📜

དྷཱཏུཝཾསོ ¶

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

༡. ཏཐཱགཏསྶཱགམནཀཐཱ

སམྦུདྡྷམཏུལཾ སུདྡྷཾ དྷམྨཾ སངྒྷཾ ཨནུཏྟརཾ,

ནམསྶིཏྭཱ པཝཀྑཱམི དྷཱཏུཝཾསཔྤཀཱསནཾ;

ཏིཀྑཏྟུམགམཱ ནཱཐོ ལངྐཱདཱིཔཾ མནོརམཾ,

སཏྟཱནཾ ཧིཏམིཙྪནྟོ སཱསནསྶ ཙིརཊྛིཏིཾ.

ཏཏྠ ཏིཀྑཏྟུམགམཱ ནཱཐོ’ཏི ཨནམཏགྒེ སཾསཱརཝཊྚེ པརིནཱམེཏྭཱ ཨཔྤཏིསརཎབྷཱཝཔྤཏྟཱནཾ ལོཀིཡལོཀུཏྟརསུཁནིཔྥཱདནབྷཱཝེན ནཱཐོ པཏིསརཎ བྷཱུཏོ བྷགཝཱ བུདྡྷདྷམྨསངྒྷརཏནཏྟཡམགྒཾ ཨཱཙིཀྑནྟོ ལངྐཱདཱིཔཾ ཏིཀྑཏྟུཾ གཏོ. ཏཏྠ པཋམགམནེ ཏཱཝ བོདྷིམཎྜཾ ཨཱརུཡ྄ཧ པུརཏྠཱིམཱབྷིམུཁོ ནིསཱིདིཏྭཱ སཱུརིཡེ ཨནཏྠམིཏེཡེཝ མཱརབལཾ ཝིདྷམེཏྭཱ, པཋམཡཱམེ པུབྦེནིཝཱསཉཱཎཾ ཨནུསྶརིཏྭཱ མཛ྄ཛྷིམཡཱམེ ཙུཏུཔཔཱཏཉཱཎཾ པཏྭཱ པཙྪིམཡཱམཱཝསཱནེ པཙྩཡཱཀཱརེ ཉཱཎཾ ཨོཏཱརེཏྭཱ དསབལཙཏུཝེསཱརཛྫཱདི གུཎཔཏིམཎྜིཏཾ སབྦཉྙུཏཉཱཎཾ པཊིཝིཛ྄ཛྷིཏྭཱ བོདྷིམཎྜཔྤདེསེ ཨནུཀྐམེན སཏྟསཏྟཱཧཾ ཝཱིཏིནཱམེཏྭཱ ཨཊྛམེ སཏྟཱཧེ ཨཛཔཱལནིགྲོདྷམཱུལེ ནིསིནྣོ དྷམྨགམྦྷིརཏཾ པཙྩཝེཀྑནེན ཨཔྤོསྶུཀྐཏཾ ཨཱཔཛྫམཱནོ དསསཧསྶ བྲཧྨཔརིཝཱརེན སཧམྤཏིམཧཱབྲཧྨུནཱ ཨཱཡཱཙིཏདྷམྨདེསནོ ཧུཏྭཱ ¶ བུདྡྷཙཀྑུནཱ ལོཀཾ ཨོལོཀེནྟོ པཉྩཝགྒིཡཱནཾ བྷིཀྑུནཾ བཧཱུཔཀཱརཀཾ ཨནུསྶརིཏྭཱ ཨུཊྛཱཡཱསནཱ ཀཱསཱིནཾ པུརཾ གནྟྭཱ ཨཉྙཱཀོཎཌཉྙཔྤམུཁེ ཨཊྛཱརས བྲཧྨཀོཊིཡོ ཨམཏཾ པཱཡེནྟོ དྷམྨཙཀྐཾ པཝཏྟེཏྭཱ པཀྑསྶ པཉྩམིཡཾ པཉྩཝགྒིཡེ སབྦེཔི ཏེ ཨརཧནྟེ པཏིཊྛཱཔེཏྭཱ ཏཾ དིཝསམེཝ ཡསཀུལཔུཏྟསྶ རཏྟིབྷཱགེ སོཏཱཔཏྟིཕལཾ དཏྭཱ པུནདིཝསེ ཨརཧནྟཾ དཏྭཱ ཏསྶ སཧཱཡཀེ ཙཏུཔཉྙཱསཛནེ ཨརཧནྟཾ པཱཔེཏྭཱ ཨེཝཾ ལོཀེ ཨེཀསཊྛིཡཱ ཨརཧནྟེསུ ཛཱཏེསུ ཝུཏྠཝསྶོ པཝཱརེཏྭཱ, ‘ཙརཐ བྷིཀྑཝེ ཙཱརིཀ’ ནྟི བྷིཀྑུ དིསཱསུ པེསེཏྭཱ སཡཾ ཨུརུཝེལཾ གཙྪནྟོ ཨནྟརཱམགྒེ ཀཔྤཱསིཀཝནསཎྜེ བྷདྡཝགྒིཡེ ཀུམཱརེ ཏིཾསཛནེ ཝིནེཏྭཱ ཨེཧིབྷིཀྑུབྷཱཝེན པབྦཱཛེཏྭཱ ཨུརུཝེལཾ གནྟྭཱ ཨཌྜྷུཌྜྷཱནི པཱཊིཧཱརིཡསཧསྶཱནི དསྶེནྟོ ཨུརུཝེལཀསྶཔཱདཡོ སཧསྶཛཊིལཔརིཝཱརེ ཏེབྷཱཏིཀཛཊིལེ ཝིནེནྟོ ཏཏྠེཝ ཝིཧཱསི. ཨཔརབྷཱགེ ཨངྒམགདྷརཊྛཝཱསིནོ ཨུརུཝེལཀསྶཔསྶ མཧཱཡཉྙཾ ཨུཔཊྛཱཔེསུཾ. སོ པན ཨིཙྪཱཙཱརཱབྷིབྷཱུཏོ ཙིནྟེསི? ‘‘སཙཱཡཾ མཧཱསམཎོ ཨིམསྶ སམཱགམསྶ མཛ྄ཛྷེ པཱཊིཧཱརིཡཾ ཀརེཡྻ ལཱབྷསཀྐཱརོ མེ པརིཧཱཡིསྶཏི’’ཏི. ཏསྶེཝཾ པཝཏྟཨཛ྄ཛྷཱསཡཾ ཉཏྭཱ པཱཏོཝ ཨུཏྟརཀུརུཏོ བྷིཀྑཾ ཨཱཧརིཏྭཱ ཨནོཏཏྟེ ཨཱཧཱརཾ པརིབྷུཉྫིཏྭཱ སཱཡནྷ སམཡེ ཕུསྶཔུཎྞམཱིཨུཔོསཐདིཝསེ ལངྐཱདཱིཔསྶཏྠཱཡ ལངྐཱདཱིཔམུཔཱགམི.

ཏསྶ པན དཱིཔསྶ མཧཱགངྒཱཡ དཀྑིཎཔསྶེ ཨཱཡཱམཏོ ཏིཡོཛནེ པུཐུལཏོ ཨེཀཡོཛནཔྤམཱཎེ མཧཱནཱགཝནུཡྻཱནེ ཡཀྑསམཱགམསྶ མཛ྄ཛྷེ ཏསྶ ཨུཔརི མཧིཡངྒཎཐཱུཔསྶ པཏིཊྛཱནཊྛཱནེ ཨཱཀཱསེཡེཝ ཋཱིཏོ ཝུཊྛིཝཱཏནྡྷཀཱརཾ དསྶེཏྭཱ ཏེསཾ བྷཡཾ ཨུཔྤཱདེསི. ཏེ བྷཡེན ཨུཔདྡུཏཱ ‘‘ཀསྶ ནུ ཁོ ཨིམཾ ཀམྨ’’ནྟི ཨིཏོ ཙིཏོ ཨོལོཀེནྟོ ཨདྡསཾསུ བྷགཝནྟཾ ཨཱཀཱསེ ནིསིནྣཾ. དིསྭཱན བྷགཝནྟཾ ཨབྷཡཾ ཡཱཝིཾསུ. ཏེསཾ བྷགཝཱ ཨཱཧ?

‘‘སཙེ ¶ ཏུམྷེ ཨབྷཡཾ ཨིཙྪཐ མཡ྄ཧཾ ནིསཛྫཊྛཱནསྶ ཨོཀཱསཾ དེཐཱ’’ཏི. སབྦེཔི ཏེ ཏསྶ ནིསཛྫཊྛཱནཾ ཨདཾསུ. བྷགཝཱ ནིསཛྫཱཡ ཨོཀཱསཾ གཧེཏྭཱ ཏེསཾ བྷཡཾ ཝིནོདེཏྭཱ ཏེཧི དིནྣེ བྷུམིབྷཱགེ ཙམྨཁཎྜཾ པཏྠརིཏྭཱ ནིསཱིདི. ནིསིནྣོཝ པན བྷགཝཱ ཙམྨཁཎྜཾ པསཱརེསི. ཏེ ཡཀྑཱ བྷཱིཏཏསིཏཱ ཨཉྙཏྠ གནྟུཾ ཨསཧམཱནཱ སམནྟཏོ སཱགརཏཱིརེ རཱསིབྷཱུཏཱ ཨཧེསུཾ. སཏྠཱ གིརིདཱིཔཾ ཨིདྡྷཱནུབྷཱཝེན ཨཱཧརིཏྭཱ དསྶེསི. ཏེསུ ཏཏྠ པཏིཊྛིཏེསུ པུན ཡཐཱཊྛཱནེཝ ཋཔེཏྭཱ པཏྠརིཏཙམྨཁཎྜམྤི སཾཁིཔི. ཏསྨིཾ ཁཎེ ཏཏོ ཏཏོ དེཝཱ སནྣིཔཏིཾསུ. ཏེསཾ སམཱགམེ དྷམྨཾ དེསེསི. ཨནེཀེསཾ པཱཎཀོཊཱིནཾ དྷམྨཱབྷིསམཡོ ཨཧོསི. སརཎེསུ ཙ སཱིལེསུ ཙ པཏིཊྛིཏཱ ཨསངྑེཡྻཱ ཨཧེསུཾ. སུམནཀཱུཊེ པན མཧཱསུམནདེཝོ སོཏཱཔཏྟིཕལཾ པཏྭཱ ཨཏྟནོ པཱུཛནཱིཡཾ བྷགཝནྟཾ ཡཱཙི. བྷགཝཱ ཏེན ཡཱཙིཏོ སཱིསཾ པཱཎིནཱ པརཱམསིཏྭཱ ཀེསདྷཱཏུཾགཧེཏྭཱ ཏསྶ ཨདཱསི. དཏྭཱ ཙ པན ལངྐཱདཱིཔཾ ཏིཀྑཏྟུཾ པདཀྑིཎཾ ཀཏྭཱ པརིཏྟཾ ཀཏྭཱ ཨཱརཀྑཾ སཾཝིདྷཱཡ པུན ཨུརུཝེལམེཝ ཨཱགཏོ. སོ པན ཀེསདྷཱཏུཡོ སུཝཎྞཙངྒོཊཀེནཱདཱཡ སཏྠུ ནིསིནྣཊྛཱནེ ནཱནཱརཏནེཧི ཝིཙིཏྟཾ ཐཱུཔཾ པཏིཊྛཱཔེཏྭཱ ཨུཔརི ཨིནྡནཱིལམཎིཐཱུཔིཀཱཧི པིདཧིཏྭཱ གནྡྷམཱལཱདཱིཧི པཱུཛེནྟོ ཝིཧཱསི. པརིནིབྦུཏེ པན བྷགཝཏི སཱརིཔུཏྟསྶ ཨནྟེཝཱསིཀོ སརབྷཱུ ནཱམ ཐེརོ ཁཱིཎཱསཝོ ཙིཏཀཏོ ཨིདྡྷིཡཱ ཏཐཱགཏསྶ གཱིཝཊྛིཾ ཨཱདཱཡ ཏསྨིཾ ཨིནྡནཱིལམཎིཐཱུཔེ པཏིཊྛཱཔེཏྭཱ མེགྷཝཎྞཔཱསཱཎེཧི དྭཱདསཧཏྠཾ ཐཱུཔཾ ཀཱརཱཔེཏྭཱ གཏོ. ཏཏོ དེཝཱནམྤིཡཏིསྶརཉྙོ བྷཱཏཱ ཙཱུལཱ༹བྷཡོ ནཱམ ཀུམཱརོ ཏམབྦྷུཏཾ ཙེཏིཡཾ དིསྭཱ ཨབྷིཔྤསནྣོ ཏཾ པཊིཙྪཱདེནྟོ ཏིཾསཧཏྠཾ ཙེཏིཡཾ པཏིཊྛཱཔེསི. པུན དུཊྛགཱམཎཱི ཨབྷཡམཧཱརཱཛཱ ཏཾ པཊིཙྪཱདེཏྭཱ ཨསཱིཏིཧཏྠཾ ཀཉྩུཀཙེཏིཡཾ ཀཱརཱཔེསི. མཧིཡངྒཎ ¶ ཐཱུཔསྶ པཏིཊྛཱནཱདྷིཀཱརོ ཨེཝཾ ཝིཏྠཱརཏོ ཝེདིཏབྦོ?

བོདྷིཾ པཏྭཱན སམྦུདྡྷོ བོདྷིམཱུལེ ནརཱསབྷོ

ནིསཱིདིཏྭཱན སཏྟཱཧཾ པཱཊིཧཱིརཾ ཏཏོ ཨཀཱ.

ཏཏོ པུབྦུཏྟརེ ཋཏྭཱ པལླངྐཱ ཨཱིསཀེ ཛིནོ

ཨནིམིསེན ནེཏྟེན སཏྟཱཧཾ ཏཾ ཨུདིཀྑཡི.

ཙངྐམིཏྭཱན སཏྟཱཧཾ ཙཀྑམེ རཏནཱམཡེ

ཝིཙིནིཏྭཱ ཛིནོ དྷམྨཾ ཝརཾ སོ རཏནཱགྷརེ.

ཨཛཔཱལམྷི སཏྟཱཧཾ ཨནུབྷོསི སམཱདྷིཛཾ

རམྨེ ཙ མུཙལིནྡསྨིཾ ཝིམུཏྟིསུཁམུཏྟམཾ.

རཱཛཱཡཏནམཱུལམྷི སཏྟརཏྟིནྡིཝཾ ཝསཱི

དནྟཔོནོདཀཾ སཀྐོ ཨདཱསི སཏྠུནོ ཏདཱ.

ཙཏུཧི ལོཀཔཱལེཧི སིལཱཔཏྟཾ སམཱཧཊཾ ཙཏུཀྐམེཀཀཾ ཀཏྭཱ ཨདྷིཊྛཱནེན ནཱཡཀོ.

ཝཱཎིཛེཧི ཏདཱ དིནྣཾ མནྠཉྩ མདྷུཔིཎྜིཀཾ

ཏཧིཾ པན གཧེཏྭཱན བྷཏྟཀིཙྩཾ ཨཀཱ ཛིནོ.

གཎྷིཾསུ སརཎཾ ཏསྶ ཏཔུསྶབྷལླིཀཱ ཨུབྷོ

སརཎཾ ཨགམུཾ ཏེ ཏཾ སཏྠུ དིནྣསིརོརུཧཱ.

གནྟྭཱན ཏེ སཀཾ རཊྛཾ ཐཱུཔཾ ཀཏྭཱ མནོརམཾ

ནམསྶིཾསུ ཙ པཱུཛེསུཾ དྭེབྷཱཏིཀོཔཱསཀཱ.

ཨིཏི སོ སཏྟསཏྟཱཧཾ ཝཱིཏིནཱམེསི ནཱཡཀོ?

བྲཧྨུནཱ ཡཱཙིཏོ སཏྠཱ དྷམྨཙཀྐཾ པཝཏྟིཏུཾ.

ཏཏོ བཱརཱཎསིཾ གནྟྭཱ དྷམྨཙཀྐཾ པཝཏྟཡི

ཀོཎྜཉྙོ དེསིཏེ དྷམྨེ སོཏཱཔཏྟིཕལཾ ལབྷི.

བྲཧྨཱནོ’ཊྛཱརསཀོཊཱི དེཝཏཱ ཙ ཨསངྑིཡཱ

སོཏཱཔཏྟིཕལཾ པཏྟཱ དྷམྨཙཀྐེ པཝཏྟིཏེ.

པཏྟོ ¶ པཱཊིཔདེ ཝཔྤོ བྷདྡིཡོ དུཏིཡེ ཕལཾ,

ཏཏིཡེ ཙ མཧཱནཱམོ ཨསྶཛཱི ཙ ཙཏུཏྠཱིཡཾ.

ཏེ སབྦེ སནྣིཔཱཏེཏྭཱ པཉྩ’མེ པཉྩཝགྒིཡེ,

ཨནཏྟསུཏྟཾ དེསེཏྭཱ བོདྷིཡགྒ ཕལེན ཏེ.

བོདྷིཾ པཱཔེཏྭཱ པཉྩཱཧེ ཡསཏྠེརཱདིཀེ ཛནེ,

ཏཏོ མགྒནྟརེ ཏིཾསཀུམཱརེ བྷདྡཝགྒིཡེ.

ཨུརུཝེལཾ ཏཏོ གནྟྭཱ ཨུརུཝེལཱཡ སཉྙིཏཾ,

ཨུརུཝེལེནནུཉྙཱཏོ ཨུརུཝེལནཱགཾ དམི.

ཏཾ ཏཾ དམཱི ཛིནོ ནཱགཾ དམནེན ཨུརཱདིགཾ,

ཏཐཱགཏཾ ནིམནྟིཾསུ དིསྭཱ ཏེ པཱཊིཧཱརིཡཾ.

ཨིདྷེཝ ཝནསཎྜསྨིཾ ཝིཧཱརེཏྭཱ མཧཱམུནཱི,

ཨུཔཊྛཱཧཱམསེ སབྦེ ནིཙྩབྷཏྟེན ཏཾ མཡཾ.

ཨུརུཝེལཀསྶཔསྶ མཧཱཡཉྙེ ཨུཔཊྛིཏེ,

ཏསྶ’ཏྟནོ ནཱགམནེ ཨིཙྪཱཙཱརཾ ཝིཛཱནིཡ.

ཨུཏྟརཀུརུཏོ བྷིཀྑཾ ཧརིཏྭཱ དིཔདུཏྟམོ,

ཨནོཏཏྟདཧེ བྷུཏྭཱ སཱཡནྷ སམཡེ སཡཾ.

བོདྷིཏོ ནཝམེ མཱསེ ཕུསྶཔུཎྞམིཡཾ ཛིནོ,

ལངྐཱདཱིཔཾ ཝིསོདྷེཏུཾ ལངྐཱདཱིཔམུཔཱགམི.

ཡཀྑེ དམིཏྭཱ སམྦུདྡྷོ དྷཱཏུཾ དཏྭཱན ནཱཡཀོ,

གནྟྭཱན ཨུརུཝེལཾ སོ ཝསཱི ཏཏྠ ཝནེ ཛིནོ.

པཋམགམནཀཐཱ སམཏྟཱ.

དུཏིཡགམནེ པན བོདྷིཏོ པཉྩམེ ཝསྶེ ཛེཏཝནམཧཱཝིཧཱརེ ཝསནྟོ ཙཱུལོ༹དར’མཧོདརཱནཾ མཱཏུལབྷཱགིནེཡྻཱནཾ ནཱགཱནཾ མཎིཔལླངྐཾ ནིསྶཱཡ སངྒཱམཾ པཙྩུཔཊྛིཏཾ དིསྭཱ སཡཾ པཏྟཙཱིཝརམཱདཱཡ ཙིཏྟམཱསསྶ ཀཱལ༹པཀྑེ ཨུཔོསཐདིཝསེ ¶ ནཱགདཱིཔཾ གནྟྭཱ ཏེསཾ སངྒཱམམཛ྄ཛྷེ ཨཱཀཱསེ ནིསིནྣོ ཨནྡྷཀཱརཾ ཨཀཱསི. ཏེ ཨནྡྷཀཱརཱབྷིབྷཱུཏེ སམསྶཱསེཏྭཱ ཨཱལོཀཾ དསྶེཏྭཱ ཨཏྟནོ སརཎབྷཱུཏཱནཾ ཏེསཾ སཱམགྒིཀརཎཏྠཾ ཕལབྷརིཏརུཀྑཾ ཙཱལེནྟོ ཝིཡ དྷམྨཾ དེསེསི. ཏེ ཨུབྷོཔི དྷམྨེ པསཱིདིཏྭཱ ཏམྤི པལླངྐཾ ཏཐཱགཏསྶ ཨདཾསུ. བྷགཝཱ པལླངྐེ ནིསིནྣོ དིབྦནྣཔཱནེཧི སནྟཔྤིཏོ བྷཏྟཱནུམོདནཾ ཀཏྭཱ ཨསཱིཏིཀོཊིཡོ ནཱགེ སརཎེསུ ཙ སཱིལེསུ ཙ པཏིཊྛཱཔེསི. ཏསྨིཾ སམཱགམེ མཧོདརསྶ མཱཏུལོ མཎིཨཀྑིཀོ ནཱམ ནཱགརཱཛཱ བྷགཝནྟཾ པུན ཀལྱཱཎིདེསམཱགམནཏྠཾ. ཨཡཱཙི. བྷགཝཱ པན ཏུཎྷཱིབྷཱཝེན ཨདྷིཝཱསེཏྭཱ ‘‘ཛེཏཝནམེཝ གཏོ.

ཨེཝཉྷི སོ ནཱགདཱིཔཾ ཨུཔེཏོ,

མཱརཱབྷིབྷུ སབྦཝིདུ སུམེདྷོ;

དམེཏྭ ནཱགེ ཀརུཎཱཡུཔེཏོ,

གནྟྭཱ ཝསཱི ཛེཏཝནེ མུནིནྡོ.

དུཏིཡགམནཀཐཱ སམཏྟཱ.

ཏཏིཡགམནེ པན བོདྷིཏོ ཨཊྛམེ ཝསྶེ ཛེཏཝནམཧཱཝིཧཱརེ ཝིཧརནྟོ བྷགཝཱ? ‘‘མམ པརིནིབྦཱནཏོ པཙྪཱ ཏམྦཔཎྞིདཱིཔེ སཱསནཾ པཏིཊྛཧིསྶཏི, སོ དཱིཔོ བཧུ བྷིཀྑུབྷིཀྑུནཱིཨུཔཱསཀོཔཱསིཀཱདི ཨརིཡགཎསེཝིཏོ ཀཱསཱཝཔཛྫོཏོ བྷཝིསྶཏི, མཡ྄ཧཾ ཙཏུནྣཾ དཱཋཱདྷཱཏུནཾ ཨནྟརེ ཨེཀཱ དཱཋཱ ཙ དཀྑིཎཨཀྑདྷཱཏུ ཙ ནལཱཊདྷཱཏུ ཙ རཱམགཱམཝཱསཱིཧི ལདྡྷོ ཨེཀཀོཊྛཱསོ ཙ ཨཉྙེ བཧུསརཱིརདྷཱཏུ ཙ ཀེསདྷཱཏུཡོ ཙ ཏཏྠེཝ པཏིཊྛཧིསྶནྟི ཨནེཀཱནི སངྒྷཱརཱམསཧསྶཱནི ཙ. བུདྡྷདྷམྨསངྒྷརཏནེ པཏིཊྛིཏསདྡྷོ མཧཱཛནོ བྷཝིསྶཏི. ཏསྨཱ ལངྐཱདཱིཔཾ གནྟྭཱ ཏཏྠ སམཱཔཏྟིཾ སམཱཔཛྫིཏྭཱ ཨཱགནྟུཾ ཝཊྚཏཱི ‘‘ཏི ཙིནྟེཏྭཱ ཨཱནནྡཏྠེརཾ ཨཱམནྟེསི? ‘‘ཨཱནནྡ ཙཏུཔཊིསམྦྷིདཔྤཏྟཱནཾ པཉྩསཏམཧཱཁཱིཎཱསཝཱནཾ བྷིཀྑཱུནཾ པཊིཝེདེསི. ཨམྷེཧི སདྡྷིཾ གནྟབྦ ‘‘ནྟི. ཨཱནནྡཏྠེརོ ཀཔིལཝཏྠུཀོལི༹ཡ ནགརཝཱསཱིནཾ པཉྩསཏམཧཱཁཱིཎཱསཝཱནཾ བྷིཀྑཱུནཾ པཊིཝེདེསི. ཏེ པཊིཝེདིཏཱ པཉྩསཏཁཱིཎཱསཝཱ པཏྟཙཱིཝརདྷཱརཱ ཧུཏྭཱ སཏྠཱརཾ ཝནྡིཏྭཱ ¶ ཨཉྫལིཾ པགྒཡ྄ཧ ནམསྶམཱནཱ ཨཊྛཾསུ. སཏྠུནོ པན སལལཱཡ ནཱམ གནྡྷཀུཊིཡཱ ཨཝིདཱུརེ རཏྟསེཏནཱིལུཔྤལཀུམུདཔདུམཔུཎྜརཱིཀསཏཔཏྟསཧསྶཔཏྟཛལཛེཧི སོགནྡྷིཀ ནཱནཱཔུཔྥེཧི སཉྩནྣཱ,སུབྷསོཔཱནཱ, པསཱདིཏསམཏིཏྟིཀཀཱཀཔེཡྻསུརམཎཱིཡསཱིཏལམདྷུརོདཀཱ སུཕུལླཔུཔྥཕལདྷཱརིཏ ནཱནཱཝིདྷཝིཙིཏྟསཱལསལལཙམྤཀཱསོཀརུཀྑཱནཱགརུཀྑཱདཱིཧི སུསཛྫིཏབྷཱུམིཔདེསཱ ཨཙྩནྟརམཎིཡཱ པོཀྑརཎཱི ཨཏྠི. ཏཏྠ ཨདྷིཝཏྠོ མཧཱནུབྷཱཝོ སུམནོནཱམ ནཱགརཱཛཱ སོལ༹སསཧསྶམཏྟཱཧི ནཱགམཱཎཝིཀཱཧི པརིཝུཏོ མཧནྟཾ སིརིསམྤཏྟིཾ ཨནུབྷཝམཱནོ ཏཐཱགཏསྶ རཱུཔསོབྷགྒཔྤཏྟཾ ཨཏྟབྷཱཝཾ ཨོལོཀེཏྭཱ མཧནྟཾ སུཁསོམནསྶཾ ཨནུབྷཝམཱནོ ཨཏྟནོ མཱཏརཾ ནནྡནཱགམཱནཝིཀཾ གརུཊྛཱནེ ཋཔེཏྭཱ ཏསྶཱ ཝེཡྻཱཝཙྩཾ ཀུརུམཱནོ ཏསྨིཾཡེཝ པོཀྑརཎིཾ ཨཛ྄ཛྷཱཝསཏི. སཏྠཱ པན ཨཏྟནོ གམནཾ སཾཝིདྷཱནཱནནྟརེ སུམནཾ ནཱགརཱཛཱནཾ ཨཝིདུརེ ཋིཏཾ ཨཱམནྟེཏྭཱ སཔརིཝཱརོ ཨཱགཙྪཱ ཧཱིཏི ཨཱཧ. སོ སཱདྷུཏི སམྤཊིཙྪིཏྭཱ ཨཏྟནོ པརིཝཱརེ ཚཀོཊིམཏྟེ ནཱགེ གཧེཏྭཱ སུཔུཔྤཱིཏཙམྤཀརུཀྑཾ ཏཐཱགཏསྶ སཱུརིཡརཾསིནིཝཱརཎཏྠཾ ཚཏྟཾ ཀཏྭཱ གཎྷི. ཨཐ བྷགཝཱ རཝིརསྨིཔཏྠཊསུཝཎྞཔབྦཏོ ཝིཡ ཝིརོཙམཱནོ ཨཏྟནོ པཏྟཙཱིཝརམཱདཱཡ ཨཱཀཱསཾ ཨབྦྷཱུགྒཉྪི. སཏྠཱརཾ པརིཝཱརེཏྭཱ ཋཱིཏཱ ཏེ པཉྩསཏཁཱིཎཱསཝཱཔི སཀཾ སཀཾ པཏྟཙཱིཝརམཱདཱཡ ཨཱཀཱསཾ ཨུགྒནྟྭཱ སཏྠཱརཾ པརིཝཱརཡིཾསུ. སཏྠཱ པཉྩསཏཁཱིཎཱསཝཔརིཝུཏོ ཝིསཱཁཔུཎྞམུཔོསཐདིཝསེ ཀལྱཱཎིཡཾ གནྟྭཱ མཧཱརཧེ མཎྜཔམཛ྄ཛྷེ པཉྙཏྟཝར བུདྡྷཱསནེ པཉྩསཏཁཱིཎཱསཝཔརིཝུཏོ ཧུཏྭཱ ནིསཱིདི.

ཨཐ མཎིཨཀྑིཀོ ནཱམ ནཱགརཱཛཱ བུདྡྷཔམུཁཾ བྷིཀྑུ སངྒྷཾ ཨནེཀེཧི དིབྦེཧི ཁཛྫབྷོཛྫེཧི སནྟཔྤེཏྭཱ ཨེཀམནྟཾ ནིསཱིདི. སཏྠཱ ཏསྶ བྷཏྟཱནུམོདནཾ ཀཏྭཱ སུམནཀུཊེ པདལཉྪནཾ དསྶེཏྭཱ ཏསྨིཾ པབྦཏཔཱདེ ཨནེཀཔཱདཔཱཀིཎྞབྷཱུམིཔྤདེསེ ནིསིནྣོ དིཝཱཝིཧཱརཾ ཀཏྭཱ ཏཏོ ཝུཊྛཱཡ དཱིགྷཝཱཔིཙེཏིཡཊྛཱནེ སམཱཔཏྟིཾ སམཱཔཛྫི. མཧཱཔཐཝཱི ཨུདཀཔརིཡནྟཾ ཀཏྭཱ སཏཝཱརཾ སཧསྶཝཱརཾ སངྐམྤི. ཏཏྠ མཧཱསེནཾ ནཱམ དེཝཔུཏྟཾ ཨཱརཀྑཏྠཱཡ ནིཝཏྟེཏྭཱ ཏཏོ ¶ ཝུཊྛཱཡ མཧཱཐཱུཔཊྛཱནེ ཏཐེཝ སམཱཔཏྟིཾ སམཱཔཛྫི. མཧཱཔཐཝི ཏཐེཝ ཀམྤི. ཏཏྲཱཔི ཝིསཱལརཱུཔ དེཝཔུཏྟཾ ཨཱརཀྑཾ གཎྷནཏྠཱཡ ཋཔེཏྭཱ ཏཏོ ཝུཊྛཱཡ ཐཱུཔཱརཱམ ཙེཏིཡཊྛཱནེ ཏཐེཝ ནིརོདྷསམཱཔཏྟིཾ སམཱཔཛྫི. མཧཱཔཐཝཱི ཏཐེཝ ཀམྤི. ཏཏྠ ཙ པཐཝིཔཱལ དེཝཔུཏྟཾ ཨཱརཀྑཏྠཱཡ. ནིཝཏྟེཏྭཱ ཏཏོ ཝུཊྛཱཡ མརིཙཝཊྚིཙེཏིཡཊྛཱནཾ གནྟྭཱ པཉྩཧི བྷིཀྑུསཏེཧི སདྡྷིཾ སམཱཔཏྟིཾ ཨཔྤཡི. པཐཝི ཏཐེཝ ཀམྤི. ཏསྨིཾ ཋཱནེ ཨིནྡཀདེཝཔུཏྟཾ ཨཱརཀྑཾ གཎྷནཏྠཱཡ ཋཔེསི. ཏཏོ ཝུཊྛཱཡ ཀཱཙརགཱམཙེཏིཡཊྛཱནེ ཏཐེཝ སམཱཔཏྟིཾ སམཱཔཛྫི. པཐཝི ཏཐེཝ ཀམྤི. (ཏསྨིཾ ཋཱནེ མཧཱགྷོས དེཝཔུཏྟཾ ཨཱརཀྑཾ གཎྷནཏྠཱཡ ནིཡྻཱདེསི) ཨེཏསྨིཾ མཧཱཙེཏིཡཊྛཱནེ མཧཱགྷོསཾ ནཱམ དེཝཔུཏྟཾ ཨཱརཀྑཾ གཧཎཏྠཱཡ ནིཝཏྟེཏྭཱ ཏཏོ ཝུཊྛཱཡ ཏིསྶམཧཱཝིཧཱརཙེཏིཡཊྛཱནེ ཏཐེཝ སམཱཔཏྟིཾ སམཱཔཛྫི. པཐཝི ཏཐེཝ ཀམྤི. ཏཏྠ མཎིམེཁལཾ ནཱམ དེཝདྷཱིཏརཾ ཨཱརཀྑཾ གཱཧཱཔེཏྭཱ ཏཏོ ནཱགམཧཱཝིཧཱརཙེཏིཡཊྛཱནེ ཏཐེཝ སམཱཔཏྟིཾ སམཱཔཛྫི. པཐཝི ཏཐེཝ ཀམྤི. ཏསྨིམྤི མཧིནྡཾ ནཱམ དེཝཔུཏྟཾ ཨཱརཀྑཾ གཧཎཏྠཱཡ ཋཔེསི. ཏཏོ ཝུཊྛཱཡ མཧཱགངྒཱཡ དཀྑིཎདིསཱབྷཱགེ སེརུ ནཱམ དཧསྶ ཨནྟེ ཝརཱཧ ནཱམ སོཎྜིམཏྠཀེ ཨཏིམནོརམཾ ཨུདཀབུབྦུལ༹ཀེལཱསཀཱུཊཔཊིབྷཱགཾ ཙེཏིཡཾ པཏིཊྛཧིསྶཏཱི’ཏི པཉྩསཏཁཱིཎཱསཝེཧི སདྡྷིཾ ནིརོདྷསམཱཔཏྟིཾ སམཱཔཛྫི. བཧལགྷནམཧཱཔཐཝི པརིབྦྷམིཏཀུམྦྷཀཱརཙཀྐཾ ཝིཡ པབྷིནྟམདམཧཱ ཧཏྠིནཱགསྶ ཀུཉྩནཱདཀརཎཾ ཝིཡ ཨུཙྪུཀོཊྚན ཡནྟ-མུཁསདྡོ ¶ ཝིཡ (ཙ) སཏཝཱརཾ སཧསྶཝཱརཾ ནདམཱནཱ སོམནསྶཔྤཏྟཱ ཝིཡ སཀལལངྐཱདཱིཔཾ ཨུནྣཱདཾ ཀུརུམཱནཱ སཾཀམྤི. ཏཏོ ཝུཊྛཱཡ སུམནནཱགརཉྙོ ཧཏྠེསུ ཋིཏ ཙམྤཀརུཀྑཏོ པུཔྥཱནི ཨཱདཱཡ ཏཏྠ པཱུཛེཏྭཱ པུནཔྤུནཾ ཏཾ ཨོལོཀེསི. སོ སཏྠཱརཾ ཝནྡིཏྭཱ མཡཱ བྷནྟེ ཀིཾ ཀཏྟབྦནྟི པུཙྪི. ཨིམསྶ ཋཱནསྶ ཨཱརཀྑཾ ཀརོཧཱིཏི ཨཱཧ. སོ ཏཾ སུཏྭཱ བྷནྟེ ཏུམྷཱཀཾ གནྡྷཀུཊིཾ མམ ཨཱརཀྑཾ ཀརོནྟསྶ རཱུཔསོབྷགྒཔྤཏྟཾ ཨསཱིཏྱཱནུབྱཉྫནབྱཱམཔྤབྷཱདྭཏྟིཾསམཧཱཔུརིསལཀྑཎཝིཙིཏྟཾ དསྶནཱནུཏྟརིཡབྷཱུཏཾ པསྶནྟསྶ མནོསིལཱཏལེ སཱིཧནཱདཾ ནདནྟོ ཏརུཎསཱིཧོ ཝིཡ གཛྫནྟོ པཱཝུསྶཀམཧཱམེགྷོ ཝིཡ ཨཱཀཱསགངྒཾ ཨོཏརནྟོ ཝིཡ རཏནདཱམཾ གནྠེནྟོ ཝིཡ ཙ ཨཊྛངྒསམནྣཱགཏཾ སཝནཱིཡསརཾ ཝིསྶཛྫེཏྭཱ བྲམྷགྷོསཾ ནིཙྪཱརེནྟོ ནཱནཱནཡེཧི ཝིཙིཏྟཀཐཾ ཀཐཡམཱནཱནཾ སཝནཱནུརིཏྟཡབྷཱུཏཾ སཾསཱརཎྞཝནིམུགྒཱནཾ ཏཱརཎསམཏྠཾ མདྷུར དྷམྨདེསནཾ སུཎནྟསྶ, ཉཱཎིདྡྷིཡཱ ཀོཊིཔྤཏྟེ སཱརིཔུཏྟམོགྒལླཱནཱདཡོ ཨསཱིཏིམཧཱསཱཝཀེ པསྶནྟསྶ, ཏཏྠེཝ མཡ྄ཧཾ ཝསནཾ རུཙྩཏི. ན སཀྐོམི ཨཉྙཏྠ ཏུམྷེཧི ཝིནཱ ཝསིཏུནྟི ཨཱཧ. བྷགཝཱ ཏསྶ ཀཐཾ སུཏྭཱ ནགརཱཛ, ཨིམཾ པདེསཾ ཏཡཱ ཙིརཾ ཝསིཏཊྛཱནཾ. ཀཀུསནྡྷསྶ བྷགཝཏོ དྷཱཏུ ཨིམསྨིཾཡེཝ ཋཱནེ པཏིཊྛིཏཱ, ཏྭམེཝ ཏསྨིཾ ཀཱལེ ཝརནིདྡོ ནཱམ ནཱགརཱཛཱ ཧུཏྭཱ ཏསྶཱ དྷཱཏུཡཱ ཨཱརཀྑཾ གཧེཏྭཱ གནྡྷམཱལཱདཱིཧི པཱུཛཾ ཀརོནྟོ ཙིརཾ ཝིཧཱསི. པུན ཀོཎཱགམནསྶ བྷགཝཏོ དྷཱཏུ ཨིམསྨིཾཡེཝ ཋཱནེ པཏིཊྛིཏཱ ཏྭམེཝ ཏསྨིཾ ཀཱལེ ཛཡསེནོ ནཱམ དེཝཔུཏྟོ ཧུཏྭཱ ཏསྶཱ དྷཱཏུཡཱ ཨཱརཀྑཾ གཧེཏྭཱ གནྡྷམཱལཱདཱིཧི པཱུཛཾ ཀཏྭཱ ཏཏྠེཝ ཙིརཾ ཝིཧཱསི. པུན ཀསྶཔསྶ བྷགཝཏོ དྷཱཏུ ཨིམསྨིཾཡེཝ ཋཱནེ པཏིཊྛིཏཱ. ཏྭམེཝ ཏསྨིཾ ཀཱལེ དཱིགྷསཱལོ ནཱམ ནཱགརཱཛཱ ཧུཏྭཱ ཏཱཡ དྷཱཏུཡཱ ཨཱརཀྑཾ གཧེཏྭཱ གནྡྷམཱལཱདཱིཧི པཱུཛཾ ཀརོནྟོ ཝིཧཱསི. མཡི པན པརིནིབྦུཏེ ཀཱཀཝཎྞཏིསྶམཧཱརཱཛཱ མཡ྄ཧཾ ནལཱཊདྷཱཏུཾ ཨིམསྨིཾཡེཝ ¶ ཋཱནེ པཏིཊྛཱཔེསྶཏི, ཏསྨཱ ཏྭཾ ཨིམསྶ ཋཱནསྶ ཨཱརཀྑཾ ཀརོཧཱིཏི ཝཏྭཱ པཉྩསཱིལེསུ པཏིཊྛཱཔེཏྭཱ པཉྩསཏཁཱིཎཱསཝེཧི སདྡྷིཾ ཙེཏིཡཊྛཱནཾ པདཀྑིཎཾ ཀཏྭཱ ཏྭཾ ཨཔྤམཏྟོ ཧོཧཱིཏི ཝཏྭཱ ཨཱཀཱསཾ ཨུཔྤཏིཏྭཱ ཛེཏཝནམེཝ གཏོ.

ཏསྶ པན ནཱགརཉྙོ མཱཏཱ ཨིནྡམཱནཝིཀཱ ནཱམ ཨཱགནྟྭཱ ཏཐཱགཏཾ ཝནྡིཏྭཱ ཨེཀམནྟཾ ཋིཏཱ, བྷནྟེ མམ པུཏྟོ སུམནོ ནཱམ ནཱགརཱཛཱ ཀུཧིནྟི ཨཱཧ. ཏཝ པུཏྟོ ཏམྦཔཎྞིདཱིཔེ མཧཱཝཱལུཀགངྒཱཡ དཀྑིཎབྷཱགེ སེརུ ནཱམ དཧསྶ སམཱིཔེ ཝརཱཧ ནཱམ སོཎྜིཡཾ སམཱདྷི ཨཔྤིཏཏྟཱ ཨཏྟནོ པརིཝཱརེ ཚཀོཊིམཏྟེ ནཱགེ གཧེཏྭཱ སཏྠཱརཾ ཝནྡིཏྭཱ བྷནྟེ ཨིཏོ པཊྛཱཡ ཏུམྷཱཀཾ དསྶནཾ དུལླབྷཾ, ཁམཐ མེཏི ཨཙྩཡཾ དེསེཏྭཱ མཧཏིཾ ནཱགསམྤཏྟིཾ གཧེཏྭཱ པུཏྟསྶ སུམནནཱགརཱཛསྶ སནྟིཀཾ གནྟྭཱ མཧཏིཾ ཨིསྶརིཡསམྤཏྟིཾ ཨནུབྷཝནྟི ཏཏྠེཝ ཨཱརཀྑཾ གཧེཏྭཱ ཙིརཾ ཝིཧཱསི.

མཧཱཔཉྙོ མཧཱསདྡྷོ མཧཱཝཱིརོ མཧཱཨིསི,

མཧཱབལེན སམྤནྣོ མཧནྟགུཎབྷུསིཏོ;

གནྟྭཱན ཏམྦཔཎྞིཾ སོ སཏྟཱནུདྡཡམཱནསོ,

གནྟྭཱ ནཱགཝརཾ དཱིཔཾ ཨགཱ ཛེཏཝནཾ ཝིདུ.

ཨཏིསཡམཏིསཱརོ སཱརདཱནཾ ཀརོནྟོ,

ཨཏིཨདྷིརམཎིཡོ སབྦལོཀེཀནེཏྟོ;

ཨཏིགུཎདྷརཎཱིཡོ སབྦསཏྟེ ཏམགྒཾ,

ཨཏིཝིཔུལདཡོ ཏཱནེཏུམཱགཱ སུདཱིཔཾ.

ཏཏིཡགམནཀཐཱ སམཏྟཱ.

ཨིཏི ཨརིཡཛནཔསཱདནཏྠཱཡ ཀཏེ དྷཱཏུཝཾསེ ཏཐཱགཏསྶ གམནཾ ནཱམ པཋམོ པརིཙྪེདོ.

ཨཱགནྟྭཱ ཏམྦཔཎྞིཾ སོ སཏྟཱནུདྡཡམཱནསོ

པུན གནྟྭཱ ནཱགདཱིཔཾ ཨགཱ ཛེཏཝནཾ ཝརཾ

ཨཏིསཡམཏིསཱརོ སཱརདཱནེཀ རཏྟོ

ཨཏིདྷིཏིརམཎིཡོ སབྦལོཀེཀནེཏྟོ

ཨཏིགུཎརམཎཱིཡཾ སབྦསནྟེཀམགྒཾ

ཨཏིཝིཔུལདཡཏྟཱ ལངྐམཱགཱ སུདཱིཔཾ

ཨིཏི སཱིཧལ༹བྷཱསཱཡ ཀཏེ དྷཱཏུཝཾསེ དིསྶཏེ.

༢. ¶ པརིནིབྦཱནཀཐཱ

སཏྠཱ པན ཏཏོ པཉྩཙཏྟཱལཱིསཝསྶཱནི ཏིཔིཊཀཔརིཡཏྟིདྷམྨཾ དེསེཏྭཱ ཝེནེཡྻཛནེ སཾསཱརཏོ ཙཏུཨརིཡམགྒཕལཔཊིལཱབྷཝསེན ཨུདྡྷཱརེཏྭཱ ནིབྦཱནེ པཏིཊྛཱཔེཏྭཱ པཙྪིམེ ཀཱལེ ཝེསཱལིནགརཾ ཨུཔནིསྶཱཡ ཙཱཔཱལཙེཏིཡཾ ནིསྶཱཡ ཝིཧརནྟོ མཱརེན པརིནིབྦཱནཏྠཱཡ ཨཱརཱདྷིཏོ སཏོ སམྤཛཱནོ ཨཱཡུསངྑཱརེ ཝིསྶཛྫེསི. ཏསྶ ཝིསྶཊྛབྷཱཝཾ ཨཱནནྡོཡེཝ ཨཉྙཱསི. ཨཉྙོ ཀོཙིཔི ཛཱནནྟོ ནཱམ ནཏྠི. ཏསྨཱ བྷིཀྑུསངྒྷམྤི ཛཱནཱཔེསྶཱམཱིཏི ཛེཏཝནམཧཱཝིཧཱརཾ གནྟྭཱ སབྦཾ བྷིཀྑུསངྒྷཾ སནྣིཔཱཏཱཔེཏྭཱ བྷིཀྑཝེ ཏཐཱགཏསྶ ན ཙིརསྶེཝ ཏིཎྞཾ མཱསཱནཾ ཨཙྩཡེན པརིནིབྦཱནཾ བྷཝིསྶཏི, ཏུམྷེ སཏྟཏིཾསབོདྷི པཀྑིཡདྷམྨེསུ སམགྒཱ ཧུཏྭཱ ཨེཀཱིབྷཱཝཱ ཧོཐ, ཏུམྷེ ཝིཝཱདཾ མཱ ཀརོཐ. ཨཔྤམཱདེན ཏིསྶོ སིཀྑཱ སམྤཱདེཐཱཏི ཝཏྭཱ པུན དིཝསེ ཝེསཱལིཡཾ པིཎྜཱཡ ཙརིཏྭཱ པིཎྜཔཱཏཱ པཊིཀྐམིཏྭཱ བྷཎྜགཱམཾ གཏོ. བྷཎྜགཱམཏོ ཧཏྠིགཱམཾ ཧཏྠིགཱམཏོ ཨམྦགཱམཾ ཨམྦགཱམཏོ ཛམྦུགཱམཾ ཛམྦུགཱམཏོ ནིགྲོདྷགཱམཾ ནིགྲོདྷགཱམཏོ བྷོགནགརཾ བྷོགནགརཏོ པཱཝཱནགརཾ པཱཝཱནགརཏོ ཀུསིནཱརཱནགརཾ པཏྟོ. ཏཏྠ ཡམཀསཱལཱནམནྟརེ ཋཱིཏོ ཨཱནནྡཏྠེརཾ ཨཱམནྟེཏྭཱ ཨུནྟརསཱིསཀཾ ཀཏྭཱ མཉྩཀཾ པཉྙཱཔེཧི ཀིལནྟོསྨི ཨཱནནྡ ནིཔཛྫིསྶཱམི’ཏི ཨཱཧ. ཏཾ སུཏྭཱ ཨཱནནྡཏྠེརོ ཨུཏྟརསཱིསཀཾ ཀཏྭཱ མཉྩཀཾ པཉྙཱཔེཏྭཱ ཙཏུགྒུཎཾ སངྒྷཱཊིཾ ཨཏྠརིཏྭཱ པཉྩཙཏྟཱལཱིསཝསྶཱནི ཨསཡིཏབུདྡྷསེཡྻཾ སཡནྟོ དཀྑིཎཔསྶེན སཏོ སམྤཛཱནོ ཨནུཊྛཱནསཉྙཾ མནསིཀརིཏྭཱ སཱིཧསེཡྻཾ ཀཔྤེསི.

ཨཏཱིཏམདྡྷཱན བྷཝེ ཙརནྟོ,

ཨནནྟསཏྟེ ཀརུཎཱཡུཔེཏོ;

ཀཏྭཱན པུཉྙཱནི ཨནཔྤཀཱནི,

པཏྟོ སིཝཾ ལོཀཧིཏཱཡ ནཱཐོ.

ཨེཝཾ ¶ ཧི སོ དསབལོཔི ཝིཧཱིནཐཱམོ,

ཡམསྶ སཱལཱན ནིཔཛྫི མཛ྄ཛྷེ;

ཀཏྭཱན སཉྙཉྷི ཨནུཊྛཧཱནཾ,

ས ཨིདྡྷིམཱ མཱརམུཁཾ པཝིཊྛོ.

ཏསྨིཾ ཁཎེ སམཀསཱལཱ སུཔུཔྥིཏཱ ཨཧེསུཾ. ན ཀེཝལཾ ཡམཀསཱལཱཡེཝ སུཔུཔྥཱིཏཱ, ཨཐ ཁོ དསསཧསྶཱི ལོཀདྷཱཏུ ཙཀྐཝཱལེ༹སུ སཱལརུཀྑཱཔི པུཔྥིཏཱ. ན སཱལརུཀྑཱཡེཝ སུཔུཔྥིཏཱ, ཨཐ ཁོ ཡཾ ཀིཉྩི པུཔྥུཔགཕལཱུཔག རུཀྑཛཱཏཾ སབྦམྤི པུཔྥཉྩ ཕལཉྩ གཎྷི. ཛལེསུ ཛལཔདུམཱནི ཐལེསུ ཐལཔདུམཱནི ཁནྡྷེསུ ཁནྡྷཔདུམཱནི སཱཁཱསུ སཱཁཱཔདུམཱནི ལཏཱསུ ལཏཱཔདུམཱནི ཨཱཀཱསེ ཨོལམྦཔདུམཱནི པིཊྛིཔཱསཱཎེ ཧིནྡིཏྭཱ སཏཔཏྟཔདུམཱནི སུཔུཔྥིཏཱནི ཨཧེསུཾ. པཐཝིཏོ ཡཱཝ བྲཧྨལོཀོ ཏཱཝ དསསཧསྶི ཙཀྐཝཱལཱ༹ ཨེཀམཱལཱགུཎཱ ཝིཡ ཨཧེསུཾ. དེཝཱ ཨཱཀཱསཏོ དིབྦམནྡཱརཝཔཱརིཙྪཏྟཀཀོཝིལཱ༹རཔུཔྥཱནི ཙ ཙནྡནཙུཎྞཱནི ཙ སམཱཀིརནྟི. དིབྦཏུརིཡསངྒིཏིཡོ ཙ ཨནྟལིཀྑེ པཝཏྟནྟི. ཨནེཀཱནི ཨཙྪརིཡསཧསྶཱནི ཨཧེསུཾ. ཨེཝཾ པཱུཛཱཝིསེསེ པཝཏྟམཱནེ པཋམཡཱམེ སུབྷདྡཔརིབྦཱཛཀཾ ཝིནེཏྭཱ མཛ྄ཛྷིམཡཱམེ དསསཧསྶི ལོཀདྷཱཏུ དེཝཏཱནཾ ཨནུསཱསིཏྭཱ པཙྪིམཡཱམཱཝསཱནེ པཋམཛ྄ཛྷཱནཾ སམཱཔཛྫིཏྭཱ ཏཏོ ཝུཊྛཱཡ དུཏིཡཛ྄ཛྷཱནཾ ཙཏུཏྠཛ྄ཛྷཱནཾ སམཱཔཛྫི. ཏཏོ ཝུཊྛཱཡ ཨཱཀཱསཱནཉྩཱཡཏནཾ ཝིཉྙཱཎཉྩཱཡཏནཾ ཨཱཀིཉྩཉྙཱཡཏནཾ ནེཝསཉྙཱནཱསཉྙཱཡཏནཾ སམཱཔཛྫིཏྭཱ ཏཏོ ཝུཊྛཱཡ ནིརོདྷསམཱཔཏྟིཾ སམཱཔཛྫི. ཏཏོ ཝུཊྛཱཡ པཋམཛ྄ཛྷཱནཾ དུཏིཡཛ྄ཛྷཱནཾ ཏཏིཡཛ྄ཛྷཱནཾ ཙཏུཏྠཛ྄ཛྷཱནཉྩ སམཱཔཛྫི. ཏཏོ ཝུཊྛཱཡ ཨེཏྠནྟརཏོ ཨནུཔཱདིསེསནིབྦཱནདྷཱཏུཡཱ པརིནིབྦཱཡི.

མཧཱམོཧཏམཾ ཧནྟྭཱ སཏྟཱནཾ ཧདཡསྶིཏཾ,

རཝཱིཝ ཛོཏམཱནོ སོ ལོཀསྶ ཨནུཀམྤཀོ;

ཝསྶཱནི ¶ པཉྩཏཱལཱིསཾ ཀཏྭཱ སཏྟཧིཏཾ བཧུཾ,

ཨདྷུནཱ ཨགྒིཀྑནྡྷོཝ པརིནིབྦཱཡི སོ ཛིནོ.

ཨེཝཾ པན བྷགཝཏི པརིནིབྦུཏེ ཝིསྶཀམྨདེཝཔུཏྟོ ཏཐཱགཏསྶ སརཱིརཔྤམཱཎཾ ཝརདོཎིཾ རཏནེཧི མཱཔེཏྭཱ ཝིསུདྡྷཀཔྤཱསེཧི ཏཐཱགཏསྶ སརཱིརཾ ཝེཋེཏྭཱ རཏནདོཎིཡཾ པཀྑིཔིཏྭཱ གནྡྷཏེལེཧི པཱུརེཏྭཱ ཨཔརཱཡ དོཎིཡཱ པིདཧིཏྭཱ སབྦགནྡྷདཱརུཙིཏཀཾ ཀཏྭཱ ཡེབྷུཡྻེན དེཝཏཱཡོ ལོཧིཏཙནྡནགྷཊིཀཱཡོ ཨཱདཱཡ ཙིཏཀཱཡཾ པཀྑིཔིཏྭཱ ཨགྒིཾ གཱཧཱཔེཏུཾ ནཱསཀྑིཾསུ. ཀསྨཱ? མཧཱཀསྶཔཏྠེརསྶ ཨནཱགཏཏྟཱ. སོ ཨཱཡསྨཱ མཧཱཀསྶཔཏྠེརོ ཡེབྷུཡྻེན བཧུནྣཾ དེཝཱནཾ པིཡོ མནཱཔོ. ཐེརསྶ ཧི དཱནཾ དཏྭཱ སགྒེ ནིབྦཏྟཱནཾ པམཱཎོ ནཱམ ནཏྠི. ཏསྨཱ དེཝཏཱ ཏསྨིཾ སམཱགམེ ཨཏྟནོ ཀུལཱུཔགཏྠེརཾ ཨདིསྭཱ ཨམྷཱཀཾ མཧཱཀསྶཔཏྠེརོ ཀུཧིནྟི ཨོལོཀེནྟོ ཨཏྟནོ པརིཝཱརེཧི པཉྩམཏྟེཧི བྷིཀྑུསཏེཧི སདྡྷིཾ མགྒཾ པཊིཔནྣོཏི ཉཏྭཱ ཡཱཝ ཐེརོ ཨིམསྨིཾ ན སམྤཏྟོ ཙིཏཀཾ ཏཱཝ ན པཛྫལཏུཏི ཨདྷིཊྛཧིཾསུ. ཏསྨིཾ ཀཱལེ ཐེརོ ཡེབྷུཡྻེན ཏེརསདྷུཏངྒདྷརེཧི པཉྩམཏྟེཧི བྷིཀྑུསཏེཧི སདྡྷིཾ ཨཱགནྟྭཱ ཙིཏཀཾ ཏིཀྑཏྟུཾ པདཀྑིཎཾ ཀཏྭཱ པཱདཔསྶེ ཋཱིཏོ, བྷནྟེ ཏུམྷཱཀཾ དསྶནཏྠཱཡ ཨིཏོ ཀཔྤསཏསཧསྶམཏྠཀེ པདུམུཏྟརསཏྠུནོ པཱདམུལེ ཨབྷིནཱིཧཱརཏོ པཊྛཱཡ ཨཝིཛཧིཏྭཱ ཨཱགཏོ. ཨིདཱནི མེ ཨཝསཱནདསྶནནྟི པཱདེ གཧེཏྭཱ ཝནྡིཏུཾ ཨདྷིཊྛཱསི.

མཧཱཀསྶཔཐེརོ སོ བྷིཀྑུསངྒྷཔུརཀྑཏོ;

ཨེཀཾསཾ ཙཱིཝརཾ ཀཏྭཱ པགྒཧེཏྭཱན ཨཉྫལིཾ.

པདཀྑིཎཉྩ ཏིཀྑཏྟུཾ ཀཏྭཱ ཋཏྭཱ པདནྟིཀེ;

པཏིཊྛཧནྟུ སཱིསེ མེ ཛིནཔཱདེཏི’དྷིཊྛཧི.

སཧཱདྷིཊྛཱནཾ ཙིཏཀཱ དུསྶཱནི ཙ ཝིབྷིནྡིཡ;

ནིཀྑམིཾསུ ཏདཱ པཱདཱ གྷནམུཏྟོཝ ཙནྡིམཱ.

ཨུཧོ ཧཏྠེཧི པགྒཡ྄ཧ ཋཔེཏྭཱ ཨཏྟནོ སིརེ;

ཝནྡིཏྭཱ སཏྠུནོ པཱདེ ཁམཱཔེཏྭཱ ཝིསཛྫཡཱི.

པུཎྞཙནྡོ ཡཐཱ ཨབྦྷཾ ཙིཏཀཾ པཱཝིསི ཏདཱ;

ཨིདཾ ཨཙྪེརཀཾ དིསྭཱ རཝཾ རཝི མཧཱཛནོ.

ཨུཊྛཧིཏྭཱན པཱཙཱིནཱ ཝནྡོ ཨཏྠངྒཏོ ཡཐཱ;

པཱདེ ཨནྟརདྷཱཡནྟེ ཨརོདིཾསུ མཧཱཛནཱ.

ཏདཱ མལླརཱཛཱནོ བྷགཝཏོ སརཱིརཀིཙྩཾ ཀརིསྶཱམཱཏི ཝཏྭཱ ནཱནཱཝཏྠཱབྷརཎཱནི ནིཝཱསེཏྭཱ པརིཝཱརཡིཾསུ. ཏཏོ རཱཛཱནོ མནུསྶཱ ཙ ཨགྒིཾ དཱཏུཾ ཨཱརཧིཾསུ. ཏདཱ སཀྐོ? མཡི པན པརིནིབྦུཏེ སཀྐོ དེཝརཱཛཱ མཎིཛོཏིརསཾ པསཱརེཏྭཱ ནིཀྑནྟཨགྒིནཱ མམ སརཱིརཀིཙྩཾ ཀརིསྶཏི. མཎིཨགྒིནོ ཨཝསཱནེ མནུསྶཱ ཨགྒིཾ ཀརིསྶནྟིཏི. ཨེཝཾ བུདྡྷཝཙནཾ པརིབྷཱཝེཏྭཱ ནིཀྑཏྟུཾ པདཀྑིཎཾ ཀཏྭཱ བྷགཝཏོ སརཱིརཀིཙྩཾ ཀཏྭཱ སམནྟཏོ ཨུཊྛཧཏུཏི ཨདྷིཊྛཧི.

ཏསྨིཾ ཁཎེ སཡམེཝ ཙིཏཀཾ ཨགྒི གཎྷི. སརཱིརཾ པན བྷགཝཏོ ཛྷཱཡཱམཱནཾ ཚཝིཙམྨམཾསནཧཱརུཨཊྛིཨཊྛིམིཉྫཾ ཨསེསེཏྭཱ སུམནམཀུལ༹མུཏྟཱརཱསིསདིསམེཝ དྷཱཏུཡོ ཨཝསེསཱ ཨཧེསུཾ.

པརིནིབྦུཏཀཱལེཔི སཀལཾ ཀལུནཾ ཨཧུ;

པརིདེཝོ མཧཱ ཨཱསི མཧཱི ཨུདྲིཡནཾ ཡཐཱ.

དེཝཏཱཡཱནུབྷཱཝེན སཏྠུནོ ཙིཏཀོ སཡཾ;

ཏཏོ ཨེཀཔྤཧཱརེན པཛྫལིཏྠ སམནྟཏོ.

ཡཉྩ ཨབྦྷནྟརཾ དུསྶཾ ཡཾ དུསྶཾ སབྦབཱཧིརཾ

དུསྶེ དྭེཝ ན ཛྷཱཡིཾསུ ཏེསཾ དུསྶཱནམནྟརེ;

ཡཐཱ ནིརུདྡྷཏེལསྶ ན མསཱི ན ཙ ཚཱརིཀཱ;

ཨེཝམསྶ ན དིསྶཏི བུདྡྷགཏྟསྶ ཛྷཱཡཏོ.

སུམནམཀུལ༹སབྷཱཝཱ ཙ དྷོཏམུཏྟཱབྷམེཝ ཙ;

སུཝཎྞཝཎྞསཾཀཱསཱ ཨཝསིསྶཾསུ དྷཱཏུཡོ.

དཱཋཱ ཙཏསྶོ ཨུཎྷཱིསཾ ཨཀྑཀཱ དྭེ ཙ སཏྟིམཱ;

ན ཝིཀིཎྞཱ ཏཏོ སེསཱ ཝིཔྤཀིཎྞཱཝ དྷཱཏུཡོ.

ཨཧོསི ཏནུཀཱ དྷཱཏུ སཱསཔབཱིཛམཏྟིཀཱ;

དྷཱཏུཡོ མཛ྄ཛྷིམཱ མཛ྄ཛྷེབྷིནྣཏཎྜུལམཏྟིཀཱ.

དྷཱཏུཡོ ¶ མཧཏི མཛ྄ཛྷེ བྷིནྣམུགྒཔྤམཱཎིཀཱ;

དྷཱཏུཝཎྞཱ ཏཡོ ཨཱསུཾ བུདྡྷཱདྷིཊྛཱནཏེཛསཱ.

སཱརིཔུཏྟསྶ ཐེརསྶ སིསྶོ སརབྷུནཱམཀོ;

ཨཱདཱཡ ཛིནགཱིཝཊྛིཾ ཙིཏཀཱཏོཝ དྷཱཏུ སོ.

སདྡྷིཾ སིསྶསཧསྶེན ཙེཏིཡེ མཧིཡངྒཎེ;

ཋཔེཏྭཱ ཙེཏིཡཾ ཀཏྭཱ ཀུསིནཱརམགཱ མུནི.

ཚལ༹བྷིཉྙོ ཝསིཔྤཏྟོ ཁེམོ ཀཱརུཎིཀོ མུནི;

སཧསཱ ཙིཏཀཱཏོཝ ཝཱམདཱཋཾ སམགྒཧཱི.

ཨཱཀཱསཏོ པཏིཏྭཱཔི ནིཀྑམིཏྭཱཔི སཱལཏོ;

སམནྟཏོམྦུམུགྒནྟྭཱ ནིབྦཱཔེསུཾ ཛལཱནལཾ.

མལླརཱཛགཎཱ སབྦེ སབྦགནྡྷོདཀེན ཏཾ;

ཙིཏཀཾ ལོཀནཱཐསྶ ནིབྦཱཔེསུཾ མཧེསིནོ.

ཨེཝཾ པན སབྦལོཀེ ཀརུཎཱདྷིཀོ སམྨཱསམྦུདྡྷོ ཝེསཱཁཔུཎྞམུཔོསཐེ ཨངྒཱརདིཝསེ པརིནིབྦུཏོ. དེཝམནུསྶཱནཾ སངྒཧཀརཎཏྠཱཡ ཡམཀསཱལཱནམནྟརེ ཙིཏཀཾ སཏྟརཏྟིནྡིཝཾ ཝསཱི. ཏཏོ ཝཱིསཾ ཧཏྠསཏིཀསྶ ཨུཔརི སཏྟརཏྟིནྡིཝཾ ཝསི. ཡཱཝ ཨགྒིཔརིནིབྦཱཔནཾ སཏྟརཏྟིནྡིཝཾ ཧོཏི.

ཏཏོ སཏྟདིཝསཱནི ཀུསིནཱརཱཡཾ མལླརཱཛཔུཏྟེསུ གནྡྷོདཀེན ཙིཏཀཾ ནིབྦཱཔཡམཱནེསུ སཱལརུཀྑཏོ ཨུདཀདྷཱརཱ ནིཀྑམིཏྭཱ ཙིཏཀཾ ནིབྦཱཔཡིཾསུ. ཏཏོ དསབལསྶ དྷཱཏུཡོ སུཝཎྞཙངྒོཊཀེ པཀྑིཔིཏྭཱ ཨཏྟནོ ནགརེ སནྠཱགཱརེ ཋཔེཏྭཱ སཏྟིཔཉྫརཾ ཀཏྭཱ དྷནུཔཱཀཱརེཧི པརིཀྑིཔཱཔེཏྭཱ སཏྟཱཧཾ ནཙྩགཱིཏཝཱདིཏགནྡྷམཱལཱདཱིཧི མལླརཱཛཔུཏྟཱ སཀྐཱརཾ ཀརིཾསུ.

ཏཏོ ཏེ མལླརཱཛཱནོ རམྨཾ དེཝསབྷོཔམཾ;

སབྦཐཱ མཎྜུཡིཏྭཱན སནྠཱགཱརཾ ཏཏོ པན.

མགྒཾ ¶ ཨལངྐརིཏྭཱན ཡཱཝ མཀུཊཙེཏིཡཱ;

ཧཏྠཱིཀྑནྡྷེ ཋཔེཏྭཱན ཧེམདོཎིཾ སདྷཱཏུཀཾ.

གནྡྷཱདཱིཧིཔི པཱུཛེཏྭཱ ཀཱིལ༹ནྟཱ སཱདྷུཀཱིལི༹ཏཾ;

པཝེསེཏྭཱན ནགརཾ སནྠཱགཱརེ མནོརམེ.

དསབྷཱུམསྨིཾ པལླངྐེ ཋཔེཏྭཱ ཛིནདྷཱཏུཡོ;

ཨུསྶཡུཾ ཏེ ཏདཱ ཚཏྟེ སནྠཱགཱརསམནྟཏོ.

ཧཏྠཱིཧི པརིཀྑིཔཱཔེསུཾ ཏཏོ ཨསྶེ ཏཏོ རཐེ,

ཨཉྙོ’ཉྙཾ པརིཝཱརེཏྭཱ ཏཏོ ཡོདྷེ ཏཏོ དྷནུ;

ཨིཏི པརིཀྑིཔཱཔེསུཾ སམནྟཱ ཡོཛནཾ ཀམཱ,

ཏདཱ ནཙྩེཧི གཱིཏེཧི ཝཱདིཏེཧི ཙ པཱུཛཡུཾ.)

པརིནིབྦཱནཀཐཱ སམཏྟཱ.

ཏཏོ བྷགཝཏོ པརིནིབྦུཏབྷཱཝཾ སུཏྭཱ ཨཛཱཏསཏྟུ མཧཱརཱཛཱ ཀོསིནཱརཀཱནཾ མལླཱནཾ སཱསནཾ པེསེསི. ཨཧམྤི ཁཏྟིཡོ བྷགཝཱཔི ཁཏྟིཡོ སཏྠུནོ སརཱིརདྷཱཏུནཾ ཐཱུཔཉྩ མཧཉྩ ཀརོམཱིཏི. ཏེནེཝ ཨུཔཱཡེན ཝེསཱལིཡཾ ལིཙྪཝིརཱཛཱནོ ཙ ཀཔིལཝཏྠུམྷི སཀྱརཱཛཱནོ ཙ ཨལླཀཔྤཀེ བུལཡོ ཙ རཱམགཱམཀེ ཀོལི༹ཡཱ ཙ ཝེཋདཱིཔཀེ བྲཱཧྨཎོ ཙ པཱཝཱཡཾ པཱཝེཡྻཀཱ ཙ སཱསནཾ པེསེཏྭཱ སབྦེ ཨེཀཏོ ཧུཏྭཱ ཀོསིནཱརཀེཧི སདྡྷིཾ ཝིཝཱདཾ ཨུཔྤཱདེསུཾ. ཏེསཾ པན ཨཱཙརིཡོ དྲོཎབྲཱཧྨཎོ ནཱམ. སོ ཏེསཾ? མཱ བྷོནྟོ ཝིགྒཧཝིཝཱདཾ ཀརོཐ, ཨམྷཱཀཾ བྷགཝཱ ཁནྟིཝཱདཱིཡེཝཱཏི ཝཏྭཱ ཏཱདིསསྶ ཙ ཁནྟིམེཏྟཱནུདྡཡསམྤནྣསྶ སརཱིརབྷཱགེ ཀལཧཾ ཀཱཏུཾ ཨཡུཏྟནྟི ཨཱཧ.

(རཱཛཱ ཨཛཱཏསཏྟུ ཙ ལིཙྪཝཱི ཙ ནརཱདྷིཔཱ;

སཀྱཱ ཙ ཨལླཀཔྤཱ ཙ ཀོལི༹ཡཱཔི ཙ རཱམཀེ.

བྲཱཧྨཎོ ཝེཋདཱིཔོ ཙ མལླཔཱཝེཡྻཀཱཔི ཙ;

མལླཱ ཙ དྷཱཏུ ཨཏྠཱཡ ཨཉྙམཉྙཾ ཝིཝཱདཡུཾ.

ཨེཝཾ ¶ སནྟེ ཏདཱ དོཎོ བྲཱཧྨཎོ ཨེཏདབྲཝཱི;

སུཎནྟུ བྷོནྟོ མེ ཝཱཙཾ ཧིཏམཏྠུཔསཾཧིཏཾ.

ཁནྟིཝཱདཱི ཨིསིཀཱལེ དྷམྨཔཱལཀུམཱརཀེ;

ཚདྡནྟེ བྷུརིདཏྟེ ཙ ཙམྤེཡྻེ སངྑཔཱལཀེ.

མཧཱཀཔིཛཱཏཀཱལེ ཨམྷཱཀཾ ལོཀནཱཡཀོ;

ཀོཔཾ ཨཀཏྭཱ ཨཉྙེསུ ཁནྟིམེཝ ཨཀཱ ཛིནོ.

སིཊྛཱསིཊྛེ སུཁེ དུཀྑེ ལཱབྷཱལཱབྷེ ཡསཱཡསེ;

ཏཱདཱི ལཀྑཎསམྤནྣོ ཁནྟིཝཱདེསུ ཀཱ ཀཐཱ.

ཨེཝཾ བྷཝཏཾ ཝིཝཱདེ སམྤཧཱརོ ན སཱདྷུཀོ;

སབྦེཝ སཧིཏཱ ཧོཐ སམགྒཱ མོདམཱནཀཱ.

ཏཐཱགཏསྶ སཱརཱིརཾ ཨཊྛབྷཱགཾ ཀརོམསེ;

ཐཱུཔཱ ཝིཏྠཱརིཏཱ ཧོནྟུ པསནྣཱ ཧི བཧུཛྫནཱ.

ཏེན ཧི ཝིབྷཛེཧི ཏྭཾ ཨཊྛབྷཱགནྟུ བྲཱཧྨཎ;

ཐཱུཔཱ ཝིཏྠཱརིཏཱ ཧོནྟུ པསནྣཱ ཧི བཧུཛྫནཱ.

ཨེཝཾ ཝུཏྟེ ཏདཱ དོཎོ བྲཱཧྨཎོ གཎཛེཊྛཀོ;

སུཝཎྞཾ ནཱལི༹ཾ ཀཏྭཱན སམཾ བྷཱཛེསི རཱཛུནཾ.

སོལ༹སནཱལི༹ཡོ ཨཱསུཾ སབྦཱ ཏཱ སེསདྷཱཏུཡོ;

ཨེཀེཀཔུརཝཱསཱིནཾ དྭེ དྭེ དོཎོ ཨདཱ ཏདཱ.

དྷཱཏུཡོ ཙ གཧེཏྭཱན ཧཊྛཏུཊྛཱ ནརཱདྷིཔཱ;

གནྟྭཱ སཀེ སཀེ རཊྛེ ཙེཏིཡཱནི ཨཀཱརཡུཾ.

དོཎོ ཏུམྦཾ གཧེཏྭཱན ཀཱརེསི ཏུམྦཙེཏིཡཾ;

ཨངྒཱརཐཱུཔཾ ཀཱརེསུཾ མོརིཡཱ ཧཊྛམཱནསཱ.

ཨེཀཱ དཱཋཱ ཏིདསཔུརེ ཨེཀཱ ནཱགཔུརེ ཨཧུ;

ཨེཀཱ གནྡྷཱརཝིསཡེ ཨེཀཱ ཀཱལིངྒརཱཛིནོ.)

ཏཏྠ ¶ དོཎོཏི? ཏདཱ གཎཱཙརིཡོ. སོ དྷཱཏུཡོ ཝིབྷཛནྟོ ཨེཀཾ དཀྑིཎདཱཋཱདྷཱཏུཾ གཧེཏྭཱ ཝེཋནྟརེ ཋཔེསི. ཏདཱ སཀྐོ ཨཛྫ དཀྑིཎདཱཋཱདྷཱཏུཾ ཀོ ལབྷཏཱིཏི ཙིནྟེཏྭཱ ཝེཋནྟརེ པསྶི. སོ རཏནཙངྒོཊཀཾ གཧེཏྭཱ ཨདིསྶམཱནཀཱཡེན གནྟྭཱ དྷཱཏུཾ གཧེཏྭཱ ཏཱཝཏིཾསབྷཝནེ ཙཱུལཱ༹མཎིཙེཏིཡ ཨེཀཡོཛནུབྦེདྷཾཡེཝ མཧནྟཾ ཐཱུཔཾ ཀཏྭཱ ཋཔེསི. ཨེཀཾ དཀྑིཎདཋཱདྷཱཏུཾ པཱདགྒནྟརེ ཨཀྐམིཏྭཱ གཎྷི. ཨེཏྟཱཝཏཱ ཏཱཝཏིཾསབྷཝནདནྟདྷཱཏུཀཐཱ པརིཔུཎྞཱ ཝེདིཏབྦཱ.

ཏདཱ ཛཡསེནོ ནཱམ ནཱགརཱཛཱ བྷགཝཏོ པརིནིབྦུཏབྷཱཝཾ སུཏྭཱ ཨཛྫ པཙྪིམདསྶནཾ པསྶིསྶཱམཱིཏི མཧནྟཾ ནཱགརཱཛསམྤཏྟིཾ གཧེཏྭཱ ཀུསིནཱརཾ གནྟྭཱ མཧཱཔཱུཛཾ ཀཏྭཱ ཨེཀམནྟཾ ཋཏྭཱ པཱདགྒནྟརེ ཋིཏཾ དྷཱཏུཾ དིསྭཱ ནཱགེདྡྷིབལེན གཧེཏྭཱ ནཱགབྷཝནཾ ནེཏྭཱ ནཱགཔུརསྶ མཛ྄ཛྷེ རཏནཁཙིཏེ ཙེཏིཡེ ཋཔེསི. ཏཾ ཏམྦཔཎྞིཡཾ ཀཱཀཝཎྞཏིསྶརཱཛཀཱལེ མཧཱདེཝཏྠེརསྶ སིསྶོ མཧིནྡཏྠེརོ ནཱམ ནཱགབྷཝནཾ གནྟྭཱ དཀྑིཎདཱཋཾ གཧེཏྭཱ ཏམྦཔཎྞིཡཾ སེརུནགརཾ ཧརིཏྭཱ གིརིཨབྷཡསྶ སེརུནགརཔབྦཏནྟརེ ཙེཏིཡཾ ཀཱརཱཔེཏྭཱ ཋཔེསི.

ཨེཏྟཱཝཏཱ ནཱགབྷཝནདནྟདྷཱཏུཀཐཱ པརིཔུཎྞཱ ཝེདིཏབྦཱ.

ཏཏྲཱཡཾ གནྡྷཱརཝཱསིནོཏི? ཨེཀཱ ཝཱམདཱཋཱ དོཎོ ནཱམ ཨཱཙརིཡོ ནིཝཏྠ ཝཏྠནྟརེ ཋཔེཏྭཱ གཎྷི. ཏདཱ ཨེཀོ གནྡྷཱརཝཱསཱི པུབྦེ ལདྡྷབྱཱཀརཎོ ཀཏཱབྷིནཱིཧཱརོ ཝཏྠནྟརེ ཋཏཔིདནྟདྷཱཏུཾ དིསྭཱ ཀུསལཙིཏྟེན ཏཏོ དནྟདྷཱཏུཾ གཧེཏྭཱ གནྡྷཱརཝཱསིཀེཧི སདྡྷིཾ ཨཏྟནོ རཊྛཾ གནྟྭཱ ཙེཏིཡཝནེ ཋཔེསི.

ཨེཏྟཱཝཏཱ ཝཱམདནྟདྷཱཏུཀཐཱ པརིཔུཎྞཱ ཝེདིཏབྦཱ.

ཏཏྠ ཨདྷོ ཝཱམདནྟདྷཱཏུཾ སཱརིཔུཏྟཏྠེརསྶ སིསྶོ ཁེམོ ནཱམ མུནི ཛཱལཙིཏཀཏོཝ ཨུཔྤཏིཏྭཱ ཝཱམདཱཋཾ གཧེཏྭཱ ཀཱལིངྒཔུརཾ ནེཏྭཱ བྲཧྨདཏྟསྶ རཉྙོ སམཱིཔཾ གནྟྭཱ ¶ དནྟདྷཱཏུཾ དསྶེཏྭཱ? མཧཱརཱཛ ཝཱམདནྟདྷཱཏུཾ བྷགཝཱ ཏམེཝ ཨིམསྨིཾ ཛམྦུདཱིཔེ ཡཱཝ གུཧསཱིཝཔརམྤརཱ དེཝམནུསྶཱནཾ ཨཏྠཾ ཀརིཏྭཱ པརིཡོསཱནེ གུཧསཱིཝརཉྙོ པཱཧེསྶཏཱིཏི (ནཱིཡཱདེཏུཾ) ཨཱཧཱཏི ནཱིཡྻཱདེསི.

ཨཔརབྷཱགེ ཧེམམཱལཱ རཱཛཀཉྙཱ དནྟཀུམཱརེན སདྡྷིཾ བྲཱཧྨཎཝེསཾ གཧེཏྭཱ དནྟདྷཱཏུཾ ཨཱདཱཡ པལཱཡིཏྭཱ ཝཱཎིཛེ ཨཱརོཙེཏྭཱ ནཱཝཱ ཝེགེན གནྟྭཱ ཙེཝ ནཱགསུཔཎྞེཧི མཧནྟཾ པཱུཛཾ ཀཱརེཏྭཱ ཨནུཀྐམེནཱགནྟྭཱ ཛམྦུཀོལ༹པཊྚནཾ པཏྭཱ དིཛཝརསྶ ཨཱཙིཀྑིཏམགྒེན ཨནུརཱདྷཔུརཾ པཏྭཱ ཀིཏྟིསྶིརིམེགྷསྶ པཝཏྟིཾ པུཙྪིཏྭཱ ནཝཝསྶཨཱཡུསམཱནོ ཏཱིསུ སརཎེསུ པསནྣབྷཱཝཾ སུཏྭཱ མེགྷགིརི མཧཱཐེརསྶ སནྟིཀཾ གནྟྭཱ ཝནྡིཏྭཱ ཨེཀམནྟཾ ནིསཱིདིཏྭཱ དནྟདྷཱཏུཾ ཛམྦུདཱིཔཏོ གཧེཏྭཱ ཨཱགཏབྷཱཝཾ ཨཱརོཙེཏྭཱ དསྶེསི. དིསྭཱ ཙ པན པཱིཏིཡཱ ཕུཊོ ཨུབྷིནྣམྤི སངྒཧཾ ཀཏྭཱ མཧཱཝིཧཱརཾ ཨལངྐཱརེཏྭཱ ཛིནདནྟདྷཱཏུཾ ཋཔེཏྭཱ ཨེཀཾ བྷིཀྑུཾ པེསེཏྭཱ ཏཾ པཝཏྟིཾ རཉྙོ ཨཱརོཙཱཔེསི. ཏཾ སུཏྭཱ རཱཛཱ པཱིཏིཔཱམོཛྫོ ཙཀྐཝཏྟིསྶ སིརིསམྤཏྟོ དལི༹དྡོ ཝིཡ ཏསྶ པཱཊིཧཱརིཡཾ དིསྭཱ ཝཱིམཾསིཏྭཱ ནིཀྐངྑོ ཧུཏྭཱ སཀལལངྐཱདཱིཔེན པཱུཛེསི. ཨེཏེན ནཡེན པཱུཛཾ ཀཏྭཱ ཨེཀདིཝསེནེཝ ནཝལཀྑཾ པཱུཛེསི.

སཱིཧལི༹ནྡོ ཨུབྷིནྣམྤི བཧཱུནི རཏནཱནི ཙ;

གཱམེ ཙ ཨིསྶརེ ཙེཝ དཏྭཱན སངྒཧཾ ཨཀཱ.

ཨེཏྟཱཝཏཱ ཨདྷོདཱཋཱདྷཱཏུཀཐཱ པརིཔུཎྞཱ ཝེདིཏབྦཱ.

ཙཏྟཱལཱིས སམཱ དནྟཱ ཀེསཱ ལོམཱ ཙ སབྦསོ དེཝཱ ཧརིཾསུ ཨེཀེཀཾ ཙཀྐཝཱལ༹པརམྤརཱ.

ཏཏྲ ཝཙནེ, ཙཏྟཱལཱིས སམཱ དནྟཱཏི? སེསདནྟཱ ཙ ཀེསཱ ཙ ལོམཱ ཙ ནཁཱ ཙ སབྦསོཔི མཡི པརིནིབྦུཏ-ཀཱལེ ¶ མཱ ཌཡ྄ཧནྟུ ལུཉྩིཏྭཱ ཨཱཀཱསེ པཏིཊྛནྟུ ཨེཀེཀཙཀྐཝཱལ༹ཉྩ ཨེཀེཀཀེསལོམནཁདནྟདྷཱཏུཔརམྤརཱ ནེཏྭཱ ཙེཏིཡཾ ཀཱརེཏྭཱན དེཝམནུསྶཱནཾ ཨཏྠཾ ཀརོཏུཏི ཨདྷིཊྛཧི. ཏསྨཱ པརིནིབྦུཏཀཱལཏོ ཡཱཝ སརཱིརཾ ན ཌཡ྄ཧཏི ཏཱཝ ཚབྦཎྞརསྨིཡོ ལོམདྷཱཏུ ན པཛཧཏི. དོཎབྲཱཧྨཎོཔི དྷཱཏུཝིབྷཛནཱཝསཱནེ ཝེཋནྟརེ ཙ ནིཝཱསནནྟརེ ཙ པཱདགྒནྟརེ ཙ དྷཱཏུནཾ ཝིནཊྛབྷཱཝཾ ཉཏྭཱ པཐཝིཡཾ ཨུཏྟཱནཀོཡེཝཛཱཏོ. ཏདཱ སཀྐོ དེཝརཱཛཱ དིསྭཱ ཨཡཾ དེཎཱཙརིཡོ དྷཱཏུ ཨཏྠཱཡ ཨནུཔརིཝཏྟེཏྭཱ ཝིནཱསཾ པཱཔུཎེཡྻ ཨཧཾ ཝཱིཎཱཙརིཡཝེསཾ གཧེཏྭཱ ཏསྶ སནྟིཀཾ གནྟྭཱ སོཀཾ ཝིནོདེསྶཱམཱིཏི སཀྐརཱུཔཾ ཛཧིཏྭཱ ཝཱིཎཱཙརིཡཝེསཾ གཧེཏྭཱ ཏསྶ སནྟིཀཾ གནྟྭཱ ཨེཀམནྟཾ ཋིཏོ དིབྦགཱིཏཾ གཱཡིཏྭཱ ཝཱིཎཾ ཝཱདེནྟོ ནཱནཔྤཀཱརཾ ཨུདཱནེསི. ཡཾ དྷམྨམེཏཾ པུརིསསྶ ཝཱདཾ ཚིནྡིསྶཱམཱིཏི ཝཏྭཱ ཀཐཱཡ སོཏུནཾ ལོབྷཾ པརསྶ ཨཏྠཾ ཝིནཱསེཏྭཱ ཨཏིལོབྷེན པུརིསོ པཱཔཀོ ཧོཏཱིཏི. ཧཾསརཱཛཛཱཏཀཾ དཱིཔེཏྭཱ ཡཾ ལདྡྷཾ ཏཾ སུལདྡྷནྟི ཨཱཧ. ཏཾ སུཏྭཱ དོཎོ ཨཡཾ ཝཱིཎཱཙརིཡོ མཡ྄ཧཾ ཐེནབྷཱཝཾ ཨཉྙཱསཱིཏི སོཀཾ ཝིནོདེཏྭཱ ཨུཊྛཱཡ ཨཱཝཛྫམཱནོ ཏུམྦཾ དིསྭཱ ཡེན བྷགཝཏོ སརཱིརདྷཱཏུཡོ མིཏཱ སོཔི དྷཱཏུགཏིཀོཝ. ཨིདཾ ཐཱུཔཾ ཀརིསྶཱམཱིཏི ཙིནྟེཏྭཱ ཏུམྦཾ གཧེཏྭཱན ཙེཏིཡེ ཋཔེསི. མོརིཡཱ ཨངྒཱརཾ གཧེཏྭཱ ཨངྒཱརཙེཏིཡཾ ནཱམ ཀཱརེསུཾ.

(ནགརེ ཀཔིལཝཏྠུམྷི སམྨཱདིཊྛི བཧུཛྫནོ;

ཏཏྠ སཱརཱིརིཀཾ ཐཱུཔཾ ཨཀཱསི རཏནཱམཡཾ.

ནགརེ ¶ ཨལླཀེ རམྨེ བུདྡྷདྷཱཏུ པཏིཊྛིཡ;

སིལཱཡ མུགྒཝཎྞཱཡ ཐཱུཔཾ སདྷཱཏུཀཾ ཨཀཱ.

ཛནོ པཱཝེཡྻརཊྛསྨིཾ པཏིཊྛིཡ སཱརཱིརིཀཾ;

སིལཱཡ མཎིཝཎྞཱཡ པཱཝེཡྻཾ ཙེཏིཡཾ ཨཀཱ.

ཙཱིཝརཾ པཏྟདཎྜཉྩ མདྷུརཱཡཾ ཨཔཱུཛཡུཾ;

ནིཝཱསནཾ ཀུསགྷརེ པཱུཛཡིཾསུ མཧཱཛནཱ.

པཙྩཏྠརཎཾ ཀཔིལེ ཨུཎྞལོམཉྩ ཀོསལེ;

པཱུཛེསུཾ པཱཊལིཔུཏྟེ ཀརཀཾ ཀཱཡབནྡྷནཾ.

ནིསཱིདནཾ ཨཝནྟིསུ ཙམྤཱཡཾ’དཀསཱཊཀཾ;

དེཝརཊྛེ ཨཏྠརཎཾ ཝིདེཧེ པརིསྶཱཝནཾ.

ཝཱསི-སཱུཙིགྷརཉྩཱཔི ཨིནྡཔཏྠེ ཨཔཱུཛཡུཾ;

པཱསཱཎཀེ པདཾ སེཊྛཾ བྷཎྜསེསཾ པརནྟཀེ.

མཧིཾསུ མནུཛཱ དྷཱཏུཾ ཨཊྛདོཎམིཏཾ ཏདཱ;

དྷཱཏུ ཝིཏྠཱརིཏཱ ཨཱསི ལོཀནཱཐསྶ སཏྠུནོ).

ཏེ པན རཱཛཱནོ ཧི ཨཏྟནོལདྡྷདྷཱཏུཾ གཧེཏྭཱ སཀསཀནགརཾ གནྟྭཱ ཙེཏིཡཾ ཀཱརཱཔེཏྭཱ མཧནྟཾ པཱུཛཱཝིདྷཱནཾ ཀརིཾསུ. ཙཀྑུམནྟསྶ བྷགཝཏོ སརཱིརདྷཱཏུ ཨཊྛདོཎམཏྟཾ སུཝཎྞནཱལི༹ཡཱ ཨེཀསཏཨཊྛཝཱིསཏིནཱལི༹ཀཱ ཨཧོསི? སཏྠཱ པན ཨུཏྟརཱསཱལ༹ྷནཀྑཏྟེན མཱཏུཀུཙྪིཡཾ པཊིསནྡྷིཾ གཎྷི. ཝིསཱཁནཀྑཏྟེན མཱཏུཀུཙྪིཏོ ནིཀྑམི. ཨུཏྟརཱསཱལ༹ྷནཀྑཏྟེན མཧཱབྷིནིཀྑམནཾ ནིཀྑམི. ཝིསཱཁནཀྑཏྟེན བུདྡྷོ ཨཧོསི. ཨུཏྟརཱསཱལ༹ྷནཀྑཏྟེན དྷམྨཙཀྐཾ པཝཏྟེསི. ཏེནེཝ ཡམཀཔཱཊིཧཱརིཡཾ ཨཀཱསི. ཨསྶཡུཛནཀྑཏྟེན དེཝོརོཧཎཾ ཨཀཱསི. ཝིསཱཁནཀྑཏྟེན པརིནིབྦཱཡི. མཧཱཀསྶཔཏྠེརཱ ཙ ཨནུརུདྡྷཏྠེརོ ཙ དྭེ མཧཱཐེརཱ བྷགཝཏོ སརཱིརདྷཱཏུཡོ ཝིསྶཛྫཱཔེཏྭཱ ཨདཾསུ.

ཏེསཾ ¶ རཱཛུནཾ བྷགཝཏོ སརཱིརདྷཱཏུཾ ལབྷིཏྭཱ སཏྟདིཝསསཏྟམཱསཱདྷིཀཱནི སཏྟཝསྶཱནི མཧཱརཧཾ པཱུཛཾ ཀཏྭཱ གཏཀཱལེ མིཙྪཱདིཊྛིཀམནུསྶཱ? སམཎོ གོཏམོ པརིནིབྦུཏོ. ཏསྶ དྷཱཏུ ཨཏྠཱཡ ཨམྷཱཀཾ ཛཱིཝིཏཀཔྤནཾ ནཱསེཏྭཱ པཱུཛཾ ཀརོཏཱི’ཏི སམྨཱསམྦུདྡྷེ པདུསྶནྟི. སཀྐོ ཨཱཝཛྫེནྟོ ཏཾ ཀཱརཎཾ ཉཏྭཱ མཧཱཀསྶཔཏྠེརསྶ ཨཱརོཙེསི;’བྷནྟེ མིཙྪཱདིཊྛིཀཱ མནུསྶཱ བྷགཝཏི པདུཊྛཙིཏྟེན ཨིཏོ ཙུཏཱ ཨཝཱིཙིནིརཡཾ ཨུཔྤཛྫནྟི. བཧུཏརཱ ཨནཱགཏེ མིཙྪཱདིཊྛིཀཱ མཱཏུཔིཏུགྷཱཏཀཱ རཱཛཱནོ བྷཝིསྶནྟི. ཨཛྫེཝ དྷཱཏུཡོ ནིདཧིཏུཾ ཝཊྚཏཱི’ཏི ཐེརོ ཝིཙཱརེཏྭཱ ཨདྡས.

ཨནནྟམཏྠཾ དྷརམཱནཀཱལེ ཀཏྭཱན སཏྟཱནམལཱིནཙིཏྟོ སེསཱནམཏྠཱཡ སརཱིརདྷཱཏུཾ ཋཔེཏྭ སོ མཙྩུམུཁཾ ཨུཔེཏོ. (ཀཏྭཱ ཡོ བོདྷིཉཱཎཾ ཝིཝིདྷབལཝརཾ བུཛ྄ཛྷིཏུཾ པཱརམཱིཡོ ཝཏྭཱ སངྑེཡྻཔུཎྞེ ཨཔརིམིཏབྷཝེ ཨུཏྟརིཏྭཱ སུམུཏྟཾ. ཨཱརོཧིཏྭཱན སཱིགྷཾ ཨརིཡསིཝཔདཾ ཨཙྩུཏཾ སཱིཏིབྷཱཝཾ པཏྟོ སོ ཛཱཏིཔཱརཾ ནིཁིལཔདཧནཾ དུཀྐརཾ ཀཱརཡིཏྭཱ.

དྷཱཏྭནྟརཱཡཾ དིསྭཱན ཐེརོ ཀསྶཔསཝ྄ཧཡོ;

ནིདྷཱནཾ སབྦདྷཱཏུནཾ ཀརོཧཱིཏྱཱཧ བྷཱུཔཏིཾ.

སཱདྷཱུཏི སོ པཊིསྶུཏྭཱ མཱགདྷོ ཏུཊྛམཱནསོ;

དྷཱཏུནིདྷཱནཾ ཀཱརེསི སབྦཏྠ ཝཏྟིཏཱདིཡ.

ཀཱརཱཔེཏྭཱན སོ རཱཛཱ ཀསྶཔསྶ ནིཝེདཡཱི;

དྷཱཏུཡོ ཨཱཧརཱི ཐེརོ ཨིདཾ ཀཱརཎམདྡས.

བྷུཛངྒཱ ¶ པརིགཎྷིཾསུ རཱམགཱམམྷི དྷཱཏུཡོ;

ཙེཏིཡེ དྷཱརཡིསྶནྟི ལངྐཱདཱིཔེ ཨནཱགཏེ.

ཏཱ དྷཱཏུཡོ ཋཔེཏྭཱན ཐེརོ ཀསྶཔསཝ྄ཧཡོ;

རཉྙོ ཨཛཱཏསཏྟུསྶ ཨདཱསི དྷཱཏུཡོ ཏདཱ.

གེཧེ ཙཱུཔཀརཎཱནི ཙཏུསཊྛིསཏཱནི སོ;

ཨབྦྷནྟརེ ཋཔེསི རཱཛཱ སབྦཱ ཏཱ བུདྡྷདྷཱཏུཡོ.

ཀརཎྜཱསཱིཏི སཾཀིཎྞཾ ཙེཏིཡཱསཱིཏིལངྐཏཾ;

གེཧེ བཧུསམཱཀིཎྞཾ ཐཱུཔཱརཱམཔྤམཱཎཀཾ.

ཀཱརེཏྭཱ སབྦཀརཎཾ ཝཱལིཀཾ ཨོཀིརཱི ཏཧིཾ;

ནཱནཱཔུཔྥསཧསྶཱནི ནཱནཱ གནྡྷཾ སམཱཀིརི.

ཨསཱིཏིཐེརརཱུཔཱནི ཨཊྛཙཀྐསཏཱནི ཙ;

སུདྡྷོདྷནསྶ རཱུཔམྤི མཱཡཱཔཛཱཔཏཱདིནཾ.

སབྦཱནི ཏཱནི རཱུཔཱནི སུཝཎྞསྶེཝ ཀཱརཡི;

པཉྩ ཚཏྟདྷཛསཏེ ཨུསྶཱཔེསི མཧཱིཔཏཱི.

ཛཱཏརཱུཔམཡེ ཀུམྦྷེ ཀུམྦྷེ ཙ རཏནཱམཡེ;

པཉྩ པཉྩ སཏེཡེཝ ཋཔཱཔེསི སམནྟཏོ.

སོཝཎྞནིཀྑམཡེན ཙ ཀཔཱལེ རཛཏཱམཡེ;

པུརེསི གནྡྷཏེལསྶ ཛཱལཱཔེཏྭཱ པདཱིཔཀེ.

པཉྩ པཉྩ སཏེཡེཝ ཋཔཱཔེསི དིསམྤཏི;

ཨིམེ ཏཐེཝ ཏིཊྛནྟ ཨདྷིཊྛཱསི མཧཱམུནི.

ཝིཏྠཱརིཏཱ དྷམྨཱསོཀོ བྷཝིསྶཏི ཨནཱགཏེ;

ཨཀྑརེ སོཎྞཔཏྟམྷི ཚིནྡཱཔེསི མཧཱམཏཱི.

པཀཔྤིཏྭཱ ཝིསུཀམྨཾ དྷཱཏུགབྦྷསམནྟཏོ;

ཝཱཏཝེགེན ཡཱཡནྟཾ ཡནྟརཱུཔམཀཱརཡཱི.

ཀཏྭཱ སིལཱཔརིཀྑེཔཾ པིདཧིཏྭཱ སིལཱཧི ཏཾ;

ཏསྶཱུཔརི ཀརཱི ཐཱུཔཾ སམཾ པཱསཱཎཐཱུཔིཡཾ.)

དྷཱཏུནིདྷཱནཀཐཱ སམཏྟཱ.

ཨིཏི ཨརིཡཛནཔྤསཱདནཏྠཱཡ ཀཏེ དྷཱཏུཝཾསེ ཏཐཱགཏསྶ པརིནིབྦུཏཱདྷིཀཱརོ ནཱམ དུཏིཡོ པརིཙྪེདོ.

༣. ¶ དྷཱཏུཔརམྤརཱཀཐཱ

དྷཱཏུསུ པན ཝིབྷཛིཏྭཱ དཱིཡམཱནེསུ སཏྠུནོ ནལཱཊདྷཱཏུ ཀོསིནཱརཀཱནཾ མལླཱནཾ ལདྡྷཀོཊྛཱསེཡེཝ ཨཧོསི. མཧཱཀསྶཔཏྠེརོ ཏེ ཨུཔསངྐམིཏྭཱ སཏྠུནོ ནལཱཊདྷཱཏུ ཏུམྷཱཀཾ ཀོཊྛཱསེ ཨཧོསི, ཏཾ གཧེཏུཾ ཨཱགཏོ, བྷགཝཱ ཧི དྷརམཱནེཡེཝ ཏམྦཔཎྞིདཱིཔསྶ ཨནུཛཱནི, ‘ཏསྨཱ ཏཾ ཨམྷཱཀཾ དེཐཱ’ཏི. ཏཾ སུཏྭཱ མལླརཱཛཱནོ?’ཨེཝཾ པཏིགཎྷཐ བྷནྟེ དྷཱཏུ’ཏི མཧཱཀསྶཔཏྠེརསྶ ཨདཾསུ. སོ ཨཏྟནོ སདྡྷིཝིཧཱརིཀཾ མཧཱནནྡཏྠེརཾ པཀྐོསཱཔེཏྭཱ ནལཱཊདྷཱཏུཾ ཐེརསྶ ནིཡྻཱདེཏྭཱ’ ཨིམཾ དྷཱཏུཾ ཏམྦཔཎྞི དཱིཔེ མཧཱཝཱལུཀགངྒཱཡ དཀྑིཎབྷཱགེ སེརུནཱམ དཧསྶ ཨནྟེ ཝརཱཧ ནཱམ སོཎྜིམཏྠཀེ ཀཱཀཝཎྞཏིསྶོ ནཱམ རཱཛཱ པཏིཊྛཱཔེསྶཏི, ཙེཏིཡཾ སངྒྷཱརཱམཾ ཀཱརཱཔེསྶཏི, ཏྭཾ ཨིམཾ དྷཱཏུཾ གཧེཏྭཱ ཝེསཱལིཡཾ ཨུཔནིསྶཱཡ མཧཱཝནཝིཧཱརེ ཀུཊཱགཱརསཱལཱཡཾ སཏྠུནོ ཝསིཏགནྡྷཀུཊིཡཾ ཋཔེཏྭཱ དྷཱཏུཔཱུཛཾ ཀཏྭཱ ཨཱཡུསངྑཱརེ ཨོསྶཊྛེ པརིནིབྦཱཔཡམཱནེ ཨཏྟནོ སདྡྷིཝིཧཱརིཀསྶ ཙནྡགུཏྟཏྠེརསྶ དྷཱཏུཝཾསཾ ཀཐེཏྭཱ ཨཔྤམཏྟོ ཧོཧཱི’ཏི ཝཏྭཱ དྷཱཏུཾ ཐེརསྶ དཏྭཱ ཨནུཔཱདིསེསནིབྦཱནདྷཱཏུཡཱ པརིནིབྦཱཡི.

སཱཝཀོ སཏྠུཀཔྤོ སོ པབྷཱིནྣཔཊིསམྦྷིདོ;

གཧེཏྭཱ མཱནཡཱི དྷཱཏུཾ མཧཱནནྡོ མཧཱཝནེ.

ཏསྶ ཐེརསྶ སདྡྷིཝིཧཱརིཀོ ཙནྡགུཏྟཏྠེརོ དྷཱཏུཾ གཧེཏྭཱ ཨཱཀཱསཾ ཨུགྒནྟྭཱ སཱཝཏྠཱིཡཾ ཛེཏཝནམཧཱཝིཧཱརེ དསབལེན ཝསིཏགནྡྷཀུཊིཡཾ ཋཔེཏྭཱ དྷཱཏུཔཱུཛཾ ཀཏྭཱ ཙིརཾ ཝིཧཱསི. སོཔི ཨཱཡུསངྑཱརེ ཨོསྶཊྛེ པརིནིབྦཱཔཡམཱནེ ཨཏྟནོ. སདྡྷིཝིཧཱརིཀཾ བྷདྡསེནཏྠེརཾ པཀྐོསཱཔེཏྭཱ དྷཱཏུཾ ཐེརསྶ ནིཡྻཱདེཏྭཱ དྷཱཏུཝཾསཾ ཀཐེཏྭཱ ཨནུསཱསིཏྭཱ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡི.

ཙནྡགུཏྟོ མཧཱཔཉྙོ ཚལ༹བྷིཉྙོ ཝིསཱརདོ;

རམྨེ ཛེཏཝནེ དྷཱཏུཾ ཋཔེཏྭཱ ཝནྡནཾ ཨཀཱ.

ཏསྶ ¶ སིསྶོ བྷདྡསེནཏྠེརོ དྷཱཏུཾ གཧེཏྭཱ ཨཱཀཱསེན གནྟྭཱ དྷམྨཙཀྐཔྤཝཏྟནེ ཨིསིཔཏནེ མཧཱ ཝིཧཱརེ སཏྠུནོ ཝསིཏགནྡྷཀུཊིཡཾ ཋཔེཏྭཱ གནྡྷམཱལཱདཱིཧི པཱུཛེཏྭཱ ཙིརཾ ཝིཧཱསི. སོ པརིནིབྦཱཔཡམཱནོ ཨཏྟནོ སདྡྷིཝིཧཱརིཀསྶ ཛཡསེནཏྠེརསྶ དྷཱཏུཾ ནིཡྻཱདེཏྭཱ དྷཱཏུཝཾསཾ ཀཐེཏྭཱ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡི.

བྷདྡསེནོ མཧཱཐེརོ ཀཏཀིཙྩོ མཧཱཨིསི;

དྷཱཏུཾ ཋཔེཏྭཱ ཨིསིཔཏནེ ཝནྡིཏྭཱ ནིབྦུཏིཾ གཏོ.

སོ པན ཛཡསེནཏྠེརོ ཏཾ དྷཱཏུཾ གཧེཏྭཱ ཝེལུཝནམཧཱཝིཧཱརེ སཏྠུནོ ཝསིཏགནྡྷཀུཊིཡཾ ཋཔེཏྭཱ གནྡྷམཱལཱདཱིཧི པཱུཛེཏྭཱ ཙིརཾ ཝསིཏྭཱ པརིནིབྦཱཔཡམཱནོ ཨཏྟནོ སདྡྷིཝིཧཱརིཀསྶ མཧཱསངྒྷརཀྑིཏཏྠེརསྶ དྷཱཏུཾ ནིཡྻཱདེཏྭཱ དྷཱཏུཝཾསཾ ཀཐེཏྭཱ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡི.

གཧེཏྭཱན དྷཱཏུཝརཾ ཛཡསེནོ མཧཱམུནི;

ནིདྷཱཡ ཝེལུཝནེ རམྨེ ཨཀཱ པཱུཛཾ མནོརམཾ.

སོ པནཱཡསྨཱ སངྒྷརཀྑིཏཏྠེརོ དྷཱཏུཾ གཧེཏྭཱ ཨཱཀཱསེན ཨཱགནྟྭཱ ཀོསམྦིཾ ཨུཔནིསྶཱཡ གྷོསིཏ སེཊྛིནཱ ཀཱརཱཔིཏེ གྷོསིཏཱརཱམེ བྷགཝཏོ ཝསིཏགནྡྷཀུཊིཡཾ ཋཔེཏྭཱ གནྡྷམཱལཱདཱིཧི པཱུཛཾ ཀཏྭཱ ཙིརཾ ཝིཧཱསི. སོ’པི པརིནིབྦཱཔཡམཱནོ ཨཏྟནོ སདྡྷིཝིཧཱརིཀཾ མཧཱདེཝཏྠེརཾ པཀྐོསཱཔེཏྭཱ དྷཱཏུཝཾསཾ ཀཐེཏྭཱ ཨཔྤམཏྟོ ཧོཧཱི’ཏི ཝཏྭཱ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡི.

སངྒྷརཀྑིཏཝ྄ཧཡོ ཐེརོ ཙནྡོ ཝིཡ སུཔཱཀཊོ;

ཋཔེཏྭཱ གྷོསིཏཱརཱམེ ཨཀཱ པཱུཛཾ མནོརམཾ.

ཏསྶ ཐེརསྶ སདྡྷིཝིཧཱརིཀོ མཧཱདེཝཏྠེརོ དྷཱཏུཾ གཧེཏྭཱ དེཝཱནམྤིཡཏིསྶསྶ མཧཱརཉྙོ བྷཱཏུ མཧཱནཱགསྶ ཨུཔརཱཛསྶ མཧཱགཱམེ སེཏཙྪཏྟཾ ཨུསྶཱཔིཏཀཱལེ ཧཏྠོཊྛ ནཱམཛནཔདེ ཀུཀྐུཊཔབྦཏནྟརེ མཧཱསཱལརུཀྑམཱུལེ ཨཱཀཱསཏོ ཨོཏརིཏྭཱ ནིསཱིདི. ཏསྨིཾ སམཡེ མཧཱཀཱལོ༹ ནཱམ ཨུཔཱསཀོ ཨཏྟནོ པུཏྟདཱརེཧི སདྡྷིཾ མཱལཱགནྡྷཝིལེཔནཾ དྷཛཔཏཱཀཱདཱིནི གཱཧཱཔེཏྭཱ དིཝསསྶ ཏིཀྑཏྟུཾ མཧནྟེཧི པཱུཛཱཝིདྷཱནེཧི དྷཱཏུཾ པརིཧརིཏྭཱ ཙིརཾ ཝསི. མཱསསྶ ཨཊྛ-ཨུཔོསཐདིཝསེ ¶ དྷཱཏུཏོ ཚབྦཎྞརཾསིཡོ ཨུགྒཙྪིཾསུ. ཏསྨིཾ སམཡེ སོ པདེསོ བུདྡྷསྶ དྷརམཱནཀཱལོ ཝིཡ ཨཧོསི. ཛནཔདཝཱསཱི མནུསྶཱཔི ཐེརསྶ སནྟིཀེ སཱིལཱནི གཎྷནྟི, ཨུཔོསཐཝཱསཾ ཝསནྟི, དཱནཾ དེནྟི, ཙེཏིཡསྶ མཧནྟཾ པཱུཛཾ ཀརོནྟཱི. ཏཏོ ཨཔརབྷཱགེ ཨུཔརཱཛཱ མཧཱགཱམེ ཝིཧརནྟོ བྷེརིཾ ཙརཱཔེསི? ཡོ ཨམྷཱཀཾ དསབལསྶ དྷཱཏུཾ གཧེཏྭཱ ཨིདྷཱགཏོ, ཏསྶ མཧནྟཾ སམྤཏྟིཾ དསྶཱམཱིཏི. ཏསྨིཾ ཀཱལེ ཀུཊུམྦིཀོ མཧཱཀཱལོ༹ ཨུཔརཱཛཾ པསྶིསྶཱམཱིཏི ཏསྶ ཨནུཙྪཝིཀཾ པཎྞཱཀཱརཾ གཧེཏྭཱ རཱཛདྭཱརེ ཋཏྭཱ སཱསནཾ པཧིཎི. ཨུཔརཱཛཱ ཏཾ པཀྐོསཱཔེསི. སོ གནྟྭཱ ཝནྡིཏྭཱ ཋིཏོ ཏཾ པཎྞཱཀཱརཾ རཱཛཔུརིསཱནཾ པཊིཙྪཱཔེསི. ཨུཔརཱཛཱ? མཱཏུལ མཧཱཀཱལ༹, ཏུམྷཱཀཾ ཛནཔདེ ཨམྷཱཀཾ སཏྠུནོ དྷཱཏུ ཨཏྠཱི’ཏི ཨཱཧ. མཧཱཀཱལོ༹ ཨུཔ རཱཛསྶ ཀཐཾ སུཏྭཱ ཨཏྠི དེཝ, མཡ྄ཧཾ ཀུལུཔགཏྠེརསྶ སནྟིཀེ ཨཱདཱསམཎྜལཔྤམཱཎཾ སཏྠུནོ ནལཱཊདྷཱཏུ ཚབྦཎྞརཾསཱིཧི ཨཱཀཱསཔྤདེསེ སཱུརིཡསཧསྶཙནྡསཧསྶཱནཾ ཨུཊྛིཏཀཱལོ ཝིཡ ཨོབྷཱསེཏི. སོ ཛནཔདོ བུདྡྷསྶ ཨུཔྤནྣཀཱལོ ཝིཡ ཨཧོསཱིཏི ཨཱཧ. ཏསྶ ཀུཊུམྦིཀསྶ ཀཐཾ སུཎནྟསྶཨེཝ རཉྙོ སཀལསརཱིརཾ པཉྩཝཎྞཱཡ པཱིཏིཡཱ པརིཔུཎྞཾ ཨཧོསི. ཨཏིཝིཡ སོམནསྶཔྤཏྟོ རཱཛཱ མཡ྄ཧཾ མཱཏུལསྶ མཧཱཀཱལ༹སྶ སཏསཧསྶཾ ཀཧཱཔཎཱནི ཙ ཙཏུསིནྡྷཝཡུཏྟརཐཉྩ སུཝཎྞཱལངྐཱརེཧི སུསཛྫིཏཾ ཨེཀཾ ཨསྶཉྩ ཨུདཀཕཱསུཀཊྛཱནཀེ ཁེཏྟཉྩ པཉྩདཱསཱིསཏཉྩ དེཐཱ’ཏི ཝཏྭཱ ཨཉྙཉྩ པསཱདཾ དཱཔེསི. སོ ཨུཔརཱཛཱ ཨེཏྟཀཾ ཀུཊུམྦིཀསྶ དཱཔེཏྭཱ ཏཾ དིཝསམེཝ ནགརེ བྷེརིཾ ཙརཱཔེཏྭཱ ཧཏྠསྶརཐཡཱནཱནི གཧེཏྭཱ ཀུཊུམྦིཀཾ མགྒདེསཀཾ ཀཏྭཱ ཨནུཔུབྦེན ཧཏྠོཊྛཛནཔདཾ པཏྭཱ རམཎཱིཡེ བྷཱུམིཔྤདེསེ ཁནྡྷཱཝཱརཾ བནྡྷིཏྭཱ ཨམཙྩགཎཔརིཝུཏོ ཀུཊུམྦིཀཾ གཧེཏྭཱ ཐེརསྶ ཝསནཊྛཱནཾ གནྟྭཱ ཝནྡིཏྭཱ ཨེཀམནྟཾ ཨཊྛཱསི. སེསཱ ཨམཙྩཱ ཀུཊུམྦིཀོ ཙ ཐེརཾ ཝནྡིཏྭཱ ཨེཀམནྟཾ ¶ ཨཊྛཾསུ. ཨུཔརཱཛཱ ཐེརཾ ཝནྡིཏྭཱ སཱརཱཎཱིཡཾ ཀཐཾ ཀཏྭཱ ཨེཀམནྟཾ ནིསིནྣོ པཊིསནྠཱརམཀཱསི. མཧཱདེཝཏྠེརོཔི སམྨོདནཱིཡཾ ཀཐཾ ཀཏྭཱ ཀིསྶ ཏྭཾ མཧཱརཱཛ ཨིདྷཱགཏོསི ཨཱགཏཀཱརཎཾ མེ ཨཱརོཙེཧཱི’ཏི ཨཱཧ. བྷནྟེ ཏུམྷཱཀཾ. སནྟིཀེ ཨམྷཱཀཾ བྷགཝཏོ ནལཱཊདྷཱཏུ ཨཏྠཱི ཀིར. ཏཾ ཝནྡིསྶཱམི’ཏི ཨཱགཏོམྷཱི’ཏི ཨཱཧ. ཐེརོ? བྷདྡཀཾ མཧཱ རཱཛ ཏཡཱ ཀཏནྟི ཝཏྭཱ དྷཱཏུགྷརདྭཱརཾ ཝིཝརིཏྭཱ མཧཱརཱཛ བུདྡྷསྶ ནལཱཊདྷཱཏུ ཨཏིདུལླབྷཱ’ཏི ཨཱཧ. རཱཛཱ སོལ༹སེཧི གནྡྷོདཀེཧི ནཧཱཡིཏྭཱ སབྦཱལངྐཱརཔཏིམཎྜིཏོ ཨེཀཾསཾ ཨུཏྟརཱསངྒཾ ཀརིཏྭཱ ཨཉྫལིཾ པགྒཡ྄ཧ ནམསྶམཱནོ ཨཊྛཱསི. བུདྡྷཱརམྨཎཱཡ པཱིཏིཡཱ སཀལསརཱིརཾ ཕུཊཾ ཨཧོསི.

(རཱཛཱ པཱིཏིཝེགེན ཨིམཱ གཱཐཱ ཨཱཧ;

ནམཱམི ཝཱིར པཱདེ ཏེ ཙཀྐངྐིཏ ཏལེ སུབྷེ;

ཝནྡིཏེ ནརདེཝེཧི ཨམཏཾ དེཧི ཝནྡིཏེ.

ལོཀནཱཐ ཏུཝཾ ཨེཀོ སརཎཾ སབྦཔཱཎིནཾ;

ལོཀེ ཏཡཱ སམོ ནཏྠི ཏཱརེཧི ཛནཏཾ བཧུཾ.

མཧཎྞཝེ མཡཾ བྷནྟེ ནིམུགྒཱ དཱིགྷསམྦྷཝེ;

ཨཔྤཏིསྶཱ ཨཔྤཏིཊྛཱ སཾསརཱམ ཙིརཾ ཏཧིཾ.

ཨེཏརཧི ཏུམྷེ ཨཱཔཛྫ པཏིཊྛཾ ཨདྷིགཙྪརེ;

ཏུམྷཱཀཾ ཝནྡནཾ ཀཏྭཱ ཨུཏྟིཎྞམྷ བྷཝཎྞཝཱ’ཏི.)

ཏསྨིཾ ཁཎེ དྷཱཏུཏོ རསྨིཡོ ནིཀྑམིཾསུ. སཀལ ལངྐཱདཱིཔཾ སུཝཎྞརསདྷཱརཱཧི སཉྪནྣཾ ཝིཡ ཨཧོསི. མཧནྟཾ པཱིཏིསོམནསྶཾ ཨུཔྤཛྫི. རཱཛཱ མཧནྟཾ སོམནསྶཾ པཏྟོ ཧུཏྭཱ ཧཊྛཏུཊྛོ ཨཧོསི. སོ དྷཱཏུགྷརཏོ ནིཀྑམིཏྭཱ ཐེརེན སདྡྷིཾ ཨལངྐཏམཎྜཔེ ཨེཀམནྟཾ ནིསཱིདི. ཨེཀམནྟཾ ནིསིནྣོ (ནིསཛྫཱདོསེ ཝཛྫེཏྭཱ སེཡྻཐིདཾ? ཨཏིདུརཙྩཱསནྟ-ཨུཔརིཝཱཏ-ཨུནྣཏཔྤདེས-ཨཏིསམྨུཁ-ཨཏིཔཙཚཱ’ཏི. ¶ ཨཏིདཱུརེ ནིསིནྣོ སཙེ ཀཐེཏུཀཱམོ ཨུཙྩཱསདྡེན ཀཐེཏབྦཾ ཧོཏི. ཨཙྩཱསནྣེ ནིསིནྣོ སངྐརཾ ཀརོཏི. ཨུཔརིཝཱཏེ ནིསིནྣོ སརཱིརགནྡྷོ ཝཱཡཏི. ཨུནྣཏཔྤདེསེ ནིསིནྣོ ཨགཱརཝཾ ཀརོཏི. ཨཏིསམྨུཁེ ནིསིནྣོ ཙཀྑུནཱ ཙཀྑུཾ པཧརིཏྭཱ དཊྛབྦཾ ཧོཏི. ཨཏིཔཙྪཱ ནིསིནྣོ གཱིཝཾ པརིཝཏྟེཏྭཱ དཊྛབྦཾ ཧོཏི. ཨིཏི ནིསཛྫཱདོསཾ ཝཛྫེཏྭཱ ནིསིནྣོ). ཨེཝམཱཧ. བྷནྟེ ཨིམཾ དྷཱཏུཾ མཡ྄ཧཾ དེཐ. མཧནྟཾ པཱུཛཱསཀྐརཾ ཀཏྭཱ པརིཧརཱམཱིཏི. བྷདྡཀཾ མཧཱརཱཛ ཨིམཱཡ དྷཱཏུཡཱ སམྨཱསམྦུདྡྷོ དྷརམཱནོཡེཝ ཝྱཱཀརཎཾ ཨཀཱསི. ཏུམྷཱཀཾ ཝཾསེ ཛཱཏོ ཀཱཀཝཎྞཏིསྶོ ནཱམ རཱཛཱ ཨིམསྨིཾ དཱིཔེ མཧཱཝཱལུཀགངྒཱཡ དཀྑིཎཏཱིརེ སེརུ ནཱམ དཧསྶ ཨནྟེ ཝརཱཧ ནཱམ སོཎྜིཡཱ མཏྠཀེ པཏིཊྛཔེཏྭཱ མཧནྟཾ ཐཱུཔཾ ཀརིསྶཏཱི’ཏི ཝཏྭཱ སཏྠཱ ཏཏྠ སམཱཔཏྟིཾ སམཱཔཛྫིཏྭཱ པཉྩསཏཁཱིཎཱསཝེཧི སདྡྷིཾ ཏིཀྑཏྟུཾ པདཀྑིཎཾ ཀཏྭཱ གཏོ. ཏསྨཱ གཎྷཐ མཧཱརཱཛཱ’ཏི ཝཏྭཱ དྷཱཏུཾ ཨདཱསི.

རཱཛཱ དྷཱཏུཾ གཧེཏྭཱ ཙཏུརསྶཔལླངྐེ དྷཱཏུཀརཎྜཀཾ ནིདཧིཏྭཱ ཀརཎྜཀེ དྷཱཏུཾ པཏིཊྛཱཔེཏྭཱ ཏཾ ཀུམུདཔཏྟསནྣིཧམངྒལསིནྡྷཝཡུཏྟརཐེ ཋཔེཏྭཱ སམནྟཱ ཨཱརཀྑཾ སཾཝིདཧིཏྭཱ (རཱཛཱ དྷཱཏུཾ གཧེཏྭཱ) པཉྩངྒཏུརིཡེ པགྒཎྷཱཔཡམཱནོ པཙྪཱ ཨཱགཙྪཏུ’ཏི མཧཱཛནསྶ སཱསནཾ ཝཏྭཱ མཧཱདེཝཏྠེརསྶ སནྟིཀཾ གནྟྭཱ? ཏུམྷེ བྷནྟེ, དྷཱཏུཡཱ ཨུཔཊྛཱནཾ ཀརོནྟོ ཨཱགཙྪཐཱ’ཏི ཨཱཧ. ཐེརོ ཏསྶ ཀཐཾ སུཏྭཱ;’མཧཱརཱཛ ཨཡཾ དྷཱཏུ པརམྤརཱ ཨཱགཏཱ. ཨཧཾ བྷགཝཏོ དྷམྨབྷཎྜཱགཱརིཀཨཱནནྡཏྠེརོ ཝིཡ ཨིམཾ དྷཱཏུཾ པརིཧརིསྶཱམཱི’ཏི ཝཏྭཱ ཨཏྟནོ པཙྩཡདཱཡཀཾ ཀུཊུམྦིཀཾ ཨཱཔུཙྪིཏྭཱ པཏྟཙཱིཝརམཱདཱཡ དྷཱཏུཾ ཨུཔཊྛཧིཡམཱནོ པཙྪཏོ པཙྪཏོ གཙྪཏི. རཱཛཱ དྷཱཏུཾ གཧེཏྭཱ ཨནུཔུབྦེན མཧཱགཱམཾ པཏྟོ མཧཱསེནགུཏྟཾ པཀྐོསཱཔེཏྭཱ ནགརཾ ཨལངྐརཱཔེཧཱི’ཏི ཨཱཧ. སོ ནགརེ བྷེརིཾ ཙརཱཔེཏྭཱ ཨཊྛཱརས ཝཱིཐིཡོ སམྨཛྫནྟུ, པུཎྞགྷཊེ ཋཔེནྟུ, དྷཛཔཏཱཀཱདཡོ ཨུསྶཱཔེནྟུ, ཏོརཎཱནི ཨུསྶཱཔེནྟུ, པཉྩཝཎྞཱནི པུཔྥཱནི ¶ ཨོཀིརནྟུ, སཀལནགརཾ ཨལངྐརོནྟུ, གནྡྷམཱལཱདཡོ གཧེཏྭཱ སུདྡྷུཏྟརཱསངྒཱ ཧུཏྭཱ སཀལནཱགརཱ པཊིཔཐཾ ཨཱགཙྪནྟུཏི ཨཱཎཱཔེསི. ཏཏོ མཧཱཛནོ སབྦཏུརིཡཱནི གྷོསཱཔཡམཱནོ གནྡྷམཱལཱདིཧཏྠོ པཊིཔཐཾ ནིཀྑནྟོ. དེཝམནུསྶཱ བྷིཀྑུབྷིཀྑུནིཡོ ཨུཔཱསཀོཔཱསིཀཱ ཨཔྤམཱཎཱ ཨཧེསུཾ. (གནྡྷམཱལཱདི པུཎྞགྷཊསམུསྶིཏདྷཛཱཀིཎྞཱ) པརིསཱ ཝེལུཀྑེཔསཧསྶཱནི པཝཏྟཡིཾསུ. སུགནྡྷཝཱཏཱབྷིགྷཱཏསམུདྡགྷོསོ ཝིཡ སཀལནགརཾ ཨེཀནིནྣཱདཛཱཏཾ. སོ རཱཛཱ ནགརེ བནྡྷནཱགཱརེ སབྦསཏྟེ བནྡྷནཱ མུཉྩནྟུ, དྷམྨེན སམེན ཨནུསཱསནྟུཏི ཝཏྭཱ དྷཱཏུཾ གཧེཏྭཱ ཨཏྟནོ ནགརཾ པཝེསེཏྭཱ ཨཏྟནོ རཱཛནིཝེསནཾ ཨཱགནྟྭཱ ནཱཊཀཱིནཾ སཉྙམདཱསི དྷཱཏུཾ ཝནྡནྟུཏི. ནཱཊཀཱི ནཱནཱབྷརཎེཧི པཏིམཎྜིཏཱ རཱཛགེཧཏོ ནིཀྑམིཏྭཱ དྷཱཏུཾ ཝནྡིཏྭཱ ཨཏྟནོ ཨཏྟནོ ཧཏྠགཏཱནི ཏུརིཡབྷཎྜཱནི སཱདྷུཀཾ པགྒཎྷིཏྭཱ མཧནྟཾ པཱུཛམཀཾསུ.

ཏཏོ ཝཌྜྷཀིཾ པཀྐོསཱཔེཏྭཱ རཱཛནིཝེསནཏོ ནཱཏིདཱུརེ ནཱཙྩཱསནྟེ སུབྷུམིཏལེ དྷཱཏུགྷརཾ ཀཱརཱཔེཏྭཱ མཱལཱཀམྨལཏཱཀམྨཱདིཾ པཏིཊྛཱཔེཏྭཱ དྷཱཏུགྷརེ ཝིཙིཏྟམཎྜཔཾ ཀཱརཱཔེཏྭཱན སཏྟརཏནམཡཾ དྷཱཏུཀརཎྜཀཾ ཀཱརཱཔེཏྭཱ དྷཱཏུཀརཎྜཀེ དྷཱཏུཾ ཋཔེཏྭཱ རཏནཔལླངྐ མཏྠཀེ དྷཱཏུཾ ཋཔེཏྭཱ ཨུཔརི ཝིཙིཏྟཝིཏཱནཾ བནྡྷིཏྭཱ སཱཎིཡཱ པརིཀྑིཔཱཔེཏྭཱ མཧནྟེན པརིཝཱརེན མཧནྟཾ དྷཱཏུཔཱུཛཾ ཨཀཱསི. མཧཱཛནཱ གནྡྷམཱལཾ གཧེཏྭཱ མཱསསྶ ཨཊྛཱུཔོསཐདིཝསེ དྷཱཏུཡཱ མཧནྟཾ པཱུཛཾ ཨཀཾསུ. དྷཱཏུཏོ རཾསིཡོ སམུགྒཙྪནྟི. མཧཱཛནཱ ཝིམྦྷཡཛཱཏཱ སཱདྷུཀཱརཾ ཀརོནྟི. སོམནསྶབྷཱུཏཱ སཀལནགརཝཱསིནོ བུདྡྷཱརམྨཎ པཱིཏིཾ གཧེཏྭཱ དིཝསེ དིཝསེ དྷཱཏུཡཱ མཧནྟཾ པཱུཛཾ ཀརོནྟཱ ཝཱིཏིནཱམེནྟི. པཉྩསཱིལཱནི རཀྑནྟི, བུདྡྷམཱམཀཱ དྷམྨམཱམཀཱ སངྒྷམཱམཀཱ ཧུཏྭཱ སརཎཱནི གཙྪནྟི. རཱཛཱ མཧཱཛནསྶ ཨོཝདཏི. ‘‘མེཏྟཾ བྷཱཝེཐ, ཀརུཎཾ མུདིཏཾ ཨུཔེཀྑཾ བྷཱཝེཐ, ཀུལེ ཛེཊྛཱཔཙཱཡནཀམྨཾ ཀརོཐཱ‘‘ཏི. ཨོཝདིཏྭཱ བྷིཀྑུསངྒྷསྶཔི ཙཏྟཱརོ པཙྩཡེ གངྒཱཡ མཧོ-གྷཔྤཝཏྟནཀཱལོ ¶ ཝིཡ མཧཱདཱནཾ པཝཏྟེསི. མཱཏཱཔིཏུཊྛཱནེ ཋཏྭཱ བྷིཀྑུསངྒྷཾ སངྒཎྷི. མཧཱཛནཱ ཏསྶ ཨོཝཱདེ ཋཏྭཱ དཱནཱདཱིནི པུཉྙཱནི ཀཏྭཱ ཡེབྷུཡྻེན ཏསྨིཾ ཀཱལེ མཏཱ སགྒཾ གཏཱ.

ཀལྱཱཎཝགྒམྷི པཏིཊྛིཏཱ ཛནཱ,

དཱནཱདི པུཉྙཱནི ཀརིཏྭ སབྦདཱ;

ཙུཏཱ ཙུཏཱ སབྦཛནཱ སུམཱནསཱ,

གཏཱ ཨསེསཾ སུགཏིཾ སུབྷེ རཏཱ.

རཱཛཱ དྷཱཏུཡཱ མཧནྟཾ པཱུཛཾ ཀརོནྟོ མཧགཱམེ ཝིཧཱསི. ཏེན པཏིཊྛཱཔིཏཝིཧཱརཱ ཀཐེཏབྦཱ? ཀཐཾ? ལེནཝིཧཱརཾ ཙནྡགིརིཝིཧཱརཾ ཀོཊིཔབྦཏཝིཧཱརཾ ནགརངྒཎཝིཧཱརཾ སེལཀཱ ཝིཧཱརཾ ཏལཱཀཱཝིཧཱརནྟི ཨེཝམཱདཡོ ཝིཧཱརེ པཏིཊྛཱཔེཏྭཱ ཏིཔིཊཀམཧཱཨརིཊྛཏྠེརསྶ དཀྑིཎོདཀཾ དཏྭཱ མཧཱཝིཧཱརེ ནིཡྻཱདེསི. ཨེཝཾ སོ རཱཛཱ ཡཱཝཛཱིཝཾ དྷཱཏུཾ པརིཧརིཏྭཱ པཙྪིམེ ཀཱལེ མརཎམཉྩེ ནིཔནྣོ ཨཏྟནོ པུཏྟཾ ཡཊཱལཏིསྶ ཀུམཱརཾ པཀྐོསཱཔེཏྭཱ; ཏཱཏ ཏིསྶ, ཨམྷེཧི པརིཧརིཏ ནལཱཊདྷཱཏུ པཱུཛེཧཱི’ཏི དྷཱཏུཝཾསཾ ཀཐེཏྭཱ པུཏྟཾ ཨནུསཱསིཏྭཱ ཀཱལཾ ཀཏྭཱ སགྒཔུརཾ གཏོ.

རཱཛཱ མཧཱནཱགཝརོ ཡསསྶི,

ཀཏྭཱཔི རཛྫཾ མཏིམཱ སུསདྡྷོ;

མཱནེཏྭ སངྒྷཾ ཙཏུཔཙྩཡེཧི,

ཨགཱ ཨསོཀོ ཝརདེཝལོཀཾ;

ཏསྶ པུཏྟོ ཡཊཱལཏིསྶཀུམཱརོ པིཏུ ཨཙྩཡེན པིཏརཱ ཝུཏྟནིཡཱམེནེཝ དྷཱཏུཡཱ མཧནྟཾ པཱུཛཾ ཀཱརེསི. སོ’པི དིཝསསྶ ཏཡོ ཝཱརེ དྷཱཏུཔཊྛཱནཾ ཀརོནྟོ རཛྫཾ ཀཱརེཏྭཱ ཙིརཾ ཝིཧཱསི. ཨིམིནཱ’པི པཏིཊྛཱཔིཏཝིཧཱརཱ ཀཐེཏབྦཱ; དྷམྨསཱལཝིཧཱརཾ མཧཱདྷམྨསཱལཝིཧཱརཾ སེལཱབྷཡཝིཧཱརནྟི ཨེཝམཱདཡོ ¶ པཏིཊྛཱཔེཏྭཱ-ཏིཔིཊཀམཧཱཨརིཊྛཏྠེརསྶ སདྡྷིཝིཧཱརིཀོ ཏིཔིཊཀམཧཱཨབྷཡཏྠེརོ ཨུཔརཱཛསྶ མཧཱནཱགསྶ ཨཡྻཀོ. ཏསྶ ཐེརསྶ དཀྑིཎོདཀཾ ཨདཱསི. སོ’པི རཱཛཱ ཡཱཝཛཱིཝཾ དྷཱཏུཾ པརིཧརིཏྭཱ པཙྪིམེ ཀཱལེ མརཎམཉྩེ ནིཔནྣོ ཨཏྟནོ པུཏྟཾ གོཋཱབྷཡཀུམཱརཾ པཀྐོསཱཔེཏྭཱ’དྷཱཏུཡཱ མཧནྟཾ པཱུཛཾ ཀརོནྟོ ཨཔྤམཏྟོ ཧོཧཱི’ཏི ཝཏྭཱ དྷཱཏུཝཾསཾ ཀཐེཏྭཱ ཀཱལཾ ཀཏྭཱ སགྒེ ནིབྦཏྟི.

ཡཊྛཱལཀོ ནཱམ མཧཱམཧཱིཔཏི,

མཧཱཛནསྶཏྠཀརོ གུཎཱལཡོ;

སོ དྷཱཏུཔཱུཛཾ ཝིཔུལཾ ཨནེཀདྷཱ,

ཀཏྭཱ གཏོ དེཝཔུརཾ ཨནིནྡིཏོ.

ཏསྶ པུཏྟོ གོཋཱབྷཡཀུམཱརོ པིཏུ ཨཙྩཡེན པིཏརཱ ཝུཏྟནིཡཱམེནེཝ དྷཱཏུཡཱ མཧནྟཾ པཱུཛཾ ཀཏྭཱ གོཋཱབྷཡ མཧཱརཱཛཱ ཧུཏྭཱ རཛྫཾ ཀརོནྟོ ཀཱཙརགཱམེ དསབྷཱཏིཀེ རཱཛཱནོ གྷཱཏེཏྭཱ དཎྜཀམྨཏྠཱཡ གོཋཱབྷཡམཧཱཐེརསྶ ཧཏྠོཊྛཛནཔདེ ཝསནྟསྶ མཏྟིཀལེནཝིཧཱརཾ ཁཱིརསཱལ ཝིཧཱརཾ ནཱགམཧཱཝིཧཱརཾ ཀུམྦྷསེལཝིཧཱརཾ ཙེཏིཡཔབྦཏཝིཧཱརཾ སཱནུཔབྦཏཝིཧཱརཾ ཀཎིཀཱར སེལཝིཧཱརཾ ཨམྦསེལ ཝིཧཱརཾ ཏིནྡུཀལེན ཝིཧཱརཾ ཀརཎྜཀཝིཧཱརཾ གོདྷསཱལཝིཧཱརཾ ཝཱལུཀཏིཏྠཝིཧཱརནྟི ཨེཝམཱདཡོ གངྒཱཡ པརཏཱིརེ པཉྩསཏཝིཧཱརེ ཨོརིམཏཱིརེ པཉྩསཏཝིཧཱརེ ཙཱ’ཏི ཝིཧཱརསཧསྶཾ ཀཱརེཏྭཱ ཨཏྟནོ སདིསནཱམསྶ གོཋཱབྷཡཏྠེརསྶ དཀྑིཎོདཀཾ དཏྭཱ ཨདཱསི. སོ ཡཱཝཛཱིཝཾ དྷཱཏུཔཱུཛཾ ཀཏྭཱ པཙྪིམེ ཀཱལེ མརཎམཉྩེ ནིཔནྣོ ཨཏྟནོ པུཏྟཾ ཀཱཀཝཎྞཏིསྶ ཀུམཱརཾ པཀྐོསཱཔེཏྭཱ ཨཱལིངྒིཏྭཱ;’ཏཱཏ ཏིསྶ, ཨཡཾ ནལཱཊདྷཱཏུ ཨམྷཱཀཾ པརམྤརཱཡ ཨཱགཏཱ. ཏྭཾ ཀིར དྷཱཏུཾ གཧེཏྭཱ མཧཱགངྒཱཡ པསྶེ སེརུ ནཱམ དཧསྶ ཨནྟེ ཝརཱཧ ནཱམ སོཎྜིཡཱ མཏྠཀེ པཏིཊྛཱཔེཏྭཱ སངྒྷཱརཱམཾ ཀཱརཱཔེསྶསཱི’ཏི སཏྠཱ ཛཱིཝམཱནོ ཝྱཱཀརཎམཀཱསི. ཏསྨཱ ཏྭཾ ཨིམཾ དྷཱཏུཾ གཧེཏྭཱ མམཙྩཡེན ཏསྨིཾ ཋཱནེ པཏིཊྛཱཔེཧཱི’ཏི པུཏྟཾ ཨནུསཱསིཏྭཱ ཀཱལཀིརིཡཾ ཀཏྭཱ སགྒེ ནིབྦཏྟི.

གོཋཱབྷཡོ ¶ ནཱམ མཧཱིཔཏིསྶརོ,

མཧཱཛནེ ཏོསཡི ཨཔྤམཏྟོ;

སོ དྷཱཏུཔཱུཛཾ ཝིཔུལཾ ཀརིཏྭཱ,

ཨགཱ ཨསོཀོ ཝརདེཝལོཀཾ.

མཧཱནནྡོ མཧཱཔཉྙོ ཙནྡགུཏྟོ བཧུསྶུཏོ;

བྷདྡསེནོ མཧཱཐེརོ བྷདྡདྷམྨེ ཝིསཱརདོ.

ཛཡསེནོ ཙ སོ ཝཱིརོ ཐེརོ སོ སངྒྷརཀྑིཏོ;

དེཝཏྠེརོ ཙ མེདྷཱཝཱི རཀྑཀཱ དྷཱཏུ བྷདྡཀཱ.

ཨུཔརཱཛཱ མཧཱནཱགོ ཡཊྛཱལཀོ མཧཱབལོ;

གོཋཱབྷཡོ མཧཱཔུཉྙོ ཀཱཀཝཎྞོ ཙ ཝཱིརིཡཝཱ.

ཨེཏེ ཐེརཱ ཙ རཱཛཱནོ པུཉྙཝནྟོ སུམཱནསཱ;

དྷཱཏུ པརམྤརཱནཱིཏཱ དྷཱཏཱ དྷཱཏུསུཀོཝིདཱ.

ཀསྶཔཱདཱིནཐེརཱནཾ པརམྤརཱཡམཱགཏཱ;

མཧཱནཱགཱདི ཧཏྠཏོ ཡཱཝ ཏིསྶམུཔཱགཏཱ.

ཨིཏི ཨརིཡཛནཔྤསཱདནཏྠཱཡ ཀཏེ དྷཱཏུཝཾསེ

དྷཱཏུཔརམྤརཱ ཀཐཱ ནཱམ

ཏཏིཡོ པརིཙྪེདོ.

༤. ¶ པཀིཎྞཀཀཐཱ

ཏཏྲ ཋཏྭཱ རཉེཉོ ཨུཔྤཏྟི ཀཐེཏབྦཱ. (སོ པན) ཨམྷཱཀཾ སཏྠུནོ བོདྷིཔྤཏྟིཏོ པུརེཏརམེཝ མཧཱམལཡ རཊྛེ ཝནཙརཀཾ པཊིཙྩ ཏསྶ བྷརིཡཱཡ ཀུཙྪིཡཾ པཊིསནྡྷིཾ གཎྷི. ནཝཌྜྷམཱསཱཝསཱནེ མཱཏུཀུཙྪིཏོ ནིཀྑམིཏྭཱ ཀམེན ཝཌྜྷནྟོ ཝིཉྙུབྷཱཝཾ པཱཔུཎི. ཏསྶ པིཏཱ ཨེཀཾ དཱརིཀཾ ཨཱནེཏྭཱ པུཏྟསྶ གེཧེ ཨཀཱསི. ཨཔརབྷཱགེ ཏསྶ པིཏཱ ཀཱལམཀཱསི. ཀུམཱརོ’ཙརཀོ’ཏི པཉྙཱཡི. སོ ཏཏོ པཊྛཱཡ པཙྩེཀབུདྡྷཾ ཨུཔཊྛཧི. ཙརཀོ ཨཏྟནོ ནིཝཱསཝཏྠུསྨིཾ ཀདལིཔནསཱདཱིནི རོཔེཏྭཱ ཕལཱརཱམཾ ཨཀཱསི. ཏཏོ ཨཔརབྷཱགེ ཏེན རོཔིཏཔནསརུཀྑོ མཧནྟཾ ཙཱཊིཔྤམཱཎཾ པནསཕལཾ གཎྷི. ཙརཀོ ཨཏྟནོ ཝཏྠུཾ གནྟྭཱ སཱཁཱཡ སུཔཀྐཾ པནསཕལཾ པསྶིཏྭཱ ཚིནྡིཏྭཱ གེཧཾ ཨཱཧརིཏྭཱ ཨཔསྶཱཡཾ ལུཉྩིཏྭཱ ཨུཔདྷཱརེསི. ཏཏོ སམནྟཱ ཙཏུམདྷུརཾ ཝིཡ ཡཱུསཾ ཨོཏརིཏྭཱ ཨཔསྶཡཾ ཨཔནཱིཏ ཨཱཝཱཊཾ པཱུརེཏྭཱ ཨཊྛཱསི. ཏཏོ ཙརཀོ ཨེཝཾ ཙིནྟེསི. ཨིམཾ པནསཕལཾ ཨམྷཱཀཾ པཙྩེཀབུདྡྷེན ཝིནཱ ཨཉྙེསཾ ནཱནུཙྪཝིཀནྟི. པཊིསཱམེཏྭཱ ཋཔེསི.

པུནདིཝསེ པཙྩེཀབུདྡྷོ ལེནཏོ ནིཀྑམིཏྭཱ སརཱིརཔཊིཛགྒནཾ ཀཏྭཱ སུརཏྟཔལླཝསདིསཾ ཨནྟརཝཱསཀཾ པརིམཎྜལཾ ཀཏྭཱ ནིཝཱསེཏྭཱ བཧལཔཝརམཧཱཔཾསུཀཱུལཙཱིཝརཾ པཱརུཔིཏྭཱ ནཱིལབྷམརཝཎྞཾ པཏྟཾ ཧཏྠེན གཧེཏྭཱ ཨཱཀཱསེན ཨཱགནྟྭཱ ཏསྶ ཀུཊིདྭཱརེ པཱཀཊོ ཨཧོསི. ཙརཀོ ཀུཊིཏོ ནིཀྑམིཏྭཱ ཏཾ ཝནྡིཏྭཱ ཧཏྠཏོ པཏྟཾ གཧེཏྭཱ གེཧཾ པཝེསེཏྭཱ པཱིཋེ ནིསཱིདཱཔེཏྭཱ ཨཏྟནཱ ཋཔིཏཊྛཱནཏོ པནསཕལཾ གཧེཏྭཱ ཡཱུསཾ པཏྟེ པཱུརེཏྭཱ པཊིགྒཧཱཔེསི. པཙྩེཀབུདྡྷོ ¶ ཏཾ པརིབྷུཉྫིཏྭཱ ཨཱཀཱསཏོ ཨཏྟནོ ཝསནཊྛཱནམེཝ གཏོ. ཨཐེཀདིཝསཾ ཙརཀོ པརདེསཱ གཙྪནྟོ བྷརིཡཾ པཀྐོསཱཔེཏྭཱ;’ ཨམྨ, ཨཡྻསྶ ཨཔྤམཏྟོ ཧུཏྭཱ དཱནཾ དེཧཱི’ཏི སབྦཱུཔཀརཎཾ ནིཡྻཱདེཏྭཱ པརདེསཾ གཏོ. པུནདིཝསེ པཙྩེཀབུདྡྷོ ལེནཏོ ནིཀྑམིཏྭཱ ཙཱིཝརཾ པཱརུཔིཏྭཱ པཏྟམཱདཱཡ ཨཱཀཱསཏོ ཨཱགནྟྭཱ ཀུཊིདྭཱརེ ཨོཏརིཏྭཱ ཨཊྛཱསི. ཏསྨིཾ ཁཎེ ཙརཀསྶ བྷརིཡཱ ཀུཊིཏོ ནིཀྑམིཏྭཱ པཙྩེཀབུདྡྷསྶ ཧཏྠཏོ པཏྟཾ གཧེཏྭཱ གེཧེ ནིསཱིདཱཔེཏྭཱ བྷཏྟཾ ཨདཱསི.

ཏེན བྷཏྟཀིཙྩེ པརིནིཊྛིཏེ སཱ ཏརུཎཔཙྩེཀབུདྡྷཾ པསྶིཏྭཱ ཀིལེསཔཊིསཾཡུཏྟཾ ཙིཏྟཾ ཨུཔྤཱདེཏྭཱ པཙྩེཀབུདྡྷསྶ ཨཏྟནོ ཨཛ྄ཛྷཱསཡཾ ཀཐེསི. པཙྩེཀབུདྡྷོ ཏསྶཱ ཀཐཾ སུཏྭཱ ཛིགུཙྪམཱནོ ཨུཔྤཏིཏྭཱ ཨཱཀཱསཏོ ཨཏྟནོ ཝསནཊྛཱནམེཝ གཏོ. སཱ པཙྩེཀབུདྡྷསྶ གཏཀཱལེ ཨཏྟནོ སརཱིརཾ ཏེལེན མཀྑེཏྭཱ བྷཎྜནཀཱ ཝིཡ ནིཏྠུནམཱནཱ མཉྩེ ནིཔཛྫི. ཙརཀོ པརདེསཏོ ཨཱགནྟྭཱ བྷརིཡཾ ནིཔཛྫམཱནཾ ཨེཝམཱཧ?’བྷདྡེ, ཀིཾ ཨཡྻསྶ བྷིཀྑཾ ཨདཱསཱི’ཏི. སཱ ནིཏྠུནམཱནཱ ཨཱཧ? མཱ པུཙྪ ཏཝ ཨཡྻསྶ ཀམྨནྟི. ཀཐེཧི བྷདྡེ, ཀིཾ ཏེན ཀམྨཾ ཀཏནྟི. སོ ཨཏྟནཱ སདྡྷིཾ ཀིལེསཝསྣེ ཨོཀཱསཾ ཀཱརཱཔེཏུཾ ཝཱཡམིཏྭཱ མཡཱ ཨཡུཏྟནྟི ཝུཏྟེ མམ ཀེསེ གཧེཏྭཱ ཧཏྠཔཱདེཧི ཨཱཀོཊེཏྭཱ སརཱིརཾ ནཁེན ཨོཏྠརིཏྭཱ སཱིསེ པཧརིཏྭཱ གཏོ’ཏི ཝུཏྟེ ཙརཀོ ཏཾ སུཏྭཱ ཨསཧནྟོ (ཨེསོ མཡཱ) ཨེཝརཱུཔསྶ ཨསྶམཎཀམྨསྶ པོསིཏོ’ཏི ཝཏྭཱ ཏསྶཱ སོཀཾ ཝིནོདེཏྭཱ དྷནུཾ ཨཱདཱཡ ཏིཀྑསརཾ གཧེཏྭཱ ཨེཏཾ མཱརེཏྭཱ ཨཱགམིསྶཱམཱི’ཏི ཝཏྭཱ ཝསནཊྛཱནཾ ཨགམཱསི.

ཏསྨིཾ སམཡེ པཙྩེཀབུདྡྷོ ནཧཱནཏྠཱཡ གཏོ. གནྟྭཱ ཙ པན ཀཱཡབནྡྷནཾ ཨཱཀཱསེ ཙཱིཝརཝཾསཾ ཝིཡ ཀཏྭཱ ནིཝཱསནཔཱཔུརཎཾ ཏསྨིཾ ཋཔེཏྭཱ ཛལསཱཊཀཾ ནིཝཱསེཏྭཱ ཨུདཀམཏྠཀཱ ཨཱཀཱསེ ནིསཱིདིཏྭཱ ནཧཱཡིཏུཾ ཨཱརབྷི. ཙརཀོ པཙྩེཀབུདྡྷསྶ གརུགཱརཝཀཱརཎཾ པསྶནྟོ གུམྦནྟརེ ནིལཱིནོ ¶ ཨཊྛཱསི. ཋཏྭཱ ཙ པན ཨེཝརཱུཔཾ ཨཙྪརིཡཾ དིསྭཱ ཙིནྟེསི? ཨཡཉྩ ཨེཝརཱུཔཾ ན ཀརོཏི, ཨདྡྷཱ ཨེསཱ མུསཱཝཱདཱ’ཏི. ཨཧཾ ཨེཏིསྶཱ ཝཙནཾ གཧེཏྭཱ ཨེཝརཱུཔསྶ སམཎསྶ ཨཀཱརཎེ ཨཔརཱདྷཾ ཀཏཾ. ཨེསོ ཏཱདིསཾ ན ཀརོཏཱི’ཏི ཙིནྟེཏྭཱ པཙྩེཀབུདྡྷསྶ ནཧཏྭཱ ཋཱིཏཀཱལེ གནྟྭཱ པཱདེསུ ནིཔཏིཏྭཱ?’མཡ྄ཧཾ ཁམཐ ཨཡྻཱ’ཏི ཨཱཧ. པཙྩེཀ བུདྡྷོ? ཀིཾ ཀཐེསི ཨུཔཱསཀཱ’ཏི. སོ ཨཏྟནོ མཱཏུགཱམསྶ ཀཐིཏཾ ཨཱཙིཀྑི. ཨེཝཉྷི སཏི ཨུཔཱསཀ ཏུམྷཱཀཾ ཨཱགཏཀམྨཾ ནིཊྛཔེཏྭཱ གནྟུཾ ཝཊྚཏཱི’ཏི ཨཱཧ. མཱ ཨེཝཾ ཀཐེཐ སཱམི, ཨཧཾ ཨཉྙཱཎབྷཱཝེན ཏསྶཱ ཝཙནཾ གཧེཏྭཱ ཏུམྷཱཀཾ ཨཀཱརཎེ དུབྦྷིཏུཾ ཨཱགཏོམྷི’ཏི སབྦཾ ཨཏྟནཱ ཙིནྟིཏཾ ཨཱཙིཀྑི.

པཙྩེཀབུདྡྷོ? ཨཱམ ཨུཔཱསཀ, སཱ ཨཏྟནཱ སདྡྷིཾ ཨསདྡྷམྨཔཊིསཾཡུཏྟཀཐཾ ཀཐེསཱི’ཏི ཨཱཧ. སོ ཏསྶཱ ཀུཛ྄ཛྷིཏྭཱ ཨཧཾ ཨེཏཾ ནིསྶཱཡ ཨིམསྶ ཨཔརཛ྄ཛྷཱམི. གནྟྭཱ ཏཾ མཱརེསྶཱམཱི’ཏི པཙྩེཀབུདྡྷཾ པཉྩཔཏིཊྛིཏེན ཝནྡིཏྭཱ ནིཀྑམི. པཙྩེཀབུདྡྷོ ཏཾ ནིཝཏྟེཏྭཱ མཱཏུགཱམཾ མཱ མཱརེཧཱི’ཏི ཨནེཀཝིདྷཱནི ཀཱརཎཱནི ཀཐེཏྭཱ པཉྩསཱིལེ པཏིཊྛཔེཏྭཱ ཏསྶ དྷམྨཾ དེསེནྟོ ཨིམཾ གཱཐམཱཧ?

ཡོ ཨཔྤདུཊྛསྶ ནརསྶ དུསྶཏི,

སུདྡྷསྶ པོསསྶ ཨནངྒཎསྶ;

ཏམེཝ བཱལཾ པཙྩེཏི པཱཔཾ,

སུཁུམོ རཛོ པཊིཝཱཏཾཝ ཁིཏྟོ’ཏི;

ཙརཀོ ཏསྶ དྷམྨདེསནཾ སུཏྭཱ པསནྟཙིཏྟོ ཧུཏྭཱ པཉྩཔཏིཊྛིཏེན ཝནྡིཏྭཱ གེཧཾ གནྟྭཱ ཏཱཡ སདྡྷིཾ སམགྒཝཱསཾ ཝསིཏྭཱ ཏཏོ པཊྛཱཡ ཡཱཝཛཱིཝཾ པཙྩེཀབུདྡྷསྶ ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱདཡོ པརིཀྑཱརེ ཙ དཏྭཱ པཊིཛགྒི. སོ ཏསྨིཾཡེཝ ལེནེ ཝསནྟོ ཨཔརབྷཱགེ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡི.

སཡམྦྷུཉཱཎེན ¶ ཝིགཡ྄ཧ དྷམྨཾ,

དུཀྑཾ ཨནནྟཾ སཀལཾ པཧཱཡ;

སམཱདྷིཛྷཱནཱབྷིརཏོ ཡསསྶི,

གཏོ ཝིནཱསཾ པཝརོ ཡསསྶི.

ཨཐ པཙྪཱ ཙརཀོ ཀཱལཾ ཀཏྭཱ སགྒེ ནིབྦཏྟི. ཏཏྠ ཙིརཾ དིབྦསམྤཏྟིཾ ཨནུབྷཝིཏྭཱ དེཝལོཀཏོ ཙཝིཏྭཱ ཨིམསྨིཾ དཱིཔེ མལཡ རཊྛེ ཨམརུཔྤལ ལེནསྶ ཨཱསནྣཊྛཱནེ ཨུཔཙརཀསྶ པུཏྟོ ཧུཏྭཱ ནིབྦཏྟི. སོ ནཝམཱསཌྜྷཔརིཡོསཱནེ མཱཏུཀུཙྪིཏོ ནིཀྑམི. ཏསྶ ནཱམགཧཎདིཝསེ ཉཱཏཀཱ ཨམརུཔྤལ ཀུམཱརོཏི ནཱམཾ ཨཀཾསུ. སོ པན ཨཔརབྷཱགེ ཝཌྜྷེནྟོ དཱརཀེཧི སདྡྷིཾ ཀཱིལ༹ནྟོ པཏྟཔུཊེན ཝཱལུཀབྷཏྟཾ པཙིཏྭཱ, དཱརཀཱ ཨིམེ སམཎཱཏི ཝཏྭཱ པཊིཔཱཊིཡཱ ནིསཱིདཱཔེཏྭཱ དཱནཾ དསྶཱམཱི’ཏི ཝཏྭཱ ཀཱིལཱ༹དཱནཾ དེཏི. ཨེཀདིཝསཾ ཨམརུཔྤལ ཀུམཱརོ ཝཱལུཀཐུཔཾ ཀཏྭཱ ཨཏྟནོ ནིཝཱསནཝཏྠདུསྶཾ གཧེཏྭཱ ཁུདྡཀདཎྜཀེ བནྡྷིཏྭཱ པཊཱཀཾ ཀཏྭཱ པཱུཛནཏྠཱཡ ཋཔེསི. ཨམརུཔྤལ ལེནཝཱསཱི མལིཡ དེཝཏྠེརཾ ནིསྶཱཡ དཱནཱདཱིནི པུཉྙཱནི ཀཏྭཱ ཏཏོ ཙུཏོ ཨིམསྨིཾཡེཝ དཱིཔེ མཧཱགཱམེ གོཋཱབྷཡམཧཱརཱཛསྶ ཨགྒམཧེསིཡཱ ཀུཙྪིམྷི པཊིསནྡྷིཾ གཎྷི. སོ ནཝམཱསཌྜྷཔརིཡོསཱནེ མཱཏུཀུཙྪིཏོ ནིཀྑམི. ཏསྶ ནཱམགཧཎ དིཝསེ’ཀཱཀཝཎྞཏིསྶོ’ཏི ནཱམཾ ཨཀཾསུ. སོ ཨནུཔུབྦེན ཝཌྜྷིཏྭཱ པིཏུ ཨཙྩཡེན ཚཏྟཾ ཨུསྶཱཔེཏྭཱ ཀཱཀཝཎྞཏིསྶམཧཱརཱཛཱ ཨཧོསི. ཏསྶ ཚཏྟེ ཨུསྶཱཔིཏེཡེཝ སཀལརཊྛཾ སུབྷིཀྑཾ ཨཧོསི. པཉྩ ཝཱ དྭཱདས ཝཱ དིཝསེ ཨནཏིཀྐམིཏྭཱ དེཝོ སམྨཱ ཝསྶཏི. ཝེསྶནྟརབོདྷིསཏྟསྶ དཱནགྒེ ཡཱཙཀཱནཾ ཧཏྠེ བྷིཀྑཱབྷཱཛནཾ ཝིཡ ཏསྨིཾ ཀཱལེ ཝཱཔཱིཔོཀྑརཎཱི-ནདཱི-ཀནྡར-སོབྦྷ-ཛཱཏསརཱདཡོ ཝསྶོདཀེན པཱུརིཏཱ ཨཧེསུཾ. པཉྩཝིདྷཔདུམསཉྪནྣཱ ཨནེཀདིཛསམཱཀིཎྞཱ ནཱནཱརུཀྑེཧི ཝིརོཙིཏཱ ཨཧེསུཾ. ནཱནཱ སསྶཱནི སམྤཛྫིཾསུ, ཨུཏྟརཀུརུ ཨཱལཀམནྡཱ རཱཛདྷཱནིསདིསཾཝ ཧིརཉྙསུཝཎྞཱདི རཏནཊྛཱནཾ.

སོ ¶ རཱཛཱ སདྡྷཱཡ སམྤནྣོ མཧཱབྷིཀྑུསངྒྷསྶ ཙཏྟཱརོ པཙྩཡེ ཨནཱུནཾ ཀཏྭཱ དཱཔེསི. སཊྛིམཏྟཱནཾ ཏིཔིཊཀདྷརཱནཾ ཙནྡནདོཎིཡཱ སཏཔཱཀཏེལསྶ པཱུརཱཔེཏྭཱ ཡཱཝཔིཊྛིཔཱདཾ ཏཱཝ ཨོསཱིདཱཔེཏྭཱ ནིསིནྣཱནཾ ལཊྛིམ དྷུདནྟཀཊྛཾ ཙཏུམདྷུརཾ པཀྑིཔིཏྭཱ དཱཔེསི. ཨུཙྪུཀཎྜ-སཀྑརཱ-ནཱལིཀེར-ཕལམཱུལཁནྡྷཁཱདནཉྩ ནཱནཱཝིདྷམཙྪརསེཧི སུགནྡྷསཱལིཏཎྜུལེན སཱདྷིཏཡཱགུབྷཏྟཉྩ པཱཏོཝ ཨདཱསི. ཨནྟརཱབྷཏྟེ ཨཊྛཱརསཝིདྷ-ཨནྟརཁཛྫཀཉྩ ཨུཙྪུཀདལིཔནསཕལཱདཡོ ཙ ནཱནཱཝིདྷོཏྟརིབྷངྒེན སདྡྷིཾ སུགནྡྷསཱལིཏཎྜུལབྷཏྟཾ ནཱནགྒརསཾ དཱཔེཏྭཱ པཙྪཱབྷཏྟཾ ཨཊྛཝིདྷཀཔྤཱིཡཔཱནཀེ ཙ དཱཔེསི. ཨཉྙེ སམཎཔརིཀྑཱརེ ཙ དཱཔེསི. ཨིམིནཱ ནིཡཱམེནེཝ བྷིཀྑུསངྒྷསྶ ཏིཔིཊཀདྷརབྷིཀྑཱུནཉྩ ནིརནྟརཾ མཧཱ དཱནཾ དཏྭཱ ཝསཏི.

ཨཐཱཔརེན སམཡེན ཀལྱཱཎིཡཾ སིཝོ ནཱམ མཧཱརཱཛཱ ཨཏྟནོ བྷཱགིནེཡྻསྶ ཨབྷཡཀུམཱརསྶ ཀཱཀཝཎྞཏིསྶ རཉྙོ བྷགིནིཡཱ སོམདེཝིཡཱ ནཱམ རཱཛཔུཏྟིཡཱ ཨཱཝཱཧམངྒལཾ ཀཏྭཱ ཨཱནེཏྭཱ པཱདཔརིཙཱརིཀཾ དཱཔེསི. དཏྭཱ ཙ པན ཨབྷཡ ཀུམཱརཾ གིརིནགརམྷི ནིསཱིདཱཔེསཱི. སོ གིརིནགརེ རཛྫཾ ཀཱརཱཔེཏྭཱ གིརིཨབྷཡོ ནཱམ རཱཛཱ ཧུཏྭཱ མཧནྟཾ སམྤཏྟིཾ ཨནུབྷཝམཱནོ ཝིཧཱསི. ཏཏོ ཨཔརབྷཱགེ ཀཱཀཝཎྞཏིསྶ མཧཱརཱཛཱ མཧཱགཱམེ ཝིཧརནྟོ ཨཉྙཏརསྶ བྷིཀྑུསྶ གཏྟེ མངྐུནཱ དཊྛཊྛཱནེ གཎྜཾ ཨུཊྛིཏཾ དིསྭཱ ཀིམེཏཾ ཨཡྻཱ’ཏི པུཙྪི. མངྐུནཱ དཊྛཊྛཱནཾ མཧཱརཱཛཱཏི. ཏཾ སུཏྭཱ སཾཝེགཔྤཏྟོ, བྷནྟེ མངྐུནཱ ཀིསྨིཾ ན བྷཝནྟི’ཏི པུཙྪི. པཊྚསཱཊཀེ ན བྷཝནྟི’ཏི. ཨིམེ པན བྷདྡནྟཱ པཊྚསཱཊཀེ ཀུཏོ ལབྷནྟཱི’ཏི ཙིནྟེཏྭཱ གཏོ. ཏཾ དིཝསམེཝ པཱནཱིཡམཱལ༹ཀེ ནིསིནྣོ ཏིཔིཊཀཏིསྶཏྠེརོ ནཱམ རཉྙོ བུདྡྷསཱིཧནཱདསུཏྟཾ ནཱམ ཀཐེསི. སོ ཐེརེ པསནྣོ; ཨུཏྟརཱསངྒེ དཱིཡམཱནེ’ཨེཀསཱཊཀོ བྷཝིསྶཱམི’ ཏསྨཱ ཨིམམེཝ དཱཏུཾ ན སཀྐཱ, ཀཐཾ ཀརིསྶཱམཱི’ཏི ཙིནྟེནྟོ ཐེརེན སདྡྷིཾ ཀཐཡམཱནོ ཏཏྠ མཱལ༹ཀེཡེཝ ཨཊྛཱསི. ཏསྨིཾ ཁཎེ ཨེཀོ ཀཱཀོ ཨམྦསཱཁནྟརེ ནིསཱིདིཏྭཱ

སདྡཾ ¶ ཀརོནྟོ ཨེཝམཱཙིཀྑི. ཨཡྻ ཀཱཀཝཎྞཏིསྶམཧཱརཱཛ, ཏུམྷཱཀཾ ཀངྑཱ ནཱམ ནཏྠཱི, པསཱདཀྑཎེ དྷམྨཀཐིཀསྶ ཨུཏྟརཱསངྒཾ དེཧཱི’ཏི ཨཱཧ.

(ཀཱཀོ སོ ཀཱཀཝཎྞསྶ ཝདེཏི ཝཙནཀྑམོ,

པསཱདཛཱཏོ ཐེརསྶ ཏུཝཾ སདྡྷམྨདེསནེ;

དདཱཧི ཨུཏྟརཱསངྒཾ མཧཱཐེརསྶ བྷཱུམིཔཱ’ཏི.)

མཧཱརཱཛ, ཨཧཾ ཏུམྷཱཀཾ པཉྩསཱསནཾ གཧེཏྭཱ ཨཱགཏོ. ཝིཧཱརདེཝི པུཏྟཾ ཝིཛཱཡི. ཨིདམེཀཾ སཱསནཾ. ཨེཀཱ ཀརེཎུཀཱ སུཝཱིརཧཏྠིཔོཏཀཾ ཏིཏྠསརེ ཝིཛཱཡཱི. ཨིདཾ དུཏིཡཾ སཱསནཾ. གོཋསམུདྡམཛ྄ཛྷེན སཏྟམཏྟཱ ནཱཝཱ པཊྚནེ པཙྩུཊྛིཏཱ, ཨིདཾ ཏཏིཡཾ སཱསནཾ ཨུཏྟར ཝཌྜྷམཱནཔབྦཏཔཱདེ དྭིཀརཱིསཔྤམཱཎེ ཁེཏྟེ ཏརུཎཏཱལཀྑནྡྷཔྤམཱཎཱ སུཝཎྞཀྑནྡྷཱ ཨུགྒཙྪིཾསུ, ཨིདཾ ཙཏུཏྠཾ སཱསནཾ. གིརིཔབྦཏཔཱདེ ཀོཊ རཊྛཀ ཝིཧཱརེ ཀོཊརཊྛཀོ ནཱམ ཐེརོ མགྒོཔསམཾ ཝཏྭཱ གིརིཔབྦཏམཏྠཀེ སཏྟཏཱལཔྤམཱཎཾ ཨུགྒནྟྭཱ ཨཱཀཱསེ ནིསིནྣོ པརིནིབྦཱཡི, ཨིདཾ པཉྩམཾ སཱསནཾ.

(པུཏྟོ ཧཏྠཱི ཙ ནཱཝཱ ཙ ཙཏུཏྠཾ ཧེམཁནྡྷཀཾ;

ཐེརསྶ པརིནིབྦཱནཾ པཉྩམཾ སཱསནཾ ཨིདཾ.

ཨིམཾ གཧེཏྭཱན ཨཧཾ ཨཱགཏོ ཏཝ སནྟིཀཾ;

སཱསནཾ ཨཱིདིསཾ སུཏྭཱ པུཉྙཀམྨེ རཏོ བྷཝ.

ཝཏྠཾ སཧསཱ དཱཔེཧི ཀཏོ སབྦསམཱགམོ;

ཨིདཾ ནིཙྩཾ ཛཱནནྟོ ཀིཾ ལགྒོ ཨུཏྟརཱསངྒེ’ཏི.)

རཱཛཱ ཀཱཀསྶ ཝཙནཾ སུཏྭཱ ཧསི. ཐེརོ? ཀསྨཱ མཧཱརཱཛ ཧསཱི’ཏི པུཙྪི. བྷནྟེ, ཨེཏསྨིཾ ཨམྦསཱཁནྟརེ ནིསཱིདིཏྭཱ སདྡཾ ཀརོནྟསྶ ཀཱཀསྶ ཀཐཾ སུཏྭཱ ཧསིནྟི སབྦཾ ཨཱརོཙེསི. ཐེརོ’པི རཉྙཱ པུརིམཏྟབྷཱཝེ ཀཏཀམྨཾ ¶ པསྶིཏྭཱ ཧསི. རཱཛཱ ཀསྨཱ ཨཡྻོ ཧསཱི’ཏི པུཙྪི. མཧཱརཱཛ, ཏུམྷཱཀཾ ཨནནྟརེ ཨཏྟབྷཱཝེ མལཡརཊྛེ ཨམརུཔྤལ ནཱམ ཀཱལེ ཀཏཀམྨཾ པསྶིཏྭཱ ཧསིཏྟི. ཏེན པུཊྛོ ཀཏཀུསལཀམྨཾ སབྦཾ ཝིཏྠཱརེན ཏསྶ ཨཱཙིཀྑི. རཱཛཱ སོམནསྶཔྤཏྟོ ཨཏྟནོ ཨུཏྟརཱསངྒཾ དཏྭཱ ཐེརཾ ཝནྡིཏྭཱ གེཧཾ གཏོ. ཀོཊརཊྛཀཝིཧཱརཾ གནྟྭཱ ཐེརསྶ སརཱིརཛ྄ཛྷཱཔནཾ ཀཱརཱཔེཏྭཱ དྷཱཏུཾ ཨཱདཱཡ ཙེཏིཡཾ ཀཱརཱཔེཏྭཱ མཧནྟཾ པཱུཛཾ ཀཏྭཱ མཧཱགཱམཾ གཏོ. སུཝཎྞཾ ཨཱཧརཱཔེཏྭཱ རཱཛངྒཎེ ཋཔཱཔེསི. གོཋསམུདྡཀུཙྪིཡཾ པཏྟ ནཱཝཱཏོ ཝཏྠཱནི ཨཱཧརཱཔེཏྭཱ བྷིཀྑུསངྒྷསྶ ཙཱིཝརཏྠཱཡ དཱཔེཏྭཱ མཧཱདཱནཾ པཝཏྟེཏྭཱ མཧཱགཱམསམཱིཔེ ཝིཧཱརཾ ཀཱརཱཔེཏྭཱ ཝིཧརནྟོ ཨཏྟནོ པུཏྟཾ དུཊྛགཱམཎིཾ པཀྐོསཱཔེཏྭཱ; ཏཱཏ, ཏྭཾ གནྟྭཱ གིརིམྷི ནགརེ ནིསཱིདཱ’ཏི ཝཏྭཱ ཨམཙྩཉྩསྶ པིཏུཊྛཱནེ ཋཔེཏྭཱ གིརིནགརཾ པཱཧེསི. ཏཾ དིསྭཱ གིརིཨབྷཡ ཀུམཱརོ ཀུམཱརེན སདྡྷིཾ ཨཱགཏབལ༹སྶ ཝཏྠཱཧཱརཱདཱིནི དཱཔེཏྭཱ མཧནྟཾ སམྨཱནཾ ཨཀཱསི. རཱཛཀུམཱརོ གིརིཔབྦཏཔཱདེ ཝིཧཱསི.

ཏཏོ ཨཔརབྷཱགེ ཛཱཏིཾ ནིསྶཱཡ ཁཏྟིཡཱནཾ ཝིཝཱདོ ཨཧོསི. སོ ཨབྷཡརཱཛཱ ཀིཾ མེཝིཝཱདེནཱ’ཏི ཨཏྟནོ བྷརིཡཱཡ སོམདེཝིཡཱ སདྡྷིཾ བལཝཱཧནཾ གཧེཏྭཱ ཨནུཀྐམེན གཙྪནྟོ སེརུནགརེ རཛྫཾ ཀཱརེནྟཾ ཨཏྟསཧཱཡཾ སིཝརཱཛཾ སནྡྷཱཡ ཏསྶ སནྟིཀཾ ཨཱགཉྫི. སོ’པི སིཝརཱཛཱ གིརིཨབྷཡརཉྙཱ སདྡྷིཾ ཨཱགཏབལ༹སྶ མཧནྟཾ སཀྐཱརཾ ཀཱརེཏྭཱ ཨཧཏཝཏྠཏིལཏཎྜུལཱདཱིནི ཨཱཧརཱཔེཏྭཱ དཱཔེསི. ཀཏིཔཱཧཙྩཡེ; སམྨ, ཀསྨཱ ཨཱགཏོསི’ཏི པུཙྪི. སོ ཨཱགཏཀཱརཎཾ སབྦམསྶ ཨཱཙིཀྑི. བྷདྡཀཾ སམྨ, ཏེ ཀཏཾ ཨཱགནྟབྦམེཝ ཨཱགཏོ. ཨཧཾ ཏེ ཀཏྟབྦཾ ཛཱནིསྶཱམི. ཏྭཾ མཱ ཙིནྟཡཱི’ཏི ཝཏྭཱ ཏསྶ ཝསནཏྠཱཡ ནགརབྷཱུམིཾ གཝེསནྟོ སརཀོཊིཡཾ ཨཏིརམཎཱིཡབྷཱུམིཾ པསྶིཏྭཱ ཏསྨིཾ བྷཱུམིབྷཱགེ སོ ནགརཾ མཱཔེཏྭཱ དེཝིཡཱ ཨེཀསདིསནཱམཾ ཀརིསྶཱམཱི’ཏི སོམནགརནྟི ནཱམཾ ཨཀཱསི. ཏཾ ནགརཾ སུསམིདྡྷཾ སམྤནྣདྷནདྷཉྙཱདཱིཧི ཨུཔཀརཎེཧི དྭཱརཊྚཱལཀགོཔུརཔརིཁཱཔོཀྑར-ཎིཡཱདཱིཧི ¶ སཧིཏཾ ཧཏྠིཨསྶརཐཔཏྟིཨཱདཱིཧི སམཱཀུལཾ སངྑཔཎཝབྷེརིསདྡཱདཱིཧི སམཱཀིཎྞཾ ནགརཾ ཨཧོསི. སོ ཨབྷཡོ ཙིརཾ སོམནགརེ མཧནྟཾ ཨིསྶརིཡཾ ཨནུབྷཝནྟོ ཝིཧཱསི.

ཨཐཱཔརསྨིཾ ཀཱལེ སོམདེཝཱི རཉྙཱ སདྡྷིཾ ཀཐེསི; ཨཡྻ ཨམྷཱཀཾ པཊིསརཎཾ ཙེཏིཡཉྩ ཝིཧཱརཉྩ ཀཱརེཏུཾ ཝཊྚཏཱི’ཏི. བྷདྡཀཾ ཏེ ཀཐིཏནྟི སོམནསྶཔྤཏྟོ ཧུཏྭཱ ཝིཧཱརབྷཱུམིཾ གཝེསནྟོ ནགརཏོ ནཱཏིདུརེ ནཱཙྩཱསནྣེ མཧནྟཾ སཱལཝནཾ ཨཏྠི. ཏཾ པསྶིཏུཾ གཏོ. ཏདཱ ཏསྨིཾ སཱལཝནེ མཧཱཨརིཊྛཏྠེརསྶ ཝཾསེ མཧཱམཧིནྡཏྠེརོ ནཱམ ཨེཀོ ཐེརོ ཨཏྠི. སོ སཊྛིམཏྟེ བྷིཀྑཱུ གཧེཏྭཱ ཝིཧརཏི. ཏཾ དིསྭཱ ཨིརིཡཱཔཐེ པསནྣོ ཐེརཾ ཨེཝམཱཧ; ‘ཨཡྻ ཏུམྷཱཀཾ ཨིམསྨིཾ སཱལཝནེ ཝིཧཱརཾ ཀརིསྶཱམི’ཏི. ཐེརོ ཏསྶ ཝཙནཾ སུཏྭཱ ཏུཎྷཱིཧཱཝེན ཨདྷིཝཱསེསི. རཱཛཱ སོམནསྶཔྤཏྟོ ཐེརཾ ཝནྡིཏྭཱ ནགརམེཝ གནྟྭཱ སོམདེཝིཾ ཨཱམནྟེཏྭཱ; བྷདྡེསོམདེཝི, ཨམྷཱཀཾ མནོརཐོ མཏྠཀཾ པཏྟོ. ཝིཧཱརཀརཎཏྠཱཡ མནཱཔོ བྷཱུམིབྷཱགོ ལདྡྷོ. ཏཏྠ ཙ མཧིནྡོ ནཱམ ཐེརོ སམཎཱནཾ སཊྛིམཏྟཾ གཧེཏྭཱ ཝིཧརཏི. ཏཾ ཝནྡིཏྭཱ ཝིཧརཎཏྠཱཡ པཊིཉྙཾ གཧེཏྭཱ ཨཱགཏོ. ཏཏྠ ཝིཧཱརཾ ཀརིསྶཱམཱི’ཏི ཨཱཧ. སཱ ཏཾ སུཏྭཱ སོམནསྶཔྤཏྟཱ སཱདྷཱུ’ཏི སམྤཊིཙྪི. པུནདིཝསེ དེཝིཡཱ སདྡྷིཾ ཐེརསྶ སནྟིཀཾ གནྟྭཱ ཝནྡིཏྭཱ ཨེཀམནྟཾ ནིསཱིདི. ཐེརོ ཏེསཾ མཧཱསམཡསུཏྟཾ ཀཐེསི. ཏེ ཨུབྷོ’པི དྷམྨཾ སུཏྭཱ སོམནསྶཛཱཏཱ ཨཧེསུཾ. ཨཐ རཱཛཱ ཨཡྻ དྷཱཏུཾ ཀུཏོ ལབྷིསྶཱམཱ’ཏི ཐེརཾ པུཙྪི. མཱ ཙིནྟཡི མཧཱརཱཛ, དྷཱཏུཾ ཨམྷེ ཛཱནིསྶཱམཱ’ཏི ཨཱཙིཀྑི.

སོ ཏཏོ པཊྛཱཡ ཝིཧཱརབྷུམིཾ སོདྷཱཔེཏྭཱ ཁཱཎུཀཎྚཀཱདཡོ ནཱིཧརིཏྭཱ བྷེརིཏལམིཝ རམཎཱིཡཾ སམཾ ཀཱརཱཔེཏྭཱ ཨིཊྛཀཝཌྜྷཀིཾ པཀྐོསཱཔེཏྭཱ ཨིཊྛཙིཏཾ ཀཱརཱཔེཏྭཱ ཙེཏིཡཀམྨཾ པཊྛཔེསི. ཝཌྜྷཀཱི ཙེཏིཡཾ ཙིནནྟོ ཀཏིཔཱཧེན པུཔྥཱདྷཱནཏྟཡཾ ནིཊྛཔེཏྭཱ དྷཱཏུགབྦྷེ སབྦཾ ཀཏྟབྦཾ ཀམྨཾ ནིཊྛཔེཏྭཱ རཉྙོ པཊིཝེདེསི. རཱཛཱ, ཨཱགནྟྭཱ ཐེརསྶ ཨཱརོཙེསི. ནིཊྛཱཔིཏོ ཨཡྻ དྷཱཏུ གབྦྷོ’ཏི. ཐེརོ རཉྙོ ཝཙནཾ སུཏྭཱ ཨཏྟནཱ པརིཧརིཏཾ ¶ ཏཐཱགཏསྶ དཀྑིཎདཱཋཱདྷཱཏུཾ ཏསྶ ཨདཱསི. རཱཛཱ དྷཱཏུཾ གཧེཏྭཱ སུནཀྑཏྟེན སུམུཧུཏྟེན མཧཏཱ པརིཝཱརེན དྷཱཏུགབྦྷེ ནིདཧིཏྭཱ ཨཏིམནོརམཾ ཨུདཀབུབྦུལ༹ཀེལཱསཀུཊཔཊིབྷཱགཾ ཙེཏིཡཾ ཀཱརཱཔེསི.

སདྡྷཱདིགུཎསམྤནྣོ ལོཀསཱསནརཀྑཀོ;

སཙེཏིཡཾ མཧཱརཱཛཱ ཀཱརཱཔེསི ཝིཧཱརཀཾ.

ཏཏོ ཐེརསྶ སནྟིཀེ སཊྛིམཏྟཱནཾ བྷིཀྑུནཾ ཨཏྠཱཡ སཊྛིམཏྟཱནི པརིཝེཎཱནི ཀཱརཱཔེཏྭཱ དྭཱརཊྚཱལཀཔཱཀཱརེཧི སོབྷིཏཾ ཝིཧཱརཾ ནིཊྛཔེཏྭཱ ཨཏྟནོ དེཝིཡཱ ཨེཀནཱམཾ ཀཏྭཱ མཧིནྡཏྠེརསྶ དཀྑིཎོདཀཾ དཏྭཱ གནྡྷམཱལཱདྷཱུཔདྷཛེཧི པཱུཛཾ ཀརོནྟོ དིཝསསྶ ཏིཀྑཏྟུཾ དྷཱཏུཔཊྛཱནཾ གནྟྭཱ དཱནཱདཱིནི པུཉྙཱནི ཀུརུམཱནོ གིརིཨབྷཡརཱཛཱ མཧནྟཾ སམྤཏྟིཾ ཨནུབྷཝམཱནོ སོམནགརཾ པཊིཝསཏི.

(ནགརེ སོམནཱམམྷི རམཎཱིཡེ མནོརམེ;

དེཝིཡཱ སཧ མོདནྟོ རཛྫཾ ཀཱརེསི ནཱཡཀོ.)

ཏཏོ ཝིཧཱརདེཝིཡཱ བྷཱཏཱ ཙུལླཔིཎྜཔཱཏིཡཏིསྶཏྠེརོ ནཱམ ཨེཀདིཝསཾ ཀཱཀཝཎྞཏིསྶམཧཱརཉྙོ ཨཱཡུསངྑཱརམོལོཀེནྟོ ན ཙིརཔྤཝཏྟནབྷཱཝཾ ཉཏྭཱ པུནདིཝསེ རཉྙོ སནྟིཀཾ གནྟྭཱ ཏེན སདྡྷིཾ ཀཐེསི. མཧཱརཱཛ ཏུམྷཱཀཾ ནལཱཊདྷཱཏུཡཱ སཏྠཱརཱ བྱཱཀརཎཾ དིནྣཾ;’མཧཱཝཱལུཀགངྒཱཡ དཀྑིཎབྷཱགེ སེརུ ནཱམ དཧསྶ ཨནྟེ ཝརཱཧ ནཱམ སོཎྜིཡཱ མཏྠཀེ ཨནཱགཏེ ཀཱཀཝཎྞཏིསྶོ ནཱམ མཧཱརཱཛཱ མཡ྄ཧཾ ནལཱཊདྷཱཏུཾ པཏིཊྛཔེསྶཏཱི’ཏི ཝཏྭཱ ཏཾ སནྡྷཱཡ བྷགཝཱ སམཱཔཏྟིཾ སམཱཔཛྫིཏྭཱ གཏོ. ཏསྶ ཝཙནཾ མནསིཀརོཧཱི’ཏི ཨཱཧ. ཏསྶ ཀཐཾ སུཏྭཱ ཨམྷཱཀཾ ཀུསལསམྤཏྟིཾ ཨཝིནཱསེཏྭཱ ཨཡྻསྶ ཝཙནམུདྡིསྶ ཙེཏིཡཾ ཀཱརཱཔནཏྠཱཡ གནྟབྦནྟི མནྟྭཱ བྷདྡཀཾ ཨཡྻཱ’ཏི ཐེརསྶ ཝཙནཾ སམྤཊིཙྪིཏྭཱ ཨཏྟནོ པུཏྟཾ དུཊྛགཱམཎིཾ གིརིནགརཏོ པཀྐོསཱཔེཏྭཱ མཧཱགཱམེ ནིསཱིདཱཔེཏྭཱ ནགརེ བྷེརིཾ ཙརཱཔེསི; ཨཧཾ མཧཱཝཱལུཀཱཡ གངྒཱཡ སམཱིཔེ སེརུ ནཱམ ¶ དཧསྶ ཨནྟེ ཝརཱཧ ནཱམ སོཎྜིཡཱ མཏྠཀེ ཙེཏིཡཾ ཀཱརཱཔནཏྠཱཡ གམིསྶཱམི, སབྦསེནིཡོ ཙ མཧཱ ཛནོ ཙ མཡཱ སདྡྷིཾ ཨཱགཙྪནྟུ’ཏི ཝཏྭཱ རཱཛཱ ཙུལཔིཎྜཔཱཏིཡཏིསྶཏྠེརསྶ ཏིསྶམཧཱཝིཧཱརེ སཱགལཏྠེརསྶ ཙ སནྟིཀཾ གནྟྭཱ བྷནྟེ ཏུམྷཱཀཾ པརིཝཱརེ པཉྩསཏམཏྟེ བྷིཀྑུ གཧེཏྭཱ དྷཱཏུཾ ཨུཔཊྛཧནྟཱ མཡཱ སདྡྷིཾཡེཝ ཨཱགཙྪཐཱ’ཏི ཝཏྭཱ བྷདྡམཱསེ བྷདྡདིཝསེ སུནཀྑཏྟེ སུམུཧུཏྟེ བནྡྷཱཝཱརཾ སཛྫེཏྭཱ དྷཱཏུགྷརཏོ དྷཱཏུཀརཎྜཀཾ ནཱིཧརིཏྭཱ སུསཛྫིཏརཐེ ཋཔེཏྭཱ ཨུཔརི སེཏཙྪཏྟཉྩ ཀཏྭཱ པུརཏོ པུརཏོ རཏནམཎཌཔེ ཀཱརཱཔེཏྭཱ པུརེཏརམཀཱསི.

ཏཏོ རཱཛཱ པུཏྟཾ དུཊྛགཱམཎིཾ པཀྐོསཱཔེཏྭཱ ཨནུསཱསིཏྭཱ པུཏྟཾ སདྡྷཱཏིསྶཀུམཱརཉྩ ཝིཧཱརདེཝིཉྩ གཧེཏྭཱ སཱིགྷཾ ནིཀྑམི. ཙཱུལ༹པིཎྜཔཱཏིཡཏིསྶཏྠེརོ ཙ ཨཏྟནོ པརིཝཱརེ པཉྩསཏབྷིཀྑཱུ གཧེཏྭཱ དྷཱཏུཾ ཨུཔཊྛཧནྟོ པཙྪཏོ ཨཱགཉྪི. སབྦསེནིཡོ ཙ རཱཛཱ ཙ བྷིཀྑུསངྒྷསྶ མཧཱདཱནཾ དཏྭཱ བྷིཀྑུ སངྒྷེན སདྡྷིཾ གནྟྭཱ དཱིགྷཝཱཔིཾ པཱཔུཎིཾསུ. ཏསྨིཾ སདྡྷཱཏིསྶཀུམཱརཾ ནིསཱིདཱཔེཏྭཱ ཨནུཀྐམེན ཨཱགནྟྭཱ སུམནམཱལཱཔིཊྛིཡཾ ཁནྡྷཝཱརཾ བནྡྷིཏྭཱ ནིསཱིདི. ཀསྨཱ པན ཏཾ ཋཱནཾ ཨེཝཾ ནཱམཀཾ ཛཱཏནྟི. སུམནནཱགརཱཛཱ སཏྟདིཝསཱནི ནཱགསམྤཏྟིཾ ཨབྷིརམམཱནོ (ནལཱཊདྷཱཏུཾ ཝིསྶརི.) སཏྟཱཧཙྩཡེན ནལཱཊདྷཱཏུཾ ཨནུསྶརིཏྭཱ པཙྪཱ ཨཱཝཛྫམཱནོ རཉྙོ དྷཱཏུཾ གཧེཏྭཱ ཨཱགཏབྷཱཝཾ ཉཏྭཱ མཧནྟཾ སོམནསྶཾ པཏྟོ མཧནྟཛ྄ཛྷཱསཡོ ཨཏྟནོ པརིཝཱརེ ཚཀོཊིམཏྟེ ནཱགེ གཧེཏྭཱ དྷཱཏུཔཊིཔཐཾ གནྟྭཱ དྷཱཏུཔཏིཊྛིཏཊྛཱནེཝ པཐཝིཡཾ ནཱབྷིཔྤམཱཎཏོ སུམནམཱལཱཝསྶཾ ཝསྶེསི. ཏསྨཱ ཏཾ ཋཱནཾ སུམནམཱལཱཔིཊྛིཏི ཛཱཏཾ. པུནདིཝསེ རཱཛཱ དྷཱཏུཾ གཧེཏྭཱ ཝརཱཧ ¶ ནཱམ སོཎྜིཾ པཱཔུཎི. སམྤཏྟཱཡ དྷཱཏུཡཱ ཏསྨིཾ ཋཱནེ སུམནནཱགརཱཛཱ རཐཙཀྐེ ཡཱཝ ནཱབྷིཾ ཏཱཝ ཨོསཱིདཱཔེཏྭཱ ཨཔརིཝཏྟནཾ ཨཀཱསི. ཏཾ དིསྭཱ རཱཛཱ སཾཝེགཔྤཏྟོ ཐེརཾ པུཙྪི. མཱ བྷཱཡི མཧཱརཱཛ, དྷཱཏུ པཏིཊྛཱནཊྛཱནཾ ཨཱགཏོ. ཨིམསྨིཾ ཋཱནེ པཏིཊྛཧིསྶཏཱི’ཏི ཨཱཧ.

ཏཾ སུཏྭཱ རཱཛཱ དྷཱཏུཔཏིཊྛཱན བྷཱུམིབྷཱགཾ བྷཝིསྶཏཱི’ཏི ཙིནྟེཏྭཱ ཏཏྠེཝ སེནཾནིཝེསེཏྭཱ ཨིདཾ ཋཱནཾ སམནྟཏོ སཀཎྚཀཾ ཝནཾ ནཱིཧརཱཔེཏྭཱ བྷཱུམིབྷཱགཾ ཨཏིརམཎཱིཡཾ བྷེརིཏལམིཝ སམཾ ཀཱརཱཔེཏྭཱ སེནིཡཔཱམོཀྑཾ ཨཱམནྟེཏྭཱ ཏུམྷེ དྷཱཏུཾ ཋཔནཏྠཱཡ པཋམཾ དྷཱཏུགྷརཾ ཀཱརཱཔེཏྭཱ དྷཱཏུ གབྦྷཾ པཏིཊྛཱཔེཏྭཱ ནིཝེདེསི. རཱཛཱ ཨནྟོ དྷཱཏུགྷརེ ཏསྨིཾ དྷཱཏུགབྦྷེ དྷཱཏུཀརཎྜཀཾ པཏིཊྛཔེཏྭཱ བཧི ཨཱརཀྑཾ སཾཝིདྷཱཡ ཏཏྠ མཧནྟཾ པཱུཛཱཝིདྷཱནཾ ཀཱརཱཔེཏྭཱ དྷཱཏུགྷརཾ ཙཏུཛཱཏིཡགནྡྷེན ཝིལིམྤཱཔེསི. ཏདུཔཱདཱཡ ཏཾ གེཧཾ གནྡྷམཱུལཾ ནཱམ ཛཱཏཾ. ཏསྨིཾ ཋཱནེ བཧཱུ སནྣིཔཏིཾསུ. ཏཏྠ མཧིནྡོ ནཱམ ཐེརོ ཨཱགནྟུཀ བྷིཀྑཱུནཾ ཝཏྟཔཊིཝཏྟཾ ཨཀཱསི. པུནདིཝསེ རཱཛཱ ཝིཧཱརཾ གནྟྭཱ སུཁེན ཝསིཏྠ ཨཡྻཱ’ཏི པུཙྪིཏྭཱ སབྦེ བྷིཀྑུ ནིམནྟེཏྭཱ རཱཛགེཧེ ནིསཱིདཱཔེཏྭཱ ཡཱགུབྷཏྟཾ སཀྐཙྩཾ དཏྭཱ པཙྪཱ བྷཏྟཾ ཨནུམོདནཾ སུཏྭཱ ནིསིནྣཀཱལེ ཐེརོ ཨོཝདནྟོ མཧཱརཱཛ, པམཱདེན ཝསིཏུཾ ན ཝཊྚཏི ཛཱིཝིཏཾ ནཱམ ན ཙིརཊྛིཏིཀཾ, དྷཱཏུཔཏིཊྛཱཔནཾ པཔཉྩཾ ཨཀཏྭཱ ཀཱརེཧཱི’ཏི ཝཏྭཱ གཱཐམཱཧ?

ཡསྨཱ ཧི ཛཱིཝིཏཾ ནཱམ ཨཔྤཾ བུབྦུལཀུཔམཾ;

ཏསྨཱ ཧི པཎྜིཏོ པོསོ ཀརེཡྻ ཀུསལཾ སདཱ’ཏི.

ཨིམིནཱ ¶ ནཡེན དྷམྨཾ ཀཐེཏྭཱ ཙཱུལ༹པིཎྜཔཱཏིཡཏིསྶ ཏྠེརོ ཙ སཱགལཏྠེརོ ཙ མཧིནྡཏྠེརོ ཙཱ’ཏི ཏཡོ ཐེརཱ ཨཏྟནོ ཨཏྟནོ པརིཝཱརེ བྷིཀྑཱུ གཧེཏྭཱ དྷཱཏུ པརིཧརཎཏྠཱཡ ཨཱགཙྪིཾསུ.

ཝིཔུལཡསོ པརཧིཏཱཝཧནྟོ,

སུཛནཧིཏོ དྷིཏིམཱ ཨཝཱིཏསདྡྷོ;

སུཔརིཝུཏོ མཧཏིཡཱ ཧི པརིསཱ,

རཱཛསེཊྛོ པཝརཐཱུཔམཱརབྷཱི’ཏི.

ཨིཏི ཨརིཡཛནཔྤསཱདནཏྠཱཡ ཀཏེ དྷཱཏུཝཾསེ

པཀིཎྞཀོ ནཱམ

ཙཏུཏྠོ པརིཙྪེདོ.

༥. ¶ དྷཱཏུནིདྷཱནཱདྷིཀཱརོ

ཏཏོ ཝིམཾསེཏྭཱ བྷུམིབྷཱགཾ གཧེཏུཾ ཝཊྚཏཱི’ཏི བྷཱུམི བྷཱགཾ ཝཱིམཾསེནྟོ མངྒལསམྨཏེ ཨཊྛ གོཎེ ཨཱཧརཱཔེཏྭཱ གནྡྷོདཀེན ནཧཱཔེཏྭཱ སིངྒེསུ སུཝཎྞཀཉྩུཀཾ པཏིམུཉྩཱཔེཏྭཱ གནྡྷཔཉྩངྒུལིཀཾ དཱཔེཏྭཱ གཱིཝཱཡ མཱལཱདཱམཾ བནྡྷཱཔེཏྭཱ ཨཡོདཱམེན བནྡྷཱཔེཏྭཱ ཨེཝཾ ཙིནྟེསི? ཡདི པན བྷགཝཏོ ནལཱཊདྷཱཏུ ཡསྨིཾ ཋཱནེ པཏིཊྛཧིཏྭཱ ལོཀཏྠཙརིཡཾ ཀརོནྟཱི པཉྩཝསྶསཧསྶཱནི སཱསནཾ པཏིཊྛཧིསྶཏི ཏསྨིཾ ཋཱནེ གོཎཱ སཡམེཝ ཨཡོདཱམཏོ མུཉྩིཏྭཱ ཐུཔཊྛཱནཾ སམནྟཏོ ཝིཙརིཏྭཱ ཙཏུསུ དིསཱསུ སཡནྟུཏི ཨདྷིཊྛཧིཏྭཱ པུརིསེ ཨཱཎཱཔེསི. ཏེ ཏཐེཝ ཨཀཾསུ. ཏཏོ ཝིབྷཱཏཱཡ རཏྟིཡཱ རཱཛཱགོཎེ གཱཧཱཔནཏྠཱཡ ཨཱཡུཏྟཀེ ཨཱཎཱཔེསི. ཏེ མནུསྶཱ གནྟྭཱ གོཎེ ཨཔསྶིཏྭཱ ན པསྶཱམ དེཝཱ’ཏི རཉྙོ ཨཱརོཙེསུཾ. གཙྪ བྷཎེ, གོཎཱནཾ གཏཊྛཱནཾ ཨོལོཀེཐཱ’ཏི ཨཱཧ. ཏེ གཝེསམཱནཱ བནྡྷནཊྛཱནེ ཨདིསྭཱ པདཱནུཔདཾ གནྟྭཱ ཐཱུཔཀརཎཊྛཱནཾ སམནྟཱ ཝིཙརིཏྭཱ ཙཏུསུ དིསཱསུ སཡིཏགོཎེ དིསྭཱ སཡིཏཊྛཱནཏོ ནངྒུཊྛཱདཱིནི མདྡནྟཱཔི ཨུཊྛཱཔེཏུཾ ཨསཀྐོནྟཱ གནྟྭཱ རཉྙོ ཨཱརོཙེསུཾ; དེཝ, གོཎཱ ན ཨུཊྛཧནྟི, ཨེཀཾ ཋཱནཾ སམནྟཱ ཝིཙརིཏྭཱ ཙཏུསུ དིསཱསུ སཡིཏཱ’ཏི. ཏཾ སུཏྭཱ རཱཛཱ སེནངྒཔརིཝུཏོ སཡམེཝ གནྟྭཱ’པི གོཎེ ཨུཊྛཱཔེཏུཾ ཨསཀྐོནྟོ རཱཛཱ ཨེཝཾ ཨདྷིཊྛཱསི; ཡདི ཨིམསྨིཾ ཋཱནེ དྷཱཏུ པཏིཊྛཱཔེཏབྦཱ བྷཝེཡྻ གོཎཱ ཨུཊྛཧིཏྭཱ གཙྪནྟུ’ཏི. གོཎཱ ཙིཏྟཀྑཎེཡེཝ ཨུཊྛཧིཏྭཱ པལཱཡིཾསུ. རཱཛཱ ཏཾ ཨཙྪརིཡཾ དིསྭཱ པསནྣམནོ ཧུཏྭཱ པུནེཀདིཝསཾ ཝུཏྟནིཡཱམེནེཝ ཨསྶེ ¶ ཨལངྐཱརཱཔེཏྭཱ ཨཡོདཱམེན བནྡྷཱཔེཏྭཱ ཋཔེསི. ཨསྶཱཔི ཏེ གོཎཱ ཝིཡ གནྟྭཱ ནིཔཛྫིཾསུ. རཱཛཱ གནྟྭཱ ཏཐེཝ ཨདྷིཊྛཧིཏྭཱ ཨསྶེ ཨུཊྛཱཔེསི. པུནེཀདིཝསཾ ཧཏྠཱིཾ ཨལངྐཱརཱཔེཏྭཱ ཏཐེཝ ཨདྷིཊྛཱསི. སོཔི བནྡྷདཱམེ ཚིནྡིཏྭཱ པཙྪིམཡཱམསམནནྟརེ གནྟྭཱ ཙེཏིཡཀརཎཊྛཱནེ ནིཔཛྫི. པབྷཱཏཱཡ རཏྟིཡཱ རཱཛཱ ཧཏྠཱིགོཔཀེ པཀྐོསཱཔེཏྭཱ ཧཏྠིཾ ཨཱནེཐཱ’ཏི ཨཱཧ. ཧཏྠིགོཔཀཱ ཧཏྠིཾ བནྡྷནཊྛཱནེ ཨདིསྭཱ, ཧཏྠིཾ བནྡྷནཊྛཱནེ ན པསྶཱམ དེཝཱ’ཏི ཨཱཧཾསུ. ཏེནཧི བྷཎེ, སཱིགྷཾ ཨུཔདྷཱརེཐཱ’ཏི ཝུཏྟེ ཧཏྠིགོཔཀཱ པདཱནུཔདཾ གཝེསམཱནཱ ཙེཏིཡཊྛཱནེ ནིཔནྣཾ ཧཏྠིཾ དིསྭཱ ཨཱགནྟྭཱ རཉྙོ ཨཱརོཙེསུཾ. ཏཾ སུཏྭཱ རཱཛཱ ཧེཊྛཱ ཝུཏྟཔྤཀཱརེན པཊིཔཛྫིཏྭཱ ཧཏྠིཾ པུརེ ཀཏྭཱ ཨཱགཙྪི.

ཨེཝཾ ཏཱིཧི ཝིམཾསནཱཧི ཝཱིམཾསེཏྭཱ བྷུམིགཧིཏབྷཱཝཾ ཐེརསྶ སནྟིཀཾ གནྟྭཱ ཝནྡིཏྭཱ ཨུཔཊྛཧམཱནོ ཨཱརོཙེསི. ཏསྨིཾ ཀཱལེ སེརུནགརེ སིཝརཱཛཱ བཧཱུ པཎྞཱཀཱརེ གཱཧཱཔེཏྭཱ རཱཛཱནཾ པསྶིསྶཱམི’ཏི ཨཱགནྟྭཱ ཝནྡིཏྭཱ ཨེཀམནྟཾ ཨཊྛཱསི. རཱཛཱ ཏེན སདྡྷིཾ སམྨོདནཱིཡཾ ཀཐཾ ཀཏྭཱ ནིསིནྣཀཱལེ ལོཎནགརེ མཧཱནཱགརཱཛཱ’པི བཧུཔཎྞཱཀཱརཾ གཱཧཱཔེཏྭཱ རཱཛཱནཾ པསྶིསྶཱམི’ཏི ཨཱགནྟྭཱ ཝནྡིཏྭཱ ཨེཀམནྟཾ ནིསཱིདི. ཏེན སདྡྷིཾ སམྨོདནཱིཡཾ ཀཐཾ ཨཀཱསི; ཨིམསྨིཾ ཋཱནེ དསབལདྷཱཏུཾ པཏིཊྛཱཔེསྶཱམི, ཏུམྷེ མམ སཧཱཡཱ ཧོཐཱ’ཏི ཏེ གཧེཏྭཱ གནྟྭཱ དྷཱཏུཾ ཝནྡཐཱ’ཏི ཝནྡཱཔེསི. ཏསྨིཾ ཁཎེ དྷཱཏུཏོ ཚབྦཎྞརཾསིཡོ ཨུགྒཙྪིཾསུ. དེཝཱ སཱདྷུཀཱརཾ ཀརོནྟཱ ཨཱཀཱསཏོ མཱལཱཡོ ཁིཔིཾསུ. རཱཛཱནོ སོམནསྶཔྤཏྟཱ ཨམྷཱཀཾ ལངྐཱཡཾ དསབལསྶ ནལཱཊདྷཱཏུ ཨམྷཱཀཾ རཊྛེ པཏིཊྛཧིསྶཏི. ཨེསཱ དྷཱཏུ མཧཱ ཛནསྶ སཏྠུཀིཙྩཾ སཱདྷེཡྻཱཏི ཝནྡིཏྭཱ གཏཱ. རཱཛཱ ཏེསཾ གཏཀཱལེ གིརིཨབྷཡཾ པཀྐོསཱཔེཏྭཱ ཏཱཏ, ཨིཊྛཀཾ ཛནསྶ པཱིལ༹ནཾ ཨཀཏྭཱ ཀཱརཱཔེམཱ’ཏཱི ཨཱཧ. མཱ ཙིནྟཡིཏྠ དེཝ, ཨཧཾ ¶ ཨིཊྛཀཾ ཀཱརཱཔེསྶཱམཱིཏི. ཨེཝཉྷི སཏི པཔཉྩོ བྷཝིསྶཏཱི’ཏི ཨཱཧ. ཨམྷཱཀཾ སནྟིཀེ སུཝཎྞརཛཏཱནི མནྡཱནི ཀུཏོ ལབྷིསྶཱམཱ’ཏི ཝུཏྟེ གིརིཨབྷཡོ ཨེཝམཱཧ; དེཝ, སཏྠཱ མཧཱཔུཉྙོ མཧནྟཾ པཱུཛཱསཀྐཱརསམྨཱནཾ ལབྷིསྶཏི. ཏྭཾ ཨཙིནྟེཏྭཱ ཙེཏིཡཀམྨཾ པཊྛཔེཧཱི’ཏི ཨཱཧ.

སོ ཏསྶ ཏཾ ཨཙིནྟནཱིཡཾ ཀཐཾ སུཏྭཱ སོམནསྶཔྤཏྟོ ཐེརསྶ སནྟིཀེ དྷམྨཾ སུཏྭཱ དྷཱཏུཾ ཝནྡིཏྭཱ ནགརཾ གནྟྭཱ བྷུཏྟསཱཡམཱསོ སཡནེ ནིཔནྣོ ནིདྡཾ ཨོཀྐམི. ཝིབྷཱཏཱཡ རཏྟིཡཱ པབུཛ྄ཛྷིཏྭཱ ཨིཊྛཀཾ ཙིནྟཡམཱནསྶ དོམནསྶཾ ཨཧོསི. ཏསྨིཾ ཀཱལེ སཀྐོ དེཝརཱཛཱ ཝིསྶཀམྨཾ དེཝཔུཏྟཾ ཨཱམནྟེཏྭཱ; ཏཱཏ, ཝིསྶཀམྨ, ཀཱཀཝཎྞཏིསྶམཧཱརཱཛཱ ཨམྷཱཀཾ སཏྠུནོ ནལཱཊ དྷཱཏུཾ ནིདཧིཏྭཱ མཧནྟཾ ཙེཏིཡཾ ཀཱརཱཔེཏུཀཱམོ ཨིཊྛཀཾ ཙིནྟཡི. ཏྭཾ གནྟྭཱ ཕཱསུཀཊྛཱནེ ཨིཊྛཀཾ མཱཔེཧཱིཏི ཨཱཧ. ཏཾ སུཏྭཱ ཝིསྶཀམྨདེཝཔུཏྟོ དུགྒཏསྶ བྲཱཧྨཎསྶ ཁེཏྟེ ཨིཊྛཀཾ མཱཔེཏྭཱ དེཝལོཀམེཝ གཏོ. ཏསྨིཾ ཁཎེ ཁེཏྟསཱམིཀོ དུགྒཏབྲཱཧྨཎོ པཱཏོཝ ཨཏྟནོ ཁེཏྟཾ ཨོལོཀནཏྠཱཡ གཏོ ཨིཏོཝིཏོ ཨོལོཀེནྟོ ཨིཊྛཀརཱསིཾ དིསྭཱ ཙིནྟེསི; ཧཱིཡོ རཱཛཱ ཨིཊྛཀཾ ཀཐཾ ལབྷིསྶཱམཱིཏི ཀཐེསི. མཧནྟཾ ཝཏ པཎྞཱཀཱརཾ མཡཱ ལདྡྷནྟི ཏུཊྛོ དེཝ྄ैཊྛཀཱནི ཀཱཛེན གཧེཏྭཱ རཉྙོ དསྶནཏྠཱཡ གནྟྭཱ རཱཛདྭཱརེ ཋཏྭཱ སཱསནཾ པཧིཎི. ཏཾ པཀྐོསཱཔེཏྭཱ ཀསྨཱ པཱཏོ’ཝ ཨཱགཏོསཱི’ཏི པུཙྪི. དེཝ མཡ྄ཧཾ ཁེཏྟེ ཨིཊྛཀརཱསིཾ དིསྭཱ པཱཏོ’ཝ ཨིཊྛཀཱནི གཧེཏྭཱ ཨཱགཏོམྷཱི’ཏི. ཨཱིདིསཱནི ཨིཊྛཀཱནི ཙེཏིཡསྶ ཨནུཙྪཝིཀཱནཱིཏི དསྶེསི. རཱཛཱ པསྶིཏྭཱ སོམནསྶཔྤཏྟོ བྲཱཧྨཎསྶ བཧུཾ དྷནཾ དཱཔེསི.

ཏསྨིཾ ¶ ཁཎེ ཨཉྙཾ སཱསནཾ ཨཱཧརི. མདནཔཊྚནདྭཱརཏོ ཙཏསྶོ རཛཏནཱཝཱ སུཝཎྞབྷུམིཏོ ཙཏསྶོ སུཝཎྞནཱཝཱ ཨུཀྐམིཾསཱུཏི པཊྚནམུཁདྭཱརེ ཝིཧརནྟོ ཨཱརཀྑཀ ཛེཊྛཀོ དྷམྨཔཱལོ ནཱམ ཨཱགནྟྭཱ རཉྙོ ཨཱརོཙེསི. རཱཛཱ ཏུཊྛོ སུཝཎྞརཛཏེ ཨཱཧརཱཔེསི.

(ཨིཊྛཀཾ རཛཏཉྩེཝ སུཝཎྞཉྩ མཧཱརཧཾ;

ཨཱཧརིཏྭཱན ཏཾ སབྦཾ ཀམྨཾ ཨཱརབྷི ཙེཏིཡེ.

སཏྠུ པུཉྙཱནུབྷཱཝེན རཉྙོ པུཉྙབལེན ཙ;

ཙིནྟིཏཙིནྟིཏཾ སབྦཾ ཁཎེནེཝ སམིཛ྄ཛྷཏི.)

ཏཏོ རཱཛཱ ཙཱུལ༹པིཎྜཔཱཏིཡཏིསྶཏྠེརསྶ སནྟིཀཾ གནྟྭཱ? ཨཡྻ ཨིཊྛཀབྷུམིཾ གམིསྶཱམཱིཏི ཨཱཧ. ཐེརོ སུཏྭཱ ཏུཊྛོ ཨཏྟནོ པརིཝཱརེཧི པཉྩསཏབྷིཀྑཱུཧི སདྡྷིཾ ཨིཊྛཀ བྷཱུམིཾ གཏོ. ཏཏོ མཧཱསཱགལཏྠེརོ ཙ མཧིནྡཏྠེརོ ཙ ཨཏྟནོ པརིཝཱརེཧི བྷིཀྑུཧི སདྡྷིཾ ཨིཊྛཀབྷུམིཾ གཏཱ. སིཝ ནགརེ རཱཛཱཔི ཨིཊྛཀབྷུམིཾ གཏོ. ལོཎནགརེ ནཱགརཱཛཱཔི ཨིཊྛཀབྷུམིཾ གཏོ. སོམནགརེ གིརིཨབྷཡརཱཛཱཔི ཨཏྟནོ སེནངྒེཧི པརིཝཱརེཏྭཱ ཨིཊྛཀབྷུམིཾ གཏོ. ཏེསཾ སམཎ བྲཱཧྨཎཱནཾ རཱཛབལཱ༹ནཉྩ སམྤིཎྜིཏཏྟཱ སོ པིཊྛིཔཱསཱཎོ བལཝཱཧནོ ནཱམ ཛཱཏོ. ཏེ སབྦེ ཨིཊྛཀབྷུམིཾ སམོསརིཾསུ. ཐེརོ ཨིཊྛཀརཱསིཾ ཨོལོཀེཏྭཱ རཱཛཱནཾ ཨེཝམཱཧ? མཧཱརཱཛ, ཨཡཾ ཨིཊྛཀརཱསི ཙེཏིཡེ སབྦཀམྨཏྠཱཡ པཧོཏཱི’ཏི. རཱཛཱ ཨཏྟམནོ སེནངྒཔརིཝུཏོ སཡམེཝ པཋམཾ ཨིཊྛཀཾ གཎྷི. ཏཾ དིསྭཱ སེསརཱཛཱནོ ཙ ཨམཙྩཱདཡོ ཙ པརིསཱ ཙ སབྦེ བྷིཀྑུ ཙ ཨིཊྛཀཱནི གཎྷིཾསུ ཏསྨིཾ ཀཱལེ བྷཱརཾ ཨུཀྑིཔིཏྭཱ གམནཾ པཔཉྩཾ བྷཝིསྶཏཱི’ཏི རཱཛཱ ཙིནྟེསི. ཐེརོ ཏསྶ ཙིཏྟཾ ཛཱནིཏྭཱ ཨེཝམཱཧ? མཱ ཙིནྟཡིཏྠ མཧཱརཱཛ, ཨིཊྛཀཱནི གཧེཏྭཱ གཙྪ. པཙྪཱ དེཝནཱགཱདཡོ ཨིཊྛཀབྷུམིཏོ པཊྛཱཡ ཡཱཝ ཙེཏིཡཊྛཱནཾ ནིརནྟརཱ ཋིཏཱ ཨཱཧརིསྶནྟཱི’ཏི. ཏེ ཨཱཧརིཏྭཱ ཙེཏིཡཊྛཱནེ རཱསིཾ ཀརོནྟི. ཏེནེཝ ¶ ནཱིཡཱམེན ཡཱཝ ཙེཏིཡསྶ ནིཊྛངྒམཱ ཏཱཝ དེཝནཱགསུཔཎྞཱདཡོ ནིརནྟརཾ ཋཏྭཱ ཨིཊྛཀཱནི ཨཱཧརིཏྭཱ ཙེཏིཡཀརཎཊྛཱནེཝ ཙཏུསུ དིསཱསུ རཱསིཾ ཨཀཾསུ.

ཏཏོ རཱཛཱ སབྦེ ཨིཊྛཀཝཌྜྷཀཱི རཱསིཾ ཀཱརཱཔེཏྭཱ ཏེསཾ ཝཌྜྷཀཱིནཾ ཨནྟརེ ཛཡསེནཾ ནཱམ ཨིཊྛཀཝཌྜྷཀིཾ པརིགཎྷིཏྭཱ ཏསྶ པན སཏསཧསྶགྒྷནཀཱནི དྭེ སཱཊཀཱནི ཀཧཱཔཎསཏསཧསྶཱནི ཙ སུཝཎྞཀུཎྜལཱདཡོ ཨཱབྷརཎཱནི ཙ དཱཔེསི. ཏསྶ པརིཝཱརཱནཾ ཝཌྜྷཀཱིནཾ ཨཧཏཝཏྠཱདཱིནི སབྦུཔཀརཎཱནི དཱཔེསི. ཨནེཀཝིདྷཾ མཧནྟཾ སམྨཱནཾ ཀཱརེཏྭཱ ཐེརེན སདྡྷིཾ མནྟེནྟོ; ཨཡྻ ཨཛྫ ཝིསཱཁཔུཎྞམཱི ཨུཔོསཐདིཝསོ, ཏསྨཱ ནལཱཊདྷཱཏུཡཱ མངྒལཾ ཀརིཏྭཱ ཙེཏིཡཊྛཱནེ ཨིཊྛཀཾ པཏིཊྛཱཔེཏུཾ ཝཊྚཏཱི’ཏི ཨཱཧ. ཏཾ སུཏྭཱ ཐེརོ; བྷདྡཀཾ མཧཱརཱཛ, བུདྡྷསྶ བྷགཝཏོ ཛཱཏདིཝསོ’ཏི ཝཏྭཱ ཙེཏིཡཀམྨཀརཎཏྠཱཡ པཉྩ ཛནེ གཎྷི. ཏེསུ ཨེཀོ ཝརདེཝོ ནཱམ, ཨེཀོ སངྑོ ནཱམ, ཨེཀོ ཝིཛྫོ ནཱམ, ཨེཀོ པུསྶདེཝོ ནཱམ, ཨེཀོ མཧཱདེཝོ ནཱམ. ཨིམེསཾ ཝཌྜྷཀཱིནཾ མངྒལཾ ཀཱརཱཔེཏྭཱ ཚཎཝེསཾ གཧེཏྭཱ སབྦཱལངྐཱརེན ཨལངྐཱརཱཔེཏྭཱ རཱཛཱ སཡམྤི སབྦཱལངྐཱརེན པཏིམཎྜིཏོ མངྒལཝིདྷཱནཾ ཀཱརཱཔེཏྭཱ བྷིཀྑུསངྒྷཾ གནྡྷམཱལཱདཱིཧི པཱུཛེཏྭཱ ཏིཀྑཏྟུཾ པདཀྑིཎཾ ཀཏྭཱ ཙཏུསུ ཋཱནེསུ པཉྩཔཏིཊྛིཏེན ཝནྡིཏྭཱ ཝིཛམྷེཏྭཱ སུཝཎྞགྷཊྛཱནཾ པཝིསིཏྭཱ སུཝཎྞཁཙིཏཾ མཎིམུཏྟཱརཏནམཡཾ པརིབྦྷམནདཎྜཾ ཛཱིཝམཱནཀམཱཏཱཔིཏརེན ཨུབྷཏོསུམཎྜིཏཔསཱདྷིཏེན ཨབྷིམངྒལསམྨཏེན ཨམཙྩཔུཏྟེན གཱཧཱཔེཏྭཱ མཧནྟཾ ཙེཏིཡཾ ཏཏྠ ཀརོནྟོ སཡམྤི པརིབྦྷམནདཎྜཾ གཧེཏྭཱ པརིཀམྨཀཏབྷུམིཡཾ པརིབྦྷམིཏྭཱ ཨེཀམནྟཾ ཨཊྛཱསི. ཏཏོ མཧཱཝཌྜྷཀཱི སུནཀྑཏྟེན སུམུཧུཏྟེན ཙེཏིཡཊྛཱནེ ཨིཊྛཀཾ པཏིཊྛཱཔེསི.

ཏསྨིཾ ¶ ཁཎེ ཙཏུནཧུཏཱདྷིཀ དྭིཡོཛན སཏསཧསྶབཧུལཱ ཨཡཾ མཧཱཔཐཝཱི སཱདྷུཀཱརཾ པཝཏྟེནྟཱི ཝིཡ མཧཱནཱདཾ པཝཏྟེསི. དེཝམནུསྶཱ དིཝསེ དིཝསེ པཧོནཀ-མཏྟིཀཾ ནིསདེན པིཾསིཏྭཱ སུཔྤེཧི པཔྥོཋེཏྭཱ དེནྟི. ཨེཝཾ ཀརོནྟོ ཀཏིཔཡེནེཝ དིཝསེན པུཔྥཱདྷཱནཏྟཡཾ ཙིནིཏྭཱ མཧཱབྷིཀྑུ སངྒྷསྶ ནིཝེདེསི. ཏཾ སུཏྭཱ སངྒྷོ ཙུནྡུཏྟརནཱམཀེ དྭེ སཱམཎེརེ ཨཱཎཱཔེསི? ཏུམྷེ ཧིམཝནྟཾ གནྟྭཱ མེདཝཎྞཔཱསཱཎེ ཨཱཧརཐཱ’ཏི. ཏེ པན སཱམཎེརཱ ཛཱཏིཡཱ སོལ༹སཝསྶིཀཱ ཚལ༹བྷིཉྙཱཔྤབྷེདེན པཊིསམྦྷིདཔྤཏྟཱ. མཧཱཁཱིཎཱསཝབྷིཀྑུསངྒྷསྶ སནྟིཀཱ བྷིཀྑུསངྒྷསྶ ཝཙནཾ སམྤཊིཙྪིཏྭཱ ཨཱཀཱསཾ ཨབྦྷུགྒནྟྭཱ ཧིམཝནྟཏོ ཨཏྟནོ ཨིདྡྷིབལེན མེདཝཎྞཔཱསཱཎེ ཨཱཧརིཾསུ. ཨེཏེསུ ཨེཀཾ པཱསཱཎཾ དྷཱཏུགབྦྷསྶ བྷུམིཡཾ པཏྠརིཏྭཱ ཙཏུསུ པསྶེསུ ཙཏྟཱརོ པཱསཱཎེ པཏིཊྛཱཔེཏྭཱ ཨཔརཾ དྷཱཏུགབྦྷཾ པིདཧིཏུཾ ཨདསྶནཾ ཀཏྭཱ ཋཔཡིཾསུ.

ཏདཱ རཱཛཱ དྷཱཏུགབྦྷེ ཀམྨཾ ནིཊྛཔེནྟོ ནཝ ཀོཊིཔྤམཱཎཾ སུཝཎྞཾ ཨཱཧརཱཔེཏྭཱ སུཝཎྞཀཱརཱནཾ དཏྭཱ དྷཱཏུགབྦྷསྶ ཨིཊྛཀཱནི ཀརོཐཱ’ཏི ཨཱཎཱཔེསི. ཏེ སུཝཎྞཀཱརཱ དཱིགྷཏོ རཏནཔྤམཱཎཾ པུཐུལཏོ ཝིདཏྠཱིཔྤམཱཎཾ བཧལཏོ ཙཏུརངྒུལཔྤམཱཎཾ ཨིཊྛཀཾ ཀཏྭཱ དྷཱཏུགབྦྷཾ ཙིནིཾསུ. ཏཾ པན དྷཱཏུགབྦྷཾ ཨུཙྩཏོ སོལ༹སཧཏྠཾ ཝིཏྠཱརཏོཔི ཨིཏོཙིཏོ དསདསརཏནཾ ཀཏྭཱ སུཝཎྞིཊྛཀེཧེཝ ནིཊྛཔེཏྭཱ དྷཱཏུགབྦྷསྶ མཛ྄ཛྷེ སཏྟརཏནམཡཾ སིནེརུཾ ཀཱརཱཔེཏྭཱ སིནེརུསྶ ཨུཔརི ཛཱཏིཧིངྒུལཀེན པཎྜུཀམྦལསིལཱསནཾ སཏྟརཏནེན པཱརིཙྪཏྟཀརུཀྑཾ རཛཏམཡཾ སེཏཙྪཏྟཾ བྲཧྨུནཱ གཱཧཱཔེཏྭཱ སཏྠུནོ པཊིམཱཡ ཨུཔརི དྷཱརིཡམཱནཾ ཀཱརེསི. སིནེརུཔཱདམཱུལེ གནྡྷཀལལཔཱུརིཏ ནཱིལུཔྤལཝིབྷུསིཏསུཝཎྞམཡཨཊྛུཏྟརསཏགྷཊཔནྟིཡོ ཋཔཱཔེསི. ཏདནནྟརཾ གནྡྷཀལལཔཱུརིཏརཏྣཔདུམཝིབྷུསིཏརཛཏམཡཨཊྛུཏྟར- ¶ སཏགྷཊཔནྟིཡོ ཋཔཱཔེསི. ཏདནནྟརཾ གནྡྷཀལལཔཱུརིཏ སེཏུཔྤལམཱལཱཝིབྷུསིཏམཎིམཡཨཊྛུཏྟརསཏགྷཊཔཏྟིཡོ ཋཔཱཔེསི. ཏདནནྟརཾ གནྡྷཀལལཔཱུརིཏསེཏུཔྤལཝིབྷུསིཏ-མསཱརགལླམཡ ཨཊྛུཏྟརསཏགྷཊཔནྟིཡོ ཋཔཱཔེསི. ཏདནནྟརཾ གནྡྷཀལལཔཱུརིཏཙམྤཀཔུཔྥཝིབྷུསིཏལོཧིཏངྐམཡཨཊྛུཏྟརསཏ གྷཊཔཏྟིཡོ ཋཔཱཔེསི. ཏདནནྟརཾ གནྡྷཀལལཔཱུརིཏཔཉྩུཔྤལཝིབྷུསིཏམཏྟིཀཱམཡཨཊྛུཏྟརསཏགྷཊཔནྟིཡོ ཋཔཱཔེསི. ཏཱསཾ གྷཊཔནྟཱིནཾ ཨནྟརེ གནྡྷཀལལཔཱུརིཏསཏྟརཏནམཡསརཱཝཀེ ཋཔཱཔེསི. ཀཉྩནམཡ-སཏྟརཏནམཡ-ཝིཙིཏྟམཱལཱལཏཱཔུཎྞགྷཊསིརིཝཙྪནནྡིཡཱཝཊྚབྷདྡཔཱིཋཱདཡོ ཙ ཧཏྠིཨསྶསཱིཧཝྱགྒྷོསབྷཔནྟིཨཱདཡོ ཙ ཀཱརེསི. དེཝོརོཧཎཾ ཡམཀཔཱཊིཧཱིརཱདཡོ དྷནཔཱལ-ཨངྒུལིམཱལ-ཨཱལ༹ཝཀདམནཱདཡོ, སཱརིཔུཏྟ-མོགྒལླཱན-མཧཱཀསྶཔཏྠེརཱདཡོ, ཨསཱིཏིམཧཱསཱཝཀརཱུཔཱདཱིནི ཙ ཀཱརཱཔེསི. སིནེརུསྶ མཛ྄ཛྷིམབྷཱགེ ཏཱརཱགཎཔརིཝཱརིཏཾ རཛཏམཡཾ ཙནྡམཎྜལཉྩ ཀཱརཱཔེསི. རཾསིཛཱལཝིབྷུསིཏཾ ཀནཀམཡཾ སཱུརིཡམཎྜལཉྩ ཀཱརཱཔེསི.

ཏཏོ སིནེརུསྶ མཏྠཀེ པཱརིཙྪཏྟཀམུལེ པཎྜུཀམྦལསིལཱསནེ ཨམྷཱཀཾ སཏྠུནོ པཊིམཾ གྷནཀོཊྚིམ རཏྟསུཝཎྞམཡཾ ཀཱརཱཔེཏྭཱ མཱཏུདེཝཔཱམོཀྑ དསསཧསྶ ཙཀྐཝཱལ༹དེཝཏཱནཾ སཏྟཔྤཀརཎཾ ཨབྷིདྷམྨཾ དེསནཱཀཱརེན ནིསཱིདཱཔེསི. ཏསྶ ཝཱིསཏིནཁཱ ཨཀྑིཏལཱནཾ སེཏཊྛཱནཱནི ཛཱཏིཕལིཀམཡཱནི. ཨངྒུལིཡོ སུཝཎྞམཡཱ ཧཏྠཔཱདཏལཱནི ཙ དནྟཱཝརཎཱནི ཙ ཨཀྑཱིནཾ རཏྟཊྛཱནཱནི ཙ ཛཱཏིཔཝཱལ༹མཡཱནི, ཀེསམསྶུབྷམུཀཊྛཱནཱནི ཨིནྡནཱིལམཡཱནི, སམཙཏྟཱལཱིས དནྟཱ ཝཛིརམཡཱ ཨཧེསུཾ. ཨུཎྞལོམཾ པན སུཝཎྞ བྷིཏྟིཡཾ ཋཔིཏརཛཏབུབྦུལ༹ཝིལཱསཾ རཛཏམཡཾ ཨཧོསི. བྷགཝཏོ ཨནཝལོཀིཏ མུདྡྷནི མཏྠཀེ སཏྟརཏནམཡཾ ཝིཙིཏྟཀིཾཀིཎིཛཱལཾ པརིཀྑིཔཱཔེསི. མཎྜཔསྶ ཨནྟོ ནཝསཏསཧསྶགྒྷནཀཾ མུཏྟཱཀལཱཔམོལམྦཀཾ མནོརམཾ ཙེལཝིཏཱནཾ བནྡྷཱཔེཏྭཱ མཎྜཔཀོཊིཡཾ མུཏྟཱཛཱལཾ ཏདནནྟརཾ སཏྟ རཏནཝིཙིཏྟཾ ཀིཾཀིཎིཛཱལཾ པརིཀྑིཔཱཔེསི.

ཨམྷཱཀཾ ¶ བྷགཝཏོ མཱཏུདེཝཔུཏྟམྤི སཏྟརཏནེན ཀཱརཱཔེསི. ཏཐཱ ཨེརཱཝཎཝིསྶཀམྨདེཝཔུཏྟཱདཡོ ཙ སཔརིཝཱརོ སཀྐོ དེཝརཱཛཱ ཙ ཙཏྟཱརོ མཧཱརཱཛཱནོ ཙ པཉྩསིཁདེཝཔུཏྟཱདཡོ གནྡྷབྦདེཝཔུཏྟཱ ཙ སཧམྤཏི མཧཱ བྲཧྨཱདཡོ མཧཱབྲཧྨནོ ཙ ཀཱརཱཔེསི. ཝེསྶནྟརཛཱཏཀཾ ཀརོནྟོ སཾཛཡམཧཱརཱཛཱ ཕུསཏཱིདེཝཱི ཨཱདཡོ ཙ མདྡཱིདེཝཱི དྭེ དཱརཀེ ཙ ཛཱུཛཀབྲཱཧྨཎཱདཡོ ཙ ཀཱརཱཔེསི. ཝིདྷུར-སོཎདཏྟ མཧཱནཱརདཀསྶཔ-སུཏསོམ-སུཔྤཱརཀ-སངྑཔཱལཛཱཏཀཱདཱིནི ཙ, དྷམྨཙཀྐཔྤཝཏྟན-མཧཱསམཡསུཏྟཱདི དེསནཱཀཱརོ ཙ, སུདྡྷོདནམཧཱརཱཛཱ མཧཱམཱཡཱ མཧཱཔཛཱཔཏཱི གོཏམཱི བྷདྡཀཙྩཱནཱ རཱཧུལམཱཏཱདེཝཱི ཙ རཱཧུལཀུམཱརོ ཙ ཚནྣཉྩ ཀནྠཀཉྩ མཧཱབྷིནིཀྑམནཾ མཧཱབོདྷིམཎྜལཾ ཨསཱིཏིམཧཱསཱཝཀཱ ཀོསལམཧཱརཱཛཱ ཨནཱཐཔིཎྜིཀམཧཱསེཊྛི ཙཱུལ༹ཨནཱཐཔིཎྜིཀ-ཝིསཱཁཱ སུཔྤཝཱསཱ ཙ པཙྪཱ ཙཱུལ༹པིཎྜཔཱཏིཡ ཏིསྶཏྠེརཉྩ ཨཏྟཱནཉྩ ཀཱརཱཔེཏྭཱ ཏེ སབྦེ དྷཱཏུ གབྦྷེ པཏིཊྛཱཔེསི.

དྷཱཏུགབྦྷཝཎྞཎཱ སམཏྟཱ.

ཨེཝཾ དྷཱཏུགབྦྷེ པཱུཛཱཝིདྷཱནཾ སུཝིབྷཏྟཾ སུམནོརམཾ ཀཱརཱཔེཏྭཱ ཐེརེན སདྡྷིཾ ཀཐེསི? བྷནྟེ དྷཱཏུགབྦྷེ མཡཱ ཀཏྟབྦཾ ནིཊྛཱཔིཏཾ. སྭེ རོཧིཎཱིནཀྑཏྟེན དྷཱཏུ ནིདྷཱནཾ ཀརིསྶཱམཱི. ཨཡྻཱ པན ཀེསདྷཱཏུཡོ གཧེཏྭཱ ཨཱགཙྪནྟུཏི. ཏིསྶཏྠེརསྶ བྷཱརམཀཱསི. ཐེརོ ཏཾ སུཏྭཱ བྷདྡཀཾ མཧཱརཱཛ, ཀེསདྷཱཏུཡོ ཝིཙིནིཏྭཱ ཨཱཧརཱཔེསྶཱམཱཏི ཝཏྭཱ ཨཏྟནོ སདྡྷིཝིཧཱརིཀཾ སིཝཏྠེརཾ པཀྐོསཱཔེཏྭཱ ཨཱཝུསོ བྷཱུམིནྡྷརནཱགཝིམཱནེ ཛཡསེནོ ནཱམ ནཱགརཱཛཱ ཝསཏི. ཏསྶ སནྟིཀེ (ཀེསདྷཱཏུཡོ སནྟི.) ཏཔུསྶ བྷལླིཀཱནཾ དྭེབྷཱཏིཀཝཱཎིཛཱནཾ པརིཙརཎཀཱལེ ཏེསཾ པམཱདཾ ཉཏྭཱ ནཱགརཱཛཱ དྭེ ཀེསདྷཱཏུཡོ གཧེཏྭཱ ནཱགབྷཝནེ ཋཔེསི. ཏྭཾ ཏཱ དྷཱཏུཡོ ཨཱཧརིཏྭཱ རཉྙོ དེཧཱིཏི ཨཱཎཱཔེསི. ཐེརོ ཏཾ ཝཙནཾ སམྤཊིཙྪིཏྭཱ གཏོ.

ཏཏོ རཱཛཱ ཨཏྟནོ བྷགིནིཡཱ སོམདེཝིཡཱ ཙ བྷཱགིནེཡྻསྶ གིརིཨབྷཡརཉྙོ ཙ སཱསནཾ པེསེསི? སྭེ དྷཱཏུནིདྷཱནཾཀརིསྶཱམ. ཏུམྷེ སེནངྒཾ གཧེཏྭཱ ཨཱགཙྪཐཱ’ཏི. ལོཎནགརེ ¶ མཧཱནཱགརཉྙོ ཙ སེརུ ནགརེ སིཝརཉྙོ ཙ ཏཐེཝ སཱསནཾ པེསེཏྭཱ སཡམྤི ཨཏྟནོ ཝིཛིཏེ ཡེན མཡ྄ཧཾ ཧཏྠཏོ ཨནྟམསོ ཨེཀཀརཱིསམཏྟམྤི ལདྡྷཾ ཏདུཔཱདཱཡ སབྦེཔི ཏུམྷེ སདྡྷིཾ པརིཝཱརེན ཨཱགཙྪཐཱ’ཏི བྷེརིཾ ཙརཱཔེསི. ཏཾ སུཏྭཱ སོམནསྶཔྤཏྟཱ མཧཱཛནཱ ཨཏྟནོ ཨཏྟནོ ཝིབྷཝཱནུརཱུཔེན ཨལངྐཏཔཊིཡཏྟཱ ཨགམིཾསུ. རཱཛཱ པབྷཱཏཱཡ རཏྟིཡཱ སབྦེ སེནིཡོ གནྡྷམཱལཱདྷཱུཔདྷཛཱདཡོ གཧེཏྭཱ དྷཱཏུནིདྷཱནཾ ཨཱགཙྪནྟུཏི ཝཏྭཱ བྷིཀྑུསངྒྷསྶ མཧཱདཱནཾ དཏྭཱ ཏིཝཱིཝརཏྠཱཡ མཧགྒྷཝཏྠཱདཱིནི དཏྭཱ སཡམྤི སབྦཱལངྐཱརཔཏིམཎྜིཏོ ནཱནགྒརསབྷོཛནཾ བྷུཉྫིཏྭཱ ཨུཔོསཐཾ ཨདྷིཊྛཱཡ མཎིཀུཎྜལམེཁལཱནཱུཔུར ཝལཡཱདིཝིཙིཏྟསབྦཱལངྐཱརཝིབྷཱུསིཏཱཧི ཀོསེཡྻཱདིསུཁུམནཱནཱཝིདྷཝིཙིཏྟཝཏྠནིཝཏྠཱཧི ནཙྩགཱིཏཝཱདིཏཏུརིཡབྷཎྜགཧིཏ ཧཏྠཱཧི དེཝཙྪརཱཔཊིབྷཱགནཱཊཀིཏྠཱིཧི པརིཝཱརིཏོ ཝུཏྟཔྤཀཱརེཧི སདྡྷིཾ ཙེཏིཡཊྛཱནཾ གནྟྭཱ མཧཱབྷིཀྑུསངྒྷཾ ཝནྡིཏྭཱ ཨཊྛཱསི.

ཏཏོ སོམནགརེ གིརིཨབྷཡརཱཛཱ’པི སབྦེ ནཱགརཱ ཨཏྟནོ ཨཏྟནོ ཝིབྷཝཱནུརཱུཔེན དྷཱཏུནིདྷཱནཊྛཱནཾ ཨཱགཙྪནྟུཏི ནགརེ བྷེརིཾ ཙརཱཔེཏྭཱ སཡཾ སབྦཱལངྐཱརཔཏིམཎྜིཏོ སུསཛྫིཏཨམཙྩགཎཔརིཝཱརིཏོ ནིཀྑམི. སོམ དེཝཱིཔི སཱིསཾ ནཧཱཏྭཱ ཨཧཏཝཏྠནིཝཏྠཱ སབྦཱལངྐཱརཔཏིམཎྜིཏཱ དེཝཙྪརཱ ཝིཡ ཨཏྟནོ པརིཝཱརཱ པཉྩསཏཀུམཱརིཡོ ནཱིལཝཏྠེཧི པརིདཧཱཔེཏྭཱ ཏཐེཝ ཨལངྐཱརེཏྭཱ པུཎྞགྷཊེ གཱཧཱཔེཏྭཱ ཏཱསཾ ཨནནྟརཱ པཉྩསཏཀུམཱརིཡོ པཱིཏཝཏྠེཧི པརིདཧཱཔེཏྭཱ ཏཐེཝ ཨལངྐཱརེཏྭཱ པཱུཛཱབྷཎྜཱནི གཱཧཱཔེཏྭཱ, ཏཱསཾ ཨནནྟརཱ པཉྩསཏ ཀུམཱརིཡོ རཏྟཝཏྠེཧི པརིདཧཱཔེཏྭཱ ཏཐེཝ. ཨལངྐཱརེཏྭཱ ཝིཙིཏྲཔུཔྥཔཱུརིཏམཉྫུསཱཡོ གཱཧཱཔེཏྭཱ ཏཱསཾ ཨནནྟརཱ པཉྩསཏཀུམཱརིཡོ སེཏཝཏྠེཧི པརིདཧཱཔེཏྭཱ ཏཐེཝ ཨལངྐཱརེཏྭཱ དྷཱུམ ཀཊཙྪུཀེ གཱཧཱཔེཏྭཱ ཨེཝཾ པཱུཛཱཝིདྷཱནཾ སཾཝིདཧིཏྭཱ པརིཝཱརེན ¶ ཙེཏིངྒཎཾ གནྟྭཱ མཧཱབྷིཀྑུསངྒྷཾ པཉྩཔཏིཊྛིཏེན ཝནྡིཏྭཱ གནྡྷམཱལཱདཱིཧི པཱུཛཾ ཀཏྭཱ ཨཏྟནོ སཱམིནཱ གིརིཨབྷཡརཱཛེན སདྡྷིཾ ཨེཀཔསྶེ ཋཱིཏཱ.

ལོཎནགརེ མཧཱནཱགརཱཛཱ’པི སབྦཱལངྐཱརེཧི པཏིམཎྜིཏོ སབྦཱབྷརཎེཧི སུསཛྫཱིཏཨམཙྩམཎྜལཔརིཝུཏོ ནཙྩགཱིཏཏུརཱིཡཱནི པགྒཎྷཱཔཡམཱནོ གནྡྷམཱལཱ དྷཱུམཀཊཙྪུ གཱཧཱཔེཏྭཱ ཙེཏིཡཊྛཱནཾ ཨཱགནྟྭཱ བྷིཀྑུསངྒྷཾ ཝནྡིཏྭཱ ཨེཀམནྟཾ ཨཊྛཱསི.

སེརུནགརེ སིཝརཱཛཱ’པི ཨཏྟཱནཾ སབྦཱལངྐཱརེཧི ཨལངྐརིཏྭཱ མཧནྟེན པརིཝཱརེན པཱུཛཱཝིདྷཱནཾ གཱཧཱཔེཏྭཱ ཙེཏིཡཊྛཱནཾ ཨཱགནྟྭཱ མཧཱབྷིཀྑུསངྒྷཾ ཝནྡིཏྭཱ ཨེཀམནྟཾ ཨཊྛཱསི. རཱཛཔརིསཱ ཨཏྟནོ ཝིབྷཝཱནུརཱུཔེན ཝཏྠཱལངྐཱརེཧི ཙནྡན མཱལཱདཱིཧི ཙ སོབྷམཱནཱ ནལཱཊེ མུཏྟཱཀལཱཔམོལམྦཀ ཝིཙིཏྟསུཝཎྞཔཊྚཱནི བནྡྷིཏྭཱ ཧཏྠཱབྷརཎཱདི ཨནེཀཱབྷརཎེཧི དིབྦཔརིསཱ ཝིཡ སུམཎྜིཏཔསཱདྷིཏཱ ཝེསཱནུརཱུཔཱནི ཝིཝིདྷཱཝུདྷཱནི གཧེཏྭཱ ཨེཀཔསྶེ ཋཱིཏཱ. སཱིཧཝྱགྒྷདཱིཔིཙམྨེཧི པསཱདྷིཏསུཝཎྞཱལངྐཱརསུཝཎྞདྷཛཧེམཛཱལསཉྪནྣེ རཐ ཝརེ ཙ སབྦཱལངྐཱརཝིབྷུསིཏཱ རཐིཀཱ ཨཱརུཡ྄ཧ ཨེཀཔསྶེ ཋཱིཏཱ. བྲཱཧྨཎཔུཏྟཱདཡོ མཎྜིཏཙམྨེ པཱརུཔིཏྭཱ ཨུཔསོབྷཡམཱནཱ ཨེཀཔསྶེ ཋཱིཏཱ. བཧུ ཨམཙྩཱ ཨཏྟནོ ཨཏྟནོ ཝེསཱནུརཱུཔེན མཧགྒྷཝཏྠཱབྷརཎཝིབྷཱུསིཏཱ སཔརིཝཱརཱ ཨེཀཔསྶེ ཋཱིཏཱ. གནྡྷོདཀ པཱུརིཏ དཀྑིཎཱཝཏྟ སངྑཾ གཧེཏྭཱ ཨུཔཝཱིཏསུཏྟཾ ཨེཀཾསཾ ཀརིཏྭཱ བྲཱཧྨཎཝེཋནཾ ཝེཋེཏྭཱ པུརོཧིཏབྲཱཧྨཎཱ མཧནྟེན པརིཝཱརེན པཱུཛཱཝིདྷཱནཾ གཱཧཱཔེཏྭཱ ཙེཏིཡཊྛཱནཾ ཨཱགནྟྭཱ མཧཱབྷིཀྑུསངྒྷཾ ཝནྡིཏྭཱ ཛཡགྷོསཾ སཱཝེནྟཱ ཨེཝམཱཧཾསུ?

ཁེམཾ སུབྷིཀྑཾ བྷཝཏུ ནིཙྩཾ ཛནཔདཾ སིཝཾ;

སསྶཱནི སམུཔྤཛྫནྟུ རཉྙོ ཨེཝཾ ཛཡཱ སིཡུཾ.

ཨཝསེསཱ མཧཱཛནཱ ཨེཝམཱཧཾསུ? སམུདྡཔརིཡནྟཾ ¶ ཧི མཧིཾ སཱགརཀུཎྜལཾ ཝསུནྡྷརཾ ཨཱཝསཏུ ཨམཙྩཔརིཝཱརིཏོ. ཨེཝཾ ཝཏྭཱ? ཨམྷཱཀཾ ཨཡྻོ ཀཱཀཝཎྞཏིསྶོ མཧཱ རཱཛཱ སདེཝཀེ ལོཀེ ཨེཀཔུགྒལསྶ ལོཀནཱཐསྶནལཱཊདྷཱཏུཾ པཏིཊྛཱཔེཏཱི’ཏི ཨཏྟནོ ཨཏྟནོ ཝིབྷཝཱནུརཱུཔེན སུམཎྜིཏཔསཱདྷིཏཱ. ཁུཛྫཝཱམནཀཱདཡོ’པི སབྦེ ཛནཱ པཱུཛཱབྷཎྜཱནི གཧེཏྭཱ སཱདྷུཀཱརཾ དདམཱནཱ ཨཊྛཾསུ. ཨིམསྨིཾ ཙེཏིཡཊྛཱནེ རཱསཱིབྷཱུཏཱ པརིསཱ ཨེཝཾ ཝེདིཏབྦཱ? ཁཏྟིཡཱ བྲཱཧྨཎཱ ཝེསྶཱ ནེགམཱ ཙ སམཱགཏཱ པུཔྥཱདིགཧིཏཱ སབྦེ ཨལངྐཱརཝིབྷཱུསིཏཱ.

གཎནཱ ཝཱིཏིཝཏྟཱ ཏེ ཨནེཀེ ཙ མཧཱཛནཱ;

སམུདྡོ པཏྠརནྟོཝ ཁཏྟིཡཱ སམུཔཱགཏཱ.

ཨལངྐཏོ མཧཱརཱཛཱ སརཱཛཔརིཝཱརིཏོ;

དེཝརཱཛཱ ཡཐཱ སཀྐོ ཨཊྛཱསི ཙེཏིཡངྒཎེ.

སཱདྷུཝཱདེན སཏྟཱནཾ པཉྩངྒཏུརིཡེཧི ཙ;

ཧཏྠསྶརཐསདྡེན སམཱཀིཎྞཾ མཧཱིཏལཾ.

ཏཏོ ཙཱུལ༹པིཎྜཔཱཏིཡཏིསྶཏྠེརོ ཨཏྟནོ སདྡྷིཝིཧཱརཱིཀེ པཉྩསཏ ཁཱིཎཱསཝེ པརིཝཱརེཏྭཱ ཙེཏིཡཊྛཱནམེཝ ཨཱགཏོ. མཧཱསཱགལཏྠེརོ’པི པཉྩསཏ ཁཱིཎཱསཝེ པརིཝཱརེཏྭཱ ཙེཏིཡཊྛཱནམེཝ ཨཱགཏོ. མཧིནྡཏྠེརོ’པི ཨཏྟནོ སཱཝཀེ སཊྛིམཏྟེ ཁིཎཱསཝེ གཧེཏྭཱ ཙེཏིཡཊྛཱནམེཝ ཨཱགཏོ. ཨིཏི ཨིམིནཱ ནིཡཱམེནེཝ ཨེཀོ དྭེ ཏཡོ ཙཏྟཱརོ པཉྩ ཁཱིཎཱསཝཱ ཨཱགཙྪནྟཱ སཏྟ སཧསྶམཏྟཱ ཨཧེསུཾ. ཏཏོ ཙཱུལ༹པིཎྜཔཱཏིཡཏིསྶཏྠེརོ ཨེཏྟཀེ བྷིཀྑཱུ པརིཝཱརེཏྭཱ ཙེཏིཡངྒཎེ ནིསཱིདཱི. ཏཏོ རཱཛཱ ཨཱགནྟྭཱ པཉྩཔཏིཊྛིཏེན ཝནྡིཏྭཱ ཐེརེན སདྡྷིཾ ཀཐེསི? ¶ ཀེསདྷཱཏུ ཀུཏོ ལབྷིསྶཱམ ཨཡྻཱ’ཏི. ཏསྨིཾ ཁཎེ ཏིསྶཏྠེརོ ཨཏྟནོ སདྡྷིཝིཧཱརིཀཾ སིཝཏྠེརཾ ཨོལོཀེསི. སོ ཨོལོཀིཏཀྑཎེཡེཝ ནིསིནྣཊྛཱནཏོ ཨུཊྛཱཡ ཙཱིཝརཾ པཱརུཔིཏྭཱ མཧཱབྷིཀྑུསངྒྷཾ ཝནྡིཏྭཱ ཚལ༹བྷིཉྙོ མཧཱཁཱིཎཱསཝོ ཙཏུཏྠཛ྄ཛྷཱནཾ སམཱཔཛྫིཏྭཱ ཏཏོ ཝུཊྛཱཡ པཐཝིཡཾ ནིམུཛྫིཏྭཱ བྷུམིནྡྷརནཱགཝིམཱནེ པཱཏུརཧོསི.

(སུཏྭཱསྶ སིཝཐེརོ ཙ ཝསིཔྤཏྟོ ཝིསཱརདོ;

པཱཀཊོ ཨབྷཝི ནཱགནགརཾ པུརཏོ ཁཎེ.)

ཏསྨིཾ ཁོ པན སམཡེ ཛཡསེནོ ནཱགརཱཛཱ ཨཏྟནོ བྷཱགིནེཡྻཾ དྭིཀོཊིམཏྟེ ནཱགེ པརིཝཱརེཏྭཱ མཧཱ ཡསཾ ཨནུབྷཝམཱནཾ ནིསིནྣཾ ཨིངྒིཏསཉྙཾ དཏྭཱ ཐེརཾ དུརཏོཝ ཨཱགཙྪནྟཾ དིསྭཱ ཙིནྟེསི? ཨིམསྨིཾ ནཱགབྷཝནེ སམཎེཧི ཀཏྟབྦཀིཙྩཾ ནཏྠཱི. ནིསྶཾསཡཾ ཀེསདྷཱཏུཾ ནིསྶཱཡ ཨཱགཏོ བྷཝིསྶཏཱིཏི ཨུཊྛཱཡ དྷཱཏུགྷརཾ པཝིསིཏྭཱ དྷཱཏུཀརཎྜཀཾ གིལིཏྭཱ ཀིཉྩི ཨཛཱནནྟོ ཝིཡ ནིསཱིདི. ཏསྨིཾ ཀཱལེ ཐེརོ ཏསྶ སནྟིཀཾ ཨགམཱསི. ནཱགརཱཛཱ པཙྩུགྒནྟྭཱ པཊིསནྠཱརཾ ཀརོནྟོ ཐེརེན སདྡྷིཾ ཀཐེསི. ཀསྨཱ ཨཡྻོ ཨཱགཏོ’ཏི ཝུཏྟེ ཨེཝམཱཧ? ཏིལོཀནཱཐསྶ ཨམྷཱཀཾ སམྦུདྡྷསྶ ཀེསདྷཱཏཱུནཾ ཨཏྠཱཡ ཨཱགཏོ, ཏུཡ྄ཧཾ སནྟིཀེ ཋཔིཏཀེསདྷཱཏུཡོ པཔཉྩཾ ཨཀཏྭཱ མཡ྄ཧཾ དེཧི, ཏེཡེཝ སནྡྷཱཡ ཨུཔཛ྄ཛྷཱཡེན པེསིཏོམྷཱི’ཏི ཝུཏྟེ ཨམྷཱཀཾ སམྨཱ སམྦུདྡྷསྶ ཀེསདྷཱཏུཡོ མམ སནྟིཀེ ནཏྠཱི’ཏི ཨཱཧ. ཐེརོ དྷཱཏུཀརཎྜཀཾ གིལིཏབྷཱཝཾ ཉཏྭཱ གཎྷཱམི མཧཱརཱཛཱ ཀེསདྷཱཏུཡོ’ཏི ཝུཏྟེ ཨཱམ པསྶནྟོ གཧེཏྭཱ གཙྪཱཧཱིཏི ཨཱཧ. ཨེཝཾ ཏཡོ ཝཱརེ པཊིཉྙཾ གཧེཏྭཱ ཏཐེཝ ཋཱིཏོ?

ཨིདྡྷིཡཱ མཱཔཡིཏྭཱན ཏཏོ སོ སུཁུམཾ ཀརཾ,

པཝེསེཏྭཱ མུཁེ ཏསྶ གཎྷཱི དྷཱཏུཀརཎྜཀཾ;

ནཱགཱལཡཱབྷིནིཀྑམི ཏིཊྛ ནཱགཱ’ཏི བྷཱསིཡ.

ཏསྨིཾ ¶ ཁཎེ ཛཡསེནོ ནཱགརཱཛཱ སམཎཾ ཝཉྩེཏྭཱ པེསིཏོམྷཱི’ཏི ཝཏྭཱ ཏསྶ གཏཀཱལེ དྷཱཏུཀརཎྜཀཾ ཨོལོཀེཏྭཱ དྷཱཏུ ཨཔསྶིཏྭཱ སམཎེན ནཱསིཏོམྷཱི’ཏི དྭེ ཧཏྠེ ཨུཀྑིཔིཏྭཱ ཋཔེཏྭཱ ཨཏྟནོ སཀལནཱགབྷཝནཾ ཨེཀ ཀོལཱཧལཾ ཀཏྭཱ མཧནྟེན སདྡེན པརིདེཝནྟོ? ཨམྷཱཀཾ ཙཀྑུནི ཨུཔྤཱཊེཏྭཱ གཏོ ཝིཡ སདེཝཀསྶ ལོཀསྶ པཏིཊྛཱནབྷཱུཏསྶ སམྨཱསམྦུདྡྷསྶ ཀེསདྷཱཏུཡོ ཨཔཱཡདུཀྑཏོ ཨམུཉྩནྟཱནཾ ཨམྷཱཀཾ ཨབྷིབྷཝིཏྭཱ དྷཱཏུཡོ གཧེཏྭཱ གཏསམཎཾ ཨནུབནྡྷིཏྭཱ གཎྷིསྶཱམཱ’ཏི དྭེཀོཊིམཏྟེ ནཱགེ གཧེཏྭཱ ཨཏྟནོ བྷཱགིནེཡྻེན སདྡྷིཾ ཏསྶ པིཊྛིཏོ པིཊྛིཏོ ཨནུབནྡྷིཏྭཱ ཨཱཀཱསཾ ཨུགྒཙྪིཾ (སུ). ཏསྨིཾ ཁཎེ པན སིཝཏྠེརོ ཨཀཱསཏོ ཨོཏརིཏྭཱ པཐཝིཡཾ པཱཝིསི. པུན ཏེཔི པཐཝིཡཾ པཝིསིཾསུ. ཨེཝཾ ཐེརོ ཏེཧི སདྡྷིཾ ཨུམྨུཛྫ ནིམུཛྫཾ ཀརོནྟོ པཱཊིཧཱརིཡཾ དསྶེཏྭཱ སེརུནགརསྶ ནཱཏིདཱུརེ པིཊྛིཔཱསཱཎེ ཨུགྒཉྫི. ཏཏྠེཝ ཏེ སཾཝེཛེཏྭཱ ཙེཏིཡངྒཎེ མཧཱབྷིཀྑུསངྒྷསྶ པུརཏོ པཱཀཊོ ཨཧོསི. ནཱགཱ ཏཾ གཧེཏུཾ ཨསཀྐོནྟཱ མཧནྟེན སདྡེན རཝཾ པཏིརཝཾ དཏྭཱ. ཨིཏོ པཊྛཱཡ ནཊྛམྷཱ’ཏི ཏསྨིཾ པིཊྛི པཱསཱཎེ སབྦེ སམཱགམཾ ཀཏྭཱ མཧཱསདྡེན པརིདེཝིཾསུ? ནཊྛམྦྷཱ ཝཏ བྷོ’ཏི. ཏཏོ པཊྛཱཡ སོ པིཊྛིཔཱསཱཎོ ནཱགཱནཾ རཝཾ པཏིརཝཾ དཏྭཱ པརིདེཝིཏཧཱཝེན ནཱགགལླཾ ནཱམ ཨཧོསི.

ནཱགོ ཐེརསྶ པིཊྛིཏོཡེཝ ཨནུབནྡྷིཏྭཱ ཙེཏིཡངྒཎཾ གནྟྭཱ རཱཛཱནཾ ཨེཝམཱཧ? དེཝ, ཨེསོ བྷིཀྑུ མཡཱ ཨདིནྣདྷཱཏུ གཧེཏྭཱ ཨཱགཏོ’ཏི. ཏཾ སུཏྭཱ རཱཛཱ? སཙྩཾ ཀིར ཨཡྻ ནཱགསྶ ཝཙནནྟི ཝུཏྟེ ནཧེཝ མཧཱརཱཛ, ཨིམིནཱ དིནྣཾ ཨེཝ དྷཱཏུཾ ཨགྒཧེསིནྟི ཝུཏྟེ? ནཱགོ ཏཝ སཀྑིཾ དེཧཱིཏི ཨཱཧ. ཐེརོ ཏསྶ བྷཱགིནྱེཾ སམཎུཔྤལ ནཱགརཱཛཱནཾ སཀྑིཾ ཨཀཱསི. རཱཛཱ ཏསྶ བྷཱགིནེཡྻསྶ སབྦཝཙནཾ སུཏྭཱ སདྡཧི. ཏསྨིཾ ཀཱལེ དུཀྑཱབྷིབྷཱུཏོ ནཱགརཱཛཱ གནྟྭཱ བཧི ཋཱིཏོ. ཏཏོ པཊྛཱཡ སོ ནཱགརཱཛཱ ¶ བཧི ཧུཏྭཱ ནིསིནྣཏྟཱ བཧིནཱགརཱཛཱ ནཱམ ཨཧོསི. ཏསྶ པན བྷཱགིནེཡྻཾ ཨནྟོ ཙེཏིཡངྒཎེ ནིསཱིདཱཔེསི. ཨིམསྶ པན ཙེཏིཡསྶ ཨཱརཀྑཾ གཧིཏནཱགཱ ཀཐེཏབྦཱ. སུམནནཱགརཉྙོ པརིཝཱརཱ ཚཀོཊིམཏྟཱ ནཱགཱ, ཛཡསེནསྶ པརིཝཱརཱ ཀོཊིསཏམཏྟཱ ནཱགཱ, སམཎུཔྤལནཱགརཉྙོ པརིཝཱརཱ དྭིཀོཊིམཏྟཱ ནཱགཱ ཨཧེསུཾ. སབྦེ དྷཱཏུཡཱ ཨཱརཀྑཾ གཎྷིཾསུ. རཱཛཱ ཐེརསྶ ཧཏྠཏོ ཀེསདྷཱཏུཾ གཧེཏྭཱ རཏནཙངེགཱཊཀེ ཋཔེཏྭཱ མཧིནྡསྶ ནཱམ ཨམཙྩསྶ ཨདཱསི. ཏསྨིཾ སམཱགམེ ཏིཔིཊཀམཧཱཕུསྶདེཝཏྠེརསྶ སདྡྷིཝིཧཱརིཀཱ པཊིསམྦྷིདཔྤཏྟཱ ཙཏྟཱརོ སཱམཎེརཱ ཨཧེསུཾ. ཏེསུ ཨེཀོ མལཡ རཱཛཔུཏྟོ སུམནསཱམཎེརོ ནཱམ, ཨེཀོ སེརུནགརེ སིཝརཱཛབྷཱགིནེཡྻསྶ པུཏྟོ ཨུཏྟར སཱམཎེརོ ནཱམ. ཨེཀོ མཧཱགཱམེ མཱལཱཀཱརཔུཏྟོ ཙུནྡ སཱམཎེརོ ནཱམ ཨེཀོ མཧཱགཱམེ ཨེཀསྶ ཀུཊུམྦིཀསྶ པུཏྟོ མཧཱཀསྶཔསཱམཎེརོ ནཱམ, ཨིམེ ཙཏྟཱརོ སཱམཎེརཱ ཨཛྫ ཀཱཀཝཎྞཏིསྶམཧཱརཱཛཱ མཧཱཙེཏིཡེ དྷཱཏུ ནིདྷཱནཾ ཀརིསྶཏི, མཡཾ ཧིམཝནྟཾ གནྟྭཱ སུཀུསུམཱནི ཨཱཧརིསྶཱམཱཏི ཐེརཾ ཝནྡིཏྭཱ ཨཱཀཱསཏོ ཧིམཝནྟཾ གནྟྭཱ ཙམྤཀནཱགསལལཱདཡོ པཱུཛནཱིཡམཱལཾ གཧེཏྭཱ ཏཱཝཏིཾསདེཝ ལོཀཾ གཏཱ.

ཏསྨིཾ ཀཱལེ སཀྐོ དེཝརཱཛཱ སབྦཱབྷརཎཔཏིམཎྜིཏོ དྭིསུ དེཝལོཀེསུ དེཝཏཱཡོ གཧེཏྭཱ ཨེརཱཝཎཧཏྠཱིཀྑནྡྷམཱརུཡ྄ཧ ཨཌྜྷཏེཡྻཀོཊིདེཝཙྪརཱཔརིཝཱརིཏོ སུདསྶནམཧཱ ཝཱིཐིཡཾ ཝིཙརནྟོ སཝངྒོཊཀེ ཏེ ཙཏྟཱརོ སཱམཎེརེ དུརཏོཝ ཨཱགཙྪནྟེ དིསྭཱ ཧཏྠཱིཀྑནྡྷཏོ ཨོརུཡ྄ཧ པཉྩ པཏིཊྛིཏེན ཝནྡིཏྭཱ ཏེསཾ ཧཏྠེ མཱལཱཙངྒོཊཀེ དིསྭཱ? ཀིཾ ཨཡྻཱ ཏུམྷཱཀཾ ཧཏྠེ’ཏི པུཙྪི. ཏཾ སུཏྭཱ སཱམཎེརཱ མཧཱརཱཛ, ཀིཾ ཏྭཾ ན ཛཱནཱསི. ལངྐཱཡཾ ཀཱཀཝཎྞཏིསྶ མཧཱརཱཛཱ དསབལསྶ ནལཱཊདྷཱཏུཾ གཧེཏྭཱ མཧཱཝཱལུཀགངགཱཡ དཀྑིཎཔསྶེ སེརུ ནཱམ དཧསྶ ཨནྟེ ཝརཱཧ ནཱམ སོཎྜིམཏྠཀེ ཙེཏིཡཾ ཀཱརཱཔེཏུཾ ཏུམྷཱཀཾ ནིཡོགེན ཝིསྶཀམྨདེཝཔུཏྟེན ནིམྨིཏ྄ैཊྛཀཱནི གཧེཏྭཱ ཙེཏིཡཾ ཀཱརཱཔེཏྭཱ ཨཛྫ དྷཱཏུནིདྷཱནཾ ཀརོཏི. ཏཏྠ པཱུཛནཏྠཱཡ ཧིམཝནྟཏོ ཨཱནཱིཏཔུཔྥམིདནྟི ཝཏྭཱ ཨིཏོཔི ཀུསུམཾ གཧེཏུཾ ཨཱགཏམྷཱ’ཏི ཝདིཾསུ. སཀྐོ ཏེསཾ ཝཙནཾ སུཏྭཱ?

ཨཡྻ ¶ ཏུམྷཱཀཾ ཧཏྠེ པུཔྥཱནི ཙཱུལཱ༹མཎིཙེཏིཡེ པུཛེཏྭཱ ཨམྷཱཀཾ ཨུཡྻཱནཏོ པུཔྥཱནི གཧེཏྭཱ གཙྪཐཱཏི ཝཏྭཱ ཏེཧི སདྡྷིཾ གནྟྭཱ ཏེསཾ པུཔྥེཧི ཙཱུལཱ༹མཎིཙེཏིཡཾ པཱུཛེསི. ཏཏོ པཔཉྩཾ ན བྷཝིཏབྦནྟི སཀྐསྶ ནིཝེདེསུཾ. ཏཾ སུཏྭཱ སཀྐོ སཱམཎེརཱནཾ པཉྩམཧཱཨུཡྻཱནཏོ པཱརིཙྪཏྟ-ཀོཝིལཱ༹རཱདཱིནི པུཔྥཱནི ཙ ཙནྡནཙུཎྞཉྩ གཧེཏྭཱ དཱཔེསི. སཱམཎེརཱ པུཔྥཱནི གཧེཏྭཱ དེཝལོཀཏོ ཨོཏརིཏྭཱ ཧིམཝནྟཾ པཝིསིཏྭཱ སུཝཎྞམཎིཔབྦཏེ སནྟཙྪཱཡཱཡ ནསཱིདིཏྭཱ དིཝཱཝིཧཱརཾ ཀཏྭཱ ནཀྑཏྟཝེལཱཡ སམྤཏྟཱཡ མཎཱི གཝེསམཱནཱ ཙཏྟཱརོ མཎཡོ ཨདྡསཾསུ. ཏེསཾ ཨེཀོ ཨིནྡནཱིལམཎཱི, ཨེཀོ པཧསྶརཛོཏིརངྒ མཎཱི, ཨེཀོ ཝེལུརིཡམཎི, ཨེཀོ མསཱརགལླམཎི, ཙཏྟཱརོ མཎཡོ ཙ དིབྦཔུཔྥཱནི ཙ གཧེཏྭཱ ཐེརཱནཾ དསྶེསུཾ. ཐེརོ? མཧཱརཱཛ, ཨིམེ སཱམཎེརཱ པཱརིཙྪཏྟཀཀོཝིལཱ༹རཱདཱིནི པུཔྥཱནི ཙ ཙནྡནཙུཎྞཉྩ ཙཏྟཱརོ མཎཡོ ཙ གཧེཏྭཱ ཨཱགཏཱ’ཏི རཉྙོ ཨཱརོཙེསུཾ.

རཱཛཱ ཏཾ སུཏྭཱ སོམནསྶཛཱཏོ སཱམཎེརེ པཉྩ པཏིཊྛཱིཏེན ཝནྡིཏྭཱ ཏེསམཱཧཏམཎཡོ གཧེཏྭཱ མཧཱནནྡ ནཱམ ཨམཙྩསྶ དཏྭཱ ཐེརེཧཱི སདྡྷིཾ མཧནྟེན པརིཝཱརེན ཙེཏིཡངྒཎཾ གནྟྭཱ མཎིཀརཎྜཀེན དྷཱཏུཾ གཧེཏྭཱ ཨཏྟནོ སཱིསེ དྷཱཏུཾ ཋཔེཏྭཱ ཨུཔརི སེཏཙྪཏྟཾ ཀཱརཱཔེཏྭཱ ཙེཏིཡཾ ཏིཀྑཏྟུཾ པདཀྑིཎཾ ཀཏྭཱ པཱཙཱིནདྭཱརེ ཋཱིཏོ? ཨཡཾ དསབལསྶ ནལཱཊདྷཱཏུ ཨམྷེཧི ཀཱརཱཔིཏཱཡ བུདྡྷཔཊིམཱཡ ནལཱཊེ ཨུཎྞལོམཱཀཱརཾ ཧུཏྭཱ པཏིཊྛཧཏཱུཏི ཨདྷིཊྛཱསི. ཏསྶ ཙིནྟིཏཀྑཎེཡེཝ དྷཱཏུ ཀརཎྜཏོ ནབྷམུགྒནྟྭཱ ཨཱཀཱསེ སཏྟཏཱལཔྤམཱཎེ ཋཏྭཱ ཚབྦཎྞ རཾསིཡོ ཝིསྶཛྫེསི. ཏཱ རཾསིཡོ ཀུཊེན ཨཱསིཉྩམཱནཝིལཱིན སུཝཎྞཾ ཝིཡ ཨནྟལིཀྑཏོ ནིཀྑནྟསུཝཎྞརསདྷཱརཱ ཝིཡ སཀལལངྐཱདཱིཔཾ ¶ རཾསིཛཱལེཧི ཨེཀོབྷཱསཾ ཀཏྭཱ གཎྷིཾསུ. ཏསྨིཾ ཀཱལེ ཡམཀཔཱཊིཧཱརིཡསདིསཾ པཱཊིཧཱརིཡཾ ཨཧོསི. མཧཱཀཱརུཎིཀསྶ བྷགཝཏོ ཨདིཊྛཔུབྦཾ པཱཊིཧཱརིཡཾ དིསྭཱ མཧཱཛནཱ ཏཐཱགཏསྶ རཱུཔཀཱཡཾ པཙྩཀྑབྷུཏཱ ཝིཡ ཨཧེསུཾ.

ཨདིཊྛཔུབྦཾ སཏྠུསྶ པཱཊིཧཱིརཾ མཧཱཛནཱ;

དིསྭཱ པཱིཏིཔརཱ ཛཱཏཱ པསཱདམཛ྄ཛྷགུཾ ཛིནེ.

པཱུཛེསུཾ གནྡྷམཱལཉྩ ཨལངྐཱརཾ སཀཾ སཀཾ;

སབྦེ ཝནྡིཾསུ སིརསཱ-ཙེཏིཡཾ ཨཱིདིསཾ ཝརཾ.

ཏསྨིཾ སམཱགམེ ཨེཀོ པཎྜིཏཔུརིསོ ཛིནཾ ཐོམེནྟོ ཨེཝམཱཧ?

ནིབྦུཏསྶཱཔི བུདྡྷསྶ ཡསོ བྷཝཏི ཨཱིདིསོ;

ཋཱིཏསྶ ལོཀནཱཐསྶ ཀཱིདིསཱ ཨཱསི སམྤདཱ.

ཨནུབྷཱཝམིདཾ སབྦཾ པུཉྙེནེཝ མཧེསིནོ;

ཀརེཡྻ ཉཏྭཱ པུཉྙཾ ཏཾ པཏྠེནྟོ བོདྷིམུཏྟམཾ.

ཏསྨིཾ ཀཱལེ ནཱནཱརཏནཝིཙིཏྟཾ ཨནེཀཱལངྐཱརཔཏིམཎྜིཏཾ མཧཱརཧཾ སམུསྶིཏདྷཛཔཏཱཀཾ ནཱནཱཝིདྷཀུསུམསམཱཀིཎྞཾ ཨནེཀཔཱུཛཱཝིདྷཱནཾ གཧེཏྭཱ མནུསྶཱ ཚཎཝེསཾ གཎྷིཾསུ. ཨནེཀཝིདྷཏུརིཡསངྒྷུཊྚཾ ཨཧོསི. ཏསྨིཾ ཁཎེ དེཝཏཱཡོ པུཔྥཝསྶཾ ཝསྶཱཔེནྟི. མཧཱནུབྷཱཝསམྤནྣཱ ནཱགཱ པཱུཛཾ ཀརོནྟི. ཨེཝཾ སབྦེ དེཝཱ ནཱགཱ མནུསྶཱ སཱདྷུཀཱརཾ དེནྟི, ཨཔྥོཊེནྟི, ཝེལུཀྑེཔཾ ཀརོནྟི, ཧཏྠཱིནོ ཀུཉྩནཱདཾ ནདནྟི. ཨསྶཱ ཏུཊྛིརཝཾ རཝནྟི, བཧལགྷན མཧཱཔཐཝཱི ཡཱཝ ཨུདཀཔརིཡནྟཾ ཀམྤི. དིསཱསུ ཝིཛྫུལླཏཱ ནིཙྪརིཾསུ. སཀལལངྐཱདཱིཔེ སུམནཀཱུཊཱདཡོ མཧཱནགཱ ཀུསུམགཎསམཱཀིཎྞཱ ཨཧེསུཾ. སབྦེ ཛལཱསཡཱ པཉྩཝིདྷ པདུམསཉྪནྟཱ, དེཝཏཱནམནྟརེ མནུསྶཱ, མནུསྶཱནཾ ཨནྟརེ ཡཀྑནཱགསུཔཎྞཱདཡོ ཙ ཨཧེསུཾ. བྷིཀྑུབྷིཀྑུནཱིཨུཔཱསཀ ཨུཔཱསིཀཱ ཨཔརིམཱཎཱ ཨཧེསུཾ. མཧནྟེན སཱདྷུཀཱརེན མཧཱ ནིགྒྷོསེན སཀལལངྐཱདཱིཔེ ཏིབྦཝཱཏཱབྷིཧཏསམུདྡོ ཝིཡ ཨེཀནིནྣཱདཾ ¶ ཨེཀནིགྒྷོསཾ ཨཧོསི. ཨིམིནཱ པཱུཛཱཝིདྷཱནེན པསཱདཀབྷཱུཏམཧཱཛནཀཱཡམཛ྄ཛྷེ དྷཱཏུ པཱཊིཧཱརིཡཾ དསྶེཏྭཱ ཨཱཀཱསཏོ ཨོཏརིཏྭཱ བུདྡྷཔཊིམཱཡ ནལཱཊེ པུཎྞཙནྡསསྶིརཱིཀཾ ཨབྷིབྷཝནྟམིཝ ཝིརོཙམཱནཱ པཏིཊྛཱསི.

རཱཛཱ མཧཱནནྡནཱམཀསྶ ཨམཙྩསྶ ཧཏྠཏོ ཀེསདྷཱཏུཾ གཧེཏྭཱ ཝིཧཱརདེཝིཡཱ དཏྭཱ ཏྭཾ ཨིམཱ ཀེསདྷཱཏུཡོ དསབལསྶ ཨནཝལོཀིཏ མཏྠཀེ པཏིཊྛཱཔེཧཱི’ཏི ཨཱཧ. སཱ ཀེསདྷཱཏུཡོ གཧེཏྭཱ ཏཏྠེཝ པཏིཊྛཧནྟུ’ཏི ཨདྷིཊྛཱནཾ ཨཀཱསི. ཏསྨིཾ ཁཎེ ཀེསདྷཱཏུཡོ ཀརཎྜཏོ ནབྷཾ ཨུགྒནྟྭཱ མཡཱུརགཱིཝསཾཀཱསནཱིལརཾསིཡོ ཝིསྶཛྫེནྟཱི ཨཱཀཱསཏོ ཨོཏརིཏྭཱ བུདྡྷཔཊིམཱཡ ཨུཏྟམངྒེ སིརསྨིཾ པཏིཊྛཧིཾསུ.

ཏཏོ རཱཛཱ ཐེརེན སདྡྷིཾ དྷཱཏུགབྦྷཾ པཝིསིཏྭཱ དིབྦཙནྡནཙུཎྞསམཱཀིཎྞཾ པཱརིཙྪཏྟཀཀོཝིལཱ༹རཱདི སུགནྡྷཔུཔྥསནྠརཾ ཝིཡཱུཧིཏྭཱ པབྷཱསམུདཡསམཱཀིཎྞེ ཙཏྟཱརོ མཎི པཱསཱཎེ ཋཔེསི. ཏེསཾ ཨཱལོཀཱབྷིབྷཱུཏོ དྷཱཏུགབྦྷོ ཨཏིཝིཡ ཝིརོཙིཏྠ. སབྦནཱཊཀིཏྠཱིཡོ ཨཏྟནོ ཨཏྟནོ ཨཱབྷརཎཱནི ཨོམུཉྩིཏྭཱ དྷཱཏུགབྦྷེཡེཝ པཱུཛེསུཾ. ཏཏོ རཱཛཱ དྷཱཏུནིདྷཱནཾ ཀཏྭཱ བུདྡྷརཱུཔསྶ པཱདཏལེ སཱིསཾ ཋཔེཏྭཱ ནིཔནྣོ ཨེཝཾ པརིདེཝི; མཡ྄ཧཾ པིཏུཔིཏཱམཧཔརམྤརཱགཏཱདྷཱཏུ ཨཛྫ ཨཱདིཾ ཀཏྭཱ ཨིཏོ པཊྛཱཡ ཝིཡོགཱ ཛཱཏཱ ཨཧཾ དཱནི ཏུམྷཱཀཾ ཨཏིཙིརཾ (ཋཱིཏཱ) རམཎཱིཡཱ རོཧཎཛནཔདཱ ཨཱཧརིཏྭཱ ཨིམསྨིཾ ཋཱནེ པཏིཊྛཱཔེསིནྟི ཝཏྭཱ སིནེརུ མུདྡྷནི ¶ སམུཛྫལམཧཱཔདཱིཔོ ཝིཡ ཏུམྷེ ཨིདྷེཝ ཋཱིཏཱ. ཨིདཱནི ན གམིསྶཱམ མཡཾ ཁམཐ བྷགཝཱ’ཏི པརིདེཝམཱནོ དྷཱཏུ གབྦྷེཡེཝ པཏིཏྭཱ ཨཱཧ?

ཨཧོ ཝིཡོགཾ དུཀྑཾ མེ ཨེཏཱ བཱདྷེནྟི དྷཱཏུཡོ;

ཝཏྭཱ སོ པརིདེཝནྟོ དྷཱཏུགབྦྷེ སཡཱི ཏདཱ.

མརིསྶཱམི ནོ གམིསྶཾ ཨཡྻཾ ཧིཏྭཱ ཨིདྷེཝ’ཧཾ;

དུལླབྷཾ དསྶནཾ ཏསྶ སཾསཱརེ ཙརཏོ མམཱ’ཏི.

ཝཏྭཱ པརིདེཝནྟོ ནིཔཛྫི. ཏསྶ པན བྷིཀྑུསངྒྷསྶ ཨནྟརེ སཧདེཝོ ནཱམ ཐེརོ རཱཛཱནཾ དྷཱཏུགབྦྷེ རོདམཱནཾ ནིཔནྣཾ དིསྭཱ ཀིམཛ྄ཛྷཱསཡོ ཨེཏསྶཱ’ཏི ཙེཏོཔརིཡཉཱཎེན སམནྟཱཧརིཏྭཱ ཨིདྷ ནིཔནྣོ མརིསྶཱམཱི’ཏི ནིཔནྣབྷཱཝཾ ཛཱནིཏྭཱ ཨིདྡྷིཡཱ སཾསརཾ པིཡརཱུཔཾ མཱཔེཏྭཱ དྷཱཏུགབྦྷཏོ ཏཾ བཧི ཨཀཱསི.

(ཨིདྡྷིཡཱ སོ ཝསིཔཏྟོ ཚལ༹བྷིཉྙོ ཝིསཱརདོ;

ཏཾ ཁཎཉྙེཝ སཔྤཉྙོ རཱཛཱནཾ ཏཾ བཧིཾ ཨཀཱ.)

ཏཏོ པཋམཱནཱིཏཛོཏིརངྒ པཱསཱཎཾ དྷཱཏུགབྦྷསྶ ཨུཔརི ཝིཏཱནཾ ཝིཡ ཋཔེཏྭཱ ཨརཧནྟཱ? དྷཱཏུགབྦྷོ སམནྟཏོ ཙཏུརསྶམཉྩཾ ཝིཡ ཨེཀགྷནོ ཧོཏུ. དྷཱཏུ གབྦྷེ གནྡྷཱ མཱ སུསྶནྟུ, པུཔྥཱནི མཱ མིལཱཡནྟུ, རཏནཱནི མཱ ཝིཝཎྞཱ ཧོནྟུ, པཱུཛནཱིཡབྷཎྜཱནི མཱ ནསྶནྟུ, པཙྩཏྠིཀཔཙྩཱམིཏྟཱནཾ ཨོཀཱསོ ཝཱ ཝིཝརོ ཝཱ མཱ ཧོཏུ’ཏི ཨདྷིཊྛཧིཾསུ. ཏཏོ རཱཛཱ དྷཱཏུཡོ མཧནྟཾ པཱུཛཾ ཀཏྭཱ མངྒལཙེཏིཡེ ཙཏུརསྶཀོཊྛཀཾ ཨཏིམནོརམཾ ཚཏྟཀམྨཉྩ ཀེལཱསཀཱུཊཾ ཝིཡ སུདྷཱཀམྨཉྩ ཝཱལུཀཔཱདཏོ པཊྛཱཡ སབྦཉྩ ཀཏྟབྦཾ ཀམྨཾ ནིཊྛཱཔེསི. སོ པན སེཏ ནིམྨལཙནྡརཾསི ཝིཡ ཨུདཀབུབྦུལ༹ཀེལཱསཀཱུཊཔཊིབྷཱགོ ཚཏྟདྷརོ ¶ ཨཙལཔྤཏིཊྛིཏོ སུཛནཔྤསཱདཀོ ཨཉྙཏིཏྠཱིཡ མདྡནཀརོ མངྒལཐཱུཔོ ཝིརོཙིཏྠ.

ཝིལཱསམཱནོ ཨཊྛཱསི ཏོསཡནྟོ མཧཱཛནེ;

མངྒལཀེལཱསཐཱུཔོ ཨཙལོ སུཔྤཏིཊྛིཏོ.

སུཛནཔྤསཱདནཀརོ ཏིཏྠིཡདིཊྛིམདྡནོ;

བྷཝི སདྡྷཱཀརོ སེཊྛོ སབྦཛནཔསཱདཀོ.

ཙེཏིཡོ པཝརོ ལོཀེ མཧཱཛནནིསེཝིཏོ;

དྷཛཔུཔྥསམཱཀིཎྞོ སདཱ པཱུཛཱརཧོ བྷཝི.

བཧཱུ ཛནཱ སམཱགམྨ ནཱནཱ དེསཱ སམཱགཏཱ;

པཱུཛེསུཾ ཏཾ མཧཱཐཱུཔཾ སབྦདཱཔི ཨཏནྡིཏཱ.

ཨཱིདིསོ པཏིརཱུཔཝཱསོ སོ དེསོ དུལླབྷོ བྷཝེ;

ཨཔྤམཏྟཱ སདཱ སནྟཱ ཝིནཱཐ ཀུསལཾ བཧུནྟི.

རཱཛཱ ཀཔྤཱསིཀསུཁུམཝཏྠེན མཧཱརཧཾ ཙེཏིཡཾ ཝེཋེཏྭཱ, སིརིཝཌྜྷནཾ ནཱམ མཧཱབོདྷིཾ པཏིཊྛཔེཏྭཱ ཏཏྠ བོདྷིགྷརཉྩ ཀཱརཱཔེཏྭཱ ཏིབྷཱུམཀཾ ཨུཔོསཐཱགཱརཾ ཀཱརཱཔེཏྭཱ རཏྟིཊྛཱན དིཝཱཊྛཱནཱདཱིནི ཀཏྭཱ སབྦཾ ཝིཧཱརེ ཀཏྟབྦཾ ཀཱརེསི. ཨེཏྟཀཾ ཀཱརཱཔེཏྭཱ ཝིཧཱརཾ དཀྑིཎོདཀཾ དསྶཱམཱི’ཏི ཙིནྟེཏྭཱ ཨསཱིཏིསཧསྶམཏྟཱནཾ བྷིཀྑཱུནཾ སཏྟདིཝསཱནི ནཱནཱཝིདྷ སཱུཔཝྱཉྫནེཧི མཧཱདཱནཾ དཏྭཱ སཏྟམེ དིཝསེ མཧཱབྷིཀྑུ སངྒྷསྶ ཏིཙཱིཝརཏྠཱཡ ཝཏྠཱནི དཱཔེཏྭཱ པཱཏོཝ པཱཏརཱསབྷཏྟཾ བྷུཉྫིཏྭཱ ཐེརསྶ སནྟིཀཾ གནྟྭཱ ཝནྡིཏྭཱ ཨེཀམནྟཾ ཋཱིཏོ ཨེཝམཱཧ? ཨཡྻཱ, ཙཱཏུདྡསིཀེ མཧཱབྷིཀྑུསངྒྷསྶ དཀྑིཎཾ དཱཏུམིཙྪཱམཱི’ཏི. སོ པནཱཡསྨཱ ཨེཝམཱཧ; ཨུཔཀཊྛ པུཎྞམཱཡཾ ཨུཔོསཐདིཝསེ ཨསྶཡུཛནཀྑཏྟེན དཀྑིཎཾ དྷཱཏུཾ བྷདྡཀནྟི. སོ ཐེརསྶ ཝཙནཾ སུཏྭཱ པཉྩཔཏིཊྛིཏེན ཐེརཾ ཝནྡིཏྭཱ སོམནགརེ ཨཏྟནོ བྷགིནིཾ དེཝིཾ ཀཐེསི? བྷགིནི, དསབལསྶ ནལཱཊདྷཱཏུཾ ནིདཧིཏྭཱ མངྒལམཧཱཙེཏིཡཱནུརཱུཔཾ ¶ པཱསཱདཾ ཨལངྐཏདྭཱརཊྚཱལཀཏོརཎཾ སེཏ ཝཏྠ ཨནེཀདྷཛསམཱཀིཎྞཾ ཝིཧཱརཉྩ ཀཱརཱཔེཏྭཱ དཀྑིཎཾ དསྶཱམཱི’ཏི ཨཡྻསྶ ཀཐེསིཾ. སོ པནཱཡསྨཱ; ཨུཔཀཊྛ པུཎྞམཱཡ ཨུཔོསཐདིཝསེ དཱཏུཾ ཡུཏྟནྟི ཨཱཧཱ’ཏི. དེཝ, ཀིཾ ཀཐེསི, ཨཡྻསྶ ཀཐཱིཏནིཡཱམེནེཝ ཨུཔཀཊྛ པུཎྞམཱཡ ཨུཔོསཐདིཝསེ དཀྑིཎཾ དེཧཱི’ཏི ཨཱཧ. སོ ཏསྶཱ ཀཐཾ སུཏྭཱ སོམནསྶཔཏྟོ སཱདྷུ བྷདྡེ’ཏི སམྤཊིཙྪིཏྭཱ སོམནགརེ ཝིཧརནྟོ, ཨུཔཀཊྛ པུཎྞམཱཡ ཨུཔོསཐེ སམྤཏྟེཡེཝ ཨཛྫུཔོསཐོ’ཏི ཉཏྭཱ གིརིཨབྷཡཾ པཀྐོསཱཔེཏྭཱ, ཏཱཏ སྭེ དཀྑིཎཾ དཱཏབྦཾ ཏྭཾ སེནངྒཾ ཨལངྐརིཏྭཱ སྭེ ཨམྷེཧི སདྡྷིཾ ཨེཧཱི’ཏི ཝཏྭཱ སེརུནགརེ སིཝརཉྙོ ལོཎནགརེ མཧཱནཱགརཉྙོ པཎྞཾ པཧིཎཱི. སྭེ ཏུམྷཱཀཾ ཧཏྠིཨསྶརཐཔཏྟཱདཱིནི སུཝཎྞཱལངྐཱརེཧི ཨལངྐརིཏྭཱ སྭེ ཨམྷེཧི སདྡྷིཾ ཚཎ ཝེསཾ གཱཧཱཔེཏྭཱ ཨཡྻསྶ ཏིསྶཏྠེརསྶ དཀྑིཎཾ དཱིཡམཱནཾ སམོསརནྟུཏི. ཏེ པན རཱཛཱནོ སཱསནཾ སུཏྭཱ ཨཏྟནོ ཨཏྟནོ ཝིབྷཝཱནུརཱུཔེན ཧཏྠིཨསྶརཐཔཏྟཱདཱིནི ཨལངྐརིཏྭཱ གནྡྷཔཉྩངྒུལིཀཾ དཏྭཱ སུཝཎྞམཱལཱདཱིནི པིལནྡྷཱཔེཏྭཱ མཧཱ གོཎེཔི ཏཐེཝ ཨལངྐརིཏྭཱ སིངྒེསུ སུཝཎྞཀཉྩུཀཾ (པཊི) མུཉྩཱཔེཏྭཱ ཨམཙྩགཧཔཏི-བྲཱཧྨཎཔུཏྟ-ཨཛགོཔཀ-ཁུཛྫཝཱམནཀ-སེནཱཔཏིཨཱདཡོ ཙ ཝིཙིཏྟཝཏྠཱནི ནིཝཱསེཏྭཱ ནཱནཱཝིདྷཝིལེཔནཱནི ཝིལིམྤེཏྭཱ ཨཱགནྟྭཱ རཉྙོ དསྶཡིཾསུ. རཱཛཱཔི ཙཏུརངྒིནིཡཱ སེནཱཡ པརིཝུཏོ ཨལངྐཏཧཏྠིཀྑནྡྷཾ ཨཱརུཧི. སེསརཱཛཱནོ ཙ ཨཏྟནོ ཨཏྟནོ སེནངྒེཧི པརིཝཱརེཏྭཱ ཧཏྠིཀྑནྡྷེ ནིསཱིདིཏྭཱ རཱཛཱནཾ མཛ྄ཛྷེ ཀཏྭཱ ཝཱམདཀྑིཎཔསྶཏོ ནམསྶམཱནཱ ནིཀྑམིཾསུ. ཏསྶ པན གམནཾ ཨཛཱཏསཏྟུནོ ཏཐཱགཏསྶ དསྶནཏྠཱཡ ཛཱིཝཀམྦཝནགམནཾ ཝིཡ ཏིཾསཡོཛནཔྤམཱཎཾ ཨེརཱཝཎཧཏྠིཀྑནྡྷཾ ཨཱརུཧིཏྭཱ དྭཱིསུ དེཝལོཀེསུ དེཝེཧི པརིཝཱརེཏྭཱ སཀྐསྶ དེཝཱནམིནྡསྶ ནནྡནཝནགམནཀཱལོ ཝིཡ ཙ ཨཧོསི. སོ ཝཌྜྷམཱསཀཙྪཱཡཱཡ ¶ སམྤཏྟཱཡ སོམནགརཏོ ནིཀྑམིཏྭཱ སེརུདཧསྶ ཨནྟེ ནཱནཱཝིདྷ ཨལངྐཏཔཊིཡཏྟནཱཊཀིཏྠཱིནཾ པཉྩངྒིཀཏུརིཡཾ པགྒཎྷཱཔཡམཱནོ ཨཊྛཱསི.

མཧཱཔཐཝཱི བྷིཛྫམཱནཱ ཝིཡ པབྦཏཱ པརིཝཏྟམཱནཱ ཝིཡ མཧཱསམུདྡོ (ཐལཾ) ཨཝཏྠརིཏྭཱ བྷིཛྫམཱནཀཱལོ ཝིཡ ཙ ཨཧོསི. བྲཱཧྨཎཱ ཛཡམུཁམངྒལིཀཱ སོཏྠི ཝཙནཾ ཝདིཾསུ. སབྦཱལངྐཱརཔཏིམཎྜིཏཱ ནཱཊཀིཏྠིཡོ པཉྩངྒིཀཏུརིཡཾ པཝཏྟཡིཾསུ. མཧཱཛནོ ཝེལུཀྑེཔསཧསྶཱནི པཝཏྟེསི. ཏཏོ རཱཛཱ བཧཱུ གནྡྷདཱིཔདྷཱུཔཱདཡོ གཱཧཱཔེཏྭཱ ཨུཊྛཱཡ སེནཱཡ པརིཝུཏོ ཐེརསྶ ཝསནཊྛཱནཾ པཝིསིཏྭཱ ཐེརཾ ཝནྡིཏྭཱ ནིསིནྣོ ཨཱཧ? ཨཡྻ རཱཛཱནོ ཙ སམྤིཎྜིཏྭཱ དཀྑིཎོདཀསྶ དཱིཡམཱནསྶ ཀཱལོ’ཏི. ཐེརོ ཏསྶ ཀཐཾ སུཏྭཱ བྷདྡཀཾ མཧཱརཱཛཱ’ཏི སམྤཊིཙྪི. ཏསྨིཾ དཀྑིཎོདཀསྶ དཱནདིཝསེ ནཱནཱཝིདྷཝིཙིཏྟམཎིདཎྜཀེསུ ནཱནཱཝིདྷ དྷཛཔཏཱཀཱདཱིནི བནྡྷཱཔེཏྭཱ སམུསྶིཏཱནི ཨཧེསུཾ. པུརིམཱདཱི དིསཱསུ མནུཉྙཝཱཏཱ ཝཱཡིཾསུ. ཏཐཱ མཧཱརཾསིཛཱལསམུཛྫལིཏོ སཧསྶརཾསིབྷཱཀརོ ཨཏྠངྒཏོ ཨཧོསི. ཝིཔྥུརིཏཀིརཎརཛདྷཱུམརཱཧུཨབྦྷཱདཱིཧི ཨུཔརོདྷེཧི ཝིརཧིཏོ ཏཱརཱགཎཔརིཝུཏོ པུཎྞཙནྡོ སམུཛྫལརཛཏམཡཾ ཨཱདཱསམཎྜལཾ ཝིཡ པཱཙཱིནདིསཏོ སམུགྒཏོ. ཏསྨིཾ ཁཎེ དཎྜདཱིཔིཀཱདཡོ སམུཛྫལཱཔེསུཾ. མཧཱམངྒལཙེཏིཡཾ པན ཛཱཏིསུམནམཱལཱདཱམེན པརིཀྑིཔིཏྭཱ ཨེཀམཱལཱགུཎཾ ཝིཡ ཨལངྐརི. ཡཐཱ ཏཱརཱགཎཔརིཝུཏོ པུཎྞཙནྡོ ཏཐཱ པདཱིཔམཱལཱལངྐཏོ མཧཱཙེཏིཡོ ཨཏིཝིཡ ཝིརོཙཏི. སཀལ ལངྐཱདཱིཔེ པན སབྦེ རུཀྑཱཔི ཝིཙིཏྟདྷཛེན ཨལངྐཏཱ ཝིཡ ཨཀཱལཕལཔལླཝེཧི ཝིཙིཏྟཱ ཨཧེསུཾ. མཧཱསམུདྡལོཎསཱགརཱདཡོ’པི པཉྩཝིདྷཔདུམསཉྪནྣཱ ཨཧེསུཾ.

ཝིཙིཏྲཝཏྠཱབྷརཎེཧི སབྦེ,

ཨལངྐཏཱ དེཝསམཱནཝཎྞཱ;

ཨནེཀསངྑྱཱ སུམནཱ པཏཱིཏཱ,

ཛནཱ སམནྟཱ པརིཝཱརཡིཾསུ.

སབྦེཝ ¶ ཨུཛྫལཱཔེསུཾ དཎྜདཱིཔཾ མནོརམཾ;

སཀལམྤི ཨིདཾ དཱིཔཾ ཨཱསི ཨོབྷཱསིཏཾ ཏདཱ.

ཏཱརཱགཎསམཱཀིཎྞོ པུཎྞཙནྡོཝ ཛོཏཡཱི;

སཱརདེ ནབྷམཛ྄ཛྷམྷི ཋིཏོ རུཙིརརཾསིཡཱ.

ཏཐཱ ཨཡཾ ཐཱུཔཝརོ སུཔྤབྷཱསོ ཨལངྐཏོ;

མཱལཱཔདཱིཔམཛ྄ཛྷམྷི བྷཱཏི བྷུཏིལཀུཏྟམོ.

སབྦེ’པི པཱདཔཱ ཨསྶ ལངྐཱདཱིཔསྶ སབྦསོ;

དྷཛེཧི’ཝ སམཱཀིཎྞཱ ཨཱསུཾ པུཔྥཕལནྡདཱ.

སཙེཏནཱ ཡཐཱ སབྦེ ཨཀཱ པཱུཛཾ ཨཀཱ ཏདཱ;

ཏཐཱ ཨཙེཏནཱ སབྦེ ཨཀཱ པཱུཛཾ ཨནཔྤཀཾ.

ཡེབྷུཡྻེན བྷུམཊྛེ དེཝེ ཨུཔཱདཱཡ ཡཱཝ ཨཀཎིཊྛཀཱ དེཝཱ བྲཧྨཱ དིབྦམཱལཱཔཱརིཙྪཏྟཀཀོཝིལཱ༹རཙནྡནཙུཎྞཾ གཧེཏྭཱ ཨཱགཏཱདེཝཱཏི ཝཱ མནུསྶཱཏི ཝཱ ཛཱནིཏུཾ ཨསཀྐོནྟི. ཨུཀྐཊྛམཧཱསམཱགམོ ཨཧོསི. ཏསྨིམྤི དིཝསེ མཧཱཔཐཝི ཨཱཀཱསཡུགནྡྷརཙཀྐཝཱལ༹པབྦཏུཏྟམཱདཡོ ཀམྤིཾསུ. ཏཾ དིསྭཱ རཱཛཱ ཨཏིཝིཡ སོམནསྶཔྤཏྟོ ཐེརེ ཙ ཨཝསེས མཧཱམཏྟཱདཡོ སནྣིཔཱཏེཏྭཱ ནཱཊཀཱདཡོ ཙ གཧེཏྭཱ, ཨིདཱནེཝཱཧཾ ཝིཧཱརདཀྑིཎཾ དསྶཱམི’ཏི ཙེཏིཡངྒཎཾ ཨགམཱསི. ཐེརོཔི བྷིཀྑུསངྒྷཾ གཧེཏྭཱ ཙེཏིཡངྒཎེ ཨལངྐཏམཎྜཔེ ནིསཱིདི. རཱཛཱ ཝཱསིཏགནྡྷོདཀསུཝཎྞབྷིངྐཱརཾ གཧེཏྭཱ ཨུདཀཾ ཐེརསྶ ཧཏྠེ ཨཱསིཉྩིཏྭཱ དཀྑིཎཾ ཨདཱསི. དཏྭཱ ཙ པན ཨེཝམཱཧ; ཨཡྻཱ ཨེསཱ དྷཱཏུ མཡ྄ཧཾ པིཏཱམཧཝཾསེན ཨཱགཏཱ. ཨིདཱནི ཨམྷཱཀཾ ཨཏིརུཙིརརམཎིཡཱ རོཧཎཛནཔདཱ ཨཱཧརིཏྭཱ སུཝཎྞེན དྷཱཏུགབྦྷཾ, སཏྟརཏནེན དྷཱཏུམཎྜཔཾ ཀཱརཱཔེཏྭཱ ཏསྨིཾ སུཝཎྞམཡཾ བུདྡྷཔཊིམཾ ནིསཱིདཱཔེཏྭཱ ཨམྷཱཀཾ དསབལསྶ ནལཱཊདྷཱཏུཾ ¶ ནིདཧིཏྭཱ ཨཡྻསྶ ཙཱིཝརཱདཱིནམཏྠཱཡ ཨིདཱནི སོལ༹སགཱམཝརཱནི དསྶཱམི’ཏི གཱམཝརཱནི དཏྭཱ སམནྟཏོ ཏིགཱཝུཏཔྤམཱཎེ སེརུདཧེ བྷེརིཾ ཙརཱཔེཏྭཱ ཨཱརཱམིཀཾ ཀཏྭཱ ཨཱཧ? བྷནྟེ, ཏུམྷཱཀཾ མཡཱ དིནྣསོལ༹སགཱམཾ ཨཛྫེཝ གནྟབྦཾ. གནྟྭཱ ཙ པན ཨཛྫེཝ པརིགྒཧཾ ཀརོཐཱཏི ཝཏྭཱ ཏཏྠེཝ ཝཱསུཔགཏོ པུན དིཝསེ སམཱགནྟྭཱ སཏྟཱཧཾ མཧཱདཱནཾ དཏྭཱ སཏྟམེ དིཝསེ མཧཱབྷིཀྑུསངྒྷསྶ ཏཱིཙཱིཝརཔྤཧོནཀསཱཊཀཾ པཎཱིཏཾ བྷོཛནཾ དཏྭཱ ཐེརསྶ སནྟིཀཾ ཨཱགཏོ, ཨཡྻ ཝིཧཱརེ ཀཏྟབྦཾ ཨཔརིཧཱཔེཏྭཱ མཡཱ ཀཏཾ, གེཧཾ གམིསྶཱམཱིཏི (ནིཝེདེསི). ཐེརོ ཏསྶ ཀཐཾ སུཏྭཱ སཱདྷུ མཧཱརཱཛཱཏི སམྤཊིཙྪི.

སོ པན ཙེཏིཡསྶ པཱུཛནཏྠཱཡ པུཔྥཱརཱམཾ ཀཱརཱཔེཏྭཱ མཱལཱཀཱརཱནཾ པརིབྦཡཾ དཱཔེསི. ཏཐཱ བྷེརིཝཱདཀནཱཊཀཱནམྤི ཝིཧཱརསཱིམནྟེ སུཝཎྞནངྒལེན པརིཙྪིནྡིཏྭཱ ཨཱརཱམིཀཱནམྤི གཱམཾ ཀཱརཱཔེསི. བྷིཀྑུསངྒྷསྶ ཝེཡྻཱཝཙྩཏྠཱཡ ཨཏྟནོ སནྟིཀེ པཉྩསཏཨམཙྩདྷཱིཏརོ ཏཏྟཀེ ཨམཙྩཔུཏྟེ དཱསདཱསིཡོ ཙ དཏྭཱ པརིབྦཡཏྠཱཡ ཏེསཾ ཏེསཾ པཉྩསཏསཧསྶཀཧཱཔཎེ ཙ དཱཔེསི. བྷིཀྑུསངྒྷསྶ ཙ དྷཱཏུཔུཛནཏྠཱཡ སོལ༹སསཧསྶཾ ཀཧཱཔཎཾ དཱཔེསི.

ཏཏོ གིརིཨབྷཡཾ པཀྐོསཱཔེཏྭཱ, ཏཱཏ ཏུམྷེ ཨིདྷེཝ ནིཙྩཾ ཝསཐ. ཨམྷཱཀཾ ཝིཧཱརེ ཙ ཨཱརཱམིཀེསུ ཙ ཨཡྻེསུ ཙ ཨཔྤམཏྟོ ཧོཧཱིཏི ཨོཝདིཏྭཱ སབྦཾ ཏསྶ ནིཡྻཱདེསི. ཐེརོ ཏསྶ ཨེཝམཱཧ? མཧཱརཱཛ སམནྟཏོ མཧཱསཱིམཾ བནྡྷིཏབྦནྟི. བནྡྷཐ བྷནྟེཏི ཝུཏྟེ? མཧཱརཱཛ ཨཀིཏྟིཏེན ནིམིཏྟེན སཱིམཾ བནྡྷིཏུཾ ནསཀྐཱ, ཝིཧཱརསྶ པཱཙཱིན པཙྪིམུཏྟརདཀྑིཎཏོ མཧཱསཱིམཾ བནྡྷནཱཡ ནིམིཏྟཾ སལླཀྑེཏྭཱ དེཧི, མཡཾ སཱིམཾ བནྡྷིསྶཱམཱཏི ཨཱཧ. རཱཛཱ ཏུཊྛོ སཏྟ ཨམཙྩེ སབྦཱལངྐཱརེན ཨལངྐརིཏྭཱ སཱིམཱནིམིཏྟཾ ཀིཏྟེཏྭཱ ཨཱགམནཏྠཾ ¶ པེསེསི. ཏེ པན སཏྟ ཨམཙྩཱ ཙཏུསུ དིསཱསུ ནིམིཏྟཾ སལླཀྑེཏྭཱ པཎྞེ ལིཁིཏྭཱ ཨཱཧརིཏྭཱ རཉྙོ ཨདཾསུ. རཱཛཱ ཨེཀེཀཾ སཏཀཧཱཔཎཾ དཏྭཱ ཙཏུསུ དིསཱསུ ཨཱརཀྑཾ དཱཔེཏྭཱ སཱིམཾ བནྡྷནྟཱུཏི མཧཱབྷིཀྑུསངྒྷསྶ ནིཝེདེསི. ཨཐ ཐེརོ བྷིཀྑུསངྒྷཔརིཝུཏོ ཙེཏིཡངྒཎེ ནིསཱིདིཏྭཱ ཝཔྤམཱསཀཱལ༹པཀྑདྭཱདསདིཝསེ སཱིམཾ བནྡྷིཏྭཱ ནིཊྛཔེསི.

ཏཏྠ སཱིམཱནིམིཏྟཾ ཨེཝཾ ཛཱནིཏབྦཾ; པུརིམཱཡ དིསཱཡ སིགཱལ པཱསཱཎཾ གཏོ. ཏཏོ མཙྪསེལགཱམསྶ ཝཱམ པསྶེན ཀོཊསཱིམཱ ནཱམ གཱམཀྑེཏྟཾ ཝིསྶཛྫེཏྭཱ གཎདྭཱརགཱམཾ གཏོ. ཙིཏྟཝཱཔིཡཱ ཨུཏྟརཝཱན ཀོཊིཏོ ཝརགཱམཀྑེཏྟེ པིཊྛིཔཱསཱཎཾ གཏོ. ཏཏོ སཱལིཀཾ ནཱམ མདྷུཀརུཀྑེ ཋཱིཏཔཱསཱཎཐཱུཔསྶ གཏོ. ཏཏོ ཝུཏྟིཀ ནཱམ ཝཱཔིཡཱ དཀྑིཎཝཱན ཀོཊིཏོ ཀཎིཀཱར སེལསྶ གཏོ. ཏཏོ ཚནྣཛ྄ཛྷཱཔིཏསེལསྶ གཏོ. ཏཏོ ཀུཀྐུཊསིཝ ནཱམ ཨུཔཱསཀསྶ མདྷུཀརུཀྑེ ཋཱིཏཾ ཐཱུཔཾ གཏོ. ཏཏོ སོཎྜཾ ནཱམ སེལཾ གཏོ. ཏཏོ སབརཾ ནཱམ པཱསཱཎཾ གཏོ. ཏཏོ ཨེལཱལཏིཏྠསྶ གཏོ. ཏཏོ སོབྦྷ མཛ྄ཛྷིམེན གནྟྭཱ ཨསྶབནྡྷནཾ ནཱམ ཋཱནཾ གཏོ. ཏཏོ པཱསཱཎསྶ མཏྠཀེ ཨུདཀ ཀཱཀཾ ནཱམ ནིགྲོདྷཾ གཏོ. སོ རུཀྑོ ཨུདཀ ཀཱཀཱནཾ ཝུསིཏ བྷཱཝེན ཨེཝཾ ནཱམ ཛཱཏོ. ཏཏོ ཏམྦཏིཏྠཾ ནཱམ གནྟཱ མཧཱཙཱརིཀསྶནཱམ ཐཱུཔམགྒསྶ གཏོ. ¶ ཏཏོ ཨསྶམཎྜལཔིཊྛིཾ གཏོ. ཏཏོ མཧཱ ཀདམྦ པསྶེ ཋཱིཏཾ པཱསཱཎཐཱུཔཾ གཏོ. ཏཏོ མཧཱ རཱཛུཝཱཔིཡཱ ཨུཏྟརཀོཊིཡཱ ཋཱིཏཾ མཧཱནིགྲོདྷརུཀྑཾ གཏོ. ཏཏོ མཧཱཝནཔིཊྛིཾ གཏོ. ཏཏོ ལོཎསཱགརསྶ ཨནྟེ རཛཏསེལཾ གཏོ. པུན ཨཱཝཏྟིཏྭཱ སིགཱལ པཱསཱཎེཡེཝ ཋཱིཏོ. ཨིམཾ ཨེཏྟཀཾ པདེསཾ སམནྟཏོ པརིཙྪིནྡཱཔེཏྭཱ རཱཛཱ ཨདཱསི. ཝིཧཱརསྶ བཧཱུ ཨཱརཱམིཀེ ཙ (ཏེསཾ) ཝིཝིདྷཱནི ཨུཔཀརཎཱནི (ཙ) དཱཔེཏྭཱ སབྦེ པཱཀཱརཏོརཎཱདཡོ ཀཱརཱཔེཏྭཱ ཝིཧཱརཾ ནིཊྛཱཔེཏྭཱ རོཧཎམེཝ གཏོ.

རཱཛཱ པསནྣཧདཡོ མཧཱཔུཉྙོ མཧཱབལོ;

ཀཱརེཏྭཱ ཨུཏྟམཾ ཐཱུཔཾ ཀཉྩནགྒྷཱིཀ སོབྷིཏཾ.

བནྡྷཱཔེཏྭཱ ཏཏོ སཱིམཾ ཝཊྚགཱམཉྩ སོལ༹ས;

དཏྭཱ ཨཱརཱམིཀཱནཉྩ སབྦུཔཀརཎཱནི ཙ.

ཏཏོ སོ རོཧཎཾ གནྟྭཱ མཧཱསེནཱཔུརཀྑཏོ;

ཝིཧཱརདེཝིཡཱ སདྡྷིཾ མོདམཱནོ ཝསཱི ཏཧིཾ.

ཐེརོ པན ཏཏྠེཝ ཝིཧརནྟོ ཡོ ཨིམསྨིཾ ཝིཧཱརེ ཝསནྟོ ཏཐཱགཏསྶ ཨེཀགནྡྷཀུཊིཡཾ ཝུཏྠོ ཝིཡ བྷཝིསྶཏཱིཏི ཁྱཱཀརིཏྭཱ ཏཏོ པཊྛཱཡ སཱིལཱཙཱརསམཱདྷིསམཱཔཏྟིཔཊིལདྡྷཛལ༹བྷིཉྙཱཔཊིསམྦྷིདཔྤཏྟེཧི ཁཱིཎཱསཝེཧི པརིཝཱརེཏྭཱ སབྦ བུདྡྷགུཎཾ ཨནུསྶརནྟོ ཙིརཾ ཝསིཏྭཱ ཏཏྠེཝ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡི.

ཨནེཀགུཎསམྤནྣོ ¶ ཏིསྶཏྠེརོ བཧུསྶུཏོ;

ཛནཱནཾ སངྒཧཾཀཏྭཱ ནིབྦུཏོ སོ ཨནཱསཝོ.

ཐེརཱཔི ཏེ སཱིལསམཱདྷིཡུཏྟཱ,

བཧུསྶུཏཱ སཱདྷུགུཎཱབྷིརཱམཱ;

པཉྙཱཔབྷཱཝཱཡུཔྤནྣཙིཏྟཱ,

གུཎཱཀརཱ ཏཱནཡུཏཱ ཛནཱནཾ.

པཧཱིནབྷཝསཾསཱརཱ པབྷིནྣཔཊིསམྦྷིདཱ;

ནཱམརཱུཔཾ སམཱསནྟོ པེསལཱ ཚིནྣབནྡྷནཱ.

སཏྟཱནཾ ཨུཏྟམཾ སནྟིཾ ཀཏྭཱ ཙ ཛནསངྒཧཾ;

ནིབྦུཏཱ ཏེ མཧཱཔཉྙཱ པདཱིཔོཙ སུམཱནསཱ.

ཨིཏི ཨརིཡཛནཔྤསཱདནཏྠཱཡ ཀཏེ དྷཱཏུཝཾསེ

དྷཱཏུནིདྷཱནཱདྷིཀཱརོ ནཱམ

པཉྩམོ པརིཙྪེདོ.

ཨིམིནཱ ¶ ཀཱརཱཔིཏཝིཧཱརཱ ཀཐེཏབྦཱ; ཝིཧཱརདེཝཱིམཧཱཝིཧཱརཾ, ཚཱཏཔབྦཏ ཝིཧཱརཾ, སམུདྡཝིཧཱརཾ, ཙིཏྟལཔབྦཏཝིཧཱརཾ, བྷདྡཔཱསཱཎདྭཱརཝིཧཱརཾ, ཨཙྪགལླ ཝིཧཱརཾ, ཀོལ༹མྦཏིསྶཔབྦཏཝིཧཱརཾ, གཎཝིཧཱརཾ, ཀཱལཀཝིཧཱརཾ, དུཀྑཔཱལཀ ཝིཧཱརཾ, ཨུཙྩངྒཎཝིཧཱརཾ, ཀོཊིཏིསྶཝིཧཱརཾ, ཏསྶ པན ཨེཀནཱམཾ ཀཏྭཱ ཀཱརཱཔིཏེ མཧཱགཱམེ ཏིསྶམཧཱཝིཧཱརཱདིཾ ཀཏྭཱ ཨེཀསཏཨཊྛཝཱིསཝིཧཱརཱནི ཀཏཱནི ཨཧེསུཾ.

ཨཊྛཝཱིསཨེཀསཏཝིཧཱརཉྩ མཧཱརཧཾ;

ཝིཧཱརདེཝིཡཱ སདྡྷིཾ ཀཱརཱཔེསི མཧཱཡསོ.

ཏཏོ པཊྛཱཡ རཱཛཱ མཧཱདཱནཾ དཏྭཱ པུཉྙཱནི ཀཏྭཱ ཏཏོ ཙུཏོ དེཝལོཀེ ནིབྦཏྟི.

ཀཏྭཱནི པུཉྙཀམྨཱནི ཨནེཀཱནི མཧཱཡསོ;

ཨཏྠཾ ཛནསྶ ཀཏྭཱན གནྟྭཱན ཏུསིཏཾ པུརཾ.

སོ ཏཏྠ དིབྦསམྤཏྟིཾ ཙཱིརཾ བྷུཉྫིཡ ནནྡིཏོ;

མཧཱཝཱིབྷཝསམྤནྣོ དེཝཏཱནཾ པུརཀྑཏོ.

ཏམྤི སམྤཏྟིམོཧཱཡ ཛཱིཝཝལོཀེ མནོརམེ;

ལོཀུཏྟརཾ སིཝཾ ཁེམཾ ཨིཙྪནྟོ ཨཱགམིསྶཏི.

སོ ཏཏོ ཙུཏོ ཛམྦུདཱིཔེ ནིབྦཏྟིཏྭཱ མེཏྟེཡྻ བྷགཝཏོ པིཏཱ སུབྲཧྨཱ ནཱམ བྷཝིསྶཏི. ཝིཧཱརདེཝཱི ཏསྶེཝ མཱཏཱ བྲཧྨཝཏཱི ནཱམ བྲཱཧྨཎཱི བྷཝིསྶཏི. ཨབྷཡགཱམཎཱིཀུམཱརོ ཏསྶེཝ མེཏྟེཡྻསྶ བྷགཝཏོ པཋམགྒསཱཝཀོ བྷཝིསྶཏི. ཀནིཊྛོ སདྡྷཱཏིསྶོ དུཏིཡགྒསཱཝཀོ བྷཝིསྶཏི.

ཨེཏྟཱཝཏཱ ནལཱཊདྷཱཏུ སཾཝཎྞནཱ སམཏྟཱ.

དྷཱཏུཝཾསོ སམཏྟོ.

ཨནེན ¶ པུཉྙཀམྨེན སཾསརནྟོ བྷཝཱབྷཝེ;

སབྦཏྠ པཎྜིཏོ ཧོམཱི སཱརིཔུཏྟོཝ པཉྙཝཱ.

ཨརིམེདསྶ བུདྡྷསྶ པབྦཛིཏྭཱན སཱསནེ;

ནིབྦཱནཾ པཱཔུཎིཏྭཱན མུཉྩེམི བྷཝབནྡྷནཱ.

ཨནེན མེ སབྦབྷཝཱབྷཝེ’ཧཾ,

བྷཝེཡྻམེཀནྟཔརཱནུཀམྤཱི;

ཀུལཱི བལཱི ཙེཝ སཏཱི མཏཱི ཙ,

ཀཝཱིཧིསནྟེཧི སདཱ སམངྒཱི.

པཉྙཱཝནྟཱནཾ ཨགྒོ བྷཝཏུ.