📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

དཱིགྷནིཀཱཡེ

མཧཱཝགྒཊཱིཀཱ

༡. མཧཱཔདཱནསུཏྟཝཎྞནཱ

པུབྦེནིཝཱསཔཊིསཾཡུཏྟཀཐཱཝཎྞནཱ

༡. ཡཐཱཛཱཏཱནཾ ¶ ¶ ¶ ཀརེརིརུཀྑཱནཾ གྷནཔཏྟསཱཁཱཝིཊཔེཧི མཎྜཔསངྑེཔེཧི སཉྪནྣོ པདེསོ ‘‘ཀརེརིམཎྜཔོ’’ཏི ཨདྷིཔྤེཏོ. དྭཱརེཏི དྭཱརསམཱིཔེ. དྭཱརེ ཋིཏརུཀྑཝསེན ཨཉྙཏྠཱཔི སམཉྙཱ ཨཏྠཱིཏི དསྶེཏུཾ ‘‘ཡཐཱ’’ཏིཨཱདི ཝུཏྟཾ. ཀཐཾ པན བྷགཝཱ མཧཱགནྡྷཀུཊིཡཾ ཨཝསིཏྭཱ ཏདཱ ཀརེརིཀུཊིཀཱཡཾ ཝིཧཱསཱིཏི? སཱཔི བུདྡྷསྶ བྷགཝཏོ ཝསནགནྡྷཀུཊི ཨེཝཱཏི དསྶེནྟོ ‘‘ཨནྟོཛེཏཝནེ’’ཏིཨཱདིམཱཧ. སལལཱ༹གཱརནྟི དེཝདཱརུརུཀྑེཧི ཀཏགེཧཾ. པཀཏིབྷཏྟསྶ པཙྪཏོཏི བྷིཀྑཱུནཾ པཱཀཏིཀབྷཏྟཀཱལཏོ པཙྪཱ, ཋིཏམཛ྄ཛྷནྷིཀཏོ ཨུཔརཱིཏི ཨཏྠོ. པིཎྜཔཱཏཏོ པཊིཀྐནྟཱནནྟི པིཎྜཔཱཏབྷོཛནཏོ ཨཔེཏཱནཾ. ཏེནཱཧ ‘‘བྷཏྟཀིཙྩ’’ནྟིཨཱདི.

མཎྜལསཎྛཱནཱ ¶ མཱལ༹སངྑེཔེན ཀཏཱ ནིསཱིདནསཱལཱ ‘‘མཎྜལམཱལ༹’’ནྟི ཨདྷིཔྤེཏཱཏི ཨཱཧ ‘‘ནིསཱིདནསཱལཱཡཱ’’ཏི. པུབྦེནིཝཱསཔཊིསཾཡུཏྟཱཏི ཨེཏྠ པུབྦ-སདྡོ ཨཏཱིཏཝིསཡོ, ནིཝཱས-སདྡོ ཀམྨསཱདྷནོ, ཁནྡྷཝིནིམུཏྟོ ཙ ནིཝསིཏདྷམྨོ ནཏྠི, ཁནྡྷཱ ཙ སནྟཱནཝསེནེཝ པཝཏྟནྟཱིཏི ཨཱཧ ‘‘པུབྦེནིཝུཏྠཀྑནྡྷསནྟཱནསངྑཱཏེན པུབྦེནིཝཱསེནཱ’’ཏི. ཡོཛེཏྭཱཏི ¶ ཝིསཡབྷཱཝེན ཡོཛེཏྭཱ. པཝཏྟིཏཱཏི ཀཐིཏཱ. དྷམྨཱུཔསཾཧིཏཏྟཱ དྷམྨཏོ ཨནཔེཏཱཏི དྷམྨཱི. ཏེནཱཧ ‘‘དྷམྨསཾཡུཏྟཱ’’ཏི.

ཨུདཔཱདཱིཏི ¶ པདུདྡྷཱརོ, ཏསྶ ཨུཔྤནྣཱ ཛཱཏཱཏི ཨིམིནཱ སམྦནྡྷོ. ཏཾ པནསྶཱ ཨུཔྤནྣཱཀཱརཾ པཱལི༹ཡཾ སངྑེཔཏོཝ དསྶིཏཾ, ཝིཏྠཱརཏོ དསྶེཏུཾ ‘‘ཨཧོ ཨཙྪརིཡ’’ནྟིཨཱདི ཨཱརདྡྷཾ. ཏཏྠ ཀེ ཨནུསྶརནྟི, ཀེ ནཱནུསྶརནྟཱིཏི པདདྭཡེ པཋམཾཡེཝ སཔྤཔཉྩནཾ, ན ཨིཏརནྟི ཏདེཝ པུགྒལབྷེདཏོ, ཀཱལཝིབྷཱགཏོ, ཨནུསྶརཎཱཀཱརཏོ, ཨོཔམྨཏོ ནིདྡིསནྟེན ‘‘ཏིཏྠིཡཱ ཨནུསྶརནྟཱི’’ཏིཨཱདི ཝུཏྟཾ. ཨགྒཔྤཏྟཀམྨཝཱདིནོཏི སིཁཱཔྤཏྟཀམྨཝཱདིནོ ‘‘ཨཏྠི ཀམྨཾ ཨཏྠི ཀམྨཝིཔཱཀོ’’ཏི (པཊི. མ. ༡.༢༣༤) ཨེཝཾ ཀམྨསྶཀཏཱཉཱཎེ ཋིཏཱ ཏཱཔསཔརིབྦཱཛཀཱ. ཙཏྟཱལཱིསཾཡེཝ ཀཔྤེ ཨནུསྶརནྟཱིཏི བྲཧྨཛཱལཱདཱིསུ (དཱི. ནི. ༡.༣༣) བྷགཝཏཱ ཏཐཱ པརིཙྪིཛྫ ཝུཏྟཏྟཱ. ཏཏོ པརཾ ན ཨནུསྶརནྟཱིཏི ཏཐཱཝཙནཉྩ དིཊྛིགཏོཔཊྛཀསྶ ཏེསཾ ཉཱཎསྶ པརིདུབྦལབྷཱཝཏོ.

སཱཝཀཱཏི མཧཱསཱཝཀཱ ཏེསཉྷི ཀཔྤསཏསཧསྶཾ པུབྦཱབྷིནཱིཧཱརོ. པཀཏིསཱཝཀཱ པན ཏཏོ ཨཱུནཀམེཝ ཨནུསྶརནྟི. ཡསྨཱ ‘‘ཀཔྤཱནཾ ལཀྑཱདྷིཀཾ ཨེཀཾ, དྭེ ཙ ཨསངྑྱེཡྻཱནཱི’’ཏི ཀཱལཝསེན ཨེཝཾ པརིམཱཎོ ཡཐཱཀྐམཾ ཨགྒསཱཝཀཔཙྩེཀབུདྡྷཱནཾ པུཉྙཉཱཎཱབྷིནཱིཧཱརོ, སཱཝཀབོདྷིཔཙྩེཀབོདྷིཔཱརམིཏཱསམྦྷརཎཉྩ, ཏསྨཱ ཝུཏྟཾ ‘‘དྭེ ཨགྒསཱཝཀཱ…པེ… ཀཔྤསཏསཧསྶཉྩཱ’’ཏི. ཡདི བོདྷིསམྦྷཱརསམྦྷརཎཀཱལཔརིཙྪིནྣོ ཏེསཾ ཏེསཾ ཨརིཡཱནཾ ཨབྷིཉྙཱཉཱཎཝིབྷཝོ, ཨེཝཾ སནྟེ བུདྡྷཱནམྤིསྶ སཔརིཙྪེདཏཱ ཨཱཔནྣཱཏི ཙོདནཾ སནྡྷཱཡཱཧ ‘‘བུདྡྷཱནཾ པན ཨེཏྟཀནྟི པརིཙྪེདོ ནཏྠི, ཡཱཝཏཀཾ ཨཱཀངྑནྟི, ཏཱཝཏཀཾ ཨནུསྶརནྟཱི’’ཏི ‘‘ཡཱཝཏཀཾ ནེཡྻཾ, ཏཱཝཏཀཾ ཉཱཎ’’ནྟི (མཧཱནི. ༡༥༦; ཙཱུལ༹ནི. ༨༥; པཊི. མ. ༣, ༥) ཝཙནཏོ. སབྦཉྙུཏཉྙཱཎསྶ ཝིཡ ཧི བུདྡྷཱནཾ ཨབྷིཉྙཱཉཱཎཱནམྤི སཝིསཡེ པརིཙྪེདོ ནཱམ ནཏྠི, ཏསྨཱ ཡཾ ¶ ཡཾ ཉཱཏུཾ ཨིཙྪནྟི, ཏེ ཏཾ ཏཾ ཛཱནནྟི ཨེཝ. ཨཐ ཝཱ སཏིཔི ཀཱལཔརིཙྪེདེ ཀརུཎཱུཔཱཡཀོསལླཔརིགྒཧཱདིནཱ སཱཏིསཡཏྟཱ མཧཱབོདྷིསམྦྷཱརཱནཾ པཉྙཱཔཱརམིཏཱཡ པཝཏྟིཨཱནུབྷཱཝསྶ པརིཙྪེདོ ནཱམ ནཏྠི, ཀུཏོ ཏནྣིམིཏྟཀཱནཾ ཨབྷིཉྙཱཉཱཎཱནནྟི ཝུཏྟཾ ‘‘བུདྡྷཱནཾ…པེ… ནཏྠཱི’’ཏི.

ཁནྡྷཔཊིཔཱཊིཡཱཏི ¶ ¶ ཡཐཱཔཙྩཡཾ ཨནུཔུབྦཔཝཏྟམཱནཱནཾ ཁནྡྷཱནཾ ཨནུཔུབྦིཡཱ. ཁནྡྷཔྤཝཏྟིནྟི ཝེདནཱདིཀྑནྡྷཔྤཝཏྟིཾ. ཏེསཉྷི ཨནུབྷཝནཱདིཨཱཀཱརགྒཧཎམསྶ སཱཏིསཡཾ, ཏཾ སཉྙཱབྷཝེ ཏཏྠ ཏཏྠ ཨནུསྶརཎཝསེན གཧེཏྭཱ གཙྪནྟཱ ཨེཀཝོཀཱརབྷཝེ ཨལབྷནྟཱ ‘‘ན པསྶནྟཱི’’ཏི ཝུཏྟཱ, ཛཱལེ པཏིཏཱ ཝིཡ སཀུཎཱ, མཙྪཱ ཝིཡ ཙཱཏི ཨདྷིཔྤཱཡོ. ཀུཎྛཱ ཝིཡཱཏི དནྡྷཱ ཝིཡ. པངྒུལཱ༹ ཝིཡཱཏི པཱིཋསཔྤིནོ ཝིཡ. དིཊྛིཾ གཎྷནྟཱིཏི ཨདྷིཙྩསམུཔྤནྣིཀདིཊྛིཾ གཎྷནྟི. ཡཊྛིཀོཊིཧེཏུཀཾ གམནཾ ཡཊྛིཀོཊིགམནཾ ཁནྡྷཔཊིཔཱཊིཡཱ ཨམུཉྩནཏོ.

ཨེཝཾ སནྟེཔཱིཏི ཀཱམཾ བུདྡྷསཱཝཀཱཔི ཨསཉྙབྷཝེ ཁནྡྷཔྤཝཏྟིཾ ན པསྶནྟི, ཨེཝཾ སནྟེཔི ཏེ བུདྡྷསཱཝཀཱ ཨསཉྙབྷཝཾ ལངྒྷིཏྭཱ པརཏོ ཨནུསྶརནྟི. ‘‘ཝཊྚེ’’ཏིཨཱདི ཏཐཱ ཏེསཾ ཨནུསྶརཎཱཀཱརདསྶནཾ. བུདྡྷེཧི དིནྣནཡེ ཋཏྭཱཏི ‘‘ཡཏྠ པཉྩཀཔྤསཏཱནི རཱུཔཔྤཝཏྟིཡེཝ, ན ཨརཱུཔཔྤཝཏྟི, སོ ཨསཉྙབྷཝོ’’ཏི ཨེཝཾ སམྨཱསམྦུདྡྷེཧི དེསིཏཱཡཾ དྷམྨནེཏྟིཡཾ ཋཏྭཱ. ཨེཝཉྷི ཨནྟརཱ ཙུཏིཔཊིསནྡྷིཡོ ཨཔསྶནྟཱ པརཏོ ཨནུསྶརནྟི སེཡྻཐཱཔི ཨཱཡསྨཱ སོབྷིཏོཏི (ཐེརགཱ. ཨཊྛ. ༡.༢.༡༦༤ སོབྷིཏཏྠེརགཱཐཱཝཎྞནཱ). སོ ཀིར པུབྦེནིཝཱསེ ཙིཎྞཝསཱི ཧུཏྭཱ ཨནུཔཊིཔཱཊིཡཱ ཨཏྟནོ ནིབྦཏྟཊྛཱནཾ ¶ ཨནུསྶརནྟོ ཡཱཝ ཨསཉྙབྷཝེ ཨཏྟནོ ཨཙིཏྟཀཔཊིསནྡྷི ཏཱཝ ཨདྡས, ཏཏོ པརཾ པཉྩཀཔྤསཏཔརིམཱཎེ ཀཱལེ ཙུཏིཔཊིསནྡྷིཡོ ཨདིསྭཱ ཨཝསཱནེ ཙུཏིཾ དིསྭཱ ‘‘ཀིཾ ནཱམེཏ’’ནྟི ཨཱཝཛྫཡམཱནོ ནཡཝསེན ‘‘ཨསཉྙབྷཝོ བྷཝིསྶཏཱི’’ཏི ནིཊྛཾ ཨགམཱསི. ཨཐ ནཾ བྷགཝཱ ཏཾ ཀཱརཎཾ ཨཊྛུཔྤཏྟིཾ ཀཏྭཱ པུབྦེནིཝཱསཾ ཨནུསྶརནྟཱནཾ ཨགྒཊྛཱནེ ཋཔེསི. ‘‘ཙུཏིཔཊིསནྡྷིཾ ཨོལོཀེཏྭཱ’’ཏི ཨིདཾ ཙུཏིཔཊིསནྡྷིཝསེན ཏེསཾ ཉཱཎསྶ སངྐམནདསྶནཾ, ཏེན སབྦསོ བྷཝེ ཨནཱམསིཏྭཱ གནྟུཾ ན སཀྐོནྟཱིཏི དསྶེཏི.

ཏཾ ཏདེཝ པསྶནྟཱིཏི ཡཐཱ ནཱམ སརདསམཡེ ཋིཏམཛ྄ཛྷནྷིཀཝེལཱཡ ཙཏུརཏནིཀེ གེཧེ ཙཀྑུམཏོ པུརིསསྶ རཱུཔགཏཾ སུཔཱཀཊམེཝ ཧོཏཱིཏི ལོཀསིདྡྷམེཏཾ, སིཡཱ པན ཏསྶ སུཁུམཏརཏིརོཧིཏཱདིབྷེདསྶ རཱུཔགཏསྶ ཨགོཙརཏཱ. ན ཏྭེཝ བུདྡྷཱནཾ ཉཱཏུཾ ཨིཙྪིཏསྶ ཉེཡྻསྶ ཨགོཙརཏཱ, ཨཐ ཁོ ཏཾ ཉཱཎཱལོཀེན ཨོབྷཱསིཏཾ ཧཏྠཏལེ ཨཱམལཀཾ ཝིཡ སུཔཱཀཊཾ སུཝིབྷཱུཏམེཝ ཧོཏི ¶ ཏཐཱ ཉེཡྻཱཝརཎསྶ སུཔྤཧཱིནཏྟཱ. ཏེནཱཧ ‘‘བུདྡྷཱ པན ཨཏྟནཱ ཝཱ པརེཧི ཝཱ དིཊྛཀཏསུཏཾ, སཱུརིཡམཎྜལོབྷཱསསདིས’’ནྟི ཙ ཨཱདི.

ཏཐཱ སཱཝཀཱ ཙ པཙྩེཀབུདྡྷཱ ཙཱཏི. ཨེཏྠ ཏཐཱ-སདྡེན ‘‘ཨཏྟནཱ དིཊྛཀཏསུཏམེཝ ཨནུསྶརནྟཱི’’ཏི ¶ ཨིདཾ ཨུཔསཾཧརཏི, ཏེན སཔྤདེསམེཝ ནེསཾ ཨནུསྶརཎཾ, ན ནིཔྤདེསནྟི ནིདསྶེཏི.

ཁཛྫོཔནཀཨོབྷཱསསདིསཾ ཉཱཎསྶ ཨཏིཝིཡ ཨཔྤཱནུབྷཱཝཏཱཡ. སཱཝཀཱནནྟི ཨེཏྠ པཀཏིསཱཝཀཱནཾ པཱཀཏིཀཔདཱིཔོབྷཱསསདིསཾ. མཧཱསཱཝཀཱནཾ (ཐེརགཱ. ཨཊྛ. ༢.༢༡ ཝངྒཱིསེཏྠརགཱཐཱཝཎྞནཱཡ ཝིཏྠཱརོ) མཧཱཔདཱིཔོབྷཱསསདིསཾ. ཏེནཱཧ ཝིསུདྡྷིམགྒེ (ཝིསུདྡྷི. ༢.༤༠༢) ‘‘ཨུཀྐཱཔབྷཱསདིས’’ནྟི. ཨོསདྷིཏཱརཀོབྷཱསསདིསནྟི ¶ ཨུསྶནྣཱ པབྷཱ ཨེཏཱཡ དྷཱིཡཏི, ཨོསདྷཱིནཾ ཝཱ ཨནུབལཔྤདཱཡཀཏྟཱ ‘‘ཨོསདྷཱི’’ཏི ཨེཝཾ ལདྡྷནཱམཱཡ ཏཱརཀཱཡ པབྷཱསདིསཾ. སརདསཱུརིཡམཎྜལོབྷཱསསདིསཾ སབྦསོ ཨནྡྷཀཱརཝིདྷམནཏོ. ཨཔཊུབྷཱཝཧེཏུཀོ ཝིསཡགྒཧཎེ ཙཉྩལབྷཱཝོ ཁལིཏཾ, ཀུཎྛིབྷཱཝཧེཏུཀོ ཝིསཡསྶ ཨནབྷིསམཡོ པཊིགྷཱཏོ. ཨཱཝཛྫནཔཊིབདྡྷམེཝཱཏི ཨཱཝཛྫནམཏྟཱདྷཱིནཾ, ཨཱཝཛྫིཏམཏྟེ ཨེཝ ཡཐིཙྪིཏསྶ པཊིཝིཛ྄ཛྷནཀནྟི ཨཏྠོ. སེསཔདདྭཡེཔི ཨེསེཝ ནཡོ.

ཨསངྒཨཔྤཊིཧཏཾ པཝཏྟམཱནཾ བྷགཝཏོ ཉཱཎཾ ལཧུཏརེཔི ཝིསཡེ, གརུཏརེ ཙ ཨེཀསདིསམེཝཱཏི དསྶེཏུཾ ‘‘དུབྦལཔཏྟཔུཊེ’’ཏིཨཱདིནཱ ཨུཔམཱདྭཡཾ ཝུཏྟཾ. དྷམྨཀཱཡཏྟཱ བྷགཝཏོ གུཎཾ ཨཱརབྦྷ པཝཏྟཱ ‘‘བྷགཝནྟཾཡེཝ ཨཱརབྦྷ ཨུཔྤནྣཱ’’ཏི ཝུཏྟཾ. ཏཾ སབྦམྤཱིཏི ཏཾ ཡཐཱཝུཏྟཾ སབྦམྤི པུབྦེནིཝཱསཔཊིསཾཡུཏྟཾ ཀཐཾ. ཏིཏྠིཡཱནཾ, སཱཝཀཱནཉྩ པུབྦེནིཝཱསཱནུསྶརཎཾ བྷགཝཏོ པུབྦེནིཝཱསཱནུསྶརཎསྶ ཧཱིནུདཱཧརཎདསྶནཝསེནེཏྠ ཀཐིཏཾ. ཨེཝཉྷི བྷགཝཏོ མཧནྟབྷཱཝོ ཝིསེསཏོ པཀཱསིཏོ ཧོཏཱིཏི. སངྑེཔཏོཏི སམཱསཏོ. ཡཏྟཀོཔི པུབྦེནིཝཱསཱནུསྶཏིཉཱཎསྶ པཝཏྟིབྷེདོ ཨཏྟནོ ཉཱཎསྶ ཝིསཡབྷཱུཏོ, ཏཾ སབྦཾ ཏདཱ ཡཐཱཀཐིཏཾ ཏེ བྷིཀྑཱུ སངྑིཔིཏྭཱ ‘‘ཨིཏིཔཱི’’ཏི ཨཱཧཾསུ. ཏསྶ ཙ ཨནེཀཱཀཱརཏཱཡ ཨཱམེཌིཏཝཙནཾ, པི-སདྡོ སམྤིཎྜནཏྠོ, ‘‘ཨིཏི ཁོ བྷིཀྑཝེ སཔྤཊིབྷཡོ བཱལོ’’ཏིཨཱདཱིསུ (མ. ནི. ༣.༡༢༤; ཨ. ནི. ༣.༡) ཝིཡ ཨཱཀཱརཏྠོ ཨིཏི-སདྡོཏི དསྶེནྟོ ‘‘ཨེཝམྤཱི’’ཏི ཏདཏྠམཱཧ.

༢-༣. ཝུཏྟམེཝཱཏི ¶ ཨེཏྠ ཙ ཨིདྷ པཱཋེ ཡཾ ཝཏྟབྦཾ ཏེན པཱཋེན སཱདྷཱརཎཾ, ཏཾ ཝུཏྟམེཝཱཏི ཨདྷིཔྤེཏཾ, ན ཨསཱདྷཱརཎཾ ཨཔུབྦཔདཝཎྞནཱཡ ཨདྷིཀཏཏྟཱཏི ཏཾ དསྶེནྟོ ¶ ‘‘ཨཡམེཝ ཧི ཝིསེསོ’’ཏིཨཱདིམཱཧ. ‘‘ཨསྶོསཱི’’ཏི ཨིདཾ སཝནཀིཙྩནིཔྥཏྟིཡཱ ཝུཏྟཾ སདྡགྒཧཎམུཁེན ཏདཏྠཱཝབོདྷསྶ སིདྡྷཏྟཱ. ཏཏྠ པན པཱལི༹ཡཾ ‘‘ཨིམཾ སཾཁིཡདྷམྨཾ ཝིདིཏྭཱ’’ ཨིཙྩེཝ (དཱི. ནི. ༡.༢) ཝུཏྟཾ. ཨིམེ བྷིཀྑཱུ མམ གུཎེ ཐོམེནྟི, ཀཐཾ? མམ པུབྦེནིཝཱསཉཱཎཾ ཨཱརབྦྷཱཏི ཡོཛནཱ. ནིཔྥཏྟིནྟི ཀིཙྩནིཔྥཏྟིཾ, ཏེན ཀཱཏབྦཀིཙྩསིདྡྷནྟི ཨཏྠོ. ནོཏི པུཙྪཱཝཱཙཱི ¶ ནུ-ཨིཏི ཨིམིནཱ སམཱནཏྠོ ནིཔཱཏོཏི ཝུཏྟཾ ‘‘ཨིཙྪེཡྻཱཐ ནཱུ’’ཏི. ནནྟི བྷགཝནྟཾ. ‘‘ཡཾ བྷགཝཱ’’ཏི ཨེཏྠ ཡཾ-སདྡེན ཀིརིཡཱཔརཱམསནབྷཱུཏེན ‘‘དྷམྨིཾ ཀཐཾ ཀཐེཡྻཱ’’ཏི ཨེཝཾ ཝུཏྟཾ. དྷམྨིཀཐཱཀརཎཾ པརཱམཊྛཾ ‘‘ཨེཏསྶཱ’’ཏི པདསྶ ཨཏྠོཏི ཨཱཧ ‘‘ཨེཏསྶ དྷམྨིཀཐཱཀརཎསྶཱ’’ཏི, ཨཱདརཝསེན པན ཏཾ དྭིཀྑཏྟུཾ ཝུཏྟཾ.

༤. སུཎཱཐཱཏི ཨེཏྠ ཨིཏི-སདྡོ ཨཱདིཨཏྠོ, པཀཱརཏྠོ ཝཱ, ཨེཏེན ‘‘མནསི ཀརོཐཱ’’ཏི པདཾ སངྒཎྷཱཏི. སོཏཱཝདྷཱནཾ སོཏསྶ ཨོདཧནཾ, སུསྶཱུསཱཏི ཨཏྠོ. ཚིནྣཾ ཨུཔཙྪིནྣཾ ཝཊུམཾ སཾསཱརཝཊྚཾ ཨེཏེསནྟི ཚིནྣཝཊུམཀཱ, སམྨཱསམྦུདྡྷཱ, ཨཉྙེ ཙ ཁཱིཎཱསཝཱ, ཨིདྷ པན སམྨཱསམྦུདྡྷཱ ཨདྷིཔྤེཏཱ. ཏེསཉྷི སབྦསོ ཨནུསྶརཎཾ ཨིཏརེསཾ ཨཝིསཡོ. ཏེནཱཧ ‘‘ཨཉྙེསཾ ཨསཱདྷཱརཎ’’ནྟི. པཙྩཏྟཝཙནེ དིསྶཏི ཡཾ-སདྡོ ཀམྨཏྠདཱིཔནཏོ. ཨུཔཡོགཝཙནེ དིསྶཏི ཡཾ-སདྡོ པུཙྪནཀིརིཡཱཡ ཀམྨཏྠདཱིཔནཏོ. ཏནྟི ཙ ཨུཔཡོགཝཙནམེཝ པུཙྪཏི-སདྡསྶ དྭིཀམྨཀབྷཱཝཏོ. ཡནྟི ཡེན ཀཱརཎེནཱཏི ཨཡམེཏྠ ཨཏྠོཏི ཨཱཧ ‘‘ཀརཎཝཙནེ དིསྶཏཱི’’ཏི. བྷུམྨེཏི དཊྛབྦོཏི ཡཐཱ ཡཾ-སདྡོ ན ཀེཝལཾ པཙྩཏྟཨུཔཡོགེསུ ཨེཝ, ཨཐ ཁོ ཀརཎེཔི དིསྶཏི, ཨེཝཾ ཨིདྷ བྷུམྨེཏི དཊྛབྦོ. དསསཧསྶིལོཀདྷཱཏུནྟི ཛཱཏིཀྑེཏྟབྷཱུཏཾ དསསཧསྶཙཀྐཝཱལ༹ཾ. ཨུནྣཱདེནྟོ ཨུཔྤཛྫི ¶ ཨནེཀཙྪརིཡཔཱཏུབྷཱཝཔཊིམཎྜིཏཏྟཱ བུདྡྷུཔྤཱདསྶ.

ཀཱལསྶ བྷདྡཏཱ ནཱམ ཏཏྠ སཏྟཱནཾ གུཎཝིབྷཱུཏིཡཱ, བུདྡྷུཔྤཱདཔརམཱ ཙ གུཎཝིབྷཱུཏཱིཏི ཏབྦཧུལཏཱ ཡསྶ ཀཔྤསྶ བྷདྡཏཱཏི ཨཱཧ ‘‘པཉྩབུདྡྷུཔྤཱདཔཊིམཎྜིཏཏྟཱ སུནྡརཀཔྤེ’’ཏི, ཏཐཱ སཱརབྷཱུཏགུཎཝསེན ‘‘སཱརཀཔྤེ’’ཏི ¶ . ‘‘ཨིམཾ ཀཔྤཾ ཐོམེནྟོ ཨེཝམཱཧཱ’’ཏི ཝཏྭཱ ཨིམསྶ ཀཔྤསྶ ཏཐཱ ཐོམེཏབྦཏཱ ཨནཉྙསཱདྷཱརཎཱཏི དསྶེཏུཾ ‘‘ཡཏོ པཊྛཱཡཱ’’ཏིཨཱདི ཝུཏྟཾ. ཏཏྠ ཡཏོ པཊྛཱཡཱཏི ཡཏོ པབྷུཏི ཨབྷིནཱིཧཱརོ ཀཏོཏི མནུསྶཏྟཱདིཨཊྛངྒསམནྣཱགཏོ ཨབྷིནཱིཧཱརོ པཝཏྟིཏོ. སཾསཱརསྶ ཨནཱདིབྷཱཝཏོ ཨིམསྶ བྷགཝཏོ ཨབྷིནཱིཧཱརཏོ པུརེཏརཾ ཨུཔྤནྣཱ སམྨཱསམྦུདྡྷཱ ཨནནྟཱ ཨཔརིམེཡྻཱཏི ཏེཧི ཨུཔྤནྣཀཔྤེ ནིཝཏྟེནྟོ ‘‘ཨེཏསྨིཾ ཨནྟརེ’’ཏི ཨཱཧ. ཀཱམཾ དཱིཔངྐརབུདྡྷུཔྤཱདེ ཨཡཾ བྷགཝཱ ཨབྷིནཱིཧཱརམཀཱསི, ཏསྶ པན བྷགཝཏོ ནིབྦཏྟི ཨིམསྶ ཨབྷིནཱིཧཱརཏོ པུརིམཏརཱཏི ཝུཏྟཾ ‘‘ཨམྷཱཀཾ…པེ… ནིབྦཏྟིཾསཱུ’’ཏི.

ཨསངྑྱེཡྻཀཔྤཔརིཡོསཱནེཏི མཧཱཀཔྤཱནཾ ཨསངྑྱེཡྻཔརིཡོསཱནེ. ཨེས ནཡོ ཨིཏོ པརེསུཔི. ‘‘ཨིཏོ ཏིཾསཀཔྤསཧསྶཱནཾ ཨུཔརཱི’’ཏི ཨེཏེན པདུམུཏྟརསྶ བྷགཝཏོ, སུམེདྷསྶ ཙ བྷགཝཏོ ཨནྟརེ ཨེཀཱུནསཏྟཏིཀཔྤསཧསྶཱནི བུདྡྷསུཉྙཱནི ཨཧེསུནྟི དསྶེཏི. ‘‘ཨིཏོ ཨཊྛཱརསནྣཾ ཀཔྤསཧསྶཱནཾ ཨུཔརཱི’’ཏི ཨིམིནཱ སུཛཱཏསྶ བྷགཝཏོ, ཨཏྠདསྶིསྶ ཙ བྷགཝཏོ ཨནྟརེ ¶ ཨེཀེནཱུནཱནི དྭཱདསཀཔྤསཧསྶཱནི བུདྡྷསུཉྙཱནི ཨཧེསུནྟི དསྶེཏི. ‘‘ཨིཏོ ཙཏུནཝུཏེ ཀཔྤེ’’ཏི ཨིམིནཱ དྷམྨདསྶིསྶ བྷགཝཏོ, སིདྡྷཏྠསྶ ཙ བྷགཝཏོ ཨནྟརེ ཚཱདྷིཀནཝསཏུཏྟརཱནི སཏྟརསཀཔྤསཧསྶཱནི བུདྡྷསུཉྙཱནི ཨཧེསུནྟི དསྶེཏི. ‘‘ཨེཀཏིཾསེ ཀཔྤེ’’ཏི ཨིམིནཱ ཝིཔསྶིསྶ བྷགཝཏོ, སིཁིསྶ ཙ བྷགཝཏོ ཨནྟརེ སཊྛི ཀཔྤཱནི བུདྡྷསུཉྙཱནི ཨཧེསུནྟི དསྶེཏི. ཏེ སབྦེཔི པདུམུཏྟརསྶ བྷགཝཏོ ཨོརཾ སུམེདྷཱདཱིཧི ཨུཔྤནྣཀཔྤེཧི སདྡྷིཾ སམོདྷཱནིཡམཱནཱ སཏསཧསྶཱ ཀཔྤཱ ཧོནྟི, ཡཏྠ མཧཱསཱཝཀཱདཡོ (ཐེརགཱ. ཨཊྛ. ༢.༢༡ ཝངྒཱིསཏྠེརགཱཐཱཝཎྞནཱ) ཝིཝཊྚཱུ པནིསྶཡཱནི ¶ ཀུསལཱནི སམྦྷརིཾསུ. བུདྡྷསུཉྙེཔི ལོཀེ པཙྩེཀབུདྡྷཱ ཨུཔྤཛྫིཏྭཱ ཏེསཾ པུརིསཝིསེསཱནཾ པུཉྙཱབྷིསནྡཱབྷིབུདྡྷིཡཱ པཙྩཡཱ ཧོནྟི. ‘‘ཨེཝམཡ’’ནྟིཨཱདི ཝུཏྟམེཝཏྠཾ ནིགམནཝསེན ཝདཏི.

‘‘ཀིཾ པནེཏ’’ནྟིཨཱདི པུབྦནིམིཏྟཝིབྷཱཝནཏྠཱཡ ཨཱརདྡྷཾ. ཏཏྠ ཨེཏནྟི བུདྡྷཱནཾ ཨུཔྤཛྫནཾ. ཀཔྤསཎྛཱནཀཱལསྨིནྟི ཝིཝཊྚཀཔྤསྶ སཎྛཧནཀཱལེ. ཨེཀམསངྑྱེཡྻནྟི སཾཝཊྚཊྛཱཡིཾ སནྡྷཱཡཱཧ. ཨེཀངྒཎཾ ཧུཏྭཱ ཋིཏེཏི པབྦཏརུཀྑགཙྪཱདཱིནཾ, མེགྷཱདཱིནཉྩ ཨབྷཱཝེན ཝིཝཊཾཨངྒཎཾ ཧུཏྭཱ ཋིཏེ. ལོཀསནྣིཝཱསེཏི ¶ བྷཱཛནལོཀེན སནྣིཝིསིཏབྦཊྛཱནེ. ཝཱིསཏི ཡཊྛིཡོ ཨུསབྷཾ. ‘‘ཨུསབྷམཏྟཱ, དྭེ ཨུསབྷམཏྟཱ’’ཏིཨཱདིནཱ པཙྩེཀཾ མཏྟཱ-སདྡོ ཡོཛེཏབྦོ. ཡོཛནསཧསྶམཏྟཱ ཧུཏྭཱཏི པཏམཱནཱཝ ཨུདཀདྷཱརཱ ཡོཛནསཧསྶམཏྟཾ ཨཱཀཱསཊྛཱནཾ ཕརིཏྭཱ པཝཏྟིཡཱ ཡོཛནསཧསྶམཏྟཱ ཧུཏྭཱ. ཡཱཝ ཨཝིནཊྛབྲཧྨལོཀཱཏི ཡཱཝ ཨཱབྷསྶརབྲཧྨལོཀཱ, ཡཱཝ སུབྷཀིཎྷབྲཧྨལོཀཱ, ཡཱཝ ཝེཧཔྥལབྲཧྨལོཀཱཏི ཨཏྠོ.

ཝཱཏཝསེནཱཏི སཊྛིསཧསྶཱདྷིཀནཝཡོཛནསཏསཧསྶུབྦེདྷསྶ སནྡྷཱརཀཝཱཏམཎྜལསྶ ཝསེན. མཧཱབོདྷིཔལླངྐོཏི མཧཱབོདྷིཔལླངྐཔྤདེསམཱཧ. ཏསྶ པཙྪཱ ཝིནཱསོ, པཋམཾ སཎྛཧནཉྩ དྷམྨཏཱཝསེན ཝེདིཏབྦཾ. ཏཏྠཱཏི ཏསྨིཾ པདེསེ. པུབྦནིམིཏྟཾ ཧུཏྭཱཏི བུདྡྷཔྤཱདསྶ པུབྦནིམིཏྟཾ ཧུཏྭཱ. པུབྦནིམིཏྟསནྣིསྶཡོ ཧི གཙྪོ ནིསྶིཏཝོཧཱརེན ཏཐཱ ཝུཏྟོ. ཏེནཱཧ ‘‘ཏསྶཱ’’ཏིཨཱདི. ཀཎྞིཀཱབདྡྷཱནི ཧུཏྭཱཏི ཨཱབདྡྷཀཎྞིཀཱ ཝིཡ ཧུཏྭཱ. སུདྡྷཱཝཱསབྲཧྨཱནོ ཨཏྟམནཱ…པེ… གཙྪནྟཱིཏི ཡོཛནཱ. ཝེཧཔྥལེཔི སུབྷཀིཎྷེ སངྒཧེཏྭཱ ‘‘ནཝ བྲཧྨལོཀཱ’’ཏི ཝུཏྟཾ. ཏཐཱ ཧི ཏེ ¶ ཙཏུཏྠིཾཡེཝ ཝིཉྙཱཎཊྛིཏིཾ བྷཛནྟི. ནིཀྑམནྟེསཱུཏི མཧཱབྷིནིཀྑམནཾ ཨབྷིནིཀྑམནྟེསུ. ཨབྷིཛཱཏི པནེཏྠ ཛཱཏིབྷཱཝསཱམཉྙེན གབྦྷོཀྐནྟིཡཱཝ སངྒཧིཏཱ. ནིམཱིཡཏི ཨནུམཱིཡཏི ཕལཾ ཨེཏེནཱཏི ནིམིཏྟཾ, ཀཱརཎཾ. ཉཱཔཀམྤི ཧི ཀཱརཎཾ དིསྭཱ ཏསྶ ཨབྱབྷིཙཱརཱིབྷཱཝེན ཕལཾ སིདྡྷམེཝ ཀཏྭཱ གཎྷི, ཡཐཱ ཏཾ ཨསིཏོ ཨིསི ཨབྷིཛཱཏིཡཾ མཧཱཔུརིསསྶ ལཀྑཎཱནི དིསྭཱ ཏེསཾ ཨབྱབྷིཙཱརཱིབྷཱཝེན བུདྡྷགུཎེ སིདྡྷེ ཨེཝ ཀཏྭཱ གཎྷི, ཨེཝཾ ¶ པན གཡ྄ཧམཱནཾ ཏནྣིམིཏྟཀཾ ཕལཾ ཏདཱནུབྷཱཝེན སིདྡྷཾ ཝིཡ ཝོཧརཱིཡཏི ཏབྦྷཱཝེ བྷཱཝཏོ. ཏེནཱཧ ‘‘ཏེསཾ ནིམིཏྟཱནཾ ཨཱནུབྷཱཝེནཱ’’ཏིཨཱདི. ཏཐཱ ཙཱཧ བྷགཝཱ ‘‘སོ ཏེན ལཀྑཎེན སམནྣཱགཏོ…པེ… རཱཛཱ སམཱནོ ཀིཾ ལབྷཏི, བུདྡྷོ སམཱནོ ཀིཾ ལབྷཏཱི’’ཏི (དཱི. ནི. ༣.༢༠༢, ༢༠༤) ཙ ཨེཝམཱདི. ཨིམམཏྠནྟི པཉྩ བུདྡྷཱ ཨིམསྨིཾ ཀཔྤེ ཨུཔྤཛྫིསྶནྟཱིཏི ཨིམམཏྠཾ ཡཱཐཱཝཏོ ཛཱནིཾསུ.

ཛཱཏིཔརིཙྪེདཱདིཝཎྞནཱ

༥-༧. ཀཔྤཔརིཙྪེདཝསེནཱཏི ¶ ‘‘ཨིཏོ སོ ཨེཀནཝུཏེ ཀཔྤེ’’ཏིཨཱདིནཱ ཡཏྠ ཡཏྠ ཀཔྤེ ཏེ ཏེ བུདྡྷཱ ཨུཔྤནྣཱ, ཏསྶ ཏསྶ ཀཔྤསྶ པརིཙྪིནྡནཝསེན པརིཛཱནནཝསེན. ‘‘ཨིདཾ ཏ’’ནྟི ཧི ནིཡམེཏྭཱ པརིཙྪིཛྫ ཛཱནནཾ པརིཙྪིནྡནཾ པརིཙྪེདོ. པརིཏྟནྟི ཨིཏྟརཾ. ལཧུཀནྟི སལླཧུཀཾ, ཨཱཡུནོ ཨདྷིཔྤེཏཏྟཱ རསྶནྟི ཝུཏྟཾ ཧོཏི. ཏེནཱཧ ‘‘ཨུབྷཡམེཏཾ ཨཔྤཀསྶེཝ ཝེཝཙན’’ནྟི.

‘‘ཨཔྤཾ ཝཱ བྷིཡྻོ’’ཏི ཨཝིསེསཛོཏནཾ ‘‘ཝཱིསཾ ཝཱ ཏིཾསཾ ཝཱ’’ཏིཨཱདིནཱ ཨནིཡམིཏཝསེནེཝ ཡཐཱལཱབྷཏོ ¶ ཝཝཏྠཔེཏྭཱ ཨཡཉྩ ནཡོ ཨཔཙུརོཏི དསྶེནྟོ ‘‘ཨེཝཾ དཱིགྷཱཡུཀོ པན ཨཏིདུལླབྷོ’’ཏི ཨཱཧ. ཨིདཾ ཏཾ ཝིསེསཝཝཏྠཱཔནཾ པུགྒལེསུ པཀྑིཔིཏྭཱ དསྶེནྟོ ‘‘ཏཏྠ ཝིསཱཁཱ’’ཏིཨཱདིམཱཧ.

ཡདི ཨེཝཾ ཀསྨཱ ཨམྷཱཀཾ བྷགཝཱ ཏཏྟཀམྤི ཀཱལཾ ན ཛཱིཝི, ནནུ མཧཱབོདྷིསཏྟཱ ཙརིམབྷཝེ ཨཏིཝིཡཨུལཱ༹རཏམེན པུཉྙཱབྷིསངྑཱརེན པཊིསནྡྷིཾ གཎྷནྟཱིཏི? སཙྩམེཏནྟི. ཏཏྠ ཀཱརཎཾ དསྶེཏུཾ ‘‘ཝིཔསྶཱིཨཱདཡོ པནཱ’’ཏིཨཱདི ཝུཏྟཾ. ཏཏྠ ཨབྷིཛཱཏིཡཱ མེཏྟཱཋཱནཏཱཡ ཨབྷིསངྑཱརཝིཉྙཱཎསྶ མེཏྟཱཔུབྦབྷཱགཏཱ. ཏདནུགུཎཉྷི ཏེསཾ ཝིསེསཏོ པཊིསནྡྷིཝིཉྙཱཎཾ. ཏསྶ ཝིསེསཏོ བཧུལཾ ཁེམཝིཏཀྐཱུཔནིསྶཡཏཱཡ སོམནསྶསཧགཏཏཱ, ཨནཉྙསཱདྷཱརཎཔརོཔདེསརཧིཏཉཱཎཝིསེསཱུཔནིསྶཡཏཱཡ ཉཱཎསམྤཡུཏྟཏཱ, ཨསངྑཱརིཀཏཱ ཙ ཝེདིཏབྦཱ, ཨསངྑྱེཡྻཾ ཨཱཡུ ཨཱདྷཱརཝིསེསཏོ, ནིསྶཡཝིསེསཏོ, པཊིཔཀྑདཱུརཱིབྷཱཝཏོ, པཝཏྟིཨཱཀཱརཝིསེསཏོ ཙ ཨཔརིམེཡྻཱནུབྷཱཝཏཱཡ ཀཱརཎསྶ. ཏཏྠ ཙིརཏརཾ ཀཱལཾ སནྟཱནསྶ པཱརམིཏཱཔརིབྷཱཝིཏཏཱ ཨཱདྷཱརཝིསེསཏཱ. ཨལོབྷཛ྄ཛྷཱསཡཱདིཨཱསཡསམྤདཱ ནིསྶཡཝིསེསཏཱ. ལཱབྷམཙྪརིཡཱདིཔཱཔདྷམྨཝིཀྑམྦྷནཾ པཊིཔཀྑདཱུརཱིབྷཱཝོ. སབྦསཏྟཱནཾ སཀལཝཊྚདུཀྑནིསྶརཎཏྠཱཡ ཨཱཡཱུཧནཱ པཝཏྟིཨཱཀཱརཝིསེསོ ཝེདིཏབྦོ.

ཨཡཉྩ ¶ ནཡོ སབྦེསཾ མཧཱབོདྷིསཏྟཱནཾ ཙརིམབྷཝཱབྷིནིབྦཏྟཀཀམྨཱཡཱུཧནེ སཱདྷཱརཎོཏི ཏསྶ ཕལེནཱཔི ཨེཀསདིསེནེཝ བྷཝིཏབྦནྟི ¶ ཨཱཧ ‘‘ཨིཏི སབྦེ བུདྡྷཱ ཨསངྑྱེཡྻཱཡུཀཱ’’ཏི, ཨསངྑྱེཡྻཀཱལཱཝཏྠཱནཱཡུཀཱཏི ཨཏྠོ. ཨསངྑྱེཡྻཱཡུཀསཾཝཏྟནསམཏྠཾ པརིཙིཏཾ ཀམྨཾ ཧོཏི, བུདྡྷཱ པན ཏདཱ མནུསྶཱནཾ ¶ པརམཱཡུཔྤམཱཎཱནུརཱུཔམེཝ ཀཱལཾ ཋཏྭཱ པརིནིབྦཱཡནྟི ཏཏོ པརཾ ཋཏྭཱ སཱདྷེཏབྦཔཡོཛནཱབྷཱཝཏོ, དྷམྨཏཱཝེསཱཏི ཝཱ ཝེདིཏབྦཱ. ཨཊྛཀཐཱཡཾ པན ཏཏོ པརཾ པན ཨཊྛཱནསྶ ‘‘ཨུཏུབྷོཛནཝིཔཏྟིཡཱ’’ཏི (དཱི. ནི. ཨཊྛ. ༢.༥) ཀཱརཎཾ ཝུཏྟཾ, ‘‘ཏཾ ལོཀསཱདྷཱརཎཾ ལོཀེ ཛཱཏསཾཝུདྡྷཱནཾ ཏཐཱགཏཱནཾ ན ཧོཏཱི’’ཏི ན སཀྐཱ ཝཏྟུཾ. ཏཐཱ ཧི ནེསཾ རོགཀིལམཐཱདཡོ ཧོནྟིཡེཝ. ཨུཏུབྷོཛནཝསེནཱཏི ཨསམྤནྣསྶ, སམྤནྣསྶ ཙ ཨུཏུནོ, བྷོཛནསྶ ཙ ཝསེན ཡཐཱཀྐམཾ ཨཱཡུ ཧཱཡཏིཔི ཝཌྜྷཏིཔི. ཨཱཡཱུཏི ཙ པརམཱཡུ ཨདྷིཔྤེཏཾ. ཏཏྠ ཡཾ ཝཏྟབྦཾ, ཏཾ བྲཧྨཛཱལཱདིཊཱིཀཱཡཾ (དཱི. ནི. ཊཱི. ༡.༤༠) ཝུཏྟམེཝ.

ཨིདཱནི ཏམཏྠཾ སམུདཱགམཏོ པཊྛཱཡ དསྶེཏུཾ ‘‘ཏཏྠ ཡདཱ’’ཏིཨཱདི ཝུཏྟཾ. དྷམྨེ ནིཡུཏྟཱ དྷམྨིཀཱ, ན དྷམྨིཀཱ ཨདྷམྨིཀཱ, ཧིཾསཱདིཨདྷམྨཔསུཏཱ. ཨདྷམྨིཀམེཝ ཧོཏི ཨིསྶརཛནཱནཾ ཨནུཝཏྟནེན, པརེསཾ དིཊྛཱནུགཏིཨཱཔཛྫནེན ཙ. ཨུཎྷཝལཱཧཀཱ དེཝཏཱཏི ཨུཎྷཨུཏུནོ པཙྩཡབྷཱུཏམེགྷམཱལཱསམུཊྛཱཔཀཱ དེཝཔུཏྟཱ. ཏེསཾ ཀིར ཏཐཱ ཙིཏྟུཔྤཱདསམཀཱལམེཝ ཡཐིཙྪིཏཊྛཱནཾ ཨུཎྷཾ ཕརམཱནཱ ཝལཱཧཀམཱལཱ ནཱཏིབཧལཱ ཨིཏོ ཙིཏོ ནབྷཾ ཚཱདེནྟཱི ཝིཏནོཏི. ཨེས ནཡོ སཱིཏཝལཱཧཀཝསྶཝལཱཧཀཱསུ. ཨབྦྷཝལཱཧཀཱ པན དེཝཏཱ སཱིཏུཎྷཝསྶེཧི ཝིནཱ ཀེཝལཾ ཨབྦྷཔཊལསྶེཝ སམུཊྛཱཔཀཱ ཝེདིཏབྦཱ. ཏཱསནྟི ཨེཏྠ ‘‘མིཏྟཱ’’ཏི པདཾ ཨཱནེཏྭཱ ཡོཛནཱ. ཀཱམཾ ཧེཊྛཱ ཝུཏྟཱ སཏྟཝིདྷཱཔི དེཝཏཱ ཙཱཏུམཧཱརཱཛིཀཱཝ ཏཱ པན ཏེན ཏེན ཝིསེསེན ཝཏྭཱ ཨིདཱནི ཏདཉྙེ པཋམབྷཱུམིཀེ ཀཱམཱཝཙརདེཝེ སཱམཉྙཏོ གཎྷནྟོ ‘‘ཙཱཏུམཧཱརཱཛིཀཱ’’ཏི ཨཱཧ. ཏཱསཾ ཨདྷམྨིཀཏཱཡཱཏི རཱཛཱུནཾ ཨདྷམྨིཀབྷཱཝམཱུལཀེན ཨུཔརཱཛཱདིཨདྷམྨིཀབྷཱཝཔརམྤརཱབྷཏེན ཏཱསཾ དེཝཏཱནཾ ཨདྷམྨིཀབྷཱཝེན. ཝིསམཾ ཙནྡིམསཱུརིཡཱ པརིཧརནྟཱིཏི ¶ བཧྭཱབཱདྷཏཱདི ཨནིཊྛཕལཱུཔནིསྶཡབྷཱུཏསྶ ཡཐཱཝུཏྟཨདྷམྨིཀཏཱསཉྙིཏསྶ སཱདྷཱརཎསྶ པཱཔཀམྨསྶ བལེན ཝིསམཾ ཝཱཡནྟེན ཝཱཡུནཱ པཱིལི༹ཡམཱནཱ ཙནྡིམསཱུརིཡཱ སིནེརུཾ པརིཀྑིཔནྟཱ ཝིསམཾ པརིཝཏྟནྟི ཡཐཱམགྒེན ནཔྤཝཏྟནྟཱིཏི ¶ . ཨསྶིདཾ ཡཐཱ ཙནྡིམསཱུརིཡཱནཾ ཝིསམཔརིཝཏྟནཾ ཝིསམཝཱཏསངྑོབྷཧེཏུཀཾ, ཨེཝཾ ཨུཏུཝསྶཱདིཝིསམཔྤཝཏྟཱིཏི དསྶེཏུཾ ‘‘ཝཱཏོ ཡཐཱམགྒེན ན ཝཱཡཏཱི’’ཏིཨཱདི ཝུཏྟཾ. དེཝཏཱནནྟི སཱིཏཝལཱཧཀདེཝཏཱདིདེཝཏཱནཾ. ཏེནཱཧ ‘‘སཱིཏུཎྷབྷེདོ ཨུཏཱུ’’ཏིཨཱདི. ཏསྨིཾ ཨསམྤཛྫནྟེཏི ཏསྨིཾ ཡཐཱཝུཏྟེ ཝསྶབཱིཛབྷཱུཏེ ཨུཏུམྷི ཡཐཱཀཱལཾ སམྤཏྟིཾ ཨནུཔགཙྪནྟེ.

‘‘ན ¶ སམྨཱ དེཝོ ཝསྶཏཱི’’ཏི སངྑེཔཏོ ཝུཏྟམཏྠཾ ཝིཝརནྟོ ‘‘ཀདཱཙཱི’’ཏིཨཱདིམཱཧ. ཏཏྠ ཀདཱཙི ཝསྶཏཱིཏི ཀདཱཙི ཨཝསྶནཀཱལེ ཝསྶཏི. ཀདཱཙི ན ཝསྶཏཱིཏི ཀདཱཙི ཝསྶིཏབྦཀཱལེ ན ཝསྶཏི. ཀཏྠཙི ཝསྶཏི, ཀཏྠཙི ན ཝསྶཏཱིཏི པདེསམཱཧ. ‘‘ཝསྶནྟོཔཱི’’ཏིཨཱདི ‘‘ཀདཱཙི ཝསྶཏི, ཀདཱཙི ན ཝསྶཏཱི’’ཏི པདདྭཡསྶེཝ ཨཏྠཝིཝརཎཾ. ཝིགཏགནྡྷཝཎྞརསཱདཱིཏི ཨཱདི-སདྡེན ནིརོཛཏཾ སངྒཎྷཱཏི. ཨེཀསྨིཾ པདེསེཏི བྷཏྟཔཙནབྷཱཛནསྶ ཨེཀཔསྶེ. ཨུཏྟཎྜུལནྟི པཱཀཏོ ཨུཀྐནྟཏཎྜུལཾ. ཏཱིཧཱཀཱརེཧཱིཏི སབྦསོ ཨཔརིཎཏཾ, ཨེཀདེསེན པརིཎཏཾ, དུཔརིཎཏཉྩཱཏི ཨེཝཾ ཏཱིཧཱཀཱརེཧི. པཙྩཏི པཀྐཱསཡཾ ཨུཔགཙྪཏི. ཨཔྤཱཡུཀཱཏི ཨེཏྠ ‘‘དུབྦཎྞཱ ཙཱ’’ཏིཔི ཝཏྟབྦཾ. ཨེཝཾ ཨུཏུབྷོཛནཝསེན ཨཱཡུ ཧཱཡཏི ཧེཏུམྷི ཨཔརིཀྑཱིཎེཔི པཙྩཡསྶ པརིདུབྦལཏྟཱ.

‘‘ཡདཱ པནཱ’’ཏིཨཱདི སུཀྐཔཀྑསྶ ཨཏྠོ ཝུཏྟཝིཔརིཡཱཡེན ཝེདིཏབྦོ.

ཝཌྜྷིཏྭཱ ¶ ཝཌྜྷིཏྭཱ པརིཧཱིནནྟི ཝེདིཏབྦཾ. ཀསྨཱ? ན ཧི ཨེཀསྨིཾ ཨནྟརཀཔྤེ ཨནེཀེ བུདྡྷཱ ཨུཔྤཛྫནྟི, ཨེཀོ ཨེཝ པན ཨུཔྤཛྫཏཱིཏི. ཨིདཱནི ཏམཏྠཾ ཝིཏྠཱརཏོ དསྶེཏུཾ ‘‘ཀཐ’’ནྟིཨཱདི ཝུཏྟཾ. ཙཏྟཱརི ཋཏྭཱཏི ཨཙྩནྟསཾཡོགེ ཨུཔཡོགཝཙནཾ. ཡཾཡཾཨཱཡུཔརིམཱཎེསཱུཏི ཡཏྟཀཡཏྟཀཔརམཱཡུཔྤམཱཎེསུ. ཏེསམྤཱིཏི བུདྡྷཱནཾ. ཏཾ ཏདེཝ ཨཱཡུཔརིམཱཎཾ ཧོཏི, ཏཏྠ ཀཱརཎཾ ཧེཊྛཱ ཝུཏྟམེཝ.

ཛཱཏིཔརིཙྪེདཱདིཝཎྞནཱ ནིཊྛིཏཱ

བོདྷིཔརིཙྪེདཝཎྞནཱ

༨. མཱུལེཏི ¶ མཱུལཱཝཡཝསྶ སམཱིཔེ. ཏཾ པན ཏསྶཱ ཧེཊྛཱཔདེསོ ཧོཏཱིཏི ཨཱཧ ‘‘པཱཊལིརུཀྑསྶ ཧེཊྛཱ’’ཏི. ཏཾདིཝསནྟི ཨཏྟནཱ ཛཱཏདིཝསེ, ཏཾདིཝསནྟི ཝཱ ཏཾ བྷགཝཏོ ཨབྷིསམྦོདྷིདིཝསེ. སོ ཀིར བོདྷིརུཀྑོ སཱལཀལྱཱཎཱི ཝིཡ པཐཝིཡཱ ཨབྦྷནྟརེ ཨེཝ པུརེཏརཾ ཝཌྜྷེནྟོ ཨབྷིསམྦོདྷིདིཝསེ པཐཝིཾ ཨུབྦྷིཛྫིཏྭཱ ཨུཊྛིཏོ རཏནསཏཾ ཨུཙྩོ, ཏཱཝདེཝ ཙ ཝིཏྠཏོ ཧུཏྭཱ ནབྷཾ པཱུརེནྟོ ཨཊྛཱསི. ཨཡམྤི ཀིརེཏསྶ རུཀྑབྷཱཝེན ཝིཡ ཨཉྙེཧི ཝེམཏྟཏཱ. གྷནསཾཧཏནཱལ༹ཝཎྚཏཱཡ ཀཎྞིཀབདྡྷེཧི ཝིཡ པུཔྥེཧི. ཨེཀསཉྪནྣཱཏི པུཔྥཱནཾ ནིརནྟརཏཱཡ ¶ ཨེཀཛ྄ཛྷཾ སཉྪནྣཱ, ཏཏྠ ཏཏྠ ནིབདྡྷ…པེ… སམུཛྫལནྟི ཏཧཾ ཏཧཾ ཨོལམྦིཏཀུསུམདཱམེཧི ཙེཝ ཏཧཾ ཏཧཾ ཁིཏྟམཱལཱཔིཎྜཱིཧི ཙ ཨིཏོ ཙིཏོ ཝིཔྤཀིཎྞཝིཝིདྷཝཎྚམུཏྟཔུཔྥེཧི ཙ སམྨདེཝ ཨུཛྫལཾ. ཨཉྙམཉྙཾ སིརཱིསམྤཏྟཱནཱིཏི ཨཉྙམཉྙསྶ སིརིཡཱ སོབྷཱཡ སམྤནྣཱནི. བུདྡྷགུཎཝིབྷཝསིརིནྟི སམྨཱསམྦུདྡྷེཧི ཨབྷིགནྟབྦགུཎཝིབྷཱུཏིསོབྷཾ. པཊིཝིཛ྄ཛྷམཱནོཏི ཨདྷིགཙྪནྟོ.

སེཏམྦརུཀྑོཏི སེཏཝཎྞཕལོ ཨམྦརུཀྑོ. ཏདེཝཱཏི ¶ པཱཊལིཡཱ ཝུཏྟཔྤམཱཎམེཝ. ཨེཀཏོཏི ཨེཀཔསྶེ. སུརསཱནཱིཏི སུམདྷུརརསཱནི.

ཨེཀོཝ པལླངྐོཏི ཨེཀོཝ པལླངྐཔྤདེསོ. སོ སོ རུཀྑོ ‘‘བོདྷཱི’’ཏི ཝུཙྩཏི བུཛ྄ཛྷནྟི ཨེཏྠཱཏི ཀཏྭཱ.

སཱཝཀཡུགཔརིཙྪེདཝཎྞནཱ

༩. སཱཝཀཔརིཙྪེདེཏི སཱཝཀཡུགཔརིཙྪེདེ. ‘‘ཁཎྜཏིསྶ’’ནྟི དྭེཔི ཨེཀཛ྄ཛྷཾ གཧེཏྭཱ ཨེཀཏྟཝསེན ཝུཏྟནྟི ཨཱཧ ‘‘ཁཎྜོ ཙ ཏིསྶོ ཙཱ’’ཏི, བུདྡྷཱནཾ སཧོདརོ, ཝེམཱཏིཀོཔི ཝཱ ཛེཊྛབྷཱཏཱ ན ཧོཏཱིཏི ‘‘ཨེཀཔིཏིཀོ ཀནིཊྛབྷཱཏཱ’’ཏི ཝུཏྟཾ. ཨཝསེསེཧི པུཏྟེཧི. ‘‘པཉྙཱཔཱརམིཡཱ མཏྠཀཾ པཏྟོ’’ཏི ཝཏྭཱ ཏསྶ མཏྠཀཔྤཏྟཾ གུཎཝིསེསཾ དསྶེཏུཾ ‘‘སིཁིནཱ བྷགཝཏཱ’’ཏིཨཱདི ཝུཏྟཾ.

ཨུཏྟརོཏི ཨུཏྟམོ. པུན ཨུཏྟརོཏི ཐེརཾ ནཱམེན ཝདཏི. པཱརནྟི པརཀོཊིམཏྠཀཾ. པཉྙཱཝིསཡེཏི པཉྙཱདྷིཀཱརེ. པཝཏྟིཊྛཱནཝསེན ཧི པཝཏྟིཾ ཝདཏི.

སཱཝཀསནྣིཔཱཏཔརིཙྪེདཝཎྞནཱ

༡༠. ཨུཔོསཐནྟི ¶ ཨཱཎཱཔཱཏིམོཀྑཾ. དུཏིཡཏཏིཡེསཱུཏི དུཏིཡེ, ཏཏིཡེ ཙ སཱཝཀསནྣིཔཱཏེ. ཨེསེཝ ནཡོཏི ཙཏུརངྒིཀཏཾ ཨཏིདིསཏི. ཨབྷིནཱིཧཱརཏོ པཊྛཱཡ ཝཏྠུཾ ཀཐེཏྭཱ པབྦཛྫཱ དཱིཔེཏབྦཱ, སཱ པན ཡསྨཱ མནོརཐཔཱུརཎིཡཾ ཨངྒུཏྟརཊྛཀཐཱཡཾ (ཨ. ནི. ཨཊྛ. ༡.༡.༢༡༡) ཝིཏྠཱརཏོ ཨཱགཏཱ, ཏསྨཱ ཏཏྠ ཝུཏྟནཡེནེཝ ཝེདིཏབྦཱཏི.

ཨུཔཊྛཱཀཔརིཙྪེདཝཎྞནཱ

༡༡. ནིབདྡྷུཔཊྛཱཀབྷཱཝནྟི ¶ ཨཱརམྦྷཏོ པཊྛཱཡ ཡཱཝ པརིནིབྦཱནཱ ནིཡཏཨུཔཊྛཱཀབྷཱཝཾ. ཨནིཡཏུཨུཔཊྛཱཀཱ པན བྷགཝཏོ པཋམབོདྷིཡཾ བཧཱུ ཨཧེསུཾ. ཏེནཱཧ ‘‘བྷགཝཏོ ཧཱི’’ཏིཨཱདི. ཨིདཱནི ཨཱནནྡཏྠེརོ ཡེན ཀཱརཎེན སཏྠུ ནིབདྡྷུཔཊྛཱཀབྷཱཝཾ ཨུཔགཏོ, ཡཐཱ ཙ ཨུཔགཏོ, ཏཾ དསྶེཏུཾ ‘‘ཏཏྠ ཨེཀདཱ’’ཏིཨཱདི ཝུཏྟཾ. ‘‘ཨཧཾ ཨིམིནཱ མགྒེན གཙྪཱམཱི’’ཏི ཨཱཧ ཨནཡབྱསནཱཔཱདཀེན ཀམྨུནཱ ཙོདིཡམཱནོ ¶ . ཨཐ ནཾ བྷགཝཱ ཏམཏྠཾ ཨནཱརོཙེཏྭཱཝ ཁེམཾ མགྒཾ སནྡྷཱཡ ‘‘ཨེཧི བྷིཀྑུ ཨིམིནཱ གཙྪཱམཱ’’ཏི ཨཱཧ. ཀསྨཱ པནསྶ བྷགཝཱ ཏམཏྠཾ ནཱརོཙེསཱིཏི? ཨཱརོཙིཏེཔི ཨསདྡཧནྟོ ནཱདིཡིསྶཏི. ཏཉྷི ཏསྶ ཧོཏི དཱིགྷརཏྟཾ ཨཧིཏཱཡ དུཀྑཱཡཱཏིཏི. ཏེཏི ཏེ གམནཾ, ‘‘ཏ’’ནྟི ཝཱ པཱཋོ.

ཨནྭཱསཏྟོཏི ཨནུབདྡྷོ, ཨུཔདྡུཏོ ཝཱ. དྷམྨགཱརཝནིསྶིཏོ སཾཝེགོ དྷམྨསཾཝེགོ ‘‘ཨམྷེསུ ནཱམ ཏིཊྛནྟེསུ བྷགཝཏོཔི ཨཱིདིསཾ ཛཱཏ’’ནྟི. ‘‘ཨཧཾ ཨུཔཊྛཧིསྶཱམཱི’’ཏི ཝདནྟོ དྷམྨསེནཱཔཏི ཨཏྠཏོ ཨེཝཾ ཝདནྟོ ནཱམ ཧོཏཱིཏི ‘‘ཨཧཾ བྷནྟེ ཏུམྷེ’’ཏིཨཱདི ཝུཏྟཾ. ཨསུཉྙཱཡེཝ མེ སཱ དིསཱཏི ཨསུཉྙཱཡེཝ མམ སཱ དིསཱ. ཏཏྠ ཀཱརཎམཱཧ ‘‘ཏཝ ཨོཝཱདོ བུདྡྷཱནཾ ཨོཝཱདསདིསོ’’ཏི.

ཝསིཏུཾ ན དསྶཏཱིཏི ཨེཀགནྡྷཀུཊིཡཾ ཝཱསཾ ན ལབྷིསྶཏཱིཏི ཨདྷིཔྤཱཡོ. པརམྨུཁཱ དེསིཏསྶཱཔི དྷམྨསྶཱཏི སུཏྟནྟདེསནཾ སནྡྷཱཡ ཝུཏྟཾ. ཨབྷིདྷམྨདེསནཱ པནསྶ པརམྨུཁཱཝ པཝཏྟཱ པགེཝ ཡཱཙནཱཡ. ཏསྶཱ ཝཱཙནཱམགྒོཔི སཱརིཔུཏྟཏྠེརཔྤབྷཝོ. ཀསྨཱ? སོ ནིདྡེསཔཊིསམྦྷིདཱ ཝིཡ ¶ ཐེརསྶ བྷིཀྑུཏོ གཧིཏདྷམྨཀྑནྡྷཔཀྑིཡོ. ཨཔརེ པན ‘‘དྷམྨབྷཎྜཱགཱརིཀོ པཊིཔཱཊིཡཱ ཏིཀདུཀེསུ དེཝསིཀཾ ཀཏོཀཱསོ བྷགཝནྟཾ པཉྷཾ པུཙྪི, བྷགཝཱཔིསྶ པུཙྪིཏཔུཙྪིཏཾ ནཡདཱནཝསེན ཝིསྶཛྫེསི. ཨེཝཾ ཨབྷིདྷམྨོཔི སཏྠཱརཱ པརམྨུཁཱ དེསིཏོཔི ཐེརེན སམྨུཁཱ པཊིགྒཧིཏོཝ ཨཧོསཱི’’ཏི ཝདནྟི. སབྦཾ ཝཱིམཾསིཏྭཱ གཧེཏབྦཾ.

ཨགྒུཔཊྛཱཀོཏི ཨུཔཊྛཱནེ སཀྐཙྩཀཱརིཏཱཡ ཨགྒབྷཱུཏོ ཨུཔཊྛཱཀོ. ཐེརོ ཧི ཨུཔཊྛཱཀཊྛཱནཾ ལདྡྷཀཱལཏོ པཊྛཱཡ བྷགཝནྟཾ དུཝིདྷེན ཨུདཀེན, ཏིཝིདྷེན དནྟཀཊྛེན, པཱདཔརིཀམྨེན, གནྡྷཀུཊིཔརིཝེཎསམྨཛྫནེནཱཏི ཨེཝམཱདཱིཧི ཀིཙྩེཧི ཨུཔཊྛཧནྟོ ‘‘ཨིམཱཡ ནཱམ ཝེལཱཡ སཏྠུ ཨིདཾ ནཱམ ལདྡྷུཾ ཝཊྚཏི, ཨིདཾ ནཱམ ཀཱཏུཾ ཝཊྚཏཱི’’ཏི ཙིནྟེཏྭཱ ¶ ཏཾ ཏཾ ནིཔྥཱདེནྟོ མཧཏིཾ དཎྜདཱིཔིཀཾ གཧེཏྭཱ ཨེཀརཏྟིཾ གནྡྷཀུཊིཔརིཝེཎཾ ནཝ ཝཱརེ ཨནུཔརིཡཱཡཏི. ཨེཝཾ ཧིསྶ ཨཧོསི ¶ ‘‘སཙེ མེ ཐིནམིདྡྷཾ ཨོཀྐམེཡྻ, བྷགཝཏི པཀྐོསནྟེ པཊིཝཙནཾ དཱཏུཾ ནཱཧཾ སཀྐུཎེཡྻ’’ནྟི, ཏསྨཱ སབྦརཏྟིཾ དཎྜདཱིཔིཀཾ ཧཏྠེན ན མུཉྩཏི. ཏེན ཝུཏྟཾ ‘‘ཨགྒུཔཊྛཱཀོ’’ཏི.

༡༢. པིཏུམཱཏུཛཱཏནགརཔརིཙྪེདོ པིཏུམུཁེན ཨཱགཏཏྟཱ ‘‘པིཏིཔརིཙྪེདོ’’ཏི ཝུཏྟོ.

ཝིཧཱརཾ པཱཝིསཱིཏི གནྡྷཀུཊིཾ པཱཝིསི. ཨེཏྟཀཾ ཀཐེཏྭཱཏི ཀཔྤཔརིཙྪེདཱདིནཝཝཱརཔཊིམཎྜིཏཾ ཝིཔསྶཱིཨཱདཱིནཾ སཏྟནྣཾ བུདྡྷཱནཾ པུབྦེནིཝཱསཔཊིསཾཡུཏྟཾ ཨེཏྟཱཝཏཱ དེསནཾ དེསེཏྭཱ. ཀསྨཱ པནེཏྠ བྷགཝཱ ཝིཔསྶཱིཨཱདཱིནཾ སཏྟནྣཾཡེཝ བུདྡྷཱནཾ པུབྦེནིཝཱསཾ ཀཐེསི, ན བུདྡྷཝཾསདེསནཱཡཾ (བུ. ཝཾ. ༦༤ གཱཐཱདཡོ) ཝིཡ པཉྩཝཱིསཏིཡཱ བུདྡྷཱནཾ, ཏཏོ ཝཱ པན བྷིཡྻོཏི? ཨནདྷིཀཱརཏོ, པཡོཛནཱབྷཱཝཏོ ཙ. བུདྡྷཝཾསདེསནཱཡཉྷི (བུ. ཝཾ. ༧༥) –

‘‘ཀཱིདིསོ ཏེ མཧཱཝཱིར, ཨབྷིནཱིཧཱརོ ནརུཏྟམ;

ཀམྷི ཀཱལེ ཏཡཱ ཝཱིར, པཏྠིཏཱ བོདྷིམུཏྟམཱ’’ཏི. ཨཱདིནཱ –

པཝཏྟཾ ཏཾ པུཙྪཾ ཨདྷིཀཱརཾ ཨཊྛུཔྤཏྟིཾ ཀཏྭཱ ཡསྶ སམྨཱསམྦུདྡྷསྶ པཱདམཱུལེ ཨཏྟནཱ མཧཱབྷིནཱིཧཱརོ ཀཏོ, ཏཾ དཱིཔངྐརཾ བྷགཝནྟཾ ཨཱདིཾ ཀཏྭཱ ཡེསཾ ཙཏུཝཱིསཏིཡཱ བུདྡྷཱནཾ སནྟིཀཱ བོདྷིཡཱ ལདྡྷབྱཱཀརཎོ ཧུཏྭཱ ཏཏྠ ཏཏྠ པཱརམིཡོ པཱུརེསི, ཏེསཾ པཊིཔཏྟིསངྑཱཏོ པུབྦེནིཝཱསོ, ཨཏྟནོ ཙ པཊིཔཏྟི ཀཐིཏཱ, ཨིདྷ པན ཏཱདིསོ ཨདྷིཀཱརོ ནཏྠི ¶ , ཡེན དཱིཔངྐརཏོ པཊྛཱཡ, ཏཏོ ཝཱ པན པུརཏོ བུདྡྷེ ཨཱརབྦྷ པུབྦེནིཝཱསཾ ཀཐེཡྻ. ཏསྨཱ ན ཨེཏྠ བུདྡྷཝཾསདེསནཱཡཾ ཝིཡ པུབྦེནིཝཱསོ ཝིཏྠཱརིཏོ. ཡསྨཱ ཙ བུདྡྷཱནཾ དེསནཱ ནཱམ དེསནཱཡ བྷཱཛནབྷཱུཏཱནཾ པུགྒལཱནཾ ཉཱཎབལཱནུརཱུཔཱ, ན ཨཏྟནོ ཉཱཎབལཱནུརཱུཔཱ, ཏསྨཱ ཏཏྠ ཨགྒསཱཝཀཱནཾ, མཧཱསཱཝཀཱནཾ, (ཐེརགཱ. ཨཊྛ. ༢.༢༡ ཝངྒཱིསཏྠེརགཱཐཱཝཎྞནཱ) ཏཱདིསཱནཉྩ ¶ དེཝབྲཧྨཱནཾ ཝསེན དེསནཱ ཝིཏྠཱརིཏཱ. ཨིདྷ པན པཀཏིསཱཝཀཱནཾ, ཏཱདིསཱནཉྩ དེཝཏཱནཾ ཝསེན པུབྦེནིཝཱསཾ ཀཐེནྟོ སཏྟནྣམེཝ བུདྡྷཱནཾ པུབྦེནིཝཱསཾ ཀཐེསི. ཏཐཱ ཧི ནེ བྷགཝཱ པལོབྷནཝསེན སམུཏྟེཛེཏུཾ སཔྤཔཉྩཏཱཡ ཀཐཱཡ དེསནཾ མཏྠཀཾ ཨཔཱཔེཏྭཱཝ གནྡྷཀུཊིཾ པཱཝིསི. ཏཐཱ ཙ ཨིམིསྶཱ ཨེཝ དེསནཱཡ ཨནུསཱརཏོ ཨཱཊཱནཱཊིཡཔརིཏྟ- (དཱི. ནི. ༣.༢༧༥) དེསནཱདཡོ པཝཏྟཱ.

ཨཔིཙེཏྠ ¶ བྷགཝཱ ཨཏྟནོ སུདྡྷཱཝཱསཙཱརིཀཱཝིབྷཱཝིནིཡཱ ཨུཔརིདེསནཱཡ སངྒཧཏྠཾ ཝིཔསྶཱིཨཱདཱིནཾ ཨེཝ སཏྟནྣཾ སམྨཱསམྦུདྡྷཱནཾ པུབྦེནིཝཱསཾ ཀཐེསི. ཏེསཾཡེཝ ཧི སཱཝཀཱ ཏདཱ ཙེཝ ཨེཏརཧི ཙ སུདྡྷཱཝཱསབྷཱུམིཡཾ ཋིཏཱ, ན ཨཉྙེསཾ པརིནིབྦུཏཏྟཱ. ‘‘སིདྡྷཏྠཏིསྶཕུསྶཱནཾ ཀིར བུདྡྷཱནཾ སཱཝཀཱ སུདྡྷཱཝཱསེསུ ཨུཔཔནྣཱ ཨུཔཔཏྟིསམནནྟརམེཝ ཨིམསྨིཾ སཱསནེ ཨུཔཀཱདཡོ ཝིཡ ཨརཧཏྟཾ ཨདྷིགནྟྭཱ ནཙིརསྶེཝ པརིནིབྦཱཡིཾསུ, ན ཏཏྠ ཏཏྠ ཡཱཝཏཱཡུཀཾ ཨཊྛཾསཱུ’’ཏི ཝདནྟི. ཏཐཱ ཡེསཾ སམྨཱསམྦུདྡྷཱནཾ པཊིཝེདྷསཱསནཾ ཨེཀཾསཏོ ནིཙྪཡེ ན ཨཛྫཱཔི དྷརཏི, ན ཨནྟརཧིཏཾ, ཏེ ཨེཝ ཀིཏྟེནྟོ ཝིཔསྶཱིཨཱདཱིནཾཡེཝ བྷགཝནྟཱནཾ པུབྦེནིཝཱསཾ ཨིམསྨིཾ སུཏྟེ ཀཐེསི ཝེནེཡྻཛ྄ཛྷཱསཡཝསེན. ཨཔུབྦཱཙརིམནིཡམོ པན ཨཔརཱཔརཾ སཾསརཎཀསཏྟཝཱསཝསེན ཨེཀིསྶཱ ལོཀདྷཱཏུཡཱ ཨིཙྪིཏོཏི ན ཏེནེཏཾ ཝིརུཛ྄ཛྷཏཱིཏི དཊྛབྦཾ. ནིརནྟརཾ མཏྠཀཾ པཱཔེཏྭཱཏི ཨབྷིཛཱཏིཏོ པཊྛཱཡ ཡཱཝ པཱཏིམོཀྑུདྡེསོ ཡཱཝ ཏཱ བུདྡྷཀིཙྩསིདྡྷི, ཏཱཝ མཏྠཀཾ སིཁཾ པཱཔེཏྭཱ. ན ཏཱཝ ཀཐིཏོཏི ཡོཛནཱ.

ཏནྟིནྟི དྷམྨཏནྟིཾ, པརིཡཏྟིནྟི ཨཏྠོ. པུཏྟཔུཏྟམཱཏུཡཱནཝིཧཱརདྷནཝིཧཱརདཱཡཀཱདཱིནཾ སམྦཧུལཱནཾ ཨཏྠཱནཾ ཝིབྷཱཝནཝསེན པཝཏྟཝཱརོ སམྦཧུལཝཱརོ.

སམྦཧུལཝཱརཝཎྞནཱ

ཀཱམཉྩཱཡཾ ¶ པཱལི༹ཡཾ ཨནཱགཏོ, ཨཊྛཀཐཱསུ ཨཱགཏཏྟཱ པན ཨཱནེཏྭཱ ¶ དཱིཔེཏབྦོཏི ཏཾ དཱིཔེནྟོ ‘‘སབྦབོདྷིསཏྟཱནཉྷཱི’’ཏིཨཱདིམཱཧ. ཀུལཝཾསོ ཀུལཱནུཀྐམོ. པཝེཎཱིཏི པརམྤརཱ. ‘‘ཀསྨཱ’’ཏི པུཏྟུཔྤཏྟིཡཱ ཀཱརཎཾ པུཙྪིཏྭཱ ཏཾ ཝིསྶཛྫེནྟོ ‘‘སབྦཉྙུབོདྷིསཏྟཱནཉྷཱི’’ཏིཨཱདིམཱཧ, ཏེན ཏེསཾ ཛཱཏནགརཱདི པཉྙཱཡམཱནཾ ཨེཀཾསཏོ མནུསྶབྷཱཝསཉྫཱནནཏྠཾ ཨིཙྪིཏབྦཾ, ཨཉྙཐཱ ཡཐཱདྷིཔྤེཏབུདྡྷཀིཙྩསིདྡྷི ཨེཝ ན སིཡཱཏི དསྶེཏི, ཡཏོ མཧཱསཏྟཱནཾ ཙརིམབྷཝེ མནུསྶལོཀེ ཨེཝ པཱཏུབྷཱཝོ, ན ཨཉྙཏྠ.

སམྦཧུལཔརིཙྪེདཝཎྞནཱ

ཙནྡཱདཱིནཾ སོབྷཱཝིསེསཾ རཧེཏི ཙཛཱཔེཏཱིཏི རཱཧུ, རཱཧུགྒཧོ, ཨིདྷ པན རཱཧུ ཝིཡཱཏི རཱཧུ. བནྡྷནནྟི ཙ ཨནཏྠུཔྤཏྟིཊྛཱནཏཾ སནྡྷཱཡ ཝུཏྟཾ. ཏཐཱ མཧཱསཏྟེན ཝུཏྟཝཙནམེཝ གཧེཏྭཱ ཀུམཱརསྶ ‘‘རཱཧུལོ’’ཏི ནཱམཾ ཨཀཾསུ. ཨཐཱཏི ནིཔཱཏམཏྟཾ. རོཙིནཱིཏི རོཙནསཱིལཱ, ཨུཛྫལརཱུཔཱཏི ¶ ཨཏྠོ. རུཙགྒཏཱིཏི རུཙཾ པབྷཱཏཾ ཨཱགཏིབྷཱུཏཱ, ག-ཀཱརཱགམཾ ཀཏྭཱ ཝུཏྟཾ. ཨིཏྠིརཏནབྷཱཝཏོ མནུསྶལོཀེ སབྦཱསཾ ཨིཏྠཱིནཾ བིམྦཔཊིཙྪནྣབྷཱུཏཱཏི བིམྦཱ.

ཛྷཱནཱ ཝུཊྛཱཡཱཏི པཱདཀཛ྄ཛྷཱནཏོ ཨུཊྛཱཡ.

ཨཊྛངྒུལུབྦེདྷཱཏི ཨཊྛངྒུལཔྤམཱཎབཧལབྷཱཝཱ. ཙཱུལ༹ཾསེན ཚཱདེཏྭཱཏི ཏིརིཡབྷཱགེན ཋཔནཝསེན སབྦཾ ཝིཧཱརཊྛཱནཾ ཚཱདེཏྭཱ. སུཝཎྞཡཊྛིཕཱལེཧཱིཏི ཕཱལཔྤམཱཎཱཧི སུཝཎྞཡཊྛཱིཧི. སུཝཎྞཧཏྠིཔཱདཱནཱིཏི པཀཏིཧཏྠིཔཱདཔརིམཱཎཱནི སུཝཎྞཁཎྜཱནི. ཝུཏྟནཡེནེཝཱཏི ཙཱུལ༹ཾསེནེཝ. སུཝཎྞཀཊྚཱིཧཱིཏི སུཝཎྞཁཎྜེཧི. སལཀྑཎཱནནྟི ལཀྑཎསམྤནྣཱནཾ སཧསྶཱརཱནཾ.

བོདྷིཔལླངྐོཏི ཨབྷིསམྦུཛ྄ཛྷནཀཱལེ ནིསཛྫཊྛཱནཾ. ཨཝིཛཧིཏོཏི ¶ བུདྡྷཱནཾ ཏཐཱནིསཛྫཱཡ ཨནཉྙཏྠབྷཱཝཱིབྷཱཝཏོ ཨཔརིཙྩཏྟོ. ཏེནཱཧ ‘‘ཨེཀསྨིཾཡེཝ ཋཱནེ ཧོཏཱི’’ཏི. པཋམཔདགཎྛིཀཱཏི པཙྪིམེ སོཔཱནཕལཀེ ཋཏྭཱ ཋཔིཡམཱནསྶ དཀྑིཎཔཱདསྶ པཏིཊྛཧནཊྛཱནཾ. ཏཾ པན ཡསྨཱ དལ༹ྷཾ ཐིརཾ ཀེནཙི ཨབྷེཛྫཾ ཧོཏི, ཏསྨཱ ‘‘པདགཎྛཱི’’ཏི ཝུཏྟཾ. ཡསྨིཾ ¶ བྷཱུམིབྷཱགེ ཨིདཱནི ཛེཏཝནམཧཱཝིཧཱརོ, ཏཏྠ ཡསྨིཾ ཋཱནེ པུརིམཱནཾ སབྦབུདྡྷཱནཾ མཉྩཱ པཉྙཏྟཱ, ཏསྨིཾཡེཝ པདེསེ ཨམྷཱཀམྤི བྷགཝཏོ མཉྩོ པཉྙཏྟོཏི ཀཏྭཱ ‘‘ཙཏྟཱརི མཉྩཔཱདཊྛཱནཱནི ཨཝིཛཧིཏཱནེཝ ཧོནྟཱི’’ཏི ཝུཏྟཾ. མཉྩཱནཾ པན མཧནྟཁུདྡཀབྷཱཝེན མཉྩཔཉྙཱཔནཔདེསསྶ མཧནྟཱམཧནྟཏཱ ཨཔྤམཱཎཾ, བུདྡྷཱནུབྷཱཝེན པན སོ པདེསོ སབྦདཱ ཨེཀཔྤམཱཎོཡེཝ ཧོཏཱིཏི ‘‘ཙཏྟཱརི མཉྩཔཱདཊྛཱནཱནི ཨཝིཛཧིཏཱནེཝ ཧོནྟཱི’’ཏི ཝུཏྟནྟི དཊྛབྦཾ. ཝིཧཱརོཔི ན ཝིཛཧིཏོ ཡེཝཱཏི ཨེཏྠཱཔི ཨེསེཝ ནཡོ. པུརིམཾ ཝིཧཱརཊྛཱནཾ ན པརིཙྩཛཏཱིཏི ཧི ཨཏྠོ.

ཝིསིཊྛཱ མཏྟཱ ཝིམཏྟཱ, ཝིམཏྟཱཝ ཝེམཏྟཾ, ཝིསདིསཏཱཏི ཨཏྠོ. པམཱཎཾ ཨཱརོཧོ. པདྷཱནཾ དུཀྐརཀིརིཡཱ. རསྨཱིཏི སརཱིརཔྤབྷཱ.

‘‘སཏྟཱནཾ པཱཀཏིཀཧཏྠེན ཚཧཏྠོ མཛ྄ཛྷིམཔུརིསོ, ཏཏོ ཏིགུཎཾ བྷགཝཏོ སརཱིརཔྤམཱཎནྟི བྷགཝཱ ཨཊྛཱརསཧཏྠོ’’ཏི ཝདནྟི. ཨཔརེ པན བྷཎནྟི ‘‘མནུསྶཱནཾ པཱཀཏིཀཧཏྠེན ཙཏུཧཏྠོ མཛ྄ཛྷིམཔུརིསོ, ཏཏོ ཏིགུཎཾ བྷགཝཏོ སརཱིརཔྤམཱཎནྟི བྷགཝཱ དྭཱདསཧཏྠོ ཨུཔཱདིནྣཀརཱུཔདྷམྨཝསེན, སམནྟཏོ པན བྱཱམམཏྟཾ བྱཱམཔྤབྷཱ ཕརཏཱིཏི ཨུཔརི ཚཧཏྠཾ ཨབྦྷུགྒཏོ, བཧལཏརཔྤབྷཱ རཱུཔེན སདྡྷིཾ ཨཊྛཱརསཧཏྠོ ཧོཏཱི’’ཏི.

ཨདྡྷནིཡནྟི ¶ དཱིགྷཀཱལཾ.

ཨཛ྄ཛྷཱསཡཔཊིབདྡྷནྟི བོདྷིསམྦྷཱརསམྦྷརཎཀཱལེ ཏཐཱཔཝཏྟཛ྄ཛྷཱསཡཱདྷཱིནཾ, ཏཐཱཔཝཏྟཔཏྠནཱནུརཱུཔཾ ཝིཔུལཾ, ཝིཔུལཏརཉྩ ¶ ཧོཏཱིཏི ཨཏྠོ. སྭཱཡམཏྠོ ཙརིཡཱཔིཊཀཝཎྞནཱཡཾ ཝུཏྟནཡེནེཝ ཝེདིཏབྦོ. ཨེཏྠ ཙ ཡསྨཱ སརཱིརཔྤམཱཎཾ, པདྷཱནཾ, སརཱིརཔྤབྷཱ ཙ བུདྡྷཱནཾ ཝིསདིསཱཏི ཨིདྷ པཱལི༹ཡཾ ཨནཱགཏཱ, ཏསྨཱ ཏེཧི སདྡྷིཾ ཝེམཏྟཏཱསཱམཉྙེན ཨཱཡུཀུལཱནིཔི ཨིདྷ ཨཱཧརིཏྭཱ དཱིཔིཏཱནི. པཊིཝིདྡྷགུཎེསཱུཏི ཨདྷིགཏསབྦཉྙུགུཎེསུ. ནནུ ཙ བོདྷིསམྦྷཱརེསུ, ཝེནེཡྻཔུགྒལཔརིམཱཎེ ཙ ཝེམཏྟཾ ནཏྠཱིཏི? སཙྩཾ ནཏྠི, ཏདུབྷཡཾ པན བུདྡྷགུཎགྒཧཎེན གཧིཏམེཝ ཧོཏཱིཏི ན ཨུདྡྷཊཾ. ཡདགྒེན ཧི སབྦབུདྡྷཱནཾ བུདྡྷགུཎེསུ ཝེམཏྟཾ ནཏྠི, ཏདགྒེན ནེསཾ སམྦོདྷིསམྦྷཱརེསུཔི ཝེམཏྟཾ ནཏྠཱིཏི. ཀསྨཱ? ཧེཏུཨནུརཱུཔཏཱཡ ཕལསྶ ¶ , ཨེཀནྟེནེཝ ཝེནེཡྻཔུགྒལཔརིམཱཎེ ཝེམཏྟབྷཱཝོ ཝིབྷཱཝིཏོ. མཧཱབོདྷིསཏྟཱནཉྷི ཧེཏུཨཝཏྠཱཡཾ སམྦྷཏཱུཔནིསྶཡིནྡྲིཡཔརིཔཱཀཱ ཝེནེཡྻཔུགྒལཱ ཙརིམབྷཝེ ཨརཧཏྟསམྤཏྟིཡཱ པརིཔོསིཏཱནི ཀམལཝནཱནི སཱུརིཡརསྨིསམྥསྶེན ཝིཡ ཏཐཱགཏགུཎཱནུབྷཱཝསམྥསྶེན ཝིབོདྷཾ ཨུཔགཙྪནྟཱིཏི དཱིཔེསུཾ ཨཊྛཀཐཱཙརིཡཱ.

ནིདྷིཀུམྦྷོཏི ཙཏྟཱརོ མཧཱནིདྷཡོ སནྡྷཱཡ ཝདཏི. ཛཱཏོ ཙཱཏི. ཙ-སདྡེན ཀཏམཧཱབྷིནཱིཧཱརོ ཙཱཏི ཨཡམྤི ཨཏྠོ སངྒཧིཏོཏི དཊྛབྦོ. ཝུཏྟཾ ཧེཏཾ བུདྡྷཝཾསེ –

‘‘ཏཱརཱགཎཱ ཝིརོཙནྟི, ནཀྑཏྟཱ གགནམཎྜལེ;

ཝིསཱཁཱ ཙནྡིམཱཡུཏྟཱ, དྷུཝཾ བུདྡྷོ བྷཝིསྶཏཱི’’ཏི. (བུ. ཝཾ. ༦༥);

‘‘ཨེཏེནེཝ ཙ སབྦབུདྡྷཱནཾ ཝིསཱཁཱནཀྑཏྟེནེཝ མཧཱབྷིནཱིཧཱརོ ཧོཏཱི’’ཏི ཙ ཝདནྟི.

༡༣. ཨཡཾ ¶ གཏཱིཏི ཨཡཾ པཝཏྟི པཝཏྟནཱཀཱརོ, ཨཉྙེ པུབྦེནིཝཱསཾ ཨནུསྶརནྟཱ ཨིམིནཱ ཨཱཀཱརེན ཨནུསྶརནྟཱིཏི ཨཏྠོ, ཡསྨཱ ཙུཏིཏོ པཊྛཱཡ ཡཱཝ པཊིསནྡྷི, ཏཱཝ ཨནུསྶརཎཾ ཨཱརོཧནཾ ཨཏཱིཏཨཏཱིཏཏརཨཏཱིཏཏམཱདིཛཱཏིསངྑཱཏེ པུབྦེནིཝཱསེ ཉཱཎསྶ ཨབྷིམུཁབྷཱཝེན པཝཏྟཱིཏི ཀཏྭཱ. ཏསྨཱ པཊིསནྡྷིཏོ པཊྛཱཡ ཡཱཝ ཙུཏི, ཏཱཝ ཨནུསྶརཎཾ ཨོརོཧནཾ པུབྦེནིཝཱསེ པཊིམུཁབྷཱཝེན ཉཱཎསྶ པཝཏྟཱིཏི ཨཱཧ ‘‘པཙྪཱམུཁཾ ཉཱཎཾ པེསེཏྭཱ’’ཏི. ཙུཏིགནྟབྦནྟི ཡཾ པནིདཾ ཙུཏིཡཱ ཉཱཎགཏིཡཱ གནྟབྦཾ, ཏཾ གམནཾ བུཛ྄ཛྷནནྟི ཨཏྠོ. གརུཀནྟི བྷཱརིཡཾ དུཀྐརཾ. ཏེནཱཧ ‘‘ཨཱཀཱསེ པདཾ དསྶེནྟོ ཝིཡཱ’’ཏི. ཨཔརམྤི ཀཱརཎནྟི ¶ ཚིནྣཝཊུམཱནུསྶརཎཾ པཙྪཱམུཁཾ ཉཱཎཾ པེསནཏོ ཨཔརཾ ཨཙྪརིཡབྦྷུཏཀཱརཎཾ. ཡཏྲཱཏི པཙྩཏྟཏྠེ, ནཱམཱཏི ཨཙྪརིཡཏྠེ ནིཔཱཏོ, ཧི-སདྡོ ཨནཏྠཀོ. ཏེནཱཧ ‘‘ཡོ ནཱམ ཏཐཱགཏོ’’ཏི. ཨེཝཉྩ ཀཏྭཱ ‘‘ཡཏྲཱ’’ཏི ནིཔཱཏཝསེན ཝིསུཾ ཡཏྲ-སདྡགྒཧཎཾ སམཏྠིཏཾ ཧོཏི. པཔཉྩེནྟི སཏྟསནྟཱནཾ སཾསཱརེ ཝིཏྠཱརེནྟཱིཏི པཔཉྩཾ. ཀམྨཝཊྚཾ ཝུཙྩཏཱིཏི ཀིལེསཝཊྚསྶ པཔཉྩགྒཧཎེན, ཝིཔཱཀཝཊྚསྶ དུཀྑགྒཧཎེན གཧིཏཏྟཱ. པརིཡཱདིནྣཝཊྚེཏི སབྦསོ ཁེཔིཏཝཊྚེ. ‘‘མགྒསཱིལེན ཕལསཱིལེནཱ’’ཏི ཝཏྭཱ ཏཡིདཾ མགྒཕལསཱིལཾ ལོཀིཡསཱིལཔུབྦཀཾ, བུདྡྷཱནཉྩ ¶ ལོཀིཡསཱིལམྤི ལོཀུཏྟརསཱིལཾ ཝིཡ ཨནཉྙསཱདྷཱརཎཾ ཨེཝཱཏི དསྶེཏུཾ ‘‘ལོཀིཡལོཀུཏྟརསཱིལེནཱ’’ཏི ཝུཏྟཾ. སམཱདྷིཔཉྙཱསུཔི ཨེསེཝ ནཡོ. སམཱདྷིཔཀྑཱཏི སམཱདྷི ཙ སམཱདྷིཔཀྑཱ ཙ སམཱདྷིཔཀྑཱ, ཨེཀདེསསརཱུཔེཀསེསོ དཊྛབྦོ. ཏེནཱཧ ‘‘མགྒསམཱདྷིནཱ’’ཏིཨཱདི, ‘‘ཝིཧཱརོ གཧིཏོ ཝཱ’’ཏི ཙ. སམཱདྷིཔཀྑཱ ནཱམ ཝཱིརིཡསཏིཨཱདཡོ.

སཡནྟི ཨཏྟནཱ. ནཱིཝརཎཱདཱིཧཱིཏི ནཱིཝརཎེཧི ཙེཝ ཏདེཀཊྛེཧི ཙ པཱཔདྷམྨེཧི, ཝིཏཀྐཝིཙཱརཱདཱིཧི ཙ. ‘‘ཝིམུཏྟཏྟཱ ¶ ཝིམུཏྟཱིཏི སངྑྱཾ གཙྪནྟཱི’’ཏི ཨིམིནཱ ཝིམུཏྟི-སདྡསྶ ཀམྨསཱདྷནཏཾ ཨཱཧ ཨཊྛསམཱཔཏྟིཨཱདིཝིསཡཏྟཱ ཏསྶ. ཝིམུཏྟཏྟཱཏི ཙ ‘‘ཝིཀྑམྦྷནཝསེན ཝིམུཏྟཏྟཱ’’ཏིཨཱདིནཱ ཡོཛེཏབྦཾ. ཏསྶ ཏསྶཱཏི ཨནིཙྩཱནུཔསྶནཱདིཀསྶ. པཙྩནཱིཀངྒཝསེནཱཏི པཧཱཏབྦཔཊིཔཀྑཨངྒཝསེན. པཊིཔྤསྶདྡྷནྟེ ཨུཔྤནྣཏྟཱཏི ཀིལེསཱནཾ པཊིཔྤསྶམྦྷནཾ པཊིཔྤསྶདྡྷཾ, སོ ཨེཝ ཨནྟོ པརིཡོསཱནབྷཱཝཏོ, ཏསྨིཾ སཱདྷེཏབྦེ ནིབྦཏྟཏྟཱ, ཏཾཏཾམགྒཝཛ྄ཛྷཀིལེསཱནཾ པཊིཔྤསྶམྦྷནཝསེན པཝཏྟཏྟཱཏི ཨཏྠོ. ཀིལེསེཧི ནིསྶཊཏཱ, ཨཔགམོ ཙ ནིབྦཱནསྶ ཏེཧི ཝིཝིཏྟཏྟཱ ཨེཝཱཏི ཨཱཧ ‘‘དཱུརེ ཋིཏཏྟཱ’’ཏི.

༡༦. དྷམྨདྷཱཏཱུཏི དྷམྨཱནཾ སབྷཱཝོ, ཨཏྠཏོ ཙཏྟཱརི ཨརིཡསཙྩཱནི. སུཔྤཊིཝིདྡྷཱཏི སུཊྛུ པཊིཝིདྡྷཱ སཝཱསནཱནཾ སབྦེསཾ ཀིལེསཱནཾ པཛཧནཏོ. ཨེཝཉྷི སབྦཉྙུཏཱ, དསབལཉཱཎཱདཡོ ཙཱཏི སབྦེ བུདྡྷགུཎཱ བྷགཝཏཱ ཨདྷིགཏཱ ཨཧེསུཾ. ཨརཧཏྟཾ དྷམྨདྷཱཏཱུཏི ཀེཙི. སབྦཉྙུཏཉཱཎནྟི ཨཔརེ. དྭཱིཧི པདེཧཱིཏི དྭཱིཧི ཝཱཀྱེཧི. ཨཱབདྡྷནྟི པཊིབདྡྷཾ ཏཾམཱུལཀཏྟཱ ཨུཔརིདེསནཱཡ. དེཝཙཱརིཀཀོལཱཧལནྟི ཨཏྟནོ དེཝལོཀེ ཙཱརིཀཱཡཾ སུདྡྷཱཝཱསདེཝཱནཾ ཀུཏཱུཧལཔྤཝཏྟིཾ དསྶེནྟོ སུཏྟནྟཔརིཡོསཱནེ (དཱི. ནི. ཨཊྛ. ༢.༩༡) ཝིཙཱརེསྶཏི, ཨཏྠཏོ ཝིབྷཱཝེསྶཏཱིཏི ཡོཛནཱ. ཨཡཾ དེསནཱཏི ‘‘ཨིཏོ སོ བྷིཀྑཝེ’’ཏིཨཱདིནཱ (དཱི. ནི. ༢.༤) ཝིཏྠཱརཏོ པཝཏྟིཏདེསནམཱཧ. ནིདཱནཀཎྜེཏིཨཱདིཏོ དེསིཏཾ ཨུདྡེསདེསནམཱཧ. སཱ ཧི ཨིམིསྶཱ དེསནཱཡ ནིདཱནཊྛཱནིཡཏྟཱ ཏཐཱ ཝུཏྟཱ.

བོདྷིསཏྟདྷམྨཏཱཝཎྞནཱ

༡༧. ‘‘ཝིཔསྶཱིཏི ¶ ཏསྶ ནཱམ’’ནྟི ཝཏྭཱ ཏསྶ ཨནྭཏྠཏཾ དསྶེཏུཾ ‘‘ཏཉྩ ཁོ’’ཏིཨཱདི ཝུཏྟཾ. ཝིཝིདྷེ ཨཏྠེཏི ཏིརོཧིཏཝིདཱུརདེསགཏཱདིཀེ ནཱིལཱདིཝསེན ¶ ནཱནཱཝིདྷེ, ཏདཉྙེ ཙ ཨིནྡྲིཡགོཙརབྷཱུཏེ ཏེ ཙ ཡཐཱུཔགཏེ, ཝོཧཱརཝིནིཙྪཡེ ཙཱཏི ནཱནཱཝིདྷེ ཨཏྠེ. པསྶནཀུསལཏཱཡཱཏི དསྶནེ ནིཔུཎབྷཱཝེན. ཡཱཐཱཝཏོ ¶ ཉེཡྻཾ བུཛ྄ཛྷཏཱིཏི བོདྷི, སོ ཨེཝ སཏྟཡོགཏོ བོདྷིསཏྟོཏི ཨཱཧ ‘‘པཎྜིཏསཏྟོ བུཛ྄ཛྷནཀསཏྟོ’’ཏི. སུཙིནྟིཏཙིནྟིཏཱདིནཱ པན པཎྜིཏབྷཱཝེ ཝཏྟབྦམེཝ ནཏྠི. ཡདཱ ཙ པནཱནེན མཧཱབྷིནཱིཧཱརོ ཀཏོ, ཏཏོ པཊྛཱཡ མཧཱབོདྷིཡཾ ཨེཀནྟནིནྣཏྟཱ བོདྷིམྷི སཏྟོ བོདྷིསཏྟོཏི ཨཱཧ ‘‘བོདྷིསངྑཱཏེསཱུ’’ཏིཨཱདི. མགྒཉཱཎཔདཊྛཱནཉྷི སབྦཉྙུཏཉཱཎཾ, སབྦཉྙུཏཉཱཎཔདཊྛཱནཉྩ མགྒཉཱཎཾ ‘‘བོདྷཱི’’ཏི ཝུཙྩཏི. ‘‘སཏོ སམྤཛཱནོ’’ཏི ཨིམིནཱ ཙཏུཏྠཱཡ གབྦྷཱཝཀྐནྟིཡཱ ཨོཀྐམཱིཏི དསྶེཏི. ཙཏསྶོ ཧི གབྦྷཱཝཀྐནྟིཡོ ཨིདྷེཀཙྩོ གབྦྷོ མཱཏུཀུཙྪིཡཾ ཨོཀྐམནེ, ཋཱནེ, ནིཀྑམནེཏི ཏཱིསུ ཋཱནེསུ ཨསམྤཛཱནོ ཧོཏི, ཨེཀཙྩོ པཋམེ ཋཱནེ སམྤཛཱནོ, ན ཨིཏརེསུ, ཨེཀཙྩོ པཋམེ, དུཏིཡེ ཙ ཋཱནེ སམྤཛཱནོ, ན ཏཏིཡེ, ཨེཀཙྩོ ཏཱིསུཔི ཋཱནེསུ སམྤཛཱནོ ཧོཏི. ཏཏྠ པཋམཱ གབྦྷཱཝཀྐནྟི ལོཀིཡམཧཱཛནསྶ ཝསེན ཝུཏྟཱ, དུཏིཡཱ ཨསཱིཏིམཧཱསཱཝཀཱནཾ (ཐེརགཱ. ཨཊྛ. ༢.༢༡ ཝངྒཱིསཏྠེརགཱཐཱཝཎྞནཱཡ ཝིཏྠཱརོ) ཝསེན, ཏཏིཡཱ དྭིནྣཾ ཨགྒསཱཝཀཱནཾ, པཙྩེཀབུདྡྷཱནཉྩ ཝསེན. ཏེ ཀིར ཀམྨཛཝཱཏེཧི ཨུདྡྷཾཔཱདཱ ཨདྷོསིརཱ ཨནེཀསཏཔོརིསེ པཔཱཏེ ཝིཡ ཡོནིམུཁེ ཁིཏྟཱ ཏཱལ༹ཙྪིགྒལེ༹ན ཧཏྠཱི ཝིཡ སམྦཱདྷེན ཡོནིམུཁེན ནིཀྑམནྟཱ མཧནྟཾ དུཀྑཾ པཱཔུཎནྟི, ཏེན ནེསཾ ‘‘མཡཾ ནིཀྑམཱམཱ’’ཏི སམྤཛཉྙཾ ན ཧོཏི. ཙཏུཏྠཱ སབྦཉྙུབོདྷིསཏྟཱནཾ ཝསེན. ཏེ ཧི མཱཏུཀུཙྪིམྷི པཊིསནྡྷིཾ གཎྷནྟཱཔི པཛཱནནྟི, ཏཏྠ ཝསནྟཱཔི པཛཱནནྟི, ནིཀྑམནཀཱལེཔི པཛཱནནྟི. ན ཧི ཏེ ཀམྨཛཝཱཏཱ ཨུདྡྷཾཔཱདེ ཨདྷོསིརེ ཀཏྭཱ ཁིཔིཏུཾ སཀྐོནྟི, དྭེ ཧཏྠེ པསཱརིཏྭཱ ཨཀྑཱིནི ཨུམྨཱིལེཏྭཱ ཋིཏཀཱཝ ནིཀྑམནྟཱིཏི. ཉཱཎེན པརིཙྪིནྡིཏྭཱཏི པུབྦབྷཱགེ པཉྩམཧཱཝིལོཀནཉཱཎེཧི ཙེཝ ‘‘ཨིདཱནི ཙཝཱམཱི’’ཏི ཙུཏིཔརིཙྪིནྡནཉཱཎེན ཙ ཨཔརབྷཱགེ ‘‘ཨིདྷ མཡཱ པཊིསནྡྷི གཧིཏཱ’’ཏི པཊིསནྡྷིཔརིཙྪིནྡནཉཱཎེན ཙ པརིཙྪིཛྫ ཛཱནིཏྭཱ.

པཉྩནྣཾ ¶ མཧཱཔརིཙྩཱགཱནཾ, ཉཱཏཏྠཙརིཡཱདཱིནཉྩ སཏིཔི པཱརམིཡཱ པརིཡཱཔནྣབྷཱཝེ སམྦྷཱརཝིསེསབྷཱཝདསྶནཏྠཾ ཝིསུཾ གཧཎཾ. ཏཏྠ ཨངྒཔརིཙྩཱགོ, ནཡནཔརིཙྩཱགོ, ཨཏྟཔརིཙྩཱགོ, རཛྫཔརིཙྩཱགོ, པུཏྟདཱརཔརིཙྩཱགོཏི ཨིམེ ¶ པཉྩ མཧཱཔརིཙྩཱགཱ. ཏཏྠཱཔི ཀཱམཾ ཨངྒཔརིཙྩཱགཱདཡོཔི དཱནཔཱརམཱིཡེཝ, ཏཐཱཔི པརིཙྩཱགཝིསེསབྷཱཝདསྶནཏྠཉྩེཝ སུདུཀྐརབྷཱཝདསྶནཏྠཉྩ ¶ མཧཱཔརིཙྩཱགཱནཾ ཝིསུཾ གཧཎཾ. ཏཏོ ཨེཝ ཙ ཨངྒཔརིཙྩཱགཏོཔི ཝིསུཾ ནཡནཔརིཙྩཱགགྒཧཎཾ, པརིཙྩཱགབྷཱཝསཱམཉྙེཔི རཛྫཔརིཙྩཱགཔུཏྟདཱརཔརིཙྩཱགགྒཧཎཉྩ ཀཏཾ. ཉཱཏཱིནཾ ཨཏྠཙརིཡཱ ཉཱཏཏྠཙརིཡཱ, སཱ ཙ ཁོ ཀརུཎཱཡནཝསེན. ཏཐཱ སཏྟལོཀསྶ དིཊྛདྷམྨིཀསམྤརཱཡིཀཔརམཏྠཱནཾ ཝསེན ཧིཏཙརིཡཱ ལོཀཏྠཙརིཡཱ. ཀམྨསྶཀཏཱཉཱཎཝསེན, ཨནཝཛྫཀམྨཱཡཏནསིཔྤཱཡཏནཝིཛྫཱཋཱནཝསེན, ཁནྡྷཱཡཏནཱདིཝསེན, ལཀྑཎཏྟཡཱདིཏཱིརཎཝསེན ཙ ཨཏྟནོ, པརེསཉྩ ཏཏྠ སཏིཔཊྛཱནེན ཉཱཎཙཱརོ བུདྡྷཙརིཡཱ, སཱ པནཏྠཏོ པཉྙཱཔཱརམཱིཡེཝ, ཉཱཎསམྦྷཱརཝིསེསཏཱདསྶནཏྠཾ པན ཝིསུཾ གཧཎཾ. བུདྡྷཙརིཡཱནནྟི བཧུཝཙནནིདྡེསེན པུབྦཡོགཔུབྦཙརིཡཱདྷམྨཀྑཱནཱདཱིནཾ སངྒཧོ དཊྛབྦོ. ཏཏྠ གཏཔཙྩཱགཏཝཏྟསངྑཱཏཱཡ པུབྦབྷཱགཔཊིཔདཱཡ སདྡྷིཾ ཨབྷིཉྙཱསམཱཔཏྟིནིཔྥཱདནཾ པུབྦཡོགོ. དཱནཱདཱིསུཡེཝ སཱཏིསཡཔཊིཔཏྟི པུབྦཙརིཡཱ. ‘‘ཡཱཝ ཙརིཡཱཔིཊཀེ སངྒཧིཏཱ ཨབྷིནཱིཧཱརོ པུབྦཡོགོ, ཀཱཡཱདིཝིཝེཀཝསེན ཨེཀཙརིཡཱ པུབྦཙརིཡཱ’’ཏི ཀེཙི. དཱནཱདཱིནཉྩེཝ ཨཔྤིཙྪཏཱདཱིནཉྩ སཾསཱརནིབྦཱནེསུ ཨཱདཱིནཝཱནིསཾསཱནཉྩ ཝིབྷཱཝནཝསེན, སཏྟཱནཾ བོདྷིཏྟཡེ པཏིཊྛཱཔནཔརིཔཱཙནཝསེན ¶ ཙ པཝཏྟཀཐཱ དྷམྨཀྑཱནཾ. ཀོཊིཾ པཏྭཱཏི པརཾ པརིཡནྟཾ པརམུཀྐཾསཾ པཱཔུཎིཏྭཱ. སཏྟམཧཱདཱནཱནཱིཏི ཨཊྛཝསྶིཀཀཱལེ ‘‘ཧདཡམཾསཱདཱིནིཔི ཡཱཙཀཱནཾ དདེཡྻ’’ནྟི ཨཛ྄ཛྷཱསཡཾ ཨུཔྤཱདེཏྭཱ དིནྣདཱནཾ, མངྒལཧཏྠིདཱནཾ, གམནཀཱལེ དིནྣཾ སཏྟསཏྟཀམཧཱདཱནཾ, མགྒཾ གཙྪནྟེན དིནྣཾ ཨསྶདཱནཾ, རཐདཱནཾ, པུཏྟདཱནཾ, བྷརིཡཱདཱནནྟི ཨིམཱནི སཏྟ མཧཱདཱནཱནི (ཙརིཡཱ. ༧༩) དཏྭཱ.

‘‘ཨིདཱནེཝ མེ མརཎཾ ཧོཏཱུ’’ཏི ཨདྷིམུཙྩིཏྭཱ ཀཱལཀརཎཾ ཨདྷིམུཏྟིཀཱལཀིརིཡཱ, ཏཾ བོདྷིསཏྟཱནཾཡེཝ, ན ཨཉྙེསཾ. བོདྷིསཏྟཱ ཀིར དཱིགྷཱཡུཀདེཝལོཀེ ཋིཏཱ ‘‘ཨིདྷ ཋིཏསྶ མེ བོདྷིསམྦྷཱརསམྦྷརཎཾ ན སམྦྷཝཏཱི’’ཏི ཀཏྭཱ ཏཏྠ ཝཱསཏོ ནིབྦིནྡམཱནསཱ ཧོནྟི, ཏདཱ ཝིམཱནཾ པཝིསིཏྭཱ ཨཀྑཱིནི ནིམཱིལེཏྭཱ ‘‘ཨིཏོ ཨུདྡྷཾ མེ ཛཱིཝིཏཾ ནཔྤཝཏྟཏཱུ’’ཏི ཙིཏྟཾ ཨདྷིཊྛཱཡ ནིསཱིདནྟི, ཙིཏྟཱདྷིཊྛཱནསམནནྟརམེཝ མརཎཾ ཧོཏི. པཱརམཱིདྷམྨཱནཉྷི ¶ ཨུཀྐཾསཔྤཝཏྟིཡཱ ཏསྨིཾ ཏསྨིཾ ཨཏྟབྷཱཝེ ཨབྷིཉྙཱསམཱཔཏྟཱིཧི སནྟཱནསྶ ཝིསེསིཏཏྟཱ ཨཏྟསིནེཧསྶ ཏནུབྷཱཝེན, སཏྟེསུ ཙ མཧཱཀརུཎཱཡ ཨུལཱ༹རབྷཱཝེན ཨདྷིཊྛཱནསྶ ཏིཀྑཝིསདབྷཱཝཱཔཏྟིཡཱ བོདྷིསཏྟཱནཾ ཨདྷིཔྤཱཡཱ སམིཛ྄ཛྷནྟི. ཙིཏྟེ, ཝིཡ ཀམྨེསུ ཙ ནེསཾ ཝསཱིབྷཱཝོ, ཏསྨཱ ཡཏྠ ཨུཔཔནྣཱནཾ པཱརམིཡོ སམྨདེཝ པརིབྲཱུཧནྟི. ཝུཏྟནཡེན ཀཱལཾ ཀཏྭཱ ཏཏྠ ཨུཔཔཛྫནྟི. ཏཐཱ ཧི ཨམྷཱཀཾ མཧཱསཏྟོ ཨིམསྨིཾཡེཝ ཀཔྤེ ནཱནཱཛཱཏཱིསུ ཨཔརིཧཱིནཛ྄ཛྷཱནོ ཀཱལཾ ཀཏྭཱ བྲཧྨལོཀེ ནིབྦཏྟོ, ཨཔྤཀམེཝ ཀཱལཾ ཏཏྠ ཋཏྭཱ ཏཏོ ཙཝིཏྭཱ མནུསྶལོཀེ ནིབྦཏྟོ, པཱརམཱིསམྦྷརཎཔསུཏོ ཨཧོསི. ཏེན ཝུཏྟཾ ‘‘བོདྷིསཏྟཱནཾཡེཝ, ན ¶ ཨཉྙེས’’ནྟི. ‘‘ཨེཀེནཨཏྟབྷཱཝེན ཨནྟརེན པཱརམཱིནཾ སབྦསོ པཱུརིཏཏྟཱ’’ཏི ཨིམིནཱ པཡོཛནཱབྷཱཝཏོ ཏཏྠ ཋཏྭཱ ཨདྷིམུཏྟིཀཱལཀིརིཡཱ ¶ ནཱམ ནཱཧོསཱིཏི དསྶེཏི. ཨཔི ཙ ཏཏྠ ཡཱཝཏཱཡུཀཊྛཱནཾ ཙརིམབྷཝེ ཨནེཀམཧཱནིདྷིསམུཊྛཱནཔུབྦིཀཱཡ དིབྦསམྤཏྟིསདིསཱཡ མཧཱསམྤཏྟིཡཱ ནིབྦཏྟི ཝིཡ, བུདྡྷབྷཱུཏསྶ ཨསདིསདཱནཱདིཝསེན ཨནཉྙསཱདྷཱརཎལཱབྷུཔྤཏྟི ཝིཡ ཙ ‘‘ཨིཏོ པརཾ མཧཱཔུརིསསྶ དིབྦསམྤཏྟིཨནུབྷཝནཾ ནཱམ ནཏྠཱི’’ཏི ཨུསྶཱཧཛཱཏསྶ པུཉྙསམྦྷཱརསྶ ཝསེནཱཏི དཊྛབྦཾ. ཨཡཉྷེཏྠ དྷམྨཏཱ.

མནུསྶགཎནཱཝསེན, ན དེཝགཎནཱཝསེན. པུབྦནིམིཏྟཱནཱིཏི ཙུཏིཡཱ པུབྦནིམིཏྟཱནི. ཨམིལཱཡིཏྭཱཏི ཨེཏྠ ཨམིལཱཏགྒཧཎེནེཝ ཏཱསཾ མཱལཱནཾ ཝཎྞསམྤདཱཡཔི གནྡྷསམྤདཱཡཔི སོབྷཱསམྤདཱཡཔི ཨཝིནཱསོ དསྶིཏོཏི དཊྛབྦཾ. བཱཧིརབྦྷནྟརཱནཾ རཛོཛལླཱནཾ ལེཔསྶཔི ཨབྷཱཝཏོ དེཝཱནཾ སརཱིརགཏཱནི ཝཏྠཱནི སབྦཀཱལཾ པརིསུདྡྷཔྤབྷསྶརཱནེཝ ཧུཏྭཱ ཏིཊྛནྟཱིཏི ཨཱཧ ‘‘ཝཏྠེསུཔི ཨེསེཝ ནཡོ’’ཏི. ནེཝ སཱིཏཾ ན ཨུཎྷནྟི ཡསྶ སཱིཏསྶ པཊིཀཱརཝསེན ཨདྷིཀཾ སེཝིཡམཱནཾ ཨུཎྷཾ, སཡམེཝ ཝཱ ཁརཏརཾ ཧུཏྭཱ ཨབྷིབྷཝནྟཾ སརཱིརེ སེདཾ ཨུཔྤཱདེཡྻ, ཏཱདིསཾ ནེཝ སཱིཏཾ, ན ཨུཎྷཾ ཧོཏི. ཏསྨིཾ ཀཱལེཏི ཡཐཱཝུཏྟམརཎཱསནྣཀཱལེ. བིནྡུབིནྡུཝསེནཱཏི ཚིནྣསུཏྟཱཡ ཨཱམུཏྟམུཏྟཱཝལིཡཱ ནིཔཏནྟཱ མུཏྟགུལི༹ཀཱ ཝིཡ བིནྡུ བིནྡུ ཧུཏྭཱ. སེདཱཏི སེདདྷཱརཱ མུཙྩནྟི. དནྟཱནཾ ཁཎྜིཏབྷཱཝོ ཁཎྜིཙྩཾ. ཀེསཱནཾ པལིཏབྷཱཝོ པཱལིཙྩཾ. ཨཱདི-སདྡེན ཝལིཏྟཙཏཾ སངྒཎྷཱཏི. ཀིལནྟརཱུཔོ ཨཏྟབྷཱཝོ ཧོཏི, ན པན ཁཎྜིཙྩཔཱལིཙྩཱདཱིཏི ¶ ཨདྷིཔྤཱཡོ. ཨུཀྐཎྛིཏཱཏི ཨནབྷིརཏི. སཱ ནཏྠི ¶ ཨུཔརཱུཔརི ཨུལཱ༹རཨུལཱ༹རཱནམེཝ བྷོགཱནཾ ཝིསེསཏོ དུཝིཛཱནནཱནཾ ཨུཔཏིཊྛཧནཏོ. ནིསྶསནྟཱིཏི ཨུཎྷཾ ནིསྶསནྟི. ཝིཛམྦྷནྟཱིཏི ཨནབྷིརཏིཝསེན ཝིཛམྦྷནཾ ཀརོནྟི.

པཎྜིཏཱ ཨེཝཱཏི བུདྡྷིསམྤནྣཱ ཨེཝ དེཝཏཱ. ཡཐཱ དེཝཏཱ སམྤཏིཛཱཏཱ ‘‘ཀཱིདིསེན པུཉྙཀམྨེན ཨིདྷ ནིབྦཏྟཱ’’ཏི ཙིནྟེཏྭཱ ‘‘ཨིམིནཱ ནཱམ པུཉྙཀམྨེན ཨིདྷ ནིབྦཏྟཱ’’ཏི ཛཱནནྟི, ཨེཝཾ ཨཏཱིཏབྷཝེ ཨཏྟནཱ ཀཏཾ, ཨཉྙདཱཔི ཝཱ ཨེཀཙྩཾ པུཉྙཀམྨཾ ཛཱནནྟིཡེཝ མཧཱཔུཉྙཱཏི ཨཱཧ ‘‘ཡེ མཧཱཔུཉྙཱ’’ཏིཨཱདི.

ན པཉྙཱཡནྟི ཙིརཏརཀཱལཏྟཱ པརམཱཡུནོ. ཨནིཡྻཱནིཀནྟི ན ནིཡྻཱནཱཝཧཾ སཏྟཱནཾ ཨབྷཱཛནབྷཱཝཏོ. སཏྟཱ ན པརམཱཡུནོ ཧོནྟི ནཱམ པཱཔུསྶནྣཏཱཡཱཏི ཨཱཧ ‘‘ཏདཱ ཧི སཏྟཱ ཨུསྶནྣཀིལེསཱ ཧོནྟཱི’’ཏི. ཨེཏྠཱཧ – ཀསྨཱ སམྨཱསམྦུདྡྷཱ མནུསྶལོཀེ ཨེཝ ཨུཔྤཛྫནྟི, ན དེཝབྲཧྨལོཀེསཱུཏི? དེཝལོཀེ ཏཱཝ ནུཔྤཛྫནྟི བྲཧྨཙརིཡཝཱསསྶ ཨནོཀཱསབྷཱཝཏོ, ཏཐཱ ཨནཙྪརིཡབྷཱཝཏོ ¶ . ཨཙྪརིཡདྷམྨཱ ཧི བུདྡྷཱ བྷགཝནྟོ, ཏེསཾ སཱ ཨཙྪརིཡདྷམྨཏཱ དེཝཏྟབྷཱཝེ ཋིཏཱནཾ ན པཱཀཊཱ ཧོཏི ཡཐཱ མནུསྶབྷཱུཏཱནཾ, དེཝབྷཱུཏེ ཧི སམྨཱསམྦུདྡྷེ དིསྶམཱནཾ བུདྡྷཱནུབྷཱཝཾ དེཝཱནུབྷཱཝཏོ ལོཀོ དཧཏི, ན བུདྡྷཱནུབྷཱཝཏོ, ཏཐཱ སཏི ‘‘སམྨཱསམྦུདྡྷོ’’ཏི ནཱདྷིམུཙྩཏི ན སམྤསཱིདཏི, ཨིསྶརགུཏྟགྒཱཧཾ ན ཝིསྶཛྫེཏི, དེཝཏྟབྷཱཝསྶ ཙ ཙིརཀཱལཱདྷིཊྛཱནཏོ ཨེཀཙྩསསྶཏཝཱདཏོ ན པརིམུཙྩཏི. བྲཧྨལོཀེ ནུཔྤཛྫནྟཱིཏི ཨེཏྠཱཔི ཨེསེཝ ནཡོ. སཏྟཱནཾ ཏཱདིསགྒཱཧཝིནིམོཙནཏྠཉྷི བུདྡྷཱ བྷགཝནྟོ མནུསྶསུགཏིཡཾཡེཝ ཨུཔྤཛྫནྟི, ན དེཝསུགཏིཡཾ. མནུསྶསུགཏིཡཾ ཨུཔྤཛྫནྟཱཔི ཨོཔཔཱཏིཀཱ ན ཧོནྟི, སཏི ཙ ཨོཔཔཱཏིཀཱུཔཔཏྟིཡཾ ཝུཏྟདོསཱནཏིཝཏྟནཏོ, དྷམྨཝེནེཡྻཱནཾ དྷམྨཏནྟིཡཱ ཋཔནསྶ ¶ ཝིཡ དྷཱཏུཝེནེཡྻཱནཾ དྷཱཏཱུནཾ ཋཔནསྶ ཨིཙྪིཏབྦཏྟཱ ཙ. ན ཧི ཨོཔཔཱཏིཀཱནཾ པརིནིབྦཱནཏོ ཨུདྡྷཾ སརཱིརདྷཱཏུཡོ ཏིཊྛནྟི. མནུསྶལོཀེ ཨུཔྤཛྫནྟཱཔི མཧཱབོདྷིསཏྟཱ ཙརིམབྷཝེ མནུསྶབྷཱཝསྶ པཱཀཊབྷཱཝཀརཎཱཡ པན དཱརཔརིགྒཧམྤི ཀརོནྟཱ ཡཱཝ པུཏྟམུཁདསྶནཱ ཨགཱརམཛ྄ཛྷེ ཏིཊྛནྟི, པརིཔཱཀགཏསཱིལནེཀྑམྨཔཉྙཱདིཔཱརམིཀཱཔི ན ཨབྷིནིཀྑམནྟཱིཏི. ཀིཾ ཝཱ ཨེཏཱཡ ¶ ཀཱརཎཙིནྟཱཡ ‘‘སབྦབུདྡྷེཧི ཨཱཙིཎྞསམཱཙིཎྞཱ, ཡདིདཾ མནུསྶབྷཱུཏཱནཾཡེཝ ཨབྷིསམྦུཛ྄ཛྷནཱ, ན དེཝབྷཱུཏཱན’’ནྟི. ཨཡམེཏྠ དྷམྨཏཱ. ཏཐཱ ཧི ཏདཏྠོ མཧཱབྷིནཱིཧཱརོཔི མནུསྶབྷཱུཏཱནཾཡེཝ ཨིཛ྄ཛྷཏི, ན དེཝབྷཱུཏཱནཾ.

ཀསྨཱ པན སམྨཱསམྦུདྡྷཱ ཛམྦུདཱིཔེ ཨེཝ ཨུཔྤཛྫནྟི, ན སེསདཱིཔེསུ? ཀེཙི ཏཱཝ ཨཱཧུ ‘‘ཡསྨཱ པཐཝིཡཱ ནཱབྷིབྷཱུཏཱ, བུདྡྷཱནུབྷཱཝསཧིཏཱ ཨཙལཊྛཱནབྷཱུཏཱ བོདྷིམཎྜབྷཱུམི ཛམྦུདཱིཔེ ཨེཝ, ཏསྨཱ ཛམྦུདཱིཔེ ཨེཝ ཨུཔྤཛྫནྟཱི’’ཏི, ཏཐཱ ‘‘ཨིཏརེསམྤི ཨཝིཛཧིཏཊྛཱནཱནཾ ཏཏྠེཝ ལབྦྷནཏོ’’ཏི. ཨཡཾ པནེཏྠ ཨམྷཱཀཾ ཁནྟི – ཡསྨཱ པུརིམབུདྡྷཱནཾ, མཧཱབོདྷིསཏྟཱནཾ, པཙྩེཀབུདྡྷཱནཉྩ ནིབྦཏྟིཡཱ སཱཝཀབོདྷིསཏྟཱནཾ སཱཝཀབོདྷིཡཱ ཨབྷིནཱིཧཱརོ, སཱཝཀཔཱརམིཡཱ སམྦྷརཎཾ, པརིཔཱཙནཉྩ བུདྡྷཁེཏྟབྷཱུཏེ ཨིམསྨིཾ ཙཀྐཝཱལེ༹ ཛམྦུདཱིཔེ ཨེཝ ཨིཛ྄ཛྷཏི, ན ཨཉྙཏྠ. ཝེནེཡྻཱནཾ ཝིནཡནཏྠོ ཙ བུདྡྷུཔྤཱདོཏི ཨགྒསཱཝཀམཧཱསཱཝཀཱདི ཝེནེཡྻཝིསེསཱཔེཀྑཱཡ ཨེཏསྨིཾ ཛམྦུདཱིཔེ ཨེཝ བུདྡྷཱ ནིབྦཏྟནྟི, ན སེསདཱིཔེསུ. ཨཡཉྩ ནཡོ སབྦབུདྡྷཱནཾ ཨཱཙིཎྞསམཱཙིཎྞོཏི. ཏེསཾ ཨུཏྟམཔུརིསཱནཾ ཏཏྠེཝ ཨུཔྤཏྟི སམྤཏྟིཙཀྐཱནཾ ཝིཡ ཨཉྙམཉྙཱུཔནིསྶཡཏོ ཨཔརཱཔརཾ ¶ ཝཏྟཏཱིཏི དཊྛབྦཾ, ཨེཏེནེཝ ཨིམཾ ཙཀྐཝཱལ༹ཾ མཛ྄ཛྷེ ཀཏྭཱ ཨིམིནཱ སདྡྷིཾ ཙཀྐཝཱལཱ༹ནཾ དསསཧསྶསྶེཝ ཁེཏྟབྷཱཝོ དཱིཔིཏོ ཨིཏོ ཨཉྙསྶ བུདྡྷཱནཾ ཨུཔྤཏྟིཊྛཱནསྶ ཏེཔིཊཀེ བུདྡྷཝཙནེ ཨནུཔལབྦྷནཏོ. ཏེནཱཧ ‘‘ཏཱིསུ དཱིཔེསུ བུདྡྷཱ ན ནིབྦཏྟནྟི, ཛམྦུདཱིཔེཡེཝ ནིབྦཏྟནྟཱིཏི དཱིཔཾ པསྶཱི’’ཏི. ཨིམིནཱ ནཡེན དེསནིཡཱམེཔི ཀཱརཎཾ ནཱིཧརིཏྭཱ ཝཏྟབྦཾ.

ཨིདཱནི ¶ ཙ ཁཏྟིཡཀུལཾ ལོཀསམྨཏཾ བྲཱཧྨཎཱནམྤི པཱུཛནཱིཡབྷཱཝཏོ. ‘‘རཱཛཱ པིཏཱ བྷཝིསྶཏཱི’’ཏི ཀུལཾ པསྶི པིཏུཝསེན ཀུལསྶ ནིདྡིསིཏབྦཏོ.

‘‘དསནྣཾ མཱསཱནཾ ཨུཔརི སཏྟ དིཝསཱནཱི’’ཏི པསྶི, ཏེན ཨཏྟནོ ཨནྟརཱཡཱབྷཱཝཾ ཨཉྙཱསི, ཏསྶཱ ཙ ཏུསིཏབྷཝེ དིབྦསམྤཏྟིཔཙྩནུབྷཝནཾ.

ཏཱ དེཝཏཱཏི དསསཧསྶིཙཀྐཝཱལ༹དེཝཏཱ. ཀཐཾ པན ཏཱ དེཝཏཱ ཏདཱ བོདྷིསཏྟསྶ པཱུརིཏཔཱརམིབྷཱཝཾ, ཀཐཾ ཙསྶ བུདྡྷབྷཱཝཾ ཛཱནནྟཱིཏི? མཧེསཀྑཱནཾ ¶ དེཝཏཱནཾ ཝསེན, ཡེབྷུཡྻེན ཙ ཏཱ དེཝཏཱ ཨབྷིསམཡབྷཱགིནོ. ཏཐཱ ཧི བྷགཝཏོ དྷམྨདཱནསཾཝིབྷཱགེ ཨནེཀཝཱརཾ དསསཧསྶཙཀྐཝཱལ༹དེཝཏཱསནྣིཔཱཏོ ཨཧོསི.

‘‘ཙཝཱམཱི’’ཏི ཛཱནཱཏི ཙུཏིཨཱསནྣཛཝནེཧི ཉཱཎསཧིཏེཧི ཙུཏིཡཱ ཨུཔཊྛིཏབྷཱཝསྶ པཊིསཾཝིདིཏཏྟཱ. ཙུཏིཙིཏྟཾ ན ཛཱནཱཏི ཙུཏིཙིཏྟཀྑཎསྶ ཨིཏྟརབྷཱཝཏོ. ཏཐཱ ཧི ཏཾ ཙུཏཱུཔཔཱཏཉཱཎསྶཔི ཨཝིསཡོཝ. པཊིསནྡྷིཙིཏྟེཔི ཨེསེཝ ནཡོ. ཨཱཝཛྫནཔརིཡཱཡོཏི ཨཱཝཛྫནཀྐམོ. ཡསྨཱ ཨེཀཝཱརཾ ཨཱཝཛྫིཏམཏྟེན ཨཱརམྨཎཾ ནིཙྪིནིཏུཾ ན སཀྐཱ, ཏསྨཱ ཏཾ ཨེཝཱརམྨཎཾ དུཏིཡཾ, ཏཏིཡཉྩ ཨཱཝཛྫིཏྭཱ ནིཙྪཡཏི. ཨཱཝཛྫནསཱིསེན ཙེཏྠ ཛཝནཝཱརོ གཧིཏོ. ཏེནཱཧ ‘‘དུཏིཡཏཏིཡཙིཏྟཝཱརེ ཨེཝ ཛཱནིསྶཏཱི’’ཏི. ཙུཏིཡཱ པུརེཏརཾ ཀཏིཔཡཙིཏྟཝཱརཏོ པཊྛཱཡ ‘‘མརཎཾ མེ ཨཱསནྣ’’ནྟི ¶ ཛཱནནཏོ ‘‘ཙུཏིཀྑཎེཔི ཙཝཱམཱིཏི ཛཱནཱཏཱི’’ཏི ཝུཏྟཾ. པཊིསནྡྷིཡཱ པན ཨཔུབྦབྷཱཝཏོ པཊིསནྡྷིཙིཏྟཾ ན ཛཱནཱཏི. ནིཀནྟིཡཱ ཨུཔྤཏྟིཏོ པརཏོ ‘‘ཨསུཀསྨིཾ མེ ཋཱནེ པཊིསནྡྷི གཧིཏཱ’’ཏི ཛཱནཱཏི. ཏསྨིཾ ཀཱལེཏི པཊིསནྡྷིགྒཧཎཀཱལེ. དསསཧསྶིལོཀདྷཱཏུ ཀམྤཏཱིཏི ཨེཏྠ ཀམྤནཀཱརཎཾ ཧེཊྛཱ བྲཧྨཛཱལཝཎྞནཱཡཾ (དཱི. ནི. ཊཱི. ༡.༡༤༩) ཝུཏྟམེཝ. ཨཏྠཏོ པནེཏྠ ཡཾ ཝཏྟབྦཾ, ཏཾ པརཏོ མཧཱཔརིནིབྦཱནཝཎྞནཱཡཾ (དཱི. ནི. ཨཊྛ. ༢.༡༧༡) ཨཱགམིསྶཏི. མཧཱཀཱརུཎིཀཱ བུདྡྷཱ བྷགཝནྟོ སཏྟཱནཾ ཧིཏསུཁཝིདྷཱནཏཔྤརཏཱཡ བཧུལཾ སོམནསྶིཀཱཝ ཧོནྟཱིཏི ཏེསཾ པཋམམཧཱཝིཔཱཀཙིཏྟེན པཊིསནྡྷིགྒཧཎཾ ཨཊྛཀཐཱཡཾ (དཱི. ནི. ཨཊྛ. ༢.༡༧; དྷ. ས. ཨཊྛ. ༤༩༨; མ. ནི. ཨཊྛ. ༤.༢༠༠) ཝུཏྟཾ. མཧཱསིཝཏྠེརོཔན ཡདིཔི མཧཱཀཱརུཎིཀཱ བུདྡྷཱ བྷགཝནྟོ སཏྟཱནཾ ཧིཏསུཁཝིདྷཱནཏཔྤརཱཝ, ཝིཝེཀཛ྄ཛྷཱསཡཱ པན ཝིསངྑཱརནིནྣཱ སབྦསངྑཱརེསུ ཨཛ྄ཛྷུཔེཀྑནབཧུལཱཏི པཉྩམམཧཱཝིཔཱཀཙིཏྟེན པཊིསནྡྷིགྒཧཎམཱཧ.

པུརེ པུཎྞམཱཡ སཏྟམདིཝསཏོ པཊྛཱཡཱཏི པུཎྞམཱཡ པུརེ སཏྟམདིཝསཏོ པཊྛཱཡ, སུཀྐཔཀྑེ ¶ ནཝམིཏོ པཊྛཱཡཱཏི ཨཏྠོ. སཏྟམེ དིཝསེཏི ནཝམིཏོ སཏྟམེ དིཝསེ ཨཱསལ༹ྷིཔུཎྞམཱཡཾ. ཨིདཾ སུཔིནནྟི ཨིདཱནི ཝུཙྩམཱནཱཀཱརཾ. མཛ྄ཛྷིམཊྛཀཐཱཡཾ པན ‘‘ཨནོཏཏྟདཧཾ ནེཏྭཱ ཨེཀམནྟཾ ཨཊྛཾསུ. ཨཐ ནེསཾ དེཝིཡོ ཨཱགནྟྭཱ མནུསྶམལཧརཎཏྠཾ ནྷཱཔེཏྭཱ’’ཏི ¶ (མ. ནི. ཨཊྛ. ༤.༢༠༠) ཝུཏྟཾ. ཏཏྠ ནེསཾ དེཝིཡོཏི མཧཱརཱཛཱུནཾ དེཝིཡོ. ཙརིཏྭཱཏི གོཙརཾ ཙརིཏྭཱ.

ཧརིཏཱུཔལིཏྟཱཡཱཏི ཧརིཏེན གོམཡེན ཀཏཔརིབྷཎྜཱཡ. ‘‘སོ ཙ ཁོ པུརིསགབྦྷོ, ན ཨིཏྠིགབྦྷོ, པུཏྟོ ཏེ བྷཝིསྶཏཱི’’ཏི ཨེཏྟཀམེཝ ¶ ཏེ བྲཱཧྨཎཱ ཨཏྟནོ སུཔིནསཏྠནཡེན ཀཐེསུཾ. ‘‘སཙེ ཨགཱརཾ ཨཛ྄ཛྷཱཝསིསྶཏཱི’’ཏིཨཱདི པན དེཝཏཱཝིགྒཧེན ཏམཏྠཾ ཡཱཐཱཝཏོ པཝེདེསུཾ.

དྷམྨཏཱཏི ཨེཏྠ དྷམྨ-སདྡོ ‘‘ཛཱཏིདྷམྨཱནཾ བྷིཀྑཝེ སཏྟཱན’’ནྟིཨཱདཱིསུ (མ. ནི. ༡.༡༣༡; ༣.༣༧༣; པཊི. མ. ༡.༣༣) ཝིཡ པཀཏིཔརིཡཱཡོ, དྷམྨོ ཨེཝ དྷམྨཏཱ ཡཐཱ དེཝོ ཨེཝ དེཝཏཱཏི ཨཱཧ ‘‘ཨཡཾ སབྷཱཝོ’’ཏི, ཨཡཾ པཀཏཱིཏི ཨཏྠོ. སྭཱཡཾ སབྷཱཝོ ཨཏྠཏོ ཏཐཱ ནིཡཏབྷཱཝོཏི ཨཱཧ ‘‘ཨཡཾ ནིཡཱམོཏི ཝུཏྟཾ ཧོཏཱི’’ཏི. ནིཡཱམོ པན བཧུཝིདྷོཏི ཏེ སབྦེ ཨཏྠུདྡྷཱརནཡེན ཨུདྡྷརིཏྭཱ ཨིདྷཱདྷིཔྤེཏནིཡཱམམེཝ དསྶེཏུཾ ‘‘ནིཡཱམོ ཙ ནཱམཱ’’ཏིཨཱདི ཝུཏྟཾ. ཏཏྠ ཀམྨཱནཾ ནིཡཱམོ ཀམྨནིཡཱམོ. ཨེས ནཡོ ཨུཏུནིཡཱམཱདཱིསུ ཏཱིསུ. ཨིཏརོ པན དྷམྨོ ཨེཝ ནིཡཱམོ དྷམྨནིཡཱམོ, དྷམྨཏཱ.

ཀུསལསྶ ཀམྨསྶ. ནིསེནྟོ ཏིཁིཎཾ ཀརོནྟོ.

ཨརཱུཔཱདིབྷཱུམིབྷཱགཝིསེསཝསེན ཨུཏུཝིསེསདསྶནཏོ ཨུཏུཝིསེསེན སིཛ྄ཛྷམཱནཱནཾ རུཀྑཱདཱིནཾ པུཔྥཕལཱདིགྒཧཎཾ ‘‘ཏེསུ ཏེསུ ཛནཔདེསཱུ’’ཏི ཝིསེསེཏྭཱ ཝུཏྟཾ. ཏསྨིཾ ཏསྨིཾ ཀཱལེཏི ཏསྨིཾ ཏསྨིཾ ཝསནྟཱདིཀཱལེ.

མདྷུརཏོ བཱིཛཏོ ཏིཏྟཏོ བཱིཛཏོཏི ཡོཛནཱ.

༡༨. ཝཏྟམཱནསམཱིཔེ ཝཏྟམཱནེ ཝིཡ ཝོཧརིཏབྦནྟི ‘‘ཨོཀྐམཏཱི’’ཏི ཝུཏྟནྟི ཨཱཧ ‘‘ཨོཀྐནྟོ ཧོཏཱིཏི ཨཡམེཝཏྠོ’’ཏི. ཨེཝཾ ཧོཏཱིཏི ཨེཝཾ ཝུཏྟཔྤཀཱརེནསྶ སམྤཛཱནནཱ ཧོཏི. ན ཨོཀྐམམཱནེ པཊིསནྡྷིཀྑཎསྶ དུཝིཉྙེཡྻཏཱཡ. ཡཐཱ ཙ ཝུཏྟཾ ‘‘པཊིསནྡྷིཙིཏྟཾ ན ཛཱནཱཏཱི’’ཏི. དསསཧསྶཙཀྐཝཱལ༹པཏྠརཎེན ¶ ཝཱ ཨཔྤམཱཎོ. ཨཏིཝིཡ སམུཛྫལནབྷཱཝེན ཨུལཱ༹རོ ¶ . དེཝཱནུབྷཱཝནྟི དེཝཱནཾ པབྷཱནུབྷཱཝཾ. དེཝཱནཉྷི པབྷཾ སོ ཨོབྷཱསོ ¶ ཨབྷིབྷཝཏི, ན ཏེསཾ ཨཱདྷིཔཙྩཾ. ཏེནཱཧ ‘‘ནིཝཏྠཝཏྠསྶཱ’’ཏིཨཱདི.

ལོཀཱནཾ ལོཀདྷཱཏཱུནཾ ཨནྟརོ ཝིཝརོ ལོཀནྟརོ, སོ ཨེཝ ཨིཏྠིལིངྒཝསེན ‘‘ལོཀནྟརིཀཱ’’ཏི ཝུཏྟོ. རུཀྑགཙྪཱདིནཱ ཀེནཙི ན ཧཉྙནྟཱིཏི ཨགྷཱ, ཨསམྦཱདྷཱ. ཏེནཱཧ ‘‘ནིཙྩཝིཝཊཱ’’ཏི. ཨསཾཝུཏཱཏི ཧེཊྛཱ, ཨུཔརི ཙ ཀེནཙི ན པིཧིཏཱ. ཏེན ཝུཏྟཾ ‘‘ཧེཊྛཱཔི ཨཔྤཏིཊྛཱ’’ཏི. ཏཏྠ པི-སདྡེན ཡཐཱ ཧེཊྛཱ ཨུདཀསྶ པིདྷཱཡིཀཱ པཐཝཱི ནཏྠཱིཏི ཨསཾཝུཏཱ ལོཀནྟརིཀཱ, ཨེཝཾ ཨུཔརིཔི ཙཀྐཝཱལེ༹སུ ཝིཡ དེཝཝིམཱནཱནཾ ཨབྷཱཝཏོ ཨསཾཝུཏཱ ཨཔྤཏིཊྛཱཏི དསྶེཏི. ཨནྡྷཀཱརོ ཨེཏྠ ཨཏྠཱིཏི ཨནྡྷཀཱརཱ. ཙཀྑུཝིཉྙཱཎཾ ན ཛཱཡཏི ཨཱལོཀསྶ ཨབྷཱཝཏོ, ན ཙཀྑུནོ. ཏཐཱ ཧི ‘‘ཏེན ཨོབྷཱསེན ཨཉྙམཉྙཾ སཉྫཱནནྟཱི’’ཏི ཝུཏྟཾ. ཛམྦུདཱིཔེ ཋིཏམཛ྄ཛྷནྷིཀཝེལཱཡཾ པུབྦཝིདེཧཝཱསཱིནཾ ཨཏྠངྒམནཝསེན ཨུཔཌྜྷཾ སཱུརིཡམཎྜལཾ པཉྙཱཡཏི, ཨཔརགོཡཱནཝཱསཱིནཾ ཨུགྒམནཝསེན, ཨེཝཾ སེསདཱིཔེསུ པཱིཏི ཨཱཧ ‘‘ཨེཀཔྤཧཱརེནེཝ ཏཱིསུ དཱིཔེསུ པཉྙཱཡནྟཱི’’ཏི. ཨིཏོ ཨཉྙཐཱ པན དྭཱིསུ ཨེཝ དཱིཔེསུ ཨེཀཔྤཧཱརེན པཉྙཱཡནྟཱིཏི. ཨེཀེཀཱཡ དིསཱཡ ནཝ ནཝ ཡོཛནསཏསཧསྶཱནི ཨནྡྷཀཱརཝིདྷམནམྤི ཨིམིནཱཝ ནཡེན དཊྛབྦཾ. པབྷཱཡ ནཔྤཧོནྟཱིཏི ཨཏྟནོ པབྷཱཡ ཨོབྷཱསིཏུཾ ཨནབྷིསམྦྷུནནྟི. ཡུགནྡྷརཔབྦཏཔྤམཱཎེ ཨཱཀཱསེ ཝིཙརཎཏོ ‘‘ཙཀྐཝཱལ༹པབྦཏསྶ ཝེམཛ྄ཛྷེན ཝིཙརནྟཱི’’ཏི ཝུཏྟཾ.

ཝཱཝཊཱཏི ¶ ཁཱདནཏྠཾ གཎྷིཏུཾ ཨུཔཀྐམནྟཱ. ཝིཔརིཝཏྟིཏྭཱཏི ཝིཝཏྟིཏྭཱ. ཚིཛྫིཏྭཱཏི མུཙྪཱཔཏྟིཡཱ ཋིཏཊྛཱནཏོ མུཙྩིཏྭཱ, ཨངྒཔཙྩངྒཚེདནེན ཝཱ ཚིཛྫིཏྭཱ. ཨཙྩནྟཁཱརེཏི ཨཱཏཔསནྟཱཔཱབྷཱཝེན ཨཏིསཱིཏབྷཱཝམེཝ སནྡྷཱཡ ཨཙྩནྟཁཱརཏཱ ཝུཏྟཱ སིཡཱ. ན ཧི ཏཾ ཀཔྤསཎྛཧནཨུདཀཾ སམྤཏྟིཀརམཧཱམེགྷཝུཊྛཾ པཐཝིསནྡྷཱརཀཾ ཀཔྤཝིནཱསཀཾ ཨུདཀཾ ཝིཡ ཁཱརཾ བྷཝིཏུཾ ཨརཧཏི. ཏཐཱ ཧི སཏི པཐཝཱིཔི ཝིལཱིཡེཡྻ, ཏེསཾ ཝཱ པཱཔཀམྨབལེན པེཏཱནཾ ཨུདཀསྶ པུབྦཁེལ༹བྷཱཝཱཔཏྟི ཝིཡ ཏསྶ ཨུདཀསྶ ཏདཱ ཁཱརབྷཱཝཱཔཏྟི ཧོཏཱིཏི ཝུཏྟཾ ‘‘ཨཙྩནྟཁཱརེ ཨུདཀེ’’ཏི.

ཨེཀཡཱགུཔཱནམཏྟམྤཱིཏི པཏྟཱདིབྷཱཛནགཏཾ ཡཱགུཾ གལོ༹ཙིཨཱདིཨུདྡྷརཎིཡཱ གཧེཏྭཱ པིཝནམཏྟམྤི ཀཱལཾ. སམནྟཏོཏི སབྦབྷཱགཏོ ཚཔྤཀཱརམྤི.

༡༩. ཙཏུནྣཾ ¶ མཧཱརཱཛཱནཾ ཝསེནཱཏི ཝེསྶཝཎཱདིཙཏུམཧཱརཱཛབྷཱཝསཱམཉྙེན.

ཡཐཱཝིཧཱརནྟི ¶ ཡཐཱསཀཾ ཝིཧཱརཾ.

༢༠. པཀཏིཡཱཏི ཨཏྟནོ པཀཏིཡཱ ཨེཝ. ཏེནཱཧ ‘‘སབྷཱཝེནེཝཱ’’ཏི. པརསྶ སནྟིཀེ གཧཎེན ཝིནཱ ཨཏྟནོ སབྷཱཝེནེཝ སཡམེཝ ཨདྷིཊྛཧིཏྭཱ སཱིལསམྤནྣཱ. བོདྷིསཏྟམཱཏཱཔཱིཏི ཨམྷཱཀཾ བོདྷིསཏྟམཱཏཱཔི. ཀཱལདེཝིལསྶཱཏི ཡཐཱ ཀཱལདེཝིལསྶ སནྟིཀེ ཨཉྙདཱ གཎྷཱཏི, བོདྷིསཏྟེ པན…པེ… སཡམེཝ སཱིལཾ ཨགྒཧེསི, ཏཐཱ ཝིཔསྶཱིབོདྷིསཏྟམཱཏཱཔཱིཏི ཨདྷིཔྤཱཡོ.

༢༡. ‘‘མནུསྶེསཱུ’’ཏི ཨིདཾ པཀཏིཙཱརིཏྟཝསེན ཝུཏྟཾ, ‘‘མནུསྶིཏྠིཡཱ ནཱམ མནུསྶཔུརིསེསུ པུརིསཱདྷིཔྤཱཡཙིཏྟཾ ཨུཔྤཛྫེཡྻཱ’’ཏི. བོདྷིསཏྟསྶ མཱཏུཡཱ པན དེཝེསུཔི ཏཱདིསཾ ཙིཏྟཾ ནུཔྤཛྫཏེཝ. ཡཐཱ བོདྷིསཏྟསྶ ཨཱནུབྷཱཝེན བོདྷིསཏྟམཱཏུ པུརིསཱདྷིཔྤཱཡཙིཏྟཾ ནུཔྤཛྫཏི, ཨེཝཾ ཏསྶ ཨཱནུབྷཱཝེནེཝ སཱ ཀེནཙི པུརིསེན ཨནབྷིབྷཝནཱིཡཱཏི ཨཱཧ ‘‘པཱདཱ ན ཝཧནྟི དིབྦསངྑལིཀཱ ཝིཡ བཛ྄ཛྷནྟཱི’’ཏི.

༢༢. པུབྦེ ¶ ‘‘ཀཱམགུཎཱུཔསཾཧིཏཾ ཙིཏྟཾ ནུཔྤཛྫཏཱི’’ཏི ཝུཏྟཾ, པུན ‘‘པཉྩཧི ཀཱམགུཎེཧི སམཔྤིཏཱ སམངྒཱིབྷཱུཏཱ པརིཙཱརེཏཱི’’ཏི ཙ ཝུཏྟཾ. ཀཐམིདཾ ཨཉྙམཉྙཾ ན ཝིརུཛ྄ཛྷཏཱིཏི ཨཱཧ ‘‘པུབྦེ’’ཏིཨཱདི. ཝཏྠུཔཊིཀྑེཔོཏི ཨབྲཧྨཙརིཡཝཏྠུཔཊིསེདྷོ. ཏེནཱཧ ‘‘པུརིསཱདྷིཔྤཱཡཝསེནཱ’’ཏི. ཨཱརམྨཎཔཊིལཱབྷོཏི རཱུཔཱདིཔཉྩཀཱམགུཎཱརམྨཎསྶེཝ པཊིལཱབྷོ.

༢༣. ཀིལམཐོཏི ཁེདོ, ཀཱཡསྶ གརུབྷཱཝཀཐིནབྷཱཝཱདཡོཔི ཏསྶཱ ཏདཱ ན ཧོནྟི ཨེཝ. ‘‘ཏིརོཀུཙྪིགཏཾ པསྶཏཱི’’ཏི ཝུཏྟཾ. ཀདཱ པཊྛཱཡ པསྶཏཱིཏི ཨཱཧ ‘‘ཀལལཱདིཀཱལཾ ཨཏིཀྐམིཏྭཱ’’ཏིཨཱདི. དསྶནེ པཡོཛནཾ སཡམེཝ ཝདཏི. ཏསྶ ཨབྷཱཝཏོ ཀལལཱདིཀཱལེ ན པསྶཏི. པུཏྟེན དཧརེན མནྡེན ཨུཏྟཱནསེཡྻཀེན སདྡྷིཾ. ‘‘ཡཾ ཏཾ མཱཏཱུ’’ཏིཨཱདི པཀཏིཙཱརིཏྟཝསེན ཝུཏྟཾ. ཙཀྐཝཏྟིགབྦྷཏོཔི ཧི སཝིསེསཾ བོདྷིསཏྟགབྦྷོ པརིཧཱརཾ ལབྷཏི པུཉྙསམྦྷཱརསྶ སཱཏིསཡཏྟཱ, ཏསྨཱ བོདྷིསཏྟམཱཏཱ ཨཏིཝིཡ སཔྤཱཡཱཧཱརཱཙཱརཱ ཙ ཧུཏྭཱ སཀྐཙྩཾ པརིཧརཏི. སུཁཝཱསཏྠནྟི བོདྷིསཏྟསྶ སུཁཝཱསཏྠཾ. པུརཏྠཱབྷིམུཁོཏི མཱཏུ ¶ པུརིམབྷཱགཱབྷིམུཁོ. ཨིདཱནི ཏིརོཀུཙྪིགཏསྶ དིསྶམཱནཏཱཡ ཨབྦྷནྟརཾ, བཱཧིརཉྩ ཀཱརཎཾ དསྶེཏུཾ ‘‘པུབྦེ ཀཏཀམྨ’’ནྟིཨཱདི ཝུཏྟཾ. ཨསྶཱཏི དེཝིཡཱ. ཝཏྠུནྟི ཀུཙྪིཾ. ཕལིཀཨབྦྷཔཊལཱདིནོ ཝིཡ བོདྷིསཏྟམཱཏུཀུཙྪིཏཙསྶ པཏནུབྷཱཝེན ཨཱལོཀསྶ ཝིབནྡྷཱབྷཱཝཏོ ཡཐཱ བོདྷིསཏྟམཱཏཱ ཀུཙྪིགཏཾ བོདྷིསཏྟཾ པསྶཏི, ཀིཾ ཨེཝཾ བོདྷིསཏྟོཔི མཱཏརཾ, ཨཉྙཉྩ པུརཏོ ཋིཏཾ རཱུཔགཏཾ པསྶཏི, ནོཏི ཨཱཧ ‘‘བོདྷིསཏྟོ པནཱ’’ཏིཨཱདི. ཀསྨཱ ¶ པན སཏི ཙཀྑུམྷི, ཨཱལོཀེ ཙ ན པསྶཏཱིཏི ཨཱཧ ‘‘ན ཧི ཨནྟོཀུཙྪིཡཾ ཙཀྑུཝིཉྙཱཎཾ ཨུཔྤཛྫཏཱི’’ཏི. ཨསྶཱསཔསྶཱསཱ ཝིཡ ཧི ཏཏྠ ཙཀྑུཝིཉྙཱཎམྤི ན ཨུཔྤཛྫཏི ཏཛྫསྶ སམནྣཱཧཱརསྶ ཨབྷཱཝཏོ.

༢༤. ཡཐཱ ¶ ཨཉྙཱ ཨིཏྠིཡོ ཝིཛཱཏཔྤཙྩཡཱ ཏཱདིསེན རོགེན ཨབྷིབྷཱུཏཱཔི ཧུཏྭཱ མརནྟི, བོདྷིསཏྟམཱཏུ པན བོདྷིསཏྟེ ཀུཙྪིགཏེ ཏསྶ ཝིཛཱཡནནིམིཏྟཾ, ན ཀོཙི རོགོ ཨུཔྤཛྫཏི, ཀེཝལཾ ཨཱཡུཔརིཀྑཡེནེཝ ཀཱལཾ ཀརོཏི, སྭཱཡམཏྠོ ཧེཊྛཱ ཝུཏྟོ ཨེཝ. ‘‘བོདྷིསཏྟེན ཝསིཏཊྛཱནཉྷཱི’’ཏིཨཱདི ཏསྶ ཀཱརཎཝཙནཾ. ཨཉྙེསཾ ཨཔརིབྷོགནྟི ཨཉྙེཧི ན པརིབྷུཉྫིཏབྦཾ, ན པརིབྷོགཡོགྱནྟི ཨཏྠོ. ཏཐཱ སཏི བོདྷིསཏྟཔིཏུ ཨཉྙཱཡ ཨགྒམཧེསིཡཱ བྷཝིཏབྦཾ, ཏཐཱཔི བོདྷིསཏྟམཱཏརི དྷརནྟིཡཱ ཨཡུཛྫམཱནཀནྟི ཨཱཧ ‘‘ན ཙ སཀྐཱ’’ཏིཨཱདི. ཨཔནེཏྭཱཏི ཨགྒམཧེསིཋཱནཏོ ནཱིཧརིཏྭཱ. ཨཏྟནི ཚནྡརཱགཝསེནེཝ བཧིདྡྷཱ ཨཱརམྨཎཔརིཡེསནཱཏི ཝིསཡིནིསཱརཱགོ སཏྟཱནཾ ཝིསཡེསུ སཱརཱགསྶ བལཝཀཱརཎནྟི དསྶེནྟོ ཨཱཧ ‘‘སཏྟཱནཾ ཨཏྟབྷཱཝེ ཚནྡརཱགོ བལཝཱ ཧོཏཱི’’ཏི. ཨནུརཀྑིཏུཾ ན སཀྐོཏཱིཏི སམྨཱ གབྦྷཔརིཧཱརཾ ནཱནུཡུཉྫཏི. ཏེན གབྦྷོ བཧྭཱབཱདྷོ ཧོཏི. ཝཏྠུ ཝིསདཾ ཧོཏཱིཏི གབྦྷཱསཡོ ཝིསུདྡྷོ ཧོཏི. མཱཏུ མཛ྄ཛྷིམཝཡསྶ ཏཏིཡཀོཊྛཱསེ བོདྷིསཏྟགབྦྷོཀྐམནམྤི ཏསྶཱ ཨཱཡུཔརིམཱཎཝིལོཀནེནེཝ སངྒཧིཏཾ ཝཡོཝསེན ཨུཔྤཛྫནཀཝིཀཱརསྶ པརིཝཛྫནཏོ. ཨིཏྠིསབྷཱཝེན ཨུཔྤཛྫནཀཝིཀཱརོ པན བོདྷིསཏྟསྶ ཨཱནུབྷཱཝེནེཝ ཝཱུཔསམཏི.

༢༥. སཏྟམཱསཛཱཏོཏི པཊིསནྡྷིགྒཧཎཏོ སཏྟམེ མཱསེ ཛཱཏོ. སོ སཱིཏུཎྷཀྑམོ ན ཧོཏི ཨཏིཝིཡ སུཁུམཱལཏཱཡ. ཨཊྛམཱསཛཱཏོ ¶ ཀཱམཾ སཏྟམཱསཛཱཏཏོ བུདྡྷིཝཡཝཱ, ཨེཀཙྩེ པན ཙམྨཔདེསཱ ཝུདྡྷིཾ པཱཔུཎནྟཱ གྷཊྚནཾ ན སཧནྟི, ཏེན སོ ན ཛཱིཝཏི. ‘‘སཏྟམཱསཛཱཏསྶ པན ན ཏཱཝ ཏེ ཛཱཏཱ’’ཏི ཝདནྟི.

༢༧. དེཝཱ ¶ པཋམཾ པཊིགྒཎྷནྟཱིཏི ‘‘ལོཀནཱཐཾ མཧཱཔུརིསཾ སཡམེཝ པཋམཾ པཊིགྒཎྷཱམཱ’’ཏི སཉྫཱཏགཱརཝབཧུམཱནཱ ཨཏྟནོ པཱིཏིཾ པཝེདེནྟཱ ཁཱིཎཱསཝཱ སུདྡྷཱཝཱསབྲཧྨཱནོ ཨཱདིཏོ པཊིགྒཎྷནྟི. སཱུཏིཝེསནྟི སཱུཏིཛགྒནདྷཱཏིཝེསཾ. ཨེཀེཏི ཨབྷཡགིརིཝཱསིནོ. མཙྪཀྑིསདིསཾ ཚཝིཝསེན. ཨཊྛཱསི ན ནིསཱིདི, ན ནིཔཛྫི ཝཱ. ཏེན ཝུཏྟཾ ‘‘ཋིཏཱཝ བོདྷིསཏྟཾ བོདྷིསཏྟམཱཏཱ ཝིཛཱཡཏཱི’’ཏི. ནིདྡུཀྑཏཱཡ ཋིཏཱ ཨེཝ ཧུཏྭཱ ཝིཛཱཡཏི. དུཀྑསྶ ཧི བལཝབྷཱཝཏོ ཏཾ དུཀྑཾ ཨསཧམཱནཱ ཨཉྙཱ ཨིཏྠིཡོ ནིསིནྣཱ ཝཱ ནིཔནྣཱ ཝཱ ཝིཛཱཡནྟི.

༢༨. ཨཛིནཔྤཝེཎིཡཱཏི ¶ ཨཛིནཙམྨེཧི སིབྦིཏྭཱ ཀཏཔཝེཎིཡཱ. མཧཱཏེཛོཏི མཧཱནུབྷཱཝོ. མཧཱཡསོཏི མཧཱཔརིཝཱརོ, ཝིཔུལཀིཏྟིགྷོསོ ཙ.

༢༩. བྷགྒཝིབྷགྒཱཏི སམྦཱདྷཊྛཱནཏོ ནིཀྑམནེན ཝིབྷཱཝིཏཏྟཱ བྷགྒཱ, ཝིབྷགྒཱ ཝིཡ ཙ ཧུཏྭཱ, ཏེན ནེསཾ ཨཝིསདབྷཱཝམེཝ དསྶེཏི. ཨལགྒོ ཧུཏྭཱཏི གབྦྷཱསཡེ, ཡོནིཔདེསེ ཙ ཀཏྠཙི ཨལགྒོ ཨསཏྟོ ཧུཏྭཱ, ཡཏོ ‘‘དྷམཀརཎཏོ ཨུདཀནིཀྑམནསདིས’’ནྟི ཝུཏྟཾ. ཨུདཀེནཱཏི གབྦྷཱསཡགཏེན ཨུདཀེན. ཨམཀྑིཏོཝ ནིཀྑམཏི སམྨཀྑིཏསྶ ཏཱདིསསྶ ཨུདཀསེམྷཱདིཀསྶེཝ ཏཏྠ ཨབྷཱཝཏོ. བོདྷིསཏྟསྶ ཧི པུཉྙཱནུབྷཱཝཏོ པཊིསནྡྷིགྒཧཎཏོ པཊྛཱཡ ཏཾ ཋཱནཾ པུབྦེཔི ཝིསུདྡྷཾ ཝིསེསཏོ པརམསུགནྡྷགནྡྷཀུཊི ཝིཡ ཙནྡནགནྡྷཾ ཝཱཡནྟཾ ཏིཊྛཏི.

ཨུདཀཝཊྚིཡོཏི ཨུདཀཀྑནྡྷཱ.

༣༡. མུཧུཏྟཛཱཏོཏི མུཧུཏྟེན ཛཱཏོ ཧུཏྭཱ མུཧུཏྟམཏྟོཝ. ཨནུདྷཱརིཡམཱནེཏི ¶ ཨནུཀཱུལཝསེན ནཱིཡམཱནེ. ཨཱགཏཱནེཝཱཏི ཏཾ ཋཱནཾ ཨུཔགཏཱནི ཨེཝ. ཨནེཀསཱཁནྟི རཏནམཡཱནེཀསཏཔཏིཊྛཱནཧཱིརཀཾ. སཧསྶམཎྜལནྟི ཏེསཾ ཨུཔརིཊྛིཏཾ ཨནེཀསཧསྶམཎྜལཧཱིརཀཾ. མརཱུཏི དེཝཱ. ན ཁོ པན ཨེཝཾ དཊྛབྦཾ པདཝཱིཏིཧཱརཏོ པགེཝ དིསཱཝིལོཀནསྶ ¶ ཀཏཏྟཱ. ཏེནཱཧ ‘‘མཧཱསཏྟོ ཧཱི’’ཏིཨཱདི. ཨེཀངྒཎཱནཱིཏི ཝིཝཊབྷཱཝེན ཝིཧཱརངྒཎཔརིཝེཎངྒཎཱནི ཝིཡ ཨེཀངྒཎསདིསཱནི ཨཧེསུཾ. སདིསོཔི ནཏྠཱིཏི ཏུམྷཱཀཾ ཨིདཾ ཝིལོཀནཾ ཝིསིཊྛེ པསྶིཏུཾ ‘‘ཨིདྷ ཏུམྷེཧི སདིསོཔི ནཏྠི, ཀུཏོ ཨུཏྟརིཏརོ’’ཏི ཨཱཧཾསུ. ཨགྒོཏི པདྷཱནོ, ཀེན པནསྶ པདྷཱནཏཱཏི ཨཱཧ ‘‘གུཎེཧཱི’’ཏི. པཋམ-སདྡོ ཙེཏྠ པདྷཱནཔརིཡཱཡོ. བོདྷིསཏྟསྶ པན པདྷཱནཏཱ ཨནཉྙསཱདྷཱརཎཱཏི ཨཱཧ ‘‘སབྦཔཋམོ’’ཏི, སབྦཔདྷཱནོཏི ཨཏྠོ. ཨེཏསྶེཝཱཏི ཨགྒསདྡསྶེཝ. ཨེཏྠ ཙ མཧེསཀྑཱ ཏཱཝ དེཝཱ ཏཐཱ ཙ ཝདནྟི, ཨིཏརེ པན ཀཐནྟི? མཧཱསཏྟསྶ ཨཱནུབྷཱཝདསྶནཱདིནཱ. མཧེསཀྑཱནཉྷི དེཝཱནཾ མཧཱསཏྟསྶ ཨཱནུབྷཱཝོ ཝིཡ ཏེན སདིསཱནམྤི ཨཱནུབྷཱཝོ པཙྩཀྑོ ཨཧོསཱིཏི, ཨིཏརེ པན ཏེསཾ ཝཙནཾ སུཏྭཱ སདྡཧནྟཱ ཨནུམིནནྟཱ ཏཐཱ ཨཱཧཾསུ. པརིཔཱཀགཏཔུབྦཧེཏུསཾསིདྡྷཱཡ དྷམྨཏཱཡ ཙོདིཡམཱནོ ཨིམསྨིཾ…པེ… བྱཱཀཱསི.

ཛཱཏམཏྟསྶེཝ བོདྷིསཏྟསྶ ཋཱནཱདཱིནི ཡེསཾ ཝིསེསཱདྷིགམཱནཾ པུབྦནིམིཏྟབྷཱུཏཱནཱིཏི ཏེ ནིདྡྷཱརེཏྭཱ དསྶེནྟོ ‘‘ཨེཏྠ ཙཱ’’ཏིཨཱདིམཱཧ. ཏཏྠ པཏིཊྛཱནཾ ཙཏུརིདྡྷིཔཱདཔཊིལཱབྷསྶ པུབྦནིམིཏྟཾ ཨིདྡྷིཔཱདཝསེན ལོཀུཏྟརདྷམྨེསུ སུཔྤཏིཊྛིཏབྷཱཝསམིཛ྄ཛྷནཏོ. ཨུཏྟརཱབྷིམུཁབྷཱཝོ ¶ ལོཀསྶ ¶ ཨུཏྟརཎཝསེན གམནསྶ པུབྦནིམིཏྟཾ. ཏེན ཧི བྷགཝཱ སདེཝཀསྶ ལོཀསྶ ཨབྷིབྷཱུཏོ, ཀེནཙི ཨནབྷིབྷཱུཏོ ཨཧོསི. ཏེནཱཧ ‘‘མཧཱཛནཾ ཨཛ྄ཛྷོཏྠརིཏྭཱ ཨབྷིབྷཝིཏྭཱ གམནསྶ པུབྦནིམིཏྟ’’ནྟི. ཏཐཱ སཏྟཔདགམནཾ སཏྟཔདབོཛ྄ཛྷངྒསམྤནྣཨརིཡམགྒགམནསྶ. སུཝིསུདྡྷསེཏཙྪཏྟདྷཱརཎཾ སུཝིསུདྡྷཝིམུཏྟིཚཏྟདྷཱརཎསྶ. པཉྩརཱཛཀཀུདྷབྷཎྜསམཱཡོགོ པཉྩཝིདྷཝིམུཏྟིགུཎསམཱཡོགསྶ. ཨནཱཝཊདིསཱནུཝིལོཀནཾ ཨནཱཝཊཉཱཎཏཱཡ. ‘‘ཨགྒོཧམསྨཱི’’ཏིཨཱདིནཱ ཨཚམྦྷིཏཝཱཙཱབྷཱསནཾ ཀེནཙི ཨཝིབནྡྷནཱིཡཏཱཡ ཨཔྤཝཏྟིཡསྶ སདྡྷམྨཙཀྐཔྤཝཏྟནསྶ. ‘‘ཨཡམནྟིམཱ ཛཱཏཱི’’ཏི ཨཱཡཏིཾ ཛཱཏིཡཱ ཨབྷཱཝཀིཏྟནཱ ཨནུཔཱདི…པེ… པུབྦནིམིཏྟནྟི ཝེདིཏབྦཾ ཏསྶ ཏསྶ ཨནཱགཏེ ལདྡྷབྦཝིསེསསྶ ཏཾ ཏཾ ནིམིཏྟཾ ཨབྱབྷིཙཱརཱིཏི ཀཏྭཱ. ན ཨཱགཏོཏི ཨིམསྨིཾ སུཏྟེ, ཨཉྙཏྠ ཙ ཝཀྑམཱནཱཡ ཨནུཔུབྦིཡཱ ན ཨཱགཏོ. ཨཱཧརིཏྭཱཏི ཏསྨིཾ ཏསྨིཾ སུཏྟེ, ཨཊྛཀཐཱསུ ཙ ཨཱགཏནཡེན ཨཱཧརིཏྭཱ དཱིཔེཏབྦོ.

‘‘དསསཧསྶིལོཀདྷཱཏུ ¶ ཀམྤཱི’’ཏི ཨིདཾ སཏིཔི ཨིདྷ པཱལི༹ཡཾ ཨཱགཏཏྟེ ཝཀྑམཱནཱནཾ ཨཙྪརིཡཱནཾ མཱུལབྷཱུཏཾ དསྶེཏུཾ ཝུཏྟཾ, ཨེཝཾ ཨཉྙམྤི ཨེཝརཱུཔཾ དཊྛབྦཾ. ཏནྟིབདྡྷཱ ཝཱིཎཱ ཙམྨབདྡྷཱ བྷེརིཡོཏི པཉྩངྒིཀཏཱུརིཡསྶ ནིདསྶནམཏྟཾ, ཙ-སདྡེན ཝཱ ཨིཏརེསམྤི སངྒཧོ དཊྛབྦོ. ‘‘ཨནྡུབནྡྷནཱདཱིནི ཏངྑཎེ ཨེཝ ཚཛྫིཏྭཱ པུན པཱཀཏིཀཱནེཝ ཧོནྟི, ཏཐཱ ཛཙྩནྡྷཱདཱིནཾ ཙཀྑུསོཏཱདཱིནི ཏཐཱརཱུཔཀམྨཔཙྩཡཱ ཏསྨིཾཡེཝ ཁཎེ ཨུཔྤཛྫིཏྭཱ ཏཱཝདེཝ ཝིགཙྪནྟཱི’’ཏི ཝདནྟི. ཚིཛྫིཾསཱུཏི ཙ པཱདེསུ བནྡྷཊྛཱནེསུ ཚིཛྫིཾསུ. ཝིགཙྪིཾསཱུཏི ཝཱུཔསམིཾསུ. ཨཱཀཱསཊྛཀརཏནཱནི ནཱམ ཏཾཏཾཝིམཱནགཏམཎིརཏནཱདཱིནི. སཀཏེཛོབྷཱསིཏཱནཱིཏི ¶ ཨཏིཝིཡ སམུཛྫལཱཡ ཨཏྟནོ པབྷཱཡ ཨོབྷཱསིཏཱནི ཨཧེསུཾ. ནཔྤཝཏྟཱིཏི ན སནྣིཔཱཏོ. ན ཝཱཡཱིཏི ཁརོ ཝཱཏོ ན ཝཱཡི. མུདུསུཁོ པན སཏྟཱནཾ སུཁཱཝཧོ ཝཱཡི. པཐཝིགཏཱ ཨཧེསུཾ ཨུཙྩཊྛཱནེ ཋཱཏུཾ ཨཝིསཧནྟཱ. ཨུཏུསམྤནྣོཏི ཨནུཎྷཱསཱིཏཏཱསངྑཱཏེན ཨུཏུནཱ སམྤནྣོ. ཨཔྥོཊནཾ ཝུཙྩཏི བྷུཛཧཏྠསངྒྷཊྚནསདྡོ, ཨཏྠཏོ པན ཝཱམཧཏྠཾ ཨུརེ ཋཔེཏྭཱ དཀྑིཎེན པུཐུཔཱཎིནཱ ཧཏྠཏཱལ༹ནེན སདྡཀརཎཾ. མུཁེན ཨུསྶེལ༹ནཾ སདྡསྶ མུཉྩནཾ སེལ༹ནཾ. ཨེཀདྡྷཛམཱལཱ ཨཧོསི ནིརནྟརཾ དྷཛམཱལཱསམོདྷཱནགཏཱཡ. ན ཀེཝལཉྩ ཨེཏཱནི ཨེཝ, ཨཐ ཁོ ཨཉྙཱནིཔི ‘‘ཝིཙིཏྟཔུཔྥསུགནྡྷཔུཔྥཝསྶདེཝོཔཝསྶི སཱུརིཡེ དིསྶམཱནེ ཨེཝ ཏཱརཀཱ ཨོབྷཱསིཾསུ, ཨཙྪཾ ཝིཔྤསནྣཾ ཨུདཀཾ པཐཝིཏོ ཨུབྦྷིཛྫི, བིལཱསཡཱ ཙ ཏིརཙྪཱནཱ ཨཱསཡཏོ ནིཀྑམིཾསུ, རཱགདོསམོཧཱཔི ཏནུ བྷཝིཾསུ, པཐཝིཡཾ རཛོ ཝཱུཔསམི, ཨནིཊྛགནྡྷོ ཝིགཙྪི, དིབྦགནྡྷོ ཝཱཡི, རཱུཔིནོ དེཝཱ སརཱུཔེནེཝ མནུསྶཱནཾ ཨཱཔཱཐཾ ཨགམཾསུ, སཏྟཱནཾ ཙུཏཱུཔཔཱཏཱ ནཱཧེསུ’’ནྟི ཨེཝམཱདཱིནི ¶ ཡཱནི མཧཱབྷིནཱིཧཱརསམཡེ ཨུཔྤནྣཱནི དྭཏྟིཾསཔུབྦནིམིཏྟཱནི, ཏཱནི ཨནཝསེསཏོ ཏདཱ ཨཧེསུནྟི.

ཏཏྲཱཔཱིཏི ཏེསུཔི པཐཝིཀམྤཱདཱིསུ ཨེཝཾ པུབྦནིམིཏྟབྷཱཝོ ཝེདིཏབྦོ. ན ཀེཝལཾ སམྤཏིཛཱཏསྶ ཋཱནཱདཱིསུ ཨེཝཱཏི ཨདྷིཔྤཱཡོ. སབྦཉྙུཏཉྙཱཎཔཊིལཱབྷསྶ པུབྦནིམིཏྟཾ སབྦསྶ ཉེཡྻསྶ, ཏིཏྠཀརམཏསྶ ཙ ཙཱལནཏོ. ཀེནཙི ཨནུསྶཱཧིཏཱནཾཡེཝ ཨིམསྨིཾཡེཝ ཨེཀཙཀྐཝཱལེ༹ སནྣིཔཱཏོ ཀེནཙི ཨནུསྶཱཧིཏཱནཾཡེཝ ཨེཀཔྤཧཱརེནེཝ ¶ སནྣིཔཏིཏྭཱ དྷམྨཔཊིགྒཎྷནསྶ པུབྦནིམིཏྟཾ. པཋམཾ དེཝཏཱནཾ པཊིགྒཧཎཾ དིབྦཝིཧཱརཔཊིལཱབྷསྶ, པཙྪཱ མནུསྶཱནཾ པཊིགྒཧཎཾ ཏཏྠེཝ ཋཱནསྶ ནིཙྩལསབྷཱཝཏོ ¶ ཨཱནེཉྫཝིཧཱརཔཊིལཱབྷསྶ པུབྦནིམིཏྟཾ. ཝཱིཎཱནཾ སཡཾ ཝཛྫནཾ པརཱུཔདེསེན ཝིནཱ སཡམེཝ ཨནུཔུབྦཝིཧཱརཔཊིལཱབྷསྶ པུབྦནིམིཏྟཾ. བྷེརཱིནཾ ཝཛྫནཾ ཙཀྐཝཱལ༹པརིཡནྟཱཡ པརིསཱཡ པཝེདནསམཏྠསྶ དྷམྨབྷེརིཡཱ ཨནུསཱཝནསྶ ཨམཏདུནྡུབྷིགྷོསནསྶ པུབྦནིམིཏྟཾ. ཨནྡུབནྡྷནཱདཱིནཾ ཚེདོ མཱནཝིནིབནྡྷབྷེདནསྶ པུབྦནིམིཏྟཾ. མཧཱཛནསྶ རོགཝིགམོ ཏསྶེཝ སཀལཝཊྚདུཀྑརོགཝིགམབྷཱུཏསྶ སཙྩཔཊིལཱབྷསྶ པུབྦནིམིཏྟཾ. ‘‘མཧཱཛནསྶཱ’’ཏི པདཾ ‘‘མཧཱཛནསྶ དིབྦཙཀྑུཔཊིལཱབྷསྶ, མཧཱཛནསྶ དིབྦསོཏདྷཱཏུཔཊིལཱབྷསྶཱ’’ཏིཨཱདིནཱ ཏཏྠ ཏཏྠ ཨཱནེཏྭཱ སམྦནྡྷིཏབྦཾ. ཨིདྡྷིཔཱདབྷཱཝནཱཝསེན སཱཏིསཡཉཱཎཛཝསམྤཏྟིསིདྡྷཱིཏི ཨཱཧ ‘‘པཱིཋསཔྤཱིནཾ ཛཝསམྤདཱ ཙཏུརིདྡྷིཔཱདཔཊིལཱབྷསྶ པུབྦནིམིཏྟ’’ནྟི. སུཔཊྚནསམྤཱཔུཎནཾ ཙཏུཔཊིསམྦྷིདཱདྷིགམསྶ པུབྦནིམིཏྟཾ. ཨཏྠཱདིཨནུརཱུཔཾ ཨཏྠཱདཱིསུ སམྤཊིཔཏྟིབྷཱཝཏོ. རཏནཱནཾ སཀཏེཛོབྷཱསིཏཏྟཾ ཡཾ ལོཀསྶ དྷམྨོབྷཱསཾ དསྶེསྶཏི, ཏེན ཏསྶ སཀཏེཛོབྷཱསིཏཏྟསྶ པུབྦནིམིཏྟཾ.

ཙཏུབྲཧྨཝིཧཱརཔཊིལཱབྷསྶ པུབྦནིམིཏྟཾ ཏསྶ སབྦསོ ཝེརཝཱུཔསམནཏོ. ཨེཀཱདསཨགྒིནིབྦཱཔནསྶ པུབྦནིམིཏྟཾ དུནྣིབྦཱཔནནིབྦཱནབྷཱཝཏོ. ཉཱཎཱལོཀཱདསྶནསྶ པུབྦནིམིཏྟཾ ཨནཱལོཀེ ཨཱལོཀདསྶནབྷཱཝཏོ. ནིབྦཱནརསེནཱཏི ཀིལེསཱནཾ ནིབྦཱཡནརསེན. ཨེཀརསབྷཱཝསྶཱཏི སཱསནསྶ སབྦཏྠ ཨེཀརསབྷཱཝསྶ, ཏཉྩ ཁོ ཨམདྷུརསྶ ¶ ལོཀསྶ སབྦསོ མདྷུརབྷཱཝཱཔཱདནེན. དྭཱསཊྛིདིཊྛིགཏབྷིནྡནསྶ པུབྦནིམིཏྟཾ སབྦསོ དིཊྛིགཏཝཱཏཱཔནཡནཝསེན. ཨཱཀཱསཱདིཨཔྤཏིཊྛཝིསམཙཉྩལཊྛཱནཾ པཧཱཡ སཀུཎཱནཾ པཐཝིགམནཾ ཏཱདིསཾ མིཙྪཱགཱཧཾ པཧཱཡ སཏྟཱནཾ པཱཎེཧི རཏནཏྟཡསརཎགམནསྶ པུབྦནིཏྟཾ. བཧུཛནཀནྟཏཱཡཱཏི ཙནྡསྶ ཝིཡ བཧུཛནསྶ ཀནྟཏཱཡ. སཱུརིཡསྶ ཨུཎྷསཱིཏཝིཝཛྫིཏཨུཏུསུཁཏཱ པརིལཱ༹ཧཝིཝཛྫིཏཀཱཡིཀཙེཏསིཀསུཁཔྤཏྟིཡཱ པུབྦནིམིཏྟཾ. དེཝཏཱནཾ ཨཔྥོཊནཱདཱིཧི ཀཱིལ༹ནཾ པམོདུཔྤཏྟི བྷཝནྟགམནེན, དྷམྨསབྷཱཝབོདྷནེན ཙ ཨུདཱནཝསེན པམོདཝིབྷཱཝནསྶ པུབྦནིམིཏྟཾ. དྷམྨཝེགཝསྶནསྶཱཏི དེསནཱཉཱཎཝེགེན དྷམྨཱམཏསྶ ཝསྶནསྶ ¶ པུབྦནིམིཏྟཾ. ཀཱཡགཏཱསཏིཝསེན ལདྡྷཾ ཛྷཱནཾ པཱདཀཾ ཀཏྭཱ ཨུཔྤཱདིཏམགྒཕལསུཁཱནུབྷཝོ ཀཱཡགཏཱསཏིཨམཏཔཊིལཱབྷོ, ཏསྶ པན ཀཱཡསྶཱཔི ཨཏཔྤཀསུཁཱཝཧཏྟཱ ཁུདཱཔིཔཱསཱཔཱིལ༹ནཱབྷཱཝོ པུབྦནིམིཏྟཾ ཝུཏྟོ ¶ . ཨཊྛཀཐཱཡཾཔན ཁུདཾ, པིཔཱསཉྩ བྷིནྡིཏྭཱ ཝུཏྟཾ. ཏཏྠ པུབྦནིམིཏྟཱནཾ བྷེདོ ཝིསེསསཱམཉྙཝིབྷཱགེན, གོབལཱིབདྡཉཱཡེན ཙ གཧེཏབྦོ. ‘‘སཡམེཝཱ’’ཏི པདཾ ‘‘ཨཊྛངྒིཀམགྒདྭཱརཝིཝརཎསྶཱ’’ཏི ཨེཏྠཱཔི ཨཱནེཏྭཱ སམྦནྡྷིཏབྦཾ. བྷརིཏབྷཱཝསྶཱཏི པརིཔུཎྞབྷཱཝསྶ. ‘‘ཨརིཡདྡྷཛམཱལཱམཱལིཏཱཡཱཏི ཀཱསཱཡདྡྷཛམཱལཱཝནྟཏཱཡཱ’’ཏི ཀེཙི, སདེཝཀསྶ ལོཀསྶ པན ཨརིཡམགྒབོཛ྄ཛྷངྒདྡྷཛམཱལཱཧི མཱལིབྷཱཝསྶ པུབྦནིམིཏྟཾ. ཡཾ པནེཏྠ ཨནུདྡྷཊཾ, ཏཾ སུཝིཉྙེཡྻམེཝ.

ཨེཏྠཱཏི ‘‘སམྤཏིཛཱཏོ’’ཏིཨཱདིནཱ ཨཱགཏེ ཨིམསྨིཾ ཝཱརེ. ཝིསྶཛྫིཏོཝ, ཏསྨཱ ཨམྷེཧི ཨིདྷ ཨཔུབྦཾ ཝཏྟབྦཾ ནཏྠཱིཏི ཨདྷིཔྤཱཡོ. ཏདཱ ¶ པཐཝིཡཾ གཙྪནྟོཔི མཧཱསཏྟོ ཨཱཀཱསེན གཙྪནྟོ ཝིཡ མཧཱཛནསྶ ཏཐཱ ཨུཔཊྛཱསཱིཏི ཨཡམེཏྠ ནིཡཏི དྷམྨནིཡཱམོ བོདྷིསཏྟཱནཾ དྷམྨཏཱ ཏི ཨིདཾ ནིཡཏིཝཱདཝསེན ཀཐནཾ. པུབྦེ པུརིམཛཱཏཱིསུ ཏཱདིསསྶ པུཉྙསམྦྷཱརཀམྨསྶ ཀཏཏྟཱ ཨུཔཙིཏཏྟཱ མཧཱཛནསྶ ཏཐཱ ཨུཔཊྛཱསཱིཏི ཨིདཾ པུབྦེཀཏཀམྨཝཱདཝསེན ཀཐནཾ. ཨིམེསཾ སཏྟཱནཾ ཨུཔརི ཨཱིསནསཱིལཏཱཡ ཡཐཱསཀཾ ཀམྨམེཝ ཨིསྶརོ ནཱམ, ཏསྶ ནིམྨཱནཾ ཨཏྟནོ ཕལསྶ ནིབྦཏྟནཾ མཧཱཔུརིསོཔི སདེཝཀཾ ལོཀཾ ཨབྷིབྷཝིཏུཾ སམཏྠེན ཨུལཱ༹རེན པུཉྙཀམྨེན ནིབྦཏྟིཏོ, ཏེན ཨིསྶརེན ནིམྨིཏོ ནཱམ, ཏསྶ ཙཱཡཾ ནིམྨཱནཝིསེསོ, ཡདིདཾ མཧཱནུབྷཱཝཏཱ, ཡཱཡ མཧཱཛནསྶ ཏཐཱ ཨུཔཊྛཱསཱིཏི ཨིདཾ ཨིསྶརནིམྨཱནཝསེན ཀཐནཾ. ཨེཝཾ ཏཾ ཏཾ བཧུལཾ ཝཏྭཱ ཀིཾ ཨིམཱཡ པརིཡཱཡཀཐཱཡཱཏི ཨཝསཱནེ ཨུཛུཀམེཝ བྱཱཀརི. སམྤཏིཛཱཏོ པཐཝིཡཾ ཀཐཾ པདསཱ གཙྪཏི, ཨེཝཾ མཧཱནུབྷཱཝོ ཨཱཀཱསེན མཉྙེ གཙྪཏཱིཏི པརིཀཔྤནཝསེན ཨཱཀཱསེན གཙྪནྟོ ཝིཡ ཨཧོསི. སཱིགྷཏརཾ པན སཏྟཔདཝཱིཏིཧཱརེན གཏཏྟཱ དིསྶམཱནརཱུཔོཔི མཧཱཛནསྶ ཨདིསྶམཱནོ ཝིཡ ཨཧོསི. ཨཙེལཀབྷཱཝོ, ཁུདྡཀསརཱིརཏཱ ཙ ཏཱདིསསྶ ཨིརིཡཱཔཐསྶ ན ཨནུཙྪཝིཀཱཏི ཀམྨཱནུབྷཱཝསཉྫནིཏཔཱཊིཧཱརིཡཝསེན ཨལངྐཏཔཊིཡཏྟོ ཝིཡ, སོལ༹སཝསྶུདྡེསིཀོ ཝིཡ ཙ མཧཱཛནསྶ ཨུཔཊྛཱསཱིཏི ཝེདིཏབྦཾ. མཧཱསཏྟསྶ པུཉྙཱནུབྷཱཝེན ཏདཱ ཏཐཱ ཨུཔཊྛཱནམཏྟམེཝེཏནྟི. པཙྪཱ བཱལདཱརཀོཝ ཨཧོསི, ན ཏཱདིསོཏི. བུདྡྷབྷཱཝཱནུཙྪཝིཀསྶ བོདྷིསཏྟཱནུབྷཱཝསྶ ཡཱཐཱཝཏོ པཝེདིཏཏྟཱ པརིསཱ ཙསྶ བྱཱཀརཎེན བུདྡྷེན ཝིཡ…པེ… ཨཏྟམནཱ ཨཧོསི.

སབྦདྷམྨཏཱཏི ¶ ¶ སབྦཱ སོལ༹སཝིདྷཱཔི ཡཐཱཝུཏྟཱ དྷམྨཏཱ ¶ སབྦབོདྷིསཏྟཱནཾ ཧོནྟཱིཏི ཝེདིཏབྦཱ པུཉྙཉཱཎསམྦྷཱརདསྶནེན ནེསཾ ཨེཀསདིསཏྟཱ.

དྭཏྟིཾསམཧཱཔུརིསལཀྑཎཝཎྞནཱ

༣༣. དུཀཱུལཙུམྦཊཀེཏི དཧརསྶ ནིཔཛྫནཡོགྱཏཱཝསེན པཊིསཾཧཊདུཀཱུལསུཁུམེ. ‘‘ཁཏྟིཡོ བྲཱཧྨཎོ’’ཏི ཨེཝམཱདི ཛཱཏི. ‘‘ཀོཎྜཉྙོ གོཏམོ’’ཏི ཨེཝམཱདི གོཏྟཾ. ‘‘པོཎིཀཱ ཙིཀྑལླིཀཱ སཱཀིཡཱ ཀོལི༹ཡཱ’’ཏི ཨེཝམཱདི ཀུལཔདེསོ. ཨཱདི-སདྡེན རཱུཔིསྶརིཡཔརིཝཱརཱདིསབྦསམྤཏྟིཡོ སངྒཎྷཱཏི. མཧནྟསྶཱཏི ཝིཔུལསྶ, ཨུལཱ༹རསྶཱཏི ཨཏྠོ. ནིཔྥཏྟིཡོཏི སིདྡྷིཡོ. གནྟབྦགཏིཡཱཏི གཏི-སདྡསྶ ཀམྨསཱདྷནཏམཱཧ. ཨུཔཔཛྫནཝསེན ཧི སུཙརིཏདུཙྩརིཏེཧི གནྟབྦཱཏི གཏིཡོ, ཨུཔཔཏྟིབྷཝཝིསེསོ. གཙྪཏི ཡཐཱརུཙི པཝཏྟཏཱིཏི གཏི, ཨཛ྄ཛྷཱསཡོ. པཊིསརཎེཏི པརཱཡཎེ ཨཝསྶཡེ. སབྦསངྑཏཝིསཾཡུཏྟསྶ ཧི ཨརཧཏོ ནིབྦཱནམེཝ ཏཾཔཊིསརཎཾ. ཏྱཱཧནྟི ཏེ ཨཧཾ.

དསཝིདྷེ ཀུསལདྷམྨེ, ཨགརཧིཏེ ཙ རཱཛདྷམྨེ (ཛཱ. ༢ མཧཱམཾསཛཱཏཀེ ཝིཏྠཱརོ) ནིཡུཏྟོཏི དྷམྨིཀོ. ཏེན ཙ དྷམྨེན སཀལཾ ལོཀཾ རཉྫེཏཱིཏི དྷམྨརཱཛཱ. ཡསྨཱ ཙཀྐཝཏྟཱི དྷམྨེན ཉཱཡེན རཛྫཾ ཨདྷིགཙྪཏི, ན ཨདྷམྨེན, ཏསྨཱ ཝུཏྟཾ ‘‘དྷམྨེན ལདྡྷརཛྫཏྟཱ དྷམྨརཱཛཱ’’ཏི. ཙཏཱུསུ དིསཱསུ སམུདྡཔརིཡོསཱནཏཱཡ ཙཏུརནྟཱ ནཱམ ཏཏྠ ཏཏྠ དཱིཔེ མཧཱཔཐཝཱིཏི ཨཱཧ ‘‘པུརཏྠིམ…པེ… ཨིསྶརོ’’ཏི. ཝིཛིཏཱཝཱིཏི ཝིཛེཏབྦསྶ ཝིཛིཏཝཱ, ཀཱམཀོདྷཱདིཀསྶ ཨབྦྷནྟརསྶ, པཊིརཱཛབྷཱུཏསྶ བཱཧིརསྶ ཙ ཨརིགཎསྶ ཝིཛཡི, ཝིཛེཏྭཱ ཋིཏོཏི ཨཏྠོ. ཀཱམཾ ཙཀྐཝཏྟིནོ ཀེནཙི ཡུདྡྷཾ ནཱམ ནཏྠི, ཡུདྡྷེན པན སཱདྷེཏབྦསྶ ཝིཛཡསྶ སིདྡྷིཡཱ ‘‘ཝིཛིཏསངྒཱམོ’’ཏི ཝུཏྟཾ. ཛནཔདོཝ ཙཏུབྦིདྷཨཙྪརིཡདྷམྨཱདིསམནྣཱགཏེ ཨསྨིཾ རཱཛིནི ཐཱཝརིཡཾ ཀེནཙི ཨསཾཧཱརིཡཾ དལ༹ྷཾ བྷཏྟབྷཱཝཾ པཏྟོ, ཛནཔདེ ¶ ཝཱ ཨཏྟནོ དྷམྨིཀཱཡ པཊིཔཏྟིཡཱ ཐཱཝརིཡཾ ཐིརབྷཱཝཾ པཏྟོཏི ཛནཔདཏྠཱཝརིཡཔྤཏྟོ. མནུསྶཱནཾ ཨུརེ སཏྠཾ ཋཔེཏྭཱ ཨིཙྪིཏདྷནཧརཎཱདིནཱ པརསཱཧསཀཱརིཏཱཡ སཱཧསིཀཱ.

རཏིཛནནཊྛེནཱཏི ཨཏཔྤཀཔཱིཏིསོམནསྶུཔྤཱདནེན. སདྡཏྠཏོ པན རམེཏཱིཏི རཏནཾ. ‘‘ཨཧོ མནོཧར’’ནྟི ཙིཏྟེ ཀཏྟབྦཏཱཡ ཙིཏྟཱིཀཏཾ ¶ . ‘‘སྭཱཡཾ ཙིཏྟཱིཀཱརོ ཏསྶ པཱུཛནཱིཡཏཱཡཱ’’ཏི ཙིཏྟཱིཀཏནྟི པཱུཛནཱིཡནྟི ཨཏྠཾ ཝདནྟི. མཧནྟཾ ཝིཔུལཾ ཨཔརིམིཏཾ མཱུལཾ ཨགྒྷཏཱིཏི མཧགྒྷཾ. ནཏྠི ཨེཏསྶ ཏུལཱ ཨུཔམཱཏི ཨཏུལཾ, ཨསདིསཾ. ཀདཱཙི ཨེཝ ཨུཔྤཛྫནཏོ དུཀྑེན ལདྡྷབྦཏྟཱ ¶ དུལླབྷདསྶནཾ. ཨནོམེཧི ཨུལཱ༹རགུཎེཧེཝ སཏྟེཧི པརིབྷུཉྫིཏབྦཏོ ཨནོམསཏྟཔརིབྷོགཾ. ཨིདཱནི ནེསཾ ཙིཏྟཱིཀཏཱདིཨཏྠཱནཾ སཝིསེསཾ ཙཀྐརཏནེ ལབྦྷམཱནཏཾ དསྶེཏྭཱ ཨིཏརེསུཔི ཏེ ཨཏིདིསིཏུཾ ‘‘ཙཀྐརཏནསྶ ཙཱ’’ཏིཨཱདི ཨཱརདྡྷཾ. ཨཉྙཾ དེཝཊྛཱནཾ ནཱམ ན ཧོཏི རཉྙོ ཨནཉྙསཱདྷཱརཎིསྶརིཡཱདིསམྤཏྟིཔཊིལཱབྷཧེཏུཏོ, སཏྟཱནཉྩ ཡཐིཙྪིཏཏྠཔཊིལཱབྷཧེཏུཏོ. ཨགྒྷོ ནཏྠི ཨཏིཝིཡ ཨུལཱ༹རསམུཛྫལསཏྟརཏནམཡཏྟཱ, ཨཙྪརིཡབྦྷུཏམཧཱནུབྷཱཝཏཱཡ ཙ. ཡདགྒེན མཧགྒྷཾ, ཏདགྒེན ཨཏུལཾ. སཏྟཱནཾ པཱཔཛིགུཙྪནེན ཝིགཏཀཱལ༹ཀོ པུཉྙཔསུཏཏཱཡ མཎྜབྷཱུཏོ ཡཱདིསོ ཀཱལོ བུདྡྷུཔྤཱདཱརཧོ, ཏཱདིསེ ཨེཝ ཙཀྐཝཏྟཱིནམྤི སམྦྷཝོཏི ཨཱཧ ‘‘ཡསྨཱ ཙ པནཱ’’ཏིཨཱདི. ཨུཔམཱཝསེན ཙེཏཾ ཝུཏྟཾ, ཨུཔམོཔམེཡྻཱནཉྩ ན ཨཙྩནྟམེཝ སདིསཏཱ. ཏསྨཱ ཡཐཱ བུདྡྷཱ ཀདཱཙི ཀརཧཙི ཨུཔྤཛྫནྟི, ན ཏཐཱ ཙཀྐཝཏྟིནོ, ཨེཝཾ སནྟེཔི ཙཀྐཝཏྟིཝཏྟཔརིཔཱུརཎསྶཱཔི དུཀྐརབྷཱཝཏོཔི དུལླབྷུཔྤཱདཱཡེཝཱཏི ¶ , ཨིམིནཱ དུལླབྷུཔྤཱདཏཱསཱམཉྙེན ཏེསཾ དུལླབྷདསྶནཏཱ ཝུཏྟཱཏི ཝེདིཏབྦཾ. ཀཱམཾ ཙཀྐརཏནཱནུབྷཱཝེན སིཛ྄ཛྷམཱནོ གུཎོ ཙཀྐཝཏྟིཔརིཝཱརསཱདྷཱརཎོ, ཏཐཱཔི ‘‘ཙཀྐཝཏྟཱི ཨེཝ ནཾ སཱམིབྷཱཝེན ཝིསཝིཏཱཡ པརིབྷུཉྫཏཱི’’ཏི ཝཏྟབྦཏཾ ཨརཧཏི ཏདཏྠཾ ཨུཔྤཛྫནཏོཏི དསྶེནྟོ ‘‘ཏདེཏ’’ནྟིཨཱདིམཱཧ. ཡཐཱཝུཏྟཱནཾ པཉྩནྣཾ, ཚནྣམྤི ཝཱ ཨཏྠཱནཾ ཨིཏརརཏནེསུཔི ལབྦྷནཏོ ‘‘ཨེཝཾ སེསཱནིཔཱི’’ཏི ཝུཏྟཾ. ཧཏྠིཨསྶ-པརིཎཱཡཀརཏནེཧི ཨཛིཏཝིཛཡཏོ, ཙཀྐརཏནེན ཙ པརིཝཱརབྷཱཝེན, སེསེཧི པརིབྷོགཱུཔཀརཎབྷཱཝེན སམནྣཱགཏོ. ཧཏྠིཨསྶམཎིཨིཏྠིརཏནེཧི པརིབྷོགཱུཔཀརཎབྷཱཝེན སེསེཧི པརིཝཱརབྷཱཝེནཱཏི ཡོཛནཱ.

ཙཏུནྣཾ མཧཱདཱིཔཱནཾ སིརིཝིབྷཝནྟི ཏཏྠ ལདྡྷཾ སིརིསམྤཏྟིཉྩེཝ བྷོགསམྤཏྟིཉྩ. ཏཱདིསམེཝཱཏི ‘‘པུརེབྷཏྟམེཝཱ’’ཏིཨཱདིནཱ ཝུཏྟཱནུབྷཱཝམེཝ. ཡོཛནཔྤམཱཎཾ པདེསཾ བྱཱཔནེན ཡོཛནཔྤམཱཎཾ ཨནྡྷཀཱརཾ. ཨཏིདཱིགྷཏཱདིཚབྦིདྷདོསཔརིཝཛྫིཏཾ.

སཱུརཱཏི སཏྟིཝནྟོ, ནིབྦྷཡཱཏི ཨཏྠོཏི ཨཱཧ ‘‘ཨབྷཱིརུཀཱ’’ཏི. ཨངྒནྟི ཀཱརཎཾ. ཡེན ཀཱརཎེན ‘‘ཝཱིརཱ’’ཏི ཝུཙྩེཡྻུཾ, ཏཾ ཝཱིརངྒཾ. ཏེནཱཧ ‘‘ཝཱིརིཡསྶེཏཾ ¶ ནཱམ’’ནྟི. ཡཱཝ ཙཀྐཝཱལ༹པབྦཏཱ ཙཀྐསྶ ཝཏྟནཏོ ‘‘ཙཀྐཝཱལ༹པབྦཏཾ སཱིམཾ ཀཏྭཱ ཋིཏསམུདྡཔརིཡནྟ’’ནྟི ཝུཏྟཾ. ‘‘ཨདཎྜེནཱ’’ཏི ཨིམིནཱཝ དྷནདཎྜསྶ, སརཱིརདཎྜསྶ ཙ ཨཀརཎཾ ཝུཏྟཾ. ‘‘ཨསཏྠེནཱ’’ཏི ཨིམིནཱ པན སེནཱཡ ཡུཛ྄ཛྷནསྶཱཏི ཏདུབྷཡཾ དསྶེཏུཾ ‘‘ཡེ ཀཏཱཔརཱདྷེ’’ཏིཨཱདི ཝུཏྟཾ. ཝུཏྟཔྤཀཱརནྟི སཱགརཔརིཡནྟཾ.

‘‘རཉྫནཊྛེན རཱགོ, ཏཎྷཱཡནཊྛེན ཏཎྷཱ’’ཏི པཝཏྟིཨཱཀཱརབྷེདེན ¶ ལོབྷོ ཨེཝ དྭིདྷཱ ཝུཏྟོ ¶ . ཏཐཱ ཧིསྶ དྭིདྷཱཔི ཚདནཊྛོ ཨེཀནྟིཀོ. ཡཐཱཧ ‘‘ཨནྡྷཏམཾ ཏདཱ ཧོཏི, ཡཾ རཱགོ སཧཏེ ནར’’ནྟི, (ནེཏྟི. ༡༡, ༢༧) ‘‘ཏཎྷཱཚདནཚཱདིཏཱ’’ཏི (ཨུདཱ. ༦༤) ཙ. ཨིམིནཱ ནཡེན དོསཱདཱིནམྤི ཚདནཊྛོ ཝཏྟབྦོ. ཀིལེསགྒཧཎེན ཝིཙིཀིཙྪཱདཡོ སེསཀིལེསཱ ཝུཏྟཱ. ཡསྨཱ ཏེ སབྦེ པཱཔདྷམྨཱ ཨུཔྤཛྫམཱནཱ སཏྟསནྟཱནཾ ཚཱདེཏྭཱ པརིཡོནནྡྷིཏྭཱ ཏིཊྛནྟི ཀུསལཔྤཝཏྟིཾ ནིཝཱརེནྟི, ཏསྨཱ ཏེ ‘‘ཚདནཱ, ཚདཱ’’ཏི ཙ ཝུཏྟཱ. ཝིཝཊྚཙྪདཱཏི ཙ ཨོ-ཀཱརསྶ ཨཱ-ཀཱརཾ ཀཏྭཱ ནིདྡེསོ.

༣༥. ཏཱསནྟི དྭིནྣམྤི ནིཔྥཏྟཱིནཾ. ནིམིཏྟབྷཱུཏཱནཱིཏི ཉཱཔཀཀཱརཎབྷཱུཏཱནི. ཏཐཱ ཧི ལཀྑཱིཡཏི མཧཱཔུརིསབྷཱཝོ ཨེཏེཧཱིཏི ལཀྑཎཱནི. ཋཱནགམནཱདཱིསུ བྷཱུམིཡཾ སུཊྛུ སམཾ པཏིཊྛིཏཱ པཱདཱ ཨེཏསྶཱཏི སུཔྤཏིཊྛིཏཔཱདོ. ཏཾ པནསྶ སུཔྤཏིཊྛིཏཔཱདཏཾ བྱཏིརེཀམུཁེན ཝིབྷཱཝེཏུཾ ‘‘ཡཐཱ’’ཏིཨཱདི ཝུཏྟཾ. ཏཏྠ ཨགྒཏལནྟི ཨགྒཔཱདཏལཾ. པཎྷཱིཏི པཎྷིཏལཾ. པསྶནྟི པཱདཏལསྶ དྭཱིསུ པསྶེསུ ཨེཀེཀཾ, ཨུབྷཡམེཝ ཝཱ པརིཡནྟཾ པསྶཾ. ‘‘ཨསྶ པནཱ’’ཏིཨཱདི ཨནྭཡཏོ ཨཏྠཝིབྷཱཝནཾ. སུཝཎྞཔཱདུཀཏལམིཝ ཨུཛུཀཾ ནིཀྑིཔིཡམཱནཾ. ཨེཀཔྤཧཱརེནེཝཱཏི ཨེཀཀྑཎེཡེཝ. སཀལཾ པཱདཏལཾ བྷཱུམིཾ ཕུསཏི ནིཀྑིཔནེ. ཨེཀཔྤཧཱརེནེཝ སཀལཾ པཱདཏལཾ བྷཱུམིཏོ ཨུཊྛཧཏཱིཏི ཡོཛནཱ. ཏསྨཱ ཨཡཾ སུཔྤཏིཊྛིཏཔཱདོཏི ནིགམནཾ. ཡཾ པནེཏྠ ཝཏྟབྦཾ ཨནུཔུབྦནིནྣཱདིཨཙྪརིཡབྦྷུཏཾ ¶ ནིསྶནྡཕལཾ, ཏཾ པརཏོ ལཀྑཎསུཏྟཝཎྞནཱཡཾ (དཱི. ནི. ཨཊྛ. ༣.༢༠༡) ཨཱཝིབྷཝིསྶཏཱིཏི.

ནཱབྷི དིསྶཏཱིཏི ལཀྑཎཙཀྐསྶ ནཱབྷི པརིམཎྜལསཎྛཱནཱ སུཔརིབྱཏྟཱ ཧུཏྭཱ དིསྶཏི, ལབྦྷཏཱིཏི ཨདྷིཔྤཱཡོ. ནཱབྷིཔརིཙྪིནྣཱཏི ཏསྶཾ ནཱབྷིཡཾ པརིཙྪིནྣཱ པརིཙྪེདཝསེན ཋིཏཱ. ནཱབྷིམུཁཔརིཀྑེཔཔཊྚོཏི པཀཏིཙཀྐསྶ ¶ ཨཀྑབྦྷཱཧཏཔརིཧརཎཏྠཾ ནཱབྷིམུཁེ ཋཔེཏབྦཾ པརིཀྑེཔཔཊྚོ, ཏཔྤཊིཙྪནྣོ ཨིདྷ ཨདྷིཔྤེཏོ. ནེམིམཎིཀཱཏི ནེམིཡཾ ཨཱཝལིབྷཱཝེན ཋིཏམཎིཀཱལེཁཱ. སམྦཧུལཝཱརོཏི བཧུཝིདྷལེཁངྒཝིབྷཱཝནཝཱརོ. སཏྟཱིཏི ཨཱཝུདྷསཏྟི. སིརིཝཙྪོཏི སིརིཨངྒཱ. ནནྡཱིཏི དཀྑིཎཱཝཏྟཾ. སོཝཏྟིཀོཏི སོཝཏྟིཨངྒོ. ཝཊཾསཀོཏི ཨཱཝེལ༹ཾ. ཝཌྜྷམཱནཀནྟི པུརིམཧཱདཱིསུ དཱིཔངྐཾ. མོརཧཏྠཀོཏི མོརཔིཉྪཀལཱཔོ, མོརཔིཉྪཔཊིསིབྦིཏོ ཝཱ བཱིཛནཱིཝིསེསོ. ཝཱལ༹བཱིཛནཱིཏི ཙཱམརིཝཱལཾ. སིདྡྷཏྠཱདི པུཎྞགྷཊཔུཎྞཔཱཏིཡོ. ‘‘ཙཀྐཝཱལོ༹’’ཏི ཝཏྭཱ ཏསྶ པདྷཱནཱཝཡཝེ དསྶེཏུཾ ‘‘ཧིམཝཱ སིནེརུ…པེ… སཧསྶཱནཱི’’ཏི ཝུཏྟཾ. ‘‘ཙཀྐཝཏྟིརཉྙོ པརིསཾ ཨུཔཱདཱཡཱ’’ཏི ཨིདཾ ཧཏྠིརཏནཱདཱིནམྤི ཏཏྠ ལབྦྷམཱནབྷཱཝདསྶནཾ. སབྦོཏིསཏྟིཨཱདིཀོ ཡཐཱཝུཏྟོ ཨངྒཝིསེསོ ཙཀྐལཀྑཎསྶེཝ པརིཝཱརོཏི ཝེདིཏབྦོ.

‘‘ཨཱཡཏཔཎྷཱི’’ཏི ¶ ཨིདཾ ཨཉྙེསཾ པཎྷིཏོ དཱིགྷཏཾ སནྡྷཱཡ ¶ ཝུཏྟཾ, ན པན ཨཏིདཱིགྷཏནྟི ཨཱཧ ‘‘པརིཔུཎྞཔཎྷཱི’’ཏི. ཡཐཱ པན པཎྷིལཀྑཎཾ པརིཔུཎྞཾ ནཱམ ཧོཏི, ཏཾ བྱཏིརེཀམུཁེན དསྶེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. ཨཱརགྒེནཱཏི མཎྜལཱཡ སིཁཱཡ. ཝཊྚེཏྭཱཏི ཡཐཱ སུཝཊྚཾ ཧོཏི, ཨེཝཾ ཝཊྚེཏྭཱ. རཏྟཀམྦལགེཎྜུཀསདིསཱཏི རཏྟཀམྦལམཡགེཎྜུཀསདིསཱ.

‘‘མཀྐཊསྶེཝཱ’’ཏི དཱིགྷབྷཱཝཾ, སམཏཉྩ སནྡྷཱཡེཏཾ ཝུཏྟཾ. ནིཡྻཱསཏེལེནཱཏི ཚཏྟིརིཏནིཡྻཱསཱདིནིཡྻཱསསམྨིསྶེན ཏེལེན, ཡཾ ‘‘སུརབྷིནིཡྻཱས’’ནྟིཔི ཝདནྟི. ནིཡྻཱསཏེལགྒཧཎཉྩེཏྠ ཧརིཏཱལཝཊྚིཡཱ གྷནསིནིདྡྷབྷཱཝདསྶནཏྠཾ.

ཡཐཱ སཏཀྑཏྟུཾ ཝིཧཏཾ ཀཔྤཱསཔཊལཾ སཔྤིམཎྜེ ཨོསཱརིཏཾ ཨཏིཝིཡ མུདུ ཧོཏི, ཨེཝཾ མཧཱཔུརིསསྶ ཧཏྠཔཱདཱཏི དསྶེནྟོ ‘‘སཔྤིམཎྜེ’’ཏིཨཱདིམཱཧ. ཏལུནཱཏི སུཁུམཱལཱ.

ཙམྨེནཱཏི ཨངྒུལནྟརཝེཋིཏཙམྨེན. པཊིབདྡྷཨངྒུལནྟརོཏི ཨེཀཏོ སམྦདྡྷཨངྒུལནྟརོ ན ཧོཏི. ཨེཀཔྤམཱཎཱཏི དཱིགྷཏོ སམཱནཔྤམཱཎཱ. ཡཝལཀྑཎནྟི ཨབྦྷནྟརཏོ ཨངྒུལིཔབྦེ ཋིཏཾ ཡཝལཀྑཎཾ. པཊིཝིཛ྄ཛྷིཏྭཱཏི ཏཾཏཾཔབྦཱནཾ སམཱནདེསཏཱཡ ཨངྒུལཱིནཾ པསཱརིཏཀཱལེཔི ཨཉྙམཉྙཾ ཝིཛ྄ཛྷིཏཱནི ཝིཡ ཕུསིཏྭཱ ཏིཊྛནྟི.

སངྑཱ ¶ ཝུཙྩནྟི གོཔྥཀཱ, ཨུདྡྷཾ སངྑཱ ཨེཏེསནྟི ཨུསྶངྑཱ, པཱདཱ. པིཊྛིཔཱདེཏི པིཊྛིཔཱདསམཱིཔེ. ཏེནཱཏི པིཊྛིཔཱདེ ཋིཏགོཔྥཀབྷཱཝེན བདྡྷཱ ཧོནྟཱིཏི ཡོཛནཱ. ཏཡིདཾ ‘‘ཏེནཱ’’ཏི པདཾ ཨུཔརིཔདདྭཡེཔི ཡོཛེཏབྦཾ ¶ ‘‘ཏེན བདྡྷབྷཱཝེན ན ཡཐཱསུཁཾ པརིཝཊྚནྟི, ཏེན ཡཐཱསུཁཾ ནཔརིཝཊྚནེན གཙྪནྟཱནཾ པཱདཏལཱནིཔི ན དིསྶནྟཱི’’ཏི. ཨུཔརཱིཏི པིཊྛིཔཱདཏོ དྭིཏིཨངྒུལིམཏྟཾ ཨུདྡྷཾ, ‘‘ཙཏུརངྒུལམཏྟ’’ནྟི ཙ ཝདནྟི. ནིགཱུལ༹ྷཱནི ཙ ཧོནྟི, ན ཨཉྙེསཾ ཝིཡ པཉྙཱཡམཱནཱནི. ཏེནཱཏི གོཔྥཀཱནཾ ཨུཔརི པཏིཊྛིཏབྷཱཝེན. ཨསྶཱཏི མཧཱཔུརིསསྶ. སཏིཔི དེསནྟརཔྤཝཏྟིཡཾ ནིཙྩལོཏི དསྶནཏྠཾ ནཱབྷིགྒཧཎཾ. ‘‘ཨདྷོཀཱཡོཝ ཨིཉྫཏཱི’’ཏི ཨིདཾ པུརིམཔདསྶ ཀཱརཎཝཙནཾ. ཡསྨཱ ཨདྷོཀཱཡོཝ ཨིཉྫཏི, ཏསྨཱ ནཱབྷིཏོ…པེ… ནིཙྩལོ ཧོཏི. ‘‘སུཁེན པཱདཱ པརིཝཊྚནྟཱི’’ཏི ཨིདཾ པན པུརིམསྶ, པཙྪིམསྶ ཙ ཀཱརཎཝཙནཾ. ཡསྨཱ སུཁེན པཱདཱ པརིཝཊྚནྟི, ཏསྨཱ ཨདྷོཀཱཡོཝ ཨིཉྫཏི, ཡསྨཱ སུཁེན པཱདཱ པརིཝཊྚནྟི, ཏསྨཱ པུརཏོཔི…པེ… པཙྪཏོཡེཝཱཏི.

ཡསྨཱ ཨེཎིམིགསྶ སམནྟཏོ ཨེཀསདིསམཾསཱ ཨནུཀྐམེན ཨུདྡྷཾ ཐཱུལཱ ཛངྒྷཱ ཧོནྟི, ཏཐཱ ¶ མཧཱཔུརིསསྶཱཔི, ཏསྨཱ ཝུཏྟཾ ‘‘ཨེཎིམིགསདིསཛངྒྷོ’’ཏི. པརིཔུཎྞཛངྒྷོཏི སམནྟཏོ མཾསཱུཔཙཡེན པརིཔུཎྞཛངྒྷོ. ཏེནཱཧ ‘‘ན ཨེཀཏོ’’ཏིཨཱདི.

ཨེཏེནཱཏི ‘‘ཨནོནམནྟོ’’ཏིཨཱདིཝཙནེན, ཛཱཎུཕཱསུབྷཱཝདཱིཔནེནཱཏི ཨཏྠོ. ཨཝསེསཛནཱཏི ཨིམིནཱ ལཀྑཎེན རཧིཏཛནཱ. ཁུཛྫཱ ཝཱ ཧོནྟི ཧེཊྛིམཀཱཡཏོ ཨུཔརིམཀཱཡསྶ རསྶཏཱཡ, ཝཱམནཱ ཝཱ ཨུཔརིམཀཱཡཏོ ཧེཊྛིམཀཱཡསྶ རསྶཏཱཡ, ཨེཏེན ཋཔེཏྭཱ སམྨཱསམྦུདྡྷཾ, ཙཀྐཝཏྟིནཉྩ ཨིཏརེ སཏྟཱ ཁུཛྫཔཀྑིཀཱ, ཝཱམནཔཀྑིཀཱ ཙཱཏི དསྶེཏི.

ཀཱམཾ སབྦཱཔི པདུམཀཎྞིཀཱ སུཝཎྞཝཎྞཱཝ, ཀཉྩནཔདུམཀཎྞིཀཱ པན པབྷསྶརབྷཱཝེན ཏཏོ སཱཏིསཡཱཏི ¶ ཨཱཧ ‘‘སུཝཎྞཔདུམཀཎྞིཀསདིསེཧཱི’’ཏི. ཨོཧིཏནྟི སམོཧིཏཾ ཨནྟོགདྷཾ. ཏཐཱབྷཱུཏཾ པན ཏཾ ཏེན ཚནྣཾ ཧོཏཱིཏི ཨཱཧ ‘‘པཊིཙྪནྣ’’ནྟི.

སུཝཎྞཝཎྞོཏི སུཝཎྞཝཎྞཝཎྞོཏི ཨཡམེཏྠ ཨཏྠོཏི ཨཱཧ ‘‘ཛཱཏིཧིངྒུལཀེནཱ’’ཏིཨཱདི, སྭཱཡམཏྠོ ཨཱཝུཏྟིཉཱཡེན ཙ ཝེདིཏབྦོ. སརཱིརཔརིཡཱཡོ ཨིདྷ ཝཎྞ-སདྡོཏི ཨདྷིཔྤཱཡོ. པཋམཝིཀཔྤཾ ཝཏྭཱ ¶ ཏཐཱརཱུཔཱཡ པན རུལ༹ྷིཡཱ ཨབྷཱཝཾ མནསི ཀཏྭཱ ཝཎྞདྷཱཏུཔརིཡཱཡམེཝ ཝཎྞ-སདྡཾ གཧེཏྭཱ དུཏིཡཝིཀཔྤོ ཝུཏྟོ. ཏསྨཱ པདདྭཡེནཱཔི སུནིདྡྷནྟསུཝཎྞསདིསཚཝིཝཎྞོཏི ཝུཏྟཾ ཧོཏི.

རཛོཏི སུཁུམརཛོ. ཛལླནྟི མལཱིནབྷཱཝཱཝཧོ རེཎུསཉྩཡོ. ཏེནཱཧ ‘‘མལཾ ཝཱ’’ཏི. ཡདི ཝིཝཏྟཏི, ཀཐཾ ནྷཱནཱདཱིནཱིཏི ཨཱཧ ‘‘ཧཏྠདྷོཝནཱདཱིནཱི’’ཏིཨཱདི.

ཨཱཝཊྚཔརིཡོསཱནེཏི པདཀྑིཎཱཝཊྚནཝསེན པཝཏྟསྶ ཨཱཝཊྚསྶ ཨནྟེ.

བྲཧྨུནོ སརཱིརཾ པུརཏོ ཝཱ པཙྪཏོ ཝཱ ཨནོནམིཏྭཱ ཨུཛུཀམེཝ ཨུགྒཏནྟི ཨཱཧ ‘‘བྲཧྨཱ ཝིཡ ཨུཛུགཏྟོ’’ཏི. སཱ པནཱཡཾ ཨུཛུགཏྟཏཱ ཨཝཡཝེསུ བུདྡྷིཔྤཏྟེསུ དཊྛབྦཱ, ན དཧརཀཱལེཏི ཝུཏྟཾ ‘‘ཨུགྒཏདཱིགྷསརཱིརོ བྷཝིསྶཏཱི’’ཏི. ཨིཏརེསཱུཏི ‘‘ཁནྡྷཛཱཎཱུསཱུ’’ཏི ཨིམེསུ དྭཱིསུ ཋཱནེསུ ནམནྟཱ པུརཏོ ནམནྟཱིཏི ཨཱནེཏྭཱ སམྦནྡྷོ. པསྶཝངྐཱཏི དཀྑིཎཔསྶེན ཝཱ ཝཱམཔསྶེན ཝཱ ཝངྐཱ. སཱུལསདིསཱཏི པོཏྠཀརཱུཔཀརཎེ ཋཔིཏསཱུལཔཱདསདིསཱ.

ཧཏྠཔིཊྛིཨཱདིཝསེན སཏྟ སརཱིརཱཝཡཝཱ ཨུསྶདཱ ཨུཔཙིཏམཾསཱ ཨེཏསྶཱཏི སཏྟུསྶདོ. ཨཊྛིཀོཊིཡོ ¶ པཉྙཱཡནྟཱིཏི ཡོཛནཱ. ནིགཱུལ༹ྷསིརཱཛཱལེཧཱིཏི ལཀྑཎཝཙནམེཏནྟི ཏེན ནིགཱུལ༹ྷཨཊྛིཀོཊཱིཧཱིཏིཔི ཝུཏྟམེཝ ཧོཏཱིཏི. ཧཏྠཔིཊྛཱདཱིཧཱིཏི ¶ ཨེཏྠ ཨཱདི-སདྡེན ཨཾསཀཱུཊཁནྡྷཀཱུཊཱནཾ སངྒཧེ སིདྡྷེ ཏཾ ཨེཀདེསེན དསྶེནྟོ ‘‘ཝཊྚེཏྭཱ…པེ… ཁནྡྷེནཱ’’ཏི ཨཱཧ. ‘‘སིལཱརཱུཔཀཾ ཝིཡཱ’’ཏིཨཱདིནཱ ཝཱ ནིགཱུལ༹ྷཨཾསཀཱུཊཏཱཔི ཝིབྷཱཝིཏཱ ཡེཝཱཏི དཊྛབྦཾ.

སཱིཧསྶ པུབྦདྡྷཾ སཱིཧཔུབྦདྡྷཾ, པརིཔུཎྞཱཝཡཝཏཱཡ སཱིཧཔུབྦདྡྷཾ ཝིཡ སཀལོ ཀཱཡོ ཨསྶཱཏི སཱིཧཔུབྦདྡྷཀཱཡོ. ཏེནཱཧ ‘‘སཱིཧསྶ པུབྦདྡྷཀཱཡོ ཝིཡ སབྦོ ཀཱཡོ པརིཔུཎྞོ’’ཏི. སཱིཧསྶེཝཱཏི སཱིཧསྶ ཝིཡ. དུསྶཎྛིཏཝིསཎྛིཏོ ན ཧོཏཱིཏི དུཊྛུ སཎྛིཏོ, ཝིརཱུཔསཎྛིཏོ ཙ ན ཧོཏི, ཏེསཾ ཏེསཾ ཨཝཡཝཱནཾ ཨཡུཏྟབྷཱཝེན, ཝིརཱུཔབྷཱཝེན ཙ སཎྛིཏི ཨུཔགཏོ ན ཧོཏཱིཏི ཨཏྠོ. སཎྛནྟཱིཏི སཎྛཧནྟི. དཱིགྷེཧཱིཏི ཨངྒུལིནཱསཱདཱིཧི. རསྶེཧཱིཏི གཱིཝཱདཱིཧི. ཐཱུལེཧཱིཏི ཨཱུརུབཱཧུཨཱདཱིཧི ¶ . ཀིསེཧཱིཏི ཀེསལོམམཛ྄ཛྷཱདཱིཧི. པུཐུལེཧཱིཏི ཨཀྑིཧཏྠཏལཱདཱིཧི. ཝཊྚེཧཱིཏི ཛངྒྷཧཏྠཱདཱིཧི.

སཏཔུཉྙལཀྑཎཏཱཡ ནཱནཱཙིཏྟེན པུཉྙཙིཏྟེན ཙིཏྟིཏོ སཉྫཱཏཙིཏྟབྷཱཝོ ‘‘ཨཱིདིསོ ཨེཝ བུདྡྷཱནཾ དྷམྨཀཱཡསྶ ཨདྷིཊྛཱནཾ བྷཝིཏུཾ ཡུཏྟོ’’ཏི དསཔཱརམཱིཧི སཛྫིཏོ ཨབྷིསངྑཏོ, ‘‘དཱནཙིཏྟེན པུཉྙཙིཏྟེནཱ’’ཏི ཝཱ པཱཋོ, དཱནཝསེན, སཱིལཱདིཝསེན ཙ པཝཏྟཔུཉྙཙིཏྟེནཱཏི ཨཏྠོ.

དྭིནྣཾ ཀོཊྚཱནཾ ཨནྟརནྟི དྭིནྣཾ པིཊྛིབཱཧཱནཾ ཝེམཛ྄ཛྷཾ པིཊྛིམཛ྄ཛྷསྶ ཨུཔརིབྷཱགོ. ཙིཏཾ པརིཔུཎྞནྟི ཨནིནྣབྷཱཝེན ཙིཏཾ, དྭཱིཧི ཀོཊྚེཧི སམཏལཏཱཡ པརིཔུཎྞཾ. ཨུགྒམྨཱཏི ཨུགྒནྟྭཱ, ཨནིནྣཾ སམཏལཾ ཧུཏྭཱཏི ཨདྷིཔྤཱཡོ. ཏེནཱཧ ‘‘སུཝཎྞཕལཀཾ ཝིཡཱ’’ཏི.

ནིགྲོདྷོ ཝིཡ པརིམཎྜལོཏི པརིམཎྜལནིགྲོདྷོ ཝིཡ ¶ པརིམཎྜལོ, ‘‘ནིགྲོདྷཔརིམཎྜལཔརིམཎྜལོ’’ཏི ཝཏྟབྦེ ཨེཀསྶ པརིམཎྜལ-སདྡསྶ ལོཔཾ ཀཏྭཱ ‘‘ནིགྲོདྷཔརིམཎྜལོ’’ཏི ཝུཏྟོ. ཏེནཱཧ ‘‘སམཀྑནྡྷསཱཁོ ནིགྲོདྷོ’’ཏིཨཱདི. ན ཧི སབྦོ ནིགྲོདྷོ པརིམཎྜལོཏི, པརིམཎྜལསདྡསནྣིདྷཱནེན ཝཱ པརིམཎྜལོཝ ནིགྲོདྷོ གཡ྄ཧཏཱིཏི ཨེཀསྶ པརིམཎྜལསདྡསྶ ལོཔེན ཝིནཱཔི ཨཡམཏྠོ ལབྦྷཏཱིཏི ཨཱཧ ‘‘ནིགྲོདྷོ ཝིཡ པརིམཎྜལོ’’ཏི. ཡཱཝཏཀོ ཨསྶཱཏི ཡཱཝཏཀྭསྶ ཨོ-ཀཱརསྶ ཝ-ཀཱརཱདེསཾ ཀཏྭཱ.

སམཝཊྚིཏཀྑནྡྷོཏི སམཾ སུཝཊྚིཏཀྑནྡྷོ. ཀོཉྩཱ ཝིཡ དཱིགྷགལཱ, བཀཱ ཝིཡ ཝངྐགལཱ ¶ , ཝརཱཧཱ ཝིཡ པུཐུལགལཱཏི ཡོཛནཱ. སུཝཎྞཱལི༹ངྒསདིསོཏི སུཝཎྞམཡཁུདྡཀམུདིངྒསདིསོ.

རསགྒསགྒཱིཏི མདྷུརཱདིབྷེདཾ རསཾ གསནྟི ཨནྟོ པཝེསནྟཱིཏི རསགྒསཱ རསགྒསཱནཾ ཨགྒཱ རསགྒསགྒཱ, ཏཱ ཨེཏསྶ སནྟཱིཏི རསགྒསགྒཱི. ཏེནཱཏི ཨོཛཱཡ ཨཕརཎེན ཧཱིནདྷཱཏུཀཏྟཱ ཏེ བཧྭཱབཱདྷཱ ཧོནྟི.

ཧནཱུཏི སནྣིསྶཡདནྟཱདྷཱརསྶ སམཉྙཱ, ཏཾ བྷགཝཏོ སཱིཧསྶ ཧནུ ཝིཡ, ཏསྨཱ བྷགཝཱ སཱིཧཧནུ. ཏཏྠ ཡསྨཱ བུདྡྷཱནཾ རཱུཔཀཱཡསྶ, དྷམྨཀཱཡསྶ ཙ ཨུཔམཱ ནཱམ ཧཱིནཱུཔམཱཝ, ནཏྠི སམཱནཱུཔམཱ, ཀུཏོ ཨདྷིཀཱུཔམཱ, ཏསྨཱ ཨཡམྤི ཧཱིནཱུཔམཱཏི དསྶེཏུཾ ‘‘ཏཏྠཱ’’ཏིཨཱདི ཝུཏྟཾ. ཡསྨཱ མཧཱཔུརིསསྶ ཧེཊྛིམཱནུརཱུཔཝསེནེཝ ཨུཔརིམམྤི སཎྛིཏཾ, ཏསྨཱ ཝུཏྟཾ ¶ ‘‘དྭེཔི པརིཔུཎྞཱནཱི’’ཏི, ཏཉྩ ཁོ ན སབྦསོ པརིམཎྜལཏཱཡ, ཨཐ ཁོ ཏིབྷཱགཱཝསེསམཎྜལཏཱཡཱཏི ཨཱཧ ‘‘དྭཱདསིཡཱ པཀྑསྶ ཙནྡསདིསཱནཱི’’ཏི. སལླཀྑེཏྭཱཏི ཨཏྟནོ ལཀྑཎསཏྠཱནུསཱརེན ¶ ཨུཔདྷཱརེཏྭཱ. དནྟཱནཾ ཨུཙྩནཱིཙཏཱ ཨབྦྷནྟརབཱཧིརཔསྶཝསེནཔི ཝེདིཏབྦཱ, ན ཨགྒཝསེནེཝ. ཏེནཱཧ ‘‘ཨཡཔཊྚཀེན ཚིནྣསངྑཔཊལཾ ཝིཡཱ’’ཏི. ཨཡཔཊྚཀནྟི ཀཀཙཾ ཨདྷིཔྤེཏཾ. སམཱ བྷཝིསྶནྟི, ན ཝིསམཱ, སམསཎྛཱནཱཏི ཨཏྠོ.

སཱཏིསཡཾ མུདུདཱིགྷཔུཐུལཏཱདིཔྤཀཱརགུཎཱ ཧུཏྭཱ བྷཱུཏཱ ཛཱཏཱཏི པབྷཱུཏཱ, བྷ-ཀཱརསྶ ཧ-ཀཱརཾ ཀཏྭཱ པཧཱུཏཱ ཛིཝ྄ཧཱ ཨེཏསྶཱཏི པཧཱུཏཛིཝ྄ཧོ.

ཝིཙྪིནྡིཏྭཱ ཝིཙྪིནྡིཏྭཱ པཝཏྟསརཏཱཡ ཚིནྣསྶརཱཔི. ཨནེཀཱཀཱརཏཱཡ བྷིནྣསྶརཱཔི. ཀཱཀསྶ ཝིཡ ཨམནུཉྙསརཏཱཡ ཀཱཀསྶརཱཔི. ཨཔལིབུདྡྷཏྟཱཏི ཨནུཔདྡུཏཝཏྠུཀཏྟཱ, ཝཏྠཱུཏི ཙ ཨཀྑརུཔྤཏྟིཊྛཱནཾ ཝེདིཏབྦཾ. ཨཊྛངྒསམནྣཱགཏོཏི ཨེཏྠ ཨངྒཱནི པརཏོ ཨཱགམིསྶནྟི. མཉྫུགྷོསོཏི མདྷུརསྶརོ.

ཨབྷིནཱིལནེཏྟོཏི ཨདྷིཀནཱིལནེཏྟོ, ཨདྷིཀཏཱ ཙ སཱཏིསཡཾ ནཱིལབྷཱཝེན ཝེདིཏབྦཱ, ན ནེཏྟནཱིལབྷཱཝསྶེཝ ཨདྷིཀབྷཱཝཏོཏི ཨཱཧ ‘‘ན སཀལནཱིལནེཏྟོ’’ཏིཨཱདི. པཱིཏལོཧིཏཝཎྞཱ སེཏམཎྜལགཏརཱཛིཝསེན. ནཱིལསེཏཀཱལ༹ཝཎྞཱ པན ཏཾཏཾམཎྜལཝསེནེཝ ཝེདིཏབྦཱ.

‘‘ཙཀྑུབྷཎྜནྟི ཨཀྑིདལ’’ནྟི ཀེཙི. ‘‘ཨཀྑིདལཝཊུམ’’ནྟི ཨཉྙེ. ཨཀྑིདལེཧི པན ¶ སདྡྷིཾ ཨཀྑིབིམྦནྟི ཝེདིཏབྦཾ. ཨེཝཉྷི ཝིནིགྒཏགམྦྷཱིརཛོཏནཱཔི ཡུཏྟཱ ཧོཏི. ‘‘ཨདྷིཔྤེཏ’’ནྟི ཨིམིནཱ ཨཡམེཏྠ ཨདྷིཔྤཱཡོ ཨེཀདེསེན སམུདཱཡུཔལཀྑཎཉཱཡེནཱཏི དསྶེཏི. ཡསྨཱ པཁུམ-སདྡོ ལོཀེ ཨཀྑིདལལོམེསུ ནིརུལ༹ྷོ, ཏེནེཝཱཧ ‘‘མུདུསིནིདྡྷནཱིལསུཁུམཔཁུམཱཙིཏཱནི ཨཀྑཱིནཱི’’ཏི.

ཀིཉྩཱཔི ཨུཎྞཱ-སདྡོ ལོཀེ ཨཝིསེསཏོ ལོམཔརིཡཱཡོ, ཨིདྷ པན ལོམཝིསེསཝཱཙཀོཏི ཨཱཧ ‘‘ཨུཎྞཱ ལོམ’’ནྟི. ནལཱཊཝེམཛ྄ཛྷེ ¶ ཛཱཏཱཏི ནལཱཊམཛ྄ཛྷགཏཱ ཛཱཏཱ. ཨོདཱཏཏཱཡ ཨུཔམཱ, ན མུདུཏཱཡ ¶ . ཨུཎྞཱ ཧི ཏཏོཔི སཱཏིསཡཾ མུདུཏརཱ. ཏེནཱཧ‘‘སཔྤི མཎྜེ’’ཏིཨཱདི. རཛཏཔུབྦུལ༹ཀནྟི རཛཏམཡཏཱརཀམཱཧ.

དྭེ ཨཏྠཝསེ པཊིཙྩ ཝུཏྟནྟི ཡསྨཱ བུདྡྷཱ, ཙཀྐཝཏྟིནོ ཙ པརིཔུཎྞནལཱཊཏཱཡ, པརིཔུཎྞསཱིསབིམྦཏཱཡ ཙ ‘‘ཨུཎྷཱིསསཱིསཱ’’ཏི ཝུཙྩནྟི, ཏསྨཱ ཏེ དྭེ ཨཏྠཝསེ པཊིཙྩ ‘‘ཨུཎྷཱིསསཱིསོ’’ཏི ཨིདཾ ཝུཏྟཾ. ཨིདཱནི ཏཾ ཨཏྠདྭཡཾ མཧཱཔུརིསེ སུཔྤཏིཊྛིཏནྟི ‘‘མཧཱཔུརིསསྶ ཧཱི’’ཏིཨཱདི ཝུཏྟཾ. སཎྷཏམཏཱཡ, སུཝཎྞཝཎྞཏཱཡ, པབྷསྶརཏཱཡ, པརིཔུཎྞཏཱཡ ཙ རཉྙོ བནྡྷཨུཎྷཱིསཔཊྚོ ཝིཡ ཝིརོཙཏི. ཀཔིསཱིསཱཏི དྭིདྷཱབྷཱུཏསཱིསཱ. ཕལསཱིསཱཏི ཕལིཏསཱིསཱ. ཨཊྛིསཱིསཱཏི མཾསསྶ ཨབྷཱཝཏོ ཨཏིཝིཡ ཨཊྛིཏཱཡ, པཏནུབྷཱཝཏོ ཝཱ ཏཙོནདྡྷཨཊྛིམཏྟསཱིསཱ. ཏུམྦསཱིསཱཏི ལཱབུསདིསསཱིསཱ. པབྦྷཱརསཱིསཱཏི པིཊྛིབྷཱགེན ཨོལམྦམཱནསཱིསཱ. པུརིམནཡེནཱཏི པརིཔུཎྞནལཱཊཏཱཔཀྑེན. ཨུཎྷཱིསཝེཋིཏསཱིསོ ཝིཡཱཏི ཨུཎྷཱིསཔཊྚེན ཝེཋིཏསཱིསཔདེསོ ཝིཡ. ཨུཎྷཱིསཾ ཝིཡཱཏི ཚེཀེན སིཔྤིནཱ ཝིརཙིཏཨུཎྷཱིསམཎྜལཾ ཝིཡ.

ཝིཔསྶཱིསམཉྙཱཝཎྞནཱ

༣༧. ཏསྶ ཝིཏྠཱརོཏི ཏསྶ ལཀྑཎཔརིགྒཎྷནེ ནེམིཏྟཀཱནཾ སནྟཔྤནསྶ ཝིཏྠཱརོ ཝིཏྠཱརཀཐཱ. གབྦྷོཀྐནྟིཡཾ ནིམིཏྟབྷཱུཏ སུཔིནཔཊིགྒཱཧཀསནྟཔྤནེ ཝུཏྟོཡེཝ. ནིདྡོསེནཱཏི ཁཱརིཀལོཎིཀཱདིདོསརཧིཏེན. དྷཱཏིཡོཏི ཐཉྙཔཱཡིཀཱ དྷཱཏིཡོ. ཏཱ ཧི དྷཱཔེནྟི ཐཉྙཾ པཱཡེནྟཱིཏི དྷཱཏིཡོ. ‘‘ཏཐཱ’’ཏི ཨིམིནཱ ‘‘སཊྛི’’ནྟི པདཾ ཨུཔསཾཧརཏི ¶ , སེསཱཔཱིཏི ནྷཱཔིཀཱ, དྷཱརིཀཱ, པརིཧཱརིཀཱཏི ཨིམཱ ཏིཝིདྷཱ. ཏཱཔི དཧནྟི ཝིདཧནྟི ནྷཱནཾ དཧནྟི དྷཱརེནྟཱིཏི ‘‘དྷཱཏིཡོ’’ ཏྭེཝ ཝུཙྩནྟི. ཏཏྠ དྷཱརཎཾ ཨུརསཱ, ཨཱུརུནཱ, ཧཏྠེཧི ཝཱ སུཙིརཾ ཝེལཾ སནྡྷཱརཎཾ. པརིཧརཎཾ ¶ ཨཉྙསྶ ཨངྐཏོ ཨཏྟནོ ཨངྐཾ, ཨཉྙསྶ བཱཧུཏོ ཨཏྟནོ བཱཧུཾ ཨུཔསཾཧརནྟེཧི ཧརཎཾ སམྤཱཔནཾ.

༣༨. མཉྫུསྶརོཏི སཎྷསྶརོ. ཡོ ཧི སཎྷོ, སོ ཁརོ ན ཧོཏཱིཏི ཨཱཧ ‘‘ཨཁརསྶརོ’’ཏི. ཝགྒུསྶརོཏི མནོརམྨསྶརོ, མནོརམྨཏཱ ཙསྶ ཙཱཏུརིཡནེ པུཉྙཡོགཏོཏི ཨཱཧ ‘‘ཚེཀནིཔུཎསྶརོ’’ཏི. མདྷུརསྶརོཏི སོཏསུཁསྶརོ, སོཏསུཁཏཱ ཙསྶ ཨཏིཝིཡ ཨིཊྛབྷཱཝེནཱཏི ཨཱཧ ‘‘སཱཏསྶརོ’’ཏི. པེམནཱིཡསྶརོཏི ¶ པིཡཱཡིཏབྦསྶརོ, པིཡཱཡིཏབྦཏཱ ཙསྶ སུཎནྟཱནཾ ཨཏྟནི བྷཏྟིསམུཔྤཱདནེནཱཏི ཨཱཧ ‘‘པེམཛནཀསྶརོ’’ཏི. ཀརཝཱིཀསྶརོཏི. ཀརཝཱིཀསདྡོ ཡེསཾ སཏྟཱནཾ སོཏཔཐཾ ཨུཔགཙྪཏི, ཏེ ཨཏྟནོ སརསམྤཏྟིཡཱ པཀཏིཾ ཛཧཱཔེཏྭཱ ཨཝསེ ཀརོནྟོ ཨཏྟནོ ཝསེ ཝཏྟེཏི, ཨེཝཾ མདྷུརོཏི དསྶེནྟོ ‘‘ཏཏྲིད’’ནྟིཨཱདིམཱཧ. ཏཏྠ ‘‘ཀརཝཱིཀསཀུཎེ’’ཏིཨཱདི ཏསྶ སབྷཱཝཀཐནཾ. ལལི༹ཏནྟི པཱིཏིཝེགསམུཊྛིཏཾ ལཱིལ༹ཾ. ཚཌྜེཏྭཱཏི ‘‘སངྑརཎམྤི མདྷུརསདྡསཝནནྟརཱཡཀར’’ནྟི ཏིཎཱནི ཨཔནེཏྭཱ. ཨནིཀྑིཔིཏྭཱཏི བྷཱུམིཡཾ ཨནིཀྑིཔིཏྭཱ ཨཱཀཱསགཏམེཝ ཀཏྭཱ. ཨནུབདྡྷམིགཱ ཝཱལ༹མིགེཧི. ཏཏོ མརཎབྷཡཾ ཧིཏྭཱ. པཀྑེ པསཱརེཏྭཱཏི པཀྑེ ཡཐཱཔསཱརིཏེ ཀཏྭཱ ཨཔཏནྟཱ ཏིཊྛནྟི.

སུཝཎྞཔཉྫརཾ ཝིསྶཛྫེསི ཡོཛནཔྤམཱཎེ ཨཱཀཱསེ ཨཏྟནོ ཨཱཎཱཡ པཝཏྟནཏོ. ཏེནཱཧ ‘‘སོ རཱཛཱཎཱཡཱ’’ཏིཨཱདི. ལལི༹ཾསཱུཏི ལལི༹ཏཾ ཀཱཏུཾ ཨཱརབྷིཾསུ. ཏཾ པཱིཏིནྟི ¶ ཏཾ བུདྡྷགུཎཱརམྨཎཾ པཱིཏིཾ ཏེནེཝ ནཱིཧཱརེན པུནཔྤུནཾ པཝཏྟཾ པཱིཏིཾ ཨཝིཛཧིཏྭཱ ཝིཀྑམྦྷིཏཀིལེསཱ ཐེརཱནཾ སནྟིཀེ ལདྡྷདྷམྨསྶཝནསཔྤཱཡཱ ཨུཔནིསྶཡསམྤཏྟིཡཱ པརིཔཀྐཉཱཎཏཱཡ སཏྟཧི…པེ… པཏིཊྛཱསི. སཏྟསཏམཏྟེན ཨོརོདྷཛནེན སདྡྷིཾ པདསཱཝ ཐེརཱནཾ སནྟིཀཾ ཨུཔགཏཏྟཱ ‘‘སཏྟཧི ཛངྒྷསཏེཧི སདྡྷི’’ནྟི ཝུཏྟཾ. ཏཏོཏི ཀརཝཱིཀསདྡཏོ. སཏབྷཱགེན…པེ… ཝེདིཏབྦོ ཨནེཀཀཔྤཀོཊིསཏསམྦྷཱུཏཔུཉྙསམྦྷཱརསམུདཱགཏཝཏྠུསམྤཏྟིབྷཱཝཏོ.

༣༩. ཀམྨཝིཔཱཀཛནྟི སཱཏིསཡསུཙརིཏཀམྨནིབྦཏྟཾ པིཏྟསེམྷརུཧིརཱདཱིཧི ཨཔལིབུདྡྷཾ དཱུརེཔི ཨཱརམྨཎཾ སམྤཊིཙྪནསམཏྠཾ ཀམྨཝིཔཱཀེན སཧཛཱཏཾ, ཀམྨསྶ ཝཱ ཝིཔཱཀབྷཱཝེན ཛཱཏཾ པསཱདཙཀྑུ. དུཝིདྷཉྷི དིབྦཙཀྑུཾ ཀམྨམཡཾ, བྷཱཝནཱམཡནྟི. ཏཏྲིདཾ ཀམྨམཡནྟི ཨཱཧ ‘‘ན བྷཱཝནཱམཡ’’ནྟི. བྷཱཝནཱམཡཾ པན བོདྷིམཱུལེ ཨུཔྤཛྫིསྶཏི. ཨཡཾ ‘‘སོ’’ཏི སལླཀྑཎཾ ཀཱམཾ མནོཝིཉྙཱཎེན ཧོཏི, ཙཀྑུཝིཉྙཱཎེན པན ཏསྶ ཏཐཱ ཝིབྷཱཝིཏཏྟཱ མནོཝིཉྙཱཎསྶ ཏཏྠ ཏཐཱཔཝཏྟཱིཏི ཨཱཧ ‘‘ཡེན ནིམིཏྟཾ…པེ… སཀྐོཏཱི’’ཏི.

༤༠. ཝཙནཏྠོཏི ¶ ¶ སདྡཏྠོ. ནིམཱིལནནྟི ནིམཱིལནདསྶནཾ ནཝིསུདྡྷཾ, ཏཐཱ ཙ ཨཀྑཱིནི ཨཝིཝཊཱནི ནིམཱིལདསྶནསྶ ན ཝིསུདྡྷིབྷཱཝཏོ. ཏབྦིཔརིཡཱཡཏོ པན དསྶནཾ ཝིསུདྡྷཾ, ཝིཝཊཉྩཱཏི ཨཱཧ ‘‘ཨནྟརནྟརཱ’’ཏིཨཱདི.

༤༡. ནཱི-ཨིཏི – ཛཱནནཏྠཾ དྷཱཏུཾ གཧེཏྭཱ ཨཱཧ ‘‘པནཡཏི ཛཱནཱཏཱི’’ཏི. ཡཏོ ཝུཏྟཾ ‘‘ཨནིམིཏྟཱ ན ནཱཡརེ’’ཏི (ཝིསུདྡྷི. ༡.༡༧༤; སཾ. ནི. ཨཊྛ. ༡.༡.༢༠), ‘‘ཝིདཱུབྷི ¶ ནེཡྻཾ ནརཝརསྶཱ’’ཏི (ནེཏྟི. སངྒཧཝཱར) ཙ. ནཱི-ཨིཏི པན པཝཏྟནཏྠཾ དྷཱཏུཾ གཧེཏྭཱ ‘‘ནཡཏི པཝཏྟེཏཱི’’ཏི. ཨཔྤམཏྟོ ཨཧོསི ཏེསུ ཏེསུ ཀིཙྩཀརཎཱིཡེསུ.

༤༢. ཝསྶཱཝཱསོ ཝསྶཾ ཨུཏྟརཔདལོཔེན, ཏསྨཱ ཝསྶཾ, ཝསྶེ ཝཱ, སནྣིཝཱསཕཱསུཏཱཡ ཨརཧཏཱིཏི ཝསྶིཀོ, པཱསཱདོ. མཱསཱ པན ཝསྶེ ཨུཏུམྷི བྷཝཱཏི ཝསྶིཀཱ. ཨིཏརེསཱུཏི ཧེམནྟིཀཾ གིམྷིཀནྟི ཨིམེསུ. ཨེསེཝ ནཡོཏི ཨུཏྟརཔདལོཔེན ནིདྡེསཾ ཨཏིདིསཏི.

ནཱཏིཨུཙྩོ ཧོཏི ནཱཏིནཱིཙོཏི གིམྷིཀོ ཝིཡ ཨུཙྩོ, ཧེམནྟིཀོ ཝིཡ ནཱིཙོ ན ཧོཏི, ཨཐ ཁོ ཏདུབྷཡཝེམཛ྄ཛྷལཀྑཎཏཱཡ ནཱཏིཨུཙྩོ ཧོཏི, ནཱཏིནཱིཙོ. ཨསྶཱཏི པཱསཱདསྶ. ནཱཏིབཧཱུནཱིཏི གིམྷིཀསྶ ཝིཡ ན ཨཏིབཧཱུནི. ནཱཏིཏནཱུནཱིཏི ཧེམནྟིཀསྶ ཝིཡ ན ཁུདྡཀཱནི, ཏནུཏརཛཱལཱནི ཙ. མིསྶཀཱནེཝཱཏི ཧེམནྟིཀེ ཝིཡ ན ཨུཎྷནིཡཱནེཝ, གིམྷིཀེ ཝིཡ ཙ ན སཱིཏནིཡཱནེཝ, ཨཐ ཁོ ཨུབྷཡམིསྶཀཱནེཝ. ཏནུཀཱནཱིཏི ན པུཐུལཱནི. ཨུཎྷཔྤཝེསནཏྠཱཡཱཏི སཱུརིཡསནྟཱཔཱནུཔྤཝེསཱཡ. བྷིཏྟིནིཡཱུཧཱནཱིཏི དཀྑིཎཔསྶེ བྷིཏྟཱིསུ ནིཡཱུཧཱནི. སིནིདྡྷནྟི སིནེཧཝནྟཾ, སིནིདྡྷགྒཧཎེནེཝ ཙསྶ གརུཀཏཱཔི ཝུཏྟཱ ཨེཝ. ཀཊུཀསནྣིསྶིཏནྟི ཏིཀཊུཀཱདིཀཊུཀདྲབྦཱུཔསཉྷིཏཾ. ཨུདཀཡནྟཱནཱིཏི ཨུདཀདྷཱརཱཝིསྶནྡཡནྟཱནི. ཡཐཱ ཛལཡནྟཱནི, ཨེཝཾ ཧིམཡནྟཱནིཔི ཏཏྠ ཀརོནྟི ཨེཝ. ཏསྨཱ ཧེམནྟེ ཝིཡ ཧིམཱནི པཏནྟཱནིཡེཝ ཧོནྟཱིཏི ཙ ཝེདིཏབྦཾ.

སབྦཊྛཱནཱནིཔཱིཏི ¶ སབྦཱནི པཊིཀིརིཡཱནྷཱནབྷོཛནཀཱིལཱ༹སཉྩརཎཱདིཊྛཱནཱནིཔི, ན ནིཝཱསཊྛཱནཱནིཡེཝ. ཏེནཱཧ ‘‘དོཝཱརིཀཱཔཱི’’ཏིཨཱདི. ཏཏྠ ཀཱརཎམཱཧ ‘‘རཱཛཱ ཀིརཱ’’ཏིཨཱདི.

པཋམབྷཱཎཝཱརཝཎྞནཱ ནིཊྛིཏཱ.

ཛིཎྞཔུརིསཝཎྞནཱ

༤༤. གོཔཱནསིཝངྐནྟི ¶ ¶ ཝངྐགོཔཱནསཱི ཝིཡ. ཝངྐཱནཉྷི ཝངྐབྷཱཝསྶ ནིདསྶནཏྠཾ ཨཝངྐགོཔཱནསཱིཔི གཡ྄ཧཏི. ཨཱབྷོགྒཝངྐནྟི ཨཱདིཏོ པཊྛཱཡ ཨབྦྷུགྒཏཱཡ ཀུཊིལསརཱིརཏཱཡ ཝངྐཾ. ཏེནཱཧ ‘‘ཁནྡྷེ’’ཏིཨཱདི. དཎྜཔརཾ དཎྜགྒཧཎཔརཾ ཨཡནཾ གམནཾ ཨེཏསྶཱཏི དཎྜཔརཱཡནཾ, དཎྜོ ཝཱ པརཾ ཨཱཡནཾ གམནཀཱརཎཾ ཨེཏསྶཱཏི དཎྜཔརཱཡནཾ. ཋཱནཱདཱིསུ དཎྜོ གཏི ཨཝསྶཡོ ཨེཏསྶ ཏེན ཝིནཱ ཨཔྤཝཏྟནཏོཏི དཎྜགཏིཀཾ, གཙྪཏི ཨེཏེནཱཏི ཝཱ གཏི, དཎྜོ གཏི གམནཀཱརཎཾ ཨེཏསྶཱཏི དཎྜགཏིཀཾ. དཎྜཔཊིསརཎནྟི ཨེཏྠཱཔི ཨེསེཝ ནཡོ. ཛརཱཏུརནྟི ཛརཱཡ ཀིལནྟཾ ཨསྶཝསཾ. ཡདཱ རཐོ པུརཏོ ཧོཏཱིཏི དྭེདྷཱཔཐེ སམྤཏྟེ པུརཏོ གཙྪནྟེ བལཀཱཡེ ཏཏྠ ཨེཀཾ སཎྛཱནཾ ཨཱརུལ༹ྷོ མཛ྄ཛྷེ གཙྪནྟོ བོདྷིསཏྟེན ཨཱརུལ༹ྷོ རཐོ ཨིཏརཾ སཎྛཱནཾ གཙྪནྟོ ཡདཱ པུརཏོ ཧོཏི. པཙྪཱ བལཀཱཡོཏི ཏདཱ པཙྪཱ ཧོཏི སབྦོ བལཀཱཡོ. ཏཱདིསེ ཨོཀཱསེཏི ཏཱདིསེ ཝུཏྟཔྤཀཱརེ མགྒཔྤདེསེ. ཏཾ པུརིསནྟི ཏཾ ཛིཎྞཔུརིསཾ. སུདྡྷཱཝཱསཱཏི སིདྡྷཏྠཱདཱིནཾ ཏིཎྞཾ སམྨཱསམྦུདྡྷཱནཾ སཱསནེ བྲཧྨཙརིཡཾ ཙརིཏྭཱ སུདྡྷཱཝཱསབྷཱུམིཡཾ ནིབྦཏྟབྲཧྨཱནོ. ཏེ ཧི ཏདཱ ཏཏྠ ཏིཊྛནྟི. ‘‘ཀིཾ ¶ པནེསོ ཛིཎྞོ ནཱམཱ’’ཏི ཨེསོ ཏཡཱ ཝུཙྩམཱནོ ཀིཾ ཨཏྠཏོ, ཏཾ མེ ནིདྡྷཱརེཏྭཱ ཀཐེཧཱིཏི དསྶེཏི. ཨནིདྡྷཱརིཏསརཱུཔཏྟཱ ཧི ཏསྶ ཨཏྟནོ བོདྷིསཏྟོ ལིངྒསབྦནཱམེན ཏཾ ཝདནྟོ ‘‘ཀི’’ནྟི ཨཱཧ. ‘‘ཡཐཱ ཀིཾ ཏེ ཛཱཏ’’ནྟི དྭཡམེཝ ཧི ལོཀེ ཡེབྷུཡྻཏོ ཛཱཡཏི ཨིཏྠཱི ཝཱ པུརིསོ ཝཱ, ཏཐཱཔི ཏཾ ལིངྒསབྦནཱམེན ཝུཙྩཏི, ཨེཝཾ སམྤདམིདཾ ཝེདིཏབྦཾ. ‘‘ཀིཾ ཝུཏྟཾ ཧོཏཱི’’ཏིཨཱདི ཏསྶ ཨནིདྡྷཱརིཏསརཱུཔཏཾཡེཝ ཝིབྷཱཝེཏི.

‘‘ཏེན ཧཱི’’ཏིཨཱདི ‘‘ཨཡཉྩ ཛིཎྞབྷཱཝོ སབྦསཱདྷཱརཎཏྟཱ མཡ྄ཧམྤི ཨུཔརི ཨཱཔཏྟིཏོ ཨེཝཱ’’ཏི མཧཱསཏྟསྶ སཾཝིཛྫནཱཀཱརཝིབྷཱཝནཾ. རཐཾ སཱརེཏཱིཏི སཱརཐི. ཀཱིལཱ༹ཝིཧཱརཏྠཾ ཨུཡྻུཏྟཱ ཡནྟི ཨུཔགཙྪནྟི ཨེཏནྟི ཨུཡྻཱནཾ. ཨལནྟི པཊིཀྑེཔཝཙནཾ. ནཱམཱཏི གརཧཎེ ནིཔཱཏོ ‘‘ཀཐཉྷིནཱམཱ’’ཏིཨཱདཱིསུ (པཱརཱ. ༣༩, ༤༢, ༨༧, ༨༨, ༩༠, ༡༦༦, ༡༧༠; པཱཙི. ༡, ༡༣, ༣༦) ཝིཡ. ཛཱཏིཡཱ ཨཱདཱིནཝདསྶནཏྠཾ ཏཾམཱུལསྶ ཨུམྨཱུལནཾ ཝིཡ ཧོཏཱིཏི, ཏསྶ ཙ ཨཝསྶིཏབྷཱཝཏོ ‘‘ཛཱཏིཡཱ མཱུལཾ ¶ ཁཎནྟོ ནིསཱིདཱི’’ཏི ཨཱཧ. སིདྡྷེ ཧི ཀཱརཎེ ཕལཾ སིདྡྷམེཝ ཧོཏཱིཏི. པཱིལ༹ཾ ཛནེཏྭཱ ཨནྟོཏུདནཝསེན སབྦཔཋམཾ ཧདཡཾ ཨནུཔཝིསྶ ཋིཏཏྟཱ པཋམེན སལླེན ཧདཡེ ཝིདྡྷོ ཝིཡ ནིསཱིདཱིཏི ཡོཛནཱ.

བྱཱདྷིཔུརིསཝཎྞནཱ

༤༧. པུབྦེ ¶ ཝུཏྟནཡེནེཝཱཏི ‘‘སུདྡྷཱཝཱསཱ ཀིརཱ’’ཏིཨཱདིནཱ པུབྦེ ཝུཏྟེནེཝ ནཡེན. ཨཱབཱདྷིཀནྟི ཨཱབཱདྷཝནྟཾ. དུཀྑིཏནྟི སཉྫཱཏདུཀྑཾ. ཨཛཱཏནྟི ཨཛཱཏབྷཱཝོ, ནིབྦཱནཾ ཝཱ.

ཀཱལཀཏཔུརིསཝཎྞནཱ

༥༠. བྷནྟནེཏྟཀུཔྤལཱདི ཝིཝིདྷཾ ཀཏྭཱ ལཱཏབྦཏོ ཝིལཱཏོ, ཝཡ྄ཧཾ, སིཝིཀཱ ཙཱཏི ཨཱཧ ‘‘ཝིལཱཏནྟི སིཝིཀ’’ནྟི. སིཝིཀཱཡ དིཊྛཔུབྦཏྟཱ མཧཱསཏྟོ ཙིཏཀཔཉྫརཾ ‘‘སིཝིཀ’’ནྟི ཨཱཧ. ཨིཏོ པཊིགཏནྟི ཨིཏོ བྷཝཏོ ཨཔགཏཾ ¶ . ཀཏཀཱལནྟི པརིཡོསཱཔིཏཛཱིཝནཀཱལཾ. ཏེནཱཧ ‘‘ཡཏྟཀ’’ནྟིཨཱདི.

པབྦཛིཏཝཎྞནཱ

༥༣. དྷམྨཾ ཙརཏཱིཏི དྷམྨཙརཎོ, ཏསྶ བྷཱཝོ དྷམྨཙརཎབྷཱཝོཏི དྷམྨཙརིཡམེཝ ཝདཏི. ཨེཝཾ ཨེཀེཀསྶ པདསྶཱཏི ཡཐཱ ‘‘སཱདྷུདྷམྨཙརིཡཱཏི པབྦཛིཏོ’’ཏི ཡོཛནཱ, ཨེཝཾ ‘‘སཱདྷུསམཙརིཡཱཏི པབྦཛིཏོ’’ཏིཨཱདིནཱ ཨེཀེཀསྶ པདསྶ ཡོཛནཱ ཝེདིཏབྦཱ. སབྦཱནཱིཏི ‘‘སཱདྷུདྷམྨཙརིཡཱ’’ཏིཨཱདཱིསུ ཨཱགཏཱནི སབྦཱནི དྷམྨསམཀུསལཔུཉྙཔདཱནི. དསཀུསལཀམྨཔཐཝེཝཙནཱནཱིཏི དཱནཱདཱིནི དསཀུསལདྷམྨཔརིཡཱཡཔདཱནི.

བོདྷིསཏྟཔབྦཛྫཱཝཎྞནཱ

༥༤. པབྦཛིཏསྶ དྷམྨིཾ ཀཐཾ སུཏྭཱཏི སམྦནྡྷོ. ཨཉྙཉྩ སངྒཱིཏིཨནཱརུལ༹ྷཾ ཏེན ཏདཱ ཝུཏྟཾ དྷམྨིཾ ཀཐནྟི ཡོཛནཱ. ‘‘ཝཾསོཝཱ’’ཏི པདཏྟཡེན དྷམྨཏཱ ཨེསཱཏི དསྶེཏི. ཙིརསྶཾ ཙིརསྶཾ པསྶནྟི དཱིགྷཱཡུཀབྷཱཝཏོ. ཏཐཱ ཧི ཝུཏྟཾ ‘‘བཧཱུནཾ ཝསྶཱནཾ…པེ… ཨཙྩཡེནཱ’’ཏི. ཏེནེཝཱཏི ན ཙིརསྶཾ དིཊྛབྷཱཝེནེཝ. ཨཙིརཀཱལནྟརིཀམེཝ པུབྦཀཱལཀིརིཡཾ དསྶེནྟོ ‘‘ཛིཎྞཉྩ དིསྭཱ…པེ… པབྦཛིཏཉྩ དིསྭཱ, ཏསྨཱ ཨཧཾ པབྦཛིཏོམྷི རཱཛཱ’’ཏི ཨཱཧ ¶ ཡཐཱ ‘‘ནྷཏྭཱ ཝཏྠཾ པརིདཧིཏྭཱ གནྡྷཾ ཝིལིམྤིཏྭཱ མཱལཾ པིལ༹ནྡྷིཏྭཱ བྷུཏྟོ’’ཏི.

མཧཱཛནཀཱཡཨནུཔབྦཛྫཱཝཎྞནཱ

༥༥. ‘‘ཀསྨཱ ¶ པནེཏྠཱ’’ཏིཨཱདིནཱ ཏེསཾ ཙཏུརཱསཱིཏིཡཱ པཱཎསཧསྶཱནཾ མཧཱསཏྟེ སཾབྷཏྟཏཾ, སཾཝེགབཧུལཏཉྩ དསྶེཏི, ཡཏོ སུཏཊྛཱནེཡེཝ ཋཏྭཱ ཉཱཏིམིཏྟཱདཱིསུ ཀིཉྩི ཨནཱམནྟེཏྭཱ མཏྟཝརཝཱརཎོ ཝིཡ ཨཡོམཡབནྡྷནཾ གྷནབནྡྷནཾ ཚིནྡིཏྭཱ པབྦཛྫཾ ཨུཔགཙྪིཾསུ.

ཙཏྟཱརོ མཱསེ ཙཱརིཀཾ ཙརི ན ཏཱཝ ཉཱཎསྶ པརིཔཱཀཾ གཏཏྟཱ.

ཡདཱ པན ཉཱཎཾ པརིཔཱཀཾ གཏཾ, ཏཾ དསྶེནྟོ ‘‘ཨཡཾ པནཱ’’ཏིཨཱདིམཱཧ. སབྦེཝ ཨིམེ པབྦཛིཏཱ མམ གམནཾ ¶ ཛཱནིསྶནྟི, ཛཱནནྟཱ ཙ མཾ ཨནུབནྡྷིསྶནྟཱིཏི ཨདྷིཔྤཱཡོ. སནྣིསཱིཝེསཱུཏི སནྣིསིནྣེསུ. སཎཏེཝཱཏི སཎཏི ཝིཡ སདྡཾ ཀརོཏི ཝིཡ.

ཨཝིཝེཀཱརཱམཱནནྟི ཨནབྷིརཏིཝིཝེཀཱནཾ. ཨཡཾ ཀཱལོཏི ཨཡཾ ཏེསཾ པབྦཛིཏཱནཾ མམ གམནསྶ ཨཛཱནནཀཱལོ. ནིཀྑམིཏྭཱཏི པཎྞསཱལཱཡ ནིགྒནྟྭཱ, མཧཱབྷིནིཀྑམནཾ པན པགེཝ ནིཀྑནྟོ. པཱརམིཏཱནུབྷཱཝེན ཨུཊྛིཏཾ ཨུཔརི དེཝཏཱཧི དིབྦཔཙྩཏྠརཎེཧི སུཔཉྙཏྟམྤི མཧཱསཏྟསྶ པུཉྙཱནུབྷཱཝེན སིདྡྷཏྟཱ ཏེན པཉྙཏྟཾ ཝིཡ ཧོཏཱིཏི ཝུཏྟཾ ‘‘པལླངྐཾ པཉྙཔེཏྭཱ’’ཏི. ‘‘ཀཱམཾ ཏཙོ ཙ ནྷཱརུ ཙ, ཨཊྛི ཙ ཨཝསིསྶཏཱུ’’ཏིཨཱདི (མ. ནི. ༢.༡༨༤; སཾ. ནི. ༢.༢༢, ༢༣༧; ཨ. ནི. ༢.༥; ༨.༡༣; མཧཱནི. ༡༧, ༡༩༦) ནཡཔྤཝཏྟཾ ཙཏུརངྒཝཱིརིཡཾ ཨདྷིཊྛཧིཏྭཱ. ཝཱུཔཀཱསནྟི ཝིཝེཀཝཱསཾ.

ཨཉྙེནེཝཱཏི ཡཏྠ མཧཱཔུརིསོ ཏདཱ ཝིཧརཏི, ཏཏོ ཨཉྙེནེཝ དིསཱབྷཱགེན. ཀཱམཾ བོདྷིམཎྜོ ཛམྦུདཱིཔསྶ མཛ྄ཛྷེ ནཱབྷིཊྛཱནིཡོ, ཏདཱ པན བྲཧཱརཉྙེ ཝིཝིཏྟེ ཡོགཱིནཾ པཊིསལླཱནསཱརུཔྤོ ཧུཏྭཱ ཏིཊྛཏི, ཏདཉྙོ པན ཛམྦུདཱིཔཔྤདེསོ ཡེབྷུཡྻེན བཧུཛནོ ཨཱཀིཎྞམནུསྶོ ཨིདྡྷོ ཕཱིཏོ ཨཧོསི. ཏེན ཏེ ཏཾ ཏཾ ཛནཔདདེསཾ ཨུདྡིསྶ གཏཱ ‘‘ཨནྟོ ཛམྦུདཱིཔཱབྷིམུཁཱ ཙཱརིཀཾ པཀྐནྟཱ’’ཏི ཝུཏྟཱ ཨནྟོ ཛམྦུདཱིཔཱབྷིམུཁཱ, ན ཧིམཝནྟཱདིཔབྦཏཱབྷིམུཁཱཏི ཨཏྠོ.

བོདྷིསཏྟཨབྷིནིཝེསཝཎྞནཱ

༥༧. ཀཱམཾ ¶ བྷགཝཱ བུདྡྷོ ཧུཏྭཱ སཏྟསཏྟཱཧཱནི ཏཏྠེཝ ཝསི, སབྦཔཋམཾ པན ཝིསཱཁཔུཎྞམཾ ¶ སནྡྷཱཡ ‘‘ཨེཀརཏྟིཝཱསཾ ཨུཔགཏསྶཱ’’ཏི ཝུཏྟཾ. རཧོགཏསྶཱཏི རཧོ ཛནཝིཝིཏྟཾ ཋཱནཾ ཨུཔགཏསྶ, ཏེན གཎསངྒཎིཀཱབྷཱཝེན མཧཱསཏྟསྶ ཀཱཡཝིཝེཀམཱཧ. པཊིསལླཱིནསྶཱཏི ¶ ནཱནཱརམྨཎཙཱརཏོ ཙིཏྟསྶ ནིཝཏྟིཡཱ པཏི སམྨདེཝ ནིལཱིནསྶ ཏཏྠ ཨཝིསཊཙིཏྟསྶ, ཏེན ཙིཏྟསངྒཎིཀཱབྷཱཝེནསྶ པུབྦབྷཱགིཡཾ ཙིཏྟཝིཝེཀམཱཧ. དུཀྑནྟི ཛཱཏིཨཱདིམཱུལཀཾ དུཀྑཾ. ཀཱམཾ ཙུཏཱུཔཔཱཏཱཔི ཛཱཏིམརཎཱནི ཨེཝ, མརཎཛཱཏིཡོཝ ‘‘ཛཱཡཏི མཱིཡཏཱི’’ཏི པན ཝཏྭཱ ‘‘ཙཝཏི ཨུཔཔཛྫཏཱི’’ཏི ཝཙནཾ ན ཨེཀབྷཝཔརིཡཱཔནྣཱནཾ ནེསཾ གཧཎཾ, ཨཐ ཁོ ནཱནཱབྷཝཔརིཡཱཔནྣཱནཾ ཨེཀཛ྄ཛྷཾ གཧཎནྟི དསྶེནྟོ ཨཱཧ ‘‘ཨིདཾ དྭཡཾ…པེ… ཝུཏྟ’’ནྟི. ཀསྨཱ པན ལོཀསྶ ཀིཙྪཱཔཏྟིཔརིཝིཏཀྐནེ ‘‘ཛརཱམརཎསྶཱ’’ཏི ཛརཱམརཎཝསེན ནིཡམནཾ ཀཏནྟི ཨཱཧ ‘‘ཡསྨཱ’’ཏིཨཱདི. ཛརཱམརཎམེཝ ཨུཔཊྛཱཏི ཨཱདིཏོཏི ཨདྷིཔྤཱཡོ. ཨབྷིནིཝིཊྛསྶཱཏི ཨཱརདྡྷསྶ. པཊིཙྩསམུཔྤཱདམུཁེན ཝིཔསྶནཱརམྦྷེ ཏསྶ ཛརཱམརཎཏོ པཊྛཱཡ ཨབྷིནིཝེསོ ཨགྒཏོ ཡཱཝ མཱུལཾ ཨོཏརཎཾ ཝིཡཱཏི ཨཱཧ ‘‘བྷཝགྒཏོ ཨོཏརནྟསྶ ཝིཡཱ’’ཏི.

ཨུཔཱཡམནསིཀཱརཱཏི ཨུཔཱཡེན མནསིཀརཎཏོ མནསིཀཱརསྶ པཝཏྟནཏོ. ཨིདཱནི ཏཾ ཨུཔཱཡམནསིཀཱརཔརིཡཱཡཾ ཡོནིསོམནསིཀཱརཾ སརཱུཔཏོ, པཝཏྟིཨཱཀཱརཏོ ཙ དསྶེཏུཾ ‘‘ཨནིཙྩཱདཱིནི ཧཱི’’ཏིཨཱདི ཝུཏྟཾ. ཡོནིསོམནསིཀཱརོ ནཱམ ཧོཏཱིཏི ཡཱཐཱཝཏོ མནསིཀཱརབྷཱཝཏོ. ཨནིཙྩཱདཱིནཱིཏི ཨཱདི-སདྡེན དུཀྑཱནཏྟཨསུབྷཱདཱིནཾ གཧཎཾ. ཨཡནྟི ‘‘ཨེཏདཧོསཱི’’ཏི ཨེཝཾ ཝུཏྟོ ‘‘ཀིམྷི ནུ ཁོ སཏཱི’’ཏིཨཱདིནཡཔྤཝཏྟོ མནསིཀཱརོ. ཏེསཾ ཨཉྙཏརོཏི ཏེསུ ཨནིཙྩཱདིམནསིཀཱརེསུ ཨཉྙཏརོ ཨེཀོ. ཀོ པན སོཏི? ཨནིཙྩམནསིཀཱརོཝ, ཏཏྠ ཀཱརཎམཱཧ ‘‘ཨུདཡབྦཡཱནུཔསྶནཱཝསེན པཝཏྟཏྟཱ’’ཏི. ཡཉྷི ཨུཔྤཛྫཏི ཙེཝ ཙཝཏི ཙ, ཏཾ ཨནིཙྩཾ ཨུདཡཝཡཔརིཙྪིནྣཏྟཱ ཨདྡྷུཝནྟི ཀཏྭཱ. ཏསྶ པན ཏབྦྷཱཝདསྶནཾ ཡཱཐཱཝམནསིཀཱརཏཱཡ ཡོནིསོམནསིཀཱརོ ¶ . ཨིཏོ ཡོནིསོམནསིཀཱརཱཏི ཧེཏུམྷི ནིསྶཀྐཝཙནནྟི ཏསྶ ཨིམིནཱ ‘‘ཨུཔཱཡམནསིཀཱརེནཱ’’ཏི ཧེཏུམྷི ཀརཎཝཙནེན ཨཏྠམཱཧ. སམཱགམོ ཨཧོསཱིཏི ¶ ཡཱཐཱཝཏོ པཊིཝིཛ྄ཛྷནཝསེན སངྒམོ ཨཧོསི. ཀིཾ པན ཏནྟི ཀིཾ པན ཏཾ ཛརཱམརཎཀཱརཎནྟི ཨཱཧ ‘‘ཛཱཏཱི’’ཏི. ‘‘ཛཱཏིཡཱ ཁོ’’ཏིཨཱདཱིསུ ཨཡཾ སངྑེཔཏྠོ – ཀིམྷི ནུ ཁོ སཏི ཛརཱམརཎཾ ཧོཏི, ཀིཾ པཙྩཡཱ ཛརཱམརཎ’’ནྟི ཛརཱམརཎཀཱརཎཾ པརིགྒཎྷནྟསྶ བོདྷིསཏྟསྶ ‘‘ཡསྨིཾ སཏི ཡཾ ཧོཏི, ཨསཏི ཙ ན ཧོཏི, ཏཾ ཏསྶ ཀཱརཎ’’ནྟི ཨེཝཾ ཨབྱབྷིཙཱརིཀཱརཎཔརིགྒཎྷནེ ‘‘ཛཱཏིཡཱ ཁོ སཏི ཛརཱམརཎཾ ཧོཏི, ཛཱཏིཔཙྩཡཱ ཛརཱམརཎ’’ནྟི ཡཱ ཛརཱམརཎསྶ ཀཱརཎཔརིགྒཱཧིཀཱ པཉྙཱ ཨུཔྤཛྫཏི, ཏཱཡ ཨུཔྤཛྫནྟིཡཱ སམཱགམོ ཨཧོསཱིཏི. སབྦཔདཱནཱིཏི ‘‘ཀིམྷི ནུ ཁོ སཏི ཛཱཏི ཧོཏཱི’’ཏིཨཱདིནཱ ཨཱགཏཱནི ཛཱཏིཨཱདཱིནི ཝིཉྙཱཎཔརིཡོསཱནཱནི ནཝ པདཱནི.

དྭཱདསཔདིཀེ ¶ པཊིཙྩསམུཔྤཱདེ ཨིདྷ ཡཱནི དྭེ པདཱནི ཨགྒཧིཏཱནི, ཏེསཾ ཨགྒཧཎེ ཀཱརཎཾ པུཙྪིཏྭཱ ཝིསྶཛྫེཏུཀཱམོ ཏེསཾ གཧེཏབྦཱཀཱརཾ ཏཱཝ དསྶེནྟོ ‘‘ཨེཏྠ པནཱ’’ཏིཨཱདིམཱཧ. པཙྩཀྑབྷཱུཏཾ པཙྩུཔྤནྣབྷཝཾ པཋམཾ གཧེཏྭཱ ཏདནནྟརཾ ཨནཱགཏཾ ‘‘དུཏིཡ’’ནྟི གཧཎེ ཨཏཱིཏོ ཏཏིཡོ ཧོཏཱིཏི ཨཱཧ ‘‘ཨཝིཛྫཱ སངྑཱརཱ ཧི ཨཏཱིཏོ བྷཝོ’’ཏི. ནནུ ཙེཏྠ ཨནཱགཏསྶཱཔི བྷཝསྶ གཧཎཾ ན སམྦྷཝཏི པཙྩུཔྤནྣཝསེན ཨབྷིནིཝེསསྶ ཛོཏིཏཏྟཱཏི? སཙྩམེཏཾ, ཀཱརཎེ པན གཧིཏེ ཕལཾ གཧིཏམེཝ ཧོཏཱིཏི ཏཐཱ ཝུཏྟནྟི དཊྛབྦཾ. ཨཔི ཙེཏྠ ཨནཱགཏོཔི ཨདྡྷཱ ཨཏྠཏོ སངྒཧིཏོ ཨེཝ, ཡཏོ པརཏོ ‘‘ནཱམརཱུཔཔཙྩཡཱ སལཱ༹ཡཏན’’ནྟིཨཱདིནཱ ཨནཱགཏདྡྷསངྒཧིཀཱ དེསནཱ པཝཏྟཱ. ཏེཧཱིཏི ཨཝིཛྫཱསངྑཱརེཧི ཨཱརམྨཎབྷཱུཏེཧི. ན གྷཊིཡཏི ན སམྦཛ྄ཛྷཏི. མཧཱཔུརིསོ ཧི པཙྩུཔྤནྣཝསེན ཨབྷིནིཝིཊྛོཏི ཨགྷཊནེ ཀཱརཎམཱཧ. ཨདིཊྛེཧཱིཏི ཨནཝབུདྡྷེཧི, ཨིཏྠམྦྷཱུཏལཀྑཎེ ཙེཏཾ ཀརཎཝཙནཾ. སཏི ཨནུབོདྷེ པཊིཝེདྷེན བྷཝིཏབྦནྟི ཨཱཧ ‘‘ན ¶ སཀྐཱ བུདྡྷེན བྷཝིཏུ’’ནྟི. ཨིམིནཱཏི མཧཱསཏྟེན. ཏེཏི ཨཝིཛྫཱསངྑཱརཱ. བྷཝཨུཔཱདཱནཏཎྷཱཝསེནེཝཱཏི བྷཝཨུཔཱདཱནཏཎྷཱདསྶནཝསེནེཝ. དིཊྛཱ ཏཾསབྷཱཝཏཾསཧགཏེཧི ཏེཧི སམཱནཡོགཀྑམཏྟཱ. ཝིསུདྡྷིམགྒེ (ཝིསུདྡྷི. ༢.༥༧༠) ཀཐིཏཱཝ, ཏསྨཱ ན ཨིདྷ ཀཐེཏབྦཱཏི ཨདྷིཔྤཱཡོ.

༥༨. པཙྩཡཏོཏི ཧེཏུཏོ, སངྑཱརཏོཏི ཨཏྠོ. ‘‘ཀིམྷི ནུ ཁོ སཏི ཛརཱམརཎཾ ཧོཏཱི’’ཏིཨཱདིནཱ ཧི ཧེཏུཔརམྤརཱཝསེན ཕལཔརམྤརཱཡ ཝུཙྩམཱནཱཡ ¶ ‘‘ཀིམྷི ནུ ཁོ སཏི ཝིཉྙཱཎཾ ཧོཏཱི’’ཏི ཝིཙཱརཎཱཡ ‘‘སངྑཱརེ ཁོ སཏི ཝིཉྙཱཎཾ ཧོཏཱི’’ཏི ཝིཉྙཱཎསྶ ཝིསེསཀཱརཎབྷཱུཏེ སངྑཱརེ ཨགྒཧིཏེ ཏཏོ ཝིཉྙཱཎཾ པཊིནིཝཏྟཏི ནཱམ, ན སབྦཔཙྩཡཏོ. ཏེནེཝཱཧ ‘‘ནཱམརཱུཔེ ཁོ སཏི ཝིཉྙཱཎཾ ཧོཏཱི’’ཏི (དཱི. ནི. ༢.༥༨), ནཱམམྤི ཙེཏྠ སཧཛཱཏཱདིཝསེནེཝ པཙྩཡབྷཱུཏཾ ཨདྷིཔྤེཏཾ, ན ཀམྨཱུཔནིསྶཡཝསེན པཙྩུཔྤནྣཝསེན ཨབྷིནིཝིསསྶ ཛོཏིཏཏྟཱ. ཨཱརམྨཎཏོཏི ཨཝིཛྫཱསངྑཱརསངྑཱཏཨཱརམྨཎཏོ, ཨཏཱིཏབྷཝསངྑཱཏཨཱརམྨཎཏོ ཝཱ. ཨཏཱིཏདྡྷཔརིཡཱཔནྣཱ ཧི ཨཝིཛྫཱསངྑཱརཱ. ཡཏོ པཊིནིཝཏྟམཱནཾ ཝིཉྙཱཎཾ ཨཏཱིཏབྷཝཏོཔི པཊིནིཝཏྟཏི ནཱམ. ཨུབྷཡམྤཱིཏི པཊིསནྡྷིཝིཉྙཱཎམྤི ཝིཔསྶནཱཝིཉྙཱཎམྤི. ནཱམརཱུཔཾ ནཱཏིཀྐམཏཱིཏི པཙྩཡབྷཱུཏཾ, ཨཱརམྨཎབྷཱུཏཉྩ ནཱམརཱུཔཾ ནཱཏིཀྐམཏི ཏེན ཝིནཱ ཨཝཏྟནཏོ. ཏེནཱཧ ‘‘ནཱམརཱུཔཏོ པརཾ ན གཙྪཏཱི’’ཏི.

ཝིཉྙཱཎེ ནཱམརཱུཔསྶ པཙྩཡེ ཧོནྟེཏི ཝིཉྙཱཎེ ནཱམསྶ, རཱུཔསྶ, ནཱམརཱུཔསྶ ཙ པཙྩཡེ ཧོནྟེ. ནཱམརཱུཔེ ཙ ཝིཉྙཱཎསྶ པཙྩཡེ ཧོནྟེཏི ཏཐཱ ནཱམེ, རཱུཔེ, ནཱམརཱུཔེ ཙ ཝིཉྙཱཎསྶ ¶ པཙྩཡེ ཧོནྟེཏི ཙཏུཝོཀཱརཨེཀཝོཀཱརཔཉྩཝོཀཱརབྷཝཝསེན ཡཐཱརཧཾ ཡོཛནཱ ཝེདིཏབྦཱ, དྭཱིསུཔི ཨཉྙམཉྙཔཙྩཡེསུ ཧོནྟེསཱུཏི པན པཉྩཝོཀཱརབྷཝཝསེནེཝ. ཨེཏྟཀེནཱཏི ཨེཝཾ ཝིཉྙཱཎ ནཱམརཱུཔཱནཾ ¶ ཨཉྙམཉྙཾ ཨུཔཏྠམྦྷནཝསེན པཝཏྟིཡཱ. ཛཱཡེཐ ཝཱ…པེ… ཨུཔཔཛྫེཐ ཝཱཏི ‘‘སཏྟོ ཛཱཡཏི…པེ… ཨུཔཔཛྫཏི ཝཱ’’ཏི སམཉྙཱ ཧོཏི ཝིཉྙཱཎནཱམརཱུཔཝིནིམུཏྟསྶ སཏྟཔཉྙཏྟིཡཱ ཨུཔཱདཱནབྷཱུཏསྶ དྷམྨསྶ ཨབྷཱཝཏོ. ཏེནཱཧ ‘‘ཨིཏོ ཧཱི’’ཏིཨཱདི. ཨེཏདེཝཱཏི ཝིཉྙཱཎཾ, ནཱམརཱུཔནྟི ཨེཏཾ དྭཡམེཝ.

པཉྩ པདཱནཱིཏི ‘‘ཛཱཡེཐ ཝཱ’’ཏིཨཱདཱིནི པཉྩ པདཱནི. ནནུ ཏཏྠ པཋམཏཏིཡེཧི ཙཏུཏྠཔཉྩམཱནི ཨཏྠཏོ ཨབྷིནྣཱནཱིཏི ཨཱཧ ‘‘སདྡྷིཾ ཨཔརཱཔརཾ ཙུཏིཔཊིསནྡྷཱིཧཱི’’ཏི. པུན ཏཾ ཨེཏྟཱཝཏཱཏི ཝུཏྟམཏྠནྟི ཡོ ‘‘ཨེཏྟཱཝཏཱ’’ཏི པདེན པུབྦེ ཝུཏྟོ, ཏམེཝ ཡཐཱཝུཏྟམཏྠཾ ‘‘ཡདིད’’ནྟིཨཱདིནཱ ནིཡྻཱཏེནྟོ ནིདསྶེནྟོ པུན ཝཏྭཱ. ཨནུལོམཔཙྩཡཱཀཱརཝསེནཱཏི པཙྩཡདྷམྨདསྶནཔུབྦཀཾ པཙྩཡུཔྤནྣདྷམྨདསྶནཝསེན. པཙྩཡདྷམྨཱནཉྷི ཨཏྟནོ པཙྩཡུཔྤནྣསྶ ¶ པཙྩཡབྷཱཝོ ཨིདཔྤཙྩཡཏཱ པཙྩཡཱཀཱརོ, སོ ཙ ‘‘ཨཝིཛྫཱཔཙྩཡཱ སངྑཱརཱ’’ཏིཨཱདིནཱ ཝུཏྟོ. སཾསཱརཔྤཝཏྟིཡཱ ཨནུལོམནཏོ ཨནུལོམཔཙྩཡཱཀཱརོ. ཛཱཏིཨཱདིཀཾ སབྦཾ ཝཊྚདུཀྑཾ ཙིཏྟེན སམིཧིཏེན ཀཏཾ སམཱུཧཝསེན གཧེཏྭཱ པཱལི༹ཡཾ ‘‘དུཀྑཀྑནྡྷསྶཱ’’ཏི ཝུཏྟནྟི ཨཱཧ ‘‘ཛཱཏི…པེ… དུཀྑརཱསིསྶཱ’’ཏི.

༥༩. དུཀྑཀྑནྡྷསྶ ཨནེཀཝཱརཾ སམུདཡདསྶནཝསེན ཝིཉྙཱཎསྶ པཝཏྟཏྟཱ ‘‘སམུདཡོ སམུདཡོ’’ཏི ཨཱམེཌིཏཝཙནཾ ཨཝོཙ. ཨཐ ཝཱ ‘‘ཨེཝཾ སམུདཡོ ཧོཏཱི’’ཏི ཨིདཾ ན ཀེཝལཾ ནིབྦཏྟིནིདསྶནཔདཾ, ཨཐ ཁོ པཊིཙྩསམུཔྤཱད-སདྡོ ཝིཡ སམུཔྤཱདམུཁེན ཨིདྷ སམུདཡ-སདྡོ ནིབྦཏྟིམུཁེན པཙྩཡཏྟཾ ཝདཏི. ཝིཉྙཱཎཱདཡོ བྷཝནྟཱ ཨིདྷ པཙྩཡདྷམྨཱ ནིདྡིཊྛཱ, ཏེ སཱམཉྙརཱུཔེན བྱཱཔནིཙྪཱཝསེན གཎྷནྟོ ‘‘སམུདཡོ སམུདཡོ’’ཏི ཨཱཧ, ཨེཝཉྩ ཀཏྭཱ ཡཾ ཝཀྑཏི ‘‘ཨིམསྨིཾ སཏི ¶ ཨིདཾ ཧོཏཱིཏི པཙྩཡསཉྫཱནནམཏྟཾ ཀཐིཏ’’ནྟི, (དཱི. ནི. ཨཊྛ. ༢.༥༩) ཏཾ སམཏྠིཏཾ ཧོཏི. ཡདི ཨེཝཾ ‘‘ཨུདཡདསྶནཔཉྙཱ ཝེསཱ’’ཏི ཨིདཾ ཀཐནྟི? ནཱཡཾ དོསོ པཙྩཡཏོ ཨུདཡདསྶནམུཁེན ནིབྦཏྟིལཀྑཎདསྶནསྶ སམྦྷཝཏོ. དསྶནཊྛེན ཙཀྑཱུཏི སམུདཡསྶ པཙྩཀྑཏོ དསྶནབྷཱཝེན ཙཀྑུ ཝིཡཱཏི ཙཀྑུ. ཉཱཏཀརཎཊྛེནཱཏི ཡཐཱ སམུདཡོ སམྨདེཝ ཉཱཏོ ཧོཏི ཨཝབུདྡྷོ, ཨེཝཾ ཀརཎཊྛེན. པཛཱནནཊྛེནཱཏི ‘‘ཝིཉྙཱཎཱདིཏཾཏཾཔཙྩཡུཔྤཏྟིཡཱ ཨེཏསྶ དུཀྑཀྑནྡྷསྶ སམུདཡོ ཧོཏཱི’’ཏི པཀཱརཏོ ཛཱནནཊྛེན. ནིབྦིཛ྄ཛྷིཏྭཱ པཊིཝིཛ྄ཛྷིཏྭཱ ཨུཔྤནྣཊྛེནཱཏི ཨནིབྦིཛ྄ཛྷིཏྭཱ པུབྦེ ཨུདཡདསྶནཔཉྙཱཡ པཊིཔཀྑདྷམྨེ ནིབྦིཛ྄ཛྷིཏྭཱ ‘‘ཨཡཾ སམུདཡོ’’ཏི པཙྩཡཏོ, ཁཎཏོ ཙ, སརཱུཔཏོ པཊིཝིཛ྄ཛྷིཏྭཱ ¶ ཨུཔྤནྣབྷཱཝེན, ནིབྦིཛ྄ཛྷནཊྛེན པཊིཝིཛ྄ཛྷནཊྛེན ཝིཛྫཱཏི ཝུཏྟཾ ཧོཏི. ཨོབྷཱསཊྛེནཱཏི སམུདཡསབྷཱཝཔཊིཙྪཱདནཀསྶ མོཧནྡྷཀཱརསྶ ཙ ཀིལེསནྡྷཀཱརསྶ ཙ ཝིདྷམནཝསེན ཨཝབྷཱསཀབྷཱཝེན.

ཨིདཱནི ཡཐཱཝུཏྟམཏྠཾ པཊིཔཱཊིཡཱ ཝིབྷཱཝེཏུཾ ‘‘ཡཐཱཧཱ’’ཏིཨཱདི ཝུཏྟཾ. ཏཏྠ ཙཀྑུཾ ཨུདཔཱདཱིཏི པཱལི༹ཡཾ པདུདྡྷཱརོ. ཀཐཾ ཨུདཔཱདཱིཏི ཙེཏི ཨཱཧ ‘‘དསྶནཊྛེནཱ’’ཏི. ‘‘སམུདཡསྶ པཙྩཀྑཏོ དསྶནབྷཱཝེནཱཏི ཝུཏྟོ ཝཱཡམཏྠོ. ཨིམིནཱ ནཡེན སེསཔདེསུཔི ཨཏྠོ ཝེདིཏབྦོ. ཙཀྑུདྷམྨོཏི ཙཀྑཱུཏི པཱལི༹དྷམྨོ. དསྶནཊྛོ ཨཏྠོཏི དསྶནསབྷཱཝོ ཏེན ¶ པཀཱསེཏབྦོ ཨཏྠོ. སེསེསུཔི ཨེསེཝ ནཡོ. ཨེཏྟཀེཧི པདེཧཱིཏི ཨིམེཧི པཉྩཧི པདེཧི. ‘‘ཀིཾ ཀཐིཏ’’ནྟི པིཎྜཏྠཾ པུཙྪཏི. པཙྩཡསཉྫཱནནམཏྟནྟི ཝིཉྙཱཎཱདཱིནཾ པཙྩཡདྷམྨཱནཾ ནཱམརཱུཔཱདིཔཙྩཡུཔྤནྣསྶ པཙྩཡསབྷཱཝསཉྫཱནནམཏྟཾ ཀཐིཏཾ ཨཝིསེསཏོ པཙྩཡསབྷཱཝསལླཀྑཎསྶ ཛོཏིཏཏྟཱ. སངྑཱརཱནཾ སམྨདེཝ ¶ ཨུདཡདསྶནསྶ ཛོཏིཏཏྟཱ ‘‘ཝཱིཐིཔཊིཔནྣཱ ཏརུཎཝིཔསྶནཱ ཀཐིཏཱ’’ཏི ཙ ཝུཏྟཾ.

༦༡. ཨཏྟནཱ ཨདྷིགཏཏྟཱ ཨཱསནྣཔཙྩཀྑཏཱཡ ‘‘ཨཡ’’ནྟི ཝུཏྟཾ, ཨརིཡམགྒཱདཱིནཾ མགྒནཊྛེན མགྒོཏི. པུབྦབྷཱགཝིཔསྶནཱ ཧེསཱ. ཏེནཱཧ ‘‘བོདྷཱཡཱ’’ཏི. བོདྷཔདསྶ བྷཱཝསཱདྷནཏཾ སནྡྷཱཡཱཧ ‘‘ཙཏུསཙྩབུཛ྄ཛྷནཏྠཱཡཱ’’ཏི. པརིཉྙཱཔཧཱནབྷཱཝནཱབྷིསམཡཱ ཡཱཝདེཝ སཙྪིཀིརིཡཱབྷིསམཡཏྠཱ ནིབྦཱནཱདྷིགམཏྠཏྟཱ བྲཧྨཙརིཡཝཱསསྶཱཏི ཝུཏྟཾ ‘‘ནིབྦཱནབུཛ྄ཛྷནཏྠཱཡ ཨེཝ ཝཱ’’ཏི. ‘‘ནིབྦཱནཾ པརམཾ སུཁ’’ནྟི (མ. ནི. ༢.༢༡༥, ༢༡༧; དྷ. པ. ༢༠༤) ཧི ཝུཏྟཾ. བུཛ྄ཛྷཏཱིཏི ཙཏྟཱརི ཨརིཡསཙྩཱནི ཨེཀཔཊིཝེདྷེན པཊིཝིཛ྄ཛྷཏི, ཏེན བོདྷ-སདྡསྶ ཀཏྟུསཱདྷནཏྟམཱཧ. པཙྩཏྟཔདེཧཱིཏི པཋམཱཝིབྷཏྟིདཱིཔཀེཧི པདེཧི. ནིབྦཱནམེཝ ཀཐིཏཾ ཝིཉྙཱཎཱདི ནིརུཛ྄ཛྷཏི ཨེཏྠཱཏི ཀཏྭཱ. ཨནིབྦཏྟིནིརོདྷནྟི སབྦསོ པཙྩཡནིརོདྷེན ཨནུཔྤཱདནིརོདྷཾ ཨཙྩནྟནིརོདྷཾ.

༦༢. སབྦེཧེཝ ཨེཏེཧི པདེཧཱིཏི ‘‘ཙཀྑཱུ’’ཏིཨཱདཱིཧི པཉྩཧི པདེཧི. ནིརོདྷསཉྫཱནནམཏྟམེཝཱཏི ‘‘ནིརོདྷོ ནིརོདྷོཏི ཁོ’’ཏིཨཱདིནཱ ནིརོདྷསྶ སཉྫཱནནམཏྟམེཝ ཀཐིཏཾ པུབྦཱརམྦྷབྷཱཝཏོ, ན ཏསྶ པཊིཝིཛ྄ཛྷནཝསེན པཙྩཀྑཏོ དསྶནཾ ཨརིཡམགྒསྶ ཨནདྷིགཏཏྟཱ. སངྑཱརཱནཾ སམྨདེཝ ནིརོདྷདསྶནཾ ནཱམ སིཁཱཔྤཏྟཱཡ ཝིཔསྶནཱཡ ཝསེན ཨིཙྪིཏབྦནྟི ‘‘ཝུཊྛཱནགཱམིནཱི བལཝཝིཔསྶནཱ ཀཐིཏཱ’’ཏི ཙ ཝུཏྟཾ.

༦༣. ཝིདིཏྭཱཏི ¶ པུབྦབྷཱགིཡེན ཉཱཎེན ཛཱནིཏྭཱ. ཏཏོ ཨཔརབྷཱགེཏི ཝུཏྟནཡེན པཙྩཡནིརོདྷཛཱནནཏོ པཙྪཱབྷཱགེ. ཨུཔཱདཱནསྶ པཙྩཡབྷཱུཏེསཱུཏི ཙཏུབྦིདྷསྶཔི ཨུཔཱདཱནསྶ ཨཱརམྨཎཔཙྩཡཱདིནཱ པཙྩཡབྷཱུཏེསུ, ཨུཔཱདཱནིཡེསཱུཏི ཨཏྠོ ¶ . ཝཧནྟོཏི པཝཏྟེནྟོ. ཨིདནྟི ‘‘ཨཔརེན སམཡེནཱ’’ཏིཨཱདི ཝཙནཾ. ཀསྨཱ ཝུཏྟནྟི ‘‘ཡཱཡ པཊིཔཏྟིཡཱ སབྦེཔི མཧཱབོདྷིསཏྟཱ ཙརིམབྷཝེ བོདྷཱཡ པཊིཔཛྫནྟི, ཝིཔསྶནཱཡ མཧཱབོདྷིསཏྟེན ཏཐེཝ པཊིཔནྣ’’ནྟི ཀཐེཏུཀམྱཏཱཝསེན པུཙྪཱཝཙནཾ. ཏེནཱཧ ¶ ‘‘སབྦེཡེཝ ཧཱི’’ཏིཨཱདི. ཏཏྠ པུཏྟསྶ ཛཱཏདིཝསེ མཧཱབྷིནིཀྑམནཾ, པདྷཱནཱནུཡོགོ ཙ དྷམྨཏཱཝསེན ཝེདིཏབྦོ, ཨིཏརཾ ཨིཏིཀཏྟབྦཏཱཝསེན. ཏཏྠཱཔི ཙིརཀཱལཔརིབྷཱཝནཱཡ ལདྡྷཱསེཝནཱཡ མཧཱཀརུཎཱཡ སཉྩོདིཏམཱནསཏྟཱ ‘‘ཀིཙྪཾ ཝཏཱཡཾ ལོཀོ ཨཱཔནྣོ’’ཏིཨཱདིནཱ (དཱི. ནི. ༢.༥༧; སཾ. ནི. ༢.༤, ༡༠) སཾསཱརདུཀྑཏོ མོཙེཏུཾ ཨིཙྪིཏསྶ སཏྟལོཀསྶ ཀིཙྪཱཔཏྟིདསྶནམུཁེན ཛརཱམརཎཏོ པཊྛཱཡ པཙྩཡཱཀཱརསམྨསནམྤི དྷམྨཏཱཝ. ཏཐཱ ཨཏྟཱདྷཱིནཏཱཡ, ཀེནཙི ཨནུཔཁཏཏྟཱ, ཨསེཙནཀསུཁཝིཧཱརཏཱཡ, ཙཏུཏྠཛ྄ཛྷཱནིཀཏཱཡ ཙ ཨཱནཱཔཱནཀམྨཊྛཱནཱནུཡོགོ. པཉྩསུ ཁནྡྷེསུ ཨབྷིནིཝིསིཏྭཱཏི ཝིཉྙཱཎནཱམརཱུཔཱདིཔརིཡཱཡེན གཧིཏེསུ པཉྩསུ ཨུཔཱདཱནཀྑནྡྷེསུ ཝིཔསྶནཱབྷིནིཝེསཝསེན ཨབྷིནིཝིསིཏྭཱ པཊིཔཏྟིཾ ཨཱརབྷིཏྭཱ. ཨནུཀྐམནྟི ཨནུ ཨནུ གཱམིཏབྦཏོ པཊིཔཛྫིཏབྦཏོ ‘‘ཨནུཀྐམ’’ནྟི ལདྡྷནཱམཾ ཨནུཔུབྦཔཊིཔཏྟིཾ. ཀཏྭཱཏི པཊིཔཛྫིཏྭཱ.

ཨིཏི རཱུཔནྟི ཨེཏྠ དུཏིཡོ ཨིཏི-སདྡོ ནིདསྶནཏྠོ, ཏེན པཋམོ ཨིཏི-སདྡོ སརཱུཔསྶ, པརིམཱཎསྶ ཙ བོདྷཀོ ཨནེཀཏྠཏྟཱ ནིཔཱཏཱནཾ,ཨཱཝུཏྟིཨཱདིཝསེན ཝཱཡམཏྠོ ཝེདིཏབྦོ. ཨནྟོགདྷཱཝདྷཱརཎཉྩ ཝཱཀྱཾ དསྶེནྟོ ‘‘ཨིདཾ རཱུཔཾ, ཨེཏྟཀཾ རཱུཔཾ, ཨིཏོ ཨུདྡྷཾ རཱུཔཾ ནཏྠཱི’’ཏིཨཱདིམཱཧ ¶ . ཏཏྠ ‘‘རུཔྤནསབྷཱཝ’’ནྟི ཨིམིནཱ སཱམཉྙཏོ རཱུཔསྶ སབྷཱཝོ དསྶིཏོ, ‘‘བྷཱུཏུཔཱདཱཡབྷེད’’ནྟིཨཱདིནཱ ཝིསེསཏོ, ཏདུབྷཡེནཔི ‘‘ཨིདཾ རཱུཔ’’ནྟི པདསྶ ཨཏྠོ ནིདྡིཊྛོ. ཏཏྠ ལཀྑཎཾ ནཱམ ཏསྶ ཏསྶ རཱུཔཝིསེསསྶ ཨནཉྙསཱདྷཱརཎོ སབྷཱཝོ. རསོ ཏསྶེཝ ཨཏྟནོ ཕལཾ པཏི པཙྩཡབྷཱཝོ. པཙྩུཔཊྛཱནཾ ཏསྶ པརམཏྠཏོ ཝིཛྫམཱནཏྟཱ ཡཱཐཱཝཏོ ཉཱཎསྶ གོཙརབྷཱཝོ. པདཊྛཱནཾ ཨཱསནྣཀཱརཎཾ, ཏེནསྶ པཙྩཡཱཡཏྟཝུཏྟིཏཱ དསྶིཏཱ. ‘‘ཨནཝསེསརཱུཔཔརིགྒཧོ’’ཏི ཨིམིནཱ པན ‘‘ཨེཏྟཀཾ རཱུཔཾ, ཨིཏོ ཨུདྡྷཾ’’ རཱུཔཾ ནཏྠཱིཏི པདདྭཡསྶཱཔི ཨཏྠོ ནིདྡིཊྛོ རཱུཔསྶ སབྦསོ པརིཡཱདཱནཝསེན ནིཡཱམནཏོ. ‘‘ཨིཏི རཱུཔསྶ སམུདཡོ’’ཏི ཨེཏྠ པན ཨིཏི-སདྡོ ‘‘ཨིཏི ཁོ བྷིཀྑཝེ སཔྤཊིབྷཡོ བཱལོ’’ཏིཨཱདཱིསུ (མ. ནི. ༣.༡༢༤; ཨ. ནི. ༣.༡) ཝིཡ པཀཱརཏྠོཏི ཨཱཧ ‘‘ཨིཏཱིཏི ཨེཝ’’ནྟི.

ཨཝིཛྫཱསམུདཡཱཏི ¶ ཨཝིཛྫཱཡ ཨུཔྤཱདཱ, ཨཏྠིབྷཱཝཱཏི ཨཏྠོ. ནིརོདྷནིརོདྷཱི ཧི ཨུཔྤཱདོ ཨཏྠིབྷཱཝཝཱཙཀོཔི ཧོཏི, ཏསྨཱ པུརིམབྷཝསིདྡྷཱཡ ¶ ཨཝིཛྫཱཡ སཏི ཨིམསྨིཾ བྷཝེ རཱུཔསམུདཡོ, རཱུཔསྶ ཨུཔྤཱདོ ཧོཏཱིཏི ཨཏྠོ. ‘‘ཏཎྷཱསམུདཡཱ’’ཏིཨཱདཱིསུཔི ཨེསེཝ ནཡོ. ཨཱཧཱརསམུདཡཱཏི ཨེཏྠ པན པཝཏྟིཔཙྩཡེསུ ཀབལཱི༹ཀཱརཱཧཱརསྶ བལཝཏཱཡ སོ ཨེཝ གཧིཏོ. ཏསྨིཾ པན གཧིཏེ པཝཏྟིཔཙྩཡཏཱསཱམཉྙེན ཨུཏུཙིཏྟཱནི གཧིཏཱནེཝ ཧོནྟཱིཏི ཙཏུསམུཊྛཱནིཀརཱུཔསྶ པཙྩཡཏོ ཨུདཡདསྶནཾ ཝིབྷཱཝིཏམེཝཱཏི དཊྛབྦཾ. ‘‘ནིབྦཏྟིལཀྑཎ’’ནྟིཨཱདིནཱ ཀཱལཝསེན ཨུདཡདསྶནམཱཧ. ཏཏྠ ནིབྦཏྟིལཀྑཎནྟི རཱུཔསྶ ཨུཔྤཱདསངྑཱཏཾ སངྑཏལཀྑཎཾ. པསྶནྟོཔཱིཏི ན ཀེཝལཾ པཙྩཡསམུདཡམེཝ, ཨཐ ཁོ ཁཎཏོ ཨུདཡཾ པསྶནྟོཔི. ཨདྡྷཱཝསེན ཧི པཋམཾ ཨུདཡཾ པསྶིཏྭཱ ཋིཏོ པུན སནྟཏིཝསེན དིསྭཱ ཨནུཀྐམེན ཁཎཝསེན པསྶཏི. ཨཝིཛྫཱནིརོདྷཱ རཱུཔནིརོདྷོཏི ཨགྒམགྒེན ¶ ཨཝིཛྫཱཡ ཨནུཔྤཱདནིརོདྷཏོ ཨནཱགཏསྶ རཱུཔསྶ ཨནུཔྤཱདནིརོདྷོ ཧོཏི པཙྩཡཱབྷཱཝེ ཨབྷཱཝཏོ. ཏཎྷཱནིརོདྷཱ ཀམྨནིརོདྷོཏི ཨེཏྠཱཔི ཨེསེཝ ནཡོ. ཨཱཧཱརནིརོདྷཱཏི པཝཏྟིཔཙྩཡསྶ ཀབལཱི༹ཀཱརཱཧཱརསྶ ཨབྷཱཝེན. རཱུཔནིརོདྷོཏི ཏཾསམུཊྛཱནརཱུཔསྶ ཨབྷཱཝོ ཧོཏི. སེསཾ ཝུཏྟནཡམེཝ. ‘‘ཝིཔརིཎཱམལཀྑཎ’’ནྟི བྷངྒཀཱལཝསེན ཧེཏཾ ཝཡདསྶནཾ, ཏསྨཱ ཏཾ ཨདྡྷཱཝསེན པཋམཾ པསྶིཏྭཱ པུན སནྟཏིཝསེན དིསྭཱ ཨནུཀྐམེན ཁཎཝསེན པསྶཏི. ཨཡཉྩ ནཡོ པཱཀཏིཀཝིཔསྶཀཝསེན ཝུཏྟོ, བོདྷིསཏྟཱནཾ པནེཏཾ ནཏྠི. ཨེས ནཡོ ཨུདཡདསྶནེཔི.

‘‘ཨིཏི ཝེདནཱ’’ཏིཨཱདཱིསུཔི ཧེཊྛཱ རཱུཔེ ཝུཏྟནཡཱནུསཱརེན ཨཏྠོ ཝེདིཏབྦོ. ཏེནཱཧ ‘‘ཨཡཾ ཝེདནཱ, ཨེཏྟཀཱ ཝེདནཱ’’ཏིཨཱདི. ཏཏྠ ཝེདཡིཏ…པེ… སབྷཱཝནྟི ཨེཏྠ ‘‘ཝེདཡིཏསབྷཱཝཾ…པེ… ཝིཛཱནནསབྷཱཝ’’ནྟི པཙྩེཀཾ སབྷཱཝ- སདྡོ ཡོཛེཏབྦོ. ཝེདཡིཏསབྷཱཝནྟི ཨནུབྷཝནསབྷཱཝཾ. སཉྫཱནནསབྷཱཝནྟི ‘‘ནཱིལཾ པཱིཏ’’ནྟིཨཱདིནཱ ཨཱརམྨཎསྶ སལླཀྑཎསབྷཱཝཾ. ཨབྷིསངྑརཎསབྷཱཝནྟི ཨཱཡཱུཧནསབྷཱཝཾ. ཝིཛཱནནསབྷཱཝནྟི ཨཱརམྨཎསྶ ཨུཔལདྡྷིསབྷཱཝཾ. སུཁཱདཱིཏི ཨཱདི-སདྡེན དུཀྑསོམནསྶདོམནསྶུཔེཀྑཱཝེདནཱནཾ སངྒཧོ རཱུཔསཉྙཱདཱིཏི ཨཱདི-སདྡེན སདྡསཉྙཱདཱིནཾ, ཕསྶཱདཱིཏི ཨཱདི-སདྡེན ཙེཏནཱ ཝིཏཀྐཱདཱིནཾ ཙཀྑུཝིཉྙཱཎཱདཱིནནྟི ཨཱདི-སདྡེན སབྦེསཾ ལོཀིཡཝིཉྙཱཎཱནཾ སངྒཧོ. ཡཐཱ ཙ ཝིཉྙཱཎེ, ཨེས ནཡོ ཝེདནཱདཱིསུཔི. ཏེསནྟི ¶ ‘‘སམུདཡོ’’ཏི ཝུཏྟདྷམྨཱནཾ. ཏཱིསུ ཁནྡྷེསཱུཏི ཝེདནཱསཉྙཱསངྑཱརཀྑནྡྷེསུ. ‘‘ཕུཊྛོ ཝེདེཏི, ཕུཊྛོ སཉྫཱནཱཏི, ཕུཊྛོ ཙེཏེཏཱི’’ཏི (སཾ. ནི. ༤.༩༣) ཝཙནཏོ ¶ ‘‘ཕསྶསམུདཡཱ’’ཏི ཝཏྟབྦཾ. ‘‘ནཱམརཱུཔཔཙྩཡཱཔི ཝིཉྙཱཎ’’ནྟི (ཝིབྷ. ༢༤༦; དཱི. ནི. ༢.༩༧) ཝཙནཏོ ཝིཉྙཱཎཀྑནྡྷེ ‘‘ནཱམརཱུཔསམུདཡཱ’’ཏི ཝཏྟབྦཾ. ཏེསཾ ཡེཝཱཏི ¶ ཏཱིསུ ཁནྡྷེསུ ‘‘ཕསྶསྶ ཝིཉྙཱཎཀྑནྡྷེ ནཱམརཱུཔསྶཱ’’ཏི ཕསྶནཱམརཱུཔཱནཾཡེཝ ཝསེན ཨཏྠངྒམཔདམྤི ཡོཛེཏབྦཾ, ཨཝིཛྫཱདཡོ པན རཱུཔེ ཝུཏྟསདིསཱ ཨེཝཱཏི ཨདྷིཔྤཱཡོ.

སམཔཉྙཱསལཀྑཎཝསེནཱཏི པཙྩཡཏོ ཝཱིསཏི ཁཎཏོ པཉྩཱཏི པཉྩཝཱིསཏིཡཱ ཨུདཡལཀྑཎཱནཾ, པཙྩཡཏོ ཝཱིསཏི ཁཎཏོ པཉྩཱཏི པཉྩཝཱིསཏིཡཱ ཨེཝ ཝཡལཀྑཎཱནཾ ཙཱཏི སམཔཉྙཱསཱཡ ཨུདཡཝཡལཀྑཎཱནཾ ཝསེན. ཏཏྠ པཉྩནྣཾ ཁནྡྷཱནཾ ཨུདཡོ ལཀྑཱིཡཏི ཨེཏེཧཱིཏི ལཀྑཎཱནཱིཏི ཝུཙྩནྟི ཨཝིཛྫཱདིསམུདཡོཏི, ཏཐཱ ཏེསཾ ཨནུཔྤཱདནིརོདྷོ ལཀྑཱིཡཏི ཨེཏེཧཱིཏི ལཀྑཎཱནཱིཏི ཝུཙྩནྟི ཨཝིཛྫཱདཱིནཾ ཨཙྩནྟནིརོདྷོ. ནིབྦཏྟིཝིཔརིཎཱམལཀྑཎཱནི པན སངྑཏལཀྑཎམེཝཱཏི. ཨེཝཾ ཨེཏཱནི སམཔཉྙཱསལཀྑཎཱནི སརཱུཔཏོ ཝེདིཏབྦཱནི. ཡཐཱནུཀྐམེན ཝཌྜྷིཏེཏི ཡཐཱཝུཏྟཨུདཡབྦཡཉཱཎེ ཏིཀྑེ སཱུརེ པསནྣེ ཧུཏྭཱ ཝཧནྟེ ཏཏོ པརཾ ཝཏྟབྦཱནཾ བྷངྒཉཱཎཱདཱིནཾ ཨུཔྤཏྟིཔཊིཔཱཊིཡཱ བུདྡྷིཔྤཏྟེ པརམུཀྐཾསགཏེ ཝིཔསྶནཱཉཱཎེ. པགེཝ ཧི ཚཏྟིཾསཀོཊིསཏསཧསྶམུཁེན པཝཏྟེན སབྦཉྙུཏཉྙཱཎཱནུཙྪཝིཀེན མཧཱཝཛིརཉཱཎསངྑཱཏེན སམྨསནཉཱཎེན སམྦྷཏཱནུབྷཱཝཾ གབྦྷཾ གཎྷནྟཾ པརིཔཱཀཾ གཙྪནྟཾ པཊིཔདཱཝིསུདྡྷིཉཱཎཾ ཨཔརིམིཏཀཱལེ སམྦྷཏཱཡ པཉྙཱཔཱརམིཡཱ ཨཱནུབྷཱཝེན ཨུཀྐཾསཔཱརམིཔྤཏྟཾ ཨནུཀྐམེན ཝུཊྛཱནགཱམིནིབྷཱཝཾ ཨུཔགནྟྭཱ ཡདཱ ཨརིཡམགྒེན གྷཊེཏི, ཏདཱ ཨརིཡམགྒཙིཏྟཾ སབྦཀིལེསེཧི མགྒཔཊིཔཱཊིཡཱ ཝིམུཙྩཏི ¶ , ཝིམུཙྩནྟཉྩ ཏཐཱ ཝིམུཙྩཏི, ཡཐཱ སབྦཉེཡྻཱཝརཎཔྤཧཱནཾ ཧོཏི. ཡཾ ཀིལེསཱནཾ ‘‘སཝཱསནཔྤཧཱན’’ནྟི ཝུཙྩཏི, ཏཡིདཾ པཧཱནཾ ཨཏྠཏོ ཨནུཔྤཏྟིནིརོདྷོཏི ཨཱཧ ‘‘ཨནུཔྤཱདནིརོདྷེནཱ’’ཏི. ཨཱསཝསངྑཱཏེཧི ཀིལེསེཧཱིཏི བྷཝཏོ ཨཱབྷཝགྒཾ, དྷམྨཏོ ཨཱགོཏྲབྷུཾ སཝནཏོ པཝཏྟནཏོ ཨཱསཝསཉྙིཏེཧི རཱགོ, དིཊྛི, མོཧོཏི ཨིམེཧི ཀིལེསེཧི. ལཀྑཎཝཙནཉྩེཏཾ, པཱལི༹ཡཾ ཡདིདཾ ‘‘ཨཱསཝེཧཱི’’ཏི, ཏདེཀཊྛཏཱཡ པན སབྦེཧིཔི ¶ ཀིལེསེཧི སབྦེཧིཔི པཱཔདྷམྨེཧི ཙིཏྟཾ ཝིམུཙྩཏི. ཨགྒཧེཏྭཱཏི ཏེསཾ ཀིལེསཱནཾ ལེསམཏྟམྤི ཨགྒཧེཏྭཱ.

མགྒཀྑཎེ ཝིམུཙྩཏི ནཱམ ཏཾཏཾམགྒཝཛ྄ཛྷཀིལེསེཧི ཕལཀྑཎེ ཝིམུཏྟཾ ནཱམ. མགྒཀྑཎེ ཝཱ ཝིམུཏྟཉྩེཝ ཝིམུཙྩཏི ཙཱཏི ཨུཔརིམགྒཀྑཎེ ཧེཊྛིམམགྒཝཛ྄ཛྷེཧི ཝིམུཏྟཉྩེཝ ཡཐཱསཀཾ པཧཱཏབྦེཧི ཝིམུཙྩཏི ཙ. ཕལཀྑཎེ ཝིམུཏྟམེཝཱཏི སབྦསྨིམྤི ཕལཀྑཎེ ཝིམུཏྟམེཝ, ན ཝིམུཙྩཏི ནཱམ.

སབྦབནྡྷནཱཏི ཨོརམྦྷཱགིཡུདྡྷམྦྷཱགིཡསངྒཧིཏཱ སབྦསྨཱཔི བྷཝསཉྙོཛནཱ, ཝིཔྤམུཏྟོ ཝིསེསཏོ པཀཱརེཧི མུཏྟོ. སུཝིཀསིཏཙིཏྟསནྟཱནོཏི སཱཏིསཡཾ ཉཱཎརསྨིསམྥསྶེན སུཊྛུ སམྨདེཝ ¶ སམྥུལླཙིཏྟསནྟཱནོ. ‘‘ཙཏྟཱརི མགྒཉཱཎཱནཱི’’ཏིཨཱདི ཡེཧི ཉཱཎེཧི སུཝིཀསིཏཙིཏྟསནྟཱནོ, ཏེསཾ ཨེཀདེསེན དསྶནཾ. ནིཔྤདེསཏོ དསྶནཾ པན པརཏོ ཨཱགམིསྶཏི, ཏསྨཱ ཏཏྠེཝ ཏཱནི ཝིབྷཛིསྶཱམ. སཀལེ ཙ བུདྡྷགུཎེཏི ཨཏཱིཏཾསེ ཨཔྤཊིཧཏཉཱཎཱདིཀེ སབྦེཔི བུདྡྷགུཎེ. ཡདཱ ཧི ལོཀནཱཐོ ཨགྒམགྒཾ ཨདྷིགཙྪཏི, ཏདཱ སབྦེ གུཎེ ཧཏྠགཏེ ཀརོཏི ནཱམ. ཏཏོ པརཾ ‘‘ཧཏྠགཏེ ཀཏྭཱ ཋིཏོ’’ཏི ཝུཙྩཏི.

‘‘པརིཔུཎྞསངྐཔྤོ’’ཏི ཝཏྭཱ པརིཔུཎྞསངྐཔྤཏཱཔརིདཱིཔནཾ ཨུདཱནཾ དསྶེཏུཾ ‘‘ཨནེཀཛཱཏིསཾསཱར’’ནྟིཨཱདི ཝུཏྟཾ. ཏཏྠ ཨཱདིཏོ དྭིནྣཾ གཱཐཱནམཏྠོ ཧེཊྛཱ བྲཧྨཛཱལནིདཱནཝཎྞནཱཡཾ (དཱི. ནི. ཊཱི. ༡.པཋམམཧཱསངྒཱིཏིཀཐཱཝཎྞནཱ) ཝུཏྟོ ཨེཝ. པརཏོ ¶ པན ཨཡོགྷནཧཏསྶཱཏི ཨཡོ ཧཉྙཏི ཨེཏེནཱཏི ཨཡོགྷནཾ, ཀམྨཱརཱནཾ ཨཡོཀཱུཊཾ, ཨཡོམུཊྛི ཙ, ཏེན ཨཡོགྷནེན ཧཏསྶ པཧཏསྶ. ཨེཝ-སདྡོ ཙེཏྠ ནིཔཱཏམཏྟཾ. ཛལཏོ ཛཱཏཝེདསོཏི ཛལཡམཱནསྶ ཨགྒིསྶ, ཨནཱདརེ ཝཱ ཨེཏཾ སཱམིཝཙནཾ. ཨནུཔུབྦཱུཔསནྟསྶཱཏི ཨནུཀྐམེན ཨུཔསནྟསྶ ཝིཀྑམྦྷནྟསྶ ནིརུདྡྷསྶ. ཡཐཱ ན ཉཱཡཏེ གཏཱིཏི ཡཐཱ ཏསྶ གཏི ན ཉཱཡཏི. ཨིདཾ ཝུཏྟཾ ཧོཏི – ཨཡོམུཊྛིཀཱུཊཱདིནཱ པཧཏཏྟཱ ཨཡོགྷནེན ཧཏསྶ པཧཏསྶ ཨཡོགཏསྶ, ཀཾསབྷཱཛནཱདིགཏསྶ ཝཱ ཛལམཱནསྶ ཨགྒིསྶ ཨནུཀྐམེན ཨུཔསནྟསྶ དསསུ དིསཱསུ ན ཀཏྠཙི གཏི པཉྙཱཡཏི པཙྩཡནིརོདྷེན ཨཔྤཊིསནྡྷིཀནིརུདྡྷཏྟཱཏི. ཨེཝཾ སམྨཱཝིམུཏྟཱནནྟི སམྨཱ ཧེཏུནཱ ཉཱཡེན ཏདངྒཝིཀྑམྦྷནཝིམུཏྟིཔུབྦངྒམཱཡ ¶ སམུཙྪེདཝིམུཏྟིཡཱ ཨརིཡམགྒེན ཙཏཱུཧིཔི ཨུཔཱདཱནེཧི, ཨཱསཝེཧི ཙ མུཏྟཏྟཱ སམྨཱ ཝིམུཏྟཱནཾ, ཏཏོ ཨེཝ ཀཱམབནྡྷནསངྑཱཏཾ ཀཱམོགྷབྷཝོགྷཱདིབྷེདཾ ཨཝསིཊྛཨོགྷཉྩ ཏརིཏྭཱ ཋིཏཏྟཱ ཀཱམབནྡྷོགྷཏཱརཱིནཾ སུཊྛུ པཊིཔསྶམྦྷིཏསབྦཀིལེསཝིཔྥནྡིཏཏྟཱ ཀིལེསཱབྷིསངྑཱརཝཱཏེཧི ཨཀམྤནཱིཡཏཱཡ ཨཙལཾ ནིབྦཱནསངྑཱཏཾ སངྑཱརཱུཔསམཾ སུཁཾ པཏྟཱནཾ ཨདྷིགཏཱནཾ ཁཱིཎཱསཝཱནཾ གཏི དེཝམནུསྶཱདིབྷེདཱསུ གཏཱིསུ ‘‘ཨཡཾ ནཱམཱ’’ཏི པཉྙཱཔེཏབྦཏཱཡ ཨབྷཱཝཏོ པཉྙཱཔེཏུཾ ནཏྠི ན ཨུཔལབྦྷཏི, ཡཐཱཝུཏྟཛཱཏཝེདོ ཝིཡ ཨཔཉྙཏྟིཀབྷཱཝམེཝ ཏེ གཙྪནྟཱིཏི ཨཏྠོ. ཨེཝཾ མནསི ཀརོནྟོཏི ‘‘ཨེཝཾ ཨནེཀཛཱཏིསཾསཱར’’ནྟིཨཱདིནཱ (དྷ. པ. ༡༥༣) ཨཏྟནོ ཀཏཀིཙྩཏྟཾ མནསི ཀརོནྟོ བོདྷིཔལླངྐེ ནིསིནྣོཝ ཝིརོཙིཏྠཱཏི ཡོཛནཱ.

དུཏིཡབྷཱཎཝཱརཝཎྞནཱ ནིཊྛིཏཱ.

བྲཧྨཡཱཙནཀཐཱཝཎྞནཱ

༦༤. ཡནྣཱུནཱཏི ¶ ¶ པརིཝིཏཀྐནཏྠེ ནིཔཱཏོ, ཨཧནྟི བྷགཝཱ ཨཏྟཱནཾ ནིདྡིསཏཱིཏི ཨཱཧ ‘‘ཡདི པནཱཧ’’ནྟི. ‘‘ཨཊྛམེ སཏྟཱཧེ’’ཏིཨཱདི ཡཐཱ ཨམྷཱཀཾ བྷགཝཱ ཨབྷིསམྦུདྡྷོ ཧུཏྭཱ ཝིམུཏྟིསུཁཔཊིསཾཝེདནཱདིཝསེན སཏྟསུ སཏྟཱཧེསུ པཊིཔཛྫི, ཏཏོ པརཉྩ དྷམྨགམྦྷཱིརཏཱཔཙྩཝེཀྑཎཱདིཝསེན, ཨེཝམེཝ སབྦེཔི སམྨཱསམྦུདྡྷཱ ཨབྷིསམྦུདྡྷཀཱལེ པཊིཔཛྫིཾསུ, ཏེ ཙ སཏྟཱཧཱདཡོ ཏཐེཝ ཝཝཏྠཔཱིཡནྟཱིཏི ཨཡཾ སབྦེསམྤི བུདྡྷཱནཾ དྷམྨཏཱ. ཏསྨཱ ཝིཔསྶཱི བྷགཝཱ ཨབྷིསམྦུདྡྷཀཱལེ ཏཐཱ པཊིཔཛྫཱིཏི དསྶེཏུཾ ཨཱརདྡྷཾ. ཏཏྠ ‘‘ཨཊྛམེ སཏྟཱཧེ’’ཏི ཨིདཾ སཏྟམསཏྟཱཧཏོ པརཾ, སཏྟཱཧཏོ ཨོརིམེ ཙ པཝཏྟཱཡ པཊིཔཏྟིཡཱ ཝསེན ཝུཏྟཾ, ན པལླངྐསཏྟཱཧསྶ ཝིཡ ཨཊྛམསྶ ནཱམ སཏྟཱཧསྶ ཝཝཏྠིཏསྶ ལབྦྷམཱནཏྟཱ. ཨནནྟརོཏི ‘‘ཨདྷིགཏོ ཁོ མྱཱཡཾ དྷམྨོ’’ཏིཨཱདིཀོ ཝིཏཀྐོ (དཱི. ནི. ༢.༦༧; མ. ནི. ༡.༢༨༡; ༢.༣༣༧; སཾ. ནི. ༡.༡༧༢; མཧཱཝ. ༧, ༨).

པཊིཝིདྡྷོཏི སཡམྦྷུཉཱཎེན ‘‘ཨིདཾ དུཀྑ’’ནྟིཨཱདིནཱ པཊིམུཁཾ པཊིཝིཛ྄ཛྷནཝསེན པཝཏྟོ, ཡཐཱབྷཱུཏཾ ཨཝབུདྡྷོཏི ཨཏྠོ. དྷམྨོཏི ཙཏུསཙྩདྷམྨོ ཏབྦིནིམུཏྟསྶ ¶ པཊིཝིཛ྄ཛྷིཏབྦདྷམྨསྶ ཨབྷཱཝཏོ. གམྦྷཱིརོཏི མཧཱསམུདྡོ ཝིཡ མཀསཏུཎྜསཱུཙིཡཱ ཨཉྙཏྲ སམུཔཙིཏཔརིཔཀྐཉཱཎསམྦྷཱརེཧི ཨཉྙེསཾ ཉཱཎེན ཨལབྦྷནེཡྻཔྤཏིཊྛོ. ཏེནཱཧ ‘‘ཨུཏྟཱནབྷཱཝཔཊིཀྑེཔཝཙནམེཏ’’ནྟི. ཨལབྦྷནེཡྻཔྤཏིཊྛོ ཨོགཱཧིཏུཾ ཨསཀྐུཎེཡྻཏཱཡ སརཱུཔཏོ ཝིསེསཏོ ཙ པསྶིཏུཾ ན སཀྐཱཏི ཨཱཧ ‘‘གམྦྷཱིརཏྟཱཝ དུདྡསོ’’ཏི. དུཀྑེན དཊྛབྦོཏི ཀིཙྪེན ཀེནཙི ཀདཱཙིདེཝ དཊྛབྦོ. ཡཾ པན དཊྛུམེཝ ན སཀྐཱ, ཏསྶ ཨོགཱཧེཏྭཱ ཨནུ ཨནུ བུཛ྄ཛྷནེ ཀཐཱ ཨེཝ ནཏྠཱིཏི ཨཱཧ ‘‘དུདྡསཏྟཱཝ དུརནུབོདྷོ’’ཏི. དུཀྑེན ཨཝབུཛ྄ཛྷིཏབྦོ ཨཝབོདྷསྶ དུཀྐརབྷཱཝཏོ. ཨིམསྨིཾ ཋཱནེ ‘‘ཏཾ ཀིཾ མཉྙཐ བྷིཀྑཝེ དུཀྐརཏརཾ ཝཱ དུརབྷིསམྦྷཝཏརཾ ཝཱ’’ཏི (སཾ. ནི. ༥.༡༡༡༥) སུཏྟཔདཾ ¶ ཝཏྟབྦཾ. སནྟཱརམྨཎཏཱཡ ཝཱ སནྟོ. ནིབྦུཏསབྦཔརིལཱ༹ཧཏཱཡ ནིབྦུཏོ. པདྷཱནབྷཱཝཾ ནཱིཏོཏི ཝཱ པཎཱིཏོ. ཨཏིཏྟིཀརཊྛེན ཨཏཔྤཀོ སཱདུརསབྷོཛནཾ ཝིཡ. ཨེཏྠ ཙ ནིརོདྷསཙྩཾ སནྟཾ ཨཱརམྨཎནྟི སནྟཱརམྨཎཾ, མགྒསཙྩཾ སནྟཾ, སནྟཱརམྨཎཉྩཱཏི སནྟཱརམྨཎཾ ཨནུཔསནྟསབྷཱཝཱནཾ ཀིལེསཱནཾ, སངྑཱརཱནཉྩ ཨབྷཱཝཏོ སནྟོ ནིབྦུཏསབྦཔརིལཱ༹ཧཏྟཱ ནིབྦུཏོ, སནྟཔཎཱིཏབྷཱཝེནེཝ ཏདཏྠཱཡ ཨསེཙནཀཏཱཡ ཨཏཔྤཀཏཱ དཊྛབྦཱ. ཏེནཱཧ ‘‘ཨིདཾ དྭཡཾ ལོཀུཏྟརམེཝ སནྡྷཱཡ ཝུཏྟ’’ནྟི. ཨུཏྟམཉཱཎསྶ ཝིསཡཏྟཱ ན ཏཀྐེན ཨཝཙརིཏབྦོ, ཏཏོ ཨེཝ ནིཔུཎཉཱཎགོཙརཏཱཡ, སཎྷསུཁུམསབྷཱཝཏྟཱ ཙ ནིཔུཎོ. བཱལཱནཾ ཨཝིསཡཏྟཱ པཎྜིཏེཧི ཨེཝ ཝེདིཏབྦོཏི པཎྜིཏཝེདནཱིཡོ. ཨཱལཱིཡནྟི ཨབྷིརམིཏབྦཊྛེན ¶ སེཝཱིཡནྟཱིཏི ཨཱལཡཱ, པཉྩ ཀཱམགུཎཱ. ཨཱལཡནྟི ཨབྷིརམཎཝསེན སེཝནྟཱིཏི ཨཱལཡཱ, ཏཎྷཱཝིཙརིཏཱནི. ཨཱལཡརཏཱཏི ཨཱལཡནིརཏཱ. སུཊྛུ མུདིཏཱ ཨཏིཝིཡ མུདིཏཱ ཨནུཀྐཎྛནཏོ. རམཏཱིཏི རཏིཾ ཝིནྡཏི ཀཱིལ༹ཏི ལལ༹ཏི. ཨིམེ སཏྟཱ ཡཐཱ ཀཱམགུཎེ, ཨེཝཾ རཱགམྤི ཨསྶཱདེནྟི ཨབྷིནནྡནྟི ཡེཝཱཏི ཝུཏྟཾ ‘‘དུཝིདྷམྤཱི’’ཏིཨཱདི.

ཋཱནཾ སནྡྷཱཡཱཏི ཋཱན-སདྡཾ སནྡྷཱཡ. ཨཏྠཏོ པན ‘‘ཋཱན’’ནྟི ཙ པཊིཙྩསམུཔྤཱདོ ཨེཝ ཨདྷིཔྤེཏོ. ཏིཊྛཏི ཨེཏྠ ཕལཾ ཏདཱཡཏྟཝུཏྟིཏཱཡཱཏི ཋཱནཾ, སངྑཱརཱདཱིནཾ པཙྩཡབྷཱུཏཱ ཨཝིཛྫཱདཡོ. ཨིམེསཾ སངྑཱརཱདཱིནཾ པཙྩཡཱཏི ཨིདཔྤཙྩཡཱ, ཨཝིཛྫཱདཡོཝ. ཨིདཔྤཙྩཡཱ ཨེཝ ཨིདཔྤཙྩཡཏཱ ཡཐཱ དེཝོ ཨེཝ དེཝཏཱ ¶ , ཨིདཔྤཙྩཡཱནཾ ཝཱ ཨཝིཛྫཱདཱིནཾ ཨཏྟནོ ཕལཾ པཊིཙྩ པཙྩཡབྷཱཝོ ¶ ཨུཔྤཱདནསམཏྠཏཱ ཨིདཔྤཙྩཡཏཱ, ཏེན པརམཏྠཔཙྩཡལཀྑཎོ པཊིཙྩསམུཔྤཱདོ དསྶིཏོ ཧོཏི. པཊིཙྩ སམུཔྤཛྫཏི ཕལཾ ཨེཏསྨཱཏི པཊིཙྩསམུཔྤཱདོ. པདདྭཡེནཱཔི དྷམྨཱནཾ པཙྩཡཊྛོ ཨེཝ ཝིབྷཱཝིཏོ. ཏེནཱཧ ‘‘སངྑཱརཱདིཔཙྩཡཱནཾ ཨཝིཛྫཱདཱིནམེཏཾ ཨདྷིཝཙན’’ནྟི. ཨཡམེཏྠ སངྑེཔོ, ཝིཏྠཱརོ པན ཝིསུདྡྷིམགྒསཾཝཎྞནཱསུ (ཝིསུདྡྷི. ༢.༥༧༠) ཝུཏྟནཡེན ཝེདིཏབྦོ.

སབྦསངྑཱརསམཐོཏིཨཱདི སབྦནྟི སབྦསངྑཱརསམཐཱདིཔདཱབྷིདྷེཡྻཾ སབྦཾ, ཨཏྠཏོ ནིབྦཱནམེཝ. ཨིདཱནི ཏསྶ ནིབྦཱནབྷཱཝཾ དསྶེཏུཾ ‘‘ཡསྨཱ ཧཱི’’ཏིཨཱདི ཝུཏྟཾ. ཏནྟི ནིབྦཱནཾ. ཨཱགམྨཱཏི པཊིཙྩ ཨརིཡམགྒསྶ ཨཱརམྨཎཔཙྩཡཧེཏུ. སམྨནྟཱིཏི ཨཔྤཊིསནྡྷིཀཱུཔསམཝསེན སམྨནྟི. ཏཐཱ སནྟཱ ཙ སཝིསེསཾ ཨུཔསནྟཱ ནཱམ ཧོནྟཱིཏི ཨཱཧ ‘‘ཝཱུཔསམྨནྟཱི’’ཏི, ཨེཏེན སབྦེ སངྑཱརཱ སམྨནྟི ཨེཏྠཱཏི སབྦསངྑཱརསམཐོ, ནིབྦཱནནྟི དསྶེཏི. སབྦསངྑཱརཝིསཾཡུཏྟེ ཧི ནིབྦཱནེ སབྦསངྑཱརཝཱུཔསམཔརིཡཱཡོ ཉཱཡཱགཏོ ཡེཝཱཏི. སེསེཔདེསུཔི ཨེསེཝ ནཡོ. ཨུཔདྷཱིཡཏི ཨེཏྠ དུཀྑནྟི ཨུཔདྷི, ཁནྡྷཱདཡོ. པཊིནིསྶཊྛཱཏི སམུཙྪེདཝསེན པརིཙྩཏྟཱ ཧོནྟི. སབྦཱ ཏཎྷཱཏི ཨཊྛསཏཔྤབྷེདཱ སབྦཱཔི ཏཎྷཱ. སབྦེ ཀིལེསརཱགཱཏི ཀཱམརཱགརཱུཔརཱགཱདིབྷེདཱ སབྦེཔི ཀིལེསབྷཱུཏཱ རཱགཱ, སབྦེཔི ཝཱ ཀིལེསཱ ཨིདྷ ཀིལེསརཱགཱཏི ཝེདིཏབྦཱ, ན ལོབྷཝིསེསཱ ཨེཝ ཙིཏྟསྶ ཝིཔརཱིཏབྷཱཝཱཔཱདནཏོ. ཡཐཱཧ ‘‘རཏྟམྤི ཙིཏྟཾ ཝིཔརིཎཏཾ, དུཊྛམྤི ཙིཏྟཾ ཝིཔརིཎཏཾ, མཱུལ༹ྷམྤི ཙིཏྟཾ ཝིཔརིཎཏ’’ནྟི (པཱརཱ. ༢༧༡) ཝིརཛྫནྟཱིཏི ¶ ཨཏྟནོ སབྷཱཝཾ ཝིཛཧནྟི. སབྦཾ དུཀྑནྟི ཛརཱམརཎཱདིབྷེདཾ སབྦཾ ཝཊྚདུཀྑཾ. བྷཝེན བྷཝནྟི ཏེན ཏེན བྷཝེན བྷཝནྟརཾ. བྷཝནིཀནྟིབྷཱཝེན སཾསིབྦཏི, ཕལེན ཝཱ སདྡྷིཾ ཀམྨཾ སཏཎྷསྶེཝ ཨཱཡཏིཾ པུནབྦྷཝབྷཱཝཏོ. ཏཏོ ཝཱནཏོ ནིཀྑནྟཾ ཏཏྠ ཏསྶ སབྦསོ ཨབྷཱཝཏོ. ཙིརནིསཛྫཱཙིརབྷཱསནེཧི པིཊྛིཨཱགིལཱཡནཏཱལུགལསོསཱདིཝསེན ཀཱཡཀིལམཐོ ཙེཝ ཀཱཡཝིཧེསཱ ¶ ཙ ཝེདིཏབྦཱ. སཱ ཙ ཁོ དེསནཱཡ ཨཏྠཾ ཨཛཱནནྟཱནཾ, ཨཔྤཊིཔཛྫནྟཱནཉྩ ཝསེན, ཛཱནནྟཱནཾ, པན པཊིཔཛྫནྟཱནཉྩ དེསནཱཡ ཀཱཡཔརིསྶམོཔི སཏྠུ ཨཔརིསྶམོཝ. ཏེནཱཧ བྷགཝཱ ‘‘ན ཙ མཾ དྷམྨཱདྷིཀརཎཾ ཝིཧེསེསཱི’’ཏི (ཨུདཱ. ༡༠). ཏཐཱ ཧི ཝུཏྟཾ ‘‘ཡཱ ཨཛཱནནྟཱནཾ དེསནཱ ནཱམ, སོ མམ ཀིལམཐོ ཨསྶཱ’’ཏི. ཨུབྷཡནྟི ཙིཏྟཀིལམཐོ, ཙིཏྟཝིཧེསཱ ¶ ཙཱཏི ཨུབྷཡཾ པེཏཾ བུདྡྷཱནཾ ནཏྠི, བོདྷིམཱུལེཡེཝ སམུཙྪིནྣཏྟཱ.

༦༥. ཨནུབྲཱུཧནཾ སམྤིཎྜནཾ. སོཏི ‘‘ཨཔིསྶཱུ’’ཏི ནིཔཱཏོ. ཝིཔསྶིནྟི པཊི-སདྡཡོགེན སཱམིཨཏྠེ ཨུཔཡོགཝཙནནྟི ཨཱཧ ‘‘ཝིཔསྶིསྶཱ’’ཏི. ཝུདྡྷིཔྤཏྟཱ ཨཙྪརིཡཱ ཝཱ ཨནཙྪརིཡཱ. ཝུདྡྷིཨཏྠོཔི ཧི ཨཀཱརོ ཧོཏི ཡཐཱ‘‘ཨསེཀྑཱ དྷམྨཱ’’ཏི (དྷ. ས. ཏིཀམཱཏིཀཱཡ ༡༡). ཀཔྤཱནཾ ཙཏྟཱརི ཨསངྑྱེཡྻཱནི སཏསཧསྶཉྩ སདེཝཀསྶ ལོཀསྶ དྷམྨསཾཝིབྷཱགཀརཎཏྠམེཝ པཱརམིཡོ ¶ པཱུརེཏྭཱ ཨིདཱནི སམདྷིགཏདྷམྨརཱཛསྶ ཏཏྠ ཨཔྤོསྶུཀྐཏཱཔཏྟིདཱིཔནཏཱ, གཱཐཱཏྠསྶ ཨཙྪརིཡཏཱ, ཏསྶ ཝུདྡྷིཔྤཏྟི ཙཱཏི ཝེདིཏབྦཱ. ཨཏྠདྭཱརེན ཧི གཱཐཱནཾ ཨནཙྪརིཡཏཱ. གོཙརཱ ཨཧེསུནྟི ཨུཔཊྛཧིཾསུ. ཨུཔཊྛཱནཉྩ ཝིཏཀྐེཏབྦཏཱཝཱཏི ཨཱཧ ‘‘པརིཝིཏཀྐཡིཏབྦཏཾ པཱཔུཎིཾསཱུ’’ཏི.

ཡདི སུཁཱཔཊིཔདཱཝ ཀཐཾ ཀིཙྪཏཱཏི ཨཱཧ ‘‘པཱརམཱིཔཱུརཎཀཱལེ’’ཏིཨཱདི. ཨེཝམཱདཱིནི དུཔྤརིཙྩཛཱནི དེནྟསྶ. ཧ-ཨིཏི ཝཱ བྱཏྟནྟི ཨེཏསྨིཾ ཨཏྠེ ནིཔཱཏོ, ‘‘ཨེཀཾསཏྠེ’’ཏི ཀེཙི. ཧ བྱཏྟཾ, ཨེཀཾསེན ཝཱ ཨལཾ ནིཔྤཡོཛནཾ ཨེཝཾ ཀིཙྪེན ཨདྷིགཏསྶ དྷམྨསྶ དེསེཏུནྟི ཡོཛནཱ. ཧལནྟི ‘‘ཨལ’’ནྟི ཨིམིནཱ སམཱནཏྠཾ པདཾ ‘‘ཧལནྟི ཝདཱམཱི’’ཏིཨཱདཱིསུ (སཾ. ནི. ཊཱི. ༡.༡༧༢) ཝིཡ. རཱགདོསཕུཊྛེཧཱིཏི ཕུཊྛཝིསེན ཝིཡ སཔྤེན རཱགེན, དོསེན ཙ སམྥུཊྛེཧི ཨབྷིབྷཱུཏེཧི. རཱགདོསཱནུགཏེཧཱིཏི རཱགདོསེཧི ཨནུབནྡྷེཧི.

ནིཙྩཱདཱིནནྟི ནིཙྩགྒཱཧཱདཱིནཾ. ཨེཝཾ གཏནྟི ཨེཝཾ པཝཏྟཾ ཨནིཙྩཱདིཨཱཀཱརེན པཝཏྟཾ. ‘‘ཙཏུསཙྩདྷམྨ’’ནྟི ཨིདཾ ཨནིཙྩཱདཱིསུ, སཙྩེསུ ཙ ཡཐཱལཱབྷཝསེན གཧེཏབྦཾ. ཨེཝཾ གཏནྟི ཝཱ ཨེཝཾ ‘‘ཨནིཙྩ’’ནྟིཨཱདིནཱ ཨབྷིནིཝིསིཏྭཱ མཡཱ, ཨཉྙེཧི ཙ སམྨཱསམྦུདྡྷེཧི གཏཾ, ཉཱཏཾ པཊིཝིདྡྷནྟི ཨཏྠོ. ཀཱམརཱགེན, བྷཝརཱགེན ཙ རཏྟཱ ནཱིཝརཎེཧི ནིཝུཏཙིཏྟཏཱཡ, དིཊྛིརཱགེན རཏྟཱ ཝིཔརཱིཏཱབྷིནིཝེསེན ན དཀྑནྟི ཡཱཐཱཝཏོ ཨིམཾ དྷམྨཾ ནཔྤཊིཝིཛ྄ཛྷིསྶནྟི. ཨེཝཾ གཱཧཱཔེཏུནྟི ‘‘ཨནིཙྩ’’ནྟིཨཱདིནཱ སབྷཱཝེན ཡཱཐཱཝཏོ དྷམྨེ ¶ ཛཱནཱཔེཏུཾ. རཱགདོསཔརེཏཏཱཔི ནེསཾ སམྨཱུལ༹ྷབྷཱཝེནེཝཱཏི ཨཱཧ ‘‘ཏམོཁནྡྷེན ཨཱཝུཊཱ’’ཏི.

དྷམྨདེསནཱཡ ¶ ཨཔྤོསྶུཀྐཏཱཔཏྟིཡཱ ཀཱརཎཾ ཝིབྷཱཝེཏུཾ ‘‘ཀསྨཱ པནཱ’’ཏིཨཱདིནཱ སཡམེཝ ཙོདནཾ སམུཊྛཱཔེཏི. ཏཏྠ ཡཐཱཡཾ ཨིདཱནི དྷམྨདེསནཱཡ ¶ ཨཔྤོསྶུཀྐཏཱཔཏྟི སབྦབུདྡྷཱནཾ ཨཱཙིཎྞསམཱཙིཎྞདྷམྨཏཱཝསེན, སབྦབོདྷིསཏྟཱནཾ ཨཱདིཏོ ‘‘ཀིཾ མེ ཨཉྙཱཏཝེསེནཱ’’ཏིཨཱདིནཱ (བུ. ཝཾ. ༢.༩༩) མཧཱབྷིནཱིཧཱརེ ཨཏྟནོ ཙིཏྟསྶ སམུསྶཱཧནཾ ཨཱཙིཎྞསམཱཙིཎྞདྷམྨཏཱ ཝཱཏི ཨཱཧ ‘‘ཀིཾ མེ’’ཏིཨཱདི. ཏཏྠ ཨཉྙཱཏཝེསེནཱཏི སདེཝཀཾ ལོཀཾ ཨུནྣཱདེནྟོ བུདྡྷོ ཨཧུཏྭཱ ཀེཝལཾ བུདྡྷཱནཾ སཱཝཀབྷཱཝཱུཔགམནཝསེན ཨཉྙཱཏརཱུཔེན. ཏིཝིདྷཾ ཀཱརཎཾ ཨཔྤོསྶུཀྐཏཱཔཏྟིཡཱ པཊིཔཀྑསྶ བལཝབྷཱཝོ, དྷམྨསྶ པརམགམྦྷཱིརཏཱ, ཏཏྠ ཙ བྷགཝཏོ སཱཏིསཡཾ གཱརཝནྟི ཏཾ དསྶེཏུཾ ‘‘ཏསྶ ཧཱི’’ཏིཨཱདི ཨཱརདྡྷཾ. ཏཏྠ པཊིཔཀྑཱ ནཱམ རཱགཱདཡོ ཀིལེསཱ སམྨཱཔཊིཔཏྟིཡཱ ཨནྟརཱཡཀརཏྟཱ. ཏེསཾ བལཝབྷཱཝཏོ ཙིརཔརིབྷཱཝནཱཡ སཏྟསནྟཱནཏོ དུབྦིསོདྷིཡཏཱཡ ཏེ སཏྟེ མཏྟཧཏྠིནོ ཝིཡ དུབྦལཾ པུརིསཾ ཨཛ྄ཛྷོཏྠརིཏྭཱ ཨནཡབྱསནཾ ཨཱཔཱདེནྟཱ ཨནེཀསཏཡོཛནཱཡཱམཝིཏྠཱརཾ སུནིཙིཏཾ གྷནསནྣིཝེསཾ ཀཎྚཀདུགྒམྤི ཨདྷིསེནྟི. དཱུརཔྤབྷེད དུཙྪེཛྫཏཱཧི དུབྦིསོདྷིཡཏཾ པན དསྶེཏུཾ ‘‘ཨཐསྶཱ’’ཏིཨཱདི ཝུཏྟཾ. ཏཏྠ ཙ ཨནྟོ ཨཱམཊྛཏཱཡ ཀཉྫིཀཔུཎྞལཱབུ ཙིརཔརིཝཱསིཀཏཱཡ ཏཀྐབྷརིཏཙཱཊི སྣེཧཏིནྟདུབྦལབྷཱཝེན ཝསཱཏེལཔཱིཏཔིལོཏིཀཱ; ཏེལམིསྶིཏཏཱཡ ཨཉྫནམཀྑིཏཧཏྠཱ དུབྦིསོདྷནཱིཡཱ ཝུཏྟཱ. ཧཱིནཱུཔམཱ ¶ ཙེཏཱ རཱུཔཔྤབནྡྷབྷཱཝཏོ, ཨཙིརཀཱལིཀཏྟཱ ཙ མལཱིནཏཱཡ, ཀིལེསསཾཀིལེསོ ཨེཝ པན དུབྦིསོདྷནཱིཡཏརོ ཨནཱདིཀཱལིཀཏྟཱ, ཨནུསཡིཏཏྟཱ ཙ. ཏེནཱཧ ‘‘ཨཏིསཾཀིལིཊྛཱ’’ཏི. ཡཐཱ ཙ དུབྦིསོདྷནཱིཡཏཱཡ ཨེཝཾ གམྦྷཱིརདུདྡསདུརནུབོདྷཱནམྤི ཝུཏྟཨུཔམཱ ཧཱིནཱུཔམཱཝ.

གམྦྷཱིརོཔི དྷམྨོ པཊིཔཀྑཝིདྷམནེན སུཔཱཀཊོ བྷཝེཡྻ, པཊིཔཀྑཝིདྷམནཾ པན སམྨཱཔཊིཔཏྟིཔཊིབདྡྷཾ, སཱ སདྡྷམྨསཝནཱདྷཱིནཱ, ཏཾ སཏྠརི, དྷམྨེ ཙ པསཱདཱཡཏྟཾ. སོ ཝིསེསཏོ ལོཀེ སམྦྷཱཝནཱིཡསྶ གརུཀཱཏབྦསྶ ཨབྷིཔཏྠནཱཧེཏུཀོཏི པནཱལི༹ཀཱཡ སཏྟཱནཾ དྷམྨསམྤཊིཔཏྟིཡཱ བྲཧྨཡཱཙནཱདིནིམིཏྟནྟི ཏཾ དསྶེནྟོ ‘‘ཨཔིཙཱ’’ཏིཨཱདིམཱཧ.

༦༦. ‘‘ཨཉྙཏརོ’’ཏི ཨཔྤཉྙཱཏོ ཝིཡ ཀིཉྩཱཔི ཝུཏྟཾ, ཨཐ ཁོ པཱཀཊོ པཉྙཱཏོཏི དསྶེཏུཾ ‘‘ཨིམསྨིཾ ཙཀྐཝཱལེ༹ ཛེཊྛཀམཧཱབྲཧྨཱ’’ཏི ཝུཏྟཾ. མཧཱབྲཧྨབྷཝནེ ཛེཊྛཀམཧཱབྲཧྨཱ. སོ ཧི སཀྐོ ཝིཡ ¶ ཀཱམདེཝལོཀེ, བྲཧྨལོཀེ ཙ པཱཀཊོ པཉྙཱཏོ. ཨུཔཀྐིལེསབྷཱུཏཾ ཨཔྤཾ རཱགཱདིརཛཾ ཨེཏསྶཱཏི ཨཔྤརཛཾ, ཨཔྤརཛཾ ཨཀྑི པཉྙཱཙཀྑུ ཡེསཾ ཏེ ཏཾསབྷཱཝཱཏི ཀཏྭཱ ཨཔྤརཛཀྑཛཱཏིཀཱཏི ཨིམམཏྠཾ དསྶེཏུཾ ‘‘པཉྙཱམཡེ’’ཏིཨཱདིམཱཧ. ཨཔྤཾ རཱགཱདིརཛཾ ཡེསཾ ཏེ ཏཾསབྷཱཝཱ ཨཔྤརཛཀྑཛཱཏིཀཱཏི ཨེཝམེཏྠ ཨཏྠོ ཝེདིཏབྦོ. ཨསྶཝནཏཱཏི ‘‘སཡཾ ¶ ཨབྷིཉྙཱ’’ཏིཨཱདཱིསུ (དཱི. ནི. ༡.༢༨, ༤༠༥; མ. ནི. ༡.༡༥༤, ༤༤༤) ཝིཡ ཀརཎེ པཙྩཏྟཝཙནནྟི ཨཱཧ ‘‘ཨསྶཝནཏཱཡཱ’’ཏི. དསཔུཉྙཀིརིཡཝཏྠུཝསེནཱཏི དཱནཱདིདསཝིདྷཝིམུཏྟིཔརིཔཱཙནཱིཡཔུཉྙཀིརིཡཝཏྠཱུནཾ ཝསེན. ཏེནཱཧ ‘‘ཀཏཱདྷིཀཱརཱ’’ཏིཨཱདི. པཔཉྩསཱུདནིཡཾ པན ‘‘དྭཱདསཔུཉྙཀིརིཡཝསེནཱ’’ཏི ¶ (མ. ནི. ཨཊྛ. ༢.༢༨༢) ཝུཏྟཾ, ཏཾ དཱནཱདཱིསུ སརཎགམནཔརཧིཏཔརིཎཱམནདྭཡ པཀྑིཔནཝསེན ཝུཏྟཾ.

༦༩. གརུཊྛཱནིཡེསུ གཱརཝཝསེན གརུཀརཔཏྠནཱ ཨཛ྄ཛྷེསནཱ, སཱཔི ཨཏྠཏོ པཏྠནཱ ཨེཝཱཏི ཝུཏྟཾ ‘‘ཡཱཙན’’ནྟི. པདེསཝིསཡཉཱཎདསྶནཾ ཧུཏྭཱ བུདྡྷཱནཾཡེཝ ཨཱཝེཎིཀབྷཱཝཏོ ཨིདཾ ཉཱཎདྭཡཾ ‘‘བུདྡྷཙཀྑཱུ’’ཏི ཝུཙྩཏཱིཏི ཨཱཧ ‘‘ཨིམེསཉྷི དྭིནྣཾ ཉཱཎཱནཾ བུདྡྷཙཀྑཱུཏི ནཱམ’’ནྟི. ཏིཎྞཾ མགྒཉཱཎཱནནྟི ཧེཊྛིམཱནཾ ཏིཎྞཾ མགྒཉཱཎཱནཾ ‘‘དྷམྨཙཀྑཱུ’’ཏི ནཱམཾ, ཙཏུསཙྩདྷམྨདསྶནནྟི ཀཏྭཱ དསྶནམཏྟབྷཱཝཏོ. ཡཏོ ཏཱནི ཉཱཎཱནི ཝིཛྫཱུཔམཱབྷཱཝེན ཝུཏྟཱནི, ཨགྒམགྒཉཱཎཾ པན ཉཱཎཀིཙྩསྶ སིཁཱཔྤཏྟིཡཱ དསྶནམཏྟཾ ན ཧོཏཱིཏི ‘‘དྷམྨཙཀྑཱུ’’ཏི ན ཝུཙྩཏཱིཏི. ཡཏོ ཏཾ ཝཛིརཱུཔམཱབྷཱཝེན ཝུཏྟཾ. ཝུཏྟནཡེནེཝཱཏི ‘‘ཨཔྤརཛཀྑཛཱཏིཀཱ’’ཏི ཨེཏྠ ཝུཏྟནཡེནེཝ. ཡསྨཱ མནྡཀིལེསཱ ‘‘ཨཔྤརཛཀྑཱ’’ཏི ཝུཏྟཱ, ཏསྨཱ བཧལཀིལེསཱ ‘‘མཧཱརཛཀྑཱ’’ཏི ཝེདིཏབྦཱ. པཊིཔཀྑཝིདྷམནསམཏྠཏཱཡ ཏིཀྑཱནི སཱུརཱནི ཝིསདཱནི, ཝུཏྟཝིཔརིཡཱཡེན མུདཱུནི. སདྡྷཱདཡོ ཨཱཀཱརཱཏི སདྡཧནཱདིཔྤཀཱརེ ཝདཏི. སུནྡརཱཏི ཀལྱཱཎཱ. སམྨོཧཝིནོདནིཡཾ པན ‘‘ཡེསཾ ཨཱསཡཱདཡོ ཀོཊྛཱསཱ སུནྡརཱ, ཏེ སྭཱཀཱརཱ’’ཏི (ཝིབྷ. ཨཊྛ. ༨༡༤) ཝུཏྟཾ, ཏཾ ཨིམཱཡ ཨཏྠཝཎྞནཱཡ ཨཉྙདཏྠུ སཾསནྡཏི ¶ སམེཏཱིཏི དཊྛབྦཾ. ཡཏོ སདྡྷཱསམྤདཱདིཝསེན ཨཛ྄ཛྷཱསཡསྶ སུནྡརཏཱཏི, ཏབྦིཔརིཡཱཡཏོ ཨསུནྡརཏཱཏི. ཀཱརཎཾ ནཱམ པཙྩཡཱཀཱརོ, སཙྩཱནི ཝཱ. པརལོཀནྟི སམྤརཱཡཾ. ཏཾ དུཀྑཱཝཧཾ ཝཛྫཾ ཝིཡ བྷཡཏོ པསྶིཏབྦནྟི ཝུཏྟཾ ‘‘པརལོཀཉྩེཝ ཝཛྫཉྩ བྷཡཏོ པསྶནྟཱི’’ཏི. སམྤཏྟིབྷཝཏོ ཝཱ ཨཉྙཏྟཱ ཝིཔཏྟིབྷཝོ ‘‘པརལོཀོ’’ཏི ཝུཏྟཾ ‘‘པར…པེ… པསྶནྟཱི’’ཏི.

ཨཡཾ ¶ པནེཏྠ པཱལཱི༹ཏི ཨེཏྠ ‘‘ཨཔྤརཛཀྑཱ’’དིཔདཱནཾ ཨཏྠཝིབྷཱཝནེ ཨཡཾ ཏསྶ ཏཐཱབྷཱཝསཱདྷཀཔཱལི༹. སདྡྷཱདཱིནཉྷི ཝིམུཏྟིཔརིཔཱཙཀདྷམྨཱནཾ བལཝབྷཱཝོ ཏཔྤཊིཔཀྑཱནཾ པཱཔདྷམྨཱནཾ དུབྦལབྷཱཝེནེཝ ཧོཏི, ཏེསཉྩ བལཝབྷཱཝོ སདྡྷཱདཱིནཾ དུབྦལབྷཱཝེནཱཏི ཝིམུཏྟིཔརིཔཱཙཀདྷམྨཱནཾ སཝིསེསཾ ཨཏྠིཏཱནཏྠིཏཱཝསེན ‘‘ཨཔྤརཛཀྑཱ མཧཱརཛཀྑཱ’’ཏི ཨཱདཡོ པཱལི༹ཡཾ (པཊི. མ. ༡.༡༡༡) ཝིབྷཛིཏྭཱ དསྶིཏཱ. ཨིཏི སདྡྷཱདཱིནཾ ཝསེན པཉྩ ཨཔྤརཛཀྑཱ, ཨསདྡྷིཡཱདཱིནཾ ཝསེན པཉྩ མཧཱརཛཀྑཱ. ཨེཝཾ ཏིཀྑིནྡྲིཡམུདིནྡྲིཡཱདཡོཏི ཝིབྷཱཝིཏཱ པཉྙཱས པུགྒལཱ. སདྡྷཱདཱིནཾ པན ཨནྟརབྷེདེན ཨནེཀབྷེདཱ ཝེདིཏབྦཱ. ཁནྡྷཱདཡོ ཨེཝ ¶ ལུཛྫནཔལུཛྫནཊྛེན ལོཀོ, སམྤཏྟིབྷཝབྷཱུཏོ ལོཀོ སམྤཏྟིབྷཝལོཀོ, སུགཏིསངྑཱཏོ ཨུཔཔཏྟིབྷཝོ, སམྤཏྟི སམྦྷཝཏི ཨེཏེནཱཏི སམྤཏྟིསམྦྷཝལོཀོ སུགཏིསཾཝཏྟནིཡོ ཀམྨབྷཝོ. དུགྒཏིསངྑཱཏཨུཔཔཏྟིབྷཝདུགྒཏིསཾཝཏྟནིཡཀམྨབྷཝཱ ཝིཔཏྟིབྷཝལོཀཝིཔཏྟིསམྦྷཝལོཀཱ.

པུན ཨེཀཀདུཀཱདིཝསེན ལོཀཾ ཝིབྷཛིཏྭཱ དསྶེཏུཾ ‘‘ཨེཀོ ལོཀོ’’ཏིཨཱདི ཝུཏྟཾ. ཨཱཧཱརཱདཡོ ཧི ལུཛྫནཔལུཛྫནཊྛེན ལོཀོཏི. ཏཏྠ ‘‘ཨེཀོ ལོཀོ སབྦེ སཏྟཱ ཨཱཧཱརཊྛིཏིཀཱ’’ཏི (དཱི. ནི. ༣.༣༠༣; ཨ. ནི. ༡༠.༢༧, ༢༨; པཊི. མ. ༡.༢, ༡༡༢, ༢༠༨) ཡཱཡཾ པུགྒལཱདྷིཊྛཱནཱཡ ཀཐཱཡ སབྦསངྑཱརཱནཾ པཙྩཡཱཡཏྟཝུཏྟིཏཱ ཝུཏྟཱ, ཏཱཡ སབྦོ སངྑཱརལོཀོ ཨེཀོ ཨེཀཝིདྷོ པཀཱརནྟརསྶཱབྷཱཝཏོ. ‘‘དྭེ ལོཀཱ’’ཏིཨཱདཱིསུཔི ཨིམིནཱ ¶ ནཡེན ཨཏྠོ ཝེདིཏབྦོ. ནཱམགྒཧཎེན ཙེཏྠ ནིབྦཱནསྶ ཨགྒཧཎཾ ཏསྶ ཨལོཀསབྷཱཝཏྟཱ. ནནུ ཙ ‘‘ཨཱཧཱརཊྛིཏིཀཱ’’ཏི ཨེཏྠ པཙྩཡཱཡཏྟཝུཏྟིཏཱཡ མགྒཕལཱནམྤི ལོཀཏཱ ཨཱཔཛྫཏཱིཏི? ནཱཔཛྫཏི པརིཉྙེཡྻཱནཾ དུཀྑསཙྩདྷམྨཱནཾ ‘‘ཨིདྷ ལོཀོ’’ཏི ཨདྷིཔྤེཏཏྟཱ. ཨཐ ཝཱ ན ལུཛྫཏི ན པལུཛྫཏཱིཏི ཡོ གཧིཏོ, ཏཐཱ ན ཧོཏི, སོ ལོཀོཏི ཏཾགཧཎརཧིཏཱནཾ ལོཀུཏྟརཱནཾ ནཏྠི ལོཀཏཱ. ཨུཔཱདཱནཱནཾ ཨཱརམྨཎབྷཱུཏཱ ཁནྡྷཱ ཨུཔཱདཱནཀྑནྡྷཱ. ཨནུརོདྷཱདིཝཏྠུབྷཱུཏཱ ལཱབྷཱདཡོ ཨཊྛ ལོཀདྷམྨཱ. དསཱཡཏནཱནཱིཏི དས རཱུཔཱཡཏནཱནི ཝིཝཊྚཛ྄ཛྷཱསཡསྶ ཨདྷིཔྤེཏཏྟཱ. ཏསྶ ཙ སབྦཾ ཏེབྷཱུམཀཀམྨཾ གརཧིཏབྦཾ, ཝཛྫིཏབྦཉྩ ཧུཏྭཱ ཨུཔཊྛཱཏཱིཏི ཝུཏྟཾ ‘‘སབྦེ ཨབྷིསངྑཱརཱ ཝཛྫཾ, སབྦེ བྷཝགཱམིཀམྨཱ ཝཛྫ’’ནྟི. ཡེསཾ ¶ པུགྒལཱནཾ སདྡྷཱདཡོ མནྡཱ, ཏེ ཨིདྷ ‘‘ཨསྶདྡྷཱ’’ཏིཨཱདིནཱ ཝུཏྟཱ. ན པན སབྦེན སབྦཾ སདྡྷཱདཱིནཾ ཨབྷཱཝཏོཏི ཨཔྤརཛཀྑདུཀཱདཱིསུ པཉྩསུ དུཀེསུ ཨེཀེཀསྨིཾ དས དས ཀཏྭཱ ‘‘པཉྙཱསཱཡ ཨཱཀཱརེཧི ཨིམཱནི པཉྩིནྡྲིཡཱནི ཛཱནཱཏཱི’’ཏི ཝུཏྟཾ. ཨཐ ཝཱ ཨནྭཡཏོ, བྱཏིརེཀཏོ ཙ སདྡྷཱདཱིནཾ ཨིནྡྲིཡཱནཾ པརོཔརིཡཏྟཾ ཛཱནཱཏཱིཏི ཀཏྭཱ ཏཐཱ ཝུཏྟཾ. ཨེཏྠ ཙ ཨཔྤརཛཀྑཱདིཝསེན ཨཱཝཛྫནྟསྶ བྷགཝཏོ ཏེ སཏྟཱ པུཉྫཔུཉྫཱཝ ཧུཏྭཱ ཨུཔཊྛཧནྟི, ན ཨེཀེཀཱ.

ཨུཔྤལཱནི ཨེཏྠ སནྟཱིཏི ཨུཔྤལིནཱི, གཙྪོཔི ཛལཱསཡོཔི, ཨིདྷ པན ཛལཱསཡོ ཨདྷིཔྤེཏོཏི ཨཱཧ ‘‘ཨུཔྤལཝནེ’’ཏི. ཡཱནི ཨུདཀསྶ ཨནྟོ ནིམུགྒཱནེཝ ཧུཏྭཱ པུསནྟི ཝཌྜྷནྟི, ཏཱནི ཨནྟོནིམུགྒཔོསཱིནཱི. དཱིཔིཏཱནཱིཏི ཨཊྛཀཐཱཡཾ པཀཱསིཏཱནི, ཨིདྷེཝ ཝཱ ‘‘ཨཉྙཱནིཔཱི’’ཏིཨཱདིནཱ དཱིཔིཏཱནི. ཨུགྒྷཊིཏཉྙཱུཏི ཨུགྒྷཊནཾ ནཱམ ཉཱཎུགྒྷཊནཾ, ཉཱཎེ ཨུགྒྷཊིཏམཏྟེ ཨེཝ ཛཱནཱཏཱིཏི ཨཏྠོ. ཝིཔཉྩིཏཾ ¶ ཝིཏྠཱརམེཝམཏྠཾ ཛཱནཱཏཱིཏི ཝིཔཉྩིཏཉྙཱུ. ཨུདྡེསཱདཱིཧི ནེཏབྦོཏི ནེཡྻོ. སཧ ཨུདཱཧཊཝེལཱཡཱཏི ཨུདཱཧཱརེ དྷམྨསྶ ཨུདྡེསེ ཨུདཱཧཊམཏྟེ ཨེཝ. དྷམྨཱབྷིསམཡོཏི ཙཏུསཙྩདྷམྨསྶ ཉཱཎེན སདྡྷིཾ ཨབྷིསམཡོ. ཨཡཾ ཝུཙྩཏཱིཏི ཨཡཾ ‘‘ཙཏྟཱརོ སཏིཔཊྛཱནཱ’’ཏིཨཱདིནཱ ¶ ནཡེན སངྑིཏྟེན མཱཏིཀཱཡ དཱིཔིཡམཱནཱཡ དེསནཱནུསཱརེན ཉཱཎཾ པེསེཏྭཱ ཨརཧཏྟཾ གཎྷིཏུཾ སམཏྠོ ‘‘པུགྒལོ ཨུགྒྷཊིཏཉྙཱུ’’ཏི ཝུཙྩཏི. ཨཡཾ ཝུཙྩཏཱིཏི ཨཡཾ སངྑིཏྟེན མཱཏིཀཾ ཋཔེཏྭཱ ཝིཏྠཱརེན ཨཏྠེ ཝིབྷཛིཡམཱནེ ཨརཧཏྟཾ པཱཔུཎིཏུཾ སམཏྠོ ‘‘པུགྒལོ ཝིཔཉྩིཏཉྙཱུ’’ཏི ཝུཙྩཏི. ཨུདྡེསཏོཏི ཨུདྡེསཧེཏུ, ཨུདྡིསནྟསྶ, ཨུདྡིསཱཔེནྟསྶ ཝཱཏི ཨཏྠོ. པརིཔུཙྪཏོཏི ཨཏྠཾ པརིཔུཙྪནྟསྶ. ཨནུཔུབྦེན དྷམྨཱབྷིསམཡོ ཧོཏཱིཏི ཨནུཀྐམེན ཨརཧཏྟཔྤཏྟོ ཧོཏི. ན ཏཱཡ ཛཱཏིཡཱ དྷམྨཱབྷིསམཡོ ཧོཏཱིཏི ཏེན ཨཏྟབྷཱཝེན མགྒཾ ཝཱ ཕལཾ ཝཱ ཨནྟམསོ ཛྷཱནཾ ཝཱ ཝིཔསྶནཾ ཝཱ ནིབྦཏྟེཏུཾ ན སཀྐོཏི. ཨཡཾ ཝུཙྩཏི པུགྒལོ པདཔརམོཏི ཨཡཾ པུགྒལོ བྱཉྫནཔདམེཝ པརམཾ ཨསྶཱཏི ‘‘པདཔརམོ’’ཏི ཝུཙྩཏི.

ཡེཏི ཡེ དུཝིདྷེ པུགྒལེ སནྡྷཱཡ ཝུཏྟཾ ཝིབྷངྒེ ཀམྨཱཝརཎེནཱཏི པཉྩཝིདྷེན ཨཱནནྟརིཡཀམྨེན. ཝིཔཱཀཱཝརཎེནཱཏི ཨཧེཏུཀཔཊིསནྡྷིཡཱ. ཡསྨཱ དུཧེཏུཀཱནམྤི ཨརིཡམགྒཔཊིཝེདྷོ ནཏྠི, ཏསྨཱ དུཧེཏུཀཔཊིསནྡྷིཔི ¶ ‘‘ཝིཔཱཀཱཝརཎམེཝཱ’’ཏི ཝེདིཏབྦཱ. ཀིལེསཱཝརཎེནཱཏི ནིཡཏམིཙྪཱདིཊྛིཡཱ. ཨསྶདྡྷཱཏི བུདྡྷཱདཱིསུ སདྡྷཱ རཧིཏཱ. ཨཙྪནྡིཀཱཏི ཀཏྟུཀམྱཏཱཀུསལཙྪནྡརཧིཏཱ, ཨུཏྟརཀུརུཀཱ མནུསྶཱ ཨཙྪནྡིཀཊྛཱནཾ པཝིཊྛཱ. དུཔྤཉྙཱཏི བྷཝངྒཔཉྙཱཡ པརིཧཱིནཱ, བྷཝངྒཔཉྙཱཡ པན པརིཔུཎྞཱཡཔི ཡསྶ བྷཝངྒཾ ལོཀུཏྟརསྶ པཙྩཡོ ན ཧོཏི, སོཔི དུཔྤཉྙོ ཨེཝ ནཱམ. ཨབྷབྦཱ ནིཡཱམཾ ཨོཀྐམིཏུཾ ཀུསལེསུ དྷམྨེསུ སམྨཏྟནྟི ¶ ཀུསལེསུ དྷམྨེསུ སམྨཏྟནིཡཱམསངྑཱཏཾ ཨརིཡམགྒཾ ཨོཀྐམིཏུཾ ཨདྷིགནྟུཾ ཨབྷབྦཱ. ‘‘ན ཀམྨཱཝརཎེནཱ’’ཏིཨཱདཱིནི ཝུཏྟཝིཔརིཡཱཡེན ཝེདིཏབྦཱནི.

‘‘རཱགཙརིཏཱ’’ཏིཨཱདཱིསུ ཡཾ ཝཏྟབྦཾ, ཏཾ པརམཏྠདཱིཔནིཡཾ [པརམཏྠམཉྫཱུསཱཡཾ ཝིསུདྡྷིམགྒསཾཝཎྞནཱཡནྟི བྷཝིཏབྦཾ –

‘‘སཱ ཨེསཱ པརམཏྠཱནཾ, ཏཏྠ ཏཏྠ ཡཐཱརཧཾ;

ནིདྷཱནཏོ པརམཏྠ-མཉྫཱུསཱ ནཱམ ནཱམཏོ’’ཏི. (ཝིསུདྡྷིམགྒམཧཱཊཱིཀཱཡ ནིགམནེ སཡམེཝ ཝུཏྟཏྟཱ)] ཝིསུདྡྷིམགྒསཾཝཎྞནཱཡཾ ཝུཏྟནཡེན ཝེདིཏབྦཾ;

༧༠. ཨཱརབྦྷཱཏི ཨཏྟནོ ཨདྷིཔྤེཏསྶ ཨཏྠསྶ བྷགཝཏོ ཛཱནཱཔནཾ ཨུདྡིསྶཱཏི ཨཏྠོ. སེལོ པབྦཏོ ཨུཙྩོ ཧོཏི ཐིརོ ཙ, ན པཾསུཔབྦཏོ, མིསྶཀཔབྦཏོ ཝཱཏི ཨཱཧ ‘‘སེལེ ཡཐཱ པབྦཏམུདྡྷནཱི’’ཏི. དྷམྨམཡཾ པཱསཱདནྟི ལོཀུཏྟརདྷམྨམཱཧ. སོ ཧི པབྦཏསདིསོ ཙ ཧོཏི སབྦདྷམྨེ ཨཏིཀྐམྨ ཨབྦྷུགྒཏཊྛེན པཱསཱདསདིསོ ཙ, པཉྙཱཔརིཡཱཡོ ཝཱ ཨིདྷ དྷམྨ-སདྡོ ¶ . སཱ ཧི ཨབྦྷུགྒཏཊྛེན པཱསཱདོཏི ཨབྷིདྷམྨེ (དྷ. ས. ཨཊྛ. ༡༦) ནིདྡིཊྛཱ. ཏཐཱ ཙཱཧ –

‘‘པཉྙཱཔཱསཱདམཱརུཡ྄ཧ, ཨསོཀོ སོཀིནིཾ པཛཾ;

པབྦཏཊྛོཝ བྷཱུམཊྛེ, དྷཱིརོ བཱལེ ཨཝེཀྑཏཱི’’ཏི. (དྷ. པ. ༢༨);

‘‘ཡཐཱ ཧཱི’’ཏིཨཱདཱིསུ ཡཐཱ པབྦཏེ ཋཏྭཱ རཏྟནྡྷཀཱརེ ཧེཊྛཱ ཨོལོཀེནྟསྶ པུརིསསྶ ཁེཏྟེ ཀེདཱརཔཱལི༹ཀུཊིཡོ, ཏཏྠ སཡིཏམནུསྶཱ ཙ ན པཉྙཱཡནྟི ཨནུཛྫལབྷཱཝཏོ. ཀུཊིཀཱསུ པན ཨགྒིཛཱལཱ པཉྙཱཡཏི ཨུཛྫལབྷཱཝཏོ ཨེཝཾ དྷམྨཔཱསཱདམཱརུཡ྄ཧ སཏྟལོཀཾ ཨོལོཀཡཏོ བྷགཝཏོ ཉཱཎསྶ ཨཱཔཱཐཾ ནཱགཙྪནྟི ཨཀཏཀལྱཱཎཱ སཏྟཱ ཉཱཎགྒིནཱ ཨནུཛྫལབྷཱཝཏོ, ཨནུལཱ༹རབྷཱཝཏོ ཙ རཏྟིཾ ཁིཏྟཱ སརཱ ¶ ཝིཡ ཧོནྟི. ཀཏཀལྱཱཎཱ པན བྷབྦཔུགྒལཱ དཱུརེ ཋིཏཱཔི བྷགཝཏོ ཉཱཎསྶ ཨཱཔཱཐཾ ཨཱགཙྪནྟི པརིཔཀྐཉཱཎགྒིཏཱཡ ¶ སམུཛྫལབྷཱཝཏོ, ཨུལཱ༹རསནྟཱནཏཱཡ ཧིམཝནྟཔབྦཏོ ཝིཡ ཙཱཏི ཨེཝཾ ཡོཛནཱ ཝེདིཏབྦཱ.

ཨུཊྛེཧཱིཏི ཏྭཾ དྷམྨདེསནཱཡ ཨཔྤོསྶུཀྐཏཱསངྑཱཏསངྐོཙཱཔཏྟིཏོ ཀིལཱསུབྷཱཝཏོ ཨུཊྛཧ. ཝཱིརིཡཝནྟཏཱཡཱཏི སཱཏིསཡ ཙཏུབྦིདྷསམྨཔྤདྷཱནཝཱིརིཡཝནྟཏཱཡ. ཝཱིརསྶ ཧི བྷཱཝོ, ཀམྨཾ ཝཱ ཝཱིརིཡཾ. ཀིལེསམཱརསྶ ཝིཡ མཙྩུམཱརསྶཔི ཨཱཡཏིཾ ཨསམྦྷཝཏོ ‘‘མཙྩུཀིལེསམཱརཱན’’ནྟི ཝུཏྟཾ. ཨབྷིསངྑཱརམཱརཝིཛཡསྶ ཨགྒཧཎཾ ཀིལེསམཱརཝིཛཡེནེཝ ཏབྦིཛཡསྶ ཛོཏིཏབྷཱཝཏོ. ཝཱཧནསམཏྠཏཱཡཱཏི སཾསཱརམཧཱཀནྟཱརཏོ ནིབྦཱནསངྑཱཏཾ ཁེམཔྤདེསཾ སམྤཱཔནསམཏྠཏཱཡ.

༧༡. ‘‘ཨཔཱརུཏཾ ཏེསཾ ཨམཏསྶ དྭཱར’’ནྟི ཀེཙི པཋནྟི. ནིབྦཱནསྶ དྭཱརཾ པཝིསནམགྒོ ཝིཝརིཏྭཱ ཋཔིཏོ མཧཱཀརུཎཱུཔནིསྶཡེན སཡམྦྷུཉཱཎེན ཨདྷིགཏཏྟཱ. སདྡྷཾ པམུཉྩནྟཱུཏི སདྡྷཾ པཝེདེནྟུ, ཨཏྟནོ སདྡཧནཱཀཱརཾ ཨུཔཊྛཱཔེནྟཱུཏི ཨཏྠོ. སུཁེན ཨཀིཙྪེན པཝཏྟནཱིཡཏཱཡ སུཔྤཝཏྟིཏཾ. ན བྷཱསིཾ ན བྷཱསིསྶཱམཱིཏི ཙིནྟེསི.

ཨགྒསཱཝཀཡུགཝཎྞནཱ

༧༣. སལླཔིཏྭཱཏི ‘‘ཝིཔྤསནྣཱནི ཁོ ཏེ ཨཱཝུསོ ཨིནྡྲིཡཱནཱི’’ཏིཨཱདིནཱ (མཧཱཝ. ༦༠) ཨཱལཱཔསལླཱཔཾ ཀཏྭཱ. ཏཉྷིསྶ ཨཔརབྷཱགེ སཏྠུ སནྟིཀཾ ཨུཔསངྐམནསྶ པཙྩཡོ ཨཧོསི.

༧༥-༦. ཨནུཔུབྦིཾ ¶ ཀཐནྟི ཨནུཔུབྦིཡཱ ཨནུཔུབྦཾ ཀཐེཏབྦཾ ཀཐཾ. ཀཱ པན སཱཏི? དཱནཱདིཀཐཱ. ཏཏྠ དཱནཀཐཱ ཏཱཝ པཙུརཛནེསུ པཝཏྟིཡཱ སབྦསཱདྷཱརཎཏྟཱ, སུཀརཏྟཱ, སཱིལེ པཏིཊྛཱནསྶ ཨུཔཱཡབྷཱཝཏོ ཙ ཨཱདིཏོ ཀཐིཏཱ. པརིཙྩཱགསཱིལོ ཧི པུགྒལོ པརིགྒཧཝཏྠཱུསུ ¶ ནིསྶངྒབྷཱཝཏོ སུཁེནེཝ སཱིལཱནི སམཱདིཡཏི, ཏཏྠ ཙ སུཔྤཏིཊྛིཏོ ཧོཏི. སཱིལེན དཱཡཀཔཊིགྒཱཧཀཝིསུདྡྷིཏོ པརཱནུགྒཧཾ ཝཏྭཱ པརཔཱིལཱ༹ནིཝཏྟིཝཙནཏོ, ཀིརིཡདྷམྨཾ ཝཏྭཱ ཨཀིརིཡདྷམྨཝཙནཏོ, བྷོགསམྤཏྟིཧེཏུཾ ¶ ཝཏྭཱ བྷཝསམྤཏྟིཧེཏུཝཙནཏོ ཙ དཱནཀཐཱནནྟརཾ སཱིལཀཐཱ ཀཐིཏཱ, ཏཉྩེ དཱནསཱིལཾ ཝཊྚནིསྶིཏཾ, ཨཡཾ བྷཝསམྤཏྟི ཏསྶ ཕལནྟི དསྶནཏྠཾ, ཨིམེཧི ཙ དཱནསཱིལམཡེཧི པཎཱིཏཔཎཱིཏཏརཱདིབྷེདབྷིནྣེཧི པུཉྙཀིརིཡཝཏྠཱུཧི ཨེཏཱ ཙཱཏུམཧཱརཱཛིཀཱདཱིསུ པཎཱིཏཔཎཱིཏཏརཱདིབྷེདབྷིནྣཱ ཨཔརིམེཡྻཱ དིབྦབྷོགབྷཝསམྤཏྟིཡོ ཧོནྟཱིཏི དསྶནཏྠཾ ཏདནནྟརཾ སགྒཀཐཾ. ཝཏྭཱ ཨཡཾ སགྒོ རཱགཱདཱིཧི ཨུཔཀྐིལིཊྛོ, སབྦདཱ ཨནུཔཀྐིལིཊྛོ ཨརིཡམགྒོཏི དསྶནཏྠཾ སགྒཱནནྟརཾ མགྒཀཐཱ ཀཐེཏབྦཱ. མགྒཉྩ ཀཐེནྟེན ཏདདྷིགམུཔཱཡདསྶནཏྠཾ སགྒཔརིཡཱཔནྣཱཔི, པགེཝ ཨིཏརེ སབྦེཔི ཀཱམཱ ནཱམ བཧྭཱདཱིནཝཱ, ཨནིཙྩཱ ཨདྷུཝཱ, ཝིཔརིཎཱམདྷམྨཱཏི ཀཱམཱནཾ ཨཱདཱིནཝོ, ཧཱིནཱ, གམྨཱ, པོཐུཛྫནིཀཱ, ཨནརིཡཱ, ཨནཏྠསཉྷིཏཱཏི ཏེསཾ ཨོཀཱརོ ལཱམཀབྷཱཝོ, སབྦེཔི བྷཝཱ ཀིལེསཱནཾ ཝཏྠུབྷཱུཏཱཏི ཏཏྠ སཾཀིལེསོ, སབྦསོ ཀིལེསཝིཔྤམུཏྟཾ ནིབྦཱནནྟི ནེཀྑམྨེ ཨཱནིསཾསོ ཙ ཀཐེཏབྦོཏི ཨཡམཏྠོ མགྒནྟཱིཏི ཨེཏྠ ཨིཏི-སདྡེན ཨཱདིཨཏྠཛོཏཀེན བོདྷིཏོཏི ཝེདིཏབྦཾ.

སུཁཱནཾ ནིདཱནནྟི དིཊྛདྷམྨིཀཱནཾ, སམྤརཱཡིཀཱནཾ, ནིབྦཱནཔཊིསཾཡུཏྟཱནཉྩཱཏི སབྦེསམྤི སུཁཱནཾ ཀཱརཎཾ. ཡཉྷི ཀིཉྩི ལོཀེ བྷོགསུཁཾ ནཱམ, ཏཾ སབྦཾ དཱནནིདཱནནྟི པཱཀཊོ ཡམཏྠོ. ཡཾ པན ཏཾ ¶ ཛྷཱནཝིཔསྶནཱམགྒཕལནིབྦཱནཔཊིསཾཡུཏྟཾ སུཁཾ, ཏསྶཱཔི དཱནཾ ཨུཔནིསྶཡཔཙྩཡོ ཧོཏིཡེཝ. སམྤཏྟཱིནཾ མཱུལནྟི ཡཱ ཨིམཱ ལོཀེ པདེསརཛྫཾ སིརིསྶརིཡཾ སཏྟརཏནསམུཛྫལཙཀྐཝཏྟིསམྤདཱཏི ཨེཝཾཔབྷེདཱ མཱནུསིཀཱ སམྤཏྟིཡོ, ཡཱ ཙ ཙཱཏུམཧཱརཱཛིཀཙཱཏུམཧཱརཱཛཱདིབྷེདཱ དིབྦསམྤཏྟིཡོ, ཡཱ ཝཱ པནཉྙཱཔི སམྤཏྟིཡོ, ཏཱསཾ སབྦཱསཾ ཨིདཾ དཱནཾ ནཱམ མཱུལཾ ཀཱརཎཾ. བྷོགཱནནྟི བྷུཉྫིཏབྦཊྛེན ‘‘བྷོགོ’’ཏི ལདྡྷནཱམཱནཾ མནཱཔིཡརཱུཔཱདཱིནཾ, ཏནྣིསྶཡཱནཉྩ ཨུཔབྷོགསུཁཱནཾ. ཨཝསྶཡཊྛེན པཏིཊྛཱ. ཝིསམགཏསྶཱཏི བྱསནཔྤཏྟསྶ. ཏཱཎནྟི རཀྑཱ ཏཏོ པརིཔཱལནཏོ. ལེཎནྟི བྱསནེཧི པརིཔཱཙིཡམཱནསྶ ཨོལཱིཡནཔདེསོ. གཏཱིཏི གནྟབྦཊྛཱནཾ. པརཱཡཎནྟི པཊིསརཎཾ. ཨཝསྶཡོཏི ཝིནིཔཏིཏུཾ ཨདེནྟོ ནིསྶཡོ. ཨཱརམྨཎནྟི ཨོལུབྦྷཱརམྨཎཾ.

རཏནམཡསཱིཧཱསནསདིསནྟི སབྦརཏནམཡསཏྟངྒམཧཱསཱིཧཱསནསདིསཾ མཧགྒྷཾ ཧུཏྭཱ སབྦསོ ཝིནིཔཏིཏུཾ ¶ ཨཔྤདཱནཏོ. མཧཱཔཐཝིསདིསཾ གཏགཏཊྛཱནེ ¶ པཏིཊྛཱཡ ལབྷཱཔནཏོ. ཨཱལམྦནརཛྫུསདིསནྟི ཡཐཱ དུབྦལསྶ པུརིསསྶ ཨཱལམྦནརཛྫུ ཨུཏྟིཊྛཏོ, ཏིཊྛཏོ ཙ ཨུཔཏྠམྦྷོ, ཨེཝཾ དཱནཾ སཏྟཱནཾ སམྤཏྟིབྷཝེ ཨུཔྤཏྟིཡཱ, ཋིཏིཡཱ ཙ པཙྩཡབྷཱཝཏོ. དུཀྑནིཏྠརཎཊྛེནཱཏི དུགྒཏིདུཀྑནིཏྠརཎཊྛེན. སམསྶཱསནཊྛེནཱཏི ¶ ལོབྷམཙྪརིཡཱདིཔཊིསཏྟུཔདྡཝཏོ སམྨདེཝ ཨསྶཱསནཊྛེན. བྷཡཔརིཏྟཱཎཊྛེནཱཏི དཱལིདྡིཡབྷཡཏོ པརིཔཱལནཊྛེན. མཙྪེརམལཱདཱིཧཱིཏི མཙྪེརལོབྷདོསཨིསྶཱཝིཙིཀིཙྪཱདིཊྛི ཨཱདིཙིཏྟམལེཧི. ཨནུཔལིཏྟཊྛེནཱཏི ཨནུཔཀྐིལིཊྛཏཱཡ. ཏེསནྟི མཙྪེརམལཱདིཀཙཝརཱནཾ. ཨེཏེཧི ཨེཝ དུརཱསདཊྛེན. ཨསནྟཱསནཊྛེནཱཏི ཨནབྷིབྷཝནཱིཡཏཱཡ སནྟཱསཱབྷཱཝེན. ཡོ ཧི དཱཡཀོ དཱནཔཏི, སོ སམྤཏིཔི ཀུཏོཙི ན བྷཱཡཏི, པགེཝ ཨཱཡཏིཾ. དྷམྨསཱིསེན པུགྒལོ ཝུཏྟོ. བལཝནྟཊྛེནཱཏི མཧཱབལཝཏཱཡ. དཱཡཀོ ཧི དཱནཔཏི སམྤཏི པཀྑབལེན བལཝཱ ཧོཏི, ཨཱཡཏིཾ པན ཀཱཡབལཱདཱིཧིཔི. ཨབྷིམངྒལསམྨཏཊྛེནཱཏི ‘‘ཝཌྜྷིཀཱརཎ’’ནྟི ཨབྷིསམྨཏབྷཱཝེན. ཝིཔཏྟིབྷཝཏོ སམྤཏྟིབྷཝཱུཔནཡནཾ ཁེམནྟབྷཱུམིསམྤཱཔནཾ, བྷཝསངྒཱམཏོ ཡོགཀྑེམསམྤཱཔནཉྩ ཁེམནྟབྷཱུམིསམྤཱཔནཊྛོ.

ཨིདཱནི དཱནཾ ཝཊྚགཏཱ ཨུཀྐཾསཔྤཏྟཱ སམྤཏྟིཡོ ཝིཡ ཝིཝཊྚགཏཱཔི ཏཱ སམྤཱདེཏཱིཏི བོདྷིཙརིཡབྷཱཝེནཔི དཱནགུཎེ དསྶེཏུཾ ‘‘དཱནཉྷཱི’’ཏིཨཱདི ཝུཏྟཾ. ཏཏྠ སཀྐམཱརབྲཧྨསམྤཏྟིཡོ ཨཏྟཧིཏཱཡ ཨེཝ, ཙཀྐཝཏྟིསམྤཏྟི པན ཨཏྟཧིཏཱཡ, པརཧིཏཱཡ ཙཱཏི དསྶེཏུཾ སཱ ཏཱསཾ པརཏོ ཝུཏྟཱ, ཨེཏཱ ལོཀིཡཱ, ཨིམཱ པན ལོཀུཏྟརཱཏི དསྶེཏུཾ ཏཏོ པརཾ ‘‘སཱཝཀཔཱརམཱིཉཱཎ’’ནྟིཨཱདི ཝུཏྟཾ. ཏཏྠཱཔི ཨུཀྐཊྛུཀྐཊྛཏརུཀྐཊྛཏམཱཏི དསྶེཏུཾ ཀམེན ཉཱཎཏྟཡཾ ཝུཏྟཾ. ཏེསཾ པན དཱནསྶ པཙྩཡབྷཱཝོ ཧེཊྛཱ ཝུཏྟོ ཨེཝ. ཨེཏེནེཝསྶ བྲཧྨསམྤཏྟིཡཱཔི པཙྩཡབྷཱཝོ དཱིཔིཏོཏི ཝེདིཏབྦོ.

དཱནཉྩ ནཱམ དཀྑིཎེཡྻེསུ ཧིཏཛ྄ཛྷཱསཡེན ཝཱ པཱུཛནཛ྄ཛྷཱསཡེན ཝཱ ཨཏྟནོ སནྟཀསྶ པརེསཾ པརིཙྩཛནཾ, ཏསྨཱ དཱཡཀོ སཏྟེསུ ཨེཀནྟཧིཏཛ྄ཛྷཱསཡོ པུརིསཔུགྒལོ, སོ ‘‘པརེསཾ ཧིཾསཏི, པརེསཾ ཝཱ སནྟཀཾ ཧརཏཱི’’ཏི ཨཊྛཱནམེཏནྟི ཨཱཧ ‘‘དཱནཾ དདནྟོ སཱིལཾ སམཱདཱཏུཾ སཀྐོཏཱི’’ཏི. སཱིལསདིསོ ཨལངྐཱརོ ནཏྠཱིཏི ཨཀིཏྟིམཾ ཧུཏྭཱ སབྦཀཱལཾ སོབྷཱཝིསེསཱཝཧཏྟཱ. སཱིལཔུཔྥསདིསཾ པུཔྥཾ ནཏྠཱིཏི ཨེཏྠཱཔི ¶ ཨེསེཝ ནཡོ. སཱིལགནྡྷསདིསོ གནྡྷོ ནཏྠཱིཏི ཨེཏྠ ‘‘ཙནྡནཾ ¶ ཏགརཾ ཝཱཔཱི’’ཏིཨཱདིཀཱ (དྷ. པ. ༥༥) གཱཐཱ, ‘‘གནྡྷོ ཨིསཱིནཾ ཙིརདིཀྑིཏཱནཾ, ཀཱཡཱ ཙུཏོ གཙྪཏི མཱལུཏེནཱ’’ཏིཨཱདིཀཱ (ཛཱ. ༢.༡༧.༥༥) ཙ ཝཏྟབྦཱ ¶ . སཱིལཉྷི སཏྟཱནཾ ཨཱབྷརཎཉྩེཝ ཨལངྐཱརོ ཙ གནྡྷཝིལེཔནཉྩ པརསྶ དསྶནཱིཡབྷཱཝཱཝཧཉྩ. ཏེནཱཧ ‘‘སཱིལཱལངྐཱརེན ཧཱི’’ཏིཨཱདི.

‘‘ཨཡཾ སགྒོ ལབྦྷཏཱི’’ཏི ཨིདཾ མཛ྄ཛྷིམེཧི ཚནྡཱདཱིཧི ཨཱརདྡྷཾ སཱིལཾ སནྡྷཱཡཱཧ. ཏེནཱཧ སཀྐོ དེཝརཱཛཱ –

‘‘ཧཱིནེན བྲཧྨཙརིཡེན, ཁཏྟིཡེ ཨུཔཔཛྫཏི;

མཛ྄ཛྷིམེན ཙ དེཝཏྟཾ, ཨུཏྟམེན ཝིསུཛ྄ཛྷཏཱི’’ཏི. (ཛཱ. ༢.༢༢.༤༢༩);

ཨིཊྛོཏི སུཁོ, ཀནྟོཏི ཀམནཱིཡོ, མནཱཔོཏི མནཝཌྜྷནཀོ, ཏཾ པནསྶ ཨིཊྛཱདིབྷཱཝཾ དསྶེཏུཾ ‘‘ནིཙྩམེཏྠ ཀཱིལཱ༹’’ཏིཨཱདི ཝུཏྟཾ. ནིཙྩནྟི སབྦཀཱལཾ ཀཱིལཱ༹ཏི ཀཱམཱུཔསཾཧིཏཱ སུཁཝིཧཱརཱ. སམྤཏྟིཡོཏི བྷོགསམྤཏྟིཡོ. དིབྦནྟི དིབྦབྷཝཾ དེཝལོཀཔརིཡཱཔནྣཾ. སུཁནྟི ཀཱཡིཀཾ, ཙེཏསིཀཉྩ སུཁཾ. དིབྦསམྤཏྟིནྟི དིབྦབྷཝཾ ཨཱཡུསམྤཏྟིཾ, ཝཎྞཡསཨིསྶརིཡསམྤཏྟིཾ, རཱུཔཱདིསམྤཏྟིཉྩ. ཨེཝམཱདཱིཏི ཨཱདི-སདྡེན ཡཱམཱདཱིཧི ཨནུབྷཝིཏབྦཾ དིབྦསམྤཏྟིཾ ཝདཏི.

ཨཔྤསྶཱདཱཏི ནིརསྶཱདཱ པཎྜིཏེཧི ཡཐཱབྷཱུཏཾ པསྶནྟེཧི ཏཏྠ ཨསྶཱདེཏབྦཏཱབྷཱཝཏོ. བཧུདུཀྑཱཏི མཧཱདུཀྑཱ སམྤཏི, ཨཱཡཏིཉྩ ཝིཔུལདུཀྑཱནུབནྡྷཏྟཱ. བཧུཔཱཡཱསཱཏི ཨནེཀཝིདྷཔརིསྶཡཱ. ཨེཏྠཱཏི ཀཱམེསུ. བྷིཡྻོཏི བཧུཾ. དོསོཏི ཨནིཙྩཏཱདིནཱ, ཨཔྤསྶཱདཏཱདིནཱ ཙ དཱུསིཏབྷཱཝོ, ཡཏོ ཏེ ཝིཉྙཱུནཾ ཙིཏྟཾ ནཱརཱདྷེནྟི. ཨཐ ཝཱ ཨཱདཱིནཾ ཝཱཏི པཝཏྟཏཱིཏི ཨཱདཱིནཝོ, པརམཀཔཎཏཱ, ཏཐཱ ¶ ཙ ཀཱམཱ ཡཐཱབྷཱུཏཾ པཙྩཝེཀྑནྟཱནཾ པཙྩུཔཏིཊྛནྟི. ལཱམཀབྷཱཝོཏི ནིཧཱིནབྷཱཝོ ཨསེཊྛེཧི སེཝིཏབྦཏྟཱ, སེཊྛེཧི ན སེཝིཏབྦཏྟཱ ཙ. སཾཀིལིསྶནནྟི ཝིབཱདྷེཏབྦཏཱ ཨུཔཏཱཔེཏབྦཏཱ. ནེཀྑམྨེ ཨཱནིསཾསནྟི ཨེཏྠ ཡཏྟཀཱ ཀཱམེསུ ཨཱདཱིནཝཱ, ཏཔྤཊིཔཀྑཏོ ཏཏྟཀཱ ནེཀྑམྨེ ཨཱནིསཾསཱ. ཨཔི ཙ ‘‘ནེཀྑམྨཾ ནཱམེཏཾ ཨསམྦཱདྷཾ ཨསཾཀིལིཊྛཾ, ནིཀྑནྟཾ ཀཱམེཧི, ནིཀྑནྟཾ ཀཱམསཉྙཱཡ, ནིཀྑནྟཾ ཀཱམཝིཏཀྐེཧི, ནིཀྑནྟཾ ཀཱམཔརིལཱ༹ཧེཧི, ནིཀྑནྟཾ བྱཱཔཱདཏོ’’ཏིཨཱདིནཱ ¶ (སཱརཏྠ. ཊཱི. ༣.༢༦ མཧཱཝགྒེ) ནཡེན ནེཀྑམྨེ ཨཱནིསཾསེ པཀཱསེསི, པབྦཛྫཱཡ, ཛྷཱནཱདཱིསུ ཙ གུཎེ ཝིབྷཱཝེསི ཝཎྞེསི.

ཝུཏྟནཡནྟི ཨེཏྠ ཡཾ ཨཝུཏྟནཡཾ ‘‘ཀལླཙིཏྟེ’’ཏིཨཱདི, ཏཏྠ ཀལླཙིཏྟེཏི ཀམྨནིཡཙིཏྟེ, ཧེཊྛཱ ¶ པཝཏྟིཏདེསནཱཡ ཨསྶདྡྷིཡཱདཱིནཾ ཙིཏྟདོསཱནཾ ཝིགཏཏྟཱ ཨུཔརིདེསནཱཡ བྷཱཛནབྷཱཝཱུཔགམནེན ཀམྨཀྑམཙིཏྟེཏི ཨཏྠོ. ཨསྶདྡྷིཡཱདཡོ ཧི ཡསྨཱ ཙིཏྟསྶ རོགབྷཱུཏཱ ཏདཱ ཏེ ཝིགཏཱ, ཏསྨཱ ཨརོགཙིཏྟེཏི ཨཏྠོ. དིཊྛིམཱནཱདིཀིལེསཝིགམནེན མུདུཙིཏྟེ. ཀཱམཙྪནྡཱདིཝིགམེན ཝིནཱིཝརཎཙིཏྟེ. སམྨཱཔཊིཔཏྟིཡཾ ཨུལཱ༹རཔཱིཏིཔཱམོཛྫཡོགེན ཨུདགྒཙིཏྟེ. ཏཏྠ སདྡྷཱསམྤཏྟིཡཱ པསནྣཙིཏྟེ. ཡདཱ ཙ བྷགཝཱ ཨཉྙཱསཱིཏི སམྦནྡྷོ. ཨཐ ཝཱ ཀལླཙིཏྟེཏི ཀཱམཙྪནྡཝིགམེན ཨརོགཙིཏྟེ. མུདུཙིཏྟེཏི བྱཱཔཱདཝིགམེན མེཏྟཱཝསེན ཨཀཐིནཙིཏྟེ. ཝིནཱིཝརཎཙིཏྟེཏི ཨུདྡྷཙྩཀུཀྐུཙྩཝིགམེན ཝིཀྑེཔསྶ ཝིགཏཏྟཱ ཏེན ཨཔིཧིཏཙིཏྟེ. ཨུདགྒཙིཏྟེཏི ཐིནམིདྡྷཝིགམེན ¶ སམྤགྒཧིཏཝསེན ཨལཱིནཙིཏྟེ. པསནྣཙིཏྟེཏི ཝིཙིཀིཙྪཱཝིགམེན སམྨཱཔཊིཔཏྟིཡཾ ཨདྷིམུཏྟཙིཏྟེ, ཨེཝམྤེཏྠ ཨཏྠོ ཝེདིཏབྦོ.

‘‘སེཡྻཐཱཔཱི’’ཏིཨཱདིནཱ ཨུཔམཱཝསེན ནེསཾ སཾཀིལེསཔྤཧཱནཾ, ཨརིཡམགྒུཔྤཱདཉྩ དསྶེཏི. ཨཔགཏཀཱལ༹ཀནྟི ཝིགཏཀཱལ༹ཀཾ. སམྨདེཝཱཏི སུཊྛུ ཨེཝ. རཛནནྟི ནཱིལཔཱིཏཱདིརངྒཛཱཏཾ. པཊིགྒཎྷེཡྻཱཏི གཎྷེཡྻ པབྷསྶརཾ བྷཝེཡྻ. ཏསྨིཾཡེཝ ཨཱསནེཏི ཏིསྶམེཝ ནིསཛྫཱཡཾ, ཨེཏེན ནེསཾ ལཧུཝིཔསྶཀཏཱ, ཏིཀྑཔཉྙཏཱ, སུཁཔཊིཔདཱཁིཔྤཱབྷིཉྙཏཱ ཙ དསྶིཏཱ ཧོཏི. ཝིརཛནྟི ཨཔཱཡགམནཱིཡརཱགརཛཱདཱིནཾ ཝིགམེན ཝིརཛཾ. ཨནཝསེསདིཊྛིཝིཙིཀིཙྪཱམལཱཔགམནེན ཝཱིཏམལཾ. པཋམམགྒཝཛ྄ཛྷཀིལེསརཛཱབྷཱཝེན ཝཱ ཝིརཛཾ. པཉྩཝིདྷདུསྶཱིལྱམལཱཔགམནེན ཝཱིཏམལཾ. དྷམྨཙཀྑུནྟི བྲཧྨཱཡུསུཏྟེ (མ. ནི. ༢.༣༨༣) ཧེཊྛིམཱ ཏཡོ མགྒཱ ཝུཏྟཱ, ཙཱུལ༹རཱཧུལོཝཱདེ (མ. ནི. ༣.༤༡༦) ཨཱསཝཀྑཡོ, ཨིདྷ པན སོཏཱཔཏྟིམགྒོ ཨདྷིཔྤེཏོ. ‘‘ཡཾ ཀིཉྩི སམུདཡདྷམྨཾ, སབྦཾ ཏཾ ནིརོདྷདྷམྨ’’ནྟི ཏསྶ ཨུཔྤཏྟིཨཱཀཱརདསྶནནྟི. ནནུ ཙ མགྒཉཱཎཾ ཨསངྑཏདྷམྨཱརམྨཎཾ, ན སངྑཏདྷམྨཱརམྨཎནྟི? སཙྩམེཏཾ. ཡསྨཱ ཏཾ ནིརོདྷཾ ཨཱརམྨཎཾ ཀཏྭཱ ཀིཙྩཝསེན སབྦསངྑཏཾ པཊིཝིཛ྄ཛྷནྟཾ ཨུཔྤཛྫཏི, ཏསྨཱ ཏཐཱ ཝུཏྟཾ.

‘‘སུདྡྷཾ ཝཏྠ’’ནྟི ནིདསྶིཏཨུཔམཱཡཾ ཨིདཾ ཨུཔམཱསཾསནྡནཾ ཝཏྠཾ ཝིཡ ཙིཏྟཾ, ཝཏྠསྶ ཨཱགནྟུཀམལེཧི ཀིལིཊྛབྷཱཝོ ཝིཡ ཙིཏྟསྶ རཱགཱདིམལེཧི སཾཀིལིཊྛབྷཱཝོ ¶ , དྷོཝནསིལཱ ཝིཡ ཨནུཔུབྦིཀཐཱ, ཨུདཀཾ ཝིཡ སདྡྷཱ, ཨུདཀེ ཏེམེཏྭཱ ཨཱུསགོམཡཚཱརིཀཱབྷརེཧི ཀཱལ༹ཀཔདེསེ སམུཙྪིནྡིཏྭཱ ཝཏྠསྶ དྷོཝནཔཡོགོ ¶ ཝིཡ སདྡྷཱསིནེཧེན ཏེམེཏྭཱ ཏེམེཏྭཱ སཏིསམཱདྷིཔཉྙཱཧི དོསེ སིཐིལཱི ཀཏྭཱ སུཏཱདིཝིདྷིནཱ ཙིཏྟསྶ སོདྷནེ ཝཱིརིཡཱརམྦྷོ, ཏེན པཡོགེན ཝཏྠེ ནཱནཱཀཱལ༹ཀཱཔགམོ ཝིཡ ཝཱིརིཡཱརམྦྷེན ཀིལེསཝིཀྑམྦྷནཾ, རངྒཛཱཏཾ ཝིཡ ཨརིཡམགྒོ, ཏེན སུདྡྷསྶ ཝཏྠསྶ པབྷསྶརབྷཱཝོ ཝིཡ ཝིཀྑམྦྷིཏཀིལེསསྶ ཙིཏྟསྶ མགྒེན པརིཡོདཔནནྟི. ‘‘དིཊྛདྷམྨཱ’’ཏི ¶ ཝཏྭཱ དསྶནཾ ནཱམ ཉཱཎདསྶནཏོ ཨཉྙམྤི ཨཏྠཱིཏི ཏཾ ནིཝཏྟནཏྠཾ ‘‘པཏྟདྷམྨཱ’’ཏི ཝུཏྟཾ. པཏྟི ཙ ཉཱཎསམྤཏྟིཏོ ཨཉྙམྤི ཝིཛྫཏཱིཏི ཏཏོ ཝིསེསདསྶནཏྠཾ ‘‘ཝིདིཏདྷམྨཱ’’ཏི ཝུཏྟཾ. སཱ པན ཝིདིཏདྷམྨཏཱ དྷམྨེསུ ཨེཀདེསེནཱཔི ཧོཏཱིཏི ནིཔྤདེསཏོ ཝིདིཏབྷཱཝཾ དསྶེཏུཾ ‘‘པརིཡོགཱལ༹ྷདྷམྨཱ’’ཏི ཝུཏྟཾ, ཏེན ནེསཾ སཙྩཱབྷིསམྦོདྷིཾཡེཝ ཝིབྷཱཝེཏི. མགྒཉཱཎཉྷི ཨེཀཱབྷིསམཡཝསེན པརིཉྙཱདིཀིཙྩཾ སཱདྷེནྟཾ ནིཔྤདེསཏོཝ ཙཏུསཙྩདྷམྨཾ སམནྟཏོ ཨོགཱཧནྟཾ པཊིཝིཛ྄ཛྷཏཱིཏི. སེསཾ ཧེཊྛཱ ཝུཏྟནཡམེཝ.

༧༧. ཙཱིཝརདཱནཱདཱིནཱིཏི ཙཱིཝརཱདིཔརིཀྑཱརདཱནཾ སནྡྷཱཡཱཧ. ཡོ ཧི ཙཱིཝརཱདིཀེ ཨཊྛ པརིཀྑཱརེ, པཏྟཙཱིཝརམེཝ ཝཱ སོཏཱཔནྣཱདིཨརིཡསྶ, པུཐུཛྫནསྶེཝ ཝཱ སཱིལསམྤནྣསྶ དཏྭཱ ‘‘ཨིདཾ པརིཀྑཱརདཱནཾ ཨནཱགཏེ ཨེཧིབྷིཀྑུབྷཱཝཱཡ པཙྩཡོ ཧོཏཱུ’’ཏི པཏྠནཾ པཊྛཔེསི, ཏསྶ ཙ སཏི ཨདྷིཀཱརསམྤཏྟིཡཾ བུདྡྷཱནཾ སམྨུཁཱིབྷཱཝེ ཨིདྡྷིམཡཔརིཀྑཱརལཱབྷཱཡ སཾཝཏྟཏཱིཏི ཝེདིཏབྦཾ. ཝསྶསཏིཀཏྠེརཱ ཝིཡ ཨཱཀཔྤསམྤནྣཱཏི ཨདྷིཔྤཱཡོ.

སནྡསྶེསཱིཏི སུཊྛུ པཙྩཀྑཾ ཀཏྭཱ དསྶེསི. ཨིདྷལོཀཏྠནྟི ཨིདྷལོཀབྷཱུཏཾ ཁནྡྷཔཉྩཀསངྑཱཏམཏྠཾ. པརལོཀཏྠནྟི ཨེཏྠཱཔི ཨེསེཝ ནཡོ. དསྶེསཱིཏི སཱམཉྙལཀྑཎཏོ, སལཀྑཎཏོ ཙ དསྶེསི. ཏེནཱཧ ‘‘ཨནིཙྩ’’ནྟིཨཱདི. ཏཏྠ ཧུཏྭཱ ཨབྷཱཝཏོ ཨནིཙྩནྟི དསྶེསི. ཨུདཡབྦཡཔཊིཔཱིལ༹ནཏོ དུཀྑནྟི དསྶེསི. ཨཝསཝཏྟནཏོ ཨནཏྟཱཏི དསྶེསི. ཨིམེ རུཔྤནཱདིལཀྑཎཱ པཉྩཀྑནྡྷཱཏི རཱསཊྛེན ཁནྡྷེ དསྶེསི. ཨིམེ ཙཀྑཱདིསབྷཱཝཱ ¶ ནིསྶཏྟནིཛྫཱིཝཊྛེན ཨཊྛཱརས དྷཱཏུཡོཏི དསྶེསི. ཨིམཱནི ཙཀྑཱདིསབྷཱཝཱནེཝ དྭཱརཱརམྨཎབྷཱུཏཱནི དྭཱདས ཨཱཡཏནཱནཱིཏི དསྶེསི. ཨིམེ ¶ ཨཝིཛྫཱདཡོ ཛརཱམརཎཔརིཡོསཱནཱ དྭཱདས པཙྩཡདྷམྨཱ པཊིཙྩསམུཔྤཱདོཏི དསྶེསི. རཱུཔཀྑནྡྷསྶ ཧེཊྛཱ ཝུཏྟནཡེན པཙྩཡཏོ ཙཏྟཱརི, ཁཎཏོ ཨེཀནྟི ཨིམཱནི པཉྩ ལཀྑཎཱནི དསྶེསི. ཏཐཱཏི ཨིམིནཱ ‘‘པཉྩ ལཀྑཎཱནཱི’’ཏི པདཾ ཨཱཀཌྜྷཏི. དསྶེནྟོཏི ཨིཏི-སདྡོ ནིདསྶནཏྠོ, ཨེཝནྟི ཨཏྠོ. ནིརཡནྟི ཨཊྛམཧཱནིརཡསོལ༹སཨུསྶདནིརཡཔྤབྷེདཾ སབྦསོ ནིརཡཾ དསྶེསི. ཏིརཙྪཱནཡོནིནྟི ཨཔདདྭིཔདཙཏུཔྤདབཧུཔྤདཱདིབྷེདཾ མིགཔསུཔཀྑིསརཱིསཔཱདིཝིབྷཱགཾ ནཱནཱཝིདྷཾ ཏིརཙྪཱནལོཀཾ. པེཏྟིཝིསཡནྟི ཁུཔྤིཔཱསིཀཝནྟཱསིཀཔརདཏྟཱུཔཛཱིཝིནིཛ྄ཛྷཱམཏཎྷིཀཱདིབྷེདབྷིནྣཾ ནཱནཱཝིདྷཾ པེཏསཏྟལོཀཾ. ཨསུརཀཱཡནྟི ཀཱལཀཉྩིཀཱསུརནིཀཱཡཾ. ཨེཝཾ ཏཱཝ དུགྒཏིབྷཱུཏཾ པརལོཀཏྠཾ ཝཏྭཱ ཨིདཱནི སུགཏིབྷཱུཏཾ ཝཏྟུཾ ‘‘ཏིཎྞཾ ཀུསལཱནཾ ཝིཔཱཀ’’ནྟིཨཱདི ཝུཏྟཾ. ཝེཧཔྥལེ སུབྷཀིཎྞེཡེཝ སངྒཧེཏྭཱ ཨསཉྙཱིསུ, ཨརཱུཔཱིསུ ཙ སམྤཏྟིཡཱ དསྶེཏབྦཱཡ ཨབྷཱཝཏོ དུཝིཉྙེཡྻཏཱཡ ‘‘ནཝནྣཾ བྲཧྨལོཀཱན’’ནྟྭེཝ ཝུཏྟཾ.

གཎྷཱཔེསཱིཏི ¶ ཏེ དྷམྨེ སམཱདིནྣེ ཀཱརཱཔེསི.

སམུཏྟེཛནཾ ནཱམ སམཱདིནྣདྷམྨཱནཾ ཡཐཱ ཨནུཔཀཱརཀཱ དྷམྨཱ པརིཧཱཡནྟི, པཧཱིཡནྟི ཙ, ཨུཔཀཱརཀཱ དྷམྨཱ པརིཝཌྜྷནྟི, ཝིསུཛ྄ཛྷནྟི ཙ, ཏཐཱ ནེསཾ ཨུསྶཱཧུཔྤཱདནནྟི ཨཱཧ ‘‘ཨབྦྷུསྶཱཧེསཱི’’ཏི. ཡཐཱ པན ཏཾ ཨུསྶཱཧུཔྤཱདནཾ ཧོཏི, ཏཾ དསྶེཏུཾ ‘‘ཨིདྷལོཀཏྠཉྩེཝཱ’’ཏིཨཱདི ཝུཏྟཾ. ཏཱསེཏྭཱ ཏཱསེཏྭཱཏི པརིབྱཏྟབྷཱཝཱཔཱདནེན ཏེཛེཏྭཱ ཏེཛེཏྭཱ. ཨདྷིགཏཾ ཝིཡ ཀཏྭཱཏི ཡེསཾ ཀཐེཏི, ཏེཧི ཏམཏྠཾ པཙྩཀྑཏོ ཨནུབྷུཡྻམཱནཾ ཝིཡ ཀཏྭཱ. ཝེནེཡྻཱནཉྷི བུདྡྷེཧི པཀཱསིཡམཱནོ ¶ ཨཏྠོ པཙྩཀྑཏོཔི པཱཀཊཏརོ ཧུཏྭཱ ཨུཔཊྛཱཏི. ཏཐཱ ཧི བྷགཝཱ ཨེཝཾ ཐོམཱིཡཏི –

‘‘ཨཱདིཏྟོཔི ཨཡཾ ལོཀོ, ཨེཀཱདསཧི ཨགྒིབྷི;

ན ཏཐཱ ཡཱཏི སཾཝེགཾ, སམྨོཧཔལིགུཎྛིཏོ.

སུཏྭཱདཱིནཝསཉྙུཏྟཾ, ཡཐཱ ཝཱཙཾ མཧེསིནོ;

པཙྩཀྑཏོཔི བུདྡྷཱནཾ, ཝཙནཾ སུཊྛུ པཱཀཊ’’ནྟི.

ཏེནཱཧ ‘‘དྭཏྟིཾསཀམྨཀཱརཎཔཉྩཝཱིསཏིམཧཱབྷཡཔྤབྷེདཉྷཱི’’ཏིཨཱདི. དྭཏྟིཾསཀམྨཀཱརཎཱནི ‘‘ཧཏྠམྤི ཚིནྡནྟཱི’’ཏིཨཱདིནཱ (མ. ནི. ༡.༡༧༨) དུཀྑཀྑནྡྷསུཏྟེ ཨཱགཏནཡེན ¶ ཝེདིཏབྦཱནི. པཉྩཝཱིསཏིམཧཱབྷཡཱནི ‘‘ཛཱཏིབྷཡཾ ཛརཱབྷཡཾ བྱཱདྷིབྷཡཾ མརཎབྷཡ’’ནྟིཨཱདིནཱ (ཙཱུལ༹ནི. ༡༢༣) ཏཏྠ ཏཏྠ སུཏྟེ ཨཱགཏནཡེན ཝེདིཏབྦཱནི. ཨཱགྷཱཏནབྷཎྜིཀཱ ཨདྷིཀུཊྚནཀལི༹ངྒརཾ, ཡཾ ‘‘ཨཙྩཱདྷཱན’’ནྟིཔི ཝུཙྩཏི.

པཊིལདྡྷགུཎེན ཙོདེསཱིཏི ‘‘ཏཾཏཾགུཎཱདྷིགམེན ཨཡམྤི ཏུམྷེཧི པཊིལདྡྷོ, ཨཱནིསཾསོ ཨཡམྤཱི’’ཏི པཙྩཀྑཏོ དསྶེནྟོ ‘‘ཀིཾ ཨིཏོ པུབྦེ ཨེཝརཱུཔཾ ཨཏྠཱི’’ཏི ཙོདེནྟོ ཝིཡ ཨཧོསི. ཏེནཱཧ ‘‘མཧཱནིསཾསཾ ཀཏྭཱ ཀཐེསཱི’’ཏི.

ཏཔྤཙྩཡཉྩ ཀིལམཐནྟི སངྑཱརཔཝཏྟིཧེཏུཀཾ ཏསྨིཾ ཏསྨིཾ སཏྟསནྟཱནེ ཨུཔྤཛྫནཀཔརིསྶམཾ སཾཝིགྷཱཏཾ ཝིཧེསཾ. ཨིདྷཱཏི ཧེཊྛཱ པཋམམགྒཱདྷིགམཏྠཱཡ ཀཐཱཡ. སབྦསངྑཱརཱུཔསམབྷཱཝཏོ སནྟཾ. ཨཏིཏྟིཀརཔརམསུཁཏཱཡ པཎཱིཏཾ. སཀལསཾསཱརབྱསནཏོ ཏཱཡནཏྠེན ¶ ཏཱཎཾ. ཏཏོ ནིབྦིནྡཧདཡཱནཾ ནིལཱིཡནཊྛཱནཏཱཡ ལེཎཾ. ཨཱདི-སདྡེན གཏིཔཊིསརཎཾ པརམསྶཱསོཏི ཨེཝམཱདཱིནཾ སངྒཧོ.

མཧཱཛནཀཱཡཔབྦཛྫཱཝཎྞནཱ

༨༠. སངྒྷཔྤཧོནཀཱནཾ བྷིཀྑཱུནཾ ཨབྷཱཝཱ ‘‘སངྒྷསྶ ཨཔརིཔུཎྞཏྟཱ’’ཏི ཝུཏྟཾ. དྭེ ཨགྒསཱཝཀཱ ཨེཝ ཧི ཏདཱ ཨཧེསུཾ.

ཙཱརིཀཱཨནུཛཱནནཝཎྞནཱ

༨༦. ‘‘ཀདཱ ¶ ཨུདཔཱདཱི’’ཏི པུཙྪཾ ‘‘སམྦོདྷིཏོ’’ཏིཨཱདིནཱ སངྑེཔཏོ ཝིསྶཛྫེཏྭཱ པུན ཏཾ ཝིཏྠཱརཏོ དསྶེཏུཾ ‘‘བྷགཝཱ ཀིརཱ’’ཏིཨཱདི ཝུཏྟཾ. པིཏུ སངྒཧཾ ཀརོནྟོ ཝིཧཱསི སམྦོདྷིཏོ ‘‘སཏྟ སཾཝཙྪརཱནི སཏྟ མཱསེ སཏྟ དིཝསེ’’ཏི ཨཱནེཏྭཱ སམྦནྡྷོ, ཏཉྩ ཁོ ཝེནེཡྻཱནཾ ཏདཱ ཨབྷཱཝཏོ. ཀིལཉྫེཧི བཧི ཚཱདཱཔེཏྭཱ, ཝཏྠེཧི ཨནྟོ པཊིཙྪཱདཱཔེཏྭཱ, ཨུཔརི ཙ ཝཏྠེཧི ཚཱདཱཔེཏྭཱ, ཏསྶ ཧེཊྛཱ སུཝཎྞ…པེ… ཝིཏཱནཾ ཀཱརཱཔེཏྭཱ. མཱལཱཝཙྪཀེཏི པུཔྥམཱལཱཧི ཝཙྪཱཀཱརེན ཝེཋིཏེ. གནྡྷནྟརེཏི ཙཱཊིབྷརིཏགནྡྷསྶ ཨནྟརེ. པུཔྥཱནཱིཏི ཙཱཊིཨཱདིབྷརིཏཱནི ཛལཛཔུཔྥཱནི ཙེཝ ཙངྐོཏཀཱདིབྷརིཏཱནི ཐལཛཔུཔྥཱནི ཙ.

ཀཱམཉྩཱཡཾ ¶ རཱཛཱ བུདྡྷཔིཏཱ, ཏཐཱཔི བུདྡྷཱ ནཱམ ལོཀགརུནོ, ན ཏེ ཀེནཙི ཝསེ ཝཏྟེཏབྦཱ, ཨཐ ཁོ ཏེ ཨེཝ པརེ ཨཏྟནོ ཝསེ ཝཏྟེནྟི, ཏསྨཱ རཱཛཱ ‘‘ནཱཧཾ བྷིཀྑུསངྒྷཾ དེམཱི’’ཏི ཨཱཧ.

དཱནམུཁནྟི དཱནཀརཎཱུཔཱཡཾ, དཱནཝཏྟནྟི ཨཏྠོ. ན དཱནི མེ ཨནུཉྙཱཏཱཏི ཨིདཱནི མེ དཱནཾ ན ཨནུཉྙཱཏཱ, ནོ ན ཨནུཛཱནནྟཱིཏི ཨཏྠོ.

པརིཏསྶནཛཱིཝིཏནྟི དུཀྑཛཱིཝིཀཱ དཱལིདྡིཡནྟི ཨཏྠོ.

སབྦེསཾ བྷིཀྑཱུནཾ པཧོསཱིཏི བྷགཝཏོ ཨཊྛསཊྛི ཙ བྷིཀྑུསཏསཧསྶཱནཾ བྷཱགཏོ དཱཏུཾ པཧོསི, ན སབྦེསཾ པརིཡཏྟབྷཱཝེན. ཏེནཱཧ ‘‘སེནཱཔཏིཔི ཨཏྟནོ དེཡྻདྷམྨཾ ཨདཱསཱི’’ཏི. ཛེཊྛིཀཊྛཱནེཏི ཛེཊྛིཀདེཝིཊྛཱནེ.

ཏཐེཝ ¶ ཀཏྭཱཏི ཙརཔུརིསེ ཋཔེཏྭཱ. སུཙིནྟི སུདྡྷཾ. པཎཱིཏནྟི ཨུལཱ༹རཾ, བྷཱཝནཔུཾསཀཉྩེཏཾ ‘‘ཨེཀམནྟ’’ནྟིཨཱདཱིསུ (པཱརཱ. ༢) ཝིཡ. བྷཉྫིཏྭཱཏི མདྡིཏྭཱ, པཱིལེ༹ཏྭཱཏི ¶ ཨཏྠོ. ཛཱཏིསཔྤིཁཱིརཱདཱིཧིཡེཝཱཏི ཨནྟོཛཱཏསཔྤིཁཱིརཱདཱིཧིཡེཝ, ཨམྷཱཀམེཝ གཱཝིཨཱདིཏོ གཧིཏསཔྤིཨཱདཱིཧིཡེཝཱཏི ཨཏྠོ.

༩༠. པརཱཔཝཱདཾ, པརཱཔཀཱརཾ, སཱིཏུཎྷཱདིབྷེདཉྩ གུཎཱཔརཱདྷཾ ཁམཏི སཧཏི ཨདྷིཝཱསེཏཱིཏི ཁནྟི. སཱ པན ཡསྨཱ སཱིལཱདཱིནཾ པཊིཔཀྑདྷམྨེ སཝིསེསཾ ཏཔཏི སནྟཔཏི ཝིདྷམཏཱིཏི པརམཾ ཨུཏྟམཾ ཏཔོ. ཏེནཱཧ ‘‘ཨདྷིཝཱསནཁནྟི ནཱམ པརམཾ ཏཔོ’’ཏི. ‘‘ཨདྷིཝཱསནཁནྟཱི’’ཏི ཨིམིནཱ དྷམྨནིཛ྄ཛྷཱནཀྑནྟིཏོ ཝིསེསེཏི. ཏིཏིཀྑནཾ ཁམནཾ ཏིཏིཀྑཱ.ཨཀྑརཙིནྟཀཱ ཧི ཁམཱཡཾ ཏིཏིཀྑཱ-སདྡཾ ཝཎྞེནྟི. ཏེནེཝཱཧ ‘‘ཁནྟིཡཱ ཨེཝ ཝེཝཙན’’ནྟིཨཱདི. སབྦཱཀཱརེནཱཏི སནྟཔཎཱིཏནིཔུཎསིཝཁེམཱདིནཱ སབྦཔྤཀཱརེན. སོ པབྦཛིཏོ ནཱམ ན ཧོཏི པབྦཱཛིཏབྦདྷམྨསྶ ཨཔབྦཱཛནཏོ. ཏསྶེཝ ཏཏིཡཔདསྶ ཝེཝཙནཾ ཨནཏྠནྟརཏྟཱ.

‘‘ན ཧཱི’’ཏིཨཱདིནཱ ཏཾ ཨེཝཏྠཾ ཝིཝརཏི. ཨུཏྟམཏྠེན པརམནྟི ཝུཙྩཏི པར-སདྡསྶ སེཊྛཝཱཙཀཏྟཱ, ‘‘པུགྒལཔརོཔརཉྙཱུ’’ཏིཨཱདཱིསུ (ཨ. ནི. ༧.༦༨; ནེཏྟི. ༡༡༨) ཝིཡ. པརནྟི ཨཉྙཾ. ཨིདཱནི པར-སདྡཾ ཨཉྙཔརིཡཱཡམེཝ གཧེཏྭཱ ཨཏྠཾ དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ. མལསྶཱཏི པཱཔམལསྶ. ཨཔབྦཱཛིཏཏྟཱཏི ཨནཱིཧཊཏྟཱ ཨནིརཱཀཏཏྟཱ ¶ . སམིཏཏྟཱཏི ནིརོདྷིཏཏྟཱ ཏེསཾ པཱཔདྷམྨཱནཾ. ‘‘སམིཏཏྟཱ ཧི པཱཔཱནཾ སམཎོཏི པཝུཙྩཏཱི’’ཏི ཧི ཝུཏྟཾ.

ཨཔིཙ བྷགཝཱ བྷིཀྑཱུནཾ པཱཏིམོཀྑཾ ཨུདྡིསནྟོ པཱཏིམོཀྑཀཐཱཡ ཙ སཱིལཔདྷཱནཏྟཱ སཱིལསྶ ཙ ཝིསེསཏོ དོསོ པཊིཔཀྑོཏི ¶ ཏསྶ ནིགྒཎྷནཝིདྷིཾ དསྶེཏུཾ ཨཱདིཏོ ‘‘ཁནྟཱི པརམཾ ཏཔོ’’ཏི ཨཱཧ, ཏེན ཨནིཊྛསྶ པཊིཧནནཱུཔཱཡོ ཝུཏྟོ, ཏིཏིཀྑཱགཧཎེན པན ཨིཊྛསྶ, ཏདུབྷཡེནཔི ཨུཔྤནྣཾ རཏིཾ ཨབྷིབྷུཡྻ ཝིཧརཏཱིཏི ཨཡམཏྠོ དསྶིཏོཏི. ཏཎྷཱཝཱནསྶ ཝཱུཔསམནཏོ ནིབྦཱནཾ པརམཾ ཝདནྟི བུདྡྷཱ. ཏཏྠ ཁནྟིགྒཧཎེན པཡོགཝིཔཏྟིཡཱ ཨབྷཱཝོ དསྶིཏོ, ཏིཏིཀྑཱགཧཎེན ཨཱསཡཝིཔཏྟིཡཱ ཨབྷཱཝོ. ཏཐཱ ཁནྟིགྒཧཎེན པརཱཔརཱདྷསཧཏཱ, ཏིཏིཀྑཱགཧཎེན པརེསུ ཨནཔརཛ྄ཛྷནཱ དསྶིཏཱ. ཨེཝཾ ཀཱརཎམུཁེན ཨནྭཡཏོ པཱཏིམོཀྑཾ དསྶེཏྭཱ ཨིདཱནི བྱཏིརེཀཏོ ཏཾ དསྶེཏུཾ ‘‘ན ཧཱི’’ཏིཨཱདི ཝུཏྟཾ, ཏེན ཡཐཱ སཏྟཱནཾ ཛཱིཝིཏཱ ཝོརོཔནཾ, པཱཎིལེཌྜུདཎྜཱདཱིཧི ཝིབཱདྷནཉྩ ‘‘པརཱུཔགྷཱཏོ, པརཝིཧེཋན’’ནྟི ཝུཙྩཏི, ཨེཝཾ ཏེསཾ མཱུལསཱཔཏེཡྻཱཝཧརཎཾ, དཱརཔརཱམསནཾ, ཝིསཾཝཱདནཾ, ཨཉྙམཉྙབྷེདནཾ, ཕརུསཝཙནེན མམྨགྷཊྚནཾ, ནིརཏྠཀཝིཔྤལཱཔོ ¶ , པརསནྟཀགིཛ྄ཛྷནཾ, ཨུཙྪེདཝིནྡནཾ, མིཙྪཱབྷིནིཝེསནཉྩཨུཔགྷཱཏོ, ཝིཧེཋནཉྩ ཧོཏཱིཏི ཡསྶ ཀསྶཙི ཨཀུསལསྶ ཀམྨཔཐསྶ, ཀམྨསྶ ཙ ཀརཎེན པབྦཛིཏོ, སམཎོ ཙ ན ཧོཏཱིཏི དསྶེཏི.

སབྦཱཀུསལསྶཱཏི སབྦསྶཱཔི དྭཱདསཱཀུསལཙིཏྟུཔྤཱདསངྒཧིཏསྶ སཱཝཛྫདྷམྨསྶ. ཀརཎཾ ནཱམ ཏསྶ ཨཏྟནོ སནྟཱནེ ཨུཔྤཱདནནྟི ཏཔྤཊིཀྑེཔཏོ ཨཀརཎཾ ‘‘ཨནུཔྤཱདན’’ནྟི ཝུཏྟཾ. ‘‘ཀུསལསྶཱ’’ཏི ཨིདཾ ‘‘ཨེཏཾ བུདྡྷཱན སཱསན’’ནྟི ཝཀྑམཱནཏྟཱ ཨརིཡམགྒདྷམྨེ, ཏེསཉྩ སམྦྷཱརབྷཱུཏེ ཏེབྷཱུམཀཀུསལདྷམྨེ སམྦོདྷེཏཱིཏི ཨཱཧ ‘‘ཙཏུབྷཱུམཀཀུསལསྶཱ’’ཏི. ཨུཔསམྤདཱཏི ཨུཔསམྤཱདནཾ, ཏཾ པན ཏསྶ སམདྷིགམོཏི ཨཱཧ ‘‘པཊིལཱབྷོ’’ཏི. ཙིཏྟཛོཏནནྟི ཙིཏྟསྶ པབྷསྶརབྷཱཝཀརཎཾ སབྦསོ པརིསོདྷནཾ. ཡསྨཱ ¶ ཨགྒམགྒསམངྒིནོ ཙིཏྟཾ སབྦསོ པརིཡོདཔཱིཡཏི ནཱམ, ཨགྒཕལཀྑཎེ པན པརིཡོདཔིཏཾ ཧོཏི པུན པརིཡོདཔེཏབྦཏཱཡ ཨབྷཱཝཏོ, ཨིཏི པརིནིཊྛིཏཔརིཡོདཔནཏཾ སནྡྷཱཡཱཧ ‘‘ཏཾ པན ཨརཧཏྟེན ཧོཏཱི’’ཏི. སབྦཔཱཔཾ པཧཱཡ ཏདངྒཱདིཝསེནེཝཱཏི ཨདྷིཔྤཱཡོ. ‘‘སཱིལསཾཝརེནཱ’’ཏི ཧི ཨིམིནཱ ཏེབྷཱུམཀསྶཱཔི སངྒཧེ ཨིཏརཔྤཧཱནཱནམྤི སངྒཧོ ཧོཏཱིཏི, ཨེཝཉྩ ཀཏྭཱ སབྦགྒཧཎཾ སམཏྠིཏཾ ཧོཏི ¶ . སམཐཝིཔསྶནཱཧཱིཏི ལོཀིཡལོཀུཏྟརཱཧི སམཐཝིཔསྶནཱཧི. སམྤཱདེཏྭཱཏི ནིཔྥཱདེཏྭཱ. སམྤཱདནཉྩེཏྠ ཧེཏུབྷཱུཏཱཧི ཕལབྷཱུཏསྶ སཧཛཱཏཱཧིཔི, པགེཝ པུརིམསིདྡྷཱཧཱིཏི དཊྛབྦཾ.

ཀསྶཙཱིཏི ཧཱིནཱདཱིསུ ཀསྶཙི སཏྟསྶ ཀསྶཙི ཨུཔཝཱདསྶ, ཏེན དཝཀམྱཏཱཡཔི ཨུཔཝདནཾ པཊིཀྑིཔཏི. ཨུཔགྷཱཏསྶ ཨཀརཎནྟི ཨེཏྠཱཔི ‘‘ཀསྶཙཱི’’ཏི ཨཱནེཏྭཱ སམྦནྡྷོ. ཀཱཡེནཱཏི ཙ ནིདསྶནམཏྟམེཏཾ མནསཱཔི པརེསཾ ཨནཏྠཙིནྟནཱདིཝསེན ཨུཔགྷཱཏཀརཎསྶ ཝཛྫེཏབྦཏྟཱ. ཀཱཡེནཱཏི ཝཱ ཨེཏྠ ཨརཱུཔཀཱཡསྶཱཔི སངྒཧོ དཊྛབྦོ, ན ཙོཔནཀཱཡཀརཛཀཱཡཱནམེཝ. པ ཨཏིམོཀྑནྟི པཀཱརཏོ ཨཏིཝིཡ སཱིལེསུ མུཁྱབྷཱུཏཾ. ‘‘ཨཏིཔམོཀྑ’’ནྟི ཏམེཝ པདཾ ཨུཔསགྒབྱཏྟཡེན ཝདཏི. ཨེཝཾ བྷེདཏོ པདཝཎྞནཾ ཀཏྭཱ ཏཏྭཏོ ཝདཏི ‘‘ཨུཏྟམསཱིལ’’ནྟི. ‘‘པཱཏི ཝཱ’’ཏིཨཱདིནཱ པཱལནཏོ རཀྑཎཏོ ཨཏིཝིཡ མོཀྑནཏོ ཨཏིཝིཡ མོཙནཏོ པཱཏིམོཀྑནྟི དསྶེཏི. ‘‘པཱཔཱ ཨཏི མོཀྑེཏཱིཏི ཨཏིམོཀྑོ’’ཏི ནིམིཏྟསྶ ཀཏྟུབྷཱཝེན ཨུཔཙརིཏབྦཏོ. ཡོ ཝཱ ནནྟི ཡོ ཝཱ པུགྒལོ ནཾ པཱཏིམོཀྑསཾཝརསཱིལཾ པཱཏི ¶ སམཱདིཡིཏྭཱ ཨཝིཀོཔེནྟོ རཀྑཏི, ཏཾ ‘‘པཱཏཱི’’ཏི ལདྡྷནཱམཾ པཱཏིམོཀྑསཾཝརསཱིལེ ཋིཏཾ མོཀྑེཏཱིཏི པཱཏིམོཀྑནྟི ཨཡམེཏྠ སངྑེཔོ, ཝིཏྠཱརཏོ པན པཱཏིམོཀྑཔདསྶ ཨཏྠོ ཝིསུདྡྷིམགྒསཾཝཎྞནཱཡཾ (ཝིསུདྡྷི. ཊཱི. ༡.༡༤) ཝུཏྟནཡེན ཝེདིཏབྦོ.

མཏྟཉྙུཏཱཏི ¶ བྷོཛནེ མཏྟཉྙུཏཱ, སཱ པན ཝིསེསཏོ པཙྩཡསནྣིསྶིཏསཱིལཝསེན གཧེཏབྦཱཏི ཨཱཧ ‘‘པཊིགྒཧཎཔརིབྷོགཝསེན པམཱཎཉྙུཏཱ’’ཏི. ཨཱཛཱིཝཔཱརིསུདྡྷིསཱིལཝསེནཱཔི གཡ྄ཧམཱནེ ‘‘པརིཡེསནཝིསྶཛྫནཝསེནཱ’’ཏིཔི ཝཏྟབྦཾ. སངྒྷཊྚནཝིརཧིཏནྟི ཛནསངྒྷཊྚནཝིརཧིཏཾ, ནིརཛནསམྦཱདྷཾ ཝིཝིཏྟནྟི ཨཏྠོ. ཙཏུཔཙྩཡསནྟོསོ དཱིཔིཏོ པཙྩཡསནྟོསཏཱསཱམཉྙེན ཨིཏརདྭཡསྶཱཔི ལཀྑཎཧཱརནཡེན ཛོཏིཏབྷཱཝཏོ. ‘‘ཨཊྛསམཱཔཏྟིཝསིབྷཱཝཱཡཱ’’ཏི ཨིམིནཱ པཡོཛནདསྶནཝསེན ཡདཏྠཾ ཝིཝིཏྟསེནཱསནསེཝནཾ ཨིཙྪིཏཾ, སོ ཨདྷིཙིཏྟཱནུཡོགོ ཝུཏྟོ. ཨཊྛ སམཱཔཏྟིཡོ ཙེཏྠ ཝིཔསྶནཱཡ པཱདཀབྷཱུཏཱ ཨདྷིཔྤེཏཱ, ན ཡཱ ཀཱཙཱིཏི སཀལསྶཱཔི ཨདྷིཙིཏྟཱནུཡོགསྶ ཛོཏིཏབྷཱཝོ ཝེདིཏབྦོ.

དེཝཏཱརོཙནཝཎྞནཱ

༩༡. ཨེཏྟཱཝཏཱཏི ¶ ཨེཏྟཀེན སུཏྟཔདེསེན. ཏཏྠཱཔི ཙ ཨིམིནཱ…པེ… ཀཐནེན སུཔྤཊིཝིདྡྷབྷཱཝཾ པཀཱསེཏྭཱཏི ཡོཛནཱ. ཙ-སདྡོ བྱཏིརེཀཏྠོ, ཏེན ཨིདཱནི ཝུཙྩམཱནཏྠཾ ཨུལླངྒེཏི. ཨེཀམིདཱཧནྟི ཨེཀཾ ཨཧཾ. ཨིདཾ-སདྡོ ནིཔཱཏམཏྟཾ. ཨཱདི-སདྡེན ‘‘བྷིཀྑཝེ སམཡ’’ནྟི ཨེཝམཱདི པཱཋོ སངྒཧིཏོ. ཨཧཾ བྷིཀྑཝེ ཨེཀཾ སམཡནྟི ཨེཝཾ པེཏྠ པདཡོཛནཱ.

སུབྷགཝནེཏི སུབྷགཏྟཱ སུབྷགཾ, སུནྡརསིརིཀཏྟཱ ¶ , སུནྡརཀཱམཏྟཱ ཝཱཏི ཨཏྠོ. སུབྷགཉྷི ཏཾ སིརིསམྤཏྟིཡཱ, སུནྡརེ ཙེཏྠ ཀཱམེ མནུསྶཱ པཏྠེནྟི. བཧུཛནཀནྟཏཱཡཔི ཏཾ སུབྷགཾ. ཝནཡཏཱིཏི ཝནཾ, ཨཏྟསམྤཏྟིཡཱ ཨཏྟནི སིནེཧཾ ཨུཔྤཱདེཏཱིཏི ཨཏྠོ. ཝནུཏེ ཨིཏི ཝཱ ཝནཾ, ཨཏྟསམྤཏྟིཡཱ ཨེཝ ‘‘མཾ པརིབྷུཉྫཐཱ’’ཏི སཏྟེ ཡཱཙཏི ཝིཡཱཏི ཨཏྠོ. སུབྷགཉྩ ཏཾ ཝནཉྩཱཏི སུབྷགཝནཾ, ཏསྨིཾ སུབྷགཝནེ. ཨཊྛཀཐཱཡཾཔན ཀིཾ ཨིམིནཱ པཔཉྩེནཱཏི ‘‘ཨེཝཾ ནཱམཀེ ཝནེ’’ཏི ཝུཏྟཾ. ཀཱམཾ སཱལརུཀྑོཔི ‘‘སཱལོ’’ཏི ཝུཙྩཏི, ཡོ ཀོཙི རུཀྑོཔི ཝནཔྤཏི ཛེཊྛཀརུཀྑོཔི. ཨིདྷ པན པཙྪིམོ ཨེཝ ཨདྷིཔྤེཏོཏི ཨཱཧ ‘‘ཝནཔྤཏིཛེཊྛཀསྶ མཱུལེ’’ཏི. མཱུལསམུགྒྷཱཏཝསེནཱཏི ཨནུསཡསམུཙྪིནྡནཝསེན.

ན ཝིཧཱཡནྟཱིཏི ཨཀུཔྤདྷམྨཏཱཡ ན ཝིཛཧནྟི. ‘‘ན ཀཉྩི སཏྟཾ ཏཔནྟཱིཏི ཨཏཔྤཱ’’ཏི ཨིདཾ ཏེསུ ཏསྶཱ སམཉྙཱཡ ནིརུལ༹ྷཏཱཡ ཝུཏྟཾ, ཨཉྙཐཱ སབྦེཔི སུདྡྷཱཝཱསཱ ན ཀཉྩི སཏྟཾ ཏཔནྟཱིཏི ཨཏཔྤཱ ནཱམ སིཡུཾ. ‘‘ན ཝིཧཱཡནྟཱི’’ཏིཨཱདིནིབྦཙནེསུཔི ཨེསེཝ ནཡོ. སུནྡརདསྶནཱཏི དསྶནཱིཡཱཏི ཨཡམཏྠོཏི ཨཱཧ ‘‘ཨབྷིརཱུཔཱ’’ཏིཨཱདི. སུནྡརམེཏེསཾ དསྶནནྟི ¶ སོབྷནམེཏེསཾ ཙཀྑུནཱ དསྶནཾ, ཝིཉྙཱཎེན དསྶནཾ པཱིཏི ཨཏྠོ. སབྦེ ཧེཝ…པེ… ཛེཊྛཱ པཉྩཝོཀཱརབྷཝེ ཏཏོ ཝིསིཊྛཱནཾ ཨབྷཱཝཏོ.

སཏྟནྣཾ བུདྡྷཱནཾ ཝསེནཱཏི སཏྟནྣཾ སམྨཱསམྦུདྡྷཱནཾ ཨཔདཱནཝསེན. ཨཝིཧེཧི ཨཛ྄ཛྷིཊྛེན ཨེཀེན ཨཝིཧཱབྲཧྨུནཱ ཀཐིཏཱ ཏེཧི སབྦེཧི ཀཐིཏཱ ནཱམ ཧོནྟཱིཏི ཝུཏྟཾ ‘‘ཏཐཱ ཨཝིཧེཧཱི’’ཏི. ཨེསེཝ ནཡོ སེསེསུཔི. ཏེནཱཧ བྷགཝཱ ‘‘དེཝཏཱ མཾ ཨེཏདཝོཙུ’’ནྟི. ཡཾ པན པཱལི༹ཡཾ ‘‘ཨནེཀཱནི དེཝཏཱསཏཱནཱི’’ཏི ཝུཏྟཾ, ཏཾ སབྦཾ ¶ པཙྪཱ ཨཏྟནོ སཱསནེ ¶ ཝིསེསཾ ཨདྷིགནྟྭཱ ཏཏྠ ཨུཔྤནྣཱནཾ ཝསེན ཝུཏྟཾ. ཨནུསནྡྷིདྭཡམྤཱིཏི དྷམྨདྷཱཏུཔདཱནུསནྡྷི, དེཝཏཱརོཙནཔདཱནུསནྡྷཱིཏི དུཝིདྷཾ ཨནུསནྡྷིཾ. ནིཡྻཱཏེནྟོཏི ནིགམེནྟོ. ཡཾ པནེཏྠ ཨཏྠཏོ ཨཝིབྷཏྟཾ, ཏཾ སུཝིཉྙེཡྻམེཝཱཏི.

མཧཱཔདཱནསུཏྟཝཎྞནཱཡ ལཱིནཏྠཔྤཀཱསནཱ.

༢. མཧཱནིདཱནསུཏྟཝཎྞནཱ

ནིདཱནཝཎྞནཱ

༩༥. ཛནཔདིནོཏི ¶ ¶ ¶ ཛནཔདཝནྟོ, ཛནཔདསྶ ཝཱ ཨིསྶརསཱམིནོ རཱཛཀུམཱརཱ གོཏྟཝསེན ཀུརཱུ ནཱམ. ཏེསཾ ནིཝཱསོ ཡདི ཨེཀོ ཛནཔདོ, ཀཐཾ བཧུཝཙནནྟི ཨཱཧ ‘‘རུལ༹ྷིསདྡེནཱ’’ཏི. ཨཀྑརཙིནྟཀཱ ཧི ཨཱིདིསེསུ ཋཱནེསུ ཡུཏྟེ ཝིཡ ཨཱིདིསལིངྒཝཙནཱནི ཨིཙྪནྟི. ཨཡམེཏྠ རུལ༹ྷི ཡཐཱ ཨཉྙཏྠཱཔི ‘‘ཨངྒེསུ ཝིཧརཏི, མལླེསུ ཝིཧརཏཱི’’ཏི ཙ. ཏབྦིསེསནེཔི ཛནཔདསདྡེ ཛཱཏིསདྡེ ཨེཀཝཙནམེཝ. ཨཊྛཀཐཱཙརིཡཱ པནཱཏི པན-སདྡོ ཝིསེསཏྠཛོཏནོ, ཏེན ‘‘པུཐུཨཏྠཝིསཡཏཱཡ ཨེཝེཏཾ པུཐུཝཙན’’ནྟི ‘‘བཧུཀེ པནཱ’’ཏིཨཱདིནཱ ཝཀྑམཱནཾ ཝིསེསཾ ཛོཏེཏི. སུཏྭཱཏི མནྡྷཱཏུམཧཱརཱཛསྶ ཨཱནུབྷཱཝདསྶནཱནུསཱརེན པརམྤརཱནུགཏཾ ཀཐཾ སུཏྭཱ. ཨནུསཾཡཱཡནྟེནཱཏི ཨནུཝིཙརནྟེན. ཨེཏེསཾ ཋཱནནྟི ཙནྡིམསཱུརིཡམུཁེན ཙཱཏུམཧཱརཱཛིཀབྷཝནམཱཧ. ཏེནཱཧ ‘‘ཏཏྠ ཨགམཱསཱི’’ཏིཨཱདི. སོཏི མནྡྷཱཏུམཧཱརཱཛཱ. ཏནྟི ཙཱཏུམཧཱརཱཛིཀརཛྫཾ. གཧེཏྭཱཏི སམྤཊིཙྪིཏྭཱ. པུན པུཙྪི པརིཎཱཡཀརཏནཾ.

དོཝཱརིཀབྷཱུམིཡཾ ཏིཊྛནྟི སུདྷམྨཱཡ དེཝསབྷཱཡ, དེཝཔུརསྶ ཙ ཙཏཱུསུ དྭཱརེསུ ཨཱརཀྑཱཡ ཨདྷིགཏཏྟཱ. ‘‘དིབྦརུཀྑསཧསྶཔཊིམཎྜིཏ’’ནྟི ¶ ཨིདཾ ‘‘ཙིཏྟལཏཱཝན’’ནྟིཨཱདཱིསུཔི ཡོཛེཏབྦཾ.

པཐཝིཡཾ པཏིཊྛཱསཱིཏི བྷསྶིཏྭཱ པཐཝིཡཱ ཨཱསནྣཊྛཱནེ ཨཊྛཱསི. ན ཧི ཙཀྐརཏནཾ བྷཱུམིཡཾ པཏཏི, ཏཐཱཋིཏཉྩ ནཙིརསྶེཝ ཨནྟརདྷཱཡི ཏེནཏྟབྷཱཝེན ཙཀྐཝཏྟིཨིསྶརིཡསྶ ཨབྷཱཝཏོ. ‘‘ཙིརཏརཾ ཀཱལཾ ཋཏྭཱ’’ཏི ཨཔརེ. རཱཛཱ ཨེཀཀོཝ ཨགམཱསི ཨཏྟནོ ཨཱནུབྷཱཝེན. མནུསྶབྷཱཝོཏི མནུསྶགནྡྷསརཱིརནིསྶནྡཱདིམནུསྶབྷཱཝོ. པཱཏུརཧོསཱིཏི དེཝལོཀེ པཝཏྟིཝིཔཱཀདཱཡིནོ ཨཔརཱཔརིཡཱཡ ཝེདནཱིཡསྶ ཀམྨསྶ ཀཏོཀཱསཏྟཱ སབྦདཱ སོལ༹སཝསྶུདྡེསིཀཏཱ མཱལཱམིལཱཡནཱདི དིབྦབྷཱཝོ པཱཏུརཧོསི. ཏདཱ མནུསྶཱནཾ ཨསངྑེཡྻཱཡུཀཏཱཡ ¶ སཀྐརཛྫཾ ཀཱརེཏྭཱ. ‘‘ཀིཾ མེ ཨིམིནཱ ཨུཔདྡྷརཛྫེནཱ’’ཏི ཨཏྲིཙྪཏཱཡ ཨཏིཏྟོཝ. མནུསྶལོཀེ ཨུཏུནོ ཀཀྑལ༹ཏཱཡ ཝཱཏཱཏཔེན ཕུཊྛགཏྟོ ཀཱལམཀཱསི.

ཨཝཡཝེསུ ¶ སིདྡྷོ ཝིསེསོ སམུདཱཡསྶ ཝིསེསཀོ ཧོཏཱིཏི ཨེཀམྤི རཊྛཾ བཧུཝཙནེན ཝོཧརིཡཏི.

ད-ཀཱརེན ཨཏྠཾ ཝཎྞཡནྟི ནིརུཏྟིནཡེན. ཀམྨཱསོཏི ཀམྨཱསཔཱདོ ཝུཙྩཏི ཨུཏྟརཔདལོཔེན ཡཐཱ ‘‘རཱུཔབྷཝོ རཱུཔ’’ནྟི. ཀཐཾ པན སོ ‘‘ཀམྨཱསཔཱདོ’’ཏི ཝུཙྩཏཱིཏི ཨཱཧ ‘‘ཏསྶ ཀིརཱ’’ཏིཨཱདི. དམིཏོཏི ཨེཏྠ ཀཱིདིསཾ དམནཾ ཨདྷིཔྤེཏནྟི ཨཱཧ ‘‘པོརིསཱདབྷཱཝཏོ པཊིསེདྷིཏོ’’ཏི. ‘‘ཨིམེ པན ཐེརཱཏི མཛ྄ཛྷིམབྷཱཎཀཱ’’ཏི ཀེཙི. ཨཔརེ པན ‘‘ཨཊྛཀཐཱཙརིཡཱ’’ཏི, ‘‘དཱིགྷབྷཱཎཀཱ’’ཏི ཝདནྟི. ཨུབྷཡཐཱཔི ཙཱུལ༹ཀམྨཱསདམྨཾ སནྡྷཱཡ ཏཐཱ ཝདནྟི. ཡཀྑིནིཔུཏྟོ ཧི ཀམྨཱསཔཱདོ ཨལཱིནསཏྟུཀུམཱརཀཱལེ (ཙརིཡཱ. ༢.༧༥) བོདྷིསཏྟེན ཏཏྠ དམིཏོ. སུཏསོམཀཱལེ (ཛཱ. ༢.༢༡.༣༧༡) པན བཱརཱཎསིརཱཛཱ པོརིསཱདབྷཱཝཔཊིསེདྷནེན ཡཏྠ དམིཏོ, ཏཾ མཧཱཀམྨཱསདམྨཾ ནཱམ. ‘‘པུཏྟོ’’ཏི ཝཏྭཱ ‘‘ཨཏྲཛོ’’ཏི ཝཙནཾ ཨོརསཔུཏྟབྷཱཝདསྶནཏྠཾ.

ཡེཧི ཨཱཝསིཏཔྤདེསོ ‘‘ཀུརུརཊྛ’’ནྟི ནཱམཾ ལབྷི, ཏེ ཨུཏྟརཀུརུཏོ ཨཱགཏམནུསྶཱ ཏཏྠ རཀྑིཏནིཡཱམེནེཝ པཉྩ སཱིལཱནི རཀྑིཾསུ. ཏེསཾ དིཊྛཱནུགཏིཡཱ པཙྪིམཛནཏཱཏི སོ དེསདྷམྨཝསེན ཨཝིཙྪེདཏོ པཝཏྟམཱནོ ཀུརུཝཏྟདྷམྨོཏི ¶ པཉྙཱཡིཏྠ. ཨཡཉྩ ཨཏྠོ ཀུརུདྷམྨཛཱཏཀེན དཱིཔེཏབྦོ. སོ ཨཔརབྷཱགེ པཋམཾ ཡཏྠ སཾཀིལིཊྛོ ཛཱཏོ, ཏཾ དསྶེཏུཾ ‘‘ཀུརུརཊྛཝཱསཱིན’’ནྟིཨཱདི ཝུཏྟཾ. ཡཏྠ བྷགཝཏོ ཝསནོཀཱསབྷཱུཏོ ཀོཙི ཝིཧཱརོ ན ཧོཏི, ཏཏྠ ཀེཝལཾ གོཙརགཱམཀིཏྟནཾ ནིདཱནཀཐཱཡ པཀཏི ཡཐཱ ཏཾ སཀྐེསུ ཝིཧརཏི དེཝདཧཾ ནཱམ སཀྱཱནཾ ནིགམོཏི ཨིམམཏྠཾ དསྶེནྟོ ‘‘ཨཝསནོཀཱསཏོ’’ཏིཨཱདིམཱཧ.

‘‘ཨཱཡསྨཱ’’ཏི ཝཱ ‘‘དེཝཱནཾ པིཡཱ’’ཏི ཝཱ ‘‘ཏཏྲ བྷཝ’’ནྟི ཝཱ པིཡསམུདཱཧཱརོ ཨེསོཏི ཨཱཧ ‘‘ཨཱཡསྨཱཏི པིཡཝཙནམེཏ’’ནྟི. ཏཡིདཾ པིཡཝཙནཾ གརུགཱརཝཝསེན ཝུཙྩཏཱིཏི ཨཱཧ ‘‘གཱརཝཝཙནམེཏ’’ནྟི.

ཨཏིདཱུརཨཙྩཱསནྣཝཛྫནེན ནཱཏིདཱུརནཱཙྩཱསནྣཾ ནཱམ གཧིཏཾ, ཏཾ པན ཨཝཀཾསཏོ ཨུབྷིནྣཾ པསཱརིཏཧཏྠཱནཾ ¶ སངྒྷཊྚནེན ཝེདིཏབྦཾ. ཙཀྑུནཱ ཙཀྑུཾ ཨཱཧཙྩ དཊྛབྦཾ ཧོཏི, ཏེནཱཔི ཨགཱརཝམེཝ ཀཏཾ ཧོཏི. གཱིཝཾ པརིཝཏྟེཏྭཱཏི པརིཝཏྟནཝསེན གཱིཝཾ པསཱརེཏྭཱ.

ཀུལསངྒཧཏྠཱཡཱཏི ¶ ཀུལཱནུདྡཡཏཱཝསེན ཀུལཱནཾ ཨནུགྒཎྷནཏྠཱཡ སཧསྶབྷཎྜིཀཾ ནིཀྑིཔནྟོ ཝིཡ བྷིཀྑཔཊིགྒཎྷནེན ཏེསཾ མཧཏོ པུཉྙཱབྷིསནྡསྶ ཛནནེན. པཊིསམྨཛྫིཏྭཱཏི ཨནྟེཝཱསིཀེཧི སམྨཛྫནཊྛཱནཾ སཀྐཙྩཀཱརིཏཱཡ པུན སམྨཛྫིཏྭཱ. ཏིཀྑཏྟུནྟི ‘‘ཨཱདིཏོ པཊྛཱཡ ཨནྟ’’ནྟིཨཱདིནཱ ཝུཏྟཙཏུརཱཀཱརཱུཔསཉྷིཏེ ཏཡོ ཝཱརེ, ཏེནསྶ དྭཱདསཀྑཏྟུཾ སམྨསིཏབྷཱཝམཱཧ.

ཨམྷཱཀཾ བྷགཝཏོ གམྦྷཱིརབྷཱཝེནེཝ ཀཐིཏཏྟཱ སེསབུདྡྷེཧིཔི ཨེཝམེཝ ཀཐིཏོཏི དྷམྨནྭཡེ ཋཏྭཱ ཝུཏྟཾ ‘‘སབྦབུདྡྷེཧི…པེ… ཀཐིཏོ’’ཏི. སཱལིནྡནྟི སཔརིབྷཎྜཾ. ‘‘སིནེརུཾ ཨུཀྑིཔནྟོ ཝིཡཱ’’ཏི ¶ ཨིམིནཱ ཏཱདིསཱཡ དེསནཱཡ སུདུཀྐརབྷཱཝམཱཧ. སུཏྟམེཝ ‘‘སུཏྟནྟཀཐ’’ནྟི ཨཱཧ དྷམྨཀྑནྡྷབྷཱཝཏོ. ཡཐཱ ཝིནཡཔཎྞཏྟིབྷཱུམནྟརསམཡནྟརཱནཾ ཝིཛཱནནཾ ཨནཉྙསཱདྷཱརཎཾ སབྦཉྙུཏཉཱཎསྶེཝ ཝིསཡོ, ཨེཝཾ ཨནྟདྭཡཝིནིམུཏྟསྶ ཀཱརཀཝེདཀརཧིཏསྶ པཙྩཡཱཀཱརསྶ ཝིབྷཛནཾ པཱིཏི དསྶེཏུཾ ‘‘བུདྡྷཱནཉྷཱི’’ཏིཨཱདི ཨཱརདྡྷཾ. ཏཏྠ ཋཱནཱནཱིཏི ཀཱརཎཱནི. གཛྫིཏཾ མཧནྟཾ ཧོཏཱིཏི ཏཾ དེསེཏབྦསྶེཝ ཨནེཀཝིདྷཏཱཡ, དུཝིཉྙེཡྻཏཱཡ ཙ ནཱནཱནཡེཧི པཝཏྟམཱནཾ དེསནཱགཛྫིཏཾ མཧནྟཾ ཝིཔུལཾ, བཧུབྷེདཉྩ ཧོཏི. ཉཱཎཾ ཨནུཔཝིསཏཱིཏི ཏཏོ ཨེཝ དེསནཱཉཱཎཾ དེསེཏབྦདྷམྨེ ཝིབྷཱགསོ ཀུརུམཱནཾ ཨནུ ཨནུ པཝིསཏི, ཏེན ཨནུཔཝིསྶ ཋིཏཾ ཝིཡ ཧོཏཱིཏི ཨཏྠོ. བུདྡྷཉཱཎསྶ མཧནྟབྷཱཝོ པཉྙཱཡཏཱིཏི ཨེཝཾཝིདྷསྶ ནཱམ དྷམྨསྶ དེསཀཾ, པཊིཝེདྷཀཉྩཱཏི བུདྡྷཱནཾ དེསནཱཉཱཎསྶ, པཊིཝེདྷཉཱཎསྶ ཙ ཨུལཱ༹རབྷཱཝོ པཱཀཊོ ཧོཏི. ཨེཏྠ ཙ ཀིཉྩཱཔི ‘‘སབྦཾ ཝཙཱིཀམྨཾ བུདྡྷསྶ བྷགཝཏོ ཉཱཎཔུབྦངྒམཾ ཉཱཎཱནུཔརིཝཏྟ’’ནྟི (མཧཱནི. ༦༩, ༡༦༩; ཙཱུལ༹ནི. ༨༥; པཊི. མ. ༣.༥; ནེཏྟི. ༡༤) ཝཙནཏོ སབྦཱཔི བྷགཝཏོ དེསནཱ ཉཱཎརཧིཏཱ ནཏྠི, སཱིཧསམཱནཝུཏྟིཏཱཡ སབྦཏྠ སམཱནཔྤཝཏྟི. དེསེཏབྦཝསེན པན དེསནཱ ཝིསེསཏོ ཉཱཎེན ཨནུཔཝིཊྛཱ, གམྦྷཱིརཏརཱ ཙ ཧོཏཱིཏི དཊྛབྦཾ. ཀཐཾ པན ཝིནཡཔཉྙཏྟིཾ པཏྭཱ དེསནཱ ཏིལཀྑཎབྦྷཱཧཏཱ སུཉྙཏཔཊིསཾཡུཏྟཱ ཧོཏཱིཏི? ཏཏྠཱཔི སནྣིསིནྣཔརིསཱཡ ཨཛ྄ཛྷཱསཡཱནུརཱུཔཾ པཝཏྟམཱནཱ དེསནཱ སངྑཱརཱནཾ ཨནིཙྩཏཱདིཝིབྷཱཝནཾ, སབྦདྷམྨཱནཾ ཨཏྟཏྟནིཡཏཱབྷཱཝཔྤཀཱསནཉྩ ཧོཏི. ཏེནེཝཱཧ ‘‘ཨནེཀཔརིཡཱཡེན ¶ དྷམྨིཾ ཀཐཾ ཀཏྭཱ’’ཏིཨཱདི.

ཨཱཔཛྫཱཏི ¶ པཏྭཱ ཡཐཱ ཉཱཎཀོཉྩནཱདཾ ཝིསྶཛྫེཏི, ཨེཝཾ པཱཔུཎིཏྭཱ.

པམཱཎཱཏིཀྐམེཏི ¶ ཨཔརིམཱཎཏྠེ ‘‘ཡཱཝཉྩིདཾ ཏེན བྷགཝཏཱ’’ཏིཨཱདཱིསུ (དཱི. ནི. ༡.༤) ཝིཡ. ཨཔརིམེཡྻབྷཱཝཛོཏནོ ཧི ཨཡཾ ཡཱཝ-སདྡོ. ཏེནཱཧ ‘‘ཨཏིགམྦྷཱིརོ ཨཏྠོ’’ཏི. ཨཝབྷཱསཏཱིཏི ཉཱཡཏི ཨུཔཊྛཱཏི. ཉཱཎསྶ ཏཐཱ ཨུཔཊྛཱནཉྷི སནྡྷཱཡ ‘‘དིསྶཏཱི’’ཏི ཝུཏྟཾ. ནནུ ཨེས པཊིཙྩསམུཔྤཱདོ ཨེཀནྟགམྦྷཱིརོཝ, ཏཏྠ ཀསྨཱ གམྦྷཱིརཱཝབྷཱསཏཱ ཛོཏིཏཱཏི? སཙྩམེཏཾ, ཨེཀནྟགམྦྷཱིརཏཱདསྶནཏྠམེཝ པནསྶ གམྦྷཱིརཱཝབྷཱསགྒཧཎཾ. ཏསྨཱ ཨཉྙཏྠ ལབྦྷམཱནཾ ཙཏུཀོཊིཀཾ བྱཏིརེཀམུཁེན ནིདསྶེཏྭཱ ཏཾ ཨེཝསྶ ཨེཀནྟགམྦྷཱིརཏཾ ཝིབྷཱཝེཏུཾ ‘‘ཨེཀཉྷཱི’’ཏིཨཱདི ཝུཏྟཾ. ཨེཏཾ ནཏྠཱིཏི ཨགམྦྷཱིརོ, ཨགམྦྷཱིརཱཝབྷཱསོ ཙཱཏི ཨེཏཾ དྭཡཾ ནཏྠི, ཏེན ཡཐཱདསྶིཏེ ཙཏུཀོཊིཀེ པཙྪིམཱ ཨེཀ ཀོཊི ལབྦྷཏཱིཏི དསྶེཏི. ཏེནཱཧ ‘‘ཨཡཉྷཱི’’ཏིཨཱདི.

ཡེཧི གམྦྷཱིརབྷཱཝེཧི པཊིཙྩསམུཔྤཱདོ ‘‘གམྦྷཱིརོ’’ཏི ཝུཙྩཏི, ཏེ ཙཏཱུཧི ཨུཔམཱཧི ཨུལླིངྒེནྟོ ‘‘བྷཝགྒགྒཧཎཱཡཱ’’ཏིཨཱདིམཱཧ. ཡཐཱ བྷཝགྒཾ ཧཏྠཾ པསཱརེཏྭཱ གཧེཏུཾ ན སཀྐཱ དཱུརབྷཱཝཏོ, ཨེཝཾ སངྑཱརཱདཱིནཾ ཨཝིཛྫཱདིཔཙྩཡསམྦྷཱུཏསམུདཱགཏཊྛོ པཱཀཏིཀཉཱཎེན གཧེཏུཾ ན སཀྐཱ. ཡཐཱ སིནེརུཾ བྷིནྡིཏྭཱ མིཉྫཾ པབྦཏརསཾ པཱཀཏིཀཔུརིསེན ནཱིཧརིཏུཾ ན སཀྐཱ, ཨེཝཾ པཊིཙྩསམུཔྤཱདགཏེ དྷམྨཏྠཱདིཀེ པཱཀཏིཀཉཱཎེན བྷིནྡིཏྭཱ ཝིབྷཛྫ པཊིཝིཛ྄ཛྷནཝསེན ཛཱནིཏུཾ ན སཀྐཱ. ཡཐཱ མཧཱསམུདྡཾ པཱཀཏིཀཔུརིསསྶ བཱཧུདྭཡེན པདྷཱརིཏུཾ ན སཀྐཱ, ཨེཝཾ ཝེཔུལླཊྛེན མཧཱསམུདྡསདིསཾ པཊིཙྩསམུཔྤཱདཾ པཱཀཏིཀཉཱཎེན དེསནཱཝསེན པདྷཱརིཏུཾ ན སཀྐཱ. ཡཐཱ མཧཱཔཐཝིཾ པརིཝཏྟེཏྭཱ ¶ པཱཀཏིཀཔུརིསསྶ པཐཝོཛཾ གཧེཏུཾ ན སཀྐཱ, ཨེཝཾ ‘‘ཨིཏྠཾ ཨཝིཛྫཱདཡོ སངྑཱརཱདཱིནཾ པཙྩཡཱ ཧོནྟཱི’’ཏི ཏེསཾ པཙྩཡབྷཱཝོ པཱཀཏིཀཉཱཎེན ནཱིཧརིཏྭཱ གཧེཏུཾ ན སཀྐཱཏི. ཨེཝཾ ཙཏུབྦིདྷགམྦྷཱིརཏཱཝསེན ཙཏསྶོ ཨུཔམཱ ཡོཛེཏབྦཱ. པཱཀཏིཀཉཱཎཝསེན ཙཱཡམཏྠཡོཛནཱ ཀཏཱ དིཊྛསཙྩཱནཾ ཏཏྠ པཊིཝེདྷསབྷཱཝཏོ, ཏཐཱཔི ཡསྨཱ སཱཝཀཱནཾ, པཙྩེཀབུདྡྷཱནཉྩ ཏཏྠ སཔྤདེསམེཝ ཉཱཎཾ, བུདྡྷཱནཾཡེཝ ནིཔྤདེསཾ, ཏསྨཱ ཝུཏྟཾ ‘‘བུདྡྷཝིསཡཾ པཉྷ’’ནྟིཨཱདི.

ཨུསྶཱདེནྟོཏི ¶ པཉྙཱཡ ཨུཀྐཾསེནྟོ, ཨུགྒཎྷནྟོཏི ཨཏྠོ. ཨཔསཱདེནྟོཏི ནིབྦྷཙྪནྟོ, ནིགྒཎྷནྟོཏི ཨཏྠོ.

ཨུསྶཱདནཱཝཎྞནཱ

ཏེནཱཏི མཧཱཔཉྙཱབྷཱཝེན. ཏཏྠཱཏི ཐེརསྶ སཏིཔི ཨུཏྟཱནབྷཱཝེ, པཊིཙྩསམུཔྤཱདསྶཨཉྙེསཾ ¶ གམྦྷཱིརབྷཱཝེ. སུབྷོཛནརསཔུཊྛསྶཱཏི སུནྡརེན བྷོཛནརསེན པོསིཏསྶ. ཀཏཡོགསྶཱཏི ནིབདྡྷཔཡོགེན ཀཏཔརིཙཡསྶ. མལླཔཱསཱཎནྟི མལླེཧི མཧབྦལེཧེཝ ཨུཀྑིཔིཏབྦཔཱསཱཎཾ. ཀུཧིཾ ཨིམསྶ བྷཱརིཡཊྛཱནནྟི ཀསྨིཾ པསྶེ ཨིམསྶ པཱསཱཎསྶ གརུཏརཔྤདེསོཏི ཏསྶ སལླཧུཀབྷཱཝཾ དཱིཔེནྟོ ཝདཏི.

ཏིམིརཔིངྒལེནེཝ དཱིཔེནྟི ཏསྶ མཧཱཝིཔྥཱརབྷཱཝཏོ. ཏེནཱཧ ‘‘ཏསྶ ཀིརཱ’’ཏིཨཱདི. པཀྐུཐཏཱིཏི པཀྐུཐནྟཾ ཝིཡ པརིཝཏྟཏི པརིཏོ ཝིཝཏྟཏི. ལཀྑཎཝཙནཉྷེཏཾ. པིཊྛིཡཾ སཀལིནཔདཀཱཔིཊྛཾ. ཀཱཡཱུཔཔནྣསྶཱཏི མཧཏཱ ཀཱཡེན ཨུཔེཏསྶ, མཧཱཀཱཡསྶཱཏི ཨཏྠོ.

པིཉྪཝཊྚཱིཏི པིཉྪཀལཱཔོ. སུཔཎྞཝཱཏནྟི ནཱགགྒཧཎཱདཱིསུ པཀྑཔཔྥོཊནཝསེན ཨུཔྤཛྫནཀཝཱཏཾ.

པུབྦཱུཔནིསྶཡསམྤཏྟིཀཐཱཝཎྞནཱ

‘‘པུབྦཱུཔནིསྶཡསམྤཏྟིཡཱ’’ཏིཨཱདིནཱ ཨུདྡིཊྛཀཱརཎཱནི ཝིཏྠཱརཏོ ཝིཝརིཏུཾ ‘‘ཨིཏོ ཀིརཱ’’ཏིཨཱདི ཝུཏྟཾ. ཏཏྠ ཨིཏོཏི ཨིཏོ ཀཔྤཏོ ¶ . སཏསཧསྶིམེཏི སཏསཧསྶམེ. ཧཾསཱཝཏཱི ནཱམ ནགརཾ ཨཧོསི ཛཱཏནགརཾ. དྷུརཔཏྟཱནཱིཏི བཱཧིརཔཏྟཱནི, ཡཱནི དཱིགྷཏམཱནི.

ཀནིཊྛབྷཱཏཱཏི ཝེམཱཏིཀབྷཱཏཱ ཀནིཊྛོ ཡཐཱ ཨམྷཱཀཾ བྷགཝཏོ ནནྡཏྠེརོ. བུདྡྷཱནཉྷི སཧོདརཱ བྷཱཏརོ ནཱམ ན ཧོནྟི. ཀཐཾ ཛེཊྛཱ ཏཱཝ ན ཨུཔྤཛྫནྟི, ཀནིཊྛཱནཾ པན ཨསམྦྷཝོ ཨེཝ. བྷོགནྟི ཝིབྷཝཾ. ཨུཔསནྟོཏི ཙོརཛནིཏསངྑོབྷཝཱུཔསམེན ཨུཔསནྟོ ཛནཔདོ.

དྭེ སཱཊཀེ ནིཝཱསེཏྭཱཏི སཱཊཀདྭཡམེཝ ཨཏྟནོ ཀཱཡཔརིཧཱརིཀཾ ཀཏྭཱ ཨིཏརཾ སབྦསམྦྷཱརཾ ཨཏྟཏོ མོཙེཏྭཱ.

པཏྟགྒཧཎཏྠནྟི ཨནྟོཔཀྑིཏྟཨུཎྷབྷོཛནཏྟཱ ཨཔརཱཔརཾ ཧཏྠེ པརིཝཏྟེནྟསྶ པཏྟགྒཧཎཏྠཾ. ཨུཏྟརིསཱཊཀནྟི ཨཏྟནོ ཨུཏྟརིསཱཊཀཾ. ཨེཏཱནི ¶ པཱཀཊཊྛཱནཱནཱིཏི ཨེཏཱནི ཡཐཱཝུཏྟཱནི བྷགཝཏོ དེསནཱཡ པཱཀཊཱནི ཐེརསྶ པུཉྙཀརཎཊྛཱནཱནི.

པཊིསནྡྷིཾ ¶ གཧེཏྭཱཏི ཨམྷཱཀཾ མཧཱབོདྷིསཏྟསྶ པཊིསནྡྷིགྒཧཎདིཝསེ ཨེཝ པཊིསནྡྷིཾ གཧེཏྭཱ.

ཏིཏྠཝཱསཱདིཝཎྞནཱ

ཨུགྒཧཎཾ པཱལི༹ཡཱ ཨུགྒཎྷནཾ. སཝནཾ ཨཏྠསཝནཾ. པརིཔུཙྪནཾ གཎྛིཊྛཱནེསུ ཨཏྠཔརིཔུཙྪནཾ. དྷཱརཎཾ པཱལི༹ཡཱཔི པཱལི༹ཨཏྠསྶཔི ཙིཏྟེ ཋཔནཾ. སབྦཉྩེཏཾ ཨིདྷ པཊིཙྩསམུཔྤཱདཝསེན ཝེདིཏབྦཾ.

སོཏཱཔནྣཱནཉྩ…པེ... ཨུཔཊྛཱཏིཏཏྠ སམྨོཧཝིདྡྷཾསནེན ‘‘ཡཾ ཀིཉྩི སམུདཡདྷམྨཾ, སབྦཾ ཏཾ ནིརོདྷདྷམྨ’’ནྟི (དཱི. ནི. ༡.༢༩༨; སཾ. ནི. ༥.༡༠༨༡; མཧཱཝ. ༡༦; ཙཱུལ༹ནི. ༤, ༧, ༨) ཨཏྟཔཙྩཀྑཝསེན ཨུཔཊྛཱནཏོ. ནཱམརཱུཔཔརིཙྪེདོཏི སཧ པཙྩཡེན ནཱམརཱུཔསྶ པརིཙྪིཛྫ ཨཝབོདྷོ.

པཊིཙྩསམུཔྤཱདགམྦྷཱིརཏཱཝཎྞནཱ

‘‘ཨཏྠགམྦྷཱིརཏཱཡཱ’’ཏིཨཱདིནཱ སངྑེཔཏོ ཝུཏྟམཏྠཾ ཝིཝརིཏུཾ ¶ ‘‘ཏཏྠཱ’’ཏིཨཱདི ཨཱརདྡྷཾ. ཛཱཏིཔཙྩཡསམྦྷཱུཏསམུདཱགཏཊྛོཏི ཛཱཏིཔཙྩཡཏོ སམྦྷཱུཏཾ ཧུཏྭཱ སཧིཏསྶ ཨཏྟནོ པཙྩཡཱནུརཱུཔསྶ ཛརཱམརཎསྶ ཨུདྡྷཾ ཨུདྡྷཾ ཨཱགཏབྷཱཝོ, ཨནུཔཝཏྟཏྠོཏི ཨཏྠོ. ཨཐ ཝཱ སམྦྷཱུཏཊྛོ ཙ སམུདཱགཏཊྛོ ཙ སམྦྷཱུཏསམུདཱགཏཊྛོ. ‘‘ན ཛཱཏིཏོ ཛརཱམརཎཾ ན ཧོཏི,’’ ན ཙ ཛཱཏིཾ ཝིནཱ ‘‘ཨཉྙཏོ ཧོཏཱི’’ཏི ཧི ཛཱཏིཔཙྩཡསམྦྷཱུཏཊྛོ ཝུཏྟོ, ཨིཏྠཉྩ ཛཱཏིཏོ སམུདཱགཙྪཏཱིཏི ཛཱཏིཔཙྩཡསམུདཱགཏཊྛོ, ཡཱ ཡཱ ཛཱཏི ཡཐཱ ཡཐཱ པཙྩཡོ ཧོཏི, ཏདནུརཱུཔཔཱཏུབྷཱཝོཏི ཨཏྠོ. སོ ཨནུཔཙིཏཀུསལསམྦྷཱརཱནཾ ཉཱཎསྶ ཏཏྠ ཨཔྤཏིཊྛཏཱཡ ཨགཱདྷཊྛེན གམྦྷཱིརོ. སེསཔདེསུཔི ཨེསེཝ ནཡོ.

ཨཝིཛྫཱཡ སངྑཱརཱནཾ པཙྩཡཊྛོཏི ཡེནཱཀཱརེན ཡདཝཏྠཱ ཨཝིཛྫཱ སངྑཱརཱནཾ པཙྩཡོ ཧོཏི. ཡེན ཧི པཝཏྟིཨཱཀཱརེན, ཡཱཡ ཙ ཨཝཏྠཱཡ ཨཝཏྠིཏཱ ཨཝིཛྫཱ ཏེསཾ ཏེསཾ སངྑཱརཱནཾ པཙྩཡོ ཧོཏི, ཏདུབྷཡསྶཔི དུརཝབོདྷནཱིཡཏོ ཨཝིཛྫཱ སངྑཱརཱནཾ ནཝཧི ཨཱཀཱརེཧི པཙྩཡཊྛོ ¶ ཨནུཔཙིཏཀུསལསམྦྷཱརཱནཾ ཉཱཎསྶ ཏཏྠ ཨཔྤཏིཊྛཏཱཡ ཨགཱདྷཊྛེན གམྦྷཱིརོ. ཨེས ནཡོ སེསཔདེསུཔི.

ཀཏྠཙི ¶ ཨནུལོམཏོ དེསཱིཡཏི, ཀཏྠཙི པཊིལོམཏོཏི ཨིདྷ པན པཙྩཡུཔྤཱདཱ པཙྩཡུཔྤནྣུཔྤཱདསངྑཱཏོ ཨནུལོམོ, པཙྩཡནིརོདྷཱ པཙྩཡུཔྤནྣནིརོདྷསངྑཱཏོ ཙ པཊིལོམོ ཨདྷིཔྤེཏོ. ཨཱདིཏོ པན པཊྛཱཡ ཨནྟགམནཾ ཨནུལོམོ, ཨནྟཏོ ཙ ཨཱདིགམནཾ པཊིལོམོཏི ཨདྷིཔྤེཏོ. ཨཱདིཏོ པཊྛཱཡ ཨནུལོམདེསནཱཡ, ཨནྟཏོ པཊྛཱཡ པཊིལོམདེསནཱཡ ཙ ཏིསནྡྷི ཙཏུསངྑེཔོ. ‘‘ཨིམེ བྷིཀྑཝེ ཙཏྟཱརོ ཨཱཧཱརཱ ཀིཾ ནིདཱནཱ’’ཏིཨཱདིཀཱཡ (སཾ. ནི. ༢.༡༡) ཙ ཝེམཛ྄ཛྷཏོ པཊྛཱཡ པཊིལོམདེསནཱཡ, ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎཾ, ཏིཎྞཾ སངྒཏི ཕསྶོ, ཕསྶཔཙྩཡཱ ཝེདནཱ’’ཏིཨཱདིཀཱཡ (སཾ. ནི. ༢.༤༣, ༤༥) ཨནུལོམདེསནཱཡ ཙ དྭིསནྡྷི ཏིསངྑེཔོ. ‘‘སཾཡོཛནིཡེསུ ¶ བྷིཀྑཝེ དྷམྨེསུ ཨསྶཱདཱནུཔསྶིནོ ཝིཧརཏོ ཏཎྷཱ པཝཌྜྷཏི, ཏཎྷཱཔཙྩཡཱ ཨུཔཱདཱན’’ནྟིཨཱདཱིསུ (སཾ. ནི. ༢.༥༣, ༥༧) ཨེཀསནྡྷི དྭིསངྑེཔོ. ཨེཀངྒོ ཧི པཊིཙྩསམུཔྤཱདོ དེསིཏོ. ལབྦྷཏེཝ ཧི སོ ‘‘ཏཏྲ བྷིཀྑཝེ སུཏཝཱ ཨརིཡསཱཝཀོ པཊིཙྩསམུཔྤཱདཾཡེཝ སཱདྷུཀཾ ཡོནིསོ མནསི ཀརོཏི ‘ཨིཏི ཨིམསྨིཾ སཏི ཨིདཾ ཧོཏི…པེ… ནིརུཛ྄ཛྷཏཱི’ཏི. སུཁཝེདནིཡཾ བྷིཀྑཝེ ཕསྶཾ པཊིཙྩ ཨུཔྤཛྫཏི སུཁཝེདནཱ’’ཏི (སཾ. ནི. ༢.༦༢) ཨིམསྶ སུཏྟསྶ ཝསེན ཝེདིཏབྦོ. ཨིཏི ཏེན ཏེན ཀཱརཎེན ཏཐཱ ཏཐཱ པཝཏྟེཏབྦཏྟཱ པཊིཙྩསམུཔྤཱདོ དེསནཱཡ གམྦྷཱིརོ. ཏེནཱཧ ‘‘ཨཡཾ དེསནཱགམྦྷཱིརཏཱ’’ཏི. ན ཧི ཏཏྠ སབྦཉྙུཏཉཱཎཏོ ཨཉྙཾ ཉཱཎཾ པཏིཊྛཾ ལབྷཏི.

‘‘ཨཝིཛྫཱཡ པནཱ’’ཏིཨཱདཱིསུ ཛཱནནལཀྑཎསྶ ཉཱཎསྶ པཊིཔཀྑབྷཱུཏོ ཨཝིཛྫཱཡ ཨཉྙཱཎཊྛོ. ཨཱརམྨཎསྶ པཙྩཀྑཀརཎེན དསྶནབྷཱུཏསྶ པཊིཔཀྑབྷཱུཏོ ཨདསྶནཊྛོ. ཡེནེསཱ ཨཏྟནོ སབྷཱཝེན དུཀྑཱདཱིནཾ ཡཱཐཱཝསརསཾ པཊིཝིཛ྄ཛྷིཏུཾ ན དེཏི ཚཱདེཏྭཱ པརིཡོནནྡྷིཏྭཱ ཏིཊྛཏི, སོ ཏསྶཱ སཙྩཱསམྤཊིཝེདྷཊྛོ. ཨབྷིསངྑརཎཾ སཾཝིདྷཱནཾ, པཀཔྤནནྟི ཨཏྠོ. ཨཱཡཱུཧནཾ སམྤིཎྜནཾ, སམྤཡུཏྟདྷམྨཱནཾ ཨཏྟནོ ཀིཙྩཱནུརཱུཔཏཱཡ རཱསཱིཀརཎནྟི ཨཏྠོ. ཨཔུཉྙཱབྷིསངྑཱརེཀདེསོ སརཱགོ. ཨཉྙོ ཝིརཱགོ. རཱགསྶ ཝཱ ཨཔྤཊིཔཀྑབྷཱཝཏོ རཱགཔྤཝཌྜྷཀོ, རཱགུཔྤཏྟིཔཙྩཡོ ¶ ཙ སབྦོཔི ཨཔུཉྙཱབྷིསངྑཱརོ སརཱགོ. ཨིཏརོ ཏབྦིདཱུརབྷཱཝཏོ ཝིརཱགོ. ‘‘དཱིགྷརཏྟཾ ཧེཏཾ བྷིཀྑཝེ ཨསྶུཏཝཏོ པུཐུཛྫནསྶ ཨཛ྄ཛྷོསིཏཾ མམཱཡིཏཾ པརཱམཊྛཾ ‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’ཏི’’ (སཾ. ནི. ༢.༦༡) ཨཏྟཔརཱམཱསསྶ ¶ ཝིཉྙཱཎཾ ཝིསེསཏོ ཝཏྠུ ཝུཏྟནྟི ཝིཉྙཱཎསྶ སུཉྙཏཊྛོ གམྦྷཱིརོ. ཨཏྟཱ ཝིཛཱནཱཏི སཾསརཏཱིཏི སབྱཱཔཱརཏཱསངྐནྟིཨབྷིནིཝེསབལཝཏཱཡ ཨབྱཱཔཱརཨསངྐནྟིཔཊིསནྡྷིཔཱཏུབྷཱཝཊྛཱ ཙ གམྦྷཱིརཱ. ནཱམརཱུཔསྶ པཊིསནྡྷིཀྑཎེ ཨེཀཏོཝ ཨུཔྤཱདོ ཨེཀུཔྤཱདོ, པཝཏྟིཡཾ ཝིསུཾ ཝིསུཾ ཡཐཱརཧཾ ཨེཀུཔྤཱདོ. ནཱམསྶ རཱུཔེན, རཱུཔསྶ ཙ ནཱམེན ཨསམྤཡོགཏོ ཝིནིབྦྷོགོ ནཱམསྶ ནཱམེན ¶ , རཱུཔསྶ ཙ རཱུཔེན ཨེཀཙྩསྶ ཨེཀཙྩེན ཨཝིནིབྦྷོགོ (ནཱམསྶ ནཱམེན ཨཝིནིབྦྷོགོ ཝིབྷ. མཱུལཊཱི. ༢༤༢) ཡོཛེཏབྦོ. ཨེཀུཔྤཱདེཀནིརོདྷེཧི ཨཝིནིབྦྷོགེ ཨདྷིཔྤེཏེ སོ རཱུཔསྶ ཙ ཨེཀཀལཱཔཔཝཏྟིནོ རཱུཔེན ལབྦྷཏཱིཏི. ཨཐ ཝཱ ཨེཀཙཏུཝོཀཱརབྷཝེསུ ནཱམརཱུཔཱནཾ ཨསཧཝཏྟནཏོ ཨཉྙམཉྙཾ ཝིནིབྦྷོགོ, པཉྩཝོཀཱརབྷཝེ སཧཝཏྟནཏོ ཨཝིནིབྦྷོགོ ཙ ཝེདིཏབྦོ.

ནཱམསྶ ཨཱརམྨཎཱབྷིམུཁཾ ནམནཾ ནམནཊྛོ. རཱུཔསྶ ཝིརོདྷིཔཙྩཡསམཝཱཡེ ཝིསདིསུཔྤཏྟི རུཔྤནཊྛོ. ཨིནྡྲིཡཔཙྩཡབྷཱཝོ ཨདྷིཔཏིཡཊྛོ. ‘‘ལོཀོཔེསོ, དྭཱརཱཔེསཱ, ཁེཏྟཾ པེཏ’’ནྟི ཝུཏྟལོཀཱདིཨཏྠོ ཙཀྑཱདཱིསུ པཉྩསུ ཡོཛེཏབྦོ. མནཱཡཏནསྶ པན ལུཛྫནཏོ, མནོསམྥསྶཱདཱིནཾ དྭཱརཁེཏྟབྷཱཝཏོ ཙ ཨེཏེ ཨཏྠཱ ཝེདིཏབྦཱ. ཨཱཔཱཐགཏཱནཾ རཱུཔཱདཱིནཾ པཀཱསནཡོགྱཏཱལཀྑཎཾ ཨོབྷཱསནཾ ཙཀྑཱདཱིནཾ ཝིསཡིབྷཱཝོ, མནཱཡཏནསྶ ཝིཛཱནནཾ. སངྒྷཊྚནཊྛོ ཝིསེསཏོ ཙཀྑུསམྥསྶཱདཱིནཾ པཉྩནྣཾ, ཨིཏརེ ཚནྣམྤི ཡོཛེཏབྦཱ. ཕུསནཉྩ ཕསྶསྶ སབྷཱཝོ. སངྒྷཊྚནཾ རསོ, ཨིཏརེ ཨུཔཊྛཱནཱཀཱརཱ. ཨཱརམྨཎརསཱནུབྷཝནཊྛོ རསཝསེན ཝུཏྟོ, ཝེདཡིཏཊྛོ ལཀྑཎཝསེན. སུཁདུཀྑམ ཨཛ྄ཛྷཏྟབྷཱཝོ ¶ ཡཐཱཀྐམཾ ཏིསྶནྣཾ ཝེདནཱནཾ སབྷཱཝཝསེན ཝུཏྟོ. ‘‘ཨཏྟཱ ཝེདཡཏཱི’’ཏི ཨབྷིནིཝེསསྶ བལཝབྷཱཝཏོ ནིཛྫཱིཝཊྛོ ཝེདནཱཡ གམྦྷཱིརོ. ནིཛྫཱིཝཱཡ ཝཱ ཝེདནཱཡ ཝེདཡིཏཾ ནིཛྫཱིཝཝེདཡིཏཾ, སོ ཨེཝ ཨཏྠོཏི ནིཛྫཱིཝཝེདཡིཏཊྛོ.

སཔྤཱིཏིཀཏཎྷཱཡ ¶ ཨབྷིནནྡིཏཊྛོ. བལཝཏརཏཎྷཱཡ གིལིཏྭཱ པརིནིཊྛཱཔནཾ ཨཛ྄ཛྷོསཱནཊྛོ. ཨིཏརེ པན ཛེཊྛབྷཱཝཨོསཱརཎསམུདྡདུརཏིཀྐམཨཔཱརིཔཱུརིཝསེན ཝེདིཏབྦཱ. ཨཱདཱནགྒཧཎཱབྷིནིཝེསཊྛཱ ཙཏུནྣམྤི ཨུཔཱདཱནཱནཾ སམཱནཱ, པརཱམཱསཊྛོ དིཊྛུཔཱདཱནཱདཱིནམེཝ, ཏཐཱ དུརཏིཀྐམཊྛོ. ‘‘དིཊྛིཀནྟཱརོ’’ཏི (དྷ. ས. ༣༩༢) ཧི ཝཙནཏོ དིཊྛཱིནཾ དུརཏིཀྐམཏཱ. དལ༹ྷགྒཧཎཏྟཱ ཝཱ ཙཏུནྣམྤི དུརཏིཀྐམཊྛོ ཡོཛེཏབྦོ. ཡོནིགཏིཋིཏིནིཝཱསེསུཁིཔནནྟི སམཱསེ བྷུམྨཝཙནསྶ ཨལོཔོ དཊྛབྦོ. ཨེཝཉྷི ཏེན ཨཱཡཱུཧནཱབྷིསངྑརཎཔདཱནཾ སམཱསོ ཧོཏི. ཡཐཱ ཏཐཱ ཛཱཡནཾ ཛཱཏིཨཏྠོ. ཏསྶཱ པན སནྣིཔཱཏཏོ ཛཱཡནཾ སཉྫཱཏིཨཏྠོ. མཱཏུཀུཙྪིཾ ཨོཀྐམིཏྭཱ ཝིཡ ཛཱཡནཾ ཨོཀྐནྟིཨཏྠོ. སོ ཛཱཏིཏོ ནིབྦཏྟནཾ ནིབྦཏྟིཨཏྠོ. ཀེཝལཾ པཱཏུབྷཝནཾ པཱཏུབྷཱཝཊྛོ.

ཛརཱམརཎངྒཾ མརཎཔྤདྷཱནནྟི ཏསྶ མརཎཊྛཱ ཨེཝ ཁཡཱདཡོ གམྦྷཱིརཱཏི དསྶིཏཱ. ཨུཔྤནྣཨུཔྤནྣཱནཉྷི ནཝནཝཱནཾ ཁཡེན ཀམེན ཁཎྜིཙྩཱདིཔརིཔཀྐཔཝཏྟིཡཾ ལོཀེ ཛརཱཝོཧཱརོཏི ¶ . ཁཡཊྛོ ཝཱ ཛརཱཡ ཝུཏྟོཏི དཊྛབྦོ. ནཝབྷཱཝཱཔགམོ ཧི ‘‘ཁཡོ’’ཏི ¶ ཝཏྟུཾ ཡུཏྟོཏི ཝིཔརིཎཱམཊྛོ དྭིནྣམྤི ཝསེན ཡོཛེཏབྦོ, སནྟཏིཝསེན ཝཱ ཛརཱཡ ཁཡཝཡབྷཱཝཱ, སམྨུཏིཁཎིཀཝསེན མརཎསྶ བྷེདཝིཔརིཎཱམཊྛཱ ཡོཛེཏབྦཱ. ཨཝིཛྫཱདཱིནཾ སབྷཱཝོ པཊིཝིཛ྄ཛྷཱིཡཏཱིཏི པཊིཝེདྷོ. ཝུཏྟཉྷེཏཾ ནིདཱནཀཐཱཡཾ ‘‘ཏེསཾ ཏེསཾ ཝཱ ཏཏྠ ཏཏྠ ཝུཏྟདྷམྨཱནཾ པཊིཝིཛ྄ཛྷིཏབྦོ སལཀྑཎསངྑཱཏོ ཨཝིཔརཱིཏསབྷཱཝོ པཊིཝེདྷོ’’ཏི. (དཱི. ནི. ཨཊྛ. པཋམམཧཱསངྒཱིཏིཀཐཱ; ཨབྷི. ཨཊྛ. ནིདཱནཀཐཱ) སོ ཧི ཨཝིཛྫཱདཱིནཾ སབྷཱཝོ མགྒཉཱཎེནེཝ ཨསམྨོཧཔཊིཝེདྷཝསེན པཊིཝིཛ྄ཛྷིཏབྦཏོ ཨཉྙཱཎསྶ ཨལབྦྷནེཡྻཔཏིཊྛཏཱཡ ཨགཱདྷཊྛེན གམྦྷཱིརོ. སཱ སབྦཱཔཱིཏི སཱ ཡཐཱཝུཏྟཱ སངྑེཔཏོ ཙཏུབྦིདྷཱ ཝིཏྠཱརཏོ ཨནེཀཔྤབྷེདཱ སབྦཱཔི པཊིཙྩསམུཔྤཱདསྶ གམྦྷཱིརཏཱ ཐེརསྶ ཨུཏྟཱནཀཱ ཝིཡ ཨུཔཊྛཱསི ཙཏཱུཧི ཨངྒེཧི སམནྣཱགཏཏྟཱ. ཨུདཱཧུ ཨཉྙེསམྤཱིཏི ‘‘མཡ྄ཧཾ ཏཱཝ ཨེས པཊིཙྩསམུཔྤཱདོ ཨུཏྟཱནཀོ ཧུཏྭཱ ཨུཔཊྛཱཏི, ཀིཾ ནུ ཁོ ཨཉྙེསམྤི ཨེཝཾ ཨུཏྟཱནཀོ ཧུཏྭཱ ཨུཔཊྛཱཏཱི’’ཏི མཱ ཨེཝཾ ཨཝཙ མཡཱཝ དིནྣནཡེ ཙཏུསཙྩཀམྨཊྛཱནཝིདྷིམྷི ཋཏྭཱ.

ཨཔསཱདནཱཝཎྞནཱ

ཨོལཱ༹རིཀནྟི ¶ ཝཏྠུཝཱིཏིཀྐམསམཏྠཏཱཝསེན ཐཱུལཾ. ཀཱམཾ ཀཱམརཱགཔཊིགྷཱཡེཝ ཨཏྠཏོ ཀཱམརཱགཔཊིགྷསཾཡོཛནཱནི, ཀཱམརཱགཔཊིགྷཱནུསཡཱ ཙ, ཏཐཱཔི ཨཉྙོཡེཝ སཾཡོཛནཊྛོ བནྡྷནབྷཱཝཏོ, ཨཉྙོ ཨནུསཡནཊྛོ ཨཔྤཧཱིནབྷཱཝེན སནྟཱནེ ཐཱམགམནནྟི ཀཏྭཱ, ཨིཏི ཀིཙྩཝིསེསཝིསིཊྛབྷེདེ གཧེཏྭཱ ‘‘ཙཏྟཱརོ ཀིལེསེ’’ཏི ཙ ཝུཏྟཾ. ཨེསེཝ ནཡོ ཨིཏརེསུཔི. ཨཎུསཧགཏེཏི ཨཎུསབྷཱཝཾ ཨུཔགཏེ. ཏབྦྷཱཝཏྠོ ཧི ཨཡཾ སཧགཏ-སདྡོ ‘‘ནནྡིརཱགསཧགཏཱ’’ཏིཨཱདཱིསུ (དཱི. ནི. ༢.༤༠༠; མ. ནི. ༡.༩༡, ༡༣༣, ༤༦༠; ༣.༣༧༤; སཾ. ནི. ༥.༡༠༨༡; མཧཱཝ. ༡༤; ཝིབྷ. ༢༠༣; པཊི. མ. ༡.༣༤; ༢.༣༠) ཝིཡ.

ཡཐཱ ཨུཔརིམགྒཱདྷིགམནཝསེན སཙྩསམྤཊིཝེདྷོ ¶ པཙྩཡཱཀཱརཔཊིཝེདྷཝསེན, ཨེཝཾ སཱཝཀབོདྷིཔཙྩེཀབོདྷིསམྨཱསམྦོདྷིཨདྷིགམནཝསེནཔི སཙྩསམྤཊིཝེདྷོ པཙྩཡཱཀཱརཔཊིཝེདྷཝསེནེཝཱཏི དསྶེཏུཾ ‘‘ཀསྨཱ ཙཱ’’ཏིཨཱདི ཝུཏྟཾ. སབྦཐཱཝཱཏི སབྦཔྤཀཱརེནེཝ ཀིཉྩིཔི པཀཱརཾ ཨསེསེཏྭཱཏི ཨཏྠོ. ཡེ ཀཏཱབྷིནཱིཧཱརཱནཾ མཧཱབོདྷིསཏྟཱནཾ ཝཱིརིཡསྶ ཨུཀྐཊྛམཛ྄ཛྷིམམུདུཏཱཝསེན བོདྷིསམྦྷཱརསམྦྷརཎེ ཀཱལབྷེདཱ ཨིཙྪིཏཱ, ཏེ དསྶེནྟོ ‘‘ཙཏྟཱརི, ཨཊྛ, སོལ༹ས ཝཱ ཨསངྑྱེཡྻཱནཱི’’ཏི ཨཱཧ, སྭཱཡམཏྠོ ཙརིཡཱཔིཊཀཝཎྞནཱཡ གཧེཏབྦོ. སཱཝཀོ པདེསཉཱཎེ ¶ ཋིཏོཏི སཱཝཀོ ཧུཏྭཱ སེཀྑབྷཱཝཏོ ཏཏྠཱཔི པདེསཉཱཎེ ཋིཏོ. བུདྡྷཱནཾ ཀཐཱཡ ‘‘ཏཾ ཏཐཱགཏོ ཨབྷིསམེཏཱི’’ཏིཨཱདིཀཱཡ པཙྩནཱིཀཾ ཧོཏི. ཨནཉྙསཱདྷཱརཎསྶ ཧི ཝསེན བུདྡྷཱནཾ སཱིཧནཱདོ, ན ཨཉྙསཱདྷཱརཎསྶ.

‘‘ཝཱཡམནྟསྶེཝཱ’’ཏི ཨིམིནཱ ཝིསེསཏོ ཉཱཎསམྦྷཱརསམྦྷརཎཾ པཉྙཱཔཱརམིཏཱཔཱུརཎཾ ཝདཏི. ཏསྶ ཙ སབྦམྤི པུཉྙཾ ཨུཔནིསྶཡོ.

‘‘ཨེས དེཝམནུསྶཱནཾ, སབྦཀཱམདདོ ནིདྷི;

ཡཾ ཡདེཝཱབྷིཔཏྠེནྟི, སབྦམེཏེན ལབྦྷཏཱི’’ཏི. (ཁུ. པཱ. ༨.༡༠) –

ཧི ཝུཏྟཾ. ཏསྨཱ མཧཱབོདྷིསཏྟཱནཾ སབྦེསམྤི པུཉྙསམྦྷཱརོ ཡཱཝདེཝ ཉཱཎསམྦྷཱརཏྠོ སམྨཱསམྦོདྷིསམདྷིགམསམཏྠཏྟཱཏི ཨཱཧ ‘‘པཙྩཡཱཀཱརཾ ¶ …པེ… ནཏྠཱི’’ཏི. ཨིདཱནི པཙྩཡཱཀཱརཔཊིཝེདྷསྶེཝ ཝཱ མཧཱནུབྷཱཝཏཱདསྶནམུཁེན པཊིཙྩསམུཔྤཱདསྶེཝ པརམགམྦྷཱིརཏཾ དསྶེཏུཾ ‘‘ཨཝིཛྫཱ’’ཏིཨཱདི ཝུཏྟཾ. ནཝཧི ཨཱཀཱརེཧཱིཏི ཨུཔྤཱདཱདཱིཧི ནཝཧི ཨཱཀཱརེཧི. ཨཝིཛྫཱ ཧི སངྑཱརཱནཾ ཨུཔྤཱདོ ཧུཏྭཱ པཙྩཡོ ཧོཏི, པཝཏྟཾ ཧུཏྭཱ ནིམིཏྟཾ, ཨཱཡཱུཧནཾ, སཾཡོགོ, པལིབོདྷོ, སམུདཡོ, ཧེཏུ, པཙྩཡོ ཧུཏྭཱ པཙྩཡོ ཧོཏི. ཨེཝཾ སངྑཱརཱདཡོ ཝིཉྙཱཎཱདཱིནཾ. ཝུཏྟཉྷེཏཾ པཊིསམྦྷིདཱམགྒེ ‘‘ཀཐཾ ¶ པཙྩཡཔརིགྒཧེ པཉྙཱ དྷམྨཊྛིཏིཉཱཎཾ? ཨཝིཛྫཱ སངྑཱརཱནཾ ཨུཔྤཱདཊྛིཏི ཙ པཝཏྟཊྛིཏི ཙ ནིམིཏྟཊྛིཏི ཙ ཨཱཡཱུཧནཊྛིཏི ཙ སཉྙོགཊྛིཏི ཙ པལིབོདྷཊྛིཏི ཙ སམུདཡཊྛིཏི ཙ ཧེཏུཊྛིཏི ཙ པཙྩཡཊྛིཏི ཙ ཨིམེཧི ནཝཧཱཀཱརེཧི ཨཝིཛྫཱཔཙྩཡཱ སངྑཱརཱ པཙྩཡསམུཔྤནྣཱ’’ཏིཨཱདི (པཊི. མ. ༡.༤༥).

ཏཏྠ ནཝཧཱཀཱརེཧཱིཏི ནཝཧི པཙྩཡབྷཱཝཱུཔགམནཱཀཱརེཧི. ཨུཔྤཛྫཏི ཨེཏསྨཱ ཕལནྟི ཨུཔྤཱདོ, ཕལུཔྤཏྟིཡཱ ཀཱརཎབྷཱཝོ. སཏི ཙ ཨཝིཛྫཱཡ སངྑཱརཱ ཨུཔྤཛྫནྟི, ནཱསཏི, ཏསྨཱ ཨཝིཛྫཱ སངྑཱརཱནཾ ཨུཔྤཱདོ ཧུཏྭཱ པཙྩཡོ ཧོཏི. ཏཐཱ ཨཝིཛྫཱཡ སཏི སངྑཱརཱ པཝཏྟནྟི, ནཱིཡནྟི ཙ. ཡཐཱ ཙ བྷཝཱདཱིསུ ཁིཔནྟི, ཨེཝཾ ཏེསཾ ཨཝིཛྫཱ པཙྩཡོ ཧོཏི. ཏཐཱ ཨཱཡཱུཧནྟི ཕལུཔྤཏྟིཡཱ གྷཊེནྟི, སཾཡུཛྫནྟི ཨཏྟནོ ཕལེན. ཡསྨིཾ སནྟཱནེ སཡཾ ཨུཔྤནྣཱ, ཏཾ པལིབུནྡྷནྟི. པཙྩཡནྟརསམཝཱཡེ ཨུདཡནྟི ཨུཔྤཛྫནྟི. ཧིནོཏི ཙ སངྑཱརཱནཾ ཀཱརཎབྷཱཝཾ གཙྪཏི. པཊིཙྩ ཨཝིཛྫཾ སངྑཱརཱ ཨཡནྟི པཝཏྟནྟཱིཏི ཨེཝཾ ཨཝིཛྫཱཡ སངྑཱརཱནཾ ཀཱརཎབྷཱཝཱུཔགམནཝིསེསཱ ཨུཔྤཱདཱདཡོ ཝེདིཏབྦཱ. ཏཏྠ ཏཐཱ སངྑཱརཱདཱིནཾ ཝིཉྙཱཎཱདཱིསུ ཨུཔྤཱདཊྛིཏིཨཱདཱིསུཔི. ཏིཊྛཏི ཨེཏེནཱཏི ཋིཏི, ཀཱརཎཾ. ཨུཔྤཱདོ ཨེཝ ཋིཏི ཨུཔྤཱདཊྛིཏི ¶ . ཨེསེཝ ནཡོ སེསེསུཔི. ‘‘པཙྩཡོ ཧོཏཱི’’ཏི ཨིདཾ ཨིདྷ ལོཀནཱཐེན ཏདཱ པཙྩཡཔརིགྒཧསྶ ཨཱརདྡྷབྷཱཝདསྶནཾ. སོ ཙ ཨཱརམྦྷོ ཉཱཡཱརུལ༹ྷོ ‘‘ཡཐཱ ཙ པུརིམེཧི མཧཱབོདྷིསཏྟེཧི བོདྷིམཱུལེ པཝཏྟིཏོ, ཏཐེཝ ཙ པཝཏྟིཏོ’’ཏི. ཨཙྪརིཡཝེགཱབྷིཧཏཱ དསསཧསྶིལོཀདྷཱཏུ སངྐམྤི སམྤཀམྤཱིཏི དསྶེནྟོ ‘‘དིཊྛམཏྟེཝཱ’’ཏིཨཱདིམཱཧ.

ཨེཏསྶ དྷམྨསྶཱཏི ཨེཏསྶ པཊིཙྩསམུཔྤཱདསཉྙིཏསྶ ¶ དྷམྨསྶ. སོ པན ཡསྨཱ ཨཏྠཏོ ཧེཏུཔབྷཝཱནཾ ཧེཏུ. ཏེནཱཧ ‘‘ཨེཏསྶ པཙྩཡདྷམྨསྶཱ’’ཏི, ཛཱཏིཨཱདཱིནཾ ཛརཱམརཎཱདིཔཙྩཡཏཱཡཱཏི ཨཏྠོ. ནཱམརཱུཔཔརིཙྪེདོ, ཏསྶ ཙ པཙྩཡཔརིགྒཧོ ན པཋམཱབྷིནིཝེསམཏྟེན ཧོཏི ¶ , ཨཐ ཁོ ཏཏྠ ཨཔརཱཔརཾ ཉཱཎུཔྤཏྟིསཉྙིཏེན ཨནུ ཨནུ བུཛ྄ཛྷནེན, ཏདུབྷཡཱབྷཱཝཾ པན དསྶེནྟོ ‘‘ཉཱཏཔརིཉྙཱཝསེན ཨནནུབུཛ྄ཛྷནཱ’’ཏི ཨཱཧ. ནིཙྩསཉྙཱདཱིནཾ པཛཧནཝསེན ཝཏྟམཱནཱ ཝིཔསྶནཱ དྷམྨེ ཙ པཊིཝིཛ྄ཛྷནྟཱི ཨེཝ ནཱམ ཧོཏི པཊིཔཀྑཝིཀྑམྦྷནེན ཏིཀྑཝིསདབྷཱཝཱཔཏྟིཏོ, ཏདདྷིཊྛཱནབྷཱུཏཱ ཙ ཏཱིརཎཔརིཉྙཱ, ཨརིཡམགྒོ ཙ པརིཉྙཱཔཧཱནཱབྷིསམཡཝསེན པཝཏྟིཡཱ ཏཱིརཎཔཧཱནཔརིཉྙཱསངྒཧོ ཙཱཏི ཏདུབྷཡཔཊིཝེདྷཱབྷཱཝཾ དསྶེནྟོ ‘‘ཏཱིརཎ…པེ… ཨཔྤཊིཝིཛ྄ཛྷནཱ’’ཏི ཨཱཧ. ཏནྟཾ ཝུཙྩཏི ཝཏྠཝཱིནནཏྠཾ ཏནྟཝཱཡེཧི དཎྜཀེ ཨཱསཉྫིཏྭཱ པསཱརིཏསུཏྟཔཊྚཱི ཏནཱིཡཏཱིཏི ཀཏྭཱ. ཏཾ པན སུཏྟསནྟཱནཱཀུལཏཱཡ ནིདསྶནབྷཱཝེན ཨཱཀུལམེཝ གཧིཏནྟི ཨཱཧ ‘‘ཏནྟཾ ཝིཡ ཨཱཀུལཀཛཱཏཱ’’ཏི. སངྑེཔཏོ ཝུཏྟམཏྠཾ ཝིཏྠཱརཏོ དསྶེཏུཾ ‘‘ཡཐཱ ནཱམཱ’’ཏིཨཱདི ཝུཏྟཾ. སམཱནེཏུནྟི པུབྦེན པརཾ སམཾ ཀཏྭཱ ཨཱནེཏུཾ, ཨཝིསམཾ ཨུཛུཾ ཀཱཏུནྟི ཨཏྠོ. ཏནྟམེཝ ཝཱ ཨཱཀུལཾ ཏནྟཱཀུལཾ, ཏནྟཱཀུལཾ ཝིཡ ཛཱཏཱ བྷཱུཏཱཏི ཏནྟཱཀུལཛཱཏཱ. མཛ྄ཛྷིམཾ པཊིཔདཾ ཨནུཔགནྟྭཱ ཨནྟདྭཡཔཏནེན པཙྩཡཱཀཱརེ ཁལིཏཱ ཨཱཀུལཱ བྱཱཀུལཱ ཧོནྟི. ཏེནེཝ ཨནྟདྭཡཔཏནེན ཏཾཏཾདིཊྛིགཱཧཝསེན པརིབྦྷམནྟཱ ཨུཛུཀཾ དྷམྨཊྛིཏི ཀཐཾ པཊིཔཛྫིཏུཾ ན ཛཱནནྟི. ཏེནཱཧ ‘‘ན སཀྐོནྟི ཏཾ པཙྩཡཱཀཱརཾ ཨུཛུཾ ཀཱཏུ’’ནྟི. དྭེ བོདྷིསཏྟེཏི པཙྩེཀབོདྷིསཏྟམཧཱབོདྷིསཏྟེ. ཨཏྟནོ དྷམྨཏཱཡཱཏི ཨཏྟནོ སབྷཱཝེན, པརོཔདེསེན ཝིནཱཏི ཨཏྠོ. ཏཏྠ ཏཏྠ གུལ༹ཀཛཱཏནྟི ཏསྨིཾ ཏསྨིཾ ཋཱནེ ཛཱཏགུལ༹ཀམྤི གཎྛཱིཏི ¶ སུཏྟགཎྛི. ཏཏོ ཨེཝ གཎྛིབདྡྷཾ བདྡྷགཎྛིཀཾ. པཙྩཡེསུ པཀྑལིཏྭཱཏི ཨནིཙྩདུཀྑཱནཏྟཱདིསབྷཱཝེསུ པཙྩཡདྷམྨེསུ ནིཙྩཱདིགྒཱཧཝསེན པཀྑལིཏྭཱ. པཙྩཡེ ཨུཛུཾ ཀཱཏུཾ ཨསཀྐོནྟཱཏི ཏསྶེཝ ནིཙྩཱདིགྒཱཧསྶ ཨཝིསྶཛྫནཏོ པཙྩཡདྷམྨནིམིཏྟཾ ཨཏྟནོ དསྶནཾ ཨུཛུཾ ཀཱཏུཾ ཨསཀྐོནྟཱ ཨིདཾསཙྩཱབྷིནིཝེསཀཱཡགནྠཝསེན གཎྛིཀཛཱཏཱ ཧོནྟཱིཏི ཨཱཧ ‘‘དྭཱསཊྛི…པེ… གཎྛིབདྡྷཱ’’ཏི. ཡེ ཧི ཀེཙི སམཎཱ ཝཱ བྲཱཧྨཎཱ ཝཱ སསྶཏདིཊྛིཨཱདིདིཊྛིཡོ ནིསྶིཏཱ ཨལླཱིནཱ.

ཝིནནཏོ ¶ ‘‘ཀུལཱ’’ཏི ཨིཏྠིལིངྒཝསེན ལདྡྷནཱམསྶ ཏནྟཝཱཡསྶ གཎྛིཀཾ ནཱམ ཨཱཀུལབྷཱཝེན ཨགྒཏོ ཝཱ མཱུལཏོ ཝཱ དུཝིཉྙེཡྻཱཡེཝ ཁལིཏཏནྟསུཏྟནྟི ཨཱཧ ‘‘ཀུལཱགཎྛིཀཾ ཝུཙྩཏི པེསཀཱརཀཉྫིཡསུཏྟ’’ནྟི. སཀུཎིཀཱཏི ཀུལཱཝཀསཀུཎིཀཱ. སཱ ཧི རུཀྑསཱཁཱསུ ཨོལམྦནཀུལཱཝཀཱ ¶ ཧོཏི. ཏཉྷི སཱ ཀུལཱཝཀཾ ཏཏོ ཏཏོ ཏིཎཧཱིརཱདིཀེ ཨཱནེཏྭཱ ཏཐཱ ཝིནནྡྷཏི, ཡཐཱ ཏེསཾ པེསཀཱརཀཉྫིཡསུཏྟཾ ཝིཡ ཨགྒེན ཝཱ ཨགྒཾ མཱུལེན ཝཱ མཱུལཾ སམཱནེཏུཾ ཝིཝེཙེཏུཾ ཝཱ ན སཀྐཱ. ཏེནཱཧ ‘‘ཡཐཱ ཧཱི’’ཏིཨཱདི. ཏདུབྷཡམྤཱིཏི ‘‘ཀུལཱགཎྛིཀ’’ནྟི ཝུཏྟཾ ཀཉྫིཡསུཏྟཾ, ཀུལཱཝཀཉྩ. པུརིམནཡེནེཝཱཏི ‘‘ཨེཝམེཝ སཏྟཱ’’ཏིཨཱདིནཱ པུབྦེ ཝུཏྟནཡེནེཝ.

ཀཱམཾ མུཉྫཔབྦཛཏིཎཱནི ཡཐཱཛཱཏཱནིཔི དཱིགྷབྷཱཝེན པཏིཏྭཱ ཨརཉྙཊྛཱནེ ཨཉྙམཉྙཾ ཝིནནྡྷིཏྭཱ ཨཱཀུལབྱཱཀུལཱནི ཧུཏྭཱ ཏིཊྛནྟི, ཏཱནི པན ན ཏཐཱ ¶ དུབྦིཝེཙིཡཱནི, ཡཐཱ རཛྫུབྷཱུཏཱནཱིཏི དསྶེཏུཾ ‘‘ཡཐཱ ཏཱནཱི’’ཏིཨཱདི ཝུཏྟཾ. སེསམེཏྠ ཧེཊྛཱ ཝུཏྟནཡམེཝ.

ཨཔཱཡཱཏི ཨཝཌྜྷིཏཱ, སུཁེན, སུཁཧེཏུནཱ ཝཱ ཝིརཧིཏཱཏི ཨཏྠོ. དུཀྑསྶ གཏིབྷཱཝཏོཏི ཨཱཔཱཡིཀསྶ དུཀྑསྶ པཝཏྟིཊྛཱནབྷཱཝཏོ. སུཁསམུསྶཡཏོཏི ཨབྦྷུདཡཏོ. ཝིནིཔཏིཏཏྟཱཏི ཝིརཱུཔཾ ནིཔཏིཏཏྟཱ ཡཐཱ ཏེནཏྟབྷཱཝེན སུཁསམུསྶཡོ ན ཧོཏི, ཨེཝཾ ནིཔཏིཏཏྟཱ. ཨིཏརོཏི སཾསཱརོ. ནནུ ‘‘ཨཔཱཡ’’ནྟིཨཱདིནཱ ཝུཏྟོཔི སཾསཱརོ ཨེཝཱཏི? སཙྩམེཏཾ, ནིརཡཱདཱིནཾ པན ཨདྷིམཏྟདུཀྑབྷཱཝདསྶནཏྠཾ ཨཔཱཡཱདིགྒཧཎཾ. གོབལཱིབདྡཉཱཡེནཱཡམཏྠོ ཝེདིཏབྦོ. ཁནྡྷཱནཉྩ པཊིཔཱཊཱིཏི པཉྩནྣཾ ཁནྡྷཱནཾ ཧེཏུཕལབྷཱཝེན ཨཔརཱཔརཾ པཝཏྟི. ཨབྦོཙྪིནྣཾ ཝཏྟམཱནཱཏི ཨཝིཙྪེདེན པཝཏྟམཱནཱ. ཏཾ སབྦམྤཱིཏི ཏཾ ‘‘ཨཔཱཡ’’ནྟིཨཱདིནཱ ཝུཏྟཾ སབྦཾ ཨཔཱཡདུཀྑཉྩེཝ ཝཊྚདུཀྑཉྩ. ‘‘མཧཱསམུདྡེ ཝཱཏུཀྑིཏྟནཱཝཱ ཝིཡཱ’’ཏི ཨིདཾ པརིབྦྷམཊྛཱནསྶ མཧནྟདསྶནཏྠཉྩེཝ པརིབྦྷམནསྶ ཨནཝཊྛིཏཏཱདསྶནཏྠཉྩ ‘‘ཨུཔམཱཡ. ཡནྟེསུ ཡུཏྟགོཎོ ཝིཡཱ’’ཏི ཨིདཾ པན ཨཝསབྷཱཝདསྶནཏྠཉྩེཝ དུཔྤམོཀྑབྷཱཝདསྶནཏྠཉྩཱཏི ཝེདིཏབྦཾ.

པཊིཙྩསམུཔྤཱདཝཎྞནཱ

ཨིམིནཱ ཏཱཝཱཏི ཨེཏྠ ཏཱཝ-སདྡོ ཀམཏྠོ, ཏེན ‘‘ཏནྟཱཀུལཀཛཱཏཱ’’ཏི པདསྶ ཨནུསནྡྷི པརཏོ ཨཱཝིབྷཝིསྶཏཱིཏི དཱིཔེཏི. ཨཏྠི ཨིདཔྤཙྩཡཱཏི ཨེཏྠ ཨཡཾ པཙྩཡོཏི ཨིདཔྤཙྩཡོ, ཏསྨཱ ཨིདཔྤཙྩཡཱ, ཨིམསྨཱ པཙྩཡཱཏི ཨཏྠོ. ཨིདཾ ཝུཏྟཾ ཧོཏི – ‘‘ཨིམསྨཱ ནཱམ པཙྩཡཱ ཛརཱམརཎ’’ནྟི ¶ ཨེཝཾ ཝཏྟབྦོ ཨཏྠི ནུ ཁོ ཛརཱམརཎསྶ པཙྩཡོཏི. ཏེནཱཧ ¶ ‘‘ཨཏྠི ནུ ཁོ…པེ… བྷཝེཡྻཱ’’ཏི. ཨེཏྠ ཧི ‘‘ཀིཾ པཙྩཡཱ ཛརཱམརཎཾ? ཛཱཏིཔཙྩཡཱ ཛརཱམརཎ’’ནྟི ཨུཔརི ཛཱཏིསདྡཔཙྩཡསདྡསམཱནཱདྷིཀརཎེན ¶ ཀིཾ-སདྡེན ཨིདཾ-སདྡསྶ སམཱནཱདྷིཀརཎཏཱདསྶནཏོ ཀམྨདྷཱརཡསམཱསཏཱ ཨིདཔྤཙྩཡསདྡསྶ ཡུཛྫཏི. ན ཧེཏྠ ‘‘ཨིམསྶ པཙྩཡཱ ཨིདཔྤཙྩཡཱ’’ཏི ཛརཱམརཎསྶ, ཨཉྙསྶ ཝཱ པཙྩཡཏོ ཛརཱམརཎསམྦྷཝཔུཙྪཱ སམྦྷཝཏི ཝིཉྙཱཏབྷཱཝཏོ, ཨསམྦྷཝཏོ ཙ, ཛརཱམརཎསྶ པན པཙྩཡཔུཙྪཱ སམྦྷཝཏི. པཙྩཡསདྡསམཱནཱདྷིཀརཎཏཱཡཉྩ ཨིདཾ-སདྡསྶ ‘‘ཨིམསྨཱ པཙྩཡཱ’’ཏི པཙྩཡཔུཙྪཱ ཡུཛྫཏི.

སཱ པན སམཱནཱདྷིཀརཎཏཱ ཡདིཔི ཨཉྙཔདཏྠསམཱསེཔི ལབྦྷཏི, ཨཉྙཔདཏྠཝཙནིཙྪཱབྷཱཝཏོ པནེཏྠ ཀམྨདྷཱརཡསམཱསོ ཝེདིཏབྦོ. སཱམིཝཙནསམཱསཔཀྑེ པན ནཏྠེཝ སམཱནཱདྷིཀརཎཏཱསམྦྷཝོཏི. ནནུ ཙ ‘‘ཨིདཔྤཙྩཡཏཱ པཊིཙྩསམུཔྤཱདོ’’ཏི ཨེཏྠ ཨིདཔྤཙྩཡ-སདྡོ སཱམིཝཙནསམཱསོ ཨིཙྪིཏོཏི? སཙྩཾ ཨིཙྪིཏོ ཨུཛུཀམེཝ ཏཏྠ པཊིཙྩསམུཔྤཱདཝཙནིཙྪཱཏི ཀཏྭཱ, ཨིདྷ པན ཀེཝལཾ ཛརཱམརཎསྶ པཙྩཡཔརིཔུཙྪཱ ཨདྷིཔྤེཏཱ, ཏསྨཱ ཡཐཱ ཏཏྠ ཨིདཾ-སདྡསྶ པཊིཙྩསམུཔྤཱདཝིསེསནཏཱ, ཨིདྷ ཙ ‘‘པུཙྪིཏབྦཔཙྩཡཏྠཏཱ སམྦྷཝཏི, ཏཐཱ ཏཏྠ, ཨིདྷ ཙ སམཱསཀཔྤནཱ ཝེདིཏབྦཱ. ཀསྨཱ པན ཏཏྠ ཀམྨདྷཱརཡསམཱསོ ན ཨིཙྪིཏོཏི? ཧེཏུཔྤབྷཝཱནཾ ཧེཏུ པཊིཙྩསམུཔྤཱདོཏི ཨིམསྶ ཨཏྠསྶ ཀམྨདྷཱརཡསམཱསེ ཨསམྦྷཝཏོཏི ཨིམསྶ, ཨཏྟནོ པཙྩཡཱནུརཱུཔསྶ ཨནུརཱུཔོ པཙྩཡོ ཨིདཔྤཙྩཡོཏི ཨེཏསྶ ཙ ཨཏྠསྶ ཨིཙྪིཏཏྟཱ. ཡོ པནེཏྠ ཨིདཾ-སདྡེན གཧིཏོ ཨཏྠོ, སོ ‘‘ཨཏྠི ཨིདཔྤཙྩཡཱ ཛརཱམརཎ’’ནྟི ཛརཱམརཎགྒཧཎེནེཝ གཧིཏོཏི ཨིདཾ-སདྡོ པཊིཙྩསམུཔྤཱདཏོ པརིཙྩཛནཏོ ཨཉྙསྶ ཨསམྦྷཝཏོ པཙྩཡེ ¶ ཨཝཏིཊྛཏི, ཏེནེཏྠ ཀམྨདྷཱརཡསམཱསོ. ཏཏྠ པན ཨིདཾ-སདྡསྶ ཏཏོ པརིཙྩཛནཀཱརཎཾ ནཏྠཱིཏི སཱམིཝཙནསམཱསོ ཨེཝ ཨིཙྪིཏོ. ཨཊྛཀཐཱཡཾཔན ཡསྨཱ ཛརཱམརཎཱདཱིནཾ པཙྩཡཔུཙྪཱམུཁེནཱཡཾ པཊིཙྩསམུཔྤཱདདེསནཱ ཨཱརདྡྷཱ, པཊིཙྩསམུཔྤཱདོ ཙ ནཱམ ཨཏྠཏོ ཧེཏུཔྤབྷཝཱནཾ ཧེཏཱུཏི ཝུཏྟོ ཝཱཡམཏྠོ, ཏསྨཱ ‘‘ཨིམསྶ ཛརཱམརཎསྶ པཙྩཡོ’’ཏི ཨེཝམཏྠཝཎྞནཱ ཀཏཱ.

པཎྜིཏེནཱཏི ཨེཀཾསབྱཱཀརཎཱིཡཱདིཔཉྷཱཝིསེསཛཱནནསམཏྠཱཡ པཉྙཱཡ སམནྣཱགཏེན. ཏམེཝ ཧིསྶ པཎྜིཙྩཾ དསྶེཏུཾ ‘‘ཡཐཱ’’ཏིཨཱདི ཝུཏྟཾ ¶ . ཡཱདིསསྶ ཛཱིཝསྶ དིཊྛིགཏིཀོ སརཱིརཏོ ཨནཉྙཏྟཾ པུཙྪཏི ‘‘ཏཾ ཛཱིཝཾ ཏཾ སརཱིར’’ནྟི, སོ ཨེཝཾ པརམཏྠཏོ ནུཔལབྦྷཏི, ཀཐཾ ཏསྶ ཝཉྫྷཱཏནཡསྶ ཝིཡ དཱིགྷརསྶཏཱ སརཱིརཏོ ཨཉྙཏཱ ཝཱ ཨནཉྙཏཱ ཝཱ བྱཱཀཱཏབྦཱ སིཡཱ, ཏསྨཱསྶ པཉྷསྶ ཋཔནཱིཡཏཱ ཝེདིཏབྦཱ. ཏུཎྷཱིབྷཱཝོ ནཱམེས པུཙྪཏོ ཨནཱདརོ ཝིཧེསཱ ¶ ཝིཡ ཧོཏཱིཏི ‘‘ཨབྱཱཀཏམེཏ’’ནྟི པཀཱརནྟརམཱཧ. ཨེཝཾ ཨབྱཱཀརཎཀཱརཎཾ ཉཱཏུཀཱམསྶ ཀཐེཏབྦཾ ཧོཏི, ཀཐིཏེ ཙ ཛཱནནྟསྶ པམཱདོཔི ཨེཝཾ སིཡཱ, ཀཐནཝིདྷི པན ‘‘ཡཱདིསསྶཱ’’ཏིཨཱདིནཱ དསྶིཏོ ཨེཝ. ཨེཝཾ ཨཔྤཊིཔཛྫིཏྭཱཏི ཨེཝཾ ཋཔནཱིཡཔཉྷེ ཝིཡ ཏུཎྷཱིབྷཱཝཱདིཾ ཨནཱཔཛྫིཏྭཱ ཨེཝ. ‘‘ཨཔྤཊིཔཛྫིཏྭཱ’’ཏི ཝཙནཾ ནིདསྶནམཏྟམེཏཾ. ‘‘ཀིཾ སབྦཾ ཨནིཙྩ’’ནྟི ཝུཏྟེ ‘‘ཀིཾ སངྑཏཾ སནྡྷཱཡ པུཙྪསི, ཨུདཱཧུ ཨསངྑཏ’’ནྟི པཊིཔུཙྪིཏྭཱ བྱཱཀཱཏབྦཾ ཧོཏི ‘‘ཀིཾ ཁནྡྷཔཉྩཀཾ པརིཉྙེཡྻ’’ནྟི པུཊྛེ ‘‘ཨཏྠི ཏཏྠ པརིཉྙེཡྻཾ, ཨཏྠི ན པརིཉྙེཡྻ’’ནྟི ཝིབྷཛྫ བྱཱཀཱཏབྦཾ ཧོཏི, ཨེཝཾ ཨཔྤཊིཔཛྫིཏྭཱཏི ཙ ཨཡམེཏྠ ཨཏྠོ ཨིཙྪིཏོཏི. པུབྦེ ཡསྶ པཙྩཡསྶ ཨཏྠིཏཱམཏྟཾ ¶ ཙོདིཏནྟི ཨཏྠིཏཱམཏྟཾ ཝིསྶཛྫིཏཾ. པུཙྪཱསབྷཱགེན ཧི ཝིསྶཛྫནནྟི. ཨིདཱནི ཏསྶེཝ སརཱུཔཔུཙྪཱ ཀརཱིཡཏཱིཏི ‘‘པུན ཀི’’ནྟི ཝུཏྟཾ. ཨིདྷཱཔི ‘‘ཡཐཱ’’ཏིཨཱདི སབྦཾ ཨཱནེཏྭཱ ཝཏྟབྦཾ.

‘‘ཨེས ནཡོ སབྦཔདེསཱུ’’ཏི ཨཏིདེསཝསེན ཨུསྶུཀྐཾ ཀཏྭཱ ‘‘ནཱམརཱུཔཔཙྩཡཱ’’ཏིཨཱདིནཱ ཏཏྠ ཨཔཝཱདོ ཨཱརདྡྷོ. ཡསྨཱ དསྶེཏུཀཱམོ, ཏསྨཱ ཨིདཾ ཝུཏྟནྟི ཡོཛནཱ. ཚནྣཾ ཝིཔཱཀསམྥསྶཱནཾཡེཝ གཧཎཾ ཧོཏི ཝིཉྙཱཎཱདི ཝེདནཱཔརིཡོསཱནཱ ཝིཔཱཀཝིདྷཱིཏི ཀཏྭཱ ཨནེཀེསུ སུཏྟཔདེསུ, (མ. ནི. ༣.༡༢༦; ཨུདཱ. ༡) ཨབྷིདྷམྨེ (ཝིབྷ. ༢༢༥) ཙ ཡེབྷུཡྻེན ཏེསཾཡེཝ གཧཎསྶ ནིརུལ༹ྷཏྟཱ. ཨིདྷཱཏི ཨིམསྨིཾ སུཏྟེ. ཙ-སདྡོ བྱཏིརེཀཏྠོ, ཏེནེཏྠ ‘‘གཧིཏམྤཱི’’ཏིཨཱདིནཱ ཝུཙྩམཱནཾཡེཝ ཝིསེསཾ ཛོཏེཏི. པཙྩཡབྷཱཝོ ནཱམ པཙྩཡུཔྤནྣཱཔེཀྑོ ཏེན ཝིནཱ ཏསྶ ཨསམྦྷཝཏོ. ཏསྨཱ སལཱ༹ཡཏནཔྤཙྩཡཱཏི ‘‘སལཱ༹ཡཏནཔཙྩཡཱ ཕསྶོ’’ཏི ཨིམིནཱ པདེནཱཏི ཡོཛནཱ. ཨཝཡཝེན ཝཱ སམུདཱཡོཔལཀྑཎམེཏཾ ‘‘སལཱ༹ཡཏནཔཙྩཡཱ’’ཏི, ཏསྨཱ ‘‘སལཱ༹ཡཏནཔཙྩཡཱ ཕསྶོ’’ཏི ཨིམིནཱ པདེནཱཏི ཝུཏྟཾ ཧོཏི. གཧིཏམྤཱིཏི ཚབྦིདྷཾ ཝིཔཱཀཕསྶམྤི. ཨགྒཧིཏམྤཱིཏི ཨཝིཔཱཀཕསྶམྤི ཀུསལཱཀུསལཀིརིཡཱཕསྶམྤི. པཙྩཡུཔྤནྣཝིསེསཾ དསྶེཏུཀཱམོཏི ¶ ཡོཛནཱ. ན ཙེཏྠ པཙྩཡུཔྤནྣོཝ ཨུཔཱདིནྣོ ཨིཙྪིཏོ, ཨཐ ཁོ པཙྩཡོཔི ཨུཔཱདིནྣོ ཨིཙྪིཏོཏི ཨཛ྄ཛྷཏྟིཀཱཡཏནསྶེཝ སལཱ༹ཡཏནགྒཧཎེན གཧཎནྟི ཀཏྭཱ ཝུཏྟཾ ‘‘སལཱ༹ཡཏནཏོ…པེ… དསྶེཏུཀཱམོ’’ཏི. ན ཧི ཕསྶསྶ ཙཀྑཱདིསལཱ༹ཡཏནམེཝ པཙྩཡོ, ཨཐ ཁོ ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎཾ, ཏིཎྞཾ སངྒཏི ཕསྶོ’’ཏིཨཱདི (མ. ནི. ༣.༤༢༡, ༤༢༥, ༤༢༦; སཾ. ནི. ༢.༤༤, ༤༥; ༢.༤.༦༠; ཀཐཱ. ༤༦༥, ༤༦༧) ཝཙནཏོ རཱུཔཱཡཏནཱདིརཱུཔཉྩ ཙཀྑུཝིཉྙཱཎཱདིནཱམཉྩ པཙྩཡོ, ཏསྨཱ ཨིམཾ ཙཀྑཱདིསལཱ༹ཡཏནཏོ ཨཏིརིཏྟཾ ¶ ཨཱཝཛྫནཱདི ཝིཡ སཱདྷཱརཎཾ ཨཧུཏྭཱ, ཏསྶ ཏསྶ ཕསྶསྶ སཱདྷཱརཎཏཱཡ ཨཉྙཾ ཝིསེསཔཙྩཡཾ པི-སདྡེན ཨཝིསིཊྛཾ སཱདྷཱརཎཔཙྩཡཾ པིདསྶེཏུཀཱམོ བྷགཝཱ, ‘‘ནཱམརཱུཔཔཙྩཡཱ ¶ ཕསྶོ’’ཏི ཨིདཾ ཝུཏྟནྟི ཡོཛནཱ. ཨབྷིདྷམྨབྷཱཛནཱིཡེཔི ཨིམམེཝ པཙྩཡཾ སནྡྷཱཡ ‘‘ནཱམརཱུཔཔཙྩཡཱ ཕསྶོ’’ཏི ཝུཏྟནྟི ཏདཊྛཀཐཱཡཾ (ཝིབྷ. ཨཊྛ. ༢༤༣) ‘‘པཙྩཡཝིསེསདསྶནཏྠཉྩེཝ མཧཱནིདཱནདེསནཱསངྒཧཏྠཉྩཱ’’ཏི ཨཏྠཝཎྞནཱ ཀཏཱ. པཙྩཡཱནནྟི ཛཱཏིཨཱདཱིནཾ པཙྩཡདྷམྨཱནཾ. ནིདཱནཾ ཀཐིཏནྟི ཛརཱམརཎཱདིཀསྶ ནིདཱནཏྟཾ ཀཐིཏཾ ཨེཀཾསིཀོ པཙྩཡབྷཱཝོ ཀཐིཏོ. ཏཉྷི ཏེསཾ པཙྩཡབྷཱཝེ ཨབྱབྷིཙཱརཱིཏི དསྶེཏུཾ ‘‘ཨིཏི ཁོ པནེཏ’’ནྟིཨཱདིནཱ ཨུཔརི དེསནཱ པཝཏྟཱ. ནིཛྫཊེཏི ནིཛྫཱལཀེ. ནིགྒུམྦེཏི ནིཀྑེཔེ. པདདྭཡེནཱཔི ཨཱཀུལཱབྷཱཝམེཝ དསྶེཏི, ཏསྨཱ ཨནཱཀུལཾ ཨབྱཱཀུལཾ མཧནྟཾ པཙྩཡནིདཱནམེཏྠ ཀཐིཏནྟི མཧཱནིདཱནཾ སུཏྟཾ ཨཉྙཐཱབྷཱཝསྶ ཨབྷཱཝཏོ.

༩༨. ཏེསཾ ཏེསཾ པཙྩཡཱནནྟི ཏེསཾ ཏེསཾ ཛཱཏིཨཱདཱིནཾ པཙྩཡཱནཾ. ཡསྨཱ པཙྩཡབྷཱཝོ ནཱམ ཏེཧི ཏེཧི པཙྩཡེཧི ཨནཱུནཱདྷིཀེཧེཝ ཏསྶ ཏསྶ ཕལསྶ སམྦྷཝཏོ ཏཐོ ཏཙྪོ, ཏཔྤཀཱརོ ཝཱ སཱམགྒིཨུཔགཏེསུ པཙྩཡེསུ མུཧུཏྟམྤི ཏཐོ ནིབྦཏྟནདྷམྨཱནཾ ཨསམྦྷཝཱབྷཱཝཏོ. ཨཝིཏཐོ ཨཝིསཾཝཱདནཀོ ཝིསཾཝཱདནཱཀཱརཝིརཧིཏོ ཨཉྙདྷམྨཔཙྩཡེཧི ཨཉྙདྷམྨཱནུཔྤཏྟིཏོ. ‘‘ཨནཉྙཐཱ’’ཏི ཝུཙྩཏི ཨཉྙཐཱབྷཱཝསྶ ཨབྷཱཝཏོ. ཏསྨཱ ‘‘ཏཐཾ ཨཝིཏཐཾ ཨནཉྙཐཾ པཙྩཡབྷཱཝཾ དསྶེཏུ’’ནྟི ཝུཏྟཾ. པརིཡཱཡཏི ¶ ཨཏྟནོ ཕལཾ པརིགྒཧེཏྭཱ ཝཏྟཏཱིཏི པརིཡཱཡོ, ཧེཏཱུཏི ཨཱཧ ‘‘པརིཡཱཡེནཱཏི ཀཱརཎེནཱ’’ཏི. སབྦེན སབྦནྟི དེཝཏྟཱདིནཱ ¶ སབྦབྷཱཝེན སབྦཱ ཛཱཏི. སབྦཐཱ སབྦནྟི ཏཏྠཱཔི ཙཱཏུམཧཱརཱཛིཀཱདིསབྦཱཀཱརེན སབྦཱ, ནིཔཱཏདྭཡམེཏཾ, ནིཔཱཏཉྩ ཨབྱཡཾ, ཏཉྩ སབྦལིངྒཝིབྷཏྟིཝཙནེསུ ཨེཀཱཀཱརམེཝ ཧོཏཱིཏི པཱལི༹ཡཾ ‘‘སབྦེན སབྦཾ སབྦཐཱ སབྦ’’ནྟི ཝུཏྟཾ. ཨཏྠཝཙནེ པན ཏསྶ ཏསྶ ཛཱཏིསདྡཱཔེཀྑཱཡ ཨིཏྠིཨཏྠཝུཏྟིཏཾ དསྶེཏུཾ ‘‘སབྦཱཀཱརེན སབྦཱ’’ཏིཨཱདི ཝུཏྟཾ. ཨིམིནཱཝ ནཡེནཱཏི ཨིམིནཱ ཛཱཏིཝཱརེ ཝུཏྟེནེཝ ནཡེན. དེཝཱདཱིསཱུཏི ཨཱདི-སདྡེན གནྡྷབྦཡཀྑཱདིཀེ པཱལི༹ཡཾ (དཱི. ནི. ༢.༩༨) ཨཱགཏེ, ཏདནྟརབྷེདེ ཙ སངྒཎྷཱཏི.

ཨིདྷ ནིཀྑིཏྟཨཏྠཝིབྷཛནཏྠེཏི ཨིམསྨིཾ ‘‘ཀསྶཙི ཀིམྷིཙཱི’’ཏི ཨནིཡམཏོ ཨུདྡེསཝསེན ཝུཏྟཏྠསྶ ནིདྡིསནཏྠེ ཛོཏེཏབྦེ ནིཔཱཏོ, ཏདཏྠཛོཏནཾ ནིཔཱཏཔདནྟི ཨཏྠོ. ཏསྶཱཏི ཏསྶ པདསྶ. ཏེཏི དྷམྨདེསནཱཡ སམྤདཱནབྷཱུཏཾ ཐེརཾ ཝདཏི. སེཡྻཐིདནྟི ཝཱ ཏེ ཀཏམེཏི ཙེཏི ཨཏྠོ. ཡེ ཧི ‘‘ཀསྶཙཱི’’ཏི, ‘‘ཀིམྷིཙཱི’’ཏི ཙ ཨནིཡམཏོ ཝུཏྟོ ཨཏྠོ, ཏེ ཀཏམེཏི. ཀཐེཏུཀམྱཏཱཔུཙྪཱ ཧེསཱ. དེཝབྷཱཝཱཡཱཏི དེཝབྷཱཝཏྠཾ. ཁནྡྷཛཱཏཱིཏི ཁནྡྷཔཱཏུབྷཱཝོ, ཡཐཱ ཁནྡྷེསུ ཨུཔྤནྣེསུ ‘‘དེཝཱ’’ཏི སམཉྙཱ ཧོཏི, ཏཐཱ ཏེསཾ ཨུཔྤཱདོཏི ཨཏྠོ. ཏེནཱཧ ‘‘ཡཱཡཱ’’ཏི ཨཱཧ. སབྦཔདེསཱུཏི ‘‘གནྡྷབྦཱནཾ གནྡྷབྦཏྠཱཡཱ’’ཏིཨཱདཱིསུ སབྦེསུ ཛཱཏིནིདྡེསཔདེསུ ¶ , བྷཝཱདིཔདེསུ ཙ. ཡེན ཧི ནཡེན སཙེ ཧི ཛཱཏཱིཏི ཨཡམཏྠཡོཛནཱ ཀཏཱ, ཛཱཏིནིདྡེསཔདེསོཝ ‘‘བྷཝོ’’ཏིཨཱདིནཱ བྷཝཱདིཔདེསུཔི སོ ཀཱཏབྦོཏི. དེཝཱཏི ཨུཔཔཏྟིདེཝཱ ཙཱཏུམཧཱརཱཛིཀཏོ པཊྛཱཡ ཡཱཝ བྷཝགྒཱ དིབྦནྟི ཀཱམགུཎཱདཱིཧི ཀཱིལ༹ནྟི ལལ༹ནྟི ཝིཧརནྟི ཛོཏནྟཱིཏི ཀཏྭཱ. གནྡྷཾ ཨབྦནྟི པརིབྷུཉྫནྟཱིཏི གནྡྷབྦཱ, དྷཏརཊྛསྶ ¶ མཧཱརཱཛསྶ པརིཝཱརབྷཱུཏཱ. ཡཛནྟི ཝེསྶཝཎསཀྐཱདིཀེ པཱུཛེནྟཱིཏི ཡཀྑཱ, ཏེན ཏེན ཝཱ པཎིདྷིཀམྨཱདིནཱ ཡཛིཏབྦཱ པཱུཛེཏབྦཱཏི ཡཀྑཱ, ཝེསྶཝཎསྶ མཧཱརཱཛསྶ པརིཝཱརབྷཱུཏཱ. ཨཊྛཀཐཱཡཾ པན ‘‘ཨམནུསྶཱ’’ཏི ཨཝིསེསེན ཝུཏྟཾ. བྷཱུཏཱཏི ཀུམྦྷཎྜཱ, ཝིརཱུལ༹ྷཀསྶ མཧཱརཱཛསྶ པརིཝཱརབྷཱུཏཱ. ཨཊྛཀཐཱཡཾ པན ‘‘ཡེ ཀེཙི ནིབྦཏྟསཏྟཱ’’ཏི ཨཝིསེསེན ཝུཏྟཾ. ཨཊྛིཔཀྑཱ བྷམརཏུཔྤལཱ༹དཡོ. ཙམྨཔཀྑཱ ཛཏུསིངྒཱལཱདཡོ. ལོམཔཀྑཱ ཧཾསམོརཱདཡོ. སརཱིསཔཱ ཨཧིཝིཙྪིཀསཏཔདིཨཱདཡོ.

‘‘ཏེསཾ ¶ ཏེས’’ནྟི ཨིདཾ ན ཡེཝཱཔནཀནིདྡེསོ ཝིཡ ཨཝུཏྟསངྒཧཏྠཾ ཝཙནཾ, ཨཐ ཁོ ཨཡེཝཱཔནཀནིདྡེསོ ཝིཡ ཝུཏྟསངྒཧཏྠནྟི. ཨཱདི-སདྡེནེཝ ཙ ཨཱམེཌིཏཏྠོ སངྒཡ྄ཧཏཱིཏི ཨཱཧ ‘‘ཏེསཾ ཏེསཾ དེཝགནྡྷབྦཱདཱིན’’ནྟི. ཏདཏྟཱཡཱཏི ཏཾབྷཱཝཱཡ, ཡཐཱརཱུཔེསུ ཁནྡྷེསུ པཝཏྟམཱནེསུ ‘‘དེཝཱ གནྡྷབྦཱ’’ཏི ལོཀསམཉྙཱ ཧོཏི, ཏཐཱརཱུཔཏཱཡཱཏི ཨཏྠོ. ཏེནཱཧ ‘‘དེཝགནྡྷབྦཱདིབྷཱཝཱཡཱ’’ཏི. ‘‘ནིརོདྷོ, ཝིགམོ’’ཏི ཙ པཊིལདྡྷཏྟཱལཱབྷསྶ བྷཱཝོ ཝུཙྩཏི, ཨིདྷ པན ཨཙྩནྟཱབྷཱཝོ ཨདྷིཔྤེཏོ ‘‘སབྦསོ ཛཱཏིཡཱ ཨསཏཱི’’ཏི ཨཝཏྭཱ ‘‘ཛཱཏིནིརོདྷཱ’’ཏི ཝུཏྟཏྟཱཏི ཨཱཧ ‘‘ཨབྷཱཝཱཏི ཨཏྠོ’’ཏི.

ཕལཏྠཱཡ ཧིནོཏཱིཏི ཡཐཱ ཕལཾ ཏཏོ ནིབྦཏྟཏི, ཨེཝཾ ཧིནོཏི པཝཏྟཏི, ཏསྶ ཧེཏུབྷཱཝཾ ཨུཔགཙྪཏཱིཏི ཨཏྠོ. ཨིདཾ གཎྷཐ ནནྟི ‘‘ཨིདཾ མེ ཕལཾ, གཎྷཐ ན’’ནྟི ཨེཝཾ ཨཔྤེཏི ཝིཡ ནིཡྻཱཏེཏི ཝིཡ. ‘‘ཨེས ནཡོ’’ཏི ཨཝིསེསཾ ཨཏིདིསིཏྭཱ ཝིསེསམཏྟསྶ ཨཏྠཾ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ནནུ ཙཱཡཾ ཛཱཏི པརིནིཔྥནྣཱ, སངྑཏབྷཱཝཱ ཙ ན ཧོཏི ཝིཀཱརབྷཱཝཏོ, ཏཐཱ ཛརཱམརཎཾ, ཏསྶ ཀཐཾ སཱ ཧེཏུ ཧོཏཱིཏི ཙོདནཾ སནྡྷཱཡཱཧ ¶ ‘‘ཛརཱམརཎསྶ ཧཱི’’ཏིཨཱདི. ཏབྦྷཱཝེ བྷཱཝོ, ཏདབྷཱཝེ ཙ ཨབྷཱཝོ ཛརཱམརཎསྶ ཛཱཏིཡཱ ཨུཔནིསྶཡཏཱ.

༩༩. ཨོཀཱསཔརིགྒཧོཏི པཝཏྟིཊྛཱནཔརིགྒཧོ. ཨུཔཔཏྟིབྷཝེ ཡུཛྫཏི ཨུཔཔཏྟིཀྑནྡྷཱནཾ ཡཐཱཝུཏྟཊྛཱནཏོ ཨཉྙཏྠ ཨནུཔྤཛྫནཏོ. ཨིདྷ པནཱཏི ཨིམསྨིཾ སུཏྟེ ‘‘ཀཱམབྷཝོ’’ཏིཨཱདིནཱ ཨཱགཏེ ཨིམསྨིཾ ཋཱནེ. ཀམྨབྷཝེ ཡུཛྫཏི ཀཱམབྷཝཱདིཛོཏནཱ ཝིསེསཏོ ཏསྶ ཛཱཏིཡཱ པཙྩཡབྷཱཝཏོཏི. ཏེནཱཧ ‘‘སོ ཧི ཛཱཏིཡཱ ཨུཔནིསྶཡཀོཊིཡཱཝ པཙྩཡོ’’ཏི. ནནུ ཙ ཨུཔཔཏྟིབྷཝོཔི ¶ ཛཱཏིཡཱ ཨུཔནིསྶཡཝསེན པཙྩཡོ ཧོཏཱིཏི? སཙྩཾ ཧོཏི, སོ པན ན ཏཐཱ པདྷཱནབྷཱུཏོ, ཀམྨབྷཝོ པན པདྷཱནབྷཱུཏོ པཙྩཡོ ཛནཀབྷཱཝཏོཏི. ‘‘སོ ཧི ཛཱཏིཡཱ’’ཏིཨཱདི ཝུཏྟཾ ཀཱམབྷཝཱུཔགཾ ཀམྨཾ ཀཱམབྷཝོ. ཨེས ནཡོ རཱུཔཱརཱུཔབྷཝེསུཔི. ཨོཀཱསཔརིགྒཧོཝ ཀཏོ‘‘ཀིམྷིཙཱི’’ཏི ཨིམིནཱ སཏྟཔརིགྒཧསྶ ཀཏཏྟཱ.

༡༠༠. ཏིཎྞམྤི ཀམྨབྷཝཱནནྟི ཀཱམཀམྨབྷཝཱདཱིནཾ ཏིཎྞམྤི ཀམྨབྷཝཱནཾ. ཏིཎྞཉྩ ཨུཔཔཏྟིབྷཝཱནནྟི ཀཱམུཔཔཏྟིབྷཝཱདཱིནཾ ཏིཎྞཉྩ ཨུཔཔཏྟིབྷཝཱནཾ. ཏཐཱ ¶ སེསཱནིཔཱིཏི དིཊྛུཔཱདཱནཱདཱིནི སེསུཔཱདཱནཱནིཔི ཏིཎྞམྤི ཀམྨབྷཝཱནཾ, ཏིཎྞཉྩ ཨུཔཔཏྟིབྷཝཱནཾ པཙྩཡོཏི ཨཏྠོ. ཨིཏཱིཏི ཨེཝཾ ཝུཏྟནཡེན. དྭཱདས ཀམྨབྷཝཱ དྭཱདས ཨུཔཔཏྟིབྷཝཱཏི ཙཏུཝཱིསཏིབྷཝཱ ཝེདིཏབྦཱ. ཡསྨཱ ཀམྨབྷཝསྶ པཙྩཡབྷཱཝམུཁེནེཝ ཨུཔཱདཱནཾ ཨུཔཔཏྟིབྷཝསྶ པཙྩཡོ ནཱམ ཧོཏི, ན ཨཉྙཐཱ, ཏསྨཱ ཨུཔཱདཱནཾ ཀམྨབྷཝསྶ ཨུཛུཀམེཝ པཙྩཡབྷཱཝོཏི ཨཱཧ ‘‘ནིཔྤརིཡཱཡེནེཏྠ དྭཱདས ཀམྨབྷཝཱ ལབྦྷནྟཱི’’ཏི. ཏེསནྟི ཀམྨབྷཝཱནཾ. སཧཛཱཏཀོཊིཡཱཏི ཨཀུསལསྶ ཀམྨབྷཝསྶ སཧཛཱཏཾ ཨུཔཱདཱནཾ སཧཛཱཏཀོཊིཡཱ, ཨིཏརཾ ཨནནྟརཱུཔནིསྶཡཱདིཝསེན ཨུཔནིསྶཡཀོཊིཡཱ, ཀུསལསྶ ཀམྨབྷཝསྶ པན ¶ ཨུཔནིསྶཡཀོཊིཡཱཝ པཙྩཡོ. ཨེཏྠ ཙ ཡཐཱ ཨཉྙམཉྙནིསྶཡསམྤཡུཏྟཨཏྠིཨཝིགཏཱདིཔཙྩཡཱནཾ སཧཛཱཏཔཙྩཡེན ཨེཀསངྒཧཏཾ དསྶེཏུཾ ‘‘སཧཛཱཏཀོཊིཡཱ’’ཏི ཝུཏྟཾ, ཨེཝཾ ཨཱརམྨཎཱུཔནིསྶཡཨནནྟརཱུཔནིསྶཡཔཀཏཱུཔནིསྶཡཱནཾ ཨེཀཛ྄ཛྷཾ གཧཎཝསེན ‘‘ཨུཔནིསྶཡཀོཊིཡཱ’’ཏི ཝུཏྟནྟི དཊྛབྦཾ.

༡༠༡. ཨུཔཱདཱནསྶཱཏི ཨེཏྠ ཀཱམུཔཱདཱནསྶ ཏཎྷཱ ཨུཔནིསྶཡཀོཊིཡཱཝ པཙྩཡོ, སེསུཔཱདཱནཱནཾ སཧཛཱཏཀོཊིཡཱཔི ཨུཔནིསྶཡཀོཊིཡཱཔི ཝིཉྙཱཎཱདི ཙ ཝེདནཱཔརིཡོསཱནཱ ཝིཔཱཀཝིདྷཱིཏི ཀཏྭཱ.

༡༠༢. ཡདིདཾ ཝེདནཱཏི ཨེཏྠ ཝིཔཱཀཝེདནཱཏི ཏམེཝ ཏཱཝ ཨུཔནིསྶཡཀོཊིཡཱ པཙྩཡོ ཨིཏརཀོཊིཡཱ ཨསམྦྷཝཏོ. ཨཉྙཱཏི ཀུསལཱཀུསལཀིརིཡཝེདནཱ. ཨཉྙཐཱཔཱིཏི སཧཛཱཏཀོཊིཡཱཔི.

༡༠༣. ཨེཏྟཱཝཏཱཏི ཛརཱམརཎཱདཱིནཾ པཙྩཡཔརམྤརཱདསྶནཝསེན པཝཏྟཱཡ ཨེཏྟཀཱཡ དེསནཱཡ. པུརིམཏཎྷནྟི པུརིམབྷཝསིདྡྷཾ ཏཎྷཾ. ‘‘ཨེས པཙྩཡོ ཏཎྷཱཡ, ཡདིདཾ ཝེདནཱ’’ཏི ཝཏྭཱ ཏདནནྟརཾ ‘‘ཕསྶཔཙྩཡཱ ཝེདནཱཏི ཨིཏི ཁོ པནེཏཾ ཝུཏྟ’’ནྟིཨཱདིནཱ ཝེདནཱཡ པཙྩཡབྷཱུཏསྶ ཕསྶསྶ ཨུདྡྷརཎཾ ཨཉྙེསུ སུཏྟེསུ ཨཱགཏནཡེན པཊིཙྩསམུཔྤཱདསྶ དེསནཱམགྒོ ¶ , ཏཾ པན ཨནོཏརིཏྭཱ སམུདཱཙཱརཏཎྷཱདསྶནམུཁེནེཝ ཏཎྷཱམཱུལཀདྷམྨེ དེསེནྟོ ཨཱཙིཎྞདེསནཱམགྒཏོ ཨོཀྐམནྟོ ཝིཡ, ཏཉྩ དེསནཾ པསྶཏོ ཨཔྤཝཏྟནྟི པསཡ྄ཧ བལཀྐཱརེན དེསེནྟོ ཝིཡ ཙ ཧོཏཱིཏི ཨཱཧ ‘‘ཨིདཱནཱི’’ཏིཨཱདི. དྭེ ཏཎྷཱཏི ཨིདྷཱདྷིཔྤེཏཏཎྷཱ ཨེཝ ¶ དྭིདྷཱ བྷིནྡནྟོ ཨཱཧ. ཨེསནཏཎྷཱཏི བྷོགཱནཾ པརིཡེསནཝསེན པཝཏྟཏཎྷཱ. ཨེསིཏཏཎྷཱཏི པརིཡིཊྛེསུ བྷོགེསུ ཨུཔྤཛྫམཱནཏཎྷཱ. སམུདཱཙཱརཏཎྷཱཡཱཏི པརིཡུཊྛཱནཝསེན པཝཏྟཏཎྷཱཡ. དུཝིདྷཱཔེསཱ ཝེདནཾ པཊིཙྩ ཏཎྷཱ ¶ ནཱམ ཝེདནཱཔཙྩཡཱ ཙ ཨཔྤཊིལདྡྷཱནཾ བྷོགཱནཾ པཊིལཱབྷཱཡ པརིཡེསནཱ, ལདྡྷེསུ ཙ ཏེསུཔཱཏབྱཏཱཔཏྟིཨཱདི ཧོཏཱིཏི.

པརིཏསྶནཝསེན པརིཡེསཏི ཨེཏཱཡཱཏི པརིཡེསནཱ. ཨཱསཡཏོ, པཡོགཏོ ཙ པརིཡེསནཱ ཏཐཱཔཝཏྟོ ཙིཏྟུཔྤཱདོ. ཏེནཱཧ ‘‘ཏཎྷཱཡ སཏི ཧོཏཱི’’ཏི. རཱུཔཱདིཨཱརམྨཎཔཊིལཱབྷོཏི སཝཏྠུཀཱནཾ རཱུཔཱདིཨཱརམྨཎཱནཾ གཝེསནཝསེན, པཝཏྟིཡཾ པན ཨཔརིཡིཊྛཾཡེཝ ལབྦྷཏི, ཏམྤི ཨཏྠཏོ པརིཡེསནཱཡ ལདྡྷམེཝ ནཱམ ཏཐཱརཱུཔསྶ ཀམྨསྶ པུབྦེཀཏཏྟཱ ཨེཝ ལབྦྷནཏོ. ཏེནཱཧ ‘‘སོ ཧི པརིཡེསནཱཡ སཏི ཧོཏཱི’’ཏི. སུཁཝིནིཙྪཡནྟི སུཁཾ ཝིསེསཏོ ནིཙྪིནོཏཱིཏི སུཁཝིནིཙྪཡོ, སུཁཾ སབྷཱཝཏོ, སམུདཡཏོ, ཨཏྠངྒམནཏོ, ནིསྶརཎཏོ ཙ ཡཱཐཱཝཏོ ཛཱནིཏྭཱ པཝཏྟཉཱཎཾ, ཏཾ སུཁཝིནིཙྪཡཾ. ཛཉྙཱཏི ཛཱནེཡྻ. ‘‘སུབྷསུཁ’’ནྟིཨཱདིཀཾ ཨཱརམྨཎེ ཨབྷཱུཏཱཀཱརཾ ཝིཝིདྷཾ ནིནྣབྷཱཝེན ནིཙྪིནོཏི ཨཱརོཔེཏཱིཏི ཝིནིཙྪཡོ. ཨསྶཱདཱནུཔསྶནཏཎྷཱདིཊྛིཡཱཔི ཨེཝམེཝ ཝིནིཙྪཡབྷཱཝོ ཝེདིཏབྦོ. ཨིམསྨིཾ པན སུཏྟེ ཝིཏཀྐོཡེཝ ཨཱགཏོཏི ཡོཛནཱ. ཨིམསྨིཾ པན སུཏྟེཏི སཀྐཔཉྷསུཏྟེ. (དཱི. ནི. ༢.༣༥༨) ཏཏྠ ཧི ‘‘ཚནྡོ ཁོ, དེཝཱནཾ ཨིནྡ, ཝིཏཀྐནིདཱནོ’’ཏི ཨཱགཏཾ. ཨིདྷཱཏི ཨིམསྨིཾ མཧཱནིདཱནསུཏྟེ. ‘‘ཝིཏཀྐེནེཝ ཝིནིཙྪིནཱཏཱི’’ཏི ཨེཏེན ‘‘ཝིནིཙྪཱིཡཏི ཨེཏེནཱཏི ཝིནིཙྪཡོ’’ཏི ཝིནིཙྪཡ-སདྡསྶ ཀརཎསཱདྷནམཱཧ. ‘‘ཨེཏྟཀ’’ནྟིཨཱདི ཝིནིཙྪཡནཱཀཱརདསྶནཾ.

ཚནྡནཊྛེན ཚནྡོ, ཨེཝཾ རཉྫནཊྛེན རཱགོ, སྭཱཡཾ ཨནཱསེཝནཏཱཡ མནྡོ ཧུཏྭཱ པཝཏྟོ ཨིདྷཱདྷིཔྤེཏོཏི ཨཱཧ ‘‘དུབྦལརཱགསྶཱདྷིཝཙན’’ནྟི. ཨཛ྄ཛྷོསཱནནྟི ཏཎྷཱདིཊྛིཝསེན ཨབྷིནིཝིསནཾ. ‘‘མཡ྄ཧཾ ¶ ཨིད’’ནྟི ཧི ཏཎྷཱགཱཧོ ཡེབྷུཡྻེན ཨཏྟགྒཱཧསནྣིསྶཡོཝ ཧོཏི. ཏེནཱཧ ‘‘ཨཧཾ མམ’’ནྟི, ‘‘བལཝསནྣིཊྛཱན’’ནྟི ཙ ཏེསཾ གཱཧཱནཾ ཐིརབྷཱཝཔྤཏྟིམཱཧ. ཏཎྷཱདིཊྛིཝསེན པརིགྒཧཀརཎནྟི ‘‘ཨཧཾ མམ’’ནྟི བལཝསནྣིཊྛཱནཝསེན ཨབྷིནིཝིཊྛསྶ ¶ ཨཏྟཏྟནིཡགྒཱཧཝཏྠུནོ ཨཉྙཱསཱདྷཱརཎཾ ཝིཡ ཀཏྭཱ པརིགྒཧེཏྭཱ ཋཱནཾ, ཏཐཱཔཝཏྟོ ལོབྷསཧགཏཙིཏྟུཔྤཱདོ. ཨཏྟནཱ པརིགྒཧིཏསྶ ཝཏྠུནོ ཡསྶ ཝསེན པརེཧི སཱདྷཱརཎབྷཱཝསྶ ཨསཧམཱནོ ¶ ཧོཏི པུགྒལོ, སོ དྷམྨོ ཨསཧནཏཱ. ཨེཝཾ ཝཙནཏྠཾ ཝདནྟི ནིརུཏྟིནཡེན. སདྡལཀྑཎེ པན ཡསྶ དྷམྨསྶ ཝསེན མཙྪརིཡཡོགཏོ པུགྒལོ མཙྪརོ, ཏསྶ བྷཱཝོ, ཀམྨཾ ཝཱ མཙྪརིཡཾ, མཙྪེརོ དྷམྨོ. མཙྪརིཡསྶ བལཝབྷཱཝཏོ ཨཱདརེན རཀྑཎཾ ཨཱརཀྑོཏི ཨཱཧ ‘‘དྭཱར…པེ… སུཊྛུ རཀྑཎ’’ནྟི. ཨཏྟནོ ཕལཾ ཀརོཏཱིཏི ཀརཎཾ, ཡཾ ཀིཉྩི ཀཱརཎཾ, ཨདྷིཀཾ ཀརཎནྟི ཨདྷིཀརཎཾ, ཝིསེསཀཱརཎཾ. ཝིསེསཀཱརཎཉྩ བྷོགཱནཾ ཨཱརཀྑདཎྜཱདཱནཱདིཨནཏྠསམྦྷཝསྶཱཏི ཝུཏྟཾ ‘‘ཨཱརཀྑཱདྷིཀརཎ’’ནྟིཨཱདི. པརནིསེདྷནཏྠནྟི མཱརཎཱདིནཱ པརེསཾ ཝིབཱདྷནཏྠཾ. ཨཱདཱིཡཏི ཨེཏེནཱཏི ཨཱདཱནཾ, དཎྜསྶ ཨཱདཱནཾ དཎྜཱདཱནཾ, ཨབྷིབྷཝིཏྭཱ པརཝིཧེཋནཙིཏྟུཔྤཱདོ. སཏྠཱདཱནེཔི ཨེསེཝ ནཡོ. ཧཏྠཔརཱམཱསཱདིཝསེན ཀཱཡེན ཀཱཏབྦཀལཧོ ཀཱཡཀལཧོ. མམྨགྷཊྚནཱདིཝསེན ཝཱཙཱཡ ཀཱཏབྦཀལཧོ ཝཱཙཱཀལཧོ. ཝིརུཛ྄ཛྷནཝསེན ཝིརཱུཔཾ གཎྷཱཏི ཨེཏེནཱཏི ཝིགྒཧོ. ཝིརུདྡྷཾ ཝདཏི ཨེཏེནཱཏི ཝིཝཱདོ. ཏུཝཾ ཏུཝནྟི ཨགཱརཝཝཙནསཧཙརཎཏོ ཏུཝཾ ཏུཝཾ, སབྦེཏེ ཏཐཱཔཝཏྟཱ དོསསཧགཏཙིཏྟུཔྤཱདཱ ཝེདིཏབྦཱ. ཏེནཱཧ བྷགཝཱ ‘‘ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟཱི’’ཏི (དཱི. ནི. ༢.༡༠༤).

༡༡༢. དེསནཾ ནིཝཏྟེསཱིཏི ‘‘ཏཎྷཾ པཊིཙྩ པརིཡེསནཱ’’ཏིཨཱདིནཱ ཨནུལོམནཡེན པཝཏྟིཏཾ དེསནཾ པཊིལོམནཡེན ¶ པུན ‘‘ཨཱརཀྑཱདྷིཀརཎ’’ནྟི ཨཱརབྷནྟོ ནིཝཏྟེསི. པཉྩཀཱམགུཎིཀརཱགཝསེནཱཏི ཨཱརམྨཎབྷཱུཏཱ པཉྩ ཀཱམགུཎཱ ཨེཏསྶ ཨཏྠཱིཏི པཉྩཀཱམགུཎིཀོ, ཏཏྠ རཉྫནཝསེན ཨབྷིརམཎཝསེན པཝཏྟརཱགོ, ཏསྶ ཝསེན ཨུཔྤནྣཱ རཉྫནཝསེན ཏཎྷཱཡནཝསེན པཝཏྟཱ རཱུཔཱདིཏཎྷཱཝ ཀཱམེསུ ཏཎྷཱཏི ཀཱམཏཎྷཱ. བྷཝཏི ཨཏྠི སབྦཀཱལཾ ཏིཊྛཏཱིཏི པཝཏྟཱ བྷཝདིཊྛི ཨུཏྟརཔདལོཔེན བྷཝོ, ཏཾསཧགཏཱ ཏཎྷཱ བྷཝཏཎྷཱ. ཝིབྷཝཏི ཝིནསྶཏི ཨུཙྪིཛྫཏཱིཏི པཝཏྟཱ ཝིབྷཝདིཊྛི ཝིབྷཝོ ཨུཏྟརཔདལོཔེན, ཏཾསཧགཏཱ ཏཎྷཱ ཝིབྷཝཏཎྷཱཏི ཨཱཧ ‘‘སསྶཏདིཊྛཱི’’ཏིཨཱདི. ཨིམེ དྭེ དྷམྨཱཏི ¶ ‘‘ཨེས པཙྩཡོ ཨུཔཱདཱནསྶ, ཡདིདཾ ཏཎྷཱ’’ཏི (དཱི. ནི. ༢.༡༠༡) ཨེཝཾ ཝུཏྟཱ ཝཊྚམཱུལཏཎྷཱ ཙ ‘‘ཏཎྷཾ པཊིཙྩ པརིཡེསནཱ’’ཏི (དཱི. ནི. ༢.༡༠༣) ཨེཝཾ ཝུཏྟཱ སམུདཱཙཱརཏཎྷཱ ཙཱཏི ཨིམེ དྭེ དྷམྨཱ. ཝཊྚམཱུལསམུདཱཙཱརཝསེནཱཏི ཝཊྚམཱུལཝསེན ཙེཝ སམུདཱཙཱརཝསེན ཙ. དྭཱིཧི ཀོཊྛཱསེཧཱིཏི དྭཱིཧི བྷཱགེཧི. དྭཱིཧི ཨཝཡཝེཧི སམོསརནྟི ནིབྦཏྟནཝསེན སམཾ ཝཏྟནྟི ཨིཏོཏི སམོསརཎཾ, པཙྩཡོ, ཨེཀཾ སམོསརཎཾ ཨེཏཱསནྟི ཨེཀསམོསརཎཱ. ཀེན པན ཨེཀསམོསརཎཱཏི ཨཱཧ ‘‘ཝེདནཱཡཱ’’ཏི. དྭེཔི ཧི ཏཎྷཱ ཝེདནཱཔཙྩཡཱ ཨེཝཱཏི. ཏེནཱཧ ‘‘ཝེདནཱཔཙྩཡེན ཨེཀཔཙྩཡཱ’’ཏི. ཏཏོ ཏཏོ ཨོསརིཏྭཱ ཨཱགནྟྭཱ སམཝསནཊྛཱནཾ ཨོསརཎ སམོསརཎཾ. ཝེདནཱཡ ¶ སམཾ སཧ ཨེཀསྨིཾ ཨཱརམྨཎེ ཨོསརཎཀཔཝཏྟནཀཱ ཝེདནཱ སམོསརཎཱཏི ཨཱཧ ‘‘ཨིདཾ སཧཛཱཏསམོསརཎཾ ནཱམཱ’’ཏི.

༡༡༣. སབྦེཏི ཨུཔྤཏྟིདྭཱརཝསེན བྷིནྡིཏྭཱ ཝུཏྟཱ སཝིཔཱཀཕསྶཱ ཨེཝ ཝིཉྙཱཎཱདི ཝེདནཱཔརིཡོསཱནཱ ཝིཔཱཀཝིཐཱིཏི ¶ ཀཏྭཱ. པཊིཙྩསམུཔྤཱདཀཐཱ ནཱམ ཝཊྚཀཐཱཏི ཨཱཧ ‘‘ཋཔེཏྭཱ ཙཏྟཱརོ ལོཀུཏྟརཝིཔཱཀཕསྶེ’’ཏི. བཧུདྷཱཏི བཧུཔྤཀཱརེན. ཨཡཉྷི པཉྩདྭཱརེ ཙཀྑུཔསཱདཱདིཝཏྠུཀཱནཾ པཉྩནྣཾ ཝེདནཱནཾ ཙཀྑུསམྥསྶཱདིཀོ ཕསྶོ སཧཛཱཏཨཉྙམཉྙནིསྶཡཝིཔཱཀཨཱཧཱརསམྤཡུཏྟཨཏྠིཨཝིགཏཝསེན ཨཊྛདྷཱ པཙྩཡོ ཧོཏི. སེསཱནཾ པན ཨེཀེཀསྨིཾ དྭཱརེ སམྤཊིཙྪནསནྟཱིརཎཏདཱརམྨཎཝསེན པཝཏྟཱནཾ ཀཱམཱཝཙརཝིཔཱཀཝེདནཱནཾ ཙཀྑུསམྥསྶཱདིཀོ ཕསྶོ ཨུཔནིསྶཡཝསེན ཨེཀདྷཱཝ པཙྩཡོ ཧོཏི. མནོདྭཱརེཔི ཏདཱརམྨཎཝསེན པཝཏྟཱནཾ ཀཱམཱཝཙརཝིཔཱཀཝེདནཱནཾ སཧཛཱཏམནོསམྥསྶོ ཏཐེཝ ཨཊྛདྷཱ པཙྩཡོ ཧོཏི, ཏཐཱ པཊིསནྡྷིབྷཝངྒཙུཏིཝསེན པཝཏྟཱནཾ ཏེབྷཱུམཀཝིཔཱཀཝེདནཱནཾ. ཡཱ པན ཏཱ མནོདྭཱརེ ཏདཱརམྨཎཝསེན པཝཏྟཱ ཀཱམཱཝཙརཝེདནཱ, ཏཱསཾ མནོདྭཱརཱཝཛྫནསམྤཡུཏྟོ མནོསམྥསྶོ ཨུཔནིསྶཡཝསེན ཨེཀདྷཱཝ པཙྩཡོ ཧོཏཱིཏི ཨེཝཾ ཕསྶོ བཧུདྷཱ ཝེདནཱཡ པཙྩཡོ ཧོཏཱིཏི ཝེདིཏབྦཾ.

༡༡༤. ཝེདནཱདཱིནནྟི ཝེདནཱསཉྙཱསངྑཱརཝིཉྙཱཎཱནཾ. ཨསདིསབྷཱཝཱཏི ཨནུབྷཝནསཉྫཱནནཱབྷིསངྑརཎཝིཛཱནནབྷཱཝཱ. ཏེ ཧི ཨཉྙམཉྙཝིདྷུརེན ཝེདཡིཏཱདིརཱུཔེན ཨཱཀིརིཡནྟི པཉྙཱཡནྟཱིཏི ཨཱཀཱརཱཏི ཝུཙྩནྟི. ཏེཡེཝཱཏི ¶ ཝེདནཱདཱིནཾ ཏེ ཨེཝ ཝེདཡིཏཱདིཨཱཀཱརཱ. སཱདྷུཀཾ དསྶིཡམཱནཱཏི སཀྐཙྩཾ པཙྩཀྑཏོ ཝིཡ པཀཱསིཡམཱནཱ. ཏཾ ཏཾ ལཱིནམཏྠཾ གམེནྟཱིཏི ‘‘ཨརཱུཔཊྛོ ཨཱརམྨཎཱབྷིམུཁནམནཊྛོ’’ཏི ཨེཝམཱདིཀཾ ཏཾ ཏཾ ལཱིནཾ ཨཔཱཀཊམཏྠཾ གམེནྟི ཉཱཔེནྟཱིཏི ལིངྒཱནི. ཏསྶ ཏསྶ སཉྫཱནནཧེཏུཏོཏི ཏསྶ ཏསྶ ཨརཱུཔཊྛཱདིཀསྶ སལླཀྑཎསྶ ཀཱརཎཏྟཱ. ནིམཱིཡནྟི ཨནུམཱིཡནྟི ཨེཏེཧཱིཏི ནིམིཏྟཱནི. ཏཐཱ ཏཐཱ ཨརཱུཔབྷཱཝཱདིཔྤཀཱརེན, ཝེདཡིཏཱདིཔྤཀཱརེན ཙ ཨུདྡིསིཏབྦཏོ ཀཐེཏབྦཏོ ཨུདྡེསཱ. ཏསྨཱཏི ‘‘ཨསདིསབྷཱཝཱ’’ཏིཨཱདིནཱ ཝུཏྟམེཝཏྠཾ ཀཱརཎབྷཱཝེན པཙྩཱམསཏི. ཡསྨཱ ཝེདནཱདཱིནཾ ཨཉྙམཉྙཨསདིསབྷཱཝཱ ཡཐཱཝུཏྟེནཏྠེན ཨཱཀཱརཱདཡོ, ཏསྨཱ ཨཡཾ ཨིདཱནི ཝུཙྩམཱནོ ཨེཏྠ པཱལི༹པདེ ཨཏྠོ.

ནཱམསམཱུཧསྶཱཏི ཨཱརམྨཎཱབྷིམུཁཾ ནམནཊྛེན ‘‘ནཱམ’’ནྟི ལདྡྷསམཉྙསྶ ¶ ཝེདནཱདིཙཏུཀྑནྡྷསངྑཱཏསྶ ཨརཱུཔདྷམྨཔུཉྫསྶ. པཉྙཏྟཱིཏི ‘‘ནཱམཀཱཡོ ཨརཱུཔཀལཱཔོ ཨརཱུཔིནོ ¶ ཁནྡྷཱ’’ཏིཨཱདིཀཱ པཉྙཱཔནཱ ཧོཏི. ཙེཏནཱཔདྷཱནཏྟཱ སངྑཱརཀྑནྡྷདྷམྨཱནཾ ‘‘སངྑཱརཱནཾ ཙེཏནཱཀཱརེ’’ཏིཨཱདི ཝུཏྟཾ. ཏཐཱ ཧི སུཏྟནྟབྷཱཛནཱིཡེ སངྑཱརཀྑནྡྷཝིབྷཛནེ ‘‘ཡཱ ཙེཏནཱ སཉྩེཏནཱ སཉྩེཏཡིཏཏྟ’’ནྟི (ཝིབྷ. ༢༤༩ ཨབྷིདྷམྨབྷཱཛནཱིཡེ) ཙེཏནཱཝ ནིདྡིཊྛཱ. ཨསཏཱིཏི ཨསནྟེསུ. ཝཙནཝིཔལླཱསེན ཧི ཨེཝཾ ཝུཏྟཾ. ཙཏྟཱརོ ཁནྡྷེ ཝཏྠུཾ ཀཏྭཱཏི ཝེདནཱ སཉྙཱ ཙིཏྟཾ ཙེཏནཱདཡོཏི ཨིམེ ཙཏུཀྑནྡྷསཉྙིཏེ ནིསྶཡཔཙྩཡབྷཱུཏེ དྷམྨེ ཝཏྠུཾ ཀཏྭཱ. ཨཡཉྩ ནཡོ པཉྩདྭཱརེཔི སམྦྷཝཏཱིཏི ‘‘མནོདྭཱརེ’’ཏི ཝིསེསིཏཾ. ཨདྷིཝཙནསམྥསྶཝེཝཙནོཏི ཨདྷིཝཙནམུཁེན པཉྙཏྟིམུཁེན གཧེཏབྦཏྟཱ ‘‘ཨདྷིཝཙནསམྥསྶོ’’ཏི ལདྡྷནཱམོ. སོཏི མནོསམྥསྶོ. པཉྩཝོཀཱརེ ཙ ཧདཡཝཏྠུཾ ནིསྶཱཡ ལབྦྷནཏོ རཱུཔཀཱཡེ པཉྙཱཡཏེཝ, ཨཡཾ པན ནཡོ ཨིདྷ ན ཨིཙྪིཏོ ཝེདནཱདིཔཊིཀྑེཔཝསེན ཨསམྦྷཝཔརིཡཱཡསྶ ཛོཏིཏཏྟཱཏི ‘‘པཉྩཔསཱདེ ཝཏྠུཾ ཀཏྭཱ ཨུཔྤཛྫེཡྻཱ’’ཏི ཨཏྠོ ཝུཏྟོ. ན ཧི ཝེདནཱསནྣིསྶཡེན ཝིནཱ པཉྩཔསཱདེ ཝཏྠུཾ ཀཏྭཱ མནོསམྥསྶསྶ སམྦྷཝོ ཨཏྠི. ཨུཔྤཏྟིཊྛཱནེ ཨསཏི ཨནུཔྤཏྟིཊྛཱནཏོ ཕལསྶ ཨུཔྤཏྟི ནཱམ ཀདཱཙིཔི ནཏྠཱིཏི ཨིམམཏྠཾ ཡཐཱདྷིགཏསྶ ཨཏྠསྶ ནིདསྶནཝསེན དསྶེནྟོ ‘‘ཨམྦརུཀྑེ’’ཏིཨཱདིམཱཧ ¶ . རཱུཔཀཱཡཏོཏི ཀེཝལཾ རཱུཔཀཱཡཏོ. ཏསྶཱཏི མནོསམྥསྶསྶ.

ཝིརོདྷིཔཙྩཡསནྣིཔཱཏེ ཝིབྷཱུཏཏརཱ ཝིསདིསུཔྤཏྟི, ཏསྨིཾ ཝཱ སཏི ཨཏྟནོ སནྟཱནེ ཝིཛྫམཱནསྶེཝ ཝིསདིསུཔྤཏྟིཧེཏུབྷཱཝོ རུཔྤནཱཀཱརོ. སོ ཨེཝ རུཔྤནཱཀཱརོ ཝཏྠུསཔྤཊིགྷཱདིཀཾ ཏཾ ཏཾ ལཱིནམཏྠཾ གམེཏཱིཏི ལིངྒཾ. ཏསྶ ཏསྶ སཉྫཱནནཧེཏུཏོ ནིམིཏྟཾ. ཏཐཱ ཏཐཱ ཨུདྡིསིཏབྦཏོ ཨུདྡེསོཏི ཨེཝམེཏྠ ཨཱཀཱརཱདཡོ ཨཏྠཏོ ¶ ཝེདིཏབྦཱ. ཝཏྠཱརམྨཎཱནཾ ཨཉྙམཉྙཔཊིཧནནཾ པཊིགྷོ, ཏཏོ པཊིགྷཏོ ཛཱཏོ པཊིགྷསམྥསྶོ. ཏེནཱཧ ‘‘སཔྤཊིགྷ’’ནྟིཨཱདི. ནཱམཀཱཡཏོཏི ཀེཝལཾ ནཱམཀཱཡཏོ. ཏསྶཱཏི པཊིགྷསམྥསྶསྶ. སེསཾ པཋམཔཉྷེ ཝུཏྟནཡམེཝ.

ཨུབྷཡཝསེནཱཏི ནཱམཀཱཡོ རཱུཔཀཱཡོཏི ཨུབྷཡསནྣིསྶཡསྶ ཨདྷིཝཙནསམྥསྶོ པཊིགྷསམྥསྶོཏི ཨུབྷཡསམྥསྶསྶ ཝསེན.

ཝིསུཾ ཝིསུཾ པཙྩཡཾ དསྶེཏྭཱཏི བྱཏིརེཀམུཁེན པཙྩེཀཾ ནཱམཀཱཡརཱུཔཀཱཡསཉྙིཏཾ པཙྩཡཾ དསྶེཏྭཱ. ཏེསནྟི ཕསྶཱནཾ. ཨཝིསེསཏོཏི ཝིསེསཾ ཨཀཏྭཱ སཱམཉྙཏོ. དསྶེཏུནྟི བྱཏིརེཀམུཁེནེཝ དསྶེཏུཾ. ཨེསེཝ ཧེཏཱུཏི ཨེས ཚསུཔི དྭཱརེསུ པཝཏྟོ ནཱམརཱུཔསངྑཱཏོ ཧེཏུ ཡཐཱརཧཾ དྭིནྣམྤི ཕསྶཱནཾ. ཨིདཱནི ཏཾ ཡཐཱརཧཾ པཝཏྟིཾ ཝིབྷཛིཏྭཱ དསྶེཏུཾ ‘‘ཙཀྑུདྭཱརཱདཱིསུ ཧཱི’’ཏིཨཱདི ཝུཏྟཾ.

སམྤཡུཏྟཀཱ ¶ ཁནྡྷཱཏི ཕསྶེན སམྤཡུཏྟཱ ཝེདནཱདཡོ ཁནྡྷཱ. ཨཱཝཛྫནསྶཱཔི སམྤཡུཏྟཀྑནྡྷགྒཧཎེནེཝེཏྠ གཧཎཾ དཊྛབྦཾ ཏདཝིནཱབྷཱཝཏོ. པརཏོ མནོསམྥསྶེཔི ཨེསེཝ ནཡོ. པཉྩཝིདྷོཔཱིཏི ཙཀྑུསམྥསྶཱདིཝསེན པཉྩཝིདྷོཔི. སོ ཕསྶོཏི པཊིགྷསམྥསྶོ. བཧུདྷཱཏི བཧུཔྤཀཱརེན. ཏཐཱ ཧི ཝིཔཱཀནཱམཾ ཝིཔཱཀསྶ ཨནེཀབྷེདསྶ མནོསམྥསྶསྶ སཧཛཱཏཨཉྙམཉྙནིསྶཡཝིཔཱཀསམྤཡུཏྟཨཏྠིཨཝིགཏཝསེན སཏྟདྷཱ པཙྩཡོ ཧོཏི. ཡཾ པནེཏྠ ཨཱཧཱརཀིཙྩཾ, ཏཾ ཨཱཧཱརཔཙྩཡཝསེན. ཡཾ ཨིནྡྲིཡཀིཙྩཾ, ཏཾ ཨིནྡྲིཡཔཙྩཡཝསེན པཙྩཡོ ཧོཏི. ཨཝིཔཱཀཾ པན ནཱམཾ ཨཝིཔཱཀསྶ མནོསམྥསྶསྶ ཋཔེཏྭཱ ཝིཔཱཀཔཙྩཡཾ ཨིཏརེསཾ ཝསེན པཙྩཡོ ཧོཏི. རཱུཔཾ པན ཙཀྑཱཡཏནཱདིབྷེདཾ ཙཀྑུསམྥསྶཱདིཀསྶ པཉྩཝིདྷསྶ ཕསྶསྶ ནིསྶཡཔུརེཛཱཏཨིནྡྲིཡཝིཔྤཡུཏྟཨཏྠིཨཝིགཏཝསེན ¶ ¶ ཚདྷཱ པཙྩཡོ ཧོཏི. རཱུཔཱཡཏནཱདིབྷེདཾ ཏསྶ པཉྩཝིདྷསྶ ཨཱརམྨཎཔུརེཛཱཏཨཏྠིཨཝིགཏཝསེན ཙཏུདྷཱ པཙྩཡོ ཧོཏི. མནོསམྥསྶསྶ པན ཏཱནི རཱུཔཱཡཏནཱདཱིནི, དྷམྨཱརམྨཎཉྩ ཏཐཱ ཙ ཨཱརམྨཎཔཙྩཡམཏྟེནེཝ པཙྩཡོ ཧོཏི. ཝཏྠུརཱུཔཾ པན མནོསམྥསྶསྶ ནིསྶཡཔུརེཛཱཏཝིཔྤཡུཏྟཨཏྠིཨཝིགཏཝསེན པཉྩདྷཱ པཙྩཡོ ཧོཏི. ཨེཝཾ ནཱམརཱུཔཾ ཨསྶ ཕསྶསྶ བཧུདྷཱ པཙྩཡོ ཧོཏཱིཏི ཝེདིཏབྦཾ.

༡༡༥. པཋམུཔྤཏྟིཡཾ ཝིཉྙཱཎཾ ནཱམརཱུཔསྶ ཝིསེསཔཙྩཡོཏི ཨིམམཏྠཾ བྱཏིརེཀམུཁེན དསྶེཏུཾ པཱལི༹ཡཾ ‘‘མཱཏུཀུཙྪིམྷི ན ཨོཀྐམིསྶཐཱ’’ཏིཨཱདི ཝུཏྟཾ. གབྦྷསེཡྻཀཔཊིསནྡྷི ཧི བཱཧིརཏོ མཱཏུཀུཙྪིཾ ཨོཀྐམནྟསྶ ཝིཡ ཧོནྟཱིཔི ཨཏྠཏོ ཡཐཱཔཙྩཡཾ ཁནྡྷཱནཾ ཏཏྠ པཋམུཔྤཏྟིཡེཝ. ཏེནཱཧ ‘‘པཝིསིཏྭཱ…པེ… ན ཝཏྟིསྶཐཱ’’ཏི. སུདྡྷནྟི ཀེཝལཾ ཝིཉྙཱཎེན ཨམིསྶིཏཾ ཝིརཧིཏཾ. ‘‘ཨཝསེས’’ནྟི ཨིདཾ ནཱམཱཔེཀྑཾ, ཏསྨཱ ཨཝསེསཾ ནཱམརཱུཔནྟི ཨིམཾ ཝིཉྙཱཎཾ ཋཔེཏྭཱ ཨཝསེསཾ ནཱམརཱུཔཾ ཝཱཏི ཨཏྠོ. པཊིསནྡྷིཝསེན ཨོཀྐནྟནྟི པཊིསནྡྷིགྒཧཎཝསེན, མཱཏུཀུཙྪིཾ ཨོཀྐམནྟསྶ ཝཱ པཋམཱཝཡཝབྷཱཝེན ཨོཏིཎྞཾ. ཝོཀྐམིསྶཐཱཏི སནྟཏིཝིཙྪེདཾ ཝིནཱསཾ ཨུཔགམིསྶཐ, ཏཾ པན མརཎཾ ནཱམ ཧོཏཱིཏི ཨཱཧ ‘‘ཙུཏིཝསེནཱ’’ཏི. ཨསྶཱཏི ཝིཉྙཱཎསྶ, ཏཉྩ ཁོ ཝིཉྙཱཎསཱམཉྙཝསེན ཝུཏྟཾ. ཏེནཱཧ ‘‘ཏསྶེཝ ཙིཏྟསྶ ནིརོདྷེནཱ’’ཏི, པཊིསནྡྷིཙིཏྟསྶེཝ ནིརོདྷེནཱཏི ཨཏྠོ. ཏཏོཏི པཊིསནྡྷིཙིཏྟཏོ. པཊིསནྡྷིཙིཏྟསྶ, ཏཏོ དུཏིཡཏཏིཡཙིཏྟཱནཾ ཝཱ ནིརོདྷེན ཙུཏི ན ཧོཏཱིཏི ཝུཏྟམཏྠཾ ཡུཏྟིཏོ ཝིབྷཱཝེཏུཾ ‘‘པཊིསནྡྷིཙིཏྟེན ཧཱི’’ཏིཨཱདི ཝུཏྟཾ. ཨེཏསྨིཾ ཨནྟརེཏི ཨེཏསྨིཾ སོལ༹སཙིཏྟཀྑཎེ ཀཱལེ. ཨནྟརཱཡོ ནཏྠཱིཏི ཨེཏྠ དཱརཀསྶ ཏཱཝ མརཎནྟརཱཡོ མཱ ཧོཏུ ཏདཱ ཙུཏིཙིཏྟསྶ ཨསམྦྷཝཏོ, མཱཏུ པན ཀཐཾ ཏདཱ མརཎནྟརཱཡཱབྷཱཝོཏི? ཏཾ ཏཾ ཀཱལཾ ཨནཏིཀྐམིཏྭཱ ¶ ཏདནྟརེཡེཝ ¶ ཙཝནདྷམྨཱཡ གབྦྷགྒཧཎསྶེཝ ཨསམྦྷཝཏོ. ཏེནཱཧ ‘‘ཨཡཉྷི ཨནོཀཱསོ ནཱམཱ’’ཏི, ཙུཏིཡཱཏི ཨདྷིཔྤཱཡོ.

པཊིསནྡྷིཙིཏྟེན སདྡྷིཾ སམུཊྛིཏརཱུཔཱནཱིཏི ཨོཀྐནྟིཀྑཎེ ཨུཔྤནྣཀམྨཛརཱུཔཱནི ཝདཏི. ཏཱནི ཧི ནིཔྤརིཡཱཡཏོ པཊིསནྡྷིཙིཏྟེན སདྡྷིཾ སམུཊྛིཏརཱུཔཱནི ནཱམ, ན ཨུཏུསམུཊྛཱནཱནི པཊིསནྡྷིཙིཏྟསྶ ཨུཔྤཱདཏོ པཙྪཱ སམུཊྛིཏཏྟཱ. ཙིཏྟཛཱཧཱརཛཱནཾ ¶ པན ཏདཱ ཨསམྦྷཝོ ཨེཝ. ཡཱནི པཊིསནྡྷིཙིཏྟེན སདྡྷིཾ སམུཊྛིཏརཱུཔཱནི, ཏཱནི ཏིཝིདྷཱནི ཏསྶ ཨུཔྤཱདཀྑཎེ སམུཊྛིཏཱནི, ཋིཏིཀྑཎེ སམུཊྛིཏཱནི, བྷངྒཀྑཎེ སམུཊྛིཏཱནཱིཏི. ཏེསུ ཨུཔྤཱདཀྑཎེ སམུཊྛིཏཱནི སཏྟརསམསྶ བྷཝངྒསྶ ཨུཔྤཱདཀྑཎེ ནིརུཛ྄ཛྷནྟི, ཋིཏིཀྑཎེ སམུཊྛིཏཱནི ཋིཏིཀྑཎེ ནིརུཛ྄ཛྷནྟི, བྷངྒཀྑཎེ སམུཊྛིཏཱནི བྷངྒཀྑཎེ ནིརུཛ྄ཛྷནྟི. ཏཏྠ ‘‘བྷཉྫམཱནོ དྷམྨོ བྷཉྫམཱནསྶ དྷམྨསྶ པཙྩཡོ ཧོཏཱི’’ཏི ན སཀྐཱ ཝཏྟུཾ, ཨུཔྤཱདེ, པན ཋིཏིཡཉྩ ན ན སཀྐཱཏི ‘‘སཏྟརསམསྶ བྷཝངྒསྶ ཨུཔྤཱདཀྑཎེ, ཋིཏིཀྑཎེ ཙ དྷརནྟཱནཾ ཝསེན ཏསྶ པཙྩཡམྤི དཱཏུཾ ན སཀྐོནྟཱི’’ཏི ཝུཏྟཾ. རཱུཔཀཱཡཱུཔཏྠམྦྷིཏསྶེཝ ཧི ནཱམཀཱཡསྶ པཉྩཝོཀཱརེ པཝཏྟཱིཏི. ཏེཧི རཱུཔདྷམྨེཧི ཏསྶ ཙིཏྟསྶ བལཝཏརཾ སནྡྷཱཡཱཧ ‘‘སཏྟརསམསྶ…པེ… པཝཏྟི པཝཏྟཏཱི’’ཏི. པཝེཎཱི གྷཊིཡཏཱིཏི ཨཊྛཙཏྟཱལཱིསཀམྨཛསྶ ¶ རཱུཔཔཝེཎཱི སམྦནྡྷཱ ཧུཏྭཱ པཝཏྟཏི. པཋམཉྷི པཊིསནྡྷིཙིཏྟཾ, ཏཏོ ཡཱཝ སོལ༹སམཾ བྷཝངྒཙིཏྟཾ, ཏེསུ ཨེཀེཀསྶ ཨུཔྤཱདཋིཏིབྷངྒཝསེན ཏཡོ ཏཡོ ཁཎཱ. ཏཏྠ ཨེཀེཀསྶ ཙིཏྟསྶ ཏཱིསུ ཏཱིསུ ཁཎེསུ སམཏིཾས སམཏིཾས ཀམྨཛརཱུཔཱནི ཨུཔྤཛྫནྟི. ཨིཏི སོལ༹སཏིཀཱ ཨཊྛཙཏྟཱལཱིསཾ ཧོནྟི. ཨེས ནཡོ ཏཏོ པརེསུཔི. ཏཾ སནྡྷཱཡ ཝུཏྟཾ ‘‘ཨཊྛཙཏྟཱལཱིསཀམྨཛསྶ རཱུཔཔཝེཎཱི སམྦནྡྷཱ ཧུཏྭཱ པཝཏྟཏཱི’’ཏི. སཙེ པན ན སཀྐོནྟཱིཏི པཊིསནྡྷིཙིཏྟེན སདྡྷིཾ སམུཊྛིཏརཱུཔཱནི སཏྟརསམསྶ བྷཝངྒསྶ པཙྩཡཾ དཱཏུཾ སཙེ ན སཀྐོནྟི. ཡདི ཧི པཊིསནྡྷིཙིཏྟཏོ སཏྟརསམཾ ཙུཏིཙིཏྟཾ སིཡཱ, པཊིསནྡྷིཙིཏྟསྶ ཋིཏིབྷངྒཀྑཎེསུཔི ཀམྨཛརཱུཔཾ ན ཨུཔྤཛྫེཡྻ, པགེཝ བྷཝངྒཙིཏྟཀྑཎེསུ. ཏཐཱ སཏི ནཏྠེཝ ཏསྶ ཙིཏྟསྶ པཙྩཡལཱབྷོཏི པཝཏྟི ནཔྤཝཏྟཏི, པཝེཎཱི ན གྷཊིཡཏེཝ, ཨཉྙདཏྠུ ཝིཙྪིཛྫཏི. ཏེནཱཧ ‘‘ཝོཀྐམཏིཏི ནཱམ ཧོཏཱི’’ཏིཨཱདི.

ཨིཏྠཏྟཱཡཱཏི ཨིཏྠཾཔཀཱརཏཱཡ. ཡཱདིསོ གབྦྷསེཡྻཀསྶ ཨཏྟབྷཱཝོ, ཏཾ སནྡྷཱཡེཏཾ ཝུཏྟཾ. ཏསྶ ཙ པཉྩཀྑནྡྷཱ ཨནཱུནཱ ཨེཝ ཧོནྟཱིཏི ཨཱཧ ‘‘ཨེཝཾ པརིཔུཎྞཔཉྩཀྑནྡྷབྷཱཝཱཡཱ’’ཏི. ཨུཔཙྪིཛྫིསྶཐཱཏི སནྟཱནཝིཙྪེདེན ཝིཙྪིནྡེཡྻ. སུདྡྷཾ ནཱམརཱུཔམེཝཱཏི ཝིཉྙཱཎཝིརཧིཏཾ ཀེཝལཾ ནཱམརཱུཔམེཝ. ཨཝཡཝཱནཾ པཱརིཔཱུརི ཝུཌྜྷི. ཐིརབྷཱཝཔྤཏྟི ཝིརཱུལ༹ྷི. མཧལླཀབྷཱཝཔྤཏྟི ཝེཔུལླཾ. ཏཱནི ¶ ཙ ཡཐཱཀྐམཾ པཋམཱདིཝཡཝསེན ཧོནྟཱིཏི ཝུཏྟཾ ‘‘པཋམཝཡཝསེནཱ’’ཏིཨཱདི. ཝཱ-སདྡོ ཨནིཡམཏྠོ, ཏེན ཝསྶསཧསྶདྭཡཱདཱིནཾ སངྒཧོ དཊྛབྦོ.

ཝིཉྙཱཎམེཝཱཏི ¶ ནིཡམཝཙནཾ, ཨིཏོ བཱཧིརཀཔྤིཏསྶ ཨཏྟནོ, ཨིསྶརཱདཱིནཉྩ པཊིཀྑེཔཔདཾ, ན ཨཝིཛྫཱདིཕསྶཱདིཔཊིཀྑེཔཔདཾ པཊིཡོགཱིནིཝཏྟནཔདཏྟཱ ཨཝདྷཱརཎསྶ. ཏེནཱཧ ‘‘ཨེསེཝ ཧེཏཱུ’’ཏིཨཱདི. ཨཡཉྩ ནཡོ ཧེཊྛཱཔི སབྦཔདེསུ ཡཐཱརཧཾ ཝཏྟབྦོ. ཨིདཱནི ཝིཉྙཱཎམེཝ ནཱམརཱུཔསྶ པདྷཱནཀཱརཎནྟི ཨིམམཏྠཾ ཨོཔམྨཝསེན ཝིབྷཱཝེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. པཙྩེཀཾ ཝིཡ སམུདིཏསྶཱཔི ནཱམརཱུཔསྶ ཝིཉྙཱཎེན ཝིནཱ ཨཏྟཀིཙྩཱསམཏྠཏཾ དསྶེཏུཾ ‘‘ཏྭཾ ནཱམརཱུཔཾ ནཱམཱ’’ཏི ཨེཀཛ྄ཛྷཾ གཧཎཾ. པུརེཙཱརིཀེཏི པུབྦངྒམེཝ. ཝིཉྙཱཎཉྷི ¶ སཧཛཱཏདྷམྨཱནཾ པུབྦངྒམཾ. ཏེནཱཧ བྷགཝཱ ‘‘མནོཔུབྦངྒམཱ དྷམྨཱ’’ཏི. (དྷ. པ. ༡; ནེཏྟི. ༩༠, ༩༢; པེཊཀོ. ༡༣, ༨༣) བཧུདྷཱཏི ཨནེཀཔྤཀཱརེན པཙྩཡོ ཧོཏི.

ཀཐཾ? ཝིཔཱཀནཱམསྶ ཧི པཊིསནྡྷིཡཾ ཨཉྙཾ ཝཱ ཝིཉྙཱཎཾ སཧཛཱཏཨཉྙམཉྙནིསྶཡཝིཔཱཀཨཱཧཱརཨིནྡྲིཡསམྤཡུཏྟཨཏྠིཨཝིགཏཔཙྩཡེཧི ནཝདྷཱ པཙྩཡོ ཧོཏི. ཝཏྠུརཱུཔསྶ པཊིསནྡྷིཡཾ སཧཛཱཏཨཉྙམཉྙནིསྶཡཝིཔཱཀཨཱཧཱརཨིནྡྲིཡཝིཔྤཡུཏྟཨཏྠིཨཝིགཏཔཙྩཡེཧི ནཝདྷཱ པཙྩཡོ ཧོཏི. ཋཔེཏྭཱ པན ཝཏྠུརཱུཔཾ སེསརཱུཔསྶ ཨིམེསུ ནཝསུ ཨཉྙམཉྙཔཙྩཡཾ ཨཔནེཏྭཱ སེསེཧི ཨཊྛཧི པཙྩཡེཧི པཙྩཡོ ཧོཏི. ཨབྷིསངྑཱརཝིཉྙཱཎཾ པན ཨསཉྙསཏྟརཱུཔསྶ, པཉྩཝོཀཱརེ ཝཱ ཀམྨཛསྶ སུཏྟནྟིཀཔརིཡཱཡཏོ ཨུཔནིསྶཡཝསེན ཨེཀདྷཱཝ པཙྩཡོ ཧོཏི. ཨཝསེསཉྷི པཋམབྷཝངྒཏོ པབྷུཏི སབྦམྤི ཝིཉྙཱཎཾ ཏསྶ ནཱམརཱུཔསྶ ཡཐཱརཧཾ པཙྩཡོ ཧོཏཱིཏི ཝེདིཏབྦཾ. ཨཡམེཏྠ སངྑེཔོ, ཝིཏྠཱརཏོ པན པཙྩཡནཡེ དསྶིཡམཱནེ སབྦཱཔི མཧཱཔཀརཎཀཐཱ ཨཱནེཏབྦཱ ཧོཏཱིཏི ན ཝིཏྠཱརིཏཱ. ཀཐཾ པནེཏཾ པཙྩེཏབྦཾ ‘‘པཊིསནྡྷིནཱམརཱུཔཾ ཝིཉྙཱཎཔཙྩཡཱ ཧོཏཱི’’ཏི? སུཏྟཏོ, ཡུཏྟིཏོ ཙ. པཱལི༹ཡཉྷི ‘‘ཙིཏྟཱནུཔརིཝཏྟིནོ དྷམྨཱ’’ཏིཨཱདིནཱ (དྷ. ས. མཱཏིཀཱ ༦༢) ནཡེན བཧུདྷཱ ཝེདནཱདཱིནཾ ཝིཉྙཱཎཔཙྩཡཏཱ ཨཱགཏཱ. ཡུཏྟིཏོ པན ཨིདྷ ཙིཏྟཛེན རཱུཔེན དིཊྛེན ཨདིཊྛསྶཱཔི རཱུཔསྶ ཝིཉྙཱཎཾ པཙྩཡོ ཧོཏཱིཏི ཝིཉྙཱཡཏི. ཙིཏྟེཧི པསནྣེ, ཨཔྤསནྣེ ཝཱ ཏདནུརཱུཔཱནི རཱུཔཱནི ཨུཔྤཛྫམཱནཱནི དིཊྛཱནི, དིཊྛེན ཙ ཨདིཊྛསྶ ཨནུམཱནཾ ཧོཏཱིཏི. ཨིམིནཱ ཨིདྷ ‘‘དིཊྛེན ཙིཏྟཛརཱུཔེན ཨདིཊྛསྶཱཔི པཊིསནྡྷིརཱུཔསྶ ཝིཉྙཱཎཾ པཙྩཡོ ཧོཏཱི’’ཏི པཙྩེཏབྦམེཏཾ ¶ . ཀམྨསམུཊྛཱནསྶཱཔི ཧི རཱུཔསྶ ཙིཏྟསམུཊྛཱནསྶ ཝིཡ ཝིཉྙཱཎཔཙྩཡཏཱ པཊྛཱནེ ཨཱགཏཱཏི.

༡༡༦. ཨིདྷ ¶ ¶ སམུདཡ-སདྡོ སམུདཱཡ-སདྡོ ཝིཡ སམཱུཧཔརིཡཱཡོཏི ཨཱཧ ‘‘དུཀྑརཱསིསམྦྷཝོ’’ཏི. ཨེཀཀོཏི ཨསཧཱཡོ རཱཛཔརིསཱརཧིཏོ. པསྶེཡྻཱམ ཏེ རཱཛབྷཱཝཾ ཨམྷེཧི ཝིནཱཏི ཨདྷིཔྤཱཡོ. ཡཐཱརཧཾ པརིསཾ རཉྫེཏཱིཏི ཧི རཱཛཱ. ཨཏྠཏོཏི ཨཏྠསིདྡྷིཏོ ཨཝདནྟམྤི ཝདཏི ཝིཡ. ‘‘ཧདཡཝཏྠུ’’ནྟི ཨིམིནཱཝ ཏནྣིསྶཡོཔི གཧིཏོ ཝཱཏི དཊྛབྦཾ. ཨཱནནྟརིཡབྷཱཝཏོ ནིསྶཡནིསྶཡོཔི ‘‘ནིསྶཡོ’’ ཏྭེཝ ཝུཙྩཏཱིཏི. པཊིསནྡྷིཝིཉྙཱཎཾ ནཱམ བྷཝེཡྻཱསི, ནེཏཾ ཋཱནཾ ཝིཛྫཏཱིཏི ཨཏྠོ. ཏེནཱཧ ‘‘པསྶེཡྻཱམཱ’’ཏིཨཱདི. བཧུདྷཱཏི ཨནེཀདྷཱ པཙྩཡོ ཧོཏི. ཀཐཾ? ནཱམཾ ཏཱཝ པཊིསནྡྷིཡཾ སཧཛཱཏཨཉྙམཉྙནིསྶཡཝིཔཱཀསམྤཡུཏྟཨཏྠིཨཝིགཏཔཙྩཡེཧི སཏྟདྷཱ ཝིཉྙཱཎསྶ པཙྩཡོ ཧོཏཱིཏི. ཀིཉྩི པནེཏྠ ཧེཏུཔཙྩཡེན, ཀིཉྩི ཨཱཧཱརཔཙྩཡེནཱཏི ཨེཝཾ ཨཉྙཐཱཔི པཙྩཡོ ཧོཏི. ཨཝིཔཱཀཾ པན ནཱམཾ ཡཐཱཝུཏྟེསུ པཙྩཡེསུ ཋཔེཏྭཱ ཝིཔཱཀཔཙྩཡཾ ཨིཏརེཧི ཚཧི པཙྩཡེཧི པཙྩཡོ ཧོཏི. ཀིཉྩི པནེཏྠ ཧེཏུཔཙྩཡེན, ཀིཉྩི ཨཱཧཱརཔཙྩཡེནཱཏི ཨཉྙཐཱཔི པཙྩཡོ ཧོཏི, ཏཉྩ ཁོ པཝཏྟིཡཾཡེཝ, ན པཊིསནྡྷིཡཾ. རཱུཔཏོ པན ཧདཡཝཏྠུ པཊིསནྡྷིཡཾ ཝིཉྙཱཎསྶ སཧཛཱཏཨཉྙམཉྙནིསྶཡཝིཔྤཡུཏྟཨཏྠི ཨཝིགཏཔཙྩཡེཧི ཚདྷཱཝ པཙྩཡོ ཧོཏི. པཝཏྟིཡཾ པན སཧཛཱཏཨཉྙམཉྙཔཙྩཡཝཛྫིཏེཧི པཉྩཧི པུརེཛཱཏཔཙྩཡེན སཧ ཏེཧེཝ པཙྩཡེཧི པཙྩཡོ ཧོཏི. ཙཀྑཱཡཏནཱདིབྷེདཾ པན པཉྩཝིདྷམྤི རཱུཔཾ ཡཐཱཀྐམཾ ཙཀྑུཝིཉྙཱཎཱདིབྷེདསྶ ཝིཉྙཱཎསྶ ནིསྶཡཔུརེཛཱཏཨིནྡྲིཡཝིཔྤཡུཏྟཨཏྠིཨཝིགཏཔཙྩཡེཧི པཙྩཡོ ཧོཏཱིཏི ཨེཝཾ ནཱམརཱུཔཾ ཝིཉྙཱཎསྶ བཧུདྷཱ པཙྩཡོ ཧོཏཱིཏི ཝེདིཏབྦཾ.

ཡྭཱཡམནུཀྐམེན ཝིཉྙཱཎསྶ ནཱམརཱུཔཾ, པཊིསནྡྷིནཱམརཱུཔསྶ ¶ , ཙ ཝིཉྙཱཎཾ པཏི པཙྩཡབྷཱཝོ, སོ ཀདཱཙི ཝིཉྙཱཎསྶ སཱཏིསཡོ, ཀདཱཙི ནཱམརཱུཔསྶ, ཀདཱཙི ཨུབྷིནྣཾ སདིསོཏི ཏིཝིདྷོཔི སོ ‘‘ཨེཏྟཱཝཏཱ’’ཏི པདེན ཨེཀཛ྄ཛྷཾ གཧིཏོཏི དསྶེནྟོ ‘‘ཝིཉྙཱཎེ…པེ… པཝཏྟེསཱུ’’ཏི ཝཏྭཱ པུན ཡམིདམྤི ཝིཉྙཱཎཾ ནཱམརཱུཔསཉྙིཏཱནཾ པཉྩནྣཾ ཁནྡྷཱནཾ ཨཉྙམཉྙནིསྶཡེན པཝཏྟཱནཾ ཨེཏྟཀེན སབྦཱ སཾསཱརཝཊྚཔྤཝཏྟཱིཏི ཨིམམཏྠཾ དསྶེནྟོ ‘‘ཨེཏྟཀེན…པེ… པཊིསནྡྷིཡོ’’ཏི ཨཱཧ. ཏཏྠ ཨེཏྟཀེནཱཏི ཨེཏྟཀེནེཝ, ན ཨིཏོ ཨཉྙེན ཀེནཙི ཀཱརཀཝེདཀསབྷཱཝེན ཨཏྟནཱ, ཨིསྶརཱདིནཱ ཝཱཏི ཨཏྠོ. ཨནྟོགདྷཱཝདྷཱརཎཉྷེཏཾ པདཾ.

ཝཙནམཏྟམེཝ ¶ ཨདྷིཀིཙྩཱཏི དཱསཱདཱིསུ སིརིཝཌྜྷཀཱདི-སདྡཱ ཝིཡ ཨཏཐཏྟཱ ཝཙནམཏྟམེཝ ཨདྷིཀཱརཾ ཀཏྭཱ པཝཏྟསྶ. ཏེནཱཧ ‘‘ཨཏྠཾ ཨདིསྭཱ’’ཏི. ཝོཧཱརསྶཱཏི ཝོཧརཎམཏྟསྶ. པཐོཏི པཝཏྟིམགྒོ པཝཏྟིཡཱ ཝིསཡོ. ཡསྨཱ སརཎཀིརིཡཱཝསེན པུགྒལོ ‘‘སཏོ’’ཏི ཝུཙྩཏི, སམྤཛཱནནཀིརིཡཱཝསེན ‘‘སམྤཛཱནོ’’ཏི, ཏསྨཱ ཝུཏྟཾ ‘‘ཀཱརཎཱཔདེསཝསེནཱ’’ཏི. ཀཱརཎཾ ¶ ནིདྡྷཱརེཏྭཱ ཨུཏྟི ནིརུཏྟཱིཏི. ཨེཀམེཝ ཨཏྠཾ ‘‘པཎྜིཏོ’’ཏིཨཱདིནཱ པཀཱརཏོ ཉཱཔནཏོ ‘‘པཉྙཏྟཱི’’ཏི ཝདནྟི. སོ ཨེཝ ཧི ‘‘པཎྜིཏོ’’ཏི ཙ ‘‘བྱཏྟོ’’ཏི ཙ ‘‘མེདྷཱཝཱི’’ཏི ཙ པཉྙཱཔཱིཡཏཱིཏི. པཎྜིཙྩཔྤཀཱརཏོ པན པཎྜིཏོ, ཝེཡྻཏྟིཡཔྤཀཱརཏོ བྱཏྟོཏི པཉྙཱཔཱིཡཏཱིཏི ཨེཝཾ པཀཱརཏོ པཉྙཱཔནཏོ པཉྙཏྟི. ཡསྨཱ ཨིདྷ ཨདྷིཝཙནནིརུཏྟིཔཉྙཏྟིཔདཱནི སམཱནཏྠཱནི. སབྦཉྩ ཝཙནཾ ཨདྷིཝཙནཱདིབྷཱཝཾ བྷཛཏི, ཏསྨཱ ཀེསུཙི ཝཙནཝིསེསེསུ ཝིསེསེན པཝཏྟེཧི ཨདྷིཝཙནཱདིསདྡེཧི སབྦཱནི ཝཙནཱནི པཉྙཏྟིཨཏྠཔྤཀཱསནསཱམཉྙེན ཝུཏྟཱནཱིཏི ཨིམིནཱ ཨདྷིཔྤཱཡེན ཨཡམཏྠཡོཛནཱ ཀཏཱཏི ཝེདིཏབྦཱ.

ཨཐ ཝཱ ཨདྷི-སདྡོ ཨུཔརིབྷཱཝེ, ཨུཔརི ཝཙནཾ ཨདྷིཝཙནཾ. ཀསྶ ཨུཔརི? པཀཱསེཏབྦསྶ ཨཏྠསྶཱཏི པཱཀཊོ ཡམཏྠོ. ཨདྷཱིནཾ ཝཱ ཝཙནཾ ཨདྷིཝཙནཾ. ཀེན ཨདྷཱིནཾ? ཨཏྠེན. ཏཐཱ ཏཾཏཾཨཏྠཔྤཀཱསེན ¶ ནིཙྪིཏཾ, ནིཡཏཾ ཝཱ ཝཙནཾ ནིརུཏྟི. པཐཝཱིདྷཱཏུཔུརིསཱདིཏཾཏཾཔཀཱརེན ཉཱཔནཏོ པཉྙཏྟཱིཏི ཨེཝཾ ཨདྷིཝཙནཱདིཔདཱནཾ སབྦཝཙནེསུ པཝཏྟི ཝེདིཏབྦཱ, ཨཉྙཐཱ སིརིཝཌྜྷཀདྷནཝཌྜྷཀཔྤཀཱརཱནམེཝ ནིརུཏྟིཏཱ, ‘‘པཎྜིཏོ ཝིཡཏྟོ’’ཏི ཨེཝཾ པཀཱརཱནམེཝ ཨེཀམེཝ ཨཏྠཾ ཏེན ཏེན པཀཱརེན ཉཱཔེནྟཱནཾ པཉྙཏྟིཏཱ ཙ ཨཱཔཛྫེཡྻཱཏི. ཨེཝཾ ཏཱིཧིཔི ནཱམེཧི ཝུཏྟསྶ ཝོཧཱརསྶ པཝཏྟིམགྒོཔི སཧ ཝིཉྙཱཎེན ནཱམརཱུཔནྟི ཨེཏྟཱཝཏཱཝ ཨིཙྪིཏབྦོ. ཏེནཱཧ ‘‘ཨིཏཱི’’ཏིཨཱདི. པཉྙཱཡ ཨཝཙརིཏབྦནྟི པཉྙཱཡ པཝཏྟིཏབྦཾ, ཉེཡྻནྟི ཨཏྠོ. ཏེནཱཧ ‘‘ཛཱནིཏབྦ’’ནྟི. ཝཊྚནྟི ཀིལེསཝཊྚཾ, ཀམྨཝཊྚཾ, ཝིཔཱཀཝཊྚནྟི ཏིཝིདྷམྤི ཝཊྚཾ. ཝཏྟཏཱིཏི པཝཏྟཏི. ཏཡིདཾ ‘‘ཛཱཡེཐཱ’’ཏིཨཱདིནཱ པཉྩཧི པདེཧི ཝུཏྟསྶ ཨཏྠསྶ ནིགམནཝསེན ཝུཏྟཾ. ཨཱདི-སདྡེན ཨིཏྠཱིཏིཔུརིསཱཏིཨཱདཱིནམྤི སངྒཧོ དཊྛབྦོ. ནཱམཔཉྙཏྟཏྠཱཡཱཏི ཁནྡྷཱདིཕསྶཱདིསཏྟཱདིཨིཏྠཱདིནཱམསྶ པཉྙཱཔནཏྠཱཡ. ཝཏྠུཔི ཨེཏྟཱཝཏཱཝ. ཏེནཱཧ ‘‘ཁནྡྷཔཉྩཀམྤི ཨེཏྟཱཝཏཱཝ པཉྙཱཡཏཱི’’ཏི. ཨེཏྟཱཝཏཱ ཨེཏྟཀེན, སཧ ཝིཉྙཱཎེན ནཱམརཱུཔཔྤཝཏྟིཡཱཏི ཨཏྠོ.

ཨཏྟཔཉྙཏྟིཝཎྞནཱ

༡༡༧. ཨནུསནྡྷིཡཏི ¶ ཨེཏེནཱཏི ཨནུསནྡྷི, ཧེཊྛཱ ཨཱགཏདེསནཱཡ ཨནུསནྡྷཱནཝསེན པཝཏྟཱ ཨུཔརིདེསནཱ, སཱ པཋམཔདསྶ དསྶིཏཱ, ཨིདཱནི དུཏིཡཔདསྶ དསྶེཏབྦཱཏི ཏམཏྠཾ དསྶེནྟོ ‘‘ཨིཏི བྷགཝཱ’’ཏིཨཱདིམཱཧ. རཱུཔིནྟི རཱུཔཝནྟཾ. པརིཏྟནྟི ན ཝིཔུལཾ, ཨཔྤཀནྟི ཨཏྠོ. ཡསྨཱ ཨཏྟཱ ནཱམ ཀོཙི པརམཏྠཏོ ནཏྠི. ཀེཝལཾ པན དིཊྛིགཏིཀཱནཾ པརིཀཔྤིཏམཏྟཾ ¶ , ཏསྨཱ ཡཏྠ ནེསཾ ཨཏྟསཉྙཱ, ཡཐཱ ཙསྶ རཱུཔིབྷཱཝཱདིཔརིཀཔྤནཱ ཧོཏི, ཏཾ དསྶེནྟོ ‘‘ཡོ’’ཏིཨཱདིམཱཧ. རཱུཔིཾ པརིཏྟནྟི ཨཏྟནོ ཨུཔཊྛིཏཀསིཎརཱུཔཝསེན རཱུཔིཾ, ཏསྶ ཨཝཌྜྷིཏབྷཱཝེན པརིཏྟཾ. པཉྙཔེཏི ནཱིལཀསིཎཱདིཝསེན ནཱནཱཀསིཎལཱབྷཱི. ཏནྟི ཨཏྟཱནཾ ¶ . ཨནནྟནྟི ཀསིཎནིམིཏྟསྶ ཨཔྤམཱཎཏཱཡ པརིཙྪེདསྶ ཨནུཔཊྛཱནཏོ ཨནྟརཧིཏཾ. ཨུགྒྷཱཊེཏྭཱཏི བྷཱཝནཱཡ ཨཔནེཏྭཱ. ནིམིཏྟཕུཊྛོཀཱསནྟི ཏེན ཀསིཎནིམིཏྟེན ཕུཊྛཔྤདེསཾ. ཏེསཱུཏི ཙཏཱུསུ ཨརཱུཔཀྑནྡྷེསུ. ཝིཉྙཱཎམཏྟམེཝཱཏི ‘‘ཝིཉྙཱཎམཡོ ཨཏྟཱ’’ཏི ཨེཝཾཝཱདཱི.

༡༡༨. ‘‘ཨེཏརཧཱི’’ཏི སཱཝདྷཱརཎམིདཾ པདནྟི ཏདཏྠཾ དསྶེནྟོ ‘‘ཨིདཱནེཝཱ’’ཏི ཝཏྭཱ ཨཝདྷཱརཎེན ནིཝཏྟིཏམཏྠཾ ཨཱཧ ‘‘ན ཨིཏོ པར’’ནྟི. ཏཏྠ ཏཏྠེཝ སཏྟཱ ཨུཙྪིཛྫནྟཱིཏི ཨུཙྪེདཝཱདཱི, ཏེནཱཧ ‘‘ཨུཙྪེདཝསེནེཏཾ ཝུཏྟ’’ནྟི. བྷཱཝིནྟི སབྦཾ སདཱ བྷཱཝིཾ ཨཝིནསྶནཀཾ. ཏེནཱཧ ‘‘སསྶཏཝསེནེཏཾ ཝུཏྟ’’ནྟི. ཨཏཐཱསབྷཱཝནྟི ཡཐཱ པརཝཱདཱི ཝདནྟི, ན ཏཐཱ སབྷཱཝཾ. ཏཐབྷཱཝཱཡཱཏི ཨུཙྪེདབྷཱཝཱཡ ཝཱ སསྶཏབྷཱཝཱཡ ཝཱ. ཨནིཡམཝཙནཉྷེཏཾ ཝུཏྟཾ སཱམཉྙཛོཏནཱཝསེན. སམྤཱདེསྶཱམཱིཏི ཏཐབྷཱཝཾ ཨསྶ སམྤནྣཾ ཀཏྭཱ དསྶཡིསྶཱམི, པཏིཊྛཱཔེསྶཱམཱིཏི ཨཏྠོ. ཏཐཱ ཧི ཝཀྑཏི ‘‘སསྶཏཝཱདཉྩ ཛཱནཱཔེཏྭཱ’’ཏིཨཱདི. (དཱི. ནི. ཨཊྛ. ༢.༡༡༨) ཨིམིནཱཏི ‘‘ཨཏཐཾ ཝཱ པནཱ’’ཏིཨཱདི ཝཙནེན, ཨནུཙྪེདསབྷཱཝམྤི སམཱནཾ སསྶཏཝཱདིནོ མཏིཝསེནཱཏི ཨདྷིཔྤཱཡོ. ཨུཔཀཔྤེསྶཱམཱིཏི ཨུཔེཙྩ སམཏྠཡིསྶཱམི.

ཨེཝཾ སམཱནནྟི ཨེཝཾ བྷཱུཏཾ སམཱནཾ. རཱུཔཀསིཎཛ྄ཛྷཱནཾ རཱུཔཾ ཨུཏྟརཔདལོཔེན, ཨདྷིགམནཝསེན ཏཾ ཨེཏསྶ ཨཏྠཱིཏི རཱུཔཱིཏི ཨཱཧ ‘‘རཱུཔིནྟི རཱུཔཀསིཎལཱབྷི’’ནྟི. པརིཏྟཏྟཱནུདིཊྛཱིཏི ཨེཏྠ རཱུཔཱི-སདྡོཔིཨཱཝུཏྟིཨཱདིནཡེན ཨཱནེཏྭཱ ཝཏྟབྦོ, རཱུཔཱིབྷཱཝམྤི ཧི སོ དིཊྛིགཏིཀོ པརིཏྟབྷཱཝཾ ཝིཡ ¶ ཨཏྟནོ ཨབྷིནིཝིསྶ ཋིཏོཏི. ཨརཱུཔིནྟི ཨེཏྠཱཔི ཨེསེཝ ནཡོ. ‘‘པཏྟཔལཱསབཧུལགཙྪསངྑེཔེན གྷནགཧནཛཊཱཝིཏཱནཱ ¶ ནཱཏིདཱིགྷསནྟཱནཱ ཝལླི, ཏབྦིཔརཱིཏཱ ལཏཱ’’ཏི ཝདནྟི. ཨཔྤཧཱིནཊྛེནཱཏི མགྒེན ཨསམུཙྪིནྣབྷཱཝེན. ཀཱརཎལཱབྷེ སཏི ཨུཔྤཛྫནཱརཧཏཱ ཨནུསཡནཊྛོ.

ཨརཱུཔཀསིཎཾ ནཱམ ཀསིཎུགྒྷཱཊིཾ ཨཱཀཱསཾ, ན པརིཙྪིནྣཱཀཱསཀསིཎཾ. ‘‘ཨུབྷཡམྤི ཨརཱུཔཀསིཎམེཝཱ’’ཏི ཀེཙི. ཨརཱུཔཀྑནྡྷགོཙརཾ ཝཱཏི ཝེདནཱདཡོ ཨརཱུཔཀྑནྡྷཱ ‘‘ཨཏྟཱ’’ཏི ཨབྷིནིཝེསསྶ གོཙརོ ཨེཏསྶཱཏི ཨརཱུཔཀྑནྡྷགོཙརོ, དིཊྛིགཏིཀོ, ཏཾ ཨརཱུཔཀྑནྡྷགོཙརཾ. ཝཱ-སདྡོ ཝུཏྟཝིཀཔྤཏྠོ. སདྡཡོཛནཱ པན ཨརཱུཔཾ ཨརཱུཔཀྑནྡྷཱ གོཙརབྷཱུཏཱ ཨེཏསྶ ཨཏྠཱིཏི ཨརཱུཔཱི, ཏཾ ཨརཱུཔིཾ. ལཱབྷིནོ ཙཏྟཱརོཏི རཱུཔཀསིཎཱདིལཱབྷཝསེན ཏཾ ཏཾ དིཊྛིཝཱདཾ སཡམེཝ པརིཀཔྤེཏྭཱ ¶ ཏཾ ཨཱདཱཡ པགྒཡ྄ཧ པཉྙཱཔནཀཱ ཙཏྟཱརོ དིཊྛིགཏིཀཱ. ཏེསཾ ཨནྟེཝཱསིཀཱཏི ཏེསཾ ལཱབྷཱིནཾ ཝཱདཾ པཙྩཀྑཏོ, པརམྤརཱཡ ཙ ཨུགྒཧེཏྭཱ ཏཐེཝ ནཾ ཁམིཏྭཱ རོཙེཏྭཱ པཉྙཱཔནཀཱ ཙཏྟཱརོ. ཏཀྐིཀཱ ཙཏྟཱརོཏི ཀསིཎཛ྄ཛྷཱནསྶ ཨལཱབྷིནོ ཀེཝལཾ ཏཀྐནཝསེནེཝ ཡཐཱཝུཏྟེ ཙཏྟཱརོ དིཊྛིཝཱདེ སཡམེཝ ཨབྷིནིཝིསྶ པགྒཡ྄ཧ ཋིཏཱ ཙཏྟཱརོ. ཏེསཾ ཨནྟེཝཱསིཀཱ པུབྦེ ཝུཏྟནཡེན ཝེདིཏབྦཱ.

ནཨཏྟཔཉྙཏྟིཝཎྞནཱ

༡༡༩. ཨཱརདྡྷཝིཔསྶཀོཔཱིཏི སམྤརཱཡིཀཝིཔསྶཀོཔི, ཏེན བལཝཝིཔསྶནཱཡ ཋིཏཾ པུགྒལཾ དསྶེཏི. ན པཉྙཔེཏི ཨེཝ ཨབཧུསྶུཏོ པཱིཏི ཨདྷིཔྤཱཡོ. ཏཱདིསོ ཧི ཝིཔསྶནཱཡ ཨཱནུབྷཱཝོ. སཱསནིཀོཔི ཛྷཱནཱབྷིཉྙཱལཱབྷཱི ‘‘ན པཉྙཔེཏཱི’’ཏི ན ཝཏྟབྦོཏི སོ ཨིདྷ ན ཨུདྡྷཊོ. ཨིདཱནི ནེསཾ ཨཔཉྙཱཔནེ ཀཱརཎཾ དསྶེཏི ‘‘ཨེཏེསཉྷཱི’’ཏིཨཱདིནཱ. ཨིཙྩེཝ ཉཱཎཾ ཧོཏི, ན ཝིཔརཱིཏགྒཱཧོ ཏསྶ ཀཱརཎསྶ དཱུརསམུསྶཱརིཏཏྟཱ. ཨརཱུཔཀྑནྡྷཱ ཨིཙྩེཝ ཉཱཎཾ ཧོཏཱིཏི ཡོཛནཱ.

ཨཏྟསམནུཔསྶནཱཝཎྞནཱ

༡༢༡. དིཊྛིཝསེན སམནུཔསྶིཏྭཱ, ན ཉཱཎཝསེན. སཱ ཙ སམནུཔསྶནཱ ཨཏྠཏོ དིཊྛིདསྶནཝསེན.

‘‘ཝེདནཾ ¶ ཨཏྟཏོ སམནུཔསྶཏཱི’’ཏི ཨེཝཾ ¶ ཨཱགཏཱ ཝེདནཱཀྑནྡྷཝཏྠུཀཱ སཀྐཱཡདིཊྛི. ཨིཊྛཱདིབྷེདཾ ཨཱརམྨཎཾ ན པཊིསཾཝེདེཏཱིཏི ཨཔྤཊིསཾཝེདནོཏི ཝེདཀབྷཱཝཔཊིཀྑེཔམུཁེན སཉྫཱནནཱདིབྷཱཝོཔི པཊིཀྑིཏྟོ ཧོཏི ཏདཝིནཱབྷཱཝཏོཏི ཨཱཧ ‘‘ཨིམིནཱ རཱུཔཀྑནྡྷཝཏྠུཀཱ སཀྐཱཡདིཊྛི ཀཐིཏཱ’’ཏི. ‘‘ཨཏྟཱ མེ ཝེདིཡཏཱི’’ཏི ཨིམིནཱ ཨཔྤཊིསཾཝེདནཏྟཾ པཊིཀྑིཔཏི. ཏེནཱཧ ‘‘ནོཔི ཨཔྤཊིསཾཝེདནོ’’ཏི. ‘‘ཝེདནཱདྷམྨོ’’ཏི པན ཨིམིནཱ ‘‘ཝེདནཱ མེ ཨཏྟཱ’’ཏི ཨིམཾ ཝཱདཾ པཊིཀྑིཔཏི. ཝེདནཱསངྑཱཏོ དྷམྨོ ཨེཏསྶ ཨཏྠཱིཏི ཧི ཝེདནཱདྷམྨོཏི ཝེདནཱཡ སམནྣཱགཏབྷཱཝཾ ཏསྶ པཊིཛཱནཱཏི. ཏེནཱཧ ‘‘ཨེཏསྶ ཙ ཝེདནཱདྷམྨོ ཨཝིཔྤཡུཏྟསབྷཱཝོ’’ཏི. སཉྙཱསངྑཱརཝིཉྙཱཎཀྑནྡྷཝཏྠུཀཱ སཀྐཱཡདིཊྛི ཀཐིཏཱཏི ཨཱནེཏྭཱ སམྦནྡྷོ. ‘‘ཝེདནཱསམྤཡུཏྟཏྟཱ ཝེདིཡཏཱི’’ཏི ཏཾསམྤཡོགཏོ ཏཾཀིཙྩཀཏམཱཧ ཡཐཱ ཙེཏནཱཡོགཏོ ཙེཏནོ པུརིསོཏི. སབྦེསམྤི ཏཾ སཱརམྨཎདྷམྨཱནཾ ཨཱརམྨཎཱནུབྷཝནཾ ལབྦྷཏེཝ, ཏཉྩ ཁོ ཨེཀདེསཏོ ཕུཊྛཏཱམཏྟཏོ ¶ , ཝེདནཱཡ པན ཝིསྶཝིཏཱཡ སཱམིབྷཱཝེན ཨཱརམྨཎརསཱནུབྷཝནནྟི. ཏསྶཱ ཝསེན སཉྙཱདཡོཔི ཏཾསམྤཡུཏྟཏྟཱ ‘‘ཝེདིཡཏཱི’’ཏི ཝུཙྩནྟི. ཏཐཱ ཧི ཝུཏྟཾ ཨཊྛསཱལིནིཡཾ ‘‘ཨཱརམྨཎརསཱནུབྷཝནཊྛཱནཾ པཏྭཱ སེསསམྤཡུཏྟདྷམྨཱ ཨེཀདེསམཏྟཀམེཝ ཨནུབྷཝནྟཱི’’ཏི, (དྷ. ས. ཨཊྛ. ༡ དྷམྨུདྡེསཀཐཱ) རཱཛསཱུདནིདསྶནེན ཝཱཡམཏྠོ ཏཏྠ ཝིབྷཱཝིཏོ ཨེཝ. ཨེཏསྶཱཏི སཉྙཱདིཀྑནྡྷཏྟཡསྶ. ‘‘ཨཝིཔྤཡུཏྟསབྷཱཝོ’’ཏི ཨིམིནཱ ཨཝིསཾཡོགཛནིཏཾ ཀཉྩི ཝིསེསཾ ཋཱནཾ དཱིཔེཏི.

༡༢༢. ཏཏྠཱཏི ཏེསུ ཝཱརེསུ. ཏཱིསུ དིཊྛིགཏིཀེསཱུཏི ‘‘ཝེདནཱ མེ ཨཏྟཱ’’ཏི, ‘‘ཨཔྤཊིསཾཝེདནོ མེ ཨཏྟཱ’’ཏི, ‘‘ཝེདནཱདྷམྨོ མེ ཨཏྟཱ’’ཏི ཙ ཨེཝཾཝཱདེསུ ¶ ཏཱིསུ དིཊྛིགཏིཀེསུ. ཏིསྶནྣཾ ཝེདནཱནཾ བྷིནྣསབྷཱཝཏྟཱ སུཁཾ ཝེདནཾ ‘‘ཨཏྟཱ’’ཏི སམནུཔསྶཏོ དུཀྑཾ, ཨདུཀྑམསུཁཾ ཝཱ ཝེདནཾ ‘‘ཨཏྟཱ’’ཏི སམནུཔསྶནཱ ན ཡུཏྟཱ. ཨེཝཾ སེསདྭཡེ པཱིཏི ཨཱཧ ‘‘ཡོ ཡོ ཡཾ ཡཾ ཝེདནཾ ཨཏྟཱཏི སམནུཔསྶཏཱི’’ཏི.

༡༢༣. ‘‘ཧུཏྭཱ ཨབྷཱཝཏོ’’ཏི ཨིམིནཱ ཨུདཡབྦཡཝནྟཏཱཡ ཨནིཙྩཱཏི དསྶེཏི, ‘‘ཏེཧི ཏེཧཱི’’ཏིཨཱདིནཱ ཨནེཀཀཱརཎསངྑཏཏྟཱ སངྑཏཱཏི. ཏཾ ཏཾ པཙྩཡནྟི ‘‘ཨིནྡྲིཡཾ, ཨཱརམྨཎཾ, ཝིཉྙཱཎཾ, སུཁ, ཝེདནཱིཡོ ཕསྶོ’’ཏི ¶ ཨེཝཾ ཨཱདིཀཾ ཏཾ ཏཾ ཨཏྟནོ ཀཱརཎཾ པཊིཙྩ ནིསྶཱཡ སམྨཱ སསྶཏཱདིབྷཱཝསྶ, ཨུཙྪེདཱདིབྷཱཝསྶ ཙ ཨབྷཱཝེན ཉཱཡེན སམཀཱརཎེན སདིསཀཱརཎེན ཨནུརཱུཔཀཱརཎེན ཨུཔྤནྣཱ. ཁཡསབྷཱཝཱཏི ཁཡདྷམྨཱ, ཝཡསབྷཱཝཱཏི ཝཡདྷམྨཱ ཝིརཛྫནསབྷཱཝཱཏི ཝིརཱགདྷམྨཱ, ནིརུཛ྄ཛྷནསབྷཱཝཱཏི ནིརོདྷདྷམྨཱ, ཙཏཱུཧིཔི པདེཧི ཝེདནཱཡ བྷངྒབྷཱཝམེཝ དསྶེཏི. ཏེནཱཧ ‘‘ཁཡོཏི…པེ… ཁཡདྷམྨཱཏིཨཱདི ཝུཏྟ’’ནྟི.

ཝིགཏོཏི སབྷཱཝཝིགམེན ཝིགཏོ. ཨེཀསྶེཝཱཏི ཨེཀསྶེཝ དིཊྛིགཏིཀསྶ. ཏཱིསུཔི ཀཱལེསཱུཏི ཏིསྶནྣཾ ཝེདནཱནཾ པཝཏྟིཀཱལེསུ. ཨེསོ མེ ཨཏྟཱཏི ‘‘ཨེསོ སུཁཝེདནཱསབྷཱཝོ, དུཀྑཨདུཀྑམསུཁཝེདནཱསབྷཱཝོ མེ ཨཏྟཱ’’ཏི ཀིཾ པན ཧོཏཱི, ཨེཀསྶེཝ བྷིནྣསབྷཱཝཏཾ ཨནུམྨཏྟཀོ ཀཐཾ པཙྩེཏཱིཏི ཨདྷིཔྤཱཡེན པུཙྪཏི. ཨིཏརོ ཨེཝམྤི ཏསྶ ན ཧོཏི ཡེཝཱཏི དསྶེནྟོ ‘‘ཀིཾ པན ན བྷཝིསྶཏཱི’’ཏིཨཱདིམཱཧ. ཝིསེསེནཱཏི སུཁཱདིཝིབྷཱགེན. སུཁཉྩ དུཀྑཉྩཱཏི ཨེཏྠ ཙ-སདྡེན ཨདུཀྑམསུཁཾ སངྒཎྷཱཏི, སུཁསངྒཧམེཝ ཝཱ ཏེན ཀཏཾ སནྟསུཁུམབྷཱཝཏོ. ཨཝིསེསེནཱཏི ཨཝིབྷཱགེན ཝེདནཱསཱམཉྙེན. ཝོཀིཎྞནྟི སུཁཱདིབྷེདེན ཝོམིསྶཀཾ. ཏཾ ཏིཝིདྷམྤི ཝེདནཾ ཨེས ¶ དིཊྛིགཏིཀོ ཨེཀཛ྄ཛྷཾ གཧེཏྭཱ ཨཏྟཱཏི སམནུཔསྶཏི. ཨེཀཀྑཎེ ཙ བཧཱུནཾ ཝེདནཱནཾ ཨུཔྤཱདོ ཨཱཔཛྫཏི ཨཝིསེསེན ཝེདནཱསབྷཱཝཏྟཱ. ཨཏྟནོ ཧི ཏསྨིཾ ¶ སཏི སདཱ སབྦཝེདནཱཔཝཏྟིཔྤསངྒཏོ དིཊྛིགཏིཀོ ཨགཏིཡཱ ཨེཀཀྑཎེཔི བཧཱུནམྤི ཝེདནཱནཾ ཨུཔྤཏྟིཾ པཊིཛཱནེཡྻཱཏི ཏསྶ ཨཝསརཾ ཨདེནྟོ ‘‘ན ཨེཀཀྑཎེ བཧཱུནཾ ཝེདནཱནཾ ཨུཔྤཏྟི ཨཏྠཱི’’ཏི ཨཱཧ, པཙྩཀྑཝིརུདྡྷམེཏནྟི ཨདྷིཔྤཱཡོ. ཨེཏེན པེཏཾ ནཀྑམཏཱིཏི ཨེཏེན ཝིརུདྡྷཏྟསཱདྷནེནཔི སབྦེན སབྦཾ ཨཏྟནོ ཨབྷཱཝེནཔི པཎྜིཏཱནཾ ན རུཙྩཏི, ཨེཏཾ དསྶནཾ དྷཱིརཱ ནཀྑམནྟཱིཏི ཨཏྠོ.

༡༢༤. ཨིནྡྲིཡབདྡྷེཔི རཱུཔཔྤབནྡྷེ ཝཱཡོདྷཱཏུཝིཔྥཱརཝསེན ཀཱཙི ཀིརིཡཱ ནཱམ ལབྦྷཏཱིཏི སུདྡྷརཱུཔཀྑནྡྷེཔི ཡཏྠ ཀདཱཙི ཝཱཡོདྷཱཏུཝིཔྥཱརོ ལབྦྷཏི, ཏམེཝ ནིདསྶནབྷཱཝེན གཎྷནྟོ ‘‘ཏཱལཝཎྚེ ཝཱ ཝཱཏཔཱནེ ཝཱ’’ཏི ཨཱཧ. ཝེདནཱདྷམྨེསཱུཏི ཝེདནཱདྷམྨཝནྟེསུ. ‘‘ཨཧམསྨཱི’’ཏི ཨིམིནཱ ཏཡོཔི ཁནྡྷེ ཨེཀཛ྄ཛྷཾ གཧེཏྭཱ ཨཧཾཀཱརསྶ ཨུཔྤཛྫནཱཀཱརོ ཝུཏྟོཏི. ‘‘ཨཡམཧམསྨཱི’’ཏི པན ཨིམིནཱ ཏཏྠ ཨེཀཾ ཨེཀཾ གཧེཏྭཱ ཨཧཾཀཱརསྶ ཨུཔྤཛྫནཱཀཱརོ ཝུཏྟོ. ཏེནཱཧ ‘‘ཨེཀདྷམྨོཔཱི’’ཏིཨཱདི ¶ . ཏནྟི ‘‘ཨཧམསྨཱི’’ཏི ཨཧཾཀཱརུཔྤཏྟིཾ. སཱ ཧི ཙཏུཀྑནྡྷནིརོདྷེན ཨནུཔལབྦྷམཱནསནྣིསྶཡཱ སསཝིསཱཎཏིཁིཎཏཱ ཝིཡ ན བྷཝེཡྻཱཝཱཏི.

ཨེཏྟཱཝཏཱཏི ‘‘ཀིཏྟཱཝཏཱ ཙ ཨཱནནྡཱ’’ཏིཨཱདིནཱ ‘‘ཏནྟཱཀུལཀཛཱཏཱ’’ཏི པདསྶ ཨནུསནྡྷིདསྶནཝསེན པཝཏྟེན ཨེཏྟཀེན དེསནཱདྷམྨེན. ཀཱམཾ ཧེཊྛཱཔི ཝཊྚཀཐཱཝ ཀཐིཏཱ, ཨིདྷ པན དིཊྛིགཏིཀསྶ ཝཊྚཏོ སཱིསུཀྑིཔནཱསམཏྠཏཱཝིབྷཱཝནཝསེན མིཙྪཱདིཊྛིཡཱ མཧཱསཱཝཛྫབྷཱཝདཱིཔནིཡཀཐཱ པཀཱསིཏཱཏི ཏཾ དསྶེནྟོ ‘‘ཝཊྚཀཐཱ ཀཐིཏཱ’’ཏི ཨཱཧ. ནནུ ཝཊྚམཱུལཾ ཨཝིཛྫཱ ཏཎྷཱ, ཏཱ ཨནཱམསིཏྭཱ ཏཏོ ཨཉྙཐཱ ཀསྨཱ ཨིདྷ ཝཊྚཀཐཱ ཀཐིཏཱཏི ཨཱཧ ‘‘བྷགཝཱ ¶ ཧཱི’’ཏིཨཱདི. ཨཝིཛྫཱསཱིསེནཱཏི ཨཝིཛྫཾ ཨུཏྟམངྒཾ ཀཏྭཱ, ཨཝིཛྫཱམུཁེནཱཏི ཨཏྠོ. ཀོཊི ན པཉྙཱཡཏཱིཏི ‘‘ཨསུཀསྶ ནཱམ སམྨཱསམྦུདྡྷསྶ, ཙཀྐཝཏྟིནོ ཝཱ ཀཱལེ ཨཝིཛྫཱ ཨུཔྤནྣཱ, ན ཏཏོ པུབྦེ ཨཏྠཱི’’ཏི ཨཝིཛྫཱཡ ཨཱདི མརིཡཱདཱ ཨཔྤཊིཧཏསྶ མམ སབྦཉྙུཏཉྙཱཎསྶཱཔི ན པཉྙཱཡཏི ཨཝིཛྫམཱནཏྟཱ ཨེཝཱཏི ཨཏྠོ. ཨཡཾ པཙྩཡོ ཨིདཔྤཙྩཡོ, ཏསྨཱ ཨིདཔྤཙྩཡཱ, ཨིམསྨཱ ཨཱསཝཱདིཀཱརཎཱཏི ཨཏྠོ. བྷཝཏཎྷཱཡཱཏི བྷཝསཾཡོཛནབྷཱུཏཱཡ ཏཎྷཱཡ. བྷཝདིཊྛིཡཱཏི སསྶཏདིཊྛིཡཱ. ‘‘ཏཏྠ ཏཏྠ ཨུཔཔཛྫནྟོ’’ཏི ཨིམིནཱ ‘‘ཨིཏོ ཨེཏྠ ཨེཏྟོ ཨིདྷཱ’’ཏི ཨེཝཾ ཨཔརིཡནྟཾ ཨཔརཱཔརུཔྤཏྟིཾ དསྶེཏི. ཏེནཱཧ ‘‘མཧཱསམུདྡེ’’ཏིཨཱདི.

༡༢༦. པཙྩཡཱཀཱརམཱུལ༹ྷསྶཱཏི བྷཱུཏཀཐནམེཏཾ, ན ཝིསེསནཾ. སབྦོཔི ཧི དིཊྛིགཏིཀོ པཙྩཡཱཀཱརམཱུལ༹ྷོ ཨེཝཱཏི. ཝིཝཊྚཾ ཀཐེནྟོཏི ཝཊྚཏོ ཝིནིམུཏྟཏྟཱ ཝིཝཊྚཾ, ཝིམོཀྑོ, ཏཾ ཀཐེནྟོ ¶ . ཀཱརཀསྶཱཏི སཏྠུཨོཝཱདཀཱརཀསྶ, སམྨཱཔཊིཔཛྫནྟསྶཱཏི ཨཏྠོ. ཏེནཱཧ ‘‘སཏིཔཊྛཱནཝིཧཱརིནོ’’ཏི. སོ ཧི ཝེདནཱནུཔསྶནཱཡ, དྷམྨཱནུཔསྶནཱཡ ཙ སམྨཱཔཊིཔཏྟིཡཱ ‘‘ནེཝ ཝེདནཾ ཨཏྟཱནཾ སམནུཔསྶཏཱི’’ཏིཨཱདིནཱ ཝཏྟབྦཏཾ ཨརཧཏི. ཏེནཱཧ ‘‘ཨེཝརཱུཔོ ཧཱི’’ཏིཨཱདི. སབྦདྷམྨེསཱུཏི སབྦེསུ ཏེབྷཱུམཀདྷམྨེསུ. ཏེ ཧི སམྨསནཱིཡཱ. ན ཨཉྙནྟི ཝེདནཱཡ ཨཉྙཾ སཉྙཱདིདྷམྨཾ ཨཏྟཱནཾ ན སམནུཔསྶཏཱིཏི. ‘‘ཁནྡྷལོཀཱདཡོ’’ཏི རཱུཔཱདིདྷམྨཱ ཨེཝ ཝུཙྩནྟི, ཏེསཾ སམཱུཧོཏི དསྶེཏུཾ ‘‘རཱུཔཱདཱིསུ དྷམྨེསཱུ’’ཏི ཝུཏྟཾ. ན ཨུཔཱདིཡཏི དིཊྛིཏཎྷཱགཱཧཝསེན. ‘‘སེཡྻོཧམསྨཱི’’ཏིཨཱདིནཱ (སཾ. ནི. ༤.༡༠༨; མཧཱནི. ༢༡, ༡༧༨; དྷ. ས. ༡༡༢༡; ཝིབྷ. ༨༣༢, ༨༦༦) པཝཏྟམཱནམཉྙནཱཔི ¶ ཏཎྷཱདིཊྛིམཉྙནཱ ཝིཡ པརིཏསྶནརཱུཔཱ ཨེཝཱཏི ཨཱཧ ‘‘ཏཎྷཱདིཊྛིམཱནཔརིཏསྶནཱཡཔཱི’’ཏི.

སཱ ཨེཝཾ དིཊྛཱིཏི སཱ ཨརཧཏོ ཨེཝཾཔཀཱརཱ དིཊྛཱིཏི ཡོ ཝདེཡྻ ¶ , ཏདཀལླཾ, ཏཾ ན ཡུཏྟནྟི ཨཏྠོ. ཨེཝམསྶ དིཊྛཱིཏི ཨེཏྠཱཔི ཨེཝཾཔཀཱརཱ ཨསྶ ཨརཧཏོ དིཊྛཱིཏིཨཱདིནཱ ཡོཛེཏབྦཾ. ཨེཝཉྷི སཏཱིཏི ཡོ ཝདེཡྻ ‘‘ཧོཏི ཏཐཱགཏོ པརཾ མརཎཱ ཨིཏིསྶ དིཊྛཱི’’ཏི, ཏསྶ ཙེ ཝཙནཾ ཏཐེཝཱཏི ཨཏྠོ. ‘‘ཨརཧཱ ན ཀིཉྩི ཛཱནཱཏཱི’’ཏི ཝུཏྟཾ བྷཝེཡྻ ཛཱནཏོ ཏཐཱ དིཊྛིཡཱ ཨབྷཱཝཏོ. ཏེནེཝཱཏི ཏཐཱ ཝཏྟུམཡུཏྟཏྟཱ ཨེཝ. ཙཏུནྣམྤི ནཡཱནནྟི ‘‘ཧོཏི ཏཐཱགཏོ’’ཏིཨཱདིནཱ ཨཱགཏཱནཾ ཙཏུནྣཾ ཝཱརཱནཾ. ཨཱདིཏོ ཏཱིསུ ཝཱརེསུ སངྑིཔིཏྭཱ པརིཡོསཱནཝཱརེ ཝིཏྠཱརིཏཏྟཱ ‘‘ཨཝསཱནེ ‘ཏཾ ཀིསྶ ཧེཏཱུ’ཏིཨཱདིམཱཧཱ’’ཏི ཝུཏྟཾ. ‘‘ཨཱདིཏོ ཏཱིསུ ཝཱརེསུ ཏཐེཝ དེསནཱ པཝཏྟཱ, ཡཐཱ པརིཡོསཱནཝཱརེ, པཱལི༹ པན སངྑིཏྟཱ’’ཏི ཀེཙི.

ཝོཧཱརོཏི ‘‘སཏྟོ ཨིཏྠཱི པུརིསོ’’ཏིཨཱདིནཱ, ‘‘ཁནྡྷཱཨཱཡཏནཱནཱི’’ཏིཨཱདིནཱ, ‘‘ཕསྶོ ཝེདནཱ’’ཏིཨཱདིནཱ ཙ ཝོཧཱརིཏབྦཝོཧཱརོ. ཏསྶ པན ཝོཧཱརསྶ པཝཏྟིཊྛཱནཾ ནཱམ སངྑེཔཏོ ཨིམེ ཨེཝཱཏི ཨཱཧ ‘‘ཁནྡྷཱ ཨཱཡཏནཱནི དྷཱཏུཡོ’’ཏི. ཡསྨཱ ནིབྦཱནཾ པུབྦབྷཱགེ སངྑཱརཱནཾ ནིརོདྷབྷཱཝེནེཝ པཉྙཱཔིཡཏི ཙ, ཏསྨཱ ཏསྶཱཔི ཁནྡྷམུཁེན ཨཝཙརིཏབྦཏཱ ལབྦྷཏཱིཏི ‘‘པཉྙཱཡ ཨཝཙརིཏབྦཾ ཁནྡྷཔཉྩཀ’’ནྟི ཝུཏྟཾ. ཏེནཱཧ བྷགཝཱ ‘‘ཨིམསྨིཾཡེཝ བྱཱམམཏྟེ ཀལེ༹ཝརེ སསཉྙིམྷི སམནཀེ ལོཀཉྩ པཉྙཔེམི ལོཀསམུདཡཉྩ ལོཀནིརོདྷཉྩ ལོཀནིརོདྷགཱམིནིཉྩ པཊིཔད’’ནྟི. (སཾ. ནི. ༡.༡༠༧; ཨ. ནི. ༤.༤༥) པཉྙཱཝཙརནྟི ཝཱ ཏེབྷཱུམཀདྷམྨཱནམེཏཾ གཧཎནྟི ‘‘ཁནྡྷཔཉྩཀ’’ནྟྭེཝ ཝུཏྟཾ, ཏསྨཱ ‘‘ཡཱཝཏཱ པཉྙཱ’’ཏི ཨེཏྠཱཔི ལོཀིཡཔཉྙཱཡ ཨེཝ གཧཎཾ དཊྛབྦཾ. ཝཊྚཀཐཱ ཧེསཱཏི. ཏཐཱ ཧི ‘‘ཡཱཝཏཱ ཝཊྚཾ ཝཊྚཏི’’ ཨིཙྩེཝ ཝུཏྟཾ. ཏེནེཝཱཧ ‘‘ཏནྟཱཀུལཀཔདསྶེཝ ཨནུསནྡྷི དསྶིཏོ’’ཏི. ཡསྨཱ བྷགཝཱ དིཊྛིསཱིསེནེཏྠ ཝཊྚཀཐཾ ཀཐེཏྭཱ ཡཐཱནུསནྡྷིནཱཔི ཝཊྚཀཐཾ ཀཐེསི, ཏསྨཱ ‘‘ཏནྟཱཀུལཀཔདསྶེཝ ¶ ¶ ཨནུསནྡྷི དསྶིཏོ’’ཏི སཱཝདྷཱརཎཾ ཀཏྭཱ ཝུཏྟཾ. པཊིཙྩསམུཔྤཱདཀཐཱ པནེཏྠ ཡཱཝདེཝ ཏསྶ གམྦྷཱིརབྷཱཝཝིབྷཱཝནཏྠཱཡ ཝིཏྠཱརིཏཱ, ཝིཝཊྚཀཐཱཔི སམཱནཱ ཨིདྷ པཙྩཱམཊྛཱཏི དཊྛབྦཾ.

སཏྟཝིཉྙཱཎཊྛིཏིཝཎྞནཱ

༡༢༧. གཙྪནྟོ ¶ གཙྪནྟོཏི སམཐཔཊིཔཏྟིཡཾ སུཔྤཏིཊྛིཏོ ཧུཏྭཱ ཝིཔསྶནཱགམནེན, མགྒགམནེན ཙ གཙྪནྟོ གཙྪནྟོ. ཨུབྷོཧི བྷཱགེཧི མུཙྩནཏོ ཨུབྷཏོབྷཱགཝིམུཏྟོ ནཱམ ཧོཏི. སོ ‘‘ཨེཝཾ ཨསམནུཔསྶནྟོ’’ཏི ཝུཏྟོ ཝིཔསྶནཱཡཱནིཀོཏི ཀཏྭཱ ‘‘ཡོ ཙ ན སམནུཔསྶཏཱིཏི ཝུཏྟོ སོ ཡསྨཱ གཙྪནྟོ གཙྪནྟོ པཉྙཱཝིམུཏྟོ ནཱམ ཧོཏཱི’’ཏི ཝུཏྟཾ. ཧེཊྛཱ ཝུཏྟཱནནྟི ‘‘ཀིཏྟཱཝཏཱ ཙ, ཨཱནནྡ, ཨཏྟཱནཾ ན པཉྙཔེནྟོ ན པཉྙཱཔེཏཱི’’ཏིཨཱདིནཱ (དཱི. ནི. ༢.༡༡༩), ‘‘ཡཏོ ཁོ, ཨཱནནྡ, བྷིཀྑུ ནེཝ ཝེདནཾ ཨཏྟཱནཾ སམནུཔསྶཏཱི’’ཏིཨཱདིནཱ (དཱི. ནི. ༢.༡༢༥ ཨཱདཡོ) ཙ ཧེཊྛཱ པཱལི༹ཡཾ ཨཱགཏཱནཾ དྭིནྣཾ པུཐུཛྫནབྷིཀྑཱུནཾ. ནིགམནནྟི ནིསྶརཎཾ. ནཱམནྟི པཉྙཱཝིམུཏྟཱདིནཱམཾ.

པཊིསནྡྷིཝསེན ཝུཏྟཱཏི ནཱནཏྟཀཱཡནཱནཏྟསཉྙིཏཱཝིསེསཝིསིཊྛཔཊིསནྡྷིཝསེན ཝུཏྟཱ སཏྟ ཝིཉྙཱཎཊྛིཏིཡོ. ཏཾཏཾསཏྟནིཀཱཡཾ པཏི ནིསྶཡཏོ ཧི ནཱནཏྟཀཱཡཱདིཏཱ ཏཾཔརིཡཱཔནྣཔཊིསནྡྷིསམུདཱགཏཱཏི དཊྛབྦཱ ཏདབྷིནིབྦཏྟཀཀམྨབྷཝསྶ ཏཐཱ ཨཱཡཱུཧིཏཏྟཱ. ཙཏསྶོ ཨཱགམིསྶནྟཱིཏི རཱུཔཝེདནཱསཉྙཱསངྑཱརཀྑནྡྷཝསེན ཙཏསྶོ ཝིཉྙཱཎཊྛིཏིཡོ ཨཱགམིསྶནྟི ‘‘རཱུཔུཔཱཡཾ ཝཱ ཨཱཝུསོ ཝིཉྙཱཎཾ ཏིཊྛམཱནཾ ཏིཊྛཏཱི’’ཏིཨཱདིནཱ (དཱི. ནི. ༣.༣༡༡). ཝིཉྙཱཎཔཏིཊྛཱནསྶཱཏི པཊིསནྡྷིཝིཉྙཱཎསྶ ཨེཏརཧི ¶ པཏིཊྛཱནཀཱརཎསྶ. ཨཏྠཏོ ཝུཏྟཝིསེསཝིསིཊྛཱ པཉྩཝོཀཱརེ རཱུཔཝེདནཱསཉྙཱསངྑཱརཀྑནྡྷཱ, ཙཏུཝོཀཱརེ ཝེདནཱདཡོ ཏཡོ ཁནྡྷཱ ཝེདིཏབྦཱ. སཏྟཱཝཱསབྷཱཝཾ ཨུཔཱདཱཡ ‘‘དྭེ ཙ ཨཱཡཏནཱནཱིཏི དྭེ ནིཝཱསཊྛཱནཱནཱི’’ཏི ཝུཏྟཾ. ནིཝཱསཊྛཱནཔརིཡཱཡོཔི ཨཱཡཏནསདྡོ ཧོཏི ཡཐཱ ‘‘དེཝཱཡཏནདྭཡ’’ནྟི. སབྦནྟི ཝིཉྙཱཎཊྛིཏི ཨཱཡཏནདྭཡནྟི སཀལཾ. ཏསྨཱ གཧིཏཾ ཏཏྠ ཨེཀམེཝ ཨགྒཧེཏྭཱཏི ཨདྷིཔྤཱཡོ. པརིཡཱདཱནཾ ཨནཝསེསགྒཧཎཾ ན གཙྪཏི ཝཊྚཾ ཝིཉྙཱཎཊྛིཏིཨཱཡཏནདྭཡཱནཾ ཨཉྙམཉྙཨནྟོགདྷཏྟཱ.

ནིདསྶནཏྠེ ནིཔཱཏོ, ཏསྨཱ སེཡྻཐཱཔི མནུསྶཱཏི ཡཐཱ མནུསྶཱཏི ཝུཏྟཾ ཧོཏི. ཝིསེསོ ཧོཏིཡེཝ སཏིཔི བཱཧིརསྶ ཀཱརཀསྶ ཨབྷེདེ ཨཛ྄ཛྷཏྟིཀསྶ བྷིནྣཏྟཱ. ནཱནཏྟཾ ཀཱཡེ ཨེཏེསཾ, ནཱནཏྟོ ¶ ཝཱ ཀཱཡོ ཨེཏེསནྟི ནཱནཏྟཀཱཡཱ, ཨིམིནཱ ནཡེན སེསཔདེསུཔི ¶ ཨཏྠོ ཝེདིཏབྦོ. ནེསནྟི མནུསྶཱནཾ. ནཱནཏྟཱ སཉྙཱ ཨེཏེསཾ ཨཏྠཱིཏི ནཱནཏྟསཉྙིནོ. སུཁསམུསྶཡཏོ ཝིནིཔཱཏོ ཨེཏེསཾ ཨཏྠཱིཏི ཝིནིཔཱཏིཀཱ སཏིཔི དེཝབྷཱཝེ དིབྦསམྤཏྟིཡཱ ཨབྷཱཝཏོ, ཨཔཱཡེསུ ཝཱ གཏོ ནཏྠི ནིཔཱཏོ ཨེཏེསནྟི ཝིནིཔཱཏིཀཱ. ཏེནཱཧ ‘‘ཙཏུཨཔཱཡཝིནིམུཏྟཱ’’ཏི. དྷམྨཔདནྟི སཏིཔཊྛཱནཱདིདྷམྨཀོཊྛཱསཾ. ཝིཛཱནིཡཱཏི སུཏམཡེན ཏཱཝ ཉཱཎེན ཝིཛཱནིཏྭཱ. ཏདནུསཱརེན ཡོནིསོམནསིཀཱརཾ པརིབྲཱུཧནྟོ སཱིལཝིསུདྡྷིཨཱདིཀཾ སམྨཱཔཊིཔཏྟིཾ ཨཔི པཊིཔཛྫེམ. སཱ ཙ པཊིཔཏྟི ཧིཏཱཡ དིཊྛདྷམྨིཀཱདིསཀལཧིཏཱཡ ཨམྷཱཀཾ སིཡཱ. ཨིདཱནི ཏཏྠ སཱིལཔཊིཔཏྟིཾ ཏཱཝ ཝིབྷཱགེན དསྶེནྟོ ‘‘པཱཎེསུ ཙཱ’’ཏི གཱཐམཱཧ.

བྲཧྨཀཱཡེ པཋམཛ྄ཛྷཱནནིབྦཏྟེ བྲཧྨསམཱུཧེ, བྲཧྨནིཀཱཡེ ཝཱ བྷཝཱཏི བྲཧྨཀཱཡིཀཱ. མཧཱབྲཧྨུནོ པརིསཱཡ བྷཝཱཏི བྲཧྨཔཱརིསཛྫཱ ཏསྶ པརིཙཱརཀཊྛཱནེ ཋིཏཏྟཱ. མཧཱབྲཧྨུནོ པུརོཧིཏཊྛཱནེ ཋིཏཱཏི བྲཧྨཔུརོཧིཏཱ ¶ . ཨཱཡུཝཎྞཱདཱིཧི མཧནྟོ བྲཧྨཱནོཏི མཧཱབྲཧྨུནོ. སཏིཔི ཏེསཾ ཏིཝིདྷཱནམྤི པཋམེན ཛྷཱནེན ཨབྷིནིབྦཏྟབྷཱཝེ ཛྷཱནསྶ པན པཝཏྟིབྷེདེན ཨཡཾ ཝིསེསོཏི དསྶེཏུཾ ‘‘བྲཧྨཔཱརིསཛྫཱ པནཱ’’ཏིཨཱདི ཝུཏྟཾ. པརིཏྟེནཱཏི ཧཱིནེན, སཱ ཙསྶ ཧཱིནཏཱ ཚནྡཱདཱིནཾ ཧཱིནཏཱཡ ཝེདིཏབྦཱ, པཊིལདྡྷམཏྟཾ ཝཱ ཧཱིནཾ. ཀཔྤསྶཱཏི ཨསངྑྱེཡྻཀཔྤསྶ. ཧཱིནཔཎཱིཏཱནཾ མཛ྄ཛྷེ བྷཝཏྟཱ མཛ྄ཛྷིམེན, སཱ ཙསྶ མཛ྄ཛྷིམཏཱ ཚནྡཱདཱིནཾ མཛ྄ཛྷིམཏཱཡ ཝེདིཏབྦཱ, པཊིལབྷིཏྭཱ ནཱཏིསུབྷཱཝིཏཾ ཝཱ མཛ྄ཛྷིམཾ. ཨུཔཌྜྷཀཔྤོཏི ཨསངྑྱེཡྻཀཔྤསྶ ཨུཔཌྜྷཀཔྤོ. ཝིཔྥཱརིཀཏརོཏི བྲཧྨཔཱརིསཛྫེཧི པམཱཎཏོ ཝིཔུལཏརོ, སབྷཱཝཏོ ཨུལཱ༹རཏརོ ཙ ཧོཏི. སབྷཱཝེནཔི ཧི ཨུལཱ༹རཏརོཝ, ཏཾ པནེཏྠ ཨཔྤམཱཎཾ. ཏཐཱ ཧི པརིཏྟཱབྷཱདཱིནཾ, པརིཏྟསུབྷཱདཱིནཉྩ ཀཱཡེ སཏིཔི སབྷཱཝཝེམཏྟེ ཨེཀཏྟཝསེནེཝ ཝཝཏྠཱཔཱིཡཏཱིཏི ‘‘ཨེཀཏྟཀཱཡཱ’’ ཏྭེཝ ཝུཙྩནྟི. པཎཱིཏེནཱཏི ཨུཀྐཊྛེན, སཱ ཙསྶ ཨུཀྐཊྛཏཱ ཚནྡཱདཱིནཾ ཨུཀྐཊྛཏཱཡ ཝེདིཏབྦཱ, སུབྷཱཝིཏཾ ཝཱ སམྨདེཝ ཝསིབྷཱཝཾ པཱཔིཏཾ པཎཱིཏཾ པདྷཱནབྷཱཝཾ ནཱིཏནྟི ཀཏྭཱ, ཨིདྷཱཔི ཀཔྤོ ཨསངྑྱེཡྻཀཔྤཝསེནེཝ ཝེདིཏབྦོ པརིཔུཎྞསྶ མཧཱཀཔྤསྶ ཨསམྦྷཝཏོ. ཨིཏཱིཏི ཨེཝཾ ཝུཏྟཔྤཀཱརེན. ཏེཏི ‘‘བྲཧྨཀཱཡིཀཱ’’ཏི ཝུཏྟཱ ཏིཝིདྷཱཔི བྲཧྨཱནོ. སཉྙཱཡ ཨེཀཏྟཱཏི ཏིཧེཏུཀབྷཱཝེན སཉྙཱཡ ཨེཀཏྟསབྷཱཝཏྟཱ ¶ . ན ཧི ཏསྶཱ སམྤཡུཏྟདྷམྨཝསེན ཨཉྙོཔི ཀོཙི བྷེདོ ཨཏྠི.

ཨེཝནྟི ཨིམིནཱ ནཱནཏྟཀཱཡཨེཀཏྟསཉྙིནོཏི དསྶེཏི.

དཎྜཨུཀྐཱཡཱཏི དཎྜདཱིཔིཀཱཡ. སརཏཱིཏི དྷཱཝཏི ཝིཡ. ཝིསྶརཏཱིཏི ཝིཔྤཀིཎྞཱ ཝིཡ དྷཱཝཏི ¶ . དྭེ ཀཔྤཱཏི དྭེ མཧཱཀཔྤཱ. ཨིཏོ པརེསུཔི ཨེསེཝ ནཡོ. ཨིདྷཱཏི ཨིམསྨིཾ སུཏྟེ. ཨུཀྐཊྛཔརིཙྪེདཝསེན ཨཱབྷསྶརགྒཧཎེནེཝ སབྦེཔི ཏེ པརིཏྟཱབྷཱ, ཨཔྤམཱཎཱབྷཱཔི གཧིཏཱ.

སོབྷནཱ པབྷཱ སུབྷཱ, སུབྷཱཡ ཀིཎྞཱ སུབྷཱཀིཎྞཱཏི ཝཏྟབྦེ ཨཱ-ཀཱརསྶ རསྶཏྟཾ, ཨནྟིམ-ཎ-ཀཱརསྶ ཧ-ཀཱརཉྩ ཀཏྭཱ ‘‘སུབྷཀིཎྷཱ’’ཏི ཝུཏྟཱ, ཨཊྛཀཐཱཡཾཔན ནིཙྩལཱཡ ཨེཀགྒྷནཱཡ པབྷཱཡ སུབྷོཏི པརིཡཱཡཝཙནནྟི ¶ ‘‘སུབྷེན ཨོཀིཎྞཱ ཝིཀིཎྞཱ’’ཏི ཨཏྠོ ཝུཏྟོ, ཨེཏྠཱཔི ཨནྟིམ-ཎ-ཀཱརསྶ ཧ-ཀཱརཀརཎཾ ཨིཙྪིཏབྦམེཝ. ན ཚིཛྫིཏྭཱ ཚིཛྫིཏྭཱ པབྷཱ གཙྪཏི ཨེཀགྒྷནཏྟཱ. ཙཏུཏྠཝིཉྙཱཎཊྛིཏིམེཝ བྷཛནྟི ཀཱཡསྶ, སཉྙཱཡ ཙ ཨེཀརཱུཔཏྟཱ. ཝིཔུལསནྟསུཁཱཡུཝཎྞཱདིཕལཏྟཱ ཝེཧཔྥལཱ. ཨེཏྠཱཏི ཝིཉྙཱཎཊྛིཏིཡཾ.

ཝིཝཊྚཔཀྑེ ཋིཏཱ ནཔུནརཱཝཏྟནཏོ. ‘‘ན སབྦཀཱལིཀཱ’’ཏི ཝཏྭཱ ཏམེཝ ཨསབྦཀཱལིཀཏྟཾ ཝིབྷཱཝེཏུཾ ‘‘ཀཔྤསཏསཧསྶམྤཱི’’ཏིཨཱདི ཝུཏྟཾ. སོལ༹སཀཔྤསཧསྶཙྩཡེན ཨུཔྤནྣཱནཾ སུདྡྷཱཝཱསབྲཧྨཱནཾ པརིནིབྦཱཡནཏོ, ཨཉྙེསཉྩ ཏཏྠ ཨནུཔྤཛྫནཏོ བུདྡྷསུཉྙེ ལོཀེ སུཉྙཾ ཏཾ ཋཱནཾ ཧོཏི, ཏསྨཱ སུདྡྷཱཝཱསཱ ན སབྦཀཱལིཀཱ, ཁནྡྷཱཝཱརཊྛཱནསདིསཱ ཧོནྟི སུདྡྷཱཝཱསབྷཱུམིཡོ. ཨིམིནཱ སུཏྟེན སུདྡྷཱཝཱསཱནཾ སཏྟཱཝཱསབྷཱཝདཱིཔནེནེཝ ཝིཉྙཱཎཊྛིཏིབྷཱཝོ དཱིཔིཏོ, ཏསྨཱ སུདྡྷཱཝཱསཱཔི སཏྟསུ ཝིཉྙཱཎཊྛིཏཱིསུ ཙཏུཏྠཝིཉྙཱཎཊྛིཏིཾ ནཝསུ སཏྟཱཝཱསེསུ ཙཏུཏྠསཏྟཱཝཱསཾཡེཝ བྷཛནྟི.

སུཁུམཏྟཱཏི སངྑཱརཱཝསེསསུཁུམབྷཱཝཔྤཏྟཏྟཱ. པརིབྱཏྟཝིཉྙཱཎཀིཙྩཱབྷཱཝཏོ ནེཝ ཝིཉྙཱཎཾ, སབྦསོ ཨཝིཉྙཱཎཾ ན ཧོཏཱིཏི ནཱཝིཉྙཱཎཾ, ཏསྨཱ པརིཔྥུཊཝིཉྙཱཎཀིཙྩཝནྟཱིསུ ཝིཉྙཱཎཊྛིཏཱིསུ ཨཝཏྭཱ.

༡༢༨. ཏཉྩ ཝིཉྙཱཎཊྛིཏིནྟི པཋམཾ ཝིཉྙཱཎཊྛིཏིཾ. ཧེཊྛཱ ཝུཏྟནཡེན སརཱུཔཏོ, མནུསྶཱདིཝིབྷཱགཏོ, སངྑེཔཏོ, ‘‘ནཱམཉྩ རཱུཔཉྩཱ’’ཏི བྷེདཏོ ¶ ཙ པཛཱནཱཏི. ཏསྶཱ སམུདཡཉྩཱཏི ཏསྶཱ པཋམཱཡ ཝིཉྙཱཎཊྛིཏིཡཱ པཉྩཝཱིསཏིཝིདྷཾ སམུདཡཉྩ པཛཱནཱཏི. ཨཏྠངྒམེཔི ཨེསེཝ ནཡོ. ཨསྶཱདེཏབྦཏོ, ཨསྶཱདཏོ ཙ ཨསྶཱདཾ. ཨཡཾ ཨནིཙྩཱདིབྷཱཝོ ཨཱདཱིནཝོ. ཚནྡརཱགོ ཝིནཱིཡཏི ཨེཏེན, ཨེཏྠ ཝཱཏི ཚནྡརཱགཝིནཡོ, སཧ མགྒེན ནིབྦཱནཾ. ཚནྡརཱགཔྤཧཱནནྟི ཨེཏྠཱཔི ཨེསེཝ ནཡོ. མཱནདིཊྛཱིནཾ ཝསེནཱཧནྟི ཝཱ, ཏཎྷཱཝསེན མམནྟི ཝཱ ཨབྷིནནྡནཱཔི མཱནསྶ པརིཏསྶནཱ ཝིཡ དཊྛབྦཱ. སབྦཏྠཱཏི སབྦེསུ སེསེསུ ཨཊྛསུཔི ཝཱརེསུ ¶ . ཏཏྠཱཏི ཨུཔརི ཏཱིསུ ཝིཉྙཱཎཊྛིཏཱིསུ དུཏིཡཱཡཏནེསུ. ཏཏྠ ཧི རཱུཔཾ ནཏྠི. པུན ཏཏྠཱཏི པཋམཱཡཏནེ. ཏཏྠ ཧི ཨེཀོ རཱུཔཀྑནྡྷོཝ. ཨེཏྠཱཏི ¶ ཙ ཏམེཝ སནྡྷཱཡ ཝུཏྟཾ. ཏཏྠ ཧི རཱུཔསྶ ཀམྨསམུཊྛཱནཏྟཱ ཨཱཧཱརཝསེན ཡོཛནཱ ན སམྦྷཝཏི.

ཡཏོ ཁོཏི ཨེཏྠ ཏོ-སདྡོ དཱ-སདྡོ ཝིཡ ཀཱལཝཙནོ ‘‘ཡཏོ ཁོ, སཱརིཔུཏྟ, བྷིཀྑུསངྒྷོ’’ཏིཨཱདཱིསུ (པཱརཱ. ༢༡) ཝིཡཱཏི ཝུཏྟཾ ‘‘ཡདཱ ཁོ’’ཏི. ཨགྒཧེཏྭཱཏི ཀཉྩིཔི སངྑཱརཾ ‘‘ཨེཏཾ མམཱ’’ཏིཨཱདིནཱ ཨགྒཧེཏྭཱ. པཉྙཱཝིམུཏྟོཏི ཨཊྛནྣཾ ཝིམོཀྑཱནཾ ཨནདྷིགཏཏྟཱ སཱཏིསཡསྶ སམཱདྷིབལསྶ ཨབྷཱཝཏོ པཉྙཱབལེནེཝ ཝིམུཏྟོ. ཏེནཱཧ ‘‘ཨཊྛ ཝིམོཀྑེ ཨསཙྪིཀཏྭཱ པཉྙཱབལེནེཝཱ’’ཏིཨཱདི. ཨཔྤཝཏྟིནྟི ཨཱཡཏིཾ ཨཔྤཝཏྟིཾ ཀཏྭཱ. པཛཱནནྟོ ཝིམུཏྟོཏི ཝཱ པཉྙཱཝིམུཏྟོ, པཋམཛ྄ཛྷཱནཕསྶེན ཝིནཱ པརིཛཱནནཱདིཔྤཀཱརེཧི ཙཏྟཱརི སཙྩཱནི ཛཱནནྟོ པཊིཝིཛ྄ཛྷནྟོ ཏེསཾ ཀིཙྩཱནཾ མཏྠཀཔྤཏྟིཡཱ ནིཊྛིཏཀིཙྩཏཱཡ ཝིསེསེན མུཏྟོཏི ཝིམུཏྟོ. སོ པཉྙཱཝིམུཏྟོ. སུཀྑཝིཔསྶཀོཏི སམཐབྷཱཝནཱསིནེཧཱབྷཱཝེན སུཀྑཱ ལཱུཁཱ, ཨསིནིདྡྷཱ ཝཱ ཝིཔསྶནཱ ཨེཏསྶཱཏི སུཀྑཝིཔསྶཀོ. ཋཏྭཱཏི པཱདཀཀརཎཝསེན ཋཏྭཱ. ཨཉྙཏརསྨིནྟི ཙ ཨཉྙཏརཨཉྙཏརསྨིཾ, ཨེཀེཀསྨིནྟི ཨཏྠོ. ཨེཝཉྷིསྶ པཉྩཝིདྷཏཱ སིཡཱ. ‘‘ན ཧེཝ ཁོ ཨཊྛ ཝིམོཀྑེ ཀཱཡེན ཕུསིཏྭཱ ཝིཧརཏཱི’’ཏི ཨིམིནཱ སཱཏིསཡསྶ སམཱདྷིབལསྶ ཨབྷཱཝོ དཱིཔིཏོ. ‘‘པཉྙཱཡ ཙསྶ དིསྭཱ’’ཏིཨཱདིནཱ སཱཏིསཡསྶ པཉྙཱབལསྶ བྷཱཝོ. པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟཱིཏི ན ཨཱསཝཱ པཉྙཱཡ པསྶནྟི, དསྶནཀཱརཎཱ པན པརིཀྑཱིཎཱ ‘‘དིསྭཱ པརིཀྑཱིཎཱ’’ཏི ཝུཏྟཱ. དསྶནཱཡཏྟཔརིཀྑཡཏྟཱ ཨེཝ ཧི དསྶནཾ ཨཱསཝཱནཾ ཁཡསྶ པུརིམཀིརིཡཱ ཧོཏི.

ཨཊྛཝིམོཀྑཝཎྞནཱ

༡༢༩. ཨེཀསྶ ¶ བྷིཀྑུནོཏི སཏྟསུ ཨརིཡཔུགྒལེསུ ཨེཀསྶ བྷིཀྑུནོ. ཝིཉྙཱཎཊྛིཏིཨཱདིནཱ པརིཛཱནནཱདིཝསཔྤ ཝཏྟནིགྒམནཉྩ ¶ པཉྙཱཝིམུཏྟནཱམཉྩ. ཨིཏརསྶཱཏི ཨུབྷཏོབྷཱགཝིམུཏྟསྶ. ཨིམེ སནྡྷཱཡ ཧི པུབྦེ ‘‘དྭིནྣཾ བྷིཀྑཱུན’’ནྟི ཝུཏྟཾ. ཀེནཊྛེནཱཏི ཀེན སབྷཱཝེན. སབྷཱཝོ ཧི ཉཱཎེན ཡཱཐཱཝཏོ ཨརཎཱིཡཏོ ཉཱཏབྦཏོ ‘‘ཨཏྠོ’’ཏི ཝུཙྩཏི, སོ ཨེཝ ཏྠ-ཀཱརསྶ ཊྛ-ཀཱརཾ ཀཏྭཱ ‘‘ཨཊྛོ’’ཏི ཝུཏྟོ. ཨདྷིམུཙྩནཊྛེནཱཏི ཨདྷིཀཾ སཝིསེསཾ མུཙྩནཊྛེན, ཨེཏེན སཏིཔི སབྦསྶཱཔི རཱུཔཱཝཙརཛ྄ཛྷཱནསྶ ཝིཀྑམྦྷནཝསེན པཊིཔཀྑཏོ ཝིམུཏྟབྷཱཝེ ཡེན བྷཱཝནཱཝིསེསེན ཏཾ ཛྷཱནཾ སཱཏིསཡཾ པཊིཔཀྑཏོ ཝིམུཙྩིཏྭཱ པཝཏྟཏི, སོ བྷཱཝནཱཝིསེསོ དཱིཔིཏོ. བྷཝཏི ཧི སམཱནཛཱཏིཡུཏྟོཔི བྷཱཝནཱཝིསེསེན པཝཏྟིཨཱཀཱརཝིསེསོ, ཡཐཱ ཏཾ སདྡྷཱཝིམུཏྟཏཱ དིཊྛིཔྤཏྟསྶ. ཏཐཱ པཙྩནཱིཀདྷམྨེཧི སུཊྛུ ཝིམུཏྟཏཱཡ ¶ , ཨེཝཾ ཨནིགྒཧིཏབྷཱཝེན ནིརཱསངྐཏཱཡ ཨབྷིརཏིཝསེན སུཊྛུ ཨདྷིམུཙྩནཊྛེནཔི ཝིམོཀྑོ. ཏེནཱཧ ‘‘ཨཱརམྨཎེ ཙཱ’’ཏིཨཱདི. ཨཡཾ པནཏྠོཏི ཨཡཾ ཨདྷིམུཙྩནཊྛོ པཙྪིམེ ཝིམོཀྑེ ནིརོདྷེ ནཏྠི, ཀེཝལོ ཝིམུཏྟཊྛོ ཨེཝ ཏཏྠ ལབྦྷཏི, ཏཾ སཡམེཝ པརཏོ ཝཀྑཏི.

རཱུཔཱིཏི ཡེནཱཡཾ སསནྟཏིཔརིཡཱཔནྣེན རཱུཔེན སམནྣཱགཏོ, ཏཾ ཡསྶ ཛྷཱནསྶ ཧེཏུབྷཱཝེན ཝིསིཊྛཾ རཱུཔཾ ཧོཏི, ཡེན ཝིསིཊྛེན རཱུཔེན ‘‘རཱུཔཱི’’ཏི ཝུཙྩེཡྻ རཱུཔཱི-སདྡསྶ ཨཏིསཡཏྠདཱིཔནཏོ, ཏདེཝ སསནྟཏིཔརིཡཱཔནྣརཱུཔཝསེན པཊིལདྡྷཾ ཛྷཱནཾ ཨིདྷ པརམཏྠཏོ རཱུཔཱིབྷཱཝསཱདྷཀནྟི དཊྛབྦཾ. ཏེནཱཧ ‘‘ཨཛ྄ཛྷཏྟ’’ནྟིཨཱདི. རཱུཔཛ྄ཛྷཱནཾ རཱུཔཾ ཨུཏྟརཔདལོཔེན. རཱུཔཱནཱིཏི པནེཏྠ པུརིམཔདལོཔོ དཊྛབྦོ. ཏེན ཝུཏྟཾ ‘‘ནཱིལཀསིཎཱདིརཱུཔཱནཱི’’ཏི. རཱུཔེ ཀསིཎརཱུཔེ སཉྙཱ རཱུཔསཉྙཱ, སཱ ཨེཏསྶ ཨཏྠཱིཏི རཱུཔསཉྙཱི, སཉྙཱསཱིསེན ཛྷཱནཾ ཝདཏི. ཏཔྤཊིཀྑེཔེན ¶ ཨརཱུཔསཉྙཱི. ཏེནཱཧ ‘‘ཨཛ྄ཛྷཏྟཾ ན རཱུཔསཉྙཱི’’ཏིཨཱདི.

‘‘ཨནྟོ ཨཔྤནཱཡཾ སུབྷནྟི ཨཱབྷོགོ ནཏྠཱི’’ཏི ཨིམིནཱ པུབྦཱབྷོགཝསེན ཏཐཱ ཨདྷིམུཏྟི སིཡཱཏི དསྶེཏི. ཨེཝཉྷེཏྠ ཏཐཱཝཏྟབྦཏཱཔཏྟིཙོདནཱ སམཏྠིཏཱ ཧོཏི. ཡསྨཱ སུཝིསུདྡྷེསུ ནཱིལཱདཱིསུ ཝཎྞཀསིཎེསུ ཏཏྠ ཀཏཱདྷིཀཱརཱནཾ ཨབྷིརཏིཝསེན སུཊྛུ ཨདྷིམུཙྩནཊྛོ སམྦྷཝཏི ¶ , ཏསྨཱ ཨཊྛཀཐཱཡཾ ཏཐཱ ཏཏིཡོ ཝིམོཀྑོ སཾཝཎྞིཏོ, ཡསྨཱ པན མེཏྟཱཝསེན པཝཏྟམཱནཱ བྷཱཝནཱ སཏྟེ ཨཔྤཊིཀཱུལཏོ དཧནྟི ཏེསུ ཏཏོ ཨདྷིམུཙྩིཏྭཱཝ པཝཏྟཏི, ཏསྨཱ པཊིསམྦྷིདཱམགྒེ (པཊི. མ. ༢༡༢) ‘‘བྲཧྨཝིཧཱརབྷཱཝནཱ སུབྷཝིམོཀྑོ’’ཏི ཝུཏྟཱ, ཏཡིདཾ ཨུབྷཡམྤི ཏེན ཏེན པརིཡཱཡེན ཝུཏྟཏྟཱ ན ཝིརུཛ྄ཛྷཏཱིཏི དཊྛབྦཾ.

སབྦསོཏི ཨནཝསེསཏོ. ན ཧི ཙཏུནྣཾ ཨརཱུཔཀྑནྡྷཱནཾ ཨེཀདེསོཔི ཏཏྠ ཨཝསྶིསྶཏི. ཝིསུདྡྷཏྟཱཏི ཡཐཱཔརིཙྪིནྣཀཱལེ ནིརོདྷིཏཏྟཱ. ཨུཏྟམོ ཝིམོཀྑོ ནཱམ ཨརིཡེཧེཝ སམཱཔཛྫིཏབྦཏོ, ཨརིཡཕལཔརིཡོསཱནཏྟཱ དིཊྛེཝ དྷམྨེ ནིབྦཱནཔྤཏྟིབྷཱཝཏོ ཙ.

༡༣༠. ཨཱདིཏོ པཊྛཱཡཱཏི པཋམསམཱཔཏྟིཏོ པཊྛཱཡ. ཡཱཝ པརིཡོསཱནཱ སམཱཔཏྟི, ཏཱཝ. ཨཊྛཏྭཱཏི ཀཏྠཙི སམཱཔཏྟིཡཾ ཨཊྛིཏོ ཨེཝ, ནིརནྟརམེཝ པཊིཔཱཊིཡཱ, ཨུཔྤཊིཔཱཊིཡཱ ཙ སམཱཔཛྫཏེཝཱཏི ཨཏྠོ. ཏེནཱཧ ‘‘ཨིཏོ ཙིཏོ ཙ སཉྩརཎཝསེན ཝུཏྟ’’ནྟི. ཨིཙྪཏི སམཱཔཛྫིཏུཾ. ཏཏྠ ‘‘སམཱཔཛྫཏི པཝིསཏཱི’’ཏི སམཱཔཏྟིསམངྒཱིཔུགྒལོ ཏཾ ཏཾ པཝིཊྛོ ཝིཡ ཧོཏཱིཏི ཀཏྭཱ ཝུཏྟཾ.

དྭཱིཧི ¶ བྷཱགེཧི ཝིམུཏྟོཏི ཨརཱུཔཛ྄ཛྷཱནེན ཝིཀྑམྦྷནཝིམོཀྑེན, མགྒེན སམུཙྪེདཝིམོཀྑེནཱཏི དྭཱིཧི ཝིམུཙྩནབྷཱགེཧི, ཨརཱུཔསམཱཔཏྟིཡཱ རཱུཔཀཱཡཏོ, མགྒེན ནཱམཀཱཡཏོཏི དྭཱིཧི ཝིམུཙྩིཏབྦབྷཱགེཧི ཙ ཝིམུཏྟོ. ཏེནཱཧ ‘‘ཨརཱུཔསམཱཔཏྟིཡཱ’’ཏིཨཱདི ¶ . ཝིམུཏྟོཏི ཧི ཀིལེསེཧི ཝིམུཏྟོ, ཝིམུཙྩནྟོ ཙ ཀིལེསཱནཾ ཝིཀྑམྦྷནསམུཙྪིནྡནེཧི ཀཱཡདྭཡཏོ ཝིམུཏྟོཏི ཨཡམེཏྠ ཨཏྠོ. གཱཐཱཡ ཙ ཨཱཀིཉྩཉྙཱཡཏནལཱབྷིནོ ཨུཔསིཝབྲཱཧྨཎསྶ བྷགཝཏཱ ‘‘ནཱམཀཱཡཱ ཝིམུཏྟོ’’ཏི ཨུབྷཏོབྷཱགཝིམུཏྟོ མུནི ཨཀྑཱཏོ. ཏཏྠ ཨཏྠཾ པལེཏཱིཏི ཨཏྠཾ གཙྪཏི. ན ཨུཔེཏི སངྑནྟི ‘‘ཨསུཀཾ ནཱམ དིསཾ གཏོ’’ཏི ཝོཧཱརཾ ན གཙྪཏི. ཨེཝཾ མུནི ནཱམཀཱཡཱ ཝིམུཏྟོཏི ཨེཝཾ ཨརཱུཔཾ ཨུཔཔནྣོ སེཀྑམུནི པཀཏིཡཱ པུབྦེཝ རཱུཔཀཱཡཱ ཝིམུཏྟོ, ཏཏྠ ཙ ཙཏུཏྠམགྒཾ ནིབྦཏྟེཏྭཱ ནཱམཀཱཡསྶ པརིཉྙཱཏཏྟཱ པུན ནཱམཀཱཡཱཔི ཝིམུཏྟོ. ཨུབྷཏོབྷཱགཝིམུཏྟོ ཁཱིཎཱསཝོ ཧུཏྭཱ ཨནུཔཱདཱཡ པརིནིབྦཱནསངྑཱཏཾ ¶ ཨཏྠཾ པལེཏི ན ཨུཔེཏི སངྑཾ, ‘‘ཁཏྟིཡོ བྲཱཧྨཎོ’’ཏི ཨེཝཾ ཨཱདིཀཾ སམཉྙཾ ན གཙྪཏཱིཏི ཨཏྠོ.

‘‘ཨཉྙཏརཏོ ཝུཊྛཱཡཱ’’ཏི ཨིདཾ ཀིཾ ཨཱཀཱསཱནཉྩཱཡཏནཱདཱིསུ ཨཉྙཏརལཱབྷཱིཝསེན ཝུཏྟཾ, ཨུདཱཧུ སབྦཱརུཔྤལཱབྷཱིཝསེནཱཏི ཡཐིཙྪསི, ཏཐཱ ཧོཏུ, ཡདི སབྦཱརུཔྤལཱབྷཱིཝསེན ཝུཏྟཾ, ན ཀོཙི ཝིརོདྷོ. ཨཐ ཏཏྠ ཨཉྙཏརལཱབྷཱིཝསེན ཝུཏྟཾ, ‘‘ཡཏོ ཁོ, ཨཱནནྡ, བྷིཀྑུ ཨིམེ ཨཊྛ ཝིམོཀྑེ ཨནུལོམམྤི སམཱཔཛྫཏཱི’’ཏིཨཱདིཝཙནེན ཝིརུཛ྄ཛྷེཡྻཱཏི? ཡསྨཱ ཨརཱུཔཱཝཙརཛ྄ཛྷཱནེསུ ཨེཀསྶཱཔི ལཱབྷཱི ‘‘ཨཊྛཝིམོཀྑལཱབྷཱི’’ ཏྭེཝ ཝུཙྩཏི ཨཊྛཝིམོཀྑེ ཨེཀདེསསྶཱཔི ཏཾནཱམདཱནསམཏྠཏཱསམྦྷཝཏོ. ཨཡཉྷི ཨཊྛཝིམོཀྑསམཉྙཱ སམུདཱཡེ ཝིཡ ཏདེཀདེསེཔི ནིརུལ༹ྷཱཔཏྟིསམཉྙཱ ཝིཡཱཏི. ཏེན ཝུཏྟཾ ‘‘ཨཱཀཱསཱནཉྩཱཡཏནཱདཱིསུ ཨཉྙཏརཏོ ཝུཊྛཱཡཱ’’ཏི. ‘‘པཉྩཝིདྷོ ཧོཏཱི’’ཏི ཝཏྭཱ ཚབྦིདྷཏཾཔིསྶ ཀེཙི པརིཀཔྤེནྟི, ཏཾ ཏེསཾ མཏིམཏྟཾ, ནིཙྪིཏོཝཱཡཾ པཉྷོ པུབྦཱཙརིཡེཧཱིཏི དསྶེཏུཾ ‘‘ཀེཙི པནཱ’’ཏིཨཱདི ཝུཏྟཾ. ཏཏྠ ཀེཙཱིཏི ཨུཏྟརཝིཧཱརཝཱསིནོ, སཱརསམཱསཱཙརིཡཱ ཙ. ཏེ ཧི ‘‘ཨུབྷཏོབྷཱགཝིམུཏྟོཏི ¶ ཨུབྷཡབྷཱགཝིམུཏྟོ སམཱདྷིཝིཔསྶནཱཏོ’’ཏི ཝཏྭཱ རཱུཔཱཝཙརསམཱདྷིནཱཔི སམཱདྷིཔརིཔནྠཏོ ཝིམུཏྟིཾ མཉྙནྟི. ཨེཝཾ རཱུཔཛ྄ཛྷཱནབྷཱགེན, ཨརཱུཔཛ྄ཛྷཱནབྷཱགེན ཙ ཨུབྷཏོ ཝིམུཏྟོཏི པཱཡསམཱནོ. ‘‘ཏཱདིསམེཝཱ’’ཏི ཨིམིནཱ ཡཱདིསཾ ཨརཱུཔཱཝཙརཛ྄ཛྷཱནཾ ཀིལེསཝིཀྑམྦྷནེ, ཏཱདིསཾ རཱུཔཱཝཙརཙཏུཏྠཛ྄ཛྷཱནཾ པཱིཏི ཨིམམཏྠཾ ཨུལླངྒེཏི. ཏེནཱཧ ‘‘ཏསྨཱ’’ཏིཨཱདི.

ཨུབྷཏོབྷཱགཝིམུཏྟཔཉྷོཏི ཨུབྷཏོབྷཱགཝིམུཏྟསྶ ཚབྦིདྷཏཾ ནིསྶཱཡ ཨུཔྤནྣཔཉྷོ. ཝཎྞནཾ ནིསྶཱཡཱཏི ཏསྶ པདསྶ ཨཏྠཝཙནཾ ནིསྶཱཡ. ཙིརེནཱཏི ཐེརསྶ ཨཔརབྷཱགེ ཙིརེན ཀཱལེན. ཝིནིཙྪཡནྟི ¶ སཾསཡཚེདཀཾ སནྣིཊྛཱནཾ པཏྟོ. ཏཾ པཉྷནྟི ཏམཏྠཾ. ཉཱཏུཾ ཨིཙྪིཏོ ཧི ཨཏྠོ པཉྷོ. ན ཀེནཙི སུཏཔུབྦནྟི ཀེནཙི ཀིཉྩི ན སུཏཔུབྦཾ, ཨིདཾ ཨཏྠཛཱཏནྟི ཨདྷིཔྤཱཡོ. ཀིཉྩཱཔི ཨུཔེཀྑཱསཧགཏཾ, ཀིཉྩཱཔི ཀིལེསེ ཝིཀྑམྦྷེཏཱིཏི པཙྩེཀཾ ཀིཉྩཱཔི-སདྡོ ཡོཛེཏབྦོ. སམུདཱཙརཏཱིཏི པཝཏྟཏི. ཏཏྠ ཀཱརཎམཱཧ ‘‘ཨིམེ ཧཱི’’ཏིཨཱདིནཱ, ཏེན རཱུཔཱཝཙརབྷཱཝནཏོ ཨཱརུཔྤབྷཱཝནཱ སཝིསེསཾ ཀིལེསེ ཝིཀྑམྦྷེཏི རཱུཔཝིརཱགབྷཱཝནཱབྷཱཝཏོ ¶ , ཨུཔརིབྷཱཝནཱབྷཱཝཏོ ཙཱཏི དསྶེཏཱིཏི. ཨེཝཉྩ ཀཏྭཱ ཨཊྛཀཐཱཡཾ ཨཱརུཔྤབྷཱཝནཱནིདྡེསེ ཡཾ ཝུཏྟཾ ‘‘ཏསྶེཝཾ ཏསྨིཾ ནིམིཏྟེ པུནཔྤུནཾ ཙིཏྟཾ ཙཱརེནྟསྶ ནཱིཝརཎཱནི ཝིཀྑམྦྷནྟི སཏི སནྟིཊྛཏཱི’’ཏིཨཱདི, (ཝིསུདྡྷི. ༡.༢༨༡) ཏཾ སམཏྠཏཾ ཧོཏཱིཏི. ཨིདཾ སུཏྟནྟི པུགྒལཔཉྙཏྟིཔཱཋམཱཧ (པུ. པ. ནིདྡེས ༢༧). སབྦཉྷི བུདྡྷཝཙནཾ ཨཏྠསཱུཙནཱདིཨཏྠེན སུཏྟནྟི ཝུཏྟོ ཝཱཡམཏྠོ. ཡཾ པན ཏཏྠ ¶ ཝཏྟབྦཾ, ཏཾ ཧེཊྛཱ ཝུཏྟམེཝ. ཨཊྛནྣཾ ཝིམོཀྑཱནཾ ཨནུལོམཱདིཏོ སམཱཔཛྫནེན སཱཏིསཡཾ སནྟཱནསྶ ཨབྷིསངྑཏཏྟཱ, ཨཊྛམཉྩ ཨུཏྟམཾ ཝིམོཀྑཾ པདཊྛཱནཾ ཀཏྭཱ ཝིཔསྶནཾ ཝཌྜྷེཏྭཱ ཨགྒམགྒཱདྷིགམེན ཨུབྷཏོབྷཱགཝིམུཙྩནཏོ ཙ ཨིམཱཡ ཨུབྷཏོབྷཱགཝིམུཏྟིཡཱ སབྦསེཊྛཏཱ ཝེདིཏཱཏི དཊྛབྦཱ.

མཧཱནིདཱནསུཏྟཝཎྞནཱཡ ལཱིནཏྠཔྤཀཱསནཱ.

༣. མཧཱཔརིནིབྦཱནསུཏྟཝཎྞནཱ

༡༣༡. པཱུཛནཱིཡབྷཱཝཏོ ¶ ¶ , ¶ བུདྡྷསམྤདཉྩ པཧཱཡ པཝཏྟཏཱ མཧནྟཉྩ ཏཾ པརིནིབྦཱནཉྩཱཏི མཧཱཔརིནིབྦཱནཾ; སཝཱསནཔྤཧཱནཏོ མཧནྟཾ ཀིལེསཀྑཡཾ ནིསྶཱཡ པཝཏྟཾ པརིནིབྦཱནནྟིཔི མཧཱཔརིནིབྦཱནཾ; མཧཏཱ ཀཱལེན མཧཏཱ ཝཱ གུཎརཱསིནཱ སཱདྷིཏཾ པརིནིབྦཱནནྟིཔི མཧཱཔརིནིབྦཱནཾ; མཧནྟབྷཱཝཱཡ, དྷཱཏཱུནཾ བཧུབྷཱཝཱཡ པརིནིབྦཱནནྟིཔི མཧཱཔརིནིབྦཱནཾ; མཧཏོ ལོཀཏོ ནིསྶཊཾ པརིནིབྦཱནནྟིཔི མཧཱཔརིནིབྦཱནཾ; སབྦལོཀཱསཱདྷཱརཎཏྟཱ བུདྡྷཱནཾ སཱིལཱདིགུཎེཧི མཧཏོ བུདྡྷསྶ བྷགཝཏོ པརིནིབྦཱནནྟིཔི མཧཱཔརིནིབྦཱནཾ; མཧཏི སཱསནེ པཏིཊྛིཏེ པརིནིབྦཱནནྟིཔི མཧཱཔརིནིབྦཱནནྟི བུདྡྷསྶ བྷགཝཏོ པརིནིབྦཱནཾ ཝུཙྩཏི, ཏཔྤཊིསཾཡུཏྟཾ སུཏྟཾ མཧཱཔརིནིབྦཱནསུཏྟཾ. གིཛ྄ཛྷཱ ཨེཏྠ ཝསནྟཱིཏི གིཛ྄ཛྷཾ, གིཛ྄ཛྷཾ ཀཱུཊཾ ཨེཏསྶཱཏི གིཛ྄ཛྷཀཱུཊོ, གིཛ྄ཛྷཾ ཝིཡ ཝཱ གིཛ྄ཛྷཾ, ཀཱུཊཾ, ཏཾ ཨེཏསྶཱཏི གིཛ྄ཛྷཀཱུཊོ, པབྦཏོ, ཏསྨིཾ གིཛ྄ཛྷཀཱུཊེ. ཏེནཱཧ ‘‘གིཛ྄ཛྷཱ’’ཏིཨཱདི. ཨབྷིཡཱཏུཀཱམོཏི ཨེཏྠ ཨབྷི-སདྡོ ཨབྷིབྷཝནཏྠོ, ‘‘ཨབྷིཝིཛཱནཱཏཱུ’’ཏིཨཱདཱིསུ (དཱི. ནི. ༢.༢༤༤; ༣.༨༥; མ. ནི. ༣.༢༥༦) ཝིཡཱཏི ཨཱཧ ‘‘ཨབྷིབྷཝནཏྠཱཡ ཡཱཏུཀཱམོ’’ཏི. ཝཛྫིརཱཛཱནོཏི ‘‘ཝཛྫེཏབྦཱ ཨིམེ’’ཏིཨཱདིཏོ པཝཏྟཾ ཝཙནཾ ཨུཔཱདཱཡ ‘‘ཝཛྫཱི’’ཏི ལདྡྷནཱམཱ རཱཛཱནོ, ཝཛྫཱིརཊྛསྶ ཝཱ རཱཛཱནོ ཝཛྫིརཱཛཱནོ. ཝཛྫིརཊྛསྶ པན ཝཛྫིསམཉྙཱ ཏནྣིཝཱསིརཱཛཀུམཱརཝསེན ཝེདིཏབྦཱ. རཱཛིདྡྷིཡཱཏི རཱཛབྷཱཝཱནུགཏེན སབྷཱཝེན. སོ པན སབྷཱཝོ ནེསཾ ¶ གཎརཱཛཱུནཾ མིཐོ སཱམགྒིཡཱ ལོཀེ པཱཀཊོ, ཙིརཊྛཱཡཱི ཙ ཨཧོསཱིཏི ‘‘སམགྒབྷཱཝཾ ཀཐེསཱི’’ཏི ཝུཏྟཾ. ཨནུ ཨནུ ཏཾསམངྒིནོ བྷཱཝེཏི ཝཌྜྷེཏཱིཏི ཨནུབྷཱཝོ, ཨནུབྷཱཝོ ཨེཝ ཨཱནུབྷཱཝོ, པཏཱཔོ, སོ པན ནེསཾ པཏཱཔོ ཧཏྠིཨསྶཱདིཝཱཧནསམྤཏྟིཡཱ, ཏཏྠ ཙ སུསིཀྑིཏབྷཱཝེན ལོཀེ པཱཀཊོ ཛཱཏོཏི ‘‘ཨེཏེན…པེ… ཀཐེསཱི’’ཏི ཝུཏྟཾ. ཏཱལ༹ཙྪིགྒལེནཱཏི ཀུཉྩིཀཱཚིདྡེན. ཨསནནྟི སརཾ. ཨཏིཔཱཏཡིསྶནྟཱིཏི ཨཏིཀྐཱམེནྟི. པོངྑཱནུཔོངྑནྟི པོངྑསྶ ཨནུཔོངྑཾ, པུརིམསརསྶ པོངྑཔདཱནུགཏཔོངྑཾ ཨིཏརཾ སརཾ ཀཏྭཱཏི ཨཏྠོ. ཨཝིརཱདྷིཏནྟི ཨཝིརཛ྄ཛྷིཏཾ. ཨུཙྪིནྡིསྶཱམཱིཏི ཨུམྨཱུལནཝསེན ཀུལསནྟཏིཾ ཚིནྡིསྶཱམི. ཨཡནཾ ¶ ཝཌྜྷནཾ ཨཡོ, ཏཔྤཊིཀྑེཔེན ཨནཡོཏི ཨཱཧ ‘‘ཨཝཌྜྷིཡཱ ཨེཏཾ ནཱམ’’ནྟི. ཝིཀྑིཔཏཱིཏི ཝིདཱུརཏོ ཁིཔཏི, ཨཔནེཏཱིཏི ཨཏྠོ.

གངྒཱཡནྟི ¶ གངྒཱསམཱིཔེ. པཊྚནགཱམནྟི སཀཊཔཊྚནགཱམཾ. ཨཱཎཱཏི ཨཱཎཱ ཝཏྟཏི. ཨཌྜྷཡོཛནནྟི ཙ ཏསྨིཾ པཊྚནེ ཨཌྜྷཡོཛནཊྛཱནཝཱསིནོ སནྡྷཱཡ ཝུཏྟཾ. ཏཏྲཱཏི ཏསྨིཾ པཊྚནེ. བལཝཱགྷཱཏཛཱཏོཏི ཨུཔྤནྣབལཝཀོདྷོ.

མེཏི མཡ྄ཧཾ. གཏེནཱཏི གམནེན.

རཱཛཨཔརིཧཱནིཡདྷམྨཝཎྞནཱ

༡༣༤. སཱིཏཾ ཝཱ ཨུཎྷཾ ཝཱ ནཏྠི, ཏཱཡཾ ཝེལཱཡཾ པུཉྙཱནུབྷཱཝེན བུདྡྷཱནཾ སབྦཀཱལཾ སམསཱིཏུཎྷཱཝ ཨུཏུ ཧོཏི, ཏཾ སནྡྷཱཡ ཏཐཱ ཝུཏྟཾ. ཨབྷིཎྷཾ སནྣིཔཱཏཱཏི ནིཙྩསནྣིཔཱཏཱ, ཏཾ པན ནིཙྩསནྣིཔཱཏཏཾ དསྶེཏུཾ ‘‘དིཝསསྶཱ’’ཏིཨཱདི ཝུཏྟཾ. སནྣིཔཱཏབཧུལཱཏི པཙུརསནྣིཔཱཏཱ. ཝོསཱནནྟི སངྐོཙཾ. ‘‘ཡཱཝཀཱིཝ’’ནྟི ཨེཀམེཝེཏཾ པདཾ ཨནིཡམཏོ པརིམཱཎཝཱཙཱི, ཀཱལོ ཙེཏྠ ཨདྷིཔྤེཏོཏི ཨཱཧ ‘‘ཡཏྟཀཾ ཀཱལ’’ནྟི. ‘‘ཝུདྡྷིཡེཝཱ’’ཏིཨཱདིནཱ ཝུཏྟམཏྠཾ བྱཏིརེཀམུཁེན ¶ དསྶེཏུཾ ‘‘ཨབྷིཎྷཾ ཨསནྣིཔཏནྟཱ ཧཱི’’ཏིཨཱདི ཝུཏྟཾ. ཨཱཀུལཱཏི ཁུབྷིཏཱ, ན པསནྣཱ. བྷིཛྫིཏྭཱཏི ཝགྒབནྡྷཏོ ཝིབྷཛྫ ཝིསུཾ ཝིསུཾ ཧུཏྭཱ.

སནྣིཔཱཏབྷེརིཡཱཏི སནྣིཔཱཏཱརོཙནབྷེརིཡཱ. ཨཌྜྷབྷུཏྟཱ ཝཱཏི སཱམིབྷུཏྟཱ ཙ. ཨོསཱིདམཱནེཏི ཧཱཡམཱནེ.

པུབྦེ ཨཀཏནྟི པུབྦེ ཨནིབྦཏྟཾ. སུངྐནྟི བྷཎྜཾ གཧེཏྭཱ གཙྪནྟེཧི པབྦཏཁཎྜ ནདཱིཏིཏྠགཱམདྭཱརཱདཱིསུ རཱཛཔུརིསཱནཾ དཱཏབྦབྷཱགཾ. བལིནྟི ནིཔྥནྣསསྶཱདིཏོ ཚབྷཱགཾ, སཏྟབྷཱགནྟིཨཱདིནཱ ལདྡྷཀརཾ. དཎྜནྟི དསཝཱིསཏིཀཧཱཔཎཱདིཀཾ ཨཔརཱདྷཱནུརཱུཔཾ གཧེཏབྦདྷནདཎྜཾ. ཝཛྫིདྷམྨནྟི ཝཛྫིརཱཛདྷམྨཾ. ཨིདཱནི ཨཔཉྙཏྟཔཉྙཱཔནཱདཱིསུ ཏཔྤཊིཀྑེཔ ཨཱདཱིནཝཱནིསཾསེ ཝིཏྠཱརཏོ དསྶེཏུཾ ‘‘ཏེསཾ ཨཔཉྙཏྟ’’ནྟིཨཱདི ཝུཏྟཾ. པཱརིཙརིཡཀྑམཱཏི ཨུཔཊྛཱནཀྑམཱ.

ཀུལབྷོགཨིསྶརིཡཱདིཝསེན མཧཏཱི མཏྟཱ པམཱཎཾ ཨེཏེསནྟི མཧཱམཏྟཱ, ནཱིཏིསཏྠཝིཧིཏེ ཝིནིཙྪཡེ ¶ ཋཔིཏཱ མཧཱམཏྟཱ ཝིནིཙྪཡམཧཱམཏྟཱ, ཏེསཾ. དེནྟཱིཏི ནིཡྻཱཏེནྟི. སཙེ ཙོརོཏི ཨེཝཾསཉྙིནོ སཙེ ཧོནྟི. པཱཔབྷཱིརུཏཱཡ ཨཏྟནཱ ཀིཉྩི ཨཝཏྭཱ. དཎྜནཱིཏིསཉྙིཏེ ཝོཧཱརེ ནིཡུཏྟཱཏི ཝོཧཱརིཀཱ, ཡེ ‘‘དྷམྨཊྛཱ’’ཏི ཝུཙྩནྟི. སུཏྟདྷརཱ ནཱིཏིསུཏྟདྷརཱ ¶ , ཨཱིདིསེ ཝོཧཱརཝིནིཙྪཡེ ནིཡམེཏྭཱ ཋཔིཏཱ. པརམྤརཱབྷཏེསུ ཨཊྛསུ ཀུལེསུ ཛཱཏཱ ཨགཏིགམནཝིརཏཱ ཨཊྛམཧལླཀཔུརིསཱ ཨཊྛཀུལིཀཱ.

སཀྐཱརནྟི ཨུཔཀཱརཾ. གརུབྷཱཝཾ པཙྩུཔཊྛཔེཏྭཱཏི ‘‘ཨིམེ ཨམྷཱཀཾ གརུནོ’’ཏི ཏཏྠ གརུབྷཱཝཾ པཏི པཏི ཨུཔཊྛཔེཏྭཱ. མཱནེནྟཱིཏི སམྨཱནེནྟི, ཏཾ པན སམྨཱནནཾ ཏེསུ ནེསཾ ཨཏྟམནཏཱཔུབྦཀནྟི ཨཱཧ ‘‘མནེན པིཡཱཡནྟཱི’’ཏི. ནིཔཙྩཀཱརནྟི པཎིཔཱཏཾ. དསྶེནྟཱིཏི ‘‘ཨིམེ ཨམྷཱཀཾ པིཏཱམཧཱ ¶ , མཱཏཱམཧཱ’’ཏིཨཱདིནཱ ནཱིཙཙིཏྟཱ ཧུཏྭཱ གརུཙིཏྟཱཀཱརཾ དསྶེནྟི. སནྡྷཱརེཏུནྟི སམྦནྡྷཾ ཨཝིཙྪིནྣཾ ཀཏྭཱ གྷཊེཏུཾ.

པསཡ྄ཧཱཀཱརསྶཱཏི བལཀྐཱརསྶ. ཀཱམཾ ཝུདྡྷིཡཱ པཱུཛནཱིཡཏཱཡ ‘‘ཝུདྡྷིཧཱནིཡོ’’ཏི ཝུཏྟཾ, ཨཏྠོ པན ཝུཏྟཱནུཀྐམེནེཝ ཡོཛེཏབྦོ, པཱལི༹ཡཾ ཝཱ ཡསྨཱ ‘‘ཝུདྡྷིཡེཝ པཱཊིཀངྑཱ, ནོ པརིཧཱནཱི’’ཏི ཝུཏྟཾ, ཏསྨཱ ཏདནུཀྐམེན ‘‘ཝུདྡྷིཧཱནིཡོ’’ཏི ཝུཏྟཾ.

ཝིཔཙྩིཏུཾ ཨལདྡྷོཀཱསེ པཱཔཀམྨེ, ཏསྶ ཀམྨསྶ ཝིཔཱཀེ ཝཱ ཨནཝསརོཝ དེཝཏོཔསགྒོ, ཏསྨིཾ པན ལདྡྷོཀཱསེ སིཡཱ དེཝཏོཔསགྒསྶ ཨཝསརོཏི ཨཱཧ ‘‘ཨནུཔྤནྣཾ…པེ… ཝཌྜྷེནྟཱི’’ཏི. ཨེཏེནེཝ ཨནུཔྤནྣཾ སུཁནྟི ཨེཏྠཱཔི ཨཏྠོ ཝེདིཏབྦོ. ‘‘བལཀཱཡསྶ དིགུཎཏིགུཎཏཱདསྶནཾ, པཊིབྷཡབྷཱཝདསྶན’’ནྟི ཨེཝཾ ཨཱདིནཱ དེཝཏཱནཾ སངྒཱམསཱིསེ སཧཱཡཏཱ ཝེདིཏབྦཱ.

ཨནིཙྪིཏནྟི ཨནིཊྛཾ. ཨཱཝརཎཏོཏི ནིསེདྷནཏོ. ཡསྶ དྷམྨཏོ ཨནཔེཏཱ དྷམྨིཡཱཏི ཨིདྷ ‘‘དྷམྨིཀཱ’’ཏི ཝུཏྟཱ. མིགསཱུཀརཱདིགྷཱཏཱཡ སུནཁཱདཱིནཾ ཀཌྜྷིཏྭཱ ཝནཙརཎཾ ཝཱཛོ, མིགཝཱ, ཏཏྠ ནིཡུཏྟཱ, ཏེ ཝཱ ཝཱཛེནྟི ནེནྟཱིཏི ཝཱཛིཀཱ, མིགཝདྷཙཱརིནོ. ཙིཏྟཔྤཝཏྟིཾ པུཙྪཏི. ཀཱཡིཀཝཱཙསིཀཔཡོགེན ཧི སཱ ལོཀེ པཱཀཊཱ པཀཱསབྷཱུཏཱཏི.

༡༣༥. དེཝཱཡཏནབྷཱཝེན ཙིཏཏྟཱ, ལོཀསྶ ཙིཏྟཱིཀཱརཊྛཱནཏྟཱ ཙ ཙེཏིཡཾ ཨཧོསི.

ཀཱམཾཀཱརཝསེན ཀིཉྩིཔི ན ཀརཎཱིཡཱཏི ཨཀརཎཱིཡཱ. ཀཱམཾཀཱརོ པན ཧཏྠགཏཀརཎཝསེནཱཏི ¶ ཨཱཧ ‘‘ཨགྒཧེཏབྦཱཏི ཨཏྠོ’’ཏི. ཨབྷིམུཁཡུདྡྷེནཱཏི ཨབྷིམུཁཾ ཨུཛུཀམེཝ སངྒཱམཀརཎེན. ཨུཔལཱཔནཾ ¶ སཱམཾ དཱནཉྩཱཏི དསྶེཏུཾ ‘‘ཨལ’’ནྟིཨཱདི ཝུཏྟཾ. བྷེདོཔི ཨིདྷ ཨུཔཱཡོ ཨེཝཱཏི ཝུཏྟཾ ‘‘ཨཉྙཏྲ མིཐུབྷེདཱཡཱ’’ཏི. ཡུདྡྷསྶ པན ཨནུཔཱཡཏཱ ¶ པགེཝ པཀཱསིཏཱ. ཨིདནྟི ‘‘ཨཉྙཏྲ ཨུཔལཱཔནཱཡ, ཨཉྙཏྲ མིཐུབྷེདཱ’’ཏི ཙ ཨིདཾ ཝཙནཾ. ཀཐཱཡ ནཡཾ ལབྷིཏྭཱཏི ‘‘ཡཱཝཀཱིཝཉྩ…པེ… ནོ པརིཧཱནཱི’’ཏི ཨིམཱཡ བྷགཝཏོ ཀཐཱཡ ནཡཾ ཨུཔཱཡཾ ལབྷིཏྭཱ.

ཨནུཀམྤཱཡཱཏི ཝཛྫིརཱཛེསུ ཨནུགྒཧེན. ཨསྶཱཏི བྷགཝཏོ.

ཀཐནྟི ཝཛྫཱིཧི སདྡྷིཾ ཀཱཏབྦཡུདྡྷཀཐཾ. ཨུཛུཾ ཀརིསྶཱམཱིཏི པཊིརཱཛཱནོ ཨཱནེཏྭཱ པཱཀཱརཔརིཁཱནཾ ཨཉྙཐཱབྷཱཝཱཔཱདནེན ཨུཛུབྷཱཝཾ ཀརིསྶཱམི.

པཏིཊྛིཏགུཎོཏི པཏིཊྛིཏཱཙརིཡགུཎོ. ཨིསྶརཱ སནྣིཔཏནྟུ, མཡཾ ཨནིསྶརཱ, ཏཏྠ གནྟྭཱ ཀིཾ ཀརིསྶཱམཱཏི ལིཙྪཝིནོ ན སནྣིཔཏིཾསཱུཏི ཡོཛནཱ. སཱུརཱ སནྣིཔཏནྟཱུཏི ཨེཏྠཱཔི ཨེསེཝ ནཡོ.

བལབྷེརིནྟི ཡུདྡྷཱཡ བལཀཱཡསྶ ཨུཊྛཱནབྷེརིཾ.

བྷིཀྑུཨཔརིཧཱནིཡདྷམྨཝཎྞནཱ

༡༣༦. ཨཔརིཧཱནཱཡ ཧིཏཱཏི ཨཔརིཧཱནིཡཱ, ན པརིཧཱཡནྟི ཨེཏེཧཱིཏི ཝཱ ཨཔརིཧཱནིཡཱ, ཏེ པན ཡསྨཱ ཨཔརིཧཱནིཡཱ ཀཱརཀཱ ནཱམ ཧོནྟི, ཏསྨཱ ཝུཏྟཾ ‘‘ཨཔརིཧཱནིཀརེ’’ཏི. ཡསྨཱ པན ཏེ པརིཧཱནིཀརཱནཾ ཨུཛུཔཊིཔཀྑབྷཱུཏཱ, ཏསྨཱ ཨཱཧ ‘‘ཝུདྡྷིཧེཏུབྷཱུཏེ’’ཏི. ཡསྨཱ བྷགཝཏོ དེསནཱ ཨུཔརཱུཔརི ཉཱཎཱལོཀཾ པསཱདེནྟཱི སཏྟཱནཾ ཧདཡནྡྷཀཱརཾ ཝིདྷམཏི, པཀཱསེཏབྦེ ཙ ཨཏྠེ ཧཏྠཏལེ ཨཱམལཀཾ ཝིཡ སུཊྛུཏརཾ པཱཀཊེ ཀཏྭཱ དསྶེཏི, ཏསྨཱ ཝུཏྟཾ ‘‘ཙནྡསཧསྶཾ…པེ… ཀཐཡིསྶཱམཱི’’ཏི.

ཡསྨཱ བྷགཝཱ ‘‘ཏསྶ བྲཱཧྨཎསྶ སམྨུཁཱ ཝཛྫཱིནཾ ཨབྷིཎྷསནྣིཔཱཏཱདིཔཊིཔཏྟིཾ ཀཐེནྟོཡེཝ ཨཡཾ ཨཔརིཧཱནིཡཀཐཱ ཨནིཡྻཱནིཀཱ ཝཊྚནིསྶིཏཱ, མཡ྄ཧཾ པན སཱསནེ ཏཐཱརཱུཔཱི ཀཐཱ ཀཐེཏབྦཱ, སཱ ཧོཏི ནིཡྻཱནིཀཱ ཝིཝཊྚནིསྶིཏཱ, ཡཱཡ སཱསནཾ མཡ྄ཧཾ པརིནིབྦཱནཏོ པརམྤི ¶ ཨདྡྷནིཡཾ ཨསྶ ཙིརཊྛིཏིཀ’’ནྟི ཙིནྟེསི, ཏསྨཱ བྷིཀྑཱུ སནྣིཔཱཏཱཔེཏྭཱ ཏེསཾ ཨཔརིཧཱནིཡེ དྷམྨེ དེསེནྟོ ཏེནེཝ ནིཡཱམེན དེསེསི. ཏེན ཝུཏྟཾ ‘‘ཨིདཾ ཝཛྫིསཏྟཀེ ཝུཏྟསདིསམེཝཱ’’ཏི. ཨེཝཾ སངྑེཔཏོ ཝུཏྟམཏྠཾ ¶ ཝིཏྠཱརཏོ དསྶེནྟོ ‘‘ཨིདྷཱཔི ཙཱ’’ཏིཨཱདིམཱཧ. ཏཏྠ ‘‘ཏཏོ’’ཏིཨཱདི ¶ དིསཱསུ ཨཱགཏསཱསནེ ཝུཏྟཾ ཏཾ ཀཐནཾ. ཝིཧཱརསཱིམཱ ཨཱཀུལཱ ཡསྨཱ, ཏསྨཱ ཨུཔོསཐཔཝཱརཎཱ ཋིཏཱ.

ཨོལཱིཡམཱནཀོཏི པཱལི༹ཏོ, ཨཏྠཏོ ཙ ཝིནསྶམཱནོ. ཨུཀྑིཔཱཔེནྟཱཏི པགུཎབྷཱཝཀརཎེན, ཨཏྠསཾཝཎྞནེན ཙ པགྒཎྷནྟཱ.

སཱཝཏྠིཡཾ བྷིཀྑཱུ ཝིཡ པཱཙིཏྟིཡཾ དེསཱཔེཏབྦོཏི (པཱརཱ. ༥༦༥ ཝིཏྠཱརཝཏྠུ). ཝཛྫིཔུཏྟཀཱ ཝིཡ དསཝཏྠུདཱིཔནེན (ཙཱུལ༹ཝ. ༤༤༦ ཝིཏྠཱརཝཏྠུ). ‘‘གིཧིགཏཱནཱིཏི གིཧིཔཊིསཾཡུཏྟཱནཱི’’ཏི ཝདནྟི. གིཧཱིསུ གཏཱནི, ཏེཧི ཉཱཏཱནི གིཧིགཏཱནི. དྷཱུམཀཱལོ ཨེཏསྶཱཏི དྷཱུམཀཱལིཀཾ ཙིཏཀདྷཱུམཝཱུཔསམཏོ པརཾ ཨཔྤཝཏྟནཏོ.

ཐིརབྷཱཝཔྤཏྟཱཏི སཱསནེ ཐིརབྷཱཝཾ ཨནིཝཏྟིཏབྷཱཝཾ ཨུཔགཏཱ. ཐེརཀཱརཀེཧཱིཏི ཐེརབྷཱཝསཱདྷཀེཧི སཱིལཱདིགུཎེཧི ཨསེཀྑདྷམྨེཧི. བཧཱུ རཏྟིཡོཏི པབྦཛིཏཱ ཧུཏྭཱ བཧཱུ རཏྟིཡོ ཛཱནནྟི. སཱིལཱདིགུཎེསུ པཏིཊྛཱཔནམེཝ སཱསནེ པརིཎཱཡཀཏཱཏི ཨཱཧ ‘‘ཏཱིསུ སིཀྑཱསུ པཝཏྟེནྟཱི’’ཏི.

ཨོཝཱདཾ ན དེནྟི ཨབྷཱཛནབྷཱཝཏོ. པཝེཎཱིཀཐནྟི ཨཱཙརིཡཔརམྤརཱབྷཏཾ སམྨཱཔཊིཔཏྟིདཱིཔནཾ དྷམྨཀཐཾ. སཱརབྷཱུཏཾ དྷམྨཔརིཡཱཡནྟི སམཐཝིཔསྶནཱམགྒཕལསམྤཱཔནེན སཱརབྷཱུཏཾ བོཛ྄ཛྷངྒཀོསལླཨནུཏྟརསཱིཏཱིབྷཱཝཨདྷིཙིཏྟསུཏྟཱདིདྷམྨཏནྟིཾ.

པུནབྦྷཝདཱནཾ པུནབྦྷཝོ ཨུཏྟརཔདལོཔེན. ཨིཏརེཏི ཡེ ན པཙྩཡཝསིཀཱ ན ཨཱམིསཙཀྑུཀཱ, ཏེ ན གཙྪནྟི ཏཎྷཱཡ ཝསཾ.

ཨཱརཉྙཀེསཱུཏི ཨརཉྙབྷཱགེསུ ཨརཉྙཔརིཡཱཔནྣེསུ. ནནུ ཡཏྠ ཀཏྠཙིཔི ཏཎྷཱ སཱཝཛྫཱ ཨེཝཱཏི ཙོདནཾ སནྡྷཱཡཱཧ ‘‘གཱམནྟསེནཱསནེསུ ཧཱི’’ཏིཨཱདི, ཏེན ‘‘ཨནུཏྟརེསུ ཝིམོཀྑེསུ པིཧཾ ཨུཔཊྛཱཔཡཏོ’’ཏི ཨེཏྠ ཝུཏྟསིནེཧཱདཡོ ཝིཡ ཨཱརཉྙཀེསུ སེནཱསནེསུ སཱལཡཏཱ སེཝིཏབྦཔཀྑིཡཱ ཨེཝཱཏི དསྶེཏི.

ཨཏྟནཱཝཱཏི ¶ ¶ སཡམེཝ, ཏེན པརེཧི ཨནུསྶཱཧིཏཱནཾ སརསེནེཝ ཨནཱགཏཱནཾ པེསལཱནཾ བྷིཀྑཱུནཾ ཨཱགམནཾ, ཨཱགཏཱནཉྩ ཕཱསུཝིཧཱརཾ པཙྩཱསིསནྟཱིཏི དསྶེཏི. ཨིམིནཱ ནཱིཧཱརེནཱཏི ཨིམཱཡ པཊིཔཏྟིཡཱ. ཨགྒཧིཏདྷམྨགྒཧཎནྟི ¶ ཨགྒཧིཏསྶ པརིཡཏྟིདྷམྨསྶ ཨུགྒཧཎཾ. གཧིཏསཛ྄ཛྷཱཡཀརཎནྟི ཨུགྒཧིཏསྶ སུཊྛུ ཨཏྠཙིནྟནཾ. ཙིནྟནཏྠོ ཧི སཛ྄ཛྷཱཡསདྡོ.

ཨེནྟཱིཏི ཨུཔགཙྪནྟི. ནིསཱིདནྟི ཨཱསནཔཉྙཱཔནཱདིནཱ.

༡༣༧. ཨཱརམིཏབྦཊྛེན ཀམྨཾ ཨཱརཱམོ. ཀམྨེ རཏཱ, ན གནྠདྷུརེ, ཝཱསདྷུརེ ཝཱཏི ཀམྨརཏཱ, ཨནུཡུཏྟཱཏི ཏཔྤརབྷཱཝེན པུནཔྤུནཾ པསུཏཱ. ཨིཏི ཀཱཏབྦཀམྨནྟི ཏཾ ཏཾ བྷིཀྑཱུནཾ ཀཱཏབྦཾ ཨུཙྩཱཝཙཀམྨཾ ཙཱིཝརཝིཙཱརཎཱདི. ཏེནཱཧ ‘‘སེཡྻཐིད’’ནྟིཨཱདི. ཨུཔཏྠམྦྷནནྟི དུཔཊྚཏིཔཊྚཱདིཀརཎཾ. ཏཉྷི པཋམཔཊལཱདཱིནཾ ཨུཔཏྠམྦྷནཀཱརཎཏྟཱ ཏཐཱ ཝུཏྟཾ. ཡདི ཨེཝཾ ཀཐཾ ཨཡཾ ཀམྨརཱམཏཱ པཊིཀྑིཏྟཱཏི ཨཱཧ ‘‘ཨེཀཙྩོ ཧཱི’’ཏིཨཱདི.

ཀརོནྟོ ཡེཝཱཏི ཡཐཱཝུཏྟཏིརཙྪཱནཀཐཾ ཀཐེནྟོཡེཝ. ཨཏིརཙྪཱནཀཐཱབྷཱཝེཔི ཏསྶ ཏཏྠ ཏཔྤརབྷཱཝདསྶནཏྠཾ ཨཝདྷཱརཎཝཙནཾ. པརིཡནྟཀཱརཱིཏི སཔརིཡནྟཾ ཀཏྭཱ ཝཏྟཱ. ‘‘པརིཡནྟཝཏིཾ ཝཱཙཾ བྷཱསིཏཱ’’ཏི (དཱི. ནི. ༡.༩, ༡༩༤) ཧི ཝུཏྟཾ. ཨཔྤབྷསྶོ ཝཱཏི པརིམིཏཀཐོཡེཝ ཨེཀནྟེན ཀཐེཏབྦསྶེཝ ཀཐནཏོ. སམཱཔཏྟིསམཱཔཛྫནཾ ཨརིཡོ ཏུཎྷཱིབྷཱཝོ.

ནིདྡཱཡཏིཡེཝཱཏི ¶ ནིདྡོཀྐམནེ ཨནཱདཱིནཝདསྶཱི ནིདྡཱཡཏིཡེཝ. ཨིརིཡཱཔཐཔརིཝཏྟནཱདིནཱ ན ནཾ ཝིནོདེཏི.

ཨེཝཾ སཾསཊྛོ ཝཱཏི ཝུཏྟནཡེན གཎསངྒཎིཀཱཡ སཾསཊྛོ ཨེཝ ཝིཧརཏི.

དུསྶཱིལཱ པཱཔིཙྪཱ ནཱམཱཏི སཡཾ ནིསྶཱིལཱ ཨསནྟགུཎསམྦྷཱཝནིཙྪཱཡ སམནྣཱགཏཏྟཱ པཱཔཱ ལཱམཀཱ ཨིཙྪཱ ཨེཏེསནྟི པཱཔིཙྪཱ.

པཱཔཔུགྒལེཧི མེཏྟིཀརཎཏོ པཱཔམིཏྟཱ. ཏེཧི སདཱ སཧ པཝཏྟནེན པཱཔསཧཱཡཱ. ཏཏྠ ནིནྣཏཱདིནཱ ཏདདྷིམུཏྟཏཱཡ པཱཔསམྤཝངྐཱ.

༡༣༨. སདྡྷཱ ཨེཏེསཾ ཨཏྠཱིཏི སདྡྷཱཏི ཨཱཧ ‘‘སདྡྷཱསམྤནྣཱ’’ཏི. ཨཱགམནཱིཡཔཊིཔདཱཡ ཨཱགཏསདྡྷཱ ¶ ཨཱགམནཱིཡསདྡྷཱ, སཱ སཱཏིསཡཱ མཧཱབོདྷིསཏྟཱནཾ པརོཔདེསེན ཝིནཱ སདྡྷེཡྻཝཏྠུཾ ཨཝིཔརཱིཏཏོ ཨོགཱཧེཏྭཱ ¶ ཨདྷིམུཙྩནཏོཏི ཨཱཧ ‘‘སབྦཉྙུབོདྷིསཏྟཱནཾ ཧོཏཱི’’ཏི. སཙྩཔཊིཝེདྷཏོ ཨཱགཏསདྡྷཱ ཨདྷིགམསདྡྷཱ སུརབནྡྷཱདཱིནཾ (དཱི. ནི. ཨཊྛ. ༣.༡༡༨; དྷ. པ. ཨཊྛ. ༡.སུཔྤབུདྡྷཀུཊྛིཝཏྠུ; ཨུདཱ. ཨཊྛ. ༤༣) ཝིཡ. ‘‘སམྨཱསམྦུདྡྷོ བྷགཝཱ’’ཏིཨཱདིནཱ བུདྡྷཱདཱིསུ ཨུཔྤཛྫནཀཔསཱདོ པསཱདསདྡྷཱ མཧཱཀཔྤིནརཱཛཱདཱིནཾ (ཨ. ནི. ཨཊྛ. ༡.༡.༢༣༡; དྷ. པ. ཨཊྛ. ༡.མཧཱཀཔྤིནཏྠེརཝཏྠུ; ཐེརགཱ. ཨཊྛ. ༢.མཧཱཀཔྤིནཏྠེརགཱཐཱཝཎྞནཱ, ཝིཏྠཱརོ) ཝིཡ. ‘‘ཨེཝམེཏ’’ནྟི ཨོཀྐནྟིཏྭཱ པཀྑནྡིཏྭཱ སདྡཧནཝསེན ཀཔྤནཾ ཨོཀཔྤནཾ. དུཝིདྷཱཔཱིཏི པསཱདསདྡྷཱཔི ཨོཀཔྤནསདྡྷཱཔི. ཏཏྠ པསཱདསདྡྷཱ ཨཔརནེཡྻརཱུཔཱ ཧོཏི སཝནམཏྟེན པསཱིདནཏོ. ཨོཀཔྤནསདྡྷཱ སདྡྷེཡྻཝཏྠུཾ ཨོགཱཧེཏྭཱ ཨནུཔཝིསིཏྭཱ ‘‘ཨེཝམེཏ’’ནྟི པཙྩཀྑཾ ཀརོནྟཱི ཝིཡ པཝཏྟཏི. ཏེནཱཧ ‘‘སདྡྷཱདྷིམུཏྟོ ཝཀྐལིཏྠེརསདིསོ ཧོཏཱི’’ཏི. ཏསྶ ཧཱིཏི ཨོཀཔྤནསདྡྷཱཡ སམནྣཱགཏསྶ. ཧིརཱི ཨེཏསྶ ཨཏྠཱིཏི ཧིརི, ཧིརི མནོ ཨེཏེསནྟི ཧིརིམནཱཏི ཨཱཧ ‘‘པཱཔ…པེ… ཙིཏྟཱ’’ཏི. པཱཔཏོ ཨོཏྟཔྤེནྟི ཨུབྦིཛྫནྟི བྷཱཡནྟཱིཏི ཨོཏྟཔྤཱི.

བཧུ སུཏཾ སུཏྟགེཡྻཱདི ཨེཏེནཱཏི བཧུསྶུཏོ, སུཏགྒཧཎཾ ཙེཏྠ ནིདསྶནམཏྟཾ དྷཱརཎཔརིཙཡཔརིཔུཙྪཱནུཔེཀྑནདིཊྛིནིཛ྄ཛྷཱནཱནཾ ¶ པེཏྠ ཨིཙྪིཏབྦཏྟཱ. སཝནམཱུལཀཏྟཱ ཝཱ ཏེསམྤི ཏགྒཧཎེནེཝ གཧཎཾ དཊྛབྦཾ. ཨཏྠཀཱམེན པརིཡཱཔུཎིཏབྦཏོ, དིཊྛདྷམྨིཀཱདིཔུརིསཏྠསིདྡྷིཡཱ པརིཡཏྟབྷཱཝཏོ ཙ པརིཡཏྟི, ཏཱིཎི པིཊཀཱནི. སཙྩཔྤཊིཝེདྷོ སཙྩཱནཾ པཊིཝིཛ྄ཛྷནཾ. ཏདཔི བཱཧུསཙྩཾ ཡཐཱཝུཏྟབཱཧུསཙྩཀིཙྩནིཔྥཏྟིཏོ. པརིཡཏྟི ཨདྷིཔྤེཏཱ སཙྩཔཊིཝེདྷཱཝཧེན བཱཧུསཙྩེན བཧུསྶུཏབྷཱཝསྶ ཨིདྷ ཨིཙྪིཏཏྟཱ. སོཏི པརིཡཏྟིབཧུསྶུཏོ. ཙཏུབྦིདྷོ ཧོཏི པཉྩམསྶ པཀཱརསྶ ཨབྷཱཝཏོ. སབྦཏྠཀབཧུསྶུཏོཏི ནིསྶཡམུཙྩནཀབཧུསྶུཏཱདཡོ ཝིཡ པདེསིཀོ ཨཧུཏྭཱ པིཊཀཏྟཡེ སབྦཏྠཀམེཝ བཱཧུསཙྩསབྦྷཱཝཏོ སབྦསྶ ཨཏྠསྶ ཀཱཡནཏོ ཀཐནཏོ སབྦཏྠཀབཧུསྶུཏོ. ཏེ ཨིདྷ ཨདྷིཔྤེཏཱ པཊིཔཏྟིཔཊིཝེདྷསདྡྷམྨཱནཾ མཱུལབྷཱུཏེ པརིཡཏྟིསདྡྷམྨེ སུཔྤཏིཊྛིཏབྷཱཝཏོ.

ཨཱརདྡྷནྟི པགྒཧིཏཾ. ཏཾ པན དུཝིདྷམྤི ཝཱིརིཡཱརམྦྷཝིབྷཱགེན དསྶེཏུཾ ‘‘ཏཏྠཱ’’ཏིཨཱདི ཝུཏྟཾ. ཏཏྠ ཨེཀཀཱཏི ཨེཀཱཀིནོ, ཝཱུཔཀཊྛཝིཧཱརིནོཏི ཨཏྠོ.

པུཙྪིཏྭཱཏི ¶ པརཏོ པུཙྪིཏྭཱ. སམྤཊིཙྪཱཔེཏུནྟི ‘‘ཏྭཾ ཨསུཀནཱམོ’’ཏི ཝཏྭཱ ཏེཧི ‘‘ཨཱམཱ’’ཏི པཊིཛཱནཱཔེཏུནྟི ཨཏྠོ. ཨེཝཾ ཙིརཀཏཱདིཨནུསྶརཎསམཏྠསཏིནེཔཀྐཱནཾ ཨཔྤཀསིརེནེཝ ¶ སཏིསམྦོཛ྄ཛྷངྒབྷཱཝནཱཔཱརིཔཱུརིཾ གཙྪཏཱིཏི དསྶནཏྠཾ ‘‘ཨེཝརཱུཔེ བྷིཀྑཱུ སནྡྷཱཡཱ’’ཏི ཝུཏྟཾ. ཏེནེཝཱཧ ‘‘ཨཔིཙཱ’’ཏིཨཱདི.

༡༣༩. བུཛ྄ཛྷཏི ཨེཏཱཡཱཏི ‘‘བོདྷཱི’’ཏི ལདྡྷནཱམཱཡ སམྨཱདིཊྛིཨཱདིདྷམྨསཱམགྒིཡཱ ཨངྒོཏི བོཛ྄ཛྷངྒོ, པསཏྠོ, སུནྡརོ ཝཱ བོཛ྄ཛྷངྒོ སམྦོཛ྄ཛྷངྒོ. ཨུཔཊྛཱནལཀྑཎོཏི ཀཱཡཝེདནཱཙིཏྟདྷམྨཱནཾ ཨསུབྷདུཀྑཱནིཙྩཱནཏྟབྷཱཝསལླཀྑཎསངྑཱཏཾ ཨཱརམྨཎེ ཨུཔཊྛཱནཾ ལཀྑཎཾ ཨེཏསྶཱཏི ཨུཔཊྛཱནལཀྑཎོ. ཙཏུནྣཾ ཨརིཡསཙྩཱནཾ པཱིལ༹ནཱདིཔྤཀཱརཏོ ཝིཙཡོ ཨུཔཔརིཀྑཱ ལཀྑཎཾ ཨེཏསྶཱཏི པཝིཙཡལཀྑཎོ. ཨནུཔྤནྣཱ ཀུསལཱནུཔྤཱདནཱདིཝསེན ཙིཏྟསྶ ¶ པགྒཧོ པགྒཎྷནཾ ལཀྑཎཾ ཨེཏསྶཱཏི པགྒཧལཀྑཎོ. ཕརཎཾ ཝིཔྥཱརིཀཏཱ ལཀྑཎཾ ཨེཏསྶཱཏི ཕརཎལཀྑཎོ. ཨུཔསམོ ཀཱཡཙིཏྟཔརིལཱ༹ཧཱནཾ ཝཱུཔསམནཾ ལཀྑཎཾ ཨེཏསྶཱཏི ཨུཔསམལཀྑཎོ. ཨཝིཀྑེཔོ ཝིཀྑེཔཝིདྡྷཾསནཾ ལཀྑཎཾ ཨེཏསྶཱཏི ཨཝིཀྑེཔལཀྑཎོ. ལཱིནུདྡྷཙྩརཧིཏེ ཨདྷིཙིཏྟེ པཝཏྟམཱནེ པགྒཧནིགྒཧསམྤཧཾསནེསུ ཨབྱཱཝཊཏྟཱ ཨཛ྄ཛྷུཔེཀྑནཾ པཊིསངྑཱནཾ ལཀྑཎཾ ཨེཏསྶཱཏི པཊིསངྑཱནལཀྑཎོ.

ཙཏཱུཧི ཀཱརཎེཧཱིཏི སཏིསམྤཛཉྙཾ, མུཊྛསྶཏིཔུགྒལཔརིཝཛྫནཱ, ཨུཔཊྛིཏསྶཏིཔུགྒལསེཝནཱ, ཏདདྷིམུཏྟཏཱཏི ཨིམེཧི ཙཏཱུཧི ཀཱརཎེཧི. ཚཧི ཀཱརཎེཧཱིཏི པརིཔུཙྪཀཏཱ, ཝཏྠུཝིསདཀིརིཡཱ, ཨིནྡྲིཡསམཏྟཔཊིཔཱདནཱ, དུཔྤཉྙཔུགྒལཔརིཝཛྫནཱ, པཉྙཝནྟཔུགྒལསེཝནཱ, ཏདདྷིམུཏྟཏཱཏི ཨིམེཧི ཚཧི ཀཱརཎེཧི. མཧཱསཏིཔཊྛཱནཝཎྞནཱཡཾ པན ‘‘སཏྟཧི ཀཱརཎེཧཱི’’ (དཱི. ནི. ཨཊྛ. ༢.༣༨༥; མ. ནི. ཨཊྛ. ༡.༡༡༨) ཝཀྑཏི, ཏཾ གམྦྷཱིརཉཱཎཙརིཡཱཔཙྩཝེཀྑཎཱཏི ཨིམཾ ཀཱརཎཾ པཀྑིཔིཏྭཱ ཝེདིཏབྦཾ. ནཝཧི ཀཱརཎེཧཱིཏི ཨཔཱཡབྷཡཔཙྩཝེཀྑཎཱ, གམནཝཱིཐིཔཙྩཝེཀྑཎཱ, པིཎྜཔཱཏསྶ ཨཔཙཱཡནཏཱ, དཱཡཛྫམཧཏྟཔཙྩཝེཀྑཎཱ, སཏྠུམཧཏྟཔཙྩཝེཀྑཎཱ, སབྲཧྨཙཱརཱིམཧཏྟཔཙྩཝེཀྑཎཱ, ཀུསཱིཏཔུགྒལཔརིཝཛྫནཱ, ཨཱརདྡྷཝཱིརིཡཔུགྒལསེཝནཱ, ཏདདྷིམུཏྟཏཱཏི ཨིམེཧི ནཝཧི ཀཱརཎེཧི. མཧཱསཏིཔཊྛཱནཝཎྞནཱཡཾ (དཱི. ནི. ཨཊྛ. ༢.༣༨༥; མ. ནི. ཨཊྛ. ༡.༡༡༨) པན ¶ ཨཱནིསཾསདསྶཱཝིཏཱ, ཛཱཏིམཧཏྟཔཙྩཝེཀྑཎཱཏི ཨིམེཧི སདྡྷིཾ ‘‘ཨེཀཱདསཱ’’ཏི ཝཀྑཏི. དསཧི ཀཱརཎེཧཱིཏི བུདྡྷཱནུསྶཏི, དྷམྨཱནུསྶཏི, སངྒྷསཱིལཙཱགདེཝཏཱཨུཔསམཱནུསྶཏི, ལཱུཁཔུགྒལཔརིཝཛྫནཱ, སིནིདྡྷཔུགྒལསེཝནཱ, ཏདདྷིམུཏྟཏཱཏི ཨིམེཧི དསཧི. མཧཱསཏིཔཊྛཱནཝཎྞནཱཡཾ (དཱི. ནི. ཨཊྛ. ༢.༣༨༥; མ. ནི. ཨཊྛ. ༡.༡༡༨) པན པསཱདནིཡསུཏྟནྟཔཙྩཝེཀྑཎཱཡ སདྡྷིཾ ‘‘ཨེཀཱདསཱ’’ཏི ཝཀྑཏི. སཏྟཧི ཀཱརཎེཧཱིཏི པཎཱིཏབྷོཛནསེཝནཏཱ ¶ , ཨུཏུསུཁསེཝནཏཱ, ཨིརིཡཱཔཐསུཁསེཝནཏཱ, མཛ྄ཛྷཏྟཔཡོགཏཱ, སཱརདྡྷཀཱཡཔུགྒལཔརིཝཛྫནཏཱ ¶ , པསྶདྡྷཀཱཡཔུགྒལསེཝནཏཱ, ཏདདྷིམུཏྟཏཱཏི ཨིམེཧི སཏྟཧི. དསཧི ཀཱརཎེཧཱིཏི ཝཏྠུཝིསདཀིརིཡཱ, ཨིནྡྲིཡསམཏྟཔཊིཔཱདནཱ, ནིམིཏྟཀུསལཏཱ, སམཡེ ཙིཏྟསྶ པགྒཧཎཾ, སམཡེ ཙིཏྟསྶ ནིགྒཧཎཾ, སམཡེ ཙིཏྟསྶ སམྤཧཾསནཾ, སམཡེ ཙིཏྟསྶ ཨཛ྄ཛྷུཔེཀྑནཾ, ཨསམཱཧིཏཔུགྒལཔརིཝཛྫནཾ, སམཱཧིཏཔུགྒལསེཝནཾ, ཏདདྷིམུཏྟཏཱཏི ཨིམེཧི དསཧི ཀཱརཎེཧི. མཧཱསཏིཔཊྛཱནཝཎྞནཱཡཾ (དཱི. ནི. ཨཊྛ. ༢.༣༨༥; མ. ནི. ཨཊྛ. ༡.༡༡༨) པན ‘‘ཛྷཱནཝིམོཀྑཔཙྩཝེཀྑཎཱ’’ཏི ཨིམིནཱ སདྡྷིཾ ‘‘ཨེཀཱདསཧཱི’’ཏི ཝཀྑཏི. པཉྩཧི ཀཱརཎེཧཱིཏི སཏྟམཛ྄ཛྷཏྟཏཱ, སངྑཱརམཛ྄ཛྷཏྟཏཱ, སཏྟསངྑཱརཀེལཱཡནཔུགྒལཔརིཝཛྫནཱ, སཏྟསངྑཱརམཛ྄ཛྷཏྟཔུགྒལསེཝནཱ, ཏདདྷིམུཏྟཏཱཏི ཨིམེཧི པཉྩཧི ཀཱརཎེཧི. ཡཾ པནེཏྠ ཝཏྟབྦཾ, ཏཾ མཧཱསཏིཔཊྛཱནཝཎྞནཱཡཾ (དཱི. ནི. ཨཊྛ. ༢.༣༨༥; མ. ནི. ཨཊྛ. ༡.༡༡༨) ཨཱགམིསྶཏི. ཀཱམཾ བོདྷིཔཀྑིཡདྷམྨཱ ནཱམ ནིཔྤརིཡཱཡཏོ ཨརིཡམགྒསམྤཡུཏྟཱ ཨེཝ ནིཡྻཱནིཀབྷཱཝཏོ. སུཏྟནྟདེསནཱ ནཱམ པརིཡཱཡཀཐཱཏི ‘‘ཨིམིནཱ ཝིཔསྶནཱ…པེ… ཀཐེསཱི’’ཏི ཝུཏྟཾ.

༡༤༠. ཏེབྷཱུམཀེ སངྑཱརེ ‘‘ཨནིཙྩཱ’’ཏི ཨནུཔསྶཏི ཨེཏཱཡཱཏི ཨནིཙྩཱནུཔསྶནཱ, ཏཐཱ པཝཏྟཱ ཝིཔསྶནཱ, སཱ པན ཡསྨཱ ཨཏྟནཱ སཧགཏསཉྙཱཡ བྷཱཝིཏཱཡ ཝིབྷཱཝིཏཱ ཨེཝ ཧོཏཱིཏི ཝུཏྟཾ ‘‘ཨནིཙྩཱནུཔསྶནཱཡ སདྡྷིཾ ཨུཔྤནྣསཉྙཱ’’ཏི. སཉྙཱསཱིསེན ཝཱཡཾ ཝིཔསྶནཱཡ ཨེཝ ནིདྡེསོ. ཨནཏྟསཉྙཱདཱིསུཔི ཨེསེཝ ནཡོ. ལོཀིཡཝིཔསྶནཱཔི ཧོནྟི, ཡསྨཱ ‘‘ཨནིཙྩ’’ནྟིཨཱདིནཱ ཏཱ པཝཏྟནྟཱིཏི. ལོཀིཡཝིཔསྶནཱཔཱིཏི པི-སདྡེན མིསྶཀཱཔེཏྠ སནྟཱིཏི ཨཏྠཏོ ཨཱཔནྣནྟི ཨཏྠཱཔཏྟིསིདྡྷམཏྠཾ ནིདྡྷཱརེཏྭཱ སརཱུཔཏོ དསྶེཏུཾ ‘‘ཝིརཱགོ’’ཏིཨཱདི ཝུཏྟཾ. ཏཏྠ ཨཱགཏཝསེནཱཏི ཏཐཱ ཨཱགཏཔཱལི༹ཝསེན ‘‘ཝིརཱགོ ནིརོདྷོ’’ཏི ཧི ཏཏྠ ¶ ནིབྦཱནཾ ཝུཏྟནྟི ཨིདྷ ¶ ‘‘ཝིརཱགསཉྙཱ, ནིརོདྷསཉྙཱ’’ཏི ཝུཏྟསཉྙཱ ནིབྦཱནཱརམྨཎཱཔི སིཡུཾ. ཏེན ཝུཏྟཾ ‘‘དྭེ ལོཀུཏྟརཱཔི ཧོནྟཱི’’ཏི.

༡༤༡. མེཏྟཱ ཨེཏསྶ ཨཏྠཱིཏི མེཏྟཾ, ཙིཏྟཾ. ཏཾསམུཊྛཱནཾ ཀཱཡཀམྨཾ མེཏྟཾ ཀཱཡཀམྨཾ. ཨེས ནཡོ སེསདྭཡེཔི. ཨིམཱནིཔི མེཏྟཱཀཱཡཀམྨཱདཱིནི བྷིཀྑཱུནཾ ཝསེན ཨཱགཏཱནི ཏེསཾ སེཊྛཔརིསབྷཱཝཏོ. ཡཐཱ པན བྷིཀྑཱུསུཔི ལབྦྷནྟི, ཨེཝཾ གིཧཱིསུཔི ལབྦྷནྟི ཙཏུཔརིསསཱདྷཱརཎཏྟཱཏི ཏཾ དསྶེནྟོ ‘‘བྷིཀྑཱུནཉྷཱི’’ཏིཨཱདིམཱཧ. ཀཱམཾ ཨཱདིབྲཧྨཙརིཡཀདྷམྨསྶཝནེནཔི མེཏྟཱཀཱཡཀམྨཱནི ལབྦྷནྟི, ནིཔྤརིཡཱཡཏོ པན ཙཱརིཏྟདྷམྨསྶཝནེན ཨཡམཏྠོ ཨིཙྪིཏོཏི དསྶེནྟོ ‘‘ཨཱབྷིསམཱཙཱརིཀདྷམྨཔཱུརཎ’’ནྟི ཨཱཧ. ཏེཔིཊཀམྤི བུདྡྷཝཙནཾ པརིཔུཙྪནཨཏྠཀཐནཝསེན པཝཏྟིཡམཱནཾ ཧིཏཛ྄ཛྷཱསཡེན པཝཏྟིཏབྦཏོ.

ཨཱཝཱིཏི ¶ པཀཱསཾ, པཀཱསབྷཱཝོ ཙེཏྠ ཡཾ ཨུདྡིསྶ ཏཾ ཀཱཡཀམྨཾ ཀརཱིཡཏི, ཏསྶ སམྨུཁབྷཱཝཏོཏི ཨཱཧ ‘‘སམྨུཁཱ’’ཏི. རཧོཏི ཨཔྤཀཱསཾ, ཨཔྤཀཱསཏཱ ཙ ཡཾ ཨུདྡིསྶ ཏཾ ཀཱཡཀམྨཾ ཀརཱིཡཏི, ཏསྶ པཙྩཀྑཱབྷཱཝཏོཏི ཨཱཧ ‘‘པརམྨུཁཱ’’ཏི. སཧཱཡབྷཱཝགམནཾ ཏེསཾ པུརཏོ. ཨུབྷཡེཧཱིཏི ནཝཀེཧི, ཐེརེཧི ཙ.

པགྒཡ྄ཧཱཏི པགྒཎྷིཏྭཱ ཨུཙྩཾ ཀཏྭཱ.

ཀཱམཾ མེཏྟཱསིནེཧསིནིདྡྷཱནཾ ནཡནཱནཾ ཨུམྨཱིལནཱ, པསནྣེན མུཁེན ཨོལོཀནཉྩ མེཏྟཾ ཀཱཡཀམྨམེཝ, ཡསྶ པན ཙིཏྟསྶ ཝསེན ནཡནཱནཾ མེཏྟཱསིནེཧསིནིདྡྷཏཱ, མུཁསྶ ཙ པསནྣཏཱ, ཏཾ སནྡྷཱཡ ཝུཏྟཾ ‘‘མེཏྟཾ མནོཀམྨཾ ནཱམཱ’’ཏི.

ལཱབྷསདྡོ ཀམྨསཱདྷནོ ‘‘ལཱབྷཱཝཏ, ལཱབྷོ ལདྡྷོ’’ཏིཨཱདཱིསུ ཝིཡ, སོ ཙེཏྠ ‘‘དྷམྨལདྡྷཱ’’ཏི ཝཙནཏོ ཨཏཱིཏཀཱལིཀོཏི ཨཱཧ ‘‘ཙཱིཝརཱདཡོ ལདྡྷཔཙྩཡཱ’’ཏི. དྷམྨཏོ ¶ ཨཱགཏཱཏི དྷམྨིཀཱ. ཏེནཱཧ ‘‘དྷམྨལདྡྷཱ’’ཏི. ཨིམམེཝ ཧི ཨཏྠཾ དསྶེཏུཾ ‘‘ཀུཧནཱདཱི’’ཏིཨཱདི ཝུཏྟཾ. ཙིཏྟེན ཝིབྷཛནཔུབྦཀཾ ཀཱཡེན ཝིབྷཛནནྟི མཱུལམེཝ དསྶེཏུཾ ‘‘ཨེཝཾ ཙིཏྟེན ཝིབྷཛན’’ནྟི ཝུཏྟཾ, ཏེན ཙིཏྟུཔྤཱདམཏྟེནཔི པཊིཝིབྷཱགོ ན ཀཱཏབྦོཏི དསྶེཏི. ཨཔྤཊིཝིབྷཏྟནྟི བྷཱཝནཔུཾསཀནིདྡེསོ, ཨཔྤཊིཝིབྷཏྟཾ ཝཱ ལཱབྷཾ བྷུཉྫཏཱིཏི ཀམྨནིདྡེསོ ཨེཝ.

ཏཾ ¶ ཏཾ ནེཝ གིཧཱིནཾ དེཏི ཨཏྟནོ ཨཱཛཱིཝསོདྷནཏྠཾ. ན ཨཏྟནཱ བྷུཉྫཏཱིཏི ཨཏྟནཱཝ ན པརིབྷུཉྫཏི ‘‘མཡ྄ཧཾ ཨསཱདྷཱརཎབྷོགིཏཱ མཱ ཧོཏཱུ’’ཏི. ‘‘པཊིགྒཎྷནྟོ ཙ…པེ… པསྶཏཱི’’ཏི ཨིམིནཱ ཏསྶ ལཱབྷསྶ ཏཱིསུཔི ཀཱལེསུ སཱདྷཱརཎཏོ ཋཔནཾ དསྶིཏཾ. ‘‘པཊིགྒཎྷནྟོ ཙ སངྒྷེན སཱདྷཱརཎཾ ཧོཏཱུ’’ཏི ཨིམིནཱ པཊིགྒཧཎཀཱལོ དསྶིཏོ, ‘‘གཧེཏྭཱ…པེ… པསྶཏཱི’’ཏི ཨིམིནཱ པཊིགྒཧིཏཀཱལོ, ཏདུབྷཡཾ པན ཏཱདིསེན པུབྦཱབྷོགེན ཝིནཱ ན ཧོཏཱིཏི ཨཏྠསིདྡྷོ པུརིམཀཱལོ. ཏཡིདཾ པཊིགྒཧཎཏོ པུབྦེ ཝསྶ ཧོཏི ‘‘སངྒྷེན སཱདྷཱརཎཾ ཧོཏཱུཏི པཊིགྒཧེསྶཱམཱི’’ཏི. པཊིགྒཎྷནྟསྶ ཧོཏི ‘‘སངྒྷེན སཱདྷཱརཎཾ ཧོཏཱུཏི པཊིགྒཎྷཱམཱི’’ཏི. པཊིགྒཧེཏྭཱ ཧོཏི ‘‘སངྒྷེན སཱདྷཱརཎཾ ཧོཏཱུཏི པཊིགྒཧིཏཾ མཡཱ’’ཏི ཨེཝཾ ཏིལཀྑཎསམྤནྣཾ ཀཏྭཱ ལདྡྷལཱབྷཾ ཨོསཱནལཀྑཎཾ ཨཝིཀོཔེཏྭཱ པརིབྷུཉྫནྟོ སཱདྷཱརཎབྷོགཱི, ཨཔྤཊིཝིབྷཏྟབྷོགཱི ཙ ཧོཏི.

ཨིམཾ པན སཱརཎཱིཡདྷམྨནྟི ཨིམཾ ཙཏུཏྠཾ སརིཏབྦཡུཏྟདྷམྨཾ. ན ཧི…པེ… གཎྷནྟི, ཏསྨཱ ¶ སཱདྷཱརཎབྷོགིཏཱ ཨེཝ དུསྶཱིལསྶ ནཏྠཱིཏི ཨཱརམྦྷོཔི ཏཱཝ ན སམྦྷཝཏི, ཀུཏོ པཱུརཎནྟི ཨདྷིཔྤཱཡོ. ‘‘པརིསུདྡྷསཱིལོ’’ཏི ཨིམིནཱ ལཱབྷསྶ དྷམྨིཀབྷཱཝཾ དསྶེཏི. ‘‘ཝཏྟཾ ཨཁཎྜེནྟོ’’ཏི ཨིམིནཱ ཨཔྤཊིཝིབྷཏྟབྷོགིཏཾ, སཱདྷཱརཎབྷོགིཏཉྩ དསྶེཏི. སཏི པན ཏདུབྷཡེ སཱརཎཱིཡདྷམྨོ པཱུརིཏོ ཨེཝ ཧོཏཱིཏི ཨཱཧ ‘‘པཱུརེཏཱི’’ཏི. ‘‘ཨོདིསྶཀཾ ¶ ཀཏྭཱ’’ཏི ཨེཏེན ཨནོདིསྶཀཾ ཀཏྭཱ པིཏུནོ, ཨཱཙརིཡུཔཛ྄ཛྷཱཡཱདཱིནཾ ཝཱ ཐེརཱསནཏོ པཊྛཱཡ དེནྟསྶ སཱརཎཱིཡདྷམྨོཡེཝ ཧོཏཱིཏི. སཱརཎཱིཡདྷམྨོ པནསྶ ན ཧོཏཱིཏི པཊིཛགྒནཊྛཱནེ ཨོདིསྶཀཾ ཀཏྭཱ དིནྣཏྟཱ. ཏེནཱཧ ‘‘པལིབོདྷཛགྒནཾ ནཱམ ཧོཏཱི’’ཏིཨཱདི. ཡདི ཨེཝཾ སབྦེན སབྦཾ སཱརཎཱིཡདྷམྨཔཱུརཀསྶ ཨོདིསྶཀདཱནཾ ན ཝཊྚཏཱིཏི? ནོ ན ཝཊྚཏི ཡུཏྟཊྛཱནེཏི དསྶེནྟོ ‘‘ཏེན པནཱ’’ཏིཨཱདིམཱཧ. གིལཱནཱདཱིནཾ ཨོདིསྶཀཾ ཀཏྭཱ དཱནཾ ཨཔྤཊིཝིབྷཱགཔཀྑིཀཾ ‘‘ཨསུཀསྶ ན དསྶཱམཱི’’ཏི པཊིཀྑེཔསྶ ཨབྷཱཝཏོ. བྱཏིརེཀཔྤདྷཱནོ ཧི པཊིཝིབྷཱགོ. ཏེནཱཧ ‘‘ཨཝསེས’’ནྟིཨཱདི. ཨདཱཏུམྤཱིཏི པི-སདྡེན དཱཏུམྤི ཝཊྚཏཱིཏི དསྶེཏི, ཏཉྩ ཁོ ཀརུཎཱཡནཝསེན, ན ཝཏྟཔཱུརཎཝསེན.

སུསིཀྑིཏཱཡཱཏི སཱརཎཱིཡདྷམྨཔཱུརཎཝིདྷིམྷི སུཊྛུ སིཀྑིཏཱཡ, སུཀུསལཱཡཱཏི ཨཏྠོ. ཨིདཱནི ཏསྶཱ ཀོསལླཾ དསྶེཏུཾ ‘‘སུསིཀྑིཏཱཡ ཧཱི’’ཏིཨཱདི ¶ ཝུཏྟཾ. ‘‘དྭཱདསཧི ཝསྶེཧི པཱུརཏི, ན ཏཏོ ཨོར’’ནྟི ཨིམིནཱ ཏསྶ དུཔྤཱུརཎཾ དསྶེཏི. ཏཐཱ ཧི སོ མཧཔྥལོ མཧཱནིསཾསོ, དིཊྛདྷམྨིཀེཧིཔི ཏཱཝ གརུཏརེཧི ཕལཱནིསཾསེཧི ཙ ཨནུགཏོ. ཏཾསམངྒཱི ཙ པུགྒལོ ཝིསེསལཱབྷཱི ཨརིཡཔུགྒལོ ཝིཡ ལོཀེ ཨཙྪརིཡབྦྷུཏདྷམྨསམནྣཱགཏོ ཧོཏི. ཏཐཱ ཧི སོ དུཔྤཛཧཾ དཱནམཡསྶ, སཱིལམཡསྶ ཙ པུཉྙསྶ པཊིཔཀྑདྷམྨཾ སུདཱུརེ ཝིཀྑམྦྷིཏཾ ཀཏྭཱ སུཝིསུདྡྷེན ཙེཏསཱ ལོཀེ པཱཀཊོ པཉྙཱཏོ ཧུཏྭཱ ཝིཧརཏི, ཏསྶིམམཏྠཾ བྱཏིརེཀཏོ, ཨནྭཡཏོ ཙ ཝིབྷཱཝེཏུཾ ‘‘སཙེ ཧཱི’’ཏིཨཱདི ཝུཏྟཾ, ཏཾ སུཝིཉྙེཡྻམེཝ.

ཨིདཱནི ཡེ སམྤརཱཡིཀེ, དིཊྛདྷམྨིཀེ ཙ ཨཱནིསཾསེ དསྶེཏུཾ ‘‘ཨེཝ’’ནྟིཨཱདི ཝུཏྟཾ. ནེཝ ཨིསྶཱ, ན མཙྪརིཡཾ ཧོཏི ཙིརཀཱལབྷཱཝནཱཡ ཝིདྷུཏབྷཱཝཏོ. མནུསྶཱནཾ པིཡོ ཧོཏི པརིཙྩཱགསཱིལཏཱཡ ཝིསུདྡྷཏྟཱ. ཏེནཱཧ ‘‘དདཾ པིཡོ ཧོཏི བྷཛནྟི ནཾ བཧཱུ’’ཏིཨཱདི ¶ (ཨ. ནི. ༥.༣༤). སུལབྷཔཙྩཡོ ཧོཏི དཱནཝསེན ཨུལཱ༹རཛ྄ཛྷཱསཡཱནཾ པཙྩཡལཱབྷསྶ ཨིདྷཱནིསཾསབྷཱཝཏོ དཱནསྶ. པཏྟགཏཾ ཨསྶ དིཡྻམཱནཾ ན ཁཱིཡཏི པཏྟགཏཝསེན དྭཱདསཝསྶིཀསྶ མཧཱཔཏྟསྶ ཨཝིཙྪེདེན པཱུརིཏཏྟཱ. ཨགྒབྷཎྜཾ ལབྷཏི དེཝསིཀཾ དཀྑིཎེཡྻཱནཾ ཨགྒཏོ པཊྛཱཡ དཱནསྶ དིནྣཏྟཱ. བྷཡེཝཱ…པེ… ཨཱཔཛྫནྟི དེཡྻཔཊིགྒཱཧཀཝིཀཔྤཾ ¶ ཨཀཏྭཱ ཨཏྟནི ནིརཔེཀྑཙིཏྟེན ཙིརཀཱལཾ དཱནཔཱུརཏཱཡ པསཱདིཏཙིཏྟཏྟཱ.

ཏཏྲཱཏི ཏེསུ ཨཱནིསཾསེསུ ཝིབྷཱཝེཏབྦེསུ. ཨིམཱནི ཏཾ དཱིཔནཱནི ཝཏྠཱུནི ཀཱརཎཱནི. ཨལབྷནྟཱཔཱིཏི ཨམཧཱཔུཉྙཏཱཡ ན ལཱབྷིནོ སམཱནཱཔི. བྷིཀྑཱཙཱརམགྒསབྷཱགནྟི སབྷཱགཾ ཏབྦྷཱགིཡཾ བྷིཀྑཱཙཱརམགྒཾ ཛཱནནྟི.

ཨནུཏྟརིམནུསྶདྷམྨཏྟཱ, ཐེརཱནཾ སཾསཡཝིནོདནཏྠཉྩ ‘‘སཱརཎཱིཡདྷམྨོ མེ བྷནྟེ པཱུརིཏོ’’ཏི ཨཱཧ. ཏཐཱ ཧི དུཏིཡཝཏྠུསྨིམྤི ཐེརེན ཨཏྟཱ པཀཱསིཏོ. མནུསྶཱནཾ པིཡཏཱཡ, སུལབྷཔཙྩཡཏཱཡཔི ཨིདཾ ཝཏྠུམེཝ. པཏྟགཏཱཁཱིཡནསྶ པན ཝིསེསཾ ཝིབྷཱཝནཏོ ‘‘ཨིདཾ ཏཱཝ…པེ… ཨེཏྠ ཝཏྠུ’’ནྟི ཝུཏྟཾ.

གིརིབྷཎྜམཧཱཔཱུཛཱཡཱཏི ¶ ཙེཏིཡགིརིམྷི སཀལལངྐཱདཱིཔེ, ཡོཛནཔྤམཱཎེ སམུདྡེ ཙ ནཱཝཱསངྒྷཱཊཱདིཀེ ཋཔེཏྭཱ དཱིཔཔུཔྥགནྡྷཱདཱིཧི ཀརིཡམཱནམཧཱཔཱུཛཱཡཾ. པརིཡཱཡེནཔཱིཏི ལེསེནཔི. ཨནུཙྪཝིཀནྟི སཱརཎཱིཡདྷམྨཔཱུརཎཏོཔི ཨིདཾ ཡཐཱབྷཱུཏཔྤཝེདནཾ ཏུམྷཱཀཾ ཨནུཙྪཝིཀནྟི ཨཏྠོ.

ཨནཱརོཙེཏྭཱཝ པལཱཡིཾསུ ཙོརབྷཡེན. ‘‘ཨཏྟནོ དུཛྫཱིཝིཀཱཡཱ’’ཏི ཙ ཝདནྟི.

ཝཊྚིསྶཏཱིཏི ཀཔྤིསྶཏི. ཐེརཱི སཱརཎཱིཡདྷམྨཔཱུརིཀཱ ཨཧོསི, ཐེརསྶ པན སཱིལཏེཛེནེཝ དེཝཏཱ ཨུསྶུཀྐཾ ཨཱཔཛྫི.

ནཏྠི ¶ ཨེཏེསཾ ཁཎྜནྟི ཨཁཎྜཱནི. ཏཾ པན ནེསཾ ཁཎྜཾ དསྶེཏུཾ ‘‘ཡསྶཱ’’ཏིཨཱདི ཝུཏྟཾ. ཏཏྠ ཨུཔསམྤནྣསཱིལཱནཾ ཨུདྡེསཀྐམེན ཨཱདི ཨནྟཱ ཝེདིཏབྦཱ. ཏེནཱཧ ‘‘སཏྟསཱུ’’ཏིཨཱདི. ཨནུཔསམྤནྣསཱིལཱནཾ པན སམཱདཱནཀྐམེནཔི ཨཱདི ཨནྟཱ ལབྦྷནྟི. པརིཡནྟེ ཚིནྣསཱཊཀོ ཝིཡཱཏི ཝཏྠནྟེ, དསནྟེ ཝཱ ཚིནྣཝཏྠཾ ཝིཡ, ཝིསདིསཱུདཱཧརཎཾ ཙེཏཾ ‘‘ཨཁཎྜཱནཱི’’ཏི ཨིམསྶ ཨདྷིགཏཏྟཱ. ཨེཝཾ སེསཱནིཔི ཨུདཱཧརཎཱནི. ཁཎྜིཏབྷིནྣཏཱ ཁཎྜཾ, ཏཾ ཨེཏསྶ ཨཏྠཱིཏི ཁཎྜཾ, སཱིལཾ. ‘‘ཚིདྡ’’ནྟིཨཱདཱིསུཔི ཨེསེཝ ནཡོ. ཝེམཛ྄ཛྷེ བྷིནྣཾ ཝིནིཝིཛ྄ཛྷནཝསེན ཝིསབྷཱགཝཎྞེན གཱཝཱི ཝིཡཱཏི སམྦནྡྷོ. སབལརཧིཏཱནི ཨསབལཱནི. ཏཐཱ ཨཀམྨཱསཱནི. སཱིལསྶ ཏཎྷཱདཱསབྱཏོ མོཙནཾ ཝིཝཊྚཱུཔནིསྶཡབྷཱཝཱཔཱདནཾ. ཡསྨཱ ཙ ཏཾསམངྒཱིཔུགྒལོ སེརཱི སཡཾཝསཱི བྷུཛིསྶོ ནཱམ ཧོཏི, ཏསྨཱཔི བྷུཛིསྶཱནི. ཏེནེཝཱཧ ‘‘བྷུཛིསྶབྷཱཝཀཱརཎཏོ ¶ བྷུཛིསྶཱནཱི’’ཏི. སུཔརིསུདྡྷབྷཱཝེན པཱསཾསཏྟཱ ཝིཉྙུཔསཏྠཱནི. ཨིམིནཱཧཾ སཱིལེན དེཝོ ཝཱ བྷཝེཡྻཾ, དེཝཉྙཏརོ ཝཱ, ཏཏྠ ‘‘ནིཙྩོ དྷུཝོ སསྶཏོ’’ཏི, ‘‘སཱིལེན སུདྡྷཱི’’ཏི ཙ ཨེཝཾ ཨཱདིནཱ ཏཎྷཱདིཊྛཱིཧི ཨཔརཱམཊྛཏྟཱ. ‘‘ཨཡཾ ཏེ སཱིལེསུ དོསོ’’ཏི ཙཏཱུསུཔི ཝིཔཏྟཱིསུ ཡཱཡ ཀཱཡཙི ཝིཔཏྟིཡཱ དསྶནེན པརཱམཊྛུཾ ཨནུདྡྷཾསེཏུཾ. སམཱདྷིསཾཝཏྟནཔྤཡོཛནཱནི སམཱདྷིསཾཝཏྟནིཀཱནི.

སམཱནབྷཱཝཱུཔགཏསཱིལཱཏི སཱིལསམྤཏྟིཡཱ སམཱནབྷཱཝཾ ཨུཔགཏསཱིལཱ སབྷཱགཝུཏྟིཀཱ. ཀཱམཾ པུཐུཛྫནཱནཉྩ ཙཏུཔཱརིསུདྡྷིསཱིལེ ནཱནཏྟཾ ན སིཡཱ, ཏཾ ¶ པན ན ཨེཀནྟིཀཾ, ཨིདཾ ཨེཀནྟིཀཾ ནིཡཏབྷཱཝཏོཏི ཨཱཧ ‘‘ནཏྠི མགྒསཱིལེ ནཱནཏྟ’’ནྟི. ཏཾ སནྡྷཱཡེཏཾ ཝུཏྟནྟི མགྒསཱིལཾ སནྡྷཱཡ ཨེཏཾ ‘‘ཡཱནི ཏཱནི སཱིལཱནཱི’’ཏིཨཱདི ཝུཏྟཾ.

ཡཱཡནྟི ཡཱ ཨཡཾ མཡ྄ཧཉྩེཝ ཏུམྷཱཀཉྩ པཙྩཀྑབྷཱུཏཱ ¶ . དིཊྛཱིཏི མགྒསམྨཱདིཊྛི. ནིདྡོསཱཏི ནིདྷུཏདོསཱ, སམུཙྪིནྣརཱགཱདིཔཱཔདྷམྨཱཏི ཨཏྠོ. ནིཡྻཱཏཱིཏི ཝཊྚདུཀྑཏོ ནིསྶརཏི ནིགཙྪཏི. སཡཾ ནིཡྻནྟསྶེཝ ཧི ‘‘ཏཾསམངྒཱིཔུགྒལཾ ཝཊྚདུཀྑཏོ ནིཡྻཱཔེཏཱི’’ཏི ཝུཙྩཏི. ཡཱ སཏྠུ ཨནུསིཊྛི, ཏཾ ཀརོཏཱིཏི ཏཀྐརོ, ཏསྶ, ཡཐཱནུསིཊྛཾ པཊིཔཛྫནཀསྶཱཏི ཨཏྠོ. སམཱནདིཊྛིབྷཱཝནྟི སདིསདིཊྛིབྷཱཝཾ སཙྩསམྤཊིཝེདྷེན ཨབྷིནྣདིཊྛིབྷཱཝཾ. ཝུདྡྷིཡེཝཱཏི ཨརིཡཝིནཡེ གུཎེཧི ཝུཌྜྷིཡེཝ, ནོ པརིཧཱནཱིཏི ཨཡཾ ཨཔརིཧཱནིཡདྷམྨདེསནཱ ཨཏྟནོཔི སཱསནསྶ ཨདྡྷནིཡཏཾ ཨཱཀངྑནྟེན བྷགཝཏཱ ཨིདྷ དེསིཏཱ.

༡༤༢. ཨཱསནྣཔརིནིབྦཱནཏྟཱཏི ཀཏིཔཡམཱསཱདྷིཀེན སཾཝཙྪརམཏྟེན པརིནིབྦཱནཾ བྷཝིསྶཏཱིཏི ཀཏྭཱ ཝུཏྟཾ. ཨེཏཾཡེཝཱཏི ‘‘ཨིཏི སཱིལ’’ནྟིཨཱདིཀཾཡེཝ ཨིཏི སཱིལནྟི ཨེཏྠ ཨིཏི-སདྡོ པཀཱརཏྠོ, པརིམཱཎཏྠོ ཙ ཨེཀཛ྄ཛྷཾ ཀཏྭཱ གཧིཏོཏི ཨཱཧ ‘‘ཨེཝཾ སཱིལཾ ཨེཏྟཀཾ སཱིལ’’ནྟི. ཨེཝཾ སཱིལནྟི ཨེཝཾ པབྷེདཾ སཱིལཾ. ཨེཏྟཀནྟི ཨེཏཾ པརམཾ, ན ཨིཏོ བྷིཡྻོ. ཙཏུཔཱརིསུདྡྷིསཱིལནྟི མགྒསྶ སམྦྷཱརབྷཱུཏཾ ལོཀིཡཙཏུཔཱརིསུདྡྷིསཱིལཾ. ཙིཏྟེཀགྒཏཱ སམཱདྷཱིཏི ཨེཏྠཱཔི ཨེསེཝ ནཡོ. ཡསྨིཾ སཱིལེ ཋཏྭཱཏི ཡསྨིཾ ལོཀུཏྟརཀུསལསྶ པདཊྛཱནབྷཱུཏེ ‘‘པུབྦེཝ ཁོ པནསྶ ཀཱཡཀམྨཾ ཝཙཱིཀམྨཾ ཨཱཛཱིཝོ སུཔརིསུདྡྷོ ཧོཏཱི’’ཏི (མ. ནི. ༣.༤༣༡; ཀཐཱ. ༨༧༤) ཨེཝཾ ཝུཏྟསཱིལེ པཏིཊྛཱཡ. ཨེསོཏི མགྒཕལསམཱདྷི. པརིབྷཱཝིཏོཏི ཏེན སཱིལེན སབྦསོ བྷཱཝིཏོ སམྦྷཱཝིཏོ. མཧཔྥལོ ཧོཏི མཧཱནིསཾསོཏི མགྒསམཱདྷི ཏཱཝ སཱམཉྙཕལེཧི མཧཔྥལོ, ཝཊྚདུཀྑཝཱུཔསམེན མཧཱནིསཾསོ. ཨིཏརོ པཊིཔྤསྶདྡྷིཔྤཧཱནེན མཧཔྥལོ, ནིབྦུཏིསུཁུཔྤཏྟིཡཱ མཧཱནིསཾསོ. ཡམྷི སམཱདྷིམྷི ¶ ཋཏྭཱཏི ཡསྨིཾ ལོཀུཏྟརཀུསལསྶ ¶ པདཊྛཱནབྷཱུཏེ པཱདཀཛ྄ཛྷཱནསམཱདྷིམྷི ཙེཝ ཝུཊྛཱནགཱམིནིསམཱདྷིམྷི ཙ ཋཏྭཱ. སཱཏི མགྒཕལཔཉྙཱ. ཏེན པརིབྷཱཝིཏཱཏི ཏེན ཡཐཱཝུཏྟསམཱདྷིནཱ སབྦསོ བྷཱཝིཏཱ པརིབྷཱཝིཏཱ. མཧཔྥལམཧཱནིསཾསཏཱ སམཱདྷིམྷི ཝུཏྟནཡེན ཝེདིཏབྦཱ. ཨཔི ཙ ཏེ བོཛ྄ཛྷངྒམགྒངྒཛྷཱནངྒཔྤབྷེདཧེཏུཏཱཡ མཧཔྥལཱ སཏྟདཀྑིཎེཡྻཔུགྒལཝིབྷཱགཧེཏུཏཱཡ ¶ མཧཱནིསཾསཱཏི ཝེདིཏབྦཱ. ཡཱཡ པཉྙཱཡ ཋཏྭཱཏི ཡཱཡཾ ཝིཔསྶནཱཔཉྙཱཡཾ, སམཱདྷིཝིཔསྶནཱཔཉྙཱཡཾ ཝཱ ཋཏྭཱ. སམཐཡཱནིཀསྶ ཧི སམཱདྷིསཧགཏཱཔི པཉྙཱ མགྒཱདྷིགམཱཡ ཝིསེསཔཙྩཡོ ཧོཏིཡེཝ. སམྨདེཝཱཏི སུཊྛུཡེཝ ཡཐཱ ཨཱསཝཱནཾ ལེསོཔི ནཱཝསིསྶཏི, ཨེཝཾ སབྦསོ ཨཱསཝེཧི ཝིམུཙྩཏི. ཨགྒམགྒཀྑཎཉྷི སནྡྷཱཡེཏཾ ཝུཏྟཾ.

༡༤༣. ལོཀིཡཏྠསདྡཱནཾ ཝིཡ ཨབྷིརནྟ-སདྡསྶ སིདྡྷི དཊྛབྦཱ. ཨབྷིརནྟཾ ཨབྷིརཏཾ ཨབྷིརཏཱིཏི ཧི ཨཏྠཏོ ཨེཀཾ. ཨབྷིརནྟ-སདྡོ ཙཱཡཾ ཨབྷིརུཙིཔརིཡཱཡོ, ན ཨསྶཱདཔརིཡཱཡོ. ཨསྶཱདཝསེན ཧི ཀཏྠཙི ཝསནྟསྶ ཨསྶཱདཝཏྠུཝིགམེན སིཡཱ ཏསྶ ཏཏྠ ཨནབྷིརཏི, ཡདིདཾ ཁཱིཎཱསཝཱནཾ ནཏྠི, པགེཝ བུདྡྷཱནནྟི ཨཱཧ ‘‘བུདྡྷཱནཾ…པེ… ནཏྠཱི’’ཏི. ཨབྷིརཏིཝསེན ཀཏྠཙི ཝསིཏྭཱ ཏདབྷཱཝཏོ ཨཉྙཏྠ གམནཾ ནཱམ བུདྡྷཱནཾ ནཏྠི. ཝེནེཡྻཝིནཡནཏྠཾ པན ཀཏྠཙི ཝསིཏྭཱ ཏསྨིཾ སིདྡྷེ ཝེནེཡྻཝིནཡནཏྠམེཝ ཏཏོ ཨཉྙཏྠ གཙྪནྟི, ཨཡམེཏྠ ཡཐཱརུཙི. ཨཱཡཱམཱཏི ཨེཏྠ ཨཱ-སདྡོ ‘‘ཨཱགཙྪཱ’’ཏི ཨིམིནཱ སམཱནཏྠོཏི ཨཱཧ ‘‘ཨེཧི ཡཱམཱ’’ཏི. ཨཡཱམཱཏི པན པཱཋེ ཨ-ཀཱརོ ནིཔཱཏམཏྟཾ. སནྟིཀཱཝཙརཏྟཱ ཐེརཾ ཨཱལཔཏི, ན པན ཏདཱ སཏྠུ སནྟིཀེ ཝསནྟཱནཾ བྷིཀྑཱུནཾ ཨབྷཱཝཏོ. ཨཔརིཙྪིནྣགཎནོ ཧི ཏདཱ བྷགཝཏོ སནྟིཀེ བྷིཀྑུསངྒྷོ ¶ . ཏེནཱཧ ‘‘མཧཏཱ བྷིཀྑུསངྒྷེན སདྡྷི’’ནྟི. ཨམྦལཊྛིཀཱགམནནྟི ཨམྦལཊྛིཀཱགམནཔཊིསཾཡུཏྟཔཱཋམཱཧ. པཱཊལིགམནེཏི ཨེཏྠཱཔི ཨེསེཝ ནཡོ. ཨུཏྟཱནམེཝ ཨནནྟརཾ, ཧེཊྛཱ ཙ སཾཝཎྞིཏརཱུཔཏྟཱ.

སཱརིཔུཏྟསཱིཧནཱདཝཎྞནཱ

༡༤༥. ‘‘ཨཱཡསྨཱ སཱརིཔུཏྟོ’’ཏིཨཱདི པཱཋཛཱཏཾ. སམྤསཱདནཱིཡེཏི སམྤསཱདནཱིཡསུཏྟེ (དཱི. ནི. ༣.༡༤༡) ཝིཏྠཱརིཏཾ པོརཱཎཊྛཀཐཱཡཾ, ཏསྨཱ མཡམྤི ཏཏྠེཝ ནཾ ཨཏྠཏོ ཝིཏྠཱརཡིསྶཱམཱཏི ཨདྷིཔྤཱཡོ.

དུསྶཱིལཨཱདཱིནཝཝཎྞནཱ

༡༤༨. ཨཱགནྟྭཱ ¶ ཝསནྟི ཨེཏྠ ཨཱགནྟུཀཱཏི ཨཱཝསཐོ, ཏདེཝ ཨགཱརནྟི ཨཱཧ ‘‘ཨཱཝསཐཱགཱརནྟི ཨཱགནྟུཀཱནཾ ཨཱཝསཐགེཧ’’ནྟི. དྭིནྣཾ ¶ རཱཛཱུནནྟི ལིཙྪཝིརཱཛམགདྷརཱཛཱུནཾ. སཧཱཡཀཱཏི སེཝཀཱ. ཀུལཱནཱིཏི ཀུཊུམྦིཀེ. སནྠཏནྟི སནྠརི, སབྦཾ སནྠརི སབྦསནྠརི, ཏཾ སབྦསནྠརིཾ. བྷཱཝནཔུཾསཀནིདྡེསོ ཙཱཡཾ. ཏེནཱཧ ‘‘ཡཐཱ སབྦཾ སནྠཏཾ ཧོཏི, ཨེཝ’’ནྟི.

༡༤༩. དུསྶཱིལོཏི ཨེཏྠ དུ-སདྡོ ཨབྷཱཝཏྠོ ‘‘དུཔྤཉྙོ’’ཏིཨཱདཱིསུ (མ. ནི. ༡.༤༤༩; ཨ. ནི. ༥.༡༠) ཝིཡ, ན གརཧཏྠོཏི ཨཱཧ ‘‘ཨསཱིལོ ནིསྶཱིལོ’’ཏི. བྷིནྣསཾཝརོཏི ཨེཏྠ ཡོ སམཱདིནྣསཱིལོ ཀེནཙི ཀཱརཎེན སཱིལབྷེདཾ པཏྟོ, སོ ཏཱཝ བྷིནྣསཾཝརོ ཧོཏི. ཡོ པན སབྦེན སབྦཾ ཨསམཱདིནྣསཱིལོ ཨཱཙཱརཧཱིནོ, སོ ཀཐཾ བྷིནྣསཾཝརོ ནཱམ ཧོཏཱིཏི? སོཔི སཱདྷུསམཱཙཱརསྶ པརིཧཱནིཡསྶ བྷེདིཏཏྟཱ བྷིནྣསཾཝརོ ཨེཝ ནཱམ. ཝིསྶཊྛསཾཝརོ སཾཝརརཧིཏོཏི ཧི ཝུཏྟཾ ཧོཏི.

ཏཾ ཏཾ སིཔྤཊྛཱནཾ. མཱགྷཱཏཀཱལེཏི ‘‘མཱ གྷཱཏེཐ པཱཎིནོ’’ཏི ཨེཝཾ མཱགྷཱཏཱཏི གྷོསནཾ གྷོསིཏདིཝསེ.

ཨབྦྷུགྒཙྪཏི པཱཔཀོ ཀིཏྟིསདྡོ.

ཨཛ྄ཛྷཱསཡེན མངྐུ ཧོཏིཡེཝ ཝིཔྤཊིསཱརིབྷཱཝཏོ.

ཏསྶཱཏི ¶ དུསྶཱིལསྶ. སམཱདཱཡ པཝཏྟིཊྛཱནནྟི ཨུཊྛཱཡ སམུཊྛཱཡ ཀཏཀཱརཎཾ. ཨཱཔཱཐཾ ཨཱགཙྪཏཱིཏི ཏཾ མནསོ ཨུཔཊྛཱཏི. ཨུམྨཱིལེཏྭཱ ཨིདྷལོཀནྟི ཨུམྨཱིལནཀཱལེ ཨཏྟནོ པུཏྟདཱརཱདིདསྶནཝསེན ཨིདྷ ལོཀཾ པསྶཏི. ནིམཱིལེཏྭཱ པརལོཀནྟི ནིམཱིལནཀཱལེ གཏིནིམིཏྟུཔཊྛཱནཝསེན པརལོཀཾ པསྶཏི. ཏེནཱཧ ‘‘ཙཏྟཱརོ ཨཔཱཡཱ’’ཏིཨཱདི. པཉྩམཔདནྟི ‘‘ཀཱཡསྶ བྷེདཱ’’ཏིཨཱདིནཱ ཝུཏྟོ པཉྩམོ ཨཱདཱིནཝཀོཊྛཱསོ.

སཱིལཝནྟཨཱནིསཾསཝཎྞནཱ

༡༥༠. ཝུཏྟཝིཔརིཡཱཡེནཱཏི ཝུཏྟཱཡ ཨཱདཱིནཝཀཐཱཡ ཝིཔརིཡཱཡེན. ‘‘ཨཔྤམཏྟོ ཏཾ ཏཾ ཀསིཝཱཎིཛྫཱདིཾ ¶ ཡཐཱཀཱལཾ སམྤཱདེཏུཾ སཀྐོཏཱི’’ཏིཨཱདིནཱ ‘‘པཱསཾསཾ སཱིལམསྶ ཨཏྠཱིཏི སཱིལཝཱ. སཱིལསམྤནྣོཏི སཱིལེན སམནྣཱགཏོ. སམྤནྣསཱིལོ’’ཏི ཨེཝམཱདིཀཾ པན ཨཏྠཝཙནཾ སུཀརནྟི ཨནཱམཊྛཾ.

༡༥༡. པཱལི༹མུཏྟཀཱཡཱཏི ¶ སངྒཱིཏིཨནཱརུལ༹ྷཱཡ དྷམྨིཀཐཱཡ. ཏཏྠེཝཱཏི ཨཱཝསཐཱགཱརེ ཨེཝ.

པཱཊལིཔུཏྟནགརམཱཔནཝཎྞནཱ

༡༥༢. ཨིསྶརིཡམཏྟཱཡཱཏི ཨིསྶརིཡཔྤམཱཎེན, ཨིསྶརིཡེན ཙེཝ ཝིཏྟཱུཔཀརཎེན ཙཱཏི ཨེཝཾ ཝཱ ཨཏྠོ དཊྛབྦོ. ཨུཔབྷོགཱུཔཀརཎཱནིཔི ཧི ལོཀེ ‘‘མཏྟཱ’’ཏི ཝུཙྩནྟི. པཱཊལིགཱམཾ ནགརཾ ཀཏྭཱཏི པུབྦེ ‘‘པཱཊལིགཱམོ’’ཏི ལདྡྷནཱམཾ ཋཱནཾ ཨིདཱནི ནགརཾ ཀཏྭཱ. མཱཔེནྟཱིཏི པཏིཊྛཱཔེནྟི. ཨཱཡམུཁཔཙྪིནྡནཏྠནྟི ཨཱཡདྭཱརཱནཾ ཨུཔཙྪེདནཱཡ. ‘‘སཧསྶསེཝཱ’’ཏི ཝཱ པཱཋོ, སཧསྶསོ ཨེཝ. ཏེནཱཧ ‘‘ཨེཀེཀཝགྒཝསེན སཧསྶཾ སཧསྶཾ ཧུཏྭཱ’’ཏི. གྷརཝཏྠཱུནཱིཏི གྷརཔཏིཊྛཱཔནཊྛཱནཱནི. ཙིཏྟཱནི ནམནྟཱིཏི ཏཾཏཾདེཝཏཱནུབྷཱཝེན ཏཏྠ ཏཏྠེཝ ཙིཏྟཱནི ནམནྟི ཝཏྠུཝིཛྫཱཔཱཋཀཱནཾ, ཡཏྠ ཡཏྠ ཏཱཧི ཝཏྠཱུནི པརིགྒཧིཏཱནི. སིཔྤཱནུབྷཱཝེནཱཏི སིཔྤཱནུགཏཝིཛྫཱནུབྷཱཝེན. ནཱགགྒཱཧོཏི ནཱགཱནཾ ནིཝཱསཔྤརིགྒཧོ. སེསདྭཡེསུཔི ཨེསེཝ ནཡོ. པཱསཱཎོཏི ཨཔྤལཀྑཎཔཱསཱཎོ. ཁཱཎུཀོཏི ཡོ ཀོཙི ཁཱཎུཀོ ¶ . སིཔྤཾ ཛཔྤིཏྭཱ ཏཱདིསཾ སཱརམྦྷཊྛཱནཾ པརིཧརིཏྭཱ ཨནཱརམྦྷེ ཋཱནེ ཏཱཧི ཝཏྠུཔརིགྒཱཧིཀཱཧི དེཝཏཱཧི སདྡྷིཾ མནྟཡམཱནཱ ཝིཡ ཏཾཏཾགེཧཱནི མཱཔེནྟི ཨུཔདེསདཱནཝསེན. ནེསནྟི ཝཏྠུཝིཛྫཱཔཱཋཀཱནཾ, སབྦཱསཾ དེཝཏཱནཾ. མངྒལཾ ཝཌྜྷཱཔེསྶནྟཱིཏི མངྒལཾ བྲཱུཧེསྶནྟི. པཎྜིཏདསྶནཱདཱིནི ཧི ཨུཏྟམམངྒལཱནི. ཏེནཱཧ ‘‘ཨཐ མཡ’’ནྟིཨཱདི.

སདྡོ ཨབྦྷུགྒཙྪཏི ཨཝཡཝདྷམྨེན སམུདཱཡསྶ ཨཔདིསིཏབྦཏོ ཡཐཱ ‘‘ཨལངྐཏོ དེཝདཏྟོ’’ཏི.

ཨརིཡཀམནུསྶཱནནྟི ཨརིཡདེསཝཱསིམནུསྶཱནཾ. རཱསིཝསེནེཝཱཏི ‘‘སཧསྶཾ སཏསཧསྶ’’ནྟིཨཱདིནཱ རཱསིཝསེནེཝ, ཨཔྤཀསྶ པན བྷཎྜསྶ ཀཡཝིཀྐཡོ ཨཉྙཏྠཱཔི ལབྦྷཏེཝཱཏི ‘‘རཱསིཝསེནེཝཱ’’ཏི ཝུཏྟཾ. ཝཱཎིཛཱཡ པཐོ པཝཏྟིཊྛཱནནྟི ཝཎིཔྤཐོཏི པུརིམཝིཀཔྤེ ཨཏྠོ དུཏིཡཝིཀཔྤེ པན ཝཱཎིཛཱནཾ པཐོ པཝཏྟིཊྛཱནནྟི, ཝཎིཔྤཐོཏི ཨིམམཏྠཾ དསྶེནྟོ ¶ ‘‘ཝཱཎིཛཱནཾ ཝསནཊྛཱན’’ནྟི ཨཱཧ. བྷཎྜཔུཊེ བྷིནྡནྟི མོཙེནྟི ཨེཏྠཱཏི པུཊབྷེདནནྟི ཨཡམེཏྠ ཨཏྠོཏི ཨཱཧ ‘‘བྷཎྜཔུཊེ…པེ… ཝུཏྟཾ ཧོཏཱི’’ཏི.

ཙ-ཀཱརཏྠོ ¶ སམུཙྩཡཏྠོ ཝཱ-སདྡོ.

༡༥༣. ཀཱལ༹ཀཎྞཱི སཏྟཱཏི ཨཏྟནཱ ཀཎྷདྷམྨབཧུལཏཱཡ པརེསཉྩ ཀཎྷཝིཔཱཀཱནཏྠནིབྦཏྟིནིམིཏྟཏཱཡ ‘‘ཀཱལ༹ཀཎྞཱི’’ཏི ལདྡྷནཱམཱ པརཱུཔདྡཝཀརཱ ཨཔྤེསཀྑསཏྟཱ. ཏནྟི བྷགཝནྟཾ. པུབྦཎྷསམཡནྟི པུབྦཎྷེ ཨེཀཾ སམཡཾ. གཱམཔྤཝིསནནཱིཧཱརེནཱཏི གཱམཔྤཝེསན ནིཝསནཱཀཱརེན. ཀཱཡཔཊིབདྡྷཾ ཀཏྭཱཏི ཙཱིཝརཾ པཱརུཔིཏྭཱ, པཏྟཾ ཧཏྠེན གཧེཏྭཱཏི ཨཏྠོ.

ཨེཏྠཱཏི ¶ ཨེཏསྨིཾ ཝཱ སཀཔྤིཏཔྤདེསེ. སཉྙཏེཏི སམྨདེཝ སཉྙཏེ སུསཾཝུཏཀཱཡཝཱཙཱཙིཏྟེ.

པཏྟིཾ དདེཡྻཱཏི ཨཏྟནཱ པསུཏཾ པུཉྙཾ ཏཱསཾ དེཝཏཱནཾ ཨནུཔྤདཛྫེཡྻ. ‘‘པཱུཛིཏཱ’’ཏིཨཱདཱིསུ ཏདེཝ པཏྟིདཱནཾ པཱུཛཱ, ཨནཱགཏེ ཨེཝ ཨུཔདྡཝེ ཨཱརཀྑསཾཝིདྷཱནཾ པཊིཔཱུཛཱ. ‘‘ཡེབྷུཡྻེན ཉཱཏིམནུསྶཱ ཉཱཏིཔེཏཱནཾ པཏྟིདཱནཱདིནཱ པཱུཛནམཱནནཱདཱིནི ཀརོནྟི ཨིམེ པན ཨཉྙཱཏཀཱཔི སམཱནཱ ཏཐཱ ཀརོནྟི, ཏསྨཱ ནེསཾ སཀྐཙྩཾ ཨཱརཀྑཱ སཾཝིདྷཱཏབྦཱ’’ཏི ཨཉྙམཉྙཾ སམྤཝཱརེཏྭཱ དེཝཏཱ ཏཏྠ ཨུསྶུཀྐཾ ཨཱཔཛྫནྟཱིཏི དསྶེནྟོ ‘‘ཨིམེ’’ཏིཨཱདིམཱཧ. བལིཀམྨཀརཎཾ མཱནནཾ, སམྤཏི ཨུཔྤནྣཔརིསྶཡཧརཎཾ པཊིམཱནནྟི དསྶེཏུཾ ‘‘ཨེཏེ’’ཏིཨཱདི ཝུཏྟཾ.

སུནྡརཱནི པསྶཏཱིཏི སུནྡརཱནི ཨིཊྛཱནི ཨེཝ པསྶཏི, ན ཨནིཊྛཱནི.

༡༥༤. ཨཱཎིཡོ ཀོཊྚེཏྭཱཏི ལཧུཀེ དཱརུདཎྜེ གཧེཏྭཱ ཀཝཱཊཕལཀེ ཝིཡ ཨཉྙམཉྙཾ སམྦནྡྷེ ཀཱཏུཾ ཨཱཎིཡོ ཀོཊྚེཏྭཱ. ནཱཝཱསངྑེཔེན ཀཏཾ ཨུལུ༹མྤཾ, ཝེལུ༹ནལཱ༹དིཀེ སངྒྷརིཏྭཱ ཝལླིཨཱདཱིཧི ཀལཱཔཝསེན བནྡྷིཏྭཱ ཀཏྟབྦཾ ཀུལླཾ.

ཨུདཀཊྛཱནསྶེཏཾ ཨདྷིཝཙནནྟི ཡཐཱཝུཏྟསྶ ཡསྶ ཀསྶཙི ཨུདཀཊྛཱནསྶ ཨེཏཾ ‘‘ཨཎྞཝ’’ནྟི ཨདྷིཝཙནཾ, སམུདྡསྶེཝཱཏི ཨདྷིཔྤཱཡོ. སརནྟི ཨིདྷ ནདཱི ཨདྷིཔྤེཏཱ སརཏི སནྡཏཱིཏི ¶ ཀཏྭཱ. གམྦྷཱིརཝིཏྠཏནྟི ཨགཱདྷཊྛེན གམྦྷཱིརཾ, སཀལལོཀཏྟཡབྱཱཔིཏཱཡ ཝིཏྠཏཾ. ཝིསཛྫཱཏི ཨནཱསཛྫ ཨཔྤཏྭཱ. པལླལཱནི ཏེསཾ ཨཏརཎཏོ. ཝིནཱཡེཝ ཀུལླེནཱཏི ཨཱིདིསཾ ཨུདཀཾ ཀུལླེན ཨཱིདིསེན ཝིནཱ ཨེཝ ཏིཎྞཱ མེདྷཱཝིནོ ཛནཱ, ཏཎྷཱསརཾ པན ཨརིཡམགྒསངྑཱཏཾ སེཏུཾ ཀཏྭཱ ནིཏྟིཎྞཱཏི ཡོཛནཱ.

པཋམབྷཱཎཝཱརཝཎྞནཱ ནིཊྛིཏཱ.

ཨརིཡསཙྩཀཐཱཝཎྞནཱ

༡༥༥. མཧཱཔནཱདསྶ ¶ ¶ རཉྙོ. པཱསཱདཀོཊིཡཾ ཀཏགཱམོཏི པཱསཱདསྶ པཏིཏཐུཔིཀཱཡ པཏིཊྛིཏཊྛཱནེ ནིཝིཊྛགཱམོ. ཨརིཡབྷཱཝཀརཱནནྟི ཡེ པཊིཝིཛ྄ཛྷནྟི, ཏེསཾ ཨརིཡབྷཱཝཀརཱནཾ ནིམིཏྟསྶ ཀཏྟུབྷཱཝཱུཔཙཱརཝསེནེཝ ཝུཏྟཾ. ཏཙྪཱཝིཔལླཱསབྷཱུཏབྷཱཝེན སཙྩཱནཾ. ཨནུབོདྷོ པུབྦབྷཱགིཡཾ ཉཱཎཾ, པཊིཝེདྷོ མགྒཉཱཎེན ཨབྷིསམཡོ, ཏཏྠ ཡསྨཱ ཨནུབོདྷཔུབྦཀོ པཊིཝེདྷོ ཨནུབོདྷེན ཝིནཱ ན ཧོཏི, ཨནུབོདྷོཔི ཨེཀཙྩོ པཊིཝེདྷེན སམྦནྡྷོ, ཏདུབྷཡཱབྷཱཝཧེཏུཀཉྩ ཝཊྚེཝ སཾསརཎཾ, ཏསྨཱ ཝུཏྟཾ པཱལི༹ཡཾ ‘‘ཨནནུབོདྷཱ…པེ… ཏུམྷཱཀཉྩཱ’’ཏི. པཊིསནྡྷིགྒཧཎཝསེན བྷཝཏོ བྷཝནྟརཱུཔགམནཾ སནྡྷཱཝནཾ, ཨཔརཱཔརཾ ཙཝནུཔཔཛྫནཝསེན སཉྩརཎཾ སཾསརཎནྟི ཨཱཧ ‘‘བྷཝཏོ’’ཏིཨཱདི. སནྡྷཱཝིཏསཾསརིཏཔདཱནཾ ཀམྨསཱདྷནཏཾ སནྡྷཱཡཱཧ ‘‘མཡཱ ཙ ཏུམྷེཧི ཙཱ’’ཏི པཋམཝིཀཔྤེ. དུཏིཡཝིཀཔྤེ པན བྷཱཝསཱདྷནཏཾ ཧདཡེ ཀཏྭཱ ‘‘མམཉྩེཝ ཏུམྷཱཀཉྩཱ’’ཏི ཡཐཱརུཏཝསེནེཝ ཝུཏྟཾ. ནཡནསམཏྠཱཏི པཱཔནསམཏྠཱ, དཱིགྷརཛྫུནཱ བདྡྷསཀུཎཾ ཝིཡ རཛྫུཧཏྠོ པུརིསོ དེསནྟརཾ ཏཎྷཱརཛྫུནཱ བདྡྷཾ སཏྟསནྟཱནཾ ཨབྷིསངྑཱརོ བྷཝནྟརཾ ནེཏི ཨེཏཱཡཱཏི བྷཝནེཏྟི, ཏཎྷཱ, སཱ ཨརིཡམགྒསཏྠེན སུཊྛུ ཧཏཱ ཚིནྣཱཏི བྷཝནེཏྟིསམཱུཧཏཱ.

ཨནཱཝཏྟིདྷམྨསམྦོདྷིཔརཱཡཎཝཎྞནཱ

༡༥༦. དྭེ གཱམཱ ‘‘ནཱཏིཀཱ’’ཏི ཨེཝཾ ལདྡྷནཱམོ, ཉ-ཀཱརསྶ ཙཱཡཾ ན-ཀཱརཱདེསེན ནིདྡེསོ ‘‘ཨནིམིཏྟཱ ན ནཱཡརེ’’ཏིཨཱདཱིསུ (ཝིསུདྡྷི. ༡.༡༧༤; ཛཱ. ཨཊྛ. ༢.༢.༣༤) ཝིཡ. ཏེནཱཧ ‘‘ཉཱཏིགཱམཀེ’’ཏི ¶ . གིཉྫཀཱ ཝུཙྩནྟི ཨིཊྛཀཱ, གིཉྫཀཱཧི ཨེཝ ཀཏོ ཨཱཝསཐོཏི གིཉྫཀཱཝསཐོ ¶ . སོ ཀིར ཨཱཝཱསོ ཡཐཱ སུདྷཱཔརིཀམྨེན སམྤཡོཛནཾ ནཏྠི, ཨེཝཾ ཨིཊྛཀཱཧི ཨེཝ ཙིནིཏྭཱ ཚཱདེཏྭཱ ཀཏོ. ཏེན ཝུཏྟཾ ‘‘ཨིཊྛཀཱམཡེ ཨཱཝསཐེ’’ཏི. ཏུལཱདཎྜཀཝཱཊཕལཀཱནི པན དཱརུམཡཱནེཝ.

༡༥༧. ཨོརཾ ཝུཙྩཏི ཀཱམདྷཱཏུ, པཙྩཡབྷཱཝེན ཏཾ ཨོརཾ བྷཛནྟཱིཏི ཨོརམྦྷཱགིཡཱནི, ཨོརམྦྷཱགསྶ ཝཱ ཧིཏཱནི ཨོརམྦྷཱགིཡཱནི. ཏེནཱཧ ‘‘ཧེཊྛཱབྷཱགིཡཱན’’ནྟིཨཱདི. ཏཱིཧི མགྒེཧཱིཏི ཧེཊྛིམེཧི ཏཱིཧི མགྒེཧི. ཏེཧི ¶ པཧཱཏབྦཏཱཡ ཧི ནེསཾ སཾཡོཛནཱནཾ ཨོརམྦྷཱགིཡཏཱ. ཨོརམྦྷཉྫིཡཱནི ཝཱ ཨོརམྦྷཱགིཡཱནི ཝུཏྟཱནི ནིརུཏྟིནཡེན. ཨིདཱནི བྱཏིརེཀམུཁེན ནེསཾ ཨོརམྦྷཱགིཡབྷཱཝཾ ཝིབྷཱཝེཏུཾ ‘‘ཏཏྠཱ’’ཏིཨཱདི ཝུཏྟཾ. ཝིཀྑམྦྷིཏཱནི སམཏྠཏཱཝིགྷཱཏེན པུཐུཛྫནཱནཾ, སམུཙྪིནྣཱནི སབྦསོ ཨབྷཱཝེན ཨརིཡཱནཾ རཱུཔཱརཱུཔབྷཝཱུཔཔཏྟིཡཱ ཝིབནྡྷཱཡ ན ཧོནྟཱིཏི ཝུཏྟཾ ‘‘ཨཝིཀྑམྦྷིཏཱནི ཨསམུཙྪིནྣཱནཱི’’ཏི. ནིབྦཏྟཝསེནཱཏི པཊིསནྡྷིགྒཧཎཝསེན. གནྟུཾ ན དེནྟི མཧགྒཏགཱམིཀམྨཱཡཱུཧནསྶ ཝིནིབནྡྷནཏོ. སཀྐཱཡདིཊྛིཨཱདཱིནི ཏཱིཎི སཾཡོཛནཱནི ཀཱམཙྪནྡབྱཱཔཱདཱ ཝིཡ མཧགྒཏཱུཔཔཏྟིཡཱ ཨཝིནིབནྡྷབྷཱུཏཱནིཔི ཀཱམབྷཝཱུཔཔཏྟིཡཱ ཝིསེསཔཙྩཡཏྟཱ ཏཏྠ མཧགྒཏབྷཝེ ནིབྦཏྟམྤི ཏནྣིབྦཏྟིཧེཏུཀམྨཔརིཀྑཡེ ཀཱམབྷཝཱུཔཔཏྟིཔཙྩཡཏཱཡ མཧགྒཏབྷཝཏོ ཨཱནེཏྭཱ པུན ཨིདྷེཝ ཀཱམབྷཝེ ཨེཝ ནིབྦཏྟཱཔེནྟི, ཏསྨཱ སབྦཱནིཔི པཉྩཔི སཾཡོཛནཱནི ཨོརམྦྷཱགིཡཱནི ཨེཝ. པཊིསནྡྷིཝསེན ཨནཱགམནསབྷཱཝཱཏི པཊིསནྡྷིགྒཧཎཝསེན ཏསྨཱ ལོཀཱ ཨིདྷ ན ཨཱགམནསབྷཱཝཱ. བུདྡྷདསྶནཐེརདསྶནདྷམྨསྶཝནཱནཾ པནཏྠཱཡསྶ ཨཱགམནཾ ཨནིཝཱརིཏཾ.

ཀདཱཙི ཀརཧཙི ཨུཔྤཏྟིཡཱ སཝིརལཱ༹ཀཱརཏཱ ¶ པརིཡུཊྛཱནམནྡཏཱཡ ཨབཧལཏཱཏི དྭེདྷཱཔི ཏནུབྷཱཝོ. ཨབྷིཎྷནྟི བཧུསོ. བཧལབཧལཱཏི ཏིབྦཏིབྦཱ. ཡཏྠ ཨུཔྤཛྫནྟི, ཏཾ སནྟཱནཾ མདྡནྟཱ, ཕརནྟཱ, སཱདྷེནྟཱ, ཨནྡྷཀཱརཾ ཀརོནྟཱ ཨུཔྤཛྫནྟི, དྭཱིཧི པན མགྒེཧི པཧཱིནཏྟཱ ཏནུཀཏནུཀཱ མནྡམནྡཱ ཨུཔྤཛྫནྟི. ‘‘པུཏྟདྷཱིཏརོ ཧོནྟཱི’’ཏི ཨིདཾ ཨཀཱརཎཾ. ཏཐཱ ཧི ཨངྒཔཙྩངྒཔརཱམསནམཏྟེནཔི ཏེ ཧོནྟི. ཨིདནྟི ‘‘རཱགདོསམོཧཱནཾ ཏནུཏྟཱ’’ཏི ཨིདཾ ཝཙནཾ. བྷཝཏནུཀཝསེནཱཏི ཨཔྤཀབྷཝཝསེན. ཏནྟི མཧཱསིཝཏྠེརསྶ ཝཙནཾ པཊིཀྑིཏྟནྟི སམྦནྡྷོ. ཡེ བྷཝཱ ཨརིཡཱནཾ ལབྦྷནྟི, ཏེ པརིཔུཎྞལཀྑཎབྷཝཱ ཨེཝ. ཡེ ན ལབྦྷནྟི, ཏཏྠ ཀཱིདིསཾ ཏཾ བྷཝཏནུཀཾ, ཏསྨཱ ཨུབྷཡཐཱཔི བྷཝཏནུཀསྶ ཨསམྦྷཝོ ཨེཝཱཏི དསྶེཏུཾ ‘‘སོཏཱཔནྣསྶཱ’’ཏིཨཱདི ཝུཏྟཾ. ཨཊྛམེ བྷཝེ བྷཝཏནུཀཾ ནཏྠི ཨཊྛམསྶེཝ བྷཝསྶ སབྦསྶེཝ ཨབྷཱཝཏོ. སེསེསུཔི ཨེསེཝ ནཡོ.

ཀཱམཱཝཙརལོཀཾ ¶ སནྡྷཱཡ ཝུཏྟཾ ཨིཏརསྶ ལོཀསྶ ཝསེན ཏཐཱ ཝཏྟུཾ ཨསཀྐུཎེཡྻཏྟཱ. ཡོ ཧི སཀདཱགཱམཱི དེཝམནུསྶལོཀེསུ ཝོམིསྶཀཝསེན ནིབྦཏྟཏི, སོཔི ཀཱམབྷཝཝསེནེཝ པརིཙྪིནྡིཏབྦོ. བྷགཝཏཱ ཙ ཀཱམལོཀེ ཋཏྭཱ ‘‘སཀིདེཝ ཨིམཾ ལོཀཾ ཨཱགནྟྭཱ’’ཏི ¶ ཝུཏྟཾ, ‘‘ཨིམཾ ལོཀཾ ཨཱགནྟྭཱ’’ཏི ཙ ཨིམིནཱ པཉྩསུ སཀདཱགཱམཱིསུ ཙཏྟཱརོ ཝཛྫེཏྭཱ ཨེཀོཝ གཧིཏོ. ཨེཀཙྩོ ཧི ཨིདྷ སཀདཱགཱམིཕལཾ པཏྭཱ ཨིདྷེཝ པརིནིབྦཱཡཏི, ཨེཀཙྩོ ཨིདྷ པཏྭཱ དེཝལོཀེ པརིནིབྦཱཡཏི, ཨེཀཙྩོ དེཝལོཀེ པཏྭཱ ཏཏྠེཝ པརིནིབྦཱཡཏི, ཨེཀཙྩོ དེཝལོཀེ པཏྭཱ ཨིདྷཱུཔཔཛྫིཏྭཱ པརིནིབྦཱཡཏི, ཨིམེ ཙཏྟཱརོ ཨིདྷ ན ལབྦྷནྟི. ཡོ པན ཨིདྷ པཏྭཱ དེཝལོཀེ ཡཱཝཏཱཡུཀཾ ཝསིཏྭཱ པུན ཨིདྷཱུཔཔཛྫིཏྭཱ པརིནིབྦཱཡཏི, ཨཡཾ ཨིདྷ ཨདྷིཔྤེཏོ. ཨཊྛཀཐཱཡཾ པན ཨིམཾ ལོཀནྟི ཀཱམབྷཝོ ཨདྷིཔྤེཏོཏི ཨིམམཏྠཾ ཝིབྷཱཝེཏུཾ ‘‘སཙེ ཧཱི’’ཏིཨཱདིནཱ ཨཉྙཾཡེཝ ཙཏུཀྐཾ དསྶིཏཾ.

ཙཏཱུསུ ¶ …པེ… སབྷཱཝོཏི ཨཏྠོ ཨཔཱཡགམནཱིཡཱནཾ པཱཔདྷམྨཱནཾ སབྦསོ པཧཱིནཏྟཱ. དྷམྨནིཡཱམེནཱཏི མགྒདྷམྨནིཡཱམེན. ནིཡཏོ ཨུཔརིམགྒཱདྷིགམསྶ ཨཝསྶཾབྷཱཝིབྷཱཝཏོ. ཏེནཱཧ ‘‘སམྦོདྷིཔརཱཡཎོ’’ཏི.

དྷམྨཱདཱསདྷམྨཔརིཡཱཡཝཎྞནཱ

༡༥༨. ཏེསཾ ཏེསཾ ཉཱཎགཏིནྟི ཏེསཾ ཏེསཾ སཏྟཱནཾ ‘‘ཨསུཀོ སོཏཱཔནྣོ, ཨསུཀོ སཀདཱགཱམཱི’’ཏིཨཱདིནཱ ཏཾཏཾཉཱཎཱདྷིགམནཾ. ཉཱཎཱུཔཔཏྟིཾ ཉཱཎཱབྷིསམྤརཱཡནྟི ཏཏོ པརམྤི ‘‘ནིཡཏོ སམྦོདྷིཔརཱཡཎོ, སཀིདེཝ ཨིམཾ ལོཀཾ ཨཱགནྟྭཱ དུཀྑསྶནྟཾ ཀརིསྶཏཱི’’ཏིཨཱདིནཱ ཙ ཉཱཎསཧིཏཾ ཨུཔྤཏྟིཔཙྩཡབྷཱཝཾ. ཨོལོཀེནྟསྶ ཉཱཎཙཀྑུནཱ པེཀྑནྟསྶ ཀཱཡཀིལམཐོཝ, ན ཏེན ཀཱཙི ཝེནེཡྻཱནཾ ཨཏྠསིདྡྷཱིཏི ཨདྷིཔྤཱཡོ. ཙིཏྟཝིཧེསཱཏི ཙིཏྟཁེདོ, སཱ ཀིལེསཱུཔསཾཧིཏཏྟཱ བུདྡྷཱནཾ ནཏྠི. ཨཱདཱིཡཏི ཨཱལོཀཱིཡཏི ཨཏྟཱ ཨེཏེནཱཏི ཨཱདཱསཾ, དྷམྨབྷཱུཏཾ ཨཱདཱསཾ དྷམྨཱདཱསཾ, ཨརིཡམགྒཉཱཎསྶེཏཾ ཨདྷིཝཙནཾ, ཏེན ཨརིཡསཱཝཀཱ ཙཏཱུསུ ཨརིཡསཙྩེསུ ཝིདྡྷསྟསམྨོཧཏྟཱ ཨཏྟཱནམྤི ཡཱཐཱཝཏོ ཉཏྭཱ ཡཱཐཱཝཏོ བྱཱཀརེཡྻ, ཏཔྤཀཱསནཏོ པན དྷམྨཔརིཡཱཡསྶ སུཏྟསྶ དྷམྨཱདཱསཏཱ ཝེདིཏབྦཱ. ཡེན དྷམྨཱདཱསེནཱཏི ཨིདྷ པན མགྒདྷམྨམེཝ ཝདཏི.

ཨཝེཙྩ ཡཱཐཱཝཏོ ཛཱནིཏྭཱ ཏནྣིམིཏྟཨུཔྤནྣཔསཱདོ ཨཝེཙྩཔསཱདོ, མགྒཱདྷིགམེན ཨུཔྤནྣཔསཱདོ ¶ , སོ པན ཡསྨཱ པཱསཱཎཔབྦཏོ ཝིཡ ནིཙྩལོ, ན ཙ ཀེནཙི ཀཱརཎེན ཝིགཙྪཏི, ཏསྨཱ ཝུཏྟཾ ‘‘ཨཙལེན ཨཙྩུཏེནཱ’’ཏི.

‘‘པཉྩསཱིལཱནཱི’’ཏི ¶ གཧཊྛཝསེནེཏཾ ཝུཏྟཾ ཏེཧི ཨེཀནྟཔརིཧརཎཱིཡཏོ. ཨརིཡཱནཾ པན སབྦཱནི སཱིལཱནི ཀནྟཱནེཝ. ཏེནཱཧ ‘‘སབྦོཔི པནེཏྠ སཾཝརོ ལབྦྷཏིཡེཝཱ’’ཏི.

སབྦེསནྟི ¶ སབྦེསཾ ཨརིཡཱནཾ. སིཀྑཱཔདཱཝིརོདྷེནཱཏི ཡཐཱ བྷཱུཏརོཙནཱཔཏྟི ན ཧོཏི, ཨེཝཾ. ཡུཏྟཊྛཱནེཏི ཀཱཏུཾ ཡུཏྟཊྛཱནེ.

ཨམྦཔཱལཱིགཎིཀཱཝཏྠུཝཎྞནཱ

༡༦༡. ཏདཱ ཀིར ཝེསཱལཱི ཨིདྡྷཱ ཕཱིཏཱ སབྦངྒསམྤནྣཱ ཨཧོསི ཝེཔུལླཔྤཏྟཱ, ཏཾ སནྡྷཱཡཱཧ ‘‘ཁནྡྷཀེ ཝུཏྟནཡེན ཝེསཱལིཡཱ སམྤནྣབྷཱཝོ ཝེདིཏབྦོ’’ཏི. ཏསྨིཾ ཀིར བྷིཀྑུསངྒྷེ པཉྩསཏམཏྟཱ བྷིཀྑཱུ ནཝཱ ཨཙིརཔབྦཛིཏཱ ཨཧེསུཾ ཨོསནྣཝཱིརིཡཱ ཙ. ཏཐཱ ཧི ཝཀྑཏི ‘‘ཏཏྠ ཀིར ཨེཀཙྩེ བྷིཀྑཱུ ཨོསནྣཝཱིརིཡཱ’’ཏིཨཱདི (དཱི. ནི. ཨཊྛ. ༢.༡༦༥). སཏིཔཙྩུཔཊྛཱནཏྠནྟི ཏེསཾ སཏིཔཙྩུཔཊྛཱཔནཏྠཾ. སརཏཱིཏི ཀཱཡཱདིཀེ ཡཐཱསབྷཱཝཏོ ཉཱཎསམྤཡུཏྟཱཡ སཏིཡཱ ཨནུསྶརཏི ཨུཔདྷཱརེཏི. སམྤཛཱནཱཏཱིཏི སམཾ པཀཱརེཧི ཛཱནཱཏི ཨཝབུཛ྄ཛྷཏི. ཨཡམེཏྠ སངྑེཔོ, ཝིཏྠཱརོ པན པརཏོ སཏིཔཊྛཱནཝཎྞནཱཡཾ (དཱི. ནི. ཨཊྛ. ༢.༣༧༣; མ. ནི. ཨཊྛ. ༡.༡༠༦) ཨཱགམིསྶཏི.

སབྦསངྒཱཧཀནྟི སརཱིརགཏསྶ ཙེཝ ཝཏྠཱལངྐཱརགཏསྶ ཙཱཏི སབྦསྶ ནཱིལབྷཱཝསྶ སངྒཱཧཀཾ ཝཙནཾ. ཏསྶེཝཱཏི ནཱིལཱཏི སབྦསངྒཱཧཀཝསེན ཝུཏྟཨཏྠསྶེཝ. ཝིབྷཱགདསྶནནྟི པབྷེདདསྶནཾ. ཡཐཱ ཏེ ལིཙྪཝིརཱཛཱནོ ཨཔཱིཏཱདིཝཎྞཱ ཨེཝ ཀེཙི ཝིལེཔནཝསེན པཱིཏཱདིཝཎྞཱ ཁཱཡིཾསུ, ཨེཝཾ ཨནཱིལཱདིཝཎྞཱ ཨེཝ ཀེཙི ཝིལེཔནཝསེན ནཱིལཱདིཝཎྞཱ ཁཱཡིཾསཱུཏི ཝུཏྟཾ ‘‘ན ཏེསཾ པཀཏིཝཎྞོ ནཱིལོ’’ཏིཨཱདི. ནཱིལོ མཎི ཨེཏེསཱུཏི ནཱིལམཎི, ཨིནྡནཱིལམཧཱནཱིལཱདིནཱིལརཏནཝིནདྡྷཱ ཨལངྐཱརཱ. ཏེ ཀིར སུཝཎྞཝིརཙིཏེ ཧི མཎིཨོབྷཱསེཧི ཨེཀནཱིལཱ ཝིཡ ཁཱཡནྟི. ནཱིལམཎིཁཙིཏཱཏི ནཱིལརཏནཔརིཀྑིཏྟཱ. ནཱིལཝཏྠཔརིཀྑིཏྟཱཏི ནཱིལཝཏྠནཱིལཀམྤལཔརིཀྑེཔཱ. ནཱིལཝམྨིཀེཧཱིཏི ནཱིལཀགྷཊཔརིཀྑིཏྟེཧི. སབྦཔདེསཱུཏི ‘‘པཱིཏཱ ཧོནྟཱི’’ཏིཨཱདིསབྦཔདེསུ. པརིཝཊྚེསཱིཏི ¶ པཊིགྷཊྚེསི. ཨཱཧརནྟི ཨིམསྨཱ རཱཛཔུརིསཱ བལིནྟི ཨཱཧཱརོ, ཏཔྤཏྟཛནཔདོཏི ཨཱཧ ‘‘སཱཧཱརནྟི སཛནཔད’’ནྟི. ཨངྒུལིཕོཊོཔི ཨངྒུལིཡཱ ཙཱལནཝསེནེཝ ¶ ¶ ཧོཏཱིཏི ཝུཏྟཾ ‘‘ཨངྒུལིཾ ཙཱལེསུ’’ནྟི. ཨམྦཀཱཡཱཏི མཱཏུགཱམེན. ཨུཔཙཱརཝཙནཾ ཧེཏཾ ཨིཏྠཱིསུ, ཡདིདཾ ‘‘ཨམྦཀཱ མཱཏུགཱམོ ཛནནིཀཱ’’ཏི.

ཨཝལོཀེཐཱཏི ཨཔཝཏྟིཏྭཱ ཨོལོཀནཾ ཨོལོཀེཐ. ཏཾ པན ཨཔཝཏྟིཏྭཱ ཨོལོཀནཾ ཨནུ ཨནུ དསྶནཾ ཧོཏཱིཏི ཨཱཧ ‘‘པུནཔྤུནཾ པསྶཐཱ’’ཏི. ཨུཔནེཐཱཏི ‘‘ཡཐཱཡཾ ལིཙྪཝིརཱཛཔརིསཱ སོབྷཱཏིསཡེན ཡུཏྟཱ, ཨེཝཾ ཏཱཝཏིཾསཔརིསཱ’’ཏི ཨུཔནཡཾ ཀརོཐ. ཏེནཱཧ ‘‘ཏཱཝཏིཾསེཧི སམཀེ ཀཏྭཱ པསྶཐཱ’’ཏི.

‘‘ཨུཔསཾཧརཐ བྷིཀྑཝེ ལིཙྪཝིཔརིསཾ ཏཱཝཏིཾསསདིས’’ནྟི ནཡིདཾ ནིམིཏྟགྒཱཧེ ནིཡོཛནཾ, ཀེཝལཾ པན དིབྦསམྤཏྟིསདིསཱ ཨེཏེསཾ རཱཛཱུནཾ ཨིསྶརིཡསམྤཏྟཱིཏི ཨནུཔུབྦིཀཐཱཡ སགྒསམྤཏྟིཀཐནཾ ཝིཡ དཊྛབྦཾ. ཏེསུ པན བྷིཀྑཱུསུ ཨེཀཙྩཱནཾ ཏཏྠ ནིམིཏྟགྒཱཧོཔི སིཡཱ, ཏཾ སནྡྷཱཡ ཝུཏྟཾ ‘‘ནིམིཏྟགྒཱཧེ ཨུཡྻོཛེཏཱི’’ཏི. ཧིཏཀཱམཏཱཡ ཏེསཾ བྷིཀྑཱུནཾ ཡཐཱ ཨཱཡསྨཏོ ནནྡསྶ ཧིཏཀཱམཏཱཡ སགྒསམྤཏྟིདསྶནཾ. ཏེནཱཧ ‘‘ཏཏྲ ཀིརཱ’’ཏིཨཱདི. ཨོསནྣཝཱིརིཡཱཏི སམྨཱཔཊིཔཏྟིཡཾ ཨཝསནྣཝཱིརིཡཱ, ཨོསྶཊྛཝཱིརིཡཱ ཝཱཏི ཨཏྠོ. ཨནིཙྩལཀྑཎཝིབྷཱཝནཏྠནྟི ཏེསཾ རཱཛཱུནཾ ཝསེན བྷིཀྑཱུནཾ ཨནིཙྩལཀྑཎཝིབྷཱུཏབྷཱཝཏྠཾ.

ཝེལུ༹ཝགཱམཝསྶཱུཔགམནཝཎྞནཱ

༡༦༣. སམཱིཔེ ཝེལུ༹ཝགཱམོཏི པུབྦཎྷཾ ཝཱ སཱཡནྷཾ ཝཱ གནྟྭཱ ནིཝཏྟནཡོགྱེ ཨཱསནྣཊྛཱནེ ནིཝིཊྛཱ པརིཝཱརགཱམོ. སངྒམྨཱཏི སམྨཱ གནྟྭཱ. ཨསྶཱཏི བྷགཝཏོ.

༡༦༤. ཕརུསོཏི ཀཀྑལོ༹, གརུཏརོཏི ཨཏྠོ. ཝིསབྷཱགརོགོཏི ¶ དྷཱཏུཝིསབྷཱགཏཱཡ སམུཊྛིཏོ བཧལཏརརོགོ, ན ཨཱབཱདྷམཏྟཾ. ཉཱཎེན པརིཙྪིནྡིཏྭཱཏི ཝེདནཱནཾ ཁཎིཀཏཾ, དུཀྑཏཾ, ཨཏྟསུཉྙཏཉྩ ཡཱཐཱཝཏོ ཉཱཎེན པརིཙྪིཛྫ པརིཏུལེཏྭཱ. ཨདྷིཝཱསེསཱིཏི ཏཱ ཨབྷིབྷཝནྟོ ཡཐཱཔརིམདྡིཏཱཀཱརསལླཀྑཎེན ཨཏྟནི ཨཱརོཔེཏྭཱ ཝཱསེསི, ན ཏཱཧི ཨབྷིབྷུཡྻམཱནོ. ཏེནཱཧ ‘‘ཨཝིཧཉྙམཱནོ’’ཏིཨཱདི. ཨདུཀྑིཡམཱནོཏི ཙེཏོདུཀྑཝསེན ཨདུཀྑིཡམཱནོ ¶ , ཀཱཡདུཀྑཾ པན ‘‘ནཏྠཱི’’ཏི ན སཀྐཱ ཝཏྟུཾ. ཨསཏི ཧི ཏསྨིཾ ཨདྷིཝཱསནཱཡ ཨེཝ ཨསམྦྷཝོཏི. ཨནཱམནྟེཏྭཱཏི ཨནཱལཔིཏྭཱ. ཨནཔལོཀེཏྭཱཏི ཨཝིསྶཛྫིཏྭཱ. ཏེནཱཧ ‘‘ཨོཝཱདཱནུསཱསནིཾ ཨདཏྭཱཏི ཝུཏྟཾ ཧོཏཱི’’ཏི. པུབྦབྷཱགཝཱིརིཡེནཱཏི ཕལསམཱཔཏྟིཡཱ པརིཀམྨཝཱིརིཡེན. ཕལསམཱཔཏྟིཝཱིརིཡེནཱཏི ཕལསམཱཔཏྟིསམྤཡུཏྟཝཱིརིཡེན. ཝིཀྑམྦྷེཏྭཱཏི ¶ ཝིནོདེཏྭཱ. ཡཐཱ ནཱམ པུཔྥནསམཡེ ཙམྤཀཱདིརུཀྑེ ཝེཁེ དིནྣེ ཡཱཝ སོ ཝེཁོ ནཱཔནཱིཡཏི, ཏཱཝསྶ པུཔྥནསམཏྠཏཱ ཝིཀྑམྦྷིཏཱ ཝིནོདིཏཱ ཧོཏི, ཨེཝམེཝ ཡཐཱཝུཏྟཝཱིརིཡཝེཁདཱནེན ཏཱ ཝེདནཱ སཏྠུ སརཱིརེ ཡཐཱཔརིཙྪིནྣཾ ཀཱལཾ ཝིཀྑམྦྷིཏཱ ཝིནོདིཏཱ ཨཧེསུཾ. ཏེན ཝུཏྟཾ ‘‘ཝིཀྑམྦྷེཏྭཱཏི ཝིནོདེཏྭཱ’’ཏི. ཛཱིཝིཏམྤི ཛཱིཝིཏསངྑཱརོ ཀམྨུནཱ སངྑརཱིཡཏཱིཏི ཀཏྭཱ. ཚིཛྫམཱནཾ ཝིརོདྷིཔཙྩཡསམཱཡོགེན པཡོགསམྤཏྟིཡཱ གྷཊེཏྭཱ ཋཔཱིཡཏི. ཨདྷིཊྛཱཡཱཏི ཨདྷིཊྛཱནཾ ཀཏྭཱ. ཏེནཱཧ ‘‘དསམཱསེ མཱ ཨུཔྤཛྫིཏྠཱཏི སམཱཔཏྟིཾ སམཱཔཛྫཱི’’ཏི. ཏཾ པན ‘‘ཨདྷིཊྛཱནཾ, པཝཏྟན’’ནྟི ཙ ཝཏྟབྦཏཾ ཨརཧཏཱིཏི ཝུཏྟཾ ‘‘ཨདྷིཊྛཧིཏྭཱ པཝཏྟེཏྭཱ’’ཏི.

ཁཎིཀསམཱཔཏྟཱིཏི ཏཱདིསཾ པུབྦཱབྷིསངྑཱརཾ ཨཀཏྭཱ ཋཱནསོ སམཱཔཛྫིཏབྦསམཱཔཏྟི. པུན སརཱིརཾ ཝེདནཱ ཨཛ྄ཛྷོཏྠརཏི སཝིསེསཔུབྦཱབྷིསངྑཱརསྶ ཨཀཏཏྟཱ. རཱུཔསཏྟཀཨརཱུཔསཏྟཀཱནི ཝིསུདྡྷིམགྒསཾཝཎྞནཱསུ ¶ (ཝིསུདྡྷི. ཊཱི. ༢.༧༠༦, ༧༡༧) ཝིཏྠཱརིཏནཡེན ཝེདིཏབྦཱནི. སུཊྛུ ཝིཀྑམྦྷེཏི པུབྦཱབྷིསངྑཱརསྶ སཱཏིསཡཏྟཱ. ཨིདཱནི ཏམཏྠཾ ཨུཔམཱཡ ཝིབྷཱཝེཏུཾ ‘‘ཡཐཱ ནཱམཱ’’ཏིཨཱདི ཝུཏྟཾ. ཨཔབྱཱུལ༹ྷོཏི ཨཔནཱིཏོ. ཙུདྡསཧཱཀཱརེཧི སནྣེཏྭཱཏི ཏེསཾཡེཝ རཱུཔསཏྟཀཨརཱུཔསཏྟཀཱནཾ ཝསེན ཙུདྡསཧི པཀཱརེཧི ཝིཔསྶནཱཙིཏྟཾ, སཀལམེཝ ཝཱ ཨཏྟབྷཱཝཾ ཝིསབྷཱགརོགསཉྫནིཏལཱུཁབྷཱཝནིརོགཀརཎཱཡ སིནེཧེཏྭཱ ན ཨུཔྤཛྫིཡེཝ སམྨཱསམྦུདྡྷེན སཱཏིསཡསམཱཔཏྟིཝེགེན སུཝིཀྑམྦྷིཏཏྟཱ.

གིལཱནོ ཧུཏྭཱ པུན ཝུཊྛིཏོཏི པུབྦེ གིལཱནོ ཧུཏྭཱ པུན ཏཏོ གིལཱནབྷཱཝཏོ ཝུཊྛིཏོ. མདྷུརཀབྷཱཝོ ནཱམ སརཱིརསྶ ཐམྦྷིཏཏྟཾ, ཏཾ པན གརུབྷཱཝཔུབྦཀནྟི ཨཱཧ ‘‘སཉྫཱཏགརུབྷཱཝོ སཉྫཱཏཐདྡྷབྷཱཝོ’’ཏི. ‘‘ནཱནཱཀཱརཏོ ན ཨུཔཊྛཧནྟཱི’’ཏི ཨིམིནཱ དིསཱསམྨོཧོཔི མེ ཨཧོསི ¶ སོཀབལེནཱཏི དསྶེཏི. སཏིཔཊྛཱནཱདིདྷམྨཱཏི ཀཱཡཱནུཔསྶནཱདཡོ ཨནུཔསྶནཱདྷམྨཱ པུབྦེ ཝིབྷཱུཏཱ ཧུཏྭཱ ཨུཔཊྛཧནྟཱཔི ཨིདཱནི མཡ྄ཧཾ པཱཀཊཱ ན ཧོནྟི.

༡༦༥. ཨབྦྷནྟརཾ ཀརོཏི ནཱམ ཨཏྟནིཡེཝ ཋཔནཏོ. པུགྒལཾ ཨབྦྷནྟརཾ ཀརོཏི ནཱམ སམཱནཏྟཏཱཝསེན དྷམྨེན པུབྦེ ཏསྶ སངྒཎྷཏོ. དཧརཀཱལེཏི ཨཏྟནོ དཧརཀཱལེ. ཀསྶཙི ཨཀཐེཏྭཱཏི ཀསྶཙི ཨཏྟནོ ཨནྟེཝཱསིཀསྶ ཨུཔནིགཱུཧབྷཱུཏཾ གནྠཾ ཨཀཐེཏྭཱ. མུཊྛིཾ ཀཏྭཱཏི མུཊྛིགཏཾ ཝིཡ རཧསིབྷཱུཏཾ ཀཏྭཱ. ཡསྨིཾ ཝཱ ནཊྛེ སབྦོ ཏཾམཱུལཀོ དྷམྨོ ཝིནསྶཏི, སོ ཨཱདིཏོ མཱུལབྷཱུཏོ དྷམྨོ, མུསྶཏི ཝིནསྶཏི དྷམྨོ ཨེཏེན ནཊྛེནཱཏི མུཊྛི, ཏཾ ཏཐཱརཱུཔཾ མུཊྛིཾ ཀཏྭཱ པརིཧརིཏྭཱ ཋཔིཏཾ ཀིཉྩི ནཏྠཱིཏི དསྶེཏི.

ཨཧམེཝཱཏི ¶ ཨཝདྷཱརཎཾ བྷིཀྑུསངྒྷཔརིཧརཎསྶ ཨཉྙསཱདྷཱརཎིཙྪཱདསྶནཏྠཾ, ཨཝདྷཱརཎེན པན ཝིནཱ ‘‘ཨཧཾ བྷིཀྑུསངྒྷ’’ནྟིཨཱདི བྷིཀྑུསངྒྷཔརིཧརཎེ ཨཧཾཀཱརམམཾཀཱརཱབྷཱཝདསྶནནྟི དཊྛབྦཾ. ཨུདྡིསིཏབྦཊྛེནཱཏི ‘‘སཏྠཱ’’ཏི ཨུདྡིསིཏབྦཊྛེན. མཱ ཝཱ ¶ ཨཧེསུཾ བྷིཀྑཱུཏི ཨདྷིཔྤཱཡོ. ‘‘མཱ ཝཱ ཨཧོསཱི’’ཏི ཝཱ པཱཋོ. ཨེཝཾ ན ཧོཏཱིཏི ‘‘ཨཧཾ བྷིཀྑུསངྒྷཾ པརིཧརིསྶཱམཱི’’ཏིཨཱདི ཨཱཀཱརེན ཙིཏྟཔྤཝཏྟི ན ཧོཏི. ‘‘པཙྪིམཝཡཨནུཔྤཏྟབྷཱཝདཱིཔནཏྠཾ ཝུཏྟ’’ནྟི ཨིམིནཱ ཝཡོ ཝིཡ བུདྡྷཀིཙྩམྤི པརིཡོསིཏཀམྨནྟི དཱིཔེཏི. སཀཊསྶ བཱཧཔྤདེསེ དལ༹ྷཱིབྷཱཝཱཡ ཝེཋདཱནཾ བཱཧབནྡྷོ. ཙཀྐནེམིསནྡྷཱིནཾ དལ༹ྷཱིབྷཱཝཱཡ ཝེཋདཱནཾ ཙཀྐབནྡྷོ.

ཏམཏྠནྟི ཝེཋམིསྶཀེན མཉྙེཏི ཝུཏྟམཏྠཾ. རཱུཔཱདཡོ ཨེཝ དྷམྨཱ སཝིགྒཧོ ཝིཡ ཨུཔཊྛཱནཏོ རཱུཔནིམིཏྟཱདཡོ, ཏེསཾ རཱུཔནིམིཏྟཱདཱིནཾ. ལོཀིཡཱནཾ ཝེདནཱནནྟི ཡཱསཾ ནིརོདྷནེན ཕལསམཱཔཏྟི སམཱཔཛྫིཏབྦཱ, ཏཱསཾ ནིརོདྷཱ ཕཱསུ ཧོཏི, ཏཐཱ བཱལ༹ྷཝེདནཱབྷིཏུནྣསརཱིརསྶཱཔི. ཏདཏྠཱཡཱཏི ཕལསམཱཔཏྟིཝིཧཱརཏྠཱཡ. དྭཱིཧི བྷཱགེཧི ཨཱཔོ གཏོ ཨེཏྠཱཏི དཱིཔོ, ཨོགྷེན པརིགཏོ ཧུཏྭཱ ཨནཛ྄ཛྷོཏྠཊོ བྷཱུམིབྷཱགོ, ཨིདྷ པན ཙཏཱུཧིཔི ཨོགྷེཧི, སཾསཱརམཧོགྷེནེཝ ཝཱ ཨནཛ྄ཛྷོཏྠཊོ ཨཏྟཱ ‘‘དཱིཔོ’’ཏི ཨདྷིཔྤེཏོ. ཏེནཱཧ ‘‘མཧཱསམུདྡགཏཱ’’ཏིཨཱདི. ཨཏྟསྶརཎཱཏི ཨཏྟཔྤཊིསརཎཱ. ཨཏྟགཏིཀཱ ཝཱཏི ཨཏྟཔརཱཡཎཱཝ ¶ . མཱ ཨཉྙགཏིཀཱཏི ཨཉྙཾ ཀིཉྩི གཏིཾ པཊིསརཎཾ པརཱཡཎཾ མཱ ཙིནྟཡིཏྠ. ཀསྨཱ? ཨཏྟཱ ནཱམེཏྠ པརམཏྠཏོ དྷམྨོ ཨབྦྷནྟརཊྛེན, སོ ཨེཝཾ སམྤཱདིཏོ ཏུམྷཱཀཾ དཱིཔཾ ཏཱཎཾ གཏི པརཱཡཎནྟི. ཏེན ཝུཏྟཾ ‘‘དྷམྨདཱིཔཱ’’ཏིཨཱདི. ཏཐཱ ཙཱཧ ‘‘ཨཏྟཱ ཧི ཨཏྟནོ ནཱཐོ, ཀོ ཧི ནཱཐོ པརོ སིཡཱ’’ཏི (དྷ. པ. ༡༦༠, ༣༨༠) ཨུཔདེསམཏྟམེཝ ¶ ཧི པརསྨིཾ པཊིབདྡྷཾ, ཨཉྙཱ སབྦཱ སམྤཏྟི པུརིསསྶ ཨཏྟཱདྷཱིནཱ ཨེཝ. ཏེནཱཧ བྷགཝཱ ‘‘ཏུམྷེཧི ཀིཙྩཾ ཨཱཏཔྤཾ, ཨཀྑཱཏཱརོ ཏཐཱགཏཱ’’ཏི (དྷ. པ. ༢༧༦). ཏམགྒེཏི ཏམཡོགསྶ ཨགྒེ ཏསྶ ཨཏིཀྐནྟཱབྷཱཝཏོ. ཏེནེཝཱཧ ‘‘ཨིམེ ཨགྒཏམཱ’’ཏིཨཱདི. མམཱཏི མམ སཱསནེ. སབྦེཔི ཏེ ཙཏུསཏིཔཊྛཱནགོཙརཱ ཝཱཏི ཙཏུབྦིདྷཾ སཏིཔཊྛཱནཾ བྷཱཝེཏྭཱ བྲཱུཧེཏྭཱ ཏདེཝ གོཙརཾ ཨཏྟནོ པཝཏྟིཊྛཱནཾ ཀཏྭཱ ཋིཏཱ ཨེཝ བྷིཀྑཱུ ཨགྒེ བྷཝིསྶནྟི.

དུཏིཡབྷཱཎཝཱརཝཎྞནཱ ནིཊྛིཏཱ.

ནིམིཏྟོབྷཱསཀཐཱཝཎྞནཱ

༡༦༦. ཨནེཀཝཱརཾ ¶ བྷགཝཱ ཝེསཱལིཡཾ ཝིཧརཏི, ཏསྨཱ ཨིམཾ ཝེསཱལིཔྤཝེསནཾ ནིཡམེཏྭཱ དསྶེཏུཾ ‘‘ཀདཱ པཱཝིསཱི’’ཏི པུཙྪིཏྭཱ ཨཱགམནཏོ པཊྛཱཡ ཏཾ དསྶེནྟོ ‘‘བྷགཝཱ ཀིརཱ’’ཏིཨཱདིམཱཧ. ཨཱགཏམགྒེནེཝཱཏི པུབྦེ ཡཱཝ ཝེལུ༹ཝགཱམཀཱ ཨཱགཏམགྒེནེཝ པཊིནིཝཏྟེནྟོ. ཡཐཱཔརིཙྪེདེནཱཏི ཡཐཱཔརིཙྪིནྣཀཱལེན. ཏཏོཏི ཕལསམཱཔཏྟིཏོ. ཨཡནྟི ཨིདཱནི ཝུཙྩམཱནཱཀཱརོ. དིཝཱཊྛཱནོལོཀནཱདི པརིནིབྦཱནསྶ ཨེཀནྟིཀབྷཱཝདསྶནཾ. ཨོསྶཊྛོཏི ཝིསྶཊྛོ ཨཱཡུསངྑཱརོ ‘‘སཏྟཱཧམེཝ མཡཱ ཛཱིཝིཏབྦ’’ནྟི.

ཛེཊྛཀནིཊྛབྷཱཏིཀཱནནྟི སབྦེཝ སབྲཧྨཙཱརིནོ སནྡྷཱཡ ཝདཏི.

པཊིཔཱདེསྶཱམཱིཏི མགྒཔཊིཔཏྟིཡཱ ནིཡོཛེསྶཱམི. མཎིཕལཀེཏི མཎིཁཙིཏེ པམུཁེ ཨཏྠཏཕལཀེ. ཏཾ པཋམཾ ¶ དསྶནནྟི ཡཾ ཝེལུ༹ཝནེ པརིབྦཱཛཀརཱུཔེན ཨཱགཏསྶ སིདྡྷཾ དསྶནཾ, ཏཾ པཋམདསྶནཾ. ཡཾ ཝཱ ཨནོམདསྶིསྶ བྷགཝཏོ ཝཙནཾ སདྡཧནྟེན ཏདཱ ཨབྷིནཱིཧཱརཀཱལེ པཙྩཀྑཏོ ¶ ཝིཡ ཏུམྷཱཀཾ དསྶནཾ སིདྡྷཾ, ཏཾ པཋམདསྶནཾ. པཙྩཱགམནཙཱརིཀནྟི པཙྩཱགམནཏྠཾ ཙཱརིཀཾ.

སཏྟཱཧནྟི ཨཙྩནྟསཾཡོགེ ཨུཔཡོགཝཙནཾ. ཐེརསྶ ཛཱཏོཝརཀགེཧཾ ཀིར ཨིཏརགེཧཏོ ཝིཝེཀཊྛཾ, ཝིཝཊངྒཎཉྩ, ཏསྨཱ དེཝབྲཧྨཱནཾ ཨུཔསངྐམནཡོགྱནྟི ‘‘ཛཱཏོཝརཀཾ པཊིཛགྒཐཱ’’ཏི ཝུཏྟཾ. སོཏི ཨུཔརེཝཏོ. ཏཾ པཝཏྟིནྟི ཏཏྠ ཝསིཏུཀཱམཏཱཡ ཝུཏྟཾ ཏཾ.

‘‘ཛཱནནྟཱཔི ཏཐཱགཏཱ པུཙྪནྟཱི’’ཏི (པཱརཱ. ༡༦, ༡༦༥) ཨིམིནཱ ནཱིཧཱརེན ཐེརོ ‘‘ཀེ ཏུམྷེ’’ཏི པུཙྪི. ‘‘ཏྭཾ ཙཏཱུཧི མཧཱརཱཛེཧི མཧནྟཏརོ’’ཏི པུཊྛོ ཨཏྟནོ མཧཏྟཾ སཏྠུ ཨུཔརི པཀྑིཔནྟོ ‘‘ཨཱརཱམིཀསདིསཱ ཨེཏེ ཨུཔཱསིཀེ ཨམྷཱཀཾ སཏྠུནོ’’ཏི ཨཱཧ. སཱཝཀསམྤཏྟིཀིཏྟནམྤི ཧི ཨཏྠཏོ སཏྠུ སམྤཏྟིཾཡེཝ ཝིབྷཱཝེཏི.

སོཏཱཔཏྟིཕལེ པཏིཊྛཱཡཱཏི ཐེརསྶ དེསནཱནུབྷཱཝེན, ཨཏྟནོ ཙ ཨུཔནིསྶཡསམྤཏྟིཡཱ ཉཱཎསྶ པརིཔཀྐཏྟཱ སོཏཱཔཏྟིཕལེ པཏིཊྛཧིཏྭཱ.

ཨཡནྟི ¶ ཡཐཱཝུཏྟཱ. ཨེཏྠཱཏི ‘‘ཝེསཱལིཾ པིཎྜཱཡ པཱཝིསཱི’’ཏི ཨེཏསྨིཾ ཝེསཱལཱིཔཝེསེ. ཨནུཔུབྦཱིཀཐཱཏི ཨནུཔུབྦདཱིཔནཱི ཀཐཱ.

༡༦༧. ཨུདེནཡཀྑསྶ ཙེཏིཡཊྛཱནེཏི ཨུདེནསྶ ནཱམ ཡཀྑསྶ ཨཱཡཏནབྷཱཝེན ཨིཊྛཀཱཧི ཙིཏེ མཧཱཛནསྶ ཙིཏྟཱིཀཏཊྛཱནེ. ཀཏཝིཧཱརོཏི བྷགཝནྟཾ ཨུདྡིསྶ ཀཏཝིཧཱརོ. ཝུཙྩཏཱིཏི པུརིམཝོཧཱརེན ‘‘ཨུདེནཙེཏིཡ’’ནྟི ཝུཙྩཏི. གོཏམཀཱདཱིསུཔཱིཏི ‘‘གོཏམཀཙེཏིཡ’’ནྟི ཨེཝཾ ཨཱདཱིསུཔི. ཨེསེཝ ནཡོཏི ཙེཏིཡཊྛཱནེ ཀཏཝིཧཱརབྷཱཝཾ ཨཏིདིསཏི. ཝཌྜྷིཏཱཏི ¶ བྷཱཝནཱཔཱརིཔཱུརིཝསེན པརིབྲཱུཧིཏཱ. པུནཔྤུནཾ ཀཏཱཏི བྷཱཝནཱཡ བཧུལཱིཀརཎེན ཨཔརཱཔརཾ པཝཏྟིཏཱ. ཡུཏྟཡཱནཾ ཝིཡ ཀཏཱཏི ཡཐཱ ཡུཏྟཾ ཨཱཛཉྙཡཱནཾ ཚེཀེན སཱརཐིནཱ ཨདྷིཊྛིཏཾ ཡཐཱརུཙི པཝཏྟཏི, ཨེཝཾ ཡཐཱརུཙིཔཝཏྟིརཧཏཾ གམིཏཱ. པཏིཊྛཱནཊྛེནཱཏི ཨདྷིཊྛཱནཊྛེན. ཝཏྠུ ཝིཡ ཀཏཱཏི སབྦསོ ཨུཔཀྐིལེསཝིསོདྷནེན ཨིདྡྷིཝིསཡཏཱཡ པཝཏྟིཊྛཱནབྷཱཝཏོ སུཝིསོདྷིཏཔརིསྶཡཝཏྠུ ཝིཡ ཀཏཱ. ཨདྷིཊྛིཏཱཏི པཊིཔཀྑདཱུརཱིབྷཱཝཏོ སུབྷཱཝིཏབྷཱཝེན ཏཾཏཾཨདྷིཊྛཱནཡོགྱཏཱཡ ཋཔིཏཱ ¶ . སམནྟཏོ ཙིཏཱཏི སབྦབྷཱགེན བྷཱཝནུཔཙཡཾ གམིཏཱ. ཏེནཱཧ ‘‘སུཝཌྜྷིཏཱ’’ཏི. སུཊྛུ སམཱརདྡྷཱཏི ཨིདྡྷིབྷཱཝནཱཡ སིཁཱཔྤཏྟིཡཱ སམྨདེཝ སཾསེཝིཏཱ.

ཨནིཡམེནཱཏི ‘‘ཡསྶ ཀསྶཙཱི’’ཏི ཨནིཡམཝཙནེན. ནིཡམེཏྭཱཏི ‘‘ཏཐཱགཏསྶཱ’’ཏི སརཱུཔདསྶནེན ནིཡམེཏྭཱ. ཨཱཡུཔྤམཱཎནྟི པརམཱཡུཔྤམཱཎཾ ཝདཏི, ཏསྶེཝ གཧཎེ ཀཱརཎཾ བྲཧྨཛཱལསུཏྟཝཎྞནཱཡཾ (དཱི. ནི. ཨཊྛ. ༡.༤༠; དཱི. ནི. ཊཱི. ༡.༤༠) ཝུཏྟནཡེནེཝ ཝེདིཏབྦཾ. མཧཱསིཝཏྠེརོ པན ‘‘མཧཱབོདྷིསཏྟཱནཾ ཙརིམབྷཝེ པཊིསནྡྷིདཱཡིནོ ཀམྨསྶ ཨསངྑྱེཡྻཱཡུཀཏཱསཾཝཏྟནསམཏྠཏཾ ཧདཡེ ཋཔེཏྭཱ བུདྡྷཱནཾ ཨཱཡུསངྑཱརསྶ པརིསྶཡཝིཀྑམྦྷནསམཏྠཏཱ པཱལི༹ཡཾ ཨཱགཏཱ ཨེཝཱཏི ཨིམཾ བྷདྡཀཔྤམེཝ ཏིཊྛེཡྻཱ’’ཏི ཨཝོཙ. ‘‘ཁཎྜིཙྩཱདཱིཧི ཨབྷིབྷུཡྻཏཱི’’ཏི ཨེཏེན ཡཐཱ ཨིདྡྷིབལེན ཛརཱཡ ན པཊིགྷཱཏོ, ཨེཝཾ ཏེན མརཎསྶཔི ན པཊིགྷཱཏོཏི ཨཏྠཏོ ཨཱཔནྣམེཝཱཏི. ‘‘ཀྭ སརོ ཁིཏྟོ, ཀྭ ཙ ནིཔཏིཏོ’’ཏི ཨཉྙཐཱ ཝུཊྛིཏེནཱཔི ཐེརཝཱདེན ཨཊྛཀཐཱཝཙནམེཝ སམཏྠིཏནྟི དཊྛབྦཾ ¶ . ཏེནཱཧ ‘‘སོ ན རུཙྩཏི…པེ… ནིཡམིཏ’’ནྟི.

པརིཡུཊྛིཏཙིཏྟོཏི ཡཐཱ ཀིཉྩི ཨཏྠཱནཏྠཾ སལླཀྑེཏུཾ ན སཀྐཱ, ཨེཝཾ ཨབྷིབྷཱུཏཙིཏྟོ. སོ པན ཨབྷིབྷཝོ མཧཏཱ ཨུདཀོགྷེན ཨཔྤཀསྶ ཨུདཀསྶ ཨཛ྄ཛྷོཏྠརཎཾ ཝིཡ ཨཧོསཱིཏི ཝུཏྟཾ ‘‘ཨཛ྄ཛྷོཏྠཊཙིཏྟོ’’ཏི. ཨཉྙོཔཱིཏི ཐེརཏོ, ཨརིཡེཧི ཝཱ ཨཉྙོཔི ཡོ ཀོཙི པུཐུཛྫནོ. པུཐུཛྫནགྒཧཎཉྩེཏྠ ཡཐཱ སབྦེན སབྦཾ ཨཔྤཧཱིནཝིཔལླཱསོ མཱརེན པརིཡུཊྛིཏཙིཏྟོ ཀིཉྩི ¶ ཨཏྠཾ སལླཀྑེཏུཾ ན སཀྐོཏི, ཨེཝཾ ཐེརོ བྷགཝཏཱ ཀཏཾ ནིམིཏྟོབྷཱསཾ སབྦསོ ན སལླཀྑེསཱིཏི དསྶནཏྠཾ. ཏེནཱཧ ‘‘མཱརོ ཧཱི’’ཏིཨཱདི. ཙཏྟཱརོ ཝིཔལླཱསཱཏི ཨསུབྷེ ‘‘སུབྷ’’ནྟི སཉྙཱཝིཔལླཱསོ, ཙིཏྟཝིཔལླཱསོ, དུཀྑེ ‘‘སུཁ’’ནྟི སཉྙཱཝིཔལླཱསོ, ཙིཏྟཝིཔལླཱསོཏི ཨིམེ ཙཏྟཱརོ ཝིཔལླཱསཱ. ཏེནཱཏི ཡདིཔི ཨིཏརེ ཨཊྛ ཝིཔལླཱསཱ པཧཱིནཱ, ཏཐཱཔི ཡཐཱཝུཏྟཱནཾ ཙཏུནྣཾ ཝིཔལླཱསཱནཾ ཨཔྤཧཱིནབྷཱཝེན. ཨསྶཱཏི ཐེརསྶ. མདྡཏཱིཏི ཕུསནམཏྟེན མདྡནྟོ ཝིཡ ཧོཏི, ཨཉྙཐཱ ཏེན མདྡིཏེ སཏྟཱནཾ མརཎམེཝ སིཡཱ. ཀིཾ སཀྑིསྶཏི, ན སཀྑིསྶཏཱིཏི ཨདྷིཔྤཱཡོ. ཀསྨཱ ¶ ན སཀྑིསྶཏི, ནནུ ཨེས ཨགྒསཱཝཀསྶ ཀུཙྪིཾ པཝིཊྛོཏི? སཙྩཾ པཝིཊྛོ, ཏཉྩ ཁོ ཨཏྟནོ ཨཱནུབྷཱཝདསྶནཏྠཾ, ན ཝིབཱདྷནཱདྷིཔྤཱཡེན. ཝིབཱདྷནཱདྷིཔྤཱཡེན པན ཨིདྷ ‘‘ཀིཾ སཀྑིསྶཏཱི’’ཏི ཝུཏྟཾ ཧདཡམདྡནསྶ ཨདྷིགཏཏྟཱ. ནིམིཏྟོབྷཱསནྟི ཨེཏྠ ‘‘ཏིཊྛཏུ བྷགཝཱ ཀཔྤ’’ནྟི སཀལཀཔྤཾ ཨཝཊྛཱནཡཱཙནཱཡ ‘‘ཡསྶ ཀསྶཙི ཨཱནནྡ ཙཏྟཱརོ ཨིདྡྷིཔཱདཱ བྷཱཝིཏཱ’’ཏིཨཱདིནཱ ཨཉྙཱཔདེསེན ཨཏྟནོ ཙཏུརིདྡྷིཔཱདབྷཱཝནཱནུབྷཱཝེན ཀཔྤཾ ཨཝཊྛཱནསམཏྠཏཱཝསེན སཉྙུཔྤཱདནཾ ནིམིཏྟཾ, ཏཐཱ པན པརིཡཱཡཾ མུཉྩིཏྭཱ ཨུཛུཀཾཡེཝ ཨཏྟནོ ཨདྷིཔྤཱཡཝིབྷཱཝནཾ ཨོབྷཱསོ. ཛཱནནྟོཡེཝ ཝཱཏི མཱརེན པརིཡུཊྛིཏབྷཱཝཾ ཛཱནནྟོ ཨེཝ. ཨཏྟནོ ཨཔརཱདྷཧེཏུཏོ ¶ སཏྟཱནཾ སོཀོ ཏནུཀོ ཧོཏི, ན བལཝཱཏི ཨཱཧ ‘‘དོསཱརོཔནེན སོཀཏནུཀརཎཏྠ’’ནྟི. ཀིཾ པན ཐེརོ མཱརེན པརིཡུཊྛིཏཙིཏྟཀཱལེ པཝཏྟིཾ པཙྪཱ ཛཱནཱཏཱིཏི? ན ཛཱནཱཏི སབྷཱཝེན, བུདྡྷཱནུབྷཱཝེན པན ཨནུཛཱནཱཏི.

མཱརཡཱཙནཀཐཱཝཎྞནཱ

༡༦༨. ཨནཏྠེ ནིཡོཛེནྟོ གུཎམཱརཎེན མཱརེཏི, ཝིརཱགཝིབནྡྷནེན ཝཱ ཛཱཏིནིམིཏྟཏཱཡ ཏཏྠ ཏཏྠ ཛཱཏཾ ཛཱཏཾ མཱརེནྟོ ཝིཡ ཧོཏཱིཏི ‘‘མཱརེཏཱིཏི མཱརོ’’ཏི ཝུཏྟཾ. ཨཏིཝིཡ པཱཔཏཱཡ པཱཔིམཱ. ཀཎྷདྷམྨེཧི སམནྣཱགཏོ ཀཎྷོ. ཝིརཱགཱདིགུཎཱནཾ ཨནྟཀརཎཏོ ཨནྟཀོ. སཏྟཱནཾ ཨནཏྠཱཝཧཔཊིཔཏྟིཾ ན མུཙྩཏཱིཏི ནམུཙི. ཨཏྟནོ མཱརཔཱསེན པམཏྟེ བནྡྷཏི, པམཏྟཱ ཝཱ བནྡྷཱུ ཨེཏསྶཱཏི པམཏྟབནྡྷུ. སཏྟམསཏྟཱཧཏོ པརཾ སཏྟ ཨཧཱནི སནྡྷཱཡཱཧ ‘‘ཨཊྛམེ སཏྟཱཧེ’’ཏི ན པན པལླངྐསཏྟཱཧཱདི ཝིཡ ནིཡཏཀིཙྩསྶ ཨཊྛམསཏྟཱཧསྶ ནཱམ ལབྦྷནཏོ. སཏྟམསཏྟཱཧསྶ ཧི པརཏོ ཨཛཔཱལནིགྲོདྷམཱུལེ མཧཱབྲཧྨུནོ, སཀྐསྶ ཙ དེཝརཉྙོ པཊིཉྙཱཏདྷམྨདེསནཾ བྷགཝནྟཾ ཉཏྭཱ ‘‘ཨིདཱནི སཏྟེ དྷམྨདེསནཱཡ མམ ཝིསཡཾ ཨཏིཀྐམཱཔེསྶཏཱི’’ཏི སཉྫཱཏདོམནསྶོ ཧུཏྭཱ ཋིཏོ ཙིནྟེསི ‘‘ཧནྡ དཱནཱཧཾ ནཾ ཨུཔཱཡེན པརིནིབྦཱཔེསྶཱམི, ཨེཝམསྶ མནོརཐོ ཨཉྙཐཏྟཾ གམིསྶཏི, མམ ཙ མནོརཐོ ཨིཛ྄ཛྷིསྶཏཱི’’ཏི ¶ . ཨེཝཾ པན ཙིནྟེཏྭཱ བྷགཝནྟཾ ཨུཔསངྐམིཏྭཱ ཨེཀཾ ཨནྟཾ ཋིཏོ ‘‘པརིནིབྦཱཏུ དཱནི བྷནྟེ བྷགཝཱ’’ཏིཨཱདིནཱ པརིནིབྦཱནཾ ཡཱཙི, ཏཾ སནྡྷཱཡ ཝུཏྟཾ ‘‘ཨཊྛམེ སཏྟཱཧེ’’ཏིཨཱདི. ཏཏྠ ཨཛྫཱཏི ཨཱཡུསངྑཱརོསྶཛྫནདིཝསཾ སནྡྷཱཡཱཧ. བྷགཝཱ ཙསྶ ཨབྷིསནྡྷིཾ ཛཱནནྟོཔི ¶ ཏཾ ཨནཱཝིཀཏྭཱ པརིནིབྦཱནསྶ ཨཀཱལབྷཱཝམེཝ པཀཱསེནྟོ ཡཱཙནཾ པཊིཀྑིཔི. ཏེནཱཧ ‘‘ན ཏཱཝཱཧ’’ནྟིཨཱདི.

མགྒཝསེན ཝིཡཏྟཱཏི སཙྩསམྤཊིཝེདྷཝེཡྻཏྟིཡེན བྱཏྟཱ. ཏཐེཝ ཝིནཱིཏཱཏི མགྒཝསེན ཀིལེསཱནཾ སམུཙྪེདཝིནཡནེན ཝིནཱིཏཱ. ཏཐཱ ཝིསཱརདཱཏི ཨརིཡམགྒཱདྷིགམེནེཝ སཏྠུསཱསནེ ཝེསཱརཛྫཔྤཏྟིཡཱ ཝིསཱརདཱ ¶ , སཱརཛྫཀརཱནཾ དིཊྛིཝིཙིཀིཙྪཱདིཔཱཔདྷམྨཱནཾ ཝིགམེན ཝིསཱརདབྷཱཝཾ པཏྟཱཏི ཨཏྠོ. ཡསྶ སུཏསྶ ཝསེན ཝཊྚདུཀྑཏོ ནིསྶརཎཾ སམྦྷཝཏི, ཏཾ ཨིདྷ ཨུཀྐཊྛནིདྡེསེན ‘‘སུཏ’’ནྟི ཨདྷིཔྤེཏནྟི ཨཱཧ ‘‘ཏེཔིཊཀཝསེནཱ’’ཏི. ཏིཎྞཾ པིཊཀཱནཾ སམཱུཧོ ཏེཔིཊཀཾ, ཏཱིཎི ཝཱ པིཊཀཱནི ཏིཔིཊཀཾ, ཏིཔིཊཀམེཝ ཏེཔིཊཀཾ, ཏསྶ ཝསེན. ཏམེཝཱཏི ཡཾ ཏཾ ཏེཔིཊཀཾ སོཏབྦབྷཱཝེན ‘‘སུཏ’’ནྟི ཝུཏྟཾ, ཏམེཝ. དྷམྨནྟི པརིཡཏྟིདྷམྨཾ. དྷཱརེནྟཱིཏི སུཝཎྞབྷཱཛནེ པཀྑིཏྟསཱིཧཝསཾ ཝིཡ ཨཝིནསྶནྟཾ ཀཏྭཱ སུཔྤགུཎསུཔྤཝཏྟིབྷཱཝེན དྷཱརེནྟི ཧདཡེ ཋཔེནྟི. ཨིཏི པརིཡཏྟིདྷམྨཝསེན བཧུསྶུཏདྷམྨདྷརབྷཱཝཾ དསྶེཏྭཱ ཨིདཱནི པཊིཝེདྷདྷམྨཝསེནཔི ཏཾ དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ. ཨརིཡདྷམྨསྶཱཏི མགྒཕལདྷམྨསྶ, ནཝཝིདྷསྶཱཔི ཝཱ ལོཀུཏྟརདྷམྨསྶ. ཨནུདྷམྨབྷཱུཏནྟི ཨདྷིགམཱཡ ཨནུརཱུཔདྷམྨབྷཱུཏཾ. ཨནུཙྪཝིཀཔཊིཔདནྟི ཙ ཏམེཝ ཝིཔསྶནཱདྷམྨམཱཧ, ཚབྦིདྷཱ ཝིསུདྡྷིཡོ ཝཱ. ཨནུདྷམྨནྟི ཏསྶཱ ཡཐཱཝུཏྟཔཊིཔདཱཡ ཨནུརཱུཔཾ ཨབྷིསལླེཁིཏཾ ཨཔྤིཙྪཏཱདིདྷམྨཾ. ཙརཎསཱིལཱཏི སམཱདཱཡ པཝཏྟནསཱིལཱ. ཨནུ མགྒཕལདྷམྨོ ཨེཏིསྶཱཏི ཝཱ ཨནུདྷམྨཱ, ཝུཊྛཱནགཱམིནིཝིཔསྶནཱ, ཏསྶཱ ཙརཎསཱིལཱ. ཨཏྟནོ ཨཱཙརིཡཝཱདནྟི ཨཏྟནོ ཨཱཙརིཡསྶ སམྨཱསམྦུདྡྷསྶ ཝཱདཾ. སདེཝཀསྶ ལོཀསྶ ཨཱཙཱརསིཀྑཱཔནེན ཨཱཙརིཡོ, བྷགཝཱ. ཏསྶ ཝཱདོ, ཙཏུསཙྩདེསནཱ.

ཨཱཙིཀྑིསྶནྟཱིཏི ཨཱདིཏོ ཀཐེསྶནྟི, ཨཏྟནཱ ཨུགྒཧིཏནིཡཱམེན པརེ ཨུགྒཎྷཱཔེསྶནྟཱིཏི ཨཏྠོ. དེསེསྶནྟཱིཏི ཝཱཙེསྶནྟི, པཱལི༹ཾ སམྨཱ པབོདྷེསྶནྟཱིཏི ཨཏྠོ. པཉྙཱཔེསྶནྟཱིཏི པཛཱནཱཔེསྶནྟི, སངྐཱཔེསྶནྟཱིཏི ཨཏྠོ. པཊྛཔེསྶནྟཱིཏི པཀཱརེཧི ཋཔེསྶནྟི, པཀཱསེསྶནྟཱིཏི ཨཏྠོ. ཝིཝརིསྶནྟཱིཏི ཝིཝཊཾ ཀརིསྶནྟི. ཝིབྷཛིསྶནྟཱིཏི ཝིབྷཏྟཾ ཀརིསྶནྟི. ཨུཏྟཱནིཾ ཀརིསྶནྟཱིཏི ¶ ཨནུཏྟཱནཾ གམྦྷཱིརཾ ཨུཏྟཱནཾ པཱཀཊཾ ཀརིསྶནྟི. སཧ དྷམྨེནཱཏི ཨེཏྠ དྷམྨ-སདྡོ ཀཱརཎཔརིཡཱཡོ ‘‘ཧེཏུམྷི ཉཱཎཾ དྷམྨཔཊིསམྦྷིདཱ’’ཏིཨཱདཱིསུ ¶ (ཝིབྷ. ༢༧༠) ཝིཡཱཏི ཨཱཧ ‘‘སཧེཏུཀེན སཀཱརཎེན ཝཙནེནཱ’’ཏི. སཔྤཱཊིཧཱརིཡནྟི སནིསྶརཎཾ ¶ , ཡཐཱ པརཝཱདཾ བྷཉྫིཏྭཱ སཀཝཱདོ པཏིཊྛཧཏི, ཨེཝཾ ཧེཏུདཱཧརཎེཧི ཡཐཱདྷིགཏམཏྠཾ སམྤཱདེཏྭཱ དྷམྨཾ ཀཐེསྶནྟི. ཏེནཱཧ ‘‘ནིཡྻཱནིཀཾ ཀཏྭཱ དྷམྨཾ དེསེསྶནྟཱི’’ཏི, ནཝཝིདྷཾ ལོཀུཏྟརདྷམྨཾ པབོདྷེསྶནྟཱིཏི ཨཏྠོ. ཨེཏྠ ཙ ‘‘པཉྙཱཔེསྶནྟཱི’’ཏིཨཱདཱིཧི ཚཧི པདེཧི ཚ ཨཏྠཔདཱནི དསྶིཏཱནི, ཨཱདིཏོ པན དྭཱིཧི པདེཧི ཚ བྱཉྫནཔདཱནི. ཨེཏྟཱཝཏཱ ཏེཔིཊཀཾ བུདྡྷཝཙནཾ སཾཝཎྞནཱནཡེན སངྒཧེཏྭཱ དསྶིཏཾ ཧོཏི. ཝུཏྟཉྷེཏཾ ནེཏྟིཡཾ ‘‘དྭཱདསཔདཱནི སུཏྟཾ, ཏཾ སབྦཾ བྱཉྫནཉྩ ཨཏྠོ ཙཱ’’ཏི (ནེཏྟི. སངྑཱརེ).

སིཀྑཏྟཡསངྒཧིཏནྟི ཨདྷིསཱིལསིཀྑཱདིསིཀྑཏྟཡསངྒཧཎཾ. སཀལཾ སཱསནབྲཧྨཙརིཡནྟི ཨནཝསེསཾ སཏྠུསཱསནབྷཱུཏཾ སེཊྛཙརིཡཾ. སམིདྡྷནྟི སམྨདེཝ ཝཌྜྷིཏཾ. ཛྷཱནསྶཱདཝསེནཱཏི ཏེཧི ཏེཧི བྷིཀྑཱུཧི སམདྷིགཏཛྷཱནསུཁཝསེན. ཝུདྡྷིཔྤཏྟནྟི ཨུལཱ༹རཔཎཱིཏབྷཱཝགམནེན སབྦསོ པརིཝུདྡྷིཾ ཨུཔགཏཾ. སབྦཔཱལིཕུལླཾ ཝིཡ ཨབྷིཉྙཱསམྤཏྟིཝསེན ཨབྷིཉྙཱསམྤདཱཧི སཱསནཱབྷིཝུདྡྷིཡཱ མཏྠཀཔྤཏྟིཏོ. པཏིཊྛིཏཝསེནཱཏི པཏིཊྛཱནཝསེན, པཏིཊྛཔྤཏྟིཡཱཏི ཨཏྠོ. པཊིཝེདྷཝསེན བཧུནོ ཛནསྶ ཧིཏནྟི བཱཧུཛཉྙཾ. ཏེནཱཧ ‘‘བཧུཛནཱབྷིསམཡཝསེནཱ’’ཏི. པུཐུ པུཐུལཾ བྷཱུཏཾ ཛཱཏཾ, པུཐུ ཝཱ པུཐུཏྟཾ བྷཱུཏཾ པཏྟནྟི ¶ པུཐུབྷཱུཏཾ. ཏེནཱཧ ‘‘སབྦཱཀཱར…པེ… པཏྟ’’ནྟི. སུཊྛུ པཀཱསིཏནྟི སུཊྛུ སམྨདེཝ ཨཱདིཀལྱཱཎཱདིབྷཱཝེན པཝེདིཏཾ.

ཨཱཡུསངྑཱརཨོསྶཛྫནཝཎྞནཱ

༡༦༩. སཏིཾ སཱུཔཊྛིཏཾ ཀཏྭཱཏི ཨཡཾ ཀཱཡཱདིཝིབྷཱགོ ཨཏྟབྷཱཝསཉྙིཏོ དུཀྑབྷཱརོ མཡཱ ཨེཏྟཀཾ ཀཱལཾ ཝཧིཏོ, ཨིདཱནི པན ན ཝཧིཏབྦོ, ཨེཏསྶ ཨཝཧནཏྠཾ ཙིརཏརཾ ཀཱལཾ ཨརིཡམགྒསམྦྷཱརོ སམྦྷཏོ, སྭཱཡཾ ཨརིཡམགྒོ པཊིཝིདྡྷོ, ཡཏོ ཨིམེ ཀཱཡཱདཡོ ཨསུབྷཱདིཏོ སམྨདེཝ པརིཉྙཱཏཱ, ཙཏུབྦིདྷམྤི སམྨཱསཏིཾ ཡཐཱཏཐཾ ཝིསཡེ སུཊྛུ ཨུཔཊྛིཏཾ ཀཏྭཱ. ཉཱཎེན པརིཙྪིནྡིཏྭཱཏི ཡསྨཱ ཨིམསྶ ཨཏྟབྷཱཝསཉྙིཏསྶ དུཀྑབྷཱརསྶ ཝཧནེ པཡོཛནབྷཱུཏཾ ཨཏྟཧིཏཾ ཏཱཝ མཧཱབོདྷིམཱུལེ ཨེཝ པརིསམཱཔིཏཾ, པརཧིཏཾ པན བུདྡྷཝེནེཡྻཝིནཡནཾ པརིསམཱཔིཏབྦཾ, ཏཾ ¶ ཨིདཱནི མཱསཏྟཡེནེཝ པརིསམཱཔནཾ པཱཔུཎིསྶཏི, ཏསྨཱ ཨབྷཱསི ‘‘ཝིསཱཁཔུཎྞམཱཡཾ པརིནིབྦཱཡིསྶཱམཱི’’ཏི, ཨེཝཾ བུདྡྷཉཱཎེན པརིཙྪིནྡིཏྭཱ སབྦབྷཱགེན ནིཙྪཡཾ ཀཏྭཱ. ཨཱཡུསངྑཱརཾ ཝིསྶཛྫཱིཏི ཨཱཡུནོ ཛཱིཝིཏསྶ ཨབྷིསངྑཱརཀཾ ཕལསམཱཔཏྟིདྷམྨཾ ‘‘ན སམཱཔཛྫིསྶཱམཱི’’ཏི ཝིསྶཛྫི ཏཾཝིསྶཛྫནེནེཝ ཏེན ཨབྷིསངྑརིཡམཱནཾ ཛཱིཝིཏསངྑཱརཾ ‘‘ནཔྤཝཏྟེསྶཱམཱི’’ཏི ཝིསྶཛྫི. ཏེནཱཧ ‘‘ཏཏྠཱ’’ཏིཨཱདི. ཋཱནམཧནྟཏཱཡཔི པཝཏྟིཨཱཀཱརམཧནྟཏཱཡཔི མཧནྟོ པཐཝཱིཀམྤོ. ཏཏྠ ཋཱནམཧནྟཏཱཡ བྷཱུམིཙཱལསྶ མཧཏྟཾ དསྶེཏུཾ ¶ ‘‘ཏདཱ ཀིར…པེ… ཀམྤིཏྠཱ’’ཏི ཝུཏྟཾ. སཱ པན ཛཱཏིཀྑེཏྟབྷཱུཏཱ དསསཧསྶཱི ལོཀདྷཱཏུ ཨེཝ, ན ཡཱ ཀཱཙི, ཡཱ མཧཱབྷིནཱིཧཱརམཧཱཛཱཏིཨཱདཱིསུཔི ཀམྤིཏྠ. ཏདཱཔི ཏཏྟིཀཱཡ ཨེཝ ཀམྤནེ ཀིཾ ཀཱརཎཾ ¶ ? ཛཱཏིཀྑེཏྟབྷཱཝེན ཏསྶེཝ ཨཱདིཏོ པརིགྒཧསྶ ཀཏཏྟཱ. པརིགྒཧཀརཎཾ ཙསྶ དྷམྨཏཱཝསེན ཝེདིཏབྦཾ. ཏཐཱ ཧི པུརིམབུདྡྷཱནམྤི ཏཱཝཏཀམེཝ ཛཱཏིཀྑེཏྟཾ ཨཧོསི. ཏཐཱ ཧི ཝུཏྟཾ ‘‘དསསཧསྶཱི ལོཀདྷཱཏཱུ, ནིསྶདྡཱ ཧོནྟི ནིརཱཀུལཱ…པེ… མཧཱསམུདྡོ ཨཱབྷུཛཏི, དསསཧསྶཱི པཀམྤཏཱི’’ཏི ཙ ཨཱདི (བུ. ཝཾ. ༨༤-༩༡). ཨུདཀཔརིཡནྟཾ ཀཏྭཱ ཚཔྤཀཱརཔཝེདྷནེན ཨཝཱིཏརཱགེ བྷིཾསེཏཱིཏི བྷིཾསནོ, སོ ཨེཝ བྷིཾསནཀོཏི ཨཱཧ ‘‘བྷཡཛནཀོ’’ཏི. དེཝབྷེརིཡོཏི དེཝདུནྡུབྷིསདྡསྶ པརིཡཱཡཝཙནམཏྟཾ. ན ཙེཏྠ ཀཱཙི བྷེརཱི ‘‘དེཝདུནྡུབྷཱི’’ཏི ཨདྷིཔྤེཏཱ, ཨཐ ཁོ ཨུཔྤཱཏབྷཱཝེན ལབྦྷམཱནོ ཨཱཀཱསགཏོ ནིགྒྷོསསདྡོ. ཏེནཱཧ ‘‘དེཝོ’’ཏིཨཱདི. དེཝོཏི མེགྷོ. ཏསྶ ཧི ཨཙྪབྷཱཝེན ཨཱཀཱསསྶ ཝསྶཱབྷཱཝེན སུཀྑགཛྫིཏསཉྙིཏེ སདྡེ ནིཙྪརནྟེ དེཝདུནྡུབྷིསམཉྙཱ. ཏེནཱཧ ‘‘དེཝོ སུཀྑགཛྫིཏཾ གཛྫཱི’’ཏི.

པཱིཏིཝེགཝིསྶཊྛནྟི ‘‘ཨེཝཾ ཙིརཏརཾ ཀཱལཾ ཝཧིཏོ ཨཡཾ ཨཏྟབྷཱཝསཉྙིཏོ དུཀྑབྷཱརོ, ཨིདཱནི ན ཙིརསྶེཝ ནིཀྑིཔིསྶཏཱི’’ཏི སཉྫཱཏསོམནསྶོ བྷགཝཱ སབྷཱཝེནེཝ པཱིཏིཝེགཝིསྶཊྛཾ ཨུདཱནཾ ཨུདཱནེསི. ཨེཝཾ པན ཨུདཱནེནྟེན ཨཡམྤི ཨཏྠོ སཱདྷིཏོ ཧོཏཱིཏི དསྶནཏྠཾ ཨཊྛཀཐཱཡཾ ‘‘ཀསྨཱ’’ཏིཨཱདི ཝུཏྟཾ.

ཏུལཱིཡཏཱིཏི ཏུལནྟི ཏུལ-སདྡོ ཀམྨསཱདྷནོཏི དསྶེཏུཾ ‘‘ཏུལིཏ’’ནྟི ཝུཏྟཾ. ཨཔྤཱནུབྷཱཝཏཱཡ པརིཙྪིནྣཾ. ཏཐཱ ཧི ཏཾ པརིཏོ ཁཎྜིཏབྷཱཝེན ‘‘པརིཏྟ’’ནྟི ཝུཙྩཏི. པཊིཔཀྑཝིཀྑམྦྷནཏོ དཱིགྷསནྟཱནཏཱཡ, ཝིཔུལཕལཏཱཡ ¶ ཙ ན ཏུལཾ ན པརིཙྪིནྣཾ. ཡེཧི ཀཱརཎེཧི པུབྦེ ཨཝིསེསཏོ མཧགྒཏཾ ‘‘ཨཏུལ’’ནྟི ཝུཏྟཾ, ཏཱནི ཀཱརཎཱནི ¶ རཱུཔཱཝཙརཏོ ཨཱརུཔྤསྶ སཱཏིསཡཱནི ཝིཛྫནྟཱིཏི ‘‘ཨརཱུཔཱཝཙརཾ ཨཏུལ’’ནྟི ཝུཏྟཾ, ཨིཏརཉྩ ‘‘ཏུལ’’ནྟི, ཨཔྤཝིཔཱཀཾ ཏཱིསུཔི ཀམྨེསུ ཡཾ ཏནུཝིཔཱཀཾ ཧཱིནཾ, ཏཾ ཏུལཾ. བཧུཝིཔཱཀནྟི ཡཾ མཧཱཝིཔཱཀཾ པཎཱིཏཾ, ཏཾ ཨཏུལཾ. ཡཾ པནེཏྠ མཛ྄ཛྷིམཾ, ཏཾ ཧཱིནཾ, ཨུཀྐཊྛནྟི དྭིདྷཱ བྷིནྡིཏྭཱ དྭཱིསུ བྷཱགེསུ པཀྑིཔིཏབྦཾ. ཧཱིནཏྟིཀཝཎྞནཱཡཾ ཝུཏྟནཡེནེཝ ཨཔྤབཧུཝིཔཱཀཏཾ ནིདྡྷཱརེཏྭཱ ཏསྶ ཝསེན ཏུལཱཏུལབྷཱཝོ ཝེདིཏབྦོ. སམྦྷཝཏི ཨེཏསྨཱཏི སམྦྷཝོཏི ཨཱཧ ‘‘སམྦྷཝསྶ ཧེཏུབྷཱུཏ’’ནྟི. ནིཡཀཛ྄ཛྷཏྟརཏོཏི སསནྟཱནདྷམྨེསུ ཝིཔསྶནཱཝསེན, གོཙརཱསེཝནཱཡ ཙ ནིརཏོ. སཝིཔཱཀཾ སམཱནཾ པཝཏྟིཝིཔཱཀམཏྟདཱཡིཀམྨཾ སཝིཔཱཀཊྛེན སམྦྷཝཾ. ན ཙ ཏཾ ཀཱམཱདིབྷཝཱབྷིསངྑཱརཀནྟི ཏཏོ ཝིསེསནཏྠཾ ‘‘སམྦྷཝ’’ནྟི ཝཏྭཱ ‘‘བྷཝསངྑཱར’’ནྟི ཝུཏྟཾ. ཨོསྶཛྫཱིཏི ཨརིཡམགྒེན ཨཝསྶཛྫི ¶ . ཀཝཙཾ ཝིཡ ཨཏྟབྷཱཝཾ པརིཡོནནྡྷིཏྭཱ ཋིཏཾ ཨཏྟནི སམྦྷཱུཏཏྟཱ ཨཏྟསམྦྷཝཾ ཀིལེསཉྩ ཨབྷིནྡཱིཏི ཀིལེསབྷེདསཧབྷཱཝིཀམྨོསྶཛྫནཾ དསྶེནྟོ ཏདུབྷཡསྶ ཀཱརཎཾ ཨཝོཙ ‘‘ཨཛ྄ཛྷཏྟརཏོ སམཱཧིཏོ’’ཏི.

ཏཱིརེནྟོཏི ‘‘ཨུཔྤཱདོ བྷཡཾ, ཨནུཔྤཱདོ ཁེམ’’ནྟིཨཱདིནཱ ཝཱིམཾསནྟོ. ‘‘ཏུལེནྟོ ཏཱིརེནྟོ’’ཏིཨཱདིནཱ སངྑེཔཏོ ཝུཏྟམཏྠཾ ཝིཏྠཱརཏོ དསྶེཏུཾ ‘‘པཉྩཀྑནྡྷཱ’’ཏི ཨཱདིཾ ཝཏྭཱ བྷཝསངྑཱརསྶ ཨཝསྶཛྫནཱཀཱརཾ སརཱུཔཏོ དསྶེསི. ‘‘ཨེཝ’’ནྟིཨཱདིནཱ པན ཨུདཱནཝཎྞནཱཡཾ ཨཱདིཏོ ཝུཏྟམཏྠཾ ནིགམནཝསེན དསྶེསི.

མཧཱབྷཱུམིཙཱལཝཎྞནཱ

༡༧༡. ཡནྟི ཀརཎེ ཝཱ ཨདྷིཀརཎེ ཝཱ པཙྩཏྟཝཙནནྟི ཨདྷིཔྤཱཡེན ཨཱཧ ‘‘ཡེན སམཡེན, ཡསྨིཾ ཝཱ སམཡེ’’ཏི. ཨུཀྑེཔཀཝཱཏཱཏི ¶ ཨུདཀསནྡྷཱརཀཝཱཏཾ ཨུཔཙྪིནྡིཏྭཱ ཋིཏཊྛཱནཏོ ཁེཔཀཝཱཏཱ. ‘‘སཊྛི…པེ… བཧལ’’ནྟི ཨིདཾ ཏསྶ ཝཱཏསྶ ཨུབྦེདྷཔྤམཱཎམེཝ གཧེཏྭཱ ཝུཏྟཾ, ཨཱཡཱམཝིཏྠཱརཏོ པན དསསཧསྶཙཀྐཝཱལ༹པྤམཱཎམྤི ཨུདཀསནྡྷཱརཀཝཱཏཾ ཨུཔཙྪིནྡཏིཡེཝ. ཨཱཀཱསེཏི པུབྦེ ཝཱཏེན པཏིཊྛིཏོཀཱསེ. པུན ཝཱཏོཏི ཨུཀྑེཔཀཝཱཏེ ཏཐཱཀཏྭཱ ཝིགཏེ ཨུདཀསནྡྷཱརཀཝཱཏོ པུན ཨཱབནྡྷིཏྭཱ ¶ གཎྷཱཏི ཡཐཱ ཏཾ ཨུདཀཾ ན བྷསྶཏི, ཨེཝཾ ཨུཏྠམྦྷེནྟཾ ཨཱབནྡྷནཝིཏཱནཝསེན བནྡྷིཏྭཱ གཎྷཱཏི. ཏཏོ ཨུདཀཾ ཨུགྒཙྪཏཱིཏི ཏཏོ ཨཱབནྡྷིཏྭཱ གཧཎཏོ ཏེན ཝཱཏེན ཨུཏྠམྦྷིཏཾ ཨུདཀཾ ཨུགྒཙྪཏི ཨུཔརི གཙྪཏི. ཧོཏིཡེཝཱཏི ཨནྟརནྟརཱ ཧོཏིཡེཝ. བཧལབྷཱཝེནཱཏི མཧཱཔཐཝིཡཱ མཧནྟབྷཱཝེན. སཀལཱ ཧི མཧཱཔཐཝཱི ཏདཱ ཨོགྒཙྪཏི, ཨུགྒཙྪཏི ཙ, ཏསྨཱ ཀམྤནཾ ན པཉྙཱཡཏི.

ཨིཛ྄ཛྷནསྶཱཏི ཨིཙྪིཏཏྠསིཛ྄ཛྷནསྶ. ཨནུབྷཝིཏབྦསྶཨིསྶརིཡསམྤཏྟིཨཱདིཀསྶ. པརིཏྟཱཏི པཊིལདྡྷམཏྟཱ ནཱཏིསུབྷཱཝིཏཱ. ཏཐཱ ཙ བྷཱཝནཱ བལཝཏཱི ན ཧོཏཱིཏི ཨཱཧ ‘‘དུབྦལཱ’’ཏི. སཉྙཱསཱིསེན ཧི བྷཱཝནཱ ཝུཏྟཱ. ཨཔྤམཱཎཱཏི པགུཎཱ སུབྷཱཝིཏཱ. སཱ ཧི ཐིརཱ དལ༹ྷཏརཱ ཧོཏཱིཏི ཨཱཧ ‘‘བལཝཱ’’ཏི. ‘‘པརིཏྟཱ པཐཝཱིསཉྙཱ, ཨཔྤམཱཎཱ ཨཱཔོསཉྙཱ’’ཏི དེསནཱམཏྟམེཝ, ཨཱཔོསཉྙཱཡ པན སུབྷཱཝིཏཱཡ པཐཝཱིཀམྤོ སུཁེནེཝ ཨིཛ྄ཛྷཏཱིཏི ཨཡམེཏྠ ཨདྷིཔྤཱཡོ ཝེདིཏབྦོ. སཾཝེཛེནྟོ དིབྦསམྤཏྟིཡཱ པམཏྟཾ སཀྐཾ དེཝརཱཛཱནཾ. ཝཱིམཾསནྟོ ཝཱ ཏཱཝདེཝ སམདྷིགཏཾ ཨཏྟནོ ཨིདྡྷིབལཾ. མཧཱམོགྒལླཱནཏྠེརསྶ པཱསཱདཀམྤནཾ པཱཀཊནྟི ཏཾ ཨནཱམསིཏྭཱ སངྒྷརཀྑིཏསཱམཎེརསྶ པཱསཱདཀམྤནཾ དསྶེཏུཾ ‘‘སོ ཀིརཱཡསྨཱ’’ཏིཨཱདི ཝུཏྟཾ. པཱུཏིམིསྶོ ¶ གནྡྷོ ཨེཏསྶཱཏི པཱུཏིགནྡྷོ, ཏེན པཱུཏིགནྡྷེནེཝ ¶ ཨདྷིགཏམཱཏུཀུཙྪིསམྦྷཝཾ ཝིཡ གནྡྷེནེཝ སཱིསེན, ཨཏིཝིཡ དཱརཀོ ཨེཝཱཏི ཨཏྠོ.

ཨཱཙརིཡནྟི ཨཱཙརིཡཱུཔདེསཾ. ཨིདྡྷཱབྷིསངྑཱརོ ནཱམ ཨིདྡྷིཝིདྷཔྤཊིཔཀྑཱདཱིབྷཱཝེན ཨིཙྪིཏབྦོ, སོ ཙ ཨུཔཱཡེ ཀོསལླསྶ ཨཏྟནཱ ན སམྨཱ ཨུགྒཧིཏཏྟཱ ན ཏཱཝ སིཀྑིཏོཏི ཨཱཧ ‘‘ཨསིཀྑིཏྭཱཝ ཡུདྡྷཾ པཝིཊྛོསཱི’’ཏི. ‘‘པིལཝནྟ’’ནྟི ཨིམིནཱ སཀལམེཝ པཱསཱདཝཏྠུཾ ཨུདཀཾ ཀཏྭཱ ཨདྷིཊྛཱཏབྦཔཱསཱདོཝ ཏཏྠ པིལཝཏཱིཏི དསྶེཏི. ཨདྷིཊྛཱནཀྐམཾ པན ཨུཔམཱཡ དསྶེནྟོ ‘‘ཏཱཏ…པེ… ཛཱནཱཧཱི’’ཏི ཨཱཧ. ཏཏྠ ཀཔལླཀཔཱུཝནྟི ཨཱསིཏྟཀཔཱུཝཾ, ཏཾ པཙནྟཱ ཀཔཱལེ པཋམཾ ཀིཉྩི པིཊྛཾ ཋཔེཏྭཱ ཨནུཀྐམེན ཝཌྜྷེཏྭཱ ཨནྟནྟེན པརིཙྪིནྡནྟི པཱུཝཾ སམནྟཏོ པརིཙྪིནྣཾ ཀཏྭཱ ཋཔེནྟི, ཨེཝཾ ‘‘ཨཱཔོཀསིཎཝསེན ‘པཱསཱདེན པཏིཊྛིཏཊྛཱནཾ ཨུདཀཾ ཧོཏཱུ’ཏི ཨདྷིཊྛཧནྟོ སམནྟཏོ པཱསཱདསྶ ཡཱཝ པརིཡནྟཱ ཡཐཱ ཨུདཀཾ ཧོཏི, ཏཐཱ ཨདྷིཊྛཱཏབྦ’’ནྟི ཨུཔམཱཡ ཨུཔདིསཏི.

མཧཱཔདཱནེ ¶ ཝུཏྟམེཝཱཏི ‘‘དྷམྨཏཱ ཨེསཱ, བྷིཀྑཝེ, ཡདཱ བོདྷིསཏྟོ ཏུསིཏཱ ཀཱཡཱ ཙཝིཏྭཱ མཱཏུཀུཙྪིཾ ཨོཀྐམཏཱི’’ཏི (དཱི. ནི. ༢.༡༨) ཝཏྭཱ ‘‘ཨཡཉྩ དསསཧསྶཱི ལོཀདྷཱཏུ སངྐམྤཏི སམྤཀམྤཏི སམྤཝེདྷཏཱི’’ཏི (དཱི. ནི. ༢.༡༨), ཏཐཱ ‘‘དྷམྨཏཱ ཨེསཱ, བྷིཀྑཝེ, ཡདཱ བོདྷིསཏྟོ མཱཏུཀུཙྪིམྷཱ ནིཀྑམཏཱི’’ཏི (དཱི. ནི. ༢.༣༠) ཝཏྭཱ ‘‘ཨཡཉྩ དསསཧསྶཱི ལོཀདྷཱཏུ སངྐམྤཏི སམྤཀམྤཏི སམྤཝེདྷཏཱི’’ཏི (དཱི. ནི. ༢.༣༢) ཙ ¶ མཧཱབོདྷིསཏྟསྶ གབྦྷོཀྐནྟིཡཾ, ཨབྷིཛཱཏིཡཉྩ དྷམྨཏཱཝསེན མཧཱཔདཱནེཔཐཝཱིཀམྤསྶ ཝུཏྟཏྟཱ ཨིཏརེསུཔི ཙཏཱུསུ ཋཱནེསུ པཐཝཱིཀམྤོ དྷམྨཏཱཝསེནེཝཱཏི མཧཱཔདཱནེཨཏྠཏོ ཝུཏྟཾ ཨེཝཱཏི ཨདྷིཔྤཱཡོ.

ཨིདཱནི ནེསཾ པཐཝཱིཀམྤནཾ ཀཱརཎཏོ, པཝཏྟིཨཱཀཱརཏོ ཙ ཝིབྷཱགཾ དསྶེཏུཾ ‘‘ཨིཏི ཨིམེསཱུ’’ཏིཨཱདི ཝུཏྟཾ. དྷཱཏུཀོཔེནཱཏི ཨུཀྑེཔཀདྷཱཏུསངྑཱཏཱཡ ཝཱཡོདྷཱཏུཡཱ པཀོཔེན. ཨིདྡྷཱནུབྷཱཝེནཱཏི ཉཱཎིདྡྷིཡཱ ཝཱ ཀམྨཝིཔཱཀཛིདྡྷིཡཱ ཝཱ པབྷཱཝེན, ཏེཛེནཱཏི ཨཏྠོ. པུཉྙཏེཛེནཱཏི པུཉྙཱནུབྷཱཝེན, མཧཱབོདྷིསཏྟསྶ པུཉྙབལེནཱཏི ཨཏྠོ. ཉཱཎཏེཛེནཱཏི པཊིཝེདྷཉཱཎཱནུབྷཱཝེན. སཱདྷུཀཱརདཱནཝསེནཱཏི ཡཐཱ ཨནཉྙསཱདྷཱརཎེན པཊིཝེདྷཉཱཎཱནུབྷཱཝེན ཨབྷིཧཏཱ མཧཱཔཐཝཱི ཨབྷིསམྦོདྷིཡཾ ཨཀམྤིཏྠ, ཨེཝཾ ཨནཉྙསཱདྷཱརཎེན དེསནཱཉཱཎཱནུབྷཱཝེན ཨབྷིཧཏཱ མཧཱཔཐཝཱི ཨཀམྤིཏྠ, ཏཾ པནསྶཱ སཱདྷུཀཱརདཱནཾ ཝིཡ ཧོཏཱིཏི ‘‘སཱདྷུཀཱརདཱནཝསེནཱ’’ཏི ཝུཏྟཾ.

ཡེན ¶ པན བྷགཝཱ ཨསཱིཏིཨནུབྱཉྫནཔཊིམཎྜིཏདྭཏྟིཾསམཧཱཔུརིསལཀྑཎ- (དཱི. ནི. ༢.༣༣; ༣.༡༩༨; མ. ནི. ༢.༣༨༥) ཝིཙིཏྲརཱུཔཀཱཡོ སབྦཱཀཱརཔརིསུདྡྷསཱིལཀྑནྡྷཱདིགུཎརཏནསམིདྡྷིདྷམྨཀཱཡོ པུཉྙམཧཏྟཐཱམམཧཏྟཡསམཧཨཱཨིདྡྷིམཧཏྟཔཉྙཱམཧཏྟཱནཾ པརམུཀྐཾསགཏོ ཨསམོ ཨསམསམོ ཨཔྤཊིཔུགྒལོ ཨརཧཾ སམྨཱསམྦུདྡྷོ ཨཏྟནོ ཨཏྟབྷཱཝསཉྙིཏཾ ཁནྡྷཔཉྩཀཾ ཀཔྤཾ ཝཱ ཀཔྤཱཝསེསཾ ཝཱ ཋཔེཏུཾ སམཏྠོཔི སངྑཏདྷམྨཾ པཊིཛིགུཙྪནཱཀཱརཔྤཝཏྟེན ཉཱཎཝིསེསེན ཏིཎཱཡཔི ཨམཉྙམཱནོ ཨཱཡུསངྑཱརོསྶཛྫནཝིདྷིནཱ ནིརཔེཀྑོ ཨོསྶཛྫི. ཏདནུབྷཱཝཱབྷིཧཏཱ མཧཱཔཐཝཱི ཨཱཡུསངྑཱརོསྶཛྫནེ ཨཀམྤིཏྠ, ཏཾ པནསྶཱ ཀཱརུཉྙསབྷཱཝསཎྛིཏཱ ཝིཡ ཧོཏཱིཏི ཝུཏྟཾ ‘‘ཀཱརུཉྙསབྷཱཝེནཱ’’ཏི ¶ . ཡསྨཱ བྷགཝཱ པརིནིབྦཱནསམཡེ ཙཏུཝཱིསཏིཀོཊིསཏསཧསྶསངྑྱཱ སམཱཔཏྟིཡོ ¶ སམཱཔཛྫི ཨནྟརནྟརཱ ཕལསམཱཔཏྟིསམཱཔཛྫནེན, ཏསྶ པུབྦབྷཱགེ སཱཏིསཡཾ ཏིཀྑཾ སཱུརཾ ཝིཔསྶནཱཉཱཎཉྩ པཝཏྟེསི, ‘‘ཡདཏྠཉྩ མཡཱ ཨེཝཾ སུཙིརཀཱལཾ ཨནཉྙསཱདྷཱརཎོ པརམུཀྐཾསགཏོ ཉཱཎསམྦྷཱརོ སམྦྷཏོ, ཨནུཏྟརོ ཙ ཝིམོཀྑོ སམདྷིགཏོ, ཏསྶ ཝཏ མེ སིཁཱཔྤཏྟཕལབྷཱུཏཱ ཨཙྩནྟནིཊྛཱ ཨནུཔཱདིསེསནིབྦཱནདྷཱཏུ ཨཛྫ སམིཛ྄ཛྷཏཱི’’ཏི བྷིཡྻོ ཨཏིཝིཡ སོམནསྶཔྤཏྟསྶ བྷགཝཏོ པཱིཏིཝིཔྥཱརཱདིགུཎཝིཔུལཏརཱནུབྷཱཝོ པརེཧི ཨསཱདྷཱརཎཉཱཎཱཏིསཡོ ཨུདཔཱདི, ཡསྶ སམཱཔཏྟིབལསམུཔབྲཱུཧིཏསྶ ཉཱཎཱཏིསཡསྶ ཨཱནུབྷཱཝཾ སནྡྷཱཡ ཨིདཾ ཝུཏྟཾ ‘‘དྭེམེ པིཎྜཔཱཏཱ སམསམཕལཱ སམསམཝིཔཱཀཱ’’ཏིཨཱདི (ཨུདཱ. ༧༥), ཏསྨཱ ཏསྶ ཨཱནུབྷཱཝེན སམབྷིཧཏཱ མཧཱཔཐཝཱི ཨཀམྤིཏྠ. ཏཾ པནསྶཱ ཏསྶཾ ཝེལཱཡཾ ཨཱརོདནཱཀཱརཔྤཏྟི ཝིཡ ཧོཏཱིཏི ‘‘ཨཊྛམོ ཨཱརོདནེནཱ’’ཏི ཝུཏྟཾ.

ཨིདཱནི སངྑེཔཏོ ཝུཏྟམཏྠཾ ཝིཝརནྟོ ‘‘མཱཏུཀུཙྪིཾ ཨོཀྐམནྟེ’’ཏིཨཱདིམཱཧ. ཨཡཾ པནཏྠོཏི ‘‘སཱདྷུཀཱརདཱནཝསེནཱ’’ཏིཨཱདིནཱ ཝུཏྟོ ཨཏྠོ. པཐཝཱིདེཝཏཱཡ ཝསེནཱཏི ཨེཏྠ སམུདྡདེཝཏཱ ཝིཡ མཧཱཔཐཝིཡཱ ཨདྷིདེཝཏཱ ཀིར ནཱམ ཨཏྠི. ཏཱདིསེ ཀཱརཎེ སཏི ཏསྶཱ ཙིཏྟཝསེན ཨཡཾ མཧཱཔཐཝཱི སངྐམྤཏི སམྤཀམྤཏི སམྤཝེདྷཏི, ཡཐཱ ཝཱཏཝལཱཧཀདེཝཏཱནཾ ཙིཏྟཝསེན ཝཱཏཱ ཝཱཡནྟི, སཱིཏུཎྷཨབྦྷཝསྶཝལཱཧཀདེཝཏཱནཾ ཙིཏྟཝསེན སཱིཏཱདཡོ བྷཝནྟི. ཏཐཱ ཧི ཝིསཱཁཔུཎྞམཱཡཾ ཨབྷིསམྦོདྷིཨཏྠཾ བོདྷིརུཀྑམཱུལེ ནིསིནྣསྶ ལོཀནཱཐསྶ ཨནྟརཱཡཀརཎཏྠཾ ཨུཔཊྛིཏཾ མཱརབལཾ ཝིདྷམིཏུཾ –

‘‘ཨཙེཏནཱཡཾ ¶ པཐཝཱི, ཨཝིཉྙཱཡ སུཁཾ དུཁཾ;

སཱཔི དཱནབལཱ མཡ྄ཧཾ, སཏྟཀྑཏྟུཾ པཀམྤཐཱ’’ཏི. (ཙརིཡཱ. ༡.༡༢༤) –

ཝཙནསམནནྟརཾ ¶ མཧཱཔཐཝཱི བྷིཛྫིཏྭཱ སཔརིསཾ མཱརཾ པརིཝཏྟེསི. ཨེཏནྟི སཱདྷུཀཱརདཱནཱདི. ཡདིཔི ནཏྠི ཨཙེཏནཏྟཱ, དྷམྨཏཱཝསེན པན ཝུཏྟནཡེན སིཡཱཏི སཀྐཱ ཝཏྟུཾ. དྷམྨཏཱ པན ཨཏྠཏོ དྷམྨསབྷཱཝོ, སོ པུཉྙདྷམྨསྶ ཝཱ ཉཱཎདྷམྨསྶ ཝཱ ཨཱནུབྷཱཝསབྷཱཝོཏི. ཏཡིདཾ སབྦཾ ཝིཙཱརིཏམེཝ, ཨེཝཉྩ ཀཏྭཱ –

‘‘ཨིམེ ¶ དྷམྨེ སམྨསཏོ, སབྷཱཝསརསལཀྑཎེ;

དྷམྨཏེཛེན ཝསུདྷཱ, དསསཧསྶཱི པཀམྤཐཱ’’ཏི. (བུ. ཝཾ. ༡.༡༦༦);

ཨཱདི ཝཙནཉྩ སམཏྠིཏཾ ཧོཏི.

ནིདྡིཊྛནིདསྶནནྟི ནིདྡིཊྛསྶ ཨཏྠསྶ ནིཡྻཱཏནཾ, ནིགམནནྟི ཨཏྠོ. ཨེཏྟཱཝཏཱཏི པཐཝཱིཀམྤཱདིཨུཔྤཱདཛནནེན ཙེཝ པཐཝཱིཀམྤསྶ བྷགཝཏོ ཧེཏུནིདསྶནེན ཙ. ‘‘ཨདྡྷཱ ཨཛྫ བྷགཝཏཱ ཨཱཡུསངྑཱརོ ཨོསྶཊྛོ’’ཏི སལླཀྑེསི པཱརིསེསཉཱཡེན. ཨེཝཉྷི ཏདཱ ཐེརོ ཏམཏྠཾ ཝཱིམཾསེཡྻ ནཱཡཾ བྷཱུམིཀམྤོ དྷཱཏུཔྤཀོཔཧེཏུཀོ ཏསྶ ཨཔཉྙཱཡམཱནརཱུཔཏྟཱ, བཱཧིརཀོཔི ཨིསི ཨེཝཾ མཧཱནུབྷཱཝོ བུདྡྷཀཱལེ ནཏྠི, སཱསནིཀོཔི སཏྠུ ཨནཱརོཙེཏྭཱ ཨེཝཾ ཀརོནྟོ ནཱམ ནཏྠི, སེསཱནཾ པཉྩནྣཾ ཨིདཱནི ཨསམྦྷཝོ, ཨེཝཾ བྷཱུམིཀམྤོ ཙཱཡཾ མཧཱབྷིཾསནཀོ སལོམཧཾསོ ཨཧོསི, ཏསྨཱ པཱརིསེསཏོ ཨཱཧ ‘‘ཨཛྫ བྷགཝཏཱ ཨཱཡུསངྑཱརོ ཨོསྶཊྛོཏི སལླཀྑེསཱི’’ཏི.

ཨཊྛཔརིསཝཎྞནཱ

༡༧༢. ཨོཀཱསཾ ཨདཏྭཱཏི ‘‘ཏིཊྛཏུ བྷནྟེ བྷགཝཱ ཀཔྤ’’ནྟིཨཱདི (དཱི. ནི. ༢.༡༧༨) ནཡཔྤཝཏྟཱཡ ཐེརསྶ ཨཱཡཱཙནཱཡ ཨཝསརཾ ཨདཏྭཱ. ཨཉྙཱནིཔི ཨཊྛཀཱནི སམྤིཎྜེནྟོ ཧེཏུཨཊྛཀཏོ ཨཉྙཱནི པརིསཱབྷིབྷཱཡཏནཝིམོཀྑཝསེན ¶ ཏཱིཎི ཨཊྛཀཱནི སངྒཧེཏྭཱ དསྶེནྟོ ‘‘ཨཊྛ ཁོ ཨིམཱ’’ཏིཨཱདིམཱཧ. ‘‘ཨཱཡསྨཏོ ཨཱནནྡསྶ སོཀུཔྤཏྟིཾ པརིཧརནྟོ ཝིཀྑེཔཾ ཀརོནྟོ’’ཏི ཀེཙི སཧསཱ བྷཎིཏེ བལཝསོཀོ ཨུཔྤཛྫེཡྻཱཏི.

སམཱགནྟབྦཏོ, སམཱགཙྪཏཱིཏི ཝཱ སམཱགམོ, པརིསཱ. བིམྦིསཱརཔམུཁོ སམཱགམོ བིམྦིསཱརསམཱགམོ. སེསདྭཡེཔི ཨེསེཝ ནཡོ. བིམྦིསཱར…པེ… སམཱགམཱདིསདིསཾ ཁཏྟིཡཔརིསནྟི ཡོཛནཱ. ཨཉྙེསུ ཙཀྐཝཱལེ༹སུཔི ལབྦྷཏེཡེཝ སཏྠུ ཁཏྟིཡཔརིསཱདིཨུཔསངྐམནཾ. ཨཱདིཏོ ཏེཧི སདྡྷིཾ སཏྠུ བྷཱསནཾ ཨཱལཱཔོ. ཀཐནཔཊིཀཐནཾ སལླཱཔོ. དྷམྨུཔསཉྷིཏཱ པུཙྪཱ པཊིཔུཙྪཱ ¶ དྷམྨསཱཀཙྪཱ. སཎྛཱནཾ པཊིཙྩ ཀཐནཾ སཎྛཱནཔརིཡཱཡཏྟཱ ¶ ཝཎྞ-སདྡསྶ ‘‘མཧནྟཾ ཧཏྠིརཱཛཝཎྞཾ ཨབྷིནིམྨིནིཏྭཱ’’ཏིཨཱདཱིསུ (སཾ. ནི. ༡.༡༣༨) ཝིཡ. ‘‘ཏེས’’ནྟི པདཾ ཨུབྷཡཔདཱཔེཀྑཾ ‘‘ཏེསམྤི ལཀྑཎསཎྛཱནཾ ཝིཡ སཏྠུ སརཱིརསཎྛཱནཾ, ཏེསཾ ཀེཝལཾ པཉྙཱཡཏི ཨེཝཱ’’ཏི. ནཱཔི ཨཱམུཀྐམཎིཀུཎྜལོ བྷགཝཱ ཧོཏཱིཏི ཡོཛནཱ. ཚིནྣསྶརཱཏི དྭིདྷཱབྷཱུཏསྶརཱ. གགྒརསྶརཱཏི ཛཛྫརིཏསྶརཱ. བྷཱསནྟརནྟི ཏེསཾ སཏྟཱནཾ བྷཱསཏོ ཨཉྙཾ བྷཱསཾ. ཝཱིམཾསཱཏི ཙིནྟནཱ. ‘‘ཀིམཏྠཾ…པེ… དེསེཏཱི’’ཏི ཨིདཾ ནནུ ཨཏྟཱནཾ ཛཱནཱཔེཏྭཱ དྷམྨེ ཀཐིཏེ ཏེསཾ སཱཏིསཡོ པསཱདོ ཧོཏཱིཏི ཨིམིནཱ ཨདྷིཔྤཱཡེན ཝུཏྟཾ? ཡེསཾ ཨཏྟཱནཾ ཨཛཱནཱཔེཏྭཱཝ དྷམྨེ ཀཐིཏེ པསཱདོ ཧོཏི, ན ཛཱནཱཔེཏྭཱ, ཏཱདིསེ སནྡྷཱཡ སཏྠཱ ཏཐཱ ཀརོཏི. ཏཏྠ པཡོཛནམཱཧ ‘‘ཝཱསནཏྠཱཡཱ’’ཏི. ཨེཝཾ སུཏོཔཱིཏི ཨེཝཾ ཨཝིཉྙཱཏདེསཀོ ཨཝིཉྙཱཏཱགམནོཔི སུཏོ དྷམྨོ ཨཏྟནོ དྷམྨསུདྷམྨཏཱཡེཝ ཨནཱགཏེ པཙྩཡོ ཧོཏི སུཎནྟསྶ.

‘‘ཨཱནནྡཱ’’ཏིཨཱདིཀོ སངྒཱིཏིཨནཱརུལ༹ྷོ པཱལི༹དྷམྨོ ཨེཝ ཏཐཱ དསྶིཏོ. ཨེས ནཡོ ཨིཏོ པརེསུཔི ཨེཝརཱུཔེསུ ཋཱནེསུ.

ཨཊྛཨབྷིབྷཱཡཏནཝཎྞནཱ

༡༧༣. ཨབྷིབྷཝཏཱིཏི ¶ ཨབྷིབྷུ, པརིཀམྨཾ, ཉཱཎཾ ཝཱ. ཨབྷིབྷུ ཨཱཡཏནཾ ཨེཏསྶཱཏི ཨབྷིབྷཱཡཏནཾ, ཛྷཱནཾ. ཨབྷིབྷཝིཏབྦཾ ཝཱ ཨཱརམྨཎསངྑཱཏཾ ཨཱཡཏནཾ ཨེཏསྶཱཏི ཨབྷིབྷཱཡཏནཾ. ཨཱརམྨཎཱབྷིབྷཝནཏོ ཨབྷིབྷུ ཙ ཏཾ ཨཱཡཏནཉྩ ཡོགིནོ སུཁཝིསེསཱནཾ ཨདྷིཊྛཱནབྷཱཝཏོ, མནཱཡཏནདྷམྨཱཡཏནབྷཱཝཏོ ཝཱཏིཔི སསམྤཡུཏྟཾ ཛྷཱནཾ ཨབྷིབྷཱཡཏནཾ. ཏེནཱཧ ‘‘ཨབྷིབྷཝནཀཱརཎཱནཱི’’ཏིཨཱདི. ཏཱནི ཧཱིཏི ཨབྷིབྷཱཡཏནསཉྙིཏཱནི ཛྷཱནཱནི. ‘‘པུགྒལསྶ ཉཱཎུཏྟརིཡཏཱཡཱ’’ཏི ཨིདཾ ཨུབྷཡཏྠཱཔི ཡོཛེཏབྦཾ. ཀཐཾ? པཊིཔཀྑབྷཱཝེན པཙྩནཱིཀདྷམྨེ ཨབྷིབྷཝནྟི པུགྒལསྶ ཉཱཎུཏྟརིཡཏཱཡ ཨཱརམྨཎཱནི ཨབྷིབྷཝནྟི. ཉཱཎབལེནེཝ ཧི ཨཱརམྨཎཱབྷིབྷཝནཾ ཝིཡ པཊིཔཀྑཱབྷིབྷཝོ པཱིཏི.

པརིཀམྨཝསེན ཨཛ྄ཛྷཏྟཾ རཱུཔསཉྙཱི, ན ཨཔྤནཱཝསེན. ན ཧི པཊིབྷཱགནིམིཏྟཱརམྨཎཱ ཨཔྤནཱ ཨཛ྄ཛྷཏྟཝིསཡཱ སམྦྷཝཏི, ཏཾ པན ཨཛ྄ཛྷཏྟཔརིཀམྨཝསེན ལདྡྷཾ ¶ ཀསིཎནིམིཏྟཾ ཨཝིསུདྡྷམེཝ ཧོཏི, ན བཧིདྡྷཱཔརིཀམྨཝསེན ལདྡྷཾ ཝིཡ ཝིསུདྡྷཾ.

པརིཏྟཱནཱིཏི ¶ ཡཐཱལདྡྷཱནི སུཔྤསརཱཝམཏྟཱནི. ཏེནཱཧ ‘‘ཨཝཌྜྷིཏཱནཱི’’ཏི. པརིཏྟཝསེནེཝཱཏི ཝཎྞཝསེན ཨཱབྷོགེ ཝིཛྫམཱནེཔི པརིཏྟཝསེནེཝ ཨིདཾ ཨབྷིབྷཱཡཏནཾ ཝུཏྟཾ. པརིཏྟཏཱ ཧེཏྠ ཨབྷིབྷཝནསྶ ཀཱརཎཾ. ཝཎྞཱབྷོགེ སཏིཔི ཨསཏིཔི ཨབྷིབྷཱཡཏནབྷཱཝནཱ ནཱམ ཏིཀྑཔཉྙསྶེཝ སམྦྷཝཏི, ན ཨིཏརསྶཱཏི ཨཱཧ ‘‘ཉཱཎུཏྟརིཀོ པུགྒལོ’’ཏི. ཨབྷིབྷཝིཏྭཱ སམཱཔཛྫཏཱིཏི ཨེཏྠ ཨབྷིབྷཝནཾ, སམཱཔཛྫནཉྩ ཨུཔཙཱརཛ྄ཛྷཱནཱདྷིགམསམནནྟརམེཝ ཨཔྤནཱཛྷཱནུཔྤཱདནནྟི ཨཱཧ ‘‘སཧ ནིམིཏྟུཔྤཱདེནེཝེཏྠ ཨཔྤནཾ པཱཔེཏཱི’’ཏི. སཧ ནིམིཏྟུཔྤཱདེནཱཏི ཙ ཨཔྤནཱཔརིཝཱསཱབྷཱཝསྶ ལཀྑཎཾ ཝཙནམེཏཾ. ཡོ ‘‘ཁིཔྤཱབྷིཉྙོ’’ཏི ཝུཙྩཏི, ཏཏོཔི ཉཱཎུཏྟརསྶེཝ ཨབྷིབྷཱཡཏནབྷཱཝནཱ. ཨེཏྠཱཏི ཨེཏསྨིཾ ནིམིཏྟེ. ཨཔྤནཾ པཱཔེཏཱིཏི བྷཱཝནཾ ཨཔྤནཾ ནེཏི.

ཨེཏྠ ¶ ཙ ཀེཙི ‘‘ཨུཔྤནྣེ ཨུཔཙཱརཛ྄ཛྷཱནེ ཏཾ ཨཱརབྦྷ ཡེ ཧེཊྛིམནྟེན དྭེ ཏཡོ ཛཝནཝཱརཱ པཝཏྟནྟི, ཏེ ཨུཔཙཱརཛ྄ཛྷཱནཔཀྑིཀཱ ཨེཝ, ཏདནནྟརཉྩ བྷཝངྒཔརིཝཱསེན, ཨུཔཙཱརཱསེཝནཱཡ ཙ ཝིནཱ ཨཔྤནཱ ཧོཏི, སཧ ནིམིཏྟུཔྤཱདེནེཝ ཨཔྤནཾ པཱཔེཏཱི’’ཏི ཝདནྟི, ཏཾ ཏེསཾ མཏིམཏྟཾ. ན ཧི པརིཝཱསིཏཔརིཀམྨེན ཨཔྤནཱཝཱརོ ཨིཙྪིཏོ, ནཱཔི མཧགྒཏཔྤམཱཎཛ྄ཛྷཱནེསུ ཝིཡ ཨུཔཙཱརཛ྄ཛྷཱནེ ཨེཀནྟཏོ པཙྩཝེཀྑཎཱ ཨིཙྪིཏབྦཱ, ཏསྨཱ ཨུཔཙཱརཛ྄ཛྷཱནཱདྷིགམནཏོ པརཾ ཀཏིཔཡབྷཝངྒཙིཏྟཱཝསཱནེ ཨཔྤནཾ པཱཔུཎནྟོ ‘‘སཧ ནིམིཏྟུཔྤཱདེནེཝེཏྠ ཨཔྤནཾ པཱཔེཏཱི’’ཏི ཝུཏྟོ. སཧ ནིམིཏྟུཔྤཱདེནེཝཱཏི ཙ ཨདྷིཔྤཱཡིཀམིདཾ ཝཙནཾ, ན ནཱིཏཏྠཾ, ཨདྷིཔྤཱཡོ ཝུཏྟནཡེནེཝ ཝེདིཏབྦོ, ན ཨནྟོསམཱཔཏྟིཡཾ ཏདཱ ཏཐཱརཱུཔསྶ ཨཱབྷོགསྶ ཨསམྦྷཝཏོ. སམཱཔཏྟིཏོ ཝུཊྛིཏསྶ ཨཱབྷོགོ པུབྦབྷཱགབྷཱཝནཱཡཝསེན ཛྷཱནཀྑཎེ པཝཏྟཾ ཨབྷིབྷཝནཱཀཱརཾ གཧེཏྭཱ པཝཏྟོཏི དཊྛབྦཾ. ཨབྷིདྷམྨཊྛཀཐཱཡཾ པན ‘‘ཨིམིནཱ ཏསྶ པུབྦཱབྷོགོ ཀཐིཏོ’’ཏི (དྷ. ས. ཨཊྛ. ༢༠༤) ཝུཏྟཾ. ཨནྟོསམཱཔཏྟིཡཾ ཏཐཱ ཨཱབྷོགཱབྷཱཝེ ཀསྨཱ ‘‘ཛྷཱནསཉྙཱཡཔཱི’’ཏི ཝུཏྟནྟི ཨཱཧ ‘‘ཨབྷིབྷཝན…པེ… ཨཏྠཱི’’ཏི.

ཝཌྜྷིཏཔྤམཱཎཱནཱིཏི ¶ ཝིཔུལཔྤམཱཎཱནཱིཏི ཨཏྠོ, ན ཨེཀངྒུལདྭངྒུལཱདིཝསེན ཝཌྜྷིཾ པཱཔིཏཱནཱིཏི ཏཐཱ ཝཌྜྷནསྶེཝེཏྠ ཨསམྦྷཝཏོ. ཏེནཱཧ ‘‘མཧནྟཱནཱི’’ཏི. བྷཏྟཝཌྜྷིཏཀནྟི བྷུཉྫནབྷཱཛནཾ ཝཌྜྷེཏྭཱ དིནྣབྷཏྟཾ, ཨེཀཱསནེ པུརིསེན བྷུཉྫིཏབྦབྷཏྟཏོ ཨུཔཌྜྷབྷཏྟནྟི ཨཏྠོ.

རཱུཔེ སཉྙཱ རཱུཔསཉྙཱ, སཱ ཨསྶ ཨཏྠཱིཏི རཱུཔསཉྙཱི, ན རཱུཔསཉྙཱི ཨརཱུཔསཉྙཱི, སཉྙཱསཱིསེན ཛྷཱནཾ ཝདཏི. རཱུཔསཉྙཱཡ ཨནུཔྤཱདནཾ ཨེཝེཏྠ ཨལཱབྷིཏཱ.

བཧིདྡྷཱཝ ¶ ¶ ཨུཔྤནྣནྟི བཧིདྡྷཱ ཝཏྠུསྨིཾཡེཝ ཨུཔྤནྣཾ. ཨབྷིདྷམྨེ པན ‘‘ཨཛ྄ཛྷཏྟཾ ཨརཱུཔསཉྙཱི བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི…པེ… ཨཔྤམཱཎཱནི སུཝཎྞདུབྦཎྞཱནཱི’’ཏི (དྷ. ས. ༢༢༠) ཨེཝཾ ཙཏུནྣཾ ཨབྷིབྷཱཡཏནཱནཾ ཨཱགཏཏྟཱ ཨབྷིདྷམྨཊྛཀཐཱཡཾ (དྷ. ས. ཨཊྛ. ༢༠༤) ‘‘ཀསྨཱ པན ‘ཡཐཱ སུཏྟནྟེ ཨཛ྄ཛྷཏྟཾ རཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པརིཏྟཱནཱིཏིཨཱདི ཝུཏྟཾ, ཨེཝཾ ཨཝཏྭཱ ཨིདྷ ཙཏཱུསུཔི ཨབྷིབྷཱཡཏནེསུ ཨཛ྄ཛྷཏྟཾ ཨརཱུཔསཉྙིཏཱཝ ཝུཏྟཱ’ཏི ཙོདནཾ ཀཏྭཱ ‘ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏོ’ཏི ཀཱརཎཾ ཝཏྭཱ, ཏཏྠ ཝཱ ཧི ཨིདྷ ཝཱ བཧིདྡྷཱ རཱུཔཱནེཝ ཨབྷིབྷཝིཏབྦཱནི, ཏསྨཱ ཏཱནི ནིཡམཏོ ཝཏྟབྦཱནཱིཏི ཏཏྲཱཔི ཨིདྷཱཔི ཝུཏྟཱནི. ‘ཨཛ྄ཛྷཏྟཾ རཱུཔསཉྙཱི’ཏི ཨིདཾ པན སཏྠུ དེསནཱཝིལཱསམཏྟམེཝཱ’’ཏི ཝུཏྟཾ. ཨེཏྠ ཙ ཝཎྞཱབྷོགརཧིཏཱནི, སཧིཏཱནི ཙ སབྦཱནི པརིཏྟཱནི ‘‘པརིཏྟཱནི སུཝཎྞདུབྦཎྞཱནཱི’’ཏི ཝུཏྟཱནི, ཏཐཱ ཨཔྤམཱཎཱནི ‘‘ཨཔྤམཱཎཱནི སུཝཎྞདུབྦཎྞཱནཱི’’ཏི. ཨཏྠི ཧི སོ པརིཡཱཡོ པརིཏྟཱནི ཨབྷིབྷུཡྻ ཏཱནི ཙེ ཀདཱཙི ཝཎྞཝསེན ཨཱབྷུཛིཏཱནི ཧོནྟི, སུཝཎྞདུབྦཎྞཱནི ཨབྷིབྷུཡྻཱཏི. པརིཡཱཡཀཐཱ ཧི སུཏྟནྟདེསནཱཏི. ཨབྷིདྷམྨེ (དྷ. ས. ༢༢༢) པན ནིཔྤརིཡཱཡདེསནཏྟཱ ཝཎྞཱབྷོགརཧིཏཱནི ཝིསུཾ ཝུཏྟཱནི, ཏཐཱ སཧིཏཱནི. ཨཏྠི ཧི ཨུབྷཡཏྠ ཨབྷིབྷཝནཝིསེསོཏི. ཏཐཱ ཨིདྷ པརིཡཱཡདེསནཏྟཱ ཝིམོཀྑཱནམྤི ཨབྷིབྷཝནཔརིཡཱཡོ ཨཏྠཱིཏི ‘‘ཨཛ྄ཛྷཏྟཾ རཱུཔསཉྙཱི’’ཏིཨཱདིནཱ པཋམདུཏིཡཨབྷིབྷཱཡཏནེསུ པཋམཝིམོཀྑོ, ཏཏིཡཙཏུཏྠཨབྷིབྷཱཡཏནེསུ དུཏིཡཝིམོཀྑོ, ཝཎྞཱབྷིབྷཱཡཏནེསུ ཏཏིཡཝིམོཀྑོ ཙ ཨབྷིབྷཝནཔྤཝཏྟིཏོ སངྒཧིཏོ. ཨབྷིདྷམྨེ པན ནིཔྤརིཡཱཡདེསནཏྟཱ ཝིམོཀྑཱབྷིབྷཱཡཏནཱནི ཨསངྐརཏོ དསྶེཏུཾ ཝིམོཀྑེ ཝཛྫེཏྭཱ ཨབྷིབྷཱཡཏནཱནི ཀཐིཏཱནི ¶ ; སབྦཱནི ཙ ཝིམོཀྑཀིཙྩཱནི ཛྷཱནཱནི ཝིམོཀྑདེསནཱཡཾ ཝུཏྟཱནི. ཏདེཏཾ ¶ ‘‘ཨཛ྄ཛྷཏྟཾ རཱུཔསཉྙཱི’’ཏི ཨཱགཏསྶ ཨབྷིབྷཱཡཏནདྭཡསྶ ཨབྷིདྷམྨེ ཨབྷིབྷཱཡཏནེསུ ཨཝཙནཏོ ‘‘རཱུཔཱི རཱུཔཱནི པསྶཏཱི’’ཏིཨཱདཱིནཉྩ སབྦཝིམོཀྑཀིཙྩསཱདྷཱརཎཝཙནབྷཱཝཏོ ཝཝཏྠཱནཾ ཀཏནྟི ཝིཉྙཱཡཏི. ‘‘ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏོ’’ཏི ཨིདཾ ཀཏྠཙིཔི ‘‘ཨཛ྄ཛྷཏྟཾ རཱུཔཱནི པསྶཏཱི’’ཏི ཨཝཏྭཱ སབྦཏྠ ཡཾ ཝུཏྟཾ ‘‘བཧིདྡྷཱ རཱུཔཱནི པསྶཏཱི’’ཏི, ཏསྶ ཀཱརཎཝཙནཾ, ཏེན ཡཾ ཨཉྙཧེཏུཀཾ, ཏཾ ཏེན ཧེཏུནཱ ཝུཏྟཾ. ཡཾ པན དེསནཱཝིལཱསཧེཏུཀཾ ཨཛ྄ཛྷཏྟཾ ཨརཱུཔསཉྙིཏཱཡ ཨེཝ ཨབྷིདྷམྨེ (དྷ. ས. ༢༢༣) ཝཙནཾ, ན ཏསྶ ཨཉྙཾ ཀཱརཎཾ མགྒིཏབྦནྟི དསྶེཏི. ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏཱ ཙ ཏེསཾ བཧིདྡྷཱ རཱུཔཱནཾ ཝིཡ ཨབྷཱུཏཏྟཱ. དེསནཱཝིལཱསོ ཙ ཡཐཱཝུཏྟཝཝཏྠཱནཝསེན ཝེདིཏབྦོ ཝེནེཡྻཛ྄ཛྷཱསཡཝསེན ཝིཛྫམཱནཔརིཡཱཡཀཐཱབྷཱཝཏོ. ‘‘སུཝཎྞདུབྦཎྞཱནཱི’’ཏི ཨེཏེནེཝ སིདྡྷཏྟཱ ན ནཱིལཱདི ཨབྷིབྷཱཡཏནཱནི ཝཏྟབྦཱནཱིཏི ཙེ? ཏཾ ན, ནཱིལཱདཱིསུ ཀཏཱདྷིཀཱརཱནཾ ནཱིལཱདིབྷཱཝསྶེཝ ཨབྷིབྷཝནཀཱརཎཏྟཱ. ན ཧི ཏེསཾ པརིསུདྡྷཱཔརིསུདྡྷཝཎྞཱནཾ ¶ པརིཏྟཏཱ, ཨཔྤམཱཎཏཱ ཝཱ ཨབྷིབྷཝནཀཱརཎཾ, ཨཐ ཁོ ནཱིལཱདིབྷཱཝོ ཨེཝཱཏི. ཨེཏེསུ ཙ པརིཏྟཱདིཀསིཎརཱུཔེསུ ཡཾ ཡཾ ཙརིཏསྶ ཨིམཱནི ཨབྷིབྷཱཡཏནཱནི ཨིཛ྄ཛྷནྟི, ཏཾ དསྶེཏུཾ ‘‘ཨིམེསུ པནཱ’’ཏིཨཱདི ཝུཏྟཾ.

སབྦསངྒཱཧཀཝསེནཱཏི སཀལནཱིལཝཎྞནཱིལནིདསྶནནཱིལནིབྷཱསཱནཾ སཱདྷཱརཎཝསེན. ཝཎྞཝསེནཱཏི སབྷཱཝཝཎྞཝསེན. ནིདསྶནཝསེནཱཏི པསྶིཏབྦཏཱཝསེན ཙཀྑུཝིཉྙཱཎཱདིཝིཉྙཱཎཝཱིཐིཡཱ གཧེཏབྦཏཱཝསེན. ཨོབྷཱསཝསེནཱཏི སཔྤབྷཱསཏཱཡ ཨཝབྷཱསནཝསེན. ཨུམཱཔུཔྥནྟི ཨཏསིཔུཔྥཾ. ནཱིལམེཝ ཧོཏི ཝཎྞསངྐརཱབྷཱཝཏོ. བཱརཱཎསིསམྦྷཝནྟི བཱརཱཎསིཡཾ སམུཊྛིཏཾ.

ཨེཀཙྩསྶ ཨིཏོ བཱཧིརཀསྶ ཨཔྤམཱཎཾ ཨཏིཝིཏྠཱརིཏཾ ཀསིཎནིམིཏྟཾ ¶ ཨོལོཀེནྟསྶ བྷཡཾ ཨུཔྤཛྫེཡྻ ‘‘ཀིཾ ནུ ཁོ ཨིདཾ སཀལཾ ལོཀཾ ཨབྷིབྷཝིཏྭཱ ཨཛ྄ཛྷོཏྠརིཏྭཱ གཎྷཱཏཱི’’ཏི, ཏཐཱགཏསྶ པན ཏཱདིསཾ བྷཡཾ ཝཱ སཱརཛྫཾ ཝཱ ནཏྠཱིཏི ཨབྷཱིཏབྷཱཝདསྶནཏྠམེཝ ཨཱནཱིཏཱནི.

ཨཊྛཝིམོཀྑཝཎྞནཱ

༡༧༤. ཨུཏྟཱནཏྠཱཡེཝ ¶ ཧེཊྛཱ ཨཏྠཏོ ཝིབྷཏྟཏྟཱ. ཨེཀཙྩསྶ ཝིམོཀྑོཏི གྷོསོཔི བྷཡཱཝཧོ ཝཊྚཱབྷིརཏབྷཱཝཏོ, ཏཐཱགཏསྶ པན ཝིམོཀྑེ ཨུཔསམྤཛྫ ཝིཧརཏོཔི ཏཾ ནཏྠཱིཏི ཨབྷཱིཏབྷཱཝདསྶནཏྠམེཝ ཨཱནཱིཏཱནི.

ཨཱནནྡཡཱཙནཀཐཱཝཎྞནཱ

༡༧༨. བོདྷཱིཏི སབྦཉྙུཏཉྙཱཎཾ. ཏཉྷི ‘‘ཙཏུམགྒཉཱཎཔཊིཝེདྷ’’ནྟྭེཝ ཝུཏྟཾ སབྦཉྙུཏཉྙཱཎཔྤཊིཝེདྷསྶ ཏཾམཱུལཀཏྟཱ. ཨེཝཾ ཝུཏྟབྷཱཝནྟི ‘‘ཨཱཀངྑམཱནོ ཨཱནནྡ ཏཐཱགཏོ ཀཔྤཾ ཝཱ ཏིཊྛེཡྻཱ’’ཏི (དཱི. ནི. ༢.༡༦༦) ཨེཝཾ ཝུཏྟབྷཱཝཾ.

༡༧༩. ཏམྤི ཨོལཱ༹རིཀནིམིཏྟཾ ཀཏཾ ཏསྶ མཱརེན པརིཡུཊྛིཏཙེཏསོ ན པཊིཝིདྡྷཾ ན སལླཀྑིཏཾ.

༡༨༣. ཨཱདིཀེཧཱིཏི ཨེཝམཱདཱིཧི མིཏྟཱམཙྩསུཧཛྫཱཧི. པིཡཱཡིཏབྦཏོ པིཡེཧི. མནཝཌྜྷནཏོ ¶ མནཱཔེཧི. ཛཱཏིཡཱཏི ཛཱཏིཨནུརཱུཔགམནེན. ནཱནཱབྷཱཝོ ཝིསུཾབྷཱཝོ ཨསམྦདྡྷབྷཱཝོ. མརཎེན ཝིནཱབྷཱཝོཏི ཙུཏིཡཱ ཏེནཏྟབྷཱཝེན ཨཔུནརཱཝཏྟནཏོ ཝིཔྤཡོགོ. བྷཝེན ཨཉྙཐཱབྷཱཝོཏི བྷཝནྟརགྒཧཎེན པུརིམཱཀཱརཏོ ཨཉྙཱཀཱརཏཱ ‘‘ཀཱམཱཝཙརསཏྟོ རཱུཔཱཝཙརོ ཧོཏཱི’’ཏིཨཱདིནཱ, ཏཏྠཱཔི ‘‘མནུསྶོ དེཝོ ཧོཏཱི’’ཏིཨཱདིནཱཔི ཡོཛེཏབྦོ. ཀུཏེཏྠ ལབྦྷཱཏི ཀུཏོ ཀུཧིཾ ཀིསྨིཾ ནཱམ ཋཱནེ ཨེཏྠ ཨེཏསྨིཾ ཁནྡྷཔྤཝཏྟེ ‘‘ཡཾ ཏཾ ཛཱཏཾ…པེ… མཱ པལུཛྫཱི’’ཏི ལདྡྷུཾ སཀྐཱ. ན སཀྐཱ ཨེཝ ཏཱདིསསྶ ཀཱརཎསྶ ཨབྷཱཝཏོཏི ཨཱཧ ‘‘ནེཏཾ ཋཱནཾ ཝིཛྫཏཱི’’ཏི. ཨེཝཾ ཨཙྪརིཡབྦྷུཏདྷམྨཾ ཏཐཱགཏསྶཱཔི སརཱིརཾ, ཀིམངྒཾ པན ཨཉྙེསནྟི ཨདྷིཔྤཱཡོ. ‘‘པཙྩཱཝམིསྶཏཱི’’ཏི ནེཏཾ ཋཱནཾ ¶ ཝིཛྫཏི སཏིཾ སཱུཔཊྛིཏཾ ཀཏྭཱ ཉཱཎེན པརིཙྪིནྡིཏྭཱ ཨཱཡུསངྑཱརཱནཾ ཨོསྶཊྛཏྟཱ, བུདྡྷཀིཙྩསྶ ཙ པརིཡོསཱཔིཏཏྟཱ. ན ཧེཏྠ མཱསཏྟཡཏོ པརཾ བུདྡྷཝེནེཡྻཱ ལབྦྷནྟཱིཏི.

༡༨༤. སཱསནསྶ ཙིརཊྛིཏི ནཱམ སསམྦྷཱརེཧི ཨརིཡམགྒདྷམྨེཧི ཀེཝལེཧཱིཏི ཨཱཧ ‘‘སབྦཾ ལོཀིཡལོཀུཏྟརཝསེནེཝ ཀཐིཏ’’ནྟི ལོཀིཡཱཧི ¶ སཱིལསམཱདྷིཔཉྙཱཧི ཝིནཱ ལོཀུཏྟརདྷམྨསམདྷིགམསྶ ཨསམྦྷཝཏོ.

ཏཏིཡབྷཱཎཝཱརཝཎྞནཱ ནིཊྛིཏཱ.

ནཱགཱཔལོཀིཏཝཎྞནཱ

༡༨༦. ནཱགཱཔལོཀིཏནྟི ནཱགསྶ ཝིཡ ཨཔལོཀིཏཾ, ཧཏྠིནཱགསྶ ཨཔལོཀནསདིསཾ ཨཔལོཀནནྟི ཨཏྠོ. ཨཱཧཙྩཱཏི ཕུསིཏྭཱ. ཨངྐུསཀལགྒཱནི ཝིཡཱཏི ཨངྐུསཀཱནི ཝིཡ ཨཉྙམཉྙསྨིཾ ལགྒཱནི ཨཱསཏྟཱནི ཧུཏྭཱ ཋིཏཱནི. ཨེཀཱབདྡྷཱནཱིཏི ཨཉྙམཉྙཾ ཨེཀཏོ ཨཱབདྡྷཱནི. ཏསྨཱཏི གཱིཝཊྛཱིནཾ ཨེཀགྒྷནཱནཾ ཝིཡ ཨེཀཱབདྡྷབྷཱཝེན, ན ཀེཝལཾ གཱིཝཊྛཱིནཾཡེཝ, ཨཐ ཁོ སབྦཱནིཔི ཏཱནི བུདྡྷཱནཾ ཋཔེཏྭཱ བཱཧུསནྡྷིཨཱདིཀཱ དྭཱདས མཧཱསནྡྷིཡོ, ཨངྒུལིསནྡྷིཡོ ཙ ཨིཏརསནྡྷཱིསུ ཨེཀཱབདྡྷཱནི ཧུཏྭཱ ཋིཏཱནི, ཡཏོ ནེསཾ པཀཏིཧཏྠཱིནཾ ཀོཊིསཧསྶབལཔྤམཱཎཾ ཀཱཡབལཾ ཧོཏི. ཝེསཱལིནགརཱབྷིམུཁཾ ཨཀཱསི ཀཎྚཀཔརིཝཏྟནེ ཝིཡ ཀཔིལནགརཱབྷིམུཁཾ. ཡདི ཨེཝཾ ཀཐཾ ཏཾ ནཱགཱཔལོཀིཏཾ ནཱམ ཛཱཏཾ? ཏདཛ྄ཛྷཱསཡཾ ཨུཔཱདཱཡ. བྷགཝཱ ¶ ཧི ནཱགཱཔལོཀིཏཝསེནེཝ ཨཔལོཀེཏུཀཱམོ ཛཱཏོ, པུཉྙཱནུབྷཱཝེན པནསྶ པཏིཊྛིཏཊྛཱནཾ པརིཝཏྟི, ཏེན ཏཾ ‘‘ནཱགཱཔལོཀིཏཾ’’ ཏྭེཝ ཝུཙྩཏི.

‘‘ཨིདཾ པཙྪིམཀཾ ཨཱནནྡ ཏཐཱགཏསྶ ¶ ཝེསཱལིཡཱ དསྶན’’ནྟི ནཡིདཾ ཝེསཱལིཡཱ ཨཔལོཀནསྶ ཀཱརཎཝཙནཾ ཨནེཀནྟིཀཏྟཱ, བྷཱུཏཀཐནམཏྟཾ པནེཏཾ. མགྒསོདྷནཝསེན ཏཾ དསྶེཏྭཱ ཨཉྙདེཝེཏྠ ཨཔལོཀནཀཱརཎཾ དསྶེཏུཀཱམོ ‘‘ནནུ ཙཱ’’ཏིཨཱདིམཱཧ. ཏཾ ཏཾ སབྦཾ པཙྪིམདསྶནམེཝ ཨནུཀྐམེན ཀུསིནཱརཾ གནྟྭཱ པརིནིབྦཱཏུཀཱམཏཱཡ ཏཏོ ཏཏོ ནིཀྑནྟཏྟཱ. ‘‘ཨནཙྪརིཡཏྟཱ’’ཏི ཨིམིནཱ ཡཐཱཝུཏྟཾ ཨནེཀནྟིཀཏྟཾ པརིཧརཏི, ཏཡིདཾ སོདྷནམཏྟཾ. ཨིདཾ པནེཏྠ ཨཝིཔརཱིཏཾ ཀཱརཎནྟི དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ན ཧི བྷགཝཱ སཱཔེཀྑོ ཝེསཱལིཾ ཨཔལོཀེསི, ‘‘ཨིདཾ པན མེ གམནཾ ཨཔུནརཱགམན’’ནྟི དསྶནམུཁེན བཧུཛནཧིཏཱཡ བཧུཛནསུཁཱཡ ལོཀཱནུཀམྤཱཡ ཨཔལོཀེསི. ཏེནཱཧ ‘‘ཨཔིཙ ཝེསཱལིརཱཛཱནོ’’ཏིཨཱདི.

ཨནྟཀརོཏི ¶ སཀལཝཊྚདུཀྑསྶ སཀསནྟཱནེ, པརསནྟཱནེ ཙ ཝིནཱསཀརོ ཨབྷཱཝཀརོ. བུདྡྷཙཀྑུདྷམྨཙཀྑུདིབྦཙཀྑུམཾསཙཀྑུསམནྟཙཀྑུསངྑཱཏེཧི པཉྩཧི ཙཀྑཱུཧི ཙཀྑུམཱ. སཝཱསནཱནཾ ཀིལེསཱནཾ སམུཙྪིནྣཏྟཱ སཱཏིསཡཾ ཀིལེསཔརིནིབྦཱནེན པརིནིབྦུཏོ.

ཙཏུམཧཱཔདེསཝཎྞནཱ

༡༨༧. མཧཱཨོཀཱསེཏི མཧནྟེ ཨོཀཱསེ. མཧནྟཱནི དྷམྨསྶ པཏིཊྛཱཔནཊྛཱནཱནི. ཡེསུ པཏིཊྛཱཔིཏོ དྷམྨོ ནིཙྪཱིཡཏི ཨསནྡེཧཏོ, ཀཱནི པན ཏཱནི? ཨཱགམནཝིསིཊྛཱནི སུཏྟོཏརཎཱདཱིནི. དུཏིཡཝིཀཔྤེ ཨཔདིསནྟཱིཏི ཨཔདེསཱ, ‘‘སམྨུཁཱ མེཏཾ ཨཱཝུསོ བྷགཝཏོ སུཏ’’ནྟིཨཱདིནཱ ཀེནཙི ཨཱབྷཏསྶ ‘‘དྷམྨོ’’ཏི ཝིནིཙྪིནནེ ཀཱརཎཾ. ཀིཾ པན ཏནྟི? ཏསྶ ཡཐཱབྷཏསྶ སུཏྟོཏརཎཱདི ཨེཝ. ཡདི ཨེཝཾ ཀཐཾ ཙཏྟཱརོཏི? ཡསྨཱ དྷམྨསྶ དྭེ སམྤརཱཡཱ སཏྠཱ, སཱཝཀཱ ཙ, ཏེསུ ཙ སཱཝཀཱ སངྒྷགཎཔུགྒལཝསེན ཏིཝིདྷཱ ¶ , ཨེཝཾ ‘‘ཏུམྷཱཀཾ མཡཱ ཡཾ དྷམྨོ པཊིགྒཧིཏོ’’ཏི ཨཔདིསིཏབྦཱནཾ བྷེདེན ཙཏྟཱརོ. ཏེནཱཧ ‘‘སམྨུཁཱ མེ ཏཾ ཨཱཝུསོ བྷགཝཏོ སུཏ’’ནྟིཨཱདི. ཏཐཱ ཙ ཝུཏྟཾ ནེཏྟིཡཾ ‘‘ཙཏྟཱརོ མཧཱཔདེསཱ བུདྡྷཱཔདེསོ སངྒྷཱཔདེསོ སམྦཧུལཏྠེརཱཔདེསོ ཨེཀཏྠེརཱཔདེསོ. ཨིམེ ཙཏྟཱརོ མཧཱཔདེསཱ’’ཏི (ནེཏྟི. ༡༨) བུདྡྷོ ཨཔདེསོ ཨེཏསྶཱཏི བུདྡྷཱཔདེསོ. ཨེས ནཡོ སེསེསུཔི. ཏེནཱཧ ‘‘བུདྡྷཱདཡོ…པེ… མཧཱཀཱརཎཱནཱི’’ཏི.

༡༨༨. ནེཝ ¶ ཨབྷིནནྡིཏབྦནྟི ན སམྤཊིཙྪིཏབྦཾ. གནྠསྶ སམྤཊིཙྪནཾ ནཱམ སཝནནྟི ཨཱཧ ‘‘ན སོཏབྦ’’ནྟི. པདབྱཉྫནཱནཱིཏི པདཱནི ཙ བྱཉྫནཱནི ཙ, ཨཏྠཔདཱནི, བྱཉྫནཔདཱནི ཙཱཏི ཨཏྠོ. པཛྫཏི ཨཏྠོ ཨེཏེཧཱིཏི པདཱནི, ཨཀྑརཱདཱིནི བྱཉྫནཔདཱནི. པཛྫིཏབྦཏོ པདཱནི, སངྐཱསནཱདཱིནི ཨཏྠཔདཱནི. ཨཊྛཀཐཱཡཾཔན ‘‘‘པདསངྑཱཏཱནི བྱཉྫནཱནཱི’ཏི བྱཉྫནཔདཱནེཝ ཝུཏྟཱནཱི’’ཏི ཀེཙི, ཏཾ ན, ཨཏྠཾ བྱཉྫེནྟཱིཏི བྱཉྫནཱནི, བྱཉྫནཔདཱནི, ཏེཧི བྱཉྫིཏབྦཏོ བྱཉྫནཱནི, ཨཏྠཔདཱནཱིཏི ཨུབྷཡསངྒཧཏོ. ཨིམསྨིཾ ཋཱནེཏི ཏེནཱབྷཏསུཏྟསྶ ཨིམསྨིཾ པདེསེ. པཱལི༹ ཝུཏྟཱཏི ཀེཝལོ པཱལི༹དྷམྨོ པཝཏྟོ. ཨཏྠོ ཝུཏྟོཏི པཱལི༹ཡཱ ཨཏྠོ པཝཏྟོ ནིདྡིཊྛོ. ཨནུསནྡྷི ཀཐིཏོཏི ཡཐཱརདྡྷདེསནཱཡ, ཨུཔརི དེསནཱཡ ཙ ཨནུསནྡྷཱནཾ ཀཐིཏཾ སམྦནྡྷོ ཀཐིཏོ ¶ . པུབྦཱཔརཾ ཀཐིཏནྟི པུབྦེནཱཔརཾ ཨཝིརུཛ྄ཛྷནཉྩེཝ ཝིསེསཱདྷཱནཉྩ ཀཐིཏཾ པཀཱསིཏཾ. ཨེཝཾ པཱལི༹དྷམྨཱདཱིནི སམྨདེཝ སལླཀྑེཏྭཱ གཧཎཾ སཱདྷུཀཾ ཨུགྒཧཎནྟི ཨཱཧ ‘‘སུཊྛུ གཧེཏྭཱ’’ཏི. སུཏྟེ ཨོཏཱརེཏབྦཱནཱིཏི ¶ ཉཱཎེན སུཏྟེ ཨོགཱཧེཏྭཱ ཏཱརེཏབྦཱནི, ཏཾ པན ཨོགཱཧེཏྭཱ ཏརཎཾ ཏཏྠ ཨོཏརཎཾ ཨནུཔྤཝེསནཾ ཧོཏཱིཏི ཝུཏྟཾ ‘‘སུཏྟེ ཨོཏཱརེཏབྦཱནཱི’’ཏི. སཾསནྡེཏྭཱ དསྶནཾ སནྡསྶནནྟི ཨཱཧ ‘‘ཝིནཡེ སཾསནྡེཏབྦཱནཱི’’ཏི.

ཀིཾ པན ཏཾ སུཏྟཾ, ཀོ ཝཱ ཝིནཡོཏི ཝིཙཱརཎཱཡ ཨཱཙརིཡཱནཾ མཏིབྷེདམུཁེན ཏམཏྠཾ དསྶེཏུཾ ‘‘ཨེཏྠ ཙཱ’’ཏིཨཱདི ཝུཏྟཾ. ཝིནཡོཏི ཝིབྷངྒཔཱཋམཱཧ. སོ ཧི མཱཏིཀཱསཉྙིཏསྶ སུཏྟསྶ ཨཏྠསཱུཙནཏོ ‘‘སུཏྟ’’ནྟི ཝཏྟབྦཏཾ ཨརཧཏི. ཝིཝིདྷནཡཏྟཱ, ཝིསིཊྛནཡཏྟཱ ཙ ཝིནཡོ, ཁནྡྷཀཔཱཋོ. ཨེཝནྟི ཨེཝཾ སུཏྟཝིནཡེསུ པརིགྒཡ྄ཧམཱནེསུ ཝིནཡཔིཊཀམྤི ན པརིཡཱདཱིཡཏི པརིཝཱརཔཱལི༹ཡཱ ཨསངྒཧིཏཏྟཱ. སུཏྟནྟཱབྷིདྷམྨཔིཊཀཱནི ཝཱ སུཏྟཾ ཨཏྠསཱུཙནཱདིཨཏྠསམྦྷཝཏོ. ཨེཝམྤཱིཏི ‘‘སུཏྟནྟཱབྷིདྷམྨཔིཊཀཱནི སུཏྟཾ, ཝིནཡཔིཊཀཾ ཝིནཡོ’’ཏི ཨེཝཾ སུཏྟཝིནཡཝིབྷཱགེ ཝུཙྩམཱནེཔི. ན ཏཱཝ པརིཡཱདཱིཡནྟཱིཏི ན ཏཱཝ ཨནཝསེསཏོ པརིགྒཡ྄ཧནྟི, ཀསྨཱཏི ཨཱཧ ‘‘ཨསུཏྟནཱམཀཉྷཱི’’ཏིཨཱདི. ཡསྨཱ ‘‘སུཏྟ’’ནྟི ཨིམཾ ནཱམཾ ཨནཱརོཔེཏྭཱ སངྒཱིཏམྤི ཛཱཏཀཱདིབུདྡྷཝཙནཾ ཨཏྠི, ཏསྨཱ ཝུཏྟནཡེན ཏཱིཎི པིཊཀཱནི ན པརིཡཱདིཎྞཱནཱིཏི. སུཏྟནིཔཱཏཨུདཱནཨིཏིཝུཏྟཀཱདཱིནི དཱིགྷནིཀཱཡཱདཡོ ཝིཡ སུཏྟནཱམཾ ཨཱརོཔེཏྭཱ ཨསངྒཱིཏཱནཱིཏི ཨདྷིཔྤཱཡེ པནེཏྠ ཛཱཏཀཱདཱིཧི སདྡྷིཾ ཏཱནིཔི གཧིཏཱནི. བུདྡྷཝཾསཙརིཡཱཔིཊཀཱནཾ པནེཏྠ ཨགྒཧཎེ ཀཱརཎཾ མགྒིཏབྦཾ, ཀིཾ ཝཱ ཏེན མགྒནེན? སབྦོཔཱཡཾ ཝཎྞནཱནཡོ ཐེརཝཱདཾ དསྶནམུཁེན པཊིཀྑིཏྟོ ཨེཝཱཏི.

ཨཏྠཱིཏི ཀིཾ ཨཏྠི, ཨསུཏྟནཱམཀཾ བུདྡྷཝཙནཾ ནཏྠི ཨེཝཱཏི དསྶེཏི. ཏཐཱ ཧི ནིདཱནཝཎྞནཱཡཾ ¶ (དཱི. ནི. ཊཱི. ༡.པཋམམཧཱསངྒཱིཏིཀཐཱཝཎྞནཱ; སཱརཏྠ. ཊཱི. ༡.པཋམམཧཱསངྒཱིཏིཀཐཱཝཎྞནཱ) ཨམྷེཧི ཝུཏྟཾ ¶ ‘‘སུཏྟནྟི སཱམཉྙཝིདྷི, ཝིསེསཝིདྷཡོ པརེ’’ཏི. ཏཾ སབྦཾ པཊིཀྑིཔིཏྭཱ ‘‘སུཏྟནྟི ཝིནཡོ’’ཏིཨཱདིནཱ ཝུཏྟཾ སཾཝཎྞནཱནཡཾ ‘‘ནཱཡམཏྠོ ཨིདྷཱདྷིཔྤེཏོ’’ཏི པཊིསོདྷེཏྭཱ. ཝིནེཏི ཨེཏེན ཀིལེསེཏི ཝིནཡོ, ཀིལེསཝིནཡནཱུཔཱཡོ, སོ ཨེཝ ཙ ནཾ ཀརོཏཱིཏི ཀཱརཎནྟི ཨཱཧ ‘‘ཝིནཡོ པན ཀཱརཎ’’ནྟི.

དྷམྨེཏི ¶ པརིཡཏྟིདྷམྨེ. སརཱགཱཡཱཏི སརཱགབྷཱཝཱཡ ཀཱམརཱགབྷཝརཱགཔརིབྲཱུཧནཱཡ. སཉྙོགཱཡཱཏི བྷཝསཾཡོཛནཱཡ. ཨཱཙཡཱཡཱཏི ཝཊྚསྶ ཝཌྜྷནཏྠཱཡ. མཧིཙྪཏཱཡཱཏི མཧིཙྪབྷཱཝཱཡ. ཨསནྟུཊྛིཡཱཏི ཨསནྟུཊྛིབྷཱཝཱཡ. སངྒཎིཀཱཡཱཏི ཀིལེསསངྒཎགཎསངྒཎཝིཧཱརཱཡ. ཀོསཛྫཱཡཱཏི ཀུསཱིཏབྷཱཝཱཡ. དུབྦྷརཏཱཡཱཏི དུཔྤོསཏཱཡ. ཝིརཱགཱཡཱཏི སཀལཝཊྚཏོ ཝིརཛྫནཏྠཱཡ. ཝིསཉྙོགཱཡཱཏི ཀཱམབྷཝཱདཱིཧི ཝིསཾཡུཛྫནཏྠཱཡ. ཨཔཙཡཱཡཱཏི སབྦསྶཱཔི ཝཊྚསྶ ཨཔཙཡནཱཡ, ནིབྦཱནཱཡཱཏི ཨཏྠོ. ཨཔྤིཙྪཏཱཡཱཏི པཙྩཡཔྤིཙྪཏཱདིཝསེན སབྦསོ ཨིཙྪཱཔགམཱཡ. སནྟུཊྛིཡཱཏི དྭཱདསཝིདྷསནྟུཊྛིབྷཱཝཱཡ. པཝིཝེཀཱཡཱཏི པཝིཝིཏྟབྷཱཝཱཡ, ཀཱཡཝིཝེཀཱདིཏདངྒཝིཝེཀཱདིཝིཝེཀསིདྡྷིཡཱ. ཝཱིརིཡཱརམྦྷཱཡཱཏི ཀཱཡིཀསྶ ཙེཝ, ཙེཏསིཀསྶ ཙ ཝཱིརིཡསྶ པགྒཧཎཏྠཱཡ. སུབྷརཏཱཡཱཏི སུཁཔོསནཏྠཱཡ. ཨེཝཾ ཡོ པརིཡཏྟིདྷམྨོ ཨུགྒཧཎདྷཱརཎཔརིཔུཙྪཱམནསིཀཱརཝསེན ཡོནིསོ པཊིཔཛྫནྟསྶ སརཱགཱདིབྷཱཝཔརིཝཛྫནསྶ ཀཱརཎཾ ཧུཏྭཱ ཝིརཱགཱདིབྷཱཝཱཡ སཾཝཏྟཏི, ཨེཀཾསཏོ ཨེསོ དྷམྨོ. ཨེསོ ཝིནཡོ, སམྨདེཝ ¶ ཨཔཱཡཱདཱིསུ ཨཔཏནཝསེན དྷཱརཎཏོ, ཀིལེསཱནཾ ཝིནཡནཏོ, སཏྠུ སམྨཱསམྦུདྡྷསྶ ཨོཝཱདཱནུསིཊྛིབྷཱཝཏོ ཨེཏཾ སཏྠུསཱསནནྟི དྷཱརེཡྻཱསི ཛཱནེཡྻཱསི, ཨཝབུཛ྄ཛྷེཡྻཱསཱིཏི ཨཏྠོ. ཙཏུསཙྩསྶ སཱུཙནཾ སུཏྟནྟི ཨཱཧ ‘‘སུཏྟེཏི ཏེཔིཊཀེ བུདྡྷཝཙནེ’’ཏི. ཏེཔིཊཀཉྷི བུདྡྷཝཙནཾ སཙྩཝིནིམུཏྟཾ ནཏྠི. རཱགཱདིཝིནཡནཀཱརཎཾ ཏཐཱགཏེན སུཏྟཔདེན པཀཱསིཏནྟི ཨཱཧ ‘‘ཝིནཡེཏི ཨེཏསྨིཾ རཱགཱདིཝིནཡཀཱརཎེ’’ཏི.

སུཏྟེ ཨོསརཎཉྩེཏྠ ཏེཔིཊཀེ བུདྡྷཝཙནེ པརིཡཱཔནྣཏཱཝསེནེཝ ཝེདིཏབྦཾ, ན ཨཉྙཐཱཏི ཨཱཧ ‘‘སུཏྟཔཊིཔཱཊིཡཱ ཀཏྠཙི ཨནཱགནྟྭཱ’’ཏི. ཚལླིཾ ཨུཊྛཔེཏྭཱཏི ཨརོགསྶ མཧཏོ རུཀྑསྶ ཏིཊྛཏོ ཨུཔཀྐམེན ཚལླིཡཱ སཀལིཀཱཡ, པཔཊིཀཱཡ ཝཱ ཨུཊྛཔནཾ ཝིཡ ཨརོགསྶ སཱསནདྷམྨསྶ ཏིཊྛཏོ བྱཉྫནམཏྟེན ཏཔྤརིཡཱཔནྣཾ ཝིཡ ཧུཏྭཱ ཚལླིསདིསཾ པུབྦཱཔརཝིརུདྡྷཏཱདིདོསཾ ཨུཊྛཔེཏྭཱ པརིདཱིཔེཏྭཱ, ཏཱདིསཱནི པན ཨེཀཾསཏོ གུལ༹ྷཝེསྶནྟརཱདིཔརིཡཱཔནྣཱནི ཧོནྟཱིཏི ཨཱཧ ‘‘གུལ༹ྷཝེསྶནྟར…པེ…པཉྙཱཡནྟཱིཏི ཨཏྠོ’’ཏི ¶ . རཱགཱདིཝིནཡེཏི རཱགཱདཱིནཾ ཝིནཡནཏྠེ. ཏདཱཀཱརཏཱཡ ན པཉྙཱཡམཱནཱནི ན དིསྶམཱནཱནི ཚཌྜེཏབྦཱནི ཝཛྫིཏབྦཱནི ན གཧེཏབྦཱནི. སབྦཏྠཱཏི སབྦཝཱརེསུ.

ཨིམསྨིཾ ¶ པན ཋཱནེཏི ཨིམསྨིཾ མཧཱཔདེསནིདྡེསཊྛཱནེ. ‘‘སུཏྟེ ཙཏྟཱརོ མཧཱཔདེསཱ’’ཏིཨཱདིནཱ ཝུཏྟམྤི ཨཝུཏྟེན སདྡྷིཾ གཧེཏྭཱ པཀིཎྞཀཀཐཱཡ མཱཏིཀཾ ཨུདྡིསཏི. ཉཱཏུཾ ¶ ཨིཙྪིཏོ ཨཏྠོ པཉྷོ, ཏསྶ ཝིསྶཛྫནཱནི པཉྷཱབྱཱཀརཎཱནི, ཨཏྠསཱུཙནཱདིཨཏྠེན སུཏྟཾ, པཱལི༹, ཏཾ སུཏྟཾ ཨནུལོམེཏི ཨནུཀཱུལེཏཱིཏི སུཏྟཱནུལོམཾ, མཧཱཔདེསོ. ཨཱཙརིཡཱ ཝདནྟི སཾཝཎྞེནྟི པཱལི༹ཾ ཨེཏེནཱཏི ཨཱཙརིཡཝཱདོ ཨཊྛཀཐཱ. ཏསྶ ཏསྶ ཐེརསྶ ཨཏྟནོ ཨེཝ མཏི ཨདྷིཔྤཱཡོཏི ཨཏྟནོམཏི. དྷམྨཝིནིཙྪཡེ པཏྟེཏི དྷམྨེ ཝིནིཙྪིནིཏབྦེ ཨུཔཊྛིཏེ. ཨིམེཏི ཨནནྟརཾ ཝུཏྟཱ ཙཏྟཱརོ མཧཱཔདེསཱ. པམཱིཡཏི དྷམྨོ པརིཙྪིཛྫཏི ཝིནིཙྪཱིཡཏི ཨེཏེནཱཏི པམཱཎཾ. ཏེནཱཧ ‘‘ཡཾ ཨེཏྠ སམེཏཱི’’ཏིཨཱདི. ཨིཏརནྟི མཧཱཔདེསེསུ ཨསམེནྟཾ. པུན ཨིཏརནྟི ཨཀཔྤིཡཾ ཨནུལོམེནྟཾ ཀཔྤིཡཾ པཊིབཱཧནྟཾ སནྡྷཱཡཱཧ.

ཨེཀཾསེནེཝ བྱཱཀཱཏབྦོ ཝིསྶཛྫེཏབྦོཏི ཨེཀཾསབྱཱཀརཎཱིཡོ. ཝིབྷཛྫཱཏི པུཙྪིཏམཏྠཾ ཨཝདྷཱརཎཱདིབྷེདེན ཝིབྷཛིཏྭཱ. པཊིཔུཙྪཱཏི པུཙྪནྟཾ པུགྒལཾ པཊིཔུཙྪིཏྭཱ. ཋཔནཱིཡོཏི ཏིདྷཱཔི ཨཝིསྶཛྫནཱིཡཏྟཱ ཋཔནཱིཡོ བྱཱཀརཎཾ ཨཀཏྭཱ ཋཔེཏབྦོ. ‘‘ཙཀྑུཾ ཨནིཙྩ’’ནྟི པཉྷེ ཨུཏྟརཔདཱཝདྷཱརཎཾ སནྡྷཱཡ ‘‘ཨེཀཾསེནེཝ བྱཱཀཱཏབྦ’’ནྟི ཝུཏྟཾ ནིཙྩཏཱཡ ལེསསྶཱཔི ཏཏྠ ཨབྷཱཝཏོ. པུརིམཔདཱཝདྷཱརཎེ པན ཝིབྷཛྫབྱཱཀརཎཱིཡཏཱ ཙཀྑུསོཏེསུ ཝིསེསཏྠསཱམཉྙཏྠཱནཾ ཨསཱདྷཱརཎབྷཱཝཏོ. དྭིནྣཾ ཏེསཾ སདིསཏཱཙོདནཱ པཊིཔུཙྪནམུཁེནེཝ བྱཱཀརཎཱིཡཱ པཊིཀྑེཔཝསེན, ཨནུཉྙཱཏཝསེན ཙ ཝིསྶཛྫིཏབྦཏོཏི ཨཱཧ ‘‘ཡཐཱ ཙཀྑུ, ཏཐཱ སོཏཾ…པེ… ཨཡཾ པཊིཔུཙྪཱབྱཱཀརཎཱིཡོ པཉྷོ’’ཏི. ཏཾ ཛཱིཝཾ ཏཾ སརཱིརནྟི ཛཱིཝསརཱིརཱནཾ ཨནཉྙཏཱཔཉྷོ. ཡསྶ ཡེན ཨནཉྙཏཱཙོདིཏཱ, སོ ཨེཝ པརམཏྠཏོ ¶ ནུཔལབྦྷཏཱིཏི ཝཉྫྷཱཏནཡསྶ མཏྟེཡྻཏཱཀིཏྟནསདིསོཏི ཨབྱཱཀཱཏབྦཏཱཡ ཋཔནཱིཡོ ཝུཏྟོཏི. ཨིམཱནི ཙཏྟཱརི པཉྷབྱཱཀརཎཱནི པམཱཎཾ ཏེནེཝ ནཡེན ཏེསཾ པཉྷཱནཾ བྱཱཀཱཏབྦཏོ.

ཝིནཡམཧཱཔདེསོ ཀཔྤིཡཱནུལོམཝིདྷཱནཏོ ནིཔྤརིཡཱཡཏོ ཨནུལོམཀཔྤིཡཾ ནཱམ, མཧཱཔདེསབྷཱཝེན པན ཏཾསདིསཏཱཡ སུཏྟནྟམཧཱཔདེསེསུཔི ‘‘ཨནུལོམཀཔྤིཡ’’ནྟི ཨཡཾ ཨཊྛཀཐཱཝོཧཱརོ. ཡདིཔི ཏཏྠ ཏཏྠ བྷགཝཏཱ པཝཏྟིཏཔཀིཎྞཀདེསནཱཝ ཨཊྛཀཐཱ, སཱ པན དྷམྨསངྒཱཧཀེཧི པཋམཾ ཏཱིཎི པིཊཀཱནི སངྒཱཡིཏྭཱ ཏསྶ ཨཏྠཝཎྞནཱནུརཱུཔེནེཝ ¶ ཝཱཙནཱམགྒཾ ཨཱརོཔིཏཏྟཱ ‘‘ཨཱཙརིཡཝཱདོ’’ཏི ཝུཙྩཏི ཨཱཙརིཡཱ ཝདནྟི སཾཝཎྞེནྟི པཱལི༹ཾ ཨེཏེནཱཏི. ཏེནཱཧ ¶ ‘‘ཨཱཙརིཡཝཱདོ ནཱམ ཨཊྛཀཐཱ’’ཏི. ཏིསྶོ སངྒཱིཏིཡོ ཨཱརུལ༹ྷོ ཨེཝ ཙ བུདྡྷཝཙནསྶ ཨཏྠསཾཝཎྞནཱབྷཱུཏོ ཀཐཱམགྒོ མཧིནྡཏྠེརེན ཏམྦཔཎྞིདཱིཔཾ ཨཱབྷཏོ པཙྪཱ ཏམྦཔཎྞིཡེཧི མཧཱཐེརེཧི སཱིཧལ༹བྷཱསཱཡ ཋཔིཏོ ནིཀཱཡནྟརལདྡྷིསངྐརཔརིཧརཎཏྠཾ. ཨཏྟནོམཏི ནཱམ ཐེརཝཱདོ. ནཡགྒཱཧེནཱཏི སུཏྟཱདིཏོ ལབྦྷམཱནནཡགྒཧཎེན. ཨནུབུདྡྷིཡཱཏི སུཏྟཱདཱིནིཡེཝ ཨནུགཏབུདྡྷིཡཱ. ཨཏྟནོ པཊིབྷཱནནྟི ཨཏྟནོ ཨེཝ ཏསྶ ཨཏྠསྶ ཝུཏྟནཡེན ཨུཔཊྛཱནཾ, ཡཐཱཨུཔཊྛིཏཱ ཨཏྠཱ ཨེཝ ཏཐཱ ཝུཏྟཱ. སམེནྟམེཝ གཧེཏབྦནྟི ཡཐཱ སུཏྟེན སཾསནྡཏི, ཨེཝཾ མཧཱཔདེསཏོ ཨཏྠཱ ཨུདྡྷརིཏབྦཱཏི དསྶེཏི. པམཱདཔཱཋཝསེན ཨཱཙརིཡཝཱདསྶ ཀདཱཙི པཱལི༹ཡཱ ཨསཾསནྡནཱཔི སིཡཱ, སོ ན གཧེཏབྦོཏི དསྶེནྟོ ཨཱཧ ‘‘ཨཱཙརིཡཝཱདོཔི སུཏྟེན སམེནྟོཡེཝ གཧེཏབྦོ’’ཏི. སབྦདུབྦལཱ པུགྒལསྶ སཡཾ པཊིབྷཱནབྷཱཝཏོ. ཏཐཱ ཙ སཱཔི གཧེཏབྦཱ, ཀཱིདིསཱི? སུཏྟེན སམེནྟཱ ཡེཝཱཏི ཡོཛནཱ. ཏཱསཱུཏི ཏཱིསུ སངྒཱིཏཱིསུ. ‘‘ཨཱགཏམེཝ པམཱཎ’’ནྟི ཨིམིནཱ མཧཱཀསྶཔཱདཱིཧི སངྒཱིཏམེཝ ‘‘སུཏྟ’’ནྟི ཨིདྷཱདྷིཔྤེཏནྟི ཏདཉྙསྶ ¶ སུཏྟབྷཱཝམེཝ པཊིཀྑིཔཏི. ཏདཏྠཱ ཨེཝ ཧི ཏིསྶོ སངྒཱིཏིཡོ. ཏཏྠཱཏི གཱརཡ྄ཧསུཏྟེ. ན ཙེཝ སུཏྟེ ཨོསརནྟི, ན ཙ ཝིནཡེ སནྡིསྶནྟཱིཏི ཝེདིཏབྦཱནི ཏསྶ ཨསུཏྟབྷཱཝཏོ ཏེན ‘‘ཨནུལོམཀཔྤིཡཾ སུཏྟེན སམེནྟམེཝ གཧེཏབྦ’’ནྟི ཝུཏྟཾ ཨེཝཏྠཾ ནིགམནཝསེན ནིདསྶེཏི. སབྦཏྠ ‘‘ན ཨིཏར’’ནྟི ཝཙནཾ ཏཏྠ ཏཏྠ གཧིཏཱཝདྷཱརཎཕལདསྶནཾ དཊྛབྦཾ.

ཀམྨཱརཔུཏྟཙུནྡཝཏྠུཝཎྞནཱ

༡༨༩. སཱུཀརམདྡཝནྟི ཝནཝརཱཧསྶ མུདུམཾསཾ. ཡསྨཱ ཙུནྡོ ཨརིཡསཱཝཀོ སོཏཱཔནྣོ, ཨཉྙེ ཙ བྷགཝཏོ, བྷིཀྑུསངྒྷསྶ ཙ ཨཱཧཱརཾ པཊིཡཱདེནྟཱ ཨནཝཛྫམེཝ པཊིཡཱདེནྟི, ཏསྨཱ ཝུཏྟཾ ‘‘པཝཏྟམཾས’’ནྟི. ཏཾ ཀིརཱཏི ‘‘ནཱཏིཏརུཎསྶཱ’’ཏིཨཱདིནཱ ཝུཏྟཝིསེསཾ. ཏཐཱ ཧི ཏཾ ‘‘མུདུ ཙེཝ སིནིདྡྷཉྩཱ’’ཏི ཝུཏྟཾ. མུདུམཾསབྷཱཝཏོ ཧི ཨབྷིསངྑརཎཝིསེསེན ཙ ‘‘མདྡཝ’’ནྟི ཝུཏྟཾ. ཨོཛཾ པཀྑིཔིཾསུ ‘‘ཨཡཾ བྷགཝཏོ པཙྪིམཀོ ཨཱཧཱརོ’’ཏི པུཉྙཝིསེསཱཔེཀྑཱཡ, ཏཾ པན ཏཐཱཔཀྑིཏྟདིབྦོཛཏཱཡ གརུཏརཾ ཛཱཏཾ.

ཨཉྙེ ¶ ཡཾ དུཛྫཱིརཾ, ཏཾ ཨཛཱནནྟཱ ‘‘ཀསྶཙི ཨདཏྭཱ ཝིནཱསིཏ’’ནྟི ཨུཔཝདེཡྻུནྟི པརཱུཔཝཱདམོཙནཏྠཾ བྷགཝཱ ‘‘ནཱཧཾ ཏ’’ནྟིཨཱདིནཱ སཱིཧནཱདཾ ནདཏི.

༡༩༠. ཀཐཾ པནཱཡཾ སཱིཧནཱདོ ནནུ ཏཾ བྷགཝཏོཔི སམྨཱཔརིཎཱམཾ ན གཏནྟི? ནཡིདཾ ཨེཝཾ དཊྛབྦཾ, ཡསྨཱ ‘‘སམྨདེཝ ཏཾ བྷགཝཏོ པརིཎཱམཾ གཏ’’ནྟི ཝཏྟུཾ ཨརཧཏི ཏཔྤཙྩཡཱ ཨུཔྤནྣསྶ ¶ ཝིཀཱརསྶ ཨབྷཱཝཏོ, ཨཉྙཔཙྩཡསྶ ཙ ཝིཀཱརསྶ མུདུབྷཱཝཾ ཨཱཔཱདིཏཏྟཱ. ཏེནཱཧ ‘‘ན པན བྷུཏྟཔྤཙྩཡཱ’’ཏིཨཱདི. ན ཧི བྷགཝཱ, ཨཉྙེ ཝཱ པན ཁཱིཎཱསཝཱ ནཝཝེདནུཔྤཱདནཝསེན ཨཱཧཱརཾ པརིབྷུཉྫནྟི ཨཊྛངྒསམནྣཱགཏམེཝ ཀཏྭཱ ཨཱཧཱརསྶ ཨུཔབྷུཉྫནཏོ. ཡདི ཨེཝཾ ཀསྨཱ པཱལི༹ཡཾ ‘‘བྷཏྟཾ བྷུཏྟཱཝིསྶ ཁརོ ཨཱབཱདྷོ ཨུཔྤཛྫཱི’’ཏིཨཱདི ཝུཏྟཾ? ཏཾ བྷོཛནུཏྟརཀཱལཾ ¶ ཨུཔྤནྣཏྟཱ ཝུཏྟཾ. ‘‘ན པན བྷུཏྟཔཙྩཡཱ’’ཏི ཝུཏྟོ ཝཱཡམཏྠོ ཨཊྛཀཐཱཡཾ. ཀཏུཔཙིཏསྶ ལདྡྷོཀཱསསྶ ཀམྨསྶ ཝསེན བལཝཏིཔི རོགེ ཨུཔྤནྣེ གརུསིནིདྡྷབྷོཛནཔྤཙྩཡཱ ཝེདནཱནིགྒཧོ ཛཱཏོ, ཏེནཱཧ ‘‘ཡདི ཧཱི’’ཏིཨཱདི. པཏྠིཏཊྛཱནེཏི ཨིཙྪིཏཊྛཱནེ, ཨིཙྪཱ ཙསྶ ཏཏྠ གནྟྭཱ ཝིནེཏབྦཝེནེཡྻཱཔེཀྑཱ དཊྛབྦཱ. གཱཐཱཡམྤི ‘‘སུཏ’’ནྟི ཨིམིནཱ སུཏམཏྟཾ, པརེསཾ ཝཙནམཏྟམེཏཾ, ན པན བྷོཛནཔྤཙྩཡཱ ཨཱབཱདྷཾ ཕུསི དྷཱིརོཏི དསྶེཏི.

པཱནཱིཡཱཧརཎཝཎྞནཱ

༡༩༡. པསནྣབྷཱཝེན ཨུདཀསྶ ཨཙྪབྷཱཝོ ཝེདིཏབྦོཏི ཨཱཧ ‘‘ཨཙྪོདཀཱཏི པསནྣོདཀཱ’’ཏི. སཱདུརསཏྟཱ སཱཏཏཱཏི ཨཱཧ ‘‘མདྷུརོདཀཱ’’ཏི. ཏནུཀམེཝ སལིལཾ ཝིསེསཏོ སཱིཏལཾ, ན བཧལནྟི ཨཱཧ ‘‘ཏནུསཱིཏལསལིལཱ’’ཏི. ནིཀྐདྡམཱཏི སེཏབྷཱཝསྶ ཀཱརཎམཱཧ. པངྐཙིཀྑལླཱདིཝསེན ཧི ཨུདཀསྶ ཝིཝཎྞཏཱ, སབྷཱཝཏོ པན ཏཾ སེཏཝཎྞཾ ཨེཝཱཏི.

པུཀྐུསམལླཔུཏྟཝཏྠུཝཎྞནཱ

༡༩༢. དྷུརཝཱཏེཏི པཊིམུཁཝཱཏེ. དཱིགྷཔིངྒལོཏི དཱིགྷོ ཧུཏྭཱ པིངྒལཙཀྑུཀོ. པིངྒལཀྑིཀོ ཧི སོ ‘‘ཨཱལཱ༹རོ’’ཏི པཉྙཱཡིཏྠ. ཨེཝརཱུཔནྟི དཀྑཏི ཀརིསྶཏི བྷཝིསྶཏཱིཏི ཨཱིདིསཾ. ཨཱིདིསེསཱུཏི ཡཏྲ ཡཾཙཱཏི ཨེཝརཱུཔནིཔཱཏསདྡཡུཏྟཊྛཱནེསུ.

༡༩༣. ཝིཙརནྟིཡོ ¶ མེགྷགབྦྷཏོ ནིཙྪརནྟིཡོ ཝིཡ ཧོནྟཱིཏི ཝུཏྟཾ ‘‘ནིཙྪརནྟཱིསཱུཏི ཝིཙརནྟཱིསཱུ’’ཏི. ནཝཝིདྷཱཡཱཏི ནཝཔྤཀཱརཱཡ. ནཝསུ ཧི པཀཱརེསུ ཨེཀཝིདྷཱཔི ཨསནི ཏཔྤརིཡཱཔནྣཏཱཡ ‘‘ནཝཝིདྷཱ’’ ཏྭེཝ ཝུཙྩཏི. ཨཱིདིསཱི ཧི ཨེསཱ རུལ༹ྷི ཨཊྛཝིམོཀྑཔཏྟིཔི སམཉྙཱ ཝིཡ. ཨསཉྙཾ ཀརོཏི, ཡོ ཏསྶཱ སདྡེན ¶ , ཏེཛསཱ ཙ ཨཛ྄ཛྷོཏྠཊོ. ཨེཀཾ ཙཀྐནྟི ཨེཀཾ མཎྜལཾ. སངྐཱརཾ ཏཱིརེནྟཱི པརིཙྪིཛྫནྟཱི ཝིཡ དསྶེཏཱིཏི སཏེརཱ. གགྒརཱཡམཱནཱཏི གགྒརཱཏིསདྡཾ ཀརོནྟཱི, ཨནུརཝདསྶནཉྷེཏཾ. ཀཔིསཱིསཱཏི ཀཔིསཱིསཱཀཱརཝཏཱི. མཙྪཝིལོལིཀཱཏི ¶ ཨུདཀེ པརིཔྥནྡམཱནམཙྪོ ཝིཡ ཝིལུལི༹ཏཱཀཱརཱ. ཀུཀྐུཊསདིསཱཏི པསཱརིཏཔཀྑཀུཀྐུཊཱཀཱརཱ. ནངྒལསྶ ཀསྶནཀཱལེ ཀསྶཀཱནཾ ཧཏྠེན གཧེཏབྦཊྛཱནེ མཎིཀཱ ཧོཏི, ཏཾ ཨུཔཱདཱཡ ནངྒལཾ ‘‘དཎྜམཎིཀཱ’’ཏི ཝུཙྩཏི, ཏསྨཱ དཎྜམཎིཀཱཀཱརཱ དཎྜམཎིཀཱ. ཏེནཱཧ ‘‘ནངྒལསདིསཱ’’ཏི. དེཝེ ཝསྶནྟེཔི སཛོཏིབྷཱུཏཏཱཡ ཨུདཀེན ཨཏེམེཏབྦཏོ མཧཱསནི ‘‘སུཀྑཱསནཱི’’ཏི ཝུཏྟཱ. ཏེནཱཧ ‘‘པཏིཏཊྛཱནཾ སམུགྒྷཱཊེཏཱི’’ཏི.

བྷུསཱགཱརཀེཏི བྷུསམཡེ ཨགཱརཀེ. ཏཏྠ ཀིར མཧནྟཾ པལཱལཔུཉྫཾ ཨབྦྷནྟརཏོ པལཱལཾ ནིཀྐཌྜྷིཏྭཱ སཱལཱསདིསཾ པབྦཛིཏཱནཾ ཝསནཡོགྒཊྛཱནཾ ཀཏཾ, ཏདཱ བྷགཝཱ ཏཏྠ ཝསི, ཏཾ པན ཁལམཎྜལཾ སཱལཱསདིསནྟི ཨཱཧ ‘‘ཁལསཱལཱཡ’’ནྟི. ཨེཏྠཱཏི ཧེཏུམྷི བྷུམྨཝཙནནྟི ཨཱཧ ‘‘ཨེཏསྨིཾ ཀཱརཎེ’’ཏི, ཨསནིཔཱཏེན ཚནྣཾ ཛནཱནཾ ཧཏཀཱརཎེཏི ཨཏྠོ. སོ ཏྭཾ བྷནྟེཏི ཨཡམེཝ ཝཱ པཱཋོ.

༡༩༤. སིངྒཱི ནཱམ ཀིར ཨུཏྟམཾ ཨཏིཝིཡ པབྷསྶརཾ བུདྡྷཱནཾ ཚཝིཝཎྞོབྷཱསཾ དེཝལོཀཏོ ཨཱགཏསུཝཎྞཾ. ཏེནེཝཱཧ ‘‘སིངྒཱིསུཝཎྞཝཎྞ’’ནྟི. ‘‘ཀིཾ པན ཐེརོ ཏཾ གཎྷཱི’’ཏི སཡམེཝ པུཙྪཾ སམུཊྛཱཔེཏྭཱ ཏཏྠ ཀཱརཎཾ དསྶེནྟོ ‘‘ཀིཉྩཱཔཱི’’ཏིཨཱདིམཱཧ. ཏེནེཝ ཀཱརཎེནཱཏི ཨུཔཊྛཱཀཊྛཱནསྶ མཏྠཀཔྤཏྟི, པརེསཾ ¶ ཝཙནོཀཱསཔཙྪེདནཾ, ཏེན ཝཏྠེན སཏྠུ པཱུཛནཾ, སཏྠུ ཨཛ྄ཛྷཱསཡཱནུཝཏྟནནྟི ཨིམིནཱ ཏེནེཝ ཡཐཱཝུཏྟེན ཙཏུབྦིདྷེན ཀཱརཎེན.

༡༩༥. ཐེརོ ཙ ཏཱཝདེཝ ཏཾ སིངྒཱིཝཎྞཾ མཊྛདུསྶཾ བྷགཝཏོ ཨུཔནཱམེསི ‘‘པཊིགྒཎྷཏུ མེ བྷནྟེ བྷགཝཱ ཨིམཾ མཊྛདུསྶཾ, ཏཾ མམསྶ དཱིགྷརཏྟཾ ཧིཏཱཡ སུཁཱཡཱ’’ཏི. པཊིགྒཧེསི བྷགཝཱ, པཊིགྒཧེཏྭཱཝ ནཾ པརིབྷུཉྫི ¶ . ཏེན ཝུཏྟཾ ‘‘བྷགཝཱཔི ཏཏོ ཨེཀཾ ནིཝཱསེསི, ཨེཀཾ པཱརུཔཱི’’ཏི. ཏཱཝདེཝ ཀིར ཏཾ བྷིཀྑཱུ ཨོཝཊྚིཀརཎམཏྟེན ཏུནྣཀམྨཾ ནིཊྛཱཔེཏྭཱ ཐེརསྶ ཨུཔནེསུཾ, ཐེརོ བྷགཝཏོ ཨུཔནཱམེསི. ཧཏཙྩིཀཾ ཝིཡཱཏི པཊིཧཏཔྤབྷཾ, ཝིཡ-སདྡོ ནིཔཱཏམཏྟཾ. བྷགཝཏོ ཧི སརཱིརཔྤབྷཱཧི ཨབྷིབྷུཡྻམཱནཱ ཏསྶ ཝཏྠཡུགསྶ པབྷསྶརཏཱ ནཱཧོསི. ཨནྟནྟེནེཝཱཏི ཨནྟོ ཨནྟོ ཨེཝ, ཨབྦྷནྟརཏོ ཨེཝཱཏི ཨཏྠོ. ཏེནཱཧ ‘‘བཧིཔནསྶ པབྷཱ ནཏྠཱི’’ཏི.

‘‘པསནྣརཱུཔཾ སམུཊྛཱཔེཏཱི’’ཏི ཨེཏེནེཏསྶ ཨཱཧཱརསྶ བྷུཏྟཔྤཙྩཡཱ ན སོ རོགོཏི ཨཡམཏྠོ དཱིཔིཏོ. དྭཱིསུ ཀཱལེསུ ཨེཝཾ ཧོཏི དྭིནྣཾ ནིབྦཱནདྷཱཏཱུནཾ སམདྷིགམསམཡབྷཱཝཏོ. ཨུཔཝཏྟནེ ཨནྟརེན ཡམཀསཱལཱནནྟི ཨེཏྠ ཝཏྟབྦཾ པརཏོ ཨཱགམིསྶཏི.

༡༩༦. སབྦཾ ¶ སུཝཎྞཝཎྞམེཝ ཨཧོསི ཨཏིཝིཡ པརིསུདྡྷཱཡ པབྷསྶརཱཡ ཨེཀགྒྷནཱཡ བྷགཝཏོ སརཱིརཔྤབྷཱཡ ནིརནྟརཾ ཨབྷིབྷཱུཏཏྟཱ.

དྷམྨེཏི པརིཡཏྟིདྷམྨེ. པཝཏྟཱཏི པཱཝཙནབྷཱཝེན དེསེཏཱ. པུརཏོཝ ནིསཱིདི ཨོཝཱདཔྤཊིཀརཎབྷཱཝཏོ.

༡༩༧. དཱནཱནིསཾསསངྑཱཏཱ ¶ ལཱབྷཱཏི ཝཎྞདཱནབལདཱནཱདིབྷེདཱ དཱནསྶ ཨཱནིསཾསསཉྙིཏཱ དིཊྛདྷམྨིཀཱ, སམྤརཱཡིཀཱ ཙ ལཱབྷཱ ཨིཙྪིཏབྦཱ. ཏེ ཨལཱབྷཱཏི ཏེ སབྦེ ཏུཡ྄ཧཾ ཨལཱབྷཱ, ལཱབྷཱ ཨེཝ ན ཧོནྟི. དིཊྛེཝ དྷམྨེ པཙྩཀྑབྷཱུཏེ ཨིམསྨིཾཡེཝ ཨཏྟབྷཱཝེ བྷཝཱ དིཊྛདྷམྨིཀཱ. སམྤརེཏབྦཏོ པེཙྩ གནྟབྦཏོ ‘‘སམྤརཱཡོ’’ཏི ལདྡྷནཱམེ པརལོཀེ བྷཝཱ སམྤརཱཡིཀཱ. དིཊྛདྷམྨིཀཱ ཙ སམྤརཱཡིཀཱ ཙ དིཊྛདྷམྨིཀསམྤརཱཡིཀཱ. དཱནཱནིསཾསསངྑཱཏཱ ལཱབྷཱཏི དཱནཱནིསཾསབྷཱུཏཱ ལཱབྷཱ. སབྦཐཱ སམམེཝ ཧུཏྭཱ སམཾ ཕལཾ ཨེཏེསཾ ན ཨེཀདེསེནཱཏི སམསམཕལཱ. པིཎྜཔཱཏཱཏི ཏབྦིསཡཾ དཱནམཡཾ པུཉྙམཱཧ.

ཡདི ཁེཏྟཝསེན ནེསཾ སམཕལཏཱ ཨདྷིཔྤེཏཱ, སཏིཔི ཨེཀསནྟཱནབྷཱཝེ པུཐུཛྫནཨརཧནྟབྷཱཝསིདྡྷཾ ནནུ ཏེསཾ ཁེཏྟཾ ཝིསིཊྛནྟི དསྶེཏུཾ ‘‘ནནུ ཙཱ’’ཏིཨཱདིམཱཧ. པརིནིབྦཱནསམཏཱཡཱཏི ཀིལེསཔརིནིབྦཱནཁནྡྷཔརིནིབྦཱནབྷཱཝེན པརིནིབྦཱནསམཏཱཡ. ‘‘པརིབྷུཉྫིཏྭཱ པརིནིབྦུཏོ’’ཏི ཨེཏེན ¶ ཡཐཱ པཎཱིཏཔིཎྜཔཱཏཔརིབྷོགཱུཔཏྠམྦྷིཏརཱུཔཀཱཡསནྣིསྶཡོ དྷམྨཀཱཡོ སུཁེནེཝ ཀིལེསེ པརིཙྩཛི, བྷོཛནསཔྤཱཡསཾསིདྡྷིཡཱ ཨེཝཾ སུཁེནེཝ ཁནྡྷེ པརིཙྩཛཱིཏི ཨེཝཾ ཀིལེསཔརིཙྩཱགསྶ, ཁནྡྷཔརིཙྩཱགསྶ ཙ སུཁསིདྡྷིནིམིཏྟཏཱཡ ཨུབྷིནྣཾ པིཎྜཔཱཏཱནཾ སམཕལཏཱ ཛོཏིཏཱ. ‘‘པིཎྜཔཱཏསཱིསེན ཙ པིཎྜཔཱཏདཱནཾ ཛོཏིཏ’’ནྟི ཝུཏྟོ ཝཱཡམཏྠོ. ཡཐཱ ཧི སུཛཱཏཱཡ ‘‘ཨིམཾ ཨཱཧཱརཾ ནིསྶཱཡ མཡ྄ཧཾ དེཝཏཱཡ ཝཎྞསུཁབལཱདིགུཎཱ སམྨདེཝ སམྤཛྫེཡྻུ’’ནྟི ཨུལཱ༹རོ ཨཛ྄ཛྷཱསཡོ ཏདཱ ཨཧོསི, ཨེཝཾ ཙུནྡསྶཔི ཀམྨཱརཔུཏྟསྶ ‘‘ཨིམཾ ཨཱཧཱརཾ ནིསྶཱཡ བྷགཝཏོ ཝཎྞསུཁབལཱདིགུཎཱ སམྨདེཝ སམྤཛྫེཡྻུ’’ནྟི ཨུལཱ༹རོ ཨཛ྄ཛྷཱསཡོཏི ཨེཝམྤི ནེསཾ ཨུབྷིནྣཾ སམཕལཏཱ ཝེདིཏབྦཱ. སཏིཔི ཙཏུཝཱིསཏིཀོཊིསཏསཧསྶསམཱཔཏྟཱིནཾ དེཝསིཀཾ ཝལ༹ཉྫནསམཱཔཏྟིབྷཱཝེ ཡཐཱ པན ཨབྷིསམྦུཛ྄ཛྷནདིཝསེ ཨབྷིནཝཝིཔསྶནཾ པཊྛཔེནྟོ རཱུཔསཏྟཀཱདི (ཝིསུདྡྷི. ཊཱི. ༢.༧༠༧ ཝིཏྠཱརོ) ཝསེན ཙུདྡསཧཱཀཱརེཧི ¶ སནྣེཏྭཱ མཧཱཝིཔསྶནཱམུཁེན ཏཱ སམཱཔཏྟིཡོ སམཱཔཛྫི, ཨེཝཾ པརིནིབྦཱནདིཝསེཔི སབྦཱ ཏཱ སམཱཔཛྫཱིཏི ཨེཝཾ སམཱཔཏྟིསམཏཱཡཔི ཏེསཾ སམཕལཏཱ. ཙུནྡསྶ ཏཱཝ ཨནུསྶརཎཾ ཨུལཱ༹རཏརཾ ཧོཏུ བྷགཝཏོ དིནྣབྷཱཝེན ཨཉྙཐཏྟཱབྷཱཝཏོ, སུཛཱཏཱཡ པན ¶ ཀཐཾ དེཝཏཱཡ དིནྣནྟི? ཨེཝཾསཉྙིབྷཱཝཏོཏི ཨཱཧ ‘‘སུཛཱཏཱ ཙཱ’’ཏིཨཱདི. ཨཔརབྷཱགེཏི ཨབྷིསམྦོདྷིཏོ ཨཔརབྷཱགེ. པུན ཨཔརབྷཱགེཏི པརིནིབྦཱནཏོ པརཏོ. དྷམྨསཱིསནྟི དྷམྨཱནཾ མཏྠཀབྷཱུཏཾ ནིབྦཱནཾ. མེ གཧིཏནྟི མམ ཝསེན གཧིཏཾ. ཏེནཱཧ ‘‘མཡ྄ཧཾ ཀིརཱ’’ཏིཨཱདི.

ཨདྷིཔཏིབྷཱཝོ ཨཱདྷིཔཏེཡྻནྟི ཨཱཧ ‘‘ཛེཊྛབྷཱཝསཾཝཏྟནིཡཀ’’ནྟི.

སཾཝརེཏི སཱིལསཾཝརེ. ཝེརནྟི པཱཎཱཏིཔཱཏཱདིཔཉྩཝིདྷཾ ཝེརཾ. ཏཉྷི ཝེརིདྷམྨབྷཱཝཏོ, ཝེརཧེཏུཏཱཡ ཙ ‘‘ཝེར’’ནྟི ཝུཙྩཏི. ཀོསལླཾ ཝུཙྩཏི ཉཱཎཾ, ཏེན ཡུཏྟོ ཀུསལོཏི ཨཱཧ ‘‘ཀུསལོ པན ཉཱཎསམྤནྣོ’’ཏི. ཉཱཎསམྤདཱ ནཱམ ཉཱཎཔཱརིཔཱུརཱི, སཱ ཙ ཨགྒམགྒཝསེན ཝེདིཏབྦཱ, ཨགྒམགྒོ ཙ ནིརཝསེསཏོ ཀིལེསེ པཛཧཏཱིཏི ཨཱཧ ‘‘ཨརིཡམགྒེན…པེ… ཛཧཱཏཱི’’ཏི. ཨིམཾ པཱཔཀཾ ཛཧིཏྭཱཏི དཱནེན ཏཱཝ ལོབྷམཙྪརིཡཱདིཔཱཔཀཾ, སཱིལེན པཱཎཱཏིཔཱཏཱདིཔཱཔཀཾ ཛཧིཏྭཱ ཏདངྒཝསེན པཧཱཡ ཏཏོ སམཐཝིཔསྶནཱདྷམྨེཧི ཝིཀྑམྦྷནཝསེན, ཏཏོ མགྒཔཊིཔཱཊིཡཱ སམུཙྪེདཝསེན ཨནཝསེསཾ པཱཔཀཾ པཧཱཡ. ཏཐཱ ¶ པཧཱིནཏྟཱ ཨེཝ རཱགཱདཱིནཾ ཁཡཱ ཀིལེསནིབྦཱནེན སབྦསོ ཀིལེསཝཱུཔསམེན ནིབྦུཏོ པརིནིབྦུཏོཏི སཨུཔཱདིསེསཱཡ ནིབྦཱནདྷཱཏུཡཱ དེསནཱཡ ཀཱུཊཾ གཎྷནྟོ ‘‘ཨིཏི ཙུནྡསྶ…པེ… སམྤསྶམཱནོ ཨུདཱནཾ ཨུདཱནེསཱི’’ཏི.

ཙཏུཏྠབྷཱཎཝཱརཝཎྞནཱ ནིཊྛིཏཱ.

ཡམཀསཱལཝཎྞནཱ

༡༩༨. ཨེཝཾ ¶ ཏཾ ཀུསིནཱརཱཡཾ ཧོཏཱིཏི ཡཐཱ ཨནུརཱདྷཔུརསྶ ཐཱུཔཱརཱམོ དཀྑིཎཔཙྪིམདིསཱཡཾ, ཨེཝཾ ཏཾ ཨུཡྻཱནཾ ཀུསིནཱརཱཡ དཀྑིཎཔཙྪིམདིསཱཡཾ ཧོཏི. ཏསྨཱཏི ཡསྨཱ ནགརཾ པཝིསིཏུཀཱམཱ ཨུཡྻཱནཏོ ཨུཔེཙྩ ཝཏྟནྟི གཙྪནྟི ཨེཏེནཱཏི ‘‘ཨུཔཝཏྟན’’ནྟི ཝུཙྩཏི, ཏཾ སཱལཔནྟིབྷཱཝེན ཋིཏཾ སཱལཝནཾ. ཨནྟརེནཱཏི ཝེམཛ྄ཛྷེ. ཏསྶ ཀིར མཉྩཀསྶཱཏི ཏཏྠ པཉྙཔིཡམཱནསྶ ཏསྶ མཉྩཀསྶ. ཏཏྲཱཔི…པེ… ཨེཀོ པཱདབྷཱགསྶ, ཏསྨཱ ‘‘ཨནྟརེན ཡམཀསཱལཱན’’ནྟི ཝུཏྟཾ. སཾསིབྦིཏྭཱཏི ཨཉྙམཉྙཨཱསཏྟཝིཊཔསཱཁཏཱཡ སཾསིབྦིཏྭཱ ཝིཡ. ‘‘ཋིཏསཱཁཱ’’ཏིཔི ཝུཏྟཾ ཨཊྛཀཐཱཡཾ. ཡཾ པན པཱལི༹ཡཾ ‘‘ཨུཏྟརསཱིསཀཾ མཉྩཀཾ ¶ པཉྙཔེཧཱི’’ཏི ཝུཏྟཾ, ཏཾ པཙྪིམདསྶནཾ དཊྛུཾ ཨཱགཏཱནཾ དེཝཏཱནཾ དཊྛུཾ ཡོགྱཏཱཝསེན ཝུཏྟཾ. ཀེཙི པན ‘‘ཨུཏྟརདིསཱཝིལོཀནམུཁཾ པུབྦདིསཱསཱིསཀཾ ཀཏྭཱ མཉྩཀཾ པཉྙཔེཧཱིཏི ཨཏྠོ’’ཏི ཝདནྟི, ཏཾ ཏེསཾ མཏིམཏྟཾ.

ཨེཏེ ནཱགཱནམུཏྟམཱཏི ཨེཏེ གོཏྟཏོ གོཙརིཨཱདིནཱམཀཱ ཧཏྠིནཱགེསུ བལེན སེཊྛཏམཱ. མཛ྄ཛྷིམཊྛཀཐཱཡཾ (མ. ནི. ཨཊྛ. ༡.༡༤༨) པན ཀེཙི ཧཏྠིནོ ཨིཏོ ཨཉྙཐཱ ཨཱགཏཱ, སོ པན ནེསཾ ནཱམམཏྟཀཏོ བྷེདོ དཊྛབྦོ.

པརིབྷུཏྟཀཱལཏོ པཊྛཱཡ…པེ… པརིཀྑཡཾ གཏཾ, ‘‘ན པན པརིབྷུཏྟཔྤཙྩཡཱ’’ཏི ཧེཊྛཱ ཝུཏྟནཡེནེཝ ཨཏྠོ དཊྛབྦོ. ཙངྒཝཱརེཏི ཨཱུམིཡཾ. ཀཏོཀཱསསྶ ཀམྨསྶ ཝསེན ཡཐཱསམུཊྛིཏོ རོགོ ཨཱརོགྱཾ ཨབྷིམདྡཏཱིཏི ཀཏྭཱ ཨེཏམཏྠཾ དསྶེནྟོ ‘‘ཝིཡཱ’’ཏི ཝུཏྟཾ. ཡསྨཱ བྷགཝཱ ཧེཊྛཱ ཝུཏྟནཡེན ¶ ཀཔྤཾ, ཀཔྤཱཝསེསཾ ཝཱ ཋཱཏུཾ སམཏྠོ ཨེཝ, ཏཏྟཀཾ ཀཱལཾ ¶ ཋཱནེ པཡོཛནཱབྷཱཝཏོ ཨཱཡུསངྑཱརེ ཨོསྶཛྫིཏྭཱ ཏཱདིསསྶ ཀམྨསྶ ཨོཀཱསཾ ཨདཱསི, ཏསྨཱ ཨེཏམཏྠཾ དསྶེནྟོ ‘‘ཝིཡཱ’’ཏིཔི ཝཏྟུཾ ཡུཛྫཏིཡེཝ.

ཀུསལཾ ཀཱཏབྦཾ མཉྙིསྶནྟི ‘‘ཨེཝཾ མཧཔྥལཾ, ཨེཝཾ མཧཱནིསཾསཾ, མཧཱནུབྷཱཝཉྩ ཏཾ ཀུསལ’’ནྟི.

ཨེཀསྶཱཔི སཏྟསྶ ཝཊྚདུཀྑཝཱུཔསམོ བུདྡྷཱནཾ གརུཏརོ ཧུཏྭཱ ཨུཔཊྛཱཏི ཨཏིདུལླབྷབྷཱཝཏོ, ཏསྨཱ ‘‘ཨཔརམྤི པསྶཏཱི’’ཏིཨཱདི ཝུཏྟཾ, སྭཱཡམཏྠོ མཱགཎྜིཡསུཏྟེན (སུ. ནི. ༨༤༡) དཱིཔེཏབྦོ.

ཏཏིཡཾ པན ཀཱརཎཾ སཏྟཱནཾ ཨུཔྤཛྫནཀཨནཏྠཔརིཧརཎནྟི ཏཾ དསྶེནྟོ པུན ‘‘ཨཔརམྤི པསྶཏཱི’’ཏིཨཱདིམཱཧ.

སཱིཧསེཡྻནྟི. ཨེཏྠ སཡནཾ སེཡྻཱ, སཱིཧསྶ ཝིཡ སེཡྻཱ སཱིཧསེཡྻཱ, ཏཾ སཱིཧསེཡྻཾ. ཨཐ ཝཱ སཱིཧསེཡྻནྟི སེཊྛསེཡྻཾ, ཡདིདཾ ཨཏྠདྭཡཾ པརཏོ ཨཱགམིསྶཏི.

‘‘ཝཱམེན པསྶེན སེནྟཱི’’ཏི ཨེཝཾ ཝུཏྟཱ ཀཱམབྷོགིསེཡྻཱ, དཀྑིཎཔསྶེན སཡཱནོ ནཱམ ནཏྠི དཀྑིཎཧཏྠསྶ སརཱིརགྒཧཎཱདིཡོགཀྑམཏོ, པུརིསཝསེན ཙེཏཾ ཝུཏྟཾ.

ཨེཀེན ¶ པསྶེན སཡིཏུཾ ན སཀྐོནྟི དུཀྑུཔྤཏྟིཏོ.

ཨཡཾ སཱིཧསེཡྻཱཏི ཨཡཾ ཨེཝཾ ཝུཏྟཱ སཱིཧསེཡྻཱ. ‘‘ཏེཛུསྶདཏྟཱ’’ཏི ཨིམིནཱ སཱིཧསྶ ཨབྷཱིརུབྷཱཝཾ དསྶེཏི. བྷཱིརུཀཱ ཧི སེསམིགཱ ཨཏྟནོ ཨཱསཡཾ པཝིསིཏྭཱ སནྟཱསཔུབྦཀཾ ཡཐཱ ཏཐཱ སཡནྟི, སཱིཧོ པན ཨབྷཱིརུབྷཱཝཏོ སཏོཀཱརཱི བྷིཀྑུ ཝིཡ སཏིཾ ཨུཔཊྛཱཔེཏྭཱཝ སཡཏི. ཏེནཱཧ ‘‘པུརིམཔཱདེ’’ཏིཨཱདི. དཀྑིཎེ པུརིམཔཱདེ ཝཱམསྶ པུརིམཔཱདསྶ ཋཔནཝསེན དྭེ པུརིམཔཱདེ ཨེཀསྨིཾ ཋཱནེ ཋཔེཏྭཱ. པཙྪིམཔཱདེཏི དྭེ པཙྪིམཔཱདེ. ཝུཏྟནཡེནེཝ ཨིདྷཱཔི ཨེཀསྨིཾ ཋཱནེ པཱདཊྛཔནཾ ཝེདིཏབྦཾ, ཋིཏོཀཱསསལླཀྑཎཾ ཨབྷཱིརུབྷཱཝེནེཝ. ‘‘སཱིསཾ པན ཨུཀྑིཔིཏྭཱ’’ཏིཨཱདིནཱ ཝུཏྟཱ སཱིཧཀིརིཡཱ ཨནུཏྲཱསཔབུཛ྄ཛྷནཾ ¶ ཝིཡ ཨབྷཱིརུབྷཱཝསིདྡྷཱ དྷམྨཏཱཝསེནེཝཱཏི ཝེདིཏབྦཱ. སཱིཧཝིཛམྦྷིཏཝིཛམྦྷནཾ ཨཏིཝེལཾ ཨེཀཱཀཱརེན ཋཔིཏཱནཾ སརཱིརཱཝཡཝཱནཾ གམནཱདིཀིརིཡཱསུ ཡོགྱབྷཱཝཱཔཱདནཏྠཾ. ཏིཀྑཏྟུཾ སཱིཧནཱདནདནཾ ཨཔྤེསཀྑམིགཛཱཏཔརིཧརཎཏྠཾ.

སེཏི ¶ ཨབྱཱཝཊབྷཱཝེན པཝཏྟཏི ཨེཏྠཱཏི སེཡྻཱ, ཙཏུཏྠཛ྄ཛྷཱནམེཝ སེཡྻཱ ཙཏུཏྠཛ྄ཛྷཱནསེཡྻཱ. ཀིཾ པན ཏཾ ཙཏུཏྠཛ྄ཛྷཱནནྟི? ཨཱནཱཔཱནཙཏུཏྠཛ྄ཛྷཱནཾ, ཏཏོ ཧི ཝུཊྛཧིཏྭཱ ཝིཔསྶནཾ ཝཌྜྷེཏྭཱ བྷགཝཱ ཨནུཀྐམེན ཨགྒམགྒཾ ཨདྷིགནྟྭཱ ཏཐཱགཏོ ཛཱཏོཏི. ‘‘ཏཡིདཾ པདཊྛཱནཾ ནཱམ, ན སེཡྻཱ, ཏཐཱཔི ཡསྨཱ ‘ཙཏུཏྠཛ྄ཛྷཱནཱ ཝུཊྛཧིཏྭཱ སམནནྟརཱ བྷགཝཱ པརིནིབྦཱཡཱི’ཏི (དཱི. ནི. ༢.༢༡༩) ཝཀྑཏི, ཏསྨཱ ལོཀིཡཙཏུཏྠཛ྄ཛྷཱནསམཱཔཏྟི ཨེཝ ཏཐཱགཏསེཡྻཱ’’ཏི ཀེཙི, ཨེཝཾ སཏི པརིནིབྦཱནཀཱལིཀཱཝ ཏཐཱགཏསེཡྻཱཏི ཨཱཔཛྫཏི, ན ཙ བྷགཝཱ ལོཀིཡཙཏུཏྠཛ྄ཛྷཱནསམཱཔཛྫནབཧུལོ ཝིཧཱསི. ཨགྒཕལཝསེན པཝཏྟཾ པནེཏྠ ཙཏུཏྠཛ྄ཛྷཱནཾ ཝེདིཏབྦཾ. ཏཏྠ ཡཐཱ སཏྟཱནཾ ནིདྡུཔགམནལཀྑཎཱ སེཡྻཱ བྷཝངྒཙིཏྟཝསེན ཧོཏི, སཱ ཙ ནེསཾ པཋམཛཱཏིསམནྭཡཱ ཡེབྷུཡྻཝུཏྟིཀཱ, ཨེཝཾ བྷགཝཏོ ཨརིཡཛཱཏིསམནྭཡཾ ཡེབྷུཡྻཝུཏྟིཀཾ ཨགྒཕལབྷཱུཏཾ ཙཏུཏྠཛ྄ཛྷཱནཾ ‘‘ཏཐཱགཏསེཡྻཱ’’ཏི ཝེདིཏབྦཾ. སཱིཧསེཡྻཱ ནཱམ སེཊྛསེཡྻཱཏི ཨཱཧ ‘‘ཨུཏྟམསེཡྻཱ’’ཏི.

ནཏྠི ཨེཏིསྶཱ ཨུཊྛཱནནྟི ཨནུཊྛཱནཱ, སེཡྻཱ, ཏཾ ཨནུཊྛཱནསེཡྻཾ. ‘‘ཨིཏོ ཨུཊྛཧིསྶཱམཱི’’ཏི མནསིཀཱརསྶ ཨབྷཱཝཏོ ‘‘ཨུཊྛཱནསཉྙཾ མནསི ཀརིཏྭཱ’’ཏི ན ཝུཏྟཾ. ཨེཏྠཱཏི ཨེཏསྨིཾ ཨནུཊྛཱནསེཡྻུཔགམནེ. ཀཱཡཝསེན ཨནུཊྛཱནཾ, ན ཙིཏྟཝསེན, ཙིཏྟཝསེན ཙ ཨནུཊྛཱནཾ ནཱམ ནིདྡུཔགམནནྟི ¶ ཏདབྷཱཝཾ དསྶེཏུཾ ‘‘ནིདྡཱཝསེནཱ’’ཏིཨཱདི ཝུཏྟཾ. བྷཝངྒསྶཱཏི ནིདྡུཔགམནལཀྑཎསྶ བྷཝངྒསྶ.

སབྦཔཱལིཕུལླཱཏི ¶ སབྦཏྠཀམེཝ ཝིཀསནཝསེན ཕུལླཱ, ན ཨེཀདེསཝིཀསནཝསེན. ཏེནཱཧ ‘‘སབྦེ སམནྟཏོ པུཔྥིཏཱ’’ཏི. ཨེཀཙྪནྣཱཏི སམྥུལླཔུཔྥེཧི ཨེཀཱཀཱརེན སབྦཏྠེཝ ཚཱདིཏཱ. ཨུལློཀཔདུམཱནཱིཏི ཧེཊྛཱ ཨོལོཀེནྟཱནི ཝིཡ ཏིཊྛནཔདུམཱནི. མོརཔིཉྪཀལཱཔོ ཝིཡ པཉྩཝཎྞཔུཔྥསཉྪཱདིཏཏྟཱ.

ནནྡཔོཀྑརཎཱིསམྦྷཝཱནཱིཏི ནནྡཔོཀྑརཎཱིཏཱིརསམྦྷཝཱནི. མཧཱཏུམྦམཏྟནྟི ཨཱལ༹ྷཀམཏྟཾ. པཝིཊྛཱནཱིཏི ཁིཏྟཱནི. སརཱིརམེཝ ཨོཀིརནྟཱིཏི སརཱིརམེཝ ཨཛ྄ཛྷོཀིརནྟི.

དེཝཏཱནཾ ¶ ཨུཔཀཔྤནཙནྡནཙུཎྞཱནཱིཏི སཊྛིཔི པཉྙཱསམྤི ཡོཛནཱནི ཝཱཡནཀསེཏཝཎྞཙནྡནཙུཎྞཱནི. དིབྦགནྡྷཛཱལཙུཎྞཱནཱིཏི དིབྦགནྡྷདིབྦཙུཎྞཱནི. ཧརིཏཱལཨཉྫནཙུཎྞཱདཱིནིཔི དིབྦཱནི པརམསུགནྡྷཱནི ཨེཝཱཏི ཝེདིཏབྦཱནི. ཏེནེཝཱཧ ‘‘སབྦདིབྦགནྡྷཝཱསཝིཀཏིཡོ’’ཏི.

ཨེཀཙཀྐཝཱལེ༹ སནྣིཔཏིཏྭཱ ཨནྟལིཀྑེ ཝཛྫནྟི མཧཱབྷིནིཀྑམནཀཱལེ ཝིཡ.

ཏཱཏི དེཝཏཱ. གནྠམཱནཱ ཝཱཏི མཱལཾ རཙནྟིཡོ ཨེཝ. ཨཔརིནིཊྛིཏཱ ཝཱཏི ཡཐཱདྷིཔྤཱཡཾ པརིཡོསིཏཱ ཨེཝ. ཧཏྠེན ཧཏྠནྟི ཨཏྟནོ ཧཏྠེན པརསྶ ཧཏྠཾ. གཱིཝཱཡ གཱིཝནྟི ཀཎྛགཱཧཝསེན ཨཏྟནོ གཱིཝཱཡ པརསྶ གཱིཝཾ. གཧེཏྭཱཏི ཨཱམསིཏྭཱ. མཧཱཡསོ མཧཱཡསོཏི ཨཱམེཌིཏཝསེན ཨཉྙམཉྙཾ ཨཱལཱཔཝཙནཾ.

༡༩༩. མཧནྟཾ ཨུསྶཱཧནྟི ཏཐཱགཏསྶ པཱུཛཱསཀྐཱརཝསེན པཝཏྟིཡམཱནཾ མཧནྟཾ ཨུསྶཱཧཾ དིསྭཱ.

སཱཡེཝ ¶ པན པཊིཔདཱཏི པུབྦབྷཱགཔཊིཔདཱ ཨེཝ. ཨནུཙྪཝིཀཏྟཱཏི ཨདྷིགནྟབྦསྶ ནཝཝིདྷལོཀུཏྟརདྷམྨསྶ ཨནུརཱུཔཏྟཱ.

སཱིལནྟི ཙཱརིཏྟསཱིལམཱཧ. ཨཱཙཱརཔཉྙཏྟཱིཏི ཙཱརིཏྟསཱིལཾ. ཡཱཝ གོཏྲབྷུཏོཏི ཡཱཝ གོཏྲབྷུཉཱཎཾ, ཏཱཝ པཝཏྟེཏབྦཱ སམཐཝིཔསྶནཱ སམྨཱཔཊིཔདཱ. ཨིདཱནི ཏཾ སམྨཱཔཊིཔདཾ བྱཏིརེཀཏོ, ཨནྭཡཏོ ཙ ཝིབྷཱཝེཏུཾ ‘‘ཏསྨཱ’’ཏིཨཱདི ཝུཏྟཾ. ཛིནཀཱལ༹སུཏྟནྟི ཛིནམཧཱཝཌྜྷཀིནཱ ཋཔིཏཾ ཝཛྫེཏབྦགཧེཏབྦདྷམྨསནྡསྶནཀཱལ༹སུཏྟཾ སིཀྑཱཔདམརིཡཱདཾ, ཨུཔཱསཀོཔཱསིཀཱཝཱརེསུ ¶ ‘‘གནྡྷཔཱུཛཾ མཱལཱཔཱུཛཾ ཀརོཏཱི’’ཏི ཝཙནཾ ཙཱརིཏྟསཱིལཔཀྑེ ཋཔེཏྭཱ ཀརཎཾ སནྡྷཱཡ ཝུཏྟཾ, ཏེན བྷིཀྑུབྷིཀྑུནཱིནམྤི ཏཐཱཀརཎཾ ཨནུཉྙཱཏམེཝཱཏི དཊྛབྦཾ.

ཨཡཉྷཱིཏི དྷམྨཱནུདྷམྨཔཊིཔདཾ སནྡྷཱཡ ཝདཏི.

ཨུཔཝཱཎཏྠེརཝཎྞནཱ

༢༠༠. ཨཔནེསཱིཏི ཋིཏཔྤདེསཏོ ཡཐཱ ཨཔགཙྪཏི, ཨེཝམཀཱསི, ན པན ནིབྦྷཙྪི. ཏེནཱཧ ‘‘ཨཱནནྡོ’’ཏིཨཱདི. ཝུཏྟསདིསཱ ཝཱཏི སམཙིཏྟཔརིཡཱཡདེསནཱཡཾ (ཨ. ནི. ༢.༣༧) ཝུཏྟསདིསཱ ཨེཝ. ཨཱཝཱརེནྟོཏི ཚཱདེནྟོ.

ཡསྨཱ ¶ ཀསྶཔསྶབུདྡྷསྶ ཙེཏིཡེ ཨཱརཀྑདེཝཏཱ ཨཧོསི, ཏསྨཱ ཐེརོཝ ཏེཛུསྶདོ, ན ཨཉྙེ ཨརཧནྟོཏི ཨཱནེཏྭཱ ཡོཛནཱ.

ཨིདཱནི ཨཱགམནཏོ པཊྛཱཡ ཏམཏྠཾ ཝིཏྠཱརཏོ དསྶེཏུཾ ‘‘ཝིཔསྶིམྷི ཀིར སམྨཱསམྦུདྡྷེ’’ཏིཨཱདི ཨཱརདྡྷཾ. ‘‘ཙཱཏུམཧཱརཱཛིཀཱ དེཝཏཱ’’ཏི ཨིདཾ གོབལཱིབདྡཉཱཡེན གཧེཏབྦཾ བྷུམྨདེཝཏཱདཱིནམྤི ཏཔྤརིཡཱཔནྣཏྟཱ. ཏེསཾ མནུསྶཱནཾ.

ཏཏྠཱཏི ཀསྶཔསྶ བྷགཝཏོ ཙེཏིཡེ.

༢༠༡. ཨདྷིཝཱསེནྟཱིཏི རོཙེནྟི.

ཚིནྣཔཱཏོ ཝིཡ ཚིནྣཔཱཏོ, ཏཾ ཚིནྣཔཱཏཾ, ¶ བྷཱཝནཔུཾསཀནིདྡེསོ ཡཾ. ཨཱཝཊྚནྟཱིཏི ཨབྷིམུཁབྷཱཝེན ཝཊྚནྟི. ཡཏྠ པཏིཏཱ, ཏཏོ ཀཏིཔཡརཏནཊྛཱནཾ ཝཊྚནཝསེནེཝ གནྟྭཱ པུན ཡཐཱཔཏིཏམེཝ ཋཱནཾ ཝཊྚནཝསེན ཨཱགཙྪནྟི. ཏེནཱཧ ‘‘ཨཱཝཊྚནྟིཡོ པཏིཏཊྛཱནམེཝ ཨཱགཙྪནྟཱི’’ཏི. ཝིཝཊྚནྟཱིཏི ཡཏྠ པཏིཏཱ, ཏཏོ ཝིནིཝཊྚནྟི. ཏེནཱཧ ‘‘པཏིཏཊྛཱནཏོ པརབྷཱགཾ ཝཊྚམཱནཱ གཙྪནྟཱི’’ཏི. པུརཏོ ཝཊྚནཾ ཨཱཝཊྚནཾ, ཨིཏརཾ ཏིཝིདྷམྤི ཝིཝཊྚནནྟི དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. དེཝཏཱ དྷཱརེཏུཾ ན སཀྐོཏི ཨུདཀཾ ཝིཡ ཨོསཱིདནཏོ. ཏེནཱཧ ‘‘ཏཏྠཱ’’ཏིཨཱདི. ཏཏྠཱཏི པཀཏིཔཐཝིཡཾ. དེཝཏཱ ཨོསཱིདནྟི དྷཱཏཱུནཾ སཎྷསུཁུམཱལབྷཱཝཏོ. པཐཝིཡཾ ¶ པཐཝིཾ མཱཔེསུནྟི པཀཏིཔཐཝིཡཾ ཨཏྟནོ སརཱིརཾ དྷཱརེཏུཾ སམཏྠཾ ཨིདྡྷཱནུབྷཱཝེན པཐཝིཾ མཱཔེསུཾ.

ཀཱམཾ དོམནསྶེ ཨསཏིཔི ཨེཀཙྩོ རཱགོ ཧོཏིཡེཝ, རཱགེ པན ཨསཏི དོམནསྶསྶ ཨསམྦྷཝོ ཨེཝཱཏི ཏདེཀཊྛབྷཱཝཏོཏི ཨཱཧ ‘‘ཝཱིཏརཱགཱཏི པཧཱིནདོམནསྶཱ’’ཏི. སིལཱཐམྦྷསདིསཱ ཨིཊྛཱནིཊྛེསུ ནིབྦིཀཱརཏཱཡ.

ཙཏུསཾཝེཛནཱིཡཊྛཱནཝཎྞནཱ

༢༠༢. ཨཔཱརགངྒཱཡཱཏི གངྒཱཡ ཨོརམྦྷཱགེ. ‘‘སངྐཱརཚཌྜཀསམྨཛྫནིཡོ གཧེཏྭཱ’’ཏིཨཱདི ཨཏྟནོ ཨཏྟནོ ཝསནཊྛཱནེ ཝཏྟཀརཎཱཀཱརདསྶནཾ. ‘‘ཨེཝཾ དྭཱིསུ ཀཱལེསཱུ’’ཏིཨཱདི ནིདསྶནཏྠཾ པཙྩཱམསནཾ, ཏཾ ཧེཊྛཱ ཨདྷིགཏཾ.

ཀམྨསཱདྷནོ ¶ སམྦྷཱཝནཏྠོ བྷཱཝནཱིཡ-སདྡོཏི ཨཱཧ ‘‘མནསཱ བྷཱཝིཏེ སམྦྷཱཝིཏེ’’ཏི. དུཏིཡཝིཀཔྤེ པན བྷཱཝནཾ, ཝཌྜྷནཉྩ པཊིཔཀྑཔཧཱནཏོཏི ཨཱཧ ‘‘ཡེ ཝཱ’’ཏིཨཱདི.

བུདྡྷཱདཱིསུ ཏཱིསུ ཝཏྠཱུསུ པསནྣཙིཏྟསྶ, ན ཀམྨཕལསདྡྷཱམཏྟེན. སཱ ཙསྶ སདྡྷཱསམྤདཱ ཨེཝཾ ¶ ཝེདིཏབྦཱཏི ཕལེན ཧེཏུཾ དསྶེནྟོ ‘‘ཝཏྟསམྤནྣསྶཱ’’ཏི ཨཱཧ. སཾཝེགོ ནཱམ སཧོཏྟཔྤཉཱཎཾ, ཨབྷིཛཱཏིཊྛཱནཱདཱིནིཔི ཏསྶ ཨུཔྤཏྟིཧེཏཱུནི བྷཝནྟཱིཏི ཨཱཧ ‘‘སཾཝེགཛནཀཱནཱི’’ཏི.

ཙེཏིཡཔཱུཛནཏྠཾ ཙཱརིཀཱ ཙེཏིཡཙཱརིཀཱ. སགྒེ པཏིཊྛཧིསྶནྟིཡེཝ བུདྡྷགུཎཱརམྨཎཱཡ ཀུསལཙེཏནཱཡ སགྒསཾཝཏྟནིཡབྷཱཝཏོ.

ཨཱནནྡཔུཙྪཱཀཐཱཝཎྞནཱ

༢༠༣. ཨེཏྠཱཏི མཱཏུགཱམེ. ཨཡཾ ཨུཏྟམཱ པཊིཔཏྟི, ཡདིདཾ ཨདསྶནཾ, དསྶནམཱུལཀཏྟཱ ཏཔྤཙྩཡཱནཾ སབྦཱནཏྠཱནཾ. ལོབྷོཏི ཀཱམརཱགོ. ཙིཏྟཙལནཱ པཊིཔཏྟིཨནྟརཱཡཀརོ ཙིཏྟཀྑོབྷོ. མུརུམུརཱཔེཏྭཱཏི སཨཊྛིཀཾ ཀཏྭཱ ཁཱདནེ ཨནུརཝདསྶནཾ. ཨཔརིམིཏཾ ཀཱལཾ དུཀྑཱནུབྷཝནཾ ཨཔརིཙྪིནྣདུཀྑཱནུབྷཝནཾ. ཝིསྶཱསོཏི ཝིསངྒོ གྷཊྚནཱབྷཱཝོ. ཨོཏཱརོཏི ཏཏྠ ཙིཏྟསྶ ¶ ཨནུཔྤཝེསོ. ཨསིཧཏྠེན ཝེརཱིཔུརིསེན, པིསཱཙེནཱཔི ཁཱདིཏུཀཱམེན. ཨཱསཱིདེཏི ཨཀྐམནཱདིཝསེན བཱདྷེཡྻ. ཨསྶཱཏི མཱཏུགཱམསྶ. པབྦཛིཏེཧི ཀཏྟབྦཀམྨནྟི ཨཱམིསཔཊིགྒཧཎཱདི པབྦཛིཏེཧི ཀཱཏབྦཾ ཀམྨཾ. སཏཱིཏི ཝཱ ཀཱཡགཏཱསཏི ཨུཔཊྛཱཔེཏབྦཱ.

༢༠༤. ཨཏནྟིབདྡྷཱཏི ཨབྷཱརཝཧཱ. པེསིཏཙིཏྟཱཏི ནིབྦཱནཾ པཏི པེསིཏཙིཏྟཱ.

༢༠༥. ཝིཧཏེནཱཏི ཀཔྤཱསཝིཧནནདྷནུནཱ པབྦཛཊཱནཾ ཝིཛཊནཝསེན ཧཏེན. ཏེནཱཧ ‘‘སུཔོཐིཏེནཱ’’ཏི, ཨསངྐརཎཝསེན སུཊྛུ པོཐིཏེནཱཏི ཨཏྠོ, དསྶནཱིཡསཾཝེཛནཱིཡཊྛཱནཀིཏྟནེན ཙ ཝསནཊྛཱནཾ ཀཐིཏཾ.

ཨཱནནྡཨཙྪརིཡདྷམྨཝཎྞནཱ

༢༠༧. ཐེརཾ ཨདིསྭཱ ཨཱམནྟེསཱིཏི ཏཏྠ ཨདིསྭཱ ཨཱཝཛྫནྟོ ཐེརསྶ ཋིཏཊྛཱནཾ, པཝཏྟིཉྩ ཉཏྭཱ ཨཱམནྟེསི.

ཀཱཡཀམྨསྶ ¶ ¶ ཧིཏབྷཱཝོ ཧིཏཛ྄ཛྷཱསཡེན པཝཏྟིཏཏྟཱཏི ཨཱཧ ‘‘ཧིཏཝུདྡྷིཡཱ ཀཏེནཱ’’ཏི. སུཁབྷཱཝོ ཀཱཡིཀདུཀྑཱབྷཱཝོ, ཙེཏསིཀསུཁབྷཱཝོ ཙེཏསིཀསུཁསམུཊྛིཏཏྟཱ ཙཱཏི ཝུཏྟཾ ‘‘སུཁསོམནསྶེནེཝ ཀཏེནཱ’’ཏི. ཨཱཝིརཧོཝིབྷཱགཏོ ཨདྭཡབྷཱཝཏོ ཨདྭཡེནཱཏི ཨིམམཏྠཾ དསྶེཏུཾ ‘‘ཡཐཱ’’ཏིཨཱདི ཝུཏྟཾ. སཏྠུ ཁེཏྟབྷཱཝསམྤཏྟིཡཱ, ཐེརསྶ ཨཛ྄ཛྷཱསཡསམྤཏྟིཡཱ ཙ ‘‘ཨེཏྟཀམིད’’ནྟི པམཱཎཾ གཧེཏུཾ ཨསཀྐུཎེཡྻཏཱཡ པམཱཎཝིརཧིཏཏྟཱ ཏསྶ ཀམྨསྶཱཏི ཨཱཧ ‘‘ཙཀྐཝཱལ༹མྤཱི’’ཏིཨཱདི.

ཨེཝཾ པཝཏྟིཏེནཱཏི ཨེཝཾ ཨོདིསྶཀམེཏྟཱབྷཱཝནཱཡ ཝསེན པཝཏྟིཏེན. ཝིཝཊྚཱུཔནིསྶཡབྷཱུཏཾ ཀཏཾ ཨུཔཙིཏཾ པུཉྙཾ ཨེཏེནཱཏི ཀཏཔུཉྙོ, ཨརཧཏྟཱདྷིགམཱཡ ཀཏཱདྷིཀཱརོཏི ཨཏྠོ. ཏེནཱཧ ‘‘ཨབྷིནཱིཧཱརསམྤནྣོསཱིཏི དསྶེཏཱི’’ཏི.

༢༠༨. ཀཏྠཙི སངྐུཙིཏཾ ཧུཏྭཱ ཋིཏཾ མཧཱཔཐཝིཾ པཏྠརནྟོ ཝིཡ, པཊིསཾཧཊཾ ཧུཏྭཱ ཋིཏཾ ཨཱཀཱསཾ ཝིཏྠཱརེནྟོ ཝིཡ, ཙཏུསཊྛཱདྷིཀཡོཛནསཏསཧསྶུབྦེདྷཾ ཙཀྐཝཱལ༹གིརིཾ ཨདྷོ ཨོསཱརེནྟོ ཝིཡ, ཨཊྛསཊྛཱདྷིཀསཧསྶཡོཛནསཏསཧསྶུབྦེདྷཾ སིནེརུཾ ཨུཀྑིཔེནྟོ ཝིཡ, སཏཡོཛནཱཡཱམཝིཏྠཱརཾ མཧཱཛམྦུཾ ཁནྡྷེ གཧེཏྭཱ ཙཱལེནྟོ ཝིཡཱཏི པཉྩ ཧི ཨུཔམཱ ཧི ཐེརསྶ གུཎཀཐཱ ¶ མཧནྟབྷཱཝདསྶནཏྠཉྩེཝ ཨཉྙེསཾ དུཀྐཊབྷཱཝདསྶནཏྠཉྩ ཨཱགཏཱཝ. ཨེཏེནེཝ ཙཱཏི ཙ-སདྡེན ‘‘ཨཧཾ ཨེཏརཧི ཨརཧཾ སམྨཱསམྦུདྡྷོ’’ (དཱི. ནི. ༢.༤), ‘‘སདེཝཀསྨིཾ ལོཀསྨིཾ ནཏྠི མེ པཊིཔུགྒལོ’’ཏི (མ. ནི. ༡.༢༨༥; ༢.༣༤༡; མཧཱཝ. ༡༡; ཀཐཱ. ༤༠༥; མི. པ. ༥.༡༡) ཙ ཨེཝཾ ཨཱདཱིནཾ སངྒཧོ དཊྛབྦོ. བྱཏྟོཏི ¶ ཁནྡྷཀོསལླཱདིསངྑཱཏེན ཝེཡྻཏྟིཡེན སམནྣཱགཏོ. མེདྷཱཝཱིཏི མེདྷཱསངྑཱཏཱཡ སམྨཱབྷཱཝིཏཱཡ པཉྙཱཡ སམནྣཱགཏོ.

༢༠༩. པཊིསནྠཱརདྷམྨནྟི པཀཏིཙཱརིཏྟཝསེན ཝུཏྟཾ, ཨུཔགཏཱནཾ པན བྷིཀྑཱུནཾ བྷིཀྑུནཱིནཉྩ པུཙྪཱཝིསྶཛྫནཝསེན ཙེཝ ཙིཏྟརུཙིཝསེན ཙ ཡཐཱཀཱལཾ དྷམྨཾ དེསེཏིཡེཝ, ཨུཔཱསཀོཔཱསིཀཱནཾ པན ཨུཔནིསིནྣཀཐཱཝསེན.

མཧཱསུདསྶནསུཏྟདེསནཱཝཎྞནཱ

༢༡༠. ཁུདྡཀ-སདྡོ ¶ པཏིརཱུཔཝཱཙཱི, ཀ-སདྡོ ཨཔྤཏྠོཏི ཨཱཧ ‘‘ཁུདྡཀནགརཀེཏི ནགརཔཏིརཱུཔཀེ སམྦཱདྷེ ཁུདྡཀནགརཀེ’’ཏི. དྷུཔརཝིསཱལསཎྛཱནཏཱཡ ཏཾ ‘‘ཨུཛྫངྒལནགརཀ’’ནྟི ཝུཏྟནྟི ཨཱཧ ‘‘ཝིསམནགརཀེ’’ཏི. ཨཉྙེསཾ མཧཱནགརཱནཾ ཨེཀདེསཔྤམཱཎཏཱཡ སཱཁཱསདིསེ. ཨེཏྠ ཙ ‘‘ཁུདྡཀནགརཀེ’’ཏི ཨིམིནཱ ཏསྶ ནགརསྶ ཨཔྤཀབྷཱཝོ ཝུཏྟོ, ‘‘ཨུཛྫངྒལནགརཀེ’’ཏི ཨིམིནཱ བྷཱུམིཝིཔཏྟིཡཱ ནིཧཱིནབྷཱཝོ, ‘‘སཱཁཱནགརཀེ’’ཏི ཨིམིནཱ ཨཔྤདྷཱནབྷཱཝོ. སཱརཔྤཏྟཱཏི ཝིབྷཝསཱརཱདིནཱ སཱརམཧཏྟཾ པཏྟཱ.

ཀཧཱཔཎསཀཊནྟི ཨེཏྠ ‘‘དྭིཀུམྦྷཾ སཀཊཾ. ཀུམྦྷོ པན དསམྦཎོ’’ཏི ཝདནྟི. དྭེ པཝིསནྟཱིཏི དྭེ ཀཧཱཔཎསཀཊཱནི དྭེ ཨཱཡཝསེན པཝིསནྟི.

སུབྷིཀྑཱཏི སུལབྷཱཧཱརཱ, སུནྡརཱཧཱརཱ ཙ. ཏེནཱཧ ‘‘ཁཛྫབྷོཛྫསམྤནྣཱ’’ཏི. སདྡཾ ཀརོནྟེཏི རཝསཱརིནཱ ཏུཊྛབྷཱཝེན ཀོཉྩནཱདཾ ཀརོནྟེ. ཨཝིཝིཏྟཱཏི ཨསུཉྙཱ, ཀདཱཙི རཐོ པཋམཾ གཙྪཏི, ཏཾ ཨཉྙོ ཨནུབནྡྷནྟོ གཙྪཏི, ཀདཱཙི དུཏིཡཾ ཝུཏྟརཐོ པཋམཾ གཙྪཏི, ཨིཏརོ ཏཾ ཨནུབནྡྷཏི ཨེཝཾ ཨཉྙམཉྙཾ ཨནུབནྡྷམཱནཱ. ཨེཏྠཱཏི ཀུསཱཝཏཱིནགརེ. ཏསྶ མཧནྟབྷཱཝཏོ ཙེཝ ཨིདྡྷཱདིབྷཱཝཏོ ཙ ནིཙྩཾ པཡོཛིཏཱནེཝ བྷེརིཨཱདཱིནི ཏཱུརིཡཱནི, སམྨ ¶ སམྨཱཏི ཝཱ ཨཉྙམཉྙཾ པིཡཱལཱཔསདྡོ སམྨ-སདྡོ. ཀཾསཏཱལཱ༹དིསབྦཏཱལཱ༹ཝཙརསདྡོ ཏཱལ༹-སདྡོ, ཀཱུཊབྷེརི-སདྡོ ཀུམྦྷཐཱུཎསདྡོ.

ཨེཝརཱུཔཱ ¶ སདྡཱ ཧོནྟི ཀཙཝརཱཀིཎྞཝཱིཐིཏཱཡ, ཨརཉྙེ ཀནྡམཱུལཔཎྞཱདིགྒཧཎཱཡ, ཏཏྠ དུཀྑཛཱིཝིཀཏཱཡ ཙཱཏི ཡཐཱཀྐམཾ ཡོཛེཏབྦཾ. ཨིདྷ ན ཨེཝཾ ཨཧོསི དེཝལོཀེ ཝིཡ སབྦསོ པརིཔུཎྞསམྤཏྟིཀཏཱཡ.

མཧནྟཾ ཀོལཱཧལནྟི སདྡྷཱསམྤནྣཱནཾ དེཝཏཱནཾ, ཨུཔཱསཀཱནཉྩ ཝསེན པུརཏོ པུརཏོ མཧཏཱི ཨུགྒྷོསནཱ ཧོཏི. ཏཏྠ བྷགཝནྟཾ ཨུདྡིསྶ ཀཏསྶ ཝིཧཱརསྶ ཨབྷཱཝཏོ, བྷིཀྑུསངྒྷསྶ ཙ མཧནྟབྷཱཝཏོ ཏེ ཨཱགནྟྭཱ…པེ… པེསེསི. པེསེནྟོ ཙ ‘‘ཀཐཉྷི ནཱམ བྷགཝཱ པཙྪིམེ ཀཱལེ ཨཏྟནོ པཝཏྟིཾ ཨམྷཱཀཾ ནཱརོཙེསི, ནེསཾ དོམནསྶཾ མཱ ཨཧོསཱི’’ཏི ‘‘ཨཛྫ ཁོ ཝཱསེཊྛཱ’’ཏིཨཱདིནཱ སཱསནཾ པེསེསི.

མལླཱནཾ ཝནྡནཱཝཎྞནཱ

༢༡༡. ཨགྷཾ ¶ དུཀྑཾ ཨཱཝེནྟི པཀཱསེནྟཱིཏི ཨགྷཱཝིནོ, པཱཀཊཱིབྷཱུཏདུཀྑཱཏི ཨཱཧ ‘‘ཨུཔྤནྣདུཀྑཱ’’ཏི. ཉཱཏིསཱལོཧིཏབྷཱཝེན ཀུལཾ པརིཝཏྟཏི ཨེཏྠཱཏི ཀུལཔརིཝཏྟཾ. ཏཾ ཏཾཀུལཱིནབྷཱགེན ཋིཏོ སཏྟནིཀཱཡོ ‘‘ཀུལཔརིཝཏྟསོ’’ཏི ཝུཏྟནྟི ཨཱཧ ‘‘ཀུལཔརིཝཏྟ’’ནྟི. ཏེ པན ཏཾཏཾཀུལཔརིཝཏྟཔརིཙྪིནྣཱ མལླརཱཛཱནོ ཏསྨིཾ ནགརེ ཝཱིཐིཨཱདིསབྷཱགེན ཝསནྟཱིཏི ཝུཏྟཾ ‘‘ཝཱིཐིསབྷཱགེན ཙེཝ རཙྪཱསབྷཱགེན ཙཱ’’ཏི.

སུབྷདྡཔརིབྦཱཛཀཝཏྠུཝཎྞནཱ

༢༡༢. ཀངྑཱ ཨེཝ ཀངྑཱདྷམྨོ. ཨེཀཏོ ཝཱཏི བྷཱུམིཾ ཨཝིབྷཛིཏྭཱ སཱདྷཱརཎཏོཝ. བཱིཛཏོ ཙ ཨགྒཾ གཧེཏྭཱ ཨཱཧཱརཾ སམྤཱདེཏྭཱ དཱནཾ བཱིཛགྒཾ. གབྦྷཀཱལེཏི གབྦྷདྷཱརཎཏོ པརཾ ཁཱིརགྒཧཎཀཱལེ. ཏེནཱཧ ‘‘གབྦྷཾ ཕཱལེཏྭཱ ཁཱིརཾ ནིཧརིཏྭཱ’’ཏིཨཱདི. པུཐུཀཀཱལེཏི སསྶཱནཾ ནཱཏིཔཀྐེ པུཐུཀཡོགྱཕལཀཱལེ. ལཱཡནགྒནྟི པཀྐསྶ སསྶསྶ ལཝནེ ལཝནཱརམྦྷེ དཱནཾ ཨདཱསི. ལུནསྶ ¶ སསྶསྶ ཝེཎིཝསེན བནྡྷིཏྭཱ ཋཔནཾ ཝེཎིཀརཎཾ. ཏསྶ ཨཱརམྦྷེ དཱནཾ ཝེཎགྒཾ. ཝེཎིཡོ པན ཨེཀཏོ ཀཏྭཱ རཱསིཀརཎཾ ཀལཱཔོ. ཏཏྠ ཨགྒདཱནཾ ཀལཱཔགྒཾ. ཀལཱཔཏོ ནཱིཧརིཏྭཱ མདྡནེ ཨགྒདཱནཾ ཁལགྒཾ. མདྡིཏཾ ཨོཕུཎིཏྭཱ དྷཉྙསྶ རཱསིཀརཎེ ཨགྒདཱནཾ ཁལབྷཎྜགྒཾ. དྷཉྙསྶ ཁལཏོ ཀོཊྛེ པཀྑིཔནེ ཨགྒདཱནཾ ཀོཊྛགྒཾ. ཨུདྡྷརིཏྭཱཏི ཀོཊྛཏོ ཨུདྡྷརིཏྭཱ.

‘‘ནཝ ¶ ཨགྒདཱནཱནི ཨདཱསཱི’’ཏི ཨིམིནཱ ‘‘ཀཐཾ ནུ ཁོ ཨཧཾ སཏྠུ སནྟིཀེ ཨགྒཏོཝ མུཙྩེཡྻ’’ནྟི ཨགྒགྒདཱནཝསེན ཝིཝཊྚཱུཔནིསྶཡསྶ ཀུསལསྶ ཀཏཱུཔཙིཏཏྟཱ, ཉཱཎསྶ ཙ ཏཐཱ པརིཔཱཀཾ གཏཏྟཱ ཨགྒདྷམྨདེསནཱཡ ཏསྶ བྷཱཛནབྷཱཝཾ དསྶེཏི. ཏེནཱཧ ‘‘ཨིམཾ ཨགྒདྷམྨཾ ཏསྶ དེསེསྶཱམཱི’’ཏིཨཱདི. ཨོཧཱིཡིཏྭཱ སངྐོཙཾ ཨཱཔཛྫིཏྭཱ.

༢༡༣. ཨཉྙཱཏུཀཱམོཝ ན སནྡིཊྛིཾ པརཱམཱསཱི. ཨབྦྷཉྙིཾསཱུཏི སནྡེཧཛཱཏསྶ པུཙྪཱཝཙནནྟི ཀཏྭཱ ཛཱནིཾསཱུཏི ཨཏྠམཱཧ. ཏེནཱཧ པཱལི༹ཡཾ ‘‘སབྦེཝ ན ཨབྦྷཉྙིཾསཱུ’’ཏི. ནེསནྟི པཱུརཎཱདཱིནཾ. སཱ པཊིཉྙཱཏི ‘‘ཀརོཏོ ཁོ མཧཱརཱཛ ཀཱརཡཏོ’’ཏིཨཱདིནཱ (དཱི. ནི. ༡.༡༦༦) པཊིཉྙཱཏཱ, སབྦཉྙུཔཊིཉྙཱ ¶ ཨེཝ ཝཱ. ནིཡྻཱནིཀཱཏི སཔྤཱཊིཧཱརིཡཱ, ཏེསཾ ཝཱ སིདྡྷནྟསངྑཱཏཱ པཊིཉྙཱ ཝཊྚཏོ ནིསྶརཎཊྛེན ནིཡྻཱནིཀཱཏི. སཱསནསྶ སམྤཏྟིཡཱ ཏེསཾ སབྦཉྙུཏཾ, ཏབྦིཔརིཡཱཡཏོ ཙ ཨསབྦཉྙུཏཾ གཙྪཏཱིཏི དཊྛབྦཾ. ཏེནཱཧ ‘‘ཏསྨཱ’’ཏིཨཱདི. ཨཏྠཱབྷཱཝཏོཏི སུབྷདྡསྶ སཱདྷེཏབྦཨཏྠཱབྷཱཝཏོ. ཨོཀཱསཱབྷཱཝཏོཏི ཏཐཱ ཝིཏྠཱརིཏཾ ཀཏྭཱ དྷམྨཾ དེསེཏུཾ ཨཝསརཱབྷཱཝཏོ. ཨིདཱནི ཏམེཝ ཨོཀཱསཱབྷཱཝཾ དསྶེཏུཾ ‘‘པཋམཡཱམསྨི’’ནྟིཨཱདི ཝུཏྟཾ.

༢༡༤. ཡེསཾ ¶ སམཎབྷཱཝཀརཱནཾ དྷམྨཱནཾ སམྤཱདནེན སམཎོ, ཏེ པན ཨུཀྐཊྛནིདྡེསེན ཨརིཡམགྒདྷམྨཱཏི ཙཏུམགྒསཾསིདྡྷིཡཱ པཱལི༹ཡཾ ཙཏྟཱརོ སམཎཱ ཝུཏྟཱཏི ཏེ བཱཧིརསམཡེ སབྦེན སབྦཾ ནཏྠཱིཏི དསྶེནྟོ ‘‘པཋམོ སོཏཱཔནྣསམཎོ’’ཏིཨཱདིམཱཧ. པུརིམདེསནཱཡཱཏི ‘‘ཡསྨིཉྩ ཁོ, སུབྷདྡ, དྷམྨཝིནཡེ’’ཏིཨཱདིནཱ ཝུཏྟཱཡ དེསནཱཡ. བྱཏིརེཀཏོ, ཨནྭཡཏོ ཙ ཨདྷིཔྤེཏོ ཨཏྠོ ཝིབྷཱཝཱིཡཏཱིཏི པཋམནཡོཔེཏྠ ‘‘པུརིམདེསནཱཡཱ’’ཏི པདེན སངྒཧིཏོ ཝཱཏི དཊྛབྦོ. ཨཏྟནོ སཱསནཾ ནིཡམེནྟོ ཨཱཧ ‘‘ཨིམསྨིཾ ཁོ’’ཏི ཡོཛནཱ. ཨཱརདྡྷཝིཔསྶཀེཧཱིཏི སམཱདྷིཀམྨིཀཝིཔསྶཀེཧི, སིཁཱཔྤཏྟཝིཔསྶཀེ སནྡྷཱཡ ཝུཏྟཾ, ན པཊྛཔིཏཝིཔསྶནེ. ཨཔརེ པན ‘‘བཱཧིརཀསམཡེ ཝིཔསྶནཱརམྦྷསྶ གནྠོཔི ནཏྠེཝཱཏི ཨཝིསེསཝཙནམེཏ’’ནྟི ཝདནྟི. ཨདྷིགཏཊྛཱནནྟི ཨདྷིགཏསྶ ཀཱརཎཾ, ཏདཏྠཾ པུབྦབྷཱགཔཊིཔདནྟི ཨཏྠོ, ཡེན སོཏཱཔཏྟིམགྒོ ཨདྷིགཏོ, ན ཨུཔརིམགྒོ, སོ སོཏཱཔཏྟིམགྒེ ཋིཏོ ཨཀུཔྤདྷམྨཏཱཡ ཏསྶ, ཏཏྠ ཝཱ སིདྡྷིཏོ ཋིཏཔུབྦོ བྷཱུཏཔུབྦགཏིཡཱཏི སོཏཱཔཏྟིམགྒཊྛོ སོཏཱཔནྣོ, ན སེསཨརིཡཱ བྷཱུམནྟརུཔྤཏྟིཏོ. སོཏཱཔནྣོ ཧི ཨཏྟནཱ ཨདྷིགཏཊྛཱནཾ སོཏཱཔཏྟིམགྒཾ ཨཉྙསྶ ཀཐེཏྭཱ སོཏཱཔཏྟིམགྒཊྛཾ ཀརེཡྻ, ན ཨཊྛམཀོ ཨསམྦྷཝཏོ. ཨེས ནཡོ སེསམགྒཊྛེསཱུཏི ཨེཏྠཱཔི ཨིམིནཱཝ ནཡེན ཨཏྠོ ཝེདིཏབྦོ. པགུཎཾ ཀམྨཊྛཱནནྟི ཨཏྟནོ པགུཎཾ ཝིཔསྶནཱཀམྨཊྛཱནཾ, ཨེཏེནེཝ ‘‘ཨཝིསེསཝཙན’’ནྟི ཝཱདོ པཊིཀྑིཏྟོཏི དཊྛབྦོ.

སབྦཉྙུཏཉྙཱཎཾ ¶ ཨདྷིཔྤེཏཾ. ཏཉྷི སབྦཉེཡྻདྷམྨཱཝབོདྷནེ ‘‘ཀུསལཾ ཚེཀཾ ནིཔུཎ’’ནྟི ཝུཙྩཏི ཏཏྠ ¶ ཨསངྒཨཔྤཊིཧཏཾ པཝཏྟཏཱིཏི ཀཏྭཱ. སམདྷིཀཱནི ¶ ཨེཀེན ཝསྶེན. ཉཱཡནྟི ཨེཏེན ཙཏུསཙྩདྷམྨཾ ཡཱཐཱཝཏོ པཊིཝིཛ྄ཛྷནྟཱིཏི ཉཱཡོ, ལོཀུཏྟརམགྒོཏི ཨཱཧ ‘‘ཨརིཡམགྒདྷམྨསྶཱ’’ཏི. པདིསྶཏི ཨེཏེན ཨརིཡམགྒོ པཙྩཀྑཏོ དིསྶཏཱིཏི པདེསོ, ཝིཔསྶནཱཏི ཝུཏྟཾ ‘‘པདེསེ ཝིཔསྶནཱམགྒེ’’ཏི. སམཎོཔཱིཏི ཨེཏྠ པི-སདྡོ ‘‘པདེསཝཏྟཱི’’ཏི ཨེཏྠཱཔི ཨཱནེཏྭཱ སམྦནྡྷིཏབྦོཏི ཨཱཧ ‘‘པདེསཝཏྟི…པེ… ནཏྠཱིཏི ཝུཏྟཾ ཧོཏཱི’’ཏི.

༢༡༥. སོཏི ཏཐཱཝུཏྟོ ཨནྟེཝཱསཱི. ཏེནཱཏི ཨཱཙརིཡེན. ཨཏྟནོ ཋཱནེ ཋཔིཏོ ཧོཏི པརཔབྦཱཛནཱདཱིསུ ནིཡུཏྟཏྟཱ.

སཀྑིསཱཝཀོཏི པཙྩཀྑསཱཝཀོ, སམྨུཁསཱཝཀོཏི ཨཏྠོ. བྷགཝཏི དྷརམཱནེཏི དྷརམཱནསྶ བྷགཝཏོ སནྟིཀེ. སེསདྭཡེཔི ཨེསེཝ ནཡོ. སབྦོཔི སོཏི སབྦོ སོ ཏིཝིདྷོཔི. ཨཡཾ པན ཨརཧཏྟཾ པཏྟོ, ཏསྨཱ པརིཔུཎྞགཏཱཡ མཏྠཀཔྤཏྟོ པཙྪིམོ སཀྑིསཱཝཀོཏི.

པཉྩམབྷཱཎཝཱརཝཎྞནཱ ནིཊྛིཏཱ.

ཏཐཱགཏཔཙྪིམཝཱཙཱཝཎྞནཱ

༢༡༦. ཏནྟི བྷིཀྑུསངྒྷསྶ ཨོཝཱདཀངྒཾ དསྶེཏུཾ…པེ… ཝུཏྟཾ དྷམྨསངྒཱཧཀེཧཱིཏི ཨདྷིཔྤཱཡོ. སུཏྟཱབྷིདྷམྨསངྒཧིཏསྶ དྷམྨསྶ ཨཏིསཛྫནཾ སམྦོདྷནཾ དེསནཱ, ཏསྶེཝ པཀཱརཏོ ཉཱཔནཾ ཝེནེཡྻསནྟཱནེ ཋཔནཾ པཉྙཱཔནནྟི ‘‘དྷམྨོཔི དེསིཏོ ཙེཝ ¶ པཉྙཏྟོ ཙཱ’’ཏི ཝུཏྟཾ. ཏཐཱ ཝིནཡཏནྟིསངྒཧིཏསྶ ཀཱཡཝཱཙཱནཾ ཝིནཡནཏོ ‘‘ཝིནཡོ’’ཏི ལདྡྷཱདྷིཝཙནསྶ ཨཏྠསྶ ཨཏིསཛྫནཾ སམྦོདྷནཾ དེསནཱ, ཏསྶེཝ པཀཱརཏོ ཉཱཔནཾ ཨསངྐརཏོ ཋཔནཾ པཉྙཱཔནནྟི ‘‘ཝིནཡོཔི དེསིཏོ ཙེཝ པཉྙཏྟོ ཙཱ’’ཏི ཝུཏྟཾ. ཨདྷིསཱིལསིཀྑཱནིདྡེསབྷཱཝེན སཱསནསྶ མཱུལབྷཱུཏཏྟཱ ཝིནཡོ པཋམཾ སིཀྑིཏབྦོཏི ཏཾ ཏཱཝ ཨཡམུདྡེསཾ སརཱུཔཏོ དསྶེནྟོ ‘‘མཡཱ ཧི ཝོ’’ཏིཨཱདིམཱཧ. ཏཏྠ སཏྟཱཔཏྟིཀྑནྡྷཝསེནཱཏི སཏྟནྣཾ ཨཱཔཏྟིཀྑནྡྷཱནཾ ཨཝཱིཏིཀྐམནཱིཡཏཱཝསེན ¶ . སཏྠུཀིཙྩཾ སཱདྷེསྶཏི ‘‘ཨིདཾ ཝོ ཀཏྟབྦཾ, ཨིདཾ ཝོ ན ཀཏྟབྦ’’ནྟི ཀཏྟབྦཱཀཏྟབྦསྶ ཝིབྷཱགེན ཨནུསཱསནཏོ.

ཏེན ¶ ཏེནཱཀཱརེནཱཏི ཏེན ཏེན ཝེནེཡྻཱནཾ ཨཛ྄ཛྷཱསཡཱནུརཱུཔེན པཀཱརེན. ཨིམེ དྷམྨེཏི ཨིམེ སཏྟཏིཾསབོདྷིཔཀྑིཡདྷམྨེ. ཏཔྤདྷཱནཏྟཱ སུཏྟནྟདེསནཱཡ ‘‘སུཏྟནྟཔིཊཀཾ དེསིཏ’’ནྟི ཝུཏྟཾ. སཏྠུཀིཙྩཾ སཱདྷེསྶཏི ཏཾཏཾཙརིཡཱནུརཱུཔཾ སམྨཱཔཊིཔཏྟིཡཱ ཨནུསཱསནཏོ. ཀུསལཱཀུསལཱབྱཱཀཏཝསེན ནཝ ཧེཏཱུ. ‘‘སཏྟ ཕསྶཱ’’ཏིཨཱདི སཏྟཝིཉྙཱཎདྷཱཏུསམྤཡོགཝསེན ཝུཏྟཾ. དྷམྨཱནུལོམེ ཏིཀཔཊྛཱནཱདཡོ ཚ, ཏཐཱ དྷམྨཔཙྩནཱིཡེ, དྷམྨཱནུལོམཔཙྩནཱིཡེ, དྷམྨཔཙྩནཱིཡཱནུལོམེཏི ཙཏུཝཱིསཏི སམནྟཔཊྛཱནཱནི ཨེཏསྶཱཏི ཙཏུཝཱིསཏིསམནྟཔཊྛཱནཾ, ཏཾ པན པཙྩཡཱནུལོམཱདིཝསེན ཝིབྷཛིཡམཱནཾ ཨཔརིམཱཎནཡཾ ཨེཝཱཏི ཨཱཧ ‘‘ཨནནྟནཡམཧཱཔཊྛཱནཔཊིམཎྜིཏ’’ནྟི. སཏྠུཀིཙྩཾ སཱདྷེསྶཏཱིཏི ཁནྡྷཱདིཝིབྷཱགེན ཉཱཡམཱནཾ ཙཏུསཙྩསམྦོདྷཱཝཧཏྟཱ སཏྠཱརཱ སམྨཱསམྦུདྡྷེན ཀཱཏབྦཀིཙྩཾ ནིཔྥཱདེསྶཏི.

ཨོཝདིསྶནྟི ཨནུསཱསིསྶནྟི ཨོཝཱདཱནུསཱསནཱིཀིཙྩནིཔྥཱདནཏོ.

ཙཱརིཏྟནྟི སམུདཱཙཱརཱ, ནཝེསུ པིཡཱལཱཔཾ ཝུཌྜྷེསུ ¶ གཱརཝཱལཱཔནྟི ཨཏྠོ. ཏེནཱཧ ‘‘བྷནྟེཏི ཝཱ ཨཱཡསྨཱཏི ཝཱ’’ཏི. གཱརཝཝཙནཾ ཧེཏཾ ཡདིདཾ བྷནྟེཏི ཝཱ ཨཱཡསྨཱཏི ཝཱ, ལོཀེ པན ‘‘ཏཏྲ བྷཝ’’ནྟི, ‘‘དེཝཱནཾ པིཡཱ’’ཏི ཙ གཱརཝཝཙནམེཝ.

‘‘ཨཱཀངྑམཱནོ སམཱུཧནཏཱུ’’ཏི ཝུཏྟེ ‘‘ན ཨཱཀངྑམཱནོ ན སམཱུཧནཏཱུ’’ཏིཔི ཝུཏྟམེཝ ཧོཏཱིཏི ཨཱཧ ‘‘ཝིཀཔྤཝཙནེནེཝ ཋཔེསཱི’’ཏི. བལནྟི ཉཱཎབལཾ. ཡདི ཨསམཱུཧནནཾ དིཊྛཾ, ཏདེཝ ཙ ཨིཙྪིཏཾ, ཨཐ ཀསྨཱ བྷགཝཱ ‘‘ཨཱཀངྑམཱནོ སམཱུཧནཏཱུ’’ཏི ཨཝོཙཱཏི? ཏཐཱརཱུཔཔུགྒལཛ྄ཛྷཱསཡཝསེན. སནྟི ཧི ཀེཙི ཁུདྡཱནུཁུདྡཀཱནི སིཀྑཱཔདཱནི སམཱདཱཡ སཾཝཏྟིཏུཾ ཨནིཙྪནྟཱ, ཏེསཾ ཏཐཱ ཨཝུཙྩམཱནེ བྷགཝཏི ཝིགྷཱཏོ ཨུཔྤཛྫེཡྻ, ཏཾ ཏེསཾ བྷཝིསྶཏི དཱིགྷརཏྟཾ ཨཧིཏཱཡ དུཀྑཱཡ, ཏཐཱ པན ཝུཏྟེ ཏེསཾ ཝིགྷཱཏོ ན ཨུཔྤཛྫེཡྻ ‘‘ཨམྷཱཀཾ ཨེཝཱཡཾ དོསོ, ཡཏོ ཨམྷེསུ ཨེཝ ཀེཙི སམཱུཧནནཾ ན ཨིཙྪནྟཱི’’ཏི. ཀེཙི ‘‘སཀལསྶ པན སཱསནསྶ སངྒྷཱཡཏྟབྷཱཝཀརཎཏྠཾ ཏཐཱ ཝུཏྟ’’ནྟི ཝདནྟི. ཡཉྩ ཀིཉྩི སཏྠཱརཱ སིཀྑཱཔདཾ པཉྙཏྟཾ, ཏཾ སམཎཱ སཀྱཔུཏྟིཡཱ སིརསཱ སམྤཊིཙྪིཏྭཱ ཛཱིཝིཏཾ ཝིཡ རཀྑནྟི. ཏཐཱ ཧི ཏེ ‘‘ཁུདྡཱནུཁུདྡཀཱནི སིཀྑཱཔདཱནི ཨཱཀངྑམཱནོ སངྒྷོ སམཱུཧནཏཱུ’’ཏི ¶ ཝུཏྟེཔི ན སམཱུཧནིཾསུ, ཨཉྙདཏྠུ ‘‘པུརཏོ ཝིཡ ཏསྶ ཨཙྩཡེཔི རཀྑིཾསུ ཨེཝཱ’’ཏི སཏྠུསཱསནསྶ ¶ , སངྒྷསྶ ཙ མཧནྟབྷཱཝདསྶནཏྠམྤི ཏཐཱ ཝུཏྟནྟི དཊྛབྦཾ. ཏཐཱ ཧི ཨཱཡསྨཱ ཨཱནནྡོ, ཨཉྙེཔི ཝཱ བྷིཀྑཱུ ‘‘ཀཏམཾ པན བྷནྟེ ཁུདྡཀཾ, ཀཏམཾ ཨནུཁུདྡཀ’’ནྟི ན པུཙྪིཾསུ སམཱུཧནཛ྄ཛྷཱསཡསྶེཝ ཨབྷཱཝཏོ.

ན ཏཾ ཨེཝཾ གཧེཏབྦནྟི ‘‘ནཱགསེནཏྠེརོ ཁུདྡཱནུཁུདྡཀཾ ཛཱནཱཏཱི’’ཏིཨཱདིནཱ ཝུཏྟཾ ཏཾ ནེསཾ ཝཙནཾ ཨིམིནཱ ཝུཏྟཱཀཱརེན ན གཧེཏབྦཾ ཨདྷིཔྤཱཡསྶ ཨཝིདིཏཏྟཱ. ཨིདཱནི ཏཾ ཨདྷིཔྤཱཡཾ ཝིབྷཱཝེཏུཾ ‘‘ནཱགསེནཏྠེརོ ¶ ཧཱི’’ཏིཨཱདི ཝུཏྟཾ. ཡསྨཱ ནཱགསེནཏྠེརོ (མིལིནྡཔཉྷེ ཨབྷེཛྫཝགྒེ ཝིཏྠཱརོ) པརེསཾ ཝཱདཔཐོཔཙྪེདནཏྠཾ སངྒཱིཏིཀཱལེ དྷམྨསངྒཱཧཀམཧཱཐེརེཧི གཧིཏཀོཊྛཱསེསུ ཙ ཨནྟིམཀོཊྛཱསམེཝ གཧེཏྭཱ མིལིནྡརཱཛཱནཾ པཉྙཱཔེསི. མཧཱཀསྶཔཏྠེརོ པན ཨེཀསིཀྑཱཔདམྤི ཨསམཱུཧནིཏུཀཱམཏཱཡ ཏཐཱ ཀམྨཝཱཙཾ སཱཝེཏི, ཏསྨཱ ཏཾ ཏེསཾ ཝཙནཾ ཏཐཱ ན གཧེཏབྦཾ.

༢༡༧. དྭེལ༹ྷཀནྟི དྭིདྷཱགཱཧོ, ཨནེཀཾསགྒཱཧོཏི ཨཏྠོ. ཝིམཏཱིཏི སཾསཡཱཔཏྟི. ཏེནཱཧ ‘‘ཝིནིཙྪིཏུཾ ཨསམཏྠཏཱ’’ཏི. ཏཾ ཝོ ཝདཱམཱིཏི ཏཾ སཾསཡཝནྟཾ བྷིཀྑུཾ སནྡྷཱཡ ཝོ ཏུམྷེ ཝདཱམི.

ནིཀྐངྑབྷཱཝཔཙྩཀྑཀརཎཉཱཎཾ ཡེཝཱཏི བུདྡྷཱདཱིསུ ཏེསཾ བྷིཀྑཱུནཾ ནིཀྐངྑབྷཱཝསྶ པཙྩཀྑཀཱརིཡཱབྷཱཝཏོ ཏམཏྠཾ པཊིཝིཛ྄ཛྷིཏྭཱ ཋིཏཾ སབྦཉྙུཏཉྙཱཎམེཝ. ཨེཏྠ ཨེཏསྨིཾ ཨཏྠེ.

༢༡༨. ཨཔྤམཛྫནཾ ཨཔྤམཱདོ, སོ པན ཨཏྠཏོ ཉཱཎཱུཔསཉྷིཏཱ སཏི. ཡསྨཱ ཏཏྠ སཏིཡཱ བྱཱཔཱརོ སཱཏིསཡོ, ཏསྨཱ ‘‘སཏིཨཝིཔྤཝཱསེནཱ’’ཏི ཝུཏྟཾ. ཨཔྤམཱདཔདེཡེཝ པཀྑིཔིཏྭཱ ཨདཱསི ཏཾ ཨཏྠཏོ, ཏསྶ སཀལསྶ བུདྡྷཝཙནསྶ སངྒཎྷནཏོ ཙ.

པརིནིབྦུཏཀཐཱཝཎྞནཱ

༢༡༩. ཛྷཱནཱདཱིསུ, ཙིཏྟེ ཙ པརམུཀྐཾསགཏཝསཱིབྷཱཝཏཱཡ ‘‘ཨེཏྟཀེ ཀཱལེ ཨེཏྟཀཱ སམཱཔཏྟིཡོ སམཱཔཛྫིཏྭཱ པརིནིབྦཱཡིསྶཱམཱི’’ཏི ཀཱལཔརིཙྪེདཾ ཀཏྭཱ སམཱཔཏྟི སམཱཔཛྫནཾ ‘‘པརིནིབྦཱནཔརིཀམྨ’’ནྟི ཨདྷིཔྤེཏཾ. ཐེརོཏི ཨནུརུདྡྷཏྠེརོ.

ཨཡམྤི ¶ ཙཱཏི ཡཐཱཝུཏྟཔཉྩསཊྛིཡཱ ཛྷཱནཱནཾ སམཱཔནྣབྷཱཝཀཐཱཔི སངྑེཔཀཐཱ ཨེཝ, ཀསྨཱ ¶ ? ཡསྨཱ བྷགཝཱ ཏདཱཔི དེཝསིཀཾ ཝལ༹ཉྫནསམཱཔཏྟིཡོ སབྦཱཔི ཨཔརིཧཱཔེཏྭཱ སམཱཔཛྫི ཨེཝཱཏི དསྶེནྟོ ‘‘ནིབྦཱནཔུརཾ པཝིསནྟོ’’ཏིཨཱདིམཱཧ.

ཨིམཱནི དྭེཔི སམནནྟརཱནེཝ པཙྩཝེཀྑཎཱཡཔི ཡེབྷུཡྻེནཱནནྟརིཡཀཏཱཡ ཛྷཱནཔཀྑིཀབྷཱཝཏོ, ཡསྨཱ ¶ བྷཝངྒཙིཏྟཾ སབྦཔཙྪིམཾ, ཏཏོ བྷཝཏོ ཙཝནཏོ ‘‘ཙུཏཱི’’ཏི ཝུཙྩཏི, ཏསྨཱ ན ཀེཝལཾ ཨཡམེཝ བྷགཝཱ, ཨཐ ཁོ སབྦེཔི སཏྟཱ བྷཝངྒཙིཏྟེནེཝ ཙཝནྟཱིཏི དསྶེཏུཾ ‘‘ཡེ ཧི ཀེཙཱི’’ཏིཨཱདི ཝུཏྟཾ.

༢༢༠. པཊིབྷཱགཔུགྒལཝིརཧིཏོཏི སཱིལཱདིགུཎེཧི ཨསདིསཏཱཡ སདིསཔུགྒལརཧིཏོ.

༢༢༡. སངྑཱརཱ ཝཱུཔསམནྟི ཨེཏྠཱཏི ཝཱུཔསམོཏི ཨེཝཾསངྑཱཏཾ ཉཱཏཾ ཀཐིཏཾ ནིབྦཱནཾ.

༢༢༢. ཡནྟི པཙྩཏྟེ ཨུཔཡོགཝཙནནྟི ཨཱཧ ‘‘ཡོ ཀཱལཾ ཨཀརཱི’’ཏི.

སུཝིཀསིཏེནེཝཱཏི པཱིཏིསོམནསྶཡོགཏོ སུཊྛུ ཝིཀསིཏེན མུདིཏེན. ཝེདནཾ ཨདྷིཝཱསེསི ཨབྷཱཝསམུདཡོ ཀཏོ སུཊྛུ པརིཉྙཱཏཏྟཱ. ཨནཱཝརཎཝིམོཀྑོ སབྦསོ ནིབྦུཏབྷཱཝཏོ.

༢༢༣. ཨཱཀརོནྟི ཨཏྟནོ ཕལཱནི སམཱནཱཀཱརེ ཀརོནྟཱིཏི ཨཱཀཱརཱ, ཀཱརཎཱནི. སབྦཱཀཱརཝརཱུཔེཏེཏི སབྦེཧི ཨཱཀཱརཝརེཧི ཨུཏྟམཀཱརཎེཧི སཱིལཱདིགུཎེཧི སམནྣཱགཏེཏི ཨཏྠོ.

༢༢༥. ཀཐཾབྷཱུཏཱཏི ཀཱིདིསཱབྷཱུཏཱ.

ཙུལླཀདྡྷཱནནྟི པརིཏྟཾ ཀཱལཾ དྭཏྟིནཱཌིཀཱམཏྟཾ ཝེལཾ.

བུདྡྷསརཱིརཔཱུཛཱཝཎྞནཱ

༢༢༧. ཀཾསཏཱལཱ༹དི ཏཱལ༹ཾ ཨཝཙརཏི ཨེཏྠཱཏི ‘‘ཏཱལཱ༹ཝཙར’’ནྟི ཝུཙྩཏི ཨཱཏཏཱདིཏཱུརིཡབྷཎྜཾ. ཏེནཱཧ ‘‘སབྦཾ ཏཱུརིཡབྷཎྜ’’ནྟི.

དཀྑིཎདིསཱབྷཱགེནེཝཱཏི ¶ ¶ ཨཉྙེན དིསཱབྷཱགེན ཨནཱཧརིཏྭཱ ཡམཀསཱལཱནཾ ཋཱནཏོ དཀྑིཎདིསཱབྷཱགེནེཝ, ཏཏོཔི དཀྑིཎདིསཱབྷཱགཾ ཧརིཏྭཱ ནེཏྭཱ.

ཛེཏཝནསདིསེཏི སཱཝཏྠིཡཱ ཛེཏཝནསདིསེ ཋཱནེ, ‘‘ཛེཏཝནསདིསེ ཋཱནེ’’ཏིཔི པཱཋོ.

༢༢༨. པསཱདྷནམངྒལསཱལཱཡཱཏི ¶ ཨབྷིསེཀཀཱལེ ཨལངྐརཎམངྒལསཱལཱཡ.

༢༢༩. དེཝདཱནིཡོཏི ཏསྶ ཙོརསྶ ནཱམཾ.

མཧཱཀསྶཔཏྠེརཝཏྠུཝཎྞནཱ

༢༣༡. པཱཝཱཡཱཏི པཱཝཱ ནགརཏོ. ཨཱཝཛྫནཔཊིབདྡྷཏྟཱ ཛཱནནསྶ ཨནཱཝཛྫིཏཏྟཱ སཏྠུ པརིནིབྦཱནཾ ཨཛཱནནྟོ ‘‘དསབལཾ པསྶིསྶཱམཱི’’ཏི ཐེརོ ཙིནྟེསི, སཏྠུ སརཱིརེ ཝཱ སཏྠུསཉྙཾ ཨུཔྤཱདེནྟོ ཏཐཱ ཙིནྟེསི. ཏེནེཝཱཧ ‘‘ཨཐ བྷགཝནྟཾ ཨུཀྑིཔིཏྭཱ’’ཏི. ‘‘དྷུཝཾ པརིནིབྦུཏོ བྷཝིསྶཏཱི’’ཏི ཙིནྟེསི པཱརིསེསཉཱཡེན. ཛཱནནྟོཔི ཐེརོ ཨཱཛཱིཝཀཾ པུཙྪིཡེཝ, པུཙྪནེ པན ཀཱརཎཾ སཡམེཝ པཀཱསེཏུཾ ‘‘ཀིཾ པནཱ’’ཏིཨཱདི ཨཱརདྡྷཾ.

ཨཛྫ སཏྟཱཧཔརིནིབྦུཏོཏི ཨཛྫ དིཝསཏོ པཊིལོམཏོ སཏྟམེ ཨཧནི པརིནིབྦུཏོ.

༢༣༢. ནཱལི༹ཡཱ ཝཱཔཀེནཱཏི ནཱལི༹ཡཱ ཙེཝ ཐཝིཀཱཡ ཙ.

མཉྫུཀེཏི མཉྫུབྷཱཎིནེ མདྷུརསྶརེ. པཊིབྷཱནེཡྻཀེཏི པཊིབྷཱནཝནྟེ. བྷུཉྫིཏྭཱ པཱཏབྦཡཱགཱུཏི པཋམཾ བྷུཉྫིཏྭཱ པིཝིཏབྦཡཱགུ.

ཏསྶཱཏི སུབྷདྡསྶ ཝུཌྜྷཔབྦཛིཏསྶ.

ཨཱརཱདྷིཏསཱསནེཏི སམཱཧིཏསཱསནེ. ཨལནྟི སམཏྠོ. པཱཔོཏི པཱཔཔུགྒལོ. ཨོསཀྐཱཔེཏུནྟི ཧཱཔེཏུཾ ཨནྟརདྷཱཔེཏུཾ.

པཉྷཝཱརཱཏི པཉྷཱ ཝིཡ ཝིསྶཛྫནཱནི ‘‘ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ¶ ཧོཏཱི’’ཏིཨཱདིནཱ, (དྷ. ས. ༡.༡) ‘‘ཡསྨིཾ སམཡེ རཱུཔཱུཔཔཏྟིཡཱ མགྒཾ བྷཱཝེཏཱི’’ཏིཨཱདིནཱ ¶ ¶ (དྷ. ས. ༡.༢༥༡) ཙ པཝཏྟཱནི ཨེཀཾ དྭེ བྷཱུམནྟརཱནི. མཱུལེ ནཊྛེ པིསཱཙསདིསཱ བྷཝིསྶཱམཱཏི ཡཐཱ རུཀྑེ ཨདྷིཝཏྠོ པིསཱཙོ ཏསྶ སཱཁཱཔརིཝཱརེ ནཊྛེ ཁནྡྷཾ ནིསྶཱཡ ཝསཏི, ཁནྡྷེ ནཊྛེ མཱུལཾ ནིསྶཱཡ ཝསཏི, མཱུལེ པན ནཊྛེ ཨནིསྶཡོཝ ཧོཏི, ཏཐཱ བྷཝིསྶཱམཱཏི ཨཏྠོ. ཨཐ ཝཱ མཱུལེ ནཊྛེཏི པིསཱཙེན ཀིར རུཀྑགཙྪཱདཱིནཾ ཀཉྩིདེཝ མཱུལཾ ཚིནྡིཏྭཱ ཨཏྟནོ པུཏྟསྶ དིནྣཾ, ཡཱཝ ཏཾ ཏསྶ ཧཏྠཏོ ན ཝིགཙྪཏི, ཏཱཝ སོ ཏཾ པདེསཾ ཨདིསྶམཱནརཱུཔོ ཝིཙརཏི. ཡདཱ པན ཏསྨིཾ ཀེནཙི ཨཙྪིནྣབྷཱཝེན ཝཱ སཏིཝིཔྤཝཱསཝསེན ཝཱ ནཊྛེ མནུསྶཱནམྤི དིསྶམཱནརཱུཔོ ཝིཙརཏི, ཏཾ སནྡྷཱཡཱཧ ‘‘མཱུལེ ནཊྛེ པིསཱཙསདིསཱ བྷཝིསྶཱམཱ’’ཏི.

མཾ ཀཱཡསཀྑིཾ ཀཏྭཱཏི ཏཾ པཊིཔདཾ ཀཱཡེན སཙྪིཀཏཝནྟཾ ཏསྨཱ ཏསྶཱ དེསནཱཡ སཀྑིབྷཱུཏཾ མཾ ཀཏྭཱ. པཊིཙྪཱཔེསི ཏཾ པཊིཙྪཱཔནཾ ཀསྶཔསུཏྟེན དཱིཔེཏབྦཾ.

༢༣༣. ཙནྡནགྷཊིཀཱབཱཧུལླཏོ ཙནྡནཙིཏཀཱ.

ཏཾ སུཏྭཱཏི ཏཾ ཨཱཡསྨཏཱ ཨནུརུདྡྷཏྠེརེན ཝུཏྟཾ དེཝཏཱནཾ ཨདྷིཔྤཱཡཾ སུཏྭཱ.

༢༣༤. དསིཀཏནྟཾ ཝཱཏི པལིཝེཋིཏཨཧཏཀཱསིཀཝཏྠཱནཾ དསཋཱནེན ཏནྟུམཏྟམྤི ཝཱ. དཱརུཀྑནྡྷཾ ཝཱཏི ཙནྡནཱདིཙིཏཀདཱརུཀྑནྡྷཾ ཝཱ.

༢༣༥. སམུདཱཡེསུ པཝཏྟཝོཧཱརཱནཾ ཨཝཡཝེསུ དིསྶནཏོ སརཱིརསྶ ཨཝཡཝབྷཱུཏཱནི ཨཊྛཱིནི ‘‘སརཱིརཱནཱི’’ཏི ཝུཏྟཱནི.

ན ཝིཔྤཀིརིཾསཱུཏི སརཱུཔེནེཝ ཋིཏཱཏི ཨཏྠོ. ‘‘སེསཱ ཝིཔྤཀིརིཾསཱུ’’ཏི ཝཏྭཱ ཡཐཱ པན ཏཱ ཝིཔྤཀིཎྞཱ ཨཧེསུཾ, ཏཾ དསྶེཏུཾ ‘‘ཏཏྠཱ’’ཏིཨཱདི ཝུཏྟཾ.

ཨུདཀདྷཱརཱ ནིཀྑམིཏྭཱ ནིབྦཱཔེསུནྟི དེཝཏཱནུབྷཱཝེན. ཨེཝཾ མཧཏིཡོ བཧཱུ ཨུདཀདྷཱརཱ ཀིམཏྠཱཡཱཏི ཨཱཧ ¶ ‘‘བྷགཝཏོ ཙིཏཀོ མཧནྟོ’’ཏི. མཧཱ ཧི སོ ཝཱིསརཏནསཏིཀོ. ཨཊྛདནྟཀེཧཱིཏི ནངྒལེཧི ཨཊྛེཝ ཧི ནེསཾ དནྟསདིསཱནི པོཏྠཱནི ཧོནྟི, ཏསྨཱ ‘‘ཨཊྛདནྟཀཱནཱི’’ཏི ཝུཙྩཏི.

དྷམྨཀཐཱཝ ¶ ¶ པམཱཎནྟི ཨཏིཝིཡ ཨཙྪརིཡབྦྷུཏབྷཱཝཏོ པསྶནྟཱནཾ, སུཎནྟཱནཉྩ སཱཏིསཡཾ པསཱདཱཝཧབྷཱཝཏོ, སཝིསེསཾ བུདྡྷཱནུབྷཱཝདཱིཔནཏོ. པརིནིབྦུཏསྶ ཧི བུདྡྷསྶ བྷགཝཏོ ཨེཝརཱུཔོ ཨཱནུབྷཱཝོཏི ཏཾ པཝཏྟིཾ ཀཐེནྟཱནཾ དྷམྨཀཐིཀཱནཾ ཨཏྟནོ ཉཱཎབལཱནུརཱུཔཾ པཝཏྟིཡམཱནཱ དྷམྨཀཐཱ ཨེཝེཏྠ པམཱཎཾ ཝཎྞེཏབྦསྶ ཨཏྠསྶ མཧཱཝིསཡཏྟཱ, ཏསྨཱ ཝཎྞནཱབྷཱུམི ནཱམེསཱཏི ཨདྷིཔྤཱཡོ. ཙཏུཛྫཱཏིཡགནྡྷཔརིབྷཎྜཾ ཀཱརེཏྭཱཏི ཏགརཀུངྐུམཡཝནཔུཔྥཏམཱལཔཏྟཱནི པིསིཏྭཱ ཀཏགནྡྷེན པརིབྷཎྜཾ ཀཱརེཏྭཱ. ཁཙིཏྭཱཏི ཏཏྠ ཏཏྠ ཨོལམྦནཝསེན རཙེཏྭཱ, གནྡྷཝཏྠཱུནི གཧེཏྭཱ གནྠིཏམཱལཱ གནྡྷདཱམཱནི རཏནཱཝལི༹ཡོ རཏནདཱམཱནི. བཧིཀིལཉྫཔརིཀྑེཔསྶ, ཨནྟོསཱཎིཔརིཀྑེཔསྶ ཀརཎེན སཱཎིཀིལཉྫཔརིཀྑེཔཾ ཀཱརེཏྭཱ. ཝཱཏགྒཱཧིནིཡོ པཊཱཀཱ ཝཱཏཔཊཱཀཱ. སརབྷརཱུཔཔཱདཀོ པལླངྐོ སརབྷམཡཔལླངྐོ, ཏསྨིཾ སརབྷམཡཔལླངྐེ.

སཏྟིཧཏྠཱ པུརིསཱ སཏྟིཡོ ཏཾསཧཙརཎཏོ ཡཐཱ ‘‘ཀུནྟཱ པཙརནྟཱི’’ཏི, ཏེཧི སམནྟཏོ རཀྑཱཔནཾ པཉྩཀརཎནྟི ཨཱཧ ‘‘སཏྟིཧཏྠེཧི པུརིསེཧི པརིཀྑིཔཱཔེཏྭཱ’’ཏི. དྷནཱུཧཱིཏི ཨེཏྠཱཔི ཨེསེཝ ནཡོ. སནྣཱཧགཝཙྪིཀཾ ཝིཡ ཀཏྭཱ ནིརནྟརཱཝཊྛིཏཨཱརཀྑསནྣཱཧེན གཝཙྪིཛཱལཾ ཝིཡ ཀཏྭཱ.

སཱདྷུཀཱིལི༹ཏནྟི ¶ སཔརཧིཏཾ སཱདྷནཊྛེན སཱདྷཱུ, ཏེསཾ ཀཱིལི༹ཏཾ ཨུལཱ༹རཔུཉྙཔསཝནཏོ, སམྤརཱཡིཀཏྠཱཝིརོདྷིཀཾ ཀཱིལཱ༹ཝིཧཱརནྟི ཨཏྠོ.

སརཱིརདྷཱཏུཝིབྷཛནཝཎྞནཱ

༢༣༦. ཨིམིནཱཝ ནིཡཱམེནཱཏི ཡེན ནཱིཧཱརེན མཧཱཏལེ ནིསིནྣོ ཀཉྩི པརིཧཱརཾ ཨཀཏྭཱ ཀེཝལཾ ཨིམིནཱ ནིཡཱམེནེཝ. སུཔིནཀོཏི དུསྶུཔིནཀོ. དུཀཱུལདུཔཊྚཾ ནིཝཱསེཏྭཱཏི དྭེ དུཀཱུལཝཏྠཱནི ཨེཀཛ྄ཛྷཾ ཀཏྭཱ ནིཝཱསེཏྭཱ. ཨེཝཉྷི ཏཱནི སོཀསམཔྤིཏསྶཱཔི ཨབྷསྶིཏྭཱ ཏིཊྛནྟི.

ཨབྷིསེཀསིཉྩཀོཏི རཛྫཱབྷིསེཀེ ཨབྷིསེཀམངྒལསིཉྩཀོ ཨུཏྟམམངྒལབྷཱཝཏོ. ཝིསཉྙཱི ཛཱཏོ ཡཐཱ ཏཾ བྷགཝཏོ གུཎཝིསེསཱམཏརསཉྙུཏཱཡ ཨཝཊྛིཏཔེམོ པོཐུཛྫནིཀསདྡྷཱཡ པཏིཊྛིཏཔསཱདོ ཀཏཱུཔཀཱརཏཱཡ སཉྫནིཏཙིཏྟམདྡཝོ.

སུཝཎྞབིམྦིསཀཝཎྞནྟི ¶ ¶ སུཝིརཙིཏ ཨཔསྶེནསདིསཾ.

ཀསྨཱ པནེཏྠ པཱཝེཡྻཀཱ པཱལི༹ཡཾ སབྦཔཙྪཏོ གཧིཏཱ, ཀིཾ ཏེ ཀུསིནཱརཱཡ ཨཱསནྣཏརཱཔི སབྦཔཙྪཏོ ཨུཊྛིཏཱ? ཨཱམ, སབྦཔཙྪཏོ ཨུཊྛིཏཱཏི དསྶེཏུཾ ‘‘ཏཏྠ པཱཝེཡྻཀཱ’’ཏིཨཱདི ཝུཏྟཾ.

དྷཱཏུཔཱསནཏྠནྟི སཏྠུ དྷཱཏཱུནཾ པཡིརུཔཱསནཱཡ. ནེསཾ པཀྑཱ ཨཧེསུཾ ‘‘ཉཱཡེན ཏེསཾ སནྟཀཱ དྷཱཏུཡོ’’ཏི.

༢༣༧. དོཎགཛྫིཏཾ ནཱམ ཨཝོཙ སཏྠུ ཨཝཏྠཏྟཡཱུཔསཾཧིཏཾ. ཨེཏདཏྠམེཝ ཧི བྷགཝཱ མགྒཾ གཙྪནྟོ ‘‘པཙྪཏོ ཨཱགཙྪནྟོ དོཎོ བྲཱཧྨཎོ ཡཱཝ མེ པདཝལ༹ཉྫཾ པསྶཏི, ཏཱཝ མཱ ཝིགཙྪཏཱུ’’ཏི ཨདྷིཊྛཱཡ ཨཉྙཏརསྨིཾ རུཀྑམཱུལེ ནིསཱིདི. དོཎོཔི ཁོ ¶ བྲཱཧྨཎོ ‘‘ཨིམཱནི སདེཝཀེ ལོཀེ ཨགྒཔུགྒལསྶ པདཱནཱི’’ཏི སལླཀྑེནྟོ པདཱནུསཱརེན སཏྠུ སནྟིཀཾ ཨུཔགཙྪི, སཏྠཱཔིསྶ དྷམྨཾ དེསེསི, ཏེནཔི སོ བྷགཝཏི ནིཝིཊྛསདྡྷོ ཨཧོསི. ཨེཏདཝོཙ, ཀིཾ ཨཝོཙཱཏི ཨཱཧ ‘‘སུཎནྟུ…པེ… ཨཝོཙཱ’’ཏི.

ཀཱཡེན ཨེཀསནྣིཔཱཏཱ ཝཱཙཱཡ ཨེཀཝཙནཱ ཨབྷིནྣཝཙནཱ ཨེཝཾ སམགྒཱ ཧོཐ. ཏསྶ པནིདཾ ཀཱརཎནྟི ཨཱཧ ‘‘སམྨོདམཱནཱ’’ཏི. ཏེནཱཧ ‘‘ཙིཏྟེནཱཔི ཨཉྙམཉྙཾ སམྨོདམཱནཱ ཧོཐཱ’’ཏི.

༢༣༨. ཏཏོ ཏཏོ སམཱགཏསངྒྷཱནནྟི ཏཏོ ཏཏོ ཨཏྟནོ ཝསནཊྛཱནཏོ སམཱགནྟྭཱ སནྣིཔཏིཏབྷཱཝེན སམཱགཏསངྒྷཱནཾ. ཏཐཱ སམཱཔཏིཏསམཱུཧབྷཱཝེན སམཱགཏགཎཱནཾ. ཝཙནསམྤཊིཙྪནེན པཊིསྶུཎིཏྭཱ.

དྷཱཏུཐཱུཔཔཱུཛཱཝཎྞནཱ

༢༣༩. ཡཀྑགྒཱཧོ དེཝཏཱཝེསོ. ཁིཔིཏཀཾ དྷཱཏུཀྑོབྷཾ ཨུཔྤཱདེཏྭཱ ཁིཔིཏཀརོགོ. ཨརོཙཀོ ཨཱཧཱརསྶ ཨརུཙྩནརོགོ.

སཏྟམདིཝསེཏི ¶ སཏྟཝསྶསཏྟམཱསཏོ པརཏོ སཏྟམེ དིཝསེ. བལཱནུརཱུཔེནཱཏི ཝིབྷཝབལཱནུརཱུཔེན.

པཙྪཱ སངྒཱིཏིཀཱརཀཱཏི དུཏིཡཾ ཏཏིཡཾ སངྒཱིཏིཀཱརཀཱ. དྷཱཏཱུནཾ ཨནྟརཱཡཾ དིསྭཱཏི ཏཏྠ ཏཏྠ ཙེཏིཡེ ཡཐཱཔཏིཊྛཱཔིཏབྷཱཝེནེཝ ཋིཏཱནཾ ¶ དྷཱཏཱུནཾ མིཙྪཱདིཊྛིཀཱནཾ ཝསེན ཨནྟརཱཡཾ དིསྭཱ, མཧཱདྷཱཏུནིདྷཱནེན སམྨདེཝ རཀྑིཏཱནཾ ཨནཱགཏེ ཨསོཀེན དྷམྨརཉྙཱ ཏཏོ ཨུདྡྷརིཏྭཱ ཝིཏྠཱརིཏབྷཱཝེ ཀཏེ སདེཝཀསྶ ལོཀསྶ ཧིཏསུཁཱཝཧབྷཱཝཉྩ དིསྭཱཏི ཨདྷིཔྤཱཡོ. པརིཙརཎམཏྟམེཝཱཏི གཧེཏྭཱ པརིཙརིཏབྦདྷཱཏུམཏྟམེཝ. རཱཛཱུནཾ ཧཏྠེ ཋཔེཏྭཱ, ན ཙེཏིཡེསུ. ཏཐཱ ཧི པཙྪཱ ཨསོཀམཧཱརཱཛཱ ཙེཏིཡེསུ དྷཱཏཱུནཾ ན ལབྷཏི.

པུརིམཾ ¶ པུརིམཾ ཀཏསྶ གཎྷནཡོགྱཾ པཙྪིམཾ པཙྪིམཾ ཀཱརེནྟོ ཨཊྛ ཨཊྛ ཧརིཙནྡནཱདིམཡེ ཀརཎྜེ ཙ ཐཱུཔེ ཙ ཀཱརེསི. ལོཧིཏཙནྡནམཡཱདཱིསུཔི ཨེསེཝ ནཡོ. མཎིཀརཎྜེསཱུཏི ལོཧིཏངྐམསཱརགལླཕལིཀམཡེ ཋཔེཏྭཱ ཨཝསེསམཎིཝིཙིཏྟཀེསུ ཀརཎྜེསུ.

ཐཱུཔཱརཱམཙེཏིཡཔྤམཱཎནྟི དེཝཱནཾཔིཡཏིསྶམཧཱརཱཛེན ཀཱརིཏཙེཏིཡཔྤམཱཎཾ.

མཱལཱ མཱ མིལཱཡནྟཱུཏི ‘‘ཡཱཝ ཨསོཀོ དྷམྨརཱཛཱ བཧི ཙེཏིཡཱནི ཀཱརེཏུཾ ཨིཏོ དྷཱཏུཡོ ཨུདྡྷརིསྶཏི, ཏཱཝ མཱལཱ མཱ མིལཱཡནྟཱུ’’ཏི ཨདྷིཊྛཧིཏྭཱ. ཨཱཝིཉྪནརཛྫུཡནྟི ཨགྒལཱ༹ཝིཉྪནརཛྫུཡཾ. ཀུཉྩིཀམུདྡིཀནྟི དྭཱརཝིཝརཎཏྠཾ ཀུཉྩིཀཉྩེཝ མུདྡིཀཉྩ.

ཝཱལ༹སངྒྷཱཏཡནྟནྟི ཀུཀྐུལཾ པཊིབྷཡདསྶནཾ ཨཉྙམཉྙཔཊིབདྡྷགམནཱདིཏཱཡ སངྒྷཱཊིཏརཱུཔཀཡནྟཾ ཡོཛེསི. ཏེནཱཧ ‘‘ཀཊྛརཱུཔཀཱནཱི’’ཏིཨཱདི. ཨཱཎིཡཱ བནྡྷིཏྭཱཏི ཨནེཀཀཊྛརཱུཔཝིཙིཏྟཡནྟཾ ཨཏྟནོ དེཝཱནུབྷཱཝེན ཨེཀཱཡ ཨེཝ ཨཱཎིཡཱ བནྡྷིཏྭཱ ཝིསྶཀམྨོ དེཝལོཀམེཝ གཏོ. ‘‘སམནྟཏོ’’ཏིཨཱདི པན ཏསྨིཾ དྷཱཏུནིདཱནེ ཨཛཱཏསཏྟུནོ ཀིཙྩཝིསེསཱནུཊྛཱནདསྶནཾ.

‘‘ཨསུཀཊྛཱནེ ནཱམ དྷཱཏུནིདྷཱན’’ནྟི རཉྙཱ པུཙྪིཏེ ‘‘ཏསྨིཾ སནྣིཔཱཏེ ཝིསེསལཱབྷིནོ ནཱཧེསུ’’ནྟི ཀེཙི. ‘‘ཨཏྟཱནཾ ནིགཱུཧིཏྭཱ ཏསྶ ཝུཌྜྷཏརསྶ ཝཙནཾ ནིསྶཱཡ ཝཱིམཾསནྟོ ཛཱནིསྶཏཱིཏི ན ཀཐེསུ’’ནྟི ཨཔརེ. ཡཀྑདཱསཀེཏི ཨུཔཧཱརཱདིཝིདྷིནཱ དེཝཏཱཝེསནཀེ བྷཱུཏཱཝིགྒཱཧཀེ.

ཨིམཾ ¶ ¶ པདནྟི ‘‘ཨེཝམེཏཾ བྷཱུཏཔུབྦ’’ནྟི དུཏིཡསངྒཱིཏིཀཱརེཧི ཋཔིཏཾ ཨིམཾ པདཾ. མཧཱདྷཱཏུནིདྷཱནམྤི ཏསྶ ཨཏྠཾ ཀཏྭཱ ཏཏིཡསངྒཱིཏིཀཱརཱཔི ཋཔཡིཾསུ.

མཧཱཔརིནིབྦཱནསུཏྟཝཎྞནཱཡ ལཱིནཏྠཔྤཀཱསནཱ.

༤. མཧཱསུདསྶནསུཏྟཝཎྞནཱ

ཀུསཱཝཏཱིརཱཛདྷཱནཱིཝཎྞནཱ

༢༤༢. སོཝཎྞམཡཱཏི ¶ ¶ ¶ སུཝཎྞམཡཱ. ཨཡཾ པཱཀཱརོཏི སབྦརཏནམཡོ པཱཀཱརོ. ཏཡོ ཏཡོཏི ཨནྟོ ཙ ཏཡོ, བཧི ཙ ཏཡོཏི ཏཡོ ཏཡོ.

ཨེསིཀཏྠམྦྷོ ཨིནྡཁཱིལོ ནགརསོབྷནོ ཨལངྐཱརཏྠམྦྷོ. ཨངྒཱིཡཏི ཉཱཡཏི པུཐུལབྷཱཝོ ཨེཏེནཱཏི ཨངྒཾ, པརིཀྑེཔོ. ཏིཔོརིསཾ ཨངྒཾ ཨེཏིསྶཱཏི ཏིཔོརིསངྒཱ. ཏེནཱཧ ‘‘ཏེནཱ’’ཏིཨཱདི. ཏེན པཉྩཧཏྠཔྤམཱཎེན ཏིཔོརིསེན. པཎྞཕལེསུཔཱིཏི སབྦརཏནམཡཱནཾ ཏཱལཱནཾ པཎྞཕལེསུཔི. ཨེསེཝ ནཡོཏི ‘‘པཎྞེསུ ཨེཀཾ པཏྟཀཾ སོཝཎྞམཡཾ, ཨེཀཾ རཱུཔིཡམཡཾ. ཕལེསུཔི ཨེཀོ ལེཁཱབྷཱཝོ སོཝཎྞམཡོ, ཨེཀོ རཱུཔིཡམཡོ’’ཏིཨཱདིཀོ ཨཡམཏྠོ ཨཏིདིཊྛོ. པཱཀཱརནྟརེཏི དྭིནྣཾ དྭིནྣཾ པཱཀཱརཱནཾ ཨནྟརེ. ཨེཀེཀཱ ཧུཏྭཱ ཋིཏཱ ཏཱལཔནྟི.

ཚེཀོཏི པཊུ སུཝིསདོ, སོ ཙསྶ པཊུབྷཱཝོ མནོསཱརོཏི ཨཱཧ ‘‘སུནྡརོ’’ཏི. རཉྫེཏུནྟི རཱགཾ ཨུཔྤཱདེཏུཾ. ཁམཏེཝཱཏི རོཙཏེཝ. ན བཱིབྷཙྪེཏཱིཏི ན ཏཛྫེཏི, སོཏསུཁབྷཱཝཏོ པིཡཱཡིཏབྦོ ཙ ཧོཏི. ཀུམྦྷཐུཎདདྡརིཀཱདི ཨེཀཏལཾ ཏཱུརིཡཾ. ཨུབྷཡཏལཾ པཱཀཊམེཝ. སབྦཏོ པརིཡོནདྡྷཾ ཙཏུརསྶཨམྦཎཀཾ, པཎཝཱདི ཙ. ཝཾསཱདཱིཏི ཨཱདི-སདྡེན སངྑཱདིཀཾ སངྒཎྷཱཏི. སུམུཙྪིཏསྶཱཏི སུཊྛུ པརིཡཏྟསྶ. པམཱཎེཏི ནཱཏིདལ༹ྷནཱཏིསིཐིལཏཱསངྑཱཏེ མཛ྄ཛྷིམེ མུཙྪནཔྤམཱཎེ ¶ . ཧཏྠཾ ཝཱ པཱདཾ ཝཱ ཙཱལེཏྭཱཏི ཧཏྠལཡཔཱདལཡེ སཛྫེཏྭཱ. ནཙྩནྟཱཏི སཱཁཱནཙྩཾ ནཙྩནྟཱ.

ཙཀྐརཏནཝཎྞནཱ

༢༤༣. ཨུཔོསཐཾ ¶ ཝུཙྩཏི ཨཊྛངྒསམནྣཱགཏཾ སབྦདིཝསེསུ གཧཊྛེཧི རཀྑིཏབྦསཱིལཾ, སམཱདཱནཝསེན ཏཾ ཏསྶ ཨཏྠཱིཏི ཨུཔོསཐིཀོ, ཏསྶ ཨུཔོསཐིཀསྶ. ཏེནཱཧ ‘‘སམཱདིནྣཨུཔོསཐངྒསྶཱ’’ཏི. ཏདཱཏི ཏསྨིཾ ¶ ཀཱལེ. ཀསྨིཾ པན ཀཱལེཏི? ཡསྨིཾ ཀཱལེ ཙཀྐཝཏྟིབྷཱཝསཾཝཏྟནིཡདཱནསཱིལཱདིཔུཉྙསམྦྷཱརསམུདཱགམསམྤནྣོ པཱུརིཏཙཀྐཝཏྟིཝཏྟོ ཀཱལདཱིཔདེསཝིསེསཔཙྩཱཛཱཏིཡཱ ཙེཝ ཀུལརཱུཔབྷོགཱདྷིཔཏེཡྻཱདིགུཎཝིསེསསམྤཏྟིཡཱ ཙ ཏདནུརཱུཔེ ཨཏྟབྷཱཝེ ཋིཏོ ཧོཏི, ཏསྨིཾ ཀཱལེ. ཏཱདིསེ ཧི ཀཱལེ ཙཀྐཝཏྟིབྷཱཝཱི པུརིསཝིསེསོ ཡཐཱཝུཏྟགུཎསམནྣཱགཏོ རཱཛཱ ཁཏྟིཡོ མུདྡྷཱཝསིཏྟོ ཝིསུདྡྷསཱིལོ ཨནུཔོསཐཾ སཏསཧསྶཝིསྶཛྫནཱདིནཱ སམྨཱཔཊིཔཏྟིཾ པཊིཔཛྫཏི, ན ཡདཱ ཙཀྐརཏནཾ ཨུཔྤཛྫཏི, ཏདཱ ཨེཝ. ཨིམེ ཙ ཝིསེསཱ སབྦཙཀྐཝཏྟཱིནཾ སཱདྷཱརཎཝསེན ཝུཏྟཱ. ཏེནཱཧ ‘‘པཱཏོཝ…པེ… དྷམྨཏཱ’’ཏི. བོདྷིསཏྟཱནཾ པན ཙཀྐཝཏྟིབྷཱཝཱཝཧགུཎཱཔི ཙཀྐཝཏྟིགུཎཱཔི སཱཏིསཡཱཝ ཧོནྟི.

ཝུཏྟཔྤཀཱརཔུཉྙཀམྨཔཙྩཡནྟི ཙཀྐཝཏྟིབྷཱཝཱཝཧདཱནདམསཾཡམཱདིཔུཉྙཀམྨཧེཏུཀཾ. ནཱིལམཎིསངྒྷཱཏསདིསནྟི ཨིནྡནཱིལམཎིསཉྩཡསམཱནཾ. དིབྦཱནུབྷཱཝཡུཏྟཏྟཱཏི དསྶནེཡྻཏཱ, མནུཉྙགྷོསཏཱ, ཨཱཀཱསགཱམིཏཱ, ཨོབྷཱསཝིསྶཛྫནཱ, ཨཔྤཊིགྷཱཏཏཱ, རཉྙོ ཨིཙྪིཏཏྠནིཔྥཏྟིཀཱརཎཏཱཏི ཨེཝམཱདཱིཧི དིབྦསདིསེཧི ཨཱནུབྷཱཝེཧི སམནྣཱགཏཏྟཱ, ཨེཏེན དིབྦཾ ཝིཡཱཏི དིབྦནྟི དསྶེཏི. ན ཧི ཏཾ དེཝལོཀཔརིཡཱཔནྣཾ. སཧསྶཾ ཨརཱ ཨེཏསྶཱཏི ཝཱ སཧསྶཱརཾ. སབྦེཧི ཨཱཀཱརེཧཱིཏི སབྦེཧི སུནྡརེཧི པརིཔུཎྞཱཝཡཝེ ལཀྑཎསམྤནྣེ ཙཀྐེ ཨིཙྪིཏབྦེཧི ཨཱཀཱརེཧི. པརིཔཱུརནྟི པརིཔུཎྞཾ, སཱ ཙསྶཱ པཱརིཔཱུརིཾ ཨིདཱནེཝ ཝིཏྠཱརེསྶཏི.

པནཱལཱི༹ཏི ཚིདྡཾ. སུདྡྷསིནིདྡྷདནྟཔནྟིཡཱ ནིབྦིཝརཱཡཱཏི ¶ ཨདྷིཔྤཱཡོ. ཏསྶཱ པན པནཱལི༹ཡཱ སམནྟཏོ པསྶསྶ རཛཏམཡཏྟཱ སཱརརཛཏམཡཱ ཝུཏྟཱ. ཡསྨཱ ཙསྶ ཙཀྐསྶ རཐཙཀྐསྶ ཝིཡ ཨནྟོབྷཱཝོ ནཱམ ནཏྠི, ཏསྨཱ ཝུཏྟཾ ‘‘ཨུབྷོསུཔི བཱཧིརནྟེསཱུ’’ཏི. ཀཏཔརིཀྑེཔཱ ཧོཏི པནཱལཱི༹ཏི ཡོཛནཱ. ནཱབྷིཔནཱལི༹པརིཀྑེཔཔཊྚེསཱུཏི ནཱབྷིཔརིཀྑེཔཔཊྚེ ཙེཝ ནཱབྷིཡཱ པནཱལི༹པརིཀྑེཔཔཊྚེ ཙ.

ཏེསནྟི ཨརཱནཾ. གྷཊཀཱ ནཱམ ཨལངྐཱརབྷཱུཏཱ ཁུདྡཀཔུཎྞགྷཊཱ. ཏཐཱ མཎིཀཱ ནཱམ མུཏྟཱཝལི༹ཀཱ. པརིཙྪེདལེཁཱ ཏསྶ ཏསྶ པརིཙྪེདདསྶནཝསེན ཋིཏཱ པརིཙྪིནྣལེཁཱ. ཨཱདི-སདྡེན ¶ མཱལཱཀམྨཱདིཾ སངྒཎྷཱཏི. སུཝིབྷཏྟཱནེཝཱཏི ཨཉྙམཉྙཾ ཨསཾཀིཎྞཏྟཱ སུཊྛུ ཝིབྷཏྟཱནི.

‘‘སུརཏྟཱ’’ཏིཨཱདཱིསུ ¶ སུརཏྟགྒཧཎེན མཧཱནཱམཝཎྞཏཾ པཊིཀྑིཔཏི, སུདྡྷགྒཧཎེན སཾངྐིལིཊྛཏཾ, སིནིདྡྷགྒཧཎེན ལཱུཁཏཾ. ཀཱམཾ ཏསྶ ཙཀྐརཏནསྶ ནེམིམཎྜལཾ ཨསནྡྷིཀམེཝ ནིབྦཏྟཾ, སབྦཏྠཀམེཝ པན ཀེཝལཾ པཝཱལ༹ཝཎྞེན ཙ སོབྷཏཱིཏི པཀཏིཙཀྐསྶ སནྡྷིཡུཏྟཊྛཱནེ སུརཏྟསུཝཎྞཔཊྚཱདིམཡཱཧི ཝཊྚཔརིཙྪེདལེཁཱཧི པཉྙཱཡམཱནཱཧི སསནྡྷིཀཱ ཝིཡ དིསྶནྟཱིཏི ཨཱཧ ‘‘སནྡྷཱིསུ པནསྶཱ’’ཏིཨཱདི.

ནེམིམཎྜལཔིཊྛིཡནྟི ནེམིམཎྜལསྶ པིཊྛིཔདེསེ. ཨཱཀཱསཙཱརིབྷཱཝཏོ ཧིསྶ ཏཏྠ ཝཱཏགྒཱཧཱི པཝཱལ༹དཎྜོ ཧོཏི. དསནྣཾ དསནྣཾ ཨརཱནཾ ཨནྟརེཏི དསནྣཾ དསནྣཾ ཨརཱནཾ ཨནྟརེ སམཱིཔེ པདེསེ. ཚིདྡམཎྜལཁཙིཏོཏི མཎྜལསཎྛཱནཚིདྡཝིཙིཏྟོ. སུཀུསལསམནྣཱཧཏསྶཱཏི སུཊྛུ ཀུསལེན སིཔྤིནཱ པཧཏསྶ, ཝཱདིཏསྶཱཏི ཨཏྠོ. ཝགྒཱུཏི མནོརམོ. རཛནཱིཡོཏི སུཎནྟཱནཾ རཱགུཔྤཱདཀོ. ཀམནཱིཡོཏི ཀནྟོ. སམོསརིཏཀུསུམདཱམཱཏི ཨོལམྦིཏསུགནྡྷཀུསུམདཱམཱ. ནེམིཔརིཀྑེཔསྶཱཏི ¶ ནེམིཔརིཡནྟཔརིཀྑེཔསྶ. ནཱབྷིཔནཱལི༹ཡཱ དྭིནྣཾ པསྶཱནཾ ཝསེན ‘‘དྭིནྣམྤི ནཱབྷིཔནཱལཱི༹ན’’ནྟི ཝུཏྟཾ. ཨེཀཱ ཨེཝ ཧི སཱ པནཱལི༹. ཡེཧཱིཏི ཡེཧི དྭཱིཧི མུཁེཧི. པུན ཡེཧཱིཏི ཡེཧི མུཏྟཀལཱཔེཧི.

ཨོདྷཱཔཡམཱནནྟི སོཏུཾ ཨཝཧིཏཱནི ཀུརུམཱནཾ.

ཙནྡོ པུརཏོ ཙཀྐརཏནཾ པཙྪཱཏི ཨེཝཾ པུབྦཱཔརིཡེན པུབྦཱཔརབྷཱཝེན.

ཨནྟེཔུརསྶཱཏི ཨནུརཱདྷཔུརེ རཉྙོ ཨནྟེཔུརསྶ. ཨུཏྟརསཱིཧཔཉྫརསདིསེཏི ཏདཱ རཉྙོ པཱསཱདེ ཏཱདིསསྶ ཨུཏྟརདིསཱཡ སཱིཧཔཉྫརསྶ ལབྦྷམཱནཏྟཱ ཝུཏྟཾ. སུཁེན སཀྐཱཏི ཀིཉྩི ཨནཱརུཧིཏྭཱ, སརཱིརཉྩ ཨནུལླངྒྷིཏྭཱ ཡཐཱཋིཏེནེཝ ཧཏྠེན པུཔྥམུཊྛིཡོ ཁིཔིཏྭཱ སུཁེན སཀྐཱ ཧོཏི པཱུཛེཏུཾ.

ནཱནཱཝིརཱགརཏནཔྤབྷཱསམུཛྫལནྟི ནཱནཱཝིདྷཝིཙིཏྟཝཎྞརཏནོབྷཱསཔབྷསྶརཾ. ཨཱཀཱསཾ ཨབྦྷུགྒནྟྭཱ པཝཏྟེཏི ཨཱགནྟྭཱ ཋིཏཊྛཱནཏོ ཨུཔརི ཨཱཀཱསཾ ཨབྦྷུགྒནྟྭཱ པཝཏྟེ.

༢༤༤. རཱཛཱཡུཏྟཱཏི ¶ རཉྙོ ཀིཙྩེ ཨཱཡུཏྟཀཔུརིསཱ.

སིནེརུཾ ¶ ཝཱམཔསྶེན ཀཏྭཱ ཏསྶ དྷུརཏརཾ གཙྪནྟོ ‘‘ཝཱམཔསྶེན སིནེརུཾ པཧཱཡཱ’’ཏི ཝུཏྟཾ.

ཝིནིབྦེདྷེནཱཏི ཏིརིཡཾ ཝིནིཝིཛ྄ཛྷནཝསེན. སནྣིཝེསཀྑམོཏི ཁནྡྷཱཝཱརསནྣིཝེསཡོགྱོ. སུལབྷཱཧཱརུཔཀརཎོཏི སུཁེནེཝ ལདྡྷབྦདྷཉྙགོརསདཱརུཏིཎཱདིབྷོཛནསཱདྷནོ.

པརཙཀྐནྟི པརསྶ རཉྙོ སེནཱ, ཨཱཎཱ ཝཱ.

ཨཱགམནནནྡནོཏི ཨཱགམནེན ནནྡིཛནནོ. གམནེན སོཙེཏཱིཏི གམནསོཙནོ. ཨུཔཀཔྤེཐཱཏི ཨུཔརཱུཔརི ཀཔྤེཐ, སཾཝིདཧཐ ཨུཔནེཐཱཏི ཨཏྠོ. ཨུཔཔརིཀྑིཏྭཱཏི ཧེཏུཏོཔི སབྷཱཝཏོཔི ཕལཏོཔི དིཊྛདྷམྨིཀསམྤརཱཡིཀཱདིཨཱདཱིནཝཏོཔི ¶ ཝཱིམཾསིཏྭཱ. ཝིབྷཱཝེནྟི པཉྙཱཡ ཨཏྠཾ ཝིབྷཱུཏཾ ཀརོནྟཱིཏི ཝིབྷཱཝིནོ, པཉྙཝནྟོ. ཨནུཡནྟཱཏི ཨནུཝཏྟཀཱ, ཨནུཝཏྟཀབྷཱཝེནེཝ, པན རཉྙོ ཙ མཧཱནུབྷཱཝེན ཏེ ཛིགུཙྪནཝསེན པཱཔཏོ ཨནོརམནྟཱཔི ཨེཀཙྩེ ཨོཏྟཔྤཝསེན ཨོརམནྟཱིཏི ཝེདིཏབྦཾ.

ཨོགཙྪམཱནནྟི ཨོསཱིདནྟཾ. ཡོཛནམཏྟནྟི ཝིཏྠཱརཏོ ཡོཛནམཏྟཾ པདེསཾ. གམྦྷཱིརབྷཱཝེན པན ཡཐཱ བྷཱུམི དིསྶཏི, ཨེཝཾ ཨོགཙྪཏི. ཏེནཱཧ ‘‘མཧཱསམུདྡཏལ’’ནྟིཨཱདི. ཨནྟེ ཙཀྐརཏནཾ ཨུདཀེན སེནཱཡ ཨནཛ྄ཛྷོཏྠརཎཏྠཾ. པུརཏྠིམོ མཧཱསམུདྡོ པརིཡནྟོ ཨེཏསྶཱཏི པུརཏྠིམམཧཱསམུདྡཔརིཡནྟོ, ཏཾ པུརཏྠིམམཧཱསམུདྡཔརིཡནྟཾ, པུརཏྠིམམཧཱསམུདྡཾ པརིཡནྟཾ ཀཏྭཱཏི ཨཏྠོ.

ཙཱཏུརནྟཱཡཱཏི ཙཏུསམུདྡནྟཱཡ, པུརཏྠིམདིསཱདིཙཏུཀོཊྛཱསནྟཱཡ ཝཱ. སོབྷཡམཱནཾ ཝིཡཱཏི ཝིཡ-སདྡོ ནིཔཱཏམཏྟཾ. ཨཏྟནོ ཨཙྪརིཡགུཎེཧི སོབྷནྟམེཝ ཧི ཏཾ ཏིཊྛཏི. པཱལི༹ཡམྤི ཧི ‘‘ཨུཔསོབྷཡམཱནཾ’’ ཏྭེཝ ཝུཏྟཾ.

ཧཏྠིརཏནཝཎྞནཱ

༢༤༦. ཧརིཙནྡནཱདཱིཧཱིཏི ཨཱདི-སདྡེན ཙཏུཛྫཱཏིཡགནྡྷཱདིཾ སངྒཎྷཱཏི. ཨཱགམནཾ ཙིནྟེཐཱཏི ¶ ཝདནྟི ཙཀྐཝཏྟིཝཏྟསྶ པཱུརིཏཏཱཡ པརིཙིཏཏྟཱ. ཀཱལ༹ཏིལཀཱདཱིནཾ ཨབྷཱཝེན ཝིསུདྡྷསེཏསརཱིརོ. སཏྟཔཏིཊྛོཏི བྷཱུམིཕུསནཀེཧི ཝཱལདྷི, ཝརངྒཾ, ཧཏྠོཏི ཨིམེཧི ཙ ཏཱིཧི, ཙཏཱུཧི པཱདེཧི ཙཱཏི ¶ སཏྟཧི ཨཝཡཝེཧི པཏིཊྛིཏཏྟཱ སཏྟཔཏིཊྛོ. སབྦཀནིཊྛོཏི སབྦེཧི ཚདྡནྟཀུལཧཏྠཱིཧི ཧཱིནོ. ཨུཔོསཐཀུལཱ སབྦཛེཊྛོཏི ཨུཔོསཐཀུལཏོ ཨཱགཙྪནྟོ ཏཏྠ སབྦཔྤདྷཱནོ ཨཱགཙྪཏཱིཏི ཡོཛནཱ. ཝུཏྟནཡེནཱཏི ‘‘མཧཱདཱནཾ དཏྭཱ’’ཏིཨཱདིནཱ ཝུཏྟེན ནཡེན. ཙཀྐཝཏྟཱིནཾ, ཙཀྐཝཏྟིཔུཏྟཱནཉྩ ཙཀྐཝཏྟིཾ ཨུདྡིསྶ ཙིནྟཡནྟཱནཾ ཨཱགཙྪཏི. ཨཔནེཏྭཱཏི ཨཏྟནོ ཨཱནུབྷཱཝེན ཨཔནེཏྭཱ. གནྡྷམེཝ ཧི ཏསྶ ཨིཏརེ ཧཏྠཱི ན སཧནྟི.

གྷརདྷེནུཝཙྪཀོ ཝིཡཱཏི གྷརེ པརིཙིཏདྷེནུཡཱ ཏཏྠེཝ ¶ ཛཱཏསཾཝདྡྷཝཙྪཀོ ཝིཡ. སཀལཔཐཝིནྟི སཀལཾ ཛམྦུདཱིཔསཉྙིཏཾ པཐཝིཾ.

ཨསྶརཏནཝཎྞནཱ

༢༤༧. སིནྡྷཝཀུལཏོཏི སིནྡྷཝསྶཱཛཱནཱིཡཀུལཏོ.

མཎིརཏནཝཎྞནཱ

༢༤༨. སཀཊནཱབྷིསམཔརིཎཱཧནྟི པརིཎཱཧཏོ མཧཱསཀཊསྶ ནཱབྷིཡཱ སམཔྤམཱཎཾ. ཨུབྷོསུ ཨནྟེསཱུཏི ཧེཊྛཱ, ཨུཔརི ཙཱཏི དྭཱིསུ ཨནྟེསུ. ཀཎྞིཀཔརིཡནྟཏོཏི དྭིནྣཾ ཀཉྩནཔདུམཱནཾ ཀཎྞིཀཱཡ པརིཡནྟཏོ. མུཏྟཱཛཱལཀེ ཋཔེཏྭཱཏི སུཝིསུདྡྷེ མུཏྟམཡེ ཛཱལཀེ པཏིཊྛཱཔེཏྭཱ. ཨརུཎུགྒམནཝེལཱ ཝིཡཱཏི ཨརུཎུགྒམནསཱིསེན སཱུརིཡཨུདཡཀྑཎཾ ཨུཔལཀྑེཏི.

ཨིཏྠིརཏནཝཎྞནཱ

༢༤༩. ‘‘ཨིཏྠིརཏནཾ པཱཏུབྷཝཏཱི’’ཏི ཝཏྭཱ ཀུཏསྶཱ པཱཏུབྷཱཝོཏི དསྶེཏུཾ ‘‘མདྡརཱཛཀུལཏོ’’ཏིཨཱདི ཝུཏྟཾ. མདྡརཊྛཾ ཀིར ཛམྦུདཱིཔེ ཨབྷིརཱུཔཱནཾ ཨིཏྠཱིནཾ ཨུཔྤཏྟིཊྛཱནཾ. ཏཐཱ ཧི ‘‘སིཉྩཡམཧཱརཱཛསྶ དེཝཱི, ཝེསྶནྟརམཧཱརཱཛསྶ དེཝཱི, བྷདྡཀཱཔིལཱནཱི’’ཏི ཨེཝམཱདི ཨིཏྠིརཏནཾ མདྡརཊྛེ ཨེཝ ཨུཔྤནྣཾ. པུཉྙཱནུབྷཱཝེནཱཏི ཙཀྐཝཏྟིརཉྙོ པུཉྙཏེཛེན.

སཎྛཱནཔཱརིཔཱུརིཡཱཏི ཧཏྠཔཱདཱདིསརཱིརཱཝཡཝཱནཾ སུསཎྛིཏཱཡ. ཨཝཡཝཔཱརིཔཱུརིཡཱ ཧི སམུདཱཡཔཱརིཔཱུརིསིདྡྷི ¶ . རཱུཔནྟི སརཱིརཾ ‘‘རཱུཔཾ ཏྭེཝ སངྑཾ གཙྪཏཱི’’ཏིཨཱདཱིསུ (མ. ནི. ༡.༣༠༦) ཝིཡ. དསྶནཱིཡཱཏི སུརཱུཔབྷཱཝེན པསྶིཏབྦཡུཏྟཱ. ཏེནཱཧ ¶ ‘‘དིསྶམཱནཱཝཱ’’ཏིཨཱདི. སོམནསྶཝསེན ཙིཏྟཾ པསཱདེཏི ཡོནིསོ ཙིནྟེནྟཱནཾ ཀམྨཕལསདྡྷཱཡ ཝསེན. པསཱདཱཝཧཏྟཱཏི ཀཱརཎཝཙནེན ཡཐཱ པཱསཱདིཀཏཱཡ ཝཎྞཔོཀྑརཏཱསིདྡྷི ཝུཏྟཱ, ཨེཝཾ དསྶནཱིཡཏཱཡ པཱསཱདིཀཏཱསིདྡྷི, ཨབྷིརཱུཔཏཱཡ ཙ དསྶནཱིཡཏཱསིདྡྷི ཝཏྟབྦཱཏི ནཡཾ དསྶེཏི. པཊིལོམཏོ ཝཱ ཝཎྞཔོཀྑརཏཱཡ ¶ པཱསཱདིཀཏཱསིདྡྷི, པཱསཱདིཀཏཱཡ དསྶནཱིཡཏཱསིདྡྷི, དསྶནཱིཡཏཱཡ ཨབྷིརཱུཔཏཱསིདྡྷི ཡོཛེཏབྦཱ. ཨེཝཾ སརཱིརསམྤཏྟིཝསེན ཨབྷིརཱུཔཏཱདིཀེ དསྶེཏྭཱ ཨིདཱནི སརཱིརེ དོསཱབྷཱཝཝསེནཔི ཏེ དསྶེཏུཾ ‘‘ཨབྷིརཱུཔཱ ཝཱ’’ཏིཨཱདི ཝུཏྟཾ. ཏཏྠ ཡཐཱ པམཱཎཡུཏྟཱ, ཨེཝཾ ཨཱརོཧཔརིཎཱཧཡོགཏོ ཙ པཱསཱདིཀཱ ནཱཏིདཱིགྷཏཱདཡོ, ཨེཝཾ མནུསྶཱནཾ དིབྦརཱུཔཏཱསམྤཏྟིཔཱིཏི ‘‘ཨཔྤཏྟཱ དིབྦཝཎྞ’’ནྟི ཝུཏྟཾ.

ཨཱརོཧསམྤཏྟི ཝུཏྟཱ ཨུབྦེདྷེན པཱསཱདིཀབྷཱཝཏོ. པརིཎཱཧསམྤཏྟི ཝུཏྟཱ ཀིསཐཱུལདོསཱབྷཱཝཏོ. ཝཎྞསམྤཏྟི ཝུཏྟཱ ཝིཝཎྞཏཱབྷཱཝཏོ. ཀཱཡཝིཔཏྟིཡཱཏི སརཱིརདོསསྶ. སཏཝཱརཝིཧཏསྶཱཏི སཏྟཀྑཏྟུཾ ཝིཧཏསྶ, ‘‘སཏཝཱརཝིཧཏསྶཱ’’ཏི ཙ ཨིདཾ ཀཔྤཱསཔིཙུཝསེན ཝུཏྟཾ, ཏཱུལཔིཙུནོ པན ཝིཧནནམེཝ ནཏྠི. ཀུངྐུམཏགརཏུརུཀྑཡཝནཔུཔྥཱནི ཙཏུཛྫཱཏི. ‘‘ཏམཱལཏགརཏུརུཀྑཡཝནཔུཔྥཱནཱི’’ཏི ཨཔརེ.

ཨགྒིདཌྜྷཱ ཝིཡཱཏི ཨཱསནགཏེན ཨགྒིནཱ དཌྜྷཱ ཝིཡ. པཋམམེཝཱཏི རཱཛཱནཾ དིསྭཱཔི ཀིཙྩནྟརཔྤསུཏཱ ཨཧུཏྭཱ ཀིཙྩནྟརཏོ པཋམམེཝ, དསྶནསམཀཱལཾ ཨེཝཱཏི ཨཏྠོ. རཉྙོ ནིསཛྫཱཡ པཙྪཱ ནིཔཱཏནཾ ནིསཱིདནཾ སཱིལཾ ཨེཏིསྶཱཏི པཙྪཱནིཔཱཏིནཱི. ཏཾ ཏཾ ཨཏྟནཱ རཉྙོ ཀཱཏབྦཀིཙྩཾ ‘‘ཀིཾ ཀརོམཱི’’ཏི པུཙྪིཏབྦཏཱཡ ཀིཾ ཀརཎཾ པཊིསཱཝེཏཱིཏི ཀིཾཀཱརཔཊིསྶཱཝིནཱི.

མཱཏུགཱམོ ནཱམ ཡེབྷུཡྻེན སཋཛཱཏིཀོ, ཨིཏྠིརཏནསྶ པན ཏཾ ནཏྠཱིཏི དསྶེཏུཾ ‘‘སྭཱསྶཱ’’ཏིཨཱདི ཝུཏྟཾ.

གུཎཱཏི རཱུཔགུཎཱ ཙེཝ ཨཱཙཱརགུཎཱ ཙ. པུརིམཀམྨཱནུབྷཱཝེནཱཏི ཀཏསྶ པུརིམཀམྨསྶཱནུབྷཱཝེན ཨིཏྠིརཏནསྶ ¶ ཏབྦྷཱཝསཾཝཏྟནིཡསྶ པུརིམཀམྨསྶ ཨཱནུབྷཱཝེན. ཙཀྐཝཏྟིནོཔི པརིཝཱརསམྤཏྟིསཾཝཏྟནིཡཾ པུཉྙཀམྨཾ ཏཱདིསསྶ ཕལཝིསེསསྶ ཨུཔནིསྶཡོ ཧོཏིཡེཝ. ཏེནཱཧ ‘‘ཙཀྐཝཏྟིནོ ¶ པུཉྙཾ ཨུཔནིསྶཱཡཱ’’ཏི, ཨེཏེན སེསེསུཔི སཝིཉྙཱཎཀརཏནེསུ ཨཏྟནོ ¶ ཀམྨཝསེན ནིབྦཏྟེསུཔི ཏེསཾ ཏེསཾ ཝིསེསཱནཾ ཏདུཔནིསྶཡཏཱ ཝིབྷཱཝིཏཱ ཨེཝཱཏི དཊྛབྦཱ. པུབྦེ ཨེཀདེསཝསེན ལབྦྷམཱནཱ པཱརིཔཱུརཱི རཉྙོ ཙཀྐཝཏྟིབྷཱཝཱུཔགམནཏོ པཊྛཱཡ སབྦཱཀཱརཔརིཔཱུརཱ ཛཱཏཱ.

གཧཔཏིརཏནཝཎྞནཱ

༢༥༠. པཀཏིཡཱ ཝཱཏི སབྷཱཝེནེཝ ཙཀྐརཏནཔཱཏུབྷཱཝཏོ པུབྦེཔི. ཡཱདིསཾ རཉྙོ ཙཀྐཝཏྟིསྶ པུཉྙབལཾ ནིསྶཱཡ ཡཐཱཝུཏྟཱ ཙཀྐརཏནཱནུབྷཱཝནིབྦཏྟི, ཏཱདིསཾ ཨེཏསྶ པུཉྙབལཾ ནིསྶཱཡ གཧཔཏིརཏནསྶ ཀམྨཝིཔཱཀཛཾ དིབྦཙཀྑུཾ ནིབྦཏྟེཏཱིཏི ཨཱཧ ‘‘ཙཀྐརཏནཱནུབྷཱཝསཧིཏ’’ནྟི. ཀཱརཎསྶ ཧི ཨེཀསནྟཏིཔཏིཏཏཱཡ, ཕལསྶ ཙ སམཱནཀཱལིཀཏཱཡ ཏཐཱཝཙནཾ.

པརིཎཱཡཀརཏནཝཎྞནཱ

༢༥༡. ‘‘ཨཡཾ དྷམྨོ, ཨཡཾ ཨདྷམྨོ’’ཏིཨཱདིནཱ ཀམྨསྶཀཏཱཝབོདྷནསངྑཱཏསྶ པཎྜིཏབྷཱཝསྶ ཨཏྠིཏཱཡ པཎྜིཏོ. བཱཧུསཙྩབྱཏྟིཡཱ བྱཏྟོ. སབྷཱཝསིདྡྷཱཡ མེདྷཱསངྑཱཏཱཡ པཀཏིཔཉྙཱཡ ཨཏྠིཏཱཡ མེདྷཱཝཱི. ཨཏྟནོ ཡཱཐཱཝབུདྡྷམཏྠཾ པརེསཾ ཝིབྷཱཝེཏུཾ པཀཱསེཏུཾ སམཏྠཏཱཡ ཝིབྷཱཝཱི. ཝཝཏྠཔེཏུནྟི ནིཙྪིཏུཾ.

ཙཏུཨིདྡྷིསམནྣཱགཏཝཎྞནཱ

༢༥༢. ཝིཔཙྩནཾ ཝིཔཱཀོ, ཝིཔཱཀོ ཨེཝ ཝེཔཱཀོ ཡཐཱ ‘‘ཝིཀཏམེཝ ཝེཀཏ’’ནྟི. སམཾ ནཱཏིསཱིཏནཱཙྩུཎྷཏཱཡ ཨཝིསམཾ བྷུཏྟསྶ ཝེཔཱཀོ ཨེཏིསྶཱ ཨཏྠཱིཏི སམཝེཔཱཀིནཱི, ཏཱཡ སམཝེཔཱཀིནིཡཱ.

དྷམྨཔཱསཱདཔོཀྑརཎིཝཎྞནཱ

༢༥༣. ཛནརཱསིཾ ཀཱརེཏྭཱ ཏེན ཛནརཱསིནཱ ཁཎིཏྭཱ ན མཱཔེསི. ཀིཉྩརཧཱིཏི ཨཱཧ ‘‘རཉྙོ པནཱ’’ཏིཨཱདི. ཏཏྠ ཀཱརཎཾ པརཏོ ཨཱགམིསྶཏི. ཨེཀཱཡ ཝེདིཀཱཡ པརིཀྑིཏྟཱ པོཀྑརཎིཡོ ¶ . པརིཝེཎཔརིཙྪེདཔརིཡནྟེཏི ཨེཏྠ པརིཝེཎཾ ནཱམ སམནྟཏོ ཝིཝཊངྒཎབྷཱུཏཾ པོཀྑརཎིཡཱ ¶ ཏཱིརཾ, ཏསྶ པརིཙྪེདབྷཱུཏེ པརིཡནྟེ ཨེཀཱཡ ཝེདིཀཱཡ ¶ པརིཀྑིཏྟཱ པོཀྑརཎིཡོ. ཨེཏདཧོསཱིཏི ཨེཏཾ ‘‘ཡཾནཱུནཱཧཾ ཨིམཱསུ པོཀྑརཎཱིསཱུ’’ཏིཨཱདིཀཾ ཨཧོསཱིཏི. སབྦོཏུཀནྟི སབྦེསུ ཨུཏཱུསུ པུཔྥནཀཾ. ནཱནཱཝཎྞཨུཔྤལབཱིཛཱདཱིནཱིཏི རཏྟནཱིལཱདིནཱནཱཝཎྞཔུཔྥེན པུཔྥནཀཨུཔྤལབཱིཛཱདཱིནི. ཛལཛཐལཛམཱལནྟི ཛལཛཐལཛཔུཔྥམཱལཾ.

༢༥༤. པརིཙཱརཝསེནཱཏི ཏངྑཎིཀཔརིཙཱརཝསེན, ཨིདཉྩ པཋམཾ པཊྛཔིཏནིཡཱམེནེཝ ཝུཏྟཾ, པཙྪཱ པན ཡཱནསཡནཱདཱིནི ཝིཡ ཨིཏྠིཡོཔི ཨཏྠིཀཱནཾ པརིཙྩཏྟཱ ཨེཝ. ཏེནཱཧ ‘‘ཨིཏྠཱིཧིཔཱི’’ཏིཨཱདི. པརིཙྩཱགཝསེནཱཏི ནིརཔེཀྑཔརིཙྩཱགཝསེན. དཱིཡཏཱིཏི དཱནཾ, དེཡྻཝཏྠུ. ཏཾ ཨགྒཱིཡཏི ནིསྶཛྫཱིཡཏི ཨེཏྠཱཏི དཱནགྒཾ, པརིཝེསནཊྛཱནཾ. ཏཱདིསཱནི ཨཏྠཱིཏི ཡཱདིསཱནི རཉྙོ དཱནགྒེ ཁོམསུཁུམཱདཱིནི ཝཏྠཱནི, ཏཱདིསཱནི ཡེསཾ ཨཏྟནོ སནྟཀཱནི སནྟི. ཨོཧཱཡཱཏི པཧཱཡ ཏཏྠེཝ ཋཔེཏྭཱ. ཨཏྠོ ཨཏྠི ཡེསཾ ཏེཏི ཨཏྠིཀཱ. ཨེཝཾ ཨནཏྠིཀཱཔི དཊྛབྦཱ.

༢༥༥. ཀལཧསདྡོཔཱིཏི པི-སདྡེན དཱནཱདྷིཔྤཱཡེན གེཧཏོ ནཱིཧཏཾ པུན གེཧཾ པཝེསེཏུཾ ན ཡུཏྟནྟི ཨིམམཏྠཾ སམུཙྩེཏི. ཏེནཱཧ ‘‘ན ཁོ ཨེཏཾ ཨམྷཱཀཾ པཏིརཱུཔ’’ནྟིཨཱདི (དཱི. ནི. ༢.༢༥༥).

༢༥༧. ཨུཎྷཱིསམཏྠཀེཏི སིཁཱཔརིཡནྟམཏྠཀེ. པརིཙྪེདམཏྠཀེཏི པཱསཱདངྒཎཔརིཙྪེདསྶ མཏྠཀེ.

༢༥༨. ཧརཏཱིཏི ཨཏིཝིཡ པབྷསྶརབྷཱཝེན ཙཀྑཱུནི པཊིཧརནྟཾ དུདྡིཀྑཏཱཡ དིཊྛིཡོ ཧརཏི ཨཔནེནྟཾ ¶ ཝིཡ ཧོཏི. ཏཾ པན ཧརཎཾ ནེསཾ པརིཔྥནྡནེནཱཏི ཨཱཧ ‘‘ཕནྡཱཔེཏཱི’’ཏི.

པཋམབྷཱཎཝཱརཝཎྞནཱ ནིཊྛིཏཱ.

ཛྷཱནསམྤཏྟིཝཎྞནཱ

༢༦༠. མཧཏིཡཱ ཨིདྡྷིཡཱཏི མཧནྟེན ཨིཙྪིཏཏྠསམིཛ྄ཛྷནེན. ཏེསཾཡེཝ ཨིཙྪིཏིཙྪིཏཏྠཱནཾ. ‘‘ཨནུབྷཝིཏབྦཱན’’ནྟི ¶ ཨིམིནཱ ཨཱནུབྷཱཝ-སདྡསྶ ཀམྨསཱདྷནཏཾ དསྶེཏི. པུབྦེ སམྤནྣཾ ཀཏྭཱ དེཡྻདྷམྨཔརིཙྩཱགསྶ ཀཏབྷཱཝཾ དསྶེནྟོ ‘‘སམྤཏྟིཔརིཙྩཱགསྶཱ’’ཏི ཨཱཧ. ཨཏྟཱནཾ དམེཏི ཨེཏེནཱཏི དམོ.

བོདྷིསཏྟཔུབྦཡོགཝཎྞནཱ

ཨསྶཱཏི ¶ མཧཱསུདསྶནརཉྙོ. ཨེཀོ ཐེརོཏི ཨཔྤཉྙཱཏོ ནཱམགོཏྟཏོ ཨཉྙཏརོ པུཐུཛྫནོ ཐེརོ. ཐེརཾ དིསྭཱཏི ཨཉྙཏརསྨིཾ རུཀྑམཱུལེ ནིསིནྣཾ དིསྭཱ. ཀཊྛཏྠརཎནྟི ཀཊྛམཡཾ ཨཏྠརཎཾ, དཱརུཕལཀནྟི ཨཏྠོ.

པརིབྷོགབྷཱཛནནྟི པཱནཱིཡཔརིབྷོཛནཱིཡཱདིཔརིབྷོགཡོགྱཾ བྷཱཛནཾ. ཨཱརཀཎྚཀནྟི སཱུཙིཝིཛ྄ཛྷནཀཀཎྚཀཾ. པིཔྥལིཀནྟི ཁུདྡཀསཏྠཀཾ. ཨུདཀཏུམྦཀནྟི ཀུཎྜིཀཾ.

ཀཱུཊཱགཱརདྭཱརེཡེཝ ནིཝཏྟེསཱིཏི ཀཱུཊཱགཱརཾ པཝིཊྛཀཱལཏོ པཊྛཱཡ ཏེསཾ མིཙྪཱཝིཏཀྐཱནཾ པཝཏྟིཡཱ ཨོཀཱསཾ ནཱདཱསི.

༢༦༡. ཀསིཎམེཝ པཉྙཱཡཏི མཧཱཔུརིསསྶ ཏཏྠ ཏཏྠ ཀཏཱདྷིཀཱརཏྟཱ, ཏེསཉྩ པདེསཱནཾ སུཔརིཀམྨཀཏཀསིཎསདིསཏྟཱ.

༢༦༢. ཙཏྟཱརི ཛྷཱནཱནཱིཏི ཙཏྟཱརི ཀསིཎཛ྄ཛྷཱནཱནི. ཀསིཎཛ྄ཛྷཱནཔྤམཉྙཱནཾཡེཝ ཝཙནཾ ཏཱསཾ ཏདཱ ཨཱདརགཱརཝཝསེན ནིབྦཏྟིཏཏྟཱ. མཧཱབོདྷིསཏྟཱནཉྷི ཨརཱུཔཛ྄ཛྷཱནེསུ ¶ ཨཱདརོ ནཏྠི, ཨབྷིཉྙཱཔདཊྛཱནཏཾ པན སནྡྷཱཡ ཏཱནིཔི ནིབྦཏྟེནྟི, ཏསྨཱ མཧཱསཏྟོ ཏཱཔསཔརིབྦཱཛཀཀཱལེ ཡཏྟཀེ ལོཀིཡགུཎེ ནིབྦཏྟེཏི, ཏེ སབྦེཔི ཏདཱ ནིབྦཏྟེསིཡེཝ. ཏེནཱཧ ‘‘མཧཱཔུརིསོ པནཱ’’ཏིཨཱདི.

ཙཏུརཱསཱིཏིནགརསཧསྶཱདིཝཎྞནཱ

༢༦༣. ཨབྷིཧརིཏབྦབྷཏྟནྟི ཨུཔནེཏབྦབྷཏྟཾ.

༢༦༤. ནིབདྡྷཝཏྟནྟི པུབྦེ ཨུཔནིབདྡྷཾ པཱཀཝཏྟཾ.

སུབྷདྡཱདེཝིཨུཔསངྐམནཝཎྞནཱ

༢༦༥. ཨཱཝཊྚེཏྭཱཏི ¶ ཨཏིཝིསིཏྭཱ. ཡཾ ཡཾ རཉྙོ ཨིཙྪིཏཾ དཱནཱུཔཀརཎཉྩེཝ བྷོགཱུཔཀརཎཉྩ, ཏསྶ ཏསྶ ཏཐེཝ སམིདྡྷབྷཱཝཾ ཝིཏྠཝཏི.

༢༦༦. སཙེ པན རཱཛཱ ཛཱིཝིཏེ ཚནྡཾ ཛནེཡྻ, ཨིཏོ པརམྤི ཙིརཾ ཀཱལཾ ཏིཊྛེཡྻ མཧིདྡྷིཀོ མཧཱནུབྷཱཝོཏི ཨེཝཾ མཧཛ྄ཛྷཱསཡཱ དེཝཱི བྷོགེསུ, ཛཱིཝིཏེ ཙ རཱཛཱནཾ སཱཔེཀྑཾ ཀཱཏུཾ ཝཱཡམི. ཏེན ཝུཏྟཾ ‘‘མཱ ¶ ཧེཝ ཁོ རཱཛཱ’’ཏིཨཱདི. ཏེནེཝཱཧ ‘‘ཏསྶ ཀཱལངྐིརིཡཾ ཨནིཙྪམཱནཱ’’ཏིཨཱདི. ཚནྡཾ ཛནེཧཱིཏི ཨེཏྠ ཚནྡ-སདྡོ ཏཎྷཱཔརིཡཱཡོཏི ཨཱཧ ‘‘པེམཾ ཨུཔྤཱདེཧཱི’’ཏི. ཨཔེཀྑཏི ཨཱརམྨཎཾ ཨེཏཱཡ ན ཝིསྶཛྫེཏཱིཏི ཨཔེཀྑཱ, ཏཎྷཱ.

༢༦༧. གརཧིཏཱཏི ཨེཏྠ ཀེཧི གརཧིཏཱ, ཀསྨཱ ཙ གརཧིཏཱཏི ཨནྟོལཱིནཾ ཙོདནཾ ཝིསྶཛྫེནྟོ ‘‘བུདྡྷེཧཱི’’ཏིཨཱདིམཱཧ, ཏེན ཝིཉྙུགརཧིཏཏྟཱ, དུགྒཏིསཾཝཏྟནིཡཏོ ཙ སཱཔེཀྑཀཱལཀིརིཡཱ པརིཝཛྫེཏབྦཱཏི དསྶེཏི.

༢༦༨. ཨེཀམནྟཾ གནྟྭཱཏི རཉྙོ ཙཀྑུཔཐཾ ཝིཛཧིཏྭཱ.

བྲཧྨལོཀཱུཔགམནཝཎྞནཱ

༢༦༩. སོཎསྶཱཏི ཀོལི༹ཝཱིསསྶ སོཎསྶ. ཨེཀཱ བྷཏྟཔཱཏཱིཏི ཨེཀཾ བྷཏྟཝཌྜྷིཏཀཾ. ཏཱདིསཾ བྷཏྟནྟི ཏཐཱརཱུཔཾ གརུཾ མདྷུརཾ སིནིདྡྷཾ བྷཏྟཾ. བྷུཏྟཱནནྟི བྷུཏྟཝནྟཱནཾ.

༢༧༡. དཱསམནུསྶཱཏི དཱསཱ ཙེཝ ཨཱཡུཏྟཀམནུསྶཱ ཙ.

ཨིདཱནི ཡཐཱཝུཏྟཱཡ རཉྙོ མཧཱསུདསྶནསྶ བྷོགསམྤཏྟིཡཱ ཀམྨསརིཀྑཏཾ ཨུདྡྷརནྟོ ‘‘ཨེཏཱནི པནཱ’’ཏིཨཱདིམཱཧ, ཏཾ སུཝིཉྙེཡྻམེཝ.

༢༧༢. ཨཱདིཏོ ¶ པཊྛཱཡཱཏི སམུདཱགམནཏོ པཊྛཱཡ. ཡཏྠ ཏཾ པུཉྙཾ ཨཱཡཱུཧིཏཾ, ཡཏོ སཱ སམྤཏྟི ནིབྦཏྟཱ, ཏཏོ ཏཏིཡཏྟབྷཱཝཏོ པབྷུཏི. མཧཱསུདསྶནསྶ ཛཱཏཀདེསནཱ ཧི ཏདཱ སམུདཱགམནཏོ པཊྛཱཡ བྷགཝཏཱ དེསིཏཱཏི. པཾསྭཱགཱརཀཱིལ༹ཾ ཝིཡཱཏི ཡཐཱ ནཱམ དཱརཀཱ པཾསཱུཧི ཝཱཔིགེཧབྷོཛནཱདཱིནི ¶ དསྶེནྟཱ ཡཐཱརུཙི ཀཱིལི༹ཏྭཱ གམནཀཱལེ སབྦཾ ཏཾ ཝིདྷཾསེནྟཱ གཙྪནྟི, ཨེཝམེཝ བྷགཝཱ མཧཱསུདསྶནཀཱལེ ཨཏྟནཱ ཨནུབྷཱུཏཾ དིབྦསམྤཏྟིསདིསཾ ཨཙིནྟེཡྻཱནུབྷཱཝསམྤཏྟིཾ ཝིཏྠཱརཏོ དསྶེཏྭཱ པུན ཨཏྟནོ དེསནཾ ཨཱདཱིནཝནིསྶརཎདསྶནཝསེན ཝིཝཊྚཱབྷིམུཁཾ ཝིཔརིཝཏྟེནྟོ ‘‘སབྦཱ སཱ སམྤཏྟི ཨནིཙྩཏཱཡ ཝིཔརིཎཏཱ ཝིདྷཾསིཏཱ’’ཏི དསྶེནྟོ ‘‘པསྶཱནནྡཱ’’ཏིཨཱདིམཱཧ. ཝིཔརིཎཏཱཏི ཝིཔརིཎཱམཾ སབྷཱཝཝིགམཾ གཏཱ. ཏེནཱཧ ‘‘པཀཏིཝིཛཧནེནཱ’’ཏིཨཱདི. པཀཏཱིཏི སབྷཱཝདྷམྨཱནཾ ཨུདཡཝཡཔརིཙྪིནྣོ ¶ ཀཀྑལ༹ཕུསནཱདིསབྷཱཝོ, སོ བྷངྒཀྑཎཏོ པཊྛཱཡ ཛཧིཏོ, པརིཙྩཛནྟོ སབྦསོ ནཏྠེཝ. ཏེནཱཧ ‘‘ནིབྦུཏཔདཱིཔོ ཝིཡ ཨཔཉྙཏྟིཀབྷཱཝཾ གཏཱ’’ཏི.

ཨེཏྟཱཝཏཱཏི ཨཱདིཏོ པཊྛཱཡ པཝཏྟེན ཨེཏྟཀེན དེསནཱམགྒེན. ཨནེཀཱནི ཝསྶཀོཊིསཏསཧསྶཱནིཡེཝ ཨུབྦེདྷོ ཨེཏིསྶཱཏི ཨནེཀཝསྶཀོཊིསཏསཧསྶུབྦེདྷཱ. ཨནིཙྩལཀྑཎཾ ཨཱདཱཡཱཏི ཏཾ སམྤཏྟིགཏཾ ཨནིཙྩལཀྑཎཾ དེསནཱཡ གཧེཏྭཱ ཝིབྷཱཝེཏྭཱ. ཡཐཱ ནིསྶེཎིམུཙྩནེ ཏཱདིསཾ སཏཧཏྠུབྦེདྷཾ རུཀྑཾ པཀཏིཔུརིསེན ཨཱརོཧིཏུཾ ན སཀྐཱ, ཨེཝཾ ཨནིཙྩཏཱཝིབྷཱཝནེན ཏསྶཱ སམྤཏྟིཡཱ ཨཔེཀྑཱནིསྶེཎིམུཙྩནེ ¶ ཀེནཙི ཨཱརོཧིཏུཾ ན སཀྐཱཏི ཨཱཧ ‘‘ཨནིཙྩལཀྑཎཾ ཨཱདཱཡ ནིསྶེཎིཾ མུཉྩནྟོ ཝིཡཱ’’ཏི. ཏེནེཝཱཏི ཡཐཱཝུཏྟཀཱརཎེནེཝ, ཨཱདིཏོ སཱཏིསཡཾ ཀཱམེསུ ཨསྶཱདཾ དསྶེཏྭཱཔི ཨུཔརི ནེསཾ ‘‘པསྶཱནནྡཱ’’ཏིཨཱདིནཱ ཨཱདཱིནཝཾ, ཨོཀཱརཾ, སཾཀིལེསཾ, ནེཀྑམྨེ ཨཱནིསཾསཉྩ ཝིབྷཱཝེཏྭཱ དེསནཱཡ ནིཊྛཱཔིཏཏྟཱ. པུབྦེཏི ཨཏཱིཏཀཱལེ. ཝསབྷརཱཛཱཏི ཝསབྷནཱམཀོ སཱིཧལ༹མཧཱརཱཛཱ.

ཨུདཀཔུཔྥུལཱ༹དཡོཏི ཨཱདི-སདྡེན ཏིཎགྒེ ཨུསྶཱཝབིནྡུཨཱདིཀེ སངྒཎྷཱཏི.

མཧཱསུདསྶནསྶ པནཱཏི པན-སདྡོ ཝིསེསཏྠཛོཏནོ, ཏེན མཧཱསུདསྶནམཧཱརཱཛཱ ཛྷཱནཱབྷིཉྙཱསམཱཔཏྟིཡོ ནིབྦཏྟེསི, ཏདགྒེན པརིསུདྡྷེ ཙ སམཎབྷཱཝེ པཏིཊྛིཏོ, ཡཏོ ཝིདྷུཡ ཨེཝ ཀཱམཝིཏཀྐཱདིསམཎབྷཱཝསཾཀིལེསཾ སུཉྙཱགཱརཾ པཱཝིསི, ཨེཝཾབྷཱུཏསྶཱཔི ཏསྶ ཀཱལཾ ཀིརིཡཏོ སཏྟམེ དིཝསེ སབྦཱ ཙཀྐཝཏྟིསམྤཏྟི ཨནྟརཧིཏཱ, ན ཏཏོ པརཾ, ཨཧོ ཨཙྪརིཡམནུསྶོ ཨནཉྙསཱདྷཱརཎགུཎཝིསེསོཏི ཨིམཾ ཝིསེསཾ དསྶེཏི.

ཨནཱརུལ༹ྷནྟི ‘‘རཱཛཱ ཀིར པུབྦེ གཧཔཏིཀུལེ ནིབྦཏྟཱི’’ཏིཨཱདིནཱ, (དཱི. ནི. ཨཊྛ. ༢.༢༦༠) ‘‘པུན ཐེརཾ ཨཱམནྟེསཱི’’ཏིཨཱདིནཱ (དཱི. ནི. ཨཊྛ. ༢.༢༧༢) ཙ ཝུཏྟམཏྠཾ ¶ སནྡྷཱཡཱཧ. སོ ཧི ཨིམསྨིཾ སུཏྟེ སངྒཱིཏིཾ ཨནཱརུལ༹ྷོ, ཨཉྙཏྠ པན ཨཱགཏོ ཨིམིསྶཱ དེསནཱཡ པིཊྛིཝཏྟཀབྷཱཝེན. ཡཾ པནེཏྠ ཨཏྠཏོ ན ཝིབྷཏྟཾ, ཏཾ སུཝིཉྙེཡྻཾ ཨེཝཱཏི.

མཧཱསུདསྶནསུཏྟཝཎྞནཱཡ ལཱིནཏྠཔྤཀཱསནཱ.

༥. ཛནཝསབྷསུཏྟཝཎྞནཱ

ནཱཏིཀིཡཱདིབྱཱཀརཎཝཎྞནཱ

༢༧༣-༢༧༥. ‘‘པརིཏོ’’ཏི ¶ ¶ ¶ པདཾ ཡཐཱ སམནྟཏྠཝཱཙཀོ, ཨེཝཾ སམཱིཔཏྠཝཱཙཀོཔི ཧོཏཱིཏི སམནྟཱ སཱམནྟཱཏི ཨཏྠོ ཝུཏྟོ. ཨཱམེཌིཏེན པན སམནྟཏྠོ ཛོཏིཏོ. ཡསྶ པན སཱམནྟཱ ཛནཔདེསུ ‘‘ནཱཏིཀེ ཝིཧརཏཱི’’ཏི ཝུཏྟཏྟཱ ནཱཏིཀསྶཱཏི ཝིཉྙཱཏོ ཡམཏྠོ. ཡསྶ པརིཏོ ཛནཔདེསུ བྱཱཀརོཏི, ཏཏྠ པརིཙཱརཀཱརཀཱནཾ བྱཱཀརཎཾ ཨཝུཏྟསིདྡྷཾ, ནིདསྶནཝསེན ཝཱ ཏསྶ ཝཀྑམཱནཏྟཱ ‘‘པརིཏོ པརིཏོ ཛནཔདེསུ’’ ཨིཙྩེཝ ཝུཏྟཾ. པརིཙཱརཀེཏི ཨུཔཱསཀེ. ཏེནཱཧ ‘‘བུདྡྷདྷམྨསངྒྷཱནཾ པརིཙཱརཀེ’’ཏི. ཨུཔཔཏྟཱིསཱུཏི ནིབྦཏྟཱིསུ. ཉཱཎགཏིཔུཉྙཱནཾ ཨུཔཔཏྟཱིསཱུཏི ཨེཏྠ ཉཱཎགཏཱུཔཔཏྟི ནཱམ ཏསྶ ཏསྶ མགྒཉཱཎགམནསྶ ནིབྦཏྟི. ཡཾ སནྡྷཱཡ ཝུཏྟཾ ‘‘པཉྩནྣཾ ཨོརམྦྷཱགིཡཱནཾ པརིཀྑཡཱ’’ཏིཨཱདི. པུཉྙཱུཔཔཏྟི ནཱམ ཏཾཏཾདེཝནིཀཱཡཱུཔཔཏྟི. སབྦཏྠཱཏི ‘‘ཝཛྫིམལླེསཱུ’’ཏིཨཱདིཀེ སབྦཏྠ ཙཏཱུསུཔི པདེསུ. པུརིམེསཱུཏི པཱལི༹ཡཾ ཝུཏྟེ སནྡྷཱཡཱཧ. དསསུཡེཝཱཏི ཏེསུ ཨེཝ དསསུ ཛནཔདེསུ. པརིཙཱརཀེ བྱཱཀརོཏི བྱཀཱཏབྦཱནཾ བཧཱུནཾ ཏཏྠ ལབྦྷནཏོ. ནཱཏིཀེ བྷཝཱ ནཱཏིཀིཡཱ.

ནིཊྛངྒཏཱཏི ནིཊྛཾ ནིཙྪཡཾ ཨུཔགཏཱ.

ཨཱནནྡཔརིཀཐཱཝཎྞནཱ

༢༧༦. ཡསྨཱ སངྒྷསུཔྤཊིཔཏྟི ནཱམ དྷམྨསུདྷམྨཏཱཡ, དྷམྨསུདྷམྨཏཱ ཙ བུདྡྷསུབུདྡྷཏཱཡ, ཏསྨཱ ‘‘ཨཧོ དྷམྨོ, ཨཧོ སངྒྷོ’’ཏི དྷམྨསངྒྷགུཎཀིཏྟནཱཔི ཨཏྠཏོ བུདྡྷགུཎཀིཏྟནཱ ཨེཝ ཧོཏཱིཏི ‘‘བྷགཝནྟཾ ¶ ཀིཏྟཡམཱནརཱུཔཱ’’ཏི པདསྶ ‘‘ཨཧོ དྷམྨོ’’ཏིཨཱདིནཱཔི ཨཏྠོ ཝུཏྟོ.

༢༧༨. ཉཱཎགཏཱིཏི ¶ ‘‘པཉྩནྣཾ ཨོརམྦྷཱགིཡཱནཾ སཾཡོཛནཱནཾ པརིཀྑཡཱ’’ཏིཨཱདིནཱ ཨཱགཏཾ པཧཱཏབྦཔཧཱནཝསེན པཝཏྟཾ མགྒཉཱཎགམནཾ. ཡསྨཱ ཏསྶཱ ཨེཝ ཉཱཎགཏིཡཱ ཝསེན ཏསྶ ཏསྶ ཨརིཡཔུགྒལསྶ ཨོཔཔཱཏིཀཏཱདིཝིསེསོ, ཏསྨཱ ཏཾ ཏཱདིསཾ ཏསྶ ཨབྷིསམྤརཱཡཾ སནྡྷཱཡཱཧ ‘‘ཉཱཎཱབྷིསམྤརཱཡམེཝཱ’’ཏི.

༢༧༩. ཨུཔསནྟཾ ¶ པཏི སམྨཏི ཨཱལོཀཱིཡཏཱིཏི ཨུཔསནྟཔཏིསོ. ཨུཔསནྟདསྶནོ ཨུཔསནྟཨུསྶནྣོ. བྷཱཏིརིཝཱཏི ཨེཏྠ ར-ཀཱརོ པདསནྡྷིཀརོ, ཨིཝ-སདྡོ བྷུསཏྠོཏི ཨཱཧ ‘‘ཨཏིཝིཡ བྷཱཏཱི’’ཏི.

ཛནཝསབྷཡཀྑཝཎྞནཱ

༢༨༠. ཛེཊྛཀབྷཱཝེན ཛནེ ཝསབྷསདིསོཏི ཛནཝསབྷོཏི ཨསྶ དེཝཔུཏྟསྶ ནཱམཾ ཨཧོསི.

ཨིཏོ དེཝལོཀཱ ཙཝིཏྭཱ སཏྟཀྑཏྟུཾ མནུསྶལོཀེ རཱཛབྷཱུཏསྶ. མནུསྶལོཀཱ ཙཝིཏྭཱ སཏྟཀྑཏྟུཾ དེཝབྷཱུཏསྶ. ཨེཏྠེཝཱཏི ཨེཏསྨིཾཡེཝ ཙཱཏུམཧཱརཱཛིཀབྷཝེ, ཨེཏྠཱཔི ཝེསྶཝཎསྶ སཧབྱཏཱཝསེན.

༢༨༡. ཨཱསིསནཾ ཨཱསཱ, པཏྠནཱ. ཨཱསཱསཱིསེན ཙེཏྠ ཀཏྟུཀམྱཏཱཀུསལཙྪནྡཾ ཝདཏི. ཏེནེཝཱཧ ‘‘སཀདཱགཱམིམགྒཏྠཱཡཱ’’ཏིཨཱདི. ཡདགྒེཏི ཨེཏྠ ཨགྒ-སདྡོ ཨཱདིཔརིཡཱཡོཏི ཨཱཧ ‘‘ཏཾ དིཝསཾ ཨཱདིཾ ཀཏྭཱ’’ཏི. ‘‘པུརིམཾ…པེ… ཨཝིནིཔཱཏོ’’ཏི ཨིདཾ ཡཐཱ ཏཏྟཀཾ ཀཱལཾ སུགཏིཏོ སུགཏཱུཔཔཏྟིཡེཝ ¶ ཨཧོསི, ཏཐཱ ཀཏཱུཔཙིཏཀུསལཀམྨཏྟཱ. ཕུསྶསྶ སམྨཱསམྦུདྡྷསྶ ཀཱལཏོ པབྷུཏི ཧི སམྦྷཏཝིཝཊྚཱུཔནིསྶཡཀུསལསམྦྷཱརོ ཨེས དེཝཔུཏྟོ. ཨནཙྪརིཡནྟི ཨནུ ཨནུ ཨཙྪརིཡཾ. ཏེནཱཧ ‘‘པུནཔྤུནཾ ཨཙྪརིཡམེཝཱ’’ཏི. སཡཾཔརིསཱཡཱཏི སཀཱཡ པརིསཱཡ. བྷགཝཏོ དིཊྛསདིསམེཝཱཏི ཨཱཝཛྫནསམནནྟརཾ ཡཐཱ ཏེ བྷགཝཏོ ཙཏུཝཱིསཏིསཏསཧསྶམཏྟཱ སཏྟཱ ཉཱཎགཏིཏོ དིཊྛཱ, ཨེཝཾ ཏུམྷེཧི དིཊྛསདིསམེཝ. ཝེསྶཝཎསྶ སམྨུཁཱ སུཏཾ མཡཱཏི ཝདཏི.

དེཝསབྷཱཝཎྞནཱ

༢༨༢. ཝསྶཱུཔནཱཡིཀསངྒཧཏྠནྟི ¶ ཝསྶཱུཔནཱཡིཀཱཡ ཨཱརཀྑཱསཾཝིདྷཱནཝསེན བྷིཀྑཱུནཾ སངྒཧཎཏྠཾ ‘‘ཝསྶཱུཔགཏཱ བྷིཀྑཱུ ཨེཝཾ སུཁེན སམཎདྷམྨཾ ཀརོནྟཱི’’ཏི, པཝཱརཎསངྒཧོ པནསྶ པཝཱརེཏྭཱ སཏྠུ སནྟིཀཾ གཙྪནྟཱནཾ བྷིཀྑཱུནཾ ཨནྟརཱམགྒེ པརིསྶཡཔརིཧརཎཏྠཾ. དྷམྨསྶཝནཏྠཾ དཱུརཊྛཱནཾ ¶ གཙྪནྟེསུཔི ཨེསེཝ ནཡོ. ཨཏྟནཱཔི ཨཱགནྟྭཱ དྷམྨསྶཝནཏྠཾ སནྣིཔཏིཡེཝ. ཨེཏྠེཏྠཱཏི ཨེཏྠ ཨེཏྠ ཨཡྻཱནཾ ཝསནཊྛཱནེ.

ཏདཱཔཱིཏི ‘‘པུརིམཱནི བྷནྟེ དིཝསཱནཱི’’ཏི ཝུཏྟཀཱལེཔི. ཨེཏེནེཝ ཀཱརཎེནཱཏི ཝསྶཱུཔནཱཡིཀནིམིཏྟམེཝ. ཏེནཱཧ པཱལི༹ཡཾ ‘‘ཏདཧུཔོསཐེ པནྣརསེ ཝསྶཱུཔནཱཡིཀཱཡཱ’’ཏིཨཱདི. ཨཱསནེཔི ནིསཛྫཱཡ སུདྷམྨཱཡ དེཝསབྷཱཡ པཋམཾ དེཝེསུ ཏཱཝཏིཾསེསུ ནིསིནྣེསུ ཏསྶཱ ཙཏཱུསུ དྭཱརེསུ ཙཏྟཱརོ མཧཱརཱཛཱནོ ནིསཱིདནྟི, ཨིདཾ ནེསཾ ཨཱསནེ ནིསཛྫཱཡ ཙཱརིཏྟཾ ཧོཏི.

ཡེནཏྠེནཱཏི ཡེན ཀིཙྩེན ཡེན པཡོཛནེན. ཨཱརཀྑཏྠནྟི ཨཱརཀྑབྷཱུཏམཏྠཾ. ཝུཏྟཾ ཝཙནཾ ཨེཏེསནྟི ཝུཏྟཝཙནཱ, མཧཱརཱཛཱནོ.

༢༨༣. ཨཏིཀྐམིཏྭཱཏི ཨབྷིབྷཝིཏྭཱ.

སནངྐུམཱརཀཐཱཝཎྞནཱ

༢༨༤. ཨབྷིསམྦྷཝིཏུཾ ཨདྷིགནྟུཾ ཨསཀྐུཎེཡྻོ ཨནབྷིསམྦྷཝནཱིཡོ. ཏེནཱཧ ‘‘ཨཔྤཏྟབྦོ’’ཏིཨཱདི. ཙཀྑུཡེཝ པཐོ རཱུཔདསྶནསྶ མགྒོ ཨུཔཱཡོཏི ཙཀྑུཔཐོ, ཏསྨིཾ ཙཀྑུཔཐསྨིནྟི ཨཱཧ ‘‘ཙཀྑུཔསཱདེ’’ཏི, ཙཀྑུསྶ གོཙརཡོགྒོ ཝཱ ཙཀྑུཔཐོཏི ཨཱཧ ‘‘ཨཱཔཱཐེ ཝཱ’’ཏི. ནཱབྷིབྷཝཏཱིཏི ན ཨབྷིབྷཝཏི, གོཙརབྷཱཝཾ ¶ ན གཙྪཏཱིཏི ཨཏྠོ. ཧེཊྛཱ ཧེཊྛཱཏི ཏཱཝཏིཾསཏོ པཊྛཱཡ ཧེཊྛཱ ཧེཊྛཱ, ན ཙཱཏུམཧཱརཱཛིཀཏོ པཊྛཱཡ, ནཱཔི བྲཧྨཔཱརིསཛྫཏོ པཊྛཱཡ. ‘‘ཙཱཏུམཧཱརཱཛིཀཱ ཧི ཏཱཝཏིཾསཱནཾ ཡཐཱ ཛཱཏིརཱུཔཱནི པསྶིཏུཾ སཀྐོནྟི, ཏཐཱ བྲཧྨཱནོ ཧེཊྛིམཱ ཨུཔརིམཱན’’ནྟི ཀེཙི, ཏཾ ན ཡུཏྟཾ. ན ཧི ཧེཊྛིམཱ བྲཧྨཱནོ ཨུཔརིམཱནཾ མཱུལཔཊིསནྡྷིརཱུཔཾ པསྶིཏུཾ སཀྐོནྟི, མཱཔིཏམེཝ པསྶིཏུཾ སཀྐོནྟཱིཏི དཊྛབྦཾ.

སུཎནྟོཝ ¶ ནིདྡཾ ཨོཀྐམཱིཏི གཏིཡོ ཨུཔདྷཱརེནྟོ བཧི ཝིསཊཝིཏཀྐཝིཙྪེདེན སངྐོཙཾ ཨཱཔནྣཙིཏྟཏཱཡ. མཡ྄ཧཾ ཨཡྻཀསྶཱཏི བྷགཝནྟཾ སནྡྷཱཡ ཝདཏི.

པཉྩ སིཁཱ ཨེཏསྶཱཏི པཉྩསིཁོ, པཉྩསིཁོ ཝིཡ པཉྩསིཁོཏི ཨཱཧ ‘‘པཉྩསིཁགནྡྷབྦསདིསོ’’ཏི. མམཱཡནྟཱིཏི པིཡཱཡནྟི.

༢༨༥. སུམུཏྟོཏི ¶ སརདོསེཧི སུཊྛུ མུཏྟོ. ཡེཧི པིཏྟསེམྷཱདཱིཧི པལིབུདྡྷཏྟཱ སརོ ཨཝིསྶཊྛོ སིཡཱ, ཏདབྷཱཝཏོ ཝིསྶཊྛོཏི དསྶེནྟོ ཨཱཧ ‘‘ཨཔལིབུདྡྷོ’’ཏི. ཝིཉྙཱཔེཏཱིཏི ཝིཉྙེཡྻོ, ཨནྟོགདྷཧེཏུཨཏྠོ ཀཏྟུསཱདྷནོ ཨེས ཝིཉྙེཡྻསདྡོཏི ཨཱཧ ‘‘ཨཏྠཝིཉྙཱཔནོ’’ཏི. སརསྶ མདྷུརཏཱ ནཱམ མདྡཝནྟི ཨཱཧ ‘‘མདྷུརོ མུདཱུ’’ཏི. སཝནཾ ཨརཧཏཱིཏི སཝནཱིཡོ. སཝནཱརཧཏཱཡ ཙ ཨཱཔཱཐསུཁཏཱཡཱཏི ཨཱཧ ‘‘ཀཎྞསུཁོ’’ཏི. བིནྡཱུཏི པིཎྜིཏོ. ཨཱཀོཊིཏབྷིནྣཀཾསསདྡོ ཝིཡ ཨནེཀཱཝཡཝོ ཨཧུཏྭཱ ནིརཝཡཝོ, ཨེཀབྷཱཝོཏི ཨཏྠོ. ཏེནཱཧ ‘‘ཨེཀགྒྷནོ’’ཏི, ཨེཏེནེཝསྶ ཨཝིསཱརིཏཱ སཾཝཎྞིཏཱ དཊྛབྦཱ. གམྦྷཱིརུཔྤཏྟིཊྛཱནཏཱཡ ཙསྶ གམྦྷཱིརཏཱཏི ཨཱཧ ‘‘ནཱབྷིམཱུལཏོ’’ཏིཨཱདི. ཨེཝཾ སམུཊྛིཏོཏི ཛཱིཝ྄ཧཱདིཔྤཧཱརམཏྟསམུཊྛིཏོ. ཨམདྷུརོ ཙ ཧོཏི ཨུཔྤཏྟིཊྛཱནཱནཾ པརིལཧུབྷཱཝཏོ. ན ཙ དཱུརཾ སཱཝེཏི ཝཱིརབྷཱཝཱབྷཱཝཏོ. ནིནྣཱདཱི སུཝིཔུལབྷཱཝཏོ སཝིསེསཾ ནིནྣཱདོ, པཱསཾསནིནྣཱདོ ཝཱ. ཏེནཱཧ ‘‘མཧཱམེགྷ…པེ… ཡུཏྟོ’’ཏི.

པཙྪིམཾ པཙྪིམནྟི དུཏིཡཾ, ཙཏུཏྠཾ, ཚཊྛཾ, ཨཊྛམཉྩ པདཾ. པུརིམསྶ པུརིམསྶཱཏི ཡཐཱཀྐམཾ པཋམསྶ, ཏཏིཡསྶ, པཉྩམསྶ, སཏྟམསྶ ཙ. ཨཏྠོཡེཝཱཏི ཨཏྠནིདྡེསོ ཨེཝ. ཝིསྶཊྛཏཱ ཧིསྶ ཝིཉྙེཡྻཏཱཡ ཝེདིཏབྦཱ, མཉྫུབྷཱཝོ སཝནཱིཡཏཱཡ, བིནྡུབྷཱཝོ ཨཝིསཱརིཏཱཡ, གམྦྷཱིརབྷཱཝོ ནིནྣཱདིཏཱཡཱཏི. ཡཐཱཔརིསནྟི ཨེཏྠ ཡཐཱ-སདྡོ པརིམཱཎཝཱཙཱི, ན པཀཱརཱདིཝཱཙཱིཏི ཨཱཧ ‘‘ཡཏྟཀཱ ¶ པརིསཱ’’ཏི, ཏེན པརིསཔྤམཱཎཾ ཨེཝསྶ སརོ ནིཙྪརཏི, ཨཡམསྶ དྷམྨཏཱཏི དསྶེཏི. ཏེནཱཧ ‘‘ཏཏྟཀམེཝཱ’’ཏིཨཱདི.

‘‘ཡེ ཧི ཀེཙཱི’’ཏིཨཱདི ‘‘ཡཱཝཉྩ སོ བྷགཝཱ’’ཏིཨཱདིནཱ ཝུཏྟསྶ ཨཏྠསྶ ཧེཏུཀིཏྟནཝསེན སམཏྠནཾ སརཎེསུ ནེསཾ ནིཙྩསེཝནེན, སཱིལེསུ ཙ པཏིཊྛཱཔནེན ཚཀཱམསགྒསམྤཏྟིཨནུཔྤཱདནཏོ. ཏེནཱཧ ‘‘ཡེ ཧི ཀེཙི…པེ… ཝདཏཱི’’ཏི. ནིབྦེམཏིཀགཧིཏསརཎེཏི མགྒེནཱགཏསརཎགམནེ. ཏེ ཧི སབྦསོ སམུགྒྷཱཏིཏཝིཙིཀིཙྪཏཱཡ རཏནཏྟཡེ ཨཝེཙྩཔྤསཱདེན སམནྣཱགཏཱཡེཝ, པོཐུཛྫནིཀསདྡྷཱཡ ཝསེན བུདྡྷཱདཱིནཾ གུཎེ ཨོགཱཧེཏྭཱ ¶ ཛཱནནྟི, ཨཔརནེཡྻབུདྡྷིནོ ཏེ པརིཡཱཡཏོ ནིབྦེམཏིཀགཧིཏསརཎཱ ཝེདིཏབྦཱ. གནྡྷབྦདེཝགཎནྟི གནྡྷབྦདེཝསམཱུཧཾ. ཏུཀཱ ¶ ཝུཙྩཏི ཁཱིརིཎཱི ཡཱ ཏུཀཱཏིཔི ཝུཙྩཏི. ཏསྶཱ ཙུཎྞཾ ཏུཀཱཔིཊྛཾ. ཏཾ ཀོཊྚེཏྭཱ པཀྑིཏྟཾ གྷནཾ ནིརནྟརཙིཏཾ ཧུཏྭཱ ཏིཊྛཏི.

བྷཱཝིཏཨིདྡྷིཔཱདཝཎྞནཱ

༢༨༧. སུཔཉྙཏྟཱཏི སུཊྛུ པཀཱརེཧི ཉཱཔིཏཱ བོདྷིཏཱ, ཨསངྐརཏོ ཝཱ ཋཔིཏཱ, ཏཾ པན བོདྷནཾ, ཨསངྐརཏོ ཋཔནཉྩ ཨཏྠཏོ དེསནཱ ཨེཝཱཏི ཨཱཧ ‘‘སུཀཐིཏཱ’’ཏི. ཨིཛ྄ཛྷནཊྛེནཱཏི སམིཛ྄ཛྷནཊྛེན, ནིཔྤཛྫནསྶ ཀཱརཎབྷཱཝེནཱཏི ཨཏྠོ. པཏིཊྛཱནཊྛེནཱཏི ཨདྷིཊྛཱནཊྛེན. ཨིདྡྷིཡཱ པཱདོཏི ཨིདྡྷིཔཱདོ, ཨིདྡྷིཡཱ ཨདྷིགམུཔཱཡོཏི ཨཏྠོ. ཏེན ཧི ཡསྨཱ ཨུཔརཱུཔརི ཝིསེསསངྑཱཏཾ ཨིདྡྷིཾ པཛྫནྟི པཱཔུཎནྟི, ཏསྨཱ ‘‘པཱདོ’’ཏི ཝུཙྩཏི. ཨིཛ྄ཛྷཏཱིཏི ཨིདྡྷི, སམིཛ྄ཛྷཏི ནིཔྤཛྫཏཱིཏི ཨཏྠོ. ཨིདྡྷི ཨེཝ པཱདོ ཨིདྡྷིཔཱདོ, ཨིདྡྷིཀོཊྛཱསོཏི ཨཏྠོ. ཨེཝཾ ཏཱཝ ‘‘ཙཏྟཱརོ ཨིདྡྷིཔཱདཱ’’ཏི ཨེཏྠ ཨཏྠོ ཝེདིཏབྦོ. ཨིདྡྷིཔཧོནཀཏཱཡཱཏི ཨིདྡྷིཡཱ ནིཔྥཱདནེ སམཏྠབྷཱཝཱཡ. ཨིདྡྷིཝིསཝིཏཱཡཱཏི ཨིདྡྷིཡཱ ནིཔྥཱདནེ ཡོགྱབྷཱཝཱཡ. ཨནེཀཏྠཏྟཱ ཧི དྷཱཏཱུནཾ ཡོགྱཏྠོ ཝི-པུབྦོ ¶ སུ-སདྡོ, ཝིསཝནཾ ཝཱ པཛྫནཾ ཝིསཝིཏཱ, ཏཏྠ ཀཱམཀཱརིཏཱ ཝིསཝིཏཱ. ཏེནཱཧ ‘‘པུནཔྤུན’’ནྟིཨཱདི. ཨིདྡྷིཝིཀུབྦནཏཱཡཱཏི ཝིཀུབྦནིདྡྷིཡཱ ཝིཝིདྷརཱུཔཀརཎཱཡ. ཏེནཱཧ ‘‘ནཱནཔྤཀཱརཏོ ཀཏྭཱ དསྶནཏྠཱཡཱ’’ཏི.

‘‘ཚནྡཉྩ བྷིཀྑུ ཨདྷིཔཏིཾ ཀརིཏྭཱ ལབྷཏི སམཱདྷིཾ, ལབྷཏི ཙིཏྟསྶེཀགྒཏཾ, ཨཡཾ ཝུཙྩཏི ཚནྡསམཱདྷཱི’’ཏི (ཝིབྷ. ༤༣༢) ཨིམཱཡ པཱལི༹ཡཱ ཚནྡཱདྷིཔཏི སམཱདྷི ཚནྡསམཱདྷཱིཏི ཨདྷིཔཏིསདྡལོཔཾ ཀཏྭཱ སམཱསོ ཝུཏྟོཏི ཝིཉྙཱཡཏི, ཨདྷིཔཏིསདྡཏྠདསྶནཝསེན པན ‘‘ཚནྡཧེཏུཀོ, ཚནྡཱདྷིཀོ ཝཱ སམཱདྷི ཚནྡསསམཱདྷཱི’’ཏི ཨཊྛཀཐཱཡཾཝུཏྟནྟི ཝེདིཏབྦཾ. ‘‘པདྷཱནབྷཱུཏཱཏི ཝཱིརིཡབྷཱུཏཱ’’ཏི ཀེཙི ཝདནྟི. སངྑཏསངྑཱརཱདིནིཝཏྟནཏྠཉྷི པདྷཱནགྒཧཎནྟི. ཨཐ ཝཱ ཏཾ ཏཾ ཝིསེསཾ སངྑརོཏཱིཏི སངྑཱརོ, སབྦམྤི ཝཱིརིཡཾ. ཏཏྠ ཙཏུཀིཙྩསཱདྷཀཏོ ཨཉྙསྶ ནིཝཏྟནཏྠཾ པདྷཱནགྒཧཎནྟི པདྷཱནབྷཱུཏཱ སེཊྛབྷཱུཏཱཏི ཨཏྠོ. ཙཏུབྦིདྷསྶ པན ཝཱིརིཡསྶ ཨདྷིཔྤེཏཏྟཱ བཧུཝཙནནིདྡེསོ ཀཏོ. ཝིསུཾ སམཱསཡོཛནཝསེན ཡོ པུབྦེ ཨིདྡྷིཔཱདཏྠོ པཱདསྶ ཨུཔཱཡཏྠཏཾ, ཀོཊྛཱསཏྠཏཉྩ གཧེཏྭཱ ཡཐཱཡོགཝསེན ཨིདྷ ¶ ཝུཏྟོ, སོ ཝཀྑམཱནཱནཾ པཊིལཱབྷཔུབྦབྷཱགཱནཾ ཀཏྟུཀརཎིདྡྷིབྷཱཝཾ, ཨུཏྟརཙཱུལ༹བྷཱཛནཱིཡེ ཝཱ ཝུཏྟེཧི ཚནྡཱདཱིཧི ཨིདྡྷིཔཱདེཧི སཱདྷེཏབྦཱཡ ཨིདྡྷིཡཱ ཀཏྟིདྡྷིབྷཱཝཾ, ཚནྡཱདཱིནཉྩ ཀརཎིདྡྷིབྷཱཝཾ སནྡྷཱཡ ཝུཏྟོཏི ཝེདིཏབྦོ, ཏསྨཱ ‘‘ཨིཛ྄ཛྷནཊྛེན ཨིདྡྷཱི’’ཏི ཨེཏྠ ཀཏྟུཨཏྠོ, ཀརཎཏྠོ ཙ ཨེཀཛ྄ཛྷཾ གཧེཏྭཱ ¶ ཝུཏྟོཏི ཀཏྟུཨཏྠཾ ཏཱཝ དསྶེཏུཾ ‘‘ནིཔྥཏྟིཔརིཡཱཡེན ཨིཛ྄ཛྷནཊྛེན ཝཱ’’ཏི ཝཏྭཱ ཨིཏརཾ དསྶེནྟོ ‘‘ཨིཛ྄ཛྷནྟི ¶ ཨེཏཱཡཱ’’ཏིཨཱདིམཱཧ. ཝུཏྟནྟི ཀཏྠ ཝུཏྟཾ? ཨིདྡྷིཔཱདཝིབྷངྒཔཱཋེ. (ཝིབྷ. ༤༣༤) ཏཐཱབྷཱུཏསྶཱཏི ཏེནཱཀཱརེན བྷཱུཏསྶ, ཏེ ཚནྡཱདིདྷམྨེ པཊིལབྷིཏྭཱ ཋིཏསྶཱཏི ཨཏྠོ. ‘‘ཝེདནཱཀྑནྡྷོ’’ཏིཨཱདཱིཧི ཚནྡཱདཡོ ཨནྟོཀཏྭཱ ཙཏྟཱརོཔི ཁནྡྷཱ ཀཐིཏཱ. སེསེསཱུཏི སེསིདྡྷིཔཱདེསུ.

ཝཱིརིཡིདྡྷིཔཱདནིདྡེསེ ‘‘ཝཱིརིཡསམཱདྷིཔདྷཱནསངྑཱརསམནྣཱགཏ’’ནྟི དྭིཀྑཏྟུཾ ཝཱིརིཡཾ ཨཱགཏཾ. ཏཏྠ པུརིམཾ སམཱདྷིཝིསེསནཾ ‘‘ཝཱིརིཡཱདྷིཔཏི སམཱདྷི ཝཱིརིཡསམཱདྷཱི’’ཏི, དུཏིཡཾ སམནྣཱགམངྒདསྶནཾ. དྭེཡེཝ ཧི སབྦཏྠ སམནྣཱགམངྒཱནི, སམཱདྷི, པདྷཱནསངྑཱརོ ཙ. ཚནྡཱདཡོ ཧི སམཱདྷིཝིསེསནཱནི, པདྷཱནསངྑཱརོ པན པདྷཱནཝཙནེནེཝ ཝིསེསིཏོ, ན ཚནྡཱདཱིཧཱིཏི ན ཨིདྷ ཝཱིརིཡཱདྷིཔཏིཏཱ པདྷཱནསངྑཱརསྶ ཝུཏྟཱ ཧོཏི. ཝཱིརིཡཉྩ སམཱདྷིཾ ཝིསེསེཏྭཱ ཋིཏམེཝ, སམནྣཱགམངྒཝསེན པན པདྷཱནསངྑཱརཝཙནེན ཝུཏྟནྟི ནཱཔི དྭཱིཧི ཝཱིརིཡེཧི སམནྣཱགམོ ཝུཏྟོ ཧོཏི. ཡསྨཱ པན ཚནྡཱདཱིཧི ཝིསིཊྛོ སམཱདྷི, ཏཐཱཝིསིཊྛེནེཝ ཙ ཏེན སམྤཡུཏྟོ པདྷཱནསངྑཱརོ, སེསདྷམྨཱ ཙ, ཏསྨཱ སམཱདྷིཝིསེསནཱནཾ ཝསེན ཙཏྟཱརོ ཨིདྡྷིཔཱདཱ ཝུཏྟཱ, ཝིསེསནབྷཱཝོ ཙ ཚནྡཱདཱིནཾ ཏཾཏཾཨཝསྶཡདསྶནཝསེན ཧོཏཱིཏི ‘‘ཚནྡསམཱདྷི…པེ… ཨིདྡྷིཔཱད’’ནྟི ཨེཏྠ ནིསྶཡཏྠེཔི པཱད-སདྡེ ཨུཔཱཡཏྠེན ཚནྡཱདཱིནཾ ཨིདྡྷིཔཱདཏཱ ཝུཏྟཱ ཧོཏི. ཏེནེཝ ཧི ཨབྷིདྷམྨེ ཨུཏྟརཙཱུལ༹བྷཱཛནཱིཡེ (ཝིབྷ. ༤༥༦) ‘‘ཙཏྟཱརོ ཨིདྡྷིཔཱདཱ ཚནྡིདྡྷིཔཱདོ’’ཏིཨཱདིནཱ ཚནྡཱདཱིནམེཝ ཨིདྡྷིཔཱདཏཱ ཝུཏྟཱ. པཉྷཔུཙྪཀེ (ཝིབྷ. ༤༥༧ ཨཱདཡོ) ‘‘ཙཏྟཱརོ ཨིདྡྷིཔཱདཱ ཨིདྷ བྷིཀྑུ ཚནྡསམཱདྷཱི’’ཏིཨཱདིནཱ ¶ ཙ ཨུདྡེསཾ ཀཏྭཱཔི པུན ཚནྡཱདཱིནཾཡེཝ ཀུསལཱདིབྷཱཝོ ཝིབྷཏྟོ. ཨུཔཱཡིདྡྷིཔཱདདསྶནཏྠམེཝ ཧི ནིསྶཡིདྡྷིཔཱདདསྶནཾ ཀཏཾ, ཨཉྙཐཱ ཙཏུབྦིདྷཏཱ ན སིཡཱཏི. ཨཡམེཏྠ པཱལི༹ཝསེན ཨཏྠཝིནིཙྪཡོ ཝེདིཏབྦོ. ཨིདཱནི པཊིལཱབྷཔུབྦབྷཱགཱནཾ ཝསེན ཨིདྡྷིཔཱདེ ཝིབྷཛིཏྭཱ དསྶེཏུཾ ‘‘ཨཔིཙཱ’’ཏིཨཱདི ¶ ཝུཏྟཾ, ཏཾ སུཝིཉྙེཡྻམེཝ. ཨིདྷ ཨིདྡྷིཔཱདཀཐཱ སངྑེཔེནེཝ ཝུཏྟཱཏི ཨཱཧ ‘‘ཝིཏྠཱརེན པན…པེ… ཝུཏྟཱ’’ཏི.

ཀེཙཱིཏི ཨབྷཡགིརིཝཱསིནོ. ཏེསུ ཧི ཨེཀཙྩེ ‘‘ཨིདྡྷི ནཱམ ཨནིཔྥནྣཱ’’ཏི ཝདནྟི, ཨེཀཙྩེ ‘‘ཨིདྡྷིཔཱདོ པན ཨནིཔྥནྣོ’’ཏི ཝདནྟི, ཨནིཔྥནྣོཏི ཙ པརམཏྠཏོ ཨསིདྡྷོ, ནཏྠཱིཏི ཨཏྠོ. ཨཱབྷཏོཏི ཨབྷིདྷམྨཔཱཋཏོ (ཝིབྷ. ༤༥༨) དཱིགྷནིཀཱཡཊྛཀཐཱཡཾ (དཱི. ནི. ཨཊྛ. ༢.༢༨༧) ཨཱནཱིཏོ པུརིམནཡཏོ ཨཉྙེནཱཀཱརེན དེསནཱཡ པཝཏྟཏྟཱ. ཚནྡོ ཨེཝ ཨིདྡྷིཔཱདོ ཚནྡིདྡྷིཔཱདོ. ཨེསེཝ ནཡོ སེསེསུཔི. ཨིམེ པནཱཏི ཨིམསྨིཾ སུཏྟེ ཨཱགཏཱ ཨིདྡྷིཔཱདཱ ¶ . རཊྛཔཱལཏྠེརོ (མ. ནི. ༢.༢༩༣; ཨ. ནི. ཨཊྛ. ༡.༡.༢༡༠; ཨཔ. ཨཊྛ. ༢.རཊྛཔཱལཏྠེརཨཔདཱནཝཎྞནཱཡ ཝིཏྠཱརོ) ‘‘ཚནྡེ སཏི ཀཐཾ ནཱནུཛཱནིསྶནྟཱི’’ཏི སཏྟཱཧཾ བྷཏྟཱནི ཨབྷུཉྫིཏྭཱ མཱཏཱཔིཏརོ ཨནུཛཱནཱཔེཏྭཱ པབྦཛིཏྭཱ ཚནྡམེཝ ཨཝསྶཱཡ ལོཀུཏྟརཾ དྷམྨཾ ནིབྦཏྟེསཱིཏི ཨཱཧ ‘‘རཊྛཔཱལཏྠེརོ…པེ… ནིབྦཏྟེསཱི’’ཏི. སོཎཏྠེརོ (མཧཱཝ. ༢༤༣; ཨ. ནི. ༦.༥༥; ཐེརགཱ. ཨཊྛ. ཏེརསནིཔཱཏ; ཨཔ. ཨཊྛ. ༢.སོཎཀོཊིཝཱིསཏྠེརཨཔདཱནཝཎྞནཱཡ ཝིཏྠཱརོ) བྷཱཝནམནུཡུཏྟོ ཨཱརདྡྷཝཱིརིཡོ པརམསུཁུམཱལོ པཱདེསུ ཕོཊེསུ ཛཱཏེསུཔི ཝཱིརིཡཾ ནཔྤཊིཔསྶམྦྷེསཱིཏི ཨཱཧ ‘‘སོཎཏྠེརོ ཝཱིརིཡཾ དྷུརཾ ཀཏྭཱ’’ཏི. སམྦྷཱུཏཏྠེརོ (ཐེརགཱ. ཨཊྛ. ༢.སམྨཱུཏཏྠེརགཱཐཱཝཎྞནཱཡ ཝིཏྠཱརོ) ‘‘ཙིཏྟཝཏོ ཀིཾ ནཱམ ན སིཛ྄ཛྷཏཱི’’ཏི ཙིཏྟཾ པུབྦངྒམཾ ཀཏྭཱ བྷཱཝནཾ ཨཱརཱདྷེསཱིཏི ཨཱཧ ‘‘སམྦྷཱུཏཏྠེརོ ཙིཏྟཾ དྷུརཾ ཀཏྭཱ’’ཏི. མོགྷཏྠེརོ ཝཱིམཾསཾ ཨཝསྶཡི, ཏསྨཱ ཏསྶ བྷགཝཱ ‘‘སུཉྙཏོ ལོཀཾ ཨཝེཀྑསྶཱུ’’ཏི (སུ. ནི. ༡༡༢༥; བུ. ཝཾ. ༥༤.༣༥༣; མཧཱ. ནི. ༡༨༦; ཙཱུལ༹ནི. མོགྷརཱཛམཱཎཝཔུཙྪཱ ༡༤༤; མོགྷརཱཛམཱཎཝཔུཙྪཱནིདྡེསེ ༨༨; ནེཏྟི. ༥; པེཊཀོ. ༢༢, ༣༡) སུཉྙཏཱཀཐཾ ཀཐེསི, པཉྙཱནིསྶིཏམཱནནིགྒཧཏྠཾ, པཉྙཱཡ པརིགྒཧཏྠཉྩ དྭིཀྑཏྟུཾ པུཙྪིཏོ སམཱནོ པཉྷཾ ¶ ཀཐེསི. ཏེནཱཧ ‘‘ཨཱཡསྨཱ མོགྷརཱཛཱ ཝཱིམཾསཾ དྷུརཾ ཀཏྭཱ’’ཏི.

པུནཔྤུནཾ ཚནྡུཔྤཱདནཾ པེསནཾ ཝིཡ ཧོཏཱིཏི ཚནྡསྶ ཨུཔཊྛཱནསདིསཏཱ ཝུཏྟཱ.

པརཀྐམེནཱཏི པརཀྐམསཱིསེན སཱུརབྷཱཝཾ ཝདཏི. ཐཱམབྷཱཝཏོ ཙ ཝཱིརིཡསྶ སཱུརབྷཱཝསདིསཏཱ དཊྛབྦཱ.

ཙིནྟནཔྤདྷཱནཏྟཱ ཙིཏྟསྶ མནྟསཾཝིདྷཱནསདིསཏཱ ཝུཏྟཱ.

ཛཱཏིསམྤཏྟི ¶ ནཱམ ཝིསིཊྛཛཱཏིཏཱ. ‘‘སབྦདྷམྨེསུ ཙ པཉྙཱ སེཊྛཱ’’ཏི ཝཱིམཾསཱཡ ཛཱཏིསམྤཏྟིསདིསཏཱ ཝུཏྟཱ. སམྨོཧཝིནོདནིཡཾ (ཝིབྷ. ཨཊྛ. ༤༣༣) པན ཙིཏྟིདྡྷིཔཱདསྶ ཛཱཏིསམྤཏྟིསདིསཏཱ, ཝཱིམཾསིདྡྷིཔཱདསྶ མནྟབལསདིསཏཱ ཙ ཡོཛིཏཱ.

ཨནེཀཾ ཝིཧིཏཾ ཝིདྷཾ ཨེཏསྶཱཏི ཨནེཀཝིཧིཏནྟི ཨཱཧ ‘‘ཨནེཀཝིདྷ’’ནྟི. ཝིདྷ-སདྡོ ཀོཊྛཱསཔརིཡཱཡོ ‘‘ཨེཀཝིདྷེན ཉཱཎཝཏྠཱུ’’ཏིཨཱདཱིསུ (ཝིབྷ. ༧༥༡) ཝིཡཱཏི ཨཱཧ ‘‘ཨིདྡྷིཝིདྷནྟི ཨིདྡྷིཀོཊྛཱས’’ནྟི.

ཏིཝིདྷཨོཀཱསཱདྷིགམཝཎྞནཱ

༢༨༨. ‘‘སུཁསྶཱ’’ཏི ¶ ཨིདཾ ཏིཎྞམྤི སུཁཱནཾ སཱདྷཱརཎཝཙནནྟི ཨཱཧ ‘‘ཛྷཱནསུཁསྶ མགྒསུཁསྶ ཕལསུཁསྶཱ’’ཏི. ནཱནཔྤནཱཔཏྟཏཱཡ པན ཨཔྤདྷཱནཏྟཱ ཨུཔཙཱརཛ྄ཛྷཱནསུཁསྶ, ཝིཔསྶནཱསུཁསྶ ཙེཏྠ ཨགྒཧཎཾ. པུརིམེསུ ཏཱཝ དྭཱིསུ ཨོཀཱསཱདྷིགམེསུ ཏཱིཎིཔི སུཁཱནི ལབྦྷནྟི, ཏཏིཡེ པན ཀཐནྟི? ཏཏྠ ཀཱམཾ ཏཱིཎི ན ལབྦྷནྟི, དྭེ པན ལབྦྷནྟིཡེཝ. ཡཐཱལཱབྷཝསེན ཧེཏཾ ཝུཏྟཾ. ‘‘སཀྑརཀཐལམྤི མཙྪགུམྦམྤི ཙརནྟམྤི ཏིཊྛནྟམྤཱི’’ཏིཨཱདཱིསུ (དཱི. ནི. ༡.༢༤༩; མ. ནི. ༡.༤༣༣; ༢.༢༥༩; ཨ. ནི. ༡.༤༥, ༤༦) ཝིཡ. སཾསཊྛོཏི སཾསགྒཾ ཨུཔགཏོ སམངྒཱིབྷཱུཏོ, སོ པན ཏེཧི སམནྣཱགཏཙིཏྟོཔི ཧོཏཱིཏི ཝུཏྟཾ ‘‘སམྤཡུཏྟཙིཏྟོ’’ཏི. ཨརིཡདྷམྨནྟི ཨརིཡབྷཱཝཀརཾ དྷམྨཾ. ཨུཔཱཡཏོཏི ཝིདྷིཏོ. པཐཏོཏི མགྒཏོ. ཀཱརཎཏོཏི ཧེཏུཏོ. ཡེན ཧི ཝིདྷིནཱ དྷམྨཱནུདྷམྨཔཊིཔཏྟི ཧོཏི, སོ ¶ ཨུཔེཏི ཨེཏེནཱཏི ཨུཔཱཡོ, སོ ཏདདྷིགམསྶ མགྒབྷཱཝཏོ པཐོ, ཏསྶ ཀརཎཏོ ཀཱརཎནྟི ཙ ཝུཙྩཏི.

‘‘ཨནིཙྩནྟིཨཱདིཝསེན མནསི ཀརོཏཱི’’ཏི སངྑེཔཏོ ཝུཏྟམཏྠཾ ཝིཝརིཏུཾ ‘‘ཡོནིསོ མནསིཀཱརོ ནཱམཱ’’ཏིཨཱདི ཝུཏྟཾ. ཏཏྠ ཨུཔཱཡམནསིཀཱརོཏི ཀུསལདྷམྨཔྤཝཏྟིཡཱ ཀཱརཎབྷཱུཏོ མནསིཀཱརོ. པཐམནསིཀཱརོཏི ཏསྶ ཨེཝ མགྒབྷཱུཏོ མནསིཀཱརོ. ཨནིཙྩེཏི ཨཱདིཨནྟཝནྟཏཱཡ, ཨནཙྩནྟིཀཏཱཡ ཙ ཨནིཙྩེ ཏེབྷཱུམཀེ སངྑཱརེ ‘‘ཨནིཙྩ’’ནྟི མནསིཀཱརོཏི ཡོཛནཱ. ཨེསེཝ ནཡོ སེསེསུཔི. ཨཡཾ པན ཝིསེསོ ཏསྨིཾཡེཝ ཨུདཡབྦཡཔཊིཔཱིལ༹ནཏཱཡ དུཀྑནཏོ, དུཀྑམཏོ ཙ དུཀྑེ, ཨཝསཝཏྟནཏྠེན, ཨནཏྟསབྷཱཝཏཱཡ ཙ ཨནཏྟནི, ཨསུཙིསབྷཱཝཏཱཡ ¶ ཨསུབྷེ. སབྦམྤི ཧི ཏེབྷཱུམཀཾ སངྑཏཾ ཀིལེསཱསུཙིཔགྒྷརཎཏོ ‘‘ཨསུབྷ’’ནྟྭེཝ ཝཏྟུཾ ཨརཧཏི. སཙྩཱནུལོམིཀེན ཝཱཏི སཙྩཱབྷིསམཡསྶ ཨནུལོམནཝསེན. ‘‘ཙིཏྟསྶ ཨཱཝཊྚནཱ’’ཏིཨཱདིནཱ ཨཱཝཛྫནཱཡ པཙྩཡབྷཱུཏཱ ཏཏོ པུརིམུཔྤནྣཱ མནོདྭཱརིཀཱ ཀུསལཛཝནཔྤཝཏྟི ཕལཝོཧཱརེནེཝ ཏཐཱ ཝུཏྟཱ. ཏསྶཱ ཧི ཝསེན སཱ ཀུསལུཔྤཏྟིཡཱ ཨུཔནིསྶཡོ ཧོཏཱིཏི. ཨཱཝཛྫནཱ ཧི བྷཝངྒཙིཏྟཾ ཨཱཝཊྚེཏཱིཏི ཙིཏྟསྶ ཨཱཝཊྚནཱ, ཨནུ ཨནུ ཨཱཝཊྚེཏཱིཏི ཨནྭཱཝཊྚནཱ. བྷཝངྒཱརམྨཎཏོ ཨཉྙཾ ཨཱབྷུཛཏཱིཏི ཨཱབྷོགོ. སམནྣཱཧརཏཱིཏི སམནྣཱཧཱརོ. ཏདེཝཱརམྨཎཾ ཨཏྟཱནཾ ཨནུབནྡྷིཏྭཱ ཨནུབནྡྷིཏྭཱ ཨུཔྤཛྫམཱནེ མནསི ཀརོཏི ཋཔེཏཱིཏི མནསིཀཱརོ. ཨཡཾ ཝུཙྩཏཱིཏི ཨཡཾ ཨུཔཱཡམནསིཀཱརལཀྑཎོ ཡོནིསོམནསིཀཱརོ ནཱམ ཝུཙྩཏི, ཡསྶ ཝསེན པུགྒལོ དུཀྑཱདཱིནི སཙྩཱནི ཨཱཝཛྫིཏུཾ སཀྐོཏི.

ཨསཾསཊྛོཏི ¶ ན སཾསཊྛོ ཀཱམཱདཱིཧི ཝིཝིཏྟོ ཝིནཱབྷཱུཏོ. ཀཱམཱདིཝིསཾསགྒཧེཏུ ཨུཔྤཛྫནཀསུཁཾ ནཱམ ཝིཝེཀཛཾ པཱིཏིསུཁནྟི ¶ ཨཱཧ ‘‘པཋམཛ྄ཛྷཱནསུཁ’’ནྟི. ཀཱམཾ པཋམཛ྄ཛྷཱནསུཁམྤི སོམནསྶམེཝ, སུཏྟེསུ པན ཏཾ ཀཱཡིཀསུཁསྶཱཔི པཙྩཡབྷཱཝཏོ ཝིསེསཏོ ‘‘སུཁ’’ནྟྭེཝ ཝུཙྩཏཱིཏི ཨིདྷཱཔི ཛྷཱནབྷཱུཏཾ སོམནསྶཾ སུཁནྟི, ཨིཏརཾ སོམནསྶཾ. ཏེན ཝུཏྟཾ ‘‘སུཁཱ’’ཏི. ཧེཏུམྷི ནིསྶཀྐཝཙནནྟི ཨཱཧ ‘‘ཛྷཱནསུཁཔཙྩཡཱ’’ཏི. ཨཔརཱཔརཾ སོམནསྶནྟི ཛྷཱནཱདྷིགམཧེཏུ པཙྩཝེཀྑཎཱདིཝསེན པུནཔྤུནཾ ཨུཔྤཛྫནཀསོམནསྶཾ.

པམོདནཾ པམུདོ, ཏརུཎཔཱིཏི, ཏཏོ པམུདཱ. ‘‘པཱམོཛྫཾ པཱིཏཏྠཱཡཱ’’ཏིཨཱདཱིསུ ཏརུཎཔཱིཏི ‘‘པཱམོཛྫ’’ནྟི ཝུཙྩཏི, ཨིདྷ པན པཀཊྛོ མུདོ པམུདོ པཱམོཛྫནྟི ཨདྷིཔྤེཏཾ, ཏཉྩ སོམནསྶརཧིཏཾ ནཏྠཱིཏི ཨཝིནཱབྷཱཝིཏཱཡ ‘‘བལཝཏརཾ པཱིཏིསོམནསྶ’’ནྟི ཝུཏྟཾ. ཛྷཱནསྶ ཨུཛུཝིཔཙྩནཱིཀཏཾ སནྡྷཱཡ ‘‘པཉྩ ནཱིཝརཎཱནི ཝིཀྑམྦྷེཏྭཱ’’ཏི ཝུཏྟཾ. ཛྷཱནཾ པན ཏདེཀཊྛེ སབྦེཔི ཀིལེསེ, སབྦེཔི ཨཀུསལེ དྷམྨེ ཝིཀྑམྦྷེཏིཡེཝ, ཨཏྟནོ ཨོཀཱསཾ གཧེཏྭཱ ཏིཊྛཏི པཊིཔཀྑདྷམྨེཧི ཨནབྷིབྷཝནཱིཡཏོ. ཏསྨཱཏི ཨོཀཱསགྒཧཎཏོ, ལདྡྷོཀཱསཏཱཡཱཏི ཨཏྠོ. མགྒཕལསུཁཱདྷིགམཱཡ ཨོཀཱསབྷཱཝཏོ ཝཱ ཨོཀཱསོ, ཨསྶ ཨདྷིགམོ ཨོཀཱསཱདྷིགམོ. པུརིམཔཀྑེ པན ཨོཀཱསཾ ཨཝསརཾ ཨདྷིགཙྪཏི ཨེཏེནཱཏི ཨོཀཱསཱདྷིགམོ.

རཱུཔསབྷཱཝཏཱཡ ¶ , ཨེཀནྟརཱུཔཱདྷཱིནཝུཏྟིཏཱཡ, སཝིཔྥཱརིཀཏཱཡ ཙ ཨཱནཱཔཱནཝིཏཀྐཝིཙཱརཱནཾ ཐཱུལབྷཱཝཾ ཨནུཛཱནནྟོ ‘‘ཀཱཡཝཙཱིསངྑཱརཱ ཏཱཝ ཨོལཱ༹རིཀཱ ཧོནྟཱུ’’ཏི ཨཱཧ. ཏབྦིདྷུརཏཱཡ པན ཨེཀཙྩཱནཾ ཝེདནཱསཉྙཱནཾ ཐཱུལཏཾ ཨནནུཛཱནནྟོ ‘‘ཙིཏྟསངྑཱརཱ ཀཐཾ ཨོལཱ༹རིཀཱ’’ཏི ཨཱཧ. ཨིཏརོ ‘‘ཨཔྤཧཱིནཏྟཱ’’ཏི ཀཱརཎཾ ཝཏྭཱ ‘‘ཀཱཡསངྑཱརཱ ཧཱི’’ཏིཨཱདིནཱ ཏམཏྠཾ ཝིཝརཏི. ཏེཏི ཙིཏྟསངྑཱརཱ. ཨཔྤཧཱིནཱ སངྑཱརཱ ལབྦྷམཱནསངྑཱརནིམིཏྟཏཱཡ ‘‘ཨོལཱ༹རིཀཱ’’ཏི ཝཏྟུཾ ཨརཧནྟི, པཧཱིནཱ པན ཏདབྷཱཝཏོ ‘‘སུཁུམཱ’’ཏི ཨཱཧ ‘‘པཧཱིནེ ཨུཔཱདཱཡ ¶ ཨཔྤཧཱིནཏྟཱ ཨོལཱ༹རིཀཱ ནཱམ ཛཱཏཱ’’ཏི. པཱལི༹ཡཾ ‘‘ཀཱཡསངྑཱརཱནཾ པཊིཔྤསྶདྡྷིཡཱ’’ཏི ཝུཏྟཏྟཱ ‘‘སུཁནྟི ཙཏུཏྠཛ྄ཛྷཱནིཀཕལསམཱཔཏྟིསུཁ’’ནྟི ཝུཏྟཾ. ‘‘ཙིཏྟསངྑཱརཱནཾ པཊིཔྤསྶདྡྷིཡཱ’’ཏི པན ཝུཏྟཏྟཱ ‘‘ནིརོདྷཱ ཝུཊྛཧནྟསྶཱ’’ཏི ཝུཏྟཾ. ཝཙཱིསངྑཱརཔཊིཔྤསྶདྡྷི ཀཱཡསངྑཱརཔཊིཔྤསྶདྡྷིཡཱཝ སིདྡྷཱཏི ཝེདིཏབྦཱ. ཏེནེཝཱཧ ‘‘དུཏིཡ…པེ… ཝིསུཾ ན ཝུཏྟཱནཱི’’ཏི. པཱལི༹ཡཾ པན ཨཏྠཏོ སིདྡྷཱཔི སུཔཱཀཊབྷཱཝེན ཝིབྷཱཝེཏུཾ སརཱུཔཏོ གཎྷཱཏི. ན ཧི ཨརིཡཝིནཡེ ཨཏྠཱཔཏྟིཝིབྷཱཝནཱ ཨབྷིདྷམྨདེསནཱཡ པཀཏཱིཏི. ཡཐཱ ནཱིཝརཎཝིཀྑམྦྷནཉྩ པཋམསྶ ཛྷཱནསྶ ཨདྷིགམཱཡ ཨུཔཱཡོ, ཨེཝཾ སུཁདུཀྑཝིཀྑམྦྷནཾ ཙཏུཏྠསྶ ¶ ཛྷཱནསྶ ཨདྷིགམཱཡ ཨུཔཱཡོཏི ‘‘ཙཏུཏྠཛ྄ཛྷཱནཾ སུཁཾ དུཀྑཾ ཝིཀྑམྦྷེཏྭཱ’’ཏི ཝུཏྟཾ. སེསཾ ཧེཊྛཱ ཝུཏྟནཡམེཝ.

ཨཝིཛྫཱརཱགཱདཱིཧི སཧ ཝཛྫེཧཱིཏི སཱཝཛྫཾ, ཨཀུསལཾ, ཏདབྷཱཝཏོ ཨནཝཛྫཾ ཀུསལཾ. ཨཏྟནོ ཧིཏསུཁཾ ཨཱཀངྑནྟེན སེཝནཱིཡཏོ སེཝིཏབྦཾ, ཀུསལཾ, ཏབྦིཔརིཡཱཡཏོ ན སེཝིཏབྦཾ, ཨཀུསལཾ. ལཱམཀབྷཱཝེན ཧཱིནཾ, ཨཀུསལཾ, སེཊྛབྷཱཝེན པཎཱིཏཾ, ཀུསལནྟི སཱཝཛྫདུཀཱདཡོ ཏཡོཔི དུཀཱ ཡཐཱརཧཾ ཨེཏེསཾ ཀུསལཱཀུསལཀམྨཔཐཱནཾ ཝསེནེཝ ཝེདིཏབྦཱ. སབྦནྟི ཡཐཱཝུཏྟཾ སབྦཾ ཙཏཱུཧི དུཀེཧི སངྒཧིཏཾ དྷམྨཛཱཏཾ. ཡཐཱརཧཾ ཀཎྷཉྩ སུཀྐཉྩ པཊིདྭནྡིབྷཱཝཏོ, སཔྤཊིབྷཱགཉྩ ཨཔྤཊིབྷཱགཉྩ ཨདྭཡབྷཱཝཏོ. ཝཊྚཔཊིཙྪཱདིཀཱ ཨཝིཛྫཱ པཧཱིཡཏི ཙཏུནྣཾ ཨརིཡསཙྩཱནཾ སམྨདེཝ པཊིཝིཛ྄ཛྷནཏོ. ཏཏོ ཨེཝ ཨརཧཏྟམགྒཝིཛྫཱ ཨུཔྤཛྫཏི. སུཁནྟི ཨེཝཾ ཀམྨཔཐམུཁེན ཏེབྷཱུམཀདྷམྨེ སམྨསིཏྭཱ ཝིཔསྶནཾ ཨུསྶུཀྐཱཔེཏྭཱ མགྒཔཊིཔཱཊིཡཱ ཨརཧཏྟེ པཏིཊྛཧནྟསྶ ཡཾ ཨརཧཏྟམགྒསུཁཉྩེཝ ཨརཧཏྟཕལསུཁཉྩ, ཏཾ ཨིདྷ ‘‘སུཁ’’ནྟི ཨདྷིཔྤེཏཾ. ཨནྟོགདྷཱ ཨེཝ ནཱནནྟརིཡབྷཱཝཏོ.

ཨཊྛཏིཾསཱརམྨཎཝསེནཱཏི ¶ ¶ པཱལི༹ཡཾ ཨཱགཏཱནཾ ཨཊྛཏིཾསཱཡ ཀམྨཊྛཱནཱནཾ ཝསེན. ཝིཏྠཱརེཏྭཱ ཀཐེཏབྦཱ པཋམཛ྄ཛྷཱནཱདིཝསེན ཨཱགཏཏྟཱཏི ཨདྷིཔྤཱཡོ. ‘‘ཀཐ’’ནྟིཨཱདིནཱ ཏམེཝ ཝིཏྠཱརེཏྭཱ ཀཐནཾ ནཡཏོ དསྶེཏི. ‘‘ཙཏུཝཱིསཏིཡཱ ཋཱནེསཱུ’’ཏིཨཱདཱིསུ ཡཾ ཝཏྟབྦཾ, ཏཾ མཧཱཔརིནིབྦཱནཝཎྞནཱཡཾ (དཱི. ནི. ཨཊྛ. ༢.༢༡༩) ཝུཏྟམེཝ. ‘‘ནིརོདྷསམཱཔཏྟིཾ པཱཔེཏྭཱ’’ཏི ཨིམིནཱ ཨརཱུཔཛ྄ཛྷཱནཱནིཔི གཧིཏཱནི ཧོནྟི ཏེཧི ཝིནཱ ནིརོདྷསམཱཔཏྟིསམཱཔཛྫནསྶ ཨསམྦྷཝཏོ, ཙཏུཏྠཛ྄ཛྷཱནསབྷཱཝཏྟཱ ཙ ཏེསཾ. དས ཨུཔཙཱརཛ྄ཛྷཱནཱནཱིཏི ཋཔེཏྭཱ ཀཱཡགཏཱསཏིཾ ཨཱནཱཔཱནཉྩ ཨཊྛ ཨནུསྶཏིཡོ, སཉྙཱཝཝཏྠཱནཉྩཱཏི དས ཨུཔཙཱརཛ྄ཛྷཱནཱནི. ཨདྷིསཱིལཾ ནཱམ སམཱདྷིསཾཝཏྟནིཡནྟི ཏསྶ ཧེཊྛིམནྟེན པཋམཛ྄ཛྷཱནཾ པརིཡོསཱནནྟི ཝུཏྟཾ ‘‘ཨདྷིསཱིལསིཀྑཱ པཋམཾ ཨོཀཱསཱདྷིགམཾ བྷཛཏཱི’’ཏི. ཨདྷིཙིཏྟཾ ནཱམ ཙཏུཏྠཛ྄ཛྷཱནནིཊྛཾ ཏདནྟོགདྷཏྟཱ ཨརཱུཔཛ྄ཛྷཱནཱནཾ, ཏཔྤརིཡོསཱནཏྟཱ ཕལཛ྄ཛྷཱནཱནནྟི ཝུཏྟཾ ‘‘ཨདྷིཙིཏྟསིཀྑཱ དུཏིཡ’’ནྟི. མཏྠཀཔྤཏྟཱ ཨདྷིཔཉྙཱསིཀྑཱ ནཱམ ཨགྒམགྒཝིཛྫཱཏི ཨཱཧ ‘‘ཨདྷིཔཉྙཱསིཀྑཱ ཏཏིཡ’’ནྟི. སིཀྑཏྟཡཝསེན ཏཡོ ཨོཀཱསཱདྷིགམེ ནཱིཧརནྟེན ཡཐཱརཧཾ ཏཾཏཾསུཏྟཝསེནཔི ནཱིཧརིཏབྦནྟི དསྶེནྟོ ‘‘སཱམཉྙཕལེཔཱི’’ཏིཨཱདིམཱཧ.

ཡདགྒེན ཙ ཏིསྶོ སིཀྑཱ ཡཐཱཀྐམཾ ཏཡོ ཨོཀཱསཱདྷིགམེ བྷཛནྟི, ཏདགྒེན ཏཔྤདྷཱནཏྟཱ ཡཐཱཀྐམཾ ཏཱིཎི པིཊཀཱནི ཏེ བྷཛནྟཱིཏི དསྶེཏུཾ ‘‘ཏཱིསུ པནཱ’’ཏིཨཱདི ཝུཏྟཾ. ཏཱིཎི ¶ པིཊཀཱནི ཝིབྷཛིཏྭཱཏི ཏིཎྞཾ ཨོཀཱསཱདྷིགམཱནཾ ཝསེན ཡཐཱནུཔུབྦཾ ཏཱིཎི པིཊཀཱནི ཝིཏྠཱརེཏྭཱ ཀཐེཏུཾ ལབྷིསྶཱམཱཏི. སམོདྷཱནེཏྭཱཏི སམཱཡོཛེཏྭཱ ཏཏྠ ཝུཏྟམཏྠཾ ཨིམསྶ སུཏྟསྶ ཨཏྠབྷཱཝེན སམཱནེཏྭཱ. དུཀྐཐིཏནྟི ཨསམྦནྡྷཀཐནེན, ཨཏིཔཔཉྩཀཐནེན ཝཱ དུཊྛུ ཀཐིཏནྟི ན སཀྐཱ ཝཏྟུཾ ཏཐཱཀཐནསྶེཝ སུཀཐནབྷཱཝཏོཏི ཨཱཧ ‘‘ཏེཔིཊཀཾ…པེ… སུཀཐིཏཾ ཧོཏཱི’’ཏི.

ཙཏུསཏིཔཊྛཱནཝཎྞནཱ

༢༨༩. ན ཀེཝལཾ ཨབྷིདྷམྨཔརིཡཱཡེནེཝ ཀུསལཊྛོ གཧེཏབྦོ, ཨཐ ཁོ བཱཧིཏིཀཔརིཡཱཡེན པཱིཏི ཨཱཧ ‘‘ཕལཀུསལསྶ ཙཱ’’ཏི. ཁེམཊྛེནཱཏི ཙཏཱུཧིཔི ཡོགེཧི ཨནུཔདྡཝབྷཱཝེན ¶ . སམྨཱ སམཱཧིཏོཏི སམཐཝསེན ¶ ཙེཝ ཝིཔསྶནཱཝསེན ཙ སུཊྛུ སམཱཧིཏོ. ཨེཀགྒཙིཏྟོཏི ཝིཀྑེཔསྶ དཱུརསམུསྶཱརིཏཏྟཱ ཨེཀགྒཏཾ ཨཝིཀྑེཔཾ པཏྟཙིཏྟོ. ཨཏྟནོ ཀཱཡཏོཏི ཨཛ྄ཛྷཏྟཾ ཀཱཡེ ཀཱཡཱནུཔསྶནཱཝསེན སམྨཱ སམཱཧིཏཙིཏྟོ སམཱནོ ‘‘སམཱཧིཏོ ཡཐཱབྷཱུཏཾ པཛཱནཱཏི པསྶཏཱི’’ཏི (སཾ. ནི. ༣.༥; ༥.༡༠༧༡, ༡༠༧༢; ནེཏྟི. ༤༠; མི. པ. ༡.༡༤) ཝཙནཏོ. ཏཏྠ ཉཱཎདསྶནཾ ནིབྦཏྟེནྟོ ཏཏོ བཧིདྡྷཱ པརསྶ ཀཱཡེཔི ཉཱཎདསྶནཾ ནིབྦཏྟེཏི. ཏེནཱཧ ‘‘པརསྶ ཀཱཡཱབྷིམུཁཾ ཉཱཎཾ པེསེཏཱི’’ཏི. སམྨཱ ཝིཔྤསཱིདཏཱིཏི སམྨཱ སམཱདྷཱནཔཙྩཡེན ཨབྷིཔྤསཱདེན ཉཱཎཱུཔསཉྷིཏེན ཨཛ྄ཛྷཏྟཾ ཀཱཡཾ ཨོཀཔྤེཏི. སབྦཏྠཱཏི སབྦཊྛཱནེསུ. སཏི ཀཐིཏཱཏི ཡོཛནཱ. ལོཀིཡལོཀུཏྟརམིསྶཀཱ ཀཐིཏཱ ཨནུཔསྶནཱཉཱཎདསྶནཱནཾ ཏདུབྷཡསཱདྷཱརཎབྷཱཝཏོ.

སཏྟསམཱདྷིཔརིཀྑཱརཝཎྞནཱ

༢༩༠. ཨེཏྠཱཏི ཨིམིསྶཱ ཀཐཱཡ. ཛྷཱནཀྑསྶ ཝཱིརིཡཙཀྐསྶ ཨརིཡམགྒརཐསྶ སཱིལཾ ཝིབྷཱུསནབྷཱཝེན ཝུཏྟནྟི ཨཱཧ ‘‘ཨལངྐཱརོ པརིཀྑཱརོ ནཱམཱ’’ཏི. སཏྟཧི ནགརཔརིཀྑཱརེཧཱིཏི ནགརཾ པརིཝཱརེཏྭཱ རཀྑཎཀེཧི ཀཏཔརིཀྑེཔོ, པརིཁཱ, ཨུདྡཱཔོ, པཱཀཱརོ, ཨེསིཀཱ, པལིགྷཱ, པཱཀཱརཔཀྑཎྜིལནྟི ཨིམེཧི སཏྟཧི ནགརཔརིཀྑཱརེཧི. སམྦྷརཱིཡཏི ཕལཾ ཨེཏེནཱཏི སམྦྷཱརོ, ཀཱརཎཾ. བྷེསཛྫཉྷི བྱཱདྷིཝཱུཔསམནེན ཛཱིཝིཏསྶ ཀཱརཎཾ. པརིཝཱརཔརིཀྑཱརཝསེནཱཏི པརིཝཱརསངྑཱཏཔརིཀྑཱརཝསེན. པརིཀྑཱརོ ཧི སམྨཱདིཊྛིཡཱདཡོ མགྒདྷམྨཱ སམྨཱསམཱདྷིསྶ སཧཛཱཏཱདིཔཙྩཡབྷཱཝེན པརིཀརཎཏོ ཨབྷིསངྑརཎཏོ. ཨུཔེཙྩ ནིསྶཱིཡཏཱིཏི ཨུཔནིསཱ, སཧ ཨུཔནིསཱཡཱཏི སཨུཔནིསོཏི ¶ ཨཱཧ ‘‘སཨུཔནིསྶཡོ’’ཏི, སཧཀཱརཱིཀཱརཎབྷཱུཏོ དྷམྨསམཱུཧོ ཨིདྷ ‘‘ཨུཔནིསྶཡོ’’ཏི ¶ ཨདྷིཔྤེཏོ. སམྨཱ པསཏྠཱ སུནྡརཱ དིཊྛི ཨེཏསྶཱཏི སམྨཱདིཊྛི, པུགྒལོ, ཏསྶ སམྨཱདིཊྛིསྶ. སོ པན ཡསྨཱ པཏིཊྛིཏསམྨཱདིཊྛིཀོ, ཏསྨཱ ཝུཏྟཾ ‘‘སམྨཱདིཊྛིཡཾ ཋིཏསྶཱ’’ཏི. སམྨཱསངྐཔྤོ པཧོཏཱིཏི མགྒསམྨཱདིཊྛིཡཱ དུཀྑཱདཱིསུ པརིཛཱནནཱདིཀིཙྩཾ སཱདྷེནྟིཡཱ ཀཱམཝིཏཀྐཱདིཀེ སམུགྒྷཱཊེནྟོ སམྨཱསངྐཔྤོ ཡཐཱ ཨཏྟནོ ཀིཙྩསཱདྷནེ པཧོཏི, ཏཐཱ པཝཏྟིཾ པནསྶ དསྶེནྟོ ཨཱཧ ‘‘སམྨཱསངྐཔྤོ པཝཏྟཏཱི’’ཏི. ཨེས ནཡོ སབྦཔདེསཱུཏི ‘‘སམྨཱསངྐཔྤསྶ སམྨཱཝཱཙཱ པཧོཏཱི’’ཏིཨཱདཱིསུ སེསཔདེསུ ཡཐཱཝུཏྟམཏྠཾ ཨཏིདིསཏི.

ཨེཏྠ ¶ ཙ ཡསྨཱ ནིབྦཱནཱདྷིགམཱཡ པཊིཔནྣསྶ ཡོགིནོ བཧཱུཔཀཱརཱ སམྨཱདིཊྛི. ཏཐཱ ཧི སཱ ‘‘པཉྙཱཔཛྫོཏོ, པཉྙཱསཏྠ’’ནྟི ཙ ཝུཏྟཱ. ཏཱཡ ཧི སོ ཨཝིཛྫནྡྷཀཱརཾ ཝིདྷམིཏྭཱ ཀིལེསཙོརེ གྷཱཏེནྟོ ཁེམེན ནིབྦཱནཾ པཱཔུཎཱཏི, ཏསྨཱ ཨརིཡམགྒཀཐཱཡཾ སམྨཱདིཊྛི ཨཱདིཏོ གཡ྄ཧཏི, ཨིདྷ པན པུགྒལཱདྷིཊྛཱནདེསནཱཡ ‘‘སམྨཱདིཊྛིསྶཱ’’ཏི ཝུཏྟཾ. ཡསྨཱ པན སམྨཱདིཊྛིཔུགྒལོ ནེཀྑམྨསངྐཔྤཱདིཝསེན སམྨདེཝ སངྐཔྤེཏི, ན མིཙྪཱཀཱམསངྐཔྤཱདིཝསེན, ཏསྨཱ སམྨཱདིཊྛིསྶ སམྨཱསངྐཔྤོ པཧོཏི. ཡསྨཱ ཙ སམྨཱསངྐཔྤོ སམྨཱཝཱཙཱཡ ཨུཔཀཱརཀོ. ཡཐཱཧ ‘‘པུབྦེ ཁོ གཧཔཏི ཝིཏཀྐེཏྭཱ ཝིཙཱརེཏྭཱ པཙྪཱ ཝཱཙཾ བྷིནྡཏཱི’’ཏི, (སཾ. ནི. ༢.༣༤༨) ཏསྨཱ སམྨཱསངྐཔྤསྶ སམྨཱཝཱཙཱ པཧོཏི. ཡསྨཱ པན ‘‘ཨིདཉྩིདཉྩ ཀརིསྶཱམཱ’’ཏི ཧི པཋམཾ ཝཱཙཱཡ སཾཝིདཧིཏྭཱ ཡེབྷུཡྻེན ཏེ ཏེ ཀམྨནྟཱ སམྨཱ པཡོཛཱིཡནྟི, ཏསྨཱ ཝཱཙཱ ཀཱཡཀམྨསྶ ཨུཔཀཱརིཀཱཏི སམྨཱཝཱཙསྶ སམྨཱཀམྨནྟོ པཧོཏི. ཡསྨཱ པན ཙཏུབྦིདྷཾ ཝཙཱིདུཙྩརིཏཾ, ཏིཝིདྷཉྩ ཀཱཡདུཙྩརིཏཾ པཧཱཡ ཨུབྷཡཾ སུཙརིཏཾ པཱུརེནྟསྶེཝ ཨཱཛཱིཝཊྛམཀསཱིལཾ པཱུརཏི, ན ཨིཏརསྶ ¶ , ཏསྨཱ སམྨཱཝཱཙསྶ སམྨཱཀམྨནྟསྶ ཙ སམྨཱཨཱཛཱིཝོ པཧོཏི. ཝིསུདྡྷིདིཊྛིསམུདཱགཏསམྨཱཨཱཛཱིཝསྶ ཡོནིསོ པདྷཱནསྶ སམྦྷཝཏོ སམྨཱཨཱཛཱིཝསྶ སམྨཱཝཱཡཱམོ པཧོཏི. ཡོནིསོ པདཧནྟསྶ ཀཱཡཱདཱིསུ ཙཏཱུསུ ཝཏྠཱུསུ སཏི སཱུཔཊྛིཏཱ ཧོཏཱིཏི སམྨཱཝཱཡཱམསྶ སམྨཱསཏི པཧོཏི. ཡསྨཱ ཨེཝཾ སཱུཔཊྛིཏཱ སཏི སམཱདྷིསྶ ཨུཔཀཱརཱནུཔཀཱརཱནཾ དྷམྨཱནཾ གཏིཡོ སམནྣེསིཏྭཱ པཧོཏི ཨེཀཏྟཱརམྨཎེ ཙིཏྟཾ སམཱདྷཱཏུཾ, ཏསྨཱ སམྨཱསཏིསྶ སམྨཱསམཱདྷི པཧོཏཱིཏི. ཨཡཉྩ ནཡོ པུབྦབྷཱགེ ནཱནཱཀྑཎིཀཱནཾ སམྨཱདིཊྛིཨཱདཱིནཾ ཝསེན ཝུཏྟོ, མགྒཀྑཎེ པན སམྨཱདིཊྛིཨཱདཱིནཾ ཏསྶ ཏསྶ སཧཛཱཏཱདིཝསེན ཝུཏྟོ ‘‘སམྨཱདིཊྛིསྶ སམྨཱསངྐཔྤོ པཧོཏཱི’’ཏིཨཱདཱིནཾ པདཱནམཏྠོ ཡུཏྟོ, ཨཡམེཝ ཙ ཨིདྷཱདྷིཔྤེཏོ. ཏེནཱཧ ‘‘ཨཡཾ པནཏྠོ’’ཏིཨཱདི.

མགྒཉཱཎེཏི མགྒཔརིཡཱཔནྣཉཱཎེ ཋིཏསྶ ཏཾསམངྒིནོ. མགྒཔཉྙཱ ཧི ཙཏུནྣཾ སཙྩཱནཾ སམྨཱདསྶནཊྛེན ‘‘མགྒསམྨཱདིཊྛཱི’’ཏི ཝུཏྟཱ, སཱ ཨེཝ ནེསཾ ཡཱཐཱཝཏོ ཛཱནནཏོ པཊིཝིཛ྄ཛྷནཏོ ཨིདྷ ¶ ‘‘མགྒཉཱཎ’’ནྟིཔི ཝུཏྟཱ. མགྒཝིམུཏྟཱིཏི མགྒེན ཀིལེསཱནཾ ཝིམུཙྩནཾ སམུཙྪེདཔྤཧཱནམེཝ. ཕལསམྨཱདིཊྛི ཨེཝ ¶ ‘‘ཕལསམྨཱཉཱཎ’’ནྟི པརིཡཱཡེན ཝུཏྟཾ, པརིཡཱཡཝཙནཉྩ ཝུཏྟནཡཱནུསཱརེན ཝེདིཏབྦཾ. ཕལཝིམུཏྟི པན པཊིཔྤསྶདྡྷིཔྤཧཱནཾ དཊྛབྦཾ.

ཨམཏསྶ དྭཱརཱཏི ཨརིཡམགྒམཱཧ. སོ པན ཝིནཱ ཙ ཨཱཙརིཡམུཊྛིནཱ ཨནནྟརཾ ཨབཱཧིརཾ ཀརིཏྭཱ ཡཱཝདེཝ མནུསྶེཧི སུཔྤཀཱསིཏཏྟཱ ཝིཝཊོ. དྷམྨཝིནཱིཏཱཏི ཨརིཡདྷམྨེ ཝིནཱིཏཱ. སོ པནེཏྠ ཀིལེསཱནཾ སམུཙྪེདཝིནཡཝསེན ཝེདིཏབྦོཏི ཨཱཧ ‘‘སམྨཱནིཡྻཱནེན ནིཡྻཱཏཱ’’ཏི.

ཨཏྠཱིཏི པུཐུཏྠཝིསཡཾ ནིཔཱཏཔདཾ ‘‘ཨཏྠི ¶ ཨིམསྨིཾ ཀཱཡེ ཀེསཱ’’ཏིཨཱདཱིསུ (དཱི. ནི. ༢.༣༧༧; མ. ནི. ༡.༡༡༠; ༣.༡༥༤; སཾ. ནི. ༤.༡༢༧; ཨ. ནི. ༦.༢༩; ༡༠.༦༠; ཝིབྷ. ༣༥༦; ཁུ. པཱ. ༢.༡.དྭཏྟིཾསཨཱཀཱར; ནེཏྟི. ༤༧) ཝིཡཱཏི ཨཱཧ ‘‘ཨནཱགཱམིནོ ཙ ཨཏྠཱི’’ཏི. ཏེནེཝཱཧ ‘‘ཨཏྠི ཙེཝེཏྠ སཀདཱགཱམིནོ’’ཏི. བཧིདྡྷཱ སཾཡོཛནཔཙྩཡོ ནིབྦཏྟིཧེཏུབྷཱུཏོ པུཉྙབྷཱགོ ཨེཏིསྶཱ ཨཏྠཱིཏི པུཉྙབྷཱགཱ, ཨཏིསཡཝིསིཊྛོ ཙེཏྠ ཨཏྠིཨཏྠོ ཝེདིཏབྦོ. ཨོཏྟཔྤམཱནོཏི ཨུཏྟསནྟོ བྷཱཡནྟོ. ན པན ནཏྠི, ཨཏྠི ཨེཝཱཏི དཱིཔེཏི.

༢༩༡. ཨསྶཱཏི ཝེསྶཝཎསྶ. ལདྡྷི པན ན ཨཏྠི པཊིཝིདྡྷསཙྩཏྟཱ. ‘‘ཨབྷིསམཡེ ཝིསེསོ ནཏྠཱི’’ཏི ཨེཏེན སབྦེཔི སབྦཉྙུགུཎཱ སབྦབུདྡྷཱནཾ སདིསཱ ཨེཝཱཏི དསྶེཏི.

༢༩༢. ཀཱརཎསྶ ཨེཀརཱུཔཏྟཱ ཨིམཱནི པན པདཱནཱིཏི ན ཀེཝལཾ ‘‘ཏཡིདཾ བྲཧྨཙརིཡ’’ནྟིཨཱདཱིནི པདཱནི, ཨཐ ཁོ ‘‘ཨིམམཏྠཾ ཛནཝསབྷོ ཡཀྑོ’’ཏིཨཱདཱིནི པདཱནི པཱིཏི.

ཛནཝསབྷསུཏྟཝཎྞནཱཡ ལཱིནཏྠཔྤཀཱསནཱ.

༦. མཧཱགོཝིནྡསུཏྟཝཎྞནཱ

༢༩༣. པཉྩཀུཎྜལིཀོཏི ¶ ¶ ¶ ཝིསྶཊྛཔཉྩཝེཎིཀོ. ཙཏུམགྒཊྛཱནེསཱུཏི ཙཏུནྣཾ མགྒཱནཾ ཝིནིཝིཛ྄ཛྷིཏྭཱ གཏཊྛཱནེསུ. ཏཏྠ ཧི ཀཏཱ སཱལཱདཡོ ཙཏཱུཧི དིསཱཧི ཨཱགཏམནུསྶཱནཾ ཨུཔབྷོགཀྑམཱ ཧོནྟི. ‘‘ཨེཝརཱུཔཱནཱི’’ཏི ཨིམིནཱ རུཀྑམཱུལསོདྷནཱདཱིནི ཙེཝ ཡཐཱསཏྟི ཨནྣདཱནཱདཱིནི ཙ པུཉྙཱནི སངྒཎྷཱཏི. ‘‘སུཝཎྞཀྑནྡྷསདིསོ ཨཏྟབྷཱཝོ ཨིཊྛོ ཀནྟོ མནཱཔོ ཨཧོསཱི’’ཏི པཱཋོ. སཀཊསཧསྶམཏྟནྟི ཝཱཧསཧསྶམཏྟཾ, ཝཱཧོ པན ཝཱིསཏི ཁཱརཱི, ཁཱརཱི སོལ༹སདོཎམཏྟཱ, དོཎཾ སོལ༹ས ནཱལི༹ཡོ ཝེདིཏབྦཱ. ཀུམྦྷཾ དསམྦཎཱནི. ‘‘སཧསྶནཱལི༹ཡོ’’ཏི ཀེཙི. རཏྟསུཝཎྞཀཎྞིཀནྟི རཏྟསུཝཎྞམཡཾ ཝཊཾསཀཾ.

ཡསྨཱ མཛ྄ཛྷིམཡཱམེ ཨེཝ དེཝཏཱ སཏྠཱརཾ ཨུཔསངྐམིཏུཾ ཨཝསརཾ ལབྷནྟི, ཏསྨཱ ‘‘ཨེཀཀོཊྛཱསཾ ཨཏཱིཏཱཡཱ’’ཏི ཝུཏྟཾ. ཨཏིཀྐནྟཝཎྞོཏི ཨཏིཝིཡ ཀམནཱིཡརཱུཔོ, ཀེཝལཀཔྤནྟི ཝཱ མནཾ ཨཱུནཾ ཨཝསེསཾ, ཨཱིསཀཾ ཨསམཏྟནྟི ཨཏྠོ བྷགཝཏོ ཧི སམཱིཔཊྛཱནཾ མུཉྩིཏྭཱ སབྦོ གིཛ྄ཛྷཀཱུཊཝིཧཱརོ ཏེན ཨོབྷཱསིཏོ. ཏེནཱཧ ‘‘ཙནྡིམཱ ཝིཡཱ’’ཏིཨཱདི.

དེཝསབྷཱཝཎྞནཱ

༢༩༤. རཏནམཏྟཀཎྞིཀརུཀྑནིསྶནྡེནཱཏི རཏནཔྤམཱཎརུཀྑམཡཀཱུཊདཱནཔུཉྙནིསྶནྡེན, ཏསྶ ཝཱ པུཉྙསྶ ནིསྶནྡཕལབྷཱཝེན. ནིབྦཏྟསབྷཱཡནྟི སམུཊྛིཏཨུཔཊྛཱནསཱལཱཡཾ. མཎིམཡཱཏི པདུམརཱགཱདིམཎིམཡཱ. ཨཱཎིཡོཏི ཐམྦྷཏུལཱསངྒྷཱཊཀཱདཱིསུ ཝཱལ༹རཱུཔཱདིསངྒྷཱཊནཀཨཱཎིཡོ.

གནྡྷབྦརཱཛཱཏི གནྡྷབྦཀཱཡིཀཱནཾ དེཝཏཱནཾ རཱཛཱ. ཡེ ¶ ཏཱཝཏིཾསཱནཾ ཨཱསནྣཝཱསིནོ ཙཱཏུམཧཱརཱཛིཀཱ དེཝཱ, ཏེ པུརཏོ ཀརོནྟོ ‘‘དྭཱིསུ དེཝལོཀེསུ དེཝཏཱ པུརཏོ ཀཏྭཱ ནིསིནྣོ’’ཏི ཝུཏྟོ. སེསེསུཔི ཏཱིསུ ཋཱནེསུ ཨེསེཝ ནཡོ.

ནཱགརཱཛཱཏི ¶ ནཱགཱནཾ ཨདྷིཔཏི, ན པན སཡཾ ནཱགཛཱཏིཀོ.

ཨཱསཏི ནིསཱིདཏི ཨེཏྠཱཏི ཨཱསནཾ, ནིསཛྫཊྛཱནནྟི ཨཱཧ ‘‘ནིསཱིདིཏུཾ ཨོཀཱསོ’’ཏི. ‘‘ཨེཏྠཱ’’ཏི པདཾ ནིཔཱཏམཏྟཾ, ཨེཏྠཱཏི ཝཱ ཨེཏསྨིཾ པཱཋེ. ཨཏྠུདྡྷཱརནཡེན ¶ ཝཏྟབྦཾ པུབྦེ ཝུཏྟཾ ཙཏུབྦིདྷམེཝ. ཏཱཝཏིཾསཱ, ཨེཀཙྩེ ཙ ཙཱཏུམཧཱརཱཛིཀཱ ཡཐཱལདྡྷཱཡ སམྤཏྟིཡཱ ཐཱཝརབྷཱཝཱཡ, ཨཱཡཏིཾ སོདྷནཱཡ ཙ པཉྩ སཱིལཱནི རཀྑནྟི, ཏེ ཏསྶ ཝིསོདྷནཏྠཾ པཝཱརཎཱསངྒཧཾ ཀརོནྟི. ཏེན ཝུཏྟཾ ‘‘མཧཱཔཝཱརཎཱཡཱ’’ཏིཨཱདི.

ཝསྶསཧསྶནྟི མནུསྶགཎནཱཡ ཝསྶསཧསྶཾ.

པནྣཔལཱསོཏི པཏིཏཔཏྟོ. ཁཱརཀཛཱཏོཏི ཛཱཏཁུདྡཀམཀུལོ༹. ཡེ ཧི ནཱིལཔཏྟཀཱ ཨཏིཝིཡ ཁུདྡཀཱ མཀུལཱ༹, ཏེ ‘‘ཁཱརཀཱ’’ཏི ཝུཙྩནྟི. ཛཱལཀཛཱཏོཏི ཏེཧིཡེཝ ཁུདྡཀམཀུལེ༹ཧི ཛཱཏཛཱལཀོ སབྦསོ ཛཱལོ ཝིཡ ཛཱཏོ. ཀེཙི པན ‘‘ཛཱལཀཛཱཏོཏི ཨེཀཛཱལོ ཝིཡ ཛཱཏོ’’ཏི ཨཏྠཾ ཝདནྟི. པཱརིཚཏྟཀོ ཀིར ཁཱརཀགྒཧཎཀཱལེ སབྦཏྠཀམེཝ པལླཝིཀོ ཧོཏི, ཏེ ཙསྶ པལླཝཱ པབྷསྶརཔཝཱལ༹ཝཎྞསམུཛྫལཱ ཧོནྟི, ཏེན སོ སབྦསོ སམུཛྫལནྟོ ཏིཊྛཏི. ཀུཊུམལཀཛཱཏོཏི སཉྫཱཏམཧཱམཀུལོ༹. ཀོརཀཛཱཏོཏི སཉྫཱཏསཱུཙིབྷེདོ སམྤཏི ཝིཀསམཱནཱཝཏྠོ. སབྦཔཱལིཕུལློཏི སབྦསོ ཕུལླིཏཝིཀསིཏོ.

ཀནྟནཀཝཱཏོཏི དེཝཱནཾ པུཉྙཀམྨཔཙྩཡཱ པུཔྥཱནཾ ཚིནྡནཀཝཱཏོ. ཀནྟཏཱིཏི ཚིནྡཏི. སམྤཊིཙྪནཀཝཱཏོཏི ཚིནྣཱནཾ ཚིནྣཱནཾ པུཔྥཱནཾ སམྤཊིགྒཎྷནཀཝཱཏོ ¶ . ནཙྩནྟོཏི ནཱནཱཝིདྷབྷཏྟིཾ སནྣིཝེསཝསེན ནཙྩནཾ ཀརོནྟོ. ཨཉྙཏརདེཝཏཱནནྟི ནཱམགོཏྟཝསེན ཨཔྤཉྙཱཏདེཝཏཱནཾ.

རེཎུཝཊྚཱིཏི རེཎུསངྒྷཱཏོ. ཀཎྞིཀཾ ཨཱཧཙྩཱཏི སུདྷམྨཱཡ ཀཱུཊཾ ཨཱཧནྟྭཱ.

ཨཊྛ དིཝསེཏི པཉྩམིཡཱ སདྡྷིཾ པཀྑེ ཙཏྟཱརོ དིཝསེ སནྡྷཱཡ ཝུཏྟཾ. ཡཐཱཝུཏྟེསུ ཨཊྛསུ དིཝསེསུ དྷམྨསྶཝནཾ ནིབདྡྷཾ ཏདཱ པཝཏྟཏཱིཏི ཏཏོ ཨཉྙདཱ ཀཱརིཏཾ སནྡྷཱཡཱཧ ‘‘ཨཀཱལདྷམྨསྶཝནཾ ཀཱརིཏ’’ནྟི. ཙེཏིཡེ ཚཏྟསྶ ཧེཊྛཱ ཀཱཏབྦཝེདིཀཱ ཚཏྟཝེདིཀཱ. ཙེཏིཡཾ པརིཀྑིཔིཏྭཱ པདཀྑིཎཀརཎཊྛཱནཾ ཨནྟོཀཏྭཱ ཀཱཏབྦཝེདིཀཱ པུཊཝེདིཀཱ. ཙེཏིཡསྶ ཀུཙྪིཾ པརིཀྑིཔིཏྭཱ ¶ ཏཾ སམྦནྡྷམེཝ ཀཏྭཱ ཀཱཏབྦཝེདིཀཱ ཀུཙྪིཝེདིཀཱ. སཱིཧརཱུཔཔཱདཀཾ ཨཱསནཾ སཱིཧཱསནཾ. ཨུབྷོསུ པསྶེསུ སཱིཧརཱུཔཡུཏྟཾ སོཔཱནཾ སཱིཧསོཔཱནཾ.

ཨཏྟམནཱ ¶ ཧོནྟི ཨནིཡཱམནཀབྷཱཝཏོ. ཏེནེཝཱཧ ‘‘མཧཱཔུཉྙེ པུརཀྑཏྭཱ’’ཏིཨཱདི. པཝཱརཎཱསངྒཧཏྠཱཡ སནྣིཔཏིཏཱཏི ཝེདིཏབྦཱ ‘‘ཏདཧུཔོསཐེ པནྣརསེ པཝཱརཎཱཡ པུཎྞཱཡ པུཎྞམཱཡ རཏྟིཡཱ’’ཏི (དཱི. ནི. ༢.༢༩༤) ཝཙནཏོ.

༢༩༥. ནཝཧི ཀཱརཎེཧཱིཏི ‘‘ཨིཏིཔི སོ བྷགཝཱ ཨརཧ’’ནྟིཨཱདིནཱ (དཱི. ནི. ༡.༡༥༧, ༢༥༥) ཝུཏྟེཧི ཨརཧཏྟཱདཱིཧི ནཝཧི བུདྡྷཱནུབྷཱཝདཱིཔནེཧི ཀཱརཎེཧི. དྷམྨསྶ ཙཱཏི ཨེཏྠ ཙ-སདྡོ ཨཝུཏྟསམུཙྩཡཏྠོཏི ཏེན སམྤིཎྜིཏམཏྠཾ དསྶེནྟོ ‘‘ཨུཛུཔྤཊིཔནྣཏཱདིབྷེདཾ སངྒྷསྶ ཙ སུཔྤཊིཔཏྟི’’ནྟི ཨཱཧ.

ཨཊྛཡཐཱབྷུཙྩཝཎྞནཱ

༢༩༦. ཡཐཱ ཨནནྟམེཝ ཨཱནཉྩཾ, བྷིསཀྐམེཝ བྷེསཛྫཾ ¶ , ཨེཝཾ ཡཐཱབྷཱུཏཱ ཨེཝ ཡཐཱབྷུཙྩཱཏི པཱལི༹ཡཾ ཝུཏྟནྟི ཨཱཧ ‘‘ཡཐཱབྷུཙྩེཏི ཡཐཱབྷཱུཏེ’’ཏི. ཝཎྞེཏབྦཏོ ཀིཏྟེཏབྦཏོ ཝཎྞཱ, གུཎཱ. ཀཐཾ པཊིཔནྣོཏི ཧེཏུཨཝཏྠཱཡཾ, ཕལཨཝཏྠཱཡཾ, སཏྟཱནཾ ཨུཔཀཱརཱ ཝཏྠཱཡནྟི ཏཱིསུཔི ཨཝཏྠཱསུ ལོཀནཱཐསྶ བཧུཛནཧིཏཱཡ པཊིཔཏྟིཡཱ ཀཐེཏུཀམྱཏཱཔུཙྪཱ. ཏཐཱ ཧི ནཾ ཨཱདིཏོ པཊྛཱཡ ཡཱཝ པརིཡོསཱནཱ སངྑེཔེནེཝ དསྶེནྟོ ‘‘དཱིཔངྐརཔཱདམཱུལེ’’ཏིཨཱདིམཱཧ. ཏཏྠ ཨབྷིནཱིཧརམཱནོཏི ཨབྷིནཱིཧཱརཾ ཀརོནྟོ. ཡཾ པནེཏྠ མཧཱབྷིནཱིཧཱརེ, པཱརམཱིསུ ཙ ཝཏྟབྦཾ, ཏཾ བྲཧྨཛཱལཊཱིཀཱཡཾ (དཱི. ནི. ཊཱི. ༡.༧) ཝུཏྟཾ ཨེཝཱཏི ཏཏྠ ཝུཏྟནཡེནེཝ ཝེདིཏབྦཾ.

‘‘ཁནྟིཝཱདིཏཱཔསཀཱལེ’’ཏིཨཱདི (ཛཱ. ༡.ཁནྟཱིཝཱདཱིཛཱཏཀ) ཧེཏུཨཝཏྠཱཡམེཝ ཨནཉྙསཱདྷཱརཎཱཡ སུདུཀྐརཱཡ བཧུཛནཧིཏཱཡ པཊིཔཏྟིཡཱ ཝིབྷཱཝནཾ. ཡཐཱདྷིཔྤེཏཾ ཧིཏསུཁཾ ཡཱཡ ཀིརིཡཱཡ ཝིནཱ ན ཨིཛ྄ཛྷཏི, སཱཔི ཏདཏྠཱ ཨེཝཱཏི དསྶེཏུཾ ‘‘ཏུསིཏཔུརེ ཡཱཝཏཱཡུཀཾ ཏིཊྛནྟོཔཱི’’ཏིཨཱདི ཝུཏྟཾ.

དྷམྨཙཀྐཔྤཝཏྟནཱདི (སཾ. ནི. ༥.༡༠༨༡; མཧཱཝ. ༡༣; པཊི. མ. ༣.༣༠) པན ནིབྦཏྟིཏཱ བཧུཛནཧིཏཱཡ པཊིཔཏྟི. ཨཱཡུསངྑཱརོསྶཛྫནམྤི ‘‘ཨེཏྟཀཾ ཀཱལཾ ཏིཊྛཱམཱི’’ཏི པཝཏྟིཡཱ བཧུཛནཧིཏཱཡ པཊིཔཏྟི. ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱནཝསེན བཧུཛནཧིཏཱཡ ¶ པཊིཔཏྟི. ཏེནཱཧ ‘‘ཡཱཝསྶཱ’’ཏིཨཱདི. སེསཔདཱནཱིཏི ‘‘བཧུཛནསུཁཱཡཱ’’ཏིཨཱདཱིནི པདཱནི. པཙྪིམནྟི ‘‘ཨཏྠཱཡ ཧིཏཱཡ སུཁཱཡཱ’’ཏི ¶ པདཏྟཡཾ. པུརིམསྶཱཏི ཏཏོ པུརིམསྶ པདཏྟཡསྶ. ཨཏྠོཏི ཨཏྠནིདྡེསོ.

ཡདིཔི ཨཏཱིཏེནངྒེན སམནྣཱགཏཱ སཏྠཱརོ ཨཧེསུཾ, ཏེཔི པན བུདྡྷཱ ཨེཝཱཏི ཨཏྠཏོ ཨམྷཱཀཾ སཏྠཱ ཨནཉྙོཏི ཨཱཧ ‘‘ཨཏཱིཏེཔི བུདྡྷཏོ ཨཉྙཾ ན སམནུཔསྶཱམཱ’’ཏི. ཡཐཱ ཙ ཨཏཱིཏེ, ཨེཝཾ ཨནཱགཏེ ཙཱཏི ཨཡམཏྠོ ནཡཏོ ལབྦྷཏཱིཏི ཀཏྭཱ ཝུཏྟཾ ‘‘ཨནཱགཏེཔི ན སམནུཔསྶཱམཱ’’ཏི. སཀྐོ པན དེཝརཱཛཱ ཏམཏྠཾ ཨཏྠཱཔནྣམེཝ ཀཏྭཱ ‘‘ན པནེཏརཧི’’ ཨིཙྩེཝཱཧ. ཀིཾ སཀྐོ ཀཐེཏཱིཏི ཝིཙཱརེཏྭཱཏི ‘‘ནེཝ ཨཏཱིཏཾསེ སམནུཔསྶམཱ’ཏི ¶ ཝདནྟོ སཀྐོ ཀིཾ ཀཐེཏཱི’’ཏི ཝིཙཱརཎཾ སམུཊྛཔེཏྭཱ. ཡསྨཱ ཨཏཱིཏེ བུདྡྷཱ ཨཧེསུཾ, ཨནཱགཏེ བྷཝིསྶནྟཱིཏི ནཱཡམཏྠོ སཀྐེན དེཝརཱཛེན པརིཉྙཱཏོ, ཏེ པན བུདྡྷསཱམཉྙེན ཨམྷཱཀཾ བྷགཝཏཱ སདྡྷིཾ གཧེཏྭཱ ཨེཏརཧི ཨཉྙསྶ སབྦེན སབྦཾ ཨབྷཱཝཏོ ཏཐཱ ཝུཏྟནྟི དསྶེཏུཾ ‘‘ཨེཏརཧཱི’’ཏིཨཱདི ཝུཏྟཾ. སྭཱཀྑཱཏཱདཱིནཱིཏི སྭཱཀྑཱཏཔདཱདཱིནི. ཀུསལཱདཱིནཱིཏི ‘‘ཨིདཾ ཀུསལ’’ནྟིཨཱདཱིནི པདཱནི.

གངྒཱཡམུནཱནཾ ཨསམཱགམཊྛཱནེ ཨུདཀཾ བྷིནྣཝཎྞཾ ཧོནྟམྤི སམཱགམཊྛཱནེ ཨབྷིནྣཝཎྞཾ ཨེཝཱཏི ཨཱཧ ‘‘ཝཎྞེནཔི སཾསནྡཏི སམེཏཱི’’ཏི. ཏཏྠ ཀིར གངྒོདཀསདིསམེཝ ཡམུནོདཀཾ. ཡཐཱ ནིབྦཱནཾ ཀེནཙི ཀིལེསེན ཨནུཔཀྐིལིཊྛཏཱཡ པརིསུདྡྷཾ, ཨེཝཾ ནིབྦཱནགཱམིནིཔཊིཔདཱཔི ཀེནཙི ཀིལེསེན ཨནུཔཀྐིལིཊྛཏཱཡ པརིསུདྡྷཱཝ ཨིཙྪིཏབྦཱ. ཏེནཱཧ ‘‘ན ཧཱི’’ཏིཨཱདི. ཡེན པརིསུདྡྷཏྠེན ནིབྦཱནསྶ, ནིབྦཱནགཱམིནིཡཱ པཊིཔདཱཡ ཙ ཨཱཀཱསཱུཔམཏཱ, སོ ཀེནཙི ཨནུཔལེཔོ, ཨནུཔཀྐིལེསོ ཙཱཏི ཨཱཧ ‘‘ཨཱཀཱསམྤི ཨལགྒཾ པརིསུདྡྷ’’ནྟི. ཨིདཱནི ཏམཏྠཾ ནིདསྶནེན ཝིབྷཱུཏཾ ཀཏྭཱ དསྶེཏུཾ ‘‘ཙནྡིམསཱུརིཡཱན’’ནྟིཨཱདི ཝུཏྟཾ. སཾསནྡཏི ཡུཛྫཏི པཊིཔཛྫིཏབྦཏཱཔཊིཔཛྫནེཧི ཨཉྙམཉྙཱནུཙྪཝིཀཏཱཡ.

པཊིཔདཱཡ ཋིཏཱནནྟི པཊིཔདཾ མགྒཔཊིཔཏྟིཾ པཊིཔཛྫམཱནཱནཾ. ཝུསིཏཝཏནྟི བྲཧྨཙརིཡཝཱསཾ ཝུསིཏཝནྟཱནཾ ཨེཏེསཾ. ལདྡྷསཧཱཡོཏི ཨེཏཱསཾ པཊིཔདཱནཾ ཝསེན ལདྡྷསཧཱཡོ. ཏཏྠ ཏཏྠ སཱཝཀེཧི སཏྠུ ཀཱཏབྦཀིཙྩེ. ཨིདཾ པན ‘‘ཨདུཏིཡོ’’ཏིཨཱདི སུཏྟནྟརེ ཨཱགཏཝཙནཾ ཨཉྙེཧི ཨསདིསཊྛེན ཝུཏྟཾ, ན ཡཐཱཝུཏྟསཧཱཡཱབྷཱཝཏོ. ཨཔནུཛྫཱཏི ཨཔནཱིཡ ཝིཝཛྫེཏྭཱ. ‘‘ཨཔནུཛྫཱ’’ཏི ཙ ཨནྟོགདྷཱཝདྷཱརཎཾ ¶ ཨིདཾ ཝཙནཾ ཨེཀནྟིཀཏྟཱ ཏསྶ ཨཔནོདསྶཱཏི ཝུཏྟཾ ‘‘ཨཔནུཛྫེཝཱ’’ཏི.

ལབྦྷཏཱིཏི ¶ ¶ ལཱབྷོ, སོ པན ཨུཀྐཾསགཏིཝིཛཱནནེན སཱཏིསཡོ, ཝིཔུལོ ཨེཝ ཙ ཨིདྷཱདྷིཔྤེཏོཏི ཨཱཧ ‘‘མཧཱལཱབྷོ ཨུཔྤནྣོ’’ཏི. ཨུསྶནྣཔུཉྙནིསྶནྡསམུཔྤནྣོཏི ཡཐཱཝུཏྟཀཱལཾ སམྦྷཏསུཝིཔུལཨུལཱ༹རཏརཔུཉྙཱབྷིསནྡཏོ ནིབྦཏྟོ.‘‘ཨིམེ ནིབྦཏྟཱ, ཨིཏོ པརཾ མཡ྄ཧཾ ཨོཀཱསོ ནཏྠཱི’’ཏི ཨུསྶཱཧཛཱཏོ ཝིཡ ཨུཔརཱུཔརི ཝཌྜྷམཱནོ ཨུདཔཱདི. སབྦདིསཱསུ ཧི ཡམཀམཧཱམེགྷོ ཨུཊྛཧིཏྭཱ མཧཱམེགྷཾ ཝིཡ སབྦཔཱརམིཡོ ‘‘ཨེཀསྨིཾ ཨཏྟབྷཱཝེ ཝིཔཱཀཾ དསྶཱམཱ’’ཏི སམྤིཎྜིཏཱ ཝིཡ བྷགཝཏོ ཨིདཾ ལཱབྷསཀྐཱརསིལོཀཾ ནིབྦཏྟཡིཾསུ, ཏཏོ ཨནྣཔཱནཝཏྠཡཱནམཱལཱགནྡྷཝིལེཔནཱདིཧཏྠཱ ཁཏྟིཡབྲཱཧྨཎཱདཡོ ཨུཔགནྟྭཱ ‘‘ཀཧཾ བུདྡྷོ, ཀཧཾ བྷགཝཱ, ཀཧཾ དེཝདེཝོ, ཀཧཾ ནརཱསབྷོ, ཀཧཾ པུརིསསཱིཧོ’’ཏི བྷགཝནྟཾ པརིཡེསནྟི, སཀཊསཏེཧིཔི པཙྩཡེ ཨཱཧརིཏྭཱ ཨོཀཱསཾ ཨལབྷམཱནཱ སམནྟཱ གཱཝུཏཔྤམཱཎམྤི སཀཊདྷུརེན སཀཊདྷུརཾ ཨཱཧཙྩ ཏིཊྛནྟི ཙེཝ ཨནུབནྡྷནྟི ཙ ཨནྡྷཀཝིནྡབྲཱཧྨཎཱདཡོ ཝིཡ. སབྦཾ ཁནྡྷཀེ, ཏེསུ ཏེསུ ཙ སུཏྟེསུ ཨཱགཏནཡེན ཝེདིཏབྦཾ. ཏེནཱཧ ‘‘ལཱབྷསཀྐཱརོ མཧོགྷོ ཝིཡཱ’’ཏིཨཱདི.

པཊིཔཱཊིབྷཏྟནྟི བཧཱུསུ ‘‘དཱནཾ དསྶཱམཱ’’ཏི ཨཱཧཊཔཊིཔཱཊིཀཱཡ ཨུཊྛིཏེསུ ཨནུཔཊིཔཱཊིཡཱ དཱཏབྦ བྷཏྟཾ.

མཏྠཀཾ པཏྟོ ཨནཉྙསཱདྷཱརཎཏྟཱ ཏསྶ དཱནསྶ. ཨུཔཱཡཾ ཨཱཙིཀྑི ནཱགརཱནཾ ཨསཀྐུཎེཡྻརཱུཔེན དཱནཾ དཱཔེཏུཾ. སཱལཀལྱཱཎིརུཀྑཱ རཱཛཔརིགྒཧཱ ཨཉྙེཧི ཨསཱདྷཱརཎཱ, ཏསྨཱ ཏེསཾ པདརེཧི མཎྜཔོ ཀཱརིཏོ, ཧཏྠིནོ ཙ རཱཛབྷཎྜབྷཱུཏཱ ནཱགརེཧི ན སཀྐཱ ལདྡྷུནྟི ཏེཧི ཚཏྟཾ དྷཱརཱཔིཏཾ, ཏཐཱ ཁཏྟིཡདྷཱིཏཱཧི ཝེཡྻཱཝཙྩཾ ཀཱརིཏཾ. ‘‘པཉྩ ཨཱསནསཏཱནཱི’’ཏི ཨིདཾ སཱལཀལྱཱཎིམཎྜཔེ པཉྙཏྟེ སནྡྷཱཡ ཝུཏྟཾ, ཏཏོ བཧི པན བཧཱུནི པཉྙཏྟཱནི ཨཧེསུཾ ¶ . ཙཏུཛྫཱཏིཡགནྡྷཾ པིསཏི བུདྡྷཔྤམུཁསྶ སངྒྷསྶ པཱུཛནཏྠཉྩེཝ པཏྟསྶ ཨུབྦཊནཏྠཉྩ. ཨུདཀནྟི པཏྟདྷོཝནཨུདཀཾ. ཨནགྒྷཱནི ཨཧེསུཾ ཨནགྒྷརཏནཱབྷིསངྑཏཏྟཱ.

སཏྟདྷཱ མུདྡྷཱ ཕལིསྶཏི ཨནཱདརཀཱརཎཱདིནཱ. ཀཱལ༹ཾ ཨོལོཀེསྶཱམཱིཏི ཀཱལ༹ཾ ཨེཝཾ ཨནུཔེཀྑིསྶཱམི, ཏསྶ ཨུཔྤཛྫནཀཾ ཨནཏྠཾ པརིཧརིསྶཱམཱིཏི ཨཏྠོ.

ཀདརིཡཱཏི ¶ ཐདྡྷམཙྪརིནོ པུཉྙཀམྨཝིམུཁཱ. དེཝལོཀཾ ན ཝཛནྟི པུཉྙསྶ ཨཀཏཏྟཱ, མཙྪརིབྷཱཝེན ཙ པཱཔསྶ པསུཏཏྟཱ. བཱལཱཏི དུཙྩིནྟིཏཙིནྟནཱདིནཱ བཱལལཀྑཎཡུཏྟཱ. ནཔྤསཾསནྟི དཱནཾ པསཾསིཏུམྤི ན ཝིསཧནྟི. དྷཱིརོཏི དྷཱིཏིསམྤནྣོ ཨུལཱ༹རཔཉྙོ པརེཧི ཀཏཾ དཱནཾ ¶ ཨནུམོདམཱནོཔི, ཏེནེཝ དཱནཱནུམོདནེནེཝ. སུཁཱི པརཏྠཱཏི པརལོཀེ ཀཱཡིཀཙེཏསིཀསུཁསམངྒཱི ཧོཏི.

ཝརརོཛོ ནཱམ ཏསྨིཾ ཀཱལེ ཨེཀོ ཁཏྟིཡོ, ཏསྶ ཝརརོཛསྶ. ཨནཝཛྫ…པེ… ཕལེཡྻ ཨབྷཱུཏཝཱདིབྷཱཝཏོཏི ཨདྷིཔྤཱཡོ. ཨཏིརེཀཔདསཧསྶེན ཏིཾསཱདྷིཀེན ཨཌྜྷཏེཡྻགཱཐཱསཏེན ཝཎྞམེཝ ཀཐེསི རཱུཔཔྤསནྣཏཱཡ ཙ.

ཡཱཝ མཉྙེ ཁཏྟིཡཱཏི ཨེཏྠ ཡཱཝཱཏི ཨཝདྷིཔརིཙྪེདཝཙནཾ, ཨཉྙེཏི ནིཔཱཏམཏྟཾ, ཡཱཝ ཁཏྟིཡཱ ཁཏྟིཡེ ཨཝདྷིཾ ཀཏྭཱ སབྦེ དེཝམནུསྶཱཏི ཨདྷིཔྤཱཡོ. ཏེནཱཧ ‘‘ཁཏྟིཡཱ བྲཱཧྨཎཱ’’ཏིཨཱདི. མདཔམཏྟོཏི ལཱབྷསཀྐཱརསིལོཀམདེན པམཏྟོ ཙེཝ ཏདནྭཡེན པམཱདེན པམཏྟོ ཙ ཧུཏྭཱ.

ཏདནྭཡམེཝཱཏི ཏདནུགཏམེཝ. ཝཱཙཱ…པེ… སམེཏཱིཏི ཝཙཱིཀམྨཀཱཡཀམྨཱནི ཨཉྙམཉྙཾ ཨཝིརུདྡྷཱནི, ཨཉྙདཏྠུ སཾསནྡནྟི. ཨཛཱ ཨེཝ མིགཱཏི ཨཛཱམིགཱ, ཏེ ཨཛཱམིགེ.

ཏིཎྞཝིཙིཀིཙྪོ སབྦསོ ཨཏིཀྐནྟཝིཙིཀིཙྪཱཀནྟཱརོ ¶ . ནནུ ཙ སབྦེཔི སོཏཱཔནྣཱ ཏིཎྞཝིཙིཀིཙྪཱ, ཝིགཏཀཐཾཀཐཱ ཙ? སཙྩམེཏཾ, ཨིདཾ པན ན ཏཱདིསཾ ཏིཎྞཝིཙིཀིཙྪཏཾ སནྡྷཱཡ ཝུཏྟཾ, ཨཐ ཁོ སབྦསྨིཾ ཉེཡྻདྷམྨེ སབྦཱཀཱརཱཝབོདྷསངྑཱཏསནྣིཊྛཱནཝསེན སབྦསོ ནིརཱཀཏཾ སནྡྷཱཡཱཏི དསྶེནྟོ ‘‘ཡཐཱ ཧཱི’’ཏི ཨཱདིམཱཧ. ཨུསྶནྣུསྶནྣཏྟཱཏི པརོཔརབྷཱཝཏོ, ཨཡཉྩ ཨཏྠོ བྷགཝཏོ ཨནེཀདྷཱཏུནཱནཱདྷཱཏུཉཱཎབལེནཔི ཨིཛ྄ཛྷཏི. སབྦཏྠ ཝིགཏཀཐཾཀཐོ སབྦདསྶཱཝིབྷཱཝཏོ. སབྦེསཾ པརམཏྠདྷམྨཱནཾ སཙྩཱབྷིསམཡཝསེན པཊིཝིདྡྷཏྟཱ ཝུཏྟཾ ‘‘ཝོཧཱརཝསེནཱ’’ཏི ཝཱ ནཱམགོཏྟཱདིཝསེནཱཏི ཨཏྠོ.

པརིཡོསིཏསངྐཔྤོཏི སབྦསོ ནིཊྛིཏམནོརཐོ. ནནུ ཙ ཨརིཡམགྒེན པརིཡོསིཏསངྐཔྤཏཱ ནཱམ སོལ༹སཀིཙྩསིདྡྷིཡཱ ཀཏཀརཎཱིཡབྷཱཝེན, ན སབྦཉེཡྻདྷམྨཱཝབོདྷེནཱཏི ཙོདནཾ སནྡྷཱཡཱཧ ‘‘པུབྦེ ¶ ཨནནུསྶུཏེསཱུ’’ཏིཨཱདི. སཱཝཀཱནཾ སཱཝཀཔཱརམིཉཱཎཾ ཝིཡ, ཧི པཙྩེཀབུདྡྷཱནཾ པཙྩེཀབོདྷིཉཱཎཾ ཝིཡ ཙ སམྨཱསམྦུདྡྷཱནཾ སབྦཉྙུཏཉྙཱཎཾ ཙཏུསཙྩཱབྷིསམྦོདྷཔུབྦཀམེཝཱཏི. ཨནནུསྶུཏེསཱུཏི ན ཨནུསྶུཏེསུ. སཱམནྟི སཡམེཝ. པདདྭཡེནཱཔི པརཏོ གྷོསེན ཝིནཱཏི དསྶེཏི. ཏཏྠཱཏི ནིམིཏྟཏྠེ བྷུམྨཾ, སཙྩཱབྷིསམྦོདྷནིམིཏྟནྟི ཨཏྠོ. སཙྩཱབྷིསམྦོདྷོ ཙ ཨགྒམགྒཝསེནཱཏི ¶ དཊྛབྦཾ. བལེསུ ཙ ཝསཱིབྷཱཝནྟི དསནྣཾ བལཉཱཎཱནཾ ཡཐཱརུཙི པཝཏྟི. ཛཱཏཏྟཱ ཛཱཏཱཏི སམྨཱསམྦུདྡྷེ ཝདཏི.

༢༩༧. ཏཏྠ ཏཏྠ རཱཛདྷཱནིཨཱདིཀེ ནིབདྡྷཝཱསཾ ཝསནྟོ. ཏཱིསུ མཎྜལེསུ ཡཐཱཀཱལཾ ཙཱརིཀཾ ཙརནྟོ.

༢༩༨. ཨསྶཱཏི ཕལསྶ. ཏནྟི ཀཱརཎཾ. དྭིནྣམྤི ཨེཀཏོ ཨུཔྤཏྟིཡཱ ཀཱརཎཾ ནཏྠི, པགེཝ ཏིཎྞཾ, ཙཏུནྣཾ ཝཱཏི. ‘‘ཨེཏྠ ཙཱ’’ཏིཨཱདི ‘‘ཨེཀིསྶཱ ལོཀདྷཱཏུཡཱ’’ཏི ཝུཏྟལོཀདྷཱཏུཡཱ ¶ པམཱཎཔརིཙྪེདདསྶནཏྠཾ ཨཱརདྡྷཾ.

ཡཱཝཏཱཏི ཡཏྟཀེན ཋཱནེན. པརིཧརནྟཱིཏི སིནེརུཾ པརིཀྑིཔནྟཱ པརིཝཏྟནྟི. དིསཱཏི དིསཱསུ, བྷུམྨཏྠེ ཨེཏཾ པཙྩཏྟཝཙནཾ. བྷནྟི དིབྦནྟི. ཝིརོཙནཱཏི ཨོབྷཱསནྟཱ, ཝིརོཙནཱ ཝཱ སོབྷམཱནཱ ཙནྡིམསཱུརིཡཱ བྷནྟི, ཏཏོ ཨེཝ དིསཱ ཙ བྷནྟི. ཏཱཝ སཧསྶདྷཱཏི ཏཏྟཀོ སཧསྶལོཀོ.

ཨེཏྟཀནྟི ཨིམཾ ཙཀྐཝཱལ༹ཾ མཛ྄ཛྷེ ཀཏྭཱ ཨིམིནཱཝ སདྡྷིཾ ཙཀྐཝཱལ༹ཾ དསསཧསྶཾ. ཡཾ པནེཏྠ ཝཏྟབྦཾ, ཏཾ མཧཱཔདཱནཝཎྞནཱཡཾ ཝུཏྟམེཝ. ན པཉྙཱཡཏཱིཏི ཏཱིསུ པིཊཀེསུ ཨནཱགཏཏྟཱ.

སནངྐུམཱརཀཐཱཝཎྞནཱ

༣༠༠. ཝཎྞེནཱཏི རཱུཔསམྤཏྟིཡཱ. སུཝིཉྙེཡྻཏྟཱ ཏཾ ཨནཱམསིཏྭཱ ཡསསདྡསྶེཝ ཨཏྠམཱཧ. ཨལངྐཱརཔརིཝཱརེནཱཏི ཨལངྐཱརེན ཙ པརིཝཱརེན ཙ. པུཉྙསིརིཡཱཏི པུཉྙིདྡྷིཡཱ.

༣༠༡. སམྤསཱདནེཏི སམྤསཱདཛནནེ. སཾཔུབྦོ ཁཱ-སདྡོ ཛཱནནཏྠོ ‘‘སངྑཱཡེཏཾ པཊིསེཝཏཱི’’ཏིཨཱདཱིསུ (མ. ནི. ༢.༡༦༨) ཝིཡཱཏི ཨཱཧ ‘‘ཛཱནིཏྭཱ མོདཱམཱ’’ཏི.

གོཝིནྡབྲཱཧྨཎཝཏྠུཝཎྞནཱ

༣༠༤. ཡཱཝ ¶ དཱིགྷརཏྟནྟི ཡཱཝ པརིམཱཎཏོ, ཨཔརིམིཏཀཱལཔརིདཱིཔནམེཏནྟི ཨཱཧ ‘‘ཨེཏྟཀནྟི…པེ… ཨཏིཙིརརཏྟ’’ནྟི. མཧཱཔཉྙོཝ སོ བྷགཝཱཏི ཏེན བྲཧྨུནཱ ཨནུམཏིཔུཙྪཱཝསེན ¶ དེཝཱནཾ ཝུཏྟནྟི དསྶེནྟོ ‘‘མཧཱཔཉྙོཝ སོ བྷགཝཱ. ནོཏི ཀཐཾ ཏུམྷེ མཉྙཐཱ’’ཏི ཨཱཧ. སཡམེཝེཏཾ པཉྷཾ བྱཱཀཱཏུཀཱམོ ‘‘བྷཱུཏཔུབྦཾ བྷོ’’ཏི ཨཱདིཾ ཨཱཧཱཏི སམྦནྡྷོ. ཨེཝཾ པན བྱཱཀརོནྟེན ཨཏྠཏོ ཨཡམྤི ཨཏྠོ ཝུཏྟོ ནཱམ ཧོཏཱིཏི དསྶེནྟོ ‘‘ཨནཙྪརིཡམེཏ’’ནྟི ཨཱདིམཱཧ. ཏིཎྞཾ མཱརཱནནྟི ¶ ཀིལེསཱབྷིསངྑཱརདེཝཔུཏྟམཱརཱནཾ. ‘‘ཨནཙྪརིཡམེཏ’’ནྟི ཝུཏྟམེཝཏྠཾ ནིགམནཝསེན ‘‘ཀིམེཏྠ ཨཙྪརིཡ’’ནྟི པུནཔི ཝུཏྟཾ.

རཉྙོ དིཊྛདྷམྨིཀསམྤརཱཡིཀཨཏྠཱནཾ པུརོ དྷཱནཏོ པུརེ པུརེ སཾཝིདྷཱནཏོ པུརོཧིཏོཏི ཨཱཧ ‘‘སབྦཀིཙྩཱནི ཨནུསཱསནཔུརོཧིཏོ’’ཏི. གོཝིནྡིཡཱབྷིསེཀེནཱཏི གོཝིནྡསྶ ཋཱནེ ཋཔནཱབྷིསེཀེན. ཏཾ ཀིར ཏསྶ བྲཱཧྨཎསྶ ཀུལཔརམྤརཱགཏཾ ཋཱནནྟརཾ. ཛོཏིཏཏྟཱཏི ཨཱཝུདྷཱནཾ ཛོཏིཏཏྟཱ. པཱལནསམཏྠཏཱཡཱཏི རཉྙོ, ཨཔརིམིཏསྶ ཙ སཏྟཀཱཡསྶ ཨནཏྠཏོ པརིཔཱལནསམཏྠཏཱཡ.

སམྨཱ ཝོསྶཛྫིཏྭཱཏི སུཊྛུ ཏསྶེཝཱགཱརཝབྷཱཝེན ཝིསྶཛྫིཏྭཱ ནིཡྻཱཏེཏྭཱ. ཏཾ ཏམཏྠཾ ཀིཙྩཾ པསྶཏཱིཏི ཨཏྠདསོ.

༣༠༥. བྷཝནཾ ཝཌྜྷནཾ བྷཝོ, བྷཝཏི ཨེཏེནཱཏི ཝཱ བྷཝོ, ཝཌྜྷིཀཱརཎཾ སནྡྷིཝསེན མ-ཀཱརཱགམོ, ཨོ-ཀཱརསྶ ཙ ཨ-ཀཱརཱདེསཾ ཀཏྭཱ ‘‘བྷཝམཏྠཱུ’’ཏི ཝུཏྟཾ. བྷཝནྟཾ ཛོཏིཔཱལནྟི པན སཱམིཨཏྠེ ཨུཔཡོགཝཙནནྟི ཨཱཧ ‘‘བྷོཏོ’’ཏི. མཱ པཙྩབྱཱཧཱསཱིཏི མཱ པཊིཀྑིཔཱིཏི ཨཏྠོ. སོ པན པཊིཀྑེཔོ པཊིཝཙནཾ ཧོཏཱིཏི ཨཱཧ ‘‘མཱ པཊིབྱཱཧཱསཱི’’ཏི. ཨབྷིསམྦྷོསཱིཏི ཀམྨནྟཱནཾ སཾཝིདྷཱནེ སམཏྠོ ཧོཏཱིཏི ཨཱཧ ‘‘སཾཝིདཧིཏྭཱ’’ཏི. བྷཝཱབྷཝཾ, པཉྙཉྩ ཝིནྡི པཊིལབྷཱིཏི གོཝིནྡོ, མཧནྟོ གོཝིནྡོ མཧཱགོཝིནྡོ. ‘‘གོ’’ཏི ཧི པཉྙཱཡེཏཾ ཨདྷིཝཙནཾ གཙྪཏི ཨཏྠེ བུཛ྄ཛྷཏཱིཏི.

རཛྫསཾཝིབྷཛནཝཎྞནཱ

༣༠༦. ཨེཀཔིཏིཀཱ ¶ ཝེམཱཏུཀཱ ཀནིཊྛབྷཱཏརོ. ཨཡཾ ཨབྷིསིཏྟོཏི ཨཡཾ རེཎུ རཱཛཀུམཱརོ པིཏུ ཨཙྩཡེན རཛྫེ ཨབྷིསིཏྟོ. རཱཛཀཱརཀཱཏི རཱཛཔུཏྟཾ རཛྫེ པཏིཊྛཱཔེཏཱརོ.

༣༠༧. མདེནྟཱིཏི ¶ མདནཱིཡཱཏི ཀཏྟུསཱདྷནཏཾ དསྶེནྟོ ‘‘མདཀརཱ’’ཏི ཨཱཧ. མདཀརཎཾ པན པམཱདསྶ ཝིསེསཀཱརཎནྟི ཝུཏྟཾ ‘‘པམཱདཀརཱ’’ཏི.

༣༠༨. རེཎུསྶ ¶ རཛྫསམཱིཔེ དསགཱཝུཏམཏྟཝིཏྠཏཱནི ཧུཏྭཱ ཨཔརབྷཱགེ ཏིཡོཛནསཏཾ ཝིཏྠཏཏྟཱ སབྦཱནི ཚ རཛྫཱནི སཀཊམུཁཱནི པཊྛཔེསི. ཝིཏཱནསདིསཾ ཙཏུརསྶབྷཱཝཏོ.

༣༡༠. སཧཱཏི གཱཐཱཡ པདཔརིཔཱུརཎཏྠཾ ཝུཏྟཾ. ཏསྶ ཨཏྠཾ དསྶེནྟོ ‘‘ཏེནེཝ སཧཱ’’ཏི ཨཱཧ. སཧཱཏི ཝཱ ཨཝིནཱབྷཱཝཏྠེ ནིཔཱཏོ, སོ སཧ ཨཱསུཾ སཏྟ བྷཱརདྷཱཏི ཡོཛེཏབྦོ, ཏེན ཏེ དེསནྟརེ ཝསནྟཱ ཝིཙིཏྟེན སཧབྷཱཝིནོ ཨཝིནཱབྷཱཝིནོཏི དཱིཔེཏི. རཛྫབྷཱརཾ དྷཱརེནྟི ཨཏྟནི ཨཱརོཔེནྟི ཝཧནྟཱིཏི བྷཱརདྷཱ.

པཋམབྷཱཎཝཱརཝཎྞནཱ ནིཊྛིཏཱ.

ཀིཏྟིསདྡཨབྦྷུགྒམནཝཎྞནཱ

༣༡༡. ཨནུཔུརོཧིཏེ ཋཔེསཱིཏི ཨནུཔུརོཧིཏེ ཀཏྭཱ ཋཔེསི, ཨནུཔུརོཧིཏེ ཝཱ ཋཱནེ ཋཔེསི. ཏིསཝནཾ ཀརོནྟེ སནྡྷཱཡ ‘‘དིཝསསྶ ཏིཀྑཏྟུ’’ནྟི ཝུཏྟཾ. དྭཱིསུ སནྡྷཱིསུ སཝནཾ ཀརོནྟེ སནྡྷཱཡ ‘‘སཱཡཾ, པཱཏོ ཝཱ’’ཏི ཝུཏྟཾ. ཏཏོ པཊྛཱཡཱཏི ཝཏཙརིཡཾ མཏྠཀཾ པཱཔེཏྭཱ ནྷཱཏཀཱལཏོ པབྷུཏི.

༣༡༢. ཨབྷིཨུགྒཙྪཱིཏི ཨུཊྛཧི ཨུདཔཱདི. ཨཙིནྟེཏྭཱཏི ‘‘ཀཐཾ ཁོ ཨཧཾ བྲཧྨུནཱ སདྡྷིཾ མནྟེཡྻ’’ནྟི ཨཙིནྟེཏྭཱ ཨེཝཾ ཙིཏྟམྤི ཨནུཔྤཱདེཏྭཱ. ཏེན སམཱགམནསྶེཝ ཨབྷཱཝཏོ ཨམནྟེཏྭཱ. ཏཾ དིསྭཱཏི ཏཾ ཀརུཎཱབྲཧྨཝིཧཱརབྷཱཝནཾ བྲཧྨདསྶནཱུཔཱཡཾ དིསྭཱ ཉཱཎཙཀྑུནཱ.

༣༡༣. ཨེཝནྟི ¶ ཨེཝཾ རཉྙོ ཨཱརོཙེཏྭཱ པཊིསལླཱནཾ ཨུཔགཏེ. སབྦཏྠཱཏི སབྦེསུ ཚནྣཾ ཁཏྟིཡཱནཾ, སཏྟནྣཾ བྲཱཧྨཎམཧཱསཱལཱནཾ ¶ , སཏྟནྣཾ ནཱཊཀསཏཱནཾ, ཙཏྟཱརཱིསཱཡ ཙ བྷརིཡཱནཾ ཨཱཔུཙྪནཝཱརེསུ.

༣༡༦. སཱདིསིཡོཏི ཛཱཏིཡཱ སཱདིསིཡོཏི ཨཱཧ ‘‘སམཝཎྞཱ སམཛཱཏིཀཱ’’ཏི.

༣༡༧. སནྠཱགཱརནྟི ཛྷཱནམནསིཀཱརེན བཧི ཝིསཊཝིཏཀྐཝཱུཔསམནེན ཙིཏྟསྶ སནྠམྦྷནཾ ¶ ཨགཱརཾ, ཛྷཱནསཱལནྟི ཨཏྠོ. གཧིཏཱཝཱཏི བྷཱཝནཱནུཡོགེན མཧཱསཏྟེན ཨཏྟནོ ཙིཏྟསནྟཱནེ ཨུཔྤཱདནཝསེན གཧིཏཱ ཨེཝ. ནཏྠི ཛྷཱནེནེཝ ཝིཀྑམྦྷིཏཏྟཱ. ཝིསེསཏོ ཧིསྶ ཀརུཎཱཡ བྷཱཝིཏཏྟཱ ཨནབྷིརཏི ཨུཀྐཎྛནཱ ནཏྠི, མེཏྟཱཡ བྷཱཝིཏཏྟཱ བྷཡཔརིཏསྶནཱ ནཏྠི. ཨུཀྐཎྛནཱཏི པན བྲཧྨདསྶནེ ཨུསྶུཀྐཾ, པརིཏསྶནཱཏི ཏདབྷིཔཏྠནཱཏི ཨཱཧ ‘‘བྲཧྨུནོ པནཱ’’ཏིཨཱདི.

བྲཧྨུནཱསཱཀཙྪཱཝཎྞནཱ

༣༡༨. ཙིཏྟུཏྲཱསོཏི ཙིཏྟསྶ ཨུཏྲཱསནམཏྟཾ. ཀཐནྟི སཏྟནིཀཱཡནིཝཱསཊྛཱནནཱམགོཏྟཱདཱིནཾ ཝསེན ཀེན པཀཱརེན. ཏེནཱཧ ‘‘ཀི’’ནྟིཨཱདི.

སོཏི ཡེ ཏེ པནཀནསནནྟབནྡྷསཏནསནངྐུམཱརཀཱལནཱམཀཱ ལོཀེ པཱཀཊཱ པཉྙཱཏཱ བྲཧྨཱནོ, ཏེསུ སནངྐུམཱརོ ནཱམཱཧནྟི དསྶེཏི.

ཨགྒྷནྟི གརུཊྛཱནིཡཱནཾ དཱཏབྦཾཨཱཧཱརཾ. མདྷུསཱཀནྟི མདྷུརཱཧཱརཾ, ཡཾ ཀིཉྩི ཨཏིཐིནོ དཱཏབྦཾ ཨཱཧཱརཾ ཨུཔཙཱརཝསེན ཨེཝཾ ཝདཏི. ཏེནཱཧ ‘‘མདྷུསཱཀཾ པནཱ’’ཏིཨཱདི. པུཙྪཱམཱཏི ནིམནྟནཝསེན པུཙྪཱམ.

༣༡༩. མཧཱསཏྟོ ཙཏྟཱརོ བྲཧྨཝིཧཱརེ བྷཱཝེཏྭཱ ཋིཏོཔི ཏེསུ ‘‘བྲཧྨསཧབྱཏཱཡ མགྒོ’’ཏི ཨནིབྦེམཏིཀཏཱཡ ‘‘ཀངྑཱི’’ཏི ཨཝོཙ. ཀེཙི པན ‘‘ཏཔོཀམྨེན པརིཀྑཱིཎསརཱིརཏཱཡ, བྲཧྨསམཱགམེན བྷཡཱདིསམུཔྤཏྟིཡཱ ཙ པཊིལདྡྷམཏྟེཧི བྲཧྨཝིཧཱརེཧི པརིཧཱིནོ ཨཧོསི, ཏསྨཱ ཨཝིཀྑམྦྷིཏཝིཙིཀིཙྪཏཱཡ ‘ཀངྑཱི’ཏི ཨཝོཙཱ’’ཏི ཝདནྟི. པརསྶ ཝེདིཡཱ ཝིདིཏཱ པརཝེདིཡཱ, ཏེ པན ཏསྶ པཱཀཊཱ ཝིབྷཱུཏཱཏི ཨཱཧ ‘‘པརསྶ ¶ པཱཀཊེསུ པརཝེདིཡེསཱུ’’ཏི. ཏཏྠ ཀཱརཎམཱཧ ‘‘པརེན སཡཾ ཨབྷིསངྑཏཏྟཱ’’ཏི. མམཱཏི ¶ ཀམྨཾ མམཾཀཱརོ, མམཏྟནྟི ཨཱཧ ‘‘ཨིདཾ མམ…པེ… ཏཎྷ’’ནྟི. ‘‘མམ’’ནྟི ཀརོཏི ཨེཏེནཱཏི ཧི མམཾཀཱརོ, ཏཐཱཔཝཏྟཱ ཏཎྷཱ. མནུཛེསཱུཏི ནིདྡྷཱརཎེ བྷུམྨཾ, ན ཝིསཡེཏི ཨཱཧ ‘‘མནུཛེསུ ཡོ ཀོཙཱི’’ཏི. ‘‘ཨེཀོདིབྷཱུཏོ’’ཏི པདསྶ བྷཱཝཏྠཾ ཏཱཝ དསྶེནྟོ ‘‘ཨེཀཱིབྷཱུཏོ’’ཏི ཝཏྭཱ པུན ཏཾ ཝིཝརནྟོ ‘‘ཨེཀོ ཏིཊྛནྟོ ཨེཀོ ནིསཱིདནྟོ’’ཏི ཨཱཧ. ཏཱདིསོཏི ཨེཀོ ཧུཏྭཱ པཝཏྟནཀོ. བྷཱུཏོཏི ཛཱཏོ. ཛྷཱནེ ཨདྷིམུཏྟི ནཱམ ཏསྨིཾ ནིབྦཏྟིཏེ, ཨནིབྦཏྟིཏེ ཀུཏོ ཨདྷིམུཏྟཱིཏི ཨཱཧ ‘‘ཛྷཱནཾ ནིབྦཏྟེཏྭཱཏི ཨཏྠོ’’ཏི. ཝིསྶགནྡྷོ ནཱམ ཀོདྷཱདིཀིལེསཔརིབྷཱཝནཱཏི ཏེསཾ ཝིཀྑམྦྷནེན ¶ ཝིསྶགནྡྷཝིརཧིཏོ. ཨེཏེསུ དྷམྨེསཱུཏི པབྦཛྫཱནཾ ཝིཝེཀཝཱསཀརུཎཱབྲཧྨཝིཧཱརཱདིདྷམྨེསུ.

༣༢༠. ཨཝིདྭཱཏི ན ཝིདིཏཝཱ. ཨཱཝརིཏཱཏི ཀུསལཱནཾ ཨུཏྟརིམནུསྶདྷམྨཱནཾ ཨུཔྤཏྟིནིཝཱརཎེན ཨཱཝརིཏཱ. པཱུཏིཀཱཏི བྱཱཔནྣཙིཏྟཏཱདིནཱ པཱུཏིབྷཱུཏཱ. ཀིལེསཝསེན དུགྒནྡྷཾ ཝིསྶགནྡྷཾ ཝཱཡཏི. ནིརཡཱདིཨཔཱཡེསུ ནིབྦཏྟནསཱིལཏཱཡ ཨཱཔཱཡིཀཱཏི ཨཱཧ ‘‘ཨཔཱཡཱུཔགཱ’’ཏི. ཙོརཱདཱིཧི ཨུཔདྡུཏསྶ པཝིསིཏུཀཱམསྶ པཱཀཱརཀཝཱཊཔརིཁཱདཱིཧི ཝིཡ ནགརཾ ཀོདྷཱདཱིཧི ནིཝུཏོ པིཧིཏོ བྲཧྨལོཀོ ཨསྶཱཏི ནིཝུཏབྲཧྨལོཀོ. པུཙྪཏི ‘‘ཀེནཱཝཊཱ’’ཏི ཝདནྟོ.

མུསཱཝཱདོཝ མོསཝཛྫཾ ཡཐཱ བྷིསཀྐམེཝ བྷེསཛྫཾ. ཀུཛ྄ཛྷནཾ དུསྶནཾ. དིཊྛཱདཱིསུ ཨདིཊྛཱདིཝཱདིཏཱཝསེན པརེསཾ ཝིསཾཝཱདནཾ པརཝིསཾཝཱདནཾ. སདིསཾ པཏིརཱུཔཾ དསྶེཏྭཱ པལོབྷནཾ སདིསཾ དསྶེཏྭཱ ཝཉྩནཾ. མིཏྟཱནཾ ཝིཧིཾསནཾ མེཏྟིབྷེདོ མིཏྟདུབྦྷནཾ. དལ༹ྷམཙྪརིཏཱ ཐདྡྷམཙྪརིཡཾ. ཨཏྟནི ཝིཛྫམཱནཾ ནིཧཱིནཏཾ, སདིསཏཾ ཝཱ ཨཏིཀྐམིཏྭཱ མཉྙནཾ. པརེསཾ སམྤཏྟིཡཱ ཨསཧནཾ ཁཱིཡནཾ. ཨཏྟསམྤཏྟིཡཱ ནིགཱུཧནཝསེན, པརེཧི སཱདྷཱརཎབྷཱཝཱསཧནཝསེན ཙ ཝིཝིདྷཱ ཨིཙྪཱ རུཙི ཨེཏསྶཱཏི ཝིཝིཙྪཱ. ཀདརིཡཏཱཡ ¶ མུདུཀཾ མཙྪརིཡཾ. ཡཏྠ ཀཏྠཙཱིཏི སཀསནྟཀེ, པརསནྟཀེ, ཧཱིནཱཏིཀེ ཙཱཏི ཡཏྠ ཀཏྠཙི ཨཱརམྨཎེ. ལུབྦྷནཾ ཨཱརམྨཎསྶ གཧཎཾ ཨབྷིགིཛ྄ཛྷནཾ. མཛྫནཾ སེཡྻཱདིཝསེན མདནཾ སམྤགྒཧོ. མུཡ྄ཧནཾ ཨཱརམྨཎསྶ ཨནཝབོདྷོ. ཨེཏེསཱུཏི ཨེཏེསུ ཡཐཱཝུཏྟེསུ ཀོདྷཱདཱིསུ སཏྟསནྟཱནསྶ ཀིལིསྶནཏོ ཝིབཱདྷནཏོ, ཨུཔཏཱཔནཏོ ཙ ཀིལེསསཉྙིཏེསུ པཱཔདྷམྨེསུ. ཡུཏྟཱ པཡུཏྟཱ སམྤཡུཏྟཱ ཨཝིརཧིཏཱ.

ཨེཏྠ ¶ ཙཱཡཾ བྲཧྨཱ མཧཱསཏྟེན ཨཱམགནྡྷེ སུཔུཊྛོ ཨཏྟནོ ཡཐཱཨུཔཊྛིཏེ པཱཔདྷམྨེ ཙུདྡསཧི པདེཧི ཝིབྷཛིཏྭཱ ཀཐེསི, ཏེ པན ཏཱདིསཾ པཝཏྟིཝིསེསཾ ཨུཔཱདཱཡ ཝུཏྟཱཔི ཀེཙི པུན ཝུཏྟཱ, ཨཱམགནྡྷསུཏྟེ (སུ. ནི. ༢༤༢) པན ཝུཏྟཱཔི ཀེཙི ཨིདྷ སབྦསོ ན ཝུཏྟཱ, ཨེཝཾ སནྟེཔི ལཀྑཎཧཱརནཡེན, ཏདེཀཊྛཏཱཡ ཝཱ ཏེསཾ པེཏྠ སངྒཧོ དཊྛབྦོ. ཏེནཱཧ ‘‘ཨིདཾ པན སུཏྟ’’ནྟིཨཱདི. ཏཏྠ ཨཱམགནྡྷསུཏྟེན དཱིཔེཏྭཱཏི ཨིདྷ སརཱུཔཏོ ཨཝུཏྟེ ཨཱམགནྡྷེཔི ཝུཏྟེཧི ཨེཀལཀྑཎཏཱདིནཱ ཨཱམགནྡྷསུཏྟེན པཀཱསེཏྭཱ ཀཐེཏབྦཾ ཏཏྠ ནེསཾ སརཱུཔཏོ ཀཐིཏཏྟཱ. ཨཱམགནྡྷསུཏྟམྤི ཨིམིནཱ དཱིཔེཏབྦཾ ཨིདྷ ཝུཏྟཱནམྤི ཀེསཉྩི ཨཱམགནྡྷཱནཾ ཏཏྠ ཨཝུཏྟབྷཱཝཏོ. ཡསྨཱ ཨཱམགནྡྷསུཏྟེ ཝུཏྟཱཔི ཨཱམགནྡྷཱ ཨཏྠཏོ ཨིདྷ སངྒཧཾ སམོསརཎཾ གཙྪནྟི, ཏསྨཱ ཨིདྷ ཝུཏྟེ པརིཧརཎཝསེན དསྶེནྟེན ཡསྨཱ ཙེཏྠ ཀེཙི ཨབྷིདྷམྨནཡེན ཨཀིལེསསབྷཱཝཱཔི སཏྟསནྟཱནསྶ ¶ ཝིབཱདྷནཊྛེན ‘‘ཀིལེསཱ’’ཏི ཝཏྟབྦཏཾ ཨརཧནྟི, ཏསྨཱ ‘‘ཙུདྡསསུ ཀིལེསེསཱུ’’ཏི ཝུཏྟཾ.

ནིམྨཱདཾ མིལཱཔནཾ ཁེཔནནྟི ཨཱཧ ‘‘ནིམྨཱདེཏབྦཱ པཧཱཏབྦཱ’’ཏི. བུདྡྷཏནྟཱིཏི བུདྡྷབྷཱཝཱིནཾ པཝེཎཱི, བུདྡྷབྷཱཝིནོཔི ‘‘བུདྡྷཱ’’ཏི ཝུཙྩནྟི ཡཐཱ ‘‘ཨགམཱ རཱཛགཧཾ བུདྡྷོ’’ཏི. མཧཱཔུརིསསྶ དལ༹ྷཱིཀམྨཾ ཀཏྭཱཏི མཧཱཔུརིསསྶ ‘‘པབྦཛིསྶཱམཧ’’ནྟི ¶ པཝཏྟཙིཏྟུཔྤཱདསྶ དལ༹ྷཱིཀམྨཾ ཀཏྭཱ.

རེཎུརཱཛཨཱམནྟནཱཝཎྞནཱ

༣༢༡. མམ མནཾ ཧརིཏྭཱཏི མམ ཙིཏྟཾ ཨཔནེཏྭཱ ཏསྶ ཝསེན ཨཝཏྟིཏྭཱ.

ཨེཀཱིབྷཱཝཾ ཨུཔགནྟྭཱ ཝུཏྠསྶཱཏི ཀཱཡཝིཝེཀཔརིབྲཱུཧནེན ཨེཀཱིབྷཱཝཾ ཨུཔགནྟྭཱ ཏཔོཀམྨཝསེན ཝུཏྠསྶ. ཀུསཔཏྟེཧི པརིཏྠཏོཏི བརིཧིསེཧི ཝེདིཡཱ སམནྟཏོ སནྠརིཏོ. ཨཀཱཙོཏི ཝཎོ ཝཎསདིསཁཎྜིཙྩཝིརཧིཏོ. ཏེནཱཧ ‘‘ཨཀཀྐསོ’’ཏི.

ཚཁཏྟིཡཨཱམནྟནཱཝཎྞནཱ

༣༢༢. སིཀྑེཡྻཱམཱཏི སིཀྑཱཔེཡྻཱམ, སིཀྑཱཔནཉྩེཏྠ ཨཏྠིབྷཱཝཱཔཱདནནྟི ཨཱཧ ‘‘ཨུཔལཱཔེཡྻཱམཱ’’ཏི.

༣༢༣. ཡསྶ ¶ ཝཱིརིཡཱརམྦྷསྶ, ཁནྟིབལསྶ ཙ ཨབྷཱཝེན པབྦཛིཏཱནཾ སམཎདྷམྨོ པརིཔུཎྞོ, པརིསུདྡྷོ ཙ ན ཧོཏི, ཏེསུ ཝཱིརིཡཱརམྦྷཁནྟིབལེསུ ཏེ ཏེ ནིཡོཛེཏུཾ ‘‘ཨཱརམྦྷཝ྄ཧོ’’ཏིཨཱདི ཝུཏྟཾ.

ཀརུཎཱཛྷཱནམགྒོཏི ཀརུཎཱཛྷཱནསངྑཱཏོ མགྒོ. ཨུཛུམགྒོཏི བྲཧྨལོཀགམནེ ཨུཛུབྷཱུཏོ མགྒོ. ཨནུཏྟརོཏི སེཊྛོ བྲཧྨཝིཧཱརསབྷཱཝཏོ. ཏེནཱཧ ‘‘ཨུཏྟམམགྒོ ནཱམཱ’’ཏི. སབྦྷི རཀྑིཏོ སཱདྷཱུཧི ཡཐཱ པརིཧཱནི ན ཧོཏི, ཨེཝཾ པཊིཔཀྑདཱུརཱིཀརཎེན རཀྑིཏོ གོཔིཏོ. ‘‘སདྡྷམྨོ སབྦྷི ཝཀྑིཏོ’’ཏི ཀེཙི པཋནྟི, ཏེསཾ སཔརཧིཏསཱདྷནེན སཱདྷཱུཧི བུདྡྷཱདཱིཧི ཀཐིཏོ པཝེདིཏོཏི ཨཏྠོ.

ཏངྑཎཝིདྡྷཾསནདྷམྨནྟི ¶ ཡསྨིཾ ཁཎེ ཝིརོདྷིདྷམྨསམཱཡོགོ, ཏསྨིཾཡེཝ ཁཎེ ཝིནསྶནསབྷཱཝཾ, ཡོ ཝཱ སོ གམནསྶཱདཱནཾ དེཝཔུཏྟཱནཾ ཧེཊྛུཔརིཡེན པཊིམུཁཾ དྷཱཝནྟཱནཾ སིརསི, པཱདེ ཙ བདྡྷཁུརདྷཱརཱསམཱགམནཏོཔི སཱིགྷཏརཏཱཡ ཨཏིཨིཏྟརོ པཝཏྟིཀྑཎོ, ཏེནེཝ ཝིནསྶནསབྷཱཝཾ. ཏསྶ ཛཱིཝིཏསྶ. གཏིནྟི ནིཊྛཾ. མནྟཱཡནྟི མནྟེཡྻནྟི ¶ ཝུཏྟཾ ཧོཏཱིཏི ཨཱཧ ‘‘མནྟེཏབྦ’’ནྟི. ཀརཎཏྠེ ཝཱ བྷུམྨནྟི ‘‘མནྟཱཡ’’ནྟི ཨིདཾ བྷུམྨཾ ཀརཎཏྠེ དཊྛབྦཾ ཡཐཱ ‘‘ཉཱཏཱཡ’’ནྟི. སབྦཔལིབོདྷེཏི སབྦེཔི ཀུསལཀིརིཡཱཡ ཝིབནྡྷེ ཨུཔརོདྷེ.

བྲཱཧྨཎམཧཱསཱལཱདཱིནཾ ཨཱམནྟནཱཝཎྞནཱ

༣༢༤. ཨཔྤེསཀྑཱཏི ཨཔྤཱནུབྷཱཝཱཏི ཨཱཧ ‘‘པབྦཛིཏཀཱལཏོ པཊྛཱཡཱ’’ཏིཨཱདི.

ཙཀྐཝཏྟི རཱཛཱ ཝིཡ སམྦྷཱཝིཏོ.

མཧཱགོཝིནྡཔབྦཛྫཱཝཎྞནཱ

༣༢༨. སམཱཔཏྟཱིནཾ ཨཱཛཱནནཾ ནཱམ ཨཏྟཔཙྩཀྑཏཱ, སཙྪིཀིརིཡཱཏི ཨཱཧ ‘‘ན སཀྑིཾསུ ནིབྦཏྟེཏུ’’ནྟི.

༣༢༩. ཨིམིནཱཏི ‘‘སརཱམཧ’’ནྟི ཨིམིནཱ པདེན. ‘‘སརཱམཧ’’ནྟི ཧི ཝདནྟེན བྷགཝཏོ མཧཱབྲཧྨུནཱ ཀཐིཏཾ ‘‘ཏཐེཝ ཏ’’ནྟི བྷགཝཏཱ པཊིཉྙཱཏམེཝ ཛཱཏནྟི. ན ཝཊྚེ ནིབྦིནྡནཏྠཱཡ ཙཏུསཙྩཀམྨཊྛཱནཀཐཱཡ ཨབྷཱཝཏོ. ཨསཏི པན ཝཊྚེ ནིབྦིདཱཡ ཝིརཱགཱནཾ ཨསམྦྷཝོ ཨེཝཱཏི ཨཱཧ ¶ ‘‘ན ཝིརཱགཱཡཱ’’ཏིཨཱདི. ཨེཀནྟམེཝ ཝཊྚེ ནིབྦིནྡནཏྠཱཡ ཨནེཀཱཀཱརཝོཀཱརཝཊྚེ ཨཱདཱིནཝཝིབྷཱཝནཏོ.

‘‘ནིབྦིདཱཡཱ’’ཏི ཨིམིནཱ པདེན ཝིཔསྶནཱ ཝུཏྟཱ. ཨེས ནཡོ སེསེསུཔི. ཝཝཏྠཱནཀཐཱཏི ཝིཔསྶནཱམགྒནིབྦཱནཱནཾ ཏཾཏཾཔདེཧི ཝཝཏྠཔེཏྭཱ ཀཐཱ. ཨཡམེཏྠ ནིཔྤརིཡཱཡཀཐཱཏི ཨཱཧ ‘‘པརིཡཱཡེན པནཱ’’ཏིཨཱདི.

༣༣༠. པརིཔཱུརེཏུནྟི བྷཱཝནཱཔཱརིཔཱུརིཝསེན པརིཔུཎྞེ ཀཱཏུཾ, ནིབྦཏྟེཏུནྟི ཨཏྠོ. བྲཧྨཙརིཡཙིཎྞཀུལཔུཏྟཱནནྟི ¶ ཙིཎྞམགྒབྲཧྨཙརིཡཱནཾ ཀུལཔུཏྟཱནནྟི ཨུཀྐཊྛནིདྡེསེན ཨརཧཏྟནིཀཱུཊེན དེསནཾ ནིཊྛཔེསི.

ཨབྷིནནྡནཾ ནཱམ སམྤཊིཙྪནཾ ‘‘ཨབྷིནནྡནྟི ཨཱགཏ’’ནྟིཨཱདཱིསུ ¶ ཝིཡ, ཏཉྩེཏྠ ཨཏྠཏོ ཙིཏྟསྶ ཨཏྟམནཏཱཏི ཨཱཧ ‘‘ཙིཏྟེན སམྤཊིཙྪནྟོ ཨབྷིནནྡིཏྭཱ’’ཏི. ‘‘སཱདྷུ སཱདྷཱུ’’ཏི ཝཱཙཱཡ སམྤཧཾསནཱ ཨནུམོདནཱཏི ཨཱཧ ‘‘ཝཱཙཱཡ སམྤཧཾསམཱནོ ཨནུམོདིཏྭཱ’’ཏི.

མཧཱགོཝིནྡསུཏྟཝཎྞནཱཡ ལཱིནཏྠཔྤཀཱསནཱ.

༧. མཧཱསམཡསུཏྟཝཎྞནཱ

ནིདཱནཝཎྞནཱ

༣༣༡. ཨུདཱནནྟི ¶ ¶ ¶ རཉྙཱ ཨོཀྐཱཀེན ཛཱཏིསམྦྷེདཔརིཧཱརནིམིཏྟཾ པཝཏྟིཏཾ ཨུདཱནཾ པཊིཙྩ. ཨེཀོཔི ཛནཔདོ རུལ༹ྷིསདྡེན ‘‘སཀྐཱ’’ཏི ཝུཙྩཏཱིཏི ཨེཏྠ ཡཾ ཝཏྟབྦཾ, ཏཾ མཧཱནིདཱནཝཎྞནཱཡཾ ཝུཏྟནཡེན ཝེདིཏབྦཾ. ཨརོཔིཏེཏི ཀེནཙི ཨརོཔིཏེ.

ཨཱཝརཎེནཱཏི སེཏུནཱ. བནྡྷཱཔེཏྭཱཏི པཾསུཔལཱསཔཱསཱཎམཏྟིཀཱཁཎྜཱདཱིཧི ཨཱལི༹ཾ ཐིརཾ ཀཱརཱཔེཏྭཱ.

‘‘ཛཱཏིཾ གྷཊྚེཏྭཱ ཀལཧཾ ཝཌྜྷཡིཾསཱུ’’ཏི སངྑེཔེན ཝུཏྟམཏྠཾ པཱཀཊཏརཾ ཀཱཏུཾ ‘‘ཀོལིཡཀམྨཀརཱ ཝདནྟཱི’’ཏིཨཱདི ཝུཏྟཾ.

ཏཱིཎི ཛཱཏཀཱནཱིཏི ཕནྡནཛཱཏཀཔཐཝཱིཨུནྡྲིཡཛཱཏཀལཊུཀིཀཛཱཏཀཱནི དྭེ ཛཱཏཀཱནཱིཏི རུཀྑདྷམྨ ཝཊྚཀཛཱཏཀཱནི.

ཏེནཱཏི བྷགཝཏཱ. ཀལཧཀཱརཎབྷཱཝོཏི ཀལཧཀཱརཎསྶ ཨཏྠིབྷཱཝོ.

ཨཊྛཱནེཏི ཨཀཱརཎེ. ཝེརཾ ཀཏྭཱཏི ཝིརོདྷཾ ཨུཔྤཱདེཏྭཱ. ‘‘ཀུཋཱརིཧཏྠོ པུརིསོ’’ཏིཨཱདིནཱ ཕནྡནཛཱཏཀཾ ཀཐེསི. ‘‘དུདྡུབྷཱཡཏི བྷདྡནྟེ’’ཏིཨཱདིནཱ པཐཝཱིཨུནྡྲིཡཛཱཏཀཾ ཀཐེསི. ‘‘ཝནྡཱམི ཏཾ ཀུཉྫརཱ’’ཏིཨཱདིནཱ ལཊུཀིཀཛཱཏཀཾ ཀཐེསི.

‘‘སཱདྷཱུ ¶ སམྦཧུལཱ ཉཱཏཱི; ཨཔི རུཀྑཱ ཨརཉྙཛཱ;

ཝཱཏོ ཝཧཏི ཨེཀཊྛཾ, བྲཧནྟམྤི ཝནཔྤཏི’’ནྟི. –

ཨཱདིནཱ རུཀྑདྷམྨཛཱཏཀཾ ཀཐེསི.

‘‘སམྨོདམཱནཱ ¶ གཙྪནྟི, ཛཱལཾ ཨཱདཱཡ པཀྑིནོ;

ཡདཱ ཏེ ཝིཝདིསྶནྟི, ཏདཱ ཨེཧིནྟི མེ ཝས’’ནྟི. –

ཨཱདིནཱ ཝཊྚཀཛཱཏཀཾ ཀཐེསི.

‘‘ཨཏྟདཎྜཱ ¶ བྷཡཾ ཛཱཏཾ, ཛནཾ པསྶཐ མེདྷགཾ;

སཾཝེགཾ ཀིཏྟཡིསྶཱམི, ཡཐཱ སཾཝིཛིཏཾ མཡཱ’’ཏི. (སུ. ནི. ༡.༩༤༡);

ཨཱདིནཱ ཨཏྟདཎྜསུཏྟཾ ཀཐེསི.

ཏཾཏཾཔལོབྷནཀིརིཡཱ ཀཱཡཝཱཙཱཧི པརཀྐམནྟིཡོ ‘‘ཨུཀྐཎྛནྟཱུ’’ཏི སཱསནཾ པེསེནྟི.

ཀུཎཱལདཧེཏི ཀུཎཱལདཧཏཱིརེ པཏིཊྛཱཡ. པུཙྪིཏཔུཙྪིཏཾ ཀཐེསི (ཛཱ. ༢.ཀུཎཱལཛཱཏཀ) ‘‘ཨནུཀྐམེན ཀུཎཱལསཀུཎརཱཛསྶ པུཙྪནཔྤསངྒེན ཀུཎཱལཛཱཏཀཾ ཀཐེསྶཱམཱི’’ཏི. ཨནབྷིརཏིཾ ཝིནོདེསི ཨིཏྠཱིནཾ དོསདསྶནམུཁེན ཀཱམཱནཾ ཨཱདཱིནཝོཀཱརསཾཀིལེསཝིབྷཱཝནེན.

ཀོསཛྫཾ ཝིདྷམིཏྭཱ པུརིསཐཱམཔརིབྲཱུཧནེན ‘‘ཨུཏྟམཔུརིསསདིསེཧི ནོ བྷཝིཏུཾ ཝཊྚཏཱི’’ཏི ཨུཔྤནྣཙིཏྟཱ.

ཨཝིསྶཊྛཀམྨནྟཱཏི ཨརཏིཝིནོདནཏོ པཊྛཱཡ ཨཝིསྶཊྛསམཎཀམྨནྟཱ, ཨཔརིཙཏྟཀམྨཊྛཱནཱཏི ཨཏྠོ. ནིསཱིདིཏུཾ ཝཊྚཏཱིཏི བྷགཝཱ ཙིནྟེསཱིཏི ཡོཛནཱ.

པདུམིནིཡནྟི པདུམསྶརེ. ཝིཀསིཾསུ གུཎགཎཝིབོདྷེན. ‘‘ཨཡཾ ཨིམསྶ…པེ… ན ཀཐེསཱི’’ཏི ཨིམིནཱ སབྦེཔི ཏེ བྷིཀྑཱུ ཏཱཝདེཝ པཊིཔཱཊིཡཱ ཨཱགཏཏྟཱ ཨཉྙམཉྙསྶ ལཛྫམཱནཱ ¶ ཨཏྟནཱ པཊིཝིདྡྷཝིསེསཾ བྷགཝཏོ ནཱརོཙེསུནྟི དསྶེཏི. ‘‘ཁཱིཎཱསཝཱན’’ནྟིཨཱདིནཱ ཏཏྠ ཀཱརཎམཱཧ.

ཨོསཱིདམཏྟེཏི བྷགཝཏོ སནྟིཀཾ ཨུཔགཏམཏྟེ. ཨརིཡམཎྜལེཏི ཨརིཡསམཱུཧེ. པཱཙཱིནཡུགནྡྷརཔརིཀྑེཔཏོཏི ཡུགནྡྷརཔབྦཏསྶ པཱཙཱིནཔརིཀྑེཔཏོ, ན བཱཧིརཀེཧི ཨུཙྩམཱནཨུདཡཔབྦཏཏོ. རཱམཎེཡྻཀདསྶནཏྠནྟི བུདྡྷུཔྤཱདཔཊིམཎྜིཏཏྟཱ ཝིསེསཏོ རམཎཱིཡསྶ ལོཀསྶ རམཎཱིཡབྷཱཝདསྶནཏྠཾ. ཨུལླངྒྷིཏྭཱཏི ¶ ཨུཊྛཧིཏྭཱ. ཨེཝརཱུཔེ ཁཎེ ལཡེ མུཧུཏྟེཏི ཡཐཱཝུཏྟེ ཙནྡམཎྜལསྶ ཨུཊྛིཏཀྑཎེ ཨུཊྛིཏཝེལཱཡཾ ཨུཊྛིཏམུཧུཏྟེཏི ཨུཔརཱུཔརི ཀཱལསྶ ཝཌྜྷིཏབྷཱཝདསྶནཏྠཾ ཝུཏྟཾ.

ཏཐཱ ¶ ཏེསཾ བྷིཀྑཱུནཾ ཛཱཏིཨཱདིཝསེན བྷགཝཏོ ཨནུརཱུཔཔརིཝཱརིཏཾ དསྶེནྟོ ‘‘ཏཏྠཱ’’ཏི ཨཱདིམཱཧ.

སམཱཔནྣདེཝཏཱཏི ཨཱསནྣཊྛཱནེ ཛྷཱནསམཱཔཏྟི སམཱཔནྣདེཝཏཱ. ཙལིཾསཱུཏི ཨུཊྛཧིཾསུ. ཀོསམཏྟཾ ཋཱནཾ སདྡནྟརཾ. ཛམྦུདཱིཔེ ཀིར ཨཱདིཏོ ཏེསཊྛིམཏྟཱནི ནགརསཧསྶཱནི ཨུཔྤནྣཱནི, ཏཐཱ དུཏིཡཾ, ཏཐཱ ཏཏིཡཾ, ཏཾ སནྡྷཱཡཱཧ ‘‘ཏིཀྑཏྟུཾ ཏེསཊྛིཡཱ ནགརསཧསྶེསཱུ’’ཏི. ཏེ པན སམྤིཎྜེཏྭཱ སཏསཧསྶཏོ པརཾ ཨསཱིཏིསཧསྶཱནི, ནཝསཧསྶཱནི ཙ ཧོནྟི. ནཝནཝུཏིཡཱ དོཎམུཁསཏསཧསྶེསཱུཏི ནཝསཏསཧསྶཱདྷིཀེསུ ནཝུཏིསཏསཧསྶེསུ དོཎམུཁེསུ. དོཎམུཁནྟི ཙ མཧཱནགརསྶ ཨཱཡུཔྤཏྟིཊྛཱནབྷཱུཏཾ པཱདནགརཾ ཝུཙྩཏི. ཚནྣཝུཏིཡཱ པཊྚནཀོཊིསཏསཧསྶེསཱུཏི ཚཀོཊིཨདྷིཀནཝུཏིཀོཊིསཏསཧསྶཔཊྚནེསུ. ཏམྦཔཎྞིདཱིཔཱདཱིསུ ཚཔཎྞཱསཱཡ རཏནཱཀརེསུ. ཨེཝཾ པན ནགརདོཎིམུཁཔཊྚནརཏནཱཀརཱདིཝིབྷཱགེན ཀཐནཾ ཏཾཏཾཨདྷིཝཏྠཱཡ ཝསནྟཱིནཾ དེཝཏཱནཾ བཧུབྷཱཝདསྶནཏྠཾ. ཡདི དསསཧསྶཙཀྐཝཱལེ༹སུ དེཝཏཱ སནྣིཔཏིཏཱ, ཨཐ ཀསྨཱ པཱལི༹ཡཾ ‘‘དསཧི ཙ ལོཀདྷཱཏཱུཧཱི’’ཏི ཝུཏྟནྟི ཨཱཧ ‘‘དསསཧསྶ…པེ… ཨདྷིཔྤེཏཱ’’ཏི, ཏེན སཧསྶིལོཀདྷཱཏུ ཨིདྷ ‘‘ཨེཀཱ ལོཀདྷཱཏཱུ’’ཏི ཝུཏྟཱཏི ཝེདིཏབྦཾ.

ལོཧཔཱསཱདེཏི ཨཱདིཏོ ཀཏེ ལོཧཔཱསཱདེ. བྲཧྨལོཀེཏི ཧེཊྛིམེ བྲཧྨལོཀེ. ཡདི ཏཱ དེཝཏཱ ཨེཝཾ ནིརནྟརཱ, པཙྪཱ ཨཱགཏཱནཾ ཨོཀཱསོ ཨེཝ ན བྷཝེཡྻཱཏི ཙོདནཾ སནྡྷཱཡཱཧ ‘‘ཡཐཱ ཁོ པནཱ’’ཏིཨཱདི. སུདྡྷཱཝཱསཀཱཡཾ ཨུཔཔནྣཱ སུདྡྷཱཝཱསཀཱཡིཀཱ, ཏཱསཾ པན ཡསྨཱ སུདྡྷཱཝཱསབྷཱུམི ནིཝཱསཊྛཱནཾ, ཏསྨཱ ཝུཏྟཾ ‘‘སུདྡྷཱཝཱསཝཱསཱིན’’ནྟི. ཨཱཝཱསཱཏི ཨཱཝཱསནཊྛཱནབྷཱུཏཱ ¶ ¶ , དེཝཏཱ པན ཨོརམྦྷཱགིཡཱནཾ, ཨིཏརེསཉྩ སཾཡོཛནཱནཾ སམུཙྪིནྡནེན སུདྡྷོ ཨཱཝཱསོ ཨེཏེསནྟི སུདྡྷཱཝཱསཱ.

༣༣༢. པུརཏྠིམཙཀྐཝཱལ༹མུཁཝཊྚིཡཾ ཨོཏརི ཨཉྙཏྠ ཨོཀཱསཾ ཨལབྷམཱནོ. ཨེཝཾ སེསཱཔི. བུདྡྷཱནཾ ཨབྷིམུཁམགྒོ བུདྡྷཝཱིཐི. ཡཱཝ ཙཀྐཝཱལཱ༹ ཨོཏྠརིཏུཾ ཨོཝརིཏུཾ ན སཀྐཱ. པཧཊབུདྡྷཝཱིཐིཡཱཝཱཏི བུདྡྷཱནཾ སནྟིཀཾ ཨུཔསངྐམནྟེཧི ཏེཧི དེཝབྲཧྨེཧི ཝལ༹ཉྫིཏཝཱིཐིཡཱཝ. སམིཏི སངྒཏི སནྣིཔཱཏོ སམཡོ, མཧནྟོ སམཡོ མཧཱསམཡོཏི ཨཱཧ ‘‘མཧཱསམཱུཧོ’’ཏི ¶ . པཝདྡྷཾ ཝནཾ པཝནནྟི ཨཱཧ ‘‘ཝནསཎྜོ’’ཏི. དེཝགྷཊཱཏི དེཝསམཱུཧཱ.

སམཱདཧཾསཱུཏི སམཱདཧིཏཾ ལོཀུཏྟརསམཱདྷིནཱ སུཊྛུ ཨཔྤིཏཾ ཨཀཾསུ, ཡཐཱསམཱཧིཏཾ པན སམཱདྷིནཱ ཡོཛིཏཾ ནཱམ ཧོཏཱིཏི ཝུཏྟཾ ‘‘སམཱདྷིནཱ ཡོཛེསུ’’ནྟི. སབྦེསཾ གོམུཏྟཝངྐཱདཱིནཾ དཱུརསམཱུཧནིཏཏྟཱ སབྦེ…པེ… ཨཀརིཾསུ. ནཡཏི ཨསྶེ ཨེཏེཧཱིཏི ནེཏྟཱནི, ཡོཏྟཱནི. ཨཝཱིཐིཔཊིཔནྣཱནཾ ཨསྶཱནཾ ཝཱིཐིཔཊིཔཱདནཾ རསྨིགྒཧཎེན པཧོཏཱིཏི ‘‘སབྦཡོཏྟཱནི གཧེཏྭཱ ཨཙོདེནྟོ’’ཏི ཝཏྭཱ ཏཾ པན ཨཙོདནཾ ཨཝཱརཎཾ ཨེཝཱཏི ཨཱཧ ‘‘ཨཙོདེནྟོ ཨཝཱརེནྟོ’’ཏི.

ཡཐཱ ཁཱིལཾ བྷིཏྟིཡཾ ཝཱ བྷཱུམིཡཾ ཝཱ ཨཱཀོཊིཏཾ དུནྣཱིཧརཎཾ, ཡཐཱ ཙ པལིགྷཾ ནགརཔྤཝེསནིཝཱརཎཾ, ཡཐཱ ཙ ཨིནྡཁཱིལཾ གམྦྷཱིརནེམི སུནིཁཱཏཾ དུནྣཱིཧརཎཾ, ཨེཝཾ རཱགཱདཡོ སཏྟསནྟཱནཏོ དུནྣཱིཧརཎཱ, ནིབྦཱནནགརཔྤཝེསནིཝཱརཎཱ ཙཱཏི ཏེ ‘‘ཁཱིལཾ, པལིགྷཾ, ཨིནྡཁཱིལ’’ནྟི ཙ ཝུཏྟཱ. ཏཎྷཱཨེཛཱཡ ཨབྷཱཝེན ཨནེཛཱ པརམསནྟུཊྛབྷཱཝེན ཙཱཏུདྡིསཏྟཱ ཨཔྤཊིཧཏཙཱརིཀཾ ཙརནྟི.

གཏཱསེཏི གཏཱ ཨེཝ, ན པན གམིསྶནྟི པརིནིཊྛིཏསརཎགམནཏྟཱཏི ¶ . ལོཀུཏྟརསརཎགམནཾ ཨདྷིཔྤེཏནྟི ཨཱཧ ‘‘ནིབྦེམཏིཀསརཎགམནེན གཏཱ’’ཏི. ཏེ ཧི ནིཡམེན ཨཔཱཡབྷཱུམིཾ ན གམིསྶནྟི, དེཝཀཱཡཉྩ པརིཔཱུརེསྶནྟི. ཡེ པན ལོཀིཡེན སརཎགམནེན བུདྡྷཾ སརཎཾ གཏཱསེ, ན ཏེ གམིསྶནྟི ཨཔཱཡབྷཱུམིཾ, སཏི ཙ པཙྩཡནྟརསམཝཱཡེ པཧཱཡ མཱནུསཾ དེཧཾ, དེཝཀཱཡཾ པརིཔཱུརེསྶནྟཱིཏི ཨཡམེཏྠ ཨཏྠོ.

དེཝཏཱསནྣིཔཱཏཝཎྞནཱ

༣༣༣. ཨེཏེསནྟི ¶ དེཝཏཱསནྣིཔཱཏཱནཾ. ཨིདཱནཱིཏི ཨིམསྨིཾ ཀཱལེ. བུདྡྷཱནནྟི ཨཉྙེསཾ བུདྡྷཱནཾ ཨབྷཱཝཱ. ཙིཏྟཀལླཏཱ ཙིཏྟམདྡཝཾ.

ཀིཾ པན བྷགཝཏཱཝ མཧནྟེ དེཝཏཱསམཱགམེ ཏེསཾ ནཱམགོཏྟཾ ཀཐེཏུཾ སཀྐཱཏི? ཨཱམ སཀྐཱཏི དསྶེཏུཾ ‘‘བུདྡྷཱ ནཱམ མཧནྟཱ’’ཏིཨཱདི ཝུཏྟཾ. ཏཏྠ དིཊྛནྟི རཱུཔཱཡཏནམཱཧ, སུཏནྟི སདྡཱཡཏནཾ, མུཏནྟི སམྤཏྟགྒཱཧིཨིནྡྲིཡཝིསཡཾ གནྡྷརསཕོཊྛབྦཱཡཏནཾ, ཝིཉྙཱཏནྟི ཝུཏྟཱཝསེསཾ སབྦཾ ¶ ཉེཡྻཾ, པཏྟནྟི པརིཡེསིཏྭཱ, ཨཔརིཡེསིཏྭཱ ཝཱ སམྤཏྟཾ, པརིཡེསིཏནྟི པཏྟཾ, ཨཔྤཏྟཾ ཝཱ པརིཡིཊྛཾ. ཨནུཝིཙརིཏཾ མནསཱཏི ཀེཝལཾ མནསཱ ཨཱལོཙིཏཾ. ཀཏྠཙི ནཱིལཱདིཝསེན ཝིབྷཏྟརཱུཔཱརམྨཎེཏི ཨབྷིདྷམྨེ (དྷ. ས. ༦༡༥) ‘‘ནཱིལཾ པཱིཏཀ’’ནྟིཨཱདིནཱ ཝིབྷཏྟེ ཡཏྠ ཀཏྠཙི རཱུཔཱརམྨཎེ ཀིཉྩི རཱུཔཱརམྨཎཾ ཝཱ ན ཨཏྠཱིཏི ཡོཛནཱ. བྷེརིསདྡཱདིཝསེནཱཏི ཨེཏྠཱཔི ཨེསེཝ ནཡོ. ཡནྟི ཡཾ ཨཱརམྨཎཾ. ཨེཏེསནྟི བུདྡྷཱནཾ.

ཨིདཱནི ཡཐཱཝུཏྟམཏྠཾ པཱལི༹ཡཱ སམཏྠེཏུཾ ‘‘ཡཐཱཧཱ’’ཏིཨཱདི ཝུཏྟཾ. ཏདཱ ཛཱནནཀིརིཡཱཡ ཨཔརིཡོསིཏབྷཱཝདསྶནཏྠཾ ‘‘ཛཱནཱམཱི’’ཏི ཝཏྭཱ ཡསྨཱ ཡཾ ཀིཉྩི ནེཡྻཾ ནཱམ, སབྦཾ ཏཾ བྷགཝཏཱ ཨཉྙཱཏཾ ནཱམ ནཏྠི, ཏསྨཱ ཝུཏྟཾ ‘‘ཏམཧཾ ཨབྦྷཉྙཱསི’’ནྟི.

ན ཨོལོཀེནྟི པཡོཛནཱབྷཱཝཏོ. ཝིཔརཱིཏཱ ‘‘ན ཀམྨཱཝརཎེན སམནྣཱགཏཱ’’ཏིཨཱདིནཱ ནཡེན ཝུཏྟཱ. ‘‘ཡསྶ མངྒལཱ སམཱུཧཏཱ’’ཏི (སུ. ནི. ༣༦༢) ཨཱརབྷིཏྭཱ ‘‘རཱགཾ ¶ ཝིནཡེཐ མཱནུསེསུ དིབྦེསུ ཀཱམེསུ ཙཱ’’ཏིཨཱདིནཱ (སུ. ནི. ༣༦༣) ཙ རཱགནིགྒཧཀཐཱབཱཧུལླཏོ སམྨཱཔརིབྦཱཛནཱིཡསུཏྟཾ རཱགཙརིཏཱནཾ སཔྤཱཡཾ, ‘‘པིཡམཔྤིཡབྷཱུཏཱ ཀལཧ ཝིཝཱདཱ པརིདེཝསོཀཱ སཧམཙྪརཱ ཙཱ’’ཏིཨཱདིནཱ (སུ. ནི. ༨༦༩; མཧཱནི. ༩༨) ཀལཧཱདཡོ ཡཏོ དོསཏོ སམུཊྛཧནྟི, སོ ཙ དོསོ ཡཏོ པིཡབྷཱཝཏོ, སོ ཙ པིཡབྷཱཝོ ཡཏོ ཚནྡཏོ སམུཊྛཧནྟི, ཨིཏི ཕལཏོ, ཀཱརཎཔརམྤརཏོ ཙ དོསེ ཨཱདཱིནཝཝིབྷཱཝནབཱཧུལླཏོ ཀལཧཝིཝཱདསུཏྟཾ (སུ. ནི. ༨༦༩; མཧཱནི. ༩༨) དོསཙརིཏཱནཾ སཔྤཱཡཾ –

‘‘ཨཔྤཉྷི ཨེཏཾ ན ཨལཾ སམཱཡ,

དུཝེ ཝིཝཱདསྶ ཕལཱནི བྲཱུམི;

ཨེཏམྤི ¶ དིསྭཱ ན ཝིཝཱདཡེཐ,

ཁེམཱབྷིཔསྶཾ ཨཝིཝཱདབྷཱུམི’’ནྟི. (སུ. ནི. ༩༠༢; མཧཱནི. ༡༣༡) –

ཨཱདིནཱ ནཡེན སམྨོཧཝིདྷམནཏོ, པཉྙཱཔརིབྲཱུཧནཏོ ཙ མཧཱབྱཱུཧསུཏྟཾ མོཧཙརིཏཱནཾ སཔྤཱཡཾ –

‘‘པརསྶ ¶ ཙེ དྷམྨཾ ཨནཱནུཛཱནཾ,

བཱལོ, མགོ ཧོཏི ནིཧཱིནཔཉྙོ;

སབྦེཝ བཱལཱ སུནིཧཱིནཔཉྙཱ,

སབྦེཝིམེ དིཊྛིཔརིབྦསཱནཱ’’ཏི. (སུ. ནི. ༨༨༦; མཧཱནི. ༡༡༥) –

ཨཱདིནཱ ནཡེན སནྡིཊྛིཔརཱམཱསིཏཱཔནཡནམུཁེན སཝིསཡེསུ དིཊྛིགྒཧཎེསུ ཝིསཊཝིཏཀྐཝིཙྪིནྡནཝསེན པཝཏྟཏྟཱ ཙཱུལ༹བྱཱུཧསུཏྟཾ ཝིཏཀྐཙརིཏཱནཾ སཔྤཱཡཾ –

‘‘མཱུལཾ ¶ པཔཉྩསངྑཱཡ (ཨིཏི བྷགཝཱ),

མནྟཱ ཨསྨཱིཏི སབྦཾ ཨུཔརུནྡྷེ;

ཡཱ ཀཱཙི ཏཎྷཱ ཨཛ྄ཛྷཏྟཾ,

ཏཱསཾ ཝིནཡཱ སདཱ སཏོ སིཀྑེ’’ཏི. (སུ. ནི. ༩༢༢; མཧཱནི. ༡༥༡) –

པཔཉྩསངྑཱཡ མཱུལཾ ཨཝིཛྫཱདིཀིལེསཛཱཏཾ ཨསྨཱིཏི པཝཏྟམཱནཉྩཱཏི སབྦཾ མནྟཱ པཉྙཱཡ ཨུཔརུནྡྷེཡྻ. ཡཱ ཀཱཙི ཨཛ྄ཛྷཏྟཾ རཱུཔཏཎྷཱདིབྷེདཱ ཏཎྷཱ ཨུཔྤཛྫེཡྻ, ཏཱསཾ ཝིནཡཱ ཝཱུཔསམཱཡ སདཱ སཏོ ཨུཔཊྛིཏསྶཏི ཧུཏྭཱ སིཀྑེཡྻཱཏི ཨེཝམཱདི ཨུཔདེསསྶ སདྡྷོཝ བྷཱཛནཾ. ཏསྶ ཧི སོ ཨཏྠཱཝཧོཏི ཏུཝཊྚཀསུཏྟཾ སདྡྷཱཙརིཏཱནཾ སཔྤཱཡཾ –

‘‘ཝཱིཏཏཎྷོ པུརཱ བྷེདཱ (ཨིཏི བྷགཝཱ),

པུབྦམནྟམནིསྶིཏོ;

ཝེམཛ྄ཛྷེ ¶ ནུཔསངྑེཡྻོ,

ཏསྶ ནཏྠི པུརཀྑཏ’’ནྟི. (སུ. ནི. ༨༥༥; མཧཱནི. ༨༤) –

ཡོ སརཱིརབྷེདཏོ པུབྦེཝ པཧཱིནཏཎྷོ, ཏཏོ ཨེཝ ཨཏཱིཏདྡྷསཉྙིཏཾ པུརིམཀོཊྛཱསཾ ཏཎྷཱནིསྶཡེན ཨནིསྶིཏོ, ཝེམཛ྄ཛྷེ པཙྩུཔྤནྣེཔི ཨདྡྷནི ‘‘རཏྟོ’’ཏིཨཱདིནཱ ཨུཔསངྑཱཏབྦོ, ཏསྶ ཨརཧཏོ ཏཎྷཱདིཊྛིཔུརཀྑཱརཱནཾ ཨབྷཱཝཱ ཨནཱགཏེ ཨདྡྷནི ཀིཉྩི པུརཀྑཏཾ ནཏྠཱིཏི ཨཱདིནཱ ཨེཝཾ གམྦྷཱིརཀཐཱབཱཧུལླཏོ པཱུརཱབྷེདསུཏྟཾ (སུ. ནི. ༨༥༥; མཧཱནི. ༨༤) བུདྡྷིཙརིཏཱནཾ སཔྤཱཡནྟི ཀཏྭཱ ཝུཏྟཾ ‘‘ཨཐ ནེསཾ སཔྤཱཡཾ …པེ… ཝཝཏྠཔེཏྭཱ’’ཏི. མནསཱཀཱསཱིཏི ཨེཝཾ ཙརིཡཱཡ ཝསེན མནསི ཀཏྭཱ པུན ཏཾ སདིསཾ ཨཏྟནོ ¶ དེསནཱནིཀྑེཔཡོགྱཏཱཝསེན མནསི ཨཀཱསི. ཨཏྟཛ྄ཛྷཱསཡེན ནུ ཁོ ཛཱནེཡྻཱཏི པརཛ྄ཛྷཱསཡཱདིཾ ཨནཔེཀྑིཏྭཱ མཡ྄ཧཾཡེཝ ཨཛ྄ཛྷཱསཡེན ཨཱརདྡྷ དེསནཾ ¶ ཛཱནེཡྻ ནུ ཁོ. པརཛ྄ཛྷཱསཡེནཱཏི སནྣིཔཏིཏཱཡ པརིསཱཡ ཀསྶཙི ཨཛ྄ཛྷཱསཡེན. ཨཊྛུཔྤཏྟིཀེནཱཏི ཨིདྷ སམུཊྛིཏཨཊྛུཔྤཏྟིཡཱ. པུཙྪཱཝསེནཱཏི ཀསྶཙི པུཙྪནྟསྶ པུཙྪཱཝསེན. ཨཱརདྡྷདེསནཾ ཛཱནེཡྻཱཏི. ‘‘སཙེ པཙྩེཀབུདྡྷོ བྷཝེཡྻཱ’’ཏི ཨིདཾ ཨིམེསཾ སུཏྟཱནཾ དེསནཱཡ པུཙྪཱ པཙྩེཀབུདྡྷཱནཾ བྷཱརིཡཱ, ཨཝིསཡཱ ཙཱཏི དསྶནཏྠཾ ཝུཏྟཾ. ཏེནཱཧ ‘‘སོཔི ན སཀྐུཎེཡྻཱ’’ཏི.

ཨེཏྠ ཙ ཡསྨཱ ན ཨནུམཏིཔུཙྪཱ, ཀཐེཏུཀམྱཏཱཔུཙྪཱ ཝཱ ཡུཏྟཱ, ཨཐ ཁོ དིཊྛསཾསནྡནཔུཙྪཱསདིསཱི ཝཱ ཝིམཏིཙྪེདནཔུཙྪཱསདིསཱི ཝཱ པུཙྪཱ ཡུཏྟཱ, ཏཱཝ པུགྒལཛ྄ཛྷཱསཡཝསེན པཝཏྟིཏཱ ནཱམ ཧོནྟི, ན ཡཐཱདྷམྨཝསེན, ཏཏྠ ཡདི བྷགཝཱ ཏཐཱ སཡམེཝ པུཙྪིཏྭཱ སཡམེཝ ཝིསྶཛྫེཡྻ, སུཎནྟཱིནཾ དེཝཏཱནཾ སམྨོཧོ བྷཝེཡྻ ‘‘ཀིཾ ནཱམེཏཾ བྷགཝཱ པཋམཾ ཨེཝམཱཧ, པུནཔི ཨེཝམཱཧཱ’’ཏི, ཨནྡྷཀཱརཾ པཝིཊྛཱ ཝིཡ ཧོནྟི, ཏསྨཱ ཝུཏྟཾ ‘‘ཨེཝཾ པེཏཱ དེཝཏཱ ན སཀྑིསྶནྟི པཊིཝིཛ྄ཛྷིཏུ’’ནྟི. ཡཐཱདྷམྨདེསནཱཡཾ པན ཀཐེཏུཀམྱཏཱཝསེན པུཙྪནེན སམྨོཧོ ཧོཏཱིཏི. སཱུརིཡོ ཨུགྒཏོཏི ཨཱཧ དེཝསངྒྷོ ཨཱསནྣཏརབྷཱཝེན ཨོབྷཱསསྶ ཝིཔུལཨུལཱ༹རབྷཱཝཏོ. ཨེཀིསྶཱ ལོཀདྷཱཏུཡཱཏི སུཏྟེ (དཱི. ནི. ༣.༡༦༡; མ. ནི. ༣.༡༢༩; ཨ. ནི. ༡.༢༧༧; ཝིབྷ. ༨༠༩; ནེཏྟི. ༥༧; མི. པ. ༥.༡.༡) ཨཱགཏནཡེན སབྦཏྠེཝ པན ཨཔུབྦཾ ཨཙརིམཾ དྭེ བུདྡྷཱ ན ཧོནྟེཝ. ཏེནེཝཱཧ – ‘‘ཨནནྟཱསུ…པེ… ཨདྡསཱ’’ཏི.

གཱཐཱཡཾ པུཙྪཱམཱིཏི ནིམྨིཏབུདྡྷོ བྷགཝནྟཾ པུཙྪིཏུཾ ཨོཀཱསཾ ཀཱརཱཔེསི. མུནིནྟི བུདྡྷམུནིཾ ¶ . པཧཱུཏཔཉྙནྟི མཧཱཔཉྙཾ. ཏིཎྞནྟི ཙཏུརོགྷཏིཎྞཾ. པཱརངྒཏནྟི ནིབྦཱནཔྤཏྟཾ, སབྦསྶ ཝཱ ཉེཡྻསྶ པཱརཾ པརིཡནྟཾ གཏཾ. པརིནིབྦུཏཾ སཨུཔཱདིསེསནིབྦཱནཝསེན. ཋིཏཏྟནྟི ཨཝཊྛིཏཙིཏྟཾ ལོཀདྷམྨེཧི ཨཀམྤནེཡྻཏཱཡ. ནིཀྑམྨ གྷརཱ པནུཛྫ ཀཱམེཏི ཝཏྠུཀཱམེ པནཱུདིཏྭཱ གྷརཱཝཱསཱ ནིཀྑམྨ. ཀཐཾ བྷིཀྑུ སམྨཱ སོ ལོཀེ པརིབྦཛེཡྻཱཏི སོ བྷིཀྑུ ཀཐཾ སམྨཱ པརིབྦཛེཡྻ གཙྪེཡྻ ཝིཧརེཡྻ, ཨནུཔལིཏྟོ ཧུཏྭཱ ལོཀཾ ཨཏིཀྐམེཡྻཱཏི ཨཏྠོ.

༣༣༤. སིལོཀཾ ¶ ཨནུཀསྶཱམཱིཏི ¶ ཨེཏྠ སིལོཀོ ནཱམ པཱདསམུདཡོ, ཨིསཱིཧི ཝུཙྩམཱནཱ གཱཐཱཏིཔི ཝུཙྩཏི. པཱདོཝ ནིཡཏཝཎྞཱནུཔུབྦིཀཱནཾ པདཱནཾ སམཱུཧོ, ཏཾ སིལོཀཾ ཨནུཀསྶཱམི པཝཏྟཡིསྶཱམཱིཏི ཨཏྠོཏི ཨཱཧ ‘‘ཨཀྑར…པེ… པཝཏྟཡིསྶཱམཱི’’ཏི. ཡཏྠཱཏི ཨདྷིཀརཎེ བྷུམྨཾ. ཨཱམེཌིཏལོཔེནཱཡཾ ནིདྡེསོཏི ཨཱཧ ‘‘ཡེསུ ཡེསུ ཋཱནེསཱུ’’ཏི. བྷུམྨཱཏི བྷཱུམིཔཊིབདྡྷནིཝཱསཱ. ཏཾ ཏཾ ནིསྶིཏཱ ཏཾ ཏཾ ཋཱནཾ ནིསྶིཏཝནྟོ ནིསྶཱཡ ཝསམཱནཱ, ཏེཧི སདྡྷིཾ སིལོཀཾ ཨནུཀསྶཱམཱིཏི ཨདྷིཔྤཱཡོ. ‘‘ཡེ སིཏཱ གིརིགབྦྷར’’ནྟི ཨིམིནཱ ཏེསཾ ཝིཝེཀཝཱསཾ དསྶེཏི, ‘‘པཧིཏཏྟཱ སམཱཧིཏཱ’’ཏི ཨིམིནཱ བྷཱཝནཱབྷིཡོགཾ.

བཧུཛནཱ པཉྩསཏསངྑྱཏྟཱ. པཊིཔཀྑཱབྷིབྷཝནཏོ, ཏེཛུསྶདཏཱཡ ཙ སཱིཧཱ ཝིཡ པཝིཝིཏྟཏཱཡ ནིལཱིནཱ. ཨེཀཏྟནྟི ཨེཀཱིབྷཱཝཾ. ཨོདཱཏཙིཏྟཱ ཧུཏྭཱ སུདྡྷཱཏི ཨརཧཏྟམགྒཱདྷིགམེན པརིཡོདཱཏཙིཏྟཱ ཧུཏྭཱ སུདྡྷཱ, ན ཀེཝལཾ སརཱིརསུདྡྷིཡཱཝ. ཝིཔྤསནྣཱཏི ཨརིཡམགྒཔྤསཱདེན ཝིསེསཏོ པསནྣཱ. ཙིཏྟསྶ ཨཱཝིལབྷཱཝཀརཱནཾ ཀིལེསཱནཾ ཨབྷཱཝེན ཨནཱཝིལཱ.

བྷིཀྑཱུ ཛཱནིཏྭཱཏི བྷིནྣཀིལེསེ བྷིཀྑཱུ ‘‘ཨིམེ དིབྦཙཀྑུནཱ ཨེཏེ དེཝཀཱཡེ པསྶནྟཱིཏི ཛཱནིཏྭཱ. སཝནནྟེ ཛཱཏཏྟཱཏི དྷམྨསྶཝནཔརིཡོསཱནེ ཨརིཡཛཱཏིཡཱ ཛཱཏཏྟཱ. ཨིདཾ སབྦནྟི ཨིདཾ ‘‘བྷིཡྻོ པཉྩསཏེ’’ཏིཨཱདིཀཾ སབྦཾ.

ཏདཏྠཱཡ ཝཱིརིཡཾ ཀརིཾསཱུཏི དིབྦཙཀྑུཉཱཎཱབྷིནཱིཧཱརཝསེན ཝཱིརིཡཾ ཨུསྶཱཧཾ ཨཀཾསུ. ཏེནཱཧ ‘‘ན ཏཾ ཏེཧཱི’’ཏིཨཱདི. སཏྟརིནྟི ཏ-ཀཱརསྶ ར-ཀཱརཱདེསཾ ཀཏྭཱ ཝུཏྟཾ, སཏྟཏིནྟི ཨཏྠོ. ‘‘སཧསྶ’’ནྟི པན ཨནུཝཏྟཏི, སཏྟཏིཡོགེན བཧུཝཙནཾ. ཏེནཱཧ ‘‘ཨེཀེ སཧསྶཾ. ཨེཀེ སཏྟཏིསཧསྶཱནཱི’’ཏི.

ཨནནྟནྟི ཨནྟརཧིཏཾ, ཏཾ པན ཨཏིཝིཡ མཧནྟཾ ནཱམ ཧོཏཱིཏི ཨཱཧ ‘‘ཝིཔུལ’’ནྟི.

ཨཝེཀྑིཏྭཱཏི ¶ ¶ ཉཱཎཙཀྑུནཱ ཝིསུཾ ཝིསུཾ ཨཝེཀྑིཏྭཱ ‘‘ཝཝཏྠིཏྭཱནཱ’’ཏིཔི པཋནྟི, སོ ཨེཝཏྠོ. ཏཾ ཨཝེཀྑནཾ ནིཙྪཡཀརཎཾ ཧོཏཱིཏི ཨཱཧ ‘‘ཝཝཏྠཔེཏྭཱ’’ཏི. པུབྦེ ཝུཏྟགཱཐཱསུ ཏཏིཡགཱཐཱཡ པཙྪིམདྡྷཾ, ཙཏུཏྠགཱཐཱཡ པུརིམདྡྷཉྩ སནྡྷཱཡཱཧ ‘‘པུབྦེ ཝུཏྟགཱཐམེཝཱ’’ཏི.

ཝིཛཱནནམྤི ¶ དསྶནཾ ཨེཝཱཏི ཨཱཧ ‘‘པསྶཐ ཨོལོཀེཐཱ’’ཏི. ཝཱཙཱཡཏཔཝཏྟིཏབྷཱཝཏོ ‘‘ཨནུཔཊིཔཱཊིཡཱཝ ཀིཏྟཡིསྶཱམཱི’’ཏི ཝདཏི.

༣༣༥. སཏྟ སཧསྶཱནི སངྑཱཡཱཏི སཏྟ སཧསྶཱ. ཡཀྑཱཡེཝཱཏི ཡཀྑཛཱཏིཀཱ ཨེཝ. ཨཱནུབྷཱཝསམྤནྣཱཏི མཧེསཀྑཱ. ཨིདྡྷིམནྟོཏི ཝཱ མཧཱནུབྷཱཝཱ. ཛུཏིམནྟོཏི མཧཔྤབྷཱ. ཝཎྞཝནྟོཏི ཨཏིཀྐནྟཝཎྞཱ. ཡསསྶིནོཏི མཧཱཔརིཝཱརཱ ཙེཝ པཏྠཊཀིཏྟིསདྡཱ ཙ. སམིཏི-སདྡོ སམཱིཔཏྠོཏི ཨདྷིཔྤཱཡེནཱཧ ‘‘བྷིཀྑཱུནཾ སནྟིཀ’’ནྟི.

ཧེམཝཏཔབྦཏེཏི ཧིམཝཏོ སམཱིཔེ ཋིཏཔབྦཏེ.

ཨེཏེ སབྦེཔཱིཏི ཨེཏེ སཏྟསཧསྶཱ ཀཱཔིལཝཏྠཝཱ, ཚསཧསྶཱ ཧེམཝཏཱ, ཏིསཧསྶཱ སཱཏཱགིརཱཏི ཡཐཱཝུཏྟཱ སབྦེཔི སོལ༹སསཧསྶཱ.

རཱཛགཧནགརེཏི རཱཛགཧནགརསྶ སམཱིཔེ. ཏནྟི ཀུམྦྷཱིརཾ.

༣༣༦. ཀཱམཾ པཱཙཱིནདིསཾ པསཱསཏི, ཏཐཱཔི ཙཏཱུསུཔི དིསཱསུ སཔརིཝཱརདཱིཔེསུ ཙཏཱུསུཔི མཧཱདཱིཔེསུ གནྡྷབྦཱནཾ ཛེཊྛཀོ, ཀཐཾ? སབྦེ ཏེ ཏསྶ ཝསེ ཝཏྟནྟི. ཀུམྦྷཎྜཱནཾ ཨདྷིཔཏཱིཏིཨཱདཱིསུཔི ཨེསེཝ ནཡོ.

ཏསྶཱཔི ཝིརུལ༹ྷསྶ. ཏཱདིསཱཡེཝཱཏི དྷཏརཊྛསྶ པུཏྟསདིསཱ ཨེཝ པུཐུཏྠཏོ, ནཱམཏོ, བལཏོ, ཨིདྡྷིཨཱདིཝིསེསཏོ ཙ.

སབྦསངྒཱཧིཀཝསེནཱཏི དསསཧསྶིལོཀདྷཱཏུཡཱ པཙྩེཀཾ ཙཏྟཱརོ ¶ ཙཏྟཱརོ མཧཱརཱཛཱནོཏི ཏེསཾ སབྦེསཾ སངྒཎྷནཝསེན. ཏེནཱཧ ‘‘ཨཡཉྩེཏྠཱ’’ཏིཨཱདི.

ཙཏུརོ དིསཱཏི ཙཏཱུསུ དིསཱསུ. ཙཏུརོ དིསཱ ཛལམཱནཱ སམུཛྫལནྟཱ ཨོབྷཱསེནྟཱ. ཡདི ¶ ཨེཝཾ མཧཏིཡཱ པརིསཱཡ ཨཱགཏཱནཾ ཀཐཾ ཀཱཔིལཝཏྠཝེ ཝནེ ཋིཏཱཏི ཨཱཧ ‘‘ཏེ པནཱ’’ཏིཨཱདི.

༣༣༧. ཏེསཾ མཧཱརཱཛཱནཾ དཱསཱཏི ཡོཛནཱ. མཱཡཱཡ ཡུཏྟཱ, ཏསྨཱ མཱཡཱཝིནོ. ཝཉྩནཾ ཨེཏེསུ ཨཏྠི, ཝཉྩནེ ཝཱ ནིཡུཏྟཱཏི ཝཉྩནིཀཱ. ཀེརཱཊིཡསཱཋེཡྻེནཱཏི ནིཧཱིནསཋེན ཀམྨེན. མཱཡཱ ཨེཏེསཾ ཨཏྠཱིཏི ¶ མཱཡཱ, ཏེ ཙ པརེསཾ ཝཉྩནཏྠཾ ཡེན མཱཡཱཀརཎེན ‘‘མཱཡཱ’’ཏི ཝུཏྟཱ, ཏཾ དསྶེནྟོ ‘‘མཱཡཱཀཱརཀཱ’’ཏི ཨཱཧ.

ཨེཏྟཀཱ དཱསཱཏི ཨེཏྟཀཱ ཀུཊེཎྜུཨཱདིཀཱ ནིགྷཎྜུཔརིཡོསཱནཱ ཨཊྛམཧཱརཱཛཱནཾ དཱསཱ.

དེཝརཱཛཱནོཏི དེཝཱ ཧུཏྭཱ ཏཾཏཾདེཝཀཱཡསྶ རཱཛཱནོ. ཙིཏྟོ ཙ སེནོ ཙ ཙིཏྟསེནོ ཙཱཏི ཏཡོ ཨེཏེ དེཝཔུཏྟཱ པཱལི༹ཡཾ ཨེཀསེསནཡེན ཝུཏྟཱཏི ཨཱཧ ‘‘ཙིཏྟོ ཙཱ’’ཏིཨཱདི.

བྷིཀྑུསངྒྷོ སམིཏོ སནྣིཔཏིཏོ ཨེཏྠཱཏི བྷིཀྑུསངྒྷསམིཏི, ཨིམཾ ཝནཾ.

༣༣༨. ནཱགསདཧཝཱསིཀཱཏི ནཱགསདཧནིཝཱསིནོ. ཏཏྠེཀོ ཀིར ནཱགརཱཛཱ, ཙིརཀཱལཾ ཝསཏོ ཏསྶ པརིསཱ མཧཏཱི པརམྤརཱགཏཱ ཨཏྠི, ཏཾ སནྡྷཱཡཱཧ ‘‘ཏཙྪཀནཱགཔརིསཱཡཱ’’ཏི.

ཡམུནཝཱསིནོཏི ཡམུནཱཡཾ ཝསནཀནཱགཱ. ནཱགཝོཧཱརེནཱཏི ཧཏྠིནཱགཝོཧཱརེན.

ཝུཏྟཔྤཀཱརེཏི ཀམྦལསྶཏརེ ཋཔེཏྭཱ ཨིཏརེ ཝུཏྟཔྤཀཱརནཱགཱ. ལོབྷཱབྷིབྷཱུཏཱཏི ཨཱཧཱརལོབྷེན ཨབྷིབྷཱུཏཱ. དིབྦཱནུབྷཱཝཏཱཏི དིབྦཱནུབྷཱཝཏོ, དིབྦཱནུབྷཱཝཧེཏུ ཝཱ དིབྦཱ. ‘‘ཙིཏྲསུཔཎྞཱ’’ཏི ནཱམཾ ཝིཙིཏྲསུནྡརཔཏྟཝནྟཏཱཡ.

ཨུཔཝ྄ཧཡནྟཱཏི ¶ ཨུཔེཙྩ ཀཐེནྟཱ. ཀཱཀོལཱུཀཨཧིནཀུལཱདཡོ ཝིཡ ཨཉྙམཉྙཾ ཛཱཏིསམུདཱགཏཝེརཱཔི སམཱནཱ མིཏྟཱ ཝིཡ…པེ… ཧཊྛཏུཊྛཙིཏྟཱ ཨཉྙམཉྙསྨིནྟི ཨདྷིཔྤཱཡོ. བུདྡྷཾཡེཝ ཏེ སརཎཾ གཏཱ ‘‘བུདྡྷཱནུབྷཱཝེནེཝ མཡཾ ཨཉྙམཉྙསྨིཾ མེཏྟིཾ པཊིལབྷིམྷཱ’’ཏི.

༣༣༩. བྷཱཏརོཏི མེཐུནབྷཱཏརོ. ཏེནཱཧ ‘‘སུཛཱཡ ཨསུརཀཉྙཱཡ ཀཱརཎཱ’’ཏི.

ཏེསཱུཏི ¶ ཨསུརེསུ. ཀཱལཀཉྩཱཏི ཨེཝཾ ནཱམཱ. མཧཱབྷིསྨཱཏི བྷིཾསནཀམཧཱསརཱིརཱ. ཨབྷབྦཱཏི སམྨཏྟནིཡཱམཾ ཨོཀྐམིཏུཾ ན བྷབྦཱ ཨཙྪནྡིཀཏྟཱ ཏཱདིསསྶ ཚནྡསྶེཝ ཨབྷཱཝཏོ.

བལིནོ ¶ མཧཱཨསུརསྶ ཨབྦྷཏཱིཏཏྟཱ ཏསྶ པུཏྟེ ཨེཝ ཀིཏྟེནྟོ བྷགཝཱ ‘‘སཏཉྩ བལིཔུཏྟཱན’’ནྟི ཨཱདིམཱཧ. སོ ཀིར སུཁུམཾ ཨཏྟབྷཱཝཾ མཱཔེཏྭཱ ཨུཔགཙྪི.

༣༤༠. ཀམྨཾ ཀཏྭཱཏི པརིཀམྨཾ ཀཏྭཱ. ནིབྦཏྟཱཏི ཨུཔཙཱརཛ྄ཛྷཱནེན ནིབྦཏྟཱ. ཨཔྤནཱཛྷཱནེན པན ནིབྦཏྟཱ བྲཧྨཱནོ ཧོནྟི, ཏེ པརཏོ ཝཀྑཏི ‘‘སུབྲཧྨཱ’’ཏིཨཱདིནཱ (དཱི. ནི. ༢.༣༤༡), ཨཡཉྩ ཀཱམཱཝཙརདེཝཏཱ ཝུཙྩཏི. ཏེནེཝཱཧ – ‘‘མེཏྟཱཀརུཎཱཀཱཡིཀཱཏི མེཏྟཱཛྷཱནེ ཙ ཀརུཎཱཛྷཱནེ ཙ པརིཀམྨཾ ཀཏྭཱ ནིབྦཏྟདེཝཱ’’ཏི. མེཏྟཱཛྷཱནེ ཀརུཎཱཛྷཱནེཏི མེཏྟཱཛྷཱནནིམིཏྟཾ ཀརུཎཱཛྷཱནནིམིཏྟཾ, ཏདཏྠནྟི ཨཏྠོ.

ཏེ ཨཱཔོདེཝཱདཡོ ཡཐཱསཀཾ ཝགྒཝསེན ཋིཏཏྟཱ དསདྷཱ ཋིཏཱ. ཡཱཝ ཀརུཎཱཀཱཡིཀཱ དས དེཝཀཱཡཱ. ནཱནཏྟཝཎྞཱཏི ནཱནཱསབྷཱཝཝཎྞཝནྟོ.

ཝེཎྜུདེཝཏཱཏི ཝེཎྜུ ནཱམ དེཝཏཱ, ཨེཝཾ སཧལི དེཝཏཱ. ཨསམདེཝཏཱ, ཡམཀདེཝཏཱཏི ‘‘དྭེ ཨཡནིཡོ’’ཏི ཝདནྟི, ཏཔྤམུཁཱ དྭེ དེཝནིཀཱཡཱཏི. ཙནྡསྶཱུཔནིསཱ དེཝཱ ཙནྡསྶ ཨུཔནིསྶཡཏོ ཝཏྟམཱནཱ ཏསྶ པུརཏོ ཙ པཙྪཏོ ཙ པསྶཏོ ཙ དྷཱཝནཀདེཝཱ. ཏེནཱཧ ‘‘ཙནྡནིསྶིཏཀཱ དེཝཱ’’ཏི. སཱུརིཡསྶཱུཔནིསཱ, ནཀྑཏྟནིསྶིཏཱཏི ཨེཏྠཱཔི ཨེསེཝ ནཡོ. ཀེཝལཾ ཝཱཏཝཱཡནཧེཏཝོ དེཝཏཱ ཝཱཏཝལཱཧཀཱ. ཏཐཱ ཀེཝལཾ ཨབྦྷཔཊལསཉྩརཎཧེཏཝོ ཨབྦྷཝལཱཧཀཱ. ཨུཎྷཔྤཝཏྟིཧེཏཝོ ¶ ཨུཎྷཝལཱཧཀཱ. ཝསྶཝལཱཧཀཱ པན པཛྫུནྣསདིསཱཏི. ཏེ ཨིདྷ ན ཝུཏྟཱ. ཝསུདེཝཏཱ ནཱམ ཨེཀོ དེཝནིཀཱཡོ, ཏེསཾ པུབྦངྒམཏྟཱ ཝཱསཝོ, སཀྐོ.

དསེཏེཏི ཨེཏེ ཝེཎྜུདེཝཏཱདཡོ ཝཱསཝཔརིཡོསཱནཱ དས དེཝཀཱཡཱ.

ཨིམཱནཱིཏི ‘‘ཛལམགྒཱི’’ཏི ཙ ‘‘སིཁཱརིཝཱ’’ཏི ཙ ཨིམཱནི ཏེསཾ ནཱམཱནི. ཀེཙི པན མ-ཀཱརོ པདསནྡྷིཀརོ ‘‘ཛལཱ’’ཏི ཙ ‘‘ཨགྒཱི’’ཏི ཙ ‘‘སིཁཱརིཝཱ’’ཏི ཙ ཨིམཱནི ཏེསཾ ནཱམཱནཱིཏི ཝདནྟི. ཨེཏེཏི ཏེསུ ཨེཝ ‘‘ཨརིཊྛཀཱ, རོཛཱ’’ཏི ཙ ཝུཏྟདེཝེསུ ཨེཀཙྩེ,ཨུམཱཔུཔྥནིབྷཱསིནོ ¶ ཝཎྞཏོ ཨུམཱཔུཔྥསདིསཱཏི ཨེཝམཏྠོ གཧེཏབྦོ, ཨཉྙཐཱ ཨེཀཱདས དེཝཀཱཡཱ སིཡུཾ.

དསེཏེཏི ¶ ཨེཏེ དས སཧབྷཱུདེཝཱདཡོ ཝཱསཝནེསིཔརིཡོསཱནཱ དས དེཝཀཱཡཱ. ཏེནེཝ ནིཀཱཡབྷེདཝསེན དསདྷཱཝ ཨཱགཏཱ.

‘‘སམཱནཱ’’ཏིཨཱདི ཏེསཾ དེཝཱནཾ ནིཀཱཡསམུདཱཡགཏཾ ནཱམཾ. ཨེཝཾ སེསཱནམྤི.

དསེཏེཏི ཨེཏེ སམཱནཱདིཀཱ མཧཱཔཱརགཔརིཡོསཱནཱ དས དེཝཀཱཡཱ. ཏེནེཝ ནིཀཱཡབྷེདེན དསདྷཱ ཨཱགཏཱ.

སུཀྐཱདཡོ ཏཡོ དེཝཀཱཡཱ. པཱམོཀྑདེཝཱཏི པམུཁཱ པདྷཱནབྷཱུཏཱ དེཝཱ.

དིསཱཏི དིསཱསུ. དེཝོཏི མེགྷོ. དསེཏེཏི ཨེཏེ སུཀྐཱདཡོ པཛྫུནྣཔརིཡོསཱནཱ དས དེཝཀཱཡཱ, ཏེ དེཝནིཀཱཡབྷེདེན དསདྷཱ ཨཱགཏཱ.

དསེཏེཏི ཨེཏེ ཁེམིཡཱདཡོ པརནིམྨིཏཔརིཡོསཱནཱ དས དེཝཀཱཡཱ, ཏེ དེཝནིཀཱཡབྷེདེན དསདྷཱཝ ཨཱགཏཱ. ཏཏྠ ‘‘ཁེམིཡཱ, ཀཊྛཀཱདཡོ ཙ པཉྩཱཔི སདེཝཀཱཡཱ ཏཱཝཏིཾསཀཱཡིཀཱ’’ཏི ཝདནྟི. ནཱམནྭཡེནཱཏི ¶ ནཱམཱནུགམེན ‘‘ཨཱཔོདེཝཏཱ’’ཏིཨཱདིནཱམསབྷཱགེན. ཏེནེཝཱཧ ‘‘ནཱམབྷཱགེན ནཱམཀོཊྛཱསེནཱ’’ཏི. སབྦཱ དེཝཏཱཏི དསསཧསྶིལོཀདྷཱཏཱུསུ སབྦཱཔི དེཝཏཱ. ནིདྡིསཏི ཏཾཏཾནཱམསབྷཱགེན ཨེཀཛ྄ཛྷཾ ཀཏྭཱ.

པཝུཏྠཱཏི པཝཱསཾ གཏཱ ཝིཡ ཨཔེཏཱཏི ཨཱཧ ‘‘ཝིགཏཱ’’ཏི. པཝུཏྠཱ ཝཱ པཀཱརཏོ ཝུཏྠཱ ཝུསིཏཱ, ཏེན ཛཱཏི ཝུསིཏབྦཱ ཨསྶཱཏི པཝུཊྛཛཱཏི. ཀཱལ༹ཀབྷཱཝཱ སཾཀིལེསདྷམྨཱ, སབྦསོ ཏདབྷཱཝཏོ ཀཱལ༹ཀབྷཱཝཱཏཱིཏཾ དསབལཾ. ལཉྩནཱབྷཱཝེན ཝཱ ཨསིཏཱཏིགོ ཀཱལ༹ཀབྷཱཝཱཏཱིཏཱཡ སིརིཡཱ ཙནྡོ, ཏཱདིསཾ ཙནྡཾ ཝིཡ སིརིཡཱ ཝིརོཙམཱནཾ.

༣༤༡. ཨེཀོ བྲཧྨཱཏི སགཱཐཀཝགྒེ (སཾ. ནི. ༡.༩༨) ཨཱགཏོ སུབྲཧྨདེཝཔུཏྟོ. བྲཧྨལོཀེ ནིབྦཏྟིཏྭཱ ཧེཊྛིམེསུ པཏིཊྛིཏཱ ཨརིཡབྲཧྨཱནོ, ན ¶ སུདྡྷཱཝཱསབྲཧྨཱནོ. ཏིསྶམཧཱབྲཧྨཱ པུཐུཛྫནོ, ཡོ ཨཔརབྷཱགེ མནུསྶེསུ ནིབྦཏྟིཏྭཱ མོགྒལིཔུཏྟཏིསྶཏྠེརོ ཛཱཏོ.

སཧསྶཾ ¶ བྲཧྨལོཀཱནནྟི བྲཧྨལོཀོ ཨེཏེསནྟི བྲཧྨལོཀཱ, བྲཧྨཱནོ, ཏེསཾ བྲཧྨལོཀཱནཾ སཧསྶཾ སཏྟལོཀཔརིཡཱཡོ ཙཱཡཾ ལོཀསདྡོཏི ཨཱཧ ‘‘མཧཱབྲཧྨཱནཾ སཧསྶཾ ཨཱགཏ’’ནྟི. ཨནནྟརགཱཐཱཡཾ ‘‘ཨཱགཏཱ’’ཏི ཝུཏྟཔདམེཝ ཨཏྠཝསེན ཝདཏི. ཡཏྠཱཏི ཡསྨིཾ བྲཧྨསཧསྶེ. ཨཉྙེ བྲཧྨེཏི ཏདཉྙེ བྲཧྨཱནོ. ཨབྷིབྷཝིཏྭཱ ཏིཊྛཏི ཝཎྞེན, ཡསསཱ ཨཱཡུནཱ ཙ.

ཨིསྶརཱཏི ཏེནེཝ ཝསཔཝཏྟནེན སེསབྲཧྨཱནཾ ཨདྷིཔཏིནོ.

༣༤༢. ཀཱལ༹ཀདྷམྨསམནྣཱགཏོ ཀཱལ༹ཀསྶ པཱཔིམསྶ མཱརསྶ བཱལབྷཱཝཾ པསྶཐ, ཡོ ཨཏྟནོ ཨཝིསཡེ ནིརཏྠཀཾ པརཀྐམིཏུཾ ཝཱཡམཏི.

ཝཱིཏརཱགབྷཱཝཱཝཧསྶ དྷམྨསྶཝནསྶ ཨནྟརཱཡཀརཎེན ¶ ཨཝཱིཏརཱགཱ རཱགེན བདྡྷཱ ཨེཝ ནཱམ ཧོནྟཱིཏི ཝུཏྟཾ ‘‘རཱགེན བདྡྷཾ ཧོཏཱུ’’ཏི.

བྷཡཱནཀཾ སརཉྩ ཀཏྭཱཏི བྷེརཝཾ མཧནྟཾ སདྡཾ སམུཊྛཔེཏྭཱ.

ཨིདཱནི ཏཾ སདྡཾ ཨུཔམཱཡ དསྶེནྟོ ‘‘ཡཐཱ’’ཏི ཨཱདིམཱཧ. ཀཉྩཱིཏི ཏསྨིཾ སམཱགམེ ཀཉྩི དེཝཏཾ, མཱནུསཀཾ ཝཱ ཨཏྟནོ ཝསེ ཝཏྟེཏུཾ ཨསཀྐོནྟོ ཨསཡཾཝསེ སཡཉྩ ན ཨཏྟནོ ཝསེ ཋིཏོ. ཏེནཱཧ ‘‘ཨསཡཾཝསཱི’’ཏིཨཱདི.

༣༤༣. ‘‘ཝཱིཏརཱགེཧཱི’’ཏི དེསནཱསཱིསམེཏཾ. སབྦཱཡཔི ཧི ཏཏྠ སམཱགཏཔརིསཱཡ མཱརསེནཱ ཨཔཀྐནྟཱཝ. ནེསཾ ལོམམྤི ཨིཉྫཡུཾ ཏེསཾ ལོམམཏྟམྤི ན ཙཱལེསུཾ, ཀུཏོ ཨནྟརཱཡཀརཎཾ. ཨིཏི ཡཏྟཀཱ ཏཏྠ ཝིསེསཾ ཨདྷིགཙྪིཾསུ, ཏེསཾ སབྦེསམྤི ཨནྟརཱཡཱཀརཎཝསེན ཨཏྠོ ཝིབྷཱཝེཏབྦོ, ཝཱིཏརཱགགྒཧཎེན ཝཱ སརཱགཝཱིཏརཱགཝིབྷཱཝིནོ ཙ ཏཏྠ སངྒཧིཏཱཏི ཝེདིཏབྦཾ. མཱརོ ཨིམཾ གཱཐཾ ཨབྷཱསི ཨཙྪརིཡབྦྷུཏཙིཏྟཛཱཏོ. ཀཐཉྷི ནཱམ ཏཱཝ གྷོརཏརཾ མཧཏིཾ ཝིབྷིཾསཀཾ མཡི ཀརོནྟེཔི སབྦེ པིམེ ནིབྦིཀཱརཱ སམཱཧིཏཱ ཨེཝ. ཀསྨཱ? ཝིཛིཏཱཝིནོ ཨིམེ ཨུཏྟམཔུརིསཱཏི. ཏེནཱཧ ‘‘སབྦེ’’ཏིཨཱདི. ཡཱདིསོ ཨརིཡཱནཾ དྷམྨནིསྶིཏོ ¶ པམོདོ, ན ཀདཱཙི ཏཱདིསོ ཨནརིཡཱནཾ ཧོཏཱིཏི ‘‘སཱསནེ བྷཱུཏེཧི ཨརིཡེཧི’’ ཨིཙྩེཏཾ ཝུཏྟཾ. ཝི-སདྡེན ཝིནཱ ཀེཝལོཔི སུཏ-སདྡོ ཝིཁྱཱཏཏྠཝཙནོ ཧོཏི ‘‘སུཏདྷམྨསྶཱ’’ཏིཨཱདཱིསུ (མཧཱཝ. ༥; ཨུདཱ. ༡༡) ཝིཡཱཏི ཨཱཧ ‘‘ཛནེ ཝིསྶུཏཱ’’ཏི.

དཱུརེཏི ¶ དཱུརེ པདེསེ. དཧརསྶ ཨནྟརཱཡཾ པརིཧརནྟཱི ‘‘ན སཀྐཱ བྷནྟེ སཀལཾ ཀཱཡཾ དསྶེཏུ’’ནྟི ཨཝོཙཱཏི.

མཧཱསམཡསུཏྟཝཎྞནཱཡ ལཱིནཏྠཔྤཀཱསནཱ.

༨. སཀྐཔཉྷསུཏྟཝཎྞནཱ

ནིདཱནཝཎྞནཱ

༣༤༤. ཨམྦསཎྜཱནཾ ¶ ¶ ¶ ཨདཱུརབྷཝཏྟཱ ཨེཀོཔི སོ བྲཱཧྨཎགཱམོ ‘‘ཨམྦསཎྜཱ’’ཏྭེཝ བཧུཝཙནཝསེན ཝུཙྩཏི, ཡཐཱ ‘‘ཝརཎཱ ནགར’’ནྟི. ཝེདི ཨེཝ ཝེདིཀོ, ཝེདིཀོ ཨེཝ ཝེདིཡོ ཀ-ཀཱརསྶ ཡ-ཀཱརཾ ཀཏྭཱ, ཏསྨིཾ ཝེདིཡཀེ. ཏེནཱཧ ‘‘མཎིཝེདིཀཱསདིསེནཱ’’ཏིཨཱདི, ཨིནྡནཱིལཱདིམཎིམཡཝེདིཀཱསདིསེནཱཏི ཨཏྠོ. པུབྦེཔཱིཏི ལེཎཀརཎཏོ པུབྦེ, གུཧཱརཱུཔེན ཋིཏཱ, དྭཱརེ ཨིནྡསཱལརུཀྑཝཏཱི ཙ, ཏསྨཱ ‘‘ཨིནྡསཱལགུཧཱ’’ཏི ཝུཏྟཱ པུརིམཝོཧཱརེན.

ཨུསྶུཀྐཾ ཝུཙྩཏི ཨབྷིརུཙི, ཏཾ པན བུདྡྷདསྶནཀཱམཏཱཝསེན, ཏཐཱ ཨུསྶཱཧནཝསེན ཙ པཝཏྟིཡཱ ‘‘དྷམྨིཀོ ཨུསྶཱཧོ’’ཏི ཝུཏྟཾ. སཀྐེན སདིསོ…པེ… ནཏྠཱིཏི. ཡཐཱཧ ‘‘ཨཔྤམཱདེན མགྷཝཱ, དེཝཱནཾ སེཊྛཏཾ གཏོ’’ཏི (དྷ. པ. ༣༠). པརིཏྟཀེནཱཏི ཨཔརཱཔརཾ བཧུཾ པུཉྙཀམྨཾ ཨཀཏྭཱ ཨཔྤམཏྟཀེནེཝ པུཉྙཀམྨེན.

སཀྐོཔི ཀཱམཾ མཧཱཔུཉྙཀཏབྷཱིརུཏྟཱནོ ཧོཏི, སཱཏིསཡཱཡ པན དིབྦསམྤཏྟིཡཱ ཝིཡོགཧེཏུཀེན སོཀེན དིགུཎིཏེན མརཎབྷཡེན ¶ སཾཏཛྫིཏོ ཛཱཏོ. ཏེནཱཧ ‘‘སཀྐོ པན མརཎབྷཡཱབྷིབྷཱུཏོ ཨཧོསཱི’’ཏི.

དིབྦཙཀྑུནཱ དེཝཏཱནཾ དསྶནཾ ནཱམ པཊིཝིཛ྄ཛྷནསདིསནྟི ཨཱཧ ‘‘པཊིཝིཛ྄ཛྷཱི’’ཏི. པཱཊིཡེཀྐོ ཝོཧཱརོཏི ཨཱཝེཎིཀོ པིཡསམུདཱཧཱརོ. མརིསནིཡསམྤཏྟིཀཱཏི མཱརིསཱ. ཏེསཉྷི སམྤཏྟིཡོ མཧཱནུབྷཱཝཏཱཡ སཧནྟི ཨུཔཊྛཧནྟི, ཨཉྙེ ཨཡོནིསོམནསིཀཱརཏཱཡ ཙེཝ ཨཔྤཧུཀཱཡ ཙ ན སཧནྟིཡེཝ, སཱ པན ནེསཾ མརིསནིཡསམྤཏྟིཀཏཱ དུཀྑཝིརཧིཏཱཡཱཏི ཝུཏྟཾ ‘‘ནིདྡུཀྑཱཏིཔི ཝུཏྟཾ ཧོཏཱི’’ཏི. ཨེཀཀོ ཝཱཏི དེཝཔརིསཱཡ ཝིནཱ ཨཱགཏཏྟཱ ཝུཏྟཾ, མཱཏལིཨཱདཡོ ¶ པན ཏཱདིསཱ སཧཱཡཱ ཏདཱཔི ཨཧེསུཾཡེཝ. ཏཐཱ ཧི ཝཀྑཏི ‘‘ཨཔི ཙཱཡཾ ཨཱཡསྨཏོ ཙཀྐནེམིསདྡེན ཏམྷཱ སམཱདྷིམྷཱ ཝུཊྛིཏོ’’ཏི (དཱི. ནི. ཨཊྛ. ༢.༣༥༢). ཨོཀཱསཾ ནཱཀཱསི ¶ སཀྐསྶ ཉཱཎཔརིཔཱཀཾ ཨཱགམེནྟོ, ཨཉྙེསཉྩ བཧཱུནཾ དེཝཱནཾ དྷམྨཱབྷིསམཡཾ ཨུཔཔརིཀྑམཱནོ. སོཏི སཀྐོ.

ཨེཝནྟི ཝཙནསམྤཊིཙྪནེ ནིཔཱཏོཏི ཨཱཧ ‘‘ཨེཝཾ ཧོཏཱུ’’ཏིཨཱདི. བྷདྡཾཏཝཱཏི པན སཀྐཾ ཨུདྡིསྶ ནེསཾ ཨཱསི ཝཱདོ.

༣༤༥. ཝལླབྷོ…པེ… དྷམྨཾ སུཎཱཏཱིཏི ཨཡམཏྠོ གོཝིནྡསུཏྟཱདཱིཧི (དཱི. ནི. ༢.༢༩༤) དཱིཔེཏབྦོ. ཨིམིནཱ ཀཏོཀཱསེཏི ཨིམིནཱ པཉྩསིཁེན ཀཏོཀཱསེ བྷགཝཏི.

ཨནུཙརིཡནྟི ཨནུཙརཎབྷཱཝཾ, ཏཾ པནསྶ ཨནུཙརཎཾ ནཱམ སདྡྷིཾ གམནམེཝཱཏི ཨཱཧ ‘‘སཧཙརཎཾ ཨེཀཏོ གམན’’ནྟི.

སོཝཎྞམཡནྟི ¶ སུཝཎྞམཡཾ. པོཀྑརནྟི ཝཱིཎཱཡ དོཎིམཱཧ. དཎྜོཏི ཝཱིཎདཎྜོ. ཝེཋཀཱཏི ཏནྟཱིནཾ བནྡྷནཱཡ ཙེཝ ཨུཔྤཱིལ༹ནཱཡ ཙ དྷམེཏབྦཱ ཝེཋཀཱ. པཏྟཀནྟི པོཀྑརཾ. སམཔཉྙཱསམུཙྪནཱ མུཙྪེཏྭཱཏི ཡཐཱ སམཔཉྙཱསམུཙྪནཱ ཀམཏོ ཏཏྠ སཾམུཙྪནཾ ཀཱཏུཾ སཀྐཱ, ཨེཝཾ ཏཾ སཛྫེཏྭཱཏི ཨཏྠོ. ‘‘སམཔཉྙཱསམུཙྪནཱ སཾམུཙྪེཏྭཱ’’ཏི ཙ ཨིདཾ དེཝལོཀེ ནིཡཏཾ ཝཱིཎཱཝཱདནཝིདྷིཾ སནྡྷཱཡ ཝུཏྟཾ. མནུསྶལོཀེ པན ཨེཀཝཱིསཏི མུཙྪནཱ. ཏེནེཝཱཧ ཝཱིཎོཔམསུཏྟཝཎྞནཱཡཾ –

‘‘སཏྟ སརཱ ཏཡོ གཱམཱ, མུཙྪནཱ ཨེཀཝཱིསཏི;

ཏཱནཱ ཙེཀཱུནཔཉྙཱས, ཨིཙྩེཏེ སརམཎྜལཱ’’ཏི. (ཨ. ནི. ཨཊྛ. ༣.༥༥; སཱརཏྠ. ཊཱི. ༣.༢༤༣);

ཏཏྠ ཚཛྫོ, ཨུསབྷོ, གནྡྷཱརོ, མཛ྄ཛྷིམོ, པཉྩམོ, དྷེཝཏོ, ནིསཱདོཏི ཨེཏེ སཏྟ སརཱ. ཚཛྫགཱམོ, མཛ྄ཛྷིམགཱམོ, སཱདྷཱརཎགཱམོཏི ཏཡོ གཱམཱ, སརསམཱུཧཱཏི ཨཏྠོ. མནུསྶལོཀེ ཝཱདནཝིདྷིནཱ ཨེཀེཀསྶེཝ ཙ སརསྶ ཝསེན ཏཡོ ཏཡོ མུཙྪནཱ ཀཏྭཱ ཨེཀཝཱིསཏི མུཙྪནཱ. ཨེཀེཀསྶེཝ ཙ སརསྶ སཏྟ སཏྟ ཏཱནབྷེདཱ, ཡཏོ སརསྶ མནྡཏརཝཝཏྠཱནཾ ཧོཏི, ཏེ ཨེཀཱུནཔཉྙཱས ཏཱནཝིསེསཱཏི, ཏིསྶོ དུཝེ ཙཏསྶོ, ཙཏསྶོ ཏིསྶོ དུཝེ ཙཏསྶོཏི དྭཱཝཱིསཏི སུཏིབྷེདཱ ¶ ཨིཙྪིཏཱ, ཨཡཾ པན ཨེཀེཀསྶ སརསྶ ཝསེན སཏྟ སཏྟ མུཙྪནཱ, ཨནྟརསརསྶ ཙ ཨེཀཱཏི སམཔཉྙཱསཱཡ མུཙྪནཱནཾ ཡོགྱབྷཱཝེན ཝཱིཎཾ ཝཛྫེསི. ཏེན ཝུཏྟཾ ‘‘སམཔཉྙཱས ¶ མུཙྪནཱ སཾམུཙྪེཏྭཱ’’ཏི. སེསདེཝེ ཛཱནཱཔེནྟོ སཀྐསྶ གམནཀཱལནྟི ཡོཛནཱ.

༣༤༦. ཨཏིརིཝཱཏི ར-ཀཱརོ པདསནྡྷིཀརོ, ཨཏཱིཝ ཨཏིཝིཡཱཏི ཝུཏྟཾ ཧོཏི. པཀཏི ¶ …པེ… ཨགམཱསི མརཎབྷཡསཾཏཛྫིཏཏྟཱ ཏརམཱནརཱུཔོ. ཏེནེཝཱཧ ‘‘ནནུ ཙཱ’’ཏིཨཱདི.

༣༤༧. བུདྡྷཱ ནཱམ མཧཱཀཱརུཎིཀཱ, སདེཝཀསྶ ལོཀསྶ ཧིཏསུཁཏྠཱཡ ཨེཝ ཨུཔྤནྣཱ, ཏེ ཀཐཾ ཨཏྠིཀེཧི དུརུཔསངྐམཱཏི ཨཱཧ ‘‘ཨཧཾ སརཱགོ’’ཏིཨཱདི. ཏདནྟརཾ པཊིསལླཱིནཱཏི ཡེན ཨནྟརེན ཡེན ཁཎེན ཨུཔསངྐམེཡྻ, ཏདནྟརཾ པཊིསལླཱིནཱ ཛྷཱནཾ སམཱཔནྣཱ. ཏདནྟར-སདྡོ ཝཱ ‘‘ཨེཏརཧཱི’’ཏི ཨིམིནཱ སམཱནཏྠོཏི ཨཱཧ ‘‘སམྤཏི པཊིསལླཱིནཱ ཝཱ’’ཏི.

པཉྩསིཁགཱིཏགཱཐཱཝཎྞནཱ

༣༤༨. སཱཝེསཱིཏི ཡཐཱདྷིཔྤེཏམུཙྪནཾ པཊྛཔེཏྭཱ ཝཱིཎཾ ཝཱདེནྟོ ཏཾཏཾཋཱནུཔྤཏྟིཡཱ པཱཀཊཱིབྷཱུཏམནྡཏཱཝཝཏྠཾ དསྶེནྟོ སུམདྷུརཀོམལམདྷུཔཱནམཏྟམདྷུཀཱརཝིརུཏཱཔཧཱསིནིལཀྑཎོ པསནྣབྷཱནཱི སམརཝཾ ཏནྟིསྶརཾ སཱཝེསི.

‘‘སཀྱཔུཏྟོཝ ཛྷཱནེན, ཨེཀོདི ནིཔཀོ སཏོ;

ཨམཏཾ མུནི ཛིགཱིསཱནོ….

ཡཐཱཔི མུནི ནནྡེཡྻ, པཏྭཱ སམྦོདྷིཾ ཨུཏྟམ’’ནྟི. (དཱི. ནི. ༢.༣༤༨);

ཙ ཨེཝཾ བུདྡྷཱུཔསཉྷིཏཱ. བུདྡྷཱུཔསཉྷིཏཱ པན བུདྡྷཱནཾ དྷམྨསརཱིརཾ ཨཱརབྦྷ ནིསྶཡཾ ཀཏྭཱ པཝཏྟིཏཱཏི ཨཱཧ ‘‘དྷམྨོ ཨརཧཏཱཾ ཨིཝཱ’’ཏི. དྷམྨཱུཔསཉྷིཏཱ, ཨརཧཏྟཱུཔསཉྷིཏཱ ཙ ཝེདིཏབྦཱ.

སཱུརིཡསམཱནསརཱིརཱཏི སཱུརིཡསམཱནཔྤབྷཱསརཱིརཱ. ཏེནཱཧ ‘‘ཏསྶཱ ཀིརཱ’’ཏིཨཱདི. ཡསྨཱ ཏིམྦརུནོ གནྡྷབྦདེཝརཱཛསྶ སཱུརིཡཝཙྪ སཱ ¶ ཨངྐེ ཛཱཏཱ, ཏསྨཱ ཨཱཧ ‘‘ཡཾ ཏིམྦརུཾ དེཝརཱཛཱནཾ ¶ ནིསྶཱཡ ཏྭཾ ཛཱཏཱ’’ཏི. ཀལྱཱཎངྒཏཱཡ ‘‘ཀལྱཱཎཱི’’ཏི ཝུཏྟཱཏི ཨཱཧ ‘‘སབྦངྒསོབྷནཱ’’ཏི.

རཱགཱཝེསཝསེན ¶ པུབྦེ ཝུཏྟཱ གཱཐཱ ཨིདཱནིཔི ཏམེཝ ཨཱརབྦྷ པུརཏོ ཋིཏཾ ཝིཡ ཨཱལཔནྟོ ཝདཏི.

ཐནུདརནྟི པཡོདྷརཉྩ ཨུདརཉྩ ཨདྷིཔྤེཏནྟི ཨཱཧ ‘‘ཐནཝེམཛ྄ཛྷཾ ཨུདརཉྩཱ’’ཏི.

ཀིཉྩི ཀཱརཎནྟི ཀིཉྩི པཱིལ༹ཾ.

པཀཏིཾ ཛཧིཏྭཱ ཋིཏཾ ཨབྷིརཏྟབྷཱཝེན.

ཝཱམཱུརཱུཏི རུཙིརཨཱུརཱུ. ཏེནཱཧ ‘‘ཝཱམཱཀཱརེནཱ’’ཏིཨཱདི. ཝཱམཝིཀསིཏརུཙིརསུནྡརཱབྷིརཱུཔཙཱརུསདྡཱ ཧི ཨེཀཏྠཱ དཊྛབྦཱ. ན ཏིཁིཎནྟི ན ཏིཀྑཾ ན ལཱུཁཾ ན ཀཀྑལ༹ཾ. མནྡནྟི མུདུ སིནིདྡྷཾ.

ཨནེཀབྷཱཝོཏི ཨནེཀསབྷཱཝོ, སོ པན བཧུཝིདྷོ ནཱམ ཧོཏཱིཏི ཨཱཧ ‘‘ཨནེཀཝིདྷོ ཛཱཏོ’’ཏི. ཨནེཀབྷཱགོཏི ཨནེཀཀོཊྛཱསོ.

ཏཡཱ སདྡྷིཾ ཝིཔཙྩཏནྟི ཏཡཱ སཧིཏཾཡེཝ མེ ཏཾ ཀམྨཾ ཝིཔཙྩཏུ, ཏཡཱ སཧེཝ ཏསྶ ཀམྨསྶ ཕལཾ ཨནུབྷཝེཡྻནྟི ཨདྷིཔྤཱཡོ. ཏཡཱ སདྡྷིམེཝཱཏི ཡཐཱ ཙཀྐཝཏྟིསཾཝཏྟནིཡཀམྨཾ ཏསྶ ནིསྶནྡཕལབྷཱུཏེན ཨིཏྠིརཏནེན སདྡྷིཾཡེཝ ཝིཔཱཀཾ དེཏི, ཨེཝཾ ཏཾ མེ ཀམྨཾ ཏཡཱ སདྡྷིཾཡེཝ མཡ྄ཧཾ ཝིཔཱཀཾ དེཏུ.

ཨེཀོདཱིཏི ཨེཀོདིབྷཱཝཾ གཏོ, སམཱཧིཏོཏི ཨཏྠོ. ཛིགཱིསཱནོཏི ཛིགཱིསམཱནོ ཧོཏི. ཏཐཱབྷཱུཏོཝ ཛིགཱིསཏི ནཱམཱཏི ཏཐཱ པཋམཝིཀཔྤོ ཝུཏྟོ. དུཏིཡཝིཀཔྤེ པན ‘‘ཝིཙརཏཱི’’ཏི ཀིརིཡཱཔདཾ ཨཱཧརིཏྭཱ ཨཏྠོ ཝུཏྟོ.

ནནྡེཡྻནྟི སམཱགམཾ པཏྠེནྟོ ཝདཏི ཨཏིསསྶིརིཀརཱུཔསོབྷཱཡ.

༣༤༩. སཾསནྡཏཱིཏི ¶ ¶ སམེཏི, ཡཱཡ མུཙྪནཱཡ, ཡེན ཙ ཨཱཀཱརེན ཏནྟིསྶརོ པཝཏྟོ, ཏཾ མུཙྪནཾ ཨནཏིཝཏྟེནྟོ, ཏེནེཝ ཙ ཨཱཀཱརེན གཱིཏསྶརོཔི པཝཏྟོཏི ཨཏྠོ. ཡེན ཨཛ྄ཛྷཱསཡེན བྷགཝཱ པཉྩསིཁསྶ གནྡྷབྦེ ཝཎྞཾ ཀཐེསི, ཡདཏྠཉྩ ཀཐེསི, ཏཾ སབྦཾ ཝིབྷཱཝེཏུཾ ‘‘ཀསྨཱ’’ཏིཨཱདིམཱཧ. ནཏྠི བོདྷིམཱུལེ ཨེཝ སམུཙྪིནྣཏྟཱ. ཨུཔེཀྑཀོ བྷགཝཱ ཨནུཔལིཏྟབྷཱཝཏོ. སུཝིམུཏྟཙིཏྟོ བྷགཝཱ ཚནྡརཱགཏོ, སབྦསྨཱ ¶ ཙ ཀིལེསཱ. ཡདི ཨེཝཾ ཀསྨཱ པཉྩསིཁསྶ གནྡྷབྦེ ཝཎྞཾ ཀཐེསཱིཏི ཨཱཧ ‘‘སཙེ པནཱ’’ཏིཨཱདི.

གནྠིཏཱཏི སནྡཧིཏཱ, ཏཱ པན ནིརནྟརཾ ཀཐིཡམཱནཱ རཱསིཀཏཱ ཝིཡ ཧོནྟཱིཏི ཨཱཧ ‘‘པིཎྜིཏཱ’’ཏི. ཝོཧཱརཝཙནནྟི བྷགཝཏོ, བྷིཀྑཱུནཉྩ པུརཏོ ཝཏྟབྦཾ ཨུཔཙཱརཝཙནཾ.

ཨུཔནཙྩནྟིཡཱཏི ཨུཔགནྟྭཱ ནཙྩནྟིཡཱ.

སཀྐཱུཔསངྐམནཝཎྞནཱ

༣༥༠. ‘‘ཀདཱ སཾཡཱུལ༹ྷཱ’’ཏིཨཱདཱིནི ཝདནྟོ པཊིསམྨོདཏི. ཝིཔྤཀཱརམྤི དསྶེཡྻཱཏི ཨཌྜྷཀཏཱབྷིནཡཝསེན ནཙྩམྤི དསྶེཡྻ.

༣༥༡. ‘‘ཨབྷིཝདིཏོ སཀྐོ དེཝཱནམིནྡོ’’ཏིཨཱདཱིནཾ ‘‘ཏེན ཁོ པན སམཡེནཱ’’ཏིཨཱདཱིནཾ (པཱརཱ. ༡༦, ༢༤) ཝིཡ སངྒཱིཏིཀཱརཝཙནབྷཱཝེ སཾསཡོ ནཏྠི, ‘‘ཨེཝཉྩ པན ཏཐཱགཏཱ’’ཏི ཨིདྷ པན སིཡཱ སཾསཡོཏི ‘‘དྷམྨསངྒཱཧཀཏྠེརེཧི ཋཔིཏཝཙན’’ནྟི ཝཏྭཱ ཨིཏརསྶཱཔི ཏཐཱབྷཱཝཾ དསྶེཏུཾ ‘‘སབྦམེཏ’’ནྟིཨཱདི ཝུཏྟཾ. ཝུཌྜྷིཝཙནེན ཝུཏྟོཏི ‘‘སུཁཱི ཧོཏུ པཉྩསིཁ སཀྐོ དེཝཱནཾ ཨིནྡོ’’ཏི ཨཱསཱིསཝཱདཾ ཝུཏྟོ. ‘‘བྷགཝཏོ པཱདེ སིརསཱ ཝནྡཏཱི’’ཏི ཝདནྟོ ཨབྷིཝཱདེཏི ནཱམ ‘‘སུཁཱི ཧོཏཱུ’’ཏི ཨཱསཱིསཝཱདསྶ ཝདཱཔནཏོ. ཏཐཱ པན ཨཱསཱིསཝཱདཾ ཝདནྟོ ཨབྷིཝདཏི ནཱམ སབྦཀཱལཾ ཏཐེཝ ཏིཊྛནཏོ.

ཨུརུཾ ¶ ཝེཔུལླཾ དསྶཏི དཀྑཏཱིཏི ཨུརུནྡཱ ཝིབྷཏྟིཨལོཔེན. ཝིཝཊཱ ཨངྒཎཊྛཱནཾ. ཡོ པཀཏིཡཱ གུཧཱཡཾ ཨནྡྷཀཱརོ, སོ ཨནྟརཧིཏོཏི ཡོ ཏསྶཾ གུཧཱཡཾ སཏྠུ སམནྟཏོ ཨསཱིཏིཧཏྠཏོ ཨཡཾ པཱཀཏིཀོ ཨནྡྷཀཱརོ, སོ དེཝཱནཾ ཝཏྠཱབྷརཎསརཱིརོབྷཱསེཧི ཨནྟརཧིཏོ, ཨཱལོཀོ སམྤཛྫི. ཨསཱིཏིཧཏྠེ པན བུདྡྷཱལོཀེནེཝ ཨནྡྷཀཱརོ ཨནྟརཧིཏོ, ན ཙ སམཏྠོ དེཝཱནཾ ཨོབྷཱསོ བུདྡྷཱནཾ ཨབྷིབྷཝིཏུཾ.

༣༥༢. ཙིརཔྤཊིཀཱཧནྟི ¶ ཙིརཔྤབྷུཏིཀོ ཨཧཾ. ཨཌྜཀརཎཾ ནཱམ ནཏྠི ཨཝིཝཱདཱདྷིཀརཎཊྛཱནེ ནིབྦཏྟཏྟཱ. ཀཱིལཱ༹དཱིནིཔཱིཏི ཨཱདི-སདྡེན དྷམྨསྶཝནཱདིཾ སངྒཎྷཱཏི.

སལལ༹མཡགནྡྷཀུཊིཡནྟི ¶ སལལ༹རུཀྑེཧི རཉྙཱ པསེནདིནཱ ཀཱརིཏགནྡྷཀུཊིཡཾ. ཏེནསྶཱཏི ཏེན ཕལདྭཡཱདྷིགམེན པཧཱིནཨོལཱ༹རིཀཀཱམརཱགཏཱཡ ཨསྶཱ བྷཱུཛཏིཡཱ དེཝལོཀེ ཨབྷིརཏིཡེཝ ནཏྠི. ཙཀྐནེམིསདྡེན ཏམྷཱ སམཱདྷིམྷཱ ཝུཊྛིཏོཏི ཨེཏྠ ཨདྷིཔྤཱཡཾ ཨཛཱནནྟཱ ‘‘ཨཱརམྨཎསྶ ཨདྷིམཏྟཏཱཡ སམཱཔཏྟིཏོ ཝུཊྛཱནཾ ཛཱཏ’’ནྟི མཉྙེཡྻུནྟི ཏཾ པཊིཀྑིཔནྟོ ‘‘སམཱཔནྣོ སདྡཾ སུཎཱཏཱིཏི ནོ ཝཏ རེ ཝཏྟབྦེ’’ཏི ཨཱཧ. སཏི ཙ ཨཱརམྨཎསངྒྷཊྚནཱཡཾ གཧཎེནཔི བྷཝིཏབྦནྟི ཨདྷིཔྤཱཡེན ‘‘སུཎཱཏཱི’’ཏི ཝུཏྟཾ, ཨིཏརོ ‘‘པཋམཾ ཛྷཱནཾ སམཱཔནྣསྶ སདྡོ ཀཎྚཀོ’’ཏི ཝཙནམཏྟཾ ནིསྶཱཡ སབྦསྶཱཔི ཛྷཱནསྶ སདྡོ ཀཎྚཀོཏི ཨདྷིཔྤཱཡེན པཊིཀྑེཔཾ ཨསཧནྟོ ‘‘ནནུ བྷགཝཱ…པེ… ¶ བྷཎཏཱི’’ཏི ཨིམམེཝ སུཏྟཔདཾ ཨུདྡྷརི. ཏཏྠ ཡཐཱ དོསདསྶནཔཊིཔཀྑབྷཱཝནཱཝསེན པཊིགྷསཉྙཱནཾ སུཔྤཧཱིནཏྟཱ མཧཏཱཔི སདྡེན ཨརཱུཔསམཱཔཏྟིཏོ ན ཝུཊྛཱནཾ, ཨེཝཾ ‘‘ཨུཔྤཱདོ བྷཡཾ, ཨནུཔྤཱདོ ཁེམ’’ནྟིཨཱདིནཱ སམྨདེཝ དོསདསྶནཔཊིཔཀྑབྷཱཝནཱཝསེན སབྦཱསམྤི ལོཀིཡསཉྙཱནཾ ཨགྒམགྒེན སམཏིཀྐནྟཏྟཱ ཨཱརམྨཎཱདྷིགམཏཱཡ ན ཀདཱཙི ཕལསམཱཔཏྟིཏོ ཝུཊྛཱནཾ ཧོཏཱིཏི. ཏཐཱ པན ན སུཔྤཧཱིནཏྟཱ པཊིགྷསཉྙཱནཾ སབྦརཱུཔསམཱཔཏྟིཏོ ཝུཊྛཱནཾ ཧོཏི, པཋམཛ྄ཛྷཱནཾ པན ཨཔྤཀམྤི སདྡཾ ན སཧཏཱིཏི ཏཾསམཱཔནྣསྶ ‘‘སདྡོ ཀཎྚཀོ’’ཏི ཝུཏྟཾ. ཡདི པན པཊིགྷསཉྙཱནཾ ཝིཀྑམྦྷིཏཏྟཱ མཧཏཱཔི སདྡེན ཨརཱུཔསམཱཔཏྟིཏོ ན ཝུཊྛཱནཾ ཧོཏི, པགེཝ མགྒཕལསམཱཔཏྟིཏོ. ཏེནཱཧ ‘‘ཙཀྐནེམིསདྡེནཱ’’ཏིཨཱདི. ཙཀྐནེམིསདྡེནཱཏི ཙ ནཡིདཾ ཀརཎཝཙནཾ ཧེཏུམྷི, ཀརཎེ ཝཱ ཨཐ ཁོ སཧཡོགེ. ཨིམམེཝ ཧི ཨཏྠཾ དསྶེཏུཾ ‘‘བྷགཝཱ པནཱ’’ཏིཨཱདི ཝུཏྟཾ.

གོཔཀཝཏྠུཝཎྞནཱ

༣༥༣. པརིཔཱུརཀཱརིནཱིཏི པརིཔུཎྞཱནི, པརིསུདྡྷཱནི ཙ ཀཏྭཱ རཀྑིཏཝཏཱི. ‘‘ཨིཏྠིཏྟ’’ནྟིཨཱདི ཏཏྠ ཝིརཛྫནཱཀཱརདསྶནཾ. དྷིཏྠིབྷཱཝཾཨིཏྠིབྷཱཝསྶ དྷིཀྐཱརོ ཧེཏཱུཏི ཨཏྠོ. ཨལནྟི པཊིཀྑེཔཝཙནཾ, པཡོཛནཾ ནཏྠཱིཏི ཨཏྠོ. ཝིརཱཛེཏཱིཏི ཛིགུཙྪཏི. ཨེཏཱ སམྤཏྟིཡོཏི ཙཀྐཝཏྟིསིརིཨཱདིཀཱ ཨེཏཱ ཡཐཱཝུཏྟསམྤཏྟིཡོ. ཏསྨཱ པུབྦཔརིཙཡེན ཨུཔཊྛིཏནིཀནྟིཝསེན. ཨུཔཊྛཱནསཱལནྟི སུདྷམྨདེཝསབྷཾ.

སོཏི ¶ ¶ ¶ གོཔཀདེཝཔུཏྟོ. ཝཊྚེཏྭཱ ཝཊྚེཏྭཱཏི ཏོམརཱདིཾ ཝཏྟེནྟེན ཝིཡ ཙོདནཝཙནཾ པརིཝཊྚེཏྭཱ པརིཝཊྚེཏྭཱ. གཱལ༹ྷཾ ཝིཛ྄ཛྷིཏབྦཱཏི གཱལ༹ྷཏརཾ གྷཊྚེཏབྦཱ.

ཀུཏོ མུཁཱཏི ཀུཏོ པཝཏྟཉཱཎམུཁཱ. ཏེནཱཧ ‘‘ཨཉྙཝིཧིཏཀཱ’’ཏི. ཀཏཔུཉྙེཏི སམྨཱ ཀཏཔུཉྙེ དྷམྨེ.

དཱཡོཏི ལཱབྷོ. སོ ཧི དཱིཡཏི ཏེཧི དཱཏབྦཏྟཱ དཱཡོ, ཡེསཾ དཱིཡཏི, ཏེཧི ལདྡྷཏྟཱ ལཱབྷོཏི ཙ ཝུཙྩཏི. སངྑཱརེ…པེ… པཏིཊྛཧིཾསུ ཀཏཱདྷིཀཱརཏྟཱ. ཏཏྠ ཏཱཝཏིཾསབྷཝནེ ཋིཏཱནཾཡེཝ ནིབྦཏྟོ ཡཐཱ སཀྐསྶ ཨིནྡསཱལགུཧཱཡཾ ཋིཏསྶེཝ སཀྐཏྟབྷཱཝོ.

ནིཀནྟིཾ ཏསྨིཾ གནྡྷབྦཀཱཡེ ཨཱལཡཾ སམུཙྪིནྡིཏུཾ ན སཀྐོནྟོ.

༣༥༤. ཨཏྟནཱཝ ཝེདིཏབྦོཏི ཨཏྟནཱཝ ཨདྷིགནྟྭཱ ཝེདིཏབྦོ, ན པརཔྤཙྩཡིཀེན. ཏུམྷེཧི ཝུཙྩམཱནཱནཱིཏི ཀེཝལཾ ཏུམྷེཧི ཝུཙྩམཱནཱནི.

ཝིཡཱཡཱམཱཏི ཝིསྶཊྛཾ ཝཱིརིཡཾ སནྟཱནེ པཝཏྟེམ. པཀཏིཡཱཏི རཱུཔཱཝཙརབྷཱཝེན, ‘‘ཨནུསྶར’’ནྟི ཝཱ པཱཋོ.

ཀཱམརཱགོ ཨེཝ ‘‘ཚནྡོ རཱགོ ཚནྡརཱགོ’’ཏིཨཱདི པཝཏྟིབྷེདེན སཾཡོཛནཊྛེན ‘‘ཀཱམརཱགསཾཡོཛནཱནཱི’’ཏི, ཡོགགནྠཱདིཔཝཏྟིཨཱཀཱརབྷེདེན ‘‘ཀཱམབནྡྷནཱནཱི’’ཏི ཙ ཝུཏྟོ. པཱཔིམཡོགཱནཱིཏི ཨེཏྠ པན སེསཡོགགནྠཱནམྤི ཝསེན ཨཏྠོ ཝེདིཏབྦོ.

དུཝིདྷཱནནྟི ¶ ཝཏྠུཀཱམཀིལེསཀཱམཝསེན དུཝིདྷཱནཾ.

‘‘ཨེཏྠ ཀིཾ, ཏཏྠ ཀི’’ནྟི ཙ པདདྭཡེ ཀིནྟི ནིཔཱཏམཏྟཾ. ཙཱཏུདྡིསབྷཱཝེཏི ཏེསཾ བུདྡྷཱདཱིནཾ ཏིཎྞཾ རཏནཱནཾ ཙཏུདྡིསཡོགྱབྷཱཝེ ཨཔྤཊིཧཊབྷཱཝེ. བུདྡྷརཏནཉྷི མཧཱཀཱརུཎིཀཏཱཡ, ཨནཱཝརཎཉཱཎཏཱཡ, པརམསནྟུཊྛཏཱཡ ཙ ཙཱཏུདྡིསཾ, དྷམྨརཏནཾ སྭཱཀྑཱཏཏཱཡ, སངྒྷརཏནཾ སུཔྤཊིཔནྣཏཱཡ. ཏེནཱཧ ‘‘སབྦདིསཱསུ ཨསཛྫམཱནོ’’ཏི.

མཛ྄ཛྷིམསྶ པཋམཛ྄ཛྷཱནསྶ ཨདྷིགཏཏྟཱ ཏཱཝདེཝ ཀཱཡཾ བྲཧྨཔུརོཧིཏཾ ཨདྷིགནྟྭཱ ཏཱཝདེཝ པུརིམཾ ¶ ཛྷཱནསཏིཾ པཊིལབྷིཏྭཱ ཏཾ ཛྷཱནཾ པཱདཀཾ ཀཏྭཱ ཝིཔསྶནཾ ཝཌྜྷེཏྭཱ ཨོརམྦྷཱགིཡསཾཡོཛནསམུཙྪིནྡནེན མགྒཕལཝིསེསཾ ཨནཱགཱམིཕལསངྑཱཏཾ ཝིསེསཾ ཨཛ྄ཛྷགཾསུ ཨདྷིགཙྪིཾསུ. ཀེཙི པན ‘‘ཀཱམཱཝཙརཏྟབྷཱཝེན ¶ མགྒཕལཱནི ཨདྷིགཙྪིཾསཱུཏི ཨདྷིཔྤཱཡེན པཉྩམསྶ ཛྷཱནསྶ ཨནདྷིགཏཏྟཱ སུདྡྷཱཝཱསེསུ ན ཨུཔྤཛྫིཾསུ, པཋམཛ྄ཛྷཱནལཱབྷིཏཱཡ པན བྲཧྨཔུརོཧིཏེསུ ནིབྦཏྟིཾསཱུ’’ཏི ཝདནྟི.

མགྷམཱཎཝཝཏྠུཝཎྞནཱ

༣༥༥. ཝིསུདྡྷོཏི ཝིསུདྡྷཨཛ྄ཛྷཱསཡོ, ཨུཔནིསྶཡསམྤནྣོཏི ཨདྷིཔྤཱཡོ. གཱམཀམྨཀརཎཊྛཱནནྟི གཱམིཀཱནཾ ཨུཔཊྛཱནཊྛཱནཾ ཝདཏི. ཏཱཝཏཀེནེཝཱཏི ཨཏྟནཱ སོདྷིཏཊྛཱནེཝ ཨཉྙསྶ ཨཱགནྟྭཱ ཨཝཊྛཱནེནེཝ. སཏིཾ པཊིལབྷིཏྭཱཏི ‘‘ཨཧོ མཡཱ ཀཏཀམྨཾ སཕལཾ ཛཱཏ’’ནྟི ཡོནིསོ ཙིཏྟཾ ཨུཔྤཱདེཏྭཱ.

པཱསཱཎེཏི མགྒམཛ྄ཛྷེ ཨུཙྩཏརབྷཱཝེན ཋིཏཔཱསཱཎེ. ཨུཙྩཱལེཏྭཱཏི ཨུདྡྷརིཏྭཱ. ཨེཏསྶ སགྒསྶ གམནམགྒནྟི ཨེཏསྶ ཙནྡཱདཱིནཾ ཨུཔྤཏྟིཊྛཱནབྷཱུཏསྶ སགྒསྶ གམནམགྒཾ པུཉྙཀམྨཾ.

སུགཏིཝསེན ལདྡྷབྦཾ, ཀཧཱཔཎཉྩཱཏི ཀཧཱཔཎཾ, དཎྜཝསེན ལདྡྷབྦཾ བལི དཎྜབལི. གཧཔཏིཀཱ ¶ ཀིཾ ཀརིསྶནྟཱིཏི གཧཔཏིཀཱ ནཱམ ཨཊཝིཀཱ ཝིཡ ཝིསམནིསྶིཏཱ, ཏེ ན ཀཉྩི ཨནཏྠཾ ཀརིསྶནྟི, ཨེཝཾ ཏཡཱ ཛཱནམཱནེན ཀསྨཱ མཡ྄ཧཾ ན ཀཐིཏནྟི ཡདིཔི པུབྦེ ན ཀཐིཏཾ, ཨེཏརཧི པན བྷཡེན ཀཐིཏཾ, མཱ མཡ྄ཧཾ དོསཾ ཀརེཡྻཱཐ, ཨཱརོཙིཏཀཱལཏོ པཊྛཱཡ ན མཡ྄ཧཾ དོསོཏི ཝདཏི.

ནིབདྡྷནྟི ཨེཀནྟིཀཾ.

པིསུཎེསཱིཏི པིསུཎཀམྨམཀཱསི, ཏུམྷཱཀཾ ཨནྟརེ མཡ྄ཧཾ པེསུཉྙཾ ཨུཔསཾཧརཏཱིཏི ཨཏྠོ. པུན ཨཧརཎཱིཡཾ བྲཧྨདེཡྻཾ ཀཏྭཱ. མཡ྄ཧམྤཱིཏི མཡ྄ཧམྤི ཨཏྠཱཡ མཾ ཨུདྡིསྶ པུཉྙཀམྨཾ ཀརོཐ. ནཱིལུཔྤལཾ ནཱམ ཝིཀསམཱནཾ ཨུདཀཏོ ཨུགྒནྟྭཱཝ ཝིཀསཏི, ཨེཝཾ ཨཧུཏྭཱ ཨནྟོཨུདཀེ པུཔྥིཏཾ ནཱིལུཔྤལཾ ཝིཡ. ཨམྷཱཀཾ པནིདཾ པུཉྙཀམྨཾ བྷཝནྟརཱུཔཔཏྟིཡཱ ཝིནཱ ཨིམསྨིཾཡེཝ ཨཏྟབྷཱཝེ ཝིཔཱཀཾ དེཏཱིཏི ཡོཛནཱ. ཙིནྟཱམཏྟཀམྤཱིཏི དོམནསྶཝསེན ཙིནྟཱམཏྟཀམྤི.

པགེཝཱཏི ¶ ཀཱལསྶེཝ, ཨཏིཝིཡ པཱཏོཏི ཨཏྠོ. ཀཎྞིཀཱུཔགནྟི ཀཎྞིཀཡོགྱཾ. ཏཙྪེཏྭཱ མཊྛཾ ཀཏྭཱ ཀཎྞིཀཱཡ ཀཏྟབྦཾ སབྦཾ ནིཊྛཔེཏྭཱ. ཏཐཱ ཧི སཱ ཝཏྠེན ཝེཋེཏྭཱ ཋཔིཏཱ.

ཙཡབནྡྷནཾ ¶ སཱལཱཡ ཨདྷིཊྛཱནསཛྫནཾ. ཀཎྞིཀམཉྩབནྡྷནཾ ཀཎྞིཀཱརོཧནཀཱལེ ཨཱརུཧིཏྭཱ ཨཝཊྛཱནཨཊྚཀརཎཾ.

ཡསྶ ཨཏྠཏེ ཕལཀེ ཡསྶ ཕལཀེ ཨཏྠཏེཏི ཡོཛནཱ.

ཨཝིདཱུརེཏི སཱལཱཡ, ཀོཝིལཱ༹རརུཀྑསྶ ཙ ཨཝིདཱུརེ. སབྦཛེཊྛིཀཱཏི སབྦཱསཾ ཏསྶ བྷརིཡཱནཾ ཛེཊྛིཀཱ སུཛཱཏཱ.

ཏསྶེཝཱཏི སཀྐསྶེཝ. སནྟིཀེཏི སམཱིཔེ སནྟིཀཱཝཙརཱ ཧུཏྭཱ ནིབྦཏྟཱ. དྷཛེན སདྡྷིཾ སཧསྶཡོཛནིཀོ པཱསཱདོ.

ཀཀྐཊཀཝིཛ྄ཛྷནསཱུལསདིསནྟི ¶ ཀཀྐཊཀེ གཎྷིཏུཾ ཏསྶ བིལཔརིཡནྟསྶ ཝིཛ྄ཛྷནསཱུཙིསདིསཾ.

མཙྪརཱུཔེནཱཏི མཏམཙྪརཱུཔེན. ཨོསརཏཱིཏི པིལཝནྟོ གཙྪཏི. ཏསྶཱཔི བཀསཀུཎིཀཱཡ པཉྩ ཝསྶསཏཱནི ཨཱཡུ ཨཧོསི དེཝནེརཡིཀཱནཾ ཝིཡ མནུསྶཔེཏཏིརཙྪཱནཱནཾ ཨཱཡུནོ ཨཔརིཙྪིནྣཏྟཱ.

ཨུཀྐུཊྛིམཀཱསཱིཏི ཨུཙྩཱསདྡམཀཱསི.

པུབྦསནྣིཝཱསེནཱཏི པུརིམཛཱཏཱིསུ ཙིརསནྣིཝཱསེན. ཨེཝཉྷི ཨེཀཙྩཱནཾ དིཊྛམཏྟེནཔི སིནེཧོ ཨུཔྤཛྫཏི. ཏེནཱཧ བྷགཝཱ –

‘‘པུབྦེཝ སནྣིཝཱསེན, པཙྩུཔྤནྣཧིཏེན ཝཱ;

ཨེཝཾ ཏཾ ཛཱཡཏེ པེམཾ, ཨུཔྤལཾཝ ཡཐོདཀེ’’ཏི. (ཛཱ. ༡.༢.༡༧༤);

ཨཝསེསེསཱུཏི ¶ ཨསུརེ, སཀྐཾ ཋཔེཏྭཱ དྭཱིསུ དེཝལོཀེསུ དེཝེཝ སནྡྷཱཡ ཝདཏི.

ཨཏྠནིསྶིཏནྟི ཨཏྟནོ, པརེསཉྩ ཨཏྠམེཝ ཧིཏམེཝ ནིསྶིཏཾ, ཏཾ པན ཧིཏཾ སུཁསྶ ནིདཱནནྟི ཨཱཧ ‘‘ཀཱརཎནིསྶིཏ’’ནྟི.

པཉྷཝེཡྻཱཀརཎཝཎྞནཱ

༣༥༧. ཀིཾསཾཡོཛནཱཏི ཀཱིདིསསཾཡོཛནཱ. སཏྟེ ཨནཏྠེ སཾཡོཛེནྟི བནྡྷནྟཱིཏི སཾཡོཛནཱནཱིཏི ཨཱཧ ‘‘ཀིཾབནྡྷནཱ, ཀེན བནྡྷནེན བདྡྷཱ’’ཏི. པུཐུཀཱཡཱཏི བཧཱུ སཏྟཀཱཡཱཏི ཨཱཧ ‘‘བཧཱུ ཛནཱ’’ཏི. ཝེརཾ ཝུཙྩཏི དོསོཏི ཨཱཧ ‘‘ཨཝེརཱཏི ཨཔྤཊིགྷཱ’’ཏི. ཨཱཝུདྷེན ¶ སརཱིརེ དཎྜོ ཨཱཝུདྷདཎྜོ, དྷནསྶ དཱཔནཏྠེན དཎྜོ དྷནདཎྜོ, ཏདུབྷཡཱཀརཎེན ཏཏོ ཝིནིམུཏྟོ ཨདཎྜོ, སམྤཏྟིཧརཎཏོ, སཧ ཨནཏྠུཔྤཏྟིཏོ ཙ སཔཏྟོ, པཊིསཏྟཱུཏི ཨཱཧ ‘‘ཨསཔཏྟཱཏི ཨཔཙྩཏྠིཀཱ’’ཏི. བྱཱཔཛ྄ཛྷཾ ¶ ཝུཙྩཏི ཙིཏྟདུཀྑཾ, ཏབྦིརཧིཏཱ ཨབྱཱཔཛ྄ཛྷཱཏི ཨཱཧ ‘‘ཝིགཏདོམནསྶཱ’’ཏི. པུབྦེ ‘‘ཨཝེརཱ’’ཏི པདེན སམྦདྡྷཱགྷཱཏཀཱབྷཱཝོ ཝུཏྟོ. ཏེནཱཧ ‘‘ཨཔྤཊིགྷཱ’’ཏི. ‘‘ཨཝེརིནོ’’ཏི པན ཨིམིནཱཔི ཀོཔམཏྟསྶཔི ཨནུཔྤཱདནཾ. ཏེནཱཧ ‘‘ཀཏྠཙི ཀོཔཾ ན ཨུཔྤཱདེཏྭཱ’’ཏི. ‘‘ཝིཧརེམཱུ’’ཏི ཙ པདཾ པུརིམཔདེཧིཔི ཡོཛེཏབྦཾ ‘‘ཨཝེརཱ ཝིཧརེམཱུ’’ཏིཨཱདིནཱ. ཨཡཉྩ ཨཝེརཱདིབྷཱཝོ སཾཝིབྷཱགེན པཱཀཊོ ཧོཏཱིཏི དསྶེཏུཾ ‘‘ཨཙྪརཱཡཱ’’ཏི ཨཱདིཾ ཝཏྭཱ ‘‘ཨིཏི ཙེ ནེསཾ ཧོཏཱི’’ཏི ཝུཏྟཾ. ཙིཏྟུཔྤཏྟི དལ༹ྷཏརཱཔི ཧུཏྭཱ པཝཏྟཏཱིཏི དསྶེཏུཾ ‘‘དཱནཾ དཏྭཱ, པཱུཛཾ ཀཏྭཱ ཙ པཏྠཡནྟཱི’’ཏི ཝུཏྟཾ. ཨིཏི ཙེཏི ཙེ-སདྡོ ཨནྭཡསཾསགྒེན པརིཀཔྤེཏཱིཏི ཨཱཧ ‘‘ཨེཝཉྩ ནེས’’ནྟི.

ཡཱཡ ཀཱཡཙི པརེསཾ སམྤཏྟིཡཱ ཁཱིཡནཾ ཨུསཱུཡནཾ ཨསཧནཾ ལཀྑཎཾ ཨེཏིསྶཱཏི པརསམྤཏྟིཁཱིཡནལཀྑཎཱ, ཡདགྒེན ཨཏྟསམྤཏྟིཡཱ པརེཧི སཱདྷཱརཎབྷཱཝཾ ཨསཧནལཀྑཎཾ, ཏདགྒེནསྶ ‘‘ནིགཱུཧནལཀྑཎ’’ནྟིཔི ཝཏྟབྦཾ. ཏཐཱ ཧིསྶ པོརཱཎཱ ‘‘མཱ ཨིདཾ ཨཙྪརིཡཾ ཨཉྙེསཾ ཧོཏུ, མཡ྄ཧམེཝ ཧོཏཱུཏི མཙྪརིཡ’’ནྟི ནིབྦཙནཾ ཝདནྟི. ཨབྷིདྷམྨེ ‘‘ཡཱ པརལཱབྷསཀྐཱརགརུཀཱརམཱནནཝནྡནཔཱུཛནཱསུ ཨིསྶཱ ཨིསྶཱཡནཱ’’ཏིཨཱདིནཱ (དྷ. ས. ༡༡༢༦) ནིཀྑེཔཀཎྜེ, ‘‘ཡཱ ཨེཏེསུ པརེསཾ ལཱབྷཱདཱིསུ ཀིཾ ཨིམིནཱ ཨིམེས’’ནྟིཨཱདིནཱ ཏཾསཾཝཎྞནཱཡཉྩ ཝུཏྟཱནེཝ, ཏསྨཱ ཏཏྠ ཝུཏྟནཡེནེཝ ཝེདིཏབྦཱནཱིཏི ཨདྷིཔྤཱཡོ.

ཡསྨཱ པན ཨིསྶཱམཙྪརིཡཱནི བཧྭཱདཱིནཝཱནི, ཏེསཾ ཝིབྷཱཝནཱ ལོཀསྶ བཧུཀཱརཱ ¶ , ཏསྨཱ ཨབྷིདྷམྨཊྛཀཐཱཡཾ ¶ (དྷ. ས. ཨཊྛ. ༡༡༢༥) ཝིབྷཱཝིཏཱནམྤི ཏེསཾ དིཊྛདྷམྨིཀེཔི སམྤརཱཡིཀེ པིཨཱདཱིནཝེ དསྶེནྟོ ‘‘ཨཱཝཱསམཙྪརིཡེན པནཱ’’ཏིཨཱདིམཱཧ. ཨེཏྠཱཏི ཨེཏེསུ ཨིསྶཱམཙྪརིཡེསུ, ཨེཏེསུ ཝཱ ཨཱཝཱསམཙྪརིཡཱདཱིསུ པཉྩསུ མཙྪརིཡེསུ. སངྐཱརཾ སཱིསེན ཨུཀྑིཔིཏྭཱཝ ཝིཙརཏི ¶ ཏཏྠ ལགྒཙིཏྟཏཱཡ, ནིཧཱིནཛ྄ཛྷཱསཡཏཱཡ ཙ. མམཱཏི མཡཱ, ཨཡམེཝ ཝཱ པཱཋོ. ལོཧིཏམྤི མུཁཏོ ཨུགྒཙྪཏི ཙིཏྟཝིགྷཱཏེན སཾཏཏྟཧདཡཏཱཡ. ཀུཙྪིཝིརེཙནམྤི ཧོཏི ཨཏིཛལགྒིནོ. ཨཉྙོ ཝིབྷཝཔཊིཝེདྷདྷམྨོ ཨརིཡཱནཾཡེཝ ཧོཏི, ཏེ ཙ ཏཾ ན མཙྪརཱཡནྟི མཙྪརིཡསྶ སབྦསོ པཧཱིནཏྟཱ. པཊིཝེདྷདྷམྨེ མཙྪརིཡསྶ ཨསམྦྷཝོ ཨེཝཱཏི ཨཱཧ ‘‘པརིཡཏྟིདྷམྨམཙྪརིཡེན ཙཱ’’ཏི. ཝཎྞམཙྪརིཡེན དུབྦཎྞོ, དྷམྨམཙྪརིཡེན ཨེལ༹མཱུགོ དུཔྤཉྙོ ཧོཏི.

‘‘ཨཔིཙཱ’’ཏིཨཱདི པཉྩནྣཾ མཙྪརིཡཱནཾ ཝསེན ཀམྨསརིཀྑཀཝིཔཱཀདསྶནཾ. ཨཱཝཱསམཙྪརིཡེན ལོཧགེཧེ པཙྩཏི པརེསཾ ཨཱཝཱསཔཙྩཡཧིཏསུཁནིསེདྷནཏོ. ཀུལམཙྪརིཡེན ཨཔྤལཱབྷོ ཧོཏི པརེཧི ཀུལེསུ ལདྡྷབྦལཱབྷནིསེདྷནཏོ, ཨཔྤལཱབྷོཏི ཙ ཨལཱབྷོཏི ཨཏྠོ. ལཱབྷམཙྪརིཡེན གཱུཐནིརཡེ ནིབྦཏྟཏི ལཱབྷཧེཏུ པརེཧི ལདྡྷབྦསྶ ཨསྶཱདནིསེདྷནཏོ. སབྦཐཱཔི ནིརསྶཱདོ ཧི གཱུཐནིརཡོ. ཝཎྞོ ནཱམ ན ཧོཏཱིཏི སརཱིརཝཎྞོ, གུཎཝཎྞོཏི དུཝིདྷོཔི ཝཎྞོ ནཱམམཏྟེནཔི ན ཧོཏི, ཏཏྠ ཏཏྠ ནིབྦཏྟམཱནོ ཝིརཱུཔོ ཨེཝ ཧོཏི. སམྤཏྟིནིགཱུཧནསབྷཱཝེན མཙྪརིཡེན ཝིརཱུཔིཏེ སནྟཱནེ ཡེབྷུཡྻེན གུཎཱ པཏིཊྛམེཝ ན ལབྷནྟི, ཡེ ཙ པཏིཊྛཧེཡྻུཾ, ཏེསམྤི ཝསེནསྶ ཝཎྞོ ན བྷཝེཡྻ. ཏེ ཧི ཏསྶ ལོཀེ རཏྟིཾ ཁིཏྟཱ སརཱ ཝིཡ ན པཉྙཱཡནྟི. དྷམྨམཙྪརིཡེན ཀུཀྐུལ༹ནིརཡེ. སོཏཱཔཏྟིམགྒེན ¶ པཧཱིཡཏི ཨཔཱཡགམནཱིཡབྷཱཝཏོ. ཝེརཱདཱིཧི ན པརིམུཙྩནྟིཡེཝ ཏཔྤརིམུཙྩནཱཡ ཨིཙྪཱཡ ཨཔྤཏྟབྦཏྟཱ ཛཱཏིཨཱདིདྷམྨཱནཾ སཏྟཱནཾ ཛཱཏིཨཱདཱིཧི ཝིཡ.

ཏིཎྞཱ མེཏྠ ཀངྑཱཏི མ-ཀཱརོ པདསནྡྷིཀརོ. ཨེཏསྨིཾ པཉྷེཏི ཨེཏསྨིཾ ‘‘ཀིཾསཾཡོཛནཱ ནུ ཁོ’’ཏི ཨེཝཾ ཉཱཏུཾ ཨིཙྪིཏེ ཨཏྠེ. ཏུམྷཱཀཾ ཝཙནཾ སུཏྭཱཏི ‘‘ཨིསྶཱམཙྪརིཡསཾཡོཛནཱ’’ཏི ཨེཝཾ པཝཏྟཾ ཏུམྷཱཀཾ ཝིསྶཛྫནཝཙནཾ སུཏྭཱ. ཀངྑཱ ཏིཎྞཱཏི ཡཐཱཔུཙྪིཏེ ཨཏྠེ སཾསཡོ ཏརིཏོ ཝིགཏོ དེསནཱནུསྶརཎམཏྟེན, ན སམུཙྪེདཝསེནཱཏི ཨཱཧ ‘‘ན མགྒཝསེནཱ’’ཏིཨཱདི. ཨཡམྤི ཀཐཾཀཐཱ ཝིགཏཱཏི ཀངྑཱཡ ཝིགཏཏྟཱ ཨེཝ ཏསྶཱ པཝཏྟིཨཱཀཱརཝིསེསབྷཱུཏཱ ‘‘ཨིདཾ ཀཐ ཨིདཾ ཀཐ’’ནྟི ཨཡམྤི ཀཐཾཀཐཱ ཝིགཏཱ ཨཔགཏཱ.

༣༥༨. ནིདཱནཱདཱིནི ¶ མཧཱནིདཱནསུཏྟཝཎྞནཱཡཾ (དཱི. ནི. ཨཊྛ. ༢.༩༥) ཝུཏྟཏྠཱནེཝ. པིཡཱནཾ ¶ ཨཏྟནོ པརིགྒཧབྷཱུཏཱནཾ སཏྟསངྑཱརཱནཾ པརེཧི སཱདྷཱརཎབྷཱཝཱསཧནཝསེན, ནིགཱུཧནཝསེན ཙ པཝཏྟནཏོ པིཡསཏྟསངྑཱརནིདཱནཾ མཙྪརིཡཾ, ཨཔྤིཡཱནཾ པརིགྒཧབྷཱུཏཱནཾ སཏྟཱནཾ, སངྑཱརཱནཉྩ ཨསཧནཝསེན པཝཏྟིཡཱ ཨཔྤིཡསཏྟསངྑཱརནིདཱནཱ ཨིསྶཱ. ཡཉྷི ཀིཉྩི ཨཔྤིཡསམྦནྡྷཾ བྷདྡཀམྤི ཏཾ ཀོདྷནསྶ ཨཔྤིཡམེཝཱཏི. ཨུབྷཡནྟི མཙྪརིཡཾ, ཨིསྶཱ ཙཱཏི ཨུབྷཡཾ. ཨུབྷཡནིདཱནནྟི པིཡནིདཱནཉྩེཝ ཨཔྤིཡནིདཱནཉྩ. པིཡཱཏི ཨིཊྛཱ. ཀེལཱ༹ཡིཏཱཏི དྷནཱཡིཏཱ. མམཱཡིཏཱཏི མམཏྟཾ ཀཏྭཱ པརིགྒཧིཏཱ. ཨིསྶཾ ཀརོཏཱིཏི ‘‘ཀིཾ ཨིམསྶ ཨིམིནཱ’’ཏི ཏསྶ པིཡསཏྟལཱབྷཱསཧནཝསེན ཨུསྶཱུཡཏི, ཏམེཝ པིཡསཏྟཾ ཡཱཙིཏོ. ཨཧོ ཝཏསྶཱཏི སཱདྷུ ཝཏ ཨསྶ. ‘‘ཨིམསྶ པུགྒལསྶ ཨེཝརཱུཔཾ པིཡཝཏྠུ ན བྷཝེཡྻཱ’’ཏི ཨིསྶཾ ཀརོཏི ཨུསཱུཡཾ ཨུཔྤཱདེཏི. མམཱཡནྟཱཏི ཀེལཱ༹ཡནྟཱ. ཨཔྤིཡེཏི ཨཔྤིཡེ སཏྟེ ཏེསཾ སཏཱཔཏོ. ཨསྶཱཏི པུགྒལསྶ, ཡེན ཏེ ལདྡྷཱ. ཏེཏི ¶ སཏྟསངྑཱརཱ, སཙེཔི ཨམནཱཔཱ ཧོནྟི ཨཔྤིཡེཧི སམུདཱགཏཏྟཱ. ཝིཔརཱིཏཝུཏྟིཏཱཡཱཏི ཨཡཱཐཱཝགཱཧིཏཱཡ. ཀོ ཨཉྙོ ཨེཝརཱུཔསྶ ལཱབྷཱིཏི ཏེན ཨཏྟཱནཾ སམྦྷཱཝེནྟོ ཨིསྶཾ ཝཱ ཀརོཏི. ཨཉྙསྶ ཏཱདིསཾ ཨུཔྤཛྫམཱནམྤི ‘‘ཨཧོ ཝཏསྶ ཨེཝརཱུཔཾ ན བྷཝེཡྻཱ’’ཏི ཨིསྶཾ ཝཱ ཀརོཏི, ཨཡཉྩ ནཡོ ཧེཊྛཱ ཝུཏྟནཡཏྟཱ ན གཧིཏོ.