📜

ཛིནཝཾསདཱིཔཾ ¶

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

༡.

མཧཱདཡོ ཡོ ཧདཡོ’དཡོ’དཡོ

ཧིཏཱཡ དུཀྑཱནུབྷཝེ བྷཝེ བྷཝེ,

ཨཀཱསི སམྦོདྷིཔདཾ པདཾ པདཾ

ཏམཱབྷིཝནྡཱམི ཛིནཾ ཛིནཾ ཛིནཾ; (ཡམཀབནྡྷནཾ)

༢. ¶

པཧཱཡ ཡཏྠཱ’བྷིརཏིཾ རཏིཾ རཏིཾ

རམནྟི དྷམྨེཝ མུནཱི མུནཱི མུནཱི,

ཝིམུཏྟིདཾ སབྦབྷཝཱ བྷཝཱ’བྷཝཱ

ཏམཱབྷིཝནྡེ མཧིཏཾ ཧིཏཾ ཧིཏཾ; (ཡམཀབནྡྷནཾ)

༣. ¶

ནིཔཱིཏསདྡྷམྨརསཱ རསཱ’རསཱ

སུཔུཉྙཁེཏྟོ’རསཏཾ སཏཾ སཏཾ,

གཏཱ ཝིདྷཱུཏཱ ཝིནཡེན ཡེན ཡེ

ཏམཱབྷིཝནྡེ’སིགཎངྒཎ’ངྒཎཾ; (ཡམཀབནྡྷནཾ)

༤. ¶

ཛིནཱ’ནཏམྦྷོརུཧ ཧཾསརཱཛིནཱི

ཛིནོརསཱནཾ མུཁཔཉྫརཱ’ལི ནཱི,

སདཏྠསཱརཾ སརསཾ ཝིསཱུད ནཱི

ཨུཔེཏུ མེ མཱནསམེཝ ཝཱཎི ནཱི;

༥.

ཀམྨཱཝསེསཱ ཝིཙིཏོ’པཛཱཏྱཱ

གནྠཱ’ཧིསངྑཱརཝིབནྡྷཀཱ མེ,

པཎཱམ པུཉྙཱཏིསཡེན’ནེན

མཱ པཱཀདཱནཱ’ཝསརཱ བྷཝནྟུ;

༦.

སུཝཎྞཝཎྞསྶ ཛིནསྶ ཝཎྞཾ

ཝཎྞེཡྻ ཀཔྤམྤི ཀཛིཏོ སུཝཎྞོ,

ཀཔྤསྶི’ཝོསཱན མནཏྟཏཱཡ

ན པཱཔུཎེ བུདྡྷགུཎཱན མནྟཾ;

༧. ¶

ནིདྡྷནྟ ཙཱམཱིཀར ཙཱརུ རཱུཔཾ

སརསྶཏཱི བྷཱུསཎ བྷཱསནཾཙ,

ཨནཉྙ སཱདྷཱརཎ ཉཱཎམསྶ

ཨཝཱཝིཡཱ’ཙིནྟིཡ མཔཀྤམེཡྻཾ;

༨.

ཀུཧིཾ ཨསཱདྷཱརཎ རཱུཔ ལཱིལཱ

ཀུཧིཾ ཨསཱདྷཱརཎ ཝཱཎི ལཱིལཱ,

ཀུཧིཾ ཨསཱདྷཱརཎཉཱཎ ལཱིལཱ

ཀུཧིཾ ནུ མེ མནྡམཏིསྶ ལཱིལཱ;

༩. ¶

ཝིབྷཱཝིམཱནཱི པརཝམྷིནོ ཡེ

ཨིསྶཱ’བྷིམཱནེན ཝིབྷཉྙམཱནཱ,

གཝེསཡནྟཱི’དྷ པརསྶ རནྡྷཾ

ཏེསཾ པསཾསཱགརཧཱཧི ཀིམྨེ;

༡༠.

པསཏྠ སཏྠཱགམ པཱརདསྶཱི

ཡེ སཱདྷཝོ སཱདྷུ གུཎཔྤསནྟཱ,

གནྠསྶ ནིམྨཱཎཔརིསྶམཾ ནོ

ཛཱནནྟི ཏེཡེཝ ཨིདྷཔྤམཱཎཱ;

༡༡.

ཨཱདིཙྩཝཾསཔྤབྷཝསྶ ཏསྶ

ཛིནསྶ སཏྠཱགམཀོཝིདེཧི,

ཝུཏྟོཔི པུབྦཱཙརིཡེཧི ཡེསུ

གནྠེསུ སངྑེཔཝསེན ཝཾསོ;

༡༢.

ན ཏེཧི སཀྐཱ སུགཏསྶ ཝཾསཾ

ཀིཉྩཱཔི ཝིཉྙཱཏུ མསེསཡིཏྭཱ,

སམྤུཎྞཝཾསསྶ ཝིབྷཱཝནཱཡ

ཏསྨཱ སམུསྶཱཧིཏ མཱནསེན;

༡༣. ¶

ཨབྷིཔྤསནྣོ རཏནཏྟཡམྷི

པསཏྠཝཾསཔྤབྷཝོ པབྷུནཾ,

ཝིབྷུསཎོ ཝིསྶུཏཀིཏྟིགྷོསོ

ཡོ བྷཱཏི ལངྐཱཡ མུལཱ༹རབྷཱགྱོ;

༡༤.

ཨམནྡཙཱགཱ’བྷིརཏསྶ

པུནནྡུ ནཱམསྶ དཡཱདྷནསྶ,

བུདྡྷེ པསཱདཱཏིསཡསྶ ཏསྶ

ཨཛ྄ཛྷེསནཉྩཱཔི པཊིགྒཧེཏྭཱ;

༡༥.

ནསྶཱཡ པུབྦཱཙརིཡོ’པདེསཾ

སོཏཱུན མཏྠཱཡ མཡཱ ཧིཏཱཡ,

ནིརུཏྟིཡཱ མཱགདྷིཀཱཡ སམྨཱ

ཝིདྷཱིཡཏེ’དཾ ཛིནཝཾསདཱིཔཾ;

༡༦. ¶

སདྡྷཱསིནེཧཱནུགཏཱཡ པཉྙཱ-

དསཱཡ སོཏཱུཧི མནོཝིམཱནེ,

པདཱིཔིཏོ’ཡཾ ཛིནཝཾསདཱིཔ-

དཱིཔོཧརེཔཱཔཏམཔྤབནྡྷཾ;

༡༧.

པུརངྒཔུཎྞཱ སིརིཛམྦུདཱིཔེ

སམྤཏྟིབྷཱརེན དིཝཱ’ཝཏིཎྞཱ,

ཡཱ དེཝརཱཛསྶ’མརཱཝཏཱི’ཝཱ-

མརཱཝཏཱིནཱམ པུརཱི པུརེ’སཱི;

༡༨.

ཝིཛྫཱདྷརཱནཉྩ ཝིཧངྒམཱནཾ

ཝིབནྡྷ ཝེཧཱསགཏིཾ བཧཱས,

ཡསྨིཾ པུརསྨིཾ ཛིཏཝེརི ཙཀྐཾ

པཱཀཱརཙཀྐཾ ཝིཡ ཙཀྐཝཱལ༹ཾ;

༡༩. ¶

སཉྩུམྦིཏམྷོཛ རཛོ པབནྡྷ-

སུཔིཉྫརཱཔཱ པརིཁཱཧིརཱམཱ,

པུརིཏྠི པཱཀཱར ནིཏམྦབྷཱགེ

སམུབྦཧཱི ཀཉྩན མེཁལཱ’བྷཾ;

༢༠.

རཏྟིནྡིཝཱ རཏྟམཎི’ནྡནཱིལ-

མཎིཔྤབྷཱརཉྫིཏ རཱཛདྷཱནི,

བབནྡྷ ཡཱ’མནྡསུརིནྡཙཱཔ-

སམུཛྫལཱཀཱསཏལབྦིལཱསཾ;

༢༡.

ཡཧིཾཝདྷཱུནཾ ཝདནམྦུཛེཧི

ཀཏཱཝམཱནཾ ཧརིཎངྐབིམྦཾ,

པབྷཱཧི ནཱིལོཔལཏོརཎཱཏཾ

སོཀཱབྷཱིབྷཱུཏཾཙ ཝིཝཎྞམཱཔ;

༢༢. ¶

སརོརུཧ’ནྟཱི མཎིམནྡིརཱབྷཱ-

སཉྩུམྦིཏཾ པུཎྞསསངྐབིམྦཾ;

སངྐཱཡ རཱམཱཛནཏཱ’བྷིརཱམཱ

ཀརེ པསཱརེསི པུརམྷི ཡསྨིཾ;

༢༣.

ཡཏྠ’ངྒནཱནཾ པཊིབིམྦིཏཱནི

ཨཱདཱསབྷིཏྟཱིསུ མུཁམྦུཛཱནི,

ཨཱསུཾ ཝིགྷཱཏཱཡ མདྷུབྦཏཱནཾ

ཝིལོཙནཱལཱིན མནུགྒཧཱཡ;

༢༤.

སམྨཏྟ མཱཏངྒ དྷརཱདྷརེཧི

ཡསྨིཾ ཨབྷིསྶནྡ མདསྶཝནྟི,

ཏུརངྒ རངྒེཧཱི ཏརངྒ མཱལཱ

སམཱཀུལེཝཱ’སི ཝིདྷཱུཏ དྷཱུལཱི;

༢༥. ¶

ནིཀྑིཏྟཝཱིཎཱ མཎིནུཔུརཱནཾ

ཝིལཱསིནཱིནཾ མུདུཔཱཎི པཱདེ,

མཏྟཱལིམཱལཱ ཀལནཱདིནཱི ཀིཾ

ནཱལངྐརུཾ ཡཏྠ ཀཏཱཝཀཱསཱ;

༢༦.

དྷཝཏྠིནཱིནཾ ཀུཙསཱརསེཧི

ནེཏྟཱལིབྷཱརཱ’ནནནཱིརཛེཧི,

ཡཱ ཧཱསཝཱིཙཱིཧི པུརཱི རཛནྱཱ

རརཱཛ སམཕུལླསརོཛིནཱི’ཝ;

༢༧.

ཙནྡཔྤབྷཱ ཙུམྦིཏ ཙནྡཀནྟ

པཱསཱཎདྷཱརཱ མཎིཙནྡིཀཱསཱུ,

ཙནྡཱནནཱནཾ ཡཧི མངྒནཱཧཾ

པརིསྶམསྶོ’པསམཱཡ’ཧེསུཾ;

༢༨. ¶

ཡསྨིཾ པཱུརེ ཨུདྡྷམདྷོ ཝིནདྡྷ-

ཛུཏིཔྤབནྡྷོ མཎིམནྡིརཱནཾ,

སམུབྦཧཱི གེརུཀ པངྐ དིདྡྷ-

ཝིཏཱན པཙྩཏྠརཎབྦིལཱསཾ

༢༩.

སུཝཎྞ མུཏྟཱ མཎི ཝཾསཝཎྞཱ-

པཝཱལ༹ རཱུཔཱི ཝཛིརེཧིཉྩཱ’པི,

ཡཱ སཏྟདྷཉྙེཧི དྷནེཧི ཕཱིཏཱ

ཨཧཱུ པུརི དྷཉྙཝཏཱི’ཝ ནཱརཱི; (སིལེསབནྡྷནཾ)

༣༠.

པསཱརིཏཱ’ནེཀདིསཱམུཁེསུ

ཝིཙིཏྟཝཏྠཱ’བྷརཎཱདིཔཱུརཱ,

ཡཏྠཱ’པཎཱ ནིཛྫིཏཀཔྤརུཀྑཱ

ཀརིཾསུ ལོཀཱབྷིམཏཏྠསིདྡྷིཾ;

༣༡. ¶

པརཱགརཏྟཱ མདྷུཔཱཏིམཏྟཱ

སམྷིནྣཝེལཱ གྷནནཱིལཝཱལཱ,

ཧཾསཱསཡཱ པཉྩསརཱབྷིརཱམཱ

ཡསྨིཾ ཏལཱ༹ཀཱ ཝིཡ ཀཱམབྷོགཱི; (སིལེསབནྡྷནཾ)

༣༢.

པུརནྟརསྨིཾ རཏནགྒྷིཀཱནཾ

རཾསིཔྤབནྡྷེཧི ཧཏནྡྷཀཱརེ,

ཀུནྡཱརཝིནྡབྦྷུདཡེནཡསྨིཾ

རཏྟིནྡིཝཱབྷེད མཝེདི ལོཀོ;

༣༣. ¶

མཱཏངྒཛཱིམཱུཏགྷཊཱཡ གྷཎྚཱ-

ཊངྐཱརགམྦྷཱིརརཝཱཡ ཡསྨིཾ,

པལམྦྷཱིཏཱ མཏྟསིཁཎྜིམཱལཱ

ཨཀཱ ཝིཀཱལེཔི ཨཁཎྜཀཱིལ༹ཾ;

༣༤.

པུརམྷི ཡསྨིཾ ཙརཎམྦུཛེཧི

ཝདྷཱུཛཏོ བནྡྷིཏནཱུཔུརེཧི,

ཝིཀཱས ཀོཀཱསན སཱིས བདྡྷ

མཏྟཱལི སེས’མྦུཛིནཱི ཨཛེསི;

༣༥.

རསཱཏལཾ ནཱགཕཎཱཝནདྡྷཾ

ནབྷོཏལཾ ཝིཛྫུལཏཱཝནདྡྷཾ,

ཡཱ ཚཱདིཏཱ རཱུཔིཡཛཱཏརཱུཔ-

དྷཛཱཝལཱིཧཱ’ཛིནི རཱཛདྷཱནཱི;

༣༦. ¶

ནཱནཏྠསཱརཾ མིཏདྷཱཏུཝཎྞཾ

ཚནྡཱརཧཾ པཱཎགཎཱ’བྷིརཱམཾ,

ཀཝིཔྤསཏྠཾ སརསཾ སིལེསཱ-

ལངྐཱརཔཛྫཾ’ཝ པུརཾ ཡམཱསི; (སིལེསབནྡྷནཾ)

༣༧.

པུརམྷི ཏསྨིཾ ཀརུཎཱནིདྷཱནོ

བུདྡྷངྐུརོ བྲཱཧྨཎསཱརཝཾསེ,

ཨསངྑཀཔྤཱན མིཏོ ཙཏུནྣཾ

ལཀྑཱདིཀཱནཾ ཨུདཔཱདི པུབྦེ;

༣༨.

བྷོཝཱདིཝཾསེ’ཀདིཝཱཀརསྶ

པུཉྙཱནུབྷཱཝོ’དཡམངྒལེཧི,

ཛཱཏསྶ ཁོ སམྤཏི ཛམྦུདཱིཔོ

ཝིལུམྤཡཱི མངྒལཝཱསལཱིལཾ;

༣༩. ¶

ཛཱཏཀྑཎེ ཏསྶ སརཱིརཛེན

གནྡྷེན ཝཎྞེན སཀེ ནིཀེཏེ,

ཧཏཔྤབྷཱ ཙནྡནཏེལདཱིཔཱ

སཎྛཱནམཏྟེཧི ཝིཛཱནིཡཱསུཾ;

༤༠.

ཝིམུཏྟདོསཱཧི སུཁེདྷིཏཱཧི

དྷཱཏཱིཧི ཀུམྦྷོརུཔཡོདྷརཱཧི,

བྷཏོ ཀུམཱརོ སུཀུམཱརཀཱཡོ

ཁེཔེསི སོ ཀཱནིཙི ཝཱསརཱནི;

༤༡.

མཧཱམཧེཙཱ’ཐ པཝཏྟམཱནེ

སཝེད ཝེདངྒ ཝིདཱུ ཝིདཱུཧི,

ཀཱརཱཔཡུཾ ཏེ པིཏརོ’རསསྶ

ནཱམཾ སུམེདྷོ’ཏི པདཏྠསཱརཾ;

༤༢. ¶

ཨུལཱ༹རབྷཱགྱེན སམཾ ཀུམཱརེ

སཾཝདྡྷམཱནེ ཛནནཱི ན ཏིཏྟིཾ,

པཱཡཱསི ནཱིལཱམཀལལོཙནཱལིཾ

མུཁམྦུཛཾ ཏསྶ’བྷིཙུམྦམཱནཱ;

༤༣.

སུཁེདྷིཏ’ངྒཱཝཡཝོ ཀུམཱརོ

ཝིམཱནབྷུམྱཱ མཎིནིམྨིཏཱཡ,

པརོདི མཱཏཱཔིཏརོ’བྷིཡཱཙཾ

བིམྦཾ ཀནིཛཾ ཛཱནུཡུགེན གཙྪཾ;

༤༤.

སུཝཎྞབིམྦོ’པམཙཱརུརཱུཔོ

སམཱཙརཾ དྷཱཏིབྷུཛཱ’ཝལམྦཾ,

ཝིཉྙཱསཔཱད’ངྒུལིམཉྫརཱིཧི

སལཱིལམཱཝཱསམལངྐརིཏྠ;

༤༥. ¶

ནིཛེན ཏེཛེན ཙ ཛིཝལོཀཾ

ཡསེན’པུབྦཱཙརིམཾ ཕུསནྟོ,

ཏིརོཀརིཏྭཱ རཝིཙནྡསོབྷཾ

སཾཝཌྜྷི དྷཱིརོ ཨུབྷཏོ སུཛཏོ;

༤༦.

སོ སཏྟམཱ ཡཱཝ པིཏཱམཧསྶ

ཡུགཱ སགབྦྷཱསཡསུདྡྷིཀོ’སི,

ནིཧཱིནཛཙྩོ’ཏི ན ཛཱཏིཝཱདཱ

ཁིཏྟོ’པཀུཊྛོ བྷཝི ཝིཔྤསེཊྛོ;

༤༧.

ཝེདནྟཡཾ སོ སནིགྷཎྚུ སཏྠཾ

སཀེཊུབྷཾ སཱཀྑརབྷེད སཏྠཾ,

སཱདྷབྦཏབྦེདི’ཏིཧཱས སཏྠཾ

ཨཝེདི ཝེདངྒཡུཏཾ པ སཏྠཾ;

༤༨.

ཨཛ྄ཛྷཱཡཀོ མནྟདྷརོ པཝཱིཎོ

ཀལཱསུ ལོཀཱཡཏལཀྑཎེསུ,

པཔཱུརཀཱརི པདཀོ ཀཝཱིནཾ

ཏེཏཱ’སི ཝེཡྻཱཀརཎོ གཎིསོ;

༤༩. ¶

ཀནྡཔྤདཔྤཱ’ནལདྷུམརཱཛི-

ལཱིལཱཝལམྦི ནིཛམསྶུརཱཛི,

ན ཀེཝལཾ ཀོམལགཎྜབྷཱགཾ

མནམྤི ཐཱིནཾ མལིནཱིཀརིཏྠ;

༥༠.

ཏནྡེབྷཝཎྞཱཡཏན’ཎྞཝམྷི

ནརཱུཔཏཎྷཱཏརཎི ནརཱནཾ,

པཱཡཱསི ཙཀྑཱཡཏནཔྤིཡཱཧི

ཏཱིརནྟརཾ ཙིཏྟནིཡཱམཀཊྛཱ;

༥༡.

དྭིཛོ སུམེདྷོ སུཝིསུདྡྷམེདྷོ

མཱཏཱཔིཏུནྣཾ ནིདྷནཱཝསཱནེ,

པུཉྙཱནུབྷཱཝཔྤབྷཝཾ ཨགཱར-

མཛ྄ཛྷཱཝསཾ ཀཱམསུཁཾ’ནུབྷུཉྫཱི;

༥༢. ¶

ནིསཛྫ པཱསཱདཏལེ’ཀདཱ སོ

པལླངྐམཱདྷཱཡ རཧོགཏོཝ,

པུནབྦྷཝུཔྤཏྟི སརཱིརབྷེདོ

དུཀྑོ’ཏི ཙིནྟེསི སབྷཱཝཙིནྟཱི;

༥༣.

ཛཱཏོ ས’ཧཾ ཛཱཏིཛརཱརུཛཱདི-

དྷམྨོ’མྷི ཏསྨཱ བྷཝདུཀྑསུཉྙཾ,

ནིཙྩཾ ཨཛཱཏིཾ ཨཛརཾ ཨརོགཾ

གཝེསིཏུཾ ཝཊྚཏི ནིབྦུཏི’ནྟི;

༥༤.

ཡཐཱཔིདུཀྑེ སཏི ཙ’ཏྠིསཱཏཾ

ཏདཉྙམུཎྷེ སཏི སཱིཏམཏྠི,

བྷཝམྷི སནྟེ ཝིབྷཝོ’པི ཨེཝཾ

ནིབྦཱཎམཏྠཱི ཏིཝིདྷགྒིསནྟེ;

༥༥. ¶

སཱཝཛྫདྷམྨེ ཨིཧཝིཛྫམཱནེ

སཾཝིཛྫཏེ བྷོ ནིརཝཛྫདྷམྨོ,

ཨཛཱཏི ཧོཏི སཏི ཛཱཏིཡཱ’ཏི

ཨེཝཾ ཝིཙིནྟེསི སདཏྠཝིནྟཱི;

༥༦.

དིསྭཱ ཡཐཱ གུཐགཏོ ཏལཱ༹ཀཾ

ན ཏསྶ དོསོ ན ཏམོཏརེཡྻ,

ཀིལེསདྷོཝེ ཨམཏམྷི སནྟེ

ཏཐཱ ན སེཝེཐ ན ཏསྶ དོསོ;

༥༧.

པཱཔཱརིརུདྡྷོ སཏི ཁེམམགྒེ

ན ཏསྶ དོསོ ན སུཁཾ ཝཛེཡྻ,

པཱཔཱརིརུདྡྷོ སཏི ཁེམམགྒེ

ཏཐཱ ནགཙྪེཡྻ ན ཏསྶ དོསོ; (ཡམཀབནྡྷནཾ)

༥༨. ¶

ཡཐཱཔི ཝེཛྫེ སཏི གྷོརརོགཱི

ན ཏསྶ དོསོ ཏ ལབྷེ ཏིཀིཙྪཾ,

རཱགཱདིརོགཱི སཏི བུདྡྷཝེཛྫེ

དྷམྨོསདྷཾ ནེ’ཙྪཏི ཀསྶ དོསོ;

༥༩.

ཡོ ཀཎྛབདྡྷཾ ཀུཎཔཾ པཧཱཡ

ཡཐཱསུཁཾ གཙྪཏི སེརིཙཱརཱི,

ཏཐེཝི’མཾ ཀུཙྪིཏ པཱུཏིཀཱཡཾ

ཡཾནཱུན གཙྪེཡྻམཧཾ ཛཧིཏྭཱ;

༦༠.

ཨུཙྩཱརཋཱནམྷི ཛནཱ’ནཔེཀྑཱ

ཀཏྭཱ ཀརཱིསཱནི ཀཡཐཱ ཝཛནྟི,

ཏཐཱ སརཱིརཾ ཀུཎཔེཧི པཱུརཾ

ཡཾནཱུན གཙྪེཡྻམཧཾ ཛཧིཏྭཱ;

༦༡. ¶

ནཱཝཾ ཡཐཱ ཛཛྫརམཱཔགཱཧིཾ

ཝཛེཡྻ ནེཏཱ ཨཏཔེཀྑཀོཝ,

ཏཐཱ ནཝདྭཱརསཝཾ སརཱིརཾ

ཡཾནཱུན གཙྪེཡྻམཧཾ ཛཧིཏྭཱ;

༦༢.

ཙོརེཧི གཙྪཾ ཨཝཧཱརབྷཱིཏྱཱ

ཁེམཾ སུམེདྷོ པུརམོཏརེཡྻ,

ཏཐཱ སརཱིརཾ ཀུསལཱཝཧཱརཾ

ཡཾནཱུན གཙྪེཡྻམཧཾ ཛཧིཏྭཱ;

༦༣.

ནེཀྑམྨ སངྐཔྤ པརོ’པམཱཧི

ཨནུསྶརིཏྭེ’ཝམུལཱ༹རཝཱིརོ,

ཧཏོ’རཔཱརེ ཏིབྷཝེ ཨསཱརེ

ཝིཧཱསི ཨུཀྐཎྛིཏམཱནསོ སོ;

༦༤. ¶

སུཝཎྞ མུཏྟཱ མཎི རཱུཔིཡཱདི-

དྷནེཧི དྷཉྙེཧི ཙ པཱུརིཏཱནི,

ཨཝཱཔུརིཏྭཱན,ཐ ཀོསཀོཊྛཱ-

གཱརཱནི ཏཾ དསྶཡི རཱསིཝཌྜྷོ;

༦༥.

པིཏཱམཧཱནཾ པཀཔིཏཱམཧཱནཾ

མཱཏཱཔིཏུནྣཾ ཝིབྷཝཱ པནེཏྠ,

ཨནཔྤཀཱཐཱཝརཛངྒམཱཏེ

སཾདིསྶརེ དྷཱིར སུམེདྷཝིཔྤ;

༦༦.

སོ སཏྟམཱ ཡཱཝ པཝེཎིཝཊྚཱ

ཝིབྷཱཝཡིཏྭཱ ཝིབྷཝསྶརཱསིཾ,

དྷནཱགམསྶཱཔི དྷནབྦཡསྶ

པམཱཎ’མཱཙཱིཀྑིཔམཱཎདསྶིཾ;

༦༧.

ཀུཊུམྦམེཏཾ པཊིཔཛྫམཱནོ

ཀཱམེསུ དེཝོཝིཡ ཨིནྡྲིཡཱནི,

ཨིཙྪཱནུརཱུཔཾ པརིཙཱརཡསྶུ

ཨིཙྩེཝ མཱརོཙཡི རཱསིཝཌྜྷོ;

༦༨. ¶

ཨམུཾ མཧནྟཾ དྷནདྷཉྙརཱསིཾ

སམཱཝིནིཏྭེ’ཀ ཀཧཱཔཎམྤི,

ནཱ’དཱཡ མཱཏཱཔིཏརོཔྱ’ཧོ ཏོ

གཏཱ ཡཐཱཀམྨ མིཏོ པརཏྠ;

༦༩.

ཏབྦཏྠུསཱརགྒཧཎཱཏིསཱུརོ

ཝོསྶགྒསནྟོ ཨཐ སཏྟསཱརོ,

རཉྙོ སམཱརོཙིཡ ཨེཏམཏྠཾ

བྷེརིཾ ཙརཱཔེསི སཀེ པུརམྷི;

༧༠.

སནྟཔྤཡི བྷེརིཝིརཱཝགནྡྷ-

མཱགྷཱཡ སམྤཏྟཛཱཏཱ’ལིཛཱཏཾ,

བྷོཝཱདི ནཱནཱརཏནཱདིབྷོག-

མདྷཱུཧི སཏྟཱཧ’མནཱཐནཱཐོ;

༧༡. ¶

ཏདགྒ ཡཉྙཱལཡ ཝཱརིཝཱཧ-

དྷཱརཱནིཔཱཏདྡྷནཝུཊྛིཧེཏུ,

མཧཱ ཛནསྶཱ’དྷིཀཝཏྠུཏཎྷཱ-

ཏཊཱནི བྷིནྣཱནི མནོདཧེསུ;

༧༢.

སུཁེདྷིཏོ ཀཱམསུཁཾ པཧཱཡ

གྷརཱ’བྷཱིནིཀྑམྨ ཏཏོ སུམེདྷོ,

ཨཛ྄ཛྷོགཧེཏྭཱ ཧིམཝནྟ’མཱཔ

དྷམྨེསཀོ དྷམྨཀཔཀབྦཏ’ནྟཾ;

༧༣.

ཝིཏཀྐམཉྙཱཡ’ཐ དེཝརཉྙཱ

ཝྱཱཔཱརིཏོ མཱཔཡི ཝིསྶཀམྨོ,

ཏཧིཾ ཝིཝེཀཀྑམཀ མསྶམཉྩ

མནོརམཾ ཙངྐམབྷུམིབྷཱགཾ;

༧༤. ¶

ཏམསྶམཾ པབྦཛིཏེཧི སུཉྙཾ

ཨུཔེཙྩ སོཉྩཱརམཝཱཔུརིཏྭཱ,

ཉཏྭཱ ཏདནྟོལིཁིཏ’ཀྑརཱནི

ཁཱརིཾཔརིཀྑཱརབྷརཾཨཝེཀྑི;

༧༥.

ནིཝཏྠཝཏྠཾནཝཝདོསུཔེཏཾ

ཝིཝཛྫིཡཱཝཛྫིཡཝཛྫདསྶི,

དྷཱརེསིཏཾབཱརསདྷཱནིསཾས-

མནོཛཔུཔྥཏྠརཝཱཀཙཱིརཾ;

༧༦.

པུནྣཱགཔུཔྥཏྠརཀཱ’བྷིརཱམཾ

ཨཾསེ ཝིདྷཱཡཱ’ཛིནཙམྨཁཎྜཾ,

ཀཏྭཱ ཛཊཱམཎྜལ མིཏྟམངྒེ

ཏིཝངྐ མཱདཱཡ’ཐ ཁཱརིཀཱཛཾ;

༧༧.

བྷུཛངྒབྷོགོ’རུབྷུཛེན དྷཱིརོ

ཨཱདཱཡ ཙཱལམྦནདཎྜཀོཊིཾ,

སམགྒཧཱི ཏཱཔསཝེསམེཝཾ

ཝིརཏྟཙིཏྟོཀ ཝིབྷཝེཝ བྷཝེ’པི;

༧༨. ¶

སོ ཙངྐམཱི ཙངྐམམོཏརིཏྭཱ

སིལཱཏལསྨིཉྩ དིཝཱ ནིསཛྫི,

སཱཡཾ པཝིཊྛོ ཝསི པཎྞསཱལཾ

ནིཔཛྫི ཀཊྛཏྠརསེསམཉྩེ;

༧༩.

པཙཙཱུསཀཱལམྷི པབུཛ྄ཛྷིཏོ སོ

ཨཱཝཛྫཡིཏྭཱ’གམནཔྤཝཏྟིཾ,

ཝིཝེཀཀཱམསྶ མམེ’ཏྠ ཝཱསོ

ཀཱམཾ གྷརཱཝཱསསམོ སིཡཱ’ཏི;

༨༠.

ཨདུཉྷི པཎྞཙྪདནཾ ཀཔོཏ-

པཱདཱརུཎཾ བེལུཝཔཀྐཝཎྞཱ,

བྷཱུམཱིཔི བྷིཏྟཱི རཛཏཱཝདཱཏཱ

མཉྩོ’པི ཙིཏྟཏྠརཝཱརུརཱུཔོ;

༨༡. ¶

སུབྷཱཀ མནཱཔཱ མམ པཀཎྞསཱལཱ

སཱདཱིནཝཱ དུཔྤརིབྷཱརིཡཱ’ཡཾ,

པཎཱིཏབྷིཀྑཱ པརིཡེཊྛི མཱུལ-

དུཀྑསྶ ནཏྠི’ཏི པམཱཎ མནྟོ;

༨༢.

ཨགཱརསཉྙཱཡ པཊིཀྑཔིཏྭཱ

ཏཉྩ’ཊྛདོསཱ ཀུལཔཎྞསཱལཾ,

དསངྒ སཱདྷཱརཎ རུཀྑམཱུལཾ

ཕལཱཕཁལཱཧཱར མུཔེཙྩ བྷོཛཱི;

༨༣.

སུམེདྷསོ སོ དིཝསཱནི སཏྟ

མཧཱཔདྷཱནཾ པདཧཾ སུམེདྷོ,

པཏྟོ ཨབྷིཉྙཱསུ ཝསིསུ པཱརཾ

སབྦཾཀ སམཱཔཏྟིསུཁཾ ཨཝིནྡི;

༨༤. ¶

ཏསྨིཾཁཎེ ཀཱནན དེཝཏཱཧི

སཱདྷཱུ’ཏི ནིགྒྷོསིཏཔཱིཏིགྷོསོ,

ཨབྦྷུགྒཏོ ཏསྶ ཡསེན སདྡྷིཾ

ཝིསུདྡྷཝིཛྫཱཙརཎུ’བྦྷཝེན;

༨༥.

ཝིཛྫཱདྷརཱ ཏགྒུཎདཱིཔཀཱནི

མུཏིངྒཝཱིཎཱདྷནིབནྡྷཝཱནི,

གཱཡིཾསུ གཱིཏཱནི’ཝ ནཙྩམཱནོ

ཧིམཱཙལོ སམྤཏི སམྤཝེདྷི;

༨༦.

མུདྡྷངྐུརཾ བྷུདྷརཀུཊབཱཧུ-

སཏེཧི ཏནྣིཛ྄ཛྷར ཙཱམརེཧི,

ཝིདྷཱུཡམཱནེཧི ཝིདྷཱུཏཔཱཔཾ

ཀཏོཔཧཱརེཝ མཧཱསརཱ’པཱི;

༨༧. ¶

ཨཀཱལམེགྷདྡྷནི བྷེརིརཱཝ-

ཝྱཱཔཱརིཏཱ མཏྟསིཁཎྜིསཎྜཱ;

ཨཛ྄ཛྷཱཝསནྟཾ ཝནསཎྜམཛ྄ཛྷཾ

མཧིཾསུཙཱ’ཁཎྜནཏཎྜཝེན;

༨༨.

མནྡཱ’ནིལཱ’མནྡབྷུཛཱ’ཝལམྦ-

སུནཱིལསཱཁཱམཎིཝིཛནཱིཧི,

ལཏངྒནཱ’ལིངྒིཏསཱལསཱམཱི

སཾཝིཛཡུཾ ཝིཏདརམྤི དྷཱིརཾ;

༩༠. ¶

ཀཔཱིཏནཱ’སོཀ ཏམཱལ ནཱིཔཱ

ཀཔཱིཏནཱ’སོཀ ཏམཱལ ནཱིཔཱ, (སམཏྟཔཱདབྷྱཱས མཧཱ ཡམཀཾ)

ཀཔཱིཏནཱ’སོཀ ཏམཱལ ནཱིཔཱ

ཀཔཱིཏནཱ’སོཀ ཏམཱལ ནཱིཔཱ;

༩༡.

ན ཝེལལིཏཱ ཀིཾ པསཝཀཱ’ཝཏཾསཱ

ལཏཱཝིཏཱནཱ མདྷུཔཱལིསཱལཱི,

ལཏཱཝིཏཱནཱ མདྷུཔཱ’ལིསཱལཱི

ན ཝེལླིཏཱ ཀིཾ པཀསཝཱ’ཝཏཾསཱ;(སམུགྒབྷེད ཡམཀཾ)

༩༢. ¶

པུཔྥཱཝལཱི ཀནྡལ པཱཊལགྒཱ

ཀལཱཔིནཱི སཱ ཝནརཱཛིནཱིལཱ,

པུཔྥཱཀུལཱི ཀནྡན པཱཊལཀྑཱི

ཀལཱཔནཱིལཱ ཝར རཱཛིནཱིཝ; (ཨདྡྷགོམུཏྟིཀཱ བནྡྷནཾ)

༩༣. ¶

ནཏཱསིརོ མཉྫརིཀཱསུརམྷཱ

ནཏཱསིརོ པཉྫལིཀཱཝ རམྨེ,

ཝནེ ནིབདྡྷཾ རམིཏོ ཝིབྷཱསི

ཝིནེཡྻ བནྡྷཱུརཙཱིཏོ པཧཱརོ; (པཱདགོམུཏྟིཀཱ བནྡྷནཾ)

༩༤.

རཛོཀིརནྟཱ’ཝནཏཱ ལཏཱསུཾ

ལཱཛོཀིརནྟཱ ཝནིཏཱ ནཏཱཝ,

དྭིཛོཨརཉྙཾ ཝསིཏཱ པིཏཱགྷོ

གཛོཏརནྟོཝ ལཏཱ ཝིཏཱནཾ; (སིལོཀགོམུཏྟིཀཱ བནྡྷནཾ ཨཱཀུལཛཱལམིཏིཔི)

༩༥. ¶

མཏངྒཛིནྡཱ ན མསཀྐརིཾསུ

པཱདཱནི ནཏྭཱན པདིཔདྷཱམཾ,

པཉྙཱདྷཝཾ པཱིན ཏཔཾ ཕལེཧི

ཧིམདྡིཔཱདེ པརིསུཏྟམཉྷི; (ཀབྦནཱམ གབྦྷ ཙཀྐཾ)

༩༦. ¶

མེཏྟཱཡ ཚཏྟཾ’ཝ ཕཎཾ ཕཎིནྡོ

དྷཱརེསི སཱིསེ ཝསིནོ ཙཙཱར,

ནཐཱམཝཱ’ཀཱཝ’བལེསུ ཀིཉྩི

མེདྷཱཡ ནནྡོ ཐིརཝཱཙི ཁེམེ; (ཀཝིནཱམ གབྦྷ ཙཀྐཾ)

༩༧. ¶

ནོ’སིཏེཧི’སྶ སནྟཱས’ནཱུ’ན ཏོས ཝཏོ དོ,

དཱཡཏོ ཝསཏོ ན’ནུསནྟཱསསྶ ཧིཏེསིནོ; (གཱཐདྡྷཝིསཡ པཊིལོམ ཡམཀཾ)

༩༨.

ཡོཀཱ’སཱ’ཝཱས ཀཱཡོ ཀཱམ’ཀཱམ’མཀཱམ’ཀཱ,

སཀཱཡནཱ’ནཱཡ’ཀཱས ཝཱམ ནཱ ག གནཱ’མཝཱ; (སབྦཏོ བྷདྡ བནྡྷནཾ)

༩༩. ¶

དཡཱཡ ཝསིཏོ དཱཡེ ཡཱཔཛཱསིཝ མཱསདཱ,

ཡཛཱརཧཾ རཉྫམཱནོ ཝསིཧཾསོ ཙིརཾཝསི; (ཨདྡྷབྦྷམ བནྡྷནཾ)

༡༠༠.

མདྷུམད མདྷུཀར ཝིརུཏེ ཝིརུཏེ

མལཡཛ སུརཧཱིཏ པཝནེ པཝནེ

ཧིམཝཏི ཝིཀསིཏ པདུམེ པདུམེ

ཨདྷིསུཁ མནུབྷཝི སཝསི སཝཀསི; (པཱདནྟ ཡམཀཾ)

ཨིཏི མེདྷཱནནྡཱབྷིདྷཱནེན ཡཏིནཱ ཝིརཙིཏེ སཀལཀཝིཛན ཧདཡཱནནྡདཱནནིདཱནེ ཛིནཝཾསདཱིཔེ དཱུརེནིདཱནེ སུམེདྷབྲཱཧྨཎཱཔདཱནཔརིདཱིཔོ.

པཋམོ སགྒོ.

༡. ¶

(མནྡཱ’ཀྐནྟཱ) མརཔུརསིརིཾ སབྦསམྤཏྟིསཱརཾ

ཛམྦུདྡཱིཔཱ’སམ སརསིཛེ ཀཎྞིཀཱ སནྣིཀཱསཾ,

རམྨཾ རམྨཝ྄ཧཡ པུརཝརཾ པཱརམཱིཔཱརདསྶཱི

བུདྡྷོ དཱིཔངྐར དསབལོ སབྦལོཀེཀདཱི; ()

ཏསྨིཾ ཀཱལེ ཝིཔུལཀརུཎཱ ནཱརིསཉྩོདིཏ’ཏྟོ

ནཱནཱ ཁཱིཎཱསཝ པརིཝུཏོ ཙཱརིཀཾ སཉྩརནྟོ,

སཾཝཏྟེནྟོ སུནིཔུཎཏཡཾ དྷམྨཙཀྐཾ ཀམེན

པཏྭཱ ཏསྨིཾ པཊིཝསཏི སོདསྶནཝ྄ཧེ ཝིཧཱརེ; ()

༣. ¶

སུཏྭཱ དིཔངྐར བྷགཝཏོ ནཱགརཱ ཀིཏྟིསདྡཾ

སམྦུདྡྷོ སོ ཨིཏིཔི ཨརཧཾ ཏྱཱདིནཱ’བྦྷུགྒཏཾ ཏཾ,

གཱཧཱཔེཏྭཱ ཏུཝཊཏུཝཊཾ ཝཏྠབྷེསཛྫ པཱནཾ

ཏནྣིཏྟཱ’སུཾ པམུདིཏམཏཱ གནྡྷམཀཱལཱདིཧཏྠཱ; ()

༤.

པཏྭཱ དཱིཔངྐརཏརིཧརིཾ གནྡྷམཱལཱདིཀེཧི

པཱུཛེཏྭཱཏ’ཉཛལིམུཀུལིཀཱ ཨེཀམནྟཾ ནིསིནྣཱ,

དྷམྨཾ སུཏྭཱ སཝཎསུབྷགཾ བུདྡྷཔཱམོཀྑསངྒྷཾ

སཾཡཱཙིཏྭཱ མུདིཏཧདཡཱ སྭཱཏྟཡཱ’པགཉྫུཾ; ()

༥. ¶

སཛྫེཏྭཱ ཏེ དུཏིཡདིཝསེ སཛྫནཱ དཱནསཱལཾ

ཨུསྶཱཔཏྟཱ དྷཛཀདལིཡོ པུཎྞཀུམྦྷེ ཋཔེནྣཱ,

ཀུབྦནྟཱ’པི དྷཝལསུལི༹ནུ’ཀྑེཔ ལཱཛོཔཧཱརཾ

ཨེཝཾ ཏསྶཱ’གམན མཡནཾ ལངྐརོནྟཱ ཝིཧཱསུཾ; ()

༦.

ཨབྦྷུགྒནྟྭཱ ཨཐ ཧིམཝཏཱ སོ སུམེདྷོ ཏཔསྶི

གཙྪཾ ཏེསཾ ཨུཔརི ནབྷསཱ ཝཱཀཙཱིརཾ དྷུནནྣོ,

དིསྭཱ པཱིཏིཔྤམུདིཏཛཏེ ཨཉྫསཾ སོདྷཡནྟེ

སཉྫྷཱམེགྷོ རིཝ པརིལསཾ དྷཏརིཏྠེ’ཀམནྟཾ; ()

༧.

སཾསོདྷེནྟཱ ཀལལཝིསམཊྛཱན སངྐཱརདྷཱནཾ

ཀསྨཱ ཏུམྷེ པཊིཔཐམིམཾ’ལངྐརོཐཱ’ཏི པུཙྪི,

བྷནྟེ དཱིཔངྐརཏརཧརི’དཱནི ནིསྶཱཡ རམྨཾ

བུདྡྷོ ཧུཏྭཱ ཝིཧརཏི མཧཱདྷམྨསངྑཾ དྷམནྟོ; ()

༨. ¶

སོ སམྦུདྡྷོ པརིཝུཏམཧཱབྷིཀྑུསངྒྷོ ཡཏོ ནོ

གཱམཀྑེཏྟཾ པཝིསཏི ཏཏོ’ལངྐརོམཱ’བྲུཝིཾསུ,

བུདྡྷཱུཔྤཱདོ ཀིམུཏ སུཏརཾ དུལླབྷོ བུདྡྷསདྡོ

ཨིཙྩེཝཾསོ སུམརིཡ ཨལངྐཏྟུཀཱམོ’སི མགྒཾ; ()

༩.

ཛྷཱནཱ’བྷིཉྙཱ རཏཏཀཝཙུ’ཛྫོཏམཱན’ཏྟབྷཱཝོ

སདྡྷཱཡེ’སོ ཨཙལསདིསོ ཨིདྡྷིམཱ ཏཱཔསོ’ཏི,

སལླཀྑེཏྭཱ ཀལལཝིསམཾ དུགྒམགྒཔྤདེསཾ

སཛྫེཏུཾ ཏེ སཔདི མུདིཏཱ སཱདྷཝོ ཏསྶ’དཾསུ; ()

༡༠. ¶

ནཱནཱཔུཔྥཾ ཛལཛཐལཛཾ ཨོཙིནིཏྭཱ ཝནམྷཱ

ཏེཏྭཱ དེཝཱསུརབྷཝནཏོ ཀོཝིལཱ༹རཱདིཔུཔྥེ,

ཨཱནེཏྭཱ’ཧཾ བྷུཛགབྷཝཏཱ ཕུལླཀཎྜུཔྤལཱནི

ཚེཀོསྨཱི’ཏི ཝིཐརིཡ པཐཾ ཨིདྡྷིཡཱ སཾཝིདྷཱཏུཾ; ()

༡༡.

ཀཏྭེ’ཝཾ མེ ཧདཡམཀུལ༹ཾ ཏོཝིཀཱསེཡྻ ཏསྨཱ

ཝེཡྻཱཝཙྩཾ ཝིསདམཏིནོ ཀཱཡིཀཾ སཾཝིདྷཱཡ,

ཨཛྫེཝཱ’ཧཾ ཝིཔུལཀུསལཾ སཉྩིནིསྶ’ནྟཱི དྷཱིརོ

སཾསོདྷེཏུཾ ཀལལཀལུསཾ ཨཉྫསཾ ཨཱརབྷིཏྠ; ()

༡༢.

པསྶནྟཱནཾ ཝིམལནཡནོ’བྷཱས ཛིམཱུཏགབྦྷེ

བུདྡྷོབུདྡྷོ’ཏྱ’བྷིཧིཏཝཙོ ཝིཛྫུརཱཛཱིཝ ཙཱརཱི,

ཏསྨིཾ པངྐེ ནིཛཀརཏལ’མེབྷཱཛཔཙྪིཧི དྷཱིམཱ

པཾསུཾ དཏྭཱ རཛཏདྷཝལཾ ཝཱལུཀཾ ཝོཀིརནྟོ; ()

༡༣. ¶

ཏསྨི ཋཱནེ ཀལླལུལིཏེ སུཊྛུ ནཱ’ལངྐཏེཝ

སདྡྷིཾ དཱིཔངྐར’ནདྷིཝརོ’ནེཀཁཱིཎཱསཝེཧི,

པཏྟོ བྲཧྨཱ’མརནརཕཎིསིདྡྷཝིཛྫཱདྷརཱནཾ

སཾཝཏྟནྟེ སུཝིཔུལམཧེ པཱཊིཧཱིརེ ཨུལཱ༹རེ; ()

༡༤.

ཧེམ’མྦྷོཛོ’པམསུཝདནཾ མཎྜིཏཾ ལཀྑཎྷོ-

སཱིཏྱཱ’ནུབྱཉྫནཝིལསིཏཾ ཀེཏུམཱལཱཝིལཱསཾ,

སཏྠཱརཾ ཏཾ དིསིདིསི པབྷཱནིཙྪརནྟ’ཉྫསམྦྷི

ཨཱགཙྪནྟཾ ཝིཡ མཎིཏལེ མཏྟམཱཏངྒརཱཛཱ; ()

༡༥. ¶

ཨོལོཀེཏྭཱ ཝིམལནཡནཉྩནྡནིལུཔྤལཱནི

ཨུམྨིལེཏྭཱ རཏནཕལཀཾ ཨཀྐམནྟོཝ པིཊྛིཾ,

ནཱནཱཁཱིཎཱསཝཔརིཙུཏོ ཀདྡམཾ ནཱ’ཀྐམིཏྭཱ

སམྦུདྡྷོཡཾ ཝཛཏུ ཨིཏི མེ དཱིགྷརཏྟཾ ཧིཏཱཡ; ()

༡༦.

སལླཀྑེཏྭཱ ཁར’ཛིནཛཊཱཝཱཀཙཱིརཱནི ཀེསེ

ཨོམུཉྩིཏྭཱ ཝིསམཀལལེ པཏྠརིཏྭཱ’ཏྟབྷཱཝཾ,

སེཏུཾ ཀཏྭཱ པརམཔཎིདྷཱི ཀོམིནཱི ཙོདིཏ’ཏྟོ

པཉྩཱ’བྷིཉྙཱརཏནམཎིམཱ སྭཱ’ཙཀུཛྫོ ནིཔཛྫི; ()

༡༧.

སུཏྭཱ གཱཐཱཔདམྤི ན མེ བྷཱརིཡཾ སཾཀིལེསེ

ཝིདྡྷཾསེཏྭཱ ཝརསིཝུརཾ པཏྟུམིཙྪེ སཙཱ’ཧཾ,

སཾཝིཛྫནྟེ ཏིབྷཝབྷཝནེ དུཀྑིཏཱ’ནནྟསཏྟེ

སོ’བྷཾ ཨེཀོ ཀཐམདྷིགམེ དྷམྨ མཉྙཱཏཝེསོ;()

༡༨. ¶

ཡནྣཱུནཱ’ཧཾ པརཧིཏརཏོ སམྨདཉྙཱཡ བོདྷིཾ

ཨཱརོཔེཏྭཱ ནིཁིལཛནཏཾ’ནུཏྟརཾ དྷམྨནཱཝཾ,

ཨུཏྟཱརེཏྭཱ ཝརསིཝཔུརཾ ཝཊྚདུཀྑོདདྷིམྷཱ

པཙྪཱ དཱིཔངྐརམུནི ཡཐཱ ནིབྦུཏིཾ པཱཔུཎིསྶཾ; ()

༡༩.

ཨིཙྩེཝཾ སོ པུམརིཡ སམོདྷཱནཡིཏྭཱ’ཊྛདྷམྨེ

སཾསཱརམྷཱ’ཝཏརཎམཧཱསེཏུརཱུཔོ པཛཱནཾ,

མུདྡྷཱབདྡྷ’ཉྫལིཔུཊཛཊོ པངྐཔིཊྛེ ནིཔནྣོ

སམྦོདྷཏྠཾ པཎིདྷིམཀརི ཏཱཝ ཏཔྤཱདམཱུལེ; ()

༢༠. ¶

ཨུསྶིསཋོ སཔདི བྷགཝཱ པཉྩཝཎྞཔྤསཱདཾ

ཨུམྨཱིལེཏྭཱ ནཡནཡུགལཾ ཕུལླནཱིལུཔྤལཱབྷཾ,

དིསྭཱ ནཱིལོཔལམཎིམཡཾ ཝཱཏཔཱནཉྩཡཾ’ཝ

ཨུགྒྷཱཊེནྟོ ཨིསིཝརམྷཱཔངྐཛཾ པངྐཔིཊྛེ; ()

༢༡.

ཨེཏསྶི’ཛཛྷིསྶཏི ཨིཏི ཨཡཾ པཏྠནཱ’ནཱགཏཾས-

ཉཱཎཾ སམྨཱ པཏིནིཡ ཨིཏོ ཀཔྤལཀྑཱདྷིཀཱནཾ,

ཨཱཝཛྫེནྟོ ཨུཔརི ཙཏུརཱསངྑིཡཱནནྟྱ’ཝེདི

པཏྭཱ བོདྷིཾ ཨཧམིཝ སིཡཱ གོཏམོ ནཱམ བུདྡྷོ; ()

༢༢.

ཏུམྷེ སམྤསྶཐ ཨིཏི ཨིམཾ ཏཱཔསཾ སངྒྷམཛ྄ཛྷེ

ཝཏྭེ’ཝཾ སོ པདམསདིསཾ དྷམྨརཱཛཱ དདནྟོ,

སམྷིནྡིཏྠཱ’དྷརཀིསལཡཱ’ལཏྟཀཾ ནཱགཏཾཡ-

པཉྙཱམུདྡཱ’ངྐིཏཔདསཏཾ ཝཏྟསནྡེསགབྦྷཾ; ()

༢༣. ¶

ཝཱསཊྛཱནཾ ཀཔིལནགརཾ ནཱམ མཱསཱམཧེསི

མཱཏཱ སུདྡྷོདནནརཔཏི ཏེ པིཏཱ’དིཙྩཝཾསེ,

བིམྦཱ བིམྦཱ དྷརཝཏི པིཡཱ ཧེམ བིམྦཱ བྷིརཱམཱ

ཏསྨིཾཀཱལེ ཏནུཛརཏནཾ རཱཧུལོ ཧེསྶཏེ ཏེ; ()

༢༤.

ཧེསྶནྟེ ཏེ པཋམདུཏིཡསྶཱཝཀཱ སཱརིཔུཏྟ-

མོགྒལླཱནཱ དྭིཛཀུལབྷཝཱ བྷུརིཔཉྙིདྡྷིམནྟོ,

ཨཱནནྡཱཁྱོ ཡཏི པཏི རུཔཊྛཱཡཀོསཱཝིཀཱནཾ

ཁེམཱཐེརི པརམ ཡུགལཾ ཨུཔྤལབྦཎྞཐེརི; ()

༢༥. ¶

ཨསྶཏྠོ ཏེ ཝིཛཡཝིཊཔཱི ཏྭཉྩ ཁོ གོཏམཝ྄ཧོ

ཚབྦསྶཱནཱི པདཧིཡ གྷརཱ ནིཀྑམིཏྭཱ སཀམྷཱ,

པཱཡཱསགྒཾ པརིཝིསིཡ བྷོ ཏྭཾ སུཛཱཏཱཡ དིནྣཾ

བོདྷིཾ བུཛ྄ཛྷིསྶསི ཨིཏི དྷུཝཾ བོདྷིམཱུལེ ནིསཛྫ; ()

༢༦.

སཏྠཱ སཉྫྷཱགྷནཔཊལཏོ མུཏྟཝིཛྫུལླཏེ,ཝ

སནྡསྶེཏྭཱ ནིཛབྷུཛལཏཾ ཙཱིཝརབྦྷནྟརམྷཱ,

པཁྱཱཀཱསི ཛལདྷརརཝཱ’ཀཱརགམྦྷཱིརགྷོཡཾ

ནིཙྪཱརེཏྭཱ སུརདྷནུརིཝོ’བྷཱས ཚབྦཎྞརཾསི; ()

༢༧.

ཨམྷེ དཱིཔངྐརབྷགཝཏོ སཱསནེ ནཱ’ཝབུདྡྷཱ

ལཙྪཱམཱ’ཏི ཏཝ པརིམུཁེ’ཝཱ’ཡཏིཾ མོཀྑདྷམྨཾ,

ཏསྨིཾ པཏྟཱ’ཁཱིལ སུརནརཱཔཏྠཡུཾ ཏངྑཎེཝཾ

པཱུཛེཏྭཱ’ཏཉྫལིསརསིཛེ པཱདཔཱིཋམྷི ཏསྶ; ()

༢༨. ¶

བུདྡྷོ བྲཧྨཱམརནརསིརོ ཙུམྦིཏངྒྷཱི སརོཛོ

སམྤཱུཛེཏྭཱ’ཊྛཧི ཛཊིལཀཾ པུཔྥམུཊྛཱིཧི ཏམྷཱ,

པཀྐཱམི སོ ཀནཀསིཁརཱིཧཱརི ཀིཉྫཀྑབྷཱརེ

ཨུབྦྷཱུཏ’མྷོརུཧཝནསིརེ ཨཔྤཡནྟོ པདཱནི; ()

༢༩.

རམྨཾ རམྨཾ མཧཱིཡ ཛཊིལཾ པུཔྥམུཊྛཱིཧི ཀཏྭཱ

ཁཱིཎཱ ཁཱིཎཱསཝཝསིགཎཱ དཀྑིཎཾ པཀྐམིཾསུ,

དེཝཱ’དེཝཱ པཝུརམཀརུཾ ཝནྡནཱམཱནཔཱུཛཾ

དཱིཔཾ དཱིཔངྐརདསབལཉྩཱ’ནུགནྟྭཱ ནིཝཏྟཱ; ()

༣༠. ¶

ཏམྷཱ ཋཱནཱ གཏསཏི ཛནེ སནྣིསིནྣསྶ ཏསྶ

པལླངྐེནཱ’མརནར པརིཙྩནྟ པུཔྥཱསནམྷི,

ཛཱཏིཀྑེཏྟཱ ཏཧིམུཔགཏཱ དེཝཏཱ ཨེཏམཏྠཾ

ཨཱརོཙེསུཾ མཧིཏཝརཎཱ ཨཉྫལིམཉྫརཱིཧིཾ; ()

༣༡.

པུབྦེ པུཔྥཱསནུཔརི སམཱརཱུལ༹ྷབུདྡྷངྐུརཱནཾ

ཨདྡྷཱནེ’ཝེ’ཏརཧི བྷཝཏོཙཱ’སནཱརོཧཎམྷི,

ཨེཀཱལོཀཱ དསཧི གུཎིཏཱ ལོཀདྷཱཏུ སཧསྶཱི

སཾཝཏྟནྟེ ཏྭམནཝརཏཾ ཧེསྶསེ ཏེན བུདྡྷོ; ()

༣༢.

ཏཱསཾ ཝཱཙཾ སཝཎམདྷུརཾ དེཝཏཱནཾ ནིསམྨ

བྷིཡྻོ ཙིཏྟཔྤབྷཝཝཱིརིཡོ པཱིཏིཝིཔྥཱརིཏཏྟོ,

པུབྦེ སཏྟུཏྟམཔརིཙིཏཱ བོདྷིསམྦྷཱརདྷམྨཱ

ཨཱཝཛྫེསི ཀཏི ཨིཏི སུདྷཱི དྷམྨདྷཱཏུཾ སཧེཏུཾ; ()

༣༣. ¶

ཨོཀུཛྫིཏྭཱ དྷརཎིཋཔིཏོ པུཎྞ ཀུམྦྷོ སུམེདྷ

ཝིསྶནྡེཏྭཱ སལིལམཁིལཾ ཀིནྟུཔཙྩཱཧརེཐ,

ཨེཝཾ དཏྭཱ དྷནསུཏཀལཏྟ’ངྒཔཙྩངྒཛཱིཝེ

ནིབྦིནྣོ མཱ བྷཝི’ཏི པཋམཾ པཱརམིཾ’དྷིཊྛཧི སོ; ()

༣༤.

ནཱ’པེཀྑིཏྭཱ ཡཐརིཝ ནིཛཾ ཛཱིཝིཏཾ ཛཱིཝིཏཾ’ཝ

རཀྑནྟོ སཉྩརཏི ཙམརི ཙཱམར ཙནྡིཀཱབྷཾ,

ཨེཝཾ སཱིལཾ ཝརསིཝཔུརདྭཱརམཱརཀྑ དྷཱིར

ཨཛ྄ཛྷིཊྛཱསི ཨིཏི སདུཏིཡཾ པཱརམིཾ སུདྡྷསཱིལོ; ()

༣༥. ¶

སཾཝིགྒོ ཡོ ཙིརཔརིཝསཾ གྷོརཀཱརཱགྷརམྷི

མུཏྟཱིཾ ཏམྷཱ’གམཡཏི ཡཐཱ ཧོཧི ནེཀྑམྨནིཏྟོ

ནིབྦིནྣོ ཏྭཾ ཏཐརིཝ བྷཝེ བནྡྷནཱགཱརརཱུཔེ

ཨཛ྄ཛྷིཊྛཱསི ཏཏིཡམྤི སོ པཱརམིནྟྱེ’ཀཙཱརཱི; ()

༣༦.

ཧཱིནུཀྐཊྛཾ ཀུལམནུགྷརཾ བྷིཀྑཀོ བྷིཀྑུ བྷིཀྑཾ

ཨཎྭཱཧིཎྜཾ ལབྷཏི ནཙིརཾ སཾཝརཊྛོ ཡཐེ’ཝཾ,

སམྦོདྷཏྠ བྷཛ པཊིབལེ པཎྜིཏེ པུཊྛཔཉྷོ

ཨཛ྄ཛྷིཊྛཱསི ཏྭམིཏི མཏིམཱ པཱརམིཾ སོ ཙཏུཏྠིཾ; ()

༣༧.

ནིཙྩུསྶཱཧོ ཝིཙརཏི ཡཐཱ ཀེསརཱི སེརིཙཱརཱི

ཨེཝཾ ཋཱནེ གམནསཡནེཙཱ’སནེ ཏྭཾ སུམེདྷ,

ཨུསྶོལ༹ྷཱི ཏྱཱསིཐིལཝཱིརིཡོ ཧོཏི སམྦོདྷནཏྠཾ

ཨཛ྄ཛྷཱིཊྛཱསི ཐིརཝཱིརིཡཝཱ པཉྩམིཾ པཱརམིཾ སོ; ()

༣༨. ¶

ཨིཊྛཱནིཊྛཾ པཐཝིརིཝ བྷོ སབྦམཱནཱཝམཱནཾ

ནཱཔཛྫིཏྭཱ མནསིཝིཀྟིཾ ཏྭཾ སཧནྟོ ཁམནྟོ,

སམྦོདྷཏྠཾ པརཝདྷཁམོ ཧོཧི’ཏཱི ཁནྟིཝཱདཱི

ཨཛ྄ཛྷིཊྛཱསི པརཧིཏརཏོ ཚཊྛམིཾ པཱརམིཾ སོ; ()

༣༩.

ཝཱིཐིཾ ནཱཏིཀྐམཏི ནིཡམཾ ཨོསདྷཱིཏཱརཀཱ’ཡཾ

ཨེཝཾ སནྟུཏྟམ པརིཙིཏཾ སཙྩཝཱཙཾ སུམེདྷ,

ཏྭཾ མཱཝིཏིཀྐམི ཀརཧཙི བོདྡྷུཀཱམོ སུབོདྷིཾ

ཨཛ྄ཛྷིཊྛཱསི’ཏྱ’ཝིཏཐཀཐི སཏྟམིཾ པཱརམིཾ སོ; ()

༤༠. ¶

ཏམྷཱཋཱནཱ བལཝཔཝནེ ཝཱཡམཱནེ’པི ཐོཀཾ

ཀཔྤཊྛཱསི ཏཙལཏི ཡཐཱ པབྦཏོ སུཔྤཏཊྛོ,

ཏྭཾ ཏིཊྛཱཧི ཏཐརིཝ ཨདྷིཊྛཱནདྷམྨེསུ དལ༹ྷཾ

ཨཛ྄ཛྷིཊྛཱསཱི’ཏྱཝལསདིསོ ཙ’ཊྛམིཾ པཱརམིཾ སོ; ()

༤༡.

ཨོཏིཎྞེསུ ཨུདཀརཧདོ བྷོ ནིཧཱིནུཏྟམེསུ

སཱིཏཏྟཾ སམྥརཏི ཧི སམཾ ཝཱརིནཱ བྷཱཝཡེནི,

མེཏྟཱཡེཝཾ ཏིབྷཝབྷཝནེ སབྦསཏྟེསུ ཏུལྱཾ

ཨཛ྄ཛྷིཊྛཱསི སམུཏི ནཝམིཾ པཱརམིཾ མེཏྟ ཙིཏྟོ; ()

༤༢.

ཨིཊྛཱནིཊྛེ སཏི པཊིཧཏེ ཝཏྠུཛཱཏེ ཡཐཱཧི

མཛ྄ཛྷཏྟཱ’ཡཾ ཝསུམཏིཝདྷཱུ ཧོཏི དུཀྑེ སུཁེཀ ཝཱ,

ཨེཝཾ བྷོ ཏྭཾ བྷཝ སམཏུལཱསནྟིབྷོ’པེཀྑ ཀོ’ཏི

ཨཛ྄ཛྷིཊྛཱསི སཝསི དསམིཾ པཱརམིཾ བྷུརིམེདྷོ; ()

༤༣. ¶

ཨཱལོལེནྟོ ཏིདསཔམིཏཾ པཱརམིསཱགརཾ སོ

སཏྟཱདྷིསོ ནིསིཏམཏིམཱ ཉཱཎམཏྠཱ’ཙལེན,

ཨཱཝཛྫེསི ཝསུམཏཝདྷུ སཱདྷུཀཱརཾ’ཝ དེནྟི

སཾཀམྤི སམྤཏི སཏིམཏོ དྷམྨཏེཛེན ཏེན; ()

༤༤.

བྷཱིརཱུཙྪམྷཱི གྷཎཔཐཝིཡཱ ཀམྤམཱཏཱཡི’མཱཡ

པཏྭཱ དཱིཔངྐརབྷགཝཏོ རམྨཝཱསཱི སམཱིཔཾ,

སམྤུཙྪིཾསུ ཝསུམཏི བྷུསཾ ཀམྤི ཏཾཀིསྶཧེཏུ

ཨཱཝཛྫེཏྭཱ སམུཏི མུནིནོ ཏམྤཝཏྟིཾ ཀཐེསི; ()

༤༥.

ནིཀྐངྑཱ ཏེ པུནཔི ནགརཱ ནཱགརཱ ཏཾ ཨུཔེཙྩ

སམྤཱུཛེསུཾ ཙརཎཡུགལཾ གནྡྷམཱལཱདིཀེཧི,

ཀཏྭཱ ཏེན’ཉྫལིསརསིཛེ ཡེན དཱིཔངྐརེ’ཎོ

ཨུཊྛཱསི སོ པུརིསཏིསཧོ སནྣཱིསིནྣཱསནམྷཱ; ()

༤༦. ¶

མཱ ཏེ རོགོ བྷཝི པཊིབྷཡཾ མཱ བྷཝི ཚམྦྷིཏཏྟཾ

སངྐཔྤོ ཏེ པརམཔཎིདྷི སིཛ྄ཛྷཏཾ ཁིཔྤམེཝ,

ཨིཏྠཉྩཱ’སིཐུཏིཔདསཏཾ ཛཱཏིཁེཏྟཱ གཏཱ ཏཾ

པུཔྥཱདཱིཧི མཧཱིཡ ཛཊིལཾ ནིཛྫརཱ བྱཱཧརིཾསུ; ()

༤༧.

ཨབྦྷུགྒནྟྭཱ པཝནཔདཝིཾ དེཝཏཱནཾ མནཱནི

བོདྷཱཏྭོ ཧིམཝཏི སཀཾ ཨསྶམཾ ཏཱཔསོ སོ,

པཏྟོ ཨཏྠཱཙལམུཔགམཱི ཏངྑཎེ རཾསིམཱལཱི

སངྐོཙེཏྭཱ སརསིཛཝནཾ སཾཧརིཏྭཱ’ཾསུཛཱལཾ; ()

༤༨. ¶

རམྨཾ དཱིཔངྐརབྷགཝཏོ རམྨཝཏྱཱ’བྷིདྷཱནཾ

ཝཱསཊྛཱནཾ ཛནཀཛནནཱི དྭེ སུདེཝསྶུམེདྷཱ,

ནིཙྩོཔཊྛཱཡཀཡཏིཝརོ སཱགཏོམངྒལོཙ

ཏིསྶོཙཱ’སུཾ པཋམདུཏིཡསྶཱཝཀཱ ཐེརནཱགཱ; ()

༤༩.

ནཱནཱཁཱིཎཱསཝཔརིཝུཏོ ཙཱ’སི ནནྡཱ སུནནྡཱ

ཏསྶཱ’ཧེསུཾ པཋམདུཏིཡསྶཱཝིཀཱ ཨགྒབྷཱུཏཱ,

ཀཱཡོ’སིཏིརཏནཔམིཏོ པིཔྥལིནཱམབོདྷི

ཨཊྛཱསི སོ པཙུརཛནཏཾ ཏཱརཡཾ ཝསྶལཀྑཾ; ()

༥༠.

སཏྠཱ དཱིཔངྐརཝ྄ཧོ སུརནརསརཎོདཱིཔདཱིཔོཙིརསྶཾ

དཱིཔེཝོ དྷམྨདཱིཔཾ ཏིབྷུཝནབྷཝནེ ཝཱིཏ’ཝིཛྫནྡྷཀཱརཾ

ཨགྒིཀྑནྡྷོ’ཝབྷཱསཾ ཝིཧརིཡ པརིནིབྦཱཡི ཁཱིཎཱསཝཱ’པི

ཁཱིཎསྣེཧཱཔདཱིཔཱཡཐརིཝ ཨརིཡཱ སཱཝཀཱ ནིབྦུཏཱ’སུཾ; ()

ཨིཏི མེདྷཱནནྡཱབྷིདྷཱནེན ཡཏིནཱ ཝིརཙིཏེ སཀལཀཝིཛན ཧདཡཱནནྡདཱནནིདཱནེ ཛིཏཝཾསདཱིཔེ དཱུརེནིདཱནེ སུམེདྷ ཏཱཔསསྶ མཱུལཔཎིཋཱནཊྛཔནཔཝཏྟི པརིདཱིཔོ དུཏིཡོ སགྒོ.

༡. ¶

ལོཀཾ (’ཝསནྟཏིལཀོ) ཀུམུདཱཀརཾ མཱ

ཀོཎྜཉྙནཱམབྷགཝཱ’ཐ པབོདྷཡཏྟོ,

ཛཱཏོ ཏདཱ ཝརམཏཱི ཝིཛིཏཱཝི རཱཛཱ

སམྤནྣ ཙཀྐརཏནོ’བྷཝི ཙཀྐམཏྟི; ()

༢.

སངྒྷསྶ བུདྡྷཔམུཁསྶ ཨུལཱ༹རདཱནཾ

དཏྭཱ ཝིདྷཱཡ པཎིདྷིཾ ཝརབོདྷིཡཱ སོ,

རཛྫཾ པཧཱཡ ཛིནསཱསནམོཏརིཏྭཱ

ཛྷཱནཱནྱ’ལཏྠ པཊིལངྭརཔྤདཱནོ; ()

༣. ¶

ཏསྶཱ’སི རམྨཝཏིནཱམ པུརཾ སུནནྡོ

རཱཛཱ ཨཧོསི ཛནཀོ ཛནནཱི སུཛཱཏཱ,

བྷདྡསྶུབྷདྡསམཎཱ ཝརསཱཝཀཱ’སུཾ

ཏིསྶོ’པཏིསྶ’སམཎི ཝརསཱཝིཀཱཡོ; ()

༤.

ལཀྑཱཡུཀོ ཝིཛཡབོདྷི ཝིསཱལསཱལ-

ཀལྱཱཎི ནཱམ ཏདུཔཊྛཧི ཙཱ’ནུརུདྡྷོ,

ཏསྶཱ’ཊྛ སཱིཏིརཏནཔྤམིཏཾ སརཱིརཾ

ཨཱསུཾ ཏཡོ ཨརིཡསཱཝཀསནྣིཔཱཏཱ; ()

༥.

ཏསྶཱ’པརེན སམཡེནི’ཧ’ནངྒབྷངྒོ

ཨུཔྤཛྫི མངྒལཛིནོ ཛནམངྒལཱཡ,

བུདྡྷངྐུརོ’ཏིརུཙིརོ སུརུཙཱི སམཉྙོ

ཨཱསི ཏདཱ’ཝཏིསུརོ དྭིཛཝཾསཀེཏུ; ()

༦. ¶

དཏྭཱ སསཱཝཀཛིཏསྶ དིནཱནི སཏྟ

པཏྠེསི བོདྷིམསམཾ གཝཔཱནདཱནཾ,

པབྱཱཀཏོ བྷགཝཏཱ བྷཝནཱ’ཧཱིགནྟྭཱ

པབྦཛྫིཏོ སུཁམཝིནྡི སམཱདྷིཛཾ སོ; ()

༧.

ཏསྶུ’ནྟརཾ པུརཝརཾ པིཏརོ’ཏྟར’ཝ྄ཧཱ

ཨཱསུཾ སུདེཝསམཎོ ཝསི དྷམྨསེནོ,

ཏསྶཱ’གྒསཱཝཀཡུགཾ སཀསཱཝིཀཱནཾ

བྷདྡཾཡུགཾ ཨབྷཝི སིཝལིཙཱ’པྱ’སོཀཱ; ()

༨. ¶

ཏཾ པཱལིཏོ ཛིནམུཔཊྛཧི ཨཊྛ’སཱིཏི

ཧཏྠོ’སི ཏསྶ ཝཛིརཱུཔམརཱུཔཀཱཡོ,

བོདྷཱི’པི ནཱགཏརུ སཱཝཀསནྟིཔཱཏཱ

ཨཱསུཾ ཏཡོ ནཝུཏིཝསྶསཧསྶམཱཡུ; ()

༩.

ཏསྶཱ’པརེན སུམནོ ཀརུཎཱནིདྷཱནོ

ནཱཐོ མནོཛམཐནོ ཨུདཔཱདི ལོཀེ,

བུདྡྷངྐུརོ’བྷཝི ཏདཱ’ཏུལནཱགརཱཛཱ

ཏེཛ’གྒིཛཱལཛལིཏོ ཨཏུལིདྡྷིམཱ སོ; ()

༡༠.

ནཱགོ’པི ནཱགབྷཝནམྷི སསཱཝཀསྶ

བུདྡྷསྶ དིབྦཏུརིཡེཧི ཀཏུཔཧཱརོ,

དཏྭཱན དཱནམཏུལཾ པཎིདྷིཾ ཨཀཱསི

བུདྡྷོ བྷཝིསྶསི ཏུཝནྟི ཨཧཱསི བུདྡྷོ; ()

༡༡. ¶

ཁེམཝ྄ཧཡཾ པུརམཧཱུ ཛནཀོ སུདནྟོ

རཱཛཱ ཛནེཏྟི སིརིམཱ ནིཛསཱཝཀཱནཾ;

ཨགྒཱ བྷཝིཾསུ སརཎོ ཝསི བྷཱཝིཏཏྟོ

སོཎཱ ཏདགྒསམཎི’སི ཏཐུ’པསོཎཱ; ()

༡༢.

ཏསྶཱ’སི ནཱགཏརུ བོདྷི ཨུདེནཏེརོ-

པཊྛཱཡཀོ ནཝུཏིཝསྶསཧསྶམཱཡུ,

ཨུབྦེདྷཏོ ནཝུཏིཧཏྠམིཏཾ སརཱིརཾ

ཨཱསུཾ ཏཡོ ཨརིཡསཱཝཀསནྣིཔཱཏཱ; ()

༡༣.

ཏསྶཱ’པརེན ཨུདཔཱདི’ཧ རེཝཏཱཁྱོ

དེཝཱདིཝནྡིཏཔདོ བྷུཝི དེཝདེཝོ,

སཏྟུཏྟམོ བྷཝི ཏདཱ ཨཏིདེཝནཱམོ

བྷོཝཱདིཝཾསཏིལཀོ ཙཏུཝེདཝེདཱི; ()

༡༤. ¶

བདྡྷཉྫལཱི སིརསི དྷམྨཀཐཾ ནིསམྨ

གནྟྭཱན ཏཾ སརཎམུཏྟརམུཏྟརིཡཾ;

དཏྭཱ’ཧིཔཏྠཡི སུཁོདྷིམཐོ མཧེསི

བུདྡྷོ བྷཝིསྶསི ཏུཝནྟཱི ཝིསཱཀརིཏྠ; ()

༡༥.

ཏསྶཱ’སི དྷཉྙཝཏིནཱམ པུརཾ ཛིནསྶ

མཱཏཱ མཧེསི ཝིཔུལཱ ཝིཔུལོ པིཏཱ’སི,

སབྲཧྨདེཝཝརུཎོ བྷཝི སངྒྷམཛ྄ཛྷེ

བྷདྡཱ ཙ བྷདྡཡུགལཾ དུཝིདྷཾ སུབྷདྡཱ; ()

༡༦.

ཏཾ སམྦྷཝོ ཝསི ཨུཔཊྛཧི ནཱགབོདྷི

རུཀྑོཔྱ’སིཏིརཏནཾ བྷཝི ཨཏྟབྷཱཝོ,

ཨཱཡུཔྤམཱཎམྤི སཊྛིསཧསྶཝསྶཾ

ཨཱསུཾ ཏཡོ ཨརིཡསཱཝཀསནྣིཔཱཏཱཏ;

༡༧. ¶

ཏསྶཱ’པརམྷི སམཡེ ཛནཔཱརིཛཱཏོ

ཨུཔྤཛྫི སོབྷིཏཛིནོ ཛིཏཔཉྩམཱརོ,

ཨཛ྄ཛྷཱཡཀོ སཀལཝེད མུལཱ༹རབྷོགཱི

བུདྡྷངྐུརོ བྷཝི ཏདཱ’ཛིཏནཱམཝཔྤོ;

༡༨.

དྷམྨཾ ནིསམྨ སརཎེསུ པཏིཊྛཧིཏྭཱ

སངྒྷསྶ བུདྡྷཔམུཁསྶ ཨུལཱ༹རདཱནཾ,

དཏྭཱ པདྷཱནཔཎིདྷཱན མཀཱསི དྷཱིརོ

ཏྭཾ ལཙྪསི’ཏི ཝརབོདྷི མཧཱསི སཏྠཱ; ()

༡༩.

རམྨཾ སུདྷམྨམཧུ ཏསྶ པུརཾ སུདྷམྨོ

རཱཛཱ ཨཧོསི ཛནཀོ ཛནིཀཱ སུདྷམྨཱ

ཏསྶཱ’གྒསཱཝཀཡུགཾ ཨསམོ སུནེཏྟོ

ཏསྶཱཝིཀཱ’གྒཡུགལཾ ནཀུལཱ སུཛཱཏཱ; ()

༢༠. ¶

ནཱགསྶ ནཱགཏརུ བོདྷི སརཱིརམཊྛ-

པཎྞཱསཧཏྠཔམིཏཾ ཏམཏོམཐེརོ,

སོཔཊྛཧཱི ནཝུཏིཝསྶསཧསྶམཱཡུ

ཨཱསུཾ ཏཡོ ཨརིཡ སཱཝཀ སནྣིཔཱཏཱ; ()

༢༡.

ཨུཔྤཛྫི ཏསྶ ཨཔརེན ཨནོམདསྶི

བུདྡྷོ པབུདྡྷཀམལཱམལནཱིལནེཏྟོ,

བུདྡྷངྐུརོ ཛིཏསུརཱརི ཏདཱནི ཡཀྑ-

སེནཱཔཏཱི བྷཝི མཧིདྡྷིམཧཱནུབྷཱཝོ; ()

༢༢.

སམྦོདྷི མགྒཔུརིསོ པཎིདྷཱནཡཾ སོ

སངྒྷསྶ བུདྡྷཔམུཁསྶ ཨུལཱ༹རདཱནཾ,

པཱདཱསི ཏིསུ སརཎེསུ པཏིཊྛཧིཏྭཱ

བུདྡྷོ བྷཝིསྶསི ཏུཝནྟི ཛིནོ’བྲུཝིཏཾ; ()

༢༣. ¶

ཋཱནཉྷི ཙནྡཝཏིནཱམ ཡསོདྷརཱཁྱཱ

མཱཏཱ མཧེསི ཡསཝཱ ཛནཀོ ཛནིནྡོ,

ཏསྶ’གྒསཱཝཀཡུགཾ ནིསབྷོ ཨཏོམོ

དྭེ སུནྡརཱི ཙ སུམནཱ ཙརསཱཝིཀཱ’སུཾ; ()

༢༤.

བོདྷཱི’པི ཏསྶ ཀཀུདྷོ མུནིདེཧམཊྛ-

པཎྞཱསཧཏྠཔམིཏཾ ཝརུཎཱབྷིདྷཱནོ,

ཐེརོ ཨུཔཊྛཧི ཙ ལཀྑཔམཱཎམཱཡུ

ཨཱསུཾ ཏཡོ ཨརིཡསཱཝཀསནྣིཔཱཏཱ; ()

༢༥.

ཏསྶཱ’པརེན པདུམོ དིཔདཱནམིནྡོ

ཛཱཏོ པབུཛ྄ཛྷིཏམནོཔདུམོ པཛཱནཾ,

དྷཱིརོ བབྷཱུཝ ཝརཝཱརཎཀུམྦྷབྷེདཱི

སཱིཧོ ཏདཱ རུཙིརཀེསརབྷཱརགཱིཝོ; ()

༢༦. ¶

བུདྡྷཾ ནིརོདྷསུཁཝེདིཡནཾ ཝཏམྷི

སཏྟཱཧམཀྑིཔདཱུམེཧི ཏམཙྩཡིཏྭཱ,

ཙིཏྟཾ པསཱདིཡ པུནཱ’གཏསཱཝཀེསུ

སཱིཧོ ཝིབྷཱསི པཊིལདྡྷཝརཔྤདཱནོ; ()

༢༧.

ཏསྶཱ’སི ཙམྤཀཔུརཾ པདུམཱབྷིདྷཱནོ

རཱཛཱ ཨཧོསི ཛནཀོ ཨསམཱ ཛནེཏྟཱི,

སཱལོཔསཱལཡཏཡོ ཝརསཱཝཀཱ’སུཾ

རཱམཱ’པི ཏསྶ པརམཱསམཎི སུརཱམཱ; ()

༢༨.

ནཱམེནུ’པཊྛཧི ཝསི ཝརུཎོ ཏམཊྛ-

པཎྞཱསཧཏྠམིཏ མསྶ སརཱིརམཱ’སི,

བོདྷི’པི སོཎཏརུ ལཀྑཔམཱཎམཱཡུ

ཨཱསུཾ ཏཡོ ཨརིཡསཱཝཀསནྣིཔཱཏཱ; ()

༢༩. ¶

ཏསྶཱ’པརེན ཝརདོ མུནི ནཱརདཝ྄ཧོ

པཱཔནྡྷཀཱརནིཀརཾ བྷཱིདུརོ’དཔཱདི,

བུདྡྷངྐུརོ བྷཝི ཏདཱ’ཁིལཛྷཱཏབྷིཉྙཱ-

ལཱབྷཱི པཝཏྟཕལབྷོཛི ཏཔོདྷནཱིསོ; ()

༣༠.

ཀཏྭཱནུ’ལཱ༹རཔཎིདྷཱན མུལཱ༹རཝིརོ

དཏྭཱ སསཱཝཀཛིནསྶ ཨུལཱ༹རདཱནཾ,

པཱུཛེསི ཏཾ སུརབྷིནཱ ཧརིཙནྡནེན

སཏྠཱཔི སམྤཏི ཝིཡཱཀརཎཾ ཨདཱསི; ()

༣༡.

ཏསྶཱ’སི དྷཉྙཝཏིནཱམ པུརཾ སུམེདྷོ

རཱཛཱ ཨཧོསི ཛནཀོ ཛནནཱི ཨནོམཱ,

དྭེ བྷདྡསཱལཛིཏམིཏྟཝསི ཝསིན-

མགྒོ’ནྟརཱ སམཎི ཕགྒུཎི བྷིཀྑུནཱིཏཾ; ()

༣༢. ¶

ཝཱསེཊྛབྷིཀྑུ ཏདུཔཊྛཧི རཱུཔཀཱཡོ

ཏསྶཱ’ཊྛསིཏིརཏནཾ མཧསོཎསཱཁཱི,

བོདྷིདྡུམོ ནཝུཏིཝསྶསཧསྶམཱཡུ

ཨཱསུཾ ཏཡོ ཨརིཡསཱཝཀསནྟིཔཱཏཱ; ()

༣༣.

ཏསྶཱ’པརེན པདུམུཏྟར དྷམྨརཱཛཱ

ཛཱཏོ ཏིལོཀཔདུམོ པདུམཔྤིཏངྒྷཱི,

ཨཌྜྷོ ཨུལཱ༹རཝིབྷཝོ མཧརཊྛིཡོ སོ

བུདྡྷངྐུརོ བྷཝི ཏདཱ ཛཊིལཱབྷིདྷཱནོ;()

༣༤.

སམྦོདྷིཡཱ’དྷིགམ པཙྩཡཔཏྠནཾ སོ

ཝིརོཝིདྷཱཡ པདུམུཏྟརཔཱདམཱུལེ,

སངྒྷསྶ བུདྡྷཔམུཁསྶ ཏིཙིཝརཱནི

པཱདཱསི ཏཱིསུརཏནེསུ ཨབྷིཔྤསནྣོ; ()

༣༥. ¶

ཏསྶཱ’སི ཧཾསཝཏིནཱམ པུརཾ ཛིནསྶ

ཨཱནནྡབྷུཔཏི པིཏཱ ཛནིཀཱ སུཛཱཏཱ,

དྭེ ཏསྶ དེཝལསུཛཱཏཝསི ཝསིནཾ

ཨགྒཱ བྷཝིཾསུ སམཎིསྭཱམིཏཱསམཱ’གྒཱ; ()

༣༦.

ལཀྑཱཡུཀོ སཛཡབོདྷིཀ ཝིསཱལསཱལ

རུཀྑོ ཨུཔཊྛཧི མུནིཾ སུམནཱབྷིདྷཱནོ,

ཏསྶ’ཊྛ’སིཏིརཏནཔྤམིཏཾ སརཱིརཾ

ཨཱསུཾ ཏཡོ བྷགཝཏོ གཎསནྣིཔཱཏཱ; ()

༣༧.

ཏསྶཱ’པརེན སམཡེན སུམེདྷནཱམོ

ལོཀམྷི པཱཏུབྷཝི ལོཀཧིཏཱཡ སཏྠཱ,

བུདྡྷངྐུརོ ཀིར ཏདཱནྱུ’བྷཏོ སུཛཱཏོ

སྭཱ’སིཏིཀོཊིཝིབྷཝོ’ཏྟར མཱཎཝོ’སི; ()

༣༨. ¶

ཝིསྶཛྫིཡཱན ཝིབྷཝཾ ཏིཾསཏིཀོཊིཾ

དཏྭཱན དཱནམསྨཾ སུགཏེ སསངྒྷེ,

པབྦཛྫིཏོ པརམབོདྷི མཔཏྠཡིཏྠ

བྱཱཀཱསི སོམུནི ཏ’མིཛ྄ཛྷནབྷཱཝ’མདྡྷཱ; ()

༣༩.

རམྨཾ སུདསྶནམཧཱུ ནགརཾ སུདནྟོ

ཏསྶཱ’སི བྷཱུཔཏི པིཏཱ ཛནནཱི སུདཏྟཱ,

སངྒྷེསུ’ཧོསུ སརཎོ ཝསི སབྦཀཱམོ

རཱམཱ ཡམཱནི པརམཱནྱ’བྷཝུཾཀ སུརཱམཱ; ()

༤༠. ¶

བོདྷཱི’པི ནཱིཔཏརུ སཱགརནཱམཐེརོ

’པཊྛཱསི ཏཾ ནཝུཏིཝསྶསཧསྶམཱཡུ,

ཏསྶཱ’ཌྷསིཏིརཏནུ’གྒཏམཱསི གཏྟཾ

ཨཱསུཾ ཏཡོ སཏིམཏོ གཎསནྟིཔཱཏཱ; ()

༤༡.

ཏསྶཱ’པརེན སམཡེན ཛནཔྤདཱིཔོ

ཛཱཏོ སུཛཱཏབྷགཝཱ ཛིཏཔཉྩམཱརོ,

སམྤནྣསཏྟརཏཏོ ཝརཙཀྐཝཏྟི

རཱཛཱ བབྷཱུཝི’ཧ མཧཱཔུརིསོ ཏདཱསོ; ()

༤༢.

དྷམྨཱ’མཏེན མུདིཏོ རཏནདྭཡསྶ

དཏྭཱ སསཏྟརཏནཾ ཙཏུདཱིཔརཛྫཾ,

པབྦཛྫི བོདྷིཔཎིདྷིཾ པཎིདྷཱཡ དྷཱིམཱ

ཉཏྭཱ མཧཱམུནི ཏམིཛ྄ཛྷནབྷཱཝམཱཧ;

༤༣. ¶

རམྨཾ སུམངྒལམཧཱུ པུརམུགྒཏཱཁྱོ

རཱཛཱ པིཏཱབྷཝི པབྷཱཝཏིནཱམ མཱཏཱ,

ཨགྒཱབྷཝིཾསུ ཙ སུདསྶནདེཝཐེརཱ

ནཱགཱ གཎསྶདསི ནཱགསམཱལཐེརི; ()

༤༤.

ཏཾ ནཱརདོམུནིརུ’པཊྛཧི ཙ’ཏྟབྷཱཝོ

པཎྞཱསཧཏྠཔམིཏོ བྷཝིཝེཎུབོདྷི,

ཏསྶཱ’བྷཝཱི ནཝུཏིཝསྶསཧསྶམཱཡུ

ཨཱསུཾ ཏཡོ དྷཱིཏིམཏོ གཎསནྣིཔཱཏཱ; ()

༤༥.

ཏསྶཱ’པརེནི’ཧ ནིརཱུཔམརཱུཔསཱརོ

ཛཱཏོབབྷཱུཝ པིཡདསྶིསམནྟདསྶི,

དྷཱིརོ ཏདནྱ’བྷཝི ཀསྶཔམཱཎཝོ སོ

ཝེདེསུ ཏཱིསུ ཀུསལོ ཀུསལཾ གཝེསི; ()

༤༦. ¶

སོ ཀོཊིལཀྑཔརིམཱཎདྷཏབྦཡེན

སངྒསྶ བུདྡྷཔམུཁསྶ མཧཱཝིཧཱརཾ,

ཀཏྭཱ པདཱསི ཨབྷིཔཏྠིཏབུདྡྷབྷཱཝོ

བུདྡྷོ’པི ཏཔྤཎིདྷིསིདྡྷི སིཡཱ’ཏྱ’བྷཱསི; ()

༤༧.

ཙནྡཱམཧེསི ཛནནཱི ཛནཀོ པུདིནྣོ

རཱཛཱ བབྷཱུཝ པུརམསྶ ཨནོམནཱམཾ,

ཨཱསུཾ ཏདགྒཡུགལཱནི སུཛཱཏདྷམྨ-

དིནྣཱ གཎསྶདསི པཀཱལིཏསབྦདསྶི; ()

༤༨.

ཏཾ སོཏཝ྄ཧསམཎོ སམུཔཊྛཧིཏྠ

བོདྷཱི པིཡངྒུ བྷགཝཱ’སི ཨསིཏིཧཏྠོ,

ཨཊྛཱསིཀ སོ ནཝུཏིཝསྶསཧསྶམ’སྶ

ཨཱསུཾ ཏཡོ མཏིམཏོ གཎསནྣིཔཱཏཱ; ()

༤༩. ¶

ཏསྶཱ’པརེན སམཡེནུ’དཔཱདི ལོཀེ

ལོཀཏྠསཱདྷནརཏོ མུནིར’ཏྠདསྶཱི,

སཏྟུནྟམོ’པི ནིརཏིཀྐམདྷམྨསིམོ

ཏེཛིདྡྷིམཱ ཨིསི ཏདཱ’སི སུསིམནཱམོ; ()

༥༠.

ཨཱནཱིཡ དིབྦབྷཝནཱ ཀུསུམཱནི ཏསྶ

མནྡཱརཝཱནི སུཔཏིཊྛིཏཔཱདཔཱིཋེ,

སམྤཱུཛིཡཱན པཎིདྷཱནམཀཱསི སཏྠཱ

ཏྭཾ མཱདིསོ’བྲུཝི བྷཝིསྶསི ཙཱ’ཡཏིནྟི; ()

༥༡.

ཏསྶཱ’སི སོབྷིཏཔུརཾ བྷཝིསཱགརཝ྄ཧོ

རཱཛཱ པིཏཱ ཛནཏིདེཝི སུདསྶནཱཁྱཱ,

སནྟོཔསནྟསམཎཱ ཝརསཱཝཀཱ’སུཾ

དྷམྨཱ ཏདགྒསམཎིཔྱ’བྷཝུཾ སུདྷམྨཱ; ()

༥༢. ¶

ཏཉྩཱ’བྷཡོ མུནིརཱུཔཊྛཧི སོཔྱ’སཱིཏི-

ཧཏྠུགྒཏོ སཏསཧསྶཔམཱཎམཱཡུ,

ཙམྤེཡྻསཱཁི བྷཝི བོདྷི སུབོདྷིཧེཏུ

ཨཱསུཾ ཏཡོ ཨརིཡསཝཀསནྣིཏཱ; ()

༥༣.

ཏསྶཱ’པརེན ཨུདཔཱདི’ཧ དྷམྨདསྶཱི

ནིསྶཱིམདྷཱི’ནདྷིཝརོ བྷཝཔཱརདསྶི,

སོ ཏཱཝཏིཾསབྷཝཏམྷི མཧཱནུབྷཱཝོ

བུདྡྷངྐུརོ བྷཝི ཏདཱ ཀིར དེཝརཱཛཱ;()

༥༤.

དིབྦཱནི གནྡྷཀུསུམཱནི ཀཐཱགཏསྶ

ཙཀྐངྐིཏོརུཙརཎམྦུརུཧཱསནམྷི,

པཱུཛེསི དིབྦཏུརིཡེཧི ཙ བུདྡྷབྷཱཝཾ

སོ པཏྠཡཾ མུནིཏམིཛ྄ཛྷ ནབྷཱཝམཱཧ; ()

༥༥. ¶

ཋཱནིཡམཱསི སརཎཾ སུགཏསྶ ཏསྶ

རཱཛཱ པིཏཱ’སི སརཎོ ཛནནི སུནནྡཱ,

ཨགྒཱབྷཝིཾསུ པདུམོཝསི ཕུསྶདེཝོ

ཁེམཱ ཙ བྷིཀྑུསམཎིསྭ’པི སབྦནཱམཱ; ()

༥༦.

ཐེརོ སུནེཏྟཝིསུཏོ ཏདུཔཊྛཧི སོ

ལཀྑཱཡུཀོ’སི ཛཡབོདྷི ཉྩ བིམྦིཛཱལོ,

ཏསྶཱ’པྱ’སིཏིརཏནཔྤམིཏཾ སརཱིརཾ

ཨཱསུཾ ཏཡོ ཨརིཡསཱཝཀསནྣིཔཱཏཱ; ()

༥༧.

ཏསྶཱ’པརེན སམཡེནི’ག སིདྡྷབོདྷི

སིདྡྷཏྠནཱམཝིདིཏོ ཨུདཔཱདི སཏྠཱ,

བུདྡྷངྐུརོ བྷཝི ཏདཱ’ཁཱིལངཛྷཱནལཱབྷཱི

བྷོཛི པཝཏྟིཏཕལཾ ཝསི མངྒལཱཁྱོ; ()

༥༨. ¶

སམྤནྣགནྡྷརསིཀཾ པརིཔཀྐམེཀཾ

ཨཱནཱིཡ སོ ཝིཔཀུལཛམྦུབྷལཾ ཝནམྷཱ,

པཱདཱསི ཏསྶ པཎིདྷཱིཀཏབུདྡྷབྷཱཝོ

ཏཉྩཱནུབྷུཡ བྷགཝཱཔི ཝིཡཱཀརིཏྠ; ()

༥༩.

ཝེཧཱརམཱསི ནགརཾ ཛཡསེནནཱམོ

རཱཛཱ ཨཧོསི ཛནཀོ ཛནནཱི སུཕསྶཱ

བྷིཀྑཱུསུ ཏསྶ ཝསི སམྦཧུལོ སུམིཏྟོ

དྭེ སཱིཝལི ཉྩ སམཎཱིསུ ཝརཱ སུརཱམཱ; ()

༦༠.

ཏཾ རེཝཏོམུནི མུནིནྡམུཊྛཧིཏྠ

བོདྷཱི’པི ཏསྶ ཀཎིཀཱརམབྷཱིརུཧོ’སི,

ལཀྑཱཡུཀོ ས’ནརསཱརཐི སཊྛིཧཏྠོ

ཨཱསུཾ ཏཡོ ཨརིཡསཱཝཀསནྣིཔཱཏཱ; ()

༦༡. ¶

ཏསྶཱ’པརེནི’ཧ སམུབྦྷཝི ནིསྶནཱམོ

སཏྠཱ པསཏྠཙརཎོ ཙཏུརོ’གྷཏིཎྞོ,

བུདྡྷངྐུརོ བྷཝི ཏདཱནི སུཛཱཏརཱཛཱ

རཱཛཉྙམོལི༹མཎིལངྐཏཔཱདཔཱིཋོ; ()

༦༢.

ཧིཏྭཱ ས’རཛྫམིསིཝེཡདྷརོ སུདྷཱིརོ

དིབྦེཧི’ནེཀཀུསུམེཧི ཛིནཾ ཝཛནྟཾ,

པཱུཛེསི མུདྡྷནི ཏམཱཔཝིཏཱནསོབྷཾ

སཏྠཱ’པི ཏཔྤཎིདྷིསིདྡྷི སིཡཱ’ཏྱ’བྷཱསི; ()

༦༣.

ཁེམཾ པུརཉྷི ཛནཀོ ཛནསནྡྷནཱམོ

རཱཛཱ ཛནེཏྟི པདུམཱ ནིཛསངྒྷམཛ྄ཛྷེ,

དྭེ བྲཧྨདེཝུདཡ ཝིསྶུཏཐེརནཱགཱ

ཕུསྶཱ ཙ ཨགྒཡུགལཱནྱ’བྷཝུཾ སུདཏྟཱ; ()

༦༤. ¶

ཏཾ སམྦྷཝོཝསི ཝསིནྡམུཔཊྛཧིཏྠ

ཏསྶཱ’སནཝ྄ཧཏརུ བོདྷི ས’སཊྛིཏཏྠོ,

ཨཊྛཱསི ཝསྶགཎནཱཡ མཧེསི ལཀྑཾ

ཨཱསུཾ ཏཡོ ཨརིཡསཱཝཀསནྣིཔཱཏཱ; ()

༦༥.

ཏསྶཱ’པརེན བྷཝསཱགརཔཱདསྶི

ཕུསྶོ མཧཱམུནིརི’ཧཀབྦྷུདཔཱདི ལོཀེ,

དྷཱིརོ ཏདཱནི ཝིཛིཏཱཝི ཛིཏཱརིཝགྒོ

རཱཛཱ བབྷཱུཝ སུརརཱཛནིབྷོ’རུཏེཛོ; ()

༦༦.

སམྦོདྷི མགྒཔུརིསོ པཎཱིདྷཱཡ ཕཱིཏཾ

རཛྫཾ ཝིཝཛྫིཡ ས’པབྦཛིཏོ ཛནསྶ,

ཨཉྙཱཡ ཏཱིཎིཔིཊཀཱནི ཀཐེསི དྷམྨཾ

ཝྱཱཀཱསི ཕུསྶབྷགཝཱ’པི’ཝ པུབྦབུདྡྷཱ; ()

༦༧. ¶

ཏསྶཱ’སི ཀཱསིནགརཾ ཛཡསེནནཱམོ

རཱཛཱ པིཏཱ’སི ཛནཏི སིརིམཱ མཧེསི,

སངྒྷེསུ’བྷོསུ’པི སུརཀྑིཏདྷམྨསེཏཱ

ཙཱལཱ ཏདགྒཡུགལཱནི ཏཐཱུ’པཉྩཱལཱ; ()

༦༨.

བོདྷིདྡུམཱ’མལཀསཱཁི སརཱིརམཊྛ-

པཎྞཱསཧཏྠཔམིཏཾ སབྷིཡཱབྷིདྷཱནོ,

སོཔཊྛཧཱི ནཝུཏིཝསྶསཧསྶམཱཡུ

ཨཱསུཾ ཏཡོ བྷཀཝཏོ གཎསནྣིཔཱཏཱ; ()

༦༩.

ཏསྶཱ’པརེན སནརཱམརསཏྟསཱརོ

སཏྠཱ ཝིཔསྶི’ཧ སམུབྦྷཝི སབྦདསྶཱི,

ཀམྨེན ཀེནཙི མཧིདྡྷིམཧཱནུབྷཱཝོ

བུདྡྷངྐུརོ’བྷཝི ཏདཱ’ཏུལནཱགརཱཛཱ; ()

༧༠. ¶

ཨངྒཱིརསསྶ གྷནཀཉྩནཧདྡཔཱིཋཾ

པཱདཱསི ཏསྶ ཁཝིཏཾ རཏནེཧི ནཱནཱ,

སོ བུདྡྷབྷཱཝམཧིཔཏྠིཡ བོདྷིསཏྟོ

ཝྱཱཀཱསི ཏཏྠསུནིསཛྫ ཛིནོ ཝིཔསྶི; ()

༧༡.

ཏསྶཱ’སི བནྡྷུམཏིནཱམཔུརཾ ཏདེཝ-

ནཱམོ པིཏཱ ཛནནི བནྡྷུམཏཱི མཧེསི,

དྭེ ཁཎྜཏིསྶཝསིནོ ཝརསཱཝཀཱ’སུཾ

ཙནྡཱ ཙ བྷདྡཡུགལཾ བྷཝི ཙནྡམིཏྟཱ; ()

༧༢.

དེཧཾ ཨསིཏིརཏཏཾ ཏམསོཀཐེརོ-

པཊྛཱསི བོདྷིཝིཊཔཱི བྷཝི ཀཎྷཝཎྚཱ,

ཝཱསཾཨཀཱ མུནིར’སཱིཏིསཧསྶཝསྶཾ

ཨཱསུཾ ཏཡོ ཨརིཡསཱཝཀསནྣིཔཱཏཱ; ()

༧༣. ¶

ཏསྶཱ’པརེན ཨདྷིསཱིལསམཱདྷིཔཉྙོ

སཏྠཱ སམུབྦྷཝཱི སིཁཱི ཛནཀཔྤསཱཁཱི,

དྷཱིརོ ཏདཱ’བྷཝི ཨརིནྡམནཱམརཱཛཱ

སདྡྷོ པཧཱུཏརཏཏོ རཏནཏྟཡམྷི; ()

༧༤.

བྷིཀྑཉྩ སཏྟརཏནཱབྷརཎཱབྷིརཱམཾ

ཉཏྭཱན ཧཏྠིརཏནཾ སུགཏེ སསངྒྷེ,

སོ བུདྡྷབྷཱཝམཧིཔཏྠཡི སཏྟསཱརོ

ཝྱཱཀཱསི ལཙྪསི སུཁོདྷིཔདནྟི སཏྠཱ; ()

༧༥.

བུདྡྷསྶ ཙཱརིཎཝཏཱི ནགརཾ ཨཧོསི

མཱཏཱ པབྷཱཝཏི པིཏཱ ཨརུཎཝ྄ཧ རཱཛཱ,

སངྒྷེསུ’བྷོསུ ཨབྷིབྷུཝསི སམྦྷཝོ ཙ

ཨགྒཱབྷཝིཾསུ མཁིལཱཔདུམཱབྷིདྷཱནཱ; ()

༧༦. ¶

ཁེམངྐརོ ཛིནམུཔཊྛཧི སཏྟཏིཾས-

ཧཏྠུཙྪིཏོ ཝིཛཡབོདྷི ཙ པུཎྜརིཀོ,

སོ སཏྟཏིཾསཏིསཧསྶ མིཏཱཡུཀོ’སི

ཨཱསུཾ ཏཡོ ཏདིཡསཱཝཀསནྣིཔཱཏཱ; ()

༧༧.

ཏསྶཱ’པརེནི’ཧ སམུབྦྷཝི ཀེཏུམཱལཱ-

བྱཱམཔྤབྷཱཔརིལསཾ མུནིཝེསྶབྷཱུ’ཏི,

བུདྡྷངྐུརོ ཀིར ཏདཱནི སུདསྶནཝ྄ཧ-

རཱཛཱ བབྷཱུཝ པརརཱཛགཛིནྡསཱིཧོ; ()

༧༨.

སངྒྷསྶ བུདྡྷཔམུཁསྶ སཙཱིཝརཾ སོ

དཏྭཱན དཱནམཏུལཾ ཛིནསཱསནམྷི,

སབྦཉྙུབོདྷིམབྷིཔཏྠིཡ པབྦཛིཏྠ

བུདྡྷོ བྷཝིསྶསི དྷུཝནྟི ཏམཱཧསཏྠཱ; ()

༧༩. ¶

ཏསྶཱ’པྱ’ནོཔམཔུརཾ བྷཝི སུཔྤཏཱིཏོ

རཱཛཱ པིཏཱ ཡསཝཏཱི ཛནིཀཱ མཧེསཱི,

སོཎུཏྟརཱ ཙ ནིཛསཱཝཀསཱཝིཀཱནཾ

དཱམཱ མཏིདྡྷིཔརམཱ པརམཱ སམཱལཱ; ()

༨༠.

བོདྷཱི’པི ཏསྶ བྷཝི སཱལམཧཱིརཱུཧོ’པ-

སམྤནྣབྷིཀྑུ ཏདུཔཊྛཧི སཊྛིཧཏྠོ,

སཏྠཱ ཝིཧཱསི སམསཊྛིསཧསྶཝསྶཾ

ཨཱསུཾ ཏཡོ ཏདིཡསཱཝཀསཏྟིཔཱཏཱ; ()

༨༡.

ཏསྶཱ’པརེནི’ཀཧ སམུབྦྷཝི སཙྩསནྡོ

ཝེནེཡྻབནྡྷུ བྷགཝཱ ཀཀུསནྡྷནཱམོ,

བུདྡྷངྐུརོ བྷུཝི ཏདཱ’བྷཝི ཁེམརཱཛཱ

དཱནཔྤབནྡྷཛལསེཀསུདྷོཏཧཏྠོ; ()

༨༢. ¶

སོ པཏྟཙཱིཝརཔབྷཱུཏིཀམནྣཔཱནཾ

དཏྭཱ སསཱཝཀཛིནསྶ གྷརཱ’བྷིགནྟྭཱ,

པབྦཛྫི བོདྷིཔཎིདྷིཾ པཎིདྷཱཡ རཱཛཱ

སཏྠཱསཡཱ’ཏྱ’ཝཙ ཏཔྤཎིདྷཱནསིདྡྷི; ()

༨༣.

ཁེམཝཧཡཾ ནགརམསྶ པིཏཱ’གྒིདཏྟོ

ཝིཔྤོ ཝིབྷཱཝི ཨབྷཝི ཛནིཀཱ ཝིསཱཁཱ,

སཉྫིཝཐེརདུཏིཡོ ཝིདྷུརོ ཙ ཐེརོ

སཱམཱ ཏདགྒཡུགལཾ བྷཝི ཙམྤཀཱཁྱཱ; ()

༨༤. ¶

ཏཾ བུདྡྷིཛོ ཛིནམུཔཊྛཧི ཏསྶ གཏྟཾ

ཏཱལི༹སཧཏྠམིཏམཱསི སིརིསབོདྷི,

ཏཱལི༹སཧཱཡནསཧསྶཔམཱཎམཱཡུ

ཨེཀོ’ཝ ཏསྶ བྷཝི སཱཝཀསནྣིཔཱཏོ; ()

༨༥.

ཏསྶཱ’པརམྷི སམཡེ ཀརུཎཱནིདྷཱནོ

ལོཀཱབྷིབྷཱུ ཀནཀབྷུདྷརཧཱརིརཱུཔོ,

ཨུཔྤཛྫི ཀོཎགམནོམུནི པབྦཏཱཁྱོ

བྷུམིསྶརོ བྷཝི མཧཱཔུརིསོ ཏདཱནི; ()

༨༦.

སངྒྷསྶ བུདྡྷཔམུཁསྶ ཨུལཱ༹རདཱནཾ

དཏྭཱ མཧགྒྷཝརཙིཝརསཱཊཀེ ཙ,

སོ པཀབྦཛིཏྠ ཨབྷིཔཏྠིཏ བུདྡྷབྷཱཝོ

བུདྡྷོ བྷཝིསྶསི ཏུཝནྟི ཏམཱཧསཏྠཱ; ()

༨༧. ¶

ནཱམེན སོབྷཝཏི ཏམྤུརམུཏྟརཱཁྱཱ

མཱཏཱ པིཏཱ’ཝནིསུརོ བྷཝི ཡཉྙདཏྟོ,

ཧཱིཡོསོཏྟརཝསཱི སམཎི སམུདྡཱ

ཏསྶོ’ཏྟརཱ ཙ པརམཱ པརིསཱསུ’བྷོསུ; ()

༨༨.

ཏཾ སོཏྠིཛོ ཛིནམུཔཊྛཧི ཏིཾསཧཏྠོ

ཨངྒཱིརསོ བྷཝི ཨུདུམྦརསཱཁི བོདྷི,

སོ ཏིཾསཧཱཡནསཧསྶམིཏཱཡུཀོ’སི

ཨེཀོ’ཝ ཏསྶ བྷཝི སཱཝཀསནྟིཔཱཏོ; ()

༨༩.

ཏསྶཱ’པརེནི’ཧ མཧཱམུནི ཀསྶཔཱཁྱོ

ལོཀམྷི པཱཏུབྷཝི ཁགྒཝིསཱཎཀཔྤོ,

བུདྡྷངྐུརོ བྷུཝི ཏདཱ’བྷཝི ཛོཏིཔཱལོ

ཝེདེསུ ཏཱིསུ སཀལཱསུ ཀལཱསུ ཚེཀོ; ()

༩༠. ¶

ཀལྱཱཎམིཏྟདུཏིཡོ སུགཏཾ ཨུཔེཙྩ

སུཏྭཱན དྷམྨམཐསཱསན མོཏརིཏྭཱ,

སབྦཉྙུབྷཱཝམྷིཔཏྠཡི མཱཎཝོ སོ

ཝྱཱཀཱསི ཀསྶཔམུནཱི’པི མུནཱི’ཙ པུབྦཱ; ()

༩༡.

བཱརཱཎསི ནགརམཱསི པིཏཱ ཙ མཱཏཱ

དྭེ བྲཧྨདཏྟདྷནཝཏྱ’བྷིདྷཱནཝནྟོ,

བྷིཀྑུསུ ཏསྶ སམཎིསྭ’པི ཏིསྶབྷཱར-

དྭཱཛཱ ཙ བྷདྡཡུགལཱཏྱ’ནུལོརུཝེལཱ; ()

༩༢.

ཏཾ སབྦམིཏྟསམཎོ སམུཔཊྛཧིཏྠ

ནིགྲོདྷསཱཁཱི ཛཡབོདྷི ས’ཝཱིསཧཏྠོ,

ཏསྶཱ’སི ཝིསཏིསཧསྶ པམཱཎམཱཡུ

ཨེཀོ’ཝ’ཧཱུ ཨརིཡསཱཝཀསནྣཱིཔཱཏོ; ()

ཨིཏི མེདྷཱནནྡཱབྷིདྷཱནེན ཡཏིཏཱ ཝིརཙིཏེ སཀལཀཝིཛན ཧདཡཱནནྡ དཱནནིདཱནེ ཛིནཝཾསདཱིཔེ དཱུརེནིདཱནེ བོདྷིསཏྟསྶ སེསཔཎིདྷཱཏཊྛཔན པཝཏྟི པརིདཱིཔོ ཏཏིཡོ སགྒོ.

༡. ¶

དཱིཔངྐརཱདིཙཏུཝཱིསཏི བུདྡྷཔཱད-

མཱུལེསུ ལངཔཎིདྷཱན མཧཱནིདྷཱནོ,

ལཀྑཱདྷིཀཾ ཙཏུརསངྑིཡཀཔྤསངྑཾ

པུཉྙཱབྷིསནྡམབྷིསངྑརི བོདྷིསཏྟོ; ()

༢.

ཨེཏྠནྟརེ ཝིཝིདྷབཱཧིརཝཏྠུཛཱཏཾ

སིས’ཀྑིམཾསརུདྷིརཱནི ཙ པུཏྟདཱརེ,

སོ ཛིཝིཏམྤི ཀཔཎཌིཀཡཱཙཀཱནཾ

ཝཱིརོ པརིཙྩཛི པཛཱཡ ཧིཏཏྠམེཝ; ()

༣. ¶

དཱནཱདྷིམུཏྟིཔརིཡེསན ཝིཔྤཝེསོ

པཏྭཱ ཏཔོཝནམཀིཏྟི ཏཔོདྷནསྶ,

ཏིཧཾ ཨལཏྠ སཀཊཱཧམལོཎཌཱཀཾ

ཡསྶཱ’བྷིབྷཱུཏཛཋརསྶ ཛིགྷཙྪིཏཏྟཱ; () (ཨཀིཏྟིཙརིཡཾ)

༤.

ཀནྟཱརམགྒ པཊིཔནྣ མནཱཏཔཏྟཾ

པཙྩེཀ བུདྡྷམཧིཔསྶིཡ སངཀྑཝིཔྤོ,

ཕུཊྛཾ སཀིཙྩཔསུཏོ སཱུརིཡཱཏཔེན

ཡོ ཚཏྟུཔཱཧཎམདཱསི སུདྷོཏཔཱཎི; () (སངྑཙརིཡཾ)

༥.

དུབྦྷིཀྑཔཱིལ༹ནབྷཡེན ཀལིངྒརཊྛཱ

སཾཡཱཙཏཾ ཡདུཔགམྨ དྷནཉྫཡཝ྄ཧོ,

སོཎྜཱཡ གཡ྄ཧ ནིཛམཉྫན ནཱགརཱཛཾ

ཡོ དཀྑིཎོདཀ ནིསེཀམཀཱསི རཱཛཱ; () (ཀུརུདྷམྨཙརིཡཾ)

༦. ¶

ཧུཏྭཱན ཡོ མཧསུདསྶན ཙཀྐཝཏྟཱི

རཱཛཱ ཀུསཱཝཏིཔུརམྷི དིཝཱ ཙ རཏྟོ,

ཝཏྠཏྟཔཱནམུཔཏེསི ཙརཱཔཡིཏྭཱ

བྷེརིཾཀ ཨསེསཀཔཎྜིཀཡཱཙཀཱནཾ; () (མཧཱསུདསྶནཙརིཡཾ)

༧.

ཡོ སཏྟབྷུམིབྷུཛསཱསི པུརོཧིཏོ’པི

རཱཛཱུཧི ལདྡྷམཁིལཾ དྷནདྷཉྙརཱསིཾ,

སམྤཏྟཡཱཙཀཛནསྶ པརིཙྪཛིཏྭཱ

པུཉྙཔྤབནྡྷམབྷིསཉྩིནི བོདྷིཧེཏུ; () (མཧཱགོཝིནྡཙརིཡཾ)

༨.

དྷམྨཱནུསཱསི ནིམིནཱམ མཧཱིབྷུཛོ’པི

སཱལཾ ཝིདྷཱཡ མིཐིལཱཡ ཙཏུམྨུཁཾ ཡོ,

ཨཙྪིནྣམཏྠིཛནཔཀྑིཙཏུཔྤདཱནཾ

དཱནཾ པཝཏྟཡཱི པུརཱ དདཏཾ ཝརིཊྛོ; () (ནིམིརཱཛཙརིཡཾ)

༩. ¶

ཡོ ཨེཀརཱཛསུཏཙནྡཀུམཱརབྷཱུཏོ

མུདྡྷཱབྷིསེཀ ཀརཎཱཡ ཛནེཧི གཙྪཾ,

སཾཝེཛིཏོ སཝིབྷཝེ ཏིབྷཝེ’པི ཡཉྙཱ-

ཝཱཊཾ ཝིདྷཱཡ’བྷིཔཝཏྟཡི དཱནཝཊྚཾ; () (ཙནྡཀུམཱརཙརིཡཾ)

༡༠.

ཡོ ཝཏྠུསཱརགཧཎེན ཨཏིཏྟརཱུཔོ

བྷུམིསྶརོ’པི སིཝིནཱམ སུརཱདྷིཔསྶ,

ཛཙྩནྡྷཝེསགཧིཏསྶ ཝིལོཙནཱནི

ཨུཔྤཱཊཡིཏྭ པདདཾ ལབྷི དིབྦཙཀྑཱུ; () (སིཝིརཱཛཙརིཡཾ;)

༡༡.

དཱནཱདྷིམུཏྟིཔརམོ སསཔཎྜིཏོ ཡོ

མིཏྟེནུ སཱསིཡ ཨདྷིཊྛིཏུཔོསཐངྒོ,

ཨངྒཱརམུདྡྷནི པཔཱཏ སཛཱིཝིཏཱསཾ

ཧིཏྭཱ དྭིཛསྶ ཏནུམཾསཔདཱཏུཀཱམོ; () (སསཔཎྜིཏཙརིཡཾ; ཨིཏིདཱནཔཱརམཱིཾ)

༡༢. ¶

ཡོ མཱཏུཔོསཀཀརི བྷིསམུདྡྷརཏྟོ

ཨནྡྷཱཡ ཧཏྠིདམཀེན ཀརེཎུཀཱཡ,

སོཎྜཱཡ སུཊྛུགཧིཏོ’པྱ’ཝིཀཎྜིཏསྶ

སཱིལསྶ ཁཎྜནབྷཡཱ ནཛནེསི ཀོཔཾ; () (མཱཏུཔོསཀཙརིཡཾ)

༡༣.

ཡོ བྷུརིདཏྟབྷུཛགོ’པརིཝམྨིཀཊྛོ,

སཱིལབྦཏཾ ཝིསདྷརོ སམདྷིཊྛཧིཏྭཱ,

པེལཱ༹ཡ ཁིཏྟབྷུཛགེ ཨཧིགུཎྛིཀམྷི

སཱིལསྶ ཀུཔྤནབྷཡེན ཛཧཱསི ཀོཔཾ; () (བྷུརིདཏྟཙརིཡཾ;)

༡༤.

སཱིལབྦཏཱདིཝིབྷཝོ ཛལིཏིདྡྷིམཱ ཡོ

ཙམྤེཡྻནཱམབྷུཛགོ ཨཧིགུཎྛིཀམྷི,

ཨིཙྪཱནུརཱུཔཝིཙརོ ཙམརཱི’ཝ ཝཱལཾ

སཱིལཾ ཛུགོཔ ནཔི ཏབྦདྷཀེ ཙུཀོཔ; () (ཙམྤེཡྻཙརིཡཾ;)

༡༥. ¶

ཡོ ཙཱུལབོདྷིཝིསུཏོ སམདིཊྛཧཏྭཱ

སཱིལབྦཏཾ ཝནམུཔེཙྩ ཝསཾ པིཡཱཡ,

ཏཱཡཾ པསཡ྄ཧ གཧིཏཱཡ’པི ཀཱསིརཉྙཱ

སཱིལབྦིསོདྷནཔརོ པཛཧིཏྠ རོསཾ; () (ཙཱུལབོདྷིཙརིཡཾ)

༡༦.

ཡོ བྷིཾསརཱུཔི མཧིསོ’པི ཝལིམུཁསྶ

ཨཱགུཾ ཏིཏིཀྑམཁཱིལཾ པརིསུདྡྷསིལོ,

རུཀྑཊྛཡཀྑཝཙནཱནི པཊིཀྑིཔིཏྭཱ

ཏཾ སཱིལབྷངྒབྷཡཏོ བྷཡཏོ མུམོཙ; ()

༡༧.

ཡོ ཝུཡ྄ཧམཱནམཔནཱིཡ ནདཱིཔཝཱཧཱ

མིཏྟདྡུཧིཾ པུཏསཛཱིཝིཏདཱནཧེཏུ,

རཉྙཱ མུམོཙ ཝདྷིཡཾ ཨཝིཀོཔནེན

སཱིལསྶ རཱུརུཧརིཎོ’པི ཧརིསྶཝཎྞོ, () (རཱུརུམིགརཱཛཙརིཡཾ;)

༡༨. ¶

ཡོ དནྟཀཊྛསཀལེཧི ཛཊཱཀུལེཧི

ཀུདྡྷེན ཀུཊཛཊིལེན ཀཏཱཧིསཱཔོ,

མཱཏངྒནཱམམུནི སཱིལདྷནཾ ཛུགོཔ

སམྤཱཏསཱཔརིཔུམིདྡྷིབལེན རཀྑཾ; () (མཱཏངྒཙརིཡཾ;)

༡༩.

མགྒཱཝཏིཎྞམདྷམཾ ཀལྷཱབྷཱིལཱསཱ-

སངྒྷཊྚིཏོབྷཡརཐངྒམདྷམྨཡཀྑཾ,

ཀོཔགྒིནཱ ནཔརིཛྷཱཔཡམིདྡྷིམཱ ཡོ

སཱིལཾ རརཀྑ ཁལུ དྷམྨིཀཡཀྑརཱཛཱ; () (དྷམྨཱདྷམྨ དེཝཔུཏྟཙརིཡཾ;)

༢༠.

ཡོ པོརིསཱདཝསགསྶ ཛཡདྡིསསྶ

རཉྙོ པཊིཉྙམདྷིཀིཙྩ ཝིཛིཝིཏཱསོ,

ཁཱིཏྟཱཡུདྷོ ཏདུཔགམྨ ཨལཱིནསཏྟོ

ཡཀྑཾ དམེསི ནནུ སཱིལཝཏཾ ནིདཱནཱ; () (ཨལཱིནསཏྟཙརིཡཾ;)

༢༡. ¶

ཡོ སངྑཔཱལབྷུཛགོ ནིཛབྷོགཔཱུར-

ཝྱཱབྷངྒིབྷཱརཏརཝཱཧིཏི བྷོཛཔུཏྟེ,

ཀཱརུཉྙམཱཔ ཨབྷིགནྟུམཔཱདཏཱཡ

སཱིལསྶ བྷངྒབྷཡཏོ’པི ཧུཏཱསཏེཛོ; () (སངྑཔཱལཙརིཡཾ; ཨིཏི སཱིལཔཱརམིཾ;)

༢༢.

སངྑཱརདྷམྨཁཎབྷངྒསབྷཱཝདསྶི

ཨུསྶཱཝབིནྡུཝིལཡཾ’ཝ ཡུདྷཉྫཡོ ཡོ,

རཱཛཱ ཛནསྶ རུདཏོ པཝིཧཱཡ རཛྫཾ

ནེཀྑམྨཔཱརམིམཔུརཡི པབྦཛིཏྭཱ; () (ཡུདྷཉྫཡ ཙརིཡཾ;)

༢༣.

ཡོ སོམནསྶཝིསུཏོ ཀུརུརཱཛཔུཏྟོ

དུསྶཱིལཀུཊཛཊིལབྦཙནཾ པཊིཙྩ,

རཉྙཱ ནིཡོཛིཏཝདྷོ ཝདྷཀཱཝཀཱསཾ

ལདྡྷཱནུསཱསིཡ’བྷིནིཀྑམི ཙཏྟརཛྫོ; () (སོམནསྶ ཙརིཡཾ;)

༢༤. ¶

ཡོ ཀཱསིརཱཛཏནུཛོ’པི ཨཡོགྷརཱཁྱོ

ཨཱིཧཾ བྷཏོ ཙིརམཡོགྷརཝཱསཧཱིརཱུ,

རཛྫཾ པཧཱཡ པརམཾ པིཏརཱ པདཏྟཾ

ནེཀྑམྨཔཱརམིཔརོ ཝནམོཏརིཏྠ; () (ཨཡོགྷརཙརིཡཾ;)

༢༥.

ཡོ པཉྩཀཱམགུཎདཱིཔནཏོ’པདིཊྛ-

སམྦྷཏྟམིཏྟཝཙནམྤི པཊིཀྑིཔིཏྭཱ,

ནིདྡྷནྟཀཉྩནནིབྷཙྪཝི ཀཉྩནཱཁྱོ

པཏྭཱ ཏཔོཝནམཔབྦཛི བནྡྷཝེཧི; () (བྷིསཙརིཡཾ;)

༢༦. ¶

པཀྑིཏྟདདྡུལནཧཱརུརིཝཱ’ནལམྷི

སངྑཱརདྷམྨཝིསཡེ པཊིཝཊྚིཏཏྟོ,

ཡོ སོཎབྷུསུརསུདྷཱི ཝིབྷཝཾ པཧཱཡ

པབྦཛྫིཏུཾ སཔརིསོ པཝནཾ ཛགཱམ; () (སོཎཔཎྜིཏཙརིཡཾ; ཨིཏི ནེཀྑམྨ པཱརམི;)

༢༧.

ཡོ སེཎཀོ སུདྷི པསིབྦཀགབྦྷསཱཡིཾ

ཝིཔྤསྶི མོཧཀལུསིཀཏམཱནསསྶ,

སཔྤཾ སུགྷོརམུཔདསྶིཡ དཱིགྷདསྶཱི

པཉྙཱསུཔཱརམིམཔཱུརཡི བྷུརིམེདྷོ; () (སེཎཀཔཎྜིཏ ཙརིཡཾ;)

༢༨.

ཡོ ཡཾ མཧོསདྷསམཱཁྱསུདྷཱི སུདྷཱིསོ

ཨུམྨགྒསཾཝུཏནིསགྒཝཏིསམོ’པི,

ཨུམྨགྒཏོ’ཝ སབལཾ མིཐིལཱདྷིནཱཐཾ

པཉྙཱཔཛཱཔཏིཔཏི རིཔུཏོ མུམོཙ; () (མཧོསདྷཙརིཡཾ ཨིཏི པཉྙཱ པཱརམཱི;)

༢༩. ¶

ཝཱལེནུ’ལཱ༹རཝཱིརིཡོ ཝཱིརིཡེན གྷོརཾ

སཾསཱརདུཀྑམིཝ ཡོ ཀིསཀཱལཀོ’པི,

གམྦྷཱིརསཱགརཛལཾ སཔཛཱནུཀམྤཱི

ཨུསྶིཉྩིཏུཾ སཏཏམཱརཧི སཏྟསཱརོ; () (ཀཱལཀ ཙརིཡཾ)

༣༠.

རཱཛཱམཧཱདིཛནཀོ ཛནཀུནྡཙནྡོ

གམྦྷཱིརབྷུརིསལིལཾ སལིལཱཀརཾ ཡོ,

སཱུརོ’རུབཱཧུཝཱིརིཡོ ཝཱིརིཡཾ ཏཏཱར

སཾསཱརསིནྡྷུཏརཎེ ཏརཎཱིསརཱུཔོ; () (མཧཱཛནཀཙརིཡཾ; ཨིཏི ཝཱིརིཡཔཱརམི;)

༣༡.

ཡོ ཁནྟིཏིནྟཧདཡོ ཡཏིཁནྟིཝཱདཱི

ཚེདཱཔིཏེ’པི སཀལཾ སཀལཏྟབྷཱཝེ,

སམཔཱུཏཁནྟིཛལམེཝབྷཱུསཾ སིསེཙ

ཝྱཱཔཱདཔཱཝཀཔདིཏྟཀལཱབུརཱཛེ; () (ཁནྟིཝཱདཱི ཙརིཡཾ)

༣༢. ¶

ཡོ དྷམྨཔཱལནཔརོ སུསུ དྷམྨཔཱལོ

ཀཱརཱཔིཏེ’པི ཝདྷཀེཧ’སིམཱལཀམྨཾ,

ཨཱསནྣཏཱཔནིརཡམྷི པཏཱཔརཱཛེ

ཁནྟིཾ པཝཏྟཡི མནཔྤིཏཁནྟིམེཏྟོ; () (དྷམྨཔཱལ ཙརིཡཾ; ཨིཏི ཁནྟིཔཱརམཱི;)

༣༣.

ཡོ ཨནྟརཱིཔགབྷཡཾཀརསུཾསུམཱར-

མུདྡྷཱསམཔྤིཏཔདོ ཀཔིརཱཛབྷཱུཏོ,

དིནྣཾ པཊིཉྙམནུཀུབྦམནཉྙལབྦྷཾ

ནཛྫཱ པཔཱཏ པརཏཱིརམསཙྩབྷཱིརཱུ; () (ཀཔིརཱཛ ཙརིཡཾ)

༣༤. ¶

ཡོ སཙྩཔཱརམིཔརོ ཝསི པཙྩནཱམོ

སཙྩེན སཙྩམཧཱིསནྡྷིཡ སཙྩདསྶཱི,

པོརིཾ སམགྒཀརཎིཾ སིརིཛམྦུདཱིཔེ

སམྤཱལཡཾ སཀལལོཀམཝོཙ ཝཱཙཾ; () (སཙྩསཝྦྷཡ ཙརིཡཾ;)

༣༥.

ཡོ ཝཊྚཔོཏཀདིཛོ ཨཝིརཱུལ༹ྷཔཀྑ-

པཱདོ’ཏིཁུདྡཀཀུལཱཝཀགབྦྷསཱཡཱི,

སཙྩེན སོལ༹སཀརིསམིཏཔྤདེསེ

དཱཝགྒིནིབྦུཏིམཀཱ ཐིརམཱཡུགནྟཾ; () (ཝཊྚཔོཏཀ ཙརིཡཾ;)

༣༦.

ཡོ གིཛ྄ཛྷཀཱཀབཀབཱཎཀབྷཀྑབྷུཏ-

བནྡྷུ ནིདཱགྷརཝིཏཱཔཔརིཀྑཡཱ’པེ,

རིཏྟེ སརམྷི པརིམོཙཡི མཙྪརཱཛཱ

སཙྩེན’ཀཱལཛལདཱགམཔཙྩཡེན; () (མཙྪརཱཛ ཙརིཡཾ;)

༣༧. ¶

དུཊྛཱཧིདཊྛཝིསཝེགཝིམུཙྪིཏཾ ཡོ

མཎྜབྦཏཱཔསཝརོ’རསཡཉྙདཏྟཾ,

ཀཏྭཱན སཙྩཀིརིཡཾ ཀརུཎཱཡ ཀཎྷ-

དཱིཔཱཡནོ མུནི མུམོཙ ཏམཱཔདམྷཱ; () (ཀཎྷཱདཱིཔཱཡན ཙརིཡཾ;)

༣༨.

ཡོ པོརིསཱདཝསགོ སུཏསོམརཱཛཱ

རཛྫེ ཏིཡོཛནསཏེ སཀཛཱིཝིཏེ’པི,

སཙྩཾ རརཀྑ ནནུ སཙྩཔརོ ནིརཱསོ

དིནྣཾ པཊིསྶཝམུབྷིནྣམཔཱནུཀུབྦཾ; () (སུཏསོམཙརིཡཾ; ཨིཏི སཙྩཔཱརམཱི;)

༣༩.

ནིབྦིནྣརཛྫཝིབྷཝོ བྷཝབྷཱིརཱུཏཱཡ

ཡོ མཱུགཔཀྑབདྷིརཱཀཏི མཱུགཔཀྑོ,

ནཱིཏེ ནིཁཱཏུམཔཀི སཱིཝཐིཀཱཝཀཱསེ

དལ༹ྷཾ ཨདྷིཊྛིཏཝཏཾ ཝཏ ནོཛཧཱསི; () (ཏེམིཡཙརིཡཾ; ཨིཏི ཨདྷིཊྛཱན པཱརམཱི;)

༤༠. ¶

མེཏྟཝིཧཱརཔརམོ པིཏུརནྡྷཡཊྛི

ཡོ སོམསོམྨཡདཡོ’པི སུཝཎྞསཱམོ,

ཝཱལེ༹ཧི སམྤརིཝུཏོ པཝནེ ཝིཧཱརི

མེཏྟཱཁྱཔཱརམིམཔཱུརཡི པཱཔབྷཱིརཱུ; () (སུཝཎྞསཱམཙརིཡཾ;)

༤༡.

ཡོ ཨེཀརཱཛཝིསུཏོ བྷུཝི ཀཱསིརཱཛཱ

མེཏྟཱཀལཏྟདུཏིཡོ སཀཛཱིཝིཏེ’པི,

ཨཝཚིནྣརཛྫཝིབྷཱཝེ པཊིཔཀྑརཱཛེ

མེཏྟཱཡ སམྥརི སམཾ པརིབྷཱཝིཏཱཡ; () (ཨེཀརཱཛཙརིཡཾ; ཨིཏི མེཏྟཱ པཱརམཱི;)

༤༢. ¶

ཡཱ ལོམེཧཾསཝིསུཏོ’པི ཏུལཱསརིཀྑོ

མཱནཱཝམཱནནཀརེསུ སུཁེ ཙ དུཀྑ,

ཝཱསཾ ཙཝཊྛིཔརིཀིཎྞསུསཱནམཛ྄ཛྷེ

ཝེརཾ ཨཝེརམནུཔེཙྩ རརཀྑུ’པེཀྑཾ; () (ལོམཧཾསཙརིཡཾ; ཨིཏི ཨུཔེཀྑཱཀ པཀཱརམིཾ)

༤༣.

སོ བོདྷིཡཱ’བྷིནིཡཏོ པརིཔཀྐཉཱཎོ

བུདྡྷངྐུརོ’པཙིཏཔཱརམིཏཱབལེན,

ནིཛ྄ཛྷཱམཏཎྷ’སིཏཀཉྫཀྑུཔྤིཔཱས-

ལོཀནྟརོརུནིརཡེསུ ན ཛཱཏུ ཛཱཏོ; ()

༤༤.

ནཱལཏྠ པཎྜཀནཔུཾསཀམཱུགཔཀྑ-

ཚཙྩནྡྷཛཱཏིབདྷིརིཏྠིཛལ༹ཏྟབྷཱཝཾ,

སོ མཀྑིཀཱམཀསཀུཏྠཀིཔིལླིཀཱདི-

ཛཱཏྱཱ ནཔཱཏུབྷཝི ཀཱིཊཔཊངྒཛཱཏྱཱ; ()

༤༥. ¶

ནཱལཏྠ གནྡྷགཛཏོ པུཐུལཏྟ བྷཱཝཾ

ནཱལཏྠ ཝཊྚསུསུཀཱ སུཁུམནྟ བྷཱཝཾ,

ནཱལཏྠ ཨུམྡནམམྨནཀཏྟ བྷཱཝཾ

ནཱལཏྠ ཨེཝམཏིཧཱིནཏརཏྟ བྷཱཝཾ;

༤༦.

ནཱཧོསི མཱཏུཝདྷཀོ པིཏུགྷཱཏཀོ ཝཱ

ནཱཧོསི སངྒྷབྷིདུརོ ཨརཧནྟགྷཱཏོ,

ནཱཧོསི དུཊྛཧདཡེན ཏཐཱགཏསྶ

ནཱཧོསི སཾཛནནཀོ རུདྷིརསྶ ཀཱཡེ; ()

༤༧.

ཀམྨཾ ཕཁལཾ ཏདུབྷཡཾ པཊིབཱཧིནོ ཡེ

ཨུཙྪེདདིཊྛིགཏིཀཱ ཝིཧརིཾསུ ཏེསཾ,

ལདྡྷིཾ ཀདཱཙི ནཔརཱམསི སདྡཧཱནོ

ཀམྨཾ ཕལཾ ནིཡཏབོདྷིཔརཱཡཎོ སོ; ()

༤༨. ¶

ཡསྨིཾ བྷཝེ བྷཝཏི ནཱམཙཏུཀྐམཏྟཾ

ཏཏྲཱ’པི པུཉྙཀརཎཏྠ མསཉྙསཏྟེ,

ཨཊྛཱནཏོ ནཔཊིསནྡྷིམགཎྷི སུདྡྷཱ-

ཝཱསེསུ པཉྩསུ ཀདཱཙི པཔཉྩབྷཱིརཱུ; ()

༤༩.

བུདྡྷངྐུརོ ནིཡཏབོདྷིཔདོ ཀདཱཙི

དཱིགྷཱཡུཀེསུ’པིབྷཝེསུ སུཁཱནཔེཁོ,

ཀཏྭཱ’དྷིམུཏྟིཝཙནཾ ཨིདྷ ཛཱིཝལོཀེ

ནིབྦཏྟི སོ ཏིདསཔཱརམིཔཱུརཎཏྠཾ; ()

༥༠.

ཨིཙྩེཝཾ སོ པུརིསནིསབྷོ དུཔྤཝེསསྶ བོདྷི-

པཱསཱདསྶཱ’ཝཏརཎསམཏྟིཾསཏིསྶེཎིརཱུཔཾ,

ནིཔྥཱདེནྟོ པརཧིཏརཏོ པཱརམཱིདྷམྨཛཱཏཾ

སཾསཱརེ སཾསརི ཙིརཏརཾ གྷོརདུཀྑཾ ཏིཏིཀྑཾ; ()

ཨིཏི མེདྷཱནནྡཱབྷིདྷཱནེན ཡཏིནཱ ཝིརཙིཏེ སཀལཀཝིཛན ཧདཡཱནནྡ དཱནནིདཱནེ ཛིནཝཾསདཱིཔེ དུརེནིདཱནེ པཱརམིདྷམྨཱབྷིསངྑརཎ པཝཏྟི པརིདཱིཔོ ཙཏུཏྠོ སགྒོ.

༡. ¶

ཨཏྠཝཏྟཔདཾ ནཱནཱཝཎྞམཎྞཝཛཱནྭིཏཾ,

པཏྠྱཱཝཏྟམིཝཱཧོསི ཛེཏུཏྟརཔུརཾ པུརེ; () (སིལེས བནྡྷནཾ;)

༢.

པརིཁཱམེཁལཱདཱམ བདྡྷཔཱཀཱརསོཎིནཱི,

རརཱཛ རཱཛདྷཱནཱི སཱ ཝདྷཱུཝ པཏིམཎྜིཏཱ; ()

༣. ¶

མཎིསིངྒཾསུམཱལཱབྷི བཱལཾསུམཱལིཝིབྦྷམཾ,

སསངྐམཎྜལཾ ཏསྨིཾ པལམྷེསཱ’བྷཱིསཱརིཀཱ; ()

༤.

ཨིནྡིརཱམནྡིརཱ’མནྡམཎིམནྡིརསཱལིནཱི,

ཧེམདྡྷཛཱཝལི ཏསྨིཾ ཀིལཱ༹པཡི ཀལཱཔིནོ; ()

༥.

རརཱཛ ནཱགརཱཛཱནཾ ཀཔྤིཏཱབྷརཎེཧི ཙ,

དཱཋཱཧི དཱནདྷཱརཱཧི མེགྷཝཙྪནྟཱ’ཝ སཱ པུརཱི; ()

༦.

ཏུརངྒནིཀརོཎྜུཏདྷུལིདྷཱུསརིཏམྦརཾ,

ནིཝཱརིཏཱཏཔཾརངྒཝིཏཱནསྶིརིམཱཧརི; ()

༧. ¶

ནཱིལསེཝཱལདྷམྨིལླཱ སམྥུལླཀམལཱ’ནནཱ,

ཏཧིམུཔྤལལོལ’ཀྑཱི ཧཾསཔཱིནཔཡོདྷརཱ; ()

༨.

ཀིཉྫཀྑརཱཛིརསཱནཱརུདྡྷརོདྷནིཏམྦིནཱི,

བྷིངྒཱལིམཎིམཉྫིརཱ ནཱརཱི’ཝཱ’སུཾ སརོཛིནཱི; () (སིལེས བནྡྷནཾ;)

༩.

ཀེཝཀལཾ ཀཔྤརུཀྑེཧི ཝིནཱ སཱ རཱཛདྷཱནྱ’ཧུ,

ཝིསཱཎཱརཱཛདྷཱནཱི’ཝ སབྦསམྤཏྟིསཱལིནཱི; ()

༡༠.

ཀདཱཙི པུརིསཱཛཉྙོ རཱཛཱ’ཧོསི པུརེ ཏཧིཾ,

ཝེསྶནྟརོ’ཏིནཱམེན ཝིསྶུཏོ བྷུཝནཏྟཡེ; ()

༡༡. ¶

ཀུམཱརོ’ཝ སམཱནོ སོ དཱནཀཱིལཱ༹པརཱཡཎོ,

ཀཱཡཱུཔགཱནི དྷཱཏཱིནཾ རཏནཱབྷརཎཱནི’པི; ()

༡༢.

ཁཎྜཱཁཎྜཾ ཀརིཏྭཱན ནཝཀྑནྟུཾ ཀཔརིཙྩཛི,

ཨེཝཾ བཱཧིརཝཏྠཱུནིདདནྟོ ཨཊྛཝསྶིཀོ; ()

༡༣.

པཱསཱདམབྷིརཱིཧིཏྭཱ སོནིསཛྫཱ’བྷིཡཱཙནཾ,

དསྶཱམཱི’ཏི ཝིཙིནྟེསི སིསཀྑིམཾསལོཧིཏཾ; ()

༡༤.

སུཁེདྷིཏོ མཧཱསཏྟོ སུཀྐཔཀྑེ’ཝ ཙནྡིམཱ,

པཱལེསི དསདྷམྨེན པཏྭཱ རཛྫསིརིཾ པཛཾ; ()

༡༥.

ནིསཛྫོ པརིཔཱསཱདེ སོ རཱཛཱ ཨེཀདཱ རཧོ,

ཀཱམཱནཾ སངྐིལེསཉྩ ཝོཀཱརཱདཱིནཝཾ སརི; ()

༡༦. ¶

པབྦཛྫཱཧིརཏོ རཱཛཱ ནིབྦིནྟོ ཝིབྷཝེབྷཝེ,

སམྤཏྟིསཱརམཱདཱཡ ཧིཏྭཱ རཛྫསིརིཾ ཝརཾ; ()

༡༧.

མཏྟམཱཏངྒརཱཛཱ’ཝ ཨགྒིཔཛྫལཀཱནནཱ,

རུདཏོ ཉཱཏིསངྒྷསྶ ཨགཱརསྨཱ’བྷི ནིཀྑམཱི; ()

༡༨.

ཙམྤཀཱསོཀཝཀུལཏརུསཎྜསུམཎྜིཏཾ,

སིཁཎྜིམཎྜལཱཁཎྜཀཱིལ༹ཾ ཀོཀིལཀཱུཛནཾ; ()

༡༩.

ཨནེཀམིགཔཀྑཱིནམཱསཡཾ སལིལཱསཡཾ,

ཝཱིཀཱསཀུསུམཱམོདཔྤཝཱསིཏསམཱིརཎཾ; ()

༢༠.

མདྷུམཏྟཱ’ལིངྡྷངྐཱརནིབྦྷར’མྦུརུཧཱཀརཾ,

སམྤཱཏནིཛ྄ཛྷརཱ’རཱཝགམྦྷཱིརབྷུརིབྷཱུདྷརཾ; ()

༢༡. ¶

པཝཝེཀཀྑམཾ ཝངྐཔབྦྷཱརཾ གིརིགབྦྷརཾ,

དུཔྤཝེསཔཀཐཾ ཝངྐགིརིནཱམཏཔོཝནཾ; ()

༢༢.

པཏྭཱ ལདྡྷེ’སིཔབྦཛྫཱ ཀཝིལཱསོ སོ མཧཱིབྷུཛོ,

ཙརནྟོ བྲཧྨཙརིཡཾ ཙིརསྶཾ ཝཱིཏིནཱམཡི; ()

༢༣.

ཏསྶརཉྙོ མཧེསིཔི མདྡཱིནཱམ སུཁེདྷིཏཱ,

པུཏྟདྷཱིཏཱུབྷིསདྡྷིཾ ཏཾ ཏཔོཝནམུཔཱཝིསི; ()

༢༤.

མཧིཙྪོ པཱུཛཀོཝིཔྤོ ཏདཱ བཱིགཙྪདསྶནོ,

ཡེན ཝེསྶནྟརོསཏྟསཱརོ ཏེནུཔསངྐམི; ()

༢༥. ¶

ཨཏྠོ ཀམྨཀརེཧཱི’ཏི ཛརཱཛཛྫརིཏསྶ མེ,

པུཏྟཉྩདྷཱིཏརཾ ཡཱཙཱི དྷཱིརཾ པཏྭཱ དཡཱཔརཾ; ()

༢༦.

ཨུབྷོ ཀཎྷཱཛིནཾ ཛཱལིཾ སསེནཧབྷཱརབྷཱཛནཾ,

སམྨཱསམྦོདྷིཀཱམོ སོ ཏཎྷཱདཱསབྱམུཏྟིཡཱ; ()

༢༧.

དཀྑིཎོདཀསམྤུཏཛཱུཛཀ’ཉྫལིབྷཱཛནེ,

སམཔྤཡིཏྠ བནྡྷིཏྭཱ ཨགམཱ’དཱཡ ནིདྡཡོ; ()

༢༨.

དཱནཱདྷིམུཏྟཱིཝཱིམཾསཱི ཝིཔྤཱཀཔྤེནུ’པཱགཏོ,

སཾཡཱཙི དེཝརཱཛཱ’ཐ མདྡིདེཝིཾ པཏིབྦཏཾ; ()

༢༩.

དཀྑིཎོདཀནིདྡྷོཏཧཏྠོ སོ དཀྑིཎོདཀཾ,

ཀཏྭཱ དེཝེསཝིཔྤསྶ དེཝིཾ དེཝོ པརིཙྩཛི; ()

༣༠. ¶

སཏྟཀྑཏྟུཾ པཀམྤིཏྠ ཏསྶ པཱརམིཏེཛསཱ,

སཱདྷུསཱདྷཱུཏི པཏྟཱནུམོདནྟཱི’ཝ མཧཱིཝདྷཱུ; ()

༣༡.

ཨིཙྩེཝཾ པུརིསཱརཉྙོ པརིཔཱཙིནཔཱརམཱི,

མཎིརཾསིསྨུཛྫོཏ པཱསཱདསཏལངྐཏེ; ()

༣༢.

མནྡམནྡཱནིལོཎྜཱུཏ པཉྩཝཎྞདྡྷཛཱལཱིནཾ,

མཎིཀིཾཀིཎིཛཱལཱནུརཱཝསོཏརསཱཡནེ; ()

༣༣.

དིབྦེཧི ནཙྩགཱིཏེཧི ཝཱདིཏེཧི མནོརམེ,

ཀནྡཔྤམཎྜཔཱཀཱར རངྒམཎྜཔམཎྜིཏེ; ()

༣༤.

དིབྦནྟདིབྦརཱཛཱུནཾ ཨིནྡཙཱཔསཏེཧི’ཝ,

ཙཱུལཱ༹མཎཱིམརཱིཙིཧཱི སམྦཱདྷཱིཀལི༹ཏ’མྦརེ; ()

༣༥. ¶

ཨཙྪརཱཧི ཀུཙཉྩནྡནམིཏངྒཱིཧི དཱུརཏོ,

ཝིདྷཱུཏཙནྡིཀཱརཱཛི ཙཱརུཙཱམར མཱརུཏེ; ()

༣༦.

སུཏྟཔྤབུདྡྷཔོསོ’ཝ ཏུསིཏེ ཏིདསཱལཡེ,

ཏཏོ ཙཝིཏྭཱ ནིབྦཏྟི ཧུཏྭཱ སནྟུསིཏ’ཝ྄ཧཡོ; ()

༣༧.

དིབྦེསུ པཉྩཀཱམེསུ ཝསནྟོ ཏུསིཏཱལཡེ,

པཉྩིནྡྲིཡཱནི ལོཀེཀལོཙནོ པརིཙཱརཡི; ()

༣༨.

ཏདཱ དསསཧསྶེསུ ཙཀྐཝཱལེ༹སུ དེཝཏཱ,

ཨེཀཏྠ སནྣིཔཏིཏཱ སུཏྭཱ བུདྡྷཧལཱ༹ཧལ༹ཾ; ()

༣༩.

ཏེནོ’པསངྐམིཏྭཱན ཡེནཱ’སི པུརིསུཏྟམོ,

ཀཏྭཱ ཏབྦདནམྦྷོཛཾ ནཡནཱལིཀུལཱལཡཾ; ()

༤༠. ¶

ཙཱུལཱ༹མཎིམཡུཁམྦུཏིདྡྷོཏཙརཎཱསནེ,

བདྡྷཉྫལིཔུཊམྦྷོཛམཀུལཱཏི སམཔྤཡུཾ; ()

༤༡.

ཙཀྐཝཏྟིཔདཾ སཀྐམཱརབྲཧྨཔདཏཡཱ,

ནཁོ མཱརིས པཏྠེཏྭཱ པཱརམཱི པརིཔཱཙིཏཱ; ()

༤༢.

ཝེནེཡྻབནྡྷུབྷུཏེན སམྨཱསམྦོདྷིམིཙྪཏཱ,

ཏཡཱ མཱརིས ཀིཙྪེན པཱུརིཏཱ དསཔཱརམཱི; ()

༤༣.

སདེཝཀསྶ ལོཀསྶ ཧིཏཱཡ མཱཏུཀུཙྪིཡཾ,

ཨུཔྤཛྫཏཱུཏི ཡཱཙིཾསུ ཏཾདྷཱིརཾ ཀརུཎཱཔརཾ; ()

༤༤.

སཏཝསྶཱཡུཧེཊྛཱཔི ཨུདྡྷཾ སཧསཧསྶཏོ,

ཡསྨཱ ཨཀཱལོ བུདྡྷཱནཾ ཏསྨཱ ཀཱལཾ ཝིཔསྶི སོ; ()

༤༥. ¶

ཡསྨཱ ཨཉྙེསུ དཱིཔེསུ སམྦུདྡྷཱ ནོཔཔཛྫརེ,

ཛཱཡནྟི ཛམྦུདཱིཔསྨིཾ ཏསྨཱ དཱིཔཾ ཝིཔསྶི སོ; ()

༤༦.

ཡསྨཱ མིལཀྑདེསེསུ ནཱུཔྤཛྫནྟི ཏཐཱགཏཱ,

ཛཱཡརེ མཛ྄ཛྷིམེ དེསེ ཏསྨཱདེསཾ ཝིཔསྶི སོ; ()

༤༧.

ཡསྨཱ ནཛཱཡརེ ཝེསྶསུདྡཏྭཡེསུ ཛཱཡརེ,

ཁནྟིཡེ བྲཱཧྨཎེ བུདྡྷཱ ཀུལཾ ཏསྨཱ ཝིཔསྶི སོ; ()

༤༨.

ཡསྨཱ ཨནཉྙཝིསཡཱ ཀུཙྪི སམྦུདྡྷམཱཏུཡཱ,

ཏསྨཱ ཨཱཡུཔརིཙྪེདཝསེན པསྶི མཱཏརཾ; ()

༤༩.

ལོཀེཀལོཙནོ ཨེཝཾ ཀཏྭཱ པཉྩཱཝལོཀནཾ,

ཏཱསཾ པཊིཉྙཾ པཱདཱསི ཀརུཎཱཔུཎྞམཱནསོ; ()

༥༠. ¶

ཏཔྤཱདཏཱམརསཙུམྦིཏ མོལི༹མཱལཱ

སམྤཏྟདེཝཔརིསཱ’ནྟརདྷཱཡི ཏཱཝ,

ཨོགཡ྄ཧ ནནྡནཝནཾ ཏུསིཏཱདྷིརཱཛཱ

ཏམྷཱ ཙཝཱི མཏིདཡཱདཡིནཱསབྷཱཡོ; ()

ཨིཏི མེདྷཱནནྡཱབྷིདྷཱནེནཡཏིནཱ ཝིརཙིཏེ སཀལཀཝིཛན ཧདཡཱནནྡདཱནཏིདཱནེ ཛིནཝཾསདཱིཔེ དུརེནིདཱནེ ཝེསྶནྟརཙརིཡཔྤབྷུཏིདེཝཱརཱདྷནཱ པཝཏྟི པརིདཱིཔོ པཉྩམོ སགྒོ.

ཛིནཝཾསདཱིཔེ དཱུརེནིདཱན བྷཱགོ པཋམོ.

༡. ¶

ཡཱ སཏྟསཱརཔབྷཝཱ སིརིཛམྦུདཱིཔེ

ཕཱིཏཱ’མརཱཝཏིཔུརཱི’ཝ པུརཱིཝཏཾསཱ,

ཨཱདིཙྩཝཾསིཀནརིནྡཔཝེཎི བྷཱུམི

ལཀྑྱཱལཡཱ ཀཔིལཝཏྠུཔུརཱི པུརེ’སི; ()

༢.

ཝཎྞེཧི ཀཎྞསུཁསདྡརསེཧི ཛཱཏ-

རཱུཔེཧི ཨཏྠཝིསརེཧི ཡཏཱིཧི ཡུཏྟཱ,

ཡཱ རཱཛདྷཱནི པུཐུཔཱཎགཎཔྤདེཧི

ཨཱསཱི (ཝསནྟཏིལཀཱ) རཙནཱ ཡཐེཝ; () (སིལེས བནྡྷནཾ;)

༣. ¶

པཱཙཱིདིསཱབྷུཛལཏཱཡ མཧཱིཡུཝཏྱཱ

སནྣདྡྷསངྑཝལཡསྶིརིམཱཝཧནྟཾ,

ཡསྶཱ སུདྷཱསུཔརིཀམྨཀཏཾ རརཱཛ

པཱཀཱརཙཀྐམཙལཾ མཀུཊཱནུཀཱརཾ; ()

༤.

ཡསྶཱ རརཱཛ པརིཁཱ ནགརིནྡིརཱཡ

ཀིཉྫཀྑིཉྫརིཏཏཱིརདསཱབྷིརཱམཱ,

སཾསིབྦིཏཱལིཝིཏྟཱིམཎིཏནྟུཔནྟཱི

པཱཀཱརསོཎིབྷརཏོ གལིཏམྦརཾ’ཝ; ()

༥.

ཀནྡཔྤདཔྤམདིརཱམདམཏྟདྷུཏྟཱ

མནྡཱནིལེརིཏསུནཱིལལཏཱཝིཏཱནཾ,

ཡསྨིཾ ཝིལོལནཡནཉྫལིཔིཡམཱནཾ

ཨཱཔཱནབྷུམིནིབྷམོཔཝནཾབྷཛིཾསུ; ()

༦. ¶

མཏྟངྒནཱཡ ནཝཡོབྦནགབྦིཏཱཡ

རངྒཱལཡགྒམཎིདཔྤཎབིམྦིཏེཧི,

ཡཱ རཱཛདྷཱནི གྷནཔཱིནཔཡོདྷརེཧི

སོམྨཱནནེཧི བྷཛི མཱནསཝཱཔིསོབྷཾ; ()

༧.

སངྐཔྤིཏཱབྷརཎརཾསི སཏེརཏཱལཱི

དཱཋཱབལཱཀཝིསརཱ མདཝུཊྛིདྷཱརཱ,

ཡསྨིཾ པུརེ གྷརམཡཱུརཀུལཾ ཨཀཱལེ

ཀཱིལཱ༹པཡིཾསུ ཝརཝཱརཎཝཱརིཝཱཧཱ; ()

༨.

པཱཀཱརཙཀྐབཧིནིགྒཏ མུགྒརཱགཾ

ཡསྨིཾ ཏུརངྒནིཀརུདྡྷཊདྷཱུལིཛཱལཾ,

རཙྪཱཝཏཱརཛནཏཱཡ ཁཎཾ ཛནེསི

བྷཱིཏིཾ པདིཏྟཔལཡཱནལཛཱལསོབྷཾ; ()

༩. ¶

ཡསྨིཾ ཝིམཱནམཎིསིངྒཛུཏིཔྤབནྡྷ-

སཉྩུམྦིཏཾ ཛིཏརཝིཾ ཧརིཎྜཀབིམྦཾ,

ནཱརཱིཛནཱནནསརོཛཀཏཱཝམཱནཾ

ཀོདྷཱབྷིབྷུཏམིཝ ཝཎྞཝིཀཱརམཱཔ; ()

༡༠.

ཡཏྠིསྶརེཧི སམདྷིགྒཧིཏཱནི ཏུངྒ-

ཀེལཱསཀུཊདྷཝལཱཏི མནོཧརཱཏི,

ནིཙྩཾ སུདྷཱསུཔརིཀམྨཀཏཱནི ཙཱ’སུཾ

ལཀྑཱིནིཀེཏནནིབྷཱནི ནིཀེཏནཱནི; ()

༡༡.

ཡཏྠིནྡནིལམཎིམཱཔིཏམཎྜཔགྒེ

ཧེམདྡྷཛཱཝལིཔརིབྦྷམཎཾཀ པུརམྷི,

ཛཱིམཱུཏཀཱུཊཔམུཁེ སཏཝིཛྫུམཱལཱ-

ལཱིལཱཝཧཾ ཝིརཧིནཱིནམགྷཾ ཛནེསི; ()

༡༢. ¶

སཉྫྷཱནུརཱགམཎིཏོརཎདཱིདྷིཏཱིཧི

བྷིནྣནྡྷཀཱརནིཀརཱ’ཁིལནཱགརཱནཾ,

ཡཱ རཱཛདྷཱནི ཛནཡནྟིཔི ཏུངྒཏུཊྛིཾ

པཱིཏྱཱ ནཝཱསི རཛནཱིསྨ བྷིསཱརིཀཱནཾ; ()

༡༣.

སེཝཱལཀེསརསམཱཀུལཏཱིརབྷཱགཱ

སམྥུལླརཏྟཔདུམུཔྤལཀལླཧཱརཱ,

ཧཾསཱལིསཱརསསམོསརཎཱབྷིརཱམཱ

ཡསྨིཾ སུནིམྨལཛལཱ ཀམལཱཀརཱསུཾ; ()

༡༤.

ཡསྨིཾཔུརེ ཀུལཝདྷཱུཝདནམྦུཛཱནཾ

ལདྡྷུཾ ནིརཱུཔམསིརིཾ བྷུསམུསྶཧནྟཱ,

ཡཱཝཛྫ སེཏསརསིརུཧསཱིཏརཾསཱི

ཨཉྙོཉྙབདྡྷཔཊིགྷཱ’ཝ ཝཛནྟི ནཱསཾ; ()

༡༥. ¶

ཡསྨིཾ སུཝཎྞམཀཎིརཱུཔིཡཝཾསཝཎྞ-

མུཏྟཱཔཝཱལ༹ཙཛིརེཧི མཧཱརཧེཧི,

ནཱནཱཔཎཱ སུཁུམཀཱསིཀསཱཎཧངྒ-

ཀོསེཡྻཁོམཝསནེཧི’བྷཝུཾ པཔུཎྞཱ; ()

༡༦.

ཙཀྐཱསིསཏྟིདྷནུཀུནྟགདཱདིབྷཏྠཱ

སནྣདྡྷཧེམཀཝཙཱ ཝིཛིཏཱརིཝགྒཱ,

སངྒཱམསཱགརསམུཏྟརཎཱཏིསུརཱ

ཡོདྷཱ ཡཧིཾ པུརཝརེ ཨཀརིཾསུ རཀྑཾ; ()

༡༧.

ཕཱུཊྛཱ ཀ ཝཱཊནིཀཊེ མཎིམནྡིརཱནཾ

ཀཔྤཱསཔཊྚདྷཝལཱ སརདབྦྷརཱཛཱི,

ཡསྨིཾ ཁཎཾ ཛཝནིཀཱསིརིམཱདདྷཱནཱ

ཐཱིནཾ ཛུགོཔ མདྷུཔེཧི མུཁམྦུཛཱནི; ()

༡༨. ¶

ནིབྦིདྡྷཝཱིཐིཝིསརེཧི སུསཛྫིཏེཧི

ནིཙྩུསྶཝཱཡ པུརམུསྶིཏཏོརསེཧི,

བྷོགིནྡབྷོགནིཀརེཧི རསཱཏལཾ’ཝ

ཡཾ སམྤསཱརིཏཕཎེཧི བབྷུཝ རམྨཾ; ()

༡༩.

ཡསྨིཾཔུརེ ཝིཝཊམནྡིརཛཱལཀཱནཾ

ཨུདྡྷཱུཏདྷུལིམལིནཱིཀལི༹ཏཱལཀཱནཾ,

ནཱརིནམིནྡུརུཙཱིརཱནན དཔྤཎེསུ

ལོཀསྶ ལོཙནམཎི པཊིབིམྦིཏཱ’སུཾ; ()

༢༠.

གམྦྷཱིརསངྑཔཊབྷདྡྷནིབྷཱུརིགྷོསཾ

ཀེལཱསཀཱུཊདྷཝལཱལཡཕེཎཔིཎྜཾ,

ཡཾ པུཎྞསཏྟརཏནཾ པུརཁཱིརསིནྡྷུཾ

ལཀྑཱི ཨལངྐརི ཏུརངྒཏརངྒཝེགཾ; ()

༢༡. ¶

རེཎུཔྤབནྡྷམལིནཾ ཀཝནརཱཛིནཱིལཾ

མདྷཝཱཏིམཏྟམདྷུཔཾ པདུམཱབྷིརཱམཾ,

ཡཾ རཱཛཧཾསབྷཛིཏཾ ཨཝཏིཎྞལོཀཾ

ཨཱསི པུརཾ ཝིཀཙཀཉྫཝནཾ ཡཐེཝ; () (སིལེསབནྡྷནཾ;)

༢༢.

ཡསྨིཾཔུརམྷི རཏནུཛྫལནཱིལཀཎྛཱ

རཱགཱཝམདྡིཏདྷརཱ’ཝིཝཊདྭིཛཱལི,

ཨཱསུཾཔཡོདྷརབྷརཱ’ཝིརལ༹པྤདེསཱ

སམྤཏྟཝུཊྛིདིཝསཱཝིཡམཱཏུགཱམཱ; () (སིལེསབནྡྷནཾ;)

༢༣. ¶

དྷམྨཱནུདྷམྨཔཊིཔཏྟི པརཱཡཎསྶ

སཾསཱརབྷཱིརུཀཛནསྶ ཏཔོཝནཱབྷཱ,

ཡཱ རཱཛདྷཱནི པཙུརནྡྷཔུཐུཛྫནཱནཾ

ཨཱཔཱནབྷུམིཝ བབྷཱུཝུ’བྷཡཔྤཀཱརཱ; ()

༢༤.

བུདྡྷངྐུརསྶ རཝིཝཾསཔབྷངྐརསྶ

སམྨཱ སུཁཱནུབྷཱཝནཱཡ སུབྷུམིབྷུཏཱ,

བྷོ ཡཱདིསི ཀཔིལཝཏྠུཔུརི པུརེ’སི

དྷམྨསྶབྷཱཝམདྷུནཱ པརིདཱིཔཡེ སཱ; ()

༢༥.

ཏསྨིཾ བབྷཱུཝ ནགརེ ནགརཱདྷིརཱཛེ

རཱཛཱ སུནཱིཏིཙཏུརོ ཙཏུསངྒཧེཧི,

དྷམྨེན སབྦཛནརཉྫནཀོ ཀདཱཙི

སུདྡྷོདནཝ྄ཧཝིསུཏོ རཝིཝཾསཀེཏུ; ()

༢༦. ¶

དིསྭཱ’ཝཏཱརཀལུསིཀཏམཏྟབྷཱཝཾ

ཨུཀྐཎྛིཏེ’ཝ ཀམལཱ ཀམལཱཔཏིསྶ,

བྷཱུཔཱལིཔཱལིབྷཛིཏཾ ཙརཎཱརཝིནྡཾ

སཾསེཝི ཡསྶ རཝིཝཾསདྷཛསྶ རཉྙོ; ()

༢༧.

ཡསྶཱ’ཝནཱིསཀཝིནོ ཀཝིཀཎྛབྷུསཱ

ཝཱཎིཝདྷཱུ མདྷུརཀོམཀལཀཏྟཝཱཎཱི,

པཏྭཱ ཙཏུམྨུཁམུཁམྦུཛཀཱནནམྷཱ

ཧཾསཱིཝ མཱནསཏལཱ༹ཀམལངྐརིཏྠ; ()

༢༨.

སབྦཱརིདཔྤམཐནོཔརི ཨེཀདྷཏྭཱ

ཨཛ྄ཛྷཏྟིཀཱརིཔརཱཛིཡམཔྤསཡ྄ཧཾ,

སཾསུདྡྷཙིཏྟནིཀསེ ནིསིཏེན ཏཱཝ

པཉྙཱཡུདྷེན ཨཝདྷིཏྠ མཧཱིབྷུཛོ ཡོ; ()

༢༩. ¶

ཡསྨཱ མཧཱིཔཏིམཧཱིདྷརཏོ ཨུཔེཀྑཱ-

ཝེལཱ༹ཏལཱཝདྷི དཡཱསལིལེན པུཎྞཱ,

མེཏྟཱསཝནྟི པབྷཝཱ མུདིཏུམིམཱལཱ

ཨཛ྄ཛྷོཏྠརིཏྠ བྷུཝནཏྟཡགཾཛནོགྷཾ; ()

༣༠.

སམྤནྣདཱནསདནམྦུདྷརེཧི ཡསྶ

དཱནཱདྷིམུཏྟིཔརམསྶ མནོདཧེསུ,

ཏཎྷཱཏཊཱནི ཀཔཎདྡྷིཀཡཱཙཀཱནཾ

ཧིནྣཱནི སཏྟརཏནམྦུནིཔཱཏནེན; ()

༣༡.

ཡསྶིནྡནཱིལནཡནཾ རཛཏཱཝདཱཏ-

དནྟཾ སུཝཎྞཝདནཉྩ པཝཱལ༹སཱིསཾ,

མུཏྟཱམཡངྒཝཡཝཾ རཏནེཧི ནཱནཱ

དེཧཾ སུམཱཔིཏམིཝཱསི པིཏཱམཧེན; () (སཱིལེསབནྡྷནཾ)

༣༢. ¶

ཡསྶཱཏིཔཎྜརཡསོཝིསརོ’སདྷཱིསོ

སངེཀྐཱཙིཏཱནནསརོ’རིནརཱདྷིཔཱནཾ,

སོཀནྡྷཀཱརབྷིདུརོ རིཔུརཱཛིནཱིནཾ

ཨཱསཱགརནྟཔཐཝིཾ པརིདྷིཀརིཏྠ; ()

༣༣.

རཱཛཉྙཚཔྤདཀུལཾ སཀལཾ པདེས-

རཛྫཱདྷིཔཙྩམཀརནྡརསཱབྷིལཱསཾ,

ཡསྶཏྟབྷཱཝཀམལཱཀརཕུལླིཏཱནི

སཾསེཝི ཙཱརུཙརཎམྦཱུརུཧཱནི བྷཏྱཱ; ()

༣༤. ¶

སེཏཱཏཔཏྟམིཝ ཝིསྶུཏཀིཏྟིཔུཉྫཾ

ཀཏྭཱ’སིཔཏྟམིཝ པཱཝཀབྷཱིམཏེཛཾ,

ཡསྨིཾ སརཛྫམནུསཱསཏི སེསབྷཱུཔཱ

ཚཏྟཱསིབྷཱུསིཏཀརཱ སཀཀིངྐརཱ’ཝ; ()

༣༥.

དྭཱརཱནི’ནེཀཀཔཎྜིཀཡཱཙཀཱནཾ

ཨུགྒྷཱཊིཏོཔྱ’ཝིརཏཾ རཏནཱལཡེསུ,

སདྡྷཱདིསཏྟདྷནརཀྑཎཏཔྤརོ སཾ

དྭཱརཏྟཡཾ པིདཧི ཡོ ཀཔིལཱདྷིནཱཐོ; ()

༣༦.

ཡསྶུསྶིཏདྡྷནུཨེཎོ པབལཱརིཝགྒཾ

ཝིསྶཊྛཱབཱཎཝིསརབྦིསམུབྦཧནྟོ,

བྷསྨིཀརི ཀརིཀརཱཡཏཔཱིནབཱཧུ-

སཔྤོ སུཕོཋིཏཛིཡཱཔརིཕནྡཛིཝ྄ཧོ; ()

༣༧. ¶

ལཀྑཱིནིདྷཱནནགརཎྞཝཔཱཏུབྷཱུཏོ

མནྟིནྡཀཱུཊསིཁརཱིཝལཡཱཝུཏོ ཡོ,

ཝཱལགྒམཏྟམྤི རཱཛསིཎེརུརཱཛཱ

ཀོདྷཱནིལེན རིཔུརཉྙམཀམྤིཡོ’སི; ()

༣༨.

བྷསྨིཀཏཱཁཱིལཝིཔཀྑནརིནྡཀཊྛོ

ཀོདྷཱནལོ སརསམཱིརཎབྷཱཝིཏོཔི,

ནིབྦཱཡི པགྒྷརིཏབཔྤཛལེཧི ཡསྶ

ལོལབྦིལོཙནགྷཊེཧི ཝིཔཀྑཐཱིནཾ; ()

༣༩.

སནྣཱིཏིམགྒཛལིཏུགྒམཏིཔྤདཱིཔོ

ཀིཏྟིཔྤབནྡྷདྷཝལཱིཀཏཛིཝལོཀོ,

རཱཛིནྡམོལི༹མཎིལངྐཏཔཱདཔཱིཋོ

དྷམྨེན རཛྫམནུསཱསི ཙིརཾ སརཱཛཱ; ()

༤༠. ¶

ཏསྶཏིཔཱིཝརཔཡོདྷརབྷདྡཀུམྦྷ-

དྭནྡཱཏིབྷཱརཝིརལཱི༹ཀཏམཛ྄ཛྷབྷཱགཱ,

ནིདྡོསབཱལརཝིམཎྜལཙཱརུགཎྜཱ

དིབྦཙྪརཱཛིཏཝིརཱཛིཏརཱུཔསོབྷཱ; ()

༤༡.

སམྥུལླནཱིལཀམལཱམལནཱིལནེཏྟཱ

ཨོལམྦམཱནམཎིཀུཎྜལལམྦཀཎྞཱ,

མུཏྟཱཝལིཝདསནཱཝལི ཧཾསདྷེནུ-

ཧེལཱཔཧཱསགམནཱ མུདུཙཱརུཝཱཎཱི; ()

༤༢.

བིམྦཱདྷརཱ ཛལདྷརཱཡཏཀེསཔཱསཱ

སོཝཎྞདཔྤཎནིབྷཱནནཙནྡབིམྦཱ,

སནྣཱིརཔུཔྥམཀུལོ༹པམཙཱརུཛངྒྷཱ

ཀནྡཔྤ མངྒལསིལཱཏལསོཎིབྷཱགཱ; ()

༤༣. ¶

ནཱབྷཱལཝཱལ༹རུཧནཱིལཏམཱལཝལླཱི-

ལཱིལཱཝིནདྡྷནཝཀོམལརོམརཱཛཱི,

ལཱཝཎྞཝཱརིདྷིཏརངྒབྷུཛཱ’བྷིནཱིལ-

སུབྦྷུལཏཱམཀརཀེཏནཙཱཔརཱུཔཱ; ()

༤༤.

བྷུཔཱལཝཾསཀམལཱཀརརཱཛབྷཾསི

མཱཡཱཝདྷུ ཨིཝ སུཛམྤཏིནོ སུཛཱཏཱ,

ཙནྡསྶཀོམུདི’ཝ ཝིཛྫུརིཝ’མྦུདསྶ

རཉྙོ’ཏིཙཱརུཙརིཏཱསི པིཡཱ མཧེསི; ()

༤༥. ¶

ཏསྨིཾ ནགོཔམགྷརེ ནགརེ ཏདཱསི

ཨཱསཱལ༹ྷིམངྒལམཧོ དིཝསཱནིསཏྟ,

མིལཱསུགནྡྷཔརམཾ ཝིགཏཱསཝཾ ཏཾ

ནཀྑཏྟཀཱིལ༹མཀརིཏྠ མཧེསི མཱཡཱ; ()

༤༦.

ཝུཊྛཱཡ སཏྟམདིནཱགཏཔུཎྞམཱཡ

པཱཏོ སུགནྡྷཔརིཝཱསིཏཝཱརིནཱ སཱ,

ཀཏྭཱ སིནཱནམཏུལཾ ཀཔཎྜིཀཱནཾ

དཱནཾ ཨདཱསི ཙཏུལཀྑདྷནབྦཡེན; ()

༤༧.

ཝཏྠཱཧཏེཧི སུནིཝཏྠསུཔཱརུཏཱ སཱ

བྷུཏྭཱ’གྒབྷོཛནམདྷིཊྛིཏུཔོསཐ’ངྒཱ,

ནིདྡཱཏུརཱ སུཔིནམོཝརཀཾ པཝིསྶ

ཀལྱཱཎམདྡས སིརཱིསཡནེ ནིཔནྣཱ; ()

༤༨. ¶

ནེཏྭཱ ནིཔནྣསཡནཾ ཧིམཝནྟཔསྶེ

ཧེཊྛཱ ཝིསཱལཏརསཱལ༹མཧཱིརུཧསྶ,

ནཾ སཊྛིཡོཛནཀཙཱརུམནོསིལཱཡཾ

ཨཱརོཔཡིཾསུ ཙཏུརོ ཀིར དེཝརཱཛཱ; ()

༤༩.

ནེཏྭཱ མནུསྶམལསཾཧརཎཱཡ ཏམྷཱ’

ནོཏཏྟནཱམརཧདཾ སུནཧཱཔཡིཏྭཱ,

དེཝིཏྠིཡོ སཔདི དིབྦམཡེཧི ནེསཾ

ཝཏྠེཧི གནྡྷཀུསུམེཧི ཨལངྐརིཏྭཱ; ()

༥༠.

ཏཏྠུབྦྷཝོ ལསཏི རཱུཔིཡཔཀབྦཏོ ཡོ

ཏསྶོདརེ’ཏིརུཙིརེ ཀནཀབྦིམཱནེ,

པཱཙཱིནསཱིསཝཏི དིབྦམཡམྷི སམྨཱ

པཉྙཱཔིཏགྒསཡནམྷི སཡཱཔཡིཾསུ; ()

༥༡.

ཨོརུཡ྄ཧ སེཏཝརཝཱརཎརཱཛཝེསོ

བུདྡྷངྐུརོ རུཙིརཀཉྩནཔབྦཏམྷཱ,

ཨཱརུཡ྄ཧ སཛ྄ཛྷུདྷརཎིདྷརམུཏྟརཱཡ

སོཎྜཱཡ སེཏསརསིརུཧམུབྦཧནྟོ; ()

༥༢. ¶

པཏྭཱ ཝིམཱནཝཐཀུཉྩནདཾ ནདིཏྭཱ

ཀཏྭཱ པདཀྑིཎམལངྐཏམཱཏུསེཡྻཾ,

བྷེཏྭཱན ཏཱཡཔན དཀྑིཎཔསྶམནྟོ

ཀུཙྪིཾ པཝིཊྛསདིསོ སུཔིནེན དིཊྛོ; ()

༥༣.

མཱཡཱཡ རཱཛཝདྷུཡཱ རུཙིརཱནནཱཡ

ཨཱསཱལ༹ྷིཔུཎྞམིཡམུཏྟར’སཱལ༹ྷབྷེན,

བུདྡྷངྐུརསྶ པཋམེན མཧཱཝིཔཱཀ-

ཙིཏྟེན སམྤཏི ཨཧཱུ པཊིསནྡྷིགབྦྷེ; ()

༥༤.

བུདྡྷངྐུརསྶ པཊིསནྡྷིགཏསྶ གབྦྷེ

མཱཡཱཡ ཙཱརུཙརིཏཱཡ ཙ ཁགྒཧཏྠཱ,

ནིསྶེསུཔདྡཝནིརཱཀརཎཱཡ རཀྑཾ

གཎྷིཾསུ ཏཱཝ ཙཏུརོ སུརརཱཛཔུཏྟཱ; ()

༥༥. ¶

མཱཡཱཡ བྷཏྟུཔརམཱཡ ཏཏོཔྤབྷུཏི

ནཱུཔྤཛྫི ཀིཉྩི པུརིསེསུ སརཱགཙིཏྟཾ,

སཱ པཉྩཀཱམསུཁིནཱི ཨཀིལནྟཀཱཡཱ

ལཱབྷེནུལཱ༹རཡསསཱཔྱབྷིཝཌྜྷིཏཱསི; ()

༥༦.

པཉྙཱཡི དྷོཏརཏནེ ཛནིཀཱཡ ཨནྟོ

ཀུཙྪིཾ གཏོ ཡཐརིཝཱཝུཏཔཎྜུསུཏྟཾ,

ཏཾ ཀུཙྪིནཱ པརིཧརཱི དསམཱསམཏྟཾ

པཏྟེན ཏེལམིཝ རཱཛིནི ཨཔྤམཏྟཱ; ()

༥༧.

པཱཏོ’ཝ པཱཊིཔདགེ དིཝསེ པབུདྡྷཱ

རཉྙོ ཀཐེསི སུཔིནཾ ཨཐ སོ ནརིནྡོ,

ཝེདངྒཝེདཙཏུརེ ཙཏུསཊྛམཏྟེ

པཀྐོསཡཱི དྭིཛཝརེ དྭིཛཝཾསཀེཏཱུ; ()

༥༨. ¶

ལཱཛུཏྟརཱཡ པརིབྷཎྜཀཏཱཡ བྷུམྱཱ

པཉྙཱཔིཏེསུ སུཁུམཏྠརཎཏྠཏེསུ,

བྷདྡཱསནེསུ བྷཝནམྷིནིསིནྣཀཱནཾ

ནེམིཏྟིཀཱནམཝནཱིཔཏི བྷུསུརཱནཾ; ()

༥༩.

པཀྑིཏྟསཔྤིམདྷུསཀྑིརཁཱིརམིསྶ-

པཱཡཱསཔུཎྞཧརིརཱུཔིཡབྷཱཛནེཧི,

ཝཏྠཱཧཏཱནི དྷནདྷཉྙཙཡཉྩ དྷེནཱུ

དཏྭཱན དིཊྛསུཔིནསྶ ཕཁལཾ ཨཔུཙྪི; ()

༦༠.

མཱཙིནྟཡིཏྠ ཏཝ རཱཛིནིཡཱ ཛནིནྡ

ཀུཙྪིམྷི ཏམྤཏི པཏིཊྛཧི པུཏྟགབྦྷོ,

ཨཛ྄ཛྷཱཝསིསྶཏི སཉྩེཔན ཙཀྐཝཏྟི

རཱཛཱ བྷཝིསྶཏི ཨགཱརམསཾསཡཾ སོ; ()

༦༡. ¶

ཧིཏྭཱ སསཏྟརཏནཾ ཙཏུདཱིཔརཛྫཾ

སོ པབྦཛིསྶཏི སཙེ བྷཝནཱ’བྷིགནྟྭཱ,

བུདྡྷོ བྷཝིསྶཏི དྷུཝཾ ཙཏུསཙྩབུདྡྷོ

ཨིཙྩབྲུཝིཾསུ སུཔིནཏྠཝིདཱུ ཝིདཱུ ཏེ; ()

༦༢.

སཱ གབྦྷབྷཱརཝཋརིཀཏམཛ྄ཛྷབྷཱགཱ

གནྟུཾ སཀཾ ཀུལགྷརཾ ཀུལཀཉྫཧཾསི,

ཨིཙྪཱམཧནྟི པཊིཝེདཡི དེཝི རཉྙོ

སོ སམྤཊིཙྪི ཝཙནཾ ཀརཝཱིཀཝཱཎྱཱ; ()

༦༣.

ཏམྷཱ མཧཱནགརཏོ ནགརངྒཔུཎྞཾ

སོ ཡཱཝ དེཝདཧནཱམིཀརཱཛདྷཱནཱི,

མུཏྟཱ’ཝདཱཏཔུལི༹ནཏྠརཎེཧི རཱཛཱ

ལཱཛོཔཧཱརཝིདྷིནཱ ཀམལུཔྤལེཧི; ()

༦༤. ¶

སནྟཱིརཔུཔྥཀལསེཧི སམཔྤིཏེཧི

མནྡཱཏིལེརིཏཔཊཱཀ དྷཛཱཝལཱིཧི,

ཀཱརཱཔཡཱི ཀནཀརཱུཔིཡཏོརཎེཧི

ཨདྡྷཱནམགྒསམལངྐརཎཾ’ཏཁིཔྤཾ; ()

༦༥.

ཝནྡཱི’བྷིགཱིཏཐུཏིམངྒལགཱིཏིཀཱཧི

པཉྩངྒིཀེཧི ཏུརིཡེཧི ཀཏུཔཧཱརཾ,

ཏསྨིཾ སུམཎྜིཏཔསཱདྷིཏམཉྫསམྷི

དིབྦཝྩརཱསིརིཝིཌམྦནརཱུཔསོབྷཾ; ()

༦༦.

དེཝིཾ སུཝཎྞསིཝིཀཱཡ སུསཛྫིཏཱཡ

ཨཱརོཔཡིཏྭ ཁཙིཏཱཡ མཎཱིཧི ནཱནཱ,

པེསེསི བྷུཔཏི པུརཀྑཏཉཱཏིསངྒྷཾ

སདྡྷིཾ སཧསྶསཙིཝེཧི སུཁེདྷིཏཾ སོ; ()

༦༧. ¶

སམྠུལླཔུཔྥཕལཔལླཝཝཏྟབྷཱར-

རུཀྑཱཀུལཾ གྷནསུནཱིལལཏཱཝིཏཱནཾ,

ཧིནྟཱལཏཱལནལ༹ཀཱིཙཀནཱལི༹ཀེར-

སནྣཱིརཔཱུགཏིཎཔཱདཔཔནྟིསཱལིཾ; ()

༦༨.

སེཝཱལནཱིལསལིལཱནིལསཱིཏལེཧི

ཨོཏིཎྞཀཧཾསཝིསརེཧི སམུལླསཏྟཾ,

ཛྷངྐཱརརཱཝམུཁརཱལིཀུལཱཀརཱལ-

ཀིཉྫཀྑཛཱལབྷརིཏམྦུརུཧཱཀརེཧི; ()

༦༩.

པུཔྥཱབྷིགནྡྷསུརབྷཱིཀཏགནྡྷཝཱཧཾ

ཨདྡཀྑིསབྦཛནལོཙནཔཱིཡམཱནཾ,

ནིནྡནྟནནྡནཝནཾ ཝནཛཱཡཏཀྑཱི

སཱ ལུམྦིནཱིཝནམནངྒཝིམཱནབྷཱུཏིཾ; ()

༧༠. ¶

སཱ རཱཛིནཱི ནཝདལངྒུལིཔནྟཱིཙཱརུ-

སཱཁཱབྷུཛོཔཧིཏམཉྫརིཙཱམརེཧི,

སནྣདྡྷཀོམལལཏཱཝནིཏཱནམགྒེ

ཨཏྟུཔཧཱརཀརཎཱཡ ཀཏཱཝཀཱསཱ; ()

༧༡.

སེནཱཡ ཙཱརུཙརཎམྦུརུཧོདྡྷཊེཧི

རེཎཱུཧི དྷཱུསརིཏམགྒམནཀྐམནྟི,

སདྡྷིཾ སཀཱཡ པརིསཱཡ ཏཏོཏརིཏྭཱ

ཏཾ ལུམྦིནཱིཝནམུཔཱཝིསི རཱམཎེཡྻཾ;()

༧༢.

ཏཾ རཱཛིནིཾ ཝནཝདྷུ ཛིཏཧཾསགཱམིཾ

ཨཱམོདམནྡམལཡཱནིལཧཏྠགེཧི,

སམྦྷཱཝཡིཏྠ མུཁརཱལིཀུལཱབྷིཀིཎྞ-

རེཎུཔྤབནྡྷཧརིསངྑསཏེཧི མགྒེ; ()

༧༣. ¶

གཙྪནྟིཡཱ ཙརཎནཱུཔུརནཱདཔཱས-

བདྡྷཱནམུནྣཏསིརོམིགཔོཏཀཱནཾ,

ཨུམྨཱིལིཏཱཡཏཝིལོཙནཔནྟིཔཀྑེ

དསྶེསི ནཱིལནལིནཱིཝནརཱཛིསོབྷཾ; ()

༧༤.

ཨུདྡྷཾ སམགྒསིཁརེཧི ཀཏཱཝཀཱས-

མགྒནྟརེཧི ཀལིཀཱཀུསུམཱཀུལེཧི,

ནཱནཱལཏཱཀུལམཧིརུཧཏོརཎེཧི

ཨུཡྻཱནབྷུམི ཨུཔཧཱརརཏེ’ཝ བྷུཡ; ()

༧༥.

ཨུཀྑིཏྟཔིཉྪབྷརམནྟསིཁཎྜིམཱལཱ-

ཀཱིལཱ༹ཧི ཀོཀིལཀུལངནིཀཱཧལེ༹ཧི,

ཨུཡྻཱནབྷུམི མཀརངཛརངྒབྷུམི-

ལཱིལཾ བྷཛིཏྠ བྷམརདྡྷནིཝལླཀཱིཧི; ()

༧༦. ¶

ནིཙྩཾ ཝསནྟསམཡསྶིརིམུབྦཧནྟཾ

ཏཾཁོཝནཾ ཝནཝདྷཱུཧདཡཱནུཏཱཔཱི,

པཏྟོ ནིདཱགྷསམཡོཔི ཛནེསི ཏུཊྛིཾ

ཏསྶཱ སིརིསཀུསུམཱལིཀུལཱཝཏཾསོ; ()

༧༧.

ཏསྨིཾ ནིདཱགྷསཱུརིཡཱཏཔཏཱཔིཏཱམྦྷཾ

རིཏྟཱལཝཱལ༹མིཝཀཱལམཀཱལམེགྷོ,

ཙིནྟཱཏུརཾ ཧདཡམཏྟསཁཱིཛནོཔི

པཱིཎེསི གབྦྷཔརིཔཱཀབྷརཾ ཝཱཧནྟྱཱ; ()

༧༨.

ཀཊྛཱཝསིཊྛཏརཝོ པརིཧཱིནཔཏྟཱ

ཏསྶཱདྷརཀྑིདསནཛྫུཏིསངྒམེན,

ཨཱསུཾ ནཝངྐུརཔལཱསཝིཀཱསཔུཔྥ-

སཾཝེལླིཏཱ’ཝ རམཎཱིཡཝནཔྤ དེསེ; ()

༧༩. ¶

གིམྷཱབྷཱིཏཱཔཔརིཔཱིལི༹ཏངྡྷལླིཀཱནཾ

གམྦྷཱིརརཱཝམུཁརཱིཀཏདཱཡརཱཛི,

དུཀྑཱཏུརབྦིརཧིནཱིཔམདཱཛནསྶ

ཨཱསི ཝིལཱཔབདྷིརཱིཀལི༹ཏེ’ཝ སཱལཱ༹; ()

༨༠.

ཏསྨིཾ ཝིཀཱསཀལིཀཱཝལིཧཱརིཧཱརཱ

ཀིཉྩཱཔི པཀྐཕཁལཝལླརིཀཎྛབྷུསཱ,

ནཱསཀྑི པཱུགཏརུཔནྟི སུམཎྜིཏཱཡ

མཱཡཱཡ ཏཱཡ སིརིམཱབྷརིཏུཾ གྷཊནྟཱི; ()

༨༡.

ཨུཡྻཱནམུབྦྷམིཏམཏྟམདྷུབྦཏེཧི

ཙམྤེཡྻཔུཔྥམཀུལེཧི སམཱཀུལཾཏཾ,

ཨུདྡྷུཏདྷུམཔཊལེཧི མནོབྷཝསྶ

དཱིཔེཧི ཝཱསབྷཝཀནཾ’ཝ ལསནྟམཱསི; ()

༨༢. ¶

གབྦྷཱུཔགཾ བྷམརཀེསཀལཱཔབྷཱརཱ

བུདྡྷངྐུརཾ པརིཎཏངྐུརལོམཧཾསཱ,

ཝནྡནྟིཡོ ཝིཡ ཏཧིཾ ཐབཀཉྫལཱིཧི

མནྡཱནིལེརིཏལཏཱཝནིཏཱ ཀནཏཱ’སུཾ; ()

༨༣.

གབྦྷཱུཔགསྶ པརིཔཀྐཕལེཧི ནཱནཱ

པུཉྙཱནུབྷཱཝཔབྷཝོཏུསམུབྦྷཝེཧི,

མཱཡཱཡ གབྦྷབལིཀམྨནི ཏཔྤརེ’ཝ

ཨུཡྻཱནབྷུམི ཛནཏཾ བྷཝི ཏཔྤཡནྟི; ()

༨༤.

གབྦྷཱུཔགསྶ ཧི མཧཱཔུརིསསྶ གབྦྷ-

ཝུཊྛཱནམངྒལམཧུསྶཝཝཱསརམྷི,

ཨུཡྻཱནབྷུམི སཀལོཏུསམུབྦྷཝེཧི

ཨཱསི ཝིཀཱསཀུསུམེཧི སམཱབྷིཀིཎྞཱ; ()

༨༥. ¶

སཱལུམྦིནཱིཝནསིརིཾ ཀལཧཾསགྷོསཾ

སམཕུལླཔུཔྥསུརབྷིཾཕལསམྦྷཝོཛཾ,

པཉྩིནྡྲིཡེཧི གིརིནིཛ྄ཛྷརསིཏཝཱཏཾ

པཙྩཀྑཔཉྩཝིདྷཀཱམརསཾཨཝིནྡི; ()

༨༦.

ནིཡྻཱསསཱརསུརཧིཾཕཁལཔལླཝེཧི

ཛྷཾཀཱརིཏཱལིཀུལཀུཛིཏཀོཀིལེཧི,

སམྥུལླཔུཔྥནིཀརེཧི སམཱབྷིཀིཎྞ

མདྡཀྑིསཱཡུཝཏིམངྒལསཱལ༹སཱལཾ; ()

༨༧.

སམྥུལླསཱལ༹ཀལིཀཾཏཡཏཱལིམཱལཱ

སཉྩུམྦིཏཾཀུཝལཡཱམལལོཙནཱཡ,

སཱཁཾསུཀོམལཀརངྒུལིཔལླཝེཧི

མཱཡཱམཧེསིསམལངྐརི ཝིཏམཱཡཱ; ()

༨༨. ¶

བྷཱརོནཏཱ’ཝ རུཙིརངྒུལིཔལླཝཱནཾ

ཛྷངྐཱརརཱཝམུཁརཱལིཀུལཱབྷིརཱམཱ,

སཱཁཱ ཝིཀཱསཀུསུམེཧིསམཱཀུལཱ སཱ

ཨོལམྦཡཊྛི བྷཝི གབྦྷབྷརཱཏུརཱཡ; ()

༨༩.

ཏསྶཱ ཙལིཏྠ པཝནོ ཙལལོཙནཱཡ

ཀམྨུབྦྷཝོ ཝརཏིརོཀརཎེཧི ཏཱཝ,

དེཝིཾ ནིརཱུཔམསིརིཾ སུཔརིཀྑིཔིཏྭཱ

ཏམྷཱ པཊིཀྐམི ཛནོ ཀལི༹ཏཱཝཀཱསོ; ()

༩༠.

བྲཧྨཱམརཱསུརནརོརགཔཱུཛནཱིཡཾ

བཏྟིཾསལཀྑཎསམུཛྫལརཱུཔ སཱརཾ

ནིདྡྷོཏཛཱཏིམཎིསནྣིབྷསུདྡྷགཏྟཾ

སཏྟུཏྟམཾ སཔདི དེཝི ཋིཏཱ ཝིཛཱཡི; ()

༩༡. ¶

དུགྒནྡྷམུཏྟམལསོཎིཏམཀྑིཏངྒཱ

ཛཱཡནྟྱ’སེསམནུཛཱ མནུཛེསུནེ’ཝཾ,

ཙངྒོཊཀམྷི ཛིནདྷཱཏུརིཝཱདྷིཝཱསོ

ཐཱུཔམྷི སོཎྞཔཊིམཱརིཝ མཱཏུགབྦྷཾ; ()

༩༢.

ནིསྶེཎིཏོཝ པུརིསོ རཏནཱསནམྷཱ

ཐེརོཝ དྷམྨཀཐིཀོ ཋིཏཀོ’ཏརནྟོ,

སམྨཱ པསཱརིཡ ཨུབྷོ མུདུཔཱཎིཔཱདེ

སོ ནིཀྑམིཏྠ ཀུཎཔེཧི ཨམཀྑིཏངྒོ; ()

༩༣. ¶

ཏཏྲོཔགམྨ ཙཏུརོ ཙཏུརཱནནཱ ཏཾ

ཛཱལེན ཀཉྩནམཡེན ཝིསུདྡྷཙིཏྟཱ,

ཨཱདཱཡ མཱཏུཔུརཏོ ཏནཡཾ ཋཔེཏྭཱ

ཙནྡཱནནེ བྷཝཏུ ནནྡམནཱ’ཏྱ’ཝོཙུཾ; ()

༩༤.

ཨཱདིཙྩཝཾསཀམལཱཀརབྷཱཀརསྶ

བུདྡྷངྐུརསྶ སུབྷསཱིཏལཝཱརིདྷཱརཱ,

ནིཀྑམྨ ཏཱཝ ནབྷསཱ ནིཛམཱཏུཡཱ ཙ

གཱཧཱཔཡུཾ ཨུཏུམུབྷོསུ ཀལེབརེསུ; ()

༩༥.

ཏེསཾ ཀརེཧི ཙཏུརོ སུརརཱཛཔུཏྟཱ

གཎྷིཾསུ སཎྷསུཁུམཱཡ’ཛིཎཔྤཝེཎྱཱ,

ཏེསཉྷི པཱཎིཏལཏོ པཎིཔཱཏཔུབྦཾ

གཎྷིཾསུ ཏཾ དུཀུལཙུམྦཊཀེན’མཙྩཱ; ()

༩༦. ¶

ཏེསཾ ཀརེཧི པཐཝིཏལམོཏརིཏྭཱ

ཋཏྭཱ པུརཏྠིམདིསཾ ཨསམོ ཝིཔསྶི,

ཨུདྡྷཾ ཨདྷོ ཙཏུདིསཱནུདིསཱ ཙ ཨེཝཾ

ཨེཀངྒནཾ བྷཝིཏདཱ’ཁིལལོཀདྷཱཏུ; ()

༩༧.

ཏུམྷེཧི ཨུཏྟརིཏརོ བྷུཝསེ ཏཱིསུ

ནཏྠཱིཏི མཏྠཀཛཊཱམཀུཊཔྤིཏེཧི,

ཀཏྭཱནིཛཉྫལིཔུཊེཧི ནིཔཙྩཀཱརཾ

བྲཧྨཱམརཱསུརནརཱ ཏམབྷིཏྠཝིཾསུ; ()

༩༨.

སོཙ’ཏྟནཱ སམམདིསྭ དིསཱསུ ཏཱསཱུ

ཏཔྤཱདཝཱིཏིཧརཎེན པདཱནིསཏྟ,

གནྟྭཱན ཨུཏྟརདིསཱ’བྷིམུཁོ ཨཝནྱཱ

ཨབྦྷུགྒཏམྦུརུཧམུདྡྷནི ཏིཊྛམཱནོ; ()

༩༩. ¶

ཨགྒོ’ཧམསྨི ཨཧམསྨི ཛནསྶ ཛེཊྛོ

སེཊྛོ’ཧམསྨི ཨཡམནྟིམ’ཛཱཏི མཡ྄ཧཾ,

དྷཱིརོ མམེཏརཧི ནཏྠི པུནབྦྷཝོ’ཏི

ནིཙྪཱརིཏཱསབྷིཝཙོ ནདི སཱིཧཀནཱདཾ; ()

༡༠༠.

ཝེསཱཁེམཱསེ སུཧཀུཛདིནེ པུཎྞམཱཡཾ ཝིསཱཁེ

ནཀྑཏྟེཡོགེ སུརགུརུགཏེ སོ ཀུལཱི༹རཝ྄ཧརཱསིཾ,

སཉྫཱཏོ ནཱཐོ པརམཀརུཎཱབྷཱཝནཱབྷཱཝཏཏྟོ

མཱཡཱཀུཙྪིམྷཱ ཀུསུམིཏལཏཱཝེལལིཏུཡྻཱནབྷུམྱཱ; ()

ཨིཏི མེདྷཱནནྡཱབྷིདྷཱནེན ཡཏིནཱ ཝིརཙིཏེ སཀལ ཀཝིཛན ཧདཡཱནནྡདཱནནིདཱནེ ཛིནཝཾསདཱིཔེ ཨཝིདུརེནིདཱནེ པཙྪིམབྷཝིཀ མཧཱབོདྷི སཏྟུཔྤཏྟི པཝཏྟིཔརིདཱིཔོ ཚཊྛོསགྒོ.

༡. ¶

ཨཐརམྨཏརཱ’སི ཛཱཏིཁེཏྟ-

པརིཡཱཔཏྟ’ཝཀཱསལོཀདྷཱཏུ,

ཀམལུཔྤལ (མཱལབྷཱརིནཱི) ཧི

ཏདུཔཊྛཱནགཏཱཧི དེཝཏཱཧི; ()

༢.

ཀམལཱསནདེཝདཱནཝཱནཾ

བྷུཝནེ’ཀཏྠ སམཱགམོ ཏདཱ’སི,

ཛིནཙཀྐཔཊིགྒཧསྶ ཋཱནཾ

ཨཝིཝཱདེན སདེཝམཱནུསཱནཾ; ()

༣.

པཊིལཱབྷནིམིཏྟམཱདིསནྟཱི

ཝཏ སབྦཉྙུཏཉཱཎསམྤདཱཡ,

དསསངྑསཧསྶིལོཀདྷཱཏུ

ཨབྷིཀམྤཱི པཧཊེ’ཝ ཀཾསཔཱཏཱི; ()

༤. ¶

ཛནནུསྶཝཝཱསརམྷི ཏསྨིཾ

ནིཛདེཧཛྫུཏིཔིཉྫརོ’དཔཱདི,

དསསངྑསཧསྶཙཀྐཝཱལ༹-

ཀུཧརཱལོཀཀརོ མཧཱཝབྷཱསོ; ()

༥.

ཨཔཏཱལི༹ཏཙམྨནདྡྷབྷེརཱི-

ཝིཀཏཱིནཾ སཡམེཝ ཝཛྫནམྤི,

ཏདནུཏྟརདྷམྨདེསནཱཡ

བྷཝི ཋཱནཾ ཨནུསཱཝཎསྶ ལོཀེ; ()

༦.

གྷཎཀཱཧལ༹ཝཾསསངྑཝཱིཎཱ-

བྷརཎཱནཾ སཡམེཝ ཝཛྫནམྤཱི,

ཨནུཔུབྦཝིཧཱརབྷཱཝནཱནཾ

པཊིལཱབྷཱཡ ནིབནྡྷནཾ བབྷཱུཝ; ()

༧. ¶

པརིམུཏྟིཝརཏྟཔཱསཀཱརཱ-

གྷར,ཡོསངྑལིཀཱདིབནྡྷནེཧི,

མིགཔཀྑིནརཱནམསྨིམཱན-

ཝིགམསྶཱ’སི ནིདཱནམཱདིབྷུཏཾ; ()

༨.

བྷུཝནེསུ མཧཱཛནསྶ རོགཱ-

པགམེནཱ’དིསནཾ ཨཧོསུཁནྟི,

ཙཏུརཱརིཡསཙྩདསྶནེན

བྷཝི ཋཱནཾ ཙཏུསཙྩདེསནཱཡ; ()

༩.

ཝིཝིདྷབྦྷུཏརཱུཔགོཙརཱནཾ

བྷུཝི ཛཙྩནྡྷཛནསྶལོཙནཱནཾ,

པབྷཝོ པབྷཝོ’སི དིབྦཙཀྑུ

པཊིལཱབྷཱཡ ཏིལོཀལོཙནསྶ; ()

༡༠. ¶

ཐུཏགཱིཏིསུདྷཱརསསྶ པཱནཾ

བདྷིརཱནཾ སཝཎཉྫལཱིཔུཊེཧི,

ཨཏིམཱནུསདིབྦསོཏདྷཱཏུ-

པཊིཝེདྷཱཡ ནིདཱནམཱསི ཏསྶ; ()

༡༡.

བྷུཝི ཛཱཏིཛལཱ༹དིཔུགྒལཱནཾ

ཏདཧེ’ནུསྶཏིཡཱ སུཔཱཏུབྷཱཝོ,

བྷཝི པུབྦམུཔཊྛིཏསྶཏིསྶ

སཏིཔཊྛཱནནིབོདྷནཱཡ ཋཱནཾ; ()

༡༢.

ཝིསིཁཱཙརཎཾ སརོཛཙཱརུ-

པདཝིཉྙཱསཝསེན པངྒུལཱནཾ,

པུརིམཾ ཙཏུརིདྡྷིཔཱདཝེག-

པཊིལཱབྷཱཡ ནིམིཏྟམཱསི ལོཀེ; ()

༡༣.

མདྷུརེན སརེན ཛཱཏིམཱུགཱ

ཐུཏིགཱིཏཱནྱ’ཝདིཾསུ ཝནྡིནོ’ཝ,

བྷུཝི ཁུཛྫཛནོ’ཛུགཏྟལཱབྷོ

ཀུཊིལཏྟཱ’པགམཱཡ ཋཱནམཱསི; ()

༡༤. ¶

སརཎཾ པུརིསཱསབྷོ སིཡཱནོ

བྷཝཏོ དུགྒཏིཏོ ཝིམུཏྟིཡཱ’ཏི,

ཀརིནོ’པི ཀརིཾསུ ཀུཉྩནཱདཾ

ཏུརགཱ ཧེསམཀཾསུ པཱིཏིཡེ’ཝ; ()

༡༥.

ཝིསདཱ པཊིསམྦྷིདཱ ཙཏསྶོ

པཊིཝིཛ྄ཛྷིསྶཏི ཙཱ’ཡཏིཾ སཙཱ’ཡཾ,

སཀཔཊྚནམེཝ ཏནྣིདཱནཱ

ཏརཎཱི སཱིགྷམུཔཱགམུཾ ཝིདེསཱ; ()

༡༦.

སཡམེཝ ཝིརོཙནཾ ཏདཱནི

རཏནཱནཾ བྷུཝནཱཀརུབྦྷཝཱནཾ,

རཝིཝཾསརཝིསྶ དྷམྨརཾསཱི

ཝིསརསྶུ’ཛྫལནཱཡ ཋཱནམཱསཱི; ()

༡༧. ¶

ཏུརིཡཱནི སཀཾསཀཾ ནིནཱདཾ

ཨཀརུཾ ཏགྒུཎདཱིཔཀཱནིཝཱ’ཏྲ,

ཝིཝཊཱ ཝིདིསཱདིསཱ སཀིཏྟི-

ཝིསརོཀཱསཀཏེ’ཝ’ཧིཔྤསཏྟཱ; ()

༡༨.

སཀལསྶ ཀིལེསཔཱཝཀསྶ

པརིནིབྦཱནསབྷཱཝདཱིཔནེན,

ནིརཡེསུ ཧུཏཱསཛཱལམཱལཱ

ཏདཧེ ནིབྦུཏིམཱཔ ཛཱཏིཁེཏྟེ; ()

༡༩.

པརིསཱསུ ཝིསཱརདསྶ ཏསྶ

ཙཏུཝེསཱརདཉཱཎལཱབྷཧེཏུ,

བྷུཝནེསུ ཏདཱམཧཱནདཱིནཾ

ཨནབྷིསྶནྡནམཱསི ཀུནྣདཱིནཾ; ()

༢༠.

ཨུདཔཱདི པབྷཱ ནིརཱཀརིཏྭཱ-

བིལལོཀནྟརིཡེསུ ཨནྡྷཀཱརཾ,

ཧཏམོཧཏམ’གྒ མགྒཉཱཎ-

ཛྫུཏིལཱབྷཱཡ ནིབནྡྷནཾ ཏམཱསི; ()

༢༡. ¶

སུཝིམུཏྟིརསོ སིཡཱ’ཝ ཏསྶ

ཙཏུརཱསིཏསཧསྶདྷམྨཁནྡྷོ,

མདྷུརཾ ཙཏུརོདདྷཱིནམཱསི

སལིལཾ སནྟཏརཾ ཏརངྒརིཏྟཾ; ()

༢༢.

ཝིདིསཱསུ ཙཏུདྡིསཱསུ ཙཎྜ-

པཝནསྶཱ’པི ཨཝཱཡནཾ ཏདཱནི,

བྷཝི པུབྦནིམིཏྟམཏྟནོ’པི

བྷཊདིཊྛྱཱབྷཝདཊྛིབྷེདནཱཡ; ()

༢༣.

ནཝཔལླཝཔཏྟསེཁརཱནཾ

ཝིཊཔཱིནཾ ཀུསུམཱཧིཀིཎྞབྷཱཝོ,

བྷཝི པུབྦནིབནྡྷནཾ ཝིམུཏྟི

ཀུསུམེཧཱ’ཏུམདེཧབྷཱུསཎཱཡ; ()

༢༤. ¶

ཀུམུདཱཀརབོདྷཀསྶ ཙནྡ-

ཀིརཎསྶཱ’ཏིཝིརོཙནཾ ཏདཱསི,

སཏིབུདྡྷསུདྷཱཀརོ’དཡམྷི

ཛནསནྡོཧམནོཔསཱདཧེཏུ; ()

༢༥.

ཝིམལཏྟམནུཎྷཏཱ ནིདཱགྷ-

སཱུརིཡསྶཱུ’པསམོ ནིམིཏྟམགྒཾ,

བྷཝི ཙེཏསིཀསྶ ཀཱཡིཀསྶ

པཊིལཱབྷཱཡ སུཁསྶ ཏམྷིཛཱཏེ; ()

༢༦.

གགནཱ’གནགཱདིཏོ’ཏརིཏྭཱ

པཐཝིསངྐམཎཾ ཏདཱ ཁགཱནཾ,

སརཎཱགམནསྶ ཋཱནམཱསི

ཛིནདྷམྨཾ སུནིསམྨ སཛྫནཱནཾ; ()

༢༧.

ནབྷསཱ’བྷིཔཝསྶནཾ ཏདཱནི

ཙཏུདཱིཔེསུ ཨཀཱལཝཱརིདཱནཾ,

པརིསཱསུ ཨཁཎྜདྷམྨཝུཊྛི-

པཏནསྶཱ’སི ནིབནྡྷནཾ ཛིནམྷཱ; ()

༢༨. ¶

ཚཎམངྒལཀཱིལ༹ཎཾ ཏདཱནི

ཏིདསཱནམྤི སཀེསཀེ ཝིམཱནེ,

ཨུཔགམྨ ཏཧིཾཏཧིཾ ཨུདཱན

སམུདཱནསྶནིདཱནམཱ’སི བོདྷིཾ; ()

༢༩.

ཝིཝཊཱ སཡམེཝ མནྡིརཱནཾ

པིཧིཏཉྩཱརཀཝཱཊཝཱཏཔཱནཱ,

བྷཝདུཀྑནིརོདྷགཱམིམགྒ-

པཊིལཱབྷཱཡ ནིམིཏྟམཱཧརིཾསུ; ()

༣༠.

ཏདཧེ མདྷུརཱམིསསྶ པེཏྟཱི-

ཝིསཡེསྭཱཧརཎཾ ཁུདཱཏུརཱནཾ,

བྷཝི ཀཱཡགཏཱསཏཱམཏསྶ

པཊིལཱབྷཱཡ ནིམིཏྟམཏྟནོ’པི; ()

༣༡. ¶

དིཝསེ ཛནནུསྶཝེ པིཔཱསཱ-

ཝིགམོ དཱིནཛནསྶ པེཏལོཀེ,

སུཁིཏཏྟསྶ ཨུཔེཙྩབུདྡྷབྷཱཝཾ; ()

༣༢.

པཊིཔཀྑཛནསྶ མེཏྟིལཱབྷོ

ཏདཧེ ཝཱཡསཝཱཡསཱརིནམྤི,

བྷཝིཋཱནམནནྟསཏྟལོཀ-

ཝིསཡབྲཧྨཝིཧཱརབྷཱཝནཱཡ; ()

༣༣.

སཏིམགྒཕལུབྦྷཝེ ཡཐེཝ

བྷཝབྷཱིཏྱཱཔགམོ ཏཐཱགཏཱནཾ,

སཏི ཛཱཏམཧཱམཧེ བྷཡཾ ཝཱ

ནཏིརཙྪཱནགཏཱནམཱསི ཏཱསོ; ()

༣༤.

པིཡབྷཱཝུཔསངྐམོ པཛཱནཾ

ཧདཡཱནནྡཀརཱཡ ཁོ གིརཱཡ,

ཛིནདྷམྨཀཐཱཡ སཱཝཀཱནཾ

ཝིཡ སཱམགྒིརསསྶ པཱཏུབྷཱཝོ; ()

༣༥. ¶

སིཏཀིཏྟིལཏཱཡ རོཔིཏཱཡ

བྷཝཏོ’སྨིཾ བྷུཝནཱལཝཱལ༹གབྦྷེ,

ཝིཡ ནིམྨིཏཡནྟཝཱརིདྷཱརཱ

ཛལདྷཱརཱ དྷརཎཱིཏལུཊྛཧིཾསུ; ()

༣༦.

བྷམརཱཝལིབྷཱརཔཉྩཝཎྞ-

ཀམལཙྪནྣམཧཱིཏལཾ རརཱཛ,

ཛལཛཾ ཐལཛཾ པརཱགཧཱརཾ

བྷུཝི སབྦཏྠ ཨཔུཔྥི པུཔྥཛཱཏཾ, ()

༣༧.

ཝིཊཔཱིསུ ལཏཱསུ ཁནྡྷསཱཁཱ-

སཏཔཏྟཱནི ཏདཱ སུཔུཔྥིཏཱནི,

ནརཝཱིར’བྷིརཱུཔདསྶནཱཡ

བྷཱུསམུམྨཱིལིཏལོཙནཱནི’ཝཱསུཾ; ()

༣༨. ¶

ཨུཔརཱུཔརི སཏྟསཏྟ ཧུཏྭཱ

སཏཔཏྟཱནི སཱིལཱཏལུབྦྷཝཱནི,

ཏཝ ཨབྦྷུདཡོ སུདུལླབྷོཏི

ཀཐཡནྟིཝི’ཧ ཀཔཱཏུབྷཱཝཏོ ནོ; ()

༣༩.

ནིཛཔཱརམིཏཱལཏཱཡ ཀཏྟི-

ལཏཡཱ’ལངྐཏཔུཔྥཧཱསརཱུཔཱ,

སམལངྐརི ཡཱཝཏཱ བྷཝགྒཾ

དྷཛམཱལཱ ཛནནུསྶཝེ ཏིལོཀཾ; ()

༤༠.

ཨཝཀུཛྫསརོརུཧཱབྷིརཱམཾ

ནབྷཝམྦྷོཛཝནསྶིརིཾ བབནྡྷ,

བྷུཝི པོཀྑརཝསྶམཱིདིསནྟི

ཝདམཱནཾཝ པཝསྶི དྷམྨཝསྶཾ; ()

༤༡.

རམཎཱི རམཎཱིཡརཱུཔསོབྷཱ

ཨཙརུཾ དྷམྨམནངྒརངྒབྷཱུམི,

མདྷུཔཱ མདྷུཔཱནམནྡིརཱནི

ཏདཧེ ནཱཝསརིཾསུ དྷམྨཀཱམཱ; () (ཨབྱཔེཏ པཋམདུཏིཡ པཱདཱདིཡམེཀཾ)

༤༢. ¶

ཀམལཱ ཀམལཱལཡཱ ཝིཝེས

བྷུཝནཾ བྷཱུརིནཝཱཝཏཱརཧཱརཱི,

དྷརཎཱི དྷརཎཱིདྷརཱཝཏཾསཱ

ཨུཔཧཱརཱཏིབྷརཱཏུརེཝ ཀམྤི; () (ཨབྱཔེཏ པཋམདུཏིཡ པཱདཱདིཡམཀཾ)

༤༣.

རུཙིརཾ རུཙིརངྒནཱ ཏདཱནི

ཨཀརུཾ ཀཱིལ༹མནེཀཙནྡིཀཱསུ,

སུཝཱིརཾ སུཙིརཾསིཀིཎྞཏཱརཱ-

ནིཀརོ’བྷཱསཏརོ’སི བྷཱཀརོ’ཝ; () (ཨབྱཔེཏ པཋམདུཏིཡ པཱདཱདིཡམཀཾ)

༤༤.

པཝནོ’པཝནོ’པཝཱཡམཱནོ

པཝིནོདེསི པརིསྶམཾ ཛནསྶ,

ཝནདཱ ཝནདཱཧཝུཔསནྟིཾ

ཨཀརུཾ སབྦདྷི སསྶསམྤདཉྩ; () (ཨབྱཔེཏ པཋམདུཏིཡ པཱདཱདིཡམཀཾ)

༤༥. ¶

ཝིསདཱ ཝིསདཱ སཀིཏྟིརཱམཱ

མུཁརངྒཱལཡ མཱཔཀོཝིདཱནཾ,

སུཛནཱ’སུཛནཱ བྷཛིཾསུ ཏསྶ

ཙརཎཱནྱངྐིཏཙཀྐལཀྑཎཱནི; () (ཨབྱཔེཏ པཋམདུཏིཡ པཱདཱདིཡམཀཾ)

༤༦.

ཝསུདྷཾ ཝསུདྷམྤཏཱི སམགྒཱ

དསདྷམྨེན’ནུསཱསཡུཾ ཏདཱནི,

ཧདཡཾ ཡདཡངྒམཱཡ ཝཱཎྱཱ

ཨསཏཾ མིཏྟདུཧཱི ཝིདྷཱནཡིཾསུ; () (ཨབྱཔེཏ པཋམདུཏིཡ པཱདཱདིཡམཀཾ)

༤༧.

ཏིམདཱ’ཏིམདཱ གཛཱདྷིཔཱཔི

མིགརཱཛཱུཧི ཏདཱ སམཱཙརིཾསུ,

པབལཱ’པབལཱ མིགཱ ཏདཉྙེ

པཊིསཏྠཱརམཀཾསུ ཨཉྙམཉྙཾ; () (ཨབྱཔེཏ པཋམདུཏིཡ པཱདཱདིཡམཀཾ)

༤༨. ¶

བྷུཝནེ བྷུཝནེཀལོཙནསྶ

ཛནནསྨིཾ དིཝསེ སམུཛྫལཱནཱི,

ནིཧནིཏཱ’ནིཧིཏཱཡུདྷཱཏི བྷིཏིཾ

ཛནཡུཾ པཱཔིམཏོཝ ནེཏརེསཾ; () (ཨབྱཔེཏ པཋམདུཏིཡ པཱདཱདིཡམཀཾ)

༤༩.

པརིཝཱདིཏདིབྦབྷེརིཝཱིཎཱ-

ཏུརིཡཾ དསྶིཏདིབྦནཙྩབྷེདཾ,

གགནཾ སུརརངྒམཎྜལཱབྷཾ

ཏིདསཱནཾ ཨུཔཧཱརསཱརམཱསི; ()

༥༠. ¶

སོཝཎྞཝཎྞཝདྷུཡཱ གརུགབྦྷགསྨིཾ

ཏཾནནྡནབྦནསམཱནཝནངྒཏསྨིཾ,

བྷུཏབྦྷུཏནྭིཏམཧེ ནཡནཉྫནསྨིཾ

ཛཱཏམྷི ཏམྷི ཏནུཛེ བྷཝི བྷདྡབྷཏྟི; () (མཱལཱབནྡྷནཾ)

ཨིཏི མེདྷཱནནྡཱབྷིདྷཱནེན ཡཏིནཱ ཝིརཙིཏེ སཀལཀཝིཛན ཧདཡཱནནྡནནིདཱནེ ཛིནཝཾསདཱིཔེ ཨཝིདཱུརེནིདཱནེ ཝིཝིདྷཔུབྦནིམིཏྟཔཱཏུབྷཱཝཔྤཝཏྟི པརིདིཔོ. སཏྟམོསགྒོ.

༡. ¶

ཝིསུདྡྷ (ཝཾསཊྛ) མསེསབནྡྷཝོ

ཀུམཱརམཱདཱཡ ཏིལོཀལོཙནཾ,

ཨགཾསུ ཏམྷཱ ཀཔིལཝ྄ཧཡཾཔུརཾ

པུརཱིཝཏཾསཾ སམལངྐཏཉྫསཾ; ()

༢.

ཏདཱ ཨབྷིཉྙཱསུ ཝསིསུ པཱརགོ

སམཱདྷིཝིཀྑམྦྷིཏསབྦཀིབྦིསོ,

ཝིཧཱསི སུདྡྷོདནབྷུམིབྷཏྟུནོ

ཀུལཱུཔགོ དེཝལནཱམཏཱཔསོ; ()

༣. ¶

ཏཔོདྷནོ སོ པཝིཝེཀཀཱམཝཱ

དིཝཱཝིཧཱརཏྠམུཔཱགཏོ དིཝཾ,

ཏམཏྠམཉྙཱཏུམཔུཙྪི དེཝཏཱ-

པཝཏྟིཏཾ པསྶིཡམངྒལུསྶཝཾ; ()

༤.

ཏཝེཝུཔཊྛཱཡཀབྷུམིབྷཏྟུནོ

ཝརོརསོ མཱརིཡ མཱརཝཱཧིནིཾ,

པརཱཛཡཾ ལཙྪཏི བོདྷིམཱཡཏིཾ

མཧུསྶཝོ ཏམྤཏི ཝཏྟཏེ, བྲཝུཾ; ()

༥.

ཨིམཱཡ ཝུཏྟནྟཀཐཱཡ ཙོདིཏོ

ཏཔོདྷནོ ཨིདྡྷིབལེན ཨིདྡྷིམཱ,

སུརཱལཡེ ཨནྟརདྷཱན’ནནྟརཾ

ནིཀེཏནེ པཱཏུརཧོསི རཱཛིནོ; ()

༦. ¶

ཀུམཱརནིཛ྄ཛྷཱནམནོརཐོཀ ཝསི

ཏཧིཾ སུཔཉྙཏྟམཧཱརཧཀཱསནེ,

ནིསཛྫ སུདྡྷོདནརཱཛིནོ’བྲུཝི

ཏཝཏྲཛཾ དཊྛུམིདྷཱགཏོཏྱ’ཧཾ; ()

༧.

ནརིནྡཙཱུལཱ༹མཎིཙུམྦིཏཱནྱ’ཐ

པདཱནི ཝནྡཱཔཡིཏུ ཏཔསྶིནོ,

ཝིབྷུསཎཱལངྐཏམཏྟསམྦྷཝཾ

ནརཱདྷིཔོ རཱཛཀུམཱརམཱཧརི; ()

༨.

ཏདཏྟབྷཱཝེན’ཧིཝཱདནཱརཧ-

སྶ’བྷཱཝཏོ ཏསྶ རརཱཛ སཱུནུནོ,

པཝཊྚཡིཏྭཱ ཛཊིལསྶ སམྤཏི

ཛཊཱསུ ཙཀྐངྐིཏཔཱདཔངྐཛཾ; ()

༩.

ཀུམཱརམཱདཱཡ སམཔྤིཏཉྫལིཾ

ཝིདྷཱཡ པཱདེསྭནིསམྨཀཱརིནོ,

སཙེ ཋཔེཡྻུཾ ཛཊིལསྶ སཏྟདྷཱ

ཕལེཡྻ མུདྡྷཱ ཛཊིཏོཛཊཱཡ’པི; ()

༡༠.

སཀཱསནུཊྛཱཡ ཨཐེ’སིབྷཱུམིཡཱ

ནིཧཙྩ སོ དཀྑིཎཛཱནུམཎྜལཾ,

ཨཀཱ མཧཱཀཱརུཎིཀསྶ གཱརཝཾ

སིརོཝིརཱུལ༹ྷཉྫལི པུཔྥམཉྫརཱི; ()

༡༡.

ཨུདིཀྑམཱནོ ཝསིནཱ སམཔྤིཏཾ

ཏམཉྫལིཾ བྷཏྟིབྷརེན བྷཱུཔཏི,

ཨཐོ’ནམེཏྭཱ ཏནུམཱིསཀཾ སཀཾ

པཝནྡི པཱདམྦུརུཧཱནི སུནུནོ; ()

༡༢.

སིཡཱ’ཝ བུདྡྷོ པུརིསཱསབྷོ ཨཡཾ

ནདསྶནཾ ཏསྶ སིཡཱ མམནྟཱི སོ,

ནིརཱུཔམཾ རཱུཔསིརིཾ སམེཀྑིཡ

པཡཱསི ནིཊྛཾ ཨུཔདྷཱརཡཾ ཝསི; ()

༡༣. ¶

ཝཝཏྠཡིཏྭེཝམུལཱ༹རབུདྡྷིམཱ

ཝིཏིཎྞཀངྑོ ཧསམཱིསཀཾ རུདཾ,

ནརིནྡམོརོདྷཔུརཀྑཏཾ ཝསཱི

ཏདཝསཱིདཱཔཡི སཾསཡཎྞཝེ; ()

༡༤.

ཏམཱཧརིཏྭཱན པཀཝཏྟིམབྦྷུཏཾ

པུརཀྑཏོ’རོདྷཛནསྶ རཱཛིནོ,

ཡཏིསྶརོ སཾསཡསལླམུདྡྷརཾ

སབནྡྷཝེ’ནུསྶརི ཀཱལདེཝལོ;()

༡༥.

སཀེཀུལེ ནཱལ༹ཀནཱམདཱརཀོ

སཡམྦྷུནོ ལཙྪཏི དསྶནཾ ཨིཏི,

ཏམཏྠམཉྙཱ སམུཔེཙྩ ཏཾཀུལཾ

ཏྭམཱཧ པབྦཛྫིཏི བྷཱགིནེཡྻཀཾ; ()

༡༦. ¶

ནིརཱམཡཾ པཉྩམཝཱསརམྷི སོ

ཝརོརསཾ ཝཱསིཏགནྡྷཝཱརིནཱ,

པཝཏྟམཱནེ བྷཝནེ མཧཱམཧེ

ནཧཱཔཡི བྷཱུཔཏི བནྡྷུམཛ྄ཛྷགོ; ()

༡༧.

པསཏྠམནྭཏྠབྷིདྷཱན མཏྟནོ

ཀུམཱརམཱརོཔཡིཏུཾ པརོསཏཾ,

སཝེདཝེདངྒཔབྷེདཀོཝིདེ

དྭིཛེ ནིམནྟཱཔཡི སོ ནརཱདྷིཔོ; ()

༡༨.

སུརིནྡརཱུཔོ སུརམནྡིརོཔམཾ

ཏམིནྡིརཱདྷཱརནརིནྡམནྡིརཾ,

ཛནིནྡསཱིཧོ’པགཏཱ’ཝནཱིསུརེ

ཨམནྡཔཱུཛཱཝིདྷིནཱ’བྷིརཱདྷཡི; ()

༡༩.

ཨནེནསིདྡྷཱ སམཏིཾསཔཱརམཱི-

སདཏྠསམྤཏྟིཔརཏྠཀཱརིནཱ,

ཏཐཱ’ཏྠ སངྑཱཏདྷནཾ ནིདྷཱནགཾ

ཨིམམྷི སིདྡྷཾ སཧཛཱཏིཡཱ ཡཏོ; (༥)

༢༠. ¶

དྭིཛེཧི ཏནྟིབྦཙནདྭཡཱརཧཾ

སམཱསསཾཁིཏྟཔདཏྠསཾཧིཏཾ,

སུཏསྶ སིདྡྷཏྠ’བྷིདྷཱནམཏྟནོ

ཏཏོ’བྷིཝོཧཱརསུཁཱཡ ཀཱརཡི; ()

༢༡.

སུཡཱམརཱམདྡྷཛམནྟིལཀྑཎ-

སུབྷོཛཀོཎྜཉྙསུདཏྟསཉྙིནོ,

ཨིམེ དྭིཛཱ རཱཛསུཔཱུཛིཏཱ ཏདཱ

ཝིཙཀྑཎཱལཀྑཎཔཱཋཀཱ’བྷཝཾ; ()

༢༢.

སུབྷཱསུབྷཾ པསྶིཡ དེཧལཀྑཎཾ

ཝིབྷཱཝཡཝ྄ཧོ ཨིཏི ཏེསམབྲུཝི,

སམུཀྑིཔིཏྭཱ’ངྒུལིཔལླཝདྭཡཾ

ཛནཱདྷིཔཾ སཏྟཛནཱ’བྲཝུཾ དྭིདྷཱ; ()

༢༣. ¶

སཙེ མཧཱརཱཛ ཨགཱརམཱཝསེ

ཝརོརསོ ཏེ པརིཙཱརིཏིནྡྲིཡོ,

སམངྒིབྷུཏོ རཏནེཧི སཏྟཧི

བྷཝེཡྻ རཱཛཱ ཝཏཙཀྐཝཏྱ’ཡཾ; ()

༢༤.

མཧཱདཡོ’ཡཾ ཀརུཎཱཡ ཙོདིཏོ

གྷརཱ’བྷིགནྟྭཱ ཡདི པབྦཛིསྶཏི,

བྷཝེཡྻ བུདྡྷོ’ཁིལཉེཡྻམཎྜལཾ

སཡཾ ཨབྷིཉྙཱཡ ནཧེ’ཏྠསཾསཡོ; ()

༢༥.

ཀཎིཊྛབྷཱུཏོ ཝཡསཱ ཏདནྟརེ

པསཏྠསཏྠཱ’ཝགམེན ཛེཊྛཀོ,

སམུཀྑིཔིཏྭཱ’ངྒུལིམེཀམབྲུཝི

ཨིཏཱིཧ ཀོཎྜཉྙསམཉྙབྷུསུརོ; ()

༢༦. ¶

ཨིམསྶ ཝེནེཡྻཛནཱཀཏཉྫལཱི

སམཾ ཕུསནྟཱནི ཝསུནྡྷརཱཏལཾ,

སུབྷཱནི བྷོཔཱདཏལཱཏི སབྦདཱ

བྷཛནྟི བྷཏྱཱ ཀམལཱནིཝཱལིནོ; ()

༢༧.

ཨིམསྶ ཁེམནྟམསེསཔཱཎིནོ

ཏིཔཊྚཀནྟཱརཔཐཱཝཏཱརཎེ,

སུསཛྫིཏཾ ཙཀྐཡུགཾཝ པཱརམཱི

རཐམྷི པཱདངྐིཏཙཀྐལཀྑཎཾ; ()

༢༨.

ཨིམསྶ བྷོ ཀམྦལབྷེཎྜུཀོཔམཾ

སུམཊྚཝཊྚཱཡཏཔཎྷིམཎྜལཾ,

སདཱ པདམྦྷོཛནིཝཱསལཀྑིཡཱ

ཏནོཏི པཱིནཏྠནཔིཎྜཝིབྦྷམཾ; ()

༢༩. ¶

ཨིམསྶ དཱིགྷངྒུལིཔནྟི ཝཊྚིཏ-

མནོསིལཱལཏྟཀཝཏྟིཀོཔམཱ,

ཝིབྷཱཏི བྷོ བཱཧུལཏཱཡ པཱརམཱི-

ལཏཱཡ ཝཱ ནཱུཏནཔཏྟཔནྟིཝ; ()

༣༠.

ཨིམསྶ པཱརེཝཊཔཱད པཱཊལཱ

སཔཱཎིཔཱདཱ ཏལུ༹ཎཱཏིཀོམལཱ,

ཨུལཱ༹རཔཱུཛཱཝིདྷིསམྤཊིཙྪནེ

པཝཱལ༹པཱཏི’ཝ སམུལླསནྟི བྷོ; ()

༣༡.

ཨིམསྶརཱུཔསྶིརིམནྡིརོདརེ

སམཔྤམཱཎཱབྷིནཝངྒུལཱིཧི བྷོ,

པདིསྶརེ ཛཱལཀཝཱཊསནྟིབྷཱ

སཔཱཎིཔཱདཱ ཏཏཛཱལལཀྑཎཱ ()

༣༢. ¶

ཨིམསྶ ཨུསྶངྑཔདསྶ གོཔྥཀཱ

པདམྦུཛཱནཾ ཙཏུརངྒུལོཔརི,

པཏིཊྛིཏཱ པུཎྞགྷཊེསུཀནྡྷརཱ-

ཝིལཱསམཱལིངྒིཡ རཱཛབྷཱསརེ; ()

༣༣.

ཨིམསྶ དེཧཛྫུཏིཝཱརིཔཱུརིཏ-

སརཱིརཀེདཱརབྷཝཱ ཕལཏྠིནོ,

སུརཏྟསཱལྱོདརསནྣིབྷཱ སུབྷཱ

དུཝེཎིཛངྒྷཱ ཨབྷིཔཱིཎཡནྟཱི བྷོ; ()

༣༤.

ཨིམསྶ བྷོ ཛཱནུཡུགཾ པརཱམསཾ

ཨནོནམནྟོ ཋིཏཀོ མཧཱབྷུཛོ,

སཧཏྟནཱ སམྦྷཝབོདྷིསཱཁིནོ

ཝིསཱལསཱཁཱཡ ཝིལཱསམཱདིསེ; ()

༣༥.

ཨིམསྶ ཀོསོཧིཏཝཏྠགུཡ྄ཧཀོ

ཨབྷིནྣཀོཀཱསཀཀོསཀོསགོ,

ཨནཉྙསཱདྷཱརཎཏཱདིནཱ’ཡཏིཾ

ཨནངྒསངྒཱམཔརམྨུཁོ སིཡཱ; ()

༣༦. ¶

ཨིམསྶ བྷོ གོཏམགོཏྟཀེཏུནོ

ཀལེཝརེ ཀཉྩནསཏྟིབྷཏྟཙོ,

སུཝཎྞཝཎྞོ ཛིནཙཱིཝརསྶཔི

ཏནོཏི སོབྷཾ གྷནབུདྡྷརཾསིནོ; ()

༣༧.

ཨིམསྶ ཛམྦོནདཱིཔིཉྫརཱཡ བྷོ

སིརིསཔུཔྥསྶུཀུམཱརཙཱརིཡཱ

རཛོནུམཏྟཾ ཚཝིཡཱ ནལིམྤཏེ

སརོཛཔཏྟེརིཝ ཝཱརིབིནྡཝོ; ()

༣༨.

ཨིམསྶ ལོམཱནི ཀལེཝརེ ཝརེ

ཝིསུཾ ཝིསུཾ ཀཱུཔགཏཱནི སཱུནུནོ,

ཝིལུམྤརེ རཱུཔཝིལཱསལཀྑིཡཱ

མནོརམཾ བྷོ ཀམཎིཀཉྩུཀསྶིརིཾ; ()

༣༩. ¶

ཨིམསྶ ཨུདྡྷགྒམུཁཾ མུཁསྶིརིཾ

པདཀྑིཎཱཝཏྟ མཔེཀྑིནོ ཡཐཱ,

ཏིརོཀརེ རོམཝིཏཱན མིནྡིརཱ-

ནིཀེཏནིནྡཱིཝརཀཱནནསྶིརིཾ; ()

༤༠.

ཨིམསྶ བྷོརཱཛ སརོཛཡོནིནོ

ཡཐོཛུགཏྟཾ ཨུཛུགཏྟམཱཡཏིཾ,

ཨནཉྙསཱམཉྙགུཎཱཝཀཱསཏོ

པཛཱབྷིཔཱུཛཱཝིདྷིབྷཱཛནཾ སིཡཱ; ()

༤༡.

ཨིམསྶ སཏྟུསྶདལཀྑཎཾ སུབྷཾ

སམཾསམདྡིཊྛསིརཱཝལིཾ སདཱ,

དདྷཱཏི བྷོ པཱརམིདྷམྨསིཔཀྤིནོ

སུདྷནྟཙཱམཱིཀརཔིཎྜཝིབྦྷམཾ; ()

༤༢. ¶

ཨིམསྶ པུཎྞོབྷཡཀཱཡབྷཱགིམཾ

མིགིནྡཔུབྦདྡྷསརཱིརལཀྑཎཾ,

ཀུདིཊྛིཝཱདཱིབྷསིརོཝིདཱརཎེ

ནརིནྡསཱམཏྠིཡམུབྦཧེ ནཀིཾ; ()

༤༣.

ཨིམསྶུ’པེཏོ གྷནམཾསཝཊྚིཡཱ

ཙིཏནྟརཾསོ མུདུཙཱརུཔིཊྛིཡཾ,

བྷཝཎྞཝཱ ཀཉྩནཔཙྩརིསིརཾ

ཏནོཏི སཏྟུཏྟརཎེ ནརཱདྷིཔ; ()

༤༤.

ཨིམསྶ ནིགྲོདྷམཧཱིརུཧསྶིཝ

སམཔྤམཱཎོ པརིམཎྜལོཔྱ’ཡཾ,

ཀདཱཙི དུཀྑཱཏཔཁིནྣདེཧིནཾ

པརིསྶམཾ བྷོ པཛཧེ བྷཝཉྫསེ; ()

༤༥. ¶

ཨིམསྶ རཱཛིཏྟཡརཉྫིཏོ’ཏྟརིཾ

ཀརཱིཡམཱནུ’ཏྟམདྷམྨནིསྶནོ,

སུམཊྚཝཊྚོ སམཝཏྟཁནྡྷཀོ

མུཏིངྒཁནྡྷོརིཝ རཱཛ རཱཛཏེ; () (སིལེས བནྡྷནཾ)

༤༦.

ཨིམསྶ བྷོ སཏྟསཧསྶསམྨིཏཱ

ཡཐཱ’མཏཛ྄ཛྷོཧརཎཱབྷིལཱསིནོ,

རསགྒསཱ སནྟི རསཱདནུམྨུཁཱ

རསགྒསགྒཱི’ཏྱ’བྷིདྷཱིཡཏེ ཏཏོ; ()

༤༧.

ཨིམསྶ’ནུབྱཉྫནཏཱརཀཱཀུལེ

ཨནནྟརཱུཔཱཡཏནམྦརོ དརེ,

ཝིརོཙཏེབཱརསམཱིསསིརིཝ

ནརིནྡསཱིཧསྶཧནཱུཔམཱཧནཱུ; ()

༤༨. ¶

ཨིམསྶ ཏཱལི༹སཏིདནྟཔནྟི བྷོ

པཧཱུཏཛིཝ྄ཧཱརཐིཀཾ ཙརནྟིཡཱ,

མནུཉྙཝཱཎིཝནིཏཱཡ ཏཏྭཏེ

པསཏྠམུཏྟཱཝལིལཱིལམཱཡཏིཾ; ()

༤༩.

ཨིམསྶ ཛཝ྄ཧཱཝརཀཎྞིཀཱཝཧེ

མུཁམྦུཛེ སཙྩསུགནྡྷཝཱསིཏེ,

སམཔྤམཱཎཱ དསནཱཝལཱི སུབྷཱ

ཝིབྷཱཏི ཀིཉྫཀྑཏཏཱིཝ བྷཱུཔཏཱི; ()

༥༠.

ཨིམསྶ བྷོ ཁཎྜིཏསངྑཔཎྜརཱ

དྭིཛཱཝལཱི ནིབྦིཝརནྟརཱཡཏིཾ,

སམུབྦྷཝཱཡུཏྟིལཏཱཡ ཏཱཡཏི

མུཁཱལཝཱལེ༹ མུཀུལཱཝལིསྶིརིཾ; ()

༥༡. ¶

ཨིམསྶ པཱིཎཱནནཙནྡཙནྡིཀཱ

སུསུཀྐདཱཋཱཝལི སཙྩཝཱདིནོ,

པདིསྶཏེ དྷམྨཏལཱ༹ཀཀཱིལ༹ནེ

ཀཏཱབྷིལཱསཱརིཝཧཾསམཱལིནཱི; ()

༥༢.

ཨིམསྶ ཙཱནུཏྟརདྷམྨདེསནཱ-

ཏརཎྱམཱལོལལཀཱརརཱུཔིནཱི,

པཧཱུཏཛིཝ྄ཧཱ བྷཝསཱགརཱ’ཡཏིཾ

ནརིནྡ པཱརཾ ཛནཏཱ’ཝཏཱརཡེ; ()

༥༣.

ཨིམསྶ བྷོ བྲཧྨསརོཔམོ སདཱ

སཧསྶདྷཱ’ཡཾ ཀརཝཱིཀརཱཝཏོ,

མནོཧརཊྛངྒསམངྒིསུསྶརོ

སསོཏཀཱནཾ མཎིཀུཎྜལཱཡཏེ; ()

༥༤. ¶

ཨིམསྶ ནཱིལཾ ནཡནུཔྤལཉྩཡཾ

ནིརཱུཔམེ རཱུཔཝིལཱསམནྡིརེ,

ནིརོཔིཏཾ བྷོ མཎིསཱིཧཔཉྫར-

དྭཡཾཝ བྷཱསེ ཀུསལེན ཀེནཙི; ()

༥༥.

ཨིམསྶ པཱཋཱིནཡུགཾ’ཝ དིསྶཏེ

ཝིསིཊྛརཱུཔཱཡཏནཱཔགཱསཡཾ,

སུབྷཾ གཝཙྪཱཔཝིལོཙནོཔམཾ

མཎིཔྤབྷཾ གོཔཁུམདྭཡཾ སདཱ; ()

༥༦.

ཨིམསྶཱ ཨུཎྞཱ བྷམུཀནྟརུབྦྷཝཱ

ལཱ༹ཊམཛ྄ཛྷོཔགཏཱ ཝིརོཙཏི,

ཡདཏྠི སཉཛྷཱགྷནརཱཛིམཛ྄ཛྷགཾ

སསངྐཧཱིནཾ སསིམཎྜལཾ ཏཐཱ ()

༥༧. ¶

ཨིམསྶ ཨུཎྷཱིསཀསཱིསལཀྑཎཾ

སདྷམྨརཛྫིསྶརིཡཾ ཨནཱགཏེ,

ཀརིཡམཱནསྶ ཧི ཙཀྐཝཏྟིནོ

དདྷཱཏི ཨུཎྷཱིསཀསིསཝིབྦྷམཾ; ()

༥༨.

ཨིམསྶ བྷུམིསྶར སུཔཀྤཏིཊྛིཏ-

པདངྐིཏེ ཙཀྐཡུགམྷི དིསྶརེ,

ཨརཱསཧསྶཱནི ཙ ནེམིནཱབྷིཡོ

ཏིཝཊྚརེཁཱ སིརིཝཙྪཀཱདཡོ; ()

༥༩.

ཨིམེཧི བཏྟིཾསཏིལཀྑཎེཧི བྷོ

ཨསཱིཏྱནུབྱཉྫནལཀྑཎེཧི’པི,

སམུཛྫལནྟོ པུརིསཱསབྷོཏྱཡཾ

བྷཝེཡྻ བུདྡྷོ བྷཝབནྡྷནཙྪིདོ; ()

༦༠. ¶

སསོཏམཱཔཱཐགཏཱཡ ཏཱཝདེ

དྭིཛསྶ ཝིཏྠཱརཀཐཱཡ ཙོདིཏོ,

ཨཔུཙྪི རཱཛཱ ཀིམཡཾ སམེཀྑིཡ

ཨནཱགཏེ བྲཱཧྨཎ པབྦཛིསྶཏི; ()

༦༡.

ཀདཱཙི ཨུཡྻཱནགཏོ མཧཱཔཐེ

ཛརཱརུཛཱམཙྩུཝིརཱུཔདསྶནཾ,

ཝིདྷཱཡ ནིབྦིནྟམནོ བྷཝཏྟཡེ

ཏཔོདྷནཾ པསྶིཡ པབྦཛིསྶཏི; ()

༦༢.

ཨིཏིཧ ཝཏྭཱན སཀཾསཀཾ གྷརཾ

ཏཏོ’པགནྟྭཱ’དྡྷནིམིཏྟཔཱཋཀཱ,

མཧལླཀཱ’དཱནི མཡནྟི སུནཝོ

ཏམཱནུཔབྦཛྫིཏུམོཝདིཾསུ ཏེ; ()

༦༣. ¶

དྭིཛེསུ ཝུདྡྷེསུ མཏེསུ སཏྟསུ

ཨཡཾཧི ཀོཎྜཉྙསམཝ྄ཧཡོ སུདྷཱི,

མཧཱཔདྷཱནཾ པུརིསཱསབྷོ’དྷུནཱ

ཀརོཏི སུཏྭཱ ཀརུཎཱཡ ཙོདིཏོ; ()

༦༤.

སམཱནལདྡྷིཧི ཀུལེསུ ཏེསུ ཧི

ཙཏུཧི ཝིཔྤེཧི སཧ’ནྟཔཉྩམོ,

ཨཐོ’རུཝེལཾ ཨུཔགམྨ པབྦཛི

བྷཝིཾསུ ཏེཔཉྩི’དྷ པཉྩཝགྒིཡཱ; ()

༦༥.

ཀདཱཙི ལདྡྷཱ པརིཡནྟསཱགརཾ

ཨིམཾ ཙཏུདྡཱིཔིཀརཛྫམཏྲཛཾ,

ཛིཏཱརིཝགྒཾ ཝིཙརནྟམམྦརེ

ཀརོམི པཙྩཀྑམཧནྟི ཙིནྟིཡ; ()

༦༦.

ནིམིཏྟརཱུཔཀྑིཔཐཔྤཝེསནཾ

ནིཝཱརཎཏྠཾ ཏནིཛརཱཛསཱུནུནཱ,

ནརཱདྷིཔོ སོ པུརིསེཧི སབྦཐཱ

དིསཱསུ རཀྑཱཝརཎཾ ཨཀཱརཡི; ()

༦༧. ¶

ཨཡཾ ཀུམཱརོ ཡདི ཙཀྐཝཏྟིཝཱ

བྷཝེཡྻ སམྦོདྷིཔདཾ ལབྷེཡྻཝཱ,

སཀེཀུལེ ཁཏྟིཡབནྡྷཝེཧི སོ

པུརཀྑཏོཡེཝ ཙརིསྶཏཾ ཨིཏི; ()

༦༨.

ཀུམཱརནཱམཊྛཔནམྷི ཝཱསརེ

སཧསྶམཏྟེསུ ཀུལེསྭ’སིཏིཡཱ,

ཨདཱསི པཙྩེཀཛནོ པཊིསྶཝཾ

པདཱཏུཀཱམོཝ ཝིསུཾཝིསུཾ སུཏེ; ()

༦༩.

ཨསེསདོསཱཔགཏཱ སུཁེདྷི ཏཱ

སུཝཎྞཀུམྦྷོརུཔཡོདྷརོ ན ཏཱ,

ཨནེཀདྷཱཏཱི ཝརཝཎྞགབྦི ཏཱ

སཔཙྩུཔཊྛཱཔཡི ཏངྑཎེཔི ཏཱ; ()

༧༠. ¶

ཏལཱ༹ཀཏཱིརམྷི ཏརངྒབྷཱསུརེ

ཡཐེཝ ཧཾསྱཱ ཀལཧཾསཔོཏཀཾ,

མཧེསིཡཱ’ངྐེ སཡནེ སིཏཏྠརེ

སུཝཱསརེ བྷུཔཏི པུཏྟམདྡས; ()

༧༡.

ཨདིཊྛཔུཏྟཱནནཔངྐཛཱ ཙིརཾ

ལཧུཾ པརིཀྑཱིཎཝཡོགུཎཱ ཨིཏོ,

ཙུཏཱ’ཝ མཱཡཱཛནནི ནིརཱམཡཱ

ཨུཔཱཝིསི སཏྟམཝཱསརེ དིཝཾ; ()

༧༢.

མཧེསིམཱཡཱབྷགིནཱི ཏདཱ མཧཱ-

པཛཱཔཏིགོཏམིནཱམརཱཛིནཱི,

ནིཛཾ ཀུམཱརཾ བྷརཎཱཡ དྷཱཏིནཾ

ཝིདྷཱཡ བྷཱརཾ པཊིཛགྒི ཏཾ སཡཾ; ()

༧༣. ¶

ཏདཱ’བྷཝུཾ དཱིཔསིཁཱ ཛགནྟཡེ

ཀལེབརོ’བྷཱསལཝེན སུནུནོ,

ཝིནཊྛཏེཛཱརིཝ རངྒདཱིཔིཀཱ

ཝིམཱནདིཔེསུ ཀཐཱཝཀཱ’ཏྟནོ; ()

༧༤.

ཝིཙིཏྟབྷུམྨཏྠརཎེ ཨབྷིཀྑཎཾ

སཛནྣུཀེཧཱ’ཙརི མནྡིརོདརེ,

མཧཱཝནསྨིཾ མཎིཝཱལུཀཱཏལེ

ཝིཛམྦྷམཱནོརིཝ སིཧཔོཏཀོ; ()

༧༥.

སུཏསྶ ཀཱིལཱ༹པསུཏསྶ མནྡི རེ

བྷམནྟབིམྦཾ མཎིདཔྤཎོད རེ

ནིབདྡྷམདྡཀྑི ཙརནྟམམྦ རེ

ཡཐེཝ ཙཀྐཾ རཏནཾ མཧཱིབྷུ ཛོ; ()

༧༦. ¶

ཏདངྒྷིཝིཉྙཱསཝསེན བྷུམིཡཱ

ཝཛནྟམངྐོ’པནིདྷཱཡ བྷུམིཔོ,

ཏདཱ’བྷིནིཙྪཱརིཏ མཱསབྷིཾ གིརཾ

ཨིདཱནི མཾ སཱཝཡ པུཏྟམབྲུཝི; ()

༧༧.

ནིབདྡྷམནྟོམཎིཝེདིཀཱཏལེ

མུཁེནྡུབིམྦུདྡྷརཎེ པཡོཛཡཾ,

སཡཾ པལམྦྷེསི ཨམཙྩསཱུནཝོ

ཝཡེན མནྡོ’པི ཨམནྡབུདྡྷིམཱ; ()

༧༨.

ཨུལཱ༹རསོཀཾ པིཏུཙིཏྟསམྦྷཝཾ

ཏིལོཀདཱིཔོ ནིཛཔུཉྙཏེཛསཱ,

ཏམོཔབནྡྷཾ བྷུཝནོ’དརུབྦྷཝཾ

ནིརཱཀརི བཱལརཝཱི’ཝ རཾསིནཱ; ()

༧༩.

ཝིཀིཎྞལཱཛཱཀུསུམཱཀུལཉྫསེ

ཝིཏཱནརངྒདྡྷཛནིབྦྷརམྦརེ,

པུརེ ཏཧིཾ མངྒལཀིཙྩསམྨཏཾ

ཀདཱཙི རཉྙོ བྷཝི ཝཔྤམངྒལཾ; ()

༨༠. ¶

སུགནྡྷམཱལཱབྷརཎཱདིམཎྜིཏ-

པསཱདྷིཏཱ ཀཱཔིལཝཏྠཝཱ ནརཱ,

སཀིངྐརཱ ཀམྨཀརཱ’པི ཀཔྤིཏཱ

ཏཏོ ཏཏོ སཏྟིཔཏིཾསུ ཏཾ ཀུལཾ; ()

༨༡.

མཧཙྩསེནཱཡཔུརཀྑཏོཧིསོ

ཨུལཱ༹རརཱཛིདྡྷིསམུཛྫལཾཏཏོ

པཡཱསིཀམྨནྟཔདེསམཏྲཛཾ

ཀུམཱརམཱདཱཡཔུརིནྡདོཔམོ; ()

༨༢.

ཚཎམྷི ཏསྨིཾ མནུཝཾསཀེཏུནོ

མནོརམཾ མངྒལནངྒལཱདིཀཾ,

སུཝཎྞཔཊྚེཧི པརིཀྑཊཾཀ མཧཱ-

ཛནསྶ’པཱི རཱུཔིཡཔཊྚཚཱདིཏཾ; ()

༨༣. ¶

ཝིསཱལསཱཁཱཀུལཛམྦུསཱཁིནོ

ཝིདྷཱཡ ཧེཊྛཱ སཡནེ མཧཱརཧེ,

ནིཛཾ ཀུམཱརཾ སཛནོ ཛནཱདྷིཔོ

སམཱརཧཱི སམྤཏི ཝཔྤམངྒལཾ; ()

༨༤.

ཀུམཱརརཀྑཱཝརཎཱཡུ’པཊྛིཏཱ

ཏམུསྶཝཾ དྷཱཏིཛནཱ ཝིཔསྶིཏུཾ,

ཨཔཀྐམིཏྭཱ བཧི སཱཎིཏོ ཁཎཾ

པམཏྟརཱུཔཱ ཝིཙརིཾསྭི’ཏོཙིཏོ; ()

༨༥.

པརིགྒཧེཏྭཱ’ནམཔཱན མཱསནེ

ནིསཛྫ པལླངྐ མལཏྠ བནྡྷིཡ,

ཛིནངྐུརོ ནཱིཝརཎེཧི ནིསྶཊཾ

ཝིཝེཀཛཾ ཛྷཱནམགཱདྷབུདྡྷིམཱ; ()

༨༦. ¶

ཝིཔསྶ པུཏྟསྶུ’པཝེསནཾ ཏཧིཾ

དུམསྶ ཚཱཡཱཡ ནིཝཏྟཏཾ ཏཐཱ,

པཝནྡི རཱཛཱ པཊིཧཱརིཀཱཀཐཱ-

པཙོདིཏོཔུཏྟམུཔེཙྩ ཏངྑཎེ; ()

༨༧.

ཀལཱསུ ཝུཛྫཱསུ ཙ པུཏྟམཏྟནོ

ཝིནེཏུཀཱམོ ཝིནཡཀྑམཾ པིཏཱ;

པསཏྠསཏྠནྟརཔཱརདསྶིནཾ

ཀདཱཙི ཝིཔྤཱཙརིཡཾ ཀིརཱ’ནཡི; ()

༨༨.

སམཔྤིཏཾ ཏཾ གུརུནོ ཀརམྦུཛེ

སདེཝལོཀསྶ གུརུཾ སགཱརཝཾ,

མཧཱིསུརོ སོ ཛལབིནྡུནཱ ཡཐཱ

སུདུཏྟརཱགཱདྷམཧོདདྷཱིརསཾ; ()

༨༩. ¶

སཝཎྞབྷེདཾ སནིགྷཎྚུཀེཊུབྷཾ

ཨཐབྦབེདེནི’ནིཧཱསཔཉྩམཾ,

ཏིཝེདམུདྡེསཔདེན དུདྡསཾ

ཏཐཱ ཀལཱསིཔྤཏཾ ནིབོདྷཡཱི; ()

༩༠.

ཨནཉྙསཱདྷཱརཎཔུཉྙཝཱསནཱ-

ཝིདྷཱུཏསམྨོཧཝིསུདྡྷབུདྡྷིནོ,

སམཏྟཝིཛྫཱ སཀལཱཀལཱ དྷིཡཱ

ཀལམྤི ནཱལཾ བཧུབྷཱསནེན ཀིཾ; ()

༩༡.

ན ཀེཝལཾ ཏསྶ ཀལེབརཾ བཧི

ཝིབྷཱཏི བཏྟིཾསཏིལཀྑཎེཧི བྷོ,

བྷུསཾ ཏདབྦྷནྟརཝཏྠུ དིཔྤཏེ

སུབུདྡྷསཏྠནྟརལཀྑཎེཧཱི’པི; ()

༩༢. ¶

ཏིལོཙནསྶཱ’པི ཏིལོཀཙཀྑུནོ

ཨཡཾ ཝིསེསོ ནཡནེཧི དིསྶཏེ,

ལལཱཊནེཏྟོ པུརིམོ ནསོབྷཏི

པརོ’ཝ ཨབྦྷཏྟརཉཱཎལོཙནོ; ()

༩༣.

ཨནུབྦཛནྟོ ནཝཡོབྦནསྶིརིཾ

ཡསོཔབནྡྷེན སཀེ ནིཀེཏནེ,

པཝཌྜྷི དྷཱིརོ སཀལཾ ཀལཱནྟརཾ

ཀལཱནིདྷཱི རཾསིཙཡེནི’ཝ’མྦརེ; ()

༩༤.

ཨུཔཌྜྷགཎྜཱཧིཏདཱཋིཀཱཡ སོ

ཡསོདྷནོ སོལ༹སཝསྶིཀོ ཡདཱ,

ཀཔོལཕུཊྛཉྫནདཱནརཱཛིཡཱ

ཀརི ཡཐཱ བཱལདསཾ ཝྱཏིཀྐམི ()

༩༥. ¶

ཏདཱ ནརིནྡོ སུརམནྡིརོ’པམཾ

ཨུཏུཏྟཡཱནུཙྪཝིཀཾ མནོརམཾ,

པཡོཛཡིཏྭཱན པཝིཎསིཔྤིཀེ

སུཏཱཡ ཀཱརཱཔཡི མནྡིརཏྟཡཾ; ()

༩༦.

ནིསིཏསམྦཱདྷཏལཾ ནིཝཱརིཏ-

སརོནིལཾ ཕསྶིཏསིཧཔཉྫརཾ,

མཧིཝཏཾསཾ ནཝབྷུམིཀཾ གྷརཾ

བབྷུཝ རམྨཾ བྷུཝི རམྨནཱམིཀཾ; ()

༩༧.

སསིཀར’མྦྷོདྷརརཱཝནིབྦྷར-

ཝིཏཱན མུགྒྷཱཊཀཝཱཊབནྡྷནཾ,

སུརམྨནཱམཾ ཧཏགྷམྨམིནྡིརཱ-

ནིཝཱསརམྨཾ བྷཝི པཉྩབྷཱུམིཀཾ; ()

༩༨.

ཨཧིཎྷསིཏུཎྦྷགུཎེཧི པཱཝུསེ

སུཁཱནུལོམཾ སམསཏྟབྷུམིཀཾ,

སུཕསྶིཏཱ’ཕསྶིཏསིཧཔཉྫརཾ

སུབྷཾ སུབྷཾ ནཱམ ནིཀེཏནཾ བྷཝི; ()

༩༩. ¶

ཝཡོནུཔཏྟསྶ ནརིནྡསུནུནོ

ཨུལཱ༹རརཱཛིདྡྷིཝིལཱསདསྶནེ,

ཀཏཱ’བྷིལཱསོ ཛནཀོ ཛནཱདྷིཔོ

པདཱཏུཀཱམོ ནིཛརཛྫསམྤདཾ; ()

༡༠༠.

ཝསནྟི ཙེ ཡོབྦནཧཱརིདཱརིཀཱ

ནརིནྡསནྡེསཧརེཧི པེསཡི

ས སཱཀིཡཱནཾ སཙིཝེཧི སཱསནེ; ()

༡༠༡.

ནིཝེདཡུཾ ཡོབྦནགབྦིཏསྶ ཏེ

ནཀིཉྩིསིཀཔྤཱཡཏན’ནྟདསྶིནོ,

སུཏསྶ དཱརཱབྷརཎཱཡ དྷཱིཏརོ

ཀཐནྣུ དསྶཱམ མཡནྟི ཁཏྟིཡཱ; ()

༡༠༢. ¶

སུཏེན ཏཾ རཱཛསུཏེན ཙོདིཏོ

པིཏཱ ཙརཱཔེསི པུརམྷི བྷེརིཡོ,

མམ’ཏྲཛོ ཀཱཧཏི སིཔྤདཱིཔནཾ

ཨིཏོཔརཾ སཏྟམཝཱསརེ ཨིཏི; ()

༡༠༣.

ཝརོ ཀུམཱརོ ཧི ཀུམཱརཝིཀྐམོ

ཀལཱཔསནྣདྡྷ ཀལེབརོ ཏདཱ,

ཝིཔསྶཏཾ བནྡྷུཛནཱནམོསརི

ཨནཔྤདཔྤོ རཎཀེལི༹མཎྜལཾ; ()

༡༠༤.

དྷནུདྡྷརོ སོ པཋམཾ སཀེ བྷུཛེ

སཧསྶཐཱམཾ སསརཾ སརཱསནཾ,

ཝིདྷཱཡ པོཋེསི ཛིཡཾ ཝསུནྡྷརཱ-

ཝིདཱརཎཱཀཱརམཧཱརཝཾ རཝི; ()

༡༠༥. ¶

ཙཏུདྡིསཱ’དྷརདྷནུདྡྷརཱ མམཾ

ཀརོནྟུ ལཀྑཾ ནིཛཁཱཎཔཏྟིཡཱ,

ཨིཏཱིཧ ཝཏྭཱ སརཝཱརཎེན སོ

ཨབྷུཏཔུབྦཾ སརསིཔྤམཱཧརི; ()

༡༠༦.

ཙཏུདྡིསཱཡཾ ཙཏུརོ དྷནུདྡྷརེ

མམེ’ཀབཱཎེན ཧཎཱམ’ཧཾ ཨིཏི,

ཨཀཱསི ཏདདཱིཔཡམཉྙཐཱ’བྦྷུཏཾ

ས ཙཀྐཝེདྷཝ྄ཧཡསིཔྤདཱིཔནཾ; ()

༡༠༧.

སརེཧི ཝེཎྱཱ’ཡཏཡཊྛིརཛྫུཀཾ

སརེཧི ཙཱ’རོཧཎམཎྜཔཱལཡཾ,

སརེཧི པཱཀཱརཏལཱ༹ཀཔངྐཛཾ

སརེཧི ཝསྶཾ ཨིཏིསིཔྤམཱཧརི; ()

༡༠༨. ¶

མཧཱསཏྟོ ལོཀཔྤབྷཝམསམཾ སིཔྤཛཱཏཾ ཛནཱནཾ

ཏདཱ སཾདསྶེསི མུདིཏཧདཡཱ སཱཀིཡཱ དཱརིཀཱཡོ,

ཨུཔཊྛཱཔེསུཾ ཏཱ སུརཏིརཏིསངྒཱམཙཏུརཱ

སཧསྶཱནཾ ཏཱལི༹སཏིཔརིམིཏཱ ནཱཊིཀཱ’སུཾ གྷརེསཱུ; ()

ཨིཏི མེདྷཱནནྡཱབྷིདྷཱནེན ཡཏིནཱ ཝིརཙིཏེ སཀལཀཝིཛན ཧདཡཱནནྡ དཱནནིདཱནེ ཛིནཝཾསདཱིཔེ ཨཝིདཱུརེནིདཱནེ ལཀྑཎཔཊིགྒཧཎ ཀུམཱརསམྦྷརཎཱདི པཝཏྟི པརིདིཔོ ཨཊྛམོ སགྒོ.

༡. ¶

ཨིཏི ཝིཧིཏེ སཏི སིཔྤདཱིཔནསྨིཾ

ཏདབྷིམུཁེ’ཏརཁཏྟིཡཱ’ཏིསཱུརཱ,

ཨཔགཏམཱནམདཱབྷཝིཾསུམཉྙོ

(ཏརུཎམིགིནྡམུཁེ)ཝ མཏྟདནྟི; ()

༢.

ཝིཛཊིཏ སཾསཡབནྡྷནོ པདཱཏུཾ

སུམརིཡ དེཝདཧམྷི སུཔཀྤབུདྡྷོ,

ནརཔཝརོ ནིཛདྷཱིཏརཾ ཀུམཱརིཾ

སུཝིམལ ཀོལིཡཝཾསཀཉྫཧཾསིཾ; ()

༣.

ཏཧིམཐམནྟིཝརེཧི མནྟཡིཏྭཱ

ནིཁིལཔཝཏྟིནིཝེདནཱཡ དཱུཏེ,

པཧིཎི ཀཝིཝཱཧམཧེ ཝིདྷིཡཏནྟི

ཏཝ ཏནུཛེན མམཉྷི དྷཱིཏུཀཉྙཱ; ()

༤. ¶

ཝལཡིཏཏཱརམུཔཊྛིཏོ’དཡཾ ཏེ

ཧིམཀརབིམྦམིཝོ’པཝིཊྛཔཱིཋཾ,

པརིཝུཏམནྟིགཎཾ པཎམྨ རཱཛཾ

ཀཔིལཔུརོཔགཏཱ ཏམཏྠམཱཧུ;

༥.

ཨཐ པཊིལདྡྷཔཊིསྶཝེནུ’དགྒཱ

པདཡུགམཉྫལིཔུཔྥམཉྫརཱིཧི,

སུམཧིཡ ཏཾ པཊིཝེདཡིཾསུ རཉྙོ

སཀཝིསཡཾ སམུཔེཙྩ རཱཛདཱུཏཱ; ()

༦.

ཨུབྷཡཀུལམྷི མཧཱིབྷུཛཱ’ཉྙམཉྙཾ

པུནརཔི མནྟིཝརེཧི མནྟཡིཏྭཱ,

ཝིསདམཏཱིཧི ནིམིཏྟཔཱཋཀེཧི

ནིཡམིཏམངྒལཝཱསརམྷིཏམྷཱ; ()

༧.

ཀནཀཝིཏཱནཝིནདྡྷཧཱརིཧཱརཾ

ཀུསུམསམཱཀུལཧེམཔུཎྞཀུམྦྷཾ,

ཏིདིཝཝིམཱནསམཱནམུལླསནྣ-

རཏནཝིཙིཏྟཝིཝཱཧམཎྜཔགྒཾ; ()

༨. ¶

གཧིཏཝིཏཱནསིཏཱཏཔཏྟཀེཏུ-

དྡྷཛམཎིཝིཛནིཙརུཙཱམརེཧི,

པཙུརཛནེཧི ཀཏུཔཧཱརམགྒེ

སུཔརིཝུཏཾ ཙཏུངྒིརནིདྷཛིནྱཱ; (༦)

༩.

ཝིཝིདྷཝིབྷཱུསཎབྷུསིཏཏྟབྷཱཝཾ

ཨབྷིནཝཔཱིནཔཡོདྷརཱབྷིརཱམཾ,

ཧརིསིཝིཀཱཡ ཡསོདྷརཾ ཀུམཱརིཾ

མཎིཁཙིཏཱཡ ཝིདྷཱཡ ཙཱ’ནཡིཾསུ; ()

༡༠.

ཝལཡིཏམཱལཏིདཱམཧེམམཱལཱ

པརིམལབྷཱཝིཏཀུནྟལཔྤཝེཎི,

ཝིརལ༹བཀཱཝལིམཔྤཝིཛྫུརཱཛིཾ

ཛལདྷརམཱལམཛེསི ཀོམལཱཡ ()

༡༡. ¶

ནིརཝདྷིརཱུཔནབྷོཏལམྷི ཏསྶཱ

ཛནམནཀུནྡཝིཀཱསནཾ བབྷཱས,

ཀུཊིལཏརཱལཀཀཱལམེགྷརཱཛི-

ཛཊིཏལལཱཊཏལདྡྷཙནྡབིམྦཾ; ()

༡༢.

མིགམདཀུངྐུམགནྡྷཔངྐལིཏྟོ

ཀུལཝདྷུཡཱ ཏིལཀོ ལལཱཊམཛ྄ཛྷེ,

མཀརདྷཛེན ནིརོཔིཏོརི’ཝཱ’སི

ཏིབྷུཝནབྷུཏཛཡཱཡ པུཔྥཀེཏུ; ()

༡༣.

ཛནནཡནཉྫནརཱུཔསམྤདཱཡ

ཀུལམཔདཱཡ རརཱཛ ནིམྨདཱཡ,

པརམསིརིཾ སརུསཱིརུཧཱབྷིརཱམཾ

ཝདནམནངྒསུཝཎྞདཔྤཎཱབྷཾ; ()

༡༤. ¶

མཎིགཎམཎྜིཏཀུཎྜལེཧི ཏསྶཱ

སཝཎྱུགཾ གྷཊིཏཱཝགཎྜབྷཱགཾ,

མནསིཛསཱཀུཎིཀེན ཁིཏྟཔཱས-

ཡུགལམིཝཀྑིཝིབྷངྒམཱནམཱསི; ()

༡༥.

སུཝིམལཀནྟིཔབནྡྷསནྡནཏྠཾ

ནཡནནདཱིནམུབྷིནྣམནྟརཱལེ༹,

ཀནཀཔཎཱལི༹སམཔྤིཏེ’ཝ ཏཱཡ

ཝརཝདནཱཡ རརཱཛ ཏུངྒནཱསཱ; ()

༡༦.

ནིརུཔམརཱུཔཝིལཱསམནྡིརསྨིཾ

སཛཝནིཀཱནི’ཝ སཱིཧཔཉྫརཱནི,

རུཙིརཝིལཱསིནིཡཱ ལསིཾསུ པམྦྷཱ-

ཝལིསཧིཏཱནི སུནཱིལལོཙནཱནི; ()

༡༧. ¶

ཀནཀཀཔཱལནིབྷཾ མནོབྷཝསྶ

ཝིམལཀཔོལཡུགཾ སིནིདྡྷཀནྣིཾ,

ནཝསསིམཎྜལཔུཎྜརཱིཀསཎྜ-

སསིརིམཝརུནྡྷིམནོཧརཱདྷརཱཡ; (༦)

༡༨.

སུཙརིཏཔཱརམིཏཱལཏཱཡ ཏཱཡ

པརིཎཏརཱགལཏཱཡ བྷཱུལཏཱཡ,

ཨདྷརཡུགཾ ཏརུཎངྐུརདྭཡཾ ཝཱ

ཀིམིཏི ཝིཏཀྐཧཏོ’ཡམཱསི ལོཀོ; ()

༡༩.

ཀུལཝདྷུཡཱ ཝདནཱ’ལཝཱལ༹གབྦྷེ

ནཝཀལིཀཱཝལིཕུལླིཏེ’ཝཀིཉྩི,

སུམདྷུརཝཱཎིལཏཱཡ མནྡཧཱས-

ཛྫུཏིདྷཝལི དསནཝལི རརཱཛ; ()

༢༠. ¶

ཀུཝལཡནཱིལཝིལོལལོཙནཱཡ

མུཁཀམལཱ’ལིཀུལཱནུཀཱརིནཱིབྷུ,

ནཡནམཡཱུཁགུཎེཧ’པཱངྒབྷངྒ-

ནིསིཏྶརེཧི ཨནངྒཙཱཔརཱུཔཱ; ()

༢༡.

ཀལརཝམཉྫུགིརཱ ཏིཝཊྚརཱཛི

གྷནཀུཙབྷདྡགྷཊཱཡ ཀམྦུགཱིཝཱ,

མདྷུརགབྷཱིརཝིརཱཝ རངྒལེཁཾ

ཨཛིནི སུཝཎྞམུཏིངྒབྷེརིསངྑཾ; ()

༢༢.

ཨབྷིནཝཔིནཔཡོདྷརོ’པདྷཱནཾ

སུཁུམཏརཙྪཝིཀོཛཝཱབྷིརཱམཾ,

ཨུརསཡནཾ སམལངྐཏཾ ཝིཡཱ’སི

ནིཛཔཏིསངྒམམངྒལཱཡ ཏཱཡ; ()

༢༣. ¶

ཀུཙཀནཀཱ’ཙལསམྦྷཝཱཡ ནཱབྷི-

ཀུཧརཏཊཱབྷིམུཁཱཡ ཀནྟིནཛྫཱ,

ཚཋཱརཝལིཏྟཡམིནྡིརོཔམཱཡ

ཨཝཧརི ཏུངྒཏརངྒཔནྟིཀནྟིཾ; ()

༢༤.

མཎིརསནཱགུཎམནྠརཱཡ ཏསྶཱ

གྷནཀུཙབྷཱརཀིསོ ཀིསོདརཱཡ,

ཧརིསིརིཝཙྪསུཧཛྫམཛ྄ཛྷབྷཱགོ

མདདྷནུམུཊྛིཝིལཱསམཱཧརིཏྠ; ()

༢༥.

སརསིཛཏནྟུཔཝེསནཱཝཀཱས

མཝཧརི པཱིནཔཡོདྷརནྟརཱལ༹ཾ,

ནིཛགལ༹བྷཱསུརཧཱརནིཛ྄ཛྷརེཧི

ཀནཀདརིམུཁཝིབྦྷམཾ ཡུཝཏྱཱ; ()

༢༦. ¶

ཨཝིཀལརཱུཔཝིལཱསསིནྡྷུཝེལཱ

ཝིརལཝིལགྒིནིཡཱཀ ཝིསཱལསོཎི,

པརིཧརི རཱཛཀུམཱརིཀཱཡ ཏཱཡ

ཀུསུམསརཱབྷཝབྷུམིབྷཱགསོབྷཾ; ()

༢༧.

ཀུལཝདྷུཡཱ ཀམལཱམལཱནནཱཡ

ཀུཝལཡཀོམལནིལརོམརཱཛི,

བྷུསམབྷིཙུམྦི གབྷིརནཱབྷིགབྦྷཾ;

ཀམལཝིཝཱཡཏམཏྟབྷིངྒརཱཛི ()

༢༨.

རུཙིརཏརོརུཡུགཾ སུཝཎྞ རམྦྷཱ-

ཀརིཀརཔཱིཝརམིནྡིརོཔམཱཡ,

བྷཛི མཀརདྡྷཛརངྒམནྡིརསྨིཾ

ཧརིམཡཐམྦྷཡུགསྶིརིཾ རམཱཡ; ()

༢༩. ¶

མདརཡརཱུཔརསདྭཡཾ ཏུལཱཡ

སུཔརིམིཏཱཡ ཙཏུམྨུཁེན ཏུལྱཾ,

ནིཛམིཧཛཱནུཡུགཾ པཝཱལ༹པཱཏི-

ཡུགལཝིཝཱསི ཨཝམྨུཁོཔནཱིཏཾ; ()

༣༠.

ཝིསཡཝིཏཀྐཏམཱཀུལཾ ཡུཝཏྱཱ

མདནུཔསངྐམཎེ མནོཝིམཱནཾ,

ཛིཏམདམཏྟམཡཱུརཀཎྛབྷཱུཏི

ཛལིཏཔདཱིཔསིཁེ’ཝ ཙཱརུཛངྒྷཱ; ()

༣༡.

མཎིམཡནཱུཔུརབྷཱསུརེཧི ཏསྶཱ

ཙརཎཏལེཧི པརཱཛིཏཱནི ཐཱིནཾ,

མུཁཔདུམཱནིཝ སངྐུཙནྟི མཉྙེ

བྷམརབྷརམྦུརུཧཱནི ཀཉྫནཱིནཾ; ()

༣༢.

ཀརཙརཎངྒུལིཔལླ’ཝགྒསཱལཱི-

ཛལལཝཔནྟིནིབྷཱ’ཏིཀོམལཱཡ,

ཨབྷིནཝཏམྦནཁཱཝལཱི བབྷཱུཝ

མཀརདྷཛསྶ ཀཏེ’ཝ པུཔྥཔཱུཛཱ; ()

༣༣. ¶

སཔརིཛནོ ཝནིཏཱཡ ཏཱཡ སདྡྷིཾ

མཎིགཎམཎྜིཏམཎྜཔཔྤདེསེ,

དིནཀརཝཾསདྷཛསྶ རཱཛཔུཏྟ-

སྶུཔགམནཾ ཨཔལོཀཡཾ ནིསཱིདི; ()

༣༤.

པརིཝུཏབནྡྷུཛནེཧི རཱཛཔུཏྟོ

ཡཐརིཝ དེཝགཎེཧི དེཝརཱཛཱ,

སཔདི ཏུརངྒརཐཾ སམཱཧིརཱུལ༹ྷོ

ཏདབྷིམུཁོ ཡསསཱ ཛལཾ པཡཱསི; ()

༣༥.

ཏཧིམུཔགམྨ ཋིཏསྶ མཎྜཔསྨིཾ

པརིདཧིཏུ’ཏྟརསཱཊཀེན ཏསྶ,

ཧརིམཎིམཎྜནམཎྜིཏ’ཏྟབྷཱཝོ

ཧིམཔཊལེན ཧིམཱཙལོ རིཝཱསི; ()

༣༦. ¶

མཎིམཀུཊེན ནིཝཏྠཀཱསིཀེན

ནརཔཏིསུནུ སུམཎྜིཏོ རརཱཛ,

སུརབྷཝནེན ཙ ཁཱིརསཱགརེན

ཀནཀསིཎེརུགིརཱི’ཝ ནིཙྩལཊྛོ; ()

༣༧.

ནབྷསི སམཱཀུལཏཱརཀཱཝལཱི’ཝ

ཨུརསི ཝིརཱཛིཏཏཱརཧཱརཔནྟཱི,

ནརཔཝརོ པིཝི ཏཱཡ རཱུཔསཱརཾ

ཨམཏམིཝཱ’ཡཏལོཙན’ཉྫལཱིཧི; ()

༣༨.

ཏདཧནི རཱཛཀུམཱརཔུབྦསེལ-

པྤབྷཝཝརཱནནཙནྡམཎྜལེན,

མུཀུལི༹ཏལོཙནནཱིལནཱིརཛཱཡ

ཨབྷཝིམནོཀུམུདཱཀརཔྤབོདྷོ; ()

༣༩. ¶

ཡུཝཏཡུཝཱནམཔེཀྑཏཾ ཛནཱནཾ

ཨནིམིསལོཙནནཱིལཀནྟིགངྒཱ,

རུཙིརཝདྷཱུཧི ཝིདྷཱུཏཙཱམརེཧི

ཨནིལཝིལོལཏརངྒསཱལིནཱིཝ; ()

༤༠.

གགནཏལོཔརི ཏཱརཀཱཀུལམྷི

ཡུཝཡུཝཏཱིནཝཙནྡཙནྡིཀེཝ,

ནིཙིཏསུཝཎྞཀཧཱཔཎེ ཝརེཛུཾ

ཨཐམཎིམཎྜཔཝེདིཀཱཏལམྷི; ()

༤༡.

སཀལཀལཱཀུསལོ’པགམྨཝིཔྤཱ-

ཙརིཡགཎོ ཛཡམངྒལཱཡ ཏེསཾ,

སུཔརིསམཱཔཡི སབྦཔུབྦཀིཙྩཾ

སཔདི པཝསྶི ཨཁཎྜལཱཝུཛཊྛི; ()

༤༢. ¶

ཀརཏལཏཱམརསེསུ ཀུཎྜིཀཱཡ

མཎིཁཝིཏཱཡ པུརོཧིཏོ ཨུབྷིནྣཾ,

སུབྷམབྷིསེཀཛལཾ ནིཔཱཏཡཾ ཏེ

པུནཧིཔཡོཛཡི པཱཎིཔཱིལ༹ཎསྨིཾ; ()

༤༣.

སུརདྷནུཝིཛྫུལཏེ’ཝ ཝཱརིཝཱཧཾ

རཐམབྷིརུཡ྄ཧ གཧཱིརམནྡགྷོསཾ,

པརིཝུཏཁཏྟིཡབནྡྷཝེཧི ཏམྷཱ

ཀཔིལཔུརཱ’བྷིམུཁཱབྷཝུཾ ཨུབྷོཏ ཏེ; ()

༤༤.

ཨཐ སམལངྐཏཝཱིཐིམཛ྄ཛྷིགཱནཾ

ཝིཝཊནིཀེཏནསཱིཧཔཉྫརཊྛཱ,

ཨནིམིསལོཙནཔངྐཛོཔཧཱརཾ

བྷཱུསམཀརུཾ ཀཔིལངྒནཱ པསནྣཱ; ()

༤༥. ¶

གམནཝིལཱསམུདིཀྑཏཾ ཛནཱནཾ

རུཙིརསིརོཔཧིཏ’ཉྫལཱིཧི བྷཏྟྱཱ,

མཎིཀལསཔྤིཏཔུཔྥམཉྫརཱིཧི

རཙིཏམིཝོབྷཡཝཱིཐིཔསྶམཱསི; ()

༤༦.

ཏིཁིཎཝིལོཙནབཱཎལཀྑབྷཱཝཾ

ནིརུཔམརཱུཔིནི ཀཱམིནཱིཧི ནཱིཏེ,

པཏིཏ’ནུརཱགསརེཧིཡེཝ ཏཱསཾ

ཧདཡཝིདཱརཎམཱསི ཏཔྥལཾ’ཝ; ()

༤༧.

ཀཐམཔི ཀཱཔིལཝཏྠཝཱ ཨཧེསུཾ

ཏདཧནི ནིཙྩལལོཙནུཔྤལེཧི,

ཀཔིལཔུརཾ ཏིདསཱལཡཱཝཏིཎྞཱ

ཏིདསགཎཱ’ཝ ཝིཔསྶནཱཡུ’བྷིནྣཾ; ()

༤༨. ¶

ཏིདིཝཔུརཱ ནིཛཝེཛཡནྟནཱམ-

སུརབྷཝནཾ’ཝ སུཛམྤཏཱི སུཛཱཏཱ,

ཀཔིལཔུརཱ པུནརཱགམིཾསུ ཏམྷཱ

པཏིཔཏིནཱི ནིཛརཱཛམནྡིརཾ དྭེ; ()

༤༩.

དྷརཎིཔཏིསུཏོ པཏྟརཛྫཱབྷིསེཀོ

ཀཔིལཔུརཝརེ ཏེསུ ཏིསྭཱལཡེསུ,

ཨཔརིམིཏསུཁཾ ཏཱཡ བིམྦཱཡ སདྡྷིཾ

སུཙིརམནུབྷཝི ཙནྡབིམྦཱནནཱཡ; ()

༥༠.

ཝིཀཙཀམལ (ནནྡཱིམུཁི) མཉྫུབྷཱཎཱི

ཏིཝིདྷཝཡསི དིབྦཙྪརཱརཱུཔསོབྷཱ,

ཨགམི ཁཡཝཡཾ སཱ’པི བིམྦཱམཧེསི

སརཐ སརཐ སངྑཱརདྷམྨསྶབྷཱཝཾ; ()

ཨིཏི མྦེདྷཱནནྡཱབྷིདྷཱནེན ཡཏིནཱ ཝིརཙིཏེ སཀལཀཝིཛན ཧདཡཱནནྡདཱནནིདཱནེ ཛིནཝཾསདཱིཔེ ཨཝིདཱུརེནིདཱནེ པཱཎིགྒཧམངྒལུསྶཝཔཝཏྟིཔརིདཱིཔོ. ནཝམོ སགྒོ.

༡. ¶

གུཎམཎིམཎིམཱ སོ དེཝརཱཛཱ’ཝ རཱཛཱ

སུཁམནུབྷཝམཱནོ ཝཱཛིཡཱནེན ཡེན,

བྷམརབྷརིཏམཱལཱ མངྒལུཡྻཱནབྷཱུམི

ཏདཝསརི ཀདཱཙི སཱལིནཱི (མཱལིནཱི) ཧི; ()

༢.

ཨུཔགཏསམཡོ’ཏི བུཛ྄ཛྷནཏྠཱཡ བོདྷིཾ

སུམརིཡ སུརཔུཏྟཱ བོདྷིསཏྟེ ཝཛནྟེ,

བྷཝཝིརཏིསམཏྠཾ དསྶཡུཾ མཱཔཡིཏྭཱ

ཛརསཀཊསརཱུཔཾ ཛིཎྞརཱུཔཾཀ ཝིརཱུཔཾ; ()

༣. ¶

ཀིམིདམིཏིཧཔུཊྛོ ཛིཎྞརཱུཔཾ ཝིཔསྶ

ཝིམཏིཔརཝསོ སོ སཱརཐིཾ རཱུཔསཱརོ,

ནིཛཧདཡནིདྷཱནེ དེཝཏཱཙོདིཏསྶ

ནིདཧི དྷནམིཝགྒྷཾ ཏསྶདྷམྨོཔདེསཾ; ()

༤.

ཧརིཏནལ༹ཀལཱཔཾ མངྒལུཡྻཱནམགྒེ

ཡཐརིཝ’ཧིམུཁཊྛཱ ཀུཉྫརི བྷཉྫམཱནཱ,

ཏཐརིཝ’བྷིབྷཝནྟཱི སབྦཡོབྦཉྙདཔྤཾ

ཁརཏརཛརཏཱ སཱ ཨཏྟཔཙྩཀྑབྷཱུཏཱ; ()

༥.

མུཁཀུཀཝལཡགབྦྷཱ བྷཊྛཀིཉྫཀྑསོབྷཱ

བྷཝི ཀཋིནཛརཱརིཁཎྜདནྟཊྛིཔནྟི,

ཀུཊིལཔལིཏཛཱཏཾ ཏཉྫརཱཡཱ’བྷིསེཀེ

སིརསི རཙིཏསེཏཙྪཏྟསོབྷཾ བབནྡྷ; ()

༦. ¶

ཨཝིརལ༹ཝལིཡོ ཏཱ ཛིཎྞརཱུཔསྶ ཙམྨེ

པབྷཝབལཝཏེཛོདྷཱཏུཝེགུཊྛིཏཱ’སུཾ,

ཏརལསལིལཔིཊྛེ སེཡྻཐཱཔོ’དདྷིསྶ

ཏརལསལིལཔིཊྛེ སེཡྻཐཱཔོ’དདྷིསྶ

པལཡཔཝནཝེགུ’ཏྟུངྒཀལློལམཱལཱ ()

༧.

ཋིཏམུཔཝནཔནྠེ ཝངྐགོཔཱཎསི’ཝ

ཨནུཛུཀམུཛུབྷུཏཾ དཎྜམོལུབྦྷ བྷུམྱཱ,

ནིཛཏརུཎཝིལཱསཾ ལཀྑམཱཔཱདཡནྟཾ

དྷནུམིཝ སགུཎཾ ཏཾ རཱུཔམདྡཀྑི དྷཱིརོ; ()

༨. ¶

ཛིནིཨཛགརབྷོགེ ཛིཎྞནིམྨོཀབྷཱརཾ

ཏིལཀཝིབཏཙམྨཾ ཏནྟིརོཛཏྟབྷཱཝེ,

ཨཔགཏགྷནམཾསོ ཕཱསུཀཊྛིཔྤནྡྷོ

ཨཛིནིཏིརཝལེཔཾ ཀུཌྜདཱརུཔྤབནྡྷཾ; ()

༩.

ཝིགཏབལམདཱདིཾ ཝིསྶཝནྟཾ སརཱིརེ

ནཝ྄ཧི ཝཎམུཁེཧི གུཐམུཏྟཱདྱ’སཱུཝིཾ,

ཝལིཝིསམཀཔོལཾ ཀམྤམཱནུཏྟམངྒཾ

སུཝིསདམཏིནོ ཏཾ པསྶཏོ ཛིཎྞརཱུཔཾ; ()

༡༠.

བྷུཝནམནཝསེསཾ ཏསྶུ’པཊྛཱསི སམྤ-

ཛྫལིཏམཐ ཛརཱཡཱ’དིཏྟགེཧཏྟཡཾ’ཝ,

ཨཧམཔཀི ཨནཏཱིཏོ དྷམྨམེཏནྟི ཝཏྭཱ

བྷཝནཝནམགཉྪི ཛཱཏིཡུ’ཀྐཎྛིཏཏྟོ; ()

༡༡. ¶

པུནརུཔཝནམགྒཾ ཨོགཧནྟསྶ རཉྙོ

སུཁམནུབྷཝནཏྠཾ དེཝཏཱམཱཔཡིཏྭཱ,

པརཔརིཧརནཱིཡཾ གྷོརརོགཱཝཏིཎྞཾ

ཨཔརམཔི ཝིརཱུཔཾ དསྶཡུཾ ཝྱཱདྷིརཱུཔཾ; ()

༡༢.

ཝིསདམཏི ཝིམཏྱཱ སཀྱཝཾསེཀཀེཏུ

ཀིམིམིཝཔལིཔནྣཾ ཝཙྩཔསྶཱཝཔངྐེ,

པབྷཝབལཝདུཀྑཾ ཏཾ པརཱདྷཱིནཝུཏྟིཾ

ཀིམིདམིཏི པདིསྭཱ པཱཛིཏཱརཾ ཨཔུཙྪི; ()

༡༣.

ཝརམཏི ཝརདྷམྨཾ ཏེན སཱུཏེན ཝུཏྟཾ

ཨམཏམིཝ པིབནྟོ སོཏདྷཱཏྭཉྫལཱིཧི,

ཨགམཔི ཨནཏིཏོ བྱཱདྷིདྷམྨནྟི ཏམྷཱ

ནིཛབྷཝནཝནཾ སོཔཱ’ག སཾཝིགྒརཱུཔོ; ()

༡༤. ¶

ཏདུཔཝནཝིམཱནཾ ཝཱཛིཡཱནེན ནཱཐེ

ཝཛཏི སཏི ཀདཱཙི མཱཔཡུཾ དེཝཏཱཡོ,

སུཎཁཀུལལགིཛ྄ཛྷཱདཱིཧཱིཝཱ ཁཛྫམཱནཾ

ནརཀུཎཔསརཱིརཾ ཨུདྡྷུམཱཏཾ པཋམྷི; ()

༡༥.

པབྷཝཀིམིཀུལཱནཾ ཙཱལཡཾ ནཱིལཝཎྞཾ

ཝཎཝིཝརམུཁེཧི ལོཧིཏཾ པགྒྷརནྟཾ,

སཀུཎགཎྭིཏཙྪིཾ མཀྑིཀཱམཀྑིཏངྒཾ

སུམཏི མཏསརཱིརཾ ཨདྡསཱ སཱརཧཱིནཾ; ()

༡༦.

ཨབྷིགམི གམཡནྟོ བྷཱརཏིཾ སཱརཐིསྶ

ནིཛསཝཎཡུགསྨིཾ ཧེམཏཱཌངྐསོབྷཾ,

ཨཧམྤི མརཎཾ བྷོ ནཱཏིཝཏྟོཏི ཝཏྭཱ

ཝནམིཝ མིགརཱཛཱ སཀྱརཱཛཱ ཝིམཱནཾ; ()

༡༧. ¶

པུནཔི སཔརིསོ སོ ཡཱནམཱརུཡ྄ཧ བྷདྲཾ

ཀཏིཔཡདིཝསཱནཾ ཨཙྩཡེནཱ’དྷིརཱཛཱ,

ཀཔིལཔུརཝརམྷཱ’ནངྒརངྒཱལཡཱབྷཾ

ཏདུཔཝནམགཉྪི པཉྩབཱཎཱབྷིརཱུཔོ; ()

༡༨.

གུཎམཎི མཎིཝཎྞཾ པཏྟམཱདཱཡ པཏྠེ

པནསསརསརཱགཾ ཝཱིཝརཾཔཱརུཔིཏྭཱ,

ཋིཏམཝིཀལཙཀྑུཾ ནིམྨིཏཾ དེཝཏཱཧི

སུམཏི སམཎརཱུཔཾ བུདྡྷརཱུཔཾ’ཝ པསྶི; ()

༡༩.

ཏདཧནི ཝིབུདྷཱ’དྷིཊྛཱནཏོ བྷཱཝནཱིཡོ

ཡཏིཔཏིརིཝ སཱུཏོ ཨཏྠདྷམྨཱནུསཱསི,

སམཎགུཎམནེཀཱདཱིནཝཾ པཉྩཀཱམེ

ཏམཝདི གམནསྨིཾ ཨཱནིསཾསཉྩ གེཧཱ; ()

༢༠. ¶

ཀུཧནལཔནམིཙྪཱཛཱིཝམོཧཱཡ ཀུཙྪི-

པརཧརཎསམཏྠཾ མཏྟིཀཱཔཏྟམསྶ,

ཀར ཀམཀལགཏཾ སོ པཱརམཱིཙོདིཏཏྟོ

ཝིསདམཏི པདིསྭཱ སམྤསཱདཾ ཛནེསི; ()

༢༡.

ཝིཀསིཏཀལིཀཱལངྐཱརམུདྡཱལསཱལ-

མིཝ སམཎཝིལཱསཾ ཙཱིཝརོབྷཱསམགྒེ,

ནཡནམདྷུཀརཱནཾ བྷཱརམཱདྷཱཡ དྷཱིརོ

ནིཛམནསི ཛནེསི ཙཱིཝརེ སམྤསཱདཾ; ()

༢༢.

ཁཎིཀམརཎདུཀྑཱཝཊྚམཱབཱདྷརཱསི-

མཀརནིཀརབྷིམཾ ཏཾ ཛརཱཝཱིཙིཝེགཾ,

བྷཝཛལདྷིམགཱདྷཾ ཛཱཏིཝེལཱཝདྷིཾ སོ

ཨཡམིཝ པཊིཔནྣཱ ནིཏྟརེཡྻུནྟྱ’ཝེདི; ()

༢༣. ¶

སམཎཝདནཔཱིནཙྩནྡབིམྦོདཡེན

ཝིཀསིཏམནཀུནྡོ ནནྡནུཡྻཱནསོབྷཾ,

ཨུཔཝནམབྷཱིགནྟུཾ སནྡནཾ ཙཱརཡེ’ཏི

ཏདཧནི མནུཛིནྡོ སནྡནཱཙཱརིམཱཧ; ()

༢༤.

ཝལཡིཏནལ༹ཏཱལཱི༹ཏཱལཧིནྟཱལཔནྟིཾ

མལཡཛཏརུཛཱཡཱསཱིཏལཾ ནིམྨལཱཔཾ,

ཨུཔཝནམཝཏིཎྞོ ནནྡནཾ ཝཱསཝོ’ཝ

ཨཀརི དིཝསབྷཱགཾ སཱདྷུཀཱིལ༹ཾ སརཱཛཱ; ()

༢༥.

དསསཏཀིརཎསྨིཾ ཡསྶ ཀིཏྟིཔྤབནྡྷ-

སརདཛལདརཱཛིཚཱདིཏསྨིཾ ནབྷསྨིཾ,

ཨུཔརིསིརསི སེཏཙྪཏྟསོབྷཾ བྷཛནྟེ

ཏདིཡཙརཎལཀྑྱཱ’ལངྐརི ཝཱཔིཏཱིརཾ; ()

༢༦. ¶

སརསིཛཝདནེཧི ཧཾསཔཱིནཏྠནེཧི

ཀུཝལཡནཡནེཧཱི ནཱིལིཀཱཀུནྟལེཧི,

མདྷུམདམུདིཏཱལཱིནཱུཔུརེབྷཱ’ཝརོདྷ-

ཛནམིཝ རམཎཱིཡཾ ཨོཏརི སོ ཏལཱ༹ཀཾ; () (སིལེསབནྡྷནཾ)

༢༧.

ཝརཡུཝཏིཛནཱནཾ ཀུམྦྷགམྦྷཱིརནཱབྷི-

ཝིཝརགཧིཏཝཱརི ཝཱཔི སཱ རིཏྟརཱུཔཱ,

གྷནཐནཛགྷནཱནཾ སངྒམེནེ’ཏརཱསཾ

པུནརབྷཝི ཀཔཔུཎྞཱ པཱིཏིཝིཔྥཱརིནཱིཝ; ()

༢༨.

ཨབྷིནཝརམཎིནཾ ཛཱཏུལཛྫཱཏུརཱནཾ

ཝིམུཁནཡནམཱིནེ མཱིནཀེཏུཔམེན,

ཨུཔཝདྷིཏུམཱིཝགྒེ ཁིཏྟཛཱལབྦིལཱསཾ

ཁཎམཝཧརི རཉྙཱ ཝིདྡྷཧཏྠམྦུདྷཱརཱ; ()

༢༩. ¶

ནཝཛལཀཎིཀཱལངྐཱརཝཏྟཱརཝིནྡཱ

གྷནཀུཙཀལཧཾསཱ ཀེསསེཝཱལནཱིལཱ,

པཏིམཐིཏཏརངྒཱཀིཎྞསུསྶོཎིཝེལཱ

སརསི སརསི’ཝཱ’སི ཏཏྲ ཀཱིལཱ༹ཏུརེ’ཀཱ; ()

༣༠.

སསིརཱུཙིརམུཁཱིནཾ ཁོམཝཏྠནྟརཱིཡེ

སནིཀམཔནཡནྟེ ཝིཙཱིཧཏྠེཧི རཉྙཱ,

རཙིཏནཡནཀནྟཱི བྱནྟ གམྦྷཱིརནཱབྷཱི-

སརསིཛཔརིཡནྟཱ ནཱལ༹པནྟཱིརི’ཝཱ’སི; ()

༢༩. ¶

ནཝཛལཀཎིཀཱལངྐཱརཝཏྟཱརཝིནྡཱ

གྷནཀུཙཀལཧཾསཱ ཀེསསེཝཱལནཱིལཱ,

པཏིམཐིཏཏརངྒཱཀིཎྞསུསྶོཎིཝེལཱ

སརསི སརསི’ཝཱ’སི ཏཏྲ ཀཱིལཱ༹ཏུརེ’ཀཱ; ()

༣༠.

སསིརུཙིརམུཁཱིནཾ ཁོམཝཏྠནྟརཱིཡེ

སནིཀམཔནཡནྟེ ཝིཝིབྷཎྠེཧི རཉྙཱ,

རཙིཏནཡནཀནྟཱི བྱནྟ གམྷཱིརནཱཧཱི

སརསིཛཔརིཡནྟཱ ནཱལ༹པནྟིརི’ཝཱ’སི; ()

༣༡. ¶

པུནརཔི ཀུཙཀུམྦྷཉྩནྡཧཱརེནིཝཱ’པེ

ནིཛགལ༹པརིམཱཎེ སནྣིམུགྒངྒནཱནཾ,

མལིནཀམལིནཱི སཱ ལོཙནེཧཱ’ནནེཧི

ཨབྷཝི བྷམརབྷཱར’མྦྷོཛསཎྜཱ’ཀུལེ’ཙ; ()

༣༢.

མདྷུམདམདྷུཔེཧི གཱིཡམཱནེཧི ཝིཙི-

བྷུཛསཏཔཧཊཱཧི སོཎིབྷེརཱིཧི ཐིནཾ,

ལལིཏཀམལསཱིསེ ནཙྩམཱནིནྡིརཱཡ

ཨཛིནི ཛལཛིནཱི སཱ དིབྦསངྒཱིཏསཱལཾ; ()

༣༣.

ཏུཧིནཀརམུཁཱིནཾ ཏནྟལཱ༹ཀ’ནྟལིཀྑེ

སུལལིཏབྷུཛཝལླཱི ཝིཛྫུལེཁཱབྷིརཱམཱ,

ཀུཝལཡཝནརཱཛི ནཱིལཛཱིམུཏརཱཛི

པཏིནཡནམཡཱུརེ ཀཱིལ༹ཡནྟཱི རརཱཛ; ()

༣༤. ¶

ཕུཊཀུཝལཡཧཏྠཾ རཱཛབྷཾསེཧི ཁིཏྟཾ

ཝིཝིདྷམདྷུཔབྷུཏྟཾ དྷམྨཝེལཱཏིཝཏྟཾ,

ཡཐརིཝ གཎིཀཾ ཏཾ ཀཉྫནིཾ སོ ཛནིནྡོ

ཏདཧནི པརིབྷུཏྭཱ’མནྡམཱནནྭྡམཱཔ; () (སིལེསབནྡྷནཾ)

༣༥.

ཙརཎ’ནུཝཛམཱནབྦཱིཙིསངྑོབྷཏཱིརཾ

ཛཧཏི སཏི ཏལཱ༹ཀཾ སཱཝརོདྷེ ནརིནྡེ,

སརསིཝིརཧིནཱིསཾརུདྡྷནིསྶཱསརཱུཔོ

མུདུསུརབྷིསམཱིརོ མནྡམནྡཾ པཝཱཡི; ()

༣༦. ¶

པརིབྷཝི རཝིབིམྦཾ ཏངྑཎཏྠཱཙལཊྛཾ

ཏཧིམུཔལཏལཊྛོ བྷཱནུཝཾསེཀབྷཱནུ,

ཨཐ སརསིཝདྷཱུནཾ ཀིཉྩིསངྐོཝིཏཱནི

སརསིཛཝདནཱཏི སོཀདཱིནཱནིཝཱ’སུཾ; ()

༣༧.

ཨསིཏནབྷསི སཉྫྷཱམེགྷམཱལཱཝིལཱསཾ

ཨབྷིབྷཝིཡ ནིསིནྣེ ཏཏྲ སཀྱཱདྷིནཱཐེ,

ཏུཝཊམུཔགཏཱ ཏཾ ཀཔྤཀཱ’ནེཀཝཏྠཱ-

བྷརཎཝིཀཏིཧཏྠཱ བྷཱུཔཏིཾ བྷཱུསཎཏྠཾ; ()

༣༨.

རཝིཀུལརཝིནོ ཁོ དྷམྨཏེཛཱབྷིབྷཱུཏོ

སུརཔཏི སུརཔུཏྟཾ ཝིསྶཀམྨཱབྷིདྷཱནཾ,

སཔདི པཧིཎི སམྨཱ དིབྦཝཏྠཱདིནཱ བྷོ

ཏིབྷུཝནསརཎཾ ཏཾ བྷཱུསཡསྶཱུ’ཏི ཝཏྭཱ; ()

༣༩. ¶

གཧིཏམནུཛཝེསོ སོ’པསངྐམྨ སཱིསེ

སུཁུམཔཊསཏེཧཱི ཝེཋནཉྩཱ’པི དཏྭཱ,

མཎིཀནཀམཡེཧི བྷཱུསཡི བྷཱུསཎེཧི

ཏདཧནི བྷཝི སཀྐོ དེཝརཱཛཱ’ཝ རཱཛཱ; ()

༤༠.

ཏིམིརཧམརབྷཱར’ཀྐནྟཔཱཙཱིནཔསྶཾ

མུཀུལིཏསཏསཉྫྷཱམེགྷཔཏྟཱཝལཱིནཾ,

གགནཏལཏལཱ༹ཀཱདྷཱརམནྡཱརནཱལ༹ཾ

ཀམལམཀུལསོབྷཾ བྷཱནུབིམྦཾ བབནྡྷ; ()

༤༡.

པཧིཎི པིཏུནརིནྡོ སཱསནཾ ཏཱཝ ཏསྶ

ནིཛཏནུཛཀུམཱརུ’པྤཏྟིམཱརོཙཡིཏྭཱ,

པམུདིཏབྷདཡོ སོ ལེཁཎཱལོཀནེན

ཨཝདིཏི མམ ཛཱཏཾ བནྡྷནཾ རཱཧུཛཱཏོ; ()

༤༢. ¶

ཏདཧནིཔིཏུརཉྙཱ ཝུཏྟཝཱཀྱཱནུརཱུཔཾ

ཏཧིམཁིལཔདཏྠཾ སདྡསཏྠཀྐམེན,

ཀརཧཙཱི མནུཛིནྡོ ཨཡྻཀོ སངྒཧེཏྭཱ

ཨཝདིཏི མམཏཏྟཱ རཱཧུལོནཱམཧོཏཾ; ()

༤༣.

ཝནསུརཝནིཏཱནཾ ལོཙནིནྡཱིཝརེཧི

མཧིཏསིརིསརིརོ བྷདྲམཱརུཡ྄ཧ ཡཱནཾ,

སབྷཝནམབྷིགནྟུཾ ཨོསརི ནཱགརཱནཾ

སུཝིམལནཡནཱལཱིཏོརཎཱཀིཎྞཝཱིཐིཾ; ()

༤༤.

ཝིཝཊམཎིཀཝཱཊོ’པནྟིཀཊྛཱ ཝིམཱནེ

ཛིཏསུརཝནིཏཱ’སི ཡཱ པིཏུཙྪཱཡ དྷཱིཏཱ,

ནཡནཀརཔུཊེཧི རཱུཔསཱརཾ ནིཔཱིཡ

སམིཏརཏིཔིཔཱསཱ སཱ ཀིསཱགོཏམཱི ཐཱི; ()

༤༥. ¶

ཛིཏམནསིཛརཱུཔཾ ཨཱིདིསཾ ཡེསམཏྠི

ཏནུཛརཏནམདྡྷཱ ནིབྦུཏཱ སཱ’པི མཱཏཱ,

པིཏུཛགཏིཔཏཱི སོ ནིབྦུཏོ སཱིཏིབྷཱུཏོ

ནིཛཔིཡབྷརིཡཱ’པི ནིབྦུཏཱ’ཏྱེ’ཝམཱཧ; ()

༤༦.

ཧདཡགཏཀིལེསེ ནིབྦུཏེ ཝཱུཔསནྟེ

ཡཏིཔཏིརིཝ དིཊྛོ ནིབྦུཏོ སོ’ཧམསྨི,

ཨིཏི ཝརམཏི སུཏྭཱ ཏཱཡ གཱཐཾ སུགཱིཏཾ

ཝིཝིདྷནཡཝིབྷཏྟཾ ཏཔྤདཏྠཾ ཨཝེདི; ()

༤༧.

ཨཧམིཏིཔདམསྶཱ ནིབྦུཏིཾ སཱཝིཏོ’སྨི

སུམརིཡ གརུབྷཏྱཱ ཏཱཡ ལཀྑགྒྷམགྒཾ,

དྷཝལཀིརཎབྷཱརཾ བྷཱསུརཾ ཧཱརིཧཱརཾ

པཧིཎིཡ བྷཝནཾ སོ པཱཝིསི སཱཝརོདྷོ; ()

༤༨. ¶

མཡམིཝ ཝརབོདྷིཾ བུཛ྄ཛྷམཱནསྶ ཛཱཏུ

མནསི ཝུཔསམེ’ཏི ཏུཡ྄ཧམེཀཱདསགྒི,

ཨུཔགམུམུཔསནྟིཾ ཝྱཱཀརོནྟཱི’ཝ ཏཱཝ

ཨཔརདིསི ཝིནདྡྷཱ’ནེཀསཉྫྷཱགྷནཱལཱི; ()

༤༩.

ཨཏུལདྷཝཛཚཏྟཾ དྷོཏམུཏྟཱཝལཱིཧི

ཝལཡིཏམིཝ རཉྙོ ཏསྶ སིཧཱསནསྨིཾ,

ཨུདཡསིཁརིསཱིསེ ཏཱཝཏཱརཱཝལཱིཧི

པརིཝུཏམཏིསོབྷཾ ཙནྡབིམྦཾ བཧཱས; ()

༥༠.

གྷནཏརཏིམིརེཧཱ’ཝཏྠརཏྟེཧི ལོཀེ

མསིམལིནཝིལཱསཾ ཏངྑཎེ དསྶཡནྟི,

རཛནིཀརཀརེཧི ཝིཔྥུརཏྟེཧི ཕཱིཏཱ

ཀཏནཝཔརིཀམྨེ’ཝཱ’སི སཱ རཱཛདྷཱནི; ()

༥༡. ¶

ཧིམཀརཀརབྷཱརཀྐཏྟརཏྟནྡྷཀཱར-

གལིཏཏིམིརལེཁཱཀཱརམཱཝཱི ཀརོནྟི,

ཕུཊཀུམུད ཝནེསུ ཙཱསིཀུནྡཱཊཝཱིསུ

སུམདྷུར མདྷུམཏྟཱ བྷིངྒམཱལཱ པམཏྟཱ; ()

༥༢.

ཛིཏསུརཔཏིཝེསོ དྷམྨཙིནྟཱཔརོ སོ

ཛལིཏ མཎིཔདཱིཔཱལོཀབྷིནྣནྡྷཀཱརེ,

ནིཛསིརིབྷཝནསྨིཾ ཧེམསཱིཧཱསནསྨིཾ

ནཙིར མབྷིནིསཛྫཱི པཉྩཀཱམེ ཝིརཏྟོ; ()

༥༣.

སཔདི ཏུརིཡཧཏྠཱ ནཱིལཛིམུཏཀེསཱ

ཀུཝལཡདལནེཏྟཱ ཙནྡལེཁཱལལཱཊཱ,

ཝིཀཙཀམལཝཏྟཱ མེཁལཱབྷཱརསོཎཱི

ཀུཙཧརཝིརལ༹ངྒཱི ཙཱརུཝཱམོརུཛངྒྷཱ; ()

༥༤. ¶

ཀུམུདམུདཀཔོལཱ ཀུཎྜལོལམྦཀཎྞཱ

ཨཝིཝརདསནཱལིམཱལཏཱིདཱམལིལཱ,

ཀནཀརཏནམཱལཱབྷཱརགཱིཝཱ, བྷིརཱམཱ,

ཨབྷིནཝཝནིཏཱཡོ ནཙྩགཱིཏེསུ ཚེཀཱ; ()

༥༥.

རཧདམིཝཔསནྣཾ ནིཙྩལཱསིནམིནཾ

སུམཏིམུཔནིསིནྣཾ སཾཝུཏདྭཱརུཔེཏཾ,

ཏམབྷིརཏིནིརཱསཾ བུདྡྷབྷཱཝཱབྷིལཱསཾ

ཨབྷིརམཡིཏུཀཱམཱ ཨོཏརུཾ རངྒབྷཱུམིཾ; ()

༥༦. ¶

མཎིམཡཝསུམཏྱཱ པཱདསངྒྷཊྚནེན

ཀནཀཝཀལཡགྷོསཾ ཀཱཙི ནིཙྪཱརཡནྟཱི,

ཙལཀིསལཡལཱིལཱ ཨངྒུལི ཙཱལཡནྟི

ཨནུལཡམབྷིནཙྩུཾ ཧེམཝལླཱིཝིལཱསཱ; ()

༥༧.

ནརཔཏིམུཁབིམྦཾཀ ལཀྑམཱཔཱདཡནྟཱི

ནཡནཁརསརཱནཾ རངྒསངྒཱམབྷཱུམྱཱ,

ཛིཏཀལརཝཝཱཎཱི ཀཱཙི རཱམཱ བྷིརཱམཱ

སཝཎསུབྷགགཱིཏཾ གཱཡམཱནཱ ཝིབྷཱསུཾ; ()

༥༨.

ཛིཏསུརལལནཱཡོཀཱཝི པཉྩངྒིཀཱནི

ཏདཧནི ཏུརིཡཱནི ཝཱདཡུཾ ལོལཔཱངྒཱ,

སཝཎམདྷུརཝཱིཎཱ བྷེརིནཱདེཧི ཏཱསཾ

གགནཏལ མིཝཱ,སི པཱཝུསེ རངྒབྷཱུམི; ()

༥༩. ¶

ཝརམཏི རམཎཱིནཾ ཏཾ མཧཱབྷཱུཏརཱུཔ-

པྤབྷཝམིཝཝིཀཱརཾ ནཙྩམདྡཀྑི ཏཱསཾ,

ཝིསམབྷཝཀུཊཱིརེ རཱཛརོགཱཏུརཱནཾ

ཨསུནིཏུརིཡརཱཝཾ གཱིཏམཊྚསྶརཾ,ཝ; ()

༦༠.

བྷུསམནཧིརཏོ སོ ནཙྩགཱིཏེསུ ཏཱསཾ

སིརིསཡནཝརསྨིཾ སཱིཧསེཡྻཾ ཨཀཱསི,

ཨིཏིགཧིཏཝིཧེསཱ ལདྡྷནིདྡཱཝཀཱསཱ

སཔདི མདནཔཱསཱ ཏཱ ནིཔཛྫིཾསུནཱརཱི; ()

༦༡.

སཧཀུམུདིནིཡཱ སོ སུཏྟམཏྟཔྤབུདྡྷོ

ནིཛསིརིསཡནསྨིཾ སནྣིསིནྣོ རཛནྱཱ,

གཧིཏཏུརིཡབྷཎྜེ ཏཏྠཏཏྠོ, ཏྠརིཏྭཱ

ཡུཝཏིཛནམཔསྶི དལ༹ྷནིདྡཱབྷིབྷཱུཏཾ; ()

༦༢. ¶

ཨནིལཙལཀཔོ ལཱ ཀཱཙི ལཱལཾ གིལནྟེ

གལིཏབཧལ༹ཁེ ལཱ༹ ཀཱཙི ཁཱདནྟི དནྟེ,

བྷགམཔགཏཙོ ལཱ༹ ཀཱཙི སཾདསྶཡ ནྣེ

ཁལིཏཝཙནམཱ ལཱ ཀཱཙི ཡཾཡཾ ལཔནྟེ; ()

༦༣.

ཁིཔིཏམཔི ཀརོནྟཱི ཀཱཙི ཀཱསནྟིཀཱཙི

ཨིཏི པཙུརཝིཀཱརཾ ནིསྶིརིཀཾ ཨསཱརཾ,

བྷཝནམནཝསེསཾ ཏསྶུ, པཊྛཱསི དལ༹ྷཾ

ནརཀུཎཔཝིཀིཎྞཾ ཨཱམཀཱལཱ༹ཧཎཾཝ; ()

༦༤.

ཏདཧནི ཏིབྷཝཾ ཙཱ,དིཏྟགེཧཏྟཡཾ,ཝ

སུམརིཡ ཝཏབྷོ, པསྶཊྛམོཔདྡུཏཾ བྷོ,

ཨིཏི པརམམུདཱནཾ ཀཝཏྟཡཾ ཏབྦིམུཏྱཱ

མནསི པུརིསསཱུརོ སཱུརབྷཱཝཾ ཛནེསི; ()

༦༥. ¶

སུརཏཙཏུརརཱམཱརཀྑསིཝཱསབྷཱུཏེ

སིརིབྷཝནཝནསྨིཾ མོཧཡནྟམྷི བཱལེ,

ཨལམིཏི མམ ཝཱསོ ཧནྡ ནིཀྑམྨ ཏམྷཱ

ཏིབྷཝབྷཡཝིམུཏྟིཾ ཨེསཡིསྶཱམཧཾ,ཏི; ()

༦༦.

ཨུཔཀམིཡ ཝིམཱནདྭཱརམུམྨཱརུཔནྟེ

སཡནུཔརི ནིཔནྣཾ ཚནྣམུཊྛཱཔཡིཏྭཱ,

ཏམཝདི ཨབྷིགནྟུཾ ཀཔྤཡིཏྭཾ, ནཡེཏི

པབལཛཝབལགྒཾ ཝཱཛིརཱཛཾ སརཱཛཱ, ()

༦༧.

གཏསཏི ཧཡསཱལ༹ཾ ཏངྑཎེ ཚནྣམཙྩེ

སཀཔཏིགམནཏྠཾ ཨེསམཾ ཀཔྤནཏྠོ,

ཨགམིཏི སཧཛཱཏོ ཀཏྠཀོ ཝཱཛིརཱཛཱ

ཨཀརི ཝིཔུལཧེསཱརཱཝམཱནནྡབྷཱརོ; ()

༦༨. ¶

པཝིསིཡ སིརིགབྦྷཾ ཏེལདཱིཔུཛྫལནྟཾ

རཏནཁཙིཏམཉྩེ གནྡྷཔུཔྥཱབྷིཀིཎྞེ,

དྷརཎིཔཏིནིཔནྣཾ ཧེམབིམྦོཔམཱནཾ

ནིཛཏནུཛཀུམཱརཾ པསྶིབིམྦཱཡསདྡྷིཾ; ()

༦༩.

ཡདི ཨཧམཔནེཏྭཱ དེཝིཡཱ ཧཏྠཔཱསཾ

མམ ཏནུཛཀུམཱརཾ ཨངྐམཱརོཔཡཱམི,

ཝདནཛིཏསརོཛཱ རཱཛིནཱི ཝུཊྛཧིཏྭཱ

ཝནམཧཱིགམནཾ མེ ཝཱརཡེ དུནྣིཝཱརཾ; ()

༧༠.

ཏནུཛམུཁསརོཛཾ བུདྡྷབྷཱུཏོ སམཱནོ

ནཡནམདྷུཀརཱནཾ ཛཱཏུ ཀཱཧཱམིབྷཱརཾ,

སུམརིཡ ཙརཎཾ སོ ཨུདྡྷརནྟོ,ཝ མེརུཾ

ཨཝཏརི བྷཝནམྷཱ ཨུཀྑིཔིཏྭཱ པཝཱིརོ; ()

༧༡. ¶

ཀུཝལཡདལནེཏྟཉྩནྡམམྷོཛཝཏྟཾ

མདནརཐརཐངྒཱཀཱརསུསྶོཎིབྷཱརཾ,

ཀཐམཝཏརི བིམྦཱནཱམདེཝིཾ པཧཱཡ

ནརཔཏི བྷཝནམྷཱ ཧེམབིམྦཱབྷིརཱམཾ; ()

༧༢.

མརཀཏཔཊིམཱབྷཾ སམྦྷཝཾ སཀྱཝཾསེ

སམུཔཙིཏསུཔུཉྙཾ ལཀྑཎཱཀིཎྞགཏྟཾ,

པཛཧིཡ སུཀུམཱརཾ རཱཧུལཱཁྱཾ ཀུམཱརཾ

ཀཐམཝཏརི པཱདམནྡམུཀྑིཔྤ དྷཱིརོ; ()

༧༣.

རིཔུགཛམིགརཱཛཾ ཛམྦུདཱིཔགྒརཱཛཾ

ཏདཧནི པིཏུརཱཛཾ པུཏྟསོཀཎྞཝམྷི,

ཀཐམམིཏདཡོ སོ ནིདྡཡོ པཀྑིཔིཏྭཱ

ཨཝཏརི བྷཝནམྷཱཀ ཨུདྡྷརིཏྭཱན པཱདེ; ()

༧༤. ¶

སཀལཔཐཝིཙཀྐཾ ཙཀྐཝཱལཱ༹ཝདྷིཾ སོ

ཨབྷིཝིཛིཡ ཨསཏྠོ སཏྟམེ ཝཱསརམྷི,

ནརཧརི ཀཏཔུཉྙོ ཙཀྐཝཏྟི ཨཧུཏྭཱ

ཀཐམཝཏརི ཏམྷཱ ཨུཀྑིཔིཏྭཱན པཱདེ; ()

༧༥.

ཨཝཏརིཡ ཝིམཱནཱ ཨཛྫ མཾ ཏཱརཡཏྭཾ

ཏྭམཔིཏིབྷཝཏོ)ཧཾ ཨུཏྟརེཡྻ’ནྟི ཝཏྭཱ,

ཏམབྷིརུཧི ཛནིནྡོ ཝཱཛིརཱཛིནྡ’མཊྛཱ-

རསརཏནཔམཱཎཾ དྷོཏསངྑཱཝདཱཏཾ; ()

༧༦.

པཝནཏུརིཏཝེགོ ཀནྠཀོ ཝཱཛིརཱཛཱ

ཡདཧནི པདསདྡཾ ཙཱ’པི ཧེསཾ ཀརེཡྻ,

ནནུ སཀལཔུརཾ སོ ཡཱཏི ཨཛ྄ཛྷོཏྠརིཏྭཱ

ཏདཧནི ཀཏསདྡཾ ཝཱརཡུཾ དེཝཏཱཡོ; ()

༧༧. ¶

ཀརཀམལཏལེསུ དེཝཏཱནིམྨིཏེསུ

པནིཧིཏཔདཝཱརཾ ཨསྶ མཱརུཡ྄ཧ དྷཱིརོ,

ལཧུམུཔགམི ཚནྣཾ ཝཱལདྷིཾ གཱཧཡིཏྭཱ

ཐིརཔིཧིཏཀཝཱཊདྭཱརཔཱཀཱརུཔནྟཾ; ()

༧༨.

ཡདི པིཧིཏཀཝཱཊུགྒྷཱཊནཾ ནཱ’བྷཝིསྶཱ

ཧཡཝརམཔི ཚནྣཱམཙྩམཱདཱཡ སོཧཾ,

ཨསརི པུརིསསིཧོ ཨུཔྤཏེཡྻནྟི ཨཊྛཱ-

རསརཏཏཔམཱཎུ’ཏྟུངྒཔཱཀཱརཙཀྐཾ; ()

༧༩.

ཏཐརིཝ ཧཡརཱཛཱ ཚནྣནཱམོ ཙ མནྟཱི

ཝཱིརིཡབལསམངྒཱི ཙཱིནྟཡུཾ ཏཱཝདེཝ,

ཝིཝརི ཏདདྷིཝཏྠཱ དེཝཏཱ ཙོདིཏཏྟཱ

པུརིསདསསཏེནུ’གྒྷཱཊིཡཾ དྭཱརབཱཧཾ; ()

༨༠. ¶

མམ ཝིསཡམསེསཾ ཨེསསིདྡྷཏྠནཱམོ

ཨབྷིབྷཝིཡ སུབོདྷིཾ ཛཱཏུ བུཛ྄ཛྷིསྶཏཱིཏི,

ཨཐ སུམརིཡ མཱརོ པཱཔིམཱ’ཏཱིཝཀུདྡྷོ

པཊིཔཐམུཔགཉྪི ནིཀྑམིཏྭཱ ཝིམཱནཱ; ()

༨༡.

ཏུརིཏམཧིཝཛནྟེ མཱརཝེརིམྷི མཱརོ

ཨསིཏནབྷསི ཋཏྭཱ ཨིཏྠམཱརོཙཡིཏྠ,

ཝརཔུརིས ཨིཏོ ཁོ སཏྟམེ ཝཱསརམྷི

ཏྭམཧིཝིཛིཡ ལོཀཾ ཧེསྶསེ ཙཀྐཝཏྟཱི; ()

༨༢.

སུཁམནུབྷཝམཱནོ ཙཀྐཝཏྟཱི བྷཝིཏྭཱ

གྷརམདྷིཝས ཙཀྐཾ ཝཏྟཡཾ ཡཱཝཛཱིཝཾ,

ཨམིཏམཏི ཏུཝཾ མཱ ནིཀྑམསྶཱུ’ཏི མཱརོ

ཨབྷིགམནནིསེདྷཾ ཀཱཏུམིཙྩཱནུསཱསི; ()

༨༣. ¶

ནམུཝིལཔིཏཝཱཙཾ སོཏདྷཱཏྭཉྫལཱིཧི

སཝིསམིཝ པིབནྟོ ཏཾ ཏུཝཾ ཀོ’སི པུཙྪི,

པཝནཔཐཋིཏོ’ཧཾ ཨིསྶརོ དེཝཏཱནཾ

ནརཝར ཝསཝཏྟཱི པཱཔིམཱ’ཏྱེ’ཝ མཱཧ; ()

༨༤.

སུརནརསརཎོ སོ ནིབྦྷཡོ དིབྦཙདྡ-

རཏནཛནནམདྡྷཱ མཱརཛཱནཱམཧ’ནྟི,

པཊིཝཙནམདཱསི མཱདིསོ དུཔྤསཡ྄ཧོ

བྷཝཏི དསསཧསྶེཧཱ’པི ཏུམྷཱདིསེཧི; ()

༨༥.

ཡདི མནསི སིཡཱ ཏེ ཀཱམདོསབྦིཧིཾསཱ-

པབྷུཏིཔརིཝིཏཀྐོ ཏཱཝཛཱནཱམ’ཧནྟི,

པཊིགྷཔརཝསོ སོ ཀིཉྩིཨོཏཱརཔེཁོ

ཨནུཔདམནུབནྡྷི ཏསྶ ཚཱཡཱཡཐེཝ; ()

༨༦. ¶

པུནརབྷིཝཛཏོཝཱ’སཱལ༹ྷིཡཱ པུཎྞམཱཡ

ཀཔིལཔུརཝིབྷཱུཏིཾ དཊྛུཀཱམམྷི ཛཱཏེ,

ཝསུམཏི པརིཝཏྟཱི དསྶཡི ཨསྶརཉྙོ

པུརཝརབྷིམུཁཊྛོ ཙེཏིཡཊྛཱནབྷུམིཾ; ()

༨༧.

སཔདི དསསཧསྶིཙཀྐཝཱལེ༹སུ དེཝཱ

ཏིབྷུཝནསརཎསྶཱ’རཀྑཎེ ཝྱཱཝཊཱསུཾ,

མཎིཀནཀམཡེཧི དཎྜདཱིཔཱདིཀེཧི

ཨནིམིསཏནཡེ’ཀེ མགྒམཱལོཀཡིཾསུ; ()

༨༨.

སུརབྷིཀུསུམདཱམོལམྦམཱནབྦིཏཱན-

ཀནཀཀལསསེཏཙྪཏྟཀེཏུདྡྷཛེཧི,

ཏདཧིགམནམགྒཾ དེཝཏཱ’ལངྐརིཾསུ

བྷུཝནཀུཧརམཱསི པུཔྥཔཱུཛཱབྷིརཱམཾ; ()

༨༩. ¶

གགནམསནིགྷོསཙྪནྟམེཝཊྛསཊྛི-

ཏུརིཡསཏསཧསྶཱརཝཝིཔྥཱརམཱསི,

མཧིཏསུརབྷིཔུཔྥཱཀིཎྞམགྒཱཝཏིཎྞོ

ཨཏུརིཏམབྷིགནྟྭཱ ཡོཛནནྟིཾསམཏྟཾ; ()

༩༠.

ཝིམལསལིལཔུཎྞཾ ཕེཎམཱལཱབྷིཀིཎྞཾ

ཝིཀཙཀམལརཱཛིཾ ཏུངྒཀལློལརཱཛིཾ,

སསིརཏརསམཱིརཾ ཝཱལུ༹ཀཱཀིཎྞཏིརཾ

སམུཔགམི ཨནོམཱནཱམགངྒཾ སཝཱིརོ; ()

༩༡.

ཨསིཏམཎིཏལཱབྷཱ ཚནྣ ཀཱ ནཱམིཀཱ’ཡཾ

ཨིཏི ཝརམཏི པུཙྪི སོ ཨནོམཱནདཱིཏི,

ཏམཝདི ཡདི ཏཱིརེ ཨེཏྠ’ཧཾ པབྦཛེཡྻཾ

ཨཏིཝིཡ སཕཁལཱ མེ སཱ ཨནོམཱསིཡཱ’ཏི; ()

༩༢. ¶

རཝིཀུལཏིལཀོ སོ པཎྷིཡཱ ཝཱཛིརཱཛཾ

སཛཝམདདི སཉྙཾ ཏཱཡ ཨཊྛོསབྷཱཡ,

སུཝིམལསལིལཱཡཱ’ནོམགངྒཱཡ ཏཱིརེ

ཏརཎིརིཝ ཋིཏོ’སི ཨུཔྤཏིཏྭཱ ཏུརངྒོ; ()

༩༣.

སིཏཔུལིནཏལཊྛོ ཏིཎྷདྷཱརཱ’སིཧཏྠོ

ཝིསདམཏི སམོལི༹ཾ ཙཱུལ༹མཱདཱཡ དལ༹ྷཾ,

ཨལུནི སིརསི སེསཱ དྭངྒུལཱ ནཱིལཀེསཱ

ན ཏདུཔརི པརཱུལ༹ྷཱ དཀྑིཎཱཝཏྟཡིཾསུ; ()

༩༤.

ཨབྷཝི ཏདནུརཱུཔཾ དཱཋིཀཱ མསྶུཙཱ’པི

ཨཡམུཔརི སཙཱ’ཧཾ ཋཱཏུ བུདྡྷོ བྷཝེཡྻཾ,

ནབྷསི ཁིཔི སིཁཾ ཏཾ ཨིཙྩདྷིཊྛཱཡ དྷཱིརོ

པརིབྷཝིཡ ཋིཏཱ སཱ མེགྷམཱལཱཝིལཱསཾ; ()

༩༥. ¶

སཔདི སུརཔུརམྷཱ དེཝརཱཛཱབྷི’གནྟྭཱ

ཏམབྷིཧརིཡ ཙཱུལ༹ཾ ཙཱརིཙངྒོཊཀེན,

རཏནམཡམུལཱ༹རཾ ཙེཏིཡཾ མཱཔཡིཏྠ

སུརགཎམཧནཱིཡཾ ཏཏྲ ཙཱུལཱ༹མཎིནྟི; ()

༩༦.

ཝིདྷིརབྷཝི སཧཱཡོ ཡོ གྷཊིཀཱརནཱམོ

ཨདདི སམཎཀཔྤཾཀ སོ ཀཔརིཀྑཱརམསྶ,

གཧིཏསམཎཝེསོ པུབྦབུདྡྷཱ’ཝ ནཱཐོ

ནབྷསི ཁིཔི ནིཝཏྠཾ སཱཊཀཾ སཾཧརིཏྭཱ; ()

༩༧.

ཏམབྷིཧརིཡ དུསྶཾ པཀྑིཔིཏྭཱ སམུགྒེ

རཏནམཡམཏུལྱཾ ཡོཛནདྭཱདསུཙྩཾ,

ཨཀརི པརཧིཏཏྠཾ བྲཧྨལོཀེཀ ཝིདྷཱཏཱ

མཀུཊམཎིམརིཙཱིཙུམྦིཡཾ ཙེཏིཡཾསོ; ()

༩༨. ¶

པིཏུནརཔཏིནོ ཏྭཾ བྷུསཎཱདཱིནི དཏྭཱ

ཨིཏི མམ ཝཙནེནཱ’རོགྱམཱརོཙཡསྶུ,

སཙིཝམནུཔལབྦྷཱ’ དཱནི པབྦཛྫིཏུཾ ཏེ

པཧིཎི ཧཡསཧཱཡཾ ཨོཝདིཏྭཱན ཚནྣཾ; ()

༩༩.

པཊིཔཐམཝཏིཎྞོ གནྟུཀཱམོ སརཊྛཾ

དྷརཎིཔཏིཝིཡོགཱ སོཀནིབྦིདྡྷགཏྟོ,

ཏུརགཔཏི ཙཝིཏྭཱ ཀནྠཀོ དེཝཔུཏྟོ

བྷཝི ཀནཀཝིམཱནེ ཏངྑཎེཏཱཝཏིཾསེ; ()

༡༠༠.

སཀལཝནསུརཱནཾ ཨཉྫལིམཉྫརིཧི

མཧིཏཉྩརཎཔཱིཋོ ཡེན པབྦཛྫིཏོ སོ,

ཏདཝསརིཨནོམཱནཱམནཛྫཱ སམཱིཔེ

ཝནམནུཔིཡནཱམཾ ཨམྦརུཀྑཱབྷིརཱམཾ; ()

༡༠༡. ¶

སོ ནིཀྑམྨ ཨབྷིནྣཁཏྟིཡཀུལཱ ནེཀྑམྨ དྷམྨཱལཡོ

བྷོགཀྑནྡྷམུལཱ༹རཙཀྐརཏནཾ ཨུཙྩཱརབྷཱརཾ ཝིཡ,

ཨོཧཱཡཱ’ནུཔིཡམྦནཱམཝིཔིནེ སཏྟཱཧམཛ྄ཛྷཱཝསཾ

པབྦཛྫཱཔཊིལཱབྷསམྦྷཝསུཁཾ ཝེདེསི བུདྡྷངྐུརོ; ()

ཨིཏི མེདྷཱནནྡཱབྷིདྷཱནེན ཡཏིནཱ ཝིརཙིཏེ སཀལ ཀཝིཛན ཧདཡཱནནྡ དཱནནིདཱནེ ཛིནཝཾསདཱིཔེ ཨཝིདཱུརེ ནིདཱནེ མཧཱབྷིནིཀྑམན པཝཏྟིཔརིདཱིཔོ དསམོ སགྒོ.

༡. ¶

མནྡཱནིལེརིཏཏརུསཎྜམཎྜིཏེ

ཏསྨིཾ ཏཔོཝནགཧཎེ ཏཔོདྷནོ,

བྷུཏྭཱ (པབྷཱཝཏི) ཝནདེཝཏཱ ཡཐཱ

དིབྦཾ སུཁཾ སུཁམནགཱརིཡཾ ཏཏོ; ()

༢.

ཡོ སེནིཡོ ནརཔཏི མཱགདྷོ ཏདཱ

ཡསྨིཾ པུརེ ཝསཏི པུརངྒབྷཱསུརེ,

རཱཛགྒཧཾ ཏམཧིཔཝེསནཏྠིཀོ

ཨདྡྷཱནམོསརི སམཏིཾསཡོཛནཾ; ()

༣.

ཙཀྐངྐིཏསྶིརིཙཱརཎོ སུསཉྙམོ

དཱིགྷཉྫསཾ ཝསི ཏདཧེན ཁེཔཡཾ,

རཱཛགྒཧཾ ཀཔུརཝརམིནྡིརཱལཡཾ

སམྤཱཝིསི ཛིཏགཛརཱཛགཱམི སོ; ()

༤. ¶

ཨིནྡཱསུདྷཱཝལིཝལཡིཀཏོ མཧཱ-

མགྒམྷི ཛངྒམྨཎིཔབྦཏོརིཝ,

ཁཏྟིཾསལཀྑཎསམལངྐཏོ མཧཱ-

ཝཱིརོ ཏཔོནིདྷི ཡུགམཏྟདསྶནོ; ()

༥.

བོདྷཱཔཡཾ བུདྷཛནམཱནསམྦུཛེ

ཨཝ྄ཧཱཔཡཾ པཐིཀཛན’ཀྑིཔཀྑིནོ,

ཝིམྷཱཔཡཾ ནིཛསིརིཡཱ སདེཝཀེ

ཏསྨིཾ པུརེ ཙརི སཔདཱནཙཱརིཀཾ; ()

༦.

པིཎྜཱཡ གཙྪཏིསཏི རཱུཔདསྶན-

པབྱཱཝཊཱ’ཁིལཛནཏཱཡ གོཏམེ,

སངྒྷོབྷིཏཱ’སུརམིསརེཧི སཱ པུརི

པཏྟེ ཡཐེཝ’སུརཔུརི པུརིནྡདེ; ()

༧. ¶

ཁཏྟིཾསལཀྑཎསུརཙཱཔབྷཱསུརེ

རཱུཔམྦརེ ཝརཔུརིསསྶ གཙྪཏོ,

ལོཀསྶ ལོཙནསཀུཎཱཝལིཏདཱ

ཨནྟཾ ནཔཱཔུཎི པརིསངྐམནྟཱིཔི; ()

༨.

མཉྫཱིརཔིཉྫརཀར ཀནྡྷརཱམཎི-

ཀེཡཱུརབྷཱསུརཙརཎཱ སིརིམཏོ,

སཱིམནྟིནཱི པརམསིརིཾ ཝིཔསྶིཏུཾ

དྷཱཝིཾསུ ནིཛྫིཏཀལཧཾསཀཱམིནཱི; ()

༩.

ནཱརིཛནཱ མཧིཏུམིཝཱ’བྷིགཙྪཏོ

རཱུཔིནྡིརཱཡ’ ནིམིསལོཙནུཔྤལེ,

དྷམྨིལླཝེལླིཏབྷུཛཙམྤཀཱཝལཱི

དྷཱཝིཾསུ པཱིཝརཀུཙཧཱརཔཱིལི༹ཏཱ; ()

༡༠. ¶

ནིསྶཱསིནཱི སམཛལབིནྡུཙུམྦིཏ-

ཝཏྟམྦུཛཱ སིཐིལིཏཀཱསིཀམྦརཱ,

ཀཱཙིཏྠིཡོ སམཎམུདིཀྑིཏུཾ པཐེ

དྷཱཝནྟིཡོ ཀིམུཔཏིསངྐིཡཱ’བྷཝུཾ; ()

༡༡.

ཨུགྒྷཱཊིཏཱ’སིཏམཎིསིཧཔཉྫརཱ

རཱམཱཔསཱརིཏཝདནམྦུཛཱཀ ཝསིཾ,

དཊྛུཾ པབྷུཛནབྷཝནེསུ ཏངྑཎེ

མནྡཱཀིནིསརསིཝིལཱསམཱཧརུཾ; ()

༡༢.

ཨུཙྪངྒཏོཔཏིཏསུཏཱ’བྷིརཱུཔིནོ

རཱུཔཔྤལམྷིཏཧདཡཱཀ པཱུརཱིཝདྷཱུ,

པསྶནྟིཡོ པཐིཀཛནསྶཧཏྠགེ

ནཱཀཾསུ ཀིཾ ཨདྷིཀརཎཱ’དྷིརོཔཎཾ; ()

༡༣. ¶

ཨེཀེ ཛནཱ ཡཏིཔཏིརཱུཔདསྶན-

ཀོཏུཧལཱ༹ སཀཔཊིབྷཱནམབྲཝུཾ,

སཱིམནྟིནཱི མནཀུམུདཱནི བོདྷཡཾ

པཏྟོ’ཏྱ’ཡཾ པཀཏིནིསཱཔཏཱིནུཁོ; ()

༡༤.

སུཏྭཱན ཏཾ སཀལཀལཱནྟརོཔགཾ

བིམྦཾ ཏདངྐིཏཧརིཎངྐམམྦརེ,

ཏུམྷེ ནཔསྶཐ ཧིམརཾསིནོ ཨིཏི

གབྦཱབྷིཛཔྤིཏཝཙནཱ’པརེཛནཱ; ()

༡༥.

ཨཙྪེརཔངྐཛཝིསརཱནི ཙིནྟིཡ

སཉྩུམྦིཏུཾ པུརལལནཱནན’མྦུཛེ;

ཝེརོཙནོ ཨིདྷུཔགམཱ ཝིརཱུཔིམཱ

ཨིཙྩབྲཝུཾ པུནརནིསམྨཀཱརིནོ; ()

༡༦.

སུཏྭཱན ཏཾ གགནཏལངྒནེ’དྷུནཱ

ཝེརོཙནསྶ’བྷིཙརཏོ ནཔསྶཐ,

ཙཎྜཱཏཔཾ ཐིརཔརིཝེསམམྦུཛ-

པཱཎིནྟི གཛྫིཏཝཙནཱ’པརེཛནཱ; ()

༡༧. ¶

ཨུཏྟུངྒམནྡིརམཎིཙནྡིཀཱཏལེ

དིབྦཙྪརཱནིབྷརམཎིཧི ཝཉྩིཏོ,

ཨེཡཱ’མརཱཝཏིནགརིཏི ཙིནྟིཡ

སཀྐོ ཙརེ ནནུ སཀཝཱདམཔཀྤཡུཾ; ()

༡༨.

སཀྐསྶ དཱནཝཝིཛཡཱ’བྷིལཱསིནོ

པཱཎིམྷི དིསྶཏི ཝཛིརཱཡུདྷཾ ཁརཾ,

སཾཝིཛྫརེ དསསཏལོཙནཱནི’པི

ནོཏཱདིསོ ཨཡམིཏི ཏབྦིཔཀྑིནོ; ()

༡༩.

ཡཱ སཱལཝཏྱ’དྷིཝཙནཱ’བྷིརཱུཔིནཱི

སཉྩོདིཏོ ཛིཏགིརིཛཱཡ ཏཱཡ ཧོ,

ཀེལཱསཔབྦཏནིབྷཔཎྜཝཱཙལ-

ཉཏྟཾ ཝཛཾ ཨཡམིཏིཨིསྶརོ’བྲཝུཾ; ()

༢༠. ¶

ཏུམྷེ ནཔསྶཐ པརམིསྶརསྶ ཀིཾ

ནགྒཏྟནཾ པསུསཡནོ’པཝེསནཾ,

པཱཎིཾ ཀཔཱལཀམདྷིཀཀྑིམཎྜལཾ

ཨིཏྠཾ པཝེདིཏཝཙནཱ’པརེཛནཱ; ()

༢༡.

ཨེསཱ’ཝལམྦིཏཔུརཁཱིརནཱིརདྷིཾ

ལཀྑིཾ སམེཀྑིཡ ནིཛལཀྑིསཾསཡོ,

པཱིཏམྦརཾ པརིདཧིཡ’ཉྫསེ ཙརཾ

ནཱརཱཡནོ ཨིཏི མཏིམཔྤཡུཾ སཀཾ; ()

༢༢.

ནཱརཱཡནོ ཀུཝལཡནཱིལཝིགྒཧོ

ཀོཔནྟརོ’རགསཡནིནྡིརཱདྷནོ,

ཙཀྐཱཡུདྷོ’ལླསིཏཀརོ’ཏིཝཱམནོ

ཏབྦཱདམདྡནཙཏུརེ’ཏརེ ཛནཱ; ()

༢༣. ¶

ཝེདཏྟཡཾ ཝིབུདྷཛནཱནམཱནནེ

སྭ’ཛ྄ཛྷཱཡཏཾ ཝསཏིནུཁོ སརསྶཏཱི,

སཉྫཱཏསཾསཡ ཛཊིཏོ པིཏཱམཧོ

ཏསྶཱགཝེསནཔསུཏོ’ཏྱུ’དཱིརཡུཾ; ()

༢༤.

སུཏྭཱན ཏཾ སརསིཛཡོནིནོ སདཱ

པཱཎིམྷི ཝིཛྫཏི ཝརམཏྟཔོཏྠཀཾ,

ཙཏྟཱརིཙཱནནཔདུམཱནི དིསྶརེ

གཙྪཾ ཨཡཾཔན པུརིསོ ནཏཱདིསོ; ()

༢༥.

སུདྡྷོདནཝ྄ཧཡཝསུདྷཱདྷིཔ’ཏྲཛོ

བུདྡྷོ བྷཝིསྶཏི ཨིཏི ཝེདཀོཝིདཱ,

ཀོཎྜཉྙབྷུསུརཔམུཁཱ དྭིཛཱ ཏདཱ

པབྱཱཀརུཾ ཏནུ བཧུབྷཱསཎེན ཀིཾ; ()

༢༦. ¶

ཨུཀྐཎྛིཏོ སཀབྷཝནཱ མཧཱམཏཱི

ནིཀྑམྨ སཏྟམདིཝསོཏི ཝིསྶུཏོ,

ཨཱཔཱཐགཾ ནིཛསཝཎཉྫལིཧི བྷོ

ཏཾ བྱཔྤཐཾ ནཔིཝཐ ཀིཾ ཡཐཱམཏཾ; ()

༢༧.

ཝེདཱགཏཾ ཝརཔུརིསངྒལཀྑཎཾ

དེཧམྷི ཝིཛྫཏི སམཎསྶ གཙྪཏོ,

ཨནྡྷཱ’ཝ བྷོ ཨཔགཏརཱུཔདསྶནཱ

ཏུམྷེ’པི ཀིཾ ཏལཧཐ རཱུཔདསྶནཾ; ()

༢༨.

ནིཀྑམྨ ཚཌྜིཏཝིབྷཝོ མཧཱཀུལཱ

སུདྡྷཱསཡོ སུགཧིཡ པཏྟཙཱིཝརཾ,

པབྦཛྫིཡཱ’ནཧིརམིཏོ བྷཝཏྟཡེ

ཨཏྠཱཙརཾ ཨནུགྷརམཉྫསེ’དྷུནཱ; ()

༢༩. ¶

སུདྡྷོདནཱཝནིཔཏིནོ ཝརོརསོ

ཨེསོ སམུཛྫལསཏཔུཉྙལཀྑཎོ,

ཝྱཱཔཱརིཏོ ཀུསལབལེན བོདྷིཡཱ

ཧོཏེ’ཝ གོཏམསམཎོ ནསཾསཡོ; ()

༣༠.

དིསྭཱ ཏཔོདྷནམཧིཡནྟམཉྫསེ

ཡེ མཱནཝཱ སཀསཀཝཱདམཔྤཡུཾ,

ཏབྦཱདབནྡྷནཝིནིཝེཋནཱ པརཾ

ཨིཙྩཱཧུ པཎྜིཏཔུརིསཱ ཡཐཱཝཏོ; ()

༣༡.

དུཏཱ ཏདཱ སུརསི སམཔྤིཏཉྫལཱི

རཉྙོ ཏམཙྪརིཡཔཝཏྟིམཱཧརུཾ,

ཨདྡཀྑི བྷུཔཏི ཙརམཱནམཉྫསེ

པིཎྜཱཡ’ཐབྦིཝརིཡ སིཧཔཉྫརཾ; ()

༣༢.

ནཱ གོ སིཡཱ པཋམིནིམུཛྫནཾ ཀ རེ

ཡཀྑོ སིཡཱ སཧཡམདསྶནཾ ཀ རེ,

དེ ཝོ སིཡཱ གགནཏལངྒཎཉྩ རེ

པོསོ སིཡཱ ཡདི པཊིལདྡྷམཱཧ རེ; ()

༣༣. ¶

དཱུཏེནུ’སཱསིཡ མགདྷཱདྷིཔོ ཨིཏི

ཝཱིམཾསིཏུཾ པཀཏིམནངྒཧངྒིནོ,

པཱཧེསི ཏེ པདམནུགམྨུ’པཱགམུཾ

སདྡྷིཾ མཧཱསམཎཝརེན པཎྜཝཾ; ()

༣༤.

ཝིཀྑཱལཡཾ མུཁཀམལཾ ཀུལེ ཀུལེ

བྷིཀྑཱཊནེན’ བྷིཧཊམིསྶབྷོཛནཾ,

ལདྡྷཱ ཛིགུཙྪིཡ ཝསི པཎྜཝཱཙལ-

ཙྪཱཡཱཡ མཱརབྷི སུནིསཛྫ བྷུཉྫིཏུཾ; ()

༣༥.

བྷཏྟམྷཱི ཀུཀྐུརཝམཐཱུཔམེ མུཧུཾ

ཨནྟོདརཾ པཝིསཏི དྷཱིམཏོ སཏི,

ཨནྟཱནི བཱཧིརཀརཎཱནི’ཝཱ’བྷཝུཾ

ཏཾཁོ སཧཱི ཝསིསནིསམྤཛཉྙཝཱ; ()

༣༦. ¶

པབྦཛྫིཏཾ སུགཧིཏཔཏྟཙཱིཝརཾ

དིསྭཱ རཏིཾ པཛཧིཡ རཱཛབྷོཛནེ,

སིདྡྷཏྠ ནོ ཏྭམབྷིགམིཏྠ ཨཏྟནཱ

ཨཏྟཱནམོཝདིཡ པབྷུཉྫི བྷོཛནཾ; ()

༣༧.

དཱུཏེཧི ཙོདིཏཧདཡོ དཡཱདྷནོ

སོ མཱགདྷོ ནརཔཏི ཏེན པཱཝིསི,

ཡེནཱ’སི པཎྜཝགིརི བྷདྲཝཱཧནཾ

ཨཱརུཡ྄ཧ དསྶནརསགྷེདྷལོཙནོ; ()

༣༨.

ཨཉྙཱཡ སཱཀིཡཀུལསམྦྷཝཾ ཝསིཾ

རཱཛཱ པསིདིཡ ཨརིཡེ’རིཡཱཔཐེ,

མཱ ཀཱཧསེ སཁ ཨིཏི དུཀྐརཾ ཁརཾ

རཛྫེན ཏཾནརཔཝརཾ པཝཱརཡི; ()

༣༩. ¶

རཛྫེན ཀིཾ ཏཝ ཙཏུརཎྞཝཱཝདྷིཾ

རཛྫཾ ནིཛཾ པཛཧིཡ ཨཱགཏསྶ མེ,

བོདྷིཾ པབུཛ྄ཛྷིཡ པཋམཾ ཏཐཱསཏི

ཨཱགཙྪཏཾ མམ ཝིཛིཏནྟྱ’ཝོཙ ནཾ; ()

༤༠.

དཏྭཱ པཊིསྶཝམཐ བྷུམིབྷཏྟུནོ

ལོཀསྶ ལོཙནམཎིཏོརཎཱཀུལེ,

དཱིགྷཉྫསེ ཝསི ཋཔིཏངྒྷིཔངྐཛོ

ཨཱལཱ༹རཱཀཾ ཨིསིཔཝརཾ ཨུཔཱཝིསི; ()

༤༡.

པཏྭཱན ཀིཾ ཀུསལགཝེསི སོ ཝསི

ཨཱལཱ༹རཀཾ ཝིརཛམུལཱ༹རཛྷཱཡིནཾ,

ཨིཙྪཱམཧནྟི’སི ཏཝ སནྟིཀེ’དྷུནཱ

དྷམྨཾ སམཱཙརིཏུམིདྷཱགཏོ བྲུཝི; ()

༤༢. ¶

སུཏྭཱན ཏཾ ཏཏིཡམརཱུཔིཀཾ ཝསི

ཛྷཱནཾ ཝིཡཱཀརི པཊིལདྡྷམཏྟནཱ,

ཁིཔྤཾ ཏཔོནིདྷིཔགུཎཾ ཨཀཱསི ཏཾ

དྷམྨཾ སཀཱཙརིཡནཡཱ’ཝལམྦིཡ; ()

༤༣.

ནཱ’ཡཾ ཝསི ཏནུཏརསདྡྷཡཱ མམཾ

དྷམྨཾ སཡཾ སམདྷིགཏཾ ཝིཡཱཀརེ,

གོསཱམིཀོ ཡཐརིཝ པཉྩགོརསཾ

ཨདྡྷཱཕལཾ ཨནུབྷཝཏཱིཏི ཏིནྟིཡ; ()

༤༤.

ཀཱལཱམ དྭེ ཨདྷིགཏཛྷཱནསམྦྷཝཾ

ཏྭཾ ཡཱཝཏཱསུཁ མནུབྷོསི མཾ ཝད,

པུཊྛསྶ ཏསྶི’ཏི ནཙཀིཉྩི བྷཱཝིཡཾ

ཨཱཀིཉྩནཾ ཨཝཙ ཨཀིཉྩནཱལཡོ; ()

༤༥. ¶

སཾཝིཛྫརེ མམཔཀི ཨིམསྶི’ཝེ’སིནོ

སདྡྷཱསཏཱིཝཱིརིཡསམཱདྷིབུདྡྷིཡོ,

ཨེཝཾ ཝིཏཀྐིཡ ནཙིརཾ ཀཏུསྶཧོ

ཛྷཱནཾ ལབྷཱི ཏཏཱིཡམརཱུཔིཀཾ ཝསཱི;

༤༦.

ཡཾ ཁོ ཏུཝཾ ཝིཧརསི ཛྷཱཏམཔཀྤིཏོ

སམྤཛྫ སམྤཏི ཝིཧརཱམཧནྟི ཏཾ,

ཨཱལཱ༹རི’སི ཝརཔུརིསེན སཱཝིཏོ

ལཱབྷཱ’ཝུསོཏྱཝཙ སུལདྡྷམཱཝུསོ;

༤༧.

ཛཱནཱམི པཱཝཙནམཧཾ ཡཐཱ ཏུཝཾ

ཛཱནཱསི པཱཝཙནམཧཾ ཡཐཱ ཏུཝཾ,

ཏྭཾ ཏཱདིསོ ཨཧམཔི ཡཱདིསོ བྷཝེ

ཏྭཾ ཡཱདིསོ ཨཧམཔཀི ཏཱདིསོ བྷཝེ;

༤༨. ¶

ཨེཧཱ’ཝུསོ སམཎ མཡཾ ཨུབྷོ ཛནཱ

ཀཱཧཱམི’ཏོ པརིཧརཎཾ གཎསྶི’དཾ,

ཝཏྭཱན ཨཱཙརིཡསམཱནཀོ སཀཾ

སིསྶཾ ཨཀཱ ཏམསམམཏྟནཱ སམཾ; ()

༤༩.

དྷམྨོཔྱ’ཡཾ ནབྷཝཏི ནིབྦིདཱཡ ཝཱ

བོདྷཱཡཝཱ ནཝུཔསམཱཡ ཀེཝལཾ,

ཨཱརུཔྤབྷུམིཡམུཔཔཏྟིཡཱ སིཡཱ

ཨིཙྩཱནལངྐརིཡ ཏཏོ ཨཔཀྐམི; ()

༥༠.

ཀཱལམཏོ ཨུཔརིཝིསེསམུདྡཀོ

ཛཉྙཱ’ཏྱ’ཡཾ སུམརིཡ རཱམཔུཏྟཀོ,

པཏྭཱ’སྶམཾ སམདྷིགཏཾ ཏྭཡཱ’པ’ཧཾ

དྷམྨཾ སམཱཙརིཏུམིདྷཱགཏོ’བྲུཝི; ()

༥༡. ¶

ཉཏྭཱ སཀཱཙརིཡམཏཉྷི བུདྡྷིམཱ

དྷམྨཉྩརེ མམ སམཡོ ཙ ཏཱདིསོ,

ཝཏྭེ’ཝམུདྡཀཝསི ཁིཔྤམཏྟནོ

སིཀྑེསི པཱཝཙནཔཐེ ཏཔོདྷནཾ; ()

༥༢.

སདྡྷཱཡ མཾ སཀསམཡཱ’ནུསཱསཀོ

ཨདྡྷཱ སམཱདྷིཛཕལམཱཧརེ’ཏྱ’ཡཾ,

ཙིནྟཱཔརོ ཝརཔུརིསོ ཨརཱུཔིཀཾ

ཛྷཱནཾ ཝལཉྫསི ཀཏམནྟྱ’པུཙྪི ནཾ; ()

༥༣.

སུཏྭཱ ཏམུདྡཀཝསི སནྟམཱནསོ

སནྟཾཧི’དཾ པརམམིདནྟི བྷཱཝིཡཾ,

སཱམཾ ཝལཉྫནཀམརཱུཔབྷུམིཀཾ

ཛྷཱནཾ ཙཏུཏྠཀམཝིཀམྤམཱཧརཱི; ()

༥༤. ¶

སཾཝིཛྫརེ མམཔི མནོནིཀེཏནེ

སདྡྷཱདིསགྒུཎརཏནཱནི’མསྶི’ཝ,

ཨེཝཾསརཾ ནཙིརམརཱུཔིཀཾ ཝསི

ཛྷཱནཾ ལབྷཱི ཝཱིརིཡབལེནཝཱ’ནྟམཾ; ()

༥༥.

ལདྡྷཾ ཏཡཱ ཡམདྷིགཏནྟི ཏམྨཡཱ

ཨཱརོཙིཏེ སམཎ ཝརེ’སིཔུངྒཝོ,

ཨམྷེ གཎཾ སུཔརིཧརཱམུ’བྷོ’ཏིམཾ

ཝཏྭཱ ཏམཱཙརིཡདྷུརེན མཱནཡི; ()

༥༦.

ནཱ’ཡཾ པཐོ བྷཝཔརིམུཏྟིཡཱ སིཡཱ

ཨདྡྷཱབྷཝེ མམཔཀི བྷཝགྒཔཏྟིཡཱ,

ཨེཝཾ ཝཝཏྠིཏཧདཡོ མཧཱདཡོ

ནིབྦིཛྫསོ ཏདཔགཏོ’ནལཾཨིཏི; ()

༥༧. ¶

མོཀྑེསཀོ ཛིཏཝརཝཱརཎཀྐམོ

ཨེཀོཙརཾ ཝསི མགདྷེསུ ཙཱརིཀཾ,

སེནཱནིཝིསྶུནྣིགམོ ཡཧིཾསིཡཱ

ཏཾ ཏཱཔསཱལཡམུརུཝེལམོསརི; ()

༥༨.

ཨདྡཀྑི སོ ཧརིཎཝིཧངྒམཱཀུལཾ

མནྡཱནིལེརིཏཏརུསཎྜམཎྜིཏཾ,

ནེརཉྫརཱསལིལཔཝཱཧསིཏལཾ

པཱསཱདིཀཾ པརམཏཔོཝནཾ ཏཧིཾ; ()

༥༩.

ཨནྟོཛཊཾ ཛཊིལཛཊཱ’ལིཝུམྦིཏ-

པཱདམྦུཛོ ཝིཛཊཡིཏུཾ གྷཊཾ ཝསཱི,

ཨཏྟཱཧིཏཱཔནཔཊིཔཏྟིཡཱ ཏཧིཾ

ཝིཛྫཱདྷརེ ཛཊིལཝརེ པསཱདཡཱི; ()

༦༠. ¶ སཉྩཱརིཏོ ཛནཔདཙཱརིཀཾ ཏདཱ

པཏྭཱ ཏཔོཝནམཐ པཉྩཝགྒིཡཱ,

བྷིཀྑུ མཧཱཔུརིསམུཔཊྛཧིཾསུ ཏཾ

ཨཱརདྡྷདུཀྐརཀིརིཡཾ ཡཐཱབལཾ. ()

༦༡. དྷཱིརོ’ཏིདུཀྐརཔཊིཔཏྟིཔཱུརཀོ

དནྟཱནི ཝཱིསཏིདསནེཧི ཝཱིསཏི,

ཏཱལུཾ ནིརུམྷིཡ རསནཱཡ ཙེཏསཱ

ཙིཏྟཾ ནིཔཱིལ༹ཡི པརིཏཱཔཡི ཏཧིཾ. ()

༦༢. པགྒཡ྄ཧ མུདྡྷནི བལཝཱ’ཏིདུབྦལཾ

ནིཔྥཱིལ༹ཡེ ཡཐརིཝ དྷཱིམཏོ ཏཐཱ,

ཨཏྟཱཧིཏཱཔནཔསུཏསྶ པགྒྷརུཾ

ཀཙྪཱདིནཱ’དྷཱིཀཏརསེདབིནྡཝོ; ()

༦༣. ¶ མགྒོབྷཝཏྱ’ཡམིཏི བོདྷིསིདྡྷིཡཱ

ཨཔྤཱཎཀཾ པཊིཔད མཱཙརཾ ཙིརཾ,

ཝཱསཾ ཨཀཱ ཝསི མུཁཏོ ཙ ནཱསཏོ

ཨསྶཱསམཔྤཊིཔཊིམོ’པརུནྡྷིཡ; ()

༦༤.

རུདྡྷེསུ ཏེསྭ’ པིཧིཏསོཏརནྡྷཏོ

ཝཱཏོ’བྷིནིཀྑམི ཨདྷིམཏྟནིསྶནོ,

ཀམྨཱརགགྒརིམུཁཏོ རཝོ བྷུསཾ

ནིགྒཙྪཏེ ཨབྷིདྷམནེན སེཡྻཐཱ; ()

༦༥.

ཡཱཝེདནཱ ཁརསིཁརེན ཛཱཡརེ

སཱིསསྶ ཝིཛ྄ཛྷནསམཡེ སུཁཏྠིནོ,

ཨེཝཾ ཏདཱ ཀཋིནསིརོརུཛཱ’བྷཝུཾ

རུདྡྷཱནིལསྶ ཧི མུཁཀཎྞནཱསཏོ; ()

༦༦. ¶

ཝཱཏཱབྷིགྷཱཏནསམཡེ སུདྷིམཏོ

སཱིསེ’བྷཝུཾ པུནརཔིསིསཝེདནཱ,

དལ༹ྷེན ཡོ སིརསི ཝརཏྟཀེན ཡཾ

དལ༹ྷཾ དདེ ཡཐརིཝ སིསཝེཋནཾ; ()

༦༧.

སམྨཱ ནིརུམྷིཏམུཁཀཎྞནཱསཏོ

དྷཱིརོ སམཱིརཎམུཔརུནྡྷིཙུ’ཏྟརིཾ,

གབྦྷནྟརཾ ཁརཏརཝེདནཱ’ཏུརཾ

ཝཱཏཱ’བྷིམནྠིཡ པརིཀནྟཡུཾ ཏཏོ; ()

༦༨.

གོགྷཱཏཀོ ཙཏུརཏརོ ཝིཀཏྟཡེ

ཀུཙྪིཾ གཝཾ ཏིཁིཎཝིཀནྟནེན ཙེ,

རུདྡྷཱཏིལེཧ’ནརིཡམགྒགཱམིནོ

ཛཱཏཱ ཏཐཱ ཁརཏར ཀུཙྪིཝེདནཱ; ()

༦༩. ¶

ཨཔྤཱནཀཾ པུནརཔི ཛྷཱནམཱཙརཾ

ཝཱིརོ སམཱིརཎ མུཔརུནྡྷི སབྦཐཱ,

ཙཱིནྟུབྦྷཝཾ སཀམུཁཀཎྞནཱསགཾ

ཏེནཱ’སི ཀཱཡིཀདརཐོ དྷིཏཱིམཏོ; ()

༧༠.

དལ༹ྷཾ ཨུབྷོ ཙརཔུརིསཱ མཧབྦལཱ

བཱཧཱསུ གཎྷིཡ པུརིསཾ’ཏིདུབྦལཾ,

ཨངྒཱརཀཱསུཡམཧིཏཱཔཡནྟིཙེ

སོ ཏཱདིསིཾ ཨནུབྷཝི དུཀྑཝེདནཾ; ()

༧༡.

ཁིཏྟཾ ཀལིངྒརམིཝཀཱཝིདེཝཏཱ

རུདྡྷཱནིལུབྦྷཝཁརཝེདནཱཏུརཾ,

ཝཱིརཾ ཝིལོཀིཡ པཏིཏཾ ཏཔོཝནེ

པབྱཱཀརུཾཀ ཝརཔུརིསོ མཏོ ཨིཏི; ()

༧༢. ¶

ཀཱལཾཀརོཏྱ’ཡམིཏི ཀཱཙི དེཝཏཱ

ནོཙཱཧུཀིཾ ཏདིཏར དེཝཏཱ ཝཏཾ,

ཨསྶེ’ཝ གོཏམསམཎསྶ མཱརིསཱ

ཨཱརོཙཡུཾ ཝིཧརཎམཱིདིསཾཨིཏི; ()

༧༣.

ཡཾནཱུན’ཧཾ པཊིཔདཧེཡྻམཱཡཏིཾ

ཨཱཧཱརཡཱཔནཧརཎཱཡ སབྦསོ,

ཨེཝཾ སཙིནྟཡི ཀརུཎཱཡ ཙོདིཏཱ

ཏཱ དེཝཏཱ ཏུཝཊུམུཔེཙྩ གོཏམཾ; ()

༧༤.

ཨཱརོཙཡུཾ ཡདིཔན ནིཙྩབྷོཛནོ-

པཙྪེདནཾ སམཎཏུཝཾ ཀརིསྶསི,

ཀཱཧཱམ ཏེ མཡམིཏིལོམཀུཔཏོ

དིབྦོཛམོཀིརིཡ སརིརཏཔྤཎཾ; ()

༧༥.

གྷཱསསྶཚེདནཝཱིརིཡཾ ཀརོམི ཙེ

ཡཱཔེནྟི ཏཱ མདྷུར སུདྷཱརསེན མཾ,

ཏེནཱ’བྷིཡཱཔནཝིདྷིམིཙྪཏོ སཏོ

ཏཾཁོཏཔཾ ནབྷཝཏི ཀིཾ མུསཱ མམཾ; ()

༧༦. ¶

ནཱལནྟི སོ ཀུཧནཝསེན དེཝཏཱ-

ཝིམྷཱཔནེཏི’ཧ ནིཛདེཧཏཔྤཎཾ,

ཨེཝཾ ཨནུསྶརིཡ’ནུཝཱསརཾ ཝསཱི

ཨཱཧཱརམཱཧརི ཝིརསཾ པརིཏྟཀཾ; ()

༧༧.

སྭཱཙེལཀོ ཝིཙརིཀརཱཔལེཁཎོ

ཨཱཙཱརམུཏྟྱ’བྷཝི ནཙེཧིཏིཊྛིཀོ,

ཨུདྡིསྶཀཾ ཨབྷིཧཊཀཾ ནིམནྟནཾ

ནཱསཱདཡི པིཊཀཀལོཔིཀུམྦྷིཀཾ; ()

༧༨. ¶

སོ དཎྜམུགྒརམུསལེ’ལ༹ཀནྟརཾ

པཱཡནྟིགབྦྷིནིཔནིཏཱིཧི ཙཱ’ཧཊཾ,

སཱམཀྑིཀཱཝིསཡ མུཧིནྣམེཀིཀཾ

སངྐིཏྟིནོདནམཔི ནཱབྷིསཱདཡཱི; ()

༧༩.

སོཝཱིརཀཾ ནཔིཝི སུརཾ ནམེརཡཾ

སུཀྑཱམཀཾ ཡདཔི ཏིཀོཝིསུདྡྷིཀཾ,

སོ མཙྪམཾསཀཝིཀཏིཾ པཊིཀྑིཔི

ཨཔྤེཀདཱ ཏཔསི ནིརཱམགནྡྷིཀོ; ()

༨༠. ¶

སོ སཏྟཏོཔྤབྷུཏི ཀམེན ཧཱཔཡཾ

ཡཱཝེཀམཱཧརི ཀབལཾ བལཏྠིཀོ,

སོ སཏྟཏོཔྤབྷུཏི ཀམེན ཧཱཔཡཾ

ཨེཀཾ ཀུལཾ ཨུཔགམི ཡཱཝ བྷིཀྑིཏུཾ; () (ཡམཀབནྡྷནཾ)

༨༡.

ཨེཀཱཡ དཱིཧིཔི ཏིཙཏཱུཧི པཉྩཧི

དིནྣཾ པཊིགྒཧི ཚཧི དཏྟིསཏྟཧི,

ཨེཀཱཧིཀཔྤབྷུཏིཀམདྡྷམཱསིཀཾ

མཱུལཾ སཡཾ པཏིཏཕལཾ པབྷུཉྫི སོ; ()

༨༢.

སཱམཱཀཏཎྜུལམཐསཱཀམདྡཀཾ

ནཱིཝཱརཀུཎྜཀཧཊདདྡུལཱདིཀཾ,

པིཉྙཱཀགོམཡཏིཎ ཛྷཱམཀོདནཾ

ཝཱིརོ མཧཱཝིཀཊམཔཱནུབྷུཉྫི སོ; ()

༨༣. ¶

ཐོཀཾ པིཝི པཀསཏམིཏཾ ཧརེཎུཀ-

ཡཱུསཾ ཏཐཱ ཙནཀ ཀུལཏྠམུགྒཛཾ,

སོ ཨཔྤབྷོཛནཔརམོ སཛཱིཝིཏཾ

ཨེཀེན ཡཱཔཡི ཏིལཏཎྜུལེན’པི; ()

༨༤.

སཱཎམྨསཱཎ?ཛིན’ཛིནཀྑིཔཙྪཝ-

དུསྶཾ ཏིརཱིཊཀཀུསཝཱཀཙཱིརཀཾ,

སོ ཀེསཀམྦལམཔིཝཱལ༹ཀམྦལ

མོལུ༹ཀཔཀྑིཀཕལཀཱནྱ’དྷཱརཡི; ()

༨༥. ¶

དུབྦཎྞནཏྟཀམཡམགྒཔུགྒལོ

ཨཔྤེཀདཱ པརིདཧི པཾསུཀཱུལཀཾ,

ཨཏྟནྟཔོཝརཎ པརཱཡཎོ བྷཝི

སོ མསྶུཀུནྟལཏནུལོམལོཙཀོ; ()

༨༦.

ཨུབྦྷཊྛཀོ’བྷཝི པརིཝཛྫིཏཱསནོ

ཨུཀྐཊྛམུཀྐུཊིཀཝཏཾ ཨདྷིཊྛཧཱི,

ཨུདྡྷགྒཀཎྚཀཝཱིསམེ ཨཔསྶཡེ

སེཡྻཾ ཨཀཱ ཏདུཔརིཋཱནཙངྐམཾ; ()

༨༧.

སོ སཱཡཏཏིཡཀམུདཀཱཝརོཧཎ-

ཡུཏྟོ པཝཱཧཡིཏུམགྷཾ སམུསྶ ཧཱི,

ཨཱཏཱཔཡཾ ཨིཏི པརིཏཱཔཡཾ སཀཾ

དེཧཾ ཙིརཾ པརིཧརི པཱཔབྷཱིརུཀོ; ()

༨༨. ¶

ཡོ ནེཀཧཱཡནགཎིཀོ’ཏྠི’ཏིནྡུཀ-

རུཀྑསྶ ཁོ པཔཊིཀཛཱཏཁཱཎུཀོ,

ཨེཝཾ ཏཐཱ པཔཊིཀཛཱཏམཏྟནོ

གཏྟཉྩ སནྣིཝིཏརཛོམལཾ བྷཝི; ()

༨༩.

སོཝཱ པརོ ནཏུ པརིཝཛྫཡཱི རཛོ-

ཛལླཱནི ཀཛྫལམལིནཱནི པཱཎིནཱ,

དེཧཾ སུབྷོཛནཛཧནེན ཛཛྫརཾ

ཏེལཾ ཝིལེཔིཡ རཛསཱ’བྷིཐཱུལཡཱི; ()

༩༠.

སོ དྭེ’ཀཔསྶཡིཀཝཏཾ པཔཱུརཡཱི

ཨཱཔཱནཀོ’ བྷཝི ཕལཀེ’པི ཐཎྜིལེ,

སེཡྻཾ ཨཀཱཀ ཝིཧརི ཝིཝེཀཀཱམཝཱ

ཨཛ྄ཛྷོགཧཾ ཨདུཏིཡཀོ མཧཱཝནཾ; ()

༩༡. ¶

པཱཎེ ཨིམེ ཝིསམགཏེ’ཏིཁུདྡཀེ

ནཱ’ཧཾ ཝདྷིསྶམིཏི པཊིཙྩ’ནུདྡཡཾ,

ཨུསྶཱཝམདྡནཧིརབྷཱིརུཏཱཡ སོ

ནཱཐོ ཨབྷིཀྐམི ཙ སཏོ པཊིཀྐམི; ()

༩༢.

ནིནྣཏྠལཱ ཝནགཧནཱ ཝནཱསཡོ

ནིནྣཏྠལཾ ཝནགཧནཾ མིགོ ཡཐཱ,

ཧཱིཏོ ཝིཔསྶིཡ ཝིཔིནོཔགེ ཛནེ

ཏཱསཱབྷིབྷཱུ པཔནཏི ཨེཝམེཝཁོ; ()

༩༣.

དིསྭཱན ལུདྡཀཝནཀམྨིཀཱདཡོ

གོཔཱལཀེ ཏིཎནལ༹ཀཊྛཧཱརཀེ,

མཱཙདྡསཾ ཨཧམཔི ཏེཏྱ’ཡཾཛནོ

མཱ མཾ ཝིཔསྶཏུ སམདྷིཊྛཧཾ ཝཏཾ; ()

༩༤.

ཨེཀོཝསངྒཎིཀཝིཧཱརབྷཱིཏིཡཱ

ནིནྣཏྠལཱ ཝནགཧནཱ ཏཔོནིདྷཱི,

ནིནྣཏྠལཾ ཝནགཧནཾ པཔཱཏ སོ

ཏསྶཱསི ཏཱདིསི པཝིཝིཏྟཏཱ ཏདཱ; ()

༩༥. ¶

ཡསྨིཾཝནེ ཙརཏམཝཱིཏརཱགཱིནཾ

རོམུགྒམོ ཙརཎཏལཱནི ཀམྤརེ,

དིསྭཱན བྷིཾསཎཀཝནཾ ཏཐཱཝིདྷཾ

ཨཛ྄ཛྷོགཧཾ ཝསི པཝིཝེཀཀཱམཝཱ; ()

༩༦.

ཨུསྶཱཝཔཱཏཏསམཡེ’ནྟརཊྛཀེ

ཧེམནྟིཀེ སིསིརཏརཱཡ རཏྟིཡཱ,

ཨབྦྷཱཝཀཱསིཀ མབྷིཔཱུརཡི ཝཏཾ

ཀིཙྪཾ ཝསི ཝསི ཝནསཎྜགོ དིཝཱ; ()

༩༧.

གིམྷོཏུ པཙྪིམདིཝསནྟརེ དིཝཱ

ཨབྦྷཱཝཀཱསིཀདྷུཏདྷམྨཔཱུརཀོ,

རཏྟིཾ ཝནེ ཝིཧརི ཛཝཊྛིཀཱནྱུ’པ

ནིསྶཱཡ སོ ཨསཡི སུསཱནབྷཱུམིཡཾ; ()

༩༨. ¶

བུདྡྷངྐུརཾ ཨུཔགམིཡོ’ཋུབྷནྟི’པི

ཨོམུཏྟཡནྟིཔི རཛསོ’ཀིརནྟི’པི,

གོམཎྜལཱ སཝཎཁིལེསུ དཎྜཀཾ

དཏྭཱ ཝདཱཔཡིཏུམུཔཀྐམནྟི’པི; ()

༩༩.

སོཝཱདྷིཝཱསཡི སཏིམཱ ཨུཔེཀྑཀོ

ཏཾཝེདནཾ ཀཊུཀཀ མནཉྙཝེདིཡཾ,

དུཀྑེ སུཁེ སུམཏི ཏུལཱསརིཀྑཀོ

བཱལེསུ ཏེསྭ’པི ནཝིཀོཔཡིམནཾ; ()

༡༠༠.

ཨཱཧཱརཏཔྤཎཝིདྷིནཱ ཝིསུདྡྷི’ཏི

ཨེཀེ ཝདནྟི’ཧ སམཎཱཉྙཏིཏྠིཡཱ,

ཀོལཱདིབྷོཛནཝིཀཏིཾ ཏཐཱཝིདྷཾ

ཨཔྤིཙྪཏཱཡ’ནུབྷཝི སུདྡྷིཀཱམཝཱ; ()

༡༠༡. ¶

ཨཔྤོཛབྷོཛནཝིཀཏིཾ པབྷུཉྫཏོ

ཁཏྟིཾསལཀྑཎསིརིཡཱ སམུཛྫལཾ,

ཀཱཡོ སུརདྡུམརུཙིརོ’དྷིམཏྟཀ-

སཱིམཱནམཊྛིཀཏཙ མཱཔདྷཱིམཏོ; ()

པབྦཱནིཝཱ ཨསིཏལནཱསྭ’སིཏིཀ-

ཝལླིསུ ཨུནྣཏ’ཝནཏཱནི སེཡྻཐཱ,

ཨཱསུཾ ཏཐཱ ཀརཙརཎཱདིཀཱནི’པི

ཏསྶུ’ནྣཏོནཏ’ཝཡཝཱཏི ཝིགྒཧེ; ()

༡༠༣.

མོཀྑེསིནོ ཀརབྷཔདཾཝ ནིསྶིརིཾ

ནིམྨཾས མཱནིསད མཧཱུ སིརིམཏོ;

ཏསྶུ’ནྟཏཱཝནཏཀཔིཊྛིཀཎྚཀོ

ཨཱསི ཡཐཱཝལཡིཏཝཊྚནཱཝལི; ()

༡༠༤. ¶

གོཔཱཎསི སིཐིལིཏབནྡྷནཱ ཛར-

སཱལཱ༹ཡ ཧེཊྛུཔརིཋིཏེ’ཝ དྷཱིམཏོ,

ནིམྨཾསལོཧིཏཀཀལེབརེ པྱ’ཝ-

བྷགྒཱ བྷཝུཾ པཝིསམཕཱསུཀཱཝལཱི; ()

༡༠༥.

ཨཔྤཾ ཀུབྷོཛནཝིཀཏིཾ པབྷུཉྫནོ

ཏསྶ’ཀྑིཀཱུཔགཡུགལཀྑིཏཱརཀཱ,

ཨོཀྐཱཡིཀཱ ཨབྷཝུ མགཱདྷགཱ ཏདཱ

གམྦྷཱིརཀུཔགདཀཏཱརཀཱཀ ཝིཡ; ()

༡༠༦.

ཝཱཏཱཏཔེན’ བྷིཕུསིཏོ ཡཐཱ’མཀ-

ཙྪིནྣོ’བྷིསམྥུཊནི ཨལཱབུ ཏིཏྟཀོ,

སཱིསཙྪཝཱི སུཁུམཚཝིསྶ བྷོཛནོ-

པཙྪེདནེན’བྷིཕུཊིཏཱ ཋིཏཾ ཏཐཱ; ()

༡༠༧. ¶

ཏསྶོདརཙྪཝི པན པིཊྛིཀཎྚཀཾ

ཨལླིཡི སོ མུནི མལམུཏྟམོཙཀོ,

ཨོཀུཛྫིཏོ པརིཔཏི པཱུཏིམཱུལཀ-

ལོམཱནི ཏབྦཔུགལིཏཱནི བྷཱུམིཡཾ; ()

༡༠༨.

སོ པིཊྛིཀཎྚཀམཝསངྒཔཱཎིནཱ

ཀུཙྪིཙྪཝིཾ ཕུསིཏུམིཏོ པརཱམསི,

སོ པིཊྛིཀཎྚཀམཝསངྒཔཱཎིནཱ

ཀུཙྪིཙྪཝིཾ ཕུསིཏུམིཏོ པརཱམསི; () (ཡམཀབནྡྷནཾ)

༡༠༩.

ཀཱལོནུཁོ ཝརཔུརིསོ’ཏི ནོ ཏཐཱ

སཱམོནུཁོ ནཔི ནནུམངྒུརཙྪཝི,

ཨཱསུཾ ཏདཱ ཀཝིམཏིཀཐཱཔརཱ ནརཱ

དིསྭཱ མལགྒཧིཏམསོབྷནཙྪཝིཾ; ()

༡༡༠. ¶

ཡེ སནྟཱི སམྤཏཱི སམཎཱ’བྷཝུཾ པུརེ

ཨཏྟནྟཔཱ ཏཔསི ཨནཱགཏེ སིཡུཾ,

ཏེ ཝེདནཾ ཀཊུཀམིཏོདྷིཀཾ ཀིམུ

ཝེདེནྟི ཝེདཡུ མབྷིཝེདཡིསྶརེ; ()

༡༡༡.

ཨཱིཧཱཡ དུཀྐརཀིརིཡཱཡི’མཱཡ’པི

ནེཝ’ཛ྄ཛྷགཱ ཡམརིཡཉཱཎདསྶནཾ,

ཨཏྟཱུཔཏཱཔནཀསིརསྶ ཀེཝལཾ

བྷཱགཱི བྷཝི ཨནརིཡམགྒགཱམིསོ; ()

༡༡༢.

སཾསཱརེ སཱཏིསཱརེ བརཏརདརཐེ སཾསརཾ སཙྩསནྡྷོ

ཁེདེཝེདེསི དེཝཱསིརནརསརཎོཨེསཡཾསཏྟསནྟིཾ,

དྷཱིརོཝཱིརོཝརོཡོཔབྷཝབྷཝབྷཡོཔཱཔཏཱཔབྦིཔཏྟོ

ཨཱཡོགཾ ཡོགིཡོགཱི པརིཧརི ཧིརིམཱཨེཝམེཝཙྪཝསྶཾ; () (མུཏྟཱཧཱར བནྡྷནཾ)

ཨིཏི མེདྷཱནནྡཱབྷིདྷཱནེན ཡཏིནཱ ཝིརཙིཏེ སཀལ ཀཝིཛན ཧཀཡཱནནྡདཱནནིདཱནེ ཛིནཝཾསདཱིཔེ ཨཝིདུརེནིདཱནེ མཧཱབོདྷིསཏྟསྶ མཧཱ པདྷཱནཱནུཡོགཔྤཝཏྟིཔརིདཱིཔོ ཨེཀཱདསམོསགྒོ.

༡. ¶

ཀཱམཾ ཀཱམསུཁལླིཀཱ’ནུཡོགོ

ཧཱིནོ’ནཏྠཀརོ’ཏྱ’ནེ(’ཀརཱུཔཾ),

ཙིནྟེཏྭཱན ཏཔོཝནཾ ཝིམཱནཱ

ཏྭཾ སིདྡྷཏྠུ’པགམྨ ཀཱཧསེ ཀིཾ; ()

༢. ¶

ཀོནཱམ’ནྟུ’པཏཱཔནཱ’ནུཡུཏྟོ

པཏྟོ ཧོཏི སུཁཔྤདཾ ཀདཱཙི,

ཏསྨཱ ཨཏྟུ’པཏཱཔནཱ’ནུཡོགོ

ཧཱིནོ’ནཏྠཀརོ’ཏི ཙིནྟཡསྶུ; ()

༣.

ཨཏྟཱནཾ སཡམེཝམོཝདིཏྭཱ

པིཎྜཱཡཱ’ནུགྷརཾ ཙརིཏྭ ལདྡྷཾ,

བྷཏྟཾ བྷུཏྟཝཏོ སཀམྷི ཀཱཡེ

ཨཱསུཾ པཱཀཏིཀཱནི ལཀྑཎཱནི, ()

༤.

ཧཱིནནྟདྭཡཝཛྫནེན ཛཱཏུ

ཉཱཎུཀྐཾསགཏམྷི ཏམྷི ཝཱིརེ,

བོདྷཱཡཱུ’པསམཱཡ ནིབྦིདཱཡ

ཨུཀྐཊྛཾ པཊིཔཏྟིམཱཙརནྟེ; ()

༥. ¶

ཚབྦསྶཱནྱ’ནིདུཀྐརཾ ཀརིཏྭཱ

བོདྷིཾ ནཱཛ྄ཛྷགཏོ སུབྷོཛནཱནི,

བྷུཉྫནྟོ ཀིམུ ཀུབྦཏེ’ པདྷཱནཱ

ཝིབྦྷནྟོ ཨིཏི པཉྩཝགྒིཡཱཡཾ; ()

༦.

མདདིཏྭཱ སིཀཏཾ སིནེཧལདྡྷཱ

ཀེཝཱ’སུཾ སམཎཾ ཧི’མཾ ཨུཔེཙྩ,

ཀོ མཱུལ༹ྷོ’དྷིགམཱདྷིགནྟུམིཙྪེ

ཙིནྟེཏྭཱ མིགདཱཡམོཏརིཾསུ; ()

༧.

སེནཱནཱིནིགམེ ཏདཱནི སེཊྛི-

དྷཱིཏཱ སཱམིཀུལཾ ཨལངྐཏཱ’སི,

བྷཱརེནཱ’ཝནཏངྒིནཱི ཀུཙཱནཾ

ཧཾསིཝཱ’ལསགཱམིནཱི སུཛཱཏཱ; ()

༨. ¶

ཛཱཏེ པཏྠིཏཔཏྠནཱསམིདྡྷེ

རུཀྑཱ’དྷིགྒཧིཏཱཡ དེཝཏཱཡ,

ཀཱཏུཾ སཱབལིཀམྨཀ མཱནཡིཏྭཱ

དྷེནཱུ ལཊྛིཝནོཔགཱ སཧསྶཾ; ()

༩.

ཏཱསཾ པཉྩསཏཱནི དུདྡྷཁཱིརཾ

པཱཡེཏྭཱ ཀཏཔུན ཡཱཝཏཱ’ཌྷདྷེནཱུ,

ཁཱིརཱནཾ པརིཝཏྟནཾ ཝིདྷཱཡ

པཙྩཱུསམྷི དུདོཧ ཏཱ’ཌྷདྷེནཱུ; ()

༡༠.

མིསྶེཏྭཱ སཡམེཝཝ དུདྡྷཁཱིརཾ

པཱཡཱསཾ པཙིཏུཾ སམཱརབྷིཏྠ,

དེཝཱ ཏཏྠ སུདྷཱརསཾ ཁིཔིཏྭཱ

ཨཱརཀྑཱདིམཀཾསུ ཨུདྡྷནསྨིཾ; ()

༡༡.

ཏསྶཱ’སི ཧིམཱཝཱཙལོ’པདྷཱནཾ

པལླངྐོ པཐཝིཏལཾ ཨཧཱུ ཙེ,

ཧཏྠཱ པཙྪིམཔུབྦསཱགརེསུ

པཱདཱ དཀྑིཎསཱགརེ བྷཝིཾསཱུ; ()

༡༢. ¶

ཨུགྒནྟྭཱ ཏིཎཛཱཏི ནཱཧིརནྡྷཱ

ཏསྶཱ’ཧཙྩ ཋིཏཱ ནབྷཾ ཨསེསཾ,

ཚཱདེསུཾ ཙརཎུཊྛིཏཱ’སྶ ཀཎྷ-

སཱིསཱ’ཛཱནུཡུགཱ’པྱ’ཀཎྷཀཱིཊཱ; ()

༡༣.

ཙཏྟཱརོ སཀུཎཱ ཙཏུདྡིསཱཧི

པཏྭཱ ཏཔྤདཔཉྫརཾ ཝིཝཎྞཱ,

སེཏཱ’སུཾ པུཐུམཱིལ༹ྷཔབྦཏསྶ

སཱིསེ ཙངྐམི སོ ཨལིམྤམཱནོ; ()

༡༤.

ཨིཙྩེཝཾ སུམཏི’ཊྛཔཱཀདཱནི

པསྶིཏྭཱ སུཔིནཱནི པཉྩ ནིཊྛཾ,

པཏྟོ ཨཛྫ བྷཝཱམཧནྟི བུདྡྷོ

ནིགྲོདྷཾ སམུཔེཙྩ སནྣིསཱིདི; ()

༡༥. ¶

སོདྷེཏཾ སཧིཏཱ ཏུ པུཎྞདཱསཱི

པཙྩཱུསེ ཝཊམཱུལཔུབྦསེལེ,

ཏཾ ལོཀེཀརཝིཾ ཝིརཱཛམཱནཾ

དིསྭཱ’ཝོཙ སུཛཱཏམེཏམཏྠཾ; ()

༡༦.

ལཀྑགྒྷཾ ཧརིཔཱཏིམཱཧརིཏྭཱ

སཱ ཨཱཝཛྫཡི པཀྐབྷཱཛནཾ སོ,

པཱཡཱསོ ཝིནིཝཊྚིཏོ ཋིཏོ’སི

ཏཱཡཾ པོཀྑརཔཏྟཏོཝ’ཏོཡཾ; ()

༡༧.

སཱ ཨཉྙཱཡ སུཝཎྞཔཱཏིཡཱ ཏཾ

ཚཱདེཏྭཱ མུདིཏཱ པསནྟཙིཏྟཱ

གནྟྭཱ མཎྜན མཎྜིཏཱ སསཱིསེ

ཀཏྭཱ པཱུཛཡི བྷོཛནཾ སུཛཱཏཱ; ()

༡༨.

ཀཱལཾ ཨེཏྟཀམེཝབོདྷིསཏྟཾ

ནཱཏིཀྐམྨ ཝིདྷཱཏུདིནྣཔཏྟོ,

སམྤཏྟོ’སི ཨདསྶནཾ ཏཏོ ཏཾ

པཱཏིཾ སོཎྞམཡཾ པཊིགྒཧེཏྭཱ; ()

༡༩. ¶

ཧཾསཱལིམལིནཱིཀཏཱརཝིནྡ-

རེཎུཙྪནྣསུནཱིལནཱིརཔུརཱ,

ཡཱ ནེརཉྫརཝིསྶུཏཱ’སི ཏཱཡ

ནཛྫཱཏཱིརམགཉྫི སཏྟསཱརོ; ()

༢༠.

པཱཡཱསཱམིསཔུཎྞསོཎྞཔཱཏིཾ

ཀཱསཱཝཱནི ཛིནངྐུརོ ཋཔེཏྭཱ,

ཏཱིརེ ཏཱཡ སཝནྟིཡཱ ནཧཱཏུཾ

ཏིཏྠཾ གནྡྷགཛོརིཝོ’ཏརིཏྠ; ()

༢༡.

རོལམྦཱཀུལནཱིལནཱིརཛེཧི

སེཝཱལེཧི ནདཱིཛལཾ སུནིལཾ,

ནིཀྑནྟཛྫུཏིསཉྩཡེཧི དེཧཱ

ཨོཏིཎྞསྶ ཛགཱམ པིཉྫརཏྟཾ; ()

༢༢. ¶

གངྒཱཀཱམིནི ཀཉྫརེཎུགནྡྷ-

ཙུཎྞཾ ཏུངྒཏརངྒབཱཧུནཱ ཏཾ,

བྷཏྟཱརཾ སལིལེན སཱིཏལེན

མཀྑེཏྭཱསུནཧཱཔཡནྟཱི’ཝཱ’སི; ()

༢༣.

ཏུལྱཾ ཏབྦདནམྦུཛེན ལདྡྷུཾ

ཨཱཡནྟཾ རཝིརཾསིསངྒམེན,

ཧཾསསྶེཎི སརོཛཀོསརཱསིཾ

སཾདཱུསེསི ཨཱཝཱརིཡོ ཧི པཱཀོ; ()

༢༤.

ཏཱིརེ སཱརསཙཀྐཝཱཀཔཀྑཱི

སོསཱཡ’སྶཝིསཱརིཏཾ’སཔཀྑཱ,

གམྦྷཱིརམྦྷསི མཏྟམཱཧརིཾསུ

མཉྙེ ནིཀྐརུཎཱཡ ཨེཏྟཀནྟཱི; ()

༢༥. ¶

ཏུཎྜེ མཎྜིཏཔུཎྜརཱིཀདཎྜོ

པཀྑེ ཀེརཝཔཎྜརེ པསཱརཱི,

ནཱཐསྶུ’བྦཧི མཏྟཧཾསརཱཛཱ

སེཏཙྪཏྟཝིབྷུཏིམུཏྟམངྒེ; ()

༢༦.

ཝཏྟམྷོཛཔལོབྷིཏཱལིཙཀྐཾ

ཙཀྑཝཱཔཱཐགཏཾ ཛིནངྐུརསྶ,

སཾདསྶེསི པདྷཱནབྷུཋིཏསྶ

ནིལསྨིཾ ཀསིཎམྷི བྷཱུཏིབྷཱརཾ; ()

༢༧.

ཝེཡྻཱཝཙྩཀརཱརིཝཱཔགཱཡཾ

སེཝཱལཱདིམལཱཔནེན མཱིནཱ,

པཱདཉྩནྡགམཱིནལཀྑཎསྶ

ཏསྶ’གྒེ ཝིམལིཀརིཾསུ ཝཱརིཾ; ()

༢༨. ¶

ཨུཏྟིཎྞསྶ ཝིསཱལསཱལ༹སཱཁཱི-

སཱཁཱཧཏྠཔུཊེཧི པུཉྐྣཱཡ,

གཏྟཾ མནྡསུགནྡྷགནྡྷཝཱཧ-

ཝཏྠཾ སཱལ༹ཝནངྒནཱ ཨདཱསི; ()

༢༩.

ལོཀིནྡོ པརིམཎྜལཾ ནིཝཏྠོ

ཚཱདེཏྭཱན ཏིམཎྜལ’ནྟརིཡཾ,

བནྡྷིཏྭོཔརི ཀཱཡབནྡྷནམྤི

ཀཱསཱཝཾ པརིདྷཱཡི པཾསུཀཱུལཾ; ()

༣༠.

པཱཡཱསསྶ ནིརཱུདཀསྶ ཨཱུན-

པཉྙཱསཔྤམིཏེ ཝིདྷཱཡ པིཎྜེ,

པཱཙཱིནཱབྷིམུཁོ ནིསཛྫ ནཛྫཱ

ཏཱིརེ ཏཱཡ ཨཀཱསི བྷཏྟཀིཙྩཾ; ()

༣༡. ¶

པཱཡཱསོ མདྷུརོ’ཡམསྶ སཏྟ-

སཏྟཱཧཾ པཊིཝིདྡྷབོདྷིནོ ཧི,

ཨོཛཱསམཕརཎཱཡ ཋཱནམཱསི

ཏསྨཱ སོ པཝིཧཱསི ནིབྦིཧེསཾ; ()

༣༢.

བུཛ྄ཛྷེཡྻཾ ཡདི བོདྷིམཛྫ སོཧཾ

ཨུདྡྷཾསོཏམཡཾ སུཝཎྞཔཱཏི,

གངྒཱཡཾ ཁིཔཀི གཙྪཏཱུཏི ཝཏྭཱ

དྷཱིམཱ དཀྑིཎཧཏྠགཾ ཏམགྒྷཾ; ()

༣༣.

སོཏཾ བྷིནྡིཡ སཱ སཝནྟིམཛ྄ཛྷེ

ཋཏྭཱ པཱཏི ཡཏོ ཨསཱིཏིཧཏྠཾ,

ཨུདྡྷཾསོཏམུཔེཙྩ སནྣིམུཛྫི

ཏསྨཱ སོ’པི ནིམུཛྫི པཱིཏིནཛྫཾ; ()

༣༤.

ནཱགཱནཾ བྷཝནཾ ཨུཔེཙྩ ཏིཎྞཾ

བུདྡྷཱནཾ པནིམམྷི བྷདྡཀཔྤེ,

སཱཔཱཏིཔརིབྷུཏྟསོཎྞཔཱཏི

གྷཊྚེཏྭཱན ཋིཏཱ ཀཏཱནུརཱཝཱ; ()

༣༥.

ཏཾ དཱིགྷཱཡུཀཀཱལནཱགརཱཛཱ

སུཏྭཱ སདྡམཐཛྫཔེ’ཀབུདྡྷོ,

ཨུཔྤནྣོཏི ཛིནཾ ཨབྷིཏྠཝནྟོ

ཨཊྛཱསི ཐུཏིགཱིཏིཀཱསཏེཧི; ()

༣༦.

ཚཱཡཱབདྡྷཝིསཱལསཱལ༹སཱལཾ

པཏྭཱསཱལ༹ཝནཾ ནདཱིསམཱིཔེ,

ཨཱཛཱིཝཊྛམསཱིལསཾཝརེན

ཨཱདོཡེཝ ཝིསུདྡྷཀཱཡཝཱཙོ; ()

༣༧.

ཀཏྭཱཊྛཱརསཔིཊྛིཀཎྚཀཱནཾ

ཀོཊཱིནཾཔཊིཔཱདནཾ ཀམེན,

པལླངྐསྶནིསཛྫབནྡྷནེན

ཀམྨཊྛཱནསཏིཾ ཨུཔཊྛཔེཏྭཱ; ()

༣༨. ¶

ཨཱནཱཔཱནསཏིཾཔརིགྒཧེཏྭཱ

ནིབྦཏྟེསིམལགྒཧཱིཏཔུབྦེ,

རཱུཔཱརཱུཔསམཱདྷཡོ’ཊྛཔཉྩཱ-

བྷིཉྙཱཡོ ཝསིཏཱཙ སོ ཝསཱིསོ ()

༣༩.

ཛྷཱནསྶཱདརཏོ དིཝཱཝིཧཱརཾ

ཀཏྭཱ སཱལ༹ཝནེ སུརཱསུརེཧི,

དྷཱིརོ མགྒམལངྐཏཾ ཀརཱིཝ

གནྟུཾ ཨོཏརིཡཏྲབོདྷིམཱུལཾ; ()

༤༠.

ལཱཛཱདཱིཀུསུམེཧིཝིཔྤཀིཎྞོ

མུཏྟཱཔཎྜརཝཱལུ༹ཀཱཏྠཏོ སོ,

མགྒོ ཏུངྒཏརངྒ བྷངྒཧཱརི

ལཀྑཱིཝཱསཔཡོདདྷཱིརི’ཝཱ’སི; ()

༤༡. ¶

མཛ྄ཛྷཱ’རོཔིཏཔངྐཛཱབྷིརཱམཾ

མུཏྟཱདཱམསམཱཀུལཾ སམནྟཱ,

ཀཎྞོལམྦསུཝཎྞགྷཎྚམསྶ

དེཊཱ དིབྦཝིཏཱན མུཀྑིཔིཾསུ; ()

༤༢.

ལོཀཏྠཾ ཀརཎཱཡ ཙོདིཏསྨིཾ

ཏསྨིཾ ལོཀདིཝཱཀརེ’ཀཝཱིརེ,

གཙྪནྟེ སཧཛཱཏབོདྷིམཱུལཾ

ཨཱལོཀོ ཨུདཔཱདི སབྦལོཀེ; ()

༤༣.

ཨཱཡནྟཾ ཏིཎྷཱརཀོ པཐམྷི

དིསྭཱ སོཏྠིཡནཱམབྷཱུསུརོ ཏཾ,

པཱདཱསི ཏིཎམུཊྛིཡོ’ཊྛམཏྟཱ

ནཱཐོ ཏཱནི ཏིཎཱནི སམྤཊིཙྪི; ()

༤༤. ¶

ཝཏྟཏྟེ ཝརཔཱཊིཧཱརིཡམྷི

མགྒེ གནྡྷགཛོ’ཙ ཛམྷམཱནོ,

སམྤཏྟོ ཀརུཎཱཀལཏྟབྷཏྟཱ

སམྦོདྷཱདྷིགམཱཡ བོདྷིམཱུལཾ; ()

༤༥.

ཏསྶོསཱིདཋིཏཾ’ཝ ཙཀྐཝཱལ༹ཾ

ཧེཊྛཱ དཀྑིཎཏོ’ཏྟརཱནནསྶ,

པཉྙཱཡུ’ཏྟརཙཀྐཝཱལ༹མུདྡྷཾ

ལངྒྷིཏྭཱནཋིཏཾ’ཝ ཨཱབྷཝགྒཾ; ()

༤༦.

ཨེཝཾ པཙྪིམམུཏྟརཾ དིསམྤི

ཨཊྛཱནནྟི པདཀྑིཎཾ ཀརོནྟོ,

གནྟྭཱ ཋཱནཝརཾ པུརཏྠིམསྨིཾ

ཨཊྛཱསི ཝསི པཙྪིམཱནནོ སོ; ()

༤༧. ¶

དྷཱིམཱ དཀྑིཎཔཱཎིཔལླཝེན

ཨགྒེ ཏཱནི ཏིཎཱནི སཏྠརཱི སོ,

ཏམྷཱ ཙུདྡསཧཏྠམུཔྤཏིཏྭཱ

པལླངྐོ སམལངྐརཱི དུམིནྡཾ; ()

༤༨.

དཀྑོ ཀཱརུཔཝཱིཎཙིཏྟཀཱརོ

ཀཱཏུཾ ཝཱ’ལིཁིཏུཾ ཡཐཱནསཀྐཱ,

ཨཊྛཾསུ ཧརིཏཱནི སནྠཏཱནི

ཨེཝཾ ཏཱནི ཏིཎཱནི ཨུཔྤཏིཏྭཱ; ()

༤༩.

མཾསཱདཱི ཨུཔསུསྶརེ ནཧཱརཱུ

ཨཊྛཱིཙེཔྱཝསིསྶརེ སརཱིརེ;

མུཉྩེཡྻཾ ཙཏུརཱསཝེཧི ཡཱཝ

བྷིནྡིསྶཱམི ནཏཱཝིམཾ ཨཧནྟི; ()

༥༠. ¶

དལ༹ྷཾ ཙིནྟིཡ དལ༹ྷམཱནསོ སོ

པཱཙཱིནཱབྷིམུཁོ དུམིནྡབནྡྷཾ;

ཀཏྭཱ པིཊྛིགཏཾ ནིསཱིདི བོདྷི-

པལླངྐམྷི ཡུགནྡྷརེ རཝཱི’ཝ; ()

༥༡.

ལོཀེསོ སསིམཎྜལཱཝབྷཱསཾ

སེཏཙྪཏྟམདྷཱརཡཱི ཏདཉྙེ,

སུདྡྷཱཝཱསཏལཊྛདེཝཏཱ ཏཾ

པཱུཛེསུཾ མཀུཊཔྤིཏཉྫལཱིཧི; ()

༥༢.

ཡེ རཱུཔཱཝཙརེ ཝསནྟི དེཝཱ

ཏེ ཙ’ཉྙཏྲ ཨསཉྙསཏྟདེཝེ,

སམྤཏྭཱ ཝཛིརཱསནེ ནིསིནྣཾ

པཱུཛེསུཾ ཀུསུམཱཀུལཉྫལཱིཧི ()

༥༣. ¶

ཨེཀཙྩེ པརནིམྨིཏཱདིལོཀཱ

པཏྭཱ བྷཏྟིབྷརཱ’མརཱ མཧིཾསུ,

པཱུཛཱབྷཎྜསམཱབྷིཀིཎྞཧཏྠཱ

མཱརཱརིཾ ཏཧིམཱཔ པཱཔིམཱ ཀིཾ; ()

༥༤.

ཡེ ནིམྨཱཎརཏིམྷི ནིཛྫརཱ ཏེ;

པཏྭཱ གནྡྷཀརཎྜམཎྜལེཧི,

སམྤཱུཛེསུམལངྐཏངྒྷིཔཱིཋཾ

ནཾ སེཊྛཾ ཝིཛཡཱསནོཔཝིཊྛཾ; ()

༥༥.

ཨཊྛཱསི ཏུསིཏཱལཡཱ སསེནོ

པཏྭཱ སནྟུསིཏཝ྄ཧདེཝརཱཛཱ,

ཝིཛེནྟོ ཧརིམོར པིཉྪཔུཉྫ-

སོབྷཾ ཀཉྩནཏཱལཝཎྚཔནྟིཾ; ()

༥༦.

པཏྭཱ ཡཱམསུརཱལཡཱ སསེནོ

སཾཝིཛེསི སུཡཱམ དེཝརཱཛཱ,

དྷཱིརཾ སོཎྞཔཎཱལི༹ཀཱནིཔཱཏ-

དྷཱརཱསནྣིབྷཙཱརུཙཱམརེཧི; ()

༥༧. ¶

དེཝིནྡོ ཝིཛཡུཏྟརཱཁྱསངྑཾ

ཝཱིསཾ ཧཏྠསཏཾ དྷམཱིཏདཉྙེ,

པཱུཛེསུཾ ཏམུཔེཙྩ ཀོཝིལཱ༹ར-

པུཔྥཱདཱིཧི ཙ ཏཱཝཏིཾསདེཝཱ; ()

༥༨.

ཡཀྑཱདཱིཧི པུརཀྑཏཱ’པི དེཝ-

རཱཛཱནོ ཙཏུརོ ཙཏུདྡིསཱསུ,

རཀྑཾ སཾཝིདཧིཾསུ དེཝལོཀཱ

ཏཾ པཏྭཱན ཝིནཊྛལོམཧཊྛཾ; ()

༥༩.

ཝཱདེནྟོ སརམཎྜལཾ ཝིདྷཱཡ

ཝཱིཎཾ པཉྩསིཁོ’པི བེལུ༹ཝཱཁྱཾ,

ཏཾ སམྤཱུཛཡི ཀཱལནཱགརཱཛཱ

ཐོམེནྟོ ཐུཏིགཱིཏིཀཱསཏེཧི; ()

༦༠. ¶

ཨེཝཾ ཀཱཧལ༹བྷེརིསངྑཝཱིཎཱ-

གྷཎྚཱཝཱིཛནིཚཏྟཙཱམརེཧི,

ནཙྩཱདཱིཧིཙལཱཛཔཉྩམེཧི

དཱིཔདྡྷུཔདྷཛེཧི མཱནཡུཾ ཏཾ; ()

༦༡.

སིདྡྷཏྠོ པཊིསིདྡྷམཱརདྷེཡྻོ

ཀཏྟུཾ ཨཏྟཝསེ སདེཝལོཀཾ,

སུཏྭཱ ཝཱཡམཏཱིཏི བོདྷིམཎྜེ

མཱརོ ཏཏྲ སམཱརབྷིཏྠགནྟུཾ; ()

༦༢.

ཏསྨིཾ ཁོ སམཡེ བྷཡཱཝཧཱནི

མཱརསྶོ’ཏརཎཱཡ ཀཱརཎཱནི,

ཙཀྑཙཱཔཱཐགཏཱནི དུནྣིམིཏྟ-

རཱུཔཱདཱིནི ཏིལོཀལོཙནསྶ; ()

༦༣. ¶

སུཀྑ’མྷོདྷརརཱཝབྷེརིརཱཝ-

ཝིཔྥཱརཱབདྷིརཱིཀཏམྦརམྤི,

བྷཱིམཾ ཝིཛྫུལཏཱ’སིགྷཊྚཎེཧི

མཱརསྶཱ’ཧཝམྦྜལཱབྷམཱཧ; ()

༦༤.

མཱརསྶཱ’གམནཉྫསེ རཛོཝ

ཝཱཛཱིནཾ ཁུརགྷཊྚཎེན ཛཱཏོ,

ཨུཀྐཱཔཱཏསཏཾ ཛནེསི ཏསྶ

ཙཀྑཝཱནིཊྛཕཁལཾ དིསཱསུ ཌཱཧོ; ()

༦༥.

ཝེཧཱསེ ཝིཙརུཾ ཀབནྡྷརཱུཔཱ

ཀཱཀོལཱ བལིཔུཊྛཝཱཡསཱརཱི,

ཨུནྣཱདིཾསུ ཁརཱནིལོ པཝཱཡཱི

ཨབྦྷུཊྛཱསི རཛོ དིསཱསུ དྷཱུམོ; ()

༦༦.

ཨཱལོཀོ ཝིགཏོ གྷཎནྡྷཀཱརོ

ཨོཏིཎྞོ མཧིཀཱསམཱབྷིཀིཎྞོ,

ཨཱཀཱསོ པཐཝི བྷཱུསཾ པཀམྤི

མེགྷཙྪནྣདིནཾ དིནཾ བབྷཱུཝ; ()

༦༧. ¶

སིདྡྷཏྠཉྷི ཨསིདྡྷམཏྠམེཏཾ

ཀཱཏུཾ ཨསྶཝམཱརཀིངྐརཱམེ,

ཝཏྭེ’ཐཱ’ཏི པཛཱཔཏཱི སསེནོ

ཏཏྠེཝ’ནྟརདྷཱཡི ཏཱཝདེཝ; ()

༦༨.

སཱ སེཏཱ པུརཏོ པཛཱཔཏིསྶ

ཨཱསཱི བཱརསཡོཛནཾ ཝིནདྡྷཱ,

ཨེཝཾ དཀྑིཎཝཱམནོ ཙ ལོཀ-

དྷཱཏྭནྟཱཝདྷཱིམཱསི པཙྪཏོ’པི; ()

༦༩.

ཨུདྡྷཾ སཱ ནཝཡོཛནཔྤམཱཎཱ

སདྡོ བྷཱུམིཝིདཱརཎོརི’ཝཱ སི,

སོ’པཌྜྷཾ སཏཡོཛནཾ བབྷཱུཝ

ཨུཙྩཾ སོ གིརིམེཁལོ གཛིནྡོ; ()

༧༠. ¶

ནཱཧེསུཾ པརིསཱསུ ནིམྨིཏཱསུཾ

དྭེཡོདྷཱ སདིསཱཡུདྷཱདདྷཱནཱ,

ཏབྱཱསེན ཨལཉྷི ལོམཧཾསོ

ཡསྶཱ’ནུསྶརཎེན ཙེ སིཡཱ མེ; ()

༧༡.

མཱཔེཏྭཱ སཧསཱ སཧསྶབཱཧུཾ

གཎྷིཏྭཱ ཝིཝིདྷཱཡུདྷཱནི ཏེཧི,

ཨཱརཱུལ༹ྷོ གིརིམེཁལཾ སསེནོ

མཱརོ པཱཏུརཧོསི བདྡྷཝེརོ; ()

༧༢.

དེཝེསོ ཡསསཱ སམཾ སཀེན

སེཏཙྪཏྟ མགཉྪི སཾཧརིཏྭཱ,

དེཝེསོ ཡསསཱ སམཾ སཀེན

སངཀྑཾ པིཊྛིགཏཾ ཝིདྷཱཡ དྷཱཝཱི; () (ཡམཀབནྡྷནཾ)

༧༣. ¶

སངྐོཙཱ’ནནཀཱཧལོ ཛགཱམ

པཱཏཱལཾ ཁལུ ཀཱལནཱགརཱཛཱ,

ཝཱིཎཱདོཎིསཁོ སཁཱནཔེཁོ

ཏམྷཱ པཉྩསིཁོ ཀལཧུཾ པལཱཡི; ()

༧༤.

དིསྭཱ མཱརབལཾ སམོསརནྟཾ

སམྤཏྟཱ ཛནཏཱ པལཱཡི བྷཱིཏཱ,

སོསཱིཧོ’ཝ ཝིཧཱསི སཀྱསཱིཧོ

ཨེཀོ ཀམཱརཀརིནྡཀུམྷབྷེདཱི; ()

༧༥.

པསྶིཏྭཱ’དྷརཀནྟིབྷཱརམསྶ

ཝཏྟམྷོརུཧ མིནྡིརཱཝིཧཱརཾ,

སིདྡྷཏྠེན སམོ ནཙཏྠི ལོཀེ

ཨིཙྩེཝཾ ཀལིམཱ’ཧ མཱརསེནཾ; ()

༧༦. ¶

ཨེཏསསཱ’བྷིམུཁཱ མཡཾ ཀདཱཙི

ནོསཀྐོམ’བྷིཡུཛ྄ཛྷིཏུནྟི ཏཱཏཱ,

ཝཏྭཱ ཨུཏྟརཔསྶཏོ སམཱརོ

ཁནྡྷཱཝཱརམབནྡྷི བདྡྷཝེརོ;

༧༧.

དིསྭཱ’ཛ྄ཛྷོཏྠརམཱནམཱརསེནཾ

ཨཱརཀྑཱཝརཎཾ ཐིརཾ ཝིདྷཱཡ,

ཁནྡྷཱཝཱརམབནྡྷི སོཔི ཝཱིརོ

ཛེཏུཾ ཏཾ དསཔཱརམཱི བྷཊེཧི; ()

༧༨.

མཱརོ བྷུདྷརམེརུཙཀྐཝཱལེ༹

རུཀྑཱདཱིནི ཝིཙུཎྞིཏུཾ སམཏྠཾ,

ཁོབྷེཏྭཱ བྷུཝནཏྟཡཾ དིསཱསུ

ཨུཊྛཱཔེསི སམཱིརཎཾ སུགྷོརཾ; ()

༧༩.

ཝཱཏོ པཱརམིདྷཱམཝཱརིཏོ སོ

ནིཏྟེཛཾ པལཡཱནིལསྶམོཔི,

པཏྟོ ཙཱམརམནྡམཱརུཏོཝ

ཏནྡེཧོཏུཔརིསྶམཾ ཛཧཱསི; ()

༨༠. ¶

དྷཱརཱཝེགཝིཧིནྣབྷཱུམིབྷཱགཾ

གམྦྷཱིརཱ’སནིརཱཝནིབྦྷརཱ’གྷཾ,

མཱརོ མཱཔཡི ཏུངྒཝཱིཙབྷངྒཾ

ཝསྶོགྷཾ པརིཔཱཏརུཀྑསེལཾ; ()

༨༡.

ཝཱིརོ པཱརམིཔཱལི༹བནྡྷནེན

རཀྑཾ བནྡྷི ནིཛནྟབྷཱཝཁེཏྟེ,

ཏེནོ’གྷོ ཝིཔཐངྒམོ ཝིཔཀྑ-

སེནཱཡཱ’སི པཝཱཧཎེ ནིདཱནཾ; ()

༨༢.

ཏེཛོཁཎྜསམཱནམཏྟནོ སོ

ཏཏྟཾ པཛྫལིཏཾ སཛོཏིབྷཱུཏཾ,

མཱཔེཏྭོ’པལཝསྶམཔྤསཡ྄ཧཾ

ཛྷཱཔེཏུཾ ཏམུཔཀྐམིཏྠ མཱརོ; ()

༨༣. ¶

མཱརསྶེཝ པཏནྟམུཏྟམངྒེ

གྷོརཾ པཱརམིཝཱཡུཝེགརུདྡྷཾ,

ཏཾཝསྶཾ ཝཛིརཱསནཱུཔཙཱརེ

པཱུཛཱཔུཔྥགུལ༹ཏྟནཾ ཛགཱམ; ()

༨༤.

ཨསྶདྡྷོ ཝིསདིདྡྷཏིཎྷདྷཱརཾ

ཨཱདིཏྟཾ པིཧིཏམྦརོ’དརཾ སོ,

མཱཔེསི ཨསིསཏྟིཏོམརཱདི-

ཝསྶཾ སབྦདིསཱནིཔཱཏམཱནཾ; ()

༨༥.

ཏསྨིཾ པཱརམིཝམྨཝམྨིཏསྨིཾ

ཝིསྶཊྛཱ’ཡུདྷཝུཊྛི ཀུཎྛིཏགྒཱ,

པཏྭཱ སམྤཏི པུཔྥཝུཊྛིབྷཱཝཾ

ཏཔྤཱདཱསནམཏྠཀེ པཔཱཏ; ()

༨༦. ¶

མཱརོ ཝིཙྩིཊཙིཙྩིཊཱཡམཱནཾ

སཾཝཊྚཱནལཁཎྜཝིབྦྷམཾ སོ,

ཝསྶངྒཱརམཡཾ སཝིཔྥུལིངྒཾ

ཨུཊྛཱཔེསི པལཱསཔཀུཔྥཝཎྞཾ; ()

༨༧.

ཁིཔྤཾཔཱརམིམནྟཛཔྤནེན

ཨངྒཱརཱནིནིཝཱརིཏཱནིཏཱནི,

ཏཾབུདྡྷངྐུརཔུཎྞཙནྡབིམྦཾ

སེཝནྟཱནིཝིཀིཎྞབྷཱནིཝཱསུཾ; ()

༨༨.

བྷསྨཱིཀཱཏུམལནྟིམཱརཝེརིཾ

དྷཱུམཱཀིཎྞམནིགྒཏགྒིཛཱལཾ,

མཱརོབྷེརཝརཱཝམུསྶདཱབྷ-

མབྦྷུཊྛཱཔཡིཁཱརབྷསྨཝསྶཾ; ()

༨༩.

སེཏཱམུདྡྷནིཝིཔྤཀིཎྞབྷསྨིཾ

ཏཾཝསྶཾཙིཏཔཱརམཱིབལེན,

པཏྭཱཙནྡནགནྡྷཙུཎྞབྷཱཝཾ

མཱརཱརིསྶཔཔཱཏཔཱདམཱུལེ; ()

༩༠. ¶

ཨསྨིཾ གུཝལཡཱལཝཱལ༹གབྦྷེ

སམྤཱཏཱནལདཌྜྷཝཎྞུདྷཱརཾ,

ཨུཏྟཱསཱཝཧམཏྟནོ’པི ཀཎྷོ

ཝསྶཱཔེསི ཨུལཱ༹རཝཎྞུཝསྶཾ; ()

༩༡.

དིསྭཱ’ངཀྒྷཱིནཁརཱལིརཾསིགངྒཱ-

ཏཱིརུསྶཱརིཏཝཎྞུརཱསི མསྶ,

ཨངྒཱརོ’ཝ’དྷིཀོདྷཔཱཝཀེན

ཀཎྷོ ཀཎྷཏརོ’སི ཛྷཱཔིཏཏྟོ; ()

༩༢.

དྷཱུཔཱཡནྟམཝཱིཙིམཙྩིམནྟཾ

སམྥུཊྛཾ གྷནཕེཎཎབུབྦུལེཧི,

ཝསྶཾ པངྐམཡཾ བྷུསཾ ནིམུགྒོ

མཱརོ མཱཔཡི པཉྩཀཱམཔངྐེ; ()

༩༣. ¶

ཏསྨིཾཔཱརམིསཏྟཱིསིཏིབྷཱུཏེ

པངྐེ ཙནྡནཔངྐབྷཱཝཡཱཏེ,

མཱརོ པསྶིཡ ཕུལླཔངྐཛཱཧཾ

ཀོཔཱ པངྐཧཏཱནནོརིཝཱསི; ()

༩༤.

མཱརཱརིཾ ཨིམིནཱ ཧནཱམཧནྟཱི

སོ ལོཀནྟརིཡནྡྷཀཱརགྷོརཾ,

མཱརོ སཱུཝིཝིདཱརིཡཾ དིསཱསུ

ཨུཊྛཱཔེསིགྷནནྡྷཀཱརཁནྡྷཾ; ()

༩༥.

སོ’ཡཾ པཱརམིཛཱཏརཾསིཛཱལ-

བྷིནྣཱ’སེསཏམོཛིནངྐུརེཎོ,

པལླངྐོདཡཔབྦཏོདིཏོ’སི

ཀཱམཾ མཱརཏུསཱརསོསནཱཡ; ()

༩༦. ¶

ཨེཏཾ གཎྷཐ བནྡྷཐཱ’ཏི ཝཏྭཱ

ནིཊྛཾ ཀཔྤམཝཎྞིཡཾ ཀཝཱིཧི,

སདྡྷིཾ མཱརབལེནུ’པཱགཏོ སོ

ཀུདྡྷོ ཡུདྡྷམཀཱ པམཏྟབནྡྷུ; ()

༩༧.

ཏཾ དིསྭཱ’ཙལནིཙྩལཊྛམེས

པལླངྐོ ནཙཔཱཔུཎཱཏི ཏུཡ྄ཧཾ,

མཡ྄ཧཾ ཧེ’སུ’པཀཔཀྤཏེཝ ཏསྨཱ

ཨསྨཱ ཝུཊྛཧཐཱ’ཝུསོཏྱ’ཝོཙ; ()

༩༨.

ཨེཀཱ’པཱི སམཏིཾསཔཱརམཱིནཾ

པལླངྐཏྠམཔཱུརིཏཱ ཏཡཱ’ཏི,

ཝུཏྟེ སོ ཁིཔི ནིཛྫིཏོ’རཙཀྐཾ

ཙཀྐཾ ཙཀྐཝརངྐིཏསྶ སཱིསེ; ()

༩༩.

ཏཾ ཙཀྐཱཡུདྷམུཛ྄ཛྷིཏཔྤབྷཱཝཾ

ཡུདྡྷེ ལདྡྷཛཡསྶ མཱརཛིསྶ,

ཨུསྶིསམྷི ཝརཱསནཱུཔཙཱརེ

སེཏཙྪནྟམིཝུསྶིཏཾ རརཱཛ; ()

༡༠༠. ¶

ཏུཡ྄ཧཾ སཉྩིནནམྷི པཱརམཱིནཾ

ཀོ སཀྑཱི’ཏི ཨཧཉྩ སཀྑིཧོམི,

སཀྑཱི’གནྟི པཝཏྟམཱརསེནཱ-

གྷོསོ བྷུམིཝིདཱརཎོརི’ཝཱསི; ()

༡༠༡.

དཱཔེནྟོནིཛསཀྑིམུགྒཏེཛོ

བཱཧུཾཏཱཝཔསཱརཡཱི པཝིརོ,

སཀྑཱིཧནྟཱིཝདཾ’ཝ མཱརསེནཾ

ཏཛྫེནྟོ’ཝ བབྷཱུཝ བྷུམིཙཱལོ; ()

༡༠༢.

མཱཏངྒོ གིརིམེཁལོ ཚིཏཱརིཾ

ཝནྡནྟོ’ཝཔཔཱཏ ཛནྣུཀེཧི,

མཱརོ ལདྡྷཔརཱཛཡོ ནིཝཏྠ-

ཝཏྠསྶཱ’པི ཨནིསྶརོ པལཱཡི; ()

༡༠༣. ¶

གྷོརམཱརབལཝཱརཎཱདྷིཔ-

མཱནདཔྤནིབྷཀུམྦྷདཱརཎོ,

བོདྷིམཱུལཝཛིརཱསནོཔརི

ཀེསརཱིཝ ཝིརརཱཛ མཱརཛི; ()

ཨིཏི མེདྷཱནནྡཱབྷིདྷཱནེན ཡཏིནཱ ཝིརཙིཏེ སཀལ ཀཝཀིཛན ཧདཡཱནནྡདཱནནིདཱནེ ཛིནཝཾསདཱིཔེ ཨཝིདཱུརེ ནིདཱནེ དེཝཔུཏྟ མཱརབལ ཝིདྡྷཾསན པཝཏྟིཔརིདཱིཔོ དྭཱདསམོ སགྒོ.

༡.

ནིཁིལམཱརཏུསཱརཝིསོསིནོ

ཨཐཛིནངྐུརདཱིདྷིཏིམཱལིནོ,

རཝི ཀཏཱཝསརོ’ཝ’པརཱཙལཾ

(དུཏ’ཝིལམྦིཏ) གཱམིམུཔཱགམཱི; ()

༢. ¶

ཛལདྷིཝཱརིསིནེཧསུཔུརིཏེ

ཨབྷཝི པཾསུམཧཱིཏལམལླཀེ,

པཎིཧིཏཱཔརབྷུདྷརཝཏྟིཀཱ-

ཛལིཏདཱིཔསིཁེ’ཝ ནབྷོམཎི; ()

༣.

ཨུདཡཔབྦཏགབྦྷསམུབྦྷཝཾ

སཀཡསོཔཊིབིམྦསམཾསུབྷཾ,

སཔདི ཏཔྤམུཁེ སསིམཎྜལཾ

ཀསིཎམཎྜལཝིབྦྷམམུབྦཧི; ()

༤.

ཨརུཎཝཎྞསུདྷཱཀར བྷཱཀརཱ

དིཝསསནྡྷིཝིལཱསིནིཡཱ ཁཎཾ,

པརིཧརིཾསུ’དཡཱཔརབྷུདྷར-

སཝཎགཾ མཎིམཎྜན ཝིབྦྷམཾ; ()

༥. ¶

རཝིདྷུརཱ ཝིདྷུརཱ སརསཱིཝདྷུ

ཀམལཀོམལཀོསཔུཊཉྫལཱི,

ཨུཔཝནེ པཝནེ’རིཏབྷཱུརུཧཱ

པནམིཏཱནམིཏཱཝ ཏཔོདྷནཾ; () (ཡམཀབནྡྷནཾ;)

༦.

ཨཔརསཱགརམུདྡྷནི བྷཱསུརཾ

ཏིམིརཛཱལཔརཾ རཝིམཎྜལཾ,

མུཀུལིཏམྦུརུཧསྶིརིམཱཧརི

བྷམརཙཀྐབྷརཾ སརསཱུཔརི; ()

༧.

ལཝཎཝཱརིདྷིཀཱཙསརཱཝཀེ

ཨཔརབྷཱུདྷར ཀཱུཊ བྷུཛཔྤིཏཱ,

སཱུརིཡམཎྜལཔཱཏི ནིམུཛྫིཡ

པུརིམཡཱམམུཁཾནཀིམཱཧརི; ()

༨. ¶

མཎིཔབྷཱརུཎ བྷཱཀར མཎྜལཾ

ཏམནུབྷུཡ མཧམྦུདྷིརཱཧུནཱ,

མུཁགཏཾཝམིཏཾ ཝིཡཀ ལོཧིཏཾ

ཛལདརཱཛི རརཱཛ དིནཙྩཡེ; ()

༩.

ཝིཏཏམེགྷཔབྷཱཧི མུཧུཾ མུཧུཾ

ཀལི༹ཏ པཱཊལ པལླཝ སམྤདཾ,

ཝནགྷཊཾ ཝིཊཔནྟརགཾ ཀམཱ

ཕཱུཊཏམོཔཊལཾཔརིཎཱམཡཱི ()

༡༠.

སུབྷཛནེབྷཛནེནིརཔེཀྑིནཱི

ཝིཔཏིནཱི པཏིནཱིཝ རཛསྶལཱ,

སུམདྷུཔེ མདྷུཔེ པརིཝཛྫཡུཾ

ཀམལིནཱིམལིནཱིཀཏནིརཛཱ; () (ཡམཀབནྡྷནཾ;)

༡༡. ¶

མདྷུམདཱལིཀུལཱ མཀུལཱཝལཱི

ཨནིལབྷངྒ ཏརངྒ བྷུཛེརིཏཱ,

པདུམིནཱི རམཎཱིཧི སིརིམཏོ

སུམཧིཏཱམཎིཀིངྐིཎིསེཎིཝ; ()

༡༢.

རསིཀཔཀྐ ཕལཱཕལ སཱལིསུ

ཏརུསིརེསུ སམོསརམཱནཀཱ,

ཏིམིརཁཎྜནིབྷཱ བདྷིརཱིཀརུཾ

རཝིཔཐཾ ཝིརུཏེཧི ཝིབྷངྒམཱ; ()

༡༣.

ཀུམུདིནཱིཔམདཱ’ཐསུདྷཱཀར-

ཀརསཏེཧི པརཱམསནཱཔརཾ,

ཀུསུམཧཱསཝིལཱསདྷརཱ བྷུསཾ

བྷུཝནཝནྡིརགབྦྷམལངྐརི; ()

༡༤. ¶

ཧིམཀརོ ཧརིཎཉྫནཧཱརིནཱ

ནིཛཀརེན ནིརཱཀརི ཏངྑཎེ,

སཀལལོཀ’ཝིལོཙན སམྦྷཝཾ

གྷནཏམོཔཊལཾཧིསཛོ ཡཐཱ; () (སིལེསབནྡྷནཾ)

༡༥.

སཔདིཔཱརམིཏཱརམིཏཱསཡོ

ནཝམ’ནུསྶཏིཡཱསཏིཡཱ པརཾ,

ཨདྷིཀཏཱ’དྷི སམཱདྷི སམཱཧིཏོ

པུརིམཛཱཏིབྷཝེ ཏིབྷཝེ སརི; () (ཡམཀབནྡྷནཾ)

༡༦.

སུམཏིཔཱདཀ ཛྷཱན སམུཊྛིཏོ

པུརིམཁནྡྷསམཱུཧམནུཀྐམཾ,

ཨསརིསོ’པནིསིནྣཛཡཱསན-

པྤབྷུཏི ཡཱཝསུམེདྷབྷཝཱཝདྷིཾ; ()

༡༧. ¶

ཨིདྷབྷཝེ སམནནྟརཛཱཏིཡཾ

ཏདིཡཁནྡྷཔབནྡྷམནུསྶརི,

ཏིཙཏུཔཉྩཚསཏྟ ནཝ’ཊྛཔི

དསཔི ཝིསཏིཏིཾསཏི ཛཱཏིཡོ; ()

༡༨.

ལཧུམནུསྶརིཏཱལི༹ས ཛཱཏིཡོ

པབྷཝ ཁནྡྷཝསེན ཏཧིཾཏཧིཾ,

བྷཝསཏཾབྷཝུཔཌྜྷསཏཾབྷཝ-

དསསཏཾབྷཝལཀྑམཐཱཔརཾ ()

༡༩.

ཨཔརིམཱཎ ཡུགནྟགཛཱཏིཡོ

ཨཔརིམཱཎ ཝིཝཊྚགཛཱཏིཡོ,

ཨཔརིམཱཎ ཡུགནྟ ཝིཝཊྚགཱ

ཨཔརིམཱཎ གུཎོ སརིཛཱཏིཡོ; ()

༢༠. ¶

ཙཏུསུཡོནིསུསཏྟམནཊྛིཏི-

ཏིབྷཝཔཉྩགཏཱིསུཔརིབྦྷམིཾ,

ཀསིརབྷཱརཝཧོ ཨཧམཉྫསེ

སཀཊབྷཱརཝཧོ གཝཛོཡཐཱ; ()

༢༡.

ཨིཏིསམཉྙ དྷརོ’སིམམུཏྲ’ཧཾ

ཨིཏི ནིཧཱིནཔསཏྠ ཀུལོ བྷཝིཾ,

ཨིཏི བྷཝིཾ ཨབྷཱིརཱུཔཝིརཱུཔིམཱ

ཨིཏིཔི བྷཏྟ ཕཁལཱཕལ མཱཧརིཾ; ()

༢༢. ¶

ཨནུབྷཝིཾཀུསལཱཀུསལཱརཧཾ

ཝིཝིདྷདུཀྑམདུཀྑ མདུཀྑ ཁཾ,

དསསཏཱཡུ སཏཱཡུམིཏོབྷཝིཾ

ཨིཏིབྷཝཾཏིབྷཝཾསམནུསྶརི; () (ཡམཀབནྡྷནཾ)

༢༣.

ཨིཏིཧ ཡཱཝསུམེདྷ བྷཝཾ སུདྷཱི

སུམརིཡཱ’ཏིགཏཱ’མིཏཛཱཏིཡོ,

ཨསརི སོཔཊིལོམཝསཱ ཏཏོ-

པྤབྷུཏི ཡཱཝ ཨིཏོ ཏཏིཡཾ བྷཝཾ; ()

༢༤.

པུནརམུཏྲ ཏཏོབྷཝཏོ ཙུཏོ

སམུཔཔཛྫི མནནྟརཛཱཏིཡཾ,

ཏཧིམཧཾཏུསིཏེ ཏིདསཱལཡེ

བྷཝིམཏིཛྫུཏི སནྟུསིཏཱབྷིདྷོ; ()

༢༥. ¶

ཏུསིཏདེཝནིཀཱཡསམཏྭཡོ

པརམརཱུཔ ཝིལཱསདྷརོ’བྷཝིཾ,

སུམདྷུརཱམཏམཱཧརི མིདིསཾ

ཨནུབྷཝིཾསུཁམིནྡྲིཡ གོཙརཾ; ()

༢༦.

སམུཔཛཱིཝིམམཱནུསཧཱཡན-

ཙཏུསཧསྶ མཧཾཏུསིཏཱལཡེ,

མརུགཎམྦུརུཧཱསནཡཱཙནཾ

ཨིཧ པཊིཙྩ ཏཏོ བྷཝཏོ ཙུཏོ; ()

༢༧.

ཛནནིརཱཛིནིཡཱ མཎིཙེཏིཡེ

སུགཏདྷཱཏུམིཝཱ’སམཀུཙྪིཡཾ,

རཝིཀུལེ པཊིསནྡྷིམཧཾ པིཏྲ-

ནརཔཏིཾ ཨདྷིཀིཙྩ སམཔྤཡིཾ; ()

༢༨.

ཨིཏིཧ རཱུཔམརཱུཔམནཱདིཀཾ

ཝིཔརིཝཏྟཏི ཝཏྟཏི ནཱཔརཾ,

ཝིསཏིཡཱ སཏི ཡཱཝ དྷིཡཱ’སནཾ

ཝིཧཏམོཧཏམོ’སི བྷཝེ སུདྷཱི; () (ཡམཀབནྡྷནཾ;)

༢༩. ¶

ཙུཏུཔཔཏྟིཔབནྡྷཝསེནཧི

ཨཝསཝཀཏྟནདྷཱཏུཔརམྤརཱ,

ཛལིཏདཱིཔསིཁེ’ཝ པཝཏྟཏི

ནཡིདྷཔུགྒལཝེདཀཀཱརཀོ; ()

༣༠.

པུརིམཁནྡྷཔབནྡྷམནེཀདྷཱ

ཨིཏིཝཝཏྠཡཏོ ཧི ཀུདིཊྛིཡོ,

ཨཔགཏཱ’ཏྟནི ཝཱིསཏིཝཏྠུཀཱ

ཏམིཧདིཊྛིཝིསུདྡྷི’ཏི ཝུཙྩཏི; ()

༣༡. ¶

སཏིམཏོ རཝིམཎྜལསནྟིབྷཱ

སཀཊམགྒནིབྷཱ’ཡམནུསྶཏི,

པུརིམཛཱཏིསུ ནཱབྷིཝིརཛ྄ཛྷཏི

སརཝཡེ སརབྷངྒསརོ ཡཐཱ; ()

༣༢.

ཨཙུཏིཡཱཙུཏིཡཱམཏི མཱསནེ

སུཏཝཏཱི’ཏཝཏཱི’ཧཏི བུཛ྄ཛྷིཏུཾ,

སམུདིཏེ’མུདིཏེ ཀུམུདཱནི’མ

ནཀམལཱ ཀམལཱནི ཨལངྐརི; () (ཡམཀབནྡྷནཾ;)

༣༣.

རུཙིརཙནྡམརིཙིཝིལེཔིནཱི

ཀུམུདསཎྜཝིཀཱསཝིཧཱསིནཱི,

རཛནིམཛ྄ཛྷིམཡཱམཝིལཱསིནཱི

ཏདདྷིསཱིལདྷནཾ ཝིཛཱབྷཱསི ཀིཾ ()

༣༤. ¶

གྷནསུནཱིལཝིསཱལཏཔོཝནཾ

ཨནལབྷཱསུརཀཱིཊཀུལཱཀུལཾ,

རཛནིརཱཛིནིཡཱ ཀུསུམཱཀུལཱ-

ཝིརལ༹ཀེསཀལཱཔསིརིཾ བྷཛཱི; ()

༣༥.

ཏདུཔཧཱརརཏཱཡི’ཝ ཀོམུདཱི-

བྷུཛལཏཱཡ ཝིབྷཱཝརིབྷཱིརུཡཱ,

གཧིཏལཱཛཀབྷཱཛནཝིབྦྷམཾ

ཕུཊིཏཀེརཝཀཱནན མཱཧརི; ()

༣༦.

ཏིབྷུཝནེཀརཝིཾ རཝིབྷཏྟརི

ཨཔརདཱིཔགཏེ སརསཱིཝདྷཱུ,

རཛནིཡཱ ཝིཧིཏཱཝསརཱ’པི ཀིཾ

པརིཙརིཾསུ པཏིབྦཏམབྦྷུཏཾ; ()

༣༧.

པརིལསིཾསུ བྷུསཾ བྷུཝནེ’ཝུ བྷོ

རཝིཔཐེ ཝིཏཏཱ, ཝིཏཏཱརཀཱ,

ཨནིམིསེ ཧི མཧཱཡ མཧིམཏོ

ཛལིཏདཱིཔསིཁཱཙ མཧཱིཏལེ; ()

༣༨. ¶

མཀརཏེནཀེཏནསནྟིབྷཱ

ཏུཧིནདཱིདྷིཏིདཱིདྷིཏི མཛ྄ཛྷིམེ,

ནིསི དདཱར སདཱརསརཱགིནཾ

ཧདཡཀེརཝཀེརཝཀཱནནཾ; () (ཡམཀབནྡྷནཾ)

༣༩.

ཨཐ བྷཝཱབྷཝདིཊྛིཝིབྷེད ནཾ

ཝིམཏི མོཧ ཏམོཔུཊཔཱཊ ནཾ,

ཙུཏུཔཔཱཏཔབྷུཏི ཝིཛཱན ནཾ

ཀཐམལཏྠ སདིབྦཝིལོཙ ནཾ; ()

༤༠.

ཀུསལཀམྨཔབྷཱཝསམུབྦྷཝཾ

སུཁུམདུརགཏཱནི’པི གོཙརཾ,

ཨནིམིསཱན པསཱདཝིལོཙནཾ

རུདྷིརསེམྦྷམཀལཱཔགཏཾཀ ཡཐཱ; ()

༤༡. ¶

ཏཐརིཝ’ཀྑིསམེན སུདྷཱསིནཾ

ཝིམཏིདིཊྛིམིསོདྷནཧེཏུནཱ,

ཧཏམནོཔཀིལེསམལེན སོ

ཝིགཏམཱནུསཀེནཧི ཙཀྑུནཱ; ()

༤༢.

ཀརཏལམྦུརུཧོཔརིཙཀྑུམཱ

ཡཐཱརིཝཱ’མལཀཱིབདརཱིཕལཾ,

ཙུཏུཔཔཏྟིགཏེཔི ཏཐཱགཏེ

ཏིབྷུཝནམྷི ཡཐིཙྪིཏ མདྡས; ()

༤༣.

ནཝུཔཔཱཏཁཎེཙ ཙུཏིཀྑཎེ

ཝིསཡབྷཱཝམུཔེནྟི ཏཐཱགཏཱ,

ཏདུཔཙཱརཝསེནི’ཧདསྶནཾ

ཁམཏི ཨཊྛཀཐཱཙརིཡཱསབྷོ; ()

༤༤. ¶

ཨུཔདྷིཧཱིན’དྷིཧནཱིནཏཐཱགཏེ

ཨནཔནཱིཏཔཎཱིཏ ཏཐཱགཏེ,

ཨནབྷིརཱུཔ’བྷིརཱུཔཏཐཱགཏེ

སུགཏི དུགྒཏི དུགྒ མུཔཱགཏེ; () (ཡམཀབནྡྷནཾ;)

༤༥.

ཏིརིཡམུདྡྷམདྷོཔཏིཏཱིཡ སོ

མཏིཔཧཾ ཨབྷིཔསྶི ཡཐཱརཧཾ,

ནིཙིཏཀམྨཔཐེཙ ཏཐཱགཏེ

ཨུཔརི པཱདཀཛྷཱནསམུཊྛིཏོ; ()

༤༦.

ཨཀུསལཱནི ཀརིཾསུ ཨིམེ ཏིདྷཱ

སུཙརིཏཱནི ཀརིཾསུ ཏིདྷཱ ཨིམེ,

ཨརིཡམགྒཕལེཧིཀ སམངྒིནོ

ནསམཎཱ’ཏིཔི ཨནྟིམཝཏྠུནཱ; ()

༤༧.

གུཎནིརཱཀརཎེན ཨསཱདྷཝོ

ཨུཔཝདིཾསུ ནསནྟི གུཎཱ’ཏི’མེ,

ཨཔིཙསཔྤུརིསཱ’རིཡཔུགྒལེ

ཏདནུརཱུཔགུཎེཧི པསཾསཡུཾ; ()

༤༨.

ཝིཏཐལདྡྷིཔརཱམསནཱ ཨིམེ

པརམལདྡྷིཔརཱམསནཱ ཨིམེ,

གཧིཏལདྡྷིཝསེན ཏཧིཾཏཧིཾ

ནིཙིཏཀམྨཔཐཱ ཛནཏཱ ཨཡཾ; ()

༤༩.

ཙཏུརཔཱཡམཔཱཡམཔཱཡཏིཾ

ཨུཔགཏཱ སུགཏི སུགཏིཾཨིཏི,

ཡཏི སམཱཧིཏཝཱཧིཏཝཱ’ དྡས

ཨནིམིསཀྑིསམཀྑིསམནྭིཏོ; () (ཡམཀབནྡྷནཾ)

༥༠. ¶

སམྨཱསམྨསཏོསཏོ སཏིམཏོ ཀམྨཱདིཧེཏུབྦྷཝཾ

རཱུཔཱརཱུཔམནཱགཏངྣི མཧཱ མོཧནྡྷཀཱརོ དྷིཡཱ,

ཨབྦྷཏྠངྒམི ཡཱཡ སོལ༹སཝིདྷཱ ཀངྑཱཙཏེཀཱལིཀཱ

སཱཀངྑཱཏརཎབྦིསུདྡྷུ དུཏིཡེཡཱམེ པཝཏྟཱ མཏི; ()

ཨིཏི མེདྷཱནནྡཱབྷིདྷཱནེནཡཏིནཱ ཝིརཙིཏེ སཀལཀཝིཛན ཧདཡཱནནྡདཱནནིདཱནེ ཛིནཝཾསདཱིཔེ ཨཝིདུརེ ནིདཱནེ པུབྦེནིཝཱསཉཱཎདིབྦཙཀྑུཉཱཎཱདྷིགམ པཝཏྟིཔརིདཱིཔོ ཏེརསམོ སགྒོ.

༡. ¶

སུདྷཱཀརེ ཝིཀསིཏཀེརཝཱཀརེ

ཀམེནུ’ པཱསཏི སཏི པཙྪིམཾ དིསཾ,

ཝིཧཱཝརཱི སསིརུཙིརཱནནཾ ཛིནཾ

བྷཛནྟི པཙྪིམམཐཡཱམ མོཏརི; ()

༢.

ཁཎཾ ནིསཱཔཏི ཝིརཧཱཏུརེཝ’ཡཾ

ནིསཱཝདྷཱུ མལིནཔཡོདྷརམྦརཱ,

ཙཏུདྡིསཱཡཏནཡནེཧི སམྤཏི

མུམོཙ སཱིཀརནིཀརསྶུབིནྡཝོ; ()

༣.

ཀིལེསནཱསནཔསུཏོ སམཱདྷིནཱ

པུཐུཛྫནོ ཏདནུསཡཾ ཡཐུབྦཧེ,

ཏཐཾ’སུནཱ བྷུཝནཀལངྐསོདྷནོ

ནཧེ ཀལཱནིདྷི སཀལངྐ མུབྦཧཱི; ()

༤. ¶

པུརཏྠིམེ ནབྷསི ཝིཀིཎྞ ཏཱརཀཱ-

པབནྡྷནིབྦྷརཏིམིརཾ ཝིཡཱཀརཱི

ནིསཱཝདྷུ ཝལཡིཏཧཱརབྷཱསུར-

སུནཱིལཀོམལནཝཀུནྟལསྶིརིཾ; ()

༥.

ཝིཔསྶནཱབལཝིམལཱིཀཏནྟརོ

ཛིནངྐུརོ དུརིཏམལཾཝ ཙནྡིམཱ,

མརིཙིསཉྩཡདྷཝལཱིཀཏམྦརོ

ཏམོཙཡཾ ཏམནུཙརཾ ནིརཱཀརཱི; ()

༦.

པཝཱཡི སཱིཏལམལཡཱནིལོ བྷུསཾ

དིསངྒནཱ སིསིརཏུསཱརབིནྡཝོ,

མུམོཙ སཱ ཝིཙརི ནིསཱ ནིསཱཀར-

མརཱིཙིམཉྫརིཔརིཙུམྦིཏེ བྷུཝི; ()

༧. ¶

ནིརངྒཎེ ནིརུཔཀིལེས ནིཙྩལེ

མུདུམྷི ཀམྨནིཡཝིསུདྡྷིབྷཱཝགེ,

སམཱཧིཏེ མནསི ཝིཔསྶནཱམནཾ

ཨཐཱསཝཀྑཡམཏིཡཱ’ བྷཱིནཱིཧརི; ()

༨.

སབཱརསངྒིཀབྷཝཙཀྐ མཛ྄ཛྷགཱ

ཨནུཀྐམེན’པི པཊིལོམཏོ སུདྷཱི

ཝཝཏྠཡཾ ཡམརིཡཉཱཎདསྶནཾ

ཝིསུདྡྷིཡཱ ཝིསདྡྷིཡཱ ཏདུཙྩཏེ; ()

༩.

ཁཎེན ཡོ སརཏི སཧསྶལོཙནོ

ཡཐཱཝཏོ དསསཏམཏྠ མསྶཔི,

ཝིདྷཱཏུནོ ནིཛཙརཎངྒུལིཔྤབྷཱ-

ཝིབྷུསིཏཱ’ཁིལབྷུཝནོདརསྶ’པི; ()

༡༠. ¶

ཨསེསནཱིཝརཎཏུསཱརསོསིནོ

སམཱདྷིསམྦྷཝ’ ཁིལཛྷཱནལཱབྷིནོ,

ཛགཏྟཡཾ ཀརབདརཾ’ཝ དསྶིནོ

ནཡསྶ ཀསྶཙི ཝིསཡཏྟ མཱགཏཾ; ()

༡༡.

ཨདིཊྛ མཔྤཊི ཝིདིཏཾ སཡཾཔུརཱ

ཨནུཏྟརཾཏམརིཡཉཱཎདསྶནཾ,

ཨིམསྶ གོཏམསམཎསྶ སིཛ྄ཛྷཏེ

གརཱུཔསེཝནཝིརཧསྶ ཨབྦྷཱུཏཾ; ()

༡༢.

བྷཝེབྷཝེ པརིཝིཏདཱནཔཱརམི-

བལེན’ཧཱུ ཝིཛཊིཏལོབྷབནྡྷནོ,

སམེཏྟིཁནྟྱནུགཏསཱིལཔཱརམཱི-

ཛལེན ནིབྦུཏཔཊིགྷཱདིཔཱཝཀོ; ()

༡༣. ¶

བྷཝེབྷཝེ བྷཝི ཐིརཉཱཎཔཱརམཱི-

པདྷཾསིཏཱ’ཁིལཝིཔརཱིཏདསྶནོ,

ཝིནཱཡཀཔྤབྷུཏི གརཱུཔསེཝན-

ཝསེན པུཙྪིཡ ཧཏམོཧསཾསཡོ; ()

༡༤.

བྷཝེབྷཝེ བུདྷཛནཔུཛནཱདིནཱ

གརཱུབྷིཝཱདནབཧུམཱནནཱདིནཱ,

ཛནཱཔཙཱཡནཝིདྷིནཱ ཝིནོདཡི

སདཔྤ མུནྣཏི མབྷིམཱན མུདྡྷཊཾ; ()

༡༥.

བྷཝེབྷཝེ ཝིབྷཝརཏིཾ རཏིཾབྷཝེ

ཨནངྒསངྒམརཏི མངྒནཱརཏིཾ,

གྷརཱ’བྷིནིཀྑམིཡ’ནགཱརིཡཾརཏོ

ཨཔཱནུདཱི པཊིལབྷི ཛྷཱན མཏྟནཱ; ()

༡༦. ¶

བྷཝེབྷཝེ ས’ཝཱིརིཡ སཙྩཔཱརམཱི-

པརཱཡཎོ ཨདྷིཀུསལེསུ ཙཱརཏིཾ,

ཛཧཾ ཝཙཱིདུརིཏམལཾ ཙཏུབྦིདྷཾ

ཝིསོདྷཡཱི ནིཛཧདཡཉྩ པགྒཧཱི; ()

༡༧.

བྷཝེ བྷཝེ ཨིཏི སམཏིཾསཔཱརམཱི-

ཝིསུཛ྄ཛྷིཏཱ’ ཀུསལམནོམལིམསོ,

ཀམེན ཨིནྡྲིཡ པརིཔཱཀཏཾ གཏོ

ནཙཉྙསམྤད མཧིཔཏྠཡཱི སུདྷཱི; ()

༡༨.

བྷཝེ བྷཝེ ཨགཎིཏམེཝ བོདྷིཡཱ

དཡཱཡ ཙོདིཏཧདཡོ’ཧི ཀཔཏྠནཾ,

ཨཀཱ ཙཏུབྦིདྷཕལསམྤདཱ ཏཏོ

པདིསྶརེ ནིརཝསརཱ རིཝ’ནྟནི; ()

༡༩. ¶

བྷཝེ བྷཝེ སཀཔཎིདྷཱནསཏྟིཡཱ

ཏིདྷཱ’ཧིསངྑཏཀུསལཾ ཨིམསྶ བྷོ,

ནསཱདྷཡེ ཀིམརིཡཉཱཎདསྶནཾ

ཨནཉྙཔུགྒལཝིསཡཾ ནསཾསཡོ; ()

༢༠.

ཨནིཙྩཏོ’དཡཝཡཏཱཡ དུཀྑཏོ

སདུཀྑཏཱཡཔི ཨཝིདྷེཡཏཱདིནཱ,

ཨནཏྟཏོ ཝརམཏི ཁནྡྷཔཉྩཀཾ

པུནཔྤུནཾ སམུཔཔརིཀྑ མུསྶཧཱི; ()

༢༡.

ཀལཱཔསམྨསནམུཁེན བཱརས-

ཝིདྷེ ཨནཱདིཀབྷཝཙཀྐནིསྶིཏེ,

ཀམེན སཏྟསུ ཨནུཔསྶནཱསུ སོ

ཛིནངྐུརོ ཏདཝཡཝེ’བྷིནཱིཧརི; ()

༢༢. ¶

ཨནིཙྩཏོབྷུསམནུཔསྶམུདྡྷརི

ཨསེསསངྑཏགཏནིཙྩསཉྙིཏཾ,

ཨནཏྟཏོ སམནུཝིཔསྶ དུཀྑཏོ

སསངྑཏེཔཛཧི སུཁཏྟསཉྙིཏཾ; ()

༢༣.

ཝིནོདཡཱི སུམཏི ཝིརཱགནིབྦིདཱ-

ཝསེན སངྑཏགཏརཱགནནྡིཡོ,

ནིརོདྷནིསྶཛནཝསཱ’ནུཔསྶིཡ

ཏཐོདཡཱདིཡནམསེསངྒྷཏེ; ()

༢༤.

ཝིདྷཱཡདུབྦིདྷམནུཔསྶཏོ ཀསཏོ

ཨསེསསངྑཏམཔི ནཱམརཱུཔཏོ,

ནིདཱནཏོ པུནཁཎཏོ’དཡབྦཡཾ

ཨུཔཊྛཧི དྭིགུཎིཏཔཉྩཝིསདྷཱ; ()

༢༥. ¶

སུདྷཱིམཏོ ཏརུཎཝིཔསྶནཱཡི’མེ

ཝིཔསྶཀསྶི’ཏི དསུཔཀྐིལེསཀཱ,

བྷཝུཾཔབྷཱསཏིམཏིཔཱིཏིནིཙྪཡོ

སུཁཱི’ཧནཱསམཐནིཀནྟྱུཔེཀྑནཱ; ()

༢༦. ¶

པསནྣལོཧིཏ པརིཔུཎྞཝིགྒཧཱ

ཝིནིགྒཏཱ ནིརཝདྷིལོཀདྷཱཏུསུ,

ཝིཔསྶནཱབལཔབྷཝཱ’བྷིཔཏྠརི

སུདྷནྟཀཉྩནརསཔིཉྫརཔྤབྷཱ; ()

༢༧.

ཨཡཾཔཐོ ནབྷཝཏི ཏཔྤབྷཱདཡོ

ཝིསཏྟིཀཱཔབྷུཏིཀིལེསཝཏྠུཀཱ,

པུནོདཡབྦཡ མནུཔསྶཏོ ཏཏོ

པཐོ སམུབྦྷཝི དསུཔཀྐིལེསགཾ; ()

༢༨.

པཐཱཔཐཾ སམུཔཔརིཀྑཏོཨིཏི

སུདྷཱིམཏོ ཏརུཎཝིཔསྶཀསྶཡཱ,

སམུཊྛིཏཱ ནིསིཏཝིཔསྶནཱམཏི

པཐཱཔཐིཀྑཎཀཝིསུདྡྷི ཝུཙྩཏེ; ()

༢༩. ¶

ནརཱསབྷོ ཨདྷིགཏཉཱཏཏཱིརཎ-

པརིཉྙཝཱ ཨུཔརིཔཧཱཎསངྑཡཱ,

པརིཉྙཡཱ ཨུབྷཡ ཝིསུདྡྷིསིདྡྷིཡཱ

ཏིསཙྩདསྶནཔསུཏོ སམཱརབྷཱི; ()

༣༠.

ཨནིཙྩལཀྑཎམཔཀི དུཀྑལཀྑཎཾ

ཨནཏྟལཀྑཎམཐ སབྦསངྑཏེ,

ཡཐཱཝཏོ ནསམནུཔསྶི སནྟཏི-

རིཡཱཔཐེཧིཙ པིཧིཏཾགྷཎེནསོ; ()

༣༡.

ཝིསོདྷཡཾ མཏིམུདཡབྦཡེ ཏཏོ

ལཧུཾ ཏིལཀྑཎཝིསདཏྟགོ བྷུསཾ,

ཝིཔསྶནཱཔཐཔཊིཔནྣ མཏྟནཱ

ཨལཏྠབྷངྒདྷིབྷཡཉཱཎམཱདིཀཾ; ()

༣༢. ¶

སཡམྦྷུནོ ཨུཔརིནཝཱནུཔསྶནཱ-

ཝིབྷཱཝནཱ ནཝགུཎཝཎྞནཱཡིདྷ,

ཝིདྷཱིཡཏེ ནཝཝིདྷཉྞབྷཱཝནཱ

པཝུཙྩཏེ སཔཀཊིཔདཱཝིསུདྡྷིཏི; ()

༣༣.

མཏཱིཧིཏིཧིཔི ཙཏུསཙྩཚཱདཀ-

ཏམོཝིདྷཾསན སམནནྟརཾ ཐིརཾ,

ནིརོདྷགོཙརམལབྷིཏྠ གོཏྲབྷུ-

མཏིཾ སུདྷཱི ཨནརིཡགོཏྟབཱཧིརཾ; ()

༣༤. ¶

པསཏྠགོཏྲབྷུམཏིདིནྣསཉྙཀཾ

སམཱུལམུདྡྷཊཀལུསཏྟཡཾ སུདྷཱི,

ཝིབནྡྷདུགྒཏིཝིནིཔཱཏནཱདིཀཾ

ཨཐཱདིམཾཔཊིལབྷཱི ཉཱཎདསྶནཾ; ()

༣༥.

ཡདེཝནནྟརཕལདནྟི པཎྜིཏཱ

ཝདནྟིཏཔྥལམཔི པཙྩཝེཀྑཎཾ,

ཨལཏྠ སོ པུན དུཏིཡཱཡ བྷུམིཡཱ

ཝིཔསྶནཾ སམདྷིགམཱཡ བྷཱཝཡཱི; ()

༣༦.

བྷུསོཝིསོསིཏ བྷཝདུཀྑཀདྡམཾ

ཨཀཱལིཀཾ ཏནུཀཏཀིབྦིསཏྟཡཾ,

ཨནུཏྟརཾ དུཏིཡམལཏྠ ཏཔྥལཾ

སཔཙྩཝེཀྑཎམཐ ཉཱཎདསྶནཾ; ()

༣༧. ¶

ཝིཔསྶནཾཔུནརཔིབྷཱཝཡཾ སཡཾ

སམུདྡྷཊཱལཡཔཊིགྷཾ བྷཝཱཔཧཾ,

སཔཙྩཝེཀྑཎཕལཉཱཎམཛ྄ཛྷགཱ

ཨནུཏྟརཾ ཏཏིཡཀ ཉཱཎདསྶནཾ; ()

༣༨.

ཏིལཀྑཎཾ ཐིརམཏིམཱ’བྷིཔཏྟིཡཱ

སུབྷཱཝཡིཀ ཨུཔརི ཙཏུཏྠབྷུམིཡཱ,

ཨཝཱརིཡཱསནིརིཝ ཏཱལམཏྠཀེ

ཀིལེསམུདྡྷནིརནིཧཙྩཙཱརིནཾ; ()

༣༩.

ནིཝཱརིཏཱཁིལ བྷཝཙཀྐཝིབྦྷམཾ

སཝཱསནཱཔརིམིཏ པཀཱཔནཱསནཾ,

ཨནཉྙགོཙར ཝརཉཱཎདསྶནཾ

ཨལཏྠ ཏཔྥལམཔིཔཙྩཝེཀྑཎཾ; ()

༤༠. ¶

ཏདཱསཝཀྑཡམཏིགྙཱཎདསྶན-

ཝིསུདྡྷིཝུཙྩཏི ཨརཧཏྟཔཏྟིཡཱ,

སཧེཝཙུདྡསཝིདྷ བུདྡྷབུདྡྷིཡོ

ཛིནོ ཙཏུབྦིདྷ པཊིསམྦྷིདཱལབྷཱི; ()

༤༡.

ཨསཱདྷཱརཎཾ ཉཱཎཚཀྐཾབལཱནི

དས’ཊྛཱརསཱཝེཎིཀཱ བུདྡྷདྷམྨཱ,

ཙཏུདྡྷཱཝིསཱརཛྫམིདྡྷཱནུབྷཱཝཱ

སམིདྡྷཱསཧེཙཱརཧཏྟེན ཏསྶ; ()

༤༢.

ཨབྷིཉྙེཡྻདྷམྨེ ཨབྷིཉྙཱཡ སཱམཾ

པརིཉྙེཡྻ དྷམྨེ པརིཉྙཱཡ སཱམཾ,

པཧཱཏབྦ དྷམྨེ པཧནྟྭཱན སཱམཾ

སནིབྦཱནམགྒཔྥལཾ སཙྪིཀཏྭཱ; ()

༤༣. ¶

སིཡཱཡཱཝཏཱཉེཡྻ དྷམྨཔྤཝཏྟི

སིཡཱཏཱཝཏཱ ཏསྶ ཉཱཎཔྤཝཏྟི,

ཨབྷིཉྙཱཡ སབྦཉྙུཏཱཉཱཎ མཱསི

སཧེཝཱརཧཏྟེན སབྦཉྙུ བུདྡྷོ; ()

༤༤.

མཧཱམོཧནིདྡཱཔགོམགྒཉཱཎ-

པྤབུདྡྷོ’ཧིསམྦོདྷིཡཱ སོབྷམཱནོ,

མུནིནྡོ དིནིནྡཾ’ སུསནྡོཧཧཱསི-

’ནྡིརཱམནྡིརིནྡིཝརཱབྷཾཨཧཱསི; ()

༤༥.

སུབུདྡྷཱབྷིསམྦོདྷིཔུབྦཱཙལམྦྷཱ

སཧེཝཱརུཎོ བུདྡྷསཱུརོདཡེན,

སམུཊྛཱསི ཝེནེཡྻ བནྡྷཱུཧིསདྡྷིཾ

པབུཛ྄ཛྷིཾསུ ཨབྦྷུགྒཏམྷོཛཀོསཱ; ()

༤༦. ¶

ཨུལཱ༹རཱཝབྷཱསོ ཏདཱ ཛཱཏིཁེཏྟེ

བྷུསཾཔཱཏུབྷུཏོ མཧཱིསམྤཝེདྷི,

སིལཱ༹སཱལ༹སེལཱ༹ཝཏཾསཱ སུབྷཱནི

ནིམཏྟཱནི བཏྟིཾསཛཱཏཱཏིལོཀེ; ()

༤༧.

ཏམོཛཱལཝིདྡྷཾསནཱདཱིནི ལོཀེ

ཀརོནྟོཝ ཙཏྟཱརིཀིཙྩཱནི’མཱནི,

སམུཊྛཱསི ཏསྨིཾཁཎེ རཾསིམཱལི

རིཝཱདིཙྩཝཾསུབྦྷཝོ བུདྡྷསཱུརོ; ()

༤༨.

མཧཱིལཱཛཝུཊྛཱིཧི སཉྪནྣབྷུཏཱ

ནབྷཾ ཀནིབྦྷརཾ གནྡྷདྷུཔདྡྷཛེཧི,

ཚཎྷོཀུལཱ ཀེཝལཾ ལོཀདྷཱཏུ

མཧཱམངྒལཱཝཱས ཀལཱིལཱཝལམྦིཾ ()

༤༩. ¶

ཏདཱཏཔྤདམྦྷོཛ པཱུཛཱགཏཱནཾ

སིརོ བྷཏྟིབྷཱརཉྫལཱིནཾ སུརཱནཾ,

ནིརཱལམྦམཱཀཱས རནྡྷཾ བབྷཱས

པབྷཱསཱར ཙཱུལཱ༹མཎིཧཀཱ’ཀརཱལ༹ཾ; ()

༥༠.

གུཎོནཱམ སཀྑནྡྷསནྟཱན སུདྡྷི

སཀོསུདྡྷཁནྭྡྷཔྤབནྡྷོཧི བུདྡྷོ,

ནམོབུདྡྷབྷུཏསྶ ནིཔྥནྟཉཱཎ-

པྤཧཱཎཱནུབྷཱཝཱཧིརཱུཔསྶཏསྶ; ()

ཨིཏི མེདྷཱནནྡཱབྷིདྷཱནེནཡཏིནཱ ཝིརཙིཏེ སཀལཀཝིཛན ཧདཡཱནནྡདཱནནིདཱནེ ཛིནཝཾསདཱིཔེ ཨཝིདུརེ ནིདཱནེ མཧཱ བོདྷིསཏྟསྶ ཨརིཡམགྒཉཱཎཱབྷིསམྦོདྷི སམདྷིགམ པཝཏྟིཔརིདཱིཔོ ཙུདྡསམོ སགྒོ.

ཛིནཝཾསདཱིཔེ ཨཝིདུརེ ནིདཱནབྷཱགོ དུཏིཡོ.

༡. ¶

ཨསྶེཝ པཀལླངྐཝརསྶཀཱརཎཱ

སཱིསཀྑིམཾསཱནི ཙ དཱརསུནཝོ,

དཏྭཱ ཙིརསྶཾ ཨཀརིནྟི དུཀྐརཾ

སོ (ཨིནྡཝཾསཱ’)བྷིདྷཛོ ཝིཙིནྟཡཱི; ()

༢.

པལླངྐཏོ ཏཱཝ ནཝུཊྛཧཾ ཏཧིཾ

པལླངྐམཱདྷཱཡ ནིསཛྫ སཏྟཧཾ,

སངྐཔྤཔུཎྞོ’དྷིསམཱདྷཡོ མུནི

སམྨཱ སམཱཔཛྫི ཨནེཀཀོཊིཡོ; ()

༣.

ནཱ’ཡཾ ཛཧཱཏེ ཝིཛཡཱསནཱ’ལཡཾ

ཡཾཀིཉྩིཀིཙྩཾ ཀརཎིཡམསྶཧི,

སཾཝིཛྫཏེ དཱནིཔི ཀཱཙི དེཝཏཱ

སངྐཱབྷིགྷཱ’ཏཱབྷིཝིཏཀྐཡུཾ ཨིཏི; ()

༤. ¶

ཏཱསཾ ཝིདིཏྭཱན ཝིཏཀྐམཱསནཱ

ཨབྦྷུཊྛིཏོ སོ གགནངྒཎཾ ཁཎཾ,

སཾདསྶཡནྟོ ཡམཔཱཊིཧཱརིཡཾ

ནིསྶཾསཡོ སཾསཡསལླམུདྡྷརཱི; ()

༥.

ནིསྶཱཡ པལླངྐམིམཾ མཧཱིརུཧཾ

སམྤཏྟསམྦོདྷིཔདོ’སྨི ཙིནྟིཡ,

ཨོརུཡ྄ཧ པཀལླངྐཋིཏཔྤདེསཏོ

པུབྦུཏྟརཱནཉྷི དིསཱན མནྟརཱ; ()

༦.

སཏྟཱཧ མིནྡིཝརཙཱརུལོཙན-

པཉྩཔྤབྷཱསཱརནིསེཙནེན སོ,

སམཔཱུཛཡནྟོ ཛཡབོདྷིམཱསནཾ

ཨཊྛཱསི ལོཀེཀཝིལོཙནོ ཛིནོ; ()

༧. ¶

གནྟྭཱ ཋཱིཏཊྛཱནཛཡཱསནནྟརཱ

པུབྦཱཔརསྶཾ དིསི སཏྟཝཱསརཾ,

ནིཀྑིཏྟཙཀྐངྐིཏཔཱདཔངྐཛོ

སོ ཙངྐམཱི ནིམྨིཏརཏནཙངྐམེ; ()

༨.

སོ བོདྷིཏོ ཨུཏྟརཔཙྪིམནྟརཱ

དེཝེཧི ནཱནཱརཏནེཧི ནིམྨིཏེ,

སཏྟཱཧམཏྟཾ མཎིམནྡིརེ མུནི

སམྨཱབྷིདྷམྨཾ པཝིཧཱསི སམྨསཾ; ()

༩.

མནྠཱཙལེ’ནམྦུནིདྷིཾ’ཝ ཀེསཝོ

ཝིཉྙཱཎཀཎྜཱདིཊསཱ ཙཏུབྦིདྷཾ,

ཏསྨིཾ ནིསིནྣོ མུནི དྷམྨསངྒཎི-

མཱལོལཡཱི ཉཱཎབལེན དུདྡསཾ; ()

༡༠. ¶

ཝེབྷངྒིཡཾ ཁནྡྷཝིབྷངྒམཱདིཀཾ

གམྦྷཱིརམཊྛཱརསདྷཱ སུདུབྦུདྷཾ,

སོ མཱརབྷངྒོ’ཐ ཝིབྷངྒསཱགརཾ

སཾཁོབྷཡཱི ཉཱཎཡུགནྟཝཱཡུནཱ; ()

༡༡.

སོ དྷཱཏུསུཉྙཏྟཔཛཱནནོ ཛིནོ

ནིསྶཏྟནིཛྫིཝསབྷཱཝདྷཱཏུཡོ,

ཝིཏྠཱརཡནྟོ ཏདནནྟརཾ ཝརཾ

ནཱནཱནཡཾ དྷཱཏུཀཐཾ ཝཝཏྠཡཱི; ()

༡༢.

ཁནྡྷཱདིཔཉྙཏྟིཝསེན ཚབྦིདྷཱ

པཉྙཏྟིཡོ’ཏི སུཝིབྷཏྟམཱཏིཀཾ,

པཉྙཱཡ སབྦཉྙུཛིནོ’ཐ པུགྒལ-

པཉྙཏྟི མཱལོལཡི ཨགྒཔུགྒལོ; ()

༡༣. ¶

ཝཱདཱིབྷསཱིཧོ སཀཝཱདམཎྜལཾ

ཨོརུཡ྄ཧ སམྨཱ པརཝཱདམཎྜལཾ,

སུཏྟཱནི སངྒཡ྄ཧ སཧསྶམཊྛདྷཱ

སཾཁིཏྟ མཱདོ མུཁཝཱདཡུཏྟིཀཾ; ()

༡༤.

ཉཱཎེན ཝིཏྠཱརིཡམཱན མཏྟནོ

ཀིཉྩཱཔྱ’ནནྟཱཔརིཡནྟ མུཏྟམཾ,

ཏཀྐཱིཧི ནཀྐཱཝཙརཾ ནཀེཧིཙི

ནཱཐོ ཀཐཱཝཏྠུ མཐཱ’བྷིསམྨསི; ()

༡༥.

ཡཾ མཱུལཁནྡྷཱདིཝསཱ དསབྦིདྷཾ

ཨུདྡེསནིདྡེསཔདཱ’ནུརཱུཔཏོ,

ནིཊྛཱནཏོ སཾསཡཏོ ཝིབྷཱགིཡཾ

གམྦྷཱིརཉཱཎེན’ཐ སཱགརཱུཔམཾ; ()

༡༦. ¶

སནྟཾ པཎིཏཾ ནིཔུཎཾ སུདུདྡསཾ

གུལ༹ྷཾ ཨཏཀྐཱཝཙརཾ ཨཙིནྟིཡཾ,

ནཱནཱནཡཾ ཏཾ ཡམཀཾ སུསཉྙམོ

དྷམྨསྶརོ སམྨསི ནིཔྤདེསཏོ; ()

༡༧.

ནཱནཱནཡུ’ཏྟུངྒཏརངྒནིབྦྷརཾ

ནེཡྻཏྠནཱིཏཏྠམཎིཧི མཎྜིཏཾ,

དྷམྨནྟརཱཝཊྚསཏཾ ཨཐཱཔརཾ

སདྡྷམྨཁནྡྷོདཀཁནྡྷཔཱུརིཏཾ; ()

༡༨.

སཏྠཱ ཙཏུབྦིས ཏིམཏྟཔཙྩཡ-

ཝེལཾ པརིཙྪེདཝིསཱལཔཊྚནཾ,

གམྦྷཱིརཔཊྛཱན མཧཎྞཝཾ ཀཐཾ

ཨཱལོལཡཾ སམྨསི ཉཱཎམེརུནཱ; ()

༡༩. ¶

ནིསྶངྒཉཱཎོ མུནི ཧེཏུཔཙྩཡོ

ཨིཙྩཱདིནཱ’རོཔིཏམཱཏིཀཱརཧཾ,

ནིདྡིཊྛནིདེདསཔདཾ པཔཉྩིཏ-

ཉེཡྻཾ ཙཏུབྦཱིསཝིདྷཾ སུདུབྦུདྷཾ; ()

༢༠.

ནིསྶཱཡ བཱཝཱིསཝིདྷེ ཏིཀེ ཏིཀ-

པཊྛཱན མནྟོགདྷནཱམརཱུཔིཀེ

ནིསྶཱཡ ནིསྶེསཀེ ཏཐཱ དུཀ-

པཊྛཱན མནྟོགདྷནཱམརཱུཔིཀེ ()

༢༡.

བཱཝིསམཏྟཱ ཏིཀམཱཏིཀཱ དུཀེ

པཀྑིཔྤ པཊྛཱནཝིདཾ དུཀནྟིཀཾ,

བཱཝཱིསམཏྟཱཡ ཏིཀེ སཏཾདུཀེ

པཀྑིཔྤ པཊྛཱནམིདཾཀ ཏིཀདྡུཀཾ; ()

༢༢. ¶

ཀཏྭཱ ཏིཀེསྭེ’ཝ ཏིཀེ དུཝཱིསཏི

པཊྛཱན མནྟོགཏིཀེ ཏིཀཏྟིཀཾ,

ཀཏྭཱ དུཀེསྭེ’ཝ ཏཐཱ སཏཾདུཀེ

པཊྛཱན མནྟཱགེཏིཀེ དུཀདྡུཀཾ; ()

༢༣.

ཨིཙྩཱནུལོམེ ཛནཡཱནི པཀྑིཔཾ

ཚ པྤཙྩནཱིཡེ’པི ནཡཱནི པཀྑིཔཾ,

ཨེཝཾ ཁིཔིཏྭཱ ཨནུལོམཔཙྩནི-

ཡེཙཱ’པི ཚ པྤཙྩནིཡཱ’ནུལོམཀེ; ()

༢༤.

གམྦྷཱིརཔཊྛཱནམཧོདདྷིཾ ཨིཏི

སངྑོབྷཡཾ སམྨསི ཉཱཎམེརུནཱ,

ཏཾ སམྨསནྟསྶ སཝཏྠུཀཾ ཚཝི-

ཝཎྞོ པསནྟོ’སི པསཱིདི ལོཧིཏཾ; ()

༢༥. ¶

ཏསྨིཾཁཎེ ཙཏྟཛཝཎྞདྷཱཏུཡོ

ཨཊྛཾསུ ཋཱནམྷི ཨསིཏིཧཏྠཀེ,

ཨཉྙཏྲ’དྷིཊྛཱནབལཾ སརཱིརཏོ

ཚབྦཎྞརཾསཱི ཝིསརཱ’ཧིནིཙྪརུཾ; ()

༢༦.

སེཝཱལཀཱལིནྡིནདི’ནྡིརཱཔཏི-

ནིལམྦརི’ནྡིཝརཝཎྞསནྟིབྷཱ,

ཀེས’ཀྑིམསྶཱུཧིཀ ཝིནིགྒཏཱ བྷུསཾ

ནཱིལཔྤབྷཱ’སེསདིསཱ ཨལངྐརུཾ; ()

༢༧.

ཏཱསཾ ཝསཱ’ སེསདིསཱཝིལཱསིནཱི

ཨཱསུཾ ཡཐཱ པཱརུཏནཱིལཀམྦལཱ,

ཏཱ ཙཀྐཝཱལཱ༹ཏི པཔཱུརཡནྟིཡོ

དྷཱཝིཾསུ ནིལོཔལཙུཎྞསནྣིབྷཱ; ()

༢༨. ¶

ནིསྶེསལོཀཾ ཧརིཏཱལཀུངྐུམ-

ཙུཎྞེཧི སོཝཎྞརསེཧི མིསྶཀཾ,

ཨཱལེཔཡནྟཱིཝིཡ པཱིཏརཾསིཡོ

ཡཱ ནིགྒཏཱ ཀཉྩནསནྣིབྷཏྟཙཱ; ()

༢༩.

ཏཱསཾ ཝསེནཱ’སི སིཎེརུཔབྦཏ-

རཱཛཱ ཝིལིནོ’ཝ མཧཎྞཝེ ཛལཾ,

སཾཀཔྤིཏཱ’ཝ’ཊྛ དིསཱགཛཱ’བྷཝུཾ

ནིདྡྷནྟཙཱམཱིཀརཀཔྤནཱདིནཱ; ()

༣༠.

ལཱཁཱརསཱནཾ པརིསེཙནཾ ཝིཡ

ནིནྡཱུརཙུཎྞོ’ཀིརཎཾ’ཝ ཡཱདིསི,

སཉྫྷཱཔབྷཱརཏྟསུརཏྟརཾསིཡོ

ནིཀྑམྨ དྷཱཝིཾསུ སམཾསལོཧིཏཱ; ()

༣༡.

ཏཱསཾ ཝསེནཱ’ཁིལབྷཱུམིཀཱམིནཱི

ཨཱསཱི ནིམུགྒཱརིཝ ཨུཏྟརཎྞཝེ,

ཨམྦྷོཛརཱགེཧི སུནིམྨིཏཱནི’ཝ

སབྦཱནི དབྦཱནྱ’བྷཝུཾ ཛགཏྟཡེ;()

༣༢. ¶

ཡཱཀུནྡསོགནྡྷིཀཙནྡཙནྡིཀཱ-

ཀཔྤཱུརཁཱིརོདདྷིཝཱིཙིཔཎྜརཱ,

ཨཊྛཱིཧི དཱཋཱཧཱི ཝིཏསྶཊཱ བྷུསཾ

ཨོདཱཏརཾསཱི དྷཝལཱིཀརུཾ དིསཱ; ()

༣༣.