📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

དཱིགྷནིཀཱཡེ

པཱཐིཀཝགྒཊཱིཀཱ

༡. པཱཐིཀསུཏྟཝཎྞནཱ

སུནཀྑཏྟཝཏྠུཝཎྞནཱ

༡. ཨཔུབྦཔདཝཎྞནཱཏི ¶ ¶ ¶ ཨཏྠསཾཝཎྞནཱཝསེན ཧེཊྛཱ ཨགྒཧིཏཏཱཡ ཨཔུབྦསྶ ཨབྷིནཝསྶ པདསྶ ཝཎྞནཱ ཨཏྠཝིབྷཱཝནཱ. ‘‘ཧིཏྭཱ པུནཔྤུནཱགཏམཏྠ’’ནྟི (དཱི. ནི. ཨཊྛ. ༡.གནྠཱརམྦྷཀཐཱ) ཧི ཝུཏྟཾ. མལླེསཱུཏི ཨེཏྠ ཡཾ ཝཏྟབྦཾ, ཏཾ ཧེཊྛཱ ཝུཏྟནཡམེཝ. ཚཱཡཱུདཀསམྤནྣེ ཝནསཎྜེ ཝིཧརཏཱིཏི ཨནུཔིཡསཱམནྟཱ ཀཏསྶ ཝིཧཱརསྶ ཨབྷཱཝཏོ. ཡདི ན ཏཱཝ པཝིཊྛོ, ཀསྨཱ ‘‘པཱཝིསཱི’’ཏི ཝུཏྟནྟི ཨཱཧ ‘‘པཝིསིསྶཱམཱི’’ཏིཨཱདི, ཏེན ཨཝསྶཾ བྷཱཝིནི བྷཱུཏེ ཝིཡ ཨུཔཙཱརཱ ཧོནྟཱིཏི དསྶེཏི. ཨིདཱནི ཏམཏྠཾ ཨུཔམཱཡ ཝིབྷཱཝེནྟོ ‘‘ཡཐཱ ཀི’’ནྟིཨཱདིམཱཧ. ཨེཏནྟི ཨེཏཾ ‘‘ཨཏིཔྤགོ ཁོ’’ཏིཨཱདིཀཾ ཙིནྟནཾ ཨཧོསི. ཨཏིཝིཡ ¶ པགོ ཁོཏི ཨཏིཝིཡ པཱཏོཝ. ཚནྣཀོཔཱིནཏཱཡ, པརིབྦཱཛཀཔབྦཛྫུཔགམེན ཙ ཚནྣཔརིབྦཱཛཀཾ, ན ནགྒཔརིབྦཱཛཀཾ.

༢. ཡསྨཱ བྷགཝཏོ ཨུཙྩཱཀུལཔྤསུཏཏཾ, མཧཱབྷིནིཀྑམནནིཀྑནྟཏཾ, ཨནཉྙསཱདྷཱརཎདུཀྐརཙརཎཾ, ཝིཝེཀཝཱསཾ, ལོཀསམྦྷཱཝིཏཏཾ, ཨོཝཱདཱནུསཱསནཱིཧི ལོཀསྶ བཧུཔཀཱརཏཾ, པརཔྤཝཱདམདྡནཾ, མཧིདྡྷིཀཏཾ ¶ , མཧཱནུབྷཱཝཏནྟི ཨེཝམཱདིཀཾ ཏཾཏཾཨཏྟཔཙྩཀྑགུཎཝིསེསཾ ནིསྶཱཡ ཡེབྷུཡྻེན ¶ ཨཉྙཏིཏྠིཡཱཔི བྷགཝནྟཾ དིསྭཱ ཨཱདརགཱརཝབཧུམཱནཾ དསྶེནྟིཡེཝ, ཏསྨཱ ཝུཏྟཾ ‘‘བྷགཝནྟཾ དིསྭཱ མཱནཐདྡྷཏཾ ཨཀཏྭཱ’’ཏིཨཱདི. ལོཀསམུདཱཙཱརཝསེནཱཏི ལོཀོཔཙཱརཝསེན. ཙིརསྶནྟི ཙིརཀཱལེན. ཨཱདཱིནི ཝདནྟི ཨུཔཙཱརཝསེན. ཏསྶཱཏི བྷགྒཝགོཏྟསྶ པརིབྦཱཛཀསྶ. གིཧིསཧཱཡོཏི གིཧིཀཱལཏོ པཊྛཱཡ སཧཱཡོ. པཙྩཀྑཱཏོཏི ཡེནཱཀཱརེན པཙྩཀྑཱནཱ, ཏཾ དསྶེཏུཾ ‘‘པཙྩཀྑཱམཱི’’ཏིཨཱདི ཝུཏྟཾ.

༣. ཨུདྡིསྶཱཏི སཏྠུཀཱརབྷཱཝེན ཨུདྡིསྶཱཏི ཨཡམེཏྠ ཨདྷིཔྤཱཡོཏི ཏཾ དསྶེནྟོ ‘‘བྷགཝཱ མེ’’ཏིཨཱདིམཱཧ. ཡདཱ སུནཀྑཏྟསྶ ‘‘བྷགཝནྟཾ པཙྩཀྑཱམཱི’’ཏི ཙིཏྟཾ ཨུཔྤནྣཾ, ཝཱཙཱ བྷིནྣཱ, ཏདཱ ཨེཝསྶ བྷགཝཏཱ སདྡྷིཾ ཀོཙི སམྦནྡྷོ ནཏྠི ཨསཀྱཔུཏྟིཡབྷཱཝཏོ སཱསནཏོ པརིབཱཧིརཏྟཱ. ཨཡཾ ཏཱཝེཏྠ སཱསནཡུཏྟི, སཱ པནཱཡཾ ཋཔེཏྭཱ སཱསནཡུཏྟིཀོཝིདེ ཨཉྙེསཾ ན སམྨདེཝ ཝིསཡོཏི བྷགཝཱ སབྦསཱདྷཱརཎཝསེནསྶ ཨཏྟནཱ སམྦནྡྷཱབྷཱཝཾ དསྶེཏུཾ ‘‘ཨཔི ནཱུ’’ཏི ཨཱདིཾ ཝཏྭཱ སུནཀྑཏྟཾ ‘‘ཀོ སནྟོ ཀཾ པཙྩཱཙིཀྑསཱི’’ཏི ཨཱཧ. ཡསྨཱ མུཁཱགཏོཡཾ སམྦནྡྷོ, ན པཱུཛཱགཏཱདིཀོ, ཡོ ཙ ཡཱཙཀཡཱཙིཏབྦཏཱཝསེན ཧོཏི, ཏདུབྷཡཉྩེཏྠ ནཏྠཱིཏི དསྶེནྟོ བྷགཝཱ སུནཀྑཏྟཾ ‘‘ཀོ སནྟོ ཀཾ པཙྩཱཙིཀྑསཱི’’ཏི ཨཝོཙ, ཏསྨཱ ཏམཏྠཾ དསྶེཏུཾ ‘‘ཡཱཙཀོ ཝཱ’’ཏིཨཱདི ཝུཏྟཾ. ཡཱཙིཏཀོ ཝཱ ཡཱཙཀཾ པཙྩཱཙིཀྑེཡྻཱཏི སམྦནྡྷོ. ཏྭཾ པན ནེཝ ཡཱཙཀོ ‘‘ཨཧཾ བྷནྟེ བྷགཝནྟཾ ཨུདྡིསྶ ཝིཧརིསྶཱམཱི’’ཏི ཨེཝཾ མམ སནྟིཀཾ ཨནུཔགཏཏྟཱ. ན ཡཱཙིཏཀོ ‘‘ཨེཧི ཏྭཾ སུནཀྑཏྟ མམཾ ཨུདྡིསྶ ཝིཧརཱཧཱི’’ཏི ཨེཝཾ མཡཱ ཨཔཏྠིཏཏྟཱ.

ཀོ སམཱནོཏི ཡཱཙཀཡཱཙིཏཀེསུ ཀོ ནཱམ ཧོནྟོ. ཀནྟི ཡཱཙཀཡཱཙིཏཀེསུ ཨེཝ ཀཾ ནཱམ ཧོནྟཾ མཾ པཙྩཱཙིཀྑསི. ཏུཙྪཔུརིསཱཏི ¶ ཛྷཱནམགྒཱདིཨུཏྟརིམནུསྶདྷམྨེསུ ཀསྶཙིཔི ཨབྷཱཝཱ རིཏྟཔུརིསཱ. ནནུ ཙཱཡཾ སུནཀྑཏྟོ ལོཀིཡཛ྄ཛྷཱནཱནི, ཨེཀཙྩཱབྷིཉྙཉྩ ཨུཔྤཱདེསཱིཏི? ཀིཉྩཱཔི ཨུཔྤཱདེསི, ཏཏོ པན བྷགཝཏི ཨཱགྷཱཏུཔྤཱདནེན སཧེཝ པརིཧཱིནོ ཨཧོསི. ཨཔརཱདྷོ ནཱམ སུཔྤཊིཔཏྟིཡཱ ཝིརཛ྄ཛྷནཧེཏུབྷཱུཏོ ཀིལེསུཔྤཱདོཏི ཨཱཧ ‘‘ཡཏྟཀོ ཏེ ཨཔརཱདྷོ, ¶ ཏཏྟཀོ དོསོ’’ཏི. ཡཱཝཉྩཱཏི ཨཝདྷིཔརིཙྪེདབྷཱཝདསྶནཾ ‘‘ཡཱཝཉྩ ¶ ཏེན བྷགཝཏཱ’’ཏིཨཱདཱིསུ (དཱི. ནི. ༡.༣) ཝིཡ. ཏེཏི ཏཡཱ. ཨིདནྟི ནིཔཱཏམཏྟཾ. ཨཔརདྡྷནྟི ཨཔརཛ྄ཛྷིཏཾ. ཨིདཾ ཝུཏྟཾ ཧོཏི – ‘‘པཙྩཱཙིཀྑཱམིདཱནཱཧཾ བྷནྟེ བྷགཝནྟ’’ནྟིཨཱདཱིནི ཝདནྟེན ཏུཙྪཔུརིས ཏཡཱ ཡཱཝཉྩིདཾ ཨཔརདྡྷཾ, ན ཏསྶ ཨཔརཱདྷསྶ པམཱཎཾ ཨཏྠཱིཏི.

༤. མནུསྶདྷམྨཱཏི བྷཱཝནཱནུཡོགེན ཝིནཱ མནུསྶེཧི ཨནུཊྛཱཏབྦདྷམྨཱ. སོ ཧི མནུསྶཱནཾ ཙིཏྟཱདྷིཊྛཱནམཏྟེན ཨིཛ྄ཛྷནཏོ ཏེསཾ སམྦྷཱཝིཏདྷམྨོ ཝིཡ ཋིཏོ ཏཐཱ ཝུཏྟོ, མནུསྶགྒཧཎཉྩེཏྠ ཏེསུ བཧུལཾ པཝཏྟནཏོ. ཨིདྡྷིབྷཱུཏཾ པཱཊིཧཱརིཡཾ, ན ཨཱདེསནཱནུསཱསནཱིཔཱཊིཧཱརིཡནྟི ཨདྷིཔྤཱཡོ. ཀཏེཏི པཝཏྟིཏེ. ནིཡྻཱཏཱིཏི ནིགྒཙྪཏི, ཝཊྚདུཀྑཏོ ནིགྒམནཝསེན པཝཏྟཏཱིཏི ཨཏྠོ. དྷམྨེ ཧི ནིགྒཙྪནྟེ ཏཾསམངྒིཔུགྒལོ ‘‘ནིགྒཙྪཏཱི’’ཏི ཝུཙྩཏི, ཨཊྛཀཐཱཡཾ པན ནི-སདྡོ ཨུཔསགྒམཏྟཾ, ཡཱཏི ཨིཙྩེཝ ཨཏྠོཏི དསྶེཏུཾ གཙྪཏཱིཏི ཨཏྠོ ཝུཏྟོ. ཏཏྲཱཏི པདྷཱནབྷཱཝེན ཝུཏྟསྶ ཨཏྠསྶ བྷུམྨཝསེན ¶ པཊིནིདྡེསོཏི ཏསྨིཾ དྷམྨེ སམྨཱ དུཀྑཀྑཡཱཡ ནིཡྻནྟེཏི ཨཡམེཏྠ ཨཏྠོཏི དསྶེནྟོ ཨཱཧ ‘‘ཏསྨིཾ…པེ… སཾཝཏྟམཱནེ’’ཏི.

༥. ཨགྒནྟི ཉཱཡཏཱིཏི ཨགྒཉྙཾ. ལོཀཔཉྙཏྟིནྟི ལོཀསྶ པཉྙཱཔནཾ. ལོཀསྶ ཨགྒནྟི ལོཀུཔྤཏྟིསམཡེ ‘‘ཨིདཾ ནཱམ ལོཀསྶ ཨགྒ’’ནྟི ཨེཝཾ ཛཱནིཏབྦཾ བུཛ྄ཛྷིཏབྦཾ. ཨགྒམརིཡཱདནྟི ཨཱདིམརིཡཱདཾ.

༦. ཨེཏྟཀཾ ཝིཔྤལཔིཏྭཱཏི ‘‘ན དཱནཱཧཾ བྷནྟེ བྷགཝནྟཾ ཨུདྡིསྶ ཝིཧརིསྶཱམཱི’’ཏི, ‘‘ན ཧི པན མེ བྷནྟེ བྷགཝཱ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརོཏཱི’’ཏི, ‘‘ན ཧི པན མེ བྷནྟེ བྷགཝཱ ཨགྒཉྙཾ པཉྙཔེཏཱི’’ཏི ཙ ཨེཏྟཀཾ ཝིཔྤལཔིཏྭཱ. ཨིདཾ ཀིར སོ བྷགཝཱ སཏྠུཀིཙྩཾ ཨིདྡྷིཔཱཊིཧཱརིཡཾ, ཨགྒཉྙཔཉྙཱཔནཉྩ ཀཱཏུཾ ན སཀྐོཏཱིཏི པཀཱསེནྟོ ཀཐེསི. ཏེནཱཧ ‘‘སུནཀྑཏྟོ ཀིརཱ’’ཏིཨཱདི. ཨུཏྟརཝཙནཝསེན པཏིཊྛཱབྷཱཝཏོ ཨཔྤཏིཊྛོ. ཏཏོ ཨེཝ ནིརཝོ ནིསྶདྡོ.

ཨཱདཱིནཝདསྶནཏྠནྟི དིཊྛདྷམྨིཀསྶ ཨཱདཱིནཝསྶ དསྶནཏྠཾ. ཏེནཱཧ ‘‘སཡམེཝ གརཧཾ པཱཔུཎིསྶསཱི’’ཏི. སམྤརཱཡིཀཱ པན ཨཱདཱིནཝཱ ཨནེཀཝིདྷཱ, ཏེ དསྶེནྟོ སུནཀྑཏྟོ ན སདྡཧེཡྻཱཏི དིཊྛདྷམྨིཀསྶེཝ གཧཎཾ ¶ . ཨནེཀཀཱརཎེནཱཏི ‘‘ཨིཏིཔི སོ བྷགཝཱ ཨརཧ’’ནྟིཨཱདིནཱ (དཱི. ནི. ༡.༡༥༧, ༢༥༥) ཨནེཀཝིདྷེན ཝཎྞཀཱརཎེན. ཨེཝཾ མེ ཨཝཎྞོ ¶ ན བྷཝིསྶཏཱིཏི ཨཛ྄ཛྷཱསཡེན ཨཏྟནོ བཱལཏཱཡ ཝཎྞཱརཧཱནཾ ཨཝཎྞཾ ཀཐེཏྭཱ. ཨེཝཾ བྷགཝཱ མཀྑིབྷཱཝེ ཨཱདཱིནཝཾ དསྶེཏྭཱ པུན ཏསྶ ཀཐནེ ཀཱརཎཾ ཝིབྷཱཝེཏུཾ ‘‘ཨིཏི ཁོ ཏེ’’ཏིཨཱདིམཱཧཱཏི ཏཾ དསྶེཏུཾ ‘‘ཏཏོ’’ཏིཨཱདི ཝུཏྟཾ. ཨེཝཉྷི སུནཀྑཏྟསྶ ཨཔྤཀོཔི ཝཙནོཀཱསོ ན བྷཝིསྶཏཱིཏི. ཨཔཀྐམཱིཏི ¶ ཨཏྟནཱ ཡཐཱཋིཏཱ ཝུཊྛཱཡ ཨཔསཀྐི. ཨཔཀྐནྟོ སཱསནཏོ བྷཊྛོ. ཏེནཱཧ ‘‘ཙུཏོ’’ཏི. ཨེཝམེཝཱཏི ཨཔཀྐམནྟོ ཙ ན ཡཐཱ ཏཐཱ ཨཔཀྐམི, ཡཐཱ པན ཀཱཡསྶ བྷེདཱ ཨཔཱཡེ ནིབྦཏྟེཡྻ, ཨེཝམེཝ ཨཔཀྐམི.

ཀོརཁཏྟིཡཝཏྠུཝཎྞནཱ

༧. དྭཱིཧི པདེཧཱིཏི དྭཱིཧི ཝཱཀྱེཧི ཨཱརདྡྷཾ བྱཏིརེཀཝསེན ཏདུབྷཡཏྠནིདྡེསཝསེན ཨུཔརིདེསནཱཡ པཝཏྟཏྟཱ. ཨནུསནྡྷིདསྶནཝསེནཱཏི ཡཐཱནུསནྡྷིསངྑཱཏཨནུསནྡྷིདསྶནཝསེན.

ཨེཀཾ སམཡནྟི ཙ བྷུམྨཏྠེ ཨུཔཡོགཝཙནནྟི ཨཱཧ ‘‘ཨེཀསྨིཾ སམཡེ’’ཏི ཙ. ཐཱུལཱུ ནཱམ ཛནཔདོཏི ཛནཔདཱིནཾ རཱཛཀུམཱརཱནཾ ཝསེན ཏཐཱལདྡྷནཱམོ. ཀུཀྐུརཝཏཾ སམཱདཱནཝསེན ཨེཏསྨིཾ ཨཏྠཱིཏི ཀུཀྐུརཝཏིཀོཏི ཨཱཧ ‘‘སམཱདིནྣཀུཀྐུརཝཏོ’’ཏི. ཨཉྙམྤཱིཏི ‘‘ཙཏུཀྐོཎྜིཀསྶེཝ ཝིཙརཎཾ, ཏཐཱ ཀཏྭཱཝ ཁཱདནཾ, བྷུཉྫནཾ, ཝཱམཔཱདཾ ཨུདྡྷརིཏྭཱ མུཏྟསྶ ཝིསྶཛྫན’’ནྟི ཨེཝམཱདིཀཾ ཨཉྙམྤི སུནཁེཧི ཀཱཏབྦཀིརིཡཾ. ཙཏཱུཧི སརཱིརཱཝཡཝེཧི ཀུཎྜནཾ གམནཾ ཙཏུཀྐོཎྜོ, སོ ཨེཏསྨིཾ ཨཏྠཱིཏི ཙཏུཀྐོཎྜིཀོ. སོ པན ཡསྨཱ ཙཏཱུཧི སརཱིརཱཝཡཝེཧི སངྒྷཊྚིཏགམནོ ཧོཏི, ཏསྨཱ ཝུཏྟཾ ‘‘ཙཏུསངྒྷཊྚིཏོ’’ཏི. ཏེནེཝཱཧ ‘‘དྭེ ཛཎྞཱུནཱི’’ཏིཨཱདི. བྷཀྑསནྟི ཝཱ བྷཀྑིཏབྦཾ, ཨསིཏབྦཉྩ. ཏེནེཝཱཧ ‘‘ཡཾ ཀིཉྩི ཁཱདནཱིཡཾ བྷོཛནཱིཡ’’ནྟི. ཀཱམཾ ཁཱདནཉྩ ནཱམ མུཁེན ཀཱཏབྦཾ, ཧཏྠེན པན ཏཏྠ ཨུཔནཱམནཾ ནིཝཱརེཏུཾ ཨཝདྷཱརཎཾ ཀཏནྟི ཨཱཧ ‘‘ཧཏྠེན ཨཔརཱམསིཏྭཱ’’ཏི, ཨགྒཧེཏྭཱཏི ཨཏྠོ. སུནྡརརཱུཔོཏི ¶ སུནྡརབྷཱཝོ. ཝཏཱཏི པཏྠནཏྠེ ནིཔཱཏོ ‘‘ཨཧོ ཝཏཱཧཾ ལཱབྷཱི ཨསྶ’’ནྟིཨཱདཱིསུ ཝིཡ. ‘‘སམཎེན ནཱམ ཨེཝརཱུཔེན བྷཝིཏབྦཾ ཨཧོ ཝཏཱཧཾ ཨེདིསོ བྷཝེཡྻ’’ནྟི ཨེཝཾ ཏསྶ པཏྠནཱ ཨཧོསི. ཏེནཱཧ ‘‘ཨེཝཾ ཀིརཱ’’ཏིཨཱདི.

གརཧཏྠེ ¶ ཨཔི-ཀཱརོ ‘‘ཨཔི སིཉྩེ པལཎྜཀ’’ནྟིཨཱདཱིསུ ཝིཡ. ཨརཧནྟེ ཙ བུདྡྷེ, བུདྡྷསཱཝཀེ ‘‘ཨརཧནྟོ ཁཱིཎཱསཝཱ ན ཧོནྟཱི’’ཏི ཨེཝཾ ཏསྶ དིཊྛི ཨུཔྤནྣཱ. ཡཐཱཧ མཧཱསཱིཧནཱདསུཏྟེ ‘‘ནཏྠི སམཎསྶ གོཏམསྶ ཨུཏྟརིམནུསྶདྷམྨཱ ཨལམརིཡཉཱཎདསྶནཝིསེསཱ’’ཏི (མ. ནི. ༡.༡༤༦). སཏྟམཾ ¶ དིཝསནྟི བྷུམྨཏྠེ ཨུཔཡོགཝཙནཾ. ཨལསཀེནཱཏི ཨཛཱིརཎེན ཨཱམརོགེན.

ཨཊྛིཏཙམཏྟཏཱཡ པུརཱཎཔཎྞསདིསོ. བཱིརཎཏྠམྦཀནྟི བཱིརཎགཙྪཱ.

མཏྟཱ ཨེཏསྶ ཨཏྠཱིཏི མཏྟཾ, བྷོཛནམཏྟཝནྟནྟི ཨཏྠོ. ཏེནཱཧ ‘‘པམཱཎཡུཏྟ’’ནྟི. མནྟཱ མནྟཱཏི མནྟཱཡ མནྟཱཡ.

༨. ཨེཀདྭཱིཧིཀཱཡ གཎནཱཡ. ནིརཱཧཱརོཝ ཨཧོསི བྷགཝཏོ ཝཙནཾ ཨཉྙཐཱ ཀཱཏུཀཱམོ, ཏཐཱབྷཱུཏོཔི སཏྟམེ དིཝསེ ཨུཔཊྛཱཀེན ཨུཔནཱིཏཾ བྷཀྑསཾ དིསྭཱ ‘‘དྷཱི’’ཏི ཨུཔཊྛཱཔེཏུཾ ཨསཀྐོནྟོ བྷོཛནཏཎྷཱཡ ཨཱཀཌྜྷིཡམཱནཧདཡོ ཏཾ ཀུཙྪིཔཱུརཾ བྷུཉྫིཏྭཱ ¶ བྷགཝཏཱ ཝུཏྟནིཡཱམེནེཝ ཀཱལམཀཱསི. ཏེན ཝུཏྟཾ ‘‘ཨཐསྶཱ’’ཏིཨཱདི. སཙེཔི…པེ… ཙིནྟེཡྻཱཏི ཡདི ཨེསོ ཨཙེལོ ‘‘དྷཱི’’ཏི པཙྩུཔཊྛཔེཏྭཱ ‘‘ཨཛྫཔི ཨཧཾ ན བྷུཉྫེཡྻ’’ནྟི ཙིནྟེཡྻ, ཏཐཱཙིནྟནེ སཏིཔི དེཝཏཱཝིགྒཧེན ཏཾ དིཝསཾ…པེ… ཀརེཡྻ. ཀསྨཱ? ཨདྭེཛ྄ཛྷཝཙནཱ ཧི ཏཐཱགཏཱ, ན ཏེསཾ ཝཙནཾ ཝིཏཐཾ ཧོཏི.

གཏགཏཊྛཱནཾ ཨངྒཎམེཝ ཧོཏཱིཏི ཏེཧི ཏཾ ཀཌྜྷིཏྭཱ གཙྪནྟེཧི གཏགཏཔྤདེསོ ཨུཏྟརཀསཱམནྟཱ ཝིཝཊངྒཎམེཝ ཧུཏྭཱ ཨུཔཊྛཱཏི. ཏེཏི ཏིཏྠིཡཱ. སུསཱནཾཡེཝ གནྟྭཱཏི ‘‘བཱིརཎཏྠམྦཀཾ ཨཏིཀྐམིསྶཱམཱ’’ཏི གཙྪནྟཱཔི ཨནེཀཝཱརཾ ཏཾ ཨནུསཾཡཱཡིཏྭཱ པུནཔི ཏཾཡེཝ སུསཱནཾ ཨུཔགནྟྭཱ.

༩. ཨིདནྟི ཨིདཾ མཏསརཱིརཾ. ‘‘ཏམེཝ ཝཱ སརཱིརཾ ཀཐཱཔེསཱིཏི ཏཾ སརཱིརཾ ཨདྷིཊྛཧིཏྭཱ ཋིཏཔེཏེན ཀཐཱཔེསཱི’’ཏི ཀེཙི. ཀོརཁཏྟིཡཾ ཝཱ ཨསུརཡོནིཏོ ཨཱནེཏྭཱ ཀཐཱཔེཏུ ཨཉྙཾ ཝཱ པེཏཾ, ཀོ ཨེཏྠ ཝིསེསོ. ‘‘ཨཙིནྟེཡྻོ ཧི བུདྡྷཝིསཡོ’’ཏི པན ཝཙནཏོ ཏདེཝ སརཱིརཾ སུནཀྑཏྟེན པཧཏམཏྟཾ བུདྡྷཱནུབྷཱཝེན ཨུཊྛཱཡ ཏམཏྠཾ ཉཱཔེསཱིཏི དཊྛབྦཾ. པུརིམོཡེཝ པན ཨཏྠོ ཨཊྛཀཐཱསུ ཝིནིཙྪིཏོ. ཏཐཱ ཧི ཝཀྑཏི ‘‘ནིབྦཏྟཊྛཱནཏོ’’ཏིཨཱདི (དཱི. ནི. ཨཊྛ. ༣.༡༠).

༡༠. ཝིཔཱཀནྟི ¶ ཕལཾ, ཨཏྠནིབྦཏྟཱིཏི ཨཏྠོ.

སམཱནེཏབྦཱནཱིཏི ¶ སམྨཱ ཨཱནེཏབྦཱནི, སརཱུཔཏོ ཨཱནེཏྭཱ དསྶེཏབྦཱནཱིཏི ཨཏྠོ. པཱཊིཧཱརིཡཱནཾ པཋམཱདིཏཱ བྷགཝཏཱ ཝུཏྟཱནུཔུབྦིཡཱ ཝེདིཏབྦཱ. ཀེཙི པནེཏྠ ‘‘པརཙིཏྟཝིབྷཱཝནཾ, ཨཱཡུཔརིཙྪེདཝིབྷཱཝནཾ, བྱཱདྷིཝིབྷཱཝནཾ, གཏིཝིབྷཱཝནཾ, སརཱིརནིཀྑེཔཝིབྷཱཝནཾ, སུནཀྑཏྟེན སདྡྷིཾ ཀཐཱཝིབྷཱཝནཉྩཱཏི ཚ པཱཊིཧཱརིཡཱནཱི’’ཏི ཝདནྟི, ཏཾ ཡདི སུནཀྑཏྟསྶ ཙིཏྟཝིབྷཱཝནཾ སནྡྷཱཡ ཝུཏྟཾ, ཨེཝཾ སཏི ‘‘སཏྟཱ’’ཏི ཝཏྟབྦཾ ཏསྶ བྷཱཝིཨཝཎྞཝིབྷཱཝནཱཡ སདྡྷིཾ. ཨཐ ཨཙེལསྶ ¶ མརཎཙིཏྟཝིབྷཱཝནཾ, ཏཾ ‘‘སཏྟམཾ དིཝསཾ ཀཱལཾ ཀརིསྶཏཱི’’ཏི ཨིམིནཱ སངྒཧིཏནྟི ཝིསུཾ ན ཝཏྟབྦཾ, ཏསྨཱ ཨཊྛཀཐཱཡཾ ཝུཏྟནཡེནེཝ གཧེཏབྦཾ.

ཨཙེལཀལཱ༹རམཊྚཀཝཏྠུཝཎྞནཱ

༡༡. ནིཀྑནྟདནྟམཊྚཀོཏི ནིཀྑནྟདནྟོ མཊྚཀོ. སོ ཀིར ཨཙེལཀབྷཱཝཏོ པུབྦེ མཊྚཀིཏོ ཧུཏྭཱ ཝིཙརི ཝིཝརདནྟོ ཙ, ཏེན ནཾ ‘‘ཀོརམཊྚཀོ’’ཏི སཉྫཱནནྟི. ཡཾ ཀིཉྩི ཏསྶ དེནྟོ ‘‘སཱདྷུརཱུཔོ ཨཡཾ སམཎོ’’ཏི སམྦྷཱཝེནྟོ ཨགྒཾ སེཊྛཾཡེཝ དེནྟི. ཏེན ཝུཏྟཾ ‘‘ལཱབྷགྒཾ པཏྟོ, ཨགྒལཱབྷཾ པཏྟོ’’ཏི. བཧཱུ ཨཙེལཀཱ ཏཾ པརིཝཱརེཏྭཱ ཝིཙརནྟི, གཧཊྛཱ ཙ ཏཾ བཧཱུ ཨཌྜྷཱ ཝིབྷཝསམྤནྣཱ ཀཱལེན ཀཱལཾ ཨུཔསངྐམིཏྭཱ པཡིརུཔཱསནྟི. ཏེན ཝུཏྟཾ ‘‘ཡསགྒཾ ཨགྒཔརིཝཱརཾ པཏྟོ’’ཏི. ཝཏཱནིཡེཝ པཛྫིཏབྦཏོ པདཱནི. ཨཉྙམཉྙཾ ཨསངྐརཏོ ཝཏཀོཊྛཱསཱ ཝཱ. སམཏྟཱནཱིཏི སམཾ ཨཏྟནི གཧིཏཱནི. པུརཏྠིམེནཱཏི ཨེན-སདྡསམྦནྡྷེན ‘‘ཝེསཱལི’’ནྟི ཨུཔཡོགཝཙནཾ, ཨཝིདཱུརཏྠེ ཙ ཨེན-སདྡོ པཉྩམྱནྟོཏི ཨཱཧ ‘‘ཝེསཱལིཏོ ཨཝིདཱུརེ’’ཏི.

༡༢. སཱསནེ པརིཙཡཝསེན ཏིལཀྑཎཱཧཏཾ པཉྷཾ པུཙྪི. ན སམྤཱཡཱསཱིཏི ནཱཝབུཛ྄ཛྷི ན སམྤཱདེསི. ཏེནཱཧ ‘‘སམྨཱ ཉཱཎགཏིཡཱ’’ཏིཨཱདི. སམྤཱཡནཾ ཝཱ སམྤཱདནཾ. པཉྷཾ པུཊྛསྶ ཙ སམྤཱདནཾ ནཱམ སམྨདེཝ ཀཐནནྟི ཏདབྷཱཝཾ དསྶེནྟོ ‘‘ཨཐ ཝཱ’’ཏིཨཱདིམཱཧ. ཀོཔཝསེན ཏསྶ ཨཀྑཱིནི ཀམྤནབྷཱཝཾ ¶ ཨཱཔཛྫིཾསཱུཏི ཨཱཧ ‘‘ཀམྤནཀྑཱིནིཔི པརིཝཏྟེཏྭཱ’’ཏི. ཀོཔནྟི ཀོདྷཾ, སོ པན ཙིཏྟསྶ པཀུཔྤནཝསེན པཝཏྟཏཱིཏི ཨཱཧ ‘‘ཀུཔྤནཱཀཱར’’ནྟི ¶ . དོསནྟི ཨཱགྷཱཏཾ, སོ པན ཨཱརམྨཎེ དུསྶནཝསེན པཝཏྟཱིཏི ཨཱཧ ‘‘དུསྶནཱཀཱར’’ནྟི. ཨཏུཊྛཱཀཱརནྟི ཏུཊྛིཡཱ པཱིཏིཡཱ པཊིཔཀྑབྷཱུཏཔྤཝཏྟིཨཱཀཱརཾ. ཀཱཡཝཙཱིཝིཀཱརེཧི པཱཀཊམཀཱསི. མཱ ཝཏ ནོཏི ཨེཏྠ མཱཏི པཊིཀྑེཔོ, ནོཏི མཡ྄ཧནྟི ཨཏྠོཏི ཨཱཧ ‘‘ཨཧོ ཝཏ མེ ན བྷཝེཡྻཱ’’ཏི. མཾ ཝཏ ནོཏི ཨེཏྠ པན ནོཏི སཾསཡེཏི ཨཱཧ ‘‘ཨཧོསི ཝཏ ནུ མམཱ’’ཏི.

༡༤. པརིཔུབྦོ ¶ དཧིཏ-སདྡོ ཝཏྠནིཝཱསནཾ ཝདཏཱིཏི ཨཱཧ ‘‘པརིདཧིཏོ ནིཝཏྠཝཏྠོ’’ཏི. ཡསནིམིཏྟཀཏཱཡ ལཱབྷསྶ ཡསཔརིཧཱནིཡཱཝ ལཱབྷཔརིཧཱནི ཝུཏྟཱ ཧོཏཱིཏི པཱལི༹ཡཾ ‘‘ཡསཱ ནིཧཱིནོ’’ཏི ཝུཏྟཾ.

ཨཙེལཔཱཐིཀཔུཏྟཝཏྠུཝཎྞནཱ

༡༥. ‘‘ཨཧཾ སབྦཾ ཛཱནཱམཱི’’ཏི ཨེཝཾ སབྦཉྙུཏཉྙཱཎཾ ཝདཏི པཊིཛཱནཱཏཱིཏི ཉཱཎཝཱདོ, ཏེན མཡཱ ཉཱཎཝཱདེན སདྡྷིཾ. ཨཏིཀྐམྨ གཙྪཏོཏི ཨུཔཌྜྷབྷཱགེན པརིཙྪིནྣཾ པདེསཾ ཨཏིཀྐམིཏྭཱ ཨིདྡྷིཔཱཊིཧཱརིཡཾ ཀཱཏུཾ གཙྪཏོ. ཀིཾ པནཱཡཾ ཨཙེལོ པཱཐིཀཔུཏྟོ ཨཏྟནོ པམཱཎཾ ན ཛཱནཱཏཱིཏི? ནོ ན ཛཱནཱཏི. ཡདི ཨེཝཾ, ཀསྨཱ སུཀྑགཛྫིཏཾ གཛྫཱིཏི? ‘‘ཨེཝཱཧཾ ལོཀེ པཱསཾསོ བྷཝིསྶཱམཱི’’ཏི ཀོཧཉྙེ ཀཏྭཱ སུཀྑགཛྫིཏཾ གཛྫི. ཏེན ཝུཏྟཾ ‘‘ནགརཝཱསིནོ’’ཏིཨཱདི. པཊྛཔེཏྭཱཏི ཡུགགྒཱཧཾ ཨཱརབྷིཏྭཱ.

༡༦. ཧཱིནཛ྄ཛྷཱསཡཏྟཱ…པེ… ཨུདཔཱདི. ཝུཏྟཉྷེཏཾ ‘‘ཧཱིནཱདྷིམུཏྟིཀཱ སཏྟཱ ཧཱིནཱདྷིམུཏྟིཀེ ཨེཝ སཏྟེ སེཝནྟི བྷཛནྟི པཡིརུཔཱསནྟཱི’’ཏི (སཾ. ནི. ༢.༩༨).

ཡསྨཱ ¶ ཏཐཱཝུཏྟཱ ཝཱཙཱ ཏཐཱརཱུཔཙིཏྟཧེཏུཀཱ, ཏཉྩ ཙིཏྟཾ ཏཐཱརཱུཔདིཊྛིཙིཏྟཧེཏུཀཾ, ཏསྨཱ ‘‘ཏཾ ཝཱཙཾ ཨཔྤཧཱཡཱ’’ཏི ཝཏྭཱ ཡཐཱ ཏསྶཱ ཨཔྤཧཱནཾ ཧོཏི, ཏཾ དསྶེནྟོ ‘‘ཏཾ ཙིཏྟཾ ཨཔྤཧཱཡཱ’’ཏི ཨཱཧ, ཏསྶ ཙ ཡཐཱ ཨཔྤཧཱནཾ ཧོཏི, ཏཾ དསྶེཏུཾ ‘‘ཏཾ དིཊྛིཾ ཨཔྤཊིནིསྶཛྫིཏྭཱ’’ཏི ཨཝོཙ. ཡསྨཱ ཝཱ ཏཐཱརཱུཔཱ ཝཱཙཱ མཧཱསཱཝཛྫཱ, ཙིཏྟཾ ཏཏོ མཧཱསཱཝཛྫཏརཾ ཏཾསམུཊྛཱཔཀབྷཱཝཏོ, དིཊྛི པན ཏཏོ མཧཱསཱཝཛྫཏམཱ ཏདུབྷཡསྶ མཱུལབྷཱཝཏོ, ཏསྨཱ ཏེསཾ མཧཱསཱཝཛྫཏཱཡ ཨིམཾ ཝིབྷཱགཾ དསྶེཏྭཱ ཨཡཾ ཨནུཀྐམོ ཋཔིཏོཏི ཝེདིཏབྦོ. ཏེསཾ པན ¶ ཡཐཱ པཧཱནཾ ཧོཏི, ཏཾ དསྶེཏུཾ ‘‘ཨཧ’’ནྟིཨཱདི ཝུཏྟཾ. ‘‘ནཱཧཾ བུདྡྷོ’’ཏི ཝདནྟོཏི སཱཋེཡྻེན ཝིནཱ ཨུཛུཀམེཝ ‘‘ཨཧཾ བུདྡྷོ ན ཧོམཱི’’ཏི ཝདནྟོ. ཙིཏྟདིཊྛིཔྤཧཱནེཔི ཨེསེཝ ནཡོ. ཝིཔཏེཡྻཱཏི ཨེཏྠ ཝི-སདྡོ པཋམེ ཝིཀཔྤེ ཨུཔསགྒམཏྟཾ, དུཏིཡེ པན ཝིསརཎཏྠོཏི ཨཱཧ ‘‘སཏྟདྷཱ ཝཱ པན ཕལེཡྻཱ’’ཏི.

༡༧. ཨེཀཾསེནཱཏི ཨེཀནྟེན, ཨེཀནྟིཀཾ པན ཝཙནཔརིཡཱཡཝིནིམུཏྟཾ ཧོཏཱིཏི ཨཱཧ ‘‘ནིཔྤརིཡཱཡེནཱ’’ཏི. ཨོདྷཱརིཏཱཏི ཨཝདྷཱརིཏཱ ནིཡམེཏྭཱ བྷཱསིཏཱ. ཝིགཏརཱུཔེནཱཏི ཨཔགཏསབྷཱཝེན ¶ . ཏེནཱཧ ‘‘ཝིགཙྪིཏསབྷཱཝེནཱ’’ཏི, ཨིདྡྷཱནུབྷཱཝེན ཨཔནཱིཏསཀབྷཱཝེན. ཏེན ཝུཏྟཾ ‘‘ཨཏྟནོ’’ཏིཨཱདི.

༡༨. དྭཡཾ གཙྪཏཱིཏི དྭཡགཱམིནཱི. ཀཱིདིསཾ དྭཡནྟི ཨཱཧ ‘‘སརཱུཔེནཱ’’ཏིཨཱདི. ཨཡཉྷི སོ གཎྜསྶུཔརིཕོཊྛབྦཱདོསཾ.

༡༩. ཨཛིཏསྶ ལིཙྪཝིསེནཱཔཏིསྶ མཧཱནིརཡེ ནིབྦཏྟིཏྭཱ ཏཏོ ཨཱགནྟྭཱ ཨཙེལསྶ པཱཐིཀཔུཏྟསྶ སནྟིཀེ པརོདནཾ. ཨབྷཱཝཱཏི ¶ པུབྦེ ཝུཏྟཔྤཀཱརསྶ པཱཊིཧཱརིཡཀརཎསྶ ཨབྷཱཝཱ. བྷགཝཱ པན སནྣིཔཏིཏཔརིསཱཡཾ པསཱདཛནནཏྠཾ ཏདནུརཱུཔཾ པཱཊིཧཱརིཡམཀཱསིཡེཝ. ཡཐཱཧ ‘‘ཏེཛོདྷཱཏུཾ སམཱཔཛྫིཏྭཱ’’ཏིཨཱདི.

ཨིདྡྷིཔཱཊིཧཱརིཡཀཐཱཝཎྞནཱ

༢༠. ནིཙཡནཾ དྷནདྷཉྙཱནཾ སཉྩཡནཾ ནིཙཡོ, ཏཏྠ ནིཡུཏྟཱཏི ནེཙཡིཀཱ, གཧཔཏི ཨེཝ ནེཙཡིཀཱ གཧཔཏིནེཙཡིཀཱ. ཨེཏྟཀཱནི ཛངྒྷསཧསྶཱནཱིཏི པརིམཱཎཱབྷཱཝཏོ སཧསྶེཧིཔི ཨཔརིམཱཎགཎནཱ. ཏེནེཝཱཏི ཨིམསྶ ཝསེན སནྣིཔཏིཏཱཡ ཨེཝཾ མཧཏིཡཱ པརིསཱཡ བནྡྷནམོཀྑཾ ཀཱཏུཾ ལབྦྷཏི, ཨེཏེནེཝ ཀཱརཎེན.

༢༡. ཙིཏྟུཏྲཱསབྷཡནྟི ཙིཏྟསྶ ཨུཏྲཱསནཱཀཱརེན པཝཏྟབྷཡཾ, ན ཉཱཎབྷཡཾ, ནཱཔི ‘‘བྷཱཡཏི ཨེཏསྨཱ’’ཏི ཨེཝཾ ཝུཏྟཾ ཨཱརམྨཎབྷཡཾ. ཚམྦྷིཏཏྟནྟི ཏེནེཝ ཙིཏྟུཏྲཱསབྷཡེན སཀལསརཱིརསྶ ཚམྦྷིཏབྷཱཝོ. ལོམཧཾསོཏི ཏེནེཝ བྷཡེན, ཏེན ཙ ཚམྦྷིཏཏྟེན སཀལསརཱིརེ ལོམཱནཾ ¶ ཧཊྛབྷཱཝོ, སོ པན ཏེསཾ བྷིཏྟིཡཾ ནཱགདནྟཱནཾ ཝིཡ ཨུདྡྷཾམུཁཏཱཏི ཨཱཧ ‘‘ལོམཱནཾ ཨུདྡྷགྒབྷཱཝོ’’ཏི. ཨནྟནྟེན ཨཱཝིཛ྄ཛྷིཏྭཱཏི ཨཏྟནོ ནིསཱིདནཏྠཾ ནིགཱུལ༹ྷཊྛཱནཾ ཨུཔཔརིཀྑནྟོ པརིབྦཱཛཀཱརཱམཾ པརིཡནྟེན ཨནུསཾཡཱཡིཏྭཱ, ཀསྶཙིདེཝ སུནཀྑཏྟསྶ ཝཱ སུནཀྑཏྟསདིསསྶ ཝཱ སབྦཉྙུཔཊིཉྙཾ ཨཔྤཧཱཡ སཏྠུ སམྨུཁཱིབྷཱཝེ སཏྟདྷཱ ཏསྶ མུདྡྷཱཕལནཾ དྷམྨཏཱ. ཏེན ཝུཏྟཾ ‘‘མཱ ནསྶཏུ བཱལོ’’ཏིཨཱདི.

༢༢. སཾསཔྤཏཱིཏི ཏཏྠེཝ པཱསཱཎཕལཀེ བཱལདཱརཀོ ཝིཡ ཨུཊྛཱཏུཾ ཨསཀྐོནྟོ ཨཝསཱིདནཝསེན ཨིཏོ ¶ ཙིཏོ ཙ སཾསཔྤཏི. ཏེནཱཧ ‘‘ཨོསཱིདཏཱི’’ཏི. ཏཏྠེཝ སཉྩརཏཱིཏི ཏསྨིཾཡེཝ པཱསཱཎེ ཨཱནིསདུཔཊྛིནོ སཉྩལནཾ ནིསཛྫཝསེནེཝ སཉྩརཏི, ན ཨུཊྛཱཡ པདསཱ.

༢༣. ཝིནཊྛརཱུཔོཏི ¶ སམྦྷཱཝནཱཡ ཝིནཱསེན, ལཱབྷསྶ ཝིནཱསེན ཙ ཝིནཊྛསབྷཱཝོ.

པཋམབྷཱཎཝཱརཝཎྞནཱ ནིཊྛིཏཱ.

༢༥. གོཡུཏྟེཧཱིཏི བལཝནྟབལཱིབདྡཡོཛིཏེཧི.

༢༦. ཏསྶཱཏི ཛཱལིཡསྶ. ཨཡཉྷི མཎྜིསེན པརིབྦཱཛཀེན སདྡྷིཾ བྷགཝནྟཾ ཨུཔསངྐམིཏྭཱ དྷམྨཾ སུཎི, ཏཏོ པུརེཏརཾ བྷགཝཏོ གུཎཱནཾ ཨཛཱནནཀཱལེ ཨཡཾ པཝཏྟི. ཏེནེཝཱཧ ‘‘ཏིཊྛཏུ ཏཱཝ པཱཊིཧཱརིཡཾ…པེ… པརཱཛཡོ བྷཝིསྶཏཱི’’ཏི.

༢༧. ཏིཎསཱིཧོཏི ཏིཎསདིསཧརིཏཝཎྞོ སཱིཧོ. ཀཱལ༹སཱིཧོཏི ཀཱལ༹ཝཎྞོ སཱིཧོ. པཎྜུསཱིཧོཏི པཎྜུཝཎྞོ སཱིཧོ. ཀེསརསཱིཧོཏི ཀེསརཝནྟོ སེཏཝཎྞོ, ལོཧིཏཝཎྞོ ཝཱ སཱིཧོ. མིགརཉྙོཏི ཨེཏྠ མིག-སདྡོ ཀིཉྩཱཔི པསདཀུརུངྒཱདཱིསུ ཀེསུཙིདེཝ ཙཏུཔྤདེསུ ནིརུལ༹ྷོ, ཨིདྷ པན སབྦསཱདྷཱརཎཝསེནཱཏི དསྶེནྟོ ‘‘མིགརཉྙོཏི སབྦཙཏུཔྤདཱནཾ རཉྙོ’’ཏི ཝུཏྟཾ. ཨཱགནྟྭཱ སེཏི ཨེཏྠཱཏི ཨཱསཡོ, ནིཝཱསནཊྛཱནཾ. སཱིཧནཱདནྟི པརིསྶཡཱནཾ སཧནཏོ, པཊིཔཀྑསྶ ཙ ཧནནཏོ ‘‘སཱིཧོ’’ཏི ལདྡྷནཱམསྶ མིགཱདྷིཔསྶ གྷོསཾ, སོ པན ཏེན ཡསྨཱ ཀུཏོཙིཔི ཨབྷཱིཏབྷཱཝེན པཝཏྟཱིཡཏི, ཏསྨཱ ཝུཏྟཾ ‘‘ཨབྷཱིཏནཱད’’ནྟི. ཏཏྠ ཏཏྠ ཏཱསུ ཏཱསུ དིསཱསུ གནྟྭཱ ཙརིཏབྦཏཱཡ ¶ བྷཀྑིཏབྦཏཱཡ གོཙརོ གྷཱསོཏི ཨཱཧ ‘‘གོཙརཱཡཱཏི ཨཱཧཱརཏྠཱཡཱ’’ཏི. ཝརཾ ¶ ཝརནྟི མིགསངྒྷེ མིགསམཱུཧེ མུདུམཾསཏཱཡ ཝརཾ ཝརཾ མཧིཾསཝནཝརཱཧཱདིཾ ཝདྷིཏྭཱཏི ཡོཛནཱ. ཏེནཱཧ ‘‘ཐཱུལཾ ཐཱུལ’’ནྟི. ཝརཝརབྷཱཝེན ཧི ཏསྶ ཝརབྷཱཝོ ཨིཙྪིཏོ. སཱུརབྷཱཝཾ སནྣིསྶིཏཾ སཱུརབྷཱཝསནྣིསྶིཏཾ, ཏེན. སཱུརབྷཱཝེནཱཔི ཧི ‘‘ཀིཾ ཨིམེ པཱཎཀེ དུབྦལེ ཧནྟྭཱ’’ཏི ཨཔྤཐཱམེསུ པཱཎེསུ ཀཱརུཉྙཾ ཨུཔཏིཊྛཏི.

༢༨. ཝིགྷཱསོཏི པརསྶ བྷཀྑིཏསེསཏཱཡ ཝིརཱུཔོ གྷཱསོ ཝིགྷཱསོ, ཨུཙྪིཊྛཾ. ཏེནཱཧ ‘‘བྷཀྑིཏཱཏིརིཏྟམཾས’’ནྟི, ཏསྨིཾ ཝིགྷཱསེ, ཝིགྷཱསནིམིཏྟནྟི ཨཏྠོ. ཨསྨིམཱནདོསེནཱཏི ཨསྨིམཱནདོསཧེཏུ, ཨཧཾཀཱརནིམིཏྟནྟི ཨཏྠོ. སོ པནསྶ ཨསྨིམཱནོ ཡཐཱ ཨུཔྤཛྫི, ཏཾ དསྶེཏུཾ ‘‘ཏཏྲཱཡ’’ནྟིཨཱདི ཝུཏྟཾ.

‘‘སེགཱལཀཾཡེཝཱ’’ཏིཔི པཱཋོ, ཡཐཱཝུཏྟོཝ ཨཏྠོ. བྷེརཎྜཀཾཡེཝཱཏི བྷེརཎྜསཀུཎརཝསདིསཾཡེཝ, བྷེརཎྜོ ནཱམ ཨེཀོ པཀྑཱི དྭིམུཁོ, ཏསྶ ཀིར སདྡོ ཨཏིཝིཡ ཝིརཱུཔོ ¶ ཨམནཱཔོ. ཏེནཱཧ ‘‘ཨཔྤིཡཨམནཱཔསདྡམེཝཱ’’ཏི. སམྨཱཔཊིཔཏྟིཡཱ ཝིསེསཏོ སུཊྛུ གཏཱཏི སུགཏཱ, སམྨཱསམྦུདྡྷཱ. ཏེ ཨཔདཱཡནྟི སོདྷེནྟི སཏྟསནྟཱནཾ ཨེཏེཧཱིཏི སུགཏཱཔདཱནཱནི, ཏིསྶོ སིཀྑཱ. ཡསྨཱ ཏཱཧི ཏེ ‘‘སུགཏཱ’’ཏི ལཀྑཱིཡནྟི, ཏཱ ཙ ཏེསཾ ཨོཝཱདབྷཱུཏཱ, ཏསྨཱ ‘‘སུགཏལཀྑཎེསཱུ’’ཏིཨཱདི ཝུཏྟཾ. ཡདི ཏཱ སུགཏསྶ ལཀྑཎབྷཱུཏཱ, སཱསནབྷཱུཏཱ ཙ, ཀཐཾ པནེས པཱཐིཀཔུཏྟོ ཏཏྠ ཏཱསུ སིཀྑཱསུ ཛཱིཝཏི, ཀོ ཏསྶ ཏཱཧི སམྦནྡྷོཏི ཨཱཧ ‘‘ཨེཏསྶ ཧཱི’’ཏིཨཱདི. སམྦུདྡྷཱནཾ དེམཱཏི དེནྟཱིཏི བུདྡྷསཉྙཱཡ དེནྟཱིཏི ཨདྷིཔྤཱཡོ. ཏེན ཨེས…པེ… ཛཱིཝཏི ནཱམ ན སུགཏནྭཡཨཛ྄ཛྷུཔགམནཏོ. ‘‘ཏཐཱགཏེ’’ཏིཨཱདི ¶ ཨེཀཏྟེ པུཐུཝཙནནྟི ཨཱཧ ‘‘ཏཐཱགཏ’’ནྟིཨཱདི. བཧུཝཙནཾ ཨེཝ གརུསྨིཾ ཨེཀསྨིམྤི བཧུཝཙནཔྤཡོགཏོ ཨེཀཝཙནཾ ཝིཡ ཝུཏྟཾ ཝཙནཝིཔལླཱསེན.

༢༩. སམེཀྑིཏྭཱཏི སམཾ ཀཏྭཱ མིཙྪཱདསྶནེན ཨཔེཀྑིཏྭཱ, ཏཾ པན ཨཔེཀྑནཾ ཏཐཱ མཉྙནམེཝཱཏི ཨཱཧ ‘‘མཉྙིཏྭཱ’’ཏི. པུབྦེ ཝུཏྟཾ སམེཀྑནམྤི མཉྙནཾ ཨེཝཱཏི ཝུཏྟཾ ‘‘ཨམཉྙཱིཏི པུན ཨམཉྙིཏྠཱ’’ཏི, ཏེན ཨཔརཱཔརཾ ཏསྶ མཉྙནཔྤཝཏྟིཾ དསྶེཏི. བྷེརཎྜཀརཝཾ ཀོསཏི ཝིཀྐོསཏཱིཏི ཀོཏྠུ.

༣༠. ཏེ ¶ ཏེ པཱཎེ བྱཱཔཱདེནྟོ གྷསཏཱིཏི བྱགྒྷོཏི ཨིམིནཱ ནིབྦཙནེན ‘‘བྱགྒྷོ’’ཏི མིགརཱཛསྶཔི སིཡཱ ནཱམནྟི ཨཱཧ ‘‘བྱགྒྷོཏི མཉྙཏཱིཏི སཱིཧོཧམསྨཱིཏི མཉྙཏཱི’’ཏི. ཡདིཔི ཡཐཱཝུཏྟནིབྦཙནཝསེན སཱིཧོཔི ‘‘བྱགྒྷོ’’ཏི ཝཏྟབྦཏཾ ཨརཧཏི, བྱགྒྷ-སདྡོ པན མིགརཱཛེ ཨེཝ ནིརུལ༹ྷོཏི དསྶེནྟོ ‘‘སཱིཧེན ཝཱ’’ཏིཨཱདིམཱཧ.

༣༡. སཱིཧེན ཝིཙརིཏཝནེ སཾཝཌྜྷཏྟཱ ཝུཏྟཾ ‘‘མཧཱཝནེ སུཉྙཝནེ ཝིཝཌྜྷོ’’ཏི.

༣༤. ཀིལེསབནྡྷནཱཏི ¶ ཏཎྷཱབནྡྷནཏོ. ཏཎྷཱབནྡྷནཉྷི ཐིརཾ དལ༹ྷབནྡྷནཾ དུམྨོཙནཱིཡཾ. ཡཐཱཧ –

‘‘སཱརཏྟརཏྟཱ མཎིཀུཎྜལེསུ,

པུཏྟེསུ དཱརེསུ ཙ ཡཱ ཨཔེཀྑཱ;

ཨེཏཾ དལ༹ྷཾ བནྡྷནམཱཧུ དྷཱིརཱ,

ཨོཧཱརིནཾ སིཐིལཾ དུཔྤམུཉྩ’’ནྟི. (དྷ. པ. ༣༤༦; ཛཱ. ༡.༢.༡༠༢);

ཀིལེསབནྡྷནཱཏི ཝཱ དསཝིདྷསཾཡོཛནཏོ. མཧཱཝིདུགྒཾ ནཱམ ཙཏྟཱརོ ཨོགྷཱ མཧནྟཾ ཛལཝིདུགྒཾ ¶ ཝིཡ ཨནུཔཙིཏཀུསལསམྦྷཱརེཧི དུགྒམཊྛེན.

ཨགྒཉྙཔཉྙཏྟིཀཐཱཝཎྞནཱ

༣༦. ཨིམསྶ པདསྶ. ཨིདཾ ནཱམ ལོཀསྶ ཨགྒནྟི ཛཱནིཏབྦཾ, ཏཾ ཨགྒཉྙཾ, སོ པན ལོཀསྶ ཨུཔྤཏྟིཀྐམོ པཝཏྟི པཝེཎཱི ཙཱཏི ཨཱཧ ‘‘ལོཀུཔྤཏྟིཙརིཡཝཾས’’ནྟི. སམྨཱསམྦོདྷིཏོ ཨུཏྟརིཏརཾ ནཱམ ཀིཉྩི ནཏྠི པཛཱནིཏབྦེསུ, ཏཾ པན ཀོཊིཾ ཀཏྭཱ དསྶེནྟོ ‘‘ཡཱཝ སབྦཉྙུཏཉྙཱཎཱ པཛཱནཱམཱི’’ཏི ཨཱཧ. ‘‘མམ པཛཱནནཱ’’ཏི ཨསྶཱདེནྟོ ཏཎྷཱཝསེན, ‘‘ཨཧཾ པཛཱནཱམཱི’’ཏི ཨབྷིནིཝིསནྟོ དིཊྛིཝསེན, ‘‘སུཊྛུ པཛཱནཱམི སམྨཱ པཛཱནཱམཱི’’ཏི པགྒཎྷནྟོ མཱནཝསེན ན པརཱམསཱམཱིཏི ཡོཛནཱ. ‘‘པཙྩཏྟཉྙེཝཱ’’ཏི པདཾ ‘‘ནིབྦུཏི ཝིདིཏཱ’’ཏི པདདྭཡེནཱཔི ཡོཛེཏབྦཾ ‘‘པཙྩཏྟཾཡེཝ ཨུཔྤཱདིཏཱ ནིབྦུཏི ཙ པཙྩཏྟཾཡེཝ ཝིདིཏཱ’’ཏི, སཡམྦྷུཉཱཎེན ནིབྦཏྟིཏཱ ནིབྦུཏི སཡམེཝ ཝིདིཏཱཏི ཨཏྠོ. ཨཊྛཀཐཱཡཾ པན ‘‘པཙྩཏྟ’’ནྟི པདཾ ཝིཝིདྷཝིབྷཏྟིཀཾ ཧུཏྭཱ ཨཱཝུཏྟིནཡེན ¶ ཨཱཝཏྟཏཱིཏི དསྶེཏུཾ ‘‘ཨཏྟནཱཡེཝ ཨཏྟནཱི’’ཏི ཝུཏྟཾ. ཨཝིདིཏནིབྦཱནཱཏི ཨཔྤཊིལདྡྷནིབྦཱནཱ མིཙྪཱཔཊིཔནྣཏྟཱ. པཛཱནནམྤི ཧི ཏདདྷིགམཝསེནེཝ ཝེདིཏབྦཾ. ཨེཏི ཨིཊྛབྷཱཝེན པཝཏྟཏཱིཏི ཨཡོ, སུཁཾ. ཏཔྤཊིཀྑེཔེན ཨནཡོ, དུཀྑཾ. ཏདེཝ ཧིཏསུཁསྶ བྱསནཏོ བྱསནཾ.

༣༧. ཏཾ དསྶེནྟོཏི བྷགཝཱཔི ‘‘ཨཉྙཏིཏྠིཡོ ཏཏྠ སཱརསཉྙཱི’’ཏི ཏཾ དསྶེནྟོ. ཨཱདྷིཔཙྩབྷཱཝེནཱཏི ཨཱདྷིཔཙྩསབྷཱཝེན. ཡསྶ ཨཱཙརིཡཝཱདསྶ ཝསེན པུརིསོ ‘‘ཨཱཙརིཡོ’’ཏི ཝུཙྩཏི, སོ ཨཱཙརིཡཝཱདོ ཨཱཙརིཡབྷཱཝོཏི ཨཱཧ ‘‘ཨཱཙརིཡབྷཱཝཾ ཨཱཙརིཡཝཱད’’ནྟི. ཨེཏྠཱཏི ཨཱཙརིཡཝཱདེ. ཨིཏི ཀཏྭཱཏི ཨིམིནཱ ཀཱརཎེན. སོཏི ཨཱཙརིཡཝཱདོ. ‘‘ཨགྒཉྙཾ’’ ཏྭེཝ ཝུཏྟོ ཨགྒཉྙཝིསཡཏྟཱ. ཀེན ཝིཧིཏནྟི ཀེན པཀཱརེན ཝིཧིཏཾ. ཏེནཱཧ ‘‘ཀེན ཝིཧིཏཾ ཀིནྟི ཝིཧིཏ’’ནྟི. བྲཧྨཛཱལེཏི བྲཧྨཛཱལསཾཝཎྞནཱཡཾ ¶ (དཱི. ནི. ཨཊྛ. ༡.༢༨). ཏཏྠ ཧི ཝིཏྠཱརཏོ ཝུཏྟཝིདྷིཾ ཨིདྷ ཨཏིདིསཏི, པཱལི༹ པན ཏཏྠ ཙེཝ ཨིདྷ ཙ ཨེཀསདིསཱ ཝཱཏི.

༤༡. ཁིཌྜཱ པདོསིཀཱ མཱུལབྷཱུཏཱ ཨེཏྠ སནྟཱིཏི ཁིཌྜཱཔདོསིཀཾ, ཨཱཙརིཡཀཾ. ཏེནེཝཱཧ ‘‘ཁིཌྜཱཔདོསིཀམཱུལཀ’’ནྟི. མནོཔདོསིཀནྟི ཨེཏྠཱཔི ཨེསེཝ ནཡོ.

༤༧. ཡེན ¶ ཝཙནེན ཨབྦྷཱཙིཀྑནྟི, ཏསྶ ཨཝིཛྫམཱནཏཱ ནཱམ ཨཏྠཝསེནེཝཱཏི ཨཱཧ ‘‘ཨསཾཝིཛྫམཱནཊྛེནཱ’’ཏི. ཏུཙྪཱ, མུསཱཏི ཙ ཀརཎཏྠེ པཙྩཏྟཝཙནནྟི ཨཱཧ ‘‘ཏུཙྪེན, མུསཱཝཱདེནཱ’’ཏི. ཝཙནསྶ ཨནྟོསཱརཾ ནཱམ ཨཝིཔརཱིཏོ ཨཏྠོཏི ཏདབྷཱཝེནཱཧ ‘‘ཨནྟོསཱརཝིརཧིཏེནཱ’’ཏི. ཨབྷིཨཱཙིཀྑནྟཱིཏི ཨབྷིབྷཝིཏྭཱ གྷཊྚེནྟཱ ཀཐེནྟི, ཨཀྐོསནྟཱིཏི ཨཏྠོ. ཝིཔརཱིཏསཉྙོཏི ཨཡཱཐཱཝསཉྙོ. སུབྷཾ ཝིམོཀྑནྟི ‘‘སུབྷ’’ནྟི ཝུཏྟཝིམོཀྑཾ. ཝཎྞཀསིཎནྟི སུནཱིལཀསུཔཱིཏཀཱདིཝཎྞཀསིཎཾ. སབྦནྟི ཡཾ སུབྷཾ, ཨསུབྷཉྩ ཝཎྞཀསིཎཾ, ཏཉྩ སབྦཾ. ན ཨསུབྷནྟི ཨསུབྷམྤི ‘‘ཨསུབྷ’’ནྟི ཏསྨིཾ སམཡེ ན སཉྫཱནཱཏི, ཨཐ ཁོ ‘‘སུབྷཾ’’ ཏྭེཝ སཉྫཱནཱཏཱིཏི ཨཏྠོ. ཝིཔརཱིཏཱ ཨཡཱཐཱཝགཱཧིཏཱཡ, ཨཡཱཐཱཝཝཱདིཏཱཡ ཙ.

༤༨. ཡསྨཱ ¶ སོ པརིབྦཱཛཀོ ཨཝིསྶཊྛམིཙྪཱགཱཧིཏཱཡ སམྨཱ ཨཔྤཊིཔཛྫིཏུཀཱམོ སམྨཱཔཊིཔནྣཾ ཝིཡ མཾ སམཎོ གོཏམོ, བྷིཀྑཝོ ཙ སཉྫཱནནྟཱུཏི ཨདྷིཔྤཱཡེན ‘‘ཏཐཱ དྷམྨཾ དེསེཏུ’’ནྟིཨཱདིམཱཧ, ཏསྨཱ ཝུཏྟཾ ‘‘མཡཱ ཨེཏསྶ…པེ… ཝཊྚཏཱི’’ཏི. མམྨནྟི མམྨཔྤདེསཾ པཱིལཱ༹ཛནནཊྛཱནཾ. སུཊྛཱུཏི སཀྐཙྩཾ. ཡཐཱ ན ཝིནསྶཏི, ཨེཝཾ ཨནུརཀྑ.

ཝཱསནཱཡཱཏི ཀིལེསཀྑཡཱཝཧཱཡ པཊིཔཏྟིཡཱ ཝཱསནཱཡ. སེསཾ སུཝིཉྙེཡྻམེཝཱཏི.

པཱཐིཀསུཏྟཝཎྞནཱཡ ལཱིནཏྠཔྤཀཱསནཱ.

༢. ཨུདུམྦརིཀསུཏྟཝཎྞནཱ

ནིགྲོདྷཔརིབྦཱཛཀཝཏྠུཝཎྞནཱ

༤༩. ཨུདུམྦརིཀཱཡཱཏི ¶ ¶ ¶ སམྦནྡྷེ སཱམིཝཙནནྟི ཨཱཧ ‘‘ཨུདུམྦརིཀཱཡ དེཝིཡཱ སནྟཀེ པརིབྦཱཛཀཱརཱམེ’’ཏི. ‘‘ཨུདུམྦརིཀཱཡ’’ནྟི ཝཱ པཱཋོ, ཏཐཱ སཏི ཨདྷིཀརཎེ ཨེཏཾ བྷུམྨཾ. ཨཡཉྷེཏྠ ཨཏྠོ ཨུདུམྦརིཀཱཡ རཉྙོ དེཝིཡཱ ནིབྦཏྟིཏོ ཨཱརཱམོ ཨུདུམྦརིཀཱ, ཏསྶཾ ཨུདུམྦརིཀཱཡཾ. ཏེནཱཧ ‘‘ཨུདུམྦརིཀཱཡ དེཝིཡཱ སནྟཀེ’’ཏི. ཏཱཡ ཧི ནིབྦཏྟིཏོ ཏསྶཱ སནྟཀོ. ཝརཎཱདིཔཱཋཝསེན ཙེཏྠ ནིབྦཏྟཏྠབོདྷཀསྶ སདྡསྶ ཨདསྶནཾ. སནྡྷཱནོཏི བྷིནྣཱནམྤི ཏེསཾ སནྡྷཱཔནེན ‘‘སནྡྷཱནོ’’ཏི ཨེཝཾ ལདྡྷནཱམོ. སཾཝཎྞིཏོཏི པསཾསིཏོ. ཨིརིཡཏཱིཏི པཝཏྟཏི. ཨརིཡེན ཉཱཎེནཱཏི ཀིལེསེཧི ཨཱརཀཏྟཱ ཨརིཡེན ལོཀུཏྟརེན ཉཱཎེན. ཨརིཡཱཡ ཝིམུཏྟིཡཱཏི སུཝིསུདྡྷཱཡ ལོཀུཏྟརཕལཝིམུཏྟིཡཱ.

དིཝཱ-སདྡོ དིན-སདྡོ ཝིཡ དིཝསཔརིཡཱཡོ, ཏསྶ ཝིསེསནབྷཱཝེན ཝུཙྩམཱནོ དིཝཱ-སདྡོ སཝིསེསཾ དིཝསབྷཱགཾ དཱིཔེཏཱིཏི ཨཱཧ ‘‘དིཝསསྶ དིཝཱ’’ཏིཨཱདི. ཡསྨཱ སམཱཔནྣསྶ ཙིཏྟཾ ནཱནཱརམྨཎཏོ པཊིསཾཧཏཾ ཧོཏི, ཛྷཱནསམངྒཱི ཙ པཝིཝེཀཱུཔགམནེན སངྒཎིཀཱབྷཱཝཏོ ཨེཀཱཀིཡཱཡ ནིལཱིནོ ཝིཡ ཧོཏི, ཏསྨཱ ཝུཏྟཾ ‘‘ཏཏོ ཏཏོ…པེ… གཏོ’’ཏི. མནོ བྷཝནྟི མནསོ ཝིཝཊྚནིསྶིཏཾ ཝཌྜྷིཾ ཨཱཝཧནྟཱིཏི མནོབྷཱཝནིཡཱཏི ཨཱཧ ‘‘མནཝཌྜྷཀཱན’’ནྟིཨཱདི. ཨུནྣམཏི ན སངྐུཙཏི, ཨལཱིནཉྩ ཧོཏཱིཏི ཨཏྠོ.

༥༡. ཡཱཝཏཱཏི ¶ ཡཱཝནྟོཏི ཨཡམེཏྠ ཨཏྠོཏི ཨཱཧ ‘‘ཡཏྟཀཱ’’ཏི. ཏེསནྟི ནིདྡྷཱརཎེ སཱམིཝཙནཾ. ནིདྡྷཱརཎཉྩ ཀེནཙི ཝིསེསེན ཨིཙྪིཏབྦཾ. ཡེཧི ཙ གུཎཝིསེསེཧི སམནྣཱགཏཱ བྷགཝཏོ སཱཝཀཱ ཨུཔཱསཀཱ རཱཛགཧེ པཊིཝསནྟི, ཨཡཉྩ ཏེཧི སམནྣཱགཏོཏི ཨིམཾ ཝིསེསཾ དཱིཔེཏུཾ ‘‘ཏེསཾ ཨབྦྷནྟརོ’’ཏི ཝུཏྟཾ. ཏེནཱཧ ‘‘བྷགཝཏོ ཀིརཱ’’ཏིཨཱདི.

༥༢. ཏེསནྟི ¶ པརིབྦཱཛཀཱནཾ. ཀཐཱཡཱཏི ཏིརཙྪཱནཀཐཱཡ. དསྶནེནཱཏི དིཊྛིདསྶནེན. ཨཱཀཔྤེནཱཏི ཝེསེན. ཀུཏྟེནཱཏི ཀིརིཡཱཡ. ཨཱཙཱརེནཱཏི ཨཉྙམཉྙསྨིཾ ཨཱཙརིཏབྦཨཱཙཱརེན. ཝིཧཱརེནཱཏི རཏྟིནྡིཝཾ ¶ ཝིཧརིཏབྦཝིཧརཎེན. ཨིརིཡཱཔཐེནཱཏི ཋཱནཱདིཨིརིཡཱཔཐེན. ཨཉྙཱཀཱརཏཱཡ ཨཉྙཏིཏྠེ ནིཡུཏྟཱཏི ཨཉྙཏིཏྠིཡཱ. སངྒནྟྭཱ སམཱགནྟྭཱ རཱསཱི ཧུཏྭཱ པརེཧི ནིསིནྣཊྛཱནེ. ཨརཉྙཱནི ཙ ཏཱནི ཝནཔཏྠཱནི ཙཱཏི ཨརཉྙཝནཔཏྠཱནི. ཏཏྠ ཡཾ ཨརཉྙཀངྒནིཔྥཱདཀཾ ཨཱརཉྙཀཱནཾ, ཏཾ ‘‘ཨརཉྙ’’ནྟི ཝེདིཏབྦཾ. ཝནཔཏྠནྟི གཱམནྟཾ ཨཏིཀྐམིཏྭཱ མནུསྶཱནཾ ཨནུཔཙཱརཊྛཱནཾ, ཡཏྠ ན ཀསཱིཡཏི ན ཝཔྤཱིཡཏི. ཝུཏྟཉྷེཏཾ ‘‘ཝནཔཏྠནྟི དཱུརཱནམེཏཾ སེནཱསནཱནཾ ཨདྷིཝཙན’’ནྟི ‘‘ཝནཔཏྠནྟི ཝནསཎྜཱནམེཏཾ སེནཱསནཱནཾ, ཝནཔཏྠནྟི བྷཱིསནཀཱནམེཏཾ, ཝནཔཏྠནྟི སལོམཧཾསཱནམེཏཾ, ཝནཔཏྠནྟི པརིཡནྟཱནམེཏཾ ཝནཔཏྠནྟི ན མནུསྶཱུཔཙཱརཱནམེཏཾ སེནཱསནཱནཾ ཨདྷིཝཙན’’ནྟི (ཝིབྷ. ༥༣༡). ཏེན ཝུཏྟཾ ‘‘གཱམཱུཔཙཱརཏོ མུཏྟཱནཱི’’ཏིཨཱདི. པནྟཱནཱིཏི པརིཡནྟཱནི ཨཏིདཱུརཱནི. ཏེནཱཧ ‘‘དཱུརཏརཱནཱི’’ཏིཨཱདི. ཝིཧཱརཱུཔཙཱརེནཱཏི ཝིཧཱརསྶ ཨུཔཙཱརཔྤདེསེན. ཨདྡྷིཀཛནསྶཱཏི ¶ མགྒགཱམིནོ ཛནསྶ. མནྡསདྡཱནཱིཏི ཨུཙྩཱསདྡམཧཱསདྡཱབྷཱཝཏོ ཏནུསདྡཱནི. མནུསྶེཧི སམཱགམྨ ཨེཀཛ྄ཛྷཾ པཝཏྟིཏསདྡོ ནིགྒྷོསོ, ཏསྶ ཡསྨཱ ཨཏྠོ དུབྦིབྷཱཝིཏོ ཧོཏི, ཏསྨཱ ཝུཏྟཾ ‘‘ཨཝིབྷཱཝིཏཏྠེན ནིགྒྷོསེནཱ’’ཏི. ཝིགཏཝཱཏཱནཱིཏི ཝིགཏསདྡཱནི. ‘‘རཧསྶ ཀརཎསྶ ཡུཏྟཱནཱི’’ཏི ཨིམིནཱཔི ཏེསཾ ཋཱནཱནཾ ཨརཉྙལཀྑཎཡུཏྟཏཾ, ཛནཝིཝིཏྟཏཾ, ཝནཝིཝིཏྟམེཝ ཙ ཝིབྷཱཝེཏི, ཏཐཱ ‘‘ཨེཀཱིབྷཱཝསྶ ཨནུརཱུཔཱནཱི’’ཏི ཨིམིནཱ.

༥༣. ཀེནཱཏི ཧེཏུམྷི, སཧཡོགེ ཙ ཀརཎཝཙནནྟི ཨཱཧ ‘‘ཀེན ཀཱརཎེན ཀེན པུགྒལེན སདྡྷི’’ནྟི. ཨེཀོཔི ཧི ཝིབྷཏྟིནིདྡེསོ ཨནེཀཏྠཝིབྷཱཝནོ ཧོཏི, ཏཐཱ ཏདྡྷིཏཏྠཔདསམཱཧཱརེཏི.

སཾསནྡནནྟི ཨཱལཱཔསལླཱཔཝསེན ཀཐཱསཾསནྡནཾ. ཉཱཎབྱཏྟབྷཱཝནྟི བྱཏྟཉཱཎབྷཱཝཾ, སོ པན པརསྶ ཝཙནེ ཨུཏྟརདཱནཝསེན, པརེན ཝཱ ཝུཏྟཨུཏྟརེ པཙྩུཏྟརདཱནཝསེན སིཡཱཏི ཨཱཧ ‘‘ཨུཏྟརཔཙྩུཏྟརནཡེནཱ’’ཏི. ཡོ ཧི པརསྶ ཝཙནཾ ཏིཔུཀྑལེན ནཡེན རཱུཔེཏི, ཏཐཱ པརསྶ རཱུཔནཝཙནཾ ཛཱཏིབྷཱཝཾ ཨཱཔཱདེཏི, ཏསྶ ཏཱདིསཾ ཝཙནསབྷཱཝཾ ཉཱཎཝེཡྻཏྟིཡཾ ཝིབྷཱཝེཏི པཱཀཊཾ ཀརོཏཱིཏི. སུཉྙཱགཱརེསུ ནཊྛཱཏི སུཉྙཱགཱརེསུ ནིཝཱསེསུ ནཊྛཱ ཝིནཊྛཱ ¶ ཨབྷཱཝཾ གཏཱ. ནཱསྶ པཉྙཱ ནསྶེཡྻ ཏེཧི ཏེཧི ཀཏཔུཙྪནཔཊིཔུཙྪནནིམིཏྟཾ ནཱནཱཔཊིབྷཱནུཔྤཏྟིཡཱ ¶ ཝིསཱརམཱཔནྣཾ པུཙྪིཏཾ པཉྷཾ ཝིསྶཛྫེཏུཾ ཨསམཏྠཏཱཡ. ཨོརོདྷེཡྻཱམཱཏི ནིརུསྶཱཧཾ ཝིཡ ཀརོནྟཱ ཨཝརོདྷེཡྻཱམ, ཏཾ པརསྶ ཨོརོདྷནཾ ཝཱདཛཱལེན ཝིནནྡྷནཾ ཝིཡ ཧོཏཱིཏི ཨཱཧ ‘‘ཝིནནྡྷེཡྻཱམཱ’’ཏི ¶ . ཏདཏྠཾ ཏེན ཏུཙྪཀུམྦྷིནིདསྶནཾ ཀཏཾ, ཏཾ བྱཏིརེཀམུཁེན དསྶེཏུཾ ‘‘པཱུརིཏགྷཊོ ཧཱི’’ཏིཨཱདི ཝུཏྟཾ.

བལཾ དཱིཔེནྟོཏི ཨབྷཱུཏམེཝ ཨཏྟནོ ཉཱཎབལཾ པཀཱསེནྟོ. ཨསམྦྷིནྣནྟི ཛཱཏིསམྦྷེདཱབྷཱཝེན ཨསམྦྷིནྣཾ. ཨཉྙཛཱཏིསམྦྷེདེ སཏི ཨསྶཏརསྶ ཨསྶསྶ ཛཱཏབྷཱཝོ ཝིཡ སཱིཧསྶཔི སཱིཧཐཱམཱབྷཱཝོ སིཡཱཏི ཨཱཧ ‘‘ཨསམྦྷིནྣཀེསརསཱིཧ’’ནྟི. ཋཱནསོ ཝཱཏི ཏངྑཎེ ཨེཝ.

༥༤. ‘‘སུམཱགདྷཱ ནཱམ ནདཱི’’ཏི ཀེཙི, ཏཾ མིཙྪཱཏི དསྶེནྟོ ‘‘སུམཱགདྷཱ ནཱམ པོཀྑརཎཱི’’ཏི ཝཏྭཱ ཏསྶཱ པོཀྑརཎིབྷཱཝསྶ སུཏྟནྟརེ ཨཱགཏཏཾ དསྶེཏུཾ ‘‘ཡསྶཱ ཏཱིརེ’’ཏིཨཱདི ཝུཏྟཾ. མོརཱནཾ ནིཝཱཔོ ཨེཏྠཱཏི མོརནིཝཱཔོ. བྱདྷིཀརཎཱནམྤི ཧི པདཱནཾ བཱཧིརཏྠསམཱསོ ཧོཏིཡེཝ ཡཐཱ ‘‘ཨུརསིལོམོ’’ཏི. ཨཐ ཝཱ ནིཝུཏྠཾ ཨེཏྠཱཏི ནིཝཱཔོ, མོརཱནཾ ནིཝཱཔོ མོརནིཝཱཔོ, མོརཱནཾ ནིཝཱཔདིནྣཊྛཱནཾ. ཏེནཱཧ ‘‘ཡཏྠ མོརཱན’’ནྟིཨཱདི. ཡསྨཱ ནིགྲོདྷོ ཏཔོཛིགུཙྪཝཱདོ, སཱསནེ ཙ བྷིཀྑཱུ ཨཏྟཀིལམཐཱནུཡོགཾ ཝཛྫེཏྭཱ བྷཱཝནཱནུཡོགེན པརམསྶཱསཔྤཏྟེ ཝིཧརནྟེ པསྶཏི, ཏསྨཱ ‘‘ཀཐཾ ནུ ཁོ སམཎོ གོཏམོ ཀཱཡཀིལམཐེན ཝིནཱཝ སཱཝཀེ ཝིནེཏཱི’’ཏི སཉྫཱཏསནྡེཧོ ‘‘ཀོ ནཱམ སོ’’ཏིཨཱདིནཱ བྷགཝནྟཾ པུཙྪི. ཨསྶསཏི ཨནུསངྐིཏཔརིསངྐིཏོ ཧོཏི ཨེཏེནཱཏི ཨསྶཱསོ, པཱིཏིསོམནསྶནྟི ¶ ཨཱཧ ‘‘ཨསྶཱསཔྤཏྟཱཏི ཏུཊྛིཔྤཏྟཱ སོམནསྶཔྤཏྟཱ’’ཏི. ཨདྷིཀོ སེཊྛོ ཨཱསཡོ ནིསྶཡོ ཨཛ྄ཛྷཱསཡོཏི ཨཱཧ ‘‘ཨུཏྟམནིསྶཡབྷཱུཏ’’ནྟི. ཨཱདིབྷཱུཏཾ པུརཱཏནཾ སེཊྛཙརིཡཾ ཨཱདིབྲཧྨཙརིཡཾ, ལོཀུཏྟརམགྒནྟི ཨཏྠོ. ཏཐཱ ཧེས སབྦབུདྡྷཔཙྩེཀབུདྡྷསཱཝཀེཧི ཏེནེཝ ཨཱཀཱརེན ཨདྷིགཏོ. ཏེནཱཧ ‘‘པུརཱཎ…པེ… ཨརིཡམགྒ’’ནྟི. ཏཐཱ ཧི ཏཾ བྷགཝཱ ‘‘ཨདྡས པུརཱཎཾ མགྒཾ པུརཱཎམཉྫས’’ནྟི ཨཝོཙ. པཱུརེཏྭཱ བྷཱཝནཱཔཱརིཔཱུརིཝསེན. ‘‘པཱུརེཏྭཱ’’ཏི ཝཱ ཨིདཾ ‘‘ཨཛ྄ཛྷཱསཡཾ ཨཱདིབྲཧྨཙརིཡ’’ནྟི ཨེཏྠ པཱཋསེསོཏི ¶ ཝདནྟི. ‘‘ཨཛ྄ཛྷཱསཡཾ ཨཱདིབྲཧྨཙརིཡཾ པཊིཛཱནནྟི ཨསྶཱསཔྤཏྟཱ’’ཏི ཨེཝཾ ཝཱ ཨེཏྠ ཡོཛནཱ.

ཏཔོཛིགུཙྪཱཝཱདཝཎྞནཱ

༥༥. པཀཏཱ ཧུཏྭཱ ཝིཙྪིནྣཱ ཝིཔྤཀཏཱཏི ཨཱཧ ‘‘ཨནིཊྛིཏཱཝ ཧུཏྭཱ ཋིཏཱ’’ཏི.

༥༦. ཝཱིརིཡེན པཱཔཛིགུཙྪནཝཱདོཏི ལཱུཁཔཊིཔཏྟིསཱདྷནེན ཝཱིརིཡེན ཨཏྟཏཎྷཱཝིནོདནཝསེན ¶ པཱཔཀསྶ ཛིགུཙྪནཝཱདོ. ཛིགུཙྪཏཱིཏི ཛིགུཙྪོ, ཏབྦྷཱཝོ ཛེགུཙྪཾ, ཨདྷིཀཾ ཛེགུཙྪཾ ཨདྷིཛེགུཙྪཾ, ཨཏིཝིཡ པཱཔཛིགུཙྪནཾ, ཏསྨིཾ ཨདྷིཛེགུཙྪེ. ཀཱཡདལ༹ྷཱིབཧུལཾ ཏཔཏཱིཏི ཏཔོ, ཨཏྟཀིལམཐཱནུཡོགཝསེན པཝཏྟཾ ཝཱིརིཡཾ, ཏེན ཀཱཡདལ༹ྷཱིབཧུལཏཱནིམིཏྟསྶ པཱཔསྶ ཛིགུཙྪནཾ, ཝིརཛྫནམྤི ཏཔོཛིགུཙྪཱཏི ཨཱཧ ‘‘ཝཱིརིཡེན པཱཔཛིགུཙྪཱ’’ཏི. གྷཱསཙྪཱདནསེནཱསནཏཎྷཱཝིནོདནམུཁེན ཨཏྟསྣེཧཝིརཛྫནནྟི ཨཏྠོ. ཨུཔརི ཝུཙྩམཱནེསུ ནཱནཱཀཱརེསུ ཨཙེལཀཱདིཝཏེསུ ཨེཀཛ྄ཛྷཾ སམཱདིནྣཱནཾ པརིསོདྷནམེཝེཏྠ པཱརིཔཱུརཎཾ ¶ , ན སབྦེསཾ ཨནཝསེསཏོ སམཱདཱནཾ ཏསྶ ཨསམྦྷཝཏོཏི ཨཱཧ ‘‘པརིཔུཎྞཱཏི པརིསུདྡྷཱ’’ཏི. པརིསོདྷནཉྩ ནེསཾ སཀསམཡསིདྡྷེན ནཡེན པཊིཔཛྫནམེཝ. ཝིཔརིཡཱཡེན ཨཔརིསུདྡྷཏཱ ཝེདིཏབྦཱ.

༥༧. ‘‘ཨེཀཾ པཉྷམྤི ན ཀཐེཏཱི’’ཏི པཋམཾ ཨཏྟནཱ པུཙྪིཏཔཉྷསྶ ཨཀཐིཏཏྟཱ ཝུཏྟཾ.

ཏཔནིསྶིཏཀོཏི ཨཏྟཀིལམཐཱནུཡོགསངྑཱཏཾ ཏཔཾ ནིསྶཱཡ སམཱདཱཡ ཝཏྟནཀོ. སཱིཧནཱདེཏི སཱིཧནཱདསུཏྟཝཎྞནཱཡཾ. ཡསྨཱ ཏཏྠ ཝིཏྠཱརིཏནཡེན ཝེདིཏབྦཱནི, ཏསྨཱ ཏསྶཱ ཨཏྠཔྤཀཱསནཱཡ ཝུཏྟནཡེནཔི ཝེདིཏབྦཱནི.

ཨུཔཀྐིལེསཝཎྞནཱ

༥༨. ‘‘སམྨཱ ཨཱདིཡཏཱི’’ཏི ཝཏྭཱ སམྨཱ ཨཱདིཡནཉྩསྶ དལ༹ྷགྒཱཧོ ཨེཝཱཏི ཨཱཧ ‘‘དལ༹ྷཾ གཎྷཱཏཱི’’ཏི. ‘‘སཱསནཱཝཙརེནཱཔི དཱིཔེཏབྦ’’ནྟི ཝཏྭཱ ¶ ཏཾ དསྶེཏུཾ ‘‘ཨེཀཙྩོ ཧཱི’’ཏིཨཱདི ཝུཏྟཾ, ཏེན དྷུཏངྒདྷརཏཱམཏྟེན ཨཏྟམནཏཱ, པརིཔུཎྞསངྐཔྤཏཱ སམྨཱཔཊིཔཏྟིཡཱ ཨུཔཀྐིལེསོཏི ཨིམམཏྠཾ དསྶེཏི, ན ཡཐཱཝུཏྟཏཔསམཱདཱནདྷུཏངྒདྷརཏཱནཾ སཏིཔི ཨནིཡྻཱནིཀཏྟེ སདིསཏནྟི དཊྛབྦཾ.

‘‘དུཝིདྷསྶཱཔཱིཏི ‘ཨཏྟམནོ ཧོཏི པརིཔུཎྞསངྐཔྤོ’ཏི ཙ ཨེཝཾ ཨུཔཀྐིལེསབྷེདེན ཝུཏྟསྶ དུཝིདྷསྶཱཔི ཏཔསྶིནོ’’ཏི ཀེཙི. ཡསྨཱ པན ཨཊྛཀཐཱཡཾ སཱསནིཀཝསེནཱཔི ཨཏྠོ དཱིཔིཏོ, ཏསྨཱ བཱཧིརཀསྶ, སཱསནིཀསྶ ཙཱཏི ཨེཝཾ དུཝིདྷསྶཱཔི ཏཔསྶིནོཏི ཨཏྠོ ཝེདིཏབྦོ. ཏཐཱ ཙེཝ ཧི ཨུཔརིཔི ཨཏྠཝཎྞནཾ ཝཀྑཏཱིཏི. ཨེཏྟཱཝཏཱཏི ཡདིདཾ ‘‘ཀོ ཨཉྙོ མཡཱ སདིསོ’’ཏི ཨེཝཾ ཨཏིམཱནསྶ, ཨནིཊྛིཏཀིཙྩསྶེཝ ཙ ‘‘ཨལམེཏྟཱཝཏཱ’’ཏི ཨེཝཾ ཨཏིམཱནསྶ ཙ ཨུཔྤཱདནཾ, ཨེཏྟཱཝཏཱ.

ཨུཀྐཾསཏཱིཏི ¶ ཨུཀྐཊྛཾ ཀརོཏི. ཨུཀྑིཔཏཱིཏི ཨཉྙེསཾ ཨུཔརི ཁིཔཏི, པགྒཎྷཱཏཱིཏི ཨཏྠོ. པརཾ སཾཧཱརེཏཱིཏི པརཾ སཾཧརཾ ནིཧཱིནཾ ཀརོཏི. ཨཝཀྑིཔཏཱིཏི ཨདྷོ ཁིཔཏི, ཨཝམཉྙཏཱིཏི ཨཏྠོ.

མཱནམདཀརཎེནཱཏི མཱནསངྑཱཏསྶ མདསྶ ཀརཎེན ཨུཔྤཱདནེན. མུཙྪིཏོ ¶ ཧོཏཱིཏི མུཙྪཱཔནྣོ ཧོཏི, སཱ པན མུཙྪཱཔཏྟི ཨབྷིཛ྄ཛྷཱསཱིལབྦཏཔརཱམཱསཀཱཡགནྠེཧི གདྷིཏཙིཏྟཏཱ, ཏཏྠ ཙ ཨཏིལགྒབྷཱཝོཏི ཨཱཧ ‘‘གདྷིཏོ ཨཛ྄ཛྷོསནྣོ’’ཏི. པམཛྫནཉྩེཏྠ པམཛྫནམེཝཱཏི ཨཱཧ ‘‘པམཱདམཱཔཛྫཏཱི’’ཏི. ཀེཝལཾ དྷུཏངྒསུདྡྷིཀོ ཧུཏྭཱ ཀམྨཊྛཱནཾ ཨནནུཡུཉྫནྟོ ཏཱཡ ཨེཝ དྷུཏངྒསུདྡྷིཀཏཱཡ ཨཏྟུཀྐཾསནཱདིཝསེན པཝཏྟེཡྻཱཏི དསྶེཏུཾ ‘‘སཱསནེ’’ཏིཨཱདི ཝུཏྟཾ. ཏེནཱཧ ‘‘དྷུཏངྒམེཝ…པེ… པཙྩེཏཱི’’ཏི.

༥༩. ཏེཡེཝ པཙྩཡཱ. སུཊྛུ ཀཏྭཱ པཊིསངྑརིཏྭཱ ལདྡྷཱཏི ཨཱདརགཱརཝཡོགེན སཀྐཙྩཾ ཨབྷིསངྑརིཏྭཱ དཱནཝསེན ཨུཔནཡཝསེན ལདྡྷཱ. ཝཎྞབྷཎནནྟི གུཎཀིཏྟནཾ. ཨསྶཱཏི ཏཔསྶིནོ.

༦༠. ཝོདཱསནྟི བྱཱསནཾ, ཝིབྷཛྫནནྟི ཨཏྠོ. ཏཾ པནེཏྠ ཝིབྷཛྫནཾ དྭིདྷཱ ཨིཙྪིཏནྟི ཨཱཧ ‘‘དྭེབྷཱགཾ ཨཱཔཛྫཏཱི’’ཏི. དྭེ བྷཱགེ ཀརོཏི རུཙྩནཱརུཙྩནཝསེན ¶ . གེདྷཛཱཏོཏི སཉྫཱཏགེདྷོ. མུཙྪནཾ ནཱམ སཏིཝིཔྤཝཱསེནེཝ ཧོཏི, ན སཏིཡཱ སཏཱིཏི ཨཱཧ ‘‘སམུཊྛསྶཏཱི’’ཏི. ཨཱདཱིནཝམཏྟམྤཱིཏི གདྷིཏཱདིབྷཱཝེན པརིབྷོགེ ཨཱདཱིནཝམཏྟམྤི ན པསྶཏི. མཏྟཉྙུཏཱཏི པརིབྷོགེ མཏྟཉྙུཏཱ. པཙྩཝེཀྑཎཔརིབྷོགམཏྟམྤཱིཏི པཙྩཝེཀྑཎམཏྟེན པརིབྷོགམྤི ཨེཀཝཱརཾ པཙྩཝེཀྑིཏྭཱཔི པརིབྷུཉྫནམྤི ན ཀརོཏི.

༦༡. ཝིཙཀྐསཎྛཱནཱཏི ཝིཔུལཏམཙཀྐསཎྛཱནཱ. སབྦསྶ བྷུཉྫནཏོ ཨཡོཀཱུཊསདིསཱ དནྟཱ ཨེཝ དནྟཀཱུཊཾ. ཨཔསཱདེཏཱིཏི པསཱདེཏི. ཨཙེལཀཱདིཝསེནཱཏི ¶ ཨཙེལཀཝཏཱདིཝསེན. ལཱུཁཱཛཱིཝིནྟི སལླེཁཔཊིཔཏྟིཡཱ ལཱུཁཛཱིཝིཀཾ.

༦༢. ཏཔཾ ཀརོཏཱིཏི བྷཱཝནཱམནསིཀཱརལཀྑཎཾ ཏཔཾ ཙརཏི ཙརནྟོ ཝིཡ ཧོཏི. ཙངྐམཾ ཨོཏརཏི བྷཱཝནཾ ཨནུཡུཉྫནྟོ ཝིཡ. ཝིཧཱརངྒཎཾ སམྨཛྫཏི ཝཏྟཔཊིཔཏྟིཾ པཱུརེནྟོ ཝིཡ.

‘‘ཨཱདསྶཡམཱནོ’’ཏི ཝཱ པཱཋོ.

ཀིཉྩི ¶ ཝཛྫནྟི ཀིཉྩི ཀཱཡིཀཾ ཝཱ ཝཱཙསིཀཾ ཝཱ དོསཾ. དིཊྛིགཏནྟི ཝིཔརཱིཏདསྶནཾ. ཨརུཙྩམཱནནྟི ཨཏྟནོ སིདྡྷནྟེ པཊིཀྑིཏྟབྷཱཝེན ཨརུཙྩམཱནཾ. རུཙྩཏི མེཏི ‘‘ཀཔྤཏི མེ’’ཏི ཝདཏི. ཨནུཛཱནིཏབྦནྟི ཏཙྪཱཝིཔརཱིཏབྷཱུཏབྷཱཝེན ‘‘ཨེཝམེཏ’’ནྟི ཨནུཛཱནིཏབྦཾ. སཝནམནོཧཱརིཏཱཡ ‘‘སཱདྷུ སུཊྛཱུ’’ཏི ཨནུམོདིཏབྦཾ.

༦༣. ཀུཛ྄ཛྷནསཱིལཏཱཡ ཀོདྷནོ. ཝུཏྟལཀྑཎོ ཨུཔནཱཧོ ཨེཏསྶ ཨཏྠཱིཏི ཨུཔནཱཧཱི. ཨེཝཾབྷཱུཏོ ཙ ཏཾསམངྒཱི ཧོཏཱིཏི ‘‘སམནྣཱགཏོ ཧོཏཱི’’ཏི ཝུཏྟཾ. ཨེས ནཡོ ཨིཏོ པརེསུཔི.

ཨཡཾ པན ཝིསེསོ – ཨིསྶཏི ཨུསཱུཡཏཱིཏི ཨུསྶུཀཱི. སཋནཾ ཨསནྟགུཎསམྦྷཱཝནཾ སཋོ, སོ ཨེཏསྶ ཨཏྠཱིཏི སཋོ. སནྟདོསཔཊིཙྪཱདནསབྷཱཝཱ མཱཡཱ, མཱཡཱ ཨེཏསྶ ཨཏྠཱིཏི མཱཡཱཝཱི. གརུཊྛཱནིཡཱནམྤི པཎིཔཱཏཱཀརཎལཀྑཎཾ ཐམྦྷནཾ ཐདྡྷཾ, ཏམེཏྠ ཨཏྠཱིཏི ཐདྡྷོ. གུཎེཧི སམཱནཾ, ཨདྷིཀཉྩ ཨཏིཀྐམིཏྭཱ ནིཧཱིནཾ ཀཏྭཱ མཉྙནསཱིལཏཱཡ ཨཏིམཱནཱི. ཨསནྟགུཎསམྦྷཱཝནཏྠིཀཏཱསངྑཱཏཱ པཱཔཱ ལཱམཀཱ ཨིཙྪཱ ཨེཏསྶཱཏི པཱཔིཙྪོ. མིཙྪཱ ཝིཔརཱིཏཱ དིཊྛི ཨེཏསྶཱཏི མིཙྪཱདིཊྛིཀོ. ‘‘ཨིདམེཝ སཙྩཾ, མོགྷམཉྙ’’ནྟི ¶ (མ. ནི. ༡༨༧, ༢༠༢, ༤༢༧; ༣.༢༧, ༢༩; ཨུདཱ. ༥༥; མཧཱནི. ༢༠; ནེཏྟི. ༥༨) ཨེཝཾ ¶ ཨཏྟནཱ ཨཏྟཱབྷིནིཝིཊྛཏཱཡ སཏཱ དིཊྛི སནྡིཊྛི, ཏམེཝ པརཱམསཏཱིཏི སནྡིཊྛིཔརཱམཱསཱི. ཨཊྛཀཐཱཡཾ པན ‘‘སཡཾ དིཊྛི སནྡིཊྛཱི’’ཏི ཝཏྠུཝསེན ཨཏྠོ ཝུཏྟོ. ཨཱ བཱལ༹ྷཾ ཝིཡ དྷཱིཡཏཱིཏི ཨཱདྷཱནནྟི ཨཱཧ ‘‘དལ༹ྷཾ སུཊྛུ ཋཔིཏ’’ནྟི. ཡཐཱགཧིཏཾ གཱཧཾ པཊིནིསྶཛྫནསཱིལོ པཊིནིསྶགྒཱི, ཏཔྤཊིཀྑེཔེན དུཔྤཊིནིསྶགྒཱི. པཊིསེདྷཏྠོ ཧི ཨཡཾ དུ-སདྡོ ཡཐཱ ‘‘དུཔྤཉྙོ, (མ. ནི. ༡.༤༤༩) དུསྶཱིལོ’’ཏི (ཨ. ནི. ༥.༢༡༣; ༡༠.༧༥; པཱརཱ. ༡༩༥; དྷ. པ. ༣༠༨) ཙ.

པརིསུདྡྷཔཔཊིཀཔྤཏྟཀཐཱཝཎྞནཱ

༦༤. ཨིདྷ ནིགྲོདྷ ཏཔསྶཱིཏི ཡཐཱནུཀྐནྟཾ པུརིམཔཱལི༹ཾ ནིགམནཝསེན ཨེཀདེསེན དསྶེཏི. ཏེནཱཧ ‘‘ཨེཝཾ བྷགཝཱ’’ཏིཨཱདི. གཧིཏལདྡྷིནྟི ‘‘ཨཙེལཀཱདིབྷཱཝོ སེཡྻོ, ཏེན ཙ སཾསཱརསུདྡྷི ཧོཏཱི’’ཏི ཨེཝཾ གཧིཏལདྡྷིཾ. རཀྑིཏཾ ཏཔནྟི ཏཱཡ ལདྡྷིཡཱ སམཱདིཡིཏྭཱ རཀྑིཏཾ ཨཙེལཀཝཏཱདིཏཔཾ. ‘‘སབྦམེཝ སཾཀིལིཊྛ’’ནྟི ཨིམིནཱ ཡཾ ཝཀྑཏི པརིསུདྡྷཔཱལི༹ཝཎྞནཱཡཾ ‘‘ལཱུཁཏཔསྶིནོ ཙེཝ དྷུཏངྒདྷརསྶ ཙ ཝསེན ཡོཛནཱ ཝེདིཏབྦཱ’’ཏི (དཱི. ནི. ཨཊྛ. ༣.༦༤), ཏསྶ པརིཀཔྤིཏརཱུཔསྶ ལཱུཁསྶ ཏཔསྶིནོཏི ཨཡམེཏྠ ཨདྷིཔྤཱཡོཏི ¶ དསྶེཏི. ‘‘པརིསུདྡྷཔཱལི༹དསྶནཏྠ’’ནྟི ཙ ཨིམིནཱ ཏིཏྠིཡཱནཾ ཝསེན པཱལི༹ ཡེཝེཏྠ ལབྦྷཏི, ན པན ཏདཏྠོཏི དསྶེཏི. ཝུཏྟཝིཔཀྑཝསེནཱཏི ཝུཏྟསྶ ཨཏྠསྶ པཊིཔཀྑཝསེན, པཊིཀྑེཔཝསེནཱཏི ཨཏྠོ. ཏསྨིཾ ཋཱནེཏི ཧེཏུཨཏྠེ བྷུམྨནྟི ཏསྶ ཧེཏུཨཏྠེན ཀརཎཝཙནེན ཨཏྠཾ དསྶེནྟོ ‘‘ཨེཝཾ སོ ཏེནཱ’’ཏིཨཱདིམཱཧ. ཨུཏྟརི ཝཱཡམམཱནོཏི ཡཐཱསམཱདིནྣེཧི དྷུཏདྷམྨེཧི ཨཔརིཏུཊྛོ, ཨཔརིཡོསིཏསངྐཔྤོ ཙ ཧུཏྭཱ ཨུཔརི བྷཱཝནཱནུཡོགཝསེན སམྨཱཝཱཡཱམཾ ཀརོནྟོ.

༦༩. ཨིཏོ པརནྟི ཨིཏོ ཡཐཱཝུཏྟནཡཏོ པརཾ. ཨགྒབྷཱཝཾ ཝཱ སཱརབྷཱཝཾ ཝཱཏི ཏཔོཛིགུཙྪཱཡ ཨགྒབྷཱཝཾ ཝཱ སཱརབྷཱཝཾ ཝཱ ཨཛཱནནྟོ. ‘‘ཨཡམེཝསྶ ཨགྒབྷཱཝོ སཱརབྷཱཝོ’’ཏི ¶ མཉྙམཱནོ ‘‘ཨགྒཔྤཏྟཱ, སཱརཔྤཏྟཱ ཙཱ’’ཏི ཨཱཧ.

པརིསུདྡྷཏཙཔྤཏྟཱདིཀཐཱཝཎྞནཱ

༧༠. ཡམནཾ ¶ སཾཡམནཾ ཡཱམོ, ཧིཾསཱདཱིནཾ ཨཀརཎཝསེན ཙཏུབྦིདྷོ ཡཱམོཝ ཙཱཏུཡཱམོ, སོ ཨེཝ སཾཝརོ, ཏེན སཾཝུཏོ གུཏྟསབྦདྭཱརོ ཙཱཏུཡཱམསཾཝརསཾཝུཏོ. ཏེནཱཧ ‘‘ཙཏུབྦིདྷེན སཾཝརེན པིཧིཏོ’’ཏི. ཨཏིཔཱཏནཾ ཧིཾསནནྟི ཨཱཧ ‘‘པཱཎཾ ན ཧནཏཱི’’ཏི. ལོབྷཙིཏྟེན བྷཱཝིཏཾ སམྦྷཱཝིཏནྟི ཀཏྭཱ བྷཱཝིཏཾ ནཱམ པཉྩ ཀཱམགུཎཱ. ཨཡཉྩ ཏེསུ ཏེསཾཡེཝ སམུདཱཙཱརོ མགྒོཊྛཱཔཀཾ ཝིཡཱཏི ཨཱཧ ‘‘ཏེསཾ སཉྙཱཡཱ’’ཏི.

ཨེཏནྟི ཨབྷིཧརཎཾ, ཧཱིནཱཡ ཨནཱཝཏྟནཉྩ. ཏེནཱཧ ‘‘སོ ཨབྷིཧརཏཱིཏི ཨཱདིལཀྑཎ’’ནྟི. ཨབྷིཧརཏཱིཏི ཨབྷིབུདྡྷིཾ ནེཏི. ཏེནཱཧ ‘‘ཨུཔརཱུཔརི ཝཌྜྷེཏཱི’’ཏི. ཙཀྐཝཏྟིནཱཔི པབྦཛིཏསྶ ཨབྷིཝཱདནཱདི ཀརཱིཡཏེཝཱཏི པབྦཛྫཱ སེཊྛཱ གུཎཝིསེསཡོགཏོ, དོསཝིརཧིཏཏོ ཙ, ཡཏོ སཱ པཎྜིཏཔཉྙཏྟཱ ཝུཏྟཱ. གིཧིབྷཱཝོ པན ནིཧཱིནོ ཏདུབྷཡཱབྷཱཝཏོཏི ཨཱཧ ‘‘ཧཱིནཱཡ གིཧིབྷཱཝཏྠཱཡཱ’’ཏི.

༧༡. ཏཙཔྤཏྟཱཏི ཏཙཾ པཏྟཱ, ཏཙསདིསཱ ཧོཏཱིཏི ཨཏྠོ.

༧༤. ཏིཏྠིཡཱནཾ ཝསེནཱཏི ཏིཏྠིཡཱནཾ སམཡཝསེན. ནེསནྟི ཏིཏྠིཡཱནཾ. ཏནྟི དིབྦཙཀྑུཾ. སཱིལསམྤདཱཏི སབྦཱཀཱརསམྤནྣཾ ཙཏུཔཱརིསུདྡྷིསཱིལཾ. ཏཙསཱརསམྤཏྟིཏོཏི ཏཙཏཔོཛིགུཙྪཱཡཱསཱརསམྤཏྟིཏོ. ཝིསེསབྷཱཝནྟི ཝིསེསསབྷཱཝཾ.

ཨཙེལཀཔཱལི༹མཏྟམྤཱིཏི ¶ ¶ ཨཙེལཀཔཱལི༹ཨཱགཏཏྠམཏྟམྤི ནཏྠི, ཏསྨཱ མཡཾ ཨནསྶཱམ ཝིནཊྛཱཏི ཨཏྠོ. ཨ-ཀཱརོ ཝཱ ནིཔཱཏམཏྟཾ, ནསྶཱམཱཏི ཝིནསྶཱམ. ཀུཏོ པརིསུདྡྷཔཱལཱི༹ཏི ཀུཏོ ཨེཝ ཨམྷེསུ པརིསུདྡྷཔཱལི༹ཨཱགཏཔཊིཔཏྟི. ཨེས ནཡོ སེསེསུཔི. སུཏིཝསེནཱཔཱིཏི སོཏཔཐཱགམནམཏྟེནཱཔི ན ཛཱནཱམ.

ནིགྲོདྷསྶཔཛ྄ཛྷཱཡནཝཎྞནཱ

༧༥. ཨསྶཱཏི ¶ སནྡྷཱནསྶ གཧཔཏིསྶ. ཀཀྑལ༹ནྟི ཕརུསཾ. དུརཱསདཝཙནནྟི ཨཝཏྟབྦཝཙནཾ. ཡསྨཱ ཕརུསཝཙནཾ ཡཾ ཨུདྡིསྶ པཡུཏྟཾ, ཏསྨིཾ ཁམཱཔིཏེ ཁམཱཔཀསྶ པཊིཔཱཀཏིཀཾ ཧོཏི, ཏསྨཱ ‘‘ཨཡཾ མཡཱི’’ཏིཨཱདི ཝུཏྟཾ.

༧༦. བོདྷཏྠཱཡ དྷམྨཾ དེསེཏི, ན ཨཏྟནོ བུདྡྷབྷཱཝགྷོསནཏྠཱཡ. ཝཱདཏྠཱཡཱཏི པརཝཱདབྷཉྫནཝཱདཏྠཱཡ. རཱགཱདིསམནཏྠཱཡ དྷམྨཾ དེསེཏི, ན ཨནྟེཝཱསིཀམྱཏཱཡ. ཨོགྷནིཏྠརཎཏྠཱཡཱཏི ཙཏུརོགྷནིཏྠརཎཏྠཱཡ དྷམྨཾ དེསེཏི སབྦསོ ཨོརཔཱརཱཏིཎྞམཱཝཧཏྟཱ དེསནཱཡ. སབྦཀིལེསཔརིནིབྦཱནཏྠཱཡ དྷམྨཾ དེསེཏི ཀིལེསཱནཾ ལེསེནཔི དེསནཱཡ ཨཔརཱམཊྛབྷཱཝཏོ.

བྲཧྨཙརིཡཔརིཡོསཱནཱདིཝཎྞནཱ

༧༧. ཨིདཾ སབྦམྤཱིཏི སཏྟཝསྶཏོ པཊྛཱཡ ཡཱཝ ‘‘སཏྟཱཧ’’ནྟི པདཾ, ཨིདཾ སབྦམྤི ཝཙནཾ. ཨསཋོ པན ཨམཱཡཱཝཱི ཨུཛུཛཱཏིཀོ ཏིཀྑཔཉྙོ ཨུགྒྷཊིཏཉྙཱུཏི ཨདྷིཔྤཱཡོ. སོ ཧི ཏཾམུཧུཏྟེནེཝ ཨརཧཏྟཾ པཏྟུཾ སཀྑིསྶཏཱིཏི. ཝངྐཝངྐོཏི ཀཱཡཝངྐཱདཱིཧིཔི ཝངྐེཧི ཝངྐོ ཛིམྷོ ཀུཊིལོ. ‘‘སཋཾ པནཱཧཾ ཨནུསཱསིཏུཾ ན སཀྐོམཱི’’ཏི ན ཨིདཾ བྷགཝཱ ཀིལཱསུབྷཱཝེནེཝ ཝདཏི, ཨཐ ཁོ ཏསྶ ཨབྷཱཛནབྷཱཝེནེཝ.

༧༨. པཀཏིཡཱ ཨཱཙརིཡོཏི ཡོ ཨེཝ ཏུམྷཱཀཾ ཨིཏོ པུབྦེ པཀཏིཡཱ ཨཱཙརིཡོ ཨཧོསི, སོ ཨེཝ ཨིདཱནིཔི པུབྦཱཙིཎྞཝསེན ཨཱཙརིཡོ ཧོཏུ, ན མཡཾ ཏུམྷེ ཨནྟེཝཱསིཀེ ཀཱཏུཀཱམཱཏི ཨདྷིཔྤཱཡོ. ན ¶ མཡཾ ཏུམྷཱཀཾ ཨུདྡེསེན ཨཏྠིཀཱ, དྷམྨཏནྟི མེཝ པན ཏུམྷེ ཉཱཔེཏུཀཱམམྷཱཏི ཨདྷིཔྤཱཡོ. ཨཱཛཱིཝཏོཏི ཛཱིཝིཀཱཡ ཝུཏྟིཏོ. ཨཀུསལཱཏི ཀོཊྛཱསཾ པཏྟཱཏི ཨཀུསལཱཏི ཏཾ ཏཾ ཀོཊྛཱསཏཾཡེཝ ཨུཔགཏཱ. ཀིལེསདརཐསམྤཡུཏྟཱཏི ཀིལེསདརཐསཧིཏཱ ཏཾསམྦནྡྷནཏོ ¶ . ཛཱཏིཛརཱམརཎཱནཾ ཧིཏཱཏི ཛཱཏིཛརཱམརཎིཡཱ. སཾཀིལེསོ ཨེཏྠ ཨཏྠི, སཾཀིལེསེ ཝཱ ནིཡུཏྟཱཏི སཾཀིལེསིཀཱ. ཝོདཱནཾ ཝུཙྩཏི ཝིསུདྡྷི, ཏསྶ པཙྩཡབྷཱུཏཏྟཱ ཝོདཱནིཡཱ. ཏཐཱབྷཱུཏཱ ཙེཏེ ཝོདཱཔེནྟཱིཏི ཨཱཧ ‘‘སཏྟེ ཝོདཱཔེནྟཱི’’ཏི. སིཁཱཔྤཏྟཱ པཉྙཱཡ པཱརིཔཱུརིཝེཔུལླཏཱ མགྒཕལཝསེནེཝ ཨིཙྪིཏབྦཱཏི ¶ ཨཱཧ ‘‘མགྒཔཉྙཱ…པེ… ཝེཔུལླཏ’’ནྟི. ཨུབྷོཔི ཝཱ ཨེཏཱནི པཱརིཔཱུརིཝེཔུལླཱནི. ཡཱ ཧི ཏསྶ པཱརིཔཱུརཱི, སཱ ཨེཝ ཝེཔུལླཏཱཏི. ཏཏོཏི སཾཀིལེསདྷམྨཔྤཧཱནཝོདཱནདྷམྨཱབྷིབུདྡྷིཧེཏུ.

༧༩. ‘‘ཡཐཱ མཱརེནཱ’’ཏི ནཡིདཾ ནིདསྶནཝསེན ཝུཏྟཾ, ཨཐ ཁོ ཏཐཱབྷཱཝཀཐནམེཝཱཏི དསྶེཏུཾ ‘‘མཱརོ ཀིརཱ’’ཏིཨཱདི ཝུཏྟཾ. ཨཐཱཏི མཱརེན ཏེསཾ པརིཡུཊྛཱནཔྤཏྟིཏོ པཙྪཱ ཨཉྙཱསཱིཏི ཡོཛནཱ. ཀསྨཱ པན བྷགཝཱ པགེཝ ན ཨཉྙཱསཱིཏི? ཨནཱཝཛྫིཏཏྟཱ. མཱརཾ པཊིབཱཧིཏྭཱཏི མཱརེན ཏེསུ ཀཏཾ པརིཡུཊྛཱནཾ ཝིདྷམེཏྭཱ, ན ཏེསཾ སཏི པཡོཛནེ བུདྡྷཱནཾ དུཀྐརཾ. སོཏི མགྒཕལུཔྤཏྟིཧེཏུ. ཏེསཾ པརིབྦཱཛཀཱནཾ.

ཕུཊྛཱཏི པརིཡུཊྛཱནཝསེན ཕུཊྛཱ. ཡཏྲཱཏི ནིདྡྷཱརཎེ བྷུམྨནྟི ཨཱཧ ‘‘ཡེསཱུ’’ཏི. ཨཉྙཱཎཏྠནྟི ཨཱཛཱནནཏྠཾ, ཨུཔསགྒམཏྟཉྩེཏྠ ¶ ཨཱ-ཀཱརོཏི ཨཱཧ ‘‘ཛཱནནཏྠ’’ནྟི, ཝཱིམཾསནཏྠནྟི ཨཏྠོ. ཙིཏྟཾ ནུཔྤནྣནྟི ‘‘ཛཱནཱམ ཏཱཝསྶ དྷམྨ’’ནྟི ཨཱཛཱནནཏྠཾ ‘‘བྲཧྨཙརིཡཾ ཙརིསྶཱམཱ’’ཏི ཨེཀསྨིཾ དིཝསེ ཨེཀཝཱརམྤི ཏེསཾ ཙིཏྟཾ ནུཔྤནྣཾ. སཏྟཱཧོ པན ཝུཙྩམཱནོ ཨེཏེསཾ ཀིཾ ཀརིསྶཏཱིཏི ཡོཛནཱ. སཏྟཱཧཾ པཱུརེཏུནྟི སཏྟཱཧཾ བྲཧྨཙརིཡཾ པཱུརེཏུཾ, བྲཧྨཙརིཡཝསེན ཝཱ སཏྟཱཧཾ པཱུརེཏུནྟི ཨཏྠོ. པརཝཱདབྷིནྡནནྟི པརཝཱདམདྡནཾ. སཀཝཱདསམུསྶཱཔནནྟི སཀཝཱདཔགྒཎྷནཾ. ཝཱསནཱཡཱཏི སཙྩསམྤཊིཝེདྷཝཱསནཱཡ. ནེསནྟི ཙ པཀརཎཝསེན ཝུཏྟཾ. ཏདཉྙེསམྤི ཧི བྷགཝཏོ སམྨུཁཱ, པརམྤརཱཡ ཙ དེཝམནུསྶཱནཾ སུཎནྟཱནཾ ཝཱསནཱཡ པཙྩཡོ ཨེཝཱཏི. ཡཾ པནེཏྠ ཨཏྠཏོ ན ཝིབྷཏྟཾ, ཏཾ སུཝིཉྙེཡྻམེཝཱཏི.

ཨུདུམྦརིཀསུཏྟཝཎྞནཱཡ ལཱིནཏྠཔྤཀཱསནཱ.

༣. ཙཀྐཝཏྟིསུཏྟཝཎྞནཱ

ཨཏྟདཱིཔསརཎཏཱཝཎྞནཱ

༨༠. ཨུཏྟཱནཾ ¶ ¶ ¶ ཝུཙྩཏི པཱཀཊཾ, ཏཔྤཊིཀྑེཔེན ཨནུཏྟཱནཾ ཨཔཱཀཊཾ, པཊིཙྪནྣཾ, ཨཔཙུརཾ, དུཝིཉྙེཡྻཉྩ. ཨནུཏྟཱནཱནཾ པདཱནཾ ཝཎྞནཱ ཨནུཏྟཱནཔདཝཎྞནཱ. ཨུཏྟཱནཔདཝཎྞནཱཡ པཡོཛནཱབྷཱཝཏོ ཨནུཏྟཱནགྒཧཎཾ. ‘‘མཱཏུལཱ’’ཏི ཨིཏྠིལིངྒཝསེན ལདྡྷནཱམོ ཨེཀོ རུཀྑོ, ཏསྶཱ ཨཱསནྣཔྤདེསེ མཱཔིཏཏྟཱ ནགརམྤི ‘‘མཱཏུལཱ’’ ཏྭེཝ པཉྙཱཡིཏྠ. ཏེན ཝུཏྟཾ ‘‘མཱཏུལཱཡནྟི ཨེཝཾ ནཱམཀེ ནགརེ’’ཏི. ཨཝིདཱུརེཏི ཏསྶ ནགརསྶ ཨཝིདཱུརེ.

ཀཱམཉྩེཏྠ སུཏྟེ ‘‘བྷཱུཏཔུབྦཾ, བྷིཀྑཝེ, རཱཛཱ དལ༹ྷནེམི ནཱམ ཨཧོསཱི’’ཏིཨཱདིནཱ ཨཏཱིཏཝཾསདཱིཔིཀཱ ཀཐཱ ཨཱདིཏོ པཊྛཱཡ ཨཱགཏཱ, ‘‘ཨཌྜྷཏེཡྻཝསྶསཏཱཡུཀཱནཾ མནུསྶཱནཾ ཝསྶསཏཱཡུཀཱ པུཏྟཱ བྷཝིསྶནྟཱི’’ཏིཨཱདིནཱ པན སཝིསེསཾ ཨནཱགཏཏྠཔཊིསཾཡུཏྟཱ ཀཐཱ ཨཱགཏཱཏི ཝུཏྟཾ ‘‘ཨནཱགཏཝཾསདཱིཔིཀཱཡ སུཏྟནྟཀཐཱཡཱ’’ཏི. ཨནཱགཏཏྠདཱིཔནཉྷི ཨཙྪརིཡཾ, ཏཏྠཱཔི ཨནཱགཏསྶ སམྨཱསམྦུདྡྷསྶ པཊིཔཏྟིཀིཏྟནཾ ཨཙྪརིཡཏམཾ. སམཱགམེནཱཏི སནྣིཔཱཏེན.

‘‘བྷཏྟགྒཾ ཨམནཱཔ’’ནྟིཨཱདི ཀེཝལཾ ཏེསཾ པརིཝིཏཀྐམཏྟཾ. ཨམནཱཔནྟི ཨམནུཉྙཾ. བུདྡྷེསུ ཀཏོ ཨཔྤཀོཔི ཨཔརཱདྷོ ཨཔྤཀོ ཀཱརོ ཝིཡ གརུཏརཝིཔཱཀོཏི ཨཱཧ ‘‘བུདྡྷེཧི སདྡྷིཾ…པེ… སདིསཾ ཧོཏཱི’’ཏི. ཏཏྲཱཏི ཏསྨིཾ མཱཏུལནགརསྶ སམཱིཔེ, ཏསྶཾ ཝཱ པརིསཱཡཾ.

ཨཏྟདཱིཔཱཏི ཨེཏྠ ཀཱམཾ ཡོ པརོ ན ཧོཏི, སོ ཨཏྟཱཏི སསནྟཱནོ ‘‘ཨཏྟཱ’’ཏི ཝུཙྩཏི, ཧིཏསུཁེསིབྷཱཝེན པན ཨཏྟནིབྦིསེསཏྟཱ དྷམྨོ ཨིདྷ ‘‘ཨཏྟཱ’’ཏི ཨདྷིཔྤེཏོ. ཏེནཱཧ ‘‘ཨཏྟཱ ནཱམ ལོཀིཡལོཀུཏྟརོ དྷམྨོ’’ཏི. དྭིདྷཱ ཨཱཔོ གཏོ ཨེཏྠཱཏི དཱིཔོ, ཨོགྷེན ཨནཛ྄ཛྷོཏྠཏོ ¶ བྷཱུམིབྷཱགོ. ཨིདྷ ¶ པན ཀཱམོགྷཱདཱིཧི ཨནཛ྄ཛྷོཏྠརཎཱིཡཏྟཱ དཱིཔོ ཝིཡཱཏི དཱིཔོ, ཨཏྟཱ དཱིཔོ པཏིཊྛཱ ཨེཏེསནྟི ཨཏྟདཱིཔཱ. ཏེནཱཧ ‘‘ཨཏྟཱནཾ དཱིཔ’’ནྟིཨཱདི. དཱིཔབྷཱཝོ ཙེཏྠ པཊིསརཎཏཱཏི ཨཱཧ ‘‘ཨིདཾ ཏསྶེཝ ཝེཝཙན’’ནྟི. ཨཉྙསརཎཔཊིཀྑེཔཝཙནནྟི ཨཉྙསརཎབྷཱཝཔཊིཀྑེཔཝཙནཾ. ཨིདཉྷི ན ཨཉྙཾ སརཎཾ ཀཏྭཱ ¶ ཝིཧརཎསྶེཝ པཊིཀྑེཔཝཙནཾ, ཨཐ ཁོ ཨཉྙསྶ སརཎསབྷཱཝསྶེཝ པཊིཀྑེཔཝཙནཾ ཏཔྤཊིཀྑེཔེ ཙ ཏེན ཨིཏརསྶཱཔི པཊིཀྑེཔསིདྡྷིཏོ. ཏེནཱཧ ‘‘ན ཧཱི’’ཏིཨཱདི. ཨིདཱནི ཏམེཝཏྠཾ སུཏྟནྟརེན སཱདྷེཏུཾ ‘‘ཝུཏྟམྤི ཙེཏ’’ནྟིཨཱདི. ཡདི ཨེཏྠ པཱཀཏིཀོ ཨཏྟཱ ཨིཙྪིཏོ, ཀཐཾ ཏསྶ དཱིཔསརཎབྷཱཝོ, ཏསྨཱ ཨདྷིཔྤཱཡིཀོ ཨེཏྠ ཨཏྟཱ བྷཝེཡྻཱཏི པུཙྪཏི ‘‘ཀོ པནེཏྠ ཨཏྟཱ ནཱམཱ’’ཏི. ཨིཏརོ ཡཐཱདྷིཔྤེཏཾ ཨཏྟཱནཾ དསྶེནྟོ ‘‘ལོཀིཡལོཀུཏྟརོ དྷམྨོ’’ཏི. དུཏིཡཝཱརོཔི པཋམཝཱརསྶེཝ པརིཡཱཡབྷཱཝེན དེསིཏོཏི དསྶེཏུཾ ‘‘ཏེནཱཧཱ’’ཏིཨཱདི ཝུཏྟཾ.

གོཙརེཏི བྷིཀྑཱུནཾ གོཙརཊྛཱནབྷཱུཏེ. ཏེནཱཧ ‘‘ཙརིཏུཾ ཡུཏྟཊྛཱནེ’’ཏི. སཀེཏི ཀཐཾ པནཱཡཾ བྷིཀྑཱུནཾ སཀོཏི ཨཱཧ ‘‘པེཏྟིཀེ ཝིསཡེ’’ཏི. པིཏིཏོ སམྨཱསམྦུདྡྷཏོ ཨཱགཏཏྟཱ ‘‘ཨཡཾ ཏུམྷཱཀཾ གོཙརོ’’ཏི ཏེན ཨུདྡིཊྛཏྟཱ པེཏྟིཀེ ཝིསཡེཏི. ཙརནྟནྟི སཱམིཨཏྠེ ཨུཔཡོགཝཙནནྟི ཨཱཧ ‘‘ཨཡམེཝཏྠོ’’ཏི, ཙརནྟཱནནྟི ཙ ཨཏྠོ, ཏེནཱཡཾ ཝིབྷཏྟིཝིཔལླཱསེནཔི ཝཙནཝིཔལླཱསེནཔཱིཏི དསྶེཏི. ཀིལེསམཱརསྶ ཨོཏཱརཱལཱབྷེནེཝ ཨིཏརམཱརཱནམྤི ཨོཏཱརཱལཱབྷོ ཝེདིཏབྦོ. ཨཡཾ པནཏྠོཏི གོཙརེ ཙརཎཾ སནྡྷཱཡཱཧ, ཝཏྠུ པན བྱཏིརེཀམུཁེན ཨཱགཏཾ.

སཀུཎེ ཧནྟཱིཏི སཀུཎགྒྷི, མཧཱསེནསཀུཎོ. ཨཛ྄ཛྷཔྤཏྟཱཏི ཨབྷིབྷཝནཝསེན པཏྟཱ ཨུཔགཏཱ. ན མྱཱཡནྟི མེ ཨཡཾ སཀུཎགྒྷི ནཱལཾ ཨབྷཝིསྶ. ནངྒལཀཊྛཀརཎནྟི ནངྒལེན ཀསིཏཔྤདེསོ. ལེཌྜུཊྛཱནནྟི ལེཌྜཱུནཾ ¶ ཨུཊྛཔིཏཊྛཱནཾ. སཀེ བལེཏི ཨཏྟནོ བལཧེཏུ. ཨཔཏྠདྡྷཱཏི ཨཝགཱལ༹ྷཏྠམྦྷཱ སཉྫཱཏཏྠམྦྷཱ. ཨསྶརམཱནཱཏི ཨཝ྄ཧཱཡནྟཱི.

མཧནྟཾ ལེཌྜུནྟི ནངྒལེན བྷིནྣཊྛཱནེ སུཀྑཏཱཡ ཏིཁིཎསིངྒཨཡོགྷནསདིསཾ མཧནྟཾ ལེཌྜུཾ. ཨབྷིརུཧིཏྭཱཏི ཏསྶ ཨདྷོབྷཱགེན ཨཏྟནཱ པཝིསིཏྭཱ ནིལཱིནཡོགྒཔྤདེསཾ སལླཀྑེཏྭཱ ཏསྶུཔརི ཙངྐམནྟོ ཨསྶརམཱནོ ཨཊྛཱསི. ‘‘ཨེཧི ཁོ’’ཏིཨཱདི ཏསྶ ཨསྶརམཱནཱཀཱརདསྶནཾ. སནྣཡ྄ཧཱཏི ཝཱཏགྒཧཎཝསེན ཨུབྷོ པཀྑེ སམཾ ཋཔེཏྭཱ. པཙྩུཔཱདཱིཏི པཱཝིསི. ཏཏྠེཝཱཏི ཡཏྠ པུབྦེ ལཱཔོ ཋིཏོ, ཏཏྠེཝ ལེཌྜུམྷི ¶ . ཨུརནྟི ཨཏྟནོ ཨུརཔྤདེསཾ. པཙྩཏཱལེ༹སཱིཏི པཏི ཨཏཱལེ༹སི སཱརམྦྷཝསེན ཝེགེན གནྟྭཱ པཧརཎཏོ ཝིདྷཱརེནྟཱི པཏཱལེ༹སི. ཨཱརམྨཎནྟི པཙྩཡཾ. ‘‘ཨཝསར’’ནྟི ཀེཙི.

‘‘ཀུསལཱན’’ནྟི ¶ ཨེཝཾ པཝཏྟཱཡ དེསནཱཡ ཀོ ཨནུསནྡྷི? ཡཐཱཨནུསནྡྷི ཨེཝ. ཨཱདིཏོ ཧི ‘‘ཨཏྟདཱིཔཱ, བྷིཀྑཝེ, ཝིཧརཐཱ’’ཏིཨཱདིནཱ (དཱི. ནི. ༣.༨༠) ཡེཝ ཨཏྟདྷམྨཔརིཡཱཡེན ལོཀིཡལོཀུཏྟརདྷམྨཱ གཧིཏཱ, ཏེ ཡེཝེཏྠ ཀུསལགྒཧཎེན གཧིཏཱཏི. ཨནཝཛྫལཀྑཎཱནནྟི ཨཝཛྫཔཊིཔཀྑསབྷཱཝཱནཾ. ‘‘ཨཝཛྫརཧིཏསབྷཱཝཱན’’ནྟི ཀེཙི. ཏཏྠ པུརིམེ ཨཏྠཝིཀཔྤེ ཝིཔཱཀདྷམྨདྷམྨཱ ཨེཝ གཧིཏཱ, དུཏིཡེ པན ཝིཔཱཀདྷམྨཱཔི. ཡདི ཨེཝཾ, ཀཐཾ ཏེསཾ སམཱདཱཡ ཝཏྟནནྟི? ན ཁོ པནེཏཾ ཨེཝཾ དཊྛབྦཾ ‘‘ཝིཔཱཀདྷམྨཱ སཱིལཱདི ཝིཡ སམཱདཱཡ ཝཏྟིཏབྦཱ’’ཏི. སམཱདཱནནྟི པན ཨཏྟནོ སནྟཱནེ སམྨཱ ཨཱདཱནཾ པཙྩཡཝསེན པཝཏྟི ཡེཝཱཏི དཊྛབྦཾ. ཝིཔཱཀདྷམྨཱ ཧི པཙྩཡཝིསེསེཧི སཏྟསནྟཱནེ སམྨདེཝ ཨཱཧིཏཱ ཨཱཡུཨཱདིསམྤཏྟིཝིསེསབྷཱུཏཱ ¶ ཨུཔརཱུཔརིཀུསལཝིསེསུཔྤཏྟིཡཱ ཨུཔནིསྶཡཱ ཧོནྟཱིཏི ཝདནྟི. པུཉྙཾ པཝཌྜྷཏཱིཏི ཨེཏྠ པུཉྙནྟི ཨུཏྟརཔདལོཔེནཱཡཾ ནིདྡེསོཏི ཨཱཧ ‘‘པུཉྙཕལཾ ཝཌྜྷཏཱི’’ཏི. པུཉྙཕལནྟི ཙ ཨེཀདེསསརཱུཔེཀསེསེན ཝུཏྟཾ ‘‘པུཉྙཉྩ པུཉྙཕལཉྩ པུཉྙཕལ’’ནྟི ཨཱཧ ‘‘ཨུཔརཱུཔརི པུཉྙམྤི པུཉྙཝིཔཱཀོཔི ཝེདིཏབྦོ’’ཏི.

‘‘མཱཏཱཔིཏཱུན’’ནྟིཨཱདི ནིདསྶནམཏྟཾ, ཏསྨཱ ཨཉྙམྤི ཨེཝརཱུཔཾ ཧེཏཱུཔནིསྶཡཾ ཀུསལཾ དཊྛབྦཾ. སིནེཧཝསེནཱཏི ཨུཔནིསྶཡབྷཱུཏསྶ སིནེཧསྶ ཝསེན, ན སམྤཡུཏྟསྶ. ན ཧི སིནེཧསམྤཡུཏྟཾ ནཱམ ཀུསལཾ ཨཏྠི. མུདུམདྡཝཙིཏྟནྟི མེཏྟཱཝསེན ཨཏིཝིཡ མདྡཝནྟཾ ཙིཏྟཾ. ཡཐཱ མཏྠཀཔྤཏྟཾ ཝཊྚགཱམིཀུསལཾ དསྶེཏུཾ ‘‘མཱཏཱཔིཏཱུནཾ …པེ… མུདུམདྡཝཙིཏྟ’’ནྟི ཝུཏྟཾ, ཨེཝཾ མཏྠཀཔྤཏྟམེཝ ཝིཝཊྚགཱམིཀུསལཾ དསྶེཏུཾ ‘‘ཙཏྟཱརོ སཏི…པེ… བོདྷིཔཀྑིཡདྷམྨཱ’’ཏི ཝུཏྟཾ. ཏདཉྙེཔི པན དཱནསཱིལཱདིདྷམྨཱ ཝཊྚསྶ ཨུཔནིསྶཡབྷཱུཏཱ ཝཊྚགཱམིཀུསལཾ ཝིཝཊྚསྶ ཨུཔནིསྶཡབྷཱུཏཱ ཝིཝཊྚགཱམིཀུསལནྟི ཝེདིཏབྦཱ. པརིཡོསཱནནྟི ཕལཝིསེསཱཝཧཏཱཡ ཕལདཱཡ ཀོཊི སིཁཱཔྤཏྟི, དེཝལོཀེ ཙ པཝཏྟིསིརིཝིབྷཝོཏི པརིཡོསཱནཾ ‘‘མནུསྶལོཀེ’’ཏི ཝིསེསིཏཾ, མནུསྶལོཀཝསེནེཝ ཙཱཡཾ ¶ དེསནཱ ཨཱགཏཱཏི. མགྒཕལནིབྦཱནསམྤཏྟི པརིཡོསཱནནྟི ཡོཛནཱ. ཝིཝཊྚགཱམིཀུསལསྶ ཝིཔཱཀཾ སུཏྟཔརིཡོསཱནེ དསྶིསྶཏི ‘‘ཨཐ ཁོ, བྷིཀྑཝེ, སངྑོ ནཱམ རཱཛཱ’’ཏིཨཱདིནཱ (དཱི. ནི. ༣.༡༠༨).

དལ༹ྷནེམིཙཀྐཝཏྟིརཱཛཀཐཱཝཎྞནཱ

༨༡. ཨིདྷཱཏི ཨིམསྨིཾ ‘‘ཀུསལཱནཾ, བྷིཀྑཝེ, དྷམྨཱན’’ནྟིཨཱདིནཱ (དཱི. ནི. ༣.༡༡༠) སུཏྟདེསནཱཡ ཨཱརདྡྷཊྛཱནེ ཝཊྚཝིཝཊྚགཱམིབྷཱཝེན སཱདྷཱརཎེ ཀུསལགྒཧཎེ. ཏཏྠ ཝཊྚགཱམིཀུསལཱནུསནྡྷིཝསེན ‘‘བྷཱུཏཔུབྦཾ བྷིཀྑཝེ’’ཏི ¶ དེསནཾ ཨཱརབྷི, ཨཱརབྷནྟོ ཙ དེསིཡམཱནམཏྟཾ ¶ . དྷམྨཔཊིགྒཱཧཀཱནཾ བྷིཀྑཱུནཾ སངྑེཔཏོ ཨེཝཾ དཱིཔེཏྭཱ ཨཱརབྷཱིཏི དསྶེཏུཾ ‘‘བྷིཀྑཝེ’’ཏིཨཱདི ཝུཏྟཾ, པཋམཾ ཏཐཱ ཨདཱིཔེནྟོཔི བྷགཝཱ ཨཏྠཏོ དཱིཔེཏི ཝིཡཱཏི ཨདྷིཔྤཱཡོ.

༨༢. ཨཱིསཀམྤཱིཏི ཨཔྤམཏྟཀམྤི. ཨཝསཀྐིཏནྟི ཨོགཏབྷཊྛཾ. ནེམིཨབྷིམུཁནྟི ནེམིཔྤདེསསྶ སམྨུཁཱ. བནྡྷིཾསུ ཙཀྐརཏནསྶ ཨོསཀྐིཏཱནོསཀྐིཏབྷཱཝཾ ཛཱནིཏུཾ. ཏདེཏནྟི ཡཐཱཝུཏྟཊྛཱནཱ ཙཝནཾ. ཨཏིབལཝདོསེཏི རཉྙོ བལཝཏི ཨནཏྠེ ཨུཔཊྛིཏེ སཏི.

ཨཔྤམཏྟོཏི རཉྙོ ཨཱཎཱཡ པམཱདཾ ཨཀརོནྟོ.

ཨེཀསམུདྡཔརིཡནྟམེཝཱཏི ཛམྦུདཱིཔམེཝ སནྡྷཱཡ ཝདཏི. སོ ཨུཏྟརཏོ ཨསྶཀཎྞཔབྦཏེན པརིཙྪིནྣཾ ཧུཏྭཱ ཨཏྟཱནཾ པརིཀྑིཔིཏྭཱ ཋིཏཨེཀསམུདྡཔརིཡནྟོ. པུཉྙིདྡྷིཝསེནཱཏི ཙཀྐཝཏྟིབྷཱཝཱཝཧཱཡ པུཉྙིདྡྷིཡཱ ཝསེན.

༨༣. ཨེཝཾ ཀཏྭཱཏི ཀཱསཱཡཱནི ཝཏྠཱནི ཨཙྪཱདེཏྭཱ. སུཀཏཾ ཀམྨནྟི དསཀུསལཀམྨཔཐམེཝ ཝདཏི.

‘‘དསཝིདྷཾ, དྭཱདསཝིདྷ’’ནྟི ཙ ཝུཏྟཝིབྷཱགོ པརཏོ ཨཱགམིསྶཏི. པཱུརེནྟེནེཝཱཏི པཱུརེཏྭཱ ཋིཏེནེཝ. ནིདྡོསེཏི ཙཀྐཝཏྟིཝཏྟསྶ པཊིཔཀྑབྷཱུཏཱནཾ དོསཱནཾ ཨཔགམནེ ནིདྡོསེ. ཙཀྐཝཏྟཱིནཾ ཝཏྟེཏི ཙཀྐཝཏྟིརཱཛཱུཧི ཝཏྟིཏབྦཝཏྟེ. བྷཱཝིནི བྷཱུཏེ ཝིཡ ཧི ཨུཔཙཱརོ ཡཐཱ ‘‘ཨགམཱ རཱཛགཧཾ བུདྡྷོ’’ཏི (སུ. ནི. ༤༡༠). ཨདྷིགཏཙཀྐཝཏྟིབྷཱཝཱཔི ཧི ཏེ ཏཏྠ ཝཏྟནྟེཝཱཏི ཏཐཱ ཝུཏྟཾ.

ཙཀྐཝཏྟིཨརིཡཝཏྟཝཎྞནཱ

༨༤. ཨཉྙཐཱ ¶ ཝཏྟིཏུཾ ཨདེནྟོ སོ དྷམྨོ ཨདྷིཊྛཱནཾ ཨེཏསྶཱཏི ཏདདྷིཊྛཱནཾ, ཏེན ཏདདྷིཊྛཱནེན ཙེཏསཱ. སཀྐརོནྟོཏི ¶ ཨཱདརཀིརིཡཱཝསེན ཀརོནྟོ. ཏེནཱཧ ‘‘ཡཐཱ’’ཏིཨཱདི. གརུཾ ཀརོནྟོཏི པཱསཱཎཙྪཏྟཾ ཝིཡ གརུཀརཎཝསེན གརུཾ ཀརོནྟོ. ཏེནེཝཱཧ ‘‘ཏསྨིཾ གཱརཝུཔྤཏྟིཡཱ’’ཏི. མཱནེནྟོཏི སམྦྷཱཝནཱཝསེན མནེན པིཡཱཡནྟོ. ཏེནཱཧ ‘‘ཏམེཝཱ’’ཏིཨཱདི. ཨེཝཾ པཱུཛཡཏོ ཨཔཙཱཡཏོ ཨེཝཉྩ ཡཐཱཝུཏྟསཀྐཱརཱདིསམྦྷཝོཏི ཏཾ དསྶེཏུཾ ‘‘ཏཾ ཨཔདིསིཏྭཱ’’ཏིཨཱདི ¶ ཝུཏྟཾ. ‘‘དྷམྨཱདྷིཔཏིབྷཱུཏོ ཨཱགཏབྷཱཝེནཱ’’ཏི ཨིམིནཱ ཡཐཱཝུཏྟདྷམྨསྶ ཛེཊྛཀབྷཱཝེན པུརིམཔུརིམཏརཨཏྟབྷཱཝེསུ སཀྐཙྩ སམུཔཙིཏབྷཱཝཾ དསྶེཏི. ‘‘དྷམྨཝསེནེཝ སབྦཀིརིཡཱནཾ ཀརཎེནཱ’’ཏི ཨེཏེན ཋཱནནིསཛྫཱདཱིསུ ཡཐཱཝུཏྟདྷམྨནིནྣཔོཎཔབྦྷཱརབྷཱཝཾ དསྶེཏི. ཨསྶཱཏི རཀྑཱཝརཎགུཏྟིཡཱ. པརཾ རཀྑནྟོ ཨཉྙཾ དིཊྛདྷམྨིཀཱདིཨནཏྠཏོ རཀྑནྟོ ཏེནེཝ པརཏྠསཱདྷནེན ཁནྟིཨཱདིགུཎེན ཨཏྟཱནཾ ཏཏོ ཨེཝ རཀྑཏི. མེཏྟཙིཏྟཏཱཏི མེཏྟཙིཏྟཏཱཡ. ནིཝཱསནཔཱརུཔནགེཧཱདཱིནཾ སཱིཏུཎྷཱདིཔཊིབཱཧནེན ཨཱཝརཎཾ. ཨནྟོ ཛནསྨིནྟི ཨབྦྷནྟརབྷཱུཏེ པུཏྟདཱརཱདིཛནེ.

‘‘སཱིལསཾཝརེ པཏིཊྛཱཔེཧཱི’’ཏི ཨིམིནཱ རཀྑཾ དསྶེཏི, ‘‘ཝཏྠགནྡྷམཱལཱདཱིནི དེཧཱི’’ཏི ཨིམིནཱ ཨཱཝརཎཾ, ཨིཏརེན གུཏྟིཾ. བྷཏྟཝེཏནསམྤདཱནེནཔཱིཏི པི-སདྡེན སཱིལསཾཝརེ པཏིཊྛཱཔནཱདཱིནི སམྤིཎྜེཏི. ཨེསེཝ ནཡོ ཨིཏོ པརེསུཔི པི-སདྡགྒཧཎེསུ. ནིགམོ ནིཝཱསོ ཨེཏེསནྟི ནེགམཱ, ཨེཝཾ ཛཱནཔདཱཏི ཨཱཧ ‘‘ནིགམཝཱསིནོ’’ཏིཨཱདི.

ནཝཝིདྷཱ མཱནམདཱཏི ‘‘སེཡྻོཧམསྨཱི’’ཏིཨཱདི (སཾ. ནི. ༤.༡༠༨; དྷ. ས. ༡༡༢༡; ཝིབྷ. ༨༦༦; མཧཱནི. ༢༡, ༡༧༨) ནཡཔྤཝཏྟིཡཱ ¶ ནཝཝིདྷཱ མཱནསངྑཱཏཱ མདཱ. མཱནོ ཨེཝ ཧེཏྠ པམཛྫནཱཀཱརེན པཝཏྟིཡཱ མཱནམདོ. སོབྷནེ ཀཱཡིཀཝཱཙསིཀཀམྨེ རཏོཏི སཱུརཏོ ཨུ-ཀཱརསྶ དཱིགྷཾ ཀཏྭཱ, ཏསྶ བྷཱཝོ སོརཙྩཾ, ཀཱཡིཀཝཱཙསིཀོ ཨཝཱིཏིཀྐམོ, སབྦཾ ཝཱ ཀཱཡཝཙཱིསུཙརིཏཾ. སུཊྛུ ཨོརཏོཏི སོརཏོ, ཏསྶ བྷཱཝོ སོརཙྩཾ, ཡཐཱཝུཏྟམེཝ སུཙརིཏཾ. རཱགཱདཱིནནྟི རཱགདོསམོཧམཱནཱདཱིནཾ. དམནཱདཱིཧཱིཏི དམནསམནཔརིནིབྦཱཔནེཧི. ཨེཀམཏྟཱནནྟི ¶ ཨེཀཾ ཙིཏྟཾ, ཨེཀཙྩཾ ཨཏྟནོ ཙིཏྟནྟི ཨཏྠོ. རཱགཱདཱིནཉྷི པུབྦབྷཱགིཡཾ དམནཱདིཔཙྩེཀཾ ཨིཙྪིཏབྦཾ, ན མགྒཀྑཎེ ཝིཡ ཨེཀཛ྄ཛྷཾ པཊིསངྑཱནམུཁེན པཛཧནཏོ. ཨེཀམཏྟཱནནྟི ཝཱ ཝིཝེཀཝསེན ཨེཀཾ ཨེཀཱཀིནཾ ཨཏྟཱནཾ. ཀཱལེ ཀཱལེཏི ཏེསཾ སནྟིཀཾ ཨུཔསངྐམིཏབྦེ ཀཱལེ ཀཱལེ.

ཨིདྷ ཋཏྭཱཏི ‘‘ཨིདཾ ཁོ, ཏཱཏ, ཏ’’ནྟི ཨེཝཾ ནིགམནཝསེན ཝུཏྟཊྛཱནེ ཋཏྭཱ. ཝཏྟནྟི ཨརིཡཙཀྐཝཏྟིཝཏྟཾ. སམཱནེཏབྦནྟི ‘‘དསཝིདྷཾ, དྭཱདསཝིདྷ’’ནྟི ཙ ཧེཊྛཱ ཝུཏྟགཎནཱཡ ཙ སམཱནཾ ཀཱཏབྦཾ ཨནཱུནཾ ཨནདྷིཀཾ ཀཏྭཱ དསྶེཏབྦཾ. ཨདྷམྨརཱགསྶཱཏི ཨཡུཏྟཊྛཱནེ རཱགསྶ. ཝིསམལོབྷསྶཱཏི ཡུཏྟཊྛཱནེཔི ཨཏིཝིཡ བལཝབྷཱཝེན པཝཏྟལོབྷསྶ.

ཙཀྐརཏནཔཱཏུབྷཱཝཝཎྞནཱ

༨༥. ཝཏྟམཱནསྶཱཏི ¶ པརིཔུཎྞེ ཙཀྐཝཏྟིཝཏྟེ ཝཏྟམཱནསྶ, ནོ ཨཔརིཔུཎྞེཏི ཨཱཧ ‘‘པཱུརེཏྭཱ ཝཏྟམཱནསྶཱ’’ཏི. ཀིཏྟཱཝཏཱ པནསྶ པཱརིཔཱུརཱི ཧོཏཱིཏི? ཏཏྠ ‘‘ཀཏཱདྷིཀཱརསྶ ཏཱཝ ཧེཊྛིམཔརིཙྪེདེན དྭཱདསཧིཔི སཾཝཙྪརེཧི པཱུརཏི, པཉྩཝཱིསཏིཡཱ, པཉྙཱསཱཡ ཝཱ སཾཝཙྪརེཧི. ཨཡཉྩ བྷེདོ དྷམྨཙྪནྡསྶཔི ཏིཀྑམཛ྄ཛྷམུདུཏཱཝསེན, ཨིཏརསྶ ཏཏོ བྷིཡྻོཔཱི’’ཏི ཝདནྟི.

དུཏིཡཱདིཙཀྐཝཏྟིཀཐཱཝཎྞནཱ

༩༠. ཨཏྟནོ མཏིཡཱཏི པརམྤརཱགཏཾ པུརཱཎཾ ཏནྟིཾ པཝེཎིཾ ལངྒྷིཏྭཱ ཨཏྟནོ ཨིཙྪིཏཱཀཱརེན. ཏེནཱཧ ‘‘པོརཱཎཀ’’ནྟིཨཱདི.

ན ¶ པབྦནྟཱིཏི སམིདྡྷིཡཱ ན པཱུརེནྟི, ཕཱིཏཱ ན ཧོནྟཱིཏི ཨཏྠོ. ཏེནཱཧ ‘‘ན ཝཌྜྷནྟཱི’’ཏི. ཏཐཱ ཙཱཧ ‘‘ཀཏྠཙི སུཉྙཱ ཧོནྟཱི’’ཏི. ཏཏྠ ཏཏྠ རཱཛཀིཙྩེ རཉྙཱ ཨམཱ སཧ ཝཏྟནྟཱིཏི ཨམཙྩཱ, ཡེཧི ཝིནཱ རཱཛཀིཙྩཾ ནཔྤཝཏྟཏི. པརམྤརཱགཏཱ ཧུཏྭཱ རཉྙོ པརིསཱཡ བྷཝཱཏི པཱརིསཛྫཱ. ཏེནཱཧ ‘‘པརིསཱཝཙརཱ’’ཏི. ཏསྨིཾ ཋཱནནྟརེ ཋཔིཏཱ ཧུཏྭཱ རཉྙོ ཨཱཡཾ, ཝཡཉྩ ཡཱཐཱཝཏོ གཎེནྟཱིཏི གཎཀཱ. ཛཱཏིཀུལསུཏཱཙཱརཱདིཝསེན པུཐུཏྟཾ གཏཏྟཱ མཧཏཱི མཏྟཱ ཨེཏེསནྟི མཧཱམཏྟཱ, ཏེ པན མཧཱནུབྷཱཝཱ ཨམཙྩཱ ཨེཝཱཏི ཨཱཧ ‘‘མཧཱཨམཙྩཱ’’ཏི. ཡེ རཉྙོ ཧཏྠཱནཱིཀཱདཱིསུ ཨཝཊྛིཏཱ, ཏེ ཨནཱིཀཊྛཱཏི ཨཱཧ ‘‘ཧཏྠིཨཱཙརིཡཱདཡོ’’ཏི ¶ . མནྟཾ པཉྙཾ ཨསིཏཱ ཧུཏྭཱ ཛཱིཝནྟཱིཏི མནྟསྶཱཛཱིཝིནོ, མཏིསཛཱིཝཱཏི ཨཏྠོ, ཡེ ཏཏྠ ཏཏྠ རཱཛཀིཙྩེ ཨུཔདེསདཱཡིནོ. ཏེནཱཧ ‘‘མནྟཱ ཝུཙྩཏི པཉྙཱ’’ཏིཨཱདི.

ཨཱཡུཝཎྞཱདིཔརིཧཱནིཀཐཱཝཎྞནཱ

༩༡. བལཝལོབྷཏྟཱཏི ‘‘ཨིམསྨིཾ ལོཀེ ཨིདཱནི དལིདྡམནུསྶཱ ནཱམ བཧཱུ, ཏེསཾ སབྦེསཾ དྷནེ ཨནུཔྤདིཡམཱནེ མཡ྄ཧཾ ཀོསསྶ པརིཀྑཡོ ཧོཏཱི’’ཏི ཨེཝཾ ཨུཔྤནྣབལཝལོབྷཏྟཱ. ཨུཔརཱུཔརིབྷཱུམཱིསཱུཏི ཚཀཱམསགྒསངྑཱཏཱསུ ཨུཔརཱུཔརིཀཱམབྷཱུམཱིསུ. ཀམྨསྶ ཕལཾ ཨགྒཾ ནཱམ, ཏཾ པནེཏྠ ཨུདྡྷགཱམཱིཏི ཨཱཧ ‘‘ཨུདྡྷཾ ཨགྒཾ ཨསྶཱ’’ཏི. སགྒེ ནིཡུཏྟཱ, སགྒཔྤཡོཛནཱཏི ཝཱ སོཝགྒིཀཱ. དསནྣཾ ཝིསེསཱནནྟི དིབྦཨཱཡུཝཎྞཡསསུཁཨཱདྷིཔཏེཡྻཱནཉྩེཝ དིབྦརཱུཔཱདཱིནཉྩ ཕལཝིསེསཱནཾ ¶ . ཝཎྞགྒཧཎེན ཙེཏྠ སཀོ ཨཏྟབྷཱཝཝཎྞོ གཧིཏོ, རཱུཔགྒཧཎེན བཧིདྡྷཱ རཱུཔཱརམྨཎཾ.

༩༢. སུཊྛུ ¶ ནིསིདྡྷནྟི ཡཐཱཡཾ ཨིམིནཱ ཨཏྟབྷཱཝེན ཨདིནྣཾ ཨཱདཱཏུཾ ན སཀྐོཏི, ཨེཝཾ སམྨདེཝ ཏཏོ ནིསེདྷིཏཾ ཀཏྭཱ. མཱུལཧཏནྟི ཛཱིཝིཏཱ ཝོརོཔནེན མཱུལེ ཨེཝ ཧཏཾ.

༩༦. རཱགཝསེན ཙརཎཾ ཙརིཏྟཾ, ཙརིཏྟམེཝ ཙཱརིཏྟཾ, མེཐུནནྟི ཨདྷིཔྤཱཡོ, ཏཾ པན ‘‘པརེསཾ དཱརེསཱུ’’ཏི ཝུཏྟཏྟཱ ‘‘མིཙྪཱཙཱར’’ནྟི ཨཱཧ.

༡༠༠. པཙྩནཱིཀདིཊྛཱིཏི ‘‘ཨཏྠི དིནྣ’’ནྟིཨཱདིཀཱཡ (མ. ནི. ༡.༤༤༡; ༢.༩༤; ཝིབྷ. ༧༩༣) སམྨཱདིཊྛིཡཱ པཊིཔཀྑབྷཱུཏཱ དིཊྛི.

༡༠༡. མཱཏུཙྪཱདིཀཱ ཨུཔརི སཡམེཝ ཝཀྑཏི. ཨཏིབལཝལོབྷོཏི ཨཏིཝིཡ བལཝཱ བཧལཀིལེསོ, ཡེན ཨཀཱལེ, ཨདེསེ ཙ པཝཏྟཏི. མིཙྪཱདྷམྨོཏི མིཙྪཱ ཝིཔརཱིཏོ ཨཝིསབྷཱགཝཏྠུཀོ ལོབྷདྷམྨོ. ཏེནཱཧ ‘‘པུརིསཱན’’ནྟིཨཱདི.

ཏསྶ བྷཱཝོཏི ཡེན མེཏྟཱཀརུཎཱཔུབྦངྒམེན ཙིཏྟེན པུགྒལོ ‘‘མཏྟེཡྻོ’’ཏི ཝུཙྩཏི, སོ ཏསྶ ཡཐཱཝུཏྟཙིཏྟུཔྤཱདོ, ཏཾསམུཊྛཱནཱ ཙ ཀིརིཡཱ མཏྟེཡྻཏཱ. ཏེནཱཧ ‘‘མཱཏརི སམྨཱ པཊིཔཏྟིཡཱ ཨེཏཾ ནཱམ’’ནྟི ¶ . ཡཱ སམྨཱ པཛྫིཏབྦེ སམྨཱ ཨཔྤཊིཔཏྟི, སོཔི དོསོ ཨགཱརཝཀིརིཡཱདིབྷཱཝཏོ. ཝིཔྤཊིཔཏྟིཡཾ པན ཝཏྟབྦམེཝ ནཏྠཱིཏི ཨཱཧ ‘‘ཏསྶཱ ཨབྷཱཝོ ཙེཝ ཏཔྤཊིཔཀྑཏཱ ཙ ཨམཏྟེཡྻཏཱ’’ཏི. ཀུལེ ཛེཊྛཱནནྟི ཨཏྟནོ ཀུལེ ཝུདྡྷཱནཾ མཧཱཔིཏུཙཱུལ༹པིཏུཛེཊྛཀབྷཱཏིཀཱདཱིནཾ.

དསཝསྶཱཡུཀསམཡཝཎྞནཱ

༡༠༣. ‘‘ཡ’’ནྟི ཨིམིནཱ སམཡོ ཨཱམཊྛོ, བྷུམྨཏྠེ ཙེཏཾ པཙྩཏྟཝཙནནྟི ཨཱཧ ‘‘ཡསྨིཾ སམཡེ’’ཏི. ཨལཾ པཏིནོཏི ཨལཾཔཏེཡྻཱ. ཏསྶཱ པརིཡཏྟཏཱ བྷརིཡཱབྷཱཝེནཱཏི ཨཱཧ ‘‘དཱཏུཾ ཡུཏྟཱ’’ཏི. ཨགྒརསཱནཱིཏི མདྷུརབྷཱཝེན, བྷེསཛྫབྷཱཝེན ཙ ཨགྒབྷཱུཏརསཱནི.

དིཔྤིསྶནྟཱིཏི ¶ པཊིཔཀྑབྷཱཝེན སམུཛྫལིསྶནྟི. ཏེནཱཧ ‘‘ཀུསལནྟིཔི ན བྷཝིསྶཏཱི’’ཏི ¶ . ཨཧོ པུརིསོཏི མཱཏཱདཱིསུཔི ཨཱིདིསོ, ཨཉྙེསཾ ཀེསཾ ཀིཾ ཝིསྶཛྫེསྶཏི, ཨཧོ ཏེཛཝཔུརིསོཏི.

གེཧེ མཱཏུགཱམཾ ཝིཡཱཏི ཨཏྟནོ གེཧེ དཱསིབྷརིཡཱབྷཱུཏམཱཏུགཱམཾ ཝིཡ. མིསྶཱིབྷཱཝནྟི མཱཏཱདཱིསུ བྷརིཡཱཡ ཝིཡ ཙཱརིཏྟསངྐརཾ.

བལཝཀོཔོཏི ཧནྟུཀཱམཏཱཝསེན ཨུཔྤཏྟིཡཱ བལཝཀོཔོ. ཨཱགྷཱཏེཏཱིཏི ཨཱཧནཏི, ཨཏྟནོ ཀཀྑལ༹ཕརུསབྷཱཝེན ཙིཏྟཾ ཝིབཱདྷཏཱིཏི ཨཏྠོ. ནིསྶཡདཧནརསོ ཧི དོསོ. བྱཱཔཱདེཏཱིཏི ཝིནཱསེཏི, མནོཔདཱུསནཏོ མནསྶ པཀོཔནཏོ. ཏིབྦནྟི ཏིཀྑཾ, སཱ པནསྶ ཏིཀྑཏཱ སརཱིརེ ཨཝཧནྟེཔི སིནེཧཝཏྠུཾ ལངྒྷིཏྭཱཔི པཝཏྟིཡཱ ཝེདིཏབྦཱཏི ཨཱཧ ‘‘པིཡམཱནསྶཔཱི’’ཏིཨཱདི.

༡༠༤. ཀཔྤཝིནཱསོ ཀཔྤོ ཨུཏྟརཔདལོཔེན, ཨནྟརཱཝ ཀཔྤོ ཨནྟརཀཔྤོ. ཏཎྷཱདིབྷེདོ ཀཔྤོ ཨེཏསྶ ཨཏྠཱིཏི ཀཔྤོ, སཏྟལོཀོཏི ཨཱཧ ‘‘ཨནྟརཱཝ ལོཀཝིནཱསོ’’ཏི. སྭཱཡཾ ཨནྟརཀཔྤོ ཀཏིཝིདྷོ, ཀཐཉྩསྶ སམྦྷཝོ, ཀིཾ གཏིཀོཏི ཨནྟོགདྷཾ ཙོདནཾ སནྡྷཱཡཱཧ ‘‘ཨནྟརཀཔྤོ ཙ ནཱམཱ’’ཏིཨཱདི. ལོབྷུསྶདཱཡཱཏི ལོབྷཱདྷིཀཱཡ པཛཱཡ ཝཏྟམཱནཱཡ.

ཨེཝཾ ཙིནྟཡིཾསཱུཏི པུབྦེ ཡཐཱནུསྶཝཱནུསྶརཎེན, ཨཏྟནོ ཙ ཨཱཡུཝིསེསསྶ ལབྷནཏོ. གུམྦལཏཱདཱིཧི གཧནཾ ཋཱནནྟི གུམྦལཏཱདཱིཧི སཉྪནྣཏཱཡ གཧནབྷཱུཏཾ ཋཱནཾ. རུཀྑེཧི ¶ གཧནནྟི རུཀྑེཧི ནིརནྟརནིཙིཏེཧི གཧནབྷཱུཏཾ ¶ . ནདཱིཝིདུགྒནྟི ཚིནྣཏཊཱཧི ནདཱིཧི ཨོརཏོ, པཱརཏོ ཙ ཝིདུགྒཾ. ཏེནཱཧ ‘‘ནདཱིན’’ནྟིཨཱདི. པབྦཏེཧི ཝིསམཾ པབྦཏནྟརཾ. པབྦཏེསུ ཝཱ ཚིནྣཏཊེསུ དུརཱརོཧཾ ཝིསམཊྛཱནཾ. སབྷཱགེཏི ཛཱིཝནཝསེན སམཱནབྷཱགེ སདིསེ ཀརིསྶནྟི.

ཨཱཡུཝཎྞཱདིཝཌྜྷནཀཐཱཝཎྞནཱ

༡༠༥. ཨཱཡཏནྟི ཝཱ དཱིགྷཾ ཙིརཀཱལིཀཾ. མརཎཝསེན ཧི ཉཱཏིཀྑཡོ ཨཱཡཏོ ཨཔུནརཱཝཏྟནཏོ, ན རཱཛབྷཡཱདིནཱ ཨུཀྐམནཝསེན པུནརཱཝཏྟིཡཱཔི ཏསྶ ལབྦྷནཏོ. ཨོསཀྐེཡྻཱམཱཏི ཨོརམེཡྻཱམ. ཝིརམཎམྤི ཨཏྠཏོ པཛཧནམེཝ པརིཙྩཛནབྷཱཝཏོཏི ཨཱཧ ‘‘པཛཧེཡྻཱམཱཏི ཨཏྠོ’’ཏི. སཱིལགབྦྷེ ཝཌྜྷིཏཏྟཱཏི མཱཏུ, པིཏུ ཙ སཱིལཝནྟཏཱཡ ཏདཝཡཝབྷཱུཏེ གབྦྷེ ཝཌྜྷི ‘‘སཱིལགབྦྷེ ཝཌྜྷིཏཱ’’ཏི ཝུཏྟཱ, ཨེཏེན ཨུཏུཨཱཧཱརསྶ ཝིཡ ཏདཉྙསྶཱཔི བཱཧིརསྶ པཙྩཡསྶ ཝསེན སཏྟསནྟཱནསྶ ཝིསེསཱདྷཱནཾ ཧོཏཱིཏི དསྶེཏི. ཡཾ པནེཏྠ ཝཏྟབྦཾ, ཏཾ བྲཧྨཛཱལཊཱིཀཱཡཾ ¶ (དཱི. ནི. ཊཱི. ༡.༧) ཝུཏྟམེཝ. ཁེཏྟཝིསུདྡྷིཡཱཏི ཨདྷིཊྛཱནབྷཱུཏཝཏྠུཝིསུདྡྷིཡཱ. ནནུ ཙ ཏཾ ཝིསེསཱདྷཱནཾ ཛཱཡམཱནཾ རཱུཔསནྟཏིཡཱ ཨེཝ བྷཝེཡྻཱཏི? སཙྩམེཏཾ, རཱུཔསནྟཏིཡཱ པན ཏཐཱ ཨཱཧིཏཝིསེསཱཡ ཨརཱུཔསནྟཏིཔི ལདྡྷཱུཔཀཱརཱ ཨེཝ ཧོཏི ཏཔྤཊིབདྡྷཝུཏྟིབྷཱཝཏོ. ཡཐཱ ཀབལཱི༹ཀཱརཱཧཱརེན ཨུཔཏྠམྦྷིཏེ རཱུཔཀཱཡེ སབྦོཔི ཨཏྟབྷཱཝོ ཨནུགྒཧིཏོ ཨེཝ ནཱམ ཧོཏི, ཡཐཱ པན རཉྙོ ཙཀྐཝཏྟིནོ པུཉྙཝིསེསཾ ཨུཔནིསྶཱཡ ཏསྶ ཨིཏྠིརཏནཱདཱིནཾ ཨནཉྙསཱདྷཱརཎཱ ཏེ ཏེ ཝིསེསཱ སམྦྷཝནྟི ཏབྦྷཱཝེ བྷཱཝཏོ, ཏདབྷཱཝེ ཙ ཨབྷཱཝཏོ, ཨེཝམེཝ ¶ ཏསྨིཾ ཀཱལེ མཱཏཱཔིཏཱུནཾ ཡཐཱཝུཏྟཔུཉྙཝིསེསཾ ཨུཔནིསྶཱཡ ཏེསཾ པུཏྟཱནཾ ཛཱཡམཱནཱནཾ དཱིགྷཱཡུཀཏཱ ཁེཏྟཝིསུདྡྷིཡཱཝ ཧོཏཱིཏི ཝེདིཏབྦཱ སཾཝེགདྷམྨཚནྡཱདིསམུཔབྲཱུཧིཏཱཡ ཏདཱ ཏེསཾ ཀུསལཙེཏནཱཡ ཏཐཱ ཨུལཱ༹རབྷཱཝེན སམུཔྤཛྫནཏོ. ཨེཏྠཱཏི ཨིམསྨིཾ མནུསྶལོཀེ, ཏཏྠཱཏི ཡཐཱཝུཏྟཾ ཀུསལདྷམྨཾ སམཱདཱཡ ཝཏྟམཱནེ སཏྟནིཀཱཡེ. ཏཏྠེཝཱཏི ཏསྨིཾཡེཝ སཏྟནིཀཱཡེ. ‘‘ཨཏྟནོཝ སཱིལསམྤཏྟིཡཱ’’ཏི ཝུཏྟཾ སསནྟཏིཔརིཡཱཔནྣསྶ དྷམྨསྶ ཏཏྠ ཝིསེསཔྤཙྩཡབྷཱཝཏོ. ཁེཏྟཝིསུདྡྷིཔི པན ཨིདྷཱཔི པཊིཀྑིཔིཏུཾ ན སཀྐཱ.

ཀོཊྛཱསཱཏི ¶ ཙཏྟཱརཱིསཝསྶཱཡུཀཱཏིཨཱདཡོ ཨསཱིཏིཝསྶསཧསྶཱཡུཀཔརིཡོསཱནཱ ཨེཀཱདས ཀོཊྛཱསཱ. ཨདིནྣཱདཱནཱདཱིཧཱིཏི ཨཱདི-སདྡེན ཀུལེ ཛེཊྛཱཔཙཱཡིཀཱཔརིཡོསཱནཱནཾ དསནྣཾ པཱཔཀོཊྛཱསཱནཾ གཧཎཾ.

སངྑརཱཛཨུཔྤཏྟིཝཎྞནཱ

༡༠༦. ཨེཝཾ ཨུཔྤཛྫནཀཏཎྷཱཏི ཨེཝཾ ཝཙཱིབྷེདཾ པཱཔནཝསེན པཝཏྟཱ བྷུཉྫིཏུཀཱམཏཱ. ཨནསནནྟི ཀཱཡིཀཀིརིཡཱཨསམཏྠཏཱཧེཏུབྷཱུཏོ སརཱིརསངྐོཙོ. ཏེནཱཧ ‘‘ཨཝིཔྥཱརིཀབྷཱཝོ’’ཏིཨཱདི. གྷནནིཝཱསཏནྟི གཱམནིགམརཱཛདྷཱནཱིནཾ གྷནནིཝིཊྛཏཾ ཨཉྙམཉྙསྶ ནཱཏིདཱུརཝཏྟིཏཾ. ནིརནྟརཔཱུརིཏོཏི ནིརནྟརཾ ཝིཡ པུཎྞོ ཏཏྲུཔགཱནཾ སཏྟཱནཾ བཧུབྷཱཝཏོ.

མེཏྟེཡྻབུདྡྷུཔྤཱདཝཎྞནཱ

༡༠༧. ཀིཉྩཱཔི པུབྦེ ཝཌྜྷམཱནཀཝསེན དེསནཱ ཨཱགཏཾ, ཨིདཾ པན ན ཝཌྜྷམཱནཀཝསེན ཝུཏྟཾ. ཀསྨཱཏི ཙེ ཨཱཧ ‘‘ན ཧཱི’’ཏིཨཱདི. སཏྟཱནཾ ཝཌྜྷམཱནཱཡུཀཀཱལེ བུདྡྷཱ ན ནིབྦཏྟནྟི སཾསཱརེ སཾཝེགསྶ དུབྦིབྷཱཝནཱིཡཏྟཱ ¶ . ཏཏོ ཝསྶསཏསཧསྶཏོ ཨོརམེཝ བུདྡྷུཔྤཱདཀཱལོ.

༡༠༨. སམུསྶིཏཊྛེན ¶ ཡཱུཔོ ཝིཡཱཏི ཡཱུཔོ, ཡཱུཔནྟི ཨེཏྠ སཏྟཱ ཨནེཀབྷཱུམིཀཱུཊཱགཱརོཝརཀཱདིཝནྟཏཱཡཱཏི ཡཱུཔོ, པཱསཱདོ. རཉྙོ ཧེཏུབྷཱུཏེནཱཏི ཧེཏུཨཏྠེ ཀརཎཝཙནནྟིདསྶེཏིཨུསྶཱཧསམྤཏྟིཨཱདིནཱ. མཧཏཱ རཱཛཱནུབྷཱཝེན, མཧཏཱ ཙ ཀིཏྟིསདྡེན སམནྣཱགཏཏྟཱ ཙཏཱུཧི སངྒཧཝཏྠཱུཧི མཧཱཛནསྶ རཉྫནཏོ མཧཱཔནཱདོ ནཱམ རཱཛཱ ཛཱཏོ. ཛཱཏཀེཏི མཧཱཔནཱདཛཱཏཀེ (ཛཱ. ༡.༣.༤༠ མཧཱཔནཱདཛཱཏཀེ).

པནཱདོ ནཱམ སོ རཱཛཱཏི ‘‘ཨཏཱིཏེ པནཱདོ ནཱམ སོ རཱཛཱ ཨསྶོསཱི’’ཏི ཨཏྟབྷཱཝནྟརཏཱཡ ཨཏྟཱནཾ པརཾ ཝིཡ ནིདྡིསཏི. ཨཱཡསྨཱ ཧི བྷདྡཛིཏྠེརོ ཨཏྟནཱ ཨཛ྄ཛྷཱཝུཏྠཔུབྦཾ སུཝཎྞཔཱསཱདཾ དསྶེཏྭཱ ཨེཝམཱཧ. ཡསྶ ཡཱུཔོ སུཝཎྞཡོཏི ཡསྶ རཉྙོ ཨཡཾ ཡཱུཔོ པཱསཱདོ སུཝཎྞཡོ སུཝཎྞམཡོ. ཏིརིཡཾ སོལ༹སུབྦེདྷོཏི ཝིཏྠཱརཏོ སོལ༹སསརཔཱཏཔྤམཱཎོ, སོ པན ཨཌྜྷཡོཛནཔྤམཱཎོ ཧོཏི. ཨུབྦྷམཱཧུ ¶ སཧསྶདྷཱཏི ཨུབྦྷཾ ཨུཙྩབྷཱཝཾ ཨསྶ པཱསཱདསྶ སཧསྶདྷཱ སཧསྶཀཎྜཔྤམཱཎཾ ཨཱཧུ, སོ པན ཡོཛནཏོ པཉྩཝཱིསཏིཡོཛནཔྤམཱཎོ ཧོཏི. ཀེཙི པནེཏྠ གཱཐཱསུཁཏྠཾ ‘‘ཨཱཧཱུ’’ཏི དཱིགྷཾ ཀཏཾ, ཨཧུ ཨཧོསཱིཏི ཨཏྠཾ ཝདནྟི.

སཧསྶཀཎྜོཏི སཧསྶབྷཱུམིཀོ, ‘‘སཧསྶཁཎྜོ’’ ཏིཔི པཱཋོ, སོ ཨེཝ ཨཏྠོ. སཏགེཎྜཱུཏི ཨནེཀསཏནིཡཱུཧཀོ. དྷཛཱལཱུཏི ཏཏྠ ཏཏྠ ནིཡཱུཧསིཁརཱདཱིསུ པཏིཊྛཔིཏེཧི སཏྟིདྷཛཝཱིརངྒདྷཛཱདཱིཧི དྷཛེཧི སམྤནྣོ. ཧརིཏཱམཡོཏི ཙཱམཱིཀརསུཝཎྞམཡོ. ཀེཙི པན ཧརིཏཱམཡོཏི ‘‘ཧརིཏམཎིཔརིཀྑཊོ’’ཏི ཝདནྟི. གནྡྷབྦཱཏི ནཊཱ. ཚསཧསྶཱནི སཏྟདྷཱཏི ཚམཏྟཱནི གནྡྷབྦསཧསྶཱནི སཏྟདྷཱ ཏསྶ པཱསཱདསྶ སཏྟསུ ཋཱནེསུ རཉྙོ ཨབྷིརམཱཔནཏྠཾ ནཙྩིཾསཱུཏི ཨཏྠོ. ཏེ ¶ ཨེཝཾ ནཙྩནྟཱཔི ཀིར རཱཛཱནཾ ཧཱསེཏུཾ ནཱསཀྑིཾསུ. ཨཐ སཀྐོ དེཝརཱཛཱ དེཝནཊཾ པེསེཏྭཱ སམཛྫཾ ཀཱརེསི, ཏདཱ རཱཛཱ ཧསཱིཏི.

ཀོཊིགཱམོ ནཱམ མཱཔིཏོ. ཝཏྠཱུཏི བྷདྡཛིཏྠེརསྶ ཝཏྠུ. ཏཾ ཐེརགཱཐཱཝཎྞནཱཡཾ (ཐེརགཱ. ཨཊྛ. བྷདྡཛིཏྠེརགཱཐཱཝཎྞནཱཡ) ཝིཏྠཱརཏོ ཨཱགཏམེཝ. ཨིཏརསྶཱཏི ནལ༹ཀཱརདེཝཔུཏྟསྶ. ཨཱནུབྷཱཝཱཏི པུཉྙཱནུབྷཱཝནིམིཏྟཾ.

དཱནཝསེན དཏྭཱཏི ཏཾ པཱསཱདཾ ཨཏྟནོ པརིགྒཧབྷཱཝཝིཡོཛནེན དཱནམུཁེ ནིཡོཛེཏྭཱ. ཝིསྶཛྫེཏྭཱཏི ཙིཏྟེནེཝ པརིཙྩཛནཝསེན དཏྭཱ པུན དཀྑིཎེཡྻཱནཾ སནྟཀབྷཱཝཀརཎེན ནིརཔེཀྑཔརིཙྩཱགཝསེན ཝིསྶཛྫེཏྭཱ. ཨེཏྟཀེནཱཏི ‘‘བྷཱུཏཔུབྦཾ བྷིཀྑཝེ’’ཏི ཨཱདིཾ ཀཏྭཱ ཡཱཝ ‘‘པབྦཛིསྶཏཱི’’ཏི པདཾ ཨེཏྟཀེན དེསནཱམགྒེན.

བྷིཀྑུནོ ཨཱཡུཝཎྞཱདིཝཌྜྷནཀཐཱཝཎྞནཱ

༡༡༠. ཨིདཾ ¶ བྷིཀྑུནོ ཨཱཡུསྨིནྟི ཨཱཡུསྨིཾ སཱདྷེཏབྦེ ཨིདཾ བྷིཀྑུནོ ཨིཙྪིཏབྦཾ ཙིརཛཱིཝིཏཱཡ ཧེཏུབྷཱཝཏོཏི. ཏེནཱཧ ‘‘ཨིདཾ ཨཱཡུཀཱརཎ’’ནྟི.

སམྤནྣསཱིལསྶ ཨཝིཔྤཊིསཱརཔཱམོཛྫཔཱིཏིཔསྶདྡྷིསུཁསམཱདྷིཡཐཱབྷཱུཏཉཱཎཱདིསམྦྷཝཏོ ཏཾསམུཊྛཱནཔཎཱིཏརཱུཔེཧི ཀཱཡསྶ ཕུཊཏྟཱ སརཱིརེ ཝཎྞདྷཱཏུ ¶ ཝིཔྤསནྣཱ ཧོཏི, ཀལྱཱཎོ ཙ ཀིཏྟིསདྡོ ཨབྦྷུགྒཙྪཏཱིཏི ཨཱཧ ‘‘སཱིལཝཏོ ཧཱི’’ཏིཨཱདི.

ཝིཝེཀཛཾ པཱིཏིསུཁཱདཱིཏི ཨཱདི-སདྡེན སམཱདྷིཛཾ པཱིཏིསུཁཾ, ཨཔཱིཏིཛཾ ཀཱཡསུཁཾ, སཏིཔཱརིསུདྡྷིཛཾ ཨུཔེཀྑཱསུཁཉྩ སངྒཎྷཱཏི.

ཨཔྤཊིཀྐཱུལཏཱཝཧོཏི ཨཔྤམཱཎཱནཾ སཏྟཱནཾ, ཨཏྟནོ ཙ ཏེསུ ཨཔྤཊིཀྐཱུལབྷཱཝཏོ. ཧིཏཱུཔསཾཧཱརཱདིཝསེན པཝཏྟིཡཱ སབྦདིསཱསུ ཕརཎཨཔྤམཱཎཝསེན སབྦདིསཱསུ ཝིཔྥཱརིཀཏཱ.

‘‘ཨརཧཏྟཕལསངྑཱཏཾ བལ’’ནྟི ཝུཏྟཾ ཏསྶ ཨཀུཔྤདྷམྨཏཱཡ ཀེནཙི ཨནབྷིབྷཝནཱིཡབྷཱཝཏོ.

‘‘ལོཀེ’’ཏི ཨིདཾ ཡཐཱ ‘‘ཨེཀབལམྤཱི’’ཏི ཨིམིནཱ སམྦནྡྷཱིཡཏི, ཨེཝཾ ¶ ‘‘དུཔྤསཧཾ དུརབྷིསམྦྷཝ’’ནྟི ཨིམེཧིཔི སམྦནྡྷིཏབྦཾ. ལོཀཔརིཡཱཔནྣེཧེཝ ཧི དྷམྨེཧི ཏེསཾ བལསྶ དུཔྤསཧཏཱ, དུརབྷིསམྦྷཝཏཱ, ན ལོཀུཏྟརེཧཱིཏི. ཨེཏྠེཝཱཏི ཨེཏསྨིཾ ཨརཧཏྟཕལེ ཨེཝ, ཏདཏྠནྟི ཨཏྠོ.

ལོཀུཏྟརཔུཉྙམྤཱིཏི ལོཀུཏྟརཔུཉྙམྤི པུཉྙཕལམྤི. ཡཱཝ ཨཱསཝཀྑཡཱ པཝཌྜྷཏི ཝིཝཊྚགཱམིཀུསལདྷམྨཱནཾ སམཱདཱནཧེཏཱུཏི ཡོཛནཱ. ཨམཏཔཱནཾ པིཝིཾསུ ཧེཊྛིམམགྒཕལསམདྷིགམཝསེནཱཏི ཨདྷིཔྤཱཡོ.

ཙཀྐཝཏྟིསུཏྟཝཎྞནཱཡ ལཱིནཏྠཔྤཀཱསནཱ.

༤. ཨགྒཉྙསུཏྟཝཎྞནཱ

ཝཱསེཊྛབྷཱརདྭཱཛཝཎྞནཱ

༡༡༡. ཨེཏྠཱཏི ¶ ¶ ¶ ‘‘པུབྦཱརཱམེ, མིགཱརམཱཏུཔཱསཱདེ’’ཏི ཨེཏསྨིཾ པདདྭཡེ. ཀོཡཾ པུབྦཱརཱམོ, ཀཐཉྩ པུབྦཱརཱམོ, ཀཱ ཙ མིགཱརམཱཏཱ, ཀཐཉྩསྶཱ པཱསཱདོ ཨཧོསཱིཏི ཨེཏསྨིཾ ཨནྟོལཱིནེ ཨནུཡོགེ. ཨཡཾ ཨིདཱནི ཝུཙྩམཱནཱ ཨནུཔུབྦིཀཐཱ ཨཱདིཏོ པཊྛཱཡ སངྑེཔེནེཝ ཨནུཔུབྦིཀཐཱ. པདུམུཏྟརཾ བྷགཝནྟཾ ཨེཀཾ ཨུཔཱསིཀཾ ཨགྒུཔཊྛཱཡིཀཊྛཱནེ ཋཔེནྟིཾ དིསྭཱན ཏཏྠ སཉྫཱཏགཱརཝབཧུམཱནཱ ཏམེཝཏྠཾ པུརཀྑཏྭཱ བྷགཝནྟཾ ནིམནྟེཏྭཱ. མེཎྜཀཔུཏྟསྶཱཏི མེཎྜཀསེཊྛིཔུཏྟསྶ. སོཏཱཔནྣཱ ཨཧོསི ཏཐཱ ཀཏཱདྷིཀཱརཏྟཱ.

མཱཏུཊྛཱནེ ཋཔེསི ཨཏྟནོ སཱིལཱཙཱརསམྤཏྟིཡཱ གརུཊྛཱནིཡཏྟཱ. ཨུཔཡོགནྟི ཏཏྠ ཏཏྠ ཨཔྤེཏབྦཊྛཱནེ ཨཔྤནཱཝསེན ཝིནིཡོགཾ ཨགམཾསུ. ཨཉྙེཧི ཙ ཝེལུ༹རིཡལོཧིཏངྐམསཱརགལླཱདཱིཧི. བྷསྶཏཱིཏི ཨོཏརཏི. སུདྡྷཔཱསཱདོཝ ན སོབྷཏཱིཏི ཀེཝལོ ཨེཀཔཱསཱདོ ཨེཝ ཝིཧཱརོ ན སོབྷཏི. ནིཡཱུཧཱནི བཧཱུནི ནཱིཧརིཏྭཱ ཀཏྟབྦསེནཱསནཱནི ‘‘དུཝཌྜྷགེཧཱནཱི’’ཏི ཝདནྟི. མཛ྄ཛྷེ གབྦྷོ སམནྟཏོ ཨནུཔརིཡཱཡཏོཏི ཨེཝཾ དྭིཀྑཏྟུཾ ཝཌྜྷེཏྭཱ ཀཏསེནཱསནཱནི དུཝཌྜྷགེཧཱནི. ཙཱུལ༹པཱསཱདཱཏི ཁུདྡཀཔཱསཱདཱ.

ཨུཏྟརདེཝཱིཝིཧཱརོ ནཱམ ནགརསྶ པཱཙཱིནདྭཱརསམཱིཔེ ཀཏཝིཧཱརོ.

ཏིཏྠིཡལིངྒསྶ ཨགྒཧིཏཏྟཱ ནེཝ ཏིཏྠིཡཔརིཝཱསཾ ཝསནྟི. ཨནུཔསམྤནྣབྷཱཝཏོ ཨཱཔཏྟིཡཱ ཨཱཔནྣཱཡ ཨབྷཱཝཏོ ན ཨཱཔཏྟིཔརིཝཱསཾ ཝསནྟི. བྷིཀྑུབྷཱཝནྟི ཨུཔསམྤདཾ. ཏེཝིཛྫསུཏྟནྟི ཨིམསྨིཾ དཱིགྷནིཀཱཡེ ཏེཝིཛྫསུཏྟཾ སུཏྭཱ.

༡༡༣. ཨནུཝཏྟམཱནཱ ¶ ¶ ཙངྐམིཾསུ ཨནནུཙངྐམནེ ཡཐཱདྷིཔྤེཏསྶ ཨཏྠསྶ པུཙྪནཱདཱིནཾ ཨསཀྐུཎེཡྻཏྟཱ. ཏེསནྟི ཏེསཾ དྭིནྣཾ. ཏེནཱཧ ‘‘པཎྜིཏཏརོ’’ཏི. ཨཏྠཱཏི བྷཝཏྠ. ཀུལསམྤནྣཱཏི སམྤནྣཀུལཱ ཨུདིཏོདིཏེ བྲཱཧྨཎཀུལེ ཨུཔྤནྣཱ. བྲཱཧྨཎཀུལཱཏི ཀེནཙི པཱརིཛུཉྙེན ཨནུཔདྡུཏཱ ¶ ཨེཝ བྲཱཧྨཎཀུལཱ. ཏེནཱཧ ‘‘བྷོགཱདིསམྤནྣ’’ནྟིཨཱདི. ཨིམེ བྲཱཧྨཎཱ ཨུཙྩཱ ཧུཏྭཱ ‘‘ཨིམཾ ཝསལཾ པབྦཛྫཾ པབྦཛིཾསཱུ’’ཏིཨཱདིནཱ ཛཱཏིཨཱདཱིནི གྷཊྚེནྟཱ ཨཀྐོསནྟི. པརིབྷཱསནྟཱིཏི པརིབྷཝིཏྭཱ བྷཱསནྟི. ཨཏྟནོ ཨནུརཱུཔཱཡཱཏི ཨཏྟནོ ཨཛ྄ཛྷཱསཡསྶ ཨནུརཱུཔཱཡ. ཨནྟརནྟརཱ ཝིཙྪིཛྫ པཝཏྟིཡམཱནཱ པརིབྷཱསཱ པརིཔུཎྞཱ ནཱམ ན ཧོཏི ཁཎྜབྷཱཝཏོ, ཏབྦིཔརིཡཱཡཏོ པརིཔུཎྞཱ ནཱམ ཧོཏཱིཏི ཨཱཧ ‘‘ཨནྟརཱ’’ཏིཨཱདི.

ཨཔྤཏིཊྛཏཱཡཱཏི ཨཔསྶཡརཧིཏཏྟཱ. ཝིབྷིནྣོཏི ཝིནཊྛོ.

ཨིཏརེ ཏཡོ ཝཎྞཱཏི ཁཏྟིཡཱདཡོ ཝཎྞཱ ཧཱིནཱ. ནནུ ཁཏྟིཡཱཝ སེཊྛཱ ཝཎྞཱ ཡཐཱ བུདྡྷཱ ཨེཏརཧི ཁཏྟིཡཀུལེ ཨེཝ ཨུཔྤནྣཱཏི? སཙྩམེཏཾ, ཏེ པན ཨཏྟནོ མིཙྪཱབྷིམཱནེན, མིཙྪཱགཱཧེན ཙ ‘‘བྲཱཧྨཎོཝ སེཊྛོ ཝཎྞོ’’ཏི ཝདནྟི, ཏཾ ཏེསཾ ཝཙནམཏྟཾ. ‘‘སུཛ྄ཛྷནྟཱིཏི སུདྡྷཱ ཧོནྟི, ན ནིནྡཾ གརཧཾ པཱཔུཎནྟཱི’’ཏི ཝདནྟི. སུཛ྄ཛྷནྟི ཝཱ སཾསཱརཏོ སུཛ྄ཛྷནྟི, ན སེསཱ ཝཎྞཱ ཨསུཀྐཛཱཏིཀཏྟཱ, མནྟཛ྄ཛྷེནཱབྷཱཝཏོ ཙཱཏི. བྲཧྨུནོ མུཁཏོ ཛཱཏཱ ཝེདཝཙནཏོ ཛཱཏཱཏི མུཁཏོ ཛཱཏཱ. ཏཏོ ཨེཝ བྲཧྨུནོ མཧཱབྲཧྨུནོ ཝེདཝཙནཏོ ཝིཛཱཏཱཏི བྲཧྨཛཱ. ཏེན ¶ དུཝིདྷེནཱཔི ནིམྨིཏཱཏི བྲཧྨནིམྨིཏཱ. ཝེདཝེདངྒཱདིབྲཧྨདཱཡཛྫཾ ཨརཧནྟཱིཏི བྲཧྨདཱཡཱདཱ. མུཎྜཀེ སམཎཀེཏི ཨེཏྠ ཀ-ཀཱརོ གརཧཱཡནྟི ཨཱཧ ‘‘ནིནྡནྟཱ ཛིགུཙྪནྟཱ ཝདནྟཱི’’ཏི. ཨིབྦྷེཏི སུདྡེ, ཏེ པན གྷརབནྡྷནེན བདྡྷཱ ནིཧཱིནཏརཱཏི ཨཱཧ ‘‘གཧཔཏིཀེ’’ཏི. ཀཎྷེཏི ཀཎྷཛཱཏིཀེ. བནྡྷནཊྛེན བནྡྷུ, ཀསྶ པན བནྡྷཱུཏི ཨཱཧ ‘‘མཱརསྶ བནྡྷུབྷཱུཏེ’’ཏི. པཱདཱཔཙྩེཏི པཱདཏོ ཛཱཏཱཔཙྩེ. ཨཡཾ ཀིར བྲཱཧྨཎཱནཾ ལདྡྷི ‘‘བྲཱཧྨཎཱ བྲཧྨུནོ མུཁཏོ ཛཱཏཱ, ཁཏྟིཡཱ ཨུརཏོ, ཨཱུརཱུཧི ཝེསྶཱ, པཱདཏོ སུདྡཱ’’ཏི.

༡༡༤. ཡསྨཱ པཋམཀཔྤིཀཀཱལེ ཙཏུཝཎྞཝཝཏྠཱནཾ ནཏྠི, སབྦེཝ སཏྟཱ ཨེཀསདིསཱ, ཨཔརབྷཱགེ པན ཏེསཾ པཡོགབྷེདཝསེན ཨཧོསི, ཏསྨཱ ཝུཏྟཾ ‘‘པོརཱཎཾ…པེ… ཨཛཱནནྟཱ’’ཏི. ལདྡྷིབྷིནྡནཏྠཱཡཱཏི ‘‘བྲཱཧྨཎཱ བྲཧྨུནོ པུཏྟཱ ཨོརསཱ མུཁཏོ ཛཱཏཱ’’ཏི ཨེཝཾ པཝཏྟཱཡ ལདྡྷིཡཱ ཝིནིཝེཋནཏྠཾ. པུཏྟཔྤཊིལཱབྷཏྠཱཡཱཏི ‘‘ཨེཝཾ མཡཾ པེཏྟིཀཾ ཨིཎཾ ¶ སོདྷེསྶཱམཱ’’ཏི ལདྡྷིཡཾ ཋཏྭཱ པུཏྟཔྤཊིལཱབྷཱཡ. ཨཡཉྷེཏྠ དྷམྨིཀཱནཾ བྲཱཧྨཎཱནཾ ཨཛ྄ཛྷཱསཡོ. སཉྫཱཏཔུཔྥཱཏི རཛསྶལཱ. ཨིཏྠཱིནཉྷི ཀུམཱརིབྷཱཝཔྤཏྟིཏོ པཊྛཱཡ པཙྪིམཝཡཏོ ཨོརཾ ཨསཏི ཝིབནྡྷེ ཨཊྛམེ ཨཊྛམེ ¶ སཏྟཱཧེ གབྦྷཱསཡསཉྙིཏེ ཏཏིཡེ ཨཱཝཏྟེ ཀཏིཔཡཱ ལོཧིཏཔཱིལ༹ཀཱ སཎྛཧིཏྭཱ ཨགྒཧིཏཔུཔྥཱ ཨེཝ བྷིཛྫནྟི, ཏཏོ ལོཧིཏཾ པགྒྷརཏི, ཏཏྠ ཨུཏུསམཉྙཱ, པུཔྥསམཉྙཱ ཙ. ནེསནྟི བྲཱཧྨཎཱནཾ. སཙྩཝཙནཾ སིཡཱཏི ‘‘བྲཧྨུནོ པུཏྟཱ’’ཏིཨཱདིཝཙནཾ སཙྩཾ ཡདི སིཡཱ, བྲཱཧྨཎཱིནཾ…པེ… མུཁཾ བྷཝེཡྻ, ན ཙེཏཾ ཨཏྠི.

ཙཏུཝཎྞསུདྡྷིཝཎྞནཱ

༡༡༥. མུཁཙྪེདཀཝཱདནྟི ¶ ‘‘བྲཱཧྨཎཱ མཧཱབྲཧྨུནོ མུཁཏོ ཛཱཏཱ’’ཏི ཝཱདསྶ ཚེདཀཝཱདཾ. ཨརིཡབྷཱཝེ ཨསམཏྠཱཏི ཨནརིཡབྷཱཝཱཝཧཱ. པཀཏིཀཱལ༹ཀཱཏི སབྷཱཝེནེཝ ན སུདྡྷཱ. ཀཎྷོཏི ཀིལིཊྛོ ཨུཔཏཱཔཀོ. ཏེནཱཧ ‘‘དུཀྑོཏི ཨཏྠོ’’ཏི.

སུཀྐབྷཱཝོ ནཱམ པརིསུདྡྷཏཱཏི ཨཱཧ ‘‘ནིཀྐིལེསབྷཱཝེན པཎྜརཱ’’ཏི. སུཀྐོཏི ན ཀིལིཊྛོ ཨནུཔཏཱཔཀོཏི ཝུཏྟཾ ‘‘སུཁོཏི ཨཏྠོ’’ཏི.

༡༡༦. ཨུབྷཡཝོཀིཎྞེཏི ཝཙནཝིཔལླཱསེན ཝུཏྟནྟི ཨཱཧ ‘‘ཨུབྷཡེསུ ཝོཀིཎྞེསཱུ’’ཏི. མིསྶཱིབྷཱུཏེསཱུཏི ‘‘ཀདཱཙི ཀཎྷཱ དྷམྨཱ, ཀདཱཙི སུཀྐཱ དྷམྨཱ’’ཏི ཨེཝཾ ཨེཀསྨིཾ སནྟཱནེ, ཨེཀསྨིཾཡེཝ ཙ ཨཏྟབྷཱཝེ པཝཏྟིཡཱ མིསྶཱིབྷཱུཏེསུ, ན པན ཨེཀཛ྄ཛྷཾ པཝཏྟིཡཱ. ཨེཏྠཱཏི ཨནནྟརཝུཏྟདྷམྨཱཝ ཨནྭཱདྷིཊྛཱཏི ཨཱཧ ‘‘ཀཎྷསུཀྐདྷམྨེསཱུ’’ཏི. ཡསྨཱ ཙ ཏེ བྲཱཧྨཎཱ ན ཙེཝ ཏེ དྷམྨེ ཨཏིཀྐནྟཱ, ཡཱཡ ཙ པཊིཔདཱཡ ཨཏིཀྐམེཡྻུཾ, སཱཔི ཏེསཾ པཊིཔདཱ ནཏྠི, ཏསྨཱ ཝུཏྟཾ ‘‘ཝཏྟམཱནཱཔཱི’’ཏི. ནཱནུཛཱནནྟི ཨཡཐཱབྷུཙྩཝཱདབྷཱཝཏོ. ཨནུཛཱནནཉྩ ནཱམ ཨབྦྷནུམོདནནྟི ཏདབྷཱཝཾ དསྶེནྟེན ‘‘ནཱནུམོདནྟི, ན པསཾསནྟཱི’’ཏི ཝུཏྟཾ. ཙཏུནྣཾ ཝཎྞཱནནྟི ནིདྡྷཱརཎེ སཱམིཝཙནཾ. ཏེསནྟི པན སམྦནྡྷེཔི ཝཱ སཱམིཝཙནཾ. ཏེ ཙ བྲཱཧྨཎཱ ན ཨེཝརཱུཔཱ ན ཨེདིསཱ, ཡཱདིསོ ཨརཧཱ ཨེཀདེསེནཱཔི ཏེན ཏེསཾ སདིསཏཱབྷཱཝཏོ, ཏསྨཱ ཏེན ཀཱརཎེན ནེསཾ བྲཱཧྨཎཱནཾ ‘‘བྲཱཧྨཎོཝ ¶ སེཊྛོ ཝཎྞོ’’ཏི ཝཱདཾ ཝིཉྙཱུ ཡཐཱབྷཱུཏཝཱདིནོ བུདྡྷཱདཡོ ཨརིཡཱ ནཱནུཛཱནནྟི.

ཨཱརཀཏྟཱདཱིཧཱིཏི ¶ ཨེཏྠ ཀིལེསཱནཾ ཨཱརཀཏྟཱ པཧཱིནབྷཱཝཏོ དཱུརཏྟཱ ཨརཧཾ, ཀིལེསཱརཱིནཾ ཧཏཏྟཱ ཨརཧཾ, སཾསཱརཙཀྐསྶ ཨརཱནཾ ཧཏཏྟཱ ཨརཧཾ, པཙྩཡཱདཱིནཾ ཨརཧཏྟཱ ཨརཧཾ, པཱཔཀརཎེ རཧཱབྷཱཝེན ཨརཧནྟི ཨེཝམཏྠོ ཝེདིཏབྦོ. ཨཡམེཏྠ སངྑེཔོ, ཝིཏྠཱརོ པན ཝིསུདྡྷིམགྒེ (ཝིསུདྡྷི. ༡.༡༢༥ ཨཱདཡོ), ཏཾ སཾཝཎྞནཱསུ (ཝིསུདྡྷི. ཊཱི. ༡.༡༢༤) ཙ ཝུཏྟནཡེན ཝེདིཏབྦོ ¶ . ཨཱསཝཱནཾ ཁཱིཎཏྟཱཏི ཙཏུནྣམྤི ཨཱསཝཱནཾ ཨནཝསེསཏོ པཧཱིནཏྟཱ. བྲཧྨཙརིཡཝཱསནྟི མགྒབྲཧྨཙརིཡཝཱསཾ. ཏསྶ ཝཱསསྶ པརིཡོསིཏཏྟཱ ཝུཏྠཝཱསོ, དསནྣམྤི ཝཱ ཨརིཡཝཱསཱནཾ ཝུཏྠཏྟཱ ཝུཏྠཝཱསོ. ཝུཏྟཉྷེཏཾ –

‘‘དསཡིམེ, བྷིཀྑཝེ, ཨརིཡཱཝཱསཱ, ཡདརིཡཱ ཨཱཝསིཾསུ ཝཱ ཨཱཝསནྟི ཝཱ ཨཱཝསིསྶནྟི ཝཱ. ཀཏམེ དས? ཨིདྷ, བྷིཀྑཝེ, བྷིཀྑུ པཉྩངྒཝིཔྤཧཱིནོ ཧོཏི ཚལ༹ངྒསམནྣཱགཏོ ཨེཀཱརཀྑོ ཙཏུརཱཔསྶེནོ པནུཎྞཔཙྩེཀསཙྩོ སམཝཡསཋེསནོ ཨནཱཝིལསངྐཔྤོ པསྶདྡྷཀཱཡསངྑཱརོ སུཝིམུཏྟཙིཏྟོ སུཝིམུཏྟཔཉྙོ. ཨིམེ ཁོ, བྷིཀྑཝེ, དས ཨརིཡཱཝཱསཱ’’ཏི (ཨ. ནི. ༡༠.༡༩).

ཝུསྶཏཱིཏི ཝཱ ཝུསིཏཾ, ཨརིཡམགྒོ, ཨརིཡཕལཉྩ, ཏཾ ཨེཏསྶ ཨཏྠཱིཏི ཨཏིསཡཝཙནིཙྪཱཝསེན ཨརཧཱ ‘‘ཝུསིཏཝཱ’’ཏི ཝུཏྟོ. ཀརཎཱིཡཾ ནཱམ པརིཉྙཱཔཧཱནསཙྪིཀིརིཡཱབྷཱཝནཱ དུཀྑསྶནྟཾ ཀཱཏུཀཱམེཧི ཨེཀནྟཏོ ཀཏྟབྦཏྟཱ, ཏཾ པན ཡསྨཱ ཙཏཱུཧི མགྒེཧི པཙྩེཀཾ ཙཏཱུསུ སཙྩེསུ ཀཱཏབྦཾ ཀཏཾ, ཏསྨཱ ཝུཏྟཾ ‘‘ཙཏཱུཧི…པེ… ཀཏཀརཎཱིཡོ’’ཏི. ཨོསཱིདཱཔནཊྛེན བྷཱརཱ ཝིཡཱཏི བྷཱརཱ, ཀིལེསཱ, ཁནྡྷཱ ཙ. ཝུཏྟཉྷི ‘‘བྷཱརཱ ཧཝེ པཉྩཀྑནྡྷཱ’’ཏི (སཾ. ནི. ༣.༢༢) ཨོཧཱརིཏོཏི ཨཔནཱིཏོ. སཀོ ཨཏྠོ སདཏྠོཏི ཨེཏྠ ད-ཀཱརོ པདསནྡྷིཀརོ. ཀཱམཾ དིཊྛིཨཱདཡོཔི སཾཡོཛནཱནི ཨེཝ, ཏཐཱཔི ཏཎྷཱཡ བྷཝསཾཡོཛནཊྛོ སཱཏིསཡོ. ཡཐཱཧ ‘‘ཨཝིཛྫཱནཱིཝརཎཱནཾ ¶ སཏྟཱནཾ ཏཎྷཱསཾཡོཛནཱན’’ནྟི. (སཾ. ནི. ༢.༡༢༥, ༡༢༦, ༡༢༧, ༡༣༢, ༡༣༤, ༡༣༦, ༡༤༢; ༣.༥.༥༢༠; ཀཐཱ. ༧༥) ཏཏོ སཱ ཨེཝ སུཏྟེ (དཱི. ནི. ༢.༤༠༠; མ. ནི. ༡.༩༣, ༡༣༣; ༣.༣༧༣; སཾ. ནི. ༣.༡༠༨༡; པཊི. མ. ༡.༣༤ ཨཱདཡོ) སམུདཡསཙྩབྷཱཝེན ཝུཏྟཱ, ཏསྨཱ ཝུཏྟཾ ‘‘བྷཝསཾཡོཛནཾ ཝུཙྩཏི ཏཎྷཱ’’ཏི. སམྨདཉྙཱ ཝིམུཏྟོཏི སམྨཱ ཨཉྙཱཡ ཛཱནནབྷཱུཏཱཡ ཨགྒམགྒཔཉྙཱཡ ¶ སམྨཱ ཡཐཱབྷཱུཏཾ ཡཾ ཡཐཱ ཛཱནིཏབྦཾ, ཏཾ ཏཐཱ ཛཱནིཏྭཱ ཝིམུཏྟོ. ཨིམསྨིཾ ལོཀེཏི ཨིམསྨིཾ སཏྟལོཀེ. ཨིདྷཏྟབྷཱཝེཏི ཨིམསྨིཾ ཨཏྟབྷཱཝེ, པརཏྟབྷཱཝེཏི པརསྨིཾ ཨཏྟབྷཱཝེ, ཨིདྷལོཀེ, པརལོཀེ ཙཱཏི ཨཏྠོ.

༡༡༧. ཨནྟརཝིརཧིཏཱཏི ཝིབྷཱགཝིརཧིཏཱ. ཏེནཱཧ ‘‘ཨཏྟནོ ཀུལེན སདིསཱ’’ཏི. ཨནུཡནྟཱིཏི ཨནུཡནྟཱ, ཨནུཡནྟཱ ཨེཝ ཨཱནུཡནྟཱ, ཨནུཝཏྟཀཱ. ཏེནཱཧ ‘‘ཝསཝཏྟིནོ’’ཏི.

༡༡༨. ནིཝིཊྛཱཏི ¶ སདྡྷེཡྻཝཏྠུསྨིཾ ཨནུཔཝིསནཝསེན ནིཝིཊྛཱ. ཏཏོ ཨེཝ ཏསྨིཾ ཨདྷིཀཾ ནིཝིསནཏོ ཨབྷིནིཝིཊྛཱ. ཨཙལཊྛིཏཱཏི ཨཙལབྷཱཝེ ཋིཏཱ.

ཡནྟི ཡཾ ཀཐེཏབྦདྷམྨཾ ཨནུཔདྷཱརེཏྭཱ, ཏདཏྠཉྩ ཨཔྤཙྩཀྑཾ ཀཏྭཱ ཀཐནཾ, ཨེཏཾ ཨཊྛཱནཾ ཨཀཱརཎཾ ཏསྶ བོདྷིམཱུལེཡེཝ སམུཙྪིནྣཏྟཱ. ཝིཙྪིནྡཛནནཏྠནྟི རཏནཏྟཡསདྡྷཱཡ ཝིཙྪིནྡསྶ ཨུཔྤཱདནཏྠཾ, ཨཉྙཐཏྟཱཡཱཏི ཨཏྠོ. སོཏི མཱརོ. མུསཱཝཱདཾ ཀཱཏུཾ ནཱསཀྑཱིཏི ཨཱགཏཕལསྶ ཨརིཡསཱཝཀསྶ པུརཏོ མུསཱ ཝཏྟུཾ ན ཝིསཧི, ཏསྨཱ ཨཱམ མཱརོསྨཱིཏི པཊིཛཱནི. སིལཱཔཐཝིཡནྟི རཏནམཡསིལཱཔཐཝིཡཾ. སིནེརུཾ ཀིར པརིཝཱརེཏྭཱ ཋིཏོ བྷཱུམིཔྤདེསོ སཏྟརཏནམཡོ, ‘‘སུཝཎྞམཡོ’’ཏི ཀེཙི, སཱ ཝིཏྠཱརཏོ, ཨུབྦེདྷཏོ ཨནེཀཡོཛནསཧསྶཔརིམཱཎཱ ཨཏིཝིཡ ནིཙྩལཱ. ཀིཾ ཏྭཾ ཨེཏྠཱཏི ཀིཾ ཀཱརཎཱ ཏྭཾ ཨེཏྠ. ‘‘ཋིཏོ’’ཏི ཨཙྪརཾ པཧརི. ཋཱཏུཾ ཨསཀྐོནྟོཏི ཨརིཡསཱཝཀསྶ པུརཏོ ཋཱཏུཾ ཨསཀྐོནྟོ. ཨཡཉྷི ཨརིཡདྷམྨཱདྷིགམསྶ ཨཱནུབྷཱཝོ, ཡཾ མཱརོཔི ¶ ནཱམ མཧཱནུབྷཱཝོ ཨུཛུཀཾ པཊིཔྤརིཏུཾ ན སཀྐོཏི.

མགྒོ ཨེཝ མཱུལཾ མགྒམཱུལཾ, ཏསྶ. སཉྫཱཏཏྟཱ ཨུཔྤནྣཏྟཱ. ཏེན མགྒམཱུལེན པཏིཊྛིཏསནྟཱནེ ལདྡྷཔཏིཊྛཱ. བྷགཝཏོ དེསནཱདྷམྨཾ ནིསྶཱཡ ཨརིཡཱཡ ཛཱཏིཡཱ ཛཱཏོ ‘‘བྷགཝནྟཾ ནིསྶཱཡ ཨརིཡབྷཱུམིཡཾ ཛཱཏོ’’ཏི ཝུཏྟོ. ‘‘ཨུརེ ཝསིཏྭཱ’’ཏི ཨིདཾ དྷམྨགྷོསསྶ ཨུརཏོ སམུཊྛཱནཏཱཡ ཝུཏྟཾ. ཨུརེ ཝཱཡཱམཛནིཏཱབྷིཛཱཏིཏཱཡ ཝཱ ཨོརསོ. མུཁཏོ ཛཱཏེན ཛཱཏོ ‘‘མུཁཏོ ཛཱཏོ’’ཏི ཝུཏྟོ. ཀཱརཎཀཱརཎེཔི ཧི ཀཱརཎེ ཝིཡ ཝོཧཱརོ ཧོཏི ‘‘ཏིཎེཧི བྷཏྟཾ སིདྡྷ’’ནྟི. ཀེཙི པན ‘‘ཝིམོཀྑམུཁསྶ ཝསེན ¶ ཛཱཏཏྟཱ མུཁཏོ ཛཱཏོ’’ཏི ཝདནྟི, ཏཏྠཱཔི ཝུཏྟནཡེནེཝ ཨཏྠོ ཝེདིཏབྦོ. པུརིམེནཏྠེན ཡོནིཛོ, སེདཛོ, མུཁཛོཏི ཏཱིསུ སམྦནྡྷེསུ མུཁཛེན སམྦནྡྷེན བྷགཝཏོ པུཏྟབྷཱཝོ ཝིབྷཱཝིཏོ. ཨཏྠདྭཡེནཱཔི དྷམྨཛབྷཱཝོཡེཝ དཱིཔིཏོ. ཨརིཡདྷམྨཔྤཏྟིཏོ ལདྡྷཝིསེསོ ཧུཏྭཱ པཝཏྟོ ཏདུཏྟརཀཱལིཀོ ཁནྡྷསནྟཱནོ ‘‘ཨརིཡདྷམྨཏོ ཛཱཏོ’’ཏི ཝེདིཏབྦོ, ཨརིཡདྷམྨཾ ཝཱ མགྒཕལཾ ནིསྶཱཡ, ཨུཔནིསྶཱཡ ཙ ཛཱཏོ སབྦོཔི དྷམྨཔྤབནྡྷོ ‘‘ཨརིཡདྷམྨཏོ ཛཱཏོ’’ཏི གཧེཏབྦོ. ཏེསཾ པན ཨརིཡདྷམྨཱནཾ ཨཔརིཡོསིཏཀིཙྩཏཱཡ ཨརིཡབྷཱཝེན ཨབྷིནིབྦཏྟིམཏྟཾ ཨུཔཱདཱཡ ‘‘ཨརིཡདྷམྨཏོ ཛཱཏཏྟཱ’’ཏི ཝུཏྟཾ. པརིཡོསིཏཀིཙྩཏཱཡ ཏཐཱ ནིབྦཏྟིཔཱརིཔཱུརིཾ ཨུཔཱདཱཡ ‘‘ནིམྨིཏཏྟཱ’’ཏི ཝུཏྟཾ, ཡཏོ ‘‘དྷམྨཛོ དྷམྨནིམྨིཏོ’’ཏི ཝུཏྟཾ. ‘‘ནཝལོཀུཏྟརདྷམྨདཱཡཾ ཨཱདིཡཏཱིཏི དྷམྨདཱཡཱདོ’’ ཏིཔི པཱཋོ. ཨསྶཱཏི ‘‘བྷགཝཏོམྷིཔུཏྟོ’’ཏིཨཱདིནཱ ཝུཏྟསྶ ཝཱཀྱསྶ. ཨཏྠཾ དསྶེནྟོཏི བྷཱཝཏྠཾ པཀཱསེནྟོ. ཏཐཱགཏསྶ ཨནཉྙསཱདྷཱརཎསཱིལཱདིདྷམྨཀྑནྡྷསྶ སམཱུཧནིཝེསཝསེན དྷམྨཀཱཡཏཱཡ ན ¶ ཀིཉྩི ཝཏྟབྦཾ ཨཏྠི, སཏྠུཊྛཱནིཡསྶ པན དྷམྨཀཱཡཏཾ དསྶེཏུཾ ‘‘ཀསྨཱ ཏཐཱགཏོ དྷམྨཀཱཡོཏི ¶ ཝུཏྟོ’’ཏི སཡམེཝ པུཙྪཾ སམུཊྛཱཔེཏྭཱ ‘‘ཏཐཱགཏོ ཧཱི’’ཏིཨཱདིནཱ ཏམཏྠཾ ཝིསྶཛྫེཏི. ཧདཡེན ཙིནྟེཏྭཱཏི ‘‘ཨིམཾ དྷམྨཾ ཨིམསྶ དེསེསྶཱམཱི’’ཏི ཏསྶ ཨུཔགཏསྶ ཝེནེཡྻཛནསྶ བོདྷནཏྠཾ ཙིཏྟེན ཙིནྟེཏྭཱ. ཝཱཙཱཡ ཨབྷིནཱིཧརཱིཏི སདྡྷམྨདེསནཱཝཱཙཱཡ ཀརཝཱིཀརུཏམཉྫུནཱ བྲཧྨསྶརེན ཝེནེཡྻསནྟཱནཱབྷིམུཁཾ ཏདཛ྄ཛྷཱསཡཱནུརཱུཔཾ ཧིཏམཏྠཾ ནཱིཧརི ཨུཔནེསི. ཏེནཱཏི ཏེན ཀཱརཎེན ཨེཝཾསདྡྷམྨཱདྷིམུཏྟིབྷཱཝེན. ཨསྶཱཏི ཏཐཱགཏསྶ. དྷམྨམཡཏྟཱཏི དྷམྨབྷཱུཏཏྟཱ. ཨིདྷཱདྷིཔྤེཏདྷམྨོ སེཊྛཊྛེན བྲཧྨབྷཱུཏོཏི ཨཱཧ ‘‘དྷམྨཀཱཡཏྟཱ ཨེཝ བྲཧྨཀཱཡོ’’ཏི. སབྦསོ ཨདྷམྨཾ པཛཧིཏྭཱ ཨནཝསེསཏོ དྷམྨོ ཨེཝ བྷཱུཏོཏི དྷམྨབྷཱུཏོ. ཏཐཱརཱུཔོ ཙ ཡསྨཱ སབྷཱཝཏོ དྷམྨོ ཨེཝཱཏི ཝཏྟབྦཏཾ ཨརཧཏཱིཏི ཨཱཧ ‘‘དྷམྨསབྷཱཝོ’’ཏི.

༡༡༩. སེཊྛཙྪེདཀཝཱདནྟི ‘‘བྲཱཧྨཎོཝ སེཊྛོ ཝཎྞོ’’ཏི (དཱི. ནི. ༣.༡༡༦) ཨེཝཾ ཝུཏྟསེཊྛབྷཱཝཙྪེདཀཝཱདཾ. ཨཔརེནཔི ནཡེནཱཏི ཡཐཱཝུཏྟསེཊྛཙྪེདཀཝཱདཏོ ཨཔརེནཔི པོརཱཎཀལོཀུཔྤཏྟིདསྶནནཡེན. སེཊྛཙྪེད…པེ… དསྶེཏུནྟི སོཔི ཧི ‘‘བྲཱཧྨཎོཝ སེཊྛོ ཝཎྞོ, ཧཱིནཱ ཨཉྙེ ¶ ཝཎྞཱ’’ཏི, ‘‘བྲཱཧྨཎཱ བྲཧྨུནོ པུཏྟཱ ཨོརསཱ མུཁཏོ ཛཱཏཱ བྲཧྨཛཱ’’ཏི (དཱི. ནི. ༣.༡༡༤) ཙ ཨེཝཾ པཝཏྟཱཡ མིཙྪཱདིཊྛིཡཱ ཝིནིཝེཋནོ ཛཱཏིབྲཱཧྨཎཱནཾ སེཊྛབྷཱཝསྶ ཚེདནཏོ སེཊྛཙྪེདནཝཱདོ ནཱམ ཧོཏཱིཏི དསྶེཏུནྟི ཨཏྠོ.

ཨིཏྠབྷཱཝནྟི ཨིམཾ པཀཱརཏཾ མནུསྶབྷཱཝཾ. སཱམཉྙཛོཏནཱ ཧི ཝིསེསེ ཨཝཏིཊྛཏི, པཀརཎཝསེན ཝཱ ཨཡམཏྠོ ཨཝཙྪིནྣོ དཊྛབྦོ. མནེནེཝ ¶ ནིབྦཏྟཱཏི བཱཧིརཔཙྩཡེན ཝིནཱ ཀེཝལཾ ཨུཔཙཱརཛྷཱནམནསཱཝ ནིབྦཏྟཱ. ཡཱཡ ཨུཔཙཱརཛ྄ཛྷཱནཙེཏནཱཡ ཏེ ཏཏྠ ནིབྦཏྟཱ, ནཱིཝརཎཝིཀྑམྦྷནཱདིནཱ ཨུལཱ༹རོ ཏསྶཱ པཝཏྟིཝིསེསོ, ཏསྨཱ ཛྷཱནཕལཀཔྤོ ཏསྶཱ ཕལཝིསེསོཏི ཨཱཧ ‘‘བྲཧྨལོཀེ ཝིཡཱ’’ཏིཨཱདི. ‘‘སཡཾཔབྷཱ’’ཏི པདཱནཾ ཏཏྠ སཱུརིཡཱལོཀཱདཱིཧི ཝིནཱ ཨནྡྷཀཱརཾ ཝིདྷམནྟཱ སཡམེཝ པབྷཱསནྟཱིཏི སཡཾཔབྷཱ, ཨནྟལིཀྑེ ཨཱཀཱསེ ཙརནྟཱིཏི ཨནྟལིཀྑཙརཱ, ཏདཉྙཀཱམཱཝཙརསཏྟཱནཾ ཝིཡ སརཱིརསྶ ཝིཙརཎཊྛཱནསྶ ཨསུབྷཏཱབྷཱཝཏོ སུབྷཾ, སུབྷེཝ ཏིཊྛནྟཱིཏི སུབྷཊྛཱཡིནོཏི ཨཏྠོ ཝེདིཏབྦོ.

རསཔཐཝིཔཱཏུབྷཱཝཝཎྞནཱ

༡༢༠. སབྦཾ ཙཀྐཝཱལ༹ནྟི ཨནཝསེསཾ ཀོཊིསཏསཧསྶཾ ཙཀྐཝཱལ༹ཾ. སམཏནཱིཏི སཉྪཱདེནྟཱི ཝིཔྥརི, སཱ པན ཏསྨིཾ ཨུདཀེ པཏིཊྛིཏཱ ཨཧོསཱིཏི ཨཱཧ ‘‘པཏིཊྛཧཱི’’ཏི. ཝཎྞེན ¶ སམྤནྣཱཏི སམྤནྣཝཎྞཱ. མཀྑིཀཎྜཀརཧིཏནྟི མཀྑིཀཱཧི ཙ ཏཱསཾ ཨཎྜཀེཧི ཙ རཧིཏཾ.

ཨཏཱིཏཱནནྟརེཔི ཀཔྤེ ལོལོཡེཝ. ཀསྨཱ? ཨེཝཾ ཙིརཔརིཙིཏལོལཏཱཝསེན སབྦཔཋམཾ ཏཐཱ ཨཀཱསཱིཏི དསྶེཏི. ཀིམེཝིདནྟི ‘‘ཝཎྞཏོ, གནྡྷཏོ ཙ ཏཱཝ ཉཱཏཾ, རསཏོ པན ཀིམེཝིདཾ བྷཝིསྶཏཱི’’ཏི སཾསཡཛཱཏོ ཝདཏི. ཏིཊྛཏཱིཏི ཨཊྛཱསི.

ཙནྡིམསཱུརིཡཱདིཔཱཏུབྷཱཝཝཎྞནཱ

༡༢༡. ཨཱལུཔྤཀཱརཀནྟི ཨེཏྠ ཨཱལོཔཔརིཡཱཡོ ཨཱལུཔྤ-སདྡོཏི ཨཱཧ ‘‘ཨཱལོཔཾ ཀཏྭཱ’’ཏི. པཙྩཀྑབྷཱུཏཱནམྤི ¶ ཙནྡིམསཱུརིཡཱནཾ པཝཏྟིཡཾ ལོཀིཡཱནཾ སམྨོཧོ ཧོཏི, ཏཾ ཝིདྷམིཏུཾ ‘‘ཀོ པན ཏེས’’ནྟིཨཱདིནཱ ཨཊྛ པཉྷཱཝིསྶཛྫནཱནི གཧིཏཱནི. ཏཏྠ ཏེསནྟི ཙནྡིམསཱུརིཡཱནཾ. ཀསྨིནྟི ཀསྨིཾ ཋཱནེ. ‘‘ཀོ ཨུཔརཱི’’ཏི ཨེཏེནེཝ ¶ ཀོ ཧེཊྛཱཏི ཨཡམཏྠོ ཝུཏྟོཡེཝ. ཏཐཱ ‘‘ཀོ སཱིགྷཾ གཙྪཏཱི’’ཏི ཨིམིནཱ ཀོ སཎིཀཾ གཙྪཏཱིཏི ཨཡམྤི ཨཏྠོ ཝུཏྟོཡེཝ. ཝཱིཐིཡོཏི གམནཝཱིཐིཡོ. ཨེཀཏོཏི ཨེཀསྨིཾ ཁཎེ པཱཏུབྷཝནྟི. སཱུརིཡམཎྜལེ པན ཨཏྠངྒཏེ ཙནྡམཎྜལཾ པཉྙཱཡིཏྠ. ཚནྡཾ ཉཏྭཱ ཝཱཏི རུཙིཾ ཉཏྭཱ ཝིཡ.

ཨུབྷཡནྟི ཨནྟོ, བཧི ཙ.

ཨུཛུཀནྟི ཨཱཡཱམཏོ, ཝིཏྠཱརཏོ, ཨུབྦེདྷཏོ ཙ. པརིམཎྜལཏོཏི པརིཀྑེཔཏོ.

ཨུཛུཀཾ སཎིཀཾ གཙྪཏི ཨམཱཝཱསིཡཾ སཱུརིཡེན སདྡྷིཾ གཙྪནྟོ དིཝསེ དིཝསེ ཐོཀཾ ཐོཀཾ ཨོཧཱིཡནྟོ པུཎྞམཱསིཡཾ ཨུཔཌྜྷམགྒམེཝ ཨོཧཱིཡནཏོ. ཏིརིཡཾ སཱིགྷཾ གཙྪཏི ཨེཀསྨིམྤི མཱསེ ཀདཱཙི དཀྑིཎཏོ, ཀདཱཙི ཨུཏྟརཏོ དསྶནཏོ. ‘‘དྭཱིསུ པསྶེསཱུ’’ཏི ཨིདཾ ཡེབྷུཡྻཝསེན ཝུཏྟཾ. ཙནྡསྶ པུརཏོ, པཙྪཏོ, སམཉྩ ཏཱརཀཱ གཙྪནྟིཡེཝ. ཨཏྟནོ ཋཱནནྟི ཨཏྟནོ གམནཊྛཱནཾ. ན ཝིཛཧནྟི ཨཏྟནོ ཝཱིཐིཡཱཝ གཙྪནཏོ. སཱུརིཡསྶ ཨུཛུཀཾ གམནསྶ སཱིགྷཏཱ ཙནྡསྶ གམནཾ ཨུཔཱདཱཡ ཝེདིཏབྦཱ. ཏིརིཡཾ གམནཾ དཀྑིཎདིསཏོ ཨུཏྟརདིསཱཡ, ཨུཏྟརདིསཏོ ཙ དཀྑིཎདིསཱཡ གམནཾ དནྡྷཾ ཚཧི ཚཧི མཱསེཧི ཨིཛ྄ཛྷནཏོ. སོཏི སཱུརིཡོ. ཀཱལ༹པཀྑཨུཔོསཐཏོཏི ཀཱལ༹པཀྑེ ཨུཔོསཐེ ཙནྡེན སཧེཝ གནྟྭཱ ཏཏོ པརཾ. པཱཊིཔདདིཝསེཏི སུཀྐཔཀྑཔཱཊིཔདདིཝསེ. ཨོཧཱཡ གཙྪཏི ཨཏྟནོ སཱིགྷགཱམིཏཱཡ, ཏསྶ ཙ དནྡྷགཱམིཏཱཡ. ལེཁཱ ¶ ཝིཡ པཉྙཱཡཏི པཙྪིམདིསཱཡཾ. ཡཱཝ ཨུཔོསཐདིཝསཱཏི ཡཱཝ སུཀྐཔཀྑཨུཔོསཐདིཝསཱ. ‘‘ཙནྡོ ཨནུཀྐམེན ཝཌྜྷིཏྭཱ’’ཏི ཨིདཾ ཨུཔརིབྷཱགཏོ པཏིཏསཱུརིཡཱལོཀཏཱཡ ཧེཊྛཏོ པཝཏྟཱཡ སཱུརིཡསྶ དཱུརབྷཱཝེན དིཝསེ དིཝསེ ཨནུཀྐམེན པརིཧཱཡམཱནཱཡ ཨཏྟནོ ཚཱཡཱཡ ཝསེན ཨནུཀྐམེན ཙནྡམཎྜལཔྤདེསསྶ ཝཌྜྷམཱནསྶ ཝིཡ དིསྶམཱནཏཱཡ ཝུཏྟཾ, ཏསྨཱ ཨནུཀྐམེན ཝཌྜྷིཏྭཱ ཝིཡ. ཨུཔོསཐདིཝསེ པུཎྞམཱཡཾ པརིཔུཎྞོ ཧོཏི, པརིཔུཎྞམཎྜལོ ཧུཏྭཱ དིསྶཏཱིཏི ཨཏྠོ. དྷཱཝིཏྭཱ གཎྷཱཏི ཙནྡསྶ དནྡྷགཏིཏཱཡ, ཨཏྟནོ ཙ སཱིགྷགཏིཏཱཡ. ཨནུཀྐམེན ཧཱཡིཏྭཱཏི ཨེཏྠ ‘‘ཨནུཀྐམེན ¶ ཝཌྜྷིཏྭཱ’’ཏི ཨེཏྠ ཝུཏྟནཡེན ཨཏྠོ ¶ ཝེདིཏབྦོ. ཏཏྠ པན ཚཱཡཱཡ ཧཱཡམཱནཏཱཡ མཎྜལཾ ཝཌྜྷམཱནཾ ཝིཡ དིསྶཏི, ཨིདྷ ཚཱཡཱཡ ཝཌྜྷམཱནཏཱཡ མཎྜལཾ ཧཱཡམཱནཾ ཝིཡ དིསྶཏི.

ཡཱཡ ཝཱིཐིཡཱ སཱུརིཡེ གཙྪནྟེ ཝསྶཝལཱཧཀཱ དེཝཔུཏྟཱ སཱུརིཡཱབྷིཏཱཔསནྟཏྟཱ ཨཏྟནོ ཝིམཱནཏོ ན ནིཀྑམནྟི, ཀཱིལཱ༹པསུཏཱ ཧུཏྭཱ ན ཝིཙརནྟི, ཏདཱ ཀིར སཱུརིཡསྶ ཝིམཱནཾ པཀཏིམགྒཏོ ཨདྷོ ཨོཏརིཏྭཱ ཝིཙརཏི, ཏསྶ ཨོརུཡ྄ཧ ཙརཎེནེཝ ཙནྡཝིམཱནམྤི ཨདྷོ ཨོརུཡ྄ཧ ཙརཏི ཏགྒཏིཀཏྟཱ, ཏསྨཱ སཱ ཝཱིཐི ཨུདཀཱབྷཱཝེན ཨཛཱནུརཱུཔཏཱཡ ‘‘ཨཛཝཱིཐཱི’’ཏི སམཉྙཾ གཏཱ. ཡཱཡ པན ཝཱིཐིཡཱ སཱུརིཡེ གཙྪནྟེ ཝསྶཝལཱཧཀཱ དེཝཔུཏྟཱ སཱུརིཡཱབྷིཏཱཔཱབྷཱཝཏོ ཨབྷིཎྷཾ ཨཏྟནོ ཝིམཱནཏོ བཧི ནིཀྑམིཏྭཱ ཀཱིལཱ༹པསུཏཱ ཨིཏོ ཙིཏོ ཙ ཝིཙརནྟི, ཏདཱ ཀིར སཱུརིཡཝིམཱནཾ པཀཏིམགྒཏོ ཨུདྡྷཾ ཨཱརུཧིཏྭཱ ཝིཙརཏི, ཏསྶ ཨུདྡྷཾ ཨཱརུཡ྄ཧ ཙརཎེནེཝ ཙནྡཝིམཱནམྤི ཨུདྡྷཾ ཨཱརུཡ྄ཧ ཙརཏི ཏགྒཏིཀཏྟཱ, ཏགྒཏིཀཏཱ ཙ སམཱནགཏིནཱ ཝཱཏམཎྜལེན ཝིམཱནསྶ ཕེལླིཏབྦཏྟཱ, ཏསྨཱ སཱ ཝཱིཐི ཨུདཀབཧུབྷཱཝེན ནཱགཱནུརཱུཔཏཱཡ ‘‘ནཱགཝཱིཐཱི’’ཏི སམཉྙཾ གཏཱ. ཡདཱ སཱུརིཡོ ཨུདྡྷམནཱརུཧནྟོ, ཨདྷོ ཙ ཨནོཏརནྟོ པཀཏིམགྒེནེཝ གཙྪཏི, ཏདཱ ཝསྶཝལཱཧཀཱ ཡཐཱཀཱལཾ, ཡཐཱརུཙི ཙ ཝིམཱནཏོ ནིཀྑམིཏྭཱ སུཁེན ཝིཙརནྟི, ཏེན ཀཱལེན ཀཱལཾ ཝསྶནཏོ ལོཀེ ཨུཏུསམཏཱ ཧོཏི, ཏཱཡ ཨུཏུསམཏཱཡ ཧེཏུབྷཱུཏཱཡ སཱ ཙནྡིམསཱུརིཡཱནཾ གཏི གཝཱནུརཱུཔཏཱཡ ‘‘གོཝཱིཐཱི’’ཏི སམཉྙཾ གཏཱ. ཏེན ཝུཏྟཾ ‘‘ཨཛཝཱིཐཱི’’ཏིཨཱདི.

ཨེཝཾ ‘‘ཀཏི ནེསཾ ཝཱིཐིཡོ’’ཏི པཉྷཾ ཝིསྶཛྫེཏྭཱ ‘‘ཀཐཾ ཝིཙརནྟཱི’’ཏི པཉྷཾ ཝིསྶཛྫེཏུཾ ‘‘ཙནྡིམསཱུརིཡཱ’’ཏིཨཱདི ཝུཏྟཾ. ཏཏྠ སིནེརུཏོ བཧི ནིཀྑམནྟཱིཏི སིནེརུསམཱིཔེན ཏཾ པདཀྑིཎཾ ཀཏྭཱ གཙྪནྟཱ ཏཏོ གམནཝཱིཐིཏོ བཧི ཨཏྟནོ ¶ ཏིརིཡགམནེན ཙཀྐཝཱལཱ༹བྷིམུཁཱ ནིཀྑམནྟི. ཨནྟོ ཝིཙརནྟཱིཏི ཨེཝཾ ཚ མཱསེ ཁཎེ ཁཎེ སིནེརུཏོ ཨཔསཀྐནཝསེན ཏཏོ ནིཀྑམིཏྭཱ ཙཀྐཝཱལ༹སམཱིཔཾ པཏྟཱ, ཏཏོཔི ཚ མཱསེ ཁཎེ ཁཎེ ཨཔསཀྐནཝསེན ¶ ནིཀྑམིཏྭཱ སིནེརུསམཱིཔཾ པཱཔུཎནྟཱ ཨནྟོ ཝིཙརནྟི. ཨིདཱནི ཏམེཝཏྠཾ སངྑེཔེན ཝུཏྟཾ ཝིཝརིཏུཾ ‘‘ཏེཧཱི’’ཏིཨཱདི ཝུཏྟཾ. སིནེརུསྶ, ཙཀྐཝཱལ༹སྶ ཙ ཡཾ ཋཱནཾ ཝེམཛ྄ཛྷཾ, ཏསྶ, སིནེརུསྶ ཙ ཡཾ ཋཱནཾ ཝེམཛ྄ཛྷཾ, ཏེན གཙྪནྟཱ ‘‘སིནེརུསམཱིཔེན ¶ ཝིཙརནྟཱི’’ཏི ཝུཏྟཱ, ན སིནེརུསྶ ཨགྒཱལི༹ནྡཨལླཱིནཱ. ཙཀྐཝཱལ༹སམཱིཔེན ཙརིཏྭཱཏི ཨེཏྠཱཔི ཨེསེཝ ནཡོ. མཛ྄ཛྷེནཱཏི སིནེརུསྶ, ཙཀྐཝཱལ༹སྶ ཙ ཨུཛུཀཾ ཝེམཛ྄ཛྷེན མགྒེན. ཙིཏྲམཱསེ མཛ྄ཛྷེནཱཏི ཨེཏྠཱཔི ཨེསེཝ ནཡོ.

ཨེཀཔྤཧཱརེནཱཏི ཨེཀཝེལཱཡ, ཨེཀེནེཝ ཝཱ ཨཏྟནོ ཨེཀཔྤཧཱརེན. མཛ྄ཛྷནྷིཀོཏི ཋིཏམཛ྄ཛྷནྷིཀོ ཀཱལོ ཧོཏི. ཏདཱ ཧི སཱུརིཡམཎྜལཾ ཨུགྒཙྪནྟཾ ཧུཏྭཱཔི ཨིམསྨིཾ དཱིཔེ ཋིཏསྶ ཨུཔཌྜྷམེཝ དིསྶཏི, ཨུཏྟརཀུརཱུསུ ཋིཏསྶ ཨོགཙྪནྟཾ ཧུཏྭཱ. ཨེཝཉྷི ཨེཀཝེལཱཡམེཝ ཏཱིསུ དཱིཔེསུ ཨཱལོཀཀརཎཾ.

ཡེསུ ཀཏྟིཀཱདིནཀྑཏྟསམཉྙཱ, ཏཱནིཔི ཏཱརཀརཱུཔཱནི ཡེཝཱཏི ཝུཏྟཾ ‘‘སེསཏཱརཀརཱུཔཱནི ཙཱ’’ཏི, ནཀྑཏྟསཉྙིཏཏཱརཀརཱུཔཏོ ཨཝསིཊྛཏཱརཀརཱུཔཱནཱིཏི ཨཏྠོ. ཨུབྷཡཱནིཔི ཏཱནི དེཝཏཱནཾ ཝསནཀཝིམཱནཱནཱིཏི ཝེདིཏབྦཱནི. རཱ-སདྡོ ཏིཡཏི ཚིཛྫཏི ཨེཏྠཱཏི རཏྟི, སཏྟཱནཾ སདྡསྶ ཝཱུཔསམནཀཱལོཏི ཨཏྠོ. དིབྦནྟི སཏྟཱ ཀཱིལ༹ནྟི ཛོཏནྟི ཨེཏྠཱཏི དིཝཱ. སཏྟཱནཾ ཨཱཡུཾ མིནནྟོ ཝིཡ སིཡཏི ཨནྟཾ ཀརོཏཱིཏི མཱསོ. ཏཾ ཏཾ ཀིརིཡཾ ཨརཏི ཝཏྟེཏཱིཏི ཨུཏུ. ཏཾ ཏཾ སཏྟཾ, དྷམྨཔྤཝཏྟིཉྩ སངྒམྨ ཝདནྟོ ཝིཡ སརཏི ཝཏྟེཏཱིཏི སཾཝཙྪརོ.

༡༢༢. ཝིཝཛྫནཾ ཝིཝཛྫོ, སོ ཨེཝ ཝེཝཛྫཾ, ཝཎྞསྶ ཝེཝཛྫཾ ¶ ཝཎྞཝེཝཛྫཾ, ཝཎྞསམྤཏྟིཡཱ ཝིགམོ, ཏསྶ པན ཨཏྠིཏཱ ‘‘ཝཎྞཝེཝཛྫཏཱ’’ཏི ཝུཏྟཱ. ཏེནཱཧ ‘‘ཝིཝཛྫབྷཱཝོ’’ཏི. ཏེསནྟི ཝཎྞཝནྟཱནཾ སཏྟཱནཾ. ཨཏིམཱནཔྤཙྩཡཱཏི དུབྦཎྞཝམྦྷནཝསེན ཨཏིཀྐམྨ ཨཏྟནོ ཝཎྞཾ པཊིཙྩ མཱནཔཙྩཡཱ, མཱནསམྤགྒཎྷནནིམིཏྟནྟི ཨཏྠོ. སཱཏིསཡོ རསོ ཨེཏིསྶཱ ཨཏྠཱིཏི རསཱཏི ལདྡྷམཱནཱཡ, ཨནུབྷཱསིཾསཱུཏི ཨནུརོདྷཝསེན བྷཱསིཾསུ. ལོཀུཔྤཏྟིཝཾསཀཐནྟི ལོཀུཔྤཏྟིཝཾསཛཾ པཝེཎཱིཀཐཾ, ཨཱདིཀཱལེ ཨུཔྤནྣཾ པཝེཎཱིཨཱགཏཀཐནྟི ཨཏྠོ. ‘‘ཨནུཔཏནྟཱི’’ཏིཔི པཱཋོ, སོ ཨེཝཏྠོ.

བྷཱུམིཔཔྤཊཀཔཱཏུབྷཱཝཱདིཝཎྞནཱ

༡༢༣. ཨེདིསོ ཧུཏྭཱཏི ཨཧིཙྪཏྟཀསདིསོ ཧུཏྭཱ.

༡༢༤. པདཱལཏཱཏི ¶ ¶ ‘‘པདཱ’’ཏི ཨེཝཾནཱམཱ ཨེཀཱ ལཏཱ, སཱ པན ཡསྨཱ སམྤནྣཝཎྞགནྡྷརསཱ, ཏསྨཱ ‘‘བྷདྡལཏཱ’’ཏི ཝུཏྟཱ. ནཱལི༹ཀཱཏི ནཱལི༹ཝལླི. ཨཧཱཡཱིཏི ནསྶི.

༡༢༥. ཨཀཊྛཔཱཀོཏི ཨཀཊྛེཡེཝ ཋཱནེ ཨུཔྤཛྫིཏྭཱ པཙྩནཀོ, ནཱིཝཱརོ ཝིཡ སཉྫཱཏོ ཧུཏྭཱ ནིཔྤཛྫནཀོཏི ཨཏྠོ. ཀཎོ ‘‘ཀུཎྜཀ’’ནྟི ཙ ཝུཙྩཏི. ཐུསནྟི ཏཎྜུལཾ པརིཡོནནྡྷིཏྭཱ ཋིཏཏྟཙོ, ཏདབྷཱཝཏོ ‘‘ཨཀཎོ, ཨཐུསོ’’ཏི སཱལི ཝུཏྟོ. ‘‘པཊིཝིརཱུལ༹ྷ’’ནྟི ཨིདཾ པཀྐབྷཱཝསྶ ཀཱརཎཝཙནཾ. པཊིཝིརཱུལ༹ྷཏོ ཧི ཏཾ པཀྐནྟི. ཡསྨིཾ ཋཱནེ སཱཡཾ པཀྐོ སཱལི གཧིཏོ, ཏདེཝ ཋཱནཾ དུཏིཡདིཝསེ པཱཏོ པཀྐེན སཱལིནཱ པརིཔུཎྞཾ ཧུཏྭཱ ཏིཊྛཏཱིཏི ཨཱཧ ‘‘སཱཡཾ གཧིཏཊྛཱནཾ པཱཏོ པཀྐཾ ཧོཏཱི’’ཏིཨཱདི. ཨལཱཡིཏནྟི ¶ ལཱཡིཏཊྛཱནམྤི ཏེསཾ ཀམྨཔྤཙྩཡཱ ཨལཱཡིཏམེཝ ཧུཏྭཱ ཨནཱུནཾ པརིཔུཎྞམེཝ པཉྙཱཡཏི, ན ཀེཝལཾ པཉྙཱཡནམེཝ, ཨཐ ཁོ ཏཐཱབྷཱུཏམེཝ ཧུཏྭཱ ཏིཊྛཏི.

ཨིཏྠིཔུརིསལིངྒཱདིཔཱཏུབྷཱཝཝཎྞནཱ

༡༢༦. ‘‘མནུསྶཀཱལེ’’ཏི ཨིདཾ པུབྦེ མནུསྶབྷཱུཏཱནཾཡེཝ ཏཏྠ ཨིདཱནི ནིཀནྟིཝསེན ཨུཔྤཏྟི ཧོཏཱིཏི ཀཏྭཱ ཝུཏྟཾ, དེཝཏཱནམྤི པུརིམཛཱཏིཡཾ ཨིཏྠིབྷཱཝེ ཋིཏཱནཾ ཏཏྠ ཝིརཱགཱདིཔུརིསཏྟཔྤཙྩཡེ ཨསཏི ཏདཱ ཨིཏྠིལིངྒམེཝ པཱཏུབྷཝཏི. པུརིསཏྟཔཙྩཡེཏི ‘‘ཨཏྟནོཔི ཨནིསྶརཏཱ, སབྦཀཱལཾ པརཱཡཏྟཝུཏྟིཏཱ, རཛསྶལཏཱ ཝཉྩཏཱ, གབྦྷདྷཱརཎཾ, པཋམཱཡ པཀཏིཡཱ ནིཧཱིནཔཀཏིཏཱ, སཱུརཝཱིརཏཱབྷཱཝོ, ‘ཨཔྤཀཱ ཛནཱ’ཏི ‘ཧཱིལེ༹ཏབྦཏཱ’ཏི ཨེཝམཱདི ཨཱདཱིནཝཔཙྩཝེཀྑཎཔུབྦཀམྤི ཨིཏྠིབྷཱཝེ ‘ཨལཾ ཨིཏྠིབྷཱཝེན, ན ཧི ཨིཏྠིབྷཱཝེ ཋཏྭཱ ཙཀྐཝཏྟིསིརིཾ, ན སཀྐམཱརབྲཧྨསིརིཡོ པཙྩནུབྷཝིཏུཾ, ན པཙྩེཀབོདྷིཾ, ན སམྨཱསམྦོདྷིཾ ཨདྷིགནྟུཾ སཀྐཱ’ཏི ཨེཝཾ ཨིཏྠིབྷཱཝཝིརཛྫནཾ, ‘ཡཐཱཝུཏྟཨཱདཱིནཝཝིརཧཏོ ཨུཏྟམཔཀཏིབྷཱཝཏོ སམྤདམིདཾ པུརིསཏྟཾ ནཱམ སེཊྛཾ ཨུཏྟམཾ, ཨེཏྠ ཋཏྭཱ སཀྐཱ ཨེཏཱ སམྤཏྟིཡོ སམྤཱཔུཎིཏུ’ནྟི ཨེཝཾ པུརིསཏྟབྷཱཝེ སམྦྷཱཝནཱཔུབྦཀཾ པཏྠནཱཋཔནཾ, ‘ཏཏྠ ནིནྣཔོཎཔབྦྷཱརཙིཏྟཏཱ’ཏི’’ ཨེཝམཱདིཀེ པུརིསབྷཱཝསྶ པཙྩཡབྷཱུཏེ དྷམྨེ. པཱུརེཏྭཱ ཝཌྜྷེཏྭཱ. པཙྩཀྑཾ བྷཱུཏཾ, སདིསཉྩ དིཊྛདྷམྨིཀཾ, སམྤརཱཡིཀཉྩ སུཝིཔུལཾ ཨནཏྠཾ ཨཙིནྟེཏྭཱ པུརིསསྶ ཀཱམེསུ མིཙྪཱཙརཎཾ ཀེཝལཾ ཨིཏྠིཡཾ ཨཱསཱཔཏྟི ¶ ཕལེནེཝཱཏི ཨཱསཱཨཱཔཏྟི ཨིཏྠིབྷཱཝཱཝཧཱཔི ཧོཏིཡེཝ. ཏནྣིནྣཔོཎཔབྦྷཱརབྷཱཝེན ཏནྣིཀནྟིཡཱ ནིམིཏྟབྷཱཝཱཔཏྟིཏོཏི ཝུཏྟཾ ‘‘པུརིསོ ཨིཏྠཏྟབྷཱཝཾ ལབྷནྟོ ཀཱམེསུམིཙྪཱཙཱརཾ ¶ ནིསྶཱཡ ལབྷཏཱི’’ཏི. ཏདཱཏི ཡཐཱཝུཏྟེ པཋམཀཔྤིཀཀཱལེ. པཀཏིཡཱཏི སབྷཱཝེན. མཱཏུགཱམསྶཱཏི པུརིམཏྟབྷཱཝེ མཱཏུགཱམབྷཱུཏསྶ. པུརིསསྶཱཏི ཨེཏྠཱཔི ‘‘པཀཏིཡཱ’’ཏི པདཾ ¶ ཨཱནེཏྭཱ སམྦནྡྷིཏབྦཾ. ཨུཔནིཛ྄ཛྷཱཡཏནྟི ཨུཔེཙྩ ནིཛ྄ཛྷཱཡནྟཱནཾ. ཡཐཱ ཨཉྙམཉྙསྨིཾ སཱརཱགོ ཨུཔྤཛྫཏི, ཨེཝཾ སཱཔེཀྑབྷཱཝེན ཨོལོཀེནྟཱནཾ. རཱགཔརིལཱ༹ཧོཏི རཱགཛོ པརིལཱ༹ཧོ.

ནིབྦུཡ྄ཧམཱནཱཡཱཏི པརིཎཏཱ ཧུཏྭཱ ནིཡྻམཱནཱཡ.

མེཐུནདྷམྨསམཱཙཱརཝཎྞནཱ

༡༢༧. གོམཡཔིཎྜམཏྟམྤི ནཱལཏྠཱཏི སམྨདེཝ ཝིཝཱཧཀམྨཾ ནཱལཏྠཱཏི ཨདྷིཔྤཱཡེན ཝདནྟི. པཱཏབྱཏནྟི ཏསྨིཾ ཨསདྡྷམྨེ ཀིལེསཀཱམེན པིཝིཏབྦཏཾ ཀིཉྩི པིཝིཏབྦཝཏྠུཾ པིཝནྟཱ ཝིཡ ཨཏིཝིཡ ཏོསེཏྭཱ པརིབྷུཉྫིཏབྦཏཾ ཨཱཔཛྫིཾསུ, པཱཏབྱཏནྟི ཝཱ པརིབྷུཉྫནཀཏཾ ཨཱཔཛྫིཾསུ ཨུཔགཙྪིཾསུ. པརིབྷོགཏྠོ ཧི ཨཡཾ པཱ-སདྡོ, ཀཏྟུསཱདྷནོ ཙ ཏབྱ-སདྡོ, ཡཐཱརུཙི པརིབྷུཉྫིཾསཱུཏི ཨཏྠོ.

སནྣིདྷིཀཱརཀནྟི སནྣིདྷིཀཱརཾ, ཀ-ཀཱརོ པདཝཌྜྷནམཏྟནྟི ཨཱཧ ‘‘སནྣིདྷིཾ ཀཏྭཱ’’ཏི. ཨཔདཱནནྟི ཨཝཁཎྜནཾ. ཨེཀེཀསྨིཾ ཋཱནེཏི ཡཏྠ ཡཏྠ ཝཧིཏཾ, ཏསྨིཾ ཏསྨིཾ ཨེཀེཀསྨིཾ ཋཱནེ. གུམྦགུམྦཱཏི པུཉྫཔུཉྫཱ.

སཱལིཝིབྷཱགཝཎྞནཱ

༡༢༨. སཱིམཾ ཋཔེཡྻཱམཱཏི ‘‘ཨཡཾ བྷཱུམིབྷཱགོ ཨསུཀསྶ, ཨཡཾ བྷཱུམིབྷཱགོ ཨསུཀསྶཱ’’ཏི ཨེཝཾ པརིཙྪེདཾ ཀརེཡྻཱམ. ཏཾ ཨགྒཾ ཀཏྭཱཏི ཏཾ ཨཱདིཾ ཀཏྭཱ.

མཧཱསམྨཏརཱཛཝཎྞནཱ

༡༣༠. པཀཱསེཏབྦནྟི དོསཝསེན པཀཱསེཏབྦཾ. ཁིཔིཏབྦནྟི ཁེཔཾ ཀཱཏབྦཾ. ཏེནཱཧ ‘‘ཧཱརེཏབྦ’’ནྟི, སཏྟནིཀཱཡཏོ ནཱིཧརིཏབྦཾ.

ནེསནྟི ¶ ནིདྡྷཱརཎེ སཱམིཝཙནཾ.

༡༣༡. ཨཀྑརནྟི ནིརུཏྟིཾ. སཱ ཧི མཧཱཛནེན སམྨཏོཏི ནིདྡྷཱརེཏྭཱ ཝཏྟབྦཏོ ནིརུཏྟི ¶ , ཏསྨིཾཡེཝ ནིརཱུལ༹ྷབྷཱཝཏོ ¶ , ཨཉྙཏྠ ཨསཉྩརཎཏོ ཨཀྑརནྟི ཙ ཝུཙྩཏི, ཏཐཱ སངྑཱཏབྦཏོ སངྑཱ, སམཉྙཱཡཏཱིཏི སམཉྙཱ, པཉྙཱཔནཏོ པཉྙཏྟི, ཝོཧརཎཏོ ཝོཧཱརོ. ཨུཔྤནྣོཏི པཝཏྟོ. ན ཀེཝལཾ ཨཀྑརམེཝཱཏི ན ཀེཝལཾ སམཉྙཱཀརཎམེཝ. ཁེཏྟསཱམིནོཏི ཏཾ ཏཾ བྷཱུམིབྷཱགཾ པརིགྒཧེཏྭཱ ཋིཏསཏྟཱ. ཏཱིཧི སངྑེཧཱིཏི ཏིཝིདྷཀིརིཡཱབྷིསངྑཏེཧི ཏཱིཧི སངྑེཧི ཁཏྟིཡཱདཱིཧི ཏཱིཧི ཝཎྞེཧི པརིགྒཧིཏེཧི. ‘‘ཁཏྟིཡཱནུཡནྟབྲཱཧྨཎགཧཔཏིཀནེགམཛཱནཔདེཧི ཏཱིཧི གཧཔཏཱིཧི པརིགྒཧིཏེཧཱི’’ཏི ཙ ཝདནྟི. ཨགྒནྟི ཉཱཏེནཱཏི ཨགྒཾ ཀུལནྟི ཉཱཏེན. ཁཏྟིཡཀུལཉྷི ལོཀེ སབྦསེཊྛཾ. ཡཐཱཧ ‘‘ཁཏྟིཡོ སེཊྛོ ཛནེཏསྨིཾ, ཡེ གོཏྟཔཊིསཱརིནོ’’ཏི, (དཱི. ནི. ༡.༢༧༧; ༣.༡༤༠; མ. ནི. ༢.༣༠; སཾ. ནི. ༡.༡༨༢, ༢༤༥) ཨབྷེདོཔཙཱརེན པན ཨཀྑརསྶ ཁཏྟིཡསདྡསྶཔི སེཊྛཏཱཏི པཱལི༹ཡཾ ‘‘ཨགྒཉྙེན ཨཀྑརེནཱ’’ཏི ཝུཏྟཾ. ཨིདཱནི ཨབྷེདོཔཙཱརེན ཝིནཱ ཨེཝ ཨཏྠཾ དསྶེཏུཾ ‘‘ཨགྒེ ཝཱ’’ཏིཨཱདི ཝུཏྟཾ.

བྲཱཧྨཎམཎྜལཱདིཝཎྞནཱ

༡༣༢. ཡེན ཨནཱརམྦྷབྷཱཝེན བཱཧིཏཱཀུསལཱ ‘‘བྲཱཧྨཎཱ’’ཏི ཝུཏྟཱ, ཏམེཝ ཏཱཝ དསྶེཏུཾ པཱལི༹ཡཾ ‘‘ཝཱིཏངྒཱརཱ’’ཏིཨཱདི ཝུཏྟནྟི ཏདཏྠཾ དསྶེནྟོ ‘‘པཙིཏྭཱ’’ཏིཨཱདིམཱཧ. ཏམེནནྟི ཝཙནཝིཔལླཱསེན ནིདྡེསོཏི ཨཱཧ ‘‘ཏེ ཨེཏེ’’ཏི. ཨབྷིསངྑརོནྟཱཏི ཙིཏྟམནྟབྷཱཝེན ཨཉྙམཉྙཾ ཨབྷིཝིསིཊྛེ ཀརོནྟཱ, བྲཱཧྨཎཱཀཔྤབྷཱཝེན སངྑརོནྟཱ ཙ. ཝཱཙེནྟཱཏི པརེསཾ ཀཐེནྟཱ, ཡེ ཏཐཱ གནྠེ ཀཱཏུཾ ན ཛཱནནྟི. ཨཙྪནྟཱིཏི ¶ ཨཱསནྟི, ཨུཔཝིསནྟཱིཏི ཨཏྠོ. ཏེནཱཧ ‘‘ཝསནྟཱི’’ཏི. ཨཙྪེནྟཱིཏི ཀཱལཾ ཁེཔེནྟི. ཧཱིནསམྨཏཾ ཛྷཱནབྷཱཝནཱནུཡོགཾ ཚཌྜེཏྭཱ གནྠེ པསུཏཏཱདཱིཔནཏོ. སེཊྛསམྨཏཾ ཛཱཏཾ ‘‘ཝེདདྷརཱ སོཏྟིཡཱ སུབྲཱཧྨཎཱཏི ཨེཝཾ སེཊྛསམྨཏཾ ཛཱཏཾ.

༡༣༣. མེཐུནདྷམྨཾ སམཱདིཡིཏྭཱཏི ཛཱཡཱཔཏིཀབྷཱཝེན དྭཡཾ དྭཡཾ ནིཝཱསཾ ཨཛ྄ཛྷུཔགནྟྭཱ. ཝཱཎིཛཀམྨཱདིཀེཏི ཨཱདི-སདྡེན ཀསིཀམྨཱདིཾ སངྒཎྷཱཏི.

༡༣༤. ལུདྡཱཙཱརཀམྨཁུདྡཱཙཱརཀམྨུནཱཏི ¶ པརཝིཧེཋནཱདིལུདྡཱཙཱརཀམྨུནཱ, ནལ༹ཀཱརདཱརུཀམྨཱདིཁུདྡཱཙཱརཀམྨུནཱ ཙ. སུདྡནྟི ཨེཏྠ སུ-ཨིཏི སཱིགྷཏྠེ ནིཔཱཏོ. དཱ-ཨིཏི གརཧཎཏྠེཏི ཨཱཧ ‘‘སུདྡཾ སུདྡཾ ལཧུཾ ལཧུཾ ཀུཙྪིཏཾ གཙྪནྟཱི’’ཏི.

༡༣༥. ཨཧཱུཏི ཀཱལཝིཔལླཱསཝསེན ཝུཏྟནྟི དསྶེནྟོ ‘‘ཧོཏི ཁོ’’ཏི ཨཱཧ. ཨིམིནཱཏི ¶ ‘‘ཨིམེཧི ཁོ, ཝཱསེཊྛ, ཙཏཱུཧི མཎྜལེཧི སམཎམཎྜལསྶ ཨབྷིནིབྦཏྟི ཧོཏཱི’’ཏི ཨིམིནཱ ཝཙནེན. ཨིམཾ དསྶེཏཱིཏི སམཎམཎྜལཾ ནཱམ…པེ… སུདྡྷིཾ པཱཔུཎནྟཱིཏི ཨིམཾ ཨཏྠཛཱཏཾ དསྶེཏི. ཡདི ཨིམེཧི…པེ… ཨབྷིནིབྦཏྟི ཧོཏི, ཨེཝཾ སནྟེ ཨིམཱནེཝ ཙཏྟཱརི མཎྜལཱནི པདྷཱནཱནི, སམཎམཎྜལཾ ཨཔྤདྷཱནཾ ཏཏོ ཨབྷིནིབྦཏྟཏྟཱཏི? ནཡིདམེཝནྟི དསྶེཏུཾ ‘‘ཨིམཱནཱི’’ཏིཨཱདི ཝུཏྟཾ. སམཎམཎྜལཾ ཨནུཝཏྟནྟི གུཎེཧི ཝིསིཊྛབྷཱཝཏོ. གུཎོ ཧི ཝིཉྙཱུནཾ ཨནུཝཏྟནཧེཏུ, ན ཀོལཔུཏྟིཡཾ, ཝཎྞཔོཀྑརཏཱ, ཝཱཀྐརཎམཏྟཾ ཝཱ. ཏེནཱཧ ‘‘དྷམྨེནེཝ ཨནུཝཏྟནྟི, ནོ ཨདྷམྨེནཱ’’ཏི. སོ དྷམྨོ ཙ ལོཀུཏྟརོཝ ཨདྷིཔྤེཏོ, ཡེན སཾསཱརཏོ ཝིསུཛ྄ཛྷཏི, ཏསྨཱ སམཎམཎྜལནྟི ཙ སཱསནིཀམེཝ ¶ སམཎགཎཾ ཝདཏཱིཏི དཊྛབྦཾ. ཏེནཱཧ ‘‘སམཎམཎྜལཉྷཱི’’ཏིཨཱདི.

དུཙྩརིཏཱདིཀཐཱཝཎྞནཱ

༡༣༦. མིཙྪཱདིཊྛིཝསེན སམཱདིནྣཀམྨཾ ནཱམ ‘‘ཀོ ཨནུབནྡྷིཏབྦོ. ཨཛོཏགྒིསོཊྛིམིསོ’’ཏིཨཱདིནཱ ཡཉྙཝིདྷཱནཱདིཝསེན པཝཏྟིཏཾ ཧིཾསཱདིཔཱཔཀམྨཾ. མིཙྪཱདིཊྛིཀམྨསྶཱཏི ‘‘ཨེས སདྡྷཱདྷིགཏོ དེཝཡཱནོ, ཡེན ཡནྟི པུཏྟིནོ ཝིསོཀཱ’’ཏིཨཱདིནཱ པཝཏྟིཏསྶ མིཙྪཱདིཊྛིསཧགཏཀམྨསྶ. སམཱདཱནཾ ཏསྶ ཏཐཱ པཝཏྟནཾ, ཏསྶཱ ཝཱ དིཊྛིཡཱ ཨུཔགམནཾ.

༡༣༧. དྭཡཀཱརཱིཏི ཀུསལཱཀུསལདྭཡསྶ ཀཏྟཱ. ཏཡིདཾ དྭཡཾ ཡསྨཱ ཨེཀཛ྄ཛྷཾ ནཔྤཝཏྟཏི, ཏསྨཱ ཨཱཧ ‘‘ཀཱལེནཱ’’ཏིཨཱདི. ཨེཀཀྑཎེ ཨུབྷཡཝིཔཱཀདཱནཊྛཱནཾ ནཱམ ནཏྠི ཨེཀསྨིཾ ཁཎེ ཙིཏྟདྭཡཱུཔསཉྷིཏཱཡ སཏྟསནྟཏིཡཱ ཨབྷཱཝཏོ. ཡཐཱ པན དྭཡཀཱརིནོ སུཁདུཀྑཔཊིསཾཝེདིཏཱ སམྦྷཝཏི, ཏཾ དསྶེཏུཾ ‘‘ཡེན པནཱ’’ཏིཨཱདི ཝུཏྟཾ. ཨེཝཾབྷཱུཏོཏི ཝིཀལཱཝཡཝོ. དྭེཔིཧི ཀུསལཱཀུསལཀམྨཱནི ཀཏཱུཔཙིཏཱནི སབྷཱཝཏོ བལཝནྟཱནེཝ ཧོནྟི, ཏསྨཱ མརཎཀཱལེ ཨུཔཊྛཧནྟི ¶ . ཏེསུ ཨཀུསལཾ བལཝཏརཾ ཧོཏི པཙྩཡལཱབྷཏོ. ནིཀནྟིཨཱདཡོ ཧི པཙྩཡཝིསེསཱ ཨཀུསལསྶེཝ སབྷཱགཱ, ན ཀུསལསྶ, ཏསྨཱ ཀཏཱུཔཙིཏབྷཱཝེན སམཱནབལེསུཔི ཀུསལཱཀུསལེསུ པཙྩཡལཱབྷེན ཝིཔཙྩིཏུཾ ལདྡྷོཀཱསཏཱཡ ཀུསལཏོ ཨཀུསལཾ བལཝཏརཾ ཧོཏཱིཏི, ཏཐཱབྷཱུཏམྤི ཏཾ ཡཐཱ ཝིཔཱཀདཱནེ ལདྡྷོཀཱསསྶ ཀུསལསྶཱཔི ཨཝསརོ ཧོཏི, ཏཐཱ ལདྡྷཔཙྩཡཾ པཊིསནྡྷིདཱནཱབྷིམུཁཾ ཀུསལཾ པཊིབཱཧིཏྭཱ པཊིསནྡྷིཾ དེནྟཾ ཏིརཙྪཱནཡོནིཡཾ ནིབྦཏྟཱཔེཏཱིཏི. ‘‘ཨཀུསལཾ བལཝཏརཾ ཧོཏཱི’’ཏི ཨེཏྠ ‘‘ཨཀུསལཾ ཙེ བལཝཏརཾ ཧོཏི, ཏཾ ཀུསལཾ པཊིབཱཧིཏྭཱ’’ཏི ཝུཏྟནཡེནེཝ ཨཏྠཾ ཝཏྭཱ ¶ ཏེསུ ཀུསལཾ ཙེ བལཝཏརཾ ཧོཏི, ཏཉྩ ¶ ཨཀུསལཾ པཊིབཱཧིཏྭཱ མནུསྶཡོནིཡཾ ནིབྦཏྟཱཔེཏི, ཨཀུསལཾ པཝཏྟིཝེདནཱིཡཾ ཧོཏི, ཨཐ ནཾ ཏཾ ཀཱཎམྤི ཀརོཏི ཁུཛྫམྤི པཱིཋསཔྤིམྤི ཀུཙྪིརོགཱདཱིཧི ཝཱ ཨུཔདྡུཏཾ. ཨེཝཾ སོ པཝཏྟིཡཾ ནཱནཔྤཀཱརཾ དུཀྑཾ པཙྩནུབྷཝཏཱིཏི ཨིདཾ སནྡྷཱཡ ཝུཏྟཾ ‘‘སུཁདུཀྑཔྤཊིསཾཝེདཱི ཧོཏཱི’’ཏི. ཏཏྲཱཡཾ ཝིནིཙྪཡོ – ཝུཏྟཀཱལེ ཝཱ ཀཱརེན སམཱནབལེསུ ཀུསལཱཀུསལཀམྨེསུ ཨུཔཊྛཧནྟེསུ མརཎསྶ ཨཱསནྣཝེལཱཡཾ ཡདི བལཝཏརཱནི ཀུསལཛཝནཱནི ཛཝནྟི, ཡཐཱཨུཔཊྛིཏཾ ཨཀུསལཾ པཊིབཱཧིཏྭཱ ཀུསལཾ ཝུཏྟནཡེན པཊིསནྡྷིཾ དེཏི. ཨཐ བལཝཏརཱནི ཨཀུསལཛཝནཱནི ཛཝནྟི, ཡཐཱཨུཔཊྛིཏཾ ཀུསལཾ པཊིབཱཧིཏྭཱ ཨཀུསལཾ ཝུཏྟནཡེནེཝ པཊིསནྡྷིཾ དེཏི. ཏཾ ཀིསྶ ཧེཏུ? ཨུབྷིནྣཾ ཀམྨཱནཾ སམཱནབལཝབྷཱཝཏོ, པཙྩཡནྟརསཱཔེཀྑཏོ ཙཱཏི, སབྦཾ ཝཱིམཾསིཏྭཱ གཧེཏབྦཾ.

བོདྷིཔཀྑིཡབྷཱཝནཱཝཎྞནཱ

༡༣༨. བོདྷི ཝུཙྩཏི མགྒསམྨཱདིཊྛི, ཙཏྟཱརི ཨརིཡསཙྩཱནི བུཛ྄ཛྷཏཱིཏི ཀཏྭཱ, སབྷཱཝཏོ, ཏཾསབྷཱཝཏོ ཙ ཏསྶཱ པཀྑེ བྷཝཱཏི བོདྷིཔཀྑིཡཱ, སཏིཝཱིརིཡཱདཡོ དྷམྨཱ, ཏེསཾ བོདྷིཔཀྑིཡཱནཾ. པཊིཔཱཊིཡཱཏི བོདྷིཔཀྑིཡདེསནཱཔཊིཔཱཊིཡཱ. བྷཱཝནཾ ཨནུགནྟྭཱཏི ཨནུཀྐམེན པཝཏྟཾ བྷཱཝནཾ པཏྭཱ. ཏེནཱཧ ‘‘པཊིཔཛྫིཏྭཱ’’ཏི. སཨུཔཱདིསེསཱཡ ནིབྦཱནདྷཱཏུཡཱ ཝསེན ཁཱིཎཱསཝསྶ སེཊྛབྷཱཝཾ ལོཀསྶ པཱཀཊཾ ཀཏྭཱ དསྶེཏུཾ སཀྐཱ, ན ཨིཏརཱཡ སབྦསོ ཨཔཉྙཏྟིབྷཱཝཱུཔགམནེ ཏསྶ ¶ ཨདསྶནཏོཏི ཝུཏྟཾ ‘‘པརིནིབྦཱཏཱིཏི ཀིལེསཔརིནིབྦཱནེན པརིནིབྦཱཡཏཱི’’ཏི. ཝིནིཝཏྟེཏྭཱཏི ཏཏོ ཙཏུཝཎྞཏོ ནཱིཧརིཏྭཱ.

༡༤༠. ཏམེཝཏྠནྟི ‘‘ཁཱིཎཱསཝོཝ དེཝམནུསྶེསུ སེཊྛོ’’ཏི ཝུཏྟམེཝཏྠཾ.

སེཊྛཙྪེདཀཝཱདམེཝཱཏི ¶ ཛཱཏིབྲཱཧྨཎཱནཾ སེཊྛབྷཱཝསམུཙྪེདཀམེཝ ཀཐཾ. དསྶེཏྭཱ བྷཱསིཏྭཱ. སུཏྟནྟཾ ཝིནིཝཏྟེཏྭཱཏི པུབྦེ ལོཀིཡདྷམྨསནྡསྶནཝསེན པཝཏྟཾ ཨགྒཉྙསུཏྟཾ ‘‘སཏྟནྣཾ བོདྷིཔཀྑིཡཱནཾ དྷམྨཱནཾ བྷཱཝནམནྭཱཡཱ’’ཏིཨཱདིནཱ ཏཏོ ཝིནིཝཏྟེཏྭཱ ནཱིཧརིཏྭཱ ཏེན ཨསཾསཊྛཾ ཀཏྭཱ. ཨཱཝཛྫནྟཱཏི སམནྣཱཧརནྟཱ. ཨནུམཛྫནྟཱཏི པུབྦེནཱཔརཾ ཨཏྠཏོ ཝིཙརནྟཱཏི.

ཨགྒཉྙསུཏྟཝཎྞནཱཡ ལཱིནཏྠཔྤཀཱསནཱ.

༥. སམྤསཱདནཱིཡསུཏྟཝཎྞནཱ

སཱརིཔུཏྟསཱིཧནཱདཝཎྞནཱ

༡༤༡. པཱཝཱརེནྟི ¶ ¶ ¶ སཉྪཱདེནྟི སརཱིརཾ ཨེཏེནཱཏི པཱཝཱརོ, ཝཏྠཾ. པཱཝརཎཾ ཝཱ པཱཝཱརོ, ‘‘ཝཏྠཾ དུསྶ’’ནྟི པརིཡཱཡསདྡཱ ཨེཏེཏི དུསྶམེཝ པཱཝཱརོ, སོ ཨེཏསྶ བཧུཝིདྷོ ཨནེཀཀོཊིཔྤབྷེདོ བྷཎྜབྷཱུཏོ ཨཏྠཱིཏི དུསྶཔཱཝཱརིཀོ. སོ ཀིར པུབྦེ དཧརཀཱལེ དུསྶཔཱཝཱརབྷཎྜམེཝ བཧུཾ པརིགྒཧེཏྭཱ ཝཱཎིཛྫཾ ཨཀཱསི, ཏེན ནཾ སེཊྛིཊྛཱནེ ཋིཏམྤི ‘‘པཱཝཱརིཀོ’’ ཏྭེཝ སཉྫཱནནྟི. བྷགཝཏཱིཏི ཨིཏི-སདྡོ ཨཱདིཨཏྠོ, པཀཱརཏྠོ ཝཱ, ཏེན བྷགཝནྟཾ ཨུཔསངྐམིཏྭཱ ཐེརེན ཝུཏྟཝཙནཾ སབྦཾ སངྒཎྷཱཏི. ‘‘ཀསྨཱ ཨེཝཾ ཨཝོཙཱ’’ཏི ཏཐཱཝཙནེ ཀཱརཎཾ པུཙྪིཏྭཱ ‘‘སོམནསྶཔཝེདནཏྠ’’ནྟི ཀསྨཱ པཡོཛནཾ ཝིསྶཛྫིཏཾ, ཏཡིདཾ ཨམྦཾ པུཊྛསྶ ལབུཛཾ བྱཱཀརཎསདིསནྟི? ནཡིདམེཝཾ ཙིནྟེཏབྦཾ. ཡཱ ཧིསྶ ཐེརསྶ ཏདཱ བྷགཝཏི སོམནསྶུཔྤཏྟི, སཱ ནིདྡྷཱརིཏརཱུཔཱ ཀཱརཎབྷཱཝེན ཙོདིཏཱ, ཏསྨཱ ཨེཝཾ ཨཝོཙཱཏི, སཱ ཨེཝ ཙ ཡསྨཱ ནིདྡྷཱརིཏརཱུཔཱ པཝེདནཝསེན བྷགཝཏོ སམྨུཁཱ ཏཐཱཝཙནཾ པཡོཛེཏི, ཏསྨཱ ‘‘ཨཏྟནོ ཨུཔྤནྣསོམནསྶཔཝེདནཏྠ’’ནྟི པཡོཛནབྷཱཝེན ཝིསྶཛྫིཏཾ.

ཏཏྲཱཏི ཏསྨིཾ སོམནསྶཔཝེདནེ. ཝིཧཱརེ ནིཝཱསཔརིཝཏྟནཝསེན སུནིཝཏྠནིཝཱསནོ. ཨཱབྷུཛིཏྭཱཏི ཨཱབནྡྷིཏྭཱ.

སམཱཔཏྟིཏོ ཝུཊྛཱཡ ‘‘ཨཧོ སནྟོ ཝཏཱཡཾ ཨརིཡཝིཧཱརོ’’ཏི སམཱཔཏྟིསུཁཔཙྩཝེཀྑཎམུཁེན ཨཏྟནོ གུཎེ ཨནུསྶརིཏུཾ ཨཱརདྡྷོ, ཨཱརབྷིཏྭཱ ཙ ནེསཾ ཏཾ ཏཾ སཱམཉྙཝིསེསཝིབྷཱགཝསེན ཨནུསྶརི. ཏཐཱ ཧི ‘‘སམཱདྷཱི’’ཏི སཱམཉྙཏོ གཧིཏསྶེཝ ‘‘པཋམཾ ཛྷཱན’’ནྟིཨཱདིནཱ ¶ ཝིསེསཝིབྷཱགོ, ‘‘པཉྙཱ’’ཏི སཱམཉྙཏོ ཙ གཧིཏསྶེཝ ‘‘ཝིཔསྶནཱཉཱཎ’’ནྟིཨཱདིནཱ ཝིསེསཝིབྷཱགོ ཨུདྡྷཊོ. ‘‘ལོཀིཡཱབྷིཉྙཱསུ དིབྦཙཀྑུཉཱཎསྶེཝ གཧཎཾ ཐེརསྶ ¶ ཨིཏརེཧི སཱཏིསཡནྟི དསྶེཏུ’’ནྟི ཝདནྟི, པུབྦེནིཝཱསཉཱཎམྤི པན ‘‘ཀཔྤསཏསཧསྶཱདྷིཀསྶཱ’’ཏིཨཱདིནཱ ཀིཙྩཝསེན དསྶིཏམེཝ, ལཀྑཎཧཱརཝསེན ཝཱ ཨིཏརེསཾ པེཏྠ གཧིཏཏཱ ཝེདིཏབྦཱ.

ཨཏྠཔྤབྷེདསྶ ¶ སལླཀྑཎཝིབྷཱཝནཝཝཏྠཱནཀརཎསམཏྠཾ ཨཏྠེ པབྷེདགཏཾ ཉཱཎཾ ཨཏྠཔཊིསམྦྷིདཱ. ཏཐཱ དྷམྨཔྤབྷེདསྶ སལླཀྑཎཝིབྷཱཝནཝཝཏྠཱནཀརཎསམཏྠཾ དྷམྨེ པབྷེདགཏཾ ཉཱཎཾ དྷམྨཔཊིསམྦྷིདཱ. ནིརུཏྟིཔབྷེདསྶ སལླཀྑཎཝིབྷཱཝནཝཝཏྠཱནཀརཎསམཏྠཾ ནིརུཏྟིཡཾ པབྷེདགཏཾ ཉཱཎཾ ནིརུཏྟིཔཊིསམྦྷིདཱ. པཊིབྷཱནཔྤབྷེདསྶ སལླཀྑཎཝིབྷཱཝནཝཝཏྠཱན ཀརཎསམཏྠཾ པཊིབྷཱནེ པབྷེདགཏཾ ཉཱཎཾ པཊིབྷཱནཔཊིསམྦྷིདཱ. ཨཡམེཏྠ སངྑེཔོ, ཝིཏྠཱརོ པན ཝིསུདྡྷིམགྒེ, (ཝིསུདྡྷི. ༢.༤༢༨) ཏཾ སཾཝཎྞནཱསུ (ཝིསུདྡྷི. ཊཱི. ༢.༤༢༨) ཝུཏྟནཡེནེཝ ཝེདིཏབྦོ. སཱཝཀཝིསཡེ པརམུཀྐཾསགཏཾ ཉཱཎཾ སཱཝཀཔཱརམིཉཱཎཾ སབྦཉྙུཏཉྙཱཎཾ ཝིཡ སབྦཉེཡྻདྷམྨེསུ. ཏསྶཱཔི ཧི ཝིསུཾ པརིཀམྨཾ ནཱམ ནཏྠི, སཱཝཀཔཱརམིཡཱ པན སམྨདེཝ པརིཔཱུརིཏཏྟཱ ཨགྒམགྒསམདྷིགམེནེཝསྶ སམདྷིགམོ ཧོཏི. སབྦཉྙུཏཉྙཱཎསྶེཝ སམྨཱསམྦུདྡྷཱནཾ ཡཱཝ ནིསིནྣཔལླངྐཱ ཨནུསྶརཏོཏི ཡོཛནཱ.

བྷགཝཏོ སཱིལཾ ནིསྶཱཡ གུཎེ ཨནུསྶརིཏུམཱརདྡྷོཏི ཡོཛནཱ. ཡསྨཱ གུཎཱནཾ བཧུབྷཱཝཏོ ནེསཾ ཨེཀཛ྄ཛྷཾ ཨཱཔཱཐཱགམནཾ ནཏྠི, སཏི ཙ ཏསྨིཾ ཨནིརཱུཔིཏརཱུཔེནེཝ ཨནུསྶརཎེན བྷཝིཏབྦཾ, ཏསྨཱ ཐེརོ སཝིསཡེ ཋཏྭཱ ཏེ ཨནུཔདཾ སརཱུཔཏོ ཨནུསྶརི, ཨནུསྶརནྟོ ཙ སབྦཔཋམཾ སཱིལཾ ཨནུསྶརི, ཏཾ དསྶེནྟོ ‘‘བྷགཝཏོ སཱིལཾ ནིསྶཱཡཱ’’ཏི ཨཱཧ, སཱིལཾ ཨཱརབྦྷཱཏི ཨཏྠོ. སེསཔདེསུཔི ཨེསེཝ ནཡོ. ཡསྨཱ ཙེཏྠ ཐེརོ ཨེཀེཀཝསེན ¶ བྷགཝཏོ གུཎེ ཨནུསྶརིཏྭཱ ཏཏོ པརཾ ཙཏུཀྐཔཉྩཀཱདིཝསེན ཨནུསྶརི, ཏསྨཱ ‘‘ཙཏྟཱརོ ཨིདྡྷིཔཱདེ’’ཏི ཝཏྭཱ ཏཏོ པརཾ བོཛ྄ཛྷངྒབྷཱཝནཱསཱམཉྙེན ཨིནྡྲིཡེསུ ཝཏྟབྦེསུ ཏཱནི ཨགྒཧེཏྭཱ ‘‘ཙཏྟཱརོ མགྒེ’’ཏིཨཱདི ཝུཏྟཾ. ཙཏུཡོནིཔརིཙྪེདཀཉཱཎཾ མཧཱསཱིཧནཱདསུཏྟེ (མ. ནི. ༡.༡༥༢) ཨཱགཏནཡེནེཝ ཝེདིཏབྦཾ. ཙཏྟཱརོ ཨརིཡཝཾསཱ ཨརིཡཝཾསསུཏྟེ (ཨ. ནི. ༤.༢༨) ཨཱགཏནཡེནེཝ ཝེདིཏབྦཱ.

པདྷཱནིཡངྒཱདཡོ སངྒཱིཏི (དཱི. ནི. ༣.༣༡༧) དསུཏྟརསུཏྟེསུ (དཱི. ནི. ༣.༣༥༥) ཨཱགམིསྶནྟི. ཚ སཱརཎཱིཡ དྷམྨཱ པརིནིབྦཱནསུཏྟེ (དཱི. ནི. ༢.༡༤༡) ཨཱགཏཱ ཨེཝ. སུཁཾ སུཔནཱདཡོ (ཨ. ནི. ༡༡.༡༥; པཊི. མ. ༢.༢༢) ཨེཀཱདས མེཏྟཱནིསཾསཱ ¶ . ‘‘ཨིདཾ དུཀྑཾ ཨརིཡསཙྩ’’ནྟིཨཱདིནཱ སཾ. ནི. ༥.༡༠༨༡, མཧཱཝ. ༡༥, པཊི. མ. ༢.༣༠) ཙཏཱུསུ ཨརིཡསཙྩེསུ ཏིཔརིཝཏྟཝསེན ཨཱགཏཱ དྭཱདས དྷམྨཙཀྐཱཀཱརཱ. མགྒཕལེསུ པཝཏྟཱནི ¶ ཨཊྛ ཉཱཎཱནི, ཚ ཨསཱདྷཱརཎཉཱཎཱནི ཙཱཏི ཙུདྡས བུདྡྷཉཱཎཱནི. པཉྩདས ཝིམུཏྟིཔརིཔཱཙནིཡཱ དྷམྨཱ མེགྷིཡསུཏྟཝཎྞནཱཡཾ (ཨུདཱ. ཨཊྛ. ༣༡) གཧེཏབྦཱ, སོལ༹སཝིདྷཱ ཨཱནཱཔཱནསྶཏི ཨཱནཱཔཱནསྶཏིསུཏྟེ (མ. ནི. ༣.༡༤༨), ཨཊྛཱརས བུདྡྷདྷམྨཱ (མཧཱནི. ༦༩, ༡༥༦; ཙཱུལ༹ནི. ༨༥; པཊི. མ. ༣.༥; དཱི. ནི. ཨཊྛ. ༣.༣༠༥) ཨེཝཾ ཝེདིཏབྦཱ –

ཨཏཱིཏཾསེ བུདྡྷསྶ བྷགཝཏོ ཨཔྤཊིཧཏཾ ཉཱཎཾ, ཨནཱགཏཾསེ, པཙྩུཔྤནྣཾསེ བུདྡྷསྶ བྷགཝཏོ ཨཔྤཊིཧཏཾ ཉཱཎཾ. ཨིམེཧི ཏཱིཧི དྷམྨེཧི སམནྣཱགཏསྶ བུདྡྷསྶ བྷགཝཏོ སབྦཾ ཀཱཡཀམྨཾ ཉཱཎཔུབྦངྒམཾ ཉཱཎཱནུཔརིཝཏྟི, སབྦཾ ཝཙཱིཀམྨཾ, སབྦཾ མནོཀམྨཾ ཉཱཎཔུབྦངྒམཾ ཉཱཎཱནུཔརིཝཏྟི. ཨིམེཧི ཚཧི དྷམྨེཧི སམནྣཱགཏསྶ བུདྡྷསྶ བྷགཝཏོ ནཏྠི ཚནྡསྶ ཧཱནི, ནཏྠི དྷམྨདེསནཱཡ ཧཱནི, ནཏྠི ཝཱིརིཡསྶ ཧཱནི, ནཏྠི སམཱདྷིསྶ ཧཱནི, ནཏྠི པཉྙཱཡ ཧཱནི, ནཏྠི ཝིམུཏྟིཡཱ ཧཱནི. ཨིམེཧི དྭཱདསཧི དྷམྨེཧི སམནྣཱགཏསྶ བུདྡྷསྶ བྷགཝཏོ ནཏྠི དཝཱ, ནཏྠི རཝཱ, ནཏྠི ཨཔྥུཊྛཾ, ནཏྠི ཝེགཱཡིཏཏྟཾ, ནཏྠི ཨབྱཱཝཊམནོ, ནཏྠི ཨཔྤཊིསངྑཱནུཔེཀྑཱཏི.

ཏཏྠ ¶ ‘‘ནཏྠི དཝཱཏི ཁིཌྜཱདྷིཔྤཱཡེན ཀིརིཡཱ ནཏྠི. ནཏྠི རཝཱཏི སཧསཱ ཀིརིཡཱ ནཏྠཱི’’ཏི ཝདནྟི. སཧསཱ པན ཀིརིཡཱ དཝཱ, ‘‘ཨཉྙཾ ཀརིསྶཱམཱི’’ཏི ཨཉྙསྶ ཀརཎཾ རཝཱ. ནཏྠི ཨཔྥུཊནྟི ཉཱཎེན ཨཕུསིཏཾ ནཏྠི. ནཏྠི ཝེགཱཡིཏཏྟནྟི ཏུརིཏཀིརིཡཱ ནཏྠི. ནཏྠི ཨབྱཱཝཊམནོཏི ནིརཏྠཀཙིཏྟསམུདཱཙཱརོ ནཏྠི. ནཏྠི ཨཔྤཊིསངྑཱནུཔེཀྑཱཏི ཨཉྙཱཎུཔེཀྑཱ ནཏྠི. ཀེཙི པན ‘‘ནཏྠི དྷམྨདེསནཱཡ ཧཱནཱི’’ཏི ཨཔཋིཏྭཱ ‘‘ནཏྠི ཚནྡསྶ ཧཱནི, ནཏྠི ཝཱིརིཡསྶ ཧཱནི, ནཏྠི སཏིཡཱ [སཏྟིཡཱ (ཝིབྷ. མཱུལཊཱི. སུཏྟནྟབྷཱཛནཱིཡཝཎྞནཱ)] ཧཱནཱི’’ཏི པཋནྟི.

ཛརཱམརཎཱདཱིསུ ཨེཀཱདསསུ པཊིཙྩསམུཔྤཱདངྒེསུ པཙྩེཀཾ ཙཏུསཙྩཡོཛནཱཝསེན པཝཏྟཱནི ཙཏུཙཏྟཱལཱིས ཉཱཎཱནིཡེཝ (སཾ. ནི. ༢.༣༣) སུཁཝིསེསཱནཾ ཨདྷིཊྛཱནབྷཱཝཏོ ཉཱཎཝཏྠཱུནི. ཝུཏྟཉྷེཏཾ –

‘‘ཡཏོ ¶ ཁོ བྷིཀྑཝེ ཨརིཡསཱཝཀོ ཨེཝཾ ཛརཱམརཎཾ པཛཱནཱཏི, ཨེཝཾ ཛརཱམརཎསམུདཡཾ པཛཱནཱཏི, ཨེཝཾ ཛརཱམརཎནིརོདྷཾ པཛཱནཱཏི, ཨེཝཾ ཛརཱམརཎནིརོདྷགཱམིནིཾ པཊིཔདཾ པཛཱནཱཏཱི’’ཏིཨཱདི (སཾ. ནི. ༢.༣༣).

ཛརཱམརཎསམུདཡོཏི ¶ ཙེཏྠ ཛཱཏི ཨདྷིཔྤེཏཱ. སེསཔདེསུ བྷཝཱདཡོ ཝེདིཏབྦཱ.

ཀུསལཙིཏྟུཔྤཱདེསུ ཕསྶཱདཡོ པརོཔཎྞཱས ཀུསལདྷམྨཱ.

‘‘ཛཱཏིཔཙྩཡཱ ཛརཱམརཎ’’ནྟི ཉཱཎཾ, ‘‘ཨསཏི ཛཱཏིཡཱ ནཏྠི ཛརཱམརཎ’’ནྟི ཉཱཎཾ, ཨཏཱིཏམྤི ཨདྡྷཱནཾ ‘‘ཛཱཏིཔཙྩཡཱ ཛརཱམརཎ’’ནྟི ཉཱཎཾ, ‘‘ཨསཏི ཛཱཏིཡཱ ནཏྠི ཛརཱམརཎ’’ནྟི ཉཱཎཾ, ཨནཱགཏམྤི ཨདྡྷཱནཾ ‘‘ཛཱཏིཔཙྩཡཱ ཛརཱམརཎ’’ནྟི ཉཱཎཾ, ‘‘ཨསཏི ཛཱཏིཡཱ ནཏྠི ཛརཱམརཎ’’ནྟི ཉཱཎཾ. ‘‘ཡམྤི ཨིདཾ དྷམྨཊྛིཏིཉཱཎཾ, ཏམྤི ཁཡདྷམྨཾ ཝཡདྷམྨཾ ཝིརཱགདྷམྨཾ ནིརོདྷདྷམྨ’’ནྟི ཉཱཎནྟི ཨེཝཾ ¶ ཛརཱམརཎཱདཱིསུ ཨེཀཱདསསུ པཊིཙྩསམུཔྤཱདངྒེསུ པཙྩེཀཾ སཏྟ སཏྟ ཀཏྭཱ སཏྟསཏྟཏི ཉཱཎཝཏྠཱུནི (སཾ. ནི. ༢.༣༤) ཝེདིཏབྦཱནི. ཏཏྠ ཡམྤཱིཏི ཚབྦིདྷམྤི པཙྩཝེཀྑཎཉཱཎཾ ཝིཔསྶནཱརམྨཎབྷཱཝེན ཨེཀཛ྄ཛྷཾ གཧེཏྭཱ ཝུཏྟཾ. དྷམྨཊྛིཏིཉཱཎནྟི ཚཔི ཉཱཎཱནི སངྑིཔིཏྭཱ ཝུཏྟཾ ཉཱཎཾ. ‘‘ཁཡདྷམྨ’’ནྟིཨཱདིནཱ པན པཀཱརེན པཝཏྟཉཱཎསྶ དསྶནཾ, ཝིཔསྶནཱདསྶནཏོ ཝིཔསྶནཱ པཊིཝིཔསྶནཱདསྶནམཏྟམེཝཱཏི ན ཏཾ ‘‘ཨངྒ’’ནྟི ཝདནྟི, པཱལི༹ཡཾ (སཾ. ནི. ༢.༣༤) པན སབྦཏྠ ཉཱཎཝསེན ཨངྒཱནཾ ཝུཏྟཏྟཱ ‘‘ནིརོདྷདྷམྨནྟི ཉཱཎ’’ནྟི ཨིཏི-སདྡེན པཀཱསེཏྭཱ ཝུཏྟཾ ཝིཔསྶནཱཉཱཎཾ སཏྟམཾ ཉཱཎནྟི ཨཡམཏྠོ དིསྶཏི. ན ཧི ཡམྤི ཨིདཾ དྷམྨཊྛིཏིཉཱཎཾ, ཏམྤི ཉཱཎནྟི སམྦནྡྷོ ཧོཏི ཉཱཎགྒཧཎེན ཨེཏསྨིཾ ཉཱཎབྷཱཝདསྶནསྶ ཨནདྷིཔྤེཏཏྟཱ, ‘‘ཁཡདྷམྨཾ…པེ… ནིརོདྷདྷམྨ’’ནྟི ཨེཏེསཾ སམྦནྡྷབྷཱཝཔྤསངྒོ ཙཱཏི. ཙཏུཝཱིསཏི…པེ… ཝཛིརཉཱཎནྟི ཨེཏྠ ཀེཙི ཏཱཝ ཨཱཧུ ‘‘བྷགཝཱ དེཝསིཀཾ དྭཱདསཀོཊིསཏསཧསྶཀྑཏྟུཾ མཧཱཀརུཎཱསམཱཔཏྟིཾ སམཱཔཛྫཏི, དྭཱདསཀོཊིསཏསཧསྶཀྑཏྟུམེཝ ཙ ཨརཧཏྟཕལསམཱཔཏྟིཾ སམཱཔཛྫཏི, ཏཱསཾ པུརེཙརཾ, སཧཝཙརཉྩ ཉཱཎཾ པཊིཔཀྑེཧི ཨབྷེཛྫཏཾ, མཧཏྟཉྩ ཨུཔཱདཱཡ མཧཱཝཛིརཉཱཎཾ ནཱམ. ཝུཏྟཉྷེཏཾ བྷགཝཏཱ –

‘ཏཐཱགཏཾ ¶ , བྷིཀྑཝེ, ཨརཧནྟཾ སམྨཱསམྦུདྡྷཾ དྭེ ཝིཏཀྐཱ བཧུལཾ སམུདཱཙརནྟི – ཁེམོ ཙ ཝིཏཀྐོ, པཝིཝེཀོ ཙ ཝིཏཀྐོ’ཏི (ཨིཏིཝུ. ༣༨).

ཁེམཝིཏཀྐོ ཧི བྷགཝཏོ མཧཱཀརུཎཱསམཱཔཏྟིཾ པཱུརེཏྭཱ ཋིཏོ, པཝིཝེཀཝིཏཀྐོ ཨརཧཏྟཕལསམཱཔཏྟིཾ. བུདྡྷཱནཉྷི བྷཝངྒཔརིཝཱསོ ལཧུཀོ, མཏྠཀཔྤཏྟོ སམཱཔཏྟཱིསུ ¶ ཝསཱིབྷཱཝོ, ཏསྨཱ སམཱཔཛྫནཝུཊྛཱནཱནི ཀཏིཔཡཙིཏྟཀྑཎེཧེཝ ཨིཛ྄ཛྷནྟི. པཉྩ རཱུཔཱཝཙརསམཱཔཏྟིཡོ ཙཏསྶོ ཨརཱུཔསམཱཔཏྟིཡོ ཨཔྤམཉྙཱསམཱཔཏྟིཡཱ སདྡྷིཾ དས, ནིརོདྷསམཱཔཏྟི, ཨརཧཏྟཕལསམཱཔཏྟི ¶ ཙཱཏི དྭཱདསེཏཱ སམཱཔཏྟིཡོ བྷགཝཱ པཙྩེཀཾ དིཝསེ དིཝསེ ཀོཊིསཏསཧསྶཀྑཏྟུཾ པུརེབྷཏྟཾ སམཱཔཛྫཏི, ཏཐཱ པཙྪཱབྷཏྟ’’ནྟི. ‘‘ཨེཝཾ སམཱཔཛྫིཏབྦསམཱཔཏྟིསཉྩཱརིཏཉཱཎཾ མཧཱཝཛིརཉཱཎཾ ནཱམཱ’’ཏི ཀེཙི.

ཨཔརེ པན ‘‘ཡཾ ཏཾ བྷགཝཏཱ ཨབྷིསམྦོདྷིདིཝསེ པཙྪིམཡཱམེ པཊིཙྩསམུཔྤཱདམུཁེན པཊིལོམནཡེན ཛརཱམརཎཏོ པཊྛཱཡ ཉཱཎཾ ཨོཏཱརེཏྭཱ ཨནུཔདདྷམྨཝིཔསྶནཾ ཨཱརབྷནྟེན ཡཐཱ ནཱམ པུརིསོ སུཝིདུགྒཾ མཧཱགཧནཾ མཧཱཝནཾ ཚིནྡནྟོ ཨནྟརནྟརཱ ནིསཱནསིལཱཡཾ ཕརསུཾ སུནིསིཏཾ ཀརོཏི, ཨེཝམེཝ ནིསཱནསིལཱསདིསིཡོ སམཱཔཏྟིཡོ ཨནྟརནྟརཱ སམཱཔཛྫིཏྭཱ ཉཱཎསྶ ཏིཀྑཝིསདསཱུརབྷཱཝཾ སམྤཱདེཏུཾ ཨནུལོམཔཊིལོམཏོ པཙྩེཀཾ པཊིཙྩསམུཔྤཱདངྒཝསེན སམྨསནྟོ དིཝསེ དིཝསེ ལཀྑཀོཊིལཀྑཀོཊིཕལསམཱཔཏྟིཡོ སམཱཔཛྫཏི, ཏཾ སནྡྷཱཡ ཝུཏྟཾ ‘ཙཏུཝཱིསཏི…པེ… མཧཱཝཛིརཉཱཎཾ ནིསྶཱཡཱ’ཏི’’. ནནུ བྷགཝཏོ སམཱཔཏྟིསམཱཔཛྫནེ པརིཀམྨེ པཡོཛནཾ ནཏྠཱིཏི? ནཡིདཾ ཨེཀནྟིཀཾ. ཏཐཱ ཧི ཝེདནཱཔཊིཔྤཎཱམནཱདཱིསུ སཝིསེསཾ པརིཀམྨཔུབྦངྒམེན སམཱཔཏྟིཡོ སམཱཔཛྫི. ཨཔརེ པན ‘‘ལོཀིཡསམཱཔཏྟིསམཱཔཛྫནེ པརིཀམྨེན པཡོཛནཾ ནཏྠི. ལོཀུཏྟརསམཱཔཏྟིསམཱཔཛྫནེ ཏཛྫཾ པརིཀམྨཾ ཨིཙྪིཏབྦམེཝཱ’’ཏི ཝདནྟི.

‘‘ཨཔརམྤརཱ’’ཏི ¶ པདཾ ཡེསཾ དེསནཱཡ ཨཏྠི, ཏེ ཨཔརམྤརིཡཱཝ. ཀུསལཔཉྙཏྟིཡནྟི ཀུསལདྷམྨཱནཾ པཉྙཱཔནེ. ཨནུཏྟརོཏི ཨུཏྟམོ. ཨུཔནིསྶཡེ ཋཏྭཱཏི ཉཱཎཱུཔནིསྶཡེ ཋཏྭཱ ཡཱདིསོ པུབྦཱུཔནིསྶཡོ པུབྦཡོགོ, ¶ ཏཏྠ པཏིཊྛཱཡ. མཧནྟཏོ སདྡཧཏི པཊིཔཀྑཝིགམེན ཉཱཎསྶ ཝིཡ སདྡྷཱཡཔི ཏིཀྑཝིསདབྷཱཝཱཔཏྟིཏོ. ཨཝསེསཨརཧནྟེཧཱིཏི པཀཏིསཱཝཀེཧི. ཨསཱིཏི མཧཱཐེརཱ པརམཏྠདཱིཔནིཡཾ ཐེརགཱཐཱཝཎྞནཱཡཾ ནཱམཏོ ཨུདྡྷཊཱ. ཙཏྟཱརོ མཧཱཐེརཱཏི མཧཱཀསྶཔཨནུརུདྡྷམཧཱཀཙྩཱནམཧཱཀོཊྛིཀཏྠེརཱ. ཏེསུཔི ཨགྒསཱཝཀེསུ སཱརིཔུཏྟཏྠེརོ པཉྙཱཡ ཝིསིཊྛབྷཱཝཏོ. སཱརིཔུཏྟཏྠེརཏོཔི ཨེཀོ པཙྩེཀབུདྡྷོ ཏིཀྑཝིསདཉཱཎོ ཨབྷིནཱིཧཱརམཧནྟཏཱཡ སམྦྷཏཉཱཎསམྦྷཱརཏྟཱ. སཏིཔི པཙྩེཀབོདྷིཡཱ ཨཝིསེསེསུ བཧཱུསུ ཨེཀཛ྄ཛྷཾ སནྣིཔཏིཏེསུ པུབྦཡོགཝསེན ལོཀིཡེ ཝིསཡེ སིཡཱ ཀསྶཙི ཉཱཎསྶ ཝིསིཊྛཏཱཏི དསྶེཏུཾ ‘‘སཙེ པནཱ’’ཏིཨཱདི ཝུཏྟཾ. ‘‘སབྦཉྙུབུདྡྷོཝ བུདྡྷགུཎེ མཧནྟཏོ སདྡཧཏཱི’’ཏི ཨིདཾ ཧེཊྛཱ ཨཱགཏདེསནཱསོཏཝསེན ཝུཏྟཾ. བུདྡྷཱ ཧི བུདྡྷགུཎེ མཧཏྟཾ པཙྩཀྑཏོཝ པསྶནྟི, ན སདྡཧནཝསེན.

ཨིདཱནི ཡཐཱཝུཏྟམཏྠཾ ཨུཔམཱཡ ཝིབྷཱཝེཏུཾ ‘‘སེཡྻཐཱཔི ནཱམཱ’’ཏིཨཱདི ཨཱརདྡྷཾ. གམྦྷཱིརོ ཨུཏྟཱནོཏི ¶ གམྦྷཱིརོ ཝཱ ཨུཏྟཱནོ ཝཱཏི ཛཱནནཏྠཾ. ‘‘ཨེཝམེཝཱ’’ཏིཨཱདི ཡཐཱདསྶིཏཱཡ ཨུཔམཱཡ ཨུཔམེཡྻེན སཾསནྡནཾ. བུདྡྷགུཎེསུ ཨཔྤམཏྟཝིསཡམྤི ལོཀིཡམཧཱཛནསྶ ཉཱཎཾ ཨཔཝཏྟིཏརཱུཔེནེཝ པཝཏྟཏི ཨནཝཏྟིཏསབྷཱཝཏྟཱཏི ཝུཏྟཾ ‘‘ཨེཀབྱཱམ…པེ… ཝེདིཏབྦཱ’’ཏི. ཏཏྠ ¶ ཉཱཏཨུདཀཾ ཝིཡཱཏི པམཱཎཏོ ཉཱཏཨུདཀཾ ཝིཡ. ཨརིཡཱནཾ པན ཏཏྠ ཨཏྟནོ ཝིསཡེ པཝཏྟནཀཉཱཎཾ པཝཏྟིཏརཱུཔེནེཝ པཝཏྟཏི ཨཏྟནོ པཊིཝེདྷཱནུརཱུཔཾ, ཨབྷིནཱིཧཱརཱནུརཱུཔཉྩ ཨཝཏྟིཏསབྷཱཝཏྟཱཏི དསྶེནྟོ ‘‘དསབྱཱམཡོཏྟེནཱ’’ཏིཨཱདིམཱཧ. ཏཏྠ པཊིཝིདྡྷསཙྩཱནམྤི པཊིཔཀྑཝིདྷམནཔུབྦཡོགཝིསེསཝསེན ཉཱཎཾ སཱཏིསཡཾ, མཧཱནུབྷཱཝཉྩ ཧོཏཱིཏི ཨིམམཏྠཾ དསྶེཏུཾ སོཏཱཔནྣཉཱཎསྶ དསབྱཱམཨུདཀཾ ཨོཔམྨབྷཱཝེན དསྶེཏྭཱ ཏཏོ པརེསཾ དསུཏྟརདིགུཎདསགུཎཨསཱིཏིགུཎཝིསིཊྛཾ ཨུདཀཾ ཨོཔམྨཾ ཀཏྭཱ དསྶིཏཾ. ནནུ ཨེཝཾ སནྟེ བུདྡྷགུཎཱ པརིམིཏཔརིཙྪིནྣཱ, ཐེརེན ཙ ཏེ པརིཙྪིཛྫ ཉཱཏཱཏི ཨཱཔཛྫཏཱིཏི? ནཱཔཛྫཏཱིཏི དསྶེནྟོ ‘‘ཏཏྠ ཡཐཱ སོ པུརིསོ’’ཏིཨཱདིམཱཧ. ཏཏྠ སོ པུརིསོཏི སོ ཙཏུརཱསཱིཏིབྱཱམསཧསྶཔྤམཱཎེན ཡོཏྟེན ཙཏུརཱསཱིཏིབྱཱམསཧསྶཊྛཱནེ མཧཱསམུདྡེ ཨུདཀཾ མིནིཏྭཱ ཋིཏོ པུརིསོ. སོ ཧི ཐེརསྶ ཨུཔམཱབྷཱཝེན གཧིཏོ. དྷམྨནྭཡེནཱཏི ¶ ཨནུམཱནཉཱཎེན. ཏཉྷི སིདྡྷཾ དྷམྨཾ ཨནུགནྟྭཱ པཝཏྟནཏོ ‘‘དྷམྨནྭཡོ’’ཏི ཝུཙྩཏི, ཏཐཱ ཨནྭཡཝསེན ཨཏྠསྶ བུཛ྄ཛྷནཏོ ཨནྭཡབུདྡྷི, ཨནུམེཡྻཾ ཨནུམིནོཏཱིཏི ཨནུམཱནཾ, ནིདསྶནེ དིཊྛནཡེན ཨནུམེཡྻཾ གཎྷཱཏཱིཏི ‘‘ནཡགྒཱཧོ’’ཏི ཙ ཝུཙྩཏི. ཏེནཱཧ ‘‘དྷམྨནྭཡེནཱ’’ཏིཨཱདི. སྭཱཡཾ དྷམྨནྭཡོ ན ཡསྶ ཀསྶཙི ཧོཏི, ཨཐ ཁོ ཏཐཱརཱུཔསྶ ཨགྒསཱཝཀསྶེཝཱཏི ཨཱཧ ‘‘སཱཝཀཔཱརམིཉཱཎེ ཋཏྭཱ’’ཏི. ཡདི ཐེརོ བུདྡྷགུཎེ ཨེཀདེསཏོ པཙྩཀྑེ ཀཏྭཱ ཏདཉྙེ ནཡགྒཱཧེན གཎྷི, ནནུ ཨེཝཾ སནྟེ བུདྡྷགུཎཱ པརིམིཏཔརིཙྪིནྣཱ ཨཱཔནྣཱཏི? ནཡིདཾ ཨེཝནྟི དསྶེནྟོ ‘‘ཨནནྟཱ ཨཔརིམཱཎཱ’’ཏི.

‘‘སདྡཧཏཱི’’ཏི ཝཏྭཱ པུན ཏམེཝཏྠཾ ཝིབྷཱཝེནྟོ ‘‘ཐེརེན ཧི…པེ… བཧུཏརཱ’’ཏི ཨཱཧ. ཀཐཾ པནཱཡམཏྠོ ཨེཝཾ དཊྛབྦོཏི ཨེཝཾ ཨདྷིཔྤཱཡབྷེདཀཾ ཨུཔམཱཡ སཉྙཱཔེཏུཾ ‘‘ཡཐཱ ཀཐཾ ཝིཡཱ’’ཏིཨཱདི ཝུཏྟཾ ‘‘ཨུཔམཱཡམིདྷེཀཙྩེ ¶ ཝིཉྙཱུ པུརིསཱ བྷཱསིཏསྶ ཨཏྠཾ ཨཱཛཱནནྟཱི’’ཏི (སཾ. ནི. ༢.༦༧) ཨིཏོ ནཝ ཨིཏོ ནཝཱཏི ཨིཏོ མཛ྄ཛྷཊྛཱནཏོ ཡཱཝ དཀྑིཎཏཱིརཱ ནཝ ཨིཏོ མཛ྄ཛྷཊྛཱནཏོ ཡཱཝ ཨུཏྟརཏཱིརཱ ནཝ. ཨིདཱནི ཡཐཱཝུཏྟམཏྠཾ སུཏྟེན སམཏྠེཏུཾ ‘‘བུདྡྷོཔཱི’’ཏི གཱཐམཱཧ.

ཡམཀཡུགལ༹མཧཱནདཱིམཧོགྷོ ཝིཡཱཏི དྭིནྣཾ ཨེཀཏོ སམཱགཏཏྟཱ ཡུགལ༹བྷཱུཏཱནཾ མཧཱནདཱིནཾ མཧོགྷོ ཝིཡ.

ཨནུཙྪཝིཀཾ ¶ ཀཏྭཱཏི ཡོཡཾ མམ པསཱདོ བུདྡྷགུཎེ ཨཱརབྦྷ ཨོགཱལ༹ྷོ ཧུཏྭཱ ཨུཔྤནྣོ, ཏཾ ཨནུཙྪཝིཀཾ ཨནུརཱུཔཾ ཀཏྭཱ. པཊིགྒཧེཏུཾ སམྤཊིཙྪིཏུཾ ཨཉྙོ ཀོཙི ན སཀྑིསྶཏི ཡཱཐཱཝཏོ ཨནཝབུཛ྄ཛྷནཏོ. པཊིགྒཧེཏུཾ སཀྐོཏི ཏསྶ ཧེཏུཏོ, པཙྩཡཏོ, སབྷཱཝཏོ, ཀིཙྩཏོ, ཕལཏོ སམྨདེཝ པཊིཝིཛ྄ཛྷནཏོ. པཱུརཏྟནྟི པུཎྞབྷཱཝོ. པགྒྷརཎཀཱལེཏི ཝིཀིརཎཀཱལེ, པཏནཀཱལེཏི ཨཏྠོ. ‘‘པསནྣོ’’ཏི ཨིམིནཱ པསཱདསྶ ཝཏྟམཱནཏཱ དཱིཔིཏཱཏི ‘‘ཨུཔྤནྣསདྡྷོ’’ཏི ཨིམིནཱཔི སདྡྷཱཡ པཙྩུཔྤནྣཏཱ པཀཱསིཏཱཏི ཨཱཧ ‘‘ཨེཝཾ སདྡཧཱམཱིཏི ཨཏྠོ’’ཏི. ཨབྷིཉྙཱཡཏཱིཏི ཨབྷིཉྙོ, ཨདྷིཀོ ཨབྷིཉྙོ བྷིཡྻོབྷིཉྙོ, སོ ཨེཝ ཨཏིསཡཝཙནིཙྪཱཝསེན ‘‘བྷིཡྻོབྷིཉྙཏརོ’’ཏི ཝུཏྟོཏི ཨཱཧ ‘‘བྷིཡྻཏརོ ཨབྷིཉྙཱཏོ’’ཏི. དུཏིཡཝིཀཔྤེ པན ཨབྷིཛཱནཱཏཱིཏི ཨབྷིཉྙཱ, ཨབྷིཝིསིཊྛཱ པཉྙཱ, བྷིཡྻོ ཨབྷིཉྙཱ ¶ ཨེཏསྶཱཏི བྷིཡྻོབྷིཉྙོ, སོ ཨེཝ ཨཏིསཡཝཙནིཙྪཱཝསེན བྷིཡྻོབྷིཉྙཏརོ, སྭཱཡམསྶ ཨཏིསཡོ ཨབྷིཉྙཱཡ བྷིཡྻོབྷཱཝཀཏོཏི ཨཱཧ ‘‘བྷིཡྻཏརཱབྷིཉྙོ ཝཱ’’ཏི. སམྦུཛ྄ཛྷཏི ཨེཏཱཡཱཏི སམྦོདྷི, སབྦཉྙུཏཉྙཱཎཾ, ཨགྒམགྒཉཱཎཉྩ. སབྦཉྙུཏཉྙཱཎཔདཊྛཱནཉྷི ཨགྒམགྒཉཱཎཾ, ཨགྒམགྒཉཱཎཔདཊྛཱནཉྩ སབྦཉྙུཏཉྙཱཎཾ སམྦོདྷི ནཱམ. ཏཏྠ པདྷཱནཝསེན ཏདཏྠདསྶནེ ¶ པཋམཝིཀཔྤོ, པདཊྛཱནཝསེན དུཏིཡཝིཀཔྤོ. ཀསྨཱ པནེཏྠ ཨརཧཏྟམགྒཉཱཎསྶེཝ གཧཎཾ, ནནུ ཧེཊྛིམཱནིཔི བྷགཝཏོ མགྒཉཱཎཱནི སཝཱསནམེཝ ཡཐཱསཀཾ པཊིཔཀྑཝིདྷམནཝསེན པཝཏྟཱནི. སཝཱསནཔྤཧཱནཉྷི ཉེཡྻཱཝརཎཔྤཧཱནནྟི? སཙྩམེཏཾ, ཏཾ པན ཨཔརིཔུཎྞཾ པཊིཔཀྑཝིདྷམནསྶ ཝིཔྤཀཏབྷཱཝཏོཏི ཨཱཧ ‘‘ཨརཧཏྟམགྒཉཱཎེ ཝཱ’’ཏི. ཨགྒམགྒཝསེན ཙེཏྠ ཨརིཡཱནཾ བོདྷིཏྟཡཔཱརིཔཱུརཱིཏི དསྶེཏུཾ ‘‘ཨརཧཏྟམགྒེནེཝ ཧཱི’’ཏིཨཱདི ཝུཏྟཾ. ནིཔྤདེསཱཏི ཨནཝསེསཱ. གཧིཏཱ ཧོནྟཱིཏི ཨརཧཏྟམགྒེན གཧིཏེན ཨདྷིགཏེན གཧིཏཱ ཨདྷིགཏཱ ཧོནྟི. སབྦནྟི ཏེཧི ཨདྷིགནྟབྦཾ. ཏེནཱཏི སམྦོདྷིནཱ སབྦཉྙུཏཉྙཱཎཔདཊྛཱནེན ཨརཧཏྟམགྒཉཱཎེན.

༡༤༢. ཁཱདནཱིཡཱནཾ ཨུལཱ༹རཏཱ སཱཏརསཱནུབྷཱཝེནཱཏི ཨཱཧ ‘‘མདྷུརེ ཨཱགཙྪཏཱི’’ཏི. པསཾསཱཡ ཨུལཱ༹རཏཱ ཝིསིཊྛབྷཱཝེནཱཏི ཨཱཧ ‘‘སེཊྛེ’’ཏི, ཨོབྷཱསསྶ ཨུལཱ༹རཏཱ མཧནྟབྷཱཝེནཱཏི ཝུཏྟཾ ‘‘ཝིཔུལེ’’ཏི. ཨུསབྷསྶ ཨཡནྟི ཨཱསབྷཱི, ཨིདྷ པན ཨཱསབྷཱི ཝིཡཱཏི ཨཱསབྷཱི. ཏེནཱཧ ‘‘ཨུསབྷསྶ ཝཱཙཱསདིསཱི’’ཏི. ཡེན པན གུཎེནསྶཱ ཏཾསདིསཏཱ, ཏཾ དསྶེཏུཾ ‘‘ཨཙལཱ ཨསམྤཝེདྷཱི’’ཏི ཝུཏྟཾ. ཡཏོ ཀུཏོཙི ཨནུསྶཝནཾ ཨནུསྶཝོ. ཝིཛྫཱཊྛཱནེསུ ཀཏཔརིཙཡཱནཾ ཨཱཙརིཡཱནཾ ཏཾ ཏམཏྠཾ ཝིཉྙཱཔེནྟཱི པཝེཎཱི ཨཱཙརིཡཔརམྤརཱ. ཀེཝལཾ ཨཏྟནོ མཏིཡཱ ‘‘ཨིཏིཀིར ཨེཝཾཀིརཱ’’ཏི པརིཀཔྤནཱ ཨིཏིཀིར. པིཊཀསྶ གནྠསྶ སམྤདཱནཏོ སཡཾ སམྤདཱནབྷཱཝེན གཧཎཾ པིཊཀསམྤདཱནཾ. ཡཐཱསུཏཱནཾ ཨཏྠཱནཾ ཨཱཀཱརསྶ པརིཝིཏཀྐནཾ ཨཱཀཱརཔརིཝིཏཀྐོ. ཏཐེཝ ‘‘ཨེཝམེཏ’’ནྟི དིཊྛིཡཱ ནིཛ྄ཛྷཱནཀྑམནཾ དིཊྛིནིཛ྄ཛྷཱནཀྑནྟི. ཨཱགམཱདྷིགམེཧི ¶ ཝིནཱ ཏཀྐམགྒཾ ནིསྶཱཡ ཏཀྐནཾ ཏཀྐོ. ཨནུམཱནཝིདྷིཾ ནིསྶཱཡ ནཡགྒཱཧོ. ཡསྨཱ བུདྡྷཝིསཡེ ¶ ཋཏྭཱ བྷགཝཏོ ཨཡཾ ཐེརསྶ ཙོདནཱ, ཐེརསྶ ཙ སོ ཨཝིསཡོ, ཏསྨཱ ‘‘པཙྩཀྑཏོ ཉཱཎེན པཊིཝིཛ྄ཛྷིཏྭཱ ཝིཡཱ’’ཏི ཝུཏྟཾ. སཱིཧནཱདོ ཝིཡཱཏི སཱིཧནཱདོ, ཏཾསདིསཏཱ ཙསྶ སེཊྛབྷཱཝེན, སོ ¶ ཙེཏྠ ཨེཝཾ ཝེདིཏབྦོཏི དསྶེནྟོ ‘‘སཱིཧནཱདོ’’ཏིཨཱདིམཱཧ. ནེཝ དནྡྷཱཡནྟེནཱཏི ན མནྡཱཡནྟེན. ན བྷགྒརཱཡནྟེནཱཏི ཨཔརིསངྐནྟེན.

ཨནུཡོགདཱཔནཏྠནྟི ཨནུཡོགཾ སོདྷཱཔེཏུཾ. ཝིམདྡཀྑམཉྷི སཱིཧནཱདཾ ནདནྟོ ཨཏྠཏོ ཏཏྠ ཨནུཡོགཾ སོདྷེཏི ནཱམ. ཨནུཡུཉྫནྟོ ཙ ནཾ སོདྷཱཔེཏི ནཱམ. དཱཏུནྟི སོདྷེཏུཾ. ཀེཙི ‘‘དཱནཏྠ’’ནྟི ཨཏྠཾ ཝདནྟི, ཏདཡུཏྟཾ. ན ཧི ཡོ སཱིཧནཱདཾ ནདཏི, སོ ཨེཝ ཏཏྠ ཨནུཡོགཾ དེཏཱིཏི ཡུཛྫཏི. ནིགྷཾསནནྟི ཝིམདྡནཾ. དྷམམཱནནྟི ཏཱཔཡམཱནཾ, ཏཱཔནཉྩེཏྠ གགྒརིཡཱ དྷམཱཔནསཱིསེན ཝདཏི. སབྦེ ཏེཏི སབྦེ ཏེ ཨཏཱིཏེ ནིརུདྡྷེ སམྨཱསམྦུདྡྷེ, ཏེནེཏཾ དསྶེཏི – ཡེ ཏེ ཨཧེསུཾ ཨཏཱིཏཾ ཨདྡྷཱནཾ ཏཝ ཨབྷིནཱིཧཱརཏོ ཨོརཾ སམྨཱསམྦུདྡྷཱ, ཏེསཾ ཏཱཝ སཱཝཀཉཱཎགོཙརེ དྷམྨེ པརིཙྪིནྡནྟོ མཱརཱདཡོ ཝིཡ བུདྡྷཱནཾ ལོཀིཡཙིཏྟཙཱརཾ ཏྭཾ ཛཱནེཡྻཱསི. ཡེ པན ཏེ ཨབྦྷཏཱིཏཱ ཏཏོ པརཏོ ཚིནྣཝཊུམཱ ཚིནྣཔཔཉྩཱ པརིཡཱདིཎྞཝཊྚཱ སབྦདུཀྑཝཱིཏིཝཏྟཱ སམྨཱསམྦུདྡྷཱ, ཏེསཾ སབྦེསམྤི སཱཝཀཉཱཎསྶ ཨཝིསཡབྷཱུཏེ དྷམྨེ ཀཐཾ ཛཱནིསྶསཱིཏི.

ཨནཱགཏབུདྡྷཱནཾ པནཱཏི པན-སདྡོ ཝིསེསཏྠཛོཏནོ, ཏེན ཨཏཱིཏེསུ ཏཱཝ ཁནྡྷཱནཾ བྷཱུཏཔུབྦཏྟཱ ཏཏྠ སིཡཱ ཉཱཎསྶ སཝིསཡེ གཏི, ཨནཱགཏེསུ པན སབྦསོ ཨསཉྫཱཏེསུ ཀཐནྟི ཨིམམཏྠཾ ཛོཏེཏི. ཏེནཱཧ ‘‘ཨནཱགཏཱཔཱི’’ཏིཨཱདི ¶ . ‘‘ཙིཏྟེན པརིཙྪིནྡིཏྭཱ ཝིདིཏཱ’’ཏི ཀསྨཱ ཝུཏྟཾ, ནནུ ཨཏཱིཏཱནཱགཏེ སཏྟཱཧེ ཨེཝ པཝཏྟཾ ཙིཏྟཾ ཙེཏོཔརིཡཉཱཎསྶ ཝིསཡོ, ན ཏཏོ པརནྟི? ནཡིདཾ ཙེཏོཔརིཡཉཱཎཀིཙྩཝསེན ཝུཏྟཾ, ཨཐ ཁོ པུབྦེནིཝཱསཨནཱགཏཾསཉཱཎཝསེན ཝུཏྟཾ, ཏསྨཱ ནཱཡཾ དོསོ.

ཝིདིཏཊྛཱནེ ན ཀརོཏི སིཀྑཱཔདེནེཝ ཏཱདིསསྶ པཊིཀྑེཔསྶ པཊིཀྑིཏྟཏྟཱ, སེཏུགྷཱཏཏོ ཙ. ཀཐཾ པན ཐེརོ དྭཡསམྦྷཝེ པཊིཀྑེཔམེཝ ཨཀཱསི, ན ཝིབྷཛྫ བྱཱཀཱསཱིཏི ཨཱཧ ‘‘ཐེརོ ཀིརཱ’’ཏིཨཱདི. པཱརཾ པརིཡནྟཾ མིནོཏཱིཏི པཱརམཱི, སཱ ཨེཝ ཉཱཎནྟི པཱརམིཉཱཎཾ, སཱཝཀཱནཾ པཱརམིཉཱཎཾ སཱཝཀཔཱརམིཉཱཎཾ, ཏསྨིཾ. སཱཝཀཱནཾ ཨུཀྐཾསཔརིཡནྟགཏེ ཛཱནནེ ནཱཡཾ ཨནུཡོགོ, ཨཐ ཁོ སབྦཉྙུཏཉྙཱཎེ སབྦཉྙུཏཱཡ ཛཱནནེ. ཀེཙི པན ‘‘སཱཝཀཔཱརམིཉཱཎེཏི སཱཝཀཔཱརམིཉཱཎཝིསཡེ’’ཏི ཨཏྠཾ ཝདནྟི. ཏཐཱ སེསཔདེསུཔི. སཱིལ ¶ ..པེ… སམཏྠནྟི སཱིལསམཱདྷིཔཉྙཱཝིམུཏྟིསངྑཱཏཀཱརཎཱནཾ ¶ ཛཱནནསམཏྠཾ. བུདྡྷསཱིལཱདཡོ ཧི བུདྡྷཱནཾ བུདྡྷཀིཙྩསྶ, པརེཧི ‘‘བུདྡྷཱ’’ཏི ཛཱནནསྶ ཙ ཀཱརཎཾ.

༡༤༣. ཨནུམཱནཉཱཎཾ ཝིཡ སཾསཡཔིཊྛིཀཾ ཨཧུཏྭཱ ‘‘ཨིདམིད’’ནྟི ཡཐཱསབྷཱཝཏོ ཉེཡྻཾ དྷཱརེཏི ནིཙྪིནོཏཱིཏི དྷམྨོ, པཙྩཀྑཉཱཎནྟི ཨཱཧ ‘‘དྷམྨསྶ པཙྩཀྑཏོ ཉཱཎསྶཱ’’ཏི. ཨནུཨེཏཱིཏི ཨནྭཡོཏི ཨཱཧ ‘‘ཨནུཡོགཾ ཨནུགནྟྭཱ’’ཏི. པཙྩཀྑསིདྡྷཉྷི ཨཏྠཾ ཨནུགནྟྭཱ ཨནུམཱནཉཱཎསྶ པཝཏྟི དིཊྛེན ཨདིཊྛསྶ ཨནུམཱནནྟི ཝེདིཏབྦོ. ཝིདིཏེ ཝེདཀམྤི ཉཱཎཾ ཨཏྠཏོ ཝིདིཏམེཝ ཧོཏཱིཏི ‘‘ཨནུམཱནཉཱཎཾ ནཡགྒཱཧོ ཝིདིཏོ’’ཏི ཝུཏྟཾ. ཝིདིཏོཏི ཝིདྡྷོ པཊིལདྡྷོ, ཨདྷིགཏོཏི ཨཏྠོ. ཨཔྤམཱཎོཏི ཨཔརིམཱཎོ མཧཱཝིསཡཏྟཱ. ཏེནཱཧ ‘‘ཨཔརིཡནྟོ’’ཏི. ཏེནཱཏི ཨཔརིཡནྟཏྟཱ, ཏེན ཝཱ ཨཔརིཡནྟེན ཉཱཎེན, ཨེཏེནེཝ ཐེརོ ཡཾ ཡཾ ཨནུམེཡྻམཏྠཾ ཉཱཏུཀཱམོ ¶ ཧོཏི, ཏཏྠ ཏཏྠསྶ ཨསངྒམཔྤཊིཧཊཨནུམཱནཉཱཎཾ པཝཏྟཏཱིཏི དསྶེཏི. ཏེནཱཧ ‘‘སོ ཨིམིནཱ’’ཏིཨཱདི. ཏཏྠ ཨིམིནཱཏི ཨིམིནཱ ཀཱརཎེན. པཱཀཱརསྶ ཐིརབྷཱཝཾ ཨུདྡྷམུདྡྷཾ ཨཱཔེཏཱིཏི ཨུདྡྷཱཔཾ, པཱཀཱརམཱུལཾ. ཨཱདི-སདྡེན པཱཀཱརདྭཱརབནྡྷཔརིཁཱདཱིནཾ སངྒཧོ ཝེདིཏབྦོ. པཙྩནྟེ བྷཝཾ པཙྩནྟིམཾ. པཎྜིཏདོཝཱརིཀཊྛཱནིཡཾ ཀཏྭཱ ཐེརོ ཨཏྟཱནཾ དསྶེཏཱིཏི དསྶེནྟོ ‘‘ཨེཀདྭཱརནྟི ཀསྨཱ ཨཱཧཱ’’ཏི ཙོདནཾ སམུཊྛཱཔེསི. ཡསྶཱ པཉྙཱཡ ཝསེན པུརིསོ ‘‘པཎྜིཏོ’’ཏི ཝུཙྩཏི, ཏཾ པཎྜིཙྩནྟི ཨཱཧ ‘‘པཎྜིཙྩེན སམནྣཱགཏོ’’ཏི. ཏཾཏཾཨིཏིཀཏྟབྦཏཱསུ ཚེཀབྷཱཝོ བྱཏྟབྷཱཝོ ཝེཡྻཏྟིཡཾ. མེདྷཏི སམྨོསཾ ཧིཾསཏི ཝིདྷམཏཱིཏི མེདྷཱ, སཱ ཨེཏསྶ ཨཏྠཱིཏི མེདྷཱཝཱི. ཋཱནེ ཋཱནེ ཨུཔྤཏྟི ཨེཏིསྶཱ ཨཏྠཱིཏི ཋཱནུཔྤཏྟིཀཱ, ཋཱནསོ ཨུཔྤཛྫནཀཔཉྙཱ. ཨནུཔརིཡཱཡནྟི ཨེཏེནཱཏི ཨནུཔརིཡཱཡོ, སོ ཨེཝ པཐོཏི ཨནུཔརིཡཱཡཔཐོ, པརིཏོ པཱཀཱརསྶ ཨནུསཾཡཱཡནམགྒོ. པཱཀཱརབྷཱགཱ སནྡྷཱཏབྦཱ ཨེཏྠཱཏི པཱཀཱརསནྡྷི, པཱཀཱརསྶ ཕུལླིཏཔྤདེསོ. སོ པན ཧེཊྛིམནྟེན དྭིནྣམྤི ཨིཊྛཀཱནཾ ཝིགམེན ཨེཝཾ ཝུཙྩཏཱིཏི ཨཱཧ ‘‘དྭིནྣཾ ཨིཊྛཀཱནཾ ཨཔགཏཊྛཱན’’ནྟི. ཚིནྣཊྛཱནནྟི ཚིནྣབྷིནྣཔྤདེསོ, ཚིནྣཊྛཱནཾ ཝཱ. ཏཉྷི ‘‘ཝིཝར’’ནྟི ཝུཙྩཏི.

ཀིལིཊྛནྟི མལཱིནཾ. ཨུཔཏཱཔེནྟཱིཏི ཀིལེསཔརིལཱ༹ཧེན སནྟཱཔེནྟི. ཝིབཱདྷེནྟཱིཏི པཱིལེ༹ནྟི. ཨུཔྤནྣཱཡ པཉྙཱཡ ནཱིཝརཎེཧི ན ཀིཉྩི ཀཱཏུཾ སཀྐཱཏི ཨཱཧ ‘‘ཨནུཔྤནྣཱཡ པཉྙཱཡ ཨུཔྤཛྫིཏུཾ ན དེནྟཱི’’ཏི. ཏསྨཱཏི པཙྩཡཱུཔགྷཱཏེན ¶ ཨུཔྤཛྫིཏུཾ ཨཔྤདཱནཏོ. ཙཏཱུསུ སཏིཔཊྛཱནེསུ སུཊྛུ ཋཔིཏཙིཏྟཱཏི ཙཏུབྦིདྷཱཡཔི ¶ སཏིཔཊྛཱནབྷཱཝནཱཡ སམྨདེཝ ཋཔིཏཙིཏྟཱ. ཡཐཱསབྷཱཝེན བྷཱཝེཏྭཱཏི ཨཝིཔརཱིཏསབྷཱཝེན ཡཐཱ པཊིཔཀྑཱ སམུཙྪིཛྫནྟི, ཨེཝཾ བྷཱཝེཏྭཱ.

པུརིམནཡེ ¶ སཏིཔཊྛཱནཱནི, བོཛ྄ཛྷངྒཱ ཙ མིསྶཀཱ ཨདྷིཔྤེཏཱཏི ཏཏོ ཨཉྙཐཱ ཝཏྟུཾ ‘‘ཨཔིཙེཏྠཱ’’ཏིཨཱདི ཝུཏྟཾ. མིསྶཀཱཏི སམཐཝིཔསྶནཱམགྒཝསེན མིསྶཀཱ. ‘‘ཙཏཱུསུ སཏིཔཊྛཱནེསུ སུཔྤཏིཊྛིཏཙིཏྟཱ’’ཏིཨཱདིཏོ ཝུཏྟཏྟཱ སཏིཔཊྛཱནེ ཝིཔསྶནཱཏི གཧེཏྭཱ ‘‘སཏྟ བོཛ྄ཛྷངྒེ ཡཐཱབྷཱུཏཾ བྷཱཝེཏྭཱ’’ཏི ཝུཏྟཏྟཱ, མགྒཔརིཡཱཔནྣཱནཾཡེཝ ཙ ནེསཾ ནིཔྤརིཡཱཡབོཛ྄ཛྷངྒབྷཱཝཏོ, ཏེསུ ཙ སབྦསོ ཨདྷིགཏེསུ ལོཀནཱཐེན སབྦཉྙུཏཉྙཱཎམྤི ཨདྷིགཏམེཝ ཧོཏཱིཏི ‘‘བོཛ྄ཛྷངྒེ མགྒོ, སབྦཉྙུཏཉྙཱཎཉྩཱཏི གཧིཏེ སུནྡརོ པཉྷོ བྷཝེཡྻཱ’’ཏི མཧཱསིཝཏྠེརོ ཨཱཧ, ན པནེཝཾ གཧིཏཾ པོརཱཎེཧཱིཏི ཨདྷིཔྤཱཡོ. ཨིཏཱིཏི ཝུཏྟཔྤཀཱརཔརཱམསནཾ. ཐེརོཏི སཱརིཔུཏྟཏྠེརོ.

ཏཏྠཱཏི ཏེསུ པཙྩནྟནགརཱདཱིསུ. ནགརཾ ཝིཡ ནིབྦཱནཾ ཏདཏྠིཀེཧི ཨུཔགནྟབྦཏོ, ཨུཔགཏཱནཉྩ པརིསྶཡརཧིཏསུཁཱདྷིགམནཊྛཱནཏོ. པཱཀཱརོ ཝིཡ སཱིལཾ ཏདུཔགཏཱནཾ པརིཏོ ཨཱརཀྑབྷཱཝཏོ. པརིཡཱཡཔཐོ ཝིཡ ཧིརཱི སཱིལཔཱཀཱརསྶ ཨདྷིཊྛཱནབྷཱཝཏོ. ཝུཏྟཉྷེཏཾ ‘‘པརིཡཱཡཔཐོཏི ཁོ བྷིཀྑུ ཧིརིཡཱ ཨེཏཾ ཨདྷིཝཙན’’ནྟི. དྭཱརཾ ཝིཡ ཨརིཡམགྒོ ནིབྦཱནནགརཔྤཝེསནཨཉྫསབྷཱཝཏོ. པཎྜིཏདོཝཱརིཀོ ཝིཡ དྷམྨསེནཱཔཏི ནིབྦཱནནགརཔཝིཊྛཔཝིསནཀཱནཾ སཏྟཱནཾ སལླཀྑཎཏོ. དིནྣོཏི དཱཔིཏོ, སོདྷིཏོཏི ཨཏྠོ.

༡༤༤. ནིཔྥཏྟིདསྶནཏྠནྟི ¶ སིདྡྷིདསྶནཏྠཾ, ཨདྷིགམདསྶནཏྠནྟི ཨཏྠོ. ‘‘པཉྩནཝུཏིཔཱསཎྜེ’’ཏི ཨིདཾ ཡསྨཱ ཐེརོ པརིབྦཱཛཀོ ཧུཏྭཱ ཏཏོ པུབྦེཝ ནིབྦཱནཔརིཡེསནཾ ཙརམཱནོ ཏེ ཏེ པཱསཎྜིནོ ཨུཔསངྐམིཏྭཱ ནིབྦཱནཾ པུཙྪི, ཏེ ནཱསྶ ཙིཏྟཾ ཨཱརཱདྷེསུཾ, ཏཾ སནྡྷཱཡ ཝུཏྟཾ. ཏེ པན པཱསཎྜཱ ཧེཊྛཱ ཝུཏྟཱ ཨེཝ. ཏཏྠེཝཱཏི ཏསྶཡེཝ བྷཱགིནེཡྻསྶ དེསིཡམཱནཱཡ དེསནཱཡ. པརསྶ ཝཌྜྷིཏཾ བྷཏྟཾ བྷུཉྫནྟོ ཝིཡ སཱཝཀཔཱརམིཉཱཎཾ ཧཏྠགཏཾ ཨཀཱསི ཨདྷིགཙྪི. ཨུཏྟརུཏྟརནྟི ཧེཊྛིམསྶ ཧེཊྛིམསྶ ཨུཏྟརཎཏོ ཨཏིཀྐམནཏོ ཨུཏྟརུཏྟརཾ, ཏཏོ ཨེཝ པདྷཱནབྷཱཝཾ པཱཔིཏཏཱཡ ¶ པཎཱིཏཔཎཱིཏཾ. ཨུཏྟརུཏྟརནྟི ཝཱ ཨུཔརཱུཔརི. པཎཱིཏཔཎཱིཏནྟི པཎཱིཏཏརཾ, པཎཱིཏཏམཉྩཱཏི ཨཏྠོ. ཀཎྷནྟི ཀཱལ༹ཀཾ སཾཀིལེསདྷམྨཾ. སུཀྐནྟི ཨོདཱཏཾ ཝོདཱནདྷམྨཾ. སཝིཔཀྑཾ ཀཏྭཱཏི པཧཱཏབྦཔཧཱཡཀབྷཱཝདསྶནཝསེན ཡཐཱཀྐམཾ ཨུབྷཡཾ སཝིཔཀྑཾ ཀཏྭཱ. ‘‘ཨཡཾ ཀཎྷདྷམྨོ, ཨིམསྶ ཨཡཾ པཧཱཡཀོ’’ཏི ཨེཝཾ ཀཎྷཾ པཊིབཱཧིཏྭཱ དེསནཱཝསེན ནཱིཧརིཏྭཱ སུཀྐཾ, ‘‘ཨཡཾ སུཀྐདྷམྨོ, ཨིམིནཱ ཨཡཾ པཧཱཏབྦོ’’ཏི ཨེཝཾ སུཀྐཾ པཊིབཱཧིཏྭཱ ཀཎྷཾ. སཨུསྶཱཧནྟི ཕལུཔྤཱདནསམཏྠཏཱཝསེན སབྱཱཔཱརཾ. ཏེནཱཧ ‘‘སཝིཔཱཀ’’ནྟི. ཝིཔཱཀདྷམྨནྟི ཨཏྠོ.

ཏསྨིཾ ¶ དེསིཏེ དྷམྨེཏི ཏསྨིཾ ཝུཏྟནཡེན བྷགཝཱ ཏུམྷེཧི དེསིཏེ དྷམྨེ ཨེཀཙྩཾ དྷམྨཾ ནཱམ སཱཝཀཔཱརམིཉཱཎཾ ཛཱནིཏྭཱ པཊིཝིཛ྄ཛྷིཏྭཱ. ཏཾཛཱནནེ ཧི ཝུཏྟེ ཙཏུསཙྩདྷམྨཛཱནནཾ ཨཝུཏྟསིདྡྷནྟི. ‘‘ཙཏུསཙྩདྷམྨེསཱུ’’ཏི ཨིདཾ པོརཱཎཊྛཀཐཱཡཾ ཝུཏྟཱཀཱརདསྶནཾ. ཝིཔཀྑོ པན པརཏོ ཨཱགམིསྶཏི. ཨེཏྠཱཏི ‘‘དྷམྨེསུ ནིཊྛཾ ཨགམ’’ནྟི ཨེཏསྨིཾ པདེ. ཐེརསལླཱཔོཏི ཐེརཱནཾ སལླཱཔསདིསོ ཝིནིཙྪཡཝཱདོ ¶ . ཀཱལ༹ཝལླཝཱསཱིཏི ཀཱལ༹ཝལླཝིཧཱརཝཱསཱི. ཨིདཱནཱིཏི ཨེཏརཧི ‘‘ཨིདཱཧཾ བྷནྟེ’’ཏིཨཱདིཝཙནཀཱལེ. ཨིམསྨིཾ པན ཋཱནེཏི ‘‘དྷམྨེསུ ནིཊྛཾ ཨགམ’’ནྟི ཨིམསྨིཾ པདེསེ, ཨིམསྨིཾ ཝཱ ནིཊྛཱནཀཱརཎབྷཱུཏེ ཡོནིསོ པརིཝིཏཀྐནེ. ‘‘ཨིམསྨིཾ པན ཋཱནེ བུདྡྷགུཎེསུ ནིཊྛངྒཏོ’’ཏི ཀསྨཱ ཝུཏྟཾ, ནནུ སཱཝཀཔཱརམིཉཱཎསམདྷིགཏཀཱལེ ཨེཝ ཐེརོ བུདྡྷགུཎེསུ ནིཊྛངྒཏོཏི? སཙྩམེཏཾ, ཨིདཱནི པན ཏཾ པཱཀཊཾ ཛཱཏནྟི ཨེཝཾ ཝུཏྟཾ. སབྦནྟི ‘‘ཙཏུསཙྩདྷམྨེསཱུ’’ཏིཨཱདི སུམཏྠེརེན ཝུཏྟཾ སབྦཾ. ཨརཧཏྟེ ནིཊྛངྒཏོཏི ཨེཏྠཱཔི ཝུཏྟནཡེནེཝ ཨནུཡོགཔརིཧཱརཱ ཝེདིཏབྦཱ. ཡདིཔི དྷམྨསེནཱཔཏི ‘‘སཱཝཀཔཱརམིཉཱཎཾ མཡཱ སམདྷིགཏ’’ནྟི ཨིཏོ པུབྦེཔི ཛཱནཱཏིཡེཝ, ཨིདཱནི པན ཨསངྑྱེཡྻཱཔརིམེཡྻབྷེདེ བུདྡྷགུཎེ ནཡགྒཱཧཝསེན པརིགྒཧེཏྭཱ ཀིཙྩསིདྡྷིཡཱ ཏསྨིཾ ཉཱཎེ ནིཊྛངྒཏོ ཨཧོསཱིཏི དསྶེནྟོ ‘‘མཧཱསིཝཏྠེརོ…པེ… དྷམྨེསཱུཏི སཱཝཀཔཱརམིཉཱཎེ ནིཊྛངྒཏོ’’ཏི ཨཝོཙ.

བུདྡྷགུཎཱ པན ནཡཏོ ཨཱགཏཱ, ཏེ ནཡགྒཱཧཏོ ཡཱཐཱཝཏོ ཛཱནནྟོ སཱཝཀཔཱརམིཉཱཎེ ཏཐཱཛཱནནཝསེན ནིཊྛངྒཏཏྟཱ སཱཝཀཔཱརམིཉཱཎམེཝ ཏསྶ ཨཔརཱཔརུཔྤཏྟིཝསེན, ཏེན ཏེན བྷཱཝེཏབྦཀིཙྩབཧུཏཱཝསེན ཙ ‘‘དྷམྨེསཱུ’’ཏི པུཐུཝཙནེན ཝུཏྟཾ. ཨནནྟཱཔརིམེཡྻཱནཾ ཨནཉྙཝིསཡཱནཾ ¶ བུདྡྷགུཎཱནཾ ནཡཏོ པརིགྒཎྷནེན ཐེརསྶ སཱཏིསཡོ བྷགཝཏི པསཱདོ ཨུཔྤཛྫཏཱིཏི ཨཱཧ ‘‘བྷིཡྻོསོམཏྟཱཡཱ’’ཏིཨཱདི. ‘‘སུཊྛུ ཨཀྑཱཏོ’’ཏི ཝཏྭཱ ཏཾ ཨེཝསྶ སུཊྛུ ཨཀྑཱཏཏཾ དསྶེཏུཾ ‘‘ནིཡྻཱནིཀོ མགྒོ’’ཏི ཝུཏྟཾ. སྭཱཀྑཱཏཏཱ ཧི དྷམྨསྶ ཡདཏྠཾ དེསིཏོ, ཏདཏྠསཱདྷནེན ཝེདིཏབྦཱ. ཕལཏྠཱཡ ནིཡྻཱཏཱིཏི ཨནནྟརཝིཔཱཀཏྟཱ, ཨཏྟནོ ཨུཔྤཏྟིསམནནྟརམེཝ ཕལནིཔྥཱདནཝསེན པཝཏྟཏཱིཏི ཨཏྠོ. ཝཊྚཙཱརཀཏོ ནིཡྻཱཏཱིཏི ཝཱ ནིཡྻཱནིཀོ, ནིཡྻཱནསཱིལོཏི ཝཱ. རཱགདོསམོཧནིམྨདནསམཏྠོཏི ཨིདྷཱཔི ¶ ‘‘པསནྣོསྨི བྷགཝཏཱིཏི དསྶེཏཱི’’ཏི ཨཱནེཏྭཱ སམྦནྡྷོ. ཝངྐཱདཱིཏི ཨཱདི-སདྡེན ཛིམྷཀུཊིལེ, ཨཉྙེ ཙ པཊིཔཏྟིདོསེ སངྒཎྷཱཏི. བྷགཝཱ ཏུམྷཱཀཾ བུདྡྷསུབུདྡྷཏཱ ཝིཡ དྷམྨསུདྷམྨཏཱ, སངྒྷསུཔྤཊིཔཏྟི ཙ དྷམྨེསུ ནིཊྛངྒམནེན སཱཝཀཔཱརམིཉཱཎེ ནིཊྛངྒཏཏྟཱ མཡ྄ཧཾ སུཊྛུ ཝིབྷཱུཏཱ སུཔཱཀཊཱ ཛཱཏཱཏི དསྶེནྟོ ཐེརོ ‘‘སྭཱཀྑཱཏོ བྷགཝཏཱ དྷམྨོ, སུཔྤཊིཔནྣོ སངྒྷོཏི པསཱིདི’’ནྟི ཨཝོཙ.

ཀུསལདྷམྨདེསནཱཝཎྞནཱ

༡༤༥. ཨནུཏྟརབྷཱཝོཏི ¶ སེཊྛབྷཱཝོ. ཨནུཏྟརོ བྷགཝཱ ཡེན གུཎེན, སོ ཨནུཏྟརབྷཱཝོ, ཏཾ ཨནུཏྟརིཡཾ. ཡསྨཱ ཏསྶཱཔི གུཎསྶ ཀིཉྩི ཨུཏྟརིཏརཾ ནཏྠི ཨེཝ, ཏསྨཱ ཝུཏྟཾ ‘‘སཱ ཏུམྷཱཀཾ དེསནཱ ཨནུཏྟརཱཏི ཝདཏཱི’’ཏི. ཀུསལེསུ དྷམྨེསཱུཏི ཀུསལདྷམྨནིམིཏྟཾ. ནིམིཏྟཏྠེ ཧི ཨེཏཾ བྷུམྨཾ, ཏསྨཱ ཀུསལདྷམྨདེསནཱཧེཏུཔི བྷགཝཱཝ ཨནུཏྟརོཏི ཨཏྠོ. བྷཱུམིཾ དསྶེནྟོཏི ཝིསཡཾ དསྶེནྟོ. ཀུསལདྷམྨདེསནཱཡ ཧི ཀུསལཱ དྷམྨཱ ཝིསཡོ. ཝུཏྟཔདེཏི ‘‘ཀུསལེསུ དྷམྨེསཱུ’’ཏི ཨེཝཾ ཝུཏྟཝཱཀྱེ, ཨེཝཾ ཝཱ ཝུཏྟདྷམྨཀོཊྛཱསེ. ‘‘པཉྩདྷཱ’’ཏི ཀསྨཱ ཝུཏྟཾ, ནནུ ཚེཀཊྛེནཔི ཀུསལཾ ཨིཙྪིཏབྦཾ ‘‘ཀུསལོ ཏྭཾ རཐསྶ ཨངྒཔཙྩངྒཱན’’ནྟིཨཱདཱིསཱུཏི (མ. ནི. ༢.༨༧)? སཙྩམེཏཾ, སོ པན ཚེཀཊྛོ ཀོསལླསམྦྷཱུཏཊྛེནེཝ སངྒཧིཏོཏི ཝིསུཾ ན གཧིཏོ. ‘‘ཀཙྩི ནུ བྷོཏོ ཀུསལཾ, ཀཙྩི བྷོཏོ ཨནཱམཡ’’ནྟི (ཛཱ. ༡.༡༥.༡༤༦; ༢.༢༢.༢༠༠༨) ཛཱཏཀེ ཨཱགཏཏྟཱ ‘‘ཛཱཏཀཔརིཡཱཡཾ པཏྭཱ ཨཱརོགྱཊྛེན ཀུསལཾ ཝཊྚཏཱི’’ཏི ཝུཏྟཾ. ‘‘ཏཾ ¶ ཀིཾ མཉྙཐ, གཧཔཏཡོ, ཨིམེ དྷམྨཱ ཀུསལཱ ཝཱ ཨཀུསལཱ ཝཱ སཱཝཛྫཱ ཝཱ ཨནཝཛྫཱ ཝཱ’’ཏིཨཱདཱིསུ སུཏྟཔདེསེསུ ‘‘ཀུསལཱ’’ཏི ཝུཏྟདྷམྨཱ ཨེཝ ‘‘ཨནཝཛྫཱ’’ཏི ཝུཏྟཱཏི ¶ ཨཱཧ ‘‘སུཏྟནྟཔརིཡཱཡཾ པཏྭཱ ཨནཝཛྫཊྛེན ཀུསལཾ ཝཊྚཏཱི’’ཏི. ཨབྷིདྷམྨེ ‘‘ཀོསལླ’’ནྟི པཉྙཱ ཨཱགཏཱཏི ཡོནིསོམནསིཀཱརཧེཏུཀསྶ ཀུསལསྶ ཀོསལླསམྨཱུཏཊྛོ, དརཐཱབྷཱཝདཱིཔནཏོ ནིདྡརཐཊྛོ, ‘‘ཀུསལསྶ ཀཏཏྟཱ ཨུཔཙིཏཏྟཱ’’ཏི ཝཏྭཱ ཨིཊྛཝིཔཱཀནིདྡིསནཏོ སུཁཝིཔཱཀཊྛོ ཙ ཨབྷིདྷམྨནཡསིདྡྷོཏི ཨཱཧ ‘‘ཨབྷིདྷམྨ…པེ… ཝིཔཱཀཊྛེནཱ’’ཏི. བཱཧིཏིཀསུཏྟེ (མ. ནི. ༢.༣༥༨) བྷགཝཏོ ཀཱཡསམཱཙཱརཱདིཀེ ཝཎྞེནྟེན དྷམྨབྷཎྜཱགཱརིཀེན ‘‘ཡོ ཁོ མཧཱརཱཛ ཀཱཡསམཱཙཱརོ ཨནཝཛྫོ’’ཏི ཀུསལོ ཀཱཡསམཱཙཱརོ རཉྙོ པསེནདིསྶ ཝུཏྟོ. ན ཧི བྷགཝཏོ སུཁཝིཔཱཀཀམྨཾ ཨཏྠཱིཏི སབྦསཱཝཛྫརཧིཏཱ ཀཱཡསམཱཙཱརཱདཡོ ‘‘ཀུསལཱ’’ཏི ཝུཏྟཱ, ཨིདྷ པན ‘‘ཀུསལེསུ དྷམྨེསཱུ’’ཏི བོདྷིཔཀྑིཡདྷམྨཱ ‘‘ཀུསལཱ’’ཏི ཝུཏྟཱ, ཏེ ཙ སམཐཝིཔསྶནཱ མགྒསམྤཡུཏྟཱ ཨེཀནྟེན སུཁཝིཔཱཀཱ ཨེཝཱཏི ཨཝཛྫརཧིཏཏཱམཏྟཾ ཨུཔཱདཱཡ ཨནཝཛྫཏྠོ ཀུསལ-སདྡོཏི ཨཱཧ ‘‘ཨིམསྨིཾ པན…པེ… དཊྛབྦ’’ནྟི. ཨེཝཉྩ ཀཏྭཱ ‘‘ཕལསཏིཔཊྛཱནཾ པན ཨིདྷ ཨནདྷིཔྤེཏ’’ནྟི ཨིདཉྩ ཝཙནཾ སམཏྠིཏཾ ཧོཏི སཝིཔཱཀསྶེཝ གཧཎནྟི ཀཏྭཱ.

‘‘ཙུདྡསཝིདྷེནཱ’’ཏིཨཱདི སཏིཔཊྛཱནེ (དཱི. ནི. ༢.༣༧༦; མ. ནི. ༡.༡༠༩) ཝུཏྟནཡེན ཝེདིཏབྦཾ. པགྒཧཊྛེནཱཏི ཀུསལཔཀྑསྶ པགྒཎྷནསབྷཱཝེན. ཀིཙྩཝསེནཱཏི ཨནུཔྤནྣཱཀུསལཱནུཔྤཱདནཱདིཀིཙྩཝསེན. ཏཏོ ཨེཝ ཙསྶ ཙཏུབྦིདྷཏཱ. ཨིཛ྄ཛྷནཊྛེནཱཏི ནིཔྤཛྫནསབྷཱཝེན. ¶ ཚནྡཱདཡོ ཨེཝ ཨིདྡྷིཔཱདེསུ ཝིསིཊྛསབྷཱཝཱ, ཨིཏརེ ཨཝིསིཊྛཱ, ཏེསམྤི ཝིསེསོ ཚནྡཱདིཀཏོཏི ཨཱཧ ‘‘ཚནྡཱདིཝསེན ནཱནཱསབྷཱཝཱ’’ཏི.

ཨདྷིམོཀྑཱདིསབྷཱཝཝསེནཱཏི ¶ པསཱདཱདྷིམོཀྑཱདིསལཀྑཎཝསེན. ཨུཔཏྠམྦྷནཊྛེནཱཏི སམྤཡུཏྟདྷམྨཱནཾ ཨུཔཏྠམྦྷནཀབྷཱཝེན. ཨཀམྤིཡཊྛེནཱཏི པཊིཔཀྑེཧི ཨཀམྤིཡསབྷཱཝེན. སལཀྑཎེནཱཏི ཨདྷིམོཀྑཱདིསབྷཱཝེན. ནིཡྻཱནཊྛེནཱཏི སཾཀིལེསཔཀྑཏོ, ཝཊྚཙཱརཀཏོ ཙ ནིགྒམནཊྛེན. ཨུཔཊྛཱནཱདིནཱཏི ཨུཔཊྛཱནདྷམྨཝིཙཡཔགྒཧསམྤིཡཱཡནཔསྶམྦྷནསམཱདྷཱནཨཛ྄ཛྷུཔེཀྑནསངྑཱཏེན ཨཏྟནོ སབྷཱཝེན. ཧེཏུཊྛེནཱཏི ནིབྦཱནསྶ སམྤཱཔཀཧེཏུབྷཱཝེན. དསྶནཱདིནཱཏི དསྶནཱབྷིནིརོཔནཔརིགྒཧསམུཊྛཱཔནཝོདཱཔནཔགྒཧུཔཊྛཱནསམཱདྷཱནསངྑཱཏེན ཨཏྟནོ སབྷཱཝེན.

སཱསནསྶ ¶ པརིཡོསཱནདསྶནཏྠནྟི སཱསནཾ ནཱམ ནིཔྤརིཡཱཡཏོ སཏྟཏིཾས བོདྷིཔཀྑིཡདྷམྨཱ. ཏཏྠ ཡེ སམཐཝིཔསྶནཱསཧགཏཱ, ཏེ སཱསནསྶ ཨཱདི, མགྒཔརིཡཱཔནྣཱ མཛ྄ཛྷེ, ཕལབྷཱུཏཱ པརིཡོསཱནཾ, ཏཾདསྶནཏྠཾ. ཏེནཱཧ ‘‘སཱསནསྶ ཧཱི’’ཏིཨཱདི.

པུན ཨེཏདཱནུཏྟརིཡཾ བྷནྟེཏི ཡཐཱརདྡྷཱཡ དེསནཱཡ ནིགམནཾ. ཝུཏྟསྶེཝ ཨཏྠསྶ པུན ཝཙནཉྷི ནིགམནཾ ཝུཏྟཾ. ཏཾ དེསནནྟི ཏཾ ཀུསལེསུ དྷམྨེསུ དེསནཱཔྤཀཱརཾ, དེསནཱཝིདྷིཾ, དེསེཏབྦཉྩ, སཀལཾ ཝཱ སམྤུཎྞཾ ཨནཝསེསཾ ཨབྷིཛཱནཱཏི ཨབྷིཝིསིཊྛེན ཉཱཎེན ཛཱནཱཏི, ཨསེསཾ ཨབྷིཛཱནནཏོ ཨེཝ ཨུཏྟརི ཨུཔརི ཨབྷིཉྙེཡྻཾ ནཏྠི. ཨིཏོཏི བྷགཝཏཱ ཨབྷིཉྙཱཏཏོ. ཨཉྙོ པརམཏྠཝསེན དྷམྨོ ཝཱ པཉྙཏྟིཝསེན པུགྒལོ ཝཱ ཨཡཾ ནཱམ ཡཾ བྷགཝཱ ན ཛཱནཱཏཱིཏི ཨིདཾ ནཏྠི ན ཨུཔལབྦྷཏི སབྦསྶེཝ སམྨདེཝ ཏུམྷེཧི ཨབྷིཉྙཱཏཏྟཱ. ཀུསལེསུ དྷམྨེསུ ཨབྷིཛཱནནེ, དེསནཱཡཉྩ བྷགཝཏོ ཨུཏྟརིཏརོ ནཏྠི.

ཨཱཡཏནཔཎྞཏྟིདེསནཱཝཎྞནཱ

༡༤༦. ཨཱཡཏནཔཉྙཱཔནཱསཱུཏི ཙཀྑཱདཱིནཾ, རཱུཔཱདཱིནཉྩ ཨཱཡཏནཱནཾ ¶ སམྦོདྷནེསུ, ཏེསཾ ཨཛ྄ཛྷཏྟིཀབཱཧིརཝིབྷཱགཏོ, སབྷཱགཝིབྷཱགཏོ, སམུདཡཏོ, ཨཏྠངྒམཏོ, ཨཱཧཱརཏོ, ཨཱདཱིནཝཏོ, ནིསྶརཎཏོ ཙ དེསནཱཡནྟི ཨཏྠོ.

གབྦྷཱཝཀྐནྟིདེསནཱཝཎྞནཱ

༡༤༧. གབྦྷོཀྐམནེསཱུཏི ¶ གབྦྷབྷཱཝེན མཱཏུཀུཙྪིཡཾ ཨཝཀྐམནེསུ ཨནུཔྤཝེསེསུ, གབྦྷེ ཝཱ མཱཏུཀུཙྪིསྨིཾ ཨཝཀྐམནེསུ. པཝིསཏཱིཏི པཙྩཡཝསེན ཏཏྠ ནིབྦཏྟེནྟོ པཝིསནྟོ ཝིཡ ཧོཏཱིཏི ཀཏྭཱ ཝུཏྟཾ. ཋཱཏཱིཏི སནྟཱནཊྛིཏིཡཱ པཝཏྟཏི, ཏཐཱབྷཱུཏོ ཙ ཏཏྠ ཝསནྟོ ཝིཡ ཧོཏཱིཏི ཨཱཧ ‘‘ཝསཏཱི’’ཏི. པཀཏིལོཀིཡམནུསྶཱནཾ པཋམཱ གབྦྷཱཝཀྐནྟཱིཏི པཙུརམནུསྶཱནཾ གབྦྷཱཝཀྐནྟི དེསནཱཝསེན ཨིདྷ པཋམཱ. ‘‘དུཏིཡཱ གབྦྷཱཝཀྐནྟཱི’’ཏིཨཱདཱིསུཔི ཨེཝཾ ཡོཛནཱ ཝེདིཏབྦཱ.

ཨལམེཝཱཏི ཡུཏྟམེཝ.

ཁིཔིཏུཾ ¶ ན སཀྐོནྟཱིཏི ཏཐཱ ཝཱཏཱནཾ ཨནུཔྤཛྫནམེཝ ཝདཏི. སེསནྟི པུན ‘‘ཨེཏདཱནུཏྟརིཡ’’ཏིཨཱདི པཱཋཔྤདེསཾ ཝདཏི.

ཨཱདེསནཝིདྷཱདེསནཱཝཎྞནཱ

༡༤༨. པརསྶ ཙིཏྟཾ ཨཱདིསཏི ཨེཏེཧཱིཏི ཨཱདེསནཱནི, ཡཐཱཨུཔཊྛིཏནིམིཏྟཱདཱིནི, ཏཱནི ཨེཝ ཨཉྙམཉྙསྶ ཨསཾཀིཎྞརཱུཔེན ཋིཏཏྟཱ ཨཱདེསནཝིདྷཱ, ཨཱདེསནཱབྷཱགཱ, ཏཱསུ ཨཱདེསནཝིདྷཱསུ. ཏེནཱཧ ‘‘ཨཱདེསནཀོཊྛཱསེསཱུ’’ཏི. ཨཱགཏནིམིཏྟེནཱཏི ཡསྶ ཨཱདིསཏི, ཏསྶ, ཨཏྟནོ ཙ ཨུཔགཏནིམིཏྟེན, ནིམིཏྟཔྤཏྟསྶ ལཱབྷཱལཱབྷཱདིཨཱདིསནཝིདྷིདསྶནསྶ པཝཏྟཏྟཱ ‘‘ཨིདཾ ནཱམ བྷཝིསྶཏཱི’’ཏི ཝུཏྟཾ. པཱལི༹ཡཾ པན ‘‘ཨེཝམྤི ཏེ མནོ’’ཏིཨཱདིནཱ པརསྶ ཙིཏྟཱདིསནམེཝ ཨཱགཏཾ, ཏཾ ནིདསྶནམཏྟཾ ཀཏནྟི དཊྛབྦཾ. ཏཐཱ ཧི ‘‘ཨིདཾ ནཱམ བྷཝིསྶཏཱི’’ཏི ཝུཏྟསྶེཝ ཨཏྠསྶ ཝིབྷཱཝནཝསེན ཝཏྠུ ཨཱགཏཾ. གཏནིམིཏྟཾ ནཱམ གམནནིམིཏྟཾ. ཋིཏནིམིཏྟཾ ¶ ནཱམ ཨཏྟནོ སམཱིཔེ ཋཱནནིམིཏྟཾ, པརསྶ གམནཝསེན, ཋཱནཝསེན ཙ གཧེཏབྦནིམིཏྟཾ. མནུསྶཱནཾ པརཙིཏྟཝིདཱུནཾ, ཨིཏརེསམྤི ཝཱ སཝནཝསེན པརསྶ ཙིཏྟཾ ཉཏྭཱ ཀཐེནྟཱནཾ སདྡཾ སུཏྭཱ. ཡཀྑཔིསཱཙཱདཱིནནྟི ཧིངྐཱརཡཀྑཱནཉྩེཝ ཀཎྞཔིསཱཙཱདིཔིསཱཙཱནཾ, ཀུམྦྷཎྜནཱགཱདཱིནཉྩ.

ཝིཏཀྐཝིཔྥཱརཝསེནཱཏི ཝིཔྥཱརིཀབྷཱཝེན པཝཏྟཝིཏཀྐསྶ ཝསེན. ཨུཔྤནྣནྟི ཏཏོ སམུཊྛིཏཾ. ཝིཔྤལཔནྟཱནནྟི ཀསྶཙི ཨཏྠསྶ ཨབོདྷནཏོ ཝིརཱུཔཾ, ཝིཝིདྷཾ ཝཱ པལཔནྟཱནཾ. སུཏྟཔམཏྟཱདཱིནནྟི ¶ ཨཱདི-སདྡེན ཝེདནཱཊྚཁིཏྟཙིཏྟཱདཱིནཾ སངྒཧོ. མཧཱཨཊྛཀཐཱཡཾ པན ‘‘ཨིདཾ ཝཀྑཱམི, ཨེཝཾ ཝཀྑཱམཱིཏི ཝིཏཀྐཡཏོ ཝིཏཀྐཝིཔྥཱརསདྡོ ནཱམ ཨུཔྤཛྫཏཱི’’ཏི (ཨབྷི. ཨཊྛ. ༡.ཝཙཱིཀམྨདྭཱརཀཐཱཔི) ཨཱགཏཏྟཱ ཛཱགརནྟཱནཾ པཀཏིཡཾ ཋིཏཱནཾ ཨཝིཔྤལཔནྟཱནཾ ཝིཏཀྐཝིཔྥཱརསདྡོ ཀདཱཙི ཨུཔྤཛྫཏཱིཏི ཝིཉྙཱཡཏི, ཡོ ལོཀེ ‘‘མནྟཛཔྤོ’’ཏི ཝུཙྩཏི. ཡསྶ མཧཱཨཊྛཀཐཱཡཾ ཨསོཏཝིཉྙེཡྻཏཱ ཝུཏྟཱ. ཏཱདིསཉྷི སནྡྷཱཡ ཝིཉྙཏྟིསཧཛམེཝ ‘‘ཛིཝ྄ཧཱཏཱལུཙལནཱདིཀརཝིཏཀྐསམུཊྛིཏཾ སུཁུམསདྡཾ དིབྦསོཏེན སུཏྭཱ ཨཱདིསཏཱིཏི སུཏྟེ ཝུཏྟ’’ནྟི (དྷ. ས. མཱུལཊཱི. ཝཙཱིཀམྨདྭཱརཀཐཱཝཎྞནཱ) ཨཱནནྡཱཙརིཡོ ཨཝོཙ. ཝུཏྟལཀྑཎོ ཨེཝ པན ནཱཏིསུཁུམོ ཨཏྟནོ, ཨཙྩཱསནྣཔྤདེསེ ཋིཏསྶ ཙ མཾསསོཏསྶཱཔི ཨཱཔཱཐཾ གཙྪཏཱིཏི སཀྐཱ ཝིཉྙཱཏུཾ. ཏསྶཱཏི ¶ ཏསྶ པུགྒལསྶ. ཏསྶ ཝསེནཱཏི ཏསྶ ཝིཏཀྐསྶ ཝསེན. ཨེཝཾ ཨཡམྤི ཨཱདེསནཝིདྷཱ ཙེཏོཔརིཡཉཱཎཝསེནེཝ ཨཱགཏཱཏི ཝེདིཏབྦཱ ¶ . ཀེཙི པན ‘‘ཏསྶ ཝསེནཱཏི ཏསྶ སདྡསྶ ཝསེནཱ’’ཏི ཨཏྠཾ ཝདནྟི, ཏཾ ཨཡུཏྟཾ. ན ཧི སདྡགྒཧཎེན ཏཾསམུཊྛཱཔཀཙིཏྟཾ གཡ྄ཧཏི, སདྡགྒཧཎཱནུསཱརེནཔི ཏདཏྠསྶེཝ གཧཎཾ ཧོཏི, ན ཙིཏྟསྶ. ཨེཏེནེཝ ཡདེཀེ ‘‘ཡཾ ཝིཏཀྐཡཏོཏི ཡམཏྠཾ ཝིཏཀྐཡཏོ’’ཏི ཝཏྭཱ ‘‘ཏསྶ ཝསེནཱཏི ཏསྶ ཨཏྠསྶ ཝསེནཱ’’ཏི ཝཎྞེནྟི, ཏམྤི པཊིཀྑིཏྟཾ.

མནསཱ སངྑརཱིཡནྟཱིཏི མནོསངྑཱརཱ, ཝེདནཱསཉྙཱ. པཎིཧིཏཱཏི པུརིམཔརིབནྡྷཝིནཡེན པདྷཱནབྷཱཝེན ནིཧིཏཱ ཋཔིཏཱ. ཏེནཱཧ ‘‘ཙིཏྟསངྑཱརཱ སུཊྛཔིཏཱ’’ཏི. ཝིཏཀྐསྶ ཝིཏཀྐནཾ ནཱམ ཨུཔྤཱདནམེཝཱཏི ཨཱཧ ‘‘པཝཏྟེསྶཏཱི’’ཏི. ‘‘པཛཱནཱཏཱི’’ཏི པུབྦེ ཝུཏྟཔདསམྦནྡྷདསྶནཝསེན ཨཱནེཏི. ཨཱགམནེནཱཏི ཛྷཱནསྶ ཨཱགམནཊྛཱནཝསེན. པུབྦབྷཱགེནཱཏི མགྒསྶ སབྦཔུབྦབྷཱགེན ཝིཔསྶནཱརམྦྷེན. ཨུབྷཡཾ པེཏཾ ཡོ སཡཾ ཛྷཱནལཱབྷཱི, ཨདྷིགཏམགྒོ ཙ ཨཉྙཾ ཏདཏྠཱཡ པཊིཔཛྫནྟཾ དིསྭཱ ‘‘ཨཡཾ ཨིམིནཱ ནཱིཧཱརེན པཊིཔཛྫནྟོ ཨདྡྷཱ ཛྷཱནཾ ལབྷིསྶཏི, མགྒཾ ཨདྷིགམིསྶཏཱི’’ཏི ཨབྷིཉྙཱཡ ཝིནཱ ཨནུམཱནཝསེན ཛཱནཱཏི, ཏཾ དསྶེཏུཾ ཝུཏྟཾ. ཏེནཱཧ ‘‘ཨཱགམནེན ཛཱནཱཏི ནཱམཱ’’ཏིཨཱདི. ཨནནྟརཱཏི ཝུཊྛིཏཀཱལཾ སནྡྷཱཡཱཧ. ཏདཱ ཧི པཝཏྟཝིཏཀྐཔཛཱནནེནེཝ ཛྷཱནསྶ ཧཱནབྷཱགིཡཏཱདིཝིསེསཔཛཱནནཾ.

ཀིཾ པནིདཾ ཙེཏོཔརིཡཉཱཎཾ པརསྶ ཙིཏྟཾ པརིཙྪིཛྫ ཛཱནནྟཾ ཨིདྡྷིཙིཏྟབྷཱཝཏོ ཨཝིསེསཏོ སབྦེསམྤི ཙིཏྟཾ ཛཱནཱཏཱིཏི? ནོཏི དསྶེནྟོ ‘‘ཏཏྠཱ’’ཏིཨཱདིམཱཧ. ན ཨརིཡཱནནྟི ཡེན ཙིཏྟེན ཏེ ཨརིཡཱ ནཱམ ཛཱཏཱ, ཏཾ ལོཀུཏྟརཙིཏྟཾ ན ཛཱནཱཏི ཨཔྤཊིཝིདྡྷབྷཱཝཏོ ¶ . ཡཐཱ ཧི པུཐུཛྫནོ སབྦེསམྤི ཨརིཡཱནཾ ལོཀུཏྟརཙིཏྟཾ ན ཛཱནཱཏི ཨཔྤཊིཝིདྡྷཏྟཱ, ཨེཝཾ ཨརིཡོཔི ཧེཊྛིམོ ཨུཔརིམསྶ ལོཀུཏྟརཙིཏྟཾ ན ཛཱནཱཏི ཨཔྤཊིཝིདྡྷཏྟཱ ཨེཝ ¶ . ཡཐཱ པན ཨུཔརིམོ ཧེཊྛིམཾ ཕལསམཱཔཏྟིཾ ན སམཱཔཛྫཏི, ཀིཾ ཨེཝཾ སོ ཏསྶ ལོཀུཏྟརཙིཏྟཾ ན ཛཱནཱཏཱིཏི ཙོདནཾ སནྡྷཱཡཱཧ ‘‘ཨུཔརིམོ པན ཧེཊྛིམསྶ ཛཱནཱཏཱི’’ཏི, པཊིཝིདྡྷཏྟཱཏི ཨདྷིཔྤཱཡོ. ‘‘ཨུཔརིམོ ཧེཊྛིམཾ ན སམཱཔཛྫཏཱི’’ཏི ཝཏྭཱ ཏཏྠ ཀཱརཎམཱཧ ‘‘ཏེསཉྷཱི’’ཏིཨཱདི. ཏེསནྟི ཨརིཡཱནཾ. ཧེཊྛིམཱ ཧེཊྛིམཱ སམཱཔཏྟི བྷཱུམནྟརཔྤཏྟིཡཱ པཊིཔྤསྶདྡྷིཀཔྤཱ. ཏེནཱཧ ‘‘ཏཏྲུཔཔཏྟིཡེཝ ཧོཏཱི’’ཏི, ན ¶ ཨུཔརིབྷཱུམིཔཏྟི. ནིམིཏྟཱདིཝསེན ཉཱཏསྶ ཀདཱཙི བྱབྷིཙཱརོཔི སིཡཱ, ན པན ཨབྷིཉྙཱཉཱཎེན ཉཱཏསྶཱཏི ཨཱཧ ‘‘ཙེཏོ…པེ… ནཏྠཱི’’ཏི. ‘‘ཏཾ བྷགཝཱ’’ཏིཨཱདི སེསཾ ནཱམ.

དསྶནསམཱཔཏྟིདེསནཱཝཎྞནཱ

༡༤༩. བྲཧྨཛཱལེཏི བྲཧྨཛཱལསུཏྟཝཎྞནཱཡཾ. ཨུཏྟརཔདལོཔེན ཧེས ནིདྡེསོ. ཨཱཏཔྤནྟི ཝཱིརིཡཾ ཨཱཏཔྤཏི ཀོསཛྫཾ སབྦམྤི སཾཀིལེསཔཀྑནྟི. ཀུསལཝཱིརིཡསྶེཝ ཧེཏྠ གཧཎཾ ཨཔྤམཱདཱདིཔདནྟརསནྣིདྷཱནཏོ. པདཧིཏབྦཏོཏི པདཧནཏོ, བྷཱཝནཾ ཨུདྡིསྶ ཝཱཡམནཏོཏི ཨཏྠོ. ཨནུཡུཉྫིཏབྦཏོཏི ཨནུཡུཉྫནཏོ. ཨཱིདིསཱནཾ པདཱནཾ བཧུལཾཀཏྟུཝིསཡཏཱཡ ཨིཙྪིཏབྦཏྟཱ ཨཱཏཔྤཔདསྶ ཝིཡ ཨིཏརེསམྤི ཀཏྟུསཱདྷནཏཱ དཊྛབྦཱ. པཊིཔཏྟིཡཾ ནཔྤམཛྫཏི ཨེཏེནཱཏི ཨཔྤམཱདོ, སཏིཨཝིཔྤཝཱསོ. སམྨཱ མནསི ཀརོཏི ཨེཏེནཱཏི སམྨཱམནསིཀཱརོ, ཏཐཱཔཝཏྟོ ཀུསལཙིཏྟུཔྤཱདོ. བྷཱཝནཱནུཡོགམེཝ ཏཐཱ ཝདཏི. དེསནཱཀྐམེན པཋམཱ, དསྶནསམཱཔཏྟི ནཱམ ཀརཛཀཱཡེ པཊིཀྐཱུལཱཀཱརསྶ སམྨདེཝ དསྶནཝསེན པཝཏྟསམཱཔཏྟིབྷཱཝཏོ. ནིཔྤརིཡཱཡེནེཝཱཏི ཝུཏྟལཀྑཎདསྶནསམཱཔཏྟིསནྣིསྶཡཏྟཱ, དསྶནམགྒཕལབྷཱཝཏོ ¶ ཙ པཋམསཱམཉྙཕལཾ པརིཡཱཡེན ཝིནཱ དསྶནསམཱཔཏྟི.

ཨཏིཀྐམྨ ཚཝིམཾསལོཧིཏཾ ཨཊྛིཾ པཙྩཝེཀྑཏཱིཏི ཏཱནི ཨཔཙྩཝེཀྑིཏྭཱ ཨཊྛིམེཝ པཙྩཝེཀྑཏི. ཨཊྛིཨཱརམྨཎཱ དིབྦཙཀྑུཔཱདཀཛ྄ཛྷཱནསམཱཔཏྟཱིཏི ཝུཏྟནཡེན ཨཊྛིཨཱརམྨཎཱ དིབྦཙཀྑུཨདྷིཊྛཱནཱ པཋམཛ྄ཛྷཱནསམཱཔཏྟི. ཡོ ཧི བྷིཀྑུ ཨཱལོཀཀསིཎེ ཙཏུཏྠཛ྄ཛྷཱནཾ ནིབྦཏྟེཏྭཱ ཏཾ པཱདཀཾ ཀཏྭཱ ཨདྷིགཏདིབྦཙཀྑུཉཱཎོ ཧུཏྭཱ སཝིཉྙཱཎཀེ ཀཱཡེ ཨཊྛིཾ པརིགྒཧེཏྭཱ ཏཏྠ པཊིཀྐཱུལམནསིཀཱརཝསེན པཋམཾ ཛྷཱནཾ ནིབྦཏྟེཏི, ཏསྶཱཡཾ པཋམཛ྄ཛྷཱནསམཱཔཏྟི དུཏིཡཱ དསྶནསམཱཔཏྟི. ཏེན ཝུཏྟཾ ‘‘ཨཊྛི ཨཊྛཱི’’ཏིཨཱདི. ཡོ པནེཏྠ པཱལི༹ཡཾ དྭཏྟིཾསཱཀཱརམནསིཀཱརོ ཝུཏྟོ, སོ མགྒསོདྷནཝསེན ཝུཏྟོ. ཏཏྠ ཝཱ ཀཏཔརིཙཡསྶ སུཁེནེཝ ཝུཏྟནཡཱ ཨཊྛིཔཙྩཝེཀྑཎཱ སམིཛ྄ཛྷཏཱིཏི. ཏེནེཝེཏྠ ‘‘ཨིམཾ ཙེཝཱ’’ཏི ‘‘ཨཏིཀྐམྨ ཙཱ’’ཏི ཙ-སདྡོ སམུཙྩཡཏྠོ ཝུཏྟོ. ཏཾ ཛྷཱནནྟི ཡཐཱཝུཏྟཾ ¶ པཋམཛ྄ཛྷཱནཾ. ཨཡནྟི ཨཡཾ སཀདཱགཱམིཕལསམཱཔཏྟི ¶ . སཱཏིསཡཾ ཙཏུསཙྩདསྶནཱགམནཏོ པརིཡཱཡེན ཝིནཱ མུཁྱཱ དུཏིཡཱ དསྶནསམཱཔཏྟི. ཡཱཝ ཏཏིཡམགྒཱ ཝཏྟཏཱིཏི ཨཱཧ ‘‘ཁཱིཎཱསཝསྶ ཝསེན ཙཏུཏྠཱ དསྶནསམཱཔཏྟི ཀཐིཏཱ’’ཏི.

པཱལི༹ཡཾ པུརིསསྶ ཙཱཏི ཙ-སདྡོ བྱཏིརེཀེ, ཏེན ཡཐཱཝུཏྟསམཱཔཏྟིདྭཡཏོ ཝུཙྩམཱནཾཡེཝ ཨིམསྶ ཝིསེསཾ ཛོཏེཏི. ཨཝིཙྪེདེན པཝཏྟིཡཱ སོཏསདིསཏཱཡ ཝིཉྙཱཎམེཝ ཝིཉྙཱཎསོཏཾ, ཏདེཏཾ ཝིཉྙཱཎཾ པུརིམཏོ ཨནནྟརཔཙྩཡཾ ལབྷིཏྭཱ པཙྪིམསྶ ཨནནྟརཔཙྩཡོ ཧུཏྭཱ པཝཏྟཏཱིཏི ཨཡཾ ཨསྶ སོཏཱགཏཏཱཡ སོཏསདིསཏཱ, ཏསྨཱ པཛཱནིཏབྦབྷཱཝེན ཝུཏྟཾ ཨེཀམེཝ ཙེཏྠ ཝིཉྙཱཎཾ ¶ , ཏསྨཱ ཨཊྛཀཐཱཡཾ ‘‘ཝིཉྙཱཎསོཏནྟི ཝིཉྙཱཎམེཝཱ’’ཏི ཝུཏྟཾ. དྭཱིཧིཔི བྷཱགེཧཱིཏི ཨོརབྷཱགཔརབྷཱགེཧི. ཨིདྷལོཀོ ཧིསྶ ཨོརབྷཱགོ, པརལོཀོ པརབྷཱགོ དྭིནྣམྤི ཝསེནེཏཾ སམྦནྡྷནྟི. ཏེནཱཧ ‘‘ཨིདྷལོཀེ པཏིཊྛིཏ’’ནྟིཨཱདི. ཝིཉྙཱཎསྶ ཁཎེ ཁཎེ བྷིཛྫནྟསྶ ཀཱམཾ ནཏྠི ཀསྶཙི པཏིཊྛིཏཏཱ, ཏཎྷཱཝསེན པན ཏཾ ‘‘པཏིཊྛིཏ’’ནྟི ཝུཙྩཏཱིཏི ཨཱཧ ‘‘ཚནྡརཱགཝསེནཱ’’ཏི. ཝུཏྟཉྷེཏཾ –

‘‘ཀབལཱི༹ཀཱརེ ཙེ བྷིཀྑཝེ ཨཱཧཱརེ ཨཏྠི རཱགོ, ཨཏྠི ནནྡཱི, ཨཏྠི ཏཎྷཱ, པཏིཊྛིཏཾ ཏཏྠ ཝིཉྙཱཎཾ ཝིརུལ༹ྷཾ. ཡཏྠ པཏིཊྛིཏཾ ཝིཉྙཱཎཾ ཝིརུལ༹ྷཾ…པེ… ཨཏྠི ཏཏྠ ཨཱཡཏིཾ པུནབྦྷཝཱབྷིནིབྦཏྟཱི’’ཏིཨཱདི (སཾ. ནི. ༢.༦༤; ཀཐཱ. ༢༩༦; མཧཱནི. ༧).

ཀམྨནྟི ཀུསལཱཀུསལཀམྨཾ, ཨུཔཡོགཝཙནམེཏཾ. ཀམྨཏོ ཨུཔགཙྪནྟནྟི ཀམྨབྷཱཝེན ཨུཔགཙྪནྟཾ, ཝིཉྙཱཎནྟི ཨདྷིཔྤཱཡོ. ཨབྷིསངྑཱརཝིཉྙཱཎཉྷི ཡེན ཀམྨུནཱ སཧགཏཾ, ཨཉྙདཏྠུ ཏབྦྷཱཝམེཝ ཨུཔགཏཾ ཧུཏྭཱ པཝཏྟཏི. ཨིདྷལོཀེ པཏིཊྛིཏཾ ནཱམ ཨིདྷ ཀཏཱུཔཙིཏཀམྨབྷཱཝཱུཔགམནཏོ. ཀམྨབྷཝཾ ཨཱཀཌྜྷནྟནྟི ཀམྨཝིཉྙཱཎཾ ཨཏྟནཱ སམྤཡུཏྟཀམྨཾ ཛཝཱཔེཏྭཱ པཊིསནྡྷིནིབྦཏྟནེན ཏདབྷིམུཁཾ ཨཱཀཌྜྷནྟཾ. ཏེནེཝ པཊིསནྡྷིནིབྦཏྟནསཱམཏྠིཡེན པརལོཀེ པཏིཊྛིཏཾ ནཱམ ཨཏྟནོ ཕལསྶ ཏཏྠ པཏིཊྛཱཔནེན. ཀེཙི པན ‘‘ཨབྷིསངྑཱརཝིཉྙཱཎཾ པརཏོ ཝིཔཱཀཾ དཱཏུཾ ཨསམཏྠཾ ཨིདྷལོཀེ པཏིཊྛིཏཾ ནཱམ, དཱཏུཾ སམཏྠཾ པན པརལོཀེ པཏིཊྛིཏཾ ¶ ནཱམཱ’’ཏི ཝདནྟི, ཏཾ ཏེསཾ མཏིམཏྟཾ ‘‘ཨུབྷཡཏོ ཨབྦོཙྪིནྣ’’ནྟི ཝུཏྟཏྟཱ. ཡཉྩ ཏེཧི ‘‘པརལོཀེ པཏིཊྛིཏ’’ནྟི ཝུཏྟཾ, ཏཾ ཨིདྷལོཀེཔི པཏིཊྛིཏམེཝ. ན ཧི ཏསྶ ཨིདྷལོཀེ པཏིཊྛིཏབྷཱཝེན ཝིནཱ པརལོཀེ པཏིཊྛིཏབྷཱཝོ སམྦྷཝཏི. སེཀྑཔུཐུཛྫནཱནཾ ¶ ཙེཏོཔརིཡཉཱཎནྟི སེཀྑཱནཾ ¶ , པུཐུཛྫནཱནཉྩ ཙེཏསོ པརིཙྪིནྡནཀཉཱཎཾ. ཀཐིཏཾ པརིཙྪིནྡིཏབྦསྶ ཙེཏསོ ཚནྡརཱགཝསེན པཏིཊྛིཏབྷཱཝཛོཏནཏོ.

ཙཏུཏྠཱཡ དསྶནསམཱཔཏྟིཡཱ ཏཏིཡདསྶནསམཱཔཏྟིཡཾ ཝུཏྟཔྤཊིཀྑེཔེན ཨཏྠོ ཝེདིཏབྦོ.

པུརིམཱནཾ དྭིནྣཾ སམཱཔཏྟཱིནཾ པུབྦེ སམཐཝསེན ཨཏྠསྶ ཝུཏྟཏྟཱ ཨིདཱནི ཝིཔསྶནཱཝསེན དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ནིཙྩལམེཝ པུབྦེ ཝུཏྟསྶ ཨཏྠསྶ ཨཔནེཏབྦཏོ. ཨཏྠནྟརཏྠཏཱཡ དསྶིཡམཱནཱཡ པདཾ ཙལིཏཾ ནཱམ ཧོཏི. ཨཔརོ ནཡོཏི ཨེཏྠ པཋམཛ྄ཛྷཱནསྶ པཋམདསྶནསམཱཔཏྟིབྷཱཝེ ཨཔུབྦཾ ནཏྠི. དུཏིཡཛ྄ཛྷཱནཾ དུཏིཡཱཏི ཨེཏྠ པན ‘‘ཨཊྛིཀཝཎྞཀསིཎཝསེན པཊིལདྡྷདུཏིཡཛ྄ཛྷཱནཾ དུཏིཡཱ དསྶནསམཱཔཏྟཱི’’ཏི ཝདནྟི, ཏཏིཡཛ྄ཛྷཱནམྤི ཏཐེཝ པཊིལདྡྷཾ. དསྶནསམཱཔཏྟིབྷཱཝོ པན ཡོ བྷིཀྑུ ཨཱལོཀཀསིཎེ ཙཏུཏྠཛ྄ཛྷཱནཾ ནིབྦཏྟེཏྭཱ ཏཾ པཱདཀཾ ཀཏྭཱ ཨདྷིགཏདིབྦཙཀྑུཀོ ཧུཏྭཱ སཝིཉྙཱཎཀེ ཨཊྛིཾ པརིགྒཧེཏྭཱ ཏཏྠ ཝཎྞཀསིཎཝསེན ཧེཊྛིམཱནི ཏཱིཎི ཛྷཱནཱནི ནིབྦཏྟེཏི, ཏསྶ. ཏཏིཡཛ྄ཛྷཱནཾ ཏཏིཡཱ དསྶནསམཱཔཏྟི ཨདྷིཊྛཱནབྷཱུཏསྶ དིབྦཙཀྑུཉཱཎསྶ ཝསེན. ཙཏུཏྠཛ྄ཛྷཱནཾ ཙཏུཏྠཱཏི རཱུཔཱཝཙརཙཏུཏྠཛ྄ཛྷཱནཾ ནིབྦཏྟེཏྭཱ ཏཾ པཱདཀཾ ཀཏྭཱ ཨདྷིགཏདིབྦཙཀྑུཉཱཎསྶ ཏཾ ཙཏུཏྠཛ྄ཛྷཱནཾ ཙཏུཏྠཱ དསྶནསམཱཔཏྟི. ཨིདྷཱཔི སེཀྑཔུཐུཛྫནཱནཾ ཙེཏསོ པརིཙྪིནྡནེན ཏཏིཡཱ དསྶནསམཱཔཏྟི, ཨརཧཏོ ཙིཏྟསྶ པརིཙྪིནྡནེན ཙཏུཏྠཱ དསྶནསམཱཔཏྟི ཝེདིཏབྦཱ. ཨེཝཉྷེསཱ ཨཏྠཝཎྞནཱ པཱལི༹ཡཱ སཾསནྡེཡྻ. ‘‘པཋམམགྒོ’’ཏིཨཱདཱིསུ ཨཊྛིཨཱརམྨཎཔཋམཛ྄ཛྷཱནཔཱདཀོ པཋམམགྒོ པཋམཱ དསྶནསམཱཔཏྟི. ཨཊྛིཨཱརམྨཎདུཏིཡཛ྄ཛྷཱནཔཱདཀོ དུཏིཡམགྒོ དུཏིཡཱ དསྶནསམཱཔཏྟི. པརཙིཏྟཉཱཎསཧགཏཱ ཙཏུཏྠཛ྄ཛྷཱནཔཱདཀཱ ཏཏིཡཙཏུཏྠམགྒཱ ཏཏིཡཙཏུཏྠདསྶནསམཱཔཏྟིཡོཏི ¶ . པུརིསསྶ ཝིཉྙཱཎཔཛཱནནཾ པནེཏྠ ཨསམྨོཧཝསེན དཊྛབྦཾ.

པུགྒལཔཎྞཏྟིདེསནཱཝཎྞནཱ

༡༥༠. པུགྒལཔཎྞཏྟཱིསཱུཏི ¶ པུགྒལཱནཾ པཉྙཱཔནེསུ. གུཎཝིསེསཝསེན ཨཉྙམཉྙཾ ཨསངྐརཏོ ཋཔནེསུ. ལོཀཝོཧཱརཝསེནཱཏི ལོཀསམྨུཏིཝསེན. ལོཀཝོཧཱརོ ཧེས, ཡདིདཾ ‘‘སཏྟོ པུགྒལོ’’ཏིཨཱདི. རཱུཔཱདཱིསུ སཏྟཝིསཏྟཏཱཡ སཏྟོ. ཏསྶ ཏསྶ སཏྟནིཀཱཡསྶ པཱུརཎཏོ གལནཏོ, མརཎཝསེན པཏནཏོ ཙ པུགྒལོ. སནྟཏིཡཱ ནཡནཏོ ནརོ. ཨཏྟབྷཱཝསྶ པོསནཏོ པོསོ. ཨེཝཾ པཉྙཱཔེཏབྦཱསུ ཝོཧརིཏབྦཱསུ. ‘‘སབྦམེཏཾ པུགྒལོ’’ཏི ཨིམིསྶཱ སཱདྷཱརཎཔཉྙཏྟིཡཱ ¶ ཝིབྷཱཝནཝསེན ཝུཏྟཾ, ན ཨིདྷཱདྷིཔྤེཏཨསཱདྷཱརཎཔཉྙཏྟིཡཱ, ཏསྨཱ ལོཀཔཉྙཏྟཱིསཱུཏི སཏྟལོཀགཏཔཉྙཏྟཱིསུ. ཨནུཏྟརོ ཧོཏི ཨནཉྙསཱདྷཱརཎཏྟཱ ཏསྶ པཉྙཱཔནསྶ.

དྭཱིཧི བྷཱགེཧཱིཏི ཀཱརཎེ, ནིསྶཀྐེ ཙེཏཾ པུཐུཝཙནཾ, ཨཱཝུཏྟིཨཱདིཝསེན ཙཱཡམཏྠོ ཝེདིཏབྦོཏི ཨཱཧ ‘‘ཨརཱུཔསམཱཔཏྟིཡཱ’’ཏིཨཱདི, ཨེཏེན ‘‘སམཱཔཏྟིཡཱ ཝིཀྑམྦྷནཝིམོཀྑེན, མགྒེན སམུཙྪེདཝིམོཀྑེན ཝིམུཏྟཏྟཱ ཨུབྷཏོབྷཱགཝིམུཏྟོ’’ཏི ཨེཝཾ པཝཏྟོ ཏིཔིཊཀཙཱུལ༹ནཱགཏྠེརཝཱདོ, ‘‘ནཱམཀཱཡཏོ, རཱུཔཀཱཡཏོ ཙ ཝིམུཏྟཏྟཱ ཨུབྷཏོབྷཱགཝིམུཏྟོ’’ཏི ཨེཝཾ པཝཏྟོ ཏིཔིཊཀམཧཱདྷམྨརཀྑིཏཏྠེརཝཱདོ, ‘‘སམཱཔཏྟིཡཱ ཝིཀྑམྦྷནཝིམོཀྑེན ཨེཀཝཱརཾ ཝིམུཏྟོཝ མགྒེན སམུཙྪེདཝིམོཀྑེན ཨེཀཝཱརཾ ཝིམུཏྟཏྟཱ ཨུབྷཏོབྷཱགཝིམུཏྟོ’’ཏི ཨེཝཾ པཝཏྟོ ཏིཔིཊཀཙཱུལཱ༹བྷཡཏྠེརཝཱདོ ཙཱཏི ཨིམེསཾ ཏིཎྞམྤི ཐེརཝཱདཱནཾ ཨེཀཛ྄ཛྷཾ སངྒཧོ ཀཏོཏི དཊྛབྦཾ. ཝིམུཏྟོཏི ཀིལེསེཧི ཝིམུཏྟོ, ཀིལེསཝིཀྑམྦྷནསམུཙྪེདནེཧི ¶ ཝཱ ཀཱཡདྭཡཏོ ཝིམུཏྟོཏི ཨཏྠོ. ཨརཱུཔསམཱཔཏྟཱིནནྟི ནིདྡྷཱརཎེ སཱམིཝཙནཾ. ཨརཧཏྟཔྤཏྟཨནཱགཱམིནོཏི བྷཱུཏཔུབྦགཏིཡཱ ཝུཏྟཾ. ན ཧི ཨརཧཏྟཔྤཏྟོ ཨནཱགཱམཱི ནཱམ ཧོཏི. པཱལཱི༹ཏི པུགྒལཔཉྙཏྟིཔཱལི༹. ཨཊྛ ཝིམོཀྑེ ཀཱཡེན ཕུསིཏྭཱཏི ཨཊྛ སམཱཔཏྟིཡོ སཧཛཱཏནཱམཀཱཡེན པཊིལབྷིཏྭཱ. པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟཱིཏི ཝིཔསྶནཱཔཉྙཱཡ སངྑཱརགཏཾ, མགྒཔཉྙཱཡ ཙཏྟཱརི སཙྩཱནི པསྶིཏྭཱ ཙཏྟཱརོཔི ཨཱསཝཱ པརིཀྑཱིཎཱ ཧོནྟི. དིསྭཱཏི དསྶནཧེཏུ. ན ཧི ཨཱསཝེ པཉྙཱཡ པསྶནྟི, དསྶནཀཱརཎཱ པན ¶ པརིཀྑཱིཎཱ ‘‘དིསྭཱ པརིཀྑཱིཎཱ’’ཏི ཝུཏྟཱ དསྶནཱཡཏྟཔརིཀྑཱིཎཏྟཱ. ཨེཝཉྷི དསྶནཾ ཨཱསཝཱནཾ ཁཡསྶ པུརིམཀིརིཡཱབྷཱཝེན ཝུཏྟཾ.

པཉྙཱཡ ཝིསེསཏོ མུཏྟོཏི པཉྙཱཝིམུཏྟོ ཨནཝསེསཏོ ཨཱསཝཱནཾ པརིཀྑཱིཎཏྟཱ. ཨཊྛཝིམོཀྑཔཊིཀྑེཔཝསེནེཝ, ན ཏདེཀདེསབྷཱུཏརཱུཔཛ྄ཛྷཱནཔཊིཀྑེཔཝསེན. ཨེཝཉྷི ཨརཱུཔཛ྄ཛྷཱནེཀདེསཱབྷཱཝེཔི ཨཊྛཝིམོཀྑཔཊིཀྑེཔོ ན ཧོཏཱིཏི སིདྡྷཾ ཧོཏི. ཨརཱུཔཱཝཙརཛ྄ཛྷཱནེསུ ཧི ཨེཀསྨིམྤི སཏི ཨུབྷཏོབྷཱགཝིམུཏྟོཡེཝ ནཱམ ཧོཏི, ན པཉྙཱཝིམུཏྟོཏི.

ཕུཊྛནྟཾ སཙྪིཀརོཏཱིཏི ཕུཊྛཱནཾ ཨནྟོ ཕུཊྛནྟོ, ཕུཊྛཱནཾ ཨརཱུཔཛ྄ཛྷཱནཱནཾ ཨནནྟརོ ཀཱལོཏི ཨདྷིཔྤཱཡོ, ཨཙྩནྟསཾཡོགེ ཙེཏཾ ཨུཔཡོགཝཙནཾ, ཕུཊྛཱནནྟརཀཱལམེཝ སཙྪིཀཱཏབྦཾ, སཙྪིཀཏོ སཙྪིཀརཎཱུཔཱཡེནཱཏི ཝུཏྟཾ ཧོཏི. ཏེནཱཧ ‘‘སོ ཛྷཱནཕསྶ’’ནྟིཨཱདི. ཨེཀཙྩེ ཨཱསཝཱཏི ཧེཊྛིམམགྒཏྟཡཝཛ྄ཛྷཱ ཨཱསཝཱ. ཡོ ཧི ཨརཱུཔཛ྄ཛྷཱནེན རཱུཔཀཱཡཏོ, ནཱམཀཱཡེཀདེསཏོ ¶ ཙ ཝིཀྑམྦྷནཝིམོཀྑེན ཝིམུཏྟོ, ཏེན ནིརོདྷསངྑཱཏོ ཝིམོཀྑོ ཨཱལོཙིཏོ པཀཱསིཏོ ¶ ཝིཡ ཧོཏི, ན པན ཀཱཡེན སཙྪིཀཏོ. ནིརོདྷཾ པན ཨཱརམྨཎཾ ཀཏྭཱ ཨེཀཙྩེསུ ཨཱསཝེསུ ཁེཔིཏེསུ ཏེན སཙྪིཀཏོ ཧོཏི, ཏསྨཱ སོ སཙྪིཀཱཏབྦཾ ནིརོདྷཾ ཡཐཱལོཙིཏཾ ནཱམཀཱཡེན སཙྪིཀརོཏཱིཏི ཀཱཡསཀྑཱིཏི ཝུཙྩཏི, ན ཏུ ཝིམུཏྟོཏི ཨེཀཙྩཱནཾ ཨཱསཝཱནཾ ཨཔརིཀྑཱིཎཏྟཱ.

དིཊྛནྟཾ པཏྟོཏི དསྶནསངྑཱཏསྶ སོཏཱཔཏྟིམགྒཉཱཎསྶ ཨནནྟརཾ པཏྟོཏི ཨཏྠོ. ‘‘དིཊྛཏྟཱ པཏྟོ’’ཏིཔི པཱཋོ, ཏེན ཙཏུསཙྩདསྶནསངྑཱཏཱཡ དིཊྛིཡཱ ནིརོདྷསྶ པཏྟཏཾ དཱིཔེཏི. ཏེནཱཧ ‘‘དུཀྑཱ སངྑཱརཱ’’ཏིཨཱདི. པཋམཕལཏོ པཊྛཱཡ ཡཱཝ ཨགྒམགྒཱ དིཊྛིཔྤཏྟོཏི ཨཱཧ ‘‘ཨེསོཔི ཀཱཡསཀྑཱི ཝིཡ ཚབྦིདྷོ ཧོཏཱི’’ཏི. ཨིདཾ དུཀྑནྟི ‘‘ཨིདཾ དུཀྑཾ, ཨེཏྟཀཾ དུཀྑཾ, ན ཨིཏོ ཨུདྡྷཾ དུཀྑ’’ནྟི ཡཐཱབྷཱུཏཾ པཛཱནཱཏི. ཡསྨཱ ཨིདཾ ཡཱཐཱཝསརསཏོ པཛཱནཱཏི, པཛཱནནྟོ ཙ ཋཔེཏྭཱ ཏཎྷཾ པཉྩུཔཱདཱནཀྑནྡྷེ ‘‘དུཀྑསཙྩ’’ནྟི པཛཱནཱཏི. ཏཎྷཾ པན ཨིདཾ དུཀྑཾ ཨིཏོ སམུདེཏི, ཏསྨཱ ‘‘ཨཡཾ དུཀྑསམུདཡོ’’ཏི ཡཐཱབྷཱུཏཾ པཛཱནཱཏི. ཡསྨཱ ཨིདཾ དུཀྑཉྩ སམུདཡོ ཙ ནིབྦཱནཾ པཏྭཱ ནིརུཛ྄ཛྷནྟི ཝཱུཔསམནྟི ཨཔྤཝཏྟིཾ གཙྪནྟི, ཏསྨཱ ཏཾ ‘‘ཨཡཾ དུཀྑནིརོདྷོ’’ཏི ཡཐཱབྷཱུཏཾ པཛཱནཱཏི. ཨརིཡོ པན ཨཊྛངྒིཀོ མགྒོ ¶ ཏཾ དུཀྑནིརོདྷཾ གཙྪཏི, ཏེན ཏཾ ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ པཛཱནཱཏི. ཨེཏྟཱཝཏཱ ནཱནཀྑཎེ སཙྩཝཝཏྠཱནཾ དསྶིཏཾ. ཨིདཱནི ཏཾ ཨེཀཀྑཎེ དསྶེཏུཾ ‘‘ཏཐཱགཏཔྤཝེདིཏཱ’’ཏིཨཱདི ཝུཏྟཾ. ཏཐཱགཏཔྤཝེདིཏཱཏི ཏཐཱགཏེན བོདྷིམཎྜེ པཊིཝིདྡྷཱ ཝིདིཏཱ པཱཀཊཱ ཀཏཱ. དྷམྨཱཏི ཙཏུསཙྩདྷམྨཱ. ཝོདིཊྛཱ ཧོནྟཱིཏི སུདིཊྛཱ ཧོནྟི. ཝོཙརིཏཱཏི སུཙརིཏཱ, ཏེསུ ཏེན པཉྙཱ སུཊྛུ ཙརཱཔིཏཱཏི ཨཏྠོ. ཨཡནྟི ཨཡཾ ཨེཝརཱུཔོ པུགྒལོ ‘‘དིཊྛིཔྤཏྟོ’’ཏི ཝུཙྩཏི.

སདྡྷཱཡ ¶ ཝིམུཏྟོཏི སདྡཧནཝསེན ཝིམུཏྟོ, ཨེཏེན སབྦཐཱ ཨཝིམུཏྟསྶཔི སདྡྷཱམཏྟེན ཝིམུཏྟབྷཱཝཾ དསྶེཏི. སདྡྷཱཝིམུཏྟོཏི ཝཱ སདྡྷཱཡ ཨདྷིམུཏྟོཏི ཨཏྠོ. ཝུཏྟནཡེནེཝཱཏི ཀཱཡསཀྑིམྷི ཝུཏྟནཡེནེཝ. ནོ ཙ ཁོ ཡཐཱ དིཊྛིཔྤཏྟསྶཱཏི ཡཐཱ དིཊྛིཔྤཏྟསྶ ཨཱསཝཱ པརིཀྑཱིཎཱ, ན ཨེཝཾ སདྡྷཱཡ ཝིམུཏྟསྶཱཏི ཨཏྠོ. ཀིཾ པན ནེསཾ ཀིལེསཔྤཧཱནེ ནཱནཏྟཾ ཨཏྠཱིཏི? ནཏྠི. ཨཐ ཀསྨཱ སདྡྷཱཝིམུཏྟོ དིཊྛིཔྤཏྟཾ ན པཱཔུཎཱཏཱིཏི? ཨཱགམནཱིཡནཱནཏྟེན. དིཊྛིཔྤཏྟོ ཧི ཨཱགམནམྷི ཀིལེསེ ཝིཀྑམྦྷེནྟོ ཨཔྤདུཀྑེན, ཨཀིལམནྟོ ཙ སཀྐོཏི ཝིཀྑམྦྷེཏུཾ, སདྡྷཱཝིམུཏྟོ དུཀྑེན ཀིལམནྟོ ཝིཀྑམྦྷེཏི, ཏསྨཱ དིཊྛིཔྤཏྟཾ ན པཱཔུཎཱཏི. ཏེནཱཧ ‘‘ཨེཏེསུ ཧཱི’’ཏིཨཱདི.

ཨཱརམྨཎཾ ¶ ཡཱཐཱཝཏོ དྷཱརེཏི ཨཝདྷཱརེཏཱིཏི དྷམྨོ, པཉྙཱ. པཉྙཱཔུབྦངྒམནྟི པཉྙཱཔདྷཱནཾ. པཉྙཾ ཝཱཧེཏཱིཏི པཉྙཱཝཱཧཱི, པཉྙཾ སཱཏིསཡཾ པཝཏྟེཏཱིཏི ཨཏྠོ. པཉྙཱ ཝཱ ཨིམཾ པུགྒལཾ ཝཱཧེཏི, ནིབྦཱནཱབྷིམུཁཾ གམེཏཱིཏི ཨཏྠོ. སདྡྷཱནུསཱརིནིདྡེསེཔི ཨེསེཝ ནཡོ.

ཏསྨཱཏི ཝིསུདྡྷིམགྒེ (ཝིསུདྡྷི. ༢.༧༧༠, ༧༧༦) ཝུཏྟཏྟཱ, ཏཏོ ཨེཝ ཝིསུདྡྷིམགྒེ, ཏཾ སཾཝཎྞནཱསུ (ཝིསུདྡྷི. ཊཱི. ༢.༧༧༦) ཝུཏྟནཡེནེཏྠ ཨཏྠོ ཝེདིཏབྦོ.

པདྷཱནདེསནཱཝཎྞནཱ

༡༥༡. པདཧནཝསེནཱཏི བྷཱཝནཱནུཡོགཝསེན. སཏྟ བོཛ྄ཛྷངྒཱ པདྷཱནཱཏི ཝུཏྟཱ ཝིཝེཀནིསྶིཏཱདིབྷཱཝེན པདཧིཏབྦཏོ བྷཱཝེཏབྦཏོ.

པཊིཔདཱདེསནཱཝཎྞནཱ

༡༥༢. དུཀྑེན ¶ ཀསིརེན སམཱདྷིཾ ཨུཔྤཱདེནྟསྶཱཏི པུབྦབྷཱགེ ཨཱགམནཀཱལེ ཀིཙྪེན དུཀྑེན སསངྑཱརེན སཔྤཡོགེན ཀིལམནྟསྶ ཀིལེསེ ཝིཀྑམྦྷེཏྭཱ ལོཀུཏྟརསམཱདྷིཾ ཨུཔྤཱདེནྟསྶ. དནྡྷཾ ཏཾ ཋཱནཾ ཨབྷིཛཱནནྟསྶཱཏི ཝིཀྑམྦྷིཏེསུ ཀིལེསེསུ ཝིཔསྶནཱཔརིཝཱསེ ཙིརཾ ¶ ཝསིཏྭཱ ཏཾ ལོཀུཏྟརསམཱདྷིསངྑཱཏཾ ཋཱནཾ དནྡྷཾ སཎིཀཾ ཨབྷིཛཱནནྟསྶ པཊིཝིཛ྄ཛྷནྟསྶ, སཙྪིཀརོནྟསྶ པཱཔུཎནྟསྶཱཏི ཨཏྠོ. ཨཡཾ ཝུཙྩཏཱིཏི ཡཱ ཨེསཱ ཨེཝཾ ཨུཔྤཛྫཏི, ཨཡཾ ཀིལེསཝིཀྑམྦྷནཔཊིཔདཱཡ དུཀྑཏྟཱ, ཝིཔསྶནཱཔརིཝཱསཔཉྙཱཡ ཙ དནྡྷཏྟཱ མགྒཀཱལེ ཨེཀཙིཏྟཀྑཎེ ཨུཔྤནྣཱཔི པཉྙཱ ཨཱགམནཝསེན ‘‘དུཀྑཔཊིཔདཱ དནྡྷཱབྷིཉྙཱ ནཱམཱ’’ཏི ཝུཙྩཏི. ཨུཔརི ཏཱིསུ པདེསུཔི ཨིམིནཱཝ ནཡེན ཨཏྠོ ཝེདིཏབྦོ.

བྷསྶསམཱཙཱརཱདིདེསནཱཝཎྞནཱ

༡༥༣. བྷསྶསམཱཙཱརེཏི ཝཙཱིསམཱཙཱརེ. ཋིཏོཏི ཡཐཱརདྡྷཾ ཏཾ ཨཝིཙྪེདཝསེན ཀཐེནྟོ. ཏེནཱཧ ‘‘ཀཐཱམགྒཾ ཨནུཔཙྪིནྡིཏྭཱ ཀཐེནྟོ’’ཏི. མུསཱཝཱདཱུཔསཉྷིཏནྟི ཨནྟརནྟརཱ པཝཏྟེན མུསཱཝཱདེན ཨུཔསཾཧིཏཾ. ཝིབྷཱུཏི ཝུཙྩཏི ཝིསུཾབྷཱཝོ, ཏཏྠ ནིཡུཏྟནྟི ཝེབྷཱུཏིཀཾ, ཏདེཝ ཝེབྷཱུཏིཡཾ, པེསུཉྙཾ. ཏེནཱཧ ‘‘བྷེདཀརཝཱཙ’’ནྟི. ཀརཎུཏྟརིཡལཀྑཎཏོ སཱརམྦྷཏོ ཛཱཏཱཏི སཱརམྦྷཛཱ. ཏསྶཱ པཝཏྟིཨཱཀཱརདསྶནཏྠཾ ‘‘ཏྭཾ དུསྶཱིལོ’’ཏིཨཱདི ཝུཏྟཾ. བཧིདྡྷཱཀཐཱ ཨམནཱཔཱ, ¶ མནཱཔཱཔི པརསྶ ཙིཏྟཝིགྷཱཏཱཝཧཏྟཱ ཀརཎུཏྟརིཡཔཀྑིཡམེཝཱཏི དསྶེནྟོ ‘‘ཏུཡ྄ཧ’’ནྟིཨཱདིམཱཧ. ཝིཀྑེཔཀཐཱཔཝཏྟནྟི ཝིཀྑེཔཀཐཱཝསེན པཝཏྟཾ. ཛཡཔུརེཀྑཱརོ ཧུཏྭཱཏི ཨཏྟནོ ཛཡཾ པུརཀྑཏྭཱ. ཡཾ ཀིཉྩི ན བྷཱསཏཱིཏི ཡོཛནཱ. ‘‘མནྟཱ’’ཏི ཝུཙྩཏི པཉྙཱ, མནྟནཾ ཛཱནནནྟི ཀཏྭཱ. ‘‘མནྟཱ’’ཏི ཨིདཾ ‘‘མནྟེཏྭཱ’’ཏི ཨིམིནཱ སམཱནཏྠཾ ནིཔཱཏཔདནྟི ཨཱཧ ‘‘ཨུཔཔརིཀྑིཏྭཱ’’ཏི. ཡུཏྟཀཐམེཝཱཏི ཨཏྟནོ, སུཎནྟསྶ ཙ ཡུཏྟརཱུཔམེཝ ཀཐཾ. ཧདཡེ ནིདཧིཏབྦཡུཏྟནྟི ཨཏྠསམྤཏྟིཡཱ, བྱཉྫནསམྤཏྟིཡཱ ¶ ཨཏྠཝེདཱདིཔཊིལཱབྷནིམིཏྟཏྟཱ ཙིཏྟེ ཋཔེཏབྦཾ, ཝིམུཏྟཱཡཏནབྷཱཝེན མནསི ཀཱཏབྦནྟི ཨཏྠོ. སབྦངྒསམྤནྣཱཔི ཝཱཙཱ ཨཀཱལེ བྷཱསིཏཱ ཨབྷཱཛནེ བྷཱསིཏཱ ཝིཡ ན ཨཏྠཱཝཧཱཏི ཨཱཧ ‘‘ཡུཏྟཔཏྟཀཱལེནཱ’’ཏི. ཨཡཉྩ ཙཏུརངྒསམནྣཱགཏཱ སུབྷཱསིཏཝཱཙཱ ¶ སཙྩསམྦོདྷཱཝཧཱདིཏཱཡ སཏྟཱནཾ མཧིདྡྷིཀཱ མཧཱནིསཾསཱཏི དསྶེཏུཾ ‘‘ཨེཝཾ བྷཱསིཏཱ ཧཱི’’ཏིཨཱདི ཝུཏྟཾ.

སཱིལཱཙཱརེཏི སཱིལེ ཙ ཨཱཙཱརེ ཙ པརིསུདྡྷསཱིལེ ཙེཝ པརིསུདྡྷམནོསམཱཙཱརེ ཙ. ཋིཏོཏི པཏིཊྛཧནྟོ. སཙྩཾ ཨེཏསྶ ཨཏྠཱིཏི སཙྩོཏི ཨཱཧ ‘‘སཙྩཀཐོ’’ཏི. ཨེས ནཡོ སདྡྷོཏི ཨེཏྠཱཔི. ཏེནཱཧ ‘‘སདྡྷཱསམྤནྣོ’’ཏི. ‘‘ནནུ ཙ ཧེཊྛཱ སཙྩཾ ཀཐིཏམེཝཱ’’ཏི ཀསྨཱ ཝུཏྟཾ? ཧེཊྛཱ ཧི ཝཙཱིསམཱཙཱརཾ ཀཐེནྟེན སཙྩཾ ཀཐིཏཾ, པཊིཔཀྑཔཊིཀྑེཔཝསེན ཨིདྷ སཱིལཾ ཀཐེནྟེན ཏཾ པརིཔུཎྞཾ ཀཏྭཱ དསྶེཏུཾ སཙྩཾ སརཱུཔེནེཝ ཀཐིཏཾ. ‘‘པུགྒལཱདྷིཊྛཱནཱཡ ཀཐཱཡ ཨཱརབྦྷནྟརཉྩེཏཾ, ཏཐཱཔི སཙྩཾ ཝཏྭཱ ཨནནྟརམེཝ སཙྩསྶ ཀཐནཾ པུནརུཏྟཾ ཧོཏཱིཏི པརསྶ ཙོདནཱཝསརོ མཱ ཧོཏཱུ’’ཏི ཏཏྠ པརིཧཱརཾ དཱཏུཀཱམོ ‘‘ཨིདྷ ཀསྨཱ པུན ཝུཏྟ’’ནྟི ཨཱཧ. ཧེཊྛཱ ཝཱཙཱསཙྩཾ ཀཐིཏཾ ཙཏུརངྒསམནྣཱགཏཾ སུབྷཱསིཏཝཱཙཾ དསྶེནྟེན. ཨནྟམསོ…པེ… དསྶེཏུཾ ཨིདྷ ཝུཏྟཾ ‘‘ཨེཝཾ སཱིལཾ སུཔརིསུདྡྷཾ ཧོཏཱི’’ཏི. ཨིམསྨིཾ པནཏྠེ ‘‘ཨེཝཾ པརིཏྟཀཾ ཁོ, རཱཧུལ, ཏེསཾ སཱམཉྙཾ, ཡེསཾ ནཏྠི སམྤཛཱནམུསཱཝཱདེ ལཛྫཱ’’ཏིཨཱདི ནཡཔྤཝཏྟཾ རཱཧུལོཝཱདསུཏྟཾ དསྶེཏབྦཾ.

གུཏྟཱ སཏིཀཝཱཊེན པིདཧིཏཱ དྭཱརཱ ཨེཏེནཱཏི གུཏྟདྭཱརོཏི ཨཱཧ ‘‘ཚསུ ཨིནྡྲིཡེསཱུ’’ཏིཨཱདི ¶ . པརིཡེསནཔཊིགྒཎྷནཔརིབྷོགཝིསྶཛྫནཝསེན བྷོཛནེ མཏྟཾ ཛཱནཱཏཱིཏི བྷོཛནེ མཏྟཉྙཱུ. སམནྟི ཨཝིསམཾ. སམཙཱརིཏཱ ཧི ཀཱཡཝིསམཱདཱིནི པཧཱཡ ཀཱཡསམཱདིཔཱུརཎཾ. ནིསཛྫཱཡཱཏི ཨེཏྠ ཨིཏི-སདྡོ ཨཱདིཨཏྠོ, ཏེན ‘‘ཨཱཝརཎཱིཡེཧི དྷམྨེཧི ཙིཏྟཾ པརིསོདྷེཏཱི’’ཏི ཨེཝམཱདིཾ སངྒཎྷཱཏི. བྷཱཝནཱཡ ཙིཏྟཔརིསོདྷནཉྷི ཛཱགརིཡཱནུཡོགོ, ན ནིདྡཱཝིནོདནམཏྟཾ. ནིཏྟནྡཱིཏི ཝིགཏཐིནམིདྡྷོ. སཱ པན ནིཏྟནྡིཏཱ ཀཱཡཱལསིཡཝིགམནེ པཱཀཊཱ ཧོཏཱིཏི ཝུཏྟཾ ‘‘ཀཱཡཱལསིཡཝིརཧིཏོ’’ཏི. ‘‘ཨཱརདྡྷཝཱིརིཡོ’’ཏི ཨིམིནཱ དུཝིདྷོཔི ཝཱིརིཡཱརམྦྷོ གཧིཏོཏི ཏཾ ཝིབྷཛིཏྭཱ དསྶེཏུཾ ‘‘ཀཱཡིཀཝཱིརིཡེནཱཔཱི’’ཏིཨཱདི ཝུཏྟཾ. སངྒམྨ གཎཝིཧཱརོ ¶ སཧཝཱསོ སངྒཎིཀཱ, སཱ པན ཀིལེསེཧིཔི ཨེཝཾ ཧོཏཱིཏི ཏཏོ ཝིསེསེཏུཾ ‘‘གཎསངྒཎིཀ’’ནྟི ཝུཏྟཾ. གཎེན སངྒཎིཀཾ གཎསངྒཎིཀནྟི. ཨཱརམྦྷཝཏྠུཝསེནཱཏི ཨནདྷིགཏཝིསེསཱདྷིགམཀཱརཎཝསེན ཨེཀཝིཧཱརཱི, ན ཀེཝལཾ ཨེཀཱིབྷཱཝཝསེན. ཀིལེསསངྒཎིཀནྟི ¶ ཀིལེསསཧིཏཙིཏྟཏཾ. ཡཐཱ ཏཐཱཏི ཝིཔསྶནཱཝསེན, པཊིསངྑཱནཝསེན ཝཱ. སམཐཝསེན ཨཱརམྨཎཱུཔནིཛ྄ཛྷཱནཾ. ཝིཔསྶནཱཝསེན ལཀྑཎཱུཔནིཛ྄ཛྷཱནཾ.

ཀལྱཱཎཔཊིབྷཱནོཏི སུནྡརཔཊིབྷཱནོ, སཱ པནསྶ པཊིབྷཱནསམྤདཱ ཝཙནཙཱཏུརིཡསཧིཏཱཝ ཨིཙྪིཏཱཏི ཨཱཧ ‘‘ཝཱཀྐརཎ…པེ… སམྤནྣོ ཙཱ’’ཏི. ‘‘པཊིབྷཱན’’ནྟི ཧི ཉཱཎམྤི ཝུཙྩཏི ཉཱཎསྶ ཨུཔཊྛིཏཝཙནམྤི. ཏཏྠ ཨཏྠཡུཏྟཾ ཀཱརཎཡུཏྟཾ པཊིབྷཱནམསྶཱཏི ཡུཏྟཔཊིབྷཱནོ. པུཙྪིཏཱནནྟརམེཝ སཱིགྷཾ བྱཱཀཱཏུཾ ཨསམཏྠཏཱཡ ནོ མུཏྟཔཊིབྷཱནཾ ཨསྶཱཏི ནོ མུཏྟཔཊིབྷཱནོ. ཨིདྷ པན ཝིཀིཎྞཝཱཙོ མུཏྟཔཊིབྷཱནོ ཨདྷིཔྤེཏོཏི ཨདྷིཔྤཱཡེན ‘‘སཱིལསམཱཙཱརསྨིཉྷི ཋིཏབྷིཀྑུ མུཏྟཔཊིབྷཱནོ ན ཧོཏཱི’’ཏི ཝུཏྟཾ. གམནསམཏྠཱཡཱཏི ¶ ཨསྶུཏཾ དྷམྨཾ གམེཏུཾ སམཏྠཱཡ. དྷཱརཎསམཏྠཱཡཱཏི སཱཏིསཡཾ སཏིཝཱིརིཡསཧིཏཏཱཡ ཡཐཱསུཏཾ ཡཐཱཔརིཡཏྟཾ དྷམྨཾ དྷཱརེཏུཾ སམཏྠཱཡ. མུནནཏོ ཨནུམིནནཏོ མུཏཱིཏི ཨནུམཱན པཉྙཱཡ ནཱམཾ. ཏཱིཧི པདེཧཱིཏི ‘‘གཏིམཱ དྷིཏིམཱ མུཏིམཱ’’ཏི ཏཱིཧི པདེཧི. ཧེཊྛཱཏི ཧེཊྛཱ ‘‘ཨཱརདྡྷཝཱིརིཡོ’’ཏི ཝུཏྟཊྛཱནེ. ཨིདྷཱཏི ‘‘དྷིཏིམཱ’’ཏི ཝུཏྟཊྛཱནེ. ཝཱིརིཡམྤི ཧེཊྛཱ གུཎབྷཱུཏཾ གཧིཏནྟི ཝུཏྟོཝཱཡམཏྠོ. ཧེཊྛཱཏི ‘‘ཛཱགརིཡཱནུཡོགམནུཡུཏྟོ, ཛྷཱཡཱི’’ཏི ཨེཏྠ ཝིཔསྶནཱཔཉྙཱ ཀཐིཏཱ. ཨིདྷཱཏི ‘‘དྷིཏིམཱ མུཏིམཱ’’ཏི ཨེཏྠ བུདྡྷཝཙནགཎྷནཔཉྙཱ ཀཐིཏཱ ཀརཎཔུབྦཱཔརཀོསལླཔཉྙཱདཱིཔནཏོ. ཀིལེསཀཱམོཔི ཝཏྠུཀཱམོ ཝིཡ ཡཐཱཔཝཏྟོ ཨསྶཱདཱིཡཏཱིཏི ཝུཏྟཾ ‘‘ཝཏྠུཀཱམཀིལེསཀཱམེསུ ཨགིདྡྷོ’’ཏི.

ཨནུསཱསནཝིདྷཱདེསནཱདིཝཎྞནཱ

༡༥༤. ཨཏྟནོ ཨུཔཱཡམནསིཀཱརེནཱཏི ཨཏྟནི སམྦྷཱུཏེན པཐམནསིཀཱརེན བྷཱཝནཱམནསིཀཱརེན. པཊིཔཛྫམཱནོཏི ཝིསུདྡྷིཾ པཊིཔཛྫམཱནོ.

༡༥༥. ཀིལེསཝིམུཏྟིཉཱཎེཏི ཀིལེསཔྤཧཱནཛཱནནེ.

༡༥༦. པརིཡཱདིཡམཱནོཏི པརིཙྪིཛྫ གཎྷནྟོཏི ཨཏྠོ. སུདྡྷཀྑནྡྷེཡེཝ ཨནུསྶརཏི ནཱམགོཏྟཾ པརིཡཱདིཡིཏུཾ ཨསཀྐོནྟོ. ཝུཏྟམེཝཏྠཾ ཝིཝརིཏུཾ ‘‘ཨེཀོ ཧཱི’’ཏིཨཱདི ཝུཏྟཾ. སཀྐོཏི ¶ པརིཡཱདིཡིཏུཾ. ཨསཀྐོནྟསྶ ¶ ཝསེན གཧིཏཾ, ‘‘ཨམུཏྲཱསིཾ ཨེཝཾནཱམོ’’ཏིཨཱདི ཝུཏྟནྟི ཨཏྠོ. ཨསཀྐོནྟསྶཱཏི ཙ ཨཱརོཧནེ ཨསཀྐོནྟསྶ, ཨོརོཧནེ པན ཉཱཎསྶ ཐིརབྷཱུཏཏྟཱ. ཏེནཱཧ ‘‘སུདྡྷཀྑནྡྷེཡེཝ ཨནུསྶརནྟོ’’ཏིཨཱདི. ཨེཏནྟི པུབྦཱཔརཝིརོདྷཾ. ན སལླཀྑེསི དིཊྛཱབྷིནིཝེསེན ¶ ཀུཎྛཉཱཎཏྟཱ. ཏེནཱཧ ‘‘དིཊྛིགཏིཀཏྟཱ’’ཏི. ཋཱནནྟི ཨེཀསྨིཾ པཀྑེ ཨཝཊྛཱནཾ. ནིཡམོཏི ཝཱདནིཡམོ པཊིནིཡཏཝཱདཏཱ. ཏེནཱཧ ‘‘ཨིམཾ གཧེཏྭཱ’’ཏིཨཱདི.

༡༥༧. པིཎྜགཎནཱཡཱཏི ‘‘ཨེཀཾ དྭེ’’ཏིཨཱདིནཱ ཨགཎེཏྭཱ སངྐལནཔདུཔྤཱདནཱདིནཱ པིཎྜནཝསེན གཎནཱཡ. ཨཙྪིདྡཀཝསེནཱཏི ཨཝིཙྪིནྡཀགཎནཱཝསེན གཎནཱ ཀམགཎནཾ མུཉྩིཏྭཱ ‘‘ཨིམསྨིཾ རུཀྑེ ཨེཏྟཀཱནི པཎྞཱནཱི’’ཏི ཝཱ ‘‘ཨིམསྨིཾ ཛལཱསཡེ ཨེཏྟཀཱནི ཨུདཀཱལ༹ྷཀཱནཱི’’ཏི ཝཱ ཨེཝཾ གཎེཏབྦསྶ ཨེཀཛ྄ཛྷམྤི པིཎྜེཏྭཱ གཎནཱ. ཀམགཎནཱ ཧི ཨནྟརནྟརཱ ཝིཙྪིཛྫ པཝཏྟིཡཱ པཙྪིནྡིཀཱ. སཱ པནེསཱ གཎནཱ སཝནནྟརཾ ཨནཔེཀྑིཏྭཱ མནསཱཝ གཎེཏབྦཏོ ‘‘མནོགཎནཱ’’ཏིཔི ཝུཙྩཏཱིཏི ཨཱཧ ‘‘མནོགཎནཱཡཱ’’ཏི. པིཎྜགཎནམེཝ དསྶེཏི, ན ཝིབྷཱགགཎནཾ. སངྑཱཏུཾ ན སཀྐཱ ཨཉྙེཧི ཨསངྑྱེཡྻཱབྷཱཝཏོ. པཉྙཱཔཱརམིཡཱ པཱུརིཏབྷཱཝཾ དསྶེནྟོ ཨིཏརཱསཾ པཱུརཎེན ཝིནཱ ཏསྶཱ པཱུརཎཾ ནཏྠཱིཏི ‘‘དསནྣཾ པཱརམཱིནཾ པཱུརིཏཏྟཱ’’ཏི ཨཱཧ. ཏེནཱཧ ‘‘སབྦཉྙུཏཉྙཱཎསྶ སུཔྤཊིཝིདྡྷཏྟཱ’’ཏི. ཨེཏྟཀནྟི དསྶེཐཱཏི དཱིཔེཏི ཐེརོ. ཡཾ པན པཱལི༹ཡཾ ‘‘སཱཀཱརཾ སཨུདྡེསཾ ཨནུསྶརཏཱི’’ཏི ཝུཏྟཾ, ཏཾ ཏསྶ ཨནུསྶརཎམཏྟཾ སནྡྷཱཡ ཝུཏྟཾ, ན ཨཱཡུནོ ཝསྶཱདིགཎནཱཡ པརིཙྪིནྡནཾ ཏསྶ ཨཝིསཡབྷཱཝཏོ.

༡༥༨. ཏུམྷཱཀཾ སམྨཱསམྦུདྡྷཱནཾ ཡེཝ ཨནུཏྟརཱ ཨནཉྙསཱདྷཱརཎཏྟཱ. ཨིདཱནི ཏསྶཱ དེསནཱཡ མཛ྄ཛྷེ བྷིནྣསུཝཎྞསྶ ཝིཡ ཝིབྷཱགཱབྷཱཝཾ དསྶེཏུཾ ‘‘ཨཏཱིཏབུདྡྷཱཔཱི’’ཏིཨཱདི ཝུཏྟཾ. ཨིམིནཱཔི ཀཱརཎེནཱཏི ཨནུཏྟརབྷཱཝེན, ཨཉྙེཧི བུདྡྷེཧི ཨེཀསདིསབྷཱཝེན ཙ.

༡༥༩. ཨཱསཝཱནཾ ཨཱརམྨཎབྷཱཝཱུཔགམནེན སཱསཝཱ. ཨུཔེཙྩ ¶ ཨཱདྷཱིཡནྟཱིཏི ཨུཔཱདྷཱི, དོསཱརོཔནཱནི, སཧ ཨུཔཱདྷཱིཧཱིཏི སཨུཔཱདྷིཀཱ. ཨནརིཡིདྡྷིཡཉྷི ཨཏྟནོ ཙིཏྟདོསེན ཨེཀཙྩེ ཨུཔཱརམྦྷཾ དདནྟི, སྭཱཡམཏྠོ ཀེཝཊྚསུཏྟེན དཱིཔེཏབྦོ. ནོ ‘‘ཨརིཡཱ’’ཏི ཝུཙྩཏི སཱསཝབྷཱཝཏོ. ནིདྡོསེཧི ¶ ཁཱིཎཱསཝེཧི པཝཏྟེཏབྦཏོ ནིདྡོསཱ དོསེཧི སཧ ཨཔྤཝཏྟནཏོ. ཏཏོ ཨེཝ ཨནུཔཱརམྦྷཱ. ཨརིཡཱནཾ ཨིདྡྷཱིཏི ཨརིཡིདྡྷཱིཏི ཝུཙྩཏི.

ཨཔྤཊིཀྐཱུལསཉྙཱིཏི ཨིཊྛསཉྙཱི ཨིཊྛཱཀཱརེན པཝཏྟཙིཏྟོ. པཊིཀྐཱུལེཏི ཨམནུཉྙེ ཨནིཊྛེ ¶ . དྷཱཏུསཉྙནྟི ‘‘དྷཱཏུཡོ’’ཏི སཉྙཾ. ཨུཔསཾཧརཏཱིཏི ཨུཔནེཏི པཝཏྟེཏི. ཨནིཊྛསྨིཾ ཝཏྠུསྨིནྟི ཨནིཊྛེ སཏྟསཉྙིཏེ ཨཱརམྨཎེ. མེཏྟཱཡ ཝཱ ཕརཏཱིཏི མེཏྟཾ ཧིཏེསིཏཾ ཨུཔསཾཧརནྟོ སབྦཏྠཀམེཝ ཏཾ ཏཏྠ ཕརཏི. དྷཱཏུཏོ ཝཱ ཨུཔསཾཧརཏཱིཏི དྷམྨསབྷཱཝཙིནྟནེན དྷཱཏུསོ, པཙྩཝེཀྑཎཱཡ དྷཱཏུམནསིཀཱརཾ ཝཱ ཏཏྠ པཝཏྟེཏི. ཨཔྤཊིཀྐཱུལེ སཏྟེ ཉཱཏིམིཏྟཱདིཀེ ཡཱཐཱཝཏོ དྷམྨསབྷཱཝཙིནྟནེན ཨནིཙྩསཉྙཱཡ ཝིསབྷཱགབྷཱུཏེ ‘‘ཀེསཱདི ཨསུཙིཀོཊྛཱསམེཝཱ’’ཏི ཨསུབྷསཉྙཾ ཕརཏི ཨསུབྷམནསིཀཱརཾ པཝཏྟེཏི. ཚལ༹ངྒུཔེཀྑཱཡཱཏི ཨིཊྛཱནིཊྛཚལཱ༹རམྨཎཱཔཱཐེ པརིསུདྡྷཔཀཏིབྷཱཝཱཝིཛཧནལཀྑཎཱཡ ཚསུ དྭཱརེསུ པཝཏྟནཏོ ‘‘ཚལ༹ངྒུཔེཀྑཱཡཱ’’ཏི ལདྡྷནཱམཱཡ ཏཏྲམཛ྄ཛྷཏྟུཔེཀྑཱཡ.

ཏཾ དེསནནྟི ཏཾ དྭཱིསུ ཨིདྡྷིཝིདྷཱསུ དེསནཔྤཀཱརཾ དེསནཱཝིདྷིཾ. ཨསེསཾ སཀལནྟི ཨསེསཾ ནིརཝསེསཾ སམྤུཎྞཾ ཨབྷིཝིསིཊྛེན ཉཱཎེན ཛཱནཱཏི. ཨསེསཾ ཨབྷིཛཱནཏོ ཏཏོ ཨུཏྟརི ཨབྷིཉྙེཡྻཾ ¶ ནཏྠི. ཨིཏོཏི བྷགཝཏོ ཨབྷིཉྙཱཏཏོ. ཨཉྙོ པརམཏྠཝསེན དྷམྨོ ཝཱ པཉྙཏྟིཝསེན པུགྒལོ ཝཱ ཨཡཾ ནཱམ ཡཾ བྷགཝཱ ན ཛཱནཱཏཱིཏི ཨིདཾ ནཏྠི ན ཨུཔལབྦྷཏི སབྦསྶེཝ སམྨདེཝ ཏུམྷེཧི ཨབྷིཉྙཱཏཏྟཱ. དྭཱིསུ ཨིདྡྷིཝིདྷཱསུ ཨབྷིཛཱནནེ, དེསནཱཡཉྩ བྷགཝཏོ ཨུཏྟརིཏརོ ནཏྠི. ཨིམིནཱཔཱིཏི པི-སདྡོ ན ཀེཝལཾ ཝུཏྟཏྠསམུཙྩཡཏྠོ, ཨཐ ཁོ ཨཝུཏྟཏྠསམུཙྩཡཏྠོཔི དཊྛབྦོ. ཡཾ ཏཾ བྷནྟེཏིཨཱདིནཱཔི ཧི བྷགཝཏོ གུཎདསྶནཾ ཏསྶེཝ པསཱདསྶ ཀཱརཎཝིབྷཱཝནཾ.

ཨཉྙཐཱསཏྠུགུཎདསྶནཱདིཝཎྞནཱ

༡༦༠. པུབྦེ ‘‘ཨེཏདཱནུཏྟརིཡཾ བྷནྟེ’’ཏིཨཱདིནཱ ཡཐཱཝུཏྟབུདྡྷགུཎཱ དསྶིཏཱ, ཏཏོ ཨཉྙོ ཨེཝཱཡཾ པཀཱརོ ‘‘ཡཾ ཏཾ བྷནྟེ’’ཏིཨཱདིནཱ ཨཱརདྡྷོཏི ཨཱཧ ‘‘ཨཔརེནཱཔི ཨཱཀཱརེནཱ’’ཏི. བུདྡྷཱནཾ སམྨཱསམྦོདྷིཡཱ སདྡཧནཏོ ཝིསེསཏོ སདྡྷཱ ཀུལཔུཏྟཱ ནཱམ བོདྷིསཏྟཱ, མཧཱབོདྷིསཏྟཱཏི ཨདྷིཔྤཱཡོ. ཏེ ཧི མཧཱབྷིནཱིཧཱརཏོ པཊྛཱཡ ¶ མཧཱབོདྷིཡཾ སཏྟཱ ཨཱསཏྟཱ ལགྒཱ ནིཡཏབྷཱཝཱུཔགམནེན ཀེནཙི ཨསཾཧཱརིཡབྷཱཝཏོ. ཡཏོ ནེསཾ ན ཀཐཉྩི ཏཏྠ སདྡྷཱཡ ཨཉྙཐཏྟཾ ཧོཏི, ཨེཏེནེཝ ཏེསཾ ཀམྨཕལཾ སདྡྷཱཡཔི ཨཉྙཐཏྟཱབྷཱཝོ དཱིཔིཏོ དཊྛབྦོ. ཏསྨཱཏི ཡསྨཱ ཨཏིསཡཝཙནིཙྪཱཝསེན, ‘‘ཨནུཔྤཏྟཾ ཏཾ བྷགཝཏཱ’’ཏི སདྡནྟརསནྣིདྷཱནེན ཙ ཝིསིཊྛཝིསཡཾ ‘‘སདྡྷེན ཀུལཔུཏྟེནཱ’’ཏི ཨིདཾ པདཾ, ཏསྨཱ. ལོཀུཏྟརདྷམྨསམདྷིགམམཱུལཀཏྟཱ སབྦབུདྡྷགུཎསམདྷིགམསྶ ‘‘ནཝ ལོཀུཏྟརདྷམྨཱ’’ཏི ཝུཏྟཾ. ‘‘ཨཱརདྡྷཝཱིརིཡེནཱ’’ཏིཨཱདཱིསུ སམཱསཔདེསུ ‘‘ཝཱིརིཡཾ ཐཱམོ’’ཏིཨཱདཱིནི ཨཝཡཝཔདཱནི. ཨཱདི-སདྡེན པརཀྐམཔདཾ སངྒཎྷཱཏི, ན ¶ དྷོརཡ྄ཧཔདཾ. ན ཧི ཏཾ ཝཱིརིཡཝེཝཙནཾ, ཨཐ ཁོ ཝཱིརིཡཝནྟཝཱཙཀཾ. དྷུརཱཡ ནིཡུཏྟོཏི ཧི དྷོརཡ྄ཧོ. ཏེནཱཧ ¶ ‘‘ཏཾ དྷུརཾ ཝཧནསམཏྠེན མཧཱཔུརིསེནཱ’’ཏི. པགྒཧིཏཝཱིརིཡེནཱཏི ཨསིཐིལཝཱིརིཡེན. ཐིརཝཱིརིཡེནཱཏི ཨུསྶོལ༹ྷཱིབྷཱཝཱུཔགམནེན ཐིརབྷཱཝཔྤཏྟཝཱིརིཡེན. ཨསམདྷུརེཧཱིཏི ཨནཉྙསཱདྷཱརཎདྷུརེཧི. པརེསཾ ཨསཡ྄ཧསཧནཱ ཧི ལོཀནཱཐཱ. ཏཾ སབྦཾ ཨཙིནྟེཡྻཱཔརིམེཡྻབྷེདཾ བུདྡྷཱནཾ གུཎཛཱཏཾ. པཱརམིཏཱ, བུདྡྷགུཎཱ, ཝེནེཡྻསཏྟཱཏི ཡསྨཱ ཨིདཾ ཏཡཾ སབྦེསམྤི བུདྡྷཱནཾ སམཱནམེཝ, ཏསྨཱ ཨཱཧ ‘‘ཨཏཱིཏཱནཱགཏ…པེ… ཨཱུནོ ནཏྠཱི’’ཏི.

ཀཱམསུཁལླིཀཱནུཡོགནྟི ཀཱམསུཁེ ཨལླཱིནཱ ཧུཏྭཱ ཨནུཡུཉྫནཾ. ཀོ ཛཱནཱཏི པརལོཀཾ ‘‘ཨཏྠཱི’’ཏི, ཨེཏྠ ‘‘ཀོ ཨེཀཝིསཡོཡཾ ཨིནྡྲིཡགོཙརོ’’ཏི ཨེཝཾདིཊྛི ཧུཏྭཱཏི ཨདྷིཔྤཱཡོ. སུཁོཏི ཨིཊྛོ སུཁཱཝཧོ. པརིབྦཱཛིཀཱཡཱཏི ཏཱཔསཔརིབྦཱཛིཀཱཡ ཏརུཎིཡཱ. མུདུཀཱཡཱཏི སུཁུམཱལཱཡ. ལོམསཱཡཱཏི ཏརུཎམུདུལོམཝཏིཡཱ. མོལི༹བནྡྷཱཧཱིཏི མོལི༹ཾ ཀཏྭཱ བནྡྷཀེསཱཧི. པརིཙཱརེནྟཱིཏི ཨཏྟནོ པཱརིཙཱརིཀཾ ཀརོནྟི, ཨིནྡྲིཡཱནི ཝཱ ཏཏྠ པརིཏོ ཙཱརེནྟི. ལཱམཀནྟི པཊིཀིལིཊྛཾ. གཱམཝཱསཱིནཾ བཱལཱནཾ དྷམྨཾ. པུཐུཛྫནཱནམིདནྟི པོཐུཛྫནིཀཾ. ཡཐཱ པན ཏཾ ‘‘པུཐུཛྫནཱནམིད’’ནྟི ཝཏྟབྦཏཾ ལབྷཏི, ཏཾ དསྶེཏུཾ ‘‘པུཐུཛྫནེཧི སེཝིཏབྦ’’ནྟི ཨཱཧ. ཨནརིཡེཧི སེཝིཏབྦནྟི ཝཱ ཨནརིཡཾ. ཡསྨཱ པན ནིདྡོསཏྠོ ཨརིཡཏྠོ, ཏསྨཱ ‘‘ཨནརིཡནྟི ན ནིདྡོས’’ནྟི ཝུཏྟཾ. ཨནཏྠསཾཡུཏྟནྟི དིཊྛདྷམྨིཀསམྤརཱཡིཀཱདིཝིཝིདྷཝིཔུལཱནཏྠསཉྷིཏཾ. ཨཏྟཀིལམཐཱནུཡོགནྟི ཨཏྟནོ ཀིལམཐསྶ ཁེདནསྶ ཨནུཡུཉྫནཾ. དུཀྑཾ ¶ ཨེཏསྶ ཨཏྠཱིཏི དུཀྑཾ. དུཀྑམནཾ ཨེཏསྶཱཏི དུཀྑམཾ.

ཨཱབྷིཙེཏསིཀཱནནྟི ¶ ཨབྷིཙེཏོ ཝུཙྩཏི ཨབྷིཀྐནྟཾ ཝིསུདྡྷཾ ཙིཏྟཾ, ཨདྷིཙིཏྟཾ ཝཱ, ཏསྨིཾ ཨབྷིཙེཏསི ཛཱཏཱནཱིཏི ཨཱབྷིཙེཏསིཀཱནི, ཨབྷིཙེཏོསནྣིསྶིཏཱནི ཝཱ. དིཊྛདྷམྨསུཁཝིཧཱརཱནནྟི དིཊྛདྷམྨེ སུཁཝིཧཱརཱནཾ, དིཊྛདྷམྨོ ཝུཙྩཏི པཙྩཀྑོ ཨཏྟབྷཱཝོ, ཏཏྠ སུཁཝིཧཱརབྷཱུཏཱནནྟི ཨཏྠོ, རཱུཔཱཝཙརཛྷཱནཱནམེཏཾ ཨདྷིཝཙནཾ. ཏཱནི ཧི ཨཔྤེཏྭཱ ནིསིནྣཱ ཛྷཱཡིནོ ཨིམསྨིཾཡེཝ ཨཏྟབྷཱཝེ ཨསཾཀིལིཊྛཾ ནེཀྑམྨསུཁཾ ཝིནྡནྟི, ཏསྨཱ ‘‘དིཊྛདྷམྨསུཁཝིཧཱརཱནཱི’’ཏི ཝུཙྩནྟཱིཏི. ཀཐིཏཱ ‘‘དིཊྛདྷམྨསུཁཝིཧཱརོ’’ཏི སཔྤཱིཏིཀཏྟཱ, ལོཀུཏྟརཝིཔཱཀསུཁུམསཉྷིཏཏྟཱ ཙ. སཧ མགྒེན ཝིཔསྶནཱཔཱདཀཛ྄ཛྷཱནཾ ཀཐིཏཾ ‘‘ཙཏྟཱརོམེ ཙུནྡ སུཁལླིཀཱནུཡོགཱ ཨེཀནྟནིབྦིདཱཡཱ’’ཏིཨཱདིནཱ (དཱི. ནི. ༣.༡༨༤) ཙཏུཏྠཛ྄ཛྷཱནིཀཕལསམཱཔཏྟཱིཏི ཙཏུཏྠཛ྄ཛྷཱནིཀཱ ཕལསམཱཔཏྟི དིཊྛདྷམྨསུཁཝིཧཱརབྷཱཝེན ཀཐིཏཱ. ཙཏྟཱརི རཱུཔཱཝཙརཱནི ‘‘དིཊྛདྷམྨསུཁཝིཧཱརཛ྄ཛྷཱནཱནཱི’’ཏི ཀཐིཏཱནཱིཏི ཨཏྠོ. ནིཀཱམལཱབྷཱིཏི ནིཀཱམེན ལཱབྷཱི ཨཏྟནོ ཨིཙྪཱཝསེན ལཱབྷཱི. ཨིཙྪིཏིཙྪིཏཀྑཎེ སམཱཔཛྫིཏུཾ སམཏྠོཏི ཨཏྠོ ¶ . ཏེནཱཧ ‘‘ཡཐཱཀཱམལཱབྷཱི’’ཏི. ཨདུཀྑལཱབྷཱིཏི སུཁེནེཝ པཙྩནཱིཀདྷམྨཱནཾ སམུཙྪིནྣཏྟཱ སམཱཔཛྫིཏུཾ སམཏྠོ. ཨཀསིརལཱབྷཱིཏི ཨཀསིརཱནཾ ཝིཔུལཱནཾ ལཱབྷཱི, ཡཐཱཔརིཙྪེདེནེཝ ཝུཊྛཱཏུཾ སམཏྠོ. ཨེཀཙྩོ ཧི ལཱབྷཱིཡེཝ ཧོཏི, ན པན སཀྐོཏི ཨིཙྪིཏིཙྪིཏཀྑཎེ སམཱཔཛྫིཏུཾ. ཨེཀཙྩོ ཏཐཱ སམཱཔཛྫིཏུཾ སཀྐོཏི, པཱརིབནྡྷཀེ པན ཀིཙྪེན ཝིཀྑམྦྷེཏི. ཨེཀཙྩོ ཏཐཱ ཙ སམཱཔཛྫཏི, པཱརིབནྡྷཀེ ཙ ཨཀིཙྪེནེཝ ཝིཀྑམྦྷེཏི ¶ , ན སཀྐོཏི ནཱལི༹ཀཡནྟཾ ཝིཡ ཡཐཱཔརིཙྪེདེ ཝུཊྛཱཏུཾ. བྷགཝཱ པན སབྦསོ སམུཙྪིནྣཔཱརིབནྡྷཀཏྟཱ ཝསིབྷཱཝསྶ སམྨདེཝ སམདྷིགཏཏྟཱ སབྦམེཏཾ སམྨདེཝ སཀྐོཏི.

ཨནུཡོགདཱནཔྤཀཱརཝཎྞནཱ

༡༦༡. དསསཧསྶིལོཀདྷཱཏུཡཱཏི ཨིམཱཡ ལོཀདྷཱཏུཡཱ སདྡྷིཾ ཨིམཾ ལོཀདྷཱཏུཾ པརིཝཱརེཏྭཱ ཋིཏཱཡ དསསཧསྶིལོཀདྷཱཏུཡཱ. ཛཱཏིཁེཏྟབྷཱཝེན ཧི ཏཾ ཨེཀཛ྄ཛྷཾ གཧེཏྭཱ ‘‘ཨེཀིསྶཱ ལོཀདྷཱཏུཡཱ’’ཏི ཝུཏྟཾ, ཏཏྟཀཱཡ ཨེཝ ཛཱཏིཁེཏྟབྷཱཝོ དྷམྨཏཱཝསེན ཝེདིཏབྦོ. ‘‘པརིགྒཧཝསེནཱ’’ཏི ཀེཙི. སབྦེསམྤི བུདྡྷཱནཾ ཏཏྟཀཾ ཨེཝ ¶ ཛཱཏིཁེཏྟཾ. ‘‘ཏནྣིཝཱསཱིནཾཡེཝ ཙ དེཝཱནཾ དྷམྨཱབྷིསམཡོ’’ཏི ཝདནྟི. པཀམྤནདེཝཏཱུཔསངྐམནཱདིནཱ ཛཱཏཙཀྐཝཱལེ༹ན སམཱནཡོགཀྑམཊྛཱནཾ ཛཱཏིཁེཏྟཾ. སརསེནེཝ ཨཱཎཱཔཝཏྟནཊྛཱནཾ ཨཱཎཱཁེཏྟཾ. བུདྡྷཉཱཎསྶ ཝིསཡབྷཱུཏཾ ཋཱནཾ ཝིསཡཁེཏྟཾ. ཨོཀྐམནཱདཱིནཾ ཚནྣམེཝ གཧཎཾ ནིདསྶནམཏྟཾ མཧཱབྷིནཱིཧཱརཱདིཀཱལེཔི ཏསྶ པཀམྤནལབྦྷནཏོ. ཨཱཎཱཁེཏྟཾ ནཱམ, ཡཾ ཨེཀཙྩཾ སཾཝཊྚཏི, ཝིཝཊྚཏི ཙ. ཨཱཎཱ ཝཏྟཏི ཏནྣིཝཱསིདེཝཏཱནཾ སིརསཱ སམྤཊིཙྪནེན, ཏཉྩ ཁོ ཀེཝལཾ བུདྡྷཱནཾ ཨཱནུབྷཱཝེནེཝ, ན ཨདྷིཔྤཱཡཝསེན. ‘‘ཡཱཝཏཱ པན ཨཱཀངྑེཡྻཱ’’ཏི (ཨ. ནི. ༣.༨༡) ཝཙནཏོ ཏཏོ པརམྤི ཨཱཎཱ པཝཏྟེཡྻེཝ.

ནུཔྤཛྫནྟཱིཏི པན ཨཏྠཱིཏི ‘‘ན མེ ཨཱཙརིཡོ ཨཏྠི, སདིསོ མེ ན ཝིཛྫཏཱི’’ཏི (མ. ནི. ༡.༢༨༥; ༢.༣༤༡; མཧཱཝ. ༡༡; ཀཐཱ. ༤༠༥) ཨིམིསྶཱ ¶ ལོཀདྷཱཏུཡཱ ཋཏྭཱ ཝདནྟེན བྷགཝཏཱ, ཨིམསྨིཾཡེཝ སུཏྟེ ‘‘ཀིཾ པནཱཝུསོ, སཱརིཔུཏྟ, ཨཏྠེཏརཧི ཨཉྙོ སམཎོ ཝཱ བྲཱཧྨཎོ ཝཱ བྷགཝཏཱ སམསམོ སམྦོདྷིཡ’’ནྟི (དཱི. ནི. ༣.༡༦༡) ཨེཝཾ པུཊྛོ ‘‘ཨཧཾ བྷནྟེ ནོཏི ཝདེཡྻ’’ནྟི (དཱི. ནི. ༣.༡༦༡) ཝཏྭཱ ཏསྶ ཀཱརཎཾ དསྶེཏུཾ ‘‘ཨཊྛཱནམེཏཾ ཨནཝཀཱསོ, ཡཾ ཨེཀིསྶཱ ལོཀདྷཱཏུཡཱ དྭེ ཨརཧནྟོ སམྨཱསམྦུདྡྷཱ’’ཏི (དཱི. ནི. ༣.༡༦༡; མ. ནི. ༣.༡༢༩; ཨ. ནི. ༡.༢༧༧; ནེཏྟི. ༥༧; མི. པ. ༥.༡.༡) ཨིམཾ སུཏྟཾ དསྶེནྟེན ¶ དྷམྨསེནཱཔཏིནཱ ཙ བུདྡྷཁེཏྟབྷཱུཏཾ ཨིམཾ ལོཀདྷཱཏུཾ ཋཔེཏྭཱ ཨཉྙཏྠ ཨནུཔྤཏྟི ཝུཏྟཱ ཧོཏཱིཏི ཨདྷིཔྤཱཡོ.

ཨེཀཏོཏི སཧ, ཨེཀསྨིཾ ཀཱལེཏི ཨཏྠོ. སོ པན ཀཱལོ ཀཐཾ པརིཙྪིནྣོཏི? ཙརིམབྷཝེ པཊིསནྡྷིགྒཧཎཏོ པཊྛཱཡ ཡཱཝ དྷཱཏུཔརིནིབྦཱནནྟི དསྶེནྟོ ‘‘ཏཏྠ བོདྷིཔལླངྐེ’’ཏིཨཱདིམཱཧ. ནིསིནྣཀཱལཏོ པཊྛཱཡཱཏི པཊིལོམཀྐམེན ཝདཏི. ཁེཏྟཔརིགྒཧོ ཀཏོཝ ཧོཏི ‘‘ཨིདཾ བུདྡྷཱནཾ ཛཱཏིཁེཏྟ’’ནྟི. ཀེན པན པརིགྒཧོ ཀཏོ? ཨུཔྤཛྫམཱནེན བོདྷིསཏྟེན. པརིནིབྦཱནཏོ པཊྛཱཡཱཏི ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱནཏོ པཊྛཱཡ. ཨེཏྠནྟརེཏི ཙརིམབྷཝེ བོདྷིསཏྟསྶ པཊིསནྡྷིགྒཧཎཾ, དྷཱཏུཔརིནིབྦཱནནྟི ཨིམེཧི དྭཱིཧི པརིཙྪིནྣེ ཨེཏསྨིཾ ཨནྟརེ.

ཏིཔིཊཀཨནྟརདྷཱནཀཐཱཝཎྞནཱ

‘‘ན ¶ ནིཝཱརིཏཱ’’ཏི ཝཏྭཱ ཏཏྠ ཀཱརཎཾ དསྶེཏུཾ ‘‘ཏཱིཎི ཧཱི’’ཏིཨཱདི ཝུཏྟཾ. པཊིཔཏྟིཨནྟརདྷཱནེན སཱསནསྶ ཨོསཀྐིཏཏྟཱ ཨཔརསྶ ཨུཔྤཏྟི ལདྡྷཱཝསརཱ ཧོཏི. པཊིཔདཱཏི པཊིཝེདྷཱཝཧཱ པུབྦབྷཱགཔཊིཔདཱ.

‘‘པརིཡཏྟི པམཱཎ’’ནྟི ཝཏྭཱ ཏམཏྠཾ བོདྷིསཏྟཾ ནིདསྶནཾ ཀཏྭཱ དསྶེཏུཾ ‘‘ཡཐཱ’’ཏིཨཱདི ཝུཏྟཾ. ཏཡིདཾ ཧཱིནཾ ནིདསྶནཾ ཀཏནྟི དཊྛབྦཾ. ནིཡྻཱནིཀདྷམྨསྶ ཧི ཋིཏིཾ དསྶེནྟོ ཨནིཡྻཱནིཀདྷམྨཾ ནིདསྶེཏི.

མཱཏིཀཱཡ ཨནྟརཧིཏཱཡཱཏི ‘‘ཡོ པན བྷིཀྑཱུ’’ཏིཨཱདི (པཱརཱ. ༣༩, ༤༤; པཱཙི. ༤༥) ནཡཔྤཝཏྟཱཡ ¶ སིཀྑཱཔདཔཱལི༹མཱཏིཀཱཡ ཨནྟརཧིཏཱཡ. ནིདཱནུདྡེསསངྑཱཏེ པཱཏིམོཀྑེ, པབྦཛྫཱཨུཔསམྤདཱཀམྨེསུ ཙ སཱསནཾ ཏིཊྛཏི. ཡཐཱ ཝཱ པཱཏིམོཀྑེ དྷརནྟེ ཨེཝ པབྦཛྫཱ ཨུཔསམྤདཱ ཙ, ཨེཝཾ སཏི ཨེཝ ཏདུབྷཡེ པཱཏིམོཀྑཾ ཏདུབྷཡཱབྷཱཝེ པཱཏིམོཀྑཱབྷཱཝཏོ. ཏསྨཱ ཏཡིདཾ ཏཡཾ སཱསནསྶ ཋིཏིཧེཏཱུཏི ཨཱཧ ‘‘པཱཏིམོཀྑཔབྦཛྫཱཨུཔསམྤདཱསུ ཋིཏཱསུ སཱསནཾ ཏིཊྛཏཱི’’ཏི. ཡསྨཱ ཝཱ ཨུཔསམྤདཱདྷཱིནཾ པཱཏིམོཀྑཾ ཨནུཔསམྤནྣསྶ ཨནིཙྪིཏཏྟཱ, ཨུཔསམྤདཱ ཙ པབྦཛྫཱདྷཱིནཱ, ཏསྨཱ པཱཏིམོཀྑེ, ཏཾ སིདྡྷིཡཱ སིདྡྷཱསུ པབྦཛྫུཔསམྤདཱསུ ཙ སཱསནཾ ཏིཊྛཏི. ཨོསཀྐིཏཾ ནཱམཱཏི པཙྪིམཀཔཊིཝེདྷསཱིལབྷེདདྭཡཾ ཨེཀཏོ ཀཏྭཱ ཏཏོ པརཾ ¶ ཝིནཊྛཾ ནཱམ ཧོཏི, པཙྪིམཀཔཊིཝེདྷཏོ པརཾ པཊིཝེདྷསཱསནཾ, པཙྪིམཀསཱིལབྷེདཏོ པརཾ པཊིཔཏྟིསཱསནཾ ཝིནཊྛཾ ནཱམ ཧོཏཱིཏི ཨཏྠོ.

སཱསནཨནྟརཧིཏཝཎྞནཱ

ཨེཏེན ཀཱམཾ ‘‘སཱསནཊྛིཏིཡཱ པརིཡཏྟི པམཱཎ’’ནྟི ཝུཏྟཾ, པརིཡཏྟི པན པཊིཔཏྟིཧེཏུཀཱཏི པཊིཔཏྟིཡཱ ཨསཏི སཱ ཨཔྤཏིཊྛཱ ཧོཏི པཊིཝེདྷོ ཝིཡ, ཏསྨཱ པཊིཔཏྟིཨནྟརདྷཱནཾ སཱསནོསཀྐནསྶ ཝིསེསཀཱརཎནྟི དསྶེཏྭཱ ཏཡིདཾ སཱསནོསཀྐནཾ དྷཱཏུཔརིནིབྦཱནོསཱནནྟི དསྶེཏུཾ ‘‘ཏཱིཎི པརིནིབྦཱནཱནཱི’’ཏིཨཱདི ཝུཏྟཾ. དྷཱཏཱུནཾ སནྣིཔཱཏནཱདི བུདྡྷཱནཾ ཨདྷིཊྛཱནེནེཝཱཏི ཝེདིཏབྦཾ.

ཏཱཏི ¶ རསྨིཡོ. ཀཱརུཉྙནྟི པརིདེཝནཀཱརུཉྙཾ. ཛམྦུདཱིཔེ, དཱིཔནྟརེསུ, དེཝནཱགབྲཧྨལོཀེསུ ཙ ཝིཔྤཀིརིཏྭཱ ཋིཏཱནཾ དྷཱཏཱུནཾ མཧཱབོདྷིཔལླངྐཊྛཱནེ ཨེཀཛ྄ཛྷཾ སནྣིཔཱཏནཾ, རསྨིཝིསྶཛྫནཾ, ཏཏྠ ཏེཛོདྷཱཏུཡཱ ཨུཊྛཱནཾ, ཨེཀཛཱལིབྷཱཝོ ཙཱཏི སབྦམེཏཾ སཏྠུ ཨདྷིཊྛཱནཝསེནེཝཱཏི ཝེདིཏབྦཾ.

ཨནཙྪརིཡཏྟཱཏི དྭཱིསུཔི ཨུཔྤཛྫམཱནེསུ ཨཙྪརིཡཏྟཱབྷཱཝདོསཏོཏི ¶ ཨཏྠོ. བུདྡྷཱ ནཱམ མཛ྄ཛྷེ བྷིནྣསུཝཎྞཾ ཝིཡ ཨེཀསདིསཱཏི ཏེསཾ དེསནཱཔི ཨེཀརསཱ ཨེཝཱཏི ཨཱཧ ‘‘དེསནཱཡ ཙ ཝིསེསཱབྷཱཝཏོ’’ཏི, ཨེཏེན ཙ ཨནཙྪརིཡཏྟམེཝ སཱདྷེཏི. ‘‘ཝིཝཱདབྷཱཝཏོ’’ཏི ཨེཏེན ཝིཝཱདཱབྷཱཝཏྠཾ དྭེ ཨེཀཏོ ན ཨུཔྤཛྫནྟཱིཏི དསྶེཏི.

ཏཏྠཱཏི མིལིནྡཔཉྷེ (མི. པ. ༥.༡.༡). ཨེཀུདྡེསོཏི ཨེཀོ ཨེཀཝིདྷོ ཨབྷིནྣོ ཨུདྡེསོ. སེསཔདེསུཔི ཨེསེཝ ནཡོ.

ཨེཀཾ ཨེཝ བུདྡྷཾ དྷཱརེཏཱིཏི ཨེཀབུདྡྷདྷཱརཎཱི, ཨེཏེན ཨེཝཾསབྷཱཝཱ ཨེཏེ བུདྡྷགུཎཱ, ཡེན དུཏིཡཾ བུདྡྷགུཎཾ དྷཱརེཏུཾ ཨསམཏྠཱ ཨཡཾ ལོཀདྷཱཏཱུཏི དསྶེཏི. པཙྩཡཝིསེསནིཔྥནྣཱནཉྷི དྷམྨཱནཾ སབྷཱཝཝིསེསོ ན སཀྐཱ ནིཝཱརེཏུནྟི. ‘‘ན དྷཱརེཡྻཱ’’ཏི ཝཏྭཱ ཏམེཝ ཨདྷཱརཎཾ པརིཡཱཡེཧི པཀཱསེནྟོ ‘‘ཙལེཡྻཱ’’ཏིཨཱདིམཱཧ. ཏཏྠ ཙལེཡྻཱཏི པརིཔྥནྡེཡྻ. ཀམྤེཡྻཱཏི པཝེདྷེཡྻ. ནམེཡྻཱཏི ཨེཀཔསྶེན ནཏཱ བྷཝེཡྻ. ཨོཎམེཡྻཱཏི ཨོསཱིདེཡྻ. ཝིནམེཡྻཱཏི ཝིཝིདྷཱ ཨིཏོ ཙིཏོ ཙ ནམེཡྻ. ཝིཀིརེཡྻཱཏི ཝཱཏེན བྷུསམུཊྛི ཝིཡ ཝིཔྤཀིརེཡྻ. ཝིདྷམེཡྻཱཏི ¶ ཝིནསྶེཡྻ. ཝིདྡྷཾསེཡྻཱཏི སབྦསོ ཝིདྡྷསྟཱ བྷཝེཡྻ. ཏཐཱབྷཱུཏཱ ཙ ན ཀཏྠཙི ཏིཊྛེཡྻཱཏི ཨཱཧ ‘‘ན ཋཱནཾ ཨུཔགཙྪེཡྻཱ’’ཏི.

ཨིདཱནི ཏཏྠ ནིདསྶནཾ དསྶེནྟོ ‘‘ཡཐཱ མཧཱརཱཛཱ’’ཏིཨཱདིམཱཧ. ཏཏྠ སམུཔཱདིཀཱཏི སམཾ ཨུདྡྷཾ པཛྫཏི པཝཏྟཏཱིཏི སམུཔཱདིཀཱ, ཨུདཀསྶ ཨུཔརི སམཾགཱམིནཱིཏི ཨཏྠོ. ཝཎྞེནཱཏི སཎྛཱནེན. པམཱཎེནཱཏི ཨཱརོཧེན. ཀིསཐཱུལེནཱཏི ཀིསཐཱུལབྷཱཝེན, པརིཎཱཧེནཱཏི ཨཏྠོ. དྭིནྣམྤཱིཏི དྭེཔི, དྭིནྣམྤི ཝཱ སརཱིརབྷཱརཾ.

ཚཱདེནྟནྟི རོཙེནྟཾ རུཙིཾ ཨུཔྤཱདེནྟཾ. ཏནྡཱིཀཏོཏི ཏེན བྷོཛནེན ཏནྡཱིབྷཱུཏོ. ཨནོཎམིཏདཎྜཛཱཏོཏི ཡཱཝདཏྠབྷོཛནེན ཨོཎམིཏུཾ ཨསམཏྠཏཱཡ ¶ ཨནོཎམིཏདཎྜོ ཝིཡ ཛཱཏོ. སཀིཾ ¶ བྷུཏྟོཝཱཏི ཨེཀཾ ཝཌྜྷིཏཀཾ བྷུཏྟམཏྟོཝ མརེཡྻཱཏི. ཨཏིདྷམྨབྷཱརེནཱཏི དྷམྨེན ནཱམ པཐཝཱི ཏིཊྛེཡྻ, སཀིཾ ཏེནེཝ ཙལཏི ཝིནསྶཏཱིཏི ཨདྷིཔྤཱཡེན པུཙྪཏི. པུན ཐེརོ རཏནཾ ནཱམ ལོཀེ ཀུཊུམྦཾ སནྡྷཱརེནྟཾ, ཨབྷིམཏཉྩ ལོཀེན; ཏཾ ཨཏྟནོ གརུསབྷཱཝཏཱཡ སཀཊབྷངྒསྶ ཀཱརཎཾ ཨཏིབྷཱརབྷཱུཏཾ དིཊྛམེཝཾ དྷམྨོ ཙ ཧིཏསུཁཝིསེསེཧི ཏཾསམངྒིནཾ དྷཱརེནྟོ, ཨབྷིམཏོ ཙ ཝིཉྙཱུནཾ གམྦྷཱིརཔྤམེཡྻབྷཱཝེན གརུསབྷཱཝཏྟཱ ཨཏིབྷཱརབྷཱུཏོ པཐཝིཙལནསྶ ཀཱརཎཾ ཧོཏཱིཏི དསྶེནྟོ ‘‘ཨིདྷ མཧཱརཱཛ དྭེ སཀཊཱ’’ཏིཨཱདིམཱཧ, ཨེཏེནེཝ ཏཐཱགཏསྶ མཱཏུཀུཙྪིཨོཀྐམནཱདིཀཱལེ པཐཝིཀམྤནཀཱརཎཾ སཾཝཎྞིཏནྟི དཊྛབྦཾ. ཨེཀསྶཱཏི ཨེཀསྨཱ, ཨེཀསྶ ཝཱ སཀཊསྶ རཏནཾ ཏསྨཱ སཀཊཏོ གཧེཏྭཱཏི ཨཏྠོ.

ཨོསཱརིཏནྟི ཨུཙྩཱརིཏཾ, ཀཐིཏནྟི ཨཏྠོ.

ཨགྒོཏི སབྦསཏྟེཧི ཨགྒོ.

སབྷཱཝཔཀཏིཀཱཏི སབྷཱཝབྷཱུཏཱ ཨཀིཏྟིམཱ པཀཏིཀཱ. ཀཱརཎམཧནྟཏྟཱཏི ཀཱརཎཱནཾ མཧནྟཏཱཡ, མཧནྟེཧི བུདྡྷཀརདྷམྨེཧི པཱརམིསངྑཱཏེཧི ཀཱརཎེཧི བུདྡྷགུཎཱནཾ ནིབྦཏྟིཏོཏི ཝུཏྟཾ ཧོཏི. པཐཝིཨཱདཱིནི མཧནྟཱནི ཝཏྠཱུནི, མཧནྟཱ ཙ སཀྐབྷཱཝཱདཡོ ཨཏྟནོ ཨཏྟནོ ཝིསཡེ ཨེཀེཀཱཝ, ཨེཝཾ སམྨཱསམྦུདྡྷོཔི མཧནྟོ ཨཏྟནོ ཝིསཡེ ཨེཀོ ཨེཝ. ཀོ ཙ ཏསྶ ཝིསཡོ? བུདྡྷབྷཱུམི, ཡཱཝཏཀཾ ཝཱ ཉེཡྻམེཝཾ ‘‘ཨཱཀཱསོ ཝིཡ ཨནནྟཝིསཡོ བྷགཝཱ ཨེཀོ ཨེཝ ཧོཏཱི’’ཏི ཝདནྟོ ‘‘ཨེཀིསྶཱ ལོཀདྷཱཏུཡཱ’’ཏི ཝུཏྟལོཀདྷཱཏུཏོ ཨཉྙེསུཔི ཙཀྐཝཱལེ༹སུ ཨཔརསྶ བུདྡྷསྶ ཨབྷཱཝཾ དསྶེཏི.

‘‘སམྨུཁཱ ¶ མེཏ’’ནྟིཨཱདིནཱ པཝཏྟིཏཾ ཨཏྟནོ བྱཱཀརཎཾ ཨཝིཔརཱིཏཏྠཏཱཡ སཏྠརི པསཱདུཔྤཱདནེན སམྨཱཔཊིཔཛྫམཱནསྶ ཨནུཀྐམེན ལོཀུཏྟརདྷམྨཱཝཧམྤི ¶ ཧོཏཱིཏི ཨཱཧ ‘‘དྷམྨསྶ…པེ… པཊིཔད’’ནྟི. ཝཱདསྶ ཨནུཔཏནཾ ཨནུཔྤཝཏྟི ཝཱདཱནུཔཱཏོཏི ཨཱཧ ‘‘ཝཱདོཡེཝཱ’’ཏི.

ཨཙྪརིཡཨབྦྷུཏཝཎྞནཱ

༡༦༢. ཨུདཱཡཱིཏི ¶ ནཱམཾ, མཧཱསརཱིརཏཱཡ པན ཐེརོ མཧཱཨུདཱཡཱིཏི པཉྙཱཡིཏྠ, ཡསྶ ཝསེན ཝིནཡེ ནིསཱིདནསྶ དསཱ ཨནུཉྙཱཏཱ. པཉྩཝཎྞཱཏི ཁུདྡིཀཱདིབྷེདཏོ པཉྩཔྤཀཱརཱ. པཱིཏིསམུཊྛཱནེཧི པཎཱིཏརཱུཔེཧི ཨཏིབྱཱཔིཏདེཧོ ‘‘ནིརནྟརཾ པཱིཏིཡཱ ཕུཊསརཱིརོ’’ཏི ཝུཏྟོ, ཏཏོ ཨེཝསྶཱ པརིཡཱཡཏོ ཕརཎལཀྑཎམྤི ཝུཏྟཾ. ཨཔྤ-སདྡོ ‘‘ཨཔྤཀསིརེནེཝཱ’’ཏིཨཱདཱིསུ (སཾ. ནི. ༡.༡༠༡; ༥.༡༥༨; ཨ. ནི. ༧.༧༡) ཝིཡ ཨིདྷ ཨབྷཱཝཏྠོཏི ཨཱཧ ‘‘ཨཔྤིཙྪཏཱཏི ནིཏྟཎྷཏཱ’’ཏི. ཏཱིཧཱཀཱརེཧཱིཏི ཡཐཱལཱབྷཡཐཱབལཡཐཱསཱརུཔྤཔྤཀཱརེཧི.

ན ན ཀཐེཏི ཀཐེཏིཡེཝ. ཙཱིཝརཱདིཧེཏུནྟི ཙཱིཝརུཔྤཱདཱདིཧེཏུབྷཱུཏཾ པཡུཏྟཀཐཾ ན ཀཐེཏི. ཝེནེཡྻཝསེནཱཏི ཝིནེཏབྦཔུགྒལཝསེན. ཀཐེཏི ‘‘ཨེཝམཡཾ ཝིནཡཾ ཨུཔགཙྪཏཱི’’ཏི. ‘‘སབྦཱབྷིབྷཱུ སབྦཝིདཱུཧམསྨཱི’’ཏིཨཱདིཀཱ (མ. ནི. ༡.༢༨༥; ༢.༣༤༡; མཧཱཝ. ༡༡; ཀཐཱ. ༤༠༥; དྷ. པ. ༣༥༣) གཱཐཱཔི ‘‘དསབལསམནྣཱགཏོ, བྷིཀྑཝེ, ཏཐཱགཏོ’’ཏིཨཱདིཀཱ (སཾ. ནི. ༢.༢༡, ༢༢) སུཏྟནྟཱཔི.

༡༦༣. ཨབྷིཀྑཎནྟི ཨབྷིཎྷཾ. ནིགྒཱཐཀཏྟཱ, པུཙྪནཝིསྶཛྫནཝསེན པཝཏྟིཏཏྟཱ ཙ ‘‘ཝེཡྻཱཀརཎ’’ནྟི ཝུཏྟཾ. སེསཾ སབྦཾ སུཝིཉྙེཡྻཾ ཨེཝཱཏི.

སམྤསཱདནཱིཡསུཏྟཝཎྞནཱཡ ལཱིནཏྠཔྤཀཱསནཱ.

༦. པཱསཱདིཀསུཏྟཝཎྞནཱ

ནིགཎྛནཱཊཔུཏྟཀཱལངྐིརིཡཝཎྞནཱ

༡༦༤. ལཀྑསྶ ¶ ¶ ¶ སརཝེདྷཾ ཨཝིརཛ྄ཛྷིཏྭཱན ཝིཛ྄ཛྷནཝིདྷིཾ ཛཱནནྟཱིཏི ཝེདྷཉྙཱ. ཏེནཱཧ ‘‘དྷནུམྷི ཀཏསིཀྑཱ’’ཏི. སིཔྤཾ ཨུགྒཧཎཏྠཱཡཱཏི དྷནུསིཔྤཱདིསིཔྤསྶ ཨུགྒཧཎཏྠཱཡ. མཛ྄ཛྷིམེན པམཱཎེན སརཔཱཏཡོགྱཏཱཝསེན ཀཏཏྟཱ དཱིགྷཔཱསཱདོ.

སམྤཏི ཀཱལཾ ཀཏོཏི ཨཙིརཀཱལཾ ཀཏོ. དྭེདྷིཀཛཱཏཱཏི ཛཱཏདྭེདྷིཀཱ སཉྫཱཏབྷེདཱ. དྭེཛ྄ཛྷཛཱཏཱཏི དུཝིདྷབྷཱཝཔྤཏྟཱ. བྷཎྜནྟི པརིབྷཱསནྟི ཨེཏེནཱཏི བྷཎྜནཾ, ཝིརུདྡྷཙིཏྟཾ. ཏནྟི བྷཎྜནཾ. ‘‘ཨིདཾ ནཧཱནཱདི ན ཀཏྟབྦ’’ནྟི པཉྙཏྟཝཏྟཾ པཎྞཏྟི. དྷམྨཝིནཡནྟི པཱཝཙནཾ སིདྡྷནྟཾ. ཝིཛ྄ཛྷནྟཱ མུཁསཏྟཱིཧི. སཧིཏཾ མེཏི མཡ྄ཧཾ ཝཙནཾ སཧིཏཾ སིལིཊྛཾ པུབྦཱཔརསམྦནྡྷཾ ཨཏྠཡུཏྟཾ ཀཱརཎཡུཏྟཾ. ཏེནཱཧ ‘‘ཨཏྠསཾཧིཏ’’ནྟི. ཨདྷིཙིཎྞནྟི ཨཱཙིཎྞཾ. ཝིཔརཱཝཏྟནྟི ཝིརོདྷདསྶནཝསེན པརཱཝཏྟིཏཾ, པརཱཝཏྟཾ དཱུསིཏནྟི ཨཏྠོ. ཏེནཱཧ ‘‘ཙིརཀཱལཝསེན པགུཎཾ, ཏཾ མམ ཝཱདཾ ཨཱགམྨ ནིཝཏྟ’’ནྟི. པརིཡེསམཱནོ ཝིཙར ཏཏྠ གནྟྭཱ སིཀྑཱཏི ཨཏྠོ. སཙེ སཀྐོསི, ཨིདཱནིཡེཝ མཡཱ ཝེཋིཏཾ དོསཾ ནིབྦེཋེཧི. མརཎམེཝཱཏི ¶ ཨཉྙམཉྙགྷཱཏནཝསེན མརཎམེཝ. ནཱཊཔུཏྟསྶ ཨིམེཏི ནཱཊཔུཏྟིཡཱ, ཏེ པན ཏསྶ སིསྶཱཏི ཨཱཧ ‘‘ཨནྟེཝཱསིཀེསཱུ’’ཏི. པུརིམཔཊིཔཏྟིཏོ པཊིནིཝཏྟནཾ པཊིཝཱནཾ, ཏཾ རཱུཔཾ སབྷཱཝོ ཨེཏེསནྟི པཊིཝཱནརཱུཔཱ. ཏེནཱཧ ‘‘ནིཝཏྟནསབྷཱཝཱ’’ཏི. ཀཐནཾ ཨཏྠསྶ ཨཱཙིཀྑནཾ. པཝེདནཾ ཧེཏུདཱཧརཎཱནི ཨཱཧརིཏྭཱ བོདྷནཾ. ཏེནཱཧ ‘‘དུཔྤཝེདིཏེཏི དུཝིཉྙཱཔིཏེ’’ཏི. ན ཨུཔསམཱཡ སཾཝཏྟཏཱིཏི ཨནུཔསམསཾཝཏྟནཾ, ཏདེཝ ཨནུཔསམསཾཝཏྟནིཀཾ, ཏསྨིཾ. སམུསྶིཏཾ ཧུཏྭཱ པཏིཊྛཱཧེཏུབྷཱཝཏོ ཐཱུཔཾ, པཏིཊྛཱཏི ཨཱཧ ‘‘བྷིནྣཐཱུཔེཏི བྷིནྣཔཏིཊྛེ’’ཏི, ཐཱུཔོཏི ཝཱ དྷམྨསྶ ནིཡྻཱནབྷཱཝོ ཝེདིཏབྦོ ཨཉྙེ དྷམྨེ ཨབྷིབྷུཡྻ སམུསྶིཏཊྛེན, སོ ནིགཎྛསྶ སམཡེ. ཀེཧིཙི ཨབྷིནྣསམྨཏོཔི བྷིནྣོ ཝིནཊྛོ ཨེཝ སབྦེན སབྦཾ ཨབྷཱཝཏོཏི སོ བྷིནྣཐཱུཔོ, སོ ཨེཝ ¶ ནིཡྻཱནབྷཱཝོ ཝཊྚདུཀྑཏོ མུཙྩིཏུཀཱམཱནཾ པཊིསརཎཾ, ཏམེཏྠ ནཏྠཱིཏི ཨཔྤཊིསརཎོ ¶ , ཏསྨིཾ བྷིནྣཐཱུཔེ ཨཔྤཊིསརཎེཏི ཨེཝམེཏྠ ཨཏྠོ ཝེདིཏབྦོ.

ཨཱཙརིཡཔྤམཱཎནྟི ཨཱཙརིཡམུཊྛི ཧུཏྭཱ པམཱཎབྷཱུཏཾ. ནཱནཱནཱིཧཱརེནཱཏི ནཱནཱཀཱརེན.

༡༦༥. ཏཐེཝ སམུདཱཙརིཾསུ བྷཱུཏཔུབྦགཏིཡཱ. སཱམཱཀཱནནྟི སཱམཱཀདྷཉྙཱནཾ.

‘‘ཡེནསྶ ཨུཔཛ྄ཛྷཱཡོ’’ཏི ཝཏྭཱ ཡཐཱསྶ ཨཱཡསྨཏོ ཙུནྡསྶ དྷམྨབྷཎྜཱགཱརིཀོ ཨུཔཛ྄ཛྷཱཡོ ཨཧོསི, ཏཾ ཝིཏྠཱརེན དསྶེཏུཾ ‘‘བུདྡྷཀཱལེ ཀིརཱ’’ཏིཨཱདི ཝུཏྟཾ. ཏཏྠ བུདྡྷཀཱལེཏི བྷཱུཏཀཐནམེཏཾ, ན ཝིསེསནཾ. སཏྠུ པརིནིབྦཱནཏོ པུརེཏརམེཝ ཧི དྷམྨསེནཱཔཏི པརིནིབྦུཏོ.

དྷམྨརཏནཔཱུཛཱཝཎྞནཱ

སདྡྷིཝིཧཱརིཀཾ ¶ ཨདཱསཱིཏི སདྡྷིཝིཧཱརིཀཾ ཀཏྭཱ ཨདཱསི.

ཀཐཱཡ མཱུལནྟི བྷགཝཏོ སནྟིཀཱ ལབྷིཏབྦདྷམྨཀཐཱཡ ཀཱརཎཾ. སམུཊྛཱཔེཏཱིཏི ཨུཊྛཱཔེཏི, དཱལིདྡིཡཔངྐཏོ ཨུདྡྷརཏཱིཏི ཨདྷིཔྤཱཡོ. སནྡྷམནྟི སམྨདེཝ དྷམནྟོ. ཨེཀེཀསྨིཾ པཧཱརེཡེཝ ཏཡོ ཏཡོ ཝཱརེ ཀཏྭཱ དིཝཱ ནཝཝཱརེ རཏྟིཾ ནཝཝཱརེ. ཨུཔཊྛཱནམེཝ གཙྪཏི བུདྡྷུཔཊྛཱནཝསེན, པཉྷཱཔུཙྪནཱདིཝསེན པན ཨནྟརནྟརཱཔི གཙྪཏེཝ, གཙྪནྟོ ཙ དིཝསསྶ…པེ… གཙྪཏི. ཉཱཏུཾ ཨིཙྪིཏསྶ ཨཏྠསྶ ཨུདྡྷརཎབྷཱཝཏོ པཉྷོཝ པཉྷུདྡྷཱརོ, ཏཾ གཧེཏྭཱཝ གཙྪཏི ཨཏྟནོ མཧཱཔཉྙཏཱཡ, སཏྠུ ཙ དྷམྨདེསནཱཡཾ ཨཀིལཱསུབྷཱཝཏོ.

ཨསམྨཱསམྦུདྡྷཔྤཝེདིཏདྷམྨཝིནཡཝཎྞནཱ

༡༦༦. ཨཱརོཙིཏེཔི ཏསྨིཾ ཨཏྠེ. སཱམིཀོ ཧོཏི, ཏསྶ སཱམིཀབྷཱཝཾ དསྶེཏུཾ ‘‘སོཝ ཏསྶཱ ཨཱདིམཛ྄ཛྷཔརིཡོསཱནཾ ཛཱནཱཏཱི’’ཏི ཨཱཧ. ཨེཝནྟི ཝཙནསམྤཊིཙྪནཾ. ཙུནྡཏྠེརེན ཧི ཨཱནཱིཏཾ ཀཐཱཔཱབྷཏཾ བྷགཝཱ སམྤཊིཙྪནྟོ ‘‘ཨེཝ’’ནྟི ཨཱཧ. ‘‘ཨེཝ’’ནྟི དུརཀྑཱཏེ དྷམྨཝིནཡེ སཱཝཀཱནཾ དྭེདྷིཀཱདིབྷཱཝེན ཝིཧརཎཀིརིཡཱཔརཱམསནཉྷེཏཾ.

ཡསྨཱ ¶ …པེ… པཱཀཊཾ ཧོཏི བྱཏིརེཀམུཁེན ཙ ནེཡྻསྶ ཨཏྠསྶ ཝིབྷཱུཏབྷཱཝཱཔཏྟིཏོ. ཨཐ ¶ ཝཱ ཡསྨཱ…པེ… པཱཀཊཾ ཧོཏི དོསེསུ ཨཱདཱིནཝདསྶནེན ཏཔྤཊིཔཀྑེསུ གུཎེསུ ཨཱནིསཾསསྶ ཝིབྷཱུཏབྷཱཝཱཔཏྟིཏོ. ཝོཀྐམྨཱཏི ཨཔསཀྐེཏྭཱ. ཨཱམེཌིཏལོཔེན ཙཱཡཾ ནིདྡེསོ, ཝོཀྐམྨ ཝོཀྐམྨཱཏི ཝུཏྟཾ ཧོཏི, ཏེན ཏསྶ ཝོཀྐམནསྶ ཨནྟརནྟརཱཏི ཨཡམཏྠོ ལབྦྷཏཱིཏི ཨཱཧ ‘‘ན ནིརནྟར’’ནྟིཨཱདི. དྷམྨཱནུདྷམྨཔཊིཔཏྟིཨཱདཡོཏི ཏེན སཏྠཱརཱ ཝུཏྟམུཏྟིདྷམྨསྶ ཨནུདྷམྨཾ ཨཔྤཊིཔཛྫནཱདཡོ ¶ . ཨཱདི-སདྡེན པཱལི༹ཡཾ ཨཱགཏཱ ཨསཱམཱིཙིཔཊིཔདཱདཡོ ཙ སངྒཡ྄ཧནྟི. མནུསྶཏྟམྤཱིཏི པི-སདྡེན ‘‘ཝིཙཱརཎཔཉྙཱཡ ཨསམྦྷཝོ, དོསེསུ ཨནབྷིནིཝེསིཏཱ, ཨསནྡིཊྛིཔརཱམཱསིཏཱ’’ཏི ཨེཝམཱདཱིནཾ སངྒཧོ དཊྛབྦོ. ‘‘ཏཐཱ ཨེཝ’’ནྟི པདེཧི ཡཐཱཀྐམཾ པཀཱརསྶ ཀཱམཾ ཏིརོཀྑཏཱ, པཙྩཀྑཏཱ ཝུཙྩཏི, ཏཐཱཔི ཡཐཱ ‘‘ཏཐཱ པཊིཔཛྫཏཱུ’’ཏི པདེན པཊིཔཛྫནཱཀཱརོ ནིཡམེཏྭཱ ཝིཧིཏོ, ཏཐཱ ‘‘ཨེཝཾ པཊིཔཛྫཏཱུ’’ཏི ཨིམིནཱཔཱིཏི ཨིདཾ ཏསྶ ཨཏྠདསྶནབྷཱཝེན ཝུཏྟཾ. སམཱདཔིཏཏྟཱ མིཙྪཱཔཊིཔདཱཡ ཨཔུཉྙཾ པསཝཏི.

༡༦༧. ཉཱཡཏི མུཏྟིདྷམྨོ ཨེཏེནཱཏི ཉཱཡོ, ཏེན སཏྠཱརཱ ཝུཏྟོ དྷམྨཱནུདྷམྨོ, ཏཾ པཊིཔནྣོཏི ཉཱཡཔྤཊིཔནྣོ, སོ པན ཡསྨཱ ཏསྶ མུཏྟིདྷམྨསྶ ཨདྷིགམེ ཀཱརཎསམྨཏོ, ཏསྨཱ ཝུཏྟཾ ‘‘ཀཱརཎཔྤཊིཔནྣོ’’ཏི. ནིཔྥཱདེསྶཏཱིཏི སཱདྷེསྶཏི, སིདྡྷིཾ གམིསྶཏཱིཏི ཝུཏྟཾ ཧོཏི. དུཀྑནིབྦཏྟཀནྟི སམྤཏི, ཨཱཡཏིཉྩ དུཀྑསྶ ནིབྦཏྟཀཾ. ཝཱིརིཡཾ ཀརོཏི མིཙྪཱཔཊིཔནྣཏྟཱ.

སམྨཱསམྦུདྡྷཔྤཝེདིཏདྷམྨཝིནཡཱདིཝཎྞནཱ

༡༦༨. ནིཡྻཱཏཱིཏི ཝཏྟཏི, སཾཝཏྟཏཱིཏི ཝཱ ཨཏྠོ.

༡༧༠. ཨིདྷ སཱཝཀསྶ སམྨཱཔཊིཔཏྟིཡཱ ཨེཀནྟིཀཨཔསྶཡདསྶནཏྠཾ སཏྠུ སམྨཱསམྦུདྡྷཏཱ, དྷམྨསྶ ཙ སྭཱཀྑཱཏཏཱ ཀིཏྟིཏཱཏི ‘‘སམྨཱཔཊིཔནྣསྶ ཀུལཔུཏྟསྶ པསཾསཾ དསྶེཏྭཱ’’ཏི ཝུཏྟཾ. ཨེཝཉྷི ཨིམིསྶཱ དེསནཱཡ སཾཀིལེསབྷཱགིཡབྷཱཝེན ཨུཊྛིཏཱཡ ཝོདཱནབྷཱགིཡབྷཱཝེན ཡཐཱནུསནྡྷིནཱ པཝཏྟི དཱིཔིཏཱ ཧོཏི. ཨབོདྷིཏཏྠཱཏི ཨཔྤཝེདིཏཏྠཱ, པརམཏྠཾ ཙཏུཏྠསཙྩཔཊིཝེདྷཾ ཨཔཱཔིཏཱཏི ཨཏྠོ. པཱལི༹ཡཾ ‘‘ཨསྶཱ’’ཏི པདཾ ¶ ‘‘སཱཝཀཱ སདྡྷམྨེ’’ཏི ¶ དྭཱིཧི པདེཧི ཡོཛེཏབྦཾ ‘‘ཨསྶ སམྨཱསམྦུདྡྷསྶ སཱཝཀཱ, ཨསྶ སདྡྷམྨེ’’ཏི. སབྦསངྒཧཔདེཧི ཀཏནྟི སབྦསྶ སཱསནཏྠསྶ སངྒཎྷནཔདེཧི ཨེཀཛ྄ཛྷཾ ཀཏཾ. ཏེནཱཧ ‘‘སབྦསངྒཱཧིཀཾ ཀཏཾ ན ཧོཏཱིཏི ཨཏྠོ’’ཏི. པུབྦེནཱཔརཾ སམྦནྡྷཏྠབྷཱཝེན སངྒཧེཏབྦཏཱཡ ཝཱ སངྒཧཱནི ¶ པདཱནི ཀཏཱནི ཨེཏསྶཱཏི སངྒཧཔདཀཏཾ, བྲཧྨཙརིཡཾ. ཏཔྤཊིཀྑེཔེན ན ཙ སངྒཧཔདཀཏནྟི ཡོཛནཱ. རཱགཱདིཔཊིཔཀྑཧརཎཾ, ཡཐཱནུསིཊྛཾ ཝཱ པཊིཔཛྫམཱནཱནཾ ཝཊྚདུཀྑཏོ པཊིཧརཎཾ ནིབྦཱནཔཱཔནཾ པཊིཧཱརོ, སོ ཨེཝ ཨཱ-ཀཱརསྶ ཨི-ཀཱརཾ ཀཏྭཱ པཊིཧིརོ, པཊིཧིརོ ཨེཝ པཱཊིཧིརོ, སཧ པཱཊིཧིརེནཱཏི སཔྤཱཊིཧིརཾ, ཏཐཱ སུཔྤཝེདིཏཏཱཡ སཔྤཱཊིཧིརཾ ཀཏནྟི སཔྤཱཊིཧིརཀཏཾ. ཏཱདིསཾ པན ཝཊྚཏོ ནིཡྻཱནེ ནིཡུཏྟཾ, ནིཡྻཱནཔྤཡོཛནཉྩ ཧོཏཱིཏི ཨཱཧ ‘‘ནིཡྻཱནིཀ’’ནྟི. དེཝལོཀཏོཏི དེཝལོཀཏོ པཊྛཱཡ རཱུཔཱིདེཝནིཀཱཡཏོ པབྷུཏི. སུཔྤཀཱསིཏནྟི སུཊྛུ པཀཱསིཏཾ. ཡཱཝ དེཝམནུསྶེཧཱིཏི ཝཱ ཡཱཝ དེཝམནུསྶེཧི ཡཏྟཀཱ དེཝཱ མནུསྶཱ ཙ, ཏཱཝ ཏེ སབྦེ ཨབྷིབྱཱཔེཏྭཱ སུཔྤཀཱསིཏཾ. ཨནུཏཱཔཱཡ ཧོཏཱིཏི ཨནུཏཔྤོ, སོ པན ཨནུཏཱཔཾ ཀརོནྟོ ཝིཡ ཧོཏཱིཏི ཝུཏྟཾ ‘‘ཨནུཏཱཔཀརོ ཧོཏཱི’’ཏི.

༡༧༢. ཐིརོཏི ཋིཏདྷམྨོ ཀེནཙི ཨསཾཧཱརིཡོ, ཨསེཀྑཱ སཱིལཀྑནྡྷཱདཡོ ཐེརཀཱརཀཱ དྷམྨཱ.

༡༧༣. ཡོགེཧི ཁེམཏྟཱཏི ཡོགེཧི ཨནུཔདྡུཏཏྟཱ. སདྡྷམྨསྶཱཏི ¶ ཨསྶ སདྡྷམྨསྶ. ཨསྶཱཏི ཙ ཨསྶ སཏྠུནོ.

༡༧༤. ཨུཔཱསཀཱ བྲཧྨཙཱརིནོ ནཱམ ཝིསེསཏོ ཨནཱགཱམིནོ. སོཏཱཔནྣསཀདཱགཱམིནོཔི ཏཱདིསཱ ཏཐཱ ཝུཙྩནྟཱིཏི ‘‘བྲཧྨཙརིཡཝཱསཾ ཝསམཱནཱ ཨརིཡསཱཝཀཱ’’ ཨིཙྩེཝ ཝུཏྟཾ.

༡༧༦. སབྦཀཱརཎསམྤནྣནྟི ཡཏྟཀེཧི ཀཱརཎེཧི སམྤནྣཾ ནཱམ ཧོཏི, ཏེཧི སབྦེཧི ཀཱརཎེཧི སམྤནྣཾ སམྤཏྟཾ ཨུཔགཏཾ པརིཔུཎྞཾ, སམནྣཱགཏཾ ཝཱ. ཨིམམེཝ དྷམྨནྟི ཨིམམེཝ སཱསནདྷམྨཾ.

ཨུདཀེན ¶ པདེསཉྙུནཱ ཨཏྟནོ པཉྙཱཝེཡྻཏྟིཡཏཾ དསྶེཏུཾ ཨནིཡྻཱནིཀེ ཨཏྠེ པཡུཏྟཾ པཧེལི༹ཀསདིསཾ ཝཙནཾ, བྷགཝཏཱ ཨཏྟནོ སབྦཉྙུཏཱཡ ནིཡྻཱནིཀེ ཨཏྠེ ཡོཛེཏྭཱ དསྶེཏུཾ ‘‘ཨུདཀོ སུད’’ནྟིཨཱདི ཝུཏྟནྟི ཏཾ དསྶེཏུཾ ‘‘སོ ཀིརཱ’’ཏིཨཱདིམཱཧ.

སངྒཱཡིཏབྦདྷམྨཱདིཝཎྞནཱ

༡༧༧. སངྒམྨ སམཱགམྨཱཏི ཏསྨིཾཡེཝ ཋཱནེ ལབྦྷམཱནཱནཾ གཏིཝསེན སངྒམྨ ཋཱནནྟརཏོ པཀྐོསནེན ¶ སམཱགཏཱནཾ ཝསེན སམཱགམྨ. ཏེནཱཧ ‘‘སངྒནྟྭཱ སམཱགནྟྭཱ’’ཏི. ཨཏྠེན ཨཏྠནྟི པདནྟརེ ཨཱགཏཨཏྠེན སཧ ཏཏྠ ཏཏྠ ཨཱགཏམཏྠཾ. བྱཉྫནེན བྱཉྫནནྟི ཨེཏྠཱཔི ཨེསེཝ ནཡོ. སམཱནེནྟེཧཱིཏི སམཱནཾ ཀརོནྟེཧི, ཨོཔམྨཾ ཝཱ ཨཱནེནྟེཧི. སངྒཱཡིཏབྦནྟི སམྨདེཝ གཱཡིཏབྦཾ ཀཐེཏབྦཾ, ཏཾ པན སངྒཱཡནཾ ཝཱཙནཱམགྒོཏི ཨཱཧ ‘‘ཝཱཙེཏབྦ’’ནྟི.

༡༧༨. ཏསྶ ཝཱ བྷཱསིཏེཏི ཏསྶ བྷིཀྑུནོ བྷཱསིཏེ ཨཏྠེ ཙེཝ བྱཉྫནེ ཙ. ཨཏྠམིཙྪཱགཧཎརོཔནཱནི ཡཐཱ ཧོནྟི, ཏཾ དསྶེཏུཾ ‘‘ཙཏྟཱརོ སཏིཔཊྛཱནཱ’’ཏིཨཱདི ཝུཏྟཾ. ཨཱརམྨཎཾ ‘‘སཏིཔཊྛཱན’’ནྟི གཎྷཱཏི, ན སཏིཡེཝ ‘‘སཏིཔཊྛཱན’’ནྟི. ‘‘སཏིཔཊྛཱནཱནཱི’’ཏི ¶ བྱཉྫནཾ རོཔེཏི ཏསྨིཾ ཨཏྠེ, ན ‘‘སཏིཔཊྛཱནཱ’’ཏི. ཨུཔཔནྣཏརཱནཱིཏི ཡུཏྟཏརཱནི. ཨལླཱིནཏརཱནཱིཏི སིལིཊྛཏརཱནི. ཡཱ ཙེཝཱཏི ལིངྒཝིཔལླཱསེན ཝུཏྟཾ, ཝིབྷཏྟིལོཔེན ཝཱ. པུན ཡཱ ཙེཝཱཏི ལིངྒཝིཔལླཱསེནེཝ ནིདྡེསོ. ནེཝ ཨུསྶཱདེཏབྦོཏི ན ཨུཀྐཾསེཏབྦོ ཝིརཛ྄ཛྷིཏྭཱ ཝུཏྟཏྟཱ. ན ཨཔསཱདེཏབྦོཏི ན སནྟཛྫེཏབྦོ ཝིཝཱདཔརིཧརཎཏྠཾ. དྷཱརཎཏྠནྟི ཨུཔདྷཱརཎཏྠཾ སལླཀྑཎཏྠཾ.

༡༨༡. ཨཏྠེན ཨུཔེཏནྟི ཨཝིཔརཱིཏེན ཨཏྠེན ཨུཔེཏཾ ཏཾ ‘‘ཨཡམེཏྠ ཨཏྠོ’’ཏི ཨུཔེཙྩ པཊིཛཱནིཏྭཱ ཋིཏཾ. ཏཐཱརཱུཔོ ཙ ཏསྶ བུཛ྄ཛྷིཏཱ ནཱམ ཧོཏཱིཏི ཨཱཧ ‘‘ཨཏྠསྶ ཝིཉྙཱཏཱར’’ནྟི. ཨེཝམེཏཾ བྷིཀྑུཾ པསཾསཐཱཏི ཝུཏྟནཡེན དྷམྨབྷཱཎཀཾ ཨམུཾ བྷིཀྑུཾ ‘‘ཨེཝཾ ལཱབྷཱ ནོ ཨཱཝུསོ’’ཏིཨཱདིཨཱཀཱརེན པསཾསཐ. ཨིདཱནིསྶ པསཾསབྷཱཝཾ དསྶེཏུཾ ‘‘ཨེསོ ཧཱི’’ཏིཨཱདི ཝུཏྟཾ. ཨེསཱཏི པརིཡཏྟིདྷམྨསྶ སཏྠུཀིཙྩཀརཎཏོ, ཏཏྠ ཙསྶ སམྨདེཝ ཨཝཊྛིཏབྷཱཝཏོ ‘‘བུདྡྷོ ནཱམ ཨེསཱ’’ཏི ¶ ཝུཏྟོ. ‘‘ལཱབྷཱ ནོ’’ཏིཨཱདིནཱ ཙསྶ བྷིཀྑཱུནཾ པིཡགརུབྷཱཝཾ ཝིབྷཱཝེནྟོ སཏྠཱ ཏཾ ཨཏྟནོ ཋཱནེ ཋཔེསཱིཏི ཝུཏྟོ.

པཙྩཡཱནུཉྙཱཏཀཱརཎཱདིཝཎྞནཱ

༡༨༢. ཏཏོཔི ཨུཏྟརིཏརནྟི ཡཱ པུབྦེ སམྨཱཔཊིཔནྣསྶ བྷིཀྑུནོ པསཾསནཝསེན ‘‘ཨིདྷ པན ཙུནྡ སཏྠཱ ཙ ཧོཏི སམྨཱསམྦུདྡྷོ’’ཏིཨཱདིནཱ (དཱི. ནི. ༣.༡༦༧, ༡༦༩) པཝཏྟིཏདེསནཱཡ ཨུཔརི ‘‘ཨིདྷ ཙུནྡ སཏྠཱ ཙ ལོཀེ ཨུདཔཱདཱི’’ཏིཨཱདིནཱ (དཱི. ནི. ༣.༡༧༠, ༡༧༡) དེསནཱ ཝཌྜྷིཏཱ. ཏཏོཔི ཨུཏྟརིཏརཾ སཝིསེསཾ དེསནཾ ཝཌྜྷེནྟོ ‘‘པཙྩཡཧེཏཱུ’’ཏིཨཱདིམཱཧ. ཏཏྠ པཙྩཡཧེཏཱུཏི པཙྩཡསཾཝཏྟནཧེཏུ. ཨུཔྤཛྫནཀཱ ཨཱསཝཱཏི པཙྩཡཱནཾ པརིཡེསནཧེཏུ ¶ ཙེཝ པརིབྷོགཧེཏུ ཙ ཨུཔྤཛྫནཀཱ ཀཱམཱསཝཱདཡོ. ཏེསཾ དིཊྛདྷམྨིཀཱནཾ ¶ ཨཱསཝཱནཾ ‘‘ཨིདྷ, བྷིཀྑཝེ, ཨརིཡསཱཝཀོ མིཙྪཱཨཱཛཱིཝཾ པཧཱཡ སམྨཱཨཱཛཱིཝེན ཛཱིཝིཏཾ ཀཔྤེཏཱི’’ཏི (སཾ. ནི. ༥.༨) ‘‘ཨིདྷ, བྷིཀྑཝེ, བྷིཀྑུ པཊིསངྑཱ ཡོནིསོ ཙཱིཝརཾ པཊིསེཝཏཱི’’ཏིཨཱདིནཱ (མ. ནི. ༡.༢༣; ཨ. ནི. ༦.༥༨) ཙ སམྨཱཔཊིཔཏྟིཾ ཨུཔདིསནྟོ བྷགཝཱ པཊིགྷཱཏཱཡ དྷམྨཾ དེསེཏི ནཱམ. ‘‘ཡོ ཏུམྷེསུ པཱལི༹ཡཱ ཨཏྠབྱཉྫནཱནི མིཙྪཱ གཎྷཱཏི, སོ ནེཝ ཨུསྶཱདེཏབྦོ, ན ཨཔསཱདེཏབྦོ, སཱདྷུཀཾ སཉྙཱཔེཏབྦོ ཏསྶེཝ ཨཏྠསྶ ནིསནྟིཡཱ’’ཏི ཨེཝཾ པརིཡཏྟིདྷམྨེ མིཙྪཱཔཊིཔནྣེ སམྨཱཔཊིཔཏྟིཡཾ བྷིཀྑཱུ ནིཡོཛེནྟོ བྷགཝཱ བྷཎྜནཧེཏུ ཨུཔྤཛྫནཀཱནཾ སམྤརཱཡིཀཱནཾ ཨཱསཝཱནཾ པཊིགྷཱཏཱཡ དྷམྨཾ དེསེཏི ནཱམ. ཡཐཱ ཏེ ན པཝིསནྟཱིཏི ཏེ ཨཱསཝཱ ཨཏྟནོ ཙིཏྟསནྟཱནཾ ཡཐཱ ན ཨོཏརནྟི. མཱུལགྷཱཏེན པཊིཧནནཱཡཱཏི ཡཐཱ མཱུལགྷཱཏོ ཧོཏི, ཨེཝཾ མཱུལགྷཱཏཝསེན པཛཧནཱཡ. ཏནྟི ཙཱིཝརཾ. ཡཐཱ ཙཱིཝརཾ ཨིདམཏྠིཀཏམེཝ ཨུཔཱདཱཡ ཨནུཉྙཱཏཾ, ཨེཝཾ པིཎྜཔཱཏཱདཡོཔི.

སུཁལླིཀཱནུཡོགཱདིཝཎྞནཱ

༡༨༣. སུཁིཏནྟི སཉྫཱཏསུཁཾ. པཱིཎིཏནྟི དྷཱཏཾ སུཧིཏཾ. ཏཐཱབྷཱུཏོ པན ཡསྨཱ ཐཱུལསརཱིརོ ཧོཏི, ཏསྨཱ ‘‘ཐཱུལཾ ཀརོཏཱི’’ཏི ཝུཏྟཾ.

༡༨༦. ནཋིཏསབྷཱཝཱཏི ¶ ཨནཝཊྛིཏསབྷཱཝཱ, ཨེཝརཱུཔཱཡ ཀཐཱཡ ཨནཝཊྛཱནབྷཱཝཏོ སབྷཱཝོཔི ཏེསཾ ཨནཝཊྛིཏོཏི ཨདྷིཔྤཱཡོ. ཏེནཱཧ ‘‘ཛིཝ྄ཧཱ ནོ ཨཏྠཱི’’ཏིཨཱདི. ཀཱམཾ ‘‘པཉྩཧི ཙཀྑཱུཧཱི’’ཏི ཝུཏྟཾ, ཨགྒཧིཏགྒཧཎེན པན ¶ ཙཏྟཱརི ཙཀྑཱུནི ཝེདིཏབྦཱནི. སབྦཉྙུཏཉྙཱཎཉྷི སམནྟཙཀྑཱུཏི. ཏསྶ ཝཱ ཉེཡྻདྷམྨེསུ ཛཱནནཝསེན པཝཏྟིཾ ཨུཔཱདཱཡ ‘‘ཛཱནཏཱ’’ཏི ཝུཏྟཾ. ཧཏྠཱམལཀཾ ཝིཡ པཙྩཀྑཏོ དསྶནཝསེན པཝཏྟིཾ ཨུཔཱདཱཡ ‘‘པསྶཏཱ’’ཏི ཝུཏྟཾ. ནེམཾ ཝུཙྩཏི ཐམྦྷཱདཱིཧི ཨནུཔཝིཊྛབྷཱུམིཔྤེདེསོཏི ཨཱཧ ‘‘གམྦྷཱིརབྷཱུམིཾ ཨནུཔཝིཊྛོ’’ཏི. སུཊྛུ ནིཁཱཏོཏི བྷཱུམིཾ ནིཁནིཏྭཱ སམྨདེཝ ཋཔིཏོ. ཏསྨིནྟི ཁཱིཎཱསཝེ. ཨནཛ྄ཛྷཱཙཱརོ ཨཙལོ ཨསམྤཝེདྷཱི, ཡསྨཱ ཨཛ྄ཛྷཱཙཱརོ སེཏུགྷཱཏོ ཁཱིཎཱསཝཱནཾ. སོཏཱཔནྣཱདཡོཏི ཨེཏྠ ཨཱདི-སདྡེན གཧིཏེསུ ཨནཱགཱམིནོ ཏཱཝ ནཝསུཔི ཋཱནེསུ ཁཱིཎཱསཝཱ ཝིཡ ཨབྷབྦཱ, སོཏཱཔནྣསཀདཱགཱམིནོ པན ‘‘ཏཏིཡཔཉྩམཊྛཱནེསུ ཨབྷབྦཱ’’ཏི ན ཝཏྟབྦཱ, ཨིཏརེསུ སཏྟསུ ཋཱནེསུ ཨབྷབྦཱཝ.

པཉྷབྱཱཀརཎཝཎྞནཱ

༡༨༧. གིཧིབྱཉྫནེནཱཏི ¶ གིཧིལིངྒེན. ཁཱིཎཱསཝོ པན གིཧིབྱཉྫནེན ཨརཧཏྟཾ པཏྟོཔི ན ཏིཊྛཏི ཝིཝེཀཊྛཱནསྶ ཨབྷཱཝཱཏི ཨདྷིཔྤཱཡོ. ཏསྶ ཝསེནཱཏི བྷུམྨདེཝཏྟབྷཱཝེ ཋཏྭཱ ཨརཧཏྟཔྤཏྟསྶ ཝསེན. ཨཡཾ པཉྷོཏི ‘‘ཨབྷབྦོ སོ ནཝ ཋཱནཱནི ཨཛ྄ཛྷཱཙརིཏུ’’ནྟི ཨཡཾ པཉྷོ ཨཱགཏོ ཨིཏརསྶ པབྦཛྫཱཡ, པརིནིབྦཱནེན ཝཱ ཨབྷབྦཏཱཡ ཨཝུཏྟསིདྡྷཏྟཱ. ཡདི ཨེཝཾ ཀཐཾ བྷིཀྑུགཧཎནྟི ཨཱཧ ‘‘བྷིནྣདོསཏྟཱ’’ཏིཨཱདི. ཨཔརིཙྪེདནྟི ཨཔརིཡནྟཾ, ཏཡིདཾ སུཝིཔུལནྟི ཨཱཧ ‘‘མཧནྟ’’ནྟི. ཉེཡྻསྶ ཧི ཝིཔུལཏཱཡ ཉཱཎསྶ ཝིཔུལཏཱ ཝེདིཏབྦཱ, ཨེཏེན ‘‘ཨཔརིཙྪེད’’ནྟི ཝུཙྩམཱནམྤི ཉེཡྻཾ སཏྠུ ཉཱཎསྶ ཝསེན པརིཙྪེདམེཝཱཏི དསྶིཏཾ ཧོཏི. ཝུཏྟཉྷེཏཾ ‘‘ཉཱཎཔརིཡནྟིཀཾ ནེཡྻ’’ནྟི (མཧཱནི. ༦༩, ༡༥༦; ཙཱུལ༹ནི. ༨༥; པཊི. མ. ༣.༥) ཨནཱགཏེ ¶ ཨཔཉྙཱཔནནྟི ཨནཱགཏེ ཝིསཡེ ཉཱཎསྶ ཨཔཉྙཱཔནཾ. ‘‘པཙྩཀྑཾ ཝིཡ ཀཏྭཱ’’ཏི ཀསྨཱ ཝིཡ-སདྡགྒཧཎཾ ཀཏཾ, ནནུ བུདྡྷཱནཾ སབྦམྤི ཉཱཎཾ ཨཏྟནོ ཝིསཡཾ པཙྩཀྑམེཝ ཀཏྭཱ པཝཏྟཏི ཨེཀཔྤམཱཎབྷཱཝཏོཏི? སཙྩམེཏཾ, ‘‘ཨཀྑ’’ནྟི པན ཙཀྑཱདིཨིནྡྲིཡཾ ཝུཙྩཏི, ཏཾ ཨཀྑཾ པཏི ཝཏྟཏཱིཏི ཙཀྑཱདིནིསྶིཏཾ ཝིཉྙཱཎཾ, ཏསྶ ¶ ཙ ཨཱརམྨཎཾ ‘‘པཙྩཀྑ’’ནྟི ལོཀེ ནིརུལ༹ྷམེཏནྟི ཏཾ ནིདསྶནཾ ཀཏྭཱ དསྶེནྟོ ‘‘པཙྩཀྑཾ ཝིཡ ཀཏྭཱ’’ཏི ཨཝོཙ, ན པན བྷགཝཏོ ཉཱཎསྶ ཨཔྤཙྩཀྑཱཀཱརེན པཝཏྟནཏོ. ཏཐཱ ཧི ཝདནྟི –

‘‘ཨཱཝིབྷཱུཏཾ པཀཱསནཾ, ཨནུཔདྡུཏཙེཏསཾ;

ཨཏཱིཏཱནཱགཏེ ཉཱཎཾ, པཙྩཀྑཱནཾ ཝསིསྶཏཱི’’ཏི.

ཨཉྙཏྠ ཝིཧིཏཀེནཱཏི ཨཉྙསྨིཾ ཝིསཡེ པཝཏྟིཏེན. སངྒཱཧེཏབྦནྟི སམཾ ཀཏྭཱ ཀཐཡིཏབྦཾ, ཀཐནཾ པན པཉྙཱཔནཾ ནཱམ ཧོཏཱིཏི པཉྙཱཔེཏབྦནྟི ཨཏྠོ ཝུཏྟོ. ཏཱདིསནྟི སཏཏཾ སམིཏཾ པཝཏྟཀཾ. ཉཱཎཾ ནཱམ ནཏྠཱིཏི ཨཱཝཛྫནེན ཝིནཱ ཉཱཎུཔྤཏྟིཡཱ ཨསམྦྷཝཏོ. ཨེཀཱཀཱརེན ཙ ཉཱཎེ པཝཏྟམཱནེ ནཱནཱཀཱརསྶ ཝིསཡསྶ ཨཝབོདྷོ ན སིཡཱ. ཨཐཱཔི སིཡཱ, ཨནིརུཔིཏརཱུཔེནེཝ ཨཝབོདྷོ སིཡཱ, ཏེན ཙ ཉཱཎཾ ཉེཡྻཾ ཨཉྙཱཏསདིསམེཝ སིཡཱ. ན ཧི ‘‘ཨིདཾ ཏ’’ནྟི ཝིཝེཀེན ཨནཝབུདྡྷོ ཨཏྠོ ཉཱཏོ ནཱམ ཧོཏི, ཏསྨཱ ‘‘ཙརཏོ ཙ ཏིཊྛཏོ ཙཱ’’ཏིཨཱདི བཱལལཱཔནམཏྟཾ. ཏེནཱཧ ‘‘ཡཐརིཝ བཱལཱ ཨབྱཏྟཱ, ཨེཝཾ མཉྙནྟཱི’’ཏི.

སཏིཾ ¶ ཨནུསྶརཏཱིཏི སཏཱནུསཱརི, སཏིཡཱནུཝཏྟནཝསེན པཝཏྟཉཱཎཾ. ཏེནཱཧ ‘‘པུབྦེནིཝཱསཱནུསྶཏིསམྤཡུཏྟཀ’’ནྟི ¶ . ཉཱཎཾ པེསེསཱིཏི ཉཱཎཾ པཝཏྟེསི. སབྦཏྠཀམེཝ ཉེཡྻཱཝརཎསྶ སུཔྤཧཱིནཏྟཱ ཨཔྤཊིཧཏཾ ཨནིཝཱརིཏཾ ཉཱཎཾ གཙྪཏི པཝཏྟཏིཙྩེཝ ཨཏྠོ. ‘‘བོདྷི ཝུཙྩཏི ཙཏཱུསུ མགྒེསུ ཉཱཎ’’ནྟི (ཙཱུལ༹ནི. ༢༡༡) ཝཙནཏོ ཙཏུམགྒཉཱཎཾ བོདྷི, ཏཏོ ཏསྶ ཨདྷིགཏཏྟཱ ཨུཔྤཛྫནཀཾ པཙྩཝེཀྑཎཉཱཎཾ ‘‘བོདྷིཛཾ ཉཱཎཾ ཨུཔྤཛྫཏཱི’’ཏི ཝུཏྟཾ. བོདྷིཛཾ བོདྷིམཱུལེ ཛཱཏཾ ཙཏུམགྒཉཱཎཾ, ཏཉྩ ཁོ ཨནཱགཏཾ ཨཱརབྦྷ ཨུདྡིསྶ ཏསྶ ཨཔྤཝཏྟིཨཏྠཾ ཏཐཱགཏསྶ ཨུཔྤཛྫཏི ཏསྶ ཨུཔྤནྣཏྟཱ ཨཱཡཏིཾ པུནབྦྷཝཱབྷཱཝཏོ. ཀཐཾ ཏཐཱགཏོ ཨནཱགཏམདྡྷཱནཾ ཨཱརབྦྷ ཨཏཱིརཀཾ ཉཱཎདསྶནཾ པཉྙཱཔེཏཱིཏི? ཨཏཱིཏསྶ པན ཨདྡྷུནོ མཧནྟཏཱཡ ཨཏཱིརཀཾ ཉཱཎདསྶནཾ ཏཏྠ པཉྙཱཔེཏཱིཏི ཀོ ཨེཏྠ ཝིརོདྷོ. ཏིཏྠིཡཱ པན ཨིམམཏྠཾ ཡཱཐཱཝཏོ ཨཛཱནནྟཱ – ‘‘ཏཡིདཾ ཀིཾ སུ, ཏཡིདཾ ཀཐཾསཱུ’’ཏི ཨཏྟནོ ཨཉྙཱཎམེཝ པཱཀཊཾ ཀརོནྟི. ཏསྨཱ བྷགཝཏཱ སསནྟཏིཔརིཡཱཔནྣདྷམྨཔྤཝཏྟིཾ སནྡྷཱཡ ‘‘ཨཉྙཝིཧིཏཀཾ ཉཱཎདསྶན’’ནྟིཨཱདི ཝུཏྟཾ. ཨིཏརཾ པན སནྡྷཱཡ ཝུཙྩམཱནེ སཏི ཏཐཱརཱུཔེ པཡོཛནེ ཨནཱགཏམྤི ཨདྡྷཱནཾ ¶ ཨཱརབྦྷ ཨཏཱིརཀམེཝ ཉཱཎདསྶནཾ པཉྙཱཔེཡྻ བྷགཝཱཏི ཨནཏྠསཾཧིཏནྟི ཨཡམེཏྠ ཨཏྠོཏི ཨཱཧ ‘‘ན ཨིདྷལོཀཏྠཾ ཝཱ པརལོཀཏྠཾ ཝཱ ནིསྶིཏ’’ནྟི. ཡཾ པན སཏྟཱནཾ ཨནཏྠཱཝཧཏྟཱ ཨནཏྠསཾཧིཏཾ, ཏཏྠ སེཏུགྷཱཏོ ཏཐཱགཏསྶ. ‘‘བྷཱརཏཡུདྡྷསཱིཏཱཧརཎསདིས’’ནྟི ¶ ཨིམིནཱ ཏསྶཱ ཀཐཱཡ ཡེབྷུཡྻེན ཨབྷཱུཏཏྠཏཾ དཱིཔེཏི. སཧེཏུཀནྟི ཉཱཔཀེན ཧེཏུནཱ སཧེཏུཀཾ. སོ པན ཧེཏུ ཡེན ནིདསྶནེན སཱདྷཱིཡཏི, ཏཾ ཏསྶ ཀཱརཎནྟི ཏེན སཀཱརཎཾ ཀཏྭཱ. ཡཐཱ ཧི པཊིཉྙཱཏཏྠསཱདྷནཏོ ཧེཏུ, ཨེཝཾ སཱདྷཀཾ ནིདསྶནནྟི. ཡུཏྟཔཏྟཀཱལེཡེཝཱཏི ཡུཏྟཱནཾ པཏྟཀཱལེ ཨེཝ. ཡེ ཧི ཝེནེཡྻཱ ཏསྶཱ ཀཐཱཡ ཡུཏྟཱ ཨནུཙྪཝིཀཱ, ཏེསཾཡེཝ ཡོཛནེ སནྡྷཱཡ ཝཱ ཀཐཱཡ པཏྟོ ཨུཔཀཱརཱཝཧོ ཀཱལོ, ཏདཱ ཨེཝ ཀཐེཏཱིཏི ཨཏྠོ.

༡༨༨. ‘‘ཏཐཱ ཏཐེཝ གདནཏོ’’ཏི ཨིམིནཱ ‘‘ཏཐཱགཏོ’’ཏི ཨཱམེཌིཏལོཔེནཱཡཾ ནིདྡེསོཏི དསྶེཏི. ཏཐཱ ཏཐེཝཱཏི ཙ དྷམྨཨཏྠསབྷཱཝཱནུརཱུཔཾ, ཝེནེཡྻཛ྄ཛྷཱསཡཱནུརཱུཔཉྩཱཏི ཨདྷིཔྤཱཡོ. དིཊྛནྟི རཱུཔཱཡཏནཾ དཊྛབྦཏོ, ཏེན ཡཾ དིཊྛཾ, ཡཾ དིསྶཏི, ཡཾ དཀྑཏི, ཡཾ སཏི སམཝཱཡེ པསྶེཡྻཾ, ཏཾ སབྦཾ ‘‘དིཊྛཾ’’ ཏྭེཝ གཧིཏཾ ཀཱལཝིསེསསྶ ཨནཱམཊྛབྷཱཝཏོ. ‘‘སུཏ’’ནྟིཨཱདཱིསུཔི ཨེསེཝ ནཡོ. སུཏནྟི སདྡཱཡཏནཾ སོཏབྦཏོ. མུཏནྟི སནིསྶཡེན གྷཱནཱདིཨིནྡྲིཡེན སཡཾ པཏྭཱ པཱཔུཎིཏྭཱ གཧེཏབྦཾ. ཏེནཱཧ ‘‘པཏྭཱ གཧེཏབྦཏོ’’ཏི. ཝིཉྙཱཏནྟི ཝིཛཱནིཏབྦཾ, ཏཾ པན དིཊྛཱདིཝིནིམུཏྟཾ ཝིཉྙེཡྻནྟི ཨཱཧ ‘‘སུཁདུཀྑཱདིདྷམྨཱཡཏན’’ནྟི. པཏྟནྟི ཡཐཱ ཏཐཱ པཏྟཾ, ཧཏྠགཏཾ ཨདྷིགཏནྟི ཨཏྠོ. ཏེནཱཧ ‘‘པརིཡེསིཏྭཱ ཝཱ ཨཔརིཡེསིཏྭཱ ཝཱ’’ཏི. པརིཡེསིཏནྟི པཏྟིཡཱམཏྠཾ པརིཡིཊྛཾ, ཏཾ པན ¶ པཏྟཾ ཝཱ སིཡཱ ཨཔྤཏྟཾ ཝཱ ཨུབྷཡཐཱཔི པརིཡེསིཏམེཝཱཏི ཨཱཧ ‘‘པཏྟཾ ཝཱ ཨཔྤཏྟཾ ཝཱ’’ཏི. པདདྭཡེནཱཔི དྭིཔྤཀཱརམྤི པཏྟཾ, དྭིཔྤཀཱརམྤི ¶ པརིཡེསིཏཾ, ཏེན ཏེན པཀཱརེན ཏཐཱགཏེན ཨབྷིསམྦུདྡྷནྟི དསྶེཏི. ཙིཏྟེན ཨནུསཉྩརིཏནྟི ཙོཔནཾ ཨཔཱཔེཏྭཱ ཙིཏྟེནེཝ ཨནུསཾཙརིཏཾ, པརིཝིཏཀྐིཏནྟི ཨཏྠོ. པཱིཏཀནྟི ཨཱདཱིཏི ཨཱདི-སདྡེན ལོཧིཏཀཨོདཱཏཱདི སབྦཾ རཱུཔཱརམྨཎཝིབྷཱགཾ སངྒཎྷཱཏི. སུམནོཏི རཱགཝསེན, ལོབྷཝསེན, སདྡྷཱདིཝསེན ཝཱ སུམནོ. དུམྨནོཏི བྱཱཔཱདཝིཏཀྐཝསེན, ཝིཧིཾསཱཝིཏཀྐཝསེན ཝཱ དུམྨནོ. མཛ྄ཛྷཏྟོཏི ཨཉྙཱཎཝསེན ཝཱ ཉཱཎཝསེན ¶ ཝཱ མཛ྄ཛྷཏྟོ. ཨེསེཝ ནཡོ སབྦཏྠ. ཏཏྠ ཏཏྠ ཨཱདི-སདྡེན སངྑསདྡོ པཎཝསདྡོ, པཏྟགནྡྷོ པུཔྥགནྡྷོ, པཏྟརསོ ཕལརསོ, ཨུཔཱདིནྣཾ ཨནུཔཱདིནྣཾ, མཛ྄ཛྷཏྟཝེདནཱ ཀུསལཀམྨཾ ཨཀུསལཀམྨནྟི ཨེཝཾ ཨཱདཱིནཾ སངྒཧོ དཊྛབྦོ.

ཨཔྤཏྟནྟི ཉཱཎེན ཨསམྤཏྟཾ, ཨཝིདིཏནྟི ཨཏྠོ. ཏེནཱཧ ‘‘ཉཱཎེན ཨསཙྪིཀཏ’’ནྟི. ཏཐེཝ གཏཏྟཱཏི ཏཐེཝ ཉཱཏཏྟཱ ཨབྷིསམྦུདྡྷཏྟཱ. གཏ-སདྡེན ཨེཀཏྠཾ བུདྡྷིཨཏྠནྟི ཨཏྠོ. ‘‘གཏིཨཏྠཱ ཧི དྷཱཏཝོ བུདྡྷིཨཏྠཱ བྷཝནྟཱི’’ཏི ཨཀྑརཙིནྟཀཱ.

ཨབྱཱཀཏཊྛཱནཱདིཝཎྞནཱ

༡༨༩. ‘‘ཨསམཏཾ ཀཐེཏྭཱ’’ཏི ཝཏྭཱ སམོཔི ནཱམ ཀོཙི ནཏྠི, ཀུཏོ ཨུཏྟརིཏརོཏི དསྶེཏུཾ ‘‘ཨནུཏྟརཏ’’ནྟི ཝུཏྟཾ. སཱ པནཱཡཾ ཨསམཏཱ, ཨནུཏྟརཏཱ ཙ སབྦཉྙུཏཾ པཱུརེཏྭཱ ཋིཏཱཏི དསྶེཏུཾ ‘‘སབྦཉྙུཏ’’ནྟི ཝུཏྟཾ. སཱ སབྦཉྙུཏཱ སདྡྷམྨཝརཙཀྐཝཏྟིབྷཱཝེན ལོཀེ པཱཀཊཱ ཛཱཏཱཏི དསྶེཏུཾ ‘‘དྷམྨརཱཛབྷཱཝཾ ཀཐེཏྭཱ’’ཏི ཝུཏྟཾ. ཏཐཱ སབྦཉྙུབྷཱཝེན ཙ སཏྠཱ ཨིམེསུ དིཊྛིགཏཝིཔལླཱསེསུ ¶ ཨེཝཾ པཊིཔཛྫཏཱིཏི དསྶེནྟོ ‘‘ཨིདཱནཱི’’ཏིཨཱདིམཱཧ. ཏཏྠ སཱིཧནཱདནྟི ཨབྷཱིཏནཱདཾ སེཊྛནཱདཾ. སེཊྛནཱདོ ཧེས, ཡདིདཾ ཋཔནཱིཡསྶ པཉྷསྶ ཋཔནཱིཡབྷཱཝདསྶནཾ. ཋཔནཱིཡཏཱ ཙསྶ པཱལི༹ཨཱརུལ༹ྷཱ ཨེཝ ‘‘ན ཧེཏ’’ནྟིཨཱདིནཱ. ཡཐཱ ཨུཔཙིཏཀམྨཀིལེསེན ཨིཏྠཏྟཾ ཨཱགནྟབྦཾ, ཏཐཱ ནཾ ཨཱགཏོཏི ཏཐཱགཏོ, སཏྟོ. ཏཐཱ ཧི སོ རཱུཔཱདཱིསུ སཏྟོ ཝིསཏྟོཏི ཀཏྭཱ ‘‘སཏྟོ’’ཏི ཙ ཝུཙྩཏི. ཨིཏྠཏྟནྟི ཙ པཊིལདྡྷཏྟཱ ཏཐཱ པཙྩཀྑབྷཱུཏོ ཨཏྟབྷཱཝོཏི ཝེདིཏབྦོ.

‘‘ཨཏྠསཾཧིཏཾ ན ཧོཏཱི’’ཏི ཨིམིནཱ ཨུབྷཡཏྠ ཝིདྷུརཏཱདསྶནེན ནིརཏྠཀཝིཔྤལཱཔཏཾ ཏསྶ ཝཱདསྶ ཝིབྷཱཝེཏི, ཨུབྷཡལོཀཏྠཝིདྷུརམྤི སམཱནཾ ‘‘ཀིཾ ནུ ཁོ ཝིཝཊྚནིསྶིཏ’’ནྟི ཀོཙི ཨཱསངྐེཡྻཱཏི ཏདཱསངྐཱནིཝཏྟནཏྠཾ ‘‘ན ཙ དྷམྨསཾཧིཏ’’ནྟི ཝུཏྟཾ. ཏེནཱཧ ‘‘ནཝལོཀུཏྟརདྷམྨནིསྶིཏཾ ན ཧོཏཱི’’ཏི. ཡདིཔི ཏཾ ན ཝིཝཊྚོགཏཾ ཧོཏི, ཝིཝཊྚསྶ པན ཨདྷིཊྛཱནབྷཱུཏཾ ¶ ནུ ཁོཏི ཀོཙི ཨཱསངྐེཡྻཱཏི ཏདཱསངྐཱནིཝཏྟནཏྠཾ ‘‘ན ཨཱདིབྲཧྨཙརིཡཀ’’ནྟིཨཱདི ཝུཏྟཾ.

༡༩༠. ཀཱམཾ ¶ ཏཎྷཱཔི དུཀྑསབྷཱཝཏྟཱ ‘‘དུཀྑ’’ནྟི བྱཱཀཱཏབྦཱ, པབྷཝབྷཱཝེན པན སཱ ཏཏོ ཝིསུཾ ཀཱཏབྦཱཏི ‘‘ཏཎྷཾ ཋཔེཏྭཱ’’ཏི ཝུཏྟཾ. ཏེནཱཧ ‘‘ཏསྶེཝ དུཀྑསྶ པབྷཱཝིཀཱ’’ཏིཨཱདི. ནནུ ཙ ཨཝིཛྫཱདཡོཔི དུཀྑསྶ སམུདཡོཏི? སཙྩཾ སམུདཡོ, ཏསྶཱ པན ཀམྨསྶ ཝིཙིཏྟབྷཱཝཧེཏུཏོ, དུཀྑུཔྤཱདནེ ཝིསེསཔཙྩཡབྷཱཝཏོ ཙ སཱཏིསཡོ སམུདཡཊྛོཏི སཱ ཨེཝ སུཏྟེསུ ཏཐཱ ཝུཏྟཱ. ཏེནཱཧ ‘‘ཏཎྷཱ དུཀྑསམུདཡོཏི ¶ བྱཱཀཏ’’ནྟི. ཨུབྷིནྣཾ ཨཔྤཝཏྟཱིཏི དུཀྑསམུདཡཱནཾ ཨཔྤཝཏྟིནིམིཏྟཾ. ‘‘དུཀྑཔརིཛཱནནོ’’ཏིཨཱདི མགྒཀིཙྩདསྶནཾ, ཏེན མགྒསྶ བྷཱཝནཏྠོཔི ཨཏྠཏོ དསྶིཏོཝཱཏི དཊྛབྦཾ. ན ཧི བྷཱཝནཱབྷིསམཡེན ཝིནཱ པརིཉྙཱབྷིསམཡཱདཡོ སམྦྷཝནྟཱིཏི. སཙྩཝཝཏྠཱཔནཾ ཨཔྤམཱདཔཊིཔཏྟིབྷཱཝཏོ ཨསམྨོཧཀལྱཱཎཀིཏྟིསདྡཱདིནིམིཏྟཏཱཡ ཡཐཱ སཱཏིསཡཾ ཨིདྷལོཀཏྠཱཝཧཾ, ཨེཝཾ ཡཱཝ ཉཱཎསྶ ཏིཀྑཝིསདབྷཱཝཔྤཏྟིཡཱ ཨབྷཱཝེན ནཝལོཀུཏྟརདྷམྨསམྤཱཔཀཾ ན ཧོཏི, ཏཱཝ ཏཏྠ ཏཏྠ སམྤཏྟིབྷཝེ ཨབྦྷུདཡསམྤཏྟི ཨནུགཏམེཝ སིཡཱཏི ཝུཏྟཾ ‘‘ཨེཏཾ ཨིདྷལོཀཔརལོཀཏྠནིསྶིཏ’’ནྟི. ནཝལོཀུཏྟརདྷམྨནིསྶིཏནྟི ནཝཝིདྷམྤི ལོཀུཏྟརདྷམྨཾ ནིསྶཱཡ པཝཏྟཾ ཏདདྷིགམཱུཔཱཡབྷཱཝཏོ. ཡསྨཱ སཙྩསམྦོདྷཾ ཨུདྡིསྶ སཱསནབྲཧྨཙརིཡཾ ཝུསྶཏི, ན ཨཉྙདཏྠཾ, ཏསྨཱ ཨེཏཾ སཙྩཝཝཏྠཱཔནཾ ‘‘ཨཱདིཔདྷཱན’’ནྟི ཝུཏྟཾ པཋམཏརཾ ཙིཏྟེ ཨཱདཱཏབྦཏོ.

པུབྦནྟསཧགཏདིཊྛིནིསྶཡཝཎྞནཱ

༡༩༡. ཏཾ མཡཱ བྱཱཀཏམེཝཱཏི ཏཾ མཡཱ ཏཐཱ བྱཱཀཏམེཝ, བྱཱཀཱཏབྦཾ ནཱམ མཡཱ ཨབྱཱཀཏཾ ནཏྠཱིཏི བྱཱཀརཎཱཝེཀལླེན ཨཏྟནོ དྷམྨསུདྷམྨཏཱཡ བུདྡྷསུབུདྡྷཏཾ ཝིབྷཱཝེཏི. ཏེནཱཧ ‘‘སཱིཧནཱདཾ ནདནྟོ’’ཏི. པུརིམུཔྤནྣཱ དིཊྛིཡོ ཨཔརཱཔརུཔྤནྣཱནཾ དིཊྛཱིནཾ ཨཝསྶཡཱ ཧོནྟཱིཏི ‘‘དིཊྛིཡོཝ དིཊྛིནིསྶཡཱ’’ཏི ཝུཏྟཾ. དིཊྛིགཏིཀཱཏི དིཊྛིགཏིཡོ, དིཊྛིཔྤཝཏྟིཡོཏི ཨཏྠོ. ཨིདམེཝ དསྶནཾ སཙྩནྟི ‘‘སསྶཏོ ཨཏྟཱ ཙ ལོཀོ ཙཱ’’ཏི ཨིདམེཝ དསྶནཾ སཙྩཾ ཨམོགྷཾ ཨཝིཔརཱིཏཾ. ཨཉྙེསཾ ཝཙནཾ མོགྷནྟི ‘‘ཨསསྶཏོ ཨཏྟཱ ཙ ལོཀོ ¶ ཙཱ’’ཏི ཨེཝམཱདིཀཾ ཨཉྙེསཾ སམཎབྲཱཧྨཎཱནཾ ཝཙནཾ མོགྷཾ ཏུཙྪཾ, མིཙྪཱཏི ཨཏྠོ. ན སཡཾ ཀཱཏབྦོཏི ཨསཡཾཀཱརོཏི ཨཱཧ ‘‘ཨསཡཾཀཏོ’’ཏི, ཡཱདིཙྪིཀཏྟཱཏི ཨདྷིཔྤཱཡོ.

༡༩༢. ཨཏྠི ¶ ཁོཏི ཨེཏྠ ཁོ-སདྡོ པུཙྪཱཡཾ, ཨཏྠི ནཱུཏི ཨཡམེཏྠ ཨཏྠོཏི ཨཱཧ ‘‘ཨཏྠི ¶ ཁོ ཨིདཾ ཨཱཝུསོ ཝུཙྩཏཱི’’ཏིཨཱདི. ཨཱཝུསོ ཡཾ ཏུམྷེཧི ‘‘སསྶཏོ ཨཏྟཱ ཙ ལོཀོ ཙཱ’’ཏི ཝུཙྩཏི, ཨིདམཏྠི ཁོ ཨིདཾ ཝཱཙཱམཏྟཾ, ནོ ནཏྠི, ཏསྨཱ ཝཱཙཱཝཏྠུམཏྟཏོ ཏསྶ ཡཾ ཁོ ཏེ ཨེཝམཱཧཾསུ ‘‘ཨིདམེཝ སཙྩཾ མོགྷཾ ཨཉྙ’’ནྟི, ཏཾ ཏེསཾ ནཱནུཛཱནཱམཱིཏི ཨེཝམེཏྠ ཨཏྠོ ཙ ཡོཛནཱ ཙ ཝེདིཏབྦཱ. ཡཾ པནེཏྠ ཝཏྟབྦཾ, ཏཾ བྲཧྨཛཱལཊཱིཀཱཡཾ (དཱི. ནི. ཊཱི. ༡.༣༠) ཝུཏྟམེཝ. དིཊྛིཔཉྙཏྟིཡཱཏི དིཊྛིཡཱ པཉྙཱཔནེ ‘‘ཨེཝཾ ཨེསཱ དིཊྛི ཨུཔྤནྣཱ’’ཏི ཏསྶཱ དིཊྛིཡཱ སམུདཡཏོ, ཨཏྠངྒམཏོ, ཨསྶཱདཏོ, ཨཱདཱིནཝཏོ, ནིསྶརཎཏོ ཙ ཡཱཐཱཝཏོ པཉྙཱཔནེ. ཨཝིཔརཱིཏཝུཏྟིཡཱ སམེན ཉཱཎེན སམཾ ཀཉྩི ནེཝ སམནུཔསྶཱམི. ཨདྷིཔཉྙཏྟཱིཏི ཨབྷིཉྙེཡྻདྷམྨཔཉྙཱཔནཱ. ཡཾ ཨཛཱནནྟཱ བཱཧིརཀཱ དིཊྛིཔཉྙཏྟིཡེཝ ཨལླཱིནཱཏི ཏཉྩ པཉྙཏྟིཏོ ཨཛཱནནྟཱ ཐཱམསཱ པརཱམཱསཱ ཨབྷིནིཝིསྶ ཝོཧརནྟི. ཨེཏྠ ཙ ཡཱཡཾ ‘‘དིཊྛིཔཉྙཏྟི ནཱམཱ’’ཏི ཝུཏྟཱ དིཊྛིཡཱ དིཊྛིགཏིཀེཧི ཨེཝཾ གཧིཏཏཱཡ ཝིབྷཱཝནཱ, ཏཏྠ ཙ བྷགཝཏོ ཨུཏྟརིཏརོ ནཱམ ཀོཙི ནཏྠི, སྭཱཡམཏྠོ བྲཧྨཛཱལེ (དཱི. ནི. ཨཊྛ. ༡.༣༠) ཝིབྷཱཝིཏོ ཨེཝ. ‘‘ཨདྷིཔཉྙཏྟཱི’’ཏི ཝུཏྟཱ པན ཝིབྷཱཝིཡམཱནཱ ལོཀསྶ ནིབྦིདཱཧེཏུབྷཱཝེན བཧུལཱིཀཱརཱཏི ཏསྶཱ ཝསེན བྷགཝཱ ཨནུཏྟརབྷཱཝཾ པཝེདེནྟོ ‘ནེཝ ཨཏྟནཱ སམསམཾ སམནུཔསྶཱམཱི’ཏི སཱིཧནཱདཾ ནདཱི’’ཏི ཀེཙི. ཨཊྛཀཐཱཡཾ (དཱི. ནི. ཨཊྛ. ༣.༡༩༢) པན ‘‘ཡཉྩ ཝུཏྟཾ ‘པཉྙཏྟིཡཱ’ཏི ཡཉྩ ‘ཨདྷིཔཉྙཏྟཱི’ཏི ¶ , ཨུབྷཡམེཏཾ ཨཏྠཏོ ཨེཀ’’ནྟི ‘‘ཨིདྷ པན པཉྙཏྟིཡཱཏི ཨེཏྠཱཔི པཉྙཏྟི ཙེཝ ཨདྷིཔཉྙཏྟི ཙ ཨདྷིཔྤེཏཱ, ཨདྷིཔཉྙཏྟཱིཏི ཨེཏྠཱཔཱི’’ཏི ཙ ཝུཏྟཱ, ཨུབྷཡསྶཔི ཝསེནེཏྠ བྷགཝཱ སཱིཧནཱདཾ ནདཱིཏི ཝིཉྙཱཡཏི. ཨུབྷཡཾ པེཏཾ ཨཏྠཏོ ཨེཀནྟི ཙ པཉྙཏྟིབྷཱཝསཱམཉྙཾ སནྡྷཱཡ ཝུཏྟཾ, ན བྷེདཱབྷཱཝཏོ. ཏེནཱཧ ‘‘བྷེདཏོ ཧཱི’’ཏིཨཱདི. ཁནྡྷཔཉྙཏྟཱིཏི ཁནྡྷཱནཾ ‘‘ཁནྡྷཱ’’ཏི པཉྙཱཔནཱ དསྶནཱ པཀཱསནཱ ཋཔནཱ ནིཀྑིཔནཱ. ‘‘ཨཱཙིཀྑཏི དསྶེཏི པཉྙཱཔེཏི པཊྛཔེཏཱི’’ཏི (སཾ. ནི. ༢.༢༠, ༩༧) ཨཱགཏཊྛཱནེ ཧི པཉྙཱཔནཱ དསྶནཱ པཀཱསནཱ པཉྙཏྟི ནཱམ, ‘‘སུཔཉྙཏྟཾ མཉྩཔཱིཋ’’ནྟི (པཱརཱ. ༢༦༩) ཨཱགཏཊྛཱནེ ཋཔནཱ ནིཀྑིཔནཱ པཉྙཏྟི ནཱམ, ཨིདྷ ཨུབྷཡམྤི ཡུཛྫཏི.

དིཊྛིནིསྶཡཔྤཧཱནཝཎྞནཱ

༡༩༦. པཛཧནཏྠནྟི ¶ ཨཙྩནྟཱཡ པཊིནིསྶཛྫནཏྠཾ. ཡསྨཱ ཏེན པཛཧནེན སབྦེ དིཊྛིནིསྶཡཱ སམྨདེཝ ཨཏིཀྐནྟཱ ཧོནྟི ཝཱིཏིཀྐནྟཱ, ཏསྨཱ ‘‘སམཏིཀྐམཱཡཱཏི ཏསྶེཝ ཝེཝཙན’’ནྟི ཨཝོཙ. ན ཀེཝལཾ སཏིཔཊྛཱནཱ ཀཐིཏམཏྟཱ, ཨཐ ཁོ ཝེནེཡྻསནྟཱནེ པཏིཊྛཱཔིཏཱཏི དསྶེཏུཾ ‘‘དེསིཏཱ’’ཏི ཝཏྭཱ ‘‘པཉྙཏྟཱ’’ཏི ཝུཏྟནྟི ཨཱཧ ‘‘དེསིཏཱཏི ཀཐིཏཱ. པཉྙཏྟཱཏི ཋཔིཏཱ’’ཏི. ཨིདཱནི སཏིཔཊྛཱནདེསནཱཡ དིཊྛིནིསྶཡཱནཾ ཨེཀནྟིཀཾ པཧཱནཱཝཧབྷཱཝཾ ¶ དསྶེཏུཾ ‘‘སཏིཔཊྛཱནབྷཱཝནཱཡ ཧཱི’’ཏིཨཱདི ཝུཏྟཾ. ཏཏྠ སཏིཔཊྛཱནབྷཱཝནཱཡཱཏི ཨིམིནཱ ཏེསཾ བྷཱཝནཱཡ ཨེཝ ནེསཾ པཧཱནཾ, དེསནཱ པན ཏདུཔནིསྶཡབྷཱཝཏོ ཏཐཱ ཝུཏྟཱཏི དསྶེཏི. སེསཾ སབྦཾ སུཝིཉྙེཡྻམེཝཱཏི.

པཱསཱདིཀསུཏྟཝཎྞནཱཡ ལཱིནཏྠཔྤཀཱསནཱ.

༧. ལཀྑཎསུཏྟཝཎྞནཱ

དྭཏྟིཾསམཧཱཔུརིསལཀྑཎཝཎྞནཱ

༡༩༩. ཨབྷིནཱིཧཱརཱདིགུཎམཧཏྟེན ¶ ¶ ¶ མཧནྟོ པུརིསོཏི མཧཱཔུརིསོ, སོ ལཀྑཱིཡཏི ཨེཏེཧཱིཏི མཧཱཔུརིསལཀྑཎཱནི. ཏཾ མཧཱཔུརིསཾ བྱཉྫཡནྟི པཀཱསེནྟཱིཏི མཧཱཔུརིསབྱཉྫནཱནི. མཧཱཔུརིསོ ནིམཱིཡཏི ཨནུམཱིཡཏི ཨེཏེཧཱིཏི མཧཱཔུརིསནིམིཏྟཱནི. ཏེནཱཧ ‘‘ཨཡཾ…པེ… ཀཱརཎཱནཱི’’ཏི.

༢༠༠. དྷཱརེནྟཱིཏི ལཀྑཎཔཱཋཾ དྷཱརེནྟི, ཏེན ལཀྑཎཱནི ཏེ སརཱུཔཏོ ཛཱནནྟི, ན པན སམུཊྛཱནཏོཏི དསྶེཏི. ཏེནཱཧ ‘‘ནོ ཙ ཁོ’’ཏིཨཱདི, ཏེན ཨནཉྙསཱདྷཱརཎམེཏཾ, ཡདིདཾ མཧཱཔུརིསལཀྑཎཱནཾ ཀཱརཎཝིབྷཱཝནནྟི དསྶེཏི. ཀསྨཱ ཨཱཧཱཏི ཡཐཱཝུཏྟསྶ སུཏྟསྶ སམུཊྛཱནཀཱརཎཾ པུཙྪཏི, ཨཱཙརིཡོ ‘‘ཨཊྛུཔྤཏྟིཡཱ ཨནུརཱུཔཏྟཱ’’ཏི ཝཏྭཱ ཏམེཝསྶ ཨཊྛུཔྤཏྟིཾ ཝིཏྠཱརཏོ དསྶེཏུཾ ‘‘སཱ པནཱ’’ཏིཨཱདིམཱཧ. སབྦཔཱལིཕུལློཏི སབྦསོ སམནྟཏོ ཝིཀསིཏཔུཔྥོ. ཝིཀསནམེཝ ཧི པུཔྥསྶ ནིཔྥཏྟི. པཱརིཙྪཏྟཀོ ཝིཡཱཏི ཨནུསྶཝལདྡྷམཏྟཾ གཧེཏྭཱ ཝདནྟི. ཨུཔྤཛྫཏཱིཏི ལབྦྷཏི, ནིབྦཏྟཏཱིཏི ཨཏྠོ.

ཡེན ཀམྨེནཱཏི ཡེན ཀུསལཀམྨུནཱ. ཡཾ ནིབྦཏྟནྟི ཡཾ ཡཾ ལཀྑཎཾ ནིབྦཏྟཾ. དསྶནཏྠནྟི ཏསྶ ཏསྶ ཀུསལཀམྨསྶ སརཱུཔཏོ, ཀིཙྩཏོ, པཝཏྟིཨཱཀཱརཝིསེསཏོ, པཙྩཡཏོ, ཕལཝིསེསཏོ ཙ དསྶནཏྠཾ, ཨེཏེནེཝ པཊིཔཱཊིཡཱ ཨུདྡིཊྛཱནཾ ལཀྑཎཱནཾ ¶ ཨསམུདྡེསཀཱརཎཝིབྷཱཝནཱཡ ཀཱརཎཾ དཱིཔིཏཾ ཧོཏི སམཱནཀཱརཎཱནཾ ལཀྑཎཱནཾ ཨེཀཛ྄ཛྷཾ ཀཱརཎདསྶནཝསེནསྶ པཝཏྟཏྟཱ. ཨེཝམཱཧཱཏི ‘‘བཱཧིརཀཱཔི ཨིསཡོ དྷཱརེནྟཱི’’ཏིཨཱདིནཱ ཨིམིནཱ ཨིམིནཱ པཀཱརེན ཨཱཧ.

སུཔྤཏིཊྛིཏཔཱདཏཱལཀྑཎཝཎྞནཱ

༢༠༡. ‘‘པུརིམཾ ¶ ཛཱཏིནྟི པུརིམཱཡཾ ཛཱཏིཡཾ, བྷུམྨཏྠེ ཨེཏཾ ཨུཔཡོགཝཙན’’ནྟི ཝདནྟི. ‘‘པུབྦེ ནིཝུཏྠཀྑནྡྷསནྟཱནེ ཋིཏོ’’ཏི ཝཙནཏོ ཨཙྩནྟསཾཡོགེ ཝཱ ཨུཔཡོགཝཙནཾ. ཡཏྠ ཡཏྠ ཧི ཛཱཏིཡཾ མཧཱསཏྟོ པུཉྙཀམྨཾ ¶ ཀཱཏུཾ ཨཱརབྷཏི, ཨཱརབྷཏོ པཊྛཱཡ ཨཙྩནྟམེཝ ཏཏྠ པུཉྙཀམྨཔྤསུཏོ ཧོཏི. ཏེནཱཧ ‘‘དལ༹ྷསམཱདཱནོ’’ཏིཨཱདི. སེསཔདདྭཡེཔི ཨེསེཝ ནཡོ. ནིཝུཏྠཀྑནྡྷཱ ‘‘ཛཱཏཱི’’ཏི ཝུཏྟཱ ཁནྡྷཝིནིམུཏྟཱཡ ཛཱཏིཡཱ ཨབྷཱཝཏོ, ནིབྦཏྟིལཀྑཎསྶ ཙ ཝིཀཱརསྶ ཨིདྷ ཨནུཔཡུཛྫནཏོ. ཛཱཏཝསེནཱཏི ཛཱཡནཝསེན. ‘‘ཏཐཱ’’ཏི ཨིམིནཱ ‘‘པུབྦེ ནིཝུཏྠཀྑནྡྷཱ’’ཏི ཨིམཾ པདཾ ཨུཔསཾཧརཏི. བྷཝནཝསེནཱཏི པཙྩཡཏོ ནིབྦཏྟནཝསེན. ནིཝུཏྠཝསེནཱཏི ནིཝུསིཏཏཱཝསེན. ཨཱལཡཊྛེནཱཏི ཨཱཝསིཏབྷཱཝེན. ནིཝཱསཏྠོ ཧི ནིཀེཏཏྠོ.

ཏཏྠཱཏི དེཝལོཀཱདིམྷི. ཨཱདི-སདྡེན ཨེཀཙྩཾ ཏིརཙྪཱནཡོནིཾ སངྒཎྷཱཏི. ན སུཀརནྟི དེཝགཏིཡཱ ཨེཀནྟསུཁཏཱཡ, དུགྒཏིཡཱ ཨེཀནྟདུཀྑཏཱཡ, དུཀྑབཧུལཏཱཡ ཙ པུཉྙཀིརིཡཱཡ ཨོཀཱསོ ན སུལབྷརཱུཔོ པཙྩཡསམཝཱཡསྶ དུལླབྷབྷཱཝཏོ, ཨུཔྤཛྫམཱནཱ ཙ སཱ ཨུལཱ༹རཱ, ཝིཔུལཱ ཙ ན ཧོཏཱིཏི གཏིཝསེནཱཔི ཁེཏྟཝིསེསཏཱ ཨིཙྪིཏབྦཱ ‘‘ཏིརཙྪཱནགཏེ དཱནཾ དཏྭཱ སཏགུཎཱ དཀྑིཎཱ པཱཊིཀངྑིཏབྦཱ, པུཐུཛྫནདུསྶཱིལེ དཱནཾ དཏྭཱ སཧསྶགུཎཱ དཀྑིཎཱ པཱཊིཀངྑིཏབྦཱ’’ཏི (མ. ནི. ༣.༣༧༩) ཝཙནཏོ ¶ . མནུསྶགཏིཡཱ པན སུཁབཧུལཏཱཡ པུཉྙཀིརིཡཱཡ ཨོཀཱསོ སུལབྷརཱུཔོ པཙྩཡསམཝཱཡསྶ ཙ ཡེབྷུཡྻེན སུལབྷབྷཱཝཏོ. ཡཉྩ ཏཏྠ དུཀྑཾ ཨུཔྤཛྫཏི, ཏམྤི ཝིསེསཏོ པུཉྙཀིརིཡཱཡ ཨུཔནིསྶཡོ ཧོཏི, དུཀྑཱུཔནིསཱ སདྡྷཱཏི. ཡཐཱ ཧི ཨཡོགྷནེན སཏྠཀེ ནིཔྥཱདིཡམཱནེ ཏསྶ ཨེཀནྟཏོ ཨགྒིམྷི ཏཱཔནཾ, ཨུདཀེན ཝཱ ཏེམནཾ ཚེདནཀིརིཡཱསམཏྠཏཱཡ ན ཝིསེསཔཙྩཡོ, ཏཱཔེཏྭཱ པན སམཱནཡོགཏོ ཨུདཀཏེམནཾ ཏསྶཱ ཝིསེསཔཙྩཡོ, ཨེཝམེཝ སཏྟསནྟཱནསྶ ཨེཀནྟདུཀྑསམངྒིཏཱ དུཀྑབཧུལཏཱ ཨེཀནྟསུཁསམངྒིཏཱ སུཁབཧུལཏཱ ཙ པུཉྙཀིརིཡཱསམཏྠཏཱཡ ན ཝིསེསཔཙྩཡོ, སཏི པན སམཱནཡོགཏོ དུཀྑསནྟཱཔནེ, སུཁུམབྲཱུཧནེ ཙ ལདྡྷཱུཔནིསྶཡཱ པུཉྙཀིརིཡཱ སམཏྠཏཱཡ སམྦྷཝཏི, ཏཐཱ སཏི ཨུཔྤཛྫམཱནཱ པུཉྙཀིརིཡཱ མཧཱཛུཏིཀཱ མཧཱཝིཔྥཱརཱ པཊིཔཀྑཙྪེདནསམཏྠཱ ཧོཏི. ཏསྨཱ མནུསྶབྷཱཝོ པུཉྙཀིརིཡཱཡ ཝིསེསཔཙྩཡོ. ཏེན ཝུཏྟཾ ‘‘ཏཏྠ ན སུཀརཾ, མནུསྶབྷཱུཏསྶེཝ སུཀར’’ནྟི.

ཨཐ ¶ ‘‘མནུསྶབྷཱུཏསྶཱ’’ཏི ཨེཏྠ ཀོ ཝཙནཏྠོ? ‘‘མནསྶ ཨུསྶནྣཏཱཡ མནུསྶཱཏི, སཱུརབྷཱཝསཏིམནྟཏཱབྲཧྨཙརིཡཡོགྱཏཱདིགུཎཝསེན ¶ ཨུཔཙིཏམནཀཱ ཨུཀྐཊྛགུཎཙིཏྟཱཏི ཨཏྠོ. ཀེ པན ཏེ? ཛམྦུདཱིཔཝཱསིནོ སཏྟཝིསེསཱ. ཏེནཱཧ བྷགཝཱ –

‘ཏཱིཧི, བྷིཀྑཝེ, ཋཱནེཧི ཛམྦུདཱིཔཀཱ མནུསྶཱ ཨུཏྟརཀུརུཀེ ཙ མནུསྶེ ཨདྷིགྒཎྷནྟི དེཝེ ཙ ཏཱཝཏིཾསེ. ཀཏམེཧི ཏཱིཧི? སཱུརཱ སཏིམནྟོ ཨིདྷ བྲཧྨཙརིཡཝཱསོ’ཏི (ཨ. ནི. ༩.༢༡; ཀཐཱ. ༢༧༡).

ཏཐཱ ཧི བུདྡྷཱ བྷགཝནྟོ, པཙྩེཀབུདྡྷཱ, ཨགྒསཱཝཀཱ ¶ , མཧཱསཱཝཀཱ, ཙཀྐཝཏྟིནོ, ཨཉྙེ ཙ མཧཱནུབྷཱཝཱ སཏྟཱ ཏཏྠེཝ ཨུཔྤཛྫནྟི. ཏེ ཧི སམཱནརཱུཔཱདིཏཱཡ པན སདྡྷིཾ པརིཏྟདཱིཔཝཱསཱིཧི ཨིཏརམཧཱདཱིཔཝཱསིནོཔི མནུསྶཱ ཏྭེཝ པཉྙཱཡིཾསཱུ’’ཏི ཀེཙི. ཨཔརེ པན བྷཎནྟི ‘‘ལོབྷཱདཱིཧི, ཨལོབྷཱདཱིཧི ཙ སཧིཏསྶ མནསྶ ཨུསྶནྣཏཱཡ མནུསྶཱ. ཡེ ཧི སཏྟཱ མནུསྶཛཱཏིཀཱ, ཏེསུ ཝིསེསཏོ ལོབྷཱདཡོ, ཨལོབྷཱདཡོ ཙ ཨུསྶནྣཱ, ཏེ ལོབྷཱདིཨུསྶནྣཏཱཡ ཨཔཱཡམགྒཾ, ཨལོབྷཱདིཨུསྶནྣཏཱཡ སུགཏིམགྒཾ, ནིབྦཱནགཱམིམགྒཉྩ པརིཔཱུརེནྟི, ཏསྨཱ ལོབྷཱདཱིཧི, ཨལོབྷཱདཱིཧི ཙ སཧིཏསྶ མནསྶ ཨུསྶནྣཏཱཡ པརིཏྟདཱིཔཝཱསཱིཧི སདྡྷིཾ ཙཏུདཱིཔཝཱསིནོ སཏྟཝིསེསཱ མནུསྶཱཏི ཝུཙྩནྟཱི’’ཏི. ལོཀིཡཱ པན ‘‘མནུནོ ཨཔཙྩབྷཱཝེན མནུསྶཱ’’ཏི ཝདནྟི. མནུ ནཱམ པཋམཀཔྤིཀོ ལོཀམརིཡཱདཱཡ ཨཱདིབྷཱུཏོ སཏྟཱནཾ ཧིཏཱཧིཏཝིདྷཱཡཀོ ཀཏྟབྦཱཀཏྟབྦཏཱསུ ནིཡོཛནཏཱཝསེན པིཏུཊྛཱནིཡོ, ཡོ སཱསནེ ‘‘མཧཱསམྨཏོ’’ཏི ཝུཙྩཏི ཨམྷཱཀཾ མཧཱབོདྷིསཏྟོ, པཙྩཀྑཏོ, པརམྤརཱ ཙ ཏསྶ ཨོཝཱདཱནུསཱསནིཡཾ ཋིཏཱ སཏྟཱ པུཏྟསདིསཏཱཡ ‘‘མནུསྶཱ, མཱནུསཱ’’ཏི ཙ ཝུཙྩནྟི. ཏཏོ ཨེཝ ཧི ཏེ ‘‘མཱནཝཱ, མནུཛཱ’’ཏི ཙ ཝོཧརཱིཡནྟི. མནུསྶབྷཱུཏསྶཱཏི མནུསྶེསུ བྷཱུཏསྶ ཛཱཏསྶ, མནུསྶབྷཱཝཾ ཝཱ པཏྟསྶཱཏི ཨཏྠོ. ཨཡཉྩ ནཡོ ལོཀིཡམཧཱཛནསྶ ཝསེན ཝུཏྟོ. མཧཱབོདྷིསཏྟཱནཾ པན སནྟཱནསྶ མཧཱབྷིནཱིཧཱརཏོ པཊྛཱཡ ཀུསལདྷམྨཔཊིཔཏྟིཡཾ སམྨདེཝ ཨབྷིསངྑཏཏྟཱ ཏེསཾ སུགཏིཡཾ, ཨཏྟནོ ཨུཔྤཛྫནདུགྒཏིཡཉྩ ནིབྦཏྟཱནཾ ཀུསལཀམྨཾ གརུཏརམེཝཱཏི དསྶེཏུཾ ‘‘ཨཀཱརཎཾ ཝཱ ཨེཏ’’ནྟིཨཱདི ཝུཏྟཾ.

ཨེཝརཱུཔེ ¶ ཨཏྟབྷཱཝེཏི ཧཏྠིཨཱདིཨཏྟབྷཱཝེ. ཋིཏེན ཀཏཀམྨཾ ན སཀྐཱ སུཁེན དཱིཔེཏུཾ ལོཀེ ཨཔྤཉྙཱཏརཱུཔཏྟཱ. སུཁེན དཱིཔེཏུཾ ‘‘ཨསུཀསྨིཾ དེསེ ཨསུཀསྨིཾ ནགརེ ཨསུཀོ ནཱམ རཱཛཱ, བྲཱཧྨཎོ ཧུཏྭཱ ཨིམཾ ཀུསལཀམྨཾ ཨཀཱསཱི’’ཏི ཨེཝཾ སུཝིཉྙཱཔཡབྷཱཝཏོ. ཐིརགྒཧཎོཏི ¶ ཨསིཐིལགྒཱཧཱི ཐཱམཔྤཏྟགྒཧཎོ. ནིཙྩལགྒཧཎོཏི ཨཙཉྩལགྒཱཧཱི ཏཏྠ ཀེནཙིཔི ཨསཾཧཱརིཡོ ¶ . པཊིཀུཊཏཱིཏི སཾཀུཊཏི, ཛིགུཙྪནཝསེན ཝིཝཊྚཏི ཝཱ. པསཱརིཡཏཱིཏི ཝིཏྠཏཾ ཧོཏི ཝེཔུལླཾ པཱཔུཎཱཏི.

ཏཝེསོ མཧཱསམུདྡསདིསོཏི ཨེསོ ཨུདཀོགྷོ ཏེཝ མཧཱསམུདྡསདིསོ.

དཱིཡཏི ཨེཏེནཱཏི དཱནཾ, པརིཙྩཱགཙེཏནཱ. དིཡྻནཝསེནཱཏི དེཡྻདྷམྨསྶ པརིཡཏྟཾ ཀཏྭཱ པརིཙྩཛནཝསེན དཱནཾ. སཾཝིབྷཱགཀརཎཝསེནཱཏི ཏསྶེཝ ཨཏྟནཱ སདྡྷིཾ པརསྶ སཾཝིབྷཛནཝསེན སཾཝིབྷཱགོ, ཏཐཱཔཝཏྟཱ ཙེཏནཱ. སཱིལསམཱདཱནེཏི སཱིལསྶ སམྨདེཝ ཨཱདཱནེ, གཧཎེ པཝཏྟནེཏི ཨཏྠོ. ཏཾ པཝཏྟིཀཱལེན དསྶེནྟོ ‘‘པཱུརཎཀཱལེ’’ཏི ཨཱཧ. མཱཏུ ཧིཏོ མཏྟེཡྻོ, ཡསྶ པན དྷམྨསྶ ཝསེན སོ ‘‘མཏྟེཡྻོ’’ཏི ཝུཙྩཏི, སོ མཏྟེཡྻཏཱཏི ཨཱཧ ‘‘མཱཏུ ཀཱཏབྦཝཏྟེ’’ཏི. ཨེསེཝ ནཡོ ‘‘པེཏྟེཡྻཏཱཡཱ’’ཏིཨཱདཱིསུ. ཨཉྙཏརཉྙཏརེསཱུཏི ཨཉྙམཉྙཝིསིཊྛེསུ ཨཉྙེསུ, ཏེ པན ཀུསལབྷཱཝེན ཝུཏྟཱ ཀུསལཱཏི ཨཱཧ ‘‘ཨེཝརཱུཔེསཱུ’’ཏི. ཨདྷིཀུསལེསཱུཏི ཨབྷིཝིསིཊྛེསུ ཀུསལེསུ, སཱ པན ཨབྷིཝིསིཊྛཏཱ ཨུཔཱདཱཡུཔཱདཱཡ ཧོཏི. ཡཾ པནེཏྠ ཨུཀྐཾསགཏཾ ཨདྷིཀུསལཾ, ཏདུཀྐཾསནཡེན ཨིདྷཱདྷིཔྤེཏནྟི ཏཾ དསྶེཏུཾ ‘‘ཨཏྠི ཀུསལཱ, ཨཏྠི ཨདྷིཀུསལཱ’’ཏིཨཱདི ཝུཏྟཾ. ནནུ པཉྙཱཔཱརམིསངྒཧཉཱཎསམྦྷཱརབྷཱུཏཱ ཀུསལཱ དྷམྨཱ ནིཔྤརིཡཱཡེན སབྦཉྙུཏཉྙཱཎཔཊིལཱབྷཔཙྩཡཱ ཀུསལཱ ནཱམ, ཨིམེ པན མཧཱཔུརིསལཀྑཎནིབྦཏྟཀཱ པུཉྙསམྦྷཱརབྷཱུཏཱ ཀསྨཱ ཏཐཱ ཝུཏྟཱཏི? སབྦེསམྤི མཧཱབོདྷིསཏྟསནྟཱནགཏཱནཾ པཱརམིདྷམྨཱནཾ ¶ སབྦཉྙུཏཉྙཱཎཔཊིལཱབྷཔཙྩཡབྷཱཝཏོ. མཧཱབྷིནཱིཧཱརཏོ པཊྛཱཡ ཧི མཧཱཔུརིསོ ཡཾ ཀིཉྩི པུཉྙཾ ཀརོཏི, སབྦཾ ཏཾ སམྨཱསམྦོདྷིསམདྷིགམཱཡེཝ པརིཎཱམེཏི. ཏཐཱ ཧི སསམྦྷཱརཱབྱཱསོ, དཱིགྷཀཱལཱབྱཱསོ, ནིརནྟརཱབྱཱསོ, སཀྐཙྩཱབྱཱསོཏི ཙཏྟཱརོ ཨབྱཱསཱ ཙཏུརདྷིཊྛཱནཔརིཔཱུརིཏསམྦནྡྷཱ ཨནུཔུབྦེན མཧཱབོདྷིཊྛཱནཱ སམྤཛྫནྟི.

སཀིམྤཱིཏི ¶ པི-སདྡེན ཨནེཀཝཱརམྤི ཀཏཾ ཝིཛཱཏིཡེན ཨནྟརིཏཾ སངྒཎྷཱཏི. ཨབྷིཎྷཀརཎེནཱཏི བཧུལཱིཀཱརེན. ཨུཔཙིཏནྟི ཨུཔརཱུཔརི ཝཌྜྷིཏཾ. པིཎྜཱིཀཏནྟི པིཎྜསོ ཀཏཾ. རཱསཱིཀཏནྟི རཱསིབྷཱཝེན ཀཏཾ. ཨནེཀཀྑཏྟུཉྷི པཝཏྟིཡམཱནཾ ཀུསལཀམྨཾ སནྟཱནེ ཏཐཱལདྡྷཔརིབྷཱཝནཾ པིཎྜཱིབྷཱུཏཾ ཝིཡ, རཱསཱིབྷཱུཏཾ ཝིཡ ཙ ཧོཏི. ཝིཔཱཀཾ པཏི སཾཧཙྩཀཱརིབྷཱཝཏྟཱ ཙཀྐཝཱལ༹ཾ ཨཏིསམྦཱདྷཾ བྷཝགྒཾ ཨཏིནཱིཙཾ, སཙེ པནེ ཏཾ རཱུཔཾ སིཡཱཏི ཨདྷིཔྤཱཡོ. ཝིཔུལཏྟཱཏི མཧནྟཏྟཱ. ཡསྨཱ པན ཏཾ ཀམྨཾ མེཏྟཱཀརུཎཱསཏིསམྤཛཉྙཱཧི པརིགྒཧིཏཏཱཡ དུརསམུསྶཱརིཏཾ པམཱཎཀརཎདྷམྨནྟི པམཱཎརཧིཏཏཱཡ ‘‘ཨཔྤམཱཎ’’ནྟི ཝཏྟབྦཏཾ ཨརཧཏི, ཏསྨཱ ‘‘ཨཔྤམཱཎཏྟཱ’’ཏི ཝུཏྟཾ.

ཨདྷིབྷཝཏཱིཏི ¶ ཕལསྶ ཨུལཱ༹རབྷཱཝེན ཨབྷིབྷུཡྻ ཏིཊྛཏི. ཨཏྠཏོ པཎཱིཏཔཎཱིཏཱནཾ བྷོགཱནཾ པཊིལཱབྷོ ཨེཝཱཏི ཨཱཧ ‘‘ཨཏིརེཀཾ ལབྷཏཱི’’ཏི. ཨདྷིགཙྪཏཱིཏི ཝིནྡཏི, ནིབྦཏྟམཱནོཝ ཏེན སམནྣཱགཏོ ཧོཏཱིཏི ཨཏྠོ. ཨེཀདེསེན ཨཕུསིཏྭཱ སབྦཔྤདེསེཧི ཕུསནཏོ སབྦཔྤདེསེཧི ¶ ཕུསནྟིཡོ ཨེཏེསཾ པཱདཏལཱནཾ སནྟཱིཏི ‘‘སབྦཱཝནྟེཧི པཱདཏལེཧཱི’’ཏི ཝུཏྟཾ. ཡཐཱ ནིཀྑིཔནེ སབྦེ པཱདཏལཔྤདེསཱ སཾཧཙྩཀཱརིནོ ཨནིནྣཏཱཡ སམབྷཱཝཏོ, ཨེཝཾ ཨུདྡྷརཎེཔཱིཏི ཝུཏྟཾ ‘‘སམཾ ཕུསཏི, སམཾ ཨུདྡྷརཏཱི’’ཏི. ཨིདཱནི ཨིམསྶ མཧཱཔུརིསལཀྑཎསྶ སམདྷིགམེན ལདྡྷབྦནིསྶནྡཕལཝིབྷཱཝནམུཁེན ཨཱནུབྷཱཝཾ ཝིབྷཱཝེཏུཾ ‘‘སཙེཔི ཧཱི’’ཏིཨཱདི ཝུཏྟཾ. ཏཏྠ ནརཀནྟི ཨཱཝཱཊཾ. ཨནྟོ པཝིསཏི སམབྷཱཝཱཔཏྟིཡཱ. ‘‘ཙཀྐལཀྑཎེན པཏིཊྛཱཏབྦཊྛཱན’’ནྟི ཨིདཾ ཡཾ བྷཱུམིཔྤདེསཾ པཱདཏལཾ ཕུསཏི, ཏཏྠ ཙཀྐལཀྑཎམྤི ཕུསནཝསེན པཏིཊྛཱཏཱིཏི ཀཏྭཱ ཝུཏྟཾ. ཏསྶ པན ཏཐཱ པཏིཊྛཱནཾ སུཔྤཏིཊྛིཏཔཱདཏཱཡ ཨེཝཱཏི སུཔྤཏིཊྛིཏཔཱདཏཱཡ ཨཱནུབྷཱཝཀིཏྟནེ ‘‘ལཀྑཎནྟརཱནཡནཾ ཀིམཏྠིཡ’’ནྟི ན ཙིནྟེཏབྦཾ. སཱིལཏེཛེནཱཏི སཱིལཔྤབྷཱཝེན. པུཉྙཏེཛེནཱཏི ཀུསལཔྤབྷཱཝེན. དྷམྨཏེཛེནཱཏི ཉཱཎཔྤབྷཱཝེན. ཏཱིཧིཔི པདེཧི བྷགཝཏོ བུདྡྷབྷཱུཏསྶ དྷམྨཱ གཧིཏཱ, ‘‘དསནྣཾ པཱརམཱིན’’ནྟི ཨིམིནཱ བུདྡྷཀརདྷམྨཱ གཧིཏཱ.

༢༠༢. མཧཱསམུདྡོཝ སཱིམཱ སབྦབྷཱུམིསྶརབྷཱཝཏོ. ‘‘ཨཁིལམནིམིཏྟམཀཎྚཀ’’ནྟི ཏཱིཧིཔི པདེཧི ཐེཡྻཱབྷཱཝོཝ ཝུཏྟོཏི ཨཱཧ ‘‘ནིཙྩོར’’ནྟིཨཱདི ¶ . ཁརསམྥསྶཊྛེནཱཏི གྷཊྚནེན དུཀྑསམྥསྶབྷཱཝེན ཁིལཱཏི. ཨུཔདྡཝཔཙྩཡཊྛེནཱཏི ཨནཏྠཧེཏུཏཱཡ ནིམིཏྟཱཏི. ‘‘ཨཁིལ’’ནྟིཨཱདིནཱ ཨེཀཙཱརཱིཧི ཙོརཱབྷཱཝོ ཝུཏྟོ, ‘‘ནིརབྦུད’’ནྟི ཨིམིནཱ པན གཎབནྡྷཝསེན ཝིཙརཎཙོརཱབྷཱཝོ ཝུཏྟོཏི དསྶེཏུཾ ‘‘གུམྦཾ གུམྦཾ ཧུཏྭཱ’’ཏིཨཱདི ཝུཏྟཾ. ཨཝིཀྑམྦྷནཱིཡོཏི ¶ ན ཝིབནྡྷནཱིཡོ ཀེནཙི ཨཔྤཊིབཱཧནཱིཡོ ཋཱནཏོ ཨནིཀྐཌྜྷནཱིཡོ. པཊིཔཀྑཾ ཨནིཊྛཾ ཨཏྠེཏཱིཏི པཙྩཏྠིཀོ, ཨེཏེན པཱཀཊབྷཱཝེན ཝིརོདྷཾ ཨཀརོནྟོ ཝེརིཔུགྒལོ ཝུཏྟོ. པཊིཝིརུདྡྷོ ཨམིཏྟོ པཙྩཱམིཏྟོ, ཨེཏེན པཱཀཊབྷཱཝེན ཝིརོདྷཾ ཀརོནྟོ ཝེརིཔུགྒལོ ཝུཏྟོ. ཝིཀྑམྦྷེཏུཾ ནཱསཀྑིཾསུ, ཨཉྙདཏྠུ སཡམེཝ ཝིགྷཱཏབྱསནཾ པཱཔུཎིཾསུ ཙེཝ སཱཝཀཏྟཉྩ པཝེདེསུཾ.

‘‘ཀམྨ’’ནྟིཨཱདཱིསུ ཀམྨཾ ནཱམ བུདྡྷབྷཱཝཾ ཨུདྡིསྶ ཀཏཱུཔཙིཏོ ལཀྑཎསཾཝཏྟནིཡོ པུཉྙསམྦྷཱརོ. ཏེནཱཧ ‘‘སཏསཧསྶཀཔྤཱདྷིཀཱནཱི’’ཏིཨཱདི. ཀམྨསརིཀྑཀཾ ནཱམ ཏསྶེཝ པུཉྙསམྦྷཱརསྶ ཀརཎཀཱལེ ཀེནཙི ཨཀམྤནཱིཡསྶ དལ༹ྷཱཝཏྠིཏབྷཱཝསྶ ཨནུཙྪཝིཀོ སུཔྤཏིཊྛིཏཔཱདཏཱསངྑཱཏསྶ ལཀྑཎསྶ པརེཧི ཨཝིཀྑམྦྷནཱིཡཏཱཡ ཉཱཔཀནིམིཏྟབྷཱཝོ, སྭཱཡཾ ནིམིཏྟབྷཱཝོ ཏསྶེཝ ལཀྑཎསྶཱཏི ཨཊྛཀཐཱཡཾ ‘‘ཀམྨསརིཀྑཀཾ ནཱམ…པེ… མཧཱཔུརིསལཀྑཎ’’ནྟི ¶ ཝུཏྟཾ. ཋཱནགམནེསུ པཱདཱནཾ དལ༹ྷཱཝཏྠིཏབྷཱཝོ ལཀྑཎཾ ནཱམ. པཱདཱནཾ བྷཱུམིཡཾ སམཾ ནིཀྑིཔནཾ, པཱདཏལཱནཾ སབྦབྷཱགེཧི ཕུསནཾ, སམམེཝ ཨུདྡྷརཎཾ, ཏསྨཱ སུཊྛུ སམཾ སབྦབྷཱགེཧི པཏིཊྛིཏཱ པཱདཱ ཨེཏསྶཱཏི སུཔྤཏིཊྛིཏཔཱདོ, ཏསྶ བྷཱཝོ སུཔྤཏིཊྛིཏཔཱདཏཱཏི ཝུཙྩཏི ལཀྑཎཾ. སུཊྛུ སམཾ བྷཱུམིཡཱ ཕུསནེནེཝ ཧི ནེསཾ ཏཏྠ དལ༹ྷཱཝཏྠིཏབྷཱཝོ སིདྡྷོ, ཡཾ ‘‘ཀམྨསརིཀྑཀ’’ནྟི ཝུཏྟཾ. ལཀྑཎཱནིསཾསོཏི ལཀྑཎཔཊིལཱབྷསྶ ཨུདྲཡོ, ལཀྑཎསཾཝཏྟནིཡསྶ ཀམྨསྶ ཨཱནིསཾསཕལནྟི ཨཏྠོ. ནིསྶནྡཕལཾ པན ཧེཊྛཱ བྷཱཝིཏམེཝ.

༢༠༣. ཀམྨཱདིབྷེདེཏི ཀམྨཀམྨསརིཀྑཀལཀྑཎ ལཀྑཎཱནིསཾསཝིསཉྙིཏེ ཝིབྷཱགེ. གཱཐཱབནྡྷཾ སནྡྷཱཡ ཝུཏྟཾ, ཨཏྠོ པན ཨཔུབྦཾ ནཏྠཱིཏི ཨདྷིཔྤཱཡོ. པོརཱཎཀཏྠེརཱཏི ཨཊྛཀཐཱཙརིཡཱ. ཝཎྞནཱགཱཐཱཏི ¶ ཐོམནཱགཱཐཱ ཝུཏྟམེཝཏྠཾ གཧེཏྭཱ ཐོམནཱཝསེན པཝཏྟཏྟཱ. ཨཔརབྷཱགེ ¶ ཐེརཱ ནཱམ པཱལི༹ཾ, ཨཊྛཀཐཉྩ པོཏྠཀཱརོཔནཝསེན སམཱགཏཱ མཧཱཐེརཱ, ཡེ སཱཊྛཀཐཾ པིཊཀཏྟཡཾ པོཏྠཀཱརུལ༹ྷཾ ཀཏྭཱ སདྡྷམྨཾ ཨདྡྷནིཡཙིརཊྛིཏིཀཾ ཨཀཾསུ. ཨེཀཔདིཀོཏི ‘‘དལ༹ྷསམཱདཱནོ ཨཧོསཱི’’ཏིཨཱདིཔཱཋེ ཨེཀེཀཔདགཱཧཱི. ཨཏྠུདྡྷཱརོཏི ཏདཏྠསྶ སུཁགྒཧཎཏྠཾ གཱཐཱབནྡྷཝསེན ཨུདྡྷརཎཏོ ཨཏྠུདྡྷཱརབྷཱུཏོ, ཏཡིདཾ པཱལི༹ཡཾ ཨཱགཏཔདཱནི གཧེཏྭཱ གཱཐཱབནྡྷཝསེན ཏདཏྠཝིཙཱརཎབྷཱཝདསྶནཾ, ན པན དྷམྨབྷཎྜཱགཱརིཀེན ཋཔིཏབྷཱཝཔཊིཀྑིཔནནྟི དཊྛབྦཾ.

ཀུསལདྷམྨཱནཾ ཝཙཱིསཙྩསྶ བཧུཀཱརཏཾ, ཏཔྤཊིཔཀྑསྶ ཙ མུསཱཝཱདསྶ མཧཱསཱཝཛྫཏཾ དསྶེཏུཾ ཨནནྟརམེཝ ཀུསལཀམྨཔཐདྷམྨེ ཝདནྟོཔི ཏཏོ ཝཙཱིསཙྩཾ ནཱིཧརིཏྭཱ ཀཐེཏི སཙྩེཏི ཝཱ སནྣིདྷཱནེཝ ‘‘དྷམྨེ’’ཏི ཝུཙྩམཱནཱ ཀུསལཀམྨཔཐདྷམྨཱ ཨེཝ ཡུཏྟཱཏི ཝུཏྟཾ ‘‘དྷམྨེཏི དསཀུསལཀམྨཔཐདྷམྨེ’’ཏི. གོབལཱིབདྡཉཱཡེན ཝཱ ཨེཏྠ ཨཏྠོ ཝེདིཏབྦོ. ཨིནྡྲིཡདམནེཏི ཨིནྡྲིཡསཾཝརེ. ཀུསལཀམྨཔཐགྒྷཎེནསྶ ཝཱརིཏྟསཱིལམེཝ གཧིཏནྟི ཨིཏརམྤི སངྒཧེཏྭཱ དསྶེཏུཾ སཾཡམསྶེཝ གཧཎཾ ཀཏནྟི ‘‘སཾཡམེཏི སཱིལསཾཡམེ’’ཏི ཝུཏྟཾ. སུཙི ཝུཙྩཏི པུགྒལོ ཡསྶ དྷམྨསྶ ཝསེན, ཏཾ སོཙེཡྻཾ, ཀཱཡསུཙརིཏཱདི. ཨེཏསྶེཝ ཧི ཝིབྷཱགསྶ དསྶནཏྠཾ ཝུཏྟམྤི ཙེཏཾ པུན ཝུཏྟཾ, མནོསོཙེཡྻགྒཧཎེན ཝཱ ཛྷཱནཱདིཨུཏྟརིམནུསྶདྷམྨཱནམྤི སངྒཎྷནཏྠཾ སོཙེཡྻགྒཧཎཾ. ཨཱལཡབྷཱུཏནྟི སམཐཝིཔསྶནཱནཾ ¶ ཨདྷིཊྛཱནབྷཱུཏཾ. ཨུཔོསཐཀམྨནྟི ཨུཔོསཐདིཝསེ སམཱདིཡིཏྭཱ སམཱཙརིཏབྦཾ པུཉྙཀམྨཾ ཨུཔོསཐོ སཧཙརཎཉཱཡེན. ‘‘ཨཝིཧིཾསཱཡཱཏི སཏྟཱནཾ ཨཝིཧེཋནཱཡཱ’’ཏི ཝདནྟི, ཏཾ པན སཱིལགྒཧཎེནེཝ གཧིཏཾ. ཏསྨཱ ཨཝིཧིཾསཱཡཱཏི ཀརུཎཱཡཱཏི ཨཏྠོ. ཨཝིཧིཾསཱགྒཧཎེནེཝ ཙེཏྠ ཨཔྤམཉྙཱསཱམཉྙེན ཙཏྟཱརོཔི བྲཧྨཝིཧཱརཱ ཨུཔཙཱརཱཝཏྠཱ གཧིཏཱ ལཀྑཎཧཱརནཡེན. སཀལནྟི ཨནཝསེསཾ པརིཔུཎྞཾ. ཨེཝམེཏྠ ཀཱམཱཝཙརཏྟབྷཱཝཔརིཡཱཔནྣཏྟཱ ལཀྑཎསྶ ཏཾསཾཝཏྟནིཀཀཱམཱཝཙརཀུསལདྷམྨཱ ཨེཝ པཱརམིཏཱསངྒཧཔུཉྙསམྦྷཱརབྷཱུཏཀཱཡསུཙརིཏཱདཱིཧི ¶ དྭཱདསདྷཱ ཝིབྷཏྟཱ ཨེཝ. གཱཐཱཡཾ ‘‘སཙྩེ’’ཏིཨཱདིནཱ དསདྷཱ སངྒཡ྄ཧ དསྶིཏཱ. ཨེས ནཡོ སེསལཀྑཎེཔི.

ཨཾནུབྷཱིཏི གཱཐཱསུཁཏྠཾ ཨཀཱརཾ སཱནུནཱསིཀཾ ཀཏྭཱ ཝུཏྟཾ. བྱཉྫནཱནི ལཀྑཎཱནི ཨཱཙིཀྑནྟཱིཏི ཝེཡཉྫནིཀཱ. ཝིཀྑམྦྷེཏབྦནྟི པཊིབཱཧིཏབྦཾ ཏསྶཱཏི ¶ མཧཱཔུརིསསྶ, ཏསྶ ཝཱ མཧཱཔུརིསལཀྑཎསྶ. ལཀྑཎསཱིསེན ཙེཏྠ ཏཾསཾཝཏྟནིཀཔུཉྙསམྦྷཱརོ ཝུཙྩཏི.

པཱདཏལཙཀྐལཀྑཎཝཎྞནཱ

༢༠༤. བྷཡཾ ནཱམ བྷཱིཏི, ཏཾ པན ཨུབྦིཛྫནཱཀཱརེན, ཨུཏྟསནཱཀཱརེན ཙ པཝཏྟིཡཱ དུཝིདྷནྟི ཨཱཧ ‘‘ཨུབྦེགབྷཡཉྩེཝ ཨུཏྟཱསབྷཡཉྩཱ’’ཏི. ཏདུབྷཡམྤི བྷཡཾ ཝིབྷཱགེན དསྶེཏུཾ ‘‘ཏཏྠཱ’’ཏིཨཱདི ཝུཏྟཾ. ཨཔནཱུདིཏཱཏི ཡཐཱ ཙོརཱདཡོ ཝིལུཔྤནབནྡྷནཱདཱིནི པརསྶ ན ཀརོནྟི, ཀཏཉྩ པཙྩཱཧརཎཱདིནཱ པཊིཔཱཀཏིཀཾ ཧོཏི, ཨེཝཾ ཡཐཱ ཙ ཙཎྜཧཏྠིཨཱདཡོ ¶ དཱུརཏོ པརིཝཛྫིཏཱ ཧོནྟི, ཨཔརིཝཛྫིཏེ ཏསྶ ཡཐཱ ཋཱནེ ཋིཏེཧི ཨབྷིབྷཝོ ན ཧོཏི, ཨེཝཾ ཨཔནཱུདིཏཱ. ཨཏིཝཱཧེཏཱིཏི ཨཏིཀྐཱམེཏི. ཏཾ ཋཱནནྟི ཏཾ སཱསངྐཊྛཱནཾ. ཨསཀྐོནྟཱནནྟི ཨུཔཡོགཏྠེ སཱམིཝཙནཾ, ཨསཀྐོནྟེཏི ཨཏྠོ. ཨསཀྐོནྟཱནནྟི ཝཱ ཨནཱདརེ སཱམིཝཙནཾ. སཧ པརིཝཱརེནཱཏི སཔརིཝཱརཾ. ཏཏྠ ཀིཉྩི དེཡྻདྷམྨཾ དེནྟོ ཡདཱ ཏསྶ པརིཝཱརབྷཱཝེན ཨཉྙམྤི དེཡྻདྷམྨཾ དེཏི, ཨེཝཾ ཏསྶ ཏཾ དཱནམཡཾ པུཉྙཾ སཔརིཝཱརཾ ནཱམ ཧོཏི.

ཏམཏྠཾ ཝིཏྠཱརེན དསྶེཏུཾ ‘‘ཏཏྠ ཨནྣ’’ནྟིཨཱདི ཝུཏྟཾ. ཏཏྠ ཡཐཱ དེཡྻདྷམྨཾ ཏསྶ ཨནྣདཱནསྶ པརིཝཱརོ, ཨེཝཾ ཏསྶ སཀྐཙྩཀརཎཾ པཱིཏི དསྶེནྟོ ‘‘ཨཐ ཁོ’’ཏིཨཱདིམཱཧ. ཡཱགུབྷཏྟཾ དཏྭཱཝ ཨདཱསཱིཏི ཡོཛནཱ. ཨེས ནཡོ ཨིཏོ པརཏོཔི. སུཏྟཾ ཝཊྚེཏཱིཏི ཙཱིཝརསྶ སིབྦནསུཏྟཀཾ དུཝཊྚཏིཝཊྚཱདིཝསེན ཝཊྚིཏཾ ཨཀཱསི. རཛནནྟི ཨལླིཨཱདིརཛནཝཏྠུཾ. པཎྜུཔལཱསནྟི རཛནུཔགམེཝ པཎྜུཝཎྞཾ པལཱསཾ.

ཧེཊྛིམཱནཱིཏི ཨནྣཱདཱིནི ཙཏྟཱརི. ནིསདགྒཧཎེནེཝ ནིསདཔོཏོཔི གཧིཏོ. ཙཱིནཔིཊྛཾ སིནྡྷུརཀཙུཎྞཾ. ཀོཛཝནྟི ཨུདྡལོམིཨེཀནྟལོམིཨཱདིཀོཛཝཏྠརཎ. སུཝིབྷཏྟཨནྟརཱནཱིཏི སུཊྛུ ཝིབྷཏྟཨནྟརཱནི, ཨེཏེན ཙཀྐཱཝཡཝཊྛཱནཱནཾ སུཔརིཙྪིནྣཏཾ དསྶེཏི.

ལདྡྷཱབྷིསེཀཱ ཁཏྟིཡཱ ཨཏྟནོ ཝིཛིཏེ ཝིསཝིཏཱཡ བྲཱཧྨཎཱདིཀེ ¶ ཙཏཱུཧི སངྒཧཝཏྠཱུཧི རཉྫེཏུཾ ¶ སཀྐོནྟི, ན ཨིཏརཱཏི ཨཱཧ ‘‘རཱཛཱནོཏི ཨབྷིསིཏྟཱ’’ཏི. རཱཛཏོ ཡཐཱལདྡྷགཱམནིགམཱདིཾ ཨིསྶརཝཏཱཡ བྷུཉྫནྟཱིཏི བྷོཛཀཱ, ཏཱདིསོ བྷོགོ ཨེཏེསཾ ཨཏྠི ¶ , ཏཏྠ ཝཱ ནིཡུཏྟཱཏི བྷོགིཀཱ, ཏེ ཨེཝ ‘‘བྷོགིཡཱ’’ཏི ཝུཏྟཱ. སཔརིཝཱརཾ དཱནནྟི ཝུཏྟནཡེན སཔརིཝཱརདཱནཾ. ཛཱནཱཏཱུཏི ‘‘སདེཝཀོ ལོཀོ ཛཱནཱཏཱུ’’ཏི ཨིམིནཱ ཝིཡ ཨདྷིཔྤཱཡེན ནིབྦཏྟཾ ཙཀྐལཀྑཎནྟི ལཀྑཎསྶེཝ ཀམྨསརིཀྑཏཱ དསྶིཏཱ. ཨེཝཾ སཏི ཏིཀམེཝ སིཡཱ, ན ཙཏུཀྐཾ, ཏསྨཱ ཙཀྐལཀྑཎསྶ མཧཱཔརིཝཱརཏཱཡ ཉཱཔཀནིམིཏྟབྷཱཝོ ཀམྨསརིཀྑཀཾ ནཱམ. ཏེནེཝཱཧ ‘‘སཔརིཝཱརཾ…པེ… ཛཱནཱཏཱུཏི ནིབྦཏྟ’’ནྟི. ‘‘དཱིགྷཱཡུཀཏཱཡ ཏཾ ནིམིཏྟ’’ནྟི (དཱི. ནི. ༣.༢༠༧) ཙ ཝཀྑཏི, ཏཐཱ ‘‘ཏཾ ལཀྑཎཾ བྷཝཏི ཏདཏྠཛོཏཀ’’ནྟི (དཱི. ནི. ༣.༢༢༡) ཙ. ནིསྶནྡཕལཾ པན པཊིཔཀྑཱབྷིབྷཝོ དཊྛབྦོ. ཏེནེཝཱཧ གཱཐཱཡཾ ‘‘སཏྟུམདྡནོ’’ཏི.

༢༠༥. ཨེཏནྟི ཨེཏཾ གཱཐཱབནྡྷབྷཱུཏཾ ཝཙནཾ, ཏཾ པནཏྠཏོ གཱཐཱ ཨེཝཱཏི ཨཱཧ ‘‘ཨིམཱ ཏདཏྠཔརིདཱིཔནཱ གཱཐཱ ཝུཙྩནྟཱི’’ཏི.

པུརཏྠཱཏི ཝཱ ‘‘པུརེ’’ཏི ཝུཏྟཏོཔི པུབྦེ. ཡསྨཱ མཧཱཔུརིསོ ན ཨཏཱིཏཱཡ ཨེཀཛཱཏིཡཾ, ནཱཔི ཀཏིཔཡཛཱཏཱིསུ, ཨཐ ཁོ པུརིམཔུརིམཏརཱསུ ཏཐཱཝ པཊིཔནྣོ, ཏསྨཱ ཏཏྠ པཊིཔཏྟིཾ དསྶེཏུཾ ‘‘པུརེ པུརཏྠཱ’’ཏི ཝུཏྟཾ. ཨིམིསྶཱཔི ཛཱཏིཡཾ ཨཏཱིཏཀཱལཝསེན ‘‘པུརེཔུརཏྠཱ’’ཏི ཝཏྟུཾ ལབྦྷཱཏི ཏཏོ ཝིསེསནཏྠཾ ‘‘པུརིམཱསུ ¶ ཛཱཏཱིསཱུ’’ཏི ཝུཏྟནྟི ཨཱཧ ‘‘ཨིམིསྶཱ’’ཏིཨཱདི. ཀེཙི ‘‘ཨིམིསྶཱ ཛཱཏིཡཱ པུབྦེ ཏུསིཏདེཝལོཀེ ཀཏཀམྨཔཊིཀྑེཔཝཙན’’ནྟི ཝདནྟི, ཏཾ ཏེསཾ མཏིམཏྟཾ ཏཏྠ ཏཱདིསསྶ ཀཏཀམྨསྶ ཨབྷཱཝཏོ. ཨཔནཱུདནོཏི ཨཔནེཏཱ. ཨདྷིམུཏྟོཏི ཡུཏྟཔཡུཏྟོ.

པུཉྙཀམྨེནཱཏི དཱནཱདིཔུཉྙཀམྨེན. ཨེཝཾ སནྟེཏི སཏམཏྟེན པུཉྙཀམྨེན ཨེཀེཀཾ ལཀྑཎཾ ནིབྦཏྟེཡྻ, ཨེཝཾ སཏི. ན རོཙཡིཾསཱུཏི ཀེཝལཾ སཏམཏྟེན པུཉྙཀམྨེན ལཀྑཎནིབྦཏྟིཾ ན རོཙཡིཾསུ ཨཊྛཀཐཱཙརིཡཱ. ཀཐཾ པན རོཙཡིཾསཱུཏི ཨཱཧ ‘‘ཨནནྟེསུ པནཱ’’ཏིཨཱདི. ཨེཀེཀཾ ཀམྨནྟི ཨེཀེཀཾ དཱནཱདིཔུབྦཀམྨཾ. ཨེཀེཀཾ སཏགུཎཾ ཀཏྭཱཏི ཨནནྟཱསུ ལོཀདྷཱཏཱུསུ ཡཏྟཀཱ སཏྟཱ, ཏེཧི སབྦེཧི པཙྩེཀཾ སཏཀྑཏྟུཾ ཀཏཱནི དཱནཱདིཔུཉྙཀམྨཱནི ཡཏྟཀཱནི, ཏཏོ ཨེཀེཀཾ པུཉྙཀམྨཾ མཧཱསཏྟེན སཏགུཎཾ ཀཏཾ ‘‘སཏ’’ནྟི ཨདྷིཔྤེཏཾ, ཏསྨཱ ཨིདྷ སཏ-སདྡོ བཧུབྷཱཝཔརིཡཱཡོ, ན སངྑྱཱཝཙནོཏི དསྶེཏི ‘‘སཏགྒྷི སཏཾ དེཝམནུསྶཱ’’ཏིཨཱདཱིསུ ¶ ཝིཡ. ཏེནཱཧ ‘‘ཏསྨཱ སཏཔུཉྙལཀྑཎོཏི ཨིམམཏྠཾ རོཙཡིཾསཱུ’’ཏི.

ཨཱཡཏཔཎྷིཏཱདིཏིལཀྑཎཝཎྞནཱ

༢༠༦. སརསཙུཏི ¶ ནཱམ ཛཱཏསྶ སཏྟསྶ ཡཱཝཛཱིཝཾ ཛཱིཝིཏྭཱ པཀཏིཡཱ མརཎཾ. ཨཱཀཌྜྷཛིཡསྶ དྷནུདཎྜསྶ ཝིཡ པཱདཱནཾ ཨནྟོམུཁཾ ཀུཊིལཏཱཡ ཨནྟོཝངྐཔཱདཏཱ. བཧིམུཁཾ ཀུཊིལཏཱཡ བཧིཝངྐཔཱདཏཱ. པཱདཏལསྶ མཛ྄ཛྷེ ཨཱུནཏཱཡ ཨུཀྐུཊིཀཔཱདཏཱ. ཨགྒཔཱདེན ཁཉྫནཀཱ ཨགྒཀོཎྜཱ. པཎྷིཔྤདེསེན ཁཉྫནཀཱ པཎྷིཀོཎྜཱ. ཨུནྣཏཀཱཡེནཱཏི ཨནོནཏབྷཱཝེན སམུསྶིཏསརཱིརེན ¶ . མུཊྛིཀཏཧཏྠཱཏི ཨཱཝུདྷཱདཱིནཾ གཧཎཏྠཾ ཀཏམུཊྛིཧཏྠཱ. ཕཎཧཏྠཀཱཏི ཨཉྙམཉྙཾ སཾསཊྛངྒུལིཧཏྠཱ. ཨིདམེཏྠ ཀམྨསརིཀྑཀནྟི ཨིདཾ ཨིམེསཾ ཏིཎྞམྤི ལཀྑཎཱནཾ ཏཐཱགཏསྶ དཱིགྷཱཡུཀཏཱཡ ཉཱཔཀནིམིཏྟབྷཱཝོ ཨེཏྠ ཨཱཡཏཔཎྷིཏཱ, དཱིགྷངྒུལིཏཱ བྲཧྨུཛུགཏྟཏཱཏི ཨེཏསྨིཾ ལཀྑཎཏྟཡེ ཀམྨསརིཀྑཀཏྟཾ. ནིསྶནྡཕལཾ པན ཨནནྟརཱཡཏཱདི དཊྛབྦཾ.

༢༠༧. བྷཱཡིཏབྦཝཏྠུནིམིཏྟཾ ཨུཔྤཛྫམཱནམྤི བྷཡཾ ཨཏྟསིནེཧཧེཏུཀཾ པཧཱིནསིནེཧསྶ ཏདབྷཱཝཏོཏི ཨཱཧ ‘‘ཡཐཱ མཡ྄ཧཾ མརཎཏོ བྷཡཾ མམ ཛཱིཝིཏཾ པིཡ’’ནྟི. སུཙིཎྞེནཱཏི སུཊྛུ ཀཏཱུཔཙིཏེན སུཙརིཏཀམྨུནཱ.

ཙཝིཏྭཱཏི སགྒཏོ ཙཝིཏྭཱ. ‘‘སུཛཱཏགཏྟོ སུབྷུཛོ’’ཏི ཨཱདཡོ སརཱིརཱཝཡཝགུཎཱ ཨིམེཧི ལཀྑཎེཧི ཨཝིནཱབྷཱཝིནོཏི དསྶེཏུཾ ཝུཏྟཱ. ཙིརཡཔནཱཡཱཏི ཨཏྟབྷཱཝསྶ ཙིརཀཱལཾ པཝཏྟནཱཡ. ཏེནཱཧ ‘‘དཱིགྷཱཡུཀབྷཱཝཱཡཱ’’ཏི. ཏཏོཏི ཙཀྐཝཏྟཱི ཧུཏྭཱ ཡཱཔནཏོ. ཝསིཔྤཏྟོཏི ཛྷཱནཱདཱིསུ ཝསཱིབྷཱཝཉྩེཝ ཙེཏོཝསིབྷཱཝཉྩ པཏྟོ ཧུཏྭཱ, ཀཐཾ ཨིདྡྷིབྷཱཝནཱཡ ཨིདྡྷིཔཱདབྷཱཝནཱཡཱཏི ཨཏྠོ. ཡཱཔེཏི ཙིརཏརནྟི ཡོཛནཱ.

སཏྟུསྶདཏཱལཀྑཎཝཎྞནཱ

༢༠༨. རསོ ཛཱཏོ ཨེཏེསནྟི རསིཏཱནི, མཧཱརསཱནི. ཏེནཱཧ ‘‘རསསམྤནྣཱན’’ནྟི. པིཊྛཁཛྫཀཱདཱིནཱིཏི པཱུཔསཀྑལིམོདཀཱདཱིནི. ཨཱདི-སདྡེན པན ཀདལིཕལཱདིཾ སངྒཎྷཱཏི. པིཊྛཾ པཀྑིཔིཏྭཱ པཙིཏབྦཔཱཡསཾ པིཊྛཔཱཡསཾ. ཨཱདི-སདྡེན ཏཐཱརཱུཔབྷོཛྫཡཱགུཨཱདིཾ སངྒཎྷཱཏི.

ཨིདྷ ¶ ¶ ¶ ཀམྨསརིཀྑཀཾ ནཱམ སཏྟུསྶདཏཱལཀྑཎསྶ པཎཱིཏལཱབྷིཏཱཡ ཉཱཔཀནིམིཏྟབྷཱཝོ. ཨིམིནཱ ནཡེན ཏཏྠ ཏཏྠ ལཀྑཎེ ཀམྨསརིཀྑཀཾ ནིདྡྷཱརེཏྭཱ ཡོཛེཏབྦཾ.

༢༠༩. ཨུཏྟམོ ཨགྒརསདཱཡཀོཏི སབྦསཏྟཱནཾ ཨུཏྟམོ ལོཀནཱཐོ ཨགྒཱནཾ པཎཱིཏཱནཾ རསཱནཾ དཱཡཀོ. ཨུཏྟམཱནཾ ཨགྒརསཱནནྟི པཎཱིཏེསུཔི པཎཱིཏརསཱནཾ. ཁཛྫབྷོཛྫཱདིཛོཏཀནྟི ཁཛྫབྷོཛྫཱདིལཱབྷཛོཏཀཾ. ལཱབྷསཾཝཏྟནིཀསྶ ཀམྨསྶ ཕལཾ ‘‘ལཱབྷསཾཝཏྟནིཀ’’ནྟི ཀཱརཎཱུཔཙཱརེན ཝདཏི. ཏདཏྠཛོཏཀནྟི ཝཱ ཏསྶ པཎཱིཏབྷོཛནདཱཡཀཏྟསངྑཱཏསྶ ཨཏྠསྶ ཛོཏཀཾ. ཏདཱདྷིགཙྪཏཱིཏི ཨེཏྠ ཨཱ-ཀཱརོ ནིཔཱཏམཏྟནྟི ཨཱཧ ‘‘ཏཾ ཨདྷིགཙྪཏཱི’’ཏི. ལཱབྷིརུཏྟམནྟི ར-ཀཱརོ པདསནྡྷིཀརོ.

ཀརཙརཎཱདིལཀྑཎཝཎྞནཱ

༢༡༠. པབྦཛིཏཔརིཀྑཱརཾ པཏྟཙཱིཝརཱདིཾ གིཧིཔརིཀྑཱརཾ ཝཏྠཱཝུདྷཡཱནསཡནཱདིཾ.

སབྦནྟི སབྦཾ ཨུཔཀཱརཾ. མཀྑེཏྭཱ ནཱསེཏི མཀྑིབྷཱཝེ ཋཏྭཱ. ཏེལེན ཝིཡ མཀྑེཏཱིཏི སཏདྷོཏཏེལེན མཀྑེཏི ཝིཡ. ཨཏྠསཾཝཌྜྷནཀཐཱཡཱཏི ཧིཏཱཝཧཀཐཱཡ. ཀཐཱགཧཎཉྩེཏྠ ནིདསྶནམཏྟཾ. པརེསཾ ཧིཏཱཝཧོ ཀཱཡཔཡོགོཔི ཨཏྠཙརིཡཱ. ཨཊྛཀཐཱཡཾ པན ཝཙཱིཔཡོགཝསེནེཝ ཨཏྠཙརིཡཱ ཝུཏྟཱ.

སམཱནཏྟཏཱཡཱཏི སདིསབྷཱཝེ སམཱནཊྛཱནེ ཋཔནེན, ཏཾ པནསྶ སམཱནཊྛཱནེ ཋཔནཾ ཨཏྟསདིསཏཱཀརཎཾ, སུཁེན ཨེཀསམྦྷོགཏཱ, ཨཏྟནོ སུཁུཔྤཏྟིཡཾ; ཏསྶ ཙ དུཀྑུཔྤཏྟིཡཾ ཏེན ཨཏྟནོ ཨེཀསམྦྷོགཏཱཏི ཨཱཧ ‘‘སམཱནསུཁདུཀྑབྷཱཝེནཱ’’ཏི. སཱ ཙ སམཱནསུཁདུཀྑཏཱ ཨེཀཏོ ནིསཛྫཱདིནཱ པཱཀཊཱ ཧོཏཱིཏི ཏཾ དསྶེནྟོ ‘‘ཨེཀཱསནེ’’ཏིཨཱདིམཱཧ. ན ཧི སཀྐཱ ཨེཀཔརིབྷོགོ ཀཱཏུཾ ཛཱཏིཡཱ ཧཱིནཏྟཱ. ཏཐཱ ཨཀརིཡམཱནེ ¶ ཙ སོ ཀུཛ྄ཛྷཏི བྷོགེན ཨདྷིཀཏྟཱ, ཏསྨཱ དུསྶངྒཧོ. ན ཧི སོ ཨེཀཔརིབྷོགཾ ཨིཙྪཏི ཛཱཏིཡཱ ཧཱིནབྷཱཝཏོ. ན ཨཀརིཡམཱནེ ཙ ཀུཛ྄ཛྷཏི བྷོགེན ཧཱིནབྷཱཝཏོ. ཨུབྷོཧཱིཏི ཛཱཏིབྷོགེཧི. སདིསོཔི སུསངྒཧོ ཨེཀསདིསབྷཱཝེནེཝ ¶ ཨིཏརེན སཧ ཨེཀཔརིབྷོགསྶ པཙྩཱསཱིསཱཡ, ཨཀརཎེ ཙ ཏསྶ ཀུཛ྄ཛྷནསྶཱབྷཱཝཏོ. ཨདཱིཡམཱནེཔི ཀིསྨིཉྩི ཨཱམིསེ ཨཀརིཡམཱནེཔི སངྒཧེ. ན པཱཔཀེན ཙིཏྟེན པསྶཏི པེསལབྷཱཝཏོ. ཏཏོ ཨེཝ པརིབྷོགོཔི…པེ… ཧོཏི. ཨེཝརཱུཔནྟི གིཧཱི ཙེ, ཨུབྷོཧི སདིསཾ; པབྦཛིཏོ ཙེ, སཱིལཝནྟནྟི ཨདྷིཔྤཱཡོ.

སུསངྒཧིཏཱཝ ¶ ཧོནྟཱིཏི སུཊྛུ སངྒཧིཏཱ ཨེཝ ཧོནྟི དལ༹ྷབྷཏྟིབྷཱཝཏོ. ཏེནཱཧ ‘‘ན བྷིཛྫནྟཱི’’ཏི.

དཱནཱདིསངྒཧཀམྨནྟི དཱནཱདིབྷེདཾ པརསངྒཎྷནཝསེན པཝཏྟཾ ཀུསལཀམྨཾ.

༢༡༡. ཨནཝཉྙཱཏེན ཨཔརིབྷཱུཏེན སམྦྷཱཝིཏེན. པམོདོ ཝུཙྩཏི ཧཱསོ, ན ཨཔྤམོདེནཱཏི ཨེཏྠ པཊིསེདྷདྭཡེན སོ ཨེཝ ཝུཏྟོ. སོ ཙ ཨོདགྱསབྷཱཝཏྟཱ ན དཱིནོ དྷམྨཱུཔསཉྷིཏཏྟཱ ན གབྦྷཡུཏྟོཏི ཨཱཧ ‘‘ན དཱིནེན ན གབྦྷིཏེནཱཏི ཨཏྠོ’’ཏི. སཏྟཱནཾ ཨགཎྷནགུཎེནཱཏི ཡོཛནཱ.

ཨཏིརུཙིརནྟི ཨཏིཝིཡ རུཙིརཀཏཾ, ཏཾ པན པསྶནྟཱནཾ པསཱདཱཝཧནྟི ཨཱཧ ‘‘སུཔཱསཱདིཀ’’ནྟི. སུཊྛུ ཚེཀནྟི ཨཏིཝིཡ སུནྡརཾ. ཝིདྷཱཏབྦོཏི ཝིདྷཱཏུཾ སནྡིསིཏུཾ སཀྐུཎེཡྻོ. པིཡཾ ཝདཏཱིཏི པིཡཝདཱུ ཡཐཱ ‘‘སབྦཝིདཱུ’’ཏི. སུཁམེཝ སུཁཏཱ, ཏཾ སུཁཏཾ. དྷམྨཉྩ ¶ ཨནུདྷམྨཉྩཱཏི ལོཀུཏྟརདྷམྨཉྩེཝ ཏསྶ ཨནུརཱུཔཔུབྦབྷཱགདྷམྨཉྩ.

ཨུསྶངྑཔཱདཱདིལཀྑཎཝཎྞནཱ

༢༡༢. ‘‘ཨཏྠཱུཔསཾཧིཏ’’ནྟི ཨིམིནཱ ཝཊྚནིསྶིཏཱ དྷམྨཀཐཱ ཝུཏྟཱཏི ཨཱཧ ‘‘ཨིདྷལོཀཔརལོཀཏྠནིསྶིཏ’’ནྟི. ‘‘དྷམྨཱུཔསཾཧིཏ’’ནྟི ཨིམིནཱ ཝིཝཊྚནིསྶིཏཱ, ཏསྨཱ དསཀུསལཀམྨཔཐཱ ཝིཝཊྚསནྣིསྶཡཱ ཝེདིཏབྦཱ. ནིདཾསེསཱིཏི སནྡསྶེསི ཏེ དྷམྨེ པཙྩཀྑེ ཀཏྭཱ པཀཱསེསི. ནིདཾསནཀཐནྟི པཱཀཊཀརཎཀཐཾ. ཛེཊྛཊྛེན ཨགྒོ, པཱསཾསཊྛེན སེཊྛོ, པམུཁཊྛེན པཱམོཀྑོ, པདྷཱནཊྛེན ཨུཏྟམོ, ཧིཏསུཁཏྠིཀེཧི པཀཱརཏོ ཝརཎཱིཡཏོ རཛནཱིཡཏོ པཝརོཏི ཨེཝཾ ཨཏྠཝིསེསཝཱཙཱིནམྤི ‘‘ཨགྒོ’’ཏིཨཱདཱིནཾ པདཱནཾ བྷཱཝཏྠསྶ བྷེདཱབྷཱཝཏོ ‘‘སབྦཱནི ཨཉྙམཉྙཝེཝཙནཱནཱི’’ཏི ཨཱཧ.

ཨུདྡྷངྒམནཱིཡཱཏི ¶ སུཎནྟཱནཾ ཨུཔརཱུཔརི ཝིསེསཾ གམེནྟཱིཏི ཨུདྡྷངྒམནཱིཡཱ. སངྑཱཡ ཨདྷོ པིཊྛིཔཱདསམཱིཔེ ཨེཝ པཏིཊྛིཏཏྟཱ ཨདྷོསངྑཱ པཱདཱ ཨེཏསྶཱཏི ཨདྷོསངྑཔཱདོ. སངྑཱཏི ཙ གོཔྥཀཱནམིདཾ ནཱམཾ.

༢༡༣. དྷམྨདཱནཡཉྙནྟི དྷམྨདཱནསངྑཱཏཾ ཡཉྙཾ.

སུཊྛུ ¶ སཎྛིཏཱཏི སམྨདེཝ སཎྛིཏཱ. པིཊྛིཔཱདསྶ ཨུཔརི པཀཏིཨངྒུལེན ཙཏུརངྒུལེ ཛངྒྷཱཔདེསེ ནིགཱུལ༹ྷཱ ཨཔཉྙཱཡམཱནརཱུཔཱ ཧུཏྭཱ ཋིཏཱཏི ཨཏྠོ.

ཨེཎིཛངྒྷལཀྑཎཝཎྞནཱ

༢༡༤. སིཔྤནྟི སིཀྑིཏབྦཊྛེན ‘‘སིཔྤ’’ནྟི ལདྡྷནཱམཾ སཏྟཱནཾ ཛཱིཝིཀཱཧེཏུབྷཱུཏཾ ཨཱཛཱིཝཝིདྷིཾ. ཛཱིཝིཀཏྠཾ, སཏྟཱནཾ ཨུཔཀཱརཏྠཉྩ ཝེདིཏབྦཊྛེན ཝིཛྫཱ, མནྟསཏྠཱདི. ཙརནྟི ཏེན སུགཏིཾ, སུཁཉྩ གཙྪནྟཱིཏི ཙརཎཾ. ཀམྨསྶཀཏཱཉཱཎཾ ¶ ཨུཏྟརཔདལོཔེན ‘‘ཀམྨ’’ནྟི ཝུཏྟནྟི ཨཱཧ ‘‘ཀམྨནྟི ཀམྨསྶཀཏཱཛཱནནཔཉྙཱ’’ཏི. ཏཱནི ཙེཝཱཏི པུབྦེ ཝུཏྟཧཏྠིཨཱདཱིནི ཙེཝ. སཏྟ རཏནཱནཱིཏི མུཏྟཱདཱིནི སཏྟ རཏནཱནི. ཙ-སདྡེན རཉྙོ ཨུཔབྷོགབྷཱུཏཱནཾ ཝཏྠསེཡྻཱདཱིནཾ སངྒཧོ. རཉྙོ ཨནུཙྪཝིཀཱནཱིཏི རཉྙོ པརིབྷུཉྫནཡོགྱཱནི. སབྦེསནྟི ‘‘རཱཛཱརཧཱནཱི’’ཏིཨཱདིནཱ ཝུཏྟཱནཾ སབྦེསཾཡེཝ ཨེཀཛ྄ཛྷཾ གཧཎཾ. བུདྡྷཱནཾ པརིསཱ ནཱམ ཨོདྷིསོ ཨནོདྷིསོ ཙ སམིཏཔཱཔཱ, ཏཐཏྠཱཡ པཊིཔནྣཱ ཙ ཧོཏཱིཏི ཝུཏྟཾ ‘‘སམཎཱནཾ ཀོཊྛཱསབྷཱུཏཱ ཙཏསྶོ པརིསཱ’’ཏི.

སིཔྤཱདིཝཱཙནནྟི སིཔྤཱནཾ སིཀྑཱཔནཾ. པཱལི༹ཡམྤི ཧི ‘‘ཝཱཙེཏཱ’’ཏི ཝཱཙནསཱིསེན སིཀྑཱཔནཾ དསྶིཏཾ. ཨུཀྐུཊིཀཱསནནྟི ཏཾཏཾཝེཡྻཱཝཙྩཀརཎེན ཨུཀྐུཊིཀསྶ ནིསཛྫཱ. པཡོཛནཝསེན གེཧཏོ གེཧཾ གཱམཏོ གཱམཾ ཛངྒྷཱཡོ ཀིལམེཏྭཱ པེསནཾ ཛངྒྷཔེསནིཀཱ. ལིཁིཏྭཱ པཱཏིཏཾ ཝིཡ ཧོཏི ཨཔརིཔུཎྞབྷཱཝཏོ. ཨནུཔུབྦཨུགྒཏཝཊྚིཏནྟི གོཔྥཀཊྛཱནཏོ པཊྛཱཡ ཡཱཝ ཛཱཎུཔྤདེསཱ མཾསཱུཔཙཡསྶ ཨནུཀྐམེན སམནྟཏོ ཝཌྜྷིཏཏྟཱ ཨནུཔུབྦེན ཨུགྒཏཾ ཧུཏྭཱ སུཝཊྚིཏཾ. ཨེཎིཛངྒྷལཀྑཎནྟི སཎྛཱནམཏྟེན ཨེཎིམིགཛངྒྷཱསདིསཛངྒྷལཀྑཎཾ.

༢༡༥. ‘‘ཡཏུཔགྷཱཏཱཡཱ’’ཏི ¶ ཨེཏྠ ཏ-ཀཱརོ པདསནྡྷིཀརོ, ཨནུནཱསིཀལོཔེན ནིདྡེསོཏི ཨཱཧ ‘‘ཡ’’ནྟིཨཱདི. ‘‘ཨུདྡྷགྒལོམཱ སུཁུམཏྟཙོཏྠཏཱ’’ཏི ཝུཏྟཏྟཱ ཙོདཀེན ‘‘ཀིཾ པན ཨཉྙེན ཀམྨེན ཨཉྙཾ ལཀྑཎཾ ནིབྦཏྟཏཱི’’ཏི ཙོདིཏོ, ཨཱཙརིཡོ ‘‘ན ནིབྦཏྟཏཱི’’ཏི ཝཏྭཱ ¶ ‘‘ཡདི ཨེཝཾ ཨིདྷ ཀསྨཱ ལཀྑཎནྟརཾ ཀཐིཏ’’ནྟི ཨནྟོལཱིནམེཝ ཙོདནཾ པརིཧརནྟོ ‘‘ཡཾ པན ནིབྦཏྟཏཱིཏི…པེ… ཨིདྷ ཝུཏྟ’’ནྟི ཨཱཧ. ཏཏྠ ཡཾ པན ནིབྦཏྟཏཱིཏི ཡཾ ལཀྑཎཾ ཝུཙྩམཱནལཀྑཎནིབྦཏྟཀེན ཀམྨུནཱ ནིབྦཏྟཏི. ཏཾ ཨནུབྱཉྫནཾ ཧོཏཱིཏི ཏཾ ལཀྑཎཾ ཝུཙྩམཱནསྶ ལཀྑཎསྶ ཨནུཀཱུལལཀྑཎཾ ནཱམ ཧོཏི. ཏསྨཱ ཏེན ཀཱརཎེན ཨིདྷ ཨེཎིཛངྒྷལཀྑཎཀཐནེ ‘‘ཨུདྡྷགྒལོམཱ སུཁུམཏྟཙོཏྠཏཱ’’ཏི ལཀྑཎནྟརཾ ཝུཏྟཾ.

སུཁུམཙྪཝིལཀྑཎཝཎྞནཱ

༢༡༦. སམིཏཔཱཔཊྛེན ¶ སམཎཾ, ན པབྦཛྫཱམཏྟེན. བཱཧིཏཔཱཔཊྛེན བྲཱཧྨཎཾ, ན ཛཱཏིམཏྟེན.

མཧནྟཱནཾ ཨཏྠཱནཾ པརིགྒཎྷནཏོ མཧཏཱི པཉྙཱ ཨེཏསྶཱཏི མཧཱཔཉྙོ. སེསཔདེསུཔི ཨེསེཝ ནཡོཏི ཨཱཧ ‘‘མཧཱཔཉྙཱདཱིཧི སམནྣཱགཏོཏི ཨཏྠོ’’ཏི. ནཱནཏྟནྟི ཡཱཧི མཧཱཔཉྙཱདཱིཧི སམནྣཱགཏཏྟཱ བྷགཝཱ ‘‘མཧཱཔཉྙོ’’ཏིཨཱདིནཱ ཀིཏྟཱིཡཏི, ཏཱསཾ མཧཱཔཉྙཱདཱིནཾ ཨིདཾ ནཱནཏྟཾ ཨཡཾ ཝེམཏྟཏཱ.

ཡསྶ ཀསྶཙི ཝིསེསཏོ ཨརཱུཔདྷམྨསྶ མཧཏྟཾ ནཱམ ཀིཙྩསིདྡྷིཡཱ ཝེདིཏབྦནྟི ཏདསྶཱ ཀིཙྩསིདྡྷིཡཱ དསྶེནྟོ ‘‘མཧནྟེ སཱིལཀྑནྡྷེ པརིགྒཎྷཱཏཱིཏི མཧཱཔཉྙཱ’’ཏིཨཱདིམཱཧ. ཏཏྠ ཧེཏུམཧནྟཏཱཡ, པཙྩཡམཧནྟཏཱཡ, ནིསྶཡམཧནྟཏཱཡ, པབྷེདམཧནྟཏཱཡ, ཀིཙྩམཧནྟཏཱཡ, ཕལམཧནྟཏཱཡ, ཨཱནིསཾསམཧནྟཏཱཡ ཙ སཱིལཀྑནྡྷསྶ མཧནྟབྷཱཝོ ཝེདིཏབྦོ. ཏཏྠ ཧེཏུ ཨལོབྷཱདཡོ. པཙྩཡོ ཧིརོཏྟཔྤསདྡྷཱསཏིཝཱིརིཡཱདཡོ. ནིསྶཡོ སཱཝཀབོདྷིཔཙྩེཀབོདྷིསམྨཱསམྦོདྷིནིཡཏཏཱ, ཏཾསམངྒིནོ ཙ པུརིསཝིསེསཱ. པབྷེདོ ཙཱརིཏྟཝཱརིཏྟཱདིཝིབྷཱགོ. ཀིཙྩཾ ཏདངྒཱདིཝསེན པཊིཔཀྑཝིདྷམནཾ. ཨཱནིསཾསོ པིཡམནཱཔཏཱདི. ཨཡམེཏྠ སངྑེཔོ, ཝིཏྠཱརོ པན ཝིསུདྡྷིམགྒེ, (ཝིསུདྡྷི. ༡.༦) ཨཱཀངྑེཡྻསུཏྟཱདཱིསུ ¶ (མ. ནི. ༡.༦༥) ཙ ཨཱགཏནཡེནེཝ ཝེདིཏབྦོ. ཨིམིནཱ ནཡེན ¶ སམཱདྷིཀྑནྡྷཱདཱིནམྤི མཧནྟཏཱ ཡཐཱརཧཾ ཝིཏྠཱརེཏྭཱ ཝེདིཏབྦཱ. ཋཱནཱཋཱནཱནཾ པན མཧཱཝིསཡཏཱཡ, སཱ བཧུདྷཱཏུཀསུཏྟེ ཨཱགཏནཡེན ཝེདིཏབྦཱ. ཝིཧཱརསམཱཔཏྟིཡོ སམཱདྷིཀྑནྡྷནིདྡྷཱརཎནཡེན ཝེདིཏབྦཱ. ཨརིཡསཙྩཱནཾ སཀལསཱསནསངྒཧཏོ, སོ སཙྩཝིབྷངྒ- (ཝིབྷ. ༡༨༩) ཏཾསཾཝཎྞནཱསུ (ཝིབྷ. ཨཊྛ. ༡༨༩) ཨཱགཏནཡེན, སཏིཔཊྛཱནཱ དཱིནཾ སཏིཔཊྛཱནཝིབྷངྒཱདཱིསུ, (ཝིབྷ. ༣༥༥) ཏཾསཾཝཎྞནཱསུ (ཝིབྷ. ཨཊྛ. ༣༥༥) ཙ ཨཱགཏནཡེན, སཱམཉྙཕལཱནཾ མཧཏོ ཧིཏསྶ, མཧཏོ སུཁསྶ, མཧཏོ ཨཏྠསྶ, མཧཏོ ཡོགཀྑེམསྶ ནིབྦཏྟིབྷཱཝཏོ, སནྟཔཎཱིཏནིཔུཎཨཏཀྐཱཝཙརཔཎྜིཏཝེདནཱིཡབྷཱཝཏོ ཙ; ཨབྷིཉྙཱནཾ མཧཱསམྦྷཱརཏོ, མཧཱཝིསཡཏོ, མཧཱཀིཙྩཏོ, མཧཱནུབྷཱཝཏོ, མཧཱནིབྦཏྟིཏོ ཙ, ནིབྦཱནསྶ མདནིམྨདནཱདིམཧཏྟསིདྡྷིཏོ མཧནྟཏཱ ཝེདིཏབྦཱ.

པུཐུཔཉྙཱཏི ཨེཏྠཱཔི ཝུཏྟནཡཱནུསཱརེན ཨཏྠོ ཝེདིཏབྦོ. ཨཡཾ པན ཝིསེསོ – ནཱནཱཁནྡྷེསུ ཉཱཎཾ པཝཏྟཏཱིཏི ‘‘ཨཡཾ རཱུཔཀྑནྡྷོ ནཱམ…པེ… ཨཡཾ ཝིཉྙཱཎཀྑནྡྷོ ནཱམཱ’’ཏི ¶ ཨེཝཾ པཉྩནྣཾ ཁནྡྷཱནཾ ནཱནཱཀརཎཾ པཊིཙྩ ཉཱཎཾ པཝཏྟཏི. ཏེསུཔི ‘‘ཨེཀཝིདྷེན རཱུཔཀྑནྡྷོ, ཨེཀཱདསཝིདྷེན རཱུཔཀྑནྡྷོ. ཨེཀཝིདྷེན ཝེདནཱཀྑནྡྷོ, བཧུཝིདྷེན ཝེདནཱཀྑནྡྷོ. ཨེཀཝིདྷེན སཉྙཱཀྑནྡྷོ. ཨེཀཝིདྷེན སངྑཱརཀྑནྡྷོ. ཨེཀཝིདྷེན ཝིཉྙཱཎཀྑནྡྷོ, བཧུཝིདྷེན ཝིཉྙཱཎཀྑནྡྷོ’’ཏི ཨེཝཾ ཨེཀེཀསྶ ཁནྡྷསྶ ཨཏཱིཏཱདིབྷེདཝསེནཱཔི ནཱནཱཀརཎཾ པཊིཙྩ ཉཱཎཾ པཝཏྟཏི. ཏཐཱ ‘‘ཨིདཾ ཙཀྑཱཡཏནཾ ནཱམ…པེ...ཨིདཾ དྷམྨཱཡཏནཾ ནཱམ. ཏཏྠ དསཱཡཏནཱ ཀཱམཱཝཙརཱ, དྭེ ཙཏུབྷཱུམཀཱ’’ཏི ཨེཝཾ ཨཱཡཏནཱནཾ ནཱནཏྟཾ པཊིཙྩ ཉཱཎཾ པཝཏྟཏི. ནཱནཱདྷཱཏཱུསཱུཏི ‘‘ཨཡཾ ཙཀྑུདྷཱཏུ ནཱམ…པེ… ཨཡཾ མནོཝིཉྙཱཎདྷཱཏུ ནཱམ. ཏཏྠ སོལ༹ས དྷཱཏུཡོ ཀཱམཱཝཙརཱ, དྭེ དྷཱཏུཡོ ཙཏུབྷཱུམིཀཱ’’ཏི ¶ ཨེཝཾ ནཱནཱདྷཱཏཱུསུ ཉཱཎཾ པཝཏྟཏི, ཏཡིདཾ ཨུཔཱདིནྣཀདྷཱཏུཝསེན ཝུཏྟཾ. པཙྩེཀབུདྡྷཱནམྤི ཧི དྭིནྣཉྩ ཨགྒསཱཝཀཱནཾ ཨུཔཱདིནྣཀདྷཱཏཱུསུ ཨེཝཾ ནཱནཱཀརཎཾ པཊིཙྩ ཉཱཎཾ པཝཏྟཏི, ཏཉྩ ཁོ ཨེཀདེསཏོཝ, ན ནིཔྤདེསཏོ. ཨནུཔཱདིནྣཀདྷཱཏཱུནཾ པན ལཀྑཎཱདིམཏྟམེཝ ཛཱནནྟི, ན ནཱནཱཀརཎཾ. སབྦཉྙུབུདྡྷཱནམེཝ པན ‘‘ཨིམཱཡ ནཱམདྷཱཏུཡཱ ཨུསྶནྣཏྟཱ ཨིམསྶ རུཀྑསྶ ཁནྡྷོ སེཏོ, ཨིམསྶ ཀཱལོ༹, ཨིམསྶ མཊྛོ, ཨིམསྶ བཧལཏྟཙོ ¶ , ཨིམསྶ ཏནུཏཙོ. ཨིམསྶ པཏྟཾ ཝཎྞསཎྛཱནཱདིཝསེན ཨེཝརཱུཔཾ. ཨིམསྶ པུཔྥཾ ནཱིལཾ, ཨིམསྶ པཱིཏཀཾ, ལོཧིཏཀཾ, ཨོདཱཏཾ, སུགནྡྷཾ, དུགྒནྡྷཾ. ཕལཾ ཁུདྡཀཾ, མཧནྟཾ, དཱིགྷཾ, ཝཊྚཾ, སུསཎྛཱནཾ, དུསྶཎྛཱནཾ, མཊྛཾ, ཕརུསཾ, སུགནྡྷཾ, དུགྒནྡྷཾ, མདྷུརཾ, ཏིཏྟཀཾ, ཨམྦིལཾ, ཀཊུཀཾ, ཀསཱཝཾ. ཀཎྚཀོ ཏིཁིཎོ, ཨཏིཁིཎོ, ཨུཛུཀོ, ཀུཊིལོ, ཀཎྷོ, ནཱིལོ, ཨོདཱཏོ ཧོཏཱི’’ཏི དྷཱཏུནཱནཏྟཾ པཊིཙྩ ཉཱཎཾ པཝཏྟཏི.

ནཱནཱཔཊིཙྩསམུཔྤཱདེསཱུཏི ཨཛ྄ཛྷཏྟབཧིདྡྷཱབྷེདཏོ ཙ ནཱནཱཔབྷེདེསུ པཊིཙྩསམུཔྤཱདངྒེསུ. ཨཝིཛྫཱདིཨངྒཱནི ཧི པཙྩེཀཾ པཊིཙྩསམུཔྤཱདསཉྙིཏཱནི. ཏེནཱཧ སངྑཱརཔིཊཀེ ‘‘དྭཱདས པཙྩཡཱ དྭཱདས པཊིཙྩསམུཔྤཱདཱ’’ཏི. ནཱནཱསུཉྙཏམནུཔལབྦྷེསཱུཏི ནཱནཱསབྷཱཝེསུ ནིཙྩསཱརཱདིཝིརཧིཏེསུ སུཉྙཏབྷཱཝེསུ ཏཏོ ཨེཝ ཨིཏྠིཔུརིསཨཏྟཏྟནིཡཱདིཝསེན ཨནུཔལབྦྷནསབྷཱཝེསུ པཀཱརེསུ. མ-ཀཱརོ ཧེཏྠ པདསནྡྷིཀརོ. ནཱནཱཨཏྠེསཱུཏི ཨཏྠཔཊིསམྦྷིདཱཡ ཝིསཡབྷཱུཏེསུ པཙྩཡུཔྤནྣཱདིཝསེན ནཱནཱཝིདྷེསུ ཨཏྠེསུ. དྷམྨེསཱུཏི དྷམྨཔཊིསམྦྷིདཱཡ ¶ ཝིསཡབྷཱུཏེསུ པཙྩཡཱདིཝསེན ནཱནཱཝིདྷེསུ དྷམྨེསུ. ནིརུཏྟཱིསཱུཏི ཏེསཾཡེཝ ཨཏྠདྷམྨཱནཾ ནིདྡྷཱརཎཝཙནསངྑཱཏེསུ ནཱནཱནིརུཏྟཱིསུ. པཊིབྷཱནེསཱུཏི ཨཏྠཔཊིསམྦྷིདཱདཱིསུ ཝིསཡབྷཱུཏེསུ ‘‘ཨིམཱནི ཉཱཎཱནི ཨིདམཏྠཛོཏཀཱནཱི’’ཏི (ཝིབྷ. ༧༢༦, ༧༢༩, ༧༣༡, ༧༣༢, ༧༣༤, ༧༣༦, ༧༣༩) ཏཐཱ ཏཐཱ པཊིབྷཱནཏོ ཨུཔཏིཊྛནཏོ ‘‘པཊིབྷཱནཱནཱི’’ཏི ལདྡྷནཱམེསུ ནཱནཱཉཱཎེསུ. ‘‘པུཐུནཱནཱསཱིལཀྑནྡྷེསཱུ’’ཏིཨཱདཱིསུ སཱིལསྶ པུཐུཏྟཾ ཝུཏྟམེཝ, ཨིཏརེསཾ པན ཝུཏྟནཡཱནུསཱརེན སུཝིཉྙེཡྻཏྟཱ པཱཀཊམེཝ. ཡཾ པན ཨབྷིནྣཾ ཨེཀམེཝ ནིབྦཱནཾ, ཏཏྠ ཨུཔཙཱརཝསེན ¶ པུཐུཏྟཾ གཧེཏབྦནྟི ཨཱཧ ‘‘པུཐུཛྫནསཱདྷཱརཎེ དྷམྨེ སམཏིཀྐམྨཱ’’ཏི, ཏེནསྶ མདནིམྨདནཱདིཔརིཡཱཡེན པུཐུཏྟཾ པརིདཱིཔིཏཾ ཧོཏི.

ཨེཝཾ ཝིསཡཝསེན པཉྙཱཡ མཧཏྟཾ, པུཐུཏྟཾ དསྶེཏྭཱ ཨིདཱནི སམྤཡུཏྟདྷམྨཝསེན ཧཱསབྷཱཝཾ, པཝཏྟིཨཱཀཱརཝསེན ཛཝནབྷཱཝཾ, ཀིཙྩཝསེན ཏིཀྑཱདིབྷཱཝཾ དསྶེཏུཾ ‘‘ཀཏམཱ ཧཱསཔཉྙཱ’’ཏིཨཱདི ཝུཏྟཾ. ཏཏྠ ཧཱསབཧུལོཏི པཱིཏིབཧུལོ. སེསཔདཱནི ཏསྶེཝ ཝེཝཙནཱནི. སཱིལཾ པརིཔཱུརེཏཱིཏི ཧཊྛཔཧཊྛོ ཨུདགྒུདགྒོ ཧུཏྭཱ ཋཔེཏྭཱ ཨིནྡྲིཡསཾཝརཾ ཏསྶ ཝིསུཾ ཝུཏྟཏྟཱ ཨནཝསེསསཱིལཾ པརིཔཱུརེཏི. པཱིཏིསོམནསྶསཧགཏཱ ཧི པཉྙཱ ཨབྷིརཏིཝསེན ཨཱརམྨཎེ ཕུལླིཏཝིཀསིཏཱ ཝིཡ ¶ པཝཏྟཏི, ན ཨེཝཾ ཨུཔེཀྑཱསཧགཏཱ. པུན སཱིལཀྑནྡྷནྟི ཨརིཡསཱིལཀྑནྡྷམཱཧ. ‘‘སམཱདྷིཀྑནྡྷ’’ནྟིཨཱདཱིསུཔི ཨེསེཝ ནཡོ.

སབྦཾ ཏཾ རཱུཔཾ ཨནིཙྩཏོ ཁིཔྤཾ ཛཝཏཱིཏི ཡཱ རཱུཔདྷམྨེ ‘‘ཨནིཙྩཱ’’ཏི སཱིགྷཝེགེན པཝཏྟཏི, པཊིཔཀྑདཱུརབྷཱཝེན པུབྦཱབྷིསངྑཱརསྶ སཱཏིསཡཏྟཱ ཨིནྡེན ཝིསྶཊྛཝཛིརཾ ཝིཡ ལཀྑཎཾ ཨཝིརཛ྄ཛྷནྟཱི ཨདནྡྷཱཡནྟཱི ¶ རཱུཔཀྑནྡྷེ ཨནིཙྩལཀྑཎཾ ཝེགསཱ པཊིཝིཛ྄ཛྷཏི, སཱ ཛཝནཔཉྙཱ ནཱམཱཏི ཨཏྠོ. སེསཔདེསུཔི ཨེསེཝ ནཡོ. ཨེཝཾ ལཀྑཎཱརམྨཎིཀཝིཔསྶནཱཝསེན ཛཝནཔཉྙཾ དསྶེཏྭཱ བལཝཝིཔསྶནཱཝསེན དསྶེཏུཾ ‘‘རཱུཔ’’ནྟིཨཱདི ཝུཏྟཾ. ཏཏྠ ཁཡཊྛེནཱཏི ཡཏྠ ཡཏྠ ཨུཔྤཛྫཏི, ཏཏྠ ཏཏྠེཝ བྷིཛྫནཏོ ཁཡསབྷཱཝཏྟཱ. བྷཡཊྛེནཱཏི བྷཡཱནཀབྷཱཝཏོ. ཨསཱརཀཊྛེནཱཏི ཨསཱརཀབྷཱཝཏོ ཨཏྟསཱརཝིརཧཏོ, ནིཙྩསཱརཱདིཝིརཧཏོ ཙ. ཏུལཡིཏྭཱཏི ཏུལནབྷཱུཏཱཡ ཝིཔསྶནཱཔཉྙཱཡ ཏུལེཏྭཱ. ཏཱིརཡིཏྭཱཏི ཏཱཡ ཨེཝ ཏཱིརཎབྷཱུཏཱཡ ཏཱིརཡིཏྭཱ. ཝིབྷཱཝཡིཏྭཱཏི ཡཱཐཱཝཏོ པཀཱསེཏྭཱ པཙྩཀྑཾ ཀཏྭཱ. ཝིབྷཱུཏཾ ཀཏྭཱཏི པཱཀཊཾ ཀཏྭཱ. རཱུཔནིརོདྷེཏི རཱུཔཀྑནྡྷནིརོདྷཧེཏུབྷཱུཏེ ནིབྦཱནེ ནིནྣཔོཎཔབྦྷཱརབྷཱཝེན. ཨིདཱནི སིཁཱཔྤཏྟཝིཔསྶནཱཝསེན ཛཝནཔཉྙཾ དསྶེཏུཾ པུན ‘‘རཱུཔ’’ནྟིཨཱདི ཝུཏྟཾ. ‘‘ཝུཊྛཱནགཱམིནིཝིཔསྶནཱཝསེནཱ’’ཏི ཀེཙི.

ཉཱཎསྶ ཏིཀྑབྷཱཝོ ནཱམ སཝིསེསཾ པཊིཔཀྑཔཧཱནེན ཝེདིཏབྦོཏི. ‘‘ཁིཔྤཾ ཀིལེསེ ཚིནྡཏཱིཏི ཏིཀྑཔཉྙཱ’’ཏི ཝཏྭཱ ཏེ པན ཀིལེསེ ཝིབྷཱགེན དསྶེནྟོ ‘‘ཨུཔྤནྣཾ ཀཱམཝིཏཀྐ’’ནྟིཨཱདིམཱཧ. ཏིཀྑཔཉྙོ ཁིཔྤཱབྷིཉྙོ ཧོཏི, པཊིཔདཱ ཙསྶ ན ཙལཏཱིཏི ཨཱཧ ‘‘ཨེཀསྨིཾ ཨཱསནེ ཙཏྟཱརོ ཨརིཡམགྒཱ…པེ… ཨདྷིགཏཱ ཧོནྟཱི’’ཏིཨཱདི.

‘‘སབྦེ སངྑཱརཱ ཨནིཙྩཱ དུཀྑཱ ཝིཔརིཎཱམདྷམྨཱ, སངྑཏཱ པཊིཙྩསམུཔྤནྣཱ ཁཡདྷམྨཱ ཝཡདྷམྨཱ ¶ ཝིརཱགདྷམྨཱ ནིརོདྷདྷམྨཱ’’ཏི ཡཱཐཱཝཏོ དསྶནེན སཙྩཔྤཊིཝེདྷོ ཨིཛ྄ཛྷཏི, ན ཨཉྙཐཱཏི ཀཱརཎམུཁེན ནིབྦེདྷིཀཔཉྙཾ དསྶེཏུཾ ‘‘སབྦསངྑཱརེསུ ཨུབྦེགབཧུལོ ཧོཏཱི’’ཏིཨཱདི ཝུཏྟཾ. ཏཏྠ ཨུབྦེགབཧུལོཏི ཝུཏྟནཡེན སབྦསངྑཱརེསུ ཨབྷིཎྷཔཝཏྟསཾཝེགོ. ཨུཏྟཱསབཧུལོཏི ཉཱཎུཏྟཱསཝསེན སབྦསངྑཱརེསུ བཧུསོ ཨུཏྲཱསམཱནསོ ¶ , ཨེཏེན ཨཱདཱིནཝཱནུཔསྶནམཱཧ. ‘‘ཨུཀྐཎྛནབཧུལོ’’ཏི པན ཨིམིནཱ ནིབྦིདཱནུཔསྶནམཱཧ ¶ , ‘‘ཨརཏིབཧུལོ’’ཏིཨཱདིནཱ ཏསྶཱ ཨེཝ ཨཔརཱཔརུཔྤཏྟིཾ. བཧིམུཁོཏི སབྦསངྑཱརཏོ བཧིབྷཱུཏཾ ནིབྦཱནཾ ཨུདྡིསྶ པཝཏྟཉཱཎམུཁོ, ཏཐཱ ཝཱ པཝཏྟིཏཝིམོཀྑམུཁོ. ནིབྦིཛ྄ཛྷནཾ ནིབྦེདྷོ, སོ ཨེཏིསྶཱ ཨཏྠི, ནིབྦིཛ྄ཛྷཏཱིཏི ཝཱ ནིབྦེདྷིཀཱ, སཱ ཨེཝ པཉྙཱ ནིབྦེདྷིཀཔཉྙཱ. ཡཾ པནེཏྠ ཨཏྠཏོ ཨཝིབྷཏྟཾ, ཏཾ ཧེཊྛཱ ཝུཏྟནཡཏྟཱ, ཨུཏྟཱནཏྠཏྟཱ ཙ སུཝིཉྙེཡྻམེཝ.

༢༡༧. པབྦཛིཏཾ ཨུཔཱསིཏཱཏི ཨེཏྠ ཡཱདིསཾ པབྦཛིཏཾ ཨུཔཱསཏོ པཉྙཱཔཊིལཱབྷོ ཧོཏི, ཏཾ དསྶེཏུཾ ‘‘པཎྜིཏཾ པབྦཛིཏ’’ནྟི ཝུཏྟཾ. ཨུཔཱསནཉྩེཏྠ ཨུཔཊྛཱནཝསེན ཨིཙྪིཏཾ, ན ཨུཔནིསཱིདནམཏྟེནཱཏི ཨཱཧ ‘‘པཡིརུཔཱསིཏཱ’’ཏི. ཨཏྠནྟི ཧིཏཾ. ཨབྦྷནྟརཾ ཀརིཏྭཱཏི ཨབྦྷནྟརགཏཾ ཀཏྭཱ. ཏེནཱཧ ‘‘ཨཏྠཡུཏྟ’’ནྟི. བྷཱཝནཔུཾསཀནིདྡེསོ ཙཱཡཾ, ཧིཏཱུཔསཉྷིཏཾ ཀཏྭཱཏི ཨཏྠོ. ཨནྟར-སདྡོ ཝཱ ཙིཏྟཔརིཡཱཡོ ‘‘ཡསྶནྟརཏོ ན སནྟི ཀོཔཱ’’ཏིཨཱདཱིསུ (ཨུདཱ. ༢༠) ཝིཡ. ཏསྨཱ ཨཏྠནྟརོཏི ཧིཏཛ྄ཛྷཱསཡོཏི ཨཏྠོ.

པཊིལཱབྷཏྠཱཡ གཏེནཱཏི པཊིལཱབྷཏྠཱཡ པཝཏྟེན, པཊིལཱབྷསཾཝཏྟནིཡེནཱཏི ཨཏྠོ. ཨུཔྤཱདེ ཙ ནིམིཏྟེ ཙ ཚེཀཱཏི ཨུཔྤཱདཝིདྷིམྷི ཙེཝ ནིམིཏྟཝིདྷིམྷི ཙ ཀུསལཱ. ཨུཔྤཱདནིམིཏྟཀོཝིདཏཱསཱིསེན ཙེཏྠ ལཀྑཎཀོསལླམེཝ དསྶེཏི. ཨཐ ཝཱ སེསལཀྑཎཱནཾ ནིབྦཏྟིཡཱ བུདྡྷཱནཾ, ཙཀྐཝཏྟཱིནཉྩ ཨུཔྤཱདོ ཨནུམཱིཡཏི, ཡཱནི ཏེཧི ལདྡྷབྦཨཱནིསཾསཱནི ནིམིཏྟཱནི ¶ , ཏསྨིཾ ཨུཔྤཱདེ ཙ ནིམིཏྟེ ཙ ཨནུམིནནཱདིཝསེན ཚེཀཱ ནིཔུཎཱཏི ཨཏྠོ. ཉཏྭཱ པསྶིསྶཏཱིཏི ཉཱཎེན ཛཱནིཏྭཱ པསྶིསྶཏི, ན ཙཀྑུཝིཉྙཱཎེནཱཏི ཨདྷིཔྤཱཡོ.

ཨཏྠཱནུསཱསནཱིསཱུཏི ཨཏྠཱནཾ ཧིཏཱནཾ ཨནུསཱསནཱིསུ. ཡསྨཱ ཨནཏྠཔཊིཝཛྫནཔུབྦིཀཱ སཏྟཱནཾ ཨཏྠཔཊིཔཏྟི, ཏསྨཱ ཨནཏྠོཔི པརིཙྪིཛྫ གཧེཏབྦོ, ཛཱནིཏབྦོ ཙཱཏི ཝུཏྟཾ ‘‘ཨཏྠཱནཏྠཾ པརིགྒཱཧཀཱནི ཉཱཎཱནཱི’’ཏི, ཡཏོ ‘‘ཨཱཡུཔཱཡཀོསལླཾ ཝིཡ ཨཔཱཡཀོསལླམྤི ཨིཙྪིཏབྦ’’ནྟི ཝུཏྟཾ.

སུཝཎྞཝཎྞལཀྑཎཝཎྞནཱ

༢༡༨. པཊིསངྑཱནབལེན ¶ ¶ ཀོདྷཝིནཡེན ཨཀྐོདྷནོ, ན བྷཱཝནཱབལེནཱཏི དསྶེཏུཾ ‘‘ན ཨནཱགཱམིམགྒེནཱ’’ཏིཨཱདི ཝུཏྟཾ. ཨེཝཾ ཨཀྐོདྷཝསིཀཏྟཱཏི ཨེཝཾ མགྷམཱཎཝོ ཝིཡ ན ཀོདྷཝསཾ གཏཏྟཱ. ནཱབྷིསཛྫཱིཏི ཀུཛ྄ཛྷནཝསེནེཝ ན ཨབྷིསཛྫི. ཡཉྷི ཀོདྷསྶ ཨུཔྤཏྟིཊྛཱནབྷཱུཏེ ཨཱརམྨཎེ ཨུཔནཱཧསྶ པཙྩཡབྷཱུཏཾ ཀུཛ྄ཛྷནཝསེན ཨབྷིསཛྫནཾ, ཏཾ ཨིདྷཱདྷིཔྤེཏཾ, ན ལུབྦྷནཝསེན. ཏེནཱཧ ‘‘ཀུཊིལཀཎྚཀོ ཝིཡཱ’’ཏིཨཱདི. སོ ཧི ཡཏྠ ལགྒཏི, ཏཾ ཁོབྷེནྟོ ཨེཝ ལགྒཏི. ཏཏྠ ཏཏྠཱཏི ཏསྨིཾ ཏསྨིཾ མམྨཊྛཱནེ. མམྨནྟི ཕུཊྛམཏྟེཔི རུཛྫནཊྛཱནཾ. པུབྦུཔྤཏྟིཀོཏི པཋམུཔྤནྣོ. ཏཏོ བལཝཏརོ བྱཱཔཱདོ ལདྡྷཱསེཝནཏཱཡ ཙིཏྟསྶ བྱཱཔཛྫནཏོ. ཏཏོ བལཝཏརཱ ¶ པཏིཏྠིཡནཱཏི སཱཏིསཡཾ ལདྡྷཱསེཝནཏཱཡ ཏཏོ བྱཱཔཱདཱཝཏྠཱཡཔི བལཝཏརཱ པཏིཏྠིཡནཱ པཙྩཏྠིཀབྷཱཝེན ཐཱམཔྤཏྟིཏོ.

སུཁུམཏྠརཎཱདཱིཏི ཨཱདི-སདྡེན པཎཱིཏབྷོཛནཱིཡཱདཱིནམྤི སངྒཧོ དཊྛབྦོ བྷོཛནདཱནསྶཔི ཝཎྞསམྤདཱནིམིཏྟབྷཱཝཏོ. ཏེནཱཧ བྷགཝཱ ‘‘བྷོཛནཾ བྷིཀྑཝེ དདམཱནོ དཱཡཀོ པཊིགྒཱཧཀཱནཾ…པེ… ཨཱཡུཾ དེཏི, ཝཎྞཾ དེཏཱི’’ཏི (ཨ. ནི. ༥.༣༧) ཏཐཱ ཙ ཝཀྑཏི ‘‘ཨཱམིསདཱནེན ཝཱ’’ཏི.

༢༡༩. ཏི ཨདཱསི. དེཝོཏི མེགྷོ, པཛྫུནྣོ ཨེཝ ཝཱ. ཝརཏརོཏི ཨུཏྟམཏརོ. པབྦཛྫཱཡ ཝིསདིསཱཝཏྠཱདི བྷཱཝཏོ ན པབྦཛྫཱཏི ཨཔབྦཛྫཱ, གིཧིབྷཱཝོ. ཨཙྪཱདེནྟི ཀོཔཱིནཾ པཊིཙྪཱདེནྟི ཨེཏེཧཱིཏི ཨཙྪཱདནཱནི, ནིཝཱསནཱནི, ཏེསཾ ཨཙྪཱདནཱནཉྩེཝ སེས ཝཏྠཱནཉྩ ཀོཛཝཱདི ཨུཏྟམཔཱཝུརཎཱནཉྩ. ཝིནཱསོཏི ཀཏསྶ ཀམྨསྶ ཨཝིཔཙྩིཏྭཱ ཝིནཱསོ.

ཀོསོཧིཏཝཏྠགུཡ྄ཧལཀྑཎཝཎྞནཱ

༢༢༠. སམཱནེཏཱཏི སམྨདེཝ ཨཱནེཏཱ སམཱགམེཏཱ. རཛྫེ པཏིཊྛིཏེན སཀྐཱ ཀཱཏུཾ བཧུབྷཏིཀསྶེཝ ཨིཛ྄ཛྷནཏོ. ཀཏྟཱ ནཱམ ནཏྠཱིཏི ཝཛྫཾ པཊིཙྪཱདེནྟཱིཏི ཨཱནེཏྭཱ སམྦནྡྷོ, ཀརོནྟི ཝཛྫཔཊིཙྪཱདནཀམྨནྟི ཝཱ. ནནུ ཝཛྫཔཊིཙྪཱདནཀམྨཾ ནཱམ སཱཝཛྫནྟི? སཙྩཾ སཱཝཛྫཾ སཾཀིལིཊྛཙིཏྟེན ¶ པཊིཙྪཱདེནྟསྶ, ཨིདཾ པན ཨསཾཀིལིཊྛཙིཏྟེན པརསྶ ཨུཔྤཛྫནཀཨནཏྠཾ ¶ པརིཧརཎཝསེན པཝཏྟཾ ཨདྷིཔྤེཏཾ. ‘‘ཉཱཏིསངྒཧཾ ཀརོནྟེནཱ’’ཏི ¶ ཨེཏེན ཉཱཏཏྠཙརིཡཱཝསེན ཏཾ ཀམྨཾ པཝཏྟཏཱིཏི དསྶེཏི.

༢༢༡. ཨམིཏྟཏཱཔནཱཏི ཨམིཏྟཱནཾ ཏཔནསཱིལཱ, ཨམིཏྟཏཱཔནཾ ཧོཏུ ཝཱ མཱ ཝཱ ཨེཝཾསབྷཱཝཱཏི ཨཏྠོ. ན ཧི ཙཀྐཝཏྟིནོ པུཏྟཱནཾ ཨམིཏྟཱ ནཱམ ཀེཙི ཧོནྟི, ཡེ ཏེ བྷཝེཡྻུཾ, ཙཀྐཱནུབྷཱཝེནེཝ སབྦེཔི ཁཏྟིཡཱདཡོ ཨནུཝཏྟཀཱ ཏེསཾ བྷཝནྟི.

པཋམབྷཱཎཝཱརཝཎྞནཱ ནིཊྛིཏཱ.

པརིམཎྜལཱདིལཀྑཎཝཎྞནཱ

༢༢༢. སམནྟི སམཱནཾ. ཏེན ཏེན ལོཀེ ཝིཉྙཱཏགུཎེན སམཾ སམཱནཾ ཛཱནཱཏི, ཡཏོ ཏཏྠ པཊིཔཛྫནཝིདྷིནཱཝ ཨིཏརསྨིཾ པཊིཔཛྫཏི. སཡཾ ཛཱནཱཏཱིཏི ཨཔརནེཡྻོ ཧུཏྭཱ སཡམེཝ ཛཱནཱཏི. པུརིསཾ ཛཱནཱཏཱིཏི ཝཱ ‘‘ཨཡཾ སེཊྛོ, ཨཡཾ མཛ྄ཛྷིམོ, ཨཡཾ ནིཧཱིནོ’’ཏི ཏཾ ཏཾ པུརིསཾ ཡཱཐཱཝཏོ ཛཱནཱཏི. པུརིསཝིསེསཾ ཛཱནཱཏཱིཏི ཏསྨིཾ ཏསྨིཾ པུརིསེ ཝིཛྫམཱནཾ ཝིསེསཾ ཛཱནཱཏི, ཡཏོ ཏཏྠ ཏཏྠ ཨནུརཱུཔདཱནཔདཱནཱདིཔཊིཔཏྟིཡཱ ཡུཏྟཔཏྟཀཱརཱི ཧོཏི. ཏེནཱཧ ‘‘ཨཡམིདམརཧཏཱི’’ཏིཨཱདི.

སམྤཏྟིཔཊིལཱབྷཊྛེནཱཏི དིཊྛདྷམྨིཀཱདིསམྤཏྟཱིནཾ པཊིལཱབྷཱཔནཊྛེན. སམསངྒཧཀམྨནྟི སམཾ ཛཱནིཏྭཱ ཏདནུརཱུཔཾ ཏསྶ ཏསྶ སངྒཎྷནཀམྨཾ.

༢༢༣. ཏུལཡིཏྭཱཏི ཏཱིརཡིཏྭཱ. པཊིཝིཙིནིཏྭཱཏི ཝཱིམཾསིཏྭཱ. ནིཔུཎཡོགཏོ ནིཔུཎཱ, ཨཏིཝིཡ ནིཔུཎཱ ཨཏིནིཔུཎཱ, སཱ པན ཏེསཾ ནིཔུཎཏཱ སཎྷསུཁུམཱ པཉྙཱཏི ཨཱཧ ‘‘སུཁུམཔཉྙཱ’’ཏི.

སཱིཧཔུབྦདྡྷཀཱཡཱདིལཀྑཎཝཎྞནཱ

༢༢༤. ཁེམཀཱམོཏི ¶ ¶ ཨནུཔདྡཝཀཱམོ. ཀམྨསྶཀཏཱཉཱཎཾ སཏྟཱནཾ ཝཌྜྷིཨཱཝཧཾ སབྦསམྤཏྟིཝིདྷཱཡཀནྟི ཨཱཧ ‘‘པཉྙཱཡཱཏི ཀམྨསྶཀཏཱཔཉྙཱཡཱ’’ཏི.

སམནྟཔརིཔཱུརཱནཱིཏི ¶ སམནྟཏོ སབྦབྷཱགེཧི པརིཔུཎྞཱནི. ཏཏོ ཨེཝ ཨཧཱིནཱནི ཨནཱུནཱནི. དྷནཱདཱིཧཱིཏི དྷནདྷཉྙཱདཱིཧི.

༢༢༥. ཨོཀཔྤནསདྡྷཱ སདྡྷེཡྻཝཏྠུཾ ཨོཀྐནྡིཏྭཱ པཀྑནྡིཏྭཱ སདྡཧནསདྡྷཱ. སཱ ཨེཝ པསཱདནཱིཡཝཏྠུསྨིམྤི ཨབྷིཔྤསཱིདནཝསེན པཝཏྟིཡཱ པསཱདསདྡྷཱ. པརིཡཏྟིསཝནེནཱཏི སཏྟཱནཾ ཧིཏསུཁཱཝཧཱཡ པརིཡཏྟིཡཱ སཝནེན. དྷཱརཎཔརིཙཡཱདཱིནཾ ཏཾམཱུལཀཏྟཱ ཏཐཱ ཝུཏྟཾ. ཨེཏེསནྟི སདྡྷཱདཱིནཾ. སཧ ཧཱནདྷམྨེནཱཏི སཧཱནདྷམྨོ, ན སཧཱནདྷམྨོཏི ཨསཧཱནདྷམྨོ, ཏསྶ བྷཱཝོ ཨསཧཱནདྷམྨཏཱ, ཏཾ ཨསཧཱནདྷམྨཏཾ, ཨཔརིཧཱནིཡསབྷཱཝནྟི ཨཏྠོ.

རསགྒསགྒིཏཱལཀྑཎཝཎྞནཱ

༢༢༦. ཏིལཕལམཏྟམྤི བྷོཛནཾ. སབྦཏྠ ཕརཏཱིཏི སབྦཱ རསཱཧརཎིཡོ ཨནུསྶརནྟཾ སབྷཱཝེན སབྦསྨིཾ ཀཱཡེ ཕརཏི. སམཱ ཧུཏྭཱ ཝཧནྟཱིཏི ཨཝིསམཱ ཨུཛུཀཱ ཧུཏྭཱ པཝཏྟནྟི.

ཨཱརོགྱཀརཎཀམྨནྟི ཨརོགབྷཱཝཀརཾ སཏྟཱནཾ ཨཝིཧེཋནཀམྨཾ. མདྷུརཱདིབྷེདཾ རསཾ གསཏི ཧརཏི ཨེཏེཧི, སཡམེཝ ཝཱ ཏཾ གསནྟི གིལནྟི ཨནྟོ པཝེསེནྟཱིཏི རསགྒསཱ, རསགྒསཱནཾ ཨགྒཱ རསགྒསགྒཱ, ཏེ ཨེཏྠ སནྟཱིཏི རསགྒསགྒཱི, ཏདེཝ ལཀྑཎཾ. བྷཝཏི ཧི ཨབྷིནྣེཔི ཝཏྠུསྨིཾ ཏགྒཏཝིསེསཱཝབོདྷནཏྠཾ བྷིནྣཾ ཝིཡ ཀཏྭཱ ཝོཧཱརོ ཡཐཱ ‘‘སིལཱཔུཏྟཀསྶ སརཱིར’’ནྟི ¶ . རསགྒསགྒིཏཱསངྑཱཏཾ ཝཱ ལཀྑཎཾ རསགྒསགྒིལཀྑཎཾ.

༢༢༧. ཝདྷ-སདྡོ ‘‘ཨཏྟཱནཾ ཝདྷིཏྭཱ ཝདྷིཏྭཱ རོདཏཱི’’ཏིཨཱདཱིསུ (པཱཙི. ༨༧༩) བཱདྷནཏྠོཔི ཧོཏཱིཏི ཏཏོ ཝིསེསནཏྠཾ ‘‘མཱརཎཝདྷེནཱ’’ཏི ཝུཏྟཾ, མཱརཎསངྑཱཏེན ཝདྷེནཱཏི ཨཏྠོ. བཱདྷནཏྠོ ཨེཝ ཝཱ ཝདྷ-སདྡོ, མཱརཎེན, བཱདྷནེན ཙཱཏི ཨཏྠོ. ཨུབྦཱདྷནཱཡཱཏི བནྡྷནཱགཱརེ པཀྑིཔིཏྭཱ ཨུདྡྷཾ ཨུདྡྷཾ བཱདྷནེན. ཏེནཱཧ ‘‘བནྡྷནཱགཱརཔྤཝེསནེནཱ’’ཏི.

ཨབྷིནཱིལནེཏྟཱདིལཀྑཎཝཎྞནཱ

༢༢༨. ཝིསཊནྟི ¶ ཀུཛ྄ཛྷནཝསེན ཝིནིསཊཾ ཀཏྭཱ. ཏེནཱཧ ‘‘ཀཀྐཊཀོ ཝིཡཱ’’ཏིཨཱདི. ཝིསཱཙཱིཏི ཝིརཱུཔཾ སཱཙིཏཀཾ, ཝིཛིམྷནྟི ཨཏྠོ. ཏེནཱཧ ‘‘ཝངྐཀྑིཀོཊིཡཱ’’ཏི ¶ , ཀུཊིལཨཀྑིཀོཊིཔཱཏེནཱཏི ཨཏྠོ. ཝིཙེཡྻ པེཀྑིཏཱཏི ཨུཛུཀཾ ཨནོལོཀེཏྭཱ དིཊྛིཔཱཏཾ ཝིཙཱརེཏྭཱ ཨོལོཀེཏྭཱ. ཏེནཱཧ ‘‘ཡོ ཀུཛ྄ཛྷིཏྭཱ’’ཏིཨཱདི. པརོཏི ཀུཛ྄ཛྷིཏོ. ན ཨོལོཀེཏི ཏཾ སམྨུཁཱ གཙྪནྟཾ ཀུཛ྄ཛྷིཏྭཱ ན ཨོལོཀེཏི, པརམྨུཁཱ. ཝིཏེཡྻཱཏི ཝིརཱུཔཾ ཏིརིཡཾ, ཝིཉྙཱུནཾ ཨོལོཀནཀྐམཾ ཝཱིཏིཀྐམིཏྭཱཏི ཨཏྠོ. ཛིམྷཾ ཨནོལོཀེཏྭཱ ཨུཛུཀཾ ཨོལོཀནཾ ནཱམ ཀུཊིལབྷཱཝཀརཱནཾ པཱཔདྷམྨཱནཾ ཨབྷཱཛནཨུཛུཀཏཙིཏྟཏསྶེཝ ¶ ཧོཏཱིཏི ཨཱཧ ‘‘ཨུཛུམནོ ཧུཏྭཱ ཨུཛུཾ པེཀྑིཏཱ’’ཏི. ཡཐཱ ཙ ཨུཛུཾ པེཀྑིཏཱ ཧོཏཱིཏི ཨཱནེཏྭཱ སམྦནྡྷོ. པསཊནྟི ཨུམྨཱིལནཝསེན སམྨདེཝ པཏྠཊཾ. ཝིཔུལཾ ཝིཏྠཏནྟི ཏསྶེཝ ཝེཝཙནཾ. པིཡཾ པིཡཱཡིཏབྦཾ དསྶནཾ ཨོལོཀནཾ ཨེཏསྶཱཏི པིཡདསྶནོ.

ཀཱཎོཏི ཨཀྑཱིནི ནིམྨཱིལེཏྭཱ པེཀྑནཀོ. ཀཱཀཀྑཱིཏི ཀེཀརཀྑོ. ཝངྐཀྑཱིཏི ཛིམྷཔེཀྑནཀོ. ཨཱཝིལཀྑཱིཏི ཨཱཀུལདིཊྛིཔཱཏོ. ནཱིལཔཱིཏལོཧིཏསེཏཀཱལ༹ཝཎྞཱནཾ ཝསེན པཉྩཝཎྞོ. ཏཏྠ པཱིཏལོཧིཏཝཎྞཱ སེཏམཎྜལགཏརཱཛིཝསེན, ནཱིལསེཏཀཱལ༹ཝཎྞཱ པན ཏཾཏཾམཎྜལཝསེནེཝ ཝེདིཏབྦཱ. ‘‘པསཱདོཏི པན ཏེསཾ ཝཎྞཱནཾ པསནྣཱཀཱརཾ སནྡྷཱཡ ཝུཏྟ’’ནྟི ཀེཙི. པཉྩཝཎྞོ པསཱདོཏི པན ཡཐཱཝུཏྟཔཉྩཝཎྞཔརིཝཱརོ, ཏེཧི ཝཱ པཊིམཎྜིཏོ པསཱདོཏི ཨཏྠོ. ནེཏྟསམྤཏྟིཀརཱནཱིཏི ‘‘པཉྩཝཎྞཔསཱདཏཱ ཏིརོཧིཏཝིདཱུརགཏདསྶནསམཏྠཏཱ’’ཏི ཨེཝམཱདི ཙཀྑུསམྤདཱཡ ཀཱརཎཱནི. ལཀྑཎསཏྠེ ཡུཏྟཱཏི ལཀྑཎསཏྠེ ཨཱཡུཏྟཱ སུཀུསལཱ.

ཨུཎྷཱིསསཱིསལཀྑཎཝཎྞནཱ

༢༣༠. པུབྦངྒམོཏི ཨེཏྠ པུབྦངྒམཏཱ ནཱམ པམུཁཏཱ, ཛེཊྛསེཊྛཀབྷཱཝོ བཧུཛནསྶ ཨནུཝཏྟནཱིཡཏཱཏི ཨཱཧ ‘‘གཎཛེཊྛཀོ’’ཏིཨཱདི.

པུབྦངྒམཏཱཏི པུབྦངྒམསྶ ཀམྨཾ. ཡསྶ ཧི ཀཱཡསུཙརིཏཱདིཀམྨསྶ ཝསེན མཧཱཔུརིསོ བཧུཛནསྶ པུབྦངྒམོ ཨཧོསི, ཏདསྶ ཀམྨཾ ‘‘པུབྦངྒམཏཱ’’ཏི ཨདྷིཔྤེཏཾ, ན པུབྦངྒམབྷཱཝོ. ཏེནཱཧ ‘‘ཨིདྷ ཀམྨཾ ནཱམ པུབྦངྒམཏཱ’’ཏི. པཱིཏིཔཱམོཛྫེན ¶ པརིཔུཎྞསཱིསོཏི པཱིཏིཡཱ, ¶ པཱམོཛྫེན ཙ སམྤུཎྞཔཉྙཱསཱིསོ བཧུལཾ སོམནསྶསཧགཏཉཱཎསམྤཡུཏྟཙིཏྟསམངྒཱི ¶ ཨེཝ ཧུཏྭཱ ཝིཙརཏི. མཧཱཔུརིསོཏི མཧཱཔུརིསཛཱཏིཀོ.

༢༣༡. བཧུཛནནྟི སཱམིཨཏྠེ ཨུཔཡོགཝཙནནྟི ཨཱཧ ‘‘བཧུཛནསྶཱ’’ཏི. པརིབྷུཉྫནཊྛེན པཊིབྷོགོ, ཨུཔཡོགཝཏྠུ པཊིབྷོགོ, ཏསྶ ཧིཏཱཏི པཊིབྷོགིཡཱ. དེསཀཱལཾ ཉཏྭཱ ཏདུཔཀརཎཱུཔཊྛཱནཱདི ཝེཡྻཱཝཙྩཀརཱ སཏྟཱ. ཨབྷིཧརནྟཱིཏི བྱཱཧརནྟི. ཏསྶ ཏསྶ ཝེཡྻཱཝཙྩསྶ པཊིཧརཎཏོ པཝཏྟནཀརཎཏོ པཊིཧཱརོ, ཝེཡྻཱཝཙྩཀརོ, ཏསྶ བྷཱཝོ པཊིཧཱརཀནྟི ཨཱཧ ‘‘ཝེཡྻཱཝཙྩཀརབྷཱཝ’’ནྟི. ཝིསཝནཾ ཝིསཝོ, ཀཱམཀཱརོ ཝསིཏཱ, སོ ཨེཏསྶ ཨཏྠཱིཏི ཝིསཝཱིཏི ཨཱཧ ‘‘ཙིཎྞཝསཱི’’ཏི.

ཨེཀེཀལོམཏཱདིལཀྑཎཝཎྞནཱ

༢༣༢. ཨུཔཝཏྟཏཱིཏི ཨནུཀཱུལབྷཱཝཾ ཨུཔེཙྩ ཝཏྟཏི. ཏེནཱཧ ‘‘ཨཛ྄ཛྷཱསཡཾ ཨནུཝཏྟཏཱི’’ཏི.

ཨེཀེཀལོམལཀྑཎནྟི ཨེཀེཀསྨིཾ ལོམཀཱུཔེ ཨེཀེཀལོམཏཱལཀྑཎཾ. ཨེཀེཀེཧི ལོམེཧཱིཏི ཨཉྙེསཾ སརཱིརེ ཨེཀེཀསྨིམྤི ལོམཀཱུཔེ ཨནེཀཱནིཔི ལོམཱནི ཨུཊྛཧནྟི, ན ཏཐཱགཏསྶ. ཏེཧི པུན པཙྩེཀཾ ལོམཀཱུཔེསུ ཨེཀེཀེཧེཝ ཨུཔྤནྣེཧི ཀུཎྜལཱཝཏྟེཧི པདཀྑིཎཱཝཏྟཀཛཱཏེཧི ནིཙིཏཾ ཝིཡ སརཱིརཾ ཧོཏཱིཏི ཝུཏྟཾ ‘‘ཨེཀེཀལོམཱུཔཙིཏངྒཝཱ’’ཏི.

ཙཏྟཱལཱིསཱདིལཀྑཎཝཎྞནཱ

༢༣༤. ཨབྷིནྡིཏབྦཔརིསོཏི པརེཧི ཀེནཙི སངྒཧེན སངྒཧེཏྭཱ, ཡུཏྟིཀཱརཎཾ དསྶེཏྭཱ ཝཱ ན བྷིནྡིཏབྦཔརིསོ.

ཨཔིསུཎཝཱཙཱཡཱཏི ཨུཔཡོགཏྠེ སཱམིཝཙནཾ, པེསུཉྙསྶ པཊིཔཀྑབྷཱུཏཾ ཀུསལཀམྨཾ. པིསུཎཱ ཝཱཙཱ ཨེཏསྶཱཏི པིསུཎཝཱཙོ, ཏསྶ པིསུཎཝཱཙསྶ པུགྒལསྶ. ཨཔརིཔུཎྞཱཏི ¶ ཙཏྟཱརཱིསཏོ ཨཱུནབྷཱཝེན ན པརིཔུཎྞཱ. ཝིརལཱ༹ཏི སཝིཝརཱ.

པཧཱུཏཛིཝ྄ཧཱདིལཀྑཎཝཎྞནཱ

༢༣༦. ཨཱདེཡྻཝཱཙོཏི ¶ ¶ ཨཱདརགཱརཝཝསེན ཨཱདཱཏབྦཝཙནོ. ‘‘ཨེཝམེཏ’’ནྟི གཧེཏབྦཝཙནོ སིརསཱ སམྤཊིཙྪིཏསཱསནོ.

བདྡྷཛིཝ྄ཧཱཏི ཡཐཱ སུཁེན པརིཝཏྟཏི, ཨེཝཾ སིརཱདཱིཧི པལིབུདྡྷཛིཝ྄ཧཱ. གཱུལ༹ྷཛིཝ྄ཧཱཏི རསབཧལཏཱཡ གཱུལ༹ྷགཎྜསདིསཛིཝ྄ཧཱ. དྭིཛིཝ྄ཧཱཏི ཨགྒེ ཀཔྤབྷཱཝེན དྭིདྷཱབྷཱུཏཛིཝ྄ཧཱ. མམྨནཱཏི ཨཔྤརིཔྤུཊཏལཱཔཱ. ཁརཕརུསཀཀྐསཱདིཝསེན སདྡོ བྷིཛྫཏི བྷིནྣཀཱརོ ཧོཏི. ཝིཙྪིནྡིཏྭཱ པཝཏྟསྶརཏཱཡ ཚིནྣསྶརཱ ཝཱ. ཨནེཀཱཀཱརཏཱཡ བྷིནྣསྶརཱ ཝཱ. ཀཱཀསྶ ཝིཡ ཨམནུཉྙསྶརཏཱཡ ཀཱཀསྶརཱ ཝཱ. མདྷུརོཏི ཨིཊྛེ, ཀམྨཕལེན ཝཏྠུནོ སུཝིསུདྡྷཏྟཱ. པེམནཱིཡོཏི པཱིཏིསཉྫནནོ, པིཡཱཡིཏབྦོ ཝཱ.

༢༣༧. ཨཀྐོསཡུཏྟཏྟཱཏི ཨཀྐོསུཔསཉྷིཏཏྟཱ ཨཀྐོསཝཏྠུསཧིཏཏྟཱ. ཨཱབཱདྷཀརིནྟི གྷཊྚནཝསེན པརེསཾ པཱིལཱ༹ཝཧཾ. བཧུནོ ཛནསྶ ཨཝམདྡནཏོ, པམདྡཱབྷཱཝཀརཎཏོ ཝཱ བཧུཛནཔྤམདྡནཾ. ཨབཱལ༹ྷནྟི ཝཱ ཨེཏྠ ཨ-ཀཱརོ ཝུདྡྷིཨཏྠོ ‘‘ཨསེཀྑཱ དྷམྨཱ’’ཏིཨཱདཱིསུ (དྷ. ས. ཏིཀམཱཏིཀཱ ༡༡) ཝིཡ, ཏསྨཱ ཨཏིཝིཡ བཱལ༹ྷཾ ཕརུསཾ གིརནྟི ཨེཝམེཏྠ ¶ ཨཏྠོ ཝེདིཏབྦོ. ན བྷཎཱིཏི ཙེཏྠ ‘‘ན ཨབྷཎི ན བྷཎཱི’’ཏི སརལོཔེན ནིདྡེསོ. སུསཾཧིཏནྟི སུཊྛུ སཾཧིཏཾ. ཀེན པན སུཊྛུ སཾཧིཏཾ? ‘‘མདྷུར’’ནྟི ཨནནྟརམེཝ ཝུཏྟཏྟཱ མདྷུརཏཱཡཱཏི ཝིཉྙཱཡཏི, ཀཱ པནསྶ མདྷུརཏཱཏི ཨཱཧ ‘‘སུཊྛུ པེམསཾཧིཏ’’ནྟི. ཨུཔཡོགཔུཐུཏྟཝིསཡོ ཡཾ ཝཱཙཱ-སདྡོཏི ཨཱཧ ‘‘ཝཱཙཱཡོ’’ཏི, སཱ ཙསྶཱ ཨུཔཡོགཔུཐུཏྟཝིསཡཏཱ ‘‘ཧདཡགཱམིནིཡོ’’ཏི པདེན སམཱནཱདྷིཀརཎཏཱཡ དཊྛབྦཱ. ‘‘ཀཎྞསུཁ’’ནྟི པཱཋེ བྷཱཝནཔུཾསཀནིདྡེསོཡནྟི དསྶེཏུཾ ‘‘ཡཐཱ’’ཏིཨཱདི ཝུཏྟཾ. ཝེདཡཐཱཏི ཀཱལཝིཔལླཱསེནཱཡཾ ནིདྡེསོཏི ཨཱཧ ‘‘ཝེདཡིཏྠཱ’’ཏི. བྲཧྨསྶརཏནྟི སེཊྛསྶརཏཾ, བྲཧྨུནོ སརསདིསསྶརཏཾ ཝཱ. བཧཱུནཾ བཧུནྟི བཧཱུནཾ ཛནཱནཾ བཧུཾ སུབྷཎིཏནྟི ཡོཛནཱ.

སཱིཧཧནུལཀྑཎཝཎྞནཱ

༢༣༨. ཨཔྤདྷཾསིཀོཏི ཨཔྤདྷཾསིཡོ. ཡ-ཀཱརསྶ ཧི ཀ-ཀཱརཾ ཀཏྭཱ ཨཡཾ ནིདྡེསོ ཡཐཱ ‘‘ནིཡྻཱནིཀཱ དྷམྨཱ’’ཏི (དྷ. ས. དུཀམཱཏིཀཱ ༩༧) གུཎཏོཏི ཨཏྟནཱ ཨདྷིགཏགུཎཏོ. ཋཱནཏོཏི ཡཐཱཋིཏཊྛཱནནྟརཏོ.

པལཱཔཀཐཱཡཱཏི ¶ ¶ སམྥཔྤལཱཔཀཐཱཡ. ཨནྟོཔཝིཊྛཧནུཀཱ ཨེཀཏོ, ཨུབྷཏོ ཝཱ སཾཀུཙིཏཝིསུཀཱ. ཝངྐཧནུཀཱ ཨེཀཔསྶེན ཀུཊིལཝིསུཀཱ. པབྦྷཱརཧནུཀཱ པུརཏོ ཨོལམྦམཱནཝིསུཀཱ.

༢༣༩. ཝིཀིཎྞཝཙནཱ ¶ ནཱམ སམྥཔྤལཱཔིནོ, ཏཔྤཊིཀྑེཔེན ཨཝིཀིཎྞཝཙནཱ མཧཱབོདྷིསཏྟཱ. ཝཱཙཱ ཨེཝ ཏདཏྠཱདྷིགམུཔཱཡཏཱཡ ‘‘བྱཱཔྤཐོ’’ཏི ཝུཏྟཱཏི ཨཱཧ ‘‘ཨཝིཀིཎྞ…པེ… ཝཙནཔཐོ ཨསྶཱ’’ཏི. ‘‘དྭཱིཧི དྭཱིཧཱི’’ཏི ནཡིདཾ ཨཱམེཌིཏཝཙནཾ ཨསམཱནཱདྷིཀརཎཏོ, ཨཐ ཁོ དྭཱིཧི དིགུཎཏཱདསྶནནྟི ཨཱཧ ‘‘དྭཱིཧི དྭཱིཧཱིཏི ཙཏཱུཧཱི’’ཏི. ཏསྨཱ ‘‘དྭིདུགམཱ’’ཏི ཙཏུགམཱ ཝུཏྟཱཏི ཨཱཧ ‘‘ཙཏུཔྤདཱན’’ནྟི. ཏཐཱསབྷཱཝོཏི ཡཐཱསྶ ཝུཏྟནཡེན ཀེནཙི ཨཔྤདྷཾསིཡཏཱ ཧོཏི གུཎེཧི, ཏཐཱསབྷཱཝོ.

སམདནྟཱདིལཀྑཎཝཎྞནཱ

༢༤༠. ཝིསུདྡྷསཱིལཱཙཱརཏཱཡ པརིསུདྡྷཱ སམནྟཏོ སབྦཐཱ ཝཱ སུདྡྷཱ པུགྒལཱ པརིཝཱརཱ ཨེཏསྶཱཏི པརིསུདྡྷཔརིཝཱརོ.

༢༤༡. པཧཱསཱིཏི ཏདངྒཝསེན, ཝིཀྑམྦྷནཝསེན ཙ པརིཙྩཛི. ཏིདིཝཾ ཏཱཝཏིཾསབྷཝནཾ པུརཾ ནགརཾ ཨེཏེསནྟི ཏིདིཝཔུརཱ, ཏཱཝཏིཾསདེཝཱ, ཏེསཾ ཝརོ ཏིདིཝཔུརཝརོ, ཨིནྡོ. ཏེན ཏིདིཝཔུརཝརེན. ཏེནཱཧ ‘‘སཀྐེནཱ’’ཏི. ལཔནྟི ཀཐེནྟི ཨེཏེནཱཏི ལཔནཾ, མུཁནྟི ཨཱཧ ‘‘ལཔནཛནྟི མུཁཛ’’ནྟི. སུཊྛུ དྷཝལཏཱཡ སུཀྐཱ, ཨཱིསཀམྤི ཨསཾཀིལིཊྛཏཱཡ སུཙི. སུནྡརསཎྛཱནཏཱཡ སུཊྛུ བྷཱཝནཏོ, ཝིཔསྶནཏོ ཙ སོབྷནཱ. ཀཱམཾ ཛནཱནཾ མནུསྶཱནཾ ནིཝཱསནཊྛཱནཱདིབྷཱཝེན པཏིཊྛཱབྷཱུཏོ དེསཝིསེསོ ‘‘ཛནཔདོ’’ཏི ཝུཙྩཏི, ཨིདྷ པན སཔརིཝཱརཙཏུམཧཱདཱིཔསཉྙིཏོ སབྦོ པདེསོ ཏཐཱ ཝུཏྟོཏི ཨཱཧ ‘‘ཙཀྐཝཱལ༹པརིཙྪིནྣོ ཛནཔདོ’’ཏི. ནནུ ཙ ཡཐཱཝུཏྟོ པདེསོ སམུདྡཔརིཙྪིནྣོ, ན ཙཀྐཝཱལ༹པབྦཏཔརིཙྪིནྣོཏི? སོ པདེསོ ཙཀྐཝཱལ༹པརིཙྪིནྣོཔི ཧོཏཱིཏི ཏཐཱ ཝུཏྟཾ ¶ . ཡེ ཝཱ སམུདྡནིསྶིཏཱ, ཙཀྐཝཱལ༹པཱདནིསྶིཏཱ ཙ སཏྟཱ, ཏེསཾ ཏེ ཏེ པདེསཱ པཏིཊྛཱཏི ཏེཔི སངྒཎྷནྟོ ‘‘ཙཀྐཝཱལ༹པརིཙྪིནྣོ’’ཏི ཨཝོཙ. ཙཀྐཝཱལ༹པརིཙྪིནྣོཏི ཙ ཙཀྐཝཱལེ༹ན པརིཙྪིནྣོཏི ཨེཝམེཏྠ ཨཏྠོ དཊྛབྦོ. ཏསྶཱཏི ཏསྶ ཙཀྐཝཏྟིནོ. པུན ¶ ཏསྶཱཏི ཏསྶ ཛནཔདསྶ. བཧུཛན སུཁནྟི ཨེཏྠ པཙྩཏྟབཧུཝཙནལོཔེན བཧུཛནགྒཧཎནྟི ཨཱཧ ‘‘བཧུཛནཱ’’ཏི. ཡཐཱ པན ཏེ ཧིཏསུཁཾ ཙརནྟི, ཏཾ ཝིདྷིཾ དསྶེཏུཾ ‘‘སམཱནསུཁདུཀྑཱ ཧུཏྭཱ’’ཏི ཝུཏྟཾ. ཝིགཏཔཱཔོཏི སབྦསོ ¶ སམུཙྪིནྡནེན ཝིནིདྡྷུཏཔཱཔདྷམྨོ. དརཐོ ཝུཙྩཏི ཀཱཡིཀོ, ཙེཏསིཀོ ཙ པརིལཱ༹ཧོ. ཏཏྠ ཙེཏསིཀཔརིལཱ༹ཧོ ‘‘ཝིགཏཔཱཔོ’’ཏི ཨིམིནཱཝ ཝུཏྟོཏི ཨཱཧ ‘‘ཝིགཏཀཱཡིཀདརཐཀིལམཐོ’’ཏི. རཱགཱདཡོ ཡསྨིཾ སནྟཱནེ ཨུཔྤནྣཱ, ཏསྶ མལཱིནབྷཱཝཀརཎེན མལཱ. ཀཙཝརབྷཱཝེན ཁིལཱ. སཏྟཱནཾ མཧཱནཏྠཀརཏྟཱ ཝིསེསཏོ དོསོ ཀལཱིཏི ཝུཏྟཾ ‘‘དོསཀལཱིནཉྩཱ’’ཏི. པནཱུདེཧཱིཏི སམུཙྪིནྡནཝསེན སསནྟཱནཏོ ནཱིཧཱརཀེཧི, པཛཧནཀེཧཱིཏི ཨཏྠོ. སེསཾ སུཝིཉྙེཡྻམེཝ.

ཨེཏྠ ཙ ཡསྨཱ སབྦེསམྤི ལཀྑཎཱནཾ མཧཱཔུརིསསནྟཱནགཏཔུཉྙསམྦྷཱརཧེཏུཀབྷཱཝེན སབྦཾཡེཝ ཏཾ པུཉྙཀམྨཾ སབྦསྶ ལཀྑཎསྶ ཀཱརཎཾ ཝིསིཊྛརཱུཔཏྟཱ ཕལསྶ. ན ཧི ཨབྷིནྣརཱུཔཀཱརཎཾ བྷིནྣསབྷཱཝསྶ ཕལསྶ པཙྩཡོ བྷཝིཏུཾ སཀྐོཏི, ཏསྨཱ ཡསྶ ཡསྶ ལཀྑཎསྶ ཡཾ ཡཾ པུཉྙཀམྨཾ ཝིསེསཀཱརཎཾ, ཏཾ ཏཾ ཝིབྷཱགེན དསྶེནྟཱི ཨཡཾ དེསནཱ པཝཏྟཱ. ཏཏྠ ཡཐཱ ཡཱདིསཾ ཀཱཡསུཙརིཏཱདིཔུཉྙཀམྨཾ སུཔྤཏིཊྛིཏཔཱདཏཱཡ ཀཱརཎཾ ཝུཏྟཾ, ཏཱདིསམེཝ ‘‘ཨུཎྷཱིསསཱིསཏཱཡ’’ ཀཱརཎནྟི ན སཀྐཱ ཝཏྟུཾ དལ༹ྷསམཱདཱནཏཱཝིསིཊྛསྶ ཏསྶ སུཔྤཏིཊྛིཏཔཱདཏཱཡ ཀཱརཎབྷཱཝེན ¶ ཝུཏྟཏྟཱ, ཨིཏརསྶ ཙ པུབྦངྒམཏཱཝིསིཊྛསྶ ཝུཏྟཏྟཱ, ཨེཝཾ ཡཱདིསཾ ཨཱཡཏཔཎྷིཏཱཡ ཀཱརཎཾ, ན ཏཱདིསམེཝ དཱིགྷངྒུལིཏཱཡ, བྲཧྨུཛུགཏྟཏཱཡ ཙ ཀཱརཎཾ ཝིསིཊྛརཱུཔཏྟཱ ཕལསྶ. ན ཧི ཨབྷིནྣརཱུཔཀཱརཎཾ བྷིནྣསབྷཱཝསྶ ཕལསྶ པཙྩཡོ བྷཝིཏུཾ སཀྐོཏི. ཏཏྠ ཡཐཱ ཨེཀེནེཝ ཀམྨུནཱ ཙཀྑཱདིནཱནིནྡྲིཡུཔྤཏྟིཡཾ ཨཝཏྠཱབྷེདཏོ, སཱམཏྠིཡབྷེདཏོ ཝཱ ཀམྨབྷེདོ ཨིཙྪིཏབྦོ. ན ཧི ཡདཝཏྠཾ ཀམྨཾ ཙཀྑུསྶ ཀཱརཎཾ, ཏདཝཏྠམེཝ སོཏཱདཱིནཾ ཀཱརཎཾ ཧོཏི ཨབྷིནྣསཱམཏྠིཡཾ ཝཱ, ཏསྨཱ པཉྩཱཡཏནིཀཏྟབྷཱཝཔཏྠནཱབྷཱུཏཱ པུརིམནིཔྥནྣཱ ཀཱམཏཎྷཱ པཙྩཡཝསེན ཝིསིཊྛསབྷཱཝཱ ཀམྨསྶ ཝིསིཊྛསབྷཱཝཕལནིབྦཏྟནསམཏྠཏཱསཱདྷནཝསེན པཙྩཡོ ཧོཏཱིཏི ཨེཀམྤི ཨནེཀཝིདྷཕལནིབྦཏྟནསམཏྠཏཱཝསེན ཨནེཀརཱུཔཏཾ ཨཱཔནྣཾ ཝིཡ ཧོཏི, ཨེཝམིདྷཱཔི ‘‘ཨེཀམྤི པཱཎཱཏིཔཱཏཱ ཝེརམཎིཝསེན ¶ པཝཏྟཾ ཀུསལཀམྨཾ ཨཱཡཏཔཎྷིཏཱདཱིནཾ ཏིཎྞམྤི ལཀྑཎཱནཾ ནིབྦཏྟཀཾ ཧོཏཱི’’ཏི ཝུཙྩམཱནེཔི ན ཀོཙི ཝིརོདྷོ. ཏེན ཝུཏྟཾ ‘‘སོ ཏསྶ ཀམྨསྶ ཀཏཏྟཱ…པེ… ཨིམཱནི ཏཱིཎི མཧཱཔུརིསལཀྑཎཱནི པཊིལབྷཏཱི’’ཏི ནཱནཱཀམྨུནཱ པན ཏེསཾ ནིབྦཏྟིཡཾ ཝཏྟབྦམེཝ ནཏྠི, པཱལི༹ཡཾ པན ‘‘ཏསྶ ཀམྨསྶཱ’’ཏི ཨེཀཝཙནནིདྡེསོ སཱམཉྙཝསེནཱཏི དཊྛབྦོ. ཨེཝཉྩ ཀཏྭཱ སཏཔུཉྙལཀྑཎཝཙནཾ སམཏྠིཏཾ ཧོཏི. ‘‘ཨིམཱནི དྭེ མཧཱཔུརིསལཀྑཎཱནི པཊིལབྷཏཱི’’ཏིཨཱདཱིསུཔི ཨེསེཝ ནཡོཏི.

ལཀྑཎསུཏྟཝཎྞནཱཡ ལཱིནཏྠཔྤཀཱསནཱ.

༨. སིངྒཱལསུཏྟཝཎྞནཱ

ནིདཱནཝཎྞནཱ

༢༤༢. པཱཀཱརེན ¶ ¶ ¶ པརིཀྑིཏྟནྟི པདཾ ཨཱནེཏྭཱ སམྦནྡྷོ. གོཔུརཊྚཱལཀཡུཏྟནྟི དྭཱརཔཱསཱདེན ཙེཝ ཏཏྠ ཏཏྠ པཱཀཱརམཏྠཀེ པཏིཊྛཱཔིཏཨཊྚཱལཀེཧི ཙ ཡུཏྟཾ. ཝེལཱུ༹ཧི པརིཀྑིཏྟཏྟཱ, ཨབྦྷནྟརེ པུཔྥཱུཔགཕལཱུཔགརུཀྑསཉྪནྣཏྟཱ ཙ ནཱིལོབྷཱསཾ. ཚཱཡཱུདཀསམྤཏྟིཡཱ, བྷཱུམིབྷཱགསམྤཏྟིཡཱ ཙ མནོརམཾ.

ཀཱལ༹ཀཝེསེནཱཏི ཀལནྡཀརཱུཔེན. ནིཝཱཔནྟི བྷོཛནཾ. ཏནྟི ཨུཡྻཱནཾ.

‘‘ཁོ པནཱ’’ཏི ཝཙནཱལངྐཱརམཏྟམེཏནྟི ཏེན སམཡེནཱཏི ཨཏྠཝཙནཾ ཡུཏྟཾ. གཧཔཏི མཧཱསཱལོཏི གཧཔཏིབྷཱུཏོ མཧཱསཱརོ, ར-ཀཱརསྶ ལ-ཀཱརཾ ཀཏྭཱ ཨཡཾ ནིདྡེསོ. ཝིབྷཝསམྤཏྟིཡཱ མཧཱསཱརཔྤཏྟོ ཀུཊུམྦིཀོ. ‘‘པུཏྟོ པནསྶ ཨསྶདྡྷོ’’ཏིཨཱདི ཨཊྛུཔྤཏྟིཀོ ཡཾ སུཏྟནིཀྑེཔོཏི ཏཾ ཨཊྛུཔྤཏྟིཾ དསྶེཏུཾ ཨཱརདྡྷཾ. ཀམྨཕལསདྡྷཱཡ ཨབྷཱཝེན ཨསྶདྡྷོ. རཏནཏྟཡེ པསཱདཱབྷཱཝེན ཨཔྤསནྣོ. ཨེཝམཱཧཱཏི ཨེཝཾ ཨིདཱནི ཝུཙྩམཱནཱཀཱརེན ཝདཏི.

ཡཱཝཛཱིཝཾ ཨནུསྶརཎཱིཡཱ ཧོཏི ཧིཏེསིཏཱཡ ཝུཏྟཱ པཙྪིམཱ ཝཱཙཱཏི ཨདྷིཔྤཱཡེན. པུཐུདིསཱཏི ཝིསུཾ ཝིསུཾ དིསཱ, ཏཱ པན ཨནེཀཱཏི ཨཱཧ ‘‘བཧུདིསཱ’’ཏི.

༢༤༣. ‘‘ན ཏཱཝ པཝིཊྛོ’’ཏིཨཱདཱིསུ ཝཏྟབྦཾ ཧེཊྛཱ ཝུཏྟམེཝ. ན ཨིདཱནེཝཱཏི ན ཨིམཱཡ ཨེཝ ཝེལཱཡ. ཀིཾ ཙརཧཱིཏི ཨཱཧ ‘‘པཙྩཱུསསམཡེཔཱི’’ཏིཨཱདི. གིཧིཝིནཡནྟི གིཧཱིནཾ གཧཊྛཱནཾ ཝིནཡཏནྟིབྷཱུཏཾ ‘‘གིཧིནཱ ཨེཝཾ ཝཏྟིཏབྦ’’ནྟི གཧཊྛཱཙཱརསྶ གཧཊྛཝཏྟསྶ ཨནཝསེསཏོ ཨིམསྨིཾ ¶ སུཏྟེ སཝིསེསཾ ¶ ཀཏྭཱ ཝུཏྟཏྟཱ. ཏཐེཝཱཏི ཡཐཱ བུདྡྷཙཀྑུནཱ དིཊྛཾ, ཏཐེཝ པསྶི. ནམསྶཏི ཝཏྟཝསེན ཀཏྟབྦནྟི གཧེཏྭཱ ཋིཏཏྟཱ.

ཚདིསཱདིཝཎྞནཱ

༢༤༤. ཝཙནཾ སུཏྭཱཝ ཙིནྟེསི བུདྡྷཱནུབྷཱཝེན ཨཏྟསམྨཱཔཎིདྷཱནནིམིཏྟེན པུཉྙབལེན ཙ ཙོདིཡམཱནོ. ན ཀིར ཏཱ ཨེཏཱཏི ཏཱ ཚ ¶ དིསཱ ཨེཏཱ ཨིདཱནི མཡཱ ནམསྶིཡམཱནཱ པུརཏྠིམཱདིཀཱ ན ཧོནྟི ཀིརཱཏི. ནིཔཱཏམཏྟནྟི ཨནཏྠཀབྷཱཝཾ ཏསྶ ཝདཏི. པུཙྪཱཔདནྟི པུཙྪཱཝཙནཾ.

བྷགཝཱ གཧཔཏིཔུཏྟེན ནམསྶིཏབྦཱ ཚ དིསཱ པུཙྪིཏོ དེསནཱཀུསལཏཱཡ ཨཱདིཏོ ཨེཝ ཏཱ ཨཀཐེཏྭཱ ཏསྶ ཏཱཝ པཊིཔཏྟིཡཱ ནཾ བྷཱཛནབྷཱུཏཾ ཀཱཏུཾ ཝཛྫནཱིཡཝཛྫནཏྠཉྩེཝ སེཝིཏབྦསེཝནཏྠཉྩ ཨོཝཱདཾ དེནྟོ ‘‘ཡཏོ ཁོ གཧཔཏིཔུཏྟཱ’’ཏིཨཱདིནཱ དེསནཾ ཨཱརབྷི. ཏཏྠ ཀམྨཀིལེསཱཏི ཀམྨབྷཱུཏཱ སཾཀིལེསཱ. ཀིལིསྶནྟཱིཏི ཀིལིཊྛཱ མལཱིནཱ ཝིཡ ཋིཏཱ, ཨུཔཏཱཔིཏཱ ཙ ཧོནྟཱིཏི ཨཏྠོ. ཏསྨཱཏི ཀིལིསྶནནིམིཏྟཏྟཱ. ཡདིཔི སུརཱཔཱནཾ པཉྩཝེརབྷཱཝེན ཨུཔཱསཀེཧི པརིཝཛྫནཱིཡཾ, ཏསྶ པན ཨཔཱཡམུཁབྷཱཝེན པརཏོ ཝཏྟུཀཱམཏཱཡ པཱཎཱཏིཔཱཏཱདིཀེ ཨེཝ སནྡྷཱཡ ‘‘ཙཏྟཱརོ’’ཏི ཝུཏྟཾ, ན ‘‘པཉྩཱ’’ཏི. ‘‘ཝིསུཾ ཨཀམྨཔཐབྷཱཝཏོ ཙཱ’’ཏི ཨཔརེ. ‘‘སུརཱཔཱནམྤི ‘སུརཱམེརཡཔཱནཾ, བྷིཀྑཝེ, ཨཱསེཝིཏཾ བྷཱཝིཏཾ བཧུལཱིཀཏཾ ནིརཡསཾཝཏྟནིཀ’ནྟིཨཱདི (ཨ. ནི. ༨.༤༠) ཝཙནཏོ ཝིསུཾ ཀམྨཔཐབྷཱཝེན ཨཱགཏཾ. ཏཐཱ ཧི ཏཾ དུཙྩརིཏཀམྨཾ ཧུཏྭཱ དུགྒཏིགཱམིཔིཊྛིཝཏྟཀབྷཱཝེན ནིཡཏ’’ནྟི ཀེཙི, ཏེསཾ མཏེན ཨེཀཱདས ཀམྨཔཐཱ སིཡུཾ ¶ . ཏསྨཱ ཡཐཱཝུཏྟེསྭེཝ ཀམྨཔཐེསུ ཨུཔཀཱརཀཏྟསབྷཱགཏྟཝསེན ཨནུཔྤཝེསོ དཊྛབྦོཏི ‘‘ཝིསུཾ ཨཀམྨཔཐབྷཱཝཏོ ཙཱ’’ཏི སུཝུཏྟམེཏཾ. སུརཱཔཱནསྶ བྷོགཱཔཱཡམུཁབྷཱཝེན ཝཏྟུཀཱམཏཱཡ ‘‘ཙཏྟཱརོ’’ ཏྭེཝ ཨཝོཙ. ཏིཊྛཏི ཨེཏྠ ཕལཾ ཏདཱཡཏྟཝུཏྟིཏཱཡཱཏི ཋཱནཾ, ཧེཏཱུཏི ཨཱཧ ‘‘ཋཱནེཧཱིཏི ཀཱརཎེཧཱི’’ཏི. ཨཔེནྟི ཨཔགཙྪནྟི, ཨཔེཏི ཝཱ ཨེཏེཧཱིཏི ཨཔཱཡཱ, ཨཔཱཡཱནཾ, ཨཔཱཡཱ ཨེཝ ཝཱ མུཁཱནི དྭཱརཱནཱིཏི ཨཔཱཡམུཁཱནི. ཝིནཱསམུཁཱནཱིཏི ཨེཏྠཱཔི ཨེསེཝ ནཡོ.

ཀིཉྩཱཔི ‘‘ཨརིཡསཱཝཀསྶཱ’’ཏི པུབྦེ སཱདྷཱརཎཏོ ཝུཏྟཾ, ཝིསེསཏོ པན པཋམཱཡ བྷཱུམིཡཾ ཋིཏསྶེཝ ཝཀྑམཱནནཡོ ཡུཛྫཏཱིཏི ‘‘སོཏི སོ སོཏཱཔནྣོ’’ཏི ཝུཏྟཾ. པཱཔཀ-སདྡོ ནིཧཱིནཔརིཡཱཡོཏི ‘‘ལཱམཀེཧཱི’’ཏི ཝུཏྟཾ. ཨཔཱཡདུཀྑཾ, ཝཊྚདུཀྑཉྩ པཱཔེནྟཱིཏི ཝཱ པཱཔཀཱ, ཏེཧི ¶ པཱཔཀེཧི. ཚ དིསཱ པཊིཙྪཱདེནྟོཏི ཏེན ཏེན བྷཱགེན དིསྶནྟཱིཏི ‘‘དིསཱ’’ཏི སཉྙིཏེ ཚ བྷཱགེ སཏྟེ ཡཐཱ ཏེཧི སདྡྷིཾ ཨཏྟནོ ཚིདྡཾ ན ཧོཏི, ཨེཝཾ པཊིཙྪཱདེནྟོ པཊིསནྡྷཱརེནྟོ. ཝིཛིནནཏྠཱཡཱཏི ¶ ཨབྷིབྷཝནཏྠཱཡ. ཡོ ཧི དིཊྛདྷམྨིཀཾ, སམྤརཱཡིཀཉྩ ཨནཏྠཾ པརིཝཛྫནཝསེན ཨབྷིབྷཝཏི, ཏཏོ ཨེཝ ཏདུབྷཡཏྠཾ སམྤཱདེཏི, སོ ཨུབྷཡལོཀཝིཛཡཱཡ པཊིཔནྣོ ནཱམ ཧོཏི པཙྩཏྠིཀནིགྒཎྷནཏོ, སཀཏྠསམྤཱདནཏོ ཙ. ཏེནཱཧ ‘‘ཨཡཉྩེཝ ལོཀོ’’ཏིཨཱདི. པཱཎཱཏིཔཱཏཱདཱིནི པཉྩ ཝེརཱནི ཝེརཔྤསཝནཏོ. ཨཱརདྡྷོ ཧོཏཱིཏི སཾསཱདྷིཏོ ཧོཏི, ཏཡིདཾ སཾསཱདྷནཾ ཀིཏྟིསདྡེན ཨིདྷ སཏྟཱནཾ ཙིཏྟཏོསནེན ¶ , ཝེརཱབྷཱཝཱཔཱདནེན ཙ ཧོཏཱིཏི ཨཱཧ ‘‘པརིཏོསིཏོ ཙེཝ ནིཔྥཱདིཏོ ཙཱ’’ཏི. པུན པཉྩ ཝེརཱནཱིཏི པཉྩ ཝེརཕལཱནི ཨུཏྟརཔདལོཔེན.

ཀཏམསྶཱཏི ཀཏམེ ཨསྶ. ཀིལེསསམྤཡུཏྟཏྟཱ ཀིལེསོཏི ཏཾཡོགཏོ ཏཾསདིསཾ ཝདཏི ཡཐཱ ‘‘པཱིཏིསུཁཾ པཋམཾ ཛྷཱནཾ, (དཱི. ནི. ༡.༢༢༦; མ. ནི. ༡.༢༧༡, ༢༨༧, ༢༩༧; སཾ. ནི. ༢.༡༥༢; ཨ. ནི. ༤.༡༢༣; ༥.༢༨; པཱརཱ. ༡༡; དྷ. ས. ༤༩༩; ཝིབྷ. ༥༠༨) ནཱིལཾ ཝཏྠ’’ནྟི ཙ. སམྤཡུཏྟཏཱ ཙེཏྠ ཏདེཀཊྛཏཱཡ ཝེདིཏབྦཱ, ན ཨེཀུཔྤཱདཱདིཏཱཡ. ཨེཝཉྩ ཀཏྭཱ པཱཎཱཏིཔཱཏཀམྨསྶ དིཊྛིམཱནལོབྷཱདཱིཧིཔི ཀིལིཊྛཏཱ སིདྡྷཱ ཧོཏི, མིཙྪཱཙཱརསྶ དོསཱདཱིཧི ཀིལིཊྛཏཱ. ཏེནཱཧ ‘‘སཾཀིལེསོཡེཝཱ’’ཏིཨཱདི. པུབྦེ ཝུཏྟཨཏྠཝསེན པན སམྨུཁེནཔི ནེསཾ ཀིལེསཔརིཡཱཡོ ལབྦྷཏེཝ. ཨེཏདཏྠཔརིདཱིཔཀམེཝཱཏི ཡོ ‘‘པཱཎཱཏིཔཱཏོ ཁོ’’ཏིཨཱདིནཱ ཝུཏྟོ, ཨེཏསྶ ཨཏྠསྶ པརིདཱིཔཀམེཝ. ཡདི ཨེཝཾ ཀསྨཱ པུན ཝུཏྟནྟི ཨཱཧ ‘‘གཱཐཱབནྡྷ’’ནྟི, ཏསྶ ཨཏྠསྶ སུཁགྒཧཎཏྠཾ བྷགཝཱ གཱཐཱབནྡྷཾ ཨཝོཙཱཏི ཨདྷིཔྤཱཡོ.

ཙཏུཋཱནཱདིཝཎྞནཱ

༢༤༦. ‘‘པཱཔཀམྨཾ ཀརོཏཱི’’ཏི ཀསྨཱ ཨཡཾ ཨུདྡེསནིདྡེསོ པཝཏྟོཏི ཨནྟོལཱིནཙོདནཾ སནྡྷཱཡ ‘‘ཨིདཾ བྷགཝཱ’’ཏིཨཱདི ཝུཏྟཾ. སུཀྐཔཀྑཝསེན ཧི ཨུདྡེསོ ཀཏོ, ཀཎྷཔཀྑཝསེན ཙ ནིདྡེསོ ཨཱརདྡྷོ. ཀཱརཀེཏི པཱཔཀམྨསྶ ཀཱརཀེ. ཨཀཱརཀོ པཱཀཊོ ཧོཏི ཡཐཱ པཊིཔཛྫནྟོ པཱཔཾ ཀརོཏི ནཱམ, ཏཐཱ ཨཔྤཊིཔཛྫནཏོ. སཾཀིལེསདྷམྨཝིཝཛྫནཔུབྦཀཾ ཝོདཱནདྷམྨཔཊིཔཏྟིཨཱཙིཀྑནཾ ཨིདྷ དེསནཱཀོསལླཾ. པཋམཏརཾ ཀཱརཀཾ དསྶེནྟོ ཨཱཧ ཡཐཱ ‘‘ཝཱམཾ མུཉྩ དཀྑིཎཾ གཎྷཱ’’ཏི (དྷ. ས. ཨཊྛ. ༤༩༨) ཏཐཱ ¶ ¶ ཧི བྷགཝཱ ཨཊྛཏིཾས མངྒལཱནི དསྶེནྟོ ‘‘ཨསེཝནཱ ཙ བཱལཱན’’ནྟི (ཁུ. པཱ. ༥.༣; སུ. ནི. ༢༦༢) ཝཏྭཱ ‘‘པཎྜིཏཱནཉྩ ¶ སེཝནཱ’’ཏི (ཁུ. པཱ. ༥.༣; སུ. ནི. ༢༦༢) ཨཝོཙ. ཚནྡཱགཏིནྟི ཨེཏྠ སནྡྷིཝསེན སརལོཔོཏི དསྶེནྟོ ཨཱཧ ‘‘ཚནྡེན པེམེན ཨགཏི’’ནྟི. ཚནྡཱཏི ཧེཏུམྷི ནིསྶཀྐཝཙནནྟི ཨཱཧ ‘‘ཚནྡེནཱ’’ཏི. ཚནྡ-སདྡོ ཙེཏྠ ཏཎྷཱཔརིཡཱཡོ, ན ཀུསལཙྪནྡཱདིཔརིཡཱཡོཏི ཨཱཧ ‘‘པེམེནཱ’’ཏི. པརཔདེསཱུཏི ‘‘དོསཱགཏིཾ གཙྪནྟོ’’ཏིཨཱདཱིསུ ཝཱཀྱེསུ. ‘‘ཨེསེཝ ནཡོ’’ཏི ཨིམིནཱ ‘‘དོསེན ཀོཔེནཱ’’ཏི ཨེཝམཱདི ཨཏྠཝཙནཾ ཨཏིདིསཏི. མིཏྟོཏི དལ༹ྷམིཏྟོ, སམྦྷཏྟོཏི ཨཏྠོ. སནྡིཊྛོཏི དིཊྛམཏྟསཧཱཡོ. པཀཏིཝེརཝསེནཱཏི པཀཏིཡཱ ཨུཔྤནྣཝེརཝསེན, ཙིརཀཱལཱནུབནྡྷཝིརོདྷཝསེནཱཏི ཨཏྠོ. ཏེནེཝཱཧ ‘‘ཏངྑཎུཔྤནྣཀོདྷཝསེན ཝཱ’’ཏི. ཡཾ ཝཱ ཏཾ ཝཱ ཨཡུཏྟཾ ཨཀཱརཎཾ ཝཏྭཱ. ཝིསམེ ཙོརཱདིཀེ, ཝིསམཱནི ཝཱ ཀཱཡདུཙྩརིཏཱདཱིནི སམཱདཱཡ ཝཏྟནེན ནིསྶིཏོ ཝིསམནིསྶིཏོ.

ཚནྡཱགཏིཨཱདཱིནི ན གཙྪཏི མགྒེནེཝ ཙཏུནྣམྤི ཨགཏིགམནཱནཾ པཧཱིནཏྟཱ, ཨགཏིགམནཱནཱིཏི ཙ ཏཐཱཔཝཏྟཱ ཨཔཱཡགམནཱིཡཱ ཨཀུསལཙིཏྟུཔྤཱདཱ ཝེདིཏབྦཱ ཨགཏི གཙྪཏི ཨེཏེཧཱིཏི.

ཡསྶཏི ཏེན ཀིཏྟཱིཡཏཱིཏི ཡསོ, ཐུཏིགྷོསོ. ཡསྶཏི ཏེན པུརེཙརཱནུཙརབྷཱཝེན པརིཝཱརཱིཡཏཱིཏི ཡསོ, པརིཝཱརོཏི ཨཱཧ ‘‘ཀིཏྟིཡསོཔི པརིཝཱརཡསོཔཱི’’ཏི. པརིཧཱཡཏཱིཏི པུབྦེ ཡོ ཙ ཡཱཝཏཀེ ལབྦྷཏི, ཏཏོ པརིཏོ ཧཱཡཏི པརིཀྑཡཾ གཙྪཏི.

ཚཨཔཱཡམུཁཱདིཝཎྞནཱ

༢༤༧. པཱུཝེ བྷཱཛནེ པཀྑིཔིཏྭཱ ཏཛྫཾ ཨུདཀཾ དཏྭཱ མདྡིཏྭཱ ཀཏཱ ¶ པཱུཝསུརཱ. ཨེཝཾ སེསསུརཱཔི. ཀིཎྞཱཏི པན ཏསྶཱ སུརཱཡ བཱིཛཾ ཝུཙྩཏི, ཡེ ‘‘སུརཱམོདཀཱ’’ ཏིཔི ཝུཙྩནྟི, ཏེ པཀྑིཔིཏྭཱ ཀཏཱ ཀིཎྞཔཀྑིཏྟཱ. ཧརཱིཏཀཱིསཱསཔཱདིནཱནཱསམྦྷཱརེཧི སཾཡོཛིཏཱ སམྦྷཱརསཾཡུཏྟཱ. མདྷུཀཏཱལནཱལི༹ཀེརཱདིཔུཔྥརསོ ཙིརཔཱརིཝཱསིཀོ པུཔྥཱསཝོ. པནསཱདིཕལརསོ ཕལཱསཝོ. མུདྡིཀཱརསོ མདྷྭཱསཝོ. ཨུཙྪུརསོ གུལཱ༹སཝོ. ཧརཱིཏཀཱམལཀཀཊུཀབྷཎྜཱདིནཱནཱསམྦྷཱརཱནཾ རསོ ཙིརཔཱརིཝཱསིཀོ སམྦྷཱརསཾཡུཏྟོ. ཏཾ སབྦམྤཱིཏི ཏཾ སབྦཾ དསཝིདྷམྤི. མདཀརཎཝསེན ¶ མཛྫཾ པིཝནྟཾ མདཡཏཱིཏི ཀཏྭཱ. སུརཱམེརཡམཛྫེ པམཱདཊྛཱནཾ སུརཱམེརཡམཛྫཔམཱདཊྛཱནཾ. ཨནུ ཨནུ ཡོགོཏི པུནཔྤུནཾ ཏཾསམངྒིཏཱ. ཏེནཱཧ ‘‘པུནཔྤུནཾ ཀརཎ’’ནྟི, ཨཔརཱཔརཾ པཝཏྟནནྟི ཨཏྠོ. ཨུཔྤནྣཱ ཙེཝ བྷོགཱ པརིཧཱཡནྟི པཱནབྱསནེན བྱསནཀརཎཏོ. ཨནུཔྤནྣཱ ཙ ནུཔྤཛྫནྟི པམཏྟསྶ ཀམྨནྟེསུ ཉཱཡཀརཎཱབྷཱཝཏོ. བྷོགཱནནྟི བྷུཉྫིཏབྦཊྛེན ¶ ‘‘བྷོགཱ’’ཏི ལདྡྷནཱམཱནཾ ཀཱམགུཎཱནཾ. ཨཔཱཡམུཁ-སདྡསྶ ཨཏྠོ ཧེཊྛཱ ཝུཏྟོ ཨེཝ. ཨཝེལཱཡཱཏི ཨཡུཏྟཝེལཱཡ. ཡདཱ ཝིཙརཏོ ཨཏྠརཀྑཱདཡོ ན ཧོནྟི. ཝིསིཁཱསུ ཙརིཡཱཏི རཙྪཱསུ ཝིཙརཎཾ.

སམཛྫཱ ཝུཙྩཏི མཧོ, ཡཏྠ ནཙྩཱནིཔི པཡོཛཱིཡནྟི, ཏེསཾ དསྶནཱདིཨཏྠཾ ཏཏྠ ཨབྷིརཏིཝསེན ཙརཎཾ ཨུཔགམནཾ སམཛྫཱབྷིཙརཎཾ. ནཙྩཱདིདསྶནཝསེནཱཏི ནཙྩཱདཱིནཾ དསྶནཱདིཝསེནཱཏི ཨཱདིསདྡལོཔོ དཊྛབྦོ, དསྶནེན ཝཱ སཝནམྤི གཧིཏཾ ཝིརཱུཔེཀསེསནཡེན. ཨཱལོཙནསབྷཱཝཏཱཡ ཝཱ པཉྩཝིཉྙཱཎཱནཾ སཝནཀིརིཡཱཡཔི དསྶནསངྑེཔསམྦྷཝཏོ ‘‘དསྶནཝསེན’’ ཨིཙྩེཝ ཝུཏྟཾ. ཨིདྷ ¶ ཙིཏྟཱལསིཡཏཱ ཨཀཱརཎནྟི ‘‘ཀཱཡཱལསིཡཏཱ’’ཏི ཝུཏྟཾ. ཡུཏྟཔྤཡུཏྟཏཱཏི ཏཔྤསུཏཏཱ ཨཏིརེཀཏརཏཱཡ.

སུརཱམེརཡསྶ ཚཨཱདཱིནཝཱདིཝཎྞནཱ

༢༤༨. སཡཾ དཊྛབྦནྟི སནྡིཊྛཾ. སནྡིཊྛམེཝ སནྡིཊྛིཀཾ, དྷནཛཱནིསདྡཱཔེཀྑཱཡ པན ཨིཏྠིལིངྒཝསེན ནིདྡེསོ, དིཊྛདྷམྨིཀཱཏི ཨཡམེཏྠ ཨཏྠོཏི ཨཱཧ ‘‘ཨིདྷལོཀབྷཱཝིནཱི’’ཏི. སམཾ, སམྨཱ པསྶིཏབྦཱཏི ཝཱ སནྡིཊྛིཀཱ, པཱནསམཀཱལབྷཱཝིནཱིཏི ཨཏྠོ. ཀལཧཔྤཝཌྜྷནཱི མིཏྟསྶ ཀལཧེ ཨནཱདཱིནཝདསྶིབྷཱཝཏོ. ཁེཏྟཾ ཨུཔྤཏྟིཊྛཱནབྷཱཝཏོ. ཨཱཡཏནནྟི ཝཱ ཀཱརཎཾ, ཨཱཀརོ ཝཱཏི ཨཏྠོ. པརལོཀེ ཨཀིཏྟིཾ པཱཔུཎནྟི ཨཀིཏྟིསཾཝཏྟནིཡསྶ ཀམྨསྶ པསཝནཏོ. ཀོཔཱིནཾ ཝཱ པཱཀཊབྷཱཝེན ཨཀཏྟབྦརཧསྶཀམྨཾ. སུརཱམདམཏྟཱ ཙ པུབྦེ ཨཏྟནཱ ཀཏཾ ཏཱདིསཾ ཀམྨཾ ཨམཏྟཀཱལེ ཚཱདེནྟཱ ཝིཙརིཏྭཱ མཏྟཀཱལེ པཙྩཏྠིཀཱནམྤི ཝིཝརནྟི པཱཀཊཾ ཀརོནྟི, ཏེན ཏེསཾ སཱ སུརཱ ཏསྶ ཀོཔཱིནསྶ ནིདཾསནཏོ ‘‘ཀོཔཱིནནིདཾསནཱི’’ཏི ཝུཙྩཏཱིཏི ཨེཝམེཏྠ ཨཏྠོ དཊྛབྦོ. ཀམྨསྶཀཏཱཔཉྙནྟི ནིདསྶནམཏྟཾ དཊྛབྦཾ. ‘‘ཡཾ ཀིཉྩི ལོཀིཡཾ པཉྙཾ དུབྦལཾ ཀརོཏིཡེཝཱ’’ཏི ཧི སཀྐཱ ཝིཉྙཱཏུཾ. ཏཐཱ ཧི བྱཏིརེཀམུཁེན ཏམཏྠཾ པཏིཊྛཔེཏུཾ ¶ ‘‘མགྒཔཉྙཾ པནཱ’’ཏིཨཱདི ཝུཏྟཾ. ‘‘ཨནྟོམུཁམེཝ ན པཝིསཏཱི’’ཏི ཨིམིནཱ སུརཱཡ མགྒཔཉྙཱདུབྦལཀརཎསྶ དུརསམུསྶཱརིཏབྷཱཝམཱཧ ¶ . ནནུ ཙེཝཾ སུརཱཡ ཏསྶཱ པཉྙཱཡ དུབྦལཱིཀརཎེ སཱམཏྠིཡཝིགྷཱཏོ ཨཙོདིཏོ ཧོཏི ཨརིཡཱནཾ ཨནུཔྤཡོགསྶེཝ ཙོདིཏཏྟཱཏི? ནཡིདཾ ཨེཝཾ ཨུཔཡོགོཔི ནཱམ སདཱ ཏེསཾ ནཏྠི, ཀུཏོ ཀིཙྩཀརཎནྟི ཨིམསྶ ཨཏྠསྶ ཝུཏྟཏྟཱ. ཨཐ པན ཨཊྛཱནཔརིཀཔྤཝསེནསྶཱ ཀདཱཙི སིཡཱ ཨུཔཡོགོ, ཏཐཱཔི སོ ཏསྶཱ དུབྦལིཡཾ ཨཱིསཀམྤི ཀཱཏུཾ ནཱལམེཝ སམྨདེཝ པཊིཔཀྑདཱུརཱིབྷཱཝེན སུཔྤཏིཊྛིཏབྷཱཝཏོ. ཏེནཱཧ ‘‘མགྒཔཉྙཾ པན དུབྦལཾ ཀཱཏུཾ ན སཀྐོཏཱི’’ཏི. མགྒསཱིསེན ཙེཏྠ ཨརིཡཱནཾ སབྦསྶཱཔི ལོཀིཡལོཀུཏྟརཱཡ ¶ པཉྙཱཡ དུབྦལབྷཱཝཱཔཱདཱནེ ཨསམཏྠཏཱ དསྶིཏཱཏི དཊྛབྦཾ. པཛྫཏི ཨེཏེན ཕལནྟི པདཾ, ཀཱརཎཾ.

༢༤༩. ཨཏྟཱཔིསྶ ཨཀཱལཙཱརིསྶ ཨགུཏྟོ སརསཏོ ཨརཀྑིཏོ ཨུཔཀྐམཏོཔི པརིཝཛྫནཱིཡཱནཾ ཨཔརིཝཛྫནཏོ. ཏེནཱཧ ‘‘ཨཝེལཱཡ ཙརནྟོ ཧཱི’’ཏིཨཱདི. ཀཎྚཀཱདཱིནིཔཱིཏི པི-སདྡེན སོབྦྷཱདིཀེ སངྒཎྷཱཏི. ཝེརིནོཔཱིཏི པི-སདྡེན ཙོརཱདིཀཱ སངྒཡ྄ཧནྟི. པུཏྟདཱརཱཏི ཨེཏྠ པུཏྟགྒཧཎེན པུཏྟཱིཔི གཧིཏཱཏི ཨཱཧ ‘‘པུཏྟདྷཱིཏརོ’’ཏི. བཧི པཏྠནནྟི ཀཱམཔཏྠནཱཝསེན ཨནྟོགེཧསྶིཏཏོ ནིབདྡྷཝཏྠུཏོ བཧིདྡྷཱ པཏྠནཾ ཀཏྭཱ. ཨཉྙེཧི ཀཏཔཱཔཀམྨེསཱུཏི པརེཧི ཀཏཱསུ པཱཔཀིརིཡཱསུ. སངྐིཏབྦོ ཧོཏི ཨཀཱལེ ཏཏྠ ཏཏྠ ཙརཎཏོ. རུཧཏི ཡསྨིཾ པདེསེ ཙོརིཀཱ པཝཏྟཱ, ཏཏྠ པརེཧི དིཊྛཏྟཱ. ཝཏྟུཾ ན སཀྐཱཏི ‘‘ཨེཏྟཀཾ དུཀྑཾ, ཨེཏྟཀཾ དོམནསྶ’’ནྟི པརིཙྪིནྡིཏྭཱ ཝཏྟུཾ ན སཀྐཱ. ཏཾ སབྦམྤི ཝིཀཱལཙཱརིམྷི པུགྒལེ ཨཱཧརིཏབྦཾ ཏསྶ ཨུཔརི པཀྑིཔིཏབྦཾ ཧོཏི. ཀཐཾ? ཨཉྙསྨིཾ པུགྒལེ ཏཐཱརཱུཔེ ཨཱསངྐིཏབྦེ ཨསཏི. ཨིཏཱིཏི ཨེཝཾ. སོཏི ཝིཀཱལཙཱརཱི. པུརཀྑཏོ ¶ པུརཏོ ཨཏྟནོ ཨུཔརི ཨཱསངྐནྟེ ཀཏྭཱ ཙརཏི.

༢༥༠. ནཊནཱཊཀཱདིནཙྩནྟི ནཊེཧི ནཱཊཀེཧི ནཙྩིཏབྦནཱཊཀཱདིནཙྩཝིདྷི. ཨཱདི-སདྡེན ཨཝསིཊྛཾ སབྦཾ སངྒཎྷཱཏི. ‘‘ཏཏྠ གནྟབྦཾ ཧོཏཱི’’ཏི ཝཏྭཱ ཏཏྠསྶ གམནེན ཡཐཱ ཨནུཔྤནྣཱནཾ བྷོགཱནཾ ཨནུཔྤཱདོ, ཨུཔྤནྣཱནཉྩ ཝིནཱསོ ཧོཏི, ཏཾ དསྶེཏུཾ ‘‘ཏསྶཱ’’ཏིཨཱདི ཝུཏྟཾ. གཱིཏནྟི སརགཏཾ, པཀརཎགཏཾ ¶ , ཏཱལ༹གཏཾ, ཨཔདྷཱནགཏནྟི གནྡྷབྦསཏྠཝིཧིཏཾ ཨཉྙམྤི སབྦཾ གཱིཏཾ ཝེདིཏབྦཾ. ཝཱདིཏནྟི ཝཱིཎཱཝེཎུམུདིངྒཱདིཝཱདནཾ. ཨཀྑཱནནྟི བྷཱརཏཡུདྡྷསཱིཏཱཧརཎཱདིཨཀྑཱནཾ. པཱཎིསྶརནྟི ཀཾསཏཱལ༹ཾ, ‘‘པཱཎིཏཱལ༹’’ནྟིཔི ཝདནྟི. ཀུམྦྷཐཱུནནྟི ཙཏུརསྶཨམྦཎཀཏཱལ༹ཾ. ‘‘ཀུཊབྷེརིསདྡོ’’ཏི ཀེཙི. ‘‘ཨེསེཝ ནཡོ’’ཏི ཨིམིནཱ ‘‘ཀསྨིཾ ཋཱནེ’’ཏིཨཱདིནཱ ནཙྩེ ཝུཏྟམཏྠཾ གཱིཏཱདཱིསུ ཨཏིདིསཏི.

༢༥༡. ཛཡནྟི ཛཱུཏཾ ཛིནནྟོ. ཝེརནྟི ཛིཏེན ཀཱིལ༹ཀཔུརིསེན ཛཡནིམིཏྟཾ ཨཏྟནོ ཨུཔརི ཝེརཾ ཝིརོདྷཾ པསཝཏི ཨུཔྤཱདེཏི. ཏཉྷིསྶ ཝེརཔསཝནཾ དསྶེཏུཾ ‘‘ཛིཏཾ མཡཱ’’ཏིཨཱདི ཝུཏྟཾ. ཛིནོཏི ཛཱུཏཔརཱཛཡཱཔནྣཱཡ དྷནཛཱནིཡཱ ཛིནོ. ཏེནཱཧ ‘‘ཨཉྙེན ཛིཏོ སམཱནོ’’ཏིཨཱདི. ཝིཏྟཾ ཨནུསོཙཏཱིཏི ཏཾ ཛིནཾ ཝིཏྟཾ ཨུདྡིསྶ ཨནུཏྠུནཏི. ཝིནིཙྪཡཊྛཱནེཏི ཡསྨིཾ ཀིསྨིཉྩི ཨཊྚཝིནིཙྪཡཊྛཱནེ. སཀྑིཔུཊྛསྶཱཏི ¶ སཀྑིབྷཱཝེན པུཊྛསྶ. ཨཀྑསོཎྜོཏི ཨཀྑདྷུཏྟོ. ཛཱུཏཀརོཏི ཛཱུཏཔམཱདཊྛཱནཱནུཡུཏྟོ. ཏྭམྤི ནཱམ ཀུལཔུཏྟོཏི ཀུལཔུཏྟོ ནཱམ ཏྭཾ, ན ¶ མཡཾ ཏཡི ཀོལཔུཏྟིཡཾ ཨིདཱནི པསྶཱམཱཏི ཨདྷིཔྤཱཡོ. ཚིནྣབྷིནྣཀོཏི ཚིནྣབྷིནྣཧིརོཏྟཔྤོ, ཨཧིརིཀོ ཨནོཏྟཔྤཱིཏི ཨཏྠོ. ཏསྶ ཀཱརཎཱཏི ཏསྶ ཨཏྠཱཡ.

ཨནིཙྪིཏོཏི ན ཨིཙྪིཏོ. པོསིཏབྦཱ བྷཝིསྶཏི ཛཱུཏཔརཱཛཡེན སབྦཀཱལཾ རིཏྟཏུཙྪབྷཱཝཏོ.

པཱཔམིཏྟཏཱཡ ཚཨཱདཱིནཝཱདིཝཎྞནཱ

༢༥༢. ཨཀྑདྷུཏྟཱཏི ཨཀྑེསུ དྷུཏྟཱ, ཨཀྑནིམིཏྟཾ ཨཏྠཝིནཱསཀཱ. ཨིཏྠིསོཎྜཱཏི ཨིཏྠཱིསུ སོཎྜཱ, ཨིཏྠིསམྦྷོགནིམིཏྟཾ ཨཱཏཔྤནཀཱ. ཏཐཱ བྷཏྟསོཎྜཱདཡོ ཝེདིཏབྦཱ. པིཔཱསཱཏི ཨུཔརཱུཔརི སུརཱཔིཔཱསཱ. ཏེནཱཧ ‘‘པཱནསོཎྜཱ’’ཏི. ནེཀཏིཀཱདཡོ ཧེཊྛཱ ཝུཏྟཱ ཨེཝ. མེཏྟིཨུཔྤཏྟིཊྛཱནཏཱཡ མིཏྟཱ ཧོནྟི. ཏསྨཱཏི པཱཔམིཏྟཏཱཡ.

༢༥༣. ཀམྨནྟནྟི ཀམྨཾ, ཡཐཱ སུཏྟཾཡེཝ སུཏྟནྟོ, ཨེཝཾ ཀམྨཾཡེཝ ཀམྨནྟོ, ཏཾ ཀཱཏུཾ གཙྪཱམཱཏི ཝུཏྟོ. ཀམྨཾ ཝཱ ཨནྟོ ནིཊྛཱནཾ གཙྪཏི ཨེཏྠཱཏི ཀམྨནྟོ, ཀམྨཀརཎཊྛཱནཾ, ཏཾ གཙྪཱམཱཏི ཝུཏྟོ.

པནྣསཁཱཏི ¶ སུརཾ པཱཏུཾ པནྣེ པཊིཔཛྫནྟེ ཨེཝ སཁཱཏི པནྣསཁཱ. ཏེནཱཧ ‘‘ཨཡམེཝཏྠོ’’ཏི. ‘‘སམྨིཡསམྨིཡོ’’ཏི ཝཙནམེཏྠ ཨཏྠཱིཏི སམྨིཡསམྨིཡོ. ཏེནཱཧ ‘‘སམྨསམྨཱཏི ཝདནྟོ’’ཏི. སཧཱཡོ ཧོཏཱིཏི སཧཱཡོ ཝིཡ ཧོཏི. ཨོཏཱརམེཝ གཝེསཏཱིཏི རནྡྷམེཝ པརིཡེསཏི ཨནཏྠམསྶ ཀཱཏུཀཱམོ. ཝེརཔྤསཝོཏི པརེཧི ཨཏྟནི ཝེརསྶ པསཝནཾ ཨནུཔཝཏྟནཾ. ཏེནཱཧ ‘‘ཝེརབཧུལཏཱ’’ཏི. པརེསཾ ཀརིཡམཱནོ ཨནཏྠོ ཨེཏྠ ཨཏྠཱིཏི ཨནཏྠོ, ཏབྦྷཱཝོ ཨནཏྠཏཱཏི ཨཱཧ ‘‘ཨནཏྠཀཱརིཏཱ’’ཏི. ཡོ ཧི པརེསཾ ¶ ཨནཏྠཾ ཀརོཏི, སོ ཨཏྠཏོ ཨཏྟནོ ཨནཏྠཀཱརོ ནཱམ, ཏསྨཱ ཨནཏྠཏཱཏི ཨུབྷཡཱནཏྠཀཱརིཏཱ. ཨརིཡོ ཝུཙྩཏི སཏྟོ, ཀུཙྪིཏོ ཨརིཡོ ཀདརིཡོ. ཡསྶ དྷམྨསྶ ཝསེན སོ ‘‘ཀདརིཡོ’’ཏི ཝུཙྩཏི, སོ དྷམྨོ ཀདརིཡཏཱ, མཙྪརིཡཾ. ཏཾ པན དུབྦིསཛྫནཱིཡབྷཱཝེ ཋིཏཾ སནྡྷཱཡཱཧ ‘‘སུཊྛུ ཀདརིཡཏཱ ཐདྡྷམཙྪརིཡབྷཱ’’ཝོཏི. ཨཝིཔཎྞསབྷཱཝཏོ ཨུཊྛཱཏུཾ ཨསཀྐོནྟོ ཙ ཨིཎཾ གཎྷནྟོ སཾསཱིདནྟོཝ ཨིཎཾ ཝིགཱཧཏི ནཱམ. སཱུརིཡེ ཨནུགྒཏེ ཨེཝ ཀམྨནྟེ ཨནཱརབྷནྟོ རཏྟིཾ ཨནུཊྛཱནསཱིལོ.

ཨཏྠཱཏི དྷནཱནི. ཨཏིཀྐམནྟཱིཏི ཨཔགཙྪནྟི. ཨཐ ཝཱ ཨཏྠཱཏི ཀིཙྩཱནི. ཨཏིཀྐམནྟཱིཏི ¶ ཨཏིཀྐནྟཀཱལཱནི ཧོནྟི, ཏེསཾ ཨཏིཀྐམོཔི ཨཏྠཏོ དྷནཱནམེཝ ཨཏིཀྐམོ. ཨིམིནཱ ཀཐཱམགྒེནཱཏི ཨིམིནཱ ‘‘ཡཏོ ཁོ གཧཔཏིཔུཏྟཱ’’ཏིཨཱདི (དཱི. ནི. ༣.༢༤༤) ནཡཔྤཝཏྟེན ཀཐཱསངྑཱཏེན ཧིཏཱདྷིགམཱུཔཱཡེན. ཨེཏྟཀཾ ཀམྨནྟི ཙཏྟཱརོ ཀམྨཀིལེསཱ, ཙཏྟཱརི ཨགཏིགམནཱནི, ཚ བྷོགཱནཾ ཨཔཱཡམུཁཱནཱིཏི ཨེཝཾ ཝུཏྟཾ ཙུདྡསཝིདྷཾ པཱཔཀམྨཾ.

མིཏྟཔཏིརཱུཔཀཝཎྞནཱ

༢༥༤. ཨནཏྠོཏི ‘‘བྷོགཛཱནི, ཨཱཡསཀྱཾ, པརིསམཛ྄ཛྷེ མངྐུབྷཱཝོ, སམྨཱུལ༹ྷམརཎ’’ནྟི ཨེཝཾ ཨཱདིཀོ དིཊྛདྷམྨིཀོ ‘‘དུགྒཏིཔརིཀིལེསོ, སུགཏིཡཉྩ ཨཔྤཱཡུཀཏཱ, བཧྭཱབཱདྷཏཱ, ཨཏིདལིདྡཏཱ, ཨཔྤནྣཔཱནཏཱ’’ཏི ཨེཝཾ ཨཱདིཀོ ཙ ཨནཏྠོ ཨུཔྤཛྫཏི. ཡཱནི ཀཱནིཙི བྷཡཱནཱིཏི ཨཏྟཱནུཝཱདབྷཡཔརཱནུཝཱདབྷཡདཎྜབྷཡཱདཱིནི ལོཀེ ལབྦྷམཱནཱནི ཡཱནི ཀཱནིཙི བྷཡཱནི. ཨུཔདྡཝཱཏི ཨནྟརཱཡཱ. ཨུཔསགྒཱཏི སརཱིརེན སཾསཊྛཱནི ཝིཡ ¶ ཨུཔརཱུཔརི ཨུཔྤཛྫནཀཱནི བྱསནཱནི. ཨཉྙདཏྠཱུཏི ཨེཀནྟེནཱཏི ཨེཏསྨིཾ ཨཏྠེ ནིཔཱཏོ ‘‘ཨཉྙདཏྠུདསོ’’ཏིཨཱདཱིསུ (དཱི. ནི. ༡.༤༢) ཝིཡཱཏི ཝུཏྟཾ ‘‘ཨེཀཾསེནཱ’’ཏི. ཡཾ ཀིཉྩི གཧཎཡོགྱཾ ཧརཏིཡེཝ གཎྷཱཏིཡེཝ. ཝཱཙཱ ¶ ཨེཝ པརམཱ ཨེཏསྶ ཀམྨནྟི ཝཙཱིཔརམོ. ཏེནཱཧ ‘‘ཝཙནམཏྟེནེཝཱ’’ཏིཨཱདི. ཨནུཔྤིཡནྟི ཏཀྐནཾ, ཡཾ ཝཱ ‘‘རུཙཱི’’ཏི ཝུཙྩཏི ཡེཧི སུརཱཔཱནཱདཱིཧི བྷོགཱ ཨཔེནྟི ཝིགཙྪནྟི, ཏེསུ ཏེསཾ ཨཔཱཡེསུ བྱསནཧེཏཱུསུ སཧཱཡོ ཧོཏི.

༢༥༥. ཧཱརཀོཡེཝ ཧོཏི, ན དཱཡཀོ, ཏམསྶ ཨེཀཾསཏོ ཧཱརཀབྷཱཝཾ དསྶེཏུཾ ‘‘སཧཱཡསྶཱ’’ཏིཨཱདི ཝུཏྟཾ. ཡཾ ཀིཉྩི ཨཔྤཀནྟི པུཔྥཕལཱདི ཡཾ ཀིཉྩི པརིཏྟཾ ཝཏྠུཾ དཏྭཱ, བཧུཾ པཏྠེཏི བཧུཾ མཧགྒྷཾ ཝཏྠཡུགཱདིཾ པཙྩཱསཱིསཏི. དཱསོ ཝིཡ ཧུཏྭཱ མིཏྟསྶ ཏཾ ཏཾ ཀིཙྩཾ ཀརོནྟོ ཀཐཾ ཨམིཏྟོ ནཱམ ཛཱཏོཏི ཨཱཧ ‘‘ཨཡ’’ནྟིཨཱདི. ཡསྶ ཀིཙྩཾ ཀརོཏི ཨནཏྠཔརིཧཱརཏྠཾ, ཨཏྟནོ མིཏྟབྷཱཝདསྶནཏྠཉྩ, ཏཾ སེཝཏི. ཨཏྠཀཱརཎཱཏི ཝཌྜྷིནིམིཏྟཾ, ཨཡམེཏེསཾ བྷེདོ.

༢༥༦. པརེཏི པརདིཝསེ. ན ཨཱགཏོ སཱིཏི ཨཱགཏོ ནཱཧོསི. ཁཱིཎནྟི ཏཱདིསསྶ, ཨསུཀསྶ ཙ དིནྣཏྟཱ. སསྶསངྒཧེཏི སསྶཏོ ཀཱཏབྦདྷཉྙསངྒཧེ ཀཏེ.

༢༥༧. ‘‘དཱནཱདཱིསུ ཡཾ ཀིཉྩི ཀརོམཱ’’ཏི ཝུཏྟེ ‘‘སཱདྷུ སམྨ ཀརོམཱ’’ཏི ཨནུཛཱནཱཏཱིཏི ཨིམམཏྠཾ ‘‘ཀལྱཱཎེཔི ཨེསེཝ ནཡོ’’ཏི ཨཏིདིསཏི. ནནུ ཨེཝཾ ཨནུཛཱནནྟོ ཨཡཾ ¶ མིཏྟོ ཨེཝ, ན ཨམིཏྟོ མིཏྟཔཏིརཱུཔཀོཏི? ཨནུཔྤིཡབྷཱཎཱིདསྶནམཏྟམེཏཾ. སཧཱཡེན ཝཱ དེསཀཱལཾ, ཏསྨིཾ ཝཱ ཀཏེ ཨུཔྤཛྫནཀཝིརོདྷཱདིཾ ཨསལླཀྑེཏྭཱ ‘‘ཀརོམཱ’’ཏི ཝུཏྟེ ཡོ ཏཾ ཛཱནནྟོ ཨེཝ ‘‘སཱདྷུ སམྨ ཀརོམཱ’’ཏི ཨནུཔྤིཡཾ བྷཎཏི, ཏཾ སནྡྷཱཡ ཝུཏྟཾ ‘‘ཀལྱཱཎཾ པིསྶ ཨནུཛཱནཱཏཱི’’ཏི. ཏེན ཝུཏྟཾ ‘‘ཀལྱཱཎེཔི ཨེསེཝ ནཡོ’’ཏི.

༢༥༩. མིཏྟཔཏིརཱུཔཀཱ ཨེཏེ མིཏྟཱཏི ཨེཝཾ ཛཱནིཏྭཱ.

སུཧདམིཏྟཝཎྞནཱ

༢༦༠. སུནྡརཧདཡཱཏི ¶ པེམསྶ ཨཏྠིཝསེན བྷདྡཙིཏྟཱ.

༢༦༡. པམཏྟཾ རཀྑཏཱིཏི ཨེཏྠ པམཱདཝསེན ཀིཉྩི ¶ ཨཡུཏྟེ ཀཏེ ཏཱདིསེ ཀཱལེ རཀྑཎཾ ‘‘བྷཱིཏསྶ སརཎཾ ཧོཏཱི’’ཏི ཨིམིནཱཝ ཏཾ གཧིཏནྟི ཏཏོ ཨཉྙམེཝ པམཏྟསྶ རཀྑཎཝིདྷིཾ དསྶེཏུཾ ‘‘མཛྫཾ པིཝིཏྭཱ’’ཏིཨཱདི ཝུཏྟཾ. གེཧེ ཨཱརཀྑཾ ཨསཾཝིཧིཏསྶ བཧིགམནམྤི པམཱདཔཀྑིཀམེཝཱཏི ‘‘སཧཱཡོ བཧིགཏོ ཝཱ ཧོཏཱི’’ཏི ཝུཏྟཾ. བྷཡཾ ཧརནྟོཏི བྷཡཾ པཊིབཱཧནྟོ. བྷོགཧེཏུཏཱཡ ཕལཱུཔཙཱརེན དྷནཾ ‘‘བྷོག’’ནྟི ཝདཏི. ཀིཙྩཀརཎཱིཡེཏི ཁུདྡཀེ, མཧནྟེ ཙ ཀཱཏབྦེ ཨུཔྤནྣེ.

༢༦༢. ནིགཱུཧིཏུཾ ཡུཏྟཀཐནྟི ནིགཱུཧིཏུཾ ཚཱདེཏུཾ ཡུཏྟཀཐཾ, ནིགཱུཧིཏུཾ ཝཱ ཡུཏྟཱ ཀཐཱ ཨེཏསྶཱཏི ནིགཱུཧིཏུཾ ཡུཏྟཀཐཾ, ཨཏྟནོ ཀམྨཾ. རཀྑཏཱིཏི ཨནཱཝིཀརོནྟོ ཚཱདེཏི. ཛཱིཝིཏམྤཱིཏི པི-སདྡེན ཀིམངྒཾ པན ཨཉྙཾ པརིགྒཧིཏཝཏྠུནྟི དསྶེཏི.

༢༦༣. པསྶནྟེསུ པསྶནྟེསཱུཏི ཨཱམེཌིཏཝཙནེན ནིཝཱརིཡམཱནསྶ པཱཔསྶ པུནཔྤུནཾ ཀརཎཾ དཱིཔེཏི. པུནཔྤུནཾ ཀརོནྟོ ཧི པཱཔཏོ ཝིསེསེན ནིཝཱརེཏབྦོ ཧོཏི. སརཎེསཱུཏི སརཎེསུ ཝཏྟསྶུ ཨབྷིནྣཱནི ཀཏྭཱ པཊིཔཛྫ, སརཎེསུ ཝཱ ཨུཔཱསཀབྷཱཝེན ཝཏྟསྶུ. ནིཔུཎནྟི སཎྷཾ. ཀཱརཎནྟི ཀམྨསྶཀཏཱདིབྷེདཡུཏྟཾ. ཨིདཾ ཀམྨནྟི ཨིམཾ དཱནཱདིབྷེདཾ ཀུསལཀམྨཾ. ‘‘ཀམྨ’’ནྟི སཱདྷཱརཎཏོ ཝུཏྟསྶཱཔི ཏསྶ ‘‘སགྒེ ནིབྦཏྟནྟཱི’’ཏི པདནྟརསནྣིདྷཱནེན སདྡྷཱཧིརོཏྟཔྤཱལོབྷཱདིགུཎདྷམྨསམངྒིཏཱ ཝིཡ ཀུསལབྷཱཝོ ཛོཏིཏོ ཧོཏི. སདྡྷཱདཡོ ཧི དྷམྨཱ སགྒགཱམིམགྒོ. ཡཐཱཧ –

‘‘སདྡྷཱ ¶ ཧིརིཡཾ ཀུསལཉྩ དཱནཾ,

དྷམྨཱ ཨེཏེ སཔྤུརིསཱནུཡཱཏཱ;

ཨེཏཉྷི མགྒཾ དིཝིཡཾ ཝདནྟི,

ཨེཏེན ཧི གཙྪཏི དེཝལོཀ’’ནྟི. (ཨ. ནི. ༨.༣༢);

༢༦༤. བྷཝནཾ ¶ ¶ སམྤཏྟིཝཌྜྷནཾ བྷཝོཏི ཨཏྠོ, ཏཔྤཊིཀྑེཔེན ཨབྷཝོཏི ཨཱཧ ‘‘ཨབྷཝེན ཨཝུཌྜྷིཡཱ’’ཏི. པཱརིཛུཉྙནྟི ཛཱནི. ཨནཏྟམནོ ཧོཏཱིཏི ཨཏྟམནོ ན ཧོཏི ཨནུཀམྤཀབྷཱཝཏོ. ཨཉྙདཏྠུ ཏཾ ཨབྷཝཾ ཨཏྟནི ཨཱཔཏིཏཾ ཝིཡ མཉྙཏི. ཨིདཱནི ཏཾ བྷཝཾ སརཱུཔཏོ དསྶེཏུཾ ‘‘ཏཐཱརཱུཔ’’ནྟིཨཱདི ཝུཏྟཾ. ཝིརཱུཔོཏི བཱིབྷཙྪོ. ན པཱསཱདིཀོཏི ཏསྶེཝ ཝེཝཙནཾ. སུཛཱཏོཏི སུནྡརཛཱཏིཀོ ཛཱཏིསམྤནྣོ.

༢༦༥. ཛལནྟི ཛལནྟོ. ཨགྒཱིཝཱཏི ཨགྒིཀྑནྡྷོ ཝིཡ. བྷཱསཏཱིཏི ཝིརོཙཏི. ཡསྨཱསྶ བྷགཝཏཱ སཝིསེསཾ ཝིརོཙནཾ ལོཀེ པཱཀཊབྷཱཝཉྩ དསྶེཏུཾ ‘‘ཛལཾ ཨགྒཱིཝ བྷཱསཏཱི’’ཏི ཝུཏྟཾ, ཏསྨཱ ཡདཱ ཨགྒི སཝིསེསཾ ཝིརོཙཏི, ཡཏྠ ཙ ཋིཏོ དཱུརེ ཋིཏཱནམྤི པཉྙཱཡཏི, ཏཾ དསྶནཱདིཝསེན ཏམཏྠཾ ཝིབྷཱཝེཏུཾ ‘‘རཏྟི’’ནྟིཨཱདི ཝུཏྟཾ.

‘‘བྷམརསྶེཝ ཨིརཱིཡཏོ’’ཏི ཨེཏེནེཝསྶ བྷོགསཾཧརཎཾ དྷམྨིཀཾ ཉཱཡོཔེཏནྟི དསྶེནྟོ ‘‘ཨཏྟཱནམྤཱི’’ཏིཨཱདིམཱཧ. རཱསིཾ ཀརོནྟསྶཱཏི ཡཐཱསྶ དྷནདྷཉྙཱདིབྷོགཛཱཏཾ སམྤིཎྜིཏཾ རཱསིབྷཱུཏཾ ཧུཏྭཱ ཏིཊྛཏི, ཨེཝཾ ཨིརཱིཡཏོ ཨཱཡཱུཧནྟསྶ ཙ. ཙཀྐཔྤམཱཎནྟི རཐཙཀྐཔྤམཱཎཾ. ནིཙཡནྟི ཝུཌྜྷིཾ པརིཝུཌྜྷིཾ. ‘‘བྷོགཱ སནྣིཙཡཾ ཡནྟཱི’’ཏི ཀེཙི པཋནྟི.

སམཱཧཏྭཱཏི སཾཧརིཏྭཱ. ཨལཾ-སདྡོ ‘‘ཨལམེཝ སབྦསངྑཱརེསུ ནིབྦིནྡིཏུཾ, ཨལཾ ཝིརཛྫིཏུ’’ནྟིཨཱདཱིསུ (དཱི. ནི. ༢.༢༧༢; སཾ. ནི. ༢.༡༢༤, ༡༢༩, ༡༣༤, ༡༤༣) ཡུཏྟནྟི ཨིམམཏྠཾ ཛོཏེཏི, ‘‘ཨལམརིཡཉཱཎདསྶནཝིསེས’’ནྟིཨཱདཱིསུ (མ. ནི. ༡.༣༢༨) པརིཡཏྟནྟི. ཡོ ཝེཋིཏཏྟོཏིཨཱདཱིསུ ¶ (སུ. ནི. ༢༡༧) ཝིཡ ཨཏྟ-སདྡོ སབྷཱཝཔརིཡཱཡོཏི ཏཾ སབྦཾ དསྶེནྟོ ‘‘ཡུཏྟསབྷཱཝོ’’ཏིཨཱདིམཱཧ. སཎྛཔེཏུནྟི སམྨཱ ཋཔེཏུཾ, སམྨདེཝ པཝཏྟེཏུནྟི ཨཏྠོ.

ཨེཝཾ ཝིབྷཛནྟོཏི ཨེཝཾ ཝུཏྟནཡེན ཨཏྟནོ དྷནཾ ཙཏུདྷཱ ཝིབྷཛནྟོ ཝིབྷཛནཧེཏུ མིཏྟཱནི གནྠཏི སོལ༹ས ཀལྱཱཎམིཏྟཱནི མེཏྟཱཡ ཨཛཱིརཱཔནེན པབནྡྷཏི. ཏེནཱཧ ‘‘ཨབྷེཛྫམཱནཱནི ཋཔེཏཱི’’ཏི ¶ . ཀཐཾ པན ཝུཏྟནཡེན ཙཏུདྷཱ བྷོགཱནཾ ཝིབྷཛནེན མིཏྟཱནི གནྠཏཱིཏི ཨཱཧ ‘‘ཡསྶ ཧཱི’’ཏིཨཱདི. ཏེནཱཧ བྷགཝཱ ‘‘དདཾ མིཏྟཱནི གནྠཏཱི’’ཏི (སཾ. ནི. ༡.༢༤༦). བྷུཉྫེཡྻཱཏི ¶ ཨུཔབྷུཉྫེཡྻ, ཨུཔཡུཉྫེཡྻ ཙཱཏི ཨཏྠོ. སམཎབྲཱཧྨཎཀཔཎདྡྷིཀཱདཱིནཾ དཱནཝསེན ཙེཝ ཨདྷིཝཏྠདེཝཏཱདཱིནཾ པེཏབལིཝསེན, ནྷཱཔིཏཱདཱིནཾ ཝེཏནཝསེན ཙ ཝིནིཡོགོཔི ཨུཔཡོགོ ཨེཝ. ཏཐཱ ཧི ཝཀྑཏི ‘‘ཨིམེསུ པནཱ’’ཏིཨཱདི ཨཱཡོ ནཱམ ཧེཊྛིམནྟེན ཝཡཏོ ཙཏུགྒུཎོ ཨིཙྪིཏབྦོ, ཨཉྙཐཱ ཝཡོ ཨཝིཙྪེདཝསེན ན སནྟཱནེཡྻ, ནིདྷེཡྻ, བྷཱཛེཡྻ ཙ ཨསམྦྷཏེཏི ཝུཏྟཾ ‘‘དྭཱིཧི ཀམྨཾ པཡོཛཡེ’’ཏི. ནིདྷེཏྭཱཏི ནིདཧིཏྭཱ, བྷཱུམིགཏཾ ཀཏྭཱཏི ཨཏྠོ. རཱཛཱདིཝསེནཱཏི ཨཱདི-སདྡེན ཨགྒིཨུདཀཙོརདུབྦྷིཀྑཱདིཀེ སངྒཎྷཱཏི. ནྷཱཔིཏཱདཱིནནྟི ཨཱདི-སདྡེན ཀུལཱལརཛཀཱདཱིནཾ སངྒཧོ.

ཚདྡིསཱཔཊིཙྪཱདནཀཎྜཝཎྞནཱ

༢༦༦. ཙཏཱུཧི ཀཱརཎེཧཱིཏི ན ཚནྡགམནཱདཱིཧི ཙཏཱུཧི ཀཱརཎེཧི ¶ . ཨཀུསལཾ པཧཱཡཱཏི ‘‘ཙཏྟཱརོ ཀམྨཀིལེསཱ’’ཏི ཝུཏྟཾ ཨཀུསལཉྩེཝ ཨགཏིགམནཱཀུསལཉྩ པཛཧིཏྭཱ. ཚཧི ཀཱརཎེཧཱིཏི སུརཱཔཱནཱདཱིསུ ཨཱདཱིནཝདསྶནསངྑཱཏེཧི ཚཧི ཀཱརཎེཧི. སུརཱཔཱནཱནུཡོགཱདིབྷེདཾ ཚབྦིདྷཾ བྷོགཱནཾ ཨཔཱཡམུཁཾ ཝིནཱསམུཁཾ ཝཛྫེཏྭཱ. སོལ༹ས མིཏྟཱནཱིཏི ཨུཔཀཱརཱདིཝསེན ཙཏྟཱརོ, པམཏྟརཀྑཎཱདིཀིཙྩཝིསེསཝསེན པཙྩེཀཾ ཙཏྟཱརོ ཙཏྟཱརོ ཀཏྭཱ སོལ༹སཝིདྷེ ཀལྱཱཎམིཏྟེ སེཝནྟོ བྷཛནྟོ. སཏྠཝཱཎིཛྫཱདིམིཙྪཱཛཱིཝཾ པཧཱཡ ཉཱཡེནེཝ ཝཏྟནཏོ དྷམྨིཀེན ཨཱཛཱིཝེན ཛཱིཝཏི. ནམསྶིཏབྦཱཏི ཨུཔཀཱརཝསེན, གུཎཝསེན ཙ ནམསྶིཏབྦཱ སབྦདཱ ནཏེན ཧུཏྭཱ ཝཏྟིཏབྦཱ. དིསཱ-སདྡསྶ ཨཏྠོ ཧེཊྛཱ ཝུཏྟོ ཨེཝ. ཨཱགམནབྷཡནྟི ཏཏྠ སམྨཱ ཨཔྤཊིཔཏྟིཡཱ, མིཙྪཱཔཊིཔཏྟིཡཱ ཙ ཨུཔྤཛྫནཀཨནཏྠོ. སོ ཧི བྷཱཡནྟི ཨེཏསྨཱཏི ‘‘བྷཡ’’ནྟི ཝུཙྩཏི. ཡེན ཀཱརཎེན མཱཏཱཔིཏུཨཱདཡོ པུརཏྠིམཱདིབྷཱཝེན ཨཔདིཊྛཱ, ཏཾ དསྶེཏུཾ ‘‘པུབྦུཔཀཱརིཏཱཡཱ’’ཏིཨཱདི ཝུཏྟཾ, ཏེན ཨཏྠསརིཀྑཏཱཡ ནེསཾ པུརཏྠིམཱདིབྷཱཝོཏི དསྶེཏི. ཏཐཱ ཧི མཱཏཱཔིཏརོ པུཏྟཱནཾ པུརཏྠིམབྷཱཝེན ཏཱཝ ཨུཔཀཱརིབྷཱཝེན དིསྶནཏོ, ཨཔདིསྶནཏོ ཙ པུརཏྠིམཱ དིསཱ. ཨཱཙརིཡཱ ཨནྟེཝཱསིཀསྶ དཀྑིཎབྷཱཝེན, ཧིཏཱཧིཏཾ པཏིཀུསལབྷཱཝེན དཀྑིཎཱརཧཏཱཡ ཙ ཝུཏྟནཡེན དཀྑིཎཱ དིསཱ. ཨིམིནཱ ནཡེན ‘‘པཙྪིམཱ དིསཱ’’ཏིཨཱདཱིསུ ཡཐཱརཧཾ ¶ ཨཏྠོ ཝེདིཏབྦོ. གྷརཱཝཱསསྶ དུཀྑབཧུལཏཱཡ ཏེ ཏེ ཙ ཀིཙྩཝིསེསཱ ཡཐཱཨུཔྤཏིཏདུཀྑནིཏྠརཎཏྠཱཏི ཝུཏྟཾ ‘‘ཏེ ཏེ དུཀྑཝིསེསེ ཨུཏྟརཏཱི’’ཏི. ཡསྨཱ དཱསཀམྨཀརཱ སཱམིཀསྶ པཱདཱནཾ པཡིརུཔཱསནཝསེན ཙེཝ ཏདནུཙྪཝིཀཀིཙྩསཱདྷནཝསེན ཙ ཡེབྷུཡྻེན ¶ སནྟིཀཱཝཙརཱ, ཏསྨཱ ཝུཏྟཾ ‘‘པཱདམཱུལེ པཏིཊྛཱནཝསེནཱ’’ཏི. གུཎེཧཱིཏི ཨུཔརིབྷཱཝཱཝཧེཧི གུཎེཧི. ཨུཔརི ཋིཏབྷཱཝེནཱཏི ¶ སགྒམགྒེ མོཀྑམགྒེ ཙ པཏིཊྛིཏབྷཱཝེན.

༢༦༧. བྷཏོཏི པོསིཏོ, ཏཾ པན བྷརཎཾ ཛཱཏཀཱལཏོ པཊྛཱཡ སུཁཔཙྩཡཱུཔཧརཎེན དུཀྑཔཙྩཡཱཔཧརཎེན ཙ ཏེཧི པཝཏྟིཏནྟི དསྶེཏུཾ ‘‘ཐཉྙཾ པཱཡེཏྭཱ’’ཏིཨཱདི ཝུཏྟཾ. ཛགྒིཏོཏི པཊིཛགྒིཏོ. ཏེཏི མཱཏཱཔིཏརོ.

མཱཏཱཔིཏཱུནཾ སནྟཀཾ ཁེཏྟཱདིཾ ཨཝིནཱསེཏྭཱ རཀྑིཏཾ ཏེསཾ པརམྤརཱཡ ཋིཏིཡཱ ཀཱརཎཾ ཧོཏཱིཏི ‘‘ཏཾ རཀྑནྟོ ཀུལཝཾསཾ སཎྛཔེཏི ནཱམཱ’’ཏི ཝུཏྟཾ. ཨདྷམྨིཀཝཾསཏོཏི ‘‘ཀུལཔྤདེསཱདིནཱ ཨཏྟནཱ སདིསཾ ཨེཀཾ པུརིསཾ གྷཊེཏྭཱ ཝཱ གཱིཝཱཡཾ ཝཱ ཧཏྠེ ཝཱ བནྡྷམཎིཡཾ ཝཱ ཧཱརེཏབྦ’’ནྟི ཨེཝཾ ཨཱདིནཱ པཝཏྟཨདྷམྨིཀཔཝེཎིཏོ. ཧཱརེཏྭཱཏི ཨཔནེཏྭཱ ཏཾ གཱཧཾ ཝིསྶཛྫཱཔེཏྭཱ. མཱཏཱཔིཏརོ ཏཏོ གཱཧཏོ ཝིཝེཙནེནེཝ ཧི ཨཱཡཏིཾ ཏེསཾ པརམྤརཱཧཱརིཀཱ སིཡཱ. དྷམྨིཀཝཾསེཏི ཧིཾསཱདིཝིརཏིཡཱ དྷམྨིཀེ ཝཾསེ དྷམྨིཀཱཡ པཝེཎིཡཾ. ཋཔེནྟོཏི པཏིཊྛཔེནྟོ. སལཱཀབྷཏྟཱདཱིནི ཨནུཔཙྪིནྡིཏྭཱཏི སལཱཀབྷཏྟདཱནཱདཱིནི ཨཝིཙྪིནྡིཏྭཱ.

དཱཡཛྫཾ པཊིཔཛྫཱམཱིཏི ཨེཏྠ ཡསྨཱ དཱཡཔཊིལཱབྷསྶ ཡོགྱབྷཱཝེན ཝཏྟམཱནོཡེཝ དཱཡཛྫཾ པཊིཔཛྫཏི ནཱམ, ན ཨིཏརོ, ཏསྨཱ ཏམཏྠཾ དསྶེཏུཾ ‘‘མཱཏཱཔིཏརོ’’ཏིཨཱདི ཝུཏྟཾ. དཱརཀེཏི པུཏྟེ. ཝིནིཙྪཡཾ པཏྭཱཏི ‘‘པུཏྟསྶ ཙཛཝིསྶཛྫན’’ནྟི ཨེཝཾ ཨཱགཏཾ ཝིནིཙྪཡཾ ཨཱགམྨ. དཱཡཛྫཾ པཊིཔཛྫཱམཱིཏི ཝུཏྟནྟི ‘‘དཱཡཛྫཾ པཊིཔཛྫཱམཱི’’ ཏི ཨིདཾ ཙཏུཏྠཾ ཝཏྟནཊྛཱནཾ ཝུཏྟཾ. ཏེསནྟི མཱཏཱཔིཏཱུནཾ. ཏཏིཡདིཝསཏོ པཊྛཱཡཱཏི མཏདིཝསཏོ ཏཏིཡདིཝསཏོ པཊྛཱཡ.

པཱཔཏོ ¶ ནིཝཱརཎཾ ནཱམ ཨནཱགཏཝིསཡཾ. སམྤཏྟཝཏྠུཏོཔི ཧི ནིཝཱརཎཾ ཝཱིཏིཀྐམེ ཨནཱགཏེ ཨེཝ སིཡཱ, ན ཝཏྟམཱནེ. ནིབྦཏྟིཏཱ པན པཱཔཀིརིཡཱ ¶ གརཧཎམཏྟཔཊིཀཱརཱཏི ཨཱཧ ‘‘ཀཏམྤི གརཧནྟཱི’’ཏི. ནིཝེསེནྟཱིཏི པཏིཊྛཔེནྟི. ཝུཏྟཔྤཀཱརཱ མཱཏཱཔིཏརོ ཨནཝཛྫམེཝ སིཔྤཾ སིཀྑཱཔེནྟཱིཏི ཝུཏྟཾ ‘‘མུདྡཱགཎནཱདིསིཔྤ’’ནྟི. རཱུཔཱདཱིཧཱིཏི ཨཱདི-སདྡེན བྷོགཔརིཝཱརཱདིཾ སངྒཎྷཱཏི. ཨནུརཱུཔེནཱཏི ཨནུཙྪཝིཀེན.

ནིཙྩབྷཱུཏོ སམཡོ ཨབྷིཎྷཀརཎཀཱལོ. ཨབྷིཎྷཏྠོ ཧི ཨཡཾ ནིཙྩ-སདྡོ ‘‘ནིཙྩཔཧཾསིཏོ ནིཙྩཔཧཊྛོ’’ཏིཨཱདཱིསུ ཝིཡ. ཡུཏྟཔཏྟཀཱལོ ཨེཝ སམཡོ ཀཱལསམཡོ. ‘‘ཨུཊྛཱཡ ¶ སམུཊྛཱཡཱ’’ཏི ཨིམིནཱསྶ ནིཙྩམེཝ དཱནེ ཏེསཾ ཡུཏྟཔཡུཏྟཏཾ དསྶེཏི. སིཁཱཋཔནཾ དཱརཀཀཱལེ. ཨཱཝཱཧཝིཝཱཧཾ པུཏྟདྷཱིཏཱུནཾ ཡོབྦནཔྤཏྟཀཱལེ.

ཏཾ བྷཡཾ ཡཐཱ ནཱགཙྪཏི, ཨེཝཾ པིཧིཏཱ ཧོཏི ‘‘པུརཏྠིམཱ དིསཱ’’ཏི ཝིབྷཏྟིཾ པརིཎཱམེཏྭཱ ཡོཛནཱ. ཡཐཱ པན ཏཾ བྷཡཾ ཨཱགཙྪེཡྻ, ཡཐཱ ཙ ནཱགཙྪེཡྻ, ཏདུབྷཡཾ དསྶེཏུཾ ‘‘སཙེ ཧཱི’’ཏིཨཱདི ཝུཏྟཾ. ཝིཔྤཊིཔནྣཱཏི ‘‘བྷཏོ ནེ བྷརིསྶཱམཱི’’ཏིཨཱདིནཱ ཨུཏྟསམྨཱཔཊིཔཏྟིཡཱ ཨཀཱརཎེན ཙེཝ ཏཔྤཊིཔཀྑམིཙྪཱཔཊིཔཏྟིཡཱ ཨཀརཎེན ཙ ཝིཔྤཊིཔནྣཱ པུཏྟཱ ཨསྶུ. ཨེཏཾ བྷཡནྟི ཨེཏཾ ‘‘མཱཏཱཔིཏཱུནཾ ཨཔྤཏིརཱུཔཱཏི ཝིཉྙཱུནཾ གརཧིཏབྦཏཱབྷཡཾ, པརཝཱདབྷཡ’’ནྟི ཨེཝམཱདི ཨཱགཙྪེཡྻ པུཏྟེསུ. པུཏྟཱནཾ ནཱནུརཱུཔཱཏི ཨེཏྠ ‘‘པུཏྟཱན’’ནྟི པདཾ ཨེཏཾ བྷཡཾ པུཏྟཱནཾ ཨཱགཙྪེཡྻཱཏི ཨེཝཾ ཨིདྷཱཔི ཨཱནེཏྭཱ སམྦནྡྷིཏབྦཾ. ཏཱདིསཱནཉྷི མཱཏཱཔིཏཱུནཾ པུཏྟཱནཾ ཨོཝཱདཱནུསཱསནིཡོ དཱཏུཾ སམཏྠཀཱལཏོ པཊྛཱཡ ཏཱ ཏེསཾ དཱཏབྦཱ ཨེཝཱཏི ཀཏྭཱ ཏཐཱ ཝུཏྟཾ. པུཏྟཱནཉྷི ཝསེནཱཡཾ དེསནཱ ཨནཱགཏཱ སམྨཱཔཊིཔནྣེསུ ཨུབྷོསུ ཨཏྟནོ, མཱཏཱཔིཏཱུནཉྩ ¶ ཝསེན ཨུཔྤཛྫནཀཏཱཡ སབྦཾ བྷཡཾ ན ཧོཏི སམྨཱཔཊིཔནྣཏྟཱ. ཨེཝཾ པཊིཔནྣཏྟཱ ཨེཝ པཊིཙྪནྣཱ ཧོཏི ཏཏྠ ཀཱཏབྦཔཊིསནྠཱརསྶ སམྨདེཝ ཀཏཏྟཱ. ཁེམཱཏི ཨནུཔདྡཝཱ. ཡཐཱཝུཏྟསམྨཱཔཊིཔཏྟིཡཱ ཨཀརཎེན ཧི ཨུཔྤཛྫནཀཨུཔདྡཝཱ ཀརཎེན ན ཧོནྟཱིཏི.

‘‘ན ཁོ ཏེ’’ཏིཨཱདིནཱ ཝུཏྟོ སངྒཱིཏིཨནཱརུལ༹ྷོ བྷགཝཏཱ ཏདཱ ཏསྶ ཝུཏྟོ པརམྤརཱགཏོ ཨཏྠོ ཝེདིཏབྦོ. ཏེནཱཧ ‘‘བྷགཝཱ སིངྒཱལཀཾ ཨེཏདཝོཙཱ’’ཏི. ཨཡཉྷཱིཏི ཨེཏྠ ཧི-སདྡོ ཨཝདྷཱརཎེ. ཏཐཱ ཧི ‘‘ནོ ཨཉྙཱ’’ཏི ཨཉྙདིསཾ ནིཝཏྟེཏི.

༢༦༨. ཨཱཙརིཡཾ ¶ དཱུརཏོཝ དིསྭཱ ཨུཊྛཱནཝཙནེནེཝ ཏསྶ པཙྩུགྒམནཱདིསཱམཱིཙིཀིརིཡཱ ཨཝུཏྟསིདྡྷཱཏི ཏཾ དསྶེནྟོ ‘‘པཙྩུགྒམནཾ ཀཏྭཱ’’ཏིཨཱདིམཱཧ. ཨུཔཊྛཱནེནཱཏི པཡིརུཔཱསནེན. ཏིཀྑཏྟུཾཨུཔཊྛཱནགམནེནཱཏི པཱཏོ, མཛ྄ཛྷནྷིཀེ, སཱཡནྟི ཏཱིསུ ཀཱལེསུ ཨུཔཊྛཱནཏྠཾ ཨུཔགམནེན. སིཔྤུགྒཧཎཏྠཾ པན ཨུཔགམནཾ ཨུཔཊྛཱནནྟོགདྷཾ པཡོཛནཝསེན གམནབྷཱཝཏོཏི ཨཱཧ ‘‘སིཔྤུགྒཧཎ…པེ… ཧོཏཱི’’ཏི. སོཏུཾ ཨིཙྪཱ སུསྶཱུསཱ, སཱ པན ཨཱཙརིཡེ སིཀྑིཏབྦསིཀྑེ ཙ ཨཱདརགཱརཝཔུབྦིཀཱ ཨིཙྪིཏབྦཱ ‘‘ཨདྡྷཱ ཨིམིནཱ སིཔྤེན སིཀྑིཏེན ཨེཝརཱུཔཾགུཎཾ པཊིལབྷིསྶཱམཱི’’ཏི. ཏཐཱབྷཱུཏཉྩ ཏཾ སཝནཾ སདྡྷཱཔུབྦངྒམཾ ཧོཏཱིཏི ཨཱཧ ‘‘སདྡཧིཏྭཱ སཝནེནཱ’’ཏི. ཝུཏྟམེཝཏྠཾ བྱཏིརེཀཝསེན དསྶེཏུཾ ‘‘ཨསདྡཧིཏྭཱ…པེ… ནཱདྷིགཙྪཏཱི’’ཏི ཝུཏྟཾ. ཏསྨཱ ཏསྶཏྠོ ཝུཏྟཔཊིཔཀྑནཡེན ཝེདིཏབྦོ. ཡཾ སནྡྷཱཡ ‘‘ཨཝསེསཁུདྡཀཔཱརིཙརིཡཱཡཱ’’ཏི ཝུཏྟཾ, ཏཾ ཝིབྷཛནཾ ཨནཝསེསཏོ དསྶེཏུཾ ‘‘ཨནྟེཝཱསིཀེན ཧཱི’’ཏིཨཱདི ¶ ཝུཏྟཾ. པཙྩུཔཊྛཱནཱདཱིནཱིཏི ཨཱདི-སདྡེན ཨཱསནཔཉྙཱཔནཾ བཱིཛནནྟི ཨེཝམཱདིཾ སངྒཎྷཱཏི. ཨནྟེཝཱསིཀཝཏྟནྟི ¶ ཨནྟེཝཱསིཀེན ཨཱཙརིཡམྷི སམྨཱཝཏྟིཏབྦཝཏྟཾ. སིཔྤཔཊིགྒཧཎེནཱཏི སིཔྤགནྠསྶ སཀྐཙྩཾ ཨུགྒཧཎེན. ཏསྶ ཧི སུཊྛུ ཨུགྒཧཎེན ཏདནུསཱརེནསྶ པཡོགོཔི སམྨདེཝ ཨུགྒཧིཏོ ཧོཏཱིཏི. ཏེནཱཧ ‘‘ཐོཀཾ གཧེཏྭཱ’’ཏིཨཱདི.

སུཝིནཱིཏཾ ཝིནེནྟཱིཏི ཨིདྷ ཨཱཙཱརཝིནཡོ ཨདྷིཔྤེཏོ. སིཔྤསྨིཾ པན སིཀྑཱཔནཝིནཡོ ‘‘སུགྒཧིཏཾ གཱཧཱཔེནྟཱི’’ཏི ཨིམིནཱཝ སངྒཧིཏོཏི ཝུཏྟཾ ‘‘ཨེཝཾ ཏེ ནིསཱིདིཏབྦ’’ནྟིཨཱདི. ཨཱཙརིཡཱ ཧི ནཱམ ཨནྟེཝཱསིཀེ ན དིཊྛདྷམྨིཀེ ཨེཝ ཝིནེནྟི, ཨཐ ཁོ སམྤརཱཡིཀེཔཱིཏི ཨཱཧ ‘‘པཱཔམིཏྟཱ ཝཛྫེཏབྦཱ’’ཏི. སིཔྤགནྠསྶ ཨུགྒཎྷནཾ ནཱམ ཡཱཝདེཝ པཡོགསམྤཱདནཏྠནྟི ཨཱཧ ‘‘པཡོགཾ དསྶེཏྭཱ གཎྷཱཔེནྟཱི’’ཏི. མིཏྟཱམཙྩེསཱུཏི ཨཏྟནོ མིཏྟཱམཙྩེསུ. པཊིཡཱདེནྟཱིཏི པརིགྒཧེཏྭཱ ནཾ མམཏྟཝསེན པཊིཡཱདེནྟི. ‘‘ཨཡཾ ཨམྷཱཀཾ ཨནྟེཝཱསིཀོ’’ཏིཨཱདིནཱ ཧི ཨཏྟནོ པརིགྒཧིཏདསྶནམུཁེན ཙེཝ ‘‘བཧུསྶུཏོ’’ཏིཨཱདིནཱ ཏསྶ གུཎཔརིགྒཎྷནམུཁེ ཙ ཏཾ ཏེསཾ པཊིཡཱདེནྟི. སབྦདིསཱསུ རཀྑཾ ཀརོནྟི ཙཱཏུདྡིསབྷཱཝསམྤཱདནེནསྶ སབྦཏྠ སུཁཛཱིཝིབྷཱཝསཱདྷནཏོ. ཏེནཱཧ ‘‘ཨུགྒཧིཏསིཔྤོ ཧཱི’’ཏིཨཱདི. སཏྟཱནཉྷི དུཝིདྷཱ སརཱིརརཀྑཱ ཨབྦྷནྟརཔརིསྶཡཔཊིགྷཱཏེན, བཱཧིརཔརིསྶཡཔཊིགྷཱཏེན ཙ. ཏཏྠ ¶ ཨབྦྷནྟརཔརིསྶཡོ ཁུཔྤིཔཱསཱདིབྷེདོ, སོ ལཱབྷསིདྡྷིཡཱ པཊིཧཉྙཏི ཏཱཡ ཏཛྫཱཔརིཧཱརསཾཝིདྷཱནཏོ. བཱཧིརཔརིསྶཡོ ཙོརཨམནུསྶཱདིཧེཏུཀོ, སོ ཝིཛྫཱསིདྡྷིཡཱ པཊིཧཉྙཏི ཏཱཡ ཏཛྫཱཔརིཧཱརསཾཝིདྷཱནཏོ. ཏེན ཝུཏྟཾ ‘‘ཡཾ ཡཾ དིས’’ནྟིཨཱདི.

པུབྦེ ‘‘ཨུགྒཧིཏསིཔྤོ ཧཱི’’ཏིཨཱདིནཱ སིཔྤསིཀྑཱཔནེནེཝ ལཱབྷུཔྤཏྟིཡཱ དིསཱསུ པརིཏྟཱཎཀརཎཾ དསྶིཏཾ, ཨིདཱནི ‘‘ཡཾ ཝཱ སོ’’ཏིཨཱདིནཱ ཏསྶ ཨུགྒཧིཏསིཔྤསྶ ནིཔྥཏྟིཝསེན གུཎཀིཏྟནམུཁེན ¶ པགྒཎྷནེནཔི ལཱབྷུཔྤཏྟིཡཱཏི ཨཡམེཏེསཾ ཝིཀཔྤཱནཾ བྷེདོ. སེསནྟི ‘‘པཊིཙྪནྣཱ ཧོཏཱི’’ཏིཨཱདིཀཾ པཱལི༹ཨཱགཏཾ, ‘‘ཨེཝཉྩ པན ཝཏྭཱ’’ཏིཨཱདིཀཾ ཨཊྛཀཐཱགཏཉྩ. ཨེཏྠཱཏི ཨེཏསྨིཾ དུཏིཡདིསཱཝཱརེ. པུརིམནཡེནེཝཱཏི པུབྦེ པཋམདིསཱཝཱརེ ཝུཏྟནཡེནེཝ.

༢༦༩. སམྨཱནནཱ ནཱམ སམྦྷཱཝནཱ, སཱ པན ཨཏྠཙརིཡཱལཀྑཎཱ ཙ དཱནལཀྑཎཱ ཙ ཙཏུཏྠཔཉྩམཊྛཱནེཧེཝ སངྒཧིཏཱཏི པིཡཝཙནལཀྑཎཾ ཏཾ དསྶེཏུཾ ‘‘སམྦྷཱཝིཏཀཐཱཀཐནེནཱ’’ཏི ཝུཏྟཾ. ཝིགཏམཱནནཱ ཝིམཱནནཱ, ན ཝིམཱནནཱ ཨཝིམཱནནཱ, ཝིམཱནནཱཡ ཨཀརཎཾ. ཏེནཱཧ ‘‘ཡཐཱ དཱསཀམྨཀརཱདཡོ’’ཏིཨཱདི. སཱམིཀེན ཧི ཝིམཱནིཏཱནཾ ཨིཏྠཱིནཾ སབྦོ པརིཛནོ ཝིམཱནེཏིཡེཝ ¶ . པརིཙརནྟོཏི ཨིནྡྲིཡཱནི པརིཙརནྟོ. ཏཾ ཨཏིཙརཏི ནཱམ ཏཾ ཨཏྟནོ གིཧིནིཾ ཨཏིམཉྙིཏྭཱ ཨགཎེཏྭཱ ཝཏྟནཏོ. ཨིསྶརིཡཝོསྶགྒེནཱཏི ཨེཏྠ ཡཱདིསོ ཨིསྶརིཡཝོསྶགྒོ གིཧིནིཡཱ ཨནུཙྪཝིཀོ, ཏཾ དསྶེནྟོ ‘‘བྷཏྟགེཧེ ཝིསྶཊྛེ’’ཏི ཨཱཧ. གེཧེ ཨེཝ ཋཏྭཱ ཝིཙཱརེཏབྦམྤི ཧི ཀསིཝཱཎིཛྫཱདིཀམྨཾ ཀུལིཏྠིཡཱ བྷཱརོ ན ཧོཏི, སཱམིཀསྶེཝ བྷཱརོ, ཏཏོ ཨཱགཏསཱཔཏེཡྻཾ པན ཏཱཡ སུགུཏྟཾ ཀཏྭཱ ཋཔེཏབྦཾ ཧོཏི. ‘‘སབྦཾ ཨིསྶརིཡཾ ཝིསྶཊྛཾ ནཱམ ཧོཏཱི’’ཏི ཨེཏཱ མཉྙནྟཱིཏི ཨདྷིཔྤཱཡོ. ཨིཏྠིཡོ ནཱམ པུཏྟལཱབྷེན ཝིཡ མཧགྒྷཝིཔུལཱལངྐཱརལཱབྷེནཔི ན སནྟུསྶནྟེཝཱཏི ཏཱསཾ ཏོསནཾ ཨལངྐཱརདཱནནྟི ཨཱཧ ‘‘ཨཏྟནོ ཝིབྷཝཱནུརཱུཔེནཱ’’ཏི.

ཀུལིཏྠིཡཱ སཾཝིཧིཏབྦཀམྨནྟཱ ནཱམ ཨཱཧཱརསམྤཱདནཝིཙཱརཔྤཀཱརཱཏི ཨཱཧ ‘‘ཡཱགུབྷཏྟཔཙནཀཱལཱདཱིནཱི’’ཏིཨཱདི. སམྨཱནནཱདཱིཧི ཡཐཱརཧཾ ¶ པིཡཝཙནེཧི ཙེཝ བྷོཛནདཱནཱདཱིཧི ཙ པཧེཎཀཔེསནཱདཱིཧི ཨཉྙཏོ, ཏཏྠེཝ ཝཱ ཨུཔྤནྣསྶ པཎྞཱཀཱརསྶ ཚཎདིཝསཱདཱིསུ པེསེཏབྦཔིཡབྷཎྜེཧི ཙ སངྒཧིཏཔརིཛནཱ. གེཧསཱམིནིཡཱ ¶ ཨནྟོགེཧཛནོ ནིཙྩཾ སངྒཧིཏོ ཨེཝཱཏི ཝུཏྟཾ ‘‘ཨིདྷ པརིཛནོ ནཱམ…པེ… ཉཱཏིཛནོ’’ཏི. ཨཱབྷཏདྷནནྟི བཱཧིརཏོ ཨནྟོགེཧཾ པཝེསིཏདྷནཾ. གིཧིནིཡཱ ནཱམ པཋམཾ ཨཱཧཱརསམྤཱདནེ ཀོསལླཾ ཨིཙྪིཏབྦཾ, ཏཏྠ ཙ ཡུཏྟཔཡུཏྟཏཱ, ཏཏོ སཱམིཀསྶ ཨིཏྠིཛནཱཡཏྟེསུ ཀིཙྩཱཀིཙྩེསུ, ཏཏོ པུཏྟཱནཾ པརིཛནསྶ ཀཱཏབྦཀིཙྩེསཱུཏི ཨཱཧ ‘‘ཡཱགུབྷཏྟསམྤཱདནཱདཱིསཱུ’’ཏིཨཱདི. ‘‘ནིཀྐོསཛྫཱ’’ཏི ཝཏྭཱ ཏམེཝ ནིཀྐོསཛྫཏཾ བྱཏིརེཀཏོ, ཨནྭཡཏོ ཙ ཝིབྷཱཝེཏུཾ ‘‘ཡཐཱ’’ཏིཨཱདི ཝུཏྟཾ. ཨིདྷཱཏི ཨིམསྨིཾ ཏཏིཡདིསཱཝཱརེ. པུརིམནཡེནེཝཱཏི པཋམདིསཱཝཱརེ ཝུཏྟནཡེནེཝ. ཨིཏི བྷགཝཱ ‘‘པཙྪིམཱ དིསཱ པུཏྟདཱརཱ’’ཏི ཨུདྡིསིཏྭཱཔི དཱརཝསེནེཝ པཙྪིམཾ དིསཾ ཝིསྶཛྫེསི, ན པུཏྟཝསེན. ཀསྨཱ? པུཏྟཱ ཧི དཱརཀཀཱལེ ཨཏྟནོ མཱཏུ ཨནུགྒཎྷནེནེཝ ཨནུགྒཧིཏཱ ཧོནྟི ཨནུཀམྤིཏཱ, ཝིཉྙུཏཾ པཏྟཀཱལེ པན ཡཐཱ ཏེཔི ཏདཱ ཨནུགྒཧེཏབྦཱ, སྭཱཡཾ ཝིདྷི ‘‘པཱཔཱ ནིཝཱརེནྟཱི’’ཏིཨཱདིནཱ པཋམདིསཱཝཱརེ དསྶིཏོ ཨེཝཱཏི ཀིཾ པུན ཝིསྶཛྫནེནཱཏི. དཱནཱདིསངྒཧཝཏྠཱུསུ ཡཾ ཝཏྟབྦཾ, ཏཾ ཧེཊྛཱ ཝུཏྟམེཝཱཏི.

༢༧༠. ཙཏྟཱརིཔི ཋཱནཱནི ལངྒྷིཏྭཱ པཉྩམམེཝ ཋཱནཾ ཝིཝརིཏུཾ ‘‘ཨཝིསཾཝཱདནཏཱཡཱ’’ཏིཨཱདི ཝུཏྟཾ. ཏཏྠ ཡསྶ ཡསྶ ནཱམཾ གཎྷཱཏཱིཏི སཧཱཡོ ཨཏྠིཀབྷཱཝེན ཡསྶ ཡསྶ ཝཏྠུནོ ནཱམཾ ཀཐེཏི. ཨཝིསཾཝཱདེཏྭཱཏི ཨེཏྠ དུཝིདྷཾ ཨཝིསཾཝཱདནཾ ཝཱཙཱཡ, པཡོགེན ཙཱཏི ཏཾ དུཝིདྷམྤི དསྶེཏུཾ ‘‘ཨིདམྤཱི’’ཏིཨཱདི ཝུཏྟཾ. ‘‘དཱནེནཱ’’ཏི ཙ ཨིདཾ ནིདསྶནམཏྟཾ དཊྛབྦཾ ཨིཏརསངྒཧཝཏྠུཝསེནཔི ཨཝིསཾཝཱདེཏྭཱ སངྒཎྷནསྶ ལབྦྷནཏོ, ཨིཙྪིཏབྦཏོ ¶ ཙ. ཨཔརཱ པཙྪིམཱ པཛཱ ཨཔརཔཛཱ, ཨཔརཱཔརཾ ཨུཔྤནྣཱ ཝཱ པཛཱ ཨཔརཔཛཱ. པཊིཔཱུཛནཱ ནཱམ མམཱཡནཱ, སཀྐཱརཀིརིཡཱ ཙཱཏི ཏདུབྷཡཾ དསྶེཏུཾ ‘‘ཀེལཱཡནྟཱི’’ཏིཨཱདི ཝུཏྟཾ. མམཱཡནྟཱིཏི མམཏྟཾ ཀརོནྟི.

༢༧༡. ཡཐཱབལཾ ཀམྨནྟསཾཝིདྷཱནེནཱཏི དཱསཀམྨཀརཱནཾ ¶ ཡཐཱབལཾ བལཱནུརཱུཔཾ ཏེསཾ ཏེསཾ ཀམྨནྟཱནཾ སཾཝིདཧནེན ཝིཙཱརཎེན, ཀཱརཱཔནེནཱཏི ཨཏྠོ. ཏེནཱཧ ‘‘དཧརེཧཱི’’ཏིཨཱདི. བྷཏྟཝེཏནཱནུཔྤདཱནེནཱཏི ཏསྶ ཏསྶ དཱསཀམྨཀརསྶ ཨནུརཱུཔཾ བྷཏྟསྶ, ཝེཏནསྶ ཙ པདཱནེན ¶ . ཏེནེཝཱཧ ‘‘ཨཡཾ ཁུདྡཀཔུཏྟོ’’ཏིཨཱདི. བྷེསཛྫཱདཱིནཱིཏི ཨཱདི-སདྡེན སཔྤཱཡཱཧཱརཝསནཊྛཱནཱདིཾ སངྒཎྷཱཏི. སཱཏབྷཱཝོ ཨེཝ རསཱནཾ ཨཙྪརིཡཏཱཏི ཨཱཧ ‘‘ཨཙྪརིཡེ མདྷུརརསེ’’ཏི. ཏེསནྟི དཱསཀམྨཀརཱནཾ. ཝོསྶཛྫནེནཱཏི ཀམྨཀརཎཏོ ཝིསྶཛྫནེན. ཝེལཾ ཉཏྭཱཏི ‘‘པཧཱརཱཝསེསོ, ཨུཔཌྜྷཔཧཱརཱཝསེསོ ཝཱ དིཝསོ’’ཏི ཝེལཾ ཛཱནིཏྭཱ. ཡོ ཀོཙི མཧུསྶཝོ ཚཎོ ནཱམ. ཀཏྟིཀུསྶཝོ, ཕགྒུཎུསྶཝོཏི ཨེཝཾ ནཀྑཏྟསལླཀྑིཏོ མཧུསྶཝོ ནཀྑཏྟཾ. པུབྦུཊྛཱཡིཏཱ, པཙྪཱནིཔཱཏིཏཱ ཙ མཧཱསུདསྶནེ ཝུཏྟཱ ཨེཝཱཏི ཨིདྷ ཨནཱམཊྛཱ.

དིནྣཱདཱཡིནོཏི པུབྦཔདཱཝདྷཱརཎཝསེན སཱཝདྷཱརཎཝཙནནྟི ཨཝདྷཱརཎེན ནིཝཏྟིཏཾ དསྶེཏུཾ ‘‘ཙོརིཀཱཡ ཀིཉྩི ཨགྒཧེཏྭཱ’’ཏི ཝུཏྟཾ. ཏེནཱཧ ‘‘སཱམིཀེཧི དིནྣསྶེཝ ཨཱདཱཡིནོ’’ཏི. ན མཡཾ ཀིཉྩི ལབྷཱམཱཏི ཨནུཛ྄ཛྷཱཡིཏྭཱཏི པཊིསེདྷདྭཡེན ཏེཧི ལདྡྷབྦསྶ ལཱབྷཾ དསྶེཏི. ‘‘ཀིཾ ཨེཏསྶ ཀམྨེན ཀཏེནཱཏི ཨནུཛ྄ཛྷཱཡིཏྭཱ’’ཏི ཨིདཾ ཏུཊྛཧདཡཏཱཡ ཀཱརཎདསྶནཾ པཊིཔཀྑདཱུརཱིབྷཱཝཏོ. ཏུཊྛཧདཡཏཱདསྶནམྤི ཀམྨསྶ སུཀཏཀཱརིཏཱཡ ཀཱརཎདསྶནཾ. ཀིཏྟི ཨེཝ ཝཎྞོ ཀིཏྟིཝཎྞོ, ཏཾ ཀིཏྟིཝཎྞཾ གུཎཀཐཾ ཧརནྟི, ཏཾ ཏཾ དིསཾ ཨུཔཱཧརནྟཱིཏི ཀིཏྟིཝཎྞཧརཱ. ཏཐཱ ཏཐཱ ཀིཏྟེཏབྦཏོ ཧི ཀིཏྟི ¶ , གུཎོ, ཏེསཾ ཝཎྞནཾ ཀཐནཾ ཝཎྞོ. ཏེནཱཧ ‘‘གུཎཀཐཱཧཱརཀཱ’’ཏི.

༢༧༢. ཀཱརཎབྷཱུཏཱ མེཏྟཱ ཨེཏེསཾ ཨཏྠཱིཏི མེཏྟཱནི, ཀཱཡཀམྨཱདཱིནི. ཡཱནི པན ཏཱནི ཡཐཱ ཡཐཱ ཙ སམྦྷཝནྟི, ཏཾ དསྶེཏུཾ ‘‘ཏཏྠཱ’’ཏིཨཱདི ཝུཏྟཾ. ‘‘ཝིཧཱརགམན’’ནྟིཨཱདཱིསུ ‘‘མེཏྟཙིཏྟཾ པཙྩུཔཊྛཱཔེཏྭཱ’’ཏི པདཾ ཨཱཧརིཏྭཱ ཡོཛེཏབྦཾ. ཨནཱཝཊདྭཱརཏཱཡཱཏི ཨེཏྠ དྭཱརཾ ནཱམ ཨལོབྷཛ྄ཛྷཱསཡཏཱ དཱནསྶ མུཁབྷཱཝཏོ. ཏསྶ སཏོ དེཡྻདྷམྨསྶ དཱཏུཀཱམཏཱ ཨནཱཝཊཏཱ ཨེཝཉྷི གྷརམཱཝསནྟོ ཀུལཔུཏྟོ གེཧདྭཱརེ པིཧིཏེཔི ཨནཱཝཊདྭཱརོ ཨེཝ, ཨཉྙཐཱ ཨཔིཧིཏེཔི གྷརདྭཱརེ ཨཱཝཊདྭཱརོ ཨེཝཱཏི. ཏེན ཝུཏྟཾ ‘‘ཏཏྠཱ’’ཏིཨཱདི. ཝིཝརིཏྭཱཔི ཝསནྟོཏི ཝཙནསེསོ. པིདཧིཏྭཱཔཱིཏི ཨེཏྠཱཔི ཨེསེཝ ནཡོ. ‘‘སཱིལཝནྟེསཱུ’’ཏི ཨིདཾ པཊིགྒཱཧཀཏོ དཀྑིཎཝིསུདྡྷིདསྶནཏྠཾ ¶ ཝུཏྟཾ. ཀརུཎཱཁེཏྟེཔི ¶ དཱནེན ཨནཱཝཊདྭཱརཏཱ ཨེཝ. ‘‘སནྟཉྙེཝཱ’’ཏི ཨིམིནཱ ཨསནྟཾ ནཏྠིཝཙནཾ པུཙྪིཏཔཊིཝཙནཾ ཝིཡ ཨིཙྪིཏབྦཾ ཨེཝཱཏི དསྶེཏི ཝིཉྙཱུནཾ ཨཏྠིཀཱནཾ ཙིཏྟམདྡཝཀརཎཏོ. ‘‘པུརེབྷཏྟཾ པརིབྷུཉྫིཏབྦཀ’’ནྟི ཨིདཾ ཡཱཝཀཱལིཀེ ཨེཝ ཨཱམིསབྷཱཝསྶ ནིརུལ༹ྷཏཱཡ ཝུཏྟཾ.

‘‘སབྦེ སཏྟཱ’’ཏི ཨིདཾ ཏེསཾ སམཎབྲཱཧྨཎཱནཾ ཨཛ྄ཛྷཱསཡསམྤཏྟིདསྶནཾ པཀྑཔཱཏཱབྷཱཝདཱིཔནཏོ, ཨོདྷིསོ ཕརཎཱཡཔི མེཏྟཱབྷཱཝནཱཡ ལབྦྷནཏོ. ཡཱཡ ཀུསལཱབྷིཝཌྜྷིཨཱཀངྑཱཡ ཏེསཾ ཨུཔཊྛཱཀཱནཾ, ཏཐཱ ནེསཾ གེཧཔཝིསནཾ, ཏཾ སནྡྷཱཡཱཧ ‘‘པཝིསནྟཱཔི ཀལྱཱཎེན ཙེཏསཱ ཨནུཀམྤནྟི ནཱམཱ’’ཏི. སུཏསྶ པརིཡོདཱཔནཾ ནཱམ ཏསྶ ཡཱཐཱཝཏོ ཨཏྠཾ ཝིབྷཱཝེཏྭཱ ཝིཙིཀིཙྪཱཏམཝིདྷམནེན ཝིསོདྷནནྟི ཨཱཧ ‘‘ཨཏྠཾ ཀཐེཏྭཱ ཀངྑཾ ཝིནོདེནྟཱི’’ཏི. སཝནཾ ནཱམ དྷམྨསྶ ཡཱཝདེཝ སམྨཱཔཊིཔཛྫནཱཡ ཨསཏི ཏསྨིཾ ཏསྶ ནིརཏྠཀབྷཱཝཏོ, ཏསྨཱ སུཏསྶ པརིཡོདཱཔནཾ ནཱམ ¶ སམྨཱཔཊིཔཛྫཱཔནནྟི ཨཱཧ ‘‘ཏཐཏྟཱཡ ཝཱ པཊིཔཛྫཱཔེནྟཱི’’ཏི.

༢༧༣. ཨལམཏྟོཏི སམཏྠསབྷཱཝོ, སོ ཙ ཨཏྠཏོ སམཏྠོ ཨེཝཱཏི ‘‘ཨགཱརཾ ཨཛ྄ཛྷཱཝསནསམཏྠོ’’ཏི ཝུཏྟཾ. དིསཱནམསྶནཊྛཱནེཏི ཡཐཱཝུཏྟདིསཱནཾ པཙྩུཔཊྛཱནསཉྙིཏེ ནམསྶནཀཱརཎེ. པཎྜིཏོ ཧུཏྭཱ ཀུསལོ ཚེཀོ ལབྷཏེ ཡསནྟི ཡོཛནཱ. སཎྷགུཎཡོགཏོ སཎྷོ, སཎྷགུཎོཏི པནེཏྠ སུཁུམནིཔུཎཔཉྙཱ, མུདུཝཱཙཱཏི དསྶེནྟོ ‘‘སུཁུམ…པེ… བྷཎནེན ཝཱ’’ཏི ཝུཏྟཾ. དིསཱནམསྶནཊྛཱནེནཱཏི ཡེན ཉཱཎེན ཡཐཱཝུཏྟཱ ཚ དིསཱ ཝུཏྟནཡེན པཊིཔཛྫནྟོ ནམསྶཏི ནཱམ, ཏཾ ཉཱཎཾ དིསཱནམསྶནཊྛཱནཾ, ཏེན པཊིབྷཱནཝཱ. ཏེན ཧི ཏཾཏཾཀིཙྩཡུཏྟཔཏྟཝསེན པཊིཔཛྫནྟོ ཨིདྷ ‘‘པཊིབྷཱནཝཱ’’ཏི ཝུཏྟོ. ནིཝཱཏཝུཏྟཱིཏི པཎིཔཱཏསཱིལོ. ཨཏྠདྡྷོཏི ན ཐདྡྷོ ཐམྦྷརཧིཏོཏི ཙིཏྟསྶ ཨུདྡྷུམཱཏལཀྑཎེན ཐམྦྷིཏབྷཱཝེན ཝིརཧིཏོ. ཨུཊྛཱནཝཱིརིཡསམྤནྣོཏི ཀཱཡིཀེན ཝཱིརིཡེན སམནྣཱགཏོ. ནིརནྟརཀརཎཝསེནཱཏི ཨཱརདྡྷསྶ ཀམྨསྶ སཏཏཀཱརིཏཱཝསེན. ཋཱནུཔྤཏྟིཡཱ པཉྙཱཡཱཏི ཏསྨིཾ ཏསྨིཾ ཨཏྠཀིཙྩེ ཨུཔཊྛིཏེ ཋཱནསོ ཏངྑཎེ ཨེཝ ཨུཔྤཛྫནཀཔཉྙཱཡ.

སངྒཧཀརོཏི ཡཐཱརཧཾ སཏྟཱནཾ སངྒཎྷནཀོ. མིཏྟཀརོཏི མིཏྟབྷཱཝཀརོ, སོ པན ཨཏྠཏོ མིཏྟེ པརིཡེསནཀོ ནཱམ ཧོཏཱིཏི ¶ ཝུཏྟཾ ‘‘མིཏྟགཝེསནོ’’ཏི. ཡཐཱཝུཏྟཾ ཝདཾ ཝཙནཾ ཛཱནཱཏཱིཏི ཝདཉྙཱུཏི ཨཱཧ ‘‘པུབྦཀཱརིནཱ ཝུཏྟཝཙནཾ ཛཱནཱཏཱི’’ཏི. ཨིདཱནི ཏམེཝཏྠཾ སངྑེཔེན ཝུཏྟཾ ཝིཏྠཱརཝསེན དསྶེཏུཾ ‘‘སཧཱཡཀསྶཱ’’ཏིཨཱདི ཝུཏྟཾ. པུབྦེ ཡཐཱཔཝཏྟཱཡ ཝཱཙཱཡ ཛཱནནེ ¶ ཝདཉྙུཏཾ དསྶེཏྭཱ ཨིདཱནི ཨཱཀཱརསལླཀྑཎེན ཨཔྤཝཏྟཱཡ ཝཱཙཱཡ ཛཱནནེཔི ཝདཉྙུཏཾ དསྶེཏུཾ ¶ ‘‘ཨཔིཙཱ’’ཏིཨཱདི ཝུཏྟཾ. ‘‘ཡེན ཡེན ཝཱ པནཱ’’ཏིཨཱདིནཱ ཝཙནཱིཡཏྠཏཾ ཝདཉྙཱུ-སདྡསྶ དསྶེཏི. ནེཏཱཏི ཡཐཱདྷིཔྤེཏམཏྠཾ པཙྩཀྑཏོ པཱཔེཏཱ. ཏེནཱཧ ‘‘ཏཾ ཏམཏྠཾ དསྶེནྟོ པཉྙཱཡ ནེཏཱ’’ཏི. ནེཏི ཏཾ ཏམཏྠནྟི ཨཱནེཏྭཱ སམྦནྡྷོ. པུནཔྤུནཾ ནེཏཱིཏི ཨནུ ཨནུ ནེཏི, ཏཾ ཏམཏྠནྟི ཨཱནེཏྭཱ ཡོཛནཱ.

ཏསྨིཾ ཏསྨིནྟི ཏསྨིཾ ཏསྨིཾ དཱནཱདཱིཧི སངྒཧེཧི སངྒཧེཏབྦེ པུགྒལེ. ཨཱཎིཡཱཏི ཨཀྑསཱིསགཏཱཡ ཨཱཎིཡཱ. ཡཱཡཏོཏི གཙྪཏོ. པུཏྟཀཱརཎཱཏི པུཏྟནིམིཏྟཾ. པུཏྟཧེཏུཀཉྷི པུཏྟེན ཀཏྟབྦཾ མཱནཾ ཝཱ པཱུཛཾ ཝཱ.

ཨུཔཡོགཝཙནེཏི ཨུཔཡོགཏྠེ. ཝུཙྩཏཱིཏི ཝཙནཾ, ཨཏྠོ. ཨུཔཡོགཝཙནེ ཝཱ ཝཏྟབྦེ. པཙྩཏྟནྟི པཙྩཏྟཝཙནཾ. སམྨཱ པེཀྑནྟཱིཏི སམྨདེཝ ཀཱཏབྦེ པེཀྑནྟི. པསཾསནཱིཡཱཏི པསཾསིཏབྦཱ. བྷཝནྟི ཨེཏེ སངྒཧེཏབྦེ ཏཏྠ པུགྒལེ ཡཐཱརཧཾ པཝཏྟེནྟཱཏི ཨདྷིཔྤཱཡོ.

༢༧༤. ‘‘ཨིཏི བྷགཝཱ’’ཏིཨཱདི ནིགམནཾ. ཡཱ དིསཱཏི ཡཱ མཱཏཱཔིཏུཨཱདིལཀྑཎཱ པུརཏྠིམཱདིདིསཱ. ནམསྶཱཏི ནམསྶེཡྻཱསཱིཏི ཨཏྠོ ‘‘ཡཐཱ ཀཐཾ པནཱ’’ཏིཨཱདིཀཱཡ གཧཔཏིཔུཏྟསྶ པུཙྪཱཡ ཝསེན དེསནཱཡ ཨཱརདྡྷཏྟཱ ‘‘པུཙྪཱཡ ཋཏྭཱ’’ཏི ཝུཏྟཾ. ཨཀཐིཏཾ ནཏྠི གིཧཱིཧི ཀཏྟབྦཀམྨེ ཨཔྤམཱདཔཊིཔཏྟིཡཱ ཨནཝསེསཏོ ཀཐིཏཏྟཱ. མཱཏཱཔིཏུཨཱདཱིསུ ཧི ཏེཧི ཙ པཊིཔཛྫིཏབྦཔཊིཔཏྟིཡཱ ནིརཝསེསཏོ ཀཐནེནེཝ རཱཛཱདཱིསུཔི པཊིཔཛྫིཏབྦཝིདྷི ཨཏྠཏོ ཀཐིཏོ ཨེཝ ཧོཏཱིཏི. གིཧིནོ ཝིནཱིཡནྟི, ཝིནཡཾ ཨུཔེནྟི ཨེཏེནཱཏི གིཧིཝིནཡོ. ཡཐཱནུསིཊྛནྟི ཡཐཱ ཨིདྷ སཏྠཱརཱ ཨནུསིཊྛཾ གིཧིཙཱརིཏྟཾ ¶ , ཏཐཱ ཏེན པཀཱརེན ཏཾ ཨཝིརཱདྷེཏྭཱ. པཊིཔཛྫམཱནསྶ ཝུདྡྷིཡེཝ པཱཊིཀངྑཱཏི དིཊྛདྷམྨིཀསམྤརཱཡིཀཔརམཏྠེཧི ཝུདྡྷིཡེཝ ཨིཙྪིཏབྦཱ ཨཝསྶམྦྷཱཝིནཱིཏི.

སིངྒཱལསུཏྟཝཎྞནཱཡ ལཱིནཏྠཔྤཀཱསནཱ.

༩. ཨཱཊཱནཱཊིཡསུཏྟཝཎྞནཱ

པཋམབྷཱཎཝཱརཝཎྞནཱ

༢༧༥. ‘‘ཙཏུདྡིསཾ ¶ ¶ ¶ རཀྑཾ ཋཔེཏྭཱ’’ཏི ཨིདཾ དྭཱིསུ ཋཱནེསུ ཙཏཱུསུ དིསཱསུ ཋཔིཏཾ རཀྑཾ སནྡྷཱཡ ཝུཏྟནྟི ཏདུབྷཡཾ དསྶེཏུཾ ‘‘ཨསུརསེནཱཡཱ’’ཏིཨཱདི ཝུཏྟཾ. ཨཏྟནོ ཧི ཨདྷིཀཱརེ, ཨཏྟནོ རཀྑཱཡ ཙ ཨཔྤམཛྫནེན ཏེསཾ ཨིདཾ དྭཱིསུ ཋཱནེསུ ཙཏཱུསུ དིསཱསུ ཨཱརཀྑཊྛཔནཾ. ཡཉྷི ཏཾ ཨསུརསེནཱཡ པཊིསེདྷནཏྠཾ དེཝཔུརེ ཙཏཱུསུ དིསཱསུ སཀྐསྶ དེཝཱནམིནྡསྶ ཨཱརཀྑཊྛཔནཾ, ཏཾ ཨཏྟནོ ཨདྷིཀཱརེ ཨཔྤམཛྫནཾ. ཡཾ པན ནེསཾ བྷགཝཏོ སནྟིཀཾ ཨུཔསངྐམནེ ཙཏཱུསུ དིསཱསུ ཨཱརཀྑཊྛཔནཾ, ཏཾ ཨཏྟནོ ཀཏཱ རཀྑཱཡ ཨཔྤམཛྫནཾ. ཏེན ཝུཏྟཾ ‘‘ཨསུརསེནཱཡ ནིཝཱརཎཏྠ’’ནྟིཨཱདི. པཱལི༹ཡཾ ཙཏུདྡིསནྟི བྷུམྨཏྠེ ཨུཔཡོགཝཙནནྟི བྷུམྨཝསེན ཏདཏྠཾ དསྶེནྟོ ‘‘ཙཏཱུསུ དིསཱསཱུ’’ཏི ཨཱཧ. ཨཱརཀྑཾ ཋཔེཏྭཱཏི ཝེསྶཝཎཱདཡོ ཙཏྟཱརོ མཧཱརཱཛཱནོ ཨཏྟནཱ ཨཏྟནཱ རཀྑིཏབྦདིསཱསུ ཨཱརཀྑཾ ཋཔེཏྭཱ གུཏྟིཾ སམྨདེཝ ཝིདཧིཏྭཱ. བལགུམྦཾ ཋཔེཏྭཱཏི ཡཀྑསེནཱདིསེནཱབལསམཱུཧཾ ཋཔེཏྭཱ. ཨོཝརཎཾ ཋཔེཏྭཱཏི པཊིཔཀྑནིསེདྷནསམཏྠཾ ཨཱཝརཎཾ ཋཔེཏྭཱ. ཨིཏི ཏཱིཧི པདེཧི ཡཐཱཀྐམཾ པཙྩེཀཾ དེཝནགརདྭཱརསྶ ཨནྟོ, དྭཱརསམཱིཔེ, དྭཱརཏོ བཧི, དིསཱརཀྑཱཝསནོཏི ཏིཝིདྷཱཡ རཀྑཱཡ ཋཔིཏབྷཱཝོ ཝཱ དཱིཔིཏོ. ཏེནཱཧ ‘‘ཨེཝཾ སཀྐསྶ…པེ… ཀཏྭཱ’’ཏི. སཏྟ བུདྡྷེ ཨཱརབྦྷཱཏི ཨེཏྠ སཏྟེཝ བུདྡྷེ ཨཱརབྦྷ པརིབནྡྷནཀཱརཎཾ མཧཱཔདཱནཊཱིཀཱཡཾ (དཱི. ནི. ཊཱི. ༢.༡༢) ཝུཏྟནཡེནེཝ ཝེདིཏབྦཾ. དྷམྨཨཱཎནྟི དྷམྨམཡཾ ཨཱཎཾ, སཏྠུ དྷམྨཙཀྐནྟི ཨཏྠོ. ‘‘པརིསཏོ བཱཧིརབྷཱཝོ, ཨསམྦྷོགོ’’ཏི ཨེཝམཱདིཾ ཨིདཉྩིདཉྩ ཝིཝཛྫནཀརཎཾ ¶ ཀརིསྶཱམཱཏི. སཱཝནནྟི ཙཏུནྣམྤི པརིསཱནཾ ཏིཀྑཏྟུཾ པརིཝཱརེན ཨནུསཱཝནཾ, ཡཐཱ སཀྐོ དེཝཱནམིནྡོ ཨསུརསེནཱཡ ནིཝཱརཎཏྠཾ ཙཏཱུསུ དིསཱསུ ཨཱརཀྑཾ ཋཔཱཔེཏི, ཨེཝཾ མཧཱརཱཛཱནོཔི ཏཱདིསེ ཀིཙྩཝིསེསེ ཨཏྟནོ ཨཱརཀྑཾ ཋཔེནྟི. ཨིམེསམྤི ཧི ཏཏོ སཱསངྐཾ སཔྤཊིབྷཡནྟི. ཏེན ཝུཏྟཾ ‘‘ཨཏྟནོཔཱི’’ཏིཨཱདི.

ཨབྷིཀྐནྟཱཏི ¶ ཨཏིཀྐནྟཱ, ཝིགཏཱཏི ཨཏྠོཏི ཨཱཧ ‘‘ཁཡེ དིསྶཏཱི’’ཏི. ཏེནེཝ ཧི ‘‘ནིཀྑནྟོ པཋམོ ཡཱམོ’’ཏི ཨནནྟརཾ ཝུཏྟཾ. ཨབྷིཀྐནྟཏརོཏི ¶ ཨཏིཝིཡ ཀནྟཏརོ. ཏཱདིསོ ཙ སུནྡརོ བྷདྡཀོ ནཱམ ཧོཏཱིཏི ཨཱཧ ‘‘སུནྡརེ དིསྶཏཱི’’ཏི.

ཀོཏི དེཝནཱགཡཀྑགནྡྷབྦཱདཱིསུ ཀོ ཀཏམོ. མེཏི མམ. པཱདཱནཱིཏི པཱདེ. ཨིདྡྷིཡཱཏི ཨིམཱཡ ཨེཝརཱུཔཱཡ དེཝིདྡྷིཡཱ. ‘‘ཡསསཱ’’ཏི ཨིམིནཱ ཨེདིསེན པརིཝཱརེན, པརིཙྪེདེན ཙ. ཛལནྟི ཝིཛྫོཏམཱནོ. ཨབྷིཀྐནྟེནཱཏི ཨཏིཝིཡ ཀནྟེན ཀམནཱིཡེན ཨབྷིརཱུཔེན. ཝཎྞེནཱཏི སརཱིརཝཎྞནིབྷཱཡ. སབྦཱ ཨོབྷཱསཡཾ དིསཱཏི དསཔི དིསཱ པབྷཱསེནྟོ ཙནྡོ ཝིཡ, སཱུརིཡོ ཝིཡ ཙ ཨེཀོབྷཱསཾ ཨེཀཱལོཀཾ ཀརོནྟོཏི གཱཐཱཡ ཨཏྠོ. ཨབྷིརཱུཔེཏི ཨུལཱ༹རརཱུཔེ སམྤནྣརཱུཔེ. ཨབྦྷནུམོདནེཏི སམྤཧཾསནེ. ཨིདྷ པནཱཏི ‘‘ཨབྷིཀྐནྟཱཡ རཏྟིཡཱ’’ཏི ཨེཏསྨིཾ པདེ. ཏེནཱཏི ཁཡཔརིཡཱཡཏྟཱ.

རཱུཔཱཡཏནཱདཱིསཱུཏི ཨཱདི-སདྡེན ཨཀྑརཱདཱིནཾ སངྒཧོ དཊྛབྦོ. སུཝཎྞཝཎྞོཏི སུཝཎྞཙྪཝཱིཏི ཨཡམེཏྠ ཨཏྠོཏི ཨཱཧ ‘‘ཚཝིཡ’’ནྟི. ཏཐཱ ཧི ཝུཏྟཾ ‘‘ཀཉྩནསནྣིབྷཏྟཙོ’’ཏི (དཱི. ནི. ༢.༣༥; ༣.༢༠༠, ༢༡༨; མ. ནི. ༢.༣༨༦) སཉྙཱུལ༹ྷཱཏི སངྒནྠིཏཱ. ཝཎྞཱཏི གུཎཝཎྞནཱཏི ཨཱཧ ‘‘ཐུཏིཡ’’ནྟི, ཐོམནཱཡནྟི ཨཏྠོ. ཀུལཝགྒེཏི ཁཏྟིཡཱདིཀུལཀོཊྛཱསེ. ཏཏྠ ‘‘ཨཙྪོ ཝིཔྤསནྣོ’’ཏིཨཱདིནཱ ཝཎྞིཏབྦཊྛེན ཝཎྞོ, ཚཝི. ཝཎྞནཊྛེན ཝཎྞོ, ཐུཏི. ཨབྷིཏྠཝནཊྛེན ཝཎྞོ, ཐུཏི, ཨཉྙམཉྙཾ ཨསངྐརཏོ ¶ ཝཎྞིཏབྦཏོ ཋཔེཏབྦཏོ ཝཎྞོ, ཁཏྟིཡཱདིཀུལཝགྒོ. ཝཎྞཱིཡཏི ཉཱཔཱིཡཏི ཨེཏེནཱཏི ཝཎྞོ, ཉཱཔཀཾ ཀཱརཎཾ. ཝཎྞནཏོ ཐཱུལརསྶཱདིབྷཱཝེན ཨུཔཊྛཱནཏོ ཝཎྞོ, སཎྛཱནཾ. ‘‘མཧནྟཾ ཁུདྡཀཾ, མཛ྄ཛྷིམ’’ནྟི ཝཎྞེཏབྦཏོ པམཱཎེཏབྦཏོ ཝཎྞོ, པམཱཎཾ. ཝཎྞཱིཡཏི ཙཀྑུནཱ ཝིཝརཱིཡཏཱིཏི ཝཎྞོ, རཱུཔཱཡཏནནྟི ཨེཝཾ ཏསྨིཾ ཏསྨིཾ ཨཏྠེ ཝཎྞ-སདྡསྶ པཝཏྟི ཝེདིཏབྦཱ. སོཏི ཝཎྞསདྡོ. ཚཝིཡཾ དཊྛབྦོ རཱུཔཱཡཏནེ གཡ྄ཧམཱནསྶ ཚཝིམུཁེནེཝ གཧེཏབྦཏོ. ‘‘ཚཝིགཏཱ པན ཝཎྞདྷཱཏུ ཨེཝ སུཝཎྞཝཎྞོཏི ཨེཏྠ ཝཎྞགྒཧཎེན གཧིཏཱ’’ཏི ཨཔརེ.

ཀེཝལཔརིཔུཎྞནྟི ཨེཀདེསམྤི ཨསེསེཏྭཱ ནིརཝསེསཏོཝ པརིཔུཎྞནྟི ཨཡམེཏྠ ཨཏྠོཏི ཨཱཧ ‘‘ཨནཝསེསཏཱ ཨཏྠོ’’ཏི. ཀེཝལཀཔྤཱཏི ཀཔྤ-སདྡོ ནིཔཱཏོ པདཔཱུརཎམཏྟཾ, ཀེཝལཾ ཨིཙྩེཝ ཨཏྠོ ¶ . ཀེཝལ-སདྡོ བཧུལཝཱཙཱིཏི ཨཱཧ ‘‘ཡེབྷུཡྻཏཱ ཨཏྠོ’’ཏི. ཀེཙི པན ‘‘ཨཱིསཀཾ ཨསམཏྟཱ ཀེཝལཀཔྤཱ’’ཏི ཝདནྟི. ཨེཝཾ སཏི ཨནཝསེསཏྠོ ཨེཝ ཀེཝལ-སདྡཏྠོ སིཡཱ, ཨནཏྠནྟརེན པན ཀཔྤ-སདྡེན པདཝཌྜྷནཾ ཀཏཾ ཀེཝལམེཝ ཀེཝལཀཔྤནྟི. ཨཐ ཝཱ ཀཔྤནཱིཡཏཱ, པཉྙཱཔེཏབྦཏཱ ¶ ཀེཝལཀཔྤཱ. ཨབྱཱམིསྶཏཱ ཝིཛཱཏིཡེན ཨསངྐརཱ སུདྡྷཏཱ. ཨནཏིརེཀཏཱ ཏཾཔརམཏཱ ཝིསེསཱབྷཱཝོ. ཀེཝལཀཔྤནྟི ཀེཝལཾ དལ༹ྷཾ ཀཏྭཱཏི ཨཏྠོ. ཀེཝལཾ ཝུཙྩཏི ནིབྦཱནཾ སབྦསངྑཏཝིཝིཏྟཏྟཱ. ཏཾ ཨེཏསྶ ཨདྷིགཏཾ ཨཏྠཱིཏི ཀེཝལཱི, སཙྪིཀཏནིརོདྷོ ཁཱིཎཱསཝོ.

ཀཔྤ-སདྡོ ¶ པནཱཡཾ ས-ཨུཔསགྒོ, ཨནུཔསགྒོ ཙཱཏི ཨདྷིཔྤཱཡེན ཨོཀཔྤནིཡཔདེ ལབྦྷམཱནཾ ཀཔྤནིཡསདྡམཏྟཾ ནིདསྶེཏི, ཨཉྙཐཱ ཀཔྤ-སདྡསྶ ཨཏྠུདྡྷཱརེ ཨོཀཔྤནིཡཔདཾ ཨནིདསྶནམེཝ སིཡཱ. སམཎཀཔྤེཧཱིཏི ཝིནཡཀྐམསིདྡྷེཧི སམཎཝོཧཱརེཧི. ནིཙྩཀཔྤནྟི ནིཙྩཀཱལཾ. པཉྙཏྟཱིཏི ནཱམཉྷེཏཾ ཏསྶ ཨཱཡསྨཏོ, ཡདིདཾ ཀཔྤོཏི. ཀཔྤིཏཀེསམསྶཱུཏི ཀཏྟརིཡཱ ཚེདིཏཀེསམསྶུ. དྭངྒུལཀཔྤོཏི མཛ྄ཛྷནྷིཀཝེལཱཡ ཝཱིཏིཀྐནྟཱཡ དྭངྒུལཏཱཝིཀཔྤོ. ལེསོཏི ཨཔདེསོ. ཨནཝསེསཾ ཕརིཏུཾ སམཏྠསྶ ཨོབྷཱསསྶ ཀེནཙི ཀཱརཎེན ཨེཀདེསཕརཎམྤི སིཡཱ, ཨཡཾ པན སབྦསོཝ ཕརཱིཏི དསྶེཏུཾ སམནྟཏྠོ ཀཔྤ-སདྡོ གཧིཏོཏི ཨཱཧ ‘‘ཨནཝསེསཾ སམནྟཏོ’’ཏི.

ཡསྨཱ དེཝཏཱནཾ སརཱིརཔྤབྷཱ དྭཱདསཡོཛནམཏྟཾ ཋཱནཾ, ཏཏོ བྷིཡྻོཔི ཕརིཏྭཱ ཏིཊྛཏི, ཏཐཱ ཝཏྠཱབྷརཎཱདཱིཧི སམུཊྛིཏཱ པབྷཱ, ཏསྨཱ ཝུཏྟཾ ‘‘ཙནྡིམཱ ཝིཡ, སཱུརིཡོ ཝིཡ ཙ ཨེཀོབྷཱསཾ ཨེཀཾ པཛྫོཏཾ ཀརིཏྭཱ’’ཏི. ཀསྨཱ ཨེཏེ མཧཱརཱཛཱནོ བྷགཝཏོ སནྟིཀེ ནིསཱིདིཾསུ? ནནུ ཡེབྷུཡྻེན དེཝཏཱ བྷགཝཏོ སནྟིཀཾ ཨུཔགཏཱ ཋཏྭཱཝ ཀཐེཏབྦཾ ཀཐེནྟཱ གཙྪནྟཱིཏི? སཙྩམེཏཾ, ཨིདྷ པན ནིསཱིདནེ ཀཱརཎཾ ཨཏྠི, ཏཾ དསྶེཏུཾ ‘‘དེཝཏཱན’’ནྟིཨཱདི ཝུཏྟཾ. ‘‘ཨིདཾ པརིཏྟཾ ནཱམ སཏྟབུདྡྷཔཊིསཾཡུཏྟཾ གརུ, ཏསྨཱ ན ཨམྷེཧི ཋཏྭཱ གཧེཏབྦ’’ནྟི ཙིནྟེཏྭཱ པརིཏྟགཱརཝཝསེན ནིསཱིདིཾསུ.

༢༧༦. ཀསྨཱ པནེཏྠ ཝེསྶཝཎོ ཨེཝ ཀཐེསི, ན ཨིཏརེསུ ཡོ ཀོཙཱིཏི? ཏཏྠ ཀཱརཎཾ དསྶེཏུཾ ‘‘ཀིཉྩཱཔཱི’’ཏིཨཱདི ཝུཏྟཾ. ཝིསྶཱསིཀོ ¶ ཨབྷིཎྷཾ ཨུཔསངྐམནེན. བྱཏྟོཏི ཝིསཱརདོ, ཏཉྩསྶ ཝེཡྻཏྟིཡཾ སུཊྛུ སིཀྑིཏབྷཱཝེནཱཏི ཨཱཧ ‘‘སུསིཀྑིཏོ’’ཏི. མནུསྶེསུ ཝིཡ ཧི དེཝེསུཔི ཀོཙིདེཝ པུརིམཛཱཏིཔརིཙཡེན སུསིཀྑིཏོ ཧོཏི, ཏཏྲཱཔི ཀོཙིདེཝ ཡཐཱདྷིཔྤེཏམཏྠཾ ཝཏྟུཾ སམཏྠོ པརིཔུཎྞཔདབྱཉྫནཱཡ པོརིཡཱ ཝཱཙཱཡ སམནྣཱགཏོ. ‘‘མཧེསཀྑཱ’’ཏི ཨིམསྶ ཨཏྠཝཙནཾ ‘‘ཨཱནུབྷཱཝསམྤནྣཱ’’ཏི, མཧེསཀྑཱཏི ཝཱ མཧཱཔརིཝཱརཱཏི ཨཏྠོ. པཱཎཱཏིཔཱཏེ ¶ ཨཱདཱིནཝདསྶནེནེཝ ཏཾ ཝིཔརིཡཱཡཏོ ཏཏོ ཝེརམཎིཡཾ ཨཱནིསཾསོ པཱཀཊོ ཧོཏཱིཏི ‘‘ཨཱདཱིནཝཾ དསྶེཏྭཱ’’ ཨིཙྩེཝ ཝུཏྟཾ. ཏེསུ སེནཱསནེསཱུཏི ཡཱནི ‘‘ཨརཉྙཝནཔྤཏྠཱནཱི’’ཏིཨཱདིནཱ (མ. ནི. ༡.༣༤-༤༥) ཝུཏྟཱནི ¶ བྷིཀྑཱུནཾ ཝསནཊྛཱནབྷཱུཏཱནི ཨརཉྙཱཡཏནཱནི, ཏེསུ བྷིཀྑཱུཧི སཡིཏབྦཏོ, ཨཱསིཏབྦཏོ ཙ སེནཱསནསཉྙིཏེསུ. ནིབདྡྷཝཱསིནོཏི རུཀྑཔབྦཏཔཊིབདྡྷེསུ ཝིམཱནེསུ ནིཙྩཝཱསིཏཱཡ ནིབདྡྷཝཱསིནོ. བདྡྷཏྟཱཏི གཱཐཱབྷཱཝེན གནྠིཏཏྟཱ སམྦནྡྷིཏཏྟཱ.

‘‘ཨུགྒཎྷཱཏུ བྷནྟེ བྷགཝཱ’’ཏི ཨཏྟནཱ ཝུཙྩམཱནཾ པརིཏྟཾ བྷགཝནྟཾ ཨུགྒཎྷཱཔེཏུཀཱམོ ཝེསྶཝཎོ ཨཝོཙཱཏི ཨདྷིཔྤཱཡེན ཙོདཀོ ‘‘ཀིཾ པན བྷགཝཏོ ཨཔྤཙྩཀྑདྷམྨོ ནཱམ ཨཏྠཱི’’ཏི ཙོདེསི. ཨཱཙརིཡོ སབྦཏྠ ཨཔྤཊིཧཏཉཱཎཙཱརསྶ བྷགཝཏོ ན ཀིཉྩི ཨཔྤཙྩཀྑནྟི དསྶེནྟོ ‘‘ནཏྠཱི’’ཏི ཝཏྭཱ ‘‘ཨུགྒཎྷཱཏུ བྷནྟེ བྷགཝཱ’’ཏི ཝདཏོ ཝེསྶཝཎསྶ ཨདྷིཔྤཱཡཾ ཝིཝརནྟོ ‘‘ཨོཀཱསཀརཎཏྠ’’ནྟིཨཱདིམཱཧ. ཡཐཱ ཧི པཉྩསིཁོ གནྡྷབྦདེཝཔུཏྟོ དེཝཱནཾ ཏཱཝཏིཾསཱནཾ, བྲཧྨུནོ ཙ སནངྐུམཱརསྶ སམྨུཁཱ ཨཏྟནོ ཡཐཱསུཏཾ དྷམྨཾ བྷགཝཏོ སནྟིཀཾ ཨུཔགནྟྭཱ པཝེདེཏི, ཨེཝམཡམྤི མཧཱརཱཛཱ ཨིཏརེཧི སདྡྷིཾ ཨཱཊཱནཱཊནགརེ གཱཐཱཝསེན བནྡྷིཏཾ པརིཏྟཾ བྷགཝཏོ པཝེདེཏུཾ ཨོཀཱསཾ ཀཱརེནྟོ ‘‘ཨུགྒཎྷཱཏུ བྷནྟེ བྷགཝཱ’’ཏི ཨཱཧ, ན ནཾ ཏསྶ པརིཡཱཔུཎནེ ནིཡོཛེནྟོ. ཏསྨཱ ཨུགྒཎྷཱཏཱུཏི ཡཐིདཾ པརིཏྟཾ མཡཱ པཝེདིཏམཏྟམེཝ ཧུཏྭཱ ཙཏུནྣཾ པརིསཱནཾ ཙིརཀཱལཾ ཧིཏཱཝཧཾ ཧོཏི, ཨེཝཾ ཨུདྡྷཾ ཨཱརཀྑཱཡ གཎྷཱཏུ, སམྤཊིཙྪཏཱུཏི ཨཏྠོ. སཏྠུ ཀཐིཏེཏི སཏྠུ ཨཱརོཙིཏེ, ཙཏུནྣཾ པརིསཱནཾ སཏྠུ ཀཐནེ ཝཱཏི ཨཏྠོ. སུཁཝིཧཱརཱཡཱཏི ¶ ཡཀྑཱདཱིཧི ཨཝིཧིཾསཱཡ ལདྡྷབྦསུཁཝིཧཱརཱཡ.

༢༧༧. སཏྟཔི ¶ བུདྡྷཱ ཙཀྑུམནྟོ པཉྩཧི ཙཀྑཱུཧི ཙཀྑུམབྷཱཝེ ཝིསེསཱབྷཱཝཏོ. ཏསྨཱཏི ཡསྨཱ ཙཀྑུམབྷཱཝོ ཝིཡ སབྦབྷཱུཏཱནུཀམྤིཏཱདཡོ སབྦེཔི ཝིསེསཱ སཏྟནྣམྤི བུདྡྷཱནཾ སཱདྷཱརཎཱ, ཏསྨཱ, གུཎནེམིཏྟཀཱནེཝ ཝཱ ཡསྨཱ བུདྡྷཱནཾ ནཱམཱནི ནཱམ, ན ལིངྒིཀཱཝཏྠིཀཡཱདིཙྪཀཱནི, ཏསྨཱ བུདྡྷཱནཾ གུཎཝིསེསདཱིཔནཱནི ‘‘ཙཀྑུམནྟསྶཱ’’ཏིཨཱདིནཱ (དཱི. ནི. ༣.༢༧༧) ཝུཏྟཱནི ཨེཏཱནི ཨེཀེཀསྶ སཏྟ སཏྟ ནཱམཱནི ཧོནྟི. ཏེསཾ ནཱམཱནཾ སཱདྷཱརཎབྷཱཝཾ ཨཏྠཝསེན ཡོཛེཏབྦཱཏི དསྶེཏུཾ ‘‘སབྦེཔཱི’’ཏིཨཱདི ཝུཏྟཾ. སབྦབྷཱུཏཱནུཀམྤིནོཏི ཨནཉྙསཱདྷཱརཎམཧཱཀརུཎཱཡ སབྦསཏྟཱནཾ ཨནུཀམྤིཀཱ. ནྷཱཏཀིལེསཏྟཱཏི ཨཊྛངྒིཀེན ཨརིཡམགྒཛལེན སཔརསནྟཱནེསུ ནིརཝསེསཏོ དྷོཏཀིལེསམལཏྟཱ. མཱརསེནཱཔམདྡིནོཏི སཔརིཝཱརེ པཉྩཔི མཱརེ པམདྡིཏཝནྟོ. ཝུསིཏཝནྟོཏི མགྒབྲཧྨཙརིཡཝཱསཾ, དསཝིདྷཾ ཨརིཡཝཱསཉྩ ཝུསིཏཝནྟོ. ཝུསིཏཝནྟཏཱཡ ཨེཝ བཱཧིཏཔཱཔཏཱ ཝུཏྟཱ ཧོཏཱིཏི ‘‘བྲཱཧྨཎསྶཱ’’ཏི པདཾ ཨནཱམཊྛཾ. ཝིམུཏྟཱཏི ཨནཉྙསཱདྷཱརཎཱནཾ པཉྩནྣམྤི ཝིམུཏྟཱིནཾ ཝསེན ནིརཝསེསཏོ མུཏྟཱ. ཨངྒཏོཏི སརཱིརངྒཏོ, ཉཱཎངྒཏོ ཙ, དྭཏྟིཾསམཧཱཔུརིསལཀྑཎ- (དཱི. ནི. ༢.༣༣; ༣.༢༠༠; མ. ནི. ༢.༣༨༥) ཨསཱིཏིཨནུབྱཉྫནེཧི ནིཀྑམནཔྤབྷཱ, བྱཱམཔྤབྷཱ, ཀེཏུམཱལཱཨུཎྷཱིསཔྤབྷཱ ¶ ཙ སརཱིརངྒཏོ ནིཀྑམནཀརསྨིཡོ, ཡམཀམཧཱཔཱཊིཧཱརིཡཱདཱིསུ ཨུཔྤཛྫནཀཔྤབྷཱ ཉཱཎངྒཏོ ནིཀྑམནཀརསྨིཡོ. ན ཨེཏཱནེཝ ‘‘ཙཀྑུམཱ’’ཏིཨཱདིནཱ (དཱི. ནི. ༣.༢༧༧) ཝུཏྟཱནི སཏྟ ནཱམཱནི, ཨཐ ཁོ ཨཉྙཱནིཔི བཧཱུནི ཨཔརིམིཏཱནི ནཱམཱནི. ཀཐནྟི ཨཱཧ ‘‘ཨསངྑྱེཡྻཱནི ནཱམཱནི སགུཎེན མཧེསིནོཏི ཝུཏྟ’’ནྟི (དྷ. ས. ཨཊྛ. ༡༣༡༣; ཨུདཱ. ཨཊྛ. ༥༣; པཊི. ཨཊྛ. ༧༦). ཀེན ཝུཏྟཾ? དྷམྨསེནཱཔཏིནཱ.

ཡདི ཨེཝཾ ཀསྨཱ ཝེསྶཝཎོ ཨེཏཱནེཝ གཎྷཱིཏི ཨཱཧ ‘‘ཨཏྟནོ པཱཀཊནཱམཝསེནཱ’’ཏི. ཁཱིཎཱསཝཱ ¶ ཛནཱཏི ཨདྷིཔྤེཏཱ. ཏེ ཧི ཀམྨཀིལེསེཧི ཛཱཏཱཔི ཨེཝཾ ན པུན ཛཱཡིསྶནྟཱིཏི ཨིམིནཱ ཨཏྠེན ཛནཱ. ཡཐཱཧ ‘‘ཡོ ཙ ཀཱལགྷསོ བྷཱུཏོ’’ཏི (ཛཱ. ༡.༢.༡༩༠) དེསནཱསཱིསམཏྟནྟི ནིདསྶནམཏྟནྟི ཨཏྠོ, ཨཝཡཝེན ཝཱ སམུདཱཡུཔལཀྑཎམེཏཾ. སཏི ཙ པིསུཎཝཱཙཔྤཧཱནེ ¶ ཕརུསཝཱཙཱ པཧཱིནཱཝ ཧོཏི, པགེཝ ཙ མུསཱཝཱདོཏི ‘‘ཨཔིསུཎཱ’’ ཨིཙྩེཝ ཝུཏྟཱ. མཧཏྟཱཏི མཧཱ ཨཏྟཱ སབྷཱཝོ ཨེཏེསནྟི མཧཏྟཱ. ཏེནཱཧ ‘‘མཧནྟབྷཱཝཾ པཏྟཱ’’ཏི. མཧནྟཱཏི ཝཱ མཧཱ ཨནྟཱ, པརིནིབྦཱནཔརིཡོསཱནཱཏི ཝུཏྟཾ ཧོཏི. མཧནྟེཧི ཝཱ སཱིལཱདཱིཧི སམནྣཱགཏཱ. ཨཡཾ ཏཱཝ ཨཊྛཀཐཱཡཾ ཨཱགཏནཡེན ཨཏྠོ. ཨིཏརེསཾ པན མཏེན བུདྡྷཱདཱིཧི ཨརིཡེཧི མཧནཱིཡཏོ པཱུཛནཱིཡཏོ མཧཾ ནཱམ ནིབྦཱནཾ, མཧམནྟོ ཨེཏེསནྟི མཧནྟཱ, ནིབྦཱནདིཊྛཱཏི ཨཏྠོ. ནིསྶཱརདཱཏི སཱརཛྫརཧིཏཱ, ནིབྦྷཡཱཏི ཨཏྠོ. ཏེནཱཧ ‘‘ཝིགཏལོམཧཾསཱ’’ཏི.

ཧིཏནྟི ཧིཏཙིཏྟཾ, སཏྟཱནཾ ཧིཏེསཱིཏི ཨཏྠོ. ཡཐཱབྷཱུཏཾ ཝིཔསྶིསུནྟི པཉྩུཔཱདཱནཀྑནྡྷེསུ སམུདཡཱདིཏོ ཡཱཐཱཝཏོ ཝིཝིདྷེནཱཀཱརེན པསྶིཾསུ. ‘‘ཡེ ཙཱཔཱི’’ཏི པུབྦེ པཙྩཏྟབཧུཝཙནེན ཨནིཡམཏོ ཝུཏྟེ ཏེསམྤཱིཏི ཨཏྠཾ སམྤདཱནབཧུཝཙནཝསེན ནིཡམེཏྭཱ ‘‘ནམཏྠཱུ’’ཏི ཙ པདཾ ཨཱནེཏྭཱ ཡོཛེཏི ཡཾ ཏཾ-སདྡཱནཾ ཨབྱབྷིཙཱརིཏསམྦནྡྷབྷཱཝཏོ. ཝིཔསྶིཾསུ ནམསྶནྟཱིཏི ཝཱ ཡོཛནཱ. པཋམགཱཐཱཡཱཏི ‘‘ཡེ ཙཱཔི ནིབྦུཏཱ ལོཀེ’’ཏི ¶ ཨེཝཾ ཝུཏྟགཱཐཱཡ. དུཏིཡགཱཐཱཡཱཏི ཏདནྟརགཱཐཱཡ. ཏཏྠ དེསནཱམུཁམཏྟནྟི ཨིཏརེསམྤི བུདྡྷཱནཾ ནཱམགྒཧཎེ པཏྟེ ཨིམསྶེཝ བྷགཝཏོ ནཱམགྒཧཎཾ ཏཐཱ དེསནཱཡ མུཁམཏྟཾ, ཏསྨཱ ཏེཔི ཨཏྠཏོ གཧིཏཱ ཨེཝཱཏི ཨདྷིཔྤཱཡོ. ཏེནཱཧ ‘‘ཨཡམྤི ཧཱི’’ཏིཨཱདི. ཏཏྠ ཨཡནྟི ཨཡཾ གཱཐཱ. པུརིམཡོཛནཱཡཾ ཏསྶཱཏི ཝིསེསིཏབྦཏཱཡ ཨབྷཱཝཏོ ‘‘ཡནྟི ནིཔཱཏམཏྟ’’ནྟི ཝུཏྟཾ, ཨིདྷ པན ‘‘ཏསྶ ནམཏྠཱུ’’ཏི ཨེཝཾ སམྦནྡྷསྶ ཙ ཨིཙྪིཏཏྟཱ ‘‘ཡ’’ནྟི ནཱམཔདཾ ཨུཔཡོགེཀཝཙནནྟི དསྶེནྟོ ‘‘ཡཾ ནམསྶནྟི གོཏམ’’ནྟི ཨཱཧ.

༢༧༨. ‘‘ཡཏོ ¶ ཨུགྒཙྪཏི སཱུརིཡོ’’ཏིཨཱདིཀཾ ཀསྨཱ ཨཱརདྡྷཾ? ཡཾ ཡེ ཡཀྑཱདཡོ སཏྠུ དྷམྨཨཱཎཾ, ཨཏྟནོ ཙ རཱཛཱཎཾ ནཱདིཡནྟི, ཏེསཾ ‘‘ཨིདཉྩིདཉྩ ནིགྒཧཾ ཀརིསྶཱམཱ’’ཏི སཱཝནཾ ཀཱཏུཀཱམཱ ཏཏྠ ཏཏྠ དྭིསཧསྶཔརིཏྟདཱིཔཔརིཝཱརེསུ ཙཏཱུསུ མཧཱདཱིཔེསུ ཨཏྟནོ ཨཱཎཱཡ ཝཏྟཱནཾ ཨཏྟནོ པུཏྟཱནཾ, ཨཊྛཝཱིསཏིཡཱ ཡཀྑསེནཱཔཏིཨཱདཱིནཉྩ སཏྠརི པསཱདགཱརཝབཧུམཱནཉྩ པཝེདེཏྭཱ ནིགྒཧཱརཧཱནཾ སནྟཛྫནཏྠཾ ཨཱརདྡྷཾ. ཏཏྠ ¶ ‘‘ཡཏོ ཨུགྒཙྪཏཱི’’ཏིཨཱདཱིསུ ‘‘ཡཏོ ཋཱནཏོ ཨུདེཏཱི’’ཏི ཝུཙྩཏི, ཀུཏོ པན ཋཱནཏོ ཨུདེཏཱིཏི ཝུཙྩཏི? པུབྦཝིདེཧཝཱསཱིནཾ ཏཱཝ མཛ྄ཛྷནྷིཀཊྛཱནེ ཋིཏོ ཛམྦུདཱིཔཝཱསཱིནཾ ཨུདེཏཱིཏི ཝུཙྩཏི, ཨུཏྟརཀུརུཀཱནཾ པན ཨོགྒཙྪཏཱིཏི ཨིམིནཱ ནཡེན སེསདཱིཔེསུཔི སཱུརིཡསྶ ཨུགྒཙྪནོགྒཙྪནཔརིཡཱཡོ ཝེདིཏབྦོ. ཨཡཉྩ ཨཏྠོ ཧེཊྛཱ ཨགྒཉྙསུཏྟཝཎྞནཱཡཾ (དཱི. ནི. ཨཊྛ. ༣.༡༢༡) པཀཱསིཏོ ཨེཝ. ཨདིཏིཡཱ པུཏྟོཏི ལོཀསམུདཱཙཱརཝསེན ཝུཏྟཾ. ལོཀིཡཱ ཧི དེཝེ ཨདིཏིཡཱ པུཏྟཱ, ཨསུརེ ཨཏིཐིཡཱ པུཏྟཱཏི ཝདནྟི. ཨཱདིཔྤནཏོ པན ཨཱདིཙྩོ, ཨེཀཔྤཧཱརེནེཝ ཏཱིསུ དཱིཔེསུ ཨཱལོཀཝིདཾསནེན སམུཛྫལནཏོཏི ཨཏྠོ. མཎྜལཱིཏི ཨེཏྠ ཨཱི-ཀཱརོ བྷུསཏྠོཏི ཨཱཧ ‘‘མཧནྟཾ མཎྜལཾ ཨསྶཱཏི མཎྜལཱི’’ཏི. མཧནྟཾ ཧིསྶ ཝིམཱནམཎྜལཾ པཉྙཱསཡོཛནཱཡཱམཝིཏྠཱརཏོ. ‘‘སཾཝརཱིཔི ¶ ནིརུཛ྄ཛྷཏཱི’’ཏི ཨིམིནཱཝ དིཝསོཔི ཛཱཡཏཱིཏི ཨཡམྤི ཨཏྠོ ཝུཏྟོཏི ཝེདིཏབྦོ. རཏྟི ཨནྟརདྷཱཡཏཱིཏི སིནེརུཔཙྪཱཡཱལཀྑཎསྶ ཨནྡྷཀཱརསྶ ཝིགཙྪནཏོ.

ཨུདཀརཧདོཏི ཛལདྷི. ‘‘ཏསྨིཾ ཋཱནེ’’ཏི ཨིདཾ པུརཏྠིམསམུདྡསྶ ཨུཔརིབྷཱགེན སཱུརིཡསྶ གམནཾ སནྡྷཱཡ ཝུཏྟཾ. ཏཐཱ ཧི ཛམྦུདཱིཔེ ཋིཏཱནཾ པུརཏྠིམསམུདྡཏོ སཱུརིཡོ ཨུགྒཙྪནྟོ ཝིཡ ཨུཔཊྛཱཏི. ཏེནཱཧ ‘‘ཡཏོ ཨུགྒཙྪཏི སཱུརིཡོ’’ཏི. སམུདྡནཊྛེན ཨཏྟནི པཏིཏསྶ སམྨདེཝ, སབྦསོ ཙ ཨུནྡནཊྛེན ཀིལེདནཊྛེན སམུདྡོ. སམུདྡོ ཧི ཀིལེདནཊྛོ རཧདོ. སཱརིཏོདཀོཏི ཨནེཀཱནི ཡོཛནསཧསྶཱནི ཝིཏྠིཎྞོདཀོ, སརིཏཱ ནདིཡོ ཨུདཀེ ཨེཏསྶཱཏི ཝཱ སརིཏོདཀོ.

སིནེརུཔབྦཏརཱཛཱ ཙཀྐཝཱལ༹སྶ ཝེམཛ྄ཛྷེ ཋིཏོ, ཏཾ པདྷཱནཾ ཀཏྭཱ ཝཏྟབྦནྟི ཨདྷིཔྤཱཡེན ‘‘ཨིཏོཏི སིནེརུཏོ’’ཏི ཝཏྭཱ ཏཐཱ པན དིསཱཝཝཏྠཱནཾ ཨནཝཊྛིཏནྟི ‘‘ཏེསཾ ནིསིནྣཊྛཱནཏོ ཝཱ’’ཏི ཝུཏྟཾ. ཏེསནྟི ཙཏུནྣཾ མཧཱརཱཛཱནཾ. ནིསིནྣཊྛཱནཾ ཨཱཊཱནཱཊནགརཾ. ཏཏྠ ཧི ནིསིནྣཱ ཏེ ཨིམཾ པརིཏྟཾ བནྡྷིཾསུ. ཏེསཾ ནིསིནྣཊྛཱནཏོཏི ཝཱ སཏྠུ སནྟིཀེ ཏེསཾ ནིསིནྣཊྛཱནཏོ. ཨུབྷཡཐཱཔི སཱུརིཡསྶ ཨུདཡཊྛཱནཱ པུརཏྠིམཱ དིསཱ ནཱམ ཧོཏི. པུརིམཔཀྑཾཡེཝེཏྠ ཝཎྞེནྟི. ཏེན ཝུཏྟཾ ‘‘ཨིཏོ སཱ པུརིམཱ དིསཱ’’ཏི. སཱུརིཡོ, པན ཙནྡནཀྑཏྟཱདཡོ ཙ སིནེརུཾ དཀྑིཎཏོ, ཙཀྐཝཱལ༹པབྦཏཉྩ ཝཱམཏོ ཀཏྭཱ པརིཝཏྟེནྟི. ཡཏྠ ¶ ཙ ནེསཾ ཨུགྒམནཾ པཉྙཱཡཏི, སཱ པུརཏྠིམཱ ¶ དིསཱ. ཡཏྠ ཨོཀྐམནཾ པཉྙཱཡཏི, སཱ པཙྪིམཱ དིསཱ. དཀྑིཎཔསྶེ ¶ ཨུཏྟརཱ དིསཱ, ཝཱམཔསྶེ དཀྑིཎཱ དིསཱཏི ཙཏུམཧཱདཱིཔཝཱསཱིནཾ པཙྩེཀཾ སིནེརུ ཨུཏྟརཱདིསཱཡམེཝ, ཏསྨཱ ཨནཝཊྛིཏཱ དིསཱཝཝཏྠཱཏི ཨཱཧ ‘‘ཨིཏི ནཾ ཨཱཙིཀྑཏི ཛནོ’’ཏི. ཡཾ དིསནྟི ཡཾ པུརཏྠིམདིསཾ ཡསསྶཱིཏི མཧཱཔརིཝཱརོ. ཀོཊིསཏསཧསྶཔརིམཱཎཱ ཧི དེཝཏཱ ཨབྷིཎྷཾ པརིཝཱརེནྟི. ཙནྡནནཱགརུཀྑཱདཱིསུ ཨོསདྷིཏིཎཝནཔྤཏིསུགནྡྷཱནཾ ཨབྦནཏོ, ཏེཧི དིཏྟབྷཱཝཱུཔགམནཏོ ‘‘གནྡྷབྦཱ’’ཏི ལདྡྷནཱམཱནཾ ཙཱཏུམཧཱརཱཛིཀདེཝཱནཾ ཨདྷིཔཏི བྷཱཝཏོ. མེ སུཏནྟི ཨེཏྠ མེཏི ནིཔཱཏམཏྟཾ. སུཏནྟི ཝིསྶུཏནྟི ཨཏྠོ. ཨཡཉྷེཏྠ ཡོཛནཱ – ཏསྶ དྷཏརཊྛམཧཱརཱཛསྶ པུཏྟཱཔི བཧཝོ. ཀིཏྟཀཱ? ཨསཱིཏི, དས ཨེཀོ ཙ. ཨེཀནཱམཱ. ཀཐཾ? ཨིནྡནཱམཱ. ‘‘མཧཔྥལཱ’’ཏི ཙ སུཏཾ ཝིསྶུཏམེཏཾ ལོཀེཏི.

ཨཱདིཙྩོ གོཏམགོཏྟོ, བྷགཝཱཔི གོཏམགོཏྟོ, ཨཱདིཙྩེན སམཱནགོཏྟཏཱཡ ཨཱདིཙྩོ བནྡྷུ ཨེཏསྶཱཏིཔི ཨཱདིཙྩབནྡྷུ, ཨཱདིཙྩསྶ ཝཱ བནྡྷཱུཏི ཨཱདིཙྩབནྡྷུ, ཏཾ ཨཱདིཙྩབནྡྷུནཾ. ཨནཝཛྫེནཱཏི ཨཝཛྫཔཊིཔཀྑེན བྲཧྨཝིཧཱརེན. སམེཀྑསི ཨོདྷིསོ, ཨནོདྷིསོ ཙ ཕརཎེན ཨོལོཀེསིཨཱསཡཱནུསཡཙརིཡཱདྷིམུཏྟིཨཱདིཝིབྷཱགཱཝབོདྷཝསེན. ཝཏྭཱ ཝནྡནྟཱིཏི ‘‘ལོཀསྶ ཨནུཀམྤཀོ’’ཏི ཀིཏྟེཏྭཱ ཝནྡནྟི. སུཏཾ ནེཏནྟི སུཏཾ ནནཱུཏི ཨེཏསྨིཾ ཨཏྠེ ནུ-སདྡོ. ཨཊྛཀཐཱཡཾ པན ནོཀཱརོཡནྟི ཨདྷིཔྤཱཡེན ཨམྷེཧཱིཏི ཨཏྠོ ཝུཏྟོ. ཨེཏནྟི ཨེཏཾ ཏཐཱ པརིཀིཏྟེཏྭཱ ཨམནུསྶཱནཾ དེཝཏཱནཾ ཝནྡནཾ. ཝདནྟི དྷཏརཊྛམཧཱརཱཛསྶ པུཏྟཱ.

༢༧༩. ཡེན ¶ པེཏཱ པཝུཙྩནྟཱིཏི ཨེཏྠ ཝཙནསེསེན ཨཏྠོ ཝེདིཏབྦོ, ན ཡཐཱརུཏཝསེནེཝཱཏི དསྶེནྟོ ‘‘ཡེན དིསཱབྷཱགེན ནཱིཧརཱིཡནྟཱུཏི ཝུཙྩནྟཱི’’ཏི ཨཱཧ. ཌཡ྄ཧནྟུ ཝཱཏི པེཏེ སནྡྷཱཡ ཝདཏི. ཚིཛྫནྟུ ཝཱ ཧཏྠཔཱདཱདིཀེ པིསུཎཱ པིཊྛིམཾསིཀཱ. ཧཉྙནྟུ པཱཎཱཏིཔཱཏིནོཏིཨཱདིཀཱ. པཝུཙྩནྟཱིཏི ཝཱ སམུཙྩནྟི, ‘‘ཨལཾ ཏེས’’ནྟི སམཱཙིནཱིཡནྟཱིཏི ཨཏྠོ. ཨེཝཉྷི ཝཙནསེསེན ཝིནཱ ཨེཝ ཨཏྠོ སིདྡྷོ ཧོཏི. རཧསྶངྒནྟི བཱིཛཾ སནྡྷཱཡ ཝདཏི.

༢༨༠. ཡསྨིཾ དིསཱབྷཱགེ སཱུརིཡོ ཨཏྠཾ གཙྪཏཱིཏི ཨེཏྠ ‘‘ཡཏོ ཋཱནཏོ ཨུདེཏཱི’’ཏི ཨེཏྠ ཝུཏྟནཡཱནུསཱརེན ཨཏྠོ ཝེདིཏབྦོ.

༢༨༡. ཡེན ¶ དིསཱབྷཱགེན ཨུཏྟརཀུརུ རམྨོ ཨཝཊྛིཏོ, ཨིཏོ སཱ ཨུཏྟརཱ དིསཱཏི ཡོཛནཱ ¶ . མཧཱནེརཱུཏི མཧནྟོ, མཧནཱིཡོ ཙ ནེརུསངྑཱཏོ པབྦཏོ. ཏེནཱཧ ‘‘མཧཱསིནེརུ པབྦཏརཱཛཱ’’ཏི. རཛཏམཡཾ. ཏཐཱ ཧི ཏསྶ པབྷཱཡ ཨཛ྄ཛྷོཏྠཏཾ ཏསྶཾ དིསཱཡཾ སམུདྡོདཀཾ ཁཱིརཾ ཝིཡ པཉྙཱཡཏི. མཎིམཡནྟི ཨིནྡནཱིལམཡཾ. ཏཐཱ ཧི དཀྑིཎདིསཱཡ སམུདྡོདཀཾ ཡེབྷུཡྻེན ནཱིལཝཎྞཾ ཧུཏྭཱ པཉྙཱཡཏི, ཏཐཱ ཨཱཀཱསཾ. མནུསྶཱ ཛཱཡནྟི. ཀཐཾ ཛཱཡནྟི? ཨམམཱ ཨཔརིགྒཧཱཏི ཡོཛནཱ. མམཏྟཝིརཧིཏཱཏི ‘‘ཨིདཾ མམ ཨིདཾ མམཱ’’ཏི མམངྐཱརཝིརཧིཏཱཏི ཨདྷིཔྤཱཡོ. ཡདི ཏེསཾ ‘‘ཨཡཾ མཡ྄ཧཾ བྷརིཡཱ’’ཏི པརིགྒཧོ ནཏྠི, ‘‘ཨཡཾ མེ མཱཏཱ, ཨཡཾ བྷགིནཱི’’ཏི ཨེཝརཱུཔཱ ཨིདྷ ཝིཡ མརིཡཱདཱཔི ན སིཡཱ མཱཏུཨཱདིབྷཱཝསྶ ཨཛཱནནཏོཏི ཙོདནཾ སནྡྷཱཡཱཧ ‘‘མཱཏརཾ ཝཱ’’ཏིཨཱདི. ཚནྡརཱགོ ནུཔྤཛྫཏཱིཏི ཨེཏྠ ‘‘དྷམྨཏཱསིདྡྷསྶ སཱིལསྶ ཨཱནུབྷཱཝེན པུཏྟེ ¶ དིཊྛམཏྟེ ཨེཝ མཱཏུ ཐནཏོ ཐཉྙཾ པགྒྷརཏི, ཏེན སཉྙཱཎེན ནེསཾ མཱཏརི པུཏྟསྶ མཱཏུསཉྙཱ, མཱཏུ ཙ པུཏྟེ པུཏྟསཉྙཱ པཙྩུཔཊྛིཏཱ’’ཏི ཀེཙི.

ནངྒལཱཏི ལིངྒཝིཔལླཱསེན ཝུཏྟནྟི ཨཱཧ ‘‘ནངྒལཱནིཔཱི’’ཏི. ཨཀཊྛེཏི ཨཀསིཏེ ཨཀཏཀསིཀམྨེ.

ཏཎྜུལཱཝ ཏསྶ ཕལནྟི སཏྟཱནཾ པུཉྙཱནུབྷཱཝཧེཏུཀཱ ཐུསཱདིཨབྷཱཝེན ཏཎྜུལཱ ཨེཝ ཏསྶ སཱལིསྶ ཕལཾ. ཏུཎྜིཀིརནྟི པཙནབྷཱཛནསྶ ནཱམནྟི ཝུཏྟཾ ‘‘ཨུཀྑལིཡ’’ནྟི. ཨཱཀིརིཏྭཱཏི ཏཎྜུལཱནི པཀྑིཔིཏྭཱ. ནིདྡྷཱུམངྒཱརེནཱཏི དྷཱུམངྒཱརརཧིཏེན ཀེཝལེན ཨགྒིནཱ. ཛོཏིཀཔཱསཱཎཏོ ཨགྒིམྷི ཨུཊྛཧནྟེ ཀུཏོ དྷཱུམངྒཱརཱནཾ སམྦྷཝོ. བྷོཛནནྟི ཨོདནམེཝཱདྷིཔྤེཏནྟི ‘‘བྷོཛནམེཝཱ’’ཏི ཨཝདྷཱརཎཾ ཀཏྭཱ ཏེན ནིཝཏྟེཏབྦཾ དསྶེནྟོ ‘‘ཨཉྙོ སཱུཔོ ཝཱ བྱཉྫནཾ ཝཱ ན ཧོཏཱི’’ཏི ཨཱཧ. ཡདི ཨེཝཾ རསཝིསེསཡུཏྟོ ཏེསཾ ཨཱཧཱརོ ན ཧོཏཱིཏི? ནོཏི དསྶེནྟོ ‘‘བྷུཉྫནྟཱནཾ…པེ… རསོ ཧོཏཱི’’ཏི ཨཱཧ. མཙྪརིཡཙིཏྟཾ ནཱམ ན ཧོཏཱིཏི དྷམྨཏཱསིདྡྷསྶ སཱིལསྶ ཨཱནུབྷཱཝེན. ཏཐཱ ཧི ཏེ ཀཏྠཙིཔི ཨམམཱ པརིགྒཧཱཝ ཧུཏྭཱ ཝསནྟི.

ཨཔིཙ ¶ ཏཏྠ ཨུཏྟརཀུརུཀཱནཾ པུཉྙཱནུབྷཱཝསིདྡྷོ ཨཡམྤི ཝིསེསོ ཝེདིཏབྦོ – ཏཏྠ ཀིར ཏེསུ ཏེསུ པདེསེསུ གྷནཙིཏཔཏྟསཉྪནྣསཱཁཱཔསཱཁཱ ཀཱུཊཱགཱརཱུཔམཱ མནོརམཱ རུཀྑཱ ཏེསཾ མནུསྶཱནཾ ནིཝེསནཀིཙྩཾ སཱདྷེནྟི, ཡཏྠ སུཁཾ ནིཝསནྟི, ཨཉྙེཔི ཏཏྠ རུཀྑཱ སུཛཱཏཱ སབྦདཱཔི པུཔྥིཏགྒཱ ཏིཊྛནྟི, ཛལཱསཡཱཔི ཝིཀསིཏཀམལཀུཝལཡཔུཎྜརཱིཀསོགནྡྷིཀཱདིཔུཔྥསཉྪནྣཱ སབྦཀཱལཾ པརམསུགནྡྷཾ སམནྟཏོ པཝཱཡནྟཱ ¶ ཏིཊྛནྟི. སརཱིརམྤི ཏེསཾ ཨཏིདཱིགྷཏཱདིདོསརཧིཏཾ ཨཱརོཧཔརིཎཱཧསམྤནྣཾ ཛརཱཡ ཨནབྷིབྷཱུཏཏྟཱ ཝལིཔལིཏཱདིདོསརཧིཏཾ ཡཱཝཏཱཡུཀཾ ཨཔརིཀྑཱིཎཛཝབལཔརཀྐམསོབྷམེཝ ཧུཏྭཱ ཏིཊྛཏི. ཨནུཊྛཱནཕལཱུཔཛཱིཝིཏཱཡ ན ཙ ¶ ནེསཾ ཀསིཝཱཎིཛྫཱདིཝསེན, ཨཱཧཱརཔརིཡེཊྛིཝསེན དུཀྑཾ ཨཏྠི, ཏཏོ ཨེཝ ན དཱསདཱསིཀམྨཀརཱདིཔརིགྒཧོ ཨཏྠི, ན ཙ ཏཏྠ སཱིཏུཎྷཌཾསམཀསཝཱཏཱཏཔསརཱིསཔཝཱལཱ༹དིཔརིསྶཡོ ཨཏྠི. ཡཐཱ ནཱམེཏྠ གིམྷཱནཾ པཙྪིམེ མཱསེ པཙྩཱུསཝེལཱཡཾ སམསཱིཏུཎྷཨུཏུ ཧོཏི, ཨེཝམེཝ སབྦཀཱལཾ སམསཱིཏུཎྷོཝ ཨུཏུ ཧོཏི, ན ཙ ཏེསཾ ཀོཙི ཨུཔགྷཱཏོ, ཝིཧེསཱ ཝཱ ཨུཔྤཛྫཏི. ཨཀཊྛཔཱཀིམམེཝ སཱལིཾ ཨཀཎཾ ཨཐུསཾ སུགནྡྷཾ ཏཎྜུལཕལཾ པརིབྷུཉྫནྟཱནཾ ནེསཾ ཀུཊྛཾ, གཎྜོ, ཀིལཱསོ, སོསོ, ཀཱསོ, སཱསོ, ཨཔམཱརོ, ཛརོཏི ཨེཝམཱདིཀོ ན ཀོཙི རོགོ ཨུཔྤཛྫཏི. ན ཏེ ཁུཛྫཱ ཝཱ ཝཱམནཀཱ ཝཱ ཀཱཎཱ ཝཱ ཀུཎཱི ཝཱ ཁཉྫཱ ཝཱ པཀྑཧཏཱ ཝཱ ཝིཀལངྒཱ ཝཱ ཝིཀལིནྡྲིཡཱ ཝཱ ཧོནྟི. ཨིཏྠིཡོཔི ཏཏྠ ནཱཏིདཱིགྷཱ ནཱཏིརསྶཱ ནཱཏིཀིསཱ ནཱཏིཐཱུལཱ ནཱཏིཀཱལཱ༹ ནཱཙྩོདཱཏཱ སོབྷགྒཔྤཏྟརཱུཔཱ ཧོནྟི. ཏཐཱ ཧི དཱིགྷངྒུལཱི ཏམྦནཁཱི ལམྦཏྠནཱ ཏནུམཛ྄ཛྷཱ པུཎྞཙནྡམུཁཱི ཝིསཱལཀྑཱི མུདུགཏྟཱ སཾཧིཏཱུརཱུ ཨོདཱཏདནྟཱ གམྦྷཱིརནཱབྷཱི ཏནུཛངྒྷཱ དཱིགྷནཱིལཝེལླིཏཀེསཱི པུཐུལསུསོཎཱི ནཱཏིལོམཱནཱལོམཱ སུབྷགཱ ཨུཏུསུཁསམྥསྶཱ སཎྷཱ སཁིལསམྦྷཱསཱ ནཱནཱབྷརཎཝིབྷཱུསིཏཱ ཝིཙརནྟི. སབྦདཱ ཧི སོལ༹སཝསྶུདྡེསིཀཱ ཝིཡ ཧོནྟི. པུརིསཱ ཙ པཉྩཝཱིསཏིཝསྶུདྡེསིཀཱ ཝིཡ, ན པུཏྟདཱརེསུ རཛྫནྟི. ཨཡཾ ཏཏྠ དྷམྨཏཱ.

སཏྟཱཧིཀམེཝ ཙ ཏཏྠ ཨིཏྠིཔུརིསཱ ཀཱམརཏིཡཱ ཝིཧརནྟི, ཏཏོ ཝཱིཏརཱགཱ ཡཐཱསཀཾ གཙྪནྟི. ན ཏཏྠ ཨིདྷ ཝིཡ གབྦྷོཀྐནྟིམཱུལཀཾ, གབྦྷཔརིཧརཎམཱུལཀཾ ¶ , ཝིཛཱཡནམཱུལཀཾ ཝཱ དུཀྑཾ ཧོཏི. རཏྟཀཉྩུཀཏོ ཀཉྩནཔཊིམཱ ¶ ཝིཡ དཱརཀཱ མཱཏུཀུཙྪིཏོ ཨམཀྑིཏཱ ཨེཝ སེམྷཱདིནཱ སུཁེནེཝ ནིཀྑམནྟི, ཨཡཾ ཏཏྠ དྷམྨཏཱ.

མཱཏཱ པན པུཏྟཾ ཝཱ དྷཱིཏརཾ ཝཱ ཝིཛཱཡིཏྭཱ ཏེསཾ ཝིཙརཎཔྤདེསེ ཋཔེཏྭཱ ཨནཔེཀྑཱ ཡཐཱརུཙི གཙྪཏི. ཏེསཾ ཏཏྠ སཡིཏཱནཾ ཡེ པསྶནྟི པུརིསཱ, ཨིཏྠིཡོ ཝཱ, ཏེ ཨཏྟནོ ཨངྒུལིཡོ ཨུཔནཱམེནྟི, ཏེསཾ ཀམྨབལེན ཏཏོ ཁཱིརཾ པཝཏྟཏི, ཏེན དཱརཀཱ ཡཱཔེནྟི. ཨེཝཾ པན ཝཌྜྷནྟཱ ཀཏིཔཡདིཝསེཧེཝ ལདྡྷབལཱ ཧུཏྭཱ དཱརིཀཱ ཨིཏྠིཡོ ཨུཔགཙྪནྟི, དཱརཀཱ པུརིསེ. ཀཔྤརུཀྑཏོ ཨེཝ ཙ ཏེསཾ ཏཏྠ ཏཏྠ ཝཏྠཱབྷརཎཱནི ནིཔྤཛྫནྟི. ནཱནཱཝིརཱགཝཎྞཝིཙིཏྟཱནི ཧི སུཁུམཱནི མུདུསུཁསམྥསྶཱནི ཝཏྠཱནི ཏཏྠ ཏཏྠ ཀཔྤརུཀྑེསུ ཨོལམྦནྟཱནི ཨིཊྛནྟི. ནཱནཱཝིདྷརཾསིཛཱལསམུཛྫལཝིཝིདྷཝཎྞརཏནཝིནདྡྷཱནི ཨནེཀཝིདྷམཱལཱཀམྨལཏཱཀམྨབྷིཏྟིཀམྨཝིཙིཏྟཱནི སཱིསཱུཔགགཱིཝཱུཔགཧཏྠཱུཔགཀཊཱུཔགཔཱདཱུཔགཱནི སོཝཎྞམཡཱནི ཨཱབྷརཎཱནི ཙ ཀཔྤརུཀྑཏོ ཨོལམྦནྟི. ཏཐཱ ཝཱིཎཱམུདིངྒཔཎཝསམྨཏཱལ༹སངྑཝཾསཝེཏཱལ༹པརིཝཱནིཝལླཀཱིཔབྷུཏིཀཱ ཏཱུརིཡབྷཎྜཱཔི ཏཏོ ཏཏོ ཨོལམྦནྟི. ཏཏྠ ཙ བཧཱུ ཕལརུཀྑཱ ཀུམྦྷམཏྟཱནི ¶ ཕལཱནི ཕལནྟི མདྷུརརསཱནི, ཡཱནི པརིབྷུཉྫིཏྭཱ ཏེ སཏྟཱཧམྤི ཁུཔྤིཔཱསཱཧི ན བཱདྷཱིཡནྟི. ནཛྫོཔི ཏཏྠ སུཝིསུདྡྷཛལཱ སུཔཏིཏྠཱ རམཎཱིཡཱ ཨཀདྡམཱ ཝཱལུཀཏལཱ ནཱཏིསཱིཏཱ ནཱཙྩུཎྷཱ སུརབྷིགནྡྷཱིཧི ཛལཛཔུཔྥེཧི སཉྪནྣཱ སབྦཀཱལཾ སུརབྷིཾ ཝཱཡནྟིཡོ སནྡནྟི. ན ཏཏྠ ཀཎྚཀཏིཎཀཀྑལ༹གཙྪལཏཱ ཧོནྟི, ཨཀཎྚཀཱ པུཔྥཕལསམྤནྣཱ ཨེཝ ཧོནྟི. ཙནྡནནཱགརུཀྑཱ སཡམེཝ རསཾ པགྒྷརནྟི ¶ . ནྷཱཡིཏུཀཱམཱ ཙ ནདཱིཏིཏྠེ ཨེཀཛ྄ཛྷཾ ཝཏྠཱབྷརཎཱནི ཋཔེཏྭཱ ནདིཾ ཨོཏརིཏྭཱ ནྷཏྭཱ ཨུཏྟིཎྞུཏྟིཎྞཱ ཨུཔརིཊྛིམཾ ཝཏྠཱབྷརཎཾ གཎྷནྟི, ན ཏེསཾ ཨེཝཾ ཧོཏི ‘‘ཨིདཾ མམ, ཨིདཾ པརསྶཱ’’ཏི, ཏཏོ ཨེཝ ན ཏེསཾ ཀོཙི ཝིགྒཧོ ཝཱ ཝིཝཱདོ ཝཱ. སཏྟཱཧིཀཱ ཨེཝ ཙ ནེསཾ ཀཱམརཏིཀཱིལཱ༹ ཧོཏི, ཏཏོ ཝཱིཏརཱགཱ ཝིཡ ཝིཙརནྟི. ཡཏྠ ཙ རུཀྑེ སཡིཏུཀཱམཱ ཧོནྟི, ཏཏྠེཝ སཡནཾ ཨུཔལབྷནྟི. མཏེ ཙ སཏྟེ དིསྭཱ ན རོདནྟི, ན སོཙནྟི, ཏཉྩ མཎྜཡིཏྭཱ ནིཀྑིཔནྟི. ཏཱཝདེཝ ཙ ནེསཾ ཏཐཱརཱུཔཱ སཀུཎཱ ཨུཔགནྟྭཱ མཏཾ དཱིཔནྟརཾ ནེནྟི. ཏསྨཱ སུསཱནཾ ཝཱ ཨསུཙིཊྛཱནཾ ཝཱ ཏཏྠ ནཏྠི. ན ཙ ཏཏོ མཏཱ ནིརཡཾ ཝཱ ཏིརཙྪཱནཡོནིཾ ཝཱ པེཏྟིཝིསཡཾ ཝཱ ཨུཔཔཛྫནྟི. ‘‘དྷམྨཏཱསིདྡྷསྶ པཉྩསཱིལསྶ ཨཱནུབྷཱཝེན ཏེ ¶ དེཝལོཀེ ནིབྦཏྟནྟཱི’’ཏི ཝདནྟི. ཝསྶསཧསྶམེཝ ཙ ནེསཾ སབྦཀཱལཾ ཨཱཡུཔྤམཱཎཾ. སབྦམེཏཾ ཏེསཾ པཉྩསཱིལཾ ཝིཡ དྷམྨཏཱསིདྡྷཾ ཨེཝཱཏི ཝེདིཏབྦཾ. ཏཏྠཱཏི ཏསྨིཾ ཨུཏྟརཀུརུདཱིཔེ.

ཨེཀཁུརཾ ཀཏྭཱཏི ཨནེཀསཕམྤི ཨེཀསཕཾ ཝིཡ ཀཏྭཱ, ཨསྶཾ ཝིཡ ཀཏྭཱཏི ཨཏྠོ. ‘‘གཱཝི’’ནྟི ཝཏྭཱ པུན ‘‘པསུ’’ནྟི ཝུཏྟཏྟཱ གཱཝིཏོ ཨིཏརོ སབྦོ ཙཏུཔྤདོ ཨིདྷ ‘‘པསཱུ’’ཏི ཨདྷིཔྤེཏོཏི ཨཱཧ ‘‘ཋཔེཏྭཱ གཱཝི’’ནྟི.

ཏསྶཱཏི གབྦྷིནིཏྠིཡཱ. པིཊྛི ཨོནམིཏུཾ སཧཏཱིཏི ཀུཙྪིཡཱ གརུབྷཱརཏཱཡ ཏེསཾ ཨཱརུལ༹ྷཀཱལེ པིཊྛི ཨོནམཏི, ཏེསཾ ནིསཛྫཾ སཧཏི པལླངྐེ ནིསིནྣཱ ཝིཡ ཧོནྟི. སམྨཱདིཊྛིཀེཏི ཀམྨཔཐསམྨཱདིཊྛིཡཱ སམྨཱདིཊྛིཀེ. ཨེཏྠཱཏི ཛམྦུདཱིཔེ. ཨེཏྠ ཧི ཛནཔདཝོཧཱརོ, ན ཨུཏྟརཀུརུམྷི. ཏཐཱ ཧི ‘‘པཙྩནྟིམམིལཀྑུཝཱསིཀེ’’ཏི ཙ ཝུཏྟཾ.

ཏསྶ རཉྙོཏི ཝེསྶཝཎམཧཱརཱཛསྶ. ཨིཏི སོ ཨཏྟཱནམེཝ པརཾ ཝིཡ ཀཏྭཱ ཝདཏི. ཨེསེཝ ནཡོ པརཏོཔི. བཧུཝིདྷཾ ¶ ནཱནཱརཏནཝིཙིཏྟཾ ནཱནཱསཎྛཱནཾ རཐཱདི དིབྦཡཱནཾ ཨུཔཊྛིཏམེཝ ཧོཏི སུདནྟཝཱཧནཡུཏྟཾ, ན ནེསཾ ཡཱནཱནཾ ཨུཔཊྛཱཔནེ ཨུསྶུཀྐཾ ཨཱཔཛྫིཏབྦཾ ཨཏྠི. ཨེཏཱནཱིཏི ཧཏྠིཡཱནཱདཱིནི. ནེསནྟི ཝེསྶཝཎཔརིཙཱརིཀཱནཾ. ཀཔྤིཏཱནི ཧུཏྭཱ ཨུཊྛིཏཱནི ཨཱརུཧིཏུཾ ཨུཔཀཔྤནཡཱནཱནི. ནིཔནྣཱཔི ནིསིནྣཱཔི ཝིཙརནྟི ཙནྡིམསཱུརིཡཱ ཝིཡ ཡཐཱསཀཾ ཝིམཱནེསུ.

ནགརཱ ¶ ཨཧཱུཏི ལིངྒཝིཔལླཱསེན ཝུཏྟནྟི ཨཱཧ ‘‘ནགརཱནི བྷཝིཾསཱུཏི ཨཏྠོ’’ཏི. ཨཱཊཱནཱཊཱ ནཱམཱཏི ཨིཏྠིལིངྒཝསེན ལདྡྷནཱམཾ ནགརཾ ཨཱསི.

ཏསྨིཾ ཋཏྭཱཏི ཏསྨིཾ པདེསེ པརཀུསིཊནཱཊཱནཱམཀེ ནགརེ ཋཏྭཱ. ཏཏོ ཨུཛུཾ ཨུཏྟརདིསཱཡཾ. ཨེཏསྶཱཏི ཀསིཝནྟནགརསྶ. ཨཔརབྷཱགེ ཨཔརཀོཊྛཱསེ, པརཏོ ཨིཙྩེཝ ཨཏྠོ.

ཀུཝེརོཏི ཏསྶ པུརིམཛཱཏིསམུདཱགཏཾ ནཱམནྟི ཏེནེཝ པསངྒེན ཡེནཱཡཾ སམྤཏྟི ཨདྷིགཏཱ, ཏདསྶ པུབྦཀམྨཾ ཨཱཙིཀྑིཏུཾ ‘‘ཨཡཾ ཀིརཱ’’ཏིཨཱདི ཝུཏྟཾ. ཨུཙྪུཝཔྤནྟི ཨུཙྪུསསྶཾ. ཨཝསེསསཱལཱཧཱིཏི ཨཝསེསཡནྟསཱལཱཧི, ནིསྶཀྐཝཙནཉྩེཏཾ. ཏཏྠེཝཱཏི པུཉྙཏྠཾ དིནྣསཱལཱཡམེཝ.

པཊིཨེསནྟོཏི ¶ པཏི པཏི ཨཏྠེ ཨེསནྟོ ཝཱིམཾསནྟོ. ན ཀེཝལཾ ཏེ ཝཱིམཾསནྟི ཨེཝ, ཨཐ ཁོ ཏམཏྠཾ པཏིཊྛཱཔེནྟཱིཏི ཨཱཧ ‘‘ཝིསུཾ ཝིསུཾ ཨཏྠེ ཨུཔཔརིཀྑམཱནཱ ཨནུསཱསམཱནཱ’’ཏི. ཡཀྑརཊྛིཀཱཏི ཡཀྑརཊྛཱདྷིཔཏིནོ. ཡཀྑཱ ཙ ཝེསྶཝཎསྶ རཉྙོ ནིཝེསནདྭཱརེ ནིཡུཏྟཱ ཙཱཏི ཡཀྑདོཝཱརིཀཱ, ཏེསཾ ཡཀྑདོཝཱརིཀཱནཾ.

ཡསྨཱ དྷརཎཱིཔོརཀྑཎིཏོ པུརཱཎོདཀཾ བྷསྶཡནྟཾ ཧེཊྛཱ ཝུཊྛི ཧུཏྭཱ ནིཀྑམཏི, ཏསྨཱ ཏཾ ཏཏོ གཧེཏྭཱ མེགྷེཧི པཝུཊྛཾ ཝིཡ ཧོཏཱིཏི ཝུཏྟཾ ‘‘ཡཏོ པོཀྑརཎིཏོ ཨུདཀཾ གཧེཏྭཱ མེགྷཱ པཝསྶནྟཱི’’ཏི. ཡཏོཏི ཡཏོ དྷརཎཱིཔོཀྑརཎིཏོ. སབྷཱཏི ¶ ཡཀྑཱནཾ ཨུཔཊྛཱནསབྷཱ.

ཏསྨིཾ ཋཱནེཏི ཏསྶཱ པོཀྑརཎིཡཱ ཏཱིརེ ཡཀྑཱནཾ ཝསནཝནེ. སདཱ ཕལིཏཱཏི ནིཙྩཀཱལཾ སཉྫཱཏཕལཱ. ནིཙྩཔུཔྥིཏཱཏི ནིཙྩཾ སཉྫཱཏཔུཔྥཱ. ནཱནཱདིཛགཎཱཡུཏཱཏི ནཱནཱཝིདྷེཧི དིཛགཎེཧི ཡུཏྟཱ. ཏེཧི པན སཀུཎསངྒྷེཧི ཨིཏོ ཙིཏོ ཙ སམྤཏནྟེཧི པརིབྦྷམནྟེཧི ཡསྨཱ སཱ པོཀྑརཎཱི ཨཱཀུལཱ ཝིཡ ཧོཏི, ཏསྨཱ ཝུཏྟཾ ‘‘ཝིཝིདྷཔཀྑིསངྒྷསམཱཀུལཱ’’ཏི. ཀོཉྩསཀུཎེཧཱིཏི སཱརསསཀུནྟེཧི.

‘‘ཨེཝཾ ཝིརཝནྟཱན’’ནྟི ཨིམིནཱ ཏཐཱ ཝསྶིཏཝསེན ‘‘ཛཱིཝཉྫཱིཝཀཱ’’ཏི ཨཡཾ ཏེསཾ སམཉྙཱཏི དསྶེཏི. ཨུཊྛཝཙིཏྟཀཱཏི ཨེཏྠཱཔི ཨེསེཝ ནཡོ. ཏེནཱཧ ‘‘ཨེཝཾ ཝསྶམཱནཱ’’ཏི. པོཀྑརསཱཏཀཱཏི པོཀྑརསཎྛཱནཏཱཡ ‘‘པོཀྑརསཱཏཀཱ’’ཏི ཨེཝཾ ལདྡྷནཱམཱ.

སབྦཀཱལཾ ¶ སོབྷཏཱིཏི སབྦཨུཏཱུསུ སོབྷཏི, ན ཏསྶཱ ཧེམནྟཱདིཝསེན སོབྷཱཝིརཏོ ཨཏྠི. ཨེཝཾབྷཱུཏཱ ཙ ནིཙྩཾ པུཔྥིཏཛལཛཐལཛཔུཔྥཏཱཡ, ཕལབྷཱརབྷརིཏརུཀྑཔརིཝཱརིཏཏཱཡ, ཨཊྛངྒསམནྣཱགཏསལིལཏཱཡ ཙ ནིརནྟརཾ སོབྷཏི.

༢༨༢. པརིཀམྨནྟི པུབྦུཔཙཱརཾ. པརིསོདྷེཏྭཱཏི ཨེཀཀྑརསྶཱཔི ཨཝིརཱདྷནཝསེན ཨཱཙརིཡསནྟིཀེ སབྦཾ སོདྷེཏྭཱ. སུཊྛུ ཨུགྒཧིཏཱཏི པརིམཎྜལཔདབྱཉྫནཱཡ པོརིཡཱ ཝཱཙཱཡ ཝིསྶཊྛཱཡ ཨནེལགལཱ༹ཡ ཨཏྠསྶ ཝིཉྙཱཔནཱིཡཱ སམྨདེཝ ཨུགྒཧིཏཱ. ཏཐཱ ཧི ‘‘ཨཏྠཉྩ བྱཉྫནཉྩ པརིསོདྷེཏྭཱ’’ཏི ཝུཏྟཾ. ཨཏྠཾ ཛཱནཏོ ཨེཝ ཧི བྱཉྫནཾ པརིསུཛ྄ཛྷཏི, ནོ ཨཛཱནཏོ. པདབྱཉྫནཱནཱིཏི པདཉྩེཝ བྱཉྫནཉྩ ཨཧཱཔེཏྭཱ. ཨེཝཉྷི པརིཔུཎྞཱ ནཱམ ¶ ཧོཏཱིཏི. ཝིསཾཝཱདེཏྭཱཏི ཨཉྙཐཱ ཀཏྭཱ. ཏེཛཝནྟཾ ན ཧོཏི ཝིརཛ྄ཛྷནཏོ ཙེཝ ཝིམྷཡཏྠབྷཱཝཏོ ¶ ཙ. སབྦསོཏི ཨནཝསེསཏོ ཨཱདིམཛ྄ཛྷཔརིཡོསཱནཏོ. ཏེཛཝནྟཾ ཧོཏཱིཏི སབྷཱཝནིརུཏྟིཾ ཨཝིརཱདྷེཏྭཱ སུཔྤཝཏྟིབྷཱཝེན སཱདྷནཏོ. ཨེཝཾ པཡོགཝིཔཏྟིཾ པཧཱཡ པཡོགསམྤཏྟིཡཱ སཏི པརིཏྟསྶ ཨཏྠསཱདྷཀཏཾ དསྶེཏྭཱ ཨིདཱནི ཨཛ྄ཛྷཱསཡཝིཔཏྟིཾ པཧཱཡ ཨཛ྄ཛྷཱསཡསམྤཏྟིཡཱ ཨཏྠསཱདྷཀཏཾ དསྶེཏུཾ ‘‘ལཱབྷཧེཏཱུ’’ཏིཨཱདི ཝུཏྟཾ. ཨིདཾ པརིཏྟབྷཎནཾ སཏྟཱནཾ ཨནཏྠཔཊིབཱཧནཧེཏཱུཏི ཏསྶ ཉཱཎཀརུཎཱཔུབྦཀཏཱ ནིསྶརཎཔཀྑོ. མེཏྟཾ པུརེཙཱརིཀཾ ཀཏྭཱཏི མེཏྟཱམནསིཀཱརེན སཏྟེསུ ཧིཏཕརཎཾ པུརཀྑཏྭཱ.

‘‘ཝཏྠུཾ ཝཱ’’ཏིཨཱདི པུབྦེ ཙཏུཔརིསམཛ྄ཛྷེ ཀཏཱཡ སཱདྷནཱཡ བྷགཝཏོ པཝེདནཾ. གྷརཝཏྠུནྟི ཝསནགེཧཾ. ནིབདྡྷཝཱསནྟི པརགེཧེཔི ནེཝཱསིཀབྷཱཝེན ཝཱསཾ ན ལབྷེཡྻ, ཡཾ པན མཧཱརཱཛཱནཾ, ཡཀྑསེནཱཔཏཱིནཉྩ ཨཛཱནནྟཱནཾཡེཝ ཀདཱཙི ཝསིཏྭཱ གམནཾ, ཏཾ ཨཔྤམཱཎནྟི ཨདྷིཔྤཱཡོ. སམིཏིནྟི ཡཀྑཱདིསམཱགམཾ. ཀཱམཾ པཱལི༹ཡཾ ‘‘ན མེ སོ’’ཏི ཨཱགཏཾ, ཨིཏརེསམྤི པན མཧཱརཱཛཱནམཏྟནཱ ཨེཀཛ྄ཛྷཱསཡཏཱཡ ཏེསམྤི ཨཛ྄ཛྷཱསཡཾ ཧདཡེ ཋཔེཏྭཱ ཝེསྶཝཎོ ཏཐཱ ཨཝོཙ. ཀཉྙཾ ཨནུ ཨནུ ཝཧིཏུཾ ཨཡུཏྟོ ཨནཱཝཡ྄ཧོ, སབྦཀཱལཾ ཀཉྙཾ ལདྡྷུཾ ཨཡུཏྟོཏི ཨཏྠོ, ཏཾ ཨནཱཝཡ྄ཧཾ. ཏེནཱཧ ‘‘ན ཨཱཝཱཧཡུཏྟ’’ནྟི. ན ཝིཝཡ྄ཧནྟི ཨཝིཝཡ྄ཧཾ, ཀཉྙཾ གཧེཏུམཡུཏྟནྟི ཨཏྠོ. ཏེནཱཧ ‘‘ན ཝིཝཱཧཡུཏྟ’’ནྟི. ཨཱཧིཏོ ཨཧཾམཱནོ ཨེཏྠཱཏི ཨཏྟཱ, ཨཏྟབྷཱཝོ. ཨཏྟཱ ¶ ཝིསཡབྷཱུཏོ ཨེཏཱསཾ ཨཏྠཱིཏི ཨཏྟཱ, པརིབྷཱསཱ, ཏཱཧི. པརིཡཏྟཾ ཀཏྭཱ ཝཙནེན པརིཔུཎྞཱཧི. ཡཐཱ ཡཀྑཱ ཨཀྐོསིཏབྦཱ, ཨེཝཾ པཝཏྟཱ ཨཀྐོསཱ ཡཀྑཨཀྐོསཱ ནཱམ, ཏེཧི. ཏེ པན ‘‘ཀལཱ༹རཀྑི ཀལཱ༹རདནྟཱ ཀཱལ༹ཝཎྞཱ’’ཏི ཨེཝཾ ཨཱདཡོ.

ཝིརུདྡྷཱཏི ¶ ཝིརུཛ྄ཛྷནཀཱ པརེཧི ཝིརོདྷིནོ. རབྷསཱཏི སཱརམྦྷཀཱཏི ཨདྷིཔྤཱཡོ. ཏེནཱཧ ‘‘ཀརཎུཏྟརིཡཱ’’ཏི. རབྷསཱཏི ཝཱ སཱཧསིཀཱ. སཱམིནོ མནསོ ཨསྶཝཱཏི མནསྶཱ, ཀིངྐརཱ. ཡེ ཧི ‘‘ཀིཾ ཀརོམི བྷདྡནྟེ’’ཏི སཱམིཀསྶ ཝསེ ཝཏྟནྟི, ཏེ ཨེཝཾ ཝུཙྩནྟི. ཏེན ཝུཏྟཾ ‘‘ཡཀྑསེནཱཔཏཱིནཾ ཡེ མནསྶཱ, ཏེས’’ནྟི. ཨཱཎཱཡ ཨཝརོདྷིཏུཔཙཱརཱ ཨཝརུདྡྷཱ, ཏེ པན ཨཱཎཱཝཏོ པཙྩཏྠིཀཱ ནཱམ ཧོནྟཱིཏི ‘‘པཙྩཱམིཏྟཱ ཝེརིནོ’’ཏི ཝུཏྟཾ. ཨུཛ྄ཛྷཱཔེཏབྦནྟི ཧེཊྛཱ ཀཏྭཱ ཙིནྟཱཔེཏབྦཾ, ཏཾ ¶ པན ཨུཛ྄ཛྷཱཔནཾ ཏེསཾ ནཱིཙཀིརིཡཱཡ ཛཱནཱཔནཾ ཧོཏཱིཏི ཨཱཧ ‘‘ཛཱནཱཔེཏབྦཱ’’ཏི.

པརིཏྟཔརིཀམྨཀཐཱཝཎྞནཱ

པརིཏྟསྶ པརིཀམྨཾ ཀཐེཏབྦནྟི ཨཱཊཱནཱཊིཡཔརིཏྟསྶ པརིཀམྨཾ པུབྦུཔཙཱརཊྛཱནིཡཾ མེཏྟསུཏྟཱདི ཀཐེཏབྦཾ. ཨེཝཉྷི ཏཾ ལདྡྷཱསེཝནཾ ཧུཏྭཱ ཏེཛཝནྟཾ ཧོཏི. ཏེནཱཧ ‘‘པཋམམེཝ ཧཱི’’ཏིཨཱདི. པིཊྛཾ ཝཱ མཾསཾ ཝཱཏི ཝཱ-སདྡོ ཨནིཡམཏྠོ, ཏེན མཙྪགྷཏསཱུཔཱདིཾ སངྒཎྷཱཏི. ཨོཏཱརཾ ལབྷནྟི ཨཏྟནཱ པིཡཱཡིཏབྦཨཱཧཱརཝསེན པིཡཱཡིཏབྦཊྛཱནཝསེན ཙ. ‘‘པརིཏྟ…པེ… ནིསཱིདིཏབྦ’’ནྟི ཨིམིནཱཝ པརིཏྟཀཱརཀསྶ བྷིཀྑུནོ པརིསུདྡྷིཔི ཨིཙྪིཏབྦཱཏི དསྶེཏི.

‘‘པརིཏྟཀཱརཀོ…པེ… སམྤརིཝཱརིཏེནཱ’’ཏི ཨིདཾ པརིཏྟཀརཎེ བཱཧིརརཀྑཱསཾཝིདྷཱནཾ. ‘‘མེཏྟཙིཏྟཾ …པེ… ཀཱཏབྦ’’ནྟི ཨིདཾ ཨབྦྷནྟརརཀྑཱ ཨུབྷཡཏོ ¶ རཀྑཱསཾཝིདྷཱནཾ. ཨེཝཉྷི ཨམནུསྶཱ པརིཏྟཀརཎསྶ ཨནྟརཱཡཾ ཀཱཏུཾ ན ཝིསཧནྟི. མངྒལཀཐཱ ཝཏྟབྦཱ པུབྦུཔཙཱརཝསེན. སབྦསནྣིཔཱཏོཏི ཏསྨིཾ ཝིཧཱརེ, ཏསྨིཾ ཝཱ གཱམཁེཏྟེ སབྦེསཾ བྷིཀྑཱུནཾ སནྣིཔཱཏོ. གྷོསེཏབྦོ,‘‘ཙེཏིཡངྒཎེ སབྦེཧི སནྣིཔཏིཏབྦ’’ནྟི. ཨནཱགནྟུཾ ནཱམ ན ལབྦྷཏི ཨམནུསྶེན བུདྡྷཱཎཱབྷཡེན, རཱཛཱཎཱབྷཡེན ཙ. གཧིཏཀཱཔདེསེན ཨམནུསྶོཝ པུཙྪིཏོ ཧོཏཱིཏི ཨཱཧ ‘‘ཨམནུསྶགྒཧིཏཀོ ‘ཏྭཾ ཀོ ནཱམཱ’ཏི པུཙྪིཏབྦོ’’ཏི. མཱལཱགནྡྷཱདཱིསུ པཱུཛནཏྠཾ ཝིནིཡུཉྫིཡམཱནེསུ. པཏྟཱིཏི ཏུཡ྄ཧཾ པཏྟིདཱནཾ. པིཎྜཔཱཏེ པཏྟཱིཏི པིཎྜཔཱཏེ དིཡྻམཱནེ པཏྟིདཱནཾ. དེཝཏཱནནྟི ཡཀྑསེནཱཔཏཱིནཾ. པརིཏྟཾ བྷཎིཏབྦནྟི ཨེཏྠཱཔི ‘‘མེཏྟཙིཏྟཾ པུརེཙཱརིཀཾ ཀཏྭཱ’’ཏི ཙ ‘‘མངྒལཀཐཱ ཝཏྟབྦཱ’’ཏི ཙ ‘‘ཝིཧཱརསྶ ཨུཔཝནེ’’ཏི ཨེཝམཱདི ཙ སབྦཾ གིཧཱིནཾ པརིཏྟཀརཎེ ཝུཏྟཾ པརིཀམྨཾ ཀཱཏབྦམེཝ.

སརཱིརེ ཨདྷིམུཙྩཏཱིཏི སརཱིརཾ ཨནུཔཝིསིཏྭཱ ཝིཡ ཨཱཝིསནྟོ ཡཐཱ གཧིཏཀསྶ ཝསེན ན ཝཏྟཏི, ཨཏྟནོ ཨེཝ ཝསེན ཝཏྟཏི, ཨེཝཾ ཨདྷིམུཙྩཏི ཨདྷིཊྛཧིཏྭཱ ཏིཊྛཏི. ཏེནཱཧ ‘‘ཨཱཝིསཏཱིཏི ¶ ཏསྶེཝ ཝེཝཙན’’ནྟི. ལགྒཏཱིཏི ཏཏྠེཝ ལགྒོ ཨལླཱིནོ ཧོཏི. ཏེནཱཧ ‘‘ན ཨཔེཏཱི’’ཏི. རོགཾ ¶ ཝཌྜྷེནྟོཏི དྷཱཏཱུནཾ སམབྷཱཝེན ཝཏྟིཏུཾ ཨཔྤདཱནཝསེན ཨུཔྤནྣཾ རོགཾ ཝཌྜྷེནྟོ. དྷཱཏཱུནཾ ཝིསམབྷཱཝཱཔཏྟིཡཱ ཙ ཨཱཧཱརསྶ ཙ ཨརུཙྩནེན གཧིཏཀསྶ སརཱིརེ ལོཧིཏཾ སུསྶཏི, མཾསཾ མིལཱཡཏི, ཏཾ པནསྶ ཡཀྑོ དྷཱཏུཀྑོབྷནིམིཏྟཏཱཡ ཀརོནྟོ ཝིཡ ཧོཏཱིཏི ཝུཏྟཾ ‘‘ཨཔྤམཾསལོཧིཏཾ ཀརོནྟོ’’ཏི.

༢༨༣. ཏེསཾ ནཱམཱནི ཨིནྡཱདིནཱམབྷཱཝེན ཝོཧརིཏབྦཏོ. ཏཏོཏི ¶ ཏཏོ ཨཱརོཙནཏོ པརཾ. ཏེཏི ཡཀྑསེནཱཔཏཡོ. ཨོཀཱསོ ན བྷཝིསྶཏཱིཏི བྷིཀྑུབྷིཀྑུནིཡོ, ཨུཔཱསཀཨུཔཱསིཀཱཡོ ཝིཧེཋེཏུཾ ཨཝསརོ ན བྷཝིསྶཏི སམྨདེཝ ཨཱརཀྑཱཡ ཝིཧིཏཏྟཱཏི.

ཨཱཊཱནཱཊིཡསུཏྟཝཎྞནཱཡ ལཱིནཏྠཔྤཀཱསནཱ.

༡༠. སངྒཱིཏིསུཏྟཝཎྞནཱ

༢༩༦. དསསཧསྶཙཀྐཝཱལེ༹ཏི ¶ ¶ ¶ བུདྡྷཁེཏྟབྷཱུཏེ དསསཧསྶཔརིམཱཎེ ཙཀྐཝཱལེ༹. ཏཏྠ ཧི ཨིམསྨིཾ ཙཀྐཝཱལེ༹ དེཝམནུསྶཱཡེཝ ཀཏཱདྷིཀཱརཱ, ཨིཏརེསུ དེཝཱ ཝིསེསབྷཱགིནོ. ཏེན ཝུཏྟཾ ‘‘དསསཧསྶཙཀྐཝཱལེ༹ ཉཱཎཛཱལཾ པཏྠརིཏྭཱ’’ཏི. ཉཱཎཛཱལཔཏྠརཎནྟི ཙ ཏེསཾ ཏེསཾ སཏྟཱནཾ ཨཱསཡཱདིཝིབྷཱཝནཝསེན ཉཱཎསྶ པཝཏྟནམེཝ. ཏེནཱཧ ‘‘ལོཀཾ ཝོལོཀཡམཱནོ’’ཏི, སཏྟལོཀཾ བྱཝལོཀཡམཱནོ ཨཱསཡཱནུསཡཙརིཏཱདྷིམུཏྟིཨཱདིཀེ ཝིསེསཏོ ཨོགཱཧེཏྭཱ པསྶནྟོཏི ཨཏྠོ. མངྒལཾ བྷཎཱཔེསྶནྟི ‘‘ཏཾ ཏེསཾ ཨཱཡཏིཾ ཝིསེསཱདྷིགམསྶ ཝིཛྫཱཊྛཱནཾ ཧུཏྭཱ དཱིགྷརཏྟཾ ཧིཏཱཡ སུཁཱཡ བྷཝིསྶཱ’’ཏི. ཏཱིཧི པིཊཀེཧི སམྨསིཏྭཱཏི ཏིཔིཊཀཏོ ཨེཀཀདུཀཱདིནཱ སངྒཧེཏབྦསྶ སངྒཎྷནཝསེན སམྨསིཏྭཱ ཝཱིམཾསིཏྭཱ. ཉཱཏུཾ ཨིཙྪིཏཱ ཨཏྠཱ པཉྷཱ, ཏེ པན ཨིམསྨིཾ སུཏྟེ ཨེཀཀཱདིཝསེན ཨཱགཏཱ སཧསྶཾ, ཙུདྡས ཙཱཏི ཨཱཧ ‘‘ཙུདྡསཔཉྷཱདྷིཀེན པཉྷསཧསྶེན པཊིམཎྜེཏྭཱ’’ཏི. ཨེཝམིདྷ སམྤིཎྜེཏྭཱ དསྶིཏེ པཉྷེ པརཏོ སུཏྟཔརིཡོསཱནེ ‘‘ཨེཀཀཝསེན དྭེ པཉྷཱ ཀཐིཏཱ’’ཏིཨཱདིནཱ (དཱི. ནི. ཨཊྛ. ༣.༣༤༩) ཝིབྷཱགེན པརིགཎེཏྭཱ སཡམེཝ དསྶེསྶཏི.

ཨུབྦྷཏཀནཝསནྡྷཱགཱརཝཎྞནཱ

༢༩༧. ཨུཙྩཱདྷིཊྛཱནཏཱཡ ཏཾ སནྡྷཱགཱརཾ བྷཱུམིཏོ ཨུབྦྷཏཾ ཝིཡཱཏི ‘‘ཨུབྦྷཏཀ’’ནྟི ནཱམཾ ལབྷཏི. ཏེནཱཧ ‘‘ཨུཙྩཏྟཱ ཝཱ ཨེཝཾ ཝུཏྟ’’ནྟི. སནྡྷཱགཱརསཱལཱཏི ཨེཀཱ མཧཱསཱལཱ. ཨུཡྻོགཀརཎཱདཱིསུ ཧི རཱཛཱནོ ཏཏྠ ཋཏྭཱ ‘‘ཨེཏྟཀཱ པུརཏོ གཙྪནྟུ, ཨེཏྟཀཱ པཙྪཱ’’ཏིཨཱདིནཱ ཏཏྠ ནིསཱིདིཏྭཱ སནྡྷཾ ཀརོནྟི མརིཡཱདཾ ¶ བནྡྷནྟི, ཏསྨཱ ཏཾ ཋཱནཾ ‘‘སནྡྷཱགཱར’’ནྟི ཝུཙྩཏི. ཨུཡྻོགཊྛཱནཏོ ཙ ཨཱགནྟྭཱ ཡཱཝ གེཧཾ གོམཡཔརིབྷཎྜཱདིཝསེན པཊིཛགྒནཾ ཀརོནྟི, ཏཱཝ ཨེཀཾ དྭེ དིཝསེ ཏེ རཱཛཱནོ ཏཏྠ སནྠམྦྷནྟཱིཏིཔི སནྡྷཱགཱརཾ, ཏེསཾ རཱཛཱུནཾ སཧ ཨཏྠཱནུསཱསནཨགཱརནྟིཔི སནྡྷཱགཱརནྟི. ཡསྨཱ ཝཱ ཏེ ཏཏྠ སནྣིཔཏིཏྭཱ ‘‘ཨིམསྨིཾ ¶ ཀཱལེ ཀསིཏུཾ ཝཊྚཏི, ཨིམསྨིཾ ཀཱལེཝཔིཏུ’’ནྟིཨཱདིནཱ གྷརཱཝཱསཀིཙྩཾ སནྡྷརནྟི, ཏསྨཱ ཚིདྡཱཝཚིདྡཾ གྷརཱཝཱསཾ ¶ ཏཏྠ སནྡྷརནྟཱིཏིཔི སནྡྷཱགཱརཾ, སཱ ཨེཝ སཱལཱཏི སནྡྷཱགཱརསཱལཱ. དེཝཏཱཏི གྷརདེཝཏཱ. ནིཝཱསཝསེན ཨནཛ྄ཛྷཱཝུཏྠཏྟཱ ‘‘ཀེནཙི ཝཱ མནུསྶབྷཱུཏེནཱ’’ཏི ཝུཏྟཾ. ཀམྨཀརཎཝསེན པན མནུསྶཱ ཏཏྠ ནིསཛྫཱདཱིནི ཀཔྤེསུམེཝ. ‘‘སཡམེཝ པན སཏྠུ ཨིདྷཱགམནཾ ཨམྷཱཀཾ པུཉྙཝསེནེཝ, ཨཧོ མཡཾ པུཉྙཝནྟོ’’ཏི ཧཊྛཏུཊྛཱ ཨེཝཾ སམྨཱ ཙིནྟེསུནྟི དསྶེནྟོ ‘‘ཨམྷེཧཱི’’ཏིཨཱདིམཱཧ.

༢༩༨. ཨཊྚཀཱཏི ཙིཏྟཀམྨཀརཎཏྠཾ བདྡྷཱ མཉྩཀཱ. མུཏྟམཏྟཱཏི ཏཱཝདེཝ སནྡྷཱགཱརེ ནཝཀམྨསྶ ནིཊྛཱཔིཏབྷཱཝམཱཧ, ཏེན‘‘ཨཙིརཀཱརིཏ’’ནྟིཨཱདིནཱ ཝུཏྟམེཝཏྠཾ ཝིབྷཱཝེཏི. ཨརཉྙཾ ཨཱརཱམོ ཨཱརམིཏབྦཊྛཱནཾ ཨེཏེསནྟི ཨརཉྙཱརཱམཱ. སནྠརཎཾ སནྠརི, སབྦོ སཀལོ སནྠརི ཨེཏྠཱཏི སབྦསནྠརི, བྷཱཝནཔུཾསཀནིདྡེསོཡཾ. ཏེནཱཧ ‘‘ཡཐཱ སབྦཾ སནྠཏཾ ཧོཏི, ཨེཝ’’ནྟི.

༢༩༩. སམནྟཔཱསཱདིཀོཏི སམནྟཏོ སབྦབྷཱགེན པསཱདཱཝཧོ ¶ ཙཱཏུརིཡསོ. ‘‘ཨསཱིཏིཧཏྠཾ ཋཱནཾ གཎྷཱཏཱི’’ཏི ཨིདཾ བུདྡྷཱནཾ ཀཱཡཔྤབྷཱཡ པཀཏིཡཱ ཨསཱིཏིཧཏྠེ ཋཱནེ ཨབྷིབྱཱཔནཏོ ཝུཏྟཾ. ཨིདྡྷཱནུབྷཱཝེན པན ཨནནྟཾ ཨཔརིམཱཎཾ ཋཱནཾ ཝིཛྫོཏཏེཝ. ནཱིལཔཱིཏལོཧིཏོདཱཏམཉྫཊྛཔབྷསྶརཝསེན ཚབྦཎྞཱ. སབྦེ དིསཱབྷཱགཱཏི སརཱིརཔྤབྷཱཡ བཱཧུལླཏོ ཝུཏྟཾ.

ཨབྦྷམཧིཀཱདཱིཧི ཨུཔཀྐིལིཊྛཾ སུཉྙཾ ན སོབྷཏི, ཏཱརཀཱཙིཏཾ པན ཨནྟལིཀྑཾ ཏཱསཾ པབྷཱཧི སམནྟཏོ ཝིཛྫོཏམཱནཾ ཝིརོཙཏཱིཏི ཨཱཧ ‘‘སམུགྒཏཏཱརཀཾ ཝིཡ གགནཏལ’’ནྟི. སབྦཔཱལིཕུལློཏི མཱུལཏོ པཊྛཱཡ ཡཱཝ སཱཁགྒཱ ཕུལློ. ‘‘པཊིཔཱཊིཡཱཋཔིཏཱན’’ནྟིཨཱདི པརིཀཔྤཱུཔམཱ. ཏཐཱ ཧི ཝིཡ-སདྡགྒཧཎཾ ཀཏཾ. སིརིཡཱ སིརིཾ ཨབྷིབྷཝམཱནཾ ཝིཡཱཏི ཨཏྟནོ སོབྷཱཡ ཏེསཾ སོབྷནྟི ཨཏྠོ. ‘‘བྷིཀྑཱུཔི སབྦེཝཱ’’ཏི ཨིདཾ ནེསཾ ‘‘ཨཔྤིཙྪཱ’’ཏིཨཱདིནཱ ཝུཏྟགུཎེསུ ལོཀིཡགུཎཱནཾ ཝསེན ཡོཛེཏབྦཾ. ན ཧི ཏེ སབྦེཝ དསཀཐཱཝཏྠུལཱབྷིནོ. ཏེན ཝུཏྟཾ ‘‘སུཏྟནྟཾ ཨཱཝཛྫེཏྭཱ…པེ… ཨརཧཏྟཾ པཱཔུཎིསྶནྟཱི’’ཏི (དཱི. ནི. ཨཊྛ. ༣.༢༩༦). ཏསྨཱ ཡེ ཏཏྠ ཨརིཡཱ, ཏེ སབྦེསམྤི པདཱནཾ ཝསེན བོདྷིཏཱ ཧོནྟི. ཡེ པན པུཐུཛྫནཱ, ཏེ ལོཀིཡགུཎདཱིཔཀེཧི པདེཧཱིཏི ན ཏཐཱ ཧེཊྛཱ ¶ ‘‘ཨསཱིཏིམཧཱཐེརཱ’’ཏིཨཱདི ཝུཏྟཾ. པུབྦེ ཨརཧཏྟབྷཱགིནོ གཧིཏཱ.

རཱུཔཀཱཡསྶ ཨསཱིཏིཨནུབྱཉྫན-པཊིམཎྜིཏ-དྭཏྟིཾསམཧཱཔུརིསལཀྑཎཀཱཡཔྤབྷཱབྱཱམཔྤབྷཱཀེཏུམཱལཱཝིཙིཏྟཏཱཝ ¶ (དཱི. ནི. ༢.༣༣; ༣.༢༠༠; མ. ནི. ༢.༣༨༥) བུདྡྷཝེསོ. ཚབྦཎྞཱ བུདྡྷརསྨིཡོ ཝིསྶཛྫེནྟསྶ བྷགཝཏོ ཀཱཡསྶ ཨཱལོཀིཏཝིལོཀིཏཱདཱིསུ པརམུཀྐཾསགཏོ བུདྡྷཱཝེཎིཀོ ཨཙྩནྟུཔསམོ བུདྡྷཝིལཱསོ. ཨསྶནྟི ཏསྶཾ.

སནྡྷཱགཱརཱནུམོདནཔཊིསཾཡུཏྟཱཏི ‘‘སཱིཏཾ ཨུཎྷཾ པཊིཧནྟཱི’’ཏིཨཱདིནཱ ¶ (ཙཱུལ༹ཝ. ༢༩༥, ༣༡༥) ནཡེན སནྡྷཱགཱརགུཎཱུཔསཉྷིཏཱ སནྡྷཱགཱརཀརཎཔུཉྙཱནིསཾསབྷཱཝིནཱི. པཀིཎྞཀཀཐཱཏི སངྒཱིཏིཨནཱརུལ༹ྷཱ སུཎནྟཱནཾ ཨཛ྄ཛྷཱསཡཱནུརཱུཔཏཱཡ ཝིཝིདྷཝིཔུལཧེཏཱུཔམཱསམཱལངྐཏཱ ནཱནཱནཡཝིཙིཏྟཱ ཝིཏྠཱརཀཐཱ. ཏེནཱཧ ‘‘ཏདཱ ཧཱི’’ཏིཨཱདི. ཨཱཀཱསགངྒཾ ཨོཏཱརེནྟོ ཝིཡ ནིརུཔཀྐིལེསཏཱཡ སུཝིསུདྡྷེན, ཝིཔུལོདཱརཏཱཡ ཨཔརིམེཡྻེན ཙ ཨཏྠེན སུཎནྟཱནཾ ཀཱཡཙིཏྟཔརིལཱ༹ཧཝཱུཔསམནཏོ. པཐཝོཛཾ ཨཱཀཌྜྷནྟོ ཝིཡ ཨཉྙེསཾ སུདུཀྐརཏཱཡ, མཧཱསཱརཏཱཡ ཝཱ ཨཏྠསྶ. མཧཱཛམྦུཾ མཏྠཀེ གཧེཏྭཱ ཙཱལེནྟོ ཝིཡ ཙཱལནཔཙྩཡཊྛཱནཝསེན པུབྦེནཱཔརཾ ཨནུསནྡྷཱནཏོ. ཡོཛནིཡ…པེ… པཱཡམཱནོ ཝིཡ དེསནཾ ཙཏུསཙྩཡནྟེ པཀྑིཔིཏྭཱ ཨཏྠཝེདདྷམྨཝེདསྶེཝ ལབྷཱཔནེན སཱཏམདྷུརདྷམྨཱམཏརསཱུཔསཾཧརཎཏོ. མདྷུགཎྜནྟི མདྷུཔཊལཾ.

༣༠༠. ‘‘ཏུཎྷཱིབྷཱུཏཾ ཏུཎྷཱིབྷཱུཏ’’ནྟི བྱཱཔནིཙྪཱཡཾ ཨིདཾ ཨཱམེཌིཏཝཙནནྟི དསྶེཏུཾ ‘‘ཡཾ ཡནྡིས’’ནྟིཨཱདི ཝུཏྟཾ. ཨནུཝིལོཀེཏྭཱཏི ཨེཏྠ ཨནུ-སདྡོ ‘‘པརཱི’’ཏི ཨིམིནཱ སམཱནཏྠོ, ཝིལོཀནཉྩེཏྠ སཏྠུ ཙཀྑུདྭཡེནཔི ཨིཙྪིཏབྦནྟི ‘‘མཾསཙཀྑུནཱ…པེ… ཏཏོ ཏཏོ ཝིལོཀེཏྭཱ’’ཏི སངྑེཔཏོ ཝཏྭཱ ཏམཏྠཾ ཝིཏྠཱརཏོ དསྶེཏུཾ ‘‘མཾསཙཀྑུནཱ ཧཱི’’ཏིཨཱདི ཝུཏྟཾ. ཧཏྠེན ཀུཙྪིཏཾ ཀཏཾ ཧཏྠཀུཀྐུཙྩཾ ཀུཀཏམེཝ ཀུཀྐུཙྩནྟི ཀཏྭཱ. ཨེཝཾ པཱདཀུཀྐུཙྩཾ དཊྛབྦཾ. ནིཙྩལཱ ནིསཱིདིཾསུ ཨཏྟནོ སུཝིནཱིཏབྷཱཝེན, བུདྡྷགཱརཝེན ཙ. ‘‘ཨཱལོཀཾ པན ཝཌྜྷཡིཏྭཱ’’ཏིཨཱདི ཀདཱཙི བྷགཝཱ ཨེཝམྤི ཀརོཏཱིཏི ¶ ཨདྷིཔྤཱཡེན ཝུཏྟཾ. ན ཧི སཏྠུ སཱཝཀཱནཾ ཝིཡ ཨེཝཾ པཡོགསམྤཱདནཱིཡམེཏཾ ཉཱཎཾ. ཏིརོཧིཏཝིདཱུརཝཏྟནིཔི རཱུཔགཏེ མཾསཙཀྑུནོ པཝཏྟིཡཱ ཨིཙྪིཏཏྟཱ ཝཱིམཾསིཏབྦཾ ¶ . ཨརཧཏྟུཔགཾ ཨརཧཏྟཔདཊྛཱནཾ. ཙཀྑུཏལེསུ ནིམིཏྟཾ ཋཔེཏྭཱཏི བྷཱཝནཱནུཡོགསམྤཏྟིཡཱ སབྦེསཾ ཏེསཾ བྷིཀྑཱུནཾ ཙཀྑུཏལེསུ ལབྦྷམཱནཾ སནྟིནྡྲིཡཝིགཏཐིནམིདྡྷཏཱཀཱརསངྑཱཏཾ ནིམིཏྟཾ ཨཏྟནོ ཧདཡེ ཋཔེཏྭཱ སལླཀྑེཏྭཱ. ཀསྨཱ ཨཱགིལཱཡཏི ཀོཊིསཏསཧསྶཧཏྠིནཱགཱནཾ བལཾ དྷཱརེནྟསྶཱཏི ཙོདཀསྶ ཨདྷིཔྤཱཡོ. ཨཱཙརིཡོ ཨེས སངྑཱརཱནཾ སབྷཱཝོ, ཡདིདཾ ཨནིཙྩཏཱ. ཡེ པན ཨནིཙྩཱ, ཏེ ཨེཀནྟེནེཝ ཨུདཡཝཡཔཊིཔཱིལི༹ཏཏཱཡ དུཀྑཱ ཨེཝ, དུཀྑསབྷཱཝེསུ ཏེསུ སཏྠུ ཀཱཡེ དུཀྑུཔྤཏྟིཡཱ ཨཡཾ པཙྩཡོཏི ¶ དསྶེཏུཾ ‘‘བྷགཝཏོ ཧཱི’’ཏིཨཱདི ཝུཏྟཾ. པིཊྛིཝཱཏོ ཨུཔྤཛྫི, སོ ཙ ཁོ པུབྦེ ཀཏཀམྨཔཙྩཡཱ. སྭཱཡམཏྠོ པརམཏྠདཱིཔནིཡཾ ཨུདཱནཊྛཀཐཱཡཾ ཨཱགཏནཡེནེཝ ཝེདིཏབྦོ.

བྷིནྣནིགཎྛཝཏྠུཝཎྞནཱ

༣༠༡. ཧེཊྛཱ ཝུཏྟམེཝ པཱསཱདིཀསུཏྟཝཎྞནཱཡཾ (དཱི. ནི. ཨཊྛ. ༣.༡༦༤).

༣༠༢. སྭཱཁྱཱཏཾ དྷམྨཾ དེསེཏུཀཱམོཏི སྭཱཁྱཱཏཾ ཀཏྭཱ དྷམྨཾ ཀཐེཏུཀཱམོ, སཏྠཱརཱ ཝཱ སྭཱཁྱཱཏཾ དྷམྨཾ སཡཾ བྷིཀྑཱུནཾ ཀཐེཏུཀཱམོ. སཏྠཱརཱ དེསིཏདྷམྨམེཝ ཧི ཏཏོ ཏཏོ གཧེཏྭཱ སཱཝཀཱ སབྲཧྨཙཱརཱིནཾ ཀཐེནྟི.

ཨེཀཀཝཎྞནཱ

༣༠༣. སམགྒེཧི བྷཱསིཏབྦནྟི ཨཉྙམཉྙཾ སམགྒེཧི ཧུཏྭཱ བྷཱསིཏབྦཾ, སཛ྄ཛྷཱཡིཏབྦཉྩེཝ ཝཎྞེཏབྦཉྩཱཏི ཨཏྠོ. ཡཐཱ པན སམགྒེཧི སངྒཱཡནཾ ཧོཏི, ཏམྤི དསྶེཏུཾ ‘‘ཨེཀཝཙནེཧཱི’’ཏིཨཱདི ཝུཏྟཾ. ཨེཀཝཙནེཧཱིཏི ཝིརོདྷཱབྷཱཝེན སམཱནཝཙནེཧི. ཏེནཱཧ ‘‘ཨཝིརུདྡྷཝཙནེཧཱི’’ཏིཨཱདི. སཱམགྒིརསཾ དསྶེཏུཀཱམོཏི ཡསྨིཾ དྷམྨེ སངྒཱཡནེ སཱམགྒིརསཱནུབྷཝནཾ ཨིཙྪིཏཾ དེསནཱཀུསལཏཱཡ, ཏཏྠ ཨེཀཀདུཀཏིཀཱདིཝསེན བཧུདྷཱ སཱམགྒིརསཾ དསྶེཏུཀཱམོ. སབྦེ སཏྟཱཏི ཨནཝསེསཱ སཏྟཱ ¶ , ཏེ པན བྷཝབྷེདཏོ སངྑེཔེནེཝ ¶ བྷིནྡིཏྭཱ དསྶེནྟོ ‘‘ཀཱམབྷཝཱདཱིསཱུ’’ཏིཨཱདིམཱཧ. བྱདྷིཀརཎཱནམྤི བཱཧིརཏྠསམཱསོ ཧོཏི ཡཐཱ ‘‘ཨུརསིལོམོ’’ཏི ཨཱཧ ‘‘ཨཱཧཱརཏོ ཋིཏི ཨེཏེསནྟི ཨཱཧཱརཊྛིཏིཀཱ’’ཏི. ཏིཊྛཏི ཨེཏེནཱཏི ཋིཏི, ཨཱཧཱརོ ཋིཏི ཨེཏེསནྟི ཨཱཧཱརཊྛིཏིཀཱཏི ཨེཝཾ ཝཱ ཨེཏྠ སམཱསཝིགྒཧོ དཊྛབྦོ. ཨཱཧཱརཊྛིཏིཀཱཏི པཙྩཡཊྛིཏིཀཱ, པཙྩཡཱཡཏྟཝུཏྟིཀཱཏི ཨཏྠོ. པཙྩཡཏྠོ ཧེཏྠ ཨཱཧཱར-སདྡོ ‘‘ཨཡཾ ཨཱཧཱརོ ཨནུཔྤནྣསྶ ཝཱ ཀཱམཙྪནྡསྶཨུཔྤཱདཱཡཱ’’ཏིཨཱདཱིསུ (སཾ. ནི. ༥.༡༨༣, ༢༣༢) ཝིཡ. ཨེཝཉྷི ‘‘སབྦེ སཏྟཱ’’ཏི ཨིམིནཱ ཨསཉྙསཏྟཱཔི པརིགྒཧིཏཱ ཧོནྟི. སཱ པནཱཡཾ ཨཱཧཱརཊྛིཏིཀཏཱ ནིཔྤརིཡཱཡཏོ སངྑཱརདྷམྨོ, ན སཏྟདྷམྨོ. ཏེནེཝཱཧུ ཨཊྛཀཐཱཙརིཡཱ ‘‘སབྦེ སཏྟཱ ཨཱཧཱརཊྛིཏིཀཱཏི ཨཱགཏཊྛཱནེ སངྑཱརལོཀོ ཝེདིཏབྦོ’’ཏི (ཝིསུདྡྷི. ༡.༡༣༦; པཱརཱ. ཨཊྛ. ཝེརཉྫཀཎྜཝཎྞནཱ; ཨུདཱ. ཨཊྛ. ༣༠; ཙཱུལ༹ནི. ཨཊྛ. ༦༥; ཨུདཱ. ཨཊྛ. ༡༨༦) ཡདི ཨེཝཾ ‘‘སབྦེ སཏྟཱ’’ཏི ཨིདཾ ཀཐནྟི? པུགྒལཱདྷིཊྛཱནཱ དེསནཱཏི ནཱཡཾ དོསོ. ཡཐཱཧ བྷགཝཱ ‘‘ཨེཀདྷམྨེ བྷིཀྑཝེ བྷིཀྑུ སམྨཱ ནིབྦིནྡམཱནོ སམྨཱ ཝིརཛྫམཱནོ སམྨཱ ¶ ཝིམུཙྩམཱནོ སམྨཱ པརིཡནྟདསྶཱཝཱི སམྨཏྟཾ ཨབྷིསམེཙྩ དིཊྛེཝ དྷམྨེ དུཀྑསྶནྟཀརོ ཧོཏི, ཀཏམསྨིཾ ཨེཀདྷམྨེ? སབྦེ སཏྟཱ ཨཱཧཱརཊྛིཏིཀཱ’’ཏི (ཨ. ནི. ༡༠.༢༧) ཨེཀོ དྷམྨོཏི ‘‘སབྦེ སཏྟཱ ཨཱཧཱརཊྛིཏིཀཱ’’ཏི ཡྭཱཡཾ པུགྒལཱདྷིཊྛཱནཱཡ ཀཐཱཡ སབྦེསཾ སངྑཱརཱནཾ པཙྩཡཱཡཏྟཝུཏྟིཏཱཡ ཨཱཧཱརཔརིཡཱཡེན སཱམཉྙཏོ པཙྩཡདྷམྨོ ཝུཏྟོ, ཨཡཾ ཨཱཧཱརོ ནཱམ ཨེཀོ དྷམྨོ. ཡཱཐཱཝཏོ ཉཏྭཱཏི ཡཐཱསབྷཱཝཏོ ¶ ཨབྷིསམྦུཛ྄ཛྷིཏྭཱ. སམྨདཀྑཱཏོཏི ཏེནེཝ ཨབྷིསམྦུདྡྷཱཀཱརེན སམྨདེཝ དེསིཏོ.

ཙོདཀོ ཝུཏྟམྤི ཨཏྠཾ ཡཱཐཱཝཏོ ཨཔྤཊིཔཛྫམཱནོ ནེཡྻཏྠཾ སུཏྟཔདཾ ནཱིཏཏྠཏོ དཧནྟོ ‘‘སབྦེ སཏྟཱ’’ཏི ཝཙནམཏྟེ ཋཏྭཱ ‘‘ནནུ ཙཱ’’ཏིཨཱདིནཱ ཙོདེཏི. ཨཱཙརིཡོ ཨཝིཔརཱིཏཾ ཏཏྠ ཡཐཱདྷིཔྤེཏམཏྠཾ པཝེདེནྟོ ‘‘ན ཝིརུཛ྄ཛྷཏཱི’’ཏི ཝཏྭཱ ‘‘ཏེསཉྷི ཛྷཱནཾ ཨཱཧཱརོ ཧོཏཱི’’ཏི ཨཱཧ. ཛྷཱནནྟི ཨེཀཝོཀཱརབྷཝཱཝཧཾ སཉྙཱཡ ཝིརཛྫནཝསེན པཝཏྟཾ རཱུཔཱཝཙརཙཏུཏྠཛ྄ཛྷཱནཾ. པཱལི༹ཡཾ པན ‘‘ཨནཱཧཱརཱ’’ཏི ཝཙནཾ ཨསཉྙབྷཝེ ཙཏུནྣཾ ཨཱཧཱརཱནཾ ཨབྷཱཝཾ སནྡྷཱཡ ཝུཏྟཾ, ན པཙྩཡཱཧཱརསྶ ཨབྷཱཝཏོ. ‘‘ཨེཝཾ སནྟེཔཱི’’ཏི ཨིདཾ སཱསནེ ཡེསུ དྷམྨེསུ ཝིསེསཏོ ¶ ཨཱཧཱར-སདྡོ ནིརུལ༹ྷོ, ‘‘ཨཱཧཱརཊྛིཏིཀཱ’’ཏི ཨེཏྠ ཡདི ཏེ ཨེཝ གཡ྄ཧནྟི, ཨབྱཱཔིཏདོསོ ཨཱཔནྣོ. ཨཐ སབྦོཔི པཙྩཡདྷམྨོ ཨཱཧཱརོཏི ཨདྷིཔྤེཏོ, ཨིམཱཡ ཨཱཧཱརཔཱལི༹ཡཱ ཝིརོདྷོ ཨཱཔནྣོཏི དསྶེཏུཾ ཨཱརདྡྷཾ. ‘‘ན ཝིརུཛ྄ཛྷཏཱི’’ཏི ཡེནཱདྷིཔྤཱཡེན ཝུཏྟཾ, ཏཾ ཝིཝརནྟོ ‘‘ཨེཏསྨིཉྷི སུཏྟེ’’ཏིཨཱདིམཱཧ. ཀབལཱི༹ཀཱརཱཧཱརཱདཱིནཾ ཨོཛཊྛམཀརཱུཔཱཧརཎཱདི ནིཔྤརིཡཱཡེན ཨཱཧཱརབྷཱཝོ. ཡཐཱ ཧི ཀབལཱི༹ཀཱརཱཧཱརོ ཨོཛཊྛམཀརཱུཔཱཧརཎེན རཱུཔཀཱཡཾ ཨུཔཏྠམྦྷེཏི, ཨེཝཾ ཕསྶཱདཡོ ཙ ཝེདནཱདིཨཱཧརཎེན ནཱམཀཱཡཾ ཨུཔཏྠམྦྷེནྟི, ཏསྨཱ སཏིཔི ཛནཀབྷཱཝེ ཨུཔཏྠམྦྷཀབྷཱཝོ ཨོཛཱདཱིསུ སཱཏིསཡོ ལབྦྷམཱནོ མུཁྱོ ཨཱཧཱརཊྛོཏི ཏེ ཨེཝ ནིཔྤརིཡཱཡེན ཨཱཧཱརལཀྑཎཱ དྷམྨཱ ཝུཏྟཱ. ཨིདྷཱཏི ཨིམསྨིཾ སངྒཱིཏིསུཏྟེ. པརིཡཱཡེན པཙྩཡོ ཨཱཧཱརོཏི ཝུཏྟོ སབྦོ པཙྩཡོ དྷམྨོ ཨཏྟནོ ཕལཾ ཨཱཧརཏཱིཏི ཨིམཾ པརིཡཱཡཾ ལབྷཏཱིཏི. ཏེནཱཧ ‘‘སབྦདྷམྨཱནཉྷཱི’’ཏིཨཱདི. ཏཏྠ སབྦདྷམྨཱནནྟི སབྦེསཾ སངྑཏདྷམྨཱནཾ. ཨིདཱནི ཡཐཱཝུཏྟམཏྠཾ ¶ སུཏྟེན (ཨ. ནི. ༡༠.༦༡) སམཏྠེཏུཾ ‘‘ཏེནེཝཱཧཱ’’ཏིཨཱདི ཝུཏྟཾ. ཨཡནྟི པཙྩཡཱཧཱརོ.

ནིཔྤརིཡཱཡཱཧཱརོཔི གཧིཏོཝ ཧོཏི, ཡཱཝཏཱ སོཔི པཙྩཡབྷཱཝེནེཝ ཛནཀོ, ཨུཔཏྠམྦྷཀོ ཙ ཧུཏྭཱ ཏཾ ཏཾ ཕལཾ ཨཱཧརཏཱིཏི ཝཏྟབྦཏཾ ལབྷཏཱིཏི. ཏཏྠཱཏི པརིཡཱཡཱཧཱརོ, ནིཔྤརིཡཱཡཱཧཱརོཏི དྭཱིསུ ཨཱཧཱརེསུ. ཨསཉྙབྷཝེ ཡདིཔི ནིཔྤརིཡཱཡཱཧཱརོ ན ལབྦྷཏི, པཙྩཡཱཧཱརོ པན ལབྦྷཏི པརིཡཱཡཱཧཱརལཀྑཎོ. ཨིདཱནི ཨིམམེཝཏྠཾ ཝིཏྠཱརེན དསྶེཏུཾ ‘‘ཨནུཔྤནྣེ ཧི བུདྡྷེ’’ཏིཨཱདི ཝུཏྟཾ. ཨུཔྤནྣེ བུདྡྷེ ཏིཏྠཀརམཏནིསྶིཏཱནཾ ཛྷཱནབྷཱཝནཱཡ ཨསིཛ྄ཛྷནཏོ ‘‘ཨནུཔྤནྣེ ¶ བུདྡྷེ’’ཏི ཝུཏྟཾ. སཱསནིཀཱ ཏཱདིསཾ ཛྷཱནཾ ན ནིབྦཏྟེནྟཱིཏི ‘‘ཏིཏྠཱཡཏནེ པབྦཛིཏཱ’’ཏི ཝུཏྟཾ. ཏིཏྠིཡཱ ཧི ཨུཔཏྟིཝིསེསེ ཝིམུཏྟིསཉྙིནོ, ཨཉྙཱཝིརཱགཱཝིརཱགེསུ ཨཱདཱིནཝཱནིསཾསདསྶིནོ ཝཱ ཧུཏྭཱ ཨསཉྙསམཱཔཏྟིཾ ནིབྦཏྟེཏྭཱ ཨཀྑཎབྷཱུམིཡཾ ཨུཔྤཛྫནྟི, ན སཱསནིཀཱ. ཝཱཡོཀསིཎེ པརིཀམྨཾ ཀཏྭཱཏི ཝཱཡོཀསིཎེ པཋམཱདཱིནི ཏཱིཎི ཛྷཱནཱནི ནིབྦཏྟེཏྭཱ ཏཏིཡཛ྄ཛྷཱནེ ཙིཎྞཝསཱི ཧུཏྭཱ ཏཏོ ཝུཊྛཱཡ ཙཏུཏྠཛ྄ཛྷཱནཱདྷིགམཱཡ པརིཀམྨཾ ཀཏྭཱ. ཏེནཱཧ ‘‘ཙཏུཏྠཛ྄ཛྷཱནཾ ནིབྦཏྟེཏྭཱ’’ཏི. ཀསྨཱ པནེཏྠ ཝཱཡོཀསིཎེཡེཝ པརིཀམྨཾ ཝུཏྟནྟི? ཡདེཏྠ ཝཏྟབྦཾ ¶ , ཏཾ བྲཧྨཛཱལཊཱིཀཱཡཾ (དཱི. ནི. ཊཱི. ༡.༤༡) ཝིཏྠཱརིཏམེཝ. དྷཱིཏི ཛིགུཙྪནཏྠེ ནིཔཱཏོ, ཏསྨཱ དྷཱི ཙིཏྟནྟི ཙིཏྟཾ ཛིགུཙྪཱམཱིཏི ཨཏྠོ. དྷིབྦཏེཏཾ ཙིཏྟནྟི ཨེཏཾ མམ ཙིཏྟཾ ཛིགུཙྪིཏཾ ཝཏ ཧོཏུ. ཝཏཱཏི སམྦྷཱཝནེ, ཏེན ཛིགུཙྪཾ སམྦྷཱཝེནྟོ ཝདཏི. ནཱམཱཏི ཙ སམྦྷཱཝནེ ཨེཝ, ཏེན ཙིཏྟསྶ ཨབྷཱཝཾ སམྦྷཱཝེཏི. ཙིཏྟསྶ བྷཱཝཱབྷཱཝེསུ ཨཱདཱིནཝཱནིསཾསེ དསྶེཏུཾ ‘‘ཙིཏྟཉྷཱི’’ཏིཨཱདི ཝུཏྟཾ. ཁནྟིཾ རུཙིཾ ཨུཔྤཱདེཏྭཱཏི ‘‘ཙིཏྟསྶ ཨབྷཱཝོ ཨེཝ སཱདྷུ སུཊྛཱུ’’ཏི ཨིམཾ དིཊྛིནིཛ྄ཛྷཱནཀྑནྟིཾ, ཏཏྠ ཙ ཨབྷིརུཙིཾ ཨུཔྤཱདེཏྭཱ.

ཏཐཱ བྷཱཝིཏསྶ ཛྷཱནསྶ ཋིཏིབྷཱགིཡབྷཱཝཔྤཏྟིཡཱ ཨཔརིཧཱིནཛ྄ཛྷཱནསྶ ཏིཏྠཱཡཏནེ པབྦཛིཏསྶེཝ ཏཐཱ ཛྷཱནབྷཱཝནཱ ཧོཏཱིཏི ཨཱཧ ‘‘མནུསྶལོཀེ’’ཏི. པཎིཧིཏོ ཨཧོསཱིཏི མརཎསྶ ¶ ཨཱསནྣཀཱལེ ཋཔིཏོ ཨཧོསི. ཡདི ཋཱནཱདིནཱ ཨཱཀཱརེན ནིབྦཏྟེཡྻ, ཀམྨབལེན ཡཱཝ བྷེདཱ ཏེནེཝཱཀཱརེན ཏིཊྛེཡྻ ཝཱཏི ཨཱཧ ‘‘སོ ཏེན ཨིརིཡཱཔཐེནཱ’’ཏིཨཱདི.

ཨེཝ རཱུཔཱནམྤཱིཏི ཨེཝཾ ཨཙེཏནཱནམྤི. པི-སདྡེན པགེཝ སཙེཏནཱནནྟི དསྶེཏི. ཀཐཾ པན ཨཙེཏནཱནཾ ནེསཾ པཙྩཡཱཧཱརསྶ ཨུཔཀཔྤནནྟི ཙོདནཾ སནྡྷཱཡ ཏཏྠ ནིདསྶནཾ དསྶེནྟོ ‘‘ཡཐཱ’’ཏིཨཱདིམཱཧ.

ཡེ ཨུཊྛཱནཝཱིརིཡེནེཝ དིཝསཾ ཝཱིཏིནཱམེཏྭཱ ཏསྶ ནིསྶནྡཕལམཏྟཾ ཀིཉྩིདེཝ ལབྷིཏྭཱ ཛཱིཝིཀཾ ཀཔྤེནྟི, ཏེ ཨུཊྛཱནཕལཱུཔཛཱིཝིནོ. ཡེ པན ཨཏྟནོ པུཉྙཕལམེཝ ཨུཔཛཱིཝེནྟི, ཏེ པུཉྙཕལཱུཔཛཱིཝིནོ. ནེརཡིཀཱནཾ པན ནེཝ ཨུཊྛཱནཝཱིརིཡཝསེན ཛཱིཝིཀཱཀཔྤནཾ, པུཉྙཕལསྶ པན ལེསོཔི ནཏྠཱིཏི ཝུཏྟཾ ‘‘ཡེ པན ཏེ ནེརཡིཀཱ…པེ… ན པུཉྙཕལཱུཔཛཱིཝཱིཏི ཝུཏྟཱ’’ཏི. པཊིསནྡྷིཝིཉྙཱཎསྶ ཨཱཧརཎེན མནོསཉྩེཏནཱཧཱརོཏི ཝུཏྟཱ, ན ཡསྶ ཀསྶཙི ཕལསྶཱཏི ཨདྷིཔྤཱཡེན ‘‘ཀིཾ པཉྩ ཨཱཧཱརཱ ཨཏྠཱི’’ཏི ཙོདེཏི. ཨཱཙརིཡོ ནིཔྤརིཡཱཡཱཧཱརེ ཨདྷིཔྤེཏེ སིཡཱ ཏཝ ཙོདནཱཡཱཝསརོ, སཱ པན ཨེཏྠ ཨནཝསརཱཏི དསྶེཏུཾ ‘‘པཉྩ ན པཉྩཱཏི ཨིདཾ ན ཝཏྟབྦ’’ནྟི ཝཏྭཱ པརིཡཱཡཱཧཱརསྶེཝ པནེཏྠ ཨདྷིཔྤེཏབྷཱཝཾ དསྶེནྟོ ‘‘ནནུ པཙྩཡོ ཨཱཧཱརོཏི ¶ ཝུཏྟམེཏ’’ནྟི ཨཱཧ. ཏསྨཱཏི ཡསྶ ཀསྶཙི པཙྩཡསྶ ‘‘ཨཱཧཱརོ’’ཏི ཨིཙྪིཏཏྟཱ. ཨིདཱནི ཝུཏྟམེཝཏྠཾ པཱལི༹ཡཱ སམཏྠེནྟོ ‘‘ཡཾ སནྡྷཱཡཱ’’ཏིཨཱདིམཱཧ.

མུཁྱཱཧཱརཝསེནཔི ¶ ནེརཡིཀཱནཾ ཨཱཧཱརཊྛིཏིཀཏཾ དསྶེཏུཾ ‘‘ཀབལཱི༹ཀཱརཾ ཨཱཧཱརཾ…པེ… སཱདྷེཏཱི’’ཏི ཝུཏྟཾ. ཡདི ཨེཝཾ ནེརཡིཀཱ སུཁཔཊིསཾཝེདིནོཔི ཧོནྟཱིཏི? ནོཏི དསྶེཏུཾ ‘‘ཁེལོ༹པི ཧཱི’’ཏིཨཱདི ཝུཏྟཾ. ཏཡོཏི ཏཡོ ཨརཱུཔཱཧཱརཱ ཀབལཱི༹ཀཱརཱཧཱརསྶ ཨབྷཱཝཏོ. ཨཝསེསཱནནྟི ཨསཉྙསཏྟེཧི ཨཝསེསཱནཾ. ཀཱམབྷཝཱདཱིསུ ནིབྦཏྟསཏྟཱནཾ པཙྩཡཱཧཱརོ ཧི སབྦེསཾ སཱདྷཱརཎོཏི. ཨེཏཾ པཉྷནྟི ‘‘ཀཏམོ ཨེཀོ དྷམྨོ’’ཏི ¶ ཨེཝཾ ཙོདིཏམེཏཾ པཉྷཾ. ཀཐེཏྭཱཏི ཝིསྶཛྫེཏྭཱ.

‘‘ཏཏྠ ཏཏྠ…པེ… དུཀྑཾ ཧོཏཱི’’ཏི ཨེཏེན ཡཐཱ ཨིདྷ པཋམསྶ པཉྷསྶ ནིཡྻཱཏནཾ, དུཏིཡསྶ ཨུདྡྷརཎཾ ན ཀཏཾ, ཨེཝཾ ཨིམིནཱ ཨེཝ ཨདྷིཔྤཱཡེན ཨིཏོ པརེསུ དུཀཏིཀཱདིཔཉྷེསུ ཏཏྠ ཏཏྠ ཨཱདིཔརིཡོསཱནེསུ ཨེཝ ཨུདྡྷརཎནིཡྻཱཏནཱནི ཀཏྭཱ སེསེསུ ན ཀཏནྟི དསྶེཏི. པཊིཙྩ ཨེཏསྨཱ ཕལཾ ཨེཏཱིཏི པཙྩཡོ, ཀཱརཎཾ, ཏདེཝ ཨཏྟནོ ཕལཾ སངྑརོཏཱིཏི སངྑཱརོཏི ཨཱཧ ‘‘ཨིམསྨིམྤི…པེ… སངྑཱརོཏི ཝུཏྟོ’’ཏི. ཨཱཧཱརཔཙྩཡོཏི ཨཱཧརཎཊྛཝིསིཊྛོ པཙྩཡོ. ཨཱཧརཎཉྩེཏྠ ཨུཔྤཱདཀཏྟཔྤདྷཱནཾ, སངྑརཎཾ ཨུཔཏྠམྦྷཀཏྟཔྤདྷཱནནྟི ཨཡམེཏེསཾ ཝིསེསོ. ཏེནཱཧ ‘‘ཨཡམེཏྠ ཧེཊྛིམཏོ ཝིསེསོ’’ཏི. ནིཔྤརིཡཱཡཱཧཱརེ གཧིཏེ ‘‘སབྦེ སཏྟཱ’’ཏི ཝུཏྟེཔི ཨསཉྙསཏྟཱ ན གཧིཏཱ ཨེཝ བྷཝིསྶནྟཱིཏི པདེསཝིསཡོ སབྦ-སདྡོ ཧོཏི ཡཐཱ ‘‘སབྦེ ཏསནྟིདཎྜསྶཱ’’ཏིཨཱདཱིསུ (དྷ. པ. ༡༣༠). ན ཧེཏྠ ཁཱིཎཱསཝཱདཱིནཾ གཧཎཾ ཧོཏི. པཱཀཊོ བྷཝེཡྻ ཝིསེསསཱམཉྙསྶ ཝིསཡཏྟཱ པཉྷཱནཾ. ནོ ཙ གཎྷིཾསུ ཨཊྛཀཐཱཙརིཡཱ. དྷམྨོ ནཱམ ནཏྠི སངྑཏོཏི ཨདྷིཔྤཱཡོ. ཨིདྷ དུཏིཡཔཉྷེ ‘‘སངྑཱརོ’’ཏི པཙྩཡོ ཨེཝ ཀཐིཏོཏི སམྦནྡྷོ.

ཡདཱ སམྨཱསམྦོདྷིསམདྷིགཏོ, ཏདཱ ཨེཝ སབྦཉེཡྻཾ སཙྪིཀཏཾ ཛཱཏནྟི ཨཱཧ ‘‘མཧཱབོདྷིམཎྜེ ནིསཱིདིཏྭཱ’’ཏི. སཡནྟི སཱམཾཡེཝ. ཨདྡྷནིཡནྟི ཨདྡྷཱནཀྑམཾ ཙིརཀཱལཱཝཊྛཱཡི པཱརམྤརིཡཝསེན. ཏེནཱཧ ‘‘ཨེཀེན ཧཱི’’ཏིཨཱདི. པརམྤརཀཐཱནིཡམེནཱཏི པརམྤརཀཐཱཀཐནནིཡམེན, ནིཡམིཏཏྠབྱཉྫནཱནུཔུབྦིཡཱ ཀཐཱཡཱཏི ཨཏྠོ. ཨེཀཀཝསེནཱཏི ཨེཀཾ ཨེཀཾ པརིམཱཎཾ ¶ ཨེཏསྶཱཏི ཨེཀཀོ, པཉྷོ. ཏསྶ ཨེཀཀསྶ ཝསེན. ཨེཀཀཾ ནིཊྛིཏཾ ཝིསྶཛྫནནྟི ཨདྷིཔྤཱཡོཏི.

ཨེཀཀཝཎྞནཱ ནིཊྛིཏཱ.

དུཀཝཎྞནཱ

༣༠༤. ཙཏྟཱརོ ¶ ¶ ཁནྡྷཱཏི ཏེསཾ ཏཱཝ ནཱམནཊྛེན ནཱམབྷཱཝཾ པཋམཾ ཝཏྭཱ པཙྪཱ ནིབྦཱནསྶ ཝཏྟུཀཱམོ ཨཱཧ. ཏསྶཱཔི ཧི ཏཐཱ ནཱམབྷཱཝཾ པརཏོ ཝཀྑཏི. ‘‘ནཱམཾ ཀརོཏི ནཱམཡཏཱི’’ཏི ཨེཏྠ ཡཾ ནཱམཀརཎཾ, ཏཾ ནཱམནྟི ཨཱཧ ‘‘ནཱམནཊྛེནཱཏི ནཱམཀརཎཊྛེནཱ’’ཏི, ཨཏྟནོཝཱཏི ཨདྷིཔྤཱཡོ. ཨེཝཉྷི སཱཏིསཡམིདཾ ཏེསཾ ནཱམཀརཎཾ ཧོཏི. ཏེནཱཧ ‘‘ཨཏྟནོ ནཱམཾ ཀརོནྟཱཝ ཨུཔྤཛྫནྟཱི’’ཏིཨཱདི. ཨིདཱནི ཏམཏྠཾ བྱཏིརེཀམུཁེན ཝིབྷཱཝེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. ཡསྶ ནཱམསྶ ཀརཎེནེཝ ཏེ ‘‘ནཱམ’’ནྟི ཝུཙྩནྟི, ཏཾ སཱམཉྙནཱམཾ, ཀིཏྟིམནཱམཾ, གུཎནཱམཾ ཝཱ ན ཧོཏི, ཨཐ ཁོ ཨོཔཔཱཏིཀནཱམནྟི པུརིམཱནི ཏཱིཎི ནཱམཱནི ཨུདཱཧརཎཝསེན དསྶེཏྭཱ ‘‘ན ཨེཝཾ ཝེདནཱདཱིན’’ནྟི ཏེ པཊིཀྑིཔིཏྭཱ ཨིཏརནཱམམེཝ ནཱམཀརཎཊྛེན ནཱམནྟི དསྶེནྟོ ‘‘ཝེདནཱདཡོ ཧཱི’’ཏིཨཱདིམཱཧ. ‘‘མཧཱཔཐཝིཨཱདཡོ’’ཏི ཀསྨཱ ཝུཏྟཾ, ནནུ པཐཝིཨཱཔཱདཡོ ཨིདྷ ནཱམནྟི ཨནདྷིཔྤེཏཱ, རཱུཔནྟི པན ཨདྷིཔྤེཏཱཏི? སཙྩམེཏཾ, ཕསྶཝེདནཱདཱིནཾ ཝིཡ པན པཐཝིཨཱདཱིནཾ ཨོཔཔཱཏིཀནཱམཏཱསཱམཉྙེན ‘‘པཐཝིཨཱདཡོ ཝིཡཱ’’ཏི ནིདསྶནཾ ཀཏཾ, ན ཨརཱུཔདྷམྨཱ ཝིཡ རཱུཔདྷམྨཱནཾ ནཱམསབྷཱཝཏྟཱ. ཕསྶཝེདནཱདཱིནཉྷི ཨརཱུཔདྷམྨཱནཾ སབྦདཱཔི ཕསྶཱདིནཱམཀཏྟཱ, པཐཝིཨཱདཱིནཾ ཀེསཀུམྦྷཱདིནཱམནྟརཱཔཏྟི ཝིཡ ནཱམནྟརཱནཱཔཛྫནཏོ ཙ སདཱ ཨཏྟནཱཝ ཀཏནཱམཏཱཡ ཙཏུཀྑནྡྷནིབྦཱནཱནི ནཱམཀརཎཊྛེན ནཱམཾ. ཨཐ ཝཱ ཨདྷིཝཙནསམྥསྶོ ཝིཡ ཨདྷིཝཙནནཱམམནྟརེན ཡེ ཨནུཔཙིཏསམྦྷཱརཱནཾ ¶ གཧཎཾ ན གཙྪནྟི, ཏེ ནཱམཱཡཏྟགྒཧཎཱ ནཱམཾ. རཱུཔཾ པན ཝིནཱཔི ནཱམསཱདྷནཾ ཨཏྟནོ རུཔྤནསབྷཱཝེན གཧཎཾ ཨུཔཡཱཏཱིཏི རཱུཔཾ. ཏེནཱཧ ‘‘ཏེསུ ཨུཔྤནྣེསཱུ’’ཏིཨཱདི. ཨིདྷཱཔི ‘‘ཡཐཱཔཐཝིཡཱ’’ཏིཨཱདཱིསུ ཝུཏྟནཡེནེཝ ཨཏྠོ ཝེདིཏབྦོ ནིདསྶནཝསེན ཨཱགཏཏྟཱ. ‘‘ཨཏཱིཏེཔཱི’’ཏིཨཱདིནཱ ཝེདནཱདཱིསུ ནཱམསཉྙཱ ནིརུལ༹ྷཱ, ཨནཱདིཀཱལིཀཱ ཙཱཏི དསྶེཏི.

ཨིཏི ཨཏཱིཏཱདིཝིབྷཱགཝནྟཱནམྤི ཝེདནཱདཱིནཾ ནཱམཀརཎཊྛེན ནཱམབྷཱཝོ ཨེཀནྟིཀོ, ཏབྦིབྷཱགརཧིཏེ པན ཨེཀསབྷཱཝེ ནིཙྩེ ནིབྦཱནེ ཝཏྟབྦམེཝ ནཏྠཱིཏི དསྶེནྟོ ‘‘ནིབྦཱནཾ པན…པེ… ནཱམནཊྛེན ནཱམ’’ནྟི ཨཱཧ. ནཱམནཊྛེནཱཏི ནཱམཀརཎཊྛེན. ནམནྟཱིཏི ཨེཀནྟཏོ སཱརམྨཎཏྟཱ ཏནྣིནྣཱ ཧོནྟི, ཏེཧི ཝིནཱ ནཔྤཝཏྟནྟཱིཏི ཨཏྠོ. སབྦནྟི ཁནྡྷཙཏུཀྐཾ, ནིབྦཱནཉྩ ¶ . ཡསྨིཾ ཨཱརམྨཎེཡེཝ ཝེདནཱཀྑནྡྷོ པཝཏྟཏི, ཏཾསམྤཡུཏྟཏཱཡ སཉྙཱཀྑནྡྷཱདཡོཔི ཏཏྠ པཝཏྟནྟཱིཏི སོ ནེ ཏཏྠ ནཱམེནྟོ ཝིཡ ཧོཏི ཝིནཱ ཨཔྤཝཏྟནཏོ. ཨེས ནཡོ སཉྙཱཀྑནྡྷཱདཱིསུཔཱིཏི ཝུཏྟཾ ‘‘ཨཱརམྨཎེ ཨཉྙམཉྙཾ ནཱམེནྟཱི’’ཏི. ཨནཝཛྫདྷམྨེ མགྒཕལཱདིཀེ ¶ . ཀཱམཾ ཀེསུཙི རཱུཔདྷམྨེསུཔི ཨཱརམྨཎཱདྷིཔཏིབྷཱཝོ ལབྦྷཏེཝ, ནིབྦཱནེ པནེས སཱཏིསཡོ ཏསྶ ཨཙྩནྟསནྟཔཎཱིཏཏཱཀཔྤབྷཱཝཏོཏི ཏདེཝ ཨཱརམྨཎཱདྷིཔཏིཔཙྩཡཏཱཡ ‘‘ཨཏྟནི ནཱམེཏཱི’’ཏི ཝུཏྟཾ. ཏཐཱ ཧི ཨརིཡཱ སཀལམྤི དིཝསབྷཱགཾ ཏཾ ཨཱརབྦྷ ཝཱིཏིནཱམེནྟཱཔི ཏིཏྟིཾ ན གཙྪནྟི.

‘‘རུཔྤནཊྛེནཱ’’ཏི ཨེཏེན རུཔྤཏཱིཏི རཱུཔནྟི དསྶེཏི. ཏཏྠ སཱིཏཱདིཝིརོདྷིཔཙྩཡསནྣིཔཱཏེ ཝིསདིསུཔྤཏྟི རུཔྤནཾ. ནནུ ཙ ཨརཱུཔདྷམྨཱནམྤི ཝིརོདྷིཔཙྩཡསམཱགམེ ཝིསདིསུཔྤཏྟི ལབྦྷཏཱིཏི? སཙྩཾ ལབྦྷཏི, ན པན ཝིབྷཱུཏཏརཾ. ཝིབྷཱུཏཏརཉྷེཏྠ རུཔྤནཾ ཨདྷིཔྤེཏཾ སཱིཏཱདིགྒཧཎཏོ. ཝུཏྟཉྷེཏཾ ‘‘རུཔྤཏཱིཏི ¶ ཁོ བྷིཀྑཝེ ཏསྨཱ ‘རཱུཔ’ནྟི ཝུཙྩཏི. ཀེན རུཔྤཏི? སཱིཏེནཔི རུཔྤཏི, ཨུཎྷེནཔི རུཔྤཏཱི’’ཏིཨཱདི (སཾ. ནི. ༣.༧༩). ཡདི ཨེཝཾ ཀཐཾ བྲཧྨལོཀེ རཱུཔསམཉྙཱཏི? ཏཏྠཱཔི ཏཾསབྷཱཝཱནཏིཝཏྟནཏོ ཧོཏིཡེཝ རཱུཔསམཉྙཱ. ཨནུགྒཱཧཀཔཙྩཡཝསེན ཝཱ ཝིསདིསཔཙྩཡསནྣིཔཱཏེཏི ཨེཝམཏྠོ ཝེདིཏབྦོ. ‘‘ཡོ ཨཏྟནོ སནྟཱནེ ཝིཛྫམཱནསྶཡེཝ ཝིསདིསུཔྤཏྟིཧེཏུབྷཱཝོ, ཏཾ རུཔྤན’’ནྟི ཨཉྙེ. ཨིམསྨིཾ པཀྑེ རཱུཔཡཏི ཝིཀཱརམཱཔཱདེཏཱིཏི རཱུཔཾ. ‘‘སངྒྷཊྚནེན ཝིཀཱརཱཔཏྟིཡཾ རུཔྤན-སདྡོ ནིརུལ༹ྷོ’’ཏི ཀེཙི. ཨེཏསྨིཾ པཀྑེ ཨརཱུཔདྷམྨེསུ རཱུཔསམཉྙཱཡ པསངྒོ ཨེཝ ནཏྠི སངྒྷཊྚནཱབྷཱཝཏོ. ‘‘པཊིགྷཏོ རུཔྤན’’ནྟི ཨཔརེ. ‘‘ཏསྶཱཏི རཱུཔསྶཱ’’ཏི ཝདནྟི, ནཱམརཱུཔསྶཱཏི པན ཡུཏྟཾ. ཡཐཱ ཧི རཱུཔསྶ, ཨེཝཾ ནཱམསྶཱཔི ཝེདནཱཀྑནྡྷཱདིཝསེན, མདནིམྨདནཱདིཝསེན ཙ ཝིཏྠཱརཀཐཱ ཝིསུདྡྷིམགྒེ (ཝིསུདྡྷི. ༢.༤༥༦) ཝུཏྟཱ ཨེཝཱཏི. ཨིཏི ཨཡཾ དུཀོ ཀུསལཏྟིཀེན སངྒཧིཏེ སབྷཱཝདྷམྨེ པརིགྒཧེཏྭཱ པཝཏྟོཏི.

ཨཝིཛྫཱཏི ཨཝིནྡིཡཾ ‘‘ཨཏྟཱ, ཛཱིཝོ, ཨིཏྠཱི, པུརིསོ’’ཏི ཨེཝམཱདིཀཾ ཝིནྡཏཱིཏི ཨཝིཛྫཱ. ཝིནྡིཡཾ ‘‘དུཀྑཾ, སམུདཡོ’’ཏི ཨེཝམཱདིཀཾ ན ཝིནྡཏཱིཏི ཨཝིཛྫཱ. སབྦམྤི དྷམྨཛཱཏཾ ཨཝིདིཏཀརཎཊྛེན ཨཝིཛྫཱ. ཨནྟརཧིཏེ སཾསཱརེ སཏྟེ ཛཝཱཔེཏཱིཏི ཨཝིཛྫཱ. ཨཏྠཏོ པན སཱ དུཀྑཱདཱིནཾ ཙཏུནྣཾ སཙྩཱནཾ སབྷཱཝཙྪཱདཀོ སམྨོཧོ ཧོཏཱིཏི ཨཱཧ ‘‘དུཀྑཱདཱིསུ ཨཉྙཱཎ’’ནྟི ¶ . བྷཝཔཏྠནཱ ནཱམ ཀཱམབྷཝཱདཱིནཾ པཏྠནཱཝསེན པཝཏྟཏཎྷཱ. ཏེནཱཧ ‘‘ཡོ བྷཝེསུ བྷཝཙྪནྡོ’’ཏིཨཱདི. ཨིཏི ‘‘ཨཡཾ དུཀོ ཝཊྚམཱུལསམུདཱཙཱརདསྶནཏྠཾ གཧིཏོ.

བྷཝདིཊྛཱིཏི ཁནྡྷཔཉྩཀཾ ‘‘ཨཏྟཱ ཙ ལོཀོ ཙཱ’’ཏི གཱཧེཏྭཱ ཏཾ ‘‘བྷཝིསྶཏཱི’’ཏི གཎྷནཝསེན ནིཝིཊྛཱ སསྶཏདིཊྛཱིཏི ¶ ཨཏྠོ. ཏེནཱཧ ‘‘བྷཝོ ཝུཙྩཏཱི’’ཏིཨཱདི. བྷཝིསྶཏཱིཏི བྷཝོ, ཏིཊྛཏི སབྦཀཱལཾ ཨཏྠཱིཏི ཨཏྠོ. སསྶཏནྟི སསྶཏབྷཱཝོ. ཝིབྷཝདིཊྛཱིཏི ཁནྡྷཔཉྩཀམེཝ ¶ ‘‘ཨཏྟཱ’’ཏི ཙ ‘‘ལོཀོ’’ཏི ཙ གཧེཏྭཱ ཏཾ ‘‘ན བྷཝིསྶཏཱི’’ཏི གཎྷནཝསེན ནིཝིཊྛཱ ཨུཙྪེདདིཊྛཱིཏི ཨཏྠོ. ཏེནཱཧ ‘‘ཝིབྷཝོ ཝུཙྩཏཱི’’ཏིཨཱདི. ཝིབྷཝིསྶཏི ཝིནསྶཏི ཨུཙྪིཛྫཏཱིཏི ཝིབྷཝོ, ཨུཙྪེདོ.

ཡཾ ན ཧིརཱིཡཏཱིཏི ཡེན དྷམྨེན ཏཾསམྤཡུཏྟདྷམྨསམཱུཧོ, པུགྒལོ ཝཱ ན ཧིརཱིཡཏི ན ལཛྫཏི, ལིངྒཝིཔལླཱསཾ ཝཱ ཀཏྭཱ ཡོ དྷམྨོཏི ཨཏྠོ ཝེདིཏབྦོ. ཧིརཱིཡིཏབྦེནཱཏི ཨུཔཡོགཏྠེ ཀརཎཝཙནཾ, ཧིརཱིཡིཏབྦཡུཏྟཀཾ ཀཱཡདུཙྩརིཏཱདིདྷམྨཾ ན ཛིགུཙྪཏཱིཏི ཨཏྠོ. ནིལླཛྫཏཱཏི པཱཔསྶ ཨཛིགུཙྪནཱ. ཡཾ ན ཨོཏྟཔྤཏཱིཏི ཨེཏྠཱཔི ཝུཏྟནཡེནེཝ ཨཏྠོ ཝེདིཏབྦོ. ཨོཏྟཔྤིཏབྦེནཱཏི པན ཧེཏུཨཏྠེ ཀརཎཝཙནཾ, ཨོཏྟཔྤིཏབྦཡུཏྟཀེན ཨོཏྟཔྤསྶ ཧེཏུབྷཱུཏེན ཀཱཡདུཙྩརིཏཱདིནཱཏི ཨཏྠོ. ཧིརཱིཡིཏབྦེནཱཏི ཨེཏྠཱཔི ཝཱ ཨེཝམེཝ ཨཏྠོ ཝེདིཏབྦོ. ཨབྷཱཡནཀཨཱཀཱརོཏི པཱཔཏོ ཨནུཏྟཱསནཱཀཱརོ.

‘‘ཡཾ ཧིརཱིཡཏཱི’’ཏིཨཱདཱིསུ ཨནནྟརདུཀེ ཝུཏྟནཡེན ཨཏྠོ ཝེདིཏབྦོ. ནིཡཀཛ྄ཛྷཏྟཾ ཛཱཏིཨཱདིསམུཊྛཱནཾ ཨེཏིསྶཱཏི ཨཛ྄ཛྷཏྟསམུཊྛཱནཱ. ནིཡཀཛ྄ཛྷཏྟཏོ བཧིབྷཱཝཏོ བཧིདྡྷཱ པརསནྟཱནེ སམུཊྛཱནཾ ཨེཏིསྶཱཏི བཧིདྡྷཱ སམུཊྛཱནཱ. ཨཏྟཱ ཨེཝ ཨདྷིཔཏི ཨཏྟཱདྷིཔཏི, ཨཛ྄ཛྷཏྟསམུཊྛཱནཏྟཱ ཨེཝ ཨཏྟཱདྷིཔཏིཏོ ཨཱགམནཏོ ཨཏྟཱདྷིཔཏེཡྻཱ. ལོཀཱདྷིཔཏེཡྻནྟི ཨེཏྠཱཔི ཨེསེཝ ནཡོ. ལཛྫཱསབྷཱཝསཎྛིཏཱཏི པཱཔཏོ ཛིགུཙྪནརཱུཔེན ཨཝཊྛིཏཱ. བྷཡསབྷཱཝསཎྛིཏནྟི ཏཏོ ཨུཏྟཱསནརཱུཔེན ཨཝཊྛིཏཾ. ཨཛ྄ཛྷཏྟསམུཊྛཱནཱདིཏཱ ཙ ཧིརོཏྟཔྤཱནཾ ཏཏྠ ཏཏྠ པཱཀཊབྷཱཝེན ཝུཏྟཱ, ན པན ཏེསཾ ཀདཱཙིཔི ཨཉྙམཉྙཝིཔྤཡོགཏོ. ན ཧི ལཛྫནཾ ནིབྦྷཡཾ, པཱཔབྷཡཾ ཝཱ ཨལཛྫནཾ ཨཏྠཱིཏི.

དུཀྑནྟི ¶ ཀིཙྪཾ, ཨནིཊྛནྟི ཝཱ ཨཏྠོ. ཝིཔྤཊིཀཱུལགཱཧིམྷཱིཏི དྷམྨཱནུདྷམྨཔཊིཔཏྟིཡཱ ཝིལོམགཱཧཀེ. ཏསྶཱ ཨེཝ ཝིཔཙྩནཱིཀཾ དུཔྤཊིཔཏྟི སཱཏཾ ཨིཊྛཾ ཨེཏསྶཱཏི ¶ ཝིཔཙྩནཱིཀསཱཏོ, ཏསྨིཾ ཝིཔཙྩནཱིཀསཱཏེ. ཨེཝཾབྷཱུཏོ ཙ ཨོཝཱདབྷཱུཏེ སཱསནཀྐམེ ཨོཝཱདཀེ ཙ ཨཱདརབྷཱཝརཧིཏོ ཧོཏཱིཏི ཨཱཧ ‘‘ཨནཱདརེ’’ཏི. ཏསྶ ཀམྨནྟི ཏསྶ དུབྦཙསྶ པུགྒལསྶ ཨནཱདརིཡཝསེན པཝཏྟཙེཏནཱ དོཝཙསྶཾ. ཏསྶ བྷཱཝོཏི ཏསྶ ཡཐཱཝུཏྟསྶ དོཝཙསྶསྶ ཨཏྠིབྷཱཝོ དོཝཙསྶཏཱ, ཨཏྠཏོ དོཝཙསྶམེཝ. ཏེནེཝཱཧ ‘‘སཱ ཨཏྠཏོ སངྑཱརཀྑནྡྷོ ཧོཏཱི’’ཏི. ཙེཏནཱཔྤདྷཱནཏཱཡ ཧི སངྑཱརཀྑནྡྷསྶ ཨེཝཾ ཝུཏྟཾ. ཨེཏེནཱཀཱརེནཱཏི ཨཔྤདཀྑིཎགྒཱཧིཏཱཀཱརེན. ཨསྶདྡྷིཡདུསྶཱིལྱཱདིཔཱཔདྷམྨཡོགཏོ པུགྒལཱ པཱཔཱ ནཱམ ཧོནྟཱིཏི དསྶེཏུཾ ‘‘ཡེ ཏེ པུགྒལཱ ཨསྶདྡྷཱ’’ཏིཨཱདི ཝུཏྟཾ. ཡཱཡ ཙེཏནཱཡ པུགྒལོ པཱཔསམྤཝངྐོ ནཱམ ཧོཏི, སཱ ཙེཏནཱ པཱཔམིཏྟཏཱ ¶ , ཙཏྟཱརོཔི ཝཱ ཨརཱུཔིནོ ཁནྡྷཱ ཏདཱཀཱརཔྤཝཏྟཱ པཱཔམིཏྟཏཱཏི དསྶེནྟོ ‘‘སཱཔི ཨཏྠཏོ དོཝཙསྶཏཱ ཝིཡ དཊྛབྦཱ’’ཏི ཨཱཧ.

‘‘སུཁཾ ཝཙོ ཨེཏསྨིཾ པདཀྑིཎགྒཱཧིམྷི ཨནུལོམསཱཏེ སཱདརེ པུགྒལེཏི སུབྦཙོཏིཨཱདིནཱ, ‘‘ཀལྱཱཎཱ སདྡྷཱདཡོ པུགྒལཱ ཨེཏསྶ མིཏྟཱཏི ཀལྱཱཎམིཏྟོ’’ཏིཨཱདིནཱ ཙ ཨནནྟརདུཀསྶ ཨཏྠོ ཨིཙྪིཏོཏི ཨཱཧ སོཝཙསྶཏཱ…པེ… ཝུཏྟཔཊིཔཀྑནཡེན ཝེདིཏབྦཱ’’ཏི. ཨུབྷོཏི སོཝཙསྶཏཱ, ཀལྱཱཎམིཏྟཏཱ ཙ. ཏེསཾ ཁནྡྷཱནཾ པཝཏྟིཨཱཀཱརཝིསེསཱ ‘‘སོཝཙསྶཏཱ, ཀལྱཱཎམིཏྟཏཱ’’ཏི ཙ ཝུཙྩནྟི, ཏེ ལོཀིཡཱཔི ཧོནྟི ལོཀུཏྟརཱཔཱིཏི ཨཱཧ ‘‘ལོཀིཡལོཀུཏྟརམིསྶཀཱ ཀཐིཏཱ’’ཏི.

ཝཏྠུབྷེདཱདིནཱ ཨནེཀབྷེདབྷིནྣཱ ཏཾཏཾཛཱཏིཝསེན ཨེཀཛ྄ཛྷཾ ཀཏྭཱ རཱསིཏོ གཡ྄ཧམཱནཱ ཨཱཔཏྟིཡོཝ ཨཱཔཏྟིཀྑནྡྷཱ. ཏཱ པན ཨནྟརཱཔཏྟཱིནཾ ཨགྒཧཎེ པཉྩཔི ཨཱཔཏྟིཀྑནྡྷཱ ཨཱཔཏྟིཡོ, ཏཱསཾ པན གཧཎེ སཏྟཔི ཨཱཔཏྟིཀྑནྡྷཱ ཨཱཔཏྟིཡོ. ‘‘ཨིམཱ ཨཱཔཏྟིཡོ, ཨེཏྟཀཱ ཨཱཔཏྟིཡོ, ཨེཝཉྩ ཏེསཾ ཨཱཔཛྫནཾ ཧོཏཱི’’ཏི ཛཱནནཔཉྙཱ ཨཱཔཏྟིཀུསལཏཱཏི ¶ ཨཱཧ ‘‘ཡཱ ཏཱས’’ནྟིཨཱདི. ཏཱསཾ ཨཱཔཏྟཱིནནྟི ཏཱསུ ཨཱཔཏྟཱིསུ. ཏཏྠ ཡཾ སམྦྷིནྣཝཏྠུཀཱསུ ཝིཡ ཋིཏཱསུ, དུཝིཉྙེཡྻཝིབྷཱགཱསུ ཙ ཨཱཔཏྟཱིསུ ཨསངྐརཏོ ཝཝཏྠཱན, ཨཡཾ ཝིསེསཏོ ཨཱཔཏྟིཀུསལཏཱཏི དསྶེཏུཾ དུཏིཡཾ ཨཱཔཏྟིགྒཧཎཾ ཀཏཾ. སཧ ¶ ཀམྨཝཱཙཱཡཱཏི ཀམྨཝཱཙཱཡ སཧེཝ. ཨཱཔཏྟིཏོ ཝུཊྛཱཔནཔཡོགཏཱཡ ཀམྨབྷཱུཏཱ ཝཱཙཱ ཀམྨཝཱཙཱ, ཏཐཱབྷཱུཏཱ ཨནུསཱཝནཝཱཙཱ ཙེཝ ‘‘པསྶིསྶཱམཱི’’ཏི ཨེཝཾ པཝཏྟཝཱཙཱ ཙ. ཏཱཡ ཀམྨཝཱཙཱཡ སདྡྷིཾ སམཀཱལམེཝ ‘‘ཨིམཱཡ ཀམྨཝཱཙཱཡ ཨིཏོ ཨཱཔཏྟིཏོ ཝུཊྛཱནཾ ཧོཏི, ཧོནྟཉྩ པཋམེ ཝཱ ཏཏིཡེ ཝཱ ཨནུསཱཝནེཡྻཀཱརཔྤཏྟེ, ‘སཾཝརིསྶཱམཱི’ཏི ཝཱ པདེ པརིཡོསིཏེ ཧོཏཱི’’ཏི ཨེཝཾ ཏཾ ཏཾ ཨཱཔཏྟཱིཧི ཝུཊྛཱནཔརིཙྪེདཔརིཛཱནནཔཉྙཱ ཨཱཔཏྟིཝུཊྛཱནཀུསལཏཱ. ཝུཊྛཱནནྟི ཙ ཡཐཱཔནྣཱཡ ཨཱཔཏྟིཡཱ ཡཐཱ ཏཐཱ ཨནནྟརཱཡཏཱཔཱདནཾ, ཨེཝཾ ཝུཊྛཱནགྒཧཎེནེཝ དེསནཱཡཔི སངྒཧོ སིདྡྷོ ཧོཏི.

‘‘ཨིཏོ པུབྦེ པརིཀམྨཾ པཝཏྟཾ, ཨིཏོ པརཾ བྷཝངྒ མཛ྄ཛྷེ སམཱཔཏྟཱི’’ཏི ཨེཝཾ སམཱཔཏྟཱིནཾ ཨཔྤནཱཔརིཙྪེདཛཱནནཔཉྙཱ སམཱཔཏྟིཀུསལཏཱ. ཝུཊྛཱནེ ཀུསལབྷཱཝོ ཝུཊྛཱནཀུསལཏཱ, པགེཝ ཝུཊྛཱན པརིཙྪེདཀརཾ ཉཱཎཾ. ཏེནཱཧ ‘‘ཡཐཱཔརིཙྪིནྣསམཡཝསེནེཝཱ’’ཏིཨཱདི. ཝུཊྛཱནསམཏྠཱཏི ཝུཊྛཱཔནེ སམཏྠཱ.

‘‘དྷཱཏུཀུསལཏཱ’’ཏི ཨེཏྠ པཐཝཱིདྷཱཏུཨཱདཡོ, སུཁདྷཱཏུཨཱདཡོ, ཀཱམདྷཱཏུཨཱདཡོ ཙ དྷཱཏུཡོ ཨེཏཱསྭེཝ ¶ ཨནྟོགདྷཱཏི ཨེཏཱསུ ཀོསལླེ དསྶིཏེ ཏཱསུཔི ཀོསལླཾ དསྶིཏམེཝ ཧོཏཱིཏི ‘‘ཨཊྛཱརས དྷཱཏུཡོ ཙཀྑུདྷཱཏུ…པེ… མནོཝིཉྙཱཎདྷཱཏཱུ’’ཏི ཝཏྭཱ ‘‘ཨཊྛཱརསནྣཾ དྷཱཏཱུནཾ སབྷཱཝཔརིཙྪེདཀཱ’’ཏི ཝུཏྟཾ. ཏཏྠ སབྷཱཝཔརིཙྪེདཀཱཏི ཡཐཱབྷཱུཏསབྷཱཝཱཝབོདྷིནཱི. ‘‘སཝནཔཉྙཱ དྷཱརཎཔཉྙཱ’’ཏིཨཱདིནཱ པཙྩེཀཾ པཉྙཱ-སདྡོ ཡོཛེཏབྦོ. དྷཱཏཱུནཾ ¶ སཝནདྷཱརཎཔཉྙཱ སུཏམཡཱ, ཨིཏརཱ བྷཱཝནཱམཡཱ. ཏཏྠཱཔི སམྨསནཔཉྙཱ ལོཀིཡཱ. ཝིཔསྶནཱ པཉྙཱ ཧི སཱ, ཨིཏརཱ ལོཀུཏྟརཱ. ལཀྑཎཱདིཝསེན, ཨནིཙྩཱདིཝསེན ཙ མནསིཀརཎཾ མནསིཀཱརོ, ཏཏྠ ཀོསལླཾ མནསིཀཱརཀུསལཏཱ. ཏཾ པན ཨཱདིམཛ྄ཛྷཔརིཡོསཱནཝསེན ཏིདྷཱ བྷིནྡིཏྭཱ དསྶེནྟོ ‘‘སམྨསནཔཊིཝེདྷཔཙྩཝེཀྑཎཔཉྙཱ’’ཏི ཨཱཧ. སམྨསནཔཉྙཱ ཧི ཏསྶཱ ཨཱདི, པཊིཝེདྷཔཉྙཱ མཛ྄ཛྷེ, པཙྩཝེཀྑཎཔཉྙཱ པརིཡོསཱནཾ.

ཨཱཡཏནཱནཾ གནྠཏོ ཙ ཨཏྠཏོ ཙ ཨུགྒཎྷནཝསེན ཏེསཾ དྷཱཏུལཀྑཎཱདིཝིབྷཱགསྶ ཛཱནནཔཉྙཱ ཨུགྒཧཛཱནནཔཉྙཱ. སམྨསནཔཊིཝེདྷཔཙྩཝེཀྑཎཝིདྷིནོ ཛཱནནཔཉྙཱ མནསིཀཱརཛཱནནཔཉྙཱ. ཡསྨཱ ཨཱཡཏནཱནིཔི ཨཏྠཏོ དྷཱཏུཡོཝ མནསིཀཱརོ ཙ ཨུགྒཎྷནཱདིཝསེན ཏེསམེཝ མནསིཀཱརཝིདྷི ¶ , ཏསྨཱ དྷཱཏུཀུསལཏཱདིཀཱ ཏིསྶོཔི ཀུསལཏཱ ཨེཀདེསེ ཀཏྭཱ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. སཝནཾ ཝིཡ ཨུགྒཎྷནཔཙྩཝེཀྑཎཱནིཔི པརིཏྟཉཱཎཀཏྟུཀཱནཱིཏི ཨཱཧ ‘‘སཝན ཨུགྒཧཎཔཙྩཝེཀྑཎཱ ལོཀིཡཱ’’ཏི. ཨརིཡམགྒཀྑཎེ སམྨསནམནསིཀཱརཱནཾ ནིཔྥཏྟི པརིནིཊྛཱནནྟི ཏེསཾ ལོཀུཏྟརཏཱཔརིཡཱཡོཔི ལབྦྷཏཱིཏི ཝུཏྟཾ ‘‘སམྨསནམནསིཀཱརཱ ལོཀིཡལོཀུཏྟརམིསྶཀཱ’’ཏི. པཙྩཡདྷམྨཱནཾ ཧེཏུཨཱདཱིནཾ ཨཏྟནོ པཙྩཡུཔྤནྣཱནཾ ཧེཏུཔཙྩཡཱདིབྷཱཝེན པཙྩཡབྷཱཝོ པཙྩཡཱཀཱརོ, སོ པན ཨཝིཛྫཱདཱིནཾ དྭཱདསནྣཾ པཊིཙྩསམུཔྤཱདངྒཱནཾ ཝསེན དྭཱདསཝིདྷོཏི ཨཱཧ ‘‘དྭཱདསནྣཾ པཙྩཡཱཀཱརཱན’’ནྟི. ཨུགྒཧཱདིཝསེནཱཏི ཨུགྒཧམནསིཀཱརསཝནསམྨསནཔཊིཝེདྷཔཙྩཝེཀྑཎཝསེན.

ཋཱནཉྩེཝ ཏིཊྛཏི ཕལཾ ཏདཱཡཏྟཝུཏྟིཏཱཡཱཏི ཀཱརཎཉྩ ཧེཏུཔཙྩཡབྷཱཝེན ཀརཎཏོ ནིཔྥཱདནཏོ. ཏེསཾ སོཏཝིཉྙཱཎཱདཱིནཾ. ཨེཏསྨིཾ ¶ དུཀེ ཨཏྠོ ཝེདིཏབྦོཏི སམྦནྡྷོ. ཡེ དྷམྨཱ ཡསྶ དྷམྨསྶ ཀཱརཎབྷཱཝཏོ ཋཱནཾ, ཏེཝ དྷམྨཱ ཏཾཝིདྷུརསྶ དྷམྨསྶ ཨཀཱརཎབྷཱཝཏོ ཨཊྛཱནནྟི པཋམནཡེ ཕལབྷེདེན ཏསྶེཝ དྷམྨསྶ ཋཱནཱཊྛཱནཏཱ དཱིཔིཏཱ; དུཏིཡནཡེ པན ཨབྷིནྣེཔི ཕལེ པཙྩཡདྷམྨབྷེདེན ཏེསཾ ཋཱནཱཊྛཱནཏཱ དཱིཔིཏཱཏི ཨཡམེཏེསཾ ཝིསེསོ. ན ཧི ཀདཱཙི ཨརིཡཱ དིཊྛིསམྤདཱ ནིཙྩགྒཱཧསྶ ཀཱརཎཾ ཧོཏི, ཨཀིརིཡཏཱ པན སིཡཱ ཏསྶ ཀཱརཎནྟི.

ཨུཛུནོ བྷཱཝོ ཨཛྫཝཾ, ཨཛིམྷཏཱ ཨཀུཊིལཏཱ ཨཝངྐཏཱཏི ཨཏྠོཏི ཏམཏྠཾ ཨནཛྫཝཔཊིཀྑེཔམུཁེན ¶ དསྶེཏུཾ ‘‘གོམུཏྟཝངྐཏཱ’’ཏིཨཱདི ཝུཏྟཾ. སྭཱཡཾ ཨནཛྫཝོ བྷིཀྑཱུནཾ ཡེབྷུཡྻེན ཨནེསནཱཡ, ཨགོཙརཙཱརིཏཱཡ ཙ ཧོཏཱིཏི ཨཱཧ ‘‘ཨེཀཙྩོ ཧི…པེ… ཙརཏཱི’’ཏི. ཨཡཾ གོམུཏྟཝངྐཏཱ ནཱམ ཨཱདིཏོ པཊྛཱཡ ཡཱཝ པརིཡོསཱནཱ པཊིཔཏྟིཡཱ ཝངྐབྷཱཝཏོ. པུརིམསདིསོཏི པཋམཾ ཝུཏྟབྷིཀྑུསདིསོ. ཙནྡཝངྐཏཱ ནཱམ པཊིཔཏྟིཡཱ མཛ྄ཛྷཊྛཱནེ ཝངྐབྷཱཝཱཔཏྟིཏོ. ནངྒལཀོཊིཝངྐཏཱ ནཱམ པརིཡོསཱནེ ཝངྐབྷཱཝཱཔཏྟིཏོ. ཨིདཾ ཨཛྫཝཾ ནཱམ སབྦཏྠཀམེཝ ཨུཛུབྷཱཝསིདྡྷིཏོ. ཨཛྫཝཏཱཏི ཨཱཀཱརནིདྡེསོ, ཡེནཱཀཱརེནསྶ ཨཛྫཝོ པཝཏྟཏི, ཏདཱཀཱརནིདྡེསོཏི ཨཏྠོ. ལཛྫཏཱིཏི ལཛྫཱི, ཧིརིམཱ, ཏསྶ བྷཱཝོ ལཛྫཝཾ, ཧིརཱིཏི ཨཏྠོ. ལཛྫཱ ཨེཏསྶ ¶ ཨཏྠཱིཏི ལཛྫཱི ཡཐཱ ‘‘མཱལཱི, མཱཡཱི’’ཏི ཙ, ཏསྶ བྷཱཝོ ལཛྫཱིབྷཱཝོ, སཱ ཨེཝ ལཛྫཱ.

པརཱཔརཱདྷཱདཱིནཾ ཨདྷིཝཱསནཀྑམཾ ཨདྷིཝཱསནཁནྟི. སུཙིསཱིལཏཱ སོརཙྩཾ. སཱ ཧི སོབྷནཀམྨརཏཏཱ, སུཊྛུ ཝཱ པཱཔཏོ ཨོརཏབྷཱཝོ ཝིརཏཏཱ སོརཙྩཾ. ཏེནཱཧ ‘‘སུརཏབྷཱཝོ’’ཏི.

‘‘ནཱམཉྩ རཱུཔཉྩཱ’’ཏིཨཱདཱིསུ ཨཡཾ ཨཔརོ ནཡོ – ནཱམཀརཎཊྛེནཱཏི ཨཉྙཾ ཨནཔེཀྑིཏྭཱ སཡམེཝ ཨཏྟནོ ནཱམཀརཎསབྷཱཝཏོཏི ཨཏྠོ. ཡཉྷི པརསྶ ནཱམཾ ཀརོཏི, ཏསྶ ཙ ཏདཔེཀྑཏྟཱ ཨཉྙཱཔེཀྑཾ ནཱམཀརཎནྟི ནཱམཀརཎསབྷཱཝཏཱ ན ཧོཏི, ཏསྨཱ མཧཱཛནསྶ ¶ ཉཱཏཱིནཾ, གུཎཱནཉྩ སཱམཉྙནཱམཱདིཀཱརཀཱནཾ ནཱམབྷཱཝོ ནཱཔཛྫཏི. ཡསྶ ཙ ཨཉྙེཧི ནཱམཾ ཀརཱིཡཏི, ཏསྶ ཙ ནཱམཀརཎསབྷཱཝཏཱ ནཏྠཱིཏི, ནཏྠིཡེཝ ནཱམབྷཱཝོ. ཝེདནཱདཱིནཾ པན སབྷཱཝསིདྡྷཏྟཱ ཝེདནཱདིནཱམསྶ ནཱམཀརཎསབྷཱཝཏོ ནཱམཏཱ ཝུཏྟཱ. པཐཝཱིཨཱདི ནིདསྶནེན ནཱམསྶ སབྷཱཝསིདྡྷཏཾཡེཝ ནིདསྶེཏི, ན ནཱམབྷཱཝསཱམཉྙཾ, ནིརུལ༹ྷཏྟཱ པན ནཱམ-སདྡོ ཨརཱུཔདྷམྨེསུ ཨེཝ ཝཏྟཏི, ན པཐཝཱིཨཱདཱིསཱུཏི ན ཏེསཾ ནཱམབྷཱཝོ. ན ཧི པཐཝཱིཨཱདིནཱམཾ ཝིཛཧིཏྭཱ ཀེསཱདིནཱམེཧི རཱུཔདྷམྨཱནཾ ཝིཡ ཝེདནཱདིནཱམཾ ཝིཛཧིཏྭཱ ཨཉྙེན ནཱམེན ཨརཱུཔདྷམྨཱནཾ ཝོཧརིཏབྦེན པིཎྜཱཀཱརེན པཝཏྟི ཨཏྠཱིཏི.

ཨཐ ཝཱ རཱུཔདྷམྨཱ ཙཀྑཱདཡོ རཱུཔཱདཡོ ཙ, ཏེསཾ པཀཱསཀཔཀཱསིཏབྦབྷཱཝཏོ ཝིནཱཔི ནཱམེན པཱཀཊཱ ཧོནྟི, ན ཨེཝཾ ཨརཱུཔདྷམྨཱཏི ཏེ ཨདྷིཝཙནསམྥསྶོ ཝིཡ ནཱམཱཡཏྟགྒཧཎཱིཡབྷཱཝེན ‘‘ནཱམ’’ནྟི ཝུཏྟཱ. པཊིགྷསམྥསྶོ ཙ ན ཙཀྑཱདཱིནི ཝིཡ ནཱམེན ཝིནཱ པཱཀཊོཏི ‘‘ནཱམ’’ནྟི ཝུཏྟོ, ཨརཱུཔཏཱཡ ཝཱ ཨཉྙནཱམསབྷཱགཏྟཱ སངྒཧིཏོཡཾ, ཨཉྙཕསྶསབྷཱགཏྟཱ ཝཱ. ཝཙནཏྠོཔི ཧི རཱུཔཡཏཱིཏི རཱུཔཾ, ནཱམཡཏཱིཏི ནཱམནྟི ཨིདྷ པཙྪིམཔུརིམཱནཾ སམྦྷཝཏི. རཱུཔཡཏཱིཏི ཝིནཱཔི ནཱམེན ཨཏྟཱནཾ པཀཱསེཏཱིཏི ཨཏྠོ. ནཱམཡཏཱིཏི ¶ ནཱམེན ཝིནཱ ཨཔཱཀཊབྷཱཝཏོ ཨཏྟནོ པཀཱསཀཾ ནཱམཾ ཀརོཏཱིཏི ཨཏྠོ. ཨཱརམྨཎཱདྷིཔཏིཔཙྩཡཏཱཡཱཏི སཏིཔི རཱུཔསྶ ཨཱརམྨཎཱདྷིཔཏིཔཙྩཡབྷཱཝེ ན ཏཾ པརམསྶཱསབྷཱུཏཾ ནིབྦཱནཾ ཝིཡ སཱཏིསཡཾ ནཱམནབྷཱཝེན པཙྩཡོཏི ནིབྦཱནམེཝ ‘‘ནཱམ’’ནྟི ཝུཏྟཾ.

‘‘ཨཝིཛྫཱ ¶ ཙ བྷཝཏཎྷཱ ཙཱ’’ཏི ཨཡཾ དུཀོ སཏྟཱནཾ ¶ ཝཊྚམཱུལསམུདཱཙཱརདསྶནཏྠོ. སམུདཱཙརཏཱིཏི ཧི སམུདཱཙཱརོ, ཝཊྚམཱུལམེཝ སམུདཱཙཱརོ ཝཊྚམཱུལསམུདཱཙཱརོ, ཝཊྚམཱུལདསྶནེན ཝཱ ཝཊྚམཱུལཱནཾ པཝཏྟི དསྶིཏཱ ཧོཏཱིཏི ཝཊྚམཱུལཱནཾ སམུདཱཙཱརོ ཝཊྚམཱུལསམུདཱཙཱརོ, ཏཾདསྶནཏྠོཏི ཨཏྠོ.

ཨེཀེཀསྨིཉྩ ‘‘ཨཏྟཱ’’ཏི ཙ ‘‘ལོཀོ’’ཏི ཙ གཧཎཝིསེསཾ ཨུཔཱདཱཡ ‘‘ཨཏྟཱ ཙ ལོཀོ ཙཱ’’ཏི ཝུཏྟཾ, ཨེཀཾ ཝཱ ཁནྡྷཾ ‘‘ཨཏྟཱ’’ཏི གཧེཏྭཱ ཨཉྙཾ ཨཏྟནོ ཨུཔབྷོགབྷཱུཏཾ ‘‘ལོཀོ’’ཏི གཎྷནྟསྶ, ཨཏྟནོ ཨཏྟཱནཾ ‘‘ཨཏྟཱ’’ཏི གཧེཏྭཱ པརསྶ ཨཏྟཱནཾ ‘‘ལོཀོ’’ཏི གཎྷནྟསྶ ཝཱ ཝསེན ‘‘ཨཏྟཱ ཙ ལོཀོ ཙཱ’’ཏི ཝུཏྟཾ.

སཧ སིཀྑིཏབྦོ དྷམྨོ སཧདྷམྨོ, ཏཏྠ བྷཝཾ སཧདྷམྨིཀཾ, ཏསྨིཾ སཧདྷམྨིཀེ. དོཝཙསྶ-སདྡཏོ ཨཱཡ-སདྡཾ ཨནཉྙཏྟཾ ཀཏྭཱ ‘‘དོཝཙསྶཱཡ’’ནྟི ཝུཏྟཾ, དོཝཙསྶསྶ ཝཱ ཨཡནཾ པཝཏྟི དོཝཙསྶཱཡཾ. ཨཱསེཝནྟསྶཱཔི ཨནུསིཀྑནཱ ཨཛ྄ཛྷཱསཡེན བྷཛནཱཏི ཨཱཧ ‘‘སེཝནཱ…པེ… བྷཛནཱ’’ཏི. སབྦཏོབྷཱགེན བྷཏྟི སམྦྷཏྟི.

སཧ ཀམྨཝཱཙཱཡཱཏི ཨབྦྷཱནཏིཎཝཏྠཱརཀཀམྨཝཱཙཱཡ, ‘‘ཨཧཾ བྷནྟེ ཨིཏྠནྣཱམཾ ཨཱཔཏྟིཾ ཨཱཔཛྫི’’ནྟིཨཱདིཀཱཡ ཙ སཧེཝ. སཧེཝ ཧི ཀམྨཝཱཙཱཡ ཨཱཔཏྟིཝུཊྛཱནཉྩ པརིཙྪིཛྫཏི, ‘‘པཉྙཏྟིལཀྑཎཱཡ ཨཱཔཏྟིཡཱ ཝཱ ཀཱརཎཾ ཝཱིཏིཀྐམལཀྑཎཾ ཀཱཡཀམྨཾ, ཝཙཱིཀམྨཾ ཝཱ, ཝུཊྛཱནསྶ ཀཱརཎཾ ཀམྨཝཱཙཱ’’ཏི ཀཱརཎེན སཧ ཕལསྶ ཛཱནནཝསེན ‘‘སཧ ཀམྨཝཱཙཱཡཱ’’ཏི ཝུཏྟཾ.‘‘སཧ ཀམྨཝཱཙཱཡཱ’’ཏི. ཨིམིནཱ ནཡེན སཧ པརིཀམྨེནཱཏི ཨེཏྠཱཔི ཨཏྠོ ཝེདིཏབྦོ.

དྷཱཏུཝིསཡཱ ¶ སབྦཱཔི པཉྙཱ དྷཱཏུཀུསལཏཱ. ཏདེཀདེསཱ མནསིཀཱརཀུསལཏཱཏི ཨདྷིཔྤཱཡེན པུརིམཔདེཔི སམྨསནཔཊིཝེདྷཔཉྙཱ ཝུཏྟཱ. ཡསྨཱ པན ནིཔྤརིཡཱཡཏོ ཝིཔསྶནཱདིཔཉྙཱ ཨེཝ མནསིཀཱརཀོསལླཾ, ཏསྨཱ ‘‘ཏཱསཾཡེཝ དྷཱཏཱུནཾ སམྨསནཔཊིཝེདྷཔཙྩཝེཀྑཎཔཉྙཱ’’ཏི ཝུཏྟཾ.

ཨཱཡཏནཝིསཡཱ སབྦཱཔི པཉྙཱ ཨཱཡཏནཀུསལཏཱཏི དསྶེནྟོ ‘‘དྭཱདསནྣཾ ཨཱཡཏནཱནཾ ཨུགྒཧམནསིཀཱརཛཱནནཔཉྙཱ’’ཏི ¶ ཝཏྭཱ པུན ‘‘ཨཔིཙཱ’’ཏིཨཱདི ཝུཏྟཾ. དྭཱིསུཔི ཝཱ པདེསུ ཝཱཙུགྒཏཱཡ ཨཱཡཏནཔཱལི༹ཡཱ, དྷཱཏུཔཱལི༹ཡཱ ཙ མནསིཀརཎཾ མནསིཀཱརོ. ཏཐཱ ཨུགྒཎྷནྟཱི, མནསི ཀརོནྟཱི ¶ , ཏདཏྠཾ སུཎནྟཱི, གནྠཏོ ཙ ཨཏྠཏོ ཙ དྷཱརེནྟཱི, ‘‘ཨིདཾ ཙཀྑཱཡཏནཾ ནཱམ, ཨཡཾ ཙཀྑུདྷཱཏུ ནཱམཱ’’ཏིཨཱདིནཱ སབྷཱཝཏོ, གཎནཏོ ཙ པརིཙྪེདཾ ཛཱནནྟཱི ཙ པཉྙཱ ཨུགྒཧཔཉྙཱདིཀཱ ཝུཏྟཱ. མནསིཀཱརཔདེ པན ཙཏུབྦིདྷཱཔི པཉྙཱ ཨུགྒཧོཏི ཏཏོ པཝཏྟོ ཨནིཙྩཱདིམནསིཀཱརོ ‘‘ཨུགྒཧམནསིཀཱརོ’’ཏི ཝུཏྟོ. ཏསྶ ཛཱནནཾ པཝཏྟནམེཝ, ‘‘ཡཐཱ པཝཏྟཾ ཝཱ ཨུགྒཧཾ, ཨེཝམེཝ པཝཏྟོ ཨུགྒཧོ’’ཏི ཛཱནནཾ ཨུགྒཧཛཱནནཾ. ‘‘མནསིཀཱརོ ཨེཝཾ པཝཏྟེཏབྦོ, ཨེཝཉྩ པཝཏྟོ’’ཏི ཛཱནནཾ མནསིཀཱརཛཱནནཾ. ཏདུབྷཡམྤི ‘‘མནསིཀཱརཀོསལླ’’ནྟི ཝུཏྟཾ. ཨུགྒཧོཔི ཧི མནསིཀཱརསམྤཡོགཏོ མནསིཀཱརནིརུཏྟིཾ ལདྡྷུཾ ཨརཧཏི. ཡོ ཙ མནསིཀཱཏབྦོ, ཡོ ཙ མནསིཀརཎཱུཔཱཡོ, སབྦོ སོ ‘‘མནསིཀཱརོ’’ཏི ཝཏྟུཾ ཝཊྚཏི, ཏཏྠ ཀོསལླཾ མནསིཀཱརཀུསལཏཱཏི. སམྨསནཾ པཉྙཱ, སཱ མགྒསམྤཡུཏྟཱ ཨནིཙྩཱདིསམྨསནཀིཙྩཾ སཱདྷེཏི ནིཙྩསཉྙཱདིཔཛཧནཏོ. མནསིཀཱརོ སམྨསནསམྤཡུཏྟོ, སོ ཏཏྠེཝ ཨནིཙྩཱདིམནསིཀཱརཀིཙྩཾ མགྒསམྤཡུཏྟོ སཱདྷེཏཱིཏི ཨཱཧ ‘‘སམྨསནམནསིཀཱརཱ ལོཀིཡལོཀུཏྟརམིསྶཀཱ’’ཏི. ‘‘ཨིམིནཱ ¶ པཙྩཡེནིདཾ ཧོཏཱི’’ཏི ཨེཝཾ ཨཝིཛྫཱདཱིནཾ སངྑཱརཱདིཔཙྩཡུཔྤནྣསྶ པཙྩཡབྷཱཝཛཱནནཾ པཊིཙྩསམུཔྤཱདཀུསལཏཱ.

ཨདྷིཝཱསནཾ ཁམནཾ. ཏཉྷི པརེསཾ དུཀྐཊཾ དུརུཏྟཉྩ པཊིཝིརོདྷཱཀརཎེན ཨཏྟནོ ཨུཔརི ཨཱརོཔེཏྭཱ ཝཱསནཾ ‘‘ཨདྷིཝཱསན’’ནྟི ཝུཙྩཏི. ཨཙཎྜིཀྐནྟི ཨཀུཛ྄ཛྷནཾ. དོམནསྶཝསེན པརེསཾ ཨཀྑཱིསུ ཨསྶཱུནཾ ཨནུཔྤཱདནཱ ཨནསྶུརོཔོ. ཨཏྟམནཏཱཏི སཀམནཏཱ. ཙིཏྟསྶ ཨབྱཱཔནྣོ སཀོ མནོབྷཱཝོ ཨཏྟམནཏཱ. ཙིཏྟནྟི ཝཱ ཙིཏྟཔྤབནྡྷཾ ཨེཀཏྟེན གཧེཏྭཱ ཏསྶ ཨནྟརཱ ཨུཔྤནྣེན པཱིཏིསཧགཏམནེན སཀམནཏཱ. ཨཏྟམནོ ཝཱ པུགྒལོ, ཏསྶ བྷཱཝོ ཨཏྟམནཏཱ, སཱ ན སཏྟསྶཱཏི པུགྒལདིཊྛིནིཝཱརཎཏྠཾ ‘‘ཙིཏྟསྶཱ’’ཏི ཝུཏྟཾ. ཨདྷིཝཱསནལཀྑཎཱ ཁནྟི ཨདྷིཝཱསནཁནྟི. སུཙིསཱིལཏཱ སོརཙྩཾ. སཱ ཧི སོབྷནཀམྨརཏཏཱ. སུཊྛུ པཱཔཏོ ཨོརཏབྷཱཝོ ཝིརཏཏཱ སོརཙྩཾ. ཏེནཱཧ ‘‘སུརཏབྷཱཝོ’’ཏི.

སཁིལོ ཝུཙྩཏི སཎྷཝཱཙོ, ཏསྶ བྷཱཝོ སཱཁལྱཾ, སཎྷཝཱཙཏཱ. ཏཾ པན བྱཏིརེཀམུཁེན ཝིབྷཱཝེནྟཱི ཡཱ པཱལི༹ པཝཏྟཱ, ཏཾ དསྶེནྟོ ‘‘ཏཏྠ ཀཏམཾ སཱཁལྱ’’ནྟིཨཱདིམཱཧ. ཏཏྠ ཨཎྜཀཱཏི སདོསཝཎེ རུཀྑེ ནིཡྻཱསཔིཎྜིཡོ, ཨཧིཙྪཏྟཀཱདཱིནི ཝཱ ཨུཊྛིཏཱནི ‘‘ཨཎྜཀཱནཱི’’ཏི ཝདནྟི ¶ . ཕེགྒུརུཀྑསྶ པན ཀུཐིཏསྶ ཨཎྜཱནི ཝིཡ ཨུཊྛིཏཱ ཙུཎྞཔིཎྜིཡོ, གཎྛིཡོ ཝཱ ཨཎྜཀཱ. ཨིདྷ པན བྱཱཔཛྫནཀཀྐསཱདིབྷཱཝཏོ ¶ ཨཎྜཀཔཀཏིབྷཱཝེན ¶ ཝཱཙཱ ‘‘ཨཎྜཀཱ’’ཏི ཝུཏྟཱ. པདུམནཱལ༹ཾ ཝིཡ སོཏཾ གྷཾསཡམཱནཱ པཝིསནྟཱི ཀཀྐསཱ དཊྛབྦཱ. ཀོདྷེན ནིབྦཏྟཏྟཱ ཏསྶ པརིཝཱརབྷཱུཏཱ ཀོདྷསཱམནྟཱ. པུརེ སཾཝདྡྷནཱརཱི པོརཱི, སཱ ཝིཡ སུཀུམཱརཱ མུདུཀཱ ཝཱཙཱ པོརཱི ཝིཡཱཏི པོརཱི. ཏཏྠཱཏི ‘‘བྷཱསིཏཱ ཧོཏཱི’’ཏི ཝུཏྟཱཡ ཀིརིཡཱཡཱཏིཔི ཡོཛནཱ སམྦྷཝཏི, ཏཏྠ ཝཱཙཱཡཱཏི ཝཱ. ‘‘སཎྷཝཱཙཏཱ’’ཏིཨཱདིནཱ ཏཾ ཝཱཙཾ པཝཏྟཡམཱནཾ ཙེཏནཾ དསྶེཏི. སམྨོདཀསྶ པུགྒལསྶ མུདུཀབྷཱཝོ མདྡཝཾ སམྨོདཀམུདུཀབྷཱཝོ. ཨཱམིསེན ཨལབྦྷམཱནེན, ཏཐཱ དྷམྨེན ཙཱཏི དྭཱིཧི ཚིདྡོ. ཨཱམིསསྶ, དྷམྨསྶ ཙ ཨལཱབྷེན ཨཏྟནོ པརསྶ ཙ ཨནྟརེ སམྦྷཝནྟསྶ ཧི ཚིདྡསྶ ཝིཝརསྶ བྷེདསྶ པཊིསནྠརཎཾ པིདཧནཾ སངྒཎྷནཾ པཊིསནྠཱརོ. ཏཾ སརཱུཔཏོ, པཊིཔཏྟིཏོ ཙ པཱལི༹དསྶནམུཁེན ཝིབྷཱཝེཏུཾ ‘‘ཨབྷིདྷམྨེཔཱི’’ཏིཨཱདིམཱཧ. ཨགྒཾ ཨགྒཧེཏྭཱཏི ཨགྒཾ ཨཏྟནོ ཨགྒཧེཏྭཱ. ཨུདྡེསདཱནནྟི པཱལི༹ཡཱ, ཨཊྛཀཐཱཡ ཙ ཨུདྡིསནཾ. པཱལི༹ཝཎྞནཱཏི པཱལི༹ཡཱ ཨཏྠཝཎྞནཱ. དྷམྨཀཐཱཀཐནནྟི སརབྷཉྙསརབྷཎནཱདིཝསེན དྷམྨཀཐནཾ.

ཀརུཎཱཏི ཀརུཎཱབྲཧྨཝིཧཱརམཱཧ. ཀརུཎཱཔུབྦབྷཱགོཏི ཏསྶ པུབྦབྷཱགཨུཔཙཱརཛ྄ཛྷཱནཾ ཝདཏི. པཱལི༹པདེ པན ཡཱ ཀཱཙི ཀརུཎཱ ‘‘ཀརུཎཱ’’ཏི ཝུཏྟཱ, ཀརུཎཱཙེཏོཝིམུཏྟཱིཏི པན ཨཔྤནཱཔྤཏྟཱཝ. མེཏྟཱཡཔི ཨེསེཝ ནཡོ. སུཙི-སདྡཏོ བྷཱཝེ ཡྻ-ཀཱརཾ, ཨི-ཀཱརསྶ ཙ ཨེ-ཀཱརཱདེསཾ ཀཏྭཱ ཨཡཾ ནིདྡེསོཏི ཨཱཧ ‘‘སོཙེཡྻནྟི སུཙིབྷཱཝོ’’ཏི. ཧོཏུ ཏཱཝ སུཙིབྷཱཝོ སོཙེཡྻཾ, ཏསྶ པན མེཏྟཱཔུབྦབྷཱགཏཱ ཀཐནྟི ཨཱཧ ‘‘ཝུཏྟམྤི ཙེཏ’’ནྟིཨཱདི.

མུཊྛཱ སཏི ཨེཏསྶཱཏི མུཊྛསྶཏི, ཏསྶ བྷཱཝོ མུཊྛསྶཙྩཾ, སཏིཔཊིཔཀྑོ དྷམྨོ, ན སཏིཡཱ ཨབྷཱཝམཏྟཾ ¶ . ཡསྨཱ པཊིཔཀྑེ སཏི ཏསྶ ཝསེན སཏིཝིགཏཱ ཝིཔྤཝུཏྠཱ ནཱམ ཧོཏི, ཏསྨཱ ཝུཏྟཾ ‘‘སཏིཝིཔྤཝཱསོ’’ཏི. ‘‘ཨསྶཏཱི’’ཏིཨཱདཱིསུ ཨ-ཀཱརོ པཊིཔཀྑེ དཊྛབྦོ, ན སཏྟཔཊིསེདྷེ. ཨུདཀེ ལཱབུ ཝིཡ ཡེན ཙིཏྟཾ ཨཱརམྨཎེ པིལཝནྟཱ ཝིཡ ཏིཊྛཏི, ན ཨོགཱཧཏི, སཱ པིལཱཔནཏཱ. ཡེན གཧིཏམྤི ཨཱརམྨཎཾ སམྨུསྶཏི ན ¶ སརཏི, སཱ སམྨུསྶནཏཱ. ཡཐཱ ཝིཛྫཱཔཊིཔཀྑཱ ཨཝིཛྫཱ ཝིཛྫཱཡ པཧཱཏབྦཏོ, ཨེཝཾ སམྤཛཉྙཔཊིཔཀྑཾ ཨསམྤཛཉྙཾ, ཨཝིཛྫཱཡེཝ.

ཨིནྡྲིཡསཾཝརབྷེདོཏི ཨིནྡྲིཡསཾཝརཝིནཱསོ. ཨཔྤཊིསངྑཱཏི ཨཔཙྩཝེཀྑིཏྭཱ ཨཡོནིསོ ཙ ཨཱཧཱརཔརིབྷོགེ ཨཱདཱིནཝཱནིསཾསེ ཨཝཱིམཾསིཏྭཱ.

ཨཔྤཊིསངྑཱཡཱཏི ཨིཏིཀཏྟབྦཏཱསུ ཨཔྤཙྩཝེཀྑཎཱཡ ནཱམཾ. ཨཉྙཱཎཾ ཨཔྤཊིསངྑཱཏ ནིམིཏྟཾ ¶ . ཨཀམྤནཉཱཎནྟི ཏཱཡ ཨནབྷིབྷཝནཱིཡཾ ཉཱཎཾ, ཏཏྠ ཏཏྠ པཙྩཝེཀྑཎཱཉཱཎཉྩེཝ པཙྩཝེཀྑཎཱཡ མུདྡྷབྷཱུཏཾ ལོཀུཏྟརཉཱཎཉྩ. ནིཔྤརིཡཱཡཏོ མགྒབྷཱཝནཱ བྷཱཝནཱ ནཱམ, ཡཱ ཙ ཏདཏྠཱ, ཏདུབྷཡཉྩ བྷཱཝེནྟསྶེཝ ཨིཙྪིཏབྦཾ, ན བྷཱཝིཏབྷཱཝནསྶཱཏི ཝུཏྟཾ ‘‘བྷཱཝེནྟསྶ ཨུཔྤནྣཾ བལ’’ནྟི. ཏེནཱཧ ‘‘ཡཱ ཀུསལཱནཾ དྷམྨཱནཾ ཨཱསེཝནཱ བྷཱཝནཱ བཧུལཱིཀམྨ’’ནྟི.

ཀཱམཾ སམྤཡུཏྟདྷམྨེསུ ཐིརབྷཱཝོཔི བལཊྛོ ཨེཝ, པཊིཔཀྑེཧི པན ཨཀམྤནཱིཡཏཱ སཱཏིསཡཾ བལཊྛོཏི ཝུཏྟཾ ‘‘ཨསྶཏིཡཱ ཨཀམྤནཝསེནཱ’’ཏི. པཙྩནཱིཀདྷམྨསམནཏོ སམཐོ སམཱདྷི. ཨནིཙྩཱདིནཱ ཝིཝིདྷེནཱཀཱརེན དསྶནཏོ ཝིཔསྶནཱ པཉྙཱ ¶ . ཏཾ ཨཱཀཱརཾ གཧེཏྭཱཏི སམཱདྷཱནཱཀཱརཾ གཧེཏྭཱ. ཡེནཱཀཱརེན པུབྦེ ཨལཱིནཾ ཨནུདྡྷཏཾ མཛ྄ཛྷིམཾ བྷཱཝནཱཝཱིཐིཔཊིཔནྣཾ ཧུཏྭཱ ཙིཏྟཾ སམཱཧིཏཾ ཧོཏི, ཏཾ ཨཱཀཱརཾ གཧེཏྭཱ སལླཀྑེཏྭཱ. ནིམིཏྟཝསེནཱཏི ཀཱརཎཝསེན. ‘‘ཨེསེཝ ནཡོ’’ཏི ཨིམིནཱ པགྒཧོཝ ཏཾ ཨཱཀཱརཾ གཧེཏྭཱ པུན པཝཏྟེཏབྦསྶ པགྒཱཧསྶ ནིམིཏྟཝསེན པགྒཱཧནིམིཏྟནྟི ཨིམམཏྠཾ ཨཏིདིསཏི, ཏསྶཏྠོ སམཐེ ཝུཏྟནཡཱནུསཱརེན ཝེདིཏབྦོ. པགྒཱཧོ ཝཱིརིཡཾ ཀོསཛྫཔཀྑཏོ ཙིཏྟསྶ པཏིཏུཾ ཨདཏྭཱ པགྒཎྷནཏོ. ཨཝིཀྑེཔོ ཨེཀགྒཏཱ ཝིཀྑེཔསྶ ཨུདྡྷཙྩསྶ པཊིཔཀྑབྷཱཝཏོ. པཊིསངྑཱནཀིཙྩནིབྦཏྟིབྷཱཝཏོ ལོཀུཏྟརདྷམྨཱནཾ པཊིསངྑཱནབལབྷཱཝོ, ཏཐཱ པུབྦེ པཝཏྟཱཀཱརསལླཀྑཎཝསེན སམཐཔགྒཱཧཱནཾ ཨུཔརི པཝཏྟིསབྦྷཱཝཏོ སམཐནིམིཏྟདུཀསྶཔི མིསྶཀཏཱ ཝུཏྟཱ.

ཡཐཱསམཱདིནྣསྶ སཱིལསྶ བྷེདཀརོ ཝཱིཏིཀྐམོ. སཱིལཝིནཱསཀོ ཨསཾཝརོ. སམྨཱདིཊྛིཝིནཱསིཀཱཏི ‘‘ཨཏྠི དིནྣ’’ནྟིཨཱདི (མ. ནི. ༡.༤༤༡; ༢.༩༤; ཝིབྷ. ༧༩༣) ནཡཔྤཝཏྟཱཡ སམྨཱདིཊྛིཡཱ དཱུསིཀཱ.

སཱིལསྶ ¶ སམྤཱདནཾ ནཱམ སབྦབྷཱགཏོ ཏསྶ ཨནཱུནཏཱཔཱདནནྟི ཨཱཧ ‘‘སམྤཱདནཏོ པརིཔཱུརཎཏོ’’ཏི. པཱརིཔཱུརཏྠོ ཧི སམྤདཱ-སདྡོཏི. མཱནསིཀསཱིལཾ ནཱམ སཱིལཝིསོདྷནཝསེན ཨབྷིཛ྄ཛྷཱདིཔྤཧཱནཾ. དིཊྛིཔཱརིཔཱུརིབྷཱུཏཾ ཉཱཎནྟི ཨཏྠིཀདིཊྛིཨཱདིསམྨཱདིཊྛིཡཱ པཱརིཔཱུརིབྷཱཝེན པཝཏྟཾ ཉཱཎཾ.

ཝིསུདྡྷིཾ ¶ པཱཔེཏུཾ སམཏྠནྟི ཙིཏྟཝིསུདྡྷིཨཱདིཨུཔརིཝིསུདྡྷིཡཱ པཙྩཡོ བྷཝིཏུཾ སམཏྠཾ. སུཝིསུདྡྷམེཝ ཧི སཱིལཾ ཏསྶཱ པདཊྛཱནཾ ཧོཏཱིཏི. ཝིསུདྡྷིཾ པཱཔེཏུཾ སམཏྠཾ དསྶནནྟི ཉཱཎདསྶནཝིསུདྡྷིཾ, པརམཏྠཝིསུདྡྷིནིབྦཱནཉྩ པཱཔེཏུཾ ཨུཔནེཏུཾ སམཏྠཾ ཀམྨསྶཀཏཱཉཱཎཱདིསམྨཱདསྶནཾ ¶ . ཏེནཱཧ ‘‘ཨབྷིདྷམྨེ’’ཏིཨཱདི. ཨེཏྠ ཙ ‘‘ཨིདཾ ཨཀུསལཾ ཀམྨཾ ནོ སཀཾ, ཨིདཾ པན ཀམྨཾ སཀ’’ནྟི ཨེཝཾ བྱཏིརེཀཏོ ཨནྭཡཏོ ཙ ཀམྨསྶཀཏཱཛཱནནཉཱཎཾ ཀམྨསྶཀཏཱཉཱཎཾ. ཏེནཱཧ ‘‘ཨེཏྠ ཙཱ’’ཏིཨཱདི. ‘‘པརེན ཀཏམྤཱི’’ཏི ཨིདཾ ནིདསྶནཝསེན ཝུཏྟཾ ཡཐཱ པརེན ཀཏཾ, ཨེཝཾ ཨཏྟནཱ ཀཏམྤི སཀཀམྨཾ ནཱམ ན ཧོཏཱིཏི. ཨཏྟནཱ ཝཱ ཨུསྶཱཧིཏེན པརེན ཀཏཾཔཱིཏི ཨེཝཾ ཝཱ ཨཏྠོ དཊྛབྦོ. ཡཉྷི ཏཾ པརསྶ ཨུསྶཱཧནཝསེན ཀཏཾ, ཏམྤི སཀཀམྨཾ ནཱམ ཧོཏཱིཏི ཨཡཉྷེཏྠ ཨདྷིཔྤཱཡོ. ཨཏྠབྷཉྫནཏོཏི དིཊྛདྷམྨིཀཱདིསབྦཨཏྠཝིནཱསནཏོ. ཨཏྠཛནནཏོཏི ཨིདྷལོཀཏྠཔརལོཀཏྠཔརམཏྠཱནཾ ཨུཔྤཱདནཏོ. ཨཱརབྦྷཀཱལེ ‘‘ཨནིཙྩཾ དུཀྑཾ ཨནཏྟཱ’’ཏི པཝཏྟམྤི ཝཙཱིསཙྩཉྩ ལཀྑཎཱནི པཊིཝིཛ྄ཛྷནྟཾ ཝིཔསྶནཱཉཱཎཾ ཨནུལོམེཏི ཏཏྠེཝ པཊིཝིཛ྄ཛྷནཏོ. པརམཏྠསཙྩཉྩ ནིབྦཱནཾ ན ཝིལོམེཏི ན ཝིརོདྷེཏི ཨེཀནྟེནེཝ སམྤཱཔནཏོ.

ཉཱཎདསྶནནྟི ཉཱཎབྷཱུཏཾ དསྶནཾ, ཏེན མགྒཾ ཝདཏི. ཏཾསམྤཡུཏྟམེཝ ཝཱིརིཡནྟི པཋམམགྒསམྤཡུཏྟཾ ཝཱིརིཡམཱཧ. སབྦཱཔི མགྒཔཉྙཱ དིཊྛིཝིསུདྡྷིཡེཝཱཏི དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ཨཡམེཝ ཙ ནཡོ ཨབྷིདྷམྨཔཱལི༹ཡཱ (དྷ. ས. ༥༥༠) སམེཏཱིཏི དསྶེནྟོ ‘‘ཨབྷིདྷམྨེ པནཱ’’ཏི ཨཱདིཾ ཨཝོཙ.

ཡསྨཱ སཾཝེགོ ནཱམ སཧོཏྟཔྤཉཱཎཾ, ཏསྨཱ སཾཝེགཝཏྠུཾ བྷཡཏོ བྷཱཡིཏབྦཏོ དསྶནཝསེན པཝཏྟཉཱཎཾ ¶ . ཏེནཱཧ ‘‘ཛཱཏིབྷཡ’’ནྟིཨཱདི. བྷཱཡནྟི ཨེཏསྨཱཏི བྷཡཾ, ཛཱཏི ཨེཝ བྷཡཾ ཛཱཏིབྷཡཾ. སཾཝེཛནཱིཡནྟི སཾཝིཛྫིཏབྦཾ བྷཱཡིཏབྦཾ ཨུཏྟཱསིཏབྦཾ. ཋཱནནྟི ཀཱརཎཾ, ཝཏྠཱུཏི ཨཏྠོ ¶ . སཾཝེགཛཱཏསྶཱཏི ཨུཔྤནྣསཾཝེགསྶ. ཨུཔཱཡཔདྷཱནནྟི ཨུཔཱཡེན པཝཏྟེཏབྦཾ ཝཱིརིཡཾ.

ཀུསལཱནཾ དྷམྨཱནནྟི སཱིལཱདཱིནཾ ཨནཝཛྫདྷམྨཱནཾ. བྷཱཝནཱཡཱཏི ཨུཔྤཱདནེན ཝཌྜྷནེན ཙ. ཨསནྟུཊྛསྶཱཏི ‘‘ཨལཾ ཨེཏྟཱཝཏཱ, ཀཐཾ ཨེཏྟཱཝཏཱ’’ཏི སངྐོཙཱཔཏྟིཝསེན ན སནྟུཊྛསྶ. བྷིཡྻོཀམྱཏཱཏི བྷིཡྻོ བྷིཡྻོ ཨུཔྤཱདནིཙྪཱ. ཝོསཱནནྟི སངྐོཙཾ ཨསམཏྠནྟི. ཏུསྶནཾ ཏུཊྛི སནྟུཊྛི, ནཏྠི ཨེཏསྶ སནྟུཊྛཱིཏི ཨསནྟུཊྛི, ཏསྶ བྷཱཝོ ཨསནྟུཊྛིཏཱ. ཝཱིརིཡཔྤཝཱཧེ ཝཏྟམཱནེ ཨནྟརཱ ཨེཝ པཊིགམནཾ ནིཝཏྟནཾ པཊིཝཱནཾ, ཏཾ ཏསྶ ཨཏྠཱིཏི པཊིཝཱནཱི, ན པཊིཝཱནཱི ཨཔྤཊིཝཱནཱི, ཏསྶ བྷཱཝོ ཨཔྤཊིཝཱནིཏཱ. སཀྐཙྩཀིརིཡཏཱཏི ཀུསལཱནཾ ཀརཎེ སཀྐཙྩཀིརིཡཏཱ ཨཱདརཀིརིཡཏཱ. སཱཏཙྩཀིརིཡཏཱཏི སཏཏམེཝ ཀརཎཾ. ཨཊྛིཏཀིརིཡཏཱཏི ཨནྟརཱ ཨཊྛཔེཏྭཱ ཁཎྜཾ ཨཀཏྭཱ ཀརཎཾ. ཨནོལཱིནཝུཏྟིཏཱཏི ན ལཱིནཔྤཝཏྟིཏཱ. ཨནིཀྑིཏྟཚནྡཏཱཏི ཀུསལཙྪནྡསྶ ཨནིཀྑིཔནཾ. ཨནིཀྑིཏྟདྷུརཏཱཏི ཀུསལཀརཎེ ཝཱིརིཡདྷུརསྶ ¶ ཨནིཀྑིཔནཾ. ཨཱསེཝནཱཏི ཨཱདརེན སེཝནཱ. བྷཱཝནཱཏི ཝཌྜྷནཱ བྲཱུཧནཱ. བཧུལཱིཀམྨནྟི པུནཔྤུནཾ ཀརཎཾ.

ཏིསྶོ ཝིཛྫཱཏི པུབྦེནིཝཱསཱནུསྶཏིཉཱཎཾ, དིབྦཙཀྑུཉཱཎཾ ཨཱསཝཀྑཡཉཱཎནྟི ཨིམཱ ཏིསྶོ ཝིཛྫཱ. པཊིཔཀྑཝིཛ྄ཛྷནཊྛེན པུབྦེ ནིཝུཏྠཀྑནྡྷཱདཱིནཾ ཝིདིཏཀརཎཊྛེན ཝིསིཊྛཱ མུཏྟཱིཏི ཝིམུཏྟི. སྭཱཡཾ ཝིསེསོ པཊིཔཀྑཝིགམནེན, པཊིཡོགིཝིགམནེན ཙ ཨིཙྪིཏབྦོཏི ཏདུབྷཡཾ དསྶེཏུཾ ‘‘ཨེཏྠ ཙཱ’’ཏིཨཱདི ཝུཏྟཾ. ཏཏྠ ཡེན ཝིསེསེན སམཱཔཏྟིཡོ པཙྩནཱིཀདྷམྨེཧི ¶ སུཊྛུ མུཏྟཱ, ཏཏོ ནིརཱསངྐཏཱཡ ཨཱརམྨཎེ ཙ ཨབྷིརཏཱ, ཏཾ ཝིསེསཾ ཨུཔཱདཱཡ ཏཱ ཨདྷིཀཾ མུཙྩནཏོ, ཨཱརམྨཎེ ཨདྷིམུཙྩནཏོ ཙ ཨདྷིམུཏྟིཡོ ནཱམཱཏི ཝུཏྟཾ ‘‘ཙིཏྟསྶ ཙ ཨདྷིམུཏྟཱི’’ཏི. མུཏྟཏྟཱཏི སབྦསངྑཱརེཧི ཝིསེསེན ནིསྶཊཏྟཱ ཝིམུཏྟི.

ཁཡེ ཉཱཎནྟི སམུཙྪེདཝསེན ཀིལེསེ ཁེཔེཏཱིཏི ཁཡོ, ཨརིཡམགྒོ, ཏཔྤརིཡཱཔནྣཾ ཉཱཎཾ ཁཡེ ཉཱཎཾ. པཊིསནྡྷིཝསེནཱཏི ཀིལེསཱནཾ ཏཾཏཾམགྒཝཛ྄ཛྷཱནཾ ཨུཔྤནྣམགྒེ ཁནྡྷསནྟཱནེ པུན སནྡཧནཝསེན. ཨནུཔྤཱདབྷཱུཏེཏི ཏཾཏཾཕལེ. ཨནུཔྤཱདཔརིཡོསཱནེཏི ཨནུཔྤཱདཀརོ མགྒོ ཨནུཔྤཱདོ, ཏསྶ པརིཡོསཱནེ, ཀིལེསཱནཾ ཝཱ ཨནུཔྤཛྫནསངྑཱཏེ པརིཡོསཱནེ, བྷངྒེཏི ཨཏྠོཏི.

དུཀཝཎྞནཱ ནིཊྛིཏཱ.

ཏིཀཝཎྞནཱ

༣༠༥. དྷམྨཏོ ¶ ཨཉྙོ ཀཏྟཱ ནཏྠཱིཏི དསྶེཏུཾ ཀཏྟུསཱདྷནཝསེན ‘‘ལུབྦྷཏཱིཏི ལོབྷོ’’ཏི ཝུཏྟཾ. ལུབྦྷཏི ཏེན, ལུབྦྷནམཏྟམེཏནྟི ཀརཎབྷཱཝསཱདྷནཝསེནཔི ཨཏྠོ ཡུཛྫཏེཝ. དུསྶཏི མུཡ྄ཧཏཱིཏི ཨེཏྠཱཔི ཨེསེཝ ནཡོ. ཨཀུསལཉྩ ཏཾ ཨཀོསལླསམྦྷཱུཏཊྛེན ཨེཀནྟཱཀུསལབྷཱཝཏོ མཱུལཉྩ ཨཏྟནཱ སམྤཡུཏྟདྷམྨཱནཾ སུཔྤཏིཊྛིཏབྷཱཝསཱདྷནཏོ, ན ཨཀུསལབྷཱཝསཱདྷནཏོ. ན ཧི མཱུལཀཏོ ཨཀུསལཱནཾ ཨཀུསལབྷཱཝོ, ཀུསལཱདཱིནཉྩ ཀུསལཱདིབྷཱཝོ. ཏཐཱ སཏི མོམཱུཧཙིཏྟདྭཡེ མོཧསྶ ཨཀུསལབྷཱཝོ ན སིཡཱ. ཏེསནྟི ལོབྷཱདཱིནཾ. ‘‘ན ལུབྦྷཏཱིཏི ཨལོབྷོ’’ཏིཨཱདིནཱ པཊིཔཀྑནཡེན.

དུཊྛུ ¶ ཙརིཏཱནཱིཏི པཙྩཡཏོ, སམྤཡུཏྟདྷམྨཏོ, པཝཏྟིཨཱཀཱརཏོ ¶ ཙ ན སུཊྛུ ཨསམྨཱ པཝཏྟིཏཱནི. ཝིརཱུཔཱནཱིཏི བཱིབྷཙྪཱནི སམྤཏི, ཨཱཡཏིཉྩ ཨནིཊྛརཱུཔཏྟཱ. ཀཱཡེནཱཏི ཀཱཡདྭཱརེན ཀརཎབྷཱུཏེན. ཀཱཡཏོཏི ཀཱཡདྭཱརཏོ. ‘‘སུཊྛུ ཙརིཏཱནཱི’’ཏིཨཱདཱིསུ ཝུཏྟཝིཔརིཡཱཡེན ཨཏྠོ ཝེདིཏབྦོ. ཡསྶ སིཀྑཱཔདསྶ ཝཱིཏིཀྐམེ ཀཱཡསམུཊྛཱནཱ ཨཱཔཏྟི ཧོཏི, ཏཾ ཀཱཡདྭཱརེ པཉྙཏྟསིཀྑཱཔདཾ. ཨཝཱིཏིཀྐམོ ཀཱཡསུཙརིཏནྟི ཝཱརིཏྟསཱིལསྶ ཝསེན ཝདཏི, ཙཱརིཏྟསཱིལསྶཔི ཝཱ, ཡསྶ ཨཀརཎེ ཨཱཔཏྟི ཧོཏི. ཝཙཱིདུཙྩརིཏསུཙརིཏནིདྡྷཱརཎམྤི ཝུཏྟནཡཱནུསཱརེན ཝེདིཏབྦཾ. ཨུབྷཡཏྠ པཉྙཏྟསྶཱཏི ཀཱཡདྭཱརེ, ཝཙཱིདྭཱརེ ཙ པཉྙཏྟསྶ. སིཀྑཱཔདསྶ ཝཱིཏིཀྐམོཝ མནོདུཙྩརིཏཾ མནོདྭཱརེ པཉྙཏྟསྶ སིཀྑཱཔདསྶ ཨབྷཱཝཏོ, ཏཡིདཾ དྭཱརདྭཡེ ཨཀིརིཡསམུཊྛཱནཱཡ ཨཱཔཏྟིཡཱ ཝསེན ཝེདིཏབྦཾ. ཨཝཱིཏིཀྐམོཏི ཡཐཱཝུཏྟཱཡ ཨཱཔཏྟིཡཱ ཨཝཱིཏིཀྐམོ མནོསུཙརིཏཾ. ‘‘སབྦསྶཱཔི སིཀྑཱཔདསྶ ཨཝཱིཏིཀྐམོ མནོསུཙརིཏ’’ནྟི ཀེཙི. ཏདུབྷཡཉྷི ཙཱརིཏྟསཱིལཾ ཨུདྡིསྶཔཉྙཏྟཾ སིཀྑཱཔདཾ, ཏསྶ ཨཝཱིཏིཀྐམོ སིཡཱ ཀཱཡསུཙརིཏཾ, སིཡཱ ཝཙཱིསུཙརིཏནྟི.

པཱཎོ ཨཏིཔཱཏཱིཡཏི ཨེཏཱཡཱཏི པཱཎཱཏིཔཱཏོ, ཏཐཱཔཝཏྟཱ ཙེཏནཱ, ཨེཝཾ ཨདིནྣཱདཱནཱདཡོཔཱིཏི ཨཱཧ ‘‘པཱཎཱཏིཔཱཏཱདཡོ པན ཏིསྶོ ཙེཏནཱ’’ཏི. ཝཙཱིདྭཱརེཔི ཨུཔྤནྣཱ ཀཱཡདུཙྩརིཏཾ ¶ དྭཱརནྟརེ ཨུཔྤནྣསྶཱཔི ཀམྨསྶ སནཱམཱཔརིཙྩཱགཏོ ཡེབྷུཡྻཝུཏྟིཡཱ, ཏབྦཧུལཝུཏྟིཡཱ ཙ. ཏེནཱཧུ ཨཊྛཀཐཱཙརིཡཱ –

‘‘དྭཱརེ ཙརནྟི ཀམྨཱནི, ན དྭཱརཱ དྭཱརཙཱརིནོ;

ཏསྨཱ དྭཱརེཧི ཀམྨཱནི, ཨཉྙམཉྙཾ ཝཝཏྠིཏཱ’’ཏི. (དྷ. ས. ཨཊྛ. ཀཱམཱཝཙརཀུསལདྭཱརཀཐཱ);

ཝཙཱིདུཙྩརིཏཾ ཀཱཡདྭཱརེཔི ཝཙཱིདྭཱརེཔི ཨུཔྤནྣཱཏི ཨཱནེཏྭཱ སམྦནྡྷིཏབྦཾ. ཙེཏནཱསམྤཡུཏྟདྷམྨཱཏི མནོཀམྨབྷཱུཏཱཡ ཙེཏནཱཡ སམྤཡུཏྟདྷམྨཱ. ཀཱཡཝཙཱིཀམྨབྷཱུཏཱཡ པན ཙེཏནཱཡ སམྤཡུཏྟཱ ཨབྷིཛ྄ཛྷཱདཡོ ཏཾ ཏཾ པཀྑིཀཱ ཝཱ ཧོནྟི ཨབྦོཧཱརིཀཱ ཝཱཏི. ཙེཏནཱསམྤཡུཏྟདྷམྨཱ མནོསུཙརིཏནྟི ཨེཏྠཱཔི ཨེསེཝ ནཡོ. ཏིཝིདྷསྶ ¶ དུཙྩརིཏསྶ ཨཀརཎཝསེན པཝཏྟཱ ཏིསྶོ ཙེཏནཱཔི ཝིརཏིཡོཔི ཀཱཡསུཙརིཏཾ ཀཱཡིཀསྶ ཝཱིཏིཀྐམསྶ ཨཀརཎཝསེན པཝཏྟནཏོ, ཀཱཡེན པན སིཀྑཱཔདཱནཾ སམཱདིཡནེ སཱིལསྶ ཀཱཡསུཙརིཏབྷཱཝེ ཝཏྟབྦམེཝ ནཏྠི. ཨེསེཝ ནཡོ ཝཙཱིསུཙརིཏེ.

ཀཱམཔཊིསཾཡུཏྟོཏི ¶ ཨེཏྠ དྭེ ཀཱམཱ ཝཏྠུཀཱམོ ཙ ཀིལེསཀཱམོ ཙ. ཏཏྠ ཝཏྠུཀཱམཔཀྑེ ཨཱརམྨཎཀརཎཝསེན ཀཱམེཧི པཊིསཾཡུཏྟོ ཝིཏཀྐོ ཀཱམཝིཏཀྐོ. ཀིལེསཀཱམཔཀྑེ པན སམྤཡོགཝསེན ཀཱམེན པཊིསཾཡུཏྟོཏི ཡོཛེཏབྦཾ. ‘‘བྱཱཔཱདཔཊིསཾཡུཏྟོ’’ཏིཨཱདཱིསུ སམྤཡོགཝསེནེཝ ཨཏྠོ ཝེདིཏབྦོ. བྱཱཔཱདཝཏྠུཔཊིསཾཡུཏྟོཔི བྱཱཔཱདཔཊིསཾཡུཏྟོཏི གཡ྄ཧམཱནེ ཨུབྷཡཐཱཔི ཡོཛནཱ ལབྦྷཏེཝ. ཝིཧིཾསཱཔཊིསཾཡུཏྟོཏི ཨེཏྠཱཔི ཨེསེཝ ནཡོ. ཝིཧིཾསནྟི ཨེཏཱཡ སཏྟེ, ཝིཧིཾསནཾ ཝཱ ཨེསཱ སཏྟཱནནྟི ཝིཧིཾསཱ, ཏཱཡ པཊིསཾཡུཏྟོ ཝིཧིཾསཱཔཊིསཾཡུཏྟོཏི ཨེཝཾ སདྡཏྠོ ཝེདིཏབྦོ. ཨཔྤིཡེ ཨམནཱཔེ སངྑཱརེ ཨཱརབྦྷ བྱཱཔཱདཝིཏཀྐཔྤཝཏྟི ཨཊྛཱནཱགྷཱཏཝསེན དཱིཔེཏབྦཱ. བྱཱཔཱདཝིཏཀྐསྶ ཨཝདྷིཾ དསྶེཏུཾ ‘‘ཡཱཝ ཝིནཱསནཱ’’ཏི ཝུཏྟཾ. ཝིནཱསནཾ པན པཱཎཱཏིཔཱཏོ ཨེཝཱཏི. ‘‘སངྑཱརོ’’ ཧི དུཀྑཱཔེཏབྦོ ནཱམ ནཏྠཱི’’ཏི ཀསྨཱ ཝུཏྟཾ, ནནུ ཡེ ‘‘དུཀྑཱཔེཏབྦཱ’’ཏི ཨིཙྪིཏཱ སཏྟསཉྙིཏཱ, ཏེཔི ཨཏྠཏོ སངྑཱརཱ ཨེཝཱཏི? སཙྩམེཏཾ, ཡེ པན ཨིནྡྲིཡབདྡྷཱ སཝིཉྙཱཎཀཏཱཡ དུཀྑཾ པཊིསཾཝེདེནྟི, ཏསྨཱ ཏེ ཝིཧིཾསཱཝིཏཀྐསྶ ཝིསཡཱ ཨིཙྪིཏཱ སཏྟསཉྙིཏཱ. ཡེ པན ན དུཀྑཾ པཊིསཾཝེདེནྟི ¶ ཝུཏྟལཀྑཎཱཡོགཏོ, ཏེ སནྡྷཱཡ ‘‘ཝིཧིཾསཱཝིཏཀྐོ སངྑཱརེསུ ནུཔྤཛྫཏཱི’’ཏི ཝུཏྟཾ. ཡཏྠ པན ཨུཔྤཛྫཏི, ཡཐཱ ཙ ཨུཔྤཛྫཏི, ཏཾ དསྶེཏུཾ ‘‘ཨིམེ སཏྟཱ’’ཏིཨཱདི ཝུཏྟཾ.

ནེཀྑམྨཾ ཝུཙྩཏི ལོབྷཏོ ནིཀྑནྟཏྟཱ ཨལོབྷོ, ནཱིཝརཎེཧི ནིཀྑནྟཏྟཱཔི པཋམཛ྄ཛྷཱནཾ, སབྦཱཀུསལེཧི ནིཀྑནྟཏྟཱ སབྦོ ཀུསལོ དྷམྨོ, སབྦསངྑཏེཧི པན ¶ ནིཀྑནྟཏྟཱ, ནིབྦཱནཾ. ཨུཔནིསྶཡཏོ, སམྤཡོགཏོ, ཨཱརམྨཎཀརཎཏོ ཙ ནེཀྑམྨེན པཊིསཾཡུཏྟོཏི ནེཀྑམྨཔཊིསཾཡུཏྟོ. ནེཀྑམྨཝིཏཀྐོ སམྨཱསངྐཔྤོ. ཨིདཱནི ཏཾ བྷཱུམིཝིབྷཱགེན དསྶེཏུཾ ‘‘སོ’’ཏིཨཱདི ཝུཏྟཾ. ཨསུབྷཔུབྦབྷཱགེཏི ཨསུབྷཛ྄ཛྷཱནསྶ པུབྦབྷཱགེ. ཨསུབྷགྒཧཎཉྩེཏྠ ཀཱམཝིཏཀྐསྶ ཨུཛུཝིཔཙྩནཱིཀདསྶནཏྠཾ ཀཏཾ. ཀཱམཝིཏཀྐཔཊིཔཀྑོ ཧི ནེཀྑམྨཝིཏཀྐོཏི. ཨེཝཉྩ ཀཏྭཱ ཨུཔརིཝིཏཀྐདྭཡསྶ བྷཱུམིཾ དསྶེནྟེན སཔུབྦབྷཱགཱནི མེཏྟཱཀརུཎཱཛྷཱནཱདཱིནི ཨུདྡྷཊཱནི. ཨསུབྷཛ྄ཛྷཱནེཏི ཨསུབྷཱརམྨཎེ པཋམཛ྄ཛྷཱནེ. ཨཝཡཝེ ཧི སམུདཱཡཝོཧཱརཾ ཀཏྭཱ ནིདྡིསཏི ཡཐཱ ‘‘རུཀྑེ སཱཁཱ’’ཏི. ཛྷཱནཾ པཱདཀཾ ཀཏྭཱཏི ནིདསྶནམཏྟཾ. ཏཾ ཛྷཱནཾ སམྨསིཏྭཱ ཨུཔྤནྣམགྒཕལཀཱལེཔི ཧི སོ ལོཀུཏྟརོཏི. བྱཱཔཱདསྶ པཊིཔཀྑོ, ཀིཉྩིཔི ན བྱཱཔཱདེཏི ཨེཏེནཱཏི ཝཱ ཨབྱཱཔཱདོ, མེཏྟཱ, ཏཱཡ པཊིསཾཡུཏྟོ ཨབྱཱཔཱདཔཊིསཾཡུཏྟོ. མེཏྟཱཛྷཱནེཏི མེཏྟཱབྷཱཝནཱཝསེན ཨདྷིགཏེ པཋམཛ྄ཛྷཱནེ. ཀརུཎཱཛྷཱནེཏི ཨེཏྠཱཔི ཨེསེཝ ནཡོ. ཝིཧིཾསཱཡ པཊིཔཀྑོ, ན ཝིཧིཾསནྟི ཝཱ ཨེཏཱཡ སཏྟེཏི ཨཝིཧིཾསཱ, ཀརུཎཱ.

ནནུ ¶ ཙ ཨལོབྷཱདོསཱནཾ ཨཉྙམཉྙཱཝིརཧཏོ ཏེསཾ ཝསེན ཨུཔྤཛྫནཀཱནཾ ཨིམེསཾ ནེཀྑམྨཝིཏཀྐཱདཱིནཾ ཨཉྙམཉྙཾ ཨསངྐརཎཏོ ཝཝཏྠཱནཾ ན ཧོཏཱིཏི? ནོཏི དསྶེཏུཾ ‘‘ཡདཱ’’ཏིཨཱདི ཨཱརདྡྷཾ. ཨལོབྷོ སཱིསཾ ཧོཏཱིཏི ཨལོབྷོ པདྷཱནོ ཧོཏི. ནིཡམིཏཔརིཎཏསམུདཱཙཱརཱདིཝསེན ཡདཱ ཨལོབྷཔྤདྷཱནོ ནེཀྑམྨགརུཀོ ཙིཏྟུཔྤཱདོ ཧོཏི, ཏདཱ ལདྡྷཱཝསརོ ནེཀྑམྨཝིཏཀྐོ པཏིཊྛཧཏི. ཏཾསམྤཡུཏྟསྶ པན ཨདོསལཀྑཎསྶ ཨབྱཱཔཱདསྶ ཝསེན ཡོ ཏསྶེཝ ཨབྱཱཔཱདཝིཏཀྐབྷཱཝོ སམྦྷཝེཡྻ, སཏི ཙ ཨབྱཱཔཱདཝིཏཀྐབྷཱཝེ ཀསྶཙིཔི ཨཝིཧེཋནཛཱཏིཀཏཱཡ ཨཝིཧིཾསཱཝིཏཀྐབྷཱཝོ ¶ ཙ སམྦྷཝེཡྻ, ཏེ ཨིཏརེ དྭེ. ཏདནྭཡིཀཱཏི ཏསྶེཝ ནེཀྑམྨཝིཏཀྐསྶ ཨནུགཱམིནོ, སརཱུཔཏོ ཨདིསྶནཏོ ‘‘ཏསྨིཾ སཏི ཧོནྟི ¶ , ཨསཏི ན ཧོནྟཱི’’ཏི ཏདནུམཱནནེཡྻཱ བྷཝནྟི. སེསདྭཡེཔི ཨིམིནཱ ནཡེན ཨཏྠོ ཝེདིཏབྦོ. ཝུཏྟནཡེནེཝཱཏི ‘‘ཀཱམཔཊིསཾཡུཏྟོ སངྐཔྤོ ཀཱམསངྐཔྤོ’’ཏིཨཱདིནཱ ཝིཏཀྐཏྟིཀེ ཝུཏྟནཡེནེཝ (དཱི. ནི. ༣.༢༨༨) ཝེདིཏབྦོ ཨཏྠཏོ ཨབྷིནྣཏྟཱ. ཡདི ཨེཝཾ ཀསྨཱ པུན དེསནཱ ཀཏཱཏི? ཏཐཱ དེསནཱཡ བུཛ྄ཛྷནཀཱནཾ ཨཛ྄ཛྷཱསཡཝསེན དེསནཱམཏྟམེཝེཏཾ.

ཀཱམཝིཏཀྐཱདཱིནཾ ཝིཡ ཨུཔྤཛྫནཱཀཱརོ ཝེདིཏབྦོ ‘‘ཏཱསུ དྭེ སཏྟེསུཔི སངྑཱརེསུཔི ཨུཔྤཛྫནྟཱི’’ཏིཨཱདིནཱ. ཏཏྠ ཀཱརཎམཱཧ ‘‘ཏཾསམྤཡུཏྟཱཡེཝ ཧི ཨེཏཱ’’ཏི. ཏཐེཝཱཏི ཡཐཱ ནེཀྑམྨཝིཏཀྐཱདཱིནཾ ‘‘ཨསུབྷཔུབྦབྷཱགེ ཀཱམཱཝཙརོ ཧོཏཱི’’ཏིཨཱདིནཱ ཀཱམཱཝཙརཱདིབྷཱཝོ ཝུཏྟོ, ཏཐེཝ ཏཱསམྤི ནེཀྑམྨསཉྙཱདཱིནམྤི ཀཱམཱཝཙརཱདིབྷཱཝོ ཝེདིཏབྦོ.

ཀཱམཔཊིསཾཡུཏྟོཏི སམྤཡོགཝསེན ཀཱམེན པཊིསཾཡུཏྟོ. ཏཀྐནཝསེན ཏཀྐོ. ཝིསེསཏོ ཏཀྐནཝསེན ཝིཏཀྐོ. སངྐཔྤནཔརིཀཔྤནཝསེན སངྐཔྤོ. ཨཉྙེསུཔི ཀཱམཔཊིསཾཡུཏྟེསུ དྷམྨེསུ ཝིཛྫམཱནེསུ ཝིཏཀྐེ ཨེཝ ཀཱམོཔཔདོ དྷཱཏུ-སདྡོ ནིརུལ༹ྷོ ཝེདིཏབྦོ ཝིཏཀྐསྶ ཀཱམསངྐཔྤཔྤཝཏྟིཡཱ སཱཏིསཡཏྟཱ. ཨེས ནཡོ བྱཱཔཱདདྷཱཏུཨཱདཱིསུ. སབྦེཔི ཨཀུསལཱ དྷམྨཱ ཀཱམདྷཱཏཱུ ཧཱིནཛ྄ཛྷཱསཡེཧི ཀཱམིཏབྦདྷཱཏུབྷཱཝཏོ ཀིལེསཀཱམསྶ ཨཱརམྨཎསབྷཱཝཏྟཱཏི ཨཏྠོ. ཝིཧེཋེཏཱིཏི ཝིབཱདྷཏི. ཏཏྠཱཏི ཏསྨིཾ ཡཐཱཝུཏྟེ ཀཱམདྷཱཏུཏྟིཀེ. སབྦཱཀུསལསངྒཱཧིཀཱཡ ཀཱམདྷཱཏུཡཱ ཨིཏརཱ དྭེ སངྒཧེཏྭཱ ཀཐནཾ སབྦསངྒཱཧིཀཱ ཀཐཱ. ཏིསྶོ དྷཱཏུཡོ ཨཉྙམཉྙཾ ཨསངྐརཏོ ཀཐཱ ཨསམྦྷིནྣཱ. ཨིཏརཱ དྭེ གཧིཏཱཝ ཧོནྟཱིཏི ཨིཏརཱ དྭེ དྷཱཏུཡོ གཧིཏཱ ཨེཝ ཧོནྟི སབྦེཔི ཨཀུསལཱ ¶ དྷམྨཱ ཀཱམདྷཱཏཱུ’’ཏི ཝུཏྟཏྟཱ སཱམཉྙཛོཏནཱཡ སཝིསཡསྶ ཨཏིབྱཱཔནེན. ཏཏོཏི ཨིཏརདྷཱཏུདྭཡསངྒཱཧིཀཱཡ ཀཱམདྷཱཏུཡཱ. ནཱིཧརིཏྭཱཏི ནིདྡྷཱརེཏྭཱ. དསྶེཏཱིཏི ཨེཝཾ བྷགཝཱ དསྶེཏཱིཏི ཝཏྟུཾ ཝཊྚཏི. བྱཱཔཱདདྷཱཏུཾ…པེ… ཀཐེསི. ཀསྨཱ? པགེཝ ¶ ཨཔཝཱདཱ ཨབྷིནིཝིསནྟི, ཏཏོ པརཾ ཨུསྶགྒོ པཝཏྟཏི, ཋཔེཏྭཱ ཝཱ ཨཔཝཱདཝིསཡཾ ཏཾ པརིཧརནྟོཝ ཨུསྶགྒོ པཝཏྟཏཱིཏི, ཉཱཡོ ཧེས ལོཀེ ནིརུལ༹ྷོཏི.

དྭེ ¶ ཀཐཱཏི ‘‘སབྦསངྒཱཧིཀཱ, ཨསམྦྷིནྣཱ ཙཱ’’ཏི (དཱི. ནི. ཨཊྛ. ༣.༣༠༥) ཨནནྟརཏྟིཀེ ཝུཏྟཱ དྭེ ཀཐཱ. ཏཏྠ ཝུཏྟནཡེན ཨཱནེཏྭཱ ཀཐནཝསེན ཝེདིཏབྦཱ. ཏསྨཱ ཏཏྠ ཝུཏྟཨཏྠོ ཨིདྷཱཔི ཨཱཧརིཏྭཱ ཝེདིཏབྦོ ‘‘ནེཀྑམྨདྷཱཏུཡཱ གཧིཏཱཡ ཨིཏརཱ དྭེ གཧིཏཱཝ ཧོནྟཱི’’ཏིཨཱདིནཱ.

སུཉྙཏཊྛེནཱཏི ཨཏྟསུཉྙཏཱཡ. ཀཱམབྷཝོ ཀཱམོ ཨུཏྟརཔདལོཔེན སུཉྙཏཊྛེན དྷཱཏུ ཙཱཏི ཀཱམདྷཱཏུ. བྲཧྨལོཀནྟི པཋམཛ྄ཛྷཱནབྷཱུམིསཉྙིཏཾ བྲཧྨལོཀཾ. དྷཱཏུཡཱ ཨཱགཏཊྛཱནམྷཱིཏི ‘‘ཀཱམདྷཱཏུ རཱུཔདྷཱཏཱུ’’ཏིཨཱདིནཱ དྷཱཏུགྒཧཎེ ཀཏེ. བྷཝེན པརིཙྪིནྡིཏབྦཱཏི ‘‘ཀཱམབྷཝོ རཱུཔབྷཝོ’’ཏིཨཱདིནཱ བྷཝཝསེན ཏདཏྠོ པརིཙྪིནྡིཏབྦོ, ན ཡཱཡ ཀཱཡཙི དྷཱཏུཡཱ ཝསེན. ཡདགྒེན ཙ དྷཱཏུཡཱ ཨཱགཏཊྛཱནེ བྷཝེན པརིཙྪེདོ ཀཱཏབྦོ, ཏདགྒེན བྷཝསྶ ཨཱགཏཊྛཱནེ དྷཱཏུཡཱ པརིཙྪེདོ ཀཱཏབྦོ བྷཝཝསེན དྷཱཏུཡཱ པརིཙྪིཛྫནཏོ. ནིརུཛ྄ཛྷཏི ཀིལེསཝཊྚམེཏྠཱཏི ནིརོདྷོ, སཱ ཨེཝ སུཉྙཏཊྛེན དྷཱཏཱུཏི ནིརོདྷདྷཱཏུ, ནིབྦཱནཾ. ནིརུདྡྷེ ཙ ཀིལེསཝཊྚེ ཀམྨཝིཔཱཀཝཊྚཱ ནིརུདྡྷཱ ཨེཝ ཧོནྟི.

ཧཱིནདྷཱཏུཏྟིཀོ ཨབྷིདྷམྨེ (དྷ. ས. ཏིཀམཱཏིཀཱ ༡༤) ཧཱིནཏྟིཀེན པརིཙྪིནྡིཏབྦོཏི ཝུཏྟཾ ‘‘ཧཱིནཱ དྷཱཏཱུཏི དྭཱདས ཨཀུསལཙིཏྟུཔྤཱདཱ’’ཏི. ཏེ ཧི ལཱམཀཊྛེན ཧཱིནདྷཱཏུ. ཧཱིནཔཎཱིཏཱནཾ མཛ྄ཛྷེ བྷཝཱཏི མཛ྄ཛྷིམདྷཱཏུ, ཨཝསེསཱ ཏེབྷཱུམཀདྷམྨཱ. ཨུཏྟམཊྛེན ཨཏཔྤཀཊྛེན ¶ ཙ པཎཱིཏདྷཱཏུ, ནཝལོཀུཏྟརདྷམྨཱ.

པཉྩཀཱམགུཎཱ ཝིསཡབྷཱུཏཱ ཨེཏསྶ སནྟཱིཏི པཉྩཀཱམགུཎིཀོ, ཀཱམརཱགོ. རཱུཔཱརཱུཔབྷཝེསཱུཏི རཱུཔཱརཱུཔཱུཔཔཏྟིབྷཝེསུ ཡཐཱདྷིགཏེསུ. ཨནདྷིགཏེསུ པན སོ པཏྠནཱ ནཱམ ན ཧོཏཱིཏི བྷཝཝསེན པཏྠནཱཏི ཨིམིནཱཝ གཧིཏོ. ཛྷཱནནིཀནྟཱིཏི རཱུཔཱརཱུཔཛ྄ཛྷཱནེསུ ནིཀནྟི. བྷཝཝསེན པཏྠནཱཏི བྷཝེསུ པཏྠནཱཏི. ཨེཝཾ ཙཏཱུཧིཔི པདེཧི ཡཐཱཀྐམཾ མཧགྒཏཱུཔཔཏྟིབྷཝཝིསཡཱ, མཧགྒཏཀམྨབྷཝཝིསཡཱ, བྷཝདིཊྛིསཧགཏཱ, བྷཝཔཏྠནཱབྷཱུཏཱ ཙ ཏཎྷཱ ‘‘བྷཝཏཎྷཱ’’ཏི ཝུཏྟཱ. ཝིབྷཝདིཊྛི ཝིབྷཝོ ཨུཏྟརཔདལོཔེན, ཝིབྷཝསཧགཏཱ ཏཎྷཱ ཝིབྷཝཏཎྷཱ. རཱུཔཱདིཔཉྩཝཏྠུ ཀཱམཝིསཡཱ བལཝརཱགབྷཱུཏཱ ཏཎྷཱ ཀཱམཏཎྷཱཏི པཋམནཡོ, ‘‘སབྦེཔི ¶ ཏེབྷཱུམཀདྷམྨཱ ¶ ཀཱམནཱིཡཊྛེན ཀཱམཱ’’ཏི (མཧཱནི. ༡) ཝཙནཏོ ཏེ ཨཱརབྦྷ པཝཏྟཱ དིཊྛིཝིཔྤཡུཏྟཱ སབྦཱཔི ཏཎྷཱ ཀཱམཏཎྷཱཏི དུཏིཡནཡོཏི ཨཡམེཏེསཾ ཝིསེསོ.

ཨབྷིདྷམྨེ པནཱཏི པན-སདྡོ ཝིསེསཏྠཛོཏནོ, ཏེན པཉྩཀཱམགུཎིཀརཱགཏོ ཨཉྙོཔི ཀཱམཱཝཙརདྷམྨཝིསཡོ ལོབྷོ ཨབྷིདྷམྨེ (ཝིབྷ. ༩༡༥) ‘‘ཀཱམཏཎྷཱ’’ཏི ཨཱགཏོཏི ཨིམཾ ཝིསེསཾ ཛོཏེཏི. ཏིཀནྟརམྤི སམཱནཾ ཏཎྷཾཡེཝ ནིསྶཱཡ པཝཏྟིཏདེསནཱནནྟརཏཱཡ ཏཾ ‘‘ཝཱརོ’’ཏི ཝཏྟབྦཏཾ ཨརཧཏཱིཏི ‘‘ཨིམིནཱ ཝཱརེནཱ’’ཏི ཝུཏྟཾ. ཨིམིནཱ ཝཱརེནཱཏི ཨིམིནཱ པརིཡཱཡེནཱཏི ཨཏྠོ. རཛནཱིཡཊྛེནཱཏི ཀཱམནཱིཡཊྛེན. པརིཡཱདིཡིཏྭཱཏི པརིགྒཧེཏྭཱ. ཏཏོཏི ཀཱམཏཎྷཱཡ. ནཱིཧརིཏྭཱཏི ནིདྡྷཱརེཏྭཱ. ཨིཏརཱ དྭེ ཏཎྷཱཏི རཱུཔཏཎྷཾ, ཨརཱུཔཏཎྷཉྩ དསྶེཏི. ཨེཏེན ‘‘ཀཱམཏཎྷཱ’’ཏི སཱདྷཱརཎཝཙནམེཏཾ སབྦསྶཔི ལོབྷསྶ, ཏསྶ པན ‘‘རཱུཔཏཎྷཱ ¶ ཨརཱུཔཏཎྷཱ’’ཏི ཝིསེསཝཙནཾ ཡཐཱ ཀཱམགུཎིཀརཱགོ རཱུཔརཱགོ ཨརཱུཔརཱགོཏི དསྶེཏི. ནིརོདྷཏཎྷཱཏི བྷཝནིརོདྷེ བྷཝསམུཙྪེདེ ཏཎྷཱ. ཡསྨཱ ཧི ཨུཙྪེདདིཊྛི མནུསྶཏྟབྷཱཝེ, ཀཱམཱཝཙརདེཝཏྟབྷཱཝེ, རཱུཔཱཝཙརཨརཱུཔཱཝཙརཏྟབྷཱཝེ ཋིཏསྶ ཨཏྟནོ སམྨཱ སམུཙྪེདོ ཧོཏཱིཏི བྷཝནིརོདྷཾ ཨཱརབྦྷ པཝཏྟཏི, ཏསྨཱ ཏཾསཧགཏཱཔི ཏཎྷཱ ཏམེཝ ཨཱརབྦྷ པཝཏྟཏཱིཏི.

ཝཊྚསྨིནྟི ཏིཝིདྷེཔི ཝཊྚེ. ཡཐཱ ཏེ ཧི ནིསྶརིཏུཾ ཨཔྤདཱནཝསེན ཀམྨཝིཔཱཀཝཊྚེ ཏཾསམངྒིསཏྟཾ ཏེསཾ པརཱཔརུཔྤཏྟིཡཱ པཙྩཡབྷཱཝེན སཾཡོཛེནྟི, ཨེཝཾ ཀིལེསཝཊྚེཔཱིཏི. སཏཱིཏི པརམཏྠཏོ ཝིཛྫམཱནེ. རཱུཔཱདིབྷེདེཏི རཱུཔཝེདནཱདིཝིབྷཱགེ. ཀཱཡེཏི ཁནྡྷསམཱུཧེ. ཝིཛྫམཱནཱཏི སཏཱི པརམཏྠཏོ ཨུཔལབྦྷམཱནཱ. དིཊྛིཡཱ པརིཀཔྤིཏོ ཧི ཨཏྟཱདི པརམཏྠཏོ ནཏྠི, དིཊྛི པན ཨཡཾ ཨཏྠེཝཱཏི. ཝིཙིནནྟོཏི དྷམྨསབྷཱཝཾ ཝཱིམཾསནྟོ. ཀིཙྪཏཱིཏི ཀིལམཏི. པརཱམསཏཱིཏི པརཏོ ཨཱམསཏི. ‘‘སཱིལེན སུདྡྷི, ཝཏེན སུདྡྷཱི’’ཏི གཎྷནྟོ ཧི ཝིསུདྡྷིམགྒཾ ཨཏིཀྐམིཏྭཱ ཏསྶ པརཏོ ཨཱམསཏི ནཱམ. ཝཱིསཏིཝཏྠུཀཱ དིཊྛཱིཏི རཱུཔཱདི-དྷམྨེ, པཙྩེཀཾ ཏེ ཝཱ ནིསྶིཏཾ, ཏེསཾ ཝཱ ནིསྶཡབྷཱུཏཾ, སཱམིབྷཱུཏཾ ཝཱ ཀཏྭཱ པརིཀཔྤནཝསེན པཝཏྟིཡཱ ཝཱིསཏིཝཏྠུཀཱ ཨཏྟདིཊྛི ཝཱིསཏི. ཝིམཏཱིཏི དྷམྨེསུ ¶ སམྨཱ, མིཙྪཱ ཝཱ མནནཱབྷཱཝཏོ སཾསཡིཏཊྛེན ཨམཏི, ཨཔྤཊིཔཛྫནནྟི ཨཏྠོ. ཝིཔརིཡཱསགྒཱཧོཏི ཨསུདྡྷིམགྒེ ‘‘སུདྡྷིམགྒོ’’ཏི ཝིཔརཱིཏགྒཱཧོ.

ཙིརཔཱརིཝཱསིཡཊྛེནཱཏི ཙིརཔརིཝུཏྠཏཱཡ པུརཱཎབྷཱཝེན. ཨཱསཝནཊྛེནཱཏི སནྡནཊྛེན, པཝཏྟནཊྛེནཱཏི ཨཏྠོ. སཝཏཱིཏི པཝཏྟཏི. ཨཝདྷིཨཏྠོ ཨཱ-ཀཱརོ, ཨཝདྷི ¶ ཙ མརིཡཱདཱབྷིཝིདྷིབྷེདཏོ དུཝིདྷོ. ཏཏྠ མརིཡཱདོ ཀིརིཡཾ བཧི ཀཏྭཱ པཝཏྟཏི ཡཐཱ ‘‘ཨཱ པཱཊལིཔུཏྟཱ ¶ ཝུཊྛོ དེཝོ’’ཏི. ཨབྷིཝིདྷི ཀིརིཡཾ བྱཱཔེཏྭཱ པཝཏྟཏི ཡཐཱ ‘‘ཨཱ བྷཝགྒཱ བྷགཝཏོ ཡསོ པཝཏྟོ’’ཏི. ཨབྷིཝིདྷིཨཏྠོ ཨཡཾ ཨཱ-ཀཱརོ ཝེདིཏབྦོ.

ཀཏྠཙི དྭེ ཨཱསཝཱ ཨཱགཏཱཏི ཝིནཡཔཱལི༹ཾ (པཱརཱ. ༣༩) སནྡྷཱཡཱཧ. ཏཏྠ ཧི ‘‘དིཊྛདྷམྨིཀཱནཾ ཨཱསཝཱནཾ སཾཝརཱཡ, སམྤརཱཡིཀཱནཾ ཨཱསཝཱནཾ པཊིགྷཱཏཱཡཱ’’ཏི (པཱརཱ. ༣༩) དྭིདྷཱ ཨཱསཝཱ ཨཱགཏཱཏི. ཀཏྠཙཱིཏི ཏིཀནིཔཱཏེ ཨཱསཝསུཏྟེ, (ཨིཏིཝུ. ༥༦; སཾ. ནི. ༥.༡༦༣) ཨཉྙེསུ ཙ སལཱ༹ཡཏནསུཏྟཱདཱིསུ (སཾ. ནི. ༤.༣༢༡). སལཱ༹ཡཏནསུཏྟེསུཔི ཧི ‘‘ཏཡོམེ ཨཱཝུསོ ཨཱསཝཱ ཀཱམཱསཝོ བྷཝཱསཝོ ཨཝིཛྫཱསཝོ’’ཏི ཏཡོ ཨེཝ ཨཱགཏཱཏི. ནིརཡཾ གམེནྟཱིཏི ནིརཡགཱམིནཱིཡཱ. ཡསྨཱ ཨིདྷ སཱསཝཾ ཀུསལཱཀུསལཾ ཀམྨཾ ཨཱསཝཔརིཡཱཡེན དེསིཏཾ, ཏསྨཱ པཉྩགཏིསཾཝཏྟནཱིཡབྷཱཝེན ཨཱསཝཱ ཨཱགཏཱ. ཨིམསྨིཾ སངྒཱིཏིསུཏྟེ ཏཡོ ཨཱགཏཱཏི. ཨེཏྠ ཡསྨཱ ཨཉྙེསུ ཙ ཨཱ བྷཝགྒཾ ཨཱ གོཏྲབྷུཾ པཝཏྟནྟེསུ མཱནཱདཱིསུ ཝིཛྫམཱནེསུ ཨཏྟཏྟནིཡཱདིགྒཱཧཝསེན, ཨབྷིབྱཱཔནམདཀརཎཝསེན ཨཱསཝསདིསཏཱ ཙ ཨེཏེསཾཡེཝ, ན ཨཉྙེསཾ, ཏསྨཱ ཨེཏེསྭེཝ ཨཱསཝ-སདྡོ ནིརུལ༹ྷོ དཊྛབྦོ. ན ཙེཏྠ ‘‘དིཊྛཱསཝོ ནཱགཏོ’’ཏི ཙིནྟེཏབྦཾ བྷཝཏཎྷཱཡ, བྷཝདིཊྛིཡཱཔི བྷཝཱསཝགྒཧཎེནེཝ གཧིཏཏྟཱ. ཀཱམཱསཝོ ནཱམ ཀཱམནཊྛེན, ཨཱསཝནཊྛེན ཙ. ཝུཏྟཱཡེཝ ཨཏྠཏོ ནིནྣཱནཱཀརཎཏོ.

ཀཱམེ ཨེསཏི གཝེསཏི ཨེཏཱཡཱཏི ཀཱམེསནཱ, ཀཱམཱནཾ ཨབྷིཔཏྠནཱཝསེན, པརིཡེཊྛིཝསེན, པརིབྷུཉྫནཝསེན ཝཱ པཝཏྟརཱགོ. བྷཝེསནཱ པན བྷཝཔཏྠནཱ, བྷཝཱབྷིརཏིབྷཝཛ྄ཛྷོསཱནཝསེན པཝཏྟརཱགོ ¶ . དིཊྛིགཏིཀསམྨཏསྶཱཏི ཨཉྙཏིཏྠིཡེཧི པརིཀཔྤིཏསྶ, སམྦྷཱཝིཏསྶ ¶ ཙ. བྲཧྨཙརིཡསྶཱཏི ཏཔོཔཀྐམསྶ. ཏདེཀཊྛནྟི ཏཱཧི རཱགདིཊྛཱིཧི སཧཛེཀཊྛཾ. ཀམྨནྟི ཨཀུསལཀམྨཾ. ཏམྤི ཧི ཀཱམཱདིཀེ ནིབྦཏྟནཱདྷིཊྛཱནཱདིཝསེན པཝཏྟཾ ‘‘ཨེསཏཱི’’ཏི ཝུཙྩཏི. ཨནྟགྒཱཧིཀཱ དིཊྛཱིཏི ནིདསྶནམཏྟམེཏཾ. ཡཱ ཀཱཙི པན མིཙྪཱདིཊྛི ཏཔོཔཀྐམཧེཏུཀཱ བྲཧྨཙརིཡེསནཱ ཨེཝ.

ཨཱཀཱརསཎྛཱནནྟི ཝིསིཊྛཱཀཱརཱཝཊྛཱནཾ ཀཐཾཝིདྷནྟི ཧི ཀེན པཀཱརེན སཎྛིཏཾ, སམཝཊྛིཏནྟི ཨཏྠོ. སདྡཏྠཏོ པན ཝིདཧནཾ ཝིསིཊྛཱཀཱརེན ཨཝཊྛཱནཾ ཝིདྷཱ, ཝིདྷཱིཡཏི ཝིསདིསཱཀཱརེན ཋཔཱིཡཏཱིཏི ཝིདྷཱ, ཀོཊྛཱསོ. ཝིདཧནཏོ ཧཱིནཱདིཝསེན ཝིཝིདྷེནཱཀཱརེན དཧནཏོ ཨུཔདྷཱརཎཏོ ཝིདྷཱ, མཱནོཝ. སེཡྻསདིསཧཱིནཱནཾ ཝསེནཱཏི སེཡྻསདིསཧཱིནབྷཱཝཱནཾ ཡཱཐཱཝཱ’ ཡཱཐཱཝབྷཱུཏཱནཾ ཝསེན. ཏཡོ མཱནཱ ཝུཏྟཱ སེཡྻསྶེཝ ཨུཔྤཛྫནཀཱ. ཨེས ནཡོ སདིསཧཱིནེསུཔི. ཏེནཱཧ ‘‘ཨཡཉྷི མཱནོ’’ཏིཨཱདི. ཨིདཱནི ཡཐཱཨུདྡིཊྛེ ནཝཝིདྷེཔི མཱནེ ཝཏྠུཝིབྷཱགེན ¶ དསྶེཏུཾ ‘‘ཏཏྠཱ’’ཏིཨཱདི ཝུཏྟཾ. རཱཛཱུནཉྩེཝ པབྦཛིཏཱནཉྩ ཨུཔྤཛྫཏི ཀསྨཱ? ཏེ ཝིསེསཏོ ཨཏྟཱནཾ སེཡྻཏོ དཧནྟཱིཏི. ཨིདཱནི ཏམཏྠཾ ཝིཏྠཱརཏོ དསྶེནྟོ ‘‘རཱཛཱ ཧཱི’’ཏིཨཱདིམཱཧ. ཀོ མཡཱ སདིསོ ཨཏྠཱིཏི ཀོ-སདྡོ པཊིཀྑེཔཏྠོ, ཨཉྙོ སདིསོ ནཏྠཱིཏི ཨདྷིཔྤཱཡོ. ཨེཏེསཾཡེཝཱཏི རཱཛཱུནཾ, པབྦཛིཏཱནཉྩ. ཨུཔྤཛྫཏི སེཊྛཝཏྠུཀཏྟཱ ཏསྶ. ‘‘ཧཱིནོཧམསྨཱི’’ཏི མཱནེཔི ཨེསེཝ ནཡོ.

‘‘ཀོ མཡཱ སདིསོ ཨཉྙོ རཱཛཔུརིསོ ཨཏྠཱི’’ཏི ཝཱ ‘‘མཡ྄ཧཾ ཨཉྙེཧི སདྡྷིཾ ཀིཾ ནཱནཱཀརཎ’’ནྟི ཝཱ ‘‘ཨམཙྩོ ཏི ནཱམཱམེཝ…པེ… ནཱམཱཧ’’ནྟི ཝཱཏི སདིསསྶ སེཡྻམཱནཱདཱིནཾ ཏིཎྞཾ པཝཏྟིཨཱཀཱརདསྶནཾ.

དཱསཱདཱིནནྟི ཨཱདི-སདྡེན བྷཏིཀ ཀམྨཀརཱདཱིནཾ པརཱདྷཱིནཝུཏྟིཀཱནཾ གཧཎཾ ¶ . ཨཱདི-སདྡེན ཝཱ གཧིཏེ ཨེཝ ‘‘པུཀྐུསཙཎྜཱལཱདཡོཔཱི’’ཏི སཡམེཝ དསྶེཏི. ནནུ ཙ མཱནོ ནཱམཱཡཾ སཾཔགྒཧརསོ, སོ ཀཐཾ ཨོམཱནེ སམྦྷཝཏཱིཏི? སོཔི ཨཝཀརཎམུཁེན ཝིདྷཱནཝཏྠུནཱ པགྒཎྷནཝསེནེཝ པཝཏྟཏཱིཏི ནཱཡཾ ཝིརོདྷོ. ཏེནེཝཱཧ ‘‘ཀིཾ དཱསོ ནཱམ ཨཧནྟི ཨེཏེ མཱནེ ཀརོཏཱི’’ཏི. ཏཐཱ ཧིསྶ ཡཱཐཱཝམཱནཏཱ ཝུཏྟཱ.

ཡཱཐཱཝམཱནཱ ¶ བྷཝནིཀནྟི ཝིཡ, ཨཏྟདིཊྛི ཝིཡ ཙ ན མཧཱསཱཝཛྫཱ, ཏསྨཱ ཏེ ན ཨཔཱཡགམནཱིཡཱ. ཡཐཱབྷཱུཏཝཏྠུཀཏཱཡ ཧི ཏེ ཡཱཐཱཝམཱནཱ. ‘‘ཨརཧཏྟམགྒཝཛ྄ཛྷཱ’’ཏི ཙ ཏསྶ ཨནཝསེསཔྤཧཱཡིཏཱཡ ཝུཏྟཾ. དུཏིཡཏཏིཡམགྒེཧི ཙ ཏེ ཡཐཱཀྐམཾ པཧཱིཡནྟི, ཡེ ཨོལཱ༹རིཀཏརཱ, ཨོལཱ༹རིཀཏམཱ ཙ. མཱནོ ཧི ‘‘ཨཧཾ ཨསྨཱི’’ཏི པཝཏྟིཡཱ ཨུཔརིམགྒེསུ སམྨཱདིཊྛིཡཱ ཨུཛུཝིཔཙྩནཱིཀོ ཧུཏྭཱ པཧཱིཡཏི. ཨཡཱཐཱཝམཱནཱ ནཱམ ཨཡཐཱབྷཱུཏཝཏྠུཀཏཱཡ, ཏེནེཝ ཏེ མཧཱསཱཝཛྫབྷཱཝེན པཋམམགྒཝཛ྄ཛྷཱ ཝུཏྟཱ.

ཨཏཏི སཏཏཾ གཙྪཏི པཝཏྟཏཱིཏི ཨདྡྷཱ, ཀཱལོཏི ཨཱཧ ‘‘ཏཡོ ཨདྡྷཱཏི ཏཡོ ཀཱལཱ’’ཏི. སུཏྟནྟཔརིཡཱཡེནཱཏི བྷདྡེཀརཏྟསུཏྟཱདཱིསུ (མ. ནི. ༣.༢༨༣) ཨཱགཏནཡེན. ཏཏྠ ཧི ‘‘ཡོ ཙཱཝུསོ མནོ, ཡེ ཙ དྷམྨཱ, ཨུབྷཡམེཏཾ པཙྩུཔྤནྣཾ, ཏསྨིཾ ཙེ པཙྩུཔྤནྣེ ཚནྡརཱགཔཊིབདྡྷཾ ཧོཏི ཝིཉྙཱཎཾ, ཚནྡརཱགཔཊིབདྡྷཏྟཱ ཝིཉྙཱཎསྶ ཏདབྷིནནྡཏི, ཏདབྷིནནྡནྟོ པཙྩུཔྤནྣེསུ དྷམྨེསུ སཾཧཱིརཏཱི’’ཏི (མ. ནི. ༣.༢༨༤) ཨདྡྷཱཔཙྩུཔྤནྣཾ སནྡྷཱཡ ཨེཝཾ ཝུཏྟཾ. ཏེནཱཧ ‘‘པཊིསནྡྷིཏོ པུབྦེ’’ཏིཨཱདི. ཏདནྟརནྟི ཏེསཾ ཙུཏིཔཊིསནྡྷཱིནཾ ཝེམཛ྄ཛྷཾ པཙྩུཔྤནྣོ ཨདྡྷཱ, ཡོ པུབྦནྟཱཔརནྟཱནཾ ཝེམཛ྄ཛྷཏཱཡ ‘‘པུབྦནྟཱཔརནྟེ ཀངྑཏི, (དྷ. ས. ༡༡༢༣) པུབྦནྟཱཔརནྟེ ¶ ཨཉྙཱཎ’’ནྟི (དྷ. ས. ༡༠༦༧, ༡༡༠༦, ༡༡༢༨) ཨེཝམཱདཱིསུ ¶ ‘‘པུབྦནྟཱཔརནྟོ’’ཏི ཙ ཝུཙྩཏི. བྷངྒོ དྷམྨོ ཨཏཱིཏཾསེན སངྒཧིཏོཏི ཨཱཧ ‘‘བྷངྒཏོ ཨུདྡྷཾ ཨཏཱིཏོ ཨདྡྷཱ ནཱམཱ’’ཏི. ཏཐཱ ཨནུཔྤནྣོ དྷམྨོ ཨནཱགཏཾསེན སངྒཧིཏོཏི ཨཱཧ ‘‘ཨུཔྤཱདཏོ པུབྦེ ཨནཱགཏོ ཨདྡྷཱ ནཱམཱ’’ཏི. ཁཎཏྟཡེཏི ཨུཔྤཱདོ, ཋིཏི, བྷངྒོཏི ཏཱིསུ ཁཎེསུ. ཡདཱ ཧི དྷམྨོ ཧེཏུཔཙྩཡསྶ སམཝཱཡེ ཨུཔྤཛྫཏི, ཡདཱ ཙ ཝེཏི, ཨིཏི དྭཱིསུཔི ཁཎེསུ ཋིཏིཀྑཎེ ཝིཡ པཙྩུཔྤནྣོཏི. དྷམྨཱནཉྷི པཱཀབྷཱཝཱུཔཱདྷིཀཾ པཏྟབྦཾ ཨུདཡོ, ཝིདྡྷཾསབྷཱཝཱུཔཱདྷིཀཾ ཝཡོ, ཏདུབྷཡཝེམཛ྄ཛྷཾ ཋིཏི. ཡདི ཨེཝཾ ཨདྡྷཱ ནཱམཱཡཾ དྷམྨོ ཨེཝ ཨཱཔནྣོཏི? ན དྷམྨོ, དྷམྨསྶ པན ཨཝཏྠཱབྷེདོ, ཏཉྩ ཨུཔཱདཱཡ ལོཀེ ཀཱལསམཉྙཱཏི དསྶེཏུཾ ‘‘ཨཏཱིཏཱདིབྷེདོ ཙ ནཱམ ཨཡ’’ནྟིཨཱདི ཝུཏྟཾ. ཨིདྷཱཏི ཨིམསྨིཾ ལོཀེ. ཏེནེཝ ཝོཧཱརེནཱཏི ཏཾ ཏཾ ཨཝཏྠཱཝིསེསཾ ཨུཔཱདཱཡ དྷམྨོ ‘‘ཨཏཱིཏོ ཨནཱགཏོ པཙྩུཔྤནྣོ’’ཏི ཡེན ཝོཧཱརེན ¶ ཝོཧརཱིཡཏི, དྷམྨཔྤཝཏྟིམཏྟཏཱཡ ཧི པརམཏྠཏོ ཨཝིཛྫམཱནོཔི ཀཱལོ ཏསྶེཝ དྷམྨསྶ པཝཏྟིཨཝཏྠཱཝིསེསཾ ཨུཔཱདཱཡ ཏེནེཝ ཝོཧཱརེན ‘‘ཨཏཱིཏོ ཨདྡྷཱ’’ཏིཨཱདིནཱ ཝུཏྟོ.

ཨནྟ-སདྡོ ལོཀེ པརིཡོསཱནེ, ཀོཊིཡཾ ནིརུལ༹ྷོཏི ཏདཏྠཾ དསྶེནྟོ ‘‘ཨནྟོཡེཝ ཨནྟོ’’ཏི ཨཱཧ, ཀོཊི ཨནྟོཏི ཨཏྠོ. པརབྷཱགོཏི པཱརིམནྟོ. ཨམཏི གཙྪཏི བྷཝཔྤབནྡྷོ ནིཊྛཱནཾ ཨེཏྠཱཏི ཨནྟོ, ཀོཊི. ཨམནཾ ནིཊྛཱནགམནནྟི ཨནྟོ, ཨོསཱནཾ. སོ པན ‘‘ཨེསེཝནྟོ དུཀྑསྶཱ’’ཏི (མ. ནི. ༣.༣༩༣; སཾ. ནི. ༢.༥༡) ཝུཏྟཏྟཱ དུཀྑཎྞཝསྶ པཱརིམནྟོཏི ཨཱཧ ‘‘པརབྷཱགོ’’ཏི. ཨམྨཏི པརིབྷུཡྻཏི ཧཱིལཱི༹ཡཏཱིཏི ཨནྟོ, ལཱམཀོ. ཨམྨཏི བྷཱགསོ ཉཱཡཏཱིཏི ཨནྟོ, ཨཾསོཏི ཨཱཧ ‘‘ཀོཊྛཱསོ ཨནྟོ’’ཏི. སནྟོ ¶ པརམཏྠཏོ ཝིཛྫམཱནོ ཀཱཡོ དྷམྨསམཱུཧོཏི སཀྐཱཡོ, ཁནྡྷཱ, ཏེ པན ཨརིཡསཙྩབྷཱུཏཱ ཨིདྷཱདྷིཔྤེཏཱཏི ཝུཏྟཾ ‘‘པཉྩུཔཱདཱནཀྑནྡྷཱ’’ཏི. པུརིམཏཎྷཱཏི ཡེསཾ ནིབྦཏྟིཀཱ, ཏནྣིབྦཏྟིཏོ པགེཝ སིདྡྷཱ ཏཎྷཱ. ཨཔྤཝཏྟིབྷཱུཏནྟི ནཔྤཝཏྟཏི ཏདུབྷཡཾ ཨེཏྠཱཏི ཏེསཾ ཨཔྤཝཏྟིཊྛཱནབྷཱུཏཾ. ཡདི ‘‘སཀྐཱཡོ ཨནྟོ’’ཏིཨཱདིནཱ ཨཉྙམཉྙཾ ཝིབྷཏྟིཏཱཡ དུཀྑསཙྩཱདཡོ གཧིཏཱ, ཨཐ ཀསྨཱ མགྒོ ན གཧིཏོཏི ཨཱཧ ‘‘མགྒོ པནཱ’’ཏིཨཱདི. ཏཏྠ ཨུཔཱཡཏྟཱཏི ཨུཔཱཡབྷཱཝཏོ, སམྤཱཔཀཧེཏུབྷཱཝཏོཏི ཨཏྠོ.

ཡདི པན ཧེཏུམནྟགྒཧཎེནེཝ ཧེཏུ གཧིཏོ ཧོཏི, ནནུ ཨེཝཾ སཀྐཱཡགྒཧཎེནེཝ ཏསྶ ཧེཏུབྷཱུཏོ སཀྐཱཡསམུདཡོ གཧིཏོ ཧོཏཱིཏི? ཏསྶ གཧཎེ སངྑཏདུཀོ ཝིཡ, སཔྤཙྩཡདུཀོ ཝིཡ ཙ དུཀོཝཱཡཾ ཨཱཔཛྫཏི, ན ཏིཀོ. ཡཐཱ པན སཀྐཱཡཾ གཧེཏྭཱ སཀྐཱཡསམུདཡོཔི གཧིཏོ, ཨེཝཾ སཀྐཱཡནིརོདྷཾ གཧེཏྭཱ སཀྐཱཡནིརོདྷུཔཱཡོ གཡ྄ཧེཡྻ, ཨེཝཾ སཏི ཙཏུཀྐོ ཨཡཾ ཨཱཔཛྫེཡྻ, ¶ ན ཏིཀོ, ཏསྨཱ ཧེཏུམནྟགྒཧཎེན ཧེཏུགྒཧཎཾ ན ཙིནྟེཏབྦཾ. ཨཡཾ པནེཏྠ ཨདྷིཔྤཱཡོ ཡུཏྟོ སིཡཱ – ཨིདྷ སཀྐཱཡསཀྐཱཡསམུདཡཱ ཨནཱདིཀཱལིཀཱ, ཨསཏི མགྒབྷཱཝནཱཡཾ པཙྩཡཱནུཔརམེན ཨཔརིཡནྟཱ ཙ, ནིབྦཱནཾ པན ཨཔྤཙྩཡཏྟཱ ཨཏྟནོ ནིཙྩཏཱཡ ཨེཝ སབྦདཱབྷཱཝཱིཏི ཨནཱདིཀཱལིཀོ, ཨཔརིཡནྟོ ཙ. ཨིཏི ཨིམཱནི ཏཱིཎི སཙྩཱནི མཧཱཐེརོ ཨིམཱཡ སབྷཱགཏཱཡ ‘‘ཏཡོ ཨནྟཱ’’ཏི ཏིཀཾ ཀཏྭཱ དསྶེཏི ¶ . ཨརིཡམགྒོ པན ཀདཱཙི ཀརཧཙི ལབྦྷམཱནོ ན ཏཐཱཏི ཏསྶ ཨཏིཝིཡ དུལླབྷཔཱཏུབྷཱཝཏཾ དཱིཔེཏུཾ ཏིཀཏོ བཧིཀཏོཏི ཨཡམེཏྠ ཨཏྟནོམཏི.

དུཀྑཏཱཏི དུཀྑབྷཱཝོ, དུཀྑཾཡེཝ ཝཱ ཡཐཱ དེཝོ ཨེཝ དེཝཏཱ. དུཀྑ-སདྡོ ཙཱཡཾ ཨདུཀྑསབྷཱཝེསུཔི ¶ སུཁུཔེཀྑཱསུ ཀཉྩི ཨནིཊྛཏཱཝིསེསཾ ཨུཔཱདཱཡ པཝཏྟཏཱིཏི ཏཏོ ནིཝཏྟེནྟོ སབྷཱཝདུཀྑཝཱཙིནཱ ཨེཀེན དུཀྑ-སདྡེན ཝིསེསེཏྭཱ ‘‘དུཀྑདུཀྑཏཱ’’ཏི ཨཱཧ. བྷཝཏི ཧི ཨེཀནྟཏོ ཏཾསབྷཱཝེཔི ཨཏྠེ ཨཉྙསྶ དྷམྨསྶ ཡེན ཀེནཙི སདིསཏཱལེསེན བྱབྷིཙཱརཱསངྐཱཏི ཝིསེསིཏབྦཏཱ ཡཐཱ ‘‘རཱུཔརཱུཔཾ ཏིལཏེལ’’ནྟི (ཝིབྷ. ཨཊྛ. པཀིཎྞཀཐཱ) ཙ. སངྑཱརབྷཱཝེནཱཏི སངྑཏབྷཱཝེན. པཙྩཡེཧི སངྑརཱིཡནྟཱིཏི སངྑཱརཱ, ཨདུཀྑམསུཁཝེདནཱ. སངྑརིཡམཱནཏྟཱ ཨེཝ ཧི ཨསཱརཀཏཱཡ པརིདུབྦལབྷཱཝེན བྷངྒབྷངྒཱབྷིམུཁཀྑཎེསུ ཝིཡ ཨཏྟལཱབྷཀྑཎེཔི ཝིབཱདྷཔྤཏྟཱ ཨེཝ ཧུཏྭཱ སངྑཱརཱ པཝཏྟནྟཱིཏི ཨཱཧ ‘‘སངྑཏཏྟཱ ཨུཔྤཱདཛརཱབྷངྒཔཱིལི༹ཏཱ’’ཏི. ཏསྨཱཏི ཡཐཱཝུཏྟཀཱརཎཏོ. ཨཉྙདུཀྑསབྷཱཝཝིརཧཏོཏི དུཀྑདུཀྑཏཱཝིཔརིཎཱམདུཀྑཏཱསངྑཱཏསྶ ཨཉྙསྶ དུཀྑསབྷཱཝསྶ ཨབྷཱཝཏོ. ཝིཔརིཎཱམེཏི པརིཎཱམེ, ཝིགམེཏི ཨཏྠོ. ཏེནཱཧ པཔཉྩསཱུདནིཡཾ ‘‘ཝིཔརིཎཱམདུཀྑཱཏི ནཏྠིབྷཱཝོ དུཀྑ’’ནྟི. ཨཔརིཉྙཱཏཝཏྠུཀཱནཉྷི སུཁཝེདནུཔརམོ དུཀྑཏོ ཨུཔཊྛཱཏི, སྭཱཡམཏྠོ པིཡཝིཔྤཡོགེན དཱིཔེཏབྦོ. ཏེནཱཧ ‘‘སུཁསྶ ཧཱི’’ཏིཨཱདི. པུབྦེ ཝུཏྟནཡོ པདེསནིསྶིཏོ ཝེདནཱཝིསེསམཏྟཝིསཡཏྟཱཏི ཨནཝསེསཏོ སངྑཱརདུཀྑཏཾ དསྶེཏུཾ ‘‘ཨཔིཙཱ’’ཏི དུཏིཡནཡོ ཝུཏྟོ. ནནུ ཙ ‘‘སབྦེ སངྑཱརཱ དུཀྑཱ’’ཏི (དྷ. པ. ༢༧༨) ཝཙནཏོ སུཁདུཀྑཝེདནཱནམྤི སངྑཱརདུཀྑཏཱ ཨཱཔནྣཱཏི ¶ ? སཙྩམེཏཾ, སཱ པན སཱམཉྙཛོཏནཱཨཔཝཱདབྷཱུཏེན ཨིཏརདུཀྑཏཱཝཙནེན ནིཝཏྟཱིཡཏཱིཏི ནཱཡཾ ཝིརོདྷོ. ཏེནེཝཱཧ ‘‘ཋཔེཏྭཱ དུཀྑཝེདནཾ སུཁཝེདནཉྩཱ’’ཏི.

མིཙྪཱསབྷཱཝོཏི ‘‘ཧིཏསུཁཱཝཧོ མེ བྷཝིསྶཏཱི’’ཏི ཨེཝཾ ཨཱསཱིསིཏོཔི ཏཐཱ ཨབྷཱཝཏོ, ཨསུབྷཱདཱིསུཡེཝ ‘‘སུབྷ’’ནྟིཨཱདིཝིཔརཱིཏཔྤཝཏྟིཏོ ཙ མིཙྪཱསབྷཱཝོ, མུསཱསབྷཱཝོཏི ཨཏྠོ. མཱཏུགྷཱཏཀཱདཱིསུ པཝཏྟམཱནཱཔི ཧི ཧིཏསུཁཾ ཨིཙྪནྟཱཝ པཝཏྟནྟཱིཏི ཏེ ¶ དྷམྨཱ ‘‘ཧིཏསུཁཱཝཧཱ མེ ¶ བྷཝིསྶནྟཱི’’ཏི ཨཱསཱིསིཏཱ ཧོནྟི. ཏཐཱ ཨསུབྷཱསུཁཱནིཙྩཱནཏྟེསུ སུབྷཱདིཝིཔརིཡཱསདལ༹ྷཏཱཡ ཨཱནནྟརིཡཀམྨནིཡཏམིཙྪཱདིཊྛཱིསུ པཝཏྟི ཧོཏཱིཏི ཏེ དྷམྨཱ ཨསུབྷཱདཱིསུ སུབྷཱདིཝིཔརཱིཏཔྤཝཏྟིཀཱ ཧོནྟི. ཝིཔཱཀདཱནེ སཏི ཁནྡྷབྷེདཱནནྟརམེཝ ཝིཔཱཀདཱནཏོ ནིཡཏོ, མིཙྪཏྟོ ཙ སོ ནིཡཏོ ཙཱཏི མིཙྪཏྟནིཡཏོ. ཨནེཀེསུ ཨཱནནྟརིཡེསུ ཀཏེསུ ཡཾ ཏཏྠ བལཝཾ, ཏཾ ཝིཔཙྩཏི, ན ཨིཏརཱནཱིཏི ཨེཀནྟཝིཔཱཀཛནཀཏཱཡ ནིཡཏཏཱ ན སཀྐཱ ཝཏྟུནྟི ‘‘ཝིཔཱཀདཱནེ སཏཱི’’ཏི ཝུཏྟཾ. ཁནྡྷབྷེདཱནནྟརནྟི ཙུཏིཨནནྟརནྟི ཨཏྠོ. ཙུཏི ཧི མརཎནིདྡེསེ ‘‘ཁནྡྷཱནཾ བྷེདོ’’ཏི (དཱི. ནི. ༢.༣༩༠; མ. ནི. ༡.༡༢༣; ༣.༣༧༣; ཝིབྷ. ༡༩༣) ཝུཏྟཱ, ཨེཏེན ཝཙནེན སཏི ཕལདཱནེ ཙུཏིཨནནྟརོ ཨེཝ ཨེཏེསཾ ཕལཀཱལོ, ན ཨཉྙོཏི ཕལཀཱལནིཡམེན ནིཡཏཏཱ ཝུཏྟཱ ཧོཏི, ན ཕལདཱནནིཡམེནཱཏི ནིཡཏཕལཀཱལཱནཾ ཨཉྙེསམྤི ཨུཔཔཛྫཝེདནཱིཡཱནཾ, དིཊྛདྷམྨཝེདནཱིཡཱནམྤི ནིཡཏཏཱ ཨཱཔཛྫཏི, ཏསྨཱ ཝིཔཱཀདྷམྨདྷམྨཱནཾ པཙྩཡནྟརཝིཀལཏཱདཱིཧི ཨཝིཔཙྩམཱནཱནམྤི ཨཏྟནོ སབྷཱཝེན ཝིཔཱཀདྷམྨཏཱ ཝིཡ བལཝཏཱ ཨཱནནྟརིཡེན ཝིཔཱཀེ དིནྣེ ཨཝིཔཙྩམཱནཱནམྤི ཨཱནནྟརིཡཱནཾ ཕལདཱནེ ནིཡཏསབྷཱཝཱ, ཨཱནནྟརིཡསབྷཱཝཱ ཙ པཝཏྟཱིཏི ཨཏྟནོ སབྷཱཝེན ¶ ཕལདཱནནིཡམེནེཝ ནིཡཏཏཱ, ཨཱནནྟརིཡཏཱ ཙ ཝེདིཏབྦཱ. ཨཝསྶཉྩ ནིཡཏསབྷཱཝཱ, ཨཱནནྟརིཡསབྷཱཝཱ ཙ ཏེསཾ པཝཏྟཱིཏི སམྤཊིཙྪིཏབྦམེཏཾ ཨཉྙསྶ བལཝཏོ ཨཱནནྟརིཡསྶ ཨབྷཱཝེ ཙུཏིཨནནྟརཾ ཨེཀནྟེན ཕལདཱནཏོ.

ནནུ ཨེཝཾ ཨཉྙེསམྤི ཨུཔཔཛྫཝེདནཱིཡཱནཾ ཨཉྙསྨིཾ ཝིཔཱཀདཱཡཀེ ཨསཏི ཙུཏིཨནནྟརམེཝ ཨེཀནྟེན ཕལདཱནཏོ ཨཱནནྟརིཡསབྷཱཝཱ, ནིཡཏསབྷཱཝཱ ཙ པཝཏྟི ཨཱཔཛྫཏཱིཏི? ནཱཔཛྫཏི ཨསམཱནཛཱཏིཀེན ཙེཏོཔཎིདྷིཝསེན, ཨུཔགྷཱཏཀེན ཙ ནིཝཏྟེཏབྦཝིཔཱཀཏྟཱ ཨནནྟརེཀནྟཕལདཱཡཀཏྟཱབྷཱཝཱ, ན པན ཨཱནནྟརིཡཱནཾ པཋམཛ྄ཛྷཱནཱདཱིནཾ དུཏིཡཛ྄ཛྷཱནཱདཱིནི ཝིཡ ཨསམཱནཛཱཏིཀཾ ཕལནིཝཏྟཀཾ ཨཏྠི སབྦཱནནྟརིཡཱནཾ ཨཝཱིཙིཕལཏྟཱ, ན ཙ ཧེཊྛཱུཔཔཏྟིཾ ཨིཙྪཏོ སཱིལཝཏོ ཙེཏོཔཎིདྷི ཝིཡ ཨུཔརཱུཔཔཏྟིཛནཀཀམྨབལཾ ཨཱནནྟརིཡབལཾ ནིཝཏྟེཏུཾ སམཏྠོ ཙེཏོཔཎིདྷི ཨཏྠི ཨནིཙྪནྟསྶེཝ ཨཝཱིཙིཔཱཏནཏོ, ན ཙ ཨཱནནྟརིཡུཔགྷཱཏཀཾ ཀིཉྩི ཀམྨཾ ཨཏྠི. ཏསྨཱ ཏེསཾཡེཝ ཨནནྟརེཀནྟཝིཔཱཀཛནཀསབྷཱཝཱ པཝཏྟཱིཏི. ཨནེཀཱནི ¶ ཙ ཨཱནནྟརིཡཱནི ཀཏཱནི ཨེཀནྟེ ཝིཔཱཀེ ནིཡཏཏྟཱ ཨུཔརཏཱཝིཔཙྩནསབྷཱཝཱསངྐཏྟཱ ནིཙྪིཏཱནི སབྷཱཝཏོ ནིཡཏཱནེཝ. ཙུཏིཨནནྟརཾ པན ཕལཾ ཨནནྟརཾ ནཱམ, ཏསྨིཾ ཨནནྟརེ ནིཡུཏྟཱནི, ཏནྣིབྦཏྟནེན ཨནནྟརཀརཎསཱིལཱནི ཨནནྟརཔཡོཛནཱནི ཙཱཏི སབྷཱཝཏོ ཨཱནནྟརིཡཱནེཝ ཙ ཧོནྟི. ཏེསུ པན སམཱནསབྷཱཝེསུ ཨེཀེན ཝིཔཱཀེ དིནྣེ ཨིཏརཱནི ཨཏྟནཱ ཀཱཏབྦཀིཙྩསྶ ཏེནེཝ ཀཏཏྟཱ ན དུཏིཡཾ ཏཏིཡཉྩ པཊིསནྡྷིཾ ¶ ཀརོནྟི, ན སམཏྠཏཱཝིགྷཱཏཏྟཱཏི ནཏྠི ཏེསཾ ནིཡཏཱནནྟརིཡཏཱནིཝཏྟཱིཏི. ན ཧི སམཱནསབྷཱཝཾ སམཱནསབྷཱཝསྶ ¶ སམཏྠཏཾ ཝིཧནཏཱིཏི. ཨེཀསྶ པན ཨཉྙཱནིཔི ཨུཔཏྠམྦྷཀཱནི ཧོནྟཱིཏི དཊྛབྦཱནཱིཏི. སམྨཱསབྷཱཝེཏི སཙྩསབྷཱཝེ. ནིཡཏོ ཨེཀནྟིཀོ ཨནནྟརམེཝ ཕལདཱནེནཱཏི སམྨཏྟནིཡམཏོ. ན ནིཡཏོཏི ཨུབྷཡཐཱཔི ན ནིཡཏོ. ཨཝསེསཱནཾ དྷམྨཱནནྟི ཀིལེསཱནནྟརིཡཀམྨནིཡྻཱནིཀདྷམྨེཧི ཨཉྙེསཾ དྷམྨཱནཾ.

ཏམནྡྷཀཱརོཏི ཏམོ ཨནྡྷཀཱརོཏི པདཝིབྷཱགོ. ཨཝིཛྫཱ ཏམོ ནཱམ ཨཱརམྨཎསྶ ཚཱདནཊྛེན. ཏེནེཝཱཧ ‘‘ཏམོ ཝིཧཏོ, ཨཱལོཀོ ཨུཔྤནྣོ (མ. ནི. ༡.༣༨༥; པཱརཱ. ༡༢), ཏམོཀྑནྡྷོ པདཱལིཏོ’’ཏི (སཾ. ནི. ༡.༡༦༤) ཙ ཨཱདི. ཨཝིཛྫཱསཱིསེན ཝིཙིཀིཙྪཱ ཝུཏྟཱ མཧཏཱ སམྨོཧེན སབྦཀཱལཾ ཨཝིཡུཛྫནཏོ. ཨཱགམྨཱཏི པཏྭཱ. ཀངྑཏཱིཏི ‘‘ཨཧོསིཾ ནུ ཁོ ཨཧཾ ཨཏཱིཏམདྡྷཱན’’ནྟིཨཱདིནཱ (མ. ནི. ༡.༡༨; སཾ. ནི. ༢.༢༠) ཀངྑཾ ཨུཔྤཱདེཏི སཾསཡཾ ཨཱཔཛྫཏི. ཨདྷིམུཙྩིཏུཾ ན སཀྐོཏཱིཏི པསཱདཱདྷིམོཀྑཝསེན ཨདྷིམུཙྩིཏུཾ ན སཀྐོཏི. ཏེནཱཧ ‘‘ན སམྤསཱིདཏཱི’’ཏི. ཡཱཝཏྟཀཉྷི ཡསྨིཾ ཝཏྠུསྨིཾ ཝིཙིཀིཙྪཱ ན ཝིགཙྪཏི, ཏཱཝ ཏཏྠ སདྡྷཱདྷིམོཀྑོ ཨནཝསརོཝ. ན ཀེཝལཾ སདྡྷཱདྷིམོཀྑོ, ནིཙྪཡཱདྷིམོཀྑོཔི ཏཏྠ ན པཏིཊྛཧཏི ཨེཝ.

ན རཀྑིཏབྦཱནཱིཏི ‘‘ཨིམཱནི མཡཱ རཀྑིཏབྦཱནཱི’’ཏི ཨེཝཾ ཀཏྠཙི རཀྑཱཀིཙྩཾ ནཏྠི པརཏོ རཀྑིཏབྦསྶེཝ ཨབྷཱཝཏོ. སཏིཡཱ ཨེཝ རཀྑིཏཱནཱིཏི མུཊྛསྶཙྩསྶ བོདྷིམཱུལེ ¶ ཨེཝ སཝཱསནཾ སམུཙྪིནྣཏྟཱ སཏིཡཱ རཀྑིཏབྦཱནི ནཱམ སབྦདཱཔི རཀྑིཏཱནི ཨེཝ. ནཏྠི ཏཐཱགཏསྶ ཀཱཡདུཙྩརིཏནྟི ཏཐཱགཏསྶ ཀཱཡདུཙྩརིཏཾ ནཱམ ནཏྠེཝ, ཡཏོ སུཔརིསུདྡྷོ ཀཱཡསམཱཙཱརོ བྷགཝཏོ. ནོ ཨཔརིསུདྡྷཱ, པརིསུདྡྷཱ ཨེཝ ཨཔརིསུདྡྷིཧེཏཱུནཾ ཀིལེསཱནཾ པཧཱིནཏྟཱ. ཏཐཱཔི ཝིནཡེ ཨཔཀཏཉྙུཏཱཝསེན སིཡཱ ¶ ཏེསཾ ཨཔཱརིསུདྡྷིལེསོ, ན བྷགཝཏོཏི དསྶེཏུཾ ‘‘ན པནཱ’’ཏིཨཱདི ཝུཏྟཾ. ཏཏྠ ཝིཧཱརཀཱརཾ ཨཱཔཏྟིནྟི ཨེཀཝཙནཝསེན ‘‘ཨཱཔཏྟིཡོ’’ཏི ཨེཏྠ ཨཱཔཏྟི-སདྡཾ ཨཱནེཏྭཱ ཡོཛེཏབྦཾ. ཨབྷིདྷེཡྻཱནུརཱུཔཉྷི ལིངྒཝཙནཱནི ཧོནྟི. ཨེས ནཡོ སེསེསུཔི. ‘‘མནོདྭཱརེ’’ཏི ཨིདཾ ཏསྶཱ ཨཱཔཏྟིཡཱ ཨཀིརིཡསམུཊྛཱནཏཱཡ ཝུཏྟཾ. ན ཧི མནོདྭཱརེ པཉྙཏྟཱ ཨཱཔཏྟི ཨཏྠཱིཏི. སཨུཔཱརམྦྷཝསེནཱཏི སཝཏྟབྦཏཱཝསེན, ན པན དུཙྩརིཏལཀྑཎཱཔཏྟིཝསེན, ཡཏོ ནཾ བྷགཝཱ པཊིཀྑིཔཏི. ཡཐཱ ཨཱཡསྨཏོ མཧཱཀཔྤིནསྶཱཔི ‘‘གཙྪེཡྻཾ ཝཱཧཾ ཨུཔོསཐཾ, ན ཝཱ གཙྪེཡྻཾ. གཙྪེཡྻཾ ཝཱཧཾ སངྒྷཀམྨཾ, ན ཝཱ གཙྪེཡྻ’’ནྟི (མཧཱཝ. ༡༣༧) པརིཝིཏཀྐིཏཾ. མནོདུཙྩརིཏནྟི མནོདྭཱརིཀཾ ཨཔྤསཏྠཾ ཙརིཏཾ. སཏྠཱརཱ ཨཔྤསཏྠཏཱཡ ཧི ཏཾ དུཙྩརིཏཾ ནཱམ ཛཱཏཾ, ན སབྷཱཝཏོ.

ཡསྨཱ ¶ མཧཱཀཱརུཎིཀོ བྷགཝཱ སདེཝཀསྶ ལོཀསྶ ཧིཏསུཁཱཡ ཨེཝ པཊིཔཛྫམཱནོ ཨཙྩནྟཝིཝེཀཛ྄ཛྷཱསཡཏཱཡ ཏབྦིདྷུརཾ དྷམྨསེནཱཔཏིནོ ཙིཏྟུཔྤཱདཾ པཊིཀྑིཔནྟོ ¶ ‘‘ན ཁོ ཏེ…པེ… ཨུཔྤཱདེཏབྦ’’ནྟི ཨཝོཙ, ཏསྨཱ སོ ཐེརསྶ ཙིཏྟུཔྤཱདོ བྷགཝཏོ ན པཱསཾསོཏི ཀཏྭཱ མནོདུཙྩརིཏཾ ནཱམ ཛཱཏོ, ཏསྶ ཙ པཊིཀྑེཔོ ཨུཔཱརམྦྷོཏི ཨཱཧ ‘‘ཏསྨིཾ མནོདུཙྩརིཏེ ཨུཔཱརམྦྷཾ ཨཱརོཔེནྟོ’’ཏི. བྷགཝཏོ པན ཨེཏྟཀམྤི ནཏྠི, ཡཏོ པཝཱརཎཱསུཏྟེ ‘‘ཧནྡ དཱནི, བྷིཀྑཝེ, པཝཱརེམི ཝོ, ན ཙ མེ ཀིཉྩི གརཧཐ ཀཱཡིཀཾ ཝཱ ཝཱཙསིཀཾ ཝཱ’’ཏི (སཾ. ནི. ༡.༢༡༥) ཝུཏྟོ བྷིཀྑུསངྒྷོ ‘‘ན ཁོ མཡཾ བྷནྟེ བྷགཝཏོ ཀིཉྩི གརཧཱམ ཀཱཡིཀཾ ཝཱ ཝཱཙསིཀཾ ཝཱ’’ཏི སཏྠུ པརིསུདྡྷཀཱཡསམཱཙཱརཱདིཀཾ སིརསཱ སམྤཊིཙྪི. ཨཡཉྷི ལོཀནཱཐསྶ དུཙྩརིཏཱབྷཱཝོ བོདྷིསཏྟབྷཱུམིཡམྤི ཙརིཡཱཙིརཱནུགཏོ ཨཧོསི, པགེཝ བུདྡྷབྷཱུམིཡནྟི དསྶེནྟོ ‘‘ཨནཙྪརིཡཉྩེཏ’’ནྟིཨཱདིམཱཧ.

བུདྡྷཱནཾཡེཝ དྷམྨཱ གུཎཱ, ན ཨཉྙེསནྟི བུདྡྷདྷམྨཱ. ཏཐཱ ཧི ཏེ བུདྡྷཱནཾ ཨཱཝེཎིཀདྷམྨཱཏི ཝུཙྩནྟི. ཏཏྠ ‘‘ནཏྠི ཏཐཱགཏསྶ ཀཱཡདུཙྩརིཏ’’ནྟིཨཱདིནཱ ཀཱཡཝཙཱིམནོདུཙྩརིཏཱབྷཱཝཝཙནཾ ཡཐཱདྷིཀཱརཾ ཀཱཡཀམྨཱདཱིནཾ ཉཱཎཱནུཔརིཝཏྟིཏཱཡ ལདྡྷགུཎཀིཏྟནཾ, ན ཨཱཝེཎིཀདྷམྨནྟརདསྶནཾ. སབྦསྨིཉྷི ཀཱཡཀམྨཱདིཀེ ཉཱཎཱནུཔརིཝཏྟིནི ཀུཏོ ཀཱཡདུཙྩརིཏཱདཱིནཾ སམྦྷཝོ. ‘‘བུདྡྷསྶ ཨཔྤཊིཧཏཉཱཎ’’ནྟིཨཱདིནཱ ཝུཏྟཱནི སབྦཉྙུཏཉྙཱཎཏོ ཝིསུཾཡེཝ ¶ ཏཱིཎི ཉཱཎཱནི ཙཏུཡོནིཔཉྩགཏིཔརིཙྪེདཀཉཱཎཱནི ཝིཡཱ’’ཏི ཝདནྟི. ཨེཀཾཡེཝ ཧུཏྭཱ ཏཱིསུ ཀཱལེསུ ཨཔྤཊིཧཏཉཱཎཾ ནཱམ སབྦཉྙུཏཉྙཱཎམེཝ. ནཏྠི ཚནྡསྶ ཧཱནཱིཏི སཏྟེསུ ཧིཏཚནྡསྶ ཧཱནི ནཏྠི. ནཏྠི ཝཱིརིཡསྶ ¶ ཧཱནཱིཏི ཁེམཔཝིཝེཀཝིཏཀྐཱནུགཏསྶ ཝཱིརིཡསྶ ཧཱནི ནཏྠི. ‘‘ནཏྠི དཝཱཏི ཁིཌྜཱདྷིཔྤཱཡེན ཀིརིཡཱ ནཏྠི. ནཏྠི རཝཱཏི སཧསཱ ཀིརིཡཱ ནཏྠཱི’’ཏི ཝདནྟི, སཧསཱ པན ཀིརིཡཱ དཝཱ ‘‘ཨཉྙཾ ཀརིསྶཱམཱི’’ཏི ཨཉྙཀརཎཾ རཝཱ. ཁལིཏནྟི ཝིརཛ྄ཛྷནཾ ཉཱཎེན ཨཔྥུཊཾ. སཧསཱཏི ཝེགཱཡིཏཏྟཾ ཏུརིཏཀིརིཡཱ. ཨབྱཱཝཊོ མནོཏི ནིརཏྠཀོ ཙིཏྟསམུདཱཙཱརོ. ཨཀུསལཙིཏྟནྟི ཨཉྙཱཎུཔེཀྑམཱཧ, ཨཡཉྩ དཱིགྷབྷཱཎཀཱནཾ པཱཋོ ཨཱཀུལོ ཝིཡ. ཨཡཾ པན པཱཋོ ཨནཱཀུལོ –

ཨཏཱིཏཾསེ བུདྡྷསྶ བྷགཝཏོ ཨཔྤཊིཧཏཉཱཎཾ, ཨནཱགཏཾསེ, པཙྩུཔྤནྣཾསེ. ཨིམེཧི ཏཱིཧི དྷམྨེཧི སམནྣཱགཏསྶ བུདྡྷསྶ བྷགཝཏོ སབྦཾ ཀཱཡཀམྨཾ ཉཱཎཔུབྦངྒམཾ ཉཱཎཱནུཔརིཝཏྟི, སབྦཾ ཝཙཱིཀམྨཾ, སབྦཾ མནོཀམྨཾ. ཨིམེཧི ཚཧི དྷམྨེཧི སམནྣཱགཏསྶ བུདྡྷསྶ བྷགཝཏོ ནཏྠི ཚནྡསྶ ཧཱནི, ནཏྠི དྷམྨདེསནཱཡ, ནཏྠི ཝཱིརིཡསྶ, ནཏྠི སམཱདྷིསྶ ¶ , ནཏྠི པཉྙཱཡ, ནཏྠི ཝིམུཏྟིཡཱ. ཨིམེཧི དྭཱདསཧི དྷམྨེཧི སམནྣཱགཏསྶ བུདྡྷསྶ བྷགཝཏོ ནཏྠི དཝཱ, ནཏྠི རཝཱ, ནཏྠི ཨཔྥུཊཾ, ནཏྠི ཝེགཱཡིཏཏྟཾ, ནཏྠི ཨབྱཱཝཊམནོ, ནཏྠི ཨཔྤཊིསངྑཱནུཔེཀྑཱཏི.

ཏཏྠ ཨཔྤཊིསངྑཱནུཔེཀྑཱཏི ཨཉྙཱཎུཔེཀྑཱ. སེསཾ ཝུཏྟནཡམེཝ. ཨེཏྠ ཙ ཏཐཱགཏསྶ ཨཱཛཱིཝཔཱརིསུདྡྷིཾ ཀཱཡཝཙཱིམནོསམཱཙཱརཔཱརིསུདྡྷིཡཱཝ སངྒཧེཏྭཱ སམཱཙཱརཏྟཡཝསེན མཧཱཐེརེན ཏིཀོ དེསིཏོ.

ཀིཉྩནཱཏི ཀིཉྩིཀྑཱ. ཨིམེ པན རཱགཱདཡོ པལིབུནྡྷནཊྛེན ཀིཉྩནཱ ཝིཡཱཏི ཀིཉྩནཱ. ཏེནཱཧ ‘‘ཀིཉྩནཱཏི པལིབོདྷཱ’’ཏི.

ཨནུདཧནཊྛེནཱཏི ཨནུ ཨནུ དཧནཊྛེན. རཱགཱདཡོ ཨརཱུཔདྷམྨཱ ཨིཏྟརཀྑཎཱ ཀཐཾ ཨནུདཧནྟཱིཏི ཨཱསངྐཾ ནིཝཏྟེཏུཾ ‘‘ཏཏྠ ཝཏྠཱུནཱི’’ཏི ཝུཏྟཾ, དཊྛབྦཱནཱིཏི ཝཙནསེསོ. ཏཏྠཱཏི ཏསྨིཾ རཱགཱདཱིནཾ ཨནུདཧནཊྛེ. ཝཏྠཱུནཱིཏི སཱསནེ, ལོཀེ ཙ པཱཀཊཏྟཱ པཙྩཀྑབྷཱུཏཱནི ཀཱརཎཱནི. རཱགོ ¶ ཨུཔྤནྣོ ཏིཁིཎཀརོ ཧུཏྭཱ. ཏསྨཱ ¶ ཏཾསམུཊྛཱནཱ ཏེཛོདྷཱཏུ ཨཏིཝིཡ ཏིཁིཎབྷཱཝེན སདྡྷིཾ ཨཏྟནཱ སཧཛཱཏདྷམྨེཧི ཧདཡཔྤདེསཾ ཛྷཱཔེསི ཡཐཱ ཏཾ བཱཧིརཱ ཏེཛོདྷཱཏུ སནིསྶཡཾ. ཏེན སཱ བྷིཀྑུནཱི སུཔཏོ ཝིཡ བྱཱདྷི ཛྷཱཡིཏྭཱ མཏཱ. ཏེནཱཧ ‘‘ཏེནེཝ ཛྷཱཡིཏྭཱ ཀཱལམཀཱསཱི’’ཏི. དོསསྶ ནིསྶཡཱནཾ དཧནཏཱ པཱཀཊཱ ཨེཝཱཏི ཨིཏརཾ དསྶེཏུཾ ‘‘མོཧཝསེན ཧཱི’’ཏིཨཱདི ཝུཏྟཾ. ཨཏིཝཏྟིཏྭཱཏི ཨཏིཀྐམིཏྭཱ.

ཀཱམཾ ཨཱཧུནེཡྻགྒིཨཱདཡོ ཏཡོ ཨགྒཱི བྲཱཧྨཎེཧི ཨིཙྪིཏཱ སནྟི, ཏེ པན ཏེཧི ཨིཙྪིཏམཏྟཱ, ན སཏྟཱནཾ ཏཱདིསཱ ཨཏྠསཱདྷཀཱ. ཡེ པན སཏྟཱནཾ ཨཏྠསཱདྷཀཱ, ཏེ དསྶེཏུཾ ‘‘ཨཱཧུནཾ ཝུཙྩཏཱི’’ཏིཨཱདི ཝུཏྟཾ. ཏཏྠ ཨཱདརེན ཧུནནཾ པཱུཛནཾ ཨཱཧུནནྟི སཀྐཱརོ ‘‘ཨཱཧུན’’ནྟི ཝུཙྩཏི, ཏཾ ཨཱཧུནཾ ཨརཧནྟི. ཏེནཱཧ བྷགཝཱ ‘‘ཨཱཧུནེཡྻཱཏི བྷིཀྑཝེ མཱཏཱཔིཏཱུནམེཏཾ ཨདྷིཝཙན’’ནྟི (ཨིཏིཝུ. ༡༠༦). ཡདགྒེན ཙ ཏེ པུཏྟཱནཾ བཧུཀཱརཏཱཡ ཨཱཧུནེཡྻཱཏི ཏེསུ སམྨཱཔཊིཔཏྟི ནེསཾ ཧིཏསུཁཱཝཧཱ, ཏདགྒེན ཏེསུ མིཙྪཱཔཊིཔཏྟི ཨཧིཏདུཀྑཱཝཧཱཏི ཨཱཧ ‘‘ཏེསུ…པེ… ནིབྦཏྟནྟཱི’’ཏི. སྭཱཡམཏྠོཏི ཡོ མཱཏཱཔིཏཱུནཾ ཨཏྟནོ ཨུཔརི ཝིཔྤཊིཔནྣཱནཾ པུཏྟཱནཾ ཨནུདཧནསྶ པཙྩཡབྷཱཝེན ཨནུདཧནཊྛོ, སོ ཨཡམཏྠོ. མིཏྟཝིནྡཀཝཏྠུནཱཏི མིཏྟཝིནྡཀསྶ ནཱམ མཱཏརི ཝིཔྤཊིཔནྣསྶ པུརིསསྶ ཏཱཡ ཨེཝ ཝིཔྤཊིཔཏྟིཡཱ ཙིརཏརཾ ཀཱལཾ ཨཱཔཱཡིཀདུཀྑཱནུབྷཝནདཱིཔནེན ཝཏྠུནཱ ཝེདིཏབྦོ.

ཨིདཱནི ¶ ཏམཏྠཾ ཀསྶཔསྶ བྷགཝཏོ ཀཱལེ པཝཏྟཾ ཝིབྷཱཝེཏུཾ ‘‘མིཏྟཝིནྡཀོ ཧཱི’’ཏིཨཱདི ཝུཏྟཾ. དྷནལོབྷེན, ན ¶ དྷམྨཙྪནྡེནཱཏི ཨདྷིཔྤཱཡོ. ཨཀུཏོབྷཡཾ ཀེནཙི ཨནུཊྛཱཔནཱིཡཏཱཡ. ནིཝཱརེསི སམུདྡཔཡཱཏཱ ནཱམ བཧྭནྟརཱཡཱཏི ཨདྷིཔྤཱཡེན. ཨནྟརཾ ཀཏྭཱཏི ཨཏིཀྐམནཝསེན དྭིནྣཾ པཱདཱནཾ ཨནྟརེ ཀཏྭཱ.

ནཱཝཱ ཨཊྛཱསི ཏསྶ པཱཔཀམྨབལེན ཝཱཏསྶ ཨཝཱཡནཏོ. ཨེཀདིཝསཾ རཀྑིཏཨུཔོསཐཀམྨཱནུབྷཱཝེན སམྤཏྟིཾ ཨནུབྷཝནྟོ. ཡཐཱ པུརིམཱཧི པརཏོ མཱ ཨགམཱསཱིཏི ཝུཏྟོ, ཨེཝཾ ཨཔརཱཔརཱཧིཔཱིཏི ཨཱཧ ‘‘ཏཱཧི ‘པརཏོ པརཏོ མཱ ཨགམཱསཱི’ཏི ཝུཙྩམཱནོ’’ཏི. ཁུརཙཀྐདྷརནྟི ཁུརདྷཱརཱུཔམཙཀྐདྷརཾ ཨེཀཾ པུརིསཾ. ཨུཔཊྛཱསི པཱཔཀམྨསྶ བལེན.

ཙཏུབྦྷཱིཏི ¶ ཙཏཱུཧི ཨཙྪརཱསདིསཱིཧི ཝིམཱནཔེཏཱིཧི, སམྤཏྟིཾ ཨནུབྷཝིཏྭཱཏི ཝཙནསེསོ. ཨཊྛཛ྄ཛྷགམཱཏི རཱུཔཱདིཀཱམགུཎེཧི ཏཏོ ཝིསིཊྛཏརཱ ཨཊྛ ཝིམཱནཔེཏིཡོ ཨདྷིགཙྪི. ཨཏྲིཙྪནྟི ཨཏྲིཙྪཱསངྑཱཏེན ཨཏིལོབྷེན སམནྣཱགཏཏྟཱ ཨཏྲ ཨཏྲ ཀཱམགུཎེ ཨིཙྪནྟོ. ཙཀྐནྟི ཁུརཙཀྐཾ. ཨཱསདོཏི ཨནཏྠཱཝཧབྷཱཝེན ཨཱསཱདེཏི.

སོཏི གེཧསཱམིཀོ བྷཏྟཱ. པུརིམནཡེནེཝཱཏི ཨནུདཧནསྶ པཙྩཡཏཱཡ.

ཨཏིཙཱརིནཱིཏི སཱམིཀཾ ཨཏིཀྐམིཏྭཱ ཙཱརིནཱི མིཙྪཱཙཱརིནཱི. རཏྟིཾ དུཀྑནྟི ཨཏྟནོ པཱཔཀམྨཱནུབྷཱཝསམུཔཊྛིཏེན སུནཁེན ཁཱདིཏབྦཏཱདུཀྑཾ. ཝཉྩེཏྭཱཏི ཏཾ ཨཛཱནཱཔེཏྭཱཝ ཀཱརཎཊྛཱནགམནཾ སནྡྷཱཡ ཝུཏྟཾ. པཊཔཊནྟཱིཏི པཊཔཊཱ ཀཏྭཱ. ཨནུརཝདསྶནཉྷེཏཾ. མུཊྛིཡོགོ ཀིརཱཡཾ ཏསྶ སུནཁནྟརདྷཱནསྶ, ཡདིདཾ ཁེལ༹པིཎྜཾ བྷཱུམིཡཾ ནིཊྛུབྷིཏྭཱ པཱདེན གྷཾསནཾ. ཏེན ཝུཏྟཾ ‘‘སོ ཏཐཱ ཨཀཱསི. སུནཁཱ ཨནྟརདྷཱཡིཾསཱུ’’ཏི.

དཀྑིཎཱཏི ¶ ཙཏྟཱརོ པཙྩཡཱ དིཡྻམཱནཱ དཀྑནྟི ཨེཏེཧི ཧིཏསུཁཱནཱིཏི. ཏཾ དཀྑིཎཾ ཨརཧཏཱིཏི དཀྑིཎེཡྻོ, བྷིཀྑུསངྒྷོ. རེཝཏཱིཝཏྠུ ཝིམཱནཝཏྠུཔེཏཝཏྠཱུསུ (ཝི. ཝ. ༨༦༡ ཨཱདཡོ) ཏེསཾ ཨཊྛཀཐཱཡཉྩ (ཝི. ཝ. ༩༧༧-༩༨༠; པེ. ཝ. ཨཊྛ. ༧༡༤-༧༣༦) ཨཱགཏནཡེན ཝེདིཏབྦཾ.

‘‘ཏིཝིདྷེན རཱུཔསངྒཧོ’’ཏི ཨེཏྠ ནནུ སངྒཧོ ཨེཀཝིདྷོཝ, སོ ཀསྨཱ ‘‘ཙཏུབྦིདྷོ’’ཏི ཝུཏྟོཏི? ‘‘སངྒཧོ’’ཏི ཨཏྠཾ ཨཝཏྭཱ ཨནིདྡྷཱརིཏཏྠསྶ སདྡསྶེཝ ཝུཏྟཏྟཱ. ‘‘ཏིཝིདྷེན རཱུཔསངྒཧོ’’ཏིཨཱདཱིསུ (དྷ. ས. རཱུཔཀཎྜ-ཏིཀེ) པདེསུ སངྒཧ-སདྡོ ཏཱཝ ཨཏྟནོ ཨཏྠཝསེན ཙཏུབྦིདྷོཏི ཨཡཉྷེཏྠ ཨཏྠོ. ཨཏྠོཔི ཝཱ ཨནིདྡྷཱརིཏཝིསེསོ སཱམཉྙེན གཧེཏབྦཏཾ པཏྟོ ‘‘ཏིཝིདྷེན རཱུཔསངྒཧོ’’ཏིཨཱདཱིསུ ¶ (དྷ. ས. རཱུཔཀཎྜ-ཏིཀེ) ‘‘སངྒཧོ’’ཏི ཝུཏྟོཏི ན ཀོཙི དོསོ. ནིདྡྷཱརིཏེ ཧི ཝིསེསེ ཏསྶ ཨེཀཝིདྷཏཱ སིཡཱ, ན ཏཏོ པུབྦེཏི. ‘‘ཛཱཏིསངྒཧོ’’ཏི ཝུཏྟེཔི ཛཱཏི-སདྡསྶ སཱཔེཀྑསདྡཏྟཱ ཨཏྟནོ ཛཱཏིཡཱ སངྒཧོཏི ཨཡམཏྠོ ཝིཉྙཱཡཏེཝ སམྦནྡྷཱརཧསྶ ཨཉྙསྶ ཨཝུཏྟཏྟཱ ཡཐཱ ‘‘མཱཏཱཔིཏུ ཨུཔཊྛཱན’’ནྟི ¶ (ཁུ. པཱ. ༥.༦; སུ. ནི. ༢༦༥). ཨཊྛཀཐཱཡཾ པན ཡཐཱདྷིཔྤེཏམཏྠཾ ཨཔརིཔུཎྞཾ ཀཏྭཱ དསྶེཏུཾ ‘‘ཛཱཏིསངྒཧོ’’ ཨིཙྩེཝ ཝུཏྟཾ. སམཱནཛཱཏིཀཱནཾ སངྒཧོ, སམཱནཛཱཏིཡཱ ཝཱ སངྒཧོ སཛཱཏིསངྒཧོ. སཉྫཱཡཏི ཨེཏྠཱཏི སཉྫཱཏི, སཉྫཱཏིཡཱ སངྒཧོ སཉྫཱཏིསངྒཧོ, སཉྫཱཏིདེསེན སངྒཧོཏི ཨཏྠོ. ཀིརིཡཱཡ ཨེཝརཱུཔཱཡ སངྒཧོ ཀིརིཡཱསངྒཧོ. རཱུཔཀྑནྡྷགཎནནྟི ‘‘རཱུཔཀྑནྡྷོ’’ཏི གཎནཾ སངྑྱཾ གཙྪཏི རུཔྤནསབྷཱཝཏྟཱ. ཏཱིཧི ཀོཊྛཱསེཧི རཱུཔགཎནཱཏི ཝཀྑམཱནེཧི ཏཱིཧི བྷཱགེཧི རཱུཔསྶ སངྒཧོ, གཎེཏབྦཏཱཏི ཨཏྠོ.

རཱུཔཱཡཏནཾ ནིཔསྶཏི པཙྩཀྑཏོ ཝིཛཱནཱཏཱིཏི ནིདསྶནཾ ¶ , ཙཀྑུཝིཉྙཱཎཾ, ནིདསྶཏཱིཏི ཝཱ ནིདསྶནཾ, དཊྛབྦབྷཱཝོ, ཙཀྑུཝིཉྙཱཎསྶ གོཙརབྷཱཝོ, ཏསྶ ཙ རཱུཔཱཡཏནཏོ ཨནཉྙཏྟེཔི ཨཉྙེཧི དྷམྨེཧི རཱུཔཱཡཏནཾ ཝིསེསེཏུཾ ཨཉྙཾ ཝིཡ ཀཏྭཱ ‘‘སཧ ནིདསྶནེནཱཏི སནིདསྶན’’ནྟི ཨེཝམེཏྠ ཨཏྠོ ཝེདིཏབྦོ. དྷམྨསབྷཱཝསཱམཉྙེན ཧི ཨེཀཱིབྷཱུཏེསུ དྷམྨེསུ ཡོ ནཱནཏྟཀརོ སབྷཱཝོ, སོ ཨཉྙོ ཝིཡ ཀཏྭཱ ཨུཔཙརིཏུཾ ཡུཏྟོ. ཨེཝཉྷི ཨཏྠཝིསེསཱཝབོདྷོ ཧོཏཱིཏི. ཙཀྑུཔཊིཧནནསམཏྠཏོཏི ཙཀྑུནོ གྷཊྚནསམཏྠཏཱཡ. གྷཊྚནཾ ཝིཡ ཙ གྷཊྚནཾ དཊྛབྦཾ. དུཏིཡེན ཨཏྠཝིཀཔྤེན དཊྛབྦབྷཱཝསངྑཱཏཾ ནཱསྶ ནིདསྶནནྟི ཨནིདསྶནནྟི ཡོཛནཱ. ཨེཏྠ ཙ དསནྣཾ ཨཱཡཏནཱནཾ ཡཐཱརཧཾ སཡཾ, ནིསྶཡཝསེན ཙ སམྤཏྟཱནཾ, ཨསམྤཏྟཱནཉྩ པཊིམུཁབྷཱཝོ ཨཉྙམཉྙཔཏནཾ པཊིཧནནཾ, ཡེན བྱཱཔཱརཱདིཝིཀཱརཔཙྩཡནྟརསནྣིདྷཱནེ ཙཀྑཱདཱིནཾ ཝིསཡེསུ ཝིཀཱརུཔྤཏྟི. ཏཏྠ བྱཱཔཱརོ ཙཀྑཱདཱིནཾ སཝིསཡེསུ ཨཱཝིཙྪནྣཾ, རཱུཔཱདཱིནཾ ཨིཊྛཱནིཊྛཏཱ, ཏཏྠ ཙ ཙིཏྟསྶ ཨཱབྷུཛནནྟི ཨིམེ ཨཱདིསདྡསངྒཧིཏཱ. ཏེཧི ཝིཀཱརཔྤཏྟིཡཱ པཙྩཡནྟརབྱཱཔཱརཏོ ཨཉྙནྟི ཀཏྭཱ ཨནུགྒཧཱུཔགྷཱཏོ ཝིཀཱརོ. ཨུཔནིསྶཡོ པན ཨཔྤདྷཱནསྶ པཙྩཡོ ཨིདྷ གཧིཏོ. ཀཱརཎཀཱརཎམྤི ཀཱརཎམེཝཱཏི གཡ྄ཧམཱནེ སིཡཱ ཏསྶཱཔི སངྒཧོཏི. ཝུཏྟཔྤཀཱརནྟི ‘‘ཙཀྑུཝིཉྙཱཎསངྑཱཏ’’ནྟི ཝུཏྟཔྤཀཱརཾ. ནཱསྶ པཊིགྷོཏི ཨེཏྠཱཔི ¶ ‘‘ཝུཏྟཔྤཀཱར’’ནྟི ཨཱནེཏྭཱ སམྦནྡྷོ. ཨཝསེསཾ སོལ༹སཝིདྷཾ སུཁུམརཱུཔཾ.

སངྑརོནྟཱིཏི ¶ སམྤིཎྜེནྟི. ཙེཏནཱ ཧི ཨཱཡཱུཧནརསཏཱཡ ཡཐཱ སམྤཡུཏྟདྷམྨེ ཡཐཱསཀཾ ཀིཙྩེསུ སཾཝིདཧནྟཱི ཝིཡ ཨབྷིསནྡཧནྟཱི ཝཏྟམཱནཱ ¶ ཏེནེཝ ཀིཙྩཝིསེསེན ཏེ སམྤིཎྜེནྟཱི ཝིཡ ཧོཏི, ཨེཝཾ ཨཏྟནོ ཝིཔཱཀདྷམྨེཔི པཙྩཡསམཝཱཡེ སངྑརོནྟཱི སམྤིཎྜེནྟཱི ཝིཡ ཧོཏི. ཏེནཱཧ ‘‘སཧཛཱཏ…པེ… རཱསཱི ཀརོནྟཱི’’ཏི. ཨབྷིསངྑརོཏཱིཏི ཨབྷིཝིསིཊྛཾ ཀཏྭཱ སངྑརོཏི. པུཉྙཱབྷིསངྑཱརོ ཧི ཨཏྟནོ ཕལཾ ཨིཏརསྶ ཕལཏོ ཨཏིཝིཡ ཝིསིཊྛཾ བྷིནྣཾ ཀཏྭཱ སངྑརོཏི པཙྩཡཏོ, སབྷཱཝཏོ, པཝཏྟིཨཱཀཱརཏོ ཙ སཡཾ ཨིཏརེཧི ཝིསིཊྛསབྷཱཝཏྟཱ. ཨེས ནཡོ ཨིཏརེཧིཔི. པུཛྫབྷཝཕལནིབྦཏྟནཏོ, ཨཏྟནོ སནྟཱནསྶ པུནནཏོ ཙ པུཉྙོ.

མཧཱཙིཏྟཙེཏནཱནནྟི ཨསངྑྱེཡྻཱཡུནིཔྥཱདནཱདིམཧཱནུབྷཱཝཏཱཡ མཧཱཙིཏྟེསུ པཝཏྟཙེཏནཱནཾ. ཨཊྛེཝ ཙེཏནཱ ཧོནྟི, ཡཱ ཀཱམཱཝཙརཱ ཀུསལཱ. ‘‘ཏེརསཔཱི’’ཏི ཀསྨཱ ཝུཏྟཾ, ནནུ ‘‘ནཝཱ’’ཏི ཝཏྟབྦཾ. ན ཧི བྷཱཝནཱ ཉཱཎརཧིཏཱ ཡུཏྟཱཏི ཨནུཡོགཾ སནྡྷཱཡཱཧ ‘‘ཡཐཱ ཧཱི’’ཏིཨཱདི. ཀསིཎཔརིཀམྨཾ ཀརོནྟསྶཱཏི ཀསིཎེསུ ཛྷཱནཔརིཀམྨཾ ཀརོནྟསྶ. ‘‘པཐཝཱི པཐཝཱི’’ཏིཨཱདི བྷཱཝནཱ ཧི ཀསིཎཔརིཀམྨཾ. ཏསྶ ཧི པརིཀམྨསྶ སུཔགུཎབྷཱཝཏོ ཨནུཡུཏྟསྶ ཏཏྠ ཨཱདརཱཀརཎེན སིཡཱ ཉཱཎརཧིཏཙིཏྟཾ. ཛྷཱནཔཙྩཝེཀྑཎཱཡཔི ཨེསེཝ ནཡོ. ཀེཙི མཎྜལཀརཎམྤི བྷཱཝནཾ བྷཛཱཔེནྟི.

དཱནཝསེན པཝཏྟཙིཏྟཙེཏསིཀདྷམྨཱ དཱནཾ, ཏཏྠ བྱཱཔཱརབྷཱུཏཱ ཨཱཡཱུཧནཙེཏནཱ དཱནཾ ཨཱརབྦྷ, དཱནཉྩ ཨདྷིཀིཙྩ ཨུཔྤཛྫཏཱིཏི ཝུཏྟཱ. ཨེཝཾ ཨིཏརེསུཔི. ཨཡཾ སངྑེཔདེསནཱཏི ཨཡཾ པུཉྙཱབྷིསངྑཱརེ སངྑེཔཏོ ཨཏྠདེསནཱ, ཨཏྠཝཎྞནཱཏི ཨཏྠོ.

སོམནསྶཙིཏྟེནཱཏི ¶ ཨནུམོདནཱཔཝཏྟིདསྶནམཏྟམེཏཾ དཊྛབྦཾ. ཨུཔེཀྑཱསཧགཏེནཱཔི ཧི ཨནུསྶརཏི ཨེཝཱཏི. ཀཱམཾ ནིཙྩསཱིལཾ, ཨུཔོསཐསཱིལཾ, ནིཡམསཱིལམྤི སཱིལམེཝ, པརིཔུཎྞཾ པན སབྦངྒསམྤནྣཾ སཱིལཾ དསྶེཏུཾ ‘‘སཱིལཔཱུརཎཏྠཱཡཱ’’ཏིཨཱདི ཝུཏྟཾ. ནཡདསྶནཾ ཝཱ ཨེཏཾ, ཏསྨཱ ‘‘ནིཙྩསཱིལཾ, ཨུཔོསཐསཱིལཾ, ནིཡམསཱིལཾ སམཱདིཡིསྶཱམཱི’’ཏི ཝིཧཱརཾ གཙྪནྟསྶ, སམཱདིཡིཏྭཱ སམཱདིནྣསཱིལེ ཙ ཏསྨིཾ, ‘‘སཱདྷུ སུཊྛཱུ’’ཏི ཨཱཝཛྫནྟསྶ, ཏཾ སཱིལཾ སོདྷེནྟསྶ ཙ པཝཏྟཱ ཙེཏནཱ སཱིལམཡཱཏི ཨེཝམེཏྠ ཡོཛནཱ ཝེདིཏབྦཱ.

པུབྦེ ¶ སམཐཝསེན བྷཱཝནཱནཡོ གཧིཏོཏི ཨིདཱནི སམྨསནནཡེན ཏཾ དསྶེཏུཾ ‘‘པཊིསམྦྷིདཱཡཾ ཝུཏྟེནཱ’’ཏིཨཱདི ཝུཏྟཾ. ཏཏྠ ཨནིཙྩཏོཏི ཨནིཙྩབྷཱཝཏོ. དུཀྑཏོ, ཨནཏྟཏོཏི ཨེཏྠཱཔི ཨེསེཝ ནཡོ.

ཏཏྠ ¶ ཡེ པཉྩུཔཱདཱནཀྑནྡྷཱ ནཱམརཱུཔབྷཱཝེན པརིགྒཧིཏཱ, ཏེ ཡསྨཱ དྭཱརཱརམྨཎེཧི སདྡྷིཾ དྭཱརཔྤཝཏྟདྷམྨཝསེན ཝིབྷཱགཾ ལབྷནྟི, ཏསྨཱ དྭཱརཚཀྐཱདིཝསེན ཚ ཚཀྐཱ གཧིཏཱ. ཡསྨཱ པན ལཀྑཎེསུ ཨནཏྟལཀྑཎཾ དུབྦིབྷཱཝཾ, ཏསྨཱ ཏསྶ ཝིབྷཱཝནཱཡ ཚ དྷཱཏུཡོ གཧིཏཱ. ཏཏོ ཡེསུ ཀསིཎེསུ ཨིཏོ བཱཧིརཀཱནཾ ཨཏྟཱབྷིནིཝེསོ, ཏཱནི ཨིམེསཾ ཛྷཱནཱནཾ ཨཱརམྨཎབྷཱཝེན ཨུཔཊྛཱནཱཀཱརམཏྟཱནི, ཨིམཱནི པན ཏཱནི ཛྷཱནཱནཱིཏི དསྶནཏྠཾ དས ཀསིཎཱནི གཧིཏཱནི. ཏཏོ དུཀྑཱནུཔསྶནཱཡ པརིཝཱརབྷཱཝེན པཊིཀྐཱུལཱཀཱརཝསེན དྭཏྟིཾས ཀོཊྛཱསཱ གཧིཏཱ. པུབྦེ ཁནྡྷཝསེན སངྑེཔཏོ ཨིམེ དྷམྨཱ གཧིཏཱ, ཨིདཱནི ནཱཏིསངྑེཔཝིཏྠཱརནཡེན ཙ མནསི ཀཱཏབྦཱཏི དསྶནཏྠཾ དྭཱདསཱཡཏནཱནི, ཨཊྛཱརས དྷཱཏུཡོ ཙ གཧིཏཱ. ཏེསུ ཨིམེ དྷམྨཱ སཏིཔི སུཉྙཱནིརཱིཧཨབྱཱཔཱརབྷཱཝེ དྷམྨསབྷཱཝཏོ ¶ ཨཱདྷིཔཙྩབྷཱཝེན པཝཏྟནྟཱིཏི ཨནཏྟབྷཱཝཝིབྷཱཝནཏྠཾ ཨིནྡྲིཡཱནི གཧིཏཱནི. ཨེཝཾ ཨནེཀབྷེདབྷིནྣཱཔི ཨིམེ དྷམྨཱ བྷཱུམིཏྟཡཔརིཡཱཔནྣཏཱཡ ཏིཝིདྷཱཝ ཧོནྟཱིཏི དསྶནཏྠཾ ཏིསྶོ དྷཱཏུཡོ གཧིཏཱ. ཨེཏྟཱཝཏཱ ནིམིཏྟཾ དསྶེཏྭཱ པཝཏྟཾ དསྶེཏུཾ ཀཱམབྷཝཱདཡོ ནཝ བྷཝཱ གཧིཏཱ. ཨེཏྟཀེ ཨབྷིཉྙེཡྻཝིསེསེ པཝཏྟམནསིཀཱརཀོསལླེན སཎྷསུཁུམེསུ ནིབྦཏྟིཏམཧགྒཏདྷམྨེསུ མནསིཀཱརོ པཝཏྟེཏབྦོཏི དསྶནཏྠཾ ཛྷཱནཨཔྤམཉྙཱརཱུཔཱནི གཧིཏཱནི. ཏཏྠ ཛྷཱནཱནི ནཱམ ཝུཏྟཱཝསེསཱརམྨཎཱནི རཱུཔཱཝཙརཛ྄ཛྷཱནཱནི. པུན པཙྩཡཔཙྩཡུཔྤནྣཝིབྷཱགཏོ ཨིམེ དྷམྨཱ ཝིབྷཛྫ མནསིཀཱཏབྦཱཏི དསྶནཏྠཾ པཊིཙྩསམུཔྤཱདངྒཱནི གཧིཏཱནི. པཙྩཡཱཀཱརམནསིཀཱརོ ཧི སུཁེན, སུཊྛུཏརཉྩ ལཀྑཎཏྟཡཾ ཝིབྷཱཝེཏི, ཏསྨཱ སོ པཙྪཏོ གཧིཏོ. ཨེཝཾ ཨེཏེ སམྨསནཱིཡབྷཱཝེན གཧིཏཱ ཁནྡྷཱདིཝསེན ཀོཊྛཱསཏོ པཉྩཝཱིསཏིཝིདྷཱ, པབྷེདཏོ པན ཨཏཱིཏཱདིབྷེདཾ ཨནཱམསིཏྭཱ གཡ྄ཧམཱནཱ དྭཱིཧི ཨཱུནཱནི དྭེསཏཱནི ཧོནྟི. ཨིདཾ ཏཱཝེཏྠ པཱལི༹ཝཝཏྠཱནཾ, ཨཏྠཝིཙཱརཾ པན ཨིཙྪནྟེཧི པརམཏྠམཉྫཱུསཱཡཾ ཝིསུདྡྷིམགྒསཾཝཎྞནཱཡཾ ཝུཏྟནཡེནེཝ ཝེདིཏབྦཾ.

ན ¶ པུཉྙོཏི ཨཔུཉྙོ. ཏསྶ པུཉྙ-སདྡེ ཝུཏྟཝིཔརིཡཱཡེན ཨཏྠོ ཝེདིཏབྦོ. སནྟཱནསྶ ཨིཉྫནཧེཏཱུནཾ ནཱིཝརཎཱདཱིནཾ སུཝིཀྑམྦྷནཏོ རཱུཔཏཎྷཱསངྑཱཏསྶ ཨིཉྫིཏསྶ ཨབྷཱཝཏོ ཨནིཉྫཾ, ཨནིཉྫམེཝ ‘‘ཨཱནེཉྫ’’ནྟི ཝུཏྟཾ. ཏཐཱ ཧི རཱུཔཱརམྨཎཾ རཱུཔནིམིཏྟཱརམྨཎཾ སབྦམྤི ཙཏུཏྠཛ྄ཛྷཱནཾ ནིཔྤརིཡཱཡེན ‘‘ཨཱནེཉྫ’’ནྟི ཝུཙྩཏི.

ཙཏྟཱརོ མགྒཊྛཱ, ཧེཊྛིམཱ ཏཡོ ཕལཊྛཱཏི ཨེཝཾ སཏྟཝིདྷོ. ཏིསྶོ སིཀྑཱཏི ཨདྷིསཱིལཱདིཀཱ ཏིསྶོ སིཀྑཱ. ཏཱསུ ཛཱཏོཏི ཝཱ སེཀྑོ, ཨརིཡཔུགྒལོ ཧི ཨརིཡཱཡ ཛཱཏིཡཱ ཛཱཡམཱནོ སིཀྑཱསུ ཛཱཡཏི, ན ཡོནིཡཾ. སིཀྑནསཱིལོཏི ¶ ཝཱ སེཀྑོ. པུགྒལཱདྷིཊྛཱནཱཡ ཝཱ ཀཐཱཡ སེཀྑསྶ ཨཡནྟི ཨཉྙཱསཱདྷཱརཎམགྒཕལཏྟཡདྷམྨཱ སེཀྑཔརིཡཱཡེན ¶ ཝུཏྟཱ. ཨསེཀྑོཏི ཙ ཡཏྠ སེཀྑབྷཱཝཱསངྐཱ ཨཏྠི, ཏཏྠཱཡཾ པཊིསེདྷོཏི ལོཀིཡནིབྦཱནེསུ ཨསེཀྑབྷཱཝནཱཔཏྟི དཊྛབྦཱ. སཱིལསམཱདྷིཔཉྙཱསངྑཱཏཱ ཧི སིཀྑཱ ཨཏྟནོ པཊིཔཀྑཀིལེསེཧིཝིཔྤམུཏྟཱ པརིསུདྡྷཱ ཨུཔཀྐིལེསཱནཾ ཨཱརམྨཎབྷཱཝམྤི ཨནུཔགམནཏོ ཨེཏཱ ‘‘སིཀྑཱ’’ཏི ཝཏྟུཾ ཡུཏྟཱ ཨཊྛསུཔི མགྒཕལེསུ ཝིཛྫནྟི, ཏསྨཱ ཙཏུམགྒཧེཊྛིམཕལཏྟཡསམངྒིནོ ཝིཡ ཨརཧཏྟཕལསམངྒཱིཔི ཏཱསུ སིཀྑཱསུ ཛཱཏོཏི ཙ ཏཾསམངྒིནོ ཨརཧཏོ ཨིཏརེསཾ ཝིཡ སེཀྑཏྟེ སཏི སེཀྑསྶ ཨཡནྟི ཙ སིཀྑཱ སཱིལཾ ཨེཏསྶཱཏི ཙ ‘‘སེཀྑོ’’ཏི ཝཏྟབྦོ སིཡཱཏི ཏནྣིཝཏྟནཏྠཾ ཨསེཀྑོཏི ཡཐཱཝུཏྟསེཀྑབྷཱཝཔཊིསེདྷོ ཀཏོ. ཨརཧཏྟཕལེ ཧི པཝཏྟམཱནཱ སིཀྑཱ པརིནིཊྛིཏསིཀྑཱཀིཙྩཏྟཱ ན སིཀྑཱཀིཙྩཾ ཀརོནྟི, ཀེཝལཾ སིཀྑཱཕལབྷཱཝེནེཝ པཝཏྟནྟི, ཏསྨཱ ན ཏཱ སིཀྑཱཝཙནཾ ཨརཧནྟི, ནཱཔི ཏཾསམངྒཱི སེཀྑཝཙནཾ, ན ཙ ‘‘སིཀྑནསཱིལོ, སིཀྑཱསུ ཛཱཏོ’’ཏི ཙ ཝཏྟབྦཏཾ ཨརཧཏི. ཧེཊྛིམཕལེསུ པན སིཀྑཱ སཀདཱགཱམིམགྒཝིཔསྶནཱདཱིནཾ ཨུཔནིསྶཡབྷཱཝཏོ སིཀྑཱཀིཙྩཾ ཀརོནྟཱིཏི སིཀྑཱཝཙནཾ ཨརཧནྟི, ཏཾསམངྒིནོ ཙ སེཀྑཝཙནཾ, ‘‘སིཀྑནསཱིལཱ, སིཀྑཱསུ ཛཱཏཱ’’ཏི ཙ ཝཏྟབྦཏཾ ཨརཧནྟི.

‘‘སིཀྑཏཱིཏི སེཀྑོ’’ཏི ཙ ཨཔརིཡོསིཏསིཀྑོ དསྶིཏོཏི. ཨནནྟརམེཝ ‘‘ཁཱིཎཱསཝོ’’ཏི ཨཱདིཾ ཝཏྭཱ ‘‘ན སིཀྑཏཱིཏི ཨསེཀྑོ’’ཏི ཝུཏྟཏྟཱ པརིཡོསིཏསིཀྑོ དསྶིཏོ, ན སིཀྑཱརཧིཏོ ཏསྶ ཏཏིཡཔུགྒལབྷཱཝེན གཧིཏཏྟཱ. ཝུདྡྷིཔྤཏྟསིཀྑོ ཝཱ ཨསེཀྑོཏི ཨེཏསྨིཾ ¶ ཨཏྠེ སེཀྑདྷམྨེསུ ¶ ཨེཝ ཋིཏསྶ ཀསྶཙི ཨརིཡསྶ ཨསེཀྑབྷཱཝཱཔཏྟཱིཏི ཨརཧཏྟམགྒདྷམྨཱ ཝུདྡྷིཔྤཏྟཱ, ཡཐཱཝུཏྟེཧི ཙ ཨཏྠེཧི སེཀྑོཏི ཀཏྭཱ ཏཾསམངྒིནོ ཨགྒམགྒཊྛསྶ ཨསེཀྑབྷཱཝོ ཨཱཔནྣོཏི? ན ཏཾསདིསེསུ ཏབྦོཧཱརཏོ. ཨརཧཏྟམགྒཏོ ཧི ནིནྣཱནཱཀརཎཾ ཨརཧཏྟཕལཾ ཋཔེཏྭཱ པརིཉྙཱདིཀིཙྩཀརཎཾ, ཝིཔཱཀབྷཱཝཉྩ, ཏསྨཱ ཏེ ཨེཝ སེཀྑདྷམྨཱ ‘‘ཨགྒཕལདྷམྨབྷཱཝཾ ཨཱཔནྣཱ’’ཏི སཀྐཱ ཝཏྟུཾ, ཀུསལསུཁཏོ ཙ ཝིཔཱཀསུཁཾ སནྟཏརཏཱཡ པཎཱིཏཏརནྟི, ཝུདྡྷིཔྤཏྟཱ ཙ ཏེ དྷམྨཱ ཧོནྟཱིཏི ཏཾསམངྒཱི ‘‘ཨསེཀྑོ’’ཏི ཝུཙྩཏཱིཏི.

ཛཱཏིམཧལླཀོཏི ཛཱཏིཡཱ ཝུཌྜྷཏརོ ཨདྡྷགཏོ ཝཡོཨནུཔྤཏྟོ. སོ ཧི རཏྟཉྙུཏཱཡ ཡེབྷུཡྻེན ཛཱཏིདྷམྨཀུལདྷམྨཔདེསུ ཐཱཝརིཡཔྤཏྟིཡཱ ཛཱཏིཐེརོ ནཱམ. ཐེརཀརཎཱ དྷམྨཱཏི སཱསནེ ཐིརབྷཱཝཀརཱ གུཎཱ པཊིཔཀྑནིམྨདནཀཱ. ཐེརོཏི ཝཀྑམཱནེསུ དྷམྨེསུ ཐིརབྷཱཝཔྤཏྟོ. སཱིལཝཱཏི པཱསཾསེན སཱཏིསཡེན སཱིལེན སམནྣཱགཏོ, སཱིལསམྤནྣོཏི ཨཏྠོ, ཨེཏེན དུསྶཱིལྱསངྑཱཏསྶ ¶ བཱལྱསྶ ཨབྷཱཝམཱཧ. སུཏྟགེཡྻཱདི བཧུ སུཏཾ ཨེཏེནཱཏི བཧུསྶུཏོ, ཨེཏེནཱསྶ སུཏཝིརཧསངྑཱཏསྶ བཱལྱསྶ ཨབྷཱཝཾ, པཊིསངྑཱནབལེན ཙ པཏིཊྛིཏབྷཱཝཾ ཝདཏི. ‘‘ཙཏུནྣཾ ཛྷཱནཱནཾ ལཱབྷཱི’’ཏི ཨིམིནཱ ནཱིཝརཎཱདིསངྑཱཏསྶ བཱལྱསྶ ཨབྷཱཝཾ, བྷཱཝནཱབལེན ཙ པཏིཊྛིཏབྷཱཝཾ ཀཐེཏི. ‘‘ཨཱསཝཱནཾ ཁཡཱ’’ཏིཨཱདིནཱ ཨཝིཛྫཱསངྑཱཏསྶ བཱལྱསྶ སབྦསོ ཨབྷཱཝཾ, ཁཱིཎཱསཝཏྠེརབྷཱཝེན པཏིཊྛིཏབྷཱཝཉྩསྶ དསྶེཏི. ན ཙེཏྠ སམུདཱཡེ ཝཱཀྱཔརིསམཱཔནཾ, ཨཐ ཁོ པཙྩེཀཾ ཝཱཀྱཔརིསམཱཔནནྟི ¶ དསྶེནྟོ ‘‘ཨེཝཾ ཝུཏྟེསུ དྷམྨེསཱུ’’ཏིཨཱདིམཱཧ. ཐེརནཱམཀོ ཝཱ ‘‘ཐེརོ’’ཏི ཨེཝཾ ནཱམཀོ ཝཱ.

ཨནུགྒཧཝསེན, པཱུཛཱཝསེན ཝཱ ཨཏྟནོ སནྟཀཾ པརསྶ དཱིཡཏི ཨེཏེནཱཏི དཱནཾ, པརིཙྩཱགཙེཏནཱ. དཱནམེཝ དཱནམཡཾ. པདཔཱུརཎམཏྟཾ མཡ-སདྡོ. པུཉྙཉྩ ཏཾ ཡཐཱཝུཏྟེནཏྠེན ཀིརིཡཱ ཙ ཀམྨབྷཱཝཏོཏི པུཉྙཀིརིཡཱ. པརེསཾ པིཡམནཱཔཏཱསེཝནཱིཡཏཱདཱིནཾ ཨཱནིསཾསཱནཾ. པུབྦེ…པེ… ཝསེནེཝཱཏི སངྑཱརཏྟིཀེ (དཱི. ནི. ༣.༣༠༥; དཱི. ནི. ཨཊྛ. ༣.༣༠༥) ཝུཏྟདཱནམཡསཱིལམཡབྷཱཝནཱམཡཙེཏནཱཝསེནེཝ. ཨིམཱནི ཝེདིཏབྦཱནཱིཏི སམྦནྡྷོ. ཨེཏྠཱཏི ཨེཏེསུ པུཉྙཀིརིཡཝཏྠཱུསུ. ཀཱཡེན ཀརོནྟསྶཱཏི ཨཏྟནོ ཀཱཡེན པརིཙྩཱགཔཡོགཾ ¶ པཝཏྟེནྟསྶ. ཏདཏྠནྟི དཱནཏྠཾ. ‘‘ཨིམཾ དེཡྻདྷམྨཾ དེཧཱི’’ཏི ཝཱཙཾ ནིཙྪཱརེནྟསྶ. དཱནཔཱརམིཾ ཨཱཝཛྫེཏྭཱ ཝཱཏི ཡཐཱ ཀེཝལཾ ‘‘ཨནྣདཱནཱདཱིནི དེམཱི’’ཏི དཱནཀཱལེ ཏཾ དཱནམཡཾ པུཉྙཀིརིཡཝཏྠུ ཧོཏི, ཨེཝཾ ‘‘ཨིམཾ དཱནམཡཾ སམྨཱསམྦོདྷིཡཱ པཙྩཡོ ཧོཏཱུ’’ཏི དཱནཔཱརམིཾ ཨཱཝཛྫེཏྭཱ དཱནཀཱལེཔི དཱནསཱིསེནེཝ པཝཏྟིཏཏྟཱ. ཝཏྟསཱིསེ ཋཏྭཱཏི ‘‘ཨེཏཾ དཱནཾ ནཱམ མཡ྄ཧཾ ཀུལཝཾསོ ཀུལཏནྟི ཀུལཔཝེཎཱི ཀུལཙཱརིཏྟ’’ནྟི ཙཱརིཏྟསཱིལེ ཋཏྭཱ དདཏོ ཙཱརིཏྟསཱིལམཡཾ. ཡཐཱ དེཡྻདྷམྨཔརིཙྩཱགཝསེན པཝཏྟམཱནཱཔི དཱནཙེཏནཱ ཝཏྟསཱིསེ ཋཏྭཱ དདཏོ སཱིལམཡཾ པུཉྙཀིརིཡཝཏྠུ ཧོཏི པུབྦཱབྷིསངྑཱརསྶ, ཨཔརབྷཱགཙེཏནཱཡ ཙ ཏཐཱ པཝཏྟཏྟཱ, ཨེཝཾ དེཡྻདྷམྨེ ཁཡཏོ, ཝཡཏོ སམྨསནཾ པཊྛཔེཏྭཱ དདཏོ བྷཱཝནཱམཡཾ པུཉྙཀིརིཡཝཏྠུ ཧོཏི པུབྦབྷཱགཙེཏནཱཡ, དེཡྻདྷམྨེ ཨཔརབྷཱགཙེཏནཱཡ ཙ ཏཐཱ པཝཏྟཏྟཱ.

ཨཔཙཱིཏིཙེཏནཱ ཨཔཙིཏིསཧགཏཾ ཨཔཙཱིཡཏི ཨེཏཱཡཱཏི ཡཐཱ ནནྡཱིརཱགོ ཨེཝ ནནྡཱིརཱགསཧགཏཱ, ཡཐཱཝུཏྟཱཡ ཝཱ ཨཔཙིཏིཡཱ སཧགཏཾ སཧཔཝཏྟནྟི ཨཔཙིཏིསཧགཏཾ ¶ . ཨཔཙཱཡནཝསེན པཝཏྟཾ པུཉྙཀིརིཡཝཏྠུ. ཝཡསཱ གུཎེཧི ཙ ཝུཌྜྷཏརཱནཾ ཝཏྟཔཊིཔཏྟཱིསུ བྱཱཝཊོ ཧོཏི ཡཱཡ ཙེཏནཱཡ, སཱ ཝེཡྻཱཝཙྩཾ, ཝེཡྻཱཝཙྩམེཝ ཝེཡྻཱཝཙྩསཧགཏཾ. ཝེཡྻཱཝཙྩསངྑཱཏཱཡ ཝཱ ཝཏྟཔཊིཔཏྟིཡཱ སམུཊྛཱཔནཝསེནེཝ སཧགཏཾ པཝཏྟནྟི ཝེཡྻཱཝཙྩསཧགཏཾ, ཏཐཱཔཝཏྟཾ པུཉྙཀིརིཡཝཏྠུ. ཨཏྟནོ སནྟཱནེ པཏྟཾ པུཉྙཾ ཨནུཔྤདཱིཡཏི ཨེཏེནཱཏི པཏྟཱནུཔྤདཱནཾ. ཏཐཱ པརེན ¶ ཨནུཔྤདིནྣཏཱཡ པཏྟཾ ཨབྦྷནུམོདཏི ཨེཏེནཱཏི པཏྟབྦྷནུམོདནཾ. ཨནནུཔྤདིནྣཾ པན ཀེཝལཾ ཨབྦྷནུམོདཱིཡཏི ཨེཏེནཱཏི ཨབྦྷནུམོདནཾ. དྷམྨཾ དེསེཏི ཨེཏཱཡཱཏི དེསནཱ, དེསནཱཝ དེསནཱམཡཾ. སུཎཱཏི ཨེཏེནཱཏི སཝནཾ, སཝནམེཝ སཝནམཡཾ. དིཊྛིཡཱ ཉཱཎསྶ ཨུཛུགམནཾ དིཊྛིཛུགཏཾ. སབྦཏྠ ‘‘པུཉྙཀིརིཡཝཏྠཱུ’’ཏི པདཾ ཨཔེཀྑིཏྭཱ ནཔུཾསཀལིངྒཏཱ.

པཱུཛཱཝསེན སཱམཱིཙིཀིརིཡཱ ཨཔཙཱཡནཾ ཨཔཙིཏི. ཝཡསཱ གུཎེཧི ཙ ཛེཊྛཱནཾ གིལཱནཱནཉྩ ཏཾཏཾཀིཙྩཀརཎཾ ཝེཡྻཱཝཙྩཾ. ཨཡམེཏེསཾ ཝིསེསོཏི ཨཱཧ ‘‘ཏཏྠཱ’’ཏིཨཱདི. ཙཏྟཱརོ པཙྩཡེ དཏྭཱ སབྦསཏྟཱནནྟི ཙ ཨེཀདེསཏོ ཨུཀྐཊྛནིདྡེསོ, ཡཾ ཀིཉྩི དེཡྻདྷམྨཾ དཏྭཱ, པུཉྙཾ ཝཱ ཀཏྭཱ ‘‘ཀཏིཔཡཱནཾ, ཨེཀསྶེཝ ཝཱ པཏྟི ཧོཏཱུ’’ཏི པརིཎཱམནམྤི པཏྟཱནུཔྤདཱནམེཝ. ཏཾ ན མཧཔྥལཾ ཏཎྷཱཡ པརཱམཊྛཏྟཱ. པརེསཾ དེསེཏི ¶ ཧིཏཕརཎེན མུདུཙིཏྟེནཱཏི ཨཱནེཏྭཱ སམྦནྡྷིཏབྦཾ. ཨེཝནྟི ཨེཝཾ ཨིམཾ དྷམྨཾ སུཏྭཱ བཧུསྶུཏོ ཧུཏྭཱ པརེ དྷམྨདེསནཱཡ ཨནུགྒཎྷིསྶཱམཱིཏི ཧིཏཕརཎེན མུདུཙིཏྟེན དྷམྨཾ སུཎཱཏི. ཨེཝཉྷིསྶ སཝནཾ ཨཏྟནོ, པརེསཉྩ སམྨཱཔཊིཔཏྟིཡཱ པཙྩཡབྷཱཝཏོ མཧཔྥལཾ བྷཝིསྶཏཱིཏི. སབྦེསནྟི སབྦེསམྤི དསནྣཾ པུཉྙཀིརིཡཝཏྠཱུནཾ. ནིཡམལཀྑཎནྟི མཧཔྥལབྷཱཝསྶ ནིཡཱམཀསབྷཱཝཾ ¶ . དིཊྛིཡཱ ཨུཛུབྷཱཝེནེཝཱཏི ‘‘ཨཏྠི, ནཏྠཱི’’ཏི ཨནྟདྭཡསྶ དུརསམུསྶཱརིཏཏཱཡ ‘‘ཨཏྠི དིནྣ’’ནྟིཨཱདི (མ. ནི. ༢.༩༤; ༣.༡༣༦; ཝིབྷ. ༧༩༣) ནཡཔྤཝཏྟཱཡ སམྨཱདིཊྛིཡཱ ཨུཛུཀམེཝ པཝཏྟིཡཱ. དཱནཱདཱིསུ ཧི ཡཾ ཀིཉྩི ཨིམཱཡ ཨེཝ སམྨཱདིཊྛིཡཱ པརིསོདྷིཏཾ མཧཱཛུཏིཀཾ མཧཱཝིཔྥཱརཾ བྷཝཏི.

པུརིམེཧེཝ ཏཱིཧཱིཏི པཱལི༹ཡཾ ཨཱགཏེཧེཝ ཏཱིཧི. སཱིལམཡེ པུཉྙཀིརིཡཝཏྠུམྷི སངྒཧཾ གཙྪནྟི ཙཱརིཏྟསཱིལབྷཱཝཏོ. དཱནམཡེ སངྒཧཾ གཙྪནྟི དཱནསབྷཱཝཏྟཱ, དཱནཝིསཡཏྟཱ ཙ. ཀཱམཾ དེསནཱ དྷམྨདཱནསབྷཱཝཏོ དཱནམཡེ སངྒཧཾ གཙྪཏཱིཏི ཝཏྟུཾ ཡུཏྟཱ, ཀུསལདྷམྨཱསེཝནབྷཱཝཏོ པན ཝིམུཏྟཱཡཏནསཱིསེ ཋཏྭཱ པཝཏྟིཏཱ ཝིཡ སཝནེན སདྡྷིཾ བྷཱཝནཱམཡེ སངྒཧཾ གཙྪནྟཱིཏི ཝུཏྟཾ. ‘‘དིཊྛིཛུགཏཾ བྷཱཝནཱམཡེ’’ཏི ཀེཙི. དིཊྛིཛུགཏེ ཨེཝ ཙ ཨཏྟནཱ ཀཏསྶ པུཉྙསྶ ཨནུསྶརཎཾ, ཏསྶ ཙ པརེསཾ ཨཏྠཱཡ པརིཎཱམནཾ, གུཎཔསཾསཱ, ཨཉྙེཧི ཀརིཡམཱནཱཡ པུཉྙཀིརིཡཱཡ, སམྨཱཔཊིཔཏྟིཡཱ ཙ ཨནུམོདནཾ སརཎགམནནྟི ཨེཝཾ ཨཱདཡོ པུཉྙཝིསེསཱ སངྒཧཾ གཙྪནྟི དིཊྛིཛུཀམྨཝསེནེཝ ཏེསཾ ཨིཛ྄ཛྷནཏོ.

པརསྶ པཊིཔཏྟིཡཱ སོདྷནཏྠོ ཨནུཡོགོ ཙོདནཱ, སཱ ཡཱནི ནིསྶཱཡ པཝཏྟཏི, ཏཱནི ཙོདནཱཝཏྠཱུནི དིཊྛསུཏཔརིསངྐིཏཱནི. ཏེནཱཧ ‘‘ཙོདནཱཀཱརཎཱནཱི’’ཏི. དིཊྛེནཱཏི ཙ ཧེཏུམྷི ཀརཎཝཙནཾ ¶ , དིཊྛེན ཧེཏུནཱཏི ཨཏྠོ. ཀིཾ པན ཏཾ དིཊྛནྟི ཨཱཧ ‘‘ཝཱིཏིཀྐམ’’ནྟི ¶ . དིསྭཱཏི ཙ དསྶནཧེཏཱུཏི ཨཡམེཏྠ ཨཏྠོ ཡཐཱ ‘‘པཉྙཱཡ ཙསྶ དིསྭཱ’’ཏི. ‘‘སུཏེནཱ’’ཏིཨཱདཱིསུཔི ཨིམིནཱ ནཡེན ཨཏྠོ ཝེདིཏབྦོ. པརསྶཱཏི པརཏོ, པརསྶ ཝཱ ཝཙནཾ སུཏྭཱ. དིཊྛཔརིསངྐིཏེནཱཏི དིཊྛཱནུགཏེན པརིསངྐིཏེན, ཏཐཱ པརིསངྐིཏེན ཝཱ ཝཱིཏིཀྐམེན. སེསཔདདྭཡེཔི ཨེསེཝ ནཡོ. ཙོདེཏི ཝཏྠུསནྡསྶནེན ཝཱ སཾཝཱསཔྤཊིཀྑེཔེན ¶ ཝཱ སཱམཱིཙིཔྤཊིཀྑེཔེན ཝཱ. ཨིམསྨིཾ པན ཨཏྠེ ཝིཏྠཱརིཡམཱནེ ཨཏིཔྤཔཉྩོ ཧོཏཱིཏི ཨཱཧ ‘‘ཨཡམེཏྠ སངྑེཔོ’’ཏི. ཝིཏྠཱརཾ པན ཨིཙྪནྟཱནཾ ཏསྶ ཨདྷིགམུཔཱཡཾ དསྶེནྟོ ‘‘ཝིཏྠཱརོ པན…པེ… ཝེདིཏབྦོ’’ཏི ཨཱཧ.

ཀཱམཱུཔཔཏྟིཡོཏི ཀཱམེཧི ཨུཔཔནྣཏཱ, སམནྣཱགཏཏཱཏི ཨཏྠོ. སམནྣཱགམོ ཙ ཏེསཾ པཊིསེཝནཾ, སམདྷིགམོ ཙཱཏི ཨཱཧ ‘‘ཀཱམཱུཔསེཝནཱ ཀཱམཔཊིལཱབྷཱ ཝཱ’’ཏི. པཙྩུཔཊྛིཏཀཱམཱཏི དུཏིཡཏཏིཡརཱསཱིནཾ ཝིཡ སཡཾ, པརེཧི ཙ ཨནིམྨིཏཱ. ཨུཊྛཱནཀམྨཕལཱུཔཛཱིཝིབྷཱཝཏོ པན ཏདུབྷཡཝསེན པཙྩུཔཊྛིཏཱ ཀཱམཱ ཨེཏེསནྟི པཙྩུཔཊྛིཏཀཱམཱ. ཏེ པན ཏེསཾ ཡེབྷུཡྻེན ནིབདྡྷཱནི ཧོནྟཱིཏི ‘‘ནིབདྡྷཀཱམཱ’’ཏི ཝུཏྟཾ. ཙཏུདེཝལོཀཝཱསིནོཏི ཙཱཏུམཧཱརཱཛིཀཏོ པཊྛཱཡ ཡཱཝ ཏུསིཏཱ དེཝཱ. ཝིནིཔཱཏིཀཱཏི ཨཱཔཱཡིཀཱ. པརནིམྨིཏཱ ཀཱམཱ ཨེཏེསནྟི པརནིམྨིཏཀཱམཱ.

པཀཏིསེཝནཝསེནཱཏི ཨནུམཱནཏོ ཛཱནནཾ ཝདཏི, ན པཙྩཀྑཏོ. ཝསཾ ཝཏྟེནྟཱིཏི ཡཐཱརུཙི པཱཏབྱཏཾ ཨཱཔཛྫནྟི. ‘‘མེཐུནཾ པཊིསེཝནྟཱི’’ཏི ཨིདཾ པན ཀེཙིཝཱདཔཊིསེདྷནཏྠཾ ཝུཏྟཾ. ཏེནཱཧ ‘‘ཀེཙི པནཱ’’ཏིཨཱདི. ཏེ ‘‘ཡཱམཱནཾ ཨཉྙམཉྙཾ ཨཱལིངྒིཏམཏྟེན ¶ , ཏུསིཏཱནཾ ཧཏྠཱམསནམཏྟེན, ནིམྨཱནརཏཱིནཾ ཧསིཏམཏྟེན, པརནིམྨིཏཝསཝཏྟཱིནཾ ཨོལོཀིཏམཏྟེན ཀཱམཀིཙྩཾ ཨིཛ྄ཛྷཏཱི’’ཏི ཝདནྟི. ‘‘ཨིཏརེསཾ དྭིནྣཾ དྭཡཾདྭཡསམཱཔཏྟིཡཱ ཝཱ’’ཏི ཝདནྟི ཏཱདིསསྶ ཀཱམེསུ ཝིརཛྫནསྶ ཏེསུ ཨབྷཱཝཏོ, ཀཱམཱནཉྩ ཨུཏྟརུཏྟརི པཎཱིཏཔཎཱིཏཏརཔཎཱིཏཏམབྷཱཝཏོ. ཀེཝལཾ པན ནིསྶནྡཱབྷཱཝོ ཏེསཾ ཝཏྟབྦོ. ཀཱམཀིཙྩནྟི ཏངྑཎིཀཔརིལཱ༹ཧཱུཔསམཱཝཧཾ ཕསྶསུཁཾ. ཀཱམཱཏི ཀཱམཱུཔབྷོགཱ. པཱཀཏིཀཱ ཨེཝཱཏི ཧེཊྛིམེཧི ཨེཀསདིསཱ ཨེཝ. ཨེཀསངྑཱཏནྟི ཨེཀརཱུཔཾ སམཱནརཱུཔནྟི, སམཉྙཱཏཾ སམཱནབྷཱཝནྟི ཝཱ ཨཏྠོ.

སུཁཔཊིལཱབྷཱཏི སུཁསམདྷིགམཱ. ཧེཊྛཱཏི པཋམཛ྄ཛྷཱནབྷཱུམིཏོ ཧེཊྛཱ མནུསྶེསུ, དེཝེསུ ཝཱ. པཋམཛ྄ཛྷཱནསུཁནྟི ཀུསལཔཋམཛ྄ཛྷཱནཾ. བྷཱུམིཝསེནཔི ཧེཊྛུཔརིབྷཱཝོ ལབྦྷཏེཝ བྲཧྨཀཱཡིཀེསུ, བྲཧྨཔུརོཧིཏེསུ ཝཱ ཀུསལཛ྄ཛྷཱནཾ ནིབྦཏྟེཏྭཱ བྲཧྨཔུརོཧིཏེསུ, མཧཱབྲཧྨེསུ ཝཱ ཝིཔཱཀསུཁཱནུབྷཝནསྶ ལབྦྷནཏོ. ཨེཏྠ ཙ དུཏིཡཏཏིཡཛ྄ཛྷཱནབྷཱུམིཝསེན དུཏིཡཏཏིཡསུཁཱུཔཔཏྟཱིནཾ ¶ ཝུཙྩམཱནཏྟཱ པཋམཛ྄ཛྷཱནབྷཱུམིཝསེནེཝ པཋམཛ྄ཛྷཱནསུཁཱུཔཔཏྟི ¶ ཝུཏྟཱ. ཏིནྟཱཏི ཏེམིཏཱ, ཛྷཱནསུཁེན ཙེཝ ཛྷཱནསམུཊྛཱནཔཎཱིཏརཱུཔཕུཊྛཀཱཡེན ཙ པཎཱིཏཱ ཝིཏྟཱཏི ཨཏྠོ. ཏེནེཝཱཧ ‘‘སམནྟཏོ ཏིནྟཱ’’ཏིཨཱདི. ཡསྨཱ ཀུསལསུཁཏོ ཝིཔཱཀསུཁཾ སནྟཏརཏཱཡ པཎཱིཏཏརཾ བཧུལཉྩ པཝཏྟཏི, ཏསྨཱ ཝུཏྟཾ ‘‘ཨིདམྤི ཝིཔཱཀཛ྄ཛྷཱནསུཁཾ ཨེཝ སནྡྷཱཡ ཝུཏྟ’’ནྟི. ཏེསནྟི ཨཱབྷསྶརཱནཾ. སཔྤཱིཏིཀསྶ སུཁསྶ ཨཏིཝིཡ ཨུལཱ༹རབྷཱཝཏོ ¶ ཏེན ཨཛ྄ཛྷོཏྠཏཙིཏྟཱནཾ བྷཝལོབྷོ མཧཱ ཨུཔྤཛྫཏི. སནྟམེཝཱཏི ཝིཏཀྐཝིཙཱརསངྑོབྷཔཱིཏིཨུབྦིལཱཝིཝིགམེན ཨཏིཝིཡ ཨུཔསནྟཾཡེཝ. ཏཐཱ སནྟབྷཱཝེནེཝ ཧི ཏཾ ཨཏྟནོ པཙྩཡེཧི པདྷཱནབྷཱཝཾ ནཱིཏཏཱཡ ‘‘པཎཱིཏ’’ནྟི ཝུཙྩཏི. ཏེནཱཧ ‘‘པཎཱིཏམེཝཱ’’ཏི. ཨཏཔྤཀེན སུཁཔཱརམིཔྤཏྟེན སུཁེན སཾཡུཏྟཱཡ ཏུསཱཡ པཱིཏིཡཱ ཨིཏཱ པཝཏྟཱཏི ཏུསིཏཱ. ཡསྨཱ ཏེ ཏཏོ ཨུཏྟརི སུཁསྶ ཨབྷཱཝཏོ ཨེཝ ན པཏྠེནྟི, ཏསྨཱ ཝུཏྟཾ ‘‘ཏཏོ…པེ… སནྟུཊྛཱ ཧུཏྭཱ’’ཏི. ཏཏིཡཛ྄ཛྷཱནསུཁནྟི ཏཏིཡཛ྄ཛྷཱནཝིཔཱཀསུཁཾ.

སཏྟ ཨརིཡཔཉྙཱཏི ཨཊྛམཀཏོ པཊྛཱཡ སཏྟནྣཾ ཨརིཡཱནཾ ཏེསཾ ཏེསཾ ཨཱཝེཎིཀཔཉྙཱ. ཋཔེཏྭཱ ལོཀུཏྟརཾ པཉྙཾ ཨཝསེསཱ པཉྙཱ ནཱམ. སབྦཱཔི ཏེབྷཱུམིཀཱ པཉྙཱ ‘‘སེཀྑཱ’’ཏིཔི ན ཝཏྟབྦཱ, ‘‘ཨསེཀྑཱ’’ཏིཔི ན ཝཏྟབྦཱཏི ནེཝསེཀྑཱནཱསེཀྑཱ, པུཐུཛྫནཔཉྙཱ.

ཡོགཝིཧིཏེསཱུཏི པཉྙཱཝིཧིཏེསུ པཉྙཱཔརིཎཱམིཏེསུ ཨུཔཱཡཔཉྙཱཡ སམྤཱདིཏེསུ. ཀམྨཱཡཏནེསཱུཏི ཨེཏྠ ཀམྨམེཝ ཀམྨཱཡཏནཾ, ཀམྨཉྩ ཏཾ ཨཱཡཏནཉྩ ཨཱཛཱིཝཱདཱིནནྟི ཝཱ ཀམྨཱཡཏནཾ. ཨེས ནཡོ སིཔྤཱཡཏནེསུཔི. ཏཏྠ ཙ དུཝིདྷཾ ཀམྨཾ ཧཱིནཉྩ ཝཌྜྷཀིཀམྨཱདི, ཨུཀྐཊྛཉྩ ཀསིཝཱཎིཛྫཱདི. སིཔྤམྤི དུཝིདྷཾ ཧཱིནཉྩ ནལ༹ཀཱརསིཔྤཱདི, ཨུཀྐཊྛཉྩ མུདྡགཎནཱདི. ཝིཛྫཱཝ ཝིཛྫཱཊྛཱནཾ, ཏཾ དྷམྨིཀམེཝ ནཱགམཎྜལཔརིཏྟཕུདྷམནཀམནྟསདིསཾ ཝེདིཏབྦཾ. ཏཱནི པནེཏཱནི ཨེཀཙྩེ པཎྜིཏཱ བོདྷིསཏྟསདིསཱ མནུསྶཱནཾ ཕཱསུཝིཧཱརཾ ཨཱཀངྑནྟཱ ནེཝ ཨཉྙེཧི ཀརིཡམཱནཱནི པསྶནྟི, ན ཝཱ ཀཏཱནི ཨུགྒཎྷནྟི. ན ཀརོནྟཱནཾ སུཎནྟི, ཨཐ ཁོ ཨཏྟནོ དྷམྨཏཱཡ ¶ ཙིནྟཱཡ ཀརོནྟི. པཉྙཝནྟེཧི ཨཏྟནོ དྷམྨཏཱཡ ཙིནྟཱཡ ཀཏཱནིཔི ཨཉྙེཧི ཨུགྒཎྷིཏྭཱ ཀརོནྟེཧི ཀཏསདིསཱནེཝ ཧོནྟི. ཀམྨསྶཀཏནྟི ‘‘ཨིདཾ ཀམྨཾ སཏྟཱནཾ སཀཾ, ཨིདཾ ནོ སཀ’’ནྟི ཨེཝཾ ཛཱནནཉཱཎཾ. སཙྩཱནུལོམིཀནྟི ཝིཔསྶནཱཉཱཎཾ. ཏཉྷི སཙྩཔཊིཝེདྷསྶ ཨནུལོམནཏོ ‘‘སཙྩཱནུལོམིཀ’’ནྟི ཝུཙྩཏི. ཨིདཱནིསྶ པཝཏྟནཱཀཱརཾ དསྶེཏུཾ ‘‘རཱུཔཾ ཨནིཙྩནྟི ཝཱ’’ཏིཨཱདི ¶ ཝུཏྟཾ. ཏཏྠ ཝཱ-སདྡེན ཨནིཡམཏྠེན དུཀྑཱནཏྟལཀྑཎཱནིཔི གཧིཏཱནེཝཱཏི དཊྛབྦཾ ནཱནནྟརིཡཀབྷཱཝཏོ. ཡཉྷི ཨནིཙྩཾ, ཏཾ དུཀྑཾ. ཡཾ དུཀྑཾ, ཏདནཏྟཱཏི [(སིཛ྄ཛྷནཏོ) ཨདྷིཀཔཱཋོ ཝིཡ དིསྶཏི]. ཡཾ ཨེཝརཱུཔནྟི ཡཾ ཨེཝཾ ཧེཊྛཱ ནིདྡིཊྛསབྷཱཝཾ. ‘‘ཨནུལོམིཀཾ ཁནྟི’’ནྟིཨཱདཱིནི པཉྙཱཝེཝཙནཱནི ¶ . སཱ ཧི ཧེཊྛཱ ཝུཏྟཱནཾ ཀམྨཱཡཏནཱདཱིནཾ པཉྩནྣཾ ཀཱརཎཱནཾ ཨཔཙྩནཱིཀདསྶནེན ཨནུལོམནཏོ, ཏཐཱ སཏྟཱནཾ ཧིཏཙརིཡཱཡ མགྒསཙྩསྶ, པརམཏྠསཙྩསྶ ཙ ནིབྦཱནསྶ ཨཝིལོམནཏོ ཨནུལོམེཏཱིཏི ཙ ཨནུལོམིཀཱ. སབྦཱནིཔི ཨེཏཱནི ཀཱརཎཱནི ཁམཏི སཧཏི དཊྛུཾ སཀྐོཏཱིཏི ཁནྟི. པསྶཏཱིཏི དིཊྛི. རོཙེཏཱིཏི རུཙི. མུནཱཏཱིཏི མུཏི. པེཀྑཏཱིཏི པེཀྑཱ. ཏེ ཙ ཀམྨཱཡཏནཱདཡོ དྷམྨཱ ནིཛ྄ཛྷཱཡམཱནཱ ཨེཏཱཡ ནིཛ྄ཛྷཱནཾ ཁམནྟཱིཏི དྷམྨནིཛ྄ཛྷཱནཀྑནྟི. པརཏོ ཨསུཏྭཱ པཊིལབྷཏཱིཏི ཨཉྙསྶ ཨུཔདེསཝཙནཾ ཨསུཏྭཱ སཡམེཝ ཙིནྟེནྟོ པཊིལབྷཏི. ཨཡཾ ཝུཙྩཏཱིཏི ཨཡཾ ཙིནྟཱམཡཱ པཉྙཱ ནཱམ ཝུཙྩཏི. སཱ པནེསཱ ཨབྷིཉྙཱཏཱནཾ བོདྷིསཏྟཱནམེཝ ཨུཔྤཛྫཏི. ཏཏྠཱཔི སཙྩཱནུལོམིཀཉཱཎཾ དྭིནྣམེཝ བོདྷིསཏྟཱནཾ ཨནྟིམབྷཝིཀཱནཾ, སེསཔཉྙཱ སབྦེསམྤི པཱུརིཏཔཱརམཱིནཾ མཧཱཔཉྙཱནཾ ཨུཔྤཛྫཏི.

པརཏོ སུཏྭཱ པཊིལབྷཏཱིཏི ཀམྨཱཡཏནཱདཱིནི པརེན ཀརིཡམཱནཱནི, པརེན ཀཏཱནི ཝཱ དིསྭཱཔི པརསྶ ཀཐཡམཱནསྶ ཝཙནཾ སུཏྭཱཔི ཨཱཙརིཡསནྟིཀེ ཨུགྒཧེཏྭཱཔི ¶ པཊིལདྡྷཱ སབྦཱ པརཏོ སུཏྭཱ པཊིལདྡྷནཱམཱཏི ཝེདིཏབྦཱ. སམཱཔནྣསྶཱཏི སམཱཔཏྟིསམངྒིསྶ, ནིདསྶནམཏྟམེཏཾ. ཝིཔསྶནཱམགྒཔཉྙཱ ཧི ཨིདྷ ‘‘བྷཱཝནཱཔཉྙཱ’’ཏི ཝིསེསཏོ ཨིཙྪིཏཱཏི.

ཨཱཝུདྷཾ ནཱམ པཊིཔཀྑཝིམཐནཏྠཾ ཨིཙྪིཏབྦཾ, རཱགཱདིསདིསོ ཙ པཊིཔཀྑོ ནཏྠི, ཏསྶ ཙ ཝིམཐནཾ བུདྡྷཝཙནམེཝཱཏི ‘‘སུཏམེཝ ཨཱཝུདྷ’’ནྟི ཝཏྭཱ ‘‘ཏཾ ཨཏྠཏོ ཏེཔིཊཀཾ བུདྡྷཝཙན’’ནྟི ཨཱཧ. ཨིདཱནི ཏམཏྠཾ ཝིཝརནྟོ ‘‘ཏཾ ཧཱི’’ཏི ཨཱདིཾ ཝཏྭཱ ‘‘སུཏཱཝུདྷོ’’ཏིཨཱདིནཱ (ཨ. ནི. ༧.༦༧) སུཏྟཔདེན སམཏྠེཏི. ཏཏྠ ཨཀུསལཾ པཛཧཏཱིཏི ཏདངྒཱདིཝསེན ཨཀུསལཾ པརིཙྩཛཏི. ཀུསལཾ བྷཱཝེཏཱིཏི སམཐཝིཔསྶནཱདིཀུསལཾ དྷམྨཾ ཨུཔྤཱདེཏི ཝཌྜྷེཏི ཙ. སུདྡྷཾ ཨཏྟཱནཾ པརིཧརཏཱིཏི ཏེན ཨཀུསལཔྤཧཱནེན, ཏཱཡ ཙ ཀུསལབྷཱཝནཱཡ རཱགཱདིསཾཀིལེསཏོ ཝིསུདྡྷཾ ཨཏྟབྷཱཝཾ པཝཏྟེཏི.

ཝིཝེཀཊྛཀཱཡཱནནྟི ¶ གཎསངྒཎིཀཾ ཝཛྫེཏྭཱ ཏཏོ ཨཔཀཌྜྷིཏཀཱཡཱནཾ. སྭཱཡཾ ཀཱཡཝིཝེཀོ ན ཀེཝལཾ ཨེཀཱཀཱིབྷཱཝོ, ཨཐ ཁོ པཋམཛ྄ཛྷཱནཱདི ནེཀྑམྨཡོགཏོཏི ཨཱཧ ‘‘ནེཀྑམྨཱབྷིརཏཱན’’ནྟི. ཙིཏྟཝིཝེཀོཏི ཀིལེསསངྒཎིཀཾ པཧཱཡ ཏཏོ ཙིཏྟསྶ ཝིཝིཏྟཏཱ. སཱ པན ཛྷཱནཝིམོཀྑཱདཱིནཾ ཝསེན ཧོཏཱིཏི ཨཱཧ ‘‘པརིསུདྡྷཙིཏྟཱནཾ པརམཝོདཱནཔྤཏྟཱན’’ནྟི. ཨུཔདྷིཝིཝེཀོཏི ནིབྦཱནཾ. ཏདདྷིགམེན ཧི པུགྒལསྶ ནིརུཔདྷིཏཱ. ཏེནཱཧ ‘‘ནིརུཔདྷཱིནཾ པུགྒལཱན’’ནྟི, ཝིསངྑཱརགཏཱནཾ ཨདྷིགཏནིབྦཱནཱནཾ, ཕལསམཱཔཏྟིསམངྒཱིནཉྩཱཏི ཨཏྠོ. སུཏམྤི ཨཝསྶཡཊྛེནེཝ ཨཱཝུདྷཾ ཝུཏྟནྟི ཨཱཧ ‘‘ཨཡམྤཱི’’ཏི. ཏཐཱ ཧི ཝུཏྟཾ ‘‘ཏཉྷི ནིསྶཱཡཱ’’ཏི. ཀཱམཉྩེཏྠ ¶ སུཏཔཝིཝེཀཱཔི པཉྙཱཝསེནེཝ ཡཐཱདྷིཔྤེཏཨཱཝུདྷཏྟསཱདྷཀཱ ¶ , པཉྙཱ པན སུཏེན, ཨེཀཙྩཔཝིཝེཀེན ཝཱ ཝིནཱཔི ཨིདྷཱདྷིཔྤེཏཨཱཝུདྷཏྟསཱདྷནཱིཏི ཏཏོ པཉྙཱ སཱམཏྠིཡདསྶནཏྠཾ ཝིསུཾ ཨཱཝུདྷབྷཱཝེན ཝུཏྟཱ. ཏེནཱཧ ‘‘ཡསྶ སཱ ཨཏྠི, སོ ན ཀུཏོཙཱི’’ཏིཨཱདི.

ནཱཉྙཱཏཾ ཨཝིདིཏཾ དྷམྨནྟི ཨནམཏགྒེ སཾསཱརཝཊྚེ ན ཨཉྙཱཏཾ ཨཝིདིཏཾ ཨམཏདྷམྨཾ, ཙཏུསཙྩདྷམྨམེཝ ཝཱ ཛཱནིསྶཱམཱིཏི པཊིཔནྣསྶ ཨིམིནཱ པུབྦཱབྷོགེན ཨུཔྤནྣཾ ཨིནྡྲིཡཾ. ཡཾ པཱལི༹ཡཾ སངྒཧཝཱརེ ‘‘ནཝ ཨིནྡྲིཡཱནི ཧོནྟཱི’’ཏི ཝུཏྟཾ, ཏཾ པུབྦཱབྷོགསིདྡྷཾ པཝཏྟིཨཱཀཱརཝིསེསཾ དཱིཔེཏུཾ ཝུཏྟཾ, ཨཏྠཏོ པན མགྒསམྨཱདིཊྛི ཨེཝ སཱཏི ཨཱཧ ‘‘སོཏཱཔཏྟིམགྒཉཱཎསྶེཏཾ ཨདྷིཝཙན’’ནྟི. ཨཉྙིནྡྲིཡནྟི ཨཱཛཱནནཀཨིནྡྲིཡཾ, པཋམམགྒེན ཉཱཏམརིཡཱདཾ ཨནཏིཀྐམིཏྭཱ ཏེསཾཡེཝ ཏེན མགྒེན ཉཱཏཱནཾ ཙཏུསཙྩདྷམྨཱནཾ ཛཱནནཀཨིནྡྲིཡནྟི ཝུཏྟཾ ཧོཏི. ཏེནཱཧ ‘‘ཨཉྙཱབྷཱུཏཾ ཨཱཛཱནནབྷཱུཏཾ ཨིནྡྲིཡ’’ནྟི. ཨཱཛཱནཱཏཱིཏི ཨཉྙོ, ཨཉྙསྶ བྷཱུཏཾ, ཨཱཛཱནནཝསེན ཝཱ བྷཱུཏནྟི ཨཉྙབྷཱུཏཾ. ཨཉྙཱཏཱཝཱིསཱུཏི ཛཱནིཏབྦཾ ཙཏུཨརིཡསཙྩཾ ཨཱཛཱནིཏྭཱ ཋིཏེསུ. ཏེནཱཧ ‘‘ཛཱནནཀིཙྩཔརིཡོསཱནཔྤཏྟེསཱུ’’ཏི, པརིཉྙཱདིབྷེདསྶ ཛཱནནཀིཙྩསྶ པརིནིཊྛཱནཔྤཏྟེསུ.

མཾསཙཀྑུ ཙཀྑུཔསཱདོཏི མཾསཙཀྑུ ནཱམ ཙཏསྶོ དྷཱཏུཡོ, ཝཎྞོ, གནྡྷོ, རསོ, ཨོཛཱ, སམྦྷཝོ, སཎྛཱནཾ, ཛཱིཝིཏཾ, བྷཱཝོ, ཀཱཡཔྤསཱདོ, ཙཀྑུཔསཱདོཏི ཨེཝཾ ཙུདྡསསམྦྷཱརོ མཾསཔིཎྜོ.

ཀསིཎཱལོཀཾ ¶ ¶ ཝཌྜྷེཏྭཱ ཏཏྠ རཱུཔདསྶནཏོ ‘‘དིབྦཙཀྑུ ཨཱལོཀནིསྶིཏཾ ཉཱཎ’’ནྟི ཝུཏྟཾ. དིབྦཙཀྑུཔཉྙཱཝིནིམུཏྟཱ ཨེཝ ལོཀིཡཔཉྙཱ པཉྙཱཙཀྑཱུཏི ཨཡམཏྠོ ཨཝུཏྟསིདྡྷོ དིབྦཙཀྑུསྶ ཝིསུཾ གཧིཏཏྟཱཏི ཝུཏྟཾ ‘‘པཉྙཱཙཀྑུ ལོཀིཡལོཀུཏྟརཔཉྙཱ’’ཏི.

ཨདྷིཀཾ ཝིསིཊྛཾ སཱིལནྟི ཨདྷིསཱིལཾ. སིཀྑིཏབྦཏོཏི ཨཱསེཝིཏབྦཏོ. ཨདྷིསཱིལཾ ནཱམ ཨནཝསེསཀཱཡིཀཝཱཙསིཀསཾཝརབྷཱཝཏོ, མགྒསཱིལསྶ པདཊྛཱནབྷཱཝཏོ ཙ. ཨདྷིཙིཏྟཾ མགྒསམཱདྷིསྶ ཨདྷིཊྛཱནབྷཱཝཏོ. ཨདྷིཔཉྙཱ མགྒཔཉྙཱཡ ཨདྷིཊྛཱནབྷཱཝཏོ. ཨིདཱནི ནེསཾ ཨདྷིསཱིལཱདིབྷཱཝཾ ཀཱརཎེན པཊིཔཱདེཏུཾ ‘‘ཨནུཔྤནྣེཔི ཧཱི’’ཏིཨཱདི ཝུཏྟཾ. ཏཏྠ ཨནུཔྤནྣེཏི ཨཔྤཝཏྟེ. ཨདྷིསཱིལམེཝ ནིབྦཱནཱདྷིགམསྶ པཙྩཡབྷཱཝཏོ. སམཱཔནྣཱཏི ཨེཏྠ ‘‘ནིབྦཱནཾ པཏྠཡནྟེནཱ’’ཏི པདཾ ཨཱནེཏྭཱ སམྦནྡྷིཏབྦཾ.

‘‘ཀལྱཱཎཀཱརཱི ¶ ཀལྱཱཎཾ, པཱཔཀཱརཱི ཙ པཱཔཀཾ;

ཨནུབྷོཏི དྭཡམྤེཏུཾ, ཨནུབནྡྷཉྷི ཀཱརཀ’’ནྟི. (སཾ. ནི. ༡.༢༥༦);

ཨེཝཾ ཨཏཱིཏེ, ཨནཱགཏེ ཙ ཝཊྚམཱུལཀདུཀྑསལླཀྑཎཝསེན སཾཝེགཝཏྠུཏཱཡ ཝིམུཏྟིཨཱཀངྑཱཡ པཙྩཡབྷཱུཏཱ ཀམྨསྶཀཏཱཔཉྙཱ ཨདྷིཔཉྙཱ’’ཏི ཝདནྟི. ལོཀིཡསཱིལཱདཱིནཾ ཨདྷིསཱིལཱདིབྷཱཝོ པརིཡཱཡེནཱཏི ནིཔྤརིཡཱཡམེཝ ཏཾ དསྶེཏུཾ ‘‘སབྦཾ ཝཱ’’ཏིཨཱདི ཝུཏྟཾ.

པཉྩདྭཱརིཀཀཱཡོཏི པཉྩདྭཱརེསུ ཀཱཡོ ཕསྶཱདིདྷམྨསམཱུཧོ. ཀཱཡོ ཙ སོ བྷཱཝིཏབྷཱཝེན བྷཱཝནཱ ཙཱཏི ཀཱཡབྷཱཝནཱ ནཱམ. ཡསྨཱ ཁཱིཎཱསཝཱནཾ ཨགྒམགྒཱདྷིགམནེན སབྦསཾཀིལེསཱ པཧཱིནཱཏི པཧཱིནཀཱལཏོ པཊྛཱཡ སབྦསོ ཨཱསེཝནཱབྷཱཝཏོ ནཏྠི ¶ ཏེསཾ བྷཱཝིནིཡཱཔི ཙཀྑུསོཏཝིཉྙེཡྻཱ དྷམྨཱ, པགེཝ ཀཱལ༹ཀཱ, ཏསྨཱ པཉྩདྭཱརིཀཀཱཡོ སུབྷཱཝིཏོ ཨེཝ ཧོཏི. ཏེན ཝུཏྟཾ ‘‘ཁཱིཎཱསཝསྶ ཧི…པེ… སུབྷཱཝིཏོ ཧོཏཱི’’ཏི. ན ཨཉྙེསཾ ཝིཡ དུབྦལཱ དུབྦལབྷཱཝཀརཱནཾ ཀིལེསཱནཾ སབྦསོ པཧཱིནཏྟཱ.

ཝིཔསྶནཱ དསྶནཱནུཏྟརིཡཾ ཨནིཙྩཱནུཔསྶནཱདིཝསེན སངྑཱརཱནཾ སམྨདེཝ དསྶནཏོ. མགྒོ པཊིཔདཱནུཏྟརིཡཾ ཏདུཏྟརིཔཊིཔདཱཡ ཨབྷཱཝཏོ. ཕལཾ ཝིམུཏྟཱནུཏྟརིཡཾ ཨཀུཔྤབྷཱཝཏོ. ཕལཾ ཝཱ དསྶནཱནུཏྟརིཡཾ དིཝསམྤི ནིབྦཱནཾ ¶ པཙྩཀྑཏོ དིསྭཱ པཝཏྟནཏོ. ནིབྦཱནཾ ཝིམུཏྟཱནུཏྟརིཡཾ སབྦསངྑཏཝིནིསྶཊཏྟཱ. དསྶན-སདྡཾ ཀམྨསཱདྷནཾ གཧེཏྭཱ ནིབྦཱནསྶ དསྶནཱནུཏྟརིཡཏཱ ཝུཏྟཱཏི དསྶེནྟོ ‘‘ཏཏོ ཨུཏྟརཉྷི དཊྛབྦཾ ནཱམ ནཏྠཱི’’ཏི ཨཱཧ. ནཏྠི ཨིཏོ ཨུཏྟརནྟི ཨནུཏྟརཾ, ཨནུཏྟརམེཝ ཨནུཏྟརིཡནྟི ཨཱཧ ‘‘ཨུཏྟམཾ ཛེཊྛཀ’’ནྟི.

སེསོཏི ཝུཏྟཱཝསེསོ པཉྩཀནཡེན, ཙཏུཀྐནཡེན ཙ ཏིཝིདྷོ སམཱདྷི, ཨིམིནཱ ཨེཝ ཙ སམཱདྷིཏྟཡཱཔདེསེན སུཏྟནྟེསུཔི པཉྩཀནཡོ ཨཱགཏོ ཨེཝཱཏི ཝེདིཏབྦཾ. ཏཏྠ ཡཾ ཝཏྟབྦཾ, ཏཾ པརམཏྠམཉྫཱུསཱཡཾ ཝིསུདྡྷིམགྒསཾཝཎྞནཱཡཾ (ཝིསུདྡྷི. ཊཱི. ༡.༣༨) ཝུཏྟམེཝ, ཏསྨཱ ཏཏྠ ཝུཏྟནཡེནེཝ ཝེདིཏབྦཾ.

ཨཱགཙྪཏི ནཱམཾ ཨེཏསྨཱཏི ཨཱགམནཾ, ཏཏོ ཨཱགམནཏོ. སགུཎཏོཏི སརསཏོ. ཨཱརམྨཎཏོཏི ཨཱརམྨཎདྷམྨཏོ. ཨནཏྟཏོ ཨབྷིནིཝིསིཏྭཱཏི ‘‘སབྦེ སངྑཱརཱ ཨནཏྟཱ’’ཏི ཝིཔསྶནཾ པཊྛཔེཏྭཱ. ཨནཏྟཏོ དིསྭཱཏི པཋམཾ སངྑཱརཱནཾ ‘‘ཨནཏྟཱ’’ཏི ཨནཏྟལཀྑཎཾ པཊིཝིཛ྄ཛྷིཏྭཱ. ཨནཏྟཏོ ཝུཊྛཱཏཱིཏི ཝུཊྛཱནགཱམིནིཝིཔསྶནཱཡ ཨནཏྟཱཀཱརཏོ པཝཏྟཱཡ མགྒཝུཊྛཱནཾ ¶ པཱཔུཎཱཏི. ཨསུཉྙཏཏྟཀཱརཀཱནཾ ཀིལེསཱནཾ ¶ ཨབྷཱཝཱཏི ཨཏྟཱབྷིནིཝེསཔཙྩཡཱནཾ དིཊྛེཀཊྛཱནཾ ཀིལེསཱནཾ ཝིཀྑམྦྷནཏོ ཝིཔསྶནཱ སུཉྙཏཱ ནཱམ ཨཏྟསུཉྙཏཱཡ ཡཱཐཱཝཏོ གཧཎཏོ. ནནུ ཨེཝཾ ཝིཔསྶནཱཡ སགུཎཏོ སུཉྙཏཱ, ན ཨཱགམནཏོཏི ནིཔྤརིཡཱཡཏོ ནཏྠཱིཏི? སཙྩམེཏཾ ནཱམལཱབྷེ, ན པན ནཱམདཱནེཏི ནཱཡཾ དོསོ. ཨཐ ཝཱ སུཏྟནྟཀཐཱ ནཱམ པརིཡཱཡཀཐཱ, ན ཨབྷིདྷམྨཀཐཱ ཝིཡ ནིཔྤརིཡཱཡཱཏི བྷིཡྻོཔི ན ཀོཙི དོསོ.

ཡསྨཱ སགུཎཏོ, ཨཱརམྨཎཏོ ཙ ནཱམལཱབྷེ སངྐརོ ཧོཏི ཨེཀསྶེཝ ནཱམནྟརལཱབྷསམྦྷཝཏོ. ཨཱགམནཏོ པན ནཱམལཱབྷེ སངྐརོ ནཏྠི ནཱམནྟརལཱབྷཱབྷཱཝཏོ, ཨསམྦྷཝཏོ ཙ, ཏསྨཱ ‘‘ཨཔརོ’’ཏིཨཱདི ཝུཏྟཾ. ནིམིཏྟཀཱརཀཀིལེསཱབྷཱཝཱཏི ནིཙྩནིམིཏྟཱདིགྒཱཧཀཔཙྩཡཱནཾ ཀིལེསཱནཾ ཝིཀྑམྦྷནཏོ. ཀཱམཉྩཱཡཾ ཝིཔསྶནཱ ནིཙྩནིམིཏྟཱདིཾ ཨུགྒྷཱཊེནྟཱི པཝཏྟཏི, སངྑཱརནིམིཏྟསྶ པན ཨཝིསྶཛྫནཏོ ན ནིཔྤརིཡཱཡཏོ ཨནིམིཏྟནཱམཾ ལབྷཏཱིཏི. པརིཡཱཡེན པནེཏཾ ཝུཏྟཾ. ཏཐཱ ཧི ནིཔྤརིཡཱཡདེསནཏྟཱ ཨབྷིདྷམྨེ མགྒསྶ ཨནིམིཏྟནཱམཾ ཨུདྡྷཊཾ. སུཏྟེ ཙ –

‘‘ཨནིམིཏྟཉྩ ¶ བྷཱཝེཧི, མཱནཱནུསཡམུཛྫཧ;

ཏཏོ མཱནཱབྷིསམཡཱ, ཨུཔསནྟོ ཙརིསྶསཱི’’ཏི. (སུ. ནི. ༣༤༤; སཾ. ནི. ༡.༢༡༢);

ཨནིམིཏྟཔརིཡཱཡོ ཨཱགཏོ. པཎིདྷིཀཱརཀཀིལེསཱབྷཱཝཱཏི སུཁཔཎིདྷིཨཱདིཔཙྩཡཱནཾ ཀིལེསཱནཾ ཝིཀྑམྦྷནཏོ.

རཱགཱདཱིཧི སུཉྙཏྟཱཏི སམུཙྪེདཝསེན པཛཧནཏོ རཱགཱདཱིཧི ཝིཝིཏྟཏྟཱ. རཱགཱདཡོ ཨེཝ རཱགནིམིཏྟཱདཱིནི. པུརིམུཔྤནྣཱ ཧི རཱགཱདཡོ པརཏོ ཨུཔྤཛྫནཀརཱགཱདཱིནཾ ཀཱརཎཾ ཧོཏི. རཱགཱདཡོ ཨེཝ ཏཐཱ པཎིདྷཱནསྶ པཙྩཡབྷཱཝཏོ རཱགཔཎིདྷིཨཱདཡོ. ནིབྦཱནཾ ཝིསངྑཱརབྷཱཝེནེཝ སབྦསངྑཱརཝིནིསྶཊཏྟཱ རཱགཱདཱིཧི སུཉྙཾ, རཱགཱདིནིམིཏྟཔཎིདྷིཝིརཧིཏཉྩཱཏི དཊྛབྦཾ. ཨེཏྠ ཙ སངྑཱརུཔེཀྑཱ ¶ སཱནུལོམཱ ཝུཊྛཱནགཱམིནིཝིཔསྶནཱ, སཱ སུཉྙཏོ ཝིཔསྶནྟཱི ‘‘སུཉྙཏཱ’’ཏི ཝུཙྩཏི, དུཀྑཏོ པསྶནྟཱི ཏཎྷཱཔཎིདྷིསོསནཏོ ‘‘ཨཔྤཎིཧིཏཱ’’ཏི. སཱ མགྒཱདྷིགམཱཡ ཨཱགམནཔཊིཔདཱཋཱནེ ཋཏྭཱ མགྒསྶ ‘‘སུཉྙཏཾ ཨནིམིཏྟཾ ཨཔྤཎིཧིཏ’’ནྟི ནཱམཾ དེཏི. ཨཱགམནཏོ ཙ ནཱམེ ལདྡྷེ སགུཎཏོ ཙ ཨཱརམྨཎཏོ ཙ ནཱམཾ སིདྡྷམེཝ ཧོཏི, ན པན སགུཎཱརམྨཎེཧི ནཱམལཱབྷེ སབྦཏྠ ཨཱགམནཏོ ནཱམཾ སིདྡྷཾ ཧོཏཱིཏི པརིཔུཎྞནཱམསིདྡྷིཧེཏུཏྟཱ, ‘‘སགུཎཱརམྨཎེཧི ¶ སབྦེསམྤི ནཱམཏྟཡཡོགོ, ན ཨཱགམནཏོ’’ཏི ཝཝཏྠཱནཀརཏྟཱ ཙ ནིཔྤརིཡཱཡཏོ ཨཱགམནཏོཝ ནཱམལཱབྷོ པདྷཱནཾ, ན ཨིཏརེཧི, པརིཡཱཡཏོ པན ཏིདྷཱ ནཱམལཱབྷོ ཨིཙྪིཏབྦོཏི ཨཊྛཀཐཱཡཾ ‘‘ཏིཝིདྷཱ ཀཐཱ’’ཏིཨཱདིནཱ ཨཡཾ ཝིཙཱརོ ཀཏོཏི དཊྛབྦཾ.

སུཙིབྷཱཝོཏི ཀིལེསཱསུཙིཝིགམེན སུདྡྷབྷཱཝོ ཨསཾཀིལིཊྛབྷཱཝོ. ཏེནཱཧ ‘‘ཏིཎྞཾ སུཙརིཏཱནཾ ཝསེན ཝེདིཏབྦོ’’ཏི.

མུནིནོ ཨེཏཱནཱིཏི མོནེཡྻཱནི. ཡེཧི དྷམྨེཧི ཨུབྷཡཧིཏམུནནཏོ མུནི ནཱམ ཧོཏི, ཏེ ཨེཝཾ ཝུཏྟཱཏི ཨཱཧ ‘‘མུནིབྷཱཝཀརཱ མོནེཡྻཔཊིཔདཱ དྷམྨཱ’’ཏི. ཏཏྠ ཡསྨཱ ཀཱཡེན ཨཀཏྟབྦསྶ ཨཀརཎཾ, ཀཏྟབྦསྶ ཙ ཀརཎཾ, ‘‘ཨཏྠི ཨིམསྨིཾ ཀཱཡེ ཀེསཱ’’ཏིཨཱདིནཱ (དཱི. ནི. ༢.༣༧༧; མ. ནི. ༡.༡༡༠; ༣.༡༥༣; ཨ. ནི. ༦.༢༩; ༡༠.༦༠; ཝིབྷ. ༣༥༦; ཁུ. པཱ. ༣.༡; ནེཏྟི. ༤༧) ཀཱཡསངྑཱཏསྶ ཨཱརམྨཎསྶ ཛཱནནཾ, ཀཱཡསྶ ཙ སམུདཡཏོ ཨཏྠངྒམཏོ ཨསྶཱདཏོ ཨཱདཱིནཝཏོ ནིསྶརཎཏོ ཙ ཡཱཐཱཝཏོ པརིཛཱནནཾ, ཏཐཱ ¶ པརིཛཱནནཝསེན པཝཏྟོ ཝིཔསྶནཱམགྒོ, ཏེན ཙ ཀཱཡེ ཚནྡརཱགསྶ པཛཧནཾ, ཀཱཡསངྑཱརཾ ནིརོདྷེཏྭཱ པཏྟབྦསམཱཔཏྟི ཙཱཏི སབྦེ ཨེཏེ ཀཱཡམུཁེན ¶ པཝཏྟཱ མོནེཡྻཔཊིཔདཱ དྷམྨཱ ཀཱཡམོནེཡྻཾ ནཱམ. ཏསྨཱ ཏམཏྠཾ དསྶེཏུཾ ‘‘ཏིཝིདྷཀཱཡདུཙྩརིཏསྶ པཧཱན’’ནྟིཨཱདིནཱ པཱལི༹ ཨཱགཏཱ. སེསདྭཡེཔི ཨེསེཝ ནཡོ. ཏཏྠ ཙོཔནཝཱཙཉྩེཝ སདྡཝཱཙཉྩ ཨཱརབྦྷ པཝཏྟཱ པཉྙཱ ཝཱཙཱརམྨཎེ ཉཱཎཾ. ཏསྶ ཝཱཙཱཡ སམུདཡཱདིཏོ པརིཛཱནནཾ ཝཱཙཱཔརིཉྙཱ. ཨེཀཱསཱིཏིཝིདྷཾ ལོཀིཡཙིཏྟཾ ཨཱརབྦྷ པཝཏྟཉཱཎཾ མནཱརམྨཎེ ཉཱཎཾ. ཏསྶ སམུདཡཱདིཏོ པརིཛཱནནཾ མནོཔརིཉྙཱཏི ཨཡམེཝ ཝིསེསོ.

ཨཡནྟི ཨིཏོ སམྤཏྟིཡོཏི ཨཱཡོ, ཀུསལཱནཾ དྷམྨཱནཾ ཨབྷིབུདྡྷཱིཏི ཨཱཧ ‘‘ཨཱཡོཏི ཝུཌྜྷཱི’’ཏི. ཨཔེནྟི སམྤཏྟིཡོ ཨེཏེནཱཏི ཨཔཱཡོ, ཀུསལཱནཾ དྷམྨཱནཾ ཧཱནཱིཏི ཨཱཧ ‘‘ཨཔཱཡོཏི ཨཝུཌྜྷཱི’’ཏི. ཏསྶ ཏསྶཱཏི ཨཱཡསྶ ཙ ཨཔཱཡསྶ ཙ. ཀཱརཎཾ ཨུཔཱཡོ ཨུཔེཏི ཨུཔགཙྪཏི ཨེཏེན ཨཱཡོ, ཨཔཱཡོ ཙཱཏི. ཏཏྠ དུཝིདྷཱ ཝུཌྜྷི ཨནཏྠཧཱནིཏོ, ཨཏྠུཔྤཏྟིཏོ ཙ, ཏཐཱ ཨཝུཌྜྷི ཨཏྠཧཱནིཏོ, ཨནཏྠུཔྤཏྟིཏོ ཙ. ཏེསཾ པཛཱནནཱཏི ཏེསཾ ཨཱཡཱཔཱཡསཉྙིཏཱནཾ ཡཐཱཝུཏྟཔྤབྷེདཱནཾ ཝུཌྜྷིཨཝུཌྜྷཱིནཾ ཡཱཐཱཝཏོ པཛཱནནཱ. ཀོསལླཾ ཀུསལཏཱ ནིཔུཎཏཱ. ཏདུབྷཡམྤི པཱལི༹ཝསེནེཝ དསྶེཏུཾ ‘‘ཝུཏྟཉྷེཏ’’ནྟིཨཱདི ཝུཏྟཾ.

ཏཏྠ ཨིདཾ ཝུཙྩཏཱིཏི ཡཱ ཨིམེསཾ ཨཀུསལདྷམྨཱནཾ ཨནུཔྤཏྟིནིརོདྷེསུ, ཀུསལདྷམྨཱནཉྩ ཨུཔྤཏྟིབྷིཡྻོབྷཱཝེསུ ¶ པཉྙཱ, ཨིདཾ ཨཱཡཀོསལླཾ ནཱམ ཝུཙྩཏི. ཨིདཱནི ཨཔཱཡཀོསལླམྤི པཱལི༹ཝསེནེཝ དསྶེཏུཾ ‘‘ཏཏྠ ཀཏམ’’ནྟིཨཱདི ཝུཏྟཾ. ཏཏྠ ཨིདཾ ཝུཙྩཏཱིཏི ཡཱ ཨིམེསཾ ཀུསལདྷམྨཱནཾ ཨནུཔྤཛྫནནིརུཛ྄ཛྷནེསུ, ཨཀུསལདྷམྨཱནཉྩ ཨུཔྤཏྟིབྷིཡྻོབྷཱཝེསུ པཉྙཱ, ཨིདཾ ཨཔཱཡཀོསལླཾ ནཱམ ཝུཙྩཏཱིཏི. ཨེཏྠཱཧཨཱཡཀོསལླཾ ཏཱཝ པཉྙཱ ཧོཏུ, ཨཔཱཡཀོསལླཾ ཀཐཾ པཉྙཱ ནཱམ ཛཱཏཱཏི ཨེཝཾ མཉྙཏི ‘‘ཨཔཱཡུཔྤཱདནསམཏྠཏཱ ཨཔཱཡཀོསལླཾ ནཱམཱ’’ཏི, ཏཾ པན ཏསྶ མཏིམཏྟཾ. པཉྙཝཱ ཨེཝ ཧི ‘‘མཡ྄ཧཾ ཨེཝཾ མནསི ཀརོཏོ ཨནུཔྤནྣཱ ¶ ཀུསལཱ དྷམྨཱ ནུཔྤཛྫནྟི, ཨུཔྤནྣཱ ནིརུཛ྄ཛྷནྟི. ཨནུཔྤནྣཱ ཨཀུསལཱ དྷམྨཱ ཨུཔྤཛྫནྟི, ཨུཔྤནྣཱ ཝཌྜྷནྟཱི’’ཏི པཛཱནཱཏི, སོ ཨེཝཾ ཉཏྭཱ ཨནུཔྤནྣེ ཨཀུསལེ དྷམྨེ ན ཨུཔྤཱདེཏི, ཨུཔྤནྣེ པཛཧཏི. ཨནུཔྤནྣེ ཀུསལེ དྷམྨེ ཨུཔྤཱདེཏི, ཨུཔྤནྣེ བྷཱཝནཱཔཱརིཔཱུརིཾ པཱཔེཏི. ཨེཝཾ ཨཔཱཡཀོསལླམྤི པཉྙཱ ¶ ཨེཝཱཏི. སབྦཱཔཱིཏི ཨཱཡཀོསལླཔཀྑིཀཱཔི ཨཔཱཡཀོསལླཔཀྑིཀཱཔི. ཏཏྲུཔཱཡཱཏི ཏཏྲ ཏཏྲ ཀརཎཱིཡེ ཨུཔཱཡབྷཱུཏཱ.

ཏསྶ ཏིཀིཙྪནཏྠནྟི ཨཙྩཱཡིཀསྶ ཀིཙྩསྶ, བྷཡསྶ ཝཱ པརིཧརཎཏྠཾ ཋཱནུཔྤཏྟིཡཀཱརཎཛཱནནཝསེནེཝཱཏི ཋཱནེ ཏངྑཎེ ཨེཝ ཨུཔྤཏྟི ཨེཏསྶ ཨཏྠཱིཏི ཋཱནུཔྤཏྟིཀཾ, ཋཱནསོ ཨུཔྤཛྫནཀཀཱརཎཾ, ཏསྶ ཛཱནནཝསེནེཝ.

མཛྫནཱཀཱརཝསེན པཝཏྟམཱནཱཏི ཨཏྟནོ ཝཏྠུནོ མདནཱིཡཏཱཡ མདསྶ ཨཱཔཛྫནཱཀཱརེན པཝཏྟམཱནཱ ཨུཎྞཏིཡོ. ནིརོགོཏི ཨརོགོ. མཱནཀརཎནྟི མཱནསྶ ཨུཔྤཱདནཾ. ཡོབྦནེ ཋཏྭཱཏི ཡོབྦནེ པཏིཊྛཱཡ, ཡོབྦནཾ ཨཔསྶཱཡཱཏི ཨཏྠོ. སབྦེསམྤི ཛཱིཝིཏཾ ནཱམ མརཎཔབྷངྒུརཾ དུཀྑཱནུབནྡྷཉྩ, ཏདུབྷཡཾ ཨནོལོཀེཏྭཱ, པབནྡྷཊྛིཏིཔཙྩཡཱ སུལབྷཏཉྩ ནིསྶཱཡ ཨུཔྤཛྫནཀམདོ ཛཱིཝིཏམདོཏི དསྶེཏུཾ ‘‘ཙིརཾ ཛཱིཝི’’ནྟིཨཱདི ཝུཏྟཾ.

ཨདྷིཔཏི ཝུཙྩཏི ཛེཊྛཀོ, ཨིསྶརོཏི ཨཏྠོ. ཏཏོ ཨདྷིཔཏིཏོ ཨཱགཏཾ ཨཱདྷིཔཏེཡྻཾ. ཀིཾ ཏཾ? པཱཔསྶ ཨཀརཎཾ. ཏེནཱཧ ‘‘ཨེཏྟཀོམྷཱི’’ཏིཨཱདི. ཏཏྠ སཱིལཱདཡོ ལོཀིཡཱ ཨེཝ དཊྛབྦཱ, ཏསྨཱ ཝིམུཏྟིཡཱཏི ལོཀིཡཝིམུཏྟིཡཱ. ཛེཊྛཀནྟི ཨིསྶརཾ, གརུནྟི ཨཏྠོ. ཨེཏྠ ཙ ཨཏྟཱནཾ, དྷམྨཉྩ ཨདྷིཔཏིཾ ཀཏྭཱ པཱཔསྶ ཨཀརཎཾ ཧིརིཡཱ ཝསེན ཝེདིཏབྦཾ. ལོཀཾ ཨདྷིཔཏིཾ ཀཏྭཱ ཨཀརཎཾ ཨོཏྟཔྤསྶ ཝསེན.

ཀཐཱཝཏྠཱུནཱིཏི ཀཐཱཡ པཝཏྟིཊྛཱནཱནི. ཡསྨཱ ¶ ཏེཧི ཝིནཱ ཀཐཱ ནཔྤཝཏྟཏི, ཏསྨཱ ‘‘ཀཐཱཀཱརཎཱནཱི’’ཏི ཝུཏྟཾ. ཨདྡྷཱན-སདྡསྶ ཨཏྠོ ཧེཊྛཱ ཝུཏྟོ ཨེཝ, སོ པནཏྠཏོ དྷམྨཔྤཝཏྟིམཏྟཾ ¶ . དྷམྨཱ ཙེཏྠ ཁནྡྷཱ ཨེཝ, ཏབྦིནིམུཏྟཱ ཙ ཏེསཾ གཏི ནཏྠཱིཏི ཨཱཧ ‘‘ཨཏཱིཏཾ དྷམྨཾ, ཨཏཱིཏཀྑནྡྷེཏི ཨཏྠོ’’ཏི. ཨཡཉྩ ཨདྡྷཱ ནཱམ དིསཱདི ཝིཡ ཨཏྠཏོ དྷམྨཔྤཝཏྟིཾ ཨུཔཱདཱཡ པཉྙཏྟིམཏྟཾ, ན ཨུཔཱདཱ ན བྷཱུཏདྷམྨོཏི ཏམཏྠཾ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ.

‘‘ཏམཝིཛ྄ཛྷནཊྛེན ཝིདིཏཀརཎཊྛེནཱ’’ཏི སངྑེཔཏོ ཝུཏྟམཏྠཾ ཝིཝརིཏུཾ ‘‘པུབྦེནིཝཱསཱ’’ཏིཨཱདི ཝུཏྟཾ. པུབྦེནིཝཱསནྟི པུབྦེ ནིཝུཏྠཀྑནྡྷེ. ཏམནྟི མོཧཏམཾ. ཝིཛ྄ཛྷཏཱིཏི ཝིཧནཏི, པཛཧཏཱིཏི ཨཏྠོ. ཏེནེཝ ཙ པཊིཙྪཱདཀཏམཝིཛ྄ཛྷནེན ¶ པུབྦེནིཝཱསཉྩ ཝིདིཏཾ པཱཀཊཾ ཀརོཏཱིཏི ཝིཛྫཱཏི. ཏནྟི ཙུཏཱུཔཔཱཏཾ.

ཨུཔཔཏྟིདེཝཝིསེསབྷཱཝཱཝཧོ ཝིཧཱརོཏི ཀཏྭཱ དིབྦོ ཝིཧཱརོ. ནནུ ཨེཝཾ ཨཉྙམཉྙཱནམྤི དིབྦཝིཧཱརབྷཱཝོ ཨཱཔཛྫཏཱིཏི? ན ཏཱསཾ སཏྟེསུ ཧིཏཱུཔསཾཧཱརཱདིཝསེན པཝཏྟིཡཱ སཝིསེསཾ ནིདྡོསཊྛེན, སེཊྛཊྛེན ཙ བྲཧྨཝིཧཱརསམཉྙཱཡ ནིརུལ༹ྷབྷཱཝཏོ. སུཝིསུདྡྷིཏོ པཊིཔཀྑསམུཙྪིནྡནཝསེན ཨརཎཱིཡཏོ པཏྟབྦཏོ, ཨརིཡབྷཱཝཔྤཏྟིཡཱ ཝཱ ཨནནྟརཾ ཨརིཡོ. ཨརིཡཱནཾ ཨཡནྟི ཝཱ ཨརིཡོ ཝིཧཱརོ.

སེསཾ ཧེཊྛཱ ཝུཏྟནཡམེཝ.

ཏིཀཝཎྞནཱ ནིཊྛིཏཱ.

ཙཏུཀྐཝཎྞནཱ

༣༠༦. པུབྦེཏི ཧེཊྛཱ མཧཱསཏིཔཊྛཱནཝཎྞནཱཡཾ.

ཡོ ཚནྡོཏི ཡོ ཚནྡིཡནཝསེན ཚནྡོ. ཚནྡིཀཏཱཏི ཚནྡབྷཱཝོ, ཚནྡིཀརཎཱཀཱརོ ཝཱ. ཀཏྟུཀམྱཏཱཏི ཀཏྟུཀཱམཏཱ. ཀུསལོཏི ཚེཀོ ཀོསལླསམྦྷཱུཏོ ¶ . དྷམྨཙྪནྡོཏི སབྷཱཝཙྪནྡོ. ཨཡཉྷི ཚནྡོ ནཱམ ཏཎྷཱཚནྡོ, དིཊྛིཚནྡོ, ཝཱིརིཡཚནྡོ, དྷམྨཙྪནྡོཏི བཧུཝིདྷོ. ཨིདྷ ཀཏྟུཀམྱཏཱཀུསལདྷམྨཙྪནྡོ ཨདྷིཔྤེཏོ. ཚནྡཾ ཛནེཏཱིཏི ཏཾ ཚནྡཾ ཨུཔྤཱདེཏི. ཏཾ པཝཏྟེནྟོ ཧི ཛནེཏི ནཱམ. ཝཱཡཱམཾ ཀརོཏཱིཏི པཡོགཾ པརཀྐམཾ ཀརོཏི. ཝཱིརིཡཾ ཨཱརབྷཏཱིཏི ཀཱཡིཀཙེཏསིཀཝཱིརིཡཾ ¶ པཝཏྟེཏི. ཙིཏྟཾ ཨུཔཏྠམྦྷེཏཱིཏི ཏེནེཝ སཧཛཱཏཝཱིརིཡེན ཙིཏྟཾ ཨུཀྑིཔཏི. པདཧཏཱིཏི པདྷཱནཾ ཝཱིརིཡཾ ཀརོཏི. པཊིཔཱཊིཡཱ པནེཏཱནི པདཱནི ཨུཔྤཱདནཱསེཝནཱབྷཱཝནཱབཧུལཱིཀམྨསཱཏཙྩཀིརིཡཱཧི ཡོཛེཏབྦཱནི. ཝིཏྠཱརཾ པརིཧརནྟོ ‘‘ཨཡམེཏྠ སངྑེཔོ’’ཏིཨཱདིམཱཧ.

ཚནྡཾ ནིསྶཱཡཱཏི ‘‘ཚནྡཝཏོ ཙེཏོསམཱདྷི ཧོཏི, མཡ྄ཧཾ ཨེཝཾ ཧོཏཱི’’ཏི ཨེཝཾ ཚནྡཾ ནིསྶཱཡ ཚནྡཾ དྷུརཾ ཛེཊྛཀཾ པུབྦངྒམཾ ཀཏྭཱ པཝཏྟོ སམཱདྷི ཚནྡསམཱདྷི. པདྷཱནབྷཱུཏཱཏི པདྷཱནཛཱཏཱ, པདྷཱནབྷཱཝཾ ཝཱ པཏྟཱ. སངྑཱརཱཏི ཙཏུཀིཙྩསཱདྷཀཾ སམྨཔྤདྷཱནཝཱིརིཡཾ ཝདཏི. ཏེཧི དྷམྨེཧཱིཏི ¶ ཡཐཱཝུཏྟསམཱདྷིཝཱིརིཡེཧི ཨུཔེཏཾ སམྤཡུཏྟཾ. ཨིདྡྷིཡཱ པཱདནྟི ནིཔྥཏྟིཔརིཡཱཡེན ཨིཛ྄ཛྷནཊྛེན, ཨིཛ྄ཛྷནྟི ཨེཏཱཡ སཏྟཱ ཨིདྡྷཱ ཝུདྡྷཱ ཨུཀྐཾསགཏཱ ཧོནྟཱིཏི ཨིམིནཱ ཝཱ པརིཡཱཡེན ‘‘ཨིདྡྷཱི’’ཏི སངྑྱཾ གཏཱནཾ ཨུཔཙཱརཛ྄ཛྷཱནཱདིཀུསལཙིཏྟསམྤཡུཏྟཱནཾ ཚནྡསམཱདྷིཔདྷཱནསངྑཱརཱནཾ ཨདྷིཊྛཱནཊྛེན པཱདབྷཱུཏཾ. ཡསྨཱ པུརིམཱ ཨིདྡྷི པཙྪིམཱཡ ཨིདྡྷིཡཱ པཱདོ པཱདཀཾ པདཊྛཱནཾ ཧོཏི, ཏསྨཱ ‘‘ཨིདྡྷིབྷཱུཏཾ ཝཱ པཱད’’ནྟི ཙ ཝུཏྟཾ. སེསེསུཔཱིཏི དུཏིཡཨིདྡྷིཔཱདཱདཱིསུ. ཀཱམཉྩེཏྠ ¶ ཛནཝསབྷསུཏྟེཔི ཨིདྡྷིཔཱདཝིཙཱརོ ཨཱགཏོ, སོཔི སངྑེཔཏོ ཨེཝཱཏི ཨཱཧ ‘‘ཝིཏྠཱརོ པན…པེ… དཱིཔིཏོ’’ཏི.

༣༠༧. དིཊྛདྷམྨོ ཝུཙྩཏི པཙྩཀྑབྷཱུཏོ ཨཏྟབྷཱཝོཏི ཨཱཧ ‘‘ཨིམསྨིཾཡེཝ ཨཏྟབྷཱཝེ’’ཏི. སུཁཝིཧཱརཏྠཱཡཱཏི ནིཀྐིལེསཏཱཡ ནིརཱམིསེན སུཁེན ཝིཧརཎཏྠཱཡ. ཕལསམཱཔཏྟིཛྷཱནཱནཱིཏི ཙཏྟཱརིཔི ཕལསམཱཔཏྟིཛྷཱནཱནི. ཨཔརབྷཱགེཏི ཨཱསཝཀྑཡཱདྷིགམཏོ ཨཔརབྷཱགེ. ནིབྦཏྟིཏཛ྄ཛྷཱནཱནཱིཏི ཨདྷིགཏརཱུཔཱརཱུཔཛ྄ཛྷཱནཱནི.

སཱུརིཡཙནྡཔཛྫོཏམཎིཨཱདཱིནནྟི པཛྫོཏགྒཧཎེན པདཱིཔཾ ཝདཏི. ཨཱདི-སདྡེན ཨུཀྐཱཝིཛྫུལཏཱདཱིནཾ སངྒཧོ. ཨཱལོཀོཏི མནསི ཀརོཏཱིཏི སཱུརིཡཙནྡཱལོཀཱདིཾ དིཝཱ, རཏྟིཉྩ ཨུཔལདྡྷཾ ཡཐཱལདྡྷཝསེནེཝ མནསི ཀརོཏི ཙིཏྟེ ཋཔེཏི. ཏཐཱཝ ནཾ མནསི ཀརོཏི, ཡཐཱསྶ སུབྷཱཝིཏཱལོཀཀསིཎསྶ ཝིཡ ཀསིཎཱལོཀོ ཡདིཙྪཀཾ ཡཱཝདིཙྪཀཾ. སོ ཨཱལོཀོ རཏྟིཡཾ ཨུཔཏིཊྛཏི, ཡེན ཏཏྠ དིཝཱསཉྙཾ ཋཔེཏི དིཝཱ ཝིཡ ཝིགཏཐིནམིདྡྷོ ཧོཏི. ཏེནཱཧ ‘‘ཡཐཱ དིཝཱ ཏཐཱ རཏྟི’’ནྟི. ཡཐཱ རཏྟིཾ ཨཱལོཀོ དིཊྛོཏི ཡཐཱ རཏྟིཡཱ ཙནྡཱལོཀཱདིཨཱལོཀོ དིཊྛོ ཨུཔལདྡྷོ. ཨེཝམེཝ དིཝཱ མནསི ཀརོཏཱིཏི རཏྟིཾ དིཊྛཱཀཱརེནེཝ དིཝཱ ཏཾ ཨཱལོཀཾ མནསི ཀརོཏི ཙིཏྟེ ཋཔེཏི. ཨཔིཧིཏེནཱཏི ཐིནམིདྡྷཔིདྷཱནེན ན པིཧིཏེན. ཨནདྡྷེནཱཏི ཨསཉྪཱདིཏེན. སཨོབྷཱསནྟི སཉཱཎོབྷཱསཾ. ཐིནམིདྡྷཝིནོདནཨཱལོཀོཔི ¶ ཝཱ ཧོཏུ ཀསིཎཱལོཀོཔི ཝཱ པརིཀམྨཱལོཀོཔི ཝཱ, ཨུཔཀྐིལེསཱལོཀོ ཝིཡ སབྦཱཡཾ ཨཱལོཀོ ཉཱཎསམུཊྛཱནོ ཝཱཏི. ཉཱཎདསྶནཔཊིལཱབྷཏྠཱཡཱཏི དིབྦཙཀྑུཉཱཎཔཊིལཱབྷཏྠཱཡ. དིབྦཙཀྑུཉཱཎཉྷི རཱུཔགཏསྶ དིབྦསྶ, ཨིཏརསྶ ཙ དསྶནཊྛེན ཨིདྷ ‘‘ཉཱཎདསྶན’’ནྟི ¶ ཨདྷིཔྤེཏཾ. ‘‘ཨཱལོཀསཉྙཾ མནསི ཀརོཏཱི’’ཏི ¶ ཨེཏྠ ཝུཏྟཨཱལོཀོ ཐིནམིདྡྷཝིནོདནཨཱལོཀོ. པརིཀམྨཨཱལོཀོཏི དིབྦཙཀྑུཉཱཎཱཡ པརིཀམྨཀརཎཝསེན པཝཏྟིཏཨཱལོཀོ. ཏཏྠ པུརིམསྶ ཝསེན ‘‘ཁཱིཎཱསཝསྶཱ’’ཏི ཝིསེསེཏྭཱ ཝུཏྟཾ. ཏསྶ ཧི ཐིནམིདྡྷཾ སུཔྤཧཱིནཾ ཧོཏི, ན ཨཉྙེསཾ. དུཏིཡསྶ ཝསེན ‘‘ཏསྨིཾ ཝཱ ཨཱགཏེཔཱི’’ཏིཨཱདི ཝུཏྟཾ. ཏཏྠ ཏསྨིནྟི དིབྦཙཀྑུཉཱཎེ. ཨཱགཏེཔཱིཏི པཊིལདྡྷེཔི. ཨནཱགཏེཔཱིཏི ཨཔྤཊིལདྡྷེཔི. ཡསྨཱ ཏཐཱརཱུཔསྶ པཱདཀཛ྄ཛྷཱནསྶེཝ ཝསེན པརིཀམྨཨཱལོཀསྶ སམྦྷཝོ, ཡཏོ ཏཾ པརིསུདྡྷཔརིཡོདཱཏཏཱདིགུཎཝིསེསུཔསཾཧིཏཾ, ཏསྨཱ ཨཱཧ ‘‘པཱདཀ…པེ… བྷཱཝེཏཱིཏི ཝུཏྟ’’ནྟི.

སཏྟཊྛཱནིཀསྶཱཏི ‘‘ཨབྷིཀྐནྟེ པཊིཀྐནྟེ སམྤཛཱནཀཱརཱི ཧོཏཱི’’ཏིཨཱདིནཱ (དཱི. ནི. ༡.༢༡༤; ༢.༦༩; མ. ནི. ༡.༡༠༢) ཝུཏྟསྶ སཏྟཊྛཱནིཀསྶ. སཏིཔི སེཀྑཱནཾ པརིཉྙཱཏབྷཱཝེ ཨེཀནྟཏོ པརིཉྙཱཏཝཏྠུཀཱ ནཱམ ཨརཧནྟོ ཨེཝཱཏི ཝུཏྟཾ ‘‘ཁཱིཎཱསཝསྶ ཝཏྠུ ཝིདིཏཾ ཧོཏཱི’’ཏིཨཱདི. ཝཏྠཱརམྨཎཝིདིཏཏཱཡཱཏི ཝཏྠུནོ, ཨཱརམྨཎསྶ ཙ ཡཱཐཱཝཏོ ཝིདིཏབྷཱཝེན. ཡཐཱ ཧི སཔྤཔརིཡེསནཾ ཙརནྟེན ཏསྶ ཨཱསཡེ ཝིདིཏེ སོཔི ཝིདིཏོ ཨེཝ ཙ ཧོཏི མནྟཱགདབལེན ཏསྶ གཧཎསྶ སུཀརཏྟཱ, ཨེཝཾ ཝེདནཱཡ ཨཱསཡབྷཱུཏེ ཝཏྠུམྷི, ཨཱརམྨཎེ ཙ ཝིདིཏེ ཨཱདིཀམྨིཀསྶཔི ཝེདནཱ ཝིདིཏཱ ཨེཝ ཧོཏི སལཀྑཎཏོ, སཱམཉྙལཀྑཎཏོ ཙ ཏསྶཱ གཧཎསྶ སུཀརཏྟཱ, པགེཝ པརིཉྙཱཏཝཏྠུཀསྶ ཁཱིཎཱསཝསྶ. ཏསྶ ཧི ཨུཔྤཱདཀྑཎེཔི ཋིཏིཀྑཎེཔི བྷངྒཀྑཎེཔི ཝེདནཱ ཝིདིཏཱ པཱཀཊཱ ཧོནྟི. ཏེནཱཧ ‘‘ཨེཝཾ ཝེདནཱ ཨུཔྤཛྫནྟཱི’’ཏིཨཱདི. ནིདསྶནམཏྟཉྩེཏཾ, ཡདིདཾ པཱལི༹ཡཾ ཝེདནཱསཉྙཱཝིཏཀྐགྒཧཎནྟི དསྶེནྟོ ‘‘ན ཀེཝལ’’ནྟིཨཱདིམཱཧ ¶ , ཏེན ཨཝསེསཏོ སབྦདྷམྨཱནམྤི ཨུཔྤཱདཱདིཏོ ཝིདིཏབྷཱཝཾ དསྶེཏི.

ཨིདཱནི ན ཀེཝལཾ ཁཎཏོ ཨེཝ, ཨཐ ཁོ པཙྩཡཏོཔི ཨནིཙྩཱདིཏོཔི ན ཀེཝལཾ ཁཱིཎཱསཝཱནཾཡེཝ ཝསེན, ཨཐ ཁོ ཨེཀཙྩཱནཾ སེཀྑཱནམྤི ཝསེན ཝེདནཱདཱིནཾ ཝིདིཏབྷཱཝཾ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ཏཏྠ ཨཝིཛྫཱསམུདཡཱཏི ཨཝིཛྫཱཡ ཨུཔྤཱདཱ, ཨཏྠིབྷཱཝཱཏི ཨཏྠོ. ནིརོདྷཝིརོདྷཱི ཧི ཨུཔྤཱདོ ཨཏྠིབྷཱཝཝཱཙཀོཔི ཧོཏཱིཏི ཏསྨཱ པུརིམབྷཝསིདྡྷཱཡ ཨཝིཛྫཱཡ སཏི ཨིམསྨིཾ བྷཝེ ཝེདནཱཡ ¶ ཨུཔྤཱདོ ཧོཏཱིཏི ཨཏྠོ. ཨཝིཛྫཱདཱིཧི ཨཏཱིཏཀཱལིཀཱདཱིཧི ¶ ཏེསཾ སཧཀཱརཎབྷཱུཏཱནི ཨུཔྤཱདཱདཱིནིཔི གཧིཏཱནེཝཱཏི ཝེདིཏབྦཾ. ཝེདནཱཡ པཝཏྟིཔཙྩཡེསུ ཕསྶསྶ བལཝབྷཱཝཏོ སོ ཨེཝ གཧིཏོ ‘‘ཕསྶསམུདཡཱ’’ཏི. ཏསྨིཾ པན གཧིཏེ པཝཏྟིཔཙྩཡཏཱསཱམཉྙེན ཝཏྠཱརམྨཎཱདཱིནིཔི གཧིཏཱནེཝ ཧོནྟཱིཏི སབྦསྶཱཔི ཝེདནཱཡ ཨནཝསེསཏོ པཙྩཡཏོ ཨུདཡདསྶནཾ ཝིབྷཱཝིཏནྟི དཊྛབྦཾ. ‘‘ནིབྦཏྟིལཀྑཎ’’ནྟིཨཱདིནཱ ཁཎཝསེན ཨུདཡདསྶནམཱཧ. ཨུཔྤཛྫཏི ཨེཏསྨཱཏི ཨུཔྤཱདོ, ཨུཔྤཛྫནཾ ཨུཔྤཱདོཏི པཙྩཡལཀྑཎཾ, ཁཎལཀྑཎཉྩ ཨུབྷཡཾ ཨེཀཛ྄ཛྷཾ གཧེཏྭཱ ཨཱཧ ‘‘ཨེཝཾ ཝེདནཱཡ ཨུཔྤཱདོ ཝིདིཏོ ཧོཏཱི’’ཏི.

ཨནིཙྩཏོ མནསི ཀརོཏོཏི ཝེདནཱ ནཱམཱཡཾ ཨནཙྩནྟིཀཏཱཡ ཨཱདིཨནྟཝཏཱི ཨུདཡབྦཡཔརིཙྪིནྣཱ ཁཎབྷངྒུརཱ ཏཱཝཀཱལིཀཱ, ཏསྨཱ ‘‘ཨནིཙྩཱ’’ཏི ཨནིཙྩཏོ མནསི ཀརོཏོ. ཏསྶཱ ཁཡཏོ, ཝཡཏོ ཙ ཨུཔཊྛཱནཾ ཝིདིཏཾ པཱཀཊཾ ཧོཏི. དུཀྑཏོ མནསི ཀརོཏོཏི ཨནིཙྩཏྟཱ ཨེཝ ཝེདནཱ ཨུདཡབྦཡཔཊིཔཱིལི༹ཏཏཱཡ, དུཀྑམཏཱཡ, དུཀྑཝཏྠུཏཱཡ ཙ ‘‘དུཀྑཱ’’ཏི མནསི ཀརོཏོ བྷཡཏོ བྷཱཡིཏབྦཏོ ཏསྶཱ ཨུཔཊྛཱནཾ ཝིདིཏཾ པཱཀཊཾ ཧོཏཱིཏི. ཏཐཱ ཨནིཙྩཏྟཱ, དུཀྑཏྟཱ ཨེཝ ཙ ¶ ཝེདནཱ ཨཏྟརཧིཏཱ ཨསཱརཱ ནིསྶཱརཱ ཨཝསཝཏྟིནཱི ཏུཙྪཱཏི ཝེདནཾ ཨནཏྟཏོ མནསི ཀརོཏོ སུཉྙཏོ རིཏྟཏོ ཨསཱམིཀཏོ ཨུཔཊྛཱནཾ ཝིདིཏཾ པཱཀཊཾ ཧོཏི. ‘‘ཁཡཏོ’’ཏིཨཱདི ཝུཏྟསྶེཝ ཨཏྠསྶ ནིགམནཾ. ཏསྨཱ ཝེདནཾ ཁཡཏོ བྷཡཏོ སུཉྙཏོ ཛཱནཱཏཱིཏི ཨཏྠཝསེན ཝིབྷཏྟིཔརིཎཱམོ ཝེདིཏབྦོ. ཨཝིཛྫཱནིརོདྷཱ ཝེདནཱནིརོདྷོཏི ཨགྒམགྒེན ཨཝིཛྫཱཡ ཨནུཔྤཱདནིརོདྷཏོ ཝེདནཱཡ ཨནུཔྤཱདནིརོདྷོ ཧོཏི པཙྩཡཱབྷཱཝེ ཨབྷཱཝཏོ. སེསཾ སམུདཡཝཱརེ ཝུཏྟནཡཱནུསཱརེན ཝེདིཏབྦཾ. ཨིདྷ སམཱདྷིབྷཱཝནཱཏི སིཁཱཔྤཏྟཱ ཨརིཡཱནཾ ཝིཔསྶནཱསམཱདྷིབྷཱཝནཱ. ཏསྶཱ པཱདཀབྷཱུཏཱ ཛྷཱནསམཱཔཏྟི ཝེདིཏབྦཱ.

ཝུཏྟནཡམེཝ མཧཱཔདཱནེ (དཱི. ནི. ༢.༦༢).

༣༠༨. པམཱཎཾ ཨགྒཧེཏྭཱཏི ཨསུབྷབྷཱཝནཱ ཝིཡ པདེསཾ ཨགྒཧེཏྭཱ. ཨེཀསྨིམྤི སཏྟེ པམཱཎཱགྒཧཎེན ཨནཝསེསཕརཎེན. ནཏྠི ཨེཏཱསཾ ¶ གཧེཏབྦཾ པམཱཎནྟི ཧི ཨཔྤམཱཎཱ, ཨཔྤམཱཎཱ ཨེཝ ཨཔྤམཉྙཱ.

ཨཔསྶཡིཏབྦཊྛེན ཨཔསྶེནཱནི, ཨིདྷ བྷིཀྑུ ཡཱནི ཨཔསྶཱཡ ཏིསྶོ སིཀྑཱ སིཀྑིཏུཾ སམཏྠོ ཧོཏི, ཏེསམེཝ ཨདྷིཝཙནཾ. ཏཱནི པནེཏཱནི པཙྩཡཱནཾ སངྑཱཡ སེཝིཏཱ ཨདྷིཝཱསནཀྑནྟི, ཝཛྫནཱིཡཝཛྫནཾ, ཝིནོདེཏབྦཝིནོདནཉྩ. ཏེནཱཧ ‘‘སངྑཱཡེཀཾ ཨདྷིཝཱསེཏཱི’’ཏིཨཱདི ¶ . ཏཏྠ སམྨདེཝ ཁཱཡཏི ཨུཔཊྛཱཏི པཊིབྷཱཏཱིཏི སངྑཱ, ཉཱཎནྟི ཨཱཧ ‘‘སངྑཱཡཱཏི ཉཱཎེནཱ’’ཏི. སངྑཱཡ སེཝིཏཱ ནཱམ ཡཾ སེཝཏོ ཨཀུསལཱ དྷམྨཱ པརིཧཱཡནྟི, ཀུསལཱ དྷམྨཱ ཨབྷིཝཌྜྷནྟི, ཏསྶ སེཝནཱཏི ཨཱཧ ‘‘སེཝིཏབྦཡུཏྟཀམེཝ སེཝཏཱི’’ཏི. ཨདྷིཝཱསནཱདཱིསུཔི ཨེསེཝ ནཡོ. ཨནྟོ པཝིསིཏུནྟི ¶ ཨབྦྷནྟརེ ཨཏྟནོ ཙིཏྟེ པཝཏྟིཏུཾ ན དེཏི.

ཨརིཡཝཾསཙཏུཀྐཝཎྞནཱ

༣༠༩. ཝཾས-སདྡོ ‘‘པིཊྛིཝཾསཾ ཨཏིཀྐམིཏྭཱ ནིསཱིདཏཱི’’ཏིཨཱདཱིསུ དྭིནྣཾ དྭིནྣཾ གོཔཱནསཱིནཾ སནྡྷཱནཊྛཱནེ ཋཔེཏབྦདཎྜཀེ ཨཱགཏོ.

‘‘ཝཾསོ ཝིསཱལོཝ ཡཐཱ ཝིསཏྟོ,

པུཏྟེསུ དཱརེསུ ཙ ཡཱ ཨཔེཀྑཱ;

ཝཾསེ ཀལཱི༹རོཝ ཨསཛྫམཱནོ,

ཨེཀོ ཙརེ ཁགྒཝིསཱཎཀཔྤོ’’ཏིཨཱདཱིསུ. (ཨཔ. ༡.༡.༩༤);

ཨཀཎྜཀེ. ‘‘བྷེརིསདྡོ མུདིངྒསདྡོ ཝཾསསདྡོ ཀཾསཏཱལ༹སདྡོ’’ཏིཨཱདཱིསུ ཏཱུརིཡཝིསེསེ, ཡོ ‘‘ཝེཎཱུ’’ ཏིཔི ཝུཙྩཏི. ‘‘ཨབྷིནྣེན པིཊྛིཝཾསེན མཏོ ཧཏྠཱི’’ཏིཨཱདཱིསུ ཧཏྠིཨཱདཱིནཾ པིཊྛིཝེམཛ྄ཛྷེ པདེསེ. ‘‘ཀུལཝཾསཾ ཋཔེསྶཱམཱི’’ཏིཨཱདཱིསུ (དཱི. ནི. ༣.༢༦༧) ཀུལཝཾསེ. ‘‘ཝཾསཱནུརཀྑཀོ པཝེཎཱིཔཱལཀོ’’ཏིཨཱདཱིསུ (ཝིསུདྡྷི. ༡.༤༢) གུཎཱནུཔུབྦིཡཾ གུཎཱནཾ པབནྡྷཔྤཝཏྟིཡཾ. ཨིདྷ པན ཙཏུཔཙྩཡསནྟོསབྷཱཝནཱརཱམཏཱསངྑཱཏགུཎཱནཾ པབནྡྷེ དཊྛབྦོ. ཏསྶ པན ཝཾསསྶ ཀུལནྭཡཾ, གུཎནྭཡཉྩ ནིདསྶནཝསེན དསྶེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. ཏཏྠ ཁཏྟིཡཝཾསོཏི ཁཏྟིཡཀུལནྭཡོ ¶ . ཨེསེཝ ནཡོ སེསཔདེསུཔི. སམཎཝཾསོ པན སམཎཏནྟི སམཎཔཝེཎཱི. མཱུལགནྡྷཱདཱིནནྟི ཨཱདི-སདྡེན ཡཐཱ སཱརགནྡྷཱདཱིནཾ སངྒཧོ, ཨེཝམེཏྠ གོརསཱདཱིནམྤི སངྒཧོ ¶ དཊྛབྦོ. དུཏིཡེན པན ཨཱདི-སདྡེན ཀཱསིཀཝཏྠསཔྤིམཎྜཱདཱིནཾ. ཨརིཡ-སདྡོ ཨམིལཀྑཱུསུཔི མནུསྶེསུ ཝཏྟཏི, ཡེསཾ པན ནིཝཱསནཊྛཱནཾ ‘‘ཨརིཡཾ ཨཱཡཏན’’ནྟི ཝུཙྩཏི. ཡཐཱཧ ‘‘ཡཱཝཏཱ, ཨཱནནྡ, ཨརིཡཾ ཨཱཡཏན’’ནྟི (དཱི. ནི. ༢.༡༥༢; ཨུདཱ. ༧༦) ལོཀིཡསཱདྷུཛནེསུཔི ‘‘ཡེ ཧི ཝོ ཨརིཡཱ པརིསུདྡྷཀཱཡཀམྨནྟཱ…པེ… ཏེསཾ ཨཧཾ ཨཉྙཏརོ’’ཏིཨཱདཱིསུ (མ. ནི. ༡.༣༥). ཨིདྷ པན ཡེ ‘‘ཨཱརཀཱ ཀིལེསེཧཱི’’ཏིཨཱདིནཱ ལདྡྷནིབྦཙནཱ ¶ པཊིཝིདྡྷཨརིཡསཙྩཱ, ཏེ ཨེཝ ཨདྷིཔྤེཏཱཏི དསྶེཏུཾ ‘‘ཀེ པན ཏེ ཨརིཡཱ’’ཏི པུཙྪཾ ཀཏྭཱ ‘‘ཨརིཡཱ ཝུཙྩནྟཱི’’ཏིཨཱདི ཝུཏྟཾ.

ཏཏྠ ཡེ མཧཱཔཎིདྷཱནཀཔྤཏོ པཊྛཱཡ ཡཱཝཱཡཾ ཀཔྤོ, ཨེཏྠནྟརེ ཨུཔྤནྣཱ སམྨཱསམྦུདྡྷཱ, ཏེ ཏཱཝ སརཱུཔཏོ དསྶེཏྭཱ ཏདཉྙེཔི སམྨཱསམྦུདྡྷེ, པཙྩེཀབུདྡྷེ, བུདྡྷསཱཝཀེ ཙ སངྒཧེཏྭཱ ཨནཝསེསཏོ ཨརིཡེ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ཏཏྠ ཡཱཝ སཱསནཾ ན ཨནྟརདྷཱཡཏི, ཏཱཝ སཏྠཱ དྷརཏི ཨེཝ ནཱམཱཏི ཨིམམེཝ བྷགཝནྟཾ, ཡེ ཙེཏརཧི བུདྡྷསཱཝཀཱ, ཏེ ཙ སནྡྷཱཡ པཙྩུཔྤནྣགྒཧཎཾ. ཏསྨིཾ ཏསྨིཾ ཝཱ ཀཱལེ ཏེ ཏེ པཙྩུཔྤནྣཱཏི ཙེ, ཨཏཱིཏཱནཱགཏགྒཧཎཾ ན ཀཏྟབྦཾ སིཡཱ. ཨིདཱནི ཡཐཱ བྷགཝཱ ‘‘དྷམྨཾ ཝོ, བྷིཀྑཝེ, དེསེསྶཱམི ཨཱདིཀལྱཱཎཾ མཛ྄ཛྷེཀལྱཱཎཾ པརིཡོསཱནཀལྱཱཎཾ སཱཏྠཾ སབྱཉྫནཾ ཀེཝལཔརིཔུཎྞཾ པརིསུདྡྷཾ བྲཧྨཙརིཡཾ པཀཱསེསྶཱམི, ཡདིདཾ ཚཚཀྐཱནཱི’’ཏི ཚཀྐདེསནཱཡ ¶ (མ. ནི. ༣.༤༢༠) ཨཊྛཧི པདེཧི ཝཎྞཾ ཨབྷཱསི, ཨེཝཾ མཧཱཨརིཡཝཾསདེསནཱཡ ཨརིཡཱནཾ ཝཾསཱནཾ ‘‘ཙཏྟཱརོམེ, བྷིཀྑཝེ, ཨརིཡཝཾསཱ ཨགྒཉྙཱ རཏྟཉྙཱ ཝཾསཉྙཱ པོརཱཎཱ ཨསཾཀིཎྞཱ ཨསཾཀིཎྞཔུབྦཱ ན སངྐཱིཡནྟི ན སངྐཱིཡིསྶནྟི ཨཔྤཊིཀུཊྛཱ སམཎེཧི བྲཱཧྨཎེཧི ཝིཉྙཱུཧཱི’’ཏི (ཨ. ནི. ༤.༢༨) ཡེཧི ནཝཧི པདེཧི ཝཎྞཾ ཨབྷཱསི, ཏཱནི ཏཱཝ ཨཱནེཏྭཱ ཐོམནཱཝསེནེཝ ཝཎྞེནྟོ ‘‘ཏེ ཁོ པནེཏེ’’ཏིཨཱདིམཱཧ. ཨགྒཱཏི ཛཱནིཏབྦཱ སབྦཝཾསེཧི སེཊྛབྷཱཝཏོ, སེཊྛབྷཱཝསཱདྷནཏོ ཙ. དཱིགྷརཏྟཾ པཝཏྟཱཏི ཛཱནིཏབྦཱ རཏྟཉྙཱུཧི, བུདྡྷཱདཱིཧི ཏེཧི ཙ ཏཐཱ ཨནུཊྛིཏཏྟཱ. ཝཾསཱཏི ཛཱནིཏབྦཱ བུདྡྷཱདཱིནཾ ཨརིཡཱནཾ ཝཾསཱཏི ཛཱནིཏབྦཱ. པོརཱཎཱཏི པུརཱཏནཱ. ན ཨདྷུནུཔྤཏྟིཀཱཏི ན ཨདྷུནཱཏནཱ. ཨསཾཀིཎྞཱཏི ན ཁིཏྟཱ ན ཚཌྜིཏཱ. ཏེནཱཧ ‘‘ཨནཔནཱིཏཱ’’ཏི. ན ཨཔནཱིཏཔུབྦཱཏི ན ¶ ཚཌྜིཏཔུབྦཱ ཏིསྶནྣཾ སིཀྑཱནཾ པརིཔཱུརཎཱུཔཱཡབྷཱཝཏོ ན པརིཙཏྟཔུབྦཱ. ཏཏོ ཨེཝ ཨིདཱནིཔི ན ཨཔནཱིཡནྟི, ཨནཱགཏེཔི ན ཨཔནཱིཡིསྶནྟི. ཡེ དྷམྨསབྷཱཝསྶ ཝིཛཱནནེཝ ཝིཉྙཱུ སམིཏཔཱཔསམཎཱ ཙེཝ བཱཧིཏཔཱཔབྲཱཧྨཎཱ ཙ, ཏེཧི ཨཔྤཊིཀུཊྛཱ ཨཔྤཊིཀྑིཏྟཱ. ཡེ ཧི ན པཊིཀྐོསིཏབྦཱ, ཏེ ཨནིནྡིཏབྦཱ ཨགརཧིཏབྦཱ. ཨཔརིཙྩཛིཏབྦཏཱཡ ཨཔྤཊིཀྑིཔིཏབྦཱ ཧོནྟཱིཏི.

སནྟུཊྛོཏི ཨེཏྠ ཡཐཱདྷིཔྤེཏསནྟོསམེཝ དསྶེནྟོ ‘‘པཙྩཡསནྟོསཝསེན སནྟུཊྛོ’’ཏི ཝུཏྟཾ. ཛྷཱནཝིཔསྶནཱདིཝསེནཔི ཨིདྷ བྷིཀྑུནོ སནྟུཊྛཏཱ ཧོཏཱིཏི. ཨིཏརཱིཏརེནཱཏི ཨིཏརེན ཨིཏརེན. ཨིཏར-སདྡོཡཾ ཨནིཡམཝཙནོ, དྭིཀྑཏྟུཾ ཝུཙྩམཱནོ ཡཾཀིཉྩི-སདྡེཧི སམཱནཏྠོ ཧོཏཱིཏི ཝུཏྟཾ ‘‘ཡེན ཀེནཙཱི’’ཏི. སྭཱཡཾ ཨནིཡམཝཱཙིཏཱཡ ¶ ཨེཝ ཡཐཱ ཐཱུལཱདཱིནཾ ཨཉྙཏརཝཙནོ, ཨེཝཾ ཡཐཱལདྡྷཱདཱིནམྤི ཨཉྙཏརཝཙནོཏི ཏཏྠ དུཏིཡཔཀྑསྶེཝ ཨིདྷ ཨིཙྪིཏབྷཱཝཾ དསྶེནྟོ ‘‘ཨཐ ཁོ’’ཏིཨཱདིམཱཧ ¶ . ནནུ ཙ ཡཐཱལདྡྷཱདཡོཔི ཐཱུལཱདཡོ ཨེཝ? སཙྩམེཏཾ, ཏཐཱཔི ཨཏྠི ཝིསེསོ. ཡོ ཧི ཡཐཱལདྡྷེསུ ཐཱུལཱདཱིསུ སནྟོསོ, སོ ཡཐཱལཱབྷསནྟོསོ ཨེཝ, ན ཨིཏརོ. ན ཧི སོ པཙྩཡམཏྟསནྣིསྶཡོ ཨིཙྪིཏོ, ཨཐ ཁོ ཨཏྟནོ ཀཱཡབལསཱརུཔྤབྷཱཝསནྣིསྶཡོཔི. ཐཱུལདུཀཱདཡོ ཙ ཏཡོཔི ཙཱིཝརེ ལབྦྷནྟི. མཛ྄ཛྷིམོ ཙཏུཔཙྩཡསཱདྷཱརཎོ, པཙྪིམོ པན ཙཱིཝརེ, སེནཱསནེ ཙ ལབྦྷཏཱིཏི དཊྛབྦཾ. ‘‘ཨིམེ ཏཡོ སནྟོསེ’’ཏི ཨིདཾ སབྦསངྒཱཧིཀཝསེན ཝུཏྟཾ. ཡེ ཧི པརཏོ གིལཱནཔཙྩཡཾ པིཎྜཔཱཏེ ཨེཝ པཀྑིཔིཏྭཱ ཙཱིཝརེ ཝཱིསཏི, པིཎྜཔཱཏེ པནྣརས, སེནཱསནེ པནྣརསཱཏི སམཔཎྞཱསསནྟོསཱ ཝུཙྩནྟི, ཏེ སབྦེཔི ཡཐཱརཧཾ ཨིམེསུ ཨེཝ ཏཱིསུ སནྟོསེསུ སངྒཧཾ སམོསརཎཾ གཙྪནྟཱིཏི.

ཙཱིཝརཾ ཛཱནིཏབྦནྟི ‘‘ཨིདཾ ནཱམ ཙཱིཝརཾ ཀཔྤིཡ’’ནྟི ཛཱཏིཏོ ཙཱིཝརཾ ཛཱནིཏབྦཾ. ཙཱིཝརཀྑེཏྟནྟི ཙཱིཝརསྶ ཨུཔྤཏྟིཀྑེཏྟཾ. པཾསུཀཱུལནྟི པཾསུཀཱུལཙཱིཝརཾ, པཾསུཀཱུལལཀྑཎཔྤཏྟཾ ཙཱིཝརཾ ཛཱནིཏབྦནྟི ཨཏྠོ. ཙཱིཝརསནྟོསོཏི ཙཱིཝརེ ལབྦྷམཱནོ སབྦོ སནྟོསོ ཛཱནིཏབྦོ. ཙཱིཝརཔཊིསཾཡུཏྟཱནི དྷུཏངྒཱནི ཛཱནིཏབྦཱནི, ཡཱནི ཏོསནྟོ ཙཱིཝརསནྟོསེན སམྨདེཝ སནྟུཊྛོ ཧོཏཱིཏི. ཁོམཀཔྤཱསིཀཀོསེཡྻཀམྦལསཱཎབྷངྒཱནི ཁོམཱདཱིནི. ཏཏྠ ཁོམཾ ནཱམ ཁོམསུཏྟེཧི ཝཱཡིཏཾ ཁོམཔཊཙཱིཝརཾ, ཏཐཱ ¶ སེསཱནིཔི. སཱཎནྟི སཱཎཝཱཀསུཏྟེཧི ཀཏཙཱིཝརཾ. བྷངྒནྟི པན ཁོམསུཏྟཱདཱིནི སབྦཱནི ཨེཀཙྩཱནི ཝོམིསྶེཏྭཱ ཀཏཙཱིཝརཾ. ‘‘བྷངྒམྤི ཝཱཀམཡམེཝཱ’’ཏི ཀེཙི. ཚཱཏི གཎནཔརིཙྪེདོ. ཡདི ཨེཝཾ ཨིཏོ ཨཉྙཱ ཝཏྠཛཱཏི ནཏྠཱིཏི? ནོ ནཏྠི, སཱ པན ཨེཏེསཾ ཨནུལོམཱཏི དསྶེཏུཾ ‘‘དུཀཱུལཱདཱིནཱི’’ཏིཨཱདི ཝུཏྟཾ. ཨཱདི-སདྡེན པཊྚུཎྞཾ, སོམཱརཔཊྚཾ, ཙཱིནཔཊྚཾ ¶ , ཨིདྡྷིཛཾ, དེཝདིནྣནྟི ཨེཏེསཾ སངྒཧོ. ཏཏྠ དུཀཱུལཾ སཱཎསྶ ཨནུལོམཾ ཝཱཀམཡཏྟཱ. པཊྚུཎྞདེསེ སཉྫཱཏཝཏྠཾ པཊྚུཎྞཾ. ‘‘པཊྚུཎྞཾ ཀོསེཡྻཝིསེསོ’’ཏི ཧི ཨམརཀོསེ ཝུཏྟཾ. སོམཱརདེསེ, ཙཱིནདེསེ ཙ ཛཱཏཝཏྠཱནི སོམཱརཙཱིནཔཊྚཱནི. པཊྚུཎྞཱདཱིནི ཏཱིཎི ཀོསེཡྻསྶ ཨནུལོམཱནི པཱཎཀེཧི ཀཏསུཏྟམཡཏྟཱ. ཨིདྡྷིཛཾ ཨེཧིབྷིཀྑཱུནཾ པུཉྙིདྡྷིཡཱ ནིབྦཏྟཾ ཙཱིཝརཾ, ཏཾ ཁོམཱདཱིནཾ ཨཉྙཏརཾ ཧོཏཱིཏི ཏེསམེཝ ཨནུལོམཉྩ. དེཝཏཱཧི དིནྣཾ ཙཱིཝརཾ དེཝདིནྣཾ, ཏཾ ཀཔྤརུཀྑེ ནིབྦཏྟཾ ཛཱལིནིཡཱ དེཝཀཉྙཱཡ ཨནུརུདྡྷཏྠེརསྶ དིནྣཝཏྠསདིསཾ, ཏམྤི ཁོམཱདཱིནཾཡེཝ ཨནུལོམཾ ཧོཏི ཏེསུ ཨཉྙཏརབྷཱཝཏོ. ཨིམཱནཱིཏི ཨནྟོགདྷཱཝདྷཱརཎཝཙནཾ, ཨིམཱནི ཨེཝཱཏི ཨཏྠོ. བུདྡྷཱདཱིནཾ པརིབྷོགཡོགྱཏཱཡ ཀཔྤིཡཙཱིཝརཱནི.

ཨིདཱནི ཨཝདྷཱརཎེན ནིཝཏྟིཏཱནི ཨེཀདེསེན དསྶེཏུཾ ‘‘ཀུསཙཱིར’’ནྟིཨཱདི ཝུཏྟཾ. ཏཏྠ ཀུསཏིཎེཧི, ཨཉྙེཧི ཝཱ ཏཱདིསེཧི ཏིཎེཧི ཀཏཙཱིཝརཾ ཀུསཙཱིརཾ. པོཏཀཱིཝཱཀཱདཱིཧི ཝཱཀེཧི ཀཏཙཱིཝརཾ ཝཱཀཙཱིརཾ. ཙཏུཀྐོཎེཧི, ཏིཀོཎེཧི ཝཱ ཕལཀེཧི ཀཏཙཱིཝརཾ ཕལཀཙཱིརཾ. མནུསྶཱནཾ ¶ ཀེསེཧི ཀཏཀམྦལཾ ཀེསཀམྦལཾ. ཙཱམརཱིཝཱལཨསྶཝཱལཱདཱིཧི ཀཏཾ ཝཱལཀམྦལཾ. མཀཙིཏནྟཱུཧི ཝཱཡིཏོ པོཏྠཀོ. ཙམྨནྟི མིགཙམྨཱདི ཡཾ ཀིཉྩི ཙམྨཾ. ཨུལཱུཀཔཀྑེཧི གནྠེཏྭཱ ཀཏཙཱིཝརཾ ཨུལཱུཀཔཀྑཾ. བྷུཛཏཙཱདིམཡཾ རུཀྑདུསྶཾ, ཏིརཱིཊཀནྟི ཨཏྠོ. སུཁུམཏརཱཧི ལཏཱཝཱཀེཧི ¶ ཝཱཡིཏཾ ལཏཱདུསྶཾ. ཨེརཀཝཱཀེཧི ཀཏཾ ཨེརཀདུསྶཾ. ཏཐཱ ཀདལིདུསྶཾ. སུཁུམེཧི ཝེལུ༹ཝིལཱིཝེཧི ཀཏཾ ཝེལུ༹དུསྶཾ. ཨཱདི-སདྡེན ཝཀྐལཱདཱིནཾ སངྒཧོ. ཨཀཔྤིཡཙཱིཝརཱནི ཏིཏྠིཡདྡྷཛབྷཱཝཏོ.

ཨཊྛནྣཉྩ མཱཏིཀཱནཾ ཝསེནཱཏི ‘‘སཱིམཱཡ དེཏི, ཀཏིཀཱཡ དེཏཱི’’ཏིཨཱདིནཱ (མཧཱཝ. ༣༧༩) ཨཱགཏཱནཾ ཨཊྛནྣཾ ཙཱིཝརུཔྤཏྟིམཱཏིཀཱནཾ ཝསེན. ཙཱིཝརཱནཾ པཊིལཱབྷཀྑེཏྟདསྶནཏྠཉྷི ¶ བྷགཝཏཱ ‘‘ཨཊྛིམཱ, བྷིཀྑཝེ, མཱཏིཀཱ’’ཏིཨཱདིནཱ མཱཏིཀཱ ཋཔིཏཱ. མཱཏིཀཱཏི ཧི མཱཏརོ ཙཱིཝརུཔྤཏྟིཛནིཀཱཏི. སོསཱནིཀནྟི སུསཱནེ པཏིཏཀཾ. པཱཔཎིཀནྟི ཨཱཔཎདྭཱརེ པཏིཏཀཾ. རཐིཡནྟི པུཉྙཏྠིཀེཧི ཝཱཏཔཱནནྟརེན རཐིཀཱཡ ཚཌྜིཏཙོལ༹ཀཾ. སངྐཱརཀཱུཊཀནྟི སངྐཱརཊྛཱནེ ཚཌྜིཏཙོལ༹ཀཾ. སིནཱནནྟི ནྷཱནཙོལ༹ཾ, ཡཾ བྷཱུཏཝེཛྫེཧི སཱིསཾ ནྷཱཔེཏྭཱ ‘‘ཀཱལ༹ཀཎྞཱིཙོལ༹ཀ’’ནྟི ཚཌྜེཏྭཱ གཙྪནྟི. ཏིཏྠནྟི ཏིཏྠཙོལ༹ཀཾ སིནཱནཏིཏྠེ ཚཌྜིཏཔིལོཏིཀཱ. ཨགྒིདཌྜྷནྟི ཨགྒིནཱ དཌྜྷཔྤདེསཾ. ཏཉྷི མནུསྶཱ ཚཌྜེནྟི. གོཁཱཡིཏཀཱདཱིནི པཱཀཊཱནེཝ. ཏཱནིཔི ཧི མནུསྶཱ ཚཌྜེནྟི.

དྷཛཾ ཨུསྶཱཔེཏྭཱཏི ནཱཝཾ ཨཱརོཧནྟེཧི ཝཱ ཡུདྡྷཾ པཝིསནྟེཧི ཝཱ དྷཛཡཊྛིཾ ཨུསྶཱཔེཏྭཱ ཏཏྠ བདྡྷཾ པཱརུཏཙཱིཝརཾ, ཏེཧི ཚཌྜིཏནྟི ཨདྷིཔྤཱཡོ.

སཱདཀབྷིཀྑུནཱཏི གཧཔཏིཙཱིཝརསྶ སཱདིཡནབྷིཀྑུནཱ. ཨེཀམཱསམཏྟནྟི ཙཱིཝརམཱསསཉྙིཏཾ ཨེཀམཱསམཏྟཾ. ཝིཏཀྐེཏུཾ ཝཊྚཏི, ན ཏཏོ པརནྟི ཨདྷིཔྤཱཡོ. སབྦསྶཱཔི ཧི ཏཎྷཱནིགྒཧཏྠཱཡ སཱསནེ པཊིཔཏྟཱིཏི. པཾསུཀཱུལིཀོ ཨདྡྷམཱསེནེཝ ཀརོཏཱིཏི ཨཔརཔཊིབདྡྷཏྟཱ ¶ པཊིལཱབྷསྶ. ཨིཏརསྶ པན པརཔཊིབདྡྷཏྟཱ མཱསམཏྟཾ ཨནུཉྙཱཏཾ. ཨིཏི མཱསདྡྷ…པེ… ཝིཏཀྐསནྟོསོ ཝིཏཀྐནསྶ པརིམིཏཀཱལིཀཏྟཱ.

མཧཱཐེརཾ ཏཏྠ ཨཏྟནོ སཧཱཡཾ ཨིཙྪནྟོཔི གརུགཱརཝེན གཱམདྭཱརཾ ‘‘བྷནྟེ གམིསྶཱམི’’ ཨིཙྩེཝམཱཧ. མཧཱཐེརོཔིསྶ ཨཛ྄ཛྷཱསཡཾ ཉཏྭཱ ‘‘ཨཧཾ པཱཝུསོ གམིསྶཱམཱི’’ཏི ཨཱཧ. ‘‘ཨིམསྶ བྷིཀྑུནོ ཝིཏཀྐསྶ ཨཝསརོ མཱ ཧོཏཱུ’’ཏི པཉྷཾ པུཙྪམཱནོ གཱམཾ པཱཝིསི. ཨུཙྩཱརཔལིབུདྡྷོཏི ཨུཙྩཱརེན པཱིལི༹ཏོ. ཏདཱ བྷགཝཏོ དུཀྐརཀིརིཡཱནུསྶརཎམུཁེན ཏཐཱགཏེ ཨུཔྤནྣཔཱིཏིསོམནསྶཝེགསྶ ¶ བལཝབྷཱཝེན ཀིལེསཱནཾ ཝིཀྑམྦྷིཏཏྟཱ ཏསྨིཾཡེཝ…པེ… ཏཱིཎི ཕལཱནི པཏྟོ.

‘‘ཀཏྠ ལབྷིསྶཱམཱི’’ཏི ཙིནྟནཱཔི ལཱབྷཱསཱཔུབྦིཀཱཏི ཏཐཱ ‘‘ཨཙིནྟེཏྭཱ’’ཏི ཝུཏྟཾ, ‘‘སུནྡརཾ ལབྷིསྶཱམི, མནཱཔཾ ལབྷིསྶཱམཱི’’ཏི ཨེཝམཱདིཙིནྟནཱཡ ཀཱ ནཱམ ཀཐཱ. ཀཐཾ པན ཝཏྟབྦནྟི ཨཱཧ ‘‘ཀམྨཊྛཱནསཱིསེནེཝ གམན’’ནྟི, ཏེན ཙཱིཝརཾ པཊིཙྩ ཀིཉྩིཔི ན ཙིནྟེཏབྦཾ ཨེཝཱཏི དསྶེཏི.

ཨཔེསལོ ¶ ཨཔྤཏིརཱུཔཱཡཔི པརིཡེསནཱཡ པཙྩཡོ བྷཝེཡྻཱཏི ‘‘པེསལཾ བྷིཀྑུཾ གཧེཏྭཱ’’ཏི ཝུཏྟཾ.

ཨཱཧརིཡམཱནནྟི སུསཱནཱདཱིསུ པཏིཏཀཾ ཝཏྠཾ ‘‘ཨིམེ བྷིཀྑཱུ པཾསུཀཱུལཔརིཡེསནཾ ཙརནྟཱི’’ཏི ཉཏྭཱ ཀེནཙི པུརིསེན ཏཏོ ཨཱནཱིཡམཱནཾ.

ཨེཝཾ ལདྡྷཾ གཎྷནྟསྶཱཔཱིཏི ཨེཝཾ པཊིལཱབྷསནྟོསཾ ཨཀོཔེཏྭཱཝ ལདྡྷཾ གཎྷནྟསྶཱཔི. ཨཏྟནོ པཧོནཀམཏྟེནེཝཱཏི ཡཐཱལདྡྷཱནཾ པཾསུཀཱུལཝཏྠཱནཾ ཨེཀཔཊྚདུཔཊྚཱནཾ ཨཏྠཱཡ ཨཏྟནོ པཧོནཀཔམཱཎེནེཝ, ཨཝདྷཱརཎེན ཨུཔརིཔཙྩཱསཾ ནིཝཏྟེཏི.

གཱམེ བྷིཀྑཱཡ ཨཱཧིཎྜནྟེན སཔདཱནཙཱརིནཱ ཝིཡ དྭཱརཔཊིཔཱཊིཡཱ ཙརཎཾ ལོལུཔྤཝིཝཛྫནཾ ནཱམ ཙཱིཝརལོལུཔྤསྶ དཱུརསམུསྶཱརིཏཏྟཱ.

ཡཱཔེཏུནྟི ཨཏྟབྷཱཝཾ པཝཏྟེཏུཾ.

དྷོཝནུཔགེནཱཏི དྷོཝནཡོགྒེན.

པཎྞཱནཱིཏི ཨམྦཛམྦཱདིཔཎྞཱནི.

ཨཀོཔེཏྭཱཏི སནྟོསཾ ཨཀོཔེཏྭཱ ¶ . པཧོནཀནཱིཧཱརེནེཝཱཏི ཨནྟརཝཱསཀཱདཱིསུ ཡཾ ཀཱཏུཀཱམོ, ཏསྶ པཧོནཀནིཡཱམེནེཝ ཡཐཱལདྡྷཾ ཐཱུལསུཁུམཱདིཾ གཧེཏྭཱ ཀརཎཾ.

ཏིམཎྜལཔཊིཙྪཱདནམཏྟསྶེཝཱཏི ¶ ‘‘ནིཝཱསནཾ ཙེ ནཱབྷིམཎྜལཾ; ཛཱཎུམཎྜལཾ, ཨིཏརཾ ཙེ གལཝཱཊམཎྜལཾ, ཛཱཎུམཎྜལ’’ནྟི ཨེཝཾ ཏིམཎྜལཔཊིཙྪཱདནམཏྟསྶེཝ ཀརཎཾ; ཏཾ པན ཨཏྠཏོ ཏིཎྞཾ ཙཱིཝརཱནཾ ཧེཊྛིམནྟེན ཝུཏྟཔརིམཱཎམེཝ ཧོཏི.

ཨཝིཙཱརེཏྭཱཏི ན ཝིཙཱརེཏྭཱ.

ཀུསིབནྡྷནཀཱལེཏི མཎྜལཱནི ཡོཛེཏྭཱ སིབྦནཀཱལེ. སཏྟཝཱརེཏི སཏྟསིབྦནཝཱརེ.

ཀཔྤབིནྡུཨཔདེསེན ཀསྶཙི ཝིཀཱརསྶ ཨཀརཎཾ ཀཔྤསནྟོསོ.

སཱིཏཔཊིགྷཱཏཱདི ཨཏྠཱཔཏྟིཏོ སིཛ྄ཛྷཏཱིཏི མུཁྱམེཝ ཙཱིཝརཔརིབྷོགེ པཡོཛནཾ དསྶེཏུཾ ‘‘ཧིརིཀོཔཱིནཔཊིཙྪཱདནམཏྟཝསེནཱ’’ཏི ཝུཏྟཾ. ཏེནཱཧ བྷགཝཱ ‘‘ཡཱཝདེཝ ཧིརིཀོཔཱིནཔཊིཙྪཱདནཏྠ’’ནྟི (མ. ནི. ༡.༢༣; ཨ. ནི. ༦.༦༨; མཧཱནི. ༡༦༢).

ཝཊྚཏི ¶ , ན ཏཱཝཏཱ སནྟོསོ ཀུཔྤཏི སམྦྷཱརཱནཾ, དཀྑིཎེཡྻཱནཉྩ ཨལཱབྷཏོ.

སཱརཎཱིཡདྷམྨེ ཋཏྭཱཏི སཱིལཝནྟེཧི བྷིཀྑཱུཧི སཱདྷཱརཎཏོ པརིབྷོགེ ཋཏྭཱ.

‘‘ཨིཏཱི’’ཏིཨཱདིནཱ པཋམསྶ ཨརིཡཝཾསསྶ པཾསུཀཱུལིཀངྒཏེཙཱིཝརིཀངྒཱནཾ, ཏེསཉྩ ཏསྶ པཙྩཡཏཾ དསྶེནྟོ ཨིཏི ཨིམེ དྷམྨཱ ཨཉྙམཉྙསྶ སམུཊྛཱཔཀཱ, ཨུཔཏྠམྦྷཀཱ ཙཱཏི དཱིཔེཏི. ཨེས ནཡོ ཨིཏོ པརཏོཔི.

‘‘སནྟུཊྛོ ཧོཏི ཝཎྞཝཱདཱི’’ཏི ཨེཏྠ ཙཏུཀྐོཊིཀཾ སམྦྷཝཏི, ཏཏྠ ཙཏུཏྠོཡེཝ པཀྑོ སཏྠཱརཱ ཝཎྞིཏོ ཐོམིཏོཏི མཧཱཐེརེན ཏཐཱ དེསནཱ ཀཏཱ. ཨེཀོ སནྟུཊྛོ ཧོཏི, སནྟོསསྶ ཝཎྞཾ ན ཀཐེཏི སེཡྻཐཱཔི ཐེརོ ནཱལཀོ (སུཏྟནིཔཱཏེ ནཱལཀསུཏྟེ ཝིཏྠཱརོ) ཨེཀོ ན སནྟུཊྛོ ཧོཏི, སནྟོསསྶ ཝཎྞཝཱདཱི སེཡྻཐཱཔི ཨུཔནནྡོ སཀྱཔུཏྟོ (པཱརཱ. ༥༡༥, ༥༢༧, ༥༣༢, ༥༣༧ ཝཱཀྱཁནྡྷེསུ ཝིཏྠཱརོ). ཨེཀོ ནེཝ སནྟུཊྛོ ཧོཏི, ན སནྟོསསྶ ཝཎྞཾ ཀཐེཏི. སེཡྻཐཱཔི ཐེརོ ¶ ལཱལུ༹དཱཡཱི (ཐེརགཱ. ཨཊྛ. ༢.ཨུདཱཡིཏྠེརགཱཐཱཝཎྞནཱ) ཨེཀོ སནྟུཊྛོ ཙེཝ ཧོཏི, སནྟོསསྶ ཙ ཝཎྞཝཱདཱི སེཡྻཐཱཔི ཐེརོ མཧཱཀསྶཔོ.

ཨནེསནནྟི ¶ ཨཡུཏྟཾ ཨེསནཾ. ཏེནཱཧ ‘‘ཨཔྤཏིརཱུཔ’’ནྟི, སཱསནེ ཋིཏཱནཾ ན པཏིརཱུཔཾ ཨསཱརུཔྤཾ ཨཡོགྱཾ. ཀོཧཉྙཾ ཀརོནྟོཏི ཙཱིཝརུཔྤཱདནིམིཏྟཾ པརེསཾ ཀུཧནཾ ཝིམྷཱཔནཾ ཀརོནྟོ. ཨུཏྟསཏཱིཏི ཏཎྷཱསནྟཱསེན ཨུཔརཱུཔརི ཏསཏི. པརིཏསཏཱིཏི པརིཏོ ཏསཏི. ཡཐཱ སབྦེ ཀཱཡཝཙཱིཔཡོགཱ ཏདཏྠཱ ཨེཝ ཛཱཡནྟི, ཨེཝཾ སབྦབྷཱགེཧི ཏསཏི. གདྷིཏཾ ཝུཙྩཏི གདྡྷོ, སོ ཙེཏྠ ཨབྷིཛ྄ཛྷཱལཀྑཎོ ཨདྷིཔྤེཏོ. གདྷིཏཾ ཨེཏསྶ ནཏྠཱིཏི ཨགདྷིཏོཏི ཨཱཧ ‘‘ཨགདྷིཏོ…པེ… ལོབྷགིདྡྷོ’’ཏི. མུཙྪནྟི ཏཎྷཱཝསེན མུཡ྄ཧནཾ, ཏསྶ ཝཱ སམུསྶཡཾ ཨདྷིགཏཾ. ཨནཱཔནྣོ ཨནུཔགཏོ. ཨནོཏྠཏོཏི ཨནཛ྄ཛྷོཏྠཏོ. ཨཔརིཡོནདྡྷོཏི ཏཎྷཱཚདནེན ཨཙྪཱདིཏོ. ཨཱདཱིནཝཾ པསྶམཱནོཏི དིཊྛདྷམྨིཀཾ, སམྤརཱཡིཀཉྩ དོསཾ པསྶནྟོ. གདྷིཏཔརིབྷོགཏོ ནིསྶརཏི ཨེཏེནཱཏི ནིསྶརཎཾ, ཨིདམཏྠིཀཏཱ, ཏཾ པཛཱནཱཏཱིཏི ནིསྶརཎཔཉྙོ. ཏེནཱཧ ‘‘ཡཱཝདེཝ…པེ… པཛཱནནྟོ’’ཏི.

ནེཝཏྟཱནུཀྐཾསེཏཱིཏི ¶ ཨཏྟཱནཾ ནེཝ ཨུཀྐཾསེཏི ན ཨུཀྑིཔཏི ན ཨུཀྐཊྛཏོ དཧཏི. ‘‘ཨཧ’’ནྟིཨཱདི ཨུཀྐཾསནཱཀཱརདསྶནཾ. ན ཝམྦྷེཏཱིཏི ན ཧཱིལ༹ཡཏི ནིཧཱིནཏོ ན དཧཏི. ཏསྨིཾ ཙཱིཝརསནྟོསེཏི ཏསྨིཾ ཡཐཱཝུཏྟེ ཝཱིསཏིཝིདྷེ ཙཱིཝརསནྟོསེ ¶ . ཀཱམཉྩེཏྠ ཝུཏྟཔྤཀཱརསནྟོསགྒཧཎེན ཙཱིཝརཧེཏུ ཨནེསནཱཔཛྫནཱདིཔི གཧིཏམེཝ ཏསྨིཾ སཏི ཏསྶ བྷཱཝཏོ, ཨསཏི ཙ ཨབྷཱཝཏོ, ཝཎྞཝཱདིཏཱནཏྟུཀྐཾསནཱ པརཝམྦྷནཱནི པན གཧིཏཱནི ན ཧོནྟཱིཏི ‘‘ཝཎྞཝཱདིཏཱདཱིསུ ཝཱ’’ཏི ཝིཀཔྤོ ཝུཏྟོ. ཨེཏྠ ཙ ‘‘དཀྑོ’’ཏིཨཱདི ཡེསཾ དྷམྨཱནཾ ཝསེནསྶ ཡཐཱཝུཏྟསནྟོསཱདི ཨིཛ྄ཛྷཏི, ཏཾ དསྶནཾ. ཏཏྠ ‘‘དཀྑོ’’ཏི ཨིམིནཱ ཏེསཾ སམུཊྛཱཔནཔཉྙཾ དསྶེཏི, ‘‘ཨནལསོ’’ཏི ཨིམིནཱ པགྒཎྷནཝཱིརིཡཾ, ‘‘སམྤཛཱནོ’’ཏི ཨིམིནཱ པཱཊིཧཱརིཡཔཉྙཾ ‘‘པཊིསྶཏོ’’ཏི ཨིམིནཱ ཏཏྠ ཨསམྨོསཝུཏྟིཾ དསྶེཏི.

པིཎྜཔཱཏོ ཛཱནིཏབྦོཏི པབྷེདཏོ པིཎྜཔཱཏོ ཛཱནིཏབྦོ. པིཎྜཔཱཏཀྑེཏྟནྟི པིཎྜཔཱཏསྶ ཨུཔྤཏྟིཊྛཱནཾ. པིཎྜཔཱཏསནྟོསོ ཛཱནིཏབྦོཏི པིཎྜཔཱཏེ སནྟོསོ པབྷེདཏོ ཛཱནིཏབྦོ. ཨིདྷ བྷེསཛྫམྤི པིཎྜཔཱཏགཏིཀམེཝ. ཨཱཧརིཏབྦཏོ ཧི སཔྤིཨཱདཱིནམྤི གཧཎཾ ཀཏཾ.

པིཎྜཔཱཏཀྑེཏྟཾ པིཎྜཔཱཏསྶ ཨུཔྤཏྟིཊྛཱནཾ. ཁེཏྟཾ ཝིཡ ཁེཏྟཾ. ཨུཔྤཛྫཏི ཨེཏྠ, ཨེཏེནཱཏི ཙ ཨུཔྤཏྟིཊྛཱནཾ. སངྒྷཏོ ཝཱ ཧི བྷིཀྑུནོ པིཎྜཔཱཏོ ཨུཔྤཛྫཏི ཨུདྡེསཱདིཝསེན ཝཱ. ཏཏྠ སཀལསྶ སངྒྷསྶ དཱཏབྦཾ བྷཏྟཾ སངྒྷབྷཏྟཾ. ཀཏིཔཡེ བྷིཀྑཱུ ཨུདྡིསིཏྭཱ ཨུདྡེསེན དཱཏབྦཾ བྷཏྟཾ ཨུདྡེསབྷཏྟཾ. ནིམནྟེཏྭཱ དཱཏབྦཾ བྷཏྟཾ ནིམནྟནཾ. སལཱཀདཱནཝསེན དཱཏབྦཾ བྷཏྟཾ སལཱཀབྷཏྟཾ ¶ . ཨེཀསྨིཾ པཀྑེ ཨེཀདིཝསཾ དཱཏབྦཾ བྷཏྟཾ པཀྑིཀཾ. ཨུཔོསཐེ དཱཏབྦཾ བྷཏྟཾ ཨུཔོསཐིཀཾ. པཱཊིཔདདིཝསེ དཱཏབྦཾ བྷཏྟཾ པཱཊིཔདིཀཾ. ཨཱགནྟུཀཱནཾ དཱཏབྦཾ བྷཏྟཾ ཨཱགནྟུཀབྷཏྟཾ. དྷུརགེཧེ ཨེཝ ཋཔེཏྭཱ དཱཏབྦཾ བྷཏྟཾ དྷུརབྷཏྟཾ. ཀུཊིཾ ཨུདྡིསྶ དཱཏབྦཾ བྷཏྟཾ ཀུཊིབྷཏྟཾ. གཱམཝཱསཱིཨཱདཱིཧི ཝཱརེན དཱཏབྦཾ བྷཏྟཾ ཝཱརབྷཏྟཾ. ཝིཧཱརཾ ཨུདྡིསྶ དཱཏབྦཾ བྷཏྟཾ ཝིཧཱརབྷཏྟཾ. སེསཱནི པཱཀཊཱནེཝ.

ཝིཏཀྐེཏི ‘‘ཀཏྠ ནུ ཁོ ཨཧཾ ཨཛྫ པིཎྜཱཡ ཙརིསྶཱམཱི’’ཏི. ‘‘ཀཏྠ པིཎྜཱཡ ཙརིསྶཱམཱ’’ཏི ཐེརེན ཝུཏྟེ ‘‘ཨསུཀགཱམེ ¶ བྷནྟེ’’ཏི ཀཱམམེཏཾ པཊིཝཙནདཱནཾ ¶ , ཡེན པན ཙིཏྟེན ‘‘ཙིནྟེཏྭཱ’’ཏི ཝུཏྟཾ, ཏཾ སནྡྷཱཡཱཧ ‘‘ཨེཏྟཀཾ ཙིནྟེཏྭཱ’’ཏི. ཏཏོ པཊྛཱཡཱཏི ཝིཏཀྐམཱལ༹ཀེ ཋཏྭཱ ཝིཏཀྐིཏཀཱལཏོ པཊྛཱཡ. ‘‘ཏཏོ པརཾ ཝིཏཀྐེནྟོ ཨརིཡཝཾསཱ ཙུཏོ ཧོཏཱི’’ཏི ཨིདཾ ཏིཎྞམྤི ཨརིཡཝཾསིཀཱནཾ ཝསེན གཧེཏབྦཾ, ན ཨེཀཙཱརིཀསྶེཝ. སབྦོཔི ཧི ཨརིཡཝཾསིཀོ ཨེཀཝཱརམེཝ ཝིཏཀྐེཏུཾ ལབྷཏི, ན ཏཏོ པརཾ. པརིབཱཧིརོཏི ཨརིཡཝཾསིཀབྷཱཝཏོ བཧིབྷཱུཏོ. སྭཱཡཾ ཝིཏཀྐསནྟོསོ ཀམྨཊྛཱནམནསིཀཱརེན ན ཀུཔྤཏི, ཝིསུཛ྄ཛྷཏི ཙ. ཨིཏོ པརེསུཔི ཨེསེཝ ནཡོ. ཏེནེཝཱཧ ‘‘ཀམྨཊྛཱནསཱིསེན གནྟབྦ’’ནྟི.

གཧེཏབྦམེཝཱཏི ཨཊྛཱནཔྤཡུཏྟོ ཨེཝ-སདྡོ. ཡཱཔནམཏྟམེཝ གཧེཏབྦནྟི ཡོཛེཏབྦཾ.

ཨེཏྠཱཏི ཨེཏསྨིཾ པིཎྜཔཱཏཔཊིགྒཧཎེ. ཨཔྤནྟི ཨཏྟནོ ཡཱཔནཔམཱཎཏོཔི ཨཔྤཾ. གཧེཏབྦཾ དཱཡཀསྶ ཙིཏྟཱརཱདྷནཏྠཾ. པམཱཎེནེཝཱཏི ཨཏྟནོ ཡཱཔནཔྤམཱཎེནེཝ ཨཔྤཾ གཧེཏབྦཾ. ‘‘པམཱཎེན གཧེཏབྦ’’ནྟི ཨེཏྠ ཀཱརཎཾ དསྶེཏུཾ ‘‘པཊིགྒཧཎསྨིཉྷཱི’’ཏིཨཱདི ཝུཏྟཾ. མཀྑེཏཱིཏི ཝིདྡྷཾསེཏི ཨཔནེཏི. ཝིནིཔཱཏེཏཱིཏི ཝིནཱསེཏི ཨཊྛཱནཝིནིཡོགེན. སཱསནནྟི སཏྠུ སཱསནཾ ཨནུསིཊྛིཾ. ན ཀརོཏི ནཔྤཊིཔཛྫཏི.

སཔདཱནཙཱརིནོ ཝིཡ དྭཱརཔཊིཔཱཊིཡཱ ཙརཎཾ ལོལུཔྤཝིཝཛྫནསནྟོསོཏི ཨཱཧ ‘‘དྭཱརཔཊིཔཱཊིཡཱ གནྟབྦ’’ནྟི.

ཧརཱཔེཏྭཱཏི ཨདྷིཀཾ ཨཔནེཏྭཱ.

ཨཱཧཱརགེདྷཏོ ནིསྶརཏི ཨེཏེནཱཏི ནིསྶརཎཾ. ཛིགྷཙྪཱཡ པཊིཝིནོདནཏྠཾ ཀཐཱ, ཀཱཡསྶཋིཏིཨཱདིཔཡོཛནཾ ¶ པན ཨཏྠཱཔཏྟིཏོ ཨཱགཏཾ ཨེཝཱཏི ཨཱཧ ‘‘ཛིགྷཙྪཱཡ…པེ… སནྟོསོ ནཱམཱ’’ཏི.

ནིདཧིཏྭཱ ན པརིབྷུཉྫིཏབྦཾ ཏདཧུཔཱིཏི ཨདྷིཔྤཱཡོ. ཨིཏརཏྠཱ པན སིཀྑཱཔདེནེཝ ཝཱརིཏཾ. སཱརཎཱིཡདྷམྨེ ཋིཏེནཱཏི སཱིལཝནྟེཧི བྷིཀྑཱུཧི སཱདྷཱརཎབྷོགིབྷཱཝེ ཋིཏེན.

སེནཱསནེནཱཏི སཡནེན, ཨཱསནེན ཙ. ཡཏྠ ཡཏྠ ¶ ཧི མཉྩཱདིཀེ, ཝིཧཱརཱདིཀེ ཙ སེཏི, ཏཾ སེནཾ. ཡཏྠ ཡཏྠ པཱིཋཱདིཀེ ཨཱསཏི, ཏཾ ཨཱསནཾ. ཏདུབྷཡཾ ཨེཀཏོ ཀཏྭཱ ‘‘སེནཱསན’’ནྟི ཝུཏྟཾ. ཏེནཱཧ ‘‘མཉྩོ’’ཏིཨཱདི. ཏཏྠ མཉྩོ མསཱརཀཱདི, ཏཐཱ པཱིཋཾ. མཉྩབྷིསི, པཱིཋབྷིསཱིཏི ¶ དུཝིདྷཱ བྷིསི. ཝིཧཱརོ པཱཀཱརཔརིཙྪིནྣོ སཀལོ ཨཱཝཱསོ. ‘‘དཱིགྷམུཁཔཱསཱདོ’’ཏི ཀེཙི. ཨཌྜྷཡོགོཏི དཱིགྷཔཱསཱདོ. ‘‘ཨེཀཔསྶཙྪདནཀསེནཱསན’’ནྟི ཀེཙི. པཱསཱདོཏི ཙཏུརསྶཔཱསཱདོ. ‘‘ཨཱཡཏཙཏུརསྶཔཱསཱདོ’’ཏི ཀེཙི. ཧམྨིཡཾ མུཎྜཙྪདནཔཱསཱདོ. གུཧཱཏི ཀེཝལཱ པབྦཏགུཧཱ. ལེཎཾ དྭཱརབནྡྷཾ. ཨཊྚོ བཧལབྷིཏྟིཀཾ གེཧཾ, ཡསྶ གོཔཱནསིཡོ ཨགྒཧེཏྭཱ ཨིཊྛཀཱཧི ཨེཝ ཚདནཾ ཧོཏི. ‘‘ཨཊྚཱལཀཱཀཱརེན ཀརིཡཏཱི’’ཏིཔི ཝདནྟི. མཱལོ༹ ཨེཀཀཱུཊསངྒཧིཏོ ཨནེཀཀོཎོ པཏིསྶཡཝིསེསོ ‘‘ཝཊྚཱཀཱརེན ཀཏསེནཱསན’’ནྟི ཀེཙི.

པིཎྜཔཱཏེ ཝུཏྟནཡེནེཝཱཏི ‘‘སཱདཀོ བྷིཀྑུ ‘ཨཛྫ ཀཏྠ ཝསིསྶཱམཱི’ཏི ཝིཏཀྐེཏཱི’’ཏིཨཱདིནཱ ཡཐཱརཧཾ པིཎྜཔཱཏེ ཝུཏྟནཡེན ཝེདིཏབྦཱ, ‘‘ཏཏོ པརཾ ཝིཏཀྐེནྟོ ཨརིཡཝཾསཱ ཙུཏོ ཧོཏི པརིབཱཧིརོ’’ཏི, ‘‘སེནཱསནཾ གཝེསནྟེནཱཔི’ཀུཧིཾ ལབྷིསྶཱམཱི’ཏི ཨཙིནྟེཏྭཱ ཀམྨཊྛཱནསཱིསེནེཝ གནྟབྦ’’ནྟི ཙ ཨེཝམཱདི སབྦཾ པུརིམནཡེནེཝ.

ཀསྨཱ པནེཏྠ པཙྩཡསནྟོསཾ དསྶེནྟེན མཧཱཐེརེན གིལཱནཔཙྩཡསནྟོསོ ན གཧིཏོཏི? ན ཁོ པནེཏཾ ཨེཝཾ དཊྛབྦནྟི དསྶེནྟོ ‘‘གིལཱནཔཙྩཡོ པན པིཎྜཔཱཏེ ཨེཝ པཝིཊྛོ’’ཏི ཨཱཧ, ཨཱཧརིཏབྦཏཱསཱམཉྙེནཱཏི ཨདྷིཔྤཱཡོ. ཡདི ཨེཝཾ ཏཏྠ པིཎྜཔཱཏེ ཝིཡ ཝིཏཀྐསནྟོསཱདཡོཔི པནྣརས སནྟོསཱ ཨིཙྪིཏབྦཱཏི? ནོཏི དསྶེནྟོ ཨཱཧ ‘‘ཏཏྠཱ’’ཏིཨཱདི. ནནུ ཙེཏྠ དྭཱདསེཝ དྷུཏངྒཱནི ཝིནིཡོགཾ གཏཱནི, ཨེཀཾ པན ནེསཛྫིཀངྒཾ ན ཀཏྠཙི ཝིནིཡུཏྟནྟི ཨཱཧ ‘‘ནེསཛྫིཀངྒཾ བྷཱཝནཱརཱམཨརིཡཝཾསཾ བྷཛཏཱི’’ཏི. ཨཡཉྩ ཨཏྠོ ཨཊྛཀཐཱརུལ༹ྷོ ཨེཝཱཏི དསྶེནྟོ ‘‘ཝུཏྟམྤི ཙེཏ’’ནྟིཨཱདིམཱཧ.

‘‘པཐཝིཾ ¶ པཏྠརམཱནོ ཝིཡཱ’’ཏིཨཱདི ཨརིཡཝཾསདེསནཱཡ སུདུཀྐརབྷཱཝདསྶནཾ ¶ མཧཱཝིསཡཏཱཡ ཏསྶཱ དེསནཱཡ. ཡསྨཱ ནཡསཧསྶཔཊིམཎྜིཏཱ ཧོཏི ཨརིཡམགྒཱདྷིགམཱཡ ཝིཏྠཱརཏོ པཝཏྟིཡམཱནཱ དེསནཱ ཡཐཱ ཏཾ ཙིཏྟུཔྤཱདཀཎྜེ, ཨཡཉྩ བྷཱཝནཱརཱམཨརིཡཝཾསཀཐཱ ཨརིཡམགྒཱདྷིགམཱཡ ཝིཏྠཱརཏོ པཝཏྟིཡམཱནཱ ཨེཝཾ ཧོཏཱིཏི ཝུཏྟཾ ‘‘སཧསྶནཡཔྤཊིམཎྜིཏཾ…པེ… དེསནཾ ཨཱརབྷཱི’’ཏི. པཊིཔཀྑཝིདྷམནཏོ ཨབྷིམུཁབྷཱཝེན ¶ རམཎཾ ཨཱརམཎཾ ཨཱརཱམོཏི ཨཱཧ ‘‘ཨབྷིརཏཱིཏི ཨཏྠོ’’ཏི. བྱདྷིཀརཎཱནམྤི པདཱནཾ ཝསེན བྷཝཏི བཱཧིརཏྠསམཱསོ ཡཐཱ ‘‘ཨུརསིལོམོ, ཀཎྛེཀཱལོ༹ཏི ཨཱཧ ‘‘པཧཱནེ ཨཱརཱམོ ཨསྶཱཏི པཧཱནཱརཱམོ’’ཏི. ཨཱརམིཏབྦཊྛེན ཝཱ ཨཱརཱམོ, པཧཱནཾ ཨཱརཱམོ ཨསྶཱཏི པཧཱནཱརཱམོཏི ཨེཝམེཏྠ སམཱསཡོཛནཱ ཝེདིཏབྦཱ. ‘‘པཛཧནྟོ རམཏཱི’’ཏི ཨེཏེན པཧཱནཱརཱམསདྡཱནཾ ཀཏྟུསཱདྷནཏཾ, ཀམྨདྷཱརཡསམཱསཉྩ དསྶེཏི. ‘‘བྷཱཝེནྟོ རམཏཱི’’ཏི ཝུཏྟཏྟཱ བྷཱཝནཱརཱམོཏི ཨེཏྠཱཔི ཨེསེཝ ནཡོ.

ཀཱམཾ ‘‘ནེསཛྫིཀངྒཾ བྷཱཝནཱརཱམཨརིཡཝཾསཾ བྷཛཏཱི’’ཏི ཝུཏྟཾ བྷཱཝནཱནུཡོགསྶ ཨནུཙྪཝིཀཏྟཱ, ནེསཛྫིཀངྒཝསེན པན ནེསཛྫིཀསྶ བྷིཀྑུནོ ཨེཀཙྩཱཧི ཨཱཔཏྟཱིཧི ཨནཱཔཏྟིབྷཱཝོཏི ཏམྤི སངྒཎྷནྟོ ‘‘ཏེརསནྣཾ དྷུཏངྒཱན’’ནྟི ཝཏྭཱ ‘‘ཝིནཡཾ པཏྭཱ གརུཀེ ཋཱཏབྦ’’ནྟི ཨིཙྪིཏཏྟཱ སལླེཁསྶ ཨཔརིཙྩཛནཝསེན པཊིཔཏྟི ནཱམ ཝིནཡེ ཋིཏསྶེཝཱཏི ཨཱཧ ‘‘ཏེརསནྣཾ…པེ… ཀཐིཏཾ ཧོཏཱི’’ཏི. ཀཱམཾ སུཏྟཱབྷིདྷམྨཔིཊཀེསུཔི (དཱི. ནི. ༡.༧.༡༩༤; ཝིབྷ. ༥༠༨) ཏཏྠ ཏཏྠ སཱིལཀཐཱ ཨཱགཏཱ ཨེཝ, ཡེཧི པན གུཎེཧི སཱིལསྶ ཝོདཱནཾ ཧོཏི, ཏེསུ ཀཐིཏེསུ ཡཐཱ སཱིལཀཐཱབཱཧུལླཾ ཝིནཡཔིཊཀཾ ཀཐིཏཾ ཧོཏི, ཨེཝཾ བྷཱཝནཱཀཐཱབཱཧུལླཾ སུཏྟནྟཔིཊཀཾ, ཨབྷིདྷམྨཔིཊཀཉྩ ཙཏུཏྠེན ཨརིཡཝཾསེན ཀཐིཏམེཝ ཧོཏཱིཏི ཝུཏྟཾ ‘‘བྷཱཝནཱརཱམེན ཨཝསེསཾ པིཊཀདྭཡཾ ཀཐིཏཾ ཧོཏཱི’’ཏི. ‘‘སོ ནེཀྑམྨཾ བྷཱཝེནྟོ རམཏཱི’’ཏི ནེཀྑམྨཔདཾ ཨཱདིཾ ཀཏྭཱ ཏཏྠ དེསནཱཡ པཝཏྟཏྟཱ, སབྦེསམྤི ཝཱ སམཐཝིཔསྶནཱམགྒདྷམྨཱནཾ ཡཐཱསཀཾཔཊིཔཀྑཏོ ནིཀྑམནེན ནེཀྑམྨསཉྙིཏཱནཾ ¶ ཏཏྠ ཨཱགཏཏྟཱ སོ པཱཋོ ‘‘ནེཀྑམྨཔཱལཱི༹’’ཏི ཝུཙྩཏཱིཏི ཨཱཧ ‘‘ནེཀྑམྨཔཱལི༹ཡཱ ཀཐེཏབྦོ’’ཏི. ཏེནཱཧ ཨཊྛཀཐཱཡཾ ‘‘སབྦེཔི ཀུསལཱ དྷམྨཱ ནེཀྑམྨནྟི པཝུཙྩརེ’’ཏི (ཨིཏིཝུ. ཨཊྛ. ༡༠༩). དསུཏྟརསུཏྟནྟ པརིཡཱཡེནཱཏི དསུཏྟརསུཏྟནྟདྷམྨེན, དསུཏྟརསུཏྟནྟེ (དཱི. ནི. ༣.༣༥༠) ཨཱགཏནཡེནཱཏི ཝཱ ཨཏྠོ. སེསདྭཡེཔི ཨེསེཝ ནཡོ.

སོཏི ཛཱགརིཡཾ ཨནུཡུཏྟོ བྷིཀྑུ. ནེཀྑམྨནྟི ཀཱམེཧི ནིཀྑནྟབྷཱཝཏོ ནེཀྑམྨསཉྙིཏཾ པཋམཛ྄ཛྷཱནཱུཔཙཱརཾ. ‘‘སོ ཨབྷིཛ྄ཛྷཾ ལོཀེ པཧཱཡཱ’’ཏིཨཱདིནཱ (ཝིབྷ. ༥༠༨, ༥༣༨) ཨཱགཏཱ ¶ པཋམཛ྄ཛྷཱནསྶ པུབྦབྷཱགབྷཱཝནཱཏི ཨིདྷཱདྷིཔྤེཏཱ ¶ , ཏསྨཱ ‘‘ཨབྱཱཔཱད’’ནྟིཨཱདཱིསུཔི ཨེཝམེཝ ཨཏྠོ ཝེདིཏབྦོ. ཡཾ པནེཏྠ ཝཏྟབྦཾ, ཏཾ བྲཧྨཛཱལཊཱིཀཱཡཾ ཝུཏྟནཡེན ཝེདིཏབྦཾ. སཨུཔཱཡཱསཱནཉྷི ཨཊྛནྣཾ སམཱཔཏྟཱིནཾ, ཨཊྛཱརསནྣཾ མཧཱཝིཔསྶནཱནཾ, ཙཏུནྣཾ ཨརིཡམགྒཱནཉྩ ཝསེནེཏྠ དེསནཱ པཝཏྟཱཏི.

‘‘ཨེཀཾ དྷམྨཾ བྷཱཝེནྟོ རམཏི, ཨེཀཾ དྷམྨཾ པཛཧནྟོ རམཏཱི’’ཏི ཙ ན ཨིདཾ དསུཏྟརསུཏྟེ ཨཱགཏནིཡཱམེན ཝུཏྟཾ, ཏཏྠ པན ‘‘ཨེཀོ དྷམྨོ བྷཱཝེཏབྦོ, ཨེཀོ དྷམྨོ པཧཱཏབྦོ’’ཏི (དཱི. ནི. ༣.༣༥༡) ཙ དེསནཱ ཨཱགཏཱ. ཨེཝཾ སནྟེཔི ཡསྨཱ ཨཏྠཏོ བྷེདོ ནཏྠི, ཏསྨཱ པཊིསམྦྷིདཱམགྒེ ནེཀྑམྨཔཱལི༹ཡཾ (པཊི. མ. ༡.༢༤, ༣.༤༡) ཨཱགཏནཱིཧཱརེནེཝ ‘‘ཨེཀཾ དྷམྨཾ བྷཱཝེནྟོ རམཏི, ཨེཀཾ དྷམྨཾ པཛཧནྟོ རམཏཱི’’ཏི ཝུཏྟཾ. ཨེས ནཡོ སེསཝཱརེསུཔི. ཡསྨཱ ཙཱཡཾ ཨརིཡཝཾསདེསནཱ ནཱམ སཏྠུ པཉྙཏྟཱཝ སཏྠཱརཱ ཧི དེསིཏཾ དེསནཾ ཨཱཡསྨཱ དྷམྨསེནཱཔཏི སཱརིཔུཏྟཏྠེརོ སངྒཱཡནཝསེན ཨིདྷཱནེསི ¶ , ཏསྨཱ མཧཱཨརིཡཝཾསསུཏྟེ སཏྠུདེསནཱནཱིཧཱརེན ནིགམནཾ དསྶེནྟོ ‘‘ཨེཝཾ ཁོ, བྷིཀྑཝེ, བྷིཀྑུ བྷཱཝནཱརཱམོ ཧོཏཱི’’ཏི ཨཱཧ. ཨེསེཝ ནཡོ ཨིཏོ པརེསུ སཏིཔཊྛཱནཔརིཡཱཡཨབྷིདྷམྨནིདྡེསཔརིཡཱཡེསུཔི. ཀཱམཉྩེཏྠ ཀཱཡཱནུཔསྶནཱཝསེནེཝ སངྑིཔིཏྭཱ ཡོཛནཱ ཀཏཱ, ཨེཀཝཱིསཏིཡཱ པན ཋཱནཱནཾ ཝསེན ཝིཏྠཱརཏོ ཡོཛནཱ ཝེདིཏབྦཱ. ‘‘ཨནིཙྩཏོ’’ (ཝིསུདྡྷི. ཊཱི. ༢.༦༩༨) ཏིཨཱདཱིསུ ཡཾ ཝཏྟབྦཾ, ཏཾ ཝིསུདྡྷིམགྒསཾཝཎྞནཱསུ ཝུཏྟནཡེན ཝེདིཏབྦཾ.

༣༡༠. སཾཝརཱདཱིནཾ སཱདྷནཝསེན པདཧཏི ཨེཏྠ, ཨེཏེཧཱིཏི ཙ པདྷཱནཱནི. ཨུཏྟམཝཱིརིཡཱནཱིཏི སེཊྛཝཱིརིཡཱནི ཝིསིཊྛསྶ ཨཏྠསྶ སཱདྷནཏོ. སཾཝརནྟསྶ ཨུཔྤནྣཝཱིརིཡནྟི ཡཐཱ ཨབྷིཛ྄ཛྷཱདཡོ ན ཨུཔྤཛྫནྟི, ཨེཝཾ སཏིཡཱ ཨུཔཊྛཱཔནེ ཙཀྑཱདཱིནཾ པིདཧནེ ཨནལསསྶ ཨུཔྤནྣཝཱིརིཡཾ. པཛཧནྟསྶཱཏི ཝིནོདེནྟསྶ. ཨུཔྤནྣཝཱིརིཡནྟི ཏསྶེཝ པཛཧནསྶ སཱདྷནཝསེན པཝཏྟཝཱིརིཡཾ. བྷཱཝེནྟསྶ ཨུཔྤནྣཝཱིརིཡནྟི ཨེཏྠཱཔི ཨེསེཝ ནཡོ. སམཱདྷིནིམིཏྟནྟི སམཱདྷི ཨེཝ. པུརིམུཔྤནྣསམཱདྷི ཧི པརཏོ ཨུཔྤཛྫནཀསམཱདྷིཔཝིཝེཀསྶ ཀཱརཎཾ ཧོཏཱིཏི ‘‘སམཱདྷིནིམིཏྟ’’ནྟི ཝུཏྟཾ.

ཨུཔདྷིཝིཝེཀཏྟཱཏི ཁནྡྷཱུཔདྷིཨཱདིཨུཔདྷཱིཧི ཝིཝིཏྟཏྟཱ ཝིནིསྶཊཏྟཱ. ཏཾ ཨཱགམྨཱཏི ཏཾ ནིབྦཱནཾ མགྒེན ཨདྷིགམཧེཏུ. རཱགཱདཡོ ཝིརཛྫནྟི ཨེཏྠ, ཨེཏེནཱཏི ¶ ཝཱ ཝིརཱགོ. ཨེཝཾ ནིརོདྷོཔི དཊྛབྦོ. ཡསྨཱ ཨིདྷ བོཛ྄ཛྷངྒཱ མིསྶཀཝསེན ཨིཙྪིཏཱ, ཏསྨཱ ‘‘ཨཱརམྨཎཝསེན ཨདྷིགནྟབྦཝསེན ཝཱ’’ཏི ཝུཏྟཾ. ཏཏྠ ཨདྷིགནྟབྦཝསེནཱཏི ཏཾནིནྣཏཱཝསེན. ཝོསྶགྒཔརིཎཱམིནྟི ཝོསྶཛྫནཝསེན ¶ པརིཎཱམིཏཾ པརིཙྩཛནཝསེན ཙེཝ པཀྑནྡནཝསེན ཙ པརིཎམནསཱིལཾ. ཏེནཱཧ ‘‘དྭེ ཝོསྶགྒཱ’’ཏིཨཱདི. ཁནྡྷཱནཾ པརིཙྩཛནཾ ནཱམ ཏཔྤཊིབདྡྷཀིལེསཔྤཧཱནཝསེནཱཏི ཡེནཱཀཱརེན ཝིཔསྶནཱ ཀིལེསེ པཛཧཏི, ཏེནེཝཱཀཱརེན ཏཾནིམིཏྟཀེ, ཁནྡྷེ ཙ ‘‘པཛཧཏཱི’’ཏི ཝཏྟབྦཏཾ ¶ ཨརཧཏཱིཏི ཨཱཧ ‘‘ཝིཔསྶནཱ…པེ… པརིཙྩཛཏཱི’’ཏི. ཡསྨཱ ཝིཔསྶནཱ ཝུཊྛཱནགཱམིནིབྷཱཝཾ པཱཔུཎནྟཱི ནིནྣཔོཎཔབྦྷཱརབྷཱཝེན ཨེཀཾསཏོ ནིབྦཱནཾ ‘‘པཀྑནྡཏཱི’’ཏི ཝཏྟབྦཏཾ ལབྷཏི, མགྒོ ཙ སམུཙྪེདཝསེན ཀིལེསེ, ཁནྡྷེ ཙ པརིཙྩཛཏི, ཏསྨཱ ཡཐཱཀྐམཾ ཝིཔསྶནཱམགྒཱནཾ ཝསེན པཀྑནྡནཔརིཙྩཱགཝོསྶགྒཱཔི ཝེདིཏབྦཱ. ཝོསྶགྒཏྠཱཡཱཏི པརིཙྩཱགཝོསྶགྒཏྠཱཡ ཙེཝ པཀྑནྡནཝོསྶགྒཏྠཱཡ ཙ. པརིཎམཏཱིཏི པརིཔཙྩཏི. ཏཾ པརིཎམནཾ ཝུཊྛཱནགཱམིནིབྷཱཝཔྤཏྟིཡཱ ཙེཝ ཨརིཡམགྒབྷཱཝཔྤཏྟིཡཱ ཙ ཨིཙྪིཏནྟི ཨཱཧ ‘‘ཝིཔསྶནཱབྷཱཝཉྩེཝ མགྒབྷཱཝཉྩ པཱཔུཎཱཏཱི’’ཏི. སེསཔདེསཱུཏི ‘‘དྷམྨཝིཙཡསམྦོཛ྄ཛྷངྒཾ བྷཱཝེཏཱི’’ཏིཨཱདཱིསུ སེསསམྦོཛ྄ཛྷངྒཀོཊྛཱསེསུ.

བྷདྡཀནྟི ཨབྷདྡཀཱནཾ ནཱིཝརཎཱདིཔཱཔདྷམྨཱནཾ ཝིཀྑམྦྷནེན རཱགཝིདྷམནེན ཨེཀནྟཧིཏཏྟཱ, དུལླབྷཏྟཱ ཙ བྷདྡཀཾ སུནྡརཾ. ན ཧི ཨཉྙཾ སམཱདྷིནིམིཏྟཾ ཨེཝཾདུལླབྷཾ, རཱགསྶ ཙ ཨུཛུཝིཔཙྩནཱིཀབྷཱུཏཾ ཨཏྠི. ཨནུརཀྑཏཱིཏི ཨེཏྠ ཨནུརཀྑནཱ ནཱམ ཨདྷིགཏསམཱདྷིཏོ ཡཐཱ ན པརིཧཱནི ཧོཏི, ཨེཝཾ པཊིཔཏྟི, སཱ པན ཏཔྤཊིཔཀྑཝིདྷམནེནཱཏི ཨཱཧ ‘‘སམཱདྷཱི’’ཏིཨཱདི. ཨཊྛིཀསཉྙཱདིཀཱཏི ཨཊྛིཀཛ྄ཛྷཱནཱདིཀཱ. སཉྙཱསཱིསེན ཧི ཛྷཱནཾ ཝདཏི.

ཨེཀཔཊིཝེདྷཝསེན ཙཏུསཙྩདྷམྨེ ཉཱཎནྟི ཙཏཱུསུ ཨརིཡསཙྩེསུ ཨེཀཱབྷིསམཡཝསེན པཝཏྟཉཱཎཾ, མགྒཉཱཎནྟི ཨཏྠོ. ཙཏུསཙྩནྟོགདྷཏྟཱ ཙཏུསཙྩབྦྷནྟརེ ནིརོདྷདྷམྨེ ནིབྦཱནེ ཉཱཎཾ, ཏེན ཕལཉཱཎཾ ཝདཏི. ཡསྨཱ མགྒཱནནྟརསྶ ཕལསྶ མགྒཱནུགུཎཱ པཝཏྟི, ཡཏོ ཏཾསམུདཡཔཀྑིཡེསུ དྷམྨེསུ པཊིཔྤསྶདྡྷིཔྤཧཱནཝསེན པཝཏྟཏི, ཏསྨཱ ནིརོདྷསཙྩེཔི ཡོ མགྒསྶ སཙྪིཀིརིཡཱབྷིསམཡོ, ཏདནུགུཎཱ པཝཏྟཱིཏི ¶ ཕལཉཱཎསྶེཝ དྷམྨེ ཉཱཎཏཱ ཝུཏྟཱ, ན ཡསྶ ཀསྶཙི ནིབྦཱནཱརམྨཎསྶ ཉཱཎསྶ ¶ . ཏེན ཝུཏྟཾ ‘‘ཡཐཱཧཱ’’ཏིཨཱདི. ཨེཏྠ ཙ མགྒཔཉྙཱ ཏཱཝ ཙཏུསཙྩདྷམྨསྶ པཊིཝིཛ྄ཛྷནཏོ དྷམྨེཉཱཎཾ ནཱམ ཧོཏུ, ཕལཔཉྙཱ པན ཀཐནྟི ཙོདནཱ སོདྷིཏཱ ཧོཏི ནིརོདྷདྷམྨཾ ཨཱརབྦྷ པཝཏྟནཏོ. དུཝིདྷཱཔི ཧི པཉྙཱ ཨཔརཔྤཙྩཡཏཱཡ ཨཏྟཔཙྩཀྑཏོ ཨརིཡསཙྩདྷམྨེ ཀིཙྩཏོ ཙ ཨཱརམྨཎཏོ ཙ པཝཏྟཏྟཱ ‘‘དྷམྨེཉཱཎ’’ནྟི ཝེདིཏབྦཱ. ཨརིཡསཙྩེསུ ཧི ཨཡཾ དྷམྨ-སདྡོ ཏེསཾ ཨཝིཔརཱིཏསབྷཱཝཏྟཱ, སངྑཏཔྤཝརོ ཝཱ ཨརིཡམགྒོ, ཏསྶ ཙ ཕལདྷམྨོ. ཏཏྠ པཉྙཱ ཏཾསཧགཏཱ དྷམྨེཉཱཎཾ.

ཨནྭཡེཉཱཎནྟི ¶ ཨནུགམནཉཱཎཾ. པཙྩཀྑཏོ དིསྭཱཏི ཙཏྟཱརི སཙྩཱནི མགྒཉཱཎེན པཙྩཀྑཏོ པཊིཝིཛ྄ཛྷིཏྭཱ. ཡཐཱ ཨིདཱནཱིཏི ཡཐཱ ཨེཏརཧི པཉྩུཔཱདཱནཀྑནྡྷཱ དུཀྑསཙྩཾ, ཨེཝཾ ཨཏཱིཏེཔི ཨནཱགཏེཔི པཉྩུཔཱདཱནཀྑནྡྷཱ དུཀྑསཙྩམེཝཱཏི ཙ སརིཀྑཊྛེན ཝུཏྟཾ. ཨེས ནཡོ སམུདཡསཙྩེ, མགྒསཙྩེ ཙ. ཨཡམེཝཱཏི ཨཝདྷཱརཎེ. ནིརོདྷསཙྩེ པན སརིཀྑཊྛོ ནཏྠི ཏསྶ ནིཙྩཏྟཱ, ཨེཀསབྷཱཝཏྟཱ ཙ. ཨེཝཾ ཏསྶ ཉཱཎསྶ ཨནུགཏིཡཾ ཉཱཎནྟི ཏསྶ དྷམྨེཉཱཎསྶ ‘‘ཨེཝཾ ཨཏཱིཏེཔཱི’’ཏིཨཱདིནཱ ཨནུགཏིཡཾ ཨནུགམནེ ཨནྭཡེ ཉཱཎཾ. ཨིདཾ ཨནྭཡེ ཉཱཎནྟི ཡོཛནཱ. ‘‘ཏེནཱཧཱ’’ཏིཨཱདིནཱ ཡཐཱཝུཏྟམཏྠཾ པཱལི༹ཡཱ ཝིབྷཱཝེཏི. སོཏི དྷམྨཉཱཎཾ པཏྭཱ ཋིཏོ བྷིཀྑུ. ཨིམིནཱ དྷམྨེནཱཏི དྷམྨགོཙརཏྟཱ གོཙརཝོཧཱརེན ‘‘དྷམྨོ’’ཏི ཝུཏྟེནམགྒཉཱཎེན, ཨུཔཡོགཏྠེ ཝཱ ཀརཎཝཙནཾ, ཨིམིནཱ དྷམྨེན ཉཱཏེནཱཏི ཨིམཾ ཙཏུསཙྩདྷམྨཾ ཉཱཎེན ཛཱནིཏྭཱ ཋིཏེན མགྒཉཱཎེནཱཏི ཨཏྠོ. དིཊྛེནཱཏི དསྶནེན སཙྩདྷམྨཾ པསྶིཏྭཱ ཋིཏེན. པཏྟེནཱཏི ¶ སཙྩཱནཾ པཏྭཱ ཋིཏེན. ཝིདིཏེནཱཏི སཙྩཱནི ཝིདིཏྭཱ ཋིཏེན. པརིཡོགཱལ༹ྷེནཱཏི ཙཏུསཙྩདྷམྨཾ པརིཡོགཱཧེཏྭཱ ཋིཏེནཱཏི ཨེཝཾ ཏཱཝེཏྠ ཨབྷིདྷམྨཊྛཀཐཱཡཾ (ཝིབྷ. ཨཊྛ. ༧༩༦) ཨཏྠོ ཝུཏྟོ. དུཝིདྷམྤི པན མགྒཕལཉཱཎཾ དྷམྨེཉཱཎཾ. པཙྩཝེཀྑཎཱཡ ཙ མཱུལཾ, ཀཱརཎཉྩ ནཡནཡནསྶཱཏི དུཝིདྷེནཱཔི ཏེན དྷམྨེནཱཏི ན ན ཡུཛྫཏི. ཏཐཱ ཙཏུསཙྩདྷམྨསྶ ཉཱཏཏྟཱ, མགྒཕལསངྑཱཏསྶ ཝཱ དྷམྨསྶ སཙྩཔཊིཝེདྷསམྤཡོགཾ གཏཏྟཱ ནཡནཡནཾ ཧོཏཱིཏི ཏེན ཨིམིནཱ དྷམྨེན ཉཱཎཝིསཡབྷཱཝེན, ཉཱཎསམྤཡོགེན ཝཱ ཉཱཏེནཱཏི ཙ ཨཏྠོ ན ན ཡུཛྫཏཱིཏི. ཨཏཱིཏཱནཱགཏེ ནཡཾ ནེཏཱིཏི ཨཏཱིཏེ, ཨནཱགཏེ ཙ ནཡཾ ནེཏི ཧརཏི ¶ པེསེཏི. ཨིདཾ པན ན མགྒཉཱཎསྶ ཀིཙྩཾ, པཙྩཝེཀྑཎཉཱཎཀིཙྩཾ, སཏྠཱརཱ པན མགྒཉཱཎཾ ཨཏཱིཏཱནཱགཏེ ནཡནཡནསདིསཾ ཀཏཾ མགྒམཱུལཀཏྟཱ. བྷཱཝིཏམགྒསྶ ཧི པཙྩཝེཀྑཎཱ ནཱམ ཧོཏི. ནཡིདཾ ཨཉྙཾ ཉཱཎུཔྤཱདནཾ ནཡནཡནཾ, ཉཱཎསྶེཝ པན པཝཏྟིཝིསེསོཏི.

པརེསཾ ཙེཏསོ པརིཏོ ཨཡནཾ པརིཙྪིནྡནཾ པརིཡོ, ཏསྨིཾ པརིཡེ. ཏེནཱཧ ‘‘པརེསཾ ཙིཏྟཔརིཙྪེདེ’’ཏི. ཨཝསེསཾ སམྨུཏིམྷིཉཱཎཾ ནཱམ ‘‘ཉཱཎ’’ནྟི སམྨཏཏྟཱ. ཝཙནཏྠཏོ པན སམྨུཏིམྷི ཉཱཎནྟི སམྨུཏིམྷིཉཱཎཾ. དྷམྨེཉཱཎཱདཱིནཾ ཝིཡ ཧི སཱཏིསཡསྶ པཊིཝེདྷཀིཙྩསྶ ཨབྷཱཝཱ ཝིསཡོབྷཱསནསངྑཱཏཛཱནནསཱམཉྙེན ‘‘ཉཱཎ’’ནྟི སམྨཏེསུ ཨནྟོགདྷནྟི ཨཏྠོ. སམྨུཏིཝསེན ཝཱ པཝཏྟཾ སམྨུཏིམྷིཉཱཎཾ སམྨུཏིདྭཱརེན ཨཏྠསྶ གཧཎཏོ. ཨཝསེསཾ ཝཱ ཨིཏརཉཱཎཏྟཡཝིསབྷཱགཾ ཉཱཎཾ ¶ ཏབྦིསབྷཱགསཱམཉྙེན སམྨུཏིམྷིཉཱཎམྷི པཝིཊྛཏྟཱ སམྨུཏིམྷིཉཱཎཾ ནཱམ ཧོཏཱིཏི.

ཀཱམཾ སོཏཱཔཏྟིམགྒཉཱཎཱདཱིནི དུཀྑཉཱཎཱདཱིནིཡེཝ, ཨུཀྐཊྛནིདྡེསེན པནེཝམཱཧ ‘‘ཨརཧཏྟཾ ¶ པཱཔེཏྭཱ’’ཏི. ཝཊྚཏོ ནིགྒཙྪཏི ཨེཏེནཱཏི ནིགྒམནཾ, ཙཏུསཙྩཀམྨཊྛཱནཾ. པུརིམཱནི དྭེ སཙྩཱནི ཝཊྚཾ པཝཏྟིཔཝཏྟིཧེཏུབྷཱཝཏོ. ཨིཏརཱནི པན དྭེ ཝིཝཊྚཾ ནིཝཏྟིནིཝཏྟིཧེཏུབྷཱཝཏོ. ཨབྷིནིཝེསོཏི ཝིཔསྶནཱབྷིནིཝེསོ ཧོཏི ལོཀིཡསྶ ཉཱཎསྶ ཝིསབྷཱགཱུཔགམནཏོ. ནོ ཝིཝཊྚེཏི ཝིཝཊྚེ ཨབྷིནིཝེསོ ནོ ཧོཏི ཨཝིསཡབྷཱཝཏོ. པརིཡཏྟཱིཏི ཀམྨཊྛཱནཏནྟི. ཨུགྒཧེཏྭཱཏི ཝཱཙུགྒཏཾ ཀཏྭཱ. ཨུགྒཧེཏྭཱཏི ཝཱ པཱལི༹ཏོ, ཨཏྠཏོ ཙ ཡཐཱརཧཾ སཝནདྷཱརཎཔརིཔུཙྪནམནསཱནུཔེཀྑནཱདིཝསེན ཙིཏྟེན ཨུདྡྷཾ ཨུདྡྷཾ གཎྷིཏྭཱ. ཀམྨཾ ཀརོཏཱིཏི ནཱམརཱུཔཔརིགྒཧཱདིཀྐམེན ཡོགཀམྨཾ ཀརོཏི.

ཡདི པུརིམེསུ དྭཱིསུ ཨེཝ ཝིཔསྶནཱབྷིནིཝེསོ, ཏེསུ ཨེཝ ཨུགྒཧཱདི, ཀཐམིདཾ ཙཏུསཙྩཀམྨཊྛཱནཾ ཛཱཏནྟི ཨཱཧ ‘‘དྭཱིསཱུ’’ཏིཨཱདི. ཀཱམཾ པཙྪིམཱནིཔི དྭེ སཙྩཱནི ཨབྷིཉྙེཡྻཱནི, པརིཉྙེཡྻཏཱ པན ཏཏྠ ནཏྠཱིཏི ན ཝིཔསྶནཱབྱཱཔཱརོ. ཀེཝལཾ པན ཨནུསྶཝམཏྟེ ཋཏྭཱ ཨཙྩནྟཔཎཱིཏབྷཱཝཏོ ཨིཊྛཾ, ཨཱཏཔྤཀནིརཱམིསཔཱིཏིསཉྫནནཏོ ཀནྟཾ, ཨུཔརཱུཔརི ཨབྷིརུཙིཛནནེན མནསྶ ཝཌྜྷནཏོ མནཱཔནྟི མནསིཀཱརཾ པཝཏྟེཏི. ཏེནཱཧ ‘‘ནིརོདྷསཙྩཾ ནཱམཱ’’ཏིཨཱདི. དྭཱིསུ སཙྩེསཱུཏི དྭཱིསུ སཙྩེསུ ཝིསཡབྷཱུཏེསུ ¶ , ཏཱནི ཙ ཨུདྡིསྶ ཨསམྨོཧཔཊིཝེདྷཝསེན པཝཏྟམཱནོ ཧི མགྒོ ཏེ ཨུདྡིསྶ པཝཏྟོ ནཱམ ཧོཏཱིཏི. ཏཱིཎི དུཀྑསམུདཡམགྒསཙྩཱནི. ཀིཙྩཝསེནཱཏི ཨསམྨུཡ྄ཧནཝསེན. ཨེཀནྟི ནིརོདྷསཙྩཾ. ཨཱརམྨཎཝསེནཱཏི ཨཱརམྨཎཀརཎཝསེནཔི ཨསམྨུཡ྄ཧནཀིཙྩཝསེནཔི ཏཏྠ པཊིཝེདྷོ ལབྦྷཏེཝ. དྭེ སཙྩཱནཱིཏི དུཀྑསམུདཡསཙྩཱནི. དུདྡསཏྟཱཏི དཊྛུཾ ¶ ཨསཀྐུཎེཡྻཏྟཱ. ཨོལཱ༹རིཀཱ ཧི དུཀྑསམུདཡཱ, ཏིརཙྪཱནགཏཱནམྤི དུཀྑཾ, ཨཱཧཱརཱདཱིསུ ཙ ཨབྷིལཱསོ པཱཀཊོ. པཱིལ༹ནཱདིཨཱཡཱུཧནཱདིཝསེནཔི ‘‘ཨིདཾ དུཀྑཾ, ཨིདཾ ཨསྶ ཀཱརཎ’’ནྟི ཡཱཐཱཝཏོ ཉཱཎེན ཨོགཱཧིཏུཾ ཨསཀྐུཎེཡྻཏྟཱ ཏཱནི གམྦྷཱིརཱནི. དྭེཏི ནིརོདྷམགྒསཙྩཱནི. ཏཱནི སཎྷསུཁུམབྷཱཝཏོ སབྷཱཝེནེཝ གམྦྷཱིརཏཱཡ ཡཱཐཱཝཏོ ཉཱཎེན དུརོགཱཧཏྟཱ ‘‘དུདྡསཱནཱི’’ཏི.

སོཏཱཔཏྟིཡངྒཱདིཙཏུཀྐཝཎྞནཱ

༣༡༡. སོཏོ ནཱམ ཨརིཡསོཏོ པུརིམཔདལོཔེན, ཏསྶ ཨཱདིཏོ སབྦཔཋམཾ པཛྫནཾ སོཏཱཔཏྟི, པཋམམགྒཔཊིལཱབྷོ. ཏསྶ ཨངྒཱནི ཨདྷིགམཱུཔཱཡབྷཱུཏཱནི ཀཱརཎཱནི སོཏཱཔཏྟིཡངྒཱནི. ཏེནཱཧ ‘‘སོཏཱ…པེ… ཨཏྠོ’’ཏི. སནྟཀཱཡཀམྨཱདིཏཱཡ སནྟདྷམྨསམནྣཱགམཏོ, སནྟདྷམྨཔཝེདནཏོ ཙ སནྟོ པུརིསཱཏི སཔྤུརིསཱ. ཏཏྠ ཡེསཾ ཝསེན ཙཏུསཙྩསམྤཊིཝེདྷཱཝཧཾ སདྡྷམྨསྶཝནཾ ལབྦྷཏི, ཏེ ཨེཝ དསྶེནྟོ ‘‘བུདྡྷཱདཱིནཾ སཔྤུརིསཱན’’ནྟི ཨཱཧ ¶ . སནྟོ སཏཾ ཝཱ དྷམྨོཏི སདྡྷམྨོ. སོ ཧི ཡཐཱནུསིཊྛཾ པཊིཔཛྫམཱནེ ཨཔཱཡདུཀྑེ, སཾསཱརདུཀྑེ ཙ ཨཔཏནྟེ དྷཱརེཏཱིཏི ཨེཝམཱདི གུཎཱཏིསཡཡོགཝསེན སནྟོ སཾཝིཛྫམཱནོ, པསཏྠོ, སུནྡརོ ཝཱ དྷམྨོ, སཏཾ ཝཱ ཨརིཡཱནཾ དྷམྨོ, ཏེསཾ ཝཱ ཏབྦྷཱཝསཱདྷཀོ དྷམྨོཏི སདྡྷམྨོ, ‘‘ཨིདྷ བྷིཀྑུ དྷམྨཾ པརིཡཱཔུཎཱཏཱི’’ཏིཨཱདིནཱ (ཨ. ནི. ༥.༧༣) ཝུཏྟཱ པརིཡཏྟི. སཱ པན མཧཱཝིསཡཏཱཡ ན སབྦཱ སབྦསྶ ཝིསེསཱཝཧཱཏི ཏསྶ ཏསྶ ཨནུཙྪཝིཀམེཝ དསྶེནྟོ ཨཱཧ ‘‘སཔྤཱཡསྶ ཏེཔིཊཀདྷམྨསྶ སཝན’’ནྟི. ཡོནིསོམནསིཀཱརོ ཧེཊྛཱ ཝུཏྟོ ཨེཝ. པུབྦབྷཱགཔཊིཔཏྟིཡཱཏི ཝིཔསྶནཱནུཡོགསྶ.

ཨཝེཙྩཔྤསཱདེནཱཏི ¶ སཙྩསམྤཊིཝེདྷཝསེན བུདྡྷཱདཱིནཾ གུཎེ ཉཏྭཱ ཨུཔྤནྣཔྤསཱདེན, སོ པན པསཱདོ དེཝཱདཱིསུ ཀེནཙིཔི ཨཀམྤིཡཏཱཡ ནིཙྩལོཏི ¶ ཨཱཧ ‘‘ཨཙལཔྤསཱདེནཱ’’ཏི. ཨེཏྠཱཏི ཨེཏསྨིཾ ཙཏུཀྐཏྟཡེ ཨཱཧཱརཙཏུཀྐེ. ལཱུཁཔཎཱིཏཝཏྠུཝསེནཱཏི ཨོདནཀུམྨཱསཱདིཀསྶ ལཱུཁསྶ ཙེཝ པཎཱིཏསྶ ཙ ཝཏྠུནོ ཝསེན. སཱ པནཱཡཾ ཨཱཧཱརསྶ ཨོལཱ༹རིཀསུཁུམཏཱ ‘‘ཀུམྦྷིལཱནཾ ཨཱཧཱརཾ ཨུཔཱདཱཡ མོརཱནཾ ཨཱཧཱརོ སུཁུམོ’’ཏིཨཱདིནཱ (སཾ. ནི. ཨཊྛ. ༢.༢.༡༡) ཨཊྛཀཐཱཡཾ ཝིཏྠཱརཏོ ཨཱགཏཱ ཨེཝ.

ཨཱརམྨཎཊྛིཏིཝསེནཱཏི ཨཱརམྨཎསངྑཱཏསྶ པཝཏྟིཔཙྩཡཊྛཱནསྶ ཝསེན. ཏིཊྛཏི ཨེཏྠཱཏི ཋིཏི, ཨཱརམྨཎམེཝ ཋིཏི ཨཱརམྨཎཊྛིཏི. ཏེནེཝཱཧ ‘‘རཱུཔཱརམྨཎ’’ནྟིཨཱདི. ཨཱརམྨཎཏྠོ ཙེཏྠ ཨུཔཏྠམྦྷནཏྠོ ཝེདིཏབྦོ, ན ཝིསཡལཀྑཎོཝ. ཨུཔཏྠམྦྷནབྷཱུཏཾ རཱུཔཾ ཨུཔེཏཱིཏི རཱུཔཱུཔཱཡཾ. ཏེནཱཧ ‘‘རཱུཔཾ ཨུཔགཏཾ ཧུཏྭཱ’’ཏིཨཱདི. རཱུཔཀྑནྡྷཾ ནིསྶཱཡ ཏིཊྛཏི ཏེན ཝིནཱ ཨཔྤཝཏྟནཏོ. ཏནྟི རཱུཔཀྑནྡྷཾ ནིསྶཱཡ ཋཱནཔྤཝཏྟནཾ. ཨེཏནྟི ‘‘རཱུཔཱུཔཱཡ’’ནྟི ཨེཏཾ ཝཙནཾ. རཱུཔཀྑནྡྷོ གོཙརོ པཝཏྟིཊྛཱནཾ པཙྩཡོ ཨེཏསྶཱཏི རཱུཔཀྑནྡྷགོཙརཾ རཱུཔཾ སཧཀཱརཱིཀཱརཎབྷཱཝེན པཏིཊྛཱ ཨེཏསྶཱཏི རཱུཔཔྤཏིཊྛཾ. ཨིཏི ཏཱིཧི པདེཧི ཨབྷིསངྑཱརཝིཉྙཱཎཾ པཏི རཱུཔཀྑནྡྷསྶ སཧཀཱརཱིཀཱརཎབྷཱཝོཡེཝེཏྠ ཝུཏྟོ. ཨུཔསིཏྟཾ ཝིཡ ཨུཔསིཏྟཾ, ཡཐཱ བྱཉྫནེཧི ཨུཔསིཏྟཾ སིནེཧིཏཾ ཨོདནཾ རུཙིཏཾ, པརིཎཱམཡོགྱཉྩ, ཨེཝཾ ¶ ནནྡིཡཱ ཨུཔསིཏྟཾ སིནེཧིཏཾ ཀམྨཝིཉྙཱཎཾ ཨབྷིརུཙིཏཾ ཧུཏྭཱ ཝིཔཱཀཡོགྱཾ ཧོཏཱིཏི. ཨིཏརནྟི དོསསཧགཏཱདིཨཀུསལཾ, ཀུསལཉྩ ཨུཔནིསྶཡཀོཊིཡཱ ཨུཔསིཏྟཾ ཧུཏྭཱཏི ཡོཛནཱ. ཨེཝཾ པཝཏྟམཱནནྟི ཨེཝཾ རཱུཔཱུཔཱཡནྟི དེསནཱབྷཱཝེན པཝཏྟམཱནཾ. ཝིཔཱཀདྷམྨཏཱཡ ཝུདྡྷིཾ…པེ… ཨཱཔཛྫཏི. ཏཏྠཱཔི ནིཔྤརིཡཱཡཕལནིབྦཏྟནཝསེན ཝུདྡྷིཾ, པརིཡཱཡཕལནིབྦཏྟནཝསེན ཝིརུལ༹ྷིཾ, ནིསྶནྡཕལནིབྦཏྟནཝསེན ཝེཔུལླཾ. དིཊྛདྷམྨཝེདནཱིཡཕལནིབྦཏྟནེན ཝཱ ཝུདྡྷིཾ, ཨུཔཔཛྫཝེདནཱིཡཕལནིབྦཏྟནཝསེན ཝིརུལ༹ྷིཾ, ཨཔརཱཔརིཡཱཡཕལནིབྦཏྟནཝསེན ཝེཔུལླཾ ཨཱཔཛྫཏཱིཏི ¶ ཡོཛནཱ. ཨེཀནྟཏོ ཝེདནུཔཱཡཱདིཝསེན པཏྟི ནཱམ ཨརཱུཔབྷཝེ ཡེཝཱཏི ཨཱཧ ‘‘ཨིམེཧི པནཱ’’ཏིཨཱདི. ཨེཝཉྩ ཀཏྭཱ པཱལི༹ཡཾ ཀཏཾ ཝཱ-སདྡགྒཧཎཉྩ སམཏྠིཏཾ ཧོཏི. ‘‘རཱུཔཱུཔཱཡ’’ནྟིཨཱདིནཱ ཡཐཱ ཨབྷིསངྑཱརཝིཉྙཱཎསྶ ཨུཔནིསྶཡབྷཱུཏཱ རཱུཔཱདཡོ གཡ྄ཧནྟི, ཨེཝཾ ཏེན ནིབྦཏྟེཏབྦཱཔི ཏེ གཡ྄ཧནྟཱིཏི ཨདྷིཔྤཱཡེན ‘‘ཙཏུཀྐཝསེན…པེ… ན ཝུཏྟ’’ནྟི ཨཱཧ. ཝིཔཱཀོཔི ཧི དྷམྨོ ¶ ཝིཔཱཀདྷམྨཝིཉྙཱཎཾ ཨུཔགཏཾ ནཱམ ཧོཏི ཏཐཱ ནནྡིཡཱ ཨུཔསིཏྟཏྟཱ. ཏེནཱཧ ‘‘ནནྡཱུཔསེཙན’’ནྟི. ཝིཏྠཱརིཏཱནེཝ སིངྒཱལསུཏྟེ.

བྷཝཏི ཨེཏེན ཨཱརོགྱནྟི བྷཝོ, གིལཱནཔཙྩཡོ. པརིཝུདྡྷོ བྷཝོ ཨབྷཝོ. ཝུདྡྷིཨཏྠོ ཧི ཨཡཾ ཨཀཱརོ ཡཐཱ ‘‘སཾཝརཱསཾཝརོ, (པཱརཱ. པཋམམཧཱསངྒཱིཏིཀཐཱ; དཱི. ནི. ཨཊྛ. ༡.པཋམམཧཱསངྒཱིཏིཀཐཱཝཎྞནཱ; དྷ. ས. ཨཊྛ. ནིདཱནཀཐཱ) ཕལཱཕལཾ’’ཏི ཙ ¶ . ཏེལམདྷུཕཱཎིཏཱདཱིནཱིཏི ཨཱདི-སདྡེན སཔྤིནཝནཱིཏཱནཾ གཧཎཾ, ཏེལཱདཱིནཾ གཧཎཉྩེཏྠ ནིདསྶནམཏྟཾ. སབྦསྶཱཔི གིལཱནཔཙྩཡསྶ སངྒཧོ དཊྛབྦོ. ཨཐ ཝཱ བྷཝཱབྷཝོཏི ཁུདྡཀོ ཙེཝ མཧནྟོ ཙ ཨུཔཔཏྟིབྷཝོ ཝེདིཏབྦོ. ཨེཝཉྩ སཏི ‘‘ཨིམེསཾ པནཱ’’ཏིཨཱདིཝཙནཾ སམཏྠིཏཾ ཧོཏི. བྷཝཱུཔཔཏྟིཔཧཱནཏྠོ ཧི ཝིསེསཏོ ཙཏུཏྠཨརིཡཝཾསོ. ཏཎྷུཔྤཱདཱནནྟི ཏཎྷུཔྤཏྟཱིནཾ, ཙཱིཝརཱདིཧེཏུ ཨུཔྤཛྫནཀཏཎྷཱནནྟི ཨཏྠོ. པདྷཱནཀརཎཀཱལེཏི བྷཱཝནཱནུཡོགཀྑཎེ. སཱིཏཱདཱིནི ན ཁམཏཱིཏི བྷཱཝནཱཡ པུབྦབྷཱགཀཱལཾ སནྡྷཱཡ ཝུཏྟཾ. ཁམཏཱིཏི སཧཏི ཨབྷིབྷཝཏི. ཝིཏཀྐསམནནྟི ནིདསྶནམཏྟཾ. སབྦེསམྤི ཀིལེསཱནཾ སམནཝསེན པཝཏྟཱ པཊིཔདཱ.

སམཱདྷིཛྷཱནཱདིབྷེདོ དྷམྨོ པཛྫཏི པཊིཔཛྫཱིཡཏི ཨེཏེནཱཏི དྷམྨཔདཾ. ཨནབྷིཛ྄ཛྷཱཝ དྷམྨཔདཾ ཨནབྷིཛ྄ཛྷཱདྷམྨཔདཾ. ཨཡཾ ཏཱཝ ཨལོབྷཔཀྑེ ནཡོ, ཨིཏརཔཀྑེ པན ཨནབྷིཛ྄ཛྷཱཔདྷཱནོ དྷམྨཀོཊྛཱསོ ཨནབྷིཛ྄ཛྷཱདྷམྨཔདཾ. ཨཀོཔོཏི ཨདོསོ, མེཏྟཱཏི ཨཏྠོ. སུཔྤཊྛིཏསཏཱིཏི ཀཱཡཱདཱིསུ སམྨདེཝ ཨུཔཊྛིཏཱ སཏི. སཏིསཱིསེནཱཏི སཏིཔདྷཱནམུཁེན. སམཱདྷིཔདྷཱནཏྟཱ ཛྷཱནཱནཾ ‘‘སམཱཔཏྟི ཝཱ’’ཏི ཝུཏྟཾ. ཀཱམཾ སཝིཉྙཱཎཀཨསུབྷེཔི ཛྷཱནབྷཱཝནཱ ཨལོབྷཔྤདྷཱནཱ ཧོཏི ཀཱཡསྶ ཛིགུཙྪནེན, པཊིཀྐཱུལཱཀཱརགྒཧཎཝསེན ཙ པཝཏྟནཏོ, སཏྟཝིདྷཨུགྒཧཀོསལླཱདིཝསེན པནསྶཱ པཝཏྟི སཏིཔདྷཱནཱཏི ཏཏིཡདྷམྨཔདེནེཝ ནཾ སངྒཎྷིཏུཀཱམོ ‘‘དས ཨསུབྷཝསེན ཝཱ’’ཏི ཨཱཧ. ཧིཏཱུཔསཾཧཱརཱདིཝསེན པཝཏྟནཏོ བྲཧྨཝིཧཱརབྷཱཝནཱ བྱཱཔཱདཝིརོདྷིནཱི ཨབྱཱཔཱདཔྤདྷཱནཱཏི ཨཱཧ ‘‘ཙཏུབྲཧྨ…པེ… དྷམྨཔད’’ནྟི. ཏཏྠ ཨདྷིགཏཱནི ཛྷཱནཱདཱིནཱིཏི ཡོཛནཱ. གམནཱདིཏོ ཨཱཧཱརསྶ པཊིཀྐཱུལབྷཱཝསལླཀྑཎཾ ¶ སཉྙཱཡ ཐིརབྷཱཝེནེཝ ཧོཏི ཏསྶཱ ཐིརསཉྙཱཔདཊྛཱནཏྟཱཏི ཨཱཧཱརེ པཊིཀྐཱུལསཉྙཱཔི ¶ ¶ ཏཏིཡདྷམྨཔདེ ཨེཝ སངྒཧཾ གཏཱ. ཨཱརུཔྤསམཱདྷིཨབྷིཉྙཱནཾ ཨདྷིཊྛཱནབྷཱཝཏོ ཀསིཎབྷཱཝནཱ, སཏྟཝིདྷབོཛ྄ཛྷངྒཝིཛྫཱཝིམུཏྟིཔཱརིཔཱུརིཧེཏུཏོ ཨཱནཱཔཱནེསུ པཋམཨཱནཱཔཱནབྷཱཝནཱ ཝིསེསཏོ སམཱདྷིཔདྷཱནཱཏི སཱ ཙཏུཏྠདྷམྨཔདེན སངྒཧིཏཱ. ཙཏུདྷཱཏུཝཝཏྠཱནཝསེན ཨདྷིགཏཱནིཔི ཨེཏྠེཝ སངྒཧེཏབྦཱནི སིཡུཾ, པཉྙཱཔདྷཱནཏཱཡ པན ན སངྒཧིཏཱནི.

དྷམྨསམཱདཱནེསུ པཋམཾ ཨཙེལཀཔཊིཔདཱ ཨེཏརཧི ཙ དུཀྑབྷཱཝཏོ, ཨནཱགཏེཔི ཨཔཱཡདུཀྑཝཊྚདུཀྑཱཝཧཏོ. ཨཙེལཀཔཊིཔདཱཏི ཙ ནིདསྶནམཏྟཾ དཊྛབྦཾ ཚནྣཔརིབྦཱཛཀཱནམྤི ཨུབྷཡདུཀྑཱཝཧཔཊིཔཏྟིདསྶནཏོ. དུཏིཡཾ…པེ… བྲཧྨཙརིཡཙརཎཾ ཨེཏརཧི སཏིཔི དུཀྑེ ཨཱཡཏིཾ སུཁཱཝཧཏྟཱ. ཀཱམེསུ པཱཏབྱཏཱ ཡཐཱཀཱམཾ ཀཱམཔརིབྷོགོ. ཨལབྷམཱནསྶཱཔཱིཏི པི-སདྡེན ཀོ པན ཝཱདོ ལབྷམཱནསྶཱཏི དསྶེཏི.

དུསྶཱིལྱཱདིཔཱཔདྷམྨཱནཾ ཁམྦྷནཾ པཊིབནྡྷནཾ ཁནྡྷཊྛོ, སོ པན སཱིལཱདི ཨེཝཱཏི ཨཱཧ ‘‘གུཎཊྛོ ཁནྡྷཊྛོ’’ཏི. གུཎཝིསཡཏཱཡ ཁནྡྷ-སདྡསྶ གུཎཏྠཏཱ ཝེདིཏབྦཱ. ཝིམུཏྟིཀྑནྡྷོཏི པཊིཔཀྑཏོ སུཊྛུ ཝིམུཏྟཱ གུཎདྷམྨཱ ཨདྷིཔྤེཏཱ, ན ཨཝིམུཏྟཱ, ནཱཔི ཝིམུཙྩམཱནཱཏི ཏེཧི སཧ དེསནཾ ཨཱརུལ༹ྷཱ སཱིལཀྑནྡྷཱདཡོཔི ཏཡོཏི ཨཱཧ ‘‘ཕལསཱིལཾ ཨདྷིཔྤེཏཾ, ཙཏཱུསུཔི ཋཱནེསུ ཕལམེཝ ཝུཏྟ’’ནྟི ཙ. ཨེཏེནེཝ ཙེཏྠ ཝིམུཏྟིཀྑནྡྷོཏི ཕལཔརིཡཱཔནྣཱ སམྨཱསངྐཔྤཝཱཡཱམསཏིཡོ ཨདྷིཔྤེཏཱཏི ཝེདིཏབྦཾ.

ཨུཔཏྠམྦྷནཊྛེན སམྤཡུཏྟདྷམྨཱནཾ ཏཏྠ ཐིརབྷཱཝེན པཝཏྟནཏོ, ཨེཏེནེཝ ཨཧིརིཀཨནོཏྟཔྤཱནམྤི སཝིསཡེ བལཊྛོ སིདྡྷོ ཝེདིཏབྦོ. ན ཧི ཏེསཾ ¶ པཊིཔཀྑེཧི ཨཀམྤིཡཊྛོ ཨེཀནྟིཀོ. ཧིརོཏྟཔྤཱནཉྷི ཨཀམྤིཡཊྛོ སཱཏིསཡོ ཀུསལདྷམྨཱནཾ མཧཱབལབྷཱཝཏོ, ཨཀུསལཱནཉྩ དུབྦལབྷཱཝཏོ. ཏེནཱཧ བྷགཝཱ ‘‘ཨབལཱ ནཾ བལཱིཡནྟི, མདྡནྟེ ནཾ པརིསྶཡཱ’’ཏི (སུ. ནི. ༧༧༦; མཧཱནི. ༥; ནེཏྟི. པཊིནིདྡེསཝཱརེ ༥) བོདྷིཔཀྑིཡདྷམྨཝསེནཱཡཾ དེསནཱཏི ‘‘སམཐཝིཔསྶནཱམགྒཝསེནཱ’’ཏི ཝུཏྟཾ.

ཨདྷཱིཏི ཨུཔསགྒམཏྟཾ, ན ‘‘ཨདྷིཙིཏྟ’’ནྟིཨཱདཱིསུ (དྷ. པ. ༡༨༥) ཝིཡ ཨདྷིཀཱརཱདིཨཏྠཾ. ཀརཎཱདྷིཀརཎབྷཱཝསཱདྷནཝསེན ཨདྷིཊྛཱན-སདྡསྶ ཨཏྠཾ དསྶེནྟོ ‘‘ཏེན ¶ ཝཱ’’ཏིཨཱདིམཱཧ. ཏེན ཨདྷིཊྛཱནེན ཏིཊྛནྟི ཨཏྟནོ སམྨཱཔཊིཔཏྟིཡཾ གུཎཱདྷིཀཱ པུརིསཱ, ཏེ ཨེཝ ཏཏྠ ཨདྷིཊྛཱནེ ཏིཊྛནྟི སམྨཱཔཏྟིཡཱ, ཋཱནམེཝ ཨདྷིཊྛཱནམེཝ སམྨཱཔཊིཔཏྟིཡནྟི ཡོཛནཱ. པཋམེན ཨདྷིཊྛཱནེན. ཨགྒཕལཔཉྙཱཏི ཨུཀྐཊྛནིདྡེསོཡཾ. ཀིལེསཱུཔསམོཏི ཀིལེསཱནཾ ཨཙྩནྟཝཱུཔསམོ ¶ . པཋམེན ནཡེན ཨདྷིཊྛཱནཱནི ཨེཀདེསཏོཝ གཧིཏཱནི, ན ནིཔྤདེསཏོཏི ནིཔྤདེསཏོཝ ཏཱནི དསྶེཏུཾ ‘‘པཋམེན ཙཱ’’ཏིཨཱདི ཝུཏྟཾ. ‘‘ཨཱདིཾ ཀཏྭཱ’’ཏི ཨེཏེན ཛྷཱནཱབྷིཉྙཱཔཉྙཉྩེཝ མགྒཔཉྙཉྩ སངྒཎྷཱཏི. ཝཙཱིསཙྩཾ ཨཱདིཾ ཀཏྭཱཏི ཨཱདི-སདྡེན ཝིརཏིསཙྩཾ སངྒཎྷཱཏི. ཏཏིཡེན ཨཱདི-སདྡེན ཀིལེསཱནཾ ཝཱིཏིཀྐམཔརིཙྩཱགཾ, པརིཡུཊྛཱནཔརིཙྩཱགཾ, ཧེཊྛིམམགྒེཧི ཨནུསཡཔརིཙྩཱགཉྩ སངྒཎྷཱཏི. ‘‘ཝིཀྑམྦྷིཏེ ཀིལེསེ’’ཏི ཨེཏེན སམཱཔཏྟཱིཧི ཀིལེསཱནཾ ཝིཀྑམྦྷནཝསེན ཝཱུཔསམཾ ཝཏྭཱ ཨཱདི-སདྡེན ཧེཊྛིམམགྒེཧི ཀཱཏབྦཾ ཏེསཾ སམུཙྪེདཝསེན ཝཱུཔསམཾ སངྒཎྷཱཏི. ཨརཧཏྟཕལཔཉྙཱ ཀཐིཏཱ ཨུཀྐཊྛནིདྡེསཏོཝ, ཨཉྙཐཱ ¶ ཝཙཱིསཙྩཱདཱིནམྤི གཧཎཾ སིཡཱ. ནིབྦཱནཉྩ ཨསམྨོསདྷམྨཏཱཡ ཨུཏྟམཊྛེན སཙྩཾ, སབྦསཾཀིལེསཔརིཙྩཱགནིམིཏྟཏཱཡ ཙཱགོ, སབྦསངྑཱརཱུཔསམབྷཱཝཏོ ཨུཔསམོཏི ཙ ཝིསེསཏོ ཝཏྟབྦཏཾ ཨརཧཏཱིཏི ཐེརསྶ ཨདྷིཔྤཱཡོ. པཀཊྛཛཱནནཕལཏཱཡ པཉྙཱ, ཨནཝསེསཏོ ཀིལེསཱནཉྩཛནྟེ ཙ ཝཱུཔསནྟེ ཙ ཨུཔྤནྣཏྟཱ ཙཱགོ, ཨུཔསམོཏི ཙ ཝིསེསཏོ ཨགྒཕལཉཱཎཾ ཝུཙྩཏཱིཏི ཐེརོ ཨཱཧ ‘‘སེསེཧི ཨརཧཏྟཕལཔཉྙཱ ཀཐིཏཱ’’ཏི.

པཉྷབྱཱཀརཎཱདིཙཏུཀྐཝཎྞནཱ

༣༡༢. ཀཱལ༹ཀནྟི མལཱིནཾ, ཙིཏྟསྶ ཨཔབྷསྶརབྷཱཝཀརཎནྟི ཨཏྠོ. ཏཾ པནེཏྠ ཀམྨཔཐཔྤཏྟམེཝ ཨདྷིཔྤེཏནྟི ཨཱཧ ‘‘དསཨཀུསལཀམྨཔཐཀམྨ’’ནྟི. ཀཎྷཱབྷིཛཱཏིཧེཏུཏོ ཝཱ ཀཎྷཾ. ཏེནཱཧ ‘‘ཀཎྷཝིཔཱཀ’’ནྟི. ཨཔཱཡཱུཔཏྟི, མནུསྶེསུ ཙ དོབྷགྒིཡཾ ཀཎྷཝིཔཱཀོ. ཨཡཾ ཏསྶ ཏམབྷཱཝོ ཝུཏྟོ. ནིབྦཏྟནཏོཏི ནིབྦཏྟཱཔནཏོ. པཎྜརནྟི ཨོདཱཏཾ, ཙིཏྟསྶ པབྷསྶརབྷཱཝཀརཎནྟི ཨཏྠོ. སུཀྐཱབྷིཛཱཏིཧེཏུཏོ ཝཱ སུཀྐཾ. ཏེནཱཧ ‘‘སུཀྐཝིཔཱཀ’’ནྟི. སགྒཱུཔཔཏྟི, མནུསྶེསུ སོབྷགྒིཡཉྩ སུཀྐཝིཔཱཀོ. ཨཡཾ ཏསྶ ཛོཏིབྷཱཝོ ཝུཏྟོ. ཨུཀྐཊྛནིདྡེསེན པན ‘‘སགྒེ ནིབྦཏྟནཏོ’’ཏི ཝུཏྟཾ, ནིབྦཏྟཱཔནཏོཏི ཨཏྠོ. མིསྶཀཀམྨནྟི ཀཱལེན ཀཎྷཾ, ཀཱལེན སུཀྐནྟི ཨེཝཾ མིསྶཀཝསེན ¶ ཀཏཀམྨཾ. ‘‘སུཁདུཀྑཝིཔཱཀ’’ནྟི ཝཏྭཱ ཏཏྠ སུཁདུཀྑཱནཾ པཝཏྟིཨཱཀཱརཾ དསྶེཏུཾ ‘‘མིསྶཀཀམྨཉྷཱི’’ཏིཨཱདི ཝུཏྟཾ. ཀམྨསྶ ཀཎྷསུཀྐསམཉྙཱ ཀཎྷསུཀྐཱབྷིཛཱཏིཧེཏུཏཱཡཱཏི ཨཔཙཡགཱམིཏཱཡ ཏདུབྷཡཝིདྡྷཾསཀསྶ ཀམྨཀྑཡཀརཀམྨསྶ ཨིདྷ སུཀྐཔརིཡཱཡོཔི ན ཨིཙྪིཏོཏི ཨཱཧ ‘‘ཨུབྷཡ…པེ… ཨཡམེཏྠ ཨཏྠོ’’ཏི. ཏཏྠ ཨུབྷཡཝིཔཱཀསྶཱཏི ཡཐཱདྷིགཏསྶ ཨུབྷཡཝིཔཱཀསྶ. སམྤཏྟིབྷཝཔརིཡཱཔནྣོ ¶ ཧི ཝིཔཱཀོ ཨིདྷ ‘‘སུཀྐཝིཔཱཀོ’’ཏི ཨདྷིཔྤེཏོ, ན ཨཙྩནྟཔརིསུདྡྷོ ཨརིཡཕལཝིཔཱཀོ.

པུབྦེནིཝཱསོ སཏྟཱནཾ ཙུཏཱུཔཔཱཏོ ཙ པཙྩཀྑཀརཎེན སཙྪིཀཱཏབྦཱ; ཨིཏརེ པཊིལཱབྷེན ཨསམྨོཧཔཊིཝེདྷཝསེན ¶ པཙྩཀྑཀརཎེན ཙ སཙྪིཀཱཏབྦཱ. ནནུ ཙ པཙྩཝེཀྑཎཱཔེཏྠ པཙྩཀྑཏོ པཝཏྟཏཱིཏི? སཙྩཾ པཙྩཀྑཏོ པཝཏྟཏི སརཱུཔདསྶནཏོ, ན པན པཙྩཀྑཀརཎཝསེན པཝཏྟཏི པཙྩཀྑཀཱརཱིནཾ པིཊྛིཝཏྟནཏོ. ཏེནཱཧ ‘‘ཀཱཡེནཱ’’ཏིཨཱདི.

ཨོཧནནྟཱིཏི ཧེཊྛཱ ཀཏྭཱ ཧནནྟི གམེནྟི. ཏཐཱབྷཱུཏཱ ཙ ཨདྷོ སཱིདེནྟི ནཱམཱཏི ཨཱཧ ‘‘ཨོསཱིདཱཔེནྟཱི’’ཏི. ཀཱམནཊྛེན ཀཱམོ ཙ སོ ཡཐཱཝུཏྟེནཏྠེན ཨོགྷོ ཙཱཏི, ཀཱམེསུ ཨོགྷོཏི ཝཱ ཀཱམོགྷོ. བྷཝོགྷོ ནཱམ བྷཝརཱགོཏི དསྶེཏུཾ ‘‘རཱུཔཱརཱུཔབྷཝེསཱུ’’ཏིཨཱདི ཝུཏྟཾ. ཏཏྠ པཋམོ ཨུཔཔཏྟིབྷཝེསུ རཱགོ, དུཏིཡོ ཀམྨབྷཝེསུ, ཏཏིཡོ བྷཝདིཊྛིསཧགཏོ. ཡཐཱ རཉྫནཊྛེན རཱགོ, ཨེཝཾ ཨོཧནཊྛེན ‘‘ཨོགྷོ’’ཏི ཝུཏྟོ.

ཡོཛེནྟཱིཏི ཀམྨཾ ཝིཔཱཀེན, བྷཝཱདིཾ བྷཝནྟརཱདཱིཧི དུཀྑེ སཏྟེ ཡོཛེནྟི གྷཊྚེནྟཱིཏི ཡོགཱ. ཨོགྷཱ ཝིཡ ཝེདིཏབྦཱ ཨཏྠཏོ ཀཱམཡོགཱདིབྷཱཝཏོ.

ཝིསཾཡོཛེནྟཱིཏི པཊིཔནྣཾ པུགྒལཾ ཀཱམཡོགཱདིཏོ ཝིཡོཛེནྟི. སཾཀིལེསཀརཎཾ ཡོཛནཾ ཡོགོ, གནྠིཀརཎཾ (གནྠཀརཎཾ དྷ. ས. མཱུལཊཱི. ༢༠-༢༥), སངྑལིཀཙཀྐལིཀཱནཾ ཝིཡ པཊིབདྡྷཏཱཀརཎཾ ཝཱ གནྠནཾ གནྠོ, ཨཡཾ ཨེཏེསཾ ཝིསེསོ. པལིབུནྡྷཏཱིཏི ནིསྶརིཏུཾ ཨཔྤདཱནཝསེན ན མུཉྩེཏི ཝིབནྡྷཏི. ཨིདམེཝཱཏི ཨཏྟནོ ཡཐཱཨུཔཊྛིཏཾ སསྶཏཝཱདཱདིཀཾ ཝདཏི. སཙྩནྟི བྷཱུཏཾ.

བྷུསཾ ¶ ¶ , དལ༹ྷཉྩ ཨཱརམྨཎཾ ཨཱདཱིཡཏི ཨེཏེཧཱིཏི ཨུཔཱདཱནཱནི. ཡཾ པན ཏེསཾ ཏཐཱགཧཎཾ, ཏམྤི ཨཏྠཏོ ཨཱདཱནམེཝཱཏི ཨཱཧ ‘‘ཨུཔཱདཱནཱནཱིཏི ཨཱདཱནགྒཧཎཱནཱི’’ཏི. གཧཎཊྛེནཱཏི ཀཱམནཝསེན དལ༹ྷཾ གཧཎཊྛེན. པུན གཧཎཊྛེནཱཏི མིཙྪཱབྷིནིཝིསནཝསེན དལ༹ྷཾ གཧཎཊྛེན. ཨིམིནཱཏི ཨིམིནཱ སཱིལཝཏཱདིནཱ. སུདྡྷཱིཏི སཾསཱརསུདྡྷི. ཨེཏེནཱཏི ཨེཏེན དིཊྛིགཱཧེན. ‘‘ཨཏྟཱ’’ཏི པཉྙཱཔེནྟོ ཝདཏི ཙེཝ ཨབྷིནིཝེསནཝསེན ཨུཔཱདིཡཏི ཙ.

ཡཝནྟི ཏཱཧི སཏྟཱ ཨམིསྶིཏཱཔི སམཱནཛཱཏིཏཱཡ མིསྶིཏཱ ཝིཡ ཧོནྟཱིཏི ཡོནིཡོ, ཏཱ པན ཨཏྠཏོ ཨཎྜཱདིཨུཔྤཏྟིཊྛཱནཝིསིཊྛཱ ཁནྡྷཱནཾ བྷཱགསོ པཝཏྟིཝིསེསཱཏི ཨཱཧ ‘‘ཡོནིཡོཏི ཀོཊྛཱསཱ’’ཏི. སཡནསྨིནྟི པུཔྥསནྠརཱདིསཡནསྨིཾ. ཏཏྠ ཝཱ ཏེ སཡིཏཱ ཛཱཡནྟཱིཏི སཡནགྒཧཎཾ. ཏཡིདཾ མནུསྶཱནཾ, བྷུམྨདེཝཱནཉྩ ཝསེན གཧེཏབྦཾ. པཱུཏིམཙྪཱདཱིསུ ཀིམཡོ ནིབྦཏྟནྟི. ཨུཔཔཏིཏཱ ཝིཡཱཏི ཨུཔཔཛྫཝསེན པཏིཏཱ ཝིཡ. བཱཧིརཔཙྩཡནིརཔེཀྑཏཱཡ ¶ ཝཱ ཨུཔཔཏནེ སཱདྷུཀཱརིནོ ཨོཔཔཱཏིནོ, ཏེ ཨེཝ ཨིདྷ ‘‘ཨོཔཔཱཏིཀཱ’’ཏི ཝུཏྟཱ. དེཝམནུསྶེསཱུཏི ཨེཏྠ ཡེ དེཝེ སནྡྷཱཡ དེཝགྒཧཎཾ, ཏེ དསྶེནྟོ ‘‘བྷུམྨདེཝེསཱུ’’ཏི ཨཱཧ.

ཨཏྟནོ སཏིསམྨོསེན ཨཱཧཱརཔྤཡོགེན མརཎཏོ ‘‘པཋམོ ཁིཌྜཱཔདོསིཀཝསེནཱ’’ཏི ཝུཏྟཾ. ཨཏྟནོ པརསྶ ཙ མནོཔདོསཝསེན མརཎཏོ ‘‘ཏཏིཡོ མནོཔདོསིཀཝསེནཱ’’ཏི ཝུཏྟཾ. ནེཝ ཨཏྟསཉྩེཏནཱཡ མརནྟི, ན པརསཉྩེཏནཱཡ ཀེཝལཾ པུཉྙཀྑཡེནེཝ མརཎཏོ, ཏསྨཱ ཙཏུཏྠོ…པེ… ཝེདིཏབྦོ.

དཀྑིཎཱཝིསུདྡྷཱདིཙཏུཀྐཝཎྞནཱ

༣༡༣. དཱནསངྑཱཏཱ དཀྑིཎཱ, ན དེཡྻདྷམྨསངྑཱཏཱ. ཝིསུཛ྄ཛྷནཱ ¶ མཧཱཛུཏིཀཏཱ, སཱ པན མཧཱཕལཏཱཡ ཝེདིཏབྦཱཏི ཨཱཧ ‘‘མཧཔྥལཱ ཧོནྟཱི’’ཏི.

ཨནརིཡཱནནྟི ཨསཱདྷཱུནཾ. ཏེ པན ནིཧཱིནཱཙཱརཱ ཧོནྟཱིཏི ཨཱཧ ‘‘ལཱམཀཱན’’ནྟི. ཝོཧཱརཱཏི སབྦོཧཱརཱ ཨབྷིལཱཔཱ ཝཱ, ཨཏྠཏོ ཏཐཱཔཝཏྟཱ ཙེཏནཱ. ཏེནཱཧ ‘‘ཨེཏྠ ཙཱ’’ཏིཨཱདི.

ཨཏྟནྟཔཱདིཙཏུཀྐཝཎྞནཱ

༣༡༤. ཏེསུ ¶ ཨཙེལཀོཏི ནིདསྶནམཏྟཾ ཚནྣཔརིབྦཱཛཀཱནམྤི ཨཏྟཀིལམཐཾ ཨནུཡུཏྟཱནཾ ལབྦྷནཏོ.

ན སཱིལཱདིསམྤནྣོཏི སཱིལཱདཱིཧི གུཎེཧི ཨཔརིཔུཎྞོ.

ཏམོཏི ཨཔྤཀཱསབྷཱཝེན ཏམོབྷཱུཏོ. ཏེནཱཧ ‘‘ཨནྡྷཀཱརབྷཱུཏོ’’ཏི, ཨནྡྷཀཱརཾ ཝིཡ བྷཱུཏོ ཛཱཏོ ཨཔྤཀཱསབྷཱཝེན, ཨནྡྷཀཱརཏྟཾ ཝཱ པཏྟོཏི ཨཏྠོ. ཏམམེཝཱཏི ཝུཏྟལཀྑཎཾ ཏམམེཝ. པརཾ པརཏོ ཨཡནཾ གཏི ནིཊྛཱཏི ཨཏྠོ. ‘‘ནཱིཙེ…པེ… ནིབྦཏྟིཏྭཱ’’ཏི ཨེཏེན ཏསྶ ཏམབྷཱཝཾ དསྶེཏི, ‘‘ཏཱིཎི དུཙྩརིཏཱནི པརིཔཱུརེཏཱི’’ཏི ཨེཏེན ཏམཔརཱཡནབྷཱཝཾ ཨཔྤཀཱསབྷཱཝཱཔཏྟིཏོ. ཏཐཱཝིདྷོ ཧུཏྭཱཏི ནཱིཙེ…པེ… ནིབྦཏྟེཏྭཱ. ‘‘ཏཱིཎི སུཙརིཏཱནི པརིཔཱུརེཏཱི’’ཏི ¶ ཨེཏེན ཏསྶ ཛོཏིཔརཱཡནབྷཱཝཾ དསྶེཏི པཀཱསབྷཱཝཱཔཏྟིཏོ. ཨིཏརདྭཡེ ཝུཏྟནཡཱནུསཱརེན ཨཏྠོ ཝེདིཏབྦོ.

མ-ཀཱརོ པདསནྡྷིམཏྟཾ ‘‘ཨཉྙམཉྙ’’ནྟིཨཱདཱིསུ (སུ. ནི. ༦༠༥) ཝིཡ. ཙཏཱུཧི ཝཱཏེཧཱིཏི ཙཏཱུཧི དིསཱཧི ཨུཊྛིཏཝཱཏེཧི. པརཔྤཝཱདེཧཱིཏི པརེསཾ དིཊྛིགཏིཀཱནཾ ཝཱདེཧི. ‘‘ཨཀམྤིཡོ’’ཏི ཝཏྭཱ ཏཏྠ ཀཱརཎམཱཧ ‘‘ཨཙལསདྡྷཱཡཱ’’ཏི, མགྒེནཱགཏསདྡྷཱཡ. པཏནུབྷཱུཏཏྟཱཏི ཨེཏྠ དྭཱིཧི ཀཱརཎེཧི པཏནུབྷཱཝོ ཝེདིཏབྦོ ཨདྷིཙྩུཔྤཏྟིཡཱ, པརིཡུཊྛཱནམནྡཏཱཡ ཙ. སཀདཱགཱམིསྶ ཧི ཝཊྚཱནུསཱརིམཧཱཛནསྶ ཝིཡ ཀིལེསཱ ཨབྷིཎྷཾ ན ཨུཔྤཛྫནྟི, ཀདཱཙི ཀརཧཙི ཨུཔྤཛྫནྟི. ཨུཔྤཛྫམཱནཱ ཙ ཝཊྚཱནུསཱརིམཧཱཛནསྶ ཝིཡ མདྡནྟཱ ཨབྷིབྷཝནྟཱ ན ཨུཔྤཛྫནྟི, དྭཱིཧི པན མགྒེཧི པཧཱིནཏྟཱ མནྡཱ མནྡཱ ཏནུཀཱཀཱརཱ ཨུཔྤཛྫནྟི. ཨིཏི ཀིལེསཱནཾ པཏནུབྷཱཝེན གུཎསོབྷཱཡ གུཎསོརཙྩེན སཀདཱགཱམཱི སམཎཔདུམོ ནཱམ. རཱགདོསཱནཾ ཨབྷཱཝཱཏི གུཎཝིཀཱསཝིབནྡྷཱནཾ ¶ སབྦསོ རཱགདོསཱནཾ ཨབྷཱཝེན. ཁིཔྤམེཝ པུཔྥིསྶཏཱིཏི ཨགྒམགྒཝིཀསནེན ནཙིརསྶེཝ ཨནཝསེསགུཎསོབྷཱཔཱརིཔཱུརིཡཱ པུཔྥིསྶཏི. ཏསྨཱ ཨནཱགཱམཱི སམཎཔུཎྜརཱིཀོ ནཱམ. ‘‘པུཎྜརཱིཀ’’ནྟི ཧི རཏྟཀམལཾ ཝུཙྩཏི. ཏཾ ཀིར ལཧུཾ པུཔྥིསྶཏི. ‘པདུམ’ནྟི སེཏཀམལཾ, ཏཾ ཙིརེན པུཔྥིསྶཏཱི’’ཏི ཝདནྟི. གནྠཀཱརཀིལེསཱནནྟི ཙིཏྟསྶ བདྡྷབྷཱཝཀརཱནཾ ཨུདྡྷམྦྷཱགིཡཀིལེསཱནཾ སབྦསོ ཨབྷཱཝཱ སམཎསུཁུམཱལོ ¶ ནཱམ སམཎབྷཱཝེན པརམསུཁུམཱལབྷཱཝཔྤཏྟིཏོ.

ཙཏུཀྐཝཎྞནཱ ནིཊྛིཏཱ.

ནིཊྛིཏཱ ཙ པཋམབྷཱཎཝཱརཝཎྞནཱ.

པཉྩཀཝཎྞནཱ

༣༡༥. སཙྩེསུ ཝིཡ ཨརིཡསཙྩཱནི ཁནྡྷེསུ ཨུཔཱདཱནཀྑནྡྷཱ ཨནྟོགདྷཱཏི ཁནྡྷེསུ ལོཀིཡལོཀུཏྟརཝསེན ཝིབྷཱགཾ དསྶེཏྭཱ ཨིཏརེསུ ཏདབྷཱཝཏོ ‘‘ཨུཔཱདཱནཀྑནྡྷཱ ལོཀིཡཱ ཝཱ’’ཏི ཨཱཧ.

གནྟབྦཱཏི ¶ ཨུཔཔཛྫིཏབྦཱ. ཡཐཱ ཧི ཀམྨབྷཝོ པརམཏྠཏོ ཨསཏིཔི ཀཱརཀེ པཙྩཡསཱམགྒིཡཱ སིདྡྷོ ‘‘ཏཾསམངྒིནཱ སནྟཱནལཀྑཎེན སཏྟེན ཀཏོ’’ཏི ཝོཧརཱིཡཏི, ཨེཝཾ ཨུཔཔཏྟིབྷཝལཀྑཎཱ གཏིཡོ པརམཏྠཏོ ཨསཏིཔི གམཀེ ཏཾཏཾཀམྨཝསེན ཡེཧི ཏཱནི ཀམྨཱནི ‘‘ཀཏཱནཱི’’ཏི ཝུཙྩནྟི, ཏེཧི ‘‘གནྟབྦཱ’’ཏི ཝོཧརཱིཡནྟི. ཡསྶ ཨུཔྤཛྫཏི, ཏཾ བྲཱུཧནྟོ ཨེཝ ཨུཔྤཛྫཏཱིཏི ཨཡོ, སུཁཾ. ནཏྠི ཨེཏྠ ཨཡོཏི ནིརཡོ. ཏཏོ ཨེཝ ཨསྶཱདེཏབྦམེཏྠ ནཏྠཱིཏི ‘‘ནིརསྶཱདོ’’ཏི ཨཱཧ. ཨཝཱིཙིཨཱདིཨོཀཱསེཔི ནིརཡསདྡོ ནིརུལ༹ྷོཏི ཨཱཧ ‘‘སཧོཀཱསེན ཁནྡྷཱ ཀཐིཏཱ’’ཏི. སཱུརིཡཝིམཱནཱདི ཨོཀཱསཝིསེསེཔི ལོཀེ དེཝ-སདྡོ ནིརུལ༹ྷོཏི ཨཱཧ ‘‘ཙཏུཏྠེ ཨོཀཱསོཔཱི’’ཏི.

ཨཱཝཱསེཏི ཝིསཡེ བྷུམྨཾ. པེཏོ ཝཱ ཨཛགརོ ཝཱ ཧུཏྭཱ ནིབྦཏྟཏི ལགྒཙིཏྟཏཱཡ, ཧཱིནཛ྄ཛྷཱསཡཏཱཡ ཙ. ཏེཧི ཏེཧི ¶ ཀཱརཎེཧི ཨཱདཱིནཝཾ དསྶེཏྭཱ ཡཐཱ ཨཉྙེ ན ལབྷནྟི, ཨེཝཾ ཀརོཏི ཨཏྟནོ ཝིསམནིསྶིཏཏཱཡ, བལཝནིསྶིཏཏཱཡ ཙ. ཝཎྞམཙྪརིཡེན ཨཏྟནོ ཨེཝ ཝཎྞཾ ཝཎྞེཏི, པརེསཾ ཝཎྞོ ‘‘ཀིཾ ཝཎྞོ ཨེསོ’’ཏི ཏཾ ཏཾ དོསཾ ཝདཏི. པཊིཝེདྷདྷམྨོ ཨརིཡཱནཾཡེཝ ཧོཏི, ཏེ ཙ ཏཾ ན མཙྪརཱཡནྟི མཙྪརིཡསྶ སབྦསོ པཧཱིནཏྟཱཏི ཏསྶ ཨསམྦྷཝོ ཨེཝཱཏི ཨཱཧ ‘‘པརིཡཏྟིདྷམྨེ’’ཏིཨཱདི. ‘‘ཨཡཾ ཨིམཾ དྷམྨཾ ཨུགྒཧེཏྭཱ ཨཉྙཐཱ ཨཏྠཾ ཝིཔརིཝཏྟེཏྭཱ ནསྶེསྶཏཱི’’ཏི དྷམྨཱནུགྒཧེན ན དེཏི. ‘‘ཨཡཾ ཨིམཾ དྷམྨཾ ཨུགྒཧེཏྭཱ ཨུདྡྷཏོ ¶ ཨུནྣལོ༹ ཨཝཱུཔསནྟཙིཏྟོ ཨཔུཉྙཾ པསཝིསྶཏཱི’’ཏི པུགྒལཱནུགྒཧེན ན དེཏི. ན ཏཾ ཨདཱནཾ མཙྪརིཡཾ མཙྪརིཡལཀྑཎསྶེཝ ཨབྷཱཝཏོ.

ཙིཏྟཾ ནིཝཱརེནྟཱིཏི ཛྷཱནཱདིཝསེན ཨུཔྤཛྫནཀཾ ཀུསལཙིཏྟཾ ནིསེདྷེནྟི ཏཐཱསྶ ཨུཔྤཛྫིཏུཾ ན དེནྟི. ནཱིཝརཎཔྤཏྟོཏི ནཱིཝརཎཱཝཏྠོ. ‘‘ཨརཧཏྟམགྒཝཛ྄ཛྷོ’’ཏི ཨེཏེན བྷཝརཱགཱནུསཡསྶཔི ནཱིཝརཎབྷཱཝཾ ཨནུཛཱནཱཏི, ཏཾ ཝིཙཱརེཏབྦཾ. ཀིམེཏྠ ཝིཙཱརེཏབྦཾ? ‘‘ཨཱརུཔྤེ ཀཱམཙྪནྡནཱིཝརཎཾ པཊིཙྩ ཐིནམིདྡྷནཱིཝརཎ’’ནྟི (པཊྛཱ. ༣.ནཱིཝརཎགོཙྪཀེ ༨) ཨཱདིཝཙནཏོ ན ཡིདཾ ‘‘པརིཡཱཡེན ཝུཏྟ’’ནྟི སཀྐཱ ཝཏྟུཾ, སབྦེསམྤི ཏེབྷཱུམཀདྷམྨཱནཾ ཀཱམནཱིཡཊྛེན ཀཱམབྷཱཝཏོ བྷཝརཱགསྶཔི ཀཱམཙྪནྡབྷཱཝསྶ ཨིཙྪིཏཏྟཱ. ཏསྨཱ ‘‘ཀཱམཙྪནྡོ ནཱིཝརཎཔྤཏྟོ’’ཏི བྷཝརཱགཱནུསཡམཱཧ. སོ ཧི ཨརཧཏྟམགྒཝཛ྄ཛྷོ. ‘‘ཡཱ ཏསྨིཾ སམཡེ ཙིཏྟསྶ ཨཀལྱཏཱ’’ཏི (དྷ. ས. ༡༡༦༢) ཨཱདིཝཙནཏོ ཐིནཾ ཙིཏྟགེལཉྙཾ. ཏཐཱ ‘‘ཡཱ ཏསྨིཾ སམཡེ ཝེདནཱཀྑནྡྷསྶཱ’’ཏི (དྷ. ས. ༤༤) ཨཱདིཝཙནཏོ མིདྡྷཾ ཁནྡྷཏྟཡགེལཉྙཾ. ཨེཏྠ ཙ ¶ ཙིཏྟགེལཉྙེན ཙིཏྟསྶེཝ ཨཀལྱཏཱ, ཁནྡྷཏྟཡགེལཉྙེན པན རཱུཔཀཱཡསྶཔི ཐིནམིདྡྷསྶ ནིདྡཱཧེཏུཏྟཱ. ཏཐཱ ཨུདྡྷཙྩནྟི ཨུདྡྷཙྩསྶ ཨརཧཏྟམགྒཝཛ྄ཛྷཏཾ ཨུཔསཾཧརཏི ཏཐཱ-སདྡེན ¶ , ན ཨུབྷཡཏཾ. ན ཧི ཏསྶ ཏཱདིསཱི ཨུབྷཡཏཱ ཨཏྠི. ཡཾ པན ཀེཙི ཝདནྟི ‘‘པུཐུཛྫནསནྟཱནཝུཏྟི སེཀྑསནྟཱནཝུཏྟཱི’’ཏི, ཏཾ ཨིདྷ ཨནུཔཡོགི སེཀྑསནྟཱནཝུཏྟིནོ ཨེཝ ཙེཏྠ ཨདྷིཔྤེཏཏྟཱ.

ཏེཧཱིཏི སཾཡོཛནེཧི. ‘‘ཨོརམྦྷཱགིཡཱནི ཨུདྡྷམྦྷཱགིཡཱནཱི’’ཏི ཝིསེསཾ ཨནཱམསིཏྭཱ ‘‘སཾཡོཛནཱནཱི’’ཏི སཱདྷཱརཎཏོ པདུདྡྷཱརོ ཨིདཱནི ཝུཙྩམཱནཙཏུཀྐཱནུཙྪཝིཀཏཱཝསེན, ཀསྶཙིཔི ཀིལེསསྶ ཨཝིཀྑམྦྷིཏཏྟཱ ཀཐཉྩིཔི ཨཝིནིཔཱཏེཡྻཏཱམུཏྟོ ཀཱམབྷཝོ ཨཛ྄ཛྷཏྟགྒཧཎསྶ ཝིསེསཔཙྩཡཏྟཱ ཨིམེསཾ སཏྟཱནཾ ཨབྦྷནྟརཊྛེན ཨནྟོ ནཱམ. རཱུཔཱརཱུཔབྷཝོ ཏབྦིཔརིཡཱཡཏོ བཧི ནཱམ. ཏཐཱ ཧི ཡསྶ ཨོརམྦྷཱགིཡཱནི སཾཡོཛནཱནི ཨཔྤཧཱིནཱནི, སོ ཨཛ྄ཛྷཏྟསཾཡོཛནོ ཝུཏྟོ, ཡསྶ ཏཱནི པཧཱིནཱནི, སོ བཧིདྡྷཱསཾཡོཛནོ, ཏསྨཱ ཨནྟོ ཨསམུཙྪིནྣབནྡྷནཏཱཡ, བཧི ཙ པཝཏྟམཱནབྷཝངྒསནྟཱནཏཱཡ ཨནྟོབདྡྷཱ བཧིསཡིཏཱ ནཱམ. ནིརནྟརཔྤཝཏྟབྷཝངྒསནྟཱནཝསེན ཧི སཡིཏཝོཧཱརོ. ཀཱམཾ ནེསཾ བཧིབནྡྷནམྤི ཨསམུཙྪིནྣཾ, ཨནྟོབནྡྷནསྶ པན ཐཱུལཏཱཡ ཨེཝཾ ཝུཏྟཾ ¶ . ཏེནཱཧ ‘‘ཏེསཉྷི ཀཱམབྷཝེ བནྡྷན’’ནྟི. ཨིམིནཱ ནཡེན སེསདྭཡེཔི ཨཏྠོ ཝེདིཏབྦོ. ཨསམུཙྪིནྣེསུ ཙ ཨོརམྦྷཱགིཡསཾཡོཛནིཡེསུ ལདྡྷཔྤཙྩཡེསུ ཨུདྡྷམྦྷཱགིཡསཾཡོཛནཱནི ཨགཎནཱུཔགཱནི ཧོནྟཱིཏི. ཨརིཡཱནཾཡེཝ ཝསེནེཏྠ ཙཏུཀྐསྶ ཨུདྡྷཊཏྟཱ ལབྦྷམཱནཱཔི པུཐུཛྫནཱ ན ཨུདྡྷཊཱ.

སིཀྑཱཀོཊྛཱསོཏི སིཀྑིཏབྦབྷཱགོ. པཛྫཏི སིཀྑཱ ཨེཏེནཱཏི སིཀྑཱཔདཾ, སིཀྑཱཡ ཨདྷིགམུཔཱཡོཏི. ཨཱགཏཱཡེཝ, ཏསྨཱ ཏཏྠ ཨཱགཏནཡེནེཝ ཝེདིཏབྦཱཏི ཨདྷིཔྤཱཡོ.

ཨབྷབྦཊྛཱནཱདིཔཉྩཀཝཎྞནཱ

༣༡༦. དེསནཱསཱིསམེཝཱཏི ¶ དེསནཱཔདེསོ ཨེཝ, ཏསྨཱ སོཏཱཔནྣཱདཡོཔི ཨབྷབྦཱ. ཡདི ཨེཝཾ ཀསྨཱ ཏཐཱ དེསནཱཏི ཨཱཧ ‘‘པུཐུཛྫནཁཱིཎཱསཝཱན’’ནྟིཨཱདི.

ཉཱཏིབྱསནེ ཡེསཾ ཉཱཏཱིནཾ ཝིནཱསོ, ཏེསཾ ཧིཏསུཁཾ ཝིདྡྷཾསེཏི, ཏསྨཱ བྱསཏཱིཏི བྱསནཾ. བྷོགབྱསནེཔི ཨེསེཝ ནཡོ. རོགབྱསནཱདཱིསུ པན ‘‘ཡསྶ རོགོ’’ཏིཨཱདིནཱ ཡོཛེཏབྦཾ. ནེཝ ཨཀུསལཱནི ཨསཾཀིལིཊྛསབྷཱཝཏྟཱ. ན ཏིལཀྑཎཱཧཏཱནི ཨབྷཱཝདྷམྨཏྟཱ. ཨིཏརཾ པན ཝུཏྟཝིཔརིཡཱཡཏོ ཨཀུསལཾ, ཏིལཀྑཎཱཧཏཉྩ.

གུཎེཧི ¶ སམིདྡྷབྷཱཝཱ སམྤདཱ.

ཝཏྠུསནྡསྶནཱཏི ཡསྨིཾ ཝཏྠུསྨིཾ ཏསྶ ཨཱཔཏྟི, ཏསྶ སརཱུཔཏོ དསྶནཱ. ཨཱཔཏྟིསནྡསྶནཱཏི ཡཾ ཨཱཔཏྟིཾ སོ ཨཱཔནྣོ, ཏསྶཱ དསྶནཱ. སཾཝཱསཔཊིཀྑེཔོཏི ཨུཔོསཐཔཝཱརཎཱདིསཾཝཱསསྶ པཊིཀྑིཔནཾ ཨཀརཎཾ. སཱམཱིཙིཔཊིཀྑེཔོ ཨབྷིཝཱདནཱདིསཱམཱིཙིཀིརིཡཱཡ ཨཀརཎཾ. ཙོདཡམཱནེནཱཏི ཙོདེནྟེན. ཙུདིཏཀསྶ ཀཱལོཏི ཙུདིཏཀསྶ པུགྒལསྶ ཙོདེཏབྦཀཱལོ. པུགྒལནྟི ཙོདེཏབྦཾ པུགྒལཾ. ཨུཔཔརིཀྑིཏྭཱཏི ‘‘ཨཡཾ ཙུདིཏཀལཀྑཎེ ཏིཊྛཏི, ན ཏིཊྛཏཱི’’ཏི ཝཱིམཾསིཏྭཱ. ཨཡསཾ ཨཱརོཔེཏི ‘‘ཨིམེ མཾ ཨབྷཱུཏེན ཨབྦྷཱཙིཀྑནྟཱ ཨནཡབྱསནཾ ཨཱཔཱདེནྟཱི’’ཏི བྷིཀྑཱུནཾ ཨཡསཾ ཨུཔྤཱདེཏི.

པདྷཱནིཡངྒཔཉྩཀཝཎྞནཱ

༣༡༧. པདཧཏཱིཏི ¶ པདཧནོ; བྷཱཝནཾ ཨནུཡུཏྟོ ཡོགཱི, ཏསྶ བྷཱཝོ བྷཱཝནཱནུཡོགོ པདཧནབྷཱཝོ. པདྷཱནཾ ཨསྶ ཨཏྠཱིཏི པདྷཱནིཀོ, ཀ-ཀཱརསྶ ཡ-ཀཱརཾ ཀཏྭཱ ‘‘པདྷཱནིཡོ’’ཏི ཝུཏྟཾ. ‘‘ཨབྷིནཱིཧཱརཏོ པཊྛཱཡ ཨཱགཏཏྟཱ’’ཏི ཝུཏྟཏྟཱ པཙྩེཀབོདྷིསཏྟསཱཝཀབོདྷིསཏྟཱནམྤི པཎིདྷཱནཏོ པབྷུཏི ཨཱགཏཱ སདྡྷཱ ཨཱགམནསདྡྷཱ ཨེཝ, ཨུཀྐཊྛནིདྡེསེན པན ‘‘སབྦཉྙུབོདྷིསཏྟཱན’’ནྟི ཝུཏྟཾ. ཨདྷིགམཏོ ¶ སམུདཱགཏཏྟཱ ཨགྒམགྒཕལསམྤཡུཏྟཱཔི ཨདྷིགམནསདྡྷཱ ནཱམ, ཡཱ སོཏཱཔནྣསྶ ཨངྒབྷཱཝེན ཝུཏྟཱ. ཨཙལབྷཱཝེནཱཏི པཊིཔཀྑེན ཨནབྷིབྷཝནཱིཡཏྟཱ ནིཙྩལབྷཱཝེན. ཨོཀཔྤནནྟི ཨོཀྐནྟིཏྭཱ པཀྑནྡིཏྭཱ ཨདྷིམུཙྩནཾ. པསཱདུཔྤཏྟི པསཱདནཱིཡེ ཝཏྠུསྨིཾ པསཱིདནམེཝ. སུཔྤཊིཝིདྡྷནྟི སུཊྛུ པཊིཝིདྡྷཾ, ཡཐཱ ཏེན པཊིཝེདྷེན སབྦཉྙུཏཉྙཱཎཾ ཧཏྠགཏཾ ཨཧོསི, ཏཐཱ པཊིཝིདྡྷཾ. ཡསྶ བུདྡྷསུབུདྡྷཏཱཡ སདྡྷཱ ཨཙལཱ ཨསམྤཝེདྷཱི, ཏསྶ དྷམྨསུདྷམྨཏཱཡ, སངྒྷསུཔྤཊིཔནྣཏཱཡ ཙ སདྡྷཱ ན ཏཐཱཏི ཨཊྛཱནམེཏཾ ཨནཝཀཱསོ. ཏེནཱཧ བྷགཝཱ ‘‘ཡོ, བྷིཀྑཝེ, བུདྡྷེ པསནྣོ, དྷམྨེ སོ པསནྣོ, སངྒྷེ སོ པསནྣོ’’ཏིཨཱདི. པདྷཱནཝཱིརིཡཾ ཨིཛ྄ཛྷཏི ‘‘ཨདྡྷཱ ཨིམཱཡ པཊིཔདཱཡ ཛརཱམརཎཏོ མུཙྩིསྶཱམཱི’’ཏི སཀྐཙྩཾ པདཧནཏོ.

ཨཔྤ-སདྡོ ཨབྷཱཝཏྠོ ‘‘ཨཔྤ-སདྡསྶ…པེ… ཁོ པནཱ’’ཏིཨཱདཱིསུ ཝིཡཱཏི ཨཱཧ ‘‘ཨརོགོ’’ཏི. སམཝེཔཱཀིནིཡཱཏི ཡཐཱབྷུཏྟཾ ཨཱཧཱརཾ སམཱཀཱརེནེཝ པཙྩནསཱིལཱཡ. དལ༹ྷཾ ཀཏྭཱ པཙྩནྟཱི ཧི གཧཎཱི གྷོརབྷཱཝེན པིཏྟཝིཀཱརཱདིཝསེན རོགཾ ཛནེཏི, སིཐིལཾ ཀཏྭཱ པཙྩནྟཱི མནྡབྷཱཝེན ཝཱཏཝིཀཱརཱདིཝསེན. ཏེནཱཧ ‘‘ནཱཏིསཱིཏཱཡ ནཱཙྩུཎྷཱཡཱ’’ཏི. གཧཎཱིཏེཛསྶ མནྡཏིཀྑཏཱཝསེན ¶ སཏྟཱནཾ ཡཐཱཀྐམཾ སཱིཏུཎྷསཧགཏཱཏི ཨཱཧ ‘‘ཨཏིསཱིཏགཧཎིཀོ’’ཏིཨཱདི. ཡཱཐཱཝཏོ ཨཙྩཡདེསནཱ ཨཏྟནོ ཨཱཝིཀརཎཾ ནཱམཱཏི ཨཱཧ ‘‘ཡཐཱབྷཱུཏཾ ཨཏྟནོ ཨགུཎཾ པཀཱསེཏཱ’’ཏི. ཨུདཡཏྠགཱམིནིཡཱཏི ¶ སངྑཱརཱནཾ ཨུདཡཾ, ཝཡཉྩ པཊིཝིཛ྄ཛྷནྟིཡཱཏི ཨཡམེཏྠ ཨཏྠོཏི ཨཱཧ ‘‘ཨུདཡཉྩཱ’’ཏིཨཱདི. པརིསུདྡྷཱཡཱཏི ནིརུཔཀྐིལེསཱཡ. ནིབྦིཛ྄ཛྷིཏུཾ སམཏྠཱཡཱཏི ཏདངྒཝསེན ཨཝསེསཾ པཛཧིཏུཾ སམཏྠཱཡ. ཏསྶ ཏསྶ དུཀྑསྶ ཁཡགཱམིནིཡཱཏི ཡཾ དུཀྑཾ ཨིམསྨིཾ ཉཱཎེ ཨནདྷིགཏེ པཝཏྟཱརཧཾ, ཨདྷིགཏེ ན པཝཏྟཏི, ཏཾ སནྡྷཱཡ ཝདཏི. ཏཐཱ ཧེས ཡོགཱཝཙརོ ‘‘ཙཱུལ༹སོཏཱཔནྣོ’’ཏི ཝུཙྩཏི.

སུདྡྷཱཝཱསཱདིཔཉྩཀཝཎྞནཱ

༣༡༨. ‘‘སུདྡྷཱ ¶ ཨཱཝསིཾསཱུ’’ཏིཨཱདིནཱ ཨདྡྷཏྟཡེཔི ཏེསཾ སུདྡྷཱཝཱསཔརིཡཱཡོ ཨབྱབྷིཙཱརཱིཏི དསྶེཏི. ཀིལེསམལརཧིཏཱཏི ནཱམཀཱཡཔརིསུདྡྷིཾ ཝདནྟོ ཨེཝ རཱུཔཀཱཡཔརིསུདྡྷིམྤི ཨཏྠཏོ དསྶེཏི. ཏེནཱཧ ‘‘ཨནཱགཱམིཁཱིཎཱསཝཱ’’ཏི.

ཨཱཡུནོ མཛ྄ཛྷནྟི ཨཝིཧཱདཱིསུ ཡཏྠ ཡཏྠ ཨུཔྤནྣོ, ཏཏྠ ཏཏྠ ཨཱཡུནོ མཛ྄ཛྷཾ ཨནཏིཀྐམིཏྭཱ. ཨནྟརཱ ཝཱཏི ཏསྶ ཨནྟརཱཝ ཨོརམེཝ. མཛ྄ཛྷཾ ཨུཔཧཙྩཱཏི ཨཱཡུནོ མཛ྄ཛྷཾ ཨཏིཙྩ. ཏེནཱཧ ‘‘ཨཏིཀྐམིཏྭཱ’’ཏི. ཨཔྤཡོགེནཱཏི ཨནུསྶཧནེན. ཨཀིལམནྟོཏི ཨཀིལནྟོ. སུཁེནཱཏི ཨཀིཙྪེན. ཨུདྡྷཾ ཝཱཧིབྷཱཝེན ཨུདྡྷཾ ཨསྶ ཏཎྷཱསོཏཾ, ཝཊྚསོཏཉྩཱཏི ཨུདྡྷཾསོཏོ; ཨུདྡྷཾ ཝཱ གནྟྭཱ པཊིལབྷིཏབྦཏོ ཨུདྡྷཾ ཨསྶ མགྒསོཏནྟི ཨུདྡྷཾསོཏོ. ཨཀནིཊྛཾ གཙྪཏཱིཏི ཨཀནིཊྛགཱམཱི. སོདྷེཏྭཱཏི ཏཏྠ ཏཏྠ ཨུཔྤཛྫནྟོ ཏེ ཏེ དེཝལོཀེ སོདྷེནྟོ ཝིཡ ཧོཏཱིཏི ཝུཏྟཾ ‘‘ཙཏྟཱརོ དེཝལོཀེ སོདྷེཏྭཱ’’ཏི. ཏཏྠ ཏཏྠ ཝཱ ཨུཔྤཛྫིཏྭཱ པུན ཨནུཔྤཛྫནཱརཧབྷཱཝེནེཝ ཏཏོཔི གཙྪནྟོ དེཝཱུཔཔཏྟིབྷཝསཉྙིཏེ ཨཏྟནོ ཁནྡྷལོཀེ བྷཝརཱགམལཾ ཝིསོདྷེཏྭཱ ཝིཀྑམྦྷེཏྭཱ. ཨཡཉྷི ཨཝིཧེསུ ཀཔྤསཧསྶཾ ཝསནྟོ ཨརཧཏྟཾ པཏྟུཾ ཨསཀྐུཎིཏྭཱ ཨཏཔྤཾ གཙྪཏི, ཏཏྠཱཔི དྭེ ཀཔྤསཧསྶཱནི ¶ ཝསནྟོ ཨརཧཏྟཾ པཏྟུཾ ཨསཀྐུཎིཏྭཱ སུདསྶཾ གཙྪཏི, ཏཏྠཱཔི ཙཏྟཱརིཀཔྤསཧསྶཱནི ཝསནྟོ ཨརཧཏྟཾ པཏྟུཾ ཨསཀྐུཎིཏྭཱ སུདསྶིཾ གཙྪཏི, ཏཏྠཱཔི ཨཊྛཀཔྤསཧསྶཱནི ཝསནྟོ ཨརཧཏྟཾ པཏྟུཾ ཨསཀྐུཎིཏྭཱ ཨཀནིཊྛཾ གཙྪཏི, ཏཏྠ ཝསནྟོ ཨགྒམགྒཾ ཨདྷིགཙྪཏི.

ཙེཏོཁིལཔཉྩཀཝཎྞནཱ

༣༡༩. ཙེཏོཁིལཱ ¶ ནཱམ ཨཏྠཏོ ཝིཙིཀིཙྪཱ ཀོདྷོ ཙ, ཏེ པན ཡསྨིཾ སནྟཱནེ ཨུཔྤཛྫནྟི, ཏསྶ ཁརབྷཱཝོ ཀཀྑལ༹བྷཱཝོ ཧུཏྭཱ ཨུཔཏིཊྛནྟི, པགེཝ ཨཏྟནཱ སམྤཡུཏྟཙིཏྟསྶཱཏི ཨཱཧ ‘‘ཙིཏྟསྶ ཐདྡྷབྷཱཝོ’’ཏི. ཡཐཱ ལཀྑཎཔཱརིཔཱུརིཡཱ གཧིཏཱཡ སབྦཱ སཏྠུརཱུཔཀཱཡསིརཱི གཧིཏཱཝ ནཱམ ཧོཏི, ཨེཝཾ སབྦཉྙུཏཱཡ སབྦཱ དྷམྨཀཱཡསིརཱི’’ གཧིཏཱ ཨེཝ ནཱམ ཧོཏཱིཏི ཏདུབྷཡཝཏྠུཀམེཝ ཀངྑཾ དསྶེནྟོ ‘‘སརཱིརེ ཀངྑམཱནོ’’ཏིཨཱདིམཱཧ. ཨཱཏཔཏི ཀིལེསེཏི ཨཱཏཔྤཾ ¶ , སམྨཱཝཱཡཱམོཏི ཨཱཧ ‘‘ཨཱཏཔྤཱཡཱཏི ཝཱིརིཡཀརཎཏྠཱཡཱ’’ཏི. པུནཔྤུནཾ ཡོགཱཡཱཏི བྷཱཝནཾ པུནཔྤུནཾ ཡུཉྫནཱཡ. སཏཏཀིརིཡཱཡཱཏི བྷཱཝནཱཡ ནིརནྟརཔྤཡོགཱཡ. ‘‘པཊིཝེདྷདྷམྨེ ཀངྑམཱནོ’’ཏི ཨེཏྠ ཀཐཾ ལོཀུཏྟརདྷམྨེ ཀངྑཱ པཝཏྟཏཱིཏི? ན ཨཱརམྨཎཀརཎཝསེན, ཨནུསྶཝཱཀཱརཔརིཝིཏཀྐལདྡྷེ པརིཀཔྤིཏརཱུཔེ ཀངྑཱ པཝཏྟཏཱིཏི དསྶེནྟོ ཨཱཧ ‘‘ཝིཔསྶནཱ…པེ… ཝདནྟི, ཏཾ ཨཏྠི ནུ ཁོ ནཏྠཱིཏི ཀངྑཏཱི’’ཏི. སིཀྑཱཏི ཙེཏྠ པུབྦབྷཱགསིཀྑཱ ཝེདིཏབྦཱ. ‘‘ཀཱམཉྩེཏྠ ཝིསེསུཔྤཏྟིཡཱ མཧཱསཱཝཛྫཏཱཡ ཙེཝ སཾཝཱསནིམིཏྟགྷཊྚནཱཧེཏུ ཨབྷིཎྷུཔྤཏྟིཀཏཱཡ ཙ ‘སབྲཧྨཙཱརཱིསཱུ’ཏི ཀོཔསྶ ཝིསཡོ ཝིསེསེཏྭཱ ཝུཏྟོ, ཏཏོ ཨཉྙཏྠཱཔི པན ཀོཔོ ‘ན ཙེཏོཁིལོ’ཏི ན སཀྐཱ ཝིཉྙཱཏུ’’ནྟི ཀེཙི. ཡདི ཨེཝཾ ཝིཙིཀིཙྪཱཡཔི ཨཡཾ ནཡོ ཨཱཔཛྫཏི, ཏསྨཱ ཡཐཱརུཏཝསེནེཝ གཧེཏབྦཾ.

ཙེཏསོཝིནིབནྡྷཱདིཔཉྩཀཝཎྞནཱ

༣༢༠. པཝཏྟིཏུཾ ཨཔྤདཱནཝསེན ཀུསལཙིཏྟཾ ཝིནིབནྡྷནྟཱིཏི ཙེཏསོཝིནིབནྡྷཱ. ཏཾ པན ཝིནིབནྡྷནྟཱ མུཊྛིགཱཧཾ ¶ གཎྷནྟཱི ཝིཡ ཧོནྟཱིཏི ཨཱཧ ‘‘ཙིཏྟཾ བནྡྷིཏྭཱ’’ཏིཨཱདི. ཀཱམགིདྡྷོ པུགྒལོ ཝཏྠུཀཱམེ ཝིཡ ཀིལེསཀཱམེཔི ཨསྶཱདེཏི ཨབྷིནནྡཏཱིཏི ཝུཏྟཾ ‘‘ཝཏྠུཀཱམེཔི ཀིལེསཀཱམེཔཱི’’ཏི. ཨཏྟནོ ཀཱཡེཏི ཨཏྟནོ ཀརཛཀཱཡེ, ཨཏྟབྷཱཝེ ཝཱ. བཧིདྡྷཱརཱུཔེཏི པརེསཾ ཀཱཡེ, ཨནིནྡྲིཡབདྡྷརཱུཔེ ཙ. ཨུདརཾ ཨཝདིཧཏི ཨུཔཙིནོཏི པརིཔཱུརེཏཱིཏི ཨུདརཱཝདེཧཀཾ. སེཡྻསུཁནྟི སེཡྻཱཡ སཡནཝསེན ཨུཔྤཛྫནཀསུཁཾ. སཾཔརིཝཏྟཀནྟི སཾཔརིཝཏྟེཏྭཱ. པཎིདྷཱཡཱཏི ཏཎྷཱཝསེན པཎིདཧིཏྭཱ. ཨིཏི པཉྩཝིདྷོཔི ལོབྷཝིསེསོ ཨེཝ ཙེཏོཝིནིབནྡྷོ ཝུཏྟོཏི ཝེདིཏབྦོ.

ལོཀིཡཱནེཝ ཀཐིཏཱནི རཱུཔིནྡྲིཡཱནཾཡེཝ ཀཐིཏཏྟཱ. པཋམདུཏིཡཙཏུཏྠཱནི ལོཀིཡཱནི པརིཏྟབྷཱུམཀཏྟཱ. ཏཏིཡཔཉྩམཱནི ཀཱམརཱུཔགྒབྷཱུམིཀཏྟཱ, ཀཱམརཱུཔཱརཱུཔགྒབྷཱུམིཀཏྟཱ ཙ. ལོཀིཡལོཀུཏྟརཱནི ¶ ཀཐིཏཱནཱིཏི ཨཱནེཏྭཱ ཡོཛནཱ. ‘‘སམཐཝིཔསྶནཱམགྒཕལཝསེནཱ’’ཏི ཝཏྟབྦཾ. ‘‘སམཐཝིཔསྶནཱམགྒཝསེནཱ’’ཏི ཝུཏྟཾ.

ནིསྶརཎིཡཔཉྩཀཝཎྞནཱ

༣༢༡. ནིསྶརནྟཱིཏི ¶ ནིསྶརཎཱིཡཱཏི ཝཏྟབྦེ རསྶཾ ཀཏྭཱ ནིདྡེསོ. ཀཏྟརི ཧེས ཨནཱིཡ-སདྡོ ཡཐཱ ‘‘ནིཡྻཱནིཀཱ’’ཏི. ཏེནཱཧ ‘‘ནིསྶཊཱ’’ཏི. ཀུཏོ པན ནིསྶཊཱཏི? ཡཐཱསཀཾ པཊིཔཀྑཏོ. ནིཛྫཱིཝཊྛེན དྷཱཏུཡོཏི ཨཱཧ ‘‘ཨཏྟསུཉྙསབྷཱཝཱ’’ཏི. ཨཏྠཏོ པན དྷམྨདྷཱཏུམནོཝིཉྙཱཎདྷཱཏུཝིསེསཱ. ཏཱདིསསྶ བྷིཀྑུནོ ཀིལེསཝསེན ཀཱམེསུ མནསིཀཱརོ ནཱམ ནཏྠཱིཏི ཨཱཧ ‘‘ཝཱིམཾསནཏྠ’’ནྟི. ‘‘ནེཀྑམྨནིསྶིཏཾ ཨིདཱནི མེ ཙིཏྟཾ, ཀིཾ ནུ ཁོ ཀཱམཝིཏཀྐོཔི ཨུཔྤཛྫཏཱི’’ཏི ཝཱིམཾསནྟསྶཱཏི ཨཏྠོ. པཀྑནྡནཾ ནཱམ ཨནུཔྤཝེསོ, སོ པན ཏཏྠ ནཏྠཱིཏི ཨཱཧ ‘‘ན པཝིསཏཱི’’ཏི. པསཱདཾ ནཱམ ཨབྷིརུཙིསནྟིཊྛཱནཾ ¶ , ཝིམུཙྩནཾ ཨདྷིམུཙྩནནྟི ཏཾ སབྦཾ པཀྑིཔནྟོ ཝདཏི ‘‘པསཱདཾ ནཱཔཛྫཏཱི’’ཏིཨཱདི. ཨེཝཾབྷཱུཏཾ པནསྶ ཙིཏྟཾ ཏཏྠ ཀཐཾ ཏིཊྛཏཱིཏི ཨཱཧ ‘‘ཡཐཱ པནཱ’’ཏིཨཱདི. ཏནྟི པཋམཛ྄ཛྷཱནཾ. ཨསྶཱཏི བྷིཀྑུནོ. ཙིཏྟཾ པཀྑནྡཏཱིཏི པརིཀམྨཙིཏྟེན སདྡྷིཾ ཛྷཱནཙིཏྟཾ ཨེཀཊྛཝསེན ཨེཀཛ྄ཛྷཾ གཧེཏྭཱ ཝདཏི. གོཙརེ གཏཏྟཱཏི ཨཏྟནོ ཨཱརམྨཎེ ཨེཝ པཝཏྟཏྟཱ. ཨཧཱནབྷཱགིཡཏྟཱཏི ཋིཏིབྷཱགིཡཏྟཱ, ཝིསེསབྷཱགིཡཏྟཱ ཝཱ. སུཊྛུ ཝིམུཏྟནྟི ཝིཀྑམྦྷནཝིམུཏྟིཡཱ སམྨདེཝ ཝིམུཏྟཾ. ཙིཏྟསྶ ཀཱཡསྶ ཙ ཧནནཏོ ཝིགྷཱཏོ, དུཀྑཾ. པརིདཧནཏོ པརིལཱ༹ཧོ, ཀཱམདརཐོ. ན ཝེདཡཏི ཨནུཔྤཛྫནཏོ. ནིསྶརནྟི ཏཏོཏི ནིསྶརཎཾ. ཀེ ནིསྶརནྟི? ཀཱམཱ. ཨེཝཉྩ ཀཏྭཱ ཀཱམཱནནྟི ཀཏྟརི སཱམིཝཙནཾ སུཊྛུ ཡུཛྫཏི. ཡདགྒེན ཀཱམཱ ཏཏོ ‘‘ནིསྶཊཱ’’ཏི ཝུཙྩནྟི, ཏདགྒེན ཛྷཱནམྤི ཀཱམཏོ ‘‘ནིསྶཊ’’ནྟི ཝཏྟབྦཏཾ ལབྷཏཱིཏི ཝུཏྟཾ ‘‘ཀཱམེཧི ནིསྶཊཏྟཱ’’ཏི. ཨེཝཾ ཝིཀྑམྦྷནཝསེན ཀཱམནིསྶརཎཾ ཝཏྭཱ ཨིདཱནི སམུཙྪེདཝསེན ཨཙྩནྟཏོཝ ནིསྶརཎཾ དསྶེཏུཾ ‘‘ཡོ པནཱ’’ཏིཨཱདི ཝུཏྟཾ.

སེསཔདེསཱུཏི སེསཀོཊྛཱསེསུ. ཨཡཾ པན ཝིསེསོཏི ཝིསེསཾ ཝདནྟེན ‘‘ཏཾ ཛྷཱནཾ པཱདཀཾ ཀཏྭཱ’’ཏིཨཱདིཀོ ཨཝིསེསོཏི ཝཏྭཱ དུཏིཡཏཏིཡཝཱརེསུ སབྦསོ ཨནཱམཊྛོ, ཙཏུཏྠཝཱརེ པན ཨཡམྤི ཝིསེསོཏི དསྶེཏུཾ ‘‘ཨཙྩནྟནིསྶརཎེ ཙེཏྠ ཨརཧཏྟཕལཾ ཡོཛེཏབྦ’’ནྟི ཝུཏྟཾ.

ཡསྨཱ ཨརཱུཔཛ྄ཛྷཱནཾ པཱདཀཾ ཀཏྭཱ ཨགྒམགྒཾ ཨདྷིགནྟྭཱ ཨརཧཏྟེ ཋིཏསྶ ཙིཏྟཾ སབྦསོ རཱུཔེཧི ནིསྶཊཾ ནཱམ ཧོཏི. ཏསྶ ཧི ཕལསམཱཔཏྟིཏོ ཝུཊྛཱཡ ¶ ཝཱིམཾསནཏྠཾ རཱུཔཱབྷིམུཁཾ ¶ ཙིཏྟཾ པེསེནྟསྶ ཨིདམཀྑཱཏནྟི སམཐཡཱནིཀཱནཾ ཝསེན ཧེཊྛཱ ཙཏྟཱརོ ཝཱརཱ ཀཐིཏཱ, ཨིདཾ པན སུཀྑཝིཔསྶཀསྶ ཝསེནཱཏི ཨཱཧ ‘‘སུདྡྷསངྑཱརེ’’ཏིཨཱདི. པུན སཀྐཱཡོ ནཏྠཱིཏི ཨུཔྤནྣནྟི ¶ ཨིདཱནི མེ སཀྐཱཡཔྤབནྡྷོ ནཏྠཱིཏི ཝཱིམཾསནྟསྶ ཨུཔྤནྣཾ.

ཝིམུཏྟཱཡཏནཔཉྩཀཝཎྞནཱ

༣༢༢. ཝིམུཏྟིཡཱ ཝཊྚདུཀྑཏོ ཝིམུཙྩནསྶ ཨཱཡཏནཱནི ཀཱརཎཱནི ཝིམུཏྟཱཡཏནཱནཱིཏི ཨཱཧ ‘‘ཝིམུཙྩནཀཱརཎཱནཱི’’ཏི. པཱལི༹ཨཏྠཾ ཛཱནནྟསྶཱཏི ‘‘ཨིདྷ སཱིལཾ ཨཱགཏཾ, ཨིདྷ སམཱདྷི, ཨིདྷ པཉྙཱ’’ཏིཨཱདིནཱ ཏཾ ཏཾ པཱལི༹ཨཏྠཾ ཡཱཐཱཝཏོ ཛཱནནྟསྶ. པཱལི༹ཾ ཛཱནནྟསྶཱཏི ཏདཏྠཛོཏནཾ པཱལི༹ཾ ཡཱཐཱཝཏོ ཨུཔདྷཱརེནྟསྶ. ཏརུཎཔཱིཏཱིཏི སཉྫཱཏམཏྟཱ མུདུཀཱ པཱིཏི ཛཱཡཏི. ཀཐཾ ཛཱཡཏི? ཡཐཱདེསིཏདྷམྨཾ ཨུཔདྷཱརེནྟསྶ ཏདནུཙྪཝིཀམེཝ ཨཏྟནོ ཀཱཡཝཙཱིམནོསམཱཙཱརཾ པརིགྒཎྷནྟསྶ སོམནསྶཔྤཏྟསྶ པམོདལཀྑཎཾ པཱམོཛྫཾ ཛཱཡཏི. ཏུཊྛཱཀཱརབྷཱུཏཱ བལཝཔཱིཏཱིཏི པུརིམུཔྤནྣཱཡ པཱིཏིཡཱ ཝསེན ལདྡྷཱསེཝནཏྟཱ ཨཏིཝིཡ ཏུཊྛཱཀཱརབྷཱུཏཱ ཀཱཡཙིཏྟདརཐཔསྶམྦྷནསམཏྠཱཡ པསྶདྡྷིཡཱ པཙྩཡོ བྷཝིཏུཾ སམཏྠཱ བལཔྤཏྟཱ པཱིཏི ཛཱཡཏི. ཡསྨཱ ནཱམཀཱཡེ པསྶདྡྷེ རཱུཔཀཱཡོཔི པསྶདྡྷོ ཨེཝ ཧོཏི, ཏསྨཱ ‘‘ནཱམཀཱཡོ པཊིཔསྶམྦྷཏི’’ ཨིཙྩེཝ ཝུཏྟཾ. སུཁཾ པཊིལབྷཏཱིཏི ཝཀྑམཱནསྶ ཙིཏྟསམཱདྷཱནསྶ པཙྩཡོ བྷཝིཏུཾ སམཏྠཾ ཙེཏསིཀཾ ནིརཱམིསཾ སུཁཾ པཊིལབྷཏི ཝིནྡཏི. ‘‘སམཱདྷིཡཏཱི’’ཏི ཨེཏྠ ན ཡོ ཀོཙི སམཱདྷི ཨདྷིཔྤེཏོ, ཨཐ ཁོ ཨནུཏྟརསམཱདྷཱིཏི དསྶེནྟོ ‘‘ཨརཧཏྟ ཕལསམཱདྷིནཱ སམཱདྷིཡཏཱི’’ཏི ཨཱཧ. ‘‘ཨཡཉྷཱི’’ཏིཨཱདི ཏསྶཱ དེསནཱཡ ཏཱདིསསྶ པུགྒལསྶ ཡཐཱཝུཏྟསམཱདྷིཔཊིལཱབྷསྶ ཀཱརཎབྷཱཝཝིབྷཱཝནཾ. ཏསྶ ཝིམུཏྟཱཡཏནབྷཱཝོ. ཨོསཀྐིཏུནྟི ནཡིཏུཾ. སམཱདྷིཡེཝ སམཱདྷིནིམིཏྟནྟི ཀམྨཊྛཱནཔཱལི༹ཨཱརུལ༹ྷོ སམཱདྷིཡེཝ པརཏོ ཨུཔྤཛྫནཀབྷཱཝནཱསམཱདྷིསྶ ཀཱརཎབྷཱཝཏོ སམཱདྷིནིམིཏྟཾ. ཏེནཱཧ ‘‘ཨཱཙརིཡསནྟིཀེ’’ཏིཨཱདི.

ཝིམུཏྟི ¶ ཝུཙྩཏི ཨརཧཏྟཾ སབྦསོ ཀིལེསེཧི པཊིཔྤསྶདྡྷིཝིམུཏྟཱིཏི ཀཏྭཱ. པརིཔཱཙེནྟཱིཏི སཱདྷེནྟི ནིཔྥཱདེནྟི. ཨནིཙྩཱནུཔསྶནཱཉཱཎེ ནིསྶཡཔཙྩཡབྷཱུཏེ ཨུཔྤནྣསཉྙཱ, ཏེན ཉཱཎེན སཧགཏཱཏི ཨཏྠོ. སེསེསུཔི ¶ ཨེསེཝ ནཡོ. ཡཾ པནེཏྠ ཝཏྟབྦཾ, ཏཾ ཝིསུདྡྷིམགྒསཾཝཎྞནཱཡཾ (ཝིསུདྡྷི. ཊཱི. ༡.༣༧, ༣༠༦) ཝུཏྟནཡེན ཝེདིཏབྦཾ.

པཉྩཀཝཎྞནཱ ནིཊྛིཏཱ.

ཚཀྐཝཎྞནཱ

༣༢༣. ཨཏྟཱནཾ ¶ ཨདྷི ཨཛ྄ཛྷཏྟཱ, ཨདྷི-སདྡོ སམཱསཝིསཡེ ཨདྷིཀཱརཏྠཾ, པཝཏྟིཨཏྠཉྩ གཧེཏྭཱ པཝཏྟཏཱིཏི ཨཏྟཱནཾ ཨདྷིཀིཙྩ ཨུདྡིསྶ པཝཏྟཱ ཨཛ྄ཛྷཏྟཱ; ཨཛ྄ཛྷཏྟེསུ བྷཝཱནི ཨཛ྄ཛྷཏྟིཀཱནཱིཏི ནིཡཀཛ྄ཛྷཏྟེསུཔི ཨབྦྷནྟརཱནི ཙཀྑཱདཱིནི ཝུཙྩནྟི, ཏཱནི པན ཡེན ཨཛ྄ཛྷཏྟབྷཱཝེན ‘‘ཨཛ྄ཛྷཏྟིཀཱནཱི’’ཏི ཝུཙྩནྟི, ཏམཏྠཾ པཱཀཊཾ ཀཏྭཱ དསྶེནྟོ ‘‘ཨཛ྄ཛྷཏྟིཀཱནཱི’’ཏི ཨཱཧ. སདྡཏྠཏོ པན ཨཛ྄ཛྷཏྟཛ྄ཛྷཏྟཱནིཡེཝ ཨཛ྄ཛྷཏྟཛ྄ཛྷཏྟིཀཱནི ཡཐཱ ‘‘ཝེནཡིཀོ’’ཏི (མ. ནི. ༡.༢༤༦; ཨ. ནི. ༨.༡༡; པཱརཱ. ༨) དཊྛབྦཾ. ཏཏོ ཨཛ྄ཛྷཏྟཏོཏི ཏཏོ ཨཛ྄ཛྷཏྟཛ྄ཛྷཏྟཏོ, ཡཱནི ཨཛ྄ཛྷཏྟིཀཱནི ཝུཏྟཱནི. ཨཛ྄ཛྷཏྟིཀཱནཉྷི པཊིཡོགཱིནི བཱཧིརཱནི ཨཛ྄ཛྷཏྟདྷམྨཱནཾ ཝིཡ བཧིདྡྷཱདྷམྨཱ. ‘‘ཨཛ྄ཛྷཏྟིཀཱནཱི’’ཏི ཧི སཔརསནྟཱནིཀཱནི ཙཀྑཱདཱིནི ཝུཙྩནྟི, ཏཐཱ རཱུཔཱདཱིནི ‘‘བཱཧིརཱནཱི’’ཏི. ཨཛ྄ཛྷཏྟཱནི པན སསནྟཱནིཀཱ ཨེཝ ཙཀྑུརཱུཔཱདཡོ, ཏཏོ ཨཉྙེཝ བཧིདྡྷཱཏི. ‘‘ཝིཉྙཱཎསམཱུཧཱ’’ཏི ཨེཏྠ ཡདིཔི ཏེསཾ ཝིཉྙཱཎཱནཾ སམོདྷཱནཾ ནཏྠི བྷིནྣཀཱལིཀཏྟཱ, ཙིཏྟེན པན ཨེཀཛ྄ཛྷཾ ཨབྷིསཾཡཱུཧནཝསེན སམཱུཧཏཱ ཝུཏྟཱ ཡཐཱ ‘‘ཝེདནཱཀྑནྡྷོ’’ཏི. ཙཀྑུཔསཱདནིསྶིཏནྟི ཙཀྑུཔསཱདཾ ནིསྶཱཡ པཙྩཡཾ ལབྷིཏྭཱ ཨུཔྤནྣཾ ཀུསལཱཀུསལཝིཔཱཀཝིཉྙཱཎཾ ཙཀྑུཝིཉྙཱཎཏཱསཱམཉྙེན ཨེཀཛ྄ཛྷཾ ཀཏྭཱ ཝུཏྟཾ. ཙཀྑུསནྣིསྶིཏོ སམྥསྶོ, ན ཙཀྑུདྭཱརིཀོ. ཨིམེ ¶ དས སམྥསྶེཏི ཨིམེ པསཱདཝཏྠུཀེ དས ཝིཔཱཀསམྥསྶེ ཋཔེཏྭཱ. ཨེཏེནེཝ ནཡེནཱཏི ཨེཏེན ཕསྶེ ཝུཏྟེནེཝ ནཡེན. ཏཎྷཱཚཀྐེ ཏཎྷཾ ཨཱརབྦྷ པཝཏྟཱཔི ཏཎྷཱ དྷམྨཏཎྷཱཏི ཝེདིཏབྦཱ.

ཨཔྤཊིསྶཡོཏི ཨཔྤཊིསྶཝོ, ཝ-ཀཱརསྶ ཡ-ཀཱརཾ ཀཏྭཱ ནིདྡེསོ. གརུནཱ ཀིསྨིཉྩི ཝུཏྟེ གཱརཝཝསེན པཊིསྶཝནཾ པཊིསྶཝོ, པཊིསྶཝབྷཱུཏཾ, ཏཾསབྷཱགཉྩ ཡཾ ཀིཉྩི གཱརཝཾ, ནཏྠི ཨེཏསྨིཾ པཊིསྶཝོཏི ཨཔྤཊིསྶཝོ, གཱརཝརཧིཏོ. ཏེནཱཧ ‘‘ཨནཱིཙཝུཏྟཱི’’ཏི. ཡཐཱ ཙེཏིཡཾ ཨུདྡིསྶ ཀཏཾ སཏྠུ ¶ ཀཏསདིསཾ, ཨེཝཾ ཙེཏིཡསྶ པུརཏོ ཀཏཾ སཏྠུ པུརཏོ ཀཏསདིསཾ ཨེཝཱཏི ཨཱཧ ‘‘པརིནིབྦུཏེ པནཱ’’ཏིཨཱདི. སཀྐཙྩཾ ན གཙྪཏཱིཏི ཨཱདརཾ གཱརཝཾ ཨུཔྤཱདེཏྭཱ ན ཨུཔསངྐམཏི. ཡཐཱ སིཀྑཱཡ ཨེཀདེསེ ཀོཔིཏེ, ཨགཱརཝེ ཙ ཀཏེ སབྦཱ སིཀྑཱ ཀུཔྤཏི, སབྦཏྠ ཙ ཨགཱརཝཾ ཀཏཾ ནཱམ ཧོཏི སམུདཱཡཏོ སཾཝརསམཱདཱནཾ ཨཝཡཝཏོ བྷེདོཏི. ཨེཝཾ ཨེཀབྷིཀྑུསྨིཾཔི…པེ… ཨགཱརཝོ ཀཏོཝ ཧོཏི. ཨནཱདརིཡམཏྟེནཔི སིཀྑཱཡ ཨཔརིཔཱུརིཡེཝཱཏི ཨཱཧ ‘‘ཨཔཱུརཡམཱནོཝ སིཀྑཱཡ ཨགཱརཝོ ནཱམཱ’’ཏི. ཨཔྤམཱདལཀྑཎཾ སམྨཱཔཊིཔཏྟི. དུཝིདྷནྟི དྷམྨཱམིསཝསེན དུཝིདྷཾ.

སོམནསྶཱུཔཝིཙཱརཱཏི ¶ སོམནསྶསཧགཏཱ ཝིཙཱརཱ ཨདྷིཔྤེཏཱ, ཨུཔསདྡོ ཙ ནིཔཱཏམཏྟནྟི ཨཱཧ ‘‘སོམནསྶསམྤཡུཏྟཱ ཝིཙཱརཱ’’ཏི. ཏཐཱ ཧིསྶ ཨབྷིདྷམྨེ (དྷ. ས. ༨) ‘‘ཙཱརོ ཝིཙཱརོ…པེ… ཨུཔཝིཙཱརོ’’ཏི ནིདྡེསོ པཝཏྟོ. སོམནསྶཀཱརཎབྷཱུཏནྟི སབྷཱཝཏོ, སངྐཔྤཏོཔི སོམནསྶསྶ ཨུཔྤཏྟིཡཱ པཙྩཡབྷཱུཏཾ. ཀཱམཾ པརིཏྟབྷཱུམཀཱ ཝིཏཀྐཝིཙཱརཱ ཨཉྙམཉྙམཝིཡོགིནོ ¶ , ཀིརིཡཱབྷེདཏོ པན པཋམཱབྷིནིཔཱཏཏཱཡ ཝིཏཀྐསྶ བྱཱཔཱརོ སཱཏིསཡོ. ཏཏོ པརཾ ཝིཙཱརསྶཱཏི ཏཾ སནྡྷཱཡ ‘‘ཝིཏཀྐེཏྭཱ’’ཏི པུབྦཀཱལཀིརིཡཱཝསེན ཝཏྭཱ ‘‘ཝིཙཱརེན པརིཙྪིནྡཏཱི’’ཏི ཝུཏྟཾ. ལདྡྷཔུབྦཱསེཝནསྶ ཝིཙཱརསྶ བྱཱཔཱརོ པཉྙཱ ཝིཡ ཧོཏི. ཏཐཱ ཧི ‘‘ཝིཙཱརོ ཝིཙིཀིཙྪཱཡ པཊིཔཀྑོ’’ཏི པེཊཀེ ཝུཏྟཾ. ‘‘དིཊྛིསཱམཉྙགཏོ’’ཏི ཨེཏྠ ཡཱཡ དིཊྛིཡཱ པུགྒལོ དིཊྛིསཱམཉྙཾ གཏོ ཝུཏྟོ, སཱ པཋམམགྒསམྨཱདིཊྛི ཀོསམྦཀསུཏྟེ ཨདྷིཔྤེཏོཏི ཨཱཧ ‘‘ཀོསམྦཀསུཏྟེ པཋམམགྒོ ཀཐིཏོ’’ཏི. ཨིདྷཱཏི ཨིམསྨིཾ སུཏྟེ. ཙཏཱུསུཔི མགྒེསུ སམྨཱདིཊྛི དིཊྛིགྒཧཎེན གཧིཏཱཏི ཨཱཧ ‘‘ཙཏྟཱརོཔི མགྒཱ ཀཐིཏཱ’’ཏི.

ཝིཝཱདམཱུལཚཀྐཝཎྞནཱ

༣༢༥. ཀོདྷནོཏི ཀུཛ྄ཛྷནསཱིལོ. ཡསྨཱ སོ ཨཔྤཧཱིནཀོདྷཏཱཡ ཝིགཏཀོདྷནོ ནཱམ ན ཧོཏི, ཏསྨཱ ‘‘ཀོདྷེན སམནྣཱགཏོ’’ཏི ཨཱཧ. ཨུཔནཱཧོ ཨེཏསྶ ཨཏྠི, ཨུཔནཡ྄ཧནསཱིལོཏི ཝཱ ཨུཔནཱཧཱི. ཝིཝཱདོ ནཱམ ཨུཔྤཛྫམཱནོ ཡེབྷུཡྻེན པཋམཾ དྭིནྣཾ ཝསེན ཨུཔྤཛྫཏཱིཏི ¶ ཝུཏྟཾ ‘‘དྭིནྣཾ བྷིཀྑཱུནཾ ཝིཝཱདོ’’ཏི. སོ པན ཡཐཱ བཧཱུནཾ ཨནཏྠཱཝཧོ ཧོཏི, ཏཾ ནིདསྶནམུཁེན དསྶེནྟོ ‘‘ཀཐ’’ནྟིཨཱདིམཱཧ. ཨབྦྷནྟརཔརིསཱཡཱཏི པརིསབྦྷནྟརེ.

པརགུཎམཀྑནཱཡ པཝཏྟོཔི ཨཏྟནོ ཀཱརཀཾ གཱུཐེན པཧརནྟཾ གཱུཐོ ཝིཡ པཋམཏརཾ མཀྑེཏཱིཏི མཀྑོ, སོ ཨེཏསྶ ཨཏྠཱིཏི མཀྑཱི. པལཱསཏཱིཏི པལཱསོ, པརསྶ གུཎེ ཌཾསིཏྭཱ ཝིཡ ཨཔནེཏཱིཏི ཨཏྠོ, སོ ཨེཏསྶ ཨཏྠཱིཏི པལཱསཱི. པལཱསཱི པུགྒལོ ཧི དུཏིཡསྶ དྷུརཾ ན དེཏི, སམཾ པསཱརེཏྭཱ ཏིཊྛཏི. ཏེནཱཧ ‘‘ཡུགགྒཱཧལཀྑཎེན པལཱསེན སམནྣཱགཏོ’’ཏི. ‘‘ཨིསྶུཀཱི’’ཏིཨཱདཱིནཾ པདཱནམཏྠོ ཧེཊྛཱ ཝུཏྟནཡཏྟཱ སུཝིཉྙེཡྻོཝ. ཀམྨཔཐཔྤཏྟཱཡ མིཙྪཱདིཊྛིཡཱ ཝསེནེཏྠ མིཙྪཱདིཊྛི ¶ ཝེདིཏབྦཱཏི ཨཱཧ ‘‘ནཏྠིཀཝཱདཱི ཨཧེཏུཀཝཱདཱི ཨཀིརིཡཝཱདཱི’’ཏི.

ནིསྶརཎིཡཚཀྐཝཎྞནཱ

༣༢༦. ཧཱཔེཏྭཱཏི ¶ ཀུསལཙིཏྟཾ པརིཧཱཔེཏྭཱ པཝཏྟིཏུམེཝ ཨཔྤདཱནཝསེན. ཨབྷཱུཏཾ བྱཱཀརཎཾ བྱཱཀརོཏི ‘‘མེཏྟཱ ཧི ཁོ མེ ཙེཏོཝིམུཏྟི བྷཱཝིཏཱ’’ཏིཨཱདིནཱ (ཨ. ནི. ༦.༡༣) ཨཏྟནི ཨཝིཛྫམཱནཾ གུཎབྱཱཧཱརཾ བྱཱཧརཏི. ཙེཏོཝིམུཏྟི-སདྡཾ ཨཔེཀྑིཏྭཱ ‘‘ནིསྶཊཱ’’ཏི ཝུཏྟཾ. པུན བྱཱཔཱདོ ནཏྠཱིཏི ཨིདཱནི མམ བྱཱཔཱདོ ནཱམ ནཏྠི སབྦསོ ནཏྠཱིཏི ཉཏྭཱ.

‘‘ཨནིམིཏྟཱ’’ཏི ཝཏྭཱ ཡེསཾ ནིམིཏྟཱནཾ ཨབྷཱཝེན ཨརཧཏྟཕལསམཱཔཏྟིཡཱ ཨནིམིཏྟཏཱ, ཏཾ དསྶེཏུཾ ‘‘སཱ ཧཱི’’ཏིཨཱདི ཝུཏྟཾ. ཏཏྠ རཱགསྶ ནིམིཏྟཾ, རཱགོ ཨེཝ ཝཱ ནིམིཏྟནྟི རཱགནིམིཏྟཾ. ཨཱདི-སདྡེན དོསནིམིཏྟཱདཱིནཾ སངྒཧོ དཊྛབྦོ. རཱུཔཝེདནཱདིསངྑཱརནིམིཏྟཾ རཱུཔནིམིཏྟཱདི. ཏེསཉྙེཝ ནིཙྩཱདིཝསེན ཨུཔཊྛཱནཾ ནིཙྩནིམིཏྟཱདི. ཏཡིདཾ ནིམིཏྟཾ ཡསྨཱ སབྦེན སབྦཾ ཨརཧཏྟཕལེ ནཏྠི, ཏསྨཱ ཝུཏྟཾ ‘‘སཱ ཧི…པེ… ཨནིམིཏྟཱཏི ཝུཏྟཱ’’ཏི. ནིམིཏྟཾ ཨནུསརཏཱིཏི ཏཾ ནིམིཏྟཾ ཨནུགཙྪཏི ཨཱརབྦྷ པཝཏྟཏི.

ཨསྨིམཱནོཏི ‘‘ཨསྨཱི’’ཏི པཝཏྟོ ཨཏྟཝིསཡོ མཱནོ. ཨཡཾ ནཱམ ཨཧཾ ཨསྨཱིཏི རཱུཔལཀྑཎོ, ཝེདནཱདཱིསུ ཝཱ ཨཉྙཏརལཀྑཎོ ཨཡཾ ནཱམ ཨཏྟཱ ¶ ཨཧཾ ཨསྨི. ‘‘ཨསྨཱི’’ཏི མཱནོ སམུགྒྷཱཊཱིཡཏི ཨེཏེནཱཏི ཨསྨིམཱནསམུགྒྷཱཏོ, ཨརཧཏྟམགྒོ. པུན ཨསྨིམཱནོ ནཏྠཱིཏི ཏསྶ ཨནུཔྤཏྟིདྷམྨཏཱཔཱདནཾ ཀིཏྟེནྟོ སམུགྒྷཱཏཏྟམེཝ ཝིབྷཱཝེཏི.

ཨནུཏྟརིཡཱདིཚཀྐཝཎྞནཱ

༣༢༧. ནཏྠི ཨེཏེསཾ ཨུཏྟརཱནི ཝིསིཊྛཱནཱིཏི ཨནུཏྟརཱནི, ཨནུཏྟརཱནི ཨེཝ ཨནུཏྟརིཡཱནི ཡཐཱ ཨནནྟམེཝ ཨཱནནྟརིཡནྟི ཨཱཧ ‘‘ཨནུཏྟརིཡཱནཱིཏི ཨནུཏྟརཱནཱི’’ཏི. དསྶནཱནུཏྟརིཡཾ ནཱམ ཨནུཏྟརཕལཝིསེསཱཝཧཏྟཱ. ཨེས ནཡོ སེསེསུཔི. སཏྟཝིདྷཨརིཡདྷནལཱབྷོཏི སཏྟཝིདྷསདྡྷཱདིལོཀུཏྟརདྷནལཱབྷོ. སིཀྑཏྟཡཔཱུརཎནྟི ¶ ཨདྷིསཱིལསིཀྑཱདཱིནཾ ཏིསྶནྣཾ སིཀྑཱནཾ པརིཔཱུརཎཾ. ཏཏྠ པརིཔཱུརཎཾ ནིཔྤརིཡཱཡཏོ ཨསེཀྑཱནཾ ཝསེན ཝེདིཏབྦཾ. ཀལྱཱཎཔུཐུཛྫནཏོ པཊྛཱཡ ཧི སཏྟ སེཀྑཱ ཏིསྶོ སིཀྑཱ པཱུརེནྟི ནཱམ, ཨརཧཱ པན པརིཔུཎྞསིཀྑོཏི. ཨིཏི ཨིམཱནི ཨནུཏྟརིཡཱནི ལོཀིཡལོཀུཏྟརཱནི ཀཐིཏཱནི.

ཨནུསྶཏིཡོ ¶ ཨེཝ དིཊྛདྷམྨིཀསམྤརཱཡིཀཱདིཧིཏསུཁཱནཾ ཀཱརཎབྷཱཝཏོ ཋཱནཱནཱིཏི ཨནུསྶཏིཊྛཱནཱནི. ཨེཝཾ ཨནུསྶརཏོཏི ཡཐཱ བུདྡྷཱནུསྶཏི ཝིསེསཱདྷིགམསྶ ཋཱནཾ ཧོཏི, ཨེཝཾ ‘‘ཨིཏིཔི སོ བྷགཝཱ’’ཏིཨཱདིནཱ (དཱི. ནི. ༡.༡༥༧, ༢༥༥) བུདྡྷགུཎེ ཨནུསྶརནྟསྶ. ཨུཔཙཱརཀམྨཊྛཱནནྟི པཙྩཀྑཏོ ཨུཔཙཱརཛ྄ཛྷཱནཱཝཧཾ ཀམྨཊྛཱནཾ, པརམྤརཱཡ པན ཡཱཝ ཨརཧཏྟཱ ལོཀིཡལོཀུཏྟརཝིསེསཱཝཧཾ.

སཏཏཝིཧཱརཚཀྐཝཎྞནཱ

༣༢༨. ནིཙྩཝིཧཱརཱཏི སབྦདཱ པཝཏྟནཀཝིཧཱརཱ. ཋཔེཏྭཱ ཧི སམཱཔཏྟིཝེལཾ, བྷཝངྒཝེལཉྩ ཁཱིཎཱསཝཱ ཨིམིནཱཝ ཚལ༹ངྒུཔེཀྑཱཝིཧཱརེན སབྦཀཱལཾ ཝིཧརནྟི. ཙཀྑུནཱ རཱུཔཾ དིསྭཱཏི ནིསྶཡཝོཧཱརེན ཝུཏྟཾ. སསམྦྷཱརཀཐཱ ཧེསཱ ཡཐཱ ‘‘དྷནུནཱ ཝིཛ྄ཛྷཏཱི’’ཏི. ཏསྨཱ ནིསྶཡསཱིསེན ནིསྶིཏསྶ གཧཎཾ དཊྛབྦནྟི ཨཱཧ ‘‘ཙཀྑུཝིཉྙཱཎེན དིསྭཱ’’ཏི. ཨིཊྛེ ཨརཛྫནྟོཏི ཨིཊྛེ ཨཱརམྨཎེ རཱགཾ ཨནུཔྤཱདེནྟོ མགྒེན སམུཙྪིནྣཏྟཱ. ནེཝ སུམནོ ཧོཏི གེཧསིཏཔེམཝསེནཔི. ན དུམྨནོ པསཱདཉྙཐཏྟཝསེནཔི. ཨསམཔེཀྑནེཏི ཨིཊྛེཔི ཨནིཊྛེཔི མཛ྄ཛྷཏྟེཔི ཨཱརམྨཎེ ན སམཾ ¶ ན སམྨཱ ཨཡོནིསོ གཧཎེ. ཡོ ཨཁཱིཎཱསཝཱནཾ མོཧོ ཨུཔྤཛྫཏི, ཏཾ ཨནུཔྤཱདེནྟོ མགྒེནེཝ ཏསྶ སམུགྒྷཱཊིཏཏྟཱ. ཉཱཎུཔེཀྑཱཝསེནེཝ ཨུཔེཀྑཀོ ཝིཧརཏི མཛ྄ཛྷཏྟོ. ཨཡཉྩསྶ པཊིཔཏྟིཝེཔུལླཔྤཏྟིཡཱ ¶ , པཉྙཱཝེཔུལླཔྤཏྟིཡཱ ཝཱཏི ཨཱཧ ‘‘སཏིཡཱ’’ཏིཨཱདི. ཚལ༹ངྒུཔེཀྑཱཏི ཚསུ དྭཱརེསུ པཝཏྟཱ སཏིསམྤཛཉྙསྶ ཝསེན ཚཱཝཡཝཱ ཨུཔེཀྑཱ. ཉཱཎསམྤཡུཏྟཙིཏྟཱནི ལབྦྷནྟི ཏེཧི ཝིནཱ སམྤཛཱནཏཱཡ ཨསམྦྷཝཏོ. མཧཱཙིཏྟཱནཱིཏི ཨཊྛཔི མཧཱཀིརིཡཙིཏྟཱནི ལབྦྷནྟི. སཏཏཝིཧཱརཱཏི ཉཱཎུཔྤཏྟིཔཙྩཡརཧིཏཀཱལེཔི པཝཏྟིབྷེདནཏོ. དས ཙིཏྟཱནཱིཏི ཨཊྛ མཧཱཀིརིཡཙིཏྟཱནི ཧསིཏུཔྤཱདཝོཊྛབྦནཙིཏྟེཧི སདྡྷིཾ དས ཙིཏྟཱནི ལབྦྷནྟི. ཨརཛྫནཱདུསྶནཝསེན པཝཏྟི ཏེསམྤི སཱདྷཱརཎཱཏི.‘‘ཨུཔེཀྑཀོ ཝིཧརཏཱི’’ཏི ཝཙནཏོ ཚལ༹ངྒུཔེཀྑཱཝསེན ཨཱགཏཱནཾ ཨིམེསཾ སཏཏཝིཧཱརཱནཾ ‘‘སོམནསྶཾ ཀཐཾ ལབྦྷཏཱི’’ཏི ཙོདེཏྭཱ ‘‘ཨཱསེཝནཏོ ལབྦྷཏཱི’’ཏི སཡམེཝ པརིཧརཏཱིཏི. ཀིཉྩཱཔི ཁཱིཎཱསཝོ ཨིཊྛཱནིཊྛེཔི ཨཱརམྨཎེ མཛ྄ཛྷཏྟེ ཝིཡ བཧུལཾ ཨུཔེཀྑཀོ ཝིཧརཏི ཨཏྟནོ པརིསུདྡྷཔཀཏིབྷཱཝཱཝིཛཧནཏོ, ཀདཱཙི པན ཏཐཱ ཙེཏོབྷིསངྑཱརཱབྷཱཝེ ཡཾ ཏཾ སབྷཱཝཏོ ཨིཊྛཾ ཨཱརམྨཎཾ, ཏཏྠ ཡཱཐཱཝསབྷཱཝགྒཧཎཝསེནཔི ཨརཧཏོ ཙིཏྟཾ སོམནསྶསཧགཏཾ ཧུཏྭཱ པཝཏྟཏེཝ, ཏཉྩ ཁོ པུབྦཱསེཝནཝསེན. ཏེནཱཧ ‘‘ཨཱསེཝནཏོ ལབྦྷཏཱི’’ཏི.

ཨབྷིཛཱཏིཚཀྐཝཎྞནཱ

༣༢༩. ‘‘ཨབྷིཛཱཏིཡོ’’ཏི ¶ ཨེཏྠ ཨབྷི-སདྡོ ཨུཔསགྒམཏྟཾ, ན ཨཏྠཝིསེསཛོཏཀོཏི ཨཱཧ ‘‘ཛཱཏིཡོ’’ཏི. ཨབྷིཛཱཡཏཱིཏི ཨེཏྠཱཔི ཨེསེཝ ནཡོ. ཛཱཡཏཱིཏི ཙ ཨནྟོགདྷཧེཏུཨཏྠཔདཾ, ཨུཔྤཱདེཏཱིཏི ཨཏྠོ. ཛཱཏིཡཱ, ཏཾནིབྦཏྟཀཀམྨཱནཉྩ ཀཎྷསུཀྐཔརིཡཱཡཏཱཡ ཡཾ ཝཏྟབྦཾ, ཏཾ ཧེཊྛཱ ཝུཏྟམེཝ. པཊིཔྤསྶམྦྷནཝསེན ཀིལེསཱནཾ ནིབྦཱཔནཏོ ནིབྦཱནཾ སཙེ ཀཎྷཾ བྷཝེཡྻ ཡཐཱ ཏཾ དསཝིདྷཾ དུསྶཱིལྱཀམྨཾ. སཙེ སུཀྐཾ བྷཝེཡྻ ཡཐཱ ཏཾ དཱནསཱིལཱདིཀུསལཀམྨཾ. དྭིནྣམྤི ཀཎྷསུཀྐཝིཔཱཀཱནཾ. ཨརཧཏྟཾ ཨདྷིཔྤེཏཾ ‘‘ཨབྷིཛཱཡཏཱི’’ཏི ཝཙནཏོ. ཏཾ ཀིལེསནིབྦཱནནྟེ ཛཱཏཏྟཱ ནིབྦཱནཾ ཡཐཱ རཱགཱདཱིནཾ ¶ ཁཡནྟེ ཛཱཏཏྟཱ རཱགཀྑཡོ དོསཀྑཡོ མོཧཀྑཡོཏི.

ནིབྦེདྷབྷཱགིཡཚཀྐཝཎྞནཱ

ནིབྦེདྷོ ¶ ཝུཙྩཏི ནིབྦཱནཾ མགྒཉཱཎེན ནིབྦིཛ྄ཛྷིཏབྦཊྛེན, པཊིཝིཛ྄ཛྷིཏབྦཊྛེནཱཏི ཨཏྠོ. ནིརོདྷཱནུཔསྶནཱཉཱཎེཏི ནིརོདྷཱནུཔསྶནཱཉཱཎེ ནིསྶཡཔཙྩཡབྷཱུཏེ ཨུཔྤནྣཱ སཉྙཱ, ཏེན སཧགཏཱཏི ཨཏྠོ.

ཚཀྐཝཎྞནཱ ནིཊྛིཏཱ.

སཏྟཀཝཎྞནཱ

༣༣༠. སམྤཏྟིཔཊིལཱབྷཊྛེནཱཏི སཱིལསམྤཏྟིཨཱདཱིནཾ སམྨཱསམྦོདྷིཔརིཡོསཱནཱནཾ སམྤཏྟཱིནཾ པཊིལཱབྷཱཔནཊྛེན, སམྤཏྟཱིནཾ ཝཱ པཊིལཱབྷོ སམྤཏྟིཔཊིལཱབྷོ, ཏསྶ ཀཱརཎཾ སམྤཏྟིཔཊིལཱབྷཊྛོ, ཏེན སམྤཏྟིཔཊིལཱབྷཊྛེན. ཏེནེཝཱཧ ‘‘སམྤཏྟཱིནཾ པཊིལཱབྷཀཱརཎཏོ’’ཏི. སདྡྷཱཝ ཨུབྷཡཧིཏཏྠིཀེཧི དྷནཱཡིཏབྦཊྛེན དྷནཾ སདྡྷཱདྷནཾ. ཨེཏྠཱཏི ཨེཏེསུ དྷནེསུ. སབྦསེཊྛཾ སབྦེསཾ པཊིལཱབྷཀཱརཎབྷཱཝཏོ, ཏེསཉྩ སཾཀིལེསཝིསོདྷནེན མཧཱཛུཏིཀམཧཱཝིཔྥཱརབྷཱཝཱཔཱདནཏོ. ཏེནཱཧ ‘‘པཉྙཱཡ ཧཱི’’ཏིཨཱདི. ཏཏྠ པཉྙཱཡ ཋཏྭཱཏི ཀམྨསྶཀཏཱཔཉྙཱཡ པཏིཊྛཱཡ སུཙརིཏཱདཱིནི ¶ པཱུརེཏྭཱ སགྒཱུཔགཱ ཧོནྟི. ཏཏྠ ཙེཝ པཱརམིཏཱ པཉྙཱཡ ཙ ཋཏྭཱ སཱཝཀཔཱརམིཉཱཎཱདཱིནི པཊིཝིཛ྄ཛྷནྟི.

སམཱདྷིཾ པརིཀྑརོནྟི ཨབྷིསངྑརོནྟཱིཏི སམཱདྷིཔརིཀྑཱརཱ, སམཱདྷིསྶ སམྦྷཱརབྷཱུཏཱ སམྨཱདིཊྛིཨཱདཡོ. ཨིདྷ པན སཧཀཱརཱིཀཱརཎབྷཱུཏཱ ཨདྷིཔྤེཏཱཏི ཨཱཧ ‘‘སམཱདྷིཔརིཝཱརཱ’’ཏི.

ཨསཏཾ ཨསཱདྷཱུནཾ དྷམྨཱ ཏེསཾ ཨསཱདྷུབྷཱཝསཱདྷནཏོ. ཨསནྟཱཏི ཨསུནྡརཱ གཱརཡ྄ཧཱ. ཏེནཱཧ ‘‘ལཱམཀཱ’’ཏི. ‘‘ཝིཔསྶཀསྶེཝ ཀཐིཏཱ’’ཏི ཝཏྭཱ ཏསྶ ཝིཔསྶནཱནིབྦཏྟིཾ དསྶེཏུཾ ‘‘ཏེསུཔཱི’’ཏིཨཱདི ཝུཏྟཾ. ཙཏུནྣམྤི ཧི སཙྩཱནཾ ཝིསེསེན དསྶནཏོ མགྒཔཉྙཱ སཱཏིསཡཾ ‘‘ཝིཔསྶནཱ’’ཏི ཝཏྟབྦཱ, ཏཾསམངྒཱི ཙ ཨརིཡོ ཝིཔསྶནཀོཏི.

སཔྤུརིསཱནཾ དྷམྨཱཏི སཔྤུརིསཱནཾཡེཝ དྷམྨཱ, ན ཨསཔྤུརིསཱནཾ. དྷམྨཱནུདྷམྨཔཊིཔཏྟིཡཱ ཨེཝ ཧི དྷམྨཉྙུཨཱདིབྷཱཝོ ¶ , ན པཱལི༹དྷམྨཔཋནཱདིམཏྟེན. བྷཱསིཏསྶཱཏི སུཏྟགེཡྻཱདིབྷཱསིཏསྶ ཙེཝ ཏདཉྙསྶ ཙ ཨཏྟཏྠཔརཏྠབོདྷཀསྶ པདསྶ. ཨཏྠཀུསལཏཱཝསེན ཨཏྠཾ ཛཱནཱཏཱིཏི ཨཏྠཉྙཱུ ¶ . ཨཏྟཱནཾ ཛཱནཱཏཱིཏི ཡཱཐཱཝཏོ ཨཏྟནོ པམཱཎཛཱནནཝསེན ཨཏྟཱནཾ ཛཱནཱཏི. པཊིགྒཧཎཔརིབྷོགམཏྟཉྙུཏཱཧི ཨེཝ པརིཡེསནཝིསྶཛྫནམཏྟཉྙུཏཱཔི བོདྷིཏཱ ཧོནྟཱིཏི ‘‘པཊིགྒཧཎཔརིབྷོགེསུ’’ ཨིཙྩེཝ ཝུཏྟཾ. ཨེཝཉྷི ཏཱ ཨནཝཛྫཱ ཧོནྟཱིཏི. ཡོགསྶ ཨདྷིགམཱཡཱཏི བྷཱཝནཱཡ ཨནུཡུཉྫནསྶ. ཨཏིསམྦཱདྷནྟི ཨཏིཁུདྡཀཾ ཨཏིཀྑཔཉྙསྶ ཏཱཝཏཱ ཀཱལེན ཏཱིརེཏུཾ ཨསཀྐུཎེཡྻཏྟཱ. ཨཊྛཝིདྷཾ པརིསནྟི ཁཏྟིཡཔརིསཱདིཀཾ ཨཊྛཝིདྷཾ པརིསཾ. བྷིཀྑུཔརིསཱདིཀཾ ཙཏུབྦིདྷཾ ཁཏྟིཡཔརིསཱདིཀཾ མནུསྶཔརིསཾཡེཝ པུན ཙཏུབྦིདྷཾ གཧེཏྭཱ ཨཊྛཝིདྷཾ ཝདནྟི ཨཔརེ. ‘‘ཨིམཾ མེ སེཝནྟསྶ ཨཀུསལཱ དྷམྨཱ པརིཧཱཡནྟི, ཀུསལཱ དྷམྨཱ ཨབྷིཝཌྜྷནྟི, ཏསྨཱ སེཝིཏབྦོ, ཝིཔརིཡཱཡཏོ ཏདཉྙོ ཨསེཝིཏབྦོ’’ཏི ཨེཝཾ སེཝིཏབྦཱསེཝིཏབྦཾ པུགྒལཾ ཛཱནཱཏཱིཏི པུགྒལཉྙཱུ. ཨེཝཾ ཏེསཾ པུགྒལཱནམྤི བོདྷནཾ ཨུཀྐཊྛཾ, ནིཧཱིནཾ ཝཱ ཛཱནཱཏི ནཱམ.

༣༣༡. ‘‘ནིདྡསཝཏྠཱུནཱི’’ཏི. ‘‘ཨཱདི-སདྡལོཔེནཱཡཾ ནིདྡེསོ’’ཏི ཨཱཧ ‘‘ནིདྡསཱདིཝཏྠཱུནཱི’’ཏི. ནཏྠི དཱནི ཨིམསྶ དསཱཏི ནིདྡསོ. པཉྷོཏི ཉཱཏུཾ ཨིཙྪིཏོ ཨཏྠོ. པུན དསཝསྶོ ན ཧོཏཱིཏི ཏེསཾ མཏིམཏྟནྟི དསྶེཏུཾ ‘‘སོ ཀིརཱ’’ཏི ཀིརསདྡགྒཧཎཾ. ‘‘ནིདྡསོ’’ཏི ཙེཏཾ དེསནཱམཏྟཾ, ཏསྶ ནིབྦཱིསཱདིབྷཱཝསྶ ཝིཡ ནིནྣཝཱདིབྷཱཝསྶ ཙ ཨིཙྪིཏཏྟཱཏི ¶ དསྶེཏུཾ ‘‘ན ཀེཝལཉྩཱ’’ཏིཨཱདི ཝུཏྟཾ. གཱམེ ཝིཙརནྟོཏི གཱམེ པིཎྜཱཡ ཝིཙརནྟོ.

ན ཨིདཾ ཏིཏྠིཡཱནཾ ཨདྷིཝཙནཾ ཏེསུ ཏནྣིམིཏྟསྶ ཨབྷཱཝཱ. སཱསནེཔི སེཀྑསྶཱཔི ན ཨིདཾ ཨདྷིཝཙནཾ, ཀིམངྒཾ པན པུཐུཛྫནསྶ. ཡསྶ པནེཏཾ ཨདྷིཝཙནཾ, ཡེན ཙ ཀཱརཎེན, ཏཾ དསྶེཏུཾ ¶ ‘‘ཁཱིཎཱསཝསྶེཏ’’ནྟིཨཱདི ཝུཏྟཾ. ཨཔྤཊིསནྡྷིཀབྷཱཝོ ཧིསྶ པཙྩཀྑཏོ ཀཱརཎཾ. པརམྤརཱཡ ཨིཏརཱནི, ཡཱནི པཱལི༹ཡཾ ཨཱགཏཱནི.

སིཀྑཱཡ སམྨདེཝ ཨཱདཱནཾ སིཀྑཱསམཱདཱནཾ, ཏཾ པནསྶཱ པཱརིཔཱུརིཡཱ ཝེདིཏབྦནྟི ཨཱཧ ‘‘སིཀྑཏྟཡཔཱུརཎེ’’ཏི. སིཀྑཱཡ ཝཱ སམྨདེཝ ཨཱདིཏོ པཊྛཱཡ རཀྑཎཾ སིཀྑཱསམཱདཱནཾ, ཏཉྩ ཨཏྠཏོ པཱུརཎེ པརིཙྪིནྣཾ ཨརཀྑཎེ སབྦེན སབྦཾ ཨབྷཱཝཏོ, རཀྑཎེ ཙ པརིཔཱུརཎཏོ. བཧལཙྪནྡོཏི དལ༹ྷཙྪནྡོ. ཨཱཡཏིནྟི ཨནནྟརཱནཱགཏདིཝསཱདིཀཱལོ ཨདྷིཔྤེཏོ ¶ , ན ཨནཱགཏབྷཝོཏི ཨཱཧ ‘‘ཨནཱགཏེ པུནདིཝསཱདཱིསུཔཱི’’ཏི. སིཀྑཾ པརིཔཱུརེནྟསྶ ཏཏྠ ནིཝིཊྛཨཏྠིཏཱ ཨཝིགཏཔེམཏཱ, ཏེབྷཱུམཀདྷམྨཱནཾ ཨནིཙྩཱདིཝསེན སམྨདེཝ ནིཛ྄ཛྷཱནཾ དྷམྨནིསཱམནཱཏི ཨཱཧ ‘‘ཝིཔསྶནཱཡེཏཾ ཨདྷིཝཙན’’ནྟི. ཏཎྷཱཝིནཡནེཏི ཝིརཱགཱནུཔསྶནཱདིཝིཔསྶནཱཉཱཎཱནུབྷཱཝསིདྡྷེ ཏཎྷཱཝིཀྑམྦྷནེ. ཨེཀཱིབྷཱཝེཏི གཎསངྒཎིཀཱཀིལེསསངྒཎིཀཱཝིགམསིདྡྷེ ཝིཝེཀབྷཱཝེ. ཝཱིརིཡཱརམྦྷེཏི སམྨཔྤདྷཱནཝཱིརིཡསྶ པགྒཎྷནེ, ཏཾ པན སབྦསོ ཝཱིརིཡསྶ པརིབྲཱུཧནཾ ཧོཏཱིཏི ཨཱཧ ‘‘ཀཱཡིཀཙེཏསིཀསྶ ཝཱིརིཡསྶ པཱུརཎེ’’ཏི. སཏིཡཉྩེཝ ནེཔཀྐབྷཱཝེ ཙཱཏི སཏོཀཱརིཏཱཡ ཙེཝ སམྤཛཱནཀཱརིཏཱཡ ཙ. སཏིསམྤཛཉྙབལེནེཝ ཝཱིརིཡཱརམྦྷོ ཨིཛ྄ཛྷཏི. དིཊྛིཔཊིཝེདྷེཏི སམྨཱདིཊྛིཡཱ པཊིཝིཛ྄ཛྷནེ. ཏེནཱཧ ‘‘མགྒདསྶནེ’’ཏི. སཙྩསམྤཊིཝེདྷེ ཧི ཨིཛ྄ཛྷམཱནེ མགྒསམྨཱདིཊྛི སིདྡྷཱ ཨེཝ ཧོཏི.

ཨསུབྷཱནུཔསྶནཱཉཱཎེཏི དསཝིདྷསྶ, ཨེཀཱདསཝིདྷསྶཱཔི ཝཱ ཨསུབྷསྶ ཨནུཔསྶནཱཝསེན པཝཏྟཉཱཎེ. ཨིདཉྷི དུཀྑཱནུཔསྶནཱཡ ¶ པརིཙཡཉཱཎཾ. ཨཱདཱིནཝཱནུཔསྶནཱཉཱཎེཏི སངྑཱརཱནཾ ཨནིཙྩདུཀྑཝིཔརིཎཱམཏཱསཾསཱུཙིཏསྶ ཨཱདཱིནཝསྶ ཨནུཔསྶནཱཝསེན པཝཏྟཉཱཎེ. ཨཔྤཧཱིནཊྛེནཱཏི མགྒེན ཨསམུཙྪིནྣབྷཱཝེན. ཨནུསེནྟཱིཏི སནྟཱནེ ཨནུ ཨནུ སཡནྟི. ཀཱརཎལཱབྷེ ཧི སཏི ཨུཔྤནྣཱརཧཱ ཀིལེསཱ སནྟཱནེ ཨནུ ཨནུ སཡིཏཱ ཝིཡ ཧོནྟི, ཏསྨཱ ཏེ ཏདཝཏྠཱ ‘‘ཨནུསཡཱ’’ཏི ཝུཙྩནྟི. ཐཱམགཏོཏི ཐཱམཔྤཏྟོ. ཐཱམགམནཉྩ ཨཉྙེཧི ཨསཱདྷཱརཎོ ཀཱམརཱགཱདཱིནམེཝ ཨཱཝེཎིཀོ སབྷཱཝོ དཊྛབྦོ. ཏཐཱ ཧི ཝུཏྟཾ ཨབྷིདྷམྨེ ‘‘ཐཱམགཏཱནུསཡཾ པཛཧཏཱི’’ཏི. ཀཱམརཱགོ ཨེཝ ཨནུསཡོ ཀཱམརཱགཱནུསཡོ. ཡེ པན ‘‘ཀཱམརཱགསྶ ¶ ཨནུསཡོ ཀཱམརཱགཱནུསཡོ’’ཏི ཝདནྟི, ཏཾ ཏེསཾ མཏིམཏྟཾ. ན ཧི ཀཱམརཱགཝིནིམུཏྟོ ཀཱམརཱགཱནུསཡོ ནཱམ ཀོཙི ཨཏྠི. ཡདི ‘‘ཏསྶ བཱིཛ’’ནྟི ཝདེཡྻུཾ, ཏམྤི ཏབྦིནིམུཏྟཾ པརམཏྠཏོ ན ཨུཔལབྦྷཏེཝཱཏི. ཨེསེཝ ནཡོ སེསེསུཔི.