📜

ཐུཔཝཾསོ ¶

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཡསྨིཾ སཡིཾསུ ཛིནདྷཱཏུཝརཱ སམནྟཱ

ཚབྦཎྞ རཾསི ཝིསརེཧི སམུཛྫལནྟཱ,

ནིམྨཱཡ ལོཀཧིཏཧེཏུ ཛིནསྶ རཱུཔཾ

ཏཾ ཐུཔམབྦྷུཏ ཏམཾ སིརསཱ ནམིཏྭཱ;

ཙཀྑཱམཧཾ སཀལ ལོཀ ཧིཏཱཝཧསྶ

ཐུཔསྶ སབྦ ཛན ནཎྡན ཀཱརཎསྶ,

ཝཾསཾ སུརཱསུར ནརིཎྡཝརེཧི ནིཙྩཾ

སམྤཱུཛིཏསྶ རཏནུཛྫལ ཐཱུཔིཀསྶ;

ཀིཉྩཱཔི སོ ཡཏིཛནེན པུརཱཏནེན

ཨཏྭཱཡ སཱིཧལ༹ཛནསྶ ཀཏོ པུརཱཔི,

ཝཱཀྐེན སིཧལ༹བྷཝེན’བྷིསངྑམཏྟཱ

ཨཏྠཾ ན སཱདྷཧཏི སབྦཛནསྶ སམྨཱ;

ཡསྨཱ ཙ མཱགདྷ ནིརུཏྟིཀཏོཔི ཐཱུཔ-

ཝཾསོ ཝིརུདྡྷནཡ སདྡ སམཱཀུལོ སོ,

ཝཏྟབྦམེཝ ཙ བཧུམྤི ཡཏོ ན ཝུཏྟཾ

ཏམྷཱ ཨཧཾ པུནཔི ཝཾསམི’མཾ ཝདཱམི;

སུཎཱཐ སཱདྷཝོ སབྦེ པརིཔུཎྞམནཱཀུལཾ

ཝུཙྩམཱནཾ མཡཱ སཱདྷུ ཝཾསཾ ཐཱུཔསྶ སཏྠུནོཏི;

ཏཏྠ ཐཱུཔསྶ ཝཾསཾ ཝཀྑཱམཱིཏི ཨེཏྠ ཏཐཱགཏོ ཨརཧཾ སམྨཱ སམྦུདྡྷོ ཐཱུཔཱརཧོ, པཙྩེཀབུདྡྷོ ཐཱུཔཱརཧོ, ཏཐཱགཏསྶ སཱཝཀོ ཐཱུཔཱརཧོ, རཱཛཱ ཙཀྐཝཏྟི ཐཱུཔཱརཧོཏི ཝཙནཏོ ཐཱུཔཱརཧཱནཾ བུདྡྷཱདཱིནཾ དྷཱཏུཡོ པཏིཊྛཱཔེཏྭཱ ཀཏ ཙེཏིཡཾ ཨབྦྷུནན ཏཊྛེན ¶ ཐཱུཔོཏི ཝུཙྩཏི, ཨིདྷ པན ཀཉྩན མཱལིཀ མཧཱཐཱུཔོ ཨདྷིཔྤེཏོ, སོ ཀསྶ དྷཱཏུཡོ པཏིཊྛཱཔེཏྭཱ ཀཏོཏི ཙེ? ཡོདཱིཔངྐརཱདཱིནཾ ཙཏུཝཱིསཏིཡཱ བུདྡྷཱནཾ སནྟིཀེ ལདྡྷཝྱཱཀརཎོ སམཏིཾསཔཱརམིཡོ པཱུརེཏྭཱ པརམཱབྷིསམྦོདྷིཾ པཏྭཱ དྷམྨཙཀྐཔྤཝཏྟནཏོ པཊྛཱཡ ཡཱཝ སུཧདྡ པརིབྦཱཛཀ ཝིནཡཱན སབྦ བུདྡྷཀིཙྩཱནི ནིཊྛཱཔེཏྭཱ ཨནུཔཱདིཡེསཱཡ ནིབྦཱནདྷཱཏུཡཱ པརིནིབྦུཏོ ཏསྶ བྷགཝཏོ ཨརཧཏོ སམྨཱ སམྦུདྡྷསྶ དྷཱཏུཡོ པཏིཊྛཱཔེཏྭཱ ཀཏོ ཨཡམེཏྠ སངྑེཔོ, ཝིཏྠཱརོ པན ཝེདིཏབྦོ?

༢. ཨིཏོ ཀིར ཀཔྤསཏསཧསྶཱདྷིཀཱནཾ ཙཏུནྣཾ ཨསངྑེཡྻཱནཾ མཏྠཀེ ཨམརཝཏཱི ནཱམ ནགརཾ ཨཧོསི. ཏཏྠ སུམེདྷོ ནཱམ བྲཱཧྨཎོ པཊིཝསཏི. སོ ཨཉྙཾ ཀམྨཾ ཨཀཏྭཱ བྲཧྨཎསིཔྤམེཝ ཨུགྒཎྷི ཏསྶ དཧརཀཱལེཡེཝ མཱཏཱཔིཏརོ ཀཱལམཀཾསུ. ཨཐསྶ རཱསིཝཌྜྷནཀོ ཨམཙྩོ ཨཱཡ པོཏྠཀཾ ཨཱཧརིཏྭཱ སུཝཎྞ རཛཏ མཎིམུཏྟཱདི བྷརིཏེ གབྦྷེ ཝིཝརིཏྭཱ ཨེཏྟཀཾ ཏེ ཀུམཱར མཱཏུ སནྟཀཾ, ཨེཏྟཀཾ པིཏུསནྟཀཾ, ཨེཏྟཀཾ ཨཡྻཀ པཡྻཀཱནནྟི ཡཱཝ སཏྟམཱ ཀུལཔརིཝཊྚཱ དྷཀཾ ཨཱཙིཀྑིཏྭཱ ཨེཏམྤཊིཛགྒཱཧཱིཏི ཨཱཧ. སོ སཱདྷཱུཏི སམྤཊིཙྪིཏྭཱ ཨགཱརཾ ཨཛ྄ཛྷཱཝསནྟོ ཨེཀདིཝསཾ ཙིནྟེསི.

༣. པུནབྦྷཝེ པཊིསཎྡྷིགཧཎཾ ཏཱམ དུཀྑཾ, ཏཐཱ ནིབྦཏྟ ནིབྦཏྟཊྛཱནེ སརཱིརབྷེདནཾ ཨཧཉྩ ཛཱནིདྷམྨོ ཛརཱདྷམྨོ ཝྱཱདྷིདྷམྨོ མརཎདྷམྨོ. ཨེཝཾ བྷཱུཏེན མཡཱ ཨཛཱཏི ཨཛརཾ ཨཝྱཱདྷིཾ ཨམརཎཾ སུཁཾ སཱིཏལཾ ནིབྦཱནཾ གཝེསིཏུཾ ཝཊྚཏཱིཏི ནེཀྑམྨཀཱརཎཾ ཙིནྟེཏྭཱ པུན ཙིནྟེསི ཨིམཾ དྷནཾ སབྦཾ མཡ྄ཧཾ པིཏུ པིཏཱམཧཱདཡོ པརལོཀཾ གཙྪནྟཱ ཨེཀ ཀཧཱཔཎམྤི གཧེཏྭཱ ནགཏཱ མཡཱ པན གཧེཏྭཱ གམནཀཱརཎཾ ཀཱཏུཾ ཝཊྚཏཱིཏི ནགརེ བྷེརིཾ ཙརཱཔེཏྭཱ མཧཱཛནསྶ དཱནཾ དཏྭཱ ཧིམཝནྟསྶ པཝིསིཏྭཱ ཏཱཔས པབྦཛྫཾ པབྦཛིཏྭཱ སཏྟཱཧབྦྷནྟརེཡེཝ ཨབྷིཉྙཱ ཙ སམཱཔཏྟིཡོ ཙ ནིབྦཏྟེཏྭ སམཱཔཏྟིསུཁེན ཝཱིཏིནཱམེསི.

ཏདཱ དཱིཔངྐརོ ནཱམ སཏྠཱ པརཡཱབྷིསམྦོདྷིཾ པཏྭཱ སཏྟ སཏྟཱཧཾ བོདྷིསམཱིཔེཙེཝ ཝིཏིནཱམེཏྭཱ སུནཎྡཱརཱམེ དྷམྨཙཀྐཾ པཝཏྟེཏྭཱ ཀོཊིསཏྟཱནཾ དེཝམནུསྶཱནཾ དྷམྨམཏཾ པཱཡེཏྭཱ ཙཱཏུདྡཱིཔིཀ མཧཱམེགྷོ ཝིཡ དྷམྨཝསྶཾ ཝསྶེནྟོ ཙཏཱུཧི ཁཱིཎཱསཡ སཏསཧསྶེཧི པརིཝུཏོ ཨནུཔུབྦེན ཙཱརཀཾ ཙརམཱནོ རམྨ ནགརཾ པཏྭཱ སུདསྶན མཧཱཝིཧཱརེ པཊིཝསཏི ཏདཱ རམྨནགརཝཱསིནོ སཔྤི ཕཎིཏཱདཱིནི བྷེསཛྫཱནི གཧེཏྭཱ པུཔྥ དྷཱུཔ གཎྡྷཧཏྠཱ ཡེན བུདྡྷོ ཏེནཔསངྐམིཏྭཱ སཏྠཱརཾ ཝནྡིཏྭཱ པུཔྥཱདཱིཧི པཱུཛེཏྭཱ ཨེཀམནྟཾ ནིསཱིདིཏྭཱ དྷམྨཾ སུཏྭཱ སྭཱཏནཱཡ བྷགཝནྟཾ ནིམནྟེཏྭཱ ཨུཊྛཱཡཱསནཱ དསབལཾ པདཀྑཱིནཾ ཀཏྭཱ པཀྐམིཾསུ.

ཏེ ¶ པུན དིཝསེ ཨསདིས མཧཱདཱནཾ སཛྫེཏྭཱ དསབལསྶ ཨཱགམན མགྒཾ སོདྷེནྟི. ཏསྨིཾ ཀཱལེ སུམེདྷཏཱཔསོ ཨཏྟནོ ཨསྶམ པདཏོ ཨུགྒནྟྭཱ རམྨནགརཝཱསཱིནཾ ཏེསཾ མནུསྶཱནཾ ཨུཔརིབྷཱགེན ཨཱཀཱསེན གཙྪནྟཱ ཏེ ཧཊྛཔཧཊྛེ མགྒཾ སོདྷེནྟེ དིསྭཱ ཀིནྣུ ཁོ ཀཱརཎནྟི ཙིནྟེནྟོ སབྦེསཾ པསྶནྟཱནཾཡེཝ ཨཱཀཱསཏོ ཨོརུ ཨེཀམནྟེ ཋཏྠཱཡཧ ཏེ མནུསྶེ པུཙྪི.’ཧམྦྷོ ཀསྶ པན ཨིམཾ མགྒཾ སོདྷེཐཱ’ཏི ཏེ ཨཱཧཾསུ བྷནྟེ སུམེདྷ ཏུམྷེ ཀིཾ ནཾ ཛཱནཱཐ, དཱིཔངྐརོ ནཱམ སཏྠཱ པརམཱབྷིསམྦོདྷིཾ པཏྭཱ པཝཏྟཝར དྷམྨཙཀྐོ ཛནཔད ཙཱརིཀཾ ཙརམཱནོ ཨནུཀྐམེན ཨམྷཱཀཾ ནགརཾ པཏྭཱ སུདསྶན མཧཱཝིཧཱརེ པཊིཝསཏི. མཡཾ ཏཾ བྷགཝནྟཾ ནིམནྟཡིམྷ ཏསྶ བྷགཝཏོ ཨཱགམནམགྒཾ སོདྷེམཱཏི. ཏཾ སུཏྭཱ སུམེདྷཔཎྜིཏོ ཙིནྟེསི. བུདྡྷོཏི ཁོ པནེས གྷོསོཔི དུལླབྷོ, པགེཝ བུདྡྷུཔྤཱདོ ཏེན ཧི མཡཱཔི ཨིམེཧི མནུསྶེཧི སདྡྷིཾ དསབལསྶ ཨཱགམནམགྒཾ སོདྷེཏུཾ ཝཊྚཏཱིཏི སོ ཏེ མནུསྶེ ཨཱཧ, སཙེ བྷོ ཏུམྷེ ཨིམཾ མགྒ བུདྡྷསྶ སོདྷེཐ - སཡཧམྤི ཨེཀཾ ཨོཀཱསཾ སམྤཊིཙྪཏྭཱ ཨཡཾ སུམེདྷཔཎྜིཏོ མཧིདྡྷིཀོ མཧཱནུབྷཱཝོཏི ཛཱནནྟཱ དུབྦིསོདྷནཾ ཨུདཀསམྦྷིནྣཾ ཨཏིཝིསམཾ ཨེཀཾ ཨོཀཱསཾ སལླཀྑེཏྭཱ ཨིམཾ ཧཀཱསཾ ཏུམྷེ སོདྷེཐ. ཨལངྐརོཐཱཏི ཨདཾསུ.

སུམེདྷཔཎྜིཏོ བུདྡྷཱརམྨཎ པཱིཏིཾ ཨུཔྤཱདེཏྭཱ ཙིནྟེསི. ཨཧམྤནིམཾ ཨོཀཱསཾ ཨིདྡྷཱིཡཱ པརམདསྶནཱིཡ ཀཱཏུཾ པཧོམི ཨེཝཾ ཀཏོ པན མཾ ན པརིཏོསེཏི ཨཛྫ པན མཡཱ ཀཱཡཝེཡྻཱཝཙྩཾ ཀཱཏུཾ ཝཊྚཏིཏི པཾསུཾ ཨཱཧརིཏྭཱ ཏཾ པཧེསཾ པཱུརེནི, ཏསྶ པན ཏསྨིཾ པདེསེ ཨསོདྷིཏེ ཛཡསུམན ཀུསུམ སདིསི ཝཎྞཾ དུཔཊྚཙཱིཝརཾ ཏིམཎྜལཾ པཊིཙྪཱདེཏྭཱ ནིཝཱསེཏྭཱ ཏསྶུཔརི ཡུཎྞམཱཔངྒེན ཀུསུམཀལཱཔཾ པརཀྑིཔནྟོ ཝིཡ ཝིཛྫུལླཏཱ སསྶཱིརཱིཀཾ ཀཱཡབཎྡྷནཾ བཎྡྷིཏྭཱ ཀནཀ གིརིསིཁར མཏྠཀེ ལཱཁཱརསཾ པརིསིཉྩནྟེ ཝིཡ སུཝཎྞཙེཏིཡཾ པཝཱལ༹ཛཱལེན པརིཀྑིཔནྟོ ཝིཡ སུཝཎྞངྒྷཀཾ རཏྟཀམྦལེན པཊིམུཉྩནྟོ ཝིཡ སརད སམཡ རཛནིཀརཾ རཏྟཝལཱཧཀེན པཊིཙྪཱདེནྟོ ཝིཡ ཙ ལཱཁཱརསེན ཏིནྣ ཀིཾ སུཀཀྶུམཝཎྞཾ རཏྟཝར པསུཀཱུལ ཙཱིཝརཾ པཱརིཔིཏྭཱ གཎྡྷཀཱུགིདྭ རཏོ ཀནཀགུཧཱཏོ སཱིཧོ ཝིཡ ནིཀྑམིཏྭཱ ཛལ༹བྷིཉྙཱནཾཡེཝ ཙཏཱུཧི ཁཱིཎཱསཝ སཏསཧསྶེཧི པརིཝུཏོ ཨམརགཎ པརིཝུཏོ དསསཏནཡནོ ཝིཡ བྲཧྨགཎཔརིཝུཏོ མཧཱ བྲཧྨཱ ཝིཡ ཙ ཨཔརིམིཏ སམཡ སམུཔཙིཏཱཡ ཀུསལབལཛནིཏཱཡ ཨནོཔམཡཱ བུདྡྷལཱིལཱཡ ཏཱརཱགཎཔརིཝུཏོ ¶ སརད སམཡ རཛནིཀརོ ཝིཡ གགནཏལཾ ཨལངྒཏ པཊིཡཏྟཾ མགྒཾ པཊིཔཛྫི.

༥. སུམེདྷཏཱཔསོཔི ཏེན ཨལངྐཏ པཊིཡཏྟེན མགྒེན ཨཱགཙྪནྟསྶ དཱིཔངྐརསྶ བྷགཝཏོ དྭཏྟིཾས ཝརལཀྑཎ པཏིམཎྜིཏཾ ཨསཏིཡཱ ཨནུབྱཉྫནེཧི ཨནུབྱཉྫིཏཾ བྱཱམཔྤཧཱཔརིཀྑེཔ སསྶཱིརཱིཀཾ ཨིཎྡནཱིལམཎིསཾཀཱསོཨཱཀཱསེ ནཱནཔྤཀཱརཱ ཝིཛྫུལླཏཱ ཝིཡ ཚབྦཎྞབུདྡྷརཾསིཡོ ཝིསྶཛྫེནྟཾ རཱུཔགྒཔྤཏྟཾ ཨཏྟབྷཱཝཾ ཨོལོཀེཏྭཱ ཨཛྫ མཡཱ དསབལསྶ ཛཱིཝིཏཔརིཙྩཱགཾ ཀཱཏུཾ ཝཊྚཏི མཱ བྷགཝཱ ཀལལེ ཨཀྐམི མཎིམཡཾ ལཀསེཏུཾ ཨཀྐམནྟོ ཝིཡ སདྡྷིཾ ཙཏཱུཧི ཁཱིཎཱསཝ སཏསཧསྶེཧི མམ པིཊྛིཾ ཨཀྐམནྟོ གཙྪཏུ ཏཾ མེ བྷཝིསྶཏི དཱིགྷརཏྟཾ ཧིཏཱཡ སུཁཱཡཱཏི ཀེསེ མོཙེཏྭཱ ཨཛིནཛཊཱ ཝཱཀཙཱིརཱནི ཀལེལ པཏྠརིཏྭཱ ཏཏྠེཝ ཀལལཔིཊྛེ ནིཔཛྫི ནིཔནྣོ ཙ སཙེ ཨཧཾ ཨིཙྪེཡྻཾ སབྦཀིལེསེ ཛྷཱཔེཏྭཱ སངྒྷནཝཀོ ཧུཏྭཱ རམྨནགརཾ པཝིསེཡྻཾ ཨཉྙཱཏཀཝེསེན པན མེ ཀིལེསེ ཎྡྷཔེཏྭཱ ནིབྦཱནཔཏྟིཡཱ ཀིཙྩཾ ནཏྠི, ཡཾནཱུནཱཧཾ དཱིཔངྐར དསབལོ ཝིཡ པརམཱབྷིསམྦོདྷིཾ པཏྭཱ དྷམྨནཱཝཾ ཨཱརོཔེཏྭཱ མཧཱཛནཾ སཾསཱརསཱགརཱ ཨུཏྟཱརེཏྭཱ པཙྪཱ པརིནིབྦཱཡེཡྻཾ. ཨིདཾ མེ པཏིརུཔནྟི ཙིནྟེཏྭཱ ཨཊྛདྷམྨེ སམོདྷཱནེཏྭཱ བུདྡྷབྷཱཝཱཡ ཨབྷིནཱིཧཱརཾ ཀཏྭཱ ནིཔཛྫ.

དཱིཔངྐརོཔི བྷགཝཱ ཨཱགཏྟྭཱ སུམེདྷཔཎྜིཏསྶ སཱིསསཱགེ ཋཏྭཱ ཀལལཔིཊྛེ ནིཔནྣཾ ཏཱཔསཾ དིསྭཱ ཨཡཾ ཏཱཔསོ བུདྡྷཏྠཱཡ ཨབྷིནཱིཧཱརཾ ཀཏྭཱ ནིཔནྟོ, ཨིཛ྄ཛྷིསྶཏི ནུ ཁོ ཨེཏསྶ པཏྠནཱ ཨུདཱཧུ ནོཏི ཨུཔདྷཱརེནྟོ - ཨནཱགཏེ གོཏམོ ནཱམ བུདྡྷོ བྷཝིསྶཏཱིཏི ཉཏྭཱ ཋིཏཀོཝ པརིས མཛ྄ཛྷེ ཝྱཱཀཱསི, པསྶཐ ནོ ཏུམྷེ བྷིཀྑཝེ ཨིམཾ ཨུགྒཏཔཾ ཏཱཔསཾ ཀལལཔིཊྛེ ནིཔནྣནྟི. ཨེཝཾ བྷནྟེ, ཨཡཾ ཡིདྡྷཏྠཱཡ ཨབྷིནཱིཧཱརཾ ཀཏྭཱ ནིཔནྣོ སམིཛ྄ཛྷིསྶཏི ཨིམསྶ པཏྠཏཱ ཀཔྤསཏ སཧསྶཱདྷིཀཱནཾ ཙཏུནྟཾ ཨསངྑེཡྻཱནཾ མཏྠཀེ གོཏམོ ནཱམ བུདྡྷོ བྷཝིསྶཏཱིཏི སབྦཾ ཝྱཱཀཱསི.

ཝུཏྟཉྷེཏཾ བུདྡྷཝཾསེ.

དཱིཔངྐརོ ལོཀཝིདཱུ - ཨཱཧུཏཱིནཾ པཊིགྒཧོ,

ཨུསྶཱིསཀེ མཾ ཋཏྭཱན - ཨིདཾ ཝཙནམབྲཝི;

པསྶཐ ཨིམཾ ཏཱཔསཾ - ཛཊིལ ཨུགྒཏཱཔསཾ ཨཔརིམེཡྻེ ཨིཏོ ཀཔྤེ - ཨཡཾ བུདྡྷོ བྷཝིསྶཏི. ཨཧུ ཀཔིལཝཧཡཱ རམྨཱ - ནིཀྑམིཏྭཱ ཏཐཱགཏོ. པདྷཱནཾ པདཧིཏྭཱན - ཀཏྭཱ དུཀྐར ཀཱརིཀཾ

བུདྡྷེ ལོཀེ - ཀེཙི.

ཨཛཔཱལ ¶ རུཀྑམཱུལསྨིཾ - ནིསཱིདིཏྭཱ ཏཐཱགཏོ,

ཏཏྠ པཱཡཱསམགྒཡ྄ཧ - ནེརཉྫརམུཔེཧེཏི;

ནེརཉྫརཱཡ ཏཱིརམྷི - པཱཡཱསཱདཱཡ སོ ཛིནོ,

པཊིཡཏྟཝརམགྒེན - བོདྷིམཱུལཉྷི ཨེཧཱིཏི;

ཏཏོ པདཀྑིཎཾ ཀཏྭཱ - བོདྷིམཎྜཾ ཨནུཏྟརོ

ཨསྶཏྠརཱཀྑམཱུལམྷི - ཝུཛ྄ཛྷིསྶཏི མཧཱཡསོ;

ཨིམསྶཛནིཀཱ མཱཏཱ - མཱཡཱ ནཱམ བྷཝིསྶཏི, པིཏཱ སུདྡྷོདནོ ནཱམ - ཨཡཾ ཧེསྶཏི གོཏམོ. ཨནཱསཝཱ ཝཱིཏརཱགཱ - སནྟཙིཏྟཱ སམཱཧིཏཱ,

ཀོལིཏོ ཨུཔཏིསྶོ ཙ - ཨགྒཱ ཧེསྶནྟི སཱཝཀཱ;

ཨཱནཎྡོ ནཱམུཔཊྛཱཀོ - ཨུཔཊྛིསྶཏཱི’མཾ ཛིནཾ;

ཁེམཱ ཨུཔྤལཝཎྞཱ ཙ - ཨགྒཱ ཧེསྶནྟི སཱཝིཀཱ;

ཨནཱསཝཱ ཝཱིཏརཱགཱ - སནྟཙིཏྟཱ སམཱཧིཏཱ;

བོདྷི ཏསྶ བྷགཝཏོ ཨསྶཏྠོཏི པཝུཙྩཏཱི’’ཏི.

ཨབྷིནཱིཧཱར ཀཐཱ

༦. ཏཏོ དཱིཔངྐརོ དསབལོ བོདྷིསཏྟཾ པསཾསིཏྭཱ ཨཊྛཧི པུཔྥ མུཊྛཱིཧི པཱུཛེཏྭཱ པདཀྑིཎཾ ཀཏྭཱ པཀྐཱམི. ཏེཔི ཙཏཱུསཏ སཧསྶ ཁཱིཎཱསཝཱ བོདྷིསཏྟཾ པུཔྥེཧི ཙ གཎྡྷེཧི ཙ པཱུཛེཏྭཱ པདཔྥཎཾ ཀཏྭཱ པཀྐམིཾསུ. དེཝམནུསྶཱ ཙ ཏཐེཝ པཱུཛེཏྭཱ ཝནྡིཏྭཱ ཨཐ ཁོ བོདྷིསཏྟོ དསབལསྶ ཝྱཱཀརཎཾ སུཏྭཱ བུདྡྷབྷཱཝཾ ཀརཏལགཏམིཝ མཉྙམཱནོ པམུདིཏ ཧདཡོ སབྦེསུ པཊིཀྐནྟེསུ སཡནཱ ཝུཊྛཱཡ པུཔྥརཱསི མཏྠཀེ པལླངྐཾ ཨཱབྷུཛིཏྭཱ ནིསིནྣོ བུདྡྷཀཱརཀདྷམྨེ ཨུཔདྷཱརེནྟོ ཀཧནནུ ཁོ བུདྡྷཀཱརཀ དྷམྨཱ, ཀིཾ ཨུདྡྷཾ ཨདྷོ དིསཱསུ ཝཱིདཱིཡཱསཱུཏི ཨནུཀྐམེན སཀལཾ དྷམྨདྷཱཏུཾ ཝིཙིནནྟོ པོརཱཎཀབོདྷིསཏྟེཧི ཨཱསེཝིཏ ནིསེཝིཏ པཋམཾ དཱནཔཱརམིཾ དིསྭཱ ཏཏྠ དལ༹བྷིསམཱདཱན ཀཏྭཱ ཨེཝཾ ཨནུཀྐམེན སཱིལ - ནེཀྑམྨ - པཉྙཱ - ཝཱིརིཡ - ཁནྟི - སཙྩ - ཨདྷིཊྛཱན - མེཏྟཱ - ཨུཔེཀྑཱ པཱརམིཡོཙ དིསྭཱ ཏཏྠདལ༹ྷ སམཱདཱནཾ ཀཏྭཱ དེཝཏཱཧི ཨབྷིཏྠུཏོ ཨཱཀཱསམབབྷུགྒནཏྭ ཧིམ ཧིམཝནྟམེཝ ཨགམཱསི.

དཱིཔངྐརོཔི སཏྠཱ ཙཏཱུཧི ཁཱིཎཱསཝ སཏསཧསྶེཧི པརིཝུཏོ རམྨནགརཝཱསཱིཧི པཱུཛཱིཡམཱནོ དེཝཏཱཧི ཨབྷིནཎྡིཡམཱནོ ཨལངྐཏ པཊིཡཏྟེན མགྒེན རམྨནགརཾ པཝིསིཏྭཱ པཉྙཏྟཝརབུདྡྷཱསནེ ནིསཱིདི. བྷིཀྑུསངྒྷོཔི ཨཏྟནོ ཨཏྟནོ པཏྟཱསནེ ནིསཱིདི. རམྨནགརཝཱསིནོཔི ཨུཔཱསཀཱ བུདྡྷཔམུཁསྶ བྷིཀྑུསངྒྷསྶ མཧཱདཱནཾ ¶ དཏྭཱ བྷགཝནྟཾ བྷུཏྟཱཝིཾ ཨོནཱིཏ པཏྟཔཱཎིཾ མཱལཱགཎྡྷཱདཱིཧི པཱུཛེཏྭཱ དཱནཱནུམོདནཾ སོཏུཀཱམཱ ནིསཱིདིཾསུ. བྷགཝཱཔི ཏེསཾ ཨནུམོདནཾ ཀརོནྟོ དཱནཀཐཾ སཱིལཀཐཾ སགྒིཀཐཾ ཀཱམཱནཾ ཨཱདཱིནཝཾ ཨོཀཱརཾ སཾཀིལེསཾ ནེཀྑམྨེ ཨཱནིསཾསཉྩ པཀཱསེཏྭཱ ཨམཏ པརིཡོསཱནཾ དྷམྨཀཐཾ ཀཐེསི.

ཨེཝཾ ཏསྶ མཧཛནསྶ དྷམྨཾ དེསེཏྭཱ ཨེཀཙྩེ སརཎེསུ ཨེཀཙྩེ པཉྩསུ སཱིལེསུ ཨེཀཙྩེ སོཏཱཔཏྟིཕལེ ཨེཀཙྩེ སཀདཱགཱམི ཕལེ ཨེཀཙྩེ ཨནཱགཱམཱི ཕལེ ཨེཀཙྩེ ཙཏུསུཔི ཕལེསུ ཨེཀཙྩེ ཏཱིསུ ཝིཛྫཱསུ ཨེཀཙྩེ ཚལ༹བྷིཉྙཱསུ ཨེཀཙྩེ ཨཊྛསུ སམཱཔཏྟིསུ པཏིཊྛཱཔེཏྭཱ ཨུཊྛཱཡཱསནཱ རམྨནགརཏོ ནིཀྑམིཏྭཱ སུདསྶན མཧཱཝིཧཱརམེཝ པཱཝིསི.

ཝུཏྟཉྷེཏཾ

‘‘ཏདཱ ཏེ བྷོཛཡིཏྭཱན - སསངྒྷཾ ལོཀནཱཡཀཾ,

ཨུཕགཚུཉྙཾ སརཎཾ ཏསྶ - དཱིཔངྐརསྶ སཏྠུནོ,

སརཎཱགམནེ ཀཉྩི - ནིཝསེཏི ཏཐཱགཏོ

ཀཉྩི པཉྩསུ སཱིལེསུ - སཱིལེ དསཝིདྷེ པརཾ;

ཀསྶཙི དེཏི སཱམཉྙཾ - ཙཏུརོ ཕལམུཏྟམེ,

ཀསྶཙི ཨསཐེ དྷམྨེ - དེཏི སོ པཊིསམྦྷིདཱ;

ཀསྶཙི ཝརསམཱཔཏྟིཡོ - ཨཊྛ དེཏི ནརཱསབྷོ,

ཏིསྶོ ཀསྶཙི ཝིཛྫཱཡོ - ཚལ༹བྷིཉྙ པཝེཙྪཏི;

ཏེན ཡོགེན ཛནཀཱཡཾ - ཨོཝདེཏི མཧཱམུནི,

ཏེན ཝིཏྠཱརིཀཾ ཨཱསཱི - ལོཀནཱཐསྶ སཱསནཾ;

མཧཱཧནཱུསབྷཀྑཎྡྷོ - དཱིཔངྐརསནཱམཀོ,

བཧཱུ ཛནེ ཏཱརཡཏི - པརིམོཙེཏི དུགྒཏིཾ;

བོདྷནེཡྻཾ ཛནཾ དིསྭཱ - སཏསཧསྶེཔི ཡོཛནེ

ཁཎེན ཨུཔགནྟྭཱན - བོདྷེཏི ཏཾ མཧཱམུནཱི’’ཏི;

ཨིཏི སོ དཱིཔངྐརོ སཏྠཱ ཝསྶསཏ སཧསྶཱནི ཋཏྭཱ སཏྟཱནཾ བཎྡྷནམོཀྑཾ ཀུརུམཱནོ སབྦབུདྡྷཀིཙྩཱནི ནིཊྛཱཔེཏྭཱ ནཎྡཱརཱམེ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡིནཧེཝ དྷཱཏུཡོ ཏསྶ - སཏྠུནོ ཝིཀིརིཾསུ ཏཱ. ཋིཏཱ ཨེཀགྷནཱ ཧུཏྭཱ - སུཝཎྞཔཊིམཱ ཝིཡ སཀལཛམྦུདཱིཔཝཱསིནོ མནུསྶཱ གྷནཀོཊིཊིམསུཝཎྞཊྛིཀཱཧི ཨེཝཾ ཚཏྟིཾས ཡོཛནིཀཾ མཧཱཐཱུཔམཀཾསུ ནིཝེདསི - ཀེཙི.

ཏེན ¶ ཝུཏྟཾ

‘‘དཱིཔངྐརོ ཛིནོ སཏྠཱ - ནཎྡཱརཱམམྷི ནིབྦུཏོ,

ཏཏྠེཝ ཏསྶ ཛིནཐཱུཔོ - ཚཏྟིཾསུབྦེདྷ ཡོཛནོ‘‘;

‘‘པཏྟ ཙཱིཝར པརིཀྑཱར - པརིབྷོགཉྫ སཏྠུནོ,

བོདྷིམཱུལེ ཏདཱ ཐཱུཔོ - ཏཱིཎི ཡོཛནམུགྒཏོ’’ཏི;

༧. དཱིཔངྐརསྶ པན བྷགཝཏོ ཨཔརབྷཱགོ ཨེཀཾ ཨསངྑེཡྻཾ ཨཏིཀྐམིཏྭཱ ཀོཎྜཉྙོ ནཱམ སཏྠཱ ཨུདཔཱདི. ཏདཱ བོདྷིསཏྟོ ཝིཛིཏཱཝི ནཱམ ཙཀྐཝཏྟི ཧུཏྭཱ ཀོཊིསཏསཧསྶ སངྑསྶ བུདྡྷ པམུཁསྶ བྷིཀྑུསངྒྷསྶ མཧཱདཱནཾ ཨདཱཡི སཏྠཱ བོདྷིསཏྟཾ བུདྡྷོ བྷཝིསྶཏཱིཏི ཝྱཱཀརིཏྭཱ དྷམྨཾ དེསེསི སོ སཏྠུ དྷམྨཾཀཐཾ སུཏྭཱ རཛྫི ནིཡྻཱདེཏྭཱ པབྦཛི སོ ཏཱིཎི པིཊཀཱནི ཨུགྒཧེཏྭཱ ཨཊྛ སམཱཔཏྟིཡོ པཉྩཨབྷིཉྙཱཡོཙ ཨུཔྤཱདེཏྭཱ ཨཔརིཧཱིནཛ྄ཛྷཱནོ བྲཧྨལོཀེ ནིབྦཏྟི. སོཔི བུདྡྷོ ཝསྶསཏསཧསྶཱནི ཋཏྭཱ སབྦབུདྡྷཀིཙྩཱནི ནིཊྛཱཔེཏྭཱ ཙཎྡཱརཱམེ པརིནིབྦཱཡི ཏསྶཱཔི བྷགཝཏོ དྷཱཏུཡཱ ན ཝིཀིརིཾསུ སཀལཛམྦུདཱིཔཝཱསིནོ མནུསྶཱ སམཱགནྟྭཱ སཏྟཡོཛནིཀཱསཏྟརཏནམཡཾ ཧརིཏཱལམནོསིལཱཡམཏྟིཀཱཀིཙྩཾ ཏེལ སཔྤཱིཧི ཨུདཀཀིཙྩཾ ཀཏྭཱ ཙེཏིཡཾ ནིཊྛཱཔེསུཾ

ཀོཎྜཉྙེ ཀིར སམྦུདྡྷོ - ཙཎྡཱརཱམེ མནོརམེ,

ནིབྦཱཡི ཙེཏིཡོ ཏསྶ - སཏྟཡོཛནིཀོ ཀཏོཏི;

ཏསྶ ཨཔརབྷཱགེ ཨེཀཾ ཨསཾངྑཡྻཾ ཨཏིཀྐམིཏྭཱ ཨེཀསྨིཾཡེཝ ཀཔྤེ ཙཏྟཱརོ བུདྡྷཱ ཨུཔྤཛྫིཾསུ - མངྒལོ སུམནོ རེཝཏོ ཡོཧིཏོཏི. མངྒལསྶ པན བྷགཝཏོ ཀཱལེ བོདྷིསཏྟོ སུརུཙི ནཱམ བྲཱཧྨཎོ ཧུཏྭཱ སཏྠཱརཾ ནིམནྟེསྶཱམཱིཏི ཨུཔསངྐམིཏྭཱ མདྷུར དྷམྨཾཀཏཾ སུཏྭཱ སྭཱཏནཱཡ ནིམནྟེཏྭཱ ཀོཊིསཏསཧསྶ སངྑསྶ བུདྡྷཔམུཁསྶ སངྒྷསྶ སཏྟཱཧཾ གཝཔཱནཾ ནཱམ དཱནམདཱསི སཏྠཱ ཨནུམོདནཾ ཀརོནྟོ མཧཱཔུརིསཾ ཨཱམནྟེཏྭཱ ཏྭཾ ཀཔྤསཏསཧསྶཱདྷིཀཱནཾ དྭནྣཾ ཨསངྑེཡྻཱནཾ མཏྠཀེ གོཏམོ ནཱམ བུདྡྷོ བྷཝིསྶསཱིཏི ཝྱཱཀཱསི མཧཱཔུརིསོ ཝྱཱཀརཎཾ སུཏྭཱ ཨཧཾ ཀིར བུདྡྷོ བྷཝིསྶཱམི ཀོ མེ གྷརཱཝཱསེན ཨཏྠོ པབྦཛིསྶམཱིཏི ཙིནྟཏྭཱ ཏཐཱརཱུཔཾ སམྤཏྟིཾ ཀེལ༹པིཎྜཾ ཝཱིཡ པཧཱཡ སཏྠུ སནྟིཀེ པབྦཛིཏྭཱ བུདྡྷཝཙནཾ ཨུགྒཎྷིཏྭཱ ཨབྷིཉྙཱ ཙ སམཱཔཏྟིཡོ ཙ ནིབྦཏྟེཏྭཱ ཨཱཡུཔརིཡོསཱནེ བྲཧྨལོཀེ ནིབྦཏྟི, ཏསྨིམྤི བུདྡྷེ པརིནིབྦུཏེ དྷཱཏུཡོ ན ཝིཀིརིཾསུ, ཛམྦུདཱིཔཝཱསིནོ པུབྦེ ཝིཡ ཏིཾསཡོཛནཀཾ ཐཱུཔམཀཾསུ.

ཏེན ¶ ཝུཏྟཾ ‘‘ཨུཡྻཱནེ ཝསབྷོ ནཱམ - བུདྡྷོ ནིབྦཱཡི མངྒལོ, ཏཏྠེཝ ཏསྶ ཛིནཐཱུཔོ - ཏིཾསཡོཛནམུགྒིཏོ’’ཏི.

ཏསྶ ཨཔརབྷཱགེ སུམནོ ནཱམ སཏྠཱ ཨུདཔཱདི ཏདཱ མཧཱསཏྟོ ཨཏུལོ ནཱམ ནཱགརཱཛཱ ཧུཏྭཱ ནིབྦཏྟི-མཧིདྡྷིཀོ མཧཱནུབྷཱཝོ སོ བུདྡྷོ ཨུཔྤནྣོཏི སུཏྭཱ ཉཱཏིསངྒྷཔརིཝུཏོ ནཱགབྷཝནཱ ནིཀྑམིཏྭཱ ཀོཊིསཏསཧསྶ བྷིཀྑུཔརིཝཱརསྶ ཏསྶ བྷགཝཏོ དིབྦཏུརིཡེཧི ཨུཔཧཱརཾ ཀཱརེཏྭཱ མཧཱདཱནཾ པཝཏྟེཏྭཱ པཙྩེཀཾ དུསྶཡུགཱནི དཏྭཱ སརཎེསུ པཏིཊྛཱསི སོཔི ནཾ སཏྠཱ ཨནཱགཏེ བུདྡྷོ བྷཝིསྶསཱིཏི ཝྱཱཀཱསི ཏསྨིམྤི བུདྡྷེ པརིནིབྦུཏེ དྷཱཏུཡོ ན ཝིཀིརིཾསུ ཛམྦུདཱིཔཝཱསནོ པུབྦེ ཝིཡ ཙཏུཡོཛནིཀཾ ཐཱུཔམཀཾསུ.

ཏེན ཝུཏྟཾ

‘‘སུམནོ ཡསདྷརོ - བུདྡྷོ ཨགྒཱརཱམམྷ ནིབྦུཏོ,

ཏཏྠེཝ ཏསྶ ཛིནཐཱུཔོ - ཙཏུཡོཛནམུགྒཏོ’’ཏི;

ཏསྶ ཨཔརབྷཱགེ རེཝཏོ ནཱམ སཏྠཱ ཨུདཔཱདི ཏདཱ བོདྷིསཏྟོ ཨཏིདེཝོ ནཱམ བྲཱཧྨཎོ ཧུཏྭཱ སཏྠུ དྷམྨདེསན སུཏྭཱ སརཎེསུ པཏིཊྛཱཡ སིརསི ཨཉྫལིཾ པགྒཧེཏྭཱ ཏསྶ སཏྠུནོ ཀིལེསཔྤཧཱནེ ཝཎྞཾ ཝཏྭཱ ཨུཏྟརཱསངྒྷེན པཱུཛམཀཱསི. སོཔི ནཾ སཏྠཱ བུདྡྷོ བྷཝིསྶཏིཏི ཝྱཱཀཱསི ཏསྨིཾ པན བུདྡྷེ པརིནིབྦུཏེ དྷཱཏུཡོ ཝིཀིརིཾསུ.

ཏེན ཝུཏྟཾ

‘‘རེཝཏོ པཝརོ བུདྡྷོ - ནིབྦུཏོ སོ མཧཱཔུརེ,

དྷཱཏུ ཝིཏྠཱརིཀཾ ཨཱསཱི - ཏེསུ ཏེསུ པདེསཏོ’’ཏི;

ཏསྶ ཨཔརབྷཱགེ སོབྷིཏོ ནཱམ སཏྠཱ ཨུདཔཱདི ཏདཱ བོདྷིསཏྟོ ཨཛིཏོ ནཱམ བྲཱཧྨཎོ ཧུཏྭཱ སཏྠུ དྷམྨདེསནཾ སུཏྭཱ སརཎེསུ པཏིཊྚཱཡ བུདྡྷཔམུཁསྶ སངྒྷསྶ མཧཱདཱནཾ ཨདཱསི. སོཔི ནཾ སཏྠཱ བུདྡྷོ བྷཝིསྶསཱིཏི ཝྱཱཀཱསི ཏསྶཱཔི བྷགཝཏོ དྷཱཏུཡོ ཝིཀིརིཾསུ.

ཏེན ཝུཏྟཾ

‘‘སོབྷིཏོ ཝརསམྦུདྡྷོ - སཱིཧརཱམམྷི ནིབྦུཏོ,

དྷཱཏུཝིཏྠཱརིཀཾ ཨཱསཱི - ཏེསུ ཏེསུ པདེསཏོ’’ཏི;

ཏསྶ ཨཔརབྷཱགེ ཨེཀམསངྑེཡྻཾ ཨཏིཀྐམིཏྭཱ ཨེཀསྨིཾཡེཝ ཀཔྤེ ཏཡོ བུདྡྷཱ ནིབྦཏྟིཾསུ - ཨནོམདསྶི པདུམོ ནཱརདོཏི. ཨནོམདསྶིསྶ བྷགཝཏོ ཀཱལེ བོདྷིསཏྟོ ཨེཀོ

༡. ཡསཝརོ དྷཱིརོ - ཀེཙི.

ཡཀྑ ¶ སེནཱཔཏི ཨཧོསི མཧིདྡྷིཀོ མཧཱནུབྷཱཝོ ཨནེཀ ཀོཊིསཏསཧསྶཱནཾ ཡཀྑཱནཾ ཨདྷིཔཏི. སོ བུདྡྷོ ཨུཔྤནྣོཏི སུཏྭཱ ཨཱགནྟྭཱ བུདྡྷཔམུཁསྶ སངྒྷསྶ མཧཱདཱནམདཱསི སཏྠཱཔི ཏཾ ཨནཱགཏེ བུདྡྷོ བྷཝིསྶསཱིཏི ཝྱཱཀཱསི. ཨནོམདསྶིམྷི པན བྷགཝཏི པརིནིབྦུཏེ དྷཱཏུཡོ ན ཝིཀིརིཾསུ ཛམྦུདཱིཔཝཱསིནོ པཉྩཝཱིསཡོཛནཀཾ ཐཱུཔཾ ཀརིཾསུ

ཏེན ཝུཏྟཾ

‘‘ཨནོམདསྶི ཛིནོ སཏྠཱ - དྷམྨཱརཱམམྷི ནིབྦུཏོ,

ཏཏྠེཝ ཏསྶ ཛིནཐཱུཔོ - ཨུབྦེདྷཱ པཎྞུཝཱིསཏཱི’ཏི;

ཏསྶ ཨཔརབྷཱགེ པདུམོ ནཱམ སཏྠཱ ཨུདཔཱདི ཏཐཱགཏེ ཨགཱམཀཱརཉྙེ ཝིཧརེནྟཱ བོདྷིསཏྟོ སཱིཧོ ཧུཏྭཱ སཏྠཱརཾ ནིརོདྷསམཱཔཏྟིཡཱ སམཱཔནྣཾ དིསྭཱ པསནྣཙིཏྟོ ཝནྡིཏྭཱ པདཀྑིཎཾ ཀཏྭཱ པཱིཏིསོམནསྶཛཱཏོ ཏིཀྑཏྟུཾ སཱིཧནཱདཾ ནདིཏྭཱ སཏྟཱཧཾ བུདྡྷཱརམྨཎཾ པཱིཏིཾ ཨཝིཛཧིཏྭཱ པཱིཏིསུཁེནེཝ གོཙརཱཡ ཨཔཀྐམིཏྭཱ ཛིཝིཏཔརིཙྩཱགཾ ཀཏྭཱ པཡིརུཔཱསམཱནོ ཨཊྛཱསི སཏྠཱ སཏྟཱཧཙྩཡེན ནིརོདྷཱ ཝུཊྛིཏོ སཱིཧཾ ཨོལོཀེཏྭཱ བྷིཀྑུསངྒྷེཔི ཙིཏྟཾ པསཱདེཏྭཱ སངྒྷཾ ཝནྡིསྶཏཱི‘‘ཏི བྷིཀྑུསངྒྷོ ཨཱགཙྪཏཱུཏི ཙིནྟེསི བྷིཀྑུ ཏཱཝདེཝ ཨཱགམིཾསུ སཱིཧོ སངྒྷེ ཙིཏྟཾ པསཱདེསི. སཏྠཱ ཏསྶ མནཾ ཨོལོཀེཏྭཱ ཨནཱགཏེ བུདྡྷོ བྷཝིསྶཏཱིཏི ཝྱཱཀཱསི ཏསྶ པན བྷགཝཏོ དྷཱཏུཡོ ཝིཀིརིཾསུ.

ཏེན ཝུཏྟཾ

‘‘པདུམོ ཛིནཝརོ སཏྠཱ - དྷམྨཱརཱམམྷི ནིབྦུཏོ,

དྷཱཏུ ཝིཏྠཱརིཀཾ ཨཱསི - ཏེསུ ཏེསུ པདེསཏོ’’ཏི;

ཏསྶ ཨཔརབྷཱགེ ནཱརདོ ནཱམ སཏྠཱ ཨཧོསི ཏདཱ བོདྷིསཏྟོ, ཨིསིཔབྦཛྫཾ པབྦཛིཏྭཱ པཉྩསུ ཨབྷིཉྙཱསུ ཨཊྛསུཙ སམཱཔཏྟིསུཙིཎྞཝསཱི ཧུཏྭཱ བུདྡྷཔམུཁསྶ སངྒྷསྶ མཧཱདཱནཾ དཏྭཱ ལོཧིཏ ཙཎྡནེན པཱུཛམཀཱསི སོཔི ནཾ ཨནཱགཏོ བུདྡྷོ བྷཝིསྶཏཱིཏི ཝྱཱཀཱསི ནཱརད པན བྷགཝཏོ དྷཱཏུཡོ ཨེཀགྷནཱ ཨཧེསུཾ. སབྦེ དེཝ མནུསྶཱ སནྣིཔཏིཏྭཱ ཙཏུཡོཛནིཀཾ ཐཱུཔཾ ཀརིཾསུ.

ཏེན ཝུཏྟཾ

‘‘ནཱརདོ ཛིནཝསབྷོ - ནིབྦུཏོ སུདསྶནེ པུརེ,

ཏཏྠེཝ ཏསྶ ཐཱུཔཝརོ - ཙཏུཡོཛནམུགྒཏོ’’ཏི;

ཏསྶ ཨཔརབྷཱགེ ཨེཀམསངྑེཡྻམཏིཀྐམིཏྭཱ ཨིཏོ ཀཔྤསཏསཧསྶ མཏྠཀེ ཨེཀསྨིཾ ཀཔྤེ པདུམུཏྟརོ ནཱམ སཏྠཱ ཨུདཔཱདི. ཏདཱ བོདྷིསཏྟོ ཛཊིལོ ནཱམ མཧཱརཊྛིཀོ ཧུཏྭཱ བུདྡྷཔམུཁསྶ སངྒྷསྶ ཙིཝརདཱནམདཱསི. སོཔི ཏཾ ཨནཱགཏོ བུདྡྷོ བྷཝིསྶཏཱིཏི ཝྱཱཀཱསི. ¶ པདུམུཏྟརསྶཱཔི བྷགཝཏོ དྷཱཏུཡོ ཨེཀགྷནཱ ཨཧེསུཾ. སབྦེ དེཝམནུསྶཱ སནྣིཔཏིཏྭཱ དྭཱདས ཡོཛནིཀཾ མཧཱཐཱུཔམཀཾསུ.

ཏེན ཝུཏྟཾ

‘‘པདུམུཏྟརོ ཛིནོ བུདྡྷོ - ནཎྡཱརཱམམྷི ནིབྦུཏོ,

ཏཏྠེཝ ཏསྶ ཐཱུཔཝརོ - དྭཱདསུབྦེདྷཡོཛནོ’’ཏི;

ཏསྶ ཨཔརབྷཱགེ ཏིཾསཀཔྤ སཧསྶཱནི ཨཏིཀྐམིཏྭཱ སུམེདྷོ སུཛཱཏོ ཙཱཏི ཨེཀསྨིཾ ཀཔྤེ དྭེ བུདྡྷཱ ནིབྦཏྟིཾསུ སུམེདྷསྶ པན བྷགཝཏོ ཀཱལེ བོདྷིསཏྟོ ཨུཏྟརོ ནཱམ མཱནཝོ ཧུཏྭཱ ནིདཧིཏྭཱ ཋཔིཏཾཡེཝ ཨསཱིཏིཀོཊིདྷནཾ ཝིསྶཛྫེཏྭཱ བུདྡྷཔམུཁསྶ སངྒྷསྶ མཧཱདཱནཾ དཏྭཱ དྷམྨཾ སུཏྭཱ སརཎེསུ པཏིཊྛཱཡ ནིཀྑམིཏྭཱ པབྦཛི སོཔི ནཾ ཨནཱགཏེ བུདྡྷོ བྷཝིསྶཏཱིཏི ཝྱཱཀཱསི. སུམྡྷེསྶ པན བྷགཝཏོ དྷཱཏུཡོ ཝིཀིརིཾསུ

ཏེན ཝུཏྟཾ

‘‘སུམེདྷོ ཛིནཝརོ བུདྡྷོ - མེདྷཱརཱམམྷི ནིབྦུཏོ,

དྷཱཏུཝིཏྠཱརིཀཾ ཨཱསི - ཏེསུ ཏེསུ པདེསཏོ’’ཏི;

ཏསྶ ཨཔརབྷཱགེ སུཛཱཏོ ནཱམ སཏྠཱ ཨུདཔཱདི. ཏདཱ བོདྷིསཏྟོཙཀྐཝཏྟིརཱཛཱ ཧུཏྭཱ བུདྡྷོ ཨུཔྤནྣོཏི སུཏྭཱ ཨུཔསཾཀམིཏྭཱ དྷམྨཾ སུཏྭཱ བུདྡྷཔམུཁསྶ སངྒྷསྶ སདྡྷིཾ སཏྟཧི རཏནེཧི ཙཏུམཧཱདཱིཔཾ རཛྫཾ དཏྭཱ སཏྠུ སནྟིཀེ པབྦཛི སཀལརཊྛཝཱསིནོ རཊྛུཔྤཱདཾ གཧེཏྭཱ ཨཱརཱམིཀ ཀིཙྩཾ སཱདྷེནྟཱ བུདྡྷཔམུཁསྶ སངྒྷསྶ ནིཙྩཾ མཧཱདཱནམདཾསུ. སོཔི ནཾ སཏྠཱ ཨནཱགཏེ བུདྡྷོབྷཝིསྶཏཱིཏི ཝྱཱཀཱསི སུཛཱཏསྶ པན བྷགཝཏོ དྷཱཏུཡོ ཨེཀགྷནཱ ཨཧེསུཾ ཛམྦུདཱིཔཝཱསིནོ ཏིགཱཝུཏཾ ཐཱུཔམཀཾསུ

ཏེན ཝུཏྟཾ

‘‘སུཛཱཏོ ཛིནཝརོ བུདྡྷོ སཱིལཱརཱམམྷི ནིབྦུཏོ,

ཏཏྠེཝ ཙེཏིཡོ ཏསྶ - ཏཱིཎི གཱཝུཏམུགྒཏོ’’ཏི;

ཏསྶ ཨཔརབྷཱགེ ཨཊྛཱརས ཀཔྤསཏམཏྠཀེ ཨེཀསྨིཾ ཀཔྤེ པིཡདསྶི ཨཏྠདསྶི དྷམྨདསྶིཏི ཏཡོ བུདྡྷཱ ནིབྦཏྟིཾསུ པིཡདསྶི བུདྡྷཀཱལེ བོདྷིསཏྟོ ཀསྶཔོ ནཱམ མཱཎཝོ ཏིཎྞཾ ཝེདཱནཾ པཱརགཏོ ཧུཏྭཱ སཏྠུ དྷམྨདེསནཾ སུཏྭཱ ཀོཊིསཏསཧསྶ དྷན པརིཙྩཱགེན སངྒྷཱརཱམཾ ཀཱརེཏྭཱ སརཎེསུ ཙ སཱིལེསུ ཙ པཏིཊྛཱསི ཨཐ ནཾ སཏྠཱ ཨཊྛཱརས ཀཔྤ སཏཙྩཡེན བུདྡྷོ བྷཝིསྶཏཱིཏི ཝྱཱཀཱསི པིཡདསྶིསྶ བྷགཝཏོཔི དྷཱཏུཡོ ཨེཀགྷནཱཝ ཨཧེསུཾ ཛམྦུདཱིཔཝཱསིནོ སནྣིཔཏིཏྭཱ ཏིཡོཛནིཀཾ མཧཱཐཱུཔམཀཾསུ.

ཏེན ¶ ཝུཏྟཾ

‘‘པིཡདསྶི མུནིཝརོ - སལལཱརཱམམྷི ནིབྦུཏོ,

ཏཏྠེཝ ཏསྶ ཛིནཐཱུཔོ - ཏཱིཎི ཡོཛནམུགྒཏོ’’ཏི;

ཏསྶ ཨཔརབྷཱགེ ཨཏྠདསྶི ནཱམ བྷགཝཱ ཨུདཔཱདི ཏདཱ བོདྷིསཏྟོ མཧིདྡྷིཀོ མཧཱནུབྷཱཝོ སུསིམོ ནཱམ ཏཱཔསོ ཧུཏྭཱ བྷགཝཏོ སནྟིཀེ དྷམྨཾ སུཏྭཱ པསཱིདིཏྭཱ དིབྦཱནི མཎྡཱརཝ པདུམཔཱརིཙྪཏྟཀཱདཱིནི པུཔྥཱནི ཨཱཧརིཏྭཱ ཙཱཏུདྭཱིཔིཀ མཧཱམེགྷོ ཝིཡ པུཔྥཝསྶཾ ཝསྶེཏྭཱ སམནྟཏོ པུཔྥམཎྜཔ པུཔྥཨགགྷིཡ ཏོརཎཱདཱིནི ཀཏྭཱ མཎྡཱརཝ པུཔྥཙྪཏྟེན དསབལཾ པཱུཛེསི སོཔི ནཾ བྷགཝཱ ཨནཱགཏོ གོཏམོ ནཱམ བུདྡྷོ བྷཝིསྶཏཱིཏི ཝཱཀཱསི. ཏསྶ པན བྷགཝཏོ དྷཱཏུཡོ ཝིཀིརིཾསུ.

ཏེན ཝུཏྟཾ

‘‘ཨཏྠདསྶི ཛིནཝརོ - ཨནོམཱརཱམམྷི ནིབྦུཏོ,

དྷཱཏུཝིཏྠཱརིཀཾ ཨཱསི - ཏེསུ ཏེསུ ཙ རཊྛཏོ’’ཏི;

ཏསྶ ཨཔརབྷཱགེ དྷམྨདསྶི ནཱམ སཏྠཱ ཨུདཔཱདི. ཏདཱ བོདྷིསཏྟོ སཀྐཱ དེཝརཱཛཱ དིབྦགཎྡྷཔུཔྥེཧི ཙ དིབྦཏུརིཡེཧི ཙ པཱུཛཾ ཨཀཱསི སོཔི ནཾ བུདྡྷོ བྷཝིསྶཏཱིཏི ཝྱཱཀཱསི. དྷམྨདསྶིསྶ པན བྷགཝཏོ དྷཱཏུཡོ ཨེཀགྷནཱ ཨཧེསུཾ. ཛམྦུདཱིཔཝཱསིནོ ཏིཡོཛནིཀཾ ཐཱུཔམཀཾསུ.

ཏེན ཝུཏྟཾ

‘‘དྷམྨདསྶི མཧཱཝཱིརོ-ཀེལཱསཱརམམྷི ནིབྦུཏོ,

ཏཏྠེཝ ཐཱུཔཝརོ ཏསྶ-ཏཱིཎི ཡོཛནམུགྒཏོ’’ཏི;

ཏསྶ ཨཔརབྷཱགེ ཙཏུནཝུཏིཀཔྤ མཏྠཀེ ཨེཀསྨིཾ ཀཔྤེ ཨེཀོཝ སིདྡྷཏྠོ ནཱམ སཏྠཱ ཨུདཔཱདི. ཏདཱ བོདྷིསཏྟོ ཨུགྒཏེཛོ ཨབྷིཉྙཱབལ སམྤནྣོ མངྒལོ ནཱམ ཏཱཔསོ ཧུཏྭཱ མཧཱཛམྦུཕལཾ ཨཱཧརིཏྭཱ ཏཐཱགསྶ ཨདཱསི སཏྠཱ ཏཾ ཕལཾ པརིབྷུཉྫིཏྭཱ ཙཏུནཝུཏི ཀཔྤམཏྠཀེ བུདྡྷོ བྷཝིསྶཏཱིཏི ཝྱཱཀཱསི ཏསྶཱཔི བྷགཝཏོ དྷཱཏུཡོ ན ཝིཀིརིཾསུ, ཙཏུཡོཛནིཀཾ རཏནམཡཾ ཐཱུཔམཀཾསུ.

ཏེན ཝུཏྟཾ

‘‘སིདྡྷཏྟོ མུནིཝརོ བུདྡྷོ ཨནོམཱརམམྷི ནིབྦུཏོ,

ཏཏྠེཝ ཏསྶ ཐཱུཔཝརོ-ཙཏུཡོཛནམུགྒཏོ’’ཏི;

ཏསྶ ཨཔརབྷཱགེ ཨིཏོ དྭཱནཝུཏི ཀཔྤམཏྠཀེ ཏིསྶོ ཕུསྶོཏི ཨེཀསྨིཾ ཀཔྤེ དེཝ བུདྡྷཱ ནིབྦཏྟིཾསུ ཏིསྶསྶ བྷགཝཏོ ཀཱལེ བོདྷིསཏྟཱ མཧཱབྷོགོ མཧཱཡསོ སུཛཱཏོ ནཱམ ཁཏྟིཡོ ཧུཏྭཱ ཨིསིཔབྦཛྫཾ པབྦཛིཏྭཱ མཧིདྡྷིཀབྷཱཝཾ པཏྭཱ བུདྡྷོ ¶ ཨུཔྤནྣོཏི སུཏྭཱ དིབྦམཎྡཱརཝ པདུམ པཱརིཙྪཏྟ པུཔྥཱནི ཨཱདཱཡ ཙཏུཔརིསམཛ྄ཛྷེ གཙྪནྟཾ ཏཐཱགཏཾ པཱུཛེསི. ཨཱཀཱསེ པུཔྥཝིཏཱནམིཝ ཨཊྛཱསི སོཔི ནཾ སཏྠཱ ཨིཏོ དྭཱནཝུཏི ཀཔྤམཏྠཀེ བུདྡྷོ བྷཝིསྶཏཱིཏི ཝྱཱཀཱསི. ཏསྶཱཔི བྷགཝཏོ དྷཱཏུཡོ ན ཝིཀིརིཾསུ དྷཱཏུཡོ གཧེཏྭཱ ཏིཡོཛནིཀཾ ཐཱུཔམཀཾསུ.

ཏེན ཝུཏྟཾ

‘‘ཏིསྶོ ཛིནཝརོ བུདྡྷོ-ནཎྡཱརཱམམྷི ནིབྦུཏོ

ཏཏྠེཝ ཏསྶ ཐཱུཔཝརོ-ཏཱིཎི ཡོཛནམུསྶིཏོ’’ཏི;

ཏསྶ ཨཔརབྷཱགེ ཕུསྶོ ནཱམ བུདྡྷོ ཨུདཔཱདི ཏདཱ བོདྷིསཏྟོ ཝིཛིཏཱཝི ནཱམ ཁཏྟིཡོ ཧུཏྭཱ མཧཱརཛྫཾ པཧཱཡ སཏྠུ སནྟིཀེ པབྦཛིཏྭཱ ཏཱིཎི པིཊཀཱནི ཨུགྒཧེཏྭཱ མཧཱཛནསྶ དྷམྨཀཐཾ ཀཐེཏྭཱ སཱིལཔཱརམིཉྩ པཱུརེསི. སོཔི ནཾ བུདྡྷོ ཏཐེཝ ཝྱཱཀཱསི ཏསྶ པན བྷགཝཏོ དྷཱཏུཡོ ཝིཀིརིཾསུ.

ཏེན ཝུཏྟཾ

‘‘ཕུསྶོ ཛིནཝརོ སཏྠཱ-སུནནྡཱརཱམམྷི ནིབྦུཏོ

དྷཱཏུཝིཏྠཱརིཀཾ ཨཱསི-ཏེསུ ཏེསུ པདེསཏོ’’ཏི;

ཏསྶ ཨཔརབྷཱགེ ཨིཏོ ཨེཀནཝུཏི ཀཔྤམཏྠཀེ ཝིཔསྶི ནཱམ བུདྡྷོ ཨུདཔཱདི ཏདཱ བོདྷིསཏྟོ མཧིདྡྷིཀོ མཧཱནུབྷཱཝོ ཨཏུལོ ནཱམ ནཱགརཱཛཱ ཧུཏྭཱ སཏྟརཏན ཁཙིཏཾ སོཝཎྞམཧཱཔཱིཋཾ བྷགཝཏོ ཨདཱསི སོཔི ནཾ ཨིཏོ ཨེཀནཝུཏིཀཔྤམཏྠཀེ བུདྡྷོ བྷཝིསྶཏཱིཏི ཝྱཱཀཱསི ཏསྶ པན བྷགཝཏོ དྷཱཏུཡོ ན ཝིཀིརིཾསུ སབྦེ དེཝམནུསྶཱ སནྟིཔཏིཏྭཱ དྷཱཏུཡོ གཧེཏྭཱ སཏྟཡོཛནིཀཾ ཐཱུཔམཀཾསུ.

ཏེན ཝུཏྟཾ

‘‘ཝིཔསྶི ཛིནཝརོ ཝཱིརོ-སུམིཏྟཱརཱམམྷི ནིབྦུཏོ,

ཏཏྠེཝ སོ ཐཱུཔཝརོ-སཏྟཡོཛནིཀོ ཀཏོ’’ཏི;

ཏསྶ ཨཔརབྷཱགེ ཨིཏོ ཨེཀཏིཾས ཀཔྤམཏྠཀེ སིཁཱི ཝེསྶབྷཱུཏི དྭེ བུདྡྷཱ ནིབྦཏྟིཾསུ སིཁིསྶ བྷགཝཏོ ཀཱལེ བོདྷིསཏྟོ ཨརིཎྡམོ ནཱམ རཱཛཱ ཧུཏྭཱ བུདྡྷཔམུཁསྶ སངྒྷསྶ སཙིཝརཾ མཧཱདཱནཾ པཝཏྟེཏྭཱ སཏྟརཏན པཏིམཎྜིཏཾ ཧཏྠིརཏནཾ དཏྭཱ ཧཏྠིཔྤམཱཎཾ ཀཏྭཱ ཀཔྤིཡ བྷཎྜམདཱསི སོཔི ནཾ ཨིཏོ ཨེཀཏིཾས ཀཔྤེ བུདྡྷོ བྷཝིསྶཏཱིཏི ཝྱཱཀཱསི, སིཁིསྶ བྷགཝཏོ དྷཱཏུཡོ ཨེཀགྷནཱ ཧུཏྭཱ ཨཊྛཾསུ, སཀལ ཛམྦུདཱིཔཝཱསིནོ པན མནུསྶཱ དྷཱཏུཡོ གཧེཏྭཱ ཏིཡོཛནུབྦེདྷཾ སཏྟརཏནམཡཾ ཧིམགིརི སདིས སོབྷཾ ཐཱུཔམཀཾསུ.

སིཁཱི ¶ མུནིཝརོ བུདྡྷོ-དུསྶཱརཱམམྷི ནིབྦུཏོ,

ཏཏྠེཝ ཏསྶ ཐཱུཔཝརོ-ཏཱིཎི ཡོཛནམུགྒཏོ’’ཏི;

ཏསྶ ཨཔརབྷཱགེ ཝེསྶབྷཱུ ནཱམ སཏྠཱ ཨུདཔཱདི. ཏདཱ བོདྷིསཏྟོ སུདསྶནོ ནཱམ རཱཛཱ ཧུཏྭཱ བུདྡྷཔམུཁསྶ སངྒྷསྶ སཙཱིཝརམཧཱདཱནཾ དཏྭཱ ཏསྶ སནྟིཀེ པབྦཛིཏྭཱ ཨཱཙཱརགུཎསམྤནྣོ བུདྡྷརཏནེ ཙིཏཏཱིཀཱར པཱིཏི བཧུལོ ཨཧོསི སེཔི ནཾ སཏྠཱ ཨིཏོ ཨེཀཏིཾསཀཔྤེ བུདྡྷོ བྷཝིསྶཏཱིཏི ཝྱཱཀཱསི ཝེསྶབྷུསྶ པན བྷགཝཏོ དྷཱཏུཡོ ཝིཀིརིཾསུ.

ཏེན ཝུཏྟཾ

‘‘ཝེསྶབྷཱུ ཛིནཝརོ སཏྠཱ-ཁེམཱརཱམམྷི ནིབྦུཏོ;

དྷཱཏུཝིཏྠཱརིཀཾ ཨཱསི-ཏེསུ ཏེསུ པདེསཏོ’’ཏི;

ཏསྶ ཨཔརབྷཱགེ ཨིམསྨིཾ ཀཔྤེ ཙཏྟཱརོ བུདྡྷཱ ནིབྦཏྟིཾསུ ཀཀུསཎྡྷོ ཀོནཱགམནོ ཀསྶཔོ ཨམྷཱཀཾ བྷགཝཱཏི ཀཏུསཎྡྷསྶ པན བྷགཝཏོ ཀཱལོ བོདྷིསཏྟོ ཁེམོ ནཱམ རཱཛཱ ཧུཏྭཱ བུདྡྷཔམུཁསྶ སངྒྷསྶ སཔཏྟཙཱིཝརཾ དཱནཉྩེཝ ཨཉྫནཱདི བྷེསཛྫཱནི ཙ དཏྭཱ སཏྠུ དྷམྨདེསནཾ སུཏྭཱ པབྦཛི སོཔི ནཾ སཏྠཱ ཝྱཱཀཱསི ཏསྶ པན བྷགཝཏོ དྷཱཏུཡོ ན ཝིཀིརིཾསུ སབྦེ སནྣིཔཏིཏྭཱ དྷཱཏུཡོ གཧེཏྭཱ གཱཝུཏུབྦེདྷཾ ཐཱུཔམཀཾསུ.

ཏེན ཝུཏྟཾ

‘‘ཀཀུསཎྡྷོ ཛིནཝརོ - ཁེམཱརཱམམྷི ནིབྦུཏོ,

ཏཏྠེཝ ཏསྶ ཐཱུཔཝརོ-གཱཝུཏཾ ནབྷམུགྒཏོ’’ཏི;

ཏསྶ ཨཔརབྷཱགེ ཀོནཱགམནོ ནཱམ སཏྠཱ ཨུདཔཱདི ཏདཱ བོདྷིསཏྟོ པབྦཏོ ནཱམ རཛཱ ཧུཏྭཱ ཨམཙྩགཎ པརིཝུཏོ སཏྠུ སནྟིཀེ གནྟྭཱ དྷམྨདེསནཾ སུཏྭཱ བུདྡྷཔམུཁཾ བྷིཀྑུསངྒྷཾ ནིམནྟེཏྭཱ མཧཱདཱནཾ པཝཏྟེཏྭཱ པཏྟུཎྞཙཱིནཔཊྚ ཀོསེཡྻ ཀམྦལ དུཀུལཱནི ཙེཝ སུཝཎྞཔཊྚཀཉྩ དཏྭཱ སཏྠུ སནྟིཀེ པབྦཛི. སོཔི ནཾ སཏྠཱ ཝྱཱཀཱསི ཏསྶ བྷགཝཏོ དྷཱཏུཡོ ཝིཀིརིཾསུ

ཏེན ཝུཏྟཾ

‘‘ཀོནཱགམནོ སམྦུདྡྷོ པབྦཏཱརཱམམྷི ནིབྦུཏོ,

དྷཱཏུ ཝིཏྠཱརིཀཾ ཨཱསི-ཏེསུ ཏེསུ པདེསཏོ’’ཏི;

ཏསྶ ཨཔརབྷཱགེ ཀསྶཔོ ནཱམ སཏྠཱ ཨུདཔཱདི. ཏདཱ བོདྷིསཏྟོ ཛོཏིཔཱལོ ནཱམ མཱཎཝོ ཧུཏྭཱ ཏིཎྞཾ ཝེདཱནཾ པཱརགུབྷཱུམིཡཉྩེཝ ཨནྟལིཀྑེཝ པཱཀཊོ གྷཊཱིཀཱརསྶ ཀུམྦྷཀཱརསྶ མིཏྟོ ཨཧོསི. སོ ཏེན སདྡྷིཾ སཏྠཱརཾ ཨུཔསངྐམིཏྭཱ དྷམྨ

ཀཐཾ ¶ སུཏྭཱ པབྦཛིཏྭཱ ཨཱརདྡྷཝཱིརིཡོ ཏཱིཎི པིཊཀཱནི ཨུགྒཧེཏྭཱ ཝཏྟཱ ཝཏྟསམྤཏྟིཡཱ བུདྡྷསཱསནཾ སོབྷེསི. སོཔི ནཾ སཏྠཱ ཝྱཱཀཱསི. ཀསྶཔསྶ པན སཏྠུནོ དྷཱཏུཡོ ན ཝིཀིརིཾསུ སཀལ ཛམྦུདཱིཔཝཱསིནོ མནུསྶཱ སནྣིཔཏིཏྭཱ ཨེཀེཀཾ སུཝཎྞཊྛིཀཾ ཀོཊི ཨགྒྷནཀཾ རཏནཝིཙིཏྟཾ བཧི རཙནཏྠཾ ཨེཀེཀཾ ཨཌྜྷཀོཊི ཨགྒྷནཀཾ ཨབྦྷནྟར པཱུརཎཏྠཾ མནོསིལཱཡ མཏྟིཀཱཀིཙྩཾ ཏེལེན ཨུདཀཀིཙྩཾ ཀརོནྟཱ ཡོཛནུབྦེདྷཾ ཐུཔམཀཾསུ.

ཏེན ཝུཏྟཾ

‘‘མཧཱཀསྶཔོ ཛིནོ སཏྠཱ-སེཏཝྱཱཡཉྷི ནིབྦུཏོ,

ཏཏྠེཝ ཏསྶ ཛིནཐུཔོ-ཡོཛནུབྦེདྷམུགྒཏོ’’ཏི;

ཨེཏྠ ཙ

དཱིཔངྐརོ ཙ ཀོཎྜཉྙོ-མངྒལོ སུམནོ ཏཐཱ,

ཨནོམདསྶཱི བུདྡྷོ ཙ-ནཱརདོ པདུམུཏྟརོ;

སུཛཱཏོ པིཡདསྶཱི ཙ-དྷམྨདསྶི ནརུཏྟམོ,

སིདྡྷཏྠབུདྡྷོ ཏིསྶོ ཙ-ཝིཔསྶི ཙ སིཁཱི ཏཐཱ;

ཀཀུསཎྡྷོ ཀསྶཔོ ཙཱཏི-སོལ༹སེཏེ མཧེསཡོ,

ཐུཔཔྤམཱཎམེཏེསཾ པཱལིཡཾཡེཝ དསྶིཏཾ;

ཡསྨཱ ཏསྨཱ མཡཱ སཱདྷཱུ-ཏེ སབྦེཔི པཀཱསིཏཱ,

ཐཱུཔཱ སདྡྷཱ ཛནཱ སཱདྷཱུ-ཏེ ཝནྡེཡྻཐ སཱདརཾ;

ཡེསཱནཾ པན ཨཊྛནྣཾ - སུགཏཱནཾ ཧིཏེསིནཾ

དྷཱཏུ ཝིཏྠཱརིཀཱ ཨཱསུཾ - ཏེསུ ཏེསུ པདེསཏོཏི;

སཱདྷུཛན མནོཔསཱདནཏྠཱཡ ཀཏེ ཐཱུཔཝཾསེ ཝིཛྫམཱནཐཱུཔཱནཾ བུདྡྷཱནཾ ཐཱུཔཀཐཱ ཙེཝ སབྦེསཾ སནྟིཀེ ཨབྷིནིཧཱརཀཏཱཙེ. སམཏྟཱ.

ཀསྶཔསྶ པན བྷགཝཏོ ཨཔརབྷཱགེ ཋཔེཏྭཱ ཨིམཾ སམྨཱ སམྦུདྡྷཾ ཨཉྙོ བུདྡྷོ ནཱམ ནཏྠི. ཨེཝཾ དཱིཔངྐརཱདཱིནཾ ཙཏུཝཱིསཏིཡཱ བུདྡྷཱནཾ སནྟིཀེ ལདྡྷཝྱཱཀརཎོ བོདྷིསཏྟོ པཱརམིཡོ པཱུརེཏྭཱ ཝེསྶནྟརཏྟབྷཱཝེ ཋིཏོ-

‘‘ཨཙེཏནཱཡཾ པཐཝཱི-ཨཝིཉྙཱཡ སུཁཾ དུཁཾ,

སཱཔི དཱནབལོ མཡ྄ཧཾ-སཏྟཀྐཏྟུཾ པཀམྤཐཱ’’ཏི;

ཨེཝཾ མཧཱཔཐཝི ཀམྤནཱནི པུཉྙཱནི ཀཏྭཱ ཨཱཡུཔརིཡོསཱནེ ཏཏོ ཙུཏོ ཏུསིཏབྷཝནེ ནིབྦཏྟི ཏཏྠ ཨཉྙེ དེཝེ དསཧི ཋཱནེཧི ཨདྷིགཎྷིཏྭཱ ཡཱཝཏཱཡུཀཾ དིབྦསམྤཏྟིཾ ཨནུབྷཝནྟོ མནུསྶགཎནཱཡ ¶ སཏྟཧི དིཝསེཧི ཨཱཡུཀྑཡཾ པཱཔུཎིསྶཏིཏི ཝཏྠཱནི ཀིལི༹སྶནྟི, མཱལཱ མིལཱཡནྟི, ཀཙྪེཧི སེདཱ མུཙྩནྟི, ཀཱཡེཙེཝ དུབྦཎྞིཡཾ ཨོཀྐམཏི. དེཝོ དེཝཱསནེ ནཱབྷིརམཏཱིཏི ཨིམེསུ པཉྩསུ པུབྦནིམིཏྟེསུ ཨུཔྤནྣེསུ ཏཱནི དིསྭཱསུཉྙཱཝཏ ནོ སགྒཱ བྷཝིསྶནྟིཏི སཾཝེགཛཱཏཱཧི དེཝཏཱཧི མཧཱསཏྟསྶ པཱརམིནཾ པཱུརིཏབྷཱཝཾ ཉཏྭཱ ཨིམསྨིཾ ཨིདཱནི ཨཉྙཾ དེཝལོཀཾ ཨནུཔགནྟྭཱ མནུསྶལོཀེ ཨུཔྤཛྫིཏྭཱ བུདྡྷབྷཱཝཾ པཏྟེ པུཉྙཱནི ཀཏྭཱ ཙུཏ ཙུཏཱ དེཝལོཀཾ པཱུརེསྶནྟཱིཏི ཙིནྟེཏྭཱ.

‘‘ཡཏོཧཾ ཏུསིཏེ ཀཱཡེ-སནྟུསིཏོ ནཱམཧཾ ཏདཱ,

དསསཧསྶི སམཱགནྟྭཱ-ཡཱཙནྟི པཉྫལཱི མམཾ;

ཀཱལོཡཾཏེ མཧཱཝཱིར-ཨུཔྤཛྫ མཱཏུཀུཙྪིཡཾ,

སདེཝཀཾ ཏཱརཡནྟོ-བུཛ྄ཛྷསྶུ ཨམཏཾ པདནྟི’’;

ཨེཝཾ བུདྡྷབྷཱཝཏྠཱཡ ཨཱཡཱཙིཏོ ཀཱལཾ-དཱིཔཾ-དེསཾ ཀུལཾ-ཛནེཏྟིཡཱ ཨཱཡུཔྤམཱཎནྟི ཨིམཱནི པཉྩ མཧཱཝིལོཀནཱནི ཝིལོཀེཏྭཱ ཀཏསནྣིཊྛཱནོ ཏཏོ ཙུཏོ སཀྱརཱཛཀུལེ པཊིསཎྡྷིཾགཧེཏྭཱ ཏཏྠ མཧཱསམྤཏྟིཡཱ པརིཧརིཡམཱནོ ཨནུཀྐམེན བྷདྡཾ ཡོབྦནཾ ཨནུཔཱཔུཎིཏྭཱ ཏིཎྞཾ ཨུཏཱུནཾ ཨནུཙྪཝིཀེསུ ཏཱིསུ པཱསཱདེསུ དེཝལོཀསིརིཾ ཝིཡ རཛྫསིརིཾ ཨནུབྷཝམཱནོ ཨུཡྻཱནཀཱིལཱ༹ཡ གམནསམཡེ ཨནུཀྐམེན ཛིཎྞ - ཝྱཱདྷི - མཏསངྑཱཏེ ཏཡོ དེཝདཱུཏེ དིསྭཱ སཾཛཱཏ སཾཝེགཱ ནིཝཏྟིཏྭཱ ཙཏུཏྠེ ཝཱརེ པབྦཛིཏཾ དིསྭཱ སཱདྷུ པབྦཛྫཱཏི པབྦཛྫཱཡ རུཙིཾ ཨུཔྤཱདེཏྭཱ ཨུཡྻཱནཾ གནྟྭཱ ཏཏྠ དིཝསཾ ཁེཔེཏྭཱ མངྒལ པོཀྑརཎིཏཱིརེ ནིསིནྣོ ཀཔྤཀ ཝེསཾ གཧེཏྭཱ ཨཱགཏེན ཝིསྶཀམྨ དེཝཔུཏྟེན ཨལངྐཏ པཊིཡཏྟོ རཱཧུལཀུམཱརསྶ པཱཏསཱསནཾ སུཏྭཱ པུཏྟསིནེཧསྶ བལཝབྷཱཝཾ ཉཏྭཱ ཡཱཝ ཨིམཾ བཎྡྷནཾ ན ཝཌྜྷཏི ཏཱཝདེཝནཾ ཚིཎྡིསྶཱམཱིཏི ཙིནྟེཏྭཱ སཱཡཾ ནགརཾ པཝིསནྟོ-

‘‘ནིབྦུཏཱ ནཱུན སཱ མཱཏཱ - ནིབྦུཏོ ནཱུན སོ པིཏཱ,

ནིབྦུཏཱ ནཱུན སཱ ནཱརཱི - ཡསྶཱཡཾ ཨཱིདིསོ པཏི’’ཏི;

ཀིསཱགོཏམིཡཱ ནཱམ པིཏུཙྪཱ དྷཱིཏཱཡ བྷཱསིཏཾ ཨིམཾ གཱཐཱ སུཏྭཱ ཨིཧཾ ཨིམཱཡ ནིབྦུཏཔདཾ སཱཝིཏོཏི གཱིཝཏོ སཏསཧསྶགྒྷནཀཾ མུཏྟཱཧཱརཾ ཨོམུཉྩིཏྭཱ ཏསྶཱ པེསེཏྭཱ ཨཏྟནོ བྷཝནཾ པཝིསིཏྭཱ སིརཱིསཡནེ ནིཔནྣོ ནིདྡཱཝས གཏཱནཾ ནཱཊཀཱནཾ ཝིཔྤཀཱརཾ དིསྭཱ ནིབྦིནྣཧདཡོ ཚནྣཾ ཨུཊྛཱཔེཏྭཱ ཀཎྠཀཾ ཨཱཧཱརཱཔེཏྭཱ ཏཾ ཨཱརུཡ྄ཧ ཚནྣསཧཱཡོ དསསཧསྶ ཙཀྐཝཱལ༹ དེཝཏཱཧི ཀཏ པརིཝཱརོ མཧཱབྷིནིཀྑམནཱ ནིཀྑམིཏྭཱ ཏེནེཝ རཏྟཱཝསེསེན ཏཱིཎི རཛྫཱནི ཨཏིཀྐམྨ ཨནོམཱཡ ནདིཡཱ པརཏཱིརཾ པཏྭཱ ཨསྶཱཔིཊྛིཏོ ཨོརུཡ྄ཧ ¶ མུཏྟརཱསི སདིསེ ཙཱལིཀཱཔུལིཎེ ཋཏྭཱ ཚནྣཏྭཾ མཡ྄ཧཾ ཨཱབྷརཎཱནི ཙེཝ ཀཎྠཀཉྩ ཨཱདཱཡ གཙྪཱཧི ཨཱབྷརཎཱནི ཙ ཀཎྠཀཉྩ པཊིཙྪཱཔེཏྭཱ དཀྑིཎ ཧཏྠེན མངྒལཁགྒམཱདཱཡ ཝཱམཧཏྠེན མོལིཡཱ སདྡྷིཾ ཙཱུལ༹ཾ ཚིཎྡིཏྭཱ སཙེ ཨཧཾ བུདྡྷོ བྷཝིསྶཱམི ཨཱཀཱསེ ཏིཊྛཏུ ནོ ཙེ བྷཱུམིཡཾ པཏཏཱུཏི ཨཱཀཱསེ ཁིཔི ཙུལཱ༹མཎཱི བཎྡྷནཾ ཡོཛནཔྤམཱཎཾ ཋཱནཾགནྟྭཱ ཨཱཀཱསེ ཨཊྛཱསི ཨཐ སཀྐོ དེཝརཱཛཱ ཡོཛནིཀེན རཏནཙངྒོཊཀེན པཊིགྒཧེསི.

ཡཐཱཧ

ཚེཏྭཱན མོལིཾ ཝརགནྡྷཝཱསིཏཾ

ཝེཧཱསཡཾ ཨུཀྑིཔི སཀྱཔུངྒཡཝོ,

སཧསྶནེཏྟོ སིརསཱ པཊིགྒཧི

སུཝཎྞ ཝངྒོཊཝརེན ཝཱསཝོ’ཏི;

པཊིགྒཧེཏྭཱ ཙ པན དེཝལོཀཾ ནེཏྭཱ སུནེརུ མུདྡྷནི ཏིཡོཛནཔྤམཱཎཾ ཨིཎྡནཱིལམཎིམཡཾ ཙུལཱ༹མཎི ཙེཏིཡཾ ནཱམ ཨཀཱསི ཨཐ ཀསྶཔ བུདྡྷཀཱལེ པོརཱཎ སཧཱཡཀོ གྷཊིཀཱར མཧཱབྲཧྨཱ ཨེཀཾ བུདྡྷནྟརཾ ཝིནཱཝཱསབྷཱཝཔྤཏྟེན མཏྟབྷཱཝོ ཙིཏྟེསི. ཨཛྫ མེ སཧཱཡཀོ མཧཱབྷིནིཀྑམནཾ ནིཀྑནྟོ སམཎ པརིཀྑཱརམསྶ གཧེཏྭཱ གཙྪཱམཱིཏི-

‘‘ཏིཙཱིཝརཉྩ པཏྟོ ཙ ཝཱསི སཱུཙི ཙ བཎྡྷནཾ,

པརིསྶཱཝན ཨཊྛེཏེན-ཡུཏྟཡོགསྶ བྷིཀྑུནོ’’ཏི;

ཨིམེ སམཎཔརིཀྑཱརེ ཨཱཧརིཏྭཱ ཨདཱསི མཧཱཔུརིསོ ཨརཧདྡྷཛཾ ནིཝཱསེཏྭཱ ཨུཏྟམཾ པབྦཛྫཱཝེསཾ གཎྷིཏྭཱ སཱཊཀཡུགལཾ ཨཱཀཱསེ ཁིཔི ཏཾ བྲཧྨཱ པཊིགྒཧེཏྭཱ བྲཧྨལོཀེ དྭཱདསཡོཛནིཀཾ སབྦརཏནམཡཾ དུསྶཙེཏིཡམཀཱསི.

‘‘ཀིལེས ཨཔྤཧཱིཎེཔི=མཧཱསཏྟསྶ ཏཾ ཁཎེ,

ཡསྶཱནུབྷཱཝཏོ ཨེཝཾ དུསྶཙཱུལཱ༹ ཧི པཱུཛིཏཱ

ཏསྨཱ ཏམྨ མཧཱབོདྷི-སཏྟཱནཾ པཊིཔཏྟིཡཾ,

ན ཀརེཡྻ མཧུསྶཱཧཾཝ-ཀོ ཧི ནཱམ བུདྷོ ཛནོ’’ཏི;

ཙཱུལཱ༹མཎིདུསྶ ཐུཔདྭཡཀཐཱ

༩. བོདྷིསཏྟོ པབྦཛིཏྭཱ ཨནུཀྐམེན རཱཛགཧཾ གནྟྭཱ ཏཏྠ པིཎྜཱཡ ཙརིཏྭཱ པཎྜཝ པབྦཏཔབྦྷཱརེ ནིསིནྣོ མགདྷརཱཛེན རཛྫེན ནིམནྟིཡམཱནོ ཏཾ པཊིཀྑིཔིཏྭཱ སབྦཉྙུཏཾ པཏྭཱ ཏིསྶཝིཛིཏཾ ཨཱགམནཏྠཱཡཏེནགཧིཏ པཊིཉྙོ ཨཱལཱ༹རཾ-ཨུདྡཀཉྩ ཨུཔསངྐམིཏྭཱ ¶ ཏེསཾ སནྟིཀེ ཨདྷིགཏཝིསེསེན ཨཔརིཏུཊྛོ ཚབྦསྶཱནི མཧཱཔདྷཱནཾ པདཧིཏྭཱ ཝིསཱཁ པུཎྞམ དིཝསེ སེནཱནིནིགམེ སུཛཱཏཱཡ དིནྣཔཱཡཱསཾ པརིབྷུཉྫིཏྭཱ ནེརཉྫརཱཡ ནདིཡཱ སུཝཎྞཔཱཏིཾ པཝཱཧེཏྭཱ ནེརཉྫརཱཡ ཏཱིརེ མཧཱཝནསཎྜེ ནཱནཱསམཱཔཏྟཱིཧི དིཝཱབྷཱགཾ ཝིཏིནཱམེཏྭཱ སཱཡཎྷ སམཡེ སོཏྠིཡེན དིནྣཾ ཏིཎམུཊྛིཾ གཧེཏྭཱ ཀཱལེ༹ན ནཱགརཱཛེན ཨབྷིཏྠུཏགུཎོ བོདྷིམཎྜཾ ཨཱརུཡ྄ཧ ཏིཎཱནི. སཏྠརིཏྭཱ ན ཏཱཝཱིམཾ པལླངྐཾ བྷིཎྡིསྶཱམི ཡཱཝ མེ ཨནུཔཱདཱཡ ཨཱསཝེཧི ཙིཏྟཾ ཝིམུཙྩིསྶཏཱི’’ཏི པཊིཉྙཾ ཀཏྭཱ པཱཙཱིན དཱསཱབྷིམུཁོ ནིསཱིདིཏྭཱ-སཱུརིཡེ ཨནཏྠམིཏེཡེཝ མཱརབལཾ ཝིདྷམེཏྭཱ པཋམཡཱམེ པུབྦེ ནིཝཱསཉཱཎཾ མཛ྄ཛྷིམཡཱམེ ཙུཏཱུཔཔཱཏཉཱཎཾ པཏྭཱ པཙྪིམཡཱམཱཝསཱནེ དསབལ ཙཏུཝེསཱརཛྫཱདི སབྦགུཎཔཏིམཎྜིཏཾསབྦཉྙུཏཉཱཎཾ པཊིཝིཛ྄ཛྷིཏྭཱ སཏྟ སཏྟཱཧཾ བོདྷིསམཱིཔེཡེཝ ཝཱིཏིནཱམེཏྭཱ ཨཊྛམེ སཏྟཱཧེ ཨཛཔཱལ ནིགྲོདྷམཱུལེ ནིསིནྣོ དྷམྨགམྦྷཱིརཏཱ པཙྩཝེཀྑནེན ཨཔྤོསྶུཀྐཏཾ ཨཱཔཛྫམཱནོ དསདཧསྶཱི མཧཱབྲཧྨ པརིཝཱརེན སཧམྤཏི མཧཱབྲཧྨུནཱ ཨཱཡཱཙིཏ དྷམྨདེསནོ བུདྡྷཙཀྑུནཱ ལོཀཾ ཨོལོཀེནྟོ བྲཧྨུནོ ཨཛ྄ཛྷེསནཾ ཨཱདཱཡ ཀསྶ ནུ ཁོ པཋམཾ དྷམྨཾ དེསེཡྻནྟི ཨོལོཀེནྟོ ཨཱལཱ༹རུདྡཀཱནཾ ཀཱལཀཏབྷཱཝཾ ཉཏྭཱ པཉྩཝགྒཱིཡཱནཾ བྷིཀྑུནཾ བཧཱུཔཀཱརཏཾ ཨནུསྶརིཏྭཱ ཨུཊྛཱཡཱསནཱ ཀཱསིཔུརཾ གཙྪནྟོ ཨནྟརཱམགྒེ ཨུཔཀེན སདྡྷིཾ མནྟེཏྭཱ ཨཱསཱལ༹ཧིཔུཎྞམ དིཝསེ ཨིསིཔཏནེ མིགདཱཡེ པཉྩ ཝགྒིཡཱནཾ བྷིཀྑུནཾ ཝསནཊྛཱནཾ པཏྭཱ ཏེ ཨནནུཙྪཝིཀེན ཨཱཝུསོ ཝཱདེན སམུདཱཙརནྟེ ཨཉྙཱཔེཏྭཱ དྷམྨཙཀྐཾ པཝཏྟེནྟོ ཨཉྙཱཀོཎྜཉྙཏྠེརཔམུཁེ ཨཊྛཱརས ཀོཊིཡོ ཨམཏཔཱནཾ པཱཡེསི.

ཏཏོ པཊྛཱཡ ཙཏྟཱལཱིས སཾཝཙྪརཱནི ཋཏྭཱ ཙཏུརཱསཱིཏི དྷམྨཀྑཎྡྷ སཧསྶཱནི དེསེཏྭཱ གཎནཔཐམཏཱིཏེ སཏྟེ བྷཝཀནྟཱརཏོ སནྟཱརེཏྭཱ སབྦབུདྡྷཀིཙྩཱནི ནིཊྛཔེཏྭཱ ཀུསིནཱརཱཡཾ ཨུཔཝཏྟནེ མལླཱནཾ སཱལཝནེ ཡམཀསཱལཱན མནྟརེ ཨུཏྟསཱིསཀཾ པཉྙཏྟེ མཉྩཀེ ཝིསཱཁཔུཎྞམ དིཝསེ དཀྑིཎེན པསྶེན སཏོ སམྤཛཱནོ ཨནུཊྛཱནསེཡྻཱཡ ནིཔཛྫི. ཏདཱ ཀིར བྷགཝཏོ པཱུཛཱཡ ཡམཀསཱལཱ སབྦཔཱལིཕུལླཱ མཱུལཏོ པཊྛཱཡ ཡཱཝ ཨགྒཱ ཨེཀཙྪནྣཱ ཨཧེསུཾ. ན ཀེཝལཉྩ ཡམཀསཱལཱཡེཝ སབྦེཔི རུཀྑསཱཁཱ སབྦཔཱལིཕུལླཱཝ ཨཧེསུཾ.

ན ཀེཝལཉྩ ཏསྨིཾཡེཝ ཨུཡྻཱནེ སཀལེཔི དསསཧསྶ ཙཀྐཝཱལེ༹ ཕལུཔག རུཀྑཱ ཕལཾ གཎྷིཾསུ. སབྦརུཀྑཱནཾ ཁཎྡྷེསུ ཁཎྡྷ པདུམཱནི, ¶ ཝལལཱིསུ ཝལལིཔདུམཱནི. ཨཱཀཱསེ ཨུལློཀཔདུམཱནི, པཐཝིཏལཾ བྷིཎྡིཏྭཱ དཎྜཀཔདུམཱནི པུཔྥིཾསུ. སབྦོ མཧཱ སམུདྡོ པཉྩཝཎྞ པདུམསཉྪནྣོ ཨཧོསི ཏིཡོཛན སཧསྶཝིཏྠཏོ པན ཧིམཝཱ གྷནབདྡྷམོརཔིཉྪཀལཱཔོ ཝིཡ ནིརནྟརཾ མཱལཱདཱམགཝཀྑིཏོ ཝིཡ སུཊྛུ པཱིལེ༹ཏྭཱ ཨཱབདྡྷཔུཔྥཝཊཾསཀོ ཝིཡ སུཔཱུརིཏ པུཔྥཙངྒེཊཀཾ ཝིཡ ཙ ཨཏིརམཎཱིཡོ ཨཧོསི.

ཡམཀསཱལཱ བྷུམྨདེཝཏཱནི སཉྩཱལིཏཀྑཝིཎྡྷཊཔཱ ཏཐཱགཏསརཱིརསྶ ཨུཔརིཔུཔྥཱནི ཝིཀིརནྟི. དིབྦཱནིཔི མཎྡཱརཝ པུཔྥཱནི ཨནྟལིཀྑཱ པཏནྟི. ཏཱནི ཧོནྟི སུཝཎྞ ཝཎྞཱནི པཎྞཙྪཏྟཔྤམཱཎཱནི མཧཱཏུམྦམཏྟཾ རེཎུ གཎྷནྟི ན ཀེཝལཉྩ མཎྡཱརཝ པུཔྥཱནེཙ, ཨཉྙཱནིཔི སབྦཱནི པཱརིཙྪཏྟཀ པུཔྥཱདཱིནི སུཝཎྞཝངྒོཊཀཱནི རཛཏཙངྒོཊཀཱནི ཙ པཱུརེཏྭཱ པཱུརེཏྭཱ ཏིདས པུརེཔི བྲཧྨལོཀེཔི ཋིཏཱཧི དེཝཏཱཧི ཝིཝིདྷཱནི ཨནྟརཱ ཨཝིཔྤཀིཎྞཱནེཝ ཧུཏྭཱ ཨཱགནྟྭཱ པཏྟཀིཾཛཀྑ རེཎུ ཙུཎྞེཧི ཏཐཱགཏསྶ སརཱིརམེཝ ཨོཀཱིརནྟི ན ཀེཝལཉྩ དེཝཏཱནཾཡེཝ ནཱག སུཔཎྞ མནུསྶཱནམྤི ཨུཔཀཔྤན ཙཎྡན ཙུཎྞཱནི ན ཀེཝལཉྩ ཙཎྡནཙུཎྞཱནེཝ ཀཱལཱ༹ནུསཱརཱི ཏགར ལོཧིཏཙཎྡནཱདི སབྦགནྡྷཛཱཏཙུཎྞཱནི, ཧརིཏཱལཉྫན སུཝཎྞ རཛཏ ཙུཎྞཱནི, སབྦགནྡྷཝཱས ཝིཀཏིཡོ སུཝཎྞ རཛཏཱདིསམུགྒེ པཱུརེཏྭཱ ཙཀྐཝཱལ༹ མུཁཝཊྚིཨཱདིསུ ཋིཏཱཧི དེཝཏཱཧི པཝིདྡྷཱ ཨནྟརཱ ཨཝིཔྤཀིརིཏྭཱ ཏཐཱགཏསྶེཝ སརཱིརཾ ཨོཀིརནྟི དིབྦཱནིཔི ཏུརིཡཱནི ཨནྟལིཀྑེ ཝཛྫནྟི. ན ཀེཝལཉྩ ཏཱནིཡེཝ སབྦཱནིཔི ཏནྟིབདྡྷ ཙམྨཔརིཡོནདྡྷ སུསིརཱདི བྷེདཱནི དསསཧསྶཙཀྐཝཱལེ༹ དེཝ-ནཱགཝ-སུཔཎྞ-མནུསྶཱནཾ ཏུརིཡཱནི ཨེཀཙཀྐཝཱལེ༹ སནྣིཔཏིཏྭཱ ཨནྟལིཀྑེ ཝཛྫནྟི.

ཝརཙཱརཎདེཝཏཱ ཀིར ནཱམེཀཱ དཱིགྷཱཡུཀཱ དེཝཏཱ མཧཱཔུརིསོ མནུསྶཔཐེ ནིབྦཏྟིཏྭཱ བུདྡྷོ བྷཝིསྶཏཱིཏི སུཏྭ པཊིསཎྡྷིདིཝསེ གཎྷིཏྭཱ གམིསྶཱམཱཏི མཱལཱ གནྠིཏུཾ ཨཱརབྷིཾསུ ཏཱ གཎྠམཱནཱཝ མཧཱཔུརིསེ མཱཏུཀུཙྪིཡཾ ནིབྦཏྟེ ཏུམྦྷེ ཀསྶ གཎྠཐཱཏི ཝུཏྟཱ ན ཏཱཝ ཏིཊྛཱཏི ཀུཙྪིཏོ ནིཀྑམན དིཝསེ གཧེཏྭཱ གམིསྶཱམཱཏི ཨཱཧཾསུ པུན ནིཀྑེནྟོཏི སུཏྭཱ མཧཱབྷིནིཀྑམནདིཝསེ གམིསྶཱམཱཏི མཧཱབྷིནིཀྑམནཾ ནིཀྑནྟོཏི སུཏྭཱ ཨབྷིསམྦོདྷི དིཝསེ གམིསྶཱམཱཏི. ཨཛྫ ཨབྷིསམྦུདྡྷོཏི སུཏྭཱ དྷམྨཙཀྐཔྤཝཏྟནདིཝསེ གམིསྶཱམཱཏི དྷམྨཙཀྐཾ པཝཏྟཡཱིཏི སུཏྭཱ ཡམཀཔཱཊིཧཱརིཡདིཝསེ གམིསྶཱམཱཏི. ཨཛྫ ཡམཀཔཱཊིཧཱརིཡཾ ཀརཱིཏི སུཏྭཱ དེཝོ རོཧནདིཝསེ གམིསྶཱམཱཏི. ཨཛྫ དེཝོརོཧནཾ ཀརཱིཏི སུཏྭཱ ཨཱཡུསངྑཱརོསྶཛྫནེ གམིསྶཱམཱཏི ཨཱཡུསངྑཱརཾ ཨོསྶཛཱིཏི སུཏྭཱ ན ཏཱཝ ནིཊྛཱཏི པརིནིབྦཱནདིཝསེ གམིསྶཱམཱཏི?

ཨཛྫ ¶ བྷགཝཱ ཡམཀསཱལཱནམནྟརེ དཀྑིཎེན པསྶེན སཏོ སམྤཛཱནོ སཱིཧསེཡྻཾ ཨུཔགཏོ བལཝ པཙྩུསམཡེ པརིནིབྦཱཡིསྶཏི ཏུམྷེ ཀསྶ གཎྠཐཱཏི ཝུཏྟཱ པན ཀིནྣཱམེཏཾ ཨཛྫེཝ མཱཏུཀུཙྪིཡཾ པཊིསཎྡྷིཾ གཎྷི ཨཛྫེཝ ཀུཙྪིཏོ ནིཀྑནྟོ, ཨཛྫེཝ མཧཱབྷིནིཀྑམནཾ ནིཀྑམི. ཨཛྫེཝབུདྡྷོ ཨཧོསི ཨཛྫེཝ དྷམྨཙཀྐཾ པཝཏྟཡི. ཨཛྫེཝ ཡམཀཔཱཊིཧཱརིཡཾ ཨཀཱསི. ཨཛྫེཝ དེཝལོཀཱ ཨོཏིནཎྞཱ. ཨཛྫེཝ ཨཱཡུསངྑརཾ ཨོསྶཛི. ཨཛྫེཝ ཀིར པརིནིབྦུཏོ. ནནུ ནཱམ དུཏིཡ དིཝསེ ཡཱགུཔཱན ཀཱལམཏྟམྤི ཋཱཏབྦཾ ཨསྶ, དས པཱརམིཡོ པཱུརེཏྭཱ བུདྡྷཏྟཾ པཏྟསྶ ནཱམ ཨནནུཙྪཝིཀནྟི ཨཔརི ནིཊྛིཏཱཝ མཱལཱཡོ གཧེཏྭཱ ཨཱགམྨ ཨནྟོ ཙཀྐཝཱལེ༹ ཨོཀཱསཾ ཨཱལབྷམཱནཱ ཙཀྐཝཱལ༹ མུཁཝཊྚིཡཾ ལབྷིཏྭཱ ཨཱདྷཱཝནྟིཡོ ཧཏྠེན ཧཏྠཾ གཱིཝཱཡ གཱིཝཾ གཧེཏྭཱ ཏཱིཎི རཏནཱནི ཨཱརབྦྷདྭཏྟིཾསམཧཔུརིསལཀྑཎཱནི ཚབྦཎྞརཾསིཡོ དསཔཱརམིཡོ ཨདྡྷཙྪཊྛཱནི ཛཱཏཀསཏཱནི ཙུདྡསྶ བུདྡྷཉཱཎཱནི ཨཱརབྦྷ གཱཡིཏྭཱ ཏསྶ ཏསྶ ཨཝསཱནེ སཧཱཡ ཧེ སཧཱཡ ཧེཏི ཝདནྟི. ཨིདམེཏཾ པཊིཙྩཝུཏྟཾ-དིབྦཱནིཔི སཾགཱིཏཱནི ཨནྟལིཀྑེ ཝཏྟནྟིཏི.

བྷགཝཱ པན ཨེཝཾ མཧཏིཡཱ པཱུཛཱཡ ཝཏྟམཱནཡཱ པཋམཡཱམེ མལླཱནཾ དྷམྨཾ དེསེསི མཛ྄ཛྷིམཡཱམེ སུབྷདྡསྶ དྷམྨཾ དེསེཏྭཱ ཏཾ མགྒཕལེ པཏིཊྛཱཔེསི པཙྪིམཡཱམེ བྷིཀྑུ ཨོཝདིཏྭཱ བལཝ པཙྩཱུས སམཡེ མཧཱཔཐཝིཾ ཀམྤེནྟོ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡི པརིནིབྦུཏེ པན བྷགཝཏི ལོཀནཱཐེ ཨཱནཎྡཏྠེརོ མལླརཱཛུནཾ ཏཾ པཝཏྟིཾ ཨཱརོཙེཏི ཏེ སུཏྭཱཝ གཎྡྷམཱལཾ སབྦཉྩ ཏཱལཱཝཙརཾ པཉྩ ཙ དུསྶཡུགསཏཱནི ཨཱདཱཡ གནྟྭཱ བྷགཝཏོ སརཱིརཾ ནཙྩེཧི - གཱིཏེཧི - ཝཱདིཏེཧི - མཱལེཧི - གཎྡྷེཧི སཀྐརོནྟཱ གརུཀརོནྟཱ མཱནེནྟཱ - པཱུཛེནྟཱ ཙེལཝིཏཱནཱནི ཀརོནྟཱ མཎྜལ མཱལཱནི པཊིཡཱདེནྟཱ ཨེཝཾ ཏཱ དིཝསཾ ཝཱིཏིནཱམེསུཾ.

ཨཐ དེཝཏཱནཉྩ ཀོསིནཱརཀཱནཾ མལླཱནཉྩ ཨེཏདཧོསི-ཨཏིཝིཀཱལོ ཁོ ཨཛྫ བྷགཝཏོ སརཱིར ཛྷཱཔེཏུཾ, སྭེདཱནི བྷགཝཏོ སརཱིརཾ ཛྷཔེསྶཱམཱཏི ཏཐཱ དུཏིཡམྤི དིཝསཾ ཝཱིཏིནཱམེསུཾ. ཏཐཱ ཏཏིཡཾ ཙཏུཏྠཾ པཉྩམཾ ཚཊྛམྤི དིཝསཾ ཝཱིཏིནཱམེསུཾ སཏྟ མེ དིཝསེ དེཝཏཱ ཙ དོསིནཱརཀཱ མལླཱ ཙ བྷགཝཏོ སརཱིརཾ དིབྦེཧི མཱནུསཀེཧི ཙ ནཙྪེཧི - གཱིཏེཧི - ཝཱདིཏེཧི - མཱལེཧི - གཎྡྷེཧི སཀྐཱརོནྟོ གརུཀརོནྟཱ མཱནེནྟཱ པཱུཛེནྟཱ ནགརམཛ྄ཛྷེན ནཱིཧརིཏྭཱ ཡཏྠ མཀུཊབཎྡྷནཾ ནཱམ མལླཱནཾ ཙེཏིཡཾ ཏཏྠ ནིཀྑིཔིཾསུ

ཏེན ཁོ པན སམཡེན ཀུསིནཱརཱ ཡཱཝ སནྡྷིསམལ སཾཀཊཱིརཱཛནྣུམཏྟེན ཨོདྷིནཱ མཎྡཱརཝ པུཔྥེན སཏྠཏཱ ཧོཏི ཨཐ ཁོ ཀོསིནཱརཀཱ ¶ མལླཱ བྷགཝཏོ སརཱིརཾ ཙཀྐཝཏྟིསྶ སརཱིརཾ ཝིཡ ཨཧཏེན ཝཏྠེན ཝེཋེསུཾ ཨཧཏེན ཝཏྠེན ཝེཋེཏྭཱ ཝིཧཏེན ཀཔྤཱསེན ཝེཋེསུཾ ཝིཧཏེན ཀཔྤཱསེན ཝེཋེཏྭཱ ཨཧཏེན ཝཏྠེན ཝེཋེསུཾ. ཨེཏེནེཝ ནཡེན པཉྩཧིཡུགསཏེཧི ཝེཋེཏྭཱ ཨཱཡསཱཡ ཏེལདོཎིཡཱ པཀྑིཔིཏྭཱ ཨཉྙིསྶཱ ཨཱཡསཱཡ དོཎིཡཱ པཊིཀུཛྫེཏྭཱ སབྦགནྡྷཱནཾ ཙིཏཀཾ ཀརིཏྭཱ བྷགཝཏོ སརཱིརཾ ཙིཏཀཾ ཨཱརོཔེསུཾ. ཏེན ཁོ པན སམཡེན ཨཱཡསྨཱ མཧཱ ཀསྶཔོ པཱཝཱཡ ཀུསིནཱརཾ ཨདྡྷཱནམགྒ པཊིཔནྣོ ཧོཏི མཧཏཱབྷིཀྑུསངྒྷེན སདྡྷིཾ པཉྩམཏྟེཧི བྷིཀྑུསཏེཧི ཏེན ཁོ པན སམཡེན ཐེརེ ཙིཏྟཾ པསཱདེཏྭཱ སགྒེ ནིབྦཏྟཱ དེཝཏཱ ཏསྨིཾ སམཱགམེ ཐེརཾ ཨདིསྭཱ ཀུཧིནྣུ ཁོ ཨམྷཱཀཾ ཀུལུཔག ཐེརོཏི ཨཱཝཛྫེནྟོ ཨནྟརཱམགྒཔཊིཔནྣཾ དིསྭཱ ཨམྷཱཀཾ ཀུལུཔག ཐེརེ ཨཝཎྡིཏེ ཙིཏཀོ མཱ པཛྫལིཏྠཱཏི ཨདྷིཊྛིཧིཾསུ.

ཨཐ ཁོ ཙཏྟཱརོ མལླཔཱམོཀྑཱ སཱིསཾ ནཧཱཏཱ ཨཧཏཱནི ཝཏྠཱནི ནིཙཏྠཱ ཝཱི སཾརཏནསཏིཀཾ ཙཎྡནཙིཏཀཾ ཨཱལིམྤེསྶཱམཱཏི ཨཊྛཔི སོལསཔི དྭཏྟིཾསཱཔི ཛནཱ ཧུཏྭཱ ཡམཀ ཨུཀྐཡོ གཧེཏྭཱ ཏཱལཝཎེཊཧི ཝིཛནྟཱ བྷསྟཱནི དྷམནྟཱ ན སཀྐོནྟིཡེཝ ཨགྒིཾ གཱཧཱཔེཏུཾ. ཨཐ ཁོ ཀོསིནཱརཀཱ མལླཱ ཙིཏཀསྶ ཨཔཛྫལན ཀཱརཎཾ ཨཱཡསྨནྟཾ ཨནུརུདྡྷཾ པུཙྪིཏྭཾ དེཝཏཱནཾ ཨབྷིཔྤཱཡཾ སུཏྭཱ མཧཱཀསྶཔོ ཀིར བྷོ པཉྩཧི བྷིཀྑུསཏེཧི སདྡྷིཾ དསབལསྶ པཱདེ ཝནྡིསྶཱམཱིཏི ཨཱགཙྪཏི ཏསྨིཾ ཀིར ཨནཱགཏེ ཙིཏཀོ ན པཛྫལཏི ཀཱིདིསོ བྷོསོ བྷིཀྑུ ཀཱལོ ཨོདཱཏོ དཱིགྷོ རསྶོ ཨེཝརཱུཔེ ནཱམ བྷོ བྷིཀྑུམྷི ཋིཏོ ཀིཾ དསབལསྶ པརིནིབྦཱནཾ ནཱམཱཏི དེཙི གཎྡྷམཱལཱདི ཧཏྠཱ པཊིཔཐཾ གཙྪིཾསུ ཀེཙི ཝཱིཐིཡོ ཝིཙིཏྟཱ ཀཏྭཱ ཨཱགམནམགྒཾ ཨོལོཀཡམཱནཱ ཨཊྛཾསུ. ཨཐ ཁོ ཨཱཡསྨཱ མཧཱཀསྶཔོ ཡེན ཀུསིནཱརཱ མཀཱུཊབཎྡྷནཾ ནཱམ མལླཱནཾ ཙེཏིཡཾ, ཡེན བྷགཝཏོ ཙིཏཀོ ཏེནུཔསངྐམི. ཨུཔསངྐམིཏྭཱ ཨེཀཾསཾ ཙཱིཝརཾ ཀཏྭཱ ཏིཀྑཏྟུཾ ཙིཏཀཾ པདཀྑིཎཾ ཀཏྭཱ ཨཱཝཛྫེནྟོཝ སལླཀྑེསི-ཨིམསྨིཾ ཋཱནེ པཱདཱཏི ཏཏེ པཱདསམཱིཔེ ཋཏྭཱ ཨབྷིཉྙཱཔཱདཀཾ ཙཏུཏྠཛ྄ཛྷཱནཾ སམཱཔཛྫིཏྭཱ ཝུཊྛཱཡ ཨརསཧསྶ པཏིམཎྜིཏཱ དསབལསྶ པཱདཱ སདྡྷིཾ ཀཔྤཱས པཊལེཧི པཉྩདུསྶཡུགསཏཱནི སུཝཎྞདོཎིཾ ཝཎྡནཙིཏཀཉྩ དྭེདྷཱ ཀཏྭཱ མཡ྄ཧཾ ཨུཏྟམངྒེ སིརསི པཏིཊྛཧནྟཱུཏི ཨདྷིཊྛཱསི སཧ ཨདྷིཊྛཱན ཙིཏྟེན ཏཱནི དུསྶཡུགཱདིནི དྭེདྷཱ ཀཏྭཱ ཝལཱཧཀནྟརཱ པུཎྞཙཎྡོ ཝིཡ པཱདཱ ནིཀྑམིཾསུ.

ཐེརོ ཝིཀསིཏ རཏྟཔདུམ སདིསེ ཧཏྠེ པསཱརེཏྭཱ སུཝཎྞཝཎྞེ སཏྠུ པཱདེ ཡཱཝ གོཔྥཀཱ བཱལ༹ྷཾ གཧེཏྭ ཨཏྟནོ སིརཝརེ པཏིཊྛཱཔེསི མཧཱཛནོ ཏཾ ཨཙྪརིཡཾ དིསྭཱ ཨེཀཔྤཧཱརེ ནེཝ མཧཱནཱདཾ ནདི. གཎྡྷམཱལཱདཱིཧི པཱུཛེཏྭཱ ཡཐཱརུཙིཾ ཝཎྡི. ཨེཝ པན ¶ ཐེརེན ཙ མཧཱཛནེན ཙ ཏེཧི ཙ པཉྩཧི བྷིཀྑུསཏེཧི ཝཎྡིཏ མཏྟེཐེརསྶ ཧཏྠཏོ མུཉྩིཏྭཱ ཨལཏྟཀ ཝཎྞཱནི བྷགཝཏོ པཱདཏཱལཱནི དཱརུཨཱདིསུ ཀིཉྩི ཨཙཱལེཏྭཱཝ ཡཐཱཊྛཱནེ པཏིཊྛཧིཾསུ. བྷགཝཏོ པཱདེསུ ནིཀྑམནྟེསུ ཝཱ པཝིསནྟེསུ ཝཱ ཀཔྤཱསཨཾསུ ཝཱ དསཱཏནྟུ ཝཱ ཏེལབིཎྡུ ཝཱ དཱརུཁཎྜཾ ཝཱ ཋཱནཱ ཙལིཏཾ ནཱམ ནཱཧོསི. སབྦཾ ཡཐཱཊྛཱནེ ཋིཏམེཝ ཨཧོསི. ཨུཊྛཧིཏྭཱ པན ཨཏྠངྒཏེ ཙཎྡེ ཝིཡ སཱུརིཡེ ཝིཡ ཙ ཏཐཱགཏསྶ པཱདེསུ ཨནྟརཧིཏེསུ མཧཱཛནོ མཧཱཀཎྡིཏཾ ཀཎྡི. པརིནིབྦུཏཀཱལཏོ ཨདྷིཀཏརཾ ཀཱརུཉྙཾ ཨཧོསི ཨཐ ཁོ དེཝཱཏཱནུབྷཱཝེན པནེས ཙིཏཀེ སམནྟཏོ ཨེཀཔྤཧཱརེནེཝ པཛྫལི. ཛྷཱཡམཱནསྶ བྷགཝཏོ སརཱིརསྶ ཚཝི ཙམྨ མཾསཱདཱིནཾ ནེཝ ཚཱརིཀཱམཏྟམྤི ཨནྟམསོ པཉྙཱཡིཏྠ ན མསི, སུམན མཀུལ སདིསཱ པན དྷོཏམུཏྟ སདིསཱ སུཝཎྞསདིསཱ ཙ དྷཱཏུཡོ ཨཝསིསྶིཾསུ.

དཱིགྷཱཡུཀ བུདྡྷཱནཉྷི སརཱིརཾ སུཝཎྞཀྑཎྡྷསདིསཾ ཨེཀགྷནམེཝ ཧོཏི. བྷགཝཱ པན ཨཧཾན ཙིརཾ ཋཏྭཱ ཋཏྭཱ པརིནིབྦཱཡཱམི. མཡ྄ཧཾ སཱསནཾ ན ཏཱཝ སབྦཏྠ ཝིཏྠཱརིཏཾ, ཏསྨཱ པརིནིབྦུཏསྶཔི མེ སཱསསམཏྟམྤི དྷཱཏུཾ གཧེཏྭཱ ཨཏྟནོ ཨཏྟནོ ཝསནཊྛཱནེ ཙེཏིཡཾ ཀཏྭཱ པརིཙརནྟོ མཧཱཛནོ སགྒཔརཱཡནོ ཧོཏིཏི དྷཱཏཱུནཾ ཝིཀིརཎཾ ཨདྷིཊྛཱསི. ཀཏི པནསྶ དྷཱཏུཡོ ཝིཔྤཀིཎྞཱ, ཀཏི ན ཝིཔྤཀིཎྞཱཏི ཙཏསྶོ དཱཊྛཱ, དྭེ ཨཀྑཀཱ, ཨུཎྷཱིསནྟི ཨིམཱ སཏྟདྷཱཏུཡོ ན ཝིཔྤཀིཎྞཱ. སེསཱ ཝིཔྤཀིརིཾསུ. ཏཏྠ སབྦཁུདྡཀཱ དྷཱཏུ སཱསཔ བཱིཛམཏྟཱ ཨཧོསི མཧཱདྷཱཏུ མཛ྄ཛྷེ བྷིནྣ ཏཎྜུལམཏྟཱ. ཨཏིམཧཏཱི མཛ྄ཛྷེ བྷིནྣམུགྒ བཱིཛམཏྟཱ ཨཧོསི.

དཌྜྷེ ཁོ པན བྷགཝཏོ སརཱིརེ ཨཱཀཱསཏོ ཨགྒབཱཧུམཏྟཱཔི ཛངྒྷམཏྟཱཔི ཏཱལཀྑཎྡྷམཏྟཱཔི ཨུདཀདྷཱརཱ པཏིཏྭཱ ཙིཏཀཾ ནིབྦཱཔེསི ན ཀེཝལཾ ཨཱཀཱསཏོཡེཝ པརིཝཱརེཏྭཱ ཋིཏསཱལརུཀྑཱནམྤི སཱཁཏྟར ཝིཊཔནྟརེཧི ཨུདཀདྷཱརཱ ནིཀྑམིཏྭཱ ནིབྦཱཔེསུཾ, བྷགཝཏོ ཙིཏཀོ མཧནྟོ, སམནྟཱ པཐཝིཾ བྷིཎྡིཏྭཱ ཏཾངྒལསཱིསམཏྟཱ ཨུདཀཝཊྚི ཨེལི༹ཀ ཝཊཾསཀ སདིསཱ གནྟྭཱ ཙིཏཀམེཝ གཎྷི མལླརཱཛཱནོ ཙ སུཝཎྞགྷཊེ རཛཏགྷཊེ ཙ པཱུརེཏྭཱ ཨཱབྷཏ ནཱནཱགཎྡྷོདཀེན སུཝཎྞ རཛཏམཡེཧི ཨཊྛདནྟཀེཧི ཝིཀིརིཏྭཱ ཙཎྡནཙིཏཀཾ ནིབྦཱཔེསུཾ. ཏཏྠ ཙིཏཀེ ཛྷཡམཱནེ པརིཝཱརེཏྭཱ ཋིཏ སཱལརུཀྑཱནཾ སཱཁནྟརེཧི ཝིཊཔནྟརེཧི པཏྟནྟརེཧི ཙ ཛཱལེ ཨུགྒཙྪནྟེ པཏྟཾ ཝཱ སཱཁཱ ཝཱ དཌྜྷཱ ནཱམ ནཏྠི ཀིཔིལླིཀཱཔི མཀྐཊཀཱཔི པཱཎཀཱཔི ཛཱལཱནཾ ཨནྟརེ ནེཝ ཝིཙརནྟི.

ཨཱཀཱསཏོ པཏིཏ ཨུདཀདྷཱརཱསུཔི སཱལརུཀྑེཧི ནིཀྑནྟ྄ौདཀདྷཱརཱསུཔི པཐཝིཾ བྷིཎྡིཏྭཱ ནིཀྑནྟ ཨུདཀདྷཱརཱསུཔི དྷམྨཏཱཝ པམཱཎཾ ཨེཝཾ ¶ ཙིཏཀཾ ནིབྦཱཔེཏྭཱ པན མལླརཱཛཱནོ སནྠཱགཱརེ ཙཏུཛཱཏིགཎྡྷ པརིབྷཎྜཾ ཀཱརེཏྭཱ ལཱཛ པཉྩམཱནི པུཔྥཱནི ཝིཀིརིཏྭཱ ཨུཔརི ཙེལཝིཏཱནཾ བཎྡྷཱཔེཏྭཱ སུཝཎྞཏཱརཀཱཧི ཁཙེཏྭཱ ཏཏྠ གཎྡྷདཱམ མཱལཱདཱམ རཏནདཱམཱནི ཨོལམྦེཏྭཱ སཏྠཱགཱརཏོ ཡཱཝ མཀུཊ བཎྡྷན སངྑཱཏཱ སཱིསཔྤསཱདྷན མངྒལསཱལཱ ཏཱཝ ཨུབྷོཧི པསྶེཧི སཱཎིཀིལཉྫ པརིཀྑེཔཾ ཀཱརེཏྭཱ ཨུཔརི ཙེལཝིཏཱནཾ བཎྡྷཱཔེཏྭཱ སུཝཎྞཏཱརཀཱཧི ཁཙེཏྭཱ ཏཏྠཱཔི གཎྡྷདཱམ མཱལཱདཱམ རཏནདཱམཱནི ཨོལམྦེཏྭཱ མཎིདཎྜེཧི པཉྩཝཎྞདྷཛེ ཨུསྶཔེཏྭཱ སམནྟཱ དྷཛཔཏཱཀཱ པིརིཀྑིཔིཏྭཱ སིཏྟསམྨཊྛཱསུ ཝཱིཐིསུ ཀདལིཡོ པུཎྞགྷཊེ ཙ ཋཔེཏྭཱ དཎྜདཱིཔིཀཱ ཛཱལེཏྭཱ ཨལངྐཏ ཧཏྠིཀྑཎྡྷེ སཧདྷཱཏཱུཧི སུཝཎྞདོཎིཾ ཋཔེཏྭཱ མཱལཱགཎྡྷཱདཱིཧི པཱུཛེཏྭཱ སཱདྷུཀཱིལ༹ཾ ཀཱིལ༹ནྟཱ ཨནྟོནགརཾ པཝེསེཏྭཱ སནྠཱགཱརེ སརབྷམཡ པལླངྐེ ཋཔེཏྭཱ ཨུཔརི སེཏཙྪཏྟཾ དྷཱརཡིཏྭཱ སཏྟི ཧཏྠེཧི པུརིསེཧི པརིཀྑིཔཱཔེཏྭཱ ཧཏྠཱིཧི ཀུམྦྷེན ཀུམྦྷཾ པཧརནྟེཧི པརིཀྑིཔཱཔེཏྭཱ ཏཏོ ཨསྶེཧི གཱིཝཱཡ གཱིཝཾ པཧརནྟེཧི ཏཏོ རཐེཧི ཨཱཎིཀོཊིཡཱ ཨཱཎིཀོཊིཾ པཧནྟེཧི ཏཏོ ཡོདྷེཧི བཱཧཱུཧི བཱཧུཾ པཧརནྟེཧི ཏེསཾ པརིཡནྟེ ཀོཊིཡཱ ཀོཊིཾ པཧརམཱནེཧི དྷནཱུཧི པརིཀྑིཔཱཔེསུཾ.

ཨིཏི སམནྟཱ ཡོཛནཔྤམཱཎཾ ཋཱནཾ སནྣཱཧགཙྪིཏཾ ཝིཡ ཀཏྭཱ ཨཱརཀྑཾ སཾཝིདཧིཾསུ. ཀསྨཱ པནེཏེ ཨེཝམཀཾསཱུཏི. ཨིཏོ པུརིམེསུ དྭཱིསུ སཏྟཱཧེསུ ཏེ བྷིཀྑུསངྒྷསྶ ཋཱནནིསཛྫོཀཱསཾ ཀརོནྟཱ ཁཱདནཱིཡ བྷོཛནཱིཡཾ སཾཝིདཧནྟཱ སཱདྷུཀཱིལཱ༹ཡ ཨོཀཱསཾ ན ལབྷིཾསུ ཏཏོ ཏེསཾ ཨཧོསི - ཨིམཾ སཏྟཱཧཾ སཱདྷུཀཱིལ༹ཾ ཀཱིལི༹སྶཱམ. ཋཱནཾ ཁོ པནེཏཾ ཝིཛྫཏི ཡཾ ཨམྷཱཀཾ པམཏྟབྷཱཝཾ ཉཏྭཱ ཀོཙཱིདེཝ ཨཱགནྟྭཱ དྷཱཏུཡོ གཎྷཡྻ-ཏསྨཱ ཨཱརཀྑཾ ཋཔེཏྭཱ ཀཱིལི༹སྶཱམཱཏི ཏེན ཏེ ཨེཝམཀཾསུ.

ཨཐ ཁོ ཨསྶོསི ཁོ རཱཛཱ མཱགདྷོ ཨཛཱཏསཏྟུ བྷགཝཱ ཀིར ཀུསིནཱརཱཡཾ པརིནིབྦུཏོཏི ཀཐཾ ཨསྶོསི པཋམམེཝསྶ ཨམཙྩཱ སུཏྭཱ ཙིནྟཡིཾསུ? སཏྠཱ ནཱམ པརིནིབྦུཏོ, ན སོ སཀྐཱ པུན ཨཱཧརིཾཏུ པོཐུཛྫནིཀ སདྡྷཱཡ པན ཨམྷཱཀཾ རཉྙཱ སདིསོ ནཏྠི. སཙེ ཨེས ཨིམིནཱཝ ནིཡཱམེན སུཎིསྶཏི, ཧདཡམསྶ ཨེལི༹སྶཏི རཱཛཱ ཁོ པནམྦྷེཧི ཨནུརཀྑིཏབྦོཏི ཏེ ཏིསྶོ སུཝཎྞདོཎིཡོ ཨཱཧརིཏྭཱ ཙཏུམདྷུརསྶ པཱུརེཏྭཱ རཉྙོ སནྟིཀཾ གནྟྭཱ ཨེཏདཝོཙུཾ. དྭེ ཨམྷེཧི སུཔིནཀོ དིཊྛོ ཏསྶ པཊིགྷཱཏཏྠཾ ཏུམྷེཧི དུཀཱུལཔཊྚཾ ནིཝཱསེཏྭཱ ཡཐཱ ནཱསཱཔུཊམཏྟཾ པཉྙཱཡཏི ཨེཝཾ ཙཏུམདྷུརདོཎིཡཾ ནིཔཛྫིཏུཾ ཝཊྚཏཱིཏི. རཱཛཱ ཨཏྠཝརཀཱནཾ ཝཙནཾ སུཏྭཱ ཨེཝཾ ཧོཏུ ཏཱཏཱ’ཏི སམྤཊིཙྪིཏྭཱ ཏཐཱ ཨཀཱསི.

ཨཐེཀོ ¶ ཨམཙྩོ ཨལངྐཱརཾ ཨོམུཉྩིཏྭཱ ཀེསེ པརིཀིརིཡ ཡཱཡ དིསཱཡ སཏྠཱ པརིནིབྦུཏོ ཏདབྷིམུཁོ ཧུཏྭཱ ཨཉྫལིམྤགྒཡ྄ཧ རཱཛཱནཾ ཨཱཧ- དེཝམརཎཏོ མུཉྩནཀསཏྟོ ནཱམ ནཏྠི. ཨམྷཱཀཾ ཨཱཡུཝདྡྷཀེནཱ ཙེཏིཡཊྛཱནཾ པུཉྙཀྑེཏྟཾ ཨབྷིསེཀཔིཊྛིཀཱ བྷགཝཱ སཏྠཱ ཀུསིནཱརཱཡཾ པརིནིབྦུཏོཏི རཱཛཱ སུཏྭཱ ཝིསཉྙཱི ཛཱཏོ ཙཏུམདྷུརདོཎི ཨུསུམཾ མུཉྩི རཱཛཱནཾ ཨུཀྑིཔིཏྭཱ དུཏིཡཱཡ དོཎིཡཱ ནིཔཛྫཱཔེསུཾ སོ སཉྙཾ ལབྷིཏྭཱ ཏཱཏ ཀིཾ ཝདཐཱཏི པུཙྪི. སཏྠཱ མཧཱརཱཛ པརིནིབྦུཏོཏི, པུན ཝིསཉྙི ཛཱཏོ ཙཏུམདྷུརདོཎིཾ ཨུསུམཾ མུཉྩི. ཨཐ ནཾ ཏཏོཔི ཨུཀྑིཔིཏྭཱ ཏཏིཡཱཡ དོཎིཡཱ ནིཔཛྫཱཔེསུཾ སོ པུན སཉྙཾ པཊིལབྷིཏྭཱ ཏཱཏ ཀིཾ ཝདཐཱཏི པུཙྪི སཏྠཱ མཧཱརཱཛ པརིནིབྦུཏོཏི. རཱཛཱ པུན ཝིསཉྙཱི ཛཱཏོ ཙ མདྷུརདོཎི ཨུསུམཾ མུཉྩི.

ཨཐ ནཾ ཏཏོཔི ཨུཀྑིཔིཏྭཱ ནཧཱཔེཏྭཱ མཏྠཀེ གྷཊེཧི ཨུདཀཾ ཨཱསིཉྩིཾསུ རཱཛཱ སཉྙཾ པཊིལབྷིཏྭཱ ཨཱསནཱ ཨུཊྛཱཡ གཎྡྷཔརིབྷཱཝཱིཏེ མཎིཝཎྞཀེསེ སུཝཎྞཕལཀ ཝཎྞཱཡ པིཊྛིཡཾ པཀིརིཏྭཱ པཝཱལ༹ངྒུརཝཎྞཱཧི སུཝཊྚིཏངྒུལཱིཧི སུཝཎྞབིམྦཀ ཝཎྞཾ ཨུརཾ སཾསིབྦནྟོ ཝིཡ གཧེཏྭཱ པརིདེཝམཱནོ ཨུམྨཏྟཀཝེསེནེཝ ཨནྟརཝཱིཐིཾ ཨོཏིཎྞོ སོ ཨལངྐཏ ནཱཊཀ པརིཝུཏོ ནགརཱ ནིཀྑམྨ ཛཱིཝཀམྦཝནཾ གནྟྭཱ ཡསྨིཾ ཋཱནེ ནིསིནྣེན བྷགཝཏཱ དྷམྨོ དེསིཏོ ཏཾ ཨོལོཀེཏྭཱ བྷགཝཱ སབྦཉྙུ ནནུ མེ ཨིམསྨིཾ ཋཱནེ ནིསཱིདིཏྭཱ དྷམྨཾ དེསཡིཏྠ ཏུམྷེ སོཀསལླཾ ཝིནོདཡིཏྠ. ཏུམྷེ མཡ྄ཧཾ སོཀསལླཾ ནཱིཧརིཏྠ. ཨཧཾ ཏུམྷཱཀཾ སརཎཾ གཏོ. ཨིདཱནི པན མེ པཊིཝཙནམྤི ན དེཐ བྷགཝཱཏི པུནཔྤུན པརིདེཝིཏྭཱ ནནུ བྷགཝཱ ཨཧཾ ཨཉྙདཱ ཨེཝརཱུཔེ ཀཱལེ ཏུཊྛེ མཧཱབྷིཀྑུསངྒྷཔརིཝཱརཱ ཛམྦུདཱིཔཏལེ ཙཱརིཀཾ ཙརཐཱཏི སུཎཱམ ཨིདཱནི པན ཨཧཾ ཏུམྷཱཀཾ ཨནནུརཱུཔཾ ཨཡུཏྟཾ པཝཏྟིཾ སུཎཱམཱིཏི ཨེཝམཱདཱིནི ཙ ཝཏྟཱ སཊྛིམཏྟཱཧི གཱཐཱཧི བྷགཝཏོ གུཎཾ ཨནུསྶརིཏྭཱ ཙིནྟེསི མམ པརིདེཝིཏེ ནེཝ ན སིཛ྄ཛྷཏི. དསབལསྶ དྷཱཏུཡོ ཨཱཧརཱཔེསྶཱམིཏི མལླརཱཛུནཾ དཱུཏཉྩ པཎྞཉྩ པཱཧེསི.

བྷགཝཱཔི ཁཏྟིཡོ, ཨཧམྤི ཁཏྟིཡོ, ཨཧམྤི ཨརཧཱམི བྷགཝཏོ སརཱིརཱནཾ ཐཱུཔཉྩ མཧཉྩ ཀཱརེཏུནྟི པེསེཏྭཱ པན སཙེ དསྶནྟི སུཎྡརཾ, ནོ ཙེ དསྶནྟི ཨཱཧརཎུཔཱཡེན ཨཱཧརིསྶཱམཱིཏི ཙཏུརངྒིནིཾ སེནཾ སནྣཡ྄ཧིཏྭཱ སཡམྤི ནིཀྑནྟོཡེཝ ཡཐཱ ཙ ཨཛཱཏསཏྟུ ཨེཝཾ ཝེསཱལིཡཾ ལིཙྪཝིརཱཛཱནོ ཀཔིལཝཏྠུམྷི སཀྱརཱཛཱནོ ཨལླཀཔྤཀེ བུལཡོ རཱམགཱམཀེ ཀོལི༹ཡཱ ཝེཋདཱིཔཀེ བྲཱཧྨཎོ པཱཝཱཡཉྩ མལླཱ དཱུཏཾ པེསེཏྭཱ སཡམྤི ཙཏུརངྒིནིཡཱ སེནཱཡ ནིཀྑམིཾསུཡེཝ ཏཏྠ པཱཙེཡྻཀཱ སབྦེཧི ཨཱསནྣཏརཱ ཀུསིནཱརཱཏོ ¶ ཏིགཱཝུཏནྟརེ ནགརེ ཝསནྟི. བྷགཝཱཔི པཱཝཾ པཝིསིཏྭཱ ཀུསིནཱརཾ གཏོ. མཧཱཔརིཧཱརཱ པནེཏེ རཱཛཱནོ པརིཧཱརཱ ཀཱརེཾནྟཱཝ པཙྪཏོ ཛཱཏཱ. ཏེ སབྦེཔི སཏྟནགརཝཱསིནོ ཨཱགཏྟྭཱ ཨམྷཱཀཾ དྷཱཏུཡོ ཝཱ དེནྟུ ཡུདྡྷཾ ཝཱཏི ཀུསིནཱརཱ ནགརཾ པརིཝཱརཡིཾསུ.

ཏཏོ མལླརཱཛཱནོཨེཏདཝོཙུཾ-བྷགཝཱཨམྷཱཀཾགཱམཀྑེཏྟེ པརིནིབྦུཏོ, ན མཡཾ སཏྠུ སཱསནཾ པཧིཎིམྷ ན གཏྟྭཱ ཨཱནཡིམྷ. སཏྠཱ པས སཡམེཝ ཨཱགནྟྭཱ སཱསནཾ པེསེཏྭཱ ཨམྷེ པཀྐོསཔེསི ཏུམྷེཔི ཁོ པན ཡཾ ཏུམྷཱཀཾ གཱམཀྑེཏྟེ རཏནཾ ཨུཔྤཛྫཏི ན ཏཾ ཨམྷཱཀཾ དེཐ སདེཝཀེ ལོཀེ བུདྡྷརཏནསམཾ རཏནཾ ནཱམ ནཏྠི, ཨེཝརཱུཔཾ. ཨུཏྟམཾ རཏནཾ ལབྷིཏྭཱ མཡཾ ན དསྶམཱཏི ཨེཝཾ ཏེ ཀལཧཾ ཝཌྜྷེཏྭཱ ན ཁོ པན ཏུམྷེཧིཡེཝ མཱཏུ ཐནཏོ ཁིརཾ པཱིཏཾ, ཨམྷེཧིཔི པཱིཏཾ ཏུམྷེཡེཝ པུརིསཱ ཨམྷེ ན པུརིསཱ ཧོཏུ ཧོཏཱུཏི ཨཉྙམཉྙཾ ཨཧཾཀཱརཾ ཀཏྭཱ སཱསན པཊིསཱསནཾ པེསེནྟཱ ཨཉྙམཉྙཾ མཱནགཛྫིཏཾ གཛྫིཾསུ ཡུདྡྷེ པན སཏི ཀོསིནཱརཀཱནཾཡེཝ ཛཡོ ཨབྷཝིསྶ, ཀསྨཱ དྷཱཏུཔཱསནཏྠཾ ཨཱགཏཱ དེཝཏཱ ཏེསཾ པཀྑཱཨཧེསུཾ.

ཏཏོ དོཎོ བྲཱཧྨཎོ ཨིམཾ ཝིཝཱདཾ སུཏྭཱ ཨེཏེ རཱཛཱནོ བྷགཝཏེ པརིནིབྦུཏཊྛཱནེ ཝིཝིདཾ ཀརོནྟི ན ཁོ པནེཏཾ པཏིརཱུཔཾ ཨལཾ ཨིམིནཱ ཀལཧེན ཙཱུཔསམེསྶཱམི ན ནྟི ཨུཎྞཏཔྤདེསེ ཋཏྭཱ དྭེབྷཱཎཝཱརཔརིམཱཎཾ དོཎགཛྫིཏཾ ནཱམ ཨཝོཙ ཏཏྠ པཊྛམཀབྷཱཎཝཱརེ ཏཱཝ ཨེཀཔདམྤི ཏེ ན ཛཱནིཾསུ དུཏིཡཀ བྷཱཎཝཱར པརིཡོསཱནེ’ཨཱཙརིཡསྶ ཝིཡ བྷོསདྡོ, ཨཱཙརིཡསྶ ཝིཡ བྷོ སདྡོ’ཏི སབྦེ ནཱི རཝཱ ཨཧེསུཾ སཀལཛམྦུདཱིཔཏལེ ཀིར ཀུལགྷརེ ཛཱཏོ ཡེབྷུཡྻེན ཏསྶ ན ཨནྟེཝཱསིཀོ ནཱམ ནཏྠི ཨཐ སོ ཏེ ཨཏྟནོ ཝཙནཾ སུཏྭཱ ཏུཎྷཱིབྷཱུཏེ ཝིདིཏྭཱ པུན ཨེཏདཝོཙ

‘‘སུཎནྟུ བྷོནྟོ མམ ཨེཀཝཱཀྱཾ

ཨམྷཱཀཾ བུདྡྷོ ཨཧུ ཁནྟིཝཱདོ,

ན ཧི སཱདྷཡཾ ཨུཏྟམ པུགྒལསྶ

སརཱིརབྷངྒེ སིཡཱ སམྤཧཱརོ

སབྦེཝ བྷོནྟོ སཧིཏཱ སམགྒཱ

སམྨོདམཱནཱ ཀརོམཊྛབྷཱགེ,

ཝིཏྠཱརིཀཱ ཧོནྟུ དིསཱཡུ ཐཱུཔཱ

བཧུཛྫནོ ཙཀྑུམཏོ པསནྣོ’’ཏི;

ཏཏྲཱཡམཏྠོ ‘‘ཨམྷཱཀཾ བུདྡྷོ ཨཧུ ཁནྟིཝཱདོ‘‘ཏི བུདྡྷབྷཱུམིཾ ཨཔྤཏྭཱཔི པཱརམིཡོ པཱུརེནྟོ ཁནྟིཝཱད ཏཱཔསཀཱལེ དྷམྨཔཱལཀུམཱར ཀཱལེ ཚདྡནྟཧཏྠིཀཱལེ བྷཱུརིདཏྟ ནཱགརཱཛ ཀཱལེ ཙམྤེཡྻ ¶ ནཱགརཱཛ ཀཱལེ སངྑཔཱལ ནཱགརཱཛ ཀཱལེ མཧཱཀཔིཀཱལེ ཨཉྙེསུཔི བཧཱུསུ ཛཱཏཀེསུ པརེསུ ཀོཔཾ ཨཀཏྭཱ ཁནྟིམེཝ ཨཀཱསི. ཁནྟིམེཝ ཝཎྞཡི, ཀིམངྒ པན ཨེཏརཧི ཨིཊྛཱནིཊྛེསུ ཏཱདིལཀྑཎཾ པཏྟོ སབྦཐཱཔི ཨམྷཱཀཾ བུདྡྷོ ཁནྟིཝཱདོ ཨཧོསི.

ཏསྶ ཨེཝཾ ཝིདྷསྶ ན ཧི སཱདྷཡ ཨུཏྟམཔུགྒལསྶ སརཱིརབྷངྒེ སིཡཱ སམྤཧཱརོ, ‘‘ན ཧི སཱདྷཡནྟི‘‘ན ཧི སཱདྷུ ཨཡཾ, ‘‘སརཱིརབྷངྒེཏི སརཱིར བྷངྒནིམིཏྟཾ དྷཱཏུཀོཊྛཱསཧེཏཱུཏི ཨཏྠོ ‘‘སིཡཱ སམྤཧཱརོ‘‘ཏི ཨཱཡུདྷ སམྤཧཱརོ ན ཧི སཱདྷུ སིཡཱཏི ཝུཏྟཾ ཧོཏི. ‘‘སབྦེཝ བྷོནྟོ སཧིཏཱ‘‘ཏི སབྦེཝ བྷཝནྟོ སཧིཏཱ བྷོཐ མཱ བྷིཛྫིཏྠ. ‘‘སམགྒཱཏི‘‘ ཀཱཡེན ཝཱཙཱཡ ཙ ཨེཀསནྣིཔཱཏཱ ཨེཀཝཙནཱ སམགྒཱ བྷོཐ ‘‘སམྨོདམཱནཱ‘‘ཏི ཙིཏྟེནཱཔི ཨཉྙམཉྙཾ མོདམཱནཱ བྷོཐ.’ཀརོམཊྛབྷཱགེ‘‘ཏི བྷགཝཏཱ སརཱིརཱནི ཨཊྛབྷཱགེ ཀརོམ. ‘‘ཙཀྑུམཏོ‘‘ཏི པཉྩཧི ཙཀྑུཧཱི ཙཀྑུཏཱ བུདྡྷསྶ, ན ཀེཝལཾ ཏུམྷེཡེཝ བཧུཛྫནོ པསནྣོ ཏེསུ ཨེཀོཔི ལདྡྷུ ཨཡུཏྟོ ནཱམ ནཏྠིཏི བཧུཾ ཀཱརཎཾ ཝཏྭཱ སཉྙཱཔེསི.

ཨཐ སབྦེཔི རཱཛཱནོ ཨེཝམཱཧཾསུ-ཏེན ཧི བྲཱཧྨཎ ཏྭཉྙེཝ བྷགཝཏོ སརཱིརཱནི ཨཊྛདྷཱ སམཾ སུཝིབྷཏྟཾ ཝིབྷཛཱཧཱིཏི. ཨེཝཾ བྷོཏི ཁོ དོཎོ བྲཱཧྨཎོ ཏེསཾ རཱཛཱུནཾ པཊིསྶུཏྭཱ དྷཱཏུཡོ སམཾ སུཝིབྷཏྟཾ ཝིབྷཛི.

ཏཏྲཱཡམནུཀྐམོ དོཎོ ཀིར ཏེསཾ པཊིསྶུཏྭཱ སུཝཎྞདོཎིཾ ཝིཝརཱཔེསི. རཱཛཱནོ ཨཱགནྟྭཱ དོཎིཡཾ ཡེཝཏཱ སུཝཎྞཝཎྞཱ དྷཱཏུཡོ དིསྭཱ བྷགཝཱ སབྦཉྙུ པུབྦེ མཡཾ ཏུམྷཱཀཾ དྭཏྟིཾས ལཀྑཎ པཏིམཎྜིཏཾ ཚབྦཎྞབུདྡྷརསྨིཁཙིཏཾ སུཝཎྞཝཎྞཾ སརཱིརཾ ཨདྡསཱམ ཨིདཱནི པན སུཝཎྞཝཎྞཱ དྷཱཏུཡོཝ ཨཝསིཊྛཱ ཛཱཏཱ, ན ཡུཏྟམིདཾ བྷགཝཱ ཏུམྷཱཀནྟི པརིདེཝིཾསུ. བྲཱཧྨཎོ ཏསྨིཾ སམཡེ ཏེསཾ པམཏྟབྷཱཝཾ ཉཏྭཱ དཀྑིཎདཱཋཾ གཧེཏྭཱ ཝེཋནྟརེ ཋཔེསི ཨཐ པཙྪཱ སམཾ སུཝིབྷཏྟཾ ཝིབྷཛི. སབྦཱཔི དྷཱཏུཡོ པཱཀཏིཀ ནཱལི༹ཡཱ སོལ༹ས ནཱལི༹ཡོ ཨཧོསུཾ. ཨེཀེཀ ནགརཝཱསིནོ དྭེ དྭེ ནཱལི༹ཡོ ལབྷིཾསུ.

བྲཱཧྨཎསྶ པན དྷཱཏུཡོ ཝིབྷཛནྟསྶེཝ སཀྐོ དེཝཱནམིནྡོ ཀེན ནུ ཁོ སདེཝཀསྶ ལོཀསྶ ཀངྑཱཙྪེདནཱཡ ཙཏུསཙྩཀཐཱཡ པཙྩཡབྷཱུཏཱ བྷགཝཏོ དཀྑིཎདཱཋཱ གཧིཏཱཏི ཨོལོཀེནྟོ བྲཱཧྨཎེན གཧིཏཱཏི དིསྭཱ བྲཱཧྨཎོ དཱཋཱཡ ཨནུཙྪཝིཀཾ སཀྐཱརཾ ཀཱཏུཾ ན སཀྑིསྶཏི གཎྷཱམི ནནྟི ཝེཋནྟརཏོ གཧེཏྭཱ སུཝཎྞ ཙངྒོཊཀེ ཋཔེཏྭཱ དེཝལོཀཾ ནེཏྭཱ ཙུལཱ༹མཎཱི ¶ ཙེཏིཡེ པཏིཊྛཱཔེསི བྲཱཧྨཎོཔི དྷཱཏུཡོ ཝིབྷཛིཏྭཱ དཱཋཾ ཨཔསྶནྟོ ཀེན མེ ཋཱ གཧིཏཱཏི པུཙྪིཏུམྤི ནཱསཀྑི. ནནུ ཏཡཱ དྷཱཏུཡོ ཝིབྷཛིཏཱ, ཀིཾ ཏྭཾ པཋམཾཡེཝ ཨཏྟནོ དྷཱཏཱུཧི ཨཏྠིབྷཱཝཾ ན ཨཉྙཱསཱིཏི, ཨཏྟནི དོསཱརོཔནཾ སམྤསྶམཱནོ མཡ྄ཧམྤི ཀོཊྛཱསཾ དེཐཱཏི ཝཏྟུམྤི ནཱསཀྑི.

ཏཏོ ཨཡཾ སུཝཎྞཀུམྦྷོཔི དྷཱཏུགཏིཀོཡེཝ ཡེན ཏཐཱགཏསྶ དྷཱཏུཡོ མིནིཏཱ. ཨིམསྶཱཧཾ ཐཱུཔཾ ཀརིསྶཱམཱིཏི ཙིནྟེཏྭཱ ཨིམཾ མེ བྷོནྟོ ཀུམྦྷཾ དདནྟཱུཏི ཨཱཧ ཏཏོ རཱཛཱནོ བྲཱཧྨཎསྶ ཀུམྦྷམདཾསུ པིཔྥལིཝནིཡཱཔི ཁོ མོརིཡཱ བྷགཝཏོ པརིནིབྦུཏབྷཱཝཾ སུཏྭཱ བྷགཝཱཔི ཁཏྟིཡོ, མཡམྤི ཁཏྟིཡོ མཡམྤི, ཨརཧཱམ ལབྷིཏུཾ བྷགཝཏོ སརཱིརཱནཾ བྷཱགནྟི དཱུཏཾ པེསེཏྭཱ ཡུདྡྷ སཛྫཱ ནིཀྑམིཏྭཱ ཨཱགཏཱ ཏེསཾ རཱཛཱནོ ཨེཝམཱཧཾསུ - ནཏྠི བྷགཝཏོ སརཱིརཱནཾ བྷཱགོ, ཝིབྷཏྟཱནི བྷགཝཏོ སརཱིརཱནི ཨིཏོ ཨངྒཱརཾ གརཐཱཏི. ཏེ ཏཏོ ཨངྒཱརཾ ཧརིཾསུ.

ཨཐ ཁོ རཱཛཱ ཨཛཱཏསཏྟུ ཀུསིནཱརཱཡ ཙ རཱཛགཧསྶ ཙ ཨནྟརེ པཉྩཝཱིསཏི ཡོཛནམགྒཾ ཨཊྛ ཨུསབྷཝིཏྠཏཾ སམཏལཾ ཀཱརེཏྭཱ སཱདིསཾ མལླརཱཛཱནོ མཀུཊབཎྡྷནསྶ ཙ སནྠཱགཱརསྶ ཙ ཨནྟརེ པཱུཛཾ ཀཱརེསུཾ ཏཱདིསཾ པཉྩཝཱིསཏིཡོཛནེཔི མགྒེ པཱུཛཱ ཀཱརེཏྭཱ ལོཀསྶ ཨནུཀྐཎྛནཏྠཾ སབྦཏྠ ཨནྟརཱཔཎེ པསཱརེཏྭཱ སུཝཎྞདོཎིཡཾ པཀྑིཏྟདྷཱཏུཡོ སཏྟིཔཉྫརེན པརིཀྑིཔཱཔེཏྭཱ ཨཏྟནོ ཝིཛིཏེ པཉྩཡོཛནསཏ པརིམཎྜལེ མནུསྶེ སནྣིཔཱཏཱཔེསི.

ཏེ དྷཱཏུཡོ གཧེཏྭཱ ཀུསིནཱརཱཏོ དྷཱཏུཀཱིལ༹ཾ ཀཱིལ༹ནྟཱ ནིཀྑམིཏྭཱ ཡཏྠ ཡཏྠ ཝཎྞཝནྟཱནི པུཔྥཱནི པསྶནྟི, ཏཏྠ ཏཏྠ དྷཱཏུཡོ སཏྟི ཨནྟརེ ཋཔེཏྭཱ ཏེསཾ པུཔྥཱནཾ ཁཱིཎཀཱལེ གཙྪནྟི. རཐསྶ དྷུརཊྛཱནཾ པཙྪིམཊྛཱནེ སམྤཏྟེ སཏྟ དིཝསེ སཱདྷུཀཱིལ༹ཾ ཀཱིལ༹ནྟི ཨེཝཾ དྷཱཏུཡོ གཧེཏྭཱ ཨཱགཙྪནྟཱནཾ སཏྟཝསྶཱནི སཏྟམཱསཱནི སཏྟ ཙ དིཝསཱནི ཝིཏིཝཏྟཱནི མིཙྪཱདིཊྛིཀཱ སམཎསྶ གོཏམསྶ པརིནིབྦུཏ ཀཱལཏོ པཊྛཱཡ བལཀྐཱརེན སཱདྷུཀཱིལི༹ཀཱཡ ཨུཔདྡུཏམྷཱ, སབྦེ ནོ ཀམྨནྟཱ ནཊྛཱཏི ཨུཛ྄ཛྷཱཡནྟཱ མནཾ པདཱུསེཏྭཱ ཚལཱ༹སཱིཏིསཧསྶམཏྟཱ ཨཔཱཡེ ནིབྦཏྟཱ, ཁཱིཎཱསཝ ཨཱཝཛྫིཏྭཱ མཧཱཛནོ མནཾ པདཱུསེཏྭཱ ཨཔཱཡེ ནིབྦཏྟོཏི སཀྐཾ དེཝརཱཛཱནཾ དིསྭཱ དྷཱཏུ ཨཱཧརཎུཔཱཡཾ ཀརིསྶཱམཱཏི ཏསྶ སནྟིཀཾ གནྟྭཱ ཏམཏྠཾ ཨཱརོཙེཏྭཱ དྷཱཏུ ཨཱཧརཎུཔཱཡཾ ཀཱརོཧི མཧཱརཱཛཱཏི ཨཱཧཾསུ. སཀྐོ ཨཱཧ ‘‘པུཐུཛྫནོ ནཱམ ཨཛཱཏསཏྟུནཱ སམོ སདྡྷོ ནཏྠི, ན སོ མམ ཝཙནཾ ཀརིསྶཏི ཨཔི ཙ ཁོ མཱརཝིབྷིསཀསདིསཾ ཝིབྷཱིསཀཾ དསྶེསྶཱམི ཡཀྑ གཱཧཀ ཁིཔནཀ ཨརོཙཀེ ཀརིསྶཱམི ཏུམྷེ ¶ ’མཧཱརཱཛ ཨམནུསྶཱ ཀུཔིཏཱ, དྷཱཏུཡོ ཨཱཧརཱཔེཐཱཏི’. ཝདེཡྻཱཐ ཨེཝཾ སོ ཨཱཧརཱཔེསྶཏཱིཏི. ཨཐ ཁོ སཀྐོ ཏཾ སབྦཾ ཨཀཱསི.

ཐེརཱཔི རཱཛཱནཾ ཨུཔསངྐམིཏྭཱ མཧཱརཱཛ ཨམནུསྶཱ ཀུཔིཏཾ, དྷཱཏུཡོ ཨཱཧརཱཔེཧཱིཏི བྷཎིཾསུ རཱཛཱ ན ཏཱཝ བྷནྟེ མཡ྄ཧཾ ཙིཏྟཾ ཏུསྶཏི. ཨེཝཾ སནྟེཔི ཨཱཧརཏཱུཏི ཨཱཧ སཏྟམེ དིཝསེ དྷཱཏུཡོ ཨཱཧརིཾསུ. ཨེཝཾ ཨཱཧཏདྷཱཏུཡོ གཧེཏྭཱ རཱཛཱ རཱཛགཧེ ཐུཔམཀཱསི ཨིཏརེཔི རཱཛཱནོ ཨཏྟནོ ཨཏྟནོ བལཱནུརཱུཔེན ནཱིཧརིཏྭཱ སཀསཀཊྛཱནེ ཐཱུཔམཀཾསུ. དོཎིཔི བྲཱཧྨཎོ པིཕྥལཱིཝནིཡཱཔི མོརིཡཱ སཀསཀཊྛཱནེ ཐཱུཔམཀཾསཱུཏི.

ཨེཀོ ཐཱུཔོ རཱཛགཧེ - ཨེཀོ ཝེསཱལིཡཱ པུརེ,

ཨེཀོ ཀཔིལཝཏྠུསྨིཾ - ཨེཀོ ཙ ཨལླཀཔྤཀེ;

ཨེཀོ ཐཱུཔོ རཱམགཱམེ - ཨེཀོ ཙ ཝེཋདཱིཔཀེ,

ཨེཀོ པཱཙེཡྻཀེ མལླེ - ཨེཀོ ཙ ཀུསིནཱརཀེ;

ཡེ ཏེ སཱརཱིརིཀཱ ཐཱུཔཱ - ཛམྦུཝདཱིཔེ པཏིཊྛིཏཱ;

ཨངྒཱརཀུམྦྷཐཱུཔེཧི - དས ཐཱུཔཱ བྷཝནྟི ཏེ;

དསཱཔི ཐཱུཔཱ པུརིསུཏྟམསྶ ཡེ-

ཡཐཱནུརཱུཔཾ ནརརཱཛ པཱུཛིཏཱ,

སབྦེན ལོཀེན སདེཝཀེན ཏེ-

ནམསྶནེཡྻཱཙ བྷཝནྟི སབྦདཱཏི;

དསཐཱུཔཀཐཱ

༡༠. ཨེཝཾ པཏིཊྛིཏེསུ པན ཐཱུཔེསུ མཧཱཀསྶཔཏྠེརོ དྷཱཏཱུནཾ ཨནྟརཱཡཾ དིསྭཱ ཨཛཱཏསཏྟུཾ ཨུཔསངྐམིཏྭཱ མཧཱརཱཛ ཨེཀཾ དྷཱཏུནིདྷཱནཾ ཀཱཏུཾ ཝཊྚཏིཏི ཨཱཧ སཱདྷུ བྷནྟེ ནིདྷཱནཀམྨཾ ཏཱཝ མམ ཧོཏུ, དྷཱཏུཡོ པན ཀཐཾ ཨཱཧརཱཔེམིཏི. ན མཧཱརཱཛ དྷཱཏུ ཨཱཧརཎཾ ཏུཡ྄ཧཾ བྷཱརོ, ཨམྷཱཀཾ བྷཱརོཏི. སཱདྷུ བྷནྟེ ཏུམྷེ དྷཱཏུཡོ ཨཱཧརཐ. ཨཧཾ དྷཱཏུནིདྷཱནཾ ཀརིསྶཱམཱིཏི. ཐེརོ ཏེསཾ ཏེསཾ རཱཛཀུལཱནཾ པརིཙརཎམཏྟཀམེཝ ཋཔེཏྭཱ སེསེདྷཱཏུཡོ ཨཱཧརི.

རཱམགཱམེ པན དྷཱཏུཡོ ནཱགཱ གཎྷིཾསུ ཏཱསཾ ཨནྟརཱཡོ ནཏྠི, ཨནཱགཏེ ལངྐཱདཱིཔེ མཧཱཝིཧཱརེ མཧཱཙེཏིཡམྷི ནིདྷིཡིསྶ ནཱིཏི. ཏཱ ན ཨཱཧརིཏྠ, སེསེཧི སཏྟཧི ནགརེཧི ཨཱཧརིཏྭཱ རཱཛགཧསྶ པཱཙཱིན དཀྑིན དིསཱབྷཱགེ ཋཔེཏྭཱ ཨིམསྨིཾ ཋཱནེ ཡོ པཱསཱཎོ ཨཏྠི, སོ ཨནྟརདྷཱཡཏུ, པཾསུ སུཝིསུདྡྷཱ ཧོཏུ, ཨུདཀཉྩ མཱ ཨུཊྛཧཏཱུཏི ཨདྷིཊྛཱསི.

རཱཛཱ ¶ ཏཾ ཋཱནཾ ཁཎཱཔེཏྭཱ ཏཏོ ཨུདྡྷཊ པཾསུནཱ ཨིཊྛིཀཱ ཀཱརེཏྭཱ ཨསཱིཏི མཧཱསཱཝཀཱནཾ ཐཱུཔེ ཀཱརེཏི ཨིདྷ རཱཛཱ ཀིཾ ཀཱརེཧཱིཏི པུཙྪནྟཱནམྤི མཧཱསཱཝཀཱནཾཙེཏིཡཱ ནཱིཏི ཝདནྟི ན ཀོཙི དྷཱཏུནིདྷཱནབྷཱཝཾ ཛཱནཱཏི ཨསཱིཏིཧཏྠགམྦྷཱིརེ པན ཏསྨིཾ པདེསེ ཛཱཏེ ཧེཊྛཱ ལོབྷསཏྠརཾ སཏྠརཱཔེཏྭཱ ཏཏྠ ཐཱུཔཱརཱམེ ཙེཏིཡ གྷརཔྤམཱཎཾ ཏམྦལོཧམཡཾ གེཧཾ ཀཱརཱཔེཏྭཱ ཨཊྛཊྛ ཧརི ཙཎྡནཱདིམཡེ ཀརཎྜེ ཙ ཐཱུཔེ ཙ ཀཱརཱཔེསི.

ཨཐ ཁོ བྷགཝཏོ དྷཱཏུཡོ ཧརིཙཎྡན ཀརཎྜེ པཀྑིཔིཏྭཱ ཏཾ ཧརིཙཎྡནཾ ཀརཎྜཾ ཨཉྙསྨིཾ ཧརིཙཎྡན ཀརཎྜེ ཏམྤི ཨཉྙསྨིནྟི ཨེཝཾ ཨཊྛ ཧརིཙཎྡན ཀརཎྜེ ཨེཀཏོ ཀཏྭཱ ཨེཏེནེཝ ཨུཔཱཡེན ཨཊྛ ཀརཎྜེ ཨཊྛསུ ཧརིཙཎྡན ཐཱུཔེསུ ཨཊྛ ཧརིཙཎྡནཐཱུཔེ ཨཊྛསུ ལོཧིཏཙཎྡན ཀརཎྜེསུ, ཨཊྛ ལོཧིཏཙཎྡནཀརཎྜེ ཨཊྛསུ ལོཧིཏཙཎྡནཐཱུཔེསུ, ཨཊྛལོཧིཏ ཙཎྡནཐཱུཔེ ཨཊྛསུ དནྟཀརཎྜེསུ, ཨཊྛ དནྟཀརཎྜེ ཨཊྛསུ དནྟཐཱུཔེསུ, ཨཊྛདནྟཐཱུཔེ ཨཊྛསུསབྦ རཏནཀརཎྜེསུ, ཨཊྛ སབྦ རཏནཀརཎྜེ ཨཊྛསུ སབྦརཏནཐཱུཔེསུ, ཨཊྛ སབྦརཏན ཐཱུཔེ ཨཊྛསུ སུཝཎྞཀརཎྜེསུ. ཨཊྛསུཝཎྞཀརཎྜེ ཨཊྛསུ སུཝཎྞཐཱུཔེསུ, ཨཊྛསུཝཎྞཐཱུཔེ ཨཊྛསུརཛཏཀརཎྜེསུ, ཨཊྛ རཛཏཀརཎྜེ ཨཊྛསུ རཛཏཐཱུཔེསེ ཨཊྛ རཛཏཐཱུཔེ ཨཊྛསུ མཎིཀརཎྜེསུ ཨཊྛམཎིཀརེཎྜཨཊྛསུཝཎྞཐཱུཔེསུ, ཨཊྛ མཎིཐཱུཔེ ཨཊྛསུ ལོཧིཏངྐ ཀརཎྜེསུ, ཨཊྛལོཧིཏངྐ ཀརཎྜེ ཨཊྛསུ ལོཧིཏངྐཐཱུཔེསུ, ཨཊྛ ལོཧིཏངྐཐཱུཔེ ཨཊྛསུ མསཱརགལླཐཱུཔེསུ, ཨཊྛ མསཱརགལླཐཱུཔེ ཨཊྛསུ ཕལིཀ ཀརཎྜེསུ, ཨཊྛ ཕལི༹ཀ ཀརཎྜེ ཨཊྛསུ ཕལི༹ཀཐཱུཔེསུ པཀྑིཔི སབྦ ཨུཔརིམཾ ཕལི༹ཀཙེཏིཡཾ ཐཱུཔཱརཱམ ཙེཏིཡཔྤམཱཎཾ ཨཧོསི.

ཏསྶ ཨུཔརིསབྦརཏནམཡཾ གེཧཾ ཀཱརེསི ཏསྶ ཨུཔརི སུཝཎྞམཡཾ, ཏསྶ ཨུཔརི རཛཏམཡཾ, ཏསྶ ཨུཔརི ཏམྦལོཧམཡཾ གེཧཾ ཀཱརེསི ཏཏྠ སབྦརཏནམཡཾ ཝཱལུཀཾ ཨོཀིརིཏྭཱ ཛལཛ ཐལཛ པུཔྥཱནཾ སཧསྶཱནི ཝིཔྤཀིརིཏྭཱ ཨདྡྷཙྪཊྛཱནི ཛཱཏཀསཏཱནི ཨཱསཱིཏི མཧཱཐེརེ སུདྡྷོདན མཧཱརཱཛཱནཾ མཧཱམཱཡཱདེཝིཾ སཏྟ སཧཛཱཏེ སབྦཱནེཏཱནི སུཝཎྞམཡཱནེཝ ཀཱརེསི པཉྩཔཉྩསཏེ སུཝཎྞརཛཏམཡེ པུཎྞགྷཊེ ཋཔཱཔེསི པཉྩསུཝཎྞདྷཛསཏེ པཉྩསཏེ སུཝཎྞདཱིཔཀེ ཙ ཀཱརཱཔེཏྭཱ སུགཎྡྷཏེལསྶ པཱུརེཏྭཱ ཏེསུ དུཀཱུལཝཊྚིཡོ ཋཔེསི.

ཨཐཱཡསྨཱ མཧཱཀསྶཔོ མཱལཱ མཱ མིལཱཡནྟུ. གཎྡྷཱ མཱ ཝིནསྶནྟུ, དཱིཔཱ མཱ ཝིཛ྄ཛྷཱཡནྟཱུཏི ཨདྷིཊྛཧིཏྭཱ སུཝཎྞཔཊྚཨཀྑརཱནི ཚིཎྡཱཔེསི. ཨནཱགཏེ པིཡདཱསོ ནཱམ ཀུམཱརོ ཚཏྟཾ ཨུསྶཱཔེཏྭཱ ¶ ཨསོཀོ ནཱམ དྷམྨརཱཛཱ བྷཝིསྶཏི སོ ཨིམཾ དྷཱཏུཡོ ཝིཏྠཱརིཀཱ ཀརིསྶཏཱིཏི རཱཛཱ སབྦཔསཱདྷནེཧི པཱུཛེཏྭཱ ཨཱདིཏོ པཊྛཱཡ དྭཱརཾ པིདཧནྟོ ནིཀྑམི ཏམྦལོཧདྭཱརཾ པིདཧིཏྭཱ ཨཱཝིཉྫན རཛྫུཡཾ ཀུཉྩིཀམུདྡིཀཾ བཎྡྷི ཏཏྠེཝ མཧནྟཾ མཎིཀྑཎྡྷཾ ཋཔེསི ཨནཱགཏེ དལི༹དྡརཱཛཱནོ ཨིམཾ མཎིཾ གཧེཏྭཱ དྷཱཏཱུནཾ སཀྐཱརཾ ཀརོནྟཱུཏི ཨཀྑརཱནི ཚིཎྡཱཔེསཱི.

སཀྐོ དེཝརཱཛཱ ཝིསྶཀམྨཾ ཨཱམནྟེཏྭཱ’ཏཱཏ, ཨཛཱཏསཏྟུནཱ དྷཱཏུནིདྷཱནཾ ཀཏཾ. ཨེཏྠ ཨཱརཀྑཾ ཋཔེཧི’ཏི པཧིཎི སོ ཨཱགནྟྭཱ ཝཱལ༹སངྒྷཱཊཡནྟཾ ཡོཛེསི. ཀཊྛརཱུཔཀཱནི ཏསྨིཾ དྷཱཏུགབྦྷེ ཕལི༹ཀཝཎྞ ཁགྒེ གཧེཏྭཱ ཝཱཏསདིསེན ཝེགེན ཨནུཔརིཡཱཡནྟཾ ཡོཛེཏྭཱ ཨེཀཱཡ ཨེཝ ཨཱཎིཝཱ བཎྡྷིཏྭཱ སམནྟཏོ གིཉྫཀ ཝསཐཱཀཱརེན སིལཱཔརིཀྑེཔཾ ཀཏྭཱ ཨུཔརི ཨེཀཱཡ པིདཧིཏྭཱ པཾསུཾ པཀྑིཔིཏྭཱ བྷཱུམིཾ སམཾ ཀཏྭཱ ཏསྶུཔརི པཱསཱཎཐཱུཔཾ པཏིཊྛཱཔེསི.

དྷཱཏུནིདྷཱན ཀཐཱ

༡༡. ཨེཝཾ ནིཊྛིཏེ དྷཱཏུནིདྷཱནེ ཡཱཝཏཱཡུཀཾ ཋཏྭཱ ཐེརོ པརིནིབྦུཏོ, རཱཛཱཔི ཡཐཱཀམྨཾ གཏོ, ཏེཔི མནུསྶཱ ཀཱལཀཏཱ, ཨཔརབྷཱགེ པིཡདཱསོ ཀུམཱརོ ཚཏྟཾ ཨུསྶཱཔེཏྭཱ ཨསོཀོ ནཱམ དྷམྨ རཱཛཱ ཧུཏྭཱ ཏཱ དྷཱཏུཡོ གཧེཏྭཱ ཛམྦུདཱིཔེ ཙཏུརཱསཱིཏིཡཱ ཙེཏིཡ སཧསྶེསུ པཏིཊྛཱཔེསི. ཀཐཾ བིཎྡུསཱརསྶ ཀིར ཨེཀསཏཾ པུཏྟཱ ཨཧེསུཾ ཏེ སབྦེ ཨསོཀོ ཨཏྟནཱ སདྡྷིཾ ཨེཀམཱཏིཀཾ ཏིསྶ ཀུམཱརཾ ཋཔེཏྭཱ གྷཱཏེསི. གྷཱཏེནྟོ ཙཏྟཱརི ཝསྶཱནི ཨནབྷིསིཏྟོ རཛྫཾ ཀཱརེཏྭཱ ཙཏུནྣཾ ཝསྶཱནཾ ཨཙྩཡེན ཏཐཱགཏསྶ པརིནིབྦཱནཏོ དྭིནྣཾ ཝསྶསཏཱནཾ ཨུཔརི ཨཊྛཱརསམེ ཝསྶེ སཀལཛམྦུདཱིཔེ ཨེཀརཛྫཱབྷིསེཀཾ པཱཔུཎི.

ཨབྷིསེཀཱནུབྷཱཝེན ཨིམཱ རཱཛིདྡྷིཡོ ཨཱགཏཱ མཧཱཔཐཝིཡཱ ཧེཊྛཱ ཡོཛནཔྤམཱཎེ ཨཱཎཱ པཝཏྟི, ཏཐཱ ཨུཔརི ཨཱཀཱསེ, ཨནོཏཏྟདཧཏོ ཨཊྛཧི ཀཱཛེཧི སོལ༹ས པཱནཱིཡགྷཊེ དིཝསེ དིཝསེ དེཝཏཱ ཨཱཧརནྟི. ཡཏོ སཱསནེ ཨུཔྤནྣསདྡྷོ ཧུཏྭཱ ཨཊྛ གྷཊེ བྷིཀྑུསངྒྷསྶ ཨདཱསི དྭེ གྷཊེ སཊྛིམཏྟཱནཾ ཏིཔིཊཀ བྷིཀྑུནཾ དྭེགྷཊེ ཨགྒམཧེསིཡཱ ཨསཎྡྷིམིཏྟཱཡ ཙཏྟཱརོ གྷཊེ ཨཏྟནཱ པརིབྷུཉྫི. དེཝཏཱ ཨེཝ ཧིམཝནྟེ ནཱགལཏཱ དནྟཀཊྛ ནཱམ ཨཏྠི སིནིདྡྷཱ མུདུཀཾ རསཝནྟཾ, ཏཾ དིཝསེ དིཝསེ ཨཱབྷིརནྟི ཡེན རཉྙོ ཙ ཨགྒམཧེསིཡཱ ཙ སོལ༹སནྣཾ ནཱཊཀསཧསྶཱནཾ སཊྛིམཏྟཱནཾ བྷིཀྑུསཧསྶཱནཾ དེཝསིཀཾ དནྟཔོཎཀིཙྩཾ ནིཔྥཛྫི.

དེཝསིཀམེཝསྶ ¶ དེཝཏཱ ཨགདཱམལཀཾ ཨགདཧརཱིཊཀཾ སུཝཎྞཝཎྞཉྩ གཎྡྷསམྤནྣཾ ཨམྦཔཀྐཾ ཨཱཧརནྟི ཏཐཱ ཚདྡནྟ དཧཏོ པཉྩཝཎྞཾ ནིཝཱསན པཱརུཔཎཾ, པཱིཏཀཝཎྞཾ ཧཏྠཔུཉྪནཀ པཊྚཾདིབྦཉྩཛཱནཀཾ ཨཱཧརནྟི དེཝསིཀམེཝ པནསྶ ཨནུལེཔགཎྡྷཾ པཱརུཔནཏྠཱཡ ཨསུཏྟམཡིཀཾ སུམནཔུཔྥཔཊཾ མཧཱརཧཉྩ ཨཉྫནཾ ནཱགབྷཝནཏོ ནཱགརཱཛཱནོ ཨཱཧརནྟི. ཚདྡནྟདཧེཡེཝ ཨུཊྛིཏསྶ སཱལིནོ ནཝ ཙཱཧ སཧསྶཱནི དིཝསེ དིཝསེ སུཝཱ ཨཱཧརནྟི. མཱུསིཀཱ ནིཏྠུས ཀཎེ ཀརོནྟི ཨེཀོཔི ཁཎྜཏཎྜུལོ ན ཧོཏི. རཉྙོ སབྦཊྛཱནེསུ ཨཡམེཝ ཏཎྜུལོ པརིབྷོགཾ གཙྪཏི. མདྷུམཀྑིཀཱ མདྷུཾ ཀརོནྟི. ཀམྨཱརསཱལཱསུ ཨཙྪཱ ཀཱུཊཾ པཧརནྟི. དཱིཔིཀཱ ཙམྨཱནི ཙཱལེནྟི ཀརཝཱིཀ སཀུཎཱ ཨཱགཏྟྭཱ མདྷུརསྶརཾ ཝིཀུཛེནྟཱ རཉྙོ བལིཀམྨཾ ཀརོནྟི.

ཨིམཱཧི ཨིདྡྷཱིཧི སམནྣཱགཏོ རཱཛཱཨེཀ དིཝསཾ སུཝཎྞ སངྑལིཀ བཎྡྷནཾ པེསེཏྭཱ ཙཏུནྣཾ བུདྡྷཱནཾ ཨདྷིགཏ རཱུཔདསྶནཾ ཀཔྤཱཡུཀཾ མཧཱཀཱལ༹ ནཱགརཱཛཱནཾ ཨཱནཡིཏྭཱ སེཏཙྪཏྟསྶ ཧེཊྛཱ མཧཱརཧེ པལླངྐེ ནིསཱིདཱཔེཏྭཱ ཨནེཀ སཏཝཎྞེཧི ཛལཛ ཐལཛ པུཔྥེཧི སུཝཎྞཔུཔྥེཧི ཙ པཱུཛཾ ཀཏྭཱ སབྦཱལངྐཱར པཏིམཎྜིཏེཧི ཙ སོལ༹སཧི ནཱཊཀ སཧསྶེཧི སམནྟཏོ པརིཀྑིཔིཏྭཱ ཨནནྟཉཱཎསྶ ཏཱཝ མེ སདྡྷམྨཝར ཙཀྐཝཏྟིནོ སམྨཱསམྦུདྡྷསྶ རཱུཔཾ ཨིམེསཾ ཨཀྑཱིནཾ ཨཱཔཱཐཾ ཀརོཧཱིཏི ནིབྦཏྟཱསཱིཏི ཨནུབྱཉྫན པཏིམཎྜིཏཾ དྭཏྟིཾས མཧཱ པུརིས ལཀྑཎ སསྶིརཱིཀཏཱཡ ཝིཀསིཏ ཀམལུཔྥལ པུཎྜརཱིཀ པཏིམཎྜིཏམིཝ སལིལཏལཾ ཏཱརཱགཎརཾསིཛཱལ ཝིསརཝིཔྥུཏསོབྷཱསམུཛྫལམིཝགགནཏལཾ ནཱིལ-པཱིཏ-ལོཧིཏཱདི བྷེད ཝིཙིཏྟཝཎྞརཾསི ཝིནདྡྷ བྱཱམཔྤབྷཱ པརིཀྑེཔ ཝིལཱསིཏཱཡ སཉྫྷཔྤབྷཱནུརཱག ཨིཎྡདྷནུ ཝིཛྫུལླཏཱ པརིཀྑིཏྟམིཝ ཀནཀགིརི སིཁརཾ ནཱནཱཝིརཱག ཝིམལཀེཏུམཱལཱ སམུཛྫལིཏཙཱརུམཏྠཀསོབྷཾ ནཡནརསཱཡནམིཝ བྲཧྨདེཝ-མནུཛ ནཱག-ཡཀྑ གཎཱནཾ བུདྡྷརཱུཔཾ པསྶནྟོ སཏྟདིཝསཾ ཨཀྑིཔཱུཛཾ ནཱམ ཨཀཱསི

རཱཛཱ ཀིར ཨབྷིསེཀཾ པཱཔུཎིཏྭཱ ཏཱིཎིཡེཝ སཾཝཙྪརཱནི བཱཧིརཀ པཱསཎྜཾ པརིགཎྷི ཙཏུཏྠེ སཾཝཙྪརེ བུདྡྷསཱསནེ པསཱིདིནཾ བྲཱཧྨཎ ཛཱཏིཡ པཱསཎྜཱནཉྩ པཎྜརངྒ པརིབྦཱཛཀཱནཉྩ སཊྛིསཧསྶམཏྟཱནཾ ནིཙྩབྷཏྟཾ པཊྛཔེསི.

ཨསོཀོ པིཏརཱ པཝཏྟིཏཾ དཱནཾ ཨཏྟནོ ཨནྟེཔུརེ ཏཐེཝ དདམཱནོ ཨེཀདིཝསཾ སཱིཧཔཉྫརེ ཋིཏོ ཨུཔསམ པརིབཱཧིརེན ཨཱཙཱརེན ¶ བྷུཉྫམཱནེ ཨསཾཡཏིཎྡྲིཡེ ཨཝིནིཏ ཨིརིཡཱཔཐེ དིསྭཱ ཙིནྟེསི ཨཱིདིསཾ དཱནཾ ཨུཔཔརིཀྑིཏྭཱ ཡུཏྟཊྛཱནེ དཱཏུཾ ཝཊྚཏིཏི ཨེཝཾ ཙིནྟེཏྭཱ ཨམཙྩེ ཨཱཧ. གཙྪཐ བྷཎེ ཨཏྟནོ ཨཏྟནོ སཱདྷུསམྨཏེ སམཎ བྲཱཧྨཎེ ཨནྟེཔུརཾ ཨཏིཧརཐ, དཱནཾ དསྶཱམཱཏི ཨམཙྩཱ སཱདྷུ དེཝཱཏི རཉྙོ པཊིསྶུཏྭཱ ཏེ ཏེ པཎྜརངྒ པརིབྦཱཛཀཱཛཱིཝཀ ནིགཎྛཱདཡོ ཨཱནེཏྭཱ ཨིམེ མཧཱརཱཛ ཨམྷཱཀཾ ཨརཧནྟོཏི ཨཱཧཾསུ.

ཨཐ རཱཛཱ ཨནྟེཔུརེ ཨུཙྩཱཝཙཱནི ཨཱསནཱནི པཉྙཱཔེཏྭ ཨཱགཙྪནྟཱུཏི ཝཏྭཱ ཨཱགཏཱགཏེ ཨཱཧ ཨཏྟནོ ཨཏྟནོ ཨནུརཱུཔེ ཨཱསནེ ནིསཱིདཐཱཏི ཨེཀཙྩེ བྷདྡཔཱིཋཀེ ཨེཀཙྩེ ཕལཀཔཱིཋཀེསེ ནིསཱིདིཾསུ. ཏཾ དིསྭཱ རཱཛཱ ནཏྠི ཨེཏེསཾ ཨནྟེསཱརོཏི ཉཏྭཱ ཏེསཾ ཨནུརཱུཔཾ ཁཱདནཱིཡཾ བྷོཛནཱིཡཾ དཏྭཱ ཨུཡྻོཛེསི.

ཨེཝཾ གཙྪནྟེ ཀཱལེ ཨེཀ དིཝསཾ སཱིཧཔཉྫརེ ཋིཏོ ཨདྡས ནིགྲོདྷ སཱམཎེརཾ རཱཛངྒཎེན གཙྪནྟཾ དནྟཾ གུཏྟཾ སནྟིནྡྲིཡཾ ཨིརིཡཱཔཐ སམྤནྣཾ. ཀོ པནཱཡཾ ནིགྲོདྷོ ནཱམ, བིཎྡུསཱར རཉྙོ ཛེཊྛཔུཏྟསྶ སུམནརཱཛ ཀུམཱརསྶ པུཏྟོ. ཏཏྲཱཡཾ ཨཱནུཔུབྦཱི ཀཐཱ-བིཎྡུསཱར རཉྙོ ཀིར དུབྦལཀཱལེཡེཝ ཨསོཀ ཀུམཱརོ ཨཏྟནཱ ལདྡྷཾ ཨུཛྫེནིརཛྫཾ པཧཱཡ ཨཱགནྟྭཱ སབྦཾ ནགརཾ ཨཏྟནོ ཧཏྠགཏཾ ཀཏྭཱ སུམན རཱཛཀུམཱརཾ ཨགྒཧེསི.

ཏཾ དིཝསམེཝ སུམནསྶ རཱཛཀུམཱརསྶ སུམནཱ ནཱམ དེཝཱི པརིཔུཎྞགབྦྷཱ ཨཧོསི. སཱ ཨཉྙཱཏཀཝེསེན ནིཀྑམིཏྭཱ ཨཝིདཱུརེ ཨཉྙཏརཾ ཙཎྜཱལགཱམཾ སནྡྷཱཡ གཙྪནྟི, ཛེཊྛཀ ཙཎྜཱལསྶ གེཧཏོ ཨཝིདཱུརེ ཨེཀསྨིཾ ནིགྲོདྷ རུཀྑེ ཨདྷིཝཏྠཱཡ དེཝཏཱཡ ཨིཏོ སུམནེཏི ཝཧནྟིཡཱ སདྡཾ སུཏྭཱ ཏསྶཱ སམཱིཔཾ གཏཱ དེཝཏཱ ཨཏྟནོ ཨཱནུབྷཱཝེན ཨེཀཾ སཱལཾ ནིམྨིཎིཏྭཱ ཨེཏྠ ཝསཱཧིཏི པདཱསི. སཱ ཏཾ སཱལཾ པཱཝིསི. གཏདིཝསེཡེཝ པུཏྟཾ ཝིཛཱཡི.

སཱ ཏསྶ ནིགྲོདྷ དེཝཏཱཡ པརིགྒཧིཏཏྟཱ ནིགྲོདྷོཏྭེཝ ནཱམཾ ཨཀཱསི. ཛེཊྛཀ ཙཎྜཱལོ དཊྛདིཝསཏོཔྤབྷཱུཏི ཏཾ ཨཏྟནོ སཱམིདྷཱིཏརཾ ཝིཡ མཉྙམཱནོ ནིབདྡྷཾ ཝཊྚཾ པཊྛཔེསི. རཱཛདྷཱིཏཱ ཏཏྠ སཏྟ ཝསྶཱནི ཝསི. ནིགྲོདྷཀུམཱརོཔི སཏྟཝསྶིཀོ ཛཱཏོ ཏདཱ མཧཱཝརུཎཏྠེརོ ནཱམ ཨེཀོ ཨརཧཱ དཱརཀསྶ ཧེཏུསམྤདཾ དིསྭཱ ཝིཧརམཱནོ སཏྟཝསྶིཀོདཱནི དཱརཀོ ཀཱལོ ནཾ པབྦཱཛེཏུནྟི ཙིནྟེཏྭཱ རཱཛདྷཱིཏཡཱ ཨཱརོཙཱཔེཏྭཱ ནིགྲོདྷཀུམཱརཾ པབྦཱཛེསི. ཀུམཱརོ ཁུརགྒེཡེཝ ཨརཧཏྟཾ པཱཔུཎི. སོ ཨེཀདིཝསཾ པཱཏོཝ སརཱིརཾ པཊིཛགྒིཏྭཱ ཨཱཙརིཡུཔཛ྄ཛྷཱནཾ ¶ ཝཏྟཾ ཀཏྭཱ པཏྟཙཱིཝརམཱདཱཡ མཱཏུཨུཔཱསིཀཱཡ གེཧདྭཱརཾ གཙྪཱམཱིཏི ནིཀྑམི མཱཏུ ནིཝེསནཊྛཱནཉྩསྶ དཀྑིཎདྭཱརེན ནགརཾ པཝིསིཏྭཱ ནགརམཛ྄ཛྷེན གནྟྭཱ པཱཙཱིནདྭཱརེན ནིཀྑམིཏྭཱ གནྟབྦཾ ཧོཏི ཏེན ཙ སམཡེན ཨསོཀོ དྷམྨརཱཛཱ པཱཙཱིན དིསཱབྷིམུཁོ སཱིཧཔཉྫརེ ཙངྐམཏི.

ཏཾ ཁཎཾཡེཝ སིགྲོདྷོ སཱམཎེརོ རཱཛངྒཎཾ པཱཔུཎི སནྟིནྡྲིཡོ སནྟམཱནསོ ཡུགམཏྟཾ པེཀྑམཱནོ. ཏེན ཝུཏྟཾ. ཨེཀདིཝསཾ སཱིཧཔཉྫརེ ཋིཏོ ཨདྡས ནིགྲོདྷསཱམཎེརཾ རཱཛངྒཎེན གཙྪནྟཾ དནྟཾ གུཏྟཾ སནྟིནྡྲིཡཾ ཨིརིཡཱཔཐ སམྤནྣནྟི. དིསྭཱ པནསྶ ཨེཏདཧོསི? ཨཡཾ ཛནོ སབྦོཔི ཝིཀྑིཏྟཙིཏྟོཧནྟམགཔཊིབྷཱགོ, ཨཡམྤན དཱརཀོ ཨཝིཀྑིཏྟཙིཏྟོ ཨཏིཝིཡསྶ ཨལོཀིཏ ཝིལོཀིཏཾ སམྨིཉྫན པསཱརཎཉྩ སོབྷཏི, ཨདྡྷཱ ཨེཏསྶ ཨབྦྷནྟརེ ལོཀུཏྟརདྷམྨོ བྷཝིསྶཏཱིཏི རཉྙོ སཧདསྶནེནེཝ སཱམཎེརེ ཙིཏྟཾ པསཱིདི. པེམཾ སཎྛཧི ཀསྨཱ? པུབྦེ ཀིར པུཉྙ ཀརཎཀཱལེ ཨེས རཉྙོ ཛེཊྛབྷཱཏཱ ཝཱཎིཛཀོ ཨཧོསི.

ཨཐ རཱཛཱ སཉྫཱཏཔེམོ སབཧུམཱནོ སཱམཎེརཾ པཀྐོསཐཱཏི ཨམཙྩེ པེསེསི ཨཏིཙིརཱཡཏཱིཏི པུན དྭེ ཏཡོ པེསེསི ཏུརིཏཾ ཨཱགཙྪཏཱུཏི སཱམརཎེརོ ཨཏྟནོ པཀཏིཡཱ ཨེཝ ཨགམཱསི རཱཛཱ པཏིརཱུཔཱསནཾ ཉཏྭཱ ནིསཱིདཐཱཏི ཨཱཧ. ཨིཏོ ཙིཏོ ཙ ཨོལོཀེཏྭཱ ནཏྠིདཱནི ཨཉྙོ བྷིཀྑུཏི སམུསྶིཏ སེཏཙྪཏྟཾ རཱཛཔལ༹ླངྐཾ ཨུཔསངྐམིཏྭཱ པཏྟགཧཎཏྠཱཡ རཉྙོ ཨཱཀཱརཾ དསྶེསི. རཱཛཱ ཏཾ པལླངྐཾ སམཱིཔཾ གཙྪནྟཾ དིསྭཱ ཨེཝཾ ཙིནྟེསི. ཨཛྫེཝདཱནི ཨཡཾ སཱམཎེརོ ཨིམསྶ གེཧསྶ སཱམིཀོ བྷཝིསྶཏི. སཱམཎེརོ རཉྙོ ཧཏྠེ པཏྟཾ དཏྭཱ པལླངྐཾ ཨབྷརུཧིཏྭཱ ནིསཱིདི.

རཱཛཱ ཨཏྟནོ ཨཏྠཱཡ སམྤཱདིཏཾ སབྦཾ ཡཱགུ-ཀཛྫཀ བྷཏྟ ཝིཀཏིཾ ཨུཔནཱམེསི. སཱམཎེརོ ཨཏྟནོ ཡཱཔནམཏྟམེཝ སམྤཊིཙྪི. བྷཏྟཀིཙྩཱཝསཱནེ རཱཛཱ ཨཱཧ སཏྠཱརཱ ཏུམྷཱཀཾ དིནྣོཝཱདཾ ཛཱནཱཐཱཏི ཛཱནམི མཧཱརཱཛ ཨེཀདེསེནཱཏི. ཏཱཏ, མཡ྄ཧམྤི ནཾ ཀཐེཧཱིཏི སཱདྷུ མཧཱརཱཛཱཏི རཉྙོ ཨནུརཱུཔཾ དྷམྨཔདེ ཨཔྤམཱད ཝགྒཾ ཨནུམོདནཏྠཱཡ ཨབྷཱསི.

རཱཛཱ པན ཨཔྤམཱདོ ཨམཏཔདཾ, པམཱདོ མཙྩུནོ པདནྟི སུཏྭ ཙ, ཨཉྙཱཏཾ ཏཱཏ པརིཡོསཱཔེཧཱིཏི ཨཱཧ ཨནུམོདནཱཝསཱནེ དྭཏྟིཾས དྷུརབྷཏྟཱནི ལབྷིཏྭཱ པུན དིཝསེ དྭཏྟིཾས བྷིཀྑུ གཧེཏྭཱ རཱཛནྟེཔུརཾ པཝིསིཏྭཱ བྷཏྟཀིཙྩམཀཱསི རཱཛཱ ཨཉྙེཔི དྭཏྟིཾས བྷིཀྑུ ཏུམྷེཧི སདྡྷིཾཡེཝ བྷིཀྑཾ གཎྷནྟཱུཏི ཨེཏེནེཝ ཨུཔཱཡེན དིཝསེ དིཝསེ ཝཌྜྷཱཔེནྟེ སཊྛི ¶ སཧསྶཱནཾ བྲཱཧྨཎ པརིབྦཱཛཀཱནཾ བྷཏྟཾ ཨུཔཙྪིཎྡིཏྭཱ ཨནྟོ ནིཝེསནེ སཊྛིསཧསྶཱནཾ བྷིཀྑུནཾ ནིཙྩབྷཏྟཾ པཊྛཔེསི, ནིགྲོདྷཏྠེར གཏེནེཝ པསཱདེན, ནིགྲོདྷཏྠེརོཔི རཱཛཱནཾ སཔརིསཾ ཏཱིསུ སརཎེསུ པཉྩསུ ཙ སཱིལེསུ པཏིཊྛཱཔེཏྭཱ བུདྡྷསཱསནེ པོཐུཛྫནིཀེན པསཱདེན ཨཙལཔྤསཱདཾ ཀཏྭཱ པཏིཊྛཱཔེསི.

པུན རཱཛ ཨསོཀཱརཱམཾ ནཱམ མཧཱཝིཧཱརཾ ཀཱརཔེཏྭཱ སཊྛིསཧསྶཱནཾ བྷིཀྑཱུནཾ བྷཏྟཾ པཊྛཔེསི. སཀལཛམྦུདཱིཔེ ཙཏུརཱསཱིཏིཡཱ ནགརསཧསྶེསུ ཙཏུརཱསཱིཏི ཝིཧཱརསཧསྶཱནི ཀཱརཱཔེསི. ཙཏུརཱསཱིཏི ཙེཏིཡསཧསྶ པཏིམཎྜིཏཱནི དྷམྨེནེཝ ནོ ཨདྷམྨེན, ཨེཀདིཝསཾ ཀིར རཱཛཱ ཨསོཀཱརཱམེ མཧཱདཱནཾ དཏྭཱ སཊྛིསཧསྶ སངྑསྶ བྷིཀྑུསངྒྷསྶ མཛ྄ཛྷེ ནིསཛྫ སངྒྷཾ ཙཏཱུཧི པཝྩཡེཧི པཝཱརེཏྭཱ ཨིམཾ པཉྷཾ པུཙྪི བྷནྟེ བྷགཝཏོ དེསིཏ དྷམྨོ ནཱམ ཀིཏྟཀོ ཧོཏཱིཏི. མཧཱརཱཛ ནཝ ཨངྒཱནི, ཁཎྡཏོ ཙཏུརཱསཱིཏི དྷམྨཀྑཎྡྷ སཧསྶཱནཱིཏི.

རཱཛཱ དྷམྨེ པསཱིདིཏྭཱ ཨེཀེཀཾ དྷམྨཀྑཎྡྷཾ ཨེཀེཀེན ཝིཧཱརེན པཱུཛེསྶཱམཱིཏི ཨེཀདིཝསམེཝ ཚནྣཝུཏི ཀོཊིདྷནཾ ཝིསྶཛྫེཏྭཱ ཨམཙྩེ ཨཱཎཱཔེསི. ཨེཐ བྷཎེ ཨེཀེཀསྨིཾ ནགརེ ཨེཀམེཀཾ ཝིཧཱརཾ ཀཱརེནྟཱ ཙཏུརཱསཱིཏིཡཱ ནགརསཧསྶེསུ ཙཏུརཱསཱིཏི ཝིཧཱརསཧསྶཱནི ཀཱརཱཔེཐཱཏི སཡཉྩ ཨསོཀཱརཱམེ ཨསོཀ མཧཱཝིཧཱརཏྠཱཡ ཀམྨཾ པཊྛཔེསི.

སངྒྷོ ཨིཎྡགུཏྟཏྠེརཾ ནཱམ མཧིདྡྷིཡཾ མཧཱནུབྷཱཝཾ ཁཱིཎཱསཝཾ ནཝཀམྨཱདྷིཊྛཱཡཀཾ ཨདཱསི. ཐེརོ ཡཾ ཡཾ ན ནིཊྛཱཏི ཏཾ ཏཾ ཨཏྟནོ ཨཱནུབྷཱཝེན ནིཊྛཱཔེསི. ཨེཝཾ ཏཱིཧི སཾཝཙྪརེཧི ཝིཧཱརཀམྨཾ ནིཊྛཱཔེསི. ཨེཀདིཝསམེཝ སབྦནགརེཧི པཎྞཱནི ཨཱགམིཾསུ ཨམཙྩཱ རཉྙོ ཨཱརོཙེསུཾ. ནིཊྛིཏཱནི དེཝ ཙཏུརཱསཱིཏི ཝིཧཱརསཧསྶཱནཱིཏི ཨཐ རཱཛཱ བྷིཀྑུསངྒྷཾ ཨུཔསངྐམིཏྭཱ བྷནྟེ མཡཱ ཙཏུརཱསཱིཏི ཝིཧཱརསཧསྶཱནི ཀཱརིཏཱནི དྷཱཏུཡོཀུཏོ ལབྷིསྶཱམཱིཏི པུཙ པུཙྪི.

མཧཱརཱཛ དྷཱཏུནིདྷཱནཾ ནཱམ ཨཏྠཱིཏི སུཎོམ. ན པན པཉྙཱཡཏི ཨསུཀཱཊྛཱནེཏི རཱཛཱ རཱཛགཧེ ཙེཏིཡཾ བྷིཎྡཱཔེཏྭཱ དྷཱཏུཾ ཨཔསྶནྟོ པཊིཔཱཀཏིཡཾ ཀཱརེཏྭཱ བྷིཀྑུ-བྷིཀྑུནིཡོ-ཨུཔཱསཀ-ཨུཔཱསིཀཱཡོཏི ཙཏསྶོ པརིསཱ གཧེཏྭཱ ཝེསཱལིཾ གཏོ. ཏཏྲཱཔི ཨལབྷིཏྭཱ ཀཔིལ༹ཝཏྠུཾ, ཏཏྲཱཔི ཨལབྷིཏྭཱ རཱམགཱམཾ གཏོ, རཱམགཱམེ ནཱགཱ ཙེཏིཡཾ བྷིཎྡིཏུཾ ན ཨདཾསུ. ཙེཏིཡེ ནིཔཏིཏ ཀུདྡཱལོ ཁཎྜཱཁཎྜཾ ཧོཏི ཨེཝཾ ཏཏྲཱཔི ཨལབྷིཏྭཱ ཨལླཀཔྤཾ-པཱཝཾ-ཀུསིནཱརནྟི སབྦཏྠ ཙེཏིཡཱཏི བྷིཎྡིཏྭཱ དྷཱཏུཾ ཨལབྷིཏྭཱ པཊིཔཱཀཏིཀཱནི ¶ ཀཏྭཱ རཱཛགཧཾ གནྟྭཱ ཙཏསྶོ པརིསཱ སནྣིཔཱཏེཏྭཱ ཨཏྠི ཀེནཙི སུཏཔུབྦཾ ཨསུཀཊྛཱནེ ནཱམ དྷཱཏུ ནིདྷཱནནྟི པུཙྪི.

ཏཏྠེཀོ ཝིསཾཝསྶ སཏིཀོ ཐེརོ ཨསུཀཊྛཱནེ དྷཱཏུནིདྷཱནནྟི ན ཛཱནཱམི. མཡ྄ཧཾ པན པིཏཱམཧཏྠེརོ མཡི སཏྟཝསྶིཀཀཱལེ མཱལཱཙངྒོཊཀཾ གཱཧཱཔེཏྭཱ ཨེཧི སཱམཎེར, ཨསུཀ གཙྪནྟརེ པཱསཱནཐཱུཔོ ཨཏྠི, ཏཏྠ གཙྪཱམཱཏི གནྟྭཱ པཱུཛེཏྭཱ ཨིམཾ ཋཱནཾ ཨུཔདྷཱརེཏུཾ ཝཊྚཏི སཱམཎེརོཏི ཨཱཧ. ཨཧཾ ཨེཏྟཀམེཝ ཛཱནཱམི མཧཱརཱཛཱཏི ཨཱཧ.

རཱཛཱ ཨེཏདེཝ ཋཱནནྟི ཝཏྭཱ གཙྪེ ཧརཱཔེཏྭཱ པཱསཱཎཐཱུཔཾ པཾསུཉྩ ཨཔནེཏྭཱ ཧེཊྛཱ སུདྷཱབྷཱུམིཾ ཨདྡས. ཏཏོ སུདྷཉྩ ཨིཊྛཀཱཡོ ཙ ཧརཱཔེཏྭཱ ཨནུཔུབྦེན པརིཝེཎཱ ཨོརུཡ྄ཧ སཏྟ རཏནཝཱལིཀཾ ཨསཱིཏི ཧཏྠཱནི ཙ ཀཊྛརཱུཔཱནི སམྤརིཝཏྟནྟཱནི ཨདྡས. སོ ཡཀྑ དཱསཀེ པཀྐོསཱཔེཏྭཱ བལིཀམྨཾ ཀཱརེཏྭཱཔི ནེཝ ཨནྟཾ ན ཀོཊིཾ པནྣནྟོ དེཝཏཱ ནམསྶམཱནོ ཨཧཾ ཨིམཱ དྷཱཏུཡོ གཧེཏྭཱ ཙཏུརཱསཱིཏིཡཱ ཝིཧཱརསཧསྶེསུ ནིདཧིཏྭཱ སཀྐཱརཾ ཀརོམི མཱ དེཝཏཱ ཨནྟརཱཡཾ ཀརེནྟཱུཏི ཨཱཧ.

སཀྐོ དེཝརཱཛཱ ཙཱརིཀཾ ཙརནྟོ ཏཾ དིསྭཱ ཝིསྶཀམྨཾ ཨཱམནྟེཏྭཱ ཨཱཧ. ཏཱཏ, ཨསོཀོ དྷམྨརཱཛཱ དྷཱཏུཡོ ནཱིཧརིསྶཱམཱིཏི པརིཝེཎཾ ཨོཏིཎྞོ, གནྟྭཱ ཀཊྛརཱུཔཱནི ཧཱརེཧཱིཏི སོ པཉྩཙཱུལ༹གཱམ དཱརཀཝེསེནཱགནྟྭཱ རཉྙོ པུརཏོ དྷནུཀཧཏྠོ ཋཏྭཱ ཧཱརེམི མཧཱརཱཛཱཏི ཨཱཧ. ཧར ཏཱཏཱཏི. སརཾ གཧེཏྭཱ སནྡྷིམྷིཡེཝ ཝིཛ྄ཛྷི, སབྦཾ ཝིཔྤཀིརཱིཡིཏྠ.

ཨཐ རཱཛཱ ཨཱཙིཉྫནེ བདྡྷ ཀུཉྩིཀ མུདྡིཀཾ གཎྷི, མཎིཀྑཎྡྷཾ པསྶི, ཨནཱགཏེ དལི༹དྡརཱཛཱནོ ཨིམཾ མཎིཾ གཧེཏྭཱ དྷཱཏཱུནཾ སཀྐཱརཾ ཀརོནྟཱུཏི པན ཨཀྑརཱནི དིསྭཱ ཀུཛ྄ཛྷིཏྭཱ མཱདིསཾ ནཱམ རཱཛཱནཾ དལི༹དྡརཱཛཱཏི ཙཏྟུ ཡུཏྟནྟི པུནཔྤུན གྷཊེཏྭཱ དྭཱརཾ ཝིཙརིཏྭཱ ཨནྟོགེཧཾ པཝིཊྛོ. ཨཊྛཱརས ཝསྶཱདྷིཀཱནཾ དྭིནྣཾ ཝསྶསཏཱནཾ ཨུཔརི ཨཱརོཔིཏདཱིཔཱ ཏཐེཝ པཛྫལནྟི ནིལུཔྤལ པུཔྥཱནི ཏཾ ཁཎཾ ཨཱཧརིཏྭཱ ཨཱརོཔིཏཱནི ཝིཡ, པུཔྥསཎྠརོ ཏཾ ཁཎཾ སནྠཏོ ཝིཡ, གཎྡྷཱ ཏཾ མུཧུཏྟཾ པིཾསིཏྭཱ ཋཔིཏཱ ཝིཡ.

རཱཛཱ སུཝཎྞཔཊྚཾ གཧེཏྭཱ ཨནཱགཏེ པིཡདཱསོནཱམ ཀུམཱརོ ཚཏྟཾ ཨུསྶཱཔེཏྭཱ ཨསོཀོ ནཱམ དྷམྨརཱཛཱ བྷཝིསྶཏི སོ ཨིམཱ དྷཱཏུཡོ གཧེཏྭཱ ཝིཏྠཱརིཀཱ ཀརིསྶཏཱིཏི ཝཱཙེཏྭཱ དིཊྛོ’ཧཾ ཨཡྻོན མཧཱཀསྶཔཏྠེརེནཱཏི ཝཏྭཱ ཝཱམཧཏྠཾ ཨཱབྷུཛིཏྭཱ དཀྑིཎཧཏྠེན ཨཔྤོཋེསི.

སོ ཏསྨིཾ ཋཱནེ པརིཙརཎཀ དྷཱཏུམཏྟཀམེཝ ཋཔེཏྭཱ སེསདྷཱཏུཡོ སབྦཱ གཧེཏྭཱ དྷཱཏུགྷརཾ པུབྦེ པིཧིཏནཡེནེཝ པིདཧིཏྭཱ ¶ སབྦཾ ཡཐཱ པཀཏིཡཱཝ ཀཱརེཏྭཱ ཨུཔརི པཱསཱཎཙེཏིཡཾ པཏིཊྛཱཔེཏྭཱ ཙཏུརཱསཱིཏིཡཱ ཝིཧཱརསཧསྶེསུདྷཱཏུཡོ པཏིཊྛཱཔེསི ཨེཝཾ ཛམྦུདཱིཔཏལེ ཨསོཀོ དྷམྨརཱཛཱ ཙཏུརཱསིཏི ཙེཏིཡ སཧསྶཱནི ཀཱརཱཔེསི.

སབྦེ ཐཱུཔཱ སབྦལོཀེཀདཱིཔཱ སབྦེསཾ ཡེ སགྒམོཀྑཱཝཧཱ ཙ, ཧིཏྭཱ སབྦཾ ཀིཙྩམཉྙཾ ཛནེན ཝཎྡཡྻཱ ཏེ སབྦཐཱ སབྦཀཱལནྟི.

ཙཏུརཱསཱིཏི སཧསྶ ཐཱུཔཀཐཱ

༡༢. ཨེཝཾ ཨསོཀོ དྷམྨརཱཛཱ ཙཏུརཱསཱིཏི ཝིཧཱརསཧསྶམཧཾ ཀཏྭཱ མཧཱཐེརོ ཝནྡིཏྭཱ པུཙྪི དཱཡཱདོམྷི བྷནྟེ བུདྡྷསཱསནེ’ཏི. ཀིསྶ དཱཡཱདོ ཏྭཾ མཧཱརཱཛ, བཱཧིརཀོ ཏྭཾ སཱསནསྶཱཏི. བྷནྟེ ཚནྣཝུཏིཀོཊིདྷནཾ ཝིསྶཛྫེཏྭཱ ཙཏུརཱསཱིཏི ཝིཧཱརསཧསྶཱནི སཙེཏིཡཱནི ཀཱརཱཔེཏྭཱ ཨཧཾ ན དཱཡཱདོ, ཨཉྙེ ཀོ དཱཡཱདོཏི, པཙྩཡ དཱཡཀོ ནཱམ ཏྭཾ མཧཱརཱཛ, ཡོ པན ཨཏྟནོ པུཏྟཉྩ དྷཱིཏརཉྩ པབྦཱཛེཏི, ཨཡཾ སཱསནེ དཱཡཱདོ ནཱམཱཏི.

ཨེཝཾ ཝུཏྟེ ཨསོཀོ རཱཛཱ སཱསནེ དཱཡཱདབྷཱཝཾ པཏྠཡམཱནོ ཨཝིདཱུརེ ཋིཏཾ མཧིཎྡཀུམཱརཾ དིསྭཱ སཀྑིསྶསིཏྭཾ ཏཱཏ པབྦཛིཏུནྟི ཨཱཧ. ཀུམཱརོ པཀཏིཡཱ པབྦཛིཏུཀཱམོ རཉྙོ ཝཙནཾ སུཏྭཱ ཨཏིཝིཡ པཱམོཛྫཛཱཏོ པབྦྫཱམི དེཝ, མཾ པབྦཱཛེཏྭཱ སཱསནེ དཱཡཱདོ ཧོཐཱཏི ཨཱཧ ཏེན ཙ སམཡེན རཱཛདྷཱིཏཱ སངྒྷམིཏྟཱཔི ཏསྨིཾ ཋཱནེ ཋིཏཱ ཧོཏི ཏཾ དིསྭཱ ཨཱཧ-’ཏྭམྤི ཨམྨ པབྦཛིཏུཾ སཀྑིསྶསཱི’ཏི, སཱདྷུ ཏཱཏཱཏི སམྤཊིཙྪི. རཱཛཱ པུཏྟ ན མནཾ ལབྷིཏྭཱ པཧཊྛཙིཏྟོ བྷིཀྑུསངྒྷཾ ཨུཔསངྐམིཏྭཱ བྷནྟེ ཨིམེ དཱརཀེ པབྦཱཛེཏྭཱ མཾ སཱསནེ དཱཡཱདཾ ཀརོཐཱཏི སངྒྷོ རཉྙོ ཝཙནཾ སམྤཊིཙྪིཏྭཱ ཀུམཱརཾ མོགྒལིཔུཏྟ ཏིསྶཏྠེརེན ཨུཔཛ྄ཛྷཱཡེན མཧཱདེཝཏྠེརེན ཙ ཨཱཙརིཡེན པབྦཛྫཱཔེསི. མཛ྄ཛྷནྟིཀཏྠེརེན ཨཱཙརིཡེན ཨུཔསམྤཱདེསི ཨུཔསམྤདཱམཱལཀེཡེཝ སཧཔཊིསམྦྷིདཱཧི ཨརཧཏྟཾ པཱཔུཎི.

སངྒྷམིཏྟཱཡཔི རཱཛདྷཱིཏཱཡ ཨཱཙརིཡཱ ཨཱཡུཔཱལཏྠེརི ནཱམ, ཨུཔཛ྄ཛྷཱཡཱ པན དྷམྨཔཱལཏྠེརཱི ནཱམ ཨཧོསི. ཨཐ མཧིཎྡཏྠེརོ ཨུཔསམྤནྣ ཀཱལཏོཔྤབྷཱུཏི ཨཏྟནོ ཨུཔཛ྄ཛྷཱཡསྶེཝ སནྟིཀེ དྷམྨཉྩ ཝིནཡཉྩ པརིཡཱཔུཎནྟོ དྭེཔི སངྒིཏིཡོ ཨཱརུལ༹ྷཾ ཏིཔིཊཀ སངྒཧཱིཏཾ སཱཊྛཀཐཾ ཐེརཝཱདཾ ཏིཎྞཾ ཝསྶཱནཾ ཨབྦྷནྟརེ ཨུགྒཧེཏྭཱ ཨཏྟནོ ཨུཔཛ྄ཛྷཱཡསྶ ཨནྟེཝཱསིཀཱནཾ སཧསྶམཏྟཱནཾ བྷིཀྑཱུནཾ པཱམོཀྑཾ ཨཧོསི.

ཏེན ¶ ཁོ པན སམཡེན མོགྒལིཔུཏྟཏིསྶཏྠེརོ ཀཏྠ ནུ ཁོ ཨནཱགཏེ སཱསནཾ སུཔྤཏིཊྛིཏཾ གཝེཡྻཱཏི ཨུཔཔརིཀྑནྟོ པཙྩནྟིམེསུ ཛནཔདེསུ སུཔྤཏིཊྛིཏཾ བྷཝིསྶཏཱིཏི ཉཏྭཱ ཏེསཾ ཏེསཾ བྷིཀྑཱུནཾ བྷཱརཾ ཀཏྭཱ ཏེ ཏེ བྷིཀྑུ ཏཏྠ ཏཏྠ པེསེསི.

མཛ྄ཛྷནྟིཀཏྠེརཾ ཀསྨཱིར གཎྡྷཱར རཊྛཾཔེསེསི ཏྭཾ ཨེཏཾ རཊྛཾ གནྟྭཱ ཏཏྠ སཱསནཾ པཏིཊྛཱཔེཧཱིཏི མཧཱདེཝཏྠེརཾ ཏཐེཝ ཝཏྭཱ མཧིཾསཀམཎྜལཾ པེསེསི. རཀྑིཏཏྠེརཾཝནཝཱསཱིཾ, ཡོནཀདྷམྨརཀྑིཏཏྠེརཾ ཨཔརནྟཀཾ, མཧཱདྷམྨརཀྑིཏཏྠེརཾ མཧཱརཊྛཾ མཧཱརཀྑིཏཏྠེརཾ ཡོནཀ ལོཀཾ. མཛ྄ཛྷིམཏྠེརཾ ཧིམཝནྟདེས བྷཱགཾ, སོཎཏྠེརཾ-ཨུཏྟརཏྠེརཉྩ སུཝཎྞབྷཱུམིཾ. ཨཏྟནོ སདྡྷིཝིཧཱརིཀཾ མཧིཎྡཏྠེརཾ ཨིཊྚིཡཏྠེརེན ཨུཏྟིཡཏྠེརེན བྷདྡསཱལཏྠེརེན སམྦལཏྠེརེན ཙ སདྡྷིཾ ཏམྦཔཎྞིདཱིཔཾ གནྟྭཱ ཨེཏྠ སཱསནཾ པཏིཊྛཱཔེཐཱཏི. སབྦེཔི ཏཾ ཏཾ དིསཱབྷཱགཾ གཙྪནྟཱ ཨཏྟཔཉྩམཱ ཨགམིཾསུ སབྦེཔི ཐེརཱ གཏགཏཊྛཱནེ མནུསྶེ པསཱདེཏྭཱ སཱསནཾ པཏིཊྛཱཔེསུཾ.

མཧིཎྡཏྠེརོ པན ཏམྦཔཎྞིདཱིཔཾ གནྟྭཱ སཱསནཾ པཏིཊྛཱཔེཧཱིཏི ཨུཔཛ྄ཛྷཱཡེན བྷིཀྑུསངྒྷེན ཙ ཨཛ྄ཛྷིཊྛོ ཀཱལོ ནུ ཁོ མེ ཏམྦཔཎྞིདཱིཔཾ གནྟུཾ ནོཏི ཨུཔདྷཱརེནྟོ མུཊསཱིཝརཉྙོ མཧལླཀབྷཱཝཾ ཙིནྟེསི. ཨཡཾ མཧཱརཱཛཱ མཧལླཀོ, ན སཀྐཱ ཨིམཾ གཎྷིཏྭཱ སཱསནཾ པགྒཧེཏུཾ, ཨིདཱནི པནསྶ པུཏྟོ དེཝཱནམྤིཡཏིསྶོ རཛྫཾ ཀཱརེསྶཏི. ཏཾ གཎྷིཏྭཱ སཀྐཱ བྷཝིསྶཏི སཱསནཾ པགྒཧེཏུཾ, ཧཎྡ ཡཱཝ སོ སམཡོ ཨཱགཙྪཏི ཏཱཝ ཉཱཏཀེ ཨོལོཀེམ, པུན’དཱནི ཨིམཾ ཛནཔདཾ ཨཱགཙྪེཡྻཱམ ཝཱ ན ཝཱཏི.

སོ ཨེཝཾ ཙིནྟེཏྭཱ ཨུཔཛ྄ཛྷཱཡཉྩ བྷིཀྑུསངྒྷཉྩ ཝནྡིཏྭཱ ཨསོཀཱརཱམཏོ ནིཀྑམྨ ཏེཧི ཨིཊྚིཡཱདཱིཧི ཙཏཱུཧི ཐེརེཧི སངྒྷམིཏྟཱཡ པུཏྟེན སུམནསཱམཎེརེན བྷཎྜུཀེནཀ ཙ ཨུཔཱསཀེན སདྡྷིཾ རཱཛགཧནགར ཨུཔཝཏྟཀེ དཀྑིཎ གིརིཛནཔདེ ཙཱརིཀཾ ཙརམཱནོ ཉཱཏཀེ ཨོལོཀེནྟོ ཚ མཱསེ ཨཏིཀྐཱམེསི ཨཐཱནུཔུབྦེན མཱཏུནིཝེསནཊྛཱནཾ ཝེཊིས ནགརཾ ནཱམ སམྤཏྟོ སམྤཏྟཉྩ པན ཐེརཾ དིསྭཱ ཐེརམཱཏཱ དེཝཱི པཱདེ སིརསཱ ཝནྡིཏྭཱ བྷིཀྑཾ དཏྭཱ ཐེརཾ ཨཏྟནཱ ཀཏཾ ཝེཊིསགིརི ཝིཧཱརཾ ནཱམ ཨཱརོཔེསི.

ཐེརོ ཏསྨིཾ ཝིཧཱརེ ནིསནྣོ ཙིནྟེསི ཨམྷཱཀཾ ཨིདྷ ཀཏྟབྦ ཀིཙྩཾ ནིཊྛིཏཾ. སམཡོ ནུ ཁོ ཨིདཱནི ལངྐཱདིཔཾ གནྟུནྟི. ཏཏོ ཙིནྟེསི-ཨནུབྷཝཏུ ཏཱཝ མེ པིཏརཱ པེསིཏཾ ཨབྷིསེཀཾ ¶ དེཝཱནམྤིཡཏིསྶོ རཏནཏྟཡགུཎཉྩ སུཎཱཏུ, ཚཎཏྠཉྩ ནགརཏོ ནིཀྑམིཏྭཱ མིསྶཀཔབྦཏཾ ཨབྷིརཱུཧཏུ ཏདཱ ཏཾ ཏཏྠ དཀྑིསྶཱམཱཏི. ཨཐཱཔརཾ ཨེཀམཱསཾ ཏཏྠེཝ ཝཱསཾ ཀཔྤེསི.

མཱསཱཏིཀྐམེ སཀྐོ དེཝཱནམིནྡོ མཧིཎྡཏྠེརཾ ཨུཔསངྐམིཏྭཱ ཨེཏདཝོཙ.’ ཀཱལཀཏོ བྷནྟེ མུཊསཱིཝརཱཛཱ, ཨིདཱནི དེཝཱནམྤིཡཏིསྶ རཱཛཱ རཛྫཾ ཀཱརེཏི. སམྨཱསམྦུདྡྷེན ཙ ཏུམྷེ ཝྱཱཀཏཱ ཨནཱགཏེ མཧིཎྡོ ནཱམ བྷིཀྑུ ཏམྦཔཎྞིདཱིཔཾ པསཱདེསྶཏཱི’ཏི. ཏསྨཱ ཏིཧ ཝོ བྷནྟེ ཀཱལོ དཱིཔཝརཾ གམནཱཡ, ཨཧམྤི ཝོ སཧཱཡོ བྷཝིསྶཱམཱི.

ཐེརོ ཏསྶ ཝཙནཾ སམྤཊིཙྪིཏྭཱཨཏྟསཏྟམོ ཝེཊིས པབྦཏཝིཧཱརཱ ཝེཧཱསཾ ཨུཔྤཏིཏྭ ཨནུརཱདྷཔུརསྶ པུརཏྠིམཱཡ དིསཱཡ མིསྶཀཔབྦཏེ པཏིཊྛཧི ཡཾ ཨེཏརཧི ཙེཏིཡཔབྦཏོཏིཔི སཉྫཱནནྟི ཏསྶམིཾ དིཝསེ ཏམྦཔཎྞིདིཔེ ཛེཊྛམཱུལ ནཀྑཏྟཾ ནཱམ ཧོཏི རཱཛཱ ནཀྑཏྟཾ གྷོསཱཔེཏྭཱ ཚཎཾ ཀརོཐཱཏི ཨམཙྩེ ཨཱཎཱཔེཏྭཱ ཙཏྟཱལཱིས པུརིས སཧསྶཔརིཝཱརོ ནགརམྦྷཱ ནིཀྑམིཏྭཱ ཡེན མིསྶཀཔབྦཏོ ཏེན པཱཡཱསི མིགཝཾ ཀཱིལི༹ཏུཀཱམོ ཨཐ ཏསྨིཾ པབྦཏེ ཨདྷིཝཏྠཱ དེཝཏཱ རཉྙོ ཐེརེ དསྶེསྶཱམཱིཏི རོཧིཏ མིགརཱུཔཾ གཧེཏྭཱ ཨཝིདཱུརེ ཏིཎཔཎྞཱནི ཁཱདམཱནཱ ཝིཡ ཙརཏི.

རཱཛཱ དིསྭཱ ཨཡུཏྟཾ དཱནི པམཏྟཾ ཝིཛ྄ཛྷིཏུནྟི ཛཱིཡཾ པོཋེསི. མགོ ཨམྦཏྠལམགྒཾ གཧེཏྭཱ པལཱཡིཏུཾ ཨཱརབྷི རཱཛཱཔི པིཊྛིཏོ པིཊྛིཏོ ཨནུབཎྡྷནྟོ ཨམྦཏྠལམེཝ ཨཱརུཧི. མིགོ ཐེརཱནཾ ཨཝིདཱུརེ ཨནྟརདྷཱཡི.

མཧིཎྡཏྠེརོ རཱཛཱནཾ ཨཝིདཱུརེ ཨཱགཙྪནྟཾ’མམཾཡེཝ རཱཛཱ པསྶཏུ, མཱ ཨིཏརེ’ཏི ཨདྷིཊྛཧིཏྭཱ’ཏིསྶ! ཏིསྶ! ཨིཏོ ཨེཧཱི’ཏི ཨཱཧ. རཱཛཱ སུཏྭཱ ཙིནྟེསི-ཨིམསྨིཾ ཏམྦཔཎྞིདཱིཔེ ཛཱཏོ མཾ ཏིསྶོཏི ནཱམཾ གཧེཏྭཱ ཨཱལཔིཏུཾ སམཏྠོ ནཱམ ནཏྠི. ཨཡམྤན ཚིནྣབྷིནྣཔཊདྷརོ བྷཎྜུཀཱསཱཝ ཝསནོ མཾ ནཱམེན ཨཱལཔཏི, ཀོ ནུ ཁོ ཨཡཾ བྷཝིསྶཏི མནུསྶོ ཝཱ ཨམནུསྶོ ཝཱཏི. ཐེརོ ཨཱཧ.

སམཎཱ མཡཾ མཧཱརཱཛ - དྷམྨརཱཛསྶ སཱཝཀཱ,

ཏཝེཝ ཨནུཀམྤཱཡ - ཛམྦུདཱིཔཱ ཨིདྷཱགཏཱཏི;

ཏེན སམཡེན དེཝཱནམྤིཡཏིསྶ རཱཛཱ ཙ ཨསོཀདྷམྨརཱཛཱ ཙ ཨདིཊྛ སཧཱཡཀཱ ཧོནྟི. དེཝཱནམྤིཡཏིསྶ རཉྙེ ཙ པུཉྙཱནུབྷཱཝེན ཚཱཏཔབྦཏཔཱདེ ཨེཀསྨིཾ ཝེལུ༹གུམྦེ ཏིསྶོ ཝེལུ༹ཡཊྛིཡོ ནིབྦཏྟིཾསུ ཨེཀཱ ལཏཱཡཊྛི ནཱམ, ཨེཀཱ པུཔྥཡཊྛི ནཱམ ཨེཀཱ སཀུཎཡཊྛི ནཱམ. ཏཱསུ ལཏཱཡཊྛི སཡཾ རཛཏཝཎྞཱ ཧོཏི ཏཾ ཨལངྐརིཏྭཱ ཨུཔྤནྣལཏཱ ཀཉྩན ཝཎྞཱ ཁཱཡཏི པུཔྥཡཊྛིཡཾ པན ¶ ནཱིལ-པཱིཏ-ལོཧིཏ-ཨོདཱཏ-ཀཱལ༹ཝཎྞཱནི པུཔྥཱནི སུཙིབྷཏྟཝཎྚ པཏྟ ཀིཉྫཀྑཱ ཧུཏྭཱ ཁཱཡནྟི སཀུཎཡཊྛིཡཾ ཧཾསཀུཀྐུཊ-ཛཱིཝཾཛཱིཝཀཱདཡོ སཀུཎཱ ནཱནཱཔྤཀཱརཱནི ཙ ཙཏུཔྤདཱནི སཛཱིཝཱནི ཝིཡ ཁཱཡནྟི སམུདྡཏོཔིསྶ མུཏྟཱ-མཎི-ཝེལུ༹རིཡཱདི ཨནེཀཝིཧིཏཾ རཏནཾ ཨུཔྤཛྫི.

ཏམྦཔཎྞིཡཾ པན ཨཊྛམུཏྟཾ ཨུཔྤཛྫིཾསུ-བྷཡམུཏྟཱ གཛམུཏྟཱ རཐམུཏྟཱ ཨཱམལཀམུཏྟཱ ཙལཡམུཏྟཱ ཨངྒུལཱིཝེཋཀམུཏྟཱ ཀཀུདྷཕལམུཏྟཱ པཱཀཏིཀམུཏྟཱཏི སོ ཏཱ ཙ ཡཊྛིཡོ ཏཱ ཙ མུཏྟཱཡོ ཨཉྙྩ བཧུཾ རཏནཾ ཨསོཀསྶ དྷམྨརཉྙོ པཎྞཱཀཱརཏྠཱཡ པེསེསི. ཨསོཀོཔི པསཱིདིཏྭཱ པཉྩ རཱཛཀཀུདྷབྷཎྜཱནིཙེཝ ཨཉྙེ ཙ ཨབྷིསེཀཏྠཱཡ བཧཱུཔཎྞཱཀཱརེ པཧིཎི. ན ཀེཝལཉྩ ཨེཏཾ ཨཱམིས པཎྞཱཀཱརཾ, ཨིམཾ ཀིར དྷམྨ པཎྞཱཀཱརམྤི པེསེསི.

‘‘ཨཧཾ བུདྡྷཉྩ དྷམྨཉྩ-སངྒྷཉྩ སརཎཾ གཏོ,

ཨུཔཱསཀཏྟཾ ཝེདེསིཾ-སཀྱཔུཏྟསྶ སཱསནེ,

ཨིམེསུ ཏཱིསུ ཝཏྠཱུསུ-ཨུནྣམེསུ ནརུཏྟམ,

ཙིཏྟཾ པསཱདཡིཏྭཱན-སདྡྷཱཡ སརཎཾ ཝཛཱ’ཏི;’’

རཱཛཱ ཨཝིརསུཏཾ སཱསནཔཝཏྟིཾ ཨནུསྶརམཱནོ ཐེརསྶ ཏཾ ‘‘སམཎཱམཡཾ མཧཱརཱཛ དྷམྨརཱཛསྶ སཱཝཀཱ‘‘ཏི ཝཙནཾ སུཏྭཱ ཨཡྻཱ ནུ ཁོ ཨཱགཏཱཏི ཏཱཝདེཝ ཨཱཝུདྷཾ ནིཀྑིཔིཏྭཱ ཨེཀམནྟཾ ནིསཱིདི སམྨོདནཱིཡཾ ཀཐཾ ཀཐཡམཱནོ, སམྨོདནཱིཡཀཐཾ ཀུརུམཱནེཡེཝ ཏསྨིཾ ཏཱནིཔི ཙཏྟཱལཱིས པུརིསསཧསྶཱནི ཨཱགནྟྭཱ ཏཾ པརིཝཱརེསུཾ. ཏདཱ ཐེརོ ཨིཏརེཔི ཛནེ དསྶེསི.

རཱཛཱ དིསྭཱ ཨིམེ ཀདཱ ཨཱགཏཱཏི པུཙྪི མཡཱ སདྡྷིཾཡེཝ མཧཱ རཱཛཱཏི. ཨིདཱནི པན ཛམྦུདཱིཔེ ཨཉྙྙོཔི ཨེཝརཱུཔཱ སམཎཱ སནྟཱིཏི. མཧཱརཱཛ ཨེཏརཧི ཛམྦུདཱིཔོ ཀཱསཱཝ པཛྫོཏོ ཨིསིཝཱཏཔརིཝཱཏོ, ཏསྨིཾ-

‘‘ཏེ ཝིཛྫཱ ཨིདྡྷིཔཏྟཱ ཙ ཙེཏོཔརིཡཱཡ ཀོཙིདཱ,

ཁཱིཎཱསཱཝ ཨརཧནྟོ-བཧཱུ བུདྡྷསྶ སཱཝཀཱཏི’’;

ཨཐ རཱཛཱ བྷནྟེ སྭེ རཐཾ པེསེསྶཱམི. ཏཾ ཨབྷིརཱུཧིཏྭཱ ཨཱགཙྪེཡྻཱཐཱཏི ཝཏྭཱ པཀྐཱཀམི ཐེརོ ཨཙིརཔཀྐནྟསྶ རཉྙོ སུམཎསཱམཎེརཾ ཨཱམནྟེསི ཨེཧི ཏྭཾ སུམན དྷམྨསཝནཀཱལཾ གྷོསེཧཱིཏི སཱམཎེརོ ཨབྷིཉྙཱཔཱདཀཾ ཙཏུཏྠཛ྄ཛྷཱནཾ སམཱཔཛྫིཏྭཱ ཝུཊྛཱཡ ཨདྷིཊྛཧིཏྭཱ སམཱཧིཏེན ཙིཏྟེན སཀལཏམྦཔཎྞིདཱིཔཾ སཱཙེནྟོ དྷམྨསཝནཀཱལཾ གྷོསེསི.

སཱམཎེརསྶ སདྡཾ སུཏྭཱ བྷུམྨཱ དེཝཏཱ སདྡམནུསྶཱཝེསུ, ཨེཏེནུཔཱཡེན ཡཱཝ བྲཧྨལོཀཱ སདྡོ ཨབྦྷུགྒཉྪི. ཏེན སདྡེན ¶ མཧཱདེཝཏཱ སནྣིཔཱཏོ ཨཧོསི ཐེརོ མཧནྟཾ དེཝཏཱ སནྟིཔཱཏཾ དིསྭཱ སམཙིཏྟསུཏྟནྟཾ ཀཐེསི. ཀཐཱ པརིཡོསཱནེ ཨསངྑེཡྻཱནཾ དེཝཱནཾ དྷམྨཱབྷིསམཡོ ཨཧོསི. བཧཱུ ནཱག སུཔཎྞཱ ཙ སརཎེསུ པཏིཊྛཧིཾསུ. ཨཐ ཏསྶཱ རཏྟིཡཱ ཨཙྩཡེན རཱཛཱ ཐེརཱནཾ རཐཾ པེསེསི. ཐེརཱ ན མཡཾ རཐཾ ཨཱརུཧཱམ. གཙྪ ཏྭཾ, པཙྪཱ མཡཾ ཨཱགཙྪིསྶཱམཱཏི ཝཏྭཱ ཝེཧཱསཾ ཨབྦྷུགྒནྟྭཱ ཨནུརཱདྷཔུརསྶ པཙྪིམདིསཱཡ པཋམཀ ཙེཏིཡཊྛཱནེ ཨོཏརིཾསུ.

རཱཛཱཔི སཱརཐིཾ པེསེཏྭཱ ཨནྟོ ནིཝེསནེ མཎྜཔཾ པཊིཡཱདེཏྭཱ ཙིནྟེསི’ ནིསཱིདིསྶནྟི ནུ ཁོ ཨཡྻཱ ཨཱསནེ ན ནིསཱིདིསྶནྟཱི‘‘ཏི. ཏསྶེཝཾ ཙིནྟཡནྟསྶེཝ སཱརཐི ནགརདྭཱརཾ པཏྭཱ ཨདྡས ཐེརེ པཋམཏརཾ ཨཱགནྟྭཱ ཀཱཡབཎྡྷནཾ བཎྡྷིཏྭཱ ཙཱིཝརཾ པཱརུཔནྟེ, དིསྭཱ ཨཏིཝིཡ པསནྣམཱནསོ ཧུཏྭཱ ཨཱགནྟྭཱ རཉྙོ ཨཱརོཙེསི ཨཱགཏཱ དེཝ ཐེརཱཏི.

རཱཛཱ རཐཾ ཨཱརུལ༹ྷཱཏི པུཙྪི ན ཨཱརཱུལ༹ྷཱ དེཝ, ཨཔི ཙ པཙྪཏོ ནིཀྑམིཏྭཱ པཋམཏརཾ ཨཱགནྟྭཱ པཱཙཱིནདྭཱརེ ཋིཏཱཏི. རཱཛཱ རཐཾ ན ཨཱརུབྷིཾསཱུཏཱི སུཏྭཱ ཏེན ཧི བྷཎེ བྷུམྨཏྠརཎ སངྑེཔེན ཨཱསནཱནི པཉྙཱཔེཐཱཏི ཝཏྭཱ པཊིཔཐཱ ཨཱགམཱསི ཨམཙྩཱ པཐཝིཡཾ ཏཊྚིཀཾ པཉྙཱཔེཏྭཱ ཨུཔརི ཀོཛཝཀཱདཱིནི ཝིཙིཏྟཏྠརཎཱནི པཉྙཱཔེསུཾ རཱཛཱཔི གནྟྭཱ ཐེརེ ཝནྡིཏྭཱ མཧིཎྡཏྠེརསྶ ཧཏྠཏོ པཏྟཾ གཧེཏྭཱ མཧཏིཡཱ པཱུཛཱཡ ཙ སཀྐཱརེན ཙ ཐེརེ པཎཱིཏེན ཁཱདནཱིཡེན བྷོཛནཱིཡེན སཧཏྠཱ སནྟཔྤེཏྭཱ ཨནུལཱདེཝཱི པམུཁཱ པཉྩ ཨིཏྠིསཏཱནི ཐེརཱནཾ ཨབྷིཝཱདནཾ པཱུཛཱསཀྐཱརཉྩ ཀཱརོནཏཱུཏི པཀྐོསཱཔེཏྭཱ ཨེཀམནྟཾ ནིསཱིདི. ཐེརོ རཉྙོ སཔརིཛནསྶ དྷམྨརཏནཝསྶཾ ཝསྶེནྟོ པེཏཝཏྠུཾ-ཝིམཱནཝཏྠུཾ-སཙྩསཾཡུཏྟཉྩ ཀཐེསི. ཏཾ སུཏྭཱ ཏཱནིཔི པཉྩ ཨིཏྠིསཏཱནི སོཏཱཔཏྟིཕལཾ སཙྪིཀརིཾསུ.

ཏདཱ ནཱགརཱ ཐེརཱནཾ གུཎེ སུཏྭཱ ཐེརེ དཊྛུཾ ན ལབྷཱམཱཏི ཨུཔཀྐོསནྟི ཨཐ རཱཛཱ ཨིདྷ ཨོཀཱསོ ནཏྠཱིཏི ཙིནྟེཏྭཱ,’གཙྪཐ བྷཎེ ཧཏྠིསཱལཾ པཊིཛགྒིཏྭཱ ཝཱལུཀཾ ཨོཀིརིཏྭཱ པཉྩཝཎྞཱནི པུཔྥཱནི ཝིཀིརིཏྭཱ ཝིཏཱནཾ བཎྡྷིཏྭཱ མངྒལ ཧཏྠིཊྛཱནེ ཐེརཱནཾ ཨཱསནཱནི པཉྙཱཔེཐཱ’ཏི ཨཱཧ, ཨམཙྩཱ ཏཐཱ ཨཀཾསུ.

ཐེརོ ཏཏྠ གནྟྭཱ ནིསཱིདིཏྭཱ དེཝདཱུཏསུཏྟནྟཾ ཀཐེསི ཀཐཱ པརིཡོསཱནེ པཱཎསཧསྶཾ སོཏཱཔཏྟིཕལེ པཏིཊྛཧི ཏཐཱ ཧཏྠིསཱལཱ སམྦཱདྷཱཏི དཀྑིཎདྭཱརེ ནཎྡནུཡྻཱནེ ཨཱསནཾ པཉྙཱཔེསུཾ. ཐེརོ ཏཏྠ ནིསཱིདིཏྭཱ ཨཱསིཝིསོཔམ སུཏྟནྟཾ ཀཐེསི. ཏམྤི སུཏྭཱ པཱཎསཧསྶཾ སོཏཱཔཏྟིཕལཾ པཊིལབྷི ཨེཝཾ ཨཱགཏདིཝསཏོ ¶ དུཏིཡདིཝསེ ཨཌྜྷཏེཡྻཱནཾ པཱཎསཧསྶཱནཾ དྷམྨཱབྷིསམཡོ ཨཧོསི.

ཐེརསྶ ནཎྡནཝནེ ཨཱགཏཱགཏཱཧི ཀུལིཏྠཱིཧི ཀུལསུཎྷཱཧི ཀུལཀུམཱརཱིཧི སདྡྷི སམོདམཱནསྶེཝ སཱཡཎྷསམཡོ ཛཱཏོ, ཐེརོ ཀཱལཾ སལླཀྑེཏྭཱ གཙྪཱམི’དཱནི མིསྶཀ པབྦཏནྟི ཨུཊྛཧི. ཨམཙྩཱ མཧཱམེགྷཝནུཡྻཱནེ ཐེརེ ཝཱསེསུཾ རཱཛཱཔི ཁོ ཏསྶཱ རཏྟིཡཱ ཨཙྩཡེན ཐེརསྶ སམཱིཔཾ གནྟྭཱ སུཁསཡིཏབྷཱཝཾ པུཙྪིཏྭཱ ཀཔྤཏི བྷནྟེ བྷིཀྑུསངྒྷསྶ ཨཱརཱམོཏི པུཙྪི. ཐེརོ ཀཔྤཏི མཧཱརཱཛཱཏི ཨཱཧ.

རཱཛཱ ཏུཊྛོ སུཝཎྞ བྷིཾཀཱརཾ གཧེཏྭཱ ཐེརསྶ ཧཏྠེ ཨུདཀཾ པཱཏེཏྭཱ མཧཱམེགྷཝནུཡྻཱནཾ ཨདཱསི ཐེརོ པུནདིཝསེཔི རཱཛགེཧེཡེཝ བྷུཉྫིཏྭཱ ནཎྡནཝནེ ཨནམཏགྒིཡཱནི ཀཐེསི. པུན དིཝསེ ཨགྒིཀྑཎྡྷོཔམ སུཏྟནྟཾ ཀཐེསི. ཨེཏེནེཝ ཨུཔཱཡེན སཏྟ དིཝསཱནི ཀཐེསི ཨཌྜྷ ནཙམཱནཾ པཱཎསཧསྶཱནཾ དྷམྨཱབྷིསམཡོ ཨཧོསི. སཏྟམེ དིཝསེ པན ཐེརོ ཨནྟོཔུརེ རཉྙོ ཨཔྤམཱད སུཏྟནྟཾ ཀཐཡིཏྭཱ ཙེཏིཡགིརིམེཝ ཨགམཱསི.

ཨཐ ཁོ རཱཛཱ ཐེརོ ཨཱཡཱཙིཏོ སཡམེཝཱགཏོ, ཏསྨཱ ཏསྶ ཨནཱཔུཙྪཱ གམནམྤི བྷཝེཡྻཱཏི ཙིནྟེཏྭཱ རཐཾ ཨབྷིརཱུཧིཏྭཱ, ཙེཏིཡགིརིཾ ཨགམཱསི མཧཏཱ རཱཛཱནུབྷཱཝེན གནྟྭཱ ཐེརཱནཾ སནྟིཀཾ ཨུཔསངྐམནྟོ ཨཏིཝིཡ ཀིལནྟརཱུཔོ ཧུཏྭཱ ཨུཔསངྐམི. ཏཏོ ནཾ ཐེརོ ཨཱཧ ཀསྨཱ ཏྭཾ མཧཱརཱཛ ཨེཝཾ ཀིལམ མཱནོ ཨཱགཏོཏི. ཏུམྷེ མམ གཱལ༹ྷཾ ཨོཝཱདཾ དཏྭཱ ཨིདཱནི གནྟུཀཱམཱ ནུཁོཏི ཛཱནནཏྠཾ བྷནྟེཏི. ན མཡཾ མཧཱརཱཛ གནྟུཀཱམཱ, ཨཔི ཙ ཝསྶུཔནཱཡིཀ ཀཱལོནམཱཡཾ སམཎེན ནཱམ ཝསྶུཔནཱཡིཀཾ ཋཱནཾ ཉཱཏུཾ ཝཊྚཏཱིཏི. རཱཛཱཔི ཁོ ཏཾཁཎཾཡེཝ ཀརཎྜཀ ཙེཏིཡངྒཎཾ པརིཀྑིཔིཏྭཱ ཨཊྛསཊྛིཡཱ ལེཎེསུ ཀམྨཾ པཊྛཔེཏྭཱ ནགརམེཝ ཨགམཱསི.

ཏེཔི ཐེརོ མཧཱཛནཾ ཨོཝདམཱནཱ ཙེཏིཡགིརིམྷི ཝསྶཾ ཝསིཾསུ. ཨཐཱཡསྨཱ མཧཱམཧིཎྡོ ཝུཏྠཝསྶོ པཝཱརེཏྭཱ ཀཏྟིཀཔུཎྞམཱཡཾ ཨུཔོསཐདིཝསེ རཱཛཱནཾ ཨེཏདཝོཙ ཙིརདིཊྛོ ནོ མཧཱརཱཛ སམྨཱསམྦུདྡྷོ ཨབྷིཝཱདན པཙྩུཔཊྛཱན ཨཉྫལི ཀམྨ སཱམཱིཙི ཀམྨ ཀརཎཊྛཱནཾ ནཏྠི, ཏེནམྷཾ ཨུཀྐཎྛིཏཱཏི ཏནུ བྷནྟེ ཏུམྷེ ཨཝོཙུཏྠ པརིནིབྦུཏོ སམྨཱསམྦུདྡྷོཏི ཀིཉྩཱཔི མཧཱརཱཛ པརིནིབྦུཏོ, ཨཐསྶ སརཱིརདྷཱཏུཡོ ཏིཊྛནྟཱིཏི. ཨཉྙཱ ཏམྦྷནྟེ ཐཱུཔཾ པཏིཊྛཱཔེམི བྷཱུམིབྷཱགཾ ཝིཙིནཐཱཏི. ཨཔི ཙ དྷཱཏུཡོ ཀུཏོ ལཙྪཱམཱིཏི སུམནེན སདྡྷིཾ མནྟེཧི མཧཱརཱཛཱཏི རཱཛཱ སུམནཾ ཨུཔསངྐམིཏྭཱ པུཙྪི’ཀུཏོདཱནི བྷནྟེདྷཱཏུཡོ ལཙྪཱམཱ’ཏི སུམནོ ¶ ཨཱཧ-ཨཔྤོསྶུཀྐོ ཏྭཾ མཧཱརཱཛ, ཝཱིཐིཡོ སོདྷཱཔེཏྭཱ དྷཛ པཏཱཀ པུཎྞགྷཊཱདཱིཧི ཨལངྐཱརཱཔེཏྭཱ སཔརིཛྫནོ ཨུཔོསཐཾ སམཱདིཡིཏྭཱ སབྦཏཱལཱཝཙརེ ཨུཔཊྛཔེཏྭཱ མངྒལཧཏྠིཾ སབྦཱལངྐཱརེཧི པཏིམཎྜིཏཾ ཀཱརེཏྭཱ ཨུཔརི ཝསྶ སེཏཙྪཏྟཾ ཨུསྶཱཔེཏྭཱ སཱཡཎྷསམཡེ མཧཱནཱགཝནུཡྻཱནཱབྷིམུཁོ ཡཱ ཧི ཨདྡྷཱ ཏསྨིཾ ཋཱནེ དྷཱཏུཡོ ལཙྪསིཏི, རཱཛཱ སཱདྷཱུཏི སམྤཊིཙྪི. ཐེརོ ཙེཏིཡགིརིམེཝ ཨགམིཾསུ.

ཏཏྲཱཡསྨཱ མཧིཎྡཏྠེརོ སུམན སཱམཎེརམཱཧ- གཙྪ ཏྭཾ སཱམཎེར ཛམྦུདཱིཔེ ཨཡྻཀཾ ཨསོཀདྷམྨརཱཛཱནཾ ཨུཔསངྐམིཏྭཱ མམ ཝཙནེན ཨེཝཾ ཝདེཧི’སཧཱཡོ ཏེ མཧཱརཱཛ དེཝཱནམྤིཡ ཏིསྶོ བུདྡྷསཱསནེ པསནྣོ ཐཱུཔཾ པཏིཊྛཱཔེཏུཀཱམོ ཏུམྷཱཀཾ ཀིར ཧཏྠེ བྷགཝཏོ པརིབྷུཏྟཔཏྟོ ཙེཝདྷཱཏུ ཙ ཨཏྠི, ཏམྨེ དེཐཱ’ཏི ཏཾ གཧེཏྭཱ སཀྐཾ དེཝརཱཛཱནཾ ཨུཔསངྐམིཏྭཱ ཏུམྷཱཀཾ ཀིར མཧཱརཱཛ ཧཏྠེ དྭེ དྷཱཏུཡོ ཨཏྠི དཀྑིཎདཱཋཱ ཙ དཀྑིཎཀྑཀཉྩ, ཏཏོཏུམྷེ དཀྑིཎདཱཋཾཔཱུཛེཐ, དཀྑིཎཀྑཀཾ པན མཡ྄ཧཾ དེཐཱཏི, ཨེཝཉྩ ནཾ ཝདེཧི ཀསྨཱ ཏྭཾ མཧཱརཱཛ ཨམྷེ ཏམྦཔཎྞིདཱིཔཾ པཧིཎིཏྭཱ པམཛྫིཏྠཱཏི.

སཱདྷུ བྷནྟེཏི ཁོ སུམནོ ཐེརསྶ ཝཙནཾ སམྤཊིཙྪིཏྭཱ ཏཱཝདེཝ པཏྟཙཱིཝརམཱདཱཡ ཝེཧཱསམབྦྷུགྒནྟྭཱ པཱཊལིཔུཏྟདྭཱརེ ཨོརུཡ྄ཧ རཉྙོ སནྟིཀཾ གནྟྭཱ ཏམཏྠཾ ཨཱརོཙེསི རཱཛཱ ཏུཊྛོ སཱམཎེརསྶ ཧཏྠཏོ པཏྟཾ གཧེཏྭཱ བྷོཛེཏྭཱ བྷགཝཏོ པཏྟཾ གཎྡྷེཧི ཨུབྦཊྚེཏྭཱ ཝརམུཏྟསདིསཱནཾ དྷཱཏཱུནཾ པཱུརེཏྭཱ ཨདཱསི.

སོ ཏུཾ གཧེཏྭཱ སཀྐཾ དེཝརཱཛཱནཾ ཨུཔསངྐམི སཀྐོ དེཝཱརཱཛཱ སཱམཎེརཾ དིསྭཱ ཀིཾ བྷནྟེ སུམན ཨཱཧིཎྜསཱིཏི ཨཱཧ. ཏྭཾ མཧཱརཱཛ ཨམྷེ ཏམྦཔཎྞིདཱིཔཾ པཧིཎིཏྭཱ ཀསྨཱ པམཛྫསཱིཏི, ཏཔྤམཛྫཱམི བྷནྟེ, ཝདེཧི ཀིཾ ཀརོམཱིཏི. ཏུམྷཱཀཾ ཀིར ཧཏྠེ དྭེ དྷཱཏུཡོ ཨཏྠི དཀྑིཎདཱཋཱ ཙ དཀྑིཎཀྑཀཉྩ, ཏཏོ ཏུམྷེ དཀྑིཎདཱཋཾ པཱུཛེཐ དཀྑིཎཀྑཀཾ པན མཡ྄ཧཾ དེཐཱཏི. སཱདྷུ བྷནྟེཏི ཁོ སཀྐོ དེཝཱནམིཎྡོ ཡོཛནཔྤམཱནཾ མཎིཐཱུཔཾ ཨུགྒྷཱཊེཏྭཱ དཀྑིཎཀྑཀཾ ནཱིཧརིཏྭཱ སུམནསྶ ཨདཱསི.

སོ ཏཾ གཧེཏྭཱ ཙེཏིཡགིརིམྷིཡེཝ པཏིཊྛཱསི ཨཐ ཁོ མཧིཎྡཔམུཁཱ སབྦེ ཏེ མཧཱནཱགཱ ཨསོཀདྷམྨརཱཛེན དིནྣ དྷཱཏུཡོ ཙེཏིཡགིརིཡམྷིཡེཝ པཏིཊྛཱཔེཏྭཱ དཀྑིཎཀྑཀཾ ཨཱདཱཡ ཝཌྜྷམཱནཀཙྪཱཡཱཡ མཧཱནཱག ཝནུཡྻཱནམགམཾསུ. རཱཛཱཔི ཁོ སུམནེན ཝུཏྟཔྤཀཱརཾ པཱུཛཱསཀྐཱརཾ ཀཏྭཱ ཧཏྠིཀྑཎྡྷཝརགཏོ སཱཡཾ མངྒལཧཏྠིམཏྠཀེ སེཏཙྪཏྟཾ དྷཱརཡམཱནོ མཧཱནཱག ཝནུཡྻཱནཾ སམྤཱཔུཎི.

ཨཐསྶ ¶ ཨེཏདཧོསི- སཙེ ཨཡཾ སམྨཱསམྦུདྡྷསྶ དྷཱཏུ, ཚཏྟཾ ཨཔནམཏུ, མངྒལཧཏྠི ཛཎྞུཀེཧི བྷཱུམིཡཾ པཏིཊྛཱཧཏུ, དྷཱཏུ ཙངྒོཊཀཾ མཡ྄ཧཾ མཏྠཀེ པཏིཊྛཧཏཱུཏི སཧ རཉྙོ ཙིཏྟུཔྤཱདེན ཚཏྟཾ ཨཔནམི ཧཏྠིཛཎྞུཀེཧི པཏིཊྛཧི དྷཱཏུཙངྒོཊཀཾ རཉྙོ མཏྠཀེ པཏིཊྛཧི རཱཛཱ ཨམཏེནེཝཱབྷིསིཏྟགཏྟོ པརམེན པཱིཏིཔཱམོཛྫེན སམནྣཱགཏོ ཧུཏྭཱ པུཙྪི དྷཱཏུཾ བྷནྟེ ཀིཾ ཀརོམཱིཏི. ཧཏྠིཀུམྦྷིཡེཝ ཏཱཝ མཧཱརཱཛ ཋཔེཧཱིཏི. རཱཛཱ དྷཱཏུཝངྒོཊཀཾ ཧཏྠིཀུམྦྷེ ཋཔེསི. པམུདིཏོ ནཱགོ ཀུཉྩནཱདཾ ནདི མཧཱམེགྷོ ཨུཊྛཧིཏྭཱ པོཀྑརཝསྶཾ ཝསིསི ཨུཀདཔརིཡནྟཾ ཀཏྭཱ མཧཱབྷཱུམིཙཱལོ ཨཧོསི པཙྩནྟེཔི ནཱམ སམྨཱསམྦུདྡྷསྶ དྷཱཏུཡོ པཏིཊྛཧིསྶནྟཱིཏི.

ཨཐ སོ ཧཏྠིནཱགོ ཨནེཀ ཏཱལཱཝཙརཔརིཝུཏོ ཨཏིཝིཡ ཨུལཱ༹རེན པཱུཛཱསཀྐཱརེན སཀྐརིཡམཱནོ པཙྪིམདིསཱབྷིམུཁོ ཧུཏྭཱ ཨཔསཀྐནྟོ ཡཱཝ ནགརསྶ པུརཏྠིམ དྭཱརཾ ཏཱཝ གནྟྭཱ པུརཏྠིམེན དྭཱརེན ནགརཾ པཝིསིཏྭཱ སཀལནགརེ ཨུལཱ༹རཱཡ པཱུཛཱཡ ཀཡིརཱམཱནཱཡ དཀྑིཎདྭཱརེན ནིཀྑམིཏྭཱ ཐཱུཔཱརཱམསྶ པཙྪིམདིསཱབྷཱགེ པབྷེཛཝཏྠུ ནཱམ ཀིར ཨཏྠི ཏཏྠ གནྟྭཱ པུན ཐཱུཔཱརཱམཱབྷིམུཁོ ཨེཝ པཊིནིཝཏྟི. སོ ཙ པུརིམཀཱནཾ ཏིཎྞཾ སམྨཱསམྦུདྡྷཱནཾ དྷམྨཀརཀཾ ཀཱཡབཎྡྷནཾ ཨུདཀསཱཊཱིཀཾ པཏིཊྛཱཔེཏྭཱ ཀཏཙེཏིཡཊྛཱནཾ ཧོཏཱི. ཏདེཏཾ ཝིནཊྛེསུཔི ཙེཏིཡེསུ དེཝཏཱནུབྷཱཝེན ཀཎྚཀ སམཱཀིཎྞསཱཁཱཧི ནཱནཱགཙྪེཧི པརིཝུཏཾ ཏིཊྛཏི. མཱ ནཾ ཀོཙི ཨུཙྩིཊྛཱ སུཝིམལ ཀཙཝརེཧི སནྡུསེསཱིཏི.

ཨཐ ཏསྶ ཧཏྠིནོ པུརཏོ གནྟྭཱ རཱཛཔུརིསཱ སབྦ གཙྪེ ཚིཎྡིཏྭཱ བྷཱུམིཾ སོདྷེཏྭཱ ཏཾ ཧཏྠཏལསདིསཾ ཨཀཾསུ. ཧཏྠིནཱགོ གནྟྭཱ ཏཾ ཋཱནཾ པུརཏོ ཀཏྭཱ ཏསྶ པཙྪིམདིསཱབྷཱགེ བོདྷིརུཀྑཊྛནེ ཨཊྛཱསི. ཨཐསྶ མཏྠཀཏོ དྷཱཏུཾ ཨོརོཔེཏུཾ ཨཱརབྷིཾསུ ནཱགོ ཨོརོཔེཏུཾ ན དེཏི. ཐེརཾ པུཙྪི, ཀསྨཱ བྷནྟེ ནཱགོ དྷཱཏུཾ ཨོརོཔེཏུཾ ན དེཏཱིཏི

ཨཱརུལ༹ྷཾ མཧཱརཱཛ ཨོརོཔེཏུཾ ན ཝཊྚཏིཏི. ཏསྨིཉྩ ཀཱལེ ཨབྷཡཝཱཔིཡཱ ཨུདཀཾ ཛིནྣཾ ཧོཏི སམནྟཱ བྷཱུམི ཕལིཏཱ སུཨུདྡྷརཱ མཏྟིཀཔིཎྜཱ. ཏཏོ མཧཱཛནོ སཱིགྷསཱིགྷཾ མཏྟིཀཾ ཨཱཧརིཏྭཱ ཧཏྠཀུམྦྷཔྤམཱཎཾ ཝཏྠུམཀཱསི. ཏཱཝདེཝ ཐཱུཔཀརཎཏྠཾ ཨིཊྛིཀཱ ཀཱཏུཾ ཨཱརབྷིཾསུ. ཡཱཝ ཨིཊྛིཀཱ པརིནིཊྛནྟི ཏཱཝ ཧཏྠིནཱགོ ཀཏིཔཱཧཾ དིཝཱ བོདྷིརུཀྑཊྛཱནེ ཧཏྠིསཱལཱཡཾ ཏིཊྛཏི. རཏྟིཡཾ ཐཱུཔཔཏིཊྛཱན བྷཱུམིཡཾ པརིཡཱཡཏི.

ཨཐ ཝཏྠུཾ ཝིནཱཔེཏྭཱ རཱཛཱ ཐེརཾ པུཙྪི, ཀཱིདིསོ བྷནྟེ ཐཱུཔོ ཀཱཏབྦོཏི. ཝཱིཧིརཱསི སདིསོ མཧཱརཱཛཱཏི, སཱདྷུ བྷནྟེཏི རཱཛཱ ཛངྒྷཔྤམཱཎཾ ¶ ཐཱུཔཾ ཙིནཱཔེཏྭཱ དྷཱཏུཨོརོཔནཏྠཱཡ མཧཱསཀྐཱརཾ ཀཱརེསི.

ཏཏོ སཀལནཱགརཱ ཙ ཛཱནཔདཱ ཙ དྷཱཏུམྷ དསྶནཏྠཾ སནྟིཔཏིཾསུ སནྣིཔཏིཏེ ཙ ཏསྨིཾ མཧཱཛནེ དསབལསྶ དྷཱཏུ ཧཏྠིཀུམྦྷཏོ སཏྟཏཱལཔྤམཱནཾ ཝེཧཱསམབྦྷུགྒནྟྭཱ ཡམཀཔཱཊིཧཱརིཡཾ དསྶེསི. ཏེཧི ཏེཧི དྷཱཏུཔྤདེསེཧི ཚབྦཎྞརཾསིཡོ ཨུདཀདྷརཱ ཙ ཨགྒིཀྑཎྡྷཱ ཙ པཝཏྟནྟི. སཱཝཏྠིཡཾ གཎྜམྦམཱུལེ བྷགཝཏཱ དསྶིཏ པཱཊིཧཱརིཡ སདིསཾ ཨེཝ པཱཊིཧཱརིཡཾ ཨཧོསི. ཏཉྩ ཁོ ནེཝ ཐེརཱནུབྷཱཝེནན དེཝཏཱནུབྷཱཝེན, ཨཔི ཙ ཁོ བུདྡྷཱནཾཡེཝ ཨཱནུབྷཱཝེན བྷགཝཱ ཀིར དྷརམཱནོཝ ཨདྷིཊྛཱསི - ཏམྦཔཎྞིདཱིཔེ ཨནུརཱདྷཔུརསྶ དཀྑིཎདིསཱབྷཱགེ པུརིམཀཱནཾ ཏིཎྞཾ བུདྡྷཱནཾ ཙེཏིཡཊྛཱནེ མམ དཀྑིཎཀྑཀདྷཱཏུ པཏིཊྛཱན དིཝསེ ཡམཀཔཱཊིཧཱརིཡཾ ཧོཏཱུཏི.

ཨེཝཾ ཨཙིནྟིཡཱ བུདྡྷཱ-བུདྡྷདྷམྨཱ ཨཙིནྟིཡཱ,

ཨཙིནྟིཡེསུ པསནྣཱནཾ-ཝིཔཱཀོ ཧོཏི ཨཙིནྟིཡོཏི;

དྷཱཏུསརཱིརཏོ ནིཀྑནྟ ཨུདཀཕུསིཏེཧི སཀལེཧི ཏམྦཔཎྞིདཱིཔཏལེ ན ཀོཙི ཨཕུཊྛོཀཱསོ ནཱམ ཨཧོསི. ཨེཝམསྶ ཏཾ དྷཱཏུ སརཱིརཾ ཨུདཀཕུསིཏེཧི ཏམྦཔཎྞིཏྠལསྶ པརིདཱཧཾ ཝཱུཔསམེཏྭཱ མཧཱཛནསྶ པཱཊིཧཱརིཡཾ དསྶེཏྭཱ ཨོཏརིཏྭཱ རཉྙོ མཏྠཀེ པཏིཊྛཱསི རཱཛཱ སཕལཾ མནུསྶཏྟཔཊིལཱབྷཾ མཉྙམཱནོ མཧནྟཾ སཀྐཱརཾ ཀཏྭཱ དྷཱཏུཾ པཏིཊྛཱཔེསི. སཧ དྷཱཏུཔཏིཊྛཱནེན མཧཱབྷཱུམིཙཱལོ ཨཧོསི ནིཊྛིཏེ པན ཐཱུཔེ རཱཛཱ ཙ རཱཛཱ བྷཱཏིཀཱ ཙ དེཝིཡོ ཙ དེ-ནཱག-ཡཀྑཱནཾ ཝིམྦྷཡཀརཾ པཙྩེཀཾ ཐཱུཔམཀཾསུ.

ཨེཝཾ ཛིནོ དྷཱཏུསརཱིརཀེན

གཏོཔི སནྟིཾ ཛནཏཱཧིཏཉྩ,

སུཁཉྩ དྷམྨཱ བཧུདྷཱ ཀརེཡྻ

ཋིཏོ ཧི ནཱཐོནུཀརཾ ཀརེཡྻ;

སཱདྷུཛན མནོཔསཱདནཏྠཱཡ ཀཏེ ཐཱུཔཝཾསེ ཐཱུཔཱརཱམ ཀཐཱ,

༡༣. ནིཊྛིཏཱཡ པན དྷཱཏུཔཱུཛཱཡ པཏིཊྛིཏེ དྷཱཏུཝརེ མཧིཎྡཏྠེརོ མཧཱམེགྷཝནུཡྻཱནམེཝ གནྟྭཱཝཱསཾ ཀཔྤེསི. ཏསྨིཾ ཁོ པན སམཡེ ཨནུལཱདེཝཱི པབྦཛིཏུཀཱམཱ ཧུཏྭཱ རཉྙོ ཨཱརོཙེསི. རཱཛཱ ཏསྶཱ ཝཙནཾ སུཏྭཱ ཐེརཾ ཨེཏདཝོཙ? བྷནྟེ ཨནུལཱདེཝཱི པབྦཛིཏུཀཱམཱ, པབྦཱཛེཐ ནནྟ ན མཧཱརཱཛ ཨམྷཱཀཾ མཱཏུགཱམཾ པབྦཱཛེཏུཾ ཀཔྤཏི. པཱཊལིཔུཏྟེ པན མཡ྄ཧཾ བྷགིནི སངྒྷམིཏྟཱ ཐེརཱི ནཱམ ཨཏྠི, ཏཾ པཀྐོསཱཔེཧི མཧཱརཱཛ, ཨིམསྨིཉྩ དཱིཔེ པུརིམཀཱནཉྩ ¶ ཏིཎྞཾ སམྨཱསམྦུདྡྷཱནཾ བོདྷི པཏིཊྛཾསི ཨམྷཱཀམྤི བྷགཝཏོ སརས རཾསིཛཱལ ཝིསྶཛྫནཀེན བོདྷིནཱ པཏིཊྛཱཏབྦཾ, ཏསྨཱ སཱསནཾ པཧིཎེཡྻསི ཡཐཱ སངྒྷམིཏྟཱ བོདྷིཾ གཧེཏྭཱ ཨཱགཙྪེཡྻཱཏི.

རཱཛཱ ཐེརསྶ ཝཙནཾ སམྤཊིཙྪིཏྭཱ ཨམཙྩེཧི སདྡྷིཾ མནྟེནྟོ ཨརིཊྛཾ ནཱམ ཨཏྟནོ བྷཱགིནེཡྻཾ ཨཱཧ སཀྑིསྶསི ཏྭཾ ཏཱཏ པཱཊལཱིཔུཏྟཾ གནྟྭཱ མཧཱབོདྷིནཱ སདྡྷིཾ ཨཡྻཾ སངྒྷམིཏྟཏྠེརིཾ ཨཱནེཏུནྟི སཀྑིསྶཱམི དེཝ སཙེ མེ པབྦཛྫཾ ཨནུཛཱནིསྶསཱིཏི.

གཙྪ ཏཱཏ ཐེརིཾ ཨཱནེཏྭཱ པབྦཛྫཱཧཱིཏི. སོ རཉྙོ ཙ ཐེརིསྶ ཙ སཱསནཾ གཧེཏྭཱ ཐེརསྶ ཨདྷིཊྛཱནཝསེན ཨེཀདིཝསེ ན ཛམྦུཀོལཔཊྚནཾ གནྟྭཱ ནཱཝཾ ཨབྷིརཱུཧིཏྭ སམུདྡཾ ཨཏིཀྐམིཏྭཱ པཱཊལཱིཔུཏྟཾ གནྟྭཱ རཉྙོ སཱསནཾ ཨཱཙིཀྑི-པུཏྟོ ཏེ དེཝ མཧིཎྡཐེརོ ཨེཝམཱཧ. སཧཱཡསྶ ཀིར ཏེ དེཝཱནམྤིཡཏིསྶསྶ བྷཱཏུཛཱཡཱ ཨནུལཱདེཝཱི ནཱམ པབྦཛིཏུཀཱམཱ, ཏཾ པབྦཱཛེཏུཾ ཨཡྻཾ སངྒྷམིཏྟཏྠེརིཾ པཧིཎེཡྻཱཐ, ཨཡྻཱཡ ཨེཝ ཙ སདྡྷིཾ མཧཱབོདྷིནྟི.

ཐེརསྶ སཱསནཾ ཨཱརོཙེཏྭཱ སངྒྷམིཏྟཏྠེརིཾ ཨུཔསངྐམིཏྭཱ ཨེཝམཱཧ. ཨཡྻེ ཏུམྷཱཀཾ བྷཱཏཱ མཧིཎྡཏྠེརོ མཾ ཏུམྷཱཀཾ སནྟིཀཾ པེསེསི དེཝཱནམྤིཡཏིསྶ རཉྙོ བྷཱཏུཛཱཡཱ ཨནུལཱདེཝཱི ནཱམ པཉྩཧི ཀཉྙཱསཏེཧི པཉྩཧི ཙ ཨནྟེཔུརིསཱ སཏེཧི སདྡྷིཾ པབྦཛིཏུཀཱམཱཏི, ཏཾ ཀིར ཨཱགནྟྭཱ པབྦཱཛེཐཱཏི.

སཱ ཏཱཝ དེཝ ཏུརིཏ ཏུརིཏཱ གནྟྭཱ རཉྙཱ ཏ྄ैམཏྠཾ ཨཱརོཙེཏྭཱ གཙྪཱམཧཾ མཧཱརཱཛ ཏམྦཔཎྞིདཱིཔནྟི ཨཱཧ.

ཏེན ཧི ཨམྨ མཧཱབོདྷིཾ གཧེཏྭཱ གཙྪཱཧཱིཏི ཝཏྭཱ པཱཊལཱིཔུཏྟཏོ ཡཱཝ མཧཱབོདྷི ཏཱཝ མགྒཾ པཊིཛགྒཱཔེཏྭཱ སཏྟཡོཛནཱཡཱམཡ ཏིཡོཛན ཝིཏྠཏཱཡ མཧཏིཡཱ སེནཱཡ པཱཊལིཔུཏྟཏོ ནིཀྑམིཏྭཱ ཨརིཡསངྒྷཾ ཨཱདཱཡ མཧཱབོདྷིསམཱིཔཾ ཨགམཱསི.

སེནཱཡ སམུསྶིཏ དྷཛཔཏཱཀཾ ནཱནཱརཏན ཝིཙིཏྟཾ ཨནེཀཱལངྐཱར པཏིམཎྜིཏཾ ནཱནཱཝིདྷ ཀུསུམ སམཱཀིཎྞཾ ཨནེཀ ཏུརིཡ སཾགྷྲཊྛཾ མཧཱབོདྷིཾ པརིཀྑིཔི ཏཏོ རཱཛཱ པུཔྥ-གཎྡྷ-མཱལཱདཱིཧི པཱུཛེཏྭཱ ཏིཀྑཏྟུཾ པདཀྑིཎཾ ཀཏྭཱ ཨཊྛསུ ཋཱནེསུ ཝནྡིཏྭཱ ཨུཊྛཱཡ ཨཉྫལིམྤགྒཡ྄ཧ ཋཏྭཱ སཙྩཝཙནཀིརིཡཱཡ བོདྷིཾ གཎྷིཏུཀཱམོ རཏནཔཱིཋཾ ཨཱརུཡ྄ཧ ཏུལིཀཾ གཧེཏྭཱ མནོསིལཱཡ ལེཁཾ ཀཏྭཱ ཡདི མཧཱབོདྷིནཱ ལངྐཱདཱིཔེ པཏིཊྛཱཏབྦཾ, ཡདི ཙཱཧཾ བུདྡྷསཱསནེ ནིབྦེམཏིཀོ བྷཝེཡྻཾ, མཧཱབོདྷི སཡམེཝ ཨིམསྨིཾ སུཝཎྞཀཊཱཧེ པཏིཊྛཧཏཱུཏི སཙྩཀིརིཡམཀཱསི སཧ སཙྩཀིརིཡཱཡ ¶ བོདྷིསཱཁཱ མནོསིལཱཡ པརིཙྪིནྣཊྛཱནེཧི ཚིཎྡིཏྭཱ གཎྡྷ ཀལལ པཱུརསྶ སུཝཎྞཀཊཱཧསྶ ཨུཔརི ཨཊྛཱསི.

ཏཏོ རཱཛཱ མཧཱབོདྷིཾ བོདྷིམཎྜཏོ མཧནྟེན སཀྐཱརེན པཱཊལཱིཔུཏྟཾ ཨཱནེཏྭཱ སབྦཔརིཧཱརཱནི དཏྭཱ མཧཱབོདྷིཾ གངྒཱཡ ནཱཝཾ ཨཱརོཔེཏྭཱ སཡམྤི ནགརཏོ ནིཀྑམིཏྭཱ ཝིཉྫྷཱཊཝིཾ སམཏིཀྐམྨ ཨནུཔུབྦེན སཏྟདིཝསེཧི ཏཱམལིཏྟིཾ ཨནུཔྤཏྟོ ཨནྟརམགྒེ དེཝ-ནཱག-མནུསྶཱ ཨུལཱ༹རཾ མཧཱབོདྷི པཱུཛམཀཾསུ.

རཱཛཱཔི སམུདྡཏཱིརེ སཏྟདིཝསཱནི མཧཱབོདྷིཾ ཋཔེཏྭཱ མཧནྟཾ སཀྐཱརཾ ཀཏྭཱ བོདྷིམྤི སཾངྒྷམིཏྟཏྠེརིམྤི སཔརིཝཱརཾ ནཱཝཾ ཨཱརོཔེཏྭཱ གཙྪཏི ཝཏརེ དསབལསྶ སརས རཾསིཛཱལཱ མུཉྩམཱནོ མཧཱབོདྷི རུཀྑོཏི ཀཎྡིཏྭཱ ཨཉྫལིམྤགྒཧེཏྭཱ ཨསྶཱུནི པཝཏྟཡམཱནོ ཨཊྛཱསི སཱཔི ཁོ མཧཱབོདྷི སམརཱུལ༹ྷནཱཝཱ པསྶཏོ པསྶཏོ མཧཱརཱཛསྶ མཧཱསམུདྡཏལཾ པཀྑཎྡི མཧཱསམུདྡེཔི སམནྟཱ ཡོཛནཾ ཝཱིཙི ཝཱུཔསནྟཱ པཉྩཝཎྞཱནི པདུམཱནི པུཔྥིཏཱནི ཨནྟལིཀྑེ དིབྦཏུརིཡཱནི ཝཛྫིཾསུ ཨཱཀཱསེ ཛལ ཐལ སནྣིསྶིཏཱཧི དེཝཏཱཧི པཝཏྟིཏཱ ཨཏིཝིཡ ཨུལཱ༹ར པཱུཛཱ ཨཧོསི. ཨེཝཾ མཧཏིཡཱ པཱུཛཱཡ སཱ ནཱཝཱ ཛམྦུཀོལཔཊྚནཾ པཱཝིསི.

དེཝཱནམྤིཡཏིསྶ མཧཱརཱཛཱཔི ཨུཏྟརདྭཱརཏོ པཊྛཱཡ ཡཱཝ ཛམྦུཀོལཔཊྚནཱ མགྒཾ སོདྷཱཔེཏྭཱ ཨལངྐཱརཱཔེཏྭཱ ནགརཏོ ནིཀྑམན དིཝསེ ཨུཏྟརདྭཱར སམཱིཔེ སདྡསཱལཱཝཏྠུསྨིཾ ཋིཏོ ཏཱཡ ཝིབྷཱུཏིཡཱ མཧཱསམུདྡེ ཨཱགཙྪནྟཾཡེཝ མཧཱབོདྷིཾ ཐེརསྶཱནུབྷཱཝེན དིསྭཱ ཏུཊྛམཱནསོ ནིཀྑམིཏྭཱ སབྦཾ མགྒཾ པཉྩཝཎྞེཧི པུཔྥེཧི ཨོཀིརནྟོ ཨནྟརནྟརཱ པུཔྥཨགྒྷིཡཱནི ཋཔེནྟོ ཨེཀཱཧེནེཝ ཛམྦུཀོལཔཊྚནཾ གནྟྭཱ སབྦཏཱལཱཝཙར པརིཝུཏོ པུཔྥ དྷཱུཔགཎྡྷཱདཱིཧི པཱུཛཡམཱནོ གལཔྤམཾནཾ ཨུདཀཾ ཨོརུཡ྄ཧ ཨཱགཏོ ཝཏ རེདསབལསྶ སརས རཾསིཛཱལཾ ཝིསྶཛྫནཀོ བོདྷིརུཀྑོཏི པསནྣཙིཏྟོ མཧཱབོདྷིཾ ཨུཀྑིཔིཏྭཱ ཨུཏྟམངྒེ སིརསྨིཾ པཏིཊྛཔེཏྭཱ མཧཱབོདྷིཾ པརིཝཱརེཏྭཱ ཨཱགཏེཧི སོལ༹སཧི ཛཱཏིསམྤནྣཀུལེཧི སདྡྷིཾ སམུདྡཏོ པཙྩུཏྟརིཏྭཱ སམུདྡཏཱིརེ བོདྷིཾ ཋཔེཏྭཱ ཏཱིཎི དིཝསཱནི སཀལ ཏམྦཔཎྞི རཛྫེན པཱུཛེསི.

ཨཐ ཙཏུཏྠེ དིཝསེ མཧཱབོདྷིཾ ཨཱདཱཡ ཨུལཱ༹རཾ པཱུཛཾ ཀུརུམཱནོ ཨནུཔུབྦེན ཨནུརཱདྷཔུརཾ སམྤཏྟེ ཨནུརཱདྷཔུརེཔི མཧཱསཀྐཱརཾ ཀཏྭཱ ཙཱཏུདྡསཱི དིཝསེ ཝཌྜྷམཱནཀཙྪཱཡཱཡ མཧཱབོདྷིཾ ཨུཏྟརདྭཱརེན པཝེསེཏྭཱ ནགརམཛ྄ཛྷན ཨཏིཧརིཏྭཱ དཀྑིཎདྭཱརེན ནིཀྑམིཏྭཱ དཀྑིཎདྭཱརཏོ པཉྩདྷནུ སཏིཀེ ཋཱནེ ཡཏྠ ཨམྷཱཀཾ ¶ སམྨཱསམྦུདྡྷོ ནིརོདྷ སམཱཔཏྟིཾ སམཱཔཛྫིཏྭཱ ནིསཱིདི. པུརིམཀཱ ཙ ཏཡོ སམྨཱསམྦུདྡྷཱ སམཱཔཏྟིཾ ཨཔྤེཏྭཱ ནིསཱིདིཾསུ. ཡཏྠ ཙ ཀཀུསཎྡྷསྶ བྷགཝཏོ སིརཱིསབོདྷི, ཀོནཱགམནསྶ བྷགཝཏོ ཨུདུམྦརབོདྷི, ཀསྶཔསྶ བྷགཝཏོ ནིགྲོདྷབོདྷི, པཏིཊྛཱཔེསི -ཏསྨིཾ མཧཱམེགྷཝནུཡྻཱནསྶ ཏིལཀབྷཱུཏེ ཀཏབྷཱུམི པརིཀམྨེ རཱཛཝཏྠུདྭཱརཀོཊྛཀཊྛཱནེ མཧཱབོདྷིཾ པཏིཊྛཱཔེསི.

ཨེཝཾ ལངྐཱཧིཏཏྠཱཡ-སཱསནསྶཙ ཝུདྡྷིཡཱ,

མཧཱམེགྷཝནེ རམྨེ-མཧཱབོདྷི པཏིཊྛིཏོཏི;

བོདྷི ཨཱགམནཀཐཱ

༡༤. ཨནུལཱདེཝཱི པཉྩཧི ཀཉྙཱསཏེཧི པཉྩཧི ཨནྟེཔུརིསཱ སཏེཧཱིཏི མཱཏུགཱམསཧསྶེན སདྡྷིཾ སངྒྷམིཏྟཏྠེརིཡཱ སནྟིཀེ པབྦཛིཏྭཱ ནཙིརསྶེཝ སཔརིཝཱརཱ ཨརཧཏྟེ པཏིཊྛཱསི. ཨརིཊྛོཔི ཁོ རཉྙོ བྷཱགིནེཡྻོ པཉྩཧི པུརིས སཏེཧི སདྡྷིཾ ཐེརསྶ སནྟིཀེ པབྦཛིཏྭཱ སཔརིཝཱརོ ནཙིརསྶེཝ ཨརཧཏྟེ པཏིཊྛཱསི. ཨཐེཀདིཝསཾ རཱཛཱ བོདྷིཾ ཝནྡིཏྭཱ ཐེརེན སདྡྷིཾ ཐཱུཔཱརཱམཾ གཙྪཏི. ཏསྶ ལོཧཔཱསཱདཊྛཱནཾ སམྤཏྟསྶ པུརིསཱ པུཔྥཱནི ཨཱཧརིཾསུ རཱཛཱ ཐེརསྶ པུཔྥཱནི ཨདཱསི. ཐེརོ པུཔྥེཧི ལོཧཔཱསཱདཊྛཱནཾ པཱུཛེསི པུཔྥེསུ བྷཱུམིཡཱ པཏིཏ མཏྟེསུ མཧཱབྷཱུམིཙཱལོ ཨཧོསི?

རཱཛཱ ཀསྨཱ བྷནྟེ བྷཱུམི ཙལིཏཱནི པུཙྪི. ཨིམསྨིཾ མཧཱརཱཛ ཨོཀཱསེ ཨནཱགཏེ སངྒྷསྶ ཨུཔོསཐཱགཱརཾ བྷཝིསྶཏི. ཏསྶེཏཾ པུབྦནིམིཏྟནྟི ཨཱཧ. པུན ཏསྶ མཧཱཙེཏིཡཊྛཱནཾ སམྤཏྟསྶ ཙམྤཀ པུཔྥཱནི ཨབྷིཧརིཾསུ. ཏཱནིཔི རཱཛཱ ཐེརསྶ ཨདཱསི. ཐེརོ མཧཱཙེཏིཡཊྛཱནཾ པུཔྥེཧི པཱུཛེཏྭཱ ཝནྡི ཏཱཝདེཝ མཧཱཔཐཝཱི སཾཀམྤི. རཱཛཱ བྷནྟེ ཀསྨཱ པཐཝཱི ཀམྤིཏྠཱཏི པུཙྪི. མཧཱརཱཛ ཨིམསྨིཾ ཋཱནེ ཨནཱགཏེ བུདྡྷསྶ བྷགཝཏོ ཨསདིསོ མཧཱཐཱུཔོ བྷཝིསྶཏི. ཏསྶེཏཾ པུབྦནིམིཏྟནྟི ཨཱཧ. ཨཧམེཝ ཀརོམི བྷནྟེཏི. ཨལཾ མཧཱརཱཛ ཏུམྷཱཀཾ ཨཉྙཾ བཧུཾ ཀམྨཾ ཨཏྠི. ཏུམྷཱཀཾ པན ནནྟཱ དུཊྛགཱམཎཱི ཨབྷཡོ ནཱམ ཀཱརེསྶཏཱིཏི.

ཨཐ རཱཛཱ སཙེ བྷནྟེ མཡ྄ཧཾ ནནྟཱ ཀརིསྶཏི. ཀཏཾཡེཝ མཡཱཏི དྭཱདསཧཏྠཾ པཱསཱཎཏྠམྷཾ ཨཱཧརཱཔེཏྭཱ དེཝཱནམྤིཡཏིསྶ རཉྙོ ནཏྟཱ དུཊྛགཱམཎི ཨབྷཡོ ནཱམ ཨིམསྨིཾ པདེསེ ཐཱུཔཾ ཀརོཏཱིཏི ཨཀྑརཱནི ལིཁཱཔེཏྭཱ པཏིཊྛཱཔེསཱིཏི ཨཐ དེཝཱནམྤིཡཏིསྶརཱཛཱ ཙེཏིཡཔཔྤཏེ ནིཧིཏཱ སམྨཱསམྦུདྡྷ བྷུཏྟ པཏྟ པཱུརེཏྭཱ ཨཱཧཊཱ དྷཱཏུཡོཧཏྠིཀྑཎྡྷེན ཨཱཧརཱཔེཏྭཱ སཀལཏམྦཔཎྞིདཱིཔེ ¶ ཡོཛནེ ཡོཛནེ ཐཱུཔཾ ཀཱརེཏྭཱ དྷཱཏུཡོ པཏིཊྛཱཔེསི བྷགཝཏོ པཏྟཾ པན རཱཛ གེཧེཡཝ ཋཔེཏྭཱ པཱུཛམཀཱསཱིཏི.

ནིདྷཱཔེཏྭཱན སམྦུདྡྷ-དྷཱཏུཡོ པཏྟམཏྟཀཱ,

ཀཱརཱཔེསི མཧཱརཱཛ-ཐཱུཔེ ཡོཛན ཡོཛནེཏི;

ཡོཛནཐཱུཔ ཀཐཱ

ཨཐ རཱཛཱ ཨཉྙཱནི ཙ བཧཱུནི པུཉྙཀམྨཱནི ཀཏྭཱ ཙཏྟཱལཱིས ཝསྶཱནི རཛྫཾ ཀཱརེསི. ཏསྶ ཨཙྩཡེན ཏཾ ཀནིཊྛོ ཨུཏྟིཡ རཱཛཱ དསཝསྶཱནི རཛྫཾ ཀཱརེསི. ཏསྶ ཨཙྩཡེན ཏཾ ཀནིཊྛོ མཧཱསཱིཝོ དསཝསྶཱནེཝ རཛྫཾ ཀཱརེསི ཏསྶ ཨཙྩཡེན ཏསྶཱཔི ཀནིཊྛོ སཱུརཏིསྶོ དསཝསྶཱནེཝ རཛྫཾ ཀཱརེསི ཏཏོ ཨསྶནཱཝིཀ པུཏྟཱ དྭེ དམིལཱ༹ སཱུརཏིསྶཾ གཧེཏྭཱ དྭེཝཱིས ཝསྶཱནི དྷམྨེན རཛྫཾ ཀཱརེསུཾ. ཏེ གཧེཏྭཱ མུཊསཱིཝསྶ རཉྙོ པུཏྟོ ཨསེལོ ནཱམ དསཝསྶཱནི རཛྫཾ ཀཱརེསི ཨཐ ཙོལ༹རཊྛཏོ ཨགནྟྭཱ ཨེལཱ༹རོ ནཱམ དམིལོ ཨསེལ བྷཱུཔཏིཾ གཧེཏྭཱ ཙཏུཙཏྟཱལཱིས ཝསྶཱནི རཛྫཾ ཀཱརེསི ཨེལཱ༹རཾ གཧེཏྭཱ དུཊྛགཱམཎི ཨབྷཡོ རཱཛཱ ཨཧོསི.

ཏདཏྠདཱིཔནཏྠཾ ཨཡམནུཔུབྦཀཐཱ

༡༥. དེཝཱནམྤིཡཏིསྶ རཉྙོ ཀིར དུཏིཡབྷཱཏིཀོ ཨུཔརཱཛཱ མཧཱནཱགོ ནཱམ ཨཧོསི. ཨཐ རཉྙོ དེཝཱི ཨཏྟནོ པུཏྟསྶ རཛྫཾ ཨིཙྪནྟི ཏརཙྪནཱཝཱ ཝཱཔིཾ ཀརོནྟསྶ ཨུཔརཱཛསྶཝིསེན ཨམྦཾ ཡོཛེཏྭཱ ཨམྦམཏྠཀེ ཋཔེཏྭཱ པེསེསི དེཝིཡི པུཏྟེ, ཨུཔརཱཛེན སདྡྷིཾ གཏོ བྷཱཛནེ ཝིཝཊེ སཡམེཝ ཨམབཾ གཧེཏྭཱ ཁཱདིཏྭཱ ཀཱལམཀཱསི ཨུཔརཱཛཱ ཏཾ ཀཱརཎཾ ཉཏྭཱ དེཝིཡཱ བྷཱིཏོ ཏཏོཡེཝ ཨཏྟནོ དེཝིཉྩ བལཝཱཧནཉྩ གཧེཏྭཱ རོཧཎཾ ཨགམཱསི. ཏསྶ ཨགྒམཧེསི ཨནྟརཱམགྒེ ཡཊྚཱལཝིཧཱརེ ནཱམ པུཏྟཾ ཝིཛཱཡི ཏསྶ ཏིསྶོཏི བྷཱཏུནཱམ’མཀཾསི.

སོ ཏཏོ གནྟྭཱ མཧཱགཱམེ ཝསནྟོ རོཧཎེ རཛྫཾ ཀཱརེསི ཏསྶ ཨཙྩཡེན ཏསྶ པུཏྟོ ཡཊྚཱལཏིསྶོ མཧཱགཱམེཡེཝ རཛྫཾ ཀཱརེསི. ཏསྶ ཨཙྩཡེན ཏསྶཱཔི པུཏྟོ གོཋཱབྷཡོ ནཱམ ཏཏྠེཝ རཛྫཾ ཀཱརེསི. གོཋཱབྷཡསྶ པུཏྟོ ཀཱཀཝཎྞཏིསྶོ ནཱམ ཏཏྠེཝ རཛྫཾ ཀཱརེསི. ཀཱཀཝཎྞཏིསྶ རཉྙོ ཀིར ཀལྱཱཎིཏིསྶ རཉྙོ དྷཱིཏཱ ཝིཧཱརམཧཱདེཝཱི ནཱམ ཨགྒམཧེསི ཨཧོསི སཱ རཉྙོ པིཡཱ ཨཧོསི མནཱཔཱ. རཱཛཱ ཏཱཡ སདྡྷིཾ སམགྒཝཱསཾ ཝསནྟོ པུཉྙཱནི ཀརོནྟོ ཝིཧཱསི. ཨཐེཀདིཝསཾ དེཝཱི རཱཛགེཧེཡེཝ བྷིཀྑུསངྒྷསྶ མཧཱདཱནཾ དཏྭཱ སཱཡཎྷསམཡེ ¶ གཎྡྷམཱལཱདཱིནི གཱཧཱཔེཏྭཱ དྷམྨཾ སོཏུཾ ཝིཧཱརཾགཏཱ, ཏཏྠ ནིཔནྣཾ བཱལ༹ྷགིལཱནཾ ཨཱསནྣམརཎཾ སཱིལཝནྟཾ སཱམཎེརཾ དིསྭཱ གཎྡྷམཱལཱདཱིཧི པཱུཛེཏྭཱ ཨཏྟནོ སམྤཏྟིཾ ཝཎྞེཏྭཱ མམ པུཏྟབྷཱཝཾ པཏྠེཐ བྷནྟེཏི ཡཱཙི.

སོ ན ཨིཙྪི, ཡཱཔི པུནཔྤུན ཡཱཙིཡེཝ. སཱམཎེརོཔི ཨེཝཾ སནྟེ སཱསནཱནུགྒཧཾ ཀཱཏུཾ སཀྐཱཏིསམྤཊིཙྪིཏྭཱ གཏིནིམིཏྟཝསེན ཨུཔཊྛིཏམྤི དེཝལོཀཾ ཚཌྜེཏྭཱ ནིཀནྟིཝསེན སུཝཎྞ སིཝིཀཱཡ གཙྪནྟིཡཱ དེཝིཡཱ ཀུཙྪིམྷི པཊིསཎྡྷིཾ གཎྷི.

སཱ དསམཱསཙྩཡེན པུཏྟཾ ཝིཛཱཡི. ཏསྶ གཱམཎི ཨབྷཡོཏི ནཱམཾ ཀརིཾསུ. ཨཔརབྷཱགེ ཨཔརམྤི ཏསྶ ཏིསྶོཏི ནཱམཾ ཀརིཾསུ. གཱམཎི ཀུམཱརོ ཀམེན ཝཌྜྷེནྟོ སོལ༹ས ཝསྶིཀོ ཧུཏྭཱ ཧཏྠསྶ ཐརཱ སིཔྤེསུ ཀོཝིདོ ཏེཛོབལ པརཀྐམ སམྤནྣོ ཨཧོསི. ཨཐ ཁོ ཀཱཀཝཎྞཏིསྶ རཱཛཱ ནཎྡྷིམིཏྟོ-སུརནིམྨལོ-མཧཱསེནོ-གོཋཡིམྦརོ-ཐེརཔུཏྟཱབྷ- ཡོ-བྷརཎོ-ཝེལུ༹སུམནོ-ཁཉྩདེཝོ-ཕུསྶདེཝོ-ལབྷིཡྻཝསབྷོཏི ཨིམེ དསཱམཧཱཡོདྷེ པུཏྟསྶ སནྟིཀེ ཋཔེཏྭཱ ཝཱསེསི.

ཏེསཾ ཨུཔྤཏྟིཀཐཱ མཧཱཝཾསཏོ གཧེཏབྦཱ རཱཛཱ དསམཧཱཡོདྷཱནཾ པུཏྟསྶ སཀྐཱརསམཾསཀྐཱརཾ ཀཱརེསི ཏིསྶཀུམཱརཾ ཛནཔད རཀྑནཏྠཱཡ དཱིགྷཝཱཔིཡཾ ཋཔེསི ཨཐེཀདིཝསཾ གཱམིཎཱི ཀུམཱརོ ཨཏྟནོ བལཝཱཧན སམྤཏྟིཾ དིསྭཱ དམིལེ༹ཧི སདྡྷིཾ ཡུཛ྄ཛྷསྶཱམཱིཏི རཉྙོ ཀཐཱཔེསི. རཱཛཱ པུཏྟཾ ཨནུརཀྑནྟོ ཨལཾ ཨོརགངྒནྟི ནིཝཱརེསི. སོ ཡཱཝ ཏཏིཡཾ ཀཐཱཔེསི རཱཛཱ ཀུཛ྄ཛྷིཏྭཱ ཧེམསངྑལིཀཾ ཀརོཐ བཎྡྷིཏྭཱ རཀྑིསྶཱམཱིཏི. ཨབྷཡོ པིཏུ རཉྙོ ཀུཛ྄ཛྷིཏྭཱ པལཱཡིཏྭཱ མལཡཾ ཨགམཱསི ཏཏོ པཊྛཱཡ པིཏརི དུཊྛཏྟཱ དུཊྛགཱམཎཱིཏི པཉྙཱཏོ རཱཛཱ པུཏྟཱནཾ ཀལཧཊྛཱནཾ ཨཱགམནཏྠཱཡ ཡོདྷེཧི སཔཐཾ ཀཱརེསི.

ཨཐ ཀཱཀཝཎྞཏིསྶ རཱཛཱ ཙཏུསཊྛིཝིཧཱརེ ཀཱརེཏྭཱ ཙཏུསཊྛི སཾཝཙྪརཱནེཝ ཋཏྭཱ ཀཱལམཀཱསི ཏིསྶཀུམཱརོ པིཏུཀཱལཀཏབྷཱཝཾ སུཏྭཱ དཱིགྷཝཱཔིཏོ ཨཱགནྟྭཱ པིཏུ སརཱིརཀིཙྩཾ ཀཱརེཏྭཱ མཱཏརཾ - ཀཎྜུལ ཧཏྠིཉྩ གཧེཏྭཱ བྷཱཏུ བྷཡཱ དཱིགྷཝཱཔིཾ ཨགམཱསི. ཨམཙྩཱ སནྣིཔཏིཏྭཱ ཏཾ པཝཏྟིཾ ཝཏྭཱ དུཊྛགཱམཎིཏིསྶ སནྟིཀཾ པེསེསུཾ. སོ ཏཾ སཱསནཾ སུཏྭཱ བྷུཏྟསཱལཾ ཨཱགམྨ བྷཱཏུ སནྟིཀཾ དཱུཏེ པེསེཏྭཱ ཏཏོ མཧཱགཱམཾ ཨཱགནྟྭཱ ཨབྷིསེཀཾ པཏྭཱ མཱཏརཾ ཀཎྜུལཧཏྠིཉྩ པེསེཏཱུཏི ཡཱཝ ཏཏིཡཾ བྷཱཏུ སནྟིཀཾ ལེཁཱ པེསེཏྭཱ ཨཔེསན བྷཱཝཾ ཉཏྭཱ ཡུདྡྷཱཡ ནིཀྑམི. ཀུམཱརོཔི ཡུདྡྷསཛྫོཧུཏྭཱནིཀྑམི. ཙུལ༹ངྒཎིཡ པིཊྛིཡཾ དྭིནྣཾ བྷཱཏཱུནཾ མཧཱཡུདྡྷཾ ཨཧོསི.

ཏེ ¶ ཀིར ཡོདྷཱ སཔཐསྶ ཀཏཏྟཱ ཏེསཾ ཡུདྡྷེ སཧཱཡཱ ན བྷཝིཾསུ. ཏདཱ རཉྙོ ཨནེཀསཧསྶ མནུསྶཱ མརིཾསུ. རཱཛཱ པརཛྫིཏྭཱ ཏིསྶཱམཙྩཾ དིགྷཏུཎིཀཾ ཝལ༹ཝཉྩ གཧེཏྭཱ པལཱཡི. ཀུམཱརོ པཙྪཏོ པཙྪཏོ ཨནུབཎྡྷི. ཨནྟརེ བྷིཀྑུ པབྦཏཾ མཱཔེསུཾ. ཏཾ དིསྭཱ ཀུམཱརོ བྷིཀྑུསངྒྷསྶ ཀམྨནྟི ཉཏྭཱ ནིཝཏྟི རཱཛཱ པལཱཡིཏྭཱ ཀཔྤཎྡཀར ནདིཡཱ ཛལམཱལཏིཏྠཾ ནཱམ གནྟྭཾ ཚཱཏོམྷིཏི ཨཱཧ. ཨམཙྩོ སུཝཎྞསརཀེ པཀྑིཏྟབྷཏྟཱ ནིཧརིཏྭཱ ཨདཱསི.

རཱཛཱ ཀཱལཾ སལླཀྑེཏྭཱ སངྒྷསྶ དཏྭཱ བྷུཉྫཱམིཏི སངྒྷསྶ-ཨམཙྩསྶ-ཝལ༹ཝཱཡ-ཨཏྟནོ ཙཱཏི ཙཏུབྷཱགཾ ཀཏྭཱ ཀཱལཱ གྷོསཱཔེསི ཏདཱ པིཡངྒུདིཔཏོ ཀུཊུམྦིཡཏིསྶཏྠེརོ ནཱམ ཨཱགནྟྭཱ པུརཏོ ཨཊྛཱསི. རཱཛཱ ཐེརཾ དིསྭཱ པསནྣམཱནསོ སངྒྷསྶ ཋཔིཏབྷཱགཾ ཨཏྟནོ བྷཱགཉྩ ཐེརསྶ པཏྟེ པཀྑིཔིཾ ཨམཙྩོཔི ཨཏྟནོ བྷཱགཾ པཀྑིཔི ཝལ༹ཝཱཔི དཱཏུཀཱམཱ ཨཧོསི. ཏསྶཱབྷིཔྤཱཡཾ ཉཏྭཱ ཨམཙྩོ ཏསྶཱཔི བྷཱགཾ པཏྟེ པཀྑིཔི.

ཨིཏི སོ རཱཛཱ ཐེརསྶ པརིཔུཎྞ བྷཏྟཔཏྟཾ ཨདཱསི. ཐེརོ པཏྟཾ གཧེཏྭཱ གནྟྭཱ གོཏམཏྠེརསྶ ནཱམ ཨདཱསི. སོ པཉྩསཏ བྷིཀྑུ བྷོཛེཏྭཱ པུན ཏཏོ ལདྡྷེཧི བྷཱགེཧི པཏྟཔཱུརེཏྭཱ ཨཱཀཱསེ ཁིཔི པཏྟོ གནྟྭཱ རཉྙོ པུརཏོ ཨཊྛཱསི ཏིསྶོ པཏྟཾ གཧེཏྭཱ རཱཛཱནཾ བྷོཛེཏྭཱ ཏཏོ སཡཾ བྷུཉྫིཏྭཱ ཝལ༹ཝཾ བྷོཛེསི. ཏཏོ རཱཛཱ སནྣཱཧཾ ཙུམྦཊཀཾ ཀཏྭཱ པཏྟཾ ཝིསྶཛྫེསི. ཏཏོ གནྟྭཱ ཐེརསྶ ཧཏྠེ པཏིཊྛཱསི, རཱཛཱ པུན མཧཱགཱམཾ ཨཱགནྟྭཱ སེནཾ སངྐཌྜིཝོ སཊྛིསཧསྶབལཱ གཧེཏྭཱ པུན བྷཱཏརཱ སདྡྷིཾ ཡུཛ྄ཛྷི ཏདཱ ཀུམཱརསྶ ཨནེཀ སཧསྶཾ མནུསྶཱ པཏིཾསུ.

ཀུམཱརོ པལཱཡིཏྭཱ ཝིཧཱརཾ པཝིསིཏྭཱ མཧཱཐེརསྶ གེཧཾ པཱཝིསི.

རཱཛཱ པཙྪཏོ པཙྪཏོ ཨནུབཎྡྷནྟོ ཝིཧཱརཾ པཝིཊྛབྷཱཝཾ ཉཏྭཱ ནིཝཏྟི པཙྪཱ ཐེརཱ ཏེ ཨུབྷོ བྷཱཏརོ ཨཉྙམཉྙཾ ཁམཱཔེསུཾ. ཏདཱ རཱཛཱ སསྶཀམྨཱནི ཀཱརེཏུཾ ཏིསྶཀུམཱརཾ དཱིགྷཝཱཔིམེཝ པཧིཎིཏྭཱ སཡམྤི བྷེརཾ ཙརཱཔེཏྭཱ སསྶཀམྨཱནི ཀཱརེསི. ཨཐ མཧཱཛནསྶ སངྒཧཾཀཏྭཱ ཀུནྟེ དྷཱཏུཾ ནིདྷཱཔེཏྭཱ བལཝཱཧན པརིཝུཏོ ཏིསྶཱརཱམཾ གནྟྭཱ སངྒྷཾ ཝནྡིཏྭཱ བྷནྟེ སཱསནཾ ཛོཏེཏུཾ པཱརགངྒཾ གམིསྶཱམི སཀྐཱརེཏུཾ ཨམྷེཧི སཧགཱམིནོ བྷིཀྑུ དེཐཱཏི ཨཱཧ.

སངྒྷོ པཉྩསཏབྷིཀྑུ ཨདཱསི. རཱཛཱ བྷིཀྑུསངྒྷཾ གཧེཏྭཱ ཀཎྜུལཧཏྠིམཱརུཡ྄ཧ ཡོདྷེཧི པརིཝུཏོ མཧཏཱ བལཀཱཡེན ཡུདྡྷཱཡ ¶ ནིཀྑམིཏྭཱ མཧིཡངྒཎཾ ཨཱགནནྟྭཱ ཏཏྠ དམིལེ༹ཧི སདྡྷིཾ ཡུཛ྄ཛྷནྟོ མཧིཡངྒཎེ ཀཉྩུཀ ཐཱུཔཾ ཀཱརེསི. ཏསྶ ཐཱུཔསྶ ཝིབྷཱཝནཏྠཾ ཨཡམཱནུཔུབྦཀཐཱ.

༡༦. བྷགཝཱ ཀིར བོདྷིཏེ ནཝམེ མཱསེ ཨིམཾ དཱིཔམཱགནྟྭཱ གངྒཱཏཱིརེ ཏིཡོཛནཱཡཏེ ཡོཛནཝིཏྠཏེ མཧཱནཱགཝནུཡྻཱནེ ཡཀྑསམཱགམཾ ཨཱགནྟྭཱ ཏེསཾ ཡཀྑཱནཾ ཨུཔརིབྷཱགེ མཧིཡངྒཎ ཐཱུཔསྶ ཋཱནེ ཝེཧཱསཡཾ ཋིཏོ ཝུཊྛི ཝཱཏནྡྷཀཱརཱདཱིཧི ཡཀྑེ སནྟཱསེཏྭཱ ཏེཧི ཨབྷཡཾ ཡཱཙིཏོ ཏུམྷཱཀཾ ཨབྷཡཾ དསྶཱམི ཏུམྷེ སམགྒཱ མཡ྄ཧཾ ནིསཱིདནཊྛཱནཾ དེཐཱཏི ཨཱཧ.

ཡཀྑཱ, མཱརིས ཏེ ཨིམཾ སཀལདཱིཔཾ དེམི. ཨབྷཡཾ ནོ དེཧཱིཏི ཨཱཧཾསུ. ཏཏོ བྷགཝཱ ཏེསཾ བྷཡཾ ཨཔནུདིཏྭཱ ཏེཧི དིནྣབྷབྷཱུམིཡཾ ཙམྨཁཎྜཾ པཏྠརིཏྭཱ ཏཏྠ ནིསིནྣོ ཏེཛོཀསིཎཾ སམཱཔཛྫིཏྭཱ ཙམྨཁཎྜཾ སམནྟཏོ ཛཱལེཏྭཱ ཝཌྜྷེསི. ཏེ ཙམྨཁཎྜེན ཨབྷིབྷཱུནཱ སམནྟཏོ སཱགར པརིཡནྟེ རཱསིབྷཱུཏཱ ཨཧེསུཾ བྷགཝཱ ཨིདྡྷིབལེན གིརིདཱིཔཾ ནཱམ ཨིདྷཱནེཏྭཱ ཏཏྠ ཡཀྑེ པཝེསེཏྭཱ དཱིཔཾ ཡཐཱཊྛཱནེ ཋཔེཏྭཱ ཙམྨཁཎྜཾ སངྑིཔི ཏདཱ དེཝཏཱ སམཱགམོ ཨཧོསི. ཏསྨིཾ སམཱགམེ བྷགཝཱ དྷམྨཾ དེསེསི-ཏདཱ.

‘‘ནེཀེསཾ པཱཎཀོཊཱིནཾ-དྷམྨཱབྷིསམཡོ ཨཧཱུ,

སརཎེསུ ཙ སཱིལེསུ-ཋིཏཱ ཨཱསུཾ ཨསངྑིཡཱ;

སོཏཱཔཏྟིཕལཾ པཏྭཱ-སེལེ སུམནཀཱུཊཀེ,

མཧཱསུམན དེཝིཎྡོ-པཱུཛིཡཾ ཡཱཙི པཱུཚིཡཾ;

སིརཾ པརཱམསིཏྭཱན-ནིལཱམལསིརོརུཧེ,

པཱཎིམཏྟེ ཨདཱ ཀེསེ ཏསྶ པཱཎིཧིཏོ ཛིནོ;

སོ ཏཾ སུཝཎྞིཙངྒོཊཾ-ཙརེནཱདཱཡ སཏྠུནོ, ནིསིནྣཊྛཱན རཙིཏེ-ནཱནཱརཏནསཉྩཡེ.

ཨུཙྩཏོ སཏྟརཏནེ-ཋཔེཏྭཱན སིརོརུཧེ,

ཏཾ ཨིཎྡནཱིལ ཐཱུཔེན-པིདཧེསི ནམསྶི ཙ’’;

པརིནིབྦུཏེ པན བྷགཝཏི དྷམྨསེནཱཔཏི སཱརི པུཏྟཏྠེརསྶ ཨནྟེཝཱསིཀོ སརབྷཱུ ནཱམེཀོ ཐེརོ ཙིཏཀཏོ གཱིཝཊྛིདྷཱཏུ གཧེཏྭཱ བྷིཀྑུ སངྒྷཔརིཝུཏོ ཨཱགནྟྭཱ ཏསྨིཾཡེཝ ཙེཏིཡེ པཏིཊྛཱཔེཏྭཱ མེགྷཝཎྞཔཱསཱཎེཧི ཚཱདེཏྭཱ དྭཱདས ཧཏྠུབྦེདྷཾ ཐཱུཔཾ ཀཱརེཏྭཱ པཀྐཱམི. ཨཐ དེཝཱནམྤིཡཏིསྶ རཉྙོ བྷཱཏཱ ཙཱུལཱ༹བྷཡོ ནཱམ ཏཾ ཨབྦྷུཏཾ ཙེཏིཡཾ དིསྭཱ ཏིཾསཧཏྠུབྦེདྷཾ ཙེཏིཡཾ ཀཱརེསི. ཨིདཱནི དུཊྛགཱམཎཱིཔི ཨབྷཡརཱཛཱ མཧིཡངྒཎཾ ཨཱགནྟྭཱ ཏཏྠ དམིལེ༹ མདྡནྟོ ཨསིཏིཧཏྠུབྦེདྷཾ ཀཉྩུཀཙེཏིཡཾ ཀཱརེཏྭཱ པཱུཛམཀཱསི.

ཨེཝམཙྩཱཡིཀཾ ¶ ཀམྨཾ-ཀརོནྟཱཔི གུཎཱཀརཱ, ཀརོནྟི པུཉྙཾ སཔྤཉྙཱ-སཾསཱརབྷས བྷཱིརུཀཱཏི.

མཧིཡངྒན ཐཱུཔཀཐཱ

༡༧. ཏཏོ རཱཛཱ དམིལེ༹ཧི སདྡྷིཾ ཡུཛ྄ཛྷིཏྭཱ ཚཏྟདམིལ༹ཾ གཎྷིཏྭཱ ཏཏྲ བཧུ དམིལེ༹ གྷཱཏེཏྭཱ ཨམྦཏིཏྠཾ ཨཱགནྟྭཱ ཨམྦདམིལ༹ཾ ཙཏཱུཧི མཱསེཧི གཎྷི. ཏཏོ ཨོརུཡ྄ཧ མཧབྦལེ སཏྟདམིལེ༹ ཨེཀཱཧེནེཝ གཎྷི ཏཏོ ཨནྟརསོབྦྷེ མཧཱཀོཊྛ དམིལ༹ཾ-དོཎགཱམེ གཝར དམིལ༹ཾ-ཧཱལཀོལེ མཧིསྶརིཡ དམིལ༹ཾ-ནཱལི༹སོབྦྷེ ནཱལི༹ཀ དམིལ༹ཾ-དིགྷཱབྷསགལླམྷི དིགྷཱབྷཡ དམིལ༹ཾ གཎྷི. ཏཏོ ཀཙྪཏིཏྠེ ཀིཉྩིསཱིས དམིལ༹ཾ ཙཏཱུཧི མཱསེཧི གཎྷི ཏཏོ ཝེཋ ནགརེ ཏཱལ༹ དམིལ༹ཾ, བྷཱཎཀདམིལ༹ཉྩ-ཝཧིཊྛེ ཝཧིཊྛ དམིལ༹ཾ=གཱམཎིམྷི གཱམཎི དམིལ༹ཾ-ཀུམྦུགཱམམྷི ཀུམྦུ དམིལ༹ཾ-ནཎྡིཀ གཱམམྷི ནཎྡིཀ དམིལ༹ཾ-ཁཱཎུགཱམམྷི ཁཱཎུ དམིལ༹ཾ-ཏམྦུནྣགཱམཀེ མཱཏུལ བྷཱགིནེཡྻེ དྭེ དམིལེ༹ གཎྷི ཏདཱ-

‘‘ཨཛཱནིཏྭཱ སཀཾ སེནཾ-གྷཱཏེནྟི སཛནཱ ཨིཏི,

སུཏྭཱན སཙྩཀིརིཡཾ-ཨཀརི ཏཏྠ བྷུཔཏི;

རཛྫསུཁཱཡ ཝཱཡཱམོ-ནཱཡཾ མམ ཀདཱཔི ཙ,

སམྦུདྡྷསཱསནསྶེཝ-ཋཔནཱཡ ཨཡཾ མམ;

ཏེན སཙྩེན མེ སེནཱ-ཀཱཡོཔགཏ བྷཎྜཀཾ,

ཛཱལཝཎྞཾཝ ཧོཏཱུཏི-ཏཾ ཏཐེཝ ཏདཱ ཨཧུ;’’

ཨེཝཾ རཱཛཱ གངྒཱཏཱིརེ དམིལེ༹ གྷཱཏེསི. གྷཱཏིཏ སོ སབྦེ ཨཱགནྟྭཱ ཝིཛིཏ ནགརེ པཝིསིཾསུ. ཏདཱ རཱཛཱ ཝིཛིཏ ནགརཾ གཎྷིཏུཾ ཝཱིམཾསནཏྠཱཡ ཨཱགཙྪནྟཾ ནཎྡྷིམིཏྟཾ དིསྭཱ ཀཎྜུལཾ མུཉྩེསི. ཀཎྜུལོཔི ཏཾ གཎྷིཏུཾ ཨཱགཉྪི ཏདཱ ནཎྡྷིམིཏྟོ ཧཏྠེཏཧི ཨུབྷོ དནྟེ བཱལ༹ྷཾ གཧེཏྭཱ པཱིལེ༹ཏྭཱ ཨུཀྐུཊིཀཾ ནིསཱིདཱཔེསི. རཱཛཱ ཨུབྷོ ཝིམཾསེཏྭཱ ཝིཛིཏནགརཾ ཨཱགཏོ. ཏཏོ དཀྑིཎདྭཱརེ ཡོདྷཱནཾ མཧཱསངྒཱམོ ཨཧོསི པུརཏྠིམདྭཱརེ ཝེལུ༹སུམནོ ཨསྶཾ ཨཱརུཡ྄ཧ བཧཱུ དམིལེ༹ གྷཱཏེསི དམིལཱ༹ ཨནྟོ པིཝིསིཏྭཱ དྭཱརཾ ཐཀེསུཾ. ཏཏོ རཱཛཱ ཡོདྷེ ཝིསྶཛྫེསི, ཀཎྜུལཧཏྠི ནཎྡྷིམིཏྟོ སུརནིམྨལོ ཙ དཀྑིཎདྭཱརེ ཀམྨཾ ཀརིཾསུ མཧཱསོཎོ གོཋཡིམྦརོ ཐེརཔུཏྟཱབྷཡོ ཙཱཏི ཨིམེ ཏཡོ ཨིཏརེསུ ཏཱིསུ དྭཱརེསུ ཀམྨཾ ཀརིཾསུ.

ཏཉྩ ནགརཾ པརིཁཱཏྟཡ པརིཀྑིཏྟཾ, དལ༹ྷ པཱཀཱར གོཔུརཾ, ཨཡོ དྭཱརཡུཏྟཾ ཨཧོསི ཀཎྜུལོ ཛཱཎུཧི ཋཏྭཱ སིལཱ སུདྷཱ ཨིཊྛཀཱ བྷིཎྡིཏྭཱ ཨཡོདྭཱརཾ པཱཔུཎི ཏདཱ དམིལཱ༹ གོཔུརེ ཋཏྭཱ ནཱནཱཝུདྷཱནི ¶ ཁིཔིཾསུ པཀྐ ཨཡོགུལེ༹ ཙེཝཔཀྐཊྛིཏ སིལེསཉྩ ཧཏྠིཔིཊྛིཡཾ པཀྑིཔིཾསུ? ཏདཱ ཀཎྜུལོ ཝེདནཊྚོ ཨུདཀཊྛཱནཾ གནྟྭཱ ཨུདཀེ ཨོགཱཧི. ཏདཱ གོཋཡིམྦརོ ན ཨིདཾ སུརཱཔཱནཾ བྷཝཏི. ཨཡོདྭཱར ཝིགྷཱཊནཾ ནཱམ, གཙྪ དྭཱརཾ ཝིགྷཱཊེཧཱིཏི ཨཱཧ. ཏཾ སུཏྭཱ ཛཱཏཱབྷིམཱཏོ ཀུཉྩནཱདཾ ཀཏྭཱ ཨུདན ཨུགྒམྨ ཐལེ ཨཊྛཱསི ཨཐ ཧཏྠིཝེཛྫོ སིལེསཾ དྷོཝིཏྭཱ ཨོསདྷཾ ཨཀཱསི. ཏཏོ རཱཛཱ ཧཏྠིཾ ཨཱརུཡ྄ཧ པཱཎིནཱ ཀུམྦྷེ པརཱམསིཏྭཱ སཀལ ལངྐཱཏལེ རཛྫཾ ཏཝ དམྨཱིཏི ཏོསེཏྭཱ ཝརབྷོཛནཾ བྷོཛེཏྭཱ ཝཎཾ སཱཊཀེན ཝེཋེཏྭཱ སུཝམྨཱིཏཾ ཀཏྭཱ ཝམྨཔིཊྛིཡཾ མཧིསཙམྨཾ སཏྟགུཎཾ ཀཏྭཱ བཎྡྷིཏྭཱ ཏསྶུཔརི ཏེལཙམྨཾ བཎྡྷིཏྭཱ ཏཾ ཝིསྶཛྫེསི སོ ཨསནི ཝིཡགཛྫནྟོ གནྟྭཱ དཱཋཱཧི པདརཾ ཝིཛ྄ཛྷིཏྭཱ པཱདེན ཨུམྨཱརཾ ཧནི. དྭཱརཾ བཱཧཱཧི སདྡྷིཾ ཨཡོདྭཱརཾ མཧཱསདྡེན བྷཱུམིཡཾ པཏི. གོཔུརེ དབྦསམྦྷཱརཾ པན ཧཏྠིཔིཊྛིཡཾ པཏནྟཾ དིསྭཱ ནཎྡྷིམིཏྟོ བཱཧཱཧི པཧརིཏྭཱ པཝཊྚེསི ཏདཱ ཀཎྜུལོ དཱཋཱཔཱིལ༹ནཝེརཾ ཚཌྜྷེསི.

ཏཏོ ཀཎྜུལོ ཨཏྟནོ པིཊྛིཾ ཨཱརཱུཧནཏྠཱཡ ནཎྡྷིམིཏྟཾ ཨོལོཀེསི. སོ ཏཡཱ ཀཏམགྒེན ན པཝིསིསྶཱམཱིཏི ཨཊྛཱརས ཧཏྠུབྦེདྷཾ པཱཀཱརཾ བཱཧུནཱ པཧརིཏྭཱ ཨཊྛུསཧཔྤམཱཎཾ པཱཀཱརཔྤདེསཾ པཱཏེཏྭཱ སུརནིམྨལཾ ཨོལོཀེསི སོཔི ཏེན ཀཏམགྒཾ ཨནིཙྪནྟོ པཱཀཱརཾ ལཌྜཱིཏྭཱ ནགརབྦྷནྟརེ པཏི གོཋཡིམྦརོཔི - སོཎོཔི - ཐེརཔུཏྟཱབྷཡོཔི ཨེཀེཀ དྭཱརཾ བྷིཎྡིཏྭཱ པཝིསིཾསུ-ཏཏོ.

‘‘ཧཏྠི གཧེཏྭཱ རཐཙཀྐཾ-མིཏྟོ སཀཊ པཉྫརཾ,

ནཱལི༹ཀེརཏརུཾ གོཋོ-ནིམྨལོ ཁགྒམུཏྟམཾ;

ཏཱལརུཀྑཾ མཧཱསོཎོ-ཐེརཔུཏྟོ མཧཱགདཾ,

ཝིསུཾ ཝིསུཾ ཝཱིཐིགཏཱ-དམིལེ༹ ནཏྠ ཙུཎྞཡུཾ’’;

ཨེཝཾ ཝིཛིཏནགརཾ ཙཏཱུཧི མཱསེཧི བྷིཎྡིཏྭཱ དམིལེ༹ མཱརེཏྭཱ ཏཏོ གརིལོཀཾ ནཱམ གནྟྭཱ གིརིཡ དམིལ༹ཾ ཨགྒཧེསི. ཏཏོ མཧེལ ནགརཾ གནྟྭཱ ཙཏཱུཧི མཱསེཧི མཧེལ རཱཛཱནཾ གཎྷིཾ ཏཏོ རཱཛཱ ཨནུརུདྷཔུརཾ གཙྪནྟོ པརིཏོཀཱསཔབྦཏེ ནཱམ ཁཎྡྷཱཝཱརཾ ནིཝཱསེཏྭཱ ཏཏྠ ཏལཱ༹ཀཾ ཀཱརེཏྭཱ ཛེཊྛམཱུལམཱསམྷི ཨུདཀཀཱིལ༹ཾ ཀཱིལི༹. ཨེལཱ༹རོཔི དུཊྛགཱམཎིསྶ ཨཱགཏབྷཱཝཾ སུཏྭཱ ཨམཙྩེཧི སདྡྷིཾ མནྟེཏྭཱ སྭེ ཡུདྡྷཾ ཀརིསྶཱམཱཏི ནིཙྪཡཾ ཨཀཱསི པུནདིཝསེ སནྣདྡྷོ མཧཱཔབྦཏ ཧཏྠིཾ ཨཱརུཡ྄ཧ མཧཱ བལཀཱཡ པརིཝུཏོ ནིཀྑམི. གཱམཎཱིཔི མཱཏརཱ སདྡྷིཾ མནྟེཏྭཱ དྭཏྟིཾས བལ ཀོཊྛཀེ ཀཱརེཏྭཱ ཚཏྟདྷརེ རཱཛརཱུཔཀེ ཏཏྠ ཏཏྠ ཋཔེསི. ཨབྦྷནྟར ཀོཊྛཀེ སཡཾ ཨཊྛཱསི.

ཏཏོ ¶ སངྒཱམེ ཝཏྟམཱནེ ཨེལཱ༹ར རཉྙོ དཱིགྷཛཏྟུ ནཱམ མཧཱ ཡོདྷོ ཁགྒཕལཀཾ གཧེཏྭཱ བྷཱུམིཏོ ཨཊྛཱརས ཧཏྠཾ ནབྷམུགྒནྟྭཱ རཱཛརཱུཔཾ ཚིཎྡིཏྭཱ པཋམཾ བལ ཀོཊྛཀཾ བྷིཎྡི ཨེཝཾ སེསེཔི བལཀོཊྛཀེ བྷིཎྡིཏྭཱ མཧཱགམཎིནཱ ཋཏཾ བལཀོཊྛཀཾ ཨཱགམི. ཏདཱ སུརནིམྨལོ རཉྙོ པརིགཙྪནྟཾ དིསྭཱ ཨཏྟནོ ནཱམཾ སཱཝེཏྭཱ ཏཾ ཨཀྐོསི ཏཾ སུཏྭཱ དཱིགྷཛནྟུ པཋམཾ ཨིམཾ མཱརེམཱིཏི ཀུཛ྄ཛྷིཏྭཱ ཨཱཀསམབྦྷུགྒནྟྭཱ ཨཏྟནོཔརི ཨོཏརནྟཾ དིསྭཱ སརནིམྨལོ ཨཏྟནོ ཕལཀཾ ཨུཔནཱམེསི. ཨིཏརོཔི ཕལཀེན སདྡྷིཾ ཏཾ བྷིཎྡིསྶ མཱིཏི ཙིནྟེཏྭཱ ཕལཀཾ པཧརི. ཨིཏརོ ཕལཀཾ མུཉྩི, དཱིགྷཛནྟུ ཕལཀཾ ཚིཎྡནྟོ བྷཱུམིཡཾ པཏི. སུརནིམྨལོ ཏཾ སཏྟིཡཱ པཧརི, ཕུསྶདེཝོ ཏཾ ཁཎེ སངྑཾ དྷམི, ཨསནིསདྡོ ཝིཡ ཨཧོསི ཨུམྨཱདཔྤཏྟཱ ཝིཡ མནུསྶཱ ཨཧེསུཾ. ཏཏོ དམིལ༹ སེནཱ བྷིཛྫིཏྠ, ཨེལཱ༹རོ པལཱཡིཏྠ ཏདཱཔི བཧུ དམིལེ༹ གྷཱཏེསུཾ.

‘‘ཏཏྠ ཝཱཔིཛལཾ ཨཱསི-ཧཏཱནཾ ལོཧིཏཱཝིལཾ,

ཏསྨཱ ཀུལཏྠཝཱཔཱིཏི-ནཱམཏོ ཝིསྶུཏཱ ཨཧཱུ;

ཙརཱཔེཏྭཱ ཏཧིཾ བྷེརིཾ-དུཊྛགཱམིཎི བྷཱུཔཏི,

ན ཧནིསྶཏུ ཨེལཱ༹རཾ-མཾ མུཉྩིཡ པརོ ཨིཏི;

སནྣདྡྷོ སཡམཱརུཡ྄ཧ-སནྣདྡྷཾ ཀཎྜུལཾ ཀརིཾ,

ཨེལཱ༹རཾ ཨནུབཎྡྷནྟོ-དཀྑིཎདྭཱར མཱགམི;

པུརེ དཀྑིཎབྷཱགམྷི-ཨུབྷོ ཡུཛ྄ཛྷིཾསུ བྷཱུམིཔཱ,

ཏོམརཾ ཁིཔི ཨེལཱ༹རོ-གཱམཎི ཏཾ ཨཝཉྩཡི;

ཝིཛ྄ཛྷཱཔེསི ཙ དནྟེཧི-ཏཾ ཧཏྠིཾ སཀཧཏྠིནཱ,

ཏོམརཾ ཁིཔི ཨེལཱ༹རོ-སཧཏྠི ཏཏྠ སོ པཏི;

ཏཏོ ཝིཛིཏ སངྒཱམོ-སཡོགྒབལཝཱཧནོ,

ལངྐཱ ཨེཀཱཏཔཏྟཾ སོ-ཀཏྭཱན པཱཝིསི པུརཾ;’’

ཨཐ རཱཛཱ ནགརེ བྷེརིཾ ཙརཱཔེཏྭཱ སམནྟཱ ཡོཛནཔྤམཱཎེ མནུསྶེ སནྣིཔཱཏེཏྭཱ ཨེལཱ༹ར རཉྙོ སརཱིརཾ མཧནྟཾ སཀྐཱརཾ ཀཱརེཏྭཱ ཀཱུཊཱགཱརེན ནེཏྭཱ ཛྷཱཔེཏྭཱ ཏཏྠ ཏེཙིཡཾ ཀཱརེཏྭཱ པརིཧཱརམདཱསི. ཨཛྫཔི རཱཛཱནོ ཏཾ པདེསམྤཏྭཱ བྷེརིཾ ན ཝཱདཱཔེནྟི. ཨེཝཾ དུཊྛགཱམཎི ཨབྷཡ མཧཱརཱཛཱ དྭཏྟིཾས དམིལ༹ རཱཛཱནོ མཱརེཏྭཱ ལངྐཱདཱིཔཾ ཨེཀཙྪཏྟམཀཱསི.

ཡདཱ དུཊྛགཱམཎི ཝིཛིཏཾ ནགརཾ གཎྷི ཏདཱ དཱིགྷཛནྟུ ཡོདྷོ ཨེལཱ༹རཾ ཨུཔསངྐམིཏྭཱ ཨཏྟནོ བྷཱགིནེཡྻསྶ བྷལླུཀསྶ ཡོདྷ བྷཱཝཾ ཨཱཙིཀྑིཏྭཱ ཨིདྷཱགམནཏྠཱཡ ཏསྶ སནྟིཀཾ པེསེསི. བྷལླུཀོཔི ཨེལཱ༹རསྶ དཌྜྷདིཝསཏོ སཏྟམེ དིཝསེ སཊྛིཡཱ པུརིས ¶ སཧསྶེཧི སདྡྷིཾ ཨོཏིཎྞོ རཉྙོ མཏབྷཱཝཾ སུཏྭཱཔི ལཛྫཱཡ ཡུཛ྄ཛྷིསྶཱམཱིཏི མཧཱཏིཏྠཏོ ནིཀྑམིཏྭཱ ཀོལམྦཧཱལཀེ ནཱམ གཱམེ ཁཎྡྷཱཝཱརཾ ནིཝེསེསི. རཱཛཱཔི ཏསྶཱ’གམནཾ སུཏྭཱ སནྣདྡྷོ ཀཎྜུལཾ ཨཱརུཡ྄ཧ ཡོདྷཔརིཝུཏོ མཧཏཱ བལཀཱཡེན ཨབྷིནིཀྑམི. ཕུསྶདེཝོཔི པཉྩཱཝུདྷ སནྣདྡྷོ རཉྙོ པཙྪིམཱསནེ ནིསཱིདི. བྷལླུཀོཔི པཉྩཱཝུདྷ སནྣདྡྷོ ཧཏྠིཾ ཨཱརུཡ྄ཧ རཱཛཱབྷིམུཁོ ཨགཉྪི. ཏདཱ ཀཎྜུལོ ཏསྶ ཝེགམཎྡི བྷཱཝཏྠཾ སནིཀཾ སནིཀཾ པཙྩོསཀཀི སེནཱཔི ཧཏྠིནཱ སདྡྷིཾ ཏཐེཝ པཙྩོསཀཀི.

རཱཛཱ ཕུསྶདེཝཾ ཨཱཧ ཨཡཾ ཧཏྠི པུབྦེ ཨཊྛཝཱིསཏིཡཱ ཡུདྡྷེསུ ཨཔཙྩོསཀཀིཏྭཱ ཨིདཱནི ཀསྨཱ པན པཙྩོསཀྐཏཱིཏི. སོ ཨཱཧཱདེཝ. ཨམྷཱཀམེཝ ཛཡོ ཨཡཾ གཛོ ཛཡབྷཱུམིཾ ཨཝེཀྑནྟོ པཙྩོསཀྐཏི ཛཡབྷཱུམིཾ པཏྭཱ ཋསྶཏཱིཏི? ནཱགོཔི པཙྩོསཀཀིཏྭ པུར དེཝསྶ པསྶེ མཧཱཝིཧཱར སཱིམནྟེ ཨཊྛཱསི.

ཏཏོ བྷལླུཀོ རཱཛཱབྷིམུཁཱ ཨཱགནྟྭཱ རཱཛཱནཾ ཨུཔྤཎྜེསི རཱཛཱཔི ཁགྒཏལེན མུཁཾ པིདྷཱཡ ཏཾ ཨཀྐོསི རཉྙོ མུཁེ ཝིཛ྄ཛྷིསྶཱམཱིཏི སརཾ ཁིཔི. སོ ཁགྒཏལ མཱགཙྩབྷཱུམིཡཾ པཏི, བྷལླུཀོ མུཁེ ཝིདྡྷེསྨིཏི སཉྙཱཡ ཨུཀྐུཊྛི, ཨཀཱསི ཏདཱ རཉྙོ པཙྪིམཱསནེ ནིསིནྣོ ཕུསྶདེཝོ རཉྙོ ཀུཎྜལཾ གྷཊེནྟོ ཏསྶ མུཁེ ཀཎྜཾ པཱཏེསི རཉྙོ པཱདེ ཀཏྭཱ པཏམཱནསྶ ཛཱཎུམྷི ཨཔརེན ཀཎྜེན ཝིཛ྄ཛྷིཏྭཱ རཉྙོ སཱིསཾ ཀཏྭཱ པཱཏེསི. རཱཛཱ ལདྡྷཛཡོ ནགརཾ ཨཱགནྟྭཱ སརཾ ཨཱཧརཱཔེཏྭཱ པུངྑེན ཨུཛུཀཾ ཋཔཱཔེཏྭཱ ཏཾ པམཱཎཾ ཀཧཱཔཎརཱསིཾ ཀཏྭཱ ཕུསྶདེཝསྶ ཨདཱསི.

ཨེཝཾ ལངྐཱརཛྫཾ ཨེཀཙྪཏྟཾ ཀཏྭཱ རཱཛཱ ཡོདྷཱནཾ ཡཐཱནུརཱུཔཾ ཋཱནནྟརཾ ཨདཱསི. ཐེརཔུཏྟཱབྷཡོ པན དཱིཡམཱནཾ ཊྛཱནནྟརཾ ན གཎྷི ཀསྨཱ ན གཎྷསིཏི པུཙྪིནོ ཡུདྡྷཾ ཨཏྠི མཧཱརཱཛཱཏི ཨཱཧཾ. ཨིདཱནི ཨེཀརཛྫེ ཀཏེ ཀིཾ ནཱམ ཡུདྡྷནྟི པུཙྪིཏེ ཀིལེས ཙོརེཧི ཡུཛ྄ཛྷིསྶ མཱིཏི ཨཱཧ. རཱཛཱ པུནཔྤུནཾ ནིཝཱརེསི སོཔི པུནཔྤུན ཡཱཙིཏྭཱ རཱཛཱནུཉྙཱཡ པབྦཛིཏྭཱ ཝིཔསྶནཱཡ ཀམྨཾ ཀརོནྟོ ཨརཧཏྟཾ པཏྭཱ པཉྩ ཁཱིཎཱསཝསཏ པརིཝཱརོ ཨཧོསི.

ཏཏོ རཱཛཱ ཨཏྟནོ པཱསཱདཏལེ སིརཱིསཡནགཏོ མཧཏིཾ སམྤཏྟིཾ ཨོལོཀེཏྭཱ ཨཀྑོབྷིཎི སེནཱགྷཱཏཾ ཨནུསྶརི. ཨནུསྶརནྟསྶ རཉྙོ མཧནྟཾ དེམནསྶཾ ཨུཔྤཛྫི སགྒ མགྒནྟརཱཡོ མེ བྷཝེཡྻཱཏི.

ཏདཱ པིཡངྒུདཱིཔེ ཨརཧནྟོ རཉྙོ པརིཙིཏཀྐཾ ཉཏྭཱ ཏཾ ཨསྶཱསེཏུཾ ཨཊྛ ཨརཧནྟེ པེསྶེ. ཏེ ཨཱགནྟྭཱ ཨཱགཏབྷཱཝཱ ནིཝེདེཏྭཱ ¶ པཱསཱདཏལཾ ཨབྷིརུཧིཾསུ རཱཛཱ ཐེརེ ཝནྡིཏྭཱ ཨཱསནེ ནིསཱིདཱཔེཏྭཱ ཨཱགཏ ཀཱརཎཾ པུཙྪི. ཐེརཱཔི ཨཱགཏ ཀཱརཎཾ ཝཏྭཱ རཉྙོ ཏེན ཀམྨུནཱ སགྒ-མོཀྑནྟརཱཡབྷཱཝཾ བོདྷེཏྭ པཀྐམིཾསུ རཱཛཱ ཏེསཾ ཝཙནཾ སུཏྭཱ ཨསྶཱསཾ པཊིལབྷིཏྭཱ ཝནྡིཏྭཱ (ཏེ ཝིསྶཛྫེཏྭཱ) སིརིསཡནགཏོ པུན ཙིནྟེསི.

མཱཏིཔིཏརོ ཁོ པན མཱ ཙོ ཀདཱཙིཔི ཝིནཱ སངྒྷེན ཨཱཧཱརཾ བྷུཉྫཐཱཏི ཨམྷེཧི སཔཐཾ ཀཱརེསུཾ བྷིཀྑུསངྒྷསྶ ཨདཏྭཱ བྷུཏྟཾ ཨཏྠི ནུ ཁོ ནཏྠིཏི ཙིནྟཡནྟོ སཏིསམྨོསེན སངྒྷསྶ ཨདཏྭཱ པཱཏརཱསཀཱལེ པརིབྷུཏྟཾ ཨེཀཾཡེཝ མརིཙཝཊྚིཾ ཨདྡས. དིསྭཱ ཙ ཨཡུཏྟཾ མཡཱ ཀཏཾ དཎྜཀམྨཾ མེ ཀཱཏབྦནྟཱི ཙིནྟེསི ཨཐ རཱཛཱ ཚཏྟམངྒལ སཏྟཱཧེ ཝཱིཏིཝཏྟེ མཧཏཱ རཱཛཱནུབྷཱཝེན མཧནྟེན ཀཱིལཱ༹ཝིདྷཱནེན ཨུདཀཀཱིལ༹ཾ ཀཱིལི༹ཏུཾ ཨབྷིསིཏྟཱནཾ རཱཛུནཾ ཙཱརིཏྟཱནུ པཱལནཏྠཉྩ ཏིསྶཝཱཔིཾ ཨགམཱསི. རཉྙོ སབྦཾ པརིཙྪདཾ ཨུཔཱཧནཚཏྟཱནི ཙ མརིཙཝཊྚི ཝིཧཱརཊྛཱནམྷི ཋཔཡིཾསུ.

ཏཏྲཱཔི ཐཱུཔཊྛཱནེ རཱཛཔུརིསཱ རཉྙོ སདྷཱཏུཀཾ ཀུནྟཾ ཨུཛུཀཾ ཋཔེསུཾ. རཱཛཱ དིཝསབྷཱགཾ ཨོརོདྷ པརིཝུཏོ ཀཱིལི༹ཏྭཱ སཱཡཎྷེ ཛཱཏེ ནགརཾ གམིསྶཱམ ཀུནྟཾ ཝཌྜྷེཐཱཏི ཨཱཧ. རཱཛཔུརིསཱ ཀུནྟཾ གཎྷནྟཱ ཙཱལེཏུཾ ནཱསཀྑིཾསུ རཱཛསེན, ཏཾ ཨཙྪརིཡཾ དིསྭཱ སམཱགནྟྭཱ གཎྡྷམཱལཱདཱིཧི པཱུཛེསི རཱཛཱཔི མཧནྟཾ ཨཙྪརིཡཾ དིསྭཱ ཧཊྛམཱནསོ སམནྟཱ ཨཱརཀྑཾ སཾཝིདཧིཏྭཱ ནགརཾ པཱཝིསི.

ཏཏོ རཱཛཱ ཀུནྟཾ པརིཀྑིཔཱཔེཏྭཱ ཙེཏིཡཾ ཏཾ པརིཀྑིཔཱཔེཏྭཱ ཝིཧཱརཉྩ ཀཱརེསི. ཝིཧཱརོ ཏཱིཧི སཾཝཙྪརེཧི ནིཊྛཱསིཾ རཱཛཱ ཝིཧཱརམཧཏྠཱཡ སངྒྷཾ སནྣིཔཱཏེསི བྷིཀྑཱུནཾ སཏསཧསྶཱནི བྷིཀྑུནཱིནཾ ནཝུཏི སཧསྶཱནི སནྣིཔཏིཾསུ ཏསྨིཾ སམཱགམེ རཱཛཱ སངྒྷཾ ཝནྡིཏྭཱ ཨེཝམཱཧ བྷནྟེ ཝིསྶརིཏྭཱ ཝིནཱ སངྒྷེན མརིཙཝཊྚིཀཾ པརིབྷུཉྫིཾ ཏདཏྠཾ དཎྜཀམྨཾ མེ ཧོཏཱུཏི-སཙེཏིཡཾ མརིཙཝཊྚིཡཾ ཝིཧཱརཾ ཀཱརེསིཾ པཏིགཎྷཱཏུ བྷནྟེ སངྒྷོ སཙེཏིཡཾ ཝིཧཱརནྟི དཀྑིཎོདཀཾ པཱཏེཏྭཱ བྷིཀྑུསངྒྷསྶ ཝིཧཱརཾ ཨདཱསི.

ཝིཧཱརསྶ སམནྟཏོ བྷིཀྑུསངྒྷསྶ ནིསཱིདནཏྠཱཡ མཧནྟཾ མཎྜཔཾ ཀཱརེསི མཎྜཔ པཱདཱ ཨབྷཡཝཱཔིཡཱ ཛལེ པཏིཊྛིཏཱ ཨཧེསུཾ. སེསོཀཱསེ ཀཐཱཙནཏྠི. ཏཏྠ བྷིཀྑུསངྒྷཾ ནིསཱིདཱཔེཏྭཱ སཏྟཱཧཾ མཧཱདཱནཾ དཏྭཱ སབྦཔརིཀྑཱརཾ ཨདཱསི. ཏཏྠ སངྒྷཏྠེརེན ལདྡྷ པརིཀྑཱརོ སཏསཧསྶགྒྷནཀོ ཨཧོསི.

ཨེཝཾ- ¶

‘‘ཡུདྡྷེ དཱནེ ཙ སཱུརེན-སཱུརིནཱ རཏནཏྟམེ,

པསནྣཱམལཙིཏྟེན-སཱསནུཛྫོཏནཏྠིནཱ;

རཉྙཱ ཀཏཉྙུནཱ ཏེན-ཐཱུཔཀཱརཱཔནཱདིཏོ,

ཝིཧཱརམཧནནྟཱནི - པཱུཛེཏུཾ རཏནཏྟཡཾ;

པརིཙྩཏྟདྷནཱནེཏྠ-ཨནགྒྷཱནི ཝིམུཉྩིཡ,

སེསཱནི ཧོནྟི ཨེཀཱཡ-ཨཱུནཱ ཝིསཏིཀོཊིཡོ;’’

ཨེཝཾ སཔཉྙོ བྷིདཱུརེ ཨསཱརེ,

དེཧེ དྷནེ སངྒམཏིཀྐམིཏྭཱ

ཀཏྭཱན པུཉྙཾ སུཁསཱདནཏྠཾ,

སཱརཾ གཧེཏུཾ སཏཏཾ ཡཏེཡྻཱཏི;

མརཱིཙཝཊྚི ཝིཧཱརཀཐཱ

༡༨. ཏཏོ རཱཛཱ ཙིནྟེསི མཧཱམཧིཎྡཏྠེརོ ཀིར མམ ཨཡྻཀསྶ དེཝཱནམྤིཡཏིསྶ རཉྙོ ཨེཝམཱཧ. ནཏྟཱ ཏེ མཧཱརཱཛ དུཊྛགཱམཎི ཨབྷཡོ ཝིསཾ ཧཏྠསཏིཀཾ སོཝཎྞམཱལིཾ ཐཱུཔཾ ཀཱརེསྶཏི. སངྒྷསྶ ཙ ཨུཔོསཐཱགཱརབྷཱུཏཾ ནཝབྷཱུམཀཾ ལོཧཔཱསཱདཾ ཀཱརེསྶཏཱིཏི ཙིནྟེཏྭཱ ཙ པན ཨོལོཀེནྟོ རཱཛགེཧེ ཀརཎྜཀེ ཋཔིཏཾ སུཝཎྞཔཊྚལེཁཾ དིསྭཱ ཏཾ ཝཱཙེསི. ཨནཱགཏེ ཙཏྟཱལཱིསཾ ཝསྶསཏཾ ཨཏིཀྐམྨ ཀཱཀཝཎྞཏིསྶསྶ པུཏྟོ དུཊྛགཱམཎི ཨབྷཡོ ཨིདཉྩིདཉྩ ཀཱརེསྶཏཱིཏི སུཏྭཱ ཧཊྛོ ཨུདགྒོ ཨཔྤོཋེསི-ཨཡྻེན ཀིར ཝཏམྷི དིཊྛོ མཧཱ མཧིཎྡེནཱཏི.

ཏཏོ པཱཏོཝ མཧཱམེགྷཝནཾ གནྟྭཱ བྷིཀྑུསངྒྷཾ སནྣིཔཱཏེཏྭཱ ཨེཏདཝོཙ? བྷནྟེ བྷིཀྑུསངྒྷསྶ ཨུཔོསཐཱགཱརཾ ཀཏྭཱ དེཝཝིམཱན སདིསཾ པཱསཱདཾ ཀཱརེསྶཱམི དེཝལོཀཾ པེསེཏྭཱ པཊེ ཝིམཱནཱཀཱརཾ ལིཁཱཔེཏྭཱ མེ དེཐཱཏི? སངྒྷོ ཨཊྛ ཁཱིཎཱསཝེ པེསེསི. ཏེ ཏཱཝཏིཾསབྷཝནཾ གནྟྭཱ དྭཱདསཡོཛནུབྦེདྷཱ ཨཊྛཙཏྟཱལཱིས ཡོཛན པརིཀྑེཔཾ ཀཱུཊཱགཱརཾ སཧསྶ པཏིམཎྜིཏཾ ནཝབྷཱུམཀཾ སཧསྶགབྦྷཾ ཁཱིརཎ དེཝདྷཱིཏཱཡ པུཉྙཱནུབྷཱཝནིབྦཏྟཾ ཨཱཀཱསཊྛཾ རཏནཔཱསཱདཾ ཨོལོཀེཏྭཱ ཧིངྒུལཀེན པཊེ ཏདཱཀཱརཾ ལིཁིཏྭཱ ཨཱནེཏྭཱ བྷིཀྑུསངྒྷསྶ ཨདཾསུ སངྒྷོ རཉྙོ པཱཧེསི.

ཏཾ དིསྭཱ རཱཛཱ ཏུཊྛམཱནསོ ཏདཱ ཏཾ ལེཁཏུལྱཾ ལོཧཔཱསཱདཾ ཀཱརེསི. ཀམྨནྟཱརམྦྷ ཀཱལེ པན ཙཏུསུ དྭཱརེསུ ཨཊྛསཏསཧསྶཱནི ཧིརཉྙཱནི ཋཔཱཔེསི ཏདཱ ཙཏུསུ དྭཱརེསུ སཧསྶ སཧསྶཾ ཝཏྠཔུཊཱནི ཙེཝ གུལ༹-ཏེལ-སཀྑར-མདྷུཔུརཱ ཨནེཀསཧསྶཙཱཊིཡོ ཙ ¶ ཋཔཱཔེསི. པཱསཱདེ ཨམཱུལཀེན ཀམྨཾ ན ཀཱཏབྦནྟི བྷེརིཾ ཙཱརཔེཏྭཱ ཨམཱུལཀེན ཀཏཀམྨཾ ཨགྒྷཱཔེཏྭཱ ཀཱརཀཱནཾ མཱུལཾ དཱཔེསི. པཱསཱདོ ཨེཀེཀེན པསྶེན ཧཏྠསཏ ཧཏྠསཏཔྤམཱཎོ ཨཧོསི ཏཐཱ ཨུབྦེདྷན, ནཝབྷཱུམཱཡོ ཙསྶ ཨཧེསུཾ ཨེཀེཀིསྶཱ བྷཱུམིཡཱ སཏཾ སཏཾ ཀཱུཊཱགཱརཱནི, ཏཱནི སབྦཱནིཔི རཏནཁཙིཏཱནི ཙེཝ སུཝཎྞ ཀིངྐིཎིཀཱཔནྟི པརིཀྑིཏྟཱནི ཙ ཨཧེསུཾ ཏེསཾ ཀཱུཊཱགཱརཱནི ནཱནཱརཏན བྷཱུསིཀཱ པཝཱལ༹ ཝེདིཀཱ ཙེཝ, ཏཱསཾ པདུམཱནི ཙ ནཱནཱརཏན ཝིཙིཏྟཱནེཝ ཨཧེསུཾ. ཏཐཱ སཧསྶགབྦྷཱ ཙ ནཱནཱརཏན ཁཙིཏཱ སཱིཡཔཉྫར ཝིབྷཱུསིཏཱ ཙ. ཝེསྶཝནསྶ ནཱརིཝཱབྷནཡཱནཾ སུཏྭཱ ཏདཱཀཱརཾ མཛ྄ཛྷེ རཏན མཎྜཔཾ ཀཱརེསི.

སོ ཨནེཀེཧི རཏནཏྠམྦྷེཧི སཱིཧཝྱགྒྷཱདི རཱུཔེཧི དེཝཏཱ རཱུཔེཧི ཙ པཏིམཎྜིཏོ སམནྟཏོ ཨོལམྦཀ མུཏྟཱ ཛཱལེན ཙ པརིཀྑིཏྟོ ཨཧོསི པཝཱལ༹ཝེདིཀཱ ཙསྶ པུབྦེ ཝུཏྟཔྤཀཱརཱཝ སཏྟརཏན ཝིཙིཏྟམཎྜཔ མཛ྄ཛྷེ པན ཨེལི༹ཀམཡ བྷཱུམིཡཱ དནྟམཡ པལླངྐོ ཨཧོསི ཨཔསྶེནམྤི དནྟམཡམེཝ, སོ སུཝཎྞསཱུརིཡམཎྜལེཧི རཛཏ ཙཎྡ མཎྜལེཧི མུཏྟཱམཡ ཏཱརཀཱཧི ཙ ཝིཙིཏྟོ ཏཏྠ ཏཏྠ ཡཐཱརཧཾ ནཱནཱརཏནམཡ པདུམཱནི ཙེཝ པསཱད ཛནཀཱནི ཙ ཛཱཏཀཱནི ཨནྟརནྟརཱ སུཝཎྞལཏཱཡོ ཙ ཀཱརེསི. ཏཏྠ མཧགྒྷཾ པཙྩཏྠརཎཾ ཨཏྠརིཏྭཱ མནུཉྙཾ དནྟ ཝིཛནིཾ ཋཔེསི. པཝཱལ༹མཡ པཱདུཀཱ ཀཱརེསི. ཏཐཱ པལླངྐསྶོཔརི ཨེལི༹ཀབྷཱུམིཡཱ པཏིཊྛིཏཾ རཛཏམཡདཎྜཾ སེཏཙྩཏྟཾ ཀཱརེསི. ཏཏྠ སཏྟརཏནམཡཱནི ཨཊྛམངྒལཱནི ཨནྟརནྟརཱ ཙ མཎིམུཏྟཱམཡཱ ཙཏུཔྤཱད པནྟིཡོ ཙ ཀཱརེསི. ཚཏྟནྟེ ཙསྶ རཏནམཡ གྷཎྚཱཔནྟིཡོ ཨོལམྦིཾསུ.

པཱསཱདོ ཚཏྟཾ པལླངྐོ མཎྜཔོ ཙཱཏི ཙཏྟཱརོ ཨནགྒྷཱ ཨཧེསུཾ མཧགྒྷཱནི མཉྩཔཱིཋཱནི པཉྙཏྭོ ཏཏྠ མཧགྒྷཱནི ཀམྦལཱནི བྷུམྨཏྠརཎཱནི ཨཏྠརཱཔེསི ཨཱཝམན ཀུམྷི ཨུལུ༹ངྐོ ཙ སོཝཎྞམཡཱཡེཝ ཨཧེསུཾ. སེས པརིབྷོག བྷཎྜེསུ ཝཏྟབྦམེཝ ནཏྠི དྭཱརཀོཊྛཀོཔི མནོཧར པཱཀཱརེན པརིཀྑིཏྟོ. ཏམྦལོཧིཊྛིཀཱབྷི པན ཚཱདིཏཏྟཱ པཱསཱདསྶ ལོཧཔཱསཱདོཏི ཝོཧཱརོ ཨཧོསི.

ཨེཝཾ ཏཱཝཏིཾསབྷཝནེ དེཝསབྷཱ ཝིཡ པཱསཱདཾ ནིཊྛཱཔེཏྭཱ སངྒྷཾ སནྣིཔཱཏེསི. མརིཙཝཊྚི ཝིཧཱརམགེ ཝིཡ སངྒྷོ སནྣིཔཏི. པཋམབྷཱུམིཡཾ པུཐུཛྫནཱཡེཝ ཨཊྛཾསུ དུཏིཡབྷཱུམིཡཱ ཏེཔིཊཀཱ, ཏཏིཡཱདིསུ ཏཱིསུ བྷཱུམིསུ ཀམེན སོཏཱཔནྣ - སཀདཱགཱམི - ཨནཱགཱམིནོ, ཨུཔརི ཙཏུསུ བྷཱུམིསུ ཁཱིཎཱསཝཱཡེཝ ཨཊྛཾསུ. ཨེཝཾ སངྒྷཾ སནྣིཔཱཏེཏྭཱ སངྒྷསྶ པཱསཱདཾ དཏྭཱ མརིཙཝཊྚི ཝིཧཱརམཧེ ཝིཡ སཏྟཱཧཾ མཧཱདཱནམདཱསཱིཏི.

‘‘པཱསཱདཧེཏུ ¶ ཙཏྟཱནི-མཧཱཙཱགེན རཱཛིནཱ,

ཨནགྒྷཱནི ཋཔེཏྭཱན-ཨཧེསུཾ ཏིཾསཀོཊིཡོ;’’

པཧཱཡ གམནཱིཡནྟཾ-དཏྭཱན དྷནསཉྩཡཾ,

ཨནུགཱམིདྷནཾ དཱནཾ-ཨེཝཾ ཀུབྦནྟི པཎྜིཏཱ;

༡༩. ཨཐེཀདིཝསཾ རཱཛཱ སཏསཧསྶཾ ཝིསྶཛྫེཏྭཱ མཧཱབོདྷི པཱུཛཾ ཀཱརེཏྭཱ ནགརཾ པཝིསནྟོ ཐཱུཔཊྛཱནེ པཏིཊྛིཏཾ སིལཱཐཱུཔཾ དིསྭཱ མཧིཎྡཏྠེརེན ཝུཏྟཝཙནཾ ཨནུསྶརིཏྭཱ མཧཱཐཱུཔཾ ཀཱརེསྶཱམཱིཏི ཀཏསནྣིཊྛཱནོ ནགརཾ པཝིསིཏྭཱ མཧཾཏལཾ ཨཱརུཡ྄ཧ སུབྷོཛནཾ བྷུཉྫིཏྭཱ སིརིསཡནགཏོ ཨེཝཾ ཙིནྟེསི མཡཱ དམིལེ༹ མདྡམཱནེན ཨཡཾ ལོཀོ ཨཏིཝིཡ པཱིལི༹ཏོ, ཀེན ནུ ཁོ ཨུཔཱཡེན ལོཀསྶ པིལ༹ནཾ ཨཀཏྭཱ དྷམྨེན སམེན མཧཱ ཙེཏིཡསྶ ཨནུཙྪཝིཀཾ ཨིཊྛཀཱ ཨུཔྤཱདེསྶཱམཱིཏི ཏཾ ཙིནྟིཏཾ ཚཏྟཾ ཨདྷིཝཏྠཱ དེཝཏཱ ཛཱནིཏྭཱ རཱཛཱ ཨེཝཾ ཙིནྟེསཱིཏི ཨུགྒྷོསེསི.

པརམྤརཱཡ དེཝལོཀེཔི ཀོལཱཧལམཧོསི ཏཾ ཉཏྭཱ སཀྐོ དེཝརཱཛཾ ཝིསྶཀམྨཾ ཨཱམནྟེཏྭཱ’ཏཱཏ! ཝིསྶ ཀམྨ! དུཊྛགཱམཎི ཨབྷཡ མཧཱརཱཛཱ མཧཱ ཙེཏིཡསྶ ཨིཊྛཀཏྠཱཡ ཙིནྟེསི. ཏྭཾ གནྟྭཱ ཨུཏྟརཔསྶེ ནགརཏོ ཡོཛནཔྤམཱཎེ ཋཱནེ གམྦྷིར ནདིཡཱ ཏཱིརེ ཨིཊྛཀཱ མཱཔེཏྭཱ ཨེཧི’ཏི པེསེསི.

ཏཾ ཉཏྭཱ ཝིསྶཀམྨ དེཝཔུཏྟོ ཨཱགནྟྭཱ ཏཏྠེཝ མཧཱཙེཏིཡཱནུཙྪཝིཀཾ ཨིཊྛཀཱ མཱཔེཏྭཱ དེཝཔུརམེཝ གཏོ. པུན དིཝསེ ཨེཀོ སུནཁལུདྡོ སུནཁེ གཧེཏྭཱ ཨརཉྙཾ གནྟྭཱ ཏཏྠ ཏཏྠ ཝིཙརནྟོ ཏཾ ཋཱནཾ པཏྭཱ ཨིཊྛཀཱ ཨདིསྭཱ ཙ ནིཀྑམི. ཏསྨིཾ ཁཎེ ཨེཀཱ བྷུམྨཱ དེཝཏཱ ཏསྶ ཨིཊྛཀཱ དསྶེཏུཾ མཧནྟཾ གོདྷཱཝཎྞཾ གཧེཏྭཱ ལུདྡསྶ སུནཁཱནཉྩ ཨཏྟཱནཾ དསྶེཏྭཱ ཏེཧི ཨནུབདྡྷོ ཨིཊྛཀཱབྷིམུཁཾ ཨཏྟྭཱ ཨནྟརདྷཱཡི.

སུནཁལུདྡོ ཨིཊྛཀཱ དིསྭཱ ཨམྷཱཀཾ རཱཛཱ ཐཱུཔཾ ཀཱརེཏུཀཱམོ, མཧནྟོ ཝཏ ནོ པཎྞཱཀཱརོ ལདྡྷོཏི ཧཊྛམཱནསོ པུན དིཝསེ པཱཏོཙ ཨཱགནྟྭཱ ཨཏྟནཱ དིཊྛཾ ཨིཊྛཀ པཎྞཱཀཱརཾ རཉྙོ ནིཝེདེསི. རཱཛཱ ཏཾ སཱསནཾ སུཏྭཱ ཨཏྟམནོ ཧུཏྭཱ ཏསྶ མཧནྟཾ སཀྐཱརཾ ཀཱརེཏྭཱ ཏཾཡེཝ ཨིཊྛཀ གོཔནཾ ཀཱརེསི. ཏཏོ རཱཛཱ ཨཧམེཝ ཨིཊྛཀོལོཀནཏྠཱཡ གཙྪཱམི - ཀུནྟཾ ཝཌྜྷེཐཱཏི ཨཱཧ.

ཏསྨིཾཡེཝ ཁཎེ པུན ཨཉྙཾ སཱསནཾ ཨཱཧརིཾསུ. ནགརཏོ ཏིཡོཛནམཏྠཀེ ཋཱནེ པུབྦུཏྟརཀཎྞེ ཨཱཙཱར ཝིཊྛིགཱམེ ཏིཡཱམརཏྟིཾ ཨབྷིཔྤཝཊྚེ དེཝེ སོལ༹ས ཀརཱིསཔྤམཱཎེ པདེསེ སུཝཎྞབཱིཛཱནི ཨུཊྛཧིཾསུ. ཏཱནི པམཱཎཏོ ཨུཀྐཊྛཱནི ཝིདཏྠིཔྤམཱཎཱནི. ཨོམཀཱནི ཨཊྛངྒུལཔྤམཱཎཱནི ཨཧེསུཾ, ཨཐ ཝིབྷཱཏཱཡ རཏྟིཡཱ ¶ གཱམཝཱསིནོ སུཝཎྞབིཛཱནི དིསྭཱ རཱཚཱ’རཧཾ ཝཏ བྷཎྜཾ ཨུཔྤནྣནྟི སམནྟཏོ ཨཱརཀྑཱ སཾཝིདཧིཏྭཱ སུཝཎྞབཱིཛཱནི པཱཏིཡཾ པཱུརེཏྭཱ ཨཱགནྟྭཱ རཉྙོ དསྶེསུཾ རཱཛཱ ཏེསམྤི ཡཐཱརཧཾ སཀྐཱརཾ ཀཱརེཏྭཱ ཏེཡེཝ སུཝཎྞ གོཔཀེ ཨཀཱསི.

ཨཐ ཏསྨིཾཡེཝ ཁཎེ ཨཉྙཾ སཱསནཾ ཨཱཧརིཾསུ. ནགརཏོ པཱཙཱིནཔསྶེ སཏྟཡོཛན མཏྠཀོ ཋཱནེ པཱརགངྒཱཡ ཏམྦཝིཊྛི ནཱམ ཛནཔདེ ཏམྦལོཧཾ ཨུཔྤཛྫི. གཱམིཀཱ པཱཏིཾ པཱུརེཏྭཱ ཏམྦལོཧཾ གཧེཏྭཱ ཨཱགནྟྭཱ རཉྙོ དསྶེསུཾ རཱཛཱ ཡཐཱནུརཱུཔཾ སཀྐཱརཾ ཏེསམྤི ཀཱརེཏྭཱ ཏེཡེཝ གོཔཀེ ཨཀཱསི.

ཏདནནྟརཾ ཨཉྙཾ སཱསནཾ ཨཱཧརིཾསུ. པུརཏོ ཙཏུཡོཛནམཏྠཀོ ཋཱནེ པུབྦདཀྑིཎ ཀཎྞེ སུམནཝཱཔིགཱམེ ཨུཔྤལཀུརུཝིཎྡ མིསྶཀཱ བཧཱུ མཎཡོ ཨུཔྤཛྫིཾསུ གཱམིཀཱ པཱཏིཾ པཱུརེཏྭཱ ཨཱགནྟྭཱ མཱནཡོ རཉྙོ དསྶེསུཾ. རཱཛཱ ཏེསམྤི སཀྐཱརཾ ཀཱརེཏྭཱ ཏེཡེཝ གོཔཀེ ཨཀཱསི.

ཏདནནྟརཾ ཨཉྙམྤི སཱསནཾ ཨཱཧརིཾསུ. ནགརཏོ དཀྑིཎ པསྶེ ཨཊྛཡོཛན མཏྠཀེ ཋཱནེ ཨམྦཊྛཀོལ ཛནཔདེ ཨེཀསྨིཾ ལེཎེ རཛཏཾ ཨུཔྤཛྫི ཏསྨིཾ སམཡེ ནགརཝཱསིཀོ ཨེཀོ ཝཱཎིཛོ བཧཱུཧི སཀཊེཧི ཧལི༹དྡི སིངྒིཝེརཱདཱིནམཏྠཱཡ མལཡཾ གཏོ, ལེཎསྶ ཨཝིདཱུརེ སཀཊཱནི མུཉྩིཏྭཱ པཏོདདཱརུཾ པརིཡེསནྟོ ཏཾ པབྦཏཾ ཨབྷིརཱུལ༹ྷོ ཨེཀཾ པཎསཡཊྛིཾ ཨདྡས.

ཏསྶ མཧནྟཾ ཙཱཊིཔྤམཱཎཾ ཨེཀམེཝ པཎས ཕལཾ ནརུཎཡཊྛིཾ ནཱམེཏྭཱ ཧེཊྛཱ པཱསཱཎཔིཊྛིཡཾ ཨཊྛཱསི. སོ ཏཾ ཕལབྷཱརེན ནམིཏཾ དིསྭཱ ཨུཔགནྟྭཱ ཧཏྠེན པརཱམསིཏྭཱ པཀྐབྷཱཝཾ ཉཏྭཱ ཝཎྚཾ ཚིཎྡི པཎསཡཊྛི ཨུགྒནྟྭཱ ཡཊཱཊྛཱནཾ ཨཊྛཱསི ཝཱཎིཛོ ཨགྒཾ དཏྭཱ བྷུཉྫིསྶཱམཱིཏི ཙིནྟེཏྭཱ ཀཱལཾ གྷོསེསི. ཏདཱ ཙཏྟཱརོ ཁཱིཎཱསཝ ཨཱགནྟྭཱ ཏསྶ པུརཏོ པཱཏུརཧེསུཾ. ཝཱཎིཛོ ཏེ དིསྭཱ ཨཏྟམནོ པཱདེ ཝནྡིཏྭཱ ནིསཱིདཱཔེཏྭཱ ཏསྶ ཕལསྶ ཝཎྚཱསམནྟཱ ཝཱསིཡཱ ཏཙྪེཏྭཱ ཨཔསྶཡཾ ལུཉྩིཏྭཱ ཨཔནཱམེསི. སམནྟཏོ ཡུསཾ ཨོཏརིཏྭཱ ཨཔསྶཡཱནིཏཾ ཨཱཝཱཊཾ པཱུརེསི ཝཱཎིཛོ མནོསིལོདཀཝཎྞ པཎསཡུསཾ པཏྟེ པཱུརེཏྭཱ ཨདཱསི. ཏེ ཁཱིཎཱསཝཱ ཏསྶ པསྶནྟསྶེཝ ཨཱཀཱསམབྦྷུགྒནྟྭཱ པཀྐམིཾསུ.

སོ པུན ཀཱལཾགྷོསེསི ཨཉྙེ ཙཏྟརོ ཁཱིཎཱསཝཱ ཨཱགམིཾསུ. ཏེསམྤི ཧཏྠཏོ པཏྟེ གཧེཏྭཱ སུཝཎྞཝཎྞེཧི པན སམིཉྫེཧི པཱུརེཏྭཱ ཨདཱསི ཏེསུ ཏཡོ ཐེརཱ ཨཱཀཱསེན པཀྐམིཾསུ ཨིཏརོ ཨིཎྡགུཏྟཏྠེརོ ནཱམ ཁཱིཎཱསཝོ ཏསྶ ཏཾ རཛཏཾ ¶ དསྶེཏུཀཱམོ ཨུཔརི པབྦཏཱ ཨོཏརིཏྭཱ ཏསྶ ལེཎསྶ ཨཝིདཱུརེ ནིསཱིདིཏྭཱ པཎས མིཉྫཾ པརིབྷུཉྫཏི ཨུཔཱསཀོ ཐེརསྶ གཏཀཱལེ ཨཝསེས མིཉྫཾ ཨཏྟནཱཔི ཁཱདིཏྭཱ སེསཀཾ བྷཎྜིཀཾ ཀཏྭཱ ཨཱདཱཡ གཙྪནྟོ ཐེརཾ དིསྭཱ ཨུདཀཉྩ པཏྟདྷོཝནསཱཁཉྩ ཨདཱསི.

ཐེརོཔི ལེཎདྭཱརེན སཀཊ སམཱིཔགཱམི མགྒཾ མཱཔེཏྭཱ ཨིམིནཱ མགྒེན གཙྪ ཨུཔཱསཀཱཏི ཨཱཧ. སོ ཐེརཾ ཝནྡིཏྭཱ ཏེན མགྒེན གཙྪནྟོ ལེཎདྭཱརཾ པཏྭཱ སམནྟཱ ལེཎཾ ཨོལོཀེནྟོ ཏཾ རཛཏརཱསིཾ དིསྭཱ རཛཏཔིཎྜཾ གཧེཏྭཱ ཙཱསིཡཱ ཚིཎྡིཏྭཱ རཛཏབྷཱཝཾ ཉཏྭཱ མཧནྟཾ སཛ྄ཛྷཔིཎྜཾ གཧེཏྭཱ སཀཊ སནྟིཀཾ གནྟྭཱ ཏིཎོདཀ སམྤནྣེ ཋཱནེ སཀཊཱནི ནིཝེསེཏྭཱ ལཧུཾ ཨནུརཱདྷཔུརཾ གནྟྭཱ རཉྙྙོ དསྶེཏྭཱ ཏམཏྠཾ ནིཝེདེསི རཱཛཱ ཏསྶཱཔི ཡཐཱརཧཾ སཀྐཱརཾ ཀཱརེསི.

ཏདནྟརཾ ཨཉྙམྤི སཱསནཾ ཨཱཧརིཾསུ ནགརཏོ པཙྪིམ དིསཱབྷཱགེ པཉྩ ཡོཛན མཏྠཀེ ཋཱནེ ཨུརུཝེལ པབྦཏ མཧཱམལཀམཏྟཱ པཙཱལ༹ མིསྶཀཱ སཊྛི སཀཊཔྤམཱཎམུཏྟཱ སམུདྡཏོ ཐལམུགྒམིཾསུ ཀེཝཊྚཱ དིསྭཱ རཱཛཱརཧཾ ཝཏ བྷཎྜཾ ཨུཔྤནྣནྟི རཱསིཾ ཀཏྭཱ ཨཱརཀྑཾ དཏྭཱ པཱཏིཾ པཱུརེཏྭཱ ཨཱགནྟྭཱ རཉྙོ དསྶེཏྭཱ ཏམཏྠཾ ནིཝེདེསུཾ. རཱཛཱ ཏེསམྤི ཡཐཱརཧཾ སཀྐཱརཾ ཀཱརེསི.

པུན ཨཉྙཾ སཱསནཾ ཨཱཧརིཾསུ ནགརཏོ པཙྪིམུཏྟར ཀཎྞེ སཏྟཡོཛན མཏྠཀེ ཋཱནེ པེལི༹ཝཱཔི གཱམསྶ ཝཱཔིཡཱ ཨོཏིཎྞ ཀཎྡརེ པུལིན པུཊྛེ ནིསདཔོཏཔྤམཱཎ དཱིགྷཏོ ཝིདཏྠིཙཏུརངྒུལཱ ཨུམྨཱཔུཔྥཝཎྞཱ ཙཏྟཱརོ མཧཱམཎི ཨུཔྤཛྫིཾསུ. ཨཐེཀོ མཏྟོ ནཱམ སུནཁལུདྡོ སུནཁེ གཧེཏྭཱ ཏཏྠ ཝིཙརནྟོ ཏཾ ཋཱནཾ པཏྭཱ དིསྭཱ རཱཛཱརཧཾ ཝཏ བྷཎྜནྟི ཝཱལིཀཱཧི པཊིཙྪཱདེཏྭཱ ཨཱགནྟྭཱ རཉྙོ ནིཝེདེསི. རཱཛཱ ཏསྶཱཔི ཡཐཱརཧཾ སཀྐཱརཾ ཀཱརེསི. ཨེཝཾ རཱཛཱ ཐཱུཔཏྠཱཡ ཨུཔྤནྣཱནི ཨིཊྛཀཱདཱིནི ཏདཧེཝ ཨསྶོསི ཨིཊྛཀ རཛཏཱནཾ ཨུཔྤནྣཊྛཱནཾ ཏེནེཝ ནཱམཾ ལབྷི.

ཐཱུཔསཱདྷན ལཱབྷཀཐཱ

༢༠. ཨཐ རཱཛཱ ཐཱུཔཏྠཱཡ ཨུཔྤནྣཱནི སུཝཎྞཱདཱིནི ཨཱཧརཱཔེཏྭཱ བྷཎྜཱགཱརེསུ རཱསིཾ ཀཱརེསི ཏཏོ སབྦསམྦྷཱརེ སམཏྟེ ཝིསཱཁ པུཎྞམུཔོསཐདིཝསེ པཏྟ ཝིསཱཁ ནཀྑཏྟེ མཧཱཐཱུཔཀརཎཏྠཱཡ བྷཱུམིཔརིཀམྨཾ ཨཱརབྷི. རཱཛཱ ཐུཔཊྛཱནེ པཏིཊྛཱཔིཏཾ སིལཱཐཱུཔཾ ཧརཱཔེཏྭཱ ཐིརབྷཱཝཏྠཱཡ སམནྟཏོ ཧཏྠིཔཱཀཱར པརིཡནྟཾ གམྦྷཱིརཏོ སཏརཏནཔྤམཱཎཾ བྷཱུམིཾ ཁནཱཔེཏྭཱ པཾསུཾ ཨཔནེཏྭཱ ¶ ཡོདྷེཧི གུལ༹པཱསཱཎེ ཨཏྠརཱཔེཏྭཱ ཀམྨཱརཀཱུཊེཧི ཨཱཧནཱཔེཏྭཱ ཙུཎྞཝིཙུཎྞེ ཀཱརེསི.

ཏཏོ ཙམྨཝིནདྡྷེཧི པཱདེཧི མཧཱ ཧཏྠཱིཧི མདྡཱཔེཏྭཱ པཱསཱཎཀོཊྚིམསྶུཔརི ནཝནཱིཏ མཏྟིཀཾ ཨཏྠརཱཔེསི. ཨཱཀཱས གངྒཱཡཧི ཏིཔཏིཏཊྛཱནེ ཨུདཀབིནྡཱུནི ཨུགྒནྟྭཱ སམནྟཱ ཏིཾས ཡོཛནཔྤམཱཎཔདེསེ པཏནྟི ཡཏྠ སཡཉྫཱཏསཱལཱི ཨུཔྤཛྫཏྟི ཏཾ ཋཱནཾ ནིཙྩམེཝ ཏིནྟཏྟཱ ནིནྟསཱིསཀོལ༹ཾ ནཱམ ཚཱཏཾ. ཏཏྠ མཏྟིཀཱ སུཁུམུཏྟཱ ནཝནཱིཏ མཏྟིཀཱཏི ཝུཙྩཏི.

ཏཾ ཏཏོ ཁཱིཎསཝཱ སཱམཎེརཱ ཨཱཧརནྟི ཏཱཡ སབྦཏྠ མཏྟིཀཱཀིཙྩནྟི ཉཱཏབྦཾ. མཏྟིཀོཔརི ཨིཊྛཀཱ ཨཏྠརཱཔེསི. ཨིཊྛཀོཔརི ཁརསུཀམྨཾ, ཏསྶོཔརིཀུརུཝིཎྡཔཱསཱཎཾ, ཏསྶོཔརིཨཡོཛཱལཾ, ཏསྶོཔརི ཁཱིཎཱསཝ སཱམཎེརེཧི ཧིམཝནྟཏོ ཨཱཧཊཾ སུགཎྡྷམཱརུམྦཾ, ཏསྶོཔརི ཁཱིརཔཱསཱཎཾ, ཏསྶོཔརི ཨེལི༹ཀཔཱསཱཎཾ, ཏསྶོཔརི སཱིལཾ ཨཏྠརཱཔེསི. སབྦམཏྟིཀཱཀིཙྩེ ནཝནཱིཏམཏྟིཀཱ ཨེཝ ཨཧོསི.

སིལཱསཏྠཱརོཔརི རསོདཀ སནྟིནྟེན ཀཔིཏྠ ནིཡྻཱསེན ཨཊྛངྒུལབཧལཏམྦལོཧཔཊྚཾ, ཏསྶོཔརི ཏིལཏེལཡནྟིནྟཱཡ མནོསིལཱཡ སཏྟངྒུལ བཧལཾ རཛཏཔཊྚཾ ཨཏྠརཱཔེསི ཨེཝཾ རཱཛཱ སབྦཱཀཱརེན བྷཱུམིཔརིཀམྨཾ ཀཱརཱཔེཏྭཱ ཨཱསཱལ༹ཧི སུཀྐཔཀྑསྶ ཙཱཏུདྡས དིཝསེ བྷིཀྑུསངྒྷཱ སནྣིཔཱཏེཏྭཱ ཨེཝམཱཧ. སྭེ པུཎྞམུཔོསཐདིཝསེ ཨུཏྟརཱསཱལ༹ྷ ནཀྑཏྟེན མཧཱཙེཏིཡེ མངྒལིཊྛཀཾ པཏིཊྛཱཔེསྶཱམི སྭེ ཐཱུཔཱུཊྛཱནེ སབྦོ སངྒྷོ སནྟིཔཏཏཱུཏི ནགརེ བྷེརིཾ ཙརཱཔེསི མཧཱཛནོ ཨུཔོསཐིཀོ ཧུཏྭཱ གཎྡྷམཱལཱདཱིནི གཧེཏྭཱ ཐཱུཔཊྛཱནེ སནྣིཔཏཏཱུཏི.

ཏཏོ ཝིསཱཁསིརི དེཝནཱམཀེ དྭེ ཨམཙྩེ ཨཱཎཱཔེསི. ཏུམྷེ གནྟྭཱ མཧཱ ཙེཏིཡཊྛཱནཾ ཨལངྐརོཐཱཏི. ཏེ གནྟྭཱ སམནྟཏོ རཛཏཔཊྚཝཎྞཝཱལུཀཾ ཨོཀཱིརཱཔེཏྭཱ ལཱཛཔཉྩམཀཱནི པུཔྥཱནི ཝིཀིརིཏྭཱ ཀདལིཏོརཎཾ ཨུསྶཱཔེཏྭཱ པུཎྞགྷཊེ ཋཔཱཔེཏྭཱ མཎིཝཎྞེ ཝེལུ༹མྷི པཉྩཔཎྞདྷཛཾ བཎྡྷཱཔེཏྭཱ གཎྡྷསམྤནྣཱནི ནཱནཱཝིདྷ ཀུསུམཱནིསཎྠརཱཔེཏྭཱ ནཱནཱཔྤཀཱརེཧི ཏཾ ཋཱནཾ ཨལངྐརིཾསུ.

ཨཐ རཱཛཱ སཀལནགརཉྩ ཝིཧཱརགཱམི མགྒཉྩ ཨལངྐཱརཱཔེསི པབྷཱཏཱཡ རཏྟིཡཱ ནགརེ ཙཏུསུ དྭཱརེསུ མསྶུ ཀམྨཏྠཱཡ ནཧཱཔིཏེ, ནཧཱཔནཏྠཱཡནཧཱཔནཀེ, ཨལངྐཱརཏྠཱཡ ཀཔྤཀེཝ ནཱནཱཝིརཱག ཝཏྠ གཎྡྷམཱལཱདཱིནི ཙ སཱུཔཝྱཉྫན སམྤནྣཱནི མདྷུརབྷཏྟཱནི ཙ ཋཔཱཔེཏྭཱ སབྦེ ནགརཱ ཙ ཛཱནཔདཱ ཙ ཡཐཱརུཙིཾ མསྶཱུཀམྨཾ ཀཱརེཏྭཱ ནཧཱཏྭཱ བྷུཉྫིཏྭཱ ཝཏྠཱབྷརཎཱདཱིཧི ཨལངྐརིཏྭཱ མཧཱཙེཏིཡཊྛཱནཾ ཨཱགཙྪནྟཱུཏི ཨཱཡུཏྟཀེཧི ཨཱརོཙཱཔེསི.

སཡམྤི ¶ སབྦཱབྷརཎ ཝིབྷཱུསིཏོ ཙཏྟཱལཱིས པུརིས སཧསྶེཧི སདྡྷིཾ ཨུཔོསཀོ ཧུཏྭཱ ཨནེཀེཧི སུམཎྜིཏ པསཱདྷིཏེཧི ཨམཙྩེཧི གཧིཏཱརཀྑོ ཨལངྐཏཱཧི དེཝཀཉྙ པམཱཧི ནཱཊཀིཏྠིཧི པརིཝུཏོ ཨམརགཎ པརིཝུཏོ དེཝརཱཛཱ ཝིཡ ཨཏྟནོ སིརིསམྤཏྟིཧཱ མཧཱཛནཾ ཏོསཡནྟོ ཨནེཀེཧི ཏུརིཡ སངྒྷུཊྛེཧི ཝཏྟམཱནེཧི ཨཔརཎྷེ མཧཱཐཱུཔཊྛཱནཾ ཨུཔགཉྫི. མཧཱ ཙེཏིཡཊྛཱན མངྒལཏྠཱཡ པུཊབདྡྷཱནི ཝཏྠཱནི ཨཊྛུཏྟར སཧསྶཾ ཋཔཱཔེསི. ཙཏུསུ པསྶེསུ ཝཏྠརཱསིཾ ཀཱརེསི ཏེལ-མདྷུ-སཀྐར-ཕཱཎིཏཱདཱིནི ཙ ཋཔཱཔེསི.

ཨཐ ནཱནཱདེསཏོ བཧཱུ བྷིཀྑཱུ ཨཱགམིཾསུ རཱཛགཧཱ སམནྟཱ ཨིཎྡིགུཏྟཏྠེརོ ནཱམ ཨསཱིཏི བྷིཀྑུསཧསྶཱནི གཧེཏྭཱ ཨཱཀཱསེནཱགཉྪི ཏཐཱ བཱརཱཎསིཡཾ ཨིསིཔཏནེ མཧཱ ཝིཧཱརཏོ དྷམྨསེནཏྠེརོ ནཱམ དྭཱདས བྷིཀྑུསཧསྶཱནི. སཱཝཏྠིཡཾ ཛེཏཝན ཝིཧཱརཏོ པིཡདསྶི ནཱམ ཐེརོ སཊྛི བྷིཀྑུ སཧསྶཱནི ཝེསཱལིཡཾ མཧཱ ཝནཏོ བུདྡྷརཀྑིཏཏྠེརོ ཨཊྛཱརས བྷིཀྑུ སཧསྶཱནི, ཀོསམྦིཡཾ གྷོསིཏཱརཱམཏོ མཧཱདྷམྨརཀྑིཏཏྠེརོ ཏིཾས བྷིཀྑུསཧསྶཱནི. ཨུཛྫེནིཡཾ དཀྑིཎགིརི མཧཱ ཝིཧཱརཏོ དྷམྨརཀྑིཏཏྠེརོ ཙཏྟཱལཱིས བྷིཀྑུསཧསྶཱནི-པཱཊལིཔུཏྟེ ཨསོཀཱརཱམཏོ མིཏྟིཎྞཏྠེརོ བྷིཀྑཱུནཾ སཏསཧསྶཱནི སཊྛིཉྩ སཧསྶཱནི གཎྡྷཱར རཊྛཏོ ཨཏྟིནྣ ཐེརོ ནཱམ བྷིཀྑཱུནཾ དྭེ སཏསཧསྶཱནི ཨསཱིཏིཉྩ སཧསྶཱནི. མཧཱཔལླཝ བྷོགཏོ མཧཱདེཝཏྠེརོ བྷིཀྑཱུནཾ ཙཏྟཱརི སཏསཧསྶཱནི སཊྛིཉྩ སཧསྶཱནི ཡོནཀརཊྛེ ཨལསཎྡཱ ནགརཏོ ཡོནཀ དྷམྨརཀྑིཏཏྠེརོ ཏིཾས བྷིཀྑུ སཧསྶཱནི. ཝིཉྫྷཱཊཝིཝཏྟནིཡ སེནཱསནཏོ ཨུཏྟརཏྠེརོ ཨསཱིཏི བྷིཀྑུསཧསྶཱནི. མཧཱབོདྷིམཎྜ ཝིཧཱརཏོ ཙིཏྟགུཏྟཏྠེརོ ཏིཾས བྷིཀྑུསཧསྶཱནི ཝནཝཱསིབྷོགཏོ ཙཎྡགུཏྟཏྠེརོ ཨསཱིཏི བྷིཀྑུསཧསྶཱནི. ཀེལཱས མཧཱཝིཧཱརཏོ སུརིབྷགུཏྟཏྠེརོ ཚནྣཝུཏི སཧསྶཱནི གཧེཏྭཱ ཨཱཀཱསེནཱགཉྪི.

‘‘བྷིཀྑཱུནཾ དཱིཔཝཱསཱིནཾ-ཨཱགཏཱནཉྩ སབྦསོ,

གཎནཱཡ པརིཙྪེདོ-པོརཱཎེཧི ན བྷཱསིཏོ;

སམཱགཏཱནཾ བྷིཀྑཱུནཾ-སབྦེསཾ ཏཾ སམཱགམེ,

ཝུཏྟཱ ཁཱིཎཱསཝཱཡེཝ-ཏེ ཚནྣཝུཏི ཀོཊིཡོ;’’

ཨཐ སངྒྷོ པརིཀྑིཏྟ པཝཱལ༹ཝེདིཀཱ ཝིཡ མཛ྄ཛྷེ རཉྙོ ཨོཀཱསེ ཋཔེཏྭཱ ཨཉྙམཉྙཾ ཨགྷཊྚེཏྭཱ ཨཊྛཱསི. པཱཙིནཔསྶེ བུདྡྷརཀྑིཏནཱམཀོ ཁཱིཎཱསཱཝཏྠེརོ ཨཏྟནཱསདིསནཱམཀེ པཉྩསཏཁཱིཎཱསཝེ གཧེཏྭཱ ཨཊྛཱསི. ཏཐཱ དཀྑིཎཔསྶེ པཙྪིམཔསྶེ ཨུཏྟརཔསྶེ ¶ ཙ དྷམྨརཀྑིཏ - སངྒྷརཀྑིཏ - ཨཱནཎྡ ནཱམཀཱ ཁཱིཎཱསཝཏྠེརཱ ཨཏྟནཱ སདིསནཱམཀེ པཉྩཔཉྩསཏ ཁཱིཎཱསཝེ གཧེཏྭཱ ཨཊྛཾསུ པིཡདསྶི ནཱམ ཁཱིཎཱསཝཏྠེརོ མཧཱབྷིཀྑུསངྒྷཾ གཧེཏྭཱ པུབྦུཏྟར ཀཎྞེ ཨཊྛཱསི.

རཱཛཱ ཀིར སངྒྷམཛ྄ཛྷཾ པཝིསནྟོཡེཝ སཙེ མཡཱ ཀཡིརམཱནཾ ཙེཏིཡཀམྨཾ ཨནནྟརཱཡེན ནིཊྛཾ གཙྪཏི པཱཙིན-དཀྑིཎ-པཙྪིམ-ཨུཏྟརཔསྶེསུ བུདྡྷརཀྑིཏ-ཙམྨརཀྑིཏ-སངྒྷརཀྑིཏ-ཨཱནཎྡ ནཱམཀཱ ཐེརཱ ཨཏྟནཱསདིསནཱམཀེ པཉྩཔཉྩསཏབྷིཀྑུ གཧེཏྭཱ ཏིཊྛནྟུ པིཡདསྶི ནཱམ ཐེརོ པུབྦུཏྟརཀཎྞེ བྷིཀྑུསངྒྷཾ གཧེཏྭཱ ཏིཊྛཏཱུཏི ཙིནྟེསི. ཐེརཱཔི རཉྙོ ཨདྷིཔྤཱཡཾ ཉཏྭཱ ཏཐཱ ཋིཏཱཏི ཝདནྟཱི སིདྡྷཏྠེརོ པན མངྒལོ-སུམནོ-པདུམོ-སཱིཝལི-ཙཎྡགུཏྟོ-སཱུརིཡགུཏྟོ-ཨིཎྡགུ- ཏྟོ-སཱགརོ-ཙིཏྟསེནོ -ཛཡསེནོ-ཨཙལོཏི ཨིམེཧི ཨེཀཱདསཧི ཐེརེཧི པརིཝུཏོ པུཎྞགྷཊེ པཱུརཏོ ཀཏྭཱ པུརཏྠཱབྷིམུཁོ ཨཊྛཱསི.

ཨཐ རཱཛཱ ཏཐཱ ཋིཏཾ བྷིཀྑུསངྒྷཾ དིསྭཱ པསནྣཙིཏྟོ གཎྡྷམཱལཱདཱིཧི པཱུཛེཏྭཱ པདཀྑིཎཾ ཀཏྭཱ ཙཏཱུསུ ཋཱནེསུ ཝནྡིཏྭཱ པུཎྞསཊཊྛཱནཾ པཝིསིཏྭཱ སུཡཎྞཁཱིལེ པཊིམུཀྐཾརཛཏམཡཾ པརིབྦྷམན དཎྜཾ ཝིཛྫམཱནམཱཏཱཔིཏཱུནཾ ཨུབྷཏོ སུཛཱཏེན སུམཎྜིཏ པསཱདྷིཏེན ཨབྷིམངྒལ སམྨཏེན ཨམཙྩཔུཏྟེན གཱཧཱཔེཏྭཱ མཧནྟཾ ཙེཏིཡཱཝཊྚཾ ཀཱརེཏུཾ ཨཱརབྷི. ཏཐཱ ཀཱརེནྟཾ པན སིདྡྷཏྠཏྠེརོ ནིཝཱརེསི. ཨེཝཾ ཀིརསྶ ཨཧོསི - ཡདི མཧཱརཱཛཱ མཧནྟཾ ཙེཏིཡཾ ཀརོཏི, ཨནིཊྛིཏེཡེཝ མརིསྶཏི ཨནཱགཏེ དུཔྤརིཧརིཡཉྩ བྷཝིསྶཏཱིཏི. ཏསྨིཾ ཁཎེ བྷིཀྑུསངྒྷོ མཧཱ རཱཛ ཐེརོ པཱཎྜིཏོ, ཐེརསྶ ཝཙནཾ ཀཱཏུཾ ཝཊྚཏཱིཏི ཨཱཧ.

རཱཛཱ བྷིཀྑུསངྒྷསྶ ཨདྷིཔྤཱཡཾ ཉཏྭཱ ཐེརོ ཀརོཏཱིཏི མཉྙམཱནོ ཀཱིདིསཾ བྷནྟེ པམཱཎཾ ཀརོམཱིཏི ཨཱཧ. ཐེརོ མམ གཏགཏཊྛཱནཏོ ཙེཏིཡཱཝཊྚཾ ཀརོཧཱིཏི ཝཏྭཱ ཨུཔདིསནྟོ ཨཱཝིཛ྄ཛྷིཏྭཱ ཨགམཱསི. རཱཛཱ ཐེརསྶ ཝུཏྟནཡེན ཙེཏིཡཱཝཊྚཾ ཀཱརེཏྭཱ ཐེརཾ ཨུཔསངྐམིཏྭཱ ནཱམཾ པུཙྪིཏྭཱ གཎྡྷམཱལཱདཱིཧི པཱུཛེཏྭཱ ཝམྦཏྭཱ པརིཝཱརེཏྭཱ ཋིཏེ སེས ཨེཀཱདས ཐེརེ ཙ ཨུཔསངྐམིཏྭཱ པཱུཛེཏྭཱ ཝནྡིཏྭཱ ཏེསཾ ནཱམཱནི ཙ པུཙྪིཏྭཱ པརིབྦྷམན དཎྜགཱཧཀསྶ ཨམཙྩ པུཏྟསྶ ཏཱམ པུཙྪི.

ཨཧཾ དེཝ སུཔྤཏིཊྛིཏ བྲཧྨཱ ནཱམཱཏི ཝུཏྟེ ཏཝ པིཏཱ ཀིཾ ནཱམོཏི པུཙྪིཏྭཱན ནཎྡིསེནོ ནཱམཱཏི ཝུཏྟེ མཱཏུནཱམཾ པུཙྪི. སུམནཱདེཝཱི ནཱམཱཏི ཝུཏྟེ སབྦེསཾ ནཱམཱནི ཨབྷིམངྒལསམྨཏཱནི, མཡཱ ཀཡརམཱནཾ ཙེཏིཡཀམྨཾ ཨཝསྶཾ ནིཊྛཱནཾ གཙྪཏིཏི ཧཊྛོ ཨཧོསི, ཏཏོ རཱཛཱ མཛ྄ཛྷེ ཨཊྛ སུཝཎྞགྷཊེ ¶ རཛཏགྷཊེ ཙ ཋཔཱཔེཏྭཱ ཏེ པརིཝཱརེཏྭཱ ཨཊྛུཏྟརསཡསྶ པུཎྞགྷཊེ ཋཔཱཔེསི.

ཨཐ ཨཊྛ སུཝཎྞིཊྛཀཱ ཋཔཱཔེསི. ཏཱསུ ཨེཀེཀཾ པརིཝཱརེཏྭཱ ཨཊྛུཏྟརསཏ ཨཊྛུཏྟརསཏ རཛཏིཊྛཀཱཡོ. ཨཊྛུཏྟརསཏ ཨཊྛུཏྟརསཏ ཝཏྠཱནི ཙ ཋཔཱཔེསི. ཨཐ སུཔྤཏིཊྛིཏ བྲཧྨནཱམེན ཨམཙྩཔུཏྟེན ཨེཀཾ སུཝཎྞིཊྛཀཾ གཱཧཱཔེཏྭཱ ཏེན སདིས ནཱམེཧི ཙ ཛཱིཝམཱནཀ མཱཏཱཔིཏཱུཧི སཏྟཧི ཨམཙྩཔུཏྟེཧི སེས སཏྟིཊྛཀཱཡོ གཱཧཱཔེསི.

ཏསྨིཾ ཁཎེ མིཏྟཏྠེརོ ནཱམ པུརཏྠིམ དིསཱབྷཱགེ པརིབྦྷམིཏ ལེཁཱཡ བྷཱུམིཡཾ གཎྡྷཔིཎྜཾ ཋཔེསི. ཛཡསེནཏྠེརོ ནཱམ ཨུདཀཾ ཨཱསིཉྩིཏྭཱ སནྟིནྟེཏྭཱ སམཾ ཨཀཱསི. སུཔྤཏིཊྛིཏབྲཧྨཱ བྷདྡ ནཀྑཏྟེན ཨེཝཾ ནཱནཱཝིདྷ མངྒལཱནིསངྑཊཊྛཱནེ པཋམཾ མངྒལིཀཊྛཀཾ པཏིཊྛཱཔེསི. སུམནཏྠེརོནཱམ ཛཱཏིསུམནཔུཔྥེཧི ཏཾ པཱུཛེསི. ཏསྨིཾ ཁཎེ ཨུདཀཔརིཡནྟཾ ཀཏྭཱ མཧཱཔཐཝི ཀམྤོ ཨཧོསི. ཨེཏེནེཝ ནཡེན སེས སཏྟིཊྛཀཱཡོཔི པཏིཊྛཱཔེསུཾ.

ཏཏོ རཱཛཱ རཛཏིཊྛཀཱཡོཔི པཏིཊྛཱཔེཏྭཱ གཎྡྷམཱལཱདཱིཧི པཱུཛེཏྭཱ མངྒལཝིདྷཱནཾ ནིཊྛཱཔེཏྭཱ སུཝཎྞཔེལཱཡཔུཔྥཱནི གཱཧཱཔེཏྭཱ པཱཙཱིནཔསྶེ བྷིཀྑུསངྒྷསྶ པུརཏོ ཋིཏཾ མཧཱ བུདྡྷརཀྑིཏཏྠེརཾ ཨུཔསངྐམིཏྭཱ གཎྡྷམཱལཱདཱིཧི པཱུཛེཏྭཱ ཝནྡིཏྭཱ ཐེརསྶ པརིཝཱརེཏྭཱ ཋིཏ བྷིཀྑཱུནཉྩ ནཱམཱནི པུཙྪིཏྭཱ ཏཏོ དཀྑིཎཔསྶེ ཋིཏཾ མཧཱདྷམྨརཀྑིཏཏྠེརཾ པཙྪིམཔསྶེ ཋིཏཾ མཧཱསངྒྷརཀྑིཏཏྠེརཾ ཨུཏྟརཔསྶེ ཋིཏཾ ཨཱནཎྡཏྠེརཉྩ ཨུཔསངྐམིཏྭཱ གཎྡྷམཱལཱདཱིཧི པཱུཛེཏྭཱ པཉྩཔཏིཊྛིཏེན ཝནྡིཏྭཱ ཏཐེཝ ནཱམཱནི པུཙྪིཏྭཱ པུབྦུཏྟར ཀཎྞཾ གནྟྭཱ ཏཏྠ ཋིཏཾ པིཡདསྶི མཧཱཐེརཾ ཝནྡིཏྭཱ པཱུཛེཏྭཱ ནཱམཱནི པུཙྪིཏྭཱ སནྟིཀེ ཨཊྛཱསི.

ཐེརོ མངྒལཾ ཝཌྜྷེནྟོ རཉྙོ དྷམྨཾ དེསེསི. མངྒལཔརིཡོསཱནེ སམྤཏྟ གིཧིཔརིསཱསུ ཙཏྟཱལཱིས སཧསྶཱནི ཨརཧནྟོ པཏིཊྛཧིཾསུ. ཙཏྟཱལཱིས སཧསྶཱནི སོཏཱཔཏྟིཕལོ སཧསྶཾ སཀདཱགཱམིཕལེ, སཧསྶཾ ཨནཱགཱམིཕལེ, བྷིཀྑཱུནཾ པན ཨཊྛཱརསསཧསྶཱནི ཨརཧཏྟཾ པཱཔུཎིཾསུ. བྷིཀྑུནཱིནཾ ཙཏུདྡས སཧསྶཱནཱིཏི.

ཐཱུཔཱརམྷ ཀཐཱ

༢༡. ཏཏོ རཱཛཱ བྷིཀྑུསངྒྷཾ ཝནྡིཏྭཱ ཡཱཙ མཧཱཙེཏིཡཾ ནིཊྛཱཏིནཱཝ མེ བྷིཀྑུསངྒྷོ བྷིཀྑཾ གཎྷཱཏཱུཏི ཨཱཧ. བྷིཀྑཱུ ནཱདྷིཝཱསེསུ, ཨནུཔུབྦེན ཡཱཙནྟོ ཨུཔལླབྷིཀྑཱུནཾ སཏྟཱཧཾ ཨདྷིཝཱསནཾ ལབྷིཏྭཱ ཐཱུཔཊྛཱནསྶ སམནྟཏོ ཨཊྛཱརསསུ ཋཱནེསུ མཎྜཔེ ཀཱརཡིཏྭཱ ¶ བྷིཀྑུསངྒྷཾ ནིསཱིདཱཔེཏྭཱ སཏྟཱཧཾ མཧཱདཱནཾ དཏྭཱ སབྦེསཾཡེཝ ཏེལ-མདྷུ-པཱཎིཏཱདི བྷེསཛྫཾ དཏྭཱ བྷིཀྑུསངྒྷཾ ཝིསྶཛྫེསི ཏཏོ ནགརེ བྷེརིཾཙཱརཱཔེཏྭཱ སབྦེ ཨིཊྛཀ ཝཌྜྷཀི སནྟིཔཱཏེསི. ཏེ པཉྩསཏམཏྟཱ ཨཧེསུཾ.

ཏེསུ ཨེཀོ ཨཧཾ རཉྙོ ཙིཏྟཾ ཨཱརཱདྷེཏྭཱ མཧཱཙེཏིཡཾ ཀཱཏུཾ སཀྐོམཱིཏི རཱཛཱནཾ པསྶི རཱཛཱ ཀཐཾ ཀརོསཱིཏི པུཙྪི. ཨཧཾ དེཝ པེསིཀཱནཾ སཏཾ གཧེཏྭཱ ཨེཀཱཧཾ ཨེཀཾ པཾསུསཀཊཾ ཁེཔེཏྭཱ ཀམྨཾ ཀརོམཱིཏི ཨཱཧ. རཱཛཱ ཨེཝཾ སཏི པཾསུརཱསིཀཾ བྷཝིསྶཏི. ཏིཎརུཀྑཱདཱིནི ཨུཔྤཛྫིསྶནྟི ཨདྡྷཱནཾ ནཔྤཝཏྟཏཱིཏི ཏཾ པཊིབཱཧི.

ཨཉྙོ ཨཧཾ པུརིསསཏཾ གཧེཏྭཱ ཨེཀཱཧཾ ཨེཀཾ པཾསུགུམྦཾ ཁེཔེཏྭཱ ཀམྨཾ ཀརོམཱིཏི ཨཱཧ.

ཨཉྙོ པཾསཱུནཾ པཉྩམྨཎཱནི ཁེཔེཏྭཱ ཀམྨཾ ཀརོམཱིཏི ཨཱཧ.

ཨཉྙོ དྭེ ཨམྨཎཱནི ཁེཔེཏྭཱ ཀམྨཾ ཀརོམཱིཏི ཨཱཧ. ཏེཔི རཱཛཱ པཊིབཱཧིཡེཝ.

ཨཐ ཨཉྙོ པཎྜིཏོ ཨིཊྛཀ ཝཌྜྷཀཱི ཨཧཾ དེཝ ཨུདུཀྑལེ ཀོཊྚེཏྭཱ སུཔྤེཧི ཝཊྚེཏྭཱ ནིསདེཔིཾསིཏྭཱ པཾསཱུནཾ ཨེཀམྨཎཾ ཨེཀཱཧེནེཝ ཁེཔེཏྭཱ པེསིཀཱནཾ སཏཾ གཧེཏྭཱ ཀམྨཾ ཀརོམཱིཏི ཨཱཧ.

རཱཛཱ ཨེཝཾ སཏི མཧཱཙེཏིཡེ ཏིཎཱདཱིནི ན བྷཝིསྶནྟི ཙིརཊྛིཏིཀཉྩ བྷཝིསྶཏིཏི སམྤཊིཙྪིཏྭཱ པུན པུཙྪི-ཀིཾ སཎྛཱནཾ པན ཀརིསྶསཱིཏི.

ཏསྨིཾ ཁཎེ ཝིསྶཀམྨ དེཝཔུཏྟོ ཝཌྜྷཀིསྶ སརཱིརེ ཨདྷིམུཙྩི. ཝཌྜྷཀཱི སུཝཎྞཔཱཏིཾ པཱུརེཏྭཱ ཨུདཀམཱཧརཱཔེཏྭཱ པཱཎིནཱ ཨུདཀཾ གཧེཏྭཱ ཨུདཀཔིཊྛིཡཾ ཨཱཧནི. ཨེལི༹ཀགྷཊ སདིསཾ མཧནྟཾ ཨུདཀབུབྦུལཾ ཨུཋྛཱསི. དེཝ ཨཱིདིསཾ ཀརོམཱིཏི ཨཱཧ.

རཱཛཱ སཱདྷཱུཏི སམྤཊིཙྪིཏྭཱ ཏསྶ སཧསྶགྒྷནཀཾ སཱཊཀ ཡུགལཾ, སཧསྶགྒྷནཀཾཡེཝ པུཎྞཀཾ ནཱམ སུཝཎྞཱལངྐཱརཾ སཧསྶགྒྷནཀཱ པཱདུཀཱ, དྭཱདས ཀཧཱཔན སཧསྶཱནི ཙ དཏྭཱ ཨནུརཱུཔཊྛཱནེ གེཧཉྩ ཁེཏྟཉྩ དཱཔེསི.

ཏཏོ རཱཛཱརཏྟིབྷཱགེ ཙིནྟེསི ཀཐཾ ནཱམ མནུསྶེ ཨཔཱིལེཏྭཱ ཨིཊྛཀཱ ཨཱཧརཱཔེཡྻནྟི དེཝཏཱ རཉྙོ ཙིཏྟཾ ཉཏྭཱ ཙེཏིཡསྶ ཙཏུསུ དྭཱརེསུ ཨེཀེཀདིཝསཔྤཧོཎཀཾ ཀཏྭཱ ཏསྶཱཡེཝ རཏྟིཡཱ ཨིཊྛཀཱརཱསིཾ ཨཀཾསུ ཝིཧཱཏཱཡ རཏྟིཡཱ མནུསྶཱ དིསྭཱ རཉྙོ ཨཱརོཙེསུཾ. རཱཛཱ ཏུསྶིཏྭཱ ཝཌྜྷཀིཾ ཀམྨེ པཊྛཔེསི. དེཝཏཱ ཨེཏེནེཝ ནཡེན ཡཱཝ མཧཱཙེཏིཡསྶ ནིཊྛཱནཾ ཏཱཝ ཨེཀེཀསྶ ¶ དིཝསསྶ པཧོཎཀཾ ཀཏྭཱ ཨིཊྛཀཱ ཨཱཧརིཾསུ. སཀལདིཝསབྷཱགེ ཀམྨཾ ཀཏཊྛཱནེ མཏྟིཀཱ ཨིཊྛཀ ཙུཎྞཾ ཝཱཔི ན པཉྙཱཡཏི. རཏྟིཡཾ དེཝཏཱ ཨནྟརདྷཱཔེནྟི.

ཨཐ རཱཛཱ མཧཱཙེཏིཡེཀམྨཀཱརཱཡཙཏུཔརིསཱཡཧཏྠ ཀམྨམཱུལཏྠཾཙཏུསུ དྭཱརེསུ ཨེཀེཀསྨིཾ དྭཱརེ སོལ༹ས ཀཧཱཔན སཧསྶཱནི ཝཏྠཱལངྐཱར-གནྡྷ-མཱལ-ཏེལ-མདྷུ-ཕཱཎིཏ-པཉྩཀཊུཀ བྷེསཛྫཱནི ནཱནཱཝིདྷ སཱུཔཝྱཉྫན སཾཡུཏྟཾ བྷཏྟཾ ཡཱགུཁཛྫཀཱདཱིནི ཨཊྛཝིདྷ ཀཔྤིཡཡ པཱནཀཱནི པཉྩཝིདྷ མུཁཝཱས སཧིཏ ཏཱམྦཱུལཱནི ཙ ཋཔཱཔེཏྭཱ མཧཱཙེཏིཡེ ཀམྨཾ ཀརོནྟཱགཧཊྛཱ ཝཱ པབྦཛིཏཱ ཝཱ ཡཐཱཛ྄ཛྷཱསཡཾ གཎྷནྟུ མུལཾ ཨགཧེཏྭཱ ཀམྨཾ ཀརོནྟཱནཾ ཀཱཏུཾ ན དེཐཱཏི ཨཱཎཱཔེསི.

ཨཐེཀོ ཐེརོ ཙེཏིཡཀམྨེ སཧཱཡ བྷཱཝཾ ཨིཙྪནྟོ ཀམྨཀརཎཊྛཱནེ མཏྟིཀཱ སདིསཾ ཀཏྭཱ ཨཏྟཱནཾ ཨབྷིསངྑཊཾ མཏྟིཀཱ པིཎྜཾ ཨེཀེན ཧཏྠེན གཧེཏྭཱ ཨཉྙེན མཱལཱ གཧེཏྭཱ མཧཱཙེཏིཡངྒཎཾ ཨཱརུཡ྄ཧ རཱཛཀམྨིཀེ ཝཉྩེཏྭཱ ཝཌྜྷཀིསྶ ཨདཱསི. སོ གཎྷནྟོཝ པཀཏིམཏྟི ཀཱ ནཱ བྷཝཏཱིཏི ཉཏྭཱ ཐེརསྶ མུཁཾ ཨོལོཀེསི ཏསྶཱཀཱརཾ ཉཏྭཱ ཏཏྠ ཀོལཱཧལ མཧོསི ཨནུཀྐམེན རཱཛཱ སུཏྭཱ ཨཱགནྟྭཱ ཝཌྜྷཀིཾ པུཙྪི-ཏུཡ྄ཧཾ ཀིར བྷཎེ ཨེཀོ བྷིཀྑུ ཨམཱུལཀ མཏྟིཀཱཔིཎྜཾ ཨདཱསཱིཏི.

སོ ཨེཝམཱཧ-ཡེབྷུཡྻེན ཨཡྻཱ ཨེཀེན ཧཏྠེན པུཔྥཾ ཨེཀེན མཏྟིཀཱཔིཎྜེ གཧེཏྭཱ ཨཱཧརིཏྭཱ དེནྟི ཏེནཱཧཾ ཨཛཱནིཏྭཱ ཀམྨེ ཨུཔནེསིཾ ‘‘ཨཡཾ པན ཨཱགནྟུཀོ, ཨཡཾ ནེཝཱསིཀོཏི ཨེཏྟཀཾ ཛཱནཱམཱིཏི.‘‘ཏེན ཧི ཏཾ ཐེརཾ ཨིམསྶ དསྶེཧཱིཏི ཨེཀཾ མཧལླཀ བལཏྠཾ ཝཌྜྷཀིསྶ སནྟིཀེ ཋཔེསི ཝཌྜྷཀཱི པུན ཨཱགཏཀཱལེ ཏཾ ཐེརཾ བལཏྠསྶ དསྶེསི སོ ཏཾ སཉྫཱནིཏྭཱ རཉྙོ ཨཱརོཙེསི.

རཱཛཱ ཏསྶ སཉྙཾ ཨདཱསི. ཏོ ཏྭཾ ཏཡོ ཛཱཏིསུམན མཀུལཀུམྦྷེ མཧཱབོདྷི ཨངྒཎེ རཱསིཾ ཀཏྭཱ གཎྡྷཉྩ ཋཔེཏྭཱ མཧཱབོདྷི ཨངྒཎཾ གཏ ཀཱལེ ཨཱགནྟུཀསྶ ཐེརསྶ པཱུཛནཏྠཱཡ རཉྙོ དཱཔིཏཾ གཎྡྷམཱལཱནྟི ཝཏྭཱ དེཧཱིཏི. བལཏྠོ རཉྙོ ཝུཏྟནཡེནེཝ ཏསྶ བོདྷི ཨངྒཎཾ གཏ ཀཱལེ ཏཾ གཎྡྷམཱལཾ ཨདཱསི.

སོཔི སོམནསྶཔྤཏྟོ ཧུཏྭཱ སེལསཎྠརཾ དྷོཝིཏྭཱ གཎྡྷེན པརིབྷཎྜཾ ཀཏྭཱ སིལཱསནྠརཾ ཀཏྭཱ པུཔྥཾ པཱུཛེཏྭཱ ཙཏུསུ ཋཱནེསུ ཝནྡིཏྭཱ པཱཙཱིནདྭཱརེ ཨཉྫལིཾ པགྒཡ྄ཧ པཱིཏིཾ ཨུཔྤཱདེཏྭཱ པུཔྥ པཱུཛཾ ཨོལོཀེནྟོ ཨཊྛཱསི.

བལཏྠོ ཏསྨིཾ ཀཱལེ ཏཾ ཐེརཾ ཨུཔསངྐམིཏྭཱ ཝནྡིཏྭཱ ཨེཝམཱཧ. བྷནྟེ ཏུམྷཱཀཾ ཙེཏིཡཀམྨེ སཧཱཡབྷཱཝཏྠཱཡ དིནྣསྶ ཨམཱུལཀ ¶ མཏྟིཀཱཔིཎྜསྶ མཱུལཾ དིནྣབྷཱཝཾ རཱཛཱ ཛཱནཱཔེཏི ཨཏྟནོ ཝནྡནེན ཝནྡཱཔེཏཱིཏི. ཏཾ སུཏྭཱ ཐེརོ ཨནཏྟམནོ ཨཧོསི. བལཏྠོ ཏིཊྛནྟུ བྷནྟེ ཏཡོ སུམན མཀུལ ཀུམྦྷཱཏཏྟཀཱནེཝ སུཝཎྞཔུཔྥཱནིཔི ཨེཏཾ མཏྟིཀཔིཎྜཾ ནཱགྒྷནྟི. ཙིཏྟཾ པསཱདེཐ བྷནྟེཏི པཀྐཱམི.

ཏདཱ ཀོཊྛིཝཱལཛནཔདེ པིཡངྒལླ ཝིཧཱརཝཱསཱི ཨེཀོ ཐེརོ ཨིཊྛཀཝཌྜྷཀིསྶ ཉཱཏཀོ ཨཧོསི. སོ ཨཱགནྟྭཱ ཝཌྜྷཀིནཱ སདྡྷིཾ མནྟེཏྭཱ དཱིགྷ བཧལ ཀིརིཡཏོ ཨིཊྛཀཔྤམཱཎཾ ཛཱནིཏྭཱ གནྟྭཱ སཧཏྠེནེཝ སཀྐཙྩཾ མཏྟིཀཾ མདྡིཏྭཱ ཨིཊྛཀཾ ཀཏྭཱ པཙིཏྭཱ པཏྟཏྠཝིཀཱཡ པཀྑིཔིཏྭཱ པཙྩཱགནྟྭཱ ཨེཀེན ཧཏྠེན རཉྙོ ཨིཊྛཀཾ ཨེཀེན པུཔྥཾ གཧེཏྭཱ ཨཏྟནོ ཨིཊྛཀཱས སདྡྷིཾ རཉྙོ ཨིཊྛཀཾ ཨདཱསི. ཝཌྜྷཀཱི གཧེཏྭཱ ཀམྨེ ཨུཔནེསི.

ཐེརོ སཉྫཱཏ པཱིཏི སོམནསྶོ མཧཱཙེཏིཡེ ཀམྨཾ ཀརོནྟོ ཨིཊྛ ཀསཱལཔརིཝེཎེ ཝསཏི ཏསྶ ཏཾ ཀམྨཾ པཱཀཊཾ ཨཧོསི. རཱཛཱ ཝཌྜྷཀིཾ པུཙྪི-བྷཎེ ཨེཀེན ཀིར ཨཡྻེན ཨམཱུལིཀ ཨིཊྛཀཱ དིནྣཱཏི. སཙྩཾ དེཝ, ཨེཀེན ཨཡྻེན དིནྣ ཨིཊྛཀཱ ཨམྷཱཀཾ ཨིཊྛཀཱཡ སདིསཱཏི ཀམྨེ ཨུཔནེསིནྟི ཨཱཧ. པུན ཏཾ ཨིཊྛཀཾ སཉྫཱནཱསཱིཏི རཉྙཱ ཝུཏྟེ ཉཱཏཀཱནུགྒཧེན ན ཛཱནཱམཱིཏི ཨཱཧ.

རཱཛཱ ཡདི ཨེཝཾ ཏཾ ཨིམསྶ དནྣེཧཱིཏི བལཏྠཾ ཋཔེསི སོ ཏཾ པུབྦེ ཝིཡ བལཏྠསྶ དསྶེསི. བལཏྠོ པརིཝེཎཾ གནྟྭཱ སནྟིཀེ ནིསཱིདིཏྭཱ པཊིསཎྠཱརཾ ཀཏྭཱ བྷནྟེ ཏུམྷེ ཨཱགནྟུཀཱ ནེཝཱསིཀཱཏི པུཙྪི. ཨཱགནྟུཀོམྷཱི ཨུཔཱསཀཱཏི. ཀཏར རཊྛཝཱསིཀོ བྷནྟེཏི ཀོཊྛིཝཱལཛནཔདེ པིཡངྒལླ ཝིཧཱརཝཱསིམྷི ཨུཔཱསཀཱཏི ཨིདྷེཝ ཝསཐ གཙྪཐཱཏི. ཨིདྷ ན ཝསཱམ ཨསུཀདིཝསེ གཙྪཱམཱཏི ཨཱཧ. བལཏྠོཔི ཨཧམྤི ཏུམྷེཧི སདྡྷིཾ ཨཱགམིསྶཱམི. མཡ྄ཧམྤི གཱམོ ཨེཏསྨིཾཡེཝ ཛནཔདེ ཨསུཀ གཱམོ ནཱམཱཏི ཨཱཧ. ཐེརོ སཱདྷཱུཏི སམྤཊིཙྪི. བལཏྠོ ཏཾ པཝཏྟིཾ རཉྙོ ནིཝེདེསི.

རཱཛཱ བལཏྠསྶ སཧསྶགྒྷནཀཾ ཝཏྠཡུགལཾ མཧགྒྷཾ རཏྟཀམྦལཾ ཨུཔཱཧནཡུགཾ སུགཎྡྷཏེལནཱལི༹ཾ ཨཉྙྩ བཧུཾ སམཎཔརིཀྑཱརཾ ཐེརསྶ དེཧཱིཏི དཱཔེསི སོཔི པརིཀྑཱརཾ གཧེཏྭཱ པརིཝེཎཾ གནྟྭཱ ཐེརེན སདྡྷིཾ རཏྟིཾ ཝསིཏྭཱ པཱཏོ སདྡྷིཾཡེཝ ནིཀྑམིཏྭཱ ཨནུཔུབྦེན གནྟྭཱ པིཡངྒལླ ཝིཧཱརསྶ དིསྶམཱནེ ཋཱནེ སཱིཏཙྪཱཡཱཡ ཐེརཾ ནིསཱིདཱཔེཏྭཱ པཱདེ དྷོཝིཏྭཱ གཎྡྷཏེལེན མཀྑེཏྭཱ གུལོ༹དཀཾ པཱཡེཏྭཱ ཨུཔཱཧནཾ པཊིམུཉྩིཏྭཱ ཨིདཾ མེ པརིཀྑཱརཾ ཀུལཱུཔགཐེརསྶཏྠཱཡ གཧིཏཾ, ཨིདཱནི ཏུམྷཱཀཾ དམྨི, ཨིདཾ པན སཱཊཀཡུགཾ མམ པུཏྟསྶ མངྒལཏྠཱཡ གཧིཏཾ, ¶ ཏུམྷེ ཙཱིཝརཾ ཀཏྭཱ པཱརུཔཐཱཏི ཝཏྭཱ ཐེརསྶ པཱདམཱུལེ ཋཔེསི.

ཐེརོ སཱཊཀཡུགཾ པཏྟཏྠཝིཀཱཡ པཀྑིཔིཏྭཱ སེསཔརིཀྑཱརཾ བྷཎྜིཀཾ ཀཏྭཱ ཨུཔཱཧནཾ ཨཱརུཡ྄ཧཾ ཀཏྟཡཊྛིཾ གཧེཏྭཱ མགྒཾ པཊྤཛྫི. བལཏྠོ ཏེན སདྡྷིཾ ཐོཀཾ གནྟྭཱ ‘‘ཏིཊྛཐ བྷནྟེ, མཡ྄ཧཾ ཨཡཾ མགྒོ‘‘ཏི ཝཏྭཱ པུབྦེ ཝུཏྟནཡེནེཝ རཉྙོ སཱསནཾ ཐེརསྶ ཨཱརོཙེསི

ཐེརོ ཏཾ སུཏྭཱ མཧནྟེན པརཀྐམེན ཀཏཀམྨཾ ཨཀཏཾ ཝིཡ ཛཱཏནྟི དོམནསྶཔྤཏྟོ ཧུཏྭཱ ཨསྶུདྷཱརཾ པཝཏྟེཏྭཱ’ཨུཔཱསཀ ཏཝ པརིཀྑཱརཾ ཏྭམེཝ གཎྷཱཧཱི‘‘ཏི ཋིཏཀོཝ སབྦཱཔརིཀྑཱརཾ ཚཌྜེསི བལཏྠོ ཀིཾ ནཱམ བྷནྟེ ཝདཐ ཨེས རཱཛཱ ཏུཡ྄ཧཾ བྷཝགྒཔྤམཱཎཾ ཀཏྭཱ པཙྩཡཾ དེནྟོཔི ཏཝ ཨིཊྛཀཱནུརཱུཔཾ ཀཱཏུཾ ན སཀྐོཏི. ཀེཝལཾ པན མཧཱཙེཏིཡེ ཀམྨཾ ཨཉྙེསཾ ཨཔཏྟཀཾ ཀཏྭཱ ཀརོམཱིཏི ཨདྷིཔྤཱཡེན ཨེཝཾ ཀཱརེཏི ཏུམྷེ པན བྷནྟེ ཨཏྟནཱ ལདྡྷཔརིཀྑཱརཾ གཧེཏྭཱ ཙིཏྟཾ པསཱདེཐཱཏི ཝཏྭཱ ཐེརཾ སཉྙཱཔེཏྭཱ པཀྐཱམི. ཨིམསྨིཾ པན ཙེཏིཡེ བྷཏིཡཱ ཀམྨཾ ཀཏྭཱ ཙིཏྟཾ པསཱདེཏྭཱ སགྒེ ནིབྦཏྟ སཏྟཱནཾ པམཱཎཾ ནཏྠི.

ཏཱཝཏིཾས བྷཝནེ ཀིར ནིབྦཏྟ དེཝདྷཱིཏརོ ཨཏྟནོ སམྤཏྟིཾ ཨོལོཀེཏྭཱ ཀེན ནུ ཀོ ཀམྨེན ཨིམཾ སམྤཏྟིཾ ལབྷིམྷཱཏི ཨཱཝཛྫམཱནཱ མཧཱཙེཏིཡེ བྷཏིཡཱ ཀམྨཾ ཀཏྭཱ ལདྡྷབྷཱཝཾ ཉཏྭཱ བྷཏིཡཱ ཀཏཀམྨསྶཱཔི ཕལཾ ཨཱིདིསཾ, ཨཏྟནོ སནྟཀེན ཀམྨཕལཾ སདྡཧིཏྭཱ ཀཏཀམྨསྶ ཕལཾ ཀཱིདིསཾ བྷཝིསྶཏཱིཏི ཙིནྟེཏྭཱ དིབྦགཎྡྷམཱལཾ ཨཱདཱཡ རཏྟིབྷཱགེ ཨཱགནྟྭཱ པཱུཛེཏྭཱ ཙེཏིཡཾ ཝནྡནྟི.

ཏསྨིཾ ཁཎེ བྷཱཏིཝངྐཝཱསཱི མཧཱསཱིཝཏྠེརོ ནཱམ ཙེཏིཡཾ ཝནྡནཏྠཱཡ གཏོ, ཏཱ ཝནྡནྟིཡོ དིསྭཱ མཧཱསཏྟཔཎྞིརུཀྑསམཱིཔེ ཋིཏོ ཏཱསཾ ཡཐཱརུཙིཾ ཝནྡིཏྭཱ གམནཀཱལེ པུཙྪི? ཏུམྷཱཀཾ སརཱིརཱལོཀེན སཀལཏམྦཔཎྞིདིཔོ ཨེཀཱལོཀོ, ཀིཾ ཀམྨཾ ཀརིཏྠཱཏི བྷནྟེ ཨམྷཱཀཾ སནྟཀེ ཀཏཀམྨཾ ནཱམ ནཏྠི ཨིམསྨིཾ ཙེཏིཡེ མནཾ པསཱདེཏྭཱ བྷཏིཡཱ ཀམྨཾ ཀརིམྷཱཏི ཨཱཧཾསུ ཨེཝཾ བུདྡྷསཱསནེ པསནྣཙིཏྟེན བྷཏིཡཱ ཀཏཀམྨམྤི མཧཔྥལཾ ཧོཏི. ཏསྨཱ-

‘‘ཙིཏྟཔྤསཱདམཏྟེན-སུགཏེ གཏི ཨུཏྟམཱ,

ལབྦྷཏཱིཏི ཝིདིཏྭཱན-ཐཱུཔཔཱུཛཾ ཀརེ བུདྡྷོ’’ཏི;

ཨེཝཾ རཱཛཱ ཙེཏིཡཀམྨཾ ཀཱརཱཔེནྟོ པུཔྥདྷཱནཏྟཡཾ ནིཊྛཱཔེསི. ཏཾ ཁཱིཎཱསཝ ཐིརབྷཱཝཏྠཱཡ བྷཱུམིསམཾ ཀཏྭཱ ཨོསཱིདཱཔེསུཾ, ཨེཝཾ ནཝཝཱརེ ཙིཏཾ ཙིཏཾ ཨོསཱིདཱཔེསུཾ. རཱཛཱ ཀཱརཎཾ ཨཛཱནནྟོ ཨནཏྟམནོ ¶ ཧུཏྭཱ བྷིཀྑུསངྒྷཾ སནྣིཔཱཏེསི. ཨསཱིཏི བྷིཀྑུསཧསྶཱནི སནྣིཔཏིཾསུ རཱཛཱ བྷིཀྑུསངྒྷཾ གཎྡྷམཱལཱདཱིཧི པཱུཛེཏྭཱ ཝནྡིཏྭཱ པུཙྪི’བྷནྟེ མཧཱཙེཏིཡེ པུཔྥདྷཱནཏྟཡཾ ནཝཝཱརེ ན ཛཱནཱམཱི’ཏི བྷིཀྑུསངྒྷོ ཨཱཧ མཧཱརཱཛ ཏུཡ྄ཧཾ ཀམྨསྶ ཝཱ ཛཱིཝིཏསྶ ཝཱ ཨནྟརཱཡོ ནཏྠི. ཨནཱགཏེ ཐིརབྷཱཝཏྠཱཡ ཨིདྡྷིམནྟེཧི ཨོསཱིདཱཔིཏཾ, ཨིཏོ པཊྛཱཡ ན ཨོསཱིདཱཔེསྶནྟི. ཏྭཾ ཨཉྙཐཏྟཾ ཨཀཏྭཱ མཧཱཐཱུཔཾ སམཱཔེཧཱིཏི. ཏཾ སུཏྭཱ ཧཊྛོ རཱཛཱ ཐཱུཔཀམྨཾ ཀཱརེསི.

དསཔུཔྥདྷཱནཱནི དསཧི ཨིཊྛཀཱཀོཊཱིཧི ནིཊྛནཾ གམིཾསུ པུན པུཔྥདྷཱནཏྟཡེ ནིཊྛིཏེ བྷིཀྑུསངྒྷོ ཨུཏྟར-སུམན ནཱམཀེ དྭེ ཁཱིཎཱསཝ སཱམཎེརེ ཨཱཎཱཔེསི. ཏུམྷེ སམཙཏུརསྶཾ ཨཊྛརཏན བཧལཾ ཨེཀེཀ པསྶཏོ ཨསཱིཏི ཨསིཏི ཧཏྠཔྤམཱཎཾ ཚམེདཀ ཝཎྞཔཱསཱཎེ ཨཱཧརཐཱཏི. ཏེ སཱདྷཱུཏི སམྤཊིཙྪིཏྭཱ ཨུཏྟརཀུརུཾ གནྟྭཱ ཙུཏྟཔྤཀཱརཔྤམཱཎེ བྷཎྜིཔུཔྥནིཧེཚ མེདཝཎྞཔཱསཱཎེ ཨཱཧརིཏྭཱ ཨེཀཾ པཱསཱཎཾ དྷཱཏུགབྦྷསྶ བྷཱུམིཡཾ ཨཏྠརིཏྭཱ ཙཏྟཱརོ པཱསཱཎེ ཙཏུསུ པསྶེསུ སཾཝིདྷཱཡ ཨཔརཾ དྷཱཏུགབྦྷཾ པིདཧནཏྠཱཡ པཱཙཱིན དིསཱབྷཱགེ ཝཱལུཀ པཱཀཱར སམཱིཔེ ཨདིསྶམཱནཾ ཀཏྭཱ ཋཔེསུཾ.

༢༢. ཏཏོ རཱཛཱ དྷཱཏུགབྦྷསྶ མཛ྄ཛྷེ སབྦརཏནམཡཾ སབྦཱཀཱརསམྤནྣཾ མནོཧརཾ བོདྷིརུཀྑཾ ཀཱརེསི སོ ཧི ཨིཎྡནཱིལམཎིབྷཱུམིཡཾ པཏིཊྛིཏོ, ཏསྶམཱུལཱནི པཙཱལ༹མཡཱནི, ཁཎྡྷོ སིརིཝཙྪཱདཱིཧི ཨཊྛམངྒལིཀེཧི པུཔྥཔནྟི ལཏཱཔནྟི ཙཏུཔྤད ཧཾསཔནྟིཧི ཙ ཝིཙིཏྟོ ཨཊྛཱརས ཧཏྠུབྦེདྷོ རཛཏམཡོ ཨཧོསི.

པཉྩམཧཱསཱཁཱཔི ཨཊྛཱརསཧཏྠཱཙ, པཏྟཱཔི མཎིམཡཱནི, པཎྜུཔཏྟཱནི, ཧེམམཡཱནི, ཕལཱ པཝཱལ༹མཡཱནི. ཏཐཱ ཨངྐུརོཔརི ཙེལཝིཏཱནཾ བཎྡྷཱཔེསི. ཏསྶ ཨནྟེ སམནྣཏོ མུཏྟམཡ ཀིངྐིཎིཀཛཱལཾ ཨོལམྦཏི. སྭཎྞགྷཎྚཱཔནྟི ཙ སུཝཎྞདཱམཱནི ཙ ཏཧིཾ ཏཧིཾ ཨོལམྦནྟི ཝིཏཱནསྶ ཙཏུསུ ཀཎྞེསུ ནཝསཏསཧསྶགྒྷནཀོ ཨེཀེཀོ མུཏྟཱཀལཱཔོ ཨོལམྦཏི. ཏཏྠ ཡཐཱནུརཱུཔཾ ནཱནཱརཏན ཀཏཱནེཝ ཙཎྡ-སཱུརིཡ-ཏཱརཀཱརཱུཔཱནི པདུམཱནི ཙ ཨཔྤིཏཱནི ཨཧེསུཾ. མཧགྒྷཱནི ཨནེཀཝཎྞཱནི ཨཊྛུཏྟར སཧསྶཱནི ཝཏྠཱནི ཨོལམྦིཾསུ.

ཏཏོ བོདྷིརུཀྑསྶ སམནྟཏོ སཏྟ རཏནམཡ ཝེདིཀཱ ཀཱརེཏྭཱ མཧཱམལཀ མུཏྟཱ ཨཏྠརཱཔེསི མུཏྟཱ ཝེདིཀཱནཾ ཨནྟརེ གཎྡྷོདཀ པུཎྞ སཏྟརཏནམཡ པུཎྞགྷཊ པནྟིཡོ ཋཔཱཔེསི. ཏཱསུ སུཝཎྞགྷཊེ པཝཱལ༹མཡཱནི པུཔྥཱནི ཨཧེསུཾ. པཝཱལ༹གྷཊེ སུཝཎྞམཡཱནི པུཔྥཱནི. མཎིགྷཊེ རཛཏམཡཱནི པུཔྥཱནི ¶ རཛཏགྷཊེ མཎིམཡཱནིཔུཔྥཱཏི. སཏྟརཏནགྷཊེ སཏྟརཏནམཡཱནི པུཔྥཱནི ཨཧེསུཾ.

བོདྷིརུཀྑསྶ པཱཙཱིན དིསཱབྷཱགེ རཏནམཡེ ཀོཊིཨགྒྷནཀེ པལླངྐེ གྷནཀོཊྚིམ སུཝཎྞམཡཾ བུདྡྷཔཊིམཾ ནིསཱིདཱཔེསི. ཏསྶཱ པཊིམཱཡ ཝཱིསཏི ནཁཱ ཨཀྑིནཾ སེཏཊྛཱནཱནི ཙ ཕལ༹ཀམཡཱནི. ཧཏྠཏལ པཱདཏལ དནྟཱཝརཎཱནི ཨཀྑཱིནཾ རཏྟཊྛཱཏཱནི ཙ པཝཱལ༹མཡཱནི ཀེས བྷམུཀཱནི ཨཀྑིནཾ ཀཱལ༹ཀཊྛཱནཱནི ཙ ཨིཎྡནཱིལ མཎིམཡཱནི ཨུཎྞཱལོམཾ པནཾ རཛཏམཡཾ ཨཧོསི. ཏཏོ སཧམྤཏི མཧཱ བྲཧྨཱནཾ རཛཏཙྪཏྟཾ དྷཱརེཏྭཱ ཋིནཾ ཀཱརེསི. ཏཏཱ དྭཱིསུ དེཝལོཀེསུ དེཝཏཱཧི སདྡྷིཾ ཝིཛཡུཏྟརསངྑཾ གཧེཏྭཱ ཨབྷིསེཀཾ དདམཱནཾ སཀྐཾ དེཝརཱཛཱནཾ པཉྩསིཁ དེཝཔུཏྟཾ བེལུ༹ཝ པཎྜུ ཝཱིཎམཱདཱཡ གཎྡྷབྦཾ ཀུརུམཱནཾ. མཧཱཀཱལ༹ ནཱགརཱཛཱནཾ ནཱགཀཉྙཱཔརིཝུཏཾ ནཱནཱཝིདྷེནཐུཏིགྷོསེན ཏཐཱགཏཾ ཝཎྞེནྟཾ ཀཱརེསི.

ཝསཝཏྟིམཱརམྤན བཱཧུསཧསྶཾ མཱཔེཏྭཱ ཏིསཱུལ མུགྒརཱདི ནཱནཱཝུདྷཱནི གཧེཏྭཱ སཧསྶཀུམྦྷཾ གིརིམེཁལ ཧཏྠིཀྑཎྡྷ མཱརུཡ྄ཧ མཱརབལཾ པརིཝཱརེཏྭཱ བོདྷིམཎྜཾ ཨཱགནྟྭཱ ཨནེཀ བྷིཾསནཀཾ ཀུརུམཱནཾ ཀཱརེསི. སེསཱསུ དིསཱསུ པཱཙཱིན དིསཱབྷཱགེ པལླངྐསདིསེ ཀོཊི ཀོཊི ཨགྒྷནཀེ ཏཡོ པལླངྐེ ཨཏྠརཱཔེཏྭཱ དནྟམཡཾ དཎྜཾ པཝཱལ༹ཝཱིཛནིཾ ཋཔཱཔེསི. བོདྷིཀྑཎྡྷཾ ཨུསྶཱིསཀེ ཀཏྭཱ ནཱནཱརཏནཾ མཎྜིཏཾ ཀོཊིཨགྒྷནཀཾ རཛཏ སཡནཾ ཨཏྠརཱཔེསི.

དསབལསྶ ཨབྷིསམྦོདྷིམྤཏྭཱ ཨནིམིསེན ཙཀྑུནཱ བོདྷིཔལླངྐཾ ཨོལོཀིཏཊྛཱནཾ སཏྟཱཧམེཝ རཏནཙངྐམེ ཙངྐམིཏཊྛཱནཾ ཨོལོཀིཏཊྛཱནཾ སཏྟཱཧམེཝ རཏནཙངྐམེ ཙངྐམིཏཊྛཱནཾ རཏནགྷརཾ པཝིསིཏྭཱ དྷམྨསམྨསིཏཊྛཱནཾ མུཙལིཎྡམཱུལཾ གནྟྭཱ ནིསིནྣསྶ མུཙལིཎྡེན ནཱགེན སཏྟཀྑཏྟུཾ བྷོགེཧི པརིཀྑིཔིཏྭཱ ཨུཔརི ཕཎཾ ཀཏྭཱ ཋིཏཊྛཱནཾ, ཏཏོ ཨཛཔཱལ ནིགྲོདྷ མཱུལཾ གནྟྭཱ ནིསིནྣཊྛཱནཾ, ཏཏོ རཱཛཱཡཏནཾ བྷོཛནེ ཨུཔནཱིཏེ ཙཏུམཧཱརཱཛེཧི ཨུཔནཱིཏ པཏྟཔཊིགྒཧཎཾ ཀཱརེསི.

ཏཏོ བྲཧྨཱཡཱཙནཾ དྷམྨཙཀྐཔྤཝཏྟནཾ སསཔབྦཛྫཾ, བྷདྡཝགྒིཡ པབྦཛྫཾ, ཏེབྷཱཏིཀ ཛཊིལ དམནཾ, ལཊྛིཝནུཡྻཱནེ བིམྦིསཱརོཔགམཎཾ, རཱཛགཧཔྤཝེསནཾ, ཝེལུ༹ཝན པཊིགྒཧཎཾ ཨསཱིཏི མཧཱསཱཝཀེ ཙ ཀཱརེསི ཏཏོ ཀཔིལཝཏྠུགམནཾ རཏནཙངྐམེ ཋཏཊྛཱནཾ, རཱཧུལཔབྦཛྫཾ, ནཎྡྲཔབྦཛྫཾ ཛེཏཝནཔཊིགྒཧཎཾ, གཎྜམྦམཱུལེ ཡམཀ པཱཊིཧཱརིཀཾ དེཝལོཀེ.

‘‘ནིསིནྣེ’’ཏི ཀཏྠཙི.

ཨབྷིདྷམྨ ¶ དེསནཱ དེཝོརོཧཎ པཱཊཱིཧཱིརཾ ཐེརཔཉྷ སམཱགམཉྩ ཀཱརེསི.

ཏཐཱ མཧཱསམཡསུཏྟ-རཱཧུལོཝཱད སུཏྟ-མངྒསུཏྟཔཱརཱཡན སུཏྟ སམཱགམཾ དྷནཔཱལ-ཨཱལ༹ཝཀ-ཨངྒུལིམཱལ-ཨཔལཱལ དམནཾ ཨཱཡུསངྑཱར ཝོསྶཛྫནཾ སཱུཀརམདྡཝ པརིགྒཧཎཾ སིངྒིཝཎྞ ཝཏྠཡུག པཊིགྒཧཎཾ པསནྣོདཀཔཱནཾ པརིནིབྦཱནཾ དེཝམནུསྶ པརིདེཝནཾ མཧཱཀསྶཔཏྠེརསྶབྷགཝཏོཔཱདཝཎྡནཾ སརཱིར ངཧནཾ ཨགྒིནིབྦཱནཾ ཨཱལཱ༹ཧནསཀྐཱརཾ དེཎེན བྲཱཧྨཎེན ཀཏདྷཱཏུ ཝིབྷཱགཉྩ ཀཱརེསི.

ཏཐཱ ཨདྡྷཙྪཊྛཱནི ཛཱཏཀསཏཱནི ཀཱརེསི. ཝེསྶནྟརཛཱཏཀཾ པན ཀཱརེནྟོ སཉྫཡ མཧཱརཱཛཾ ཕུསཏཱིདེཝིཾ མདྡིདེཝིཾ ཛཱལིཡ ཀུམཱརཾ ཀཎྷཱཛིནཉྩ ཀཱརེསི. ཏཏོ པཎྜཝ ཧཏྠིདཱནཾ སཏྟ སཏཀ མཧཱདཱནཾ ནགར ཝིལོཀནཾ སིནྡྷཝདཱནཾ དེཝཏཱཧི རོཧིཏཐ ཝཎྞེན རཐསྶ ཝཧནཾ རཐདཱནཾ སཡམེཝོཎཏ དུམཏོ ཕལཾ གཧེཏྭཱ དཱརཀཱནཾ མདྷུམཾས དིནྣ ནེསཱདསྶ སུཝཎྞ སཱུཙིདཱནཾ ཝངྐཔབྦཏཀུཙྪིམྷི པབྦཛྫཱཝེསེན ཝསིཏཊྛཱནཾ པཱུཛཀསྶ དཱརཀདཱནཾ སཀྐབྲཱཧྨཎསྶ བྷརིཡཾདཱནཾ པཱུཛཀསྶ དེཝཏཱནུབྷཱཝེཀ དཱརཀེ གཧེཏྭཱ གནྟྭཱ སཉྫཡ ནརིཎྡསྶ པུརཏོ གཏཊྛཱནཾ ཏཏོ ཝངྐཔབྦཏཀུཙྪིཡཾ ཚནྣཾ ཁཏྟིཡཱནཾ སམཱགམཾ ཝེསྶནྟརསྶ མདྡིཡཱ ཙ ཨབྷིསེཀཾ པཏྟཊྛཱནཾ ནཀརམྤཝིཊྛེ སཏྟརཏནཝསྶཾ ཝསྶིཏཊྛཱནཾ ཏཏོ ཙཝིཏྭཱ ཏུསིཏཔུརེ ནིབྦཏྟཊྛཱནཉྩ སབྦཾ ཝིཏྠཱརེན ཀཱརེསི.

ཏཏོ དས སཧསྶ ཙཀྐཝཱལ༹དེཝཏཱཧི བུདྡྷ བྷཱཝཱཡ ཨཱཡཱཙིཏཊྛཱནཾ ཨཔུནརཱཝཏྟནཾ མཱཏུཀུཙྪིཨོཀྐམནཾ མཧཱམཱཡཱདེཝིཾ སུདྡྷོདན མཧཱརཱཛཾ ལུམྦིནཱིཝནེ ཛཱཏཊྛཱནཾ ཨནྟལིཀྑཏོ དྭིནྣཾ ཨུདཀདྷཱརཱནཾ པཏནཾ ཨུཏྟརཱབྷིམུཁཾ སཏྟཔདཝཱིཏིཧཱར གམནཾ ཀཱལ༹དེཝལ༹སྶ ཛཊཱམཏྠཀེ མཧཱཔུརིསསྶ པཱདཔཏིཊྛཱན ཨནཏིཝཏྟམཱནཱཡ ཛམྦུཙྪཱཡཱཡ དྷཱཏཱིནཾ པམཱདཾ དིསྭཱ སིརིསཡནེ པལླངྐེ ནིསཱིདིཏྭཱ ཛྷཱནསམཱཔནྣཊྛཱནཉྩ ཀཱརེསི.

ཏཏོ རཱཧུལ མཱཏརཾ རཱཧུལ བྷདྡཀཉྩ ཀཱརེསི ཏཏོ ཨེཀཱུན ཏིཾསཝསྶཀཱལེ ཨུཡྻཱནེ ཀཱིལ༹ཏཏྠཱཡ གམན སམཡེ ཛིཎྞ ཝྱཱདྷིཏ མཏ སངྑྱཱཏེ ཏཡོ དེཝདཱུཏེ དིསྭཱ ནིཝཏྟནཊྛཱནཾ ཙཏུཏྠཝཱརེ པབྦཛིཏརཱུཔཾ དིསྭཱ སཱདྷུཔབྦཛྫཱཏི ཙིཏྟཾ ཨུཔྤཱདེཏྭཱ ཨུཡྻཱནཾ གནྟྭཱ ཨུཡྻཱནསིརིཾ ཨནུབྷཝིཏྭཱ སཱཡཎྷ སམཡེ ནཧཱཏྭཱ མངྒལ སིལཱཔཊྚེ ནིསིནྣམཏྟ ཝིསྶཀཊྛཱནཱ ཨལངྐརཎཊྛཱཎཾ ཏཏོ མཛ྄ཛྷིམརཏྟིཡཾ ནཱཊཀཱནཾ ཝིཔྤཀཱརཾ དིསྭཱ ཀཎྠཀ ཧཡ ཝརམཱརུཡ྄ཧ) མཧཱབྷིནིཀྑམཎཾ ནིཀྑམིཏཊྛཱནཾ དས སཧསྶ) ཙཀྐཝཱལ༹ དེཝཏཱཧི ཀཏ པཱུཛཱཝིདྷིཾ ཀཎྠཀནིཝཏྟན ཙེཏིཡཊྛཱནཾ ¶ ཨནོམཱ ནདཱིཏཱིརེ པབྦཛྫཾ རཱཛགཧཔྤཝེསནཾ པཎྜཝ པབྦཏཙྪ ཡཱཡ རཉྙོ བིམྦིསཱརམྨ རཛྫཀརཎཏྠཱཡ ཨཱཡཱཙནཾ སུཛཱཏཱཡ དིནྣ ཁཱིརཔཱཡཱས པཊིགྒཧཎཾ ནེརཉྫརཱཡ ནདིཡཱ ཏཱིརེ པཱཡཱས པརིབྷོགཾ ནདིཡཱ པཱཏིཝིསྶཊྛཾ པཱཊིཧཱརིཡཾ སཱལཝནེ དིཝཱཝིཧཱར གཏཊྛཱནཾ སོཏྠིཡེན དིནྣ ཀུསཏིཎཔཊིགྒཧཎཾ བོདྷིམཎྜཾ ཨཱརུཡ྄ཧ ནིསིནྣཊྛཱནཉྩ སབྦཾ ཝིཏྠཱརེན ཀཱརེསི.

ཏཏོ མཧིཎྡཏྠེར པམུཁེ སཏྟ སཧ ཨཱགཏེ ཙ ཀཱརཱཔེསི. ཙཏུསུ དིསཱསུ ཁགྒཧཏྠེ ཙཏྟཱརོ མཧཱརཱཛཱནོ ཀཱརེསི ཏཏོ དྭཏྟིཾས དེཝཔུཏྟེ ཏཏོ སུཝཎྞ དཎྜ དཱིཔཀདྷཱརཱ དྭཏྟིཾས དེཝཀུམཱརིཡོ ཏཏོ ཨཊྛཝཱིསཏི ཡཀྑསེནཱཔཏིནོ ཏཏོ ཨཉྫལིཾ པགྒཡ྄ཧ ཋིཏ དེཝཏཱཡོ ཏཏོ རཏནམཡ པུཔྤཀལཱཔེ གཧེཏྭཱ ཋིཏ དེཝཏཱཡོ ཏཏོ སུཝཎྞགྷཊེ གཧེཏྭཱ ཋིཏི དེཝཏཱཡོ ཏཏོ ནཙྩནཀ དེཝཏཱཡོ ཏཏོ ཏུརིཡཝཱདཀ དེཝཏཱཡོ ཏཏོ པཙྩེཀ སཏསཧསྶགྒྷནཀེ དསཧཏྠཔྤམཱཎེ ཨཱདཱསེ གཧེཏྭཱ ཋིཏ དེཝཏཱཡོ ཏཏོ ཏཐེཝ སཏསཧསྶགྒྷནཀ པུཔྥ སཱཁཱཡོ གཧེཏྭཱ ཋིཏདེཝཏཱཡོ ཏཏོ ཙཎྡམཎྜལེ གཧེཏྭཱ ཋིཏདེཝཏཱཡོ སཱུརིཡམཎྜལེ གཧེཏྭཱ ཋིཏདེཝཏཱཡོ ཏཏོ པདུམཱནི གཧེཏྭཱ ཋིཏ དེཝཏཱཡོ ཏཏོ ཚཏྟཱནི གཧེཏྭཱ ཋིཏདེཝཏཱཡོ ཏཏོ ཝིཙིཏྟཝེསདྷརེ མལླདེཝཔུཏྟེ ཏཏོ དུསྶཔོཋན དེཝཏཱཡོ ཏཏོ རཏནགྒྷིཀེ གཧེཏྭཱ ཋིཏདེཝཏཱཡོ ཏཏོ དྷམྨཙཀྐཱཀི གཧེཏྭཱ ཋིཏདེཝཏཱཡོ ཏཏོ ཁགྒདྷརཱ དེཝཏཱཡོ ཏཏོ པཉྩཧཏྠཔྤམཱཎ གཎྡྷིཏེལཔཱུརིཏཱ དུཀཱུལཝཊྚིཡཾ པཛྫལིཏ དཱིཔཀཉྩནན པཱཏིཡོ སཱིསེཧི དྷཱརེཏྭཱ ཋིཏདེཝཏཱཡོ ཙ ཀཱརཱཔེསི.

ཏཏོ ཙཏུསུཀཎྞེསུཕལི༹ཀམཡཨགྒྷིཡ མཏྠཀེ ཙཏྟཱརོམཧཱམཎ ཋཔཱཔེསི ཙཏུསུ ཀཎྞེསུ སུཝཎྞ-མཎི-མུཏྟ-ཝཛིརཱནཾ ཙཏྟཱརོ རཱསིཡོ ཀཱརེསི ཏཏོ མེགྷཝཎྞ པཱསཱཎབྷིཏྟིཡཾ ཝིཛྫུལླཏཱ ཀཱརེསི ཏཏོ རཏན ལཏཱཡོ ཏཏོ ཙཱལ༹ཝིཛཏིཡོ ཏཏོ ནིལུཔྤལེ གཧེཏྭཱ ཋིཏ ནཱགམཎཝིཀཱཡོ ཀཱརེསི.

རཱཛཱ ཨེཀྟིཀཱནི རཱུཔཀཱནི གྷནཀོཊྚིམ སུཝཎྞེཧེཝ ཀཱརེསི. ཨཝསེསམྤི པཱུཛཱཝིདྷིཾ སཏྟརཏནེཧེཝ ཀཱརེསཱིཏི. ཨེཏྠ ཙ ཝུཏྟཔྤཀཱརམྤན པཱུཛནཱིཡབྷཎྜཾ ཨནནྟམཔརིམཱཎཾ ཧོཏི ཏཐཱ ཧི ཨམྦཔཱསཱནཝཱསཱི ཙིཏྟགུཏྟཏྠེརོནཱམ ཧེཊྛཱ ལོཧཔཱསཱདེ སནྣིཔཏིཏཱནཾ དྭཱདསནྣཾ བྷིཀྑུསཧསྶཱནཾ དྷམྨཾ ཀཐེནྟོ རཐཝིནཱིཏསུཏྟཾ ཨཱརབྷིཏྭཱ མཧཱ དྷཱཏུནིདྷཱནཾ ཝཎྞེནྟོ ཨེཀཙྩེ ན སདྡཧིསྶནྟཱིཏི མཉྙམཱནོ ཨོསཀྐིཏྭཱ ཀཐེསི. ཏསྨིཾ ཁཎེ ཀོཊཔབྦཏཝཱསཱི མཧཱཏིསྶཏྠེརོ ¶ ནཱམ ཁཱིཎཱསཝོ ཨཝིདཱུརེ ནིསཱིདིཏྭཱ དྷམྨཾ སུཎནྟོ ཨཱཝུསོ དྷམྨཀཐིཀ ཏཝ ཀཐཱཏོ པརིཧཱིནམྤི ཨཏྠི. ཨཔཙྩོ སཀཀིཏྭཱ ཝིཏྠཱརེན ཀཐེཧཱིཏི ཨཱཧ. ཨཐ ཨིམསྨིཾཡེཝ དཱིཔེ བྷཱཏིཡ མཧཱརཱཛཱ ནཱམ སདྡོ པསནྣོ ཨཧོསི སོ སཱཡཾ པཱཏཾ མཧཙེཏིཡཾ ཝནྡིཏྭཱཝ བྷུཉྫཏི. ཨེཀདིཝསཾ ཝིནིཙྪཡེ ནིསཱིདིཏྭ དུབྦཱིནིཙྪིཏཾ ཨཊྚཾ ཝིནིཙྪིནནྟོ ཨཏིསཱཡཾ ཝུཊྛིཏོ ཐཱུཔཝཎྡནཾ ཝིསྶརིཏྭཱ བྷོཛནེ ཨུཔནཱིཏེ ཧཏྠཾ ཨོཏཱརེཏྭཱ མནུསྶེ པུཙྪིཨཛྫ མཡཱ ཨཡྻཀོ ཝནྡིཏོ ན ཝནྡིཏོཏི. པོརཱཎཀ རཱཛཱནོ ཧི སཏྠཱརཾ ཨཡྻཀོཏི ཝདནྟི. མནུསྶཱ ན ཝནྡིཏོ དེཝཱཏི ཨཱཧཾསུ.

ཏསྨིཾ ཁཎེ རཱཛཱ ཧཏྠེན གཧིཏ བྷཏྟཔིཎྜཾ པཱཏིཡཾ པཱཏེཏྭཱ ཨུཊྛཱཡ དཀྑིཎདྭཱརཾ ཝིཝརཱཔེཏྭཱ ཨཱགནྟྭཱ པཱཙཱིན དྭཱརེན མཧཱཙེཏིཡངྒཎཾ ཨཱརུཡ྄ཧ ཝནྡནྟོ ཨནྟོ དྷཱཏུགབྦྷེ ཁཱིཎཱསཝཱནཾ དྷམྨཾ ཨོསཱརཎསདྡཾ སུཏྭཱ དཀྑིཎདྭཱརེཏི མཉྙམཱནོ ཏཏྠ གནྟྭཱ ཨདིསྭཱ ཨེཏེནེཝ ནཡེན ཨིཏརཱནིཔི དྭཱརཱནི གནྟྭཱ ཏཏྠཱཔི ཨདིསྭཱ ཨཡྻཱ དྷམྨཾ ཨོསཱརེནྟོ ཝིཙརནྟཱིཏི མཉྙམཱནོ ཨོལོཀནཏྠཱཡ ཙཏུསུ དྭཱརེསུ མནུསྶེ ཋཔེཏྭཱ སཡཾ པུན ཝིཙརིཏྭཱ ཨཔསྶནྟོ མནུསྶེ པུཙྪིཏྭཱ བཧིདྡྷཱ ནཏྠི བྷཱཝཾ ཉཏྭཱ ཨནྟོ དྷཱཏུགབྦྷེ བྷཝིསྶཏིཏི སནྣིཊྛཱནཾ ཀཏྭཱ པཱཙཱིནདྭཱརེ ཨཱསནྣཏརེ མཧཱ ཙེཏིཡཱབྷིམུཁོ ཧཏྠཔཱདེ པསཱརེཏྭཱ ཛཱིཝིཏུཾ པརིཙྩཛིཏྭཱ དལ༹ྷསམཱདཱནཾ ཀཏྭཱ ནིཔཛྫི. སཙེ མཱ ཨཡྻཱ དྷཱཏུགབྦྷཾ ན ཨོལོཀཱཔེནྟི-སཏྟཱཧཾ ནིརཱཧཱརོ ཧུཏྭཱ སུསྶམཱནོ བྷཱུསམུཊྛི ཝིཡ ཝིཔྤཀིརིཡམཱནོཔི ན ཨུཊྛཧིསྶཱམཱིཏི. ཏསྶ གུཎཱནུབྷཱཝེན སཀྐསྶ བྷཝནཾ ཨུཎྷཱཀཱརཾ དསྶེསི.

སཀྐོ ཨཱཝཛྫནྟོ ཏཾ ཀཱརཎཾ ཉཏྭཱ ཨགནྟྭཱ དྷམྨཾ ཨོསཱརེནྟཱནཾ ཐེརཱནཾ ཨེཝམཱཧ. ཨཡཾ བྷནྟེ རཱཛཱ དྷམྨིཀོ བུདྡྷསཱསནེ པསནྣོ ཨིམསྨིཾ ཋཱནེ སཛ྄ཛྷཱཡན སདྡཾ སུཏྭཱ དྷཱཏུགབྦྷཾ ཨཔསྶིཏྭཱ ན ཨུཊྛཧིསྶཱམཱིཏི དལ༹ྷསམཱདཱནཾ ཀཏྭཱ ནིཔནྣོ སཙེ དྷཱཏུགབྦྷཾ ན པསྶཏི ཏཏྠེཝ མརིསྶཏི. ཏཾ པཝེསེཏྭཱ དྷཱཏུ གབྦྷཾ ཨོལོཀཱཔེཐཱཏི. ཐེརཱཔི ཏསྶ ཨནུཀམྤཱཡ དྷཱཏུགབྦྷཾ དསྶེཏུཾ ཨེཀཾ ཐེརཾ ཨཱཎཱཔེསུཾ རཱཛཱནཾ ཨཱནེཏྭཱ དྷཱཏུགབྦྷཱ ཨོལོཀཱཔེཏྭཱ པེསེཧཱིཏི. སོ རཉྙོ ཧཏྠེ གཧེཏྭཱ དྷཱཏུགབྦྷཾ པཝེསེཏྭཱ ཡཐཱརུཙིཾ ཝནྡཱཔེཏྭཱ སབྦཾ སལླཀྑིཏཀཱལེ པེསེསི རཱཛཱ ནགརཾ གནྟྭཱ ཨཔརེན སམཡེན དྷཱཏུགབྦྷེ ཨཏྟནཱ དིཊྛརཱུཔཀེསུ ཨེཀདེསཱནི སུཝཎྞཁཙིཏཱནི ཀཱརེཏྭཱ རཱཛངྒཎེ མཧནྟཾ མཎྜཔཾ ཀཱརེཏྭཱ ཏསྨིཾ མཎྜཔེ ¶ ཏཱནི རཱུཔཀཱནི སཾཝིདཧཱཔེཏྭཱ ནགརེ སནྣིཔཱཏེཏྭཱ དྷཱཏུགབྦྷེ མཡཱ དིཊྛཱནི སུཝཎྞརཱུཔཀཱནི ཨཱིདིསཱནི ཨཱཧ. ཏེསཾ རཱུཔཀཱནཾ ནིཡཱམེན ཀཏཏྟཱ ནིཡཱམཀ རཱུཔཀཱནི ནཱམ ཛཱཏཱནི.

རཱཛཱ སཾཝཙྪརེ སཾཝཙྪརེ ཏཱནི རཱུཔཀཱནི ནཱིཧརཱཔེཏྭཱ ནཱགརཱནཾ དསྶེསི པཋམཾ དསྶིཏཀཱལེ ནཱགརཱ པསཱིདིཏྭཱ ཨེཀེཀ ཀུལཏོ ཨེཀེཀཾ དཱརཀཾ ནཱིཧརིཏྭཱ པབྦཱཛེསུཾ. པུན རཱཛཱ ཨཡྻཱ ཨེཏཾ པཀཱརཾ ཨཛཱནནཀཱ བཧཱུ ཏེསམྤི ཨཱརོཙེསྶཱམཱིཏི ཝིཧཱརཾ གནྟྭཱ ཧེཊྛཱ ལོཧཔཱསཱདེ བྷིཀྑུསངྒྷཾ སནྣིཔཱཏེཏྭཱ སཡཾ དྷམྨཱསནགཏོ ཏིཡཱམ རཏྟིཾ དྷཱཏུགབྦྷེ ཨདྷིཀཱརཾ ཀཐེཏྭཱ པརིཡོསཱཔེཏུམསཀྐཱནྟོསེཝ ཨུཊྛཱསི. ཏཏྠེཀོ བྷིཀྑུ རཱཛཱནཾ པུཙྪི-མཧཱརཱཛ ཏྭཾ པཱཏརཱསབྷཏྟཾ བྷཱུཏྭཱ ཨཱགཏོསི. ཏིཡཱམ རཏྟིཾ ཝཎྞེནྟོ དྷཱཏུགབྦྷེ པཱུཛཱཝིདྷིམྤི པརིཡོསཱཔེཏུཾ ནཱསཀྑི ཨཉྙམྤི བཧུཾ ཨཏྠིཏི.

རཱཛཱ ཀིཾ ཀཐེཏ བྷནྟེ, ཏུམྷཱཀཾ མཡཱ ཀཐིཏཾ དསབྷཱགེསུ ཨེཀབྷཱགམྤི ནཔྤཧོཏི. ཨཧམྤན མཡཱ སལླཀྑིཏ མཏྟམེཝ ཀཐེསིཾ. ཨནནྟཾ བྷནྟེ དྷཱཏུགབྦྷེ པཱུཛཱཝིདྷཱནནྟི ཨཱཧ ཨེཝཾ ཨནནྟཾ པཱུཛནཱིཡབྷཎྜཾ སམཙཏུརསྶེ ཨེཀེཀ པསྶཏོ ཨསཱིཏི ཨསཱིཏི ཧཏྠཔྤམཱཎེ དྷཱཏུགབྦྷེ ནིརནྟརཾ ཀཏྭཱ པུརེཏུམྤི ན སུཀརཾ, པགེཝ ཡཐཱརཧཾ སཾཝིདྷཱཏུ ཏིཊྛཏུ ཏཱཝ དྷཱཏུགབྦྷོ ཡཱཝ མཧཱཙེཏིཡེ ཝཱལུཀ པཱཀཱར པརིཙྪེདཱ ནིརནྟརཾ པུརེཏུམྤི ན སཀྐཱ. ཏསྨཱ ཏཾ སབྦཾ པཱུཛནཱིཡབྷཎྜཾ ཏཏྠ ཀཐཾ གཎྷཱིཏི ཡདེཏྠ ཝཏྟབྦཾ པོརཱཎེཧི ཝུཏྟམེཝ.

ནིགྲོ དྷཔིཊྛི ཏེཔིཊཀ མཧཱསཱིཝཏྠེརོ ཀིར རཱཛགེཧེ ནིསིདིཏྭཱ རཉྙོ དསབལ སཱིཧནཱདསུཏཏཾ ཀཐེནྟོ དྷཱཏུནིདྷཱནཾ ཝཎྞེཏྭཱ སུཏྟནྟཾ ཝིནིཝཊྚེསི. རཱཛཱ ཐེརསྶ ཨེཝམཱཧ-ཨཡཾ བྷནྟེ དྷཱཏུགབྦྷཱ སམཙཏུརསྶོ, ཨེཀེཀཔསྶཏོ ཨསཱིཏི ཨསཱིཏི ཧཏྠཔྤམཱཎེ ཨེཏྟཀཱནི པཱུཛནཱིཡ བྷཎྜཱནི ཨེཏྠ ཊྛིཏཱནཱིཏི ཀོ སདྡཧེསྶཏིཏི. ཐེརོ ཨཱཧ. ཨིཎྡསཱལགུཧཱཀིཏྟཀཔྤམཱཎཱཏི ཏཡཱ སུཏཔུབྦཱཏི. རཱཛཱ ཁུདྡཀ མཉྩཀཔྤམཱཎཱ བྷནྟེཏི ཨཱཧ. ཏཏོ ཐེརོ ཨཱཧ, མཧཱརཱཛ ཨམྷཱཀཾ སཏྠཱརཱ སཀྐསས སཀྐ པཉྷསུཏྟནྟཾ ཀཐནདིཝསེ གུཧཱཡ ཀིཏྟཀཱ པརིསཱ ཨོསཊཱཏི སུཏཔུབྦཱཏི. རཱཛཱ དྭཱིསུ བྷནྟེ དེཝལོཀེསུ དེཝཏཱཏི ཨཱཧ. ཨེཝཾ སནྟེ ཏམྤི ཨསདྡཧེཡྻཾ ནུ མཧཱརཱཛཱཏི ཐེརེན ཝུཏྟེ རཱཛཱ ཏཾ པན དེཝཱནཾ དེཝིདྡྷིཡཱ ཨཧོསི དེཝིདྡྷི ནཱམ ཨཙིནྟེཡྻཱ བྷནྟེཏི ཨཱཧ.

ཏཏོ ཐེརོ མཧཱརཱཛ ཏཾ ཨེཀཱཡཡེཝ དེཝིདྡྷིཡཱ ཨཧོསི. ཨིདཾ པན རཉྙོ རཱཛིདྡྷིཡཱ དེཝཱནཾ དེཝིདྡྷིཡཱ ཨརིཡཱནཾ ཨརིཡིདྡྷིཡཱཏི ཨིམཱཧི ¶ ཏཱིཧི ཨིདྡྷཱིཧི ཛཱཏནྟི ཨཝོཙ. རཱཛཱ ཐེརསྶ ཝཙནཾ སཱདྷཱུཏི སམྤཊིཙྪིཏྭཱ ཐེརཾ སེཏཙྪཏྟེན པཱུཛེཏྭཱ མཏྠཀེ ཚཏྟཾ དྷཱརེནྟོ མཧཱ ཝིཧཱརཾ ཨཱནེཏྭཱ པུན མཧཱཙེཏིཡསྶ སཏྟཱཧཾ ཚཏྟཾ དཏྭཱ ཛཱཏི སུམནཔུཔྥ པཱུཛཾ ཨཀཱསཱིཏི. ཨེཏསྶཏྠསྶ སཱདྷནཏྠམེཝ ཨཉྙཱནིཔི བཧཱུནི ཝཏྠཱུནི དསྶིཏཱནི ཏཱནི ཀིནྟེཧཱིཏི ཨམྷེ ཨུཔེཀྑིཏཱནི ཨེཏྠ ཙ རཱཛཱ མཧེསཀྑོ མཧཱནུབྷཱཝོ པཱུརིཏཔཱརམི ཀཏཱབྷིནཱིཧཱརོཏི ཏསྶཝསེན རཱཛིདྡྷིཝེདིཏབྦཱ སཀྐེན ཨཱཎཏྟེན ཝིསྶཀམྨུནཱ དེཝཔུཏྟེན ཨཱདིཏོ པཊྛཱཡ ཨཱཝིསིཏྭཱ ཀཏཏྟཱ ཏསྶ ཝསེན དེཝིདདྷི ཝེདིཏབྦཱ, ཀམྨཱདྷིཊྛཱཡཀ ཨིཎྡགུཏྟཏྠེརོ ཁུདྡཱནུཁུདྡཀཾ ཀམྨཾ ཨནུཝིདྷཱཡནྟོ ཀཱརེསི ན ཀེཝལཾཐེརོཡེཝ, སབྦེཔི ཨརིཡཱ ཨཏྟནཱ ཨཏྟནཱ ཀཏྟབྦ ཀིཙྩེསུ ཨུསྶུཀྐམཱཔནྣཱཡེཝ ཨཧེསུནྟི ཨིམཱཧི ཏཱིཧི ཨིདྡྷཱིཧི ཀཏནྟི ཝེདིཏབྦཾ.

ཝུཏྟཉྷེཏཾ མཧཱཝཾསོ.

ཨིཎྡགུཏྟ མཧཱཐེརོ-ཚལ༹བྷིཉྙོ མཧཱམཏི,

ཀམྨཱདྷིཊྛཱཡཀོ ཨེཏྠ-སབྦཾ སཾཝིདཧི ཨིམཾ;

སབྦཾ རཱཛིདྡྷིཡཱ ཨེཏཾ དེཝཏཱནཉྩ ཨིདྡྷིཡཱ;

ཨིདྡྷིཡཱ ཨརིཡཱནཉྩ-ཨསམྦཱདྷཱ པཏིཊྛིཏ’’ནྟི;

དྷཱཏུགབྦ རཱུཔཝཎྞནཱཀཐཱ

༢༣. ཨེཝཾ རཱཛཱ དྷཱཏུགབྦྷེ ཀཏྟབྦ ཀམྨཾ ནིཊྛཱཔེཏྭཱ ཙཱཏུདྡསི དིཝསེ ཝིཧཱརཾ གནྟྭཱ བྷིཀྑུསངྒྷཾ སནྣིཔཱཏེསི, སནྣིཔཏྟི བྷིཀྑཱུ ཏིཾས སཧསྶཱནི ཨཧེསུཾ རཱཛཱ བྷིཀྑུསངྒྷཾ ཝནྡིཏྭཱ ཨེཝམཱཧ. དྷཱཏུགབྦྷེ མཡཱ ཀཏྟབྦཀམྨཾ ནིཊྛཱཔིཏཾ, སྭེ ཨཱསཱལ༹བྷིམུཔོསཐ དིཝསེ ཨུཏྟརསཱལ༹ྷ ནཀྑཏྟེན དྷཱཏུནིདྷཱནཾ བྷཝིསྶཏི དྷཱཏུཡོ ཛནཱཐ བྷནྟེཏི བྷིཀྑུསངྒྷསྶ བྷཱརཾ ཀཏྭཱ ནགརམེཝཱགཉྫི.

ཨཐ བྷིཀྑུསངྒྷོ དྷཱཏུ ཨཱཧརཎཀཾ བྷིཀྑུཾ གཝེསནྟོ པཱུཛཱ པརིཝེཎ ཝཱསིཀཾ སོལ༹ས ཝསྶུདྡེསིཀཾ ཚལ༹བྷིཉྙཾ སོཎུཏྟརཾ ནཱམ སཱམཎེརཾ དིསྭཱ ཏཾ པཀྐོསཱཔེཏྭཱ ཨཱཝུསོ སོཎུཏྟར རཱཛཱ དྷཱཏུགབྦྷཾ ནིཊྛཱཔེཏྭཱ དྷཱཏུ ཨཱབྷརཎཾ བྷིཀྑུསངྒྷསྶ བྷཱརམཀཱསི. ཏསྨཱ ཏཡཱ དྷཱཏུཡོ ཨཱཧརིཏབྦཱཏི ཨཱཧརཱམི བྷནྟེ དྷཱཏུཡོ ཀུཏོ ལཙྪཱམཱིཏི པུཙྪི ཏསྶ བྷིཀྑུསངྒྷོ ཨེཝམཱཧ. ཨཱཝུསོ སོཎུཏྟར ཏཏཱགཏོ མརཎམཉྩེ ནིཔནྣོ སཀྐཾ དེཝརཱཛཱནཾ ཨཱམནྟེཏྭཱ མཡ྄ཧཾ ཨཊྛདོཎཔྤམཱཎེསུ སཱརཱིརིཀ དྷཱཏུསུ ཨེཀཾ དོཎཾ ཀོལི༹ཡརཱཛུཧི སཀྐཏཾ, ཨནཱགཏེ ཏམྦཔཎྞི དཱིཔེ མཧཱཙེཏིཡེ པཏིཊྛཧིསྶཏཱིཏི ཨཱཧ.

ཨཐ ¶ བྷགཝཏི པརིནིབྦུཏེ དོཎ བྲཱཧྨཎོ དྷཱཏུཡོ ཨཊྛ ཀོཊྛཱསེ ཀཏྭཱ ཨཊྛནྣཾ ནགརཝཱསཱིནཾ ཨདཱསི ཏེ ཨཏྟནོ ཨཏྟནོ ནགརེ ཙེཏིཡཾ ཀཱརེཏྭཱ པརིཧརིཾསུ ཏེསུ རཱམགཱམེ ཀོལི༹ཡེཧི ཀཏཙེཏིཡེ མཧོགྷེན བྷིནྣེ དྷཱཏུཀརཎྜཀོ སམུདྡཾ པཝིསིཏྭཱ རཏནཝཱལུཀཱ པིཊྛེ ཚབྦཎྞརཾསི སམཱཀིཎྞོ ཨཊྛཱསི.

ནཱགཱ དིསྭཱ མཉྫེརིཀ ནཱག བྷཝནཾ གནྟྭཱ མཧཱཀཱལ༹ ནཱག རཉྙོ ཨཱརོཙེསུཾ སོ དསཀོཊི ནཱག སཧསྶ པརིཝུཏོ ཨཱགནྟྭཱ གཎྡྷམཱལཱདཱིཧི པཱུཛེཏྭཱ སུཝཎྞ-པཝཱལ༹-མིཎི-རཛཏདྷཛེ ཨུསྶཱཔེཏྭཱ པཉྩངྒིཀ ཏུརིཡ པགྒཧཱིཏ ནཱནཱཝིདྷ ནཱག ནཱཊཀཱནཾ མཛ྄ཛྷཧཏོ དྷཱཀུཀརཎྜཾ མཎིཙངྒོཊཀེ ཋཔེཏྭཱ སཱིསེནཱདཱཡ མཧཱསཀྐཱར སམྨཱནཾ ཀརོནྟོ ནཱགབྷཝནཾ ནེཏྭཱ ཚནྣཝུཏི ཀོཊིདྷནེ པཱུཛེཏྭཱ སབྦརཏནེཧི ཙེཏིཡཉྩ ཙེཏིཡགྷརཉྩ མཱཔེཏྭཱ དྷཱཏུཡོ པརིཧརཏི. མཧཱཀསྶཔཏྠེརོ ཨཛཱཏསཏྟུནོ དྷཱཏུནིདྷཱནཾ ཀརོནྟོ རཱམགཱམེ དྷཱཏུཡོ ཋཔེཏྭཱ སེས དྷཱཏུཡོ ཨཱཧརིཏྭཱ ཨདཱསི རཱཛཱ རཱམགཱམེ དྷཱཏུཡོ ཀསྨཱ ནཱཧཊཱཏི པུཙྪི.

ཐེརོ མཧཱརཱཛ ཏཱསཾ ཨནྟརཱཡོ ནཏྠི ཨནཱགཏེ ཏམྦཔཎྞིདཱིཔེ མཧཱཙེཏིཡེ པཏིཊྛཧིསྶནྟཱིཏི ཨཱཧ. ཨསོཀོ དྷམྨརཱཛཱཔི དྷཱཏུནིདྷཱནཾ ཨུགྒྷཱཊེཏྭཱ ཨོལོཀེནྟོ ཨཊྛམཾ དྷཱཏུདོཎཾ ཨདིསྭཱ ཨཔརཾ དྷཱཏུཾ དོཎཾ ཀཏྠ བྷནྟེཏི པུཙྪི མཧཱརཱཛ ཏཾ ཀོལི༹ཡེཧི གངྒཱཏཱིརེ ཀཏ ཙེཏིཡེ པཏིཊྛིཏཾ, མཧོགྷེན ཙེཏིཡེ བྷིནྣེ མཧཱསམུདྡཾ པཱཝིསི.

ཏཾ ནཱགཱ དིསྭཱ ཨཏྟནོ ནཱགབྷཝནཾ ནེཏྭཱ པརིཧརནྟཱིཏི ཁཱིཎཱསཝཱ ཨཱཧཾསུ རཱཛཱ ནཱགབྷཝནཾ ནཱམ མམ ཨཱཎཱཔཝཏྟནཊྛཱནཾ, ཏམྤི ཨཱཧརཱམི བྷནྟེཏི ཨཱཧ. མཧཱརཱཛ ཏཱ དྷཱཏུཡོ ཨནཱགཏེ ཏམྦཔཎྞིདཱིཔེ མཧཱཙེཏིཡེ པཏིཊྛཧིསྶནྟིཏི ནིཝཱརེསུཾ. ཏསྨཱ ཏྭཾ མཉྪེརིཀ ནཱག བྷཝནཾ གནྟྭཱ ཏཾ པཝཏྟིཾ ནཱག རཉྙོ ནིཝེདེཏྭཱ དྷཱཏུཡོ ཨཱཧར, སྭེ དྷཱཏུ ནིདྷཱནཾ བྷཝིསྶཏཱིཏི. སོཎུཏྟརོ སཱདྷཱུཏི སམྤཊིཙྪིཏྭཱ ཨཏྟནོ པརིཝེཎཾ ཨགམཱསི.

རཱཛཱཔི ནགརཾ ཨནྟྭཱ ནགརེ བྷེརིཾ ཙརཱཔེསི- སྭེ དྷཱཏུནིདྷཱནཾ བྷཝིསྶཏི ནཱགརཱ ཨཏྟནོ ཨཏྟནོ ཝིབྷཝཱནུརཱུཔེན ཨལངྐརིཏྭཱ གཎྡྷམཱལཱདཱིནི གཧེཏྭཱ མཧཱཙེཏིཡངྒཎཾ ཨོཏརནྟུཏི. སཀྐོཔི ཝིསྶཀམྨཾ ཨཱཎཱཔེསི-སྭེ མཧཱཙེཏིཡེ དྷཱཏུནིདྷཱནཾ བྷཝིསྶཏི. སཀལ ཏམྤཔཎྞིདཱིཔཾ ཨལངྐརོཧཱིཏི. སོ པུནདིཝསེ ཨེཀཱུནཡོཛནསཏིཀཾ ཏམྦཔཎྞིདཱིཔཾ ཀསཱིཎམཎྜལཾ ཝིཡ སམཾ ཀཏྭཱ རཛཏཔཊྚསདིསཾ ཝཱལུཀཱཀིཎྞཾཔཉྩཝཎྞཔུཔྥསམཱཀཱུལཾ ཀཏྭཱ ¶ སམནྟཏོ པུཎྞགྷཊཔནྟིཡོ ཋཔཱཔེཏྭཱ སཱཎཱིཧི པརིཀྑིཔིཏྭཱ ཨུཔརི ཙེལཝིཏཱནཾ བཎྡྷིཏྭཱ པཐཝིཏལེ ཐལཔདུམཱནི ཨཱཀཱསེ ཨོལམྦཀ པདུམཱནི དསྶེཏྭཱ ཨལངྐཏ དེཝསབྷཾ ཝིཡ སཛྫེསི. མཧཱསམུདྡཉྩ སནྣིསིནྣཾ པཉྩཝིདྷ པདུམསཉྩནྣཾ ཨཀཱསི.

དྷཱཏུ ཨཱནུབྷཱཝེན སཀལ ཙཀྐཝཱལ༹ཾ གབྦྷོཀྐམནཱབྷིསམྦོདྷིཀཱལཱདིསུ ཝིཡ སཛྫིཏཾ ཨཧོསི ནཱགརཱཔ ནགར ཝཱིཐིཡོ སམྨཛྫིཏྭཱ མུཏྟཱཕལ སདིསཾ ཝཱལུཀཾ ཨོཀིརིཏྭཱ ལཱཛཔཉྩམཀ པུཔྥཱནི སམོཀིརིཏྭཱ ནཱནཱཝིརཱག དྷཛཔཊཱཀཱཡོ ཨུསྶཱཔེཏྭཱ སུཝཎྞགྷཊ ཀདལིཏོརཎ མཱལགགྷིཀཱདཱིཧི ཨལངྐརིཏྭཱ ནགརཾ སཛྫེསུ. རཱཛཱ ནགརསྶ ཙཏུསུ དྭཱརེསུ ཨནཱཐཱནཾ མནུསྶཱནཾ པརིབྷོཏྠཱཡ ནཱནཱཔྤཀཱར ཁཱདནཱིཡ བྷོཛནཱིཡ གཎྡྷམཱལ ཝཏྠཱབྷརཎ པཉྩཝིདྷི མུདྷཝཱས སཧིཏ ཏཱམྦུལཱནི ཙ ཋཔཱཔེསི.

ཨཐ རཱཛཱ སབྦཱབྷརཎ ཝིབྷཱུསིཏོ ཀུམུད པནྣཝཎྞ ཙཏུསིཎྡྷཝཡུཏྟ རཐཝརམཱརུཡ྄ཧ ཨལངྐཏཾ ཀཎྜུལཾ ཧཏྠིཾ པུརཏོ ཀཏྭཱ སུཝཎྞཙངྒོཊཀཾ སཱིསེ ཀཏྭཱ སེཏཙྪཏྟསྶ ཧེཊྛཱ ཨཊྛཱསི. ཏསྨིཾ ཁཎེ སཀྐཾ དེཝརཱཛཱནཾ དེཝཙྪརཱ ཝིཡ ནཱནཱབྷརཎཝིབྷཱུསིཏཱ དེཝཀཉྙུཔམཱ ཨནེཀ སཧསྶ ནཱཊཀིཏྠིཡོ ཙེཝ དསམཧཱཡོདྷཱ ཙ ཙཏུརངྒིནཱི སེནཱ ཙ རཱཛཱནཾ པརིཝཱརེསུཾ.

ཏཐཱ ཨཊྛུཏྟར སཧསྶ ཨིཏྠིཡོ ཙ པུཎྞགྷཊེ གརཧཏྭཱ པརིཝཱརེསུཾ. ཨཊྛུཏྟར སཧསྶ ཨཊྛུཏྟར སརསྶཔྤམཱཎེཡེཝ པུརིསཱ ཙེཝ ཨིཏྠིཡོ ཙ པུཔྥསམུགྒཱནི དཎྜདཱིཔིཀཱ ནཱནཱཝཎྞ དྷཛེ ཙ གཧེཏྭཱ པརིཝཱརེསུཾ. ཨེཝཾ རཱཛཱ མཧནྟེན རཱཛཱནུབྷཱཝེན ནཎྡནཝནཾ ནིཀྑནྟ དེཝརཱཛཱ ཝིཡ ནིཀྑམི. ཏདཱ ནཱནཱཝིདྷ ཏུརིཡ གྷོསེཧི ཙེཝ ཧཏྠསྶ རཐ སདྡེཧི ཙ མཧཱཔཐཝིབྷིཛྫནཱཀཱརཔྤཏྟཱ ཝིཡ ཨཧོསི.

ཏསྨིཾ ཁཎེ སོཎུཏྟརོ ཨཏྟནོ པརིཝེཎེཡེཝ ནིསིནྣོ ཏུརིཡ གྷོསེན རཉྙོ ནིཀྑནྟབྷཱཝཾ ཉཏྭཱ ཨབྷིཉྙཱཔཱདཀཾ ཙཏུཏྠཛ྄ཛྷཱནཾ སམཱཔཛྫིཏྭཱ ཨདྷིཊྛཡཱ པཐཝིཡཾ ནིམུཛྫིཏྭཱ མཉྫེརིཀ ནཱགབྷཝནེ མཧཱཀཱལཱ༹ནཱགརཉྙོ པུརཏོ པཱཏུརཧོསི. ནཱགརཱཛཱ སོཎུཏྟརཾ དིསྭཱ ཨུཊྛཱཡཱསནཱ ཨབྷིཝཱདེཏྭཱ གཎྡྷོདཀེན པཱདེ དྷོཝིཏྭཱ ཝཎྞ གཎྡྷ སམྤནྣ ཀུསུམེཧི པཱུཛེཏྭཱ ཨེཀཱམནྟཾ ནིསཱིདིཏྭཱ ཀུཏོ ཨཱགཏཏྠ བྷནྟེཏི པུཙྪི ཏམྦཔཎྞི དཱིཔཏོ ཨཱགཏམྷཱཧི ཝུཏྟེ ཀིམཏྠཱཡཱཏི པུཙྪི.

མཧཱརཱཛ ཏམྦཔཎྞིདཱིཔེ དུཊྛགཱམཎི ཨབྷཡ མཧཱརཱཛཱ མཧཱ ཙེཏིཡཾ ཀཱརེནྟོ དྷཱཏུཡོ བྷིཀྑུསངྒྷསྶ བྷཱརམཀཱསི. མཧཱཝིཧཱརེ ཏིཾསམཏྟཱནི བྷིཀྑུསཧསྶཱནི སནྣིཔཏིཏྭཱ མཧཱཐཱུཔཏྠཱཡ ཋཔིཏདྷཱཏུཡོ ¶ མཧཱཀཱལ༹ ནཱག རཉྙོ སནྟིཀེ ཋིཏཱ, ཏསྶ ཏཾ པཝཏྟིཾ ཀཐེཏྭཱ དྷཱཏུཡོ ཨཱཧརཱཏི མཾ པེསེསུཾ, ཏསྨཱ ཨིདྷཱགཏོམྷཱིཏི ཨཱཧ.

ཏཾ སུཏྭཱ ནཱགརཱཛཱ པབྦཏེན ཝིཡ ཨཛ྄ཛྷོཏྠཊོ མཧནྟེན མདཱམནསྶེན ཨབྷིབྷཱུཏོ ཨེཝཾ ཙིནྟེསི མཡཾ པན ཨིམཱ དྷཱཏུཡོ པཱུཛེཏྭཱ ཨཔཱཡཏོ མུཉྩིཏྭཱ སགྒེ ནིབྦཏྟིསྶམཱཏི ཨམཉྙིམྷ. ཨཡཾ པན བྷིཀྑུ མཧིདྡྷིཀོ མཧཱནུབྷཱཝོ, སཙེ ཨིམཱ དྷཱཏུཡོ ཨིམསྨིཾ ཋཱནེ ཋིཏོ བྷཝེཡྻུཾ, ཨམྷེ ཨབྷིབྷཝིཏྭཱཔི གཎྷིཏུཾ སཀྐུཎེཡྻ. དྷཱཏུཡོ ཨཔནེཏུཾ ཝཊྚཏཱིཏི ཙིནྟེཏྭཱ པརིསཾ ཨོལོཀེནྟོ པརིས པརིཡནྟེ ཋིཏཾ ཝཱསུལདཏྟཾ ནཱམ ཨཏྟནོ བྷཱགིནེཡྻཾ དིསྭཱ ཏསྶ སཉྙམདཱསི སོ མཱཏུལསྶ ཨདྷིཔྤཱཡཾ ཉཏྭཱ ཙེཏིཡགྷརཾ གནྟྭཱ དྷཱཏུཀརཎྜཀཾ ཨཱདཱཡ གིལིཏྭཱ སིནེརུཔབྦཏ པཱདམཱུལཾ གནྟྭཱ-

ཡོཛནསཏཱམཱཝཊྚཾ དཱིགྷཾ ཏིསཏ ཡོཛནཾ,

ཕཎཱནེཀསཧསྶཱནི-མཱཔིསིཏྭཱ མཧིདྡྷིཀོ,

སིནེརུ པཱདམཱུལམྷི-དྷུམཱཡནྟོ ཙ པཛྫལཾ,

ཨཱབྷུཛིཏྭཱན སོ བྷོགེ-ནིཔཛྫི ཝཱལུཀཱཏལེ;

‘‘ཨནེཀཱནི སཧསྶཱནི-ཨཏྟནཱ སདིསེ ཨཧི,

མཱཔཡིཏྭཱ སཡཱཔེསི-སམནྟཱ པརིཝཱརིཏེ,

བཧཱུ དེཝཱ ཙ ནཱགཱ ཙ-ཨོསརིཾསུ ཏཧིཾ ཏདཱ,

ཡུདྡྷཾ ཨུབྷིནྣཾ ནཱགཱནཾ-སསྶིསྶཱམ མཡཾ ཨིཏི;’’

ཏཏོ ནཱགརཱཛཱ བྷཱགིནེཡྻེན དྷཱཏུཡོ ཨཔནཱིཏབྷཱཝཾ ཉཏྭཱ ཨེཝམཱཧ- མམ སནྟིཀེ དྷཱཏུཡོ ནཏྠི, ཏུམྷེ ཨིདྷ པཔཉྩ ཨཀཏྭཱ སཱིགྷཾ གནྟྭཱ བྷིཀྑུསངྒྷསྶ ཏཾ པཝཏྟིཾ ཨཱརོཙེཐ བྷིཀྑུསངྒྷོ ཨཉྙཏོ དྷཱཏུཾ པརིཡེསིསྶཏཱིཏི སཱམཎེརོ ཨཱདིཏེ པཊྛཱཡ དྷཱཏུ ཨཱགམནཾ ཝཏྭཱ དྷཱཏུཡོ ཏཝ སནྟིཀེཡེཝ, པཔཉྩཾ ཨཀཏྭཱ དེཧཱིཏི ཙོདེསི.

ཏཏོ ནཱགརཱཛཱ སཱམཎེརེན མཱུལམྷི གཧིཏབྷཱཝཾ ཉཏྭཱ ཡེན ཀེནཙི པརིཡཱཡེན དྷཱཏུཡོ ཨདཏྭཱཝ པེསིཏུཾ ཝཊྚཏཱིཏི ཙིནྟེཏྭཱ སཱམཎེརཾ དྷཱཏུགྷརཾ ནེཏྭཱ ཙེཏིཡཉྩ ཙེཏིཡགྷརཉྩ དསྶེསི. ཏཾ པན ཙེཏིཡཉྩ ཙེཏིཡགྷརཉྩ སབྦརཏནམཡམེཝ ཨཧོསི.

ཝུཏྟཉྷེཏཾ མཧཱཝཾསེ

‘‘ཨནེཀདྷཱ ཨནེཀེཧི རཏནེཧི སུསངྑཏཾ,

ཙེཏིཡཾ ཙེཏིཡགྷརཾ-པསྶ བྷིཀྑུ སུནིམྨིཏ’’ནྟི;

དསྶེཏྭཱ ཙ པན ཙེཏིཡགྷརཏོ ཨོརུཡ྄ཧ ཨདྡྷཙཎྡཀཔཱསཱཎེ པཝཱལ༹པདུམམྷི ཋཏྭཱ ཨིམསྶ ཙེཏིཡསྶ ཙེཏིཡགྷརསྶ ཙ ཨགྒྷཾ ཀརོཧི ¶ བྷནྟེཏི ཨཱཧ སཱམཎེརོ ན སཀྐོམ མཧཱརཱཛ ཨགྒྷཾ ཀཱཏུཾ, སཀལེཔི ཏམྦྷཔཎྞིདཱིཔེ རཏནཱནི ཨིམཾ ཨདྡྷཙཎྡཀ པཱསཱཎཾ ནཱགྒྷཏཱིཏི ཨཱཧ.

ནཱགརཱཛཱ ཨེཝཾ སནྟེ མཧཱསཀྐཱརཊྛཱནཏོ ཨཔྤསཀྐཱརཊྛཱནཾ དྷཱཏཱུནཾ ནཡནཾ ཨཡུཏྟཾ ནནུ བྷིཀྑཱུཏི ཨཱཧ. སཱམཎེརོ ཨེཝམཱཧམཧཱརཱཛ བུདྡྷཱ ནཱམ དྷམྨགརུཀཱ, ན ཨཱམིས གརུཀཾ, ཏུམྷེསུ ཙཀྐཝཱལ༹པྤམཱཎཾ རཏནགྷརཾ མཱཔེཏྭཱ སབྦརཏནསྶ པཱུརེཏྭཱ དྷཱཏུཡོ པརིཧརནྟེསུཔི ཨེཀནཱགོཔི དྷམྨཱབྷིསམཡཾ ཀཱཏུཾ སམཏྠོ ནཱམ ནཏྠི ཡསྨཱ-

‘‘སཙྩཱབྷིསམཡོ ནཱག-ཏུམྷཱཀམྤི ན ཝིཛྫཏི. སཙྩཱབྷིསམཡཊྛཱནཾ-ནེཏུཾ ཡུཏྟཉྷི དྷཱཏུཡོ. སཾསཱརདུཀྑམོཀྑཱཡ-ཨུཔྤཛྫནྟ ཏཐཱགཏཱ, བུདྡྷསྶ ཝེཏྠཱདཱིཔྤཱཡོ-ཏེན ནེསྶཱམི དྷཱཏུཡོ. དྷཱཏུནིདྷཱནཾ ཨཛྫེཝ-སོ ཧི རཱཛཱ ཀརིསྶཏི.

ཏསྨཱ པཔཉྩམཀརིཏྭཱ-ལཧུཾ མེ དེཧི དྷཱཏུཡེ’’ཏི-ཨཱཧ. ཨེཝཾ ཝུཏྟེ ནཱགརཱཛཱ ཨཔྤཊིཧཱནོ ཡུཏྭཱ ཨཏྟནོ བྷཱགིནེཡྻེན དྷཱཏུཡོ གོཔིཏོཏི མཉྙམཱནོ ཨེཝམཱཧ. ཏུམྷེ བྷནྟེ ཙེཏིཡེ དྷཱཏཱུནཾ ཨཏྠིབྷཱཝཾ ཝཱ ནཏྠིབྷཱཝཾ ཝཱ ཨཛཱནནྟཱ དེཧི དེཧཱིཏི ཝདཐ. ཨཧཾ ནཏྠཱིཏི ཝདཱམི. སཙེ པསྶཐ གཧེཏྭཱ གཙྪཐཱཏི. གཎྷཱམི མཧཱརཱཛཱཏི, གཎྷ བྷིཀྑཱུཏི. གཎྷཱམི མཧཱརཱཛཱཏི, གཎྷ བྷིཀྑཱུཏི ཏིཀྑཏྟུཾ པཊིཉྙཾ གཧེཏྭཱ.

‘‘སུཁུམཾ ཀརཾ མཱཔཡིཏྭཱ-ཐིཀྑཱུ ཏཏྲ ཋིཏོཙ སོ,

བྷཱགིནེཡྻསྶ ཝདནེ-ཧཏྠམྤཀྑིཔྤ ཏཱཝདེ,

དྷཱཏུཀརཎྜམདཱཡ-ཏིཊྛ ནཱགཱཏི བྷཱསིཧ,

ནིམུཛྫིཏྭཱ པཐཝིཡཾ-པརིཝེཎམྷི ཨུཊྛཧི;’’

ཏདཱ སཱམཎེརསྶ ནཱགེན སདྡྷིཾ ཡུདྡྷཾ པསྶིསྶཱམཱཏི སམཱགཏཱ དེཝ-ནཱག པརིསཱཔ བྷིཀྑུནཱགསྶ ཝིཛཡཾ དིསྭཱ ཧཊྛཱ པམོདིཏོ དྷཱཏུཡོ པཱུཛཡནྟཱཝ ཏེནེཝ སཧ ཨཱགམུཾ, ནཱགརཱཛཱ སཱམཎེརསྶ གཏ ཀཱལེ བྷིཀྑུཾ ཝཉྩེཏྭཱ པེསིཏོམྷཱིཏི ཧཊྛཏུཊྛོ དྷཱཏུཡོ གཧེཏྭཱ ཨཱགམཏྠཱཡ བྷཱགིནེཡྻསྶ སཱསནཾ པེསེསི.

‘‘བྷཱགིནེཡྻོ’ཐ ཀུཙྪིམྷི-ཨཔསྶིཏྭཱ ཀརཎྜཀཾ,

པརིདེཝམཱནོ ཨཱགནྟྭཱ-མཱཏུལསྶ ནིཝེདཡི;

ཏདཱ སོ ནཱགརཱཛཱཔི-ཝཉྩིཏམྷ མཡཾ ཨིཏི,

པརིདེཝི ནཱགཱ སབྦེཔི-པརིདེཝིཾསུ པིཎྜིཏཱ;’’

ཏཏོ ¶ ནཱགབྷཝནེ སབྦེ ནཱགཱ སམཱགནྟྭཱ ཀེསེ མུཉྩིཏྭཱ ཨུབྷོཧི ཧཏྠེཧི ཧདཡེ གཧེཏྭཱ ནཱིལུཔྤལ སདིསེཧི ནེཏྟེཧི ཝིལཱིན སོཀམིཝ ཨསྶུདྷཱརཾ པཝཏྟཡམཱནཱ-

‘‘པརིདེཝམཱནཱ ཨཱགནྟྭཱ-ནཱགཱ སངྒྷསྶ སནྟིཀེ,

བཧུདྷཱ པརིདེཝིཾས-དྷཱཏཱཧརཎ དུཀྑིཏཱ’’ཏི;

པརིདེཝིཏྭཱ ཙ བྷིཀྑུསངྒྷསྶ ཨེཝམཱཧཾསུ- བྷནྟེ ཀསྶཙི པཱིལ༹ཾ ཨཀཏྭཱ ཨམྷཱཀཾ པུཉྙཱནུབྷཱཝེན ལབྷིཏྭཱ ཙཱིརཔརིཧཊ དྷཱཏུཡོ ཀསྨཱ ཨནཝསེསཾ ཀཏྭཱ ཨཧརཱཔེཐ ཨམྷཱཀཾ སགྒམོཀྑནྟརཱཡཾ ཀརོཐཱཏི.

’ཏེསཾ སངྒྷོ’ནུཀམྤཱཡ-ཐོཀཾ དྷཱཏུམདཱཔཡི,

ཏེ ཏེན ཏུཊྛཱ གནྟྭཱན-པཱུཛཱབྷཎྜཱནི ཨཱཧརུཾ;

ཏཏོ སཀྐོ དེཝཱནམིཎྡོ ཝིསྶཀམྨཾ ཨཱམནྟེཏྭཱ སཱམཎེརསྶ ཨུཊྛིཏཊྛཱནེ སཏྟརཏནམཡཾ མཎྜཔཾ མཱཔེཧཱིཏི ཨཱཧ. སོ ཏསྨིཡེཝ ཁཎེ མཎྜཔཾ མཱཔེསི ཨཐ སཀྐོ དྭཱིསུ དེཝལོཀེསུ དེཝཔརིསཱཡ པརིཝུཏོ སུཝཎྞཙངྒོཊཀེན སདྡྷིཾ རཏན པལླངྐམཱདཱཡ ཨཱགནྟྭཱ ཏསྨིཾ མཎྜཔེ པཏིཊྛཱཔེཏྭཱ སཱམཎེརསྶ ཧཏྠཏོ དྷཱཏུཀརཎྜཀཾ གཧེཏྭཱ ཏསྨིཾ པལླངྐེ པཏིཊྛཱཔེསི. ཏདཱ-

’བྲཧྨཱ ཚཏྟམདྷཱརེསི-སནྟུསིཏོ ཝཱལཝིཛནིཾ,

མཎིཏཱལཝཎྚཾ སུཡཱམོ-སཀྐོ སངྑནྟུ སོདཀཾ;

ཙཏྟཱརོ ཏུ མཧཱརཱཛ-ཨཊྛཾསུ ཁགྒཔཱཎིནོ,

སམུགྒཧཏྠཱ དྭཏྟིཾསཱ-དེཝཔུཏྟཱ མཧིདྡྷིཀཱ;

པཱརིཙྪཏྟཀ པུཔྥེཧི པཱུཛཡནྟཱ ཏཧིཾ ཋིཏཱ,

ཀུམཱརིཡོཔི དྭཏྟིཾསཱ-དཎྜིདཱིཔདྷརཱ ཋིཏཱ;

པལཱཔེཏྭཱ དུཊྛཡཀྑེ-ཡཀྑསེནཱཔཏི པན

ཨཊྛཝཱིསཏི ཨཊྛཾསུ-ཨཱརཀྑཾ ཀུརུམཱནཀཱ;

ཝཱིཎཾ ཝཱདཡམཱནོཝ-ཨཊྛཱ པཉྩསིཁོ ཏཧིཾ,

རངྒབྷཱུམིཾ མཱཔཡིཏྭཱ-ཏིམྦརཱུ ཏུརིཡགྷོསཝཱ;

ཨནེཀཱ དེཝཔུཏྟཱ ཙ-སཱདྷུགཱིཏཔྤཡོཛཀཱ,

མཧཱཀཱལོ ནཱགརཱཛཱ-ཐཱུཡམཱནོ ཨནེཀདྷཱ;

དིབྦཏུརིཡཱནི ཝཛྫནྟི-དིབྦསངྒིཏི ཝཏྟཏི,

དིབྦགཎྡྷཱ ཙ ཝསྶཱནི-ཝསྶཱཔེནྟི ཙ དེཝཏཱ;

ཏདཱ ཨིཎྡགུཏྟཏྠེརོ མཱརསྶ པཊིབཱཧནཏྠཱཡ ཙཀྐཝཱལ༹པརིཡནྟཾ ཀཏྭཱ ཨཱཀཱསེ ལོཧཚཏྟཾ མཱཔེསི. པཉྩནིཀཱཡིཀ ཐེརཱ ¶ དྷཱཏུཡོ པརིཝཱརེཏྭཱ པཉྩསུ ཋཱནེསུ ནིསཱིདིཏྭཱ གཎསཛ྄ཛྷཱཡམཀཾསུ. ཏསྨིཾ ཀཱལེ རཱཛཱ ཏཾ ཋནཾ ཨཱགནྟྭཱ སིསཏོ སུཝཎྞ ཙངྒོཊཀཾ ཨོཏཱརེཏྭཱ དྷཱཏུ ཙངྒོཊཀཾ ཨཏྟནོ ཙངྒོཊཀེ ཋཔེཏྭཱ པལླངྐེ པཏིཊྛཱཔེཏྭཱ གཎྡྷམཱལཱདཱིཧི པཱུཛེཏྭཱ པཉྩཔཏིཊྛིཏེན ཝནྡིཏྭཱ སིརསི ཨཉྫལིཾ པགྒཡ྄ཧ ཨཀྑཱིནི ཨུམྨཱིལེཏྭཱ ཨོལོཀེནྟོ ཨཊྛཱསི. ཏསྨིཾ ཁཎེ དྷཱཏུམཏྠཀེ སེཏཙྪཏྟཾ དིསྶཏི ཚཏྟགཱཧཀ བྲཧྨཱ ན དིསྶཏི. ཏཐཱ ཏཱལཝཎྚ ཝིཛནི ཨཱདཡོ དིསྶནྟི གཱཧཀཱ ན དིསྶནྟི དིབྦཏུརིཡགྷོས སངྒིཏིཡོ སུཡྻནྟི གཎྡྷབྦ དེཝཏཱ ན དིསྶནྟི. རཱཛཱ ཨེཏཾ ཨཙྪརིཡཾ དིསྭཱ ཨིཎྡགུཏྟཏྠེརཾ ཨེཝམཱཧ-དེཝཏཱ དིབྦཚཏྟེན པཱུཛེསུཾ ཨཧཾ མཱནུས ཀཙྪཏྟེན པཱུཛེམི བྷནྣེཏི. ཐེརོ ཡུཏྟཾ མཧཱརཱཛཱཏི ཨཱཧ. རཱཛཱ ཨཏྟནོ སུཝཎྞཔིཎྜིཀེ སེཏཙྪཏྟེན པཱུཛེཏྭཱ སུཝཎྞབྷིཾཀཱརཾ གཧེཏྭཱ ཨབྷིསེཀོདཀཾ དཏྭཱ ཏཾ དིཝསཾ སཀལཏམྦཔཎྞི དཱིཔེ རཛྫཾ ཨདཱསི.

ཏཏོ སབྦཏུརིཡཱནི པགྒཎྷིཾསུ, གཎྡྷམཱལཱདཱིཧི པཱུཛེཏྭ མཧནྟཾ སཀྐཱརམཀཾསུ པུན རཱཛཱ ཐེརཾ པུཙྪི - ཨམྷཱཀཾ སཏྠཱ དིབྦམཱནུསཀཱནི དྭེ ཚཏྟཱནི དྷཱརེསི བྷནྟེ. ན དྭེ ཚཏྟཱནི ཏཱིཎི ཚཏྟཱནི མཧཱརཱཛཱཏི. ཨཉྙཾ ཚཏྟཾ ནཔསྶཱམི བྷནྣེཏི. སཱིལཔཏིཊྛཾ སམཱདྷིདཎྜཀཾ ཨིཎྡྲིཡསལཱཀཾ བལམཱལཾ མགྒཕལཔཏྟ སཉྪནྣཾ ཝིམུཏྟིཝརསེཏཙྪཏྟཾ ཨུསྶཱཔེཏྭཱ ཉཱཎཱབྷིསེཀམྤཏྟོ དྷམྨརཏན ཙཀྐཾ པཝཏྟེཏྭཱ དསསཧསྶ ཙཀྐཝཱལེ༹སུ བུདྡྷརཛྫཾ ཧཏྠགཏཾ ཀཏྭཱ རཛྫཾ ཀཱརེསཱིཏི རཱཛཱ ཏཱིཎིཙྪཏྟ དྷཱརཀསྶ སཏྠུནོ ཏིཀྑཏྟུཾ རཛྫཾ དམྨཱིཏི ཏིཀྑཏྟུཾ དྷཱཏུཡོ རཛྫེན པཱུཛེསི.

ཏཏོ རཱཛཱ དེཝམནུསྶེསུ དིབྦགཎྡྷམཱལཱདཱིཧི པཱུཛེནྟེསུ ཨནེཀེསུ ཏུརིཡགྷོས སངྒིཏེསུ ཝཏྟམཱནེསུ དྷཱཏུཀརཎྜཀཾ སཱིསེནཱདཱཡ རཏནམཎྜཔཏོ ནིཀྑམིཏྭཱ བྷིཀྑུསངྒྷ པརིཝུཏོ མཧཱཙེཏིཡཾ པདཀྑིཎཾ ཀཏྭཱ པཱཙཱིནདྭཱརེནཱརུཡ྄ཧ དྷཱཏུགབྦྷཾ ཨོཏརི. ཏཏོ མཧཱཙེཏིཡཾ པརིཝཱརེཏྭཱ ཚནྣཝུཏི ཀོཊིཔྤམཱཎ ཨརཧནྟོ ཨཊྛཾསུ.

རཱཛཱ སཱིསཏོ དྷཱཏུཀརཎྜཀཾ ཨོཏཱརེཏྭཱ མཧཱརཧེ སཡནཔིཊྛེ ཋཔེསྶཱམཱིཏི ཙིནྟེསི ཏསྨིཾ ཁཎེ དྷཱཏུཀརཎྜཀོ རཉྙོ སཱིསཏོ སཏྟ ཏཱལཔྤམཱཎེ ཋཱནེ གནྟྭཱ སཡམེཝ ཝིཙརི དྷཱཏུཡོ ཨཱཀཱསམུགྒནྟྭཱ དྭཏྟིཾས མཧཱ པུརིསལཀྑཎ ཨསིཏི ཨནུབྱཉྫནཱ བྱཱམཔྤབྷཱ པཏིམཎྜིཏཾ ཀེཏུམཱལོཔ སོབྷིཏཾ ནིལ-པཱིཏ-ལོཧིཏཱདི བྷེད ཝིཙིཏྲ རཾསིཛཱལཱ སམུཛྫལཾ བུདྡྷཝེསཾ གཧེཏྭཱ གཎྜམྦམཱུལེ ¶ ཡམཀ པཱཊིཧཱརིཡཾ སདིས ཡམཀ པཱཊིཧཱརིཡཾ ཨཀཾསུ. ཏཾ དྷཱཏུཔཱཊིཧཱརིཡཾ དིསྭཱ པསཱིདིཏྭཱ ཨརཧཏྟམྤཏྟཱ དེཝམནུསྶཱ དྭཱདསཀོཊིཡོ ཨཧེསུཾ. སེསཕལཏྟཡཾ པཏྟཱ གཎནཔཐམཏཱིཏཱ ཨཧེསུཾ. ཨེཝཾ དྷཱཏུཡོ ཨནེཀདྷཱ པཱཊིཧཱརིཡཾ དསྶེཏྭཱ བུདྡྷཝེསཾ ཝིསྶཛྫེཏྭཱ ཀརཎྜཀཾ པཝིསིཏྭཱ ཏེན སདྡྷིཾ ཨོཏརིཏྭཱ རཉྙོ སཱིསེ པཏིཊྛཧིཾསུ.

རཱཛཱ ཨམཏེན ཝིཡ ཨབྷིསིཏྟོ སཕལཾ མནུསྶཏྟ པཊིལཱབྷཾ མཉྙམཱནོ ཨུབྷོཧི ཧཏྠེཧི དྷཱཏུཀརཎྜཀཾ གཧེཏྭཱ ནཱཊཀ པརིཝུཏོ ཨལངྐཏ སཡན སམཱིཔཾ གནྟྭཱ དྷཱཏུཙངྒོཊཀཾ རཏནཔལླངྐེ ཋཔེཏྭཱ གཎྡྷཝཱསིཏོདཀེན ཧཏྠེ དྷོཝིཏྭཱ ཝཏུཛཱཏིཡ གཎྡྷེན ཨུབྦཊྚེཏྭཱ རཏནཀརཎྜཀཾ ཝིཙརིཏྭཱ དྷཱཏུཡོ གཧེཏྭཱ ཨེཝཾ ཙིནྟེསི.

‘‘ཨནཱཀུལཱ ཀེཧིཙིཔི ཡདི ཧེསྶསྟི དྷཱཏུཡོ,

ཛནསྶ སརཎཾ ཧུཏྭཱ ཡདི ཋསྶནྟི དྷཱཏུཡོ;

སཏྠུནིཔནྣཱ ཀཱརེན པརིནིབྦཱན མཉྩཀེ,

ནིཔཛྫནྟུ སུཔཉྙཏྟེ-སཡནམྷི མཧཱརཧེ’’ཏི;

ཨེཝཾ ཙིནྟེཏྭཱ པན ཝརསཡནཔིཊྛེ དྷཱཏུཡོ ཋཔེསི ཏསྨིཾ ཁཎེ དྷཱཏུཡོ རཉྙཱ ཙིནྟིཏ ནིཡཱམེནེཝ མཧཱརཧེ སཡནེ བུདྡྷཝེསེན སཡིཾསུ.

‘‘ཨཱསཱལ༹ཧི སུཀྐཔཀྑསྶ པནྣརས ཨུཔོསཐེ,

ཨུཏྟརཱསཱལ༹ྷ ནཀྑཏྟེ ཨེཝཾ དྷཱཏུ པཏིཊྛིཏཱ;

སཧ དྷཱཏུ པཏིཊྛཱནཱ ཨཀམྤིཏྠ མཧཱམཧཱི, པཱཊིཧཱིརཱནི ནེཀཱནི པཝཏྟིཾསུ ཨནེཀདྷཱ.’’

ཏདཧི ཨུདཀཔརིཡནྟཾ ཀཏྭཱ ཨཡཾ མཧཱཔཐཝཱི སངྐམྤི སམྤཀམྤི སམྤཝེདྷི, མཧཱསམུདྡོ སངྑཱུབྷི, ཨཱཀཱསེ ཝིཛྫུལླཏཱ ནིཙྪརིཾསུ. ཁཎིཀཝསྶཾ ཝསྶི, ཚ དེཝལོཀཱ ཨེཀཀོལཱཧལ མཧོསི རཱཛཱ ཨེཏཾ ཨཙྪརིཡཾ དིསྭཱ པསནྣོ ཨཏྟནོ ཀཉྩན མཱལིཀ སེཏཙྪཏྟེན དྷཱཏུཡོ པཱུཛེཏྭཱ ཏམྦཔཎྞིདིཔེ རཛྫཾ སཏྟཱཧཾ དཏྭཱ ཏིཾས སཏསཧསྶགྒྷནཀཾ ཨལངྐཱར བྷཎྜཾ ཨོམུཉྩིཏྭཱ པཱུཛེསི. ཏཐཱ སབྦཱཔི ནཱཊཀིཏྠིཡོ ཨམཙྩཱ སེས མཧཱཛནོ དེཝཱ ཙ སབྦཱབྷརཎཱནི པཱུཛེསུཾ ཏསྨཱ-

ཏིཊྛནྟཾ སུགཏཾ ཏིལོཀམཧིཏཾ ཡོ པཱུཛཡེ སཱདརཾ,

ཡོ ཝཱ སཱསཔ བཱིཛམཏྟམྤི ཏཾ དྷཱཏུཾ ནརོ པཱུཛཡེ;

ཏེསཾ པུཉྙཕལཾ སམཱནམཱིཏི ཏཾ ཙིཏྟཔྤསཱདེ སམེ,

ཉཏྭཱ ཏཾ པརིནིབྦུཏེཔི སུགཏེ དྷཱཏུཾ བུདྷོ པཱུཛཡེ’ཏི;

ཏཏོ ¶ རཱཛཱ ཙཱིཝརཝཏྠཱནི ཙེཝ གུལ༹-སཔྤི ཨཱདི བྷེསཛྫཱནི ཙ སངྒྷསྶ དཏྭཱ སབྦརཏྟིཾ གཎསཛ྄ཛྷཱཡཾ ཀཱརེསི པུན དིཝསེ ནགརེ བྷེརིཾ ཙརཱཔེསི མཧཱཛནོ ཨིམཾ སཏྟཱཧཾ གཎྡྷམཱལཱདཱིནི ཨཱདིཡ གནྟྭཱ དྷཱཏུཡོ ཝནྡཏཱུཏི ཨིཎྡགུཏྟཏྠེརོཔི སཀལ ཏམྦཔཎྞི དཱིཔེ མནུསྶཱ དྷཱཏུཡོ ཝནྡིཏུཀཱམཱ, ཏཾ ཁཎཾཡེཝ ཨཱགནྟྭཱ ཝནྡིཏྭཱ ཡཐཱཊྛཱནཾ གཙྪནྟཱུཏི ཨདྷིཊྛཱསི.

ཏེ ཏཐེཝ དྷཱཏུཡོ ཝནྡིཏྭཱ གམིཾསུ རཱཛཱ སཏྟཱཧཾ སངྒྷསྶ མཧཱདཱནཾ པཝཏྟེཏྭཱ སཏྟཱཧསྶ ཨཙྩཡེན དྷཱཏུགབྦྷེ མཡཱ ཀཏྟབྦཀིཙྩཾ ནིཊྛཱཔིཏཾ, དྷཱཏུགབྦྷཾ པིདཧཐ བྷནྟེཏི སངྒྷསྶ ཨཱརོཙེསི. སངྒྷོ ཨུཏྟརསུམན སཱམཎེརེ ཨཱམནྟེཏྭཱ ཏུམྷེཧི པུབྦེ ཨཱཧཊ མེདཝཎྞ པཱསཱཎེན དྷཱཏུ གབྦྷཾ པིདཧཐཱཏི ཨཱཧ. ཏེ སཱདྷཱུཏི སམྤཊིཙྪིཏྭཱ དྷཱཏུགབྦྷཾ པིདཧིཾསུ.

ཏཏོ ཁཱིཎཱསཝཱ དྷཱཏུགབྦྷེ གཎྡྷཱ མཱ སུསནྟུ མཱལཱ མཱ མིལཱཡནྟུ. དཱིཔཱ མཱ ནིབྦཱཡནྟུ རཏནཱནི མཱ ཝིཝཎྞཱནི ཧོནྟུ པཱུཛནཱིཡབྷཎྜཱནི མཱ ནསྶནྟུ. མེདཝཎྞ པཱསཱཎཱ སནྡྷཱིཡནྟུ, པཙྩཏྠིཀཱནཾ ཨོཀཱསོ མཱ ཧོཏཱུཏི ཨདྷིཊྛཧིཾསུ.

ཨེཝཾ རཱཛཱ དྷཱཏུ ནིདྷཱཔེཏྭཱ པུན ནགརེ བྷེརིཾ ཙརཱཔེསི མཧཱ ཙེཏིཡེ དྷཱཏུཾ ནིདྷཱཔེཏྭཱ དྷཱཏུཾ ཨཱཧརིཏྭཱ ནིདྷཱནཾ ཀརོནྟཱུཏི. མཧཱཛནོ ཨཏྟནོ ཨཏྟནོ བལཱནུརཱུཔེན སུཝཎྞ རཛཏཱདི ཀརཎྜེ ཀཱརཱཔེཏྭཱ ཏཏྠ དྷཱཏུཡོ པཏིཊྛཱཔེཏྭཱ དྷཱཏུནིདྷཱནསྶུཔརི མེདཝཎྞ པཱསཱཎ པིཊྛིཡཾ ནིདཧིཾསུ. སབྦེཧི སནྣིཧིཏ དྷཱཏུཡོ སཧསྶམཏྟཱ ཨཧེསུནྟི.

ཨིཏི སཱདྷུཛན མནོཔསཱདནཏྠཱཡ ཀཏེ ཐཱུཔཝཾསེ དྷཱཏུནིདྷཱན ཀཐཱ ནིཊྛིཏཱ.

༢༤. ཏཏོ རཱཛཱ ཏཾ སབྦཾ པིདཧེཏྭཱ ཙེཏིཡཾ ཀརོནྟོ ཨུདརེན སདྡྷིཾ ཙཏུརསྶ ཀོཊྛཀཾ ནིཊྛཱཔེསི ཨཐ ཚཏྟཀམྨེ སུདྷཱཀམྨེ ཙ ཨནིཊྛིཏེཡེཝ མཱརཎནྟིཀ རོགེན གིལཱནོ ཧུཏྭཱ དཱིགྷཝཱཔིཏོ ཀནིཊྛབྷཱཏརཾ པཀྐོསཱཔེཏྭཱ ཙེཏིཡེ ཨནིཊྛིཏཾ ཚཏྟཀམྨཾ སུདྷཱཀམྨཉྩ སཱིགྷཾ ནིཊྛཱཔེཏྭཱ མཾ ཏོསེཧི ཏཱཏཱཏི ཨཱཧ. སོ རཉྙོ དུབྦལབྷཱཝཾ ཉཏྭཱ ཨནྟརེ ཨནིཊྛིཏཀམྨཾ ཀཱཏུཾ ན སཀྐཱཏི སུདྡྷཝཏྠེཧི ཀཉྩུཀཾ ཀཱརེཏྭཱ ཙེཏིཡེ པཊིམུཉྩཱཔེཏྭཱ ཙིཏྟཀཱརེཧི ཀཉྩུཀ མཏྠཀེ ཝེདིཀཱ ཙ པུཎྞགྷཊ པཉྩངྒུལི པནྟིཡོ ཙ ཀཱརཱཔེསི.

ནལ༹ཀཱརེཧི ཝེལུ༹མཡ ཚཏྟཾ ཀཱརེཏྭཱ ཁརཔཏྟམཡེ ཙཎྡསཱུརིཡམཎྜལེ མུདྡྷནི ཝེདིཀཱ ཀཱརེཏྭཱ ལཱཁཱཀུཀུཊྛཀེཧི ཏཾ ཝིཙིཏྟཾ ཀཏྭཱ ཐཱུཔཀམྨཾ ནིཊྛིཏནྟི རཉྙོ ཨརོཙེསི རཱཛཱ ཏེན ཧི མཾ ¶ མཧཱཙེཏིཡཾ དསྶེཧཱིཏི ཝཏྭཱ སིཝིཀཱཡ ནིཔཛྫིཏྭཱ ཙེཏིཡཱ པདཀྑིཎཾ ཀཏྭཱ དཀྑིཎདྭཱརེ བྷཱུམིསཡནཾ པཉྙཱཔེཏྭཱ ཏཏྠ ནིཔནྣོ དཀྑིཎེན པསྶེན སཡིཏྭཱ མཧཱཐཱུཔཾ ཝཱམཔསྶེན སཡིཏྭཱ ལོཧཔཱསཱདཾ ཨོལོཀེནྟོ པསནྣ ཙིཏྟོ ཨཧོསི. ཏདཱ རཉྙོ སཱསནསྶ བཧཱུཔཀཱརབྷཱཝཾ སལླཀྑེཏྭཱ གིལཱན པུཙྪནཏྠཱཡ ཏཏོ ཏཏོ ཨཱགཏཱ བྷིཀྑུ ཚནྣཝུཏི ཀོཊིཡོ རཱཛཱནཾ པརིཝཱརེཏྭཱ ཨཊྛཾསུ. ཏཏོ སངྒྷོ ཝགྒ ཝགྒཱ ཧུཏྭཱ གཎསཛ྄ཛྷཱཡཾ ཨཀཱསི.

རཱཛཱ ཏསྨིཾ སམཱགམེ ཐེརཔུཏྟཱབྷཡཏྠེརཾ ཨདིསྭཱ ཨེཝཾ ཙིནྟེསི. སོ མཡི དམིལེ༹ཧི སདྡྷིཾ ཨཊྛཝཱིསཏི མཧཱཡུདྡྷེ ཀཡིརམཱསེ ཨཔཙྩོསཀཀིཏྭཱ ཨིདཱནི མརཎཡུདྡྷེ ཝཏྟམཱཎེ མཡ྄ཧཾ པརཱཛཡཾ དིསྭཱ མཉྙེ ནཱགཙྪཏཱིཏི. ཏདཱ ཐེརོ ཀརིཎྡ ནདཱི སཱིསེ པཛྫལིཏ པབྦཏེ ཝསནྟོ རཉྙོ པརིཝིཏཀྐཾ ཉཏྭཱ པཉྩསཏ ཁཱིཎཱསཝ པརིཝུསེཏཱ ཨཱཀཱསེནཱགནྟྭཱ རཉྙོ པུརཏོ པཱཏུརཧོསི.

རཱཛཱ ཐེརཾ དིསྭཱ ཨཏྟནོ པུརཏོ ནིསཱིདཱཔེཏྭཱ ཨེཝམཱཧ བྷནྟེ ཏུམྷེཧི སདྡྷིཾ དསམཧཱ ཡོདྷེ གཧེཏྭཱ དམིལེ༹ཧི སདྡྷི ཡུཛ྄ཛྷིཾ. ཨིདཱནི ཨེཀཀོཝ མཙྩཱུནཱ སདྡྷིཾ ཡུཛ྄ཛྷིཏུཾ ཨཱརབྷིཾ. མཙྩུ སཏྟུམྤན པརཱཛེཏུཾ ན སཀྐོམཱིཏི. ཏཏོ-

ཐེརཔུཏྟཱབྷཡཏྠེརོ མཱ བྷཱཡི མནུཛཱདྷིཔ,

ཀིལེས སཏྟུཾ ཨཛིནིཏྭཱ ཨཛེཡྻོ མཙྩཱུསཏྟུཀོ;

ཨིཏི ཝཏྭཱ ཨེཝཾ ཨནུསཱསི. མཧཱརཱཛ སབྦོཡེཝ ལོཀ སནྣིཝཱསེ ཛཱཏིཡཱ ཨནུགཏོ, ཛརཱཡ ཨནུསཊོ, ཝྱཱདྷིནཱ ཨབྷིབྷཱུཏོ, མརཎེན ཨབྦྷཱཧཏོ. ཏེཏཱཧ-

‘‘ཡཐཱཔི སེལཱ ཝིཔུལཱ-ནཧཾ ཨཱཧཙྩ པབྦཏཱ,

སམནྟཱ ཨནུཔརིཡེཡྻུཾ-ནིཔྤོཐེནྟཱ ཙཏུདྡིསཾ;

ཨེཝཾ ཛརཱ ཙ མཙྩུ ཙ-ཨདྷིཝཏྟནྟི པཱཎིནོ,

ཁཏྟིཡོ བྲཱཧྨཎེ ཝེསྶེ སུདྡེ ཙཎྜཱལ པུཀྐུསེ,

ན ཀིཉྩི པརིཝཛྫེཏི-སབྦམེཝཱབྷིམདྡཏི;

ན ཏཏྠ ཧཏྠིནཾ བྷཱུམི-ན རཐཱནཾ ན པཏྟིཡཱ,

ན ཙཱཔི མནྟཡུདྡྷེན-སཀྐཱ ཛེཏུཾ དྷནེན ཝཱ’’ཏི;

ཏསྨཱ ཨིདཾ མརཎཾ ནཱམ མཧཱཡསཱནཾ མཧཱསམྨཏཱདཱིནཾ མཧཱ པུཉྙཱནཾ ཛོཏིཡཱདཱིནཾ མཧཱཐཱམཱནཾ བལདེཝཱདཱིནཾ ཨིདྡྷིམནྟཱནཾ མཧཱམོགྒལླཱནཱདཱིནཾ པཉྙཱཝནྟཱནཾ སཱརིཔུཏྟཱདཱིནཾ སཡམྦྷཱུཉཱཎེན ཨདྷིགཏ སཙྩཱནཾ, པཙྩེཀབུདྡྷཱནཾ སབྦགུཎསམནྣཱགཏཱནཾ སམྨཱསམྦུདྡྷཱནམྤི ཨུཔརི ནིརཱསངྐམེཝ པཏཏི ཀིམངྒཔནཉྙེསུ སཏྟེསུ.

ཏསྨཱ- ¶

མཧཱཡསཱ རཱཛཝརཱ གཏཱ ཏེ སབྦེ མཧཱསམྨཏ ཨཱདཡོཔི,

ཨནིཙྩབྷཱཝཾ བལདེཝ ཨཱདི མཧཱབལཱ ཙེཝ ཏཐཱ གམིཾསུ;

ཡེ པུཉྙཝནྟཱནི གཏཱ པསིདྡྷིཾ མཧདྡྷནཾ ཛོཏིཡམེཎྜཀཱདཱི,

ཨུཔཱཝིསིཾ ཝཙྩུམུཁཾ སབྷོགཱ སབྦེཔི ཏེ རཱཧུམུཁཾ སསཱིཝ;

ཡོ ཨིདྡྷིམནྟེསུ ཏཐཱགཏསྶ པུཏྟེསུསེཊྛོ ཨིཏི ཝིསྶུཏོཔི,

ཐེརོ མཧཱརཱཛསཧེཝ ཨིདྡྷིབལེན སོ མཙྩུམུཁཾ པཝིཊྛོ;

སབྦེསུ སཏྟེསུ ཛིནཾ ཋཔེཏྭཱ ནེཝཏྠི པཉྙཱཡ སམོཔི ཡེན,

སོ དྷམྨསེནཱཔཏི སཱཝཀོཔི གཏོ མཧཱརཱཛ ཨནིཙྩཏཾ’ཙ;

སཡམྦྷཱུཉཱཎསྶ བལེན སནྟིཾ གཏཱ མཧཱརཱཛ སཡམྦྷཱུནོཔི,

སབྦེཔི ཏེ ཉཱཎབལཱུཔ པནྣཱ ཨནིཙྩཏཾ ནེཝ ཨཏིཀྐམིཾསུ;

ཏིལོཀནཱཐོ པུརིསུཏྟམོ སོ ཨནིཙྩབྷཱཝཾ སམཏིཀྐམིཏྭཱ,

ནཱསཀྑི གནྟུཾ སུགཏོཔི རཱཛ ཨཉྙེསུ སཏྟེསུ ཀཐཱཝ ནཏྠི;

ཏསྨཱ མཧཱརཱཛ བྷཝེསུ སཏྟཱ སབྦེཔི ནཱསུཾ མརཎཱ ཝིམུཏྟཱ,

སབྦམྤི སངྑཱརགཏཾ ཨནིཙྩཾ དཱུཀྑཾ ཨནཏྟཱཏི ཝིཙིནྟཡསྶུ;

‘‘དུཏིཡེ ཨཏྟབྷཱཝེཔི དྷམྨཙྪཎྡོ མཧཱ ཧི ཏེ,

ཨུཔཊྛིཏེ དེཝལོཀེ ཧིཏྭཱ དིབྦསུཁཾ ཏུཝཾ;

ཨིདྷཱགམྨ བཧུཾ པུཉྙཾ ཨཀཱསི ཙ ཨནེཀདྷཱ,

ཀརཎམྤེཀ རཛྫསྶ སཱསནཛྫོཏནཱཡ ཏེ;

མཧཱ རཱཛ ཀཏཾ པུཉྙཾ ཡཱཝཛྫ དིཝསཱ ཏཡཱ,

སབྦཾ ཨནུསྶརེཐེཝ སུཁཾ སཛྫུ བྷཝིསྶཏི;

ཏཾ སུཏྭཱ ཏུཊྛམཱནསོ རཱཛཱ བྷནྟེ ཏུམྷེ མཙྩུཡུདྡྷེཔི ཨཔསྶཡཱཏི ཝཏྭཱ ལདྡྷསྶཱསོ པུཉྙཔོཏྠཀཾ ཝཱཙེཏུཾ ཨཱཎཱཔེསི ལེཁཀོ པུཉྙཔོཏྠཀཾ ཨེཝཾ ཝཱཙེསི.

‘‘ཨེཀཱུནསཏཝིཧཱརཱ མཧཱརཱཛེན ཀཱརིཏཱ,

ཨེཀཱུནསཏཀོཊཱིཧི ཝིཧཱརོ མརིཙཊྚི ཙ;

ཨུཏྟམོ ལོཧཔཱསཱདོ ཏིཾསཀོཊཱིཧི ཀཱརིཏོ,

མཧཱཐཱུཔེ ཨནགྒྷཱནི ཀཱརིཏཱ ཙཏུཝཱིསཏི;

མཧཱཐཱུཔམྷི སེསཱནི ཀརིཏཱནི སུབུདྡྷིནཱ,

ཀོཊིསཧསྶཾ ཨགྒྷནྟི མཧཱརཱཛ ཏཡཱ པུན;

ཀོལ༹མྦ ནཱམ མལེཡ ཨཀྑཀྑཱཡིཀ ཚཱཏཀེ,

ཀུཎྜལཱནི མཧགྒྷཱནི དུཝེ དཏྭཱན གཎྷིཡ;

ཁཱིཎཱསཝཱནཾ ¶ པཉྩནྣཾ མཧཱཐེརཱནམུཏྟམོ,

དིནྣོ པསནྣཙིཏྟེན ཀངྒུ ཨམྦིལ པིཎྜཀོ;

ཙཱུལ༹ངྒཎིཡ ཡུདྡྷམྷི པརཛ྄ཛྷིཏྭཱ པལཱཡཏཱ,

ཀཱལཾ གྷོསཱཔཡིཏྭཱན ཨཱགཏསྶ ཝིཧཱཡསཱ;

ཁཱིཎཱསཝསྶ ཡཏིནོ ཨཏྟཱནམནཔེཀྑིཡ,

དིནྣཾ སརཀ བྷཏྟནྟི པུཉྙཔོཏྠཾ ཨཝཱཙཡི;

༢༥. ཏཾ སུཏྭཱ རཱཛཱ ཏུསྶིཏྭཱ ཋཔེཧི ཋཔེཧི བྷཎེཏི ཝཏྭཱ ཨེཝམཱཧ. མརིཙཝཊྚི ཝིཧཱརམཧསཏྟཱཧེ ཐཱུཔཱརམྷསཏྟཱཧེ ཙ ཙཱཏུདྡིས ཨུབྷཏོ སངྒྷསྶ མཧཱརཧཾ མཧཱདཱནཾ པཝཏྟེསིཾ. ཙཏུཝཱིསཏི མཧཱཝིསཱཁཔཱུཛཱ ཀཱརེསིཾ ཏམྦཔཎྞིདཱིཔེ མཧཱབྷིཀྑུསངྒྷསྶ ཏིཀྑཏྟུཾ ཙཱིཝརམདཱསིཾ སཏྟ སཏྟ དཱིནཱནི ལངྐཱ རཛྫཾ སཱསནསྶ པཉྩཀྑཏྟུཾ ཨདཱསིཾ སཔྤི སནྣིཏྟ སུཔརིསུདྡྷ ཝཊྚིཡཱ དྭཱདསཋཱནེསུ, སཏྟཾ དཱིཔསཧསྶཾ ཛཱལེསིཾ ཨཊྛཱརསྶུ ཋཱནེསུ གིལཱནཱནཾ ཝེཛྫེཧི བྷེསཛྫཉྩ བྷཏྟཉྩ ནིཙྩཾ དཱཔེསི. ཙཏུཙཏྟཱལཱིས ཋཱནེསུ ཏེལུལློཔཀཉྩ ཨདཱསིཾ. ཏཏྟཀེསུཡེཝ ཋཱནེསུ གྷཏཔཀྐཛཱལཔཱུཝེ བྷཏྟེན སདྡྷིཾ ནིཙྩཾ དཱཔེསིཾ.

མཱསེ མཱསེ ཨཊྛསུ ཨུཔོསཐདིཝསེསུ ལངྐཱདཱིཔེ སབྦཝིཧཱརེསུ དཱིཔཏེལཾ དཱཔེསིཾ. ཨཱམིས དཱནཏོ དྷམྨདཱནཾ མཧནྟནྟི སུཏྭཱ ཧེཊྛཾ ལོཧཔཱསཱདེ དྷམྨཱསནེ ནིསཱིདིཏྭཱ མངྒལ སུཏྟཾ ཨོསཱརེཏུཾ ཨཱརབྷིཏྭཱཔི སངྒྷ གཱརཝེན ཨོསཱརེཏུཾ ནཱསཀྑིཾ. ཏཏོ པཊྛཱཡ དྷམྨདེསཀེ སཀྐརིཏྭཱ སབྦཝིཧཱརེསུ དྷམྨཀཐཾ ཀཐཱཔེསིཾ ཨེཀེཀསྶ དྷམྨཀཐིཀསྶ ནཱལ༹ ནཱལི༹པྤམཱཎཱནི སཔྤིཕཱཎིཏ སཀྑརཱནི ཙཏུརངྒུལ མུཊྛིཔྤམཱཎཾ ཡཊྛིམདྷུཀཾ སཱཊཀདྭཡཉྩ མཱསསྶ ཨཊྛསུ ཨུཔོསཐ དིསེསུ དཱཔེསིཾ. ཨེཏཾ སབྦམྤི ཨིསྶརིཡེ ཋཏྭཱ དིནྣཏྟཱ མམ ཙིཏྟཾ ས ཨཱརཱདྷེཏི. ཛཱིཝིཏཾ པན ཨནཔེཀྑིཏྭཱ དུགྒཏེན མཡཱ དིནྣདཱནདྭཡམེཝ ཨཱརཱདྷེཏཱིཏི.

ཏཾ སུཏྭཱ ཨབྷཡཏྠེརོ མཧཱརཱཛ པསཱདནཱིཡཊྛཱནེཡེཝ པསཱདཾ ཨཀཱསི ཏཾ པན པིཎྜཔཱཏདྭཡཾ པརིསྶ པཱིལ༹ཾ ཨཀཏྭཱ ལདྡྷ དྷམྨིཀ པཙྩཡཏྟཱ ཨཏྟཱནཾ ཨནཝལོཀེཏྭཱ ཨསཛྫམཱནེན དིནྣཏྟཱ པཊིགྒཱཧཀཱནཾ ཡཱཝདཏྠཾ ཀཏྭཱ དིནྣཏྟཱ པཱིཏིཔཱམོཛྫཾཛནཡིཏྭཱ བལཝ སདྡྷཱཡ དིནྣཏྟཱ དེཡྻདྷམྨསྶ ནིརཝསེསཾ པརིབྷོགཾ གཏཏྟཱཏི ཨིམེཧི པཉྩཧི ཀཱརཎེཧི མཧནྟཏྟི ཝཏྭཱ མཧཱརཱཛ ཀངྒུ ཨམྦིལི པིཎྜགཱཧཀཏྠེརེསུ མལིཡམཧཱདེཝཏྠེརོ སམནྟཀཱུཊེ པཉྩནྣཾ བྷིཀྑུསཏཱནཾ དཏྭཱ པརིབྷུཉྫི པཐཝི ཙཱལནཀ དྷམྨགུཏྟཏྠེརོ ཀལྱཱཎཱིཡ ཝིཧཱརེ པཉྩནྣཾ བྷིཀྑུསཏཱནཾ དཏྭཱ པརིབྷུཉྫི.

ཏལངྒརཝཱསཱི ¶ དྷམྨགུཏྟཏྠེརོཔི པིཡངྒུདཱིཔེ དྭཱདསནྣཾ བྷིཀྑུསཧསྶཱནཾ དཏྭཱ པརིབྷུཉྫི. མངྒཎཝཱསཱི ཙུལ༹ཏིསྶཏྠེརོ ཀེལཱསཀཱུཊེ ཝིཧཱརེ སཊྛིསཧསྶཱནཾ བྷིཀྑཱུནཾ དཏྭཱ པརིབྷུཉྫི མཧཱབྷགྒཏྠེརོཔི ཨུཀྐཱནགར ཝིཧཱརེ སཏྟསཏཱནཾ བྷིཀྑཱུནཾ དཏྭཱ པརིབྷུཉྫི སརཀ བྷཏྟགཱཧཀཏྠེརོ པན པིཡངྒུདཱིཔེ དྭཱདསནྣཾ བྷིཀྑུསཧསྶཱནཾ དཏྭཱ པརིབྷོགམཀཱསཱིཏི ཝཏྭཱ རཉྙོ ཙིཏྟཾ ཧཱསེསི.

རཱཛཱ ཙིཏྟཾ པསཱདེཏྭཱ ཨེཝམཱཧ-ཨཧམྦྷནྟེ ཙཏུཝཱིསཏི ཝསྶཱནི རཛྫཾ ཀཱརེནྟོ བྷིཀྑུསངྒྷསྶ པཧཱུཔཀཱརོ ཨཧོསིཾ. ཀཱཡོཔི མེ སངྒྷསྶ ཨུཔཀཱརཀོ ཧོཏུ སངྒྷདཱསསྶ མེ སརཱིརཾ མཧཱཙེཏིཡསྶ དསྶནཊྛཱནེ སངྒྷསྶ ཀམྨམཱལཀེ ཛྷཱཔེཐཱཏི. ཏཏོ ཀནིཊྛཾ ཨཱམནྟེཏྭཱ’ཏཱཏ! ཏིསྶ! མཧཱཐཱུཔེ ཨནིཊྛིཏཾ ཀམྨཾ སཱདྷུཀཾ ནིཊྛཱཔེསི. སཱཡཾ པཱཏོ ཙ མཧཱཐཱུཔེ པུཔྥཔཱུཛཾ ཀཱརེཏྭཱ ཏིཀྑཏྟུཾ ཨུཔཧཱརཾ ཀཱརེཧི. མཡཱ ཋཔིཏཾ དཱནཝཊྚཾ སབྦཾ ཨཔརིཧཱཔེཏྭཱ སངྒྷསྶ ཀཏྟབྦཀིཙྩེསུ སདཱ ཨཔྤམཏྟོ ཧོཧཱི’ཏི ཨནུསཱཡིཏྭཱ ཏུཎྷི ཨཧོསི.

ཏསྨིཾ ཁཎེ བྷིཀྑུ གཎསཛ྄ཛྷཱཡཾ ཨཱརབྷིཾསུ དེཝཏཱ པན ཚདེཝ ལོཀཏོ ཚ རཐེ གཧེཏྭཱ ཨཱདཱཡ པཊིཔཱཊིཡཱ ཋཔེཏྭཱ མཧཱརཱཛ ཨམྷཱཀཾ དེཝལོཀོ རམཎཱིཡོ, ཨམྷཱཀཾ དེཝལོཀོ རམཎཱིཡོཏི ཝཏྭཱ ཨཏྟནོ ཨཏྟནོ དེཝལོཀཾ ཨཱགམནཏྠཱཡ ཡཱཙིཾསུ རཱཛཱ ཏེསཾ ཝཙནཾ སུཏྭཱ ཡཱཝཱཧཾ དྷམྨཾ སུཎཱམི- ཏཱཝ ཨདྷིཝཱསེཐཱཏི ཏེ ཧཏྠསཉྙཱཡ ནིཝཱརེསི སངྒྷོ གཎསཛ྄ཛྷཱཡཾ ནིཝཱརེསཱིཏི མཉྙིཏྭཱ སཛ྄ཛྷཱཡཾ ཋཔཱཔེསི.

རཱཛཱ ཀསྨཱ བྷནྟེ གཎསཛ྄ཛྷཱཡཾ ཋཔེཐཱཏི ཨཱཧ. མཧཱརཱཛ ཏཡཱ ཧཏྠསཉྙཱཡ ནིཝཱརིཏཏྟཱཏི. བྷནྟེ ཏུམྷཱཀཾ སཉྙཾ ནཱདཱསིཾ. དེཝཏཱ ཚདེཝལོཀཏོ ཚ རཐེ ཨཱནེཏྭཱ ཨཏྟནོ ཨཏྟནོ དེཝལོཀཾ གནྟུཾ ཡཱཙནྟི ཏསྨཱ ཏེསཾ ཡཱཝཱཧཾ དྷམྨཾ སུཎཱམི ཏཱཝ ཨཱགམེཐཱཏི སཉྙཾ ཨདཱསིནྟི ཏཾ སུཏྭཱ ཀེཙི ཨཡཾ རཱཛཱ མརཎབྷཡབྷིཏོ ཝིཔྤལཔཏི, མརཎཏོ ཨབྷཱཡནཀ སཏྟོ ནཱམ ནཏྠཱིཏི མཉྙིཾསུ.

ཏཏོ ཨབྷཡཏྠེརོ ཨཱཧ ཀཐཾ མཧཱརཱཛ སདྡཧིཏུཾ སཀྐཱ ཚ དེཝལོཀཏོ ཚ རཐཱ ཨཱནཱིཏཱཏི ཏཾ སུཏྭཱ རཱཛཱ ཨཱཀཱསེ པུཔྥདཱམཱནི ཁིཔཱཔེསི. ཏཱནི གནྟྭཱ ཝིསུཾ རཐདྷུརེ ཨོལམྦིཾསུ མཧཱཛནོ ཨཱཀཱསེ ཨོལམྦནྟཱནི པུཔྥདཱམཱནི དིསྭཱ ནིཀྐངྑོ ཨཧོསི.

ཏཏོ རཱཛཱ ཐེརཾ པུཙྪི-ཀཏམོ པན བྷནྟེ དེཝལོཀོ རམཎཱིཡོཏི. ཏུསིཏབྷཝནཾ པན མཧཱརཱཛ རམཎཱིཡཾ, བུདྡྷབྷཱཝཱཡ སམཡཾ ཨོལོཀེནྟོ མེཏྟེཡྻོ བོདྷིསཏྟོཔི ཏསྨིཾཡེཝ ཝསཏཱིཏི ཨཱཧ.

ཏཾ ¶ སུཏྭཱ རཱཛཱ ཏསྨིཾ ཨཱལཡཾ ཀཏྭཱ མཧཱཐཱུཔཾ ཨོལོཀེནྟོ ནིཔནྣོཝ ཙཝིཏྭཱ སུཏྟཔྤབུདྡྷོ ཝིཡ ཏུསིཏ བྷཝནཏོ ཨཱཧཊ. རཐེ ནིབྦཏྟིཏྭཱ ཨཏྟནོ ཀཏཔུཉྙསྶ ཐལཾ མཧཱཛནསྶ པཱཀཊཾ ཀཱཏུཾ རཐེཡེཝ ཋཏྭཱ དིབྦཱབྷརཎ ཝིབྷཱུསིཏོ མཧཱཛནསྶ པསྶནྟསྶེཝ ཏིཀྑཏྟུཾ མཧཱཐཱུཔཾ པདཀྑིཎཾ ཀཏྭཱ བྷིཀྑུསངྒྷཉྩ ཝནྡིཏྭཱ ཏུསིཏབྷཝནཾ ཨགམཱསི.

ཨེཝཾ ཨསཱརེ ནིཙཡེ དྷནཱནཾ ཨནིཙྩསངྒྷཾ སཏྟཾ སཔཉྙཱ,

ཀཏྭན ཙཱགཾ རཏནཏྟཡམཧི ཨཱདཱཡ སཱརཾ སུགཏིཾ ཝཛནྟི;

རཉྙོ ནཱཊཀཏྠིཡོ མཏབྷཱཝཾ ཉཏྭཱ ཡཏྠ ཋིཏཱ མཀུལ༹ཾ མོཙཡིཾསུ ཏཏྠཾ ཋཱནེ ཀཏསཱལཱ མཀུལ༹མུཏྟསཱལཱནཱམཛཱཏཱ. རཉྙོ སརཱིརསྨིཾ ཙིཏཀཾ ཨཱརོཔིཏེ ཡཏྠ མཧཱཛནོ ཧཏྠེ པགྒཧེཏྭཱ ཝིརཙི. ཏཏྠ ཀཏསཱལཱ ཝིརཙིཏྠསཱལཱ ནཱམ ཛཱཏཱ. རཉྙོ སརཱིརཾ ཡཏྠ ཛྷཱཔེསུཾ - སོ སཱིམཱམཱལཀོ རཱཛམཱལཀོ ནཱམ ཛཱཏོ. ཨཐ རཉྙོ ཀནིཊྛབྷཱཏཱ སདྡྷཱཏིསྶམཧཱརཱཛཱ ནཱམ ཧུཏྭཱ ཙེཏིཡེ ཨནིཊྛཏཾ ཛཏྟཀམྨཾ སུདྷཱཀམྨཉྩ ནིཊྛཱཔེཏྭཱ ཐཱུཔམཀཱསཱིཏི

ཨིཏི སཱདྷུཛན མནོཔསཱདནཏྠཱཡ ཀཏེ ཐཱུཔཝཾསེ མཧཱཙེཏིཡེ ཀཏཱ ནིཊྛིཏཱ.

༢༦. ཨེཏརཧི དུཊྛགཱམཎི ཨབྷཡ མཧཱརཱཛསྶ པིཏཱ ཀཱཀཝཎྞཏིསྶ རཱཛཱ མེཏྟེཡྻསྶ བྷགཝཏོ པིཏཱ བྷཝིསྶཏི. ཝིཧཱརམཧཱདེཝཱི མཱཏཱ བྷཝིསྶཏི. དུཊྛགཱམིཎི ཨབྷཡོ ཨགྒསཱཝཀོ བྷཝིསྶཏི. ཀནིཊྛོ དུཏིཡ སཱཝཀོ བྷཝིསསཏི. རཉྙོ པིཏུཙྪཱ ཨནུལཱ༹དེཝཱི ཨགྒམཧེསཱི བྷཝིསྶཏི. རཉྙོ པུཏྟོ སཱལི རཱཛཀུམཱརོ པུཏྟོ བྷཝིསྶཏི. བྷཎྜཱགཱརིཀ སངྒྷཱམཙྩོ ཨགྒུཔཊྛཱཀོ བྷཝིསྶཏི ཏསྶཱམཙྩསྶ དྷཱིཏཱ ཨགྒུཔཊྛཱཡིཀཱ བྷཝིསྶཏཱིཏི ཨེཝཾ སབྦེཔི ཀཏཱདྷིཀཱརཱ ཧེཏུ སམྤནྣཱ ཏསྶ བྷགཝཏོ དྷམྨཾ སུཏྭཱ དུཀྑསྶནྟཾ ཀརིཏྭཱ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡིསྶནྟཱིཏི.

ཨེཏྟཱཝཏཱ ཙ

༢༧.

མཧིཎྡསེན ནཱམམྷི ཝསནྟོ པརིཝེཎཀེ,

པཏྟཙཱིཝརཔཱདོ? ཡོ པིཊཀཏྟཡ པཱརགོ;

སདྡྷཱསིལགུཎུཔེཏོ སབྦསཏྟཧིཏེ རཏོ,

ཏེན སཱདྷུ སམཛ྄ཛྷིཊྛོ ཡམཧཾ ཀཱཏུམཱརབྷིཾ;

སོདཱནི ནིཊྛཾ སམྤཏྟོ ཐཱུཔཝཾསོ ཨནཱཀུལོ,

པརིཔུཎྞོ སངྑཐཱ སཱདྷུ པཎྜིཏེཧི པསཾསིཏོ;

ཡཾ ¶ པཏྟཾ ཀུསལཾ ཀམྨཾ ཀརོནྟེན ཨིམཾ མཡཾ,

ཏེན ཨེཏེན པུཉྙེན སཏྟཱ གཙྪནྟུ ནིབྦུཏིཾ;

ཨནནྟརཱཡེན ཡཐཱ ཙ སིདྡྷིཾ

མཱུཔཱགཏོ ཐཱུཔཝརསྶ ཝཾསོ,

ཏཐེཝ སདྡྷམྨསིཏཱ ཛནཱནཾ

མནོ རཐཱ སཱིགྷམུཔེནྟུ སིདྡྷིཾ;

པརིསམྦྷིདཱམགྒསྶ ཡེན ལཱིལཏྠ དཱིཔནི

ཊཱིཀཱ ཝིརཙིཏཱ སཱདྷུ སདྡྷམྨོདཡ ཀཱམིནཱ;

ཏཐཱ པཀརཎེ སཙྩསངྑེཔེ ཨཏྠདཱིཔནཱ,

དྷཱིམཏཱ སུཀཏཱ ཡེན སུཊྛུ སཱིཧལ༹ བྷཱསཏོ

ཝིསུདྡྷིམགྒ སངྑེཔེ ཡེན ཨཏྠཔྤཀཱསནཱ,

ཡོགཱི ནམུཔཀཱརཱཡ ཀཏཱ སཱིཧལ༹བྷཱསཏོ;

པརཀྐམ ནརིཎྡསྶ སབྦབྷཱུཔཱན ཀེཏུནོ,

དྷམྨཱགཱརེ ནིཡུཏྟོ ཡོ པིཊཀཏྟཡ པཱརགོ;

སཱསནཾ སུཊྛིཏཾ ཡསྶ ཨནྟེཝཱསིཀ བྷིཀྑུསུ,

ཏེན ཝཱཙིསྶརཏྠེར པཱདེན ལིཁིཏོ ཨཡནྟི;

ཐཱུཔཝཾསོ ནིཊྛིཏོ.