📜

ཏེལཀཊཱཧགཱཐཱ ¶

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

༡.

ལཾཀིསྶརོ ཛཡཏུ ཝཱརཎརཱཛགཱམཱི

བྷོགིནྡབྷོག རུཙིརཱཡཏ པཱིཎ བཱཧུ,

སཱདྷུཔཙཱརནིརཏོ གུཎསནྣིཝཱསོ

དྷམྨེ ཋིཏོ ཝཱིགཏཀོདྷམདཱཝལེཔོ;

༢.

ཡོ སབྦལོཀམཧིཏོ ཀརུཎཱདྷིཝཱསོ

མོཀྑཱཀརོ རཝིཀུལམྦར པུཎྞ ཙནྡོ,

ཉེཡྻོདདྷིཾ སུཝིཔུལཾ སཀལཾ ཝིབུདྡྷོ

ལོཀུཏྟམཾ ནམཐ ཏཾ སིརསཱ མུནིནྡཾ;

༣.

སོཔཱནམཱལམམལཾ ཏིདསཱལཡསྶ

སཾསཱར སཱགརསམུཏྟརཎཱཡ སེཏུཾ,

སབྦཱགཏཱིབྷཡ ཝིཝཛྫིཏ ཁེམ མགྒཾ

དྷམྨཾ ནམསྶཐ སདཱ མུནིནཱ པཎཱིཏཾ;

༤. ¶

དེཡྻཾ ཏདཔྤམཔི ཡཏྠ པསནྣ ཙིཏྟཱ

དཏྭཱ ནརཱ ཕལམུལཱ༹རཏརཾ ལབྷནྟེ,

ཏཾ སབྦདཱ དསབལེནཔི སུཔྤསཏྠཾ

སངྒྷཾ ནམསྶཐ སདཱམིཏཔུཉྙཁེཏྟཾ;

༥.

ཏེཛོ བལེན མཧཏཱ རཏནཏྟཡསྶ

ལོཀཏྟཡཾ སམདྷིགཙྪཏི ཡེན མོཀྑཾ,

རཀྑཱ ན ཙཏྠི ཙ སམཱ རཏནཏྟཡསྶ

ཏསྨཱ སདཱ བྷཛཐ ཏཾ རཏནཏྟཡཾ བྷོ;

༦.

ལཾཀིསྶརོ པརཧིཏེཀརཏོ ནིརཱསོ

རཏྟིམྤི ཛཱགརརཏོ ཀརུཎཱདྷིཝཱསོ,

ལོཀཾ ཝིབོདྷཡཏི ལོཀཧིཏཱཡ ཀཱམཾ

དྷམྨཾ སམཱཙརཐ ཛཱགརིཡཱནུཡུཏྟཱ;

༧. ¶

སཏྟོཔཀཱར ནིརཏཱ ཀུསལེ སཧཱཡཱ

བྷོ དུལླབྷཱ བྷུཝི ནརཱ ཝིཧཏཔྤམཱདཱ,

ལཾཀཱདྷིཔཾ གུཎདྷནཾ ཀུསལེ སཧཱཡཾ

ཨཱགམྨ སཾཙརཐ དྷམྨམལཾ པམཱདཾ;

༨.

དྷམྨོ ཏིལོཀ སརཎོ པརམོ རསཱནཾ

དྷམྨོ མཧགྒྷརཏནོ རཏནེསུ ལོཀེ,

དྷམྨོ བྷཝེ ཏིབྷཝདུཀྑ ཝིནཱསཧེཏུ

དྷམྨཾ སམཱཙརཐ ཛཱགརིཡཱནུཡུཏྟཱ;

༩.

ནིདྡཾ ཝིནོདཡཐ བྷཱཝཡཐཔྤམེཡྻཾ

དུཀྑཾ ཨནིཙྩམྤི ཙེཧ ཨནཏྟཏཉྩ,

དེཧེ རཏིཾ ཛཧཐ ཛ ཛཛྫརབྷཱཛནཱབྷོ

དྷམྨཾ སམཱཙརཐ ཛཱགརིཡཱནུཡུཏྟཱ;

༡༠. ¶

ཨོཀཱས མཛྫ མམ ནཏྠི སུཝེ ཀརིསྶཾ

དྷམྨཾ ཨིཏཱིཧལསཏཱ ཀུསལཔྤཡོགེ,

ནཱ’ལཾ ཏིཡདྡྷསུ ཏཐཱ བྷུཝནཏྟཡེ ཙ

ཀཱམཾ ན ཙཏྠི མནུཛོ མརཎཱ པམུཏྟོ;

༡༡.

ཁིཏྟོ ཡཐཱ ནབྷསི ཀེནཙིདེཝ ལེཌྜུ

བྷཱུམིཾ སམཱཔཏྟི བྷཱརཏཡཱ ཁཎེན,

ཛཱཏཏྟམེཝ ཁལུ ཀཱརཎམེཀམཏྲ

ལོཀཾ སདཱ ནནུ དྷུཝཾ མརཎཱཡ གནྟུཾ;

༡༢.

ཀཱམཾ ནརསྶ པཏཏོ གིརིམུདྡྷནཱཏོ

མཛ྄ཛྷེ ན ཀིཉྩི བྷཡནིསྶརཎཱཡ ཧེཏུ,

ཀཱམཾ ཝཛནྟི མརཎཾ ཏིབྷཝེསུ སཏྟཱ

བྷོགེ རཏིཾ པཛཧཐཱཔི ཙ ཛཱིཝིཏེ ཙ;

༡༣. ¶

ཀཱམཾ པཏནྟི མཧིཡཱ ཁལུ ཝསྶདྷཱརཱ

ཝིཛྫུལླཏཱ ཝིཏཏམེགྷ མུཁཱ པམུཏྟཱ,

ཨེཝཾ ནརཱ མརཎབྷཱིམ པཔཱཏམཛ྄ཛྷེ

ཀཱམཾ པཏནྟི ནཧི ཀོཙི བྷཝེསུ ནིཙྩོ;

༡༤.

ཝེལཱཏཊེ པཊུཏརོརུ ཏརཾགམཱལཱ

ནཱསཾ ཝཛནྟི སཏཏཾ སལིལཱལཡསྶ,

ནཱསཾ ཏཐཱ སམུཔཡནྟི ནརཱམརཱནཾ

པཱཎཱནི དཱརུཎཏརེ མརཎོདདྷིམྷི;

༡༥.

རུདྡྷོཔི སོ རཐཝརསྶགཛཱདྷིཔེཧི

ཡོདྷེཧི ཙཱཔི སབལེཧི ཙ སཱཡུདྷེཧི,

ལོཀཾ ཝིཝཾཙིཡ སདཱ མརཎཱུསབྷོ སོ

ཀཱམཾ ནིཧནྟི བྷུཝནཏྟཡ སཱལི དཎྜཾ;

༡༦. ¶

བྷོ མཱརུཏེན མཧཏཱ ཝིཧཏོ པདཱིཔོ

ཁིཔྤཾ ཝིནཱས མུཁམེཏི མཧཔྤབྷོཔི,

ལོཀེ ཏཐཱ མརཎཙཎྜ སམཱིརཎེན

ཁིཔྤཾ ཝིནསྶཏི ནརཱཡུམཧཱ པདཱིཔོ;

༡༧

རཱམཛྫུནཔྤབྷཱུཏི བྷཱུཔཏི པུཾགཝཱ ཙ

སཱུརཱ པུརེ རཎམུཁེ ཝིཛིཏཱརི སངྒྷཱ,

ཏེཔཱིཧ ཙཎྜ མརཎོགྷ ནིམུགྒདེཧཱ

ནཱསཾ གཏཱ ཛགཏི ཀེ མརཎཱ པམུཏྟཱ?

༡༨.

ལཀྑཱི ཙ སཱགརཔཊཱ སདྷརཱདྷརཱ ཙ

སམྤཏྟིཡོ ཙ ཝིཝིདྷཱ ཨཔི རཱུཔསོབྷཱ,

སབྦཱ ཙ ཏཱ ཨཔི ཙ མིཏྟསུཏཱ ཙ དཱརཱ

ཀེ ཙཱཔི ཀཾ ཨནུགཏཱ མརཎཾ ཝཛནྟཾ?

༡༩. ¶

བྲཧྨཱསུརཱསུརགཎཱ ཙ མཧཱནུབྷཱཝཱ

གནྡྷབྦཀིནྣརམཧོརགརཀྑསཱ ཙ,

ཏེ ཙཱ པརེ ཙ མརཎགྒིསིཁཱཡ སབྦེ

ཨནྟེ པཏནྟི སལབྷཱ ཨིཝ ཁཱིཎཔུཉྙཱ;

༢༠.

ཡེ སཱརིཔུཏྟཔམུཁཱ མུནིསཱཝཀཱ ཙ

སུདྡྷཱ སདཱསཝནུདཱ པརམིདྡྷིཔཏྟཱ,

ཏེ ཙཱཔི མཙྩུཝལ༹བྷཱ མུཁ སནྣིམུགྒཱ

དཱིཔཱནིཝཱནལཧཏཱ ཁཡཏཾ ཨུཔེཏཱ;

༢༡.

བུདྡྷཱཔི བུདྡྷཀམལཱམལཙཱརུནེཏྟཱ

བཏྟིཾསལཀྑཎ ཝིརཱཛིཏ རཱུཔསོབྷཱ,

སབྦཱསཙཀྑཡཀརཱཔི ཙ ལོཀནཱཐཱ

སམྨདྡིཏཱ མརཎམཏྟམཧཱགཛེན;

༢༢. ¶

རོགཱཏུརེསུ ཀརུཎཱ ན ཛརཱཏུརེསུ

ཁིཌྜཱཔརེསུ སུཀུམཱརཀུམཱརཀེསུ,

ལོཀཾ སདཱ ཧནཏི མཙྩུ མཧཱགཛིནྡོ

དཝཱནལོ ཝནམིཝཱཝརཏཾ ཨསེསཾ;

༢༣.

ཨཱཔུཎྞཏཱ ན སལིལེ ན ཛལཱསཡསྶ

ཀཊྛསྶ ཙཱཔི བཧུཏཱ ན ཧུཏཱསནསྶ,

བྷུཏྭཱན སོ ཏིབྷཱུཝནམྤི ཏཐཱ ཨསེསཾ

བྷོ ནིདྡཡོ ན ཁལུ པཱིཏིམུཔེཏི མཙྩུ;

༢༤.

བྷོ མོཧ མོཧིཏཏཡཱ ཝིཝསོ ཨདྷཉྙོ

ལོཀོ པཏཏྱཔིཔི མཙྩུམུཁེ སུབྷཱིམེ,

བྷོགེ རཏིཾ སམུཔཡཱཏི ནིཧཱིནཔཉྙོ

དོལཱ ཏརངྒཙཔལེ སུཔིནོཔམེཡྻེ;

༢༥. ¶

ཨེཀོཔི མཙྩུརབྷིཧནྟུམལཾ ཏིལོཀཾ

ཀིཾ ནིདྡཡཱ ཨཔི ཛརཱམརཎཱནུཡཱཡཱི,

ཀོ ཝཱ ཀརེཡྻ ཝིབྷསུཝེསུ ཙ ཛཱིཝིཏཱསཾ

ཛཱཏོ ནརོ སུཔིན སཾགམ སནྣིབྷེསུ;

༢༦.

ནིཙྩཱཏུརཾ ཛགདིདཾ སབྷཡཾ སསོཀཾ

དིསྭཱ ཙ ཀོདྷམདམོཧཛརཱབྷིབྷཱུཏཾ,

ཨུབྦེགམཏྟམཔི ཡསྶ ན ཝིཛྫཏཱི ཙེ

སོ དཱརུཎོན མརཎཾ ཝཏ ཏཾ དྷིརཏྠུ!

བྷོ བྷོ ན པསྶཐ ཛརཱསིདྷརཉྷི མཙྩུ

མཱཧཉྙམཱནམཁིལཾ སཏཏཾ ཏིལོཀཾ,

ཀིཾ ནིདྡཡཱ ནཡཐ ཝཱིཏབྷཡཱ ཏིཡཱམཾ

དྷམྨཾ སདཱ’སཝནུདཾ ཙརཐ’པྤམཏྟཱ;

༢༨. ¶

བྷཱཝེཐ བྷོ མརཎམཱརཝིཝཛྫནཱཡ

ལོཀེ སདཱ མརཎ སཉྙམིམཾ ཡཏཏྟཱ,

ཨེཝཉྷི བྷཱཝནརཏསྶ ནརསྶ ཏསྶ

ཏཎྷཱ པཧཱིཡཏི སརཱིརགཏཱ ཨསེསཱ;

༢༩.

རཱུཔཾ ཛརཱ པིཡཏརཾ མལིནཱིཀརོཏི

སབྦཾ བལཾ ཧརཏི ཨཏྟནི གྷོརརོགོ,

ནཱནཱུཔབྷོག པརིརཀྑིཏ མཏྟབྷཱཝཾ

བྷོ མཙྩུ སཾཧརཏི ཀིཾ ཕལམཏྟབྷཱཝེ?

༣༠.

ཀམྨཱནིལཱཔཧཏརོགཏརཾགབྷཾགེ

སཾསཱར སཱགར མུཁེ ཝིཏཏེ ཝིཔནྣཱ,

མཱ མཱཔམཱདམཀརིཏྠ ཀརོཐ མོཀྑཾ

དུཀྑོདཡོ ནནུ པམཱདམཡཾ ནརཱནཾ;

༣༡. ¶

བྷོགཱ ཙ མིཏྟསུཏཔོརིས བནྡྷཝཱ ཙ

ནཱརཱི ཙ ཛཱིཝིཏསམཱ ཨཔི ཁེཏྟཝཏྠུ,

སབྦཱནི ཏཱནི པརལོཀམིཏོ ཝཛནྟཾ

ནཱནུབྦཛནྟི ཀུསལཱཀུསལཾཝ ལོཀེ;

༣༢.

བྷོ ཝིཛྫུཙཾཙལཏརེ བྷཝསཱགརམྷི

ཁིཏྟཱ པུརཱ ཀཏམཧཱཔཝནེན ཏེན,

ཀཱམཾ ཝིབྷིཛྫཏི ཁཎེན སརཱིརནཱཝཱ

ཧཏྠེ ཀརོཐ པརམཾ གུཎཧཏྠསཱརཾ;

༣༣.

ནིཙྩཾ ཝིབྷིཛྫཏིཧ ཨཱམཀ བྷཱཛནཾཝ

སཾརཀྑིཏོཔི བཧུདྷཱ ཨིཧ ཨཏྟབྷཱཝོ,

དྷམྨཾ སམཱཙརཐ སགྒཔཏིཔྤཏིཊྛཾ

དྷམྨོ སུཙིཎྞམིཧམེཝ ཕལཾ དདཱཏི;

༣༤. ¶

རནྟྭཱ སདཱ པིཡཏརེ དིཝི དེཝརཛྫེ

ནམྷཱ ཙཝནྟི ཝིབུདྷཱ ཨཔི ཁཱིཎཔུཉྙཱ,

སབྦཾ སུཁཾ དིཝི བྷུཝཱིཧ ཝིཡོགནིཊྛཾ

ཀོ པཉྙཝཱ བྷཝསུཁེསུ རཏིཾ ཀརེཡྻ?

༣༥.

བུདྡྷོ སསཱཝཀགཎོ ཛགདེཀནཱཐོ

ཏཱརཱཝལཱིཔརིཝུཏོཔི ཙ པུཎྞཙནྡོ,

ཨིནྡོཔི དེཝམཀུཊཾཀིཏ པཱདཀཉྫོ

ཀོ ཕེཎཔིཎྜ-ན-སམོ ཏིབྷཝེསུ ཛཱཏོ?

༣༦.

ལཱིལཱཝཏཾསམཔི ཡོབྦན རཱུཔསོབྷཾ

ཨཏྟཱུཔམཾ པིཡཛནེན ཙ སམྤཡོགཾ,

དིསྭཱཔི ཝིཛྫུཙཔལཾ ཀུརུཏེ པམཱདཾ

བྷོ མོཧམོཧིཏཛནོ བྷཝརཱགརཏྟོ;

༣༧. ¶

པུཏྟོ པིཏཱ བྷཝཏི མཱཏུ པཏཱིཧ པུཏྟོ

ནཱརཱི ཀདཱཙི ཛནནཱི ཙ པིཏཱ ཙ པུཏྟོ,

ཨེཝཾ སདཱ ཝིཔརིཝཏྟཏི ཛཱིཝལོཀོ

ཙིཏྟེ སདཱཏིཙཔལེ ཁལུ ཛཱཏིརངྒེ;

༣༨.

རནྟྭཱ པུརེ ཝིཝིདྷཕུལླལཏཱཀུལེཧི

དེཝཱཔི ནནྡནཝནེ སུརསུནྡརཱིཧི,

ཏེ ཝེ’ཀདཱ ཝིཏཏཀཎྚཀསཾཀཊེསུ

བྷོ ཀོཊིསིམྦལིཝནེསུ ཕུསནྟི དུཀྑཾ;

༣༩.

བྷུཏྭཱ སུདྷནྣམཔི ཀཉྩནབྷཱཛནེསུ

སགྒེ པུརེ སུརཝརཱ པརམིདྡྷིཔཏྟཱ,

ཏེ ཙཱཔི པཛྫལིཏལོཧགུལཾ གིལནྟི

ཀཱམཾ ཀདཱཙི ནརཀཱལཡ ཝཱསབྷཱུཏཱ;

༤༠. ¶

བྷུཏྭཱ ནརིསྶརཝརཱ ཙ མཧིཾ ཨསེསཾ

དེཝཱདྷིཔཱ ཙ དིཝི དིབྦསུཁཾ སུརམྨཾ,

ཝཱསཾ ཀདཱཙི ཁུརསཉྩིཏབྷཱུཏལེསུ

ཏེ ཝཱ མཧཱརཐགཎཱནུགཏཱ དིཝཱིཧ;

༤༡.

དེཝངྒནཱ ལལིཏབྷིནྣཏརངྒམཱལེ

རངྒེ མཧིསྶརཛཊཱམཀུཊཱནུཡཱཏེ,

རནྟྭཱ པུརེ སུརཝརཱ པམདཱསཧཱཡཱ

ཏེ ཙཱཔི གྷོརཏརཝེཏརཎིཾ པཏནྟི;

༤༢.

ཕུལླཱནི པལླཝལཏཱཕལསཾཀུལཱནི

རམྨཱནི ནནྡནཝནཱནི མནོརམཱནི,

དིབྦཙྪརཱལལིཏཔུཎྞདརཱིམུཁཱནི

ཀེལཱསམེརུསིཁརཱནི ཙ ཡནྟི ནཱསཾ;

༤༣. ¶

དོལཱ’ནིལཱ’ནལཏརཾགསམཱ ཧི བྷོགཱ

ཝིཛྫུཔྤབྷཱཏིཙཔལཱནི ཙ ཛཱིཝིཏཱནི,

མཱཡཱམརཱིཙིཛལསོམསམཾ སརཱིརཾ

ཀོ ཛཱིཝིཏེ ཙ ཝིབྷཝེ ཙ ཀརེཡྻ རཱགཾ?

༤༤.

ཀིཾ དུཀྑམཏྠི ན བྷཝེསུ ཙ དཱརུཎེསུ

སཏྟོཔི ཏསྶ ཝིཝིདྷསྶ ན བྷཱཛནོ ཀོ,

ཛཱཏོ ཡཐཱ མརཎརོགཛརཱབྷིབྷཱུཏོ

ཀོ སཛྫནོ བྷཝརཏིཾ པིཧཡེཡྻ’བཱལོ?

༤༥.

ཀེ ཝཱཔི པཛྫལིཏལོཧགུལཾ གིལནྟི

སཀྐཱ ཀཐཉྩིདཔི པཱཎིཏལེན བྷཱིམཾ,

དུཀྑོདཡཾ ཨསུཙིནིསྶཝནཾ ཨནནྟཾ

ཀོ ཀཱམཡེཐ ཁལུ དེཧམིམཾ ཨབཱལོ?

༤༦. ¶

ལོཀེ ན མཙྩུསམམཏྠི བྷཡཾ ནརཱནཾ

ན ཝྱཱདྷིདུཀྑསམམཏྠི ཙ ཀིཾཙི དུཀྑཾ,

ཨེཝཾ ཝིརཱུཔཀརཎཾ ན ཛརཱསམཱནཾ

མོཧེན བྷོ རཏིམུཔེཏི ཏཐཱཔི དེཧེ;

༤༧.

ནིསྶཱརཏོ ནལཀལཱིཀདལཱིསམཱནཾ

ཨཏྟཱནམེཝ པརིཧཉྙཏི ཨཏྟཧེཏུ,

སམྤོསིཏོཔི ཀུསཧཱཡ ཨིཝཱཀཏཉྙཱུ

ཀཱཡོ ན ཡསྶ ཨནུགཙྪཏི ཀཱལཀེརཱ;

༤༨.

ཏཾ ཕེཎཔིཎྜསདིསཾ ཝིསསཱུལཀཔྤཾ

ཏོཡཱ’ནིལཱ’ནལམཧཱིཨུརགཱདྷིཝཱསཾ,

ཛིཎྞཱལཡཾཝ པརིདུབྦལམཏྟབྷཱཝཾ

དིསྭཱ ནརོ ཀཐམུཔེཏི རཏིཾ སཔཉྙོ?

༤༩. ¶

ཨཱཡུཀྑཡཾ སམུཔཡཱཏི ཁཎེ ཁཎེཔི

ཨནྭེཏི མཙྩུ ཧནནཱཡ ཛརཱསིཔཱཎཱི,

ཀཱལཾ ཏཐཱ ན པརིཝཏྟཏི ཏཾ ཨཏཱིཏཾ

དུཀྑཾ ཨིདཾ ནནུ བྷཝེསུ ཨཙིནྟནཱིཡཾ?

༥༠.

ཨཔྤཱཡུཀསྶ མརཎཾ སུལབྷཾ བྷཝེསུ

དཱིགྷཱཡུཀསྶ ཙ ཛརཱ ཝྱསནཾ ཙ’ནེཀཾ,

ཨེཝཾ བྷཝེ ཨུབྷཡཏོཔི ཙ དུཀྑམེཝ

དྷམྨཾ སམཱཙརཐ དུཀྑཝིནཱསནཱཡ;

༥༡.

དུཀྑགྒིནཱ སུམཧཏཱ པརིཔཱིལི༹ཏེསུ

ལོཀཏྟཡསྶ ཝསཏོ བྷཝཝཱརཀེསུ,

སབྦཏྟཏཱ སུཙརིཏསྶ པམཱདཀཱལོ

བྷོ བྷོ ན ཧོཏི པརམཾ ཀུསལཾ ཙིཎཱཐ;

༥༢. ¶

ཨཔྤཾ སུཁཾ ཛལལཝཾ ཝིཡ བྷོ ཏིཎགྒེ

དུཀྑནྟུ སཱགརཛལཾ ཝིཡ སབྦལོཀེ,

སཾཀཔྤནཱ ཏདཔི ཧོཏི སབྷཱཝཏོ ཧི

སབྦཾ ཏིལོཀམཔི ཀེཝལདུཀྑམེཝ;

༥༣.

ཀཱཡོ ན ཡསྶ ཨནུགཙྪཏི ཀཱཡཧེཏུ

བཱལོ ཨནེཀཝིདྷམཱཙརཏཱིཧ དུཀྑཾ,

ཀཱཡོ སདཱ ཀལི མལཱཀལིལཉྷི ལོཀེ

ཀཱཡེ རཏོ’ནཝརཏཾ ཝྱསནཾ པརེཏི

༥༤.

མཱིལ༹ྷཱཀརཾ ཀལིམལཱཀརམཱམགནྡྷཾ

སཱུལཱ༹སིསལླཝིསཔནྣགརོགབྷཱུཏཾ,

དེཧཾ ཝིཔསྶཐ ཛརཱམརཎཱདྷིཝཱསཾ

ཏུཙྪཾ སདཱ ཝིགཏསཱརམིམཾ ཝིནིནྡྱཾ;

༥༥. ¶

དུཀྑཾ ཨནིཙྩམསུབྷཾ ཝཏ ཨཏྟབྷཱཝཾ

མཱ སཾཀིལེསཡ ན ཝིཛྫཏི ཛཱཏུ ནིཙྩོ,

ཨམྦྷོ ན ཝིཛྫཏི ཧི ཨཔྤམཔཱིཧ སཱརཾ

སཱརཾ སམཱཙརཐ དྷམྨམལཾ པམཱདཾ;

༥༦.

མཱཡཱམརཱིཙིཀདལཱིནལཕེཎཔུཉྫ-

གཾགཱཏརངྒཛལབུབྦུལསནྣིབྷེསུ,

ཁནྡྷེསུ པཉྩསུ ཚལཱ༹ཡཏནེསུ ཏེསུ

ཨཏྟཱ ན ཝིཛྫཏི ཧི ཀོ ན ཝདེཡྻ’བཱལོ?

༥༧.

ཝཉྫྷཱསུཏོ སསཝིསཱཎམཡེ རཐེ ཏུ,

དྷཱཝེཡྻ ཙེ ཙིརཏརཾ སདྷུརཾ གཧེཏྭཱ,

དཱིཔཙྩིམཱལམིཝ ཏཾ ཁཎབྷངྒབྷཱུཏཾ

ཨཏྟཱཏི དུབྦལཏརནྟུ ཝདེཡྻ དེཧཾ;

༥༨. ¶

བཱལོ ཡཐཱ སལིལབུབྦུལབྷཱཛནེན

ཨཱཀཎྛཏོ ཝཏ པིབེཡྻ མརཱིཙིཏོཡཾ,

ཨཏྟཱནི སཱརརཧིཏཾ ཀདལཱིསམཱནཾ

མོཧཱ བྷཎེཡྻ ཁལུ དེཧམིམཾ ཨནཏྟཾ;

༥༩.

ཡོ’དུམྦརསྶ ཀུསུམེན མརཱིཙིཏོཡཾ

ཝཱསཾ ཡདིཙྪཏི ས ཁེདམུཔེཏི བཱལོ,

ཨཏྟཱནམེཝ པརིཧཉྙཏི ཨཏྟཧེཏུ

ཨཏྟཱ ན ཝིཛྫཏི ཀདཱཙིདཔཱིཧ དེཧེ;

༦༠.

པོསོ ཡཐཱ ཧི ཀདལཱི སུཝིནིབྦྷུཛནྟོ

སཱརཾ ཏདཔྤམྤི ནོཔལབྷེཡྻ ཀཱམཾ,

ཁནྡྷེསུ པཾཙསུ ཚལཱ༹ཡཏནེསུ ཏེསུ

སུཉྙེསུ ཀིཉྩིདཔི ནོཔལབྷེཡྻ སཱརཾ;

༦༡. ¶

སུཏྟཾ ཝིནཱ ན པཊབྷཱཝམིཧཏྠི ཀིཾཙི

དེཧཾ ཝིནཱ ན ཁལུ ཀོཙི མིཧཏྠི སཏྟོ,

དེཧོ སབྷཱཝརཧིཏོ ཁཎབྷཾགཡུཏྟོ,

ཀོ ཨཏྟཧེཏུ ཨཔརོ བྷུཝི ཝིཛྫཏཱིཧ?

༦༢.

དིསྭཱ མརཱིཙིསལིལཉྷི སུདཱུརཏོ བྷོ

བཱལོ མིགོ སམུཔདྷཱཝཏི ཏོཡསཉྙཱི,

ཨེཝཾ སབྷཱཝརཧིཏེ ཝིཔརཱིཏསིདྡྷེ

དེཧེ པརེཏི པརིཀཔྤནཡཱ ཧི རཱགཾ;

༦༣.

དེཧེ སབྷཱཝརཧིཏེ པརིཀཔྤསིདྡྷེ

ཨཏྟཱ ན ཝིཛྫཏི ཧི ཝིཛྫུམིཝནྟལིཀྑེ,

བྷཱཝེཐ བྷཱཝནརཏཱ ཝིགཏཔྤམཱདཱ

སབྦཱསཝཔྤཧནནཱཡ ཨནཏྟསཉྙཾ;

༦༤. ¶

ལཱལཱཀརཱིསརུདྷིརསྶུཝསཱནུལིཏྟཾ

དེཧཾ ཨིམཾ ཀལིམལཱཀལིལཾ ཨསཱརཾ,

སཏྟཱ སདཱ པརིཧརནྟི ཛིགུཙྪནཱིཡཾ

ནཱནཱསུཙཱིཧི པརིཔུཎྞགྷཊཾ ཡཐེཝ;

༦༥.

ཎཧཱཏྭཱ ཛལཉྷི སཀལཾ ཙཏུསཱགརསྶ

མེརུཔྤམཱཎམཔི གནྡྷམནུཏྟརཉྩ,

པཔྤོཏི ནེཝ མནུཛོ ཧི སུཙིཾ ཀདཱཙི

ཀིཾ བྷོ ཝིཔསྶཐ གུཎཾ ཀིམུ ཨཏྟབྷཱཝེ?

༦༦.

དེཧོ ས ཨེཝ ཝིཝིདྷཱསུཙིསནྣིདྷཱནོ

དེཧོ ས ཨེཝ ཝདྷབནྡྷནརོགབྷཱུཏོ,

དེཧོ ས ཨེཝ ནཝདྷཱ པརིབྷིནྣགཎྜོ

དེཧཾ ཝིནཱ བྷཡཀརཾ ན སུསཱནམཏྠི;

༦༧. ¶

ཨནྟོགཏཾ ཡདིཝ མུཏྟཀརཱིསབྷཱགོ

དེཧཱ བཧིཾ ཨཏིཙརེཡྻ ཝིནིཀྑམིཏྭཱ,

མཱཏཱ པིཏཱ ཝིཀརུཎཱ ཙ ཝིནཊྛཔེམཱ

ཀཱམཾ བྷཝེཡྻུ ཀིམུ བནྡྷུསུཏཱ ཙ དཱརཱ?

༦༨.

དེཧཾ ཡཐཱ ནཝམུཁཾ ཀིམིསངྒྷགེཧཾ

མཾསཊྛིསེདརུདྷིརཱཀལིལཾ ཝིགནྡྷཾ,

པོསེནྟི ཡེ ཝིཝིདྷཔཱཔམིཧཱཙརིཏྭཱ

ཏེ མོཧིཏཱ མརཎདྷམྨམཧོ ཝཏེཝཾ!

༦༩.

གཎྜཱུཔམེ ཝིཝིདྷརོག ནིཝཱསབྷཱུཏེ

ཀཱཡེ སདཱ རུདྷིརམུཏྟཀརཱིསཔུཎྞེ,

ཡོ ཨེཏྠ ནནྡཏི ནརོ སསིགཱལབྷཀྑེ

ཀཱམཉྷི སོཙཏི པརཏྠ ས བཱལབུདྡྷི;

༧༠. ¶

བྷོ ཕེཎཔིཎྜསདིསོ ཝིཡ སཱརཧཱིནོ

མཱིལ༹ྷཱལཡོ ཝིཡ སདཱ པཊིཀཱུལགནྡྷོ,

ཨཱསཱིཝིསཱལཡནིབྷོ སབྷཡོ སདུཀྑོ

དེཧོ སདཱ སཝཏི ལོཎགྷཊོཝ བྷིནྣོ;

༧༡.

ཛཱཏཾ ཡཐཱ ན ཀམལཾ བྷུཝི ནིནྡནཱིཡཾ

པངྐེསུ བྷོ ཨསུཙིཏོཡ སམཱཀུལེསུ,

ཛཱཏཾ ཏཐཱ པརཧིཏམྤི ཙ དེཧབྷཱུཏཾ

ཏཾ ནིནྡནཱིཡམིཧ ཛཱཏུ ན ཧོཏི ལོཀེ;

༧༢.

དྭཏྟིཾསབྷཱགཔརིཔཱུརཏརོ ཝིསེསོ

ཀཱཡོ ཡཐཱ ཧི ནརནཱརི གཎསྶ ལོཀེ,

ཀཱཡེསུ ཀིཾ ཕལམིཧཏྠི ཙ པཎྜིཏཱནཾ

ཀཱམཾ ཏདེཝ ནནུ ཧོཏི པརོཔཀཱརཾ;

༧༣. ¶

པོསོན པཎྜིཏཏརེན ཏཐཱཔི དེཧོ

སབྦཏྟནཱ ཙིརཏརཾ པརིཔཱལནཱིཡོ,

དྷམྨཾ ཙརེཡྻ སུཙིརཾ ཁལུ ཛཱིཝམཱནོ

དྷམྨེ ཧཝེ མཎིཝརོ ཨིཝ ཀཱམདོ བྷོ

༧༤.

ཁཱིརེ ཡཐཱ སུཔརིབྷཱཝིཏམོསདྷམྷི

སྣེཧེན ཨོསདྷབལཾ པརིབྷཱསཏེཝ,

དྷམྨོ ཏཐཱ ཨིཧ སམཱཙརིཏོ ཧི ལོཀེ

ཚཱཡཱཝ ཡཱཏི པརལོཀ མིཏོ ཝཛནྟཾ;

༧༥.

ཀཱཡསྶ བྷོ ཝིརཙིཏསྶ ཡཐཱནུཀཱུལཾ

ཚཱཡཱ ཝིབྷཱཏི རུཙིརཱམལདཔྤཎེ ཏུ,

ཀཏྭཱ ཏཐེཝ པརམཾ ཀུསལཾ པརཏྠ

སམྦྷཱུསིཏཱ ཨིཝ བྷཝནྟི ཕལེན ཏེན;

༧༦. ¶

དེཧེ ཏཐཱ ཝིཝིདྷདུཀྑ ནིཝཱསབྷཱུཏེ

མོཧཱ པམཱདཝསགཱ སུཁསཉྙམཱུལ༹ྷཱ,

ཏིཀྑེ ཡཐཱ ཁུརམུཁེ མདྷུལེཧམཱནོ

བཱལ༹ྷཉྩ དུཀྑམནུགཙྪཏི ཧཱིནཔཉྙོ;

༧༧.

སཾཀཔྤརཱགཝིགཏེ ནིརཏཏྟབྷཱཝེ

དུཀྑཾ སདཱ སམདྷིགཙྪཏི ཨཔྤཔཉྙོ,

མཱུལ༹ྷསྶ ཙེཝ སུཁསཉྙམིཧཏྠིལོཀེ

ཀིཾཔཀྐམེཝ ནནུ ཧོཏི ཝིཙཱརམཱནེ;

༧༨.

སབྦོཔབྷོག དྷནདྷཉྙཝིསེསལཱབྷཱི

རཱུཔེན བྷོ ས མཀརདྡྷཛསནྣིབྷོཔི,

ཡོ ཡོབྦནེཔི མརཎཾ ལབྷཏེ ཨཀཱམཾ

ཀཱམཾ པརཏྠཔརཔཱཎཧརོ ནརོ ཧི;

༧༩.

སོ ཡཱཙཀོ བྷཝཏི བྷིནྣཀཔཱལཧཏྠོ

མུཎྜོ དྷིགཀྑརསཏེཧི ཙ ཏཛྫཡནྟོ,

བྷིཀྑཾ སདཱརིབྷཝནེ སཀུཙེལཝཱསོ

དེཧེ པརཏྠི པརཙིཏྟཧརོ ནརོ ཡོ;

༨༠. ¶

ཨིཏྠཱི ནམུཉྩཏི སདཱ པུན ཨིཏྠིབྷཱཝཱ

ནཱརཱི སདཱ བྷཝཏི སོ པུརིསོ པརཏྠ,

ཡོ ཨཱཙརེཡྻ པརདཱརམལངྒྷནཱིཡཾ

གྷོརཉྩ ཝིནྡཏི སདཱ ཝྱསནཉྩ ནེཀཾ;

༨༡.

དཱིནོ ཝིགནྡྷཝདནོ ཙ ཛལོ༹ ཨཔཉྙོ

མཱུགོ སདཱ བྷཝཏི ཨཔྤིཡདསྶནོ ཙ,

པཔྤོཏི དུཀྑམཏུལཉྩ མནུསྶབྷཱུཏོ

ཝཱཙཾ མུསཱ བྷཎཏི ཡོ ཧི ཨཔཉྙསཏྟོ;

༨༢.

ཨུམྨཏྟཀཱ ཝིགཏལཛྫགུཎཱ བྷཝནྟི

དཱིནཱ སདཱ ཝྱསནསོཀཔརཱཡཎཱ ཙ,

ཛཱཏཱ བྷཝེསུ ཝིཝིདྷེསུ ཝིརཱུཔདེཧཱ

པཱིཏྭཱ ཧལཱཧལཝིསཾཝ སུརཾ ཝིཔཉྙཱ;

༨༣.

པཱཔཱནི ཡེན ཨིཧ ཨཱཙརིཏཱནི ཡཱནི

ཡོ ཝསྶཀོཊིནཧུཏཱནི ཨནཔྤཀཱནི,

ལདྡྷཱན གྷོརམཏུལཾ ནརཀེསུ དུཀྑཾ

པཔྤོཏི ཙེཏྠ ཝིཝིདྷཝྱསནཉྩ ནེཀཾ;

༨༤. ¶

ལོཀཏྟཡེསུ སཀལེསུ སམཾ ན ཀིཾཙི

ལོཀསྶ སནྟིཀརཎཾ རཏནཏྟཡེན,

ཏཾཏེཛསཱ སུམཧཏཱ ཛིཏསབྦཔཱཔོ

སོཧཾ སདཱདྷིགཏསབྦསུཁོ བྷཝེཡྻཾ;

༨༥.

ལོཀཏྟཡེསུ སཀལེསུ ཙ སབྦསཏྟཱ

མིཏྟཱ ཙ མཛ྄ཛྷརིཔུབནྡྷུཛནཱ ཙ སབྦེ,

ཏེ སབྦདཱ ཝིགཏརོགབྷཡཱ ཝིསོཀཱ

སབྦཾ སུཁཾ ཨདྷིགཏཱ མུདིཏཱ བྷཝནྟུ;

༨༦.

ཀཱཡོ ཀརཱིསབྷརིཏོ ཝིཡ བྷིནྣཀུམྦྷོ

ཀཱཡོ སདཱ ཀལིམལཝྱསནཱདྷིཝཱསོ,

ཀཱཡེ ཝིཧཉྙཏི ཙ སབྦསུཁནྟི ལོཀོ

ཀཱཡོ སདཱ མརཎརོགཛརཱདྷིཝཱསོ;

༨༧. ¶

སོ ཡོབྦནོཏི ཐཝིརོཏི ཙ བཱལཀོཏི

སཏྟེ ན པེཀྑཏི ཝིཧཉྙཏིརེཝ མཙྩུ,

སོཧཾ ཋིཏོཔི སཡིཏོཔི ཙ པཀྐམནྟོ

གཙྪཱམི མཙྩུཝདནཾ ནིཡཏཾ ཏཐཱ ཧི;

༨༨.

ཨེཝཾ ཡཐཱ ཝིཧིཏདོསམིདཾ སརཱིརཾ

ནིཙྩཾཝ ཏགྒཏམནཱ ཧདཡེ ཀརོཐ,

མེཏྟཾ པརིཏྟམསུབྷཾ མརཎསྶཏིཉྩ

བྷཱཝེཐ བྷཱཝནརཏཱ སཏཏཾ ཡཏཏྟཱ;

༨༩.

དཱནཱདི པུཉྙཀིརིཡཱནི སུཁུདྲཡཱནི

ཀཏྭཱ ཙ ཏམྥལམསེས མིཧཔྤམེཡྻཾ,

དེཡྻཾ སདཱ པརཧིཏཱཡ སུཁཱཡ ཙེཝ

ཀིམྦྷོ ཏདེཝ ནནུ ཧཏྠགཏཉྷི སཱརཾ?

༩༠.

ཧེཏུཾ ཝིནཱ ན བྷཝཏཱི ཧི ཙ ཀིཾཙི ལོཀེ

སདྡོཝ པཱཎིཏལགྷཊྚནཧེཏུཛཱཏོ,

ཨེཝཉྩ ཧེཏུཕལ བྷཱཝཝིབྷཱགབྷིནྣོ

ལོཀོ ཨུདེཏི ཙ ཝིནསྶཏི ཏིཊྛཏཱི ཙ;

༩༡. ¶

ཀམྨསྶ ཀཱརཎཱམཡཉྷི ཡཐཱ ཨཝིཛྫཱ

བྷོ ཀམྨནཱ སམདྷིགཙྪཏི ཛཱཏིབྷེདཾ,

ཛཱཏིཾ པཊིཙྩ ཙ ཛརཱམརཎཱདིདུཀྑཾ

སཏྟཱ སདཱ པཊིལབྷནྟི ཨནཱདིཀཱལེ;

༩༢.

ཀམྨཾ ཡཐཱ ན བྷཝཏཱིཧ ཙ མོཧནཱསཱ

ཀམྨཀྑཡཱཔི ཙ ན ཧོཏི བྷཝེསུ ཛཱཏི,

ཛཱཏིཀྑཡཱ ཨིཧ ཛརཱམརཎཱདིདུཀྑཾ

སབྦཀྑཡོ བྷཝཏི དཱིཔེཝཱནིལེན;

༩༣.

ཡོ པསྶཏཱིཧ སཏཏཾ མུནིདྷམྨཀཱཡཾ

བུདྡྷཾ ས པསྶཏི ནརོ ཨིཏི སོ ཨཝོཙ,

བུདྡྷཉྩ དྷམྨམམལཉྩ ཏིལོཀནཱཐཾ

སམྤསྶིཏུཾ ཝིཙིནཐཱ’པི ཙ དྷམྨཏཾ བྷོ;

༩༤. ¶

སལླཾཝ བྷོ སུནིསིཏཾ ཧདཡེ ནིམུགྒཾ

དོསཏྟཡཾ ཝིཝིདྷཔཱཔམལེན ལིཏྟཾ,

ནཱནཱཝིདྷབྱསནབྷཱཛནམཔྤསནྣཾ

པཉྙཱམཡེན བལིསེན ནིརཱཀརོཐ;

༩༥.

ནཱཀམྤཡནྟི སཀལཱཔི ཙ ལོཀདྷམྨཱ

ཙིཏྟཾ སདཱཔགཏཔཱཔཀིལེསསལླཾ,

རཱུཔཱདཡོ ཙ ཝིཝིདྷཱ ཝིསཡཱ སམགྒཱ

ཕུཊྛཾཝ མེརུསིཁརཾ མཧཏཱནིལེན;

༩༦.

སཾསཱརདུཀྑམགཎེཡྻ ཡཐཱ མུནིནྡོ

གམྦྷིརཔཱརམིཏ སཱགརམུཏྟརིཏྭཱ,

ཉེཡྻཾ ཨབོདྷི ནིཔུཎཾ ཧཏམོཧཛཱལོ

ཏསྨཱ སདཱ པརཧིཏཾ པརམཾ ཙིཎཱཐ;

༩༧.

ཨོཧཱཡ སོ’དྷིགཏམོཀྑསུཁཾ པརེསཾ

ཨཏྠཱཡ སཾཙརི བྷཝེསུ མཧབྦྷཡེསུ,

ཨེཝཾ སདཱ པརཧིཏཾ པུརཏོ ཀརིཏྭཱ

དྷམྨོ མཡཱནུཙརིཏོ ཛགདཏྠམེཝ;

༩༨. ¶

ལདྡྷཱན དུལླབྷཏརཉྩ མནུསྶཡོནིཾ

སབྦཾ པཔཉྩརཧིཏཾ ཁཎསམྤདཉྩ,

ཉཏྭཱན ཨཱསཝནུདེཀཧིཏཉྩ དྷམྨཾ

ཀོ པཉྙཝཱ ཨནཝརཾ ན བྷཛེཡྻ དྷམྨཾ?

༩༩.

ལདྡྷཱན བུདྡྷསམཡཾ ཨཏིདུལླབྷཾཙ

སདྡྷམྨ མགྒམསམཾ སིཝདཾ ཏཐེཝ,

ཀལྱཱཎམིཏྟཔཝརེ མཏིསམྤདཉྩ

ཀོ བུདྡྷིམཱ ཨནཝརཾ ན བྷཛེཡྻ དྷམྨཾ?

༡༠༠.

ཨེཝམྤི དུལླབྷཏརཾ ཝིབྷཝེ སུལདྡྷཱ

མཙྪེརདོས ཝིརཏཱ ཨུབྷཡཏྠཀཱམཱ,

སདྡྷཱདིདྷམྨསཧིཏཱ སཏཏཔྤམཏྟཱ

བྷོ! བྷོ! ཀརོཐ ཨམཏཱདྷིགམཱཡ པུཉྙཾ;