཧིརཉྙསུཝཎྞཱདཱིཧི སཀཊེ པཱུརེཏྭཱ པཊིཔེསེཏྭཱ མེཏྟིཾ ཐིརཾ ཀཏྭཱ ཨཱབྷཏཝཱིཧཡོ རཱཛགེཧེ སནྣིཙཡམཀཱསི, ཨཐ རཱཛཱ ཀཏིཔཱཧཙྩཡེན མུསལཾ པགྒཡ྄ཧ སཧཏྠེནེཝ ཝཱིཧིཾ ཀོཊྚེཏི, ཀོཊྚིཏཀོཊྚིཏཾ ཀཎིཊྛིཀཱ པཔྥོཊེཏི. ཨེཝཾ ཨུབྷོཔི ཏཎྜུལཱནཾ མཧནྟཾ རཱསིཾ ཀཏྭཱ དཱརཱུདཀཱདཡོ ཨཱཧརིཏྭཱ ཨམྦིལབྷཏྟཾ པཙིཏྭཱ རཱཛགེཧེ པཉྩསཏཨཱསནཱནི པཉྙཱཔེཏྭཱ ཀཱལཾ ཨུགྒྷོསེསུཾ, ཨཱགཙྪནྟུ ཨཡྻཱ ཨནུཀམྤཾ ཨུཔཱདཱཡ མམ གེཧེ བྷུཉྫནྟཱུཏི. ཏཾ སུཏྭཱ པཉྩསཏཱ བྷིཀྑཱུ ཨཱཀཱསེན ཨཱགམིཾསུ, རཱཛཱ ཏེ ཡཱཝདཏྠཾ པརིཝིསི, ཏཏོ ཏེསཾ ཨནྟརེ པིཡཾགུདཱིཔཝཱསཱི ཨེཀོ མཧཱསིཝཏྠེརོ ནཱམ བྷཏྟཾ གཧེཏྭཱ ཨེཏེ མཾ པསྶནྟཱུཏི ཨདྷིཊྛཧིཏྭཱ ཨཱཀཱསེན པིཡཾགུདཱིཔཾ གནྟྭཱ བྷཏྟཾ པཉྩསཏཱནཾ བྷིཀྑཱུནཾ དཏྭཱ པརིབྷུཉྩི. ཏཾ ཏསྶཱནུབྷཱཝེན སབྦེསཾ ཡཱཝདཏྠཾ ཨཧོསི. ཨེཝཾ ཨཔྤཀེནཱཔི དེཡྻདྷམྨེན སཔྤུརིསཱ དཱཡཀཱནཾ མནཾ པསཱདེཏྭཱ པཏིཊྛཾ ཀརོནྟཱིཏི. ཝུཏྟཉྷི.

༡.

ཨཔྤཀེནཔི མེདྷཱཝཱི, དཱཡཀཱནཾ མནཾ པཏི;

སདྡྷཾ ཝཌྜྷེནྟི ཙནྡོཝ, རཾསིནཱ ཁཱིརསཱགརཾ.

༢.

ཨཊྛཱནེ ན ནིཡོཛེནྟཱ, ཀརོནྟཱ ནེཝ སནྣིདྷིཾ;

པརིབྷོག མཀཏྭཱན, ནེཝ ནཱསེནྟི པཙྩཡཾ.

༣.

ན པཱཔེནྟཱཙ ཐེཡྻསྶ, ན ཀརོནྟཱ ཏཐེཝིཎཾ;

ཝིབྷཛནྟི སུསཱིལེསུ, སཡཾ བྷུཏྭཱན སཱིལཝཱཏི.

ཨཐ རཱཛཱ ཀཎིཊྛིཀཱཡ སདྡྷིཾ ཐཏྠེཝ ཋིཏོ པིཡཾགུདཱིཔེ པརིབྷུཉྫནྟེ པཉྩསཏབྷིཀྑཱུ དིསྭཱ ཧཊྛོ ཨུདགྒོ ཨཧོསི. ཨཐ ¶ ཏེ ཨཔརབྷཱགེ ཨཏྟནཱ ཀཏཾ དཱནཝརཾ ཨནུསྶརནྟཱ ན ཙིརེནེཝ ཨུབྷོཔི སོཏཱཔནྣཱ ཨཧེསུཾཏི.

༤.

ན གཎེནྟཱཏྟནོ དུཀྑཾ, ཝིཧཱཡ མཧཏིཾ སིརིཾ;

ཨཱཡཏིཾབྷཝམིཙྪནྟཱ, སུཛནེཝཾ སུབྷེ རཏཱ.

༥.

ཨཱཡཱསེན ཀཏཾ པུཉྙཾ, མཧནྟཕལདཱཡཀཾ;

ཨིཏི མནྟྭཱན མེདྷཱཝཱི, སཧཏྠེནེཝ ཏཾ ཀརེཏི.

མཧཱསེནརཉྙོ ཝཏྠུཾ པཐམཾ.

༣༢. སུཝཎྞཏིལཀཱཡ ཝཏྠུམྷི ཨཡམཱནུཔུབྦཱིཀཐཱ

ལངྐཱདཱིཔེ ཀིར ཨནུརཱདྷཔུརནགརེ ཨེཀོ མཱཏུགཱམོ [ཨེཀཱམཱཏུགཱམཱཏིཝཱ ཨེཀཱམཱཏུགཱམོཏིཝཱ ཀཏྠཙི] སདྡྷཱསམྤནྣཱ ནིཙྩཾ ཨབྷཡུཏྟརཙེཏིཡེ པུཔྥཔཱུཛཾ ཀརོཏི, ཨཐེཀདིཝསཾ སཱ ཨཏྟནོ དྷཱིཏུཡཱ སདྡྷིཾ ཏསྨིཾ ཙེཏིཡེ པུཔྥཔཱུཛནཏྠཱཡ [པུཔྥཔཱུཛཏྠཱཡ ཨིཏིཀཏྠཙི] གནྟྭཱ པུཔྥཱསནསཱལཱཡ ཨུདཀཾ ཨཔསྶནྟཱི དྷཱིཏུ ཧཏྠེ པུཔྥཙངྒོཊཀཾ ཋཔེཏྭཱ གྷཊ མཱདཱཡ པོཀྑརཎིཾ ཨགམཱསི, ཏཏོ སཱ དཱརིཀཱ མཱཏརི ཨནཱགཏཱཡཡེཝ [ཨནཱགཏེཡེཝ ཨིཏིསབྦཏྠ] ཨདྷོཏཱསནེ པུཔྥམུཊྛིཾགཧེཏྭཱ མཎྜལཾ ཀཏྭཱ པཱུཛེཏྭཱ ཨེཝཾ པཏྠནམཀཱསི. ཏཐཱ ཧི.

༡.

མཧཱཝཱིརསྶ དྷཱིརསྶ, སཡམྦྷུསྶ མཧེསིནོ;

ཏིལོཀགྒསྶ ནཱཐསྶ, བྷགཝནྟསྶ སཏྠུནོ.

༢.

ཡ མཧཾ པཱུཛཡིཾ པུཔྥཾ, ཏསྶ ཀམྨསྶ ཝཱཧསཱ;

རཱུཔཱིནཾ པཝརཱ ཧེསྶཾ, ཨཱརོཧཔརིཎཱཧཝཱ.

༣.

མཾ ¶ དིསྭཱ པུརིསཱ སབྦེ, མུཙྪནྟུ ཀཱམམུཙྪིཏཱ;

ནིཙྪརནྟུ སརཱིརཱ མེ, རཾསིམཱལཱིཝ རཾསིཡོ.

༤.

ཧདཡངྒམཱ ཀཎྞསུཁཱ, མཉྫུབྷཱཎཱི སུབྷཱ མམ;

ཀིནྣརཱནཾ ཡཐཱ ཝཱཎཱི, ཨེཝམེཝ པཝཏྟཏཱུཏི.

ཨཐསྶཱ མཱཏཱ ཨཱགམྨ ཨདྷོཏཱསནེ པཱུཛིཏཱནི པུཔྥཱནི དིསྭཱ ཀསྨཱ ཙཎྜཱལཱི ཨདྷོཏཱསནེ བྷགཝཏོ པུཔྥཱནི པཱུཛེསི, ཨཡུཏྟཾ ཏཡཱ ཀཏནྟི ཨཱཧ, ཏཾ སུཏྭཱ སཱ མཱཏུཡཱ ཀུཛ྄ཛྷིཏྭཱ ཏྭཾ ཙཎྜཱལཱིཏི ཨཀྐོསི, སཱ ཨེཏྟཀཾ པུཉྙཱཔུཉྙཾ ཀཏྭཱ ཨཔརབྷཱགེ ཏཏོ ཙུཏཱ ཛམྦུདཱིཔེ ཨུཏྟརམདྷུརཱཡཾ ཨེཀསྶ ཙཎྜཱལགནྡྷབྦབྲཱཧྨཎསྶ དྷཱིཏཱ ཧུཏྭཱ ནིབྦཏྟི, ཨུཏྟམརཱུཔདྷརཱ ཨཧོསི, ཏསྶཱ སརཱིརཏོ མེགྷམུཁཏོ ཝིཛྫུལླཏཱཝིཡ རཾསིཡོ ནིཙྪརནྟི. སམནྟཱ ཙཏུཧཏྠཊྛཱནེ སརཱིརཔྤབྷཱཡ ཨནྡྷཀཱརེ ཝིདྷམཏི. མུཁཏོ ཨུཔྤལགནྡྷོ ཝཱཡཏི, ཀཱཡཏོ ཙནྡནགནྡྷོ, ཏསྶཱ དྭིནྣཾ ཐནཱན མནྟརེ སུཝཎྞཝཎྞཾ ཨེཀཾ ཏིལཀཾ ཨཧོསི, ཏེན བཱལསུརིཡསྶ ཝིཡ པབྷཱ ནིཙྪརཏི. དིཊྛདིཊྛཱ ཡེབྷུཡྻེན ཨུམྨཏྟཱ ཝིཡ ཀཱམམདེན ཝིསཉྙིནོ ཧོནྟི, ཨཧོ ཀུསལཱཀུསལཱནཾ ཨཱནུབྷཱཝོ. ཏཐཱ ཧི.

༥.

ཡེན སཱ ཀོདྷསཱམཱཏུ, ཙཎྜཱལཱི ཨིཏི བྷཱསིཏཱ;

ཏེན སཱ ཨཱསི ཙཎྜཱལཱི, ཛེགུཙྪཱ ཧཱིནཛཱཏིཀཱ.

༦.

སལླཀྑེཏྭཱན སམྦུདྡྷ, གུཎཾ པཱུཛེསི ཡཾ ཏདཱ;

ཏེན པུཉྙཱནུབྷཱཝེན, སཱ བྷིརཱུཔཱི མནོརམཱ.

༧.

ཡེན ཡེན པཀཱརེན, པུཉྙཔཱཔཱནི ཡོ ཀརེ;

ཏསྶ ཏསྶཱནུརཱུཔེན, མོརོཝ ལབྷཏེ ཕལཾ.

༨.

པཱཔེན ཙ ཏིརཙྪཱནེ, ཛཱཡནྟི ཀུསལེན ཏེ;

ཝཎྞཔོཀྑརཏཱ ཧོཏི, མོརཱནཾ ཀམྨ མཱིདིསནྟི.

ཏཏོ ¶ ཏསྶཱ མཱཏཱཔིཏརོ སུཝཎྞཏིལཀཱཏི ནཱམ མཀཾསུ. ཏསྨིཾཀིར ནགརེ མནུསྶཱ ཏསྶཱ རུཔདསྶནེནཙ སཝཎེནཙ སམྤཏྟཱཔི ཙཎྜཱལདྷཱིཏཱ ཨཡནྟི པརིབྷཝབྷཡེན ཨཱཝཱཧཾ ན ཀརོནྟི. ཨཐ ཏསྨིཾ ནགརེ ཛེཊྛཙཎྜཱལབྲཱཧྨཎསྶ པུཏྟོ ཨེཏམཏྠཱཡ ཏསྶཱ མཱཏཱཔིཏུནྣཾ སནྟིཀཾ ཝཏྠཱབྷརཎགནྡྷམཱལཱདཡོ པེསེསི སུཝཎྞཏིལཀཾ ཨམྷཱཀཾ དདནྟཱུཏི, ཏེ ཏཾ པཝཏྟིཾ ཏསྶཱ ཨཱརོཙེསུཾ. སཱསྶ ཛིགུཙྪནྟཱི པརིཧཱས མཀཱསི. ཏཏོ བྲཱཧྨཎསྶ པུཏྟོ ལཛྫིཏོ རཉྙོ སནྟིཀཾ གནྟྭཱ ཝཱིཎཾ མུཉྩེཏྭཱ གཱཡམཱནོ ཨེཝམཱཧ.

༩.

ལལནཱ ནནཱནཱི ཙལལོཙནཱནཱི,

ཏརུཎཱ རུཎཱནཱི ཙལིཏཱདྷརཱཎཱི;

མནུཛོ ཧི ཡོ ནེཏྟཔིཡཾ ཀརོཏི,

ས ཏུ ནཱིཙཛཱཏིཾ ཨཔི ནོ ཛཧཱཏི.

ཀིམིདནྟི རཉྙཱ པུཊྛོ ཨཱཧ.

༡༠.

སམེཏི ཀིཾ དེཝ ཚམཱཡ མཏྟིཀཱ,

ཀདཱཙི ཙཱམཱིཀརཛཱཏིཀཱཡ;

སིགཱལདྷེནུ ཨཔི ནཱིཙཛཱཏིཀཱ,

སམེཏི ཀིཾསཱིཧཝརེན དེཝཱཏི.

ཨེཝཉྩ པན ཝཏྭཱ དེཝ ཨིམསྨིཾནགརེ སུཝཎྞཏིལཀཱ ནཱམེཀཱ ཙཎྜཱལདྷཱིཏཱ ཨཏྠི, སཱ སམཱནཛཱཏིཀེཧི པེསིཏཔཎྞཱཀཱརཾ ན གཎྷཱཏི, ཀུལཝནྟེཡེཝ པཏྠེཏི, ཀདཱ ནཱམ ཀཱཀཱི སུཝཎྞཧཾསེན སམཱགཙྪཏི དེཝཱཏི. རཱཛཱ ཏཾ སུཏྭཱ ཏསྶཱ པིཏརཾ པཀྐོསཱཔེཏྭཱ ཏམཏྠཾ ཝཏྭཱ སཙྩཾ བྷཎེཏི པུཙྪི, སོཔི སཙྩཾ དེཝ, སཱ ཛཱཏིསམྤནྣམེཝ ཀཱམེཏཱིཏི ཨཱཧ. རཱཛཱ ཨེཝཾ སཏི བྷཎེ པཉྩམདྷུརནགརེ ཨུདྡཱལ༹བྲཱཧྨཎོ ནཱམ ཨཏྠི, སོ ཛཱཏིསམྤནྣོ མཱཏིཏོཙ པིཏིཏོཙ ཨནུཔཀྐུཊྛོ ¶ , ཛེགུཙྪཱ པཊིཀྐཱུལཱ ཨེཏཱཏི མཱཏུགཱམེན སདྡྷིཾ ན སཾཝསཏི. ཨཏྟནོ གེཧཏོ རཱཛགེཧཾ གཙྪནྟོཙ ཨཱགཙྪནྟོ ཙ སོལ༹སཁཱིརོདཀགྷཊེཧི མགྒེ སིཉྩཱཔེསི. མཱཏུགཱམེ དིསྭཱ ཀཱལཀཎྞཱི མཡཱ དིཊྛཱཏི ཁཱིརོདཀེན མུཁཾ དྷོཝཏི. ཏཝ དྷཱིཏཱ སཀྐོནྟཱི ཏེན སདྡྷིཾ སཾཝསཏུ, ཨེཏམཏྠཾ ཏཝ དྷཱིཏརཾ ཀཐེཧཱིཏི ཨཱཧ, སོཔི ཏཾ སུཏྭཱ གེཧཾ གནྟྭཱ དྷཱིཏརཾ པཀྐོསིཏྭཱ རཉྙཱ ཝུཏྟནིཡཱམེནེཝ ཏསྶཱ ཀཐེསི. ཏཱཡ ཏཾ སུཏྭཱ སཀྐོནྟཱི ཨཧཾ ཨུདྡཱལ༹བྲཱཧྨཎེན སདྡྷིཾ ཝསིསྶཱམི, མཱ ཏུམྷེ ཙིནྟེཐ, པཔཉྩམྤི མཱ ཀརོཐ, པཱཏོཝ གམིསྶཱམཱིཏི ཝུཏྟེ པིཏཱ པནསྶཱ སཱདྷཱུཏི སཧསྶགྒྷནཀཙིཏྟཀམྦལཀཉྩུཀེན དྷཱིཏུ སརཱིརཾ པཱརུཔཱཔེཏྭཱ ཝཱིཎཱདིཏུརིཡབྷཎྜཱནི གཱཧཱཔེཏྭཱ དྷཱིཏུཡཱ སདྡྷིཾ ཨདྡྷཱནམགྒཾ པཊིཔཛྫི. གཙྪནྟོ ཨནྟརཱམགྒེ ཨཉྙཏརསྨིཾ ནགརེ རཉྙོ གནྡྷབྦཾ ཀརོནྟོ དྷཱིཏརཾ པིཊྛིཔསྶེ ནིསཱིདཱཔེཏྭཱ གནྡྷབྦམཀཱསི. ཨཐསྶ པིཊྛིཔསྶནིསིནྣཱ སུཝཎྞཏིལཀཱ ནཡནཀོཊིཡཱ དིཊྛིཾ པཱཔེནྟཱི སརསེན ཏཾ ཨོལོཀེཏྭཱ པཱརུཏཀཉྩུཀཾ ཀིཉྩི ཨཔནེཏྭཱ སརཱིརཔྤབྷཾ པཉྙཱཔེསི, རཱཛཱ པནསྶཱ སརཱིརཔྤབྷཾཙ རཱུཔསམྤདཾཙ དིསྭཱ ཀཱམཱཏུརོ ཝིགཏསཉྙོ སམྨཱུལ༹ྷོ ཧུཏྭཱ མུཧུཏྟེན པཊིལདྡྷསྶཱསོ ཏསྶཱ སསྶཱམིཀཱསྶཱམིཀབྷཱཝཾ པུཙྪིཏྭཱ ཙཎྜཱལདྷཱིཏཱཏི སུཏྭཱ པརིབྷཝབྷཡེན ཏཾ ཨཱནེཏུ མསཀྐོནྟོ ཨེཝརཱུཔཾ ཝཎྞཔོཀྑརསམྤནྣཾ ཨིཏྠིརཏནཾ ཨལབྷནྟསྶ མེ ཀོ ཨཏྠོ ཛཱིཝིཏེནཱཏི སོཙནྟོ པརིདེཝནྟོ ཀཱམམུཙྪིཏོ ཀཏྟབྦཱ ཀཏྟབྦཾ ཨཛཱནནྟོ ཨསིཾ གཧེཏྭཱ ཨཏྟནོ སཱིསཾ སཡམེཝ ཚིནྡིཏྭཱ ཀཱལ མཀཱསི. ཨེཝམེཝ ཨནྟརཱམགྒེ པཉྩརཱཛཱནོ ཏསྶཱ རཱུཔསམྤཏྟིམདམཏྟཱ ཨསིནཱ ཚིནྣསཱིསཱ ཛཱིཝིཏཀྑཡཾ པཱཔུཎིཾསུ. ཏཐཱ ཧི སཏྟཱ ཧིརཉྙསུཝཎྞདཱསིདཱས པུཏྟདཱརཱདཱིསུ [པུཏྟདཱརཱདཱིཧི ཨིཏིསབྦཏྠ] པིཡཾ ནིསྶཱཡ ཀཱམེན མུཙྪིཏཱ ཨནཡབྱསནཾ པཱཔུཎནྟཱིཏི. ཝུཏྟཉྷེཏཾ བྷགཝཏཱ.

༡༡.

པིཡཏོ ¶ ཛཱཡཏེ སོཀོ,

པིཡཏོ ཛཱཡཏེ བྷཡཾ;

པིཡཏོ ཝིཔྤམུཏྟསྶ,

ནཏྠི སོཀོ ཀུཏོ བྷཡཾ.

༡༢.

པེམཏོ ཛཱཡཏེ སོཀོ,

པེམཏོ ཛཱཡཏེ བྷཡཾ;

པེམཏོ ཝིཔྤམུཏྟསྶ,

ནཏྠི སོཀོ ཀུཏོ བྷཡཾ.

༡༣.

རཏིཡཱ ཛཱཡཏེ སོཀོ,

རཏིཡཱ ཛཱཡཏེ བྷཡཾ;

རཏིཡཱ ཝིཔྤམུཏྟསྶ,

ནཏྠི སོཀོ ཀུཏོ བྷཡཾ.

༡༤.

ཀཱམཏོ ཛཱཡཏེ སོཀོ,

ཀཱམཏོ ཛཱཡཏེ བྷཡཾ;

ཀཱམཏོ ཝིཔྤམུཏྟསྶ,

ནཏྠི སོཀོ ཀུཏོ བྷཡཾ.

༡༥.

ཏཎྷཱཡ ཛཱཡཏེ སོཀོ,

ཏཎྷཱཡ ཛཱཡཏེ བྷཡཾ;

ཏཎྷཱཡ ཝིཔྤམུཏྟསྶ,

ནཏྠི སོཀོ ཀུཏོ བྷཡཾ.

ཏཏོ སོ ཨནུཀྐམེན པཉྩམདྷུརནགརཾ གནྟྭཱ ཨཏྟནོ ཨཱགཏབྷཱཝཾ རཉྙཱ ཀཐཱཔེཏྭཱ ཏེན ཨནུཉྙཱཏོ གནྟྭཱ རཱཛཱནཾ ཨདྡས. ཏདཱ ཨུདྡཱལ༹བྲཱཧྨཎོ རཉྙོ ཨཝིདཱུརེ ཀམྦལབྷདྡཔཱིཋེ ནིསིནྣོ ཧོཏི, གནྡྷབྦབྲཱཧྨཎོཔི དྷཱིཏུཡཱ སདྡྷིཾ གནྡྷབྦཾ ཀུརུམཱནོ ནིསཱིདི. ཏསྨིཾཁཎེ པིཏུ པིཊྛིཔསྶེ ནིསིནྣཱ སུཝཎྞཏིལཀཱ ཨུདྡཱལ༹བྲཱཧྨཎོ ཀཏམོཏི པུཙྪིཏྭཱ ཨེཏསྨིཾ བྷདྡཔཱིཋེ ནིསིནྣོཾ ཨེསོཏི སུཏྭཱ ནིལཱམལལོཙནེཧི ཏཾ ཨོལོཀནྟི དསནརཾསིནཱ སམྦྷིནྣསུརཏྟཱདྷརེན མནྡཧསིཏཾ ¶ ཀརོནྟཱི ཏཾ ཨོལོཀེཏྭཱ པཱརུཏཀཉྩུཀཾ ཨཔནེཏྭཱ སརཱིརཔྤབྷཾ ཝིསྶཛྫེསི. ཏཾ དིསྭཱ བྲཱཧྨཎོ ཨུམྨཏྟོ སོཀེན པརིདཌྜྷགཏྟོ ཨུཎྷཝཱཏེན པཱུརིཏམུཁནཱསོ ཨསྶུནཱ ཀིལིནྣནེཏྟོ ཝིསཉྙཱི ཨཧོསི. ཏཏོ སོ མུཧུཏྟེན ལདྡྷསྶཱསོ རོགཱིཝིཡ རཉྙོ སཀཱསཱ ཨཔསརནྟོ ཨཏྟནོ གེཧཾ གནྟྭཱ སུཧདེ པཀྐོསིཏྭཱ ཏེསཾ ཨེཝམཱཧ. བྷཝནྟེཏྠ.

༡༦.

ཡོ ཨཱཔདེ སམུཔྤནྣེ,

ཨུཔཏིཊྛཏི སནྟིཀེ;

སུཁདུཀྑེ སམོ ཧོཏི,

སོ མིཏྟོ སོཙ ཉཱཏཀོ.

༡༧.

ཡོ གུཎཾ བྷཱསཏེ ཡསྶ, ཨགུཎཉྩ ནིགཱུཧཏི;

པཊིསེདྷེཏྱ [པཊིསེདྷེཏིཀཏྟབྦཱ ཨིཏིསབྦཏྠ] ཀཏྟབྦཱ, སོ མིཏྟོ སོཙ ཉཱཏཀོ.

༡༨.

སུཝཎྞཏིལཀཱནཱམ, ལལནཱ ཀཱམལཱལཡཱ;

ནཱིལཀྑིཙཎྜཀཎྜེཧི, ཝིཁཎྜེསི མནོ མམ.

༡༩.

ཏསྶཱ མུཁམྦུཛེ སཏྟཱ, མམ ནེཏྟམདྷུབྦཏཱ,

ཨཔྤམྤིན སརནྟཱམཾ, ཏཏྠེཝཱ བྷིརམནྟི ཏེ.

༢༠.

སཧེཝ ཏེཧི མེ ཙིཏྟཾ, གཏཾ ཨུལླཾགྷིཡུདྡྷཏོ;

ལཛྫཱགམྦྷཱིརཔརིཁཾ, དྷིཏིཔཱཀཱརམུགྒཏཾ.

༢༡.

སམྨུཡ྄ཧཱམི པམུཡ྄ཧཱམི, སབྦཱ མུཡ྄ཧནྟི མེ དིསཱ;

ཏསྶ མེ སརཎཾ ཧོཐ, ཀརོཐ མམ སངྒཧནྟི.

ཏཾ སུཏྭཱ ཏེ ཨེཝམཱཧཾསུ.

༢༢.

ཡཾ ཏྭམཱཙརིཡ པཏྠེསི, ཙཎྜཱལཱི སཱ ཨསངྒམཱ;

ཀིནྣུ མཱིལ༹ྷེན སཾཡོགོ, ཙནྡནསྶ ཀདཱ སིཡཱ.

༢༣.

ཨགམྨགམནཱ ¶ ཡཱཏི, ནརཱནཾ དཱུརཏོ སིརཱི;

ཀིཏྟིཙཱཡུ བལཾ བུདྡྷི, ཨཡསཾཙ ས གཙྪཏཱིཏི.

ཨཐ ཏེསཾ བྲཧྨཎོ ཨཱཧ.

༢༤.

ན པརིཙྩཛཏི ལོཀོཡཾ, ཨམེཛ྄ཛྷེ མཎིམུཏྟམཾ;

ཐཱིརཏནཾ ཡུཝཱཎཱི ཙ, དུཀྐུལཱ ཨཔི གཱཧིཡཱཏི.

ཨེཝཉྩ པན ཝཏྭཱ ཏསྶཱ སསྶཱམིཀཱསྶཱམིཀབྷཱཝཾ ཉཏྭཱ ཨཱནེཐཱཏི ཨཱཧ, ཏེ ཏཐཱ ཨཀཾསུ. ཏཏོ བྲཱཧྨཎོ ཏཱཡ གེཧཾ ཨཱགཏཀཱལཏོ པཊྛཱཡ ཙཏྟཱརོ མཱསེ རཉྙོ ཨུཔཊྛཱནཾ ནེཝ ཨགམཱསི. ཏསྶ པན བྲཧྨཎསྶ སནྟིཀེ པཉྩསཏརཱཛཀུམཱརཱ ནཱནཱཝིདྷཱནི སིཔྤཱནི ཨུགྒཎྷནྟི. ཏེ ཏཾ ཀཱརཎཾ ཉཏྭཱ སུཝཎྞཏིལཀཱཡ ཝིཛྫམཱནཱཡ ཨམྷཱཀཾ སིཔྤུགྒཧཎསྶ ཨནྟརཱཡོ བྷཝིསྶཏི, ཡེན ཀེནཙི ཨུཔཱཡེན ཨེཏཾ མཱརེཏུཾ ཝཊྚཏཱིཏི, ཙིནྟེཏྭཱ ཏེ ཧཏྠཱ ཙརིཡཾ པཀྐོསིཏྭཱ ལཉྫཾ དཏྭཱ ཨེཝམཱཧཾསུ, ཧཏྠིཾ སུརཱཡ མཏྟཾ ཀཏྭཱ སུཝཎྞཏིལཀཾ མཱརེཧཱིཏི. ཏཏོ ཏེ སབྦེ རཱཛངྒཎེ སནྣིཔཏིཏྭཱ དཱུཏཾ པཱཧེསུཾ, ཨཱཙརིཡཾ དཊྛུཀཱམམྷཱཏི. ཏཏོ བྲཱཧྨཎེན ཨཱགནྟྭཱ ནིསིནྣེན པཊིསནྠཱརཾ ཀཏྭཱ ཨཱཙརིཡ ཨཱཙརིཡཱནིཾ པསྶིཏུཀཱམམྷཱཏི ཨཱཧཾསུ. ཨཐ སོ སུཝཎྞཏིལཀཾ གཧེཏྭཱ ཨཱགཙྪཐཱཏི མནུསྶེ པེསེསི. ཏེ ཏཐཱ ཀརིཾསུ, ཨཐ ཏསྶཱ ཝཱིཐིམཛ྄ཛྷཾ སམྤཏྟཀཱལེ ཧཏྠིཾ ཝིསྶཛྫཱཔེསུཾ. སོ སོཎྜཱཡ བྷཱུམིཡཾ པཧརནྟོ [པཧརནྟོཨུཔདྷཱཝིཏྭཱ ཨིཏིཀཏྠཙི] གཙྪནྟོ ཨུཔདྷཱཝིཏྭཱ སོཎྜེན ཏཾ ཨུཀྑིཔིཏྭཱ ཀུམྦྷེ ནིསཱིདཱཔེསི. ཏཏོ རཱཛཱནོ ཏཐཱ ཏཾ མཱརཱཔེཏུ མསཀྐོནྟཱ པུན དིཝསེ མནུསྶེ པཡོཛེཏྭཱ རཏྟིཡཾ མཱརཱཔེསུཾ. བྲཱཧྨཎོཔི ཨེཝརཱུཔཾ ཨིཏྠིཾ ཨལསིཏྭཱ ཛཱིཝནཏོ མཏམེཝ [མཏཾམེསེཡྻོ ཨིཏིཀཏྠཙི] སེཡྻོཏི སོཙནྟོ པརིདེཝནྟོ རཱཛངྒཎེ དཱརུཙིཏཀཾ ཀཱརཱཔེཏྭཱ ཨགྒིཾཔཝིསིཏྭཱ ¶ མཏོཏི. ཨེཝཾ མཱཏུགཱམཝསངྒཏཱ མཧནྟཾ ཨནཡབྱསནཉྩ མརཎཉྩ པཱཔུཎནྟཱིཏི. ཝུཏྟཉྷེཏཾ བྷགཝཏཱ.

༢༥.

མཱཡཱཝེསཱ [མཱཡཱཙེསཱ ཨིཏིཀཏྠཙི] མརཱིཙཱིཝ,

སོཀོ རོགོ ཙུཔདྡཝོ;

ཁརཱཝ བནྡྷནཱ ཙེསཱ,

མཙྩུཔཱསོ གུཧཱསཡོ;

ཏཱསུ ཡོ ཝིསྶསེ པོསོ,

སོ ནརེསུ ནརཱདྷམོཏི.

༢༦.

ཨཡོནིསོ སཱ པུརིམཱཡ ཛཱཏིཡཱ,

པུཉྙཾ ཀརིཏྭཱ ཨལབྷཱིདིསཾ གཏིཾ;

དྷཱིསམྤཡུཏྟཾ [དྷིཏིསམྤཡུཏྟཾ ཨིཏིཀཏྠཙི] ཀུསལཾ ཀརོནྟཱ,

ནིབྦཱཎམེཝཱབྷིམུཁཾ ཀརོཐཱཏི.

སུཝཎྞཏིལཀཱཡ ཝཏྠུཾ དུཏིཡཾ.

༣༣. ཀཔཎཱཡ ཝཏྠུམྷི ཨཡམཱནུཔུབྦཱིཀཐཱ

བྷགཝཏི པརིནིབྦུཏེ ཛམྦུདཱིཔེ ཏཏྠ ཏཏྠ བྷིཀྑུབྷིཀྑུཎིཡོ ཙ ཨུཔཱསཀཨུཔཱསིཀཱཡོ ཙ ཛཡམཧཱབོདྷིཾ ཝནྡིསྶཱམཱིཏི ཡེབྷུཡྻེན གནྟྭཱ ཝནྡནྟི. ཨཐཱ པརབྷཱགེ བཧཱུ བྷིཀྑཱུ སངྒམྨ མཧཱབོདྷིཾ ཝནྡནཏྠཱཡ གཙྪནྟཱ ཨཉྙཏརསྨིཾ གཱམཀེ བྷིཀྑཱཡ ཙརིཏྭཱ ཨཱསནསཱལཾ གནྟྭཱ ཀཏབྷཏྟཀིཙྩཱ ཐོཀཾ ཝིསྶམིཾསུ, ཏདཱ ཏཏྠ ཨེཀཱ ཀཔཎཱ དུགྒཏིཏྠཱི ཏཐཱ ནིསིནྣབྷིཀྑཱུ དིསྭཱ ཨུཔསངྐམིཏྭཱ པཉྩཔཏིཊྛིཏེན ཝནྡིཏྭཱ ཨེཀམནྟེ ཋིཏཱ ཨཡྻཱ ཀུཧིཾ གཙྪནྟཱིཏི པུཙྪི. བྷིཀྑཱུ ཏཾ སུཏྭཱ ཛཡམཧཱབོདྷིསྶ ཨཱནུབྷཱཝཉྩ ཏཾ ཝནྡནཏྠཱཡ ཨཏྟཱནཾ གམནཉྩ ཀཐེནྟཱ ཨེཝམཱཧཾསུ.

༡.

ཡཏྠཱསཱིནོ ¶ ཛིནོ ཛེསི, སསེནཾ མཀརདྡྷཛཾ;

ཧནྟྭཱ ཀིལེསསེནཉྩ, བུདྡྷོ ཨཱསི ནིརུཏྟརོ.

༢.

ཡཾ པཱུཛེསི མཧཱཝཱིརོ, ཋིཏོ པད མཀོཔཡཾ;

སཏྟརཏྟིནྡིཝཾ ནེཏྟ, ནཱིལནཱིརཛརཾསིནཱ.

༣.

སུརཱསུརནརཱདཱིནཾ, ནེཏྟཱལི པཱལི༹པཱཏནཱ;

མེཙཀཱཀཱརཔཏྟེཧི, སིཁཎྜཱིཝིཡ བྷཱཏི ཡོ.

༤.

སུརཔཱདཔོཝ སཏྟཱནཾ, ཡཾ ཏིཊྛཏི མཧཱིཏལེ;

ཨིཧ ལོཀེ པརཏྟེ ཙ, དདནྟོ ཨིཙྪིཏིཙྪིཏཾ.

༥.

ཡསྶ པུརཱཎཔཎྞམྤི, པཏིཏཾ ཡོ ནརོ ཨིདྷ;

པཱུཛེཏི ཏསྶ སོ དེཏི, བྷཝབྷོགཾ མཧཱིརུཧོ.

༦.

གནྡྷམཱལེཧི སལིལེཧི, ཡམུཔཱསཏི སདཱ ནརོ;

ཨཛ྄ཛྷཏྟཉྩ བཧིདྡྷཱ ཙ, དུརིཏཾ སོ ནིཧཉྙཏི.

༧.

ཡོ དེཏི ཨིཧལོཀཏྠཾ,

ཡོ དེཏི པཱརལོཀིཀཾ,

སམྤདཾ ཛཡབོདྷིཾཏཾ,

བྷོཏི གཙྪཱམ ཝནྡིཏུཾ.

ཏཾ སུཏྭཱ ཨུདགྒཱ སོམནསྶཛཱཏཱ བྷིཀྑཱུནཾ ཨེཝམཱཧ. ཨཧཾ བྷནྟེ པརཀུལེ བྷཏིཡཱ ཀམྨཾ ཀརོནྟཱི དུཀྑེན ཀསིརེན ཛཱིཝིཀཾ ཀཔྤེམི. སྭཱཏནཱཡ མེ ཏཎྜུལནཱལིཔི [བྷཎྜུལནཱམྤ ཨིཏིསབྦཏྠ] ནཏྠི, པགེཝ ཨཉྙཾ དྷནཾ, ཨིམཾ ཝིནཱ ཨཉྙཾ སཱཊཀམྤི ནཏྠི, ཀསྨཱ པུབྦེ ཨཀཏཔུཉྙཏྟཱ, ཏསྨཱ ཨིམཾ བྷནྟེ སཱཊཀཾ མམཱནུགྒཧཱཡ བོདྷིམྷི དྷཛཾ བནྡྷཐཱཏི ཡཱཙིཏྭཱ སཱཊཀཾ དྷོཝིཏྭཱ ཏེསཾ ཨདཱསི. བྷིཀྑཱུཔི ཏསྶཱནུགྒཧཱཡ ཏཾ གཧེཏྭཱ ཨགམཾསུ. སཱ སཱཊཀཾ དཏྭཱ པཱིཏིཔཱམོཛྫམཱནསཱ གེཧཾ གནྟྭཱ ཏདཧེཝ རཏྟིཡཱ མཛ྄ཛྷིམཡཱམེ སཏྠཀཝཱཏེན ཨུཔཧཏཱ ཀཱལཾ ཀཏྭཱ ཏེསཾ ¶ བྷིཀྑཱུནཾ གམནམགྒེ ཨེཀསྨིཾ རམཎཱིཡེ ཝནསཎྜེ བྷུམྨདེཝཏཱ ཧུཏྭཱ ནིབྦཏྟཱི, ཨཐསྶཱ པུཉྙཱནུབྷཱཝེན ཏིཡོཛནིཀེ ཋཱནེ དིབྦཀཔྤརུཀྑཱ པཱཏུརཧཾསུ, ཏཏྟ ཏཏྟ ནཱནཱཝིརཱགདྷཛཔཏཱཀཱ ཨོལམྦནྟི. དེཝཔུཏྟཱ ཙ དེཝདྷཱིཏརོ ཙ སབྦཱབྷརཎཝིབྷཱུསིཏཱ ཏཐེཝ དྷཛཔཏཱཀཱདཡོ གཧེཏྭཱ ཀཱིལ༹ནྟི. ནཙྩགཱིཏཱདིནེཀཱནི ཨཙྪརིཡཱནི པཡོཛེནྟི. ཨཐ དུཏིཡདིཝསེ ཏེཔི བྷིཀྑཱུ བོདྷིམཎྜལཾ གཙྪནྟཱ སཱཡཎྷེ ཏཾ ཋཱནཾ པཏྭཱ ཨཛྫ ཨིམསྨིཾ ཝནསཎྜེ ཝསིཏྭཱ གམིསྶཱམཱཏི ཏཏྠ ཝཱསཾ ཨུཔགམིཾསུ, ཏཏོ ཏེ རཏྟིབྷཱགེ ནཱནཱཝཎྞདྷཛེ ཙ དེཝཏཱཧི པཡོཛིཡམཱནཱ གཱིཏཝཱདིཏཱདཡོ ཙ ཏིཡོཛནཊྛཱནེ ཀཔྤརུཀྑཱནི ཙ ཨིདཾ སབྦཾ དེཝིསྶརིཡཾ ཏསྶཱནུབྷཱཝེན ནིབྦཏྟབྷཱཝཾ དིསྭཱ ཝིམྷིཏམཱནསཱ དེཝདྷཱིཏརཾ ཨཱམནྟེཏྭཱ ཏྭཾ ཀེན ཀམྨེན ཨིདྷ ནིབྦཏྟཱཏི པུཙྪིཾསུ. སཱ བྷིཀྑཱུ ཝནྡིཏྭཱ ཨཉྫལིཾ པགྒཡ྄ཧ ཋིཏཱ བྷནྟེ མཾ ན སཉྫཱནིཏྠཱཏི ཨཱཧ. བྷིཀྑཱུཧི ན མཡཾ སཉྫཱནཱམ བྷགིནཱིཏི ཝུཏྟེ སཱ ཨཏྟནོ སབྷཱཝཾ ཀཐེནྟཱི ཨེཝམཱཧ.

༨.

ཧཱིཡྻོ ཨཱསནསཱལཱཡ, ནིསཱིདིཏྠ སམཱགཏཱ;

ཏུམྷཀཾ སནྟིཀཾ གམྨ, ཡཱ ཝརཱཀཱིབྷིཝཱདཡི.

༩.

ཡཱ བོདྷིཾ པཱུཛནཏྠཱཡ, ཝཏྠཀཾ པཊིཔཱདཡི;

སཱཧཾ ཧཱིཡྻོ ཙུཏཱ ཨཱསིཾ, རཏྟིཡཾ བྱཱདྷིཔཱིལི༹ཏཱ.

༡༠.

ནཱནཱསམྤཏྟིསཾཡུཏྟཱ, ནཱནཱབྷཱུསནབྷཱུསིཏཱ;

ཝིམཱནེ རཏནཱ ཀིཎྞེ, ཛཱཏཱཧཾ ཨེཏྠ ཀཱནནེ.

༡༡.

ཧཱིཡྻོ པསྶིཏྠ མེ གཏྟཾ, རཛོཛལླེཧི སཾཀུལཾ;

ཨཛྫ པསྶཐ མེ གཏྟཾ, ཝཎྞཝནྟཾ པབྷསྶརཾ.

༡༢.

ཧཱིཡྻོ པསྶིཏྠ མེ བྷནྟེ, ནིཝཏྠཾ མལིནམྦརཾ;

ཨཛྫ པསྶཐ མེ བྷནྟེ, དིབྦམམྦརམུཏྟམཾ.

༡༣.

ཝིཀིཎྞཕལིཏགྒེཧི ¶ , ཀེསེཧི ཝིརལཱ ཀུལཾ;

ཨཱུཀཱགཱུཐཔཊིཀྐཱུལཾ, ཧཱིཡྻོ ཨཱསིསིརཾ མམ.

༡༤.

ཨཛྫ ཏཾ པརིཝཏྟིཏྭཱ, མམ པུཉྙཱནུབྷཱཝཏོ;

སུནཱིལམུདུདྷམྨིལླཾ, ཀུསུམཱ བྷརཎབྷཱུསིཏཾ.

༡༥.

པུརཱ མེ སཀསཱིསེན, ཝཧིཏཾ དཱརཱུ དཀཱདིཀཾ;

པུཉྙེནཱཧཾ ཨཛྫ མཱལཱ, བྷཱརཾ སཱིསེ སམུབྦཧེ.

༡༦.

དྷཛཏྠཱཡ མཡཱ ཧཱིཡྻོ, པདིནྣཾ ཐཱུལསཱཊཀཾ;

ཨཛྫ ནིབྦཏྟི མེ བྷོནྟོ, མཧནྟཾ དིབྦསམྤདཾ.

༡༧.

ཛཱནམཱནེན ཀཏྟབྦཾ, དཱནཱདཱིསུ མཧཔྥལཾ;

དེཝལོཀེ མནུསྶེསུ, སུཁདཾ དཱན མུཏྟམནྟི.

ཏཾ སུཏྭཱ སབྦེ བྷིཀྑཱུ ཨཙྪརིཡབྦྷུཏཙིཏྟཱ ཨཧེསུཾ. སཱ དེཝཏཱ ཏསྶཱ རཏྟིཡཱ ཨཙྩཡེན བྷིཀྑཱུ ནིམནྟེཏྭཱ དིབྦེཧི ཁཛྫབྷོཛྫེཧི སཧཏྠཱ སནྟཔྤེཏྭཱ ཏེཧི སདྡྷིཾ ཨཱགཙྪནྟཱི ཨནྟརཱམགྒེ དཱནཾ དདམཱནཱ མཧཱབོདྷིཾ གནྟྭཱ སབྦེཧི དྷཛཔཏཱཀཱ དཱིཧི ཙ ནཱནཱཝིདྷཝཎྞགནྡྷསམྤནྣཔུཔྥེཧི ཙ དཱིཔདྷཱུཔེཧི ཙ བོདྷིཾ པཱུཛེཏྭཱ བྷིཀྑཱུནཾ ཙཱིཝརཏྠཱཡ དིབྦཝཏྠཱནི དཏྭཱ ཨཱགམྨ ཏསྨིཾཡེཝ ཝནསཎྜེ ཝསནྟཱི ནཱནཱཝིདྷཱནི པུཉྙཱནི ཀཏྭཱ ཏཱཝཏིཾསབྷཝནེ ནིབྦཏྟི. བྷིཀྑཱུཔི ཏཾ ཨཙྪརིཡཾ ཏཏྠ ཏཏྠ པཀཱསེནྟཱ བཧཱུཛནེ པུཉྙཀམྨེ ནིཡོཛེསུཾཏི.

༡༨.

ཨེཝཾ ཝིདྷཱཔི ཀཔཎཱ ཛིནསཱསནམྷི,

ཀཏྭཱ པསཱད མཐ ཐཱུལཀུཙེལཀེན;

པཱུཛེཏྭ དིབྦཝིབྷཝཾ ཨལབྷཱིཏི ཉཏྭཱ,

པཱུཛཱཔརཱ བྷཝཐ ཝཏྠུསུ ཏཱིསུ སམྨཱཏི.

ཀཔཎཱཡ ཝཏྠུཾ ཏཏིཡཾ.

༣༤. ཨིནྡགུཏྟཏྠེརསྶ ཝཏྠུམྷི ཨཡམཱནུཔུབྦཱིཀཐཱ

ཨམྷཱཀཾ བྷགཝཏོ པརིནིབྦཱཎཏོ ཨོརབྷཱགེ ཛམྦུདཱིཔེ ཀིར པཱཊལིཔུཏྟཾ ནཱམ ནགརཾ ཨཧོསི. ཏཏྠ དྷམྨཱསོཀོ ནཱམ མཧིདྡྷིཀོ མཧཱནུབྷཱཝོ ཨཱཎཱཙཀྐཝཏྟི རཱཛཱ རཛྫཾ ཀཱརེཏི. ཨུདྡྷཾ ཨཱཀཱསཏོ ཧེཊྛཱ པཐཝིཡཱ ཡོཛནཔྤམཱཎེ སཀལཛམྦཱུདཱིཔེ ཏསྶ ཨཱཎཱ པཝཏྟཏི, ཏདཱ སཀལཛམྦུདཱིཔཝཱསིནོ ཙ ཙཏུརཱསཱིཏི ནགརསཧསྶེ རཱཛཱནོ ཙ ཨཏྟནོ ཨཏྟནོ བལཝཱཧནེ གཧེཏྭཱ ཨཱགམྨ དྷམྨཱསོཀམཧཱརཉྙོ ཨུཔཊྛཱནཾ ཀརོནྟི. ཏསྨིཾ སམཡེ དེཝཔུཏྟནགརེ དེཝཔུཏྟོ ནཱམ མཧཱརཱཛཱ ཨཏྟནོ བལཝཱཧནཾ གཧེཏྭཱ རཉྙོ ཨུཔཊྛཱནཾ ཨགམཱསི. དྷམྨཱསོཀོ དེཝཔུཏྟམཧཱརཱཛཱནཾ དིསྭཱ མདྷུརཔཊིསནྠཱརཾ ཀཏྭཱ ཏུམྷཱཀཾ རཊྛེ བཧུསྶུཏཱ ཨཱགཏཱགམཱ མཧཱགུཎཝནྟཱ ཨཡྻཱ ཨཏྠཱིཏི པུཙྪི. ཏཾ སུཏྭཱ དེཝཔུཏྟརཱཛཱ ཨཏྠི དེཝ ཏསྨིཾ ནགརེ སཱིཧཀུམྦྷཀཾ ནཱམ མཧཱཝིཧཱརཾ. ཏཏྠ ཨནེཀསཧསྶབྷིཀྑཱུ ཝིཧརནྟི སཱིལཝནྟཱ ཨཔྤིཙྪཱ སནྟུཊྛཱ ཝིཝེཀཀཱམིནོ. ཏེསུ སཱཊྛཀཐཱཏིཔིཊཀདྷརོ ཨིནྡགུཏྟཏྠེརོ ནཱམ ཏེསཾ པཱམོཀྑོ ཨཧོསི. སོ ཨནེཀཔརིཡཱཡེན སནརཱམརཱནཾ བྷིཀྑཱུནཾ དྷམྨཾཝཎྞེཏི. གུཎཝཱ ཨཏྟནོ གུཎཾ ནིསྶཱཡ ལོཀེ པཱཀཊོཏི. ཏཾ སུཏྭཱ རཱཛཱ ཏུཊྛམཱནསོ ཐེརཾ པསྶིཏུཀཱམོ ཧུཏྭཱ སམྨ ཏྭམེཝ གནྟྭཱ ཐེརཾ ཡཱཙིཏྭཱ ཨིདྷཱ ནེཧཱིཏི ཨཱཧ. ཏཾ སུཏྭཱ དེཝཔུཏྟརཱཛཱ ཨཏྟནོ ཧཏྠསྶབལཝཱཧནཱ དིམཧཱ སེནངྒཔརིཝུཏོ ཨིནྡགུཏྟཏྠེརསྶ སནྟིཀཾ གནྟྭཱ ཝནྡིཏྭཱ ཨཡྻ ཨཡྻཾ དྷམྨཱསོཀམཧཱརཱཛཱ དཊྛུཀཱམོཏི ཨཱཧ. ཐེརེན སཱདྷཱུཏི སམྤཊིཙྪིཏེ རཱཛཱ ཐེརེན སམྤཊིཙྪིཏབྷཱཝཾ དྷམྨཱསོཀམཧཱརཱཛིནོ པེསེསི. ཏཏོ དྷམྨཱསོཀམཧཱརཱཛཱ སོམནསྶཔྤཏྟོ ཨཏྟནོ ཨཱཎཱཔཝཏྟིཏཊྛཱནེ རཱཛཱུནཾ སཱསནཾ པེསེསི. སབྦེཝ ཐེརཱགམནམགྒཾ ¶ ཨལངྐརོནྟཱུཏི. ཨཐ ཏེ རཱཛཱནོ ཏུཊྛཔཧཊྛཱ ཨཏྟནོ ཨཏྟནོ ནགརེ བྷེརིཾ ཙརཱཔེཏྭཱ དེཝཔུཏྟནགརཏོ ཡཱཝ པཱཊལིཔུཏྟནགརཾ ཨེཏྠནྟརེ པཉྩཔཎྞཱསཡོཛནིཀཾ མགྒཾ ཝིསམཾ སམཾ ཀརོནྟོ དེཝཏཱནཾ དིབྦཝཱིཐིམིཝ ཨལངྐརིཏྭཱ དྷམྨཱསོཀམཧཱནརིནྡསྶ ཨེཝཾ སཱསནཾ པེསེསུཾ. བྷཝནྟེཏྠ.

༡.

ཨིནྡགུཏྟམཧཱཐེར, སཱམིནོ གམནཱཡ ནོ;

མགྒཾ ཨལངྐརོནྟཱུཏི, མཧཱརཱཛེན པེསིཏཾ.

༢.

ཏཏོ ཏེ ཨཔནེཏྭཱན, པཱསཱཎཀཎྚཀཱདིཀཾ;

ཝིསམཾ སམཾ ཀརིཏྭཱན, སམྨཛྫིཏྭཱན སཱདྷུཀཾ.

༣.

དྷོཏམུཏྟཱ སམཱབྷཱསཱ, ཨོཀིརིཏྭཱན ཝཱལུཀཱ;

ཨུསྶཱཔིཏཱ ཏཏྠ ཏཏྠ, དུསྶཏོརཎཔནྟིཡོ.

༤.

ཀལདྷོཏཧེམརམྦྷཱདི, ནཱནཱཏོརཎཔནྟིཡོ;

ཏཐཱ པུཔྥམཡཱ ནེཀ, ཏོརཎཱུཔརིཏོརཎཱ.

༥.

ཏེསུ ཏེསུཙ ཋཱནེསུ, སངྑཏཱ ཀུསུམགྒྷིཀཱ;

ཏཐེཝ གནྡྷཏེལེཧི, དཱིཔིཏཱ དཱིཔཔནྟིཡོ.

༦.

པདུམུཔྤལསནྣཱིར, པུཔྥཔལླཝ ལངྐཏཱ;

ཋཔིཏཱ གྷཊམཱལཱཡོ, པུཎྞཱ སོགནྡྷཝཱརིཧི.

༧.

ནིལཔཱིཏཱ དིསམྦྷིནྣ, པཏཱཀཱཧི དྷཛེཧི ཙ;

མགྒསྶ ཨུབྷཏོ པསྶེ, ཝནམཱསི སམཱཀུལཾ.

༨.

ཀེཏཝོ ཨུགྒཏཱ ཏཏྠ, མནྡམནྡསམཱིརཎཱ;

ཨཝ྄ཧཡནྟཱཝ སོབྷནྟི, བྲཧྨོརགསུརཱདཡོ.

༩.

ནཱགཙམྤཔུནྣཱག, ཀེཏཀཱིཝཀུལཱདིཧི;

པདུམུཔྤལཱ དིཛལཛེཧི, མཱལཏཱི ཀུསུམཱ དིཧི.

༡༠.

མཱལཱདཱམེཧི ¶ ནེཀེཧི, མགྒམཱསི ཝིཙིཏྟཀཾ;

པཏྠརིཏྭཱ པཱདཔཊེ, སིཏྟསམྨཏྟབྷཱུམིཡཾ.

༡༡.

ལཱཛཱདིཔཉྩཔུཔྥཱནི, ཝིཀིརིཾསུ མནོརམཾ;

ཨལངྐརིཏྭཱ ཧཏྟསྶཱ, ཀུསུམཱ བྷརཎཱདིཧི.

༡༢.

མགྒཱལངྐརཎཏྠཱཡ, ཋཔིཏཱསུཾ ཏཏོ ཏཏོ;

ཏེསུ ཏེསུ ཙ ཋཱནེསུ, བྷེརིམཎྜལམཛ྄ཛྷགཱ.

༡༣.

ནཙྩནྟི ཙཱཏུརཱ ནཱརཱི, རསབྷཱཝནིརནྟརཱ;

ཀཾསཝཾསཱདིཔགྒཡ྄ཧ, ཝཛྫེནྟཱནེཀཏནྟིཡོ.

༡༤.

གཱཡནྟི མདྷུརཾ གཱིཏཾ, གཱཡནྟེཏྠ ལཡཱནྭིཏཾ;

མགྒོསོ སཱདྷུཝཱདེཧི, བྷེརིཏནྟིནདེཧིཙ.

༡༥.

ཀརཱིནཾ ཀོཉྩནཱདེཧི, ཧཡཱནཾ ཧེསིཏེཧི ཙ;

ནེཀཝིཊངྐསངྒྷེཧི, སོ ཀརཱིཧི སམཱཀུལོ.

༡༦.

མགྒསྶ ཨུབྷཏོ པསྶེ, དེཝཀཉྙཱུཔམཱ སུབྷཱ;

མཱལཱཀལཱཔེ པགྒཡ྄ཧ, ཏིཊྛནྟི ཏུཊྛམཱནསཱ.

༡༧.

ཏཐཱ པུཎྞགྷཊེ གཡ྄ཧ, པདུམུཔྤལསཾཀུལེ,

ཨཊྛམངྒལམུགྒཡ྄ཧ, ཏིཊྛནྟི པམདཱ ཏཧིཾ.

༡༨.

སཱིཏལཱུདཀསམྤནྣ, པཔཱཧི སམལངྐཏཱ;

སིནཱནཏྠཾ ཁཏཱ ཨཱསུཾ, པོཀྑརཉྙོ ཏཧིཾཏཧིཾ.

༡༩.

ཏཧིཾཏཧིཾཀཏཱ ཨཱསུཾ, དཱནསཱལཱ མནོརམཱ;

ནིཙིཏཱསུམནེཀཱནི, དཱནོཔཀརཎཱ ཏཧིཾ.

༢༠.

ཨེཝཾ ནེཀཝིདྷཱ པཱུཛཱ, ཨམྷེཧི པཊིཔཱདིཏཱ;

ཋཔེཏྭཱན མཧཱགངྒཾ, ཏཾ ཛཱནཱཏུ མཧཱིཔཏཱིཏི.

ཏཾ སུཏྭཱ ཨསོཀམཧཱརཱཛཱ གངྒཾ ཨལངྐརོཐཱཏི སོལ༹སཡཀྑེ པེསེསི, ཏེ སཔརིཝཱརཱ ཏཏྠ གནྟྭཱ ཨཏྟནོ ¶ ཨཱནུབྷཱཝེན གངྒཱཡ ཨནྟོ ཏིགཱཝུཏཊྛཱནེ ཨུདུཀྑལཔཱསཱཎེ ཋཔེསུཾ. ཋཔེཏྭཱ ཐམྦྷེ ཨུསྶཱཔེཏྭཱ ཏུལཱསཾགྷཱཊེ དཏྭཱ ཧིམཝནྟཏོ རཏྟཙནྡནསཱརེ ཨཱཧརིཏྭཱ པདརེ སནྠརིཏྭཱ ཨནེཀེཧི པཱུཛཱཝིདྷཱནེཧི ཨལངྐརིཏྭཱ རཉྙོ ཨེཝཾ སཱསནཾ པེསེསུཾ. བྷཝནྟེཏྠ.

༢༡.

ཡམཏྠཱཡ མཡཾ སབྦེ, མཧཱརཱཛེན པེསིཏཱ;

ཨམྷེཧི དཱནི ཏཾ སབྦཾ, ཀཏམེཝ སུཎོཐ ཏཾ.

༢༢.

གཱཝུཏཏྟཡགམྦྷཱིརཾ, གངྒཾ ཡོཛནཝིཏྠཏཾ;

ཐམྦྷེ པཏིཊྛཔེཏྭཱན, ཨནགྒྷཾ རཏྟཙནྡནཾ.

༢༣.

ཧིམཝནྟཏོ ཧརིཏྭཱན, སེཏུཾ ཏཏྠ སུམཱཔིཏཾ;

ཏོརཎཱ ཙ ཨུབྷོ པསྶེ, རཏནེཧི སུནིམྨིཏཱ.

༢༤.

པུཎྞཀུམྦྷདྡྷཛཱ ཙེཝ, པདཱིཔཱཝལིཡོ ཏཐཱ;

ཨུབྷོ པསྶེསུ རཏནཱནི, མཱཔེཏྭཱལམྦནཱནིཙ.

༢༥.

སུཝཎྞམཎིམུཏྟཱདི, དཱམེཧི སམལངྐཏཱ;

ཝཱལུཀཏྠཱཡ ཨོཀིཎྞཱ, དྷོཏམུཏྟཱ པབྷསྶརཱ.

༢༦.

ཏེསུ ཏེསུ ཙ ཋཱནེསུ, ཋཔིཏཱསུཾ མཧཱམཎཱི;

ནཱནཱརཱགཝིཏཱནེཧི, སོབྷིཏཱ སེཏུནོ པརི.

༢༧.

ཨོལམྦིཏཱསུཾ ཏཏྠེཝ, དིབྦཱདིཀུསུམཱདཡོ;

ནིཊྛིཏཾ ཨིདྷ ཀཱཏབྦ, ཡུཏྟཾ པཱུཛཱཝིདྷིཾཏུ ནོ;

དེཝོཏཾ པཊིཛཱནཱཏུ, ཨིཏི ཝཏྭཱན པེསཡུཾཏི.

ཏམྤི སུཏྭཱ ཨསོཀོ མཧཱརཱཛཱ ཏུམྷེཝ ཐེརཾ ཨིདྷཱནེཐཱཏི ཏེསཾཡེཝ སཱསནཾ པཊིཔེསེསི, ཏེ སཱདྷཱུཏི ཨིནྡགུཏྟཏྠེརསྶ སནྟིཀཾ གནྟྭཱ ཝནྡིཏྭཱ བྷནྟེ པཱཊལིཔུཏྟནགརསྶ གམནཱཡ ཀཱལོཏི ཨཱཧཾསུ, ཏཏོ ཐེརོ སཊྛིསཧསྶམཏྟེཧི ¶ བྷིཀྑུསངྒྷེཧི པརིཝུཏོ པཉྩཔཎྞཱསཡོཛནམགྒཾ པཊིཔཛྫི. ཨཐཱཔརཾ དེཝཔུཏྟནགརཝཱསིནོ ཨནེཀཝིདྷམཱལཱགནྡྷཝཱསཙུཎྞདྡྷཛཔཏཱཀཱདཱིཧི ཨནེཀེཧི ཏཱལཱཝཙརེཧི ནཙྩགཱིཏཝཱདིཏེཧི པཱུཛེཏྭཱ ཨགམཾསུ. ཨཐ ཐེརོ མཧནྟེན པཱུཛཱཝིདྷཱནེན ཛམྦུདཱིཔཝཱསཱིཧི པཱུཛིཡམཱནོ ཨནུཀྐམེན ཙནྡབྷཱགཱཡ གངྒཱཡ སེཏུཾ པཏྭཱ ཏཏྠ མཧནྟཾ པཱུཛཱཝིདྷཱནཾ ཨོལོཀེནྟོ ཨེཝཾ ཙིནྟེསི, ཨེཝཾ ཨུལཱ༹རཾ པཱུཛཱཝིདྷཱནཾ ཨིདཱནི ཛམྦུདཱིཔེ ནཱཉྙསྶ ཧོཏི, མཡ྄ཧམེཝེཏཾ ཀཏཾ. ཨཧམེཝེཏྟ ཨུཏྟམོ ཨཔྤཊིམོཏི ཨེཝཾ སེཡྻསྶ སེཡྻོཧམསྨཱིཏི མཱནཾ ཨུཔྤཱདེཏྭཱ ཨཊྛཱསི. ཏསྨིཾ ཁཎེ ཨེཀོ ཁཱིཎཱསཝཏྠེརོ ཏཾ མཱནེནུཔཏྠདྡྷཙེཏསཱ ཋིཏཾ དིབྦཙཀྑུནཱ དིསྭཱ ཨུཔསངྐམིཏྭཱ ཝནྡིཏྭཱ ཐེརསྶ ཨོཝདནྟོ ཨེཝམཱཧ. ཏསྨཱ.

༢༨.

མཱ མཱནསྶ ཝསཱི ཧོཐ, མཱནོ བྷནྟེ ཝསཾགཏཾ [མཱནཾབྷནྟེཝསཱིཀཏཾ ཨིཏིསབྦཏྠ];

ཨནཏྠདོ སདཱ ཧོཏི, པཱཏེཏྭཱན བྷཝཱ ཝཊེ.

༢༩.

མཱནོ པལཱལིཏོ སཏྟོ, ཏཎྷཱཔཊིགྷསངྒཏོ;

མཀྐཊོརགསོཎཱདི, ཧུཏྭཱ ཛཱཡཏི ཛཱཏིསུ.

༣༠.

མཱ མཱནཾ སཱམི པཱུརེཧི, ཨཏྟཱནཾ པརིསོདྷཡ;

ཨཔརིསུདྡྷཱ སཡོ བྷིཀྑུ, དཱཡཀཾ ན པརིཏོསཏི.

༣༡.

དདནྟཱནཾ སརནྟཱནཾ, པཱུཛེནྟཱནཾ སཙེ ཏུཝཾ;

མཧཔྥལཾ མཧཱབྷཱུཏིཾ, ཀཱམཏྠ ཧོཐ ནིབྦཎཱཏི [ནིམྨནཱ ཨིཏིཀཏྟཙི].

ཏཾ སུཏྭཱ ཐེརོ སཾསཱརེ ནིབྦིནྡོ ཏཏྠེཝ ཋིཏོ ཏིལཀྑཎཾ པཊྛཔེཏྭཱ ཀརཛཀཱཡཾ སམྨསནྟོ སཧཔཊི སམྦྷིདཱཧི ཨརཧཏྟཾ པཏྭཱཝ ནིཀྑམི. ཏཏོ དྷམྨཱསོཀམཧཱརཱཛཱ བལཝཱཧནཔརིཝུཏོ མཧནྟེན པཱུཛཱཝིདྷཱནེན པཊིམགྒཾ ཨཱགམྨ ཝནྡིཏྭཱ ¶ ཏཏོ དིགུཎཾ པཱུཛཱསཀྐཱརཾ ཀུརུམཱནོ མཧཱབྷིཀྑུསངྒྷེན སདྡྷིཾ ཐེརཾ ཨཏྟནོ ནགརཾ ནེཏྭཱ ཏསྶ དྷམྨཀཐཾ སུཏྭཱ པསནྣམཱནསོ པཉྩསཱིལེ པཏིཊྛཱཡ མཧནྟཾ ཝིཧཱརཾ ཀཱརེཏྭཱ ཐེརེན སཧཱགཏཱནཾ སཊྛིསཧསྶཱནཾ བྷིཀྑཱུནཾ ཙཏུཔཙྩཡེཧི ཨུཔཊྛཱན མཀཱསི, ཨཐ ཐེརོ སཱཊྛཀཐཾ པིཊཀཏྟཡཾ པཀཱསེནྟོ ཏསྨིཾ ཙིརཾ ཝསིཏྭཱ ཏཏྠེཝ པརིནིབྦཱཡི. ཏཏོ རཱཛཱ སཔརིསོ ཏསྶ སརཱིརནིཀྑེཔཾ ཀཱརེཏྭཱ དྷཱཏུཡོ གཧེཏྭཱ མཧནྟཾ ཙེཏིཡཾ ཀཱརཱཔེསཱིཏི.

༣༢.

པུརཱཏནཱནཾ བྷུཝི པུཉྙཀམྨིནཾ,

གུཎཱནུབྷཱཝེན མཧེནྟི ཨེཝཾ;

སདེཝཀཱ ནཾ མནསཱིཀརོནྟཱ,

པུཉྙཾ ཀརོཐཱ ཡཏནེ སདཱ དརཱཏི.

ཨིནྡགུཏྟཏྠེརསྶ ཝཏྠུཾ ཙཏུཏྠཾ.

༣༥. སཱཁམཱལཔཱུཛིཀཱཡ ཝཏྠུམྷི ཨཡམཱནུཔུབྦཱིཀཐཱ

ཨམྷཱཀཾ བྷགཝཱ དསཔཱརམིཡོ པཱུརེཏྭཱ ཨནུཀྐམེན ཏུསིཏབྷཝནེ ནིབྦཏྟོ དེཝེཧི ཨཱརཱདྷིཏོ སཀྐརཱཛཀུལེ པཊིསནྡྷིཾ གཧེཏྭཱ མཱཏུཀུཙྪིཏོ ནིཀྑནྟོ ཨནུཀྐམེན པརམཱབྷིསམྦོདྷིཾ པཏྭཱ ཏཏོ པཊྛཱཡ པཉྩཙཏྟཱལཱིསསཾཝཙྪརཱནི ཋཏྭཱ ཙཏུརཱསཱིཏིདྷམྨཀྑནྡྷསཧསྶཱནི དེསེཏྭཱ གཎནཔཐམཏཱིཏེ སཏྟེ བྷཝཀནྟཱརཏོ སནྟཱརེཏྭཱ སབྦབུདྡྷཀིཙྩཱནི ནིཊྛཱཔེཏྭཱ ཀུསིནཱརཱཡཾ ཨུཔཝཏྟནེ མལླཱནཾ སཱལཝནེ ཡམཀསཱལཱན མནྟརེ ཨུཏྟརསཱིསཀཾ པཉྙཏྟེ མཉྩཀེ ཝེསཱཁཔུཎྞདིཝསེ དཀྑིཎེན པསྶེན སཏོ སམྤཛཱནོ ཨནུཊྛཱནསེཡྻཱཡ ནིཔནྣོ པཙྪིམཡཱམེ བྷིཀྑཱུ ཨོཝདིཏྭཱ བལཝཔཙྩཱུ-ས ¶ སམཡེ མཧཱཔཐཝིཾཀམྤེནྟོ ཨནུཔཱདིསེསཱཡ ནིབྦཱཎདྷཱཏུཡཱ པརིནིབྦཱཡི, ནིབྦུཏེ པན བྷགཝཏི ལོཀནཱཐེ ཨཱནནྡཏྠེརོ མལླརཱཛཱུནཾ ཨེཏཾ པཝཏྟིཾ ཨཱརོཙེསི. ཏཏོ ཀོསིནཱརཀཱ ཙ དེཝབྲཧྨཱདཡོ ཙ སནྣིཔཏིཏྭཱ ནཙྩགཱིཏཝཱདིཏེཧི མཱལཱགནྡྷཱདཱིཧི ཙ སཀྐརོནྟཱ གརུཀརོནྟཱ མཱནེནྟཱ པཱུཛེནྟཱ ཙེལཝིཏཱནཱདཡོ ཀརོནྟཱ བྷགཝཏོ སརཱིརཾ ནགརམཛ྄ཛྷེ ཡཏྠ མཀུཊབནྡྷནཾ ནཱམ མལླཱནཾ ཙེཏིཡཾ, ཏཏྠ ནེཏྭཱ ཙཀྐཝཏྟིསྶ སརཱིརཾ ཝིཡ ཨཧཏེན ཝཏྠེན ཝེཋེཏྭཱ ཏཏོ ཝིཧཏེན ཀཔྤཱསེན ཝེཋེཏྭཱཏི ཨེཝཾ པཉྩདུསྶཡུགསཏེཧི ཝེཋེཏྭཱ ཨཱཡསཱཡ ཏེལདོཎིཡཱ པཀྑིཔིཏྭཱ ཨཉྙིསྶཱཡ ཨཱཡསཱཡ དོཎིཡཱ པཊིཀུཛྫིཏྭཱ སབྦགནྡྷཱནཾ ཙིཏཀཾ ཀརིཏྭཱ བྷགཝཏོ སརཱིརཾ ཙིཏཀཾ ཨཱརོཔེསུཾ. ཨཐ མཧཱཀསྶཔཏྠེརེན བྷགཝཏོ པཱདེ སིརསཱ ཝནྡིཏེ དེཝཏཱནུབྷཱཝེན ཙིཏཀོ སམནྟཱ ཨེཀཔྤཧཱརེནེཝ པཛྫལི. བྷགཝཏོ པན སརཱིརེ དཌྜྷེ སུམནམཀུལ༹སདིསཱ དྷཱཏུཡོ ཨཝསིསྶིཾསུ. ཏསྨིཾ ཀིར སམཡེ ཀོསལརཉྙོ ཛནཔདེ ཨཉྙཏརཱ གཱམཝཱསིཀཱ ཨིཏྠཱི བྷགཝཏི པརིནིབྦུཏེ སཱདྷུཀཱིལ༹ྷཾ ཨཱགཙྪམཱནཱ ཨནྟརཱམགྒེ ཨཏྟནོ སརཱིརེ ཨུཔྤནྣཝཱཏརོགེན ཨུཔདྡུཏཱ སཱདྷུཀཱིལ༹ྷཾ སམྤཱཔུཎིཏུཾ ཨསཀྐོནྟཱི སཏྠུ ཨཱལཱ༹ཧནཾ གནྟྭཱ བྷགཝཏོ དྷཱཏུསརཱིརེ ཏཱིཎི སཱཁཔུཔྥཱནི པཱུཛེཏྭཱ པསནྣམཱནསཱ པཉྩཔཏིཊྛིཏེན ཝནྡིཏྭཱ གཏཱ ཏཱཡ ཨེཝ རཏྟིཡཱ མཛ྄ཛྷིམཡཱམེ ཀཱལཾ ཀཏྭཱ ཏཱཝཏིཾསབྷཝནེ ཏིཾསཡོཛནིཀེ ཀནཀཝིམཱནེ ནིབྦཏྟི. ཏསྶཱ པུབྦཀམྨཔཀཱསནཏྠཾ ཙཀྐམཏྟཱནི སཱཁཔུཔྥཱནི ཏཏྟ ཏཏྠ ཨོལམྦནྟི. ཏེཧེཝ སབྦཾ ཝིམཱནཾ ཨེཀོབྷཱསཱི [ཨེཀོབྷཱསི ཏཏོ ཨིཏིསབྦཏྠ] ཨཧོསི. ཏཏོ སུགནྡྷཀརཎྜཀཾ ཝིཡ ཙ ཨཧོསི, སཱ པན ཨཏྟནོ སོབྷགྒཔྤཏྟཾ ཨཏྟབྷཱཝཉྩ ཝིམཱནསམྤདཉྩ པརིཝཱརསམྤཏྟིཡོ ཙ དིསྭཱ ཝིམྷིཏམཱནསཱ པུབྦེ ཀཏེན [པུབྦེཀིསྶམེ. པུབྦེཀཏེནམེ ཨིཏིཙཀཏྠཙི] ¶ ཀེན མེ པུཉྙཀམྨེནཱ ཡཾ ལདྡྷཱཏི ཨོལོཀནྟཱི བྷགཝཏོ དྷཱཏུསརཱིརསྨིཾ པཱུཛིཏཱནི ཏཱིཎི སཱཁཔུཔྥཱནི དིསྭཱ པསནྣམཱནསཱ མཧཱཙཀྐཔྤམཱཎཾ སཱཁམཱལཾ ཧཏྠེན དྷཱརེནྟཱི དྷཱཏུཔཱུཛནཏྠཱཡ ཨགམཱསི. ཏདཱ ཏཏྠ སནྣིཔཏིཏཱ མནུསྶཱ ཏསྶཱ རཱུཔསམྤདཉྩ ཧཏྟེ མཧནྟཾ སཱཁམཱལཉྩ དིསྭཱ ཝིམྷིཏམཱནསཱ ཨམྨ ཏྭཾ ཀཏྠ ཝཱསིཀཱ. ཀཏྠ པནིམཾ པུཔྥཾ པཊིལདྡྷནྟི པུཙྪིཾསུ, ཏཾ སུཏྭཱ དེཝདྷཱིཏཱ ཨཏྟནཱ བྷགཝཏོ དྷཱཏུསརཱིརསྶ པཱུཛིཏསཱཁམཱལཏྟཡཱནུབྷཱཝེན པཊིལདྡྷསམྤཏྟིཡོ ཙ དིབྦཝིམཱནཉྩ པུབྦེ མཏཀལེཝརཾ ཙཱཏི སབྦཾ ཏེསཾ དསྶེཏྭཱ དྷམྨདེསནཱཝསཱནེ ཨཱཧ.

༡.

སམཱགཏཱ བྷཝནྟཱ བྷོ, པསྶནྟུ མམ སམྤདཾ;

ཀཏམཔྤེན ཀཱརེན, སམྨཱསམྦུདྡྷདྷཱཏུཡཱ.

༢.

སཱཁམཱལཱནི ཏཱིཎེཝ, ཧཱིཡྻོཧཾ མུནིདྷཱཏུཡཱ;

པཱུཛཡིཏྭཱན སནྟུཊྛཱ, ནིཝཏྟཱ ཏཱཡ རཏྟིཡཱ.

༣.

མརནྟཱི ཁརཝཱཏེན, ཏམཧཾ སུཙརིཏཾ སརིཾ;

ཏེནཱཧཾ པུཉྙཀམྨེན, ཏཱཝཏིཾསཱུཔགཱཨཧུཾ.

༤.

ཏཏྠ མེ ཨཱསི པཱསཱདོ, ཏིཾསཡོཛནམུགྒཏོ;

ཀཱུཊཱགཱརཝརཱཀིཎྞོ, སཱཁམཱལཱཏི [སཱདྷམཱལོ ཨིཏིཔིཀཏྠཙི], ཝིསྶུཏོ.

༥.

ཡཐཱ སབྦསུགནྡྷེཧི, ཀརཎྜཾ པརིབྷཱཝིཏཾ;

ཏཐཱ དིབྦསུགནྡྷེཧི, གནྡྷིཏཾ བྷཝནཾ མམ.

༦.

ཙཀྐམཏྟཱ སཱཁཔུཔྥཱ, ཏཏྠ ཏཏྠཱུཔལམྦརེ [ཏཏཝཏྠུཔལབྦརེ ཨིཏིཔིཀཏྠཙི];

དིབྦགནྡྷཱ པཝཱཡནྟི, མདྷུབྦབྷནིསེཝིཏཱ.

༧.

བྷསྶནྟི ཨེཀཔུཔྥསྨཱ, ཏུམྦམཏྟཱ ཧི རེཎཝོ;

ཏེཧི པིཉྫརིཏཱ དེཝཱ, ཀཱིལ༹ནྟི ཙ ལལནྟིཙ.

༨.

པཱིལ༹ནྡྷིཏྭཱན ¶ མཱལཱདྷཡཱ, སུདིབྦཱ བྷརཎཱནིཙ;

སཧཙྪརཱ དེཝཔུཏྟཱ, ནཙྩགཱིཏཱདིབྱཱཝཊཱ.

༩.

པསྶཐེམཾ བྷུཛངྒཱ བྷོ, སཏྟཱ མོཧེན པཱརུཏཱ;

ཧཱིཡྻོ མཏཾ པཝིདྡྷཾ མེ, པཱུཏིབྷཱུཏཾ ཀལེཝརཾ.

༡༠.

པུལ༹ཝེཧི སམཱཀིཎྞཾ, མཀྑིཀཱགཎཀཱིལི༹ཏཾ;

ཀཱཀསོཎཱདིསཏྟཱན, མཱཧཱརཾ ཀུཎཔཱལཡཾ.

༡༡.

པཏྠེནྟི པུརིསཱ པུབྦེ, ཨནེཀོཔཱཡནེན ཏཾ;

དཊྛུམྤིདཱནི ནིཙྪནྟི, ཏཎྷཱཡཉྙཱཎཏཱ ཨཧོ.

༡༢.

ལོཀཔཛྫོཏཀསྶཱཧཾ, ཝིམལསྶ ཡསསྶིནོ;

དྷཱཏུཾ ཧཱིཡྻོ མཧིཾ སམྨཱ, ཨཛྫ སགྒེ པཏིཊྛིཏཱ.

༡༣.

ཧིཏྭཱནེ ཏཱདིསཾ ཀཱཡཾ, ལདྡྷཾདཱནི མམེདིསཾ;

དིབྦཏྟབྷཱཝཾ སོབྷཱཧི, བྷཱསམཱན མུདིཀྑཐ.

༡༤.

བྷཱསམཱནཱཡ མེ ཝཱཙཾ, སུཎོཐེཏྠ སམཱགཏཱ;

ནཏྠེཝཱཀཏཔུཉྙསྶ, ཨཎུམཏྟཾ བྷཝེ སུཁཾ.

༡༥.

བིནྡུམཏྟམྤི ཡོ པུཉྙ, བཱིཛཾ རོཔེཏི སཱསནེ;

ན ཧཱ ནཏྠཕལཾ [ནཧཔནནྟཕལཾ ཨིཏིཔིཀཏྠཙི] ཧོཏི, ཡཱཝ ནིབྦཱཎཔཏྟིཡཱཏི.

ཨེཝཾ སཱ དེཝཏཱ ཨཏྟནཱ པཊིལདྡྷདིབྦཝིབྷཝཾ དསྶེཏྭཱ ཛནཀཱཡཾ ཨོཝདིཏྭཱ དིབྦསཱཁཔུཔྥེཧི ཛིནདྷཱཏུཾ པཱུཛེཏྭཱ མནུསྶཱནཾ པསྶནྟཱནཾཡེཝ སདྡྷིཾ ཝིམཱནེན དེཝལོཀམེཝ ཨགམཱསི. ཏཾ དིསྭཱ མཧཱཛནོ དཱནཱདཱིནི པུཉྙཱནི ཀཏྭཱ དེཝལོཀཾ པཱུརེསཱིཏི.

༡༦.

ཨེཝཉྷི ¶ སཱ པུཔྥམཏྟེན དྷཱཏུཾ,

པཱུཛེཏྭ དེཝེསུ ཨལཏྠ བྷཱུཏིཾ;

ཏུམྷེཔི བྷོནྟོ ཏིདིཝེསུ སཱཏཾ,

ཀཱམཏྠ ཙེ ཀཏྠ པུཉྙཱནི སཱདྷུཾཏི.

སཱཁམཱལཔཱུཛིཀཱཡ ཝཏྠུཾ པཉྩམཾ.

༣༦. མོརིཡབྲཧྨཎསྶ ཝཏྠུམྷི ཨཡམཱནུཔུབྦཱིཀཐཱ

ཨམྷཱཀཾ བྷགཝཏི པརིནིབྦུཏེ མགདྷརཊྛེ མཙལཾ ནཱམ མཧཱགཱམཾ ཨཧོསི. ཏཏྠ མོརིཡོནཱམ བྲཱཧྨཎོ པཊིཝསཏི སདྡྷོ པསནྣོ, ཏསྶ སེནཱནཱམེ ཀཱ བྷརིཡཱ ཨཏྠི. སཱཔི སདྡྷཱ པསནྣཱ རཏནཏྟཡེསུ. ཏེ ཨུབྷོཔི སམགྒཱ སམྨོདམཱནཱ བྷིཀྑུསངྒྷཾ ནིམནྟེཏྭཱ ནིཙྩཾ དཱནཾ པཝཏྟེནྟཱ ཙཱིཝརཱདིཙཏུཔཙྩཡེཧི ཨུཔཊྛཧནྟཱ སཱིལཾ རཀྑནྟཱ ཨུཔོསཐཀམྨཾ ཀརོནྟཱ དིཝསཾ ཝཱིཏིནཱམེནྟི. ཨཐསྶ གེཧེ ཝིབྷཝཾ ཡེབྷུཡྻེན དཱནཱདཱིསུ པརིཀྑཡམགམཱསི. ཏཏོ བྲཱཧྨཎཱི སཱམི ནོ གེཧེ དྷནཾ པརིཀྑཱིཎཾ. ཀཐཾ དཱནཾ པཝཏྟེཡྻཱམཱཏི བྲཱཧྨཎསྶ ཨཱརོཙེསི, ཏཏོ བྲཱཧྨཎོ མཱ བྷདྡེ ཙིནྟེསི. ཡེནཀེནཙི ཨུཔཱཡེན དཱནཾ པཏིཊྛཔེསྶཱམཱཏི ཝཏྭཱ ཏསྨིཾཡེཝ ཨཏྟནོ སཨུསྶཱཧཏཾ པཀཱསོནྟོ ཨཱཧ.

༡.

ཛཱནམཱནོ ཧི ལོཀསྨིཾ, དཱནསྶེདཾ ཕལཾ ཨིཏི;

ན དཛྫཱ ཀོ སུསཱིལེསུ, ཨཔྤམྤི དིཝསམྤཏི.

༢.

སགྒལོཀནིདཱནཱནི, དཱནཱནི མཏིམཱ ཨིདྷ;

ཀོཧིནཱམ ནརོ ལོཀེ, ན དདེཡྻ ཧིཏེ རཏོཏི.

ཨེཝཉྩ པན ཝཏྭཱ བྷདྡེ ཝནཾ པཝིསིཏྭཱ ཨནེཀཝིདྷཱནི པཎྞཱནི ཙ ཕལཱནི ཙ པཙྪིཔཱུརཾ ཨཱཧརིཏྭཱ ཝིཀྐིཎིཏྭཱཔི དཱནཾ ན ཨུཔཙྪིནྡིསྶཱམཱཏི ¶ ཝཏྭཱ ཏཏོ པཊྛཱཡ ཝནཾ གནྟྭཱ པཎྞཱནི ཙ ཕལཱནི ཙ ཨཱཧརིཏྭཱ ཝིཀྐིཎིཏྭཱ དཱནཾ དེནྟོ པཊིཝསཏི. ཨཐེཀདིཝསཾ བྲཱཧྨཎོ ཝནཾ པཝིཊྛོ པཎྞེཧི ཙ ཕལེཧི ཙ པཙྪིཾ པཱུརེཏྭཱ སཱིསེནཱ དཱཡ གེཧཾ ཨཱགཙྪནྟོ པུཔྥཕལཔལླཝེཧི ཝིནཏཾ ནེཀཏརུགཎནིཙིཏཾ སམྨཏྟཱནེཀཙཱཏཀཙཏུཔྤདནིསེཝིཏཾ ཝིཔྤཀིཎྞཱནནྟཔུཔྥཔཏྟཀིཉྫཀྑཙྪནྣཝཱལུ༹ཀཱཏལཾ སནྡམཱནསཱིཏལཱ མལཛལཔྤཝཱཧཾ ཨཀདྡམཱནིནྣསུཔཏིཏྟེཧི སུནྡརཾ ཀནྡརཾ དིསྭཱ པཙྪིཾ ཏཱིརེ ཋཔེཏྭཱ ཨོཏིཎྞོ ནཧཱཡཏི, ཏསྨིཾ ཁཎེ ཏཏྠ ཨེཀསྨིཾ རུཀྑེ ཨདྷིཝཏྠོ དེཝཔུཏྟོ ཏཾ ཏཏྠ ནཧཱཡནྟཾ དིསྭཱ ཀིནྣུ ཁོ ཨེས ཀལྱཱཎཛ྄ཛྷཱསཡོ ཝཱ ཨུདཱཧུ པཱཔཛ྄ཛྷཱསཡོ སཏྟོཏི དིབྦཙཀྑུནཱ ཨུཔདྷཱརནྟོ ཨཙྪརིཡཔུརིསོ ཨེསོ དུགྒཏོཔི ཧུཏྭཱ ཨཏྟནོ དཱནཔྤཝེཎིཡཱ ཨུཔཙྪིཛྫནབྷཡེན ཝནཾ གནྟྭཱ པཎྞཱནི ཙ ཕལཱནི ཙ ཨཱཧརིཏྭཱ དུཀྑེན ཀསིརེན ཛཱིཝིཀཾ ཀཔྤེནྟོ དཱནདྷམྨཾ ན ཨུཔཙྪིནྡཏཱིཏི ཙིནྟེཏྭཱ ཏསྶ གུཎཱདཡོ པཊིཙྩ པཙྪིཡཾ ཋཔིཏཔཎྞཱནི ཙ ཕལཱནི ཙ སབྦཱནི སུཝཎྞཱནི ཧོནྟཱུཏི ཨདྷིཊྛཱསི. ཨཐསྶཱནུབྷཱཝེན སབྦཾ སུཝཎྞཾ ཨཧོབྷི, ཨཐ སོ སུཝཎྞཔུཎྞཔཙྪིཡཾ ཨུཔརི སུཝཎྞརཱསིམཏྠཀེ སབྦཀཱམདདཾ མཧནྟཾ མཎིརཏནཾ ཋཔེཏྭཱ ཨནྟརཧིཏོ པཊིཀྐམྨ ཨཊྛཱསི, ཏཏོ བྲཱཧྨཎོ ནཧཱཏྭཱ ཨུཏྟིཎྞོ པཙྪིཡཾ སམྤུཎྞསུཝཎྞཝཎྞརཾསིནཱ སམྦྷིནྣཝིཛྫོཏམཱནམཎིརཏནཾ དིསྭཱ ཀིམེཏཾཏི ཨཱསངྐིཏཔརིསངྐིཏོ པཙྪིསམཱིཔཾ གནྟྭཱ ཧཏྠཾ པསཱརེཏུཾ ཨཝིསཧནྟོ ཨཊྛཱསི. ཏཾ དིསྭཱ དེཝཔུཏྟོ དིསྶམཱནསརཱིརེན ཋཏྭཱ མཱ ཏྭཾ བྷཱཡི བྲཱཧྨཎ. མཡཱ ཨེཏཱནི ནིམྨིཏཱནི, གཧེཏྭཱ གཙྪཱཧཱིཏི ཨཱཧ, ཨཐ བྲཱཧྨཎོ དེཝཔུཏྟསྶ ཀཐཾ སུཏྭཱ ཨཡཾ དེཝཔུཏྟོ ཨིམཾ མཡཱ ནིམྨིཏཾ, གཧེཏྭཱ གཙྪཱཏི ཝདཏི. ཀིནྣུ ཁོ སོ ཨཏྟནོ ཨཱནུབྷཱཝེན དེཏི, ཨུདཱཧུ མཡཱ ཀཏཔུཉྙེནཱཏི པུཙྪིསྶཱམི ཏཾཏི པཉྫལིཀོཝ དེཝཔུཏྟཾ པུཙྪནྟོ ཨཱཧ.

༣.

པུཙྪཱམི ¶ པཉྫལཱི དཱནི, དེཝཔུཏྟ མཧིདྡྷིཀ;

དདཱསི མེ སུཝཎྞཉྩ, ཀཱམདཾ མཎིམུཏྟམཾ.

༤.

ནཱཔི ཀོ ནོ ཏུཝཾ ཉཱཏི,

ན མིཏྟོ ནོཔཀཱརཀོ;

ཀིཾ ཏྭཾ ཨཏྠཝསཾ དིསྭཱ,

མམ དཛྫཱསིམཾ དྷནཾ.

༥.

ཀེན ཏཔེན སཱིལེན, ཀེནཱཙཱརགུཎེན ཙ;

ཡེན དཛྫཱསི མེ དེཝ, ཀིཾ མེ སུཙརིཏཾ ཙིཏཾ.

༦.

ཀིནྣུ པུརཱཏནཾ ཀམྨཾ, ཀེན ཀམྨེན དསྶསི;

ཨཐཝཱ ཏཝིདྡྷིཡཱ དེསི, ཏཾ མེ ཨཀྑཱཧི པུཙྪིཏོཏི.

ཏཏོ དེཝཔུཏྟོ ན ཁོ པནཱཧཾ བྲཱཧྨཎ དེཝོཏི པརེསཾ ཀིཉྩི དཱཏུཾ སཀྐོམི, ཏཡཱ པུབྦེ ཀཏསུཙརིཏཱནུབྷཱཝེན ནིབྦཏྟཏཱིཏི ཝཏྭཱ དིབྦཙཀྑུནཱ ཏསྶ པུབྦཀམྨཾ དིསྭཱ ཏསྶ པཀཱསེནྟོ ཨཱཧ.

༧.

ཀསྶཔེ ལོཀཔཛྫོཏེ, སམྦུདྡྷེ པརིནིབྦུཏེ;

སབྦཏྠ པཏྠཊཾ ཨཱསི, ཏསྶ བུདྡྷསྶ སཱསནཾ.

༨.

ཏདཱ པཙྩནྟིམེ གཱམེ, ཏྭམཱསི ཀུལདཱརཀོ;

སདྡྷོ ཨཱསི པསནྣོ ཙ, དཱཡཀོ ཀུསལེ རཏོ.

༩.

ཏདཱ པབྦཛིཏོ ཨེཀོ, གཙྪནྟོ ཨནྟརཱཔཐེ;

ཙོརེཧི ཨནུབདྡྷོསི, ཨཙྪིནྣཔཏྟཙཱིཝརོ.

༡༠.

སཱཁཱབྷངྒཾ ནིཝཱསེཏྭཱ, པཱརུཔིཏྭཱ ཏཐེཝ ཏཾ;

ཨནྟོགཱམཾ པཝིཊྛོསི, ཨེསམཱནོ པིལོཏིཀེ.

༡༡.

ཏཏོ ཏྭཾ ཙརམཱནཾ ཏཾ, དིསྭཱ ཀམྤིཏམཱནསོ;

ཝཏྠཡུགཾ ཨདཱསི ཏྭཾ, སདྡཧཾ དཱནཏོ ཕལཾ.

༡༢.

པཏྠོདནེན ¶ ཏཾ བྷིཀྑུཾ, པརིཝིསིཏྭཱ ཡཐཱབལཾ;

པེསེསི ཨབྷིཝཱདེཏྭཱ, སདྡྷཱཡ སུདྡྷམཱནསོ.

༡༣.

ཨིམཾ ཏྭཾ ཨཀརཱི པུཉྙཾ, ཏུཡ྄ཧེཏཾ ཙརིཏཾ ཨིམཾ;

ཏསྶ ཏེ པུཉྙཀམྨསྶ, ཨམུཁྱཕལ མཱིདིསཾཏི.

ཨེཝཉྩ པན ཝཏྭཱ ཨིདཾ ཏེ བྲཱཧྨཎ དྷནཾ རཱཛཱདཱིཧི མཡཱ ཨནཱཧརཎཱིཡཾ ཀཏཾ, ཏྭཾ ཨཔརིསངྐནྟོ གཧེཏྭཱ ཡཐཱདྷིཔྤཱཡཾ ཀརོཧི, ཨིམཾ ཁོ པན མཎིརཏནཾ ཨིཙྪིཏིཙྪིཏཾ པསཝཏི, ཏེནཱཔི ཨཱནུབྷཱཝེན ཏཝ དཱནཾ ཨནུཔཙྪིནྡནྟོ པུཏྟདཱརཱདཡོ པོསེཧཱིཏི ཨནུསཱསི, ཏཾ སུཏྭཱ བྲཱཧྨཎོ ཏེན ཝུཏྟནིཡཱམེནེཝ བྷིཀྑུསངྒྷསྶ མཧཱདཱནཾ དདནྟོ སཱིལཾ རཀྑནྟོ ཙིརཾ ཝསིཏྭཱ ཨཔརབྷཱགེ ཏཏོ ཙུཏོ དེཝལོཀེ ནིབྦཏྟཱིཏི.

༡༤.

ཨེཝཾ ནིཧཱིནཱཔཱི དྷནེན སནྟོ,

དཱནནྭཡཾ ནེཝ པརིཙྩཛནྟི;

ཏསྨཱ ཧི བྷོནྟོ སཏི དེཡྻདྷམྨེ,

མཱ ཀཏྠ དཱནེསུ པམཱདབྷཱཝཾཏི.

མོརིཡབྲཱཧྨཎསྶ ཝཏྠུཾ ཚཊྛམཾ.

༣༧. པུཏྟཝཏྠུམྷི ཨཡམཱནུཔུབྦཱིཀཐཱ

ཨེཀསྨིཾ ཀིར སམཡེ ལངྐཱདཱིཔཝཱསིནོ སཊྛིམཏྟཱ བྷིཀྑཱུ ཛཡམཧཱབོདྷིཾ ཝནྡིཏུཀཱམཱ ཨེཀཏོ མནྟེཏྭཱ མཧཱཏིཏྠེན ནཱཝཾ ཨཱརུཡ྄ཧ ཛམྦུདཱིཔཾ པཏྭཱ ཏཱམལིཏྟིཔཊྛེནེ [ཏམལིཏྟཔཊྚནེ ཨིཏིཀཏྠཙི] ཨོཏརིཏྭཱ ཨནུཀྐམེན པཱཊལིཔུཏྟནགརཾ པཱཔུཎིཾསུ. ཨཐ ཏསྨིཾ ¶ ནགརེ པིཎྜཱཡ ཙརནྟེ ཏེ བྷིཀྑཱུ ཨེཀོ དུགྒཏམནུསྶོ དིསྭཱ ཙིརེན [ཙིརེནཱཧཾདིཊྛཱ ཨིཏིསབྦཏྠ] མཡཱ དིཊྛཱ བུདྡྷཔུཏྟཱཏི སོམནསྶོ བྷརིཡཾ པཀྐོསིཏྭཱ བྷདྡེ ཨིམེསཾ ཨཡྻཱནཾ དཱནཾ དཱཏུཀཱམོམྷི, པུབྦེ ནོ ཨཀཏཔུཉྙཏྟཱ ཨིདཱནི དུགྒཏཱ ཛཱཏཱ, ཨིམེསུ པུཉྙཀྑེཏྟེསུ བཱིཛཾ ནོ ཙེ རོཔེསྶཱམ, པུནཔི ཨེཝམེཝ བྷཝིསྶཱམཱཏི ཝཏྭཱ ཀིཾ མེ གེཧེ དེཡྻདྷམྨཾ ཨཏྠཱིཏི པུཙྪི. སཱ ཏཾ སུཏྭཱ གྷརེ ནོ སཱམི ཨཡྻཱནཾ ཀིཉྩི དཱཏབྦཾ ན པསྶཱམི. ཨཔི ཙ མམ པུཏྟཾ མཱརེཏྭཱ དཱནཾ དཱཏུཾ སཀྐཱཏི. སོ ཏསྶཱ ཀཐཾ སུཏྭཱ བྷདྡེ པུཏྟཾ མཱརེཏྭཱ ཀིཾ དཱནཾ དེམཱཏི ཨཱཧ. ཏཱཡ ཏཾ སུཏྭཱ སཱམི ཀིཾ ན ཛཱནཱསི, པུཏྟེ ནོ མཏེ སནྡིཊྛསམྦྷཏྟཱ ཉཱཏིམིཏྟསུཧཛྫཱ ཙ ཨམྷཱཀཾ སནྟིཀཾ ཨཱགཙྪཱནྟཱ ཀིཉྩི པཎྞཱཀཱརཾ གཧེཏྭཱ ཨཱགཙྪནྟི. མཡཾ ཏེན པཎྞཱཀཱརེན དཱནཾ དསྶཱམཱཏི ཝུཏྟེ ཨུཔཱསཀོ སཱདྷུ ཏཐཱ ཀརོཧཱིཏི མཱཏུཡཱ ཨེཝ བྷཱརམཀཱསི, སཱ པུཏྟཾ མཱརེཏུཾ ཨཝིསཧནྟཱི ཨཱཧ. ཏཐཱ ཧི.

༡.

ཀིཙྪཱ ལདྡྷཾ པིཡཾ པུཏྟཾ, ཨམྨམྨཱཏི པིཡཾ ཝདཾ;

སུནཱིལནེཏྟཾ སུབྷམུཾ, ཀོ པཀྐམིཏུམིཙྪཏི.

༢.

མཱཏརཱ མཱརིཡནྟོཔི, མཱཏརམེཝ རོདཏི;

མཱརེཏུཾ ཏཾ ན སཀྐོམི, ཧདཡཾ མེ པཝེདྷཏཱིཏི.

ཨེཝཉྩ པན ཝཏྭཱ ཨཧཾ སཱམི ན སཀྐོམི པུཏྟཾ མཱརེཏུཾ. ཏྭཾ མཱརེཧཱིཏི པུཏྟཾ པིཏུསནྟིཀཾ པེསེསི. ཨཐ སོཔི ཏཾ མཱརེཏུ མསཀྐོནྟོ ཨེཝམཱཧ. ཝུཏྟཉྷི.

༣.

ཏཱཡནྟི པིཏུནོ དུཀྑཾ, པུཏྟཱ པུཏྟཱཏི ཀིཏྟིཏཱ;

པིཏུ དུཀྑཾ སུཁཾ པུཏྟཱ, དཱཡཱདཱ ཧོནྟི སབྦདཱ.

༤.

ཏསྨཱ ¶ མེ སདིསཾ པུཏྟཾ, པིལླཀཾ མཉྫུབྷཱསནཾ;

ན སཀྐོམི ཨཧཾ བྷདྡེ, ཛཱིཝིཏཱ ཏཾ ཝིཡོཛིཏུཾ.

༥.

ཨཡསཉྩ ཨཀིཏྟིཉྩ, པཔྤོཏི པུཏྟགྷཱཏཀོ;

པཱཎཱཏིཔཱཏཀམྨམྤི, ཀཱམཾ སོ ཕུསཏེ ནརོཏི.

ཨེཝཉྩ པན ཝཏྭཱ སོ ཏྭམེཝ ཏཝ པུཏྟཾ མཱརེཧཱིཏི པེསེསི, ཨེཝཾ ཏེན ཝུཏྟེ པུཏྠསྶ མཱརཔཱཎཱུཔཱཡཾ པརིཡེསནྟཱ ཨེཝམཱཧཾསུ, ཨམྷེ པནིམཾ མཱརེཏུཾ ན སཀྐོམི, ཨམྷཱཀཾ པཙྪཱགེཧེ མཧནྟོ ཝམྨིཀོ ཨཏྠི, ཏསྨིཾ ཨེཀོ ནཱགརཱཛཱ པཊིཝསཏི. ཀུམཱརཾ ཏཏྠ པེསེསྶཱམ, སོ ཏཾ ཌསིཏྭཱ མཱརེསྶཏཱིཏི. ཨིཙྩེཏེ ཨེསོ ཁོ ཨུཔཱཡོ ཨེཝཱཏི ཙིནྟེཏྭཱ ཀུམཱརཾ པཀྐོསིཏྭཱ ཨཉྩནཱ ཝལིཝལཡཱདཱིཧི མཎྜེཏྭཱ ཏསྶ ཧཏྠེ གེཎྜུཾ [ཏེཎྜུཾ ཨིཏིསབྦཏྠ] ཋཔེཏྭཱ ཏཱཏ པཙྪཱགེཧེ ཝམྨིཀསམཱིཔཾ གནྟྭཱ ཀཱིལཱ༹ཏི པེསེསུཾ. ཏཏོ དཱརཀོ གནྟྭཱ གེཎྜུཀེན ཀཱིལ༹ནྟོ ཝམྨིཀབིལེ གེཎྜུཀཾ པཱཏེསི. ཨཐ སོ གེཎྜུཀཾ གཎྷིསྶཱམཱིཏི ཝམྨིཀསུསིརེ ཧཏྠཾ པཝེསེསི. ཏཏོ སཔྤོ ཀུཛ྄ཛྷིཏྭཱ སུསཱུཏིསདྡཾ ཀརོནྟོ མཧནྟཾ ཕཎཾ ཀཏྭཱ བིལཏོ སཱིསཾ ཨུཀྑིཔིཏྭཱ ཨོལོཀེནྟོ ཨཊྛཱསི ཀུམཱརསྶ ཧཏྠཏོ པརིགལིཏཔཱསཾཝིཡ. ཨཐསྶ ཀུམཱརོ ཀིཉྩི ཨཛཱནནྟོ སཔྤསྶ གཱིཝཾ དལ༹ྷཾ གཎྷི. ཨཐསྶ མཱཏཱཔིཏུནྣཾ སདྡྷཱབལེན ནཱགརཱཛཱ ཀུམཱརསྶ ཀརཏལེ ཨཊྛཾསཾ ཨིཙྪཱདཱཡཀཾ ཀཎྛམཎིརཏནཾ པཱཏེསི. ཀུམཱརསྶ མཱཏཱཔིཏརོ དྭཱརཾ ནིསྶཱཡ ཋིཏཱ ཏསྶ ཀིརིཡཾ ཨོལོཀེནྟོ ཏཾ མཎིརཏནཾ དིསྭཱ སཱིགྷཾ གནྟྭཱ པུཏྟཾ ཨུཀྑིཔིཏྭཱ ཧཏྠཏོ མཎིརཏནཾ གཎྷིཾསུ. ཏཏོ ཏེ ཏཾ མཎིརཏནཾ པརིསུདྡྷཱསནེ ཋཔེཏྭཱ ཨུཔཙཱརཾ ཀཏྭཱ ཨམྷཱཀཾ ཨིདཉྩིདཉྩ དེཐཱཏི ཨབྦྷུཀྐིརིཾསུ. ཨཐ ཏེ མཎིརཏནཱནུབྷཱཝེན གེཧདྭཱརེ མཧནྟཾ མཎྜཔཾ ཀཱརེཏྭཱ ཝིཏཱནཱདིནཱ མཎྜཔཾ ¶ ཨལངྐརིཏྭཱ བྷིཀྑཱུནཾ ཨཱསནཱནི པཉྙཱཔེཏྭཱ ཏེ སཊྛིམཏྟེ བྷིཀྑཱུ ནིསཱིདཱཔེཏྭཱ མཧཱདཱནཾ ཨདཾསུ. ཏཏོ ནགརཝཱསིནོ མཎིརཏནཱནུབྷཱཝཾ སུཏྭཱ སནྣིཔཏིཾསུ. ཨཐ ཏེ ཏེསཾ མཛ྄ཛྷེ ཨཏྟནོ སདྡྷཱབལེན མཎིརཏནསྶ ལཱབྷཾ པཀཱསེཏྭཱ ཨིམཉྷི དཱནཏྠཱཡེཝ པརིཙྩཛྫཱམཱཏི ཨེཀསྨིཾ ཋཱནེ པཏིཊྛཱཔེཏྭཱ ཏེནཱནུབྷཱཝེན ཡཱཝཛཱིཝཾ དཱནཾ དདནྟཱ སཱིལཾ རཀྑནྟཱ ཨཱཡུཔརིཡོསཱནེ དེཝལོཀེ ནིབྦཏྟིཾསཱུཏི.

༦.

ཚེཏྭཱན པེམཾ ཨཔི ཨཏྲཛེསུ,

དདནྟི དཱནཾ ཨིདྷ མཱནུསེཝཾ;

ན དདཱཏི ཀོ ནཱམ ནརོ སམིདྡྷོ,

དཱནཉྷི དཱནསྶ ཕལཾ སརནྟོཏི.

པུཏྟཝཏྠུཾ སཏྟམཾ.

༣༨. ཏེབྷཱཏིཀམདྷུཝཱཎིཛཀཱནཾ ཝཏྠུམྷི ཨཡམཱནུཔུབྦཱིཀཐཱ

ཨཏཱིཏེ ཀིར བཱརཱཎསིཡཾ ཏེ བྷཱཏིཀཱ ཨེཀཏོ ཧུཏྭཱ མདྷུཾ ཝིཀྐིཎནྟཱ པུཏྟདཱརེ པོསེནྟི. ཏཏོ ཏེསུ ཨེཀོ པཙྩནྟཾ གནྟྭཱ མལཡཝཱསཱིནཾ [མལཝཱསཱིནཾ ཨིཏིཔིཀཏྠཙི] ཧཏྠཏོ མདྷུཾ ཀིཎིཏྭཱ [ཝཀྐིཎིཏྭཱ ཨིཏིསབྦཏྠ] གཎྷཱཏི, ཨེཀོ གཧིཏགཧིཏམདྷུཾ ནགརཾ ཨཱཧརཏི. ཨེཀོ ཏེན ཨཱཧཊཱཧཊམདྷཱུནི བཱརཱཎསིཡཾ ནིསཱིདིཏྭཱ ཝིཀྐིཎཱཏི. ཏསྨིཾ སམཡེ གནྡྷམཱདནཔབྦཏེ ཨེཀོ པཙྩེཀབུདྡྷོ ཝཎརོགེནཱ ཏུརོ ཨཧོསི. ཨཐཉྙཏརོ པཙྩེཀབུདྡྷོ ཏསྶ མདྷུནཱ ཕཱསུ བྷཝིསྶཏཱིཏི ཉཏྭཱ གནྡྷམཱདནཔབྦཏེཡེཝ ཋིཏོ ¶ ཙཱིཝརཾ པཱརུཔིཏྭཱ ཨཱཀཱསེནཱ གནྟྭཱ ནགརདྭཱརེ ཨོཏརིཏྭཱ ཀཏྠ མདྷུཾ ལབྷཱམཱིཏི [ལབྦྷཏི ཨིཏིསབྦཏྠ] ཨོལོཀེནྟོ ཨཊྛཱསཱི, ཏདཱ ཏསྨིཾཔརཀུལེ བྷཏིཾ ཀཏྭཱ ཛཱིཝམཱནཱ ཨེཀཱ ཙེཊིཀཱ གྷཊམཱདཱཡ ཨུདཀཏྠཾ ཏིཏྠཾ གཙྪནྟཱི མགྒཱ ཨོཀྐམྨ གྷཊཾ ཋཔེཏྭཱ ཝནྡིཏྭཱ ཨེཀམནྟཾ ཨཊྛཱསི, ཏདཱ པཙྩེཀབུདྡྷོ བྷགིནཱི ཨེཏྠ བྷིཀྑཱཡ ཙརནྟཱནཾ ཀཏརསྨིཾ ཋཱནེ མདྷུ ལབྦྷཏཱིཏི པུཙྪི. སཱ ཏསྶ ཀཐཾ སུཏྭཱ མདྷུཨཱཔཎསྶ པཉྙཱཡནཊྛཱནེ ཋཏྭཱ ཧཏྠཾ པསཱརེཏྭཱ ཨེས བྷནྟེ མདྷུཨཱཔཎོཏི དསྶེཏྭཱ ཡཛྫཱཡཾ པཙྩེཀབུདྡྷོ ཨཱཔཎཏོ མདྷུཾ ན ལབྷཏི. མམ ནིཝཏྠཝཏྠཀཾ དཏྭཱཔི མདྷུཾ དསྶཱམཱིཏི ཙིནྟེཏྭཱ ཨོལོཀེནྟཱི ཏཏྠེཝ ཨཊྛཱསི, ཨཐ པཙྩེཀབུདྡྷོ ཨནུཔུབྦེན ཝིཙརནྟོ [ཙརནྟོ ཨིཏིཔིཀཏྠཙི] མདྷུཨཱཔཎཾ སམྤཱཔུཎི, ཏཏོ ཀུཊིམྦིཀོ [ཀུཊིམྦ ཀོ ཨིཏིཔིཀཏྠཙི] ཏཾ དིསྭཱ ཧཏྠཏོ པཏྟཾ གཧེཏྭཱ ཨཱདྷཱརཀེ ཋཔེཏྭཱ མདྷུགྷཊཾ ཨཱདཱཡ པཏྟསྶ ཨུཔནཱམེནྟོ སཧསཱ ནིཀྐུཛྫི. ཏཏོ མདྷུ པཏྟཾ པཱུརེཏྭཱ ཨུཏྟརནྟོ པུན བྷཱུམིཡཾ པགྒྷརི. ཏཾ དིསྭཱ སོམནསྶོ ཝཱཎིཛོ ཨེཝཾ པཏྠནམཀཱསི.

ཝུཏྟཉྷི མཧཱཝཾསེ.

༡.

ཏཏྠ པཏྟསྶ བུདྡྷསྶ, ཝཱཎིཛོ སོ པསཱདཝཱ;

ཝིསྶནྡཡནྟོ མུཁཏོ, པཏྟཔཱུརཾ མདྷུཾ ཨདཱ.

༢.

པུཎྞཉྩ ཨུཔྤཏཱིཏཉྩ, པཏིཏཉྩ མཧཱིཏལེ;

དིསྭཱ མདྷུཾ པསནྣོ སོ, ཨེཝཾ པཎིདཧཱི ཏདཱ.

༣.

ཛམྦུདཱིཔེ ཨེཀརཛྫཾ, དཱནེནཱནེན ཧོཏུ མེ;

ཨཱཀཱསེ ཡོཛནེ ཨཱཎཱ, བྷཱུམིཡཾ ཡོཛནེཔིཏི.

ཨེཝཉྩ པན ཝཏྭཱ པཏྟཾ ཨདཱསི, པཙྩེཀབུདྡྷོ པཏྟཾ པཊིགྒཧེཏྭཱ ཏཏྠེཝ ཋིཏོ.

༤.

ཨིཙྪིཏཾ ¶ པཏྠིཏཾ ཏུཡ྄ཧཾ, ཁིཔྤམེཝ སམིཛ྄ཛྷཏུ;

པཱུརེནྟུ ཙིཏྠསཾཀཔྤཱ, ཙནྡོ པཎྞརསོ ཡཐཱ.

༥.

ཨིཙྪིཏཾ པཏྠིཏཾ ཏུཡ྄ཧཾ, སབྦམེཝ སམིཛ྄ཛྷཏུ;

པཱུརེནྟུ ཙིཏྟསཾཀཔྤཱ, མཎིཛོཏིརསོ ཡཐཱཏི.

ཝཏྭཱ མངྒལཾ ཝཌྜྷེཏྭཱ ཨགམཱསི. ཨཐནྟརཱམགྒེ ཋིཏཱ གྷཊཙེཊིཀཱ པཙྩེཀབུདྡྷཱབྷིམུཁཾ གནྟྭཱ མདྷུཾ ལབྷིཏྠ བྷནྟེཏི པུཙྪི. ཏེན ལདྡྷཾ བྷགིནཱིཏི ཝུཏྟེ ཀིཾ ཝཏྭཱ སོ ཨདཱསཱིཏི པུཙྪི. པཙྩེཀབུདྡྷོ སབྦཾ ཀཐེསི. སཱ ཏཾ སུཏྭཱ ཐོཀཾ བྷནྟེ ཨིདྷེཝ ཧོཐ དཱསིཡཱ ཨནུགྒཧཏྠཱཡཱཏི སཱིགྷཾ གེཧཾ གནྟྭཱ ནིཝཏྠཔིལོ༹ཏིཀཱ ཨཏྟནོ སཱཊཀཾ དྷོཝིཏྭཱ ཨཱཧརིཏྭཱ ཙུམྦཊཀཾ ཀཏྭཱ པཙྩེཀབུདྡྷསྶ ཨདཱསི, ཡདཱ སོ བྷནྟེ མདྷུདཱཡཀོ སཀལཛམྦུདཱིཔེ ཨེཀརཛྫཾ ཀཱརེཏི. ཏདཱཧཾ ཏསྶ ཨགྒམཧེསཱི བྷཝེཡྻཾཏི ཝཏྭཱ པཏྠནཾ ཀརོནྟཱིཨེཝམཱཧ.

༦.

ཡདཱ ཏེ མདྷུདོ བྷནྟེ, བྷཱུབྷུཛོ ཧོཏི བྷཱུཏལེ;

ཏསྶ ཧེསྶཾ ཏདཱ བྷནྟེ, པིཡཱ ཨགྒམཧེསིཀཱ.

༧.

སུརཱུཔཱཙ སུཝཱཎཱིཙ, སུཡསཱ སུབྦཏཱ སུབྷཱ;

ཨསྶཾ ཏསྶ པིཡཱཙཱཐ, མནཱཔཱ ཨིཙྪདཱ [ཨིཙྪིདཱ ཨིཏིཔིཀཏྠཙི] སདཱཏི.

ཏསྶཱཔི ཏདཱ པཙྩེཀབུདྡྷོ ཏཐེཝ ཧོཏཱུཏི མངྒལཾ ཝཏྭཱ ཨཱཀཱསེན གནྡྷམཱདནམེཝ ཨགམཱསི, ཨཐཱཔརབྷཱགེ ཏེ ཏཡོཔི ཨེཀཏོ ཧུཏྭཱ མདྷུལོཀནཾ ཀརོནྟཱ ཏཾ མདྷུགྷཊཾ ཀུཧིཾཏི པུཙྪིཾསུ, སོ ཏེནཏྟནཱ ཀཏཀམྨཾ ཝཏྭཱ སཙེ ཏུམྷེ ཏསྨིཾ པཏྟིཾ ཨནུམོདེཡྻཱཐ, ཏཾ སཱདྷུ. ནོ ཙེ. མདྷུཨགྒྷནཀཾ མམ ཧཏྠཏོ གཎྷཐཱཏི ཝཏྭཱ ཏེཧི ཏཏོ ན ནོ ཨཏྠོ [ནནོཧཏྠོ ཨིཏིསབྦཏྠ] མདྷུནཱ, ཀཱིདིསསྶེཏཾ ཨདཱསཱིཏི ཝུཏྟེ ཏཾ སུཏྭཱ ཨིཏརོ པཙྩེཀབུདྡྷཱ ནཱམེ ཏེ གནྡྷམཱདནེ ཝསནྟི ཀཱསཱཝཾ ¶ པཱརུཔིཏྭཱ ཀུལེ ཀུལེ བྷིཀྑཾ ཙརནྟི, སནྟོ ཨེཏེ སཱིལཝནྟཱཏི ཀཐེསི, ཨཐ ཏེསུ ཛེཊྛོ བྲཱཧྨཎཙཎྜཱལཀཱཔི ཀཱསཱཝཾ པརིདཧིཏྭཱ ཙརནྟི. ནཱུནཱཡཾ ཙཎྜཱལཀོཏི མཉྙཱམཱིཏི ཨཱཧ, མཛ྄ཛྷིམོ ཀུཛ྄ཛྷིཏྭཱ ཏཝ པཙྩེཀབུདྡྷཾ པརསམུདྡེ ཁིཔཱཧཱིཏི ཨཝོཙ, ཨཐ ཏེསཾ ཀཐཾ སུཏྭཱ མདྷུདཱཡཀོ མཱ བྷོ ཏུམྷེ ཨརིཡཱནཾ མཧེསཀྑཱནཾ མཧཱནུབྷཱཝཱནཾ པཙྩེཀབུདྡྷཱནཾ ཕརུསཾ ཀཐེཐ. ནིརཡདུཀྑཱ ན བྷཱཡཐཱཏིཨཱདིནཱ ཨནེཀཱ ཀཱརེན ནིཝཱརེཏྭཱ ཏེསཾ གུཎཾ པཀཱསེསི, ཏཾ སུཏྭཱ ཏེ ཨུབྷོཔི སཱདྷཱུཏི པསནྣཱཙིཏྟཱ ཨནུམོདིཾསུ, ཨཔརབྷཱགེ ཏེ ཀཱལཾ ཀཏྭཱ དེཝམནུསྶེསུ སཾསརནྟཱ ཏཏྠ ཏཏྠ མཧཱསམྤཏྟིཡོ ཨནུབྷཝིཏྭཱ ཨམྷཱཀཾ སཏྠུ པརིནིབྦཱཎཏོ དྭིནྣཾ ཝསྶསཏཱནཾ ཨཙྩཡེན ཨཏྟནོ ཨཏྟནོ སམྤཏྟཊྛཱནེ ནིབྦཏྟིཾསུ. ཏེན ཝུཏྟཾ.

༨.

ཨསོཀོ མདྷུདོ སནྡྷི, མིཏྟཱདེཝཱི ཏུ ཙེཊིཀཱ;

ཙཎྜཱལཝཱདཱི ནིགྲོདྷོ, ཏིསྶོ སོ པཱརཝཱདིཀོཏི.

ཏེསུ ཙཎྜཱལཝཱདཱི ཛེཊྛཝཱཎིཛོ བིནྡུསཱརརཉྙོ ཛེཊྛཔུཏྟསྶ སུམནརཱཛཀུམཱརསྶ པུཏྟོ ཧུཏྭཱ ནིབྦཏྟི. ཏསྶཱཡམཱནུཔུབྦཱིཀཐཱ. བིནྡུསཱརརཉྙོ ཀིར དུབྦལཀཱལེཡེཝ ཨསོཀཀུམཱརོ ཨཏྟནཱ ལདྡྷཾ ཨུཛྫེནིཡཱ རཛྫཾ པཧཱཡ ཨཱགནྟྭཱ སབྦནགརཾ ཨཏྟནོ ཧཏྠགཏཾ ཀཏྭཱ སུམནརཱཛཀུམཱརཾ ཨགྒཧེསི. ཏཾ དིཝསམེཝ སུམནསྶ རཱཛཀུམཱརསྶ སུམནཱ ནཱམ དེཝཱི པརིཔུཎྞགབྦྷཱ ཨཧོསི. སཱ ཨཉྙཱཏཀཝེསེན ནིཀྑམིཏྭཱ ཨཝིདཱུརེ ཨཉྙཏརཾ ཙཎྜཱལགཱམཾ སནྡྷཱཡ གཙྪནྟཱི ཛེཊྛཀཙཎྜཱལསྶ གེཧཏོ ཨཝིདཱུརེ ནིགྲོདྷོ ཨཏྠི, ཏསྨིཾ རུཀྑེ ཨདྷིཝཏྠཱཡ དེཝཏཱཡ ཨིཏོ ཨེཧི སུམནེཏི ཝདནྟིཡཱ སདྡཾ སུཏྭཱ ཏསྶཱ སམཱིཔཾ གཏཱ, དེཝཏཱ ཨཏྟནོ ཨཱནུབྷཱཝེན ཨེཀཾ སཱལཾ ནིམྨིཎིཏྭཱ ཨེཏྠ ཝསཱཧཱིཏི པཱདཱསི. སཱ ¶ ཏཾ སཱལཾ པཱཝིསི, གཏདིཝསེཡེཝ སཱ པུཏྟཾ ཝིཛཱཡི. སཱ ཏསྶ ནིགྲོདྷདེཝཏཱཡ པརིགྒཧིཏཏྟཱ ནིགྲོདྷོཏྭེཝ ནཱམཾ ཨཀཱསི. ཛེཊྛཀཙཎྜཱལོ དིཊྛདིཝསཏོཔྤབྷུཏི ཏཾ ཨཏྟནོ སཱམིདྷཱིཏརཾ ཝིཡ མཉྙམཱནོ ནིབདྡྷཝཏྟཾ པཊྛཔེསི. རཱཛདྷཱིཏཱ ཏཏྠ སཏྟཝསྶཱནི ཝསི, ནིགྲོདྷཀུམཱརོཔི སཏྟཝསྶིཀོ ཛཱཏོ, ཏདཱ མཧཱཝརུཎཏྠེརོ ནཱམ ཨེཀོ ཨརཧཱ དཱརཀསྶ ཧེཏུསམྤདཾ དིསྭཱ ཝིཧརམཱནོ སཏྟཝསྶིཀོ དཱནི དཱརཀོ. ཀཱལོ ནཾ པབྦཱཛེཏུཾཏི ཙིནྟེཏྭཱ རཱཛདྷཱིཏཱཡ ཨཱརོཙཱཔེཏྭཱ ནིགྲོདྷཀུམཱརཾ པབྦཱཛེསི, ཀུམཱརོ ཁུརགྒེཡེཝ ཨརཧཏྟཾ པཱཔུཎི. ཏེན ཝུཏྟཾ མཧཱཝཾསེ.

༩.

ཏཾ མཧཱཝརུཎོ ཐེརོ, ཏདཱ དིསྭཱ ཀུམཱརཀཾ;

ཨུཔནིསྶཡསམྤནྣཾ, ཨརཧཱ པུཙྪི མཱཏརཾ;

པབྦཱཛེསི ཁུརགྒེ སོ, ཨརཧཏྟམཔཱཔུཎཱིཏི.

སོ ཀིར ཨེཀདིཝསཾ པཱཏོཝ སརཱིརཾ པཊིཛགྒིཏྭཱ ཨཱཙརིཡུཔཛ྄ཛྷཱཡཝཏྟཾ ཀཏྭཱ པཏྟཙཱིཝར མཱདཱཡ མཱཏུཨུཔཱསིཀཱཡ གེཧདྭཱརཾ གཙྪཱམཱིཏི ནིཀྑམི. མཱཏུནིཝཱསཊྛཱནཉྩསྶ དཀྑིཎདྭཱརེན ནགརཾ པཝིསིཏྭཱ ནགརམཛ྄ཛྷེན གནྟྭཱ པཱཙཱིནདྭཱརེན ནིཀྑམིཏྭཱ གནྟབྦཾ ཧོཏི. ཏེན ཙ སམཡེན ཨསོཀོ དྷམྨརཱཛཱ པཱཙཱིནདིསཱབྷིམུཁོ སཱིཧཔཉྫརེ ཙངྐམཏི. ཏཾ ཁཎཾཡེཝ ནིགྲོདྷོ རཱཛངྒཎཾ སམྤཱཔུཎི སནྟིནྡྲིཡོ སནྟམཱནསོ ཡུགམཏྟཾ པེཀྑམཱནོ, ཏེན ཝུཏྟཾ ཨེཀདིཝསཾ སཱིཧཔཉྫརེ ཋིཏོ ཨདྡས ནིགྲོདྷཾ སཱམཎེརཾ རཱཛངྒཎེན གཙྪནྟཾ དནྟཾ གུཏྟཾ སནྟིནྡྲིཡཾ ཨིརིཡཱཔཐསམྤནྣནྟི. དིསྭཱ པནསྶ ཨེཏདཧོསི. ཨཡཾ ཛནོ སབྦོཔི ཝིཀྑིཏྟཙིཏྟོ བྷནྟམིགཔཊིབྷཱགོ. ཨཡཾ པན དཧརཀོ ཨཝིཀྑིཏྟོ ཨཏིཝིཡསྶ ཨཱལོཀིཏཝིལོཀིཏཾ སམྨིཉྫནཔསཱརཎཉྩ སོབྷཏི. ཨདྡྷཱ ཨེཏསྶབྦྷནྟརེ ལོཀུཏྟརདྷམྨོ བྷཝིསྶཏཱིཏི རཉྙོ སཧ ¶ དསྶནེནེཝ སཱམཎེརེ ཙིཏྟཾ པསཱིདི, པེམཾ སཎྛཧི, ཀསྨཱ. པུབྦེ ཀིར པུཉྙཀརཎཀཱལེ རཉྙོ ཛེཊྛཀབྷཱཏཱ ཝཱཎིཛཀོཡཾ.

༡༠.

པུབྦེཝ [པུབྦེན ཨིཏིཀཏྠཙི] སནྣིཝཱསེན, པཙྩུཔྤནྣཧིཏེན ཝཱ;

ཨེཝཾ ཏཾ ཛཱཡཏེ པེམཾ, ཨུཔྤལཾཝ ཡཐོདཀེཏི.

ཨཐ རཱཛཱ སཉྫཱཏཔེམོ སབཧུམཱནོ སཱམཎེརཾ པཀྐོསཐཱཏི ཨམཙྩེ པེསེསི, ཏེ ཨཏིཙིརཱཡནྟཱིཏི པུན དྭེ ཏཡོ པེསེསི ཏུརིཏཾ ཨཱགཙྪཏཱུཏི. སཱམཎེརོ ཨཏྟནོ པཀཏིཡཱ ཨེཝ ཨགམཱསི. རཱཛཱ པཏིརཱུཔཱསནཾ ཉཏྭཱ ནིསཱིདཐཱཏི ཨཱཧ. སོ ཨིཏོཙིཏོ ཙ ཝིལོཀེཏྭཱ ནཏྠི དཱནི ཨཉྙོ བྷིཀྑཱུཏི སམུསྶིཏསེཏཙྪཏྟཾ རཱཛཔལླངྐཾ ཨུཔསངྐམིཏྭཱ པཏྟཾ གཎྷནཏྠཱཡ རཉྙོ ཨཱཀཱརཾ དསྶེསི. རཱཛཱ ཏཾ པལླངྐསམཱིཔཾ གཙྪནྟཾ ཨེཝ དིསྭཱ ཙིནྟེསི ཨཛྫེཝ དཱནི ཨཡཾ སཱམཎེརོ ཨིམསྶ གེཧསྶ སཱམིཀོ བྷཝིསྶཏཱིཏི, སཱམཎེརོ རཉྙོ ཧཏྠེ པཏྟཾ དཏྭཱ པལླངྐཾ ཨབྷིརུཧིཏྭཱ ནིསཱིདི. རཱཛཱ ཨཏྟནོ ཨཏྠཱཡ སམྤཱདིཏཾ སབྦཾ ཡཱགུཁཛྫཀབྷཏྟཝིཀཏིཾ ཨུཔནཱམེསི. སཱམཎེརོ ཨཏྟནོ ཡཱཔནམཏྟམེཝ སམྤཊིཙྪི. བྷཏྟཀིཙྩཱཝསཱནེ རཱཛཱ ཨཱཧ སཏྠཱརཱ ཏུམྷཱཀཾ དིནྣཨོཝཱདཾ ཛཱནཱཐཱཏི. ཛཱནཱམི མཧཱརཱཛ ཨེཀདེསེནཱཏི. ཏཱཏ མཡ྄ཧམྤཱི ནཾ ཀཐེཧཱིཏི. སཱདྷུ མཧཱརཱཛཱཏི རཉྙོ ཨནུརཱུཔཾ དྷམྨཔཨེད ཨཔྤམཱདཝགྒཾ ཨནུམོདནཏྠཱཡ ཨབྷཱསི. རཱཛཱ པན ཨཔྤམཱདོ ཨམཏཔདཾ, པམཱདོ མཙྩུནོ པདཾཏི སུཏྭཱཝ ཨཉྙཱཏཾ ཏཱཏ, པརིཡོསཱཔེཧཱིཏི ཨཱཧ. སཱམཎེརོ ཨནུམོདནཱ ཝསཱནེ དྭཏྟིཾསདྷུཝབྷཏྟཱནི [དྭིཏྟིཾསདྷུརབྷཏྟཱནི ཨིཏིསབྦཏྠ] ལབྷིཏྭཱ པུན དིཝསེ དྭཏྟིཾསབྷིཀྑཱུ གཧེཏྭཱ རཱཛནྟོཔུརཾ པཝིསིཏྭཱ བྷཏྟཀིཙྩ མཀཱསི. རཱཛཱ ཨཉྙེཔི དྭཏྟིཾསབྷིཀྑཱུ ཏུམྷེཧི སདྡྷིཾསྭེ བྷིཀྑཾ གཎྷནྟཱུཏི ཨེཏེནེཝ ཨུཔཱཡེན དིཝསེ ¶ དིཝསེ ཝཌྜྷཱཔེནྟོ སཊྛིསཧསྶཱནཾ བྲཱཧྨཎཔརིབྦཱཛཀཱནཾ བྷཏྟཾ ཨུཔཙྪིནྡིཏྭཱ ཨནྟོནིཝེསནེ སཊྛིསཧསྶཱནཾ བྷིཀྑཱུནཾ ནིཙྩབྷཏྟཾ པཊྛཔེསི ནིགྲོདྷཏྠེརགཏེནེཝ པསཱདེན. ནིགྲོདྷཏྠེརོཔི རཱཛཱནཾ སཔརིསཾ ཏཱིསུ སརཎེསུ པཉྩསུ སཱིལེསུ པཏིཊྛཱཔེཏྭཱ བུདྡྷསཱསནེ པོཐུཛྫནིཀེན པསཱདེན ཨཙལཔྤསཱདཾ ཀཏྭཱ པཏིཊྛཱཔེསི. རཱཛཱཔི ཨསོཀཱརཱམཾ ནཱམ མཧཱཝིཧཱརཾ ཀཱརཱཔེཏྭཱ སཊྛིསཧསྶཱནཾ བྷིཀྑཱུནཾ ནིཙྩབྷཏྟཾ པཊྛཔེསི. སཀལཛམྦུདཱིཔེ ཙཏུརཱསཱིཏིཡཱ ནགརསཧསྶེསུ ཙཏུརཱསཱིཏིཝིཧཱརསཧསྶཱནི ཀཱརཱཔེསི. ཏེན ཝུཏྟཾ.

༡༡.

ཙཎྜཱལཝཱདིདོསེན,

ཛཱཏོ ཙཎྜཱལགཱམཀེ;

པཏྟཱནུམོདནཱ པཱཀཱ,

ཨཱསེ སོ [ཨསེསོ ཨིཏིཔིཀཏྠཙི] ཧི ཨནཱསཝོཏི.

ཨཡཾ ནིགྲོདྷཏྠེརསྶ ཀཐཱནཡོ.

མདྷུདཱཡཀོ པན ཝཱཎིཛོ དེཝལོཀཏོ ཙཝིཏྭཱ པུཔྥཔུརེ རཱཛཀུལེ ཨུཔྤཛྫིཏྭཱ པིཡདཱསོ ནཱམ ཀུམཱརོ ཧུཏྭཱ ཚཏྟཾ ཨུསྶཱཔེཏྭཱ སཀལཛམྦུདཱིཔེ ཨེཀརཛྫཾ ཨཀཱསི. ཀཐཾ.

བིནྡུསཱརརཱཛསྶ ཨེཀསཏཔུཏྟཱ ཨཧེསུཾ. ཏེ སབྦེ ཨསོཀོ ཨཏྟནཱ སདྡྷིཾ ཨེཀམཱཏིཀཾ ཏིསྶཀུམཱརཾ ཋཔེཏྭཱ གྷཱཏེསི. གྷཱཏེནྟོ ཙཏྟཱརི ཝསྶཱནི ཨནབྷིསིཏྟོཝ རཛྫཾ ཀཱརེཏྭཱ ཙཏུནྣཾ ཝསྶཱནཾ ཨཙྩཡེན ཏཐཱགཏསྶ པརིནིབྦཱཎཏོ དྭིནྣཾ ཝསྶསཏནཾ ཨུཔརི ཨཊྛཱརསམེ ཝསྶེ སཀལཛམྦུདཱིཔེ ཨེཀརཛྫཱབྷིསེཀཾ པཱཔུཎི. ཨཐ ཏཾ སཀལཛམྦུདཱིཔེ ཙཏུརཱསཱིཏིནགརསཧསྶེ རཱཛཱནོ ཨཱགནྟྭཱ ཨུཔཊྛཧིསྶནྟི. ཏིཎྞཾ ཨུཏཱུནཾ ཨནུཙྪཝིཀཱ ཏཡོ པཱསཱདཱ ཨཧེསུཾ. ཨེཀོ མཧཱསཔྤིཀོ ¶ , ཨེཀོ མོརགཱིཝོ, ཨེཀོ མངྒལོ ནཱམ, ཏེསུ ནེཀནཱཊཀསཧསྶཔརིཝུཏོ པཊིཝསཏི. ཡཱསྶ མདྷུཨཱཔཎཾ དསྶེསི, སཱ ཨསནྡྷིམིཏྟཱ ནཱམ དེཝཙྪརཔརིབྷཱགཱ རཱཛདྷཱིཏཱ ཧུཏྭཱ སཊྛིསཧསྶཱནཾ ཨིཏྠཱིནཾ ཛེཊྛིཀཱ དྷམྨཱསོཀརཉྙོ ཨགྒམཧེསཱི ཨཧོསི. ཨབྷིསེཀཱནནྟརཾ ཏསྶ ཨིམཱ རཱཛིདྡྷིཡོ ཨཱགཏཱ, པཐཝིཡཱ ཙ ཧེཊྛཱ ཡོཛནཔྤམཱཎེ ཨཱཎཱ པཝཏྟཏི. ཏཐཱ ཨུཔརི ཨཱཀཱསེ. ཨནོཏཏྟདཧཏོ ཨཊྛཧི ཀཱཛེཧི སོལ༹སཔཱནཱིཡགྷཊེ དིཝསེ དིཝསེ དེཝཏཱ ཨཱཧརནྟི. ཡཏོ སཱསནེ ཨུཔྤནྣསདྡྷོ ཧུཏྭཱ ཨཊྛགྷཊེ བྷིཀྑུསངྒྷསྶ ཨདཱསི. དྭེ གྷཊེ སཊྛིམཏྟཱནཾ ཏེཔིཊཀབྷིཀྑཱུནཾ དྭེ གྷཊེ ཨགྒམཧེསིཡཱ ཨསནྡྷིམིཏྟཱཡ. ཙཏྟཱརོ གྷཊེ ཨཏྟནཱ པརིབྷུཉྩི དེཝཏཱ [དེཝཏཱཨེཝཾ ཨིཏིསབྦཏྠ], ཨེཝ ཧིམཝནྟཏོ ནཱགལཏཱདནྟཀཊྛཾ སིནིདྡྷཾ མུདུཀཾ རསཝནྟཾ དིཝསེ དིཝསེ ཨཱཧརནྟི, ཏེན རཉྙོ ཙ མཧེསིཡཱ ཙ སོལ༹སནྣཾ ནཱཊཀསཧསྶཱནཉྩ སཊྛིམཏྟཱནཉྩ བྷིཀྑུསཧསྶཱནཾ དེཝསིཀཾ དནྟཔོཎཀིཙྩཾ ནིཔྥཛྫཏི. དེཝསིཀམེཝསྶ དེཝཏཱ ཨགདཱམལཀཾ ཨགདཧརཱིཊཀཾ སུཝཎྞཝཎྞཉྩ གནྡྷརསསམྤནྣཾ ཨམྦཔཀྐཾ ཨཱཧརནྟི. ཚདྡནྟདཧཏོ པཉྩཝཎྞཾ ནིཝཱསནཔཱརུཔནཾ པཱིཏཀཝཎྞཾ ཧཏྠཔུཉྪནཀཔཊཾ [ཧཏྠཔུཙྪནཀཔཊྚཾ ཨིཏིསབྦཏྠ] དིབྦཉྩ པཱནཾ ཨཱཧརནྟི. དེཝསིཀམེཝསྶ ཨནུལེཔནགནྡྷཾ པཱརུཔནཏྠཱཡ ཨསུཏྟམཡིཀཾ སུམནཔུཔྥཔཊཾ མཧཱརཧཉྫ ཨཉྫནཾ ནཱགབྷཝནཏོ ནཱགརཱཛཱནོ ཨཱཧརནྟི. ཚདྡནྟདཧཏོཡེཝ ཨུཊྛིཏསྶ སཱལིནོ ནཝཝཱཧསཧསྶནི དིཝསེ དིཝསེ སུཝཱ ཨཱཧརནྟི. ཏེ མཱུསིཀཱ ནིཏྠུསཀཱནི ཀརོནྟི. ཨེཀོཔི ཁཎྜཏཎྜུལོ ནཱཧོསི. རཉྙོ སབྦཊྛཱནེསུ ཨཡམེཝ ཏཎྜུལོ པརིབྷོགཾ གཙྪཏི. མདྷུམཀྑིཀཱ མདྷུཾ ཀརོནྟི. ཀམྨཱརསཱལཱསུ ཨཙྪཱ ཀཱུཊཾ པཧརནྟི. ཀརཝཱིཀསཀུཎཱ ཨཱགནྟྭཱ མདྷུརསྶརཾ ཝིཀཱུཛེནྟཱ རཉྙོ བལིཀམྨཾ ཀརོནྟི. ཨིམཱཧི ཨིདྡྷཱིཧི སམནྣཱགཏོ རཱཛཱ ཨེཀདིཝསཾ སུཝཎྞསངྑལིཀབནྡྷནཾ ¶ པེསེཏྭཱ ཙཏུནྣཾ བུདྡྷཱནཾ ཨདྷིགཏརཱུཔདསྶནཾ ཀཔྤཱ ཡུཀཾ མཧཱཀཱལནཱགརཱཛཱནཾ ཨཱནཡིཏྭཱ སེཏཙྪཏྟསྶ ཧེཊྛཱ མཧཱརཧེ པལླངྐེ ནིསཱིདཱཔེཏྭཱ ཨནེཀསཏ ཝཎྞེཧི ཛལཛཐལཛཔུཔྥེཧི སུཝཎྞཔུཔྥེཧི ཙ པཱུཛཾ ཀཏྭཱ སབྦཱ ལངྐཱརཔཏིམཎྜིཏེཧི སོལ༹སཧི ནཱཊཀསཧསྶེཧི སམནྟཏོ པརིཀྑིཔིཏྭཱ ཨནནྟཉཱཎསྶ ཏཱཝ མེ སདྡྷམྨཝརཙཀྐཝཏྟིནོ སམྨཱསམྦུདྡྷསྶ [སམྨཱསམྦུདྡྷརཱུཔཾ ཨིཏིསབྦཏྠ] རཱུཔཾ ཨིམེསཾ ཨཀྑཱིནཾ ཨཱཔཱཐཾ ཀརོཧཱིཏི ཝཏྭཱ ཏེན ནིམྨིཏཾ སཀལསརཱིརེ ཝིཔྤཀིཎྞཔུཉྙཔྤབྷཱཝནིབྦཏྟཱསཱིཏི ཨནུབྱཉྫནཔཏིམཎྜིཏ དྭཏྟིཾས མཧཱཔུརིསལཀྑཎ སསྶིརཱིཀཏཱཡ ཝིཀཙཀམལུཔྤལཔུཎྜརཱིཀཔཏིམཎྜིཏམིཝ སལིལཏལཾ ཏཱརཱགཎརཾསིཛཱལཝིསརཝིཔྥུརིཏསོབྷཱསམུཛྫལམིཝ གགནཏལཾ ནཱིལཔཱིཏལོཧིཏཱ དིབྷེདཾ ཝིཙིཏྟཝཎྞརཾསིཝིནདྡྷབྱཱམཔྤབྷཱཔརིཀྑེཔཝིལཱསིཏཱཡ སཉྩྱཱཔྤབྷཱནུརཱགཨིནྡདྷནུཝིཛྫུལླཏཱཔརིཀྑིཏྟམིཝ ཀཎཀགིརིསིཁརཾ ནཱནཱཝིརཱགཝིམལཀེཏུམཱལཱསམུཛྫལིཏཙཱརུམཏྠཀསོབྷནཾ ནཡནརསཱཡནམིཝ ཙ བྲཧྨདེཝམནུཛནཱགཡཀྑགཎཱནཾ བུདྡྷརཱུཔཾ པསྶནྟོ སཏྟདིཝསཱནི ཨཀྑིཔཱུཛཾ ནཱམ ཨཀཱསི. རཱཛཱ ཀིར ཨབྷིསེཀཾ པཱཔུཎིཏྭཱ ཏཱིཎིཡེཝ སཾཝཙྪརཱནི བཱཧིརཀཔཱསཎྜཾ པརིགཎྷི, ཙཏུཏྠེ སཾཝཙྪརེ བུདྡྷསཱསནེ པསཱིདི, ཏསྶ པན པིཏཱ བིནྡུསཱརོ བྲཱཧྨཎབྷཏྟོ ཨཧོསི. སོ བྲཱཧྨཎཱནཉྩ བྲཱཧྨཎཛཱཏིཔཱསཎྜཱནཾ པཎྜརངྒཔརིབྦཱཛཀཱནཉྩ སཊྛིསཧསྶམཏྟཱནཾ ནིཙྩབྷཏྟཾ པཊྛཔེསི. ཨསོཀོཔི པིཏརཱ པཝཏྟིཏཾ དཱནཾ ཨཏྟནོ ཨནྟོཔུརེ [ཨནྟེཔུརེ ཨིཏིསབྦཏྠ] ཏཐེཝ དདམཱནོ ཨེཀདིཝསཾ སཱིཧཔཉྫརེ ཋིཏོ ཏེ ཨུཔསམཔརིབཱཧིརེན ཨཱཙཱརེན བྷུཉྫམཱནེ ཨསཾཡཏིནྡྲིཡེ ཨཝིནཱིཏཨིརིཡཱཔཐེ དིསྭཱ ཙིནྟེསི, ཨཱིདིསཾ དཱནཾ ཨུཔཔརིཀྑིཏྭཱ ཡུཏྟཊྛཱནེ དཱཏུཾ ཝཊྚཏཱིཏི. ཨེཝཾ ཙིནྟེཏྭཱ ཨམཙྩེ ཨཱཧ, གཙྪཐ བྷཎེ ཨཏྟནོ ཨཏྟནོ སཱདྷུསམྨཏེ སམཎབྲཱཧྨཎེ ཨནྟོཔུརཾ ཨབྷིཧརཐ དཱནཾ དསྶཱམཱིཏི, ཨམཙྩཱ སཱདྷུ དེཝཱཏི རཉྙོ ¶ པཊིསྶུཏྭཱ ཏེ ཏེ པཎྜརངྒཔརིབྦཱཛཀཱ ཛཱིཝཀ ནིགཎྛཱདཡོ ཨཱནེཏྭཱ ཨིམེ མཧཱརཱཛ ཨམྷཱཀཾ ཨརཧནྟོཏི ཨཱཧཾསུ, ཨཐ རཱཛཱ ཨནྟོཔུརེ ཨུཙྩཱཝཙཱནི ཨཱསནཱནི པཉྙཱཔེཏྭཱ ཨཱགཙྪནྟཱུཏི ཝཏྭཱ ཨཱགཏཱགཏེ ཨཱཧ ཨཏྟནོ ཨནུརཱུཔེ ཨཱསནེ ནིསཱིདཐཱཏི, ཨེཀཙྩེ བྷདྡཔཱིཋཀེསུ ཨེཀཙྩེ ཕལཀཔཱིཋཀེསུ ནིསཱིདིཾསུ, ཏཾ དིསྭཱ རཱཛཱ ནཏྠི ཨེཏེསཾ ཨནྟོ སཱརོཏི ཉཏྭཱ ཏེསཾ ཨནུརཱུཔཾ ཁཱདནཱིཡབྷོཛནཱིཡཾ དཏྭཱ ཨུཡྻོཛེསི. ཨེཝཾ གཙྪནྟེ ཀཱལེ ཨེཀདིཝསཾ སཱིཧཔཉྫརེ ཋིཏོ ནིགྲོདྷསཱམཎེརཾ དིསྭཱ ཏསྨིཾ གཏེན པསཱདེན བུདྡྷསཱསནེ པསནྣོ སཊྛིསཧསྶམཏྟེ པཱསཎྜིཡེ ཨཔནེཏྭཱ སཊྛིསཧསྶམཏྟེ བྷིཀྑཱུ བྷོཛེནྟོ བུདྡྷསཱསནེ པསཱིདིཏྭཱ ཨསོཀཱརཱམཾ ཀཱརེཏྭཱ ཏཏྠ ཏེ ཝསཱཔེནྟོ ཨེཀདིཝསཾ ཨསོཀཱརཱམེ སཊྛིསཧསྶབྷིཀྑཱུནཾ དཱནཾ དཏྭཱ ཏེསཾ མཛ྄ཛྷེ ནིསཛྫ སངྒྷཾ ཙཏཱུཧི པཙྩཡེཧི པཝཱརེཏྭཱ ཨིམཾ པཉྷཾ པུཙྪི, བྷནྟེ བྷགཝཏཱ དེསིཏདྷམྨོ ནཱམ ཀིཏྟཀོ ཧོཏཱིཏི, མཧཱརཱཛ ནཝ ཨངྒཱནི, ཁནྡྷཏོ ཙཏུརཱསཱིཏིདྷམྨཀྑནྡྷསཧསྶཱནཱིཏི. རཱཛཱ དྷམྨེ པསཱིདིཏྭཱ ཨེཀེཀཾ དྷམྨཀྑནྡྷཾ ཨེཀེཀཝིཧཱརེན པཱུཛེསྶཱམཱིཏི ཨེཀདིཝསམེཝ ཚནྣཝུཏིཀོཊིཁནཾ ཝིསྶཛྫེཏྭཱ ཨམཙྩེ ཨཱཎཱཔེསི, ཨེཀམེཀསྨིཾ ནགརེ ཨེཀམེཀཾ ཝིཧཱརཾ ཀཱརེནྟཱ ཙཏུརཱསཱིཏིཡཱ ནགརསཧསྶེསུ ཙཏུརཱསཱིཏིཝིཧཱརསཧསྶཱནི ཀཱརཱཔེཐཱཏི, སཡཉྩ ཨསོཀཱརཱམེ ཨསོཀམཧཱཝིཧཱརཏྠཱཡ [སཡཾཙཨསོཀཧོཝིཧཱརཏྠཱཡ ཨིཏིཔིཀཏྠཙི] ཀམྨཾ པཊྛཔེསི, སངྒྷོ ཨིནྡགུཏྟཏྠེརཾ ནཱམ མཧིདྡྷིཀཾ མཧཱནུབྷཱཝཾ ཁཱིཎཱསཝཾ ནཝཀམྨཱདྷིཊྛཱཡཀཾ ཨདཱསི, ཐེརོ ཡཾ ཡཾ ན ནིཊྛཱཏི, ཏཾ ཏཾ ཨཏྟནོ ཨཱནུབྷཱཝེན ནིཊྛཱཔེསི, ཨེཝཾཔིཏཱིཧི སཾཝཙྪརེཧི ཝིཧཱརཀམྨཾ ནིཊྛཱཔེསི, ཨེཀདིཝསམེཝ སབྦནགརེཧི པཎྞཱནི ཨཱགམིཾསུ, ཨམཙྩཱ རཉྙོ ཨཱརོཙེསུཾ ནིཊྛིཏཱནི དེཝ ཙཏུརཱསཱིཏིམཧཱཝིཧཱརསཧསྶཱནཱིཏི. ཨཐ རཱཛཱ ¶ བྷིཀྑུསངྒྷཾ ཨུཔསངྐམིཏྭཱ བྷནྟེ མཡཱ ཙཏུརཱསཱིཏིཝིཧཱརསཧསྶཱནི ཀཱརིཏཱནི, དྷཱཏུཡོ ཀུཏོ ལཙྪཱམཱིཏི པུཙྪི, མཧཱརཱཛ དྷཱཏུནིདྷཱནཾ ནཱམ ཨཏྠཱིཏི སུཎོམ, ན པན པཉྙཱཡཏི ཨསུཀཊྛཱནེཏི. རཱཛཱ རཱཛགཧེ ཙེཏིཡཾ བྷིནྡཱཔེཏྭཱ དྷཱཏུཾ ཨཔསྶནྟོ པཊིཔཱཀཏིཀཾ ཀཱརཱཔེཏྭཱ བྷིཀྑུབྷིཀྑུཎིཡོ ཨུཔཱསཀཨུཔཱསིཀཱཡོཏི ཙཏསྶོ པརིསཱ གཧེཏྭཱ ཝེསཱལིཡཾ གཏོ. ཏཏྲཱཔི ཨལབྷིཏྭཱ ཀཔིལཝཏྠུཾ གཏོ, ཏཏྲཱཔི ཨལབྷིཏྭཱ རཱམགཱམཾ གཏོ, རཱམགཱམེ ནཱགཱ ཙེཏིཡཾ བྷིནྡིཏུཾ ནཱདཾསུ. ཙེཏིཡེ ནིཔཏིཏཀུདྡཱལོ ཁཎྜཱཝཎྜཾ ཧོཏི, ཨེཝཾ ཏཏྲཱཔི ཨལབྷིཏྭཱ ཨལླཀཔྤཾ པཱཝཾ ཀུསིནཱརཾཏི སབྦཙེཏིཡཱནི བྷིནྡིཏྭཱ དྷཱཏུཾ ཨལབྷིཏྭཱ པཊིཔཱཀཏིཀཱནི ཀཏྭཱ རཱཛགཧཾ གནྟྭཱ ཙཏསྶོ པརིསཱ སནྣིཔཱཏཱཔེཏྭཱ ཨཏྠི ཀེནཙི སུཏཔུབྦཾ ཨསུཀཊྛཱནེ དྷཱཏུནིདྷཱནཾཏི པུཙྪི. ཏཏྠེཀོ ཝཱིསཾཝསྶ སཏིཀོ ཐེརོ ཨསུཀཊྛཱནེ དྷཱཏུནིདྷཱནཾཏི ན ཛཱནཱམི, མཡ྄ཧཾ པན པིཏཱམཧཏྠེརོ མཡི སཏྟཝསྶིཀཱལེ མཱལཱཙངྒོཊཀཾ གཱཧཱཔེཏྭཱ ཨེཧི སཱམཎེར ཨསུཀགཙྪནྟརེ པཱསཱཎཐཱུཔོ ཨཏྠི. ཏཏྠ གཙྪཱམཱཏི གནྟྭཱ པཱུཛེཏྭཱ ཨིམཾ ཋཱནཾ ཨུཔདྷཱརེཏུཾ ཝཊྚཏི སཱམཎེརཱཏི ཨཱཧ. ཨཧཾ ཨེཏམེཝ ཛཱནཱམི མཧཱརཱཛཱཏི ཨཱཧ. རཱཛཱ ཨེཏདེཝ ཋཱནཾཏི ཝཏྭཱ གཙྪེ ཧརཱཔེཏྭཱ པཱསཱཎཐཱུཔཾ པཾསུཾཙ ཨཔནེཏྭཱ ཧེཊྛཱ སུདྷཱབྷཱུམིཾ ཨདྡས, ཏཏོ སུདྷཱ ཙ ཨིཊྛཀཱཡོ ཙ ཧརཱཔེཏྭཱ ཨནུཔུབྦེན པརིཝེཎཾ ཨོརུཡ྄ཧ སཏྟརཏནཝཱལིཀཾ ཨསིཧཏྠཱནི ཙ ཀཊྛརཱུཔཀཱནི སམྤརིཝཏྟནྟཱནི ཨདྡས, སོ ཡཀྑདཱསཀེ པཀྐོསཱཔེཏྭཱ བལིཀམྨཾ ཀཱརཱཔེཏྭཱཔི ནེཝ ཨནྟཾ པསྶནྟོ དེཝཏཱ ནམསྶམཱནོ ཨཧཾ ཨིམཱ དྷཱཏུཡོ གཧེཏྭཱ ཙཏུརཱསཱིཏིཝིཧཱརསཧསྶེ ནིདཧིཏྭཱ སཀྐཱརཾ ཀརོམི. མཱ མེ དེཝཏཱ ཨནྟརཱཡཾ ཀརོནྟཱུཏི ཨཱཧ, སཀྐོ དེཝརཱཛཱ ཙཱརིཀཾ ཙརནྟོ ཏཾ དིསྭཱ ཝིསྶཀམྨཾ ཨཱམནྟེཏྭཱ ཏཱཏ ཨསོཀདྷམྨརཱཛཱ དྷཱཏུཡོ ¶ ནཱིཧརིསྶཱམཱིཏི པརིཝེཎཾ ཨོཏིཎྞོ. གནྟྭཱ ཀཊྛརཱུཔཱནི ནཱིཧརཱཔེཧཱིཏི. སོ པཉྩཙཱུལཀགཱམདཱརཀཝེསེན གནྟྭཱ རཉྙོ པུརཏོ དྷནུཀཧཏྠོ ཋཏྭཱ ཧཱརེམི མཧཱརཱཛཱཏི ཨཱཧ, ཧར ཏཱཏཱཏི སརཾ གཧེཏྭཱ སནྡྷིམྷིཡེཝ ཝིཛ྄ཛྷི, སབྦཾ ཝིཔྤཀིརཱིཡིཏྠ, ཨཐ རཱཛཱ ཨཱཝིཉྫནེ [ཨཝིཉྩིནེ ཨིཏིཔིཀཏྠཙི] བནྡྷཀུཉྩིཀམུདྡིཀཾ གཎྷི, མཎིཀྑནྡྷཾ པསྶིཏྭཱ ཨནཱགཏེ དལི༹དྡརཱཛཱནོ ཨིམཾ མཎིཾ གཧེཏྭཱ དྷཱཏཱུནཾ སཀྐཱརཾ ཀརོནྟཱུཏི པཎྞེ ཨཀྑརཱནི དིསྭཱ ཀུཛ྄ཛྷིཏྭཱ མཱདིསཱནཾ པན རཱཛཱུནཾ [རཱཛཱནཾ ཨིཏིསབྦཏྠ] དལི༹དྡརཱཛཱཏི ཝཏྟུཾ ཨཡུཏྟཾཏི པུནཔྤུནཾ གྷཊེཏྭཱ དྭཱརཾ ཝིཝརིཏྭཱ ཨནྟོགེཧཾ པཝིཊྛོ ཨཊྛཱརསཝསྶཱདྷིཀཱནཾ དྭིནྣཾ ཝསྶསཏཱནཾ ཨུཔརི ཨཱརོཔིཏདཱིཔཱ ཏཐེཝ པཛྫལནྟི, ནཱིལུཔྤལཔུཔྥཱནི ཏཾཁཎཾཡེཝ ཨཱཧརིཏྭཱ ཨཱརོཔིཏཱནི ཝིཡ པུཔྥསནྠཱརོ ཏཾ ཁཎཾ སནྠཏོ ཝིཡ གནྡྷཱ ཏཾ མུཧུཏྟཾ པིཾསིཏྭཱ ཋཔིཏཱ ཝིཡ ཨཧེསུཾ. རཱཛཱ སུཝཎྞཔཊྚཾ གཧེཏྭཱ ཨནཱགཏེ པིཡདཱསོ ནཱམ ཀུམཱརོ ཚཏྟཾ ཨུསྶཱཔེཏྭཱ ཨསོཀོ ནཱམ དྷམྨརཱཛཱ བྷཝིསྶཏི, སོ ཨིམཱ དྷཱཏུཡོ ཝིཏྠཱརིཏཱ ཀརིསྶཏཱིཏི ཝཱཙེཏྭཱ དིཊྛོཧཾ ཨཡྻེན མཧཱཀསྶཔཏྠེརེནཱཏི ཝཏྭཱ ཝཱམཧཏྠཾ ཨཱབྷུཛིཏྭཱ དཀྑིཎཧཏྠེན ཨཔྥོཊེསི. སོ ཏསྨིཾ ཋཱནེ པརིཙརཎཀདྷཱཏུམཏྟམེཝ ཋཔེཏྭཱ སེསདྷཱཏུཡོ སབྦཱ གཧེཏྭཱ དྷཱཏུགྷརཾ པུབྦེ པིཧིཏནཡེནེཝ པིདཧིཏྭཱ སབྦཱ ཡཐཱ པཀཏིཡཱཡེཝ ཀཱརེཏྭཱ ཨུཔརིཔཱསཱཎཙེཏིཡཾ པཏིཊྛཱཔེཏྭཱ ཙཏུརཱསཱིཏིཡཱ ཝིཧཱརསཧསྶེསུ དྷཱཏུཡོ པཏིཊྛཱཔེསི. ཨཐེཀདིཝསཾ རཱཛཱ ཝིཧཱརཾ གནྟྭཱ བྷིཀྑུསཾགྷཾ ཝནྡིཏྭཱ ཨེཀམནྟེ ནིསིནྣོ ཡདི བྷནྟེ ཚནྣཝུཏིཀོཊིདྷནཾ ཝིསྶཛྫེཏྭཱ ཙཏུརཱསཱིཏིཝིཧཱརསཧསྶཱནིསཙེཏིཡཱནི ཀཱརཱཔེཏྭཱཔི ཨཧཾ ན དཱཡཱདོ. ཨཉྙོ ཀོ དཱཡཱདོཏི, པཙྩཡདཱཡཀོ ནཱམ ཏྭཾ མཧཱརཱཛ, ཡོ པན ཨཏྟནོ པུཏྟཉྩ དྷཱིཏརཉྩ པབྦཱཛེཏི, ཨཡཾ སཱསནེ དཱཡཱདོ ནཱམཱཏི ཨེཝཾ ཝུཏྟེ ¶ ཨསོཀོ རཱཛཱ སཱསནེ དཱཡཱདབྷཱཝཾ པཏྠཡམཱནོ ཨཝིདཱུརེ ཋིཏཾ མཧིནྡཀུམཱརཾ དིསྭཱ སཀྑིསྶསི ཏཱཏ ཏྭཾ པབྦཛིཏུཾཏི ཨཱཧ. ཀུམཱརོ པཀཏིཡཱ པབྦཛིཏུཀཱམོ རཉྙོ ཝཙནཾ སུཏྭཱ ཨཏིཝིཡ པཱམོཛྫཛཱཏོ པུབྦཛཱམི [པབྦཛྫཱམི ཨིཏིསབྦཏྠ] དེཝ. མཾ པབྦཱཛེཏྭཱ སཱསནེ དཱཡཱདོ ཧོཐཱཏི ཨཱཧ. ཏེན ཙ སམཡེན རཱཛདྷཱིཏཱ སཾགྷམིཏྟཱཔི ཏསྨིཾ ཋཱནེ ཋིཏཱ ཧོཏི. ཏཾ དིསྭཱ ཨཱཧ ཏྭམྤི ཨམྨ པབྦཛིཏུཾ སཀྑིསྶསཱིཏི, སཱདྷུ ཏཱཏཱཏི སམྤཊིཙྪི. རཱཛཱ པུཏྟཱནཾ མནཾ ལབྷིཏྭཱ པཧཊྛཙིཏྟོ བྷིཀྑུསཾགྷཾ ཨུཔསངྐམིཏྭཱ བྷནྟེ ཨིམེ དཱརཀེ པབྦཱཛེཏྭཱ མཾ སཱསནེ དཱཡཱདཾ ཀརོཐཱཏི. སངྒྷོ རཉྙོ ཝཙནཾ སམྤཊིཙྪིཏྭཱ ཀུམཱརཾ མོགྒལིཔུཏྟཏིསྶཏྠེརེན ཨུཔཛ྄ཛྷཱཡེན མཧཱདེཝཏྠེརེན ཨཱཙརིཡེན པབྦཛཱཔེསི [པབྦཛྫཱཔེསི ཨིཏིསབྦཏྠ]. མཛ྄ཛྷནྟིཀཏྠེརེན ཨཱཙརིཡེན ཨུཔསམྤཱདེསི, སོ ཨུཔསམྤདཱམཱལཀེཡེཝ སཧ པཊིསམྦྷིདཱཧི ཨརཧཏྟཾ པཱཔུཎི. སངྒྷམིཏྟཱཡཔི རཱཛདྷཱིཏཱཡ ཨཱཙརིཡཱཎཱི ཨཱཡུཔཱལཏྠེརཱི ནཱམ [ཨཙཱརིཡཱ ཨཱཡུཔཱལཏྠེརཱིནཱམ ཨིཏིསབྦཏྠ]. ཨུཔཛ྄ཛྷཱཡཱ དྷམྨཔཱལཏྠེརཱི ནཱམ ཨཧོསི. རཱཛཱ པན ཨནེཀཱཀཱརེན བུདྡྷསཱསནཾ སོབྷེཏྭཱ མོགྒལིཔུཏྟཏིསྶཏྠེརསྶ སཧཱཡེན [སཧཡྻེན. སཱཧཱཡྻེན. སཱཧཡྻེན ཨིཏིཔིཀཏྠཙི] སཊྛིསཧསྶམཏྟེ དུསྶཱིལེ ཏིཏྠིཡེ བུདྡྷསཱསནཱ ཨུཔྤབྦཱཛེཏྭཱ ཏཏིཡདྷམྨསཾགཱིཏིཾ ནིཊྛཱཔེསི. ཏསྨིཾ ཀིར སམཱགམེ བྷིཀྑུབྷིཀྑུཎིཡོ ཀིཏྟཀཱཏི [ཀིཏྟཀཱནཱིཏི ཨིཏིསབྦཏྠ], ཝུཏྟཉྷི.

༡༢.

ཏསྨིཾ སམཱགམེ ཨཱསུཾ, ཨསཱིཏིབྷིཀྑུཀོཊིཡོ;

ཨཧེསུཾ སཏསཧསྶཱནི, ཏེསུ ཁཱིཎཱསཝཱ ཡཏཱི.

༡༣.

ནཝུཏིསཏསཧསྶཱནི, ཨཧཱུ བྷིཀྑུཎིཡོ ཏཧིཾ;

ཁཱིཎཱསཝཱ སིཀྑུཎིཡོ, སཧསྶཾ ཨཱསུ ཏཱསུ ཙཱཏི.

ཨེཝཾ ¶ སོ ཨསོཀོ དྷམྨརཱཛཱ སཀལཛམྦུདཱིཔེ ཨགྒརཱཛཱ ཧུཏྭཱ བུདྡྷསཱསནཾ སོབྷེནྟོ ཝིཧཱསི. ཨཡཾ པནེཏྠ སངྑེཔོ, ཝིཏྠཱརོ པན མཧཱཝཾསེ ཝུཏྟོཏི. ཝུཏྟཉྷི.

༡༤.

སམྤུཎྞཏྟཱ ཨཡཾ ཏིསྶོ, ཙེཏནཱཡོ མདྷུཔྤདོ;

སབྦཏྠ སབྦདཱ སབྦ, སམྤཏྟིམབྷིསམྦྷུཎཱིཏི.

མཛ྄ཛྷིམོ པན ཝཱཎིཛོ ཨཏྟནོ པཱརཝཱདིདོསེན པརསམུདྡེ ལངྐཱཡཾ ནིབྦཏྟི. ཏསྶེཝཾ ཀཐཱཔཊིཔཱཊི ཝེདིཏབྦཱ. ཏམྦཔཎྞིདཱིཔེ ཀིར མུཊསཱིཝོ ནཱམ རཱཛཱ སཊྛིཝསྶཱནི རཛྫཾ ཀཱརེསི, ཏསྶ པུཉྙཔཉྙཱགུཎོཔེཏཱ ཨཉྙམཉྙཾ ཧིཏེསིནོ དས པུཏྟཱ ཨཧེསུཾ. དྭེ ཙ དྷཱིཏརོ. སབྦེ ཏེ སམགྒཱ སམྨོདམཱནཱ ཝསནྟི. ཨཐཱཔརསྨིཾ སམཡེ ཨམཙྩཱ མུཊསཱིཝརཉྙེ ཀཱལཀཏེ དེཝཱནཾཔིཡཏིསྶཀུམཱརཾ ཨབྷིསིཉྩིཾསུ, ཨབྷིསེཀསམཀཱལམེཝསྶ ཨནེཀཱནི ཨཙྪརིཡཱནི ཨཧེསུཾ. ཏཱནི པཀཱསེནྟཱ མཧཱཝཾསཀཐཱཙརིཡཱ ཨཱཧཾསུ.

༡༥.

དེཝཱནཾཔིཡཏིསྶོཏི, ཝིསྶུཏོ དུཏིཡོ སུཏོ;

ཏེསུ [ཨཧོསིམུཊསཱིཝསྶ, དསཔུཏྟེསུཔུཉྙཝཱ ཨིཏིཀཏྠཙི] བྷཱཏུསུ སབྦེསུ, པུཉྙཔཉྙཱདྷིཀོ ཨཧུ.

༡༦.

དེཝཱནཾཔིཡཏིསྶོ སོ, རཱཛཱསི པིཏུཨཙྩཡེ;

ཏསྶཱབྷིསེཀེན སམཾ, བཧཱུནཙྪརིཡཱནཧཱུ.

༡༧.

ལངྐཱདཱིཔམྷི སཀལེ, ནིདྷཡོ རཏནཱནིཙ;

ཨནྟོཋིཏཱནི ཨུགྒནྟྭཱ, པཐཝཱིཏལམཱརུཧུཾ.

༡༨.

ལངྐཱདཱིཔསམཱིཔམྷི, བྷིནྣནཱཝཱ གཏཱནི ཙ;

ཏཏྲ ཛཱཏཱནི ཙ ཐལཾ, རཏནཱནི སམཱརུཧུཾ.

༡༩.

ཚཱཏཔབྦཏཔཱདམྷི, ཏིསྶོ ཙ ཝེལུ༹ཡཊྛིཡོ;

ཛཱཏཱ རཐཔཏོདེན, སམཱནཱ པརིམཱཎཏོ.

༢༠.

ཏཱསུ ¶ ཨེཀཱ ལཏཱཡཊྛི, རཛཏཱབྷཱ ཏཧིཾ ལཏཱ;

སུཝཎྞཝཎྞཱ རུཙིརཱ; དིསྶནྟེཏཱ མནོརམཱ.

༢༡.

ཨེཀཱ ཀུསུམཡཊྛཱིཏུ; ཀུསུམཱནི ཏཧིཾཔན;

ནཱནཱནི ནཱནཱཝཎྞཱནི; དིསྶནྟེཏིཕུཊཱནི ཙ.

༢༢.

ཨེཀཱ སཀུཎཡཊྛཱི ཏུ, ཏཧིཾཔཀྑིམིགཱ བཧཱུ;

ནཱནཱ ཙ ནཱནཱཝཎྞཱ ཙ, སཛཱིཝཱཝིཡ དིསྶརེ.

༢༣.

ཧཡགཛརཐཱ མལཀྱཱ, ཝལཡངྒུལིཝེཋཀཱ ཙེཝ;

ཀཀུདྷཕལཱ པཱཀཏིཀཱ, ཨིཙྩེ ཏཱ ཨཊྛ ཛཱཏིཡཱ.

༢༤.

མུཏྟཱ སམུདྡཱ ཨུགྒནྟྭཱ; ཏཱིརེ ཝཊྚིཝིཡཊྛིཏཱ;

དེཝཱནཾཔིཡཏིསྶསྶ; སབྦཾ པུཉྙཝིཛམྦྷིཏཾ.

༢༥.

ཨིནྡནཱིལཾ ཝེལུ༹རིཡཾ, ལོཧིཏངྐམཎཱི ཙི མེ;

རཏནཱནི པནེ ཏཱནི, མུཏྟཱ ཏཱ ཏཱཙ ཡཊྛིཡོ;

སཏྟཱཧབྦྷནྟརེཡེཝ, རཉྙོ སནྟིཀམཱཧརུཾཏི.

ཏེན ཙ སམཡེན དེཝཱནཾཔིཡཏིསྶམཧཱརཱཛཱ ཙ ཨསོཀོ དྷམྨརཱཛཱ ཙ ཨདྡིཊྛསཧཱཡཱ ཧོནྟི. ཏསྨཱ སོ ཨེཏཱནི རཏནཱནི ཙ ཨཉྙཱནི བཧཱུནི ཨུཔཱཡནཱནི མམ སཧཱཡསྶ དེཐཱཏི དྷམྨཱསོཀམཧཱནརིནྡསྶ པཎྞཱཀཱརཏྠཱཡ པེསེསི. སོཔི ཏཾ དིསྭཱ པསཱིདིཏྭཱ པཉྩརཱཛཀཀུདྷབྷཎྜཱནི ཙ ཨཉྙཉྩ བཧུཔཎྞཱཀཱརཉྩ ཨབྷིསེཀཏྠཱཡ པེསེསི. མཡ྄ཧཾ སཧཱཡཾ ཨབྷིསེཀཾ ཀརོནྟཱུཏི. ན ཀེཝལཉྩེཏཾ ཨཱམིསཔཎྞཱཀཱརཾ. ཨིམཾ ཀིར དྷམྨཔཎྞཱཀཱརམྤི པེསེསི.

༢༦.

ཨཧཾ བུདྡྷཾཙ དྷམྨཾཙ; སཾགྷཾཙ སརཎཾ གཏོ;

ཨུཔསཀཏྟཾ ཝེདེསིཾ; སཀྱཔུཏྟསྶ སཱསནེ.

༢༧.

ཨིམེསུ ཏཱིསུ ཝཏྠཱུསུ; ཨུཏྟམེསུ ནརུཏྟམ;

ཙིཏྟཾ པསཱདཡིཏྭཱན, སདྡྷཱཡ སརཎཾ ཝཛཱཏི.

ཨམཙྩཱ ¶ པུན ལངྐམཱགམྨ རཱཛཱནཾ ཨབྷིསིཉྩིཾསུ, ཏེན ཁོ པན སམཡེན མོགྒལིཔུཏྟཏིསྶཏྠེརོ ཀཏྠ ནུཁོ ཨནཱགཏེ སཱསནཾ སུཔྤཏིཊྛིཏཾ བྷཝེཡྻཱཏི ཨུཔཔརིཀྑནྟོ པཙྩནྟིམེ སུཔྤཏིཊྛིཏཾ བྷཝིསྶཏཱིཏི ཉཏྭཱ ཏེ ཏེ ཐེརེ ཏཏྠ ཏཏྠ པེསེཏྭཱ མཧཱམཧིནྡཏྠེརཾ གནྟྭཱ ཏམྦཔཎྞིདཱིཔཾ པསཱདེཧཱིཏི ནིཡོཛེསི, སཀྐོ ཙ དེཝཱནམིནྡོ མཧཱམཧིནྡཏྠེརཾ ཨུཔསཾཀམིཏྭཱ ཀཱལཀཏོ བྷནྟེ མུཊསཱིཝོ རཱཛཱ. ཨིདཱནི དེཝཱནཾཔིཡཏིསྶམཧཱརཱཛཱ རཛྫཾ ཀཱརེཏི. སམྨཱསམྦུདྡྷེན ཙ ཏུམྷེ བྱཱཀཏཱ ཨནཱགཏེ མཧིནྡོ ནཱམ བྷིཀྑུ ཏམྦཔཎྞིདཱིཔཾ པསཱདེསྶཏཱིཏི. ཏསྨཱ ཏིཧ ཁོ བྷནྟེ ཀཱལོ དཱིཔཝརཾ གམནཱཡ, ཨཧམྤི སཧཱཡོ བྷཝིསྶཱམཱིཏི, ཐེརོ ཏསྶ ཝཙནཾ སམྤཊིཙྪིཏྭཱ ཨཏྟསཏྟམོ ཙེཏིཡཔབྦཏཝིཧཱརཏོ ཝེཧཱསཾ ཨུཔྤཏིཏྭཱ ཨནུརཱདྷཔུརསྶ པུརཏྠིམདིསཱཡ མིསྶཀཔབྦཏེ པཏིཊྛཧི, ཨིམཾ ཨེཏརཧི ཙེཏིཡཔབྦཏོཏིཔི སཉྫཱནནྟི. ཏདཱ ཏམྦཔཎྞིཡཾ ཨུསྶཝདིཝསོ ཧོཏི, རཱཛཱ ཚཎཾ ཀརོཐཱཏི ཨམཙྩེ ཨཱཎཱཔེཏྭཱ ཙཏྟཱལཱི༹སསཧསྶཔུརིསེཧི པརིཝཱརིཏོ ནགརམྷཱ ནིཀྑམིཏྭཱ མིསྶཀཔབྦཏཾ པཱཡཱསི མིགཝཾ ཀཱིལི༹ཏུཀཱམོ. ཨཐ ཏསྨིཾ པབྦཏེ ཨདྷིཝཏྠཱ ཨེཀཱ དེཝཏཱ རཉྙོ ཐེརེ དསྶེསྶཱམཱིཏི རོཧིཏམཱིགཝཎྞེན ཨཝིདཱུརེ ཏིཎཔཎྞཱནི ཁཱདམཱནཱ ཝིཡ ཙརཏི, རཱཛཱ ཨཡུཏྟཾ དཱནི པམཏྟཾ ཝིཛ྄ཛྷིཏུཾཏི ཛིཡཾ པོཋེསི, མིགོ ཨམྦཏྠལམགྒཾ གཧེཏྭཱ པལཱཡིཏུཾ ཨཱརབྷི, རཱཛཱ ཏཾ ཨནུབནྡྷནྟོ ཨམྦཏྠལམེཝ ཨབྷིརུཧི, མིགོཔི ཐེརཱནཾ ཨཝིདཱུརེ ཨནྟརདྷཱཡི, མཧིནྡཏྠེརོ རཱཛཱནཾ ཨཝིདཱུརེ ཨཱགཙྪནྟ མཾཡེཝ རཱཛཱ པསྶཏུ, མཱ ཨིཏརེཏི ཨདྷིཊྛཧིཏྭཱ ཏིསྶ ཏིསྶ ཨིཏོ ཨེཧཱིཏི ཨཱཧ, རཱཛཱ ཏཾ སུཏྭཱ ཙིནྟེསི. ཨིམསྨིཾ ཏམྦཔཎྞིདཱིཔེ ཛཱཏོ མཾ ཏིསྶོཏི ནཱམཾ གཧེཏྭཱ ཨཱལཔིཏུཾ སམཏྠོ ནཱམ ནཏྠི. ཨཡཾ པན ཚིནྣབྷིནྣཔཊདྷརོ བྷཎྜུཀཱསཱཝ ཝསནོ མཾ ནཱམེནཱ ལཔཏི, ཀོ ནུཁོ ཡཾ བྷཝིསྶཏི མནུསྶོ ཨམནུསྶོ ཝཱཏི. ཐེརོ ཨཱཧ.

༢༨.

སམཎཱ ¶ མཡཾ མཧཱརཱཛ, དྷམྨརཱཛསྶ སཱཝཀཱ;

ཏཝེཝ ཨནུཀམྤཱཡ, ཛམྦུདཱིཔཱ ཨིདྷཱགཏཱཏི.

རཱཛཱ དྷམྨཱསོཀནརིནྡེན པེསིཏསཱསནཱནུསཱརེན ཨནུསྶརམཱནོ ཨཡྻཱ ནུཁོ ཨཱགཏཱཏི ཏཱཝདེཝ ཨཱཡུདྷཾ ནིཀྑིཔིཏྭཱ ཨེཀམནྟཾ ནིསཱིདི སམྨོདནཱིཡཾ ཀཐཾ ཀཐཡམཱནོ སཱརཎཱིཡཾ [སམྨོདནཱིཡཾ-ཨིཏིསབྦཏྠ] ཀཐཾ ཀུརུམཱནོ. ཏསྨིཾ ཏཱནིཔི ཙཏྟཱལཱི༹སཔུརིསསཧསྶཱནི ཨཱགནྟྭཱ ཏཾ པརིཝཱརེསུཾ, ཏདཱ ཐེརོ ཨིཏརེཔི ཛནེ དསྶེསི, རཱཛཱ དིསྭཱ ཨིམེ ཀདཱ ཨཱགཏཱཏི པུཙྪི, མཡཱ སདྡྷིཾཡེཝ མཧཱརཱཛཱཏི. ཨིདཱནི པན ཛམྦུདཱིཔེ ཨཉྙེཔི ཨེཝརཱུཔཱ སམཎཱ སནྟཱིཏི. མཧཱརཱཛ ཨེཏརཧི ཛམྦུདཱིཔོ ཀཱསཱཝཔཛྫོཏོ ཨིསིཝཱཏཔཊིཝཱཏོ, ཏསྨིཾ.

༢༩.

ཏེཝིཛྫཱ ཨིདྡྷིཔྤཏྟཱ ཙ, ཙེཏོཔརིཉྙཀོཝིདཱ;

ཁཱིཎཱསཝཱ ཨརཧནྟོ, བཧཱུ བུདྡྷསྶ སཱཝཀཱཏི.

རཱཛཱ ཏཾ སུཏྭཱ པསནྣོ ཨཧོསི, ཨཐ ཐེརོ རུཀྑོཔམཱདིནཱ ཏསྶ པཉྙཱཝེཡྻཏྟིཡཾ ཉཏྭཱ དྷམྨཾ དེསེསི སནརཱམརེཧི སཱདྷུཀཱརཾ ཀཱརཡམཱནོ. ཏེན ཝུཏྠཾ.

༣༠.

པཎྜིཏོཏི ཝིདིཏྭཱན, ཙུལླཧཏྠིཔདོཔམཾ;

སུཏྟནྟཾ དེསཡཱི ཐེརོ, མཧཱིཔསྶ མཧཱམཏི [མཧཱིམཏཱི ཨིཏིཔིཀཏྠཙི].

དེསནཱཔརིཡོསཱནེ སོ སདྡྷིཾ ཏེཧི ནརེཧི ཙཏྟཱལཱི༹སསཧསྶེཧི སརཎེསུ པཏིཊྛཧཱིཏི. ཨཐསྶ རཱཛཱ སྭེ བྷནྟེ མམ གེཧེ བྷིཀྑཾ གཎྷཱཐཱཏི ཡཱཙིཏྭཱ གནྟྭཱ ནགརཉྩ རཱཛགེཧཉྩ ཨལངྐརིཏྭཱ ཐེརེ ནིསཱིདཱཔེཏྭཱ པཎཱིཏེནཱཧཱརེན པརིཝིསིཏྭཱ ཨནུལཱ༹དེཝིཔྤམུཁཱཧི པཉྩསཏཨིཏྠཱིཧི སདྡྷིཾ ཨེཀམནྟཾ ནིསཱིདི. ཨཐ ཐེརོ དྷམྨརཏན ཝསྶཾ ཝསྶཱཔེསི. ཏཏོ ¶ ཏཱ པཉྩསཏཨིཏྠིཡོ སོཏཱཔཏྟིཕལཾ པཱཔུཎིཾསུ. ཏཏོ ཧཏྠིསཱལཱཡཾ སཧསྶཾ, ནནྡནཝནེ སཧསྶཾཏི ཨེཝཾ དུཏིཡདིཝསེ ཨཌྜྷཏེཡྻཱནི པཱཎསཧསྶཱནི སོཏཱཔཏྟིཕལེ པཏིཊྛཱཔེསི. ཏཏིཡདིཝསེ ཨཌྜྷནཝཔྤམཱཎཾ པཱཎསཧསྶཾཏི ཨེཝཾ ཨནེཀསཏཱནཾ ཨནེཀསཧསྶཱནཾ ཨནེཀསཏ སཧསྶཱནཾ དྷམྨཱ མཏཾ པཱཡེསི. ཝུཏྟཉྷི.

༣༡.

མཧཱམཧིནྡསུརིཡོ, ལངྐཱཝེཧཱསམཛ྄ཛྷགོ;

བོདྷནེཡྻམྦུཛེ ཀཱསི, ཝིཀཱསཾ དྷམྨརཾསིནཱ.

༣༢.

མཧཱམཧིནྡཙནྡོ སོ, ལངྐཱཝེཧཱསམཛ྄ཛྷགོ;

བོདྷེསི དྷམྨརཾསཱིཧི, ཝེནེཡྻཀུམུདཱཀརེ.

༣༣.

མཧཱམཧིནྡམེགྷོ སོ, ཝསྶཾ དྷམྨམྦུཝུཊྛིཡཱ;

སཱདྷཱུནཾ ཙིཏྟབཱིཛེསུ, ཛནེསི ཀུསལངྐུརེཏི.

ཨཐ རཱཛཱ སུམནསཱམཎེརེན དྷམྨཱསོཀསྶ ཧཏྠཏོ སམྨཱསམྦུདྡྷཔརིབྷུཏྟཔཏྟཔཱུརདྷཱཏུཡོ ཙ སཀྐསྶ སནྟིཀཱ དཀྑིཎཀྑཀདྷཱཏུཾཙ ཨཱཧརཱཔེཏྭཱ [ཨཱཧཱརིཏྭཱ-ཨིཏིསབྦཏྠ] ཙེཏིཡཔབྦཏེ ཐཱུཔཾ ཨཱདིཾཀཏྭཱ སཀལལངྐཱདཱིཔེ ཡོཛནེ ཡོཛནེ ཐཱུཔཱནི ཀཱརེཏྭཱ དཀྑིཎཀདྷཱཏུཾ ནིདཧིཏྭཱ ཐཱུཔཱརཱམཐཱུཔཉྩ པཏིཊྛཱཔེསི. ཨཐ སངྒྷམིཏྟཱཡ ཐེརིཡཱ ཨཱནཱིཏཾ ཛཡམཧཱབོདྷིནོ དཀྑིཎམཧཱསཱཁཾ པཏིཊྛཱཔེཏྭཱ པཱུཛཾ ཀཱརེསི. སབྦོ པནེཏྠ ཀཐཱཝིཏྠརོ མཧཱཝཾསཏོ ཝེདིཏབྦོ.

༣༤.

པཱརཝཱདིཀདོསེན, ཛཱཏེཝཾ པརསཱགརེ;

པཏྟཱནུམོདནཱ ཨེཝཾ, ལངྐཱཡཾ ཨཱསི ཨིསྶརོ.

༣༥.

པཱཔམྤི ཨེཝཾ ཕལཏཱིཏི མནྟྭཱ,

ཉཏྭཱན པུཉྙསྶ ཕལཾ ཨིདནྟི;

བྷོ ཡོནིསོ ཀུབྦཐ པུཉྙཀམྨེ,

གནྟྭཱན ཡེ ཡཏྠ ན སོཙཡནྟཱིཏི.

ཏེབྷཱཏིཀམདྷུཝཱཎིཛཀཱནཾ ཝཏྠུཾ ཨཊྛམཾ.

༣༩. བོདྷིརཱཛདྷཱིཏུཡཱ [བོདྷིརཱཛདྷཱིཏཱཡ ཨིཏིསབྦཏྠ] ཝཏྠུམྷི ཨཡམཱནུཔུབྦཱིཀཐཱ

བྷགཝཏི པརིནིབྦུཏེ ལངྐཱཡཾ སཱསནེ སུཔྤཏིཊྛིཏེ ཏཏྠ ཧཀུརེལཱི༹ཏི ཨེཀོ གཱམོ ཨཧོསི, ཏཏྠེཀཱ དཱརིཀཱ གཱམཱདཱརིཀཱཧི སདྡྷིཾ ཏཏྠ ཏཏྠ ཀཱིལ༹ནྟཱི ཝིཧརཏི, ཏདཱ གཱམསམཱིཔེ མཧཱསོབྦྷཾ ཧོཏི. ཏཏྠེཀོ མརུཏྠརུཀྑོ སབྦདཱ པཱལི༹ཕུལློཝ ཏིཊྛཏི. མནུསྶཱ བུདྡྷཔཱུཛནཏྠཾ པུཔྥཱནི ཝིཙིཎནྟཱ ཨུདཀཾ ཨོགཧེཏྭཱ རུཀྑམབྷིརུཡ྄ཧ པུཔྥཱནི ཨོཙིཎནྟི, ཀུམཱརིཀཱ ཏེ དིསྭཱ མནུསྶཱ སུཁེན གནྟྭཱ པུཔྥཱནི ཨོཙིཎནྟཱུཏི ཨེཀཾ སུཀྑཔཱལིབྷདྡདཎྜཀཾ ཨཱཧརིཏྭཱ སེཏུཾ ཀཏྭཱ ཋཔེསི, ཏཏོ པཊྛཱཡ མནུསྶཱ ཏེནགནྟྭཱ པུཔྥཱནི ཨོཙིཎནྟི. ཨཐ སཱ ཏཏོ ཙུཏཱ ཏེནེཝ ཀུསལཀམྨེན ཛམྦུདཱིཔེ པཱཊལིཔུཏྟནགརེ སོམདཏྟརཉྙོ དྷཱིཏཱ ཧུཏྭཱ ནིབྦཏྟི, ཨུཏྟམརཱུཔདྷརཱ དེཝཙྪརཔཊིབྷཱགཱ ཨཧོསི. མཱཏཱཔིཏརོ པནསྶཱ བོདྷིརཱཛཀུམཱརིཀཱཏི ཝོཧརིཾསུ. པུབྦེ ཀཏསེཏུཨཱནུབྷཱཝེན ཏསྶཱ སུཝཱིརཀོ ནཱམེཀོ ཨཱཀཱསགཱམཱི སིནྡྷཝཔོཏཀོ ནིབྦཏྟི. རཱཛདྷཱིཏུཡཱ པན པིཏཱ བུདྡྷམཱམཀོ དྷམྨམཱམཀོ སངྒྷམཱམཀོ ཧུཏྭཱ མཧནྟཾ པུཉྙཾ པསཝནྟོ སིནྡྷཝཔོཏཀཾ དིསྭཱ པུཉྙཀརཎསྶ མེ སཧཱཡོ ལདྡྷོཏི ཏུཊྛམཱནསོ ཨསྶཾ ཨབྷིརུཧིཏྭཱ དིཝསསྶ ཏིཀྑཏྟུཾ གནྟྭཱ མཧཱབོདྷིཾ ¶ ཝནྡཏི. རཱཛདྷཱིཏཱ ནཾ དིསྭཱ པིཏུསནྟིཀཾ གནྟྭཱ ཨབྷིཎྷཾ ཏཱཏ ཀུཧིཾ གཙྪསཱིཏི པུཙྪི. རཱཛཱ ན ཀིཉྩི ཀཐེསི, ཨཐ སཱ པུནཔྤུནཾ པིཏརཾ ནིབནྡྷནྟཱི པུཙྪི. ཏཏོ རཱཛཱ ཏསྶཱཝི ཀརོནྟོ ཨེཝམཱཧ.

༡.

ཨམྷཱཀཾ བྷགཝཱ པུབྦེ, པཱུརེནྟོ དསཔཱརམཱི;

ཨདཱསི སཱིསརཏྟཀྑི, མཾསཾ ཛཱིཝིཏམེཝ ཙ.

༢.

པུཏྟདཱརེ ཙ རཛྫེ ཙ, པཏྭཱ [དཏྭཱ ཨིཏིཔིཀཏྠཙི] པཱརམིམཏྠཀཾ;

ཨནཔྤཀཔྤཀོཊཱིནཾ, ཁེཔེཏྭཱ ཀཔིལཝུཡེ.

༣.

སཀྐརཱཛཀུལེ ཛཱཏོ, ལོཀེ ཨཔྤཊིཔུགྒལོ;

སམྤཏྟཙཀྐཝཏྟིཏྟཾ, པཧནྟྭཱན ནརཱདྷིཔོ.

༤.

དིསྭཱ ནིམིཏྟེ ཙཏུརོ, ནིཀྑམྨ ཨབྷིནིཀྑམཾ;

བོདྷིམཱུལམུཔཱགམྨ, ནིསིནྣོ ཝཛིརཱསནེ.

༥.

སཧསྶབཱཧུཾ མཱཔེཏྭཱ, ནཱནཱཡུདྷསམཱཀུལཾ [ནཱནཱཝུདྷསམཱཀུལཾ-ཨིཏིསབྦཏྠ];

མཧཱབྷཱིཏིཀརཾ ཝེསཾ, ཀཱལ༹པབྦཏསཱདིསཾ.

༦.

མཱཔེཏྭཱན སམཱརུཡ྄ཧ, གིརིམེཁལཝཱརཎཾ;

མཱརསེནཾ སམཱནེཏྭཱ, ཨཱགཏཾ མཀརདྡྷཛཾ.

༧.

པཱརམིཏཱབལེན ཏཾ, མཱརསེནཾ པལཱཔིཡ;

ཡཏྠཱསཱིནོ ཀིལེསཱརི, སཧསྶཾ གྷཱཏཡཱི ཛིནོ.

༨.

ནཡནཾ སུཛལསེཀེཧི, སཏྟཱཧཾ ཛིནསེཝིཏཾ;

པཱུཛིཏཾ དེཝབྲཧྨེཧི, སིདྡྷོརགནརཱདིཧི;

ཝནྡིཏུཾ ཛཡབོདྷིཾཏཾ, གཙྪཱམི སཏཏཾ ཨཧཾ.

༩.

ཨུཔཱསཏི སདཱ གནྟྭཱ, ཡོ ནརོ བོདྷིཔཱདཔཾ;

གནྡྷོདདཱིཔདྷཱུཔཱདི, ནཱནཱཔཱུཛཱཧི སཱདྷུཀཾ.

༡༠.

ས ནརོ ནིརཱམཡོ ཧོཏི, པཙྩཏྟེ ཙ པརཏྠ ཙ;

པཱུཛིཏོ མཱནིཏོ ཧོཏི, དཱིགྷཱཡུ བལཝཱ སུཁཱི.

༡༡.

ཏདཏྠཾ པཏྠཡནྟེན, ཨཏྠཀཱམེན ཛནྟུནཱ;

ཨུཔཱསནཱིཡཾ སདྡྷཱཡ, ནིཙྩཾ ཏཾ བོདྷིཔཱདཔཾཏི.

ཏཾ སུཏྭཱ ཀུམཱརིཀཱ པཱིཏིཡཱ ཕུཊསརཱིརཱ པིཏརཾ ཝནྡིཏྭཱ ཨཧམྤི ཏཱཏ གཙྪཱམཱིཏི ཨཱཧ. རཱཛཱ པནསྶཱ ཨུཔདྡཝབྷཡེན གམནཾ ན ཨིཙྪི. ཏཏོ སཱ ཡཱཝཏཏིཡཾ པིཏརཾ ཡཱཙིཏྭཱ རཉྙཱ ཨནུཉྙཱཏཱ. ཏཏོ པཊྛཱཡ པིཏརཱ སདྡྷིཾ སིནྡྷཝམཱརུཡ྄ཧ བོདྷིཾ ཝནྡིཏུཾ སཏཏཾ གཙྪཏི. ཨཐཱཔརབྷཱགེ རཱཛཱ མརཎམཉྩེ ནིཔནྣོ ཙིནྟེསི. དྷཱིཏཱ མེ ནིརནྟརཾ བོདྷིཨུཔཊྛཱནཾགཙྪཏི, ཨེཏིསྶཱ ཨནཱགཏེ ཡཾཀིཉྩི བྷཡཾ ཨུཔྤཛྫམཱནཾ ཏཏོ ཨུཔྤཛྫཏི. ཏཏྠ མེ ཀིཾ ཀཱཏབྦནྟི. ཏཏོ སིནྡྷཝཾ པཀྐོསཱཔེཏྭཱ ཏསྶ ཀཎྞམཱུལེ མནྟེནྟོ ཨེཝམཱཧ, ཏཱཏ མམ དྷཱིཏཱ ཨབྷིཎྷཾ ཏཝ སཧཱཡཾ ཀཏྭཱ བོདྷིཾ ཝནྡིཏུཾ གཙྪཏི. ཏཏྠསྶཱ ཡཾཀིཉྩི བྷཡཾ བྷཝེཡྻ. ཏཾ ནཔྤཏིརཱུཔཾ. ཏཏྠ གམནཱགམནེ མམ དྷཱིཏརཾ རཀྑེཡྻཱསཱིཏི ཏསྶ དྷཱིཏརཾ པཊིཔཱདེཏྭཱ ཀཱལམཀཱསི. ཏཏོ རཱཛདྷཱིཏཱ པིཏུསརཱིརཀིཙྩཾ ཀཱརེཏྭཱ དིཝསསྶ ཏིཀྑཏྟུཾ ཨསྶམབྷིརུཡ྄ཧ བོདྷིཨུཔཊྛཱནཾ གཙྪཏི. མནུསྶཱ པནསྶཱ རཱུཔསམྤཏྟིཾ དིསྭཱ ཝིམྷིཏམཱནསཱ རཱཛཱརཧཾ ཝཏ ནོ ཨིདཾ པཎྞཱཀཱརཾ དིཊྛཾ. གནྟྭཱ རཉྙོ ཨཱཙིཀྑིསྶཱམ. ཨཔྤེཝ ནཱམ རཱཛཱ སོ ཀིཉྩི ནོ དདེཡྻཱཏི ཙིནྟེཏྭཱ རཉྙོ སནྟིཀཾ གནྟྭཱ ཝནྡིཏྭཱ ཋིཏཱ ཨེཝམཱཧཾསུ.

༡༢.

བོདྷིམཎྜཾ སམཱགམྨ, ཨབྷིཎྷཾ ཏུཊྛམཱནསཱ;

ཝནྡནྟཱི ཡཱཏི ཀཉྙེཀཱ, ཝིཛྫཱུཝ སིརིཡཱ ཛལཾ.

༡༣.

ནཱིལདྷམྤིལླབྷཱརཱ སཱ, ཝིསཱལཱཡཏལོཙནཱ;

སོཎྞདོལཱབྷསཝཎཱ, སཱམཱ སུབྷཔཡོདྷརཱ.

༡༤.

སཏརཾསཱིཧི སམྨིསྶ, སཉྩྱཱམྦུདསམཱདྷརཱ;

ཏུངྒནཱསཱ ནཱིལབྷམུ, ཧཱསབྷཱསཱ མནོརམཱ.

༡༥.

ཨཱིདིསཾ ¶ ནོ མཧཱརཱཛཱ [མཧཱརཱཛདིཊྛཔུབྦ ཨིཏིཔིཀཏྠཙི], དིཊྛཔུབྦཾ ཀུདཱཙནཾ;

ཨེཧི ཏསྶཱ སིརིཾདེཝ, བོདྷིམཎྜམྷི དཀྑསཱིཏི.

ཏཾ སུཏྭཱ རཱཛཱ སཝཎསཾསགྒེནེཝ ཏཱཡ པཊིབདྡྷཙིཏྟོ ཙཏུརངྒིནིཾསེནཾ གཧེཏྭཱ རཱཛདྷཱིཏརཾ བོདྷིཝནྡནཏྠཱཡ ཨཱགཏཀཱལེ བཧིཔཱཀཱརེ སེནཾ པརིཀྑིཔཱཔེཏྭཱ གཎྷཐེཏནྟི མནུསྶེ ནིཡོཛེསི. ཏཏོ སེནཱཔི ཏཾ གཧཎསཛྫཱ ཨཊྛཱསི. རཱཛདྷཱིཏཱ ཏེ དིསྭཱ སཱིགྷཾ སིནྡྷཝཾ ཨུཔསངྐམིཏྭཱ ཏསྶ པིཊྛིཡཾ ནིསིནྣཱ པཎྷིཡཱ སཉྙཾ ཨདཱསི. སོ ཏཾ གཧེཏྭཱ ཝེགེན ཨཱཀཱསཾ པཀྑནྡི. སཱ པན དུནྣིསིནྣབྷཱཝེན ཨསྶསྶ ཝེགཾ སནྡྷཱརེཏུམསཀྐོནྟཱི ཨསྶཔིཊྛིཏོ པརིགལི. སིནྡྷཝོ རཱཛདྷཱིཏརཾ པཏམཱནཾ དིསྭཱ རཱཛོཝཱདཾ སརམཱནོ ཝེགེནཱགནྟྭཱ ཏསྶཱ ཀེསེ ཌཾསིཏྭཱ ཨུཀྑིཔིཏྭཱ པཏམཱནཱཡ ཏསྶཱ པིཊྛིཾདཏྭཱ ནིསཱིདཱཔེཏྭཱ ཨཱཀཱསེན ཏཾ ནེཏྭཱ པཱཊལིཔུཏྟནགརེཡེཝ པཏིཊྛཱཔེསི [པཱཏལིཔུཏྟནགརེཡེཝཏཾ པཝིཋཱཔེསིཨིཏིཔིཀཏྠཙི].

༡༦.

ཏིརཙྪཱནགཏཱཔེཝཾ, སརནྟཱ ཨུཔཀཱརཀཾ;

ན ཛཧནྟཱིཏི མནྟྭཱན, ཀཏཉྙཱུ ཧོནྟུ [ཧོནྟིཔཱཎིནོ-ཨིཏིཔིཀཏྠཙི] པཱཎིནོཏི.

ཏཏོ པཊྛཱཡ སཱ པུཉྙཀམྨཾ ཀཏྭཱ སགྒཔརཱཡནཱ ཨཧོསཱིཏི.

༡༧.

ཡོ ཡཾ དུམིནྡཾཡཏིནནྡནེན;

སམྤཱུཛིཏཾ པཱུཛཡཏེ ས པཉྙོ;

ས བྷོགཝཱ ཧོཏི ཨནཱིཏིཀོ ཙ,

སབྦཏྠ སོ ཧོཏི པསཏྠརཱུཔོ.

བོདྷིརཱཛདྷཱིཏུཡཱ ཝཏྠུཾ ནཝམཾ.

༤༠. ཀུཎྜལིཡཱ ཝཏྠུམྷི ཨཡམཱནུཔུབྦཱིཀཐཱ

ལངྐཱདཱིཔེ ¶ རོཧཎཛཔདེ མཧཱགཱམོ ནཱམ ཨཧོསི, ཏཏྠ ཏིསྶཝིཧཱརཾ ནཱམ ཨནེཀསཏབྷིཀྑཱུཧི སམཱཀིཎྞཾ ཨནེཀཔརིཝེཎཔཏིམཎྜིཏཾ ཝིཧཱརཾ ཨཧོསི. ཏཏྠེཀོ ཏིསྶོ ནཱམ སཱམཎེརོ པཊིཝསཏི. སོ ཨེཀསྨིཾསམཡེ ཛནཔདཙཱརིཀཾ ཙརནྟོ པཱསཱཎཝཱཔིགཱམེ བྷིཀྑཾ ཙརིཏྭཱ ཡཱཔནམཏྟཾ བྷཏྟཾ སཔྤིནཱ སདྡྷིཾ ལབྷིཏྭཱ ནིཀྑམྨ གཱམདྭཱརཾ པཏྭཱ མཧཱགཱམཱབྷིམུཁོ གཙྪནྟོ མནུསྶེ ཨུདཀཕཱསུཀཊྛཱནཾ པུཙྪི. ཏེཧི བྷནྟེ ཏུམྷཱཀཾ ཨབྷིམུཁེ ཨཝིདཱུརཊྛཱནེ ཀཀུབནྡཀནྡརཾ ནཱམ སནྡམཱནསཱིཏལོདཀཾ དྷཝལཝཱལུཀཱཏལཾ ཏཏྠ ཏུམྷེ གནྟྭཱ ནཧཱཏྭཱ སཱིཏལཙྪཱཡཱཡ ཝཱལུཀཱཏལེ ནིསིནྣོ བྷཏྟཀིཙྩཾ ཀཏྭཱ གཙྪཐཱཏི ཝུཏྟེ སཱམཎེརོ ¶ སཱདྷཱུཏི ཝཏྭཱ ཏཏྠ གནྟྭཱ ཕཱསུཀཊྛཱནེ ནིསིནྣོ བྷཏྟཾ བྷུཉྫིཏུམཱརབྷི. ཏདཱ ཨེཀེན ཝནཀམྨིཀེན སདྡྷིཾཨརཉྙཾ གཏཱ ཨེཀཱ སུནཁཱི ཏསྨིཾ ཀནྡརེ ཨེཀསྨིཾ པབྦྷཱརཊྛཱནེ དཱརཀེ ཝིཛཱཡིཏྭཱ ཚཱཏཛ྄ཛྷཏྟཱ པཝེདྷམཱནགཏྟཱ དཱརཀཱནཾ སམཱིཔེནིཔནྣཱ སཱམཎེརསྶ པཏྟེ ཨཱཧཱརགནྡྷཾ གྷཱཡིཏྭཱ ནིཔནྣཊྛཱནཏོ ཝུཊྛཱཡ པཝེདྷམཱནཱ ཏསྶ སམཱིཔཾ ཨཱགམྨ ནངྒུཊྛཾ ཙཱལེནྟཱི ཨཊྛཱསི, སཱམཎེརོ ཏཾ དིསྭཱ ཀམྤིཏམཱནསོ ཨཏྟནོ བྷོཛནཏྠཱཡ ཝཊྚིཏཾ པཐམཱལོཔཾ ཏསྶཱ པུརཏོ ཋཔེསི, ཏཏོ སཱ སོམནསྶཱ ཏཾ བྷུཉྫི. ཏཾ དིསྭཱ ཏུཊྛོ པུནཔྤུནཾ ཨཱལོཔཾ ཀརོནྟོ ཏསྶཱ བྷཏྟཾ དཏྭཱ པཏྟཾ དྷོཝིཏྭཱ ཐཝིཀཱཡ པཀྑིཔིཏྭཱ ཨགམཱསི. ཏཏོ སཱ སུནཁཱི སཱམཎེརགཏེན པསཱདེན ཏཏོ ཙུཏཱ ཛམྦུདཱིཔེ དེཝཔུཏྟནགརེ རཱཛཱནཾ པཊིཙྩ ཏསྶ མཧེསིཡཱ ཀུཙྪིམྷི པཊིསནྡྷིཾ གཎྷིཏྭཱ དསམཱསཙྩཡེན མཱཏུཀུཙྪིཏོ ནིཀྑམི, ཨཐསྶཱ སིཁཱམངྒལདིཝསེ སམྤཏྟེ མཱཏཱཔིཏརོ པནསྶཱ ཀུཎྜལཱཝཊྚཀེསཏྟཱ ཀུཎྜལཱཏི ནཱམ མཀཾསུ. སཱ ཨནུཀྐམེན སོལ༹སཝསྶུདྡེསིཀཱ ཨཧོསི, ཏསྨིཾ ཀིར སམཡེ ཏིསྶོ སཱམཎེརོ མཧཱབོདྷིཾ ཝནྡིསྶཱམཱིཏི ནཱཝཾ ཨབྷིརུཡ྄ཧ ཛམྦུདཱིཔཾ གནྟྭཱ ཨནུཔུབྦེན དེཝཔུཏྟནགརཾ པཏྭཱ སུནིཝཏྠོ སུཔཱརུཏོ ཡུགམཏྟདསོ བྷིཀྑཱཡ ཙརནྟོ མཧཱཝཱིཐིཾ སམྤཱཔུཎི. རཱཛདྷཱིཏཱ སཱིཧཔཉྫརཾ ཨུགྒྷཱཊེཏྭཱ ཨནྟརཝཱིཐིཾ ཨོལོཀེནྟཱི བྷིཀྑནྟཾ སཱམཎེརཾ དིསྭཱ པུབྦསིནེཧཾ པཊིལབྷི, ཏསྨིཾཁཎེ ཏསྶཱ ཛཱཏིསྶརཉཱཎཾ ཨཧོསི. སཱ ཀིར པུབྦེ བྷིཀྑུཎཱི ཧུཏྭཱ པཎྞསཱུཙིཡཱ སདྡྷིཾ པོཏྠཀཉྩ པདཱིཔིཡཏེལཉྩ དཏྭཱ ཛཱཏིསྶརཱ བྷཝེཡྻཾཏི པཏྠནཾ ཋཔེསི, ཏཏོ སཱཛཱཏིཾ ཨནུསྶརནྟཱི སཱམཎེརེན ཨཏྟནོ ཀཏཱུཔཀཱརཾ དིཏྭཱ སོམནསྶཱ ནཾ པཀྐོསཱཔེཏྭཱ རཱཛགེཧེ ཨཱསནཾ པཉྙཱཔེཏྭཱ ཏཏྠ ནིསིནྣཾ ནཱནགྒརས བྷོཛནེན པརིཝིསིཏྭཱ ཨོནཱིཏཔཏྟཔཱཎིཾ སཱམཎེརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསིནྣཱ ཏེན སདྡྷིཾ སལླཔནྟཱི ཨེཝམཱཧ.

༡.

ན སཉྫཱནཱསི མཾ དྷཱིར, པུབྦེཧཾ ཏཝ དཱསིཀཱ;

ཏེནཱཧཾ སུཁིཏཱ ཨཱསིཾ, ཏསྨཱ ཏྭམསི ཨིསྶརོཏི.

ཏཾ སུཏྭཱ སཱམཎེརོ ཨཱཧ.

༢.

ནཏྠི མེ ཏཱདིསཱི དཱསཱི, ན སཉྫཱནཱམི ཏཾ ཨཧཾ;

ཀཱསི ཏྭཾ ཀསྶ ཝཱ དྷཱིཏཱ, ཏཾ མེ ཨཀྑཱཧི པུཙྪིཏཱཏི.

ཏཏོ སཱ ཏཾ སཱརཱཔེནྟཱི ཨཱཧ.

༣.

སཱརཱཔེམི ཏུཝཾ ཨཛྫ, ཡཐཱ ཛཱནཱསིམཾ ཨིསེ;

བུཛ྄ཛྷསྶུ བོདྷིཏོ དཱནི, མཡཱ ཛཱཏིཾསརནྟིཡཱ.

༤.

པཱསཱཎཝཱཔིགཱམམྷི, ཏམྦཔཎྞིམྷི རོཧཎེ;

བྷིཀྑིཏྭཱན ཏུཝཾ བྷནྟེ, ཡདཱ ཀཀུབནྡཀནྡརེ.

༥.

ནིསཱིདིཏྭཱན ཏྭཾ བྷཏྟཾ, བྷུཏྟཀཱལཾ སརིསྶསི;

ཏདཱཧཾ སུནཁཱི ཨཱསིཾ, ཝིཛཱཏཱ ལདྡྷགོཙརཱ.

༦.

དཱརཀེ ¶ ཁཱདིཏུཾ མཡ྄ཧ, མཱསནྣཱ ཁུདཔཱིལི༹ཏཱ;

པཝེདྷམཱནསབྦངྒཱ, ཨཊྛཱསིཾ ཏཝ སནྟིཀེ.

༧.

དིསྭཱ ཏཾ མཾ ཏདཱ བྷནྟེ, ཝེདྷམཱནཾ བུབྷུཀྑིཏཾ;

ཚིནྣབྷཏྟོ ཏུཝཾ ཧུཏྭཱ, མམཾ བྷཏྟེན ཏོསཡཱི.

༨.

ཏདཱཧཾ མུདུཙིཏྟེན, ཙིཏྟཾ ཏཡི པསཱདཡིཾ;

ཏེནཱཧཾ པུཉྙཀམྨེན, དུཏིཡེ ཨཏྟསམྦྷཝེ.

༩.

ཨིདྷ རཱཛཀུལེ ཛཱཏཱ, སབྦཀཱམསམིདྡྷིནཱི;

ཙིཏྟཔྤསཱདམཏྟེན, ལོཀནཱཐསྶ སཱསནེ.

༡༠.

ཏདཧུཔབྦཛིཏསྶཱཔི, ཨཱིདིསཱ ཧོནྟི སམྤདཱ;

ཀཱིདིསཾ ཧོཏི སམྦུདྡྷེ, པསཱདེན ཕལཾ ཨཧོ.

༡༡.

ཨཉྙཱནི པན ཀིཙྩཱནི, པཧཱཡཱཏྟཧིཏེ རཏོ;

ཨཏནྡིཏོ དིཝཱརཏྟིཾ, སརཱཏུ རཏནཏྟཡཾཏི.

ཨེཝཾ སཱམཎེརེན ཀཏཱུཔཀཱརཾ སཱརཱཔེཏྭཱ བྷནྟེ ཏཝ དཱསིཡཱ ཨནུགྒཧཾ པཊིཙྩ ཨིདྷེཝ ཝསཐཱཏི ནིམནྟིཏྭཱ ཏེན སམྤཊིཙྪིཏེ མཧནྟཾ ཝིཧཱརཾ ཀཱརཱཔེཏྭཱ སཱམཎེརཾ ཨཱདིཾ ཀཏྭཱ ཨནེཀབྷིཀྑུསཏེ ནིམནྟེཏྭཱ ཝིཧཱརེ ཝསཱཔེཏྭཱ སུལབྷཾ ཀཏྭཱ ཙཏུཔཙྩཡེཧི ཨུཔཊྛཱསི. སཱམཎེརོཔི སུནཁིཡཱ དིནྣདཱནཾ ཨནུསྶརིཏྭཱ ཏུཊྛོ བུདྡྷཱནུསྶཏིཾ མནསིཀརོནྟོ ན ཙིརེནཝ ཨརཧཏྟཾ པཏྭཱ ཏསྨིཾཡེཝ ཝིཧཱརེ ཝསནྟོ ཨཱཡུཔརིཡོསཱནེ ཏཏྠེཝ པརིནིབྦཱཡཱིཏི.

༡༢.

ཏིཡདྡྷེསུ ཏིལོཀསྨིཾ, ནཏྠི ཝཏྠུཏྟཡཾ ཝིནཱ;

སཏྟཱན མཉྙ མིཙྪཏྠ, དཱཡཀཾ སུརཔཱདཔཾ.

ཀུཎྜལིཡཱ ཝཏྠུཾ དསམཾ.

མཧཱསེནཝགྒོ ཙཏུཏྠོ.

ཨེཏྟཱཝཏཱ ཛམྦུདཱིཔུཔྤཏྟིཀཐཱ སམཏྟཱ.