📜

དཱཋཱཝཾསོ ¶

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

༡.

ཝིསཱརདཾ ཝཱདཔཐཱཏི ཝཏྟིནཾ,

ཏིལོཀཔཛྫོཏམསཡ྄ཧསཱཧིནཾ;

ཨསེས ཉེཡྻཱཝརཎཔྤཧཱཡིནཾ,

ནམཱམི སཏྠཱརམནནྟགོཙརཾ.

༢. ¶

ཏིལོཀ ནཱཐཔྤབྷཝཾ བྷཡཱཔཧཾ,

ཝིསུདྡྷཝིཛྫཱཙརཎེཧི སེཝིཏཾ;

པཔཉྩ སཾཡོཛནབནྡྷནཙྪིདཾ,

ནམཱམི དྷམྨཾ ནིཔུཎཾ སུདུདྡསཾ.

༣.

པསཱདམཏྟེན’པི ཡཏྠ པཱཎིནོ,

ཕཱུསནྟི དུཀྑཀྑཡམཙྩུཏཾ པདཾ;

ཏམཱཧུཎེཡྻཾ སུསམཱཧིཏིནྡྲིཡཾ,

ནམཱམི སངྒྷཾ མུནིརཱཛསཱཝཀཾ.

༤.

ཝིབྷུསཡཾ ཀཱལ༹ཀནཱགརནྭ ཡཾ,

པརཀྐམོ ཀཱརུཎིཀོ ཙམཱུཔཏི;

གཝེསམཱནོ ཛིནསཱསནསྶ ཡོ,

ཝིརཱུལ༹ྷིམཏྠཉྩ ཛནསྶ པཏྠཡཾ.

༥. ¶

སུདྷཱམཡཱུཁཱམལ པཎྜུཝཾསཛཾ,

ཝིརཱུལ༹ྷསདྡྷཾ མུནིརཱཛསཱསནེ;

པིཡཾ ཝདཾ ནཱིཏིཔཐཱནུཝཏྟིནིཾ,

སདཱ པཛཱནཾ ཛནིཀཾ’ཝ མཱཏརཾ.

༦.

པིཡཾ པརཀྐནྟིབྷུཛསྶ རཱཛིནོ,

མཧེསི མཙྩུནྣཏཁུདྡྷིསམྤདཾ;

ཝིདྷཱཡ ལཱིལཱཝཏིམིཙྪིཏཏྠདཾ,

ཨསེས ལངྐཱཏལརཛྫལཀྑིཡཾ.

༧.

ཀུམཱརམཱརཱདྷིཏསཱདྷུམནྟིནཾ,

མཧཱདཡཾ པཎྜུནརིནྡ ཝཾསཛཾ;

ཝིདྷཱཡ སདྡྷཾ མདྷུརིནྡནཱམཀཾ,

སུསིཀྑཱིཏཾ པཱཝཙནེ ཀལཱསུ ཙ.

༨. ¶

ནརིནྡསུཉྙཾ སུཙིརཾ ཏིསཱིཧལ༹ཾ,

ཨིཏིཔྤཏཱིཏཾ ཨཡསཾ ཨཔཱནུདི;

ཙིརཾ པཎཱིཏེན ཙ ཙིཝརཱདིནཱ,

སུསཉྙཏེ སཾཡམིནོ ཨཏཔྤཡི.

༩.

ཙིརཊྛིཏིཾ པཱཝཙནསྶ ཨིཙྪཏཱ,

ཀཏཉྙུནཱ ཝིཀྐམ བུདྡིསཱལིནཱ;

སཏཱིམཏཱ ཙནྡིམ བནྡྷུཀིཏྟིནཱ,

སགཱརཝཾ ཏེན’བྷཱིཡཱཙིཏོ ཨཧཾ.

༡༠.

སདེས བྷཱསཱཡ ཀཝཱིཧི སཱིཧལེ༹,

ཀཏམྤི ཝཾསཾ ཛིནདནྟདྷཱཏུཡཱ;

ནིརུཏྟིཡཱ མཱགདྷིཀཱཡ ཝུདྡྷིཡཱ,

ཀརོམི དཱིཔནྟརཝཱསིནཾ ཨཔི.

༡༡. ¶

ཛཱིནོ’ཡམིདྡྷེ ཨམརཝ྄ཧཡེ པུརེ,

ཀདཱཙི ཧུཏྭཱན སུམེདྷནཱམཀོ;

སཝེདཝེདངྒཝིབྷཱགཀོཝིདོ,

མཧདྡྷནེ ཝིཔྤཀུལམྷི མཱཎཝོ.

༡༢.

ཨཧཉྷི ཛཱཏིབྱསནེན པཱིལི༹ཏོ,

ཛརཱབྷིབྷུཏོ མརཎེན ཨོཏྠཊོ;

སིཝཾ པདཾ ཛཱཏིཛརཱདིནིསྶཊཾ,

གཝེསཡིསྶཾ’ཏི རཧོ ཝིཙིནྟིཡ.

༡༣.

ཨནེཀསངྑཾ དྷནདྷཉྙསམྤདཾ,

པཏིཊྛཔེཏྭཱ ཀཔཎེསི དུཙྩཛཾ;

ཨནཔྤཀེ པེམབྷརཱནུབནྡྷིནོ,

ཝིཧཱཡ མིཏྟེ ཙ སུཏེཙ བནྡྷཝེ.

༡༤. ¶

པཧཱཡ ཀཱམེ ནིཁིལེ མནོརམེ,

གྷརཱབྷིནིཀྑམྨ ཧིམཱཙལནྟིཀེ;

མཧཱིདྷརཾ དྷམྨིཀནཱམ ཝིསྶུཏཾ,

ཨུཔེཙྩ ནཱནཱཏརུརཱཛིབྷུསིཏཾ.

༡༥.

མནོནུཀཱུལེ སུརརཱཛནིམྨཱིཏེ,

ཨསམྨིགཱནཾ ཨགཏིམྷི ཨསྶམེ;

ནིཝཏྟཙཱིརོ ཨཛིནཀྑིཔཾ ཝཧཾ,

ཛཊཱདྷརོ ཏཱཔས ཝེསམགྒཧཱི.

༡༦.

སུསཉྙཏཏྟོཔརིཝཱརི ཏིནྡྲིཡོ,

ཕལཱཕལཱདཱིཧི པཝཏྟཡཾ ཏནུཾ;

གཏོ ཨབྷིཉྒྙཱསུ ཙ པཱརམིཾ ཝསཱི,

ཏཧིཾ སམཱཔཏྟི སུཁཾ ཨཝིནྡི སོ.

༡༧. ¶

སུསཛྫིཏེ རམྨཔུརཱདྷིཝཱསིནཱ,

མཧཱཛནེན’ཏྟམནེན ཨཉྫསེ;

པཐཔྤདེསེ ཨབྷིཡནྟམཏྟནོ,

ཨནིཊྛིཏེཡེཝ སུམེདྷ ཏཱཔསོ.

༡༨.

ཨགཱདྷཉེཡྻོདདྷཱིཔཱརདསྶིནཾ,

བྷཝནྟགུཾ ནིབྦནཐཾ ཝིནཱཡཀཾ;

ཨནེཀཁཱིཎཱསཝལཀྑསེཝིཏཾ,

ཀདཱ ཙི དཱིཔངྐརབུདྡྷམདྡས.

༡༩.

ཏཏོ སསངྒྷསྶ ཏིལོཀབྷཏྟུནོ,

པརིཙྩཛིཏྭཱན ཏནུམྤི ཛཱིཝིཏཾ;

པསཱརཡིཏྭཱན ཛཊཱཛིནཱདིཀཾ,

ཝིདྷཱཡ སེཏུཾ ཏནུམེཝ པལླལེ.

༢༠. ¶

ཨནཀྐམིཏྭཱ ཀལལཾ མཧཱདཡེ,

སབྷིཀྑུཀོ གཙྩཏུ པིཊྛིཡཱ ཨིཏི;

ཨདྷིཊྛཧིཏྭཱན ནིཔནྣཀོ ཏཧིཾ,

ཨནཱཐ མེཏཾ ཏིབྷཝཾ སམེཀྑིཡ.

༢༡.

དཡཱཡ སཉྩོདིཏམཱནསོ ཛནེ,

བྷཝཎྞཝཱ ཨུདྡྷརིཏུཾ དུཁདྡིཏེ;

ཨཀཱསི སམྦོདྷིཔདསྶ པཏྟིཡཱ,

མཧཱབྷིནཱིཧཱརམུདགྒཝིཀྐམོ.

༢༢. ¶

ཨཐོ ཝིདིཏྭཱ ཝསིནོ ཏམཱསཡཾ,

ཨདཱསི སོ ཝྱཱཀརཎཾ མཧཱམུནི;

ཏཏོ པུརཾ ཏམྷི ཏཐཱགཏེ གཏེ,

སཡཾཝསཱི སམྨསི པཱརམིགུཎེ.

༢༣.

ཏཏོ ཙ ཀཔྤཱནམལཱིནཝིཀྐམོ,

ཨསཾཁིཡེ སོ ཙཏུརོ སལཀྑཀེ;

ཏཧིཾ ཏཧིཾ ཛཱཏིསུ བོདྷིཔཱཙནེ,

ཝིསུདྡྷསམྦྷཱརགུཎེ ཨཔཱུརཡི;

ཨཐཱབྷིཛཱཏོ ཏུསིཏེ མཧཱཡསོ,

ཝིསུདྡྷསམྦོདྷིཔདོཔལདྡྷིཡཱ;

ཨུདིཀྑམཱནོ སམཡཾ དཡཱདྷནོ,

ཙིརཾ ཝིབྷུཏིཾ ཨནུབྷོསི སབྦསོ.

༢༥. ¶

སཧསྶསངྑཱ དསཙཀྐཝཱལཏོ,

སམཱགཏཱནེཀསུརཱདྷིཔཱདིཧི;

ཨུདགྒུདགྒེཧི ཛིནཏྟཔཏྟིཡཱ,

སགཱརཝཾ སོ ཨབྷིགམྨ ཡཱཙིཏོ.

༢༦.

ཏཏོ ཙཝིཏྭཱ ཀཔིལ༹ཝ྄ཧཡེ པུརེ,

སདཱ སཏོ སཀྱཀུལེཀཀེཏུནོ;

ཨཧོསི སུདྡྷོདནབྷུམིབྷཏྟུནོ,

མཧཱདིམཱཡཱཡ མཧེསིཡཱ སུཏོ.

༢༧. ¶

ཝིཛཱཏམཏྟོ’ཝ ཝསུནྡྷརཱཡ སོ,

པཏིཊྛཧིཏྭཱན དིསཱ ཝིལོཀཡཱི;

ཏདཱ ཨཧེསུཾ ཝིཝཊངྒནཱ དིསཱ,

ཨཔཱུཛཡུཾ ཏཏྠ ཙ དེཝམཱནུསཱ.

༢༨.

ཨཱདྷཱརཡུཾ ཨཱཏཔཝཱརཎཱདིཀཾ,

ཨདིསྶམཱནཱཝ ནབྷམྦྷི དེཝཏཱ;

པདཱནི སོ སཏྟ ཙ ཨུཏྟརཱམུཁོ,

ཨུཔེཙྩ ནིཙྪཱརཡི ཝཱཙམཱསབྷིཾ.

༢༩.

ཡཐཏྠསིདྡྷཏྟཀུམཱརནཱམཀོ,

མཧབྦལོ ཡོབྦནཧཱརིཝིགྒཧོ;

ཨུཏུཏྟཡཱནུཙྪཝིཀེསུ ཏཱིསུ སོ,

ནུབྷོསི པཱསཱདཝརེསུ སམྤདཾ.

༣༠. ¶

ཀདཱཙི ཨུཡྻཱནཔཐེ ཛརཱཧཏཾ,

ཏཐཱཏུརཾ ཀཱལཀཏཉྩ སཾཡམིཾ;

ཀམེན དིསྭཱན ཝིརཏྟམཱནསོ,

བྷཝེསུ སོ པབྦཛིཏུཾ ཨཀཱམཡི.

༣༡.

སཔུཔྥདཱིཔཱདཱིཀརེཧི རཏྟིཡཾ,

པུརཀྑཏོ སོ ཏིདིཝཱདྷིཝཱསིཧི;

སཚནྣཀོ ཀནྟཀཝཱཛིཡཱནཏོ,

ཏཏོ མཧཱཀཱརུཎིཀོ’བྷིནིཀྑམི.

༣༢.

ཀམེན པཏྭཱན ཨནོམམཱཔགཾ,

སུདྷོཏམུཏྟཱཕལཧཱརིསེཀཏེ;

པཏིཊྛཧིཏྭཱ ཝརམོལི༹བནྡྷནཾ,

སིཏཱསིལཱུནཾ གགནེ སམུཀྑིཔཱི.

༣༣. ¶

པཊིགྒཧེཏྭཱ ཏིདསཱནམིསྶརོ,

སུཝཎྣཙངྒོཊཝརེན ཏཾ ཏདཱ;

ཏིཡོཛནཾ ནཱིལམཎཱིཧི ཙེཏིཡཾ,

ཨཀཱསི ཙཱུལཱ༹མཎིམཏྟནོ པུརེ.

༣༤.

ཏཏོ གྷཊཱིཀཱརསརོཛཡོནིནཱ,

སམཱཧཊཾ དྷཱརཡཱི ཙཱིཝརཱདིཀཾ;

ཨཐོ སཀཾ ཝཏྠཡུགཾ ནབྷཏྠལེ,

པསཏྠཝེསགྒཧཎོ སམུཀྑིཔཱི.

༣༥.

པཊིགྒཧེཏྭཱན ཏམམྦུཛཱསནོ,

མཧིདྡྷིཀོ བྷཏྟིབྷརེན ཙོདིཏོ;

སཀེ བྷཝེ དྭཱདསཡོཛནཾ ཨཀཱ,

མཎཱིཧི ནཱིལཱདིཧི དུསྶཙེཏིཡཾ.

༣༦. ¶

སུསཉྙཏཏྟོ སཏིམཱ ཛིཏིནྡྲིཡོ,

ཝིནཱིཏཝེསོ རསགེདྷཝཛྫིཏོ;

ཚཧཱཡནཱནེཝ ཨནོམཝིཀྐམོ,

མཧཱཔདྷཱནཾ པདཧིཏྠ དུཀྐརཾ.

༣༧.

ཝིསཱཁམཱསསྶཐ པུཎྞམཱསིཡཾ,

ཨུཔེཙྩ མཱུལཾ སཧཛཱཡ བོདྷིཡཱ;

ཏིཎཱསནེ ཙུདྡསཧཏྠསམྨིཏེ,

ཨདྷིཊྛཧིཏྭཱ ཝཱིརིཡཾ ནིསཛྫི སོ.

༣༨.

ཨཝཏྠརནྟིཾ ཝསུདྷཾཙ ཨམྦརཾ,

ཝིརཱུཔཝེསགྒཧཎེན བྷིཾསནཾ;

པཀམྤཡནྟོ སདྷརཱདྷརཾ མཧིཾ,

ཛིནོ པདོསེ’ཛིནི མཱརཝཱཧིཎིཾ.

༣༩. ¶

སུརཱསུརབྲཧྨགཎེཧི སཛྫིཏེ,

ཛགཏྟཡེ པུཔྥམཡགགྷིཀཱདིནཱ;

པཝཏྟམཱནེ སུརདུནྡུབྷིསྶརེ,

ཨབུཛ྄ཛྷིབོདྷིཾ རཛནཱིཔརིཀྑཡེ.

༤༠.

ཏདཱ པཀམྤིཾསུ སསེལཀཱནནཱ,

སཧསྶསཾཁཱ དསལོཀདྷཱཏུཡོ;

ཨགཉྫི སོ ལོཎཔཡོདྷི སཱདྷུཏཾ,

མཧཱཝབྷཱསོ བྷུཝནེསུ པཏྠརཱི.

༤༡.

ལབྷིཾསུ ཨནྡྷཱ ཝིམལེ ཝིལོཙནེ,

སུཎིཾསུ སདྡེ བདྷིརཱཔི ཛཱཏིཡཱ;

ལཔིཾསུ མཱུགཱ ཝཙནེན ཝགྒུནཱ,

ཙརིཾསུ ཁེལཾ པདསཱ’ཝ པངྒུལཱ.

༤༢.

བྷཝིཾསུ ཁུཛྫཱ ཨུཛུསོམྨཝིགྒཧཱ,

སིཁཱི’པི ནིབྦཱཡི ཨཝཱིཙིཨཱདིསུ;

ཨཔཱགམུཾ བནྡྷནཏོ’པི ཛནྟཝོ,

ཁུདཱདིཀཾ པེཏབྷཝཱ ཨཔཀྐམཱི.

༤༣. ¶

སམིཾསུ རོགཝྱསནཱནི པཱཎིནཾ,

བྷཡཾ ཏིརཙྩཱནགཏེ ན པཱིལ༹ཡཱི;

ཛནཱ ཨཧེསུཾ སཁིལཱ པིཡཾཝདཱ,

པཝཏྟཡུཾ ཀོཉྩནདཾ མཏངྒཛཱ.

༤༤.

ཧཡཱ ཙ ཧེསིཾསུ པཧཊྛམཱནསཱ,

ནདིཾསུ སབྦཱ སཡམེཝ དུནྡུབྷཱི;

རཝིཾསུ དེཧཱབྷརཎཱནི པཱཎིནཾ,

དིསཱ པསཱིདིཾསུ སམཱ སམནྟཏོ.

༤༥.

པཝཱཡི མནྡོ སུཁསཱིཏམཱརུཏོ,

པཝསྶི མེགྷོ’པི ཨཀཱལསམྦཝོ;

ཛཧིཾསུ ཨཱཀཱསགཏིཾ ཝིཧངྒམཱ,

མཧིཾ སམུབྷིཛྫཛལཾ སམུཊྛཧཱི.

༤༦.

ཨསནྡམཱནཱ’ཝ ཋིཏཱ སཝནྟིཡོ,

ནབྷེ ཝིརོཙིཾསུ ཨསེསཛོཏིཡོ;

བྷཝཱ ཨཧེསུཾ ཝིཝཊཱ སམནྟཏོ,

ཛནསྶ ནཱསུཾ ཝཙནཱུཔཔཏྟིཡོ.

༤༧. ¶

སམེཀྑཏཾ ནཱཝརཎཱ ནགཱདཡོ,

པཝཱཡི གནྡྷོ ཨཔི དིབྦསམྨཏོ;

དུམཱ ཨཧེསུཾ ཕལཔུཔྥ དྷཱརིནོ,

ཨཧོསི ཚནྣོ ཀམལེཧི ཨཎྞཝོ.

༤༨.

ཐལེསུ ཏོཡེསུ ཙ པུཔྥམཱནཀཱ,

ཝིཙིཏྟཔུཔྥཱ ཝིཀསིཾསུ སབྦཐཱ;

ནིརནྟརཾ པུཔྥསུགནྡྷཝུཊྛིཡཱ,

ཨཧོསི སབྦཾ ཝསུདྷམྦརནྣརཾ.

༤༩.

ནིསཛྫ པལླངྐཝརེ ཏཧིཾ ཛིནོ,

སུཁཾ སམཱཔཏྟིཝིཧཱརསམྦྷཝཾ;

ཏཏོ’ནུབྷོནྟོ སུཙིརཱབྷིཔཏྠིཏཾ,

དིནཱནི སཏྟེཝ ཨཏིཀྐམཱཔཡཱི.

༥༠. ¶

སམུཔྤཏིཏྭཱ གགཎངྒནཾ ཏཏོ,

པདསྶཡིཏྭཱ ཡམཀཾ མཧཱམུནི;

སཔཱཊིཧཱིརཾ ཏིདིཝཱདྷིཝཱསིནཾ,

ཛིནཏྟནེ སཾསཡིཏཾ ནིརཱཀརི.

༥༡.

ཨཐོཏརིཏྭཱན ཛཡཱསནསྶ སོ,

ཋིཏོ’ཝ པུབྦུཏྟརཀཎྞནིསྶིཏོ;

དིནཱནི སཏྟཱནིམིསེན ཙཀྑུནཱ,

ཏམཱསནཾ བོདྷིཏརུཾཙ’པཱུཛཡི.

༥༢.

ཨཐ’ནྟརཱལེ༹ མཎིཙངྐམེ ཛིནོ,

ཋིཏཔྤདེསསྶ ཙ ཨཱསནསྶ ཙ;

མཧཱརཧེ དེཝཝརཱབྷིནིམྨིཏེ,

དིནཱནི སཏྟེཝ ཨཀཱསི ཝངྐམཾ.

༥༣. ¶

ཏཏོ དིསཱཡཾ ཨཔརཱཡ བོདྷིཡཱ,

ཨུཔཱཝིསིཏྭཱ རཏནཱལཡེ ཛིནོ;

སམནྟཔཊྛཱནནཡཾ ཝིཙིནྟཡཾ,

དིནཱནི སཏྟེཝ སཝཱིཏིནཱམཡི.

༥༤.

ཝིནིགྒཏོ སཏྠུསརཱིརཏོ ཏདཱ,

ཛུཏིཔྤབནྡྷོ པཊིབནྡྷཝཛྫིཏོ;

པམཱཎསུཉྙཱསུ ཙ ལོཀདྷཱཏུསུ,

སམནྟཏོ ཨུདྡྷམདྷོ ཙ པཏྠརཱི.

༥༥.

ཝཊསྶ མཱུལེ ཨཛཔཱལསཉྙིནོ,

སུཁཾ ཕུསནྟོ པཝིཝེཀསམྦྷཝཾ;

ཝིནཱཡཀོ སཏྟ ཝིཧཱསི ཝཱསརེ,

ཨནནྟདསྶཱི སུརརཱཛཔཱུཛིཏོ.

༥༦. ¶

ཝིཧཱསི མཱུལེ མུཙལིནྡསཱཁིནོ,

ནིསཛྫ བྷོགཱཝལིམནྡིརོདརེ;

ཝིཀིཎྞཔུཔྥེ མུཙལིནྡབྷོགིནོ,

སམཱདྷིནཱ ཝཱསརསཏྟཀཾ ཛིནོ.

༥༧.

དུམེ’པི རཱཛཱཡཏནེ སམཱདྷིནཱ,

ཝིཧཱསི རཏྟིནྡིཝ སཏྟཀཾ མུནི;

སཧསྶནེཏྟོ ཨཐ དནྟཔོཎཀཾ,

མུཁོདཀཉྩཱཔི ཨདཱསི སཏྠུནོ.

༥༨.

ཏཏོ མཧཱརཱཛཝརེཧི ཨཱབྷཏཾ,

སིལཱམཡཾ པཏྟ ཙཏུཀྐམེཀཀཾ;

ཝིདྷཱཡ མཏྠཾ མདྷུཔིཎྜིཀཾ ཏཧིཾ,

པཊིགྒཧེཏྭཱན སཝཱཎིཛཱཧཊཱ.

༥༩. ¶

ཀཏནྣཀིཙྩོ སརཎེསུ ཏེ ཨུབྷོ,

པཏིཊྛཔེཏྭཱན ཏཔསྶུབྷལླིཀེ;

ཨདཱསི ཏེསཾ ཨབྷིཔཱུཛིཏུཾ སཀཾ,

པརཱམསིཏྭཱན སིརཾ སིརོརུཧེ.

༦༠.

ཝཊསྶམུལེ ཨཛཔཱལསཉྙིནོ,

སཧམྤཏཱིབྲཧྨཝརེན ཡཱཙིཏོ;

ཛནསྶ ཀཱཏུཾ ཝརདྷམྨསངྒཧཾ,

ཨགཉྪི བཱརཱཎསིམེཀཀོ མུནི.

༦༡. ¶

གནྟྭཱ སོ དྷམྨརཱཛཱ ཝནམིསིཔཏནཾ སཉྙཏཱནཾ ནིཀེཏཾ,

པལླངྐསྨིཾ ནིསིནྣོ ཏཧིམཝིཙལིཏཊྛཱནསམྤཱདིཏམྷི;

ཨཱསཱལ༹ྷེ པུཎྞམཱཡཾ སིཏརུཙིརུཙིཡཱ ཛོཏིཏེ ཙཀྐཝཱལེ༹,

དེཝབྲཧྨཱདིཀཱནཾ དུརིཏམལཧརཾ ཝཏྟཡི དྷམྨཙཀྐཾ.

༦༢.

སུཏྭཱ སདྡྷམྨམགྒཾ ཏིབྷཱུཝནཀུཧརཱབྷོགཝིཏྠཱརིཀཾ ཏཾ,

ཨཉྙཱཀོཎྜཉྙནཱམདྭིཛམུནིཔམུཁཱཊྛཱརསབྲཧྨཀོཊཱི;

ཨཉྙཱསུཾ མགྒདྷམྨཾ པརིམིཏརཧིཏེ ཙཀྐཝཱལེ༹ ཨུལཱ༹རོ,

ཨོབྷཱསོ པཱཏུབྷུཏོ སཔདི བཧུཝིདྷཾ ཨཱསི ཨཙྪེརཀཉྩ.

པཋམོ པརིཙྪེདོ.

༦༣. ¶

ཏཏོ པཊྛཱཡ སོ སཏྠཱ ཝིནེནྟོ དེཝམཱནུསེ,

བོདྷིཏོ ཕུསྶམཱསམྷི ནཝམེ པུཎྞམཱསིཡཾ.

༦༤.

ལངྐམཱགམྨ གངྒཱཡ ཏཱིརེ ཡོཛནཝིཏྠཏེ,

མཧཱནཱགཝནུཡྻཱནེ ཨཱཡཱམེན ཏིཡོཛནེ.

༦༥.

ཡཀྑཱནཾ སམིཏིཾ གནྟྭཱ ཋཏྭཱན གགནེ ཏཧིཾ;

ཝཱཏནྡྷཀཱརཝུཊྛིཧི ཀཏྭཱ ཡཀྑེ བྷཡདྡིཏེ.

༦༦.

ལདྡྷཱབྷཡེཧི ཡཀྑེཧི ཏེཧི དིནྣཱཡ བྷུམིཡཱ;

ཙམྨཁཎྜཾ པསཱརེཏྭཱ ནིསཱིདིཏྭཱན ཏངྑཎེ.

༦༧.

ཙམྨཁཎྜཾ པདིཏྟགྒི ཛཱལཱམཱལཱསམཱཀུལཾ;

ཨིདྡྷིཡཱ ཝཌྜྷཡིཏྭཱན ཡཱཝ སིནྡྷུཾ སམནྟཏོ.

༦༨. ¶

ཛཝེན སིནྡྷུཝེལཱཡ རཱསིབྷུཏེ ནིསཱཙརེ;

གིརིདཱིཔམིདྷཱནེཏྭཱ པཏིཊྛཱཔེསི ཏེ ཏཧིཾ.

༦༩.

དེསཡིཏྭཱ ཛིནོ དྷམྨཾ ཏདཱ དེཝསམཱགམེ;

བཧུནྣཾ པཱཎཀོཊཱིནཾ དྷམྨཱབྷིསམཡཾ ཨཀཱ.

༧༠.

མཧཱསུམནདེཝསྶ སེལེ སུམནཀཱུཊཀེ;

དཏྭཱ ནམསྶིཏུཾ ཀེསེ ཨགཱ ཛེཏཝནཾ ཛིནོ.

༧༡.

པཏིཊྛཔེཏྭཱ ཏེ སཏྠུ ནིསིནྣཱསནབྷུམིཡཾ;

ཨིནྡནཱིལམཡཾ ཐཱུཔཾ ཀརིཏྭཱ སོ ཨཔཱུཛཡི.

༧༢.

ནིསྶཱཡ མཎིཔལླངྐཾ པབྦཏཎྞཝཝཱསིནོ;

དིསྭཱ ཡུདྡྷཏྠིཀེ ནཱགེ ཙཱུལོ༹དར མཧོདརེ.

༧༣.

བོདྷིཏོ པཉྩམེ ཝསྶེ ཙིཏྟམཱསེ མཧཱམུནི;

ཨུཔོསཐེ ཀཱལཔཀྑེ ནཱགདཱིཔམུཔཱགམཱི.

༧༤. ¶

ཏདཱ སམིདྡྷིསུམནོ དེཝོ ཛེཏཝནེ ཋིཏཾ;

ཨཏྟནོ བྷཝནཾཡེཝ རཱཛཱཡཏནཔཱདཔཾ.

༧༥.

ཨིནྡནཱིལདྡིཀཱུཊཾ’ཝ གཧེཏྭཱཏུཊྛམཱནསོ;

དྷཱརཡིཏྭཱ སཧཱགཉྪི ཚཏྟཾ ཀཏྭཱན སཏྠུནོ.

༧༦.

ཨུབྷིནྣཾ ནཱགརཱཛཱུནཾ ཝཏྟམཱནེ མཧཱཧཝེ;

ནིསིནྣོ གགནེ ནཱཐོ མཱཔཡིཏྠ མཧཱཏམཾ.

༧༧.

ཨཱལོཀཾ དསྶཡིཏྭཱཐ ཨསྶཱསེཏྭཱན བྷོགིནོ;

སཱམགྒིཀརཎཾ དྷམྨཾ ཨབྷཱསི པུརིསཱསབྷོ.

༧༨.

ཨསཱིཏིཀོཊིཡོ ནཱགཱ ཨཙལམྦུདྷིཝཱསིནོ;

པཏིཊྛཧིཾསུ མུདིཏཱ སཱིལེསུ སརཎེསུ ཙ.

༧༩. ¶

དཏྭཱན མཎིཔལླངྐཾ སཏྠུནོ བྷུཛགཱདྷིཔཱ;

ཏཏྠཱསཱིནཾ མཧཱཝཱིརཾ ཨནྣཔཱནེཧི ཏཔྤཡུཾ.

༨༠.

པཏིཊྛཔེཏྭཱ སོ ཏཏྠ རཱཛཱཡཏནཔཱདཔཾ;

པལླངྐཾ ཏཉྩ ནཱགཱནཾ ཨདཱསི ཨབྷིཔཱུཛིཏུཾ.

༨༡.

བོདྷིཏོ ཨཊྛམེ ཝསྶེ ཝེསཱཁེ པུཎྞམཱསིཡཾ;

མཎིཨཀྑིཀནཱམེན ནཱགིནྡེན ནིམནྟིཏོ.

༨༢.

ནཱགརཱཛསྶ ཏསྶེཝ བྷཝནཾ སཱདྷུ སཛྫཱིཏཾ;

ཀལྱཱཎིཡཾ པཉྩབྷིཀྑཱུ སཏེཧི སཧ ཨཱགམི.

༨༣.

ཀལྱཱཎིཙེཏིཡཊྛཱནེ ཀཏེ རཏན མཎྜཔེ;

མཧཱརཧམྷི པལླངྐེ ཨུཔཱཝིསི ནརཱསབྷོ.

༨༤.

དིབྦེཧི ཁཛྫབྷོཛྫེཧི སསངྒྷཾ ལོཀནཱཡཀཾ;

སནྟཔྤེསི ཕཎིནྡོ སོ བྷུཛངྒེཧི པུརཀྑཏོ.

༨༥. ¶

དེསཡིཏྭཱན སདྡྷམྨཾ སགྒམོཀྑསུཁཱཝཧཾ;

སོ སཏྠཱ སུམནེ ཀཱུཊེ དསྶེསི པདལཉྪནཾ.

༨༦.

ཏཏོ པབྦཏཔཱདམྷི སསངྒྷོ སོ ཝིནཱཡཀོ;

དིཝཱཝིཧཱརཾ ཀཏྭཱན དཱིགྷཝཱཔིཾ ཨུཔཱགམི.

༨༧.

ཐཱུཔཊྛཱནེ ཏཧིཾ བུདྡྷོ སསངྒྷོ’བྷིནིསཱིདིཡ;

སམཱཔཏྟི སམུབབྷུཏཾ ཨཝིནྡི ཨསམཾ སུཁཾ.

༨༨.

མཧཱབོདྷིཏརུཊྛཱནེ སམཱདྷིཾ ཨཔྤཡི ཛིནོ;

མཧཱཐཱུཔཔྤདེསེ ཙ ཝིཧརིཏྠ སམཱདྷིནཱ.

༨༩.

ཐཱུཔཱརཱམམྷི ཐཱུཔསྶ ཋཱནེ ཛྷཱནསུཁེན སོ;

སབྷིཀྑུསངྒྷོ སམྦུདྡྷོ མུཧུཏྟཾ ཝཱིཏིནཱམཡཱི.

༩༠. ¶

སིལཱཐུཔཔྤདེསམྷི ཋཏྭཱཀཱལཱཝིདཱུ མུནི;

དེཝེ སམནུསཱསིཏྭཱ ཏཏོ ཛེཏཝནཾ ཨགཱ.

༩༡.

ཨགིདྡྷོ ལཱབྷསཀྐཱརེ ཨསཡ྄ཧམཝམཱནནཾ;

སཧནྟོ ཀེཝལཾ སབྦ ལོཀནིཏྠརཎཏྠིཀོ.

༩༢.

སཾཝཙྪརཱནི ཋཏྭཱན ཙཏྟཱལཱི༹སཉྩ པཉྩ ཙ;

དེསཡིཏྭཱན སུཏྟཱདི ནཝངྒཾ སཏྠུསཱསནཾ.

༩༣.

ཏཱརེཏྭཱ བྷཝཀནྟཱརཱ ཛནེ སངྑྱཱཏིཝཏྟིནོ;

བུདྡྷཀིཙྩཱནི སབྦཱནི ནིཊྛཱཔེཏྭཱན ཙཀྑུམཱ.

༩༤. ¶

ཀུསིནཱརཱཔུརེ རཉྙཾ མལླཱནམུཔཝཏྟནེ;

སཱལཝནམྷི ཡམཀསཱལརུཀྑཱནམནྟརེ.

༩༥.

མཧཱརཧེ སུཔཉྙཏྟེ མཉྩེ ཨུཏྟརསཱིསཀཾ;

ནིཔནྣོ སཱིཧསེཡྻཱཡ ཝེསཱཁེ པུཎྞམཱསིཡཾ.

༩༦.

དེསེཏྭཱ པཋམེ ཡཱམེ མལླཱནཾ དྷམྨམུཏྟམཾ;

སུབྷདྡཾ མཛ྄ཛྷིམེ ཡཱམེ པཱཔེཏྭཱ ཨམཏཾ པདཾ.

༩༧.

བྷིཀྑུ པཙྪིམཡཱམམྷི དྷམྨཀྑནྡྷེ ཨསེསཀེ;

སངྒཡ྄ཧ ཨོཝདིཏྭཱན ཨཔྤམཱད པདེན ཙ.

༩༨.

པཙྩུསསམཡེ ཛྷཱནསམཱཔཏྟིཝིཧཱརཏོ;

ཨུཊྛཱཡ པརིནིབྦཱཡི སེསོཔཱདིཝིཝཛྫིཏོ.

༩༩. ¶

མཧཱིཀམྤཱདཡོ ཨཱསུཾ ཏདཱ ཨཙྪརིཡཱཝཧཱ;

པཱུཛཱཝིསེསཱ ཝཏྟིཾསུ དེཝམཱནུསཀཱ བཧཱུ.

༡༠༠.

པརིནིབྦཱཎསུཏྟནྟེ ཝུཏྟཱནུཀྐམཏོ པན;

པཱུཛཱཝིསེསོ ཝིཉྙེཡྻོ ཨིཙྪནྟེཧི ཨསེསཏོ.

༡༠༡.

ཨཧཏེཧི ཙ ཝཏྠེཧི ཝེཋེཏྭཱ པཋམཾ ཛིནཾ;

ཝེཋཡིཏྭཱན ཀཔྤཱསཔིཙུནཱ ཝིཧཏེན ཙ.

༡༠༢.

ཨེཝཾ པཉྩསཏཀྑཏྟུཾ ཝེཋཡིཏྭཱན སཱདྷུཀཾ;

པཀྑིཔིཏྭཱ སུཝཎྞཱཡ ཏེལཔུཎྞཱཡ དོཎིཡཱ.

༡༠༣.

ཝཱིསཾཧཏྠསཏུབྦེདྷཾ གནྡྷདཱརཱུཧི སངྑཏཾ;

ཨཱརོཔཡིཾསུ ཙིཏཀཾ མལླཱནཾ པམུཁཱ ཏདཱ.

༡༠༤.

མཧཱཀསྶཔཐེརེན དྷམྨརཱཛེ ཨཝནྡིཏེ;

ཙིཏཀཾ མཱ ཛལིཏྠཱཏི དེཝདྷིཊྛཱནཏོ པན.

༡༠༥. ¶

པཱམོཀྑཱ མལླརཱཛཱུནཾ ཝཱཡམནྟོཔ’ནེཀདྷཱ;

ཙིཏཀཾ ཏཾ ན སཀྑིཾསུ གཱཧཱཔེཏུཾ ཧུཏཱསནཾ.

༡༠༦.

མཧཱཀསྶཔཐེརེན ཨདྷིཊྛཱནེན ཨཏྟནོ;

ཝཏྠཱདཱིནི མཧཱདོཎིཾ ཙིཏཀཉྩ མཧཱརཧཾ.

༡༠༧.

དྭིདྷཱ ཀཏྭཱན ནིཀྑམྨ སཀསཱིསེ པཏིཊྛིཏཱ;

ཝནྡིཏཱ སཏྠུནོ པཱདཱ ཡཐཱཊྛཱནེ པཏིཊྛིཏཱ.

༡༠༨.

ཏཏོ དེཝཱནུབྷཱཝེན པཛྫལིཏྠ ཙིཏཱནལོ;

ན མསི སཏྠུདེཧསྶ དཌྜྷསྶཱསི ན ཚཱརིཀཱ.

༡༠༩.

དྷཱཏུཡོ ཨཝསིསྶིཾསུ མུཏྟཱབྷཱ ཀཉྩནཔྤབྷཱ;

ཨདིཊྛཱནེན བུདྡྷསྶ ཝིཔྤཀིཎྞཱ ཨནེཀདྷཱ.

༡༡༠. ¶

ཨུཎྷཱིསཾ ཨཀྑཀཱ དྭེ ཙ ཙཏསྶོ དནྟདྷཱཏུཡོ;

ཨིཙྩེཏཱ དྷཱཏུཡོ སཏྟ ཝིཔྤཀིཎྞཱ ན སཏྠུནོ.

༡༡༡.

ཨཱཀཱསཏོ པཏིཏྭཱཔི ཨུགྒནྟྭཱཔི མཧཱིཏལཱ;

སམནྟཱ ཛལདྷཱརཱཡོ ནིབྦཱཔེསུཾ ཙིཏཱནལཾ.

༡༡༢.

ཐེརསྶ སཱརིཔུཏྟསྶ ཨནྟེཝཱསི མཧིདྡྷིཀོ;

སརབྷུནཱམཀོ ཐེརོ པབྷིནྣ པཊིསམྦྷིདོ.

༡༡༣.

གཱིཝཱདྷཱཏུཾ གཧེཏྭཱན ཙིཏཏོ མཧིཡངྒཎེ;

པཏིཊྛཔེཏྭཱ ཐཱུཔམྷི ཨཀཱ ཀཉྩུཀཙེཏིཡཾ.

༡༡༤.

ཁེམཝ྄ཧཡོ ཀཱརུཎིཀོ ཁཱིཎསཾཡོཛནོ མུནི;

ཙིཏཀཱ ཏོ ཏཏོ ཝཱམདཱཋཱདྷཱཏུཾ སམགྒཧི.

༡༡༥.

ཨཊྛནྣམཐ རཱཛུནཾ དྷཱཏུཨཏྠཱཡ སཏྠུནོ;

ཨུཔྤནྣཾ ཝིགྒཧཾ དོཎོ སམེཏྭཱན དྭིཛུཏྟམོ.

༡༡༦. ¶

ཀཏྭཱན ཨཊྛ ཀོཊྛཱསེ བྷཱཛེཏྭཱ སེསདྷཱཏུཡོ;

ཨདཱསི ཨཊྛརཱཛཱུནཾ ཏཾ ཏཾ ནགརཝཱསིནཾ.

༡༡༧.

ཧཊྛཏུཊྛཱ གཧེཏྭཱན དྷཱཏུཡོ ཏཱ ནརཱདྷིཔཱ;

གནྟྭཱ སཀེ སཀེ རཊྛེ ཙེཏིཡཱནི ཨཀཱརཡུཾ.

༡༡༨.

ཨེཀཱ དཱཋཱ སུརིནྡེན ཨེཀཱ གནྡྷཱརཝཱསིཧི;

ཨེཀཱ བྷུཛངྒརཱཛཱུཧི ཨཱསི སཀྐཏཔཱུཛིཏཱ.

༡༡༩.

དནྟདྷཱཏུཾ ཏཏོ ཁེམོ ཨཏྟནཱ གཧིཏཾ ཨདཱ;

དནྟཔུརེ ཀལིངྒསྶ བྲཧྨདཏྟསྶ རཱཛིནོ.

༡༢༠.

དེསཡིཏྭཱན སོ དྷམྨཾ བྷེཏྭཱ སབྦཱ ཀུདིཊྛིཡོ;

རཱཛཱནཾ ཏཾ པསཱདེསི ཨགྒམྦྷཱི རཏནཏྟཡེ.

༡༢༡. ¶

ཨཛ྄ཛྷོགཱལ༹ྷོ མུནིནྡསྶ དྷམྨཱམཏམཧཎྞཝཾ;

སོ ནརིནྡོཔཝཱཧེསི མལཾ མཙྪརིཡཱདིཀཾ.

༡༢༢.

པཱཝུསྶཀོ ཡཐཱ མེགྷོ ནཱནཱ རཏནཝསྶཏོ;

དཱལི༹དྡིཡནིདཱགྷཾ སོ ནིབྦཱཔེསི ནརུཏྟམོ.

༡༢༣.

སུཝཎྞཁཙིཏཱལམྦ མུཏྟཱཛཱལེཧི སོབྷིཏཾ;

ཀཱུཊཱགཱརསཏཱཀཱིཎྞཾ ཏརུཎཱདིཙྩསནྣིབྷཾ.

༡༢༤.

ནཱནཱརཏནསོབྷཱཡ དུདིཀྑཾ ཙཀྑུམཱུསནཾ;

ཡཱནཾ སགྒཱཔཝགྒསྶ པསཱདཱཏིསཡཱཝཧཾ.

༡༢༥.

ཀཱརཡིཏྭཱན སོ རཱཛཱ དཱཋཱདྷཱཏུནིཝེསནཾ;

དྷཱཏུཔཱིཋཉྩ ཏཏྠེཝ ཀཱརེཏྭཱ རཏནུཛྫལཾ.

༡༢༦.

ཏཧིཾ སམཔྤཡིཏྭཱན དཱཋཱདྷཱཏུཾ མཧེསིནོ;

པཱུཛཱཝཏྠཱུཧི པཱུཛེསི རཏྟིནྡིཝམཏནྡིཏོ.

༡༢༧. ¶

ཨིཏི སོ སཉྩིནིཏྭཱན པུཉྙསམྦྷཱར སམྤདཾ;

ཛཧིཏྭཱ མཱནུསཾ དེཧཾ སགྒཀཱཡམལངྐརི.

༡༢༨.

ཨནུཛཱཏོ ཏཏོ ཏསྶ ཀཱསིརཱཛཝ྄ཧཡོ སུཏོ;

རཛྫཾ ལདྡྷཱ ཨམཙྩཱནཾ སོཀསལླམཔཱནུདཱི.

༡༢༩.

པུཔྥགནྡྷཱདིནཱ དནྟདྷཱཏུཾ ཏམབྷིཔཱུཛིཡ;

ནིཙྩཾ མཎིཔྤདཱིཔེཧི ཛོཏཡི དྷཱཏུམནྡིརཾ.

༡༣༠.

ཨིཙྩེཝམཱདིཾ སོ རཱཛཱ ཀཏྭཱ ཀུསལསཉྩཡཾ;

ཛཧིཏྭཱན ནིཛཾ དེཧཾ དེཝིནྡཔུརམཛ྄ཛྷགཱ.

༡༣༡.

སུནནྡོ ནཱམ རཱཛིནྡོ ཨཱནནྡཛནནོ སཏཾ;

ཏསྶ’ཏྲཛོ ཏཏོ ཨཱསི བུདྡྷསཱསནམཱམཀོ.

༡༣༢.

སམྨཱནེཏྭཱན སོ དནྟདྷཱཏུཾ ཉེཡྻནྟདསྶིནོ;

མཧཏཱ བྷཏྟིཡོགེན ཨགཱ དེཝསཧཝྱཏཾ.

༡༣༣. ¶

ཏཏོ པརཉྩ ཨཉྙེ’པི བཧཝོ ཝསུདྷཱདྷིཔཱ;

དནྟདྷཱཏུཾ མུནིནྡསྶ ཀམེན ཨབྷིཔཱུཛཡུཾ.

༡༣༤.

གུཧསཱིཝཝ྄ཧཡོ རཱཛཱ དུརཏིཀྐམ སཱསནོ;

ཏཏོ རཛྫསིརིཾ པཏྭཱ ཨནུགཎྷི མཧཱཛནཾ.

༡༣༥.

སཔརཏྠཱནབྷིཉྙེ སོ ལཱབྷསཀྐཱརལོལུཔེ;

མཱཡཱཝིནོ ཨཝིཛྫནྡྷེ ནིགནྛེ སམུཔཊྛཧི.

༡༣༦.

ཝསྶཱརཏྟེ ཡཐཱ ཙནྡོ མོཧཀྑནྡྷེན ཨཱཝཊོ;

ནཱསཀྑཱི གུཎརཾསཱིཧི ཛལིཏུཾ སོ ནརཱསབྷོ.

༡༣༧.

དྷམྨམགྒཱ ཨཔེཏེ’པི པཝིཊྛེ དིཊྛིཀཱནནཾ;

ཏསྨིཾ སཱདྷུཔཐཾ ཨཉྙེ ནཱཏིཝཏྟིཾསུ པཱཎིནོ

༡༣༨. ¶

ཧེམཏོརཎམཱལཱཧི དྷཛེཧི ཀདལིཧི ཙ;

པུཔྥགགྷིཡེཧི’ནེཀེཧི སཛྫེཏྭཱ ནཱགརཱ པུརཾ

༡༣༩.

མངྒལཏྠུཏི གྷོསེཧི ནཙྩགཱིཏཱདིཀེཧི ཙ;

ཧེམརཱུཔིཡཔུཔྥེཧི གནྡྷཙུཎྞཱདིཀེཧི ཙ.

༡༤༠.

པཱུཛེནྟཱ མུནིརཱཛསྶ དཱཋཱདྷཱཏུཾ ཀུདཱཙནཾ;

ཨཀཾསུ ཨེཀནིགྒྷོསཾ སཾཝཊྚམྦུདྷིསནྣིབྷཾ.

༡༤༡.

ཨུགྒྷཱཊེཏྭཱ ནརིནྡོ སོ པཱསཱདེ སིཧཔཉྫརཾ;

པསྶནྟོ ཛནམདྡཀྑཱི པཱུཛཱཝིདྷིཔརཱཡཎཾ.

༡༤༢.

ཨཐཱམཙྩསབྷཱམཛེཏྡྷ རཱཛཱ ཝིམྦྷཱིཏ མཱནསོ;

ཀོཏུཧལཱཀུལོ ཧུཏྭཱ ཨིདཾ ཝཙནམབྲཝཱི.

༡༤༣.

ཨཙྪེརཀཾ ཀིམེཏནྣུ ཀཱིདིསཾ པཱཊིཧཱརིཡཾ;

མམེཏཾ ནགརཾ ཀསྨཱ ཚཎནིསྶིཏཀཾ ཨིཏི.

༡༤༤. ¶

ཏཏོ ཨམཙྩོ ཨཱཙིཀྑི མེདྷཱཝཱི བུདྡྷམཱམཀོ;

རཱཛིནོ ཏསྶ སམྦུདྡྷཱནུབྷཱཝམཝིཛཱནཏོ.

༡༤༥.

སབྦཱབྷིབྷུསྶབུདྡསྶ ཏནྷཱསངྐཡདསྶིནོ;

ཨེསཱ དྷཱཏུ མཧཱརཱཛ ཁེམཏྠེརེན ཨཱཧཊཱ.

༡༤༦.

ཏཾ དྷཱཏུཾ པཱུཛཡིཏྭཱན རཱཛཱནོ པུབྦཀཱ ཨིདྷ;

ཀལྱཱཎམིཏྟེ ནིསྶཱཡ དེཝཀཱཡམུཔཱགམུཾ.

༡༤༧.

ནཱགརཱཔི ཨིམེ སབྦེ སམྤརཱཡ སུཀཏྠིཀཱ;

པཱུཛཡནྟི སམཱགམྨ དྷཱཏུཾ ཏཾ སཏྠུནོ ཨིཏི.

༡༤༨.

ཏསྶཱམཙྩསྶ སོ རཱཛཱ སུཏྭཱ དྷམྨཾ སུབྷཱསིཏཾ;

དུལླདྡྷཱིམལམུཛ྄ཛྷིཏྭཱ པསཱིདི རཏནཏྟཡེ.

༡༤༩. ¶

དྷཱཏུཔཱུཛཾ ཀརོནྟོ སོ རཱཛཱ ཨཙྪརིཡཱ ཝཧཾ;

ཏིཏྠིཡེ དུམྨནེ’ཀཱསི སུམནེ ཙེཏརེ ཛནེ.

༡༥༠.

ཨིམེ ཨཧིརིཀཱ སབྦེ སདྡྷཱདིགུཎཝཛྫིཏཱ;

ཐདྡྷཱ སཋཱ ཙ དུཔྤཉྙཱ སགྒམོཀྑཝིབནྡྷཀཱ.

༡༥༡.

ཨིཏི སོ ཙིནྟཡིཏྭཱན གུཧསཱིཝོ ནརཱདྷིཔོ;

པབྦཱཛེསི སཀཱ རཊྛཱ ནིགཎྛེ ཏེ ཨསེསཀེ.

༡༥༢.

ཏཏོ ནིགྞྛཱ སབྦེ’པི གྷཏསིཏྟཱནལཱ ཡཐཱ;

ཀོདྷགྒིཛལིཏཱ’གཉྪུཾ པུརཾ པཱཊལིཔུཏྟཀཾ.

༡༥༣.

ཏཏྠ རཱཛཱ མཧཱཏེཛོ ཛམྦུདཱིཔསྶ ཨིསྶརོ;

པཎྜུནཱམོ ཏདཱ ཨཱསི ཨནནྟབལཝཱཧཎོ.

༡༥༤. ¶

ཀོདྷནྡྷཱཐ ནིགཎྛཱ ཏེ སབྦེ པེསུཉྙཀཱརཀཱ;

ཨུཔསངྐམྨ རཱཛཱནཾ ཨིདཾ ཝཙནམབྲཝཱུཾ.

༡༥༥.

སབྦདེཝམནུསྶེཧི ཝནྡནཱིཡེ མཧིདྡྷིཀེ;

སིཝབྲཧྨཱདཡོ དེཝེ ནིཙྩཾ ཏུམྷེ ནམསྶཐ.

༡༥༦.

ཏུཡ྄ཧཾ སཱམནྟབྷུཔཱལོ གུཧསཱིཝོ པནཱདྷུནཱ;

ནིནྡནྣོ ཏཱདིསེ དེཝེ ཚཝཊྛིཾ ཝནྡཏེ ཨིཏི.

༡༥༧.

སུཏྭཱན ཝཙནཾ ཏེསཾ རཱཛཱ ཀོདྷཝསཱནུགོ;

སཱུརཾ སཱམནྟབྷཱུཔཱལཾ ཙིཏྟཡཱནམཐ’བྲཝཱི.

༡༥༨.

ཀལིངྒརཊྛཾ གནྟྭཱན གུཧསཱིཝམིདྷཱནཡ;

པཱུཛིཏཾ ཏཾ ཚཝཊྛིཉྩ ཏེན རཏྟིནྡིཝཾ ཨིཏི.

༡༥༩.

ཙིཏྟཡཱནོ ཏཏོ རཱཛཱ མཧཏིཾ ཙཏུརངྒིནིཾ;

སནྣཡཧིཏྭཱ སཀཾ སེནཾ པུརཱ ཏམྷཱབྷིནིཀྑམི.

༡༦༠. ¶

གནྟྭཱན སོ མཧཱིཔཱལོ སེནངྒེཧི པུརཀྑཏོ;

དནྟཔུརསྶཱཝིདཱུརེ ཁནྡྷཱཝཱརཾ ནིཝེསཡི.

༡༦༡.

སུཏྭཱ ཨཱགམནཾ ཏསྶ ཀལིངྒོ སོ མཧིཔཏི;

གཛིནྡཔཱབྷཏཱདིཧི ཏཾ ཏོསེསི ནརཱདྷིཔཾ.

༡༦༢.

ཧིཏཛ྄ཛྷཱསཡཏཾ ཉཏྭཱ གུཧསཱིཝསྶ རཱཛིནོ;

དནྟཔུརཾ ཙིཏྟཡཱནོ སདྡྷིཾ སེནཱཡ པཱཝིསི.

༡༦༣.

པཱཀཱརགོཔུརཊྚཱལཔཱསཱདགགྷིཀཙིཏྟིཏཾ;

དཱནསཱལཱཧི སོ རཱཛཱ སམིདྡྷཾ པུརམདྡས.

༡༦༤.

ཏཏོ སོ སུམནོ གནྟྭཱ པཝིཊྛོ རཱཛམནྡིརཾ;

གུཧསཱིཝསྶ ཨཱཙིཀྑི པཎྜུརཱཛསྶ སཱསནཾ.

༡༦༥. ¶

སུཏྭཱན སཱསནཾ ཏསྶ དཱརུཎཾ དུརཏིཀྐམཾ;

པསནྣམུཁཝཎྞོ’ཝ ཙིཏྟཡཱནཾ སམབྲཝཱི.

༡༦༦.

སབྦལོཀཧིཏཏྠཱཡ མཾསནེཏྟཱདིདཱནཏོ;

ཨནཔྤཀཔྤེ སམྦྷཱརེ སམྦྷརིཏྭཱ ཨཏནྡིཏོ.

༡༦༧.

ཛེཏྭཱ ནམུཙིནོ སེནཾ པཏྭཱ སབྦཱསཝཀྑཡཾ;

ཨནཱཝརཎཉཱཎེན སབྦདྷམྨེསུ པཱརགུ.

༡༦༨.

དིཊྛདྷམྨསུཀསྶཱདཾ ཨགཎེཏྭཱན ཨཏྟནོ;

དྷམྨནཱཝཱཡ ཏཱརེསི ཛནཏཾ ཡོ བྷཝཎྞཝཱ.

༡༦༩.

དེཝཱཏིདེཝཾ ཏཾ བུདྡྷཾ སརཎཾ སབྦཔཱཎིནཾ;

ཛནོ ཧི ཨཝཛཱནནྟོ ཨདྡྷཱ སོ ཝཉྩིཏོ ཨིཏི.

༡༧༠. ¶

ཨིཙྩེཝམཱདིཾ སུཏྭཱན སོ རཱཛཱ སཏྠུཝཎྞནཾ;

ཨཱནནྡསྶུཔྤབནྡྷེཧི པཝེདེསི པསནྣཏཾ.

༡༧༡.

གུཧསཱིཝོ པསནྣཾ ཏཾ ཙིཏྟཡཱནཾ ཨུདིཀྑིཡ;

ཏེན སདྡྷིཾ མཧགྒྷཾ ཏཾ ཨགམཱ དྷཱཏུམནྡིརཾ.

༡༧༢.

ཧརིཙནྡནསམྦྷུཏཾ དྭཱརབཱཧཱདིཀེཧི ཙ;

པཝཱལ༹ཝཱལ༹མཱལཱཧི ལམྦམུཏྟཱལཏཱཧི ཙ.

༡༧༣.

ཨིནྡནཱིལཀཝཱཊེཧི མཎིཀིངྐིཎིཀཱཧི ཙ;

སོཝཎྞཀཎྞམཱལཱཧི སོབྷིཏཾ མཎིཐཱུཔིཀཾ.

༡༧༤.

ཨུཙྩཾ ཝེལུརིཡུབྦྷཱསི ཚདནཾ མཀརཱཀུལཾ;

དྷཱཏུམནྡིརམདྡཀྑི རཏནུཛྫལ པཱིཋཀཾ.

༡༧༥.

ཏཏོ སེཏཱཏཔཏྟསྶ ཧེཊྛཱ རཏནཙིཏྟིཏཾ;

དིསྭཱ དྷཱཏུཀརནྜཉྩ ཏུཊྛོ ཝིམྦྷཡམཛ྄ཛྷགཱ.

༡༧༦. ¶

ཏཏོ ཀལིངྒནཱཐོ སོ ཝིཝརིཏྭཱ ཀརཎྜཀཾ;

མཧཱིཏལེ ནིཧནྟྭཱན དཀྑིཎཾ ཛཱནུམཎྜལཾ.

༡༧༧.

ཨཉྫལིཾ པགྒཧེཏྭཱན གུཎེ དསབལཱདིཀེ;

སརིཏྭཱ བུདྡྷསེཊྛསྶ ཨཀཱསི ཨབྷིཡཱཙནཾ.

༡༧༨.

གཎྜམྦརུཀྑམཱུལམྷི ཏཡཱ ཏིཏྠཱིཡམདྡནེ;

ཡམཀཾ དསྶཡནྟེན པཱཊིཧཱརིཡམབྦྷུཏཾ.

༡༧༩.

པུབྦཀཱཡཱདིནིཀྑནྟཛལཱནལསམཱཀུལཾ;

ཙཀྐཝཱལ༹ངྒཎཾ ཀཏྭཱ ཛནཱ སབྦེ པསཱདིཏཱ.

༡༨༠.

དེསེཏྭཱན ཏཡོ མཱསེ ཨབྷིདྷམྨཾ སུདྷཱསིནཾ;

ནགརཾ ཨོཏརནྟེན སངྐསྶཾ ཏཱཝཏིཾསཏོ.

༡༨༡. ¶

ཚཏྟཝཱམརསངྑཱདིགཱཧཀེཧི ཨནེཀདྷཱ;

བྲཧྨདེཝཱསུརཱདཱིཧི པཱུཛིཏེན ཏཡཱ པན.

༡༨༢.

ཋཏྭཱན མཎིསོཔཱཎེ ཝིསྶཀམྨཱབྷིནིམྨིཏེ;

ལོཀཝིཝརཎཾ ནཱམ དསྶིཏཾ པཱཊིཧཱརིཡཾ.

༡༨༣.

ཏཐཱནེཀེསུ ཋཱནེསུ མུནིརཱཛ ཏཡཱཔུན;

བཧཱུནི པཱཊིཧིརཱནི དསྶིཏཱནི སཡམྦྷུནཱ.

༡༨༤.

པཱཊིཧཱརིཡམཛྫཱཔི སགྒམོཀྑསུཁཱཝཧཾ;

པསྶནྟཱནཾ མནུསྶཱནཾ དསྶནཱིཡཾ ཏཡཱ ཨིཏི.

༡༨༥. ¶

ཨབྦྷུགྒནྟྭཱ གགཎ ཀུཧརཾ ཙནྡལེཁཱབྷིརཱམཱ,

ཝིསྶཛྫེནྟི རཛཏ དྷཝལཱ རཾསིཡོ དནྟདྷཱཏུ;

དྷཱུཔཱཡནྟི སཔདི བཧུདྷཱ པཛྫལནྟཱི མུཧུཏྟཾ,

ནིབྦཱཡནྟཱི ནཡནསུབྷགཾ པཱཊིཧཱིརཾ ཨཀཱསི.

༡༨༦.

ཨཙྪེརཾ ཏཾ པརམ རུཙིརཾ ཙིཏྟཡཱནོ ནརིནྡོ,

དིསྭཱ ཧཊྛོ ཙིརཔརིཙིཏཾ དིཊྛིཛཱལཾ ཛཧིཏྭཱ;

གནྟྭཱ བུདྡྷཾ སརཎམསམཾ སབྦསེཎཱིཧི སདྡྷིཾ,

ཨགྒཾ པུཉྙཾ པསཝི བཧུདྷཱ དྷཱཏུསམྨཱནནཱཡ.

དུཏིཡོ པརིཙྪེདོ

༡༨༧. ¶

ཏཏོ ཀལིངྒཱདྷིཔཏིསྶ ཏསྶསོཙིཏྟཡཱནོཔརམཔྤཏཱིཏོ;

ཏཾ སཱསནཾ པཎྜུནརཱདྷིཔསྶ ཉཱཔེསི དྷཱིརོ དུརཏིཀྐམཾ’ཏི.

༡༨༨.

རཱཛཱཏཏོ དནྟཔུརཾ དྷཛེཧི པུཔྥེཧི དྷཱུཔེཧི ཙ ཏོརཎེཧི;

ཨལངྐརིཏྭཱན མཧཱཝིཏཱན ནིཝཱརིཏཱདིཙྩམརཱིཙིཛཱལཾ.

༡༨༩.

ཨསྶུཔྤབནྡྷཱཝུཏལོཙནེཧི པུརཀྑཏོ ནེགམ ནཱགརེཧི;

སམུབྦཧནྟོ སིརསཱ ནིཛེན མཧཱརཧཾ དྷཱཏུཀརཎྜཀཾ ཏཾ.

༡༩༠.

སམུསྶིཏོདཱར སིཏཱཏཔཏྟཾ སངྑོདརོདཱཏ ཏུརངྒཡུཏྟཾ;

རཐཾ ནཝཱདིཙྩསམཱནཝཎྞ མཱརུཡ྄ཧ ཙིཏྟཏྠརཎཱབྷིརཱམཾ.

༡༩༡.

ཨནེཀསངྑེཧི བལེཧི སདྡྷིཾ ཝེལཱཏིཝཏྟམྦུདྷིསནྣིབྷེཧཱི;

ནིཝཏྟམཱནསྶ བཧུཛྫནསྶ ཝིནཱཔི དེཧཾ མནསཱནུཡཱཏོ

༡༩༢. ¶

སུསནྠཏཾ སབྦདྷིཝཱལུཀཱཧི སུསཛྫིཏཾ པུཎྞ གྷཊཱདིཀེཧི;

པུཔྥཱབྷིཀིཎྞཾ པཊིཔཛྫི དཱིགྷཾ སུཝིཏྠཏཾ པཱཊལིཔུཏྟམགྒཾ.

༡༩༣.

ཀལིངྒྷནཱཐོ ཀུསུམཱདིཀེཧི ནཙྩེཧི གཱིཏེཧི ཙ ཝཱདིཏེཧི;

དིནེ དིནེ ཨདྡྷནི དནྟདྷཱཏུཾ པཱུཛེསི སདྡྷིཾ ཝནདེཝཏཱཧི.

༡༩༤.

སུདུགྒམཾ སིནྡྷུམཧཱིདྷརེཧི ཀམེན མདྡྷཱནམཏིཀྐམིཏྭཱ;

ཨཱདཱཡ དྷཱཏུཾ མནུཛཱདྷིནཱཐོ ཨགཱ པུརཾ པཱཊལི པུཏྟནཱམཾ.

༡༩༥.

རཱཛཱདྷིརཱཛོ’ཐ སབྷཱཡ མཛ྄ཛྷེ དིསྭཱན ཏཾ ཝཱིཏབྷཡཾ ཝིསངྐཾ;

ཀལིངྒརཱཛཾ པཊིགྷཱབྷིབྷུཏོ ཨབྷཱསི པེསུཉྙཀརེ ནིགཎྛེ

༡༩༦.

དེཝེ ཛཧིཏྭཱན ནམསྶནཱིཡེ ཚཝཊྛིམེཏེན ནམསྶིཏཾ’ཏཾ;

ཨངྒཱརརཱསིམྷི སཛོཏིབྷཱུཏེ ནིཀྑིཔྤ ཁིཔྤཾ དཧཐཱདྷུནེཏི.

༡༩༧. ¶

པཧཊྛཙིཏྟཱ’ཝཏཏོ ནིགཎྛཱརཱཛངྒཎེ ཏེ མཧཏིཾ གབྷཱིརཾ;

ཝཱིཏཙྩིཀངྒཱརཀ རཱསི པུཎྞཾ ཨངྒཱརཀཱསུཾ ཨབྷིསངྑརིཾསུ.

༡༩༨.

སམནྟཏོ པཛྫལིཏཱཡ ཏཱཡ སཛོཏིཡཱ རོརུཝབྷེརཝཱཡ;

མོཧནྡྷབྷུཏཱ ཨཐ ཏིཏྠིཡཱ ཏེ ཏཾ དནྟདྷཱཏུཾ ཨབྷིནིཀྑིཔིཾསུ.

༡༩༩.

ཏསྶཱནུབྷཱཝེན ཏམགྒཱིརཱསིཾ ཧེཏྭཱ སརོཛཾ རཐཙཀྐམཏྟཾ;

སམནྟཏོ ཨུགྒཏརེཎུཛཱལ མུཊྛཱསི ཀིཉྫཀྑ བྷརཱབྷིརཱམཾ.

༢༠༠.

ཏསྨིཾ ཁཎེ པངྐཛ ཀཎྞིཀཱཡ པཏིཊྛཧིཏྭཱ ཛིནདནྟདྷཱཏུ;

ཀུནྡཱཝདཱཏཱཧི པབྷཱཧི སབྦཱ དིསཱ པབྷཱསེསི པབྷསྶརཱཧི.

༢༠༡. ¶

དིསྭཱན ཏཾ ཨཙྪརིཡཾ མནུསྶཱ པསནྣཙིཏྟཱ རཏནཱདིཀེཧི;

སམྤཱུཛཡིཏྭཱ ཛིནདནྟདྷཱཏུཾ སཀཾ སཀཾ དིཊྛིམཝོསྶཛིཾསུ.

༢༠༢.

སོ པཎྜུརཱཛཱ པན དིཊྛིཛཱལཾ ཙིརཱནུབདྡྷཾ ཨཔརིཙྩཛནྟོ;

པཏིཊྛཔེཏྭཱ’དྷིཀརཉྙམེཏཾ ཀུཊེན གྷཱཏཱཔཡི དནྟདྷཱཏུཾ.

༢༠༣.

ཏསྶཾ ནིམུགྒཱ’དྷིཀརཉྙམེསཱ ཨུཔཌྜྷབྷཱགེ ནཙ དིསྶམཱནཱ;

པུབྦཱཙལཊྛོ’ཝ སུདྷཱམརཱིཙི ཛོཏེསི རཾསཱིཧི དིསཱ སམནྟཱ.

༢༠༤.

དིསྭཱནུབྷཱཝཾ ཛིནདནྟདྷཱཏུ ཡཱཔཛྫི སོ ཝིམྦྷཡ མགྒརཱཛཱ;

ཨེཀོ’ཐ ཨིསྶཱཔསུཏོ ནིགཎྛོ ཏཾ རཱཛརཱཛཱནམིདཾ ཨཝོཙ.

༢༠༥.

རཱམཱདཡོ དེཝ ཛནདྡནསྶ ནཱནཱཝཏཱརཱ བྷུཝནེ ཨཧེསུཾ;

ཏསྶེཀདེསོ’ཙ ཨིདཾ ཚཝཊྛིནོཙེ’ནུབྷཱཝོཀཐམཱིདིསོཏི.

༢༠༦. ¶

ཨདྡྷཱ མནུསྶཏྟམུཔཱགཏསྶ དེཝསྶ པཙྪཱ ཏིདིཝཾ གཏསྶ;

དེཧེཀདེསོ ཋཔིཏོ ཧིཏཏྠམེཏནྟི སཙྩཾཝཙནཾབྷཝེཡྻ.

༢༠༧.

སཾཝཎྞཡིཏྭཱན གུཎེ པཧཱུཏེ ནཱརཱཡཎསྶ’སྶམཧིདྡྷིཀསྶ;

ནིམུགྒམེཏྟཱ’དྷིཀརཉྙམེཏཾསམྤསྶཏོ མེབཧིནཱིཧརིཏྭཱ.

༢༠༨.

སམྤཱདཡིཏྭཱན མཧཱཛནཱནཾ མུཁཱནི པངྐེརུཧསུནྡརཱནི;

ཡཊིཙྪིཏཾ གཎྷཐ ཝཏྠུཛཱཏཾ ཨིཙྩཱཧ རཱཛཱ མུཁརེ ནིགཎྛེ.

༢༠༩.

ཏེ ཏིཏྠིཡཱ ཝིཎཧུསུརཾ གུཎེཧི ཝིཙིཏྟ རཱུཔེཧི ཨབྷིཏྠཝིཏྭཱ;

ཏོཡེན སིཉྩིཾསུ སཋཱ ཏཐཱཔི ཋིཏཔྤདེསཱ ན ཙལིཏྠ དྷཱཏུ.

༢༡༠.

ཛིགུཙྪམཱནོ ཨཐ ཏེ ནིགཎྛེ སོ དྷཱཏུཡཱནཱིཧརཎེ ཨུཔཱཡཾ;

ཨནྭེསམཱནོ ཝསུདྷཱདྷིནཱཐོ བྷེརིཾ ཙརཱཔེསི སཀེ པུརམྷི.

༢༡༡. ¶

ནིམུགྒམེཏྠཱ’དྷིཀརཉྙམཛྫི ཡོ དྷཱཏུམེཏཾ བཧི ནཱིཧརེཡྻ;

ལདྡྷཱན སོ ཨིསྶརིཡཾ མཧནྟཾ རཉྙོསཀཱསཱསུཁམེསྶཏཱིཏི

༢༡༢.

སུཏྭཱ ན ཏཾ བྷེརིརཝཾཨུལཱ༹རཾཔུཉཉྙཏྠིཀོབུདྡྷབལེཔསནྣོ;

ཏསྨིཾ པུརེ སེཊྛིསུཏོ སུབྷདྡོ པཱཝེཀྑིརཉྙོ སམིཏིཾ པགབྦྷོ.

༢༡༣.

ཏམགྒརཱཛཾ ཨཐ སོ ནམིཏྭཱ སཱམཱཛིཀཱནཾ ཧདཡངྒམཱཡ;

བྷཱསཱཡ སབྦཉྙུགུཎཔྤབྷཱཝཾ ཝཎྞེསི སཱརཛྫཝིམུཏྟ ཙིཏྟོ.

༢༡༤.

བྷུམིཾ ཀིཎིཏྭཱ མཧཏཱ དྷནེན མནོརམཾ ཛེཏཝནཾ ཝིཧཱརཾ;

ཡོ ཀཱརཡིཏྭཱན ཛིནསྶ དཏྭཱ ཨུཔཊྛཧི ཏཾ ཙཏུཔཙྩཡེཧི.

༢༡༥. ¶

ཨནཱཐཔིཎྜིཔྤདསེཊྛིསེཊྛོསོདིཊྛདྷམྨོཔཔིཏཱམཧོམེ;

ཏིལོཀནཱཐེ མམ དྷམྨརཱཛེ ཏུམྷེ’དྷུནཱཔསྶཐབྷཏྟིབྷཱརཾ.

༢༡༦.

ཨིཏྠཾ ནདིཏྭཱན པཧཱུཏཔཉེཉྙཱ ཀཏྭཱན ཨེཀཾསམཐུཏྟརཱིཡཾ;

མཧཱིཏལཾ དཀྑིཎཛཱནུཀེན ཨཱཧཙྩ བདྡྷཉྫལིཀོ ཨཝོཙ.

༢༡༧.

ཚདྡནྟནཱགོ སཝིསེན ཝིདྡྷོ སལླེན ཡོ ལོཧིཏམཀྑི ཏངྒོ;

ཚབྦཎྞརཾསཱིཧི སམུཛྫལནྟེ ཚེཏྭཱན ལུདྡཱཡ ཨདཱསི དནྟེ.

༢༡༨.

སསོ’པི ཧུཏྭཱན ཝིསུདྡྷསཱིལོ ཨཛ྄ཛྷཏྟདཱནཱབྷིརཏོ དྭིཛཱཡ;

ཡོ’དཛྫིདེཧམྤི སཀཾ ནིཔཙྩ ཨངྒཱརརཱསིམྷི བུབྷུཀྑིཏཱཡ.

༢༡༩. ¶

ཡོ བོདྷིཡཱ བཱཧིརཝཏྠུདཱནཱ ཨཏིཏྟརཱུཔོ སིཝིརཱཛ སེཊྛོ;

ཨདཱསི ཙཀྑཱུནི པབྷསྶརཱནི དྭིཛཱཡ ཛིཎྞཱཡ ཨཙཀྑུཀཱཡ.

༢༢༠.

ཡོཁནྟིཝཱདཱི’པི ཀལཱབུརཱཛེ ཚེདཱཔཡནྟེ’པི སཧཏྠཔཱདཾ;

པརིཔླུཏངྒོརུདྷིརེ ཏིཏིཀྑིམེཏྟཱཡམཱནོ ཡསདཱཡཀེ’ཝ.

༢༢༡.

ཡོ དྷམྨཔཱལོ ཨཔི སཏྟམཱས ཛཱཏོཔདུཊྛེ ཛནཀེསཀམྷི;

ཀཱརཱཔཡནྟེ ཨསིམཱལཀམྨཾ ཙིཏྟཾ ན དཱུསེསི པཏཱཔརཱཛེ.

༢༢༢.

སཱཁཱམིགོ ཡོ ཨསཏཱ པུམེན ཝནེ པཔཱཏཱ སཡམུདྡྷཊེན;

སིལཱཡ བྷིནྣེ’པི སཀེ ལལཱཊེ ཏཾ ཁེམབྷུམིཾ ཨནཡིཏྠམཱུལ༹ྷཾ.

༢༢༣.

རུཊྛེན མཱརེན’བྷིནིམྨིཏམྤི ཨངྒཱརཀཱསུཾ ཛལིཏཾ ཝིཧིཛྫ;

སམུཊྛིཏེ སཛྫུམཧཱརཝིནྡེ ཋཏྭཱན ཡོ སེཊྛི ཨདཱསི དཱནཾ.

༢༢༤. ¶

མིགེན ཡེནཱཔེཝིཛཉྙམེཀཾ བྷཱིཏཾཝདྷཱམོཙཡིཏུཾཀུརངྒིཾ;

ཨཱགྷཱཏནེ ཨཏྟསིརཾཋཔེཏྭཱཔམོཙིཏཱ’ཉྙྙཔིཔཱཎིསངྒྷཱ.

༢༢༥.

ཡོ སཏྟཝསྶོ ཝིསིཁཱཡ པཾསུ ཀཱིལཱ༹པརོ སམྦྷཝནཱམཀོ’པི;

སབྦཉྙུལཱིལ༹ྷཱཡ ནིགུལ༹ྷཔཉྷཾ པུཊྛོ ཝིཡཱཀཱསི སུཙཱིརཏེན.

༢༢༦.

ཧིཏྭཱ ནིཀནྟིཾ སཀཛཱིཝིཏེ’པི བདྡྷཱསཀུཙྪིམྷི ཙ ཝེཏྟཝལླིཾ;

སཱཁཱམིགེ ནེཀསཧསྶསངྑེ ཝདྷཱཔམོཙེསི ཀཔིསྶརོཡོ.

༢༢༧.

སནྟཔྤཡཾ དྷམྨསུདྷཱརསེན ཡོ མཱནུསེ ཏུཎྜིལསཱུཀརོ’པི;

ཨིསཱི’ཝ ཀཏྭཱ ཨཐ ཉཱཡགནྠཾ ནིཛཾ པཝཏྟེསི ཙིརཱཡ དྷམྨཾ.

༢༢༨. ¶

པཙྩཏྠིཀཾ པུཎྞཀཡཀྑམུགྒཾ མཧིདྡྷིཀཾ ཀཱམགུཎེསུ གིདྡྷཾ;

ཡོ ཏིཀྑཔཉྙོཝིདྷུརཱབྷིདྷཱནོདམེསི ཀཱལཱ༹གིརིམཏྟཀམྷི.

༢༢༩.

ཀུལཱཝསཱཡི ཨཝིརཱུལ༹ྷཔཀྑོ ཡོ བུདྡྷིམཱ ཝཊྚཀཔོཏཀོ’པི;

སཙྩེན དཱཝགྒིམབྷིཛྫལནྟཾ ཝསྶེན ནིབྦཱཔཡི ཝཱརིདོ’ཝ.

༢༣༠.

ཡོ མཙྪརཱཛཱཔི ཨཝུཊྛིཀཱལེདིསྭཱནམཙྪེ ཏསིཏེཀིལནྟེ;

སཙྩེནཝཱཀྱེནམཧོགྷཔུཎྞཾམུཧུཏྟམཏྟེནཨཀཱསིརཊྛཾ.

༢༣༡.

ཝིཙིཏྟཧཏྠསྶ རཐཱདིཀཱནི ཝསུནྡྷརཱ ཀམྤན ཀཱརཎཱནི;

པུཏྟེ’ནུཛཱཏེ སདིསེཙདཱརེཡོ’དཛྫིཝེསྶནྟརཛཱཏིཡམྤི.

༢༣༢. ¶

བུདྡྷོ བྷཝིཏྭཱ ཨཔི དིཊྛདྷམྨ སུཁཱནཔེཀྑོ ཀརུཎཱནུཝཏྟཱི;

སབྦཾ སཧནྟོ ཨཝམཱནནཱདིཾ ཡོདུཀྐརཾ ལོཀཧིཏཾཨཀཱསི.

༢༣༣.

བལེན སདྡྷིཾ ཙཏུརངྒིཀེན ཨབྷིདྡཝནྟཾ ཨཏིབྷིཾསནེན;

ཨཛེཡྻསཏྠཾ པརམིདྡྷིཔཏྟཾ དམེསི ཡོ ཨཱལཝཀམྤཱི ཡཀྑཾ.

༢༣༤.

དེཧཱབྷིནིཀྑནྟ ཧུཏཱསནཙྩི མཱལཱཀུལཾ བྲཧྨབྷཝཾ ཀརིཏྭཱ;

བྷེཏྭཱན དིཊྛིཾ སུཙིརཱནུབདྡྷཾ དམེསི ཡོ བྲཧྨཝརཾ མུནིནྡོ.

༢༣༥.

ཨཙྩངྐུསཾ དཱནསུདྷོཏ གཎྜཾ ནིཔཱཏིཏཊྛཱལཀ གོཔུརཱདིཾ;

དྷཱཝནྟམགྒེ དྷནཔཱལཧཏྠིཾ དམེསི ཡོ དཱརུཎམནྟཀཾ’ཝ.

༢༣༦. ¶

མནུསྶརཏྟཱརུཎཔཱཎིཔཱདམུཀྑིཔྤ ཁགྒཾ ཨནུབནྡྷམཱནཾ;

མཧཱདཡོ དུཔྤསཧཾ པརེཧི དམེསི ཡོ ཨངྒུལིམཱལཙོརཾ.

༢༣༧.

ཡོ དྷམྨརཱཛཱ ཝིཛིཏཱརིསངྒྷོ པཝཏྟཡནྟོ ཝརདྷམྨཙཀྐཾ;

སདྡྷམྨ སཉྙཾ རཏནཱཀརཉྩ ཨོགཱཧཡཱི སཾ པརིསཾ སམགྒཾ.

༢༣༨.

ཏསྶེཝ སདྡྷམྨ ཝརཱདྷིཔསྶཏཐཱགཏསྶ’པྤཊིཔུགྒལསྶ;

ཨནནྟཉཱཎསྶ ཝིསཱརདསྶ ཨེསཱ མཧཱཀཱརུཎིཀསྶ དྷཱཏུ.

༢༣༩.

ཨནེན སཙྩེན ཛིནསྶ དྷཱཏུ ཁིཔྤཾ སམཱརུཡ྄ཧ ནབྷནྟརཱལ༹ཾ;

སུདྷཾསུལེཁེཝ སམུཛྫལནྟི ཀངྑཾ ཝིནོདེཏུ མཧཱཛནསྶ.

༢༤༠. ¶

ཏསྨིཾ ཁཎེ སཱ ཛིནདནྟདྷཱཏུ ནབྷཾ སམུགྒམྨ པབྷཱསཡནྟཱི;

སབྦཱ དིསཱ ཨོསདྷིཏཱརཀཱ’ཝ ཛནཾ པསཱདེསི ཝྟིཎྞཀངྑཾ.

༢༤༡.

ཨཐོཏརིཏྭཱ གགནངྒཎམྷཱ སཱ མཏྠཀེ སེཊྛིསུཏསྶ ཏསྶ;

པཏིཊྛཧིཏྭཱན སུདྷཱབྷིསིཏྟགཏྟཾ’ཝ ཏཾ པཱིཎཡི བྷཏྟིཏིནྣཾ.

༢༤༢.

དསྭཱན ཏཾ ཨཙྪརིཡཾ ནིགཎྛཱ ཨིཙྩབྲཝུཾ པཎྜུནརཱདྷིཔཾ ཏཾ;

ཝིཛྫཱབལཾ སེཊྛིསུཏསྶ ཨེཏཾ ན དྷཱཏུཡཱ དེཝ ཨཡམྤབྷཱཝོ.

༢༤༣.

ནིསམྨ ཏེསཾ ཝཙནཾ ནརིནྡོ ཨིཙྩབྲཝཱི སེཊྛིསུཏཾ སུབྷདྡཾ;

ཡཐཱ ཙ ཨེཏེ ཨབྷིསདྡཧེཡྻུཾ ཏཐཱཝིདྷཾ དསྶཡ ཨིདྡྷིམཉྙཾ.

༢༤༤.

ཏཏོ སུབྷདྡོ ཏཔནཱིཡཔཏྟེ སུགནྡྷིསཱིཏོདཀཔཱུརིཏམྷི;

ཝཌྜྷེསི དྷཱཏུཾ མུནིཔུངྒཝསྶ ཨནུསྶརནྟོ ཙརིཏབྦྷུཏཱནི.

༢༤༥. ¶

སཱ རཱཛཧཾ སཱི’ཝ ཝིདྷཱཝམཱནཱ སུགནྡྷིཏོཡམྷི པདཀྑིཎེན;

ཨུམྨུཛྫམཱནཱ ཙ ནིམུཛྫམཱནཱ ཛནེ པམོདསྶུདྷརེ ཨཀཱསི.

༢༤༦.

ཏཏོ ཙ ཀཱསུཾ ཝིསིཁཱཡམཛ྄ཛྷེ ཀཏྭཱ ཏཧིཾ དྷཱཏུམབྷིཀྑིཔིཏྭཱ;

པཾསཱུཧི སམྨཱ ཨབྷིཔཱུརཡིཏྭཱ བཧཱུཧི མདྡཱཔཡི ཀུཉྫརེཧི.

༢༤༧.

བྷེཏྭཱ མཧིཾཨུཊྛཧི ཙཀྐམཏྟཾ ཝིརཱཛམཱནཾ མཎིཀཎྞིཀཱཡ;

པབྷསྶརཾ རཱུཔིཡཀེསརེཧི སརོརུཧཾ ཀཉྩནཔཏྟཔཱལི༹ཾ.

༢༤༨.

པཏིཊྛབྷིཏྭཱན ཏཧིཾ སརོཛེ མནྡཱནིལཱཝཏྟིཏརེཎུ ཛཱལེ;

ཨོབྷཱསཡནྟི’ཝ དིསཱ པབྷཱཧི དིཊྛཱ མུཧུཏྟེན ཛིནསྶདྷཱཏུ.

༢༤༩.

ཁིཔིཾསུ ཝཏྠཱབྷརཎཱནི མཙྩཱ པཝསྶཡུཾ པུཔྥམཡཉྩ ཝསྶཾ;

ཨུཀྐུཊྛིསདྡེཧི ཙ སདྷུཀཱརནཱདེཧི པུཎྞཾ ནགརཾ ཨཀཾསུ.

༢༥༠. ¶

ཏེ ཏིཏྠིཡཱ ཏཾ ཨབྷིཝཉྩནཾ’ཏི རཱཛཱདྷིརཱཛཾ ཨཐ སཉྙཔེཏྭཱ;

ཛིགུཙྪནཱིཡེ ཀུཎཔཱདིཀེཧི ཁིཔིཾསུ དྷཱཏུཾ པརིཁཱཡ པིཊྛེ.

༢༥༡.

ཏསྨིཾ ཁཎེ པཉྩཝིདྷམྦུཛེཧིསཉྪཱདིཏཱཧཾསགཎོཔབྷུཏྟཱ;

མདྷུབྦཏཱལཱི ཝིརུཏཱབྷིརཱམཱ ཨཧོསི སཱ པོཀྑརཎཱི’ཝ ནནྡཱ.

༢༥༢.

གཛཱདྷིཔཱ ཀོཉྙྩརཝཾ རཝིཾསུ ཀརིཾསུ ཧེསཱནིནདཾ ཏུརངྒཱ;

ཨུཀྐུཊྛིནཱདཾ ཨཀརིཾསུ མཙྩཱ སུཝཱདིཏཱ དུནྡུབྷིཨཱདཡོ’པི.

༢༥༣.

ཐོམིཾསུ མཙྩཱ ཐུཏིགཱིཏཀེཧི ནཙྩིཾསུ ཨོཏྟཔྤཝིབྷུསནཱ’པི;

ཝཏྠཱནི སཱིསེ བྷམཡིཾསུ མཏྟཱ བྷུཛཱནི པོཋེསུམུདགྒཙིཏྟཱ.

༢༥༤. ¶

དྷཱུཔེཧི ཀཱལཱགརུསམྦྷཝེཧི གྷནཱཝནདྡྷཾ’ཝ ནབྷཾ ཨཧོསི;

སམུསྶིཏཱནེཀདྷཛཱཝལཱིཧི པུརཾ ཏདཱ ཝཏྠམཡཾ’ཝ ཨཱསི.

༢༥༥.

དིསྭཱ ཏམཙྪེརམཙིནྟནཱིཡཾ ཨཱམོདིཏཱམཙྩགཎཱ སམགྒཱ;

ཨཏྠེ ནིཡོཛེཏུ མུཔེཙྩ ཏསྶ ཝདིཾསུ པཎྜུསྶ ནརཱདྷིཔསྶ.

༢༥༦.

དིསྭཱན ཡོ ཨཱིདིསཀམྤི རཱཛ ཨིདྡྷཱནུབྷཱཝཾ མུནིཔུངྒཝསྶ;

པསཱདམཏྟམྤི ཀརེཡྻ ནོཙེ ཀིམཏྠིཡཱ ཏསྶ བྷཝེཡྻ པཉྙཱ.

༢༥༧.

པསཱདནཱིཡེསུ གུཎེསུ རཱཛ པསཱདནཾ སཱདྷུཛནསྶ དྷམྨོ;

པུཔྥནྟི སབྦེ སཡམེཝ ཝནྡེ སམུགྒཏེ ཀོམུདཀཱནནཱནི.

༢༥༨. ¶

ཝཱཙཱཡ ཏེསཾ པན དུམྨཏཱིནཾ མཱ སགྒམགྒཾ པཛཧིཏྠ རཱཛ;

ཨནྡྷེ གཧེཏྭཱ ཝིཙརེཡྻ ཀོ ཧི ཨནྭེསམཱནོ སུཔཐཾ ཨམཱུལ༹ྷོ.

༢༥༩.

ནརཱདྷིཔཱ ཀཔྤིཎ བིམྦིསཱར སུདྡྷོདནཱདི ཨཔི ཏེཛཝནྟཱ;

ཏཾ དྷམྨརཱཛཾ སརཎཾ ཨུཔེཙྩ པིཝིཾསུ དྷམྨཱམཏམཱདརེན.

༢༦༠.

སཧསྶནེཏྟོ ཏིདསཱདྷིཔོ’པི ཁཱིཎཱཡུཀོ ཁིཎབྷཝཾ མུནིནྡཾ;

ཨུཔེཙྩ དྷམྨཾ ཝིམལཾ ནིསམྨ ཨལཏྠ ཨཱཡུཾ ཨཔི དིཊྛདྷམྨོ.

༢༦༡.

ཏུཝམྤི ཏསྨིཾ ཛིཏཔཉྩམཱརེ དེཝཱཏིདེཝེ ཝརདྷམྨརཱཛེ;

སགྒཱཔཝགྒཱདྷིགམཱཡ ཁིཔྤཾ ཙིཏྟཾ པསཱདེཧི ནརཱདྷིརཱཛ.

༢༦༢. ¶

སུཏྭཱནཏེསཾ ཝཙནཾ ནརིནྡོ ཝིཀིཎྞཀངྑོ རཏནཏྟཡམྷི;

སེནཱཔཏིཾ ཨཏྠཝརཾ ཨཝོཙ པཧཊྛབྷཱཝོ པརིསཱཡ མཛ྄ཛྷེ.

༢༦༣.

ཨསདྡཧཱནོ རཏནཏྟཡསྶ གུཎེ བྷཝཙྪེདནཀཱརཎསྶ;

ཙིརཱཡ དུལླདྡྷིཔཐེ ཙརནྟོ ཋིཏོ སརཛྫེ ཨཔི ཝཉྩིཏོཧཾ.

༢༦༤.

མོཧེན ཁཛྫོཔནཀཾ དྷམེསིཾ སཱིཏདྡིཏོ དྷུམསིཁེ ཛལནྟེ;

པིཔཱསིཏོ སིནྡྷུཛལཾ པཧཱཡ པིཝིཾ པམཱདེན མརཱིཙིཏོཡཾ.

༢༦༥.

པརིཙྩཛིཏྭཱ ཨམཏཾ ཙིརཱཡ ཛིཝཏྠིཀོ ཏིཀྑཝིསཾ ཨཁཱདིཾ;

ཝིཧཱཡ’ཧཾ ཙམྤཀཔུཔྥདཱམཾ ཨདྷཱརཡིཾ ཛཏྟུསུ ནཱགབྷཱརཾ.

༢༦༦. ¶

གནྟྭཱན ཁིཔྤཾ པརིཁཱ སམཱིཔཾ ཨཱརཱདྷཡིཏྭཱ ཛིནདནྟདྷཱཏུཾ;

ཨཱནེཧི པཱུཛཱཝིདྷིནཱ ཀརིསྶཾ པུཉྙཱནི སབྦཏྠ སུཁཱཝཧཱནི.

༢༦༧.

གནྟྭཱཏཏེསོཔརིཁཱསམཱིཔཾ སེནཱདྷིནཱཐོ པརམཔྤཏཱིཏོ;

དྷཱཏུཾ མུནིནྡསྶ ནམསྶམཱནོ ཨཛ྄ཛྷེསི རཉྙོ ཧིཏམཱ ཙརནྟོ

༢༦༨.

ཙིརཱགཏཾ དིཊྛིམལཾ པཧཱཡ ཨལཏྠ སདྡྷཾ སུགཏེ ནརིནྡོ;

པཱསཱདམཱགམྨ པསཱདམསྶ ཝཌྜྷེཧི རཉྙོ རཏནཏྟཡམྷི.

༢༦༩.

ཏསྨིཾ ཁཎེ པོཀྑརཎཱི ཝིཙིཏྟཱ ཕུལླེཧི སོཝཎྞསརོརུཧེཧི;

ཨལངྐརོནྟཱི གགནཾ ཨཧོསི མནྡཱཀིནཱིཝཱབྷིནཝཱཝཏཱརཱ.

༢༧༠.

ཧཾསངྒཎེཝཱཐ མུནིནྡདྷཱཏུ སཱ པངྐཛཱ པངྐཛམོཀྐམནྟི;

ཀུནྡཱཝདཱཏཱཧི པབྷཱཧི སབྦཾ ཁིརོདཀུཙྪིཾ’ཝ པུརཾ ཨཀཱསི.

༢༧༡. ¶

ཏཏོ སུརཏྟཉྫལིཔངྐཛམྷི པཏིཊྛཧིཏྭཱན ཙམུཔཏིསྶ;

སནྡིསྶམཱནཱ མཧཏཱ ཛནེན མཧཔྥལཾ མཱནུསཀཾ ཨཀཏྠ.

༢༧༢.

སུཏྭཱན ཝུཏྟནྟམིམཾ ནརིནྡོ པཧཊྛབྷཱཝོཔདསཱ’ཝ གནྟྭཱ;

སཾསཱུཙཡནྟོ དིགུཎཾ པསཱདཾ སུཝིམྷིཏོཔཉྫལིཀོཨཝོཙ.

༢༧༣.

ཝོཧཱརདཀྑཱ མནུཛཱ མུནིནྡ སངྒྷཊྚཡིཏྭཱ ནིཀསོཔལམྷི;

ཀརོནྟིཨགྒྷཾ ཝརཀཉྩནསྶ ཨེསོཧི དྷམྨོ ཙརིཏོཔུརཱཎོ.

༢༧༤.

མཎིཾ པསཏྠཱཀརསམྦྷཝམྤི ཧུཏཱསཀམྨེཧབྷཱིསངྑརིཏྭཱ;

པཱཔེནྟིརཱཛཉྙཀིརཱིཊཀོཊིཾ ཝིབྷུསནཏྟཾ ཝིདུནོམནུསྶཱ.

༢༧༥. ¶

ཝཱིམཾསནཏྠཱཡ ཏཝཱདྷུནཱཔི མཡཱ ཀཏཾ སབྦམིདཾ མུནིནྡ;

ཨཱགུཾ མཧནྟཾ ཁམ བྷུརིཔཉྙ ཁིཔྤཾ མམཱལངྐུརུ ཨུཏྟམངྒཾ.

༢༧༦.

པཏིཊྛིཏཱ ཏསྶ ཏཏོ ཀིརཱིཊེ མཎིཔྤབྷཱ བྷཱསིནི དནྟདྷཱཏུ;

ཨམུཉྩི རཾསཱི དྷཝལཱ པཛཱསུ སིནེཧཛཱཏཱ ཨིཝ ཁཱིརདྷཱརཱ.

༢༧༧.

སོ དནྟདྷཱཏུཾ སིརསཱཝཧནྟོ པདཀྑིཎཾཏཾནགརཾ ཀརིཏྭཱ;

སམྤཱུཛཡནྟོ ཀུསུམཱདིཀེཧི སུསཛྫིཏནྟེ པུརམཱཧརིཏྠ.

༢༧༨.

སམུསྶིཏོདཱརསིཏཱཏཔཏྟེ པལླངྐསེཊྛེ རཏནུཛྫལམྷི;

པཏིཊྛཔེཏྭཱན ཛིནསྶ དྷཱཏུཾ པཱུཛེསི རཱཛཱ རཏནཱདིཀེཧི.

༢༧༩.

བུདྡྷཱདིཝཏྠུཏྟཡམེཝ རཱཛཱ ཨཱཔཱཎཀོཊིཾ སརཎཾ ཨུཔེཙྩ;

ཧིཏྭཱ ཝིཧིཾསཾ ཀརུཎཱདྷིཝཱསོ ཨཱརཱདྷཡཱི སབྦཛནཾ གུཎེཧི.

༢༨༠. ¶

ཀཱརེསི ནཱནཱརཏནཔྤབྷཱཧི སཧསྶརཾསཱིཾ’ཝ ཝིརོཙམཱནཾ;

ནརཱདྷིཔོ བྷཏྟིབྷརཱནུརཱུཔཾ སུཙིཏྟིཏཾ དྷཱཏུནིཝེསནམྤི.

༢༨༡.

ཝཌྜྷེསི སོ དྷཱཏུགྷརམྷི དྷཱཏུཾ ཨལངྐརིཏྭཱ སཀལཾ པུརམྤི;

སེསེན པཱུཛཱཝིདྷིནཱ ཨཏིཏྟོ པཱུཛེསི རཊྛཾ སདྷནཾ སབྷོགྒཾ.

༢༨༢.

ཨཱམནྟཡིཏྭཱ གུཧསཱིཝརཱཛཾ སམྨཱནིཏཾ ཨཏྟསམཾ ཀརིཏྭཱ;

དཱནཱདིཀཾ པུཉྙམནེཀརཱུཔཾ སདྡྷཱདྷནོ སཉྩིཎིརཱཛསེཊྛོ.

༢༨༣.

ཏཏོ སོ བྷུཔཱལོ ཀུམཏིཛནསཾསགྒམནཡཾ,

ནིརཱཀཏྭཱ མགྒེ སུགཏཝཙནུཛྫོཏསུགམེ;

པདྷཱཝནྟོ སམྨཱ སཔརཧིཏསམྤཏྟིཙཏུརོ,

པསཏྠཾ ལོཀཏྠཾ ཨཙརི ཙརིཏཱཝཛྫིཏཛནོ.

ཏཏིཡོ པརིཙྪེདོ.

༢༨༤. ¶

ཙརཏི དྷརཎི པཱལེ རཱཛདྷམྨེསུ ཏསྨིཾ,

སམརཙཏུརསེནོ ཁཱིརདྷཱརོ ནརིནྡོ;

ནིཛབྷུཛབལལཱིལཱ’རཱཏིདཔྤཔྤམཱཐཱི,

ཝིབྷཝཛནིཏམཱནོ ཡུདྡྷསཛྫོ’བྷིགཉྪི.

༢༨༥.

ཀརིཝརམཐ དིསྭཱ སོ གུཧཱདྭཱརཡཱཏཾ,

པཊིབྷཡརཧིཏཏྟོ སཱིཧརཱཛཱ’ཝ རཱཛཱ;

ནིཛནགརསམཱིཔཱཡཱཏམེཏཾ ནརིནྡཾ,

ཨམིཏབལམམཧོགྷེནོཏྠརནྟཱ’བྷིཡཱཡི.

༢༨༦.

ཨུདིཏབཧལ༹དྷཱུལཱིཔཱལི༹རུདྡྷནྟལི༹ཀྑོ,

སམདཝིཝིདྷཡོདྷཱརཱཝསཾརམྦྷབྷཱིམེ;

ནིསིཏསརསཏཱལཱིཝསྶདྷཱརཱཀརཱལེ༹,

ཨཛིནི མཧཏི ཡུདྡྷེ པཎྜུཀོ ཁཱིརདྷཱརཾ.

༢༨༧. ¶

ཨཐ ནརཔཏིསེཊྛོ སངྒཧེཏྭཱན རཊྛཾ,

ནིཛ ཏནུཛ ཝརསྨིཾ རཛྫབྷཱརཾ ནིདྷཱཡ;

སུགཏ དསན དྷཱཏུཾ སམྤཊིཙྪཱཔཡིཏྭཱ,

པཧིཎི ཙ གུཧསཱིཝཾ སཀྐརིཏྭཱ སརཊྛཾ.

༢༨༨.

སུཝིརམཝནཱིཔཱལོ སཉྙམཾ ཨཛ྄ཛྷུཔེཏོ,

ཝིཝིདྷ ཝིབྷཝ དཱནཱཡཱཙཀེ ཏཔྤཡིཏྭཱ;

ཏིདསཔུར སམཱཛཾ དེཧབྷེདཱ པཡཱཏོ,

ཀུསལ ཕལམནཔྤཾ པཏྠིཏཾ པཙྩལཏྠ.

༢༨༩.

ནརཔཏི གུཧསཱིཝོ ཏཾ མུནིནྡསྶ དྷཱཏུཾ,

སཀཔུརམུཔནེཏྭཱ སཱདྷུ སམྨཱནཡནྟོ;

སུགཏི གམན མགྒེ པཱཎིནོ ཡོཛཡནྟོ,

སུཙརིཏ མབྷིརཱུཔཾ སཉྩིཎནྟོ ཝིཧཱསི.

༢༩༠. ¶

ཨགཎིཏམཧིམསྶུཛྫེ ནིརཉྙོ ཏནཱུཛོ,

པུརིམ ཝཡསི ཡེཝཱརདྡྷསདྡྷཱབྷིཡོགོ;

དསབལ ཏནུདྷཱཏུཾ པཱུཛིཏུཾ ཏསྶ རཉྙོ,

པུརཝར མུཔཱཡཱཏོ དནྟནཱམོ ཀུམཱརོ.

༢༩༡.

གུཎཛནིཏ པསཱདཾ ཏཾ ཀལིངྒཱདྷིནཱཐཾ,

ནིཁིལ གུཎ ནིཝཱསོ སོ ཀུམཱརོ ཀརིཏྭཱ;

ཝིཝིདྷ མཧཝིདྷཱནཾ སཱདྷུསམྤཱདཡནྟོ,

ཨཝསི སུགཏདྷཱཏུཾ ཨནྭཧཾ ཝནྡམཱནོ.

༢༩༢.

ཨབྷཝི ཙ གུཧསཱིཝསྶཱཝནཱིསསྶ དྷིཏཱ,

ཝིཀཙ ཀུཝལཡཀྑཱི ཧཾསཀནྟཱབྷིཡཱཏཱ;

ཝདན ཛིཏ སརོཛཱ ཧཱརིདྷམྨིལླབྷཱརཱ,

ཀུཙབྷརནམིཏངྒི ཧེམ མཱལཱབྷིདྷཱནཱ.

༢༩༣. ¶

ཨཁིལགུཎནིདྷཱནཾ བནྡྷུབྷཱཝཱནུརཱུཔཾ,

སུཝིམལཀུལཛཱཏཾ ཏཾ ཀུམཱརཾ ཝིདིཏྭཱ;

ནརཔཏི གུཧསཱིཝོ ཨཏྟནོ དྷཱིཏརཾ ཏཾ,

ཨདདི སབཧུམཱནཾ རཱཛཔུཏྟསྶ ཏསྶ.

༢༩༤.

མནུཛཔཏི ཀུམཱརཾ དྷཱཏུརཀྑཱདྷིཀཱརེ,

པཙུརཔརིཛནཾ ཏཾ སབྦཐཱ ཡོཛཡིཏྭཱ;

གཝ མཧིས སཧསྶཱདཱིཧི སམྤཱིཎཡིཏྭཱ,

སཀ ཝིབྷཝ སརིཀྑེ ཨིསྶརཏྟེ ཋཔེསི.

༢༩༥.

སམརབྷུཝི ཝིནཊྛེ ཁཱིརདྷཱརེ ནརིནྡེ,

མལཡཝནམུཔེཏཱ བྷཱགིནེཡྻཱ ཀུམཱརཱ;

པབལ མཏི མཧནྟཾ སཾཧརིཏྭཱ བལགྒཾ,

ཨུཔཔུརམུཔགཉྪུཾ དྷཱཏུཡཱ གཎྷནཏྠཾ.

༢༩༦.

ཨཐ ནགརསམཱིཔེ ཏེ ནིཝེསཾ ཀརིཏྭཱ,

སཝཎཀཊུཀམེཏཾ སཱསནཾ པེསཡིཾསུ;

སུགཏདསནདྷཱཏུཾ དེཧི ཝཱ ཁིཔྤམམྷཾ,

ཡསསིརིཛནནིཾ ཝཱ ཀཱིལ༹ སངྒཱམཀེལི༹ཾ.

༢༩༧. ¶

སཔདི དྷརཎིཔཱལོ སཱསནཾ ཏཾ སུཎིཏྭཱ,

ཨཝདི རཧསི ཝཱཙཾ རཱཛཔུཏྟསྶ ཏསྶ;

ནཧི སཏི མམ དེཧེ དྷཱཏུམཉྙསྶ དསྶཾ,

ཨཧམཔི ཡདི ཛེཏུཾ ནེཝ ཏེ སཀྐུཎེཡྻཾ.

༢༩༨.

སུརནར ནམིཏཾ ཏཾ དནྟདྷཱཏུཾ གཧེཏྭཱ,

གཧིཏ དིཛཝིལཱསོ སཱིཧལ༹ཾ ཡཱཧི དཱིཔཾ;

ཨིཏི ཝཙནམུདཱརཾ མཱཏུལསྶཱཐ སུཏྭཱ,

ཏམཝཙ གུཧསཱིཝཾ དནྟནཱམོ ཀུམཱརོ.

༢༩༩.

ཏཝཙ མམཙ ཀོ ཝཱ སཱིཧལེ༹ བནྡྷུབྷཱུཏོ,

ཛིནཝརཎསརོཛེ བྷཏྟིཡུཏྟོ ཙ ཀོཝཱ;

ཛལནཱིདྷིཔརཏཱིརེ སཱིཧལ༹ཾ ཁུདྡདེསཾ,

ཀཐམཧམཏིནེསྶཾ དནྟདྷཱཏུཾ ཛིནསྶ.

༣༠༠. ¶

ཏམཝདི གུཧསཱིཝོ བྷཱགིནེཡྻཾ ཀུམཱརཾ,

དསབལཏནུདྷཱཏུ སཎྛིཏཱ སཱིཧལ༹སྨིཾ;

བྷཝབྷཡཧཏིདཀྑོ ཝཏྟཏེ སཏྠུདྷམྨོ,

གཎནཔཐམཏཱིཏཱ བྷིཀྑཝོ ཙཱཝསིཾསུ.

༣༠༡.

མམ ཙ པིཡསཧཱཡོ སོ མཧཱསེན རཱཛཱ,

ཛིནཙརཎསརོཛདྭནྡསེཝཱབྷིཡུཏྟོ;

སལིལམཔི ཙ ཕུཊྛཾ དྷཱཏུཡཱ པཏྠཡནྟོ,

ཝིཝིདྷརཏནཛཱཏཾ པཱབྷཏཾ པེསཡིཏྠ.

༣༠༢.

པབྷཝཏི མནུཛིནྡོ སབྦདཱ བུདྡྷིམཱ སོ,

སུགཏདསནདྷཱཏུཾ པཱུཛིཏུཾ པཱུཛནེཡྻཾ;

པརིཙིཏཝིསཡམྷཱ ཝིཔྤཝུཏྠཾ བྷཝནྟཾ,

ཝིཝིདྷཝིབྷཝདཱནཱ སཱདྷུ སངྒཎྷིཏུཉྩ.

༣༠༣. ¶

ནིཛ དུཧིཏུཔཏིཾ ཏཾ ཨིཏྠམཱརཱདྷཡིཏྭཱ,

ནརཔཏི གུཧསཱིཝོ སངྒཧེཏྭཱན སེནཾ;

རཎདྷརཎིམུཔེཏོ སོ ཀུམཱརེཧི སདྡྷིཾ,

མརཎཔརཝསཏྟཾ ཨཛ྄ཛྷགཱ ཡུཛ྄ཛྷམཱནོ.

༣༠༤.

ཨཐ ནརཔཏི པུཏྟོ དནྟནཱམོ སུཎིཏྭཱ,

སཝཎ ཀཊུཀམེཏཾ མཱཏུལསྶཔྤཝཏྟིཾ;

གཧིཏ དིཛཝིལཱསོ དནྟདྷཱཏུཾ གཧེཏྭཱ,

ཏུརིཏ ཏུརིཏ བྷཱུཏོ སོ པུརམྷཱ པལཱ༹ཡི.

༣༠༥.

སརབྷས མུཔགནྟྭཱ དཀྑིཎཾ ཙཱཐ དེསཾ,

ཨཝིཙལིཏསབྷཱཝོ ཨིདྡྷིཡཱ དེཝཏཱནཾ;

ནདིམཏིམཧཏིཾ སོ ཨུཏྟརིཏྭཱན པུཎྞཾ,

ནིདཧི དསནདྷཱཏུཾ ཝཱལུཀཱརཱསིམཛ྄ཛྷེ.

༣༠༦.

པུན པུརམུཔགནྟྭཱ ཏཾ གཧཱིཏཉྙཝེསཾ,

བྷརིཡམཔི གཧེཏྭཱ ཨཱགཏོ ཏཏྠ ཁིཔྤཾ;

སུགཏདསནདྷཱཏུཾ ཝཱལུཀཱཐུཔཀུཙྪིཾ,

ཋཔིཏམུཔཙརནྟོ ཨཙྪི གུམྦནྟརསྨིཾ.

༣༠༧. ¶

སཔདི ནབྷསི ཐེརོ གཙྪམཱནོ པནེཀོ,

ཝིཝིདྷཀིརཎཛཱལཾ ཝཱལུཀཱརཱསིཐཱུཔཱ;

ཨཝིརལི༹ཏམུདེནྟཾ དྷཱཏུཡཱ ཏཱཡ དིསྭཱ,

པཎམི སུགཏདྷཱཏུཾ ཨོཏརིཏྭཱན ཏཏྠ.

༣༠༨.

མུནིསུཏམཐ དིསྭཱ ཛམྤཏཱི ཏེ པཏཱིཏཱ,

ནིཛགམནཝིདྷཱནཾ སབྦམཱརོཙཡིཾསུ;

དསབལཏནུཛོ སོ དྷཱཏུརཀྑཱ ནིཡུཏྟོ,

པརཧིཏནིརཏཏྟོ ཏེ ཨུབྷོ ཨཛ྄ཛྷབྷཱསི.

༣༠༩.

དསབལཏནུདྷཱཏུཾ སཱིཧལ༹ཾ ནེཐ ཏུམྷེ,

ཨགཎིཏ ཏནུཁེདཱ ཝཱིཏསཱརཛྫམེཏཾ;

ཨཔི ཙ གམནམགྒེ ཛཱཏམཏྟེ ཝིགྷཱཏེ,

སརཐ མམམནེཀོཔདྡཝཙྪེདདཀྑཾ.

༣༡༠. ¶

ཨིཏི སུགཏནནཱུཛོ ཛམྤཏཱིནཾ ཀཐེཏྭཱ,

པུན’པི ཏདནུརཱུཔཾ དེསཡིཏྭཱན དྷམྨཾ;

པུཐུཏརམཔནེཏྭཱ སོཀསལླཉྩ གཱལ༹ྷཾ,

སཀཝསཏིམུཔེཏོ ཨནྟལིཀྑེན དྷཱིརོ.

༣༡༡.

བྷུཛགབྷཝནཝཱསཱི ནིནྣགཱཡཱཐ ཏསྶཱ,

བྷུཛགཔཏི མཧིདྡྷི པཎྜུཧཱརཱབྷིདྷཱནོ;

སཀཔུརཔཝརམྷཱ ནིཀྑམིཏྭཱ ཙརནྟོ,

སམུཔགམི ཏདཱ ཏཾ ཋཱནམིཙྪཱཝསེན.

༣༡༢.

ཝིམལཔུལིནཐཱུཔཱ སོ སམུགྒཙྪམཱནཾ,

སསིརུཙིརམརཱིཙིཛྫཱལམཱལོཀཡིཏྭཱ;

ཋིཏམཐ མུནིདྷཱཏུཾ ཝཱལུཀཱརསིགབྦྷེ,

ཀིམིདམིཏི སཀངྑཾ པེཀྑམཱནོ ཨཝེདི.

༣༡༣. ¶

སཔདི སབཧུམཱནོ སོ ཨསནྡིསྶམཱནོ,

རཏནམཡཀརཎྜཾ དྷཱཏུཡུཏྟཾ གིལིཏྭཱ;

ཝིཏཏཔུཐུལདེཧོ བྷོགམཱལཱཧི ཏུངྒཾ,

ཀཎཀསིཁརིརཱཛཾ ཝེཋཡིཏྭཱ སཡིཏྠ.

༣༡༤.

སལིལནིདྷིསམཱིཔཾ ཛམྤཏཱི གནྟུཀཱམཱ,

པུལིནཏལགཏཾ ཏཾ དནྟདྷཱཏུཾ ཨདིསྭཱ;

ནཡནསལིལདྷཱརཾ སོཀཛཱཏཾ ཀིརནྟཱ,

སུགཏསུཏཝརཾ ཏཾ ཏངྑཎེ’ནུསྶརིཾསུ.

༣༡༥.

ཨཐ སུགཏསུཏོ སོ ཙིནྟིཏཾ སཾཝིདིཏྭཱ,

ཨགམི སཝིདྷམེསཾ སོཀདིནཱནནཱནཾ;

ཨསུཎི ཙ ཛིནདྷཱཏུཾ ཝཱལུཀཱརཱསིམཛ྄ཛྷེ,

ནཱིཧིཏམཔི ཨདིཊྛཾ པཱུཛིཏཾ ཛམྤཏཱིཧི.

༣༡༦.

སཡིཏམཐ ཡཏཱིསོ དིབྦཙཀྑུཔྤབྷཱཝཱ,

རཏནགིརིནིཀུཉྫེ ནཱགརཱཛཾ ཨཔསྶི;

ཝིཧགཔཏིསརཱིརཾ མཱཔཡི ཏམྨུཧུཏྟེ,

ཝིཏཏཔུཐུལཔཀྑེན’ནྟལི༹ཀྑཾ ཐཀེནྟཾ.

༣༡༧. ¶

ཛལདྷིམཏིགབྷཱིརཾ ཏཾ དྭིདྷཱ སོ ཀརིཏྭཱ,

པབལཔཝནཝེགེན’ཏྟནོ པཀྑཛེན;

སརབྷས མཧིདྷཱཝཾ བྷཱིམསཾརམྦྷཡོགཱ,

ཨབྷིགམི བྷུཛགིནྡཾ མེརུཔཱདེ ནིཔནྣཾ.

༣༡༨.

ཛཧིཏབྷུཛགཝེསོ ཏངྑཎེ སོ ཕཎིནྡོ,

པཊིབྷཡཙཀིཏཏྟོ སཾཁིཔིཏྭཱན བྷོགེ;

སརབྷས མུཔགནྟྭཱ ཏསྶ པཱདེ ནམིཏྭཱ,

ཝིནཡམདྷུརམིཏྠཾ ཏཾ མུནཱིསཾ ཨཝོཙ.

༣༡༩.

སཀལཛནཧིཏཏྠཾ ཨེཝ ཛཱཡནྟི བུདྡྷཱ,

བྷཝཏི ཛནཧིཏཏྠཾ དྷཱཏུམཏྟསྶ པཱུཛཱ;

ཨཧམཔི ཛིནདྷཱཏུཾ པཱུཛཡིཏྭཱ མཧགྒྷཾ,

ཀུསལཕལམནཔྤཾ སཉྩིཎིསྶཾ’ཏི གཎྷིཾ.

༣༢༠. ¶

ཨཐ མནུཛགཎཱནཾ སཙྩབོདྷཱརཧཱནཾ,

ཝསཏིབྷཝནམེསཱ ནཱིཡྻཏེ སཱིཧལ༹ཾ ཏཾ;

མུནིཝརཏནུདྷཱཏུཾ ཏེན དེཧཱིཏི ཝུཏྟོ,

བྷུཛགཔཏི ཀརཎྜཾ དྷཱཏུགབྦྷཾ ཨདཛྫི.

༣༢༡.

ཝིཧགཔཏིཏནུཾ ཏཾ སཾཧརིཏྭཱན ཐེརོ,

ཛལཙརསཏབྷཱིམཱ ཨཎྞཝཱ ཨུཔྤཏིཏྭཱ;

སཀལཔཐཝིཙཀྐེ རཛྫལཀྑིཾ’ཝ དྷཱཏུཾ,

ནརཔཏིཏནུཛཱནཾ ཛམྤཏཱིནཾ ཨདཱསི.

༣༢༢.

ཨིཏི ཀཏབཧུཀཱརེ སཾཡམིནྡེ པཡཱཏེ,

སུགཏདསནདྷཱཏུཾ མུདྡྷནཱ ཨུབྦཧནྟཱ;

མཧཏི ཝིཔིནདེཝཱདཱིཧི མགྒེ པཡུཏྟེ,

ཝིཝིདྷམཧཝིདྷཱནེ ཏེ ཏཏོ ནིཀྑམིཾསུ.

༣༢༣. ¶

མུདུསུརབྷཱིསམཱིརོ ཀཎྚཀཱདིཝྱཔེཏོ,

ཝིམལཔུལིནཧཱརཱི ཨཱསཱི སབྦཏྠ མགྒོ;

ཨཡནམུཔགཏེ ཏེ དནྟདྷཱཏུཔྤབྷཱཝཱ,

ནིགམནགརཝཱསཱི སཱདྷུ སམྨཱནཡིཾསུ.

༣༢༤.

ཀུསུམསུརབྷིཙུཎྞཱཀིཎྞཧཏྠཱཧི ནིཙྩཱ,

སཀུཏུཀམནུཡཱཏཱ ཀཱནནེ དེཝཏཱཧཱི;

ཨཙལགཧཎདུགྒཾ ཁེཔཡིཏྭཱན མགྒཾ,

ཨགམུམཏུརིཏཱ ཏེ པཊྚནཾ ཏཱམལིཏྟིཾ.

༣༢༥.

ཨཙལཔདརབདྡྷཾ སུཊྛིཏོདཱརཀཱུཔཾ,

ཨུདིཏཔུཐུལཀཱརཾ དཀྑནཱིཡཱམཀཉྩ;

སཡམབྷིམཏལངྐཱགཱམིནིཾ ནཱཝམེཏེ,

སཔདི སམུཔརཱུལ༹ྷཾ ཨདྡསུཾ ཝཱཎིཛེཧི.

༣༢༦. ¶

ཨཐ དིཛཔཝརཱ ཏེ སཱིཧལ༹ཾ གནྟུམིཙྪཾ,

སརབྷས མུཔགནྟྭཱ ནཱཝིཀསྶཱཝདིཾསུ;

སུཏིསུཁཝཙསཱ སོ སཱདྷུཝུཏྟེན ཙེསཾ,

པམུདིཏཧདཡོ ཏེ ནཱཝམཱརོཔཡིཏྠ.

༣༢༧.

ཛལནིདྷིམབྷིརཱུལ༹ྷེསྭེསུ ཨཱདཱཡ དྷཱཏུཾ,

སམབྷཝུམུཔསནྣཱ ལོལཀལློལམཱལཱ;

སམསུརབྷིམནུཉྙོ ཨུཏྟརོ ཝཱཡི ཝཱཏོ,

ཝིམལརུཙིརསོབྷཱ སབྦཐཱ’སུཾ དིསཱ’པི.

༣༢༨.

ནབྷསི ཨསིཏསོབྷེ ཝེནཏེཡྻོ’ཝ ནཱཝཱ,

པབལཔཝནཝེགཱ སཏྟཏཾ དྷཱཝམཱནཱ;

ནཡནཝིསཡབྷཱཝཱཏཱིཏཏཱིརཱཙལཱདིཾ,

པཝིསི ཛལདྷིམཛ྄ཛྷཾ ཕེཎཔུཔྥཱབྷིཀིཎྞཾ.

༣༢༩. ¶

ཨཐ ཨབྷཝི སམུདྡོ བྷཱིམསཾཝཊྚཝཱཏཱ,

བྷཱིཧཏསིཁརིཀཱུཊཱཀཱརཝཱིཙིཔྤབནྡྷོ;

སཝནབྷིདུརགྷོརཱརཱཝརུནྡྷནྟལིཀྑོ,

བྷཡཙཀིཏམནུསྶཀྐནྡིཏོ སབྦརཏྟིཾ.

༣༣༠.

ཨུདཡསིཁརིསཱིསཾ ནཱུཏནཱདིཙྩབིམྦེ,

ཨུཔགཏཝཏི ཏསྶཱ རཏྟིཡཱ ཨཙྩཡམྷི;

སལིལནིདྷིཛལཾ ཏཾ སནྟཀལློལམཱལཾ,

ཨསིཏམཎིཝིཙིཏྟཾ ཀོཊྚིམཾ’ཝཱཝབྷཱསི.

༣༣༡.

ཨཐ ཝིཏཏཕཎཱལཱི བྷིཾསནཱ ཀེཙི ནཱགཱ,

སུརབྷིཀུསུམཧཏྠཱ ཀེཙི དིབྦཏྟབྷཱཝཱ;

རུཙིརམཎིཔདཱིཔེ ཀེཙི སནྡྷཱརཡནྟཱ,

ནིཛསིརསི ཀརོནྟཱ ཀེཙི ཀཎྜུཔྤལཱནཱི.

༣༣༢. ¶

ཕུཊཀུམུདཀལཱཔེ ཛཏྟུནེཀེ ཝཧནྟཱ,

ཀཎཀཀལསམཱལཱ ཨུཀྑིཔཏྟཱ ཙ ཀེཙི;

པཝནཙལིཏཀེཏུགྒཱཧཀཱ ཀེཙི ཨེཀེ,

རུཙིར ཀཎཀ ཙུཎྞཱཔུཎྞཙངྒོཊཧཏྠཱ.

༣༣༣.

སལལི༹ཏརམཎིཡཾ ཀེཙི ནཙྩཾ ཀརོནྟཱ,

སལཡམདྷུརགཱིཏཾ གཱཡམཱནཱ’ཝ ཀེཙི;

པཙུརཏུརིཡབྷཎྜེ ཨཱཧནནྟཱ’ཝ ཨེཀེ,

མུནིཝརཏནུདྷཱཏུཾ པཱུཛིཏུཾ ཨུཊྛཧིཾསུ.

༣༣༤.

རུཙིརཀཙཀལཱཔཱ རཱཛཀཉྙཱཡ ཏསྶཱ,

མུནིཝརདསནཾ ཏཾ ནིགྒཏེཝིནྡུལེཁཱ;

ཨུཛུརཛཏསལཱཀཱ སནྣིབྷེ མུཉྩི རཾསཱི.

༣༣༥. ¶

ཨཏུལིཏམནུབྷཱཝཾ དྷཱཏུཡཱ པེཀྑཏཾ ཏཾ,

པམུདིཏཧདཡཱནཾ ཏངྑཎེ པནྣགཱནཾ;

པཊིརཝཧརིཏཱནཾ སཱདྷུཝཱདཱདིཀཱནཾ,

གགནམཔརིཡནྟཾ’ཝཱསི ཝིཏྠཱརིཏཱནཾ.

༣༣༦.

པཝིསི སུགཏ དཱཋཱདྷཱཏུ སཱ མོལི༹གབྦྷཾ,

པུན གགནཏལམྷཱ ཨོཏརིཏྭཱན ཏསྶཱ;

ཕཎདྷརནིཝཧཱ ཏེ ཏཾ ཏརིཾ ཝཱརཡིཏྭཱ,

མཧམཀརུམུདཱརཾ སཏྟརཏྟིནྡིཝཾཧི.

༣༣༧.

ཨཙལམིཝ ཝིམཱནཾ ཨནྟལིཀྑམྷི ནཱཝཾ,

གཏིཝིརཧིཏམམྷོརཱསིམཛ྄ཛྷམྷི དིསྭཱ;

བྷཡཝིལུལིཏཙིཏྟཱ ཛམྤཏཱི ཏེ སམགྒཱ,

དསབལཏནུཛཾ ཏཾ ཨིདྡྷིམནྟཾ སརིཾསུ.

༣༣༨.

སཔདི མུནིསུཏོ སོ ཙིཏྟམེསཾ ཝིདིཏྭཱ,

ནབྷསི ཛལདྷརཱལཱི མདྡམཱནོ’བྷིགནྟྭཱ;

ཝིཧགཔཏིསརཱིརཾ མཱཔཡིཏྭཱ མཧནྟཾ,

བྷཡཙཀིཏབྷུཛངྒེ ཏེ པལཱ༹པེསི ཁིཔྤཾ.

༣༣༩. ¶

ཨིཏྠཾ བུདྡྷིསུཏེ བྷུཛངྒཛནིཏཾ བྷཱིཏིཾ སམེཏྭཱ གཏེ,

སཱ ནཱཝཱ པཝནཱ པཀམྤིཏདྷཛཱ ཏུངྒཾ ཏརངྒཱཝལིཾ;

བྷཱིནྡནྟཱི གཏིཝེགསཱ པུཐུཏརཾ མེགྷཱཝལཱིསནྣིབྷཾ,

ལངྐཱཔཊྚནམོཏརིཏྠ སཧསཱ ཐེརསྶ ཏསྶིདྡྷིཡཱ.

ཙཏུཏྠོ པརིཙྪེདོ.

༣༤༠.

སཾཝཙྪརམྷི ནཝམམྷི མཧཱདིསེན,

པུཏྟསྶ ཀིཏྟིསིརིམེགྷནརཱདྷིཔསྶ;

ཏེ ཛམྤཏཱི ཏམཐ པཊྚནམོཏརིཏྭཱ,

དེཝཱལཡེ པཊིཝསིཾསུ མནོབྷིརཱམེ.

༣༤༡. ¶

དིསྭཱན ཏེ དྭིཛཝརོ པཐིཀེ ནིསཱཡཾ,

སནྟཔྤཡིཏྠ མདྷུརཱསནཔཱནཀེཧི;

རཏྟིཀྑཡེ ཙ ཨནུརཱདྷཔུརསྶ མགྒཾ,

ཚཱཡཱཔཏཱིནམཐ སོ ཨབྷིཝེདཡིཏྠ.

༣༤༢.

ཨཱདཱཡ ཏེ དསནདྷཱཏུཝརཾ ཛིནསྶ,

སམྨཱནིཏཱ དྭིཛཝརེན’ཐ པཊྚནམྷཱ;

ནིཀྑམྨ དཱུརཏརམགྒམཏིཀྐམིཏྭཱ,

པདྭཱརགཱམམནུརཱདྷཔུརསྶ’གཉྪུཾ.

༣༤༣.

ཡཾ དྷམྨིཀཾ ནརཝརཾ ཨབྷིཏཀྐཡིཏྭཱ,

ཛཱཡཱཔཏཱི ཝིསཡམེཏམུཔཱགམིཾསུ;

ཏཾ ཝྱཱདྷིནཱ སམུདིཏེན མཧཱདིསེན,

ལངྐིསྶརཾསུཙིརཀཱལཀཏཾ སུཎིཾསུ.

༣༤༤.

སོཀེན ཏེ སིཁརིནེཝ སམུགྒཏེན,

ཨཛ྄ཛྷོཏྠཊཱ བཧུཏརཾ ཝིལཔཱིཾསུ མུལ༹ྷཱ;

ཀཱཡིཾསུ ཏེསམཐ མུཙྪིཏམཱནསཱནཾ,

སབྦཱ དིསཱ ཙ ཝིདིསཱ ཙ གྷནནྡྷཀཱརཱ

༣༤༥. ¶

སུཏྭཱན ཀིཏྟིསིརིམེགྷནརཱདྷིཔསྶ,

རཛྫེཋིཏསྶ རཏནཏྟཡམཱམཀཏྟཾ;

ཝསྶེན ནིབྦུཏམཧཱདཧནཱ’ཝ ཀཙྪཱ,

ཏེ ཛམྤཏཱི སམབྷཝུཾ ཧཏསོཀཏཱཔཱ.

༣༤༦.

སུཏྭཱན མེགྷགིརིནཱམམཧཱཝིཧཱརེ,

བྷིཀྑུསྶ ཀསྶཙི ནརཱདྷིཔཝལླབྷཏྟཾ;

ཏསྶ’ནྟིཀཾ སམུཔགམྨ ཀཏཱཏིཐེཡྻཱ,

དྷཱཏུཔྤཝཏྟིམཝདིཾསུ ཨུབྷོ སམེཙྩ.

༣༤༧.

སུཏྭཱན སོ མུནིཝརོ དསནཔྤཝཏྟིཾ,

ཧཊྛོ ཡཐཱམཏརསེན’ཧིསིཏྟགཏྟོ;

གེཧེ སཀེ སཔདི པཊྚཝིཏཱནཀེཧི,

ཝཌྜྷེསི དྷཱཏུམམལཾ སམལངྐཏམྷི.

༣༤༨. ¶

ཏེསཉྩ ཛཱནིཔཏིཀཱནམུབྷིནྣམེསོ,

ཀཏྭཱན སངྒཧམུལཱ༹རཏརཾ ཡཐིཙྪཾ;

ཝུཏྟནྟམེཏམབྷིཝེདཡིཏུཾ པསཏྠཾ,

ལངྐཱདྷིཔསྶ སཝིདྷཾ པཧིཎིཏྠ བྷིཀྑུཾ.

༣༤༩.

རཱཛཱ ཝསནྟསམཡེ སཧ ཀཱམིནཱིཧི,

ཨུཡྻཱནཀེལི༹སུཁ མེཀདིནེ’ནུབྷོནྟོ;

ཨཱགཙྪམཱནམཐ ཏཏྠ སུདུརཏོ’ཙ,

ཏཾ ཝིཔྤསནྣམུཁཝཎྞམཔསྶི བྷིཀྑུཾ.

༣༥༠.

སོ སཾཡམི སམུཔགམྨ ནརཱདྷིཔཾ ཏཾ,

ཝུཏྟནྟམེཏམབྷིཝེདཡི ཏུཊྛཙིཏྟོ;

སུཏྭཱན ཏཾ པརམཔཱིཏིབྷརཾ ཝཧནྟོ,

སམྤཏྟཙཀྐརཏནོ’ཝ ཨཧོསི རཱཛཱ.

༣༥༡. ¶

ལངྐིསྶརོ དྭིཛཝརཱ ཛིནདནྟདྷཱཏུ,

མཱདཱཡ ཛཱནིཔཏཡོ ཨུབྷཡེ སམེཙྩ;

ཨེསྶནྟི ལངྐམཙིརེན ཨིཏཱིརིཏཾ ཏཾ,

ནེམིཏྟིཀསྶ ཝཙནཉྩ ཏཐཾ ཨམཉྙི.

༣༥༢.

རཱཛཱ ཏཏོ མཧཏིཡཱ པརིསཱཡ སདྡྷིཾ,

ཏསྶཱནུརཱདྷནགརསྶ པུརུཏྟརཱཡ;

ཨཱསཱཡ ཏཾ སཔདི མེགྷགིརིཾ ཝིཧཱརཾ,

སདྡྷོ ཨགཉྪི པདསཱ’ཝ པསནྣཙིཏྟོ.

༣༥༣.

དིསྭཱ ཏཏོ སུགཏདྷཱཏུམལབྦྷནེཡྻཾ,

ཨཱནནྡཛསྶུནིཝཧེཧི ཙ ཏཱརཧཱརཾ;

སིཉྩཾ ཝིདྷཱཡ པཎིདྷིཾ བཧུམཱནཔུབྦཾ,

རོམཉྩཀཉྩུཀདྷརོ ཨིཏི ཙིནྟཡིཏྠ.

༣༥༤. ¶

སོ’ཧཾ ཨནེཀརཏནུཛྫལམོལི༹དྷཱརིཾ,

པཱུཛེཡྻམཛྫ ཡདི དུཙྩཛམུཏྟམངྒཾ;

ལོཀཏྟཡེཀསརཎསྶ ཏཐཱགཏསྶ,

ནོ དྷཱཏུཡཱ མཧམནུཙྪཝིཀཾ ཀརེཡྻཾ.

༣༥༥.

ཨེཏཾ པཧཱུཏརཏནཾ སདྷནཾ སབྷོགྒཾ,

སམྤཱུཛཡཾ ཨཔི དྷརཱཝལཡཾ ཨསེསཾ;

པཱུཛཾ ཀརོམི ཏདནུཙྪཝིཀཾ ཨཧཾ’ཏི,

ཙིནྟེཡྻ ཀོཧི བྷུཝནེསུ ཨམཱུལ༹ྷཏིཏྟོ.

༣༥༦.

ལངྐཱདྷིཔཙྩམིདམཔྤཏརཾ མམཱསི,

བུདྡྷོ གུཎེཧི ཝིཝིདྷེཧི པམཱཎ སུཉྙོ;

སོ’ཧཾ པརིཏྟཝིབྷཝོ ཏིབྷཝེཀནཱཐཾ,

ཏཾ ཏཱདིསཾ དསབལཾ ཀཐམཙྩཡིསྶཾ.

༣༥༧. ¶

ཨིཏྠཾ པུནཔྤུན ཏདེཝ ཝིཙིནྟཡནྟོ,

ཨཱཔཛྫི སོ དྷིཏིཡུཏོ’པི ཝིསཉྙིབྷཱཝཾ;

སཾཝཱིཛིཏོ སཔདི ཙཱམརམཱརུཏེན,

ཁིནྣེན སེཝཀཛནེན ཨལཏྠ སཉྙཾ.

༣༥༨.

ཐོཀམྤི བཱིཛམཐ ཝཱ ཨབྷིརོཔཡནྟཱ,

མེདྷཱཝིནོ མཧཏིཡཱ’པི མསུནྡྷརཱཡ;

ཀཱལེན པཏྟ ཏཝ པུཔྥཕལདིཀཱནི,

ཝིནྡནྟི པཏྠིཏཕལཱནི ཨནཔྤཀཱནི.

༣༥༩.

ཨེཝཾ གུཎེཧི ཝིཝིདྷེཧི’པི ཨཔྤམེཡྻ,

དྷམྨིསྶརམྷི མཧམཔྤཏརམྤི ཀཏྭཱ;

ཀཱལཙྩཡེན པརིཎཱམ ཝིསེསརམྨཾ,

སགྒཱཔཝགྒསུཁམཔྤཊིམཾ ལབྷིསྶཾ.

༣༦༠. ¶

ཨིཏྠཾ ཝིཙིནྟིཡ པམོདབྷརཱཏིརེཀ,

སམྤུཎྞཙནྡིམསརིཀྑམུཁོ ནརིནྡོ;

སབྦཉྙུནོ དསནདྷཱཏུཝརསྶ ཏསྶ,

པཱུཛེསི སབྦམཔི སཱིཧལ༹དཱིཔམེཏཾ.

༣༦༡.

བྷིཀྑཱུ’པི ཏེཔིཊཀ ཛཱཏཀབྷཱཎཀཱདི,

ཏཀྐགམཱདི ཀུསལཱ ཨཔི བུདྡྷིམནྟོ;

ཝཏྠུཏྟཡེཀསརཎཱ ཨཔི པོརཝགྒཱ,

ཀོཏུཧལཱ སཔདི སནྣིཔཏིཾསུ ཏཏྠ.

༣༦༢.

རཱཛཱ ཏཏོ མཧཏིཡ པརིསཱཡ མཛ྄ཛྷེ,

ཨིཙྩབྲུཝཱི མུནིཝརོ ཧི སུསུཀྐདཱཋོ;

དཱཋཱ ཛིནསྶ ཡདི ཨོསདྷིཏཱརཀཱ’ཝ,

སེཏཱ བྷཝེཡྻ ཀིམཡཾ མལིནཱཝབྷཱསཱ.

༣༦༣. ¶

ཏསྨིཾ ཁཎེ དསནདྷཱཏུ མུནིསྶརསྶ,

པཀྑེ པསཱརིཡ དུཝེ ཝིཡ རཱཛཧཾསཱི;

ཝིཏྠཱརིཏཾ’སུནི ཝཧཱ གགནངྒནམྷི,

ཨཱཝཊྚཏོ ཚཝི ཛཝེན མུཧུཏྟམཏྟཾ.

༣༦༤.

པཙྩགྒྷམཏྠརཎཀཾ སིཏམཏྠརིཏྭཱ,

བྷདྡཱསནམྷི ཝིནིདྷཱཡ མུནིནྡདྷཱཏུཾ;

ཏཾ ཛཱཏིཔུཔྥནིཀརེན ཐཀེསི རཱཛཱ,

ཝསྶཙྩཡམྦུདྷརཀཱུཊསམཔྤབྷེན.

༣༦༥.

ཨུགྒམྨ ཁིཔྤམཐ དྷཱཏུ མུནིསྶརསྶ,

སཱ པུཔྥརཱསིསིཁརམྷི པཏིཊྛཧིཏྭཱ;

རཾསཱིཧི དུདྡྷདྷཝལེཧི ཝིརོཙམཱནཱ,

སམྤསྶཏཾ ཨནིམིསེ ནཡནེ ཨཀཱསི.

༣༦༦. ¶

ཏཾ དྷཱཏུམཱསནགཏམྷི པཏིཊྛཔེཏྭཱ,

ཁཱིརོདཨེཎེཔཊལཔྤཊིམེ དུཀུལེ༹;

ཚཱདེསི སཱཊཀསཏེཧི མཧཱརཧེཧི,

བྷིཡྻོ’པི སོ ཨུཔཔརིཀྑིཏུཀཱམཏཱཡ.

༣༦༧.

ཨབྦྷུགྒཏཱ སཔདི ཝཏྠསཏཱནི བྷེཏྭཱ,

སེཏམྦུདོདརཝིནིགྒཏཙནྡིམཱ’ཝ;

ཋཏྭཱན སཱ ཨུཔརི ཏེསམབྷཱསཡིཏྠ,

རཾསཱིཧི ཀུནྡཝིསདེཧི དིསཱ སམནྟཱ

༣༦༨.

ཏསྨིཾ ཁཎེ ཝསུམཏཱི སཧ བྷཱུདྷརེཧི,

གཛྫིཏྠ སཱདྷུཝཙནཾ’ཝ སམུགྒིརནྟཱི;

ཏཾ ཨབྦྷཱུཏཾ ཝིཡ སམེཀྑིཏུམམྦུརཱསི,

སོ ནིཙྩལོ ཨབྷཝི སནྟཏརངྒབཱཧུ.

༣༦༩. ¶

མཏྟེབྷཀམྤིཏསུཔུཔཕིཏསཱལཏོ’ཝ,

བྷསྶིཾསུ དིབྦཀུསུམཱནི’པི ཨནྟལི༹ཀྑཱ;

ནཙྩེསུ ཙཱཏུརིཡཡམཙྪརིཡཾ ཛནསྶ,

སནྡསྶཡིཾསུ གགནེ སུརསུནྡརཱི’པི.

༣༧༠.

ཨཱནནྡསཉྫནིཏཏཱརརཝཱབྷིརཱམཾ,

གཱཡིཾསུ གཱིཏམམཏཱསནགཱཡཀཱ’པི;

མུཉྩིཾསུ དིབྦཏུརིཡཱནི’པི ཝཱདིཏཱནི,

གམྦྷཱིརམུཙྩམདྷུརཾ དྭིགུཎཾ ནིནཱདཾ.

༣༧༡.

སཾསིབྦིཏཾ རཛཏརཛྫུསཏཱནུཀཱརཱི,

དྷཱརཱསཏེཧི ཝསུདྷམྦརམམྦུདེན;

སབྦཱ དིསཱ ཛལདཀུཊམཧགགྷིཡེསུ,

དིཏྟཱཙིརཛྫུཏིཔདཱིཔསཏཱཝབྷཱསཱ.

༣༧༢. ¶

ཨཱདྷུཡམཱན མལཡཱཝལ ཀཱནནནྟོ,

སམཐུལླ པུཔྥཛ པརཱགཧརཱབྷིཧཱརི;

སེདོད བིནྡུགཎ སཾཧརཎཔྤཝཱིཎོ,

མནྡཾ ཨཝཱསི སིསིརོ ཨཔི གནྡྷཝཱཧོ.

༣༧༣.

རཱཛཱ ཏམབྦྷུཏམཝེཀྑིཡ པཱཊིཧཱིརཾ,

ལོཀུསྶཝཾ བཧུཏརཉྩ ཨདིཊྛཔུབྦཾ;

ཙིཔྥཱརིཏཀྑིཡུགལོ པརམཔྤམོདཱ,

པཱུཛཾ ཀརིཏྠ མཧཏིཾ རཏནཱདིཀེཧི.

༣༧༤.

སོ དྷཱཏུམཏྟསིརསཱ’ཐ སམུབྦཧནྟོ,

ཋཏྭཱ སམུསྶིཏ སིཏཱཏཔཝཱརཎམྷི;

ཙིཏྟཏྠརེ རཐཝརེ སིཏཝཱཛིཡུཏྟེ,

ལཀྑིནིདྷཱནནུརཱདྷཔུརཾ པཝེཀྑི.

༣༧༥. ¶

དེཝིནྡ མནྡིར སམེ སམལངྐཏམྷི,

རཱཛཱ སཀམྷི བྷཝནེ ཨཏུལཱནུབྷཱཝོ;

སཱིཧཱསནེ པཊིཀ ཀོཛཝ སནྠཏམྷི,

དྷཱཏུཾ ཋཔེསི མུནིནོ སསིཏཱཏཔཏྟེ.

༣༧༦.

ཨནྟོ’ཝ བྷུམིཔཏི དྷཱཏུགྷརཾ མཧགྒྷཾ,

ཀཏྭཱན ཏཏྠ ཝིནིདྷཱཡ མུནིནྡདྷཱཏུཾ;

སམྤཱུཛཡིཏྠ ཝིཝིདྷེཧི ཨུཔཱཡནེཧི,

རཏྟཱིནྡིཝཾ ཏིདིཝམོཀྑ སུཁཱབྷིཀངྑཱི.

༣༧༧.

ཏེསཉྩ ཛཱནིཔཏིཀཱནམུབྷིནྣམེཝ,

ཏུཊྛོ བཧཱུནི རཏནཱབྷརཎཱདིཀཱནི;

གཱམེཙ ཨིསྶརཀུལེཀ ནཱིཝཱསབྷུཏེ,

དཏྭཱན སངྒཧམཀཱསི ཏིསཱིཧལི༹ནྡོ.

༣༧༨. ¶

སངྒམྨ ཛཱནཔད ནེགམ ནཱགརཱདཱི,

ཨུཀྐཎྛིཏཱ སུགཏདྷཱཏུམཔསྶམཱནཱ;

ལོཀུཏྟམསྶ ཙརིཏཱནི ཨབྷིཏྠཝནྟཱ,

ཨུགྒྷོསཡིཾསུ དྷརཎཱིཔཏིསནྣིདྷཱནི;

དྷམྨིསྶརོ སཀལལོཀཧིཏཱཡ ལོཀེ,

ཛཱཡིཏྠ སབྦཛནཏཱཧིཏམཱཙརིཏྠ;

ཝིཏྠཱརིཏཱ བཧུཛནསྶ ཧིཏཱཡ དྷཱཏུ,

ཨིཙྪཱམ དྷཱཏུམབྷིཔཱུཛཡིཏུཾ མཡམྤི.

༣༨༠.

སོ སནྣིཔཱཏིཡ མཧཱིཔཏི བྷིཀྑུསངྒྷ,

མཱརཱམཝཱསིམནུརཱདྷཔུརོཔཀཎྛེ;

ཨཛ྄ཛྷཱསཡཾ ཏམབྷིཝེདཡི སཏྠུདྷཱཏུ,

པཱུཛཱཡ སནྣིཔཏིཏསྶ མཧཱཛནསྶ.

༣༨༡. ¶

ཐེརོ ཏཧིཾ མཧཏི བྷིཀྑུགཎེ པནེཀོ,

མེདྷཱབལེན ཨསམོ ཀརུཎཱདྷིཝཱསོ;

ཨེཝཾ ཏིསཱིཧལ༹པཏིསྶ མཧཱམཏིསྶ,

ལོཀཏྠཙཱརཙཏུརསྶ ནིཝེདཡིཏྠ.

༣༨༢.

ཡོ ཨཱཙརེཡྻ ཨནུཛཱིཝིཛནསྶ ཨཏྠཾ,

ཨེསོ བྷཝེ’ནུཙརིཏོ མཧཏཾ སབྷཱཝོ;

དྷཱཏུཾ ཝསནྟསམཡེ བཧི ནཱིཧརིཏྭཱ,

དསྶེཧི པུཉྙམབྷིཔཏྠཡཏཾ ཛནཱནཾ.

༣༨༣.

སུཏྭཱན སཾཡམིཝརསྶ སུབྷཱསིཏཱནི,

པུཙྪིཏྠ སོ ནརཝརོ པུན བྷིཀྑུསངྒྷཾ;

དྷཱཏུཾ ནམསྶིཏུམནེན མཧཱཛནེན,

ཋཱནཾ ཀིམེཏྠ རམཎཱིཡཏརཾ སིཡཱ’ཏི.

༣༨༤. ¶

སབྦེ’པི ཏེ ཨཐ ནིཀཱཡ ནིཝཱསི བྷིཀྑཱུ,

ཋཱནཾ སཀཾ སཀམ ཝཎྞཡུམཱདརེན;

ཨཉྙོཉྙབྷིནྣཝཙནེསུ ཙ ཏེསུ རཱཛཱ,

ནེཝཱབྷིནནྡི ན པཊིཀྑིཔི ཀིཉྩིཝཱཀྱཾ.

༣༨༥.

མཛ྄ཛྷཏྟཏཱནུགཏམཱནསཏཱཡ ཀིནྟུ,

རཱཛཱ ཨཝོ ཙ པུན བྷིཀྑུགཎསྶ མཛ྄ཛྷེ;

ཨཏྟཱནུརཱུཔམཡམེཝ མུནིནྡདྷཱཏུ,

ཋཱནཾ ཁཎེན སཡམེཝ གམིསྶཏཱིཏི.

༣༨༦.

རཱཛཱ ཏཏོ བྷཝནམེཝ སཀཾ ཨུཔེཙྩ,

དྷཱཏུཔྤཎཱམམབྷིཔཏྠཡཏཾ ཛནཱནཾ;

ཁིཔྤཾམུཁམྦུཛཝནཱནཱི ཝིཀཱསཡནྟོ,

སཛྫེཏུམཱཧ ནགརཉྩ ཝིཧཱརམགྒཾ.

༣༨༧.

སམྨཛྫིཏཱ སལིལ སེཝན སནྟདྷཱུལཱི,

རཙྪཱ ཏདཱ’སི པུལིནཏྠརཎཱབྷིརཱམཱ;

ཨུསྶཱཔིཏཱནི ཀཎཀཱདིཝིཙིཏྟིཏཱནི,

ཝྱགྒྷཱདི རཱུཔཁཙིཏཱནི ཙ ཏོརཎཱནི.

༣༨༨. ¶

ཚཱཡཱ ནིཝཱརིཏ ཝིརོཙན རཾསིཏཱཔཱ,

ནཙྩཾ’ཝ དསྶཡཏི ཝཱཏདྷཱུཏཱ དྷཛཱལི;

ཝཱིཐི ཝསནྟཝནརཱཛི སམཱནཝཎྞཱ,

ཛཱཏཱ སུཛཱཏཀདལཱིཏརུམཱལིཀཱཧི.

༣༨༩.

སཾསཱུཙཡནྟི ཙ སཏཾ ནཝཔུཎྞཀུམྦྷཱ,

སགྒཱཔཝགྒསུཁམིཙྪིཏམིཛ྄ཛྷཏཱིཏི;

ཀཔྤུརསཱརཏགརཱགརུསམྦྷཝེཧི,

དྷཱུཔེཧི དུདྡིནམཐོ སུདིནཾ ཨཧོསི.

༣༩༠.

ཨོལམྦམཱནསིཏམུཏྟཀཛཱལཀཱནི,

སཛྫཱཔིཏཱནི ཝིཝིདྷཱནི ཙ མཎྜཔཱནི;

སམྤཱདིཏཱནི ཙ ཏཧིཾ ཀུསུམགགྷིཀཱནི,

ཨཱམོད ལུདྡྷ མདྷུཔཱཝལི ཀུཛིཏཱནི.

༣༩༡. ¶

གཙྪིཾསུ ཀེཙི གཧིཏུསྶཝ ཝེསསོབྷཱ,

ཨེཀེ སམུགྒཔརིཔུརིཏཔུཔྥཧཏྠཱ;

ཨཉྙེ ཛནཱ སུརབྷིཙུཎྞབྷརཾ ཝཧནྟཱ,

ཏཏྠེཏརེ དྷཏཝིཙིཏྟམཧཱཏཔཏྟཱ.

༣༩༢.

ལངྐིསྶརོ’ཐ སསིཔཎྜརཝཱཛིཡུཏྟེ,

ཨུཛྫོཏིཏེ རཐཝརེ རཏནཔྤབྷཱཧི;

དྷཱཏུཾ ཏིལོཀཏིལཀསྶ པཏིཊྛཔེཏྭཱ,

ཨེཏཾ ཨཝོཙ ཝཙནཾ པཎིཔཱཏཔུབྦཾ.

༣༩༣.

སམྦོདྷིཡཱ ཨིཝ མུནིསྶར བོདྷིམཎྜཾ,

གཎྜམྦརུཀྑམིཝ ཏིཏྠིཡམདྡནཱཡ;

དྷམྨཉྩ སཾཝིབྷཛིཏུཾ མིགདཱཡམཛྫ,

པཱུཛཱནུརཱུཔམུཔགཙྪ སཡཾ པདེསཾ.

༣༩༤. ¶

རཱཛཱ ཏཏོ སམུཙིཏཱཙརཎེསུ དཀྑོ,

ཝིསྶཛྫི ཕུསྶརཐམཊྛིཏསཱརཐིཾ ཏཾ;

པཙྪཱ སཡཾ མཧཏིཡཱ པརིསཱཡ སདྡྷིཾ,

པཱུཛཱཝིསེསམསམཾ ཨགམཱ ཀརོནྟོ.

༣༩༥.

ཨུཀྐུཊྛིནཱདཝིསརེན མཧཱཛནསྶ,

ཧེསཱརཝེན ཝིསཊེན ཏུརངྒམཱནཾ;

བྷེརཱིརཝེན མཧཏཱ ཀརི གཛྫིཏེན,

ཨུདྡཱམསཱགར སམཾ ནགརཾ ཨཧོསི.

༣༩༦.

ཨཱམོདིཏཱ ཨུབྷཡཝཱིཐིགཏཱ ཀུལིཏྠི,

ཝཱཏཱཡནེཧི ཀནཀཱབྷརཎེ ཁིཔིཾསུ;

སབྦཏྠཀཾ ཀུསུམཝསྶམཝསྶཡིཾསུ,

ཙེལཱནིཙེཝ བྷམཡིཾསུནིཛུཏྟམངྒེ.

༣༩༧. ¶

པཱཙཱིནགོཔུརསམཱིཔམུཔཱགཏམྷི,

ཏསྨིཾ རཐེ ཛལདྷིཔིཊྛིགཏེ’ཝ པོཏེ;

ཏུཊྛཱ ཏཧིཾ ཡཏིགཎཱ མནུཛཱ ཙ སབྦེ,

སམྤུཛཡིཾསུ ཝིཝིདྷེཧི ཨུཔཱཡནེཧི.

༣༩༨.

ཀཏྭཱ པདཀྑིཎམཐོ པུརམུཏྟརེན,

དྭཱརེན སོ རཐཝརོ བཧི ནིཀྑམིཏྭཱ;

ཋཱནེ མཧིནྡམིནུདྷམྨཀཐཱཔཝིཏྟེ,

ཨཊྛཱསི ཏིཏྠགམིཏཱ ཨིཝ བྷཎྜནཱཝཱ.

༣༩༩.

ཋཱནེ ཏཧིཾ དསནདྷཱཏུཝརཾ ཛིནསྶ,

ལངྐིསྶརོ རཏནཝིཏྟཀརཎྜགབྦྷཱ;

སཉྫྷཱགྷནཱ ཨིཝ ཝིདྷུཾ བཧིནཱིཧརིཏྭཱ,

དསྶེསི ཛཱནཔད ནེགམ ནཱགརཱནཾ.

༤༠༠. ¶

ཏསྨིཾ ཛནེ སཔདི ཨཱབྷརཎཱདིཝསྶ,

མཙྩནྟཔཱིཏིབྷརིཏེ ཨབྷིཝསྶཡནྟེ;

སཱནནྡིཝནྡིཛནམངྒལགཱིཏཀེཧི,

སམྤཱདིཏེསུ མུཁརེསུ དིསཱམུཁེསུ.

༤༠༡.

ཧཏྠཱརཝིནྡནིཝཧེསུ མཧཱཛནསྶ,

ཙནྡོདཡེ’ཙ མུཀུལཏྟནམཱགཏེསུ;

བྲཧྨཱམརཱདིཛནིཏཱམིཏ སཱདྷུཝཱདེ,

ཏཱརཱཔཐམྷི བྷུཝནོདར མོཏྠརནྟེ.

༤༠༢.

སཱདནྟདྷཱཏུ སསིཁཎྜ སམཱནཝཎྞཱ,

རཾསཱིཧི ཀུནྡ ནཝཙནྡན པཎྜརེཧི;

པཱསཱད གོཔུར སིལུཙྩཡ པཱདཔཱདིཾ,

ནིདྡྷོཏ རཱུཔིཡམཡཾ’ཝ ཨཀཱ ཁཎེན.

༤༠༣.

ཏཾ པཱཊིཧཱརིཡ མཙིནྟིཡ མཙྩུལཱ༹རཾ,

དིསྭཱན ཀེ ཏཧཱིམཧེསུ མཧཊྛལོམཱ;

ཀེཝཱ’ནཡུཾ སཀསཀཱབྷརཎཱནི གེཧཾ,

ཀེཝཱ ན ཨཏྟཔཊིལཱབྷམཝཎྞཡིཾསུ.

༤༠༤. ¶

ཀེ ནོཛཧིཾསུ སཀདིཊྛིམལཱནུབདྡྷཾ,

ཀེ ཝཱ ན བུདྡྷམཧིམཾ ཨབྷིཔཏྠཡིཾསུ;

ཀེ ནཱམ མཙྪརིཡཔཱསཝསཱ ཨཧེསུཾ,

ཝཏྠུཏྟཡཉྩ སརཎཾ ནགམིཾསུ ཀེཝཱ.

༤༠༥.

ལངྐིསྶརོ’པི ནཝལཀྑ པརིབྦཡེན,

སབྦཉྙུདྷཱཏུམཏུལཾ ཨབྷིཔཱུཛཡིཏྭཱ;

ཏཾ དནྟདྷཱཏུབྷཝནཾ པུན ཝཌྜྷཡིཏྭཱ,

ཨནྟེཔུརམྷི པཊིཝཱསརམཙྩཡིཏྠ.

༤༠༦.

དྷཱཏུཾ ཝིཧཱརམཧཡུཏྟརམེཝ ནེཏྭཱ,

པཱུཛཾ ཝིདྷཱཏུམནུཝཙྪརམེཝརཱུཔཾ;

རཱཛཱ’ཐ ཀིཏྟིསིརིམེགྷསམཝ྄ཧཡོ སོ,

ཝཱརིཏྟལེཁ མབྷིལེཁཡི སཙྩསནྡྷོ.

༤༠༧. ¶

ཝཱརིཏྟམེཏམིཏརེ’པི པཝཏྟཡནྟཱ,

ཏེ བུདྡྷདཱསཔམུཁཱ ཝསུདྷཱདྷིནཱཐཱ;

སདྡྷཱདཡཱདྷིཀགུཎཱབྷརཎཱབྷིརཱམཱ,

ཏཾ སཀྐརིཾསུ བཧུདྷཱ ཛིནདནྟདྷཱཏུཾ.

༤༠༨.

སཏྠཱརཱ སམྦྷཏཏྠཾ པུརིམཏརབྷཝེ སམྤཛཱནཾ པཛཱནཾ,

སམྦོདྷིཾ ཏསྶ སབྦཱསཝཝིགམཀརིཾ སདྡཧནྟོ’དཧནྟོ;

སོཏཾ ཏསྶ’གྒདྷམྨེ ནིཔུཎམཏི སཏཾ སངྒམེསངྒམེསཾ,

ནིབྦཱཎཾ སནྟམིཙྪེ ཏིབྷཝབྷཡཔརིཙྩཱགཧེཏུཾ གཧེཏུཾ.

པཉྩམོ པརིཙྪེདོ.

༤༠༩. ¶

ཡོ ཙནྡགོམི རཙིཏེཝརསདྡསཏྠེ,

ཊཱིཀཾ པསཏྠམཀརིཏྠ ཙ པཉྩིཀཱཡ;

བུདྡྷཔྤབྷཱཝཛན ནིཾཙ ཨཀཱ སམནྟ,

པཱསཱདིཀཱཡ ཝིནཡཊྛཀཐཱཡ ཊཱིཀཾ.

༤༡༠.

ཨངྒུཏྟརཱགམཝརཊྛཀཐཱཡ ཊཱིཀཾ,

སམྨོབྷཝིབྦྷམ ཝིགྷཱཏཀརིཾ ཨཀཱསི;

ཨཏྠཱཡ སཾཡམིགཎསྶ པདྷཱནིཀསྶ,

གནྠཾ ཨཀཱ ཝིནཡསངྒཧནཱམདྷེཡྻཾ.

༤༡༡.

སནྟིནྡྲིཡསྶཔཊིཔཏྟི པརཱཡཎསྶ,

སལླེཁ ཝུཏྟི ནིརཏསྶ སམཱཧིཏསྶ;

ཨཔྤིཙྪཏཱདི གུཎཡོག ཝིབྷུསནསྶ,

སམྦུདྡྷསཱསནམཧོདཡཀཱརཎསྶ.

༤༡༢. ¶

སབྦེསུཨཱཙརིཡཏཾ པརམཾ གཏསྶ,

སཏྠེསུ སབྦསམཡནྟར ཀོཝིདསྶ;

སིསྶེནསཱརིཏནུཛསྶ མཧཱདིསཱམི.

༤༡༣.

སུདྡྷནྭཡེན ཀརུཎཱདིགུཎོདཡེན,

ཏཀྐཱགམཱདི ཀུསལེན ཝིསཱརདེན;

སབྦཏྠ པཏྠཊ སུདྷཱཀརརཾསིཛཱལ,

སངྐཱསཀིཏྟིཝིསརེན པརིཀྑཀེན.

༤༡༤. ¶

སདྡྷཱདྷནེན སཁིལེན ཙ དྷམྨཀིཏྟི,

ནཱམེན རཱཛགརུནཱ ཙརིཡེན ཨེསོ;

སོཏུཔྤསཱདཛནནོ ཛིནདནྟདྷཱཏུ,

ཝཾསོ ཀཏོ ནིཁིལདསྶིཔབྷཱཝདཱིཔོ.

༤༡༥.

དྷམྨོ པཝཏྟཏུ ཙིརཱཡ མུནིསྶརསྶ,

དྷམྨེ ཋིཏཱ ཝསུམཏཱིཔཏཡོ བྷཝནྟུ;

ཀཱལེ པཝསྶཏུ གྷནོ ནིཁིལཱ པཛཱ’པི,

ཨཉྙོཉྙམེཏྟིཔཊིལཱབྷསུཁཾ ལབྷནྟུ.