📜
ཛིནཙརིཏཡ ¶
ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ
ཨུཏྟམཾ ཨུཏྟམངྒེན ནམསྶིཏྭཱ མཧེསིནོ;
ནིབྦཱཎམདྷུདཾ པཱདཔངྐཛཾ སཛྫནཱལིནཾ.
མཧཱམོཧཏམཾ ལོཀེ དྷཾསེནྟཾ དྷམྨབྷཱཀརཾ;
པཱཏུབྷཱུཏཾ མཧཱཏེཛཾ དྷམྨརཱཛོདཡཱཙལེ.
ཛནྟུཙིཏྟསརེ ཛཱཏཾ པསཱདཀུམུདཾ སདཱ;
བོདྷེནྟཾ སངྒྷཝནྡཉྩ སིལོརུཀིརཎུཛྫལཾ.
ཏཧིཾ, ཏཧིཾ སུཝིཏྠིཎྞཾ ཛིནསྶ ཙརིཏཾ ཧིཏཾ;
པཝཀྑཱམི སམཱསེན སདཱ’ནུསྶརཎཏྠིཀོ.
པཎིཏཾ ཏཾ སརནྟཱནཾ དུལླབྷམྤི སིཝཾཔདཾ;
ཨདུལླབྷཾ བྷཝེ བྷོགཔཊིལཱབྷམྷི ཀཱ ཀཐཱ?
ཏསྨཱ ཏཾ བྷཉྙམཱནཾ མེ ཙིཏྟཝུཏྟཔདཀྐམཾ;
སུནྡརཾ མདྷུརཾ སུདྡྷཾ སོཏུསོཏརསཱཡནཾ.
སོཏཧཏྠཔུཊཱ སམྨཱ གཧེཏྭཱན ནིརནྟརཾ;
ཨཛརཱམརམི’ཙྪནྟཱ སཱདྷཝོ པརིབྷུཉྫཐ.
ཀཔྤསཏསཧསྶསྶ ཙཏུནྣཾ ཙཱ’པི མཏྠཀེ;
ཨསངྑེཡྻཱནམཱ’ཝཱསཾ སབྦདཱ པུཉྙཀཱམིནཾ.
༩. ¶
ནཱནཱརཏནསམྤནྣཾ ནཱནཱཛནསམཱཀུལཾ;
ཝིཙིཏྟཱཔཎ སཾཀིཎྞཾ ཏོརཎ གྒྷིཀ བྷཱུསིཏཾ.
ཡུཏྟཾ དསཧི སདྡེཧི དེཝིནྡཔུརསནྣིབྷཾ;
པུརཾ ཨམརསངྑཱཏཾ ཨཧོསཱི རུཙིརཾ ཝརཾ.
ཏཧིཾ བྲཱཧྨནྭཡེ ཛཱཏོ སབྦལོཀཱབྷིཔཱུཛིཏོ;
མཧཱདཡོ མཧཱཔཉྙོ ཨབྷིརཱུཔོ མནོརམོ.
སུམེདྷོ ནཱམ ནཱམེན ཝེདསཱགརཔཱརགཱུ;
ཀུམཱརོ’སི གརཱུནཾ སོ ཨཝསཱནེ ཛིནཾཀུརོ.
རཱསིཝཌྜྷཀམཙྩེན དསྶིཏཾ ཨམིཏཾ དྷནཾ;
ཨནེཀསཏགབྦྷེསུ ནིཙིཏཾ ཏཾ ཨུདིཀྑིཡ.
དྷནསནྣིཙཡཾ ཀཏྭཱ ཨཧོ མཡ྄ཧཾ པིཏཱདཡོ;
གཏཱ མཱསཀམེ’ཀམྤི ནེཝཱ’དཱཡ དིཝཾ ཨིཏི.
སཾཝེགམུ’པཡཱཏོ’ཝཙཱིམནྟེསཱི’ཏི གུཎཱཀརོ;
དྷནསཱརཾ ཨིཧཾ གཡ྄ཧ གནྟུཾ ཡུཏྟནྟི མེ པན.
རཧོགཏོ ནིསཱིདིཏྭཱ སུནྡརེ ནིཛམནྡིརེ;
དེཧེ དོསོ ཨུདིཀྑནྟོ ཨོཝདནྟོ’པི ཨཏྟནོ.
བྷེདནཾ ཏནུནོདུཀྑཾ དུཀྑོ ཏསྶོ’དཡོ’པི ཙ;
ཛཱཏིདྷམྨོ ཛརཱདྷམྨོ ཝྱཱདྷིདྷམྨོ ཨཧཾ ཨིཏི.
ཨེཝམཱ’དཱིཧི དེཧསྨིཾ དིསྭཱ དོསེ ཨནེཀདྷཱ;
པུརེ བྷེརིཾ ཙརཱཔེཏྭཱ ཨཱརོཙེཏྭཱན རཱཛིནོ.
བྷེརིནཱདསུགནྡྷེན ཡཱཙཀཱལིསམཱགཏེ;
དཱནཀིཉྫཀྑཨོགྷེན སཏྟཱཧཾ པཱིནཡཱི ཏཏོ.
དཱནགྒཧིམབིནྡཱུནཾ ནིཔཱཏེནཱ’པི དྷཾསནཾ;
ཨཡཱཏཾ ཏཾ ཝིལོཀེཏྭཱ རཏནམྦུཛཀཱནནཾ.
རུདཏོ ཉཱཏིསངྒྷསྶ ཛལིཏཱནལཀཱནནཱ;
གཛིནྡོ ཝིཡ གེཧམྷཱ ནིཀྑམིཏྭཱ མནོརམཱ.
༢༢. ¶
མཧནྟཾ སོ མཧཱཝཱིརོ ཨུཔགཉྪི ཧིམཱལཡཾ;
ཧརིཙནྡནཀཔྤཱུརཱགརུགནྡྷེཧི ཝཱསིཏཾ.
སུཕལླཙམྤཀཱསོཀཔཱཊལཱིཏིལཀེཧི ཙ;
པཱུགཔུནྣཱགནཱགཱདིཔཱདཔེཧི ཙ མཎྜིཏཾ.
སཱིཧཝྱགྒྷཏརཙྪེཧི ཨིབྷདཱིཔིཀཔཱིཧི ཙ;
ཏུརངྒམཱདིནེཀེཧི མིགེཧི ཙ སམཱཀུལཾ.
སཱལི༹ཀཱརཝིཧཾསེཧི ཧཾསཀོཉྩསུཝེཧི ཙ;
ཀཔོཏཀརཝཱིཀཱདིསཀུནྟེཧི ཙ ཀཱུཛིཏཾ.
ཡཀྑརཀྑསགནྡྷབྦདེཝདཱནཝཀེཧི ཙ;
སིདྡྷཝིཛྫཱདྷརཱདཱིཧི བྷཱུཏེཧི ཙ ནིསེཝིཏཾ.
མནོསཱིལིནྡནཱིལོརུཙཱརུཔབྦཏཔནྟིཧི;
སཛ྄ཛྷུཧེམཱདིནེཀེཧི བྷཱུདྷརེཧི ཙ བྷཱསུརཾ.
སུཝཎྞམཎིསོཔཱནནེཀཏིཏྠསརེཧི ཙ;
སོབྷིཏཾ ཏཏྠ ཀཱིལ༹ནྟནེཀདེཝངྒནཱཧི ཙ.
སཱིཏསཱིཀརསཉྪནྣནིཛ྄ཛྷརཱནཾ སཏེཧི ཙ;
ཀིཎྞརོརགརངྒེཧི རམྨེཧི ཝིརཱཛིཏཾ.
སིཁཎྜིསཎྜནཙྩེཧི ལཏཱནཾ མཎྜཔེཧི ཙ;
སེཏཝཱལུཀསཉྪནྣམཱལཀེཧི ཙ མཎྜིཏཾ.
སུཝཎྞམཎིམུཏྟཱདི ཨནེཀརཏནཱཀརཾ;
ཨིཙྪནྟཱནཾ ཛནཱལཱིནཾ པུཉྙཀིཉྫཀྑམཱ’ལཡཾ.
ཏམ’ཛ྄ཛྷོགཡ྄ཧ སོ དྷཱིརོ སཧསྶཀྑེན མཱཔིཏེ;
དིསྭཱ ཨིསིཔརིཀྑཱརེ པཎྞསཱལཝརེ ཏཧིཾ.
ཨིསིཝེསཾ གཧེཏྭཱན ཝིཧརནྟོ སམཱཧིཏོ;
སཏྟཱཧ’བྦྷནྟརེ པཉྩ ཨབྷིཉྙ’ཊྛཝིདྷཱ’པི ཙ.
ཨུཔྤཱདེཏྭཱ སམཱཔཏྟིསུཁེནེ’ཙ ཏཔོདྷནོ;
ནབྷསཱ དིཝསེ’ཀསྨིཾ གཙྪནྟོ ཛནཏཾ ཨིསི.
༣༥. ¶
སོདྷེནྟམ’ཉྫསཾ དིསྭཱ ཨོཏརིཏྭཱ ནབྷཱ ཏཧིཾ;
ཨིཏི ཏཾ ཛནཏཾ པུཙྪི ཀསྨཱ སོདྷེཐ ཨཉྫསཾ.
སུམེདྷ ཏྭཾ ནཛཱནཱསི དཱིཔངྐརཏཐཱགཏོ;
སམྦོདྷིམུ’ཏྟམཾ པཏྭཱ དྷམྨཙཀྐམ’ནུཏྟརཾ.
པཝཏྟེཏྭཱན ལོཀསྶ ཀརོནྟོ དྷམྨསངྒཧཾ;
རམྨཾ རམྨཔུརཾ པཏྭཱ ཝསཏཱི’ཧ སུདསྶནེ.
བྷིཀྑུསཏསཧསྶེཧི ཙཏཱུཧི ཝིམལེཧི ཏཾ;
ནིམནྟཡིམྷ དཱནེན མཡཾ ལོཀེཀནཱཡཀ.
ཏསྶ ཨཱགམནཏྠཱཡ མགྒཾ སོདྷེམ ཙཀྑུམ;
ཨིཏི སོཏསྶ སོ ཏསྶ སུཁཾ དེནྟོ ཛནོ’བྲཝིཾ.
བུདྡྷོ’ཏི ཝཙནཾ སུཏྭཱ པཱིཏིཡོ’དགྒམཱནསོ;
སཀབྷཱཝེན སཎྛཱཏུཾ ནེཝསཀྑི གུཎཱཀརོ.
ཏེནཱ’རདྡྷཉྫསཱ དྷཱིརོ ཡཱཙིཏྭཱན པདེསཀཾ;
ལབྷིཏྭཱ ཝིསམཾ ཋཱནཾ སམཾ ཀཱཏུཾ སམཱརབྷི.
ནཱ’ལངྐཏེཡེཝ ཏཧིཾ པདེསེ,
ལོཀེཀནཱཐོ སནརཱམརེཧི;
སམྤཱུཛིཏོ ལོཀཧིཏོ མཧེསི,
ཝསཱིཧི སདྡྷིཾ པཊིཔཛྫི མགྒཾ.
ཚབྦཎྞརཾསིཛཱལེཧི པཛྫལནྟཾ ཏཐཱགཏཾ;
ཨཱགཙྪནྟཾ ཏཧི དིསྭཱ མོདམཱནོ ཝིཙིནྟཡི.
ཡནྣཱུནི’མསྶ དྷཱིརསྶ སེཏུཾ ཀཏྭཱན ཀདྡམེ;
སཀཏྟཱནཾ ནིཔཛྫཡེ སསངྒྷསྶ མཧེསིནོ.
དཱིགྷརཏྟཱམ’ལཾ ཏཾ མེ ཧིཏཱཡ ཙ སུཁཱཡ ཙ;
ཨིཙྩེ’ཝཾ ཙིནྟཡིཏྭཱན ནིཔནྣོ’སོ ཛིནངྐུརོ.
པབོདྷེཏྭཱན དིསྭཱན ཙཱརུལོཙནཔངྐཛེ;
པུན’པེ’ཝཾ ཝིཙིནྟེསི ནིཔནྣོ དྷིཏིམཱ ཏཧིཾ.
༤༧. ¶
ཨིཙྪེཡྻཾ ཙེ’ཧམ’ཛྫེ’ཝ ཧནྟྭཱ’ནནྟརཎེ བྷཝེ;
སངྒྷསྶ ནཝཀོ ཧུཏྭཱ པཝིསེཡྻཾ པུརཾ ཝརཾ.
ཀིམ’ཉྙཱཏཀཝེསེན ཀླེསནིབྦཱཔཎེན མེ;
ཨཡཾ བུདྡྷོ’ཝ’ཧཾ བུདྡྷོ ཧུཏྭཱ ལོཀེ ཨནུཏྟརོ.
ཛནཏཾ དྷམྨནཱཝཱཡ ཏཱརེཏྭཱན བྷཝཎྞཝཱཝ;
ནིབྦཱཎཔུརམཱ’ནེཏྭཱ སེཡྻཾ མེ པརིནིབྦུཏཾ.
ཨིཙྩེ’ཝཾ ཙིནྟཡིཏྭཱན ནིཔནྣོ ཀདྡམེ ཏཧིཾ;
སུཝཎྞཀདལིཀྑནྡྷསནྣིབྷོ སོ’ཏི སོབྷཏི.
ཚབྦཎྞརཾསཱིཧི ཝིརཱཛམཱནཾ,
དིསྭཱ མནུཉྙཾ སུགཏཏྟབྷཱཝཾ;
སཉྫཱཏཔཱིཏཱིཧི ཨུདགྒཙིཏྟོ,
སམྦོདྷིཡཱ ཚནྡམ’ཀཱསི དྷཱིརོ.
ཨཱགནྟྭཱན ཏཧིཾ ཋཱནཾ ཨིསིཾ པངྐེ ནིཔནྣཀཾ;
ལོཀསྶ སེཏུབྷཱུཏོ’པི སེཏུབྷཱུཏཾ ཏམ’ཏྟནོ.
དིསྭཱ ཨུསྶཱིསཀེ ཏསྶ ཋཏྭཱ ལོཀེཀསེཏུནོ;
ལོཀེཀལོཙནོ དྷཱིརོ དཱིཔངྐརཏཐཱགཏོ.
གོཏམོ ནཱམ ནཱམེན སམྦུདྡྷོ’ཡཾ ཨནཱགཏེ;
བྷཝིསྶཏཱིཏི ཝྱཱཀཱསི སཱཝཀེ ཙ པུརཱདིཀེ.
ཨིདཾ ཝཏྭཱན ཀཏྭཱན སསངྒྷོ ཏཾ པདཀྑིཎཾ;
པཱུཛེསི ཨཊྛམུཊྛིཧི ཀུསུམེཧི གུཎཔྤིཡོ.
ཨིཏི ཀཱཏཱུན པཱཡཱསི སསངྒྷོ ལོཀནཱཡཀོཝ;
རམྨཀཾ ནཱམ ནགརཾ རམྨཱརཱམཱལཡཱལཡཾ
ཛིནསྶ ཝཙནཾ སུཏྭཱ ཨུཊྛཧིཏྭཱན པངྐཏོ;
མུདིཏོ དེཝསངྒྷེཧི ཀུསུམཱདཱིཧི པཱུཛིཏོ.
པལླངྐམཱ’བྷུཛིཏྭཱན ནིསཱིདི ཀུསུམཱསནེ;
མཧཱཏཔོ མཧཱཔཉྙོ སུམེདྷོ དམིཏིནྡྲིཡོ.
༥༩. ¶
དེཝཱ དསསཧསྶེསུ ཙཀྐཝཱལེ༹སུ མོདིཏཱ;
ཨབྷིཏྭཝིཾསུ ཏཾ དྷཱིརཾ ནིསིནྣཾ ཀུསུམཱསནེ.
ནིསིནྣོ ཨུཔདྷཱརེསི དྷམྨེ བུདྡྷཀརེ ཏདཱ;
ཀིམུདྡྷཾ ཝཱ ཨདྷོ ཝཱ’པི དིསཱསུ ཝིདིསཱསུ ཙ.
ཨིཙྩེ’ཝཾ ཝིཙིནནྟོ སོ སཀལཾ དྷམྨདྷཱཏུཀཾ;
ཨདྡཀྑི སཀསནྟཱནེ པཋམཾ དཱནཔཱརམིཾ.
ཨེཝམེ’ཝཾ གཝེསནྟོ ཨུཏྟརིཾ པཱརམཱི ཝིདཱུ;
སབྦཱ པཱརམིཡོ དིསྭཱ ཨཏྟནོ ཉཱཎཙཀྑུནཱ.
སཾསཱརེ སཾསརནྟོ སོ བཧུཾ དུཀྑཾ ཏིཏིཀྑིཡ;
གཝེསནྟོ’མཏཾ སནྟོ པཱུརེཏྭཱ དཱནཔཱརམིཾ.
སཏྟནཾ ཀཔྤརུཀྑོ’ཝ ཙིནྟཱམཎི’ཝ ཀཱམདོ;
ཨིཙྪིཏིཙྪིཏམནྣཱདིཾ དདནྟོ དདཏཾ ཝརོ.
ཏཱརཀཱཧི བཧུཾ ཀཏྭཱ ནབྷེ ཙཱརུཝིལོཙནེ;
ཨུཔྤཱཊེཏྭཱ དདཾ དྷཱིརོ ཡཱཙཀཱནཾ པམོདིཏོ.
མཧིཡཱ པཾསུཏོ ཙཱ’པི སམུདྡོདཀཏོ’དྷིཀཾ;
དདཾ སརཱིརམཾསཉྩ ལོཧིཏམྤི ཙ ཨཏྟནོ.
མོལིནཱ’ལངྐཏེ སཱིསེ’དྷིཀཾ ཀཏྭཱ སིནེརུཏོ;
ཀམྤཡིཏྭཱ མཧིཾ དེནྟོ སུཏེ ཙཱ’པི སཀངྒཏཱཝ.
སཱིལནེཀྐམྨཔཉྙཱདཱི པཱུརེཏྭཱ སབྦཔཱརམཱི;
ཝེསྶནྟརཏྟབྷཱཝེ’ ཝམྤཏྭཱ ཏམྦྷཱ ཙུཏོ པན.
ཨུཔྤཛྫིཏྭཱ སུརཱཝཱསེ སུནྡརེ ཏུསིཏེ པུརེ;
ཝསནྟོ སུཙིརཾ ཀཱལཾ བྷུཏྭཱནཱ’ཏནྟསམྤདཾ.
ཀཏཉྫལཱིཧི དེཝེཧི ཡཱཙིཏོ དིཔདུཏྟམོ;
སམྦོདྷཱཡ མཧཱཝཱིར ཀཱལོ ཏུཡ྄ཧནྟིཨཱདིནཱ.
ཝིལོཀེཏྭཱན ཀཱལཱདིཾ ཉཏྭཱ ཀཱལནྟི བོདྷིཡཱ;
པཊིཉྙཾ དེཝསངྒྷསྶ དཏྭཱ ནནྡནཀཱནནཾ.
༧༢. ¶
གནྟྭཱན དེཝསངྒྷེཧི སུགཏིཾ གཙྪི’ཏོ ཙུཏོ;
ཨབྷིཏྠུཏོ མཧཱཔཉྙོ ཙཝིཏྭཱན ཏཏོ ཨིདྷ.
སུསཛྫིཏངྒོརུཏུརངྒམཱཀུལེ,
ཝིཙིཏྟནཱནཱཔཎཔཎྱསམྤདེ;
མནོརམུཏྟུངྒཛིནྡརཱཛིཏེ,
ཝིབྷཱུསིཏེ ཏོརཎཀེཏུརཱསིཧི.
ཨལངྐཏཊྚཱལཝིསཱལམཱལཡེ,
སུགོཔུརེ སུནྡརསུནྡརཱལཡེ;
སུདསྶནཱིཡེ ཀཔིལ༹ཝ྄ཧཡེ པུརེ,
པུརིནྡདསྶཱ’པི པུརསྶ ཧཱསཀེ.
བྷཱུཔཱལམོལི༹རཏནཱལིནིསེཝིཏངྒྷི,
པངྐེརུཧཾ ཝིམལནེཀགུཎཱདྷིཝཱསཾ;
ཨོཀྐཱཀརཱཛཀུལཀེཏུམནཱཐནཱཐཾ,
སུདྡྷོདནཾ ནརཔཏིཾ པཝརཾ པཊིཙྩ.
སོ སཛ྄ཛྷུདཱམདྷཝལཱམལདསྶནཱིཡ,
སོཎྜཱཡ སཾགཧིཏསེཏཝརཱརཙིནྡཾ;
ཙནྡཱཝདཱཏཝརཝཱརཎརཱཛཝཎྞཾ,
སནྡསྶཡིཏྭ སུཔིནེན ཝིསཱལཔཉྙོ.
བིམྦཱདྷརཱཡ ཝིཀཙུཔྤལལོཙནཱཡ,
དེཝིནྡཙཱཔརཏིཙཌྜྷནབྷཱུལཏཱཡ;
སམྤུཎྞསོམྨཝིམལིནྡུཝརཱནནཱཡ,
སོཝཎྞཧཾསཡུགཙཱརུཔཡོདྷརཱཡ.
པཱདཱརཝིནྡཀརཔལླཝསུནྡརཱཡ,
སོཝཎྞཝཎྞཏནུཝཎྞཝིརཱཛིཏཱཡ;
སཱིལཱདིནེཀ གུཎབྷཱུསནབྷཱུསིཏཱཡ,
མཱཡཱཡ རཱཛཝནིཏཱཡུ’པགཉྪི ཀུཙྪིཾ.
པཊིསནྡྷིཀྑཎེ ཏསྶ ཛཱཏཱ’ནེཀཝིདྷབྦྷུཏཱ;
ཨཐཱ’ཡཾ གཧིཏཱརཀྑོ ནརེཧི ཨམརེཧི ཙ.
༨༠. ¶
མནུཉྙརཏྟམྦུཛཀཎྞིཀཱཡ,
མཱ’སཱིནསིངྒཱིཔཊིམཱ’ཝ རམྨཱ;
སུཝཎྞཝཎྞོ དིཔདཱནམིནྡོ,
པལླངྐམཱ’བྷུཉྪིཡ མཱཏུགབྦྷེ.
མཎིམྷི ཝིཔྤསནྣམྷི རཏྟསུཏྟམི’ཝཱ’ཝུཏཾ;
མཱཏུཙིཏྟམྦུཛཾ དྷཱིརོ བོདྷཡནྟོ པདིསྶཏི.
དསམཱསཱཝསཱནམྷི དེཝཱི རཉྙོ ཀཐེསི’དཾ;
མཡ྄ཧཾ ཉཱཏིགྷརཾ དེཝ གནྟུམི’ཙྪཱམ’ཧཾ ཨིཏི.
རཉྙོ’ཐ སམནུཉྙཏཱ གཙྪནྟི ཀུལམ’ཏྟནོ;
མཧཏཱ པརིཧཱརེན དིབྦཉྫས སམཉྫསེ.
སུརབྷིཀུསུམསཎྜཱལངྐཏསྶཱལསཎྜཾ,
སམདཧམརམཱལཱགཱིཡམཱནགྒནཱདཾ;
ནཡནཝིཧགསངྒྷེ ཨཝ྄ཧཡནྟཾ’ཝ དིསྭཱ,
ཝིཔུལརཏིནིཝཱསཾ ལུམྦིནཱིཀཱནནཾ ཏཾ.
ཝིཔུལཏརརཏིཾ སཱ ཏམྷི ཀཱཏཱུན རམྨེ,
ཨམརཡུཝཏིལཱིལཱཙཱརུལཱིལཱབྷིརཱམཱ;
ཝིཀསིཏཝརསཱལསྶོ’པགནྟྭཱན མཱུལཾ,
སཡམ’ཏིནམིཏེ ཀཾ སཱལསཱཁཾ ཨགཎྷི.
ཏསྨིཾ ཁཎེ ཀམྨཛམཱལུཏ’སྶཱ,
ཙལིཾསུ སཱནཱིཧི པརིཀྑིཔིཏྭཱ;
དེཝིཾ ཛནོ ཏཾ ཨབྷིཔཱལཡནྟོ,
ཏམྷཱ པཊིཀྐམྨ སུསཎྛིཏཱ’ཐ.
སགཙཱརུཧེམཝལཡཱདིཝིབྷཱུསིཏེན,
ཨཙྩནྟཏམྦནཁརཾསིསམུཛྫལེན;
ཏུལཱཏིཀོམལསུརཏྟཀརེན སཱཁཾ,
ཨོལམྦ ཏཏྠ མཛནེསི ཊྛིཏཱ’ཝ དྷཱིརཾ.
༨༨. ¶
སོཝཎྞཝཎྞཏནུཝཎྞཝིརཱཛམཱནཾ,
ནེཏྟཱབྷིརཱམམཏུལཾ ཨཏུལཱཡ གབྦྷཱ;
སམྨཱ པསཱརིཏཀརངྒྷཱིཡུགཱབྷིརཱམཾ,
པངྐེརུཧཱ ཀཎཀཧཾསམི’ཝོ’ཏརནྟཾ.
བྲཧྨཱ མནགྒྷརཏིཝཌྜྷནཧེམཛཱལ,
མཱ’དཱཡ ཏེན ཨུཔགམྨ པཊིགྒཧེཏྭཱ;
‘‘སམྨོད དེཝི ཨཡ མ’གྒཏརོ སུཏོ ཏེ,
ཛཱཏོ’’ཏི ཏཱཡ པུརཏོ ཀཐཡིཾསུ ཋཏྭཱ.
ཛཱཡནྟི སེསམནུཛཱ མལམཀྑིཏངྒཱ,
ཛཱཏོ པནེ’ས པཝརོ དིཔདཱནམིནྡོ;
ཨཙྩནྟ སཎྷམལཀཱསིཀཝཏྠཀམྷི,
ནིཀྑིཏྟནགྒྷཏརཙཱརུམཎཱི’ཝ སུདྡྷོ.
ཨེཝ’མྤི སནྟེ སབྷཏོ’པགནྟྭཱ,
དྭེ ཝཱརིདྷཱརཱ སུབྷགསྶ དེཧེ;
ཛནེཏྟིདེཧེ’པི ཨུཏུཾ མནུཉྙཾ,
གཱཧཱཔཡུཾ མངྒལཀིཙྩཏཱཡ.
ཏེསཾ ཀརཾ རཏིཀརཱ ཨཛིནཔྤཝེཎཱི,
མཱ’དཱཡ ཏེན ཨུཔགམྨ པཊིགྒཧེསུཾ;
དེཝཱ དུཀཱུལམཡཙུམྦཊཀེན ཝཱིརཾ,
ཏེསཾ ཀརཾ ནརཝརཱ ནརསཱིཧརཱཛཾ.
ཏེསཾ ཀརཱ རཏིཀརོ ཝིམལོ’ཝ ཙནྡོ,
ཙཀྐངྐིཏོརུཙརཎེཧི མཧཱིཏལསྨིཾ;
སམྨཱ པཏིཊྛིཡ པུརཏྠིམཀཾ དིསཾ སོ,
ཨོལོཀཡིཏྠ ཀམལཱཡཏལོཙནེཧི.
ཨེཀངྒནཱ ནེཀསཏཱནི ཙཀྐ,
ཝཱལཱ༹ན’ཧེསུཾ སནརཱམརཱ’ཐ;
དྷཱིརཾ སུགནྡྷཔྤབྷཱུཏཱིཧི ཏེསུ,
སམྤཱུཛཡནྟཱ ཨིདམ’བྲཝིཾསུ.
༩༥. ¶
ནཏྠེ’ཏྠ ཏུམྷེཧི སམོ སུདྷཱིས,
ཨེཀོ པུམཱ’པ’གྒཏརོ ཀུཏོ’ཏི;
ཨེཝཾ དིསཱ ལོཀིཡ ལོཀནཱཐོ,
ཏཔེཀྑམཱནོ སདིས’མྤི ཨེཀཾ.
ཨུཏྟརཱ’བྷིམུཁོ སཏྟཔདཾ གནྟྭཱ ཀཐེསི’དཾ,
‘‘ཨགྒོ’ཧམསྨི ལོཀསྶ ཛེཊྛོ སེཊྛོ’’ཏིཨཱདིཀཾ.
ཨནཉྙསཱདྷཱརཎནཱདམུ’ཏྟམཾ,
སུརཱསུརབྲཧྨནརིནྡཔཱུཛིཏཾ;
ནརིནྡ’མཱདཱཡ གཏོ མཧཱཛནོ,
སུསཛྫིཏཾ ཏཾ ཀཔིལ༹ཝ྄ཧཡཾ པུརཾ.
བྷཱརཱཏིབྷཱརནགཔཱདཔམེརུརཱཛཾ,
སབྦ’མྤི སཱགརཛལཾ ཝཧིཏུཾ སམཏྠཱ;
ཛཱཏཀྑཎེ,པི གུཎབྷཱརམ’སཡ྄ཧམཱནཱ,
སངྐམྤཡཱི’ཝ པཐཝཱི པཝརསྶ ཏསྶ.
རམིཾསུ སོཎཱ ཧརིཎེཧི སདྡྷིཾ,
ཀཱཀཱ ཨུལཱུཀེཧི མུདགྒུདགྒཱ;
སུཔཎྞརཱཛཱུཧི མཧོརགཱ ཙ,
མཛྫཱརསངྒྷཱ’པི ཙ ཨུནྡུརེཧི.
མིགཱ མིགིནྡེཧི སམཱགམིཾསུ,
པུཏྟེཧི མཱཏཱཔིཏརོ ཡཐེ’ཝ;
ནཱཝཱ ཝིདེས’མྤི གཏཱ སདེསཾ,
གཏཱ’ཙ ཀཎྜཾ སརབྷངྒསཏྠུ.
ནཱནཱཝིརཱགུཛྫལཔངྐཛེཧི,
ཝིབྷཱུསིཏོ སནྟཏརངྒམཱལོ;
མཧཎྞཝོ ཨཱསི ཏཧིཾ ཛལ’མྤི,
ཨཙྩནྟསཱཏཏྟམུ’པཱགམཱསི.
སུཕུལླཨོལམྦཀཔངྐཛེཧི,
སམཱཀུལཏྟཾ གགནཾ ཨགཉྪི;
ཛཧིཾསུ པཀྑཱི གམནཾ ནབྷམྷི,
ཋིཏཱ’ཙ སིནྡྷཱུ’པི ཨསནྡམཱནཱ.
༡༠༣. ¶
ཨཀཱལམེགྷཔྤིཡསངྒམེན,
མཧཱིཝདྷཱུ སོམྨཏམཱ ཨཧོསི;
མརཱུཧི ཝསྶཱཔིཏནེཀཔུཔྥ,
ཝིབྷཱུསིཏེནཱ’ཏིཝིབྷཱུསིཏཱཝ.
སུཕུལླམཱལཱབྷརཎཱབྷིརཱམཱ,
ལཏངྒནཱ’ལིཾགིཏཔཱདཔིནྡཱ;
སུགནྡྷཀིཉྫཀྑཝརམྦརེཧི,
དིསངྒནཱཡོ ཨཏིསོབྷཡིཾསུ.
སུགནྡྷདྷཱུཔེཧི ནབྷཾ ཨསེསཾ,
པཝཱསིཏཾ རམྨཏརཾ ཨཧོསི;
སུརཱསུརིནྡཱ ཚནཝེསདྷཱརཱི,
སཾགཱིཏིཡུཏྟཱ ཝིཙརིཾསུ སབྦེ.
པིཡཾཝདཱ སབྦཛནཱ ཨཧེསུཾ,
དིསཱ ཨསེསཱ’པི ཙ ཝིཔྤསནྣཱ;
གཛཱ’ཏིགཛྫིཾསུ ནདིཾསུ སཱིཧཱ,
ཧེསཱརཝོ ཙཱ’སི ཏུརངྒམཱནཾ.
སཝེཎུཝཱིཎཱ སུརདུནྡུབྷཱི ནབྷེ,
སཀཾ སཀཾ ཙཱརུསརམྤམོཙཡུཾ;
སཔབྦཏིནྡཔྤུཐུལོཀདྷཱཏུཡཱ,
ཨུལཱ༹རཨོབྷཱསཝཡོ མནོརམོ.
མནུཉྙགནྡྷོ མུདུསཱིཏལཱནིལོ,
སུཁཔྤདཾ ཝཱཡི ཨསེསཛནྟུནོ;
ཨནེཀརོགཱདུཔཔཱིལི༹ཏཾགིནོ,
ཏཏོ པམུཏྟཱ སུཁིནོ སིཡུཾ ཛནཱ.
ཝིཛམྦྷམཱནཱམིཏཝཱལ༹ཝཱིཛནིཔྤ,
-བྷཱབྷིརཱམཾ བྷུཝནཾ ཨཧོསི.
མཧིཾཧི བྷེཏྭཱ ཙུ’དཀཱནི སནྡཡུཾ,
གམིཾསུ བུཛྫཱ ཨུཛུགཏྟཏཾ ཛནཱ.
༡༡༠. ¶
ཨནྡྷཱ པངྒུལནཙྩཱནི ལཱིལོཔེཏཱནི པེཀྑཡུཾ;
སུཎིཾསུ བདྷིརཱ མཱུག གཱིཏིཡོ’པི མནོརམཱ.
སིཏལཏྟམུ’པཱགཉྪི ཨཝཱིཙགྒི’པི ཏཱཝདེ;
མོདིཾསུ ཛལཛཱ ཏསྨིཾ ཛནྟཝོ པཧསིཾསུ ཙ.
ཁུཔྤིཔཱསཱབྷི བྷཱུཏཱནཾ པེཏཱནཾ ཨཱསི བྷོཛནཾ;
ལོཀནྟརེ’པི ཨཱལོཀོ ཨནྡྷཀཱརནིརནྟརེ.
ཨཏིརེཀཏརཱ ཏཱརཱཝལི༹ཙནྡདིཝཱཀརཱ;
ཝིརོཙིཾསུ ནབྷེ བྷཱུམིགཏཱནི རཏནཱནི ཙ.
མཧཱིཏལཱདཡོ བྷེཏྭཱ ནིཀྑམྨ ཨུཔརཱུཔརི;
ཝིཙིཏྟཔཉྩཝཎྞཱ’སུཾ སུཕུལླཝིཔུལམྦུཛཱ.
དུནྡུབྷཱདཱི ཙ’ལངྐཱརཱ ཨཝཱདིཏ ཨགྷཊྚིཏཱ;
ཨཙྩནྟམདྷུརཾ ནཱདཾ པམུཉྩཾསུ མཧཱིཏལེ.
བདྡྷཱ སངྑལིཀཱདཱིཧི མུཉྩིཾསུ མནུཛཱ ཏཏོ;
བྷུཝནེ བྷཝནདྭཱརཀཝཱཊཱ ཝིཝཊཱ སཡཾ.
‘‘པུརེ ཀཔིལ༹ཝཏྠུམྷི ཛཱཏོ སུདྡྷོདནཏྲཛོ;
ནིསཛྫ བོདྷིམཎྜེ’ཏི ཨཡཾ བུདྡྷོ བྷཝིསྶཏི.’’
ཙེལུཀྑེཔཱདཡོ ཙཱ’པཱི པཝཏྟེནྟཱ པམོདིཏཱ;
ཀཱིལི༹ཾསུ དེཝསངྒྷཱ ཏེ ཏཱཝཏིཾསཱལཡེ ཏདཱ.
ཨིདྡྷིམནྟོ མཧཱཔཉྙོ ཀཱལདེཝལཏཱཔསོ;
སུདྡྷོདནནརིནྡསྶ དྷཱིམཏོ སོ ཀུལཱུཔགོ.
བྷོཛནསྶཱཝསཱནམྷི ཏཱཝཏིཾསཱལཡཾ གཏོ;
གནྟྭཱ དིཝཱཝིཧཱརཱཡ ནིསིནྣོ བྷཝནེ ཏཧིཾ.
ཚནཝེསཾ གཧེཏྭཱན ཀཱིལ༹ནྟེ ཏེ ཨུདིཀྑིཡ;
སནྟོསཀཱརཎཾ པུཙྪི ཏེསཾ ཏེ’པི ན’མབྲཝུཾ.
སུཏྭཱ ཏཾ ཏཏྟཏོ ཏམྷཱ པཱིཏིཡོ’དགྒམཱནསོ;
ཏཱཝདེཝོ’པགནྟྭཱན སུདྡྷོདནནིཝེསནཾ.
༡༢༣. ¶
པཝིསིཏྭཱ སུཔཉྙཏྟེ ནིསིསྶོ ཨཱསནེ ཨིསི;
‘‘ཛཱཏོ ཀིར མཧཱརཱཛ པུཏྟོ ཏེ ནུཏྟརོ སུདྷི.
དཊྚྛུ’མིཙྪཱམ’ཧཾ ཏཾ’’ཏི ཨཱཧ རཱཛཱ ཨལངྐཏཾ;
ཨཱནཱཔེཏྭཱ ཀུམཱརཾ ཏཾ ཝནྡཱཔེཏུ’མུཔཱགམཱི.
ཀུམཱརབྷཱུཏསྶ’པི ཏཱཝདེཝ གུཎཱནུབྷཱཝེན མནོརམཱནི;
པཱདཱརཝིནྡཱ པརིཝཏྟིཡ’གྒཱ པཏིཊྛིཏཱ མུདྡྷནི ཏཱཔསསྶ.
ཏེནཏྟབྷཱཝེན ནརུཏྟམསྶ,
ན ཝནྡིཏབྦོ ཏིབྷཝེཔི ཀོཙི;
ཏིལོཀནཱཐསྶ སཙེ ཧི སཱིསཾ,
ཏཔསྶིནོ པཱདཏལེ ཋཔེཡྻཾ.
ཕཱལེཡྻམུདྡྷཱ ཁལུ ཏཱཔསསྶ པགྒཡ྄ཧ སོ ཨཉྫལིམུཏྟམསྶ;
ཨཊྛཱསི དྷཱིརསྶ གུཎཎྞཝསྶ ནཱསེཏུ’མཏྟཱན’མཡུཏྟཀནྟི.
དིསྭཱན ཏཾ ཨཙྪརིཡཾ ནརིནྡོ དེཝཱཏིདེཝསྶ སཀཏྲཛསྶ;
པཱདཱརཝིནྡཱན’བྷིཝནྡི ཏུཊྛོ ཝིཙིཏྟཙཀྐངྐིཏཀོམལཱནི.
ཡདཱ’སི རཉྙོ པུཐུཝཔྤམངྒལཾ ཏདཱ པུརཾ དེཝཔུརཾ’ཝ སཛྫིཏཾ;
ཝིབྷཱུསིཏཱ ཏཱ ཛནཏཱ མནོརམཱ སམཱགཏཱ ཏསྶ ནིཀེཏམུཏྟམཾ.
ཝིབྷཱུསིཏངྒོ ཛནཏཱཧི ཏཱཧི སོ པུརཀྑཏོ བྷཱུསནབྷཱུསིཏཏྲཛཾ;
ཏམཱ’དཡིཏྭཱ’ཏུལཝཔྤམངྒལཾ སུརིནྡལཱིལཱཡ གཏོ ནརིསྶརོ.
ནཱནཱཝིརཱགུཛྫལཙཱརུསཱནི པརིཀྑིཏེ ཀམྷི ཙ ཛམྦུམཱུལེ;
སཡཱཔཡིཏྭཱ བཧིམངྒལཾ ཏཾ ཨུདིཀྑིཏུཾ དྷཱཏིགཎཱ གམིཾསུ.
༡༣༢. ¶
སུཝཎྞཏཱརཱདིཝིརཱཛམཱན’ཝིཏཱནཛོཏུཛྫལཛམྦུམཱུལེ;
ནིསཛྫ དྷཱིརོ སཡནེ མནུཉྙེ’ཛྷཱནཾ སམཱཔཛྫི ཀཏཱཝཀཱསོ.
སུཝཎྞབིམྦཾ ཝིཡ ཏཾ ནིསིནྣཾ ཚཱཡཉྩ ཏསྶཱ ཋིཏམེ’ཝ དིསྭཱ;
ཏམབྲཝཱི དྷཱཏིཛནོ’པགནྟྭཱ ‘‘པུཏྟསྶ ཏེ ཨབྦྷུཏམཱི’དིསནྟི.’’
ཝིསུདྡྷཙནྡཱནནབྷཱསུརསྶ སུཏྭཱན ཏཾ པངྐཛལོཙནསྶ;
སཝནྡནཾ མེ དུཏིཡ’ནྟི ཝཏྭཱ པུཏྟསྶ པཱདེ སིརསཱ’བྷིཝནྡི.
ཏདཉྙཱནིཔི ལོཀསྨིཾ ཛཱཏཱ’ནེཀཝིདྷབྦྷུཏཱ;
དསྶིཏཱ མེ སམཱསེན གནྠཝིཏྠཱརབྷཱིརུནཱ.
ཡསྨིཾ ཝིཙིཏྟམཎིམཎྜིཏམནྡིརཱནཾ,
ནཱནཱཝིཏཱནསཡནཱསནམཎྜིཏཱནཾ;
ནིསྶེཎི སེཎི པུཐུབྷཱུམིཀབྷཱུསིཏཱནཾ,
ཏིཎྞཾ ཨུཏཱུནམ’ནུརཱུཔམ’ལངྐཏཱནཾ.
སིངྒེསུ རཾསིནིཀརཱ སུརམནྡིརཱནཾ,
སིངྒེསུ རཾསིམཔཧཱསཀརཱ’ཝ ནིཙྩཾ;
ཨཱདིཙྩརཾསི ཝིཡ པངྐཛཀཱནནཱནི,
ལོཀཱནནམྦུཛཝནཱནི ཝིཀཱསཡནྟི.
ནཱནཱ མཎིཝིཙིཏྟཱཧི བྷིཏྟཱིཏི ཝནིཏཱ སདཱ;
ཝིནཱ’པི དཔྤཎཙྪཱཡཾ པསཱདྷེནྟི སཀཾ ཏནུཾ.
ཏེལཱསནགསངྐཱསཾ ཝིལོཙནརསཱཡནཾ;
སུདྷཱལངྐཏཔཱཀཱརཝལཡཾ ཡཏྠ དིསྶཏེ.
ཨིནྡནཱིལོརུཝལཡཾ ནཱནཱ རཏནབྷཱུསིཏཾ;
དིསྶཏེ’ཝ སདཱ ཡསྨིཾ པརིཁཱནེཀཔངྐཛཱ.
༡༤༡. ¶
པཏྭཱན ཝུདྡྷིཾ ཝིཔུལེ མནུཉྙེ,
བྷུཏྭཱན ཀཱམེ ཙ ཏཧིཾ ཝསནྟོ;
གཙྪཾ ཏིལོཀེཀཝིལོཙནོ སོ,
ཨུཡྻཱནཀཱིལཱ༹ཡ མཧཱཔཐམྷི.
ཀམེན ཛིཎྞཾ བྱདྷིཏཾ མཏཉྩ,
དིསྭཱན རཱུཔཾ ཏིབྷཝེ ཝིརཏྟོ;
མནོརམཾ པབྦཛིཏཉྩ རཱུཔཾ,
ཀཏྭཱ རཏིཾ ཏམྷི ཙཏུཏྠཝཱརེ.
སུཕུལླནཱནཱཏརུསཎྜམཎྜིཏཾ སིཁཎྜིསཎྜཱདིདིཛཱུཔཀཱུཛིཏཾ;
སུདསྶནཱིཡཾ ཝིཡ ནནྡནཾ ཝནཾ མནོརམུཡྻཱནམ’གཱ མཧཱཡསོ.
སུརངྒནཱ སུནྡརསུནྡརཱིནཾ མནོརམེ ཝཱདིཏནཙྩགཱིཏེ སུརིནྡལཱིལཱཡ;
ཏཧིཾ ནརིནྡོ རམིཏྭ ཀཱམཾ དིཔདཱན’མིནྡོ.
ཨཱབྷུཛིཏྭཱན པལླངྐཾ ནིསིནྣོ རུཙིརཱསནེ;
ཀཱརཱཔེཏུམ’ཙིནྟེསི དེཧབྷཱུསན’མཏྟནོ.
ཏསྶ ཙིཏྟཾ ཝིདིཏྭཱན ཝིསྶཀམྨསྶི’དཾབྲཝཱི;
ཨལངྐརོཧི སིདྡྷཏྠ’མིཏི དེཝཱནམིསྶརོ.
ཏེནཱ’ཎཏྟོ’པགནྟྭཱན ཝིསྶཀམྨོ ཡསསྶིནོ;
དསདུསྶསཧསྶེཧི སཱིསཾ ཝེཋེསི སོབྷནཾ.
ཏནུཾ མནུཉྙམྤི ཨཀཱསི སོབྷནཾ,
ཨནཉྙསཱདྷཱརཎལཀྑཎུཛྫལཾ;
ཝིཙིཏྟནཱནུཏྟམབྷཱུསནེཧི སོ,
སུགནྡྷིགནྡྷུཔྤལཙནྡནཱདིནཱ.
ཝིབྷཱུསིཏོ ཏེན ཝིབྷཱུསིཏངྒིནཱ,
ཏཧིཾ ནིསིནྣོ ཝིམལེ སིལཱཏལེ;
སུརངྒནཱསནྣིབྷསུནྡརཱིཧི སོ,
པུརཀྑཏོ དེཝཔཏཱིཝ སོབྷཏི.
༡༥༠. ¶
སུདྡྷོདནནརིནྡེན པེསིཏཾ སཱསནུཏྟམཾ;
‘‘པུཏྟོ ཏེ པུཏྟ ཛཱཏོ’’ཏི སུཏྭཱན དཱིཔདུཏྟམོ.
‘‘མམ’ཛྫ བནྡྷནཾ ཛཱཏཾ’’ཨིཏི ཝཏྭཱན ཏཱཝདེ;
སམིདྡྷཾ སབྦཀཱམེཧི ཨགམཱ སུནྡརཾ པུརཾ.
ཋིཏཱ ཨུཔརིཔཱསཱདེ ཀིསཱགོཏམི ཏཾ ཏདཱ;
རཱཛེནྟཾ སཏརཾསི’ཾཝ རཱཛཾ དིསྭཱ ཀཐེ སི’དཾ.
‘‘ཡེསཾ སཱུནུ ཨཡཾ དྷཱིརོ ཡཱ ཙ ཛཱཡཱ ཨིམསྶ ཏུ;
ཏེ སབྦེ ནིབྦུཏཱ ནཱུན སདཱ’ནཱུནགུཎསྶ ཝེ’’.
ཨིཏཱི’དིསཾ གིརཾ སུཏྭཱ མནུཉྙཾ ཏཱཡ བྷཱསིཏཾ;
སཉྫཱཏཔཱིཏིཡཱ པཱིནོ གཙྪམཱནོ སཀཱལཡཾ.
སཱིཏལཾ ཝིམལཾ ཧཱརིཾ ཧཱརཾ ཏཾ རཏིཝཌྜྷནཾ;
པེསེཏྭཱ སནྟིཀཾ ཏསྶཱ ཨོམུཉྩིཏྭཱན ཀཎྛཏོ.
པཱསཱདམ’བྷིརཱུཧིཏྭཱ ཝེཛཡནྟཾ’ཝ སུནྡརཾཝ;
ནིཔཛྫི དེཝརཱཛཱ’ཝ སཡནེ སོ མཧཱརཧེ.
སུནྡརཱི ཏཾ པུརཀྑཏྭཱ སུརསུནྡརིསནྣིབྷཱ;
པཡོཛཡིཾསུ ནཙྩཱནི གཱིཏཱནི ཝིཝིདྷཱནི’པི.
པབྦཛྫཱབྷིརཏོ དྷཱིརོ པཉྩཀཱམེ ནིརཱལཡོ;
ཏཱདིསེ ནཙྩགཱིཏེ’པི ན རམིཏྭཱ མནོརམེ.
ནིཔནྣོ ཝིསྶམིཏྭཱན ཨཱིསཀཾ སཡནེ ཏཧིཾ;
པལླངྐམཱ’བྷུཛིཏྭཱན མཧཱཝཱིརོ མཧཱིཔཏི.
ནིསིནྣོ’ཝ’ནེཀཔྤཀཱརཾ ཝིཀཱརཾ,
པདིསྭཱན ནིདྡུཔགཱནཾ ཝདྷཱུནཾ;
གམིསྶཱམི’དཱནཱི’ཏི ཨུབྦིགྒཙིཏྟོ,
བྷཝེ དྭཱརམཱུལཾ’པགནྟྭཱན རམྨཾ.
ཋཔེཏྭཱན སཱིསཾ སུབྷུམྨཱརཀསྨིཾ,
སུཎིསྶཱམི དྷཱིརསྶ སདྡནྟི ཏསྨིཾ;
ནིཔནྣཾ སུདནྟཾ པསཱདཱཝཧནྟཾ,
སཧཱཡཾ ཨམཙྩཾ མཧཱཔུཉྙཝནྟཾ.
༡༦༢. ¶
ཨཙྪནྣསཝནཾ ཚནྣཾ ཨཱམནྟེཏྭཱ ཀཐེསི’དཾ;
‘‘ཨཱནེཧི ཨིཏི ཀཔྤེཏྭཱ ཀནྠཀཾ ནཱམ སིནྡྷཝཾ.’’
སོ ཚནྣོ པཏིགཎྷིཏྭཱ ཏཾ གིརཾ ཏེན བྷཱསིཏཾ;
ཏཏོ གནྟྭཱན ཀཔྤེཏྭཱ སཱིགྷམཱ’ནེསི སིནྡྷཝཾ.
ཨབྷིནིཀྑམནཾ ཏསྶ ཉཏྭཱ ཝརཏུརངྒམོ;
ཏེན སཛྫིཡམཱནོ སོ ཧེསཱརཝམུ’དཱིརཡི.
པཏྠརིཏྭཱན གཙྪནྟཾ སདྡཾ ཏཾ སཀལཾ པུརཾ;
སབྦེ སུརགཎཱ ཏསྨིཾ སོཏུཾ ནཱ’དཾསུ ཀསྶཙི.
ཨཐ སོ སཛྫནཱནནྡོ ཨུཏྟམཾ པུཏྟམ’ཏྟནོ;
པསྶིཏྭཱ པཋམཾ གནྟྭཱ པཙྪཱ བུདྡྷོ བྷཝཱམ’ཧཾ.
ཙིནྟཡིཏྭཱན ཨེཝ’མྤི གནྟྭཱ ཛཱཡཱནིཝེསནཾ;
ཋཔེཏྭཱ པཱདདུ’མྨཱརེ གཱིཝཾ ཨནྟོ པཝེསིཡ.
ཀུསུམེཧི སམཱཀིཎྞེ དེཝིནྡསཡནཱུཔམེ;
ནིཔནྣཾ མཱཏུཡཱ སདྡྷིཾ སཡནེ སཀམ’ཏྲཛཾ.
ཝིལོཀེཏྭཱན ཙིནྟེསི ཨིཏི ལོཀེཀནཱཡཀོ;
སཙཱ’ཧཾ དེཝིཡཱ བཱཧུམ’པནེཏྭཱ མམ’ཏྲཛཾ.
གཎྷིསྶཱམ’ནྟརཱཡ’མྤི ཀརེཡྻ གམནསྶ མེ;
པབུཛ྄ཛྷིཏྭཱ མཧནྟེན པེམེནེ’སཱ ཡསོདྷརཱ.
བུདྡྷོ ཧུཏྭཱ པུནཱ’གམྨ པསྶིསྶཱམཱི’ཏི ཨཏྲཛཾ;
ནརཱདྷིཔོ ཏདཱ ཏམྷཱ པཱསཱདཏལཏོ’ཏརི.
པེསལཱནནཀརངྒྷིཔངྐཛཱ ཧཱསཕེནབྷམུཝཱིཙིབྷཱསུརཱ;
ནེཏྟནཱིལཀམལཱ ཡསོདྷརཱཀོམུདཱི’ཝ ནཡནཱལིཔཏྠིཏཱ.
སམཏྠོ ཨསྶ ཀོ ཏསྶཱ ཛཧིཏུཾ དེཧསམྤདཾ;
ཝིནྡམཱནོ ཝིནཱ དྷཱིརཾ ཋིཏཾ པརམིམུདྡྷནི.
‘‘ཨསྶོ སཱམི མཡཱནཱིཏོ ཀཱལཾ ཛཱན རཐེསབྷ’’;
ཨིཏི ཨབྲཝི ཚནྣོ སོ བྷཱུཔཱལསྶ ཡསསྶིནོ.
༡༧༥. ¶
མཧཱིཔཏི ཏདཱ སུཏྭཱ ཚནྣེནོ’དཱིརིཏཾ གིརཾ;
པཱསཱདཱ ཨོཏརིཏྭཱན གནྟྭཱ ཀནྠཀསནྟིཀཾ.
ཏསྶི’དཾ ཝཙནཾ བྷཱསི སབྦསཏྟཧིཏེ རཏོ;
‘‘ཀནྠཀ’ཛྫེ’ཀརཏྟིཾ མཱ ཏཱརེཧི’’ སནརཱམརཾ.
ལོཀམུ’ཏྟཱརཡིསྶཱམི བུདྡྷོ ཧུཏྭཱ ཨནུཏྟརོ;
བྷཝསཱགརཏོ གྷོརཛརཱདིམཀརཱཀརཱ.’’
ཨིདཾ ཝཏྭཱ ཏམཱ’རུཡ྄ཧ སིནྡྷཝཾ སངྑསནྣིབྷཾ;
གཱཧཱཔེཏྭཱན ཚནྣེན སུདལ༹ྷཾ ཏསྶ ཝཱལདྷིཾ.
པཏྭཱན སོ མཧཱདྭཱརསམཱིཔཾ སམཙིནྟཡི;
བྷཝེཡྻ ཝིཝཊཾ དྭཱརཾ ཡེན ཀེནཙི ནོ སཙེ.
ཝཱལདྷིཾ གཧིཏེནེཝ སདྡྷིཾ ཚནྣེན ཀནྠཀཾ,
ནིཔྤཱིལ༹ཡིཏྭཱ སཏྠཱིཧི ཨིམམཙྩུགྒཏཾ སུབྷཾ;
ཨུལླངྒྷིཏྭཱན པཱཀཱརཾ གཙྪཱམཱི’ཏི མཧབྦལོ.
ཏཐཱ ཐཱམབལཱུཔེཏོ ཚནྣོ’པི ཏུརགུཏྟམོ;
ཝིསུཾ ཝིསུཾ ཝིཙིནྟེསུཾ པཱཀཱརཾ སམཏིཀྐམཾ.
ཏསྶ ཙིཏྟཾ ཝིདིཏྭཱན མོདིཏཱ གམནེ སུབྷེ;
ཝིཝརིཾསུ ཏདཱ དྭཱརཾ དྭཱརེ’དྷིགྒཧིཏཱ སུརཱ.
ཏཾ སིདྡྷཏྠམ’སིདྡྷཏྠཾ ཀརིསྶཱམཱི’ཏི ཙིནྟིཡ;
ཨཱགནྟྭཱ ཏསྶི’དཾ བྷཱསི ཨནྟལིཀྑེ ཊྛིཏནྟིཀོ.
‘‘མཱ ནིཀྑམི མཧཱཝཱིར ཨིཏོ ཏེ སཏྟམེ དིནེ;
དིབྦཾ ཏུ ཙཀྐརཏནཾ ཨདྡྷཱ པཱཏུབྷཝིསྶཏི.’’
ཨིཙྩེཝཾ ཝུཙྩམཱནོ སོ ཨནྟཀེན མཧཱཡསོ;
‘‘ཀོ’སི ཏྭམི’ཏི’’ཏཾ བྷཱསི མཱརོ ཙ’ཏྟཱནམཱ’དིསི.
‘‘མཱརཛཱནཱམ’ཧཾ མཡ྄ཧཾ དིབྦཙཀྐསྶ སམྦྷཝཾ;
གཙྪ ཏྭམི’དྷ མཱ ཏིཊྛ ན’མྷི རཛྫེནམཏྠིཀོ.
སབྦཾ དསསཧསྶིམྤི ལོཀདྷཱཏུམ’ཧཾ པན;
ཨུནྣཱདེཏྭཱ བྷཝིསྶཱམི བུདྡྷོ ལོཀེཀནཱཡཀོ.’’
༡༨༨. ¶
ཨེཝཾ ཝུཏྟེ མཧཱསཏྟེ ཨཏྟནོ གིརམུ’ཏྟརིཾ;
གཱཧཱཔེཏུམ’སཀྐོནྟོ ཏཏྠེ’ཝ’ནྟརདྷཱཡི’སོ.
པཱཔིམསྶ ཨིདཾ ཝཏྭཱ ཙཀྐཝཏྟིསིརིམྤི ཙ;
པཧཱཡ ཁེཔིཎྜཾ’ཝ པཙྩུསསམཡེ ཝསིཾ.
གཙྪནྟམ’བྷིཔཱུཛེཏུཾ སམཱགནྟྭཱན ཏཱཝདེ;
རཏནུཀྐཱསཧསྶཱནི དྷཱརཡནྟཱ མརཱུ ཏཧིཾ.
པཙྪཏོ པུརཏོ ཏསྶ ཨུབྷོཔསྶེསུ གཙྪརེ;
ཏཐེ’ཝ ཨབྷིཔཱུཛེནྟཱ སུཔཎྞཱ ཙ མཧོརགཱ.
སུཝིཔུལསུརསེནཱ ཙཱརུལཱིལཱབྷིརཱམཱ,
ཀུསུམསལིལདྷཱརཱ ཝསྶཡནྟཱ ནབྷམྷཱ;
ཨིཧཧི དསསཧསྶཱི ཙཀྐཝཱལཱ༹ གཏཱ ཏཱ,
སུཁུམཏནུཏམེཏོདགྒུདགྒཱ ཙརནྟི.
ཡསྨིཾ སུགནྡྷཝརཔུཔྥསུདྷཱུཔ ཙུཎྞ,
ཧེམདྡྷཛཔྤབྷུཏིབྷཱསུརཙཱརུམགྒེ;
གཙྪཾ མཧཱཛཝཝརངྒ ཏུརཾག རཱཛཱ,
གནྟུཾ ན སཀྑི ཛཝཏོ ཀུསུམཱདིལགྒོ.
ཨིཏྠཾ ཏམྷི པཐེ རམྨེ ཝཏྟམཱནེ མཧཱམཧེ;
གཙྪནྟོ རཏྟིསེསེན ཏིཾསཡོཛནམཉྫསེ.
པཏྭཱ’ནོམཱནདཱིཏཱིརཾ པིཊྛིཏོ ཏུརགསྶ སོ;
ཨོཏརིཏྭཱན ཝིམལེ སཱིཏལེ སིཀཏཱཏལེ.
ཝིསྶམིཏྭཱ ཨིདཾ ཝཏྭཱ ‘‘གཙྪཱཧཱི’ཏི སཀཾ པུརཾ;
ཨཱབྷརཎཱནི ཨཱདིཡ ཚནྣེ’མཾ གུརགམྤི ཙ.’’
ཋིཏོ ཏསྨིཾ མཧཱཝཱིརོ ཨཙྩནྟ ནིསིཏཱ’སིནཱ;
སུགནྡྷཝཱསིཏཾ མོལི༹ཾ ཚེཏྭཱ’ནུཀྑིཔི ཨམྦརེ.
ཙཱརུཧེམསུམུགྒེན ཀེསདྷཱཏུཾ ནབྷུགྒཏཾ;
པཱུཛནཏྠཾ སཧསྶཀྑོ སིརསཱ སམྤཊིཙྪིཡ.
༡༩༩. ¶
ཝིལོཙནཱནནྡཀརིནྡནཱིལམཡེཧི ཙཱུལཱ༹མཎི ཙེཏིཡཾ སོ;
པཏིཊྛཔེསཱ’མལཏཱཝཏིཾསེ ཨུབྦེདྷཏོ ཡོཛནམཏྟམགྒཱ.
ཨུཏྟམཊྛཔརིཀྑཱརཾ དྷཱརེཏྭཱ བྲཧྨུནཱབྷཏཾ;
ཨམྦརེ’ཙ པཝིཛ྄ཛྷིཏྠ ཝརཾ དུསྶཡུགམྤི ཙ.
ཏམཱ’དཱཡ མཧཱབྲཧྨཱ བྲཧྨལོཀེ མནོརམཾ;
དྭཱདསཡོཛནུབྦེདྷཾ དུསྶཐཱུཔཾ ཨཀཱརཡི.
ནཱམེནཱ’ནུཔིཡཾ ནཱམ གནྟྭཱ ཨམྦཝནཾ ཏཧིཾ;
སཏྟཱཧཾ ཝཱིཏིནཱམེཏྭཱ པབྦཛྫཱསུཁཏོ ཏཏོ.
གནྟྭཱནེ’ཀདིནེནེ’ཝ ཏིཾསཡོཛནམཉྫསཾ;
པཏྭཱ རཱཛགཧཾ དྷཱིརོ པིཎྜཱཡ ཙརི སུབྦཏོ.
ཨིནྡནཱིལསིལཱཡཱ’པི ཀཏཱ པཱཀཱརགོཔུརཱ;
ཧེམཙལཱ’ཝ དིསྶནྟི ཏསྶཱ’བྷཱགི ཏཧིཾ ཏདཱ.
ཀོ’ཡཾ སཀྐོ ནུཁོ བྲཧྨཱ མཱརོ ནཱགོ’ཏིཨཱདིནཱ;
བྷིཡྻོ ཀོཏུཧལ༹པྤཏྟོ པདིསྭཱ ཏཾ མཧཱཛནོ.
པཝིསིཏྭཱ གརཧེཏཱུན བྷཏྟཾ ཡཱཔནམཏྟཀཾ;
ཡུགམཏྟཾ’ཝ པེཀྑནྟོ གཙྪནྟོ རཱཛཝཱིཐིཡཾ.
མཐིཏཾ མེརུམནྠེན སམུདྡ’ཝ མཧཱཛནཾ;
ཏམྷཱ སོ ཨཱཀུལཱི ཀཏྭཱ གནྟྭཱ པཎྜཝཔབྦཏཾ.
ཏཏོ ཏསྶེ’ཝ ཚཱཡཱཡ བྷཱུམིབྷཱགེ མནོརམེ;
ནིསིནྣོ མིསྶཀཾ བྷཏྟཾ པརིབྷུཉྫིཏུམཱ’རབྷི.
པཙྩཝེཀྑཎམཏྟེན ཨནྟསཔྤཾ ནིཝཱརིས;
དེཧཝམྨིཀཏོ དྷཱིརོ ནིཀྑམནྟཾ མཧབྦལོ.
བྷུཏྭཱན བིམྦིསཱརེན ནརིནྡེན ནརཱསབྷོ;
ནིམནྟིནོ’པི རཛྫེན ཨུཔགནྟྭཱན’ནེཀདྷཱ.
༢༡༡. ¶
པཊིཀྑིཔིཡ ཏཾ རཛྫཾ ཨཐ ཏེནཱ’བྷིཡཱཙིཏོ;
དྷམྨཾ དེསེཧི མཡ྄ཧནྟི བུདྡྷོ ཧུཏྭཱ ཨནུཏྟརོ.
དཏྭཱ པཊིཉྙཾ མནུཛཱདྷིཔསྶ དྷཱིརོ’པགནྟྭཱན པདྷཱནབྷཱུམིཾ;
ཨནཉྙསཱདྷཱརཎདུཀྐརཱནི ཀཏྭཱ ཏཏོ ཀིཉྩི ཨཔསྶམཱནོ.
ཨོལཱ༹རིཀནྣཔཱནཱནི བྷུཉྫིཏྭཱ དེཧསམྤདཾ;
པཏྭཱ’ཛཔཱལནིགྲོདྷམཱུལཾ པཏྟོ སུརོ ཝིཡ.
པུརཏྠཱ’བྷིམུཁོ ཧུཏྭཱ ནིསིནྣོ’སི ཛུཏིནྡྷརོ;
དེཧཝཎྞེཧི ནིགྲོདྷོ ཧེམཝཎྞོ’སི ཏསྶ སོ.
སམིདྡྷཔཏྠནཱ ཨེཀཱ སུཛཱཏཱ ནཱམ སུནྡརཱི;
ཧེམཔཱཏིཾ སཔཱཡཱསཾ སཱིསེནཱ’དཱཡ ཨོནཏཱ.
ཏསྨིཾ ཨདྷིགྒཧཱིཏསྶ རུཀྑདེཝསྶ ཏཱཝདེ;
བལིཾ དམྨཱི’ཏི གནྟྭཱན དིསྭཱ ཏཱ དཱིཔདུཏྟམཾ.
དོཝོ’ཏི སཉྙཱཡ ཨུདགྒཙིཏྟཱ པཱཡཱསཔཱཏིཾ པཝརསྶ དཏྭཱ;
‘‘ཨཱསིཾསནཱ ཨིཛ྄ཛྷིཡཐཱ ཧི མཡ྄ཧཾ ཏུཡ྄ཧམྤི སཱ སཱམི སམིཛ྄ཛྷིཏཱུ’ཏི.’’
ཨིཙྩེ’ཝཾ ཝཙནཾ ཝཏྭཱ གཏཱ ཏམྷཱ ཝརངྒནཱ;
ཨཐ པཱཡཱསཔཱཏིཾ ཏཾ གཧེཏྭཱ མུནིཔུངྒཝོ.
གནྟྭཱ ནེརཉྫརཱཏཱིརཾ བྷཱུཏྭཱ ཏཾ ཝརབྷོཛནཾ;
པཊིསོཏཾ པཝིསྶཛྫི ཏསྶཱ པཱཏིཾ མནོརམཾ.
ཛནྟཱལིཔཱལིམནནེཏྟཝིལུམྤམཱནཾ,
སམྥུལླསཱལཝནརཱཛིཝིརཱཛམཱནཾ;
དེཝིནྡནནྡནཝནཾ’ཝ’བྷིནནྡནཱིཡ,
མུ’ཡྻཱནམུ’ཏྟམཏརཾ པཝརོ’པགནྟྭཱ.
ཀཏྭཱ དིཝཱཝིཧཱརཾ སོ སཱཡཎྷསམཡེ ཏཧིཾ;
གཙྪཾ ཀེསརལཱིལཱཡ བོདྷིཔཱདཔསནྟིཀཾ.
༢༢༢. ¶
བྲཧྨསུརཱསུརམཧོརགཔཀྑིརཱཛ,
སཾསཛྫིཏོརུཝཊུམེ དིཔདཱནམིནྡོ;
པཱཡཱསི སོཏྠིཡདྭིཛོ ཏིཎཧཱརཀོ ཏཾ,
དིསྭཱན ཏསྶ ཨདདཱ ཏིཎམུཊྛིཡོ སོ.
ཨིནྡིཝརཱརཝིནྡཱདིཀུསུམཱན’མྦརཱ ཏཧིཾ;
པཏནྟཱི ཝུཊྛིདྷཱརཱ’ཝ གཙྪནྟེ དཱིཔདུཏྟམེ.
ཙཱརུཙནྡནཙུཎྞཱདི’དྷུཔགནྡྷེཧི ནེཀདྷཱ;
ཨནོཀཱསོ’སི ཨཱཀཱསོ གཙྪནྟེ དཱིཔདུཏྟམེ.
རཏནུཛྫལཚཏྟེཧི ཙཱརུཧེམདྡྷཛེཧི ཙ;
ཨནོཀཱསོ’སི ཨཱཀཱསོ གཙྪནྟེ དིཔདུཏྟམེ.
ཝེལུཀྑེཔསཧསྶེཧི ཀཱིལ༹ནྟེཧི མརཱུཧི’པི;
ཨནོཀཱསོ’སི ཨཱཀཱསོ གཙྪནྟེ དིཔདུཏྟམེ.
སུརདུནྡུབྷིཝཛྫཱནི ཀརོནྟེཧི མརཱུཧིཔི;
ཨནོཀཱསོ’སི ཨཱཀཱསོ གཙྪནྟེ དིཔདུཏྟམེ.
སུརངྒནཱཧི སངྒིཏིཾ གཱཡནྟིཧི’པི’ནེཀདྷཱ;
ཨནོཀཱསོ’སི ཨཱཀཱསོ གཙྪནྟེ དིཔདུཏྟམེ.
མནོརམཱ ཀིཎྞརཀིཎྞརངྒནཱ,
མནོརམངྒཱ ཨུརགོརགངྐནཱ;
མནོརམཱ ཏམྷི ཙ ནཙྩགཱིཏིཡོ,
མནོརམཱ’ནེཀཝིདྷཱ པཝཏྟཡུཾ.
ཏདཱ མཧོགྷེ’ཝ མཧཱམགེཧི,
པཝཏྟམཱནེ ཨིཏི སོ མཧཱཡསོ;
ཏིཎེ གཧེཏྭཱ ཏིབྷཝེཀནཱཡཀོ,
ཨུཔཱགཏོ བོདྷིདུམིནྡསནྟིཀཾ.
ཝིདྡུམཱསིཏསེལགྒརཛཏཱཙལསནྣིབྷཾ;
ཀཏྭཱ པདཀྑིཎཾ བོདྷིཔཱདཔཾ དིཔདུཏྟམོ.
པུརཏྠིམདིསཱབྷཱགེ ཨཙལེ རཎདྷཾསཀེ;
མཧཱིཏལེ ཋིཏོ དྷཱིརོ ཙཱལེསི ཏིཎམུཊྛིཡོ.
༢༣༣. ¶
ཝིདྡསཧཏྠམཏྟོ སོ པལླངྐོ ཨཱསི ཏཱཝདེ;
ཨཐ ནཾ ཨབྦྷུཏཾ དིསྭཱ མཧཱཔཉྙོ ཝིཙིནྟཡི.
‘‘མཾསལོཧིཏམཊྛི ཙ ནཧཱརཱུ ཙ ཏཙོ ཙ མེ;
ཀཱམཾ སུསྶཏུ ནེཝཱ’ཧཾ ཛཧཱམི ཝཱིརིཡཾ’’ཨིཏི.
ཨཱབྷུཛིཏྭཱ མཧཱཝཱིརོ པལླངྐམ’པརཱཛིཏཾ;
པཱཙིནཱབྷིམུཁོ ཏསྨིཾ ནིསཱིདི དཱིཔདུཏྟམོ.
དེཝདེཝསྶ དེཝིནྡོ སངྑམཱ’དཱཡ ཏཱཝདེ;
ཝཱིསུཏྟརསཏུབྦེདྷཾ དྷམཡནྟོ ཏཧིཾ ཋིཏོ.
དུཏིཡཾ པུཎྞཙནྡཾ’ཝ སེཏཙྪཏྟཾ ཏིཡོཛནཾ;
དྷཱརཡནྟོ ཋིཏོ སམྨཱ མཧཱབྲཧྨཱ སཧམྤཏི.
ཙཱརུཙཱམརམཱ’དཱཡ སུཡཱམོ’པི སུརཱདྷིཔོ;
ཝཱིཛཡནྟོ ཋིཏོ ཏཏྠ མནྡཾ མནྡཾ ཏིགཱཝུཏཾ.
བེལུཝཾ ཝཱིཎམཱ’དཱཡ སུརོཔཉྩསིཁཝ྄ཧཡོ;
ནཱནཱཝིདྷལཡོཔེཏཾ ཝཱདཡནྟོ ཏཐཱ ཋིཏོ.
ཐུཏིགཱིཏཱནི གཱཡནྟོ ནཱཊཀཱིཧི པུརཀྑཏོ;
ཏཐེ’ཝ’ཊྛཱསི སོ ནཱགརཱཛཱ ཀཱལཝ྄ཧཡོ’པི ཙ.
གཧེཏྭཱ ཧེམམཉྫུསཱ སུརཔུཔྥེཧི པཱུརིཏཱ;
པཱུཛཡནྟཱ’ཝ ཨཊྛཾསུ བཏྟིཾསཱ’པི ཀུམཱརིཀཱ.
སེནྡདེཝསངྒྷེཧི ཏེཧི ཨིཏྠཾ མཧཱམཧེ;
ཝཏྟམཱནེ ཏདཱ མཱརོ པཱཔིམཱ ཨིཏི ཙིནྟཡི.
‘‘ཨཏིཀྐམིཏུཀཱམོ’ཡཾ ཀུམཱརོ ཝིསཡཾ མམ;
སིདྡྷཏྠོ ཨཐ སིདྡྷཏྠཾ ཀརིསྶཱམཱི’’ཏི ཏཱཝདེ.
མཱཔེཏྭ བྷིཾསནཏརོརུསཧསྶབཱཧུཾ,
སངྒཡ྄ཧ ཏེཧི ཛལིཏཱ ཝིཝིདྷཱཡུདྷཱནི;
ཨཱརུཡ྄ཧ ཙཱརུ དིརདཾ གིརིམེཁལཱཀྑྱཾ,
ཙཎྜཾ དིཡཌྜྷསཏཡོཛནམཱཡཏཾ ཏཾ.
༢༤༥. ¶
ནཱནཱནནཱཡ’ནལཝཎྞསིརོརུཧཱཡ,
རཏྟོརུཝཊྚབཧིནིགྒཏལོཙནཱཡ;
དཊྛོཊྛབྷིཾསནམུཁཱཡུ’རགབྦྷུཛཱཡ,
སེནཱཡ སོ པརིཝུཏོ ཝིཝིདྷཱཡུདྷཱཡ.
ཏཏྠོ’པགམྨ ཨཏིབྷཱིམརམཾ རཝནྟོ,
སིདྡྷཏྠམེ’ཐ ཨིཏི གཎྷཐ བནྡྷཐེ’མཾ;
ཨཱཎཱཔཡཾ སུརགཎཾ སཧདསྶནེན,
ཙཎྜཱནཱིལུགྒཏཔིཙུཾ’ཝ པལཱཔཡིཏྠ.
གམྦྷཱིརམེགྷརཝསནྟིབྷཝཎྜནཱདཾ,
ཝཱཏཾཙ མཱཔིཡ ཏཏོ སུབྷགསྶ ཏསྶ;
ཀཎྞམྤི ཝཱིཝརཝརསྶ མནོརམསྶ,
ནོ ཨཱསིཡེཝ ཙལིཏུཾ པབྷུ ཨནྟཀོཐ.
སཾཝཊྚཝུཊྛིཛཝསནྣིབྷབྷཱིམགྷོར,
ཝསྶཾ པཝསྶིཡ ཏཏོ’དཀབིནྡུཀམྤི;
ནཱསཀྑི ནེཏུམ’ཏུལསྶ སམཱིཔཀམྤི,
དིསྭཱ ཏམ’བྦྷུཏམ’ཐོ’པི སུདུམྨུཁོ སོ.
ཨཙྩནྟབྷཱིམནལ༹ཨཙྩིསམུཛྫལོརུ,
པཱསཱནབྷསྨཀལལཱཡུདྷཝསྶདྷཱརཱ;
ཨངྒཱརཔཛྫལིཏཝཱལུཀཝསྶདྷཱརཱ,
ཝསྶཱཔཡིཏྠ སཀལཱནི ཨིམཱནི ཏཱནི.
མཱརཱནུབྷཱཝབལཏོ ནབྷཏོ’པགནྟྭཱ,
པཏྭཱན པུཉྙསིཁརུགྒཏསནྟིཀཾ ཏུ;
མཱལཱགུལ༹པྤབྷཱུཏིབྷཱཝགཏཱནི’ཐཱཔི,
ལོཀནྟརེ’ཝ ཏིམིརཾ ཏིམིརཾ སུགྷོརཾ.
མཱཔེཏྭ མོཧཏིམིརམྤི ཧཏསྶ ཏསྶ,
དེཧཔྤབྷཱགི སཏརཾསིསཏོདིཏཾ’ཝ;
ཛཱཏཾ མནོརམཏརཾ ཨཏིདསྶནཱིཡ,
མཱ’ལོཀཔུཉྫམ’ཝལོཀིཡ པཱཔདྷམྨོ.
༢༥༢. ¶
ཀོཔོཔརཏྟཝདནོ བྷུཀུཊིཔྤཝཱརཱ,
ཨཙྩནྟབྷིཾསནཝིརཱུཔཀཝེསདྷཱརཱི;
ཨཙྩནྟཏིཎྷཏརདྷཱརམསངྒམེ’ཝ,
ཙཀྐཱཡུདྷཾ ཙརཏརཾ ཨཔི མེརུརཱཛཾ.
སངྑཎྜཡནྟམི’ཝ ཐཱུལཀལཱིརཀཎྜཾ,
ཝིསྶཛྫི ཏེན’པི ན ཀིཉྩི གུཎཱཀརསྶ;
ཀཱཏུཾ པཧུཏྟམུ’པགཉྪི ཏཏོ ཏམེ’ཏཾ,
གནྟྭཱ ནབྷཱ ཀུསུམཚཏྟཏམཱ’ག སཱིསཾ.
ཝིསྶཛྫིཏཱ’པི སེནཱཡ སེལཀཱུཊཱནལཱཀུལཱ;
པགནྟྭཱ ནབྷསཱ མཱལཱགུལཏྟཾ སམུཔཱགཏཱ.
ཏམྤི དིསྭཱ སསོཀོ སོ གནྟྭཱ དྷཱིརསྶ སནྟིཀཾ;
པཱཔུཎཱཏི མམེཝཱ’ཡཾ པལླངྐོ ཨཔརཱཛིཏོ.
ཨིཏོ ཨུཊྛཧ པལླངྐཱ ཨིཏི’བྷཱསིཏྠ དྷཱིམཏོ;
ཀཏཀལྱཱཎཀམྨསྶ པལླངྐཏྠཱཡ མཱར ཏེ.
ཀོ སཀྑཱི’ཏི པཝུཏྟོ སོ ཨིམེ སབྦེ’ཏི སཀྑིནོ;
སེནཱཡཱ’བྷིམུཁཾ ཧཏྠཾ པསཱརེཏྭཱན པཱཔིམཱ.
གྷོརནཱདེན’ཧཾ སཀྑི ཨཧཾ སཀྑཱི’ཏི ཏཱཡ’པི;
སཀྑིབྷཱཝཾ ཝདཱཔེཏྭཱ ཏསྶེ’ཝཾ སམུདཱིརཡི.
ཀོ ཏེ སིདྡྷཏྠ སཀྑཱི’ཏི ཨཐ ཏེནཱ’ཏུལེན’པི;
མམེ’ཏྠ སཀྑིནོ མཱར ནསནྟི’ཏི སཙེཏནཱ.
རཏྟམེགྷོཔནིཀྑནྟཧེམཝིཛྫུཝབྷཱསུརཾ;
ནཱིཧརིཏྭཱ སུརཏྟམྦྷཱ ཙཱིཝརཱ དཀྑིཎཾ ཀརཾ.
བྷཱུམིཡཱ’བྷིམུཁཾ ཀཏྭཱ ཀསྨཱ པཱརམིབྷཱུམིཡཾ;
ཨུནྣཱདེཏྭཱ ནི’དཱནེ’ཝཾ ནིསྶདྡཱསཱི’ཏི བྷཱུམིཡཱ.
མུཉྩཱཔིཏེ རཝེ ནེཀསཏེ མེགྷརཝེ ཡཐཱ;
བུདྡྷནཱགབལཱ ནཱགཾ ཛཱནཱུཧི སུཔཔཏིཊྛིཏཾ.
༢༦༣. ¶
དིསྭཱནི’དཱནི གཎྷཱཏི’དཱནི གཎྷཱཏི ཙིནྟིཡ;
སམྦྷིནྣདཱཋསཔྤོ’ཝ ཧཏདཔྤོ སུདུམྨུཁོ.
པཧཱཡཱ’ཡུདྷཝཏྠཱནི’ལངྐཱརཱནི ཨནེཀདྷཱ;
ཙཀྐཝཱལཱ༹ཝལཱ ཡཱཝ སསེནཱཡ པལཱཡི སོ.
ཏཾ མཱརསེནཾ སབྷཡཾ སསོཀཾ པལཱཡམཱནཾ ཨིཏི དེཝསངྒྷཱ;
དིསྭཱན མཱརསྶ པརཱཛཡོ’ཡཾ ཛཡོ’ཏི སིདྡྷཏྠ ཀུམཱརཀསྶ.
སམྨོདམཱནཾ ཨབྷིཔཱུཛཡནྟཱ དྷཱིརཾ སུགནྡྷཔྤབྷཱུཏིཧི ཏསྨིཾ;
པུནཱ’གཏཱ ནེཀཐུཏཱིཧི སམྨཱ ཨུགྒྷོསམཱནཱ ཚནཝེསདྷཱརི.
ཨེཝཾ མཱརབལཾ དྷཱིརོ ཝིདྡྷཾསེཏྭཱ མཧབྦལོ;
ཨཱདིཙྩེ དྷརམཱནེ’ཝ ནིསིནྣོ ཨཙལཱསནེ.
ཡཱམསྨིཾ པཋམེ པུབྦེནིཝཱསཾ ཉཱཎ’མུཏྟམོ;
ཝིསོདྷེཏྭཱན ཡཱམསྨིཾ མཛ྄ཛྷིམེ དིབྦལོཙནཾ.
སོ པཊིཙྩསམུཔྤཱདེ ཨཐ པཙྪིམཡཱམཀེ;
ཨོཏཱརེཏྭཱན ཉཱཎཾསཾ སམྨསནྣོ ཨནེཀདྷཱ.
ལོཀདྷཱཏུསཏཾ སམྨཱ ཨུནྣཱདེཏྭཱ’རུཎོདཡེ;
བུདྡྷོ ཧུཏྭཱན སམྦུདྡྷོསམྦུདྡྷཛལོཙནོ.
‘‘ཨནེཀཛཱཏིསཾསཱརཾ སནྡྷཱཝིསྶ’’ནྟིཨཱདིནཱ;
ཨུདཱནེ’དཾ ཨུདཱནེསི པཱིཏིཝེགེན སཱདིསོ.
སལླཀྑེཏྭཱགུཎེ ཏསྶ པལླངྐསྶ ཨནེཀདྷཱ;
ནཱ ཏཱཝ’ཨུཊྛཧིསྶཱམི ཨིཏོ པལླངྐཏོ ཨིཏི.
སམཱཔཏྟཱི སམཱཔཛྫཱི ཨནེཀསཏཀོཊིཡོ;
སཏྠཱ ཏཏྠེ’ཝ སཏྟཱཧཾ ནིསིནྣོ ཨཙལཱསནེ.
ཨཛྫཱ’པི ནཱུན དྷཱིརསྶ སིདྡྷཏྠསྶ ཡསསྶིནོ;
ཨཏྠི ཀཏྟབྦཀིཙྩཉྷི ཏསྨཱ ཨཱསནམཱལཡཾ.
༢༧༥. ¶
ནཛཧཱསཱི’ཏི ཨེཀཙྩདེཝཏཱནཱ’སི སཾསཡཾ;
ཉཏྭཱ ཏཱསཾ ཝིཏཀྐཾ ཏཾ སམེཏུཾ སནྟམཱནསོ.
ཨུཊྛཱཡ ཧེམཧཾསོ’ཝ ཧེམཝཎྞོ པབྷངྐརོ;
ཨབྦྷུགྒནྟྭཱ ནབྷཾ ནཱཐོ ཨཀཱསི པཱཊིཧཱརིཡཾ.
ཝིཏཀྐམེ’ཝཾ ཨིམིནཱ མརཱུནཾ སམྨུ’པསམྨཱ’ནིམིསེསི བོདྷིཾ;
སམྤཱུཛཡནྟོ ནཡནམྦུཛེཧི སཏྟཱཧམ’ཊྛཱསི ཛཡཱསནཉྩ.
སུབྷཱསུརསྨིཾ རཏནེཧི ཏསྨིཾ སཝངྐམནྟོ ཝརཙངྐམསྨིཾ;
མནོརམསྨིཾ རཏནཱལཡེཧི’པི ཝིསུདྡྷདྷམྨཾ ཝིཙིནཾ ཝིསུདྡྷོ.
མཱུལེཛཔཱལཏརུརཱཛཝརསྶ ཏསྶ,
མཱརངྒནཱནམ’མལཱནནཔངྐཛཱནི;
སམྨཱ མིལཱཔིཡ ཏཏོ མུཙལིནྡམཱུལེ,
བྷོགིནྡཙིཏྟཀུམུདཱནི པབོདྷཡནྟོ.
མཱུལེ’པི རཱཛཡཏནསྶ ཏསྶ ཏསྨིཾ སམཱཔཏྟིསུཁམྤི ཝིནྡཾ;
སཾཝཱིཏིནཱམེསི མནུཉྙཝཎྞོ ཨེཀཱུནཔཉྙཱསདིནཱནི དྷཱིམཱ.
ཨནོཏཏྟོདཀཾ དནྟཀཊྛནཱགལཏཱམཡཾ;
ཧརཱིཊཀཱགདཾ བྷུཏྭཱ དེཝིནྡེནཱབྷཏུཏྟམཾ.
ཝཱནིཛེཧི སམཱནཱིཏཾ སམཏྠམདྷུཔིཎྜིཀཾ;
མཧཱརཱཛཱུཔནཱིཏམྷི པཏྟམྷི པཏིགཎྷིཡ.
བྷོཛནསྶཱཝསཱནམྷི ཛཔཱལཏརུམཱུལཀཾ;
གནྟྭཱདྷིགཏདྷམྨསྶ གམྦྷཱིརཏྟམནུསྶརི.
མཧཱིསནྡྷཱརཀོ ཝཱརིཀྑནྡྷསནྣིབྷཀོ ཨཡཾ;
གམྦྷཱིརོདྷིགཏོ དྷམྨོ མཡཱ སནྟོ’ཏིཨཱདིནཱ.
༢༨༥. ¶
དྷམྨགམྦྷཱིརཏཾ དྷམྨརཱཛསྶ སརཏོ སཏོ;
ཨཱསེཝཾ ཏཀྐཎཾ དྷམྨཾ ཨིམཾ མེ པཊིཝིཛ྄ཛྷིཏུཾ.
ཝཱཡམནྟོ སམྤཏྟཡཱཙཀཱནཾ མནོརམཾ;
ཀནྟེཏྭཱ ཨུཏྟམངྒཉྩ མོལི༹བྷཱུསནབྷཱུསིཏཾ.
སུཝཉྫིཏཱནི ཨཀྑིནི ཨུཔྤཱཊེཏྭཱན ལོཧིཏཾ;
གལ༹ཏོ ནཱིཧིརིཏྭཱན བྷརིཡཾ ལཱཝཎྞབྷཱསུརཾ.
ཨཏྲཛཉྩ དདནྟེན ཀུལཝཾསཔྤདཱིཔཀཾ;
དཱནཾ ནཱམ ན དིནྣཉྩ ནཏྠི སཱིལཾ ཨརཀྑིཏཾ.
ཏཐཱཧི སངྑཔཱལཱདིཨཏྟབྷཱཝེསུ ཛཱིཝིཏཾ;
མཡཱ པརིཙྩཛནྟེན སཱིལབྷེདབྷཡེན ཙ.
ཁནྟིཝཱདཱདིཀེ ནེཀཨཏྟབྷཱཝེ ཨཔཱུརིཏཱ;
ཚེཛྫཱདིཾ པཱཔུནཏྟེན པཱརམཱི ནཏྠི ཀཱཙི མེ.
ཏསྶ མེ ཝིདྷམནྟསྶ མཱརསེནཾ ཝསུནྡྷརཱ;
ན ཀམྤིཏྠ ཨཡཾ པུབྦེནིཝཱསཾ སརཏོ’པི ཙ.
ཝིསོདྷེནྟསྶ མེ ཡཱམེ མཛ྄ཛྷིམེ དིབྦལོཙནཾ;
ན ཀམྤིཏྠ པཀམྤིཏྠ པཙྪིམེ པན ཡཱམཀེ.
པཙྩཡཱཀཱརཉཱཎཾ མེ ཏཱཝདེ པཊིཝིཛ྄ཛྷཏོ;
སཱདྷུཀཱརཾ དདནྟཱི’ཙ མུཉྩམཱནཱ མཧཱརཝཾ.
སམྤུཎྞལཱཔཱུ ཝིཡ ཀཉྫིཀཱཧི,
ཏཀྐེཧི པུཎྞཾ ཝིཡ ཝཱཊིཀཱ’ཝ;
སམྨཀྑིཏོ’ཝ’ཉྫནཀེཧི ཧཏྠོ,
ཝསཱཧི སམྤཱིཏ པིལོཏིཀཱ’ཝ.
ཀིལེསཔུཉྫབྦྷརིཏོ ཀིལིཊྛོ,
རཱགེན རཏྟོ ཨཔི དེསདུཊྛོ;
མོཧེན མཱུལ༹ྷོ’ཏི མཧབྦལེན,
ལོཀོ ཨཝིཛྫཱནིཀརཱཀརོ’ཡཾ.
༢༩༦. ¶
ཀིནྣཱམ དྷམྨཾ པཊིཝིཛ྄ཛྷཏེ’ཏཾ,
ཨཏྠོ ཧི ཀོ ཏསྶི’ཏི དེསནཱཡ;
ཨེཝཾ ནིརུསྶཱཧམ’གཉྪི ནཱཐོ,
པཛཱཡ དྷམྨཱམཏཔཱནདཱནེ.
ནིཙྪཱརེཏྭཱ མཧཱནཱདཾ ཏཏོ བྲཧྨཱ སཧམྤཏཱི;
ནསྶཏི ཝཏ བྷོ ལོཀོ ཨིཏི ལོཀོ ཝིནསྶཏི.
བྲཧྨསངྒྷཾ སམཱདཱཡ དེཝསངྒྷཉྩ ཏཱཝདེ;
ལོཀདྷཱཏུསཏེ སཏྠུ སམཱིཔཾ སམུཔཱགཏོ.
གནྟྭཱ མཧཱིཏལེ ཛཱནུཾ ནིཧཙྩ སིརསཉྫལིཾ;
པགྒཡ྄ཧ ‘‘བྷགཝཱ དྷམྨཾ དེསེཏུ’’ ཨིཏིཨཱདིནཱ.
ཡཱཙིཏོ ཏེན སམྦུདྡྷརཝིནྡཝདནོ ཛིནོ;
ལོཀདྷཱཏུསཏཾ བུདྡྷཙཀྑུནཱ’ལོཀཡཾ ཏདཱ.
ཏསྨིཾ ཨཔྤརཛཀྑཱདིམཙྩཱ དིསྭཱ’ཏི ཨེཏྟཀཱ;
ཝིབྷཛིཏྭཱ’ཐ ཏེ སཏྟེ བྷབྦཱབྷབྦཝསེན སོ.
ཨབྷབྦེ པརིཝཛྫེཏྭཱ བྷབྦེ’ཝཱ’དཱཡ བུདྡྷིཡཱ;
ཨུཔནེཏུ ཛནོ’དཱནི སདྡྷཱབྷཱཛནམ’ཏྟནོ.
པཱུརེསྶཱམཱི’ཏི ཏཾ ཏསྶ སདྡྷམྨཱམཏདཱནཏོ;
ཝིསྶཛྫི བྲཧྨསངྒྷསྶ ཝཙནཱམཏརཾསིཡོ.
ཏཏོཛཔཱལོདཡཔབྦཏོདིཏོ,
མཧཔྤབྷོ བུདྡྷདིཝཱཀརོ ནབྷེ;
མཎིཔྤབྷཱསནྣིབྷབྷཱསུརཔྤབྷོ,
པམོཙཡཾ བྷཱསུརབུདྡྷརཾསིཡོ.
པམོདཡནྟོ ཨུཔཀཱདཡོ ཏདཱ,
ཀམེན ཨཊྛཱརསཡོཛནཉྫསཾ;
ཨཏིཀྐམིཏྭཱན སུཕུལླཔཱདཔེ,
ཝིཛམྦྷམཱནཱལིགཎཱབྷིཀཱུཛིཏཾ.
༣༠༦. ¶
ནིརནྟརཾ ནེཀདིཛུཔཀཱུཛིཏཾ སུཕྲལླཔངྐེརུཧ གནྡྷཝཱསིཏཾ གཏོ;
ཡསསྶཱི མིགདཱཡམུཏྟམཾ ཏཧིཾ ཏཔསྶཱི ཨཐ པཉྩཝགྒིཡཱ.
དེཝཱཏིདེཝཾ ཏིབྷཝེཀནཱཐཾ,
ལོཀནྟདསྶིཾ སུགཏཾ སུགཏྟཾ;
དིསྭཱན དྷཱིརཾ མུནིསཱིཧརཱཛཾ,
ཀུམནྟཎཾ ཏེ ཨིཏི མནྟཡིཾསུ.
‘‘བྷུཏྭཱན ཨོལཱ༹རིཀཨནྣཔཱནཾ,
སུཝཎྞཝཎྞོ པརིཔུཎྞཀཱཡོ;
ཨེཏཱ’ཝུསོ’ཡཾ སམཎོ ཨིམསྶ,
ཀརོམ ནཱ’མྷེ ཨབྷིཝཱདནཱདིཾ.
ཨཡཾ ཝིསཱལནྭཡཏོ སསཱུཏོ,
སམྦྷཱཝནཱིཡོ བྷུཝི ཀེཏུབྷཱུཏོ;
པཊིགྒཧེཏུཾ’རཧཏཱ’སནཾ ཏུ,
ཏསྨཱ’སནཾ’ཡེཝི’ཏི པཉྙཔེམ.’’
ཉཏྭཱ’ཐ བྷགཝཱ ཏེསཾ ཝིཏཀྐཾ ཏིཀྑབུདྡྷིཡཱ;
མེཏྟཱནིལཀདམྦེཧི མཱནཀེཏུཾ པདྷཾསཡཱི.
སམཏྠཱ ནཧི སཎྛཱཏུཾ སཀཱཡ ཀཏིཀཱཡ ཏེ;
ཨཀཾསུ ལོཀནཱཐསྶ ཝནྡནཱདཱིནི དྷཱིམཏོ.
བུདྡྷབྷཱཝཾ ཨཛཱནནྟཱ མུནཡོ མུནིརཱཛིནོ;
ཨཱཝུསོ ཝཱདཏོ ཏསྶ ཀེཝལཾ སམུདཱིརཡུཾ.
ཨཐ ལོཀཝིདཱུ ལོཀནཱཐོ ཏེསམུ‘‘དཱིརཐ;
ཨཱཝུསོཝཱདཏོ ནེཝ སཏྠུནོ’’ སམུདཱིརཡི.
‘‘བྷིཀྑཝེ ཨརཧཾ སམྨཱ སམྦུདྡྷོ’ཏི ཏཐཱགཏོ’’;
བུདྡྷབྷཱཝཾ པཀཱསེཏྭཱ ཨཏྟནོ ཏེསམུ’ཏྟམོ.
ནིསིནྣོ ཏེཧི པཉྙཏྟེ དསྶནེཡྻུཏྟམཱསནེ;
བྲཧྨནཱདེན ཏེ ཐེརེ སཱིལབྷཱུསནབྷཱུསིཏེ.
༣༡༦. ¶
ཨཱམནྟེཏྭཱན བྲཧྨཱནཾ ནེཀཀོཊིཔུརཀྑཏོ;
དྷམྨཙཀྐཾ པཝཏྟེནྟོ དེསནཱརཾསིནཱ ཏདཱ.
མོཧནྡྷཀཱརརཱསིམྤི ཧནྟྭཱ ལོཀེ མནོརམཾ;
དྷམྨཱལོཀཾ པདསྶེཏྭཱ ཝེནེཡྻམྦུཛབུདྡྷིཡཱ.
མིགཀཱནནསངྑཱཏོ རཎབྷཱུམིཏལེ ཨིཏི;
རཱཛཱ མཧཱནུབྷཱཝོ’ཝདྷམྨརཱཛཱ ཝིསཱརདོ.
དེསནཱསིཾ སམཱདཱཡ དྷཱིབྷུཛེན མནོརམཾ;
ཝེནེཡྻཛནབནྡྷུནཾ མཧཱནཏྠཀརཾ སདཱ.
ཀིལེསཱརཱི པདཱལེ༹ཏྭཱ སདྡྷམྨཛཡདུནྡུབྷིཾ;
པཧརིཏྭཱན སདྡྷམྨཛཡཀེཏུཾ སུདུཛྫཡཾ.
ཨུསྶཱཔེཏྭཱན སདྡྷམྨཛཡཏྠུཎུཏྟམཾ སུབྷཾ;
པཏིཊྛཱཔིཡ ལོཀེཀརཱཛཱ ཧུཏྭཱ སིཝངྐརོ.
པམོཙེཏྭཱན ཛནཏཾ བྲཧཱསཾསཱརབནྡྷནཱ;
ནིབྦཱཎནགརཾ ནེཏུཀཱམོ ལོཀཧིཏེ རཏོ.
སུཝཎྞཱཙལཀཱུཊཾ’ཝ ཛངྒམཾ ཙཱརུདསྶནཾ;
པཏྭོ’རུཝེལགཱམིཾ ཏཾ ཨཉྫསཾ’ཝ སུརཉྫསཾ.
བྷདྡཝགྒིཡབྷཱུཔཱལཀུམཱརེ ཏིཾསམཏྟཀེ;
མགྒཏྟཡཱམཏརསཾ པཱཡེནྭཱ རསམུ’ཏྟམཾ.
པབྦཛྫམུ’ཏྟམཾ དཏྭཱ ལོཀསྶ’ཏྠཱཡ བྷིཀྑཝོ;
ཨུཡྻོཛེཏྭཱན སམྦུདྡྷོ ཙཱརིཀཾ ཙརཐཱ’ཏི ཏེ.
གནྟྭོ’རུཝེལཾ ཛཊིལཱནམ’ནྟོ-
ཛཊཱ ཙ ཚེཏྭཱན ཛཊཱ བཧིདྡྷཱ;
པཱཔེཏྭ ཨགྒཉྫསམུ’ཏྟམོ ཏེ,
པུརཀྑཏོ ཨིནྡུ’ཝ ཏཱརཀཱབྷི.
པུརཀྑཏོ ཏེཧི ཨནཱསཝེཧི,
ཚབྦཎྞརཾསཱབྷརནུཏྟམེཧི;
དིསངྒནཱཡོ ཨཏིསོབྷཡནྟོ,
པཀྑཱིནམཀྑཱིནི’པི པཱིཎཡནྟོ.
༣༢༨. ¶
དིནྣཾ པཊིཉྙཾ སམནུསྶརནྟོ,
ཏཾ བིམྦིསཱརསྶ མཧཱཡསསྶ;
མོཙེཏུཀཱམོ ཝརརཱཛཝཾསཾ,
དྷཛཱུཔམཱནསྶ གུཎཱལཡསྶ.
སིཁཎྜིམཎྜལཱརདྡྷནཙྩཾ ལཊྛིཝནཝ྄ཧཡཾ;
ཨུཡྻཱནམ’གམཱ ནེཀཏརུསཎྜཱབྷིམཎྜིཏཾ.
བིམྦིསཱརནརིནྡོ སོ’གཏབྷཱཝཾ མཧེསིནོ;
སུཎིཏྭཱ པཱིཏིཔཱམོཛྫབྷཱུསནེན ཝིབྷཱུསིཏོ.
ཏམུ’ཡྻཱནུ’པགནྟྭཱན མཧཱམཙྩཔུརཀྑཏོ;
སཏྠུཔཱདཱརཝིནྡེཧི སོབྷཡནྟོ སིརོརུཧེ.
ནིསིནྣོ བིམྦིསཱརཾ ཏཾ སདྡྷམྨཨམཏམྦུནཱ;
དེཝིནྡགཱིཡམཱནགྒཝཎྞོ ཝཎྞཱབྷིརཱཛིཏོ.
དེཝདཱནཝབྷོགིནྡཔཱུཛིཏོ སོ མཧཱཡསོ;
རམྨཾ རཱཛགཧཾ གནྟྭཱ དེཝིནྡཔུརསནྣིབྷཾ.
ནརིནྡགེཧཾ ཨཱནཱིཏོ ནརིནྡེན སརཱསབྷོ;
བྷོཛནསྶཱ’ཝསཱནམྷི ཙཱལཡནྟོ མཧཱམཧིཾ.
པཏིགཎྷིཡ སམྥུལླཏརུརཱཛཝིརཱཛིཏཾ;
རམྨཾ ཝེལུཝནཱརཱམཾ ཝིལོཙན རསཱཡནཾ.
སིཏཔུལིནསམཱུཧཙྪནྣབྷཱལངྐཏསྨིཾ,
སུརབྷིཀུསུམགནྡྷཱཀིཎྞམནྡཱནིལསྨིཾ;
ཝིཝིདྷཀམལམཱལཱལངྐཏམྦཱསཡསྨིཾ,
ཝིཔུལཝིམལཏསྨིཾ ཝལླིཡཱམཎྜཔསྨིཾ.
སུརནརམཧནཱིཡོ ཙཱརུཔཱདཱརཝིནྡོ,
ཝིམལཀམལནེཏྟོ ཀུནྡདནྟཱབྷིརཱམོ;
གུཎརཏནསམུདྡོ ནཱཐནཱཐོ མུནིནྡོ,
ཀཎཀཀིརཎསོབྷོ སོམསོམྨཱནནོ སོ.
༣༣༨. ¶
ཝིམལཔཝརསཱིལཀྑནྡྷཝཱརཉྩ ཀཏྭཱ,
རུཙིརཝརསམཱདྷཱིཀུནྟམུ‘‘སྶཱཔཡིཏྭཱ;
ཏིཁིཎཏརསུབྷགྒཾ བུདྡྷཉཱཎོརུཀཎྜཾ,
ཝིཧརཏི བྷམཡནྟོ ཀཱམམ’གྒཱ ཝིཧཱརཱ.
ཏདཱ སུདྡྷོདནོ རཱཛཱ‘‘པུཏྟོ སམྦོདྷིམུཏྟམཾ;
པཏྭཱ པཝཏྟསདྡྷམྨཙཀྐོ ལོཀཧིཏཱཡ མེ.
རཱཛགཧཾ’ཙ ནིསྶཱཡ རམྨེ ཝེལུཝནེ’དྷུནཱ;
ཝསཏཱི‘‘ཏི སུཎིཏྭཱན བུདྡྷབྷཱུཏཾ སཀཏྲཛཾ.
དཊྛུཀཱམོ ནཝཀྑཏྟུཾ ནཝཱམཙྩེ མཧེསིནོ;
ནཝཡོདྷསཧསྶེཧི སདྡྷིཾ པེསེསི སནྟིཀཾ.
གནྟྭཱ ཏེ དྷམྨརཱཛསྶ སུཏྭཱ’ནོཔམདེསནཾ;
ཨུཏྟམཏྠཾ ལབྷིཏྭཱན སཱསནམྤི ནཔེསཡུཾ.
ཏེསྭེ’ཀམྤི ཨཔསྶནྟོ ཀཱལུདཱཡིཾ སུབྷཱརཏིཾ;
ཨཱམནྟེཏྭཱ མཧཱམཙྩཾ པབྦཛྫཱབྷིརཏཾ སདཱ.
‘‘སུགཏྟརཏནཾ ནེཏྭཱ མམ ནེཏྟརསཱཡནཾ;
ཡེན ཀེནཙུ’པཱཡེན ཀརོཧཱི’’ཏི ཏམ’བྲཝཱི.
ཨཐ ཡོདྷསཧསྶེན ཏམྤི པེསེསི སོ’པི ཙ;
གནྟྭཱ སཔརིསོ སཏྠུ སུཏྭཱ སུནྡརདེསནཾ.
ཨརཧཏྟཉྫསཾ པཏྭཱ པབྦཛིཏྭཱ ནརཱསབྷཾ;
ནམསྶནྟོ ས སམྦུདྡྷཾ པགྒཡ྄ཧ སིརསཉྫལིཾ.
‘‘ཝསནྟཀཱལཛྫནཱིཏཱཏིརཏྟཝཎྞཱབྷིརཱམངྐུརཔལླཝཱནི;
སུནཱིལཝཎྞུཛྫལཔཏྟཡུཏྟཱ སཱཁཱསཧསྶཱནི མནོརམཱནི.
ཝིསིཊྛགནྡྷཱཀུལཕཱལིཕུལླནཱནཱཝིཙིཏྟཱནི མཧཱིརུཧཱནི;
སུཙིཏྟནཱནཱམིགཔཀྑིསངྒྷསངྒཱིཡམཱནུཏྟམཀཱནནཱནི.
༣༤༩. ¶
སུནཱིལསཱཏོདཀཔཱུརིཏཱནི སུནཱདིཀཱདམྦཀདམྦཀཱནི;
སུགནྡྷེནྡཱིཝརཀལླཧཱརཱ རཝིནྡརཏྟམྦུཛབྷཱུསིཏཱནི.
ཏཱིརནྟརེ ཛཱཏདུམེསུ པུཔྥཀིཉྫཀྑརཱཛཱིཧི ཝིརཱཛིཏཱནི;
མུཏྟཱཏིསེཏཱམལསེཀཏཱནི རམྨཱནི ནེཀཱནི ཛལཱསཡཱནི.
མནུཉྙཝེལུ༹རིཡཀཉྩུཀཱནིཝགུཎྛིཏཱནི’ཙ སུསདྡལེཧི;
སུནཱིལབྷཱུཏཱནི མཧཱིཏལཱནི ནབྷཱནི མནྡཱནིལ སངྐུལཱནི.
ཨནནྟབྷོགེཧི ཛནེཧི ཕཱིཏཾ,
སུརཱཛདྷཱནིཾ ཀཔིལཱ༹བྷིདྷཱནིཾ;
གནྟུཾ བྷདནྟེ སམཡོ’’ཏིཨཱདིཾ,
སཾཝཎྞི ཝཎྞཾ གམནཉྫསསྶ.
སུཝཎྞནཾ ཏཾ སུགཏོ སུཎིཏྭཱ,
‘‘ཝཎྞེསི ཝཎྞཾ གམནསྶུ’དཱཡི;
ཀིནྣཱུ‘‘ཏི བྷཱསིཏྠ ཏཏོ ཨུདཱཡི,
ཀཐེསི’དཾ ཏསྶ སིཝངྐརསྶ.
‘‘བྷནྟེ པིཏཱ དསྶནམི’ཙྪཏེ ཏེ,
སུདྡྷོདནོ རཱཛཝརོ ཡསསྶཱི;
ཏཐཱགཏོ ལོཀཧིཏེཀནཱཐོ,
ཀརོཏུ སཉྙཱཏཀསངྒཧནྟི.’’
སུཎིཏྭཱ མདྷུརཾ ཏསྶ གིརཾ ལོཀཧིཏེ རཏོ;
‘‘སཱདྷུ’དཱཡི ཀརིསྶཱམི ཉཱཏཀཱནནྟི སངྒཧཾ.’’
ཛངྒམོ ཧེམམེརཱུ’ཝ རཏྟཀམྦལལངྐཏོ;
ཝིམལོ པུཎྞཙནྡོ’ཝ ཏཱརཀཱཔརིཝཱརིཏོ.
སདྡྷིཾ ཝཱིསསཧསྶེཧི སནྟཙིཏྟེཧི ཏཱདིཧི;
གཙྪནྟོ སིརིསམྤནྣོ ཨཉྫསེ སཊྛིཡོཛནེ.
༣༥༨. ¶
དིནེ དིནེ ཝསིཏྭཱན ཡོཛནེ ཡོཛནེ ཛིནོ;
དྭཱིཧི མཱསེཧི སམྤཏྟོ བུདྡྷོ ཛཱཏཔུརཾ ཝརཾ.
བུདྡྷཾ ཝིསུདྡྷཀམལཱནནསོབྷམཱནཾ,
བཱལཾསུམཱལིསཏབྷཱནུསམཱནབྷཱནུཾ;
ཙཀྐངྐིཏོརུཙརཎཾ ཙརཎཱདྷིཝཱསཾ,
ལོཀཏྟཡེཀསརཎཾ ཨརཎགྒཀཱཡཾ.
སམྤུཎྞཧེམགྷཊཏོརཎདྷཱུམགནྡྷ,
མཱལེཧི ཝེཎུཔཎཝཱདིཧི དུནྡུབྷཱིཧི;
ཙིཏྟེཧི ཚཏྟདྷཛཙཱམརཝཱིཛནཱིཧི,
སུདྡྷོདནཱདིཝནིཔཱ ཨབྷིཔཱུཛཡིཾསཱུ.
སུསཛྫིཏཾ པུརཾ པཏྭཱ མུནིནྡོ ཏཾ མནོརམཾ;
སུགནྡྷིཔུཔྥཀིཉྫཀྑཱལངྐཏོརུཏལཱཀུལཾ.
སུཕུལླཛལཛཱཀིཎྞ ཨཙྪོདཀཛལཱལཡཾ;
མཡཱུརམཎྜལཱརདྡྷ རངྒེཧི ཙ ཝིརཱཛིཏཾ.
ཙཱརུཙངྐམཔཱསཱད ལཏཱམཎྜཔམཎྜིཏཾ;
པཱཝེཀྑི པཝརོ རམྨཾ ནིགྲོདྷཱརཱམམུཏྟམཾ.
‘‘ཨམྷཱཀམེ’སསིདྡྷཏྠོ པུཏྟོ ནཏྟོ’ཏི’’ཨཱདིནཱ;
ཙིནྟཡིཏྭཱན སཉྫཱཏམཱནསཏྠདྡྷསཱཀིཡཱ.
དཧརེ དཧརེ རཱཛ ཀུམཱརེ ཨིདམ’བྲཝུཾ;
‘‘ཏུམྷེ ཝནྡཐ སིདྡྷཏྠཾ ནཝནྡཱམ མཡནྟི ཏཾ.’’
ཨིདཾ ཝཏྭཱ ནིསཱིདིཾསུ ཀཏྭཱ ཏེ པུརཏོ ཏཏོ;
ཨདནྟདམཀོ དནྟོ ཏིལོཀེཀཝིལོཙནོ.
ཏེསཾ ཨཛ྄ཛྷཱསཡཾ ཉཏྭཱ ‘‘ན མཾ ཝནྡནྟི ཉཱཏཡོ;
ཧནྡ ཝནྡཱཔཡིསྶཱམི’དཱནི ནེསནྟི’’ ཏཱཝདེ.
ཨབྷིཉྙཱ པཱདཀཛ྄ཛྷཱནཾ སམཱཔཛྫིཏྭཱ ཛྷཱནཏོ;
ཝུཊྛཱཡ ཧེམཧཾསོ’ཝ ཧེམཝཎྞོ པབྷངྐརོ.
༣༦༩. ¶
ཨབྦྷུགྒནྟྭཱ ནབྷཾ སབྦསཏྟནེཏྟརསཱཡནཾ;
གཎྜམྦརུཀྑམཱུལསྨིཾ པཱཊིཧཱརིཡསནྣིབྷཾ.
ཨསཱདྷཱརཎམ’ཉྙེསཾ པཱཊིཧཱརིཡམུ’ཏྟམཾ;
རམནཱིཡཏརེ ཏསྨིཾ ཨཀཱསི མུནིཔུངྒཝོ.
དིསྭཱ ཏམ’བྦྷུཏཾ རཱཛཱ སུདྡྷོདནོནརཱསབྷོ;
སཉྫཱཏཔཱིཏིཔཱམོཛྫོ སཀྱཝཾསེཀནཱཡཀོ.
སཏྠུཔཱདཱརཝིནྡེཧི སཀེ ཙཱརུསིརོརུཧེ;
བྷཱུསིཏེ’ཀཱསི ཏེ སབྦེ སཱཀིཡ’ ཨཀརུཾ ཏཐཱ.
དྷཱིརོ པོཀྑརཝསྶསྶ ཨཝསཱནེ མནོརམཾ;
དྷམྨཝསྶཾ པཝསྶེཏྭཱ སཏྟཙིཏྟཱཝནུགྒཏཾ.
མཧཱམོཧརཛཾ ཧནྟྭཱ སསངྒྷོ དུཏིཡེ དིནེ;
པཝེཀྑི སཔདཱནེན པིཎྜཱཡ པུརམུ’ཏྟམཾ.
ཏསྶ པཱདཱརཝིནྡཱནི’རཝིནྡཱནི ཨནེཀདྷཱ;
ཨུགྒནྟྭཱ པཏིགཎྷིཾསུ ཨཀྐནྟཀྐནྟཋཱནཏོ.
དེཧཛོཏིཀདམྦེཧི གོཔུརཊྚཱལམནྡིརཱ;
པིཉྫརཏྟཾ གཏཱ ཏསྨིཾ པཱཀཱརཔྤབྷཱུཏི ཏདཱ.
ཙརནྟཾ པཝིསིཏྭཱན པིཎྜཱཡ པུརཝཱིཐིཡཾ;
ལོཀཱལོཀཀརཾ ཝཱིརཾ སནྟཾ དནྟཾ པབྷངྐརཾ.
པསཱདཛནཀེ རམྨེ པཱསཱདེ སཱ ཡསོདྷརཱ;
སཱིཧཔཉྫརཏོ དིསྭཱ ཋིཏཱ པེམཔརཱཡཎཱ.
བྷཱུསནེ མཎིརཾསཱིཧི བྷཱསུརཾ རཱཧུལཾ ཝརཾ;
ཨཱམནྟེཏྭཱ པདསྶེཏྭཱ ‘‘ཏུཡ྄ཧམེ’སོ པིཏཱ’’ཏི ཏཾ.
ནིཀེཏམུ’པསངྐམྨ སུདྡྷོདནཡསསྶིནོ;
ཝནྡིཏྭཱ ཏམ’ནེཀཱཧི ཨིཏྠཱིཧི པརིཝཱརིཏཱ.
‘‘དེཝ དེཝིནྡལཱིལཱཡ པུཏྟོ ཏེ’དྷ པུརེ པུརེ;
ཙརིཏྭཱ ཙརཏེ’དཱནི པིཎྜཱཡཱ’ཏི གྷརེ གྷརེ’’.
༣༨༢. ¶
པཝེདེསི པཝེདེཏྭཱ’གམཱ མནྡིརམ’ཏྟནོ;
ཨཱནནྡཛལསནྡོཧ པཱུརིཏོ’རུཙིལོཙནཱ.
ཏཏོ སེསནརིནྡཱནཾ ཨིནྡོ ཨིནྡོཝ ལངྐཏོ;
ཀམྤམཱནོ པགནྟྭཱན ཝེགེན ཛིནསནྟིཀཾ.
‘‘སཀྱཔུངྒཝ ཏེ ནེ’ས ཝཾསོ མཱ ཙར མཱ ཙར;
ཝཾསེ པུཏྟེ’ཀརཱཛཱ’པི ན པིཎྜཱཡ ཙརཱི པུརེ.’’
ཨིཏི ཝུཏྟེ ནརིནྡེན མུནིནྡོ གུཎསེཁརོ;
‘‘ཏུཡ྄ཧམེ’སོ མཧཱརཱཛ ཝཾསོ མཡ྄ཧཾ པན’ནྭཡོ.
བུདྡྷཝཾསོ’’ཏི སམྦུདྡྷཝཾསཾ ཏསྶ པཀཱསཡཱི;
ཨཐོ ཏསྨིཾ ཋིཏོཡེཝ དེསེནྟོ དྷམྨམུ’ཏྟརིཾ.
‘‘ཨུཏྟིཊྛེ ནཔྤམཛྫེཡྻ དྷམྨམི’’ཙྩཱདིམུ’ཏྟམཾ;
གཱཐཾ མནོརམཾ ཝཏྭཱ སོཏཱུནཾ སིཝམཱ’ཝཧཾ.
དསྶནགྒརསཾ དཏྭཱ སནྟཔྤེཏྭཱ ཏམུ’ཏྟམོ;
ཏེནཱ’བྷིཡཱཙིཏོ ཏསྶ ནིཀེཏཾ སམུཔཱགཏོ.
སདྡྷིཾ ཝིསསཧསྶེཧི ཏཱདཱིཧི དིཔདུཏྟམཾ;
མདྷུརོདནཔཱནེན སནྟཔྤེཏྭཱ མཧཱིཔཏི.
ཙུལཱ༹མཎཱིམརཱིཙཱིཧི པིཉྫརཉྫལིཀེཧི ཏཾ;
རཱཛུཧི སཧ ཝནྡིཏྭཱ ནིསཱིདི ཛིནསནྟིཀེ.
ཏཱ’པི ནེཀསཏཱ གནྟྭཱ སུནྡརཱ རཱཛསུནྡརཱི;
ནརིནྡེན ཨནུཉྙཱཏཱ ནིསིདིཾསུ ཏཧིཾ ཏདཱ.
དེསེཏྭཱ མདྷུརཾ དྷམྨཾ ཏིལོཀཏིལཀོ ཛིནོ;
ཨཧམྤ’ཛྫ ན གཙྪེཡྻཾ སཝེ བིམྦཱཡ མནྡིརཾ.
དཡཱཡ ཧདཡཾ ཏསྶཱ ཕཱལེཡྻཱ’ཏི དཡཱལཡོ;
སཱཝཀགྒཡུགཾ གཡ྄ཧ མནྡིརཾ པིཏརཱ གཏོ.
ནིསཱིདི པཝིསིཏྭཱན བུདྡྷོ བུདྡྷཱསནེ ཏཧིཾ;
ཚབྦཎྞརཾསིཛཱལེཧི བྷཱསུརནྟོ’ཝ བྷཱནུམཱ.
༣༩༥. ¶
མནོསིལཱཙུཎྞསམཱནདེཧམརཱིཝིཛཱལེཧི ཝིརཱཛམཱནཱ;
པཀམྤིཏཱ ཧེམལཏཱ’ཝ བིམྦཱ བིམྦདྷརཱ སཏྠུ སམཱིཔ’མཱག.
སཏྠུ པཱདེསུ སམྥསྶསཱིཏལུཏྟམཝཱརིནཱ;
ནིབྦཱཔེསི མཧཱསོཀཔཱཝཀཾ ཧདཡིནྡྷནེ.
རཱཛཱ སཏྠུ པཝེདེསི བིམྦཱཡཱ’ཏི བཧུཾ གུཎཾ;
མུནིནྡོ’པི པཀཱསེསི ཙནྡཀིཎྞརཛཱཏཀཾ.
ཏདཱ ནནྡཀུམཱརསྶ སམྤཏྟེ མངྒལཏྟཡེ;
ཝིཝཱཧོ ཨབྷིསེཀོ ཙ ཨིཏི གེཧཔྤཝེསནཾ.
མངྒལཱནཾ པུརེཡེཝ པབྦཱཛེསི པབྷངྐརོ;
ཨནིཙྪནྟཾ’ཝ ནེཏྭཱ ཏཾ ཨཱརཱམཾ རམྨམུཏྟམཾ.
ཨཏྟཱནམ’ནུགཙྪནྟཾ དཱཡཛྫཏྠཾ སཀཏྲཛཾ;
ཀུམཱརཾ རཱཧུལཾ ཙཱ’པི ཀུམཱརཱབྷརཎུཛྫལཾ.
‘‘སུཁཱ’ཝ ཚཱཡཱ ཏེ མེ’’ཏི ཨུགྒིརནྟཾ གིརཾ པིཡཾ;
‘‘དཱཡཛྫཾ མེ དདཱཧཱི’ཏི དཱཡཛྫཾ མེ དདཱཧི ཙ’’.
ཨཱརཱམམེཝ ནེཏྭཱན པབྦཱཛེསི ནིརུཏྟརཾ;
སདྡྷམྨརཏནཾ དཏྭཱ དཱཡཛྫཾ ཏསྶ དྷཱིམཏོ.
ནིཀྑམྨ ཏམྷཱ སུགཏཾསུམཱལི ཏཧིཾ ཛནྟུསརོརུཧཱནི;
སདྡྷམྨརཾསཱིཧི ཝིཀཱསཡནྟོ ཨུཔཱགཏོ རཱཛགཧཾ པུནཱ’པི.
ཀུསུམཱཀུལ སུནྡརཏརུཔཝནེ པདུམུཔྤལ བྷཱསུརསརནིཀརེ;
པུཐུཙངྐམམཎྜིཏསིཏསིཀཏེ སུབྷསཱིཏཝནེ ཝིཧརཏི སུགཏོ.
ཏདཱ སུདཏྟཝ྄ཧཡསེཊྛིསེཊྛོ,
བཧཱུཧི བྷཎྜཾ སཀཊེཧི གཡ྄ཧ;
སཱཝཏྠིཏོ རཱཛགཧེ མནུཉྙེ,
སཧཱཡསེཊྛིསྶ གྷརཱུ’པགནྟྭཱ.
༤༠༦. ¶
ཏེནེ’ཝ ཝུཏྟོ སུབྷགེན བུདྡྷོ,
ཛཱཏོ’ཏི ལོཀེ དིཔདཱནམིནྡོ;
སཉྫཱཏཔཱིཏཱིཧི ཨུདགྒཙིཏྟོ,
རཏྟིཾ པབྷཱཏཾ ཨིཏི མཉྙམཱནོ.
ནིཀྑམྨ ཏམྷཱ ཝིགཏནྡྷཀཱརེ,
དེཝཱནུབྷཱཝེན མཧཱཔཐམྷི;
གནྟྭཱན ཏཾ སཱིཏཝནཾ སུརམྨཾ,
སམྤུཎྞ ཙནྡཾ’ཝ ཝིརཱཛམཱནཾ.
ཏཾ དཱིཔརུཀྑཾ ཝིཡ པཛྫལནྟཾ,
ཝིལོཙནཱནནྡཀརཾ མཧེསིཾ;
དིསྭཱན ཏསྶུ’ཏྟམཔཱདརཱགཾ,
པཊིགྒཧེཏྭཱ སིརསཱ སུདྷཱིམཱ.
གམྦྷཱིརཾ ནིཔུཎཾ དྷམྨཾ སུཎིཏྭཱ ཝིམལཾ ཝརཾ;
སོཏཱཔཏྟིཕལ’མྤཏྭཱ སཧསྶནཡ མཎྜིཏཾ.
ནིམནྟེཏྭཱན སམྦུདྡྷཾ སསངྒྷཾ ལོཀནཱཡཀཾ;
ཝཎྞགནྡྷརསཱུཔེཏཾ དཏྭཱ དཱནཾ སུཁཱཝཧཾ.
སཏྠུ ཨཱགམནཏྠཱཡ སཱཝཏྠིནགརཾ ཝརཾ;
པཊིཉྙཾ སོ གཧེཏྭཱན གཙྪནྟོ ཨནྟརཱཔཐེ.
ཡོཛནེ ཡོཛནེ ཝཱརུ ཙིཏྟཀམྨསམུཛྫལེ;
ཝིཧཱརེ པཝརེ དཏྭཱ ཀཱརཱཔེཏྭཱ བཧུཾ དྷནཾ.
སཱཝཏྠིཾ པུན’རཱགནྟྭཱ པཱསཱདསཏམཎྜིཏཾ;
ཏོརཎངྒྷིཀཔཱཀཱརགོཔུརཱདིཝིརཱཛིཏཾ.
པུརཾ ཨཔཧསནྟཾ’ཝ དེཝིནྡསྶཱ’པི སབྦདཱ;
སབྦསམྤཏྟིསམྤནྣཾ ནཙྩགཱིཏཱདིསོབྷིཏཾ.
ཀསྨིཾ སོ ཝིཧརེཡྻཱ’ཏི བྷགཝཱ ལོཀནཱཡཀོ;
སམནྟཱནུཝིལོཀེནྟོ ཝིཧཱརཱརཧབྷཱུམིཀཾ.
༤༡༦. ¶
ཛེཏརཱཛཀུམཱརསྶ ཨུཡྻཱནཾ ནནྡནོཔམཾ;
ཚཱཡཱུདཀཱདིསམྤནྣཾ བྷཱུམིབྷཱགཾ ཨུདིཀྑིཡ.
ཧིརཉྙཀོཊིསནྠཱརཝསེནེ’ཝ མཧཱཡསོ;
ཀིཎིཏྭཱ པཝརེ ཏམྷི ནརཱམརམནོཧརེ.
ནིཙྩཾ ཀིངྐིཎིཛཱལནཱདརུཙིརཾ སིངྒཱིཝ སིངྒཱཀུལཾ,
རམྨཾནེཀམཎཱིཧི ཚནྣཚདནཾ ཨཱམུཏྟམུཏྟཱཝལིཾ;
ནཱནཱརཱགཝིཏཱན བྷཱསུརཏརཾ པུཔྥཱདིནཱ’ལངྐཏ,
ཙིཏྲཾ གནྡྷཀུཊིཾ ཝརཾ སུཝིཔུལཾ ཀཱརེསི བྷཱུསེཁརཾ.
ཛིནཏྲཛཱནམྤི ཝིསཱལམཱལཡཾ,
ཝིཏཱནནཱནཱསཡནཱསནུཛྫལཾ;
སུམཎྜིཏཾ མཎྜཔཝངྐམཱདིནཱ,
ཝིལུམྤམཱནཾ མནལོཙནཾ སདཱ.
ཨཐཱཔི སཎྷཱམལསེཏཝཱལུཀཾ,
སཝེདིཀཱཙཱརུཝིསཱལམཱལཀཾ;
ཛལཱསཡཾ སཱཏ’ཏིསཱིཏལོདཀཾ,
སུགནྡྷིསོགནྡྷིཀཔངྐཛཱཀུལཾ.
སུཕུལླསཱལཱསནསོགནཱག,
པུནྣཱགཔཱུགཱདིཝིརཱཛམཱནཾ;
མནོརམཾ ཛེཏཝནཱབྷིདྷཱནཾ,
ཀཱརཱཔཡཱི སེཊྛི ཝིཧཱརསེཊྛཾ.
ཝིསཱལཀེལཱསདྷརཱདྷརུཏྟམཱ-
བྷིརཱམཔཱཀཱརཕནིནྡགོཔིཏོ;
ཛནསྶ སབྦཱབྷིམནཏྠསཱདྷཀོ,
ཝིཧཱརཙིནྟཱམཎི སོ ཝིརཱཛིཏེ.
ཏཏོ ཨཱགམནཏྠཱཡ མུནིནྡཾ ནཱཐཔིཎྜིཀོ;
དཱུཏཾ པཱཧེསི སོ སཏྠཱ སུཏྭཱ དཱུཏསྶ སཱསནཾ.
མཧཏཱ བྷིཀྑུསངྒྷེན ཏདཱ ཏམྷཱ པུརཀྑཏོ;
ནིཀྑམིཏྭཱ’ནུཔུབྦེན པཏྟོ སཱཝཏྠིམུཏྟམཾ.
༤༢༥. ¶
སམུཛྫལཱནི ནེཀཱནི དྷཛཱནཱདཱཡ སུནྡརཱ;
ཀུམཱརཱ པུརཏོ སཏྠུ ནིཀྑམིཾསུ སུརཱ ཡཐཱ.
ནིཀྑམིཾསུ ཏཏོ ཏེསཾ པཙྪཏོ ཏརུཎངྒནཱ;
ཙཱརུཔུཎྞགྷཊཱདཱཡ དེཝཀཉྙཱ ཡཐཱ ཏཐཱ.
པུཎྞཔཱཏིཾ གཧེཏྭཱན སེཊྛིནོ བྷརིཡཱ ཏཐཱ;
སདྡྷིཾ ནེཀསཏིཏྠིཧི ནེཀཱལངྐཱརལངྐཏཱ.
མཧཱསེཊྛི མཧཱསེཊྛིསཏེཧི སཧ ནཱཡཀཾ;
ཨབྦྷུགྒཉྪི མཧཱཝཱིརཾ པཱུཛིཏོ ཏེཧི ནེཀདྷཱ.
ཚབྦཎྞརཾསཱིཧི མནོརམེཧི,
པུརཾ ཝརཾ པིཉྫརཝཎྞབྷཱཝཾ;
ནེནྟོ མུནིནྡོ སུགཏོ སུགཏྟོ,
ཨུཔཱཝིསཱི ཛེཏཝནཾ ཝིཧཱརཾ.
ཙཱཏུདྡིསསྶ སངྒྷསྶ སམྦུདྡྷཔམུཁསྶ’ཧཾ;
ཨིམཾ དམྨི ཝིཧཱརནྟི སཏྠུ ཙཱརུཀརམྦུཛེ.
སུགནྡྷཝཱསིཏཾ ཝཱརིཾ ཧེམབྷིངྐཱརཏོ ཝརཾ;
ཨཱཀིརིཏྭཱ ཨདཱ རམྨཾ ཝིཧཱརཾ ཙཱརུདསྶནཾ.
སུརམྨཾ ཝིཧཱརཾ པཊིགྒཡཧ སེཊྛཾ,
ཨནགྒྷེ ཝིཙིཏྟཱསནསྨིཾ ནིསིནྣོ;
ཛནིནྡཱནམིནྡོ ཏིལོཀེཀནེཏྟོ,
ཏིལོཀཔྤསཱདཱཝཧཾ ཏཾ མནུཉྙཾ.
ཨུདཱརཱནིསཾསཾ ཝིཧཱརཔྤདཱནེ,
ཨནཱཐཔྤདཱནེན ནཱཐསྶ ཏསྶ;
སུདཏྟཱབྷིདྷཱནསྶ སེཊྛིསྶ སཏྠཱ,
ཡསསྶཱི ཧིཏེསཱི མཧེསཱི ཨདེསཱི.
ཨུདཱརཱནིསཾསཾ ཝིཧཱརཔྤདཱནེ,
ཀཐེཏུཾ སམཏྠོ ཝིནཱ བྷཱུརིཔཉྙཾ;
ཏིལོཀེཀནཱཐཾ ནརོ ཀོསི ཡུཏྟོ,
མུཁཱནཾ སཧསྶེཧི ནེཀེཧི ཙཱ’པི.
༤༣༥. ¶
ཨིཏི ཝིཔུལཡསོ སོ ཏསྶ དྷམྨཾ ཀཐེཏྭཱ,
ཨཔི སཀལཛནཱནཾ མཱནསེ ཏོསཡནྟོ;
པརམམདྷུརནཱདཾ དྷམྨབྷེརིཾ མཧནྟཾ,
ཝིཧརཏི པཧརནྟོ ཏཏྠ ཏཏྠཱུཔགནྟྭཱ.
ཨེཝཾ ཏིལོཀཧིཏདེན མཧཱདཡེན,
ལོཀུཏྟམེན པརིབྷུཏྟཔདེསཔནྟིཾ;
ནིཙྩཾསུརཱསུརམཧོརགརཀྑསཱདི,
སམྤཱུཛིཏཾ ཨཧམི’དཱནི ནིདསྶསིསྶཾ.
སདྡྷམྨརཾསིནིཀརེཧི ཛིནཾསུམཱལི,
ཝེནེཡྻཔངྐཛཝནཱནི ཝིཀཱསཡནྟོ;
ཝཱསཾ ཨཀཱསི པཝརོ པཋམམྷི ཝསྶེ,
བཱརཱཎསིམྷི ནགརེ མིགཀཱནནམྷི.
ནཱནཱཔྤཀཱརརཏནཱཔཎཔནྟིཝཱིཐི,
རམྨེ པུརེ པཝརརཱཛགཧཱབྷིདྷཱནེ;
ཝཱསཾ ཨཀཱསི དུཏིཡེ ཏཏིཡེ ཙཏུཏྠེ,
ཝསྶེཔི ཀནྟཏརཝེལུཝནེཝ ནཱཐོ.
བྷཱུཔཱལམོལི༹མཎིརཾསིཝིརཱཛམཱནཾ,
ཝེསཱལིནཱམཝིདིཏཾ ནགརཾ སུརམྨཾ;
ནིསྶཱཡ སཀྱམུནིཀེསརི པཉྩམམྷཱི,
ཝསྶམྷི ཝཱསམཀརིཏྠ མཧཱཝནསྨིཾ.
ཕུལླཱཏིནཱིལཝིམལུཔྤལཙཱརུནེཏྟོ,
སིཾགཱིསམཱནཏནུཛོཏིཧི ཛོཏམཱནོ;
བུདྡྷོ ཨནནྟགུཎསནྣིདྷི ཚཊྛཝསྶེ,
ཝཱསཾ ཨཀཱ ཝིཔུལམངྐུལ པབྦཏསྨིཾ.
གམྦྷཱིརདུདྡསཏརཾ མདྷུརཾ མརཱུནཾ,
དེསེཏྭ དྷམྨམཏུལོ སིརིསནྣིཝཱསོ;
དེཝིནྡསཱིཏལཝིསཱལསིལཱསནསྨིཾ,
ཝསྶམྷི ཝཱསམ’ཀརཱི མུནི སཏྟམམྷི.
༤༤༢. ¶
ཕུལླཱརཝིནྡཙརཎོ ཙརཎཱདྷིཝཱསོ,
སོ སུཾསུམཱརགིརིནཱམདྷརཱདྷརམྷི;
ཝཱསཾ ཨཀཱ པརམམཱརཛི ཨཊྛམསྨིཾ,
ཝསྶམྷི ཀནྟརབྷེསཀལཱཝནམྷི.
ནཱནཱམཏཱཏིབཧུཏིཏྠིཡསཔྤདཔྤཾ,
ཧནྟྭཱ ཏིལོཀཏིལཀོ ནཝམམྷི ཝསྶེ;
ཝཱསཾ ཨཀཱསི རུཙིརེ ཨཏིདསྶནཱིཡེ,
ཀོསམྦིསིམྦལིཝནེ ཛིནཔཀྑིརཱཛཱ.
ཏེསཾ མཧནྟཀལཧཾ སམིཏུཾ ཡཏཱིནཾ,
ནིསྶཱཡ ཝཱརཎཝརཾ དསམམྷི ཝསྶེ;
པུཔྥཱབྷིཀིཎྞཝིཔུལཱམལཀཱནནསྨིཾ,
ཝཱསཾ ཨཀཱ མུནིཝརོ ཝརཔཱརལེཡྻོ.
དྷམྨཱམཏེན ཛནཏཾ ཨཛརཱམརཏྟཾ,
ནེནྟོ ཝིལོཙནམནོཧརསུདྡྷདནྟོ;
ནཱལཱབྷིདྷཱནདིཛགཱམཝརེ མུནིནྡོ,
ཝཱསཾ ཨཀཱ ཨམིཏབུདྡྷི དསེཀཝསྶེ.
ཝེརཉྫ ཙཱརུདིཛགཱམསམཱིཔབྷཱུཏེ,
ཨཱརཱམཀེ སུརབྷིཔུཔྥཕལཱབྷིརཱམེ;
སབྦཉྙུ སཀྱམུནི བཱརསམམྷི ཝསྶེ,
ཝཱསཾ ཨཀཱསི པུཙིམནྡདུམིནྡམཱུལེ.
ཕུལླཱརཝིནྡཝདནོ རཙིཙཱརུསོབྷོ,
ལོཀསྶ ཨཏྠཙརིཡཱཡ དཡཱདྷིཝཱསོ;
ཝཱསཾ ཨཀཱ རུཙིརཙཱལིཡཔབྦཏསྨིཾ,
ཝཱིརོ ཏིལོཀགརུ ཏེརསམམྷི ཝསྶེ.
བནྡྷཱུཀཔུཔྥསམཔཱདཀརཱབྷིརཱམོ,
དྷམྨིསྶརོ པཝརཛེཏཝནེ སུརམྨེ;
དྷཱིརོ མཧིདྡྷི མུནི ཙུདྡསམམྷི ཝསྶེ,
ཝཱསཾ ཨཀཱ སཀལསཏྟཧིཏེསུ ཡུཏྟོ.
༤༤༩. ¶
ཝེནེཡྻབནྡྷུཝནརཱགགཛེ ཝིཧནྟྭཱ,
ཝསྶམྷི པཉྩདསམེ མུནིསཱིཧརཱཛཱ;
ཝཱསཾ ཨཀཱ ཀཔིལཝཏྠུདྷརཱདྷརོརུ,
ནིགྲོདྷརཱམརམཎཱིཡམཎིགྒུཧཱཡཾ.
ཡཀྑམྤི ཀཀྑལཏརཾ སུཝིནཱིཏབྷཱཝཾ,
ནེཏྭཱ པུརེ ཝརཏམཱལཝཀཱབྷིདྷཱནེ;
ཝསྨམྷི ཝཱསམཀརཱི དསཚཊྛམམྷི,
ནེནྟོ ཛནཾ བཧུཏརམྤི ཙ སནྟིམགྒཾ.
པཱཀཱརགོཔུརནིཀེཏནཏོརཎཱདི,
ནེཏྟཱབྷིརཱམཝརརཱཛགཧེ མཧེསི;
ཝཱསཾ ཨཀཱནདྷིཝརོ དསསཏྟམམྷི,
ཝསྶམྷི པཏྠཡསོ བྷུཝནཏྟཡསྨིཾ.
དྷམྨོསདྷེན མདྷུརེན སུཁཱཝཧེན,
ལོཀསྶ གྷོརཏརརཱགརཛཾ ཝིཧནྟྭཱ;
ཝསྶམྷི ཝཱསམཀརཱི དསཨཊྛམསྨིཾ,
ཨངྒཱིརསོ པཝརཙཱལིཡཔབྦཏསྨིཾ.
ཝེནཡྻབནྡྷུཛནམོཧརིཔུཾ ཨུལཱ༹རཾ,
ཧནྟྭཱན དྷམྨཨསིནཱ ཝརདྷམྨརཱཛཱ;
ཨེཀཱུནཝཱིསཏིམཀེ པུན ཏཏྠ ཝསྶེ,
ཝཱསཾ ཨཀཱ མདྷུརབྷཱརཏི ལོཀནཱཐོ.
སུདྡྷཱསཡོ པཝརརཱཛགཧེ ཝིཙིཏྟེ,
ཝཱསཾ ཨཀཱསི སམཝཱིསཏིམམྷི ཝསྶེ;
ལོཀསྶ ཨཏྠཙརཎེ སུབྷཀཔྤརུཀྑོ,
ཙིནྟཱམཎིཔྤཝརབྷདྡགྷཊོ མུནིནྡོ.
ཨེཝཾ ཏིལོཀམཧིཏོ ཨནིབདྡྷཝཱསཾ,
ཀཏྭཱ ཙརམྤཋམབོདྷིཡུདཱརཔཉྙོ;
ཚབྦཎྞརཾསིསམུཔེཏཝིཙིཏྟདེཧོ,
ལོཀེཀབནྡྷུ བྷགཝཱ ཨཝསེསཀཱལེ.
༤༥༦. ¶
སཱཝཏྠིཡཾ པཝརཛེཏཝནེ ཙ རམྨེ,
དིབྦཱལཡེ ཙ སམལངྐཏཔུབྦརཱམེ;
ཝཱསཾ ཨཀཱསི མུནི ཝཱིསཏིཔཉྩཝསྶེ,
ལོཀཱབྷིཝུདྡྷིནིརཏོ སུཁསནྣིཝཱསོ.
ཨིཏི ཨམིཏདཡོ ཡོ པཉྩཏཱལཱི༹སཝསྶེ,
མནུཛམནཝནསྨིཾ ཛཱཏརཱགགྒིརཱསིཾ;
པརམམདྷུརདྷམྨམྦུཧི ནིབྦཱཔཡནྟོ,
ཨཝསི སམུནིམེགྷོ ལོཀསནྟིཾ ཀརོཏུ!
པཉྙཱཝརངྒནཱ མཡ྄ཧཾ སཉྫཱཏཱ མནམནྡིརེ;
ཏོསཡནྟཱི སབྦཛནཾ ཝུདྡྷིཾ གཙྪཏུ སབྦདཱ.
ཙིཏཾ ཡཾ རཙཡནྟེན ཛིནསྶ ཙརིཏཾ མཡཱ;
པུཉྙཾ ཏསྶཱནུབྷཱཝེན སམྤཏྟོ ཏུསིཏཱལཡཾ.
མེཏྟེཡྻལོཀནཱཐསྶ སུཎནྟོ དྷམྨདེསནཾ;
ཏེན སདྡྷིཾ ཙིརཾ ཀཱལཾ ཝིནྡནྟོ མཧཏིཾ སིརིཾ.
བུདྡྷེ ཛཱཏེ མཧཱསཏྟོརམྨེ ཀེཏུམནཱིཔུརེ;
རཱཛཝཾསེ ཛནཱིཏྭཱན ཏིཧེཏུཔཊིསནྡྷིཀོ.
ཙིཝརཾ པིཎྜཔཱཏཉྩ ཨནགྒྷཾ ཝིཔུལཾ ཝརཾ;
སེནཱསནཉྩ བྷེསཛྫཾ དཏྭཱ ཏསྶ མཧེསིནོ.
སཱསནེ པབྦཛིཏྭཱན ཛོཏེནྟོ ཏམནུཏྟརཾ;
ཨིདྡྷིམཱ སཏིམཱ སམྨཱ དྷཱརེནྟོ པིཊཀཏྟཡཾ.
ཝྱཱཀཏོ ཏེན བུདྡྷོ ཡཾ ཧེསྶཏཱིཏི ཨནཱགཏེ;
ཨུཔྤནྣུཔྤནྣབུདྡྷཱནཾ དཱནཾ དཏྭཱ སུཁཱཝཧཾ.
སཾསཱརེ སཾསརནྟོ ཧི ཀཔྤརུཀྑོ ཙ པཱཎིནཾ;
ཨིཙྪིཏིཙྪིཏམནྣཱདིཾ དདནྟོ མདྷུརཾ ཙརཾ.
མཾསལོཧིཏནེཏྟཱདིཾ དདཾ ཙིཏྟསམཱཧིཏོ;
སཱིལནེཀྑམྨཔཉྙཱདིཾ པཱུརེནྟོ སབྦཔཱརམིཾ.
༤༦༧. ¶
པཱརམིསིཁརཾ པཏྭཱ བུདྡྷོ ཧུཏྭཱ ཨནུཏྟརོ;
དེསེཏྭཱ མདྷུརཾ དྷམྨཾ ཛནྟཱུནཾ སིཝམཱཝཧཾ.
སབྦཾ སདེཝཀཾ ལོཀཾ བྲཧཱསཾསཱརབནྡྷནཱ;
མོཙཡིཏྭཱ ཝརཾ ཁེམཾ པཱཔུཎྱེཾ སིཝཾ པུརཾ.
ལངྐཱལངྐཱར བྷཱུཏེན བྷཱུཔཱལནྭཡཀེཏུནཱ;
ཝིཛཡབཱཧུནཱ རཉྙཱ སཀནཱམེན ཀཱརིཏེ.
སཏོཡཱསཡཔཱཀཱར གོཔུརཱདིཝིརཱཛིཏེ;
པརིཝེཎཝརེ རམྨེ ཝསཏཱ སནྟཝུཏྟིནཱ.
མེདྷངྐརཱབྷིདྷཱནེན དཡཱཝཱསེན དྷཱིམཏཱ;
ཐེརེན རཙིཏཾ ཨེཏཾ སབྦྷ སཾསེཝིཏཾ སདཱ.
བྷཝེ བྷཝེ’དྷ གཱཐཱནཾ ཏེསཏྟཏི ཙཏུསྶཏཾ;
གནྠཏོ པཉྩཔཉྙཱསཱ-དྷིཀཾ པཉྩསཏཾ ཨིཏི.