📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

དཱིགྷནིཀཱཡེ

སཱིལཀྑནྡྷཝགྒཨབྷིནཝཊཱིཀཱ

གནྠཱརམྦྷཀཐཱ

ཡོ ¶ ¶ དེསེཏྭཱན སདྡྷམྨཾ, གམྦྷཱིརཾ དུདྡསཾ ཝརཾ;

དཱིགྷདསྶཱི ཙིརཾ ཀཱལཾ, པཏིཊྛཱཔེསི སཱསནཾ.༡.

ཝིནེཡྻཛ྄ཛྷཱསཡེ ཚེཀཾ, མཧཱམཏིཾ མཧཱདཡཾ;

ནཏྭཱན ཏཾ སསདྡྷམྨགཎཾ གཱརཝབྷཱཛནཾ.༢.

སངྒཱིཏིཏྟཡམཱརུལ༹ྷཱ, དཱིགྷཱགམཝརསྶ ཡཱ;

སཾཝཎྞནཱ ཡཱ ཙ ཏསྶཱ, ཝཎྞནཱ སཱདྷུཝཎྞིཏཱ. ༣.

ཨཱཙརིཡདྷམྨཔཱལ- ¶ ཏྠེརེནེཝཱབྷིསངྑཏཱ;

སམྨཱ ནིཔུཎགམྦྷཱིར-དུདྡསཏྠཔྤཀཱསནཱ.༤.

ཀཱམཉྩ སཱ ཏཐཱབྷཱུཏཱ, པརམྤརཱབྷཏཱ པན;

པཱཋཏོ ཨཏྠཏོ ཙཱཔི, བཧུཔྤམཱདལེཁནཱ.༥.

སངྑེཔཏྟཱ ཙ སོཏཱུཧི, སམྨཱ ཉཱཏུཾ སུདུཀྐརཱ;

ཏསྨཱ སབྲཧྨཙཱརཱིནཾ, ཡཱཙནཾ སམནུསྶརཾ.༦.

ཡོ’ནེཀསེཏནཱགིནྡོ, རཱཛཱ ནཱནཱརཊྛིསྶརོ;

སཱསནསོདྷནེ དལ༹ྷཾ, སདཱ ཨུསྶཱཧམཱནསོ.༧.

ཏཾ ནིསྶཱཡ ‘‘མམེསོཔི, སཏྠུསཱསནཛོཏནེ;

ཨཔྤེཝ ནཱམུཔཏྠམྦྷོ, བྷཝེཡྻཱ’’ཏི ཝིཙིནྟཡཾ.༨.

ཝཎྞནཾ ¶ ཨཱརབྷིསྶཱམི, སཱདྷིཔྤཱཡམཧཱཔཡཾ;

ཨཏྠཾ ཏམུཔནིསྶཱཡ, ཨཉྙཉྩཱཔི ཡཐཱརཧཾ.༩.

ཙཀྐཱབྷིཝུཌྜྷིཀཱམཱནཾ, དྷཱིརཱནཾ ཙིཏྟཏོསནཾ;

སཱདྷུཝིལཱསིནིཾ ནཱམ, ཏཾ སུཎཱཐ སམཱཧིཏཱཏི. ༡༠.

གནྠཱརམྦྷཀཐཱཝཎྞནཱ

ནཱནཱནཡནིཔུཎགམྦྷཱིརཝིཙིཏྲསིཀྑཏྟཡསངྒཧསྶ བུདྡྷཱནུབུདྡྷསཾཝཎྞིཏསྶ སདྡྷཱཝཧགུཎསམྤནྣསྶ དཱིགྷཱགམཝརསྶ གམྦྷཱིརདུརནུབོདྷཏྠདཱིཔཀཾ སཾཝཎྞནམིམཾ ཀརོནྟོ སཀསམཡསམཡནྟརགཧནཛ྄ཛྷོགཱཧནསམཏྠོ མཧཱཝེཡྻཱཀརཎོཡམཱཙརིཡོ སཾཝཎྞནཱརམྦྷེ རཏནཏྟཡཔཎཱམཔཡོཛནཱདིཝིདྷཱནཱནི ཀརོནྟོ པཋམཾ ཏཱཝ རཏནཏྟཡཔཎཱམཾ ཀཱཏུཾ ‘‘ཀརུཎཱསཱིཏལཧདཡ’’ནྟིཨཱདིམཱཧ. ཨེཏྠ ཙ སཾཝཎྞནཱརམྦྷེ རཏནཏྟཡཔཎཱམཀརཎཔྤཡོཛནཾ ཏཏྠ ཏཏྠ བཧུདྷཱ པཔཉྩེནྟི ཨཱཙརིཡཱ. ཏཐཱ ཧི ཝཎྞཡནྟི –

‘‘སཾཝཎྞནཱརམྦྷེ ¶ སཏྠརི པཎཱམཀརཎཾ དྷམྨསྶ སྭཱཀྑཱཏབྷཱཝེན སཏྠརི པསཱདཛནནཏྠཾ, སཏྠུ ཙ ཨཝིཏཐདེསནབྷཱཝཔྤཀཱསནེན དྷམྨེ པསཱདཛནནཏྠཾ. ཏདུབྷཡཔྤསཱདཱ ཧི མཧཏོ ཨཏྠསྶ སིདྡྷི ཧོཏཱི’’ཏི (དྷ. ས. ཊཱི. ༡-༡).

ཨཐ ཝཱ ‘‘རཏནཏྟཡཔཎཱམཝཙནཾ ཨཏྟནོ རཏནཏྟཡཔྤསཱདསྶ ཝིཉྙཱཔནཏྠཾ, ཏཾ པན ཝིཉྙཱུནཾ ཙིཏྟཱརཱདྷནཏྠཾ, ཏཾ ཨཊྛཀཐཱཡ གཱཧཎཏྠཾ, ཏཾ སབྦསམྤཏྟིནིཔྥཱདནཏྠ’’ནྟི. ཨཐ ཝཱ ‘‘སཾཝཎྞནཱརམྦྷེ རཏནཏྟཡཝནྡནཱ སཾཝཎྞེཏབྦསྶ དྷམྨསྶ པབྷཝནིསྶཡཝིསུདྡྷིཔཊིཝེདནཏྠཾ, ཏཾ པན དྷམྨསཾཝཎྞནཱསུ ཝིཉྙཱུནཾ བཧུམཱནུཔྤཱདནཏྠཾ, ཏཾ སམྨདེཝ ཏེསཾ ཨུགྒཧཎདྷཱརཎཱདིཀྐམལདྡྷབྦཱཡ སམྨཱཔཊིཔཏྟིཡཱ སབྦཧིཏསུཁནིཔྥཱདནཏྠ’’ནྟི. ཨཐ ཝཱ ‘‘མངྒལབྷཱཝཏོ, སབྦཀིརིཡཱསུ པུབྦཀིཙྩབྷཱཝཏོ, པཎྜིཏེཧི སམཱཙརིཏབྷཱཝཏོ, ཨཱཡཏིཾ པརེསཾ དིཊྛཱནུགཏིཨཱཔཛྫནཏོ ཙ སཾཝཎྞནཱཡཾ རཏནཏྟཡཔཎཱམཀིརིཡཱ’’ཏི. ཨཐ ཝཱ ‘‘ཙཏུགམྦྷཱིརབྷཱཝཡུཏྟཾ དྷམྨཝིནཡཾ སཾཝཎྞེཏུཀཱམསྶ མཧཱསམུདྡཾ ཨོགཱཧནྟསྶ ཝིཡ པཉྙཱཝེཡྻཏྟིཡསམནྣཱགཏསྶཱཔི མཧནྟཾ བྷཡཾ སམྦྷཝཏི, བྷཡཀྑཡཱཝཧཉྩེཏཾ རཏནཏྟཡགུཎཱནུསྶརཎཛནིཏཾ ¶ པཎཱམཔཱུཛཱཝིདྷཱནཾ, ཏཏོ ཙ སཾཝཎྞནཱཡཾ རཏནཏྟཡཔཎཱམཀིརིཡཱ’’ཏི. ཨཐ ཝཱ ‘‘ཨསཏྠརིཔི སཏྠཱབྷིནིཝེསསྶ ལོཀསྶ ཡཐཱབྷཱུཏཾ སཏྠརི ཨེཝ སམྨཱསམྦུདྡྷེ སཏྠུསམྦྷཱཝནཏྠཾ, ཨསཏྠརི ཙ སཏྠུསམྦྷཱཝནཔརིཙྩཛཱཔནཏྠཾ, ‘ཏཐཱགཏཔྤཝེདིཏཾ དྷམྨཝིནཡཾ པརིཡཱཔུཎིཏྭཱ ཨཏྟནོ དཧཏཱི’ཏི (པཱརཱ. ༡༩༥) ཙ ཝུཏྟདོསཔརིཧརཎཏྠཾ སཾཝཎྞནཱཡཾ པཎཱམཀིརིཡཱ’’ཏི. ཨཐ ཝཱ ‘‘བུདྡྷསྶ བྷགཝཏོ པཎཱམཝིདྷཱནེན སམྨཱསམྦུདྡྷབྷཱཝཱདྷིགམཱཡ བུདྡྷཡཱནཾ པཊིཔཛྫནྟཱནཾ ཨུསྶཱཧཛནནཏྠཾ, སདྡྷམྨསྶ ཙ པཎཱམཝིདྷཱནེན པཙྩེཀབུདྡྷབྷཱཝཱདྷིགམཱཡ པཙྩེཀབུདྡྷཡཱནཾ པཊིཔཛྫནྟཱནཾ ཨུསྶཱཧཛནནཏྠཾ, སངྒྷསྶ ཙ པཎཱམཝིདྷཱནེན པརམཏྠསངྒྷབྷཱཝཱདྷིགམཱཡ སཱཝཀཡཱནཾ པཊིཔཛྫནྟཱནཾ ཨུསྶཱཧཛནནཏྠཾ སཾཝཎྞནཱཡཾ པཎཱམཀིརིཡཱ’’ཏི. ཨཐ ཝཱ ‘‘མངྒལཱདིཀཱནི སཏྠཱནི ཨནནྟརཱཡཱནི, ཙིརཊྛིཏིཀཱནི, བཧུམཏཱནི ཙ བྷཝནྟཱིཏི ཨེཝཾལདྡྷིཀཱནཾ ཙིཏྟཔརིཏོསནཏྠཾ སཾཝཎྞནཱཡཾ པཎཱམཀིརིཡཱ’’ཏི. ཨཐ ཝཱ ‘‘སོཏུཛནཱནཾ ཡཐཱཝུཏྟཔཎཱམེན ཨནནྟརཱཡེན ཨུགྒཧཎདྷཱརཎཱདིནིཔྥཱདནཏྠཾ སཾཝཎྞནཱཡཾ པཎཱམཀིརིཡཱ. སོཏུཛནཱནུགྒཧམེཝ ཧི པདྷཱནཾ ཀཏྭཱ ཨཱཙརིཡེཧི སཾཝཎྞནཱརམྦྷེ ཐུཏིཔཎཱམཔརིདཱིཔཀཱནི ཝཱཀྱཱནི ནིཀྑིཔཱིཡནྟི, ཨིཏརཐཱ ཝིནཱཔི ཏཾ ནིཀྑེཔཾ ཀཱཡམནོཔཎཱམེནེཝ ཡཐཱདྷིཔྤེཏཔྤཡོཛནསིདྡྷིཏོ ཀིམེཏེན གནྠགཱརཝཀརཎེནཱ’’ཏི ཙ ཨེཝམཱདིནཱ. མཡཾ པན ཨིདྷཱདྷིཔྤེཏམེཝ པཡོཛནཾ དསྶཡིསྶཱམ, ཏསྨཱ སཾཝཎྞནཱརམྦྷེ རཏནཏྟཡཔཎཱམཀརཎཾ ཡཐཱཔཊིཉྙཱཏསཾཝཎྞནཱཡ ཨནནྟརཱཡེན པརིསམཱཔནཏྠནྟི ཝེདིཏབྦཾ. ཨིདམེཝ ཙ པཡོཛནཾ ཨཱཙརིཡེན ཨིདྷཱདྷིཔྤེཏཾ. ཏཐཱ ཧི ཝཀྑཏི ‘‘ཨིཏི མེ པསནྣམཏིནོ ¶ …པེ… ཏསྶཱནུབྷཱཝེནཱ’’ཏི. རཏནཏྟཡཔཎཱམཀརཎཉྷི ཡཐཱཔཊིཉྙཱཏསཾཝཎྞནཱཡ ཨནནྟརཱཡེན པརིསམཱཔནཏྠཾ རཏནཏྟཡཔཱུཛཱཡ པཉྙཱཔཱཊཝབྷཱཝཏོ, ཏཱཡ ཙ པཉྙཱཔཱཊཝཾ རཱགཱདིམལཝིདྷམནཏོ. ཝུཏྟཉྷེཏཾ –

‘‘ཡསྨིཾ མཧཱནཱམ སམཡེ ཨརིཡསཱཝཀོ ཏཐཱགཏཾ ཨནུསྶརཏི, ནེཝསྶ ཏསྨིཾ སམཡེ རཱགཔརིཡུཊྛིཏཾ ཙིཏྟཾ ཧོཏི, ན དོསཔརིཡུཊྛིཏཾ ཙིཏྟཾ ཧོཏི, ན མོཧཔརིཡུཊྛིཏཾ ཙིཏྟཾ ཧོཏི, ཨུཛུགཏམེཝསྶ ཏསྨིཾ སམཡེ ཙིཏྟཾ ཧོཏཱི’’ཏིཨཱདི (ཨ. ནི. ༦.༡༠; ཨ. ནི. ༡༡.༡༡).

ཏསྨཱ ¶ རཏནཏྟཡཔཱུཛཱཡ ཝིཀྑཱལིཏམལཱཡ པཉྙཱཡ པཱཊཝསིདྡྷི. ཨཐ ཝཱ རཏནཏྟཡཔཱུཛཱཡ པཉྙཱཔདཊྛཱནསམཱདྷིཧེཏུཏྟཱ པཉྙཱཔཱཊཝཾ. ཝུཏྟཉྷེཏཾ –

‘‘ཨུཛུགཏཙིཏྟོ ཁོ པན མཧཱནཱམ ཨརིཡསཱཝཀོ ལབྷཏི ཨཏྠཝེདཾ, ལབྷཏི དྷམྨཝེདཾ, ལབྷཏི དྷམྨོཔསཾཧིཏཾ པཱམོཛྫཾ, པམུདིཏསྶ པཱིཏི ཛཱཡཏི, པཱིཏིམནསྶ ཀཱཡོ པསྶམྦྷཏི, པསྶདྡྷཀཱཡོ སུཁཾ ཝེདཡཏི, སུཁིནོ ཙིཏྟཾ སམཱདྷིཡཏཱི’’ཏི (ཨ. ནི. ༦.༡༠; ཨ. ནི. ༡༡.༡༡).

སམཱདྷིསྶ ཙ པཉྙཱཡ པདཊྛཱནབྷཱཝོ ‘‘སམཱཧིཏོ ཡཐཱབྷཱུཏཾ པཛཱནཱཏཱི’’ཏི (སཾ. ནི. ༣.༥; ༤.༩༩; ༥.༡༠༧༡; ནེཏྟི. ༤༠; པེཊཀོ. ༦༦; མི. པ. ༡༤) ཝུཏྟོཡེཝ. ཏཏོ ཨེཝཾ པཊུབྷཱུཏཱཡ པཉྙཱཡ ཁེདམབྷིབྷུཡྻ པཊིཉྙཱཏཾ སཾཝཎྞནཾ སམཱཔཡིསྶཏི. ཏེན ཝུཏྟཾ ‘‘རཏནཏྟཡཔཎཱམཀརཎཉྷི…པེ… པཉྙཱཔཱཊཝབྷཱཝཏོ’’ཏི. ཨཐ ཝཱ རཏནཏྟཡཔཱུཛཱཡ ཨཱཡུཝཎྞསུཁབལཝཌྜྷནཏོ ཨནནྟརཱཡེན པརིསམཱཔནཾ ཝེདིཏབྦཾ. རཏནཏྟཡཔཎཱམེན ཧི ཨཱཡུཝཎྞསུཁབལཱནི ཝཌྜྷནྟི. ཝུཏྟཉྷེཏཾ –

‘‘ཨབྷིཝཱདནསཱིལིསྶ, ནིཙྩཾ ཝུཌྜྷཱཔཙཱཡིནོ;

ཙཏྟཱརོ དྷམྨཱ ཝཌྜྷནྟི, ཨཱཡུ ཝཎྞོ སུཁཾ བལ’’ནྟི. (དྷ. པ. ༡༠༩);

ཏཏོ ཨཱཡུཝཎྞསུཁབལཝུདྡྷིཡཱ ཧོཏྭེཝ ཀཱརིཡནིཊྛཱནནྟི ཝུཏྟཾ ‘‘རཏནཏྟཡཔཱུཛཱཡ ཨཱཡུ…པེ… ཝེདིཏབྦ’’ནྟི. ཨཐ ཝཱ རཏནཏྟཡཔཱུཛཱཡ པཊིབྷཱནཱཔརིཧཱནཱཝཧཏྟཱ ཨནནྟརཱཡེན པརིསམཱཔནཾ ཝེདིཏབྦཾ. ཨཔརིཧཱནཱཝཧཱ ཧི རཏནཏྟཡཔཱུཛཱ. ཝུཏྟཉྷེཏཾ –

‘‘སཏྟིམེ ¶ བྷིཀྑཝེ, ཨཔརིཧཱནཱིཡཱ དྷམྨཱ, ཀཏམེ སཏྟ? སཏྠུགཱརཝཏཱ, དྷམྨགཱརཝཏཱ, སངྒྷགཱརཝཏཱ, སིཀྑཱགཱརཝཏཱ, སམཱདྷིགཱརཝཏཱ, ཀལྱཱཎམིཏྟཏཱ, སོཝཙསྶཏཱ’’ཏི (ཨ. ནི. ༧.༣༤) ཏཏོ པཊིབྷཱནཱཔརིཧཱནེན ཧོཏྭེཝ ཡཐཱཔཊིཉྙཱཏཔརིསམཱཔནནྟི ཝུཏྟཾ ‘‘རཏནཏྟཡ…པེ… ཝེདིཏབྦ’’ནྟི. ཨཐ ཝཱ པསཱདཝཏྠཱུསུ པཱུཛཱཡ པུཉྙཱཏིསཡབྷཱཝཏོ ཨནནྟརཱཡེན པརིསམཱཔནཾ ཝེདིཏབྦཾ. པུཉྙཱཏིསཡཱ ཧི པསཱདཝཏྠཱུསུ པཱུཛཱ. ཝུཏྟཉྷེཏཾ –

‘‘པཱུཛཱརཧེ ¶ པཱུཛཡཏོ, བུདྡྷེ ཡདིཝ སཱཝཀེ;

པཔཉྩསམཏིཀྐནྟེ, ཏིཎྞསོཀཔརིདྡཝེ.

ཏེ ཏཱདིསེ པཱུཛཡཏོ, ནིབྦུཏེ ཨཀུཏོབྷཡེ;

ན སཀྐཱ པུཉྙཾ སངྑཱཏུཾ, ཨིམེཏྟམཔི ཀེནཙཱི’’ཏི. (ཁུ. པཱ. ༡༩༦; ཨཔ. ༡.༡༠.༢);

པུཉྙཱཏིསཡོ ཙ ཡཐཱདྷིཔྤེཏཔརིསམཱཔནུཔཱཡོ. ཡཐཱཧ –

‘‘ཨེས དེཝམནུསྶཱནཾ, སབྦཀཱམདདོ ནིདྷི;

ཡཾ ཡདེཝཱབྷིཔཏྠེནྟི, སབྦམེཏེན ལབྦྷཏཱི’’ཏི. (ཁུ. པཱ. ༨.༡༠);

ཨུཔཱཡེསུ ཙ པཊིཔནྣསྶ ཧོཏྭེཝ ཀཱརིཡནིཊྛཱནནྟི ཝུཏྟཾ ‘‘པསཱདཝཏྠཱུསུ…པེ… ཝེདིཏབྦ’’ནྟི. ཨེཝཾ རཏནཏྟཡཔཱུཛཱ ནིརཏིསཡཔུཉྙཀྑེཏྟསམྦུདྡྷིཡཱ ཨཔརིམེཡྻཔྤབྷཱཝོ པུཉྙཱཏིསཡོཏི བཧུཝིདྷནྟརཱཡེཔི ལོཀསནྣིཝཱསེ ཨནྟརཱཡནིབནྡྷནསཀལསཾཀིལེསཝིདྡྷཾསནཱཡ པཧོཏི, བྷཡཱདིཨུཔདྡཝཉྩ ནིཝཱརེཏི. ཏསྨཱ སུཝུཏྟཾ ‘‘སཾཝཎྞནཱརམྦྷེ རཏནཏྟཡཔཎཱམཀརཎཾ ཡཐཱཔཊིཉྙཱཏསཾཝཎྞནཱཡ ཨནནྟརཱཡེན པརིསམཱཔནཏྠནྟི ཝེདིཏབྦ’’ནྟི.

ཨེཝཾ པན སཔཡོཛནཾ རཏནཏྟཡཔཎཱམཾ ཀཏྟུཀཱམོ བུདྡྷརཏནམཱུལཀཏྟཱ སེསརཏནཱནཾ པཋམཾ ཏསྶ པཎཱམཾ ཀཱཏུམཱཧ – ‘‘ཀརུཎཱསཱིཏལཧདཡཾ…པེ… གཏིཝིམུཏྟ’’ནྟི. བུདྡྷརཏནམཱུལཀཱནི ཧི དྷམྨསངྒྷརཏནཱནི, ཏེསུ ཙ དྷམྨརཏནམཱུལཀཾ སངྒྷརཏནཾ, ཏཐཱབྷཱཝོ ཙ ‘‘པུཎྞཙནྡོ ཝིཡ བྷགཝཱ, ཙནྡཀིརཎནིཀརོ ཝིཡ ཏེན དེསིཏོ དྷམྨོ, ཙནྡཀིརཎསམུཔྤཱདིཏཔཱིཎིཏོ ལོཀོ ཝིཡ སངྒྷོ’’ཏི ཨེཝམཱདཱིཧི ཨཊྛཀཐཱཡམཱགཏཨུཔམཱཧི ཝིབྷཱཝེཏབྦོ. ཨཐ ཝཱ སབྦསཏྟཱནཾ ཨགྒོཏི ཀཏྭཱ པཋམཾ བུདྡྷོ, ཏཔྤབྷཝཏོ, ཏདུཔདེསིཏཏོ ཙ ཏདནནྟརཾ དྷམྨོ, ཏསྶ དྷམྨསྶ སཱདྷཱརཎཏོ ¶ , ཏདཱསེཝནཏོ ཙ ཏདནནྟརཾ སངྒྷོ ཝུཏྟོ. ‘‘སབྦསཏྟཱནཾ ཝཱ ཧིཏེ ཝིནིཡོཛཀོཏི ཀཏྭཱ པཋམཾ བུདྡྷོ, སབྦསཏྟཧིཏཏྟཱ ཏདནནྟརཾ དྷམྨོ, ཧིཏཱདྷིགམཱཡ པཊིཔནྣོ ཨདྷིགཏཧིཏོ ཙཱཏི ཀཏྭཱ ཏདནནྟརཾ སངྒྷོ ཝུཏྟོ’’ཏི ཨཊྛཀཐཱགཏནཡེན ཨནུཔུབྦཏཱ ཝེདིཏབྦཱ.

བུདྡྷརཏནཔཎཱམཉྩ ¶ ཀརོནྟོ ཀེཝལཔཎཱམཏོ ཐོམནཱཔུབྦངྒམོཝསཱཏིསཡོཏི ‘‘ཀརུཎཱསཱིཏལཧདཡ’’ནྟིཨཱདིཔདེཧི ཐོམནཱཔུབྦངྒམཏཾ དསྶེཏི. ཐོམནཱཔུབྦངྒམེན ཧི པཎཱམེན སཏྠུ གུཎཱཏིསཡཡོགོ, ཏཏོ ཙསྶ ཨནུཏྟརཝནྡནཱིཡབྷཱཝོ, ཏེན ཙ ཨཏྟནོ པཎཱམསྶ ཁེཏྟངྒཏབྷཱཝོ, ཏེན ཙསྶ ཁེཏྟངྒཏསྶ པཎཱམསྶ ཡཐཱདྷིཔྤེཏནིཔྥཏྟིཧེཏུབྷཱཝོ དསྶིཏོཏི. ཐོམནཱཔུབྦངྒམཏཉྩ དསྶེནྟོ ཡསྶཱ སཾཝཎྞནཾ ཀཏྟུཀཱམོ, སཱ སུཏྟནྟདེསནཱ ཀརུཎཱཔཉྙཱཔྤདྷཱནཱཡེཝ, ན ཝིནཡདེསནཱ ཝིཡ ཀརུཎཱཔྤདྷཱནཱ, ནཱཔི ཨབྷིདྷམྨདེསནཱ ཝིཡ པཉྙཱཔྤདྷཱནཱཏི ཏདུབྷཡཔྤདྷཱནམེཝ ཐོམནམཱརབྷཏི. ཨེསཱ ཧི ཨཱཙརིཡསྶ པཀཏི, ཡདིདཾ ཨཱརམྦྷཱནུརཱུཔཐོམནཱ. ཏེནེཝ ཙ ཝིནཡདེསནཱཡ སཾཝཎྞནཱརམྦྷེ ‘‘ཡོ ཀཔྤཀོཊཱིཧིཔི…པེ… མཧཱཀཱརུཎིཀསྶ ཏསྶཱ’’ཏི (པཱརཱ. ཨཊྛ. གནྠཱརམྦྷཀཐཱ) ཀརུཎཱཔྤདྷཱནཾ, ཨབྷིདྷམྨདེསནཱཡ སཾཝཎྞནཱརམྦྷེ ‘‘ཀརུཎཱ ཝིཡ…པེ… ཡཐཱརུཙཱི’’ཏི (དྷ. ས. ཨཊྛ. ༡) པཉྙཱཔྤདྷཱནཉྩ ཐོམནམཱརདྡྷཾ. ཝིནཡདེསནཱ ཧི ཨཱསཡཱདིནིརཔེཀྑཀེཝལཀརུཎཱཡ པཱཀཏིཀསཏྟེནཱཔི ཨསོཏབྦཱརཧཾ སུཎནྟོ, ཨཔུཙྪིཏབྦཱརཧཾ པུཙྪནྟོ, ཨཝཏྟབྦཱརཧཉྩ ཝདནྟོ སིཀྑཱཔདཾ པཉྙཔེསཱིཏི ཀརུཎཱཔྤདྷཱནཱ. ཏཐཱ ཧི ཨུཀྐཾསཔརིཡནྟགཏཧིརོཏྟཔྤོཔི བྷགཝཱ ལོཀིཡསཱདྷུཛནེཧིཔི པརིཧརིཏབྦཱནི ‘‘སིཁརཎཱི, སམྦྷིནྣཱ’’ཏིཨཱདིཝཙནཱནི, (པཱརཱ. ༡༨༥) ཡཐཱཔརཱདྷཉྩ གརཧཝཙནཱནི མཧཱཀརུཎཱསཉྩོདིཏམཱནསོ མཧཱཔརིསམཛ྄ཛྷེ ཨབྷཱསི, ཏཾཏཾསིཀྑཱཔདཔཉྙཏྟི ཀཱརཎཱཔེཀྑཱཡ ཙ ཝེརཉྫཱདཱིསུ སཱརཱིརིཀཾ ཁེདམནུབྷོསི. ཏསྨཱ ཀིཉྩཱཔི བྷཱུམནྟརཔཙྩཡཱཀཱརསམཡནྟརཀཐཱནཾ ཝིཡ ཝིནཡཔཉྙཏྟིཡཱཔི སམུཊྛཱཔིཀཱ པཉྙཱ ཨནཉྙསཱདྷཱརཎཏཱཡ ཨཏིསཡཀིཙྩཝཏཱི, ཀརུཎཱཡ ཀིཙྩཾ པན ཏཏོཔི ཨདྷིཀནྟི ཝིནཡདེསནཱཡ ཀརུཎཱཔྤདྷཱནཏཱ ཝུཏྟཱ. ཀརུཎཱབྱཱཔཱརཱདྷིཀཏཱཡ ཧི དེསནཱཡ ཀརུཎཱཔདྷཱནཏཱ, ཨབྷིདྷམྨདེསནཱ པན ཀེཝལཔཉྙཱཔྤདྷཱནཱ པརམཏྠདྷམྨཱནཾ ཡཐཱསབྷཱཝཔཊིཝེདྷསམཏྠཱཡ པཉྙཱཡ ཏཏྠ སཱཏིསཡཔྤཝཏྟིཏོ. སུཏྟནྟདེསནཱ པན ཀརུཎཱཔཉྙཱཔྤདྷཱནཱ ཏེསཾ ཏེསཾ སཏྟཱནཾ ཨཱསཡཱནུསཡཱདྷིམུཏྟིཙརིཏཱདིབྷེདཔརིཙྪིནྡནསམཏྠཱཡ པཉྙཱཡ སཏྟེསུ ཙ མཧཱཀརུཎཱཡ ཏཏྠ སཱཏིསཡཔྤཝཏྟིཏོ. སུཏྟནྟདེསནཱཡ ཧི མཧཱཀརུཎཱཡ སམཱཔཏྟིབཧུལོ ཝིནེཡྻསནྟཱནེ ཏདཛ྄ཛྷཱསཡཱནུལོམེན ¶ གམྦྷཱིརམཏྠཔདཾ པཏིཊྛཔེསི. ཏསྨཱ ཨཱརམྦྷཱནུརཱུཔཾ ཀརུཎཱཔཉྙཱཔྤདྷཱནམེཝ ཐོམནཾ ཀཏནྟི ཝེདིཏབྦཾ, ཨཡམེཏྠ སམུདཱཡཏྠོ.

ཨཡཾ ¶ པན ཨཝཡཝཏྠོ – ཀིརཏཱིཏི ཀརུཎཱ, པརདུཀྑཾ ཝིཀྑིཔཏི པཙྩཡཝེཀལླཀརཎེན ཨཔནེཏཱིཏི ཨཏྠོ. དུཀྑིཏེསུ ཝཱ ཀིརིཡཏི པསཱརིཡཏཱིཏི ཀརུཎཱ. ཨཐ ཝཱ ཀིཎཱཏཱིཏི ཀརུཎཱ, པརདུཀྑེ སཏི ཀཱརུཎིཀཾ ཧིཾསཏི ཝིབཱདྷཏི, པརདུཀྑཾ ཝཱ ཝིནཱསེཏཱིཏི ཨཏྠོ. པརདུཀྑེ སཏི སཱདྷཱུནཾ ཀམྤནཾ ཧདཡཁེདཾ ཀརོཏཱིཏི ཝཱ ཀརུཎཱ. ཨཐ ཝཱ ཀམིཏི སུཁཾ, ཏཾ རུནྡྷཏཱིཏི ཀརུཎཱ. ཨེསཱ ཧི པརདུཀྑཱཔནཡནཀཱམཏཱལཀྑཎཱ ཨཏྟསུཁནིརཔེཀྑཏཱཡ ཀཱརུཎིཀཱནཾ སུཁཾ རུནྡྷཏི ཝིབནྡྷཏཱིཏི, སབྦཏྠ སདྡསཏྠཱནུསཱརེན པདནིཔྥཏྟི ཝེདིཏབྦཱ. ཨུཎྷཱབྷིཏཏྟེཧི སེཝཱིཡཏཱིཏི སཱིཏཾ, ཨུཎྷཱབྷིསམནཾ. ཏཾ ལཱཏི གཎྷཱཏཱིཏི སཱིཏལཾ, ‘‘ཙིཏྟཾ ཝཱ ཏེ ཁིཔིསྶཱམི, ཧདཡཾ ཝཱ ཏེ ཕཱལེསྶཱམཱི’’ཏི (སཾ. ནི. ༡.༢༤༦; སུ. ནི. ཨཱལ༹ཝཀསུཏྟ) ཨེཏྠ ཨུརོ ‘‘ཧདཡ’’ནྟི ཝུཏྟཾ, ‘‘ཝཀྐཾ ཧདཡ’’ནྟི (མ. ནི. ༡.༡༡༠; ༢.༡༡༤; ༣.༡༥༤) ཨེཏྠ ཧདཡཝཏྠུ, ‘‘ཧདཡཱ ཧདཡཾ མཉྙེ ཨཉྙཱཡ ཏཙྪཏཱི’’ཏི (མ. ནི. ༡.༦༣) ཨེཏྠ ཙིཏྟཾ, ཨིདྷཱཔི ཙིཏྟམེཝ ཨབྦྷནྟརཊྛེན ཧདཡཾ. ཨཏྟནོ སབྷཱཝཾ ཝཱ ཧརཏཱིཏི ཧདཡཾ, ར-ཀཱརསྶ ད-ཀཱརཾ ཀཏྭཱཏི ནེརུཏྟིཀཱ. ཀརུཎཱཡ སཱིཏལཾ ཧདཡམསྶཱཏི ཀརུཎཱསཱིཏལཧདཡོ, ཏཾ ཀརུཎཱསཱིཏལཧདཡཾ.

ཀཱམཉྩེཏྠ པརེསཾ ཧིཏོཔསཾཧཱརསུཁཱདིཨཔརིཧཱནིཛ྄ཛྷཱནསབྷཱཝཏཱཡ, བྱཱཔཱདཱདཱིནཾ ཨུཛུཝིཔཙྩནཱིཀཏཱཡ ཙ སཏྟསནྟཱནགཏསནྟཱཔཝིཙྪེདནཱཀཱརཔྤཝཏྟིཡཱ མེཏྟཱམུདིཏཱནམྤི ཙིཏྟསཱིཏལབྷཱཝཀཱརཎཏཱ ཨུཔལབྦྷཏི, ཏཐཱཔི པརདུཀྑཱཔནཡནཱཀཱརཔྤཝཏྟིཡཱ པརཱུཔཏཱཔཱསཧནརསཱ ཨཝིཧིཾསཱབྷཱུཏཱ ཀརུཎཱཝ ཝིསེསེན བྷགཝཏོ ཙིཏྟསྶ ཙིཏྟཔསྶདྡྷི ཝིཡ སཱིཏིབྷཱཝནིམིཏྟནྟི ཏསྶཱཡེཝ ཙིཏྟསཱིཏལབྷཱཝཀཱརཎཏཱ ཝུཏྟཱ. ཀརུཎཱམུཁེན ཝཱ མེཏྟཱམུདིཏཱནམྤི ཧདཡསཱིཏལབྷཱཝཀཱརཎཏཱ ཝུཏྟཱཏི དཊྛབྦཾ. ན ཧི སབྦཏྠ ནིརཝསེསཏྠོ ཨུཔདིསཱིཡཏི, པདྷཱནསཧཙརཎཱཝིནཱབྷཱཝཱདིནཡེཧིཔི ཡཐཱལབྦྷམཱནཾ གཡ྄ཧམཱནཏྟཱ. ཨཔིཙེཏྠ ཏཾསམྤཡུཏྟཉཱཎསྶ ཚཨསཱདྷཱརཎཉཱཎཔརིཡཱཔནྣཏཱཡ ཨསཱདྷཱརཎཉཱཎཝིསེསནིབནྡྷནབྷཱུཏཱ སཱཏིསཡཾ, ནིརཝསེསཉྩ སབྦཉྙུཏཉྙཱཎཾ ¶ ཝིཡ སཝིསཡབྱཱཔིཏཱཡ མཧཱཀརུཎཱབྷཱཝམུཔགཏཱ ཨནཉྙསཱདྷཱརཎསཱཏིསཡབྷཱཝཔྤཏྟཱ ཀརུཎཱཝ ཧདཡསཱིཏལཏྟཧེཏུབྷཱཝེན ཝུཏྟཱ. ཨཐ ཝཱ སཏིཔི མེཏྟཱམུདིཏཱནཾ པརེསཾ ཧིཏོཔསཾཧཱརསུཁཱདིཨཔརིཧཱནིཛ྄ཛྷཱནསབྷཱཝཏཱཡ སཱཏིསཡེ ཧདཡསཱིཏལབྷཱཝནིབནྡྷནཏྟེ སཀལབུདྡྷགུཎཝིསེསཀཱརཎཏཱཡ ཏཱསམྤི ཀཱརཎནྟི ཀརུཎཱཡ ཨེཝ ཧདཡསཱིཏལབྷཱཝཀཱརཎཏཱ ཝུཏྟཱ. ཀརུཎཱནིདཱནཱ ཧི སབྦེཔི བུདྡྷགུཎཱ. ཀརུཎཱནུབྷཱཝནིབྦཱཔིཡམཱནསཾསཱརདུཀྑསནྟཱཔསྶ ཧི བྷགཝཏོ པརདུཀྑཱཔནཡནཀཱམཏཱཡ ཨནེཀཱནིཔི ཀཔྤཱནམསངྑྱེཡྻཱནི ཨཀིལནྟརཱུཔསྶེཝ ནིརཝསེསབུདྡྷཀརདྷམྨསམྦྷརཎནིརཏསྶ སམདྷིགཏདྷམྨཱདྷིཔཏེཡྻསྶ ཙ སནྣིཧིཏེསུཔི སཏྟསངྒྷཱཏསམུཔནཱིཏཧདཡཱུཔཏཱཔནིམིཏྟེསུ ན ཨཱིསཀམྤི ¶ ཙིཏྟསཱིཏིབྷཱཝསྶ ཨཉྙཐཏྟམཧོསཱིཏི. ཏཱིསུ ཙེཏྠ ཝིཀཔྤེསུ པཋམེ ཝིཀཔྤེ ཨཝིསེསབྷཱུཏཱ བུདྡྷབྷཱུམིགཏཱ, དུཏིཡེ ཏཐེཝ མཧཱཀརུཎཱབྷཱཝཱུཔགཏཱ, ཏཏིཡེ པཋམཱབྷིནཱིཧཱརཏོ པཊྛཱཡ ཏཱིསུཔི ཨཝཏྠཱསུ པཝཏྟཱ བྷགཝཏོ ཀརུཎཱ སངྒཧིཏཱཏི དཊྛབྦཾ.

པཛཱནཱཏཱིཏི པཉྙཱ, ཡཐཱསབྷཱཝཾ པཀཱརེཧི པཊིཝིཛ྄ཛྷཏཱིཏི ཨཏྠོ. པཉྙཔེཏཱིཏི ཝཱ པཉྙཱ, ཏཾ ཏདཏྠཾ པཱཀཊཾ ཀརོཏཱིཏི ཨཏྠོ. སཱཡེཝ ཉེཡྻཱཝརཎཔྤཧཱནཏོ པཀཱརེཧི དྷམྨསབྷཱཝཛོཏནཊྛེན པཛྫོཏོཏི པཉྙཱཔཛྫོཏོ. པཉྙཝཏོ ཧི ཨེཀཔལླངྐེནཔི ནིསིནྣསྶ དསསཧསྶིལོཀདྷཱཏུ ཨེཀཔཛྫོཏཱ ཧོཏི. ཝུཏྟཉྷེཏཾ བྷགཝཏཱ ‘‘ཙཏྟཱརོམེ བྷིཀྑཝེ, པཛྫོཏཱ. ཀཏམེ ཙཏྟཱརོ? ཙནྡཔཛྫོཏོ, སཱུརིཡཔཛྫོཏོ, ཨགྒིཔཛྫོཏོ, པཉྙཱཔཛྫོཏོ, ཨིམེ ཁོ བྷིཀྑཝེ, ཙཏྟཱརོ པཛྫོཏཱ. ཨེཏདགྒཾ བྷིཀྑཝེ, ཨིམེསཾ ཙཏུནྣཾ པཛྫོཏཱནཾ ཡདིདཾ པཉྙཱཔཛྫོཏོ’’ཏི (ཨ. ནི. ༤.༡༤༥). ཏེན ཝིཧཏོ ཝིསེསེན སམུགྒྷཱཊིཏོཏི པཉྙཱཔཛྫོཏཝིཧཏོ, ཝིསེསཏཱ ཙེཏྠ ཨུཔརི ཨཱཝི བྷཝིསྶཏི. མུཡ྄ཧནྟི ཏེན, སཡཾ ཝཱ མུཡ྄ཧཏི, མུཡ྄ཧནམཏྟམེཝ ཝཱ ཏནྟི མོཧོ, ཨཝིཛྫཱ. སྭེཝ ཝིསཡསབྷཱཝཔཊིཙྪཱདནཏོ ཨནྡྷཀཱརསརིཀྑཏཱཡ ཏམོ ཝིཡཱཏི མོཧཏམོ. སཏིཔི ཏམསདྡསྶ སདིསཀཔྤནམནྟརེན ཨཝིཛྫཱཝཱཙཀཏྟེ མོཧསདྡསནྣིདྷཱནེན ཏབྦིསེསཀཏཱཝེཏྠ ཡུཏྟཱཏི སདིསཀཔྤནཱ. པཉྙཱཔཛྫོཏཝིཧཏོ མོཧཏམོ ¶ ཡསྶཱཏི པཉྙཱཔཛྫོཏཝིཧཏམོཧཏམོ, ཏཾ པཉྙཱཔཛྫོཏཝིཧཏམོཧཏམཾ.

ནནུ ཙ སབྦེསམྤི ཁཱིཎཱསཝཱནཾ པཉྙཱཔཛྫོཏེན ཨཝིཛྫནྡྷཀཱརཧཏཏཱ སམྦྷཝཏི, ཨཐ ཀསྨཱ ཨཉྙསཱདྷཱརཎཱཝིསེསགུཎེན བྷགཝཏོ ཐོམནཱ ཝུཏྟཱཏི? སཝཱསནཔྤཧཱནེན ཨནཉྙསཱདྷཱརཎཝིསེསཏཱསམྦྷཝཏོ. སབྦེསམྤི ཧི ཁཱིཎཱསཝཱནཾ པཉྙཱཔཛྫོཏཧཏཱཝིཛྫནྡྷཀཱརཏྟེཔི སཏི སདྡྷཱདྷིམུཏྟེཧི ཝིཡ དིཊྛིཔྤཏྟཱནཾ སཱཝཀཔཙྩེཀབུདྡྷེཧི སམྨཱསམྦུདྡྷཱནཾ སཝཱསནཔྤཧཱནེན ཀིལེསཔྤཧཱནསྶ ཝིསེསོ ཝིཛྫཏེཝཱཏི. ཨཐ ཝཱ པརོཔདེསམནྟརེན ཨཏྟནོ སནྟཱནེ ཨཙྩནྟཾ ཨཝིཛྫནྡྷཀཱརཝིགམསྶ ནིཔྥཱདིཏཏྟཱ (ནིབྦཏྟིཏཏྟཱ མ. ནི. ཊཱི. ༡.༡), ཏཏྠ ཙ སབྦཉྙུཏཱཡ བལེསུ ཙ ཝསཱིབྷཱཝསྶ སམདྷིགཏཏྟཱ, པརསནྟཏིཡཉྩ དྷམྨདེསནཱཏིསཡཱནུབྷཱཝེན སམྨདེཝ ཏསྶ པཝཏྟིཏཏྟཱ, བྷགཝཱཡེཝ ཝིསེསཏོ པཉྙཱཔཛྫོཏཝིཧཏམོཧཏམབྷཱཝེན ཐོམེཏབྦོཏི. ཨིམསྨིཉྩ ཨཏྠཝིཀཔྤེ པཉྙཱཔཛྫོཏཔདེན སསནྟཱནགཏམོཧཝིདྷམནཱ པཊིཝེདྷཔཉྙཱ ཙེཝ པརསནྟཱནགཏམོཧཝིདྷམནཱ དེསནཱཔཉྙཱ ཙ སཱམཉྙནིདྡེསེན, ཨེཀསེསནཡེན ཝཱ སངྒཧིཏཱ. ན ཏུ པུརིམསྨིཾ ཨཏྠཝིཀཔྤེ ཝིཡ པཊིཝེདྷཔཉྙཱཡེཝཱཏི ཝེདིཏབྦཾ.

ཨཔརོ ¶ ནཡོ – བྷགཝཏོ ཉཱཎསྶ ཉེཡྻཔརིཡནྟིཀཏྟཱ སཀལཉེཡྻདྷམྨསབྷཱཝཱཝབོདྷནསམཏྠེན ཨནཱཝརཎཉཱཎསངྑཱཏེན པཉྙཱཔཛྫོཏེན སཀལཉེཡྻདྷམྨསབྷཱཝཙྪཱདཀམོཧཏམསྶ ཝིཧཏཏྟཱ ཨནཱཝརཎཉཱཎབྷཱུཏེན ཨནཉྙསཱདྷཱརཎཔཉྙཱཔཛྫོཏཝིཧཏམོཧཏམབྷཱཝེན བྷགཝཏོ ཐོམནཱ ཝེདིཏབྦཱ. ཨིམསྨིཾ པན ཨཏྠཝིཀཔྤེ མོཧཏམཝིདྷམནནྟེ ཨདྷིགཏཏྟཱ ཨནཱཝརཎཉཱཎཾ ཀཱརཎཱུཔཙཱརེན སཀསནྟཱནེ མོཧཏམཝིདྷམནནྟི ཝེདིཏབྦཾ. ཨབྷིནཱིཧཱརསམྤཏྟིཡཱ སཝཱསནཔྤཧཱནམེཝ ཧི ཀིལེསཱནཾ ཉེཡྻཱཝརཎཔྤཧཱནནྟི, པརསནྟཱནེ པན མོཧཏམཝིདྷམནསྶ ཀཱརཎབྷཱཝཏོ ཕལཱུཔཙཱརེན ཨནཱཝརཎཉཱཎམེཝ མོཧཏམཝིདྷམནནྟི ཝུཙྩཏི. ཨནཱཝརཎཉཱཎནྟི ཙ སབྦཉྙུཏཉྙཱཎམེཝ, ཡེན དྷམྨདེསནཱཔཙྩཝེཀྑཎཱནི ཀརོཏི. ཏདིདཉྷི ཉཱཎདྭཡཾ ཨཏྠཏོ ཨེཀམེཝ. ཨནཝསེསསངྑཏཱསངྑཏསམྨུཏིདྷམྨཱརམྨཎཏཱཡ སབྦཉྙུཏཉྙཱཎཾ ¶ ཏཏྠཱཝརཎཱབྷཱཝཏོ ནིསྶངྒཙཱརམུཔཱདཱཡ ཨནཱཝརཎཉཱཎནྟི, ཝིསཡཔྤཝཏྟིམུཁེན པན ཨཉྙེཧི ཨསཱདྷཱརཎབྷཱཝདསྶནཏྠཾ དྭིདྷཱ ཀཏྭཱ ཚལཱ༹སཱདྷཱརཎཉཱཎབྷེདེ ཝུཏྟཾ.

ཀིཾ པནེཏྠ ཀཱརཎཾ ཨཝིཛྫཱསམུགྒྷཱཏོཡེཝེཀོ པཧཱནསམྤཏྟིཝསེན བྷགཝཏོ ཐོམནཱཡ གཡ྄ཧཏི, ན པན སཱཏིསཡཾ ནིརཝསེསཀིལེསཔྤཧཱནནྟི? ཝུཙྩཏེ – ཏཔྤཧཱནཝཙནེནེཝ ཧི ཏདེཀཊྛཏཱཡ སཀལསཾཀིལེསསམུགྒྷཱཏསྶ ཛོཏིཏབྷཱཝཏོ ནིརཝསེསཀིལེསཔྤཧཱནམེཏྠ གཡ྄ཧཏི. ན ཧི སོ སཾཀིལེསོ ཨཏྠི, ཡོ ནིརཝསེསཱཝིཛྫཱསམུགྒྷཱཏནེན ན པཧཱིཡཏཱིཏི. ཨཐ ཝཱ སཀལཀུསལདྷམྨུཔྤཏྟིཡཱ, སཾསཱརནིཝཏྟིཡཱ ཙ ཝིཛྫཱ ཝིཡ ནིརཝསེསཱཀུསལདྷམྨུཔྤཏྟིཡཱ, སཾསཱརཔྤཝཏྟིཡཱ ཙ ཨཝིཛྫཱཡེཝ པདྷཱནཀཱརཎནྟི ཏབྦིགྷཱཏཝཙནེནེཝ སཀལསཾཀིལེསསམུགྒྷཱཏཝཙནསིདྡྷིཏོ སོཡེཝེཀོ གཡ྄ཧཏཱིཏི. ཨཐ ཝཱ སཀལསཾཀིལེསདྷམྨཱནཾ མུདྡྷབྷཱུཏཏྟཱ ཨཝིཛྫཱཡ ཏཾ སམུགྒྷཱཏོཡེཝེཀོ གཡ྄ཧཏི. ཡཐཱཧ –

‘‘ཨཝིཛྫཱ མུདྡྷཱཏི ཛཱནཱཧི, ཝིཛྫཱ མུདྡྷཱདྷིཔཱཏིནཱི;

སདྡྷཱསཏིསམཱདྷཱིཧི, ཚནྡཝཱིརིཡེན སཾཡུཏཱ’’ཏི. (སུ. ནི. ༡༠༣༢; ཙཱུལ༹. ནི. ༥༡);

སནརཱམརལོཀགརུནྟི ཨེཏྠ པན པཋམཔཀཏིཡཱ ཨཝིབྷཱགེན སཏྟོཔི ནརོཏི ཝུཙྩཏི, ཨིདྷ པན དུཏིཡཔཀཏིཡཱ མནུཛཔུརིསོཡེཝ, ཨིཏརཐཱ ལོཀསདྡསྶ ཨཝཏྟབྦཏཱ སིཡཱ. ‘‘ཡཐཱ ཧི པཋམཔཀཏིབྷཱུཏོ སཏྟོ ཨིཏརཱཡ པཀཏིཡཱ སེཊྛཊྛེན པུརེ ཨུཙྩཊྛཱནེ སེཏི པཝཏྟཏཱིཏི པུརིསོཏི ཝུཙྩཏི, ཨེཝཾ ཛེཊྛབྷཱཝཾ ནེཏཱིཏི ནརོཏི. པུཏྟབྷཱཏུབྷཱུཏོཔི ཧི པུགྒལོ མཱཏུཛེཊྛབྷགིནཱིནཾ པིཏུཊྛཱནེ ¶ ཏིཊྛཏི, པགེཝ བྷཏྟུབྷཱུཏོ ཨིཏརཱས’’ནྟི (ཝི. ཨཊྛ. ༤༣-༤༦) ནཱཝཱཝིམཱནཝཎྞནཱཡཾ ཝུཏྟཾ. ཨེཀསེསཔྤཀཔྤནེན པུཐུཝཙནནྟཝིགྒཧེན ཝཱ ནརཱ, མརཎཾ མརོ, སོ ནཏྠི ཡེསནྟི ཨམརཱ, སཧ ནརེཧི, ཨམརེཧི ཙཱཏི སནརཱམརོ.གརཏི ཨུགྒཙྪཏི ཨུགྒཏོ པཱཀཊོ བྷཝཏཱིཏི གརུ, གརསདྡོ ཧི ཨུགྒམེ. ཨཔིཙ པཱསཱཎཙྪཏྟཾ ཝིཡ བྷཱརིཡཊྛེན ‘‘གརཱུ’’ཏི ཝུཙྩཏི.

མཱཏཱཔིཏཱཙརིཡེསུ ¶ , དུཛྫརེ ཨལཧུམྷི ཙ;

མཧནྟེ ཙུགྒཏེ ཙེཝ, ནིཚེཀཱདིཀརེསུ ཙ;

ཏཐཱ ཝཎྞཝིསེསེསུ, གརུསདྡོ པཝཏྟཏི.

ཨིདྷ པན སབྦལོཀཱཙརིཡེ ཏཐཱགཏེ. ཀེཙི པན ‘‘གརུ, གུརཱུཏི ཙ དྭིདྷཱ གཧེཏྭཱ བྷཱརིཡཝཱཙཀཏྟེ གརུསདྡོ, ཨཱཙརིཡཝཱཙཀཏྟེ ཏུ གུརུསདྡོ’’ཏི ཝདནྟི, ཏཾ ན གཧེཏབྦཾ. པཱལི༹ཝིསཡེ ཧི སབྦེསམྤི ཡཐཱཝུཏྟཱནམཏྠཱནཾ ཝཱཙཀཏྟེ གརུསདྡོཡེཝིཙྪིཏབྦོ ཨཀཱརསྶ ཨཱཀཱརབྷཱཝེན ‘‘གཱརཝ’’ནྟི ཏདྡྷིཏནྟཔདསྶ སཝུདྡྷིཀསྶ དསྶནཏོ. སཀྐཏབྷཱསཱཝིསཡེ པན གུརུསདྡོཡེཝིཙྪིཏབྦོ ཨུཀཱརསྶ ཝུདྡྷིབྷཱཝེན ཨཉྙཐཱ ཏདྡྷིཏནྟཔདསྶ དསྶནཏོཏི. སནརཱམརོ ཙ སོ ལོཀོ ཙཱཏི སནརཱམརལོཀོ, ཏསྶ གརཱུཏི ཏཐཱ, ཏཾ སནརཱམརལོཀགརུཾ. ‘‘སནརམརཱུལོཀགརུ’’ནྟིཔི པཋནྟི, ཏདཔི ཨརིཡཱགཱཐཏྟཱ ཝུཏྟིལཀྑཎཏོ, ཨཏྠཏོ ཙ ཡུཏྟམེཝ. ཨཏྠཏོ ཧི དཱིགྷཱཡུཀཱཔི སམཱནཱ ཡཐཱཔརིཙྪེདཾ མརཎསབྷཱཝཏྟཱ མརཱུཏི དེཝཱ ཝུཙྩནྟི. ཨེཏེན དེཝམནུསྶཱནཾ ཝིཡ ཏདཝསིཊྛསཏྟཱནམྤི ཡཐཱརཧཾ གུཎཝིསེསཱཝཧཏཱཡ བྷགཝཏོ ཨུཔཀཱརཀཏཾ དསྶེཏི. ནནུ ཙེཏྠ དེཝམནུསྶཱ པདྷཱནབྷཱུཏཱ, ཨཐ ཀསྨཱ ཏེསཾ ཨཔྤདྷཱནཏཱ ནིདྡིསཱིཡཏཱིཏི? ཨཏྠཏོ པདྷཱནཏཱཡ གཧེཏབྦཏྟཱ. ཨཉྙོ ཧི སདྡཀྐམོ, ཨཉྙོ ཨཏྠཀྐམོཏི སདྡཀྐམཱནུསཱརེན པདྷཱནཱཔདྷཱནབྷཱཝོ ན ཙོདེཏབྦོ. ཨེདིསེསུ ཧི སམཱསཔདེསུ པདྷཱནམྤི ཨཔྤདྷཱནཾ ཝིཡ ནིདྡིསཱིཡཏི ཡཐཱ ཏཾ ‘‘སརཱཛིཀཱཡ པརིསཱཡཱ’’ཏི, ཏསྨཱ སབྦཏྠ ཨཏྠཏོཝ ཨདྷིཔྤཱཡོ གཝེསིཏབྦོ, ན བྱཉྫནམཏྟེན. ཡཐཱཧུ པོརཱཎཱ –

‘‘ཨཏྠཉྷི ནཱཐོ སརཎཾ ཨཝོཙ,

ན བྱཉྫནཾ ལོཀཧིཏོ མཧེསི.

ཏསྨཱ ཨཀཏྭཱ རཏིམཀྑརེསུ,

ཨཏྠེ ནིཝེསེཡྻ མཏིཾ མཏིམཱ’’ཏི. (ཀངྑཱ. ཨཊྛ. པཋམཔཱརཱཛིཀཀཎྜཝཎྞནཱ);

ཀཱམཉྩེཏྠ ¶ སཏྟསངྑཱརབྷཱཛནཝསེན ཏིཝིདྷོ ལོཀོ, གརུབྷཱཝསྶ པན ཨདྷིཔྤེཏཏྟཱ གརུཀརཎསམཏྠསྶེཝ ཡུཛྫནཏོ སཏྟལོཀཝསེན ཨཏྠོ གཧེཏབྦོ. སོ ཧི ལོཀཱིཡནྟི ཨེཏྠ པུཉྙཱཔུཉྙཱནི ¶ , ཏབྦིཔཱཀོ ཙཱཏི ལོཀོ, དསྶནཏྠེ ཙ ལོཀསདྡམིཙྪནྟི སདྡཝིདཱུ. ཨམརགྒཧཎེན ཙེཏྠ ཨུཔཔཏྟིདེཝཱ ཨདྷིཔྤེཏཱ. ཨཔརོ ནཡོ – སམཱུཧཏྠོ ཨེཏྠ ལོཀསདྡོ སམུདཱཡཝསེན ལོཀཱིཡཏི པཉྙཱཔཱིཡཏཱིཏི ཀཏྭཱ. སཧ ནརེཧཱིཏི སནརཱ, ཏེཡེཝ ཨམརཱཏི སནརཱམརཱ, ཏེསཾ ལོཀོ ཏཐཱ, པུརིམནཡེནེཝ ཡོཛེཏབྦཾ. ཨམརསདྡེན ཙེཏྠ ཨུཔཔཏྟིདེཝཱ ཝིཡ ཝིསུདྡྷིདེཝཱཔི སངྒཡ྄ཧནྟི. ཏེཔི ཧི པརམཏྠཏོ མརཎཱབྷཱཝཏོ ཨམརཱ. ཨིམསྨིཾ པན ཨཏྠཝིཀཔྤེ ནརཱམརཱནམེཝ གཧཎཾ ཨུཀྐཊྛནིདྡེསཝསེན ཡཐཱ ‘‘སཏྠཱ དེཝམནུསྶཱན’’ནྟི (དཱི. ནི. ༡.༡༥༧, ༢༥༥). ཏཐཱ ཧི སབྦཱནཏྠཔརིཧཱནཔུབྦངྒམཱཡ ནིརཝསེསཧིཏསུཁཝིདྷཱནཏཔྤརཱཡ ནིརཏིསཡཱཡ པཡོགསམྤཏྟིཡཱ, སདེཝམནུསྶཱཡ པཛཱཡ ཨཙྩནྟམུཔཀཱརིཏཱཡ ཨཔརིམིཏནིརུཔམཔྤབྷཱཝགུཎསམངྒིཏཱཡ ཙ སབྦསཏྟུཏྟམོ བྷགཝཱ ཨཔརིམཱཎཱསུ ལོཀདྷཱཏཱུསུ ཨཔརིམཱཎཱནཾ སཏྟཱནཾ ཨུཏྟམམནཉྙསཱདྷཱརཎཾ གཱརཝཊྛཱནནྟི. ཀཱམཉྩ ཨིཏྠཱིནམྤི ཏཐཱཨུཔཀཱརཏྟཱ བྷགཝཱ གརུཡེཝ, པདྷཱནབྷཱུཏཾ པན ལོཀཾ དསྶེཏུཾ པུརིསལིངྒེན ཝུཏྟནྟི དཊྛབྦཾ. ནེརུཏྟིཀཱ པན ཨཝིསེསནིཙྪིཏཊྛཱནེ ཏཐཱ ནིདྡིཊྛམིཙྪནྟི ཡཐཱ ‘‘ནརཱ ནཱགཱ ཙ གནྡྷབྦཱ, ཨབྷིཝཱདེཏྭཱན པཀྐམུ’’ནྟི (ཨཔ. ༡.༡.༤༨). ཏཐཱ ཙཱཧུ –

‘‘ནཔུཾསཀེན ལིངྒེན, སདྡོདཱཧུ པུམེན ཝཱ;

ནིདྡིསྶཏཱིཏི ཉཱཏབྦམཝིསེསཝིནིཙྪིཏེ’’ཏི.

ཝནྡེཏི ཨེཏྠ པན –

ཝཏྟམཱནཱཡ པཉྩམྱཾ, སཏྟམྱཉྩ ཝིབྷཏྟིཡཾ;

ཨེཏེསུ ཏཱིསུ ཋཱནེསུ, ཝནྡེསདྡོ པཝཏྟཏི.

ཨིདྷ པན ཝཏྟམཱནཱཡཾ ཨཉྙཱསམསམྦྷཝཏོ. ཏཏྠ ཙ ཨུཏྟམཔུརིསཝསེནཏྠོ གཧེཏབྦོ ‘‘ཨཧཾ ཝནྡཱམཱི’’ཏི. ནམནཐུཏིཡཏྠེསུ ཙ ཝནྡསདྡམིཙྪནྟི ཨཱཙརིཡཱ, ཏེན ཙ སུགཏཔདཾ, ནཱཐཔདཾ ཝཱ ཨཛ྄ཛྷཱཧརིཏྭཱ ཡོཛེཏབྦཾ. སོབྷནཾ གཏཾ གམནཾ ཨེཏསྶཱཏི སུགཏོ. གམནཉྩེཏྠ ཀཱཡགམནཾ, ཉཱཎགམནཉྩ, ཀཱཡགམནམྤི ཝིནེཡྻཛནོཔསངྐམནཾ, པཀཏིགམནཉྩཱཏི དུབྦིདྷཾ. བྷགཝཏོ ཧི ཝིནེཡྻཛནོཔསངྐམནཾ ཨེཀནྟེན ཏེསཾ ཧིཏསུཁནིཔྥཱདནཏོ ¶ སོབྷནཾ, ཏཐཱ ལཀྑཎཱནུབྱཉྫནཔཊིམཎྜིཏརཱུཔཀཱཡཏཱཡ དུཏཝིལམྦིཏཁལིཏཱནུཀཌྜྷནནིཔྤཱིལ༹ནུཀྐུཊིཀ-ཀུཊིལཱཀུལཏཱདིདོསརཧིཏ- མཝཧསིཏརཱཛཧཾས- ¶ ཝསབྷཝཱརཎམིགརཱཛགམནཾ པཀཏིགམནཉྩ, ཝིམལཝིཔུལཀརུཎཱསཏིཝཱིརིཡཱདིགུཎཝིསེསསཧིཏམྤི ཉཱཎགམནཾ ཨབྷིནཱིཧཱརཏོ པཊྛཱཡ ཡཱཝ མཧཱབོདྷི, ཏཱཝ ནིརཝཛྫཏཱཡ སོབྷནམེཝཱཏི. ཨཐ ཝཱ ‘‘སཡམྦྷཱུཉཱཎེན སཀལམྤི ལོཀཾ པརིཉྙཱབྷིསམཡཝསེན པརིཛཱནནྟོ སམྨཱ གཏོ ཨཝགཏོཏི སུགཏོ. ཡོ ཧི གཏྱཏྠོ, སོ བུདྡྷཡཏྠོ. ཡོ ཙ བུདྡྷཡཏྠོ, སོ གཏྱཏྠོཏི. ཏཐཱ ལོཀསམུདཡཾ པཧཱནཱབྷིསམཡཝསེན པཛཧནྟོ ཨནུཔྤཏྟིདྷམྨཏམཱཔཱདེནྟོ སམྨཱ གཏོ ཨཏཱིཏོཏི སུགཏོ. ལོཀནིརོདྷཾ སཙྪིཀིརིཡཱབྷིསམཡཝསེན སམྨཱ གཏོ ཨདྷིགཏོཏི སུགཏོ. ལོཀནིརོདྷགཱམིནིཾ པཊིཔདཾ བྷཱཝནཱབྷིསམཡཝསེན སམྨཱ གཏོ པཊིཔནྣོཏི སུགཏོ, ཨཡཉྩཏྠོ ‘སོཏཱཔཏྟིམགྒེན ཡེ ཀིལེསཱ པཧཱིནཱ, ཏེ ཀིལེསེ ན པུནེཏི ན པཙྩེཏི ན པཙྩཱགཙྪཏཱི’ཏི (མཧཱནི. ༣༨; ཙཱུལ༹ནི. ༢༧) སུགཏོཏིཨཱདིནཱ ནིདྡེསནཡེན ཝིབྷཱཝེཏབྦོ.

ཨཔརོ ནཡོ – སུནྡརཾ སམྨཱསམྦོདྷིཾ, ནིབྦཱནམེཝ ཝཱ གཏོ ཨདྷིགཏོཏི སུགཏོ. བྷཱུཏཾ ཏཙྪཾ ཨཏྠསཾཧིཏཾ ཡཐཱརཧཾ ཀཱལཡུཏྟམེཝ ཝཱཙཾ ཝིནེཡྻཱནཾ སམྨཱ གདཏཱིཏི ཝཱ སུགཏོ, ད-ཀཱརསྶ ཏ-ཀཱརཾ ཀཏྭཱ, ཏཾ སུགཏཾ. པུཉྙཱཔུཉྙཀམྨེཧི ཨུཔཔཛྫནཝསེན གནྟབྦཱཏི གཏིཡོ, ཨུཔཔཏྟིབྷཝཝིསེསཱ. ཏཱ པན ནིརཡཱདིབྷེདེན པཉྩཝིདྷཱ, སཀལསྶཱཔི བྷཝགཱམིཀམྨསྶ ཨརིཡམགྒཱདྷིགམེན ཨཝིཔཱཀཱརཧབྷཱཝཀརཎེན ནིཝཏྟིཏཏྟཱ པཉྩཧིཔི ཏཱཧི ཝིསཾཡུཏྟོ ཧུཏྭཱ མུཏྟོཏི གཏིཝིམུཏྟོ. ཨུདྡྷམུདྡྷབྷཝགཱམིནོ ཧི དེཝཱ ཏཾཏཾཀམྨཝིཔཱཀདཱནཀཱལཱནུརཱུཔེན ཏཏོ ཏཏོ བྷཝཏོ མུཏྟཱཔི མུཏྟམཏྟཱཝ, ན པན ཝིསཉྙོགཝསེན མུཏྟཱ, གཏིཔརིཡཱཔནྣཱ ཙ ཏཾཏཾབྷཝགཱམིཀམྨསྶ ཨརིཡམགྒེན ཨནིཝཏྟིཏཏྟཱ, ན ཏཐཱ བྷགཝཱ. བྷགཝཱ པན ཡཐཱཝུཏྟཔྤཀཱརེན ཝིསཾཡུཏྟོ ཧུཏྭཱ མུཏྟོཏི. ཏསྨཱ ཨནེན བྷགཝཏོ ཀཏྠཙིཔི གཏིཡཱ ཨཔརིཡཱཔནྣཏཾ དསྶེཏི. ཡཏོ ཙ བྷགཝཱ ‘‘དེཝཱཏིདེཝོ’’ཏི ཝུཙྩཏི. ཏེནེཝཱཧ –

‘‘ཡེན ¶ དེཝཱུཔཔཏྱསྶ, གནྡྷབྦོ ཝཱ ཝིཧངྒམོ;

ཡཀྑཏྟཾ ཡེན གཙྪེཡྻཾ, མནུསྶཏྟཉྩ ཨབྦཛེ;

ཏེ མཡ྄ཧཾ ཨཱསཝཱ ཁཱིཎཱ, ཝིདྡྷསྟཱ ཝིནལཱི༹ཀཏཱ’’ཏི. (ཨ. ནི. ༤.༣༦);

ཏཾཏཾགཏིསཾཝཏྟནཀཱནཉྷི ཀམྨཀིལེསཱནཾ མཧཱབོདྷིམཱུལེཡེཝ ཨགྒམགྒེན པཧཱིནཏྟཱ ནཏྠི བྷགཝཏོ ཏཾཏཾགཏིཔརིཡཱཔནྣཏཱཏི ཨཙྩནྟམེཝ བྷགཝཱ སབྦབྷཝཡོནིགཏིཝིཉྙཱཎཊྛིཏིསཏྟཱཝཱསསཏྟནིཀཱཡེཧི པརིམུཏྟོཏི. ཨཐ ཝཱ ཀཱམཾ སཨུཔཱདིསེསཱཡཔི ནིབྦཱནདྷཱཏུཡཱ ཏཱཧི གཏཱིཧི ¶ ཝིམུཏྟོ, ཨེསཱ པན ‘‘པཉྙཱཔཛྫོཏཝིཧཏམོཧཏམ’’ནྟི ཨེཏྠེཝནྟོགདྷཱཏི ཨིམིནཱ པདེན ཨནུཔཱདིསེསཱཡ ནིབྦཱནདྷཱཏུཡཱཝ ཐོམེཏཱིཏི དཊྛབྦཾ.

ཨེཏྠ པན ཨཏྟཧིཏསམྤཏྟིཔརཧིཏཔཊིཔཏྟིཝསེན དྭཱིཧཱཀཱརེཧི བྷགཝཏོ ཐོམནཱ ཀཏཱ ཧོཏི. ཏེསུ ཨནཱཝརཎཉཱཎཱདྷིགམོ, སཧ ཝཱསནཱཡ ཀིལེསཱནམཙྩནྟཔྤཧཱནཾ, ཨནུཔཱདིསེསནིབྦཱནཔྤཏྟི ཙ ཨཏྟཧིཏསམྤཏྟི ནཱམ, ལཱབྷསཀྐཱརཱདིནིརཔེཀྑཙིཏྟསྶ པན སབྦདུཀྑནིཡྻཱནིཀདྷམྨདེསནཱཔཡོགཏོ དེཝདཏྟཱདཱིསུཔི ཝིརུདྡྷསཏྟེསུ ནིཙྩཾ ཧིཏཛ྄ཛྷཱསཡཏཱ, ཝིནཱིཏབྦསཏྟཱནཾ ཉཱཎཔརིཔཱཀཀཱལཱགམནཉྩ ཨཱསཡཏོ པརཧིཏཔཊིཔཏྟི ནཱམ. སཱ པན ཨཱསཡཔཡོགཏོ དུཝིདྷཱ, པརཧིཏཔཊིཔཏྟི ཏིཝིདྷཱ ཙ ཨཏྟཧིཏསམྤཏྟི ཨིམཱཡ གཱཐཱཡ ཡཐཱརཧཾ པཀཱསིཏཱ ཧོཏི. ‘‘ཀརུཎཱསཱིཏལཧདཡ’’ནྟི ཧི ཨེཏེན ཨཱསཡཏོ པརཧིཏཔཊིཔཏྟི, སམྨཱ གདནཏྠེན སུགཏསདྡེན པཡོགཏོ པརཧིཏཔཊིཔཏྟི. ‘‘པཉྙཱཔཛྫོཏཝིཧཏམོཧཏམཾ གཏིཝིམུཏྟ’’ནྟི ཨེཏེཧི, ཙཏུསཙྩཔཊིཝེདྷཏྠེན ཙ སུགཏསདྡེན ཏིཝིདྷཱཔི ཨཏྟཧིཏསམྤཏྟི, ཨཝསིཊྛཊྛེན པན ཏེན, ‘‘སནརཱམརལོཀགརུ’’ནྟི ཙ ཨེཏེན སབྦཱཔི ཨཏྟཧིཏསམྤཏྟི, པརཧིཏཔཊིཔཏྟི ཙ པཀཱསིཏཱ ཧོཏི.

ཨཐ ཝཱ ཧེཏུཕལསཏྟཱུཔཀཱརཝསེན ཏཱིཧཱཀཱརེཧི ཐོམནཱ ཀཏཱ. ཏཏྠ ཧེཏུ ནཱམ མཧཱཀརུཎཱསམཱཡོགོ, བོདྷིསམྦྷཱརསམྦྷརཎཉྩ, ཏདུབྷཡམྤི པཋམཔདེན ཡཐཱརུཏཏོ, སཱམཏྠིཡཏོ ཙ པཀཱསིཏཾ. ཕལཾ པན ཉཱཎཔྤཧཱནཨཱནུབྷཱཝརཱུཔཀཱཡསམྤདཱཝསེན ཙཏུབྦིདྷཾ ¶ . ཏཏྠ སབྦཉྙུཏཉཱཎཔདཊྛཱནཾ མགྒཉཱཎཾ, ཏམྨཱུལཀཱནི ཙ དསབལཱདིཉཱཎཱནི ཉཱཎསམྤདཱ, སཝཱསནསཀལསཾཀིལེསཱནམཙྩནྟམནུཔྤཱདདྷམྨཏཱཔཱདནཾ པཧཱནསམྤདཱ, ཡཐིཙྪིཏནིཔྥཱདནེ ཨཱདྷིཔཙྩཾ ཨཱནུབྷཱཝསམྤདཱ, སཀལལོཀནཡནཱབྷིསེཀབྷཱུཏཱ པན ལཀྑཎཱནུབྱཉྫནཔཊིམཎྜིཏཱ ཨཏྟབྷཱཝསམྤཏྟི རཱུཔཀཱཡསམྤདཱ. ཏཱསུ ཉཱཎཔྤཧཱནསམྤདཱ དུཏིཡཔདེན, སཙྩཔཊིཝེདྷཏྠེན ཙ སུགཏསདྡེན པཀཱསིཏཱ, ཨཱནུབྷཱཝསམྤདཱ ཏཏིཡཔདེན, རཱུཔཀཱཡསམྤདཱ སོབྷནཀཱཡགམནཏྠེན སུགཏསདྡེན ལཀྑཎཱནུབྱཉྫནཔཱརིཔཱུརིཡཱ ཝིནཱ ཏདབྷཱཝཏོ. ཡཐཱཝུཏྟཱ དུཝིདྷཱཔི པརཧིཏཔཊིཔཏྟི སཏྟཱུཔཀཱརསམྤདཱ, སཱ པན སམྨཱ གདནཏྠེན སུགཏསདྡེན པཀཱསིཏཱཏི ཝེདིཏབྦཱ.

ཨཔིཙ ཨིམཱཡ གཱཐཱཡ སམྨཱསམྦོདྷི ཏམྨཱུལ – ཏཔྤཊིཔཏྟིཡཱདཡོ ཨནེཀེ བུདྡྷགུཎཱ ཨཱཙརིཡེན པཀཱསིཏཱ ཧོནྟི. ཨེསཱ ཧི ཨཱཙརིཡཱནཾ པཀཏི, ཡདིདཾ ཡེན ཀེནཙི པཀཱརེན ཨཏྠནྟརཝིཉྙཱཔནཾ. ཀཐཾ? ‘‘ཀརུཎཱསཱིཏལཧདཡ’’ནྟི ཧི ཨེཏེན སམྨཱསམྦོདྷིཡཱ མཱུལཾ དསྶེཏི ¶ . མཧཱཀརུཎཱསཉྩོདིཏམཱནསོ ཧི བྷགཝཱ སཾསཱརཔངྐཏོ སཏྟཱནཾ སམུདྡྷརཎཏྠཾ ཀཏཱབྷིནཱིཧཱརོ ཨནུཔུབྦེན པཱརམིཡོ པཱུརེཏྭཱ ཨནུཏྟརཾ སམྨཱསམྦོདྷིམདྷིགཏོཏི ཀརུཎཱ སམྨཱསམྦོདྷིཡཱ མཱུལཾ. ‘‘པཉྙཱཔཛྫོཏཝིཧཏམོཧཏམ’’ནྟི ཨེཏེན སམྨཱསམྦོདྷིཾ དསྶེཏི. སབྦཉྙུཏཉཱཎཔདཊྛཱནཉྷི ཨགྒམགྒཉཱཎཾ, ཨགྒམགྒཉཱཎཔདཊྛཱནཉྩ སབྦཉྙུཏཉྙཱཎཾ ‘‘སམྨཱསམྦོདྷཱི’’ཏི ཝུཙྩཏི. སམྨཱ གམནཏྠེན སུགཏསདྡེན སམྨཱསམྦོདྷིཡཱ པཊིཔཏྟིཾ དསྶེཏི ལཱིནུདྡྷཙྩཔཏིཊྛཱནཱཡཱུཧནཀཱམསུཁཏྟཀིལམཐཱནུཡོགསསྶཏུཙྪེདཱབྷིནིཝེསཱདིཨནྟདྭཡརཧིཏཱཡ ཀརུཎཱཔཉྙཱཔརིགྒཧིཏཱཡ མཛ྄ཛྷིམཱཡ པཊིཔཏྟིཡཱ པཀཱསནཏོ, ཨིཏརེཧི སམྨཱསམྦོདྷིཡཱ པདྷཱནཱཔྤདྷཱནཔྤབྷེདཾ པཡོཛནཾ དསྶེཏི. སཾསཱརམཧོགྷཏོ སཏྟསནྟཱརཎཉྷེཏྠ པདྷཱནཾ, ཏདཉྙམཔྤདྷཱནཾ. ཏེསུ ཙ པདྷཱནེན པཡོཛནེན པརཧིཏཔཊིཔཏྟིཾ དསྶེཏི, ཨིཏརེན ཨཏྟཧིཏསམྤཏྟིཾ, ཏདུབྷཡེན ཙ ཨཏྟཧིཏཔཊིཔནྣཱདཱིསུ ཙཏཱུསུ པུགྒལེསུ བྷགཝཏོ ཙཏུཏྠཔུགྒལབྷཱཝཾ པཀཱསེཏི. ཏེན ཙ ཨནུཏྟརཾ དཀྑིཎེཡྻབྷཱཝཾ, ཨུཏྟམཉྩ ཝནྡནཱིཡབྷཱཝཾ, ཨཏྟནོ ཙ ཝནྡནཱཡ ཁེཏྟངྒཏབྷཱཝཾ ཝིབྷཱཝེཏི.

ཨཔིཙ ཀརུཎཱགྒཧཎེན ལོཀིཡེསུ མཧགྒཏབྷཱཝཔྤཏྟཱསཱདྷཱརཎགུཎདཱིཔནཏོ སབྦལོཀིཡགུཎསམྤཏྟི དསྶིཏཱ, པཉྙཱགྒཧཎེན སབྦཉྙུཏཉྙཱཎཔདཊྛཱནམགྒཉཱཎདཱིཔནཏོ ¶ སབྦལོཀུཏྟརགུཎསམྤཏྟི. ཏདུབྷཡགྒཧཎསིདྡྷོ ཧི ཨཏྠོ ‘‘སནརཱམརལོཀགརུ’’ནྟིཨཱདིནཱ ཝིཔཉྩཱིཡཏཱིཏི. ཀརུཎཱགྒཧཎེན ཙ ནིརུཔཀྐིལེསམུཔགམནཾ དསྶེཏི, པཉྙཱགྒཧཎེན ཨཔགམནཾ. ཏཐཱ ཀརུཎཱགྒཧཎེན ལོཀསམཉྙཱནུརཱུཔཾ བྷགཝཏོ པཝཏྟིཾ དསྶེཏི ལོཀཝོཧཱརཝིསཡཏྟཱ ཀརུཎཱཡ, པཉྙཱགྒཧཎེན ལོཀསམཉྙཱཡ ཨནཏིདྷཱཝནཾ. སབྷཱཝཱནཝབོདྷེན ཧི དྷམྨཱནཾ སབྷཱཝཾ ཨཏིདྷཱཝིཏྭཱ སཏྟཱདིཔརཱམསནཾ ཧོཏི. ཏཐཱ ཀརུཎཱགྒཧཎེན མཧཱཀརུཎཱསམཱཔཏྟིཝིཧཱརཾ དསྶེཏི, པཉྙཱགྒཧཎེན ཏཱིསུ ཀཱལེསུ ཨཔྤཊིཧཏཉཱཎཾ, ཙཏུསཙྩཉཱཎཾ, ཙཏུཔཊིསམྦྷིདཱཉཱཎཾ, ཙཏུཝེསཱརཛྫཉཱཎཾ, ཀརུཎཱགྒཧཎེན མཧཱཀརུཎཱསམཱཔཏྟིཉཱཎསྶ གཧིཏཏྟཱ སེསཱསཱདྷཱརཎཉཱཎཱནི, ཚ ཨབྷིཉྙཱ, ཨཊྛསུ པརིསཱསུ ཨཀམྤནཉཱཎཱནི, དས བལཱནི, ཙུདྡས བུདྡྷགུཎཱ, སོལ༹ས ཉཱཎཙརིཡཱ, ཨཊྛཱརས བུདྡྷདྷམྨཱ, ཙཏུཙཏྟཱརཱིས ཉཱཎཝཏྠཱུནི, སཏྟསཏྟཏི ཉཱཎཝཏྠཱུནཱིཏི ཨེཝམཱདཱིནཾ ཨནེཀེསཾ པཉྙཱཔབྷེདཱནཾ ཝསེན ཉཱཎཙཱརཾ དསྶེཏི. ཏཐཱ ཀརུཎཱགྒཧཎེན ཙརཎསམྤཏྟིཾ, པཉྙཱགྒཧཎེན ཝིཛྫཱསམྤཏྟིཾ. ཀརུཎཱགྒཧཎེན ཨཏྟཱདྷིཔཏིཏཱ, པཉྙཱགྒཧཎེན དྷམྨཱདྷིཔཏིཏཱ. ཀརུཎཱགྒཧཎེན ལོཀནཱཐབྷཱཝོ, པཉྙཱགྒཧཎེན ཨཏྟནཱཐབྷཱཝོ. ཏཐཱ ཀརུཎཱགྒཧཎེན པུབྦཀཱརཱིབྷཱཝོ, པཉྙཱགྒཧཎེན ཀཏཉྙུཏཱ. ཀརུཎཱགྒཧཎེན ཨཔརནྟཔཏཱ, པཉྙཱགྒཧཎེན ཨནཏྟནྟཔཏཱ. ཀརུཎཱགྒཧཎེན ཝཱ བུདྡྷཀརདྷམྨསིདྡྷི, པཉྙཱགྒཧཎེན བུདྡྷབྷཱཝསིདྡྷི. ཏཐཱ ཀརུཎཱགྒཧཎེན པརསནྟཱརཎཾ, པཉྙཱགྒཧཎེན ¶ ཨཏྟསནྟཱརཎཾ. ཏཐཱ ཀརུཎཱགྒཧཎེན སབྦསཏྟེསུ ཨནུགྒཧཙིཏྟཏཱ, པཉྙཱགྒཧཎེན སབྦདྷམྨེསུ ཝིརཏྟཙིཏྟཏཱ དསྶིཏཱ ཧོཏི སབྦེསཉྩ བུདྡྷགུཎཱནཾ ཀརུཎཱ ཨཱདི ཏནྣིདཱནབྷཱཝཏོ, པཉྙཱ པརིཡོསཱནཾ ཏཏོ ཨུཏྟརི ཀརཎཱིཡཱབྷཱཝཏོ. ཨིཏི ཨཱདིཔརིཡོསཱནདསྶནེན སབྦེ བུདྡྷགུཎཱ དསྶིཏཱ ཧོནྟི. ཏཐཱ ཀརུཎཱགྒཧཎེན སཱིལཀྑནྡྷཔུབྦངྒམོ སམཱདྷིཀྑནྡྷོ དསྶིཏོ ཧོཏི. ཀརུཎཱནིདཱནཉྷི སཱིལཾ ཏཏོ པཱཎཱཏིཔཱཏཱདིཝིརཏིཔྤཝཏྟིཏོ, སཱ ཙ ཛྷཱནཏྟཡསམྤཡོགིནཱིཏི, པཉྙཱཝཙནེན པཉྙཱཀྑནྡྷོ. སཱིལཉྩ སབྦབུདྡྷགུཎཱནཾ ཨཱདི, སམཱདྷི མཛ྄ཛྷེ, པཉྙཱ པརིཡོསཱནནྟི ཨེཝམྤི ཨཱདིམཛ྄ཛྷཔརིཡོསཱནཀལྱཱཎཱ སབྦེ བུདྡྷགུཎཱ དསྶིཏཱ ཧོནྟི ནཡཏོ དསྶིཏཏྟཱ. ཨེསོ ཨེཝ ཧི ནིརཝསེསཏོ བུདྡྷགུཎཱནཾ དསྶནུཔཱཡོ, ཡདིདཾ ནཡགྒཱཧཎཾ, ཨཉྙཐཱ ཀོ ¶ ནཱམ སམཏྠོ བྷགཝཏོ གུཎེ ཨནུཔདཾ ནིརཝསེསཏོ དསྶེཏུཾ. ཏེནེཝཱཧ –

‘‘བུདྡྷོཔི བུདྡྷསྶ བྷཎེཡྻ ཝཎྞཾ,

ཀཔྤམྤི ཙེ ཨཉྙམབྷཱསམཱནོ.

ཁཱིཡེཐ ཀཔྤོ ཙིརདཱིགྷམནྟརེ,

ཝཎྞོ ན ཁཱིཡེཐ ཏཐཱགཏསྶཱ’’ཏི.

ཏེནེཝ ཙ ཨཱཡསྨཏཱ སཱརིཔུཏྟཏྠེརེནཱཔི བུདྡྷགུཎཔརིཙྪེདནཾ པཏི བྷགཝཏཱ ཨནུཡུཏྟེན ‘‘ནོ ཧེཏཾ བྷནྟེ’’ཏི པཊིཀྑིཔིཏྭཱ ‘‘ཨཔི ཙ མེ བྷནྟེ དྷམྨནྭཡོ ཝིདིཏོ’’ཏི སམྤསཱདནཱིཡསུཏྟེ ཝུཏྟཾ.

ཨེཝཾ སངྑེཔེན སཀལསབྦཉྙུགུཎེཧི བྷགཝཏོ ཐོམནཱཔུབྦངྒམཾ པཎཱམཾ ཀཏྭཱ ཨིདཱནི སདྡྷམྨསྶཱཔི ཐོམནཱཔུབྦངྒམཾ པཎཱམཾ ཀརོནྟོ ‘‘བུདྡྷོཔཱི’’ཏིཨཱདིམཱཧ. ཏཏྠཱཡཾ སཧ པདསམྦནྡྷེན སངྑེཔཏྠོ – ཡཐཱཝུཏྟཝིཝིདྷགུཎགཎསམནྣཱགཏོ བུདྡྷོཔི ཡཾ ཨརིཡམགྒསངྑཱཏཾ དྷམྨཾ, སཧ པུབྦབྷཱགཔཊིཔཏྟིདྷམྨེན ཝཱ ཨརིཡམགྒབྷཱུཏཾ དྷམྨཾ བྷཱཝེཏྭཱ ཙེཝ ཡཾ ཕལནིབྦཱནསངྑཱཏཾ དྷམྨཾ, པརིཡཏྟིདྷམྨཔཊིཔཏྟིདྷམྨེཧི ཝཱ སཧ ཕལནིབྦཱནབྷཱུཏཾ དྷམྨཾ སཙྪིཀཏྭཱ ཙ སམྨཱསམྦོདྷིསངྑཱཏཾ བུདྡྷབྷཱཝམུཔགཏོ, ཝཱིཏམལམནུཏྟརཾ ཏཾ དྷམྨམྤི ཝནྡེཏི.

ཏཏྠ བུདྡྷསདྡསྶ ཏཱཝ ‘‘བུཛ྄ཛྷིཏཱ སཙྩཱནཱིཏི བུདྡྷོ. བོདྷེཏཱ པཛཱཡཱཏི བུདྡྷོ’’ཏིཨཱདིནཱ ནིདྡེསནཡེན ཨཏྠོ ཝེདིཏབྦོ. ཨཐ ཝཱ ཨགྒམགྒཉཱཎཱདྷིགམེན སཝཱསནཱཡ སམྨོཧནིདྡཱཡ ཨཙྩནྟཝིགམནཏོ, ཨཔརིམིཏགུཎགཎཱལངྐཏསབྦཉྙུཏཉྙཱཎཔྤཏྟིཡཱ ཝིཀསིཏབྷཱཝཏོ ¶ ཙ བུདྡྷཝཱཏི བུདྡྷོ ཛཱགརཎཝིཀསནཏྠཝསེན. ཨཐ ཝཱ ཀསྶཙིཔི ཉེཡྻདྷམྨསྶ ཨནཝབུདྡྷསྶ ཨབྷཱཝེན ཉེཡྻཝིསེསསྶ ཀམྨབྷཱཝཱགཧཎཏོ ཀམྨཝཙནིཙྪཱཡཱབྷཱཝེན ཨཝགམནཏྠཝསེན ཀཏྟུནིདྡེསོཝ ལབྦྷཏི, ཏསྨཱ བུདྡྷཝཱཏི བུདྡྷོཏིཔི ཝཏྟབྦོ. པདེསགྒཧཎེ ཧི ཨསཏི གཧེཏབྦསྶ ནིཔྤདེསཏཱཝ ཝིཉྙཱཡཏི ཡཐཱ ‘‘དིཀྑིཏོ ན དདཱཏཱི’’ཏི. ཨེཝཉྩ ཀཏྭཱ ཀམྨཝིསེསཱནཔེཀྑཱ ཀཏྟརི ཨེཝ བུདྡྷསདྡསིདྡྷི ཝེདིཏབྦཱ, ཨཏྠཏོ ¶ པན པཱརམིཏཱཔརིབྷཱཝིཏོ སཡམྦྷུཉཱཎེན སཧ ཝཱསནཱཡ ཝིཧཏཝིདྡྷསྟནིརཝསེསཀིལེསོམཧཱཀརུཎཱསབྦཉྙུཏཉྙཱཎཱདིཨཔརིམེཡྻགུཎགཎཱདྷཱརོ ཁནྡྷསནྟཱནོ བུདྡྷོ, ཡཐཱཧ –

‘‘བུདྡྷོཏི ཡོ སོ བྷགཝཱ སཡམྦྷཱུ ཨནཱཙརིཡཀོ པུབྦེ ཨནནུསྶུཏེསུ དྷམྨེསུ སཱམཾ སཙྩཱནི ཨབྷིསམྦུཛ྄ཛྷི, ཏཏྠ ཙ སབྦཉྙུཏཾ པཏྟོ, བལེསུ ཙ ཝསཱིབྷཱཝ’’ནྟི (མཧཱནི. ༡༩༢; ཙཱུལ༹ནི. ༩༧; པཊི. མ. ༡༦༡).

ཨཔིསདྡོ སམྦྷཱཝནེ, ཏེན ཨེཝཾ གུཎཝིསེསཡུཏྟོ སོཔི ནཱམ བྷགཝཱ ཨཱིདིསཾ དྷམྨཾ བྷཱཝེཏྭཱ, སཙྪིཀཏྭཱ ཙ བུདྡྷབྷཱཝམུཔགཏོ, ཀཱ ནཱམ ཀཐཱ ཨཉྙེསཾ སཱཝཀཱདིབྷཱཝམུཔགམནེཏི དྷམྨེ སམྦྷཱཝནཾ དཱིཔེཏི. བུདྡྷབྷཱཝནྟི སམྨཱསམྦོདྷིཾ. ཡེན ཧི ནིམིཏྟབྷཱུཏེན སབྦཉྙུཏཉྙཱཎཔདཊྛཱནེན ཨགྒམགྒཉཱཎེན, ཨགྒམགྒཉཱཎཔདཊྛཱནེན ཙ སབྦཉྙུཏཉྙཱཎེན བྷགཝཏི ‘‘བུདྡྷོ’’ཏི ནཱམཾ, ཏདཱརམྨཎཉྩ ཉཱཎཾ པཝཏྟཏི, ཏམེཝིདྷ ‘‘བྷཱཝོ’’ཏི ཝུཙྩཏི. བྷཝནྟི བུདྡྷིསདྡཱ ཨེཏེནཱཏི ཧི བྷཱཝོ. ཏཐཱ ཧི ཝདནྟི –

‘‘ཡེན ཡེན ནིམིཏྟེན, བུདྡྷི སདྡོ ཙ ཝཏྟཏེ;

ཏཾཏཾནིམིཏྟཀཾ བྷཱཝཔཙྩཡེཧི ཨུདཱིརིཏ’’ནྟི.

བྷཱཝེཏྭཱཏི ཨུཔྤཱདེཏྭཱ, ཝཌྜྷེཏྭཱ ཝཱ. སཙྪིཀཏྭཱཏི པཙྩཀྑཾ ཀཏྭཱ. ཙེཝ-སདྡོ ཙ-སདྡོ ཙ ཏདུབྷཡཏྠ སམུཙྩཡེ. ཏེན ཧི སདྡདྭཡེན ན ཀེཝལཾ བྷགཝཱ དྷམྨསྶ བྷཱཝནཱམཏྟེན བུདྡྷབྷཱཝམུཔགཏོ, ནཱཔི སཙྪིཀིརིཡཱམཏྟེན, ཨཐ ཁོ ཏདུབྷཡེནེཝཱཏི སམུཙྩིནོཏི. ཨུཔགཏོཏི པཏྟོ, ཨདྷིགཏོཏི ཨཏྠོ. ཨེཏསྶ ‘‘བུདྡྷབྷཱཝ’’ནྟི པདེན སམྦནྡྷོ. ཝཱིཏམལནྟི ཨེཏྠ ཝིརཧཝསེན ཨེཏི པཝཏྟཏཱིཏི ཝཱིཏོ, མལཏོ ཝཱིཏོ, ཝཱིཏཾ ཝཱ མལཾ ཡསྶཱཏི ཝཱིཏམལོ, ཏཾ ཝཱིཏམལཾ. ‘‘གཏམལ’’ནྟིཔི པཱཋོ དིསྶཏི, ཨེཝཾ སཏི སཨུཔསགྒོ ཝིཡ ཨནུཔསགྒོཔི གཏསདྡོ ཝིརཧཏྠཝཱཙཀོ ཝེདིཏབྦོ དྷཱཏཱུནམནེཀཏྠཏྟཱ. གཙྪཏི ཨཔགཙྪཏཱིཏི ཧི གཏོ, དྷམྨོ ¶ . གཏཾ ཝཱ མལཾ, པུརིམནཡེན སམཱསོ. ཨནུཏྟརནྟི ཨུཏྟརཝིརཧིཏཾ. ཡཐཱནུསིཊྛཾ པཊིཔཛྫམཱནེ ཨཔཱཡཏོ, སཾསཱརཏོ ཙ ཨཔཏམཱནེ ཀཏྭཱ དྷཱརེཏཱིཏི དྷམྨོ, ནཝཝིདྷོ ལོཀུཏྟརདྷམྨོ. ཏཔྤཀཱསནཏྟཱ, སཙྪིཀིརིཡཱསམྨསནཔརིཡཱཡསྶ ཙ ལབྦྷམཱནཏྟཱ པརིཡཏྟིདྷམྨོཔི ཨིདྷ སངྒཧིཏོ ¶ . ཏཐཱ ཧི ‘‘ཨབྷིདྷམྨནཡསམུདྡཾ ཨདྷིགཙྪི, ཏཱིཎི པིཊཀཱནི སམྨསཱི’’ཏི ཙ ཨཊྛཀཐཱཡཾ ཝུཏྟཾ, ཏཐཱ ‘‘ཡཾ དྷམྨཾ བྷཱཝེཏྭཱ སཙྪིཀཏྭཱ’’ཏི ཙ ཝུཏྟཏྟཱ བྷཱཝནཱསཙྪིཀིརིཡཱཡོགྱཏཱཡ བུདྡྷཀརདྷམྨབྷཱུཏཱཧི པཱརམིཏཱཧི སཧ པུབྦབྷཱགཨདྷིསཱིལསིཀྑཱདཡོཔི ཨིདྷ སངྒཧིཏཱཏི ཝེདིཏབྦཱ. ཏཱཔི ཧི ཝིགཏཔཊིཔཀྑཏཱཡ ཝཱིཏམལཱ, ཨནཉྙསཱདྷཱརཎཏཱཡ ཨནུཏྟརཱ ཙ. ཀཐཾ པན ཏཱ བྷཱཝེཏྭཱ, སཙྪིཀཏྭཱ ཙ བྷགཝཱ བུདྡྷབྷཱཝམུཔགཏོཏི? ཝུཙྩཏེ – སཏྟཱནཉྷི སཾསཱརཝཊྚདུཀྑནིསྶརཎཱཡ [ནིསྶརཎཏྠཱཡ (པཎྞཱས ཊཱི.) ནིསྶརཎེ (ཀཏྠཙི)] ཀཏམཧཱབྷིནཱིཧཱརོ མཧཱཀརུཎཱདྷིཝཱསནཔེསལཛ྄ཛྷཱསཡོ པཉྙཱཝིསེསཔརིཡོདཱཏནིམྨལཱནཾ དཱནདམསཉྙམཱདཱིནཾ ཨུཏྟམདྷམྨཱནཾ ཀཔྤཱནཾ སཏསཧསྶཱདྷིཀཱནི ཙཏྟཱརི ཨསངྑྱེཡྻཱནི སཀྐཙྩཾ ནིརནྟརཾ ནིརཝསེསཾ བྷཱཝནཱསཙྪིཀིརིཡཱཧི ཀམྨཱདཱིསུ ཨདྷིགཏཝསཱིབྷཱཝོ ཨཙྪརིཡཱཙིནྟེཡྻམཧཱནུབྷཱཝོ ཨདྷིསཱིལཱདྷིཙིཏྟཱནཾ པརམུཀྐཾསཔཱརམིཔྤཏྟོ བྷགཝཱ པཙྩཡཱཀཱརེ ཙཏུཝཱིསཏིཀོཊིསཏསཧསྶམུཁེན མཧཱཝཛིརཉཱཎཾ པེསེཏྭཱ ཨནུཏྟརཾ སམྨཱསམྦོདྷིསངྑཱཏཾ བུདྡྷབྷཱཝམུཔགཏོཏི.

ཨིམཱཡ པན གཱཐཱཡ ཝིཛྫཱཝིམུཏྟིསམྤདཱདཱིཧི ཨནེཀེཧི གུཎེཧི ཡཐཱརཧཾ སདྡྷམྨཾ ཐོམེཏི. ཀཐཾ? ཨེཏྠ ཧི ‘‘བྷཱཝེཏྭཱ’’ཏི ཨེཏེན ཝིཛྫཱསམྤདཱཡ ཐོམེཏི, ‘‘སཙྪིཀཏྭཱ’’ཏི ཨེཏེན ཝིམུཏྟིསམྤདཱཡ. ཏཐཱ པཋམེན ཛྷཱནསམྤདཱཡ, དུཏིཡེན ཝིམོཀྑསམྤདཱཡ. པཋམེན ཝཱ སམཱདྷིསམྤདཱཡ, དུཏིཡེན སམཱཔཏྟིསམྤདཱཡ. ཨཐ ཝཱ པཋམེན ཁཡཉཱཎབྷཱཝེན, དུཏིཡེན ཨནུཔྤཱདཉཱཎབྷཱཝེན. པཋམེན ཝཱ ཝིཛྫཱུཔམཏཱཡ, དུཏིཡེན ཝཛིརཱུཔམཏཱཡ. པཋམེན ཝཱ ཝིརཱགསམྤཏྟིཡཱ, དུཏིཡེན ནིརོདྷསམྤཏྟིཡཱ. ཏཐཱ པཋམེན ནིཡྻཱནབྷཱཝེན, དུཏིཡེན ནིསྶརཎབྷཱཝེན. པཋམེན ཝཱ ཧེཏུབྷཱཝེན, དུཏིཡེན ཨསངྑཏབྷཱཝེན. པཋམེན ཝཱ དསྶནབྷཱཝེན, དུཏིཡེན ཝིཝེཀབྷཱཝེན. པཋམེན ཝཱ ཨདྷིཔཏིབྷཱཝེན, དུཏིཡེན ཨམཏབྷཱཝེན དྷམྨཾ ཐོམེཏི. ཨཐ ཝཱ ‘‘ཡཾ དྷམྨཾ བྷཱཝེཏྭཱ བུདྡྷབྷཱཝཾ ཨུཔགཏོ’’ཏི ཨེཏེན སྭཱཀྑཱཏཏཱཡ དྷམྨཾ ཐོམེཏི, ‘‘སཙྪིཀཏྭཱ’’ཏི ཨེཏེན སནྡིཊྛིཀཏཱཡ. ཏཐཱ པཋམེན ཨཀཱལིཀཏཱཡ, དུཏིཡེན ཨེཧིཔསྶིཀཏཱཡ. པཋམེན ཝཱ ཨོཔནེཡྻིཀཏཱཡ, དུཏིཡེན པཙྩཏྟཾཝེདིཏབྦཏཱཡ. པཋམེན ཝཱ སཧ པུབྦབྷཱགསཱིལཱདཱིཧི སེཀྑེཧི སཱིལསམཱདྷིཔཉྙཱཀྑནྡྷེཧི ¶ , དུཏིཡེན སཧ ཨསངྑཏདྷཱཏུཡཱ ཨསེཀྑེཧི དྷམྨཾ ཐོམེཏི.

‘‘ཝཱིཏམལ’’ནྟི ¶ ཨིམིནཱ པན སཾཀིལེསཱབྷཱཝདཱིཔནེན ཝིསུདྡྷཏཱཡ དྷམྨཾ ཐོམེཏི, ‘‘ཨནུཏྟར’’ནྟི ཨེཏེན ཨཉྙསྶ ཝིསིཊྛསྶ ཨབྷཱཝདཱིཔནེན པརིཔུཎྞཏཱཡ. པཋམེན ཝཱ པཧཱནསམྤདཱཡ, དུཏིཡེན སབྷཱཝསམྤདཱཡ. པཋམེན ཝཱ བྷཱཝནཱཕལཡོགྱཏཱཡ. བྷཱཝནཱགུཎེན ཧི སོ སཾཀིལེསམལསམུགྒྷཱཏཀོ, ཏསྨཱནེན བྷཱཝནཱཀིརིཡཱཡ ཕལམཱཧ. དུཏིཡེན སཙྪིཀིརིཡཱཕལཡོགྱཏཱཡ. ཏདུཏྟརིཀརཎཱིཡཱབྷཱཝཏོ ཧི ཨནཉྙསཱདྷཱརཎཏཱཡ ཨནུཏྟརབྷཱཝོ སཙྪིཀིརིཡཱནིབྦཏྟིཏོ, ཏསྨཱནེན སཙྪིཀིརིཡཱཕལམཱཧཱཏི.

ཨེཝཾ སངྑེཔེནེཝ སབྦསདྡྷམྨགུཎེཧི སདྡྷམྨསྶཱཔི ཐོམནཱཔུབྦངྒམཾ པཎཱམཾ ཀཏྭཱ ཨིདཱནི ཨརིཡསངྒྷསྶཱཔི ཐོམནཱཔུབྦངྒམཾ པཎཱམཾ ཀརོནྟོ ‘‘སུགཏསྶ ཨོརསཱན’’ནྟིཨཱདིམཱཧ. ཏཏྠ སུགཏསྶཱཏི སམྦནྡྷནིདྡེསོ, ‘‘པུཏྟཱན’’ནྟི ཨེཏེན སམྦཛ྄ཛྷིཏབྦོ. ཨུརསི བྷཝཱ, ཛཱཏཱ, སཾཝུདྡྷཱ ཝཱ ཨོརསཱ, ཨཏྟཛོ ཁེཏྟཛོ ཨནྟེཝཱསིཀོ དིནྣཀོཏི ཙཏུབྦིདྷེསུ པུཏྟེསུ ཨཏྟཛཱ, ཏཾསརིཀྑཏཱཡ པན ཨརིཡཔུགྒལཱ ‘‘ཨོརསཱ’’ཏི ཝུཙྩནྟི. ཡཐཱ ཧི མནུསྶཱནཾ ཨོརསཔུཏྟཱ ཨཏྟཛཱཏཏཱཡ པིཏུསནྟཀསྶ དཱཡཛྫསྶ ཝིསེསབྷཱགིནོ ཧོནྟི, ཨེཝམེཏེཔི སདྡྷམྨསཝནནྟེ ཨརིཡཱཡ ཛཱཏིཡཱ ཛཱཏཏཱཡ བྷགཝཏོ སནྟཀསྶ ཝིམུཏྟིསུཁསྶ དྷམྨརཏནསྶ ཙ དཱཡཛྫསྶ ཝིསེསབྷཱགིནོཏི. ཨཐ ཝཱ བྷགཝཏོ དྷམྨདེསནཱནུབྷཱཝེན ཨརིཡབྷཱུམིཾ ཨོཀྐམམཱནཱ, ཨོཀྐནྟཱ ཙ ཨརིཡསཱཝཀཱ བྷགཝཏོ ཨུརེ ཝཱཡཱམཛནིཏཱབྷིཛཱཏཏཱཡ སདིསཀཔྤནམནྟརེན ནིཔྤརིཡཱཡེནེཝ ‘‘ཨོརསཱ’’ཏི ཝཏྟབྦཏམརཧནྟི. ཏཐཱ ཧི ཏེ བྷགཝཏཱ ཨཱསཡཱནུསཡཙརིཡཱདྷིམུཏྟིཨཱདིཨོལོཀནེན, ཝཛྫཱནུཙིནྟནེན ཙ ཧདཡེ ཀཏྭཱ ཝཛྫཏོ ནིཝཱརེཏྭཱ ཨནཝཛྫེ པཏིཊྛཱཔེནྟེན སཱིལཱདིདྷམྨསརཱིརཔོསནེན སཾཝཌྜྷཱཔིཏཱ. ཡཐཱཧ བྷགཝཱ ཨིཏིཝུཏྟཀེ ‘‘ཨཧམསྨི བྷིཀྑཝེ བྲཱཧྨཎོ…པེ… ཏསྶ མེ ཏུམྷེ པུཏྟཱ ཨོརསཱ མུཁཏོ ཛཱཏཱ’’ཏིཨཱདི (ཨིཏིཝུ. ༡༠༠). ནནུ སཱཝཀདེསིཏཱཔི དེསནཱ ཨརིཡབྷཱཝཱཝཧཱཏི? སཙྩཾ, སཱ པན ཏམྨཱུལིཀཏྟཱ, ལཀྑཎཱདིཝིསེསཱབྷཱཝཏོ ཙ ‘‘བྷགཝཏོ དྷམྨདེསནཱ’’ ¶ ཨིཙྩེཝ སངྑྱཾ གཏཱ, ཏསྨཱ བྷགཝཏོ ཨོརསཔུཏྟབྷཱཝོཡེཝ ཏེསཾ ཝཏྟབྦོཏི, ཨེཏེན ཙཏུབྦིདྷེསུ པུཏྟེསུ ཨརིཡསངྒྷསྶ ཨཏྟཛཔུཏྟབྷཱཝཾ དསྶེཏི. ཨཏྟནོ ཀུལཾ པུནེནྟི སོདྷེནྟི, མཱཏཱཔིཏཱུནཾ ཝཱ ཧདཡཾ པཱུརེནྟཱིཏི པུཏྟཱ, ཨཏྟཛཱདཡོ. ཨརིཡཱ པན དྷམྨཏནྟིཝིསོདྷནེན, དྷམྨཱནུདྷམྨཔཊིཔཏྟིཡཱ ཙིཏྟཱརཱདྷནེན ཙ ཏཔྤཊིབྷཱགཏཱཡ བྷགཝཏོ པུཏྟཱ ནཱམ, ཏེསཾ. ཏསྶ ‘‘སམཱུཧ’’ནྟི པདེན སམྦནྡྷོ.

སཾཀིལེསནིམིཏྟཾ ཧུཏྭཱ གུཎཾ མཱརེཏི ཝིབཱདྷཏཱིཏི མཱརོ, དེཝཔུཏྟམཱརོ. སིནཱཏི པརེ བནྡྷཏི ཨེཏཱཡཱཏི སེནཱ, མཱརསྶ སེནཱ ཏཐཱ, མཱརཉྩ མཱརསེནཉྩ མཐེནྟི ཝིལོཐེནྟཱིཏི མཱརསེནམཐནཱ ¶ , ཏེསཾ. ‘‘མཱརམཱརསེནམཐནཱན’’ནྟི ཧི ཝཏྟབྦེཔི ཨེཀདེསསརཱུཔེཀསེསཝསེན ཨེཝཾ ཝུཏྟཾ. མཱརསདྡསནྣིདྷཱནེན ཝཱ སེནཱསདྡེན མཱརསེནཱ གཧེཏབྦཱ, གཱཐཱབནྡྷཝསེན ཙེཏྠ རསྶོ. ‘‘མཱརསེནམདྡནཱན’’ནྟིཔི ཀཏྠཙི པཱཋོ, སོ ཨཡུཏྟོཝ ཨརིཡཱཛཱཏིཀཏྟཱ ཨིམིསྶཱ གཱཐཱཡ. ནནུ ཙ ཨརིཡསཱཝཀཱནཾ མགྒཱདྷིགམསམཡེ བྷགཝཏོ ཝིཡ ཏདནྟརཱཡཀརཎཏྠཾ དེཝཔུཏྟམཱརོ ཝཱ མཱརསེནཱ ཝཱ ན ཨཔསཱདེཏི, ཨཐ ཀསྨཱ ཨེཝཾ ཝུཏྟནྟི? ཨཔསཱདེཏབྦབྷཱཝཀཱརཎསྶ ཝིམཐིཏཏྟཱ. ཏེསཉྷི ཨཔསཱདེཏབྦཏཱཡ ཀཱརཎེ སཾཀིལེསེ ཝིམཐིཏེ ཏེཔི ཝིམཐིཏཱ ནཱམ ཧོནྟཱིཏི. ཨཐ ཝཱ ཁནྡྷཱབྷིསངྑཱརམཱརཱནཾ ཝིཡ དེཝཔུཏྟམཱརསྶཱཔི གུཎམཱརཎེ སཧཱཡབྷཱཝཱུཔགམནཏོ ཀིལེསབལཀཱཡོ ཨིདྷ ‘‘མཱརསེནཱ’’ཏི ཝུཙྩཏི ཡཐཱཧ བྷགཝཱ –

‘‘ཀཱམཱ ཏེ པཋམཱ སེནཱ, དུཏིཡཱ ཨརཏི ཝུཙྩཏི;

ཏཏིཡཱ ཁུཔྤིཔཱསཱ ཏེ, ཙཏུཏྠཱི ཏཎྷཱ པཝུཙྩཏི.

པཉྩམཾ ཐིནམིདྡྷཾ ཏེ, ཚཊྛཱ བྷཱིརཱུ པཝུཙྩཏི;

སཏྟམཱི ཝིཙིཀིཙྪཱ ཏེ, མཀྑོ ཐམྦྷོ ཏེ ཨཊྛམོ.

ལཱབྷོ སིལོཀོ སཀྐཱརོ,

མིཙྪཱལདྡྷོ ཙ ཡོ ཡསོ;

ཡོ ཙཏྟཱནཾ སམུཀྐཾསེ,

པརེ ཙ ཨཝཛཱནཏི.

ཨེསཱ ¶ ནམུཙི ཏེ སེནཱ, ཀཎྷསྶཱབྷིཔྤཧཱརིནཱི;

ན ནཾ ཨསཱུརོ ཛིནཱཏི, ཛེཏྭཱ ཙ ལབྷཏེ སུཁ’’ནྟི. (སུ. ནི. ༤༣༨; མཧཱནི. ༢༨; ཙཱུལ༹ནི. ༤༧);

སཱ ཙ ཏེཧི ཨརིཡསཱཝཀེཧི དིཡཌྜྷསཧསྶབྷེདཱ, ཨནནྟབྷེདཱ ཝཱ ཀིལེསཝཱཧིནཱི སཏིདྷམྨཝིཙཡཝཱིརིཡསམཐཱདིགུཎཔཧརཎཱིཧི ཨོདྷིསོ མཐིཏཱ, ཝིདྡྷཾསིཏཱ, ཝིཧཏཱ ཙ, ཏསྨཱ ‘‘མཱརསེནམཐནཱ’’ཏི ཝུཙྩནྟི. ཝིལོཐནཉྩེཏྠ ཝིདྡྷཾསནཾ, ཝིཧནནཾ ཝཱ. ཨཔིཙ ཁནྡྷཱབྷིསངྑཱརམཙྩུདེཝཔུཏྟམཱརཱནཾ ཏེསཾ སཧཱཡབྷཱཝཱུཔགམནཏཱཡ སེནཱསངྑཱཏསྶ ཀིལེསམཱརསྶ ཙ མཐནཏོ ‘‘མཱརསེནམཐནཱ’’ཏིཔི ཨཏྠོ གཧེཏབྦོ. ཨེཝཉྩ སཏི པཉྩམཱརནིམྨཐནབྷཱཝེན ཨཏྠོ པརིཔུཎྞོ ཧོཏི. ཨརིཡསཱཝཀཱཔི ཧི སམུདཡཔྤཧཱནཔརིཉྙཱཝསེན ཁནྡྷམཱརཾ, སཧཱཡཝེཀལླཀརཎེན ¶ སབྦཐཱ, ཨཔྤཝཏྟིཀརཎེན ཙ ཨབྷིསངྑཱརམཱརཾ, བལཝིདྷམནཝིསཡཱཏིཀྐམནཝསེན མཙྩུམཱརཾ, དེཝཔུཏྟམཱརཉྩ སམུཙྪེདཔྤཧཱནཝསེན སབྦསོ ཨཔྤཝཏྟིཀརཎེན ཀིལེསམཱརཾ མཐེནྟཱིཏི, ཨིམིནཱ པན ཏེསཾ ཨོརསཔུཏྟབྷཱཝེ ཀཱརཎཾ, ཏཱིསུ པུཏྟེསུ ཙ ཨནུཛཱཏཏཾ དསྶེཏི. མཱརསེནམཐནཏཱཡ ཧི ཏེ བྷགཝཏོ ཨོརསཔུཏྟཱ, ཨནུཛཱཏཱ ཙཱཏི.

ཨཊྛནྣནྟི གཎནཔརིཙྪེདོ, ཏེནསཏིཔི ཏེསཾ ཏཾཏཾབྷེདེན ཨནེཀསཏསཧསྶསངྑྱཱབྷེདེ ཨརིཡབྷཱཝཀརམགྒཕལདྷམྨབྷེདེན ཨིམཾ གཎནཔརིཙྪེདཾ ནཱཏིཝཏྟནྟི མགྒཊྛཕལཊྛབྷཱཝཱནཏིཝཏྟནཏོཏི དསྶེཏི. པི-སདྡོ, ཨཔི-སདྡོ ཝཱ པདལཱིལཱ༹དིནཱ ཀཱརཎེན ཨཊྛཱནེ པཡུཏྟོ, སོ ‘‘ཨརིཡསངྒྷ’’ནྟི ཨེཏྠ ཡོཛེཏབྦོ, ཏེན ན ཀེཝལཾ བུདྡྷདྷམྨེཡེཝ, ཨཐ ཁོ ཨརིཡསངྒྷམྤཱིཏི སམྤིཎྜེཏི. ཡདིཔི ཨཝཡཝཝིནིམུཏྟོ སམུདཱཡོ ནཱམ ཀོཙི ནཏྠི ཨཝཡཝཾ ཨུཔཱདཱཡ སམུདཱཡསྶ ཝཏྟབྦཏྟཱ, ཨཝིཉྙཱཡམཱནསམུདཱཡཾ པན ཝིཉྙཱཡམཱནསམུདཱཡེན ཝིསེསིཏུམརཧཏཱིཏི ཨཱཧ ‘‘ཨཊྛནྣམྤི སམཱུཧ’’ནྟི, ཨེཏེན ‘‘ཨརིཡསངྒྷ’’ནྟི ཨེཏྠ ན ཡེན ཀེནཙི སཎྛཱནཱདིནཱ, ཀཱཡསཱམགྒིཡཱ ཝཱ སམུདཱཡབྷཱཝོ, ཨཔི ཏུ མགྒཊྛཕལཊྛབྷཱཝེནེཝཱཏི ཝིསེསེཏི. ཨཝཡཝམེཝ སམྤིཎྜེཏྭཱ ཨཱུཧིཏབྦོ ཝིཏཀྐེཏབྦོ, སཾཨཱུཧནིཏབྦོ ཝཱ སངྒྷཊིཏབྦོཏི སམཱུཧོ, སོཡེཝ སམོཧོ ཝཙནསིལིཊྛཏཱདིནཱ. དྭིདྷཱཔི ཧི པཱཋོ ཡུཛྫཏི. ཨཱརཀཏྟཱ ཀིལེསེཧི, ཨནཡེ ན ཨིརིཡནཏོ, ཨཡེ ཙ ཨིརིཡནཏོ ཨརིཡཱ ནིརུཏྟིནཡེན ¶ . ཨཐ ཝཱ སདེཝཀེན ལོཀེན སརཎནྟི ཨརཎཱིཡཏོ ཨུཔགནྟབྦཏོ, ཨུཔགཏཱནཉྩ ཏདཏྠསིདྡྷིཏོ ཨརིཡཱ, དིཊྛིསཱིལསཱམཉྙེན སཾཧཏོ, སམགྒཾ ཝཱ ཀམྨཾ སམུདཱཡཝསེན སམུཔགཏོཏི སངྒྷོ, ཨརིཡཱནཾ སངྒྷོ, ཨརིཡོ ཙ སོ སངྒྷོ ཙ ཡཐཱཝུཏྟནཡེནཱཏི ཝཱ ཨརིཡསངྒྷོ, ཏཾ ཨརིཡསངྒྷཾ. བྷགཝཏོ ཨཔརབྷཱགེ བུདྡྷདྷམྨརཏནཱནམྤི སམདྷིགམོ སངྒྷརཏནཱདྷཱིནོཏི ཨརིཡསངྒྷསྶ བཧཱུཔཀཱརཏཾ དསྶེཏུཾ ཨིདྷེཝ ‘‘སིརསཱ ཝནྡེ’’ཏི ཝུཏྟཾ. ཨཝསྶཉྩཱཡམཏྠོ སམྤཊིཙྪིཏབྦོ ཝིནཡཊྛཀཐཱདཱིསུཔི (པཱརཱ. ཨཊྛ. གནྠཱརམྦྷཀཐཱ) ཏཐཱ ཝུཏྟཏྟཱ. ཀེཙི པན པུརིམགཱཐཱསུཔི ཏཾ པདམཱནེཏྭཱ ཡོཛེནྟི, ཏདཡུཏྟམེཝ རཏནཏྟཡསྶ ཨསཱདྷཱརཎགུཎཔྤཀཱསནཊྛཱནཏྟཱ, ཡཐཱཝུཏྟཀཱརཎསྶ ཙ སབྦེསམྤི སཾཝཎྞནཱཀཱརཱནམདྷིཔྤེཏཏྟཱཏི.

ཨིམཱཡ པན གཱཐཱཡ ཨརིཡསངྒྷསྶ པབྷཝསམྤདཱ པཧཱནསམྤདཱདཡོ ཨནེཀེ གུཎཱ དསྶིཏཱ ཧོནྟི. ཀཐཾ? ‘‘སུགཏསྶ ཨོརསཱནཾ པུཏྟཱན’’ནྟི ཧི ཨེཏེན ཨརིཡསངྒྷསྶ པབྷཝསམྤདཾ དསྶེཏི སམྨཱསམྦུདྡྷཔབྷཝཏཱདཱིཔནཏོ. ‘‘མཱརསེནམཐནཱན’’ནྟི ཨེཏེན པཧཱནསམྤདཾ སཀལསཾཀིལེསཔྤཧཱནདཱིཔནཏོ. ‘‘ཨཊྛནྣམྤི སམཱུཧ’’ནྟི ཨེཏེན ཉཱཎསམྤདཾ མགྒཊྛཕལཊྛབྷཱཝདཱིཔནཏོ ¶ . ‘‘ཨརིཡསངྒྷ’’ནྟི ཨེཏེན སབྷཱཝསམྤདཾ སབྦསངྒྷཱནཾ ཨགྒབྷཱཝདཱིཔནཏོ. ཨཐ ཝཱ ‘‘སུགཏསྶ ཨོརསཱནཾ པུཏྟཱན’’ནྟི ཨརིཡསངྒྷསྶ ཝིསུདྡྷནིསྶཡབྷཱཝདཱིཔནཾ. ‘‘མཱརསེནམཐནཱན’’ནྟི སམྨཱཨུཛུཉཱཡསཱམཱིཙིཔཊིཔནྣབྷཱཝདཱིཔནཾ. ‘‘ཨཊྛནྣམྤི སམཱུཧ’’ནྟི ཨཱཧུནེཡྻཱདིབྷཱཝདཱིཔནཾ. ‘‘ཨརིཡསངྒྷ’’ནྟི ཨནུཏྟརཔུཉྙཀྑེཏྟབྷཱཝདཱིཔནཾ. ཏཐཱ ‘‘སུགཏསྶ ཨོརསཱནཾ པུཏྟཱན’’ནྟི ཨེཏེན ཨརིཡསངྒྷསྶ ལོཀུཏྟརསརཎགམནསབྦྷཱཝཾ དསྶེཏི. ལོཀུཏྟརསརཎགམནེན ཧི ཏེ བྷགཝཏོ ཨོརསཔུཏྟཱ ཛཱཏཱ. ‘‘མཱརསེནམཐནཱན’ནྟི ཨེཏེན ཨབྷིནཱིཧཱརསམྤདཱསིདྡྷཾ པུབྦབྷཱགསམྨཱཔཊིཔཏྟིཾ དསྶེཏི. ཀཏཱབྷིནཱིཧཱརཱ ཧི སམྨཱཔཊིཔནྣཱ མཱརཾ, མཱརསེནཾ ཝཱ ཨབྷིཝིཛིནནྟི. ‘‘ཨཊྛནྣམྤི སམཱུཧ’’ནྟི ཨེཏེན ཝིདྡྷསྟཝིཔཀྑེ སེཀྑཱསེཀྑདྷམྨེ དསྶེཏི པུགྒལཱདྷིཊྛཱནེན མགྒཕལདྷམྨཱནཾ དསྶིཏཏྟཱ. ‘‘ཨརིཡསངྒྷ’’ནྟི ཨེཏེན ཨགྒདཀྑིཎེཡྻབྷཱཝཾ དསྶེཏི ཨནུཏྟརཔུཉྙཀྑེཏྟབྷཱཝསྶ དསྶིཏཏྟཱ. སརཎགམནཉྩ སཱཝཀཱནཾ སབྦགུཎསྶ ཨཱདི, སཔུབྦབྷཱགཔཊིཔདཱ སེཀྑཱ སཱིལཀྑནྡྷཱདཡོ མཛ྄ཛྷེ, ཨསེཀྑཱ སཱིལཀྑནྡྷཱདཡོ ¶ པརིཡོསཱནནྟིཨཱདིམཛ྄ཛྷཔརིཡོསཱནཀལྱཱཎཱ སངྑེཔཏོ སབྦེཔི ཨརིཡསངྒྷགུཎཱ དསྶིཏཱ ཧོནྟཱིཏི.

ཨེཝཾ གཱཐཱཏྟཡེན སངྑེཔཏོ སཀལགུཎསཾཀིཏྟནམུཁེན རཏནཏྟཡསྶ པཎཱམཾ ཀཏྭཱ ཨིདཱནི ཏཾ ནིཔཙྩཀཱརཾ ཡཐཱདྷིཔྤེཏཔཡོཛནེ པརིཎཱམེནྟོ ‘‘ཨིཏི མེ’’ཏིཨཱདིམཱཧ. ཏཏྠ ཨིཏི-སདྡོ ནིདསྶནེ. ཏེན གཱཐཱཏྟཡེན ཡཐཱཝུཏྟནཡཾ ནིདསྶེཏི. མེཏི ཨཏྟཱནཾ ཀརཎཝཙནེན ཀཏྟུབྷཱཝེན ནིདྡིསཏི. ཏསྶ ‘‘ཡཾ པུཉྙཾ མཡཱ ལདྡྷ’’ནྟི པཱཋསེསེན སམྦནྡྷོ, སམྤདཱནནིདྡེསོ ཝཱ ཨེསོ, ‘‘ཨཏྠཱི’’ཏི པཱཋསེསོ, སཱམིནིདྡེསོ ཝཱ ‘‘ཡཾ མམ པུཉྙཾ ཝནྡནཱམཡ’’ནྟི. པསཱིདཱིཡཏེ པསནྣཱ, ཏཱདིསཱ མཏི པཉྙཱ, ཙིཏྟཾ ཝཱ ཡསྶཱཏི པསནྣམཏི, ཨཉྙཔདལིངྒཔྤདྷཱནཏྟཱ ཨིམསྶ སམཱསཔདསྶ ‘‘པསནྣམཏིནོ’’ཏི ཝུཏྟཾ. རཏིཾ ནཡཏི, ཛནེཏི, ཝཧཏཱིཏི ཝཱ རཏནཾ, སཏྟཝིདྷཾ, དསཝིདྷཾ ཝཱ རཏནཾ, ཏམིཝ ཨིམཱནཱིཏི ནེརུཏྟིཀཱ. སདིསཀཔྤནམཉྙཏྲ པན ཡཐཱཝུཏྟཝཙནཏྠེནེཝ བུདྡྷཱདཱིནཾ རཏནབྷཱཝོ ཡུཛྫཏི. ཏེསཉྷི ‘‘ཨིཏིཔི སོ བྷགཝཱ’’ཏིཨཱདིནཱ (དཱི. ནི. ༡.༡༥༧, ༢༥༥) ཡཐཱབྷཱུཏགུཎེ ཨཱཝཛྫནྟསྶ ཨམཏཱདྷིགམཧེཏུབྷཱུཏཾ ཨནཔྤཀཾ པཱིཏིཔཱམོཛྫཾ ཨུཔྤཛྫཏི. ཡཐཱཧ –

‘‘ཡསྨིཾ མཧཱནཱམ སམཡེ ཨརིཡསཱཝཀོ ཏཐཱགཏཾ ཨནུསྶརཏི, ནེཝསྶ ཏསྨིཾ སམཡེ རཱགཔརིཡུཊྛིཏཾ ཙིཏྟཾ ཧོཏི, ན དོས…པེ… ན མོཧ…པེ… ཨུཛུགཏམེཝསྶ ཏསྨིཾ སམཡེ ཙིཏྟཾ ཧོཏི ཏཐཱགཏཾ ཨཱརབྦྷ. ཨུཛུགཏཙིཏྟོ ཁོ པན མཧཱནཱམ ཨརིཡསཱཝཀོ ¶ ལབྷཏི ཨཏྠཝེདཾ, ལབྷཏི དྷམྨཝེདཾ, ལབྷཏི དྷམྨཱུཔསཾཧིཏཾ པཱམོཛྫཾ, པམུདིཏསྶ པཱིཏི ཛཱཡཏཱི’’ཏིཨཱདི (ཨ. ནི. ༦.༡༠; ༡༡.༡༡).

ཙིཏྟཱིཀཏཱདིབྷཱཝོ ཝཱ རཏནཊྛོ. ཝུཏྟཉྷེཏཾ ཨཊྛཀཐཱསུ –

‘‘ཙིཏྟཱིཀཏཾ མཧགྒྷཉྩ, ཨཏུལཾ དུལླབྷདསྶནཾ;

ཨནོམསཏྟཔརིབྷོགཾ, རཏནཾ ཏེན ཝུཙྩཏཱི’’ཏི. (ཁུ. པཱ. ཨཊྛ. ༦.༣; ཨུདཱན. ཨཊྛ. ༤༧; དཱི. ནི. ཨཊྛ. ༢.༣༣; སུ. ནི. ༡.༢༢༦; མཧཱནི. ཨཊྛ. ༡.༢༢༦);

ཙིཏྟཱིཀཏབྷཱཝཱདཡོ ཙ ཨནཉྙསཱདྷཱརཎཱ སཱཏིསཡཏོ བུདྡྷཱདཱིསུཡེཝ ལབྦྷནྟཱིཏི. ཝིཏྠཱརོ རཏནསུཏྟཝཎྞནཱཡཾ (ཁུ. པཱ. ཨཊྛ. ༦.༣; སུ. ནི. ཨཊྛ. ༡.༢༢༦) གཧེཏབྦོ. ཨཡམཏྠོ ¶ པན ནིབྦཙནཏྠཝསེན ན ཝུཏྟོ, ཨཐ ཀེནཱཏི ཙེ? ལོཀེ རཏནསམྨཏསྶ ཝཏྠུནོ གརུཀཱཏབྦཏཱདིཨཏྠཝསེནཱཏི སདྡཝིདཱུ. སཱདྷཱུནཉྩ རམནཏོ, སཾསཱརཎྞཝཱ ཙ ཏརཎཏོ, སུགཏིནིབྦཱནཉྩ ནཡནཏོ རཏནཾ ཏུལྱཏྠསམཱསཝསེན, ཨལམཏིཔཔཉྩེན. ཨེཀསེསཔཀཔྤནེན, པུཐུཝཙནནིབྦཙནེན ཝཱ རཏནཱནི. ཏིཎྞཾ སམཱུཧོ, ཏཱིཎི ཝཱ སམཱཧཊཱནི, ཏཡོ ཝཱ ཨཝཡཝཱ ཨསྶཱཏི ཏཡཾ, རཏནཱནམེཝ ཏཡཾ, ནཱཉྙེསནྟི རཏནཏྟཡཾ. ཨཝཡཝཝིནིམུཏྟསྶ པན སམུདཱཡསྶ ཨབྷཱཝཏོ ཏཱིཎི ཨེཝ རཏནཱནི ཏཐཱ ཝུཙྩནྟི, ན སམུདཱཡམཏྟཾ, སམུདཱཡཱཔེཀྑཱཡ པན ཨེཀཝཙནཾ ཀཏཾ. ཝནྡཱིཡཏེ ཝནྡནཱ, སཱཝ ཝནྡནཱམཡཾ ཡཐཱ ‘‘དཱནམཡཾ སཱིལམཡ’’ནྟི (དཱི. ནི. ༣.༣༠༥; ཨིཏིཝུ. ༦༠; ནེཏྟི. ༣༣). ཝནྡནཱ ཙེཏྠ ཀཱཡཝཱཙཱཙིཏྟེཧི ཏིཎྞཾ རཏནཱནཾ གུཎནིནྣཏཱ, ཐོམནཱ ཝཱ. ཨཔིཙ ཏསྶཱ ཙེཏནཱཡ སཧཛཱཏཱདོཔཀཱརེཀོ སདྡྷཱཔཉྙཱསཏིཝཱིརིཡཱདིསམྤཡུཏྟདྷམྨོ ཝནྡནཱ, ཏཱཡ པཀཏནྟི ཝནྡནཱམཡཾ ཡཐཱ ‘‘སོཝཎྞམཡཾ རཱུཔིཡམཡ’’ནྟི, ཨཏྠཏོ པན ཡཐཱཝུཏྟཙེཏནཱཝ. རཏནཏྟཡེ, རཏནཏྟཡསྶ ཝཱ ཝནྡནཱམཡཾ རཏནཏྟཡཝནྡནཱམཡཾ. པུཛྫབྷཝཕལནིབྦཏྟནཏོ པུཉྙཾ ནིརུཏྟིནཡེན, ཨཏྟནོ ཀཱརཀཾ, སནྟཱནཾ ཝཱ པུནཱཏི ཝིསོདྷེཏཱིཏི པུཉྙཾ, སཀམྨཀཏྟཱ དྷཱཏུསྶ ཀཱརིཏཝསེན ཨཏྠཝིཝརཎཾ ལབྦྷཏི, སདྡནིཔྥཏྟི པན སུདྡྷཝསེནེཝཱཏི སདྡཝིདཱུ.

ཏཾཏཾསམྤཏྟིཡཱ ཝིབནྡྷནཝསེན སཏྟསནྟཱནསྶ ཨནྟརེ ཝེམཛ྄ཛྷེ ཨེཏི ཨཱགཙྪཏཱིཏི ཨནྟརཱཡོ, དིཊྛདྷམྨིཀཱདིཨནཏྠོ. པཎཱམཔཡོཛནེ ཝུཏྟཝིདྷིནཱ སུཊྛུ ཝིཧཏོ ཝིདྡྷསྟོ ཨནྟརཱཡོ ཨསྶཱཏི སུཝིཧཏནྟརཱཡོ. ཝིཧནནཉྩེཏྠ ཏདུཔྤཱདཀཧེཏུཔརིཧརཎཝསེན ཏེསཾ ཨནྟརཱཡཱནམནུཔྤཏྟིཀརཎནྟི ¶ དཊྛབྦཾ. ཧུཏྭཱཏི པུབྦཀཱལཀིརིཡཱ, ཏསྶ ‘‘ཨཏྠཾ པཀཱསཡིསྶཱམཱི’’ཏི ཨེཏེན སམྦནྡྷོ. ཏསྶཱཏི ཡཾ-སདྡེན ཨུདྡིཊྛསྶ ཝནྡནཱམཡཔུཉྙསྶ. ཨཱནུབྷཱཝེནཱཏི བལེན.

‘‘ཏེཛོ ཨུསྶཱཧམནྟཱ ཙ, པབྷཱུ སཏྟཱིཏི པཉྩིམེ;

‘ཨཱནུབྷཱཝོ’ཏི ཝུཙྩནྟི, ‘པབྷཱཝོ’ཏི ཙ ཏེ ཝདེ’’ཏི. –

ཝུཏྟེསུ ཧི ཨཏྠེསུ ཨིདྷ སཏྟིཡཾ ཝཏྟཏི. ཨནུ པུནཔྤུནཾ ཏཾསམངྒིཾ བྷཱཝེཏི ཝཌྜྷེཏཱིཏི ཧི ཨནུབྷཱཝོ, སོཡེཝ ཨཱནུབྷཱཝོཏི ཨུདཱནཊྛཀཐཱཡཾ ¶ , ཨཏྠཏོ པན ཡཐཱལདྡྷསམྤཏྟིནིམིཏྟཀསྶ པུརིམཀམྨསྶ བལཱནུཔྤདཱནཝསསངྑཱཏཱ ཝནྡནཱམཡཔུཉྙསྶ སཏྟིཡེཝ, སཱ ཙ སུཝིཧཏནྟརཱཡཏཱཡ ཀརཎཾ, ཧེཏུ ཝཱ སམྦྷཝཏི.

ཨེཏྠ པན ‘‘པསནྣམཏིནོ’’ཏི ཨེཏེན ཨཏྟནོ པསཱདསམྤཏྟིཾ དསྶེཏི. ‘‘རཏནཏྟཡཝནྡནཱམཡ’’ནྟི ཨེཏེན རཏནཏྟཡསྶ ཁེཏྟབྷཱཝསམྤཏྟིཾ, ཏཏོ ཙ ཏསྶ པུཉྙསྶ ཨཏྟནོ པསཱདསམྤཏྟིཡཱ, རཏནཏྟཡསྶ ཙ ཁེཏྟབྷཱཝསམྤཏྟིཡཱཏི དྭཱིཧི ཨངྒེཧི ཨཏྠསཾཝཎྞནཱཡ ཨུཔགྷཱཏཀཨུཔདྡཝཱནཾ ཝིཧནནེ སམཏྠཏཾ དཱིཔེཏི. ཙཏུརངྒསམྤཏྟིཡཱ དཱནཙེཏནཱ ཝིཡ ཧི དྭཡངྒསམྤཏྟིཡཱ པཎཱམཙེཏནཱཔི ཨནྟརཱཡཝིཧནནེན དིཊྛདྷམྨིཀཱཏི.

ཨེཝཾ རཏནཏྟཡསྶ ནིཔཙྩཀཱརཀརཎེ པཡོཛནཾ དསྶེཏྭཱ ཨིདཱནི ཡསྶཱ དྷམྨདེསནཱཡ ཨཏྠཾ སཾཝཎྞེཏུཀཱམོ, ཏདཔི སཾཝཎྞེཏབྦདྷམྨབྷཱཝེན དསྶེཏྭཱ གུཎཱབྷིཏྠཝནཝིསེསེན ཨབྷིཏྠཝེཏུཾ ‘‘དཱིགྷསྶཱ’’ཏིཨཱདིམཱཧ. ཨཡཉྷི ཨཱཙརིཡསྶ པཀཏི, ཡདིདཾ ཏཾཏཾསཾཝཎྞནཱསུ ཨཱདིཏོ ཏསྶ ཏསྶ སཾཝཎྞེཏབྦདྷམྨསྶ ཝིསེསགུཎཀིཏྟནེན ཐོམནཱ. ཏཐཱ ཧི ཏེསུ ཏེསུ པཔཉྩསཱུདནཱིསཱརཏྠཔཀཱསནཱིམནོརཐཔཱུརཎཱིཨཊྛསཱལིནཱིཨཱདཱིསུ ཡཐཱཀྐམཾ ‘‘པརཝཱདམཐནསྶ, ཉཱཎཔྤབྷེདཛནནསྶ, དྷམྨཀཐིཀཔུངྒཝཱནཾ ཝིཙིཏྟཔཊིབྷཱནཛནནསྶ,

ཏསྶ གམྦྷཱིརཉཱཎེཧི, ཨོགཱལ༹ྷསྶ ཨབྷིཎྷསོ;

ནཱནཱནཡཝིཙིཏྟསྶ, ཨབྷིདྷམྨསྶ ཨཱདིཏོ’’ཏི. ཨཱདིནཱ –

ཐོམནཱ ཀཏཱ. ཏཏྠ དཱིགྷསྶཱཏི དཱིགྷནཱམཀསྶ. དཱིགྷསུཏྟངྐིཏསྶཱཏི དཱིགྷེཧི ཨབྷིཨཱཡཏཝཙནཔྤབནྡྷཝནྟེཧི སུཏྟེཧི ལཀྑིཏསྶ, ཨནེན ‘‘དཱིགྷོ’’ཏི ཨཡཾ ཨིམསྶ ཨཱགམསྶ ¶ ཨཏྠཱནུགཏཱ སམཉྙཱཏི དསྶེཏི. ནནུ ཙ སུཏྟཱནིཡེཝ ཨཱགམོ, ཀཐཾ སོ ཏེཧི ཨངྐཱིཡཏཱིཏི? སཙྩམེཏཾ པརམཏྠཏོ, པཉྙཏྟིཏོ པན སུཏྟཱནི ཨུཔཱདཱཡ ཨཱགམབྷཱཝསྶ པཉྙཏྟཏྟཱ ཨཝཡཝེཧི སུཏྟེཧི ཨཝཡཝཱིབྷཱུཏོ ཨཱགམོ ཨངྐཱིཡཏི. ཡཐེཝ ཧི ཨཏྠབྱཉྫནསམུདཱཡེ ‘‘སུཏྟ’’ནྟི ཝོཧཱརོ, ཨེཝཾ སུཏྟསམུདཱཡེ ཨཱགམཝོཧཱརོཏི. པཊིཙྩསམུཔྤཱདཱདིནིཔུཎཏྠབྷཱཝཏོ ནིཔུཎསྶ. ཨཱགཙྪནྟི ཨཏྟཏྠཔརཏྠཱདཡོ ཨེཏྠ, ཨེཏེན, ཨེཏསྨཱཏི ཝཱ ཨཱགམོ, ཨུཏྟམཊྛེན, པཏྠནཱིཡཊྛེན ཙ སོ ཝརོཏི ¶ ཨཱགམཝརོ. ཨཔིཙ ཨཱགམསམྨཏེཧི བཱཧིརཀཔཝེདིཏེཧི བྷཱརཏཔུརཱཎཀཐཱནརསཱིཧཔུརཱཎཀཐཱདཱིཧི ཝརོཏིཔི ཨཱགམཝརོ, ཏསྶ. བུདྡྷཱནམནུབུདྡྷཱ བུདྡྷཱནུབུདྡྷཱ, བུདྡྷཱནཾ སཙྩཔཊིཝེདྷཾ ཨནུགམྨ པཊིཝིདྡྷསཙྩཱ ཨགྒསཱཝཀཱདཡོ ཨརིཡཱ, ཏེཧི ཨཏྠསཾཝཎྞནཱཝསེན, གུཎསཾཝཎྞནཱཝསེན ཙ སཾཝཎྞིཏོཏི ཏཐཱ. ཨཐ ཝཱ བུདྡྷཱ ཙ ཨནུབུདྡྷཱ ཙ, ཏེཧི སཾཝཎྞིཏོ ཡཐཱཝུཏྟནཡེནཱཏི ཏཐཱ, ཏསྶ. སམྨཱསམྦུདྡྷེནེཝ ཧི ཏིཎྞམྤི པིཊཀཱནཾ ཨཏྠསཾཝཎྞནཱཀྐམོ བྷཱསིཏོ, ཏཏོ པརཾ སངྒཱཡནཱདིཝསེན སཱཝཀེཧཱིཏི ཨཱཙརིཡཱ ཝདནྟི. ཝུཏྟཉྩ མཛ྄ཛྷིམཱགམཊྛཀཐཱཡ ཨུཔཱལིསུཏྟཝཎྞནཱཡཾ ‘‘ཝེཡྻཱཀརཎསྶཱཏི ཝིཏྠཱརེཏྭཱ ཨཏྠདཱིཔཀསྶ. བྷགཝཏཱ ཧི ཨབྱཱཀཏཾ ཏནྟིཔདཾ ནཱམ ནཏྠི, སབྦེསཾཡེཝ ཨཏྠོ ཀཐིཏོ’’ཏི (མ. ནི. ཨཊྛ. ༣.༧༦). སདྡྷཱཝཧགུཎསྶཱཏི བུདྡྷཱདཱིསུ པསཱདཱཝཧགུཎསྶ. ནནུ ཙ སབྦམྤི བུདྡྷཝཙནཾ ཏེཔིཊཀཾ སདྡྷཱཝཧགུཎམེཝ, ཨཐ ཀསྨཱ ཨཡམཉྙསཱདྷཱརཎགུཎེན ཐོམིཏོཏི? སཱཏིསཡཏོ ཨིམསྶ ཏགྒུཎསམྤནྣཏྟཱ. ཨཡཉྷི ཨཱགམོ བྲཧྨཛཱལཱདཱིསུ སཱིལདིཊྛཱདཱིནཾ ཨནཝསེསནིདྡེསཱདིཝསེན, མཧཱཔདཱནཱདཱིསུ (དཱི. ནི. ༢.༣) པུརིམབུདྡྷཱནམྤི གུཎནིདྡེསཱདིཝསེན, པཱཐིཀསུཏྟཱདཱིསུ (དཱི. ནི. ༣.༡.༤) ཏིཏྠིཡེ མདྡིཏྭཱ ཨཔྤཊིཝཏྟིཡསཱིཧནཱདནདནཱདིཝསེན, ཨནུཏྟརིཡསུཏྟཱདཱིསུ ཝིསེསཏོ བུདྡྷགུཎཝིབྷཱཝནེན རཏནཏྟཡེ སཱཏིསཡཾ སདྡྷཾ ཨཱཝཧཏཱིཏི.

ཨེཝཾ སཾཝཎྞེཏབྦདྷམྨསྶ ཨབྷིཏྠཝནམྤི ཀཏྭཱ ཨིདཱནི སཾཝཎྞནཱཡ སམྤཏི ཝཀྑམཱནཱཡ ཨཱགམནཝིསུདྡྷིཾ དསྶེཏུཾ ‘‘ཨཏྠཔྤཀཱསནཏྠ’’ནྟིཨཱདིམཱཧ. ཨིམཱཡ ཧི གཱཐཱཡ སངྒཱིཏིཏྟཡམཱརུལ༹ྷདཱིགྷཱགམཊྛཀཐཱཏོཝ སཱིཧལ༹བྷཱསཱམཏྟཾ ཝིནཱ ཨཡཾ ཝཀྑམཱནསཾཝཎྞནཱ ཨཱགཏཱ, ནཱཉྙཏོ, ཏདེཝ ཀཱརཎཾ ཀཏྭཱ ཝཏྟབྦཱ, ནཱཉྙནྟི ཨཏྟནོ སཾཝཎྞནཱཡ ཨཱགམནཝིསུདྡྷིཾ དསྶེཏི. ཨཔརོ ནཡོ – པརམནིཔུཎགམྦྷཱིརཾ བུདྡྷཝིསཡམཱགམཝརཾ ཨཏྟནོ བལེནེཝ ཝཎྞཡིསྶཱམཱིཏི ཨཉྙེཧི ཝཏྟུམྤི ཨསཀྐུཎེཡྻཏྟཱ སཾཝཎྞནཱནིསྶཡཾ དསྶེཏུམཱཧ ‘‘ཨཏྠཔྤཀཱསནཏྠ’’ནྟིཨཱདི. ཨིམཱཡ ཧི པུབྦཱཙརིཡཱནུབྷཱཝཾ ནིསྶཱཡེཝ ཏསྶ ཨཏྠཾ ཝཎྞཡིསྶཱམཱིཏི ཨཏྟནོ སཾཝཎྞནཱནིསྶཡཾ དསྶེཏི. ཏཏྠ ‘‘ཨཏྠཔྤཀཱསནཏྠ’’ནྟི པཱཋཏྠོ, སབྷཱཝཏྠོ, ཉེཡྻཏྠོ, པཱཋཱནུརཱུཔཏྠོ, ཏདནུརཱུཔཏྠོ, སཱཝསེསཏྠོ, ནིཝརསེསཏྠོ, ནཱིཏཏྠོ, ནེཡྻཏྠོཏིཨཱདིནཱ ¶ ¶ ཨནེཀཔྤཀཱརསྶ ཨཏྠསྶ པཀཱསནཏྠཱཡ, པཀཱསནཱཡ ཝཱ. གཱཐཱབནྡྷསམྤཏྟིཡཱ དྭིབྷཱཝོ. ཨཏྠོ ཀཐཱིཡཏི ཨེཏཱཡཱཏི ཨཏྠཀཐཱ, སཱཡེཝ ཨཊྛཀཐཱ ཏྠ-ཀཱརསྶ ཊྛ-ཀཱརཾ ཀཏྭཱ ཡཐཱ ‘‘དུཀྑསྶ པཱིལ༹ནཊྛོ’’ཏི (པཊི. མ. ༡.༡༧; ༢.༨), ཨཡཉྩ སསཉྙོགཝིདྷི ཨརིཡཱཛཱཏིབྷཱཝཏོ. ཨཀྑརཙིནྟཀཱཔི ཧི ‘‘ཏཐཱནཾཊྛ ཡུག’’ནྟི ལཀྑཎཾ ཝཏྭཱ ཨིདམེཝུདཱཧརནྟི.

ཡཱཡ’ཏྠམབྷིཝཎྞེནྟི, བྱཉྫནཏྠཔདཱནུགཾ;

ནིདཱནཝཏྠུསམྦནྡྷཾ, ཨེསཱ ཨཊྛཀཐཱ མཏཱ.

ཨཱདིཏོཏིཨཱདིམྷི པཋམསངྒཱིཏིཡཾ. ཚལ༹བྷིཉྙཏཱཡ པརམེན ཙིཏྟཝསཱིབྷཱཝེན སམནྣཱགཏཏྟཱ, ཛྷཱནཱདཱིསུ པཉྩཝསིཏཱ སབྦྷཱཝཏོ ཙ ཝསིནོ, ཐེརཱ མཧཱཀསྶཔཱདཡོ, ཏེསཾ སཏེཧི པཉྩཧི. ཡཱ སངྒཱིཏཱཏི ཡཱ ཨཊྛཀཐཱ ཨཏྠཾ པཀཱསེཏུཾ ཡུཏྟཊྛཱནེ ‘‘ཨཡམེཏསྶ ཨཏྠོ, ཨཡམེཏསྶ ཨཏྠོ’’ཏི སངྒཧེཏྭཱ ཝུཏྟཱ. ཨནུསངྒཱིཏཱ ཙ པཙྪཱཔཱིཏི ན ཀེཝལཾ པཋམསངྒཱིཏིཡམེཝ, ཨཐ ཁོ པཙྪཱ དུཏིཡཏཏིཡསངྒཱིཏཱིསུཔི. ན ཙ པཉྩཧི ཝསིསཏེཧི ཨཱདིཏོ སངྒཱིཏཱཡེཝ, ཨཔི ཏུ ཡསཏྠེརཱདཱིཧི ཨནུསངྒཱིཏཱ ཙཱཏི སཧ སམུཙྩཡེན ཨཏྠོ ཝེདིཏབྦོ. སམུཙྩཡདྭཡཉྷི པཙྩེཀཾ ཀིརིཡཱཀཱལཾ སམུཙྩིནོཏི.

ཨཐ པོརཱཎཊྛཀཐཱཡ ཝིཛྫམཱནཱཡ ཀིམེཏཱཡ ཨདྷུནཱ པུན ཀཏཱཡ སཾཝཎྞནཱཡཱཏི པུནརུཏྟིཡཱ, ནིརཏྠཀཏཱཡ ཙ དོསཾ སམནུསྶརིཏྭཱ ཏཾ པརིཧརནྟོ ‘‘སཱིཧལ༹དཱིཔ’’ནྟིཨཱདིམཱཧ. ཏཾ པརིཧརཎེནེཝ ཧི ཨིམིསྶཱ སཾཝཎྞནཱཡ ནིམིཏྟཾ དསྶེཏི. ཏཏྠ སཱིཧཾ ལཱཏི གཎྷཱཏཱིཏི སཱིཧལོ༹ ལ-ཀཱརསྶ ལ༹-ཀཱརཾ ཀཏྭཱ ཡཐཱ ‘‘གརུལོ༹’’ཏི. ཏསྨིཾ ཝཾསེ ཨཱདིཔུརིསོ སཱིཧཀུམཱརོ, ཏབྦཾསཛཱཏཱ པན ཏམྦཔཎྞིདཱིཔེ ཁཏྟིཡཱ, སབྦེཔི ཙ ཛནཱ ཏདྡྷིཏཝསེན, སདིསཝོཧཱརེན ཝཱ སཱིཧལཱ༹, ཏེསཾ ནིཝཱསདཱིཔོཔི ཏདྡྷིཏཝསེན, ཋཱནཱིནཱམེན ཝཱ ‘‘སཱིཧལོ༹’’ཏི ཝེདིཏབྦོ. ཛལམཛ྄ཛྷེ དིཔྤཏི, དྭིདྷཱ ཝཱ ཨཱཔོ ཨེཏྠ སནྡཏཱིཏི དིཔོ, སོཡེཝ དཱིཔོ, བྷེདཱཔེཀྑཱཡ ཏེསཾ དཱིཔོཏི ཏཐཱ. པནསདྡོ ཨརུཙིསཾསཱུཙནེ, ཏེན ཀཱམཉྩ སཱ སངྒཱིཏིཏྟཡམཱརུལ༹ྷཱ, ཏཐཱཔི པུན ཨེཝཾབྷཱུཏཱཏི ཨརུཙིཡབྷཱཝཾ སཾསཱུཙེཏི. ཏདཏྠསམྦནྡྷཏཱཡ པན པུརིམགཱཐཱཡ ‘‘ཀཱམཉྩ སངྒཱིཏཱ ¶ ཨནུསངྒཱིཏཱ ཙཱ’’ཏི སཱནུགྒཧཏྠཡོཛནཱ སམྦྷཝཏི. ཨཉྙཏྠཱཔི ཧི ཏཐཱ དིསྶཏཱིཏི. ཨཱབྷཏཱཏི ཛམྦུདཱིཔཏོ ཨཱནཱིཏཱ. ཨཐཱཏི སངྒཱིཏིཀཱལཏོ པཙྪཱ, ཨེཝཾ སཏི ཨཱབྷཏཔདེན སམྦནྡྷོ. ཨཐཱཏི ཝཱ མཧཱམཧིནྡཏྠེརེནཱབྷཏཀཱལཏོ པཙྪཱ, ཨེཝཾ སཏི ཋཔིཏཔདེན སམྦནྡྷོ. སཱ ཧི དྷམྨསངྒཱཧཀཏྠེརེཧི པཋམཾ ཏཱིཎི པིཊཀཱནི སངྒཱཡིཏྭཱ ཏསྶ ཨཏྠསཾཝཎྞནཱནུརཱུཔེནེཝ ཝཱཙནཱམགྒཾ ¶ ཨཱརོཔིཏཏྟཱ ཏིསྶོ སངྒཱིཏིཡོ ཨཱརུལ༹ྷཱཡེཝ, ཏཏོ པཙྪཱ ཙ མཧཱམཧིནྡཏྠེརེན ཏམྦཔཎྞིདཱིཔམཱབྷཏཱ, པཙྪཱ པན ཏམྦཔཎྞིཡེཧི མཧཱཐེརེཧི ནིཀཱཡནྟརལདྡྷིསངྐརཔརིཧརཎཏྠཾ སཱིཧལ༹བྷཱསཱཡ ཋཔིཏཱཏི. ཨཱཙརིཡདྷམྨཔཱལཏྠེརོ པན པཙྪིམསམྦནྡྷམེཝ དུདྡསཏྟཱ པཀཱསེཏི. ཏཐཱ ‘‘དཱིཔཝཱསཱིནམཏྠཱཡཱ’’ཏི ཨིདམྤི ‘‘ཋཔིཏཱ’’ཏི ཙ ‘‘ཨཔནེཏྭཱ ཨཱརོཔེནྟོ’’ཏི ཙ ཨེཏེཧི པདེཧི སམྦཛ྄ཛྷིཏབྦཾ. ཨེཀཔདམྤི ཧི ཨཱཝུཏྟིཡཱདིནཡེཧི ཨནེཀཏྠསམྦནྡྷམུཔགཙྪཏི. པུརིམསམྦནྡྷེན ཙེཏྠ སཱིཧལ༹དཱིཔཝཱསཱིནམཏྠཱཡ ནིཀཱཡནྟརལདྡྷིསངྐརཔརིཧརཎེན སཱིཧལ༹བྷཱསཱཡ ཋཔིཏཱཏི ཏམྦཔཎྞིཡཏྠེརེཧི ཋཔནཔཡོཛནཾ དསྶེཏི. པཙྪིམསམྦནྡྷེན པན ཨིམཱཡ སཾཝཎྞནཱཡ ཛམྦུདཱིཔཝཱསཱིནཾ, ཨཉྙདཱིཔཝཱསཱིནཉྩ ཨཏྠཱཡ སཱིཧལ༹བྷཱསཱཔནཡནསྶ, ཏནྟིནཡཱནུཙྪཝིཀབྷཱསཱརོཔནསྶ ཙ པཡོཛནནྟི. མཧཱཨིསྶརིཡཏྟཱ མཧིནྡོཏི རཱཛཀུམཱརཀཱལེ ནཱམཾ, པཙྪཱ པན གུཎམཧནྟཏཱཡ མཧཱམཧིནྡོཏི ཝུཙྩཏི. སཱིཧལ༹བྷཱསཱ ནཱམ ཨནེཀཀྑརེཧི ཨེཀཏྠསྶཱཔི ཝོཧརཎཏོ པརེསཾ ཝོཧརིཏུཾ ཨཏིདུཀྐརཱ ཀཉྩུཀསདིསཱ སཱིཧལཱ༹ནཾ སམུདཱཙིཎྞཱ བྷཱསཱ.

ཨེཝཾ ཧོཏུ པོརཱཎཊྛཀཐཱཡ, ཨདྷུནཱ ཀརིཡམཱནཱ པན ཨཊྛཀཐཱ ཀཐཾ ཀརཱིཡཏཱིཏི ཨནུཡོགེ སཏི ཨིམིསྶཱ ཨཊྛཀཐཱཡ ཀརཎཔྤཀཱརཾ དསྶེཏུམཱཧ ‘‘ཨཔནེཏྭཱནཱ’’ཏིཨཱདི. ཏཏྠ ཏཏོ མཱུལཊྛཀཐཱཏོ སཱིཧལ༹བྷཱསཾ ཨཔནེཏྭཱ པོཏྠཀེ ཨནཱརོཔིཏབྷཱཝེན ནིརངྐརིཏྭཱཏི སམྦནྡྷོ, ཨེཏེན ཨཡཾ ཝཀྑམཱནཱ ཨཊྛཀཐཱ སངྒཱིཏིཏྟཡམཱརོཔིཏཱཡ མཱུལཊྛཀཐཱཡ སཱིཧལ༹བྷཱསཱཔནཡནམཏྟམཉྙཏྲ ཨཏྠཏོ སཾསནྡཏི ཙེཝ སམེཏི ཙ ཡཐཱ ‘‘གངྒོདཀེན ཡམུནོདཀ’’ནྟི དསྶེཏི. ‘‘མནོརམ’’ མིཙྩཱདཱིནི ‘‘བྷཱས’’ནྟི ཨེཏསྶ སབྷཱཝནིརུཏྟིབྷཱཝདཱིཔཀཱནི ཝིསེསནཱནི. སབྷཱཝནིརུཏྟིབྷཱཝེན ཧི པཎྜིཏཱནཾ མནཾ རམཡཏཱིཏི མནོརམཱ. ཏནོཏི ཨཏྠམེཏཱཡ, ཏནཱིཡཏི ཝཱ ཨཏྠཝསེན ཝིཝརཱིཡཏི, ཝཊྚཏོ ཝཱ སཏྟེ ཏཱརེཏི ¶ , ནཱནཱཏྠཝིསཡཾ ཝཱ ཀངྑཾ ཏརནྟི ཨེཏཱཡཱཏི ཏནྟི, པཱལི༹. ཏསྶཱ ནཡསངྑཱཏཱཡ གཏིཡཱ ཚཝིཾ ཚཱཡཾ ཨནུགཏཱཏི ཏནྟིནཡཱནུཙྪཝིཀཱ. ཨསབྷཱཝནིརུཏྟིབྷཱསནྟརསཾཀིཎྞདོསཝིརཧིཏཏཱཡ ཝིགཏདོསཱ, ཏཱདིསཾ སབྷཱཝནིརུཏྟིབྷཱུཏཾ –

‘‘སཱ མཱགདྷཱི མཱུལབྷཱསཱ, ནརཱ ཡཱཡཱ’དིཀཔྤིཀཱ;

བྲཧྨཱནོ ཙསྶུཏཱལཱཔཱ, སམྦུདྡྷཱ ཙཱཔི བྷཱསརེ’’ཏི. –

ཝུཏྟཾ པཱལི༹གཏིབྷཱསཾ པོཏྠཀེ ལིཁནཝསེན ཨཱརོཔེནྟོཏི ཨཏྠོ, ཨིམིནཱ སདྡདོསཱབྷཱཝམཱཧ.

སམཡཾ ¶ ཨཝིལོམེནྟོཏི སིདྡྷནྟམཝིརོདྷེནྟོ, ཨིམིནཱ པན ཨཏྠདོསཱབྷཱཝམཱཧ. ཨཝིརུདྡྷཏྟཱ ཨེཝ ཧི ཏེ ཐེརཝཱདཱཔི ཨིདྷ པཀཱསཡིསྶནྟི. ཀེསཾ པན སམཡནྟི ཨཱཧ ‘‘ཐེརཱན’’ནྟིཨཱདི, ཨེཏེན རཱཧུལཱཙརིཡཱདཱིནཾ ཛེཏཝནཝཱསཱིཨབྷཡགིརིཝཱསཱིནིཀཱཡཱནཾ སམཡཾ ནིཝཏྟེཏི. ཐིརེཧི སཱིལསུཏཛྷཱནཝིམུཏྟིསངྑཱཏེཧི གུཎེཧི སམནྣཱགཏཱཏི ཐེརཱ. ཡཐཱཧ ‘‘ཙཏྟཱརོམེ བྷིཀྑཝེ ཐེརཀརཎཱ དྷམྨཱ. ཀཏམེ ཙཏྟཱརོ? ཨིདྷ བྷིཀྑཝེ བྷིཀྑུ སཱིལཝཱ ཧོཏཱི’’ཏིཨཱདི (ཨ. ནི. ༤.༢༢). ཨཔིཙ སཙྩདྷམྨཱདཱིཧི ཐིརཀརཎེཧི སམནྣཱགཏཏྟཱ ཐེརཱ. ཡཐཱཧ དྷམྨརཱཛཱ དྷམྨཔདེ –

‘‘ཡམྷི སཙྩཉྩ དྷམྨོ ཙ, ཨཧིཾསཱ སཾཡམོ དམོ;

ས ཝེ ཝནྟམལོ དྷཱིརོ, ‘ཐེརོ’ཨིཏི པཝུཙྩཏཱི’’ཏི. (དྷ. པ. ༢༦༠);

ཏེསཾ. མཧཱཀསྶཔཏྠེརཱདཱིཧི ཨཱགཏཱ ཨཱཙརིཡཔརམྤརཱ ཐེརཝཾསོ, ཏཔྤརིཡཱཔནྣཱ ཧུཏྭཱ ཨཱགམཱདྷིགམསམྤནྣཏྟཱ པཉྙཱཔཛྫོཏེན ཏསྶ སམུཛྫལནཏོ ཏཾ པཀཱརེན དཱིཔེནྟི, ཏསྨིཾ ཝཱ པདཱིཔསདིསཱཏི ཐེརཝཾསཔདིཔཱ. ཝིཝིདྷེན ཨཱཀཱརེན ནིཙྪཱིཡཏཱིཏི ཝིནིཙྪཡོ, གཎྛིཊྛཱནེསུ ཁཱིལམདྡནཱཀཱརེན པཝཏྟཱ ཝིམཏིཙྪེདནཱིཀཐཱ, སུཊྛུ ནིཔུཎོ སཎྷོ ཝིནིཙྪཡོ ཨེཏེསནྟི སུནིཔུཎཝིནིཙྪཡཱ. ཨཐ ཝཱ ཝིནིཙྪིནོཏཱིཏི ཝིནིཙྪཡོ, ཡཐཱཝུཏྟཝིསཡཾ ཉཱཎཾ, སུཊྛུ ནིཔུཎོ ཚེཀོ ཝིནིཙྪཡོ ཨེཏེསནྟི སུནིཔུཎཝིནིཙྪཡཱ. མཧཱམེགྷཝནེ ཋིཏོ ཝིཧཱརོ མཧཱཝིཧཱརོ, ཡོ སཏྠུ མཧཱབོདྷིནཱ ཝིརོཙཏི, ཏསྨིཾ ཝསནསཱིལཱ མཧཱཝིཧཱརཝཱསིནོ ¶ , ཏཱདིསཱནཾ སམཡཾ ཨཝིལོམེནྟོཏི ཨཏྠོ, ཨེཏེན མཧཱཀསྶཔཱདིཐེརཔརམྤརཱགཏོ, ཏཏོཡེཝ ཨཝིཔརིཏོ སཎྷསུཁུམོ ཝིནིཙྪཡོཏི མཧཱཝིཧཱརཝཱསཱིནཾ སམཡསྶ པམཱཎབྷཱུཏཏཾ པུགྒལཱདྷིཊྛཱནཝསེན དསྶེཏི.

ཧིཏྭཱ པུནཔྤུནབྷཏམཏྠནྟི ཨེཀཏྠ ཝུཏམྤི པུན ཨཉྙཏྠ ཨཱབྷཏམཏྠཾ པུནརུཏྟིབྷཱཝཏོ, གནྠགརུཀབྷཱཝཏོ ཙ ཙཛིཏྭཱ ཏསྶ ཨཱགམཝརསྶ ཨཏྠཾ པཀཱསཡིསྶཱམཱིཏི ཨཏྠོ.

ཨེཝཾ ཀརཎཔྤཀཱརམྤི དསྶེཏྭཱ ‘‘དཱིཔཝཱསཱིནམཏྠཱཡཱ’’ཏི ཝུཏྟཔྤཡོཛནཏོ ཨཉྙམྤི སཾཝཎྞནཱཡ པཡོཛནཾ དསྶེཏུཾ ‘‘སུཛནསྶ ཙཱ’’ཏིཨཱདིམཱཧ. ཏཏྠ སུཛནསྶ ཙཱཏི ཙ-སདྡོ སམུཙྩཡཏྠོ, ཏེན ན ཀེཝལཾ ཛམྦུདཱིཔཝཱསཱིནམེཝ ཨཏྠཱཡ, ཨཐ ཁོ སཱདྷུཛནཏོསནཏྠཉྩཱཏི སམུཙྩིནོཏི. ཏེནེཝ ཙ ཏམྦཔཎྞིདཱིཔཝཱསཱིནམྤི ཨཏྠཱཡཱཏི ཨཡམཏྠོ སིདྡྷོ ཧོཏི ཨུགྒཧཎཱདིསུཀརཏཱཡ ཏེསམྤི བཧཱུཔཀཱརཏྟཱ. ཙིརཊྛིཏཏྠཉྩཱཏི ཨེཏྠཱཔི ཙ-སདྡོ ན ཀེཝལཾ ཏདུབྷཡཏྠམེཝ, ཨཔི ཏུ ཏིཝིདྷསྶཱཔི སཱསནདྷམྨསྶ, པརིཡཏྟིདྷམྨསྶ ཝཱ པཉྩཝསྶསཧསྶཔརིམཱཎཾ ¶ ཙིརཀཱལཾ ཋིཏཏྠཉྩཱཏི སམུཙྩཡཏྠམེཝ དསྶེཏི. པརིཡཏྟིདྷམྨསྶ ཧི ཋིཏིཡཱ པཊིཔཏྟིདྷམྨཔཊིཝེདྷདྷམྨཱནམྤི ཋིཏི ཧོཏི ཏསྶེཝ ཏེསཾ མཱུལབྷཱཝཏོ. པརིཡཏྟིདྷམྨོ པན སུནིཀྑིཏྟེན པདབྱཉྫནེན, ཏདཏྠེན ཙ ཙིརཾ སམྨཱ པཏིཊྛཱཏི, སཾཝཎྞནཱཡ ཙ པདབྱཉྫནཾ ཨཝིཔརཱིཏཾ སུནིཀྑིཏྟཾ, ཏདཏྠོཔི ཨཝིཔརཱིཏོ སུནིཀྑིཏྟོ ཧོཏི, ཏསྨཱ སཾཝཎྞནཱཡ ཨཝིཔརཱིཏསྶ པདབྱཉྫནསྶ, ཏདཏྠསྶ ཙ སུནིཀྑིཏྟསྶ ཨུཔཱཡབྷཱཝམུཔཱདཱཡ ཝུཏྟཾ ‘‘ཙིརཊྛིཏཏྠཉྩ དྷམྨསྶཱ’’ཏི. ཝུཏྟཉྷེཏཾ བྷགཝཏཱ –

‘‘དྭེམེ བྷིཀྑཝེ དྷམྨཱ སདྡྷམྨསྶ ཋིཏིཡཱ ཨསམྨོསཱཡ ཨནནྟརདྷཱནཱཡ སཾཝཏྟནྟི. ཀཏམེ དྭེ? སུནིཀྑིཏྟཉྩ པདབྱཉྫནཾ, ཨཏྠོ ཙ སུནཱིཏོ, ཨིམེ ཁོ…པེ… སཾཝཏྟནྟཱི’’ཏིཨཱདི (ཨ. ནི. ༢.༢༡).

ཨེཝཾ པཡོཛནམྤི དསྶེཏྭཱ ཝཀྑམཱནཱཡ སཾཝཎྞནཱཡ མཧཏྟཔརིཙྩཱགེན གནྠགརུཀབྷཱཝཾ པརིཧརིཏུམཱཧ ‘‘སཱིལཀཐཱ’’ཏིཨཱདི. ཏཐཱ ཧི ཝུཏྟཾ ‘‘ན ཏཾ ཝིཙརཡིསྶཱམཱི’’ཏི. ཨཔརོ ནཡོ – ཡདཊྛཀཐཾ ཀཏྟུཀཱམོ, ཏདེཀདེསབྷཱཝེན ཝིསུདྡྷིམགྒོ གཧེཏབྦོཏི ཀཐིཀཱནཾ ཨུཔདེསཾ ཀརོནྟོ ¶ ཏཏྠ ཝིཙཱརིཏདྷམྨེ ཨུདྡེསཝསེན དསྶེཏུམཱཧ ‘‘སཱིལཀཐཱ’’ཏིཨཱདི. ཏཏྠ སཱིལཀཐཱཏི ཙཱརིཏྟཝཱརིཏྟཱདིཝསེན སཱིལཝིཏྠཱརཀཐཱ. དྷུཏདྷམྨཱཏི པིཎྜཔཱཏིཀངྒཱདཡོ ཏེརས ཀིལེསདྷུནནཀདྷམྨཱ. ཀམྨཊྛཱནཱནཱིཏི བྷཱཝནཱསངྑཱཏསྶ ཡོགཀམྨསྶ པཝཏྟིཊྛཱནཏྟཱ ཀམྨཊྛཱནནཱམཱནི དྷམྨཛཱཏཱནི. ཏཱནི པན པཱལི༹ཡམཱགཏཱནི ཨཊྛཏིཾ སེཝ ན གཧེཏབྦཱནི, ཨཐ ཁོ ཨཊྛཀཐཱཡམཱགཏཱནིཔི དྭེཏི ཉཱཔེཏུཾ ‘‘སབྦཱནིཔཱི’’ཏི ཝུཏྟཾ. ཙརི ཡཱཝིདྷཱནསཧིཏོཏི རཱགཙརིཏཱདཱིནཾ སབྷཱཝཱདིཝིདྷཱནེན སཧ པཝཏྟོ, ཨིདཾ པན ‘‘ཛྷཱནསམཱཔཏྟིཝིཏྠཱརོ’’ཏི ཨིམསྶ ཝིསེསནཾ. ཨེཏྠ ཙ རཱུཔཱཝཙརཛ྄ཛྷཱནཱནི ཛྷཱནཾ, ཨརཱུཔཱཝཙརཛ྄ཛྷཱནཱནི སམཱཔཏྟི. ཏདུབྷཡམྤི ཝཱ པཊིལདྡྷམཏྟཾ ཛྷཱནཾ, སམཱཔཛྫནཝསཱིབྷཱཝཔྤཏྟཾ སམཱཔཏྟི. ཨཔིཙ ཏདཔི ཨུབྷཡཾ ཛྷཱནམེཝ, ཕལསམཱཔཏྟིནིརོདྷསམཱཔཏྟིཡོ པན སམཱཔཏྟི, ཏཱསཾ ཝིཏྠཱརོཏི ཨཏྠོ.

ལོཀིཡལོཀུཏྟརབྷེདཱནཾ ཚནྣམྤི ཨབྷིཉྙཱནཾ གཧཎཏྠཾ ‘‘སབྦཱ ཙ ཨབྷིཉྙཱཡོ’’ཏི ཝུཏྟཾ. ཉཱཎཝིབྷངྒཱདཱིསུ (ཝིབྷ. ༧༥༡) ཨཱགཏནཡེན ཨེཀཝིདྷཱདིནཱ བྷེདེན པཉྙཱཡ སངྐལཡིཏྭཱ སམྤིཎྜེཏྭཱ, གཎེཏྭཱ ཝཱ ཝིནིཙྪཡནཾ པཉྙཱསངྐལནཝིནིཙྪཡོ. ཨརིཡཱནཱིཏི བུདྡྷཱདཱིཧི ཨརིཡེཧི པཊིཝིཛ྄ཛྷིཏབྦཏྟཱ, ཨརིཡབྷཱཝསཱདྷཀཏྟཱ ཝཱ ཨརིཡཱནི ཨུཏྟརཔདལོཔེན. ཨཝིཏཐབྷཱཝེན ཝཱ ཨརཎཱིཡཏྟཱ, ཨཝགནྟབྦཏྟཱ ཨརིཡཱནི, ‘‘སཙྩཱནཱི’’ཏིམསྶ ཝིསེསནཾ.

ཧེཏཱདིཔཙྩཡདྷམྨཱནཾ ¶ ཧེཏུཔཙྩཡཱདིབྷཱཝེན པཙྩཡུཔྤནྣདྷམྨཱནམུཔཀཱརཀཏཱ པཙྩཡཱཀཱརོ, ཏསྶ དེསནཱ ཏཐཱ, པཊིཙྩསམུཔྤཱདཀཐཱཏི ཨཏྠོ. སཱ པན ནིཀཱཡནྟརལདྡྷིསངྐརརཧིཏཏཱཡ སུཊྛུ པརིསུདྡྷཱ, གྷནཝིནིབྦྷོགསྶ ཙ སུདུཀྐརཏཱཡ ནིཔུཎཱ, ཨེཀཏྟཱདིནཡསཧིཏཱ ཙ ཏཏྠ ཝིཙཱརིཏཱཏི ཨཱཧ ‘‘སུཔརིསུདྡྷནིཔུཎནཡཱ’’ཏི. པདཏྟཡམྤི ཧེཏཾ པཙྩཡཱཀཱརདེསནཱཡ ཝིསེསནཾ. པཊིསམྦྷིདཱདཱིསུ ཨཱགཏནཡཾ ཨཝིསྶཛྫིཏྭཱཝ ཝིཙཱརིཏཏྟཱ ཨཝིམུཏྟོ ཏནྟིམགྒོ ཡསྶཱཏི ཨཝིམུཏྟཏནྟི མགྒཱ. མགྒོཏི ཙེཏྠ པཱལི༹སངྑཱཏོ ཨུཔཱཡོ ཏཾཏདཏྠཱནཾ ཨཝབོདྷསྶ, སཙྩཔཊིཝེདྷསྶ ཝཱ ཨུཔཱཡབྷཱཝཏོ. པབནྡྷོ ཝཱ དཱིགྷབྷཱཝེན པཀཏིམགྒསདིསཏྟཱ, ཨིདཾ པན ‘‘ཝིཔསྶནཱ, བྷཱཝནཱ’’ཏི པདདྭཡསྶ ཝིསེསནཾ.

ཨིཏི ¶ པན སབྦནྟི ཨེཏྠ ཨིཏི-སདྡོ པརིསམཱཔནེ ཡཐཱཨུདྡིཊྛཨུདྡེསསྶ པརིནིཊྛིཏཏྟཱ, ཨེཏྟཀཾ སབྦནྟི ཨཏྠོ. པནཱཏི ཝཙནཱལངྐཱརམཏྟཾ ཝིསུཾ ཨཏྠཱབྷཱཝཏོ. པདཏྠསཾཀིཎྞསྶ, ཝཏྟབྦསྶ ཙ ཨཝུཏྟསྶ ཨཝསེསསྶ ཨབྷཱཝཏོ སུཝིཉྙེཡྻབྷཱཝེན སུཔརིསུདྡྷཾ, ‘‘སབྦ’’ནྟི ཨིམིནཱ སམྦནྡྷོ, བྷཱཝནཔུཾསཀཾ ཝཱ ཨེཏཾ ‘‘ཝུཏྟ’’ནྟི ཨིམིནཱ སམྦཛ྄ཛྷནཏོ. བྷིཡྻོཏི ཨཏིརེཀཾ, ཨཏིཝིཏྠཱརནྟི ཨཏྠོ, ཨེཏེན པདཏྠམཏྟམེཝ ཝིཙཱརཡིསྶཱམཱིཏི དསྶེཏི. ཨེཏཾ སབྦཾ ཨིདྷ ཨཊྛཀཐཱཡ ན ཝིཙཱརཡིསྶཱམི པུནརུཏྟིབྷཱཝཏོ, གནྠགརུཀབྷཱཝཏོ ཙཱཏི ཨདྷིཔྤཱཡོ. ཝིཙརཡིསྶཱམཱིཏི ཙ གཱཐཱབྷཱཝཏོ ན ཝུདྡྷིབྷཱཝོཏི དཊྛབྦཾ.

ཨེཝམྤི ཨེས ཝིསུདྡྷིམགྒོ ཨཱགམཱནམཏྠཾ ན པཀཱསེཡྻ, ཨཐ སབྦོཔེསོ ཨིདྷ ཝིཙཱརིཏབྦོཡེཝཱཏི ཙོདནཱཡ ཏཐཱ ཨཝིཙཱརཎསྶ ཨེཀནྟཀཱརཎཾ ནིདྡྷཱརེཏྭཱ ཏཾ པརིཧརནྟོ ‘‘མཛ྄ཛྷེ ཝིསུདྡྷིམགྒོ’’ཏིཨཱདིམཱཧ. ཏཏྠ མཛ྄ཛྷེཏི ཁུདྡཀཏོ ཨཉྙེསཾ ཙཏུནྣམྤི ཨཱགམཱནཾ ཨབྦྷནྟརེ. ཧི-སདྡོ ཀཱརཎེ, ཏེན ཡཐཱཝུཏྟཾ ཀཱརཎཾ ཛོཏེཏི. ཏཏྠཱཏི ཏེསུ ཙཏཱུསུ ཨཱགམེསུ. ཡཐཱབྷཱསིཏནྟི བྷགཝཏཱ ཡཾ ཡཾ དེསིཏཾ, དེསིཏཱནུརཱུཔཾ ཝཱ. ཨཔི ཙ སཾཝཎྞཀེཧི སཾཝཎྞནཱཝསེན ཡཾ ཡཾ བྷཱསིཏཾ, བྷཱསིཏཱནུརཱུཔནྟིཔི ཨཏྠོ. ཨིཙྩེཝཱཏི ཨེཏྠ ཨིཏི-སདྡེན ཡཐཱཝུཏྟཾ ཀཱརཎཾ ནིདསྶེཏི, ཨིམིནཱཝ ཀཱརཎེན, ཨིདམེཝ ཝཱ ཀཱརཎཾ མནསི སནྣིདྷཱཡཱཏི ཨཏྠོ. ཀཏོཏི ཨེཏྠཱཔི ‘‘ཝིསུདྡྷིམགྒོ ཨེསཱ’’ཏི པདཾ ཀམྨབྷཱཝེན སམྦཛ྄ཛྷཏི ཨཱཝུཏྟིཡཱདིནཡེནཱཏི དཊྛབྦཾ. ཏམྤཱིཏི ཏཾ ཝིསུདྡྷིམགྒམྤི ཉཱཎེན གཧེཏྭཱན. ཨེཏཱཡཱཏི སུམངྒལཝིལཱསིནིཡཱ ནཱམ ཨེཏཱཡ ཨཊྛཀཐཱཡ. ཨེཏྠ ཙ ‘‘མཛ྄ཛྷེ ཋཏྭཱ’’ཏི ཨེཏེན མཛ྄ཛྷཏྟབྷཱཝདཱིཔནེན ཝིསེསཏོ ཙཏུནྣམྤི ཨཱགམཱནཾ སཱདྷཱརཎཊྛཀཐཱ ཝིསུདྡྷིམགྒོ, ན སུམངྒལཝིལཱསིནཱིཨཱདཡོ ཝིཡ ཨསཱདྷཱརཎཊྛཀཐཱཏི དསྶེཏི. ཨཝིསེསཏོ པན ཝིནཡཱབྷིདྷམྨཱནམྤི ཡཐཱརཧཾ སཱདྷཱརཎཊྛཀཐཱ ཧོཏིཡེཝ, ཏེཧི སམྨིསྶཏཱཡ ཙ ཏདཝསེསསྶ ཁུདྡཀཱགམསྶ ¶ ཝིསེསཏོ སཱདྷཱརཎཱ སམཱནཱཔི ཏཾ ཋཔེཏྭཱ ཙཏུནྣམེཝ ཨཱགམཱནཾ སཱདྷཱརཎཱཏྭེཝ ཝུཏྟཱཏི.

ཨིཏི སོལ༹སགཱཐཱཝཎྞནཱ.

གནྠཱརམྦྷཀཐཱཝཎྞནཱ ནིཊྛིཏཱ.

ནིདཱནཀཐཱཝཎྞནཱ

ཨེཝཾ ¶ ¶ ཡཐཱཝུཏྟེན ཝིཝིདྷེན ནཡེན པཎཱམཱདིཀཾ པཀརཎཱརམྦྷཝིདྷཱནཾ ཀཏྭཱ ཨིདཱནི ཝིབྷཱགཝནྟཱནཾ སབྷཱཝཝིབྷཱཝནཾ ཝིབྷཱགདསྶནཝསེནེཝ སུཝིབྷཱཝིཏཾ, སུཝིཉྙཱཔིཏཉྩ ཧོཏཱིཏི པཋམཾ ཏཱཝ ཝགྒསུཏྟཝསེན ཝིབྷཱགཾ དསྶེཏུཾ ‘‘ཏཏྠ དཱིགྷཱགམོ ནཱམཱ’’ཏིཨཱདིམཱཧ. ཏཏྠ ཏཏྠཱཏི ‘‘དཱིགྷསྶ ཨཱགམཝརསྶ ཨཏྠཾ པཀཱསཡིསྶཱམཱི’’ཏི ཡདིདཾ ཝུཏྟཾ, ཏསྨིཾ ཝཙནེ. ‘‘ཡསྶ ཨཏྠཾ པཀཱསཡིསྶཱམཱི’’ཏི པཊིཉྙཱཏཾ, སོ དཱིགྷཱགམོ ནཱམ ཝགྒསུཏྟཝསེན ཨེཝཾ ཝེདིཏབྦོ, ཨེཝཾ ཝིབྷཱགོཏི ཝཱ ཨཏྠོ. ཨཐ ཝཱ ཏཏྠཱཏི ‘‘དཱིགྷཱགམནིསྶིཏ’’ནྟི ཡཾ ཝུཏྟཾ, ཨེཏསྨིཾ ཝཙནེ. ཡོ དཱིགྷཱགམོ ཝུཏྟོ, སོ དཱིགྷཱགམོ ནཱམ ཝགྒསུཏྟཝསེན. ཨེཝཾ ཝིབྷཛིཏབྦོ, ཨེདིསོཏི ཝཱ ཨཏྠོ. ‘‘དཱིགྷསྶཱ’’ཏིཨཱདིནཱ ཧི ཝུཏྟཾ དཱུརཝཙནཾ ཏཾ-སདྡེན པཊིནིདྡིསཏི ཝིཡ ‘‘དཱིགྷཱགམནིསྶིཏ’’ནྟི ཝུཏྟཾ ཨཱསནྣཝཙནམྤི ཏཾ-སདྡེན པཊིནིདྡིསཏི ཨཏྟནོ བུདྡྷིཡཾ པརམྨུཁཾ ཝིཡ པརིཝཏྟམཱནཾ ཧུཏྭཱ པཝཏྟནཏོ. ཨེདིསེསུ ཧི ཋཱནེསུ ཨཏྟནོ བུདྡྷིཡཾ སམྨུཁཾ ཝཱ པརམྨུཁཾ ཝཱ པརིཝཏྟམཱནཾ ཡཐཱ ཏཐཱ ཝཱ པཊིནིདྡིསིཏུཾ ཝཊྚཏི སདྡམཏྟཔཊིནིདྡེསེན ཨཏྠསྶཱཝིརོདྷནཏོ. ཝགྒསུཏྟཱདཱིནཾ ནིབྦཙནཾ པརཏོ ཨཱཝི བྷཝིསྶཏི. ཏཡོ ཝགྒཱ ཡསྶཱཏི ཏིཝགྒོ. ཙཏུཏྟིཾས སུཏྟཱནི ཨེཏྠ སངྒཡ྄ཧནྟི, ཏེསཾ ཝཱ སངྒཧོ གཎནཱ ཨེཏྠཱཏི ཙཏུཏྟིཾསསུཏྟསངྒཧོ.

ཨཏྟནོ སཾཝཎྞནཱཡ པཋམསངྒཱིཏིཡཾ ནིཀྑིཏྟཱནུཀྐམེནེཝ པཝཏྟབྷཱཝཾ དསྶེཏུཾ ‘‘ཏསྶ…པེ… ནིདཱནམཱདཱི’’ཏི ཝུཏྟཾ. ཨཱདིབྷཱཝོ ཧེཏྠ སངྒཱིཏིཀྐམེནེཝ ཝེདིཏབྦོ. ཀསྨཱ པན ཙཏཱུསུ ཨཱགམེསུ དཱིགྷཱགམོ པཋམཾ སངྒཱིཏོ, ཏཏྠ ཙ སཱིལཀྑནྡྷཝགྒོ པཋམཾ ནིཀྑིཏྟོ, ཏསྨིཉྩ བྲཧྨཛཱལསུཏྟཾ, ཏཏྠཱཔི ནིདཱནནྟི? ནཱཡམནུཡོགོ ཀཏྠཙིཔི ན པཝཏྟཏི སབྦཏྠེཝ ཝཙནཀྐམམཏྟཾ པཊིཙྩ ཨནུཡུཉྫིཏབྦཏོ. ཨཔིཙ སདྡྷཱཝཧགུཎཏྟཱ དཱིགྷཱགམོཝ པཋམཾ སངྒཱིཏོ. སདྡྷཱ ཧི ཀུསལདྷམྨཱནཾ བཱིཛཾ. ཡཐཱཧ ‘‘སདྡྷཱ བཱིཛཾ ཏཔོ ཝུཊྛཱི’’ཏི (སཾ. ནི. ༢.༡༩༧; སུ. ནི. ༧༧). སདྡྷཱཝཧགུཎཏཱ ཙསྶ ཧེཊྛཱ དསྶིཏཱཡེཝ. ཀིཉྩ བྷིཡྻོ – ཀཏིཔཡསུཏྟསངྒཧཏཱཡ ¶ ཙེཝ ཨཔྤཔརིམཱཎཏཱཡ ཙ ཨུགྒཧཎདྷཱརཎཱདིསུཁཏོ པཋམཾ སངྒཱིཏོ. ཏཐཱ ཧེས ཙཏུཏྟིཾསསུཏྟསངྒཧོ, ཙཏུསཊྛིབྷཱཎཝཱརཔརིམཱཎོ ཙ. སཱིལཀཐཱབཱཧུལླཏོ པན སཱིལཀྑནྡྷཝགྒོ པཋམཾ ནིཀྑིཏྟོ. སཱིལཉྷི སཱསནསྶ ཨཱདི སཱིལཔཏིཊྛཱནཏྟཱ སབྦགུཎཱནཾ ¶ . ཏེནེཝཱཧ ‘‘ཏསྨཱ ཏིཧ ཏྭཾ བྷིཀྑུ ཨཱདིམེཝ ཝིསོདྷེཧི ཀུསལེསུ དྷམྨེསུ. ཀོ ཙཱདི ཀུསལཱནཾ དྷམྨཱནཾ? སཱིལཉྩ སུཝིསུདྡྷ’’ནྟིཨཱདི (སཾ. ནི. ༥.༤༦༩). སཱིལཀྑནྡྷཀཐཱབཱཧུལླཏོ ཧི སོ ‘‘སཱིལཀྑནྡྷཝགྒོ’’ཏི ཝུཏྟོ. དིཊྛིཝིནིཝེཋནཀཐཱབྷཱཝཏོ པན སུཏྟནྟཔིཊཀསྶ ནིརཝསེསདིཊྛིཝིབྷཛནཾ བྲཧྨཛཱལསུཏྟཾ པཋམཾ ནིཀྑིཏྟནྟི ཝེདིཏབྦཾ. ཏེཔིཊཀེ ཧི བུདྡྷཝཙནེ བྲཧྨཛཱལསདིསཾ དིཊྛིགཏཱནི ནིགྒུམྦཾ ནིཛྫཊཾ ཀཏྭཱ ཝིབྷཏྟསུཏྟཾ ནཏྠི. ནིདཱནཾ པན པཋམསངྒཱིཏིཡཾ མཧཱཀསྶཔཏྠེརེན པུཊྛེན ཨཱཡསྨཏཱ ཨཱནནྡེན དེསཀཱལཱདིནིདསྶནཏྠཾ པཋམཾ ནིཀྑིཏྟནྟི. ཏེནཱཧ ‘‘བྲཧྨཛཱལསྶཱཔཱི’’ཏིཨཱདི. ཏཏྠ ཙ ‘‘ཨཱཡསྨཏཱ’’ཏིཨཱདིནཱ དེསཀཾ ནིཡམེཏི, པཋམསངྒཱིཏིཀཱལེཏི པན ཀཱལནྟི, ཨཡམཏྠོ ཨུཔརི ཨཱཝི བྷཝིསྶཏི.

པཋམམཧཱསངྒཱིཏིཀཐཱཝཎྞནཱ

ཨིདཱནི ‘‘པཋམམཧཱསངྒཱིཏིཀཱལེ’’ཏི ཝཙནཔྤསངྒེན ཏཾ པཋམམཧཱསངྒཱིཏིཾ དསྶེནྟོ, ཡསྶཾ ཝཱ པཋམམཧཱསངྒཱིཏིཡཾ ནིཀྑིཏྟཱནུཀྐམེན སཾཝཎྞནཾ ཀཏྟུཀཱམཏྟཱ ཏཾ ཝིབྷཱཝེནྟོ ཏསྶཱ ཏནྟིཡཱ ཨཱརུལ༹ྷཱཡཔི ཨིདྷ ཝཙནེ ཀཱརཎཾ དསྶེཏུཾ ‘‘པཋམམཧཱསངྒཱིཏི ནཱམ ཙེསཱ’’ཏིཨཱདིམཱཧ. ཨེཏྠ ཧི ཀིཉྩཱཔི…པེ… མཱརུལ༹ྷཱཏི ཨེཏེན ནནུ སཱ སངྒཱིཏིཀྑནྡྷཀེ ཏནྟིམཱརུལ༹ྷཱ, ཀསྨཱ ཨིདྷ པུན ཝུཏྟཱ, ཡདི ཙ ཝུཏྟཱ ཨསྶ ནིརཏྠཀཏཱ, གནྠགརུཏཱ ཙ སིཡཱཏི ཙོདནཱལེསཾ དསྶེཏི. ‘‘ནིདཱན…པེ… ཝེདིཏབྦཱ’’ཏི པན ཨེཏེན ནིདཱནཀོསལླཏྠབྷཱཝཏོ ཡཐཱཝུཏྟདོསཏཱ ན སིཡཱཏི ཝིསེསཀཱརཎདསྶནེན པརིཧརཏི. ‘‘པཋམམཧཱསངྒཱིཏི ནཱམ ཙེསཱ’’ཏི ཨེཏྠ ཙ-སདྡོ ཨཱིདིསེསུ ཋཱནེསུ ཝཏྟབྦསམྤིཎྜནཏྠོ. ཏེན ཧི པཋམམཧཱསངྒཱིཏིཀཱལེ ཝུཏྟཾ ནིདཱནཉྩ ཨཱདི, ཨེསཱ ཙ པཋམམཧཱསངྒཱིཏི ནཱམ ཨེཝཾ ཝེདིཏབྦཱཏི ཨིམམཏྠཾ སམྤིཎྜེཏི. ཨུཔཉྙཱསཏྠོ ཝཱ ཙ-སདྡོ, ཨུཔཉྙཱསོཏི ཙ ཝཱཀྱཱརམྦྷོ ཝུཙྩཏི. ཨེསཱ ཧི གནྠཀཱརཱནཾ པཀཏི, ཡདིདཾ ཀིཉྩི ཝཏྭཱ པུན ཨཔརཾ ཝཏྟུམཱརབྷནྟཱནཾ ཙ-སདྡཔཡོགོ. ཡཾ པན ཝཛིརབུདྡྷིཏྠེརེན ཝུཏྟཾ ‘‘ཨེཏྠ ཙ-སདྡོ ཨཏིརེཀཏྠོ, ཏེན ཨཉྙཱཔི ཨཏྠཱིཏི དཱིཔེཏཱི’’ཏི (ཝཛིར ཊཱི. བཱཧིརནིདཱནཀཐཱཝཎྞནཱ), ཏདཡུཏྟམེཝ. ན ཧེཏྠ ཙ-སདྡེན ཏདཏྠོ ཝིཉྙཱཡཏི. ཡདི ཙེཏྠ ཏདཏྠདསྶནཏྠམེཝ ཙ-ཀཱརོ ཨདྷིཔྤེཏོ སིཡཱ, ཨེཝཾ སཏི སོ ན ཀཏྟབྦོཡེཝ པཋམསདྡེནེཝ ཨཉྙཱསཾ དུཏིཡཱདིསངྒཱིཏཱིནམྤི ¶ ཨཏྠིབྷཱཝསྶ དསྶིཏཏྟཱ. དུཏིཡཱདིམུཔཱདཱཡ ཧི པཋམསདྡཔཡོགོ ¶ དཱིགྷཱདིམུཔཱདཱཡ རསྶཱདིསདྡཔཡོགོ ཝིཡ. ཡཐཱཔཙྩཡཾ ཏཏྠ ཏཏྠ དེསིཏཏྟཱ, པཉྙཏྟཏྟཱ ཙ ཝིཔྤཀིཎྞཱནཾ དྷམྨཝིནཡཱནཾ སངྒཧེཏྭཱ གཱཡནཾ ཀཐནཾ སངྒཱིཏི, ཨེཏེན ཏཾ ཏཾ སིཀྑཱཔདཱནཾ, ཏཾཏཾསུཏྟཱནཉྩ ཨཱདིཔརིཡོསཱནེསུ, ཨནྟརནྟརཱ ཙ སམྦནྡྷཝསེན ཋཔིཏཾ སངྒཱིཏིཀཱརཀཝཙནཾ སངྒཧིཏཾ ཧོཏི. མཧཱཝིསཡཏྟཱ, པཱུཛིཏཏྟཱ ཙ མཧཏཱི སངྒཱིཏི མཧཱསངྒཱིཏི, པཋམཱ མཧཱསངྒཱིཏི པཋམམཧཱསངྒཱིཏི. ཀིཉྩཱཔཱིཏི ཨནུགྒཧཏྠོ, ཏེན པཱལི༹ཡམྤི སཱ སངྒཱིཏིམཱརུལ༹ྷཱཝཱཏི ཨནུགྒཧཾ ཀརོཏི, ཨེཝམྤི ཏཏྠཱརུལ༹ྷམཏྟེན ཨིདྷ སོཏཱུནཾ ནིདཱནཀོསལླཾ ན ཧོཏཱིཏི པན-སདྡེན ཨརུཙིཡཏྠཾ དསྶེཏི. ནིདདཱཏི དེསནཾ དེསཀཱལཱདིཝསེན ཨཝིདིཏཾ ཝིདིཏཾ ཀཏྭཱ ནིདསྶེཏཱིཏི ནིདཱནཾ, ཏསྨིཾ ཀོསལླཾ, ཏདཏྠཱཡཱཏི ཨཏྠོ.

ཨིདཱནི ཏཾ ཝིཏྠཱརེཏྭཱ དསྶེཏུཾ ‘‘དྷམྨཙཀྐཔཝཏྟནཉྷཱི’’ཏིཨཱདི ཝུཏྟཾ. ཏཏྠ སཏྟཱནཾ དསྶནཱནུཏྟརིཡསརཎཱདིཔཊིལཱབྷཧེཏུབྷཱུཏཱསུ ཝིཛྫམཱནཱསུཔི ཨཉྙཱསུ བྷགཝཏོ ཀིརིཡཱསུ ‘‘བུདྡྷོ བོདྷེཡྻ’’ནྟི (བུ. ཝཾ. ཨཊྛ. ཨབྦྷནྟརནིདཱན ༡; ཙརིཡཱ. ཨཊྛ. པཀིཎྞཀཀཐཱ; ཨུདཱན ཨཊྛ. ༡༨) པཊིཉྙཱཡ ཨནུལོམནཏོ ཝིནེཡྻཱནཾ མགྒཕལུཔྤཏྟིཧེཏུབྷཱུཏཱ ཀིརིཡཱཝ ནིཔྤརིཡཱཡེན བུདྡྷཀིཙྩཾ ནཱམཱཏི ཏཾ སརཱུཔཏོ དསྶེཏུཾ ‘‘དྷམྨཙཀྐཔྤཝཏྟནཉྷི…པེ… ཝིནཡནཱ’’ཏི ཝུཏྟཾ. དྷམྨཙཀྐཔྤཝཏྟནཏོ པན པུབྦབྷཱགེ བྷགཝཏཱ བྷཱསིཏཾ སུཎནྟཱནམྤི ཝཱསནཱབྷཱགིཡམེཝ ཛཱཏཾ, ན སེཀྑབྷཱགིཡཾ, ན ནིབྦེདྷབྷཱགིཡཾ ཏཔུསྶབྷལླིཀཱནཾ སརཎདཱནཾ ཝིཡ. ཨེསཱ ཧི དྷམྨཏཱ, ཏསྨཱ ཏམེཝ མརིཡཱདབྷཱཝེན ཝུཏྟནྟི ཝེདིཏབྦཾ. སདྡྷིནྡྲིཡཱདི དྷམྨོཡེཝ པཝཏྟནཊྛེན ཙཀྐནྟི དྷམྨཙཀྐཾ. ཨཐ ཝཱ ཙཀྐནྟི ཨཱཎཱ, དྷམྨཏོ ཨནཔེཏཏྟཱ དྷམྨཉྩ ཏཾ ཙཀྐཉྩཱཏི དྷམྨཙཀྐཾ. དྷམྨེན ཉཱཡེན ཙཀྐནྟིཔི དྷམྨཙཀྐཾ. ཝུཏྟཉྷི པཊིསམྦྷིདཱཡཾ –

‘‘དྷམྨཉྩ པཝཏྟེཏི ཙཀྐཉྩཱཏི དྷམྨཙཀྐཾ. ཙཀྐཉྩ པཝཏྟེཏི དྷམྨཉྩཱཏི དྷམྨཙཀྐཾ, དྷམྨེན པཝཏྟེཏཱིཏི དྷམྨཙཀྐཾ, དྷམྨཙརིཡཱཡ པཝཏྟེཏཱིཏི དྷམྨཙཀྐ’’ནྟིཨཱདི (པཊི. མ. ༢.༤༠, ༤༡).

ཏསྶ པཝཏྟནཾ ཏཐཱ. པཝཏྟནནྟི ཙ པཝཏྟཡམཱནཾ, པཝཏྟིཏནྟི པཙྩུཔྤནྣཱཏཱིཏཝསེན དྭིདྷཱ ཨཏྠོ. ཡཾ སནྡྷཱཡ ཨཊྛཀཐཱསུ ཝུཏྟཾ ‘‘དྷམྨཙཀྐཔཝཏྟནསུཏྟནྟཾ ¶ དེསེནྟོ དྷམྨཙཀྐཾ པཝཏྟེཏི ནཱམ, ཨཉྙཱསིཀོཎྜཉྙཏྠེརསྶ མགྒཕལཱདྷིགཏཏོ པཊྛཱཡ པཝཏྟིཏཾ ནཱམཱ’’ཏི (སཾ. ནི. ཨཊྛ. ༣.༥.༡༠༨༡-༡༠༨༨; པཊི. མ. ཨཊྛ. ༢.༢.༤༠). ཨིདྷ པན པཙྩུཔྤནྣཝསེནེཝ ཨཏྠོ ཡུཏྟོ. ཡཱཝཱཏི པརིཙྪེདཏྠེ ནིཔཱཏོ, སུབྷདྡསྶ ནཱམ པརིབྦཱཛཀསྶ ཝིནཡནཾ ¶ ཨནྟོཔརིཙྪེདཾ ཀཏྭཱཏི ཨབྷིཝིདྷིཝསེན ཨཏྠོ ཝེདིཏབྦོ. ཏཉྷི བྷགཝཱ པརིནིབྦཱནམཉྩེ ནིཔནྣོཡེཝ ཝིནེསཱིཏི. ཀཏཾ པརིནིཊྛཱཔིཏཾ བུདྡྷཀིཙྩཾ ཡེནཱཏི ཏཐཱ, ཏསྨིཾ. ཀཏབུདྡྷཀིཙྩེ བྷགཝཏི ལོཀནཱཐེ པརིནིབྦུཏེཏི སམྦནྡྷོ, ཨེཏེན བུདྡྷཀཏྟབྦསྶ ཀིཙྩསྶ ཀསྶཙིཔི ཨསེསིཏབྷཱཝཾ དཱིཔེཏི. ཏཏོཡེཝ ཧི བྷགཝཱ པརིནིབྦུཏོཏི. ནནུ ཙ སཱཝཀེཧི ཝིནཱིཏཱཔི ཝིནེཡྻཱ བྷགཝཏཱཡེཝ ཝིནཱིཏཱ ནཱམ. ཏཐཱ ཧི སཱཝཀབྷཱསིཏཾ སུཏྟཾ ‘‘བུདྡྷབྷཱསིཏ’’ནྟི ཝུཙྩཏི. སཱཝཀཝིནེཡྻཱ ཙ ན ཏཱཝ ཝིནཱིཏཱ, ཏསྨཱ ‘‘ཀཏབུདྡྷཀིཙྩེ’’ཏི ན ཝཏྟབྦནྟི? ནཱཡཾ དོསོ ཏེསཾ ཝིནཡནུཔཱཡསྶ སཱཝཀེསུ ཋཔིཏཏྟཱ. ཏེནེཝཱཧ –

‘‘ན ཏཱཝཱཧཾ པཱཔིམ པརིནིབྦཱཡིསྶཱམི, ཡཱཝ མེ བྷིཀྑཱུ ན སཱཝཀཱ བྷཝིསྶནྟི ཝིཡཏྟཱ ཝིནཱིཏཱ ཝིསཱརདཱ བཧུསྶུཏཱ དྷམྨདྷརཱ…པེ… ཨུཔྤནྣཾ པརཔྤཝཱདཾ སཧ དྷམྨེན སུནིགྒཧིཏཾ ནིགྒཧེཏྭཱ སཔཱཊིཧཱརིཡཾ དྷམྨཾ དེསེསྶནྟཱི’’ཏིཨཱདི (དཱི. ནི. ༢.༡༦༨; ཨུདཱ. ༥༡).

‘‘ཀུསིནཱརཱཡ’’ནྟིཨཱདིནཱ བྷགཝཏོ པརིནིབྦུཏདེསཀཱལཝིསེསཝཙནཾ ‘‘ཨཔརིནིབྦུཏོ བྷགཝཱ’’ཏི གཱཧསྶ མིཙྪཱབྷཱཝདསྶནཏྠཾ, ལོཀེ ཛཱཏསཾཝདྡྷཱདིབྷཱཝདསྶནཏྠཉྩ. ཏཐཱ ཧི མནུསྶབྷཱཝསྶ སུཔཱཀཊཀརཎཏྠཾ མཧཱབོདྷིསཏྟཱ ཙརིམབྷཝེ དཱརཔརིགྒཧཱདཱིནིཔི ཀརོནྟཱིཏི. ཀུསིནཱརཱཡནྟི ཨེཝཾ ནཱམཀེ ནགརེ. ཏཉྷི ནགརཾ ཀུསཧཏྠཾ པུརིསཾ དསྶནཊྛཱནེ མཱཔིཏཏྟཱ ‘‘ཀུསིནཱར’’ནྟི ཝུཙྩཏི, སམཱིཔཏྠེ ཙེཏཾ བྷུམྨཾ. ཨུཔཝཏྟནེ མལླཱནཾ སཱལཝནེཏི ཏསྶ ནགརསྶ ཨུཔཝཏྟནབྷཱུཏེ མལླརཱཛཱུནཾ སཱལཝནེ. ཏཉྷི སཱལཝནཾ ནགརཾ པཝིསིཏུཀཱམཱ ཨུཡྻཱནཏོ ཨུཔཙྩ ཝཏྟནྟི གཙྪནྟི ཨེཏེནཱཏི ཨུཔཝཏྟནཾ. ཡཐཱ ཧི ཨནུརཱདྷཔུརསྶ དཀྑིཎཔཙྪིམདིསཱཡཾ ཐཱུཔཱརཱམོ, ཨེཝཾ ཏཾ ཨུཡྻཱནཾ ཀུསིནཱརཱཡ དཀྑིཎཔཙྪིམདིསཱཡཾ ཧོཏི. ཡཐཱ ཙ ཐཱུཔཱརཱམཏོ དཀྑིཎདྭཱརེན ནགརཾ པཝིསནམགྒོ པཱཙཱིནམུཁོ གནྟྭཱ ཨུཏྟརེན ནིཝཏྟཏི, ཨེཝཾ ཨུཡྻཱནཏོ སཱལཔནྟི པཱཙཱིནམུཁཱ གནྟྭཱ ཨུཏྟརེན ནིཝཏྟཱ, ཏསྨཱ ཏཾ ‘‘ཨུཔཝཏྟན’’ནྟི ཝུཙྩཏི. ཨཔརེ པན ¶ ‘‘ཏཾ སཱལཝནམུཔགནྟྭཱ མིཏྟསུཧཛྫེ ཨཔལོཀེཏྭཱ ནིཝཏྟནཏོ ཨུཔཝཏྟནནྟི པཱཀཊཾ ཛཱཏཾ ཀིརཱ’’ཏི ཝདནྟི. ཡམཀསཱལཱནམནྟརེཏི ཡམཀསཱལཱནཾ ཝེམཛ྄ཛྷེ. ཏཏྠ ཀིར བྷགཝཏོ པཉྙཏྟསྶ པརིནིབྦཱནམཉྩསྶ སཱིསབྷཱགེ ཨེཀཱ སཱལཔནྟི ཧོཏི, པཱདབྷཱགེ ཨེཀཱ. ཏཏྲཱཔི ཨེཀོ ཏརུཎསཱལོ སཱིསབྷཱགསྶ ཨཱསནྣོ ཧོཏི, ཨེཀོ པཱདབྷཱགསྶ. ཏསྨཱ ‘‘ཡམཀསཱལཱནམནྟརེ’’ཏི ཝུཏྟཾ. ཨཔིཙ ‘‘ཡམཀསཱལཱ ནཱམ མཱུལཀྑནྡྷཝིཊཔཔཏྟེཧི ཨཉྙམཉྙཾ སཾསིབྦེཏྭཱ ཋིཏསཱལཱ’’ཏིཔི མཧཱཨཊྛཀཐཱཡཾ ཝུཏྟཾ. མཱ ཨིཏི ཙནྡོ ཝུཙྩཏི ཏསྶ གཏིཡཱ དིཝསསྶ ¶ མིནིཏབྦཏོ, ཏདཱ སབྦཀལཱཔཱརིཔཱུརིཡཱ པུཎྞོ ཨེཝ མཱཏི པུཎྞམཱ. སདྡཝིདཱུ པན ‘‘མོ སིཝོ ཙནྡིམཱ ཙེཝཱ’’ཏི ཝུཏྟཾ སཀྐཏབྷཱསཱནཡཾ གཧེཏྭཱ ཨོཀཱརནྟམྤི ཙནྡིམཝཱཙཀ མ-སདྡམིཙྪནྟི. ཝིསཱཁཱཡ ཡུཏྟོ པུཎྞམཱ ཡཏྠཱཏི ཝིསཱཁཱཔུཎྞམོ, སོཡེཝ དིཝསོ ཏཐཱ, ཏསྨིཾ. པཙྩཱུསཏི ཏིམིརཾ ཝིནཱསེཏཱིཏི པཙྩཱུསོ, པཏི-པུབྦོ ཨུས-སདྡོ རུཛཱཡནྟི ཧི ནེརུཏྟིཀཱ, སོཡེཝ སམཡོཏི རཏྟིཡཱ པཙྪིམཡཱམཔརིཡཱཔནྣོ ཀཱལཝིསེསོ ཝུཙྩཏི, ཏསྨིཾ. ཝིསཱཁཱཔུཎྞམདིཝསེ ཨཱིདིསེ རཏྟིཡཱ པཙྪིམསམཡེཏི ཝུཏྟཾ ཧོཏི.

ཨུཔཱདཱིཡཏེ ཀམྨཀིལེསེཧཱིཏི ཨུཔཱདི, ཝིཔཱཀཀྑནྡྷཱ, ཀཊཏྟཱ ཙ རཱུཔཾ. སོ པན ཨུཔཱདི ཀིལེསཱབྷིསངྑཱརམཱརནིམྨཐནེ ཨནོསྶཊྛོ, ཨིདྷ ཁནྡྷམཙྩུམཱརནིམྨཐནེ ཨོསྶཊྛོན སེསིཏོ, ཏསྨཱ ནཏྠི ཨེཏིསྶཱ ཨུཔཱདིསངྑཱཏོ སེསོ, ཨུཔཱདིསྶ ཝཱ སེསོཏི ཀཏྭཱ ‘‘ཨནུཔཱདིསེསཱ’’ཏི ཝུཙྩཏི. ནིབྦཱནདྷཱཏཱུཏི ཙེཏྠ ནིབྦུཏིམཏྟཾ ཨདྷིཔྤེཏཾ, ནིབྦཱནཉྩ ཏཾ སབྷཱཝདྷཱརཎཏོ དྷཱཏུ ཙཱཏི ཀཏྭཱ. ནིབྦུཏིཡཱ ཧི ཀཱརཎཔརིཡཱཡེན ཨསངྑཏདྷཱཏུ ཏཐཱ ཝུཙྩཏི. ཨིཏྠམྦྷཱུཏལཀྑཎེ ཙཱཡཾ ཀརཎནིདྡེསོ. ཨནུཔཱདིསེསཏཱསངྑཱཏཾ ཨིམཾ པཀཱརཾ བྷཱུཏསྶ པཏྟསྶ པརིནིབྦུཏསྶ བྷགཝཏོ ལཀྑཎེ ནིབྦཱནདྷཱཏུསངྑཱཏེ ཨཏྠེ ཏཏིཡཱཏི ཝུཏྟཾ ཧོཏི. ནནུ ཙ ‘‘ཨནུཔཱདིསེསཱཡཱ’’ཏི ནིབྦཱནདྷཱཏུཡཱཝ ཝིསེསནཾ ཧོཏི, ན པརིནིབྦུཏསྶ བྷགཝཏོ, ཨཐ ཀསྨཱ ཏཾ བྷགཝཱ པཏྟོཏི ཝུཏྟོཏི? ནིབྦཱནདྷཱཏུཡཱ སཧཙརཎཏོ. ཏཾསཧཙརཎེན ཧི བྷགཝཱཔི ཨནུཔཱདིསེསབྷཱཝཾ པཏྟོཏི ཝུཙྩཏི. ཨཐ ཝཱ ཨནུཔཱདིསེསབྷཱཝསངྑཱཏཾ ཨིམཾ པཀཱརཾ པཏྟཱཡ ནིབྦཱནདྷཱཏུཡཱ ལཀྑཎེ སཉྫཱནནཀིརིཡཱཡ ཏཏིཡཱཏིཔི ཝཏྟུཾ ཡུཛྫཏི. ཨནུཔཱདིསེསཱཡ ནིབྦཱནདྷཱཏུཡཱཏི ཙ ཨནུཔཱདིསེསནིབྦཱནདྷཱཏུ ¶ ཧུཏྭཱཏི ཨཏྠོ. ‘‘ཨཱུནཔཉྩབནྡྷནེན པཏྟེནཱ’’ཏི (པཱརཱ. ༦༡༢). ཨེཏྠ ཧི ཨཱུནཔཉྩབནྡྷནཔཏྟོ ཧུཏྭཱཏི ཨཏྠཾ ཝདནྟི. ཨཔིཙ ནིབྦཱནདྷཱཏུཡཱ ཨནུཔཱདིསེསཱཡ ཨནུཔཱདིསེསཱ ཧུཏྭཱ བྷཱུཏཱཡཱཏིཔི ཡུཛྫཏི. ཝུཏྟཉྷི ཨུདཱནཊྛཀཐཱཡ ནནྡསུཏྟཝཎྞནཱཡཾ ‘‘ཨུཔཌྜྷུལླིཁིཏེཧི ཀེསེཧཱིཏི ཨིཏྠམྦྷཱུཏལཀྑཎེ ཀརཎཝཙནཾ ཝིཔྤཀཏུལླིཁིཏེཧི ཀེསེཧི ཨུཔལཀྑིཏཱཏི ཨཏྠོ’’ཏི (ཨུདཱ. ཨཊྛ. ༢༢) ཨེསནཡོ ཨཱིདིསེསུ. དྷཱཏུབྷཱཛནདིཝསེཏི ཛེཊྛམཱསསྶ སུཀྐཔཀྑཔཉྩམཱིདིཝསཾ སནྡྷཱཡ ཝུཏྟཾ, ཏཉྩ ན ‘‘སནྣིཔཏིཏཱན’’ནྟི ཨེཏསྶ ཝིསེསནཾ, ‘‘ཨུསྶཱཧཾ ཛནེསཱི’’ཏི ཨེཏསྶ པན ཝིསེསནཾ ‘‘དྷཱཏུབྷཱཛནདིཝསེ བྷིཀྑཱུནཾ ཨུསྶཱཧཾ ཛནེསཱི’’ཏི ཨུསྶཱཧཛནནསྶ ཀཱལཝསེན བྷིནྣཱདྷིཀརཎཝིསེསནབྷཱཝཏོ. དྷཱཏུབྷཱཛནདིཝསཏོ ཧི པུརིམཏརདིཝསེསུཔི བྷིཀྑཱུ སནྣིཔཏིཏཱཏི. ཨཐ ཝཱ ‘‘སནྣིཔཏིཏཱན’’ནྟི ཨིདཾ ཀཱཡསཱམགྒིཝསེན སནྣིཔཏནམེཝ སནྡྷཱཡ ཝུཏྟཾ, ན སམཱགམནམཏྟེན. ཏསྨཱ ‘‘དྷཱཏུབྷཱཛནདིཝསེ’’ཏི ཨིདཾ ‘‘སནྣིཔཏིཏཱན’’ནྟི ཨེཏསྶ ཝིསེསནཾ སམྦྷཝཏི, ཨིདཉྩ བྷིཀྑཱུནཾ ཨུསྶཱཧཾ ཛནེསཱིཏི ཨེཏྠ ‘‘བྷིཀྑཱུན’’ནྟི ཨེཏེནཔི སམྦཛ྄ཛྷནཱིཡཾ ¶ . སངྒྷསྶ ཐེརོ སངྒྷཏྠེརོ. སོ པན སངྒྷོ ཀིཾ པརིམཱཎོཏི ཨཱཧ ‘‘སཏྟནྣཾ བྷིཀྑུསཏསཧསྶཱན’’ནྟི. སངྒྷསདྡེན ཧི ཨཝིཉྙཱཡམཱནསྶ པརིམཱཎསྶ ཝིཉྙཱཔནཏྠམེཝེཏཾ པུན ཝུཏྟཾ. སདྡཝིདཱུ པན ཝདནྟི –

‘‘སམཱསོ ཙ ཏདྡྷིཏོ ཙ, ཝཱཀྱཏྠེསུ ཝིསེསཀཱ;

པསིདྡྷིཡནྟུ སཱམཉྙཾ, ཏེལཾ སུགཏཙཱིཝརཾ.

ཏསྨཱ ནཱམམཏྟབྷཱུཏསྶ སངྒྷཏྠེརསྶ ཝིསེསནཏྠམེཝེཏཾ པུན ཝུཏྟནྟི, ནིཙྩསཱཔེཀྑཏཱཡ ཙ ཨེདིསེསུ སམཱསོ ཡཐཱ ‘‘དེཝདཏྟསྶ གརུཀུལ’’ནྟི. ནིཙྩསཱཔེཀྑཏཱ ཙེཏྠ སངྒྷསདྡསྶ བྷིཀྑུསཏསཧསྶསདྡཾ སཱཔེཀྑཏྟེཔི ཨཉྙཔདནྟརཱབྷཱཝེན ཝཱཀྱེ ཝིཡ ཨཔེཀྑིཏབྦཏྠསྶ གམཀཏྟཱ. ‘‘སཏྟནྣཾ བྷིཀྑུསཏསཧསྶཱན’’ནྟི ཧི ཨེཏསྶ སངྒྷསདྡེ ཨཝཡཝཱིབྷཱཝེན སམྦནྡྷོ, ཏསྶཱཔི སཱམིབྷཱཝེན ཐེརསདྡེཏི. ‘‘སཏྟནྣཾ བྷིཀྑུསཏསཧསྶཱན’’ནྟི ཙ གཎཔཱམོཀྑབྷིཀྑཱུཡེཝ སནྡྷཱཡ ཝུཏྟཾ. ཏདཱ ཧི སནྣིཔཏིཏཱ བྷིཀྑཱུ ཨེཏྟཀཱཏི གཎནཔཐམཏིཀྐནྟཱ. ཏཐཱ ཧི ཝེལུ༹ཝགཱམེ ཝེདནཱཝིཀྑམྦྷནཏོ པཊྛཱཡ ‘‘ནཙིརེནེཝ བྷགཝཱ པརིནིབྦཱཡིསྶཏཱི’’ཏི སུཏྭཱ ཏཏོ ཏཏོ ཨཱགཏེསུ བྷིཀྑཱུསུ ཨེཀབྷིཀྑུཔི པཀྐནྟོ ནཱམ ནཏྠི. ཡཐཱཧུ –

‘‘སཏྟསཏསཧསྶཱནི ¶ , ཏེསུ པཱམོཀྑབྷིཀྑཝོ;

ཐེརོ མཧཱཀསྶཔོཝ, སངྒྷཏྠེརོ ཏདཱ ཨཧཱུ’’ཏི.

ཨཱཡསྨཱ མཧཱཀསྶཔོ ཨནུསྶརནྟོ མཉྙམཱནོ ཙིནྟཡནྟོ ཧུཏྭཱ ཨུསྶཱཧཾ ཛནེསི, ཨནུསྶརནྟོ མཉྙམཱནོ ཙིནྟཡནྟོ ཨཱཡསྨཱ མཧཱཀསྶཔོ ཨུསྶཱཧཾ ཛནེསཱིཏི ཝཱ སམྦནྡྷོ. མཧནྟེཧི སཱིལཀྑནྡྷཱདཱིཧི སམནྣཱགཏཏྟཱ མཧནྟོ ཀསྶཔོཏི མཧཱཀསྶཔོ. ཨཔིཙ ‘‘མཧཱཀསྶཔོ’’ཏི ཨུརུཝེལཀསྶཔོ ནདཱིཀསྶཔོ གཡཱཀསྶཔོ ཀུམཱརཀསྶཔོཏི ཨིམེ ཁུདྡཱནུཁུདྡཀེ ཐེརེ ཨུཔཱདཱཡ ཝུཙྩཏི. ཀསྨཱ པནཱཡསྨཱ མཧཱཀསྶཔོ ཨུསྶཱཧཾ ཛནེསཱིཏི ཨནུཡོགེ སཏི ཏཾ ཀཱརཎཾ ཝིབྷཱཝེནྟོ ཨཱཧ ‘‘སཏྟཱཧཔརིནིབྦུཏེ’’ཏིཨཱདི. སཏྟ ཨཧཱནི སམཱཧཊཱནི སཏྟཱཧཾ. སཏྟཱཧཾ པརིནིབྦུཏསྶ ཨསྶཱཏི ཏཐཱ ཡཐཱ ‘‘ཨཙིརཔཀྐནྟོ, མཱསཛཱཏོ’’ཏི, ཨནྟཏྠཨཉྙཔདསམཱསོཡཾ, ཏསྨིཾ. བྷགཝཏོ པརིནིབྦཱནདིཝསཏོ པཊྛཱཡ སཏྟཱཧེ ཝཱིཏིཝཏྟེཏི ཝུཏྟཾ ཧོཏི, ཨེཏསྶ ‘‘ཝུཏྟཝཙན’’ནྟི པདེན སམྦནྡྷོ, ཏཐཱ ‘‘སུབྷདྡེན ཝུཌྜྷཔབྦཛིཏེནཱ’’ཏི ཨེཏསྶཔི. ཏཏྠ སུབྷདྡོཏི ཏསྶ ནཱམམཏྟཾ, ཝུཌྜྷཀཱལེ པན པབྦཛིཏཏྟཱ ‘‘ཝུཌྜྷཔབྦཛིཏེནཱ’’ཏི ཝུཏྟཾ, ཨེཏེན སུབྷདྡཔརིབྦཱཛཀཱདཱིཧི ཏཾ ཝིསེསཾ ཀརོཏི. ‘‘ཨལཾ ཨཱཝུསོ’’ཏིཨཱདིནཱ ¶ ཏེན ཝུཏྟཝཙནཾ ནིདསྶེཏི. སོ ཧི སཏྟཱཧཔརིནིབྦུཏེ བྷགཝཏི ཨཱཡསྨཏཱ མཧཱཀསྶཔཏྠེརེན སདྡྷིཾ པཱཝཱཡ ཀུསིནཱརཾ ཨདྡྷཱནམགྒཔཊིཔནྣེསུ པཉྩམཏྟེསུ བྷིཀྑུསཏེསུ ཨཝཱིཏརཱགེ བྷིཀྑཱུ ཨནྟརཱམགྒེ དིཊྛཨཱཛཱིཝཀསྶ སནྟིཀཱ བྷགཝཏོ པརིནིབྦཱནཾ སུཏྭཱ པཏྟཙཱིཝརཱནི ཚཌྜེཏྭཱ བཱཧཱ པགྒཡ྄ཧཾ ནཱནཔྤཀཱརཾ པརིདེཝནྟེ དིསྭཱ ཨེཝམཱཧ.

ཀསྨཱ པན སོ ཨེཝམཱཧཱཏི? བྷགཝཏི ཨཱགྷཱཏེན. ཨཡཾ ཀིརེསོ ཁནྡྷཀེ ཨཱགཏེ ཨཱཏུམཱཝཏྠུསྨིཾ (མཧཱཝ. ༣༠༣) ནཧཱཔིཏཔུབྦཀོ ཝུཌྜྷཔབྦཛིཏོ བྷགཝཏི ཀུསིནཱརཏོ ནིཀྑམིཏྭཱ ཨཌྜྷཏེལ༹སེཧི བྷིཀྑུསཏེཧི སདྡྷིཾ ཨཱཏུམཾ གཙྪནྟེ ‘‘བྷགཝཱ ཨཱགཙྪཏཱི’’ཏི སུཏྭཱ ‘‘ཨཱགཏཀཱལེཡཱགུདཱནཾ ཀརིསྶཱམཱི’’ཏི སཱམཎེརབྷཱུམིཡཾ ཋིཏེ དྭེ པུཏྟེ ཨེཏདཝོཙ ‘‘བྷགཝཱ ཀིར ཏཱཏཱ ཨཱཏུམཾ ཨཱགཙྪཏི མཧཏཱ བྷིཀྑུསངྒྷེན སདྡྷིཾ ཨཌྜྷཏེལ༹སེཧི བྷིཀྑུསཏེཧི, གཙྪཐ ཏུམྷེ ཏཱཏཱ, ཁུརབྷཎྜཾ ཨཱདཱཡ ནཱལི༹ཡཱ ཝཱ པསིབྦཀེན ཝཱ ཨནུགྷརཀཾ ཨཱཧིཎྜཐ, ལོཎམྤི ཏེལམྤི ཏཎྜུལམྤི ཁཱདནཱིཡམྤི ¶ སཾཧརཐ, བྷགཝཏོ ཨཱགཏསྶ ཡཱགུདཱནཾ ཀརིསྶཱམཱི’’ཏི. ཏེ ཏཐཱ ཨཀཾསུ. ཨཐ བྷགཝཏི ཨཱཏུམཾ ཨཱགནྟྭཱ བྷུསཱགཱརཀཾ པཝིཊྛེ སུབྷདྡོ སཱཡནྷསམཡཾ གཱམདྭཱརཾ གནྟྭཱ མནུསྶེ ཨཱམནྟེཏྭཱ ‘‘ཧཏྠཀམྨམཏྟཾ མེ དེཐཱ’’ཏི ཧཏྠཀམྨཾ ཡཱཙིཏྭཱ ‘‘ཀིཾ བྷནྟེ ཀརོམཱ’’ཏི ཝུཏྟེ ‘‘ཨིདཉྩིདཉྩ གཎྷཐཱ’’ཏི སབྦཱུཔཀརཎཱནི གཱཧཱཔེཏྭཱ ཝིཧཱརེ ཨུདྡྷནཱནི ཀཱརེཏྭཱ ཨེཀཾ ཀཱལ༹ཀཾ ཀཱསཱཝཾ ནིཝཱསེཏྭཱ ཏཱདིསམེཝ པཱརུཔིཏྭཱ ‘‘ཨིདཾ ཀརོཐ, ཨིདཾ ཀརོཐཱ’’ཏི སབྦརཏྟིཾ ཝིཙཱརེནྟོ སཏསཧསྶཾ ཝིསྶཛྫེཏྭཱ བྷོཛྫཡཱགུཉྩ མདྷུགོལ༹ཀཉྩ པཊིཡཱདཱཔེསི. བྷོཛྫཡཱགུ ནཱམ བྷུཉྫིཏྭཱ པཱཏབྦཡཱགུ, ཏཏྠ སཔྤིམདྷུཕཱཎིཏམཙྪམཾསཔུཔྥཕལརསཱདི ཡཾ ཀིཉྩི ཁཱདནཱིཡཾ ནཱམ ཨཏྠི, ཏཾ སབྦཾ པཝིསཏི. ཀཱིལི༹ཏུཀཱམཱནཾ སཱིསམཀྑནཡོགྒཱ ཧོཏི སུགནྡྷགནྡྷཱ.

ཨཐ བྷགཝཱ ཀཱལསྶེཝ སརཱིརཔཊིཛགྒནཾ ཀཏྭཱ བྷིཀྑུསངྒྷཔརིཝུཏོ པིཎྜཱཡ ཙརིཏུཾ ཨཱཏུམཱབྷིམུཁོ པཱཡཱསི. ཨཐ ཏསྶ ཨཱརོཙེསུཾ ‘‘བྷགཝཱ པིཎྜཱཡ གཱམཾ པཝིསཏི, ཏཡཱ ཀསྶ ཡཱགུ པཊིཡཱདིཏཱ’’ཏི. སོ ཡཐཱནིཝཏྠཔཱརུཏེཧེཝ ཏེཧི ཀཱལ༹ཀཀཱསཱཝེཧི ཨེཀེན ཧཏྠེན དབྦིཉྩ ཀཊཙྪུཉྩ གཧེཏྭཱ བྲཧྨཱ ཝིཡ དཀྑིཎཾ ཛཱཎུམཎྜལཾ བྷཱུམིཡཾ པཏིཊྛཔེཏྭཱ ཝནྡིཏྭཱ ‘‘པཊིགྒཎྷཱཏུ མེ བྷནྟེ བྷགཝཱ ཡཱགུ’’ནྟི ཨཱཧ. ཏཏོ ‘‘ཛཱནནྟཱཔི ཏཐཱགཏཱ པུཙྪནྟཱི’’ཏི ཁནྡྷཀེ (མཧཱཝ. ༣༠༤) ཨཱགཏནཡེན བྷགཝཱ པུཙྪིཏྭཱ ཙ སུཏྭཱ ཙ ཏཾ ཝུཌྜྷཔབྦཛིཏཾ ཝིགརཧིཏྭཱ ཏསྨིཾ ཝཏྠུསྨིཾ ཨཀཔྤིཡསམཱདཱནསིཀྑཱཔདཾ, ཁུརབྷཎྜཔརིཧརཎསིཀྑཱཔདཉྩཱཏི དྭེ སིཀྑཱཔདཱནི པཉྙཔེཏྭཱ ‘‘ཨནེཀཀཔྤཀོཊིཡོ བྷིཀྑཝེ བྷོཛནཾ པརིཡེསནྟེཧེཝ ཝཱིཏིནཱམིཏཱ ¶ , ཨིདཾ པན ཏུམྷཱཀཾ ཨཀཔྤིཡཾ, ཨདྷམྨེན ཨུཔྤནྣཾ བྷོཛནཾ ཨིམཾ པརིབྷུཉྫིཏྭཱ ཨནེཀཱནི ཨཏྟབྷཱཝསཧསྶཱནི ཨཔཱཡེསྭེཝ ནིབྦཏྟིསྶནྟི, ཨཔེཐ མཱ གཎྷཐཱ’’ཏི ཝཏྭཱ བྷིཀྑཱཙཱརཱབྷིམུཁོ ཨགམཱསི, ཨེཀབྷིཀྑུནཱཔི ན ཀིཉྩི གཧིཏཾ. སུབྷདྡོ ཨནཏྟམནོ ཧུཏྭཱ ‘‘ཨཡཾ སབྦཾ ཛཱནཱམཱི’’ཏི ཨཱཧིཎྜཏི, སཙེ ན གཧེཏུཀཱམོ པེསེཏྭཱ ཨཱརོཙེཏབྦཾ ཨསྶ, པཀྐཱཧཱརོ ནཱམ སབྦཙིརཾ ཏིཊྛནྟོ སཏྟཱཧམཏྟཾ ཏིཊྛེཡྻ, ཨིདཉྩ མམ ཡཱཝཛཱིཝཾ པརིཡཏྟཾ ཨསྶ, སབྦཾ ཏེན ནཱསིཏཾ, ཨཧིཏཀཱམོ ཨཡཾ མཡ྄ཧ’’ནྟི བྷགཝཏི ཨཱགྷཱཏཾ བནྡྷིཏྭཱ དསབལེ དྷརམཱནེ ཀིཉྩི ཝཏྟུཾ ¶ ནཱསཀྑི. ཨེཝཾ ཀིརསྶ ཨཧོསི ‘‘ཨཡཾ ཨུཙྩཱ ཀུལཱ པབྦཛིཏོ མཧཱཔུརིསོ, སཙེ ཀིཉྩི དྷརནྟསྶ ཝཀྑཱམི, མམཾཡེཝ སནྟཛྫེསྶཏཱི’’ཏི.

སྭཱཡཾ ཨཛྫ མཧཱཀསྶཔཏྠེརེན སདྡྷིཾ གཙྪནྟོ ‘‘པརིནིབྦུཏོ བྷགཝཱ’’ཏི སུཏྭཱ ལདྡྷསྶཱསོ ཝིཡ ཧཊྛཏུཊྛོ ཨེཝམཱཧ. ཐེརོ པན ཏཾ སུཏྭཱ ཧདཡེ པཧཱརཾ ཝིཡ, མཏྠཀེ པཏིཏསུཀྑཱསནིཾ ཝིཡ (སུཀྑཱསནི ཝིཡ དཱི. ནི. ཨཊྛ. ༣.༢༣༢) མཉྙི, དྷམྨསཾཝེགོ ཙསྶ ཨུཔྤཛྫི ‘‘སཏྟཱཧམཏྟཔརིནིབྦུཏོ བྷགཝཱ, ཨཛྫཱཔིསྶ སུཝཎྞཝཎྞཾ སརཱིརཾ དྷརཏིཡེཝ, དུཀྑེན བྷགཝཏཱ ཨཱརཱདྷིཏསཱསནེ ནཱམ ཨེཝཾ ལཧུཾ མཧནྟཾ པཱཔཾ ཀསཊཾ ཀཎྚཀོ ཨུཔྤནྣོ, ཨལཾ ཁོ པནེས པཱཔོ ཝཌྜྷམཱནོ ཨཉྙེཔི ཨེཝརཱུཔེ སཧཱཡེ ལབྷིཏྭཱ སཱསནཾ ཨོསཀྐཱཔེཏུ’’ནྟི.

ཏཏོ ཐེརོ ཙིནྟེསི ‘‘སཙེ ཁོ པནཱཧཾ ཨིམཾ མཧལླཀཾ ཨིདྷེཝ པིལོཏིཀཾ ནིཝཱསེཏྭཱ ཚཱརིཀཱཡ ཨོཀིརཱཔེཏྭཱ ནཱིཧརཱཔེསྶཱམི, མནུསྶཱ ‘སམཎསྶ གོཏམསྶ སརཱིརེ དྷརམཱནེཡེཝ སཱཝཀཱ ཝིཝདནྟཱི’ཏི ཨམྷཱཀཾ དོསཾ དསྶེསྶནྟི, ཨདྷིཝཱསེམི ཏཱཝ. བྷགཝཏཱ ཧི དེསིཏདྷམྨོ ཨསངྒཧིཏཔུཔྥརཱསིསདིསོ, ཏཏྠ ཡཐཱ ཝཱཏེན པཧཊཔུཔྥཱནི ཡཏོ ཝཱ ཏཏོ ཝཱ གཙྪནྟི, ཨེཝམེཝ ཨེཝརཱུཔཱནཾ ཝསེན གཙྪནྟེ གཙྪནྟེ ཀཱལེ ཝིནཡེ ཨེཀཾ དྭེ སིཀྑཱཔདཱནི ནསྶིསྶནྟི, སུཏྟེ ཨེཀོ དྭེ པཉྷཱཝཱརཱ ནསྶིསྶནྟི, ཨབྷིདྷམྨེ ཨེཀཾ དྭེ བྷཱུམནྟརཱནི ནསྶིསྶནྟི, ཨེཝཾ ཨནུཀྐམེན མཱུལེ ནཊྛེ པིསཱཙསདིསཱ བྷཝིསྶཱམ, ཏསྨཱ དྷམྨཝིནཡསངྒཧཾ ཀརིསྶཱམི, ཨེཝཾ སཏི དལ༹ྷསུཏྟེན སངྒཧིཏཔུཔྥཱནི ཝིཡ ཨཡཾ དྷམྨཝིནཡོ ནིཙྩལོ བྷཝིསྶཏི. ཨེཏདཏྠཉྷི བྷགཝཱ མཡ྄ཧཾ ཏཱིཎི གཱཝུཏཱནི པཙྩུགྒམནཾ ཨཀཱསི, ཏཱིཧི ཨོཝཱདེཧི (སཾ. ནི. ༢.༡༤༩, ༡༥༠, ༡༥༡) ཨུཔསམྤདཾ ཨཀཱསི, ཀཱཡཏོ ཙཱིཝརཔརིཝཏྟནཾ ཨཀཱསི, ཨཱཀཱསེ པཱཎིཾ ཙཱལེཏྭཱ ཙནྡོཔམཔཊིཔདཾ ཀཐེནྟོ མཉྙེཝ སཀྑིཾ ཀཏྭཱ ཀཐེསི, ཏིཀྑཏྟུཾ སཀལསཱསནརཏནཾ པཊིཙྪཱཔེསི, མཱདིསེ བྷིཀྑུམྷི ཏིཊྛམཱནེ ཨཡཾ པཱཔོ སཱསནེ ཝཌྜྷིཾ མཱ ཨལཏྠ, ཡཱཝ ཨདྷམྨོ ན དིཔྤཏི, དྷམྨོ ན པཊིབཱཧིཡྻཏི, ཨཝིནཡོ ན དིཔྤཏི, ཝིནཡོ ན པཊིབཱཧིཡྻཏི, ཨདྷམྨཝཱདིནོ ན བལཝནྟོ ཧོནྟི, དྷམྨཝཱདིནོ ¶ ན དུབྦལཱ ཧོནྟི, ཨཝིནཡཝཱདིནོ ན བལཝནྟོ ཧོནྟི, ཝིནཡཝཱདིནོ ན དུབྦལཱ ཧོནྟི, ཏཱཝ དྷམྨཉྩ ཝིནཡཉྩ སངྒཱཡིསྶཱམི, ཏཏོ བྷིཀྑཱུ ཨཏྟནོ ཨཏྟནོ པཧོནཀཾ ¶ གཧེཏྭཱ ཀཔྤིཡཱཀཔྤིཡེ ཀཐེསྶནྟི, ཨཐཱཡཾ པཱཔོ སཡམེཝ ནིགྒཧཾ པཱཔུཎིསྶཏི, པུན སཱིསཾ ཨུཀྑིཔིཏུཾ ན སཀྑིསྶཏི, སཱསནཾ ཨིདྡྷཉྩེཝ ཕཱིཏྟཉྩ བྷཝིསྶཏཱི’’ཏི ཙིནྟེཏྭཱ སོ ‘‘ཨེཝཾ ནཱམ མཡ྄ཧཾ ཙིཏྟཾ ཨུཔྤནྣ’’ནྟི ཀསྶཙིཔི ཨནཱརོཙེཏྭཱ བྷིཀྑུསངྒྷཾ སམསྶཱསེཏྭཱ ཨཐ པཙྪཱ དྷཱཏུབྷཱཛནདིཝསེ དྷམྨཝིནཡསངྒཱཡནཏྠཾ བྷིཀྑཱུནཾ ཨུསྶཱཧཾ ཛནེསི. ཏེན ཝུཏྟཾ ‘‘ཨཱཡསྨཱ མཧཱཀསྶཔོ སཏྟཱཧཔརིནིབྦུཏེ…པེ… དྷམྨཝིནཡསངྒཱཡནཏྠཾ བྷིཀྑཱུནཾ ཨུསྶཱཧཾ ཛནེསཱི’’ཏི.

ཏཏྠ ཨལནྟི པཊིཀྑེཔཝཙནཾ, ན ཡུཏྟནྟི ཨཏྠོ. ཨཱཝུསོཏི པརིདེཝནྟེ བྷིཀྑཱུ ཨཱལཔཏི. མཱ སོཙིཏྠཱཏི ཙིཏྟེ ཨུཔྤནྣབལཝསོཀེན མཱ སོཀམཀཏྠ. མཱ པརིདེཝིཏྠཱཏི ཝཱཙཱཡ མཱ ཝིལཱཔམཀཏྠ. ‘‘པརིདེཝནཾ ཝིལཱཔོ’’ཏི ཧི ཝུཏྟཾ. ཨསོཙནཱདཱིནཾ ཀཱརཎམཱཧ ‘‘སུམུཏྟཱ’’ཏིཨཱདིནཱ. ཏེན མཧཱསམཎེནཱཏི ནིསྶཀྐེ ཀརཎཝཙནཾ, སྨཱཝཙནསྶ ཝཱ ནཱབྱཔྤདེསོ. ‘‘ཨུཔདྡུཏཱ’’ཏི པདེ པན ཀཏྟརི ཏཏིཡཱཝསེན སམྦནྡྷོ. ཨུབྷཡཱཔེཀྑཉྷེཏཾ པདཾ. ཨུཔདྡུཏཱ ཙ ཧོམཱཏི ཏཾཀཱལཱཔེཀྑཝཏྟམཱནཝཙནཾ, ‘‘ཏདཱ’’ཏི སེསོ. ཨཏཱིཏཏྠེ ཝཱ ཝཏྟམཱནཝཙནཾ, ཨཧུམྷཱཏི ཨཏྠོ. ཨནུསྶརནྟོ དྷམྨསཾཝེགཝསེནེཝ, ན པན ཀོདྷཱདིཝསེན. དྷམྨསབྷཱཝཙིནྟཱཝསེན ཧི པཝཏྟཾ སཧོཏྟཔྤཉཱཎཾ དྷམྨསཾཝེགོ. ཝུཏྟཉྷེཏཾ –

‘‘སབྦསངྑཏདྷམྨེསུ, ཨོཏྟཔྤཱཀཱརསཎྛིཏཾ;

ཉཱཎམོཧིཏབྷཱརཱནཾ, དྷམྨསཾཝེགསཉྙིཏ’’ནྟི. (སཱརཏྠ. ཊཱི. ༡.པཋམམཧཱསངྒཱིཏིཀཐཱཝཎྞནཱ);

ཨཉྙཾ ཨུསྶཱཧཛནནཀཱརཎཾ དསྶེཏུཾ ‘‘ཨཱིདིསསྶཱ’’ཏིཨཱདི ཝུཏྟཾ. ཏཏྠ ཨཱིདིསསྶ ཙ སངྒྷསནྣིཔཱཏསྶཱཏི སཏྟསཏསཧསྶགཎཔཱམོཀྑཏྠེརཔྤམུཁགཎནཔཐཱཏིཀྐནྟསངྒྷསནྣིཔཱཏཾ སནྡྷཱཡ ཝདཏི. ‘‘ཋཱནཾ ཁོ པནེཏཾ ཝིཛྫཏཱི’’ཏིཨཱདིནཱཔི ཨཉྙཾ ཀཱརཎཾ དསྶེཏི. ཏིཊྛཏི ཨེཏྠ ཕལཾ ཏདཱཡཏྟཝུཏྟིཏཱཡཱཏི ཋཱནཾ, ཧེཏུ. ཁོཏི ཨཝདྷཱརཎེ. པནཱཏི ཝཙནཱལངྐཱརེ, ཨེཏཾ ཋཱནཾ ཝིཛྫཏེཝ, ནོ ན ཝིཛྫཏཱིཏི ཨཏྠོ. ཀིཾ པན ཏནྟི ཨཱཧ ‘‘ཡཾ པཱཔབྷིཀྑཱུ’’ཏིཨཱདི. ཡནྟི ནིཔཱཏམཏྟཾ, ཀཱརཎནིདྡེསོ ཝཱ, ཡེན ཋཱནེན ཨནྟརདྷཱཔེཡྻུཾ, ཏདེཏཾ ཋཱནཾ ཝིཛྫཏིཡེཝཱཏི. པཱཔེན ལཱམཀེན ཨིཙྪཱཝཙརེན སམནྣཱགཏཱ བྷིཀྑཱུ པཱཔབྷིཀྑཱུ ¶ . ཨཏཱིཏོ སཏྠཱ ཨེཏྠ, ཨེཏསྶཱཏི ཝཱ ཨཏཱིཏསཏྠུཀཾ ཡཐཱ ‘‘བཧུཀཏྟུཀོ’’ཏི. པདྷཱནཾ ཝཙནཾ པཱཝཙནཾ. པཱ-སདྡོ ¶ ཙེཏྠ ནིཔཱཏོ ‘‘པཱ ཨེཝ ཝུཏྱསྶཱ’’ཏིཨཱདཱིསུ ཝིཡ. ཨུཔསགྒཔདཾ ཝཱ ཨེཏཾ, དཱིགྷཾ ཀཏྭཱ པན ཏཐཱ ཝུཏྟཾ ཡཐཱ ‘‘པཱཝདཏཱི’’ཏིཔི ཝདནྟི. པཀྑནྟི ཨལཛྫིཔཀྑཾ. ‘‘ཡཱཝ ཙཱ’’ཏིཨཱདིནཱ སངྒཱིཏིཡཱ སཱསནཙིརཊྛིཏིཀབྷཱཝེ ཀཱརཎཾ, སཱདྷཀཉྩ དསྶེཏི. ‘‘ཏསྨཱ’’ཏི ཧི པདམཛ྄ཛྷཱཧརིཏྭཱ ‘‘སངྒཱཡེཡྻ’’ནྟི པདེན སམྦནྡྷནཱིཡཾ.

ཏཏྠ ཡཱཝ ཙ དྷམྨཝིནཡོ ཏིཊྛཏཱིཏི ཡཏྟཀཾ ཀཱལཾ དྷམྨོ ཙ ཝིནཡོ ཙ ལཛྫིཔུགྒལེསུ ཏིཊྛཏི. པརིནིབྦཱནམཉྩཀེ ནིཔནྣེན བྷགཝཏཱ མཧཱཔརིནིབྦཱནསུཏྟེ (དཱི. ནི. ༢.༢༡༦) ཝུཏྟཾ སནྡྷཱཡ ‘‘ཝུཏྟཉྷེཏ’’ནྟིཨཱདིམཱཧ. ཧི-སདྡོ ཨཱགམཝསེན དལ༹ྷིཛོཏཀོ. དེསིཏོ པཉྙཏྟོཏི དྷམྨོཔི དེསིཏོ ཙེཝ པཉྙཏྟོ ཙ. སུཏྟཱབྷིདྷམྨསངྒཧིཏསྶ ཧི དྷམྨསྶ ཨཏིསཛྫནཾ པབོདྷནཾ དེསནཱ, ཏསྶེཝ པཀཱརཏོ ཉཱཔནཾ ཝིནེཡྻསནྟཱནེ ཋཔནཾ པཉྙཱཔནཾ. ཝིནཡོཔི དེསིཏོ ཙེཝ པཉྙཏྟོ ཙ. ཝིནཡཏནྟིསངྒཧིཏསྶ ཧི ཨཏྠསྶ ཨཏིསཛྫནཾ པབོདྷནཾ དེསནཱ, ཏསྶེཝ པཀཱརཏོ ཉཱཔནཾ ཨསངྐརཏོ ཋཔནཾ པཉྙཱཔནཾ, ཏསྨཱ ཀམྨདྭཡམྤི ཀིརིཡཱདྭཡེན སམྦཛ྄ཛྷནཾ ཡུཛྫཏཱིཏི ཝེདིཏབྦཾ.

སོཏི སོ དྷམྨོ ཙ ཝིནཡོ ཙ. མམཙྩཡེནཱཏི མམ ཨཙྩཡཀཱལེ. ‘‘བྷུམྨཏྠེ ཀརཎནིདྡེསོ’’ཏི ཧི ཨཀྑརཙིནྟཀཱ ཝདནྟི. ཧེཏྭཏྠེ ཝཱ ཀརཎཝཙནཾ, མམ ཨཙྩཡཧེཏུ ཏུམྷཱཀཾ སཏྠཱ ནཱམ བྷཝིསྶཏཱིཏི ཨཏྠོ. ཝུཏྟཉྷི མཧཱཔརིནིབྦཱནསུཏྟཝཎྞནཱཡཾ ‘‘མཡི པརིནིབྦུཏེ ཏུམྷཱཀཾ སཏྠུཀིཙྩཾ སཱདྷེསྶཏཱི’’ཏི (དཱི. ནི. ཨཊྛ. ༢.༢༡༦). ལཀྑཎཝཙནཉྷེཏྠ ཧེཏྭཏྠསཱདྷཀཾ ཡཐཱ ‘‘ནེཏྟེ ཨུཛུཾ གཏེ སཏཱི’’ཏི (ཨ. ནི. ༤.༧༠; ནེཏྟི. ༡༠.༩༠, ༩༣). ཨིདཾ ཝུཏྟཾ ཧོཏི – མཡཱ ཝོ ཋིཏེནེཝ ‘‘ཨིདཾ ལཧུཀཾ, ཨིདཾ གརུཀཾ, ཨིདཾ སཏེཀིཙྪཾ, ཨིདཾ ཨཏེཀིཙྪཾ, ཨིདཾ ལོཀཝཛྫཾ, ཨིདཾ པཎྞཏྟིཝཛྫཾ, ཨཡཾ ཨཱཔཏྟི པུགྒལསྶ སནྟིཀེ ཝུཊྛཱཏི, ཨཡཾ གཎསྶ, ཨཡཾ སངྒྷསྶ སནྟིཀེ ཝུཊྛཱཏཱི’’ཏི སཏྟནྣཾ ཨཱཔཏྟིཀྑནྡྷཱནཾ ཨཝཱིཏིཀྐམནཱིཡཏཱཝསེན ཨོཏིཎྞཝཏྠུསྨིཾ སཁནྡྷཀཔརིཝཱརོ ཨུབྷཏོཝིབྷངྒོ མཧཱཝིནཡོ ནཱམ དེསིཏོ, ཏཾ སཀལམྤི ཝིནཡཔིཊཀཾ མཡི པརིནིབྦུཏེ ཏུམྷཱཀཾ སཏྠུཀིཙྩཾ སཱདྷེསྶཏི ‘‘ཨིདཾ ཝོ ཀཏྟབྦཾ, ཨིདཾ ཝོ ན ཀཏྟབྦ’’ནྟི ཀཏྟབྦཱཀཏྟབྦསྶ ཝིབྷཱགེན ¶ ཨནུསཱསནཏོ. ཋིཏེནེཝ ཙ མཡཱ ‘‘ཨིམེ ཙཏྟཱརོ སཏིཔཊྛཱནཱ, ཙཏྟཱརོ སམྨཔྤདྷཱནཱ, ཙཏྟཱརོ ཨིདྡྷིཔཱདཱ, པཉྩིནྡྲིཡཱནི, པཉྩ བལཱནི, སཏྟ བོཛ྄ཛྷངྒཱ, ཨརིཡོ ཨཊྛངྒིཀོ མགྒོ’’ཏི ཏེན ཏེན ཝིནེཡྻཱནཾ ཨཛ྄ཛྷཱསཡཱནུརཱུཔེན པཀཱརེན ཨིམེ སཏྟཏིཾས བོདྷིཔཀྑིཡདྷམྨེ ཝིབྷཛིཏྭཱ ཝིབྷཛིཏྭཱ སུཏྟནྟཔིཊཀཾ དེསིཏཾ, ཏཾ སཀལམྤི སུཏྟནྟཔིཊཀཾ མཡི པརིནིབྦུཏེ ཏུམྷཱཀཾ སཏྠུཀིཙྩཾ སཱདྷེསྶཏི ཏཾཏཾཙརིཡཱནུརཱུཔཾ སམྨཱཔཊིཔཏྟིཡཱ ཨནུསཱསནཏོ, ཋིཏེནེཝ ཙ མཡཱ ‘‘ཨིམེ ¶ པཉྩཀྑནྡྷཱ (དཱི. ནི. ཨཊྛ. ༢.༢༡༦), དྭཱདསཱཡཏནཱནི, ཨཊྛཱརས དྷཱཏུཡོ, ཙཏྟཱརི སཙྩཱནི, བཱཝཱིསཏིནྡྲིཡཱནི, ནཝ ཧེཏཱུ, ཙཏྟཱརོ ཨཱཧཱརཱ, སཏྟ ཕསྶཱ, སཏྟ ཝེདནཱ, སཏྟ སཉྙཱ, སཏྟ ཙེཏནཱ, སཏྟ ཙིཏྟཱནི. ཏཏྲཱཔི ཨེཏྟཀཱ དྷམྨཱ ཀཱམཱཝཙརཱ, ཨེཏྟཀཱ རཱུཔཱཝཙརཱ, ཨེཏྟཀཱ ཨརཱུཔཱཝཙརཱ, ཨེཏྟཀཱ པརིཡཱཔནྣཱ, ཨེཏྟཀཱ ཨཔརིཡཱཔནྣཱ, ཨེཏྟཀཱ ལོཀིཡཱ, ཨེཏྟཀཱ ལོཀུཏྟརཱ’’ཏི ཨིམེ དྷམྨེ ཝིབྷཛིཏྭཱ ཝིབྷཛིཏྭཱ ཨབྷིདྷམྨཔིཊཀཾ དེསིཏཾ, ཏཾ སཀལམྤི ཨབྷིདྷམྨཔིཊཀཾ མཡི པརིནིབྦུཏེ ཏུམྷཱཀཾ སཏྠུཀིཙྩཾ སཱདྷེསྶཏི ཁནྡྷཱདིཝིབྷཱགེན ཉཱཡམཱནཾ ཙཏུསཙྩསམྦོདྷཱཝཧཏྟཱ. ཨིཏི སབྦམྤེཏཾ ཨབྷིསམྦོདྷིཏོ ཡཱཝ པརིནིབྦཱནཱ པཉྩཙཏྟཱལཱིས ཝསྶཱནི བྷཱསིཏཾ ལཔིཏཾ ‘‘ཏཱིཎི པིཊཀཱནི, པཉྩ ནིཀཱཡཱ, ནཝངྒཱནི, ཙཏུརཱསཱིཏི དྷམྨཀྑནྡྷསཧསྶཱནཱི’’ཏི ཨེཝཾ མཧཔྤབྷེདཾ ཧོཏི. ཨིམཱནི ཙཏུརཱསཱིཏི དྷམྨཀྑནྡྷསཧསྶཱནི ཏིཊྛནྟི, ཨཧཾ ཨེཀོཝ པརིནིབྦཱཡིསྶཱམི, ཨཧཉྩ པནིདཱནི ཨེཀོཝ ཨོཝདཱམི ཨནུསཱསཱམི, མཡི པརིནིབྦུཏེ ཨིམཱནི ཙཏུརཱསཱིཏི བུདྡྷསཧསྶཱནི ཏུམྷེ ཨོཝདིསྶནྟི ཨནུསཱསིསྶནྟི ཨོཝཱདཱནུསཱསནཀིཙྩསྶ ནིཔྥཱདནཏོཏི.

སཱསནནྟི པརིཡཏྟིཔཊིཔཏྟིཔཊིཝེདྷཝསེན ཏིཝིདྷམྤི སཱསནཾ, ནིཔྤརིཡཱཡཏོ པན སཏྟཏིཾས བོདྷིཔཀྑིཡདྷམྨཱ. ཨདྡྷཱནཾ གམིཏུམལནྟི ཨདྡྷནིཡཾ, ཨདྡྷཱནགཱམི ཨདྡྷཱནཀྑམནྟི ཨཏྠོ. ཙིརཾ ཋིཏི ཨེཏསྶཱཏི ཙིརཊྛིཏིཀཾ. ཨིདཾ ཝུཏྟཾ ཧོཏི – ཡེན པཀཱརེན ཨིདཾ སཱསནཾ ཨདྡྷནིཡཾ, ཏཏོཡེཝ ཙ ཙིརཊྛིཏིཀཾ བྷཝེཡྻ, ཏེན པཀཱརེན དྷམྨཉྩ ཝིནཡཉྩ ཡདི པནཱཧཾ སངྒཱཡེཡྻཾ, སཱདྷུ ཝཏཱཏི.

ཨིདཱནི སམྨཱསམྦུདྡྷེན ཨཏྟནོ ཀཏཾ ཨནུགྒཧཝིསེསཾ སམནུསྶརིཏྭཱ ཙིནྟནཱཀཱརམྤི དསྶེནྟོ ‘‘ཡཉྩཱཧཾ བྷགཝཏཱ’’ཏིཨཱདིམཱཧ. ཏཏྠ ‘‘ཡཉྩཱཧ’’ནྟི ཨེཏསྶ ‘‘ཨནུགྒཧིཏོ, པསཾསིཏོ’’ཏི ཨེཏེཧི སམྦནྡྷོ. ཡནྟི ¶ ཡསྨཱ, ཀིརིཡཱཔརཱམསནཾ ཝཱ ཨེཏཾ, ཏེན ‘‘ཨནུགྒཧིཏོ, པསཾསིཏོ’’ཏི ཨེཏྠ ཨནུགྒཧཎཾ, པསཾསནཉྩ པརཱམསཏི. ‘‘དྷཱརེསྶསཱི’’ཏིཨཱདིཀཾ པན ཝཙནཾ བྷགཝཱ ཨཉྙཏརསྨིཾ རུཀྑམཱུལེ མཧཱཀསྶཔཏྠེརེན པཉྙཏྟསངྒྷཱཊིཡཾ ནིསིནྣོ ཏཾ སངྒྷཱཊིཾ པདུམཔུཔྥཝཎྞེན པཱཎིནཱ ཨནྟནྟེན པརཱམསནྟོ ཨཱཧ. ཝུཏྟཉྷེཏཾ ཀསྶཔསཾཡུཏྟེ (སཾ. ནི. ༢.༡༥༤) མཧཱཀསྶཔཏྠེརེནེཝ ཨཱནནྡཏྠེརཾ ཨཱམནྟེཏྭཱ ཀཐེནྟེན –

‘‘ཨཐ ཁོ ཨཱཝུསོ བྷགཝཱ མགྒཱ ཨོཀྐམྨ ཡེན ཨཉྙཏརཾ རུཀྑམཱུལཾ ཏེནུཔསངྐམི, ཨཐ ཁྭཱཧཾ ཨཱཝུསོ པཊཔིལོཏིཀཱནཾ སངྒྷཱཊིཾ ཙཏུགྒུཎཾ པཉྙཔེཏྭཱ བྷགཝནྟཾ ཨེཏདཝོཙཾ ‘ཨིདྷ བྷནྟེ བྷགཝཱ ནིསཱིདཏུ, ཡཾ མམསྶ དཱིགྷརཏྟཾ ཧིཏཱཡ སུཁཱཡཱ’ཏི ¶ . ནིསཱིདི ཁོ ཨཱཝུསོ བྷགཝཱ པཉྙཏྟེ ཨཱསནེ, ནིསཛྫ ཁོ མཾ ཨཱཝུསོ བྷགཝཱ ཨེཏདཝོཙ ‘མུདུཀཱ ཁོ ཏྱཱཡཾ ཀསྶཔ པཊཔིལོཏིཀཱནཾ སངྒྷཱཊཱི’ཏི. པཊིགྒཎྷཱཏུ མེ བྷནྟེ བྷགཝཱ པཊཔིལོཏིཀཱནཾ སངྒྷཱཊིཾ ཨནུཀམྤཾ ཨུཔཱདཱཡཱཏི. དྷཱརེསྶསི པན མེ ཏྭཾ ཀསྶཔ སཱཎཱནི པཾསུཀཱུལཱནི ནིབྦསནཱནཱིཏི. དྷཱརེསྶཱམཧཾ བྷནྟེ བྷགཝཏོ སཱཎཱནི པཾསུཀཱུལཱནི ནིབྦསནཱནཱིཏི. སོ ཁྭཱཧཾ ཨཱཝུསོ པཊཔིལོཏིཀཱནཾ སངྒྷཱཊིཾ བྷགཝཏོ པཱདཱསིཾ, ཨཧཾ པན བྷགཝཏོ སཱཎཱནི པཾསུཀཱུལཱནི ནིབྦསནཱནི པཊིཔཛྫི’’ནྟི (སཾ. ནི. ༢.༡༥༤).

ཏཏྠ མུདུཀཱ ཁོ ཏྱཱཡནྟི མུདུཀཱ ཁོ ཏེ ཨཡཾ. ཀསྨཱ པན བྷགཝཱ ཨེཝམཱཧཱཏི? ཐེརེན སཧ ཙཱིཝརཾ པརིཝཏྟེཏུཀཱམཏཱཡ. ཀསྨཱ པརིཝཏྟེཏུཀཱམོ ཛཱཏོཏི? ཐེརཾ ཨཏྟནོ ཋཱནེ ཋཔེཏུཀཱམཏཱཡ. ཀིཾ སཱརིཔུཏྟམོགྒལླཱནཱ ནཏྠཱིཏི? ཨཏྠི, ཨེཝཾ པནསྶ ཨཧོསི ‘‘ཨིམེ ན ཙིརཾ ཋསྶནྟི, ‘ཀསྶཔོ པན ཝཱིསཝསྶསཏཱཡུཀོ, སོ མཡི པརིནིབྦུཏེ སཏྟཔཎྞིགུཧཱཡཾ ཝསིཏྭཱ དྷམྨཝིནཡསངྒཧཾ ཀཏྭཱ མམ སཱསནཾ པཉྩཝསྶསཧསྶཔརིམཱཎཀཱལཾ པཝཏྟནཀཾ ཀརིསྶཏཱི’’ཏི ཨཏྟནོ ནཾ ཋཱནེ ཋཔེསི, ཨེཝཾ བྷིཀྑཱུ ཀསྶཔསྶ སུསྶུསིཏབྦཾ མཉྙིསྶནྟཱི’’ཏི ཏསྨཱ ཨེཝམཱཧ. ཐེརོ པན ཡསྨཱ ཙཱིཝརསྶ ཝཱ པཏྟསྶ ཝཱ ཝཎྞེ ཀཐིཏེ ‘‘ཨིམཾ ཏུམྷེ གཎྷཐཱ’’ཏི ཝཙནཾ ཙཱརིཏྟམེཝ, ཏསྨཱ ‘‘པཊིགྒཎྷཱཏུ མེ བྷནྟེ བྷགཝཱ’’ཏི ཨཱཧ.

དྷཱརེསྶསི ¶ པན མེ ཏྭཾ ཀསྶཔཱཏི ཀསྶཔ ཏྭཾ ཨིམཱནི པརིབྷོགཛིཎྞཱནི པཾསུཀཱུལཱནི པཱརུཔིཏུཾ སཀྑིསྶསཱིཏི ཝདཏི. ཏཉྩ ཁོ ན ཀཱཡབལཾ སནྡྷཱཡ, པཊིཔཏྟིཔཱུརཎཾ པན སནྡྷཱཡ ཨེཝམཱཧ. ཨཡཉྷེཏྠ ཨདྷིཔྤཱཡོ – ཨཧཾ ཨིམཾ ཙཱིཝརཾ པུཎྞཾ ནཱམ དཱསིཾ པཱརུཔིཏྭཱ ཨཱམཀསུསཱནེ ཚཌྜིཏཾ སུསཱནཾ པཝིསིཏྭཱ ཏུམྦམཏྟེཧི པཱཎཀེཧི སམྤརིཀིཎྞཾ ཏེ པཱཎཀེ ཝིདྷུནིཏྭཱ མཧཱཨརིཡཝཾསེ ཋཏྭཱ ཨགྒཧེསིཾ, ཏསྶ མེ ཨིམཾ ཙཱིཝརཾ གཧིཏདིཝསེ དསསཧསྶཙཀྐཝཱལེ༹ མཧཱཔཐཝཱི མཧཱཝིརཝཾ ཝིརཝམཱནཱ ཀམྤིཏྠ, ཨཱཀཱསཾ ཏཊཏཊཱཡི, ཙཀྐཝཱལེ༹ དེཝཏཱ སཱདྷུཀཱརཾ ཨདཾསུ, ཨིམཾ ཙཱིཝརཾ གཎྷནྟེན བྷིཀྑུནཱ ཛཱཏིཔཾསུཀཱུལིཀེན ཛཱཏིཨཱརཉྙིཀེན ཛཱཏིཨེཀཱསནིཀེན ཛཱཏིསཔདཱནཙཱརིཀེན བྷཝིཏུཾ ཝཊྚཏི, ཏྭཾ ཨིམསྶ ཙཱིཝརསྶ ཨནུཙྪཝིཀཾ ཀཱཏུཾ སཀྑིསྶསཱིཏི. ཐེརོཔི ཨཏྟནཱ པཉྩནྣཾ ཧཏྠཱིནཾ བལཾ དྷཱརེཏི, སོ ཏཾ ཨཏཀྐཡིཏྭཱ ‘‘ཨཧམེཏཾ པཊིཔཏྟིཾ པཱུརེསྶཱམཱི’’ཏི ཨུསྶཱཧེན སུགཏཙཱིཝརསྶ ཨནུཙྪཝིཀཾ ཀཱཏུཀཱམོ ‘‘དྷཱརེསྶཱམཧཾ བྷནྟེ’’ཏི ཨཱཧ. པཊིཔཛྫིནྟི པཊིཔནྣོསིཾ. ཨེཝཾ པན ཙཱིཝརཔརིཝཏྟནཾ ¶ ཀཏྭཱ ཐེརེན པཱརུཔིཏཙཱིཝརཾ བྷགཝཱ པཱརུཔི, སཏྠུ ཙཱིཝརཾ ཐེརོ. ཏསྨིཾ སམཡེ མཧཱཔཐཝཱི ཨུདཀཔརིཡནྟཾ ཀཏྭཱ ཨུནྣདནྟཱི ཀམྤིཏྠ.

སཱཎཱནི པཾསུཀཱུལཱནཱིཏི མཏཀལེ༹ཝརཾ པརིཝེཋེཏྭཱ ཚཌྜིཏཱནི ཏུམྦམཏྟེ ཀིམཱི པཔྥོཊེཏྭཱ གཧིཏཱནི སཱཎཝཱཀམཡཱནི པཾསུཀཱུལཙཱིཝརཱནི. ནིབྦསནཱནཱིཏི ནིཊྛིཏཝསནཀིཙྩཱནི, པརིབྷོགཛིཎྞཱནཱིཏི ཨཏྠོ. ཨེཏྠ ཙ ཀིཉྩཱཔི ཨེཀམེཝ ཏཾ ཙཱིཝརཾ, ཨནེཀཱཝཡཝཏྟཱ པན བཧུཝཙནཾ ཀཏནྟི མཛ྄ཛྷིམགཎྛིཔདེ ཝུཏྟཾ. ཙཱིཝརེ སཱདྷཱརཎཔརིབྷོགེནཱཏི ཨེཏྠ ཨཏྟནཱ སཱདྷཱརཎཔརིབྷོགེནཱཏི ཨཏྠསྶ ཝིཉྙཱཡམཱནཏྟཱ, ཝིཉྙཱཡམཱནཏྠསྶ ཙ སདྡསྶ པཡོགེ ཀཱམཱཙཱརཏྟཱ ‘‘ཨཏྟནཱ’’ཏི ན ཝུཏྟཾ. ‘‘དྷཱརེསྶསི པན མེ ཏྭཾ ཀསྶཔ སཱཎཱནི པཾསུཀཱུལཱནཱི’’ཏི (སཾ. ནི. ༢.༡༥༤) ཧི ཝུཏྟཏྟཱ ‘‘ཨཏྟནཱཝ སཱདྷཱརཎཔརིབྷོགེནཱ’’ཏི ཝིཉྙཱཡཏི, ནཱཉྙེན. ན ཧི ཀེཝལཾ སདྡཏོཡེཝ སབྦཏྠ ཨཏྠནིཙྪཡོ, ཨཏྠཔཀརཎཱདིནཱཔི ཡེབྷུཡྻེན ཨཏྠསྶ ནིཡམིཏཏྟཱ. ཨཱཙརིཡདྷམྨཔཱལཏྠེརེན པནེཏྠ ཨེཝཾ ཝུཏྟཾ ‘‘ཙཱིཝརེ སཱདྷཱརཎཔརིབྷོགེནཱཏི ཨེཏྠ ‘ཨཏྟནཱ སམསམཊྛཔནེནཱ’ཏི ཨིདྷ ཝུཏྟཾ ཨཏྟནཱ – སདྡམཱནེཏྭཱ ‘ཙཱིཝརེ ཨཏྟནཱ སཱདྷཱརཎཔརིབྷོགེནཱ’ཏི ཡོཛེཏབྦཾ.

ཡསྶ ¶ ཡེན ཧི སམྦནྡྷོ, དཱུརཊྛམྤི ཙ ཏསྶ ཏཾ;

ཨཏྠཏོ ཧྱསམཱནཱནཾ, ཨཱསནྣཏྟམཀཱརཎནྟི.

ཨཐ ཝཱ བྷགཝཏཱ ཙཱིཝརེ སཱདྷཱརཎཔརིབྷོགེན བྷགཝཏཱ ཨནུགྒཧིཏོཏི ཡོཛནཱིཡཾ. ཨེཀསྶཱཔི ཧི ཀརཎནིདྡེསསྶ སཧཱདིཡོགཀཏྟུཏྠཛོཏཀཏྟསམྦྷཝཏོ’’ཏི. སམཱནཾ དྷཱརཎམེཏསྶཱཏི སཱདྷཱརཎོ, ཏཱདིསོ པརིབྷོགོཏི སཱདྷཱརཎཔརིབྷོགོ, ཏེན. སཱདྷཱརཎཔརིབྷོགེན ཙ སམསམཊྛཔནེན ཙ ཨནུགྒཧིཏོཏི སམྦནྡྷོ.

ཨིདཱནི –

‘‘ཨཧཾ བྷིཀྑཝེ, ཡཱཝདེ ཨཱཀངྑཱམི ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧི སཝིཏཀྐཾ སཝིཙཱརཾ ཝིཝེཀཛཾ པཱིཏིསུཁཾ པཋམཾ ཛྷཱནཾ ཨུཔསམྤཛྫ ཝིཧརཱམི, ཀསྶཔོཔི བྷིཀྑཝེ ཡཱཝདེ ཨཱཀངྑཏི ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧི སཝིཏཀྐཾ སཝིཙཱརཾ ཝིཝེཀཛཾ པཱིཏིསུཁཾ པཋམཾ ཛྷཱནཾ ཨུཔསམྤཛྫ ཝིཧརཏཱི’’ཏིཨཱདིནཱ (སཾ. ནི. ༢.༡༥༢) –

ནཝཱནུཔུབྦཝིཧཱརཚལ༹བྷིཉྙཱཔབྷེདེ ¶ ཨུཏྟརིམནུསྶདྷམྨེ ཨཏྟནཱ སམསམཊྛཔནཏྠཱཡ བྷགཝཏཱ ཝུཏྟཾ ཀསྶཔསཾཡུཏྟེ (སཾ. ནི. ༢.༡༥༡) ཨཱགཏཾ པཱལི༹མིམཾ པེཡྻཱལམུཁེན, ཨཱདིགྒཧཎེན ཙ སངྑིཔིཏྭཱ དསྶེནྟོ ཨཱཧ ‘‘ཨཧཾ བྷིཀྑཝེ’’ཏིཨཱདི.

ཏཏྠ ཡཱཝདེཏི ཡཱཝདེཝ, ཡཏྟཀཾ ཀཱལཾ ཨཱཀངྑཱམི, ཏཏྟཀཾ ཀཱལཾ ཝིཧརཱམཱིཏི ཨཏྠོ. ཏཏོཡེཝ ཧི མཛ྄ཛྷིམགཎྛིཔདེ, ཙཱུལ༹གཎྛིཔདེ ཙ ‘‘ཡཱཝདེཏི ཡཱཝདེཝཱཏི ཝུཏྟཾ ཧོཏཱི’’ཏི ལིཁིཏཾ. སཾཡུཏྟཊྛཀཐཱཡམྤི ‘‘ཡཱཝདེ ཨཱཀངྑཱམཱིཏི ཡཱཝདེཝ ཨིཙྪཱམཱི’’ཏི (སཾ. ནི. ཨཊྛ. ༡.༢.༡༥༢) ཨཏྠོ ཝུཏྟོ. ཏཐཱ ཧི ཏཏྠ ལཱིནཏྠཔཀཱསནིཡཾ ཨཱཙརིཡདྷམྨཔཱལཏྠེརེན ‘‘ཡཱཝདེཝཱཏི ཨིམིནཱ སམཱནཏྠཾ ‘ཡཱཝདེ’ཏི ཨིདཾ པད’’ནྟི ཝུཏྟཾ. པོཏྠཀེསུ པན ཀཏྠཙི ‘‘ཡཱཝདེཝཱ’’ཏི ཨཡམེཝ པཱཋོ དིསྶཏི. ཨཔི ཙ ཡཱཝདེཏི ཡཏྟཀཾ སམཱཔཏྟིཝིཧཱརཾ ཝིཧརིཏུཾ ཨཱཀངྑཱམི, ཏཏྟཀཾ སམཱཔཏྟིཝིཧཱརཾ ཝིཧརཱམཱིཏི སམཱཔཏྟིཊྛཱནེ, ཡཏྟཀཾ ཨབྷིཉྙཱཝོཧཱརཾ ཝོཧརིཏུཾ ¶ ཨཱཀངྑཱམི, ཏཏྟཀཾ ཨབྷིཉྙཱཝོཧཱརཾ ཝོཧརཱམཱིཏི ཨབྷིཉྙཱཋཱནེ ཙ སཧ པཱཋསེསེན ཨཏྠོ ཝེདིཏབྦོ. ཨཱཙརིཡདྷམྨཔཱལཏྠེརེནཱཔི ཏདེཝཏྠཾ ཡཐཱལཱབྷནཡེན དསྶེཏུཾ ‘‘ཡཏྟཀེ སམཱཔཏྟིཝིཧཱརེ, ཨབྷིཉྙཱཝོཧཱརེ ཝཱ ཨཱཀངྑནྟོ ཝིཧཱརཱམི ཙེཝ ཝོཧརཱམི ཙ, ཏཐཱ ཀསྶཔོཔཱིཏི ཨཏྠོ’’ཏི ཝུཏྟཾ. ཨཔརེ པན ‘‘ཡཱཝདེཏི ‘ཡཾ པཋམཛ྄ཛྷཱནཾ ཨཱཀངྑཱམི, ཏཾ པཋམཛ྄ཛྷཱནཾ ཨུཔསམྤཛྫ ཝིཧཱརཱམཱི’ཏིཨཱདིནཱ སམཱཔཏྟིཊྛཱནེ, ཨིདྡྷིཝིདྷཱབྷིཉྙཱཋཱནེ ཙ ཨཛ྄ཛྷཱཧརིཏསྶ ཏ-སདྡསྶ ཀམྨཝསེན ‘ཡཾ དིབྦསོཏཾ ཨཱཀངྑཱམི, ཏེན དིབྦསོཏེན སདྡེ སུཎཱམཱི’ཏིཨཱདིནཱ སེསཱབྷིཉྙཱཋཱནེ ཀརཎཝསེན ཡོཛནཱ ཝཏྟབྦཱ’’ཏི ཝདནྟི. ཝིཝིཙྩེཝ ཀཱམེཧཱིཏི ཨེཏྠ ཨེཝ-སདྡོ ནིཡམཏྠོ, ཨུབྷཡཏྠ ཡོཛེཏབྦོ. ཡམེཏྠ ཝཏྟབྦཾ, ཏདུཔརི ཨཱཝི བྷཝིསྶཏི.

ནཝཱནུཔུབྦཝིཧཱརཚལ༹བྷིཉྙཱཔྤབྷེདེཏི ཨེཏྠ ནཝཱནུཔུབྦཝིཧཱརཱ ནཱམ ཨནུཔཊིཔཱཊིཡཱ སམཱཔཛྫིཏབྦཏྟཱ ཨེཝཾསཉྙིཏཱ ནིརོདྷསམཱཔཏྟིཡཱ སཧ ཨཊྛ སམཱཔཏྟིཡོ. ཚལ༹བྷིཉྙཱ ནཱམ ཨཱསཝཀྑཡཉཱཎེན སཧ པཉྩཱབྷིཉྙཱཡོ. ཀཏྠཙི པོཏྠཀེ ཙེཏྠ ཨཱདིསདྡོ དིསྶཏི. སོ ཨནདྷིཔྤེཏོ ཡཐཱཝུཏྟཱཡ པཱལི༹ཡཱ གཧེཏབྦསྶ ཨཏྠསྶ ཨནཝསེསཏྟཱ. མནུསྶེསུ, མནུསྶཱནཾ ཝཱ ཨུཏྟརིབྷཱུཏཱནཾ, ཨུཏྟརཱིནཾ ཝཱ མནུསྶཱནཾ ཛྷཱཡཱིནཉྩེཝ ཨརིཡཱནཉྩ དྷམྨོཏི ཨུཏྟརིམནུསྶདྷམྨོ, མནུསྶདྷམྨཱ ཝཱ ཨུཏྟརཱིཏི ཨུཏྟརིམནུསྶདྷམྨོ. དས ཀུསལཀམྨཔཐཱ ཙེཏྠ ཝིནཱ བྷཱཝནཱམནསིཀཱརེན པཀཏིཡཱཝ མནུསྶེཧི ནིབྦཏྟེཏབྦཏོ, མནུསྶཏྟབྷཱཝཱཝཧནཏོ ཙ མནུསྶདྷམྨོ ནཱམ, ཏཏོ ཨུཏྟརི པན ཛྷཱནཱདི ཨུཏྟརིམནུསྶདྷམྨོཏི ཝེདིཏབྦོ. སམསམཊྛཔནེནཱཏི ‘‘ཨཧཾ ཡཏྟཀཾ ཀཱལཾ, ཡཏྟཀེ ཝཱ སམཱཔཏྟིཝིཧཱརེ, ཡཏྟཀཱ ཨབྷིཉྙཱཡོ ཙ ཝལ༹ཉྫེམི ¶ , ཏཐཱ ཀསྶཔོཔཱི’’ཏི ཨེཝཾ སམསམཾ ཀཏྭཱ ཋཔནེན. ཨནེཀཊྛཱནེསུ ཋཔནཾ, ཀསྶཙིཔི ཨུཏྟརིམནུསྶདྷམྨསྶ ཨསེསབྷཱཝེན ཨེཀནྟསམཊྛཔནཾ ཝཱ སནྡྷཱཡ ‘‘སམསམཊྛཔནེནཱ’’ཏི ཝུཏྟཾ, ཨིདཉྩ ནཝཱནུཔུབྦཝིཧཱརཚལ༹བྷིཉྙཱབྷཱཝསཱམཉྙེན པསཾསཱམཏྟནྟི དཊྛབྦཾ. ན ཧི ཨཱཡསྨཱ མཧཱཀསྶཔོ བྷགཝཱ ཝིཡ དེཝསིཀཾ ཙཏུཝཱིསཏིཀོཊིསཏསཧསྶསངྑྱཱ སམཱཔཏྟིཡོ སམཱཔཛྫཏི, ཡམཀཔཱཊིཧཱརིཡཱདིཝསེན ཙ ཨབྷིཉྙཱཡོ ཝལ༹ཉྫེཏཱིཏི. ཨེཏྠ ཙ ཨུཏྟརིམནུསྶདྷམྨེ ཨཏྟནཱ སམསམཊྛཔནེནཱ’’ཏི ཨིདཾ ནིདསྶནམཏྟནྟི ཝེདིཏབྦཾ. ཏཐཱ ཧི –

‘‘ཨོཝད ¶ ཀསྶཔ བྷིཀྑཱུ, ཀརོཧི ཀསྶཔ བྷིཀྑཱུནཾ དྷམྨིཾ ཀཐཾ, ཨཧཾ ཝཱ ཀསྶཔ བྷིཀྑཱུ ཨོཝདེཡྻཾ, ཏྭཾ ཝཱ. ཨཧཾ ཝཱ ཀསྶཔ བྷིཀྑཱུནཾ དྷམྨིཾ ཀཐཾ ཀརེཡྻཾ, ཏྭཾ ཝཱ’’ཏི –

ཨེཝམྤི ཨཏྟནཱ སམསམཊྛཔནམཀཱསིཡེཝཱཏི.

ཏཐཱཏི རཱུཔཱུཔསཾཧཱརོ ཡཐཱ ཨནུགྒཧིཏོ, ཏཐཱ པསཾསིཏོཏི. ཨཱཀཱསེ པཱཎིཾ ཙཱལེཏྭཱཏི བྷགཝཏཱ ཨཏྟནོཡེཝ པཱཎིཾ ཨཱཀཱསེ ཙཱལེཏྭཱ ཀུལེསུ ཨལགྒཙིཏྟཏཱཡ ཙེཝ ཀརཎབྷཱུཏཱཡ པསཾསིཏོཏི སམྦནྡྷོ. ཨལགྒཙིཏྟཏཱཡཱཏི ཝཱ ཨཱདྷཱརེ བྷུམྨཾ, ཨཱཀཱསེ པཱཎིཾ ཙཱལེཏྭཱ ཀུལཱུཔཀསྶ བྷིཀྑུནོ ཨལགྒཙིཏྟཏཱཡ ཀུལེསུ ཨལགྒནཙིཏྟེན བྷཝིཏུཾ ཡུཏྟཏཱཡ ཙེཝ མཉྙེཝ སཀྑིཾ ཀཏྭཱ པསཾསིཏོཏི ཨཏྠོ. ཡཐཱཧ –

‘‘ཨཐ ཁོ བྷགཝཱ ཨཱཀཱསེ པཱཎིཾ ཙཱལེསི སེཡྻཐཱཔི བྷིཀྑཝེ, ཨཡཾ ཨཱཀཱསེ པཱཎི ན སཛྫཏི ན གཡ྄ཧཏི ན བཛ྄ཛྷཏི, ཨེཝམེཝ ཁོ བྷིཀྑཝེ ཡསྶ ཀསྶཙི བྷིཀྑུནོ ཀུལཱནི ཨུཔསངྐམཏོ ཀུལེསུ ཙིཏྟཾ ན སཛྫཏི ན གཡ྄ཧཏི ན བཛ྄ཛྷཏི ‘ལབྷནྟུ ལཱབྷཀཱམཱ, པུཉྙཀཱམཱ ཀརོནྟུ པུཉྙཱནཱི’ཏི. ཡཐཱ སཀེན ལཱབྷེན ཨཏྟམནོ ཧོཏི སུམནོ, ཨེཝཾ པརེསཾ ལཱབྷེན ཨཏྟམནོ ཧོཏི སུམནོ. ཨེཝརཱུཔོ ཁོ བྷིཀྑཝེ བྷིཀྑུ ཨརཧཏི ཀུལཱནི ཨུཔསངྐམིཏུཾ. ཀསྶཔསྶ བྷིཀྑཝེ ཀུལཱནི ཨུཔསངྐམཏོ ཀུལེསུ ཙིཏྟཾ ན སཛྫཏི ན གཡ྄ཧཏི ན བཛ྄ཛྷཏི ‘ལབྷནྟུ ལཱབྷཀཱམཱ, པུཉྙཀཱམཱ ཀརོནྟུ པུཉྙཱནཱི’ཏི. ཡཐཱ སཀེན ལཱབྷེན ཨཏྟམནོ ཧོཏི སུམནོ, ཨེཝཾ པརེསཾ ལཱབྷེན ཨཏྟམནོ ཧོཏི སུམནོ’’ཏི (སཾ. ནི. ༢.༡༤༦).

ཏཏྠ ཨཱཀཱསེ པཱཎིཾ ཙཱལེསཱིཏི ནཱིལེ གགནནྟརེ ཡམཀཝིཛྫུཀཾ སཉྩཱལཡམཱནོ ཝིཡ ཧེཊྛཱབྷཱགེ ¶ , ཨུཔརིབྷཱགེ, ཨུབྷཏོ ཙ པསྶེསུ པཱཎིཾ སཉྩཱལེསི, ཨིདཉྩ པན ཏེཔིཊཀེ བུདྡྷཝཙནེ ཨསམྦྷིནྣཔདཾ ནཱམ. ཨཏྟམནོཏི སཀམནོ, ན དོམནསྶེན པཙྪིནྡིཏྭཱ གཧིཏམནོ. སུམནོཏི ཏུཊྛམནོ, ཨིདཱནི ཡོ ཧཱིནཱདྷིམུཏྟིཀོ མིཙྪཱཔཊིཔནྣོ ཨེཝཾ ¶ ཝདེཡྻ ‘‘སམྨཱསམྦུདྡྷོ ‘ཨལགྒཙིཏྟཏཱཡ ཨཱཀཱསེ ཙཱལིཏཔཱཎཱུཔམཱ ཀུལཱནི ཨུཔསངྐམཐཱ’ཏི ཝདནྟོ ཨཊྛཱནེ ཋཔེཏི, ཨསཡ྄ཧབྷཱརཾ ཨཱརོཔེཏི, ཡཾ ན སཀྐཱ ཀཱཏུཾ, ཏཾ ཀཱརེཧཱི’’ཏི, ཏསྶ ཝཱདཔཐཾ པཙྪིནྡིཏྭཱ ‘‘སཀྐཱ ཙ ཁོ ཨེཝཾ ཀཱཏུཾ, ཨཏྠི ཨེཝརཱུཔོ བྷིཀྑཱུ’’ཏི ཨཱཡསྨནྟཾ མཧཱཀསྶཔཏྠེརམེཝ སཀྑིཾ ཀཏྭཱ དསྶེནྟོ ‘‘ཀསྶཔསྶ བྷིཀྑཝེ’’ཏིཨཱདིམཱཧ.

ཨཉྙམྤི པསཾསནམཱཧ ‘‘ཙནྡོཔམཔཊིཔདཱཡ ཙཱ’’ཏི, ཙནྡཔཊིབྷཱགཱཡ པཊིཔདཱཡ ཙ ཀརཎབྷཱུཏཱཡ པསཾསིཏོ, ཏསྶཾ ཝཱ ཨཱདྷཱརབྷཱུཏཱཡ མཉྙེཝ སཀྑིཾ ཀཏྭཱ པསཾསིཏོཏི ཨཏྠོ. ཡཐཱཧ –

‘‘ཙནྡཱུཔམཱ བྷིཀྑཝེ ཀུལཱནི ཨུཔསངྐམཐ ཨཔཀསྶེཝ ཀཱཡཾ, ཨཔཀསྶ ཙིཏྟཾ ནིཙྩནཝཀཱ ཀུལེསུ ཨཔྤགབྦྷཱ. སེཡྻཐཱཔི བྷིཀྑཝེ པུརིསོ ཛརུདཔཱནཾ ཝཱ ཨོལོཀེཡྻ པབྦཏཝིསམཾ ཝཱ ནདཱིཝིདུགྒཾ ཝཱ ཨཔཀསྶེཝ ཀཱཡཾ, ཨཔཀསྶ ཙིཏྟཾ, ཨེཝམེཝ ཁོ བྷིཀྑཝེ ཙནྡཱུཔམཱ ཀུལཱནི ཨུཔསངྐམཐ ཨཔཀསྶེཝ ཀཱཡཾ, ཨཔཀསྶ ཙིཏྟཾ ནིཙྩནཝཀཱ ཀུལེསུ ཨཔྤགབྦྷཱ. ཀསྶཔོ བྷིཀྑཝེ ཙནྡཱུཔམོ ཀུལཱནི ཨུཔསངྐམཏི ཨཔཀསྶེཝ ཀཱཡཾ, ཨཔཀསྶ ཙིཏྟཾ ནིཙྩནཝཀོ ཀུལེསུ ཨཔྤགབྦྷོ’’ཏི (སཾ. ནི. ༢.༡༤༦).

ཏཏྠ ཙནྡཱུཔམཱཏི ཙནྡསདིསཱ ཧུཏྭཱ. ཀིཾ པརིམཎྜལཏཱཡ སདིསཱཏི? ནོ, ཨཔིཙ ཁོ ཡཐཱ ཙནྡོ གགནཏལཾ པཀྑནྡམཱནོ ན ཀེནཙི སདྡྷིཾ སནྠཝཾ ཝཱ སིནེཧཾ ཝཱ ཨཱལཡཾ ཝཱ ནིཀནྟིཾ ཝཱ པཏྠནཾ ཝཱ པརིཡུཊྛཱནཾ ཝཱ ཀརོཏི, ན ཙ ན ཧོཏི མཧཱཛནསྶ པིཡོ མནཱཔོ, ཏུམྷེཔི ཨེཝཾ ཀེནཙི སདྡྷིཾ སནྠཝཱདཱིནཾ ཨཀརཎེན བཧུཛནསྶ པིཡཱ མནཱཔཱ ཙནྡཱུཔམཱ ཧུཏྭཱ ཁཏྟིཡཀུལཱདཱིནི ཙཏྟཱརི ཀུལཱནི ཨུཔསངྐམཐཱཏི ཨཏྠོ. ཨཔིཙ ཡཐཱ ཙནྡོ ཨནྡྷཀཱརཾ ཝིདྷམཏི, ཨཱལོཀཾ ཕརཏི, ཨེཝཾ ཀིལེསནྡྷཀཱརཝིདྷམནེན, ཉཱཎཱལོཀཕརཎེན ཙ ཙནྡཱུཔམཱ ཧུཏྭཱཏི ཨེཝམཱདཱིཧིཔི ནཡེཧི ཨཏྠོ དཊྛབྦོ.

ཨཔཀསྶེཝ ཀཱཡཾ, ཨཔཀསྶ ཙིཏྟནྟི ཏེནེཝ སནྠཝཱདཱིནམཀརཎེན ཀཱཡཉྩ ཙིཏྟཉྩ ཨཔཀསྶིཏྭཱ, ཨཀཌྜྷིཏྭཱ ཨཔནེཏྭཱཏི ཨཏྠོ. ནིཙྩནཝཀཱཏི ནིཙྩཾ ནཝིཀཱཝ, ཨཱགནྟུཀསདིསཱ ¶ ཨེཝ ཧུཏྭཱཏི ཨཏྠོ. ཨཱགནྟུཀོ ¶ ཧི པཊིཔཱཊིཡཱ སམྤཏྟགེཧཾ པཝིསིཏྭཱ སཙེ ནཾ གྷརསཱམིཀཱ དིསྭཱ ‘‘ཨམྷཱཀཾ པུཏྟབྷཱཏརོཔི ཝིཔྤཝཱསགཏཱ ཨེཝཾ ཝིཙརིཾསཱུ’’ཏི ཨནུཀམྤམཱནཱ ནིསཱིདཱཔེཏྭཱ བྷོཛེནྟི, བྷུཏྟམཏྟོཡེཝ ‘‘ཏུམྷཱཀཾ བྷཱཛནཾ གཎྷཐཱ’’ཏི ཨུཊྛཱཡ པཀྐམཏི, ན ཏེཧི སདྡྷིཾ སནྠཝཾ ཝཱ ཀརོཏི, ཀིཙྩཀརཎཱིཡཱནི ཝཱ སཾཝིདཧཏི, ཨེཝཾ ཏུམྷེཔི པཊིཔཱཊིཡཱ སམྤཏྟགྷརཾ པཝིསིཏྭཱ ཡཾ ཨིརིཡཱཔཐེསུ པསནྣཱ མནུསྶཱ དེནྟི, ཏཾ གཧེཏྭཱ པཙྪིནྣསནྠཝཱ ཏེསཾ ཀིཙྩཀརཎཱིཡེ ཨབྱཱཝཊཱ ཧུཏྭཱ ནིཀྑམཐཱཏི དཱིཔེཏི. ཨཔྤགབྦྷཱཏི ན པགབྦྷཱ, ཨཊྛཊྛཱནེན ཀཱཡཔཱགབྦྷིཡེན, ཙཏུཊྛཱནེན ཝཙཱིཔཱགབྦྷིཡེན, ཨནེཀཊྛཱནེན མནོཔཱགབྦྷིཡེན ཙ ཝིརཧིཏཱ ཀུལཱནི ཨུཔསངྐམཐཱཏི ཨཏྠོ.

ཛརུདཔཱནནྟི ཛིཎྞཀཱུཔཾ. པབྦཏཝིསམནྟི པབྦཏེ ཝིསམཾ པཔཱཏཊྛཱནཾ. ནདཱིཝིདུགྒནྟི ནདིཡཱ ཝིདུགྒཾ ཚིནྣཏཊཊྛཱནཾ. ཨེཝམེཝ ཁོཏི ཨེཏྠ ཨིདཾ ཨོཔམྨསཾསནྡནཾ – ཛརུདཔཱནཱདཡོ ཝིཡ ཧི ཙཏྟཱརི ཀུལཱནི, ཨོལོཀནཔུརིསོ ཝིཡ བྷིཀྑུ, ཡཐཱ པན ཨནཔཀཊྛཀཱཡཙིཏྟོ ཏཱནི ཨོལོཀེནྟོ པུརིསོ ཏཏྠ པཏཏི, ཨེཝཾ ཨརཀྑིཏེཧི ཀཱཡཱདཱིཧི ཀུལཱནི ཨུཔསངྐམནྟོ བྷིཀྑུ ཀུལེསུ བཛ྄ཛྷཏི, ཏཏོ ནཱནཔྤཀཱརཾ སཱིལཔཱདབྷཉྫནཱདིཀཾ ཨནཏྠཾ པཱཔུཎཱཏི. ཡཐཱ པན ཨཔཀཊྛཀཱཡཙིཏྟོ པུརིསོ ཏཏྠ ན པཏཏི, ཨེཝཾ རཀྑིཏེནེཝ ཀཱཡེན, རཀྑིཏཱཡ ཝཱཙཱཡ, རཀྑིཏེཧི ཙིཏྟེཧི, སཱུཔཊྛིཏཱཡ སཏིཡཱ ཨཔཀཊྛཀཱཡཙིཏྟོ ཧུཏྭཱ ཀུལཱནི ཨུཔསངྐམནྟོ བྷིཀྑུ ཀུལེསུ ན བཛ྄ཛྷཏི, ཨཐསྶ སཱིལསདྡྷཱསམཱདྷིཔཉྙཱསངྑཱཏཱནི པཱདཧཏྠཀུཙྪིསཱིསཱནི ན བྷཉྫནྟི, རཱགཀཎྚཀཱདཡོ ན ཝིཛ྄ཛྷནྟི, སུཁིཏོ ཡེནཀཱམཾ ཨགཏཔུབྦཾ ནིབྦཱནདིསཾ གཙྪཏི, ཨེཝརཱུཔོ ཨཡཾ མཧཱཀསྶཔོཏི ཧཱིནཱདྷིམུཏྟིཀསྶ མིཙྪཱཔཊིཔནྣསྶ ཝཱདཔཐཔཙྪིནྡནཏྠཾ མཧཱཀསྶཔཏྠེརཾ ཨེཝ སཀྑིཾ ཀཏྭཱ དསྶེནྟོ ‘‘ཀསྶཔོ བྷིཀྑཝེ’’ཏིཨཱདིམཱཧཱཏི. ཨེཝམྤེཏྠ ཨཏྠམིཙྪནྟིཨལགྒཙིཏྟཏཱསངྑཱཏཱཡ ཙནྡོཔམཔཊིཔདཱཡ ཀརཎབྷཱུཏཱཡ པསཾསིཏོ, ཏསྶཾ ཝཱ ཨཱདྷཱརབྷཱུཏཱཡ མཉྙེཝ སཀྑིཾ ཀཏྭཱ པསཾསིཏོཏི, ཨེཝཾ སཏི ཙེཝ-སདྡོ, ཙ-སདྡོ ཙ ན པཡུཛྫིཏབྦོ དྭིནྣཾ པདཱནཾ ཏུལྱཱདྷིཀརཎཏྟཱ, ཨཡམེཝ ཨཏྠོ པཱཋོ ཙ ཡུཏྟཏརོ ཝིཡ དིསྶཏི པརིནིབྦཱནསུཏྟཝཎྞནཱཡཾ ‘‘ཨཱཀཱསེ པཱཎིཾ ཙཱལེཏྭཱ ཙནྡཱུཔམཾ པཊིཔདཾ ཀཐེནྟོ མཾ ཀཱཡསཀྑིཾ ཀཏྭཱ ཀཐེསཱི’’ཏི (དཱི. ནི. ཨཊྛ. ༢.༢༣༢) ཝུཏྟཏྟཱཏི.

ཏསྶ ¶ ཀིམཉྙཾ ཨཱཎཎྱཾ བྷཝིསྶཏི, ཨཉྙཏྲ དྷམྨཝིནཡསངྒཱཡནཱཏི ཨདྷིཔྤཱཡོ. ཏཏྠ ཏསྶཱཏི ཡཾ-སདྡསྶ ཀཱརཎནིདསྶནེ ‘‘ཏསྨཱ’’ཏི ཨཛ྄ཛྷཱཧརིཏྭཱ ཏསྶ མེཏི ཨཏྠོ, ཀིརིཡཱཔརཱམསནེ པན ཏསྶ ཨནུགྒཧཎསྶ, པསཾསནསྶ ཙཱཏི. པོཏྠཀེསུཔི ཀཏྠཙི ‘‘ཏསྶ མེ’’ཏི པཱཋོ དིསྶཏི, ཨེཝཾ སཏི ཀིརིཡཱཔརཱམསནེ ‘‘ཏསྶཱ’’ཏི ཨཔརཾ པདམཛ྄ཛྷཱཧརིཏབྦཾ. ནཏྠི ¶ ཨིཎཾ ཡསྶཱཏི ཨཎཎོ, ཏསྶ བྷཱཝོ ཨཱཎཎྱཾ. དྷམྨཝིནཡསངྒཱཡནཾ ཋཔེཏྭཱ ཨཉྙཾ ཀིཾ ནཱམ ཏསྶ ཨིཎཝིརཧིཏཏྟཾ བྷཝིསྶཏི, ན བྷཝིསྶཏི ཨེཝཱཏི ཨཏྠོ. ‘‘ནནུ མཾ བྷགཝཱ’’ཏིཨཱདིནཱ ཝུཏྟམེཝཏྠཾ ཨུཔམཱཝསེན ཝིབྷཱཝེཏི. སཀཀཝཙཨིསྶརིཡཱནུཔྤདཱནེནཱཏི ཨེཏྠ ཀཝཙོ ནཱམ ཨུརཙྪདོ, ཡེན ཨུརོ ཚཱདཱིཡཏེ, ཏསྶ ཙ ཙཱིཝརནིདསྶནེན གཧཎཾ, ཨིསྶརིཡསྶ པན ཨབྷིཉྙཱསམཱཔཏྟིནིདསྶནེནཱཏི དཊྛབྦཾ. ཀུལཝཾསཔྤཏིཊྛཱཔཀནྟི ཀུལཝཾསསྶ ཀུལཔཝེཎིཡཱ པཏིཊྛཱཔཀཾ. ‘‘མེ’’ཏི པདསྶ ནིཙྩསཱཔེཀྑཏྟཱ སདྡྷམྨཝཾསཔྤཏིཊྛཱཔཀོཏི སམཱསོ. ཨིདཾ ཝུཏྟཾ ཧོཏི – སཏྟུསངྒྷནིམྨདྡནེན ཨཏྟནོ ཀུལཝཾསཔྤཏིཊྛཱཔནཏྠཾ སཀཀཝཙཨིསྶརིཡཱནུཔྤདཱནེན ཀུལཝཾསཔྤཏིཊྛཱཔཀཾ པུཏྟཾ རཱཛཱ ཝིཡ བྷགཝཱཔི མཾ དཱིགྷདསྶཱི ‘‘སདྡྷམྨཝཾསཔྤཏིཊྛཱཔཀོ མེ ཨཡཾ བྷཝིསྶཏཱི’’ཏི མནྟྭཱ སཱསནཔཙྩཏྠིཀགཎནིམྨདྡནེན སདྡྷམྨཝཾསཔྤཏིཊྛཱཔནཏྠཾ ཙཱིཝརདཱནསམསམཊྛཔནསངྑཱཏེན ཨིམིནཱ ཨསཱདྷཱརཎཱནུགྒཧེན ཨནུགྒཧེསི ནནུ, ཨིམཱཡ ཙ ཨུལཱ༹རཱཡ པསཾསཱཡ པསཾསི ནནཱུཏི. ཨིཏི ཙིནྟཡནྟོཏི ཨེཏྠ ཨིཏིསདྡེན ‘‘ཨནྟརདྷཱཔེཡྻུཾ, སངྒཱཡེཡྻཾ, ཀིམཉྙཾ ཨཱཎཎྱཾ བྷཝིསྶཏཱི’’ཏི ཝཙནཔུབྦངྒམཾ, ‘‘ཋཱནཾ ཁོ པནེཏཾ ཝིཛྫཏཱི’’ཏིཨཱདི ཝཱཀྱཏྟཡཾ ནིདསྶེཏི.

ཨིདཱནི ཡཐཱཝུཏྟམཏྠཾ སངྒཱིཏིཀྑནྡྷཀཔཱལི༹ཡཱ སཱདྷེནྟོ ཨཱཧ ‘‘ཡཐཱཧཱ’’ཏིཨཱདི. ཏཏྠ ཡཐཱཧཱཏི ཀིཾ ཨཱཧ, མཡཱ ཝུཏྟསྶ ཨཏྠསྶ སཱདྷཀཾ ཀིཾ ཨཱཧཱཏི ཝུཏྟཾ ཧོཏི. ཡཐཱ ཝཱ ཡེན པཀཱརེན མཡཱ ཝུཏྟཾ, ཏཐཱ ཏེན པཀཱརེན པཱལི༹ཡམྤི ཨཱཧཱཏི ཨཏྠོ. ཡཐཱ ཝཱ ཡཾ ཝཙནཾ པཱལི༹ཡཾ ཨཱཧ, ཏཐཱ ཏེན ཝཙནེན མཡཱ ཝུཏྟཝཙནཾ སཾསནྡཏི ཙེཝ སམེཏི ཙ ཡཐཱ ཏཾ གངྒོདཀེན ཡམུནོདཀནྟིཔི ཝཏྟབྦོ པཱལི༹ཡཱ སཱདྷནཏྠཾ ཨུདཱཧརིཏབྷཱཝསྶ པཙྩཀྑཏོ ཝིཉྙཱཡམཱནཏྟཱ, ཝིཉྙཱཡམཱནཏྠསྶ ཙ སདྡསྶ པཡོགེ ཀཱམཱཙཱརཏྟཱ. ཨདྷིཔྤཱཡཝིབྷཱཝནཏྠཱ ཧི ཨཏྠཡོཛནཱ. ཡཐཱ ཝཱ ཡེན པཀཱརེན དྷམྨཝིནཡསངྒཱཡནཏྠཾ བྷིཀྑཱུནཾ ¶ ཨུསྶཱཧཾ ཛནེསི, ཏཐཱ ཏེན པཀཱརེན པཱལི༹ཡམྤི ཨཱཧཱཏི ཨཏྠོ. ཨེཝམཱིདིསེསུ.

ཨེཀམིདཱཧནྟི ཨེཏྠ ཨིདནྟི ནིཔཱཏམཏྟཾ. ཨེཀཾ སམཡནྟི ཙ བྷུམྨཏྠེ ཨུཔཡོགཝཙནཾ, ཨེཀསྨིཾ སམཡེཏི ཨཏྠོ. པཱཝཱཡཱཏི པཱཝཱནགརཏོ, ཏཏྠ པིཎྜཱཡ ཙརིཏྭཱ ‘‘ཀུསིནཱརཾ གམིསྶཱམཱི’’ཏི ཨདྡྷཱནམགྒཔྤཊིཔནྣོཏི ཝུཏྟཾ ཧོཏི. ཨདྡྷཱནམགྒོཏི ཙ དཱིགྷམགྒོ ཝུཙྩཏི, དཱིགྷཔརིཡཱཡོ ཧེཏྠ ཨདྡྷཱནསདྡོ. མཧཏཱཏི གུཎམཧཏྟེནཔི སངྑྱཱམཧཏྟེནཔི མཧཏཱ. ‘‘པཉྩམཏྟེཧཱི’’ཏིཨཱདིནཱ སངྑྱཱམཧཏྟཾ དསྶེཏི, མཏྟསདྡོ ཙ པམཱཎཝཙནོ ‘‘བྷོཛནེ མཏྟཉྙུཏཱ’’ཏིཨཱདཱིསུ (ཨ. ནི. ༣.༡༦) ཝིཡ. ‘‘དྷམྨཝིནཡསངྒཱཡནཏྠཾ ཨུསྶཱཧཾ ཛནེསཱི’’ཏི ཨེཏསྶཏྠསྶ སཱདྷནཏྠཾ ཨཱཧཏཱ ‘‘ཨཐ ཁོ’’ཏིཨཱདིཀཱ པཱལི༹ ཡཐཱཝུཏྟམཏྠཾ ན སཱདྷེཏི ¶ . ན ཧེཏྠ ཨུསྶཱཧཛནནཔྤཀཱརོ ཨཱགཏོཏི ཙོདནཾ པརིཧརིཏུམཱཧ ‘‘སབྦཾ སུབྷདྡཀཎྜཾ ཝིཏྠཱརཏོ ཝེདིཏབྦ’’ནྟི. ཨེཝམྤེསཱ ཙོདནཱ ཏདཝཏྠཱཡེཝཱཏི ཝུཏྟཾ ‘‘ཏཏོ པརཾ ཨཱཧཱ’’ཏིཨཱདི. ཨཔིཙ ཡཐཱཝུཏྟཏྠསཱདྷིཀཱ པཱལི༹ མཧཏརཱཏི གནྠགརུཏཱཔརིཧརཎཏྠཾ མཛ྄ཛྷེ པེཡྻཱལམུཁེན ཨཱདིཨནྟམེཝ པཱལི༹ཾ དསྶེནྟོ ‘‘སབྦཾ སུབྷདྡཀཎྜཾ ཝིཏྠཱརཏོ ཝེདིཏབྦ’’ནྟི ཨཱཧ. ཏེན ཧི ‘‘ཨཐ ཁྭཱཧཾ ཨཱཝུསོ མགྒཱ ཨོཀྐམྨ ཨཉྙཏརསྨིཾ རུཀྑམཱུལེ ནིསཱིདཱི’’ཏི (ཙཱུལ༹ཝ. ༤༣༧) ཝུཏྟཔཱལི༹ཏོ པཊྛཱཡ ‘‘ཡཾ ན ཨིཙྪིསྶཱམ, ན ཏཾ ཀརིསྶཱམཱ’’ཏི (ཙཱུལ༹ཝ. ༤༣༧) ཝུཏྟཔཱལི༹པརིཡོསཱནཾ སུབྷདྡཀཎྜཾ དསྶེཏི.

‘‘ཏཏོ པར’’ནྟིཨཱདིནཱ པན ཏདཝསེསཾ ‘‘ཧནྡ མཡཾ ཨཱཝུསོ’’ཏིཨཱདིཀཾ ཨུསྶཱཧཛནནཔྤཀཱརདསྶནཔཱལི༹ཾ. ཏསྨཱ ཏཏོ པརཾ ཨཱཧཱཏི ཨེཏྠ སུབྷདྡཀཎྜཏོ པརཾ ཨུསྶཱཧཛནནཔྤཀཱརདསྶནཝཙནམཱཧཱཏི ཨཏྠོ ཝེདིཏབྦོ. མཧཱགཎྛིཔདེཔི ཧི སོཡེཝཏྠོ ཝུཏྟོ. ཨཱཙརིཡསཱརིཔུཏྟཏྠེརེནཱཔི (སཱརཏྠ. ཊཱི. ༡.པཋམམཧཱསངྒཱིཏིཀཐཱཝཎྞནཱ) ཏཐེཝ ཨདྷིཔྤེཏོ. ཨཱཙརིཡདྷམྨཔཱལཏྠེརེན པན ‘‘ཏཏོ པརནྟི ཏཏོ བྷིཀྑཱུནཾ ཨུསྶཱཧཛནནཏོ པརཏོ’’ཏི (དཱི. ནི. ཊཱི. ༡.པཋམམཧཱསངྒཱིཏིཀཐཱཝཎྞནཱ) ཝུཏྟཾ, ཏདེཏཾ ཝིཙཱརེཏབྦཾ ཧེཊྛཱ ཨུསྶཱཧཛནནཔྤཀཱརསྶ པཱལི༹ཡཾ ཨཝུཏྟཏྟཱ. ཨཡམེཝ ཧི ཨུསྶཱཧཛནནཔྤཀཱརོ ཡདིདཾ ‘‘ཧནྡ མཡཾ ཨཱཝུསོ དྷམྨཉྩ ཝིནཡཉྩ སངྒཱཡེཡྻཱམ, པུརེ ཨདྷམྨོ དིཔྤཏཱི’’ཏིཨཱདི. ཡདི ¶ པན སུབྷདྡཀཎྜམེཝ ཨུསྶཱཧཛནནཧེཏུབྷཱུཏསྶ སུབྷདྡེན ཝུཏྟཝཙནསྶ པཀཱསནཏྟཱ ཨུསྶཱཧཛནནནྟི ཝདེཡྻ, ནཏྠེཝེཏྠ ཝིཙཱརེཏབྦཏཱཏི. པུརེ ཨདྷམྨོ དིཔྤཏཱིཏི ཨེཏྠ ཨདྷམྨོ ནཱམ དསཀུསལཀམྨཔཐཔཊིཔཀྑབྷཱུཏོ ཨདྷམྨོ. དྷམྨཝིནཡསངྒཱཡནཏྠཾ ཨུསྶཱཧཛནནཔྤསངྒཏྟཱ ཝཱ ཏདསངྒཱཡནཧེཏུཀོ དོསགཎོཔི སམྦྷཝཏི, ‘‘ཨདྷམྨཝཱདིནོ བལཝནྟོ ཧོནྟི, དྷམྨཝཱདིནོ དུབྦལཱ ཧོནྟཱི’’ཏི ཝུཏྟཏྟཱ སཱིལཝིཔཏྟིཨཱདིཧེཏུཀོ པཱཔིཙྪཏཱདིདོསགཎོ ཨདྷམྨོཏིཔི ཝདནྟི. པུརེ དིཔྤཏཱིཏི ཨཔི ནཱམ དིཔྤཏི. སཾསཡཏྠེ ཧི པུརེ-སདྡོ. ཨཐ ཝཱ ཡཱཝ ཨདྷམྨོ དྷམྨཾ པཊིབཱཧིཏུཾ སམཏྠོ ཧོཏི, ཏཏོ པུརེཏརམེཝཱཏི ཨཏྠོ. ཨཱསནྣེ ཧི ཨནདྷིཔྤེཏེ ཨཡཾ པུརེ-སདྡོ. དིཔྤཏཱིཏི དིཔྤིསྶཏི, པུརེ-སདྡཡོགེན ཧི ཨནཱགཏཏྠེ ཨཡཾ ཝཏྟམཱནཔཡོགོ ཡཐཱ ‘‘པུརཱ ཝསྶཏི དེཝོ’’ཏི. ཏཐཱ ཧི ཝུཏྟཾ –

‘‘ཨནཱགཏེ སནྣིཙྪཡེ, ཏཐཱཏཱིཏེ ཙིརཏནེ;

ཀཱལདྭཡེཔི ཀཝཱིཧི, པུརེསདྡོ པཡུཛྫཏེ’’ཏི. (ཝཛིར. ཊཱི. བཱཧིརནིདཱནཀཐཱཝཎྞནཱ);

‘‘པུརེཡཱཝཔུརཱཡོགེ ¶ , ནིཙྩཾ ཝཱ ཀརཧི ཀདཱ;

ལཙྪཱཡམཔི ཀིཾ ཝུཏྟེ, ཝཏྟམཱནཱ བྷཝིསྶཏཱི’’ཏི ཙ.

ཀེཙི པནེཏྠ ཨེཝཾ ཝཎྞཡནྟི – པུརེཏི པཙྪཱ ཨནཱགཏེ, ཡཐཱ ཨདྡྷཱནཾ གཙྪནྟསྶ གནྟབྦམགྒོ ‘‘པུརེ’’ཏི ཝུཙྩཏི, ཏཐཱ ཨིདྷཱཔི མགྒགམནནཡེན ཨནཱགཏཀཱལོ ‘‘པུརེ’’ཏི ཝུཙྩཏཱིཏི. ཨེཝཾ སཏི ཏཾཀཱལཱཔེཀྑཱཡ ཙེཏྠ ཝཏྟམཱནཔཡོགོ སམྦྷཝཏི. དྷམྨོ པཊིབཱཧིཡྻཏཱིཏི ཨེཏྠཱཔི པུརེ-སདྡེན ཡོཛེཏྭཱ ཝུཏྟནཡེན ཨཏྠོ ཝེདིཏབྦོ, ཏཐཱ དྷམྨོཔི ཨདྷམྨཝིཔརཱིཏཝསེན, ཨིཏོ པརམྤི ཨེསེཝ ནཡོ. ཨཝིནཡོཏི པཧཱནཝིནཡསཾཝརཝིནཡཱནཾ པཊིཔཀྑབྷཱུཏོ ཨཝིནཡོ. ཝིནཡཝཱདིནོ དུབྦལཱ ཧོནྟཱིཏི ཨེཝཾ ཨིཏི-སདྡེན པཱཋོ, སོ ‘‘ཏཏོ པརཾ ཨཱཧཱ’’ཏི ཨེཏྠ ཨཱཧ-སདྡེན སམྦཛ྄ཛྷིཏབྦོ.

ཏེན ཧཱིཏི ཨུཡྻོཛནཏྠེ ནིཔཱཏོ. ཨུཙྩིནནེ ཨུཡྻོཛེནྟཱ ཧི མཧཱཀསྶཔཏྠེརཾ ཨེཝམཱཧཾསུ ‘‘བྷིཀྑཱུ ཨུཙྩིནཏཱུ’’ཏི, སངྒཱིཏིཡཱ ཨནུརཱུཔེ བྷིཀྑཱུ ཨུཙྩིནིཏྭཱ ཨུཔདྷཱརེཏྭཱ གཎྷཱཏཱུཏི ཨཏྠོ. ‘‘སཀལ…པེ… པརིགྒཧེསཱི’’ཏི ཨེཏེན སུཀྑཝིཔསྶཀཁཱིཎཱསཝཔརིཡནྟཱནཾ ཡཐཱཝུཏྟཔུགྒལཱནཾ སཏིཔི ¶ ཨཱགམཱདྷིགམསམྦྷཝེ སཧ པཊིསམྦྷིདཱཧི པན ཏེཝིཛྫཱདིགུཎཡུཏྟཱནཾ ཨཱགམཱདྷིགམསམྤཏྟིཡཱ ཨུཀྐཾསགཏཏྟཱ སངྒཱིཏིཡཱ བཧཱུཔཀཱརཏཾ དསྶེཏི. སཀལཾ སུཏྟགེཡྻཱདིཀཾ ནཝངྒཾ ཨེཏྠ, ཨེཏསྶཱཏི ཝཱ སཀལནཝངྒཾ, སཏྠུ བྷགཝཏོ སཱསནཾ སཏྠུསཱསནཾ སཱསཱིཡཏི ཨེཏེནཱཏི ཀཏྭཱ, ཏདེཝ སཏྠུསཱསནནྟི སཀལནཝངྒསཏྠུསཱསནཾ. ནཝ ཝཱ སུཏྟགེཡྻཱདཱིནི ཨངྒཱནི ཨེཏྠ, ཨེཏསྶཱཏི ཝཱ ནཝངྒཾ, ཏམེཝ སཏྠུསཱསནཾ, ཏཉྩ སཀལམེཝ, ན ཨེཀདེསནྟི ཏཐཱ. ཨཏྠཀཱམེན པརིཡཱཔུཎིཏབྦཱ སིཀྑིཏབྦཱ, དིཊྛདྷམྨིཀཱདིཔུརིསཏྠཾ ཝཱ ནིཔྥཱདེཏུཾ པརིཡཏྟཱ སམཏྠཱཏི པརིཡཏྟི, ཏཱིཎི པིཊཀཱནི, སཀལནཝངྒསཏྠུསཱསནསངྑཱཏཱ པརིཡཏྟི, ཏཾ དྷཱརེནྟཱིཏི ཏཐཱ, ཏཱདིསེཏི ཨཏྠོ. པུཐུཛྫན…པེ… སུཀྑཝིཔསྶཀཁཱིཎཱསཝབྷིཀྑཱུཏི ཨེཏྠ –

‘‘དུཝེ པུཐུཛྫནཱ ཝུཏྟཱ, བུདྡྷེནཱདིཙྩབནྡྷུནཱ;

ཨནྡྷོ པུཐུཛྫནོ ཨེཀོ, ཀལྱཱཎེཀོ པུཐུཛྫནོ’’ཏི. (དཱི. ནི. ཨཊྛ. ༡.༧; མ. ནི. ཨཊྛ. ༡.༢; སཾ. ནི. ཨཊྛ. ༢.༦༡; ཨ. ནི. ཨཊྛ. ༡.༥༡; ཙཱུལ༹ནི. ཨཊྛ. ༨༨; པཊི. མ. ཨཊྛ. ༢.༡༣༠); –

ཝུཏྟེསུ ཀལྱཱཎཔུཐུཛྫནཱཝ ཨདྷིཔྤེཏཱ སདྡནྟརསནྣིདྷཱནེནཔི ཨཏྠཝིསེསསྶ ཝིཉྙཱཏབྦཏྟཱ. སམཐབྷཱཝནཱསིནེཧཱབྷཱཝེན ¶ སུཀྑཱ ལཱུཁཱ ཨསིནིདྡྷཱ ཝིཔསྶནཱ ཨེཏེསནྟི སུཀྑཝིཔསྶཀཱ, ཏེཡེཝ ཁཱིཎཱསཝཱཏི ཏཐཱ. ‘‘བྷིཀྑཱུ’’ཏི པན སབྦཏྠ ཡོཛེཏབྦཾ. ཝུཏྟཉྷི –

‘‘ཡཉྩཏྠཝཏོ སདྡེཀསེསཏོ ཝཱཔི སུཡྻཏེ;

ཏཾ སམྦཛ྄ཛྷཏེ པཙྩེཀཾ, ཡཐཱལཱབྷཾ ཀདཱཙིཔཱི’’ཏི.

ཏིཔིཊཀསབྦཔརིཡཏྟིཔྤབྷེདདྷརེཏི ཨེཏྠ ཏིཎྞཾ པིཊཀཱནཾ སམཱཧཱརོ ཏིཔིཊཀཾ, ཏཾསངྑཱཏཾ ནཝངྒཱདིཝསེན ཨནེཀབྷེདབྷིནྣཾ སབྦཾ པརིཡཏྟིཔྤབྷེདཾ དྷཱརེནྟཱིཏི ཏཐཱ, ཏཱདིསེ. ཨནུ ཨནུ ཏཾ སམངྒིནཾ བྷཱཝེཏི ཝཌྜྷེཏཱིཏི ཨནུབྷཱཝོ, སོཡེཝ ཨཱནུབྷཱཝོ, པབྷཱཝོ, མཧནྟོ ཨཱནུབྷཱཝོ ཡེསཾ ཏེ མཧཱནུབྷཱཝཱ. ‘‘ཨེཏདགྒཾ བྷིཀྑཝེ’’ཏི བྷགཝཏཱ ཝུཏྟཝཙནམུཔཱདཱཡ པཝཏྟཏྟཱ ‘‘ཨེཏདགྒ’’ནྟི པདཾ ཨནུཀརཎཛནཱམཾ ནཱམ ཡཐཱ ‘‘ཡེཝཱཔནཀ’’ནྟི, ཏབྦསེན ཝུཏྟཊྛཱནནྟརམིདྷ ཨེཏདགྒཾ, ཏམཱརོཔིཏེཏི ཨཏྠོ. ཨེཏདགྒཾ ཨེསོ བྷིཀྑུ ཨགྒོཏི ཝཱ ཨཱརོཔིཏེཔི ཝཊྚཏི. ཏདནཱརོཔིཏཱཔི ཨཝསེསགུཎསམྤནྣཏྟཱ ཨུཙྩིནིཏཱ ཏཏྠ སནྟཱིཏི དསྶེཏུཾ ‘‘ཡེབྷུཡྻེནཱ’’ཏི ཝུཏྟཾ. ཏིསྶོ ཝིཛྫཱ ཏེཝིཛྫཱ, ཏཱ ¶ ཨཱདི ཡེསཾ ཚལ༹བྷིཉྙཱདཱིནནྟི ཏེཝིཛྫཱདཡོ, ཏེ བྷེདཱ ཨནེཀཔྤཀཱརཱ ཡེསནྟི ཏེཝིཛྫཱདིབྷེདཱ. ཨཐ ཝཱ ཏིསྶོ ཝིཛྫཱ ཨསྶ ཁཱིཎཱསཝསྶཱཏི ཏེཝིཛྫོ, སོ ཨཱདི ཡེསཾ ཚལ༹བྷིཉྙཱདཱིནནྟི ཏེཝིཛྫཱདཡོ, ཏེཡེཝ བྷེདཱ ཡེསནྟི ཏེཝིཛྫཱདིབྷེདཱ. ཏེཝིཛྫཚལ༹བྷིཉྙཱདིཝསེན ཨནེཀབྷེདབྷིནྣེ ཁཱིཎཱསཝབྷིཀྑཱུཡེཝཱཏི ཝུཏྟཾ ཧོཏི. ཡེ སནྡྷཱཡ ཝུཏྟནྟི ཡེ བྷིཀྑཱུ སནྡྷཱཡ ཨིདཾ ‘‘ཨཐ ཁོ’’ཏིཨཱདིཝཙནཾ སངྒཱིཏིཀྑནྡྷཀེ ཝུཏྟཾ. ཨིམིནཱ ཀིཉྩཱཔི པཱལི༹ཡཾ ཨཝིསེསཏོཝ ཝུཏྟཾ, ཏཐཱཔི ཝིསེསེན ཡཐཱཝུཏྟཁཱིཎཱསཝབྷིཀྑཱུཡེཝ སནྡྷཱཡ ཝུཏྟནྟི པཱལི༹ཡཱ སཾསནྡནཾ ཀརོཏི.

ནནུ ཙ སཀལནཝངྒསཏྠུསཱསནཔརིཡཏྟིདྷརཱ ཁཱིཎཱསཝཱ ཨནེཀསཏཱ, ཨནེཀསཧསྶཱ ཙ, ཀསྨཱ ཐེརོ ཨེཀེནཱུནམཀཱསཱིཏི ཙོདནཾ ཨུདྡྷརིཏྭཱ ཝིསེསཀཱརཎདསྶནེན ཏཾ པརིཧརིཏུཾ ‘‘ཀིསྶ པནཱ’’ཏིཨཱདི ཝུཏྟཾ. ཏཏྠ ཀིསྶཱཏི ཀསྨཱ. པཀྑནྟརཛོཏཀོ པན-སདྡོ. ཨོཀཱསཀརཎཏྠནྟི ཨོཀཱསཀརཎནིམིཏྟཾ ཨོཀཱསཀརཎཧེཏུ. ཨཏྠ-སདྡོ ཧི ‘‘ཚཎཏྠཉྩ ནགརཏོ ནིཀྑམིཏྭཱ མིསྶཀཔབྦཏཾ ཨབྷིརུཧཏཱུ’’ཏིཨཱདཱིསུ ཝིཡ ཀཱརཎཝཙནོ, ‘‘ཀིསྶ ཧེཏཱུ’’ཏིཨཱདཱིསུ (མ. ནི. ༡.༢༣༨) ཝིཡ ཙ ཧེཏྭཏྠེ པཙྩཏྟཝཙནཾ. ཏཐཱ ཧི ཝཎྞཡནྟི ‘‘ཚཎཏྠནྟི ཚཎནིམིཏྟཾ ཚཎཧེཏཱུཏི ཨཏྠོ’’ཏི. ཨེཝཉྩ སཏི པུཙྪཱསབྷཱགཏཱཝིསྶཛྫནཱཡ ཧོཏི, ཨེས ནཡོ ཨཱིདིསེསུ.

ཀསྨཱ པནསྶ ཨོཀཱསམཀཱསཱིཏི ཨཱཧ ‘‘ཏེནཱ’’ཏིཨཱདི. ཧི-སདྡོ ཀཱརཎཏྠེ. ‘‘སོ ཧཱཡསྨཱ’’ཏིཨཱདིནཱ ¶ ‘‘སཧཱཔི ཝིནཱཔི ན སཀྐཱ’’ཏི ཝུཏྟཝཙནེ པཙྩེཀཾ ཀཱརཎཾ དསྶེཏི. ཀེཙི པན ‘‘ཏམཏྠཾ ཝིཝརཏཱི’’ཏི ཝདནྟི, ཏདཡུཏྟཾ ‘‘ཏསྨཱ’’ཏི ཀཱརཎཝཙནདསྶནཏོ. ‘‘ཏསྨཱ’’ཏིཨཱདིནཱ ཧི ཀཱརཎདསྶནཊྛཱནེ ཀཱརཎཛོཏཀོཡེཝ ཧི-སདྡོ. སཉྙཱཎམཏྟཛོཏཀཱ སཱཁཱབྷངྒོཔམཱ ཧི ནིཔཱཏཱཏི, ཨེཝམཱིདིསེསུ. སིཀྑཏཱིཏི སེཀྑོ, སིཀྑནཾ ཝཱ སིཀྑཱ, སཱཡེཝ ཏསྶ སཱིལནྟི སེཀྑོ. སོ ཧི ཨཔརིཡོསིཏསིཀྑཏྟཱ, ཏདདྷིམུཏྟཏྟཱ ཙ ཨེཀནྟེན སིཀྑནསཱིལོ, ན ཨསེཀྑོ ཝིཡ པརིནིཊྛིཏསིཀྑོ ཏཏྠ པཊིཔྤསྶདྡྷུསྶཱཧོ, ནཱཔི ཝིསྶཊྛསིཀྑོ པཙུརཛནོ ཝིཡ ཏཏྠ ཨནདྷིམུཏྟོ, ཀིཏཝསེན ཝིཡ ཙ ཏདྡྷིཏཝསེནིདྷ ཏཔྤཀཏིཡཏྠོ གཡ྄ཧཏི ཡཐཱ ‘‘ཀཱརུཎིཀོ’’ཏི. ཨཐ ཝཱ ཨརིཡཱཡ ཛཱཏིཡཱ ཏཱིསུཔི སིཀྑཱསུ ཛཱཏོ, ཏཏྠ ཝཱ བྷཝོཏི ¶ སེཀྑོ. ཨཔིཙ ཨིཀྑཏི ཨེཏཱཡཱཏི ཨིཀྑཱ, མགྒཕལསམྨཱདིཊྛི, སཧ ཨིཀྑཱཡཱཏི སེཀྑོ. ཨུཔརིམགྒཏྟཡཀིཙྩསྶ ཨཔརིཡོསིཏཏྟཱ སཧ ཀརཎཱིཡེནཱཏི སཀརཎཱིཡོ. ཨསྶཱཏི ཨནེན, ‘‘ཨཔྤཙྩཀྑཾ ནཱམཱ’’ཏི ཨེཏེན སམྦནྡྷོ. ཨསྶཱཏི ཝཱ ‘‘ནཏྠཱི’’ཏི ཨེཏྠ ཀིརིཡཱཔཊིགྒཧཀཝཙནཾ. པགུཎཔྤཝཏྟིབྷཱཝཏོ ཨཔྤཙྩཀྑཾ ནཱམ ནཏྠི. ཝིནཡཊྛཀཐཱཡཾ པན ‘‘ཨསམྨུཁཱ པཊིགྒཧིཏཾ ནཱམ ནཏྠཱི’’ཏི (པཱརཱ. ཨཊྛ. ༡.པཋམམཧཱསངྒཱིཏིཀཐཱཝཎྞནཱ) ཝུཏྟཾ, ཏཾ’’ དྭེ སཧསྶཱནི བྷིཀྑུཏོ’’ཏི ཝུཏྟམྤི བྷགཝཏོ སནྟིཀེ པཊིགྒཧིཏམེཝ ནཱམཱཏི ཀཏྭཱ ཝུཏྟཾ. ཏཐཱ ཧི སཱཝཀབྷཱསིཏམྤི སུཏྟཾ ‘‘བུདྡྷབྷཱསིཏ’’ནྟི ཝུཙྩཏཱིཏི.

‘‘ཡཐཱཧཱ’’ཏིཨཱདིནཱ ཨཱཡསྨཏཱ ཨཱནནྡེན ཝུཏྟགཱཐམེཝ སཱདྷཀབྷཱཝེན དསྶེཏི. ཨཡཉྷི གཱཐཱ གོཔཀམོགྒལླཱནེན ནཱམ བྲཱཧྨཎེན ‘‘བུདྡྷསཱསནེ ཏྭཾ བཧུསྶུཏོཏི པཱཀཊོ, ཀིཏྟཀཱ དྷམྨཱ ཏེ སཏྠཱརཱ བྷཱསིཏཱ, ཏཡཱ ཙ དྷཱརིཏཱ’’ཏི པུཙྪིཏེན ཏསྶ པཊིཝཙནཾ དེནྟེན ཨཱཡསྨཏཱ ཨཱནནྡེནེཝ གོཔཀམོགྒལླཱནསུཏྟེ, ཨཏྟནོ གུཎདསྶནཝསེན ཝཱ ཐེརགཱཐཱཡམྤི བྷཱསིཏཱ. ཏཏྠཱཡཾ སངྑེཔཏྠོ – བུདྡྷཏོ སཏྠུ སནྟིཀཱ དྭཱསཱིཏི དྷམྨཀྑནྡྷསཧསྶཱནི ཨཧཾ གཎྷིཾ ཨདྷིགཎྷིཾ, དྭེ དྷམྨཀྑནྡྷསཧསྶཱནི བྷིཀྑུཏོ དྷམྨསེནཱཔཏིཨཱདཱིནཾ བྷིཀྑཱུནཾ སནྟིཀཱ གཎྷིཾ. ཡེ དྷམྨཱ མེ ཛིཝ྄ཧཱགྒེ, ཧདཡེ ཝཱ པཝཏྟིནོ པགུཎཱ ཝཱཙུགྒཏཱ, ཏེ དྷམྨཱ ཏདུབྷཡཾ སམྤིཎྜེཏྭཱ ཙཏུརཱསཱིཏི དྷམྨཀྑནྡྷསཧསྶཱནཱིཏི. ཀེཙི པན ‘‘ཡེམེཏི ཨེཏྠ ‘ཡེ ཨིམེ’ཏི པདཙྪེདཾ ཀཏྭཱ ཡེ ཨིམེ དྷམྨཱ བུདྡྷསྶ, བྷིཀྑཱུནཉྩ པཝཏྟིནོ པཝཏྟིཏཱ, ཏེསུ དྷམྨེསུ བུདྡྷཏོ དྭཱསཱིཏི སཧསྶཱནི ཨཧཾ གཎྷིཾ, དྭེ སཧསྶཱནི བྷིཀྑུཏོ གཎྷིཾ, ཨེཝཾ ཙཏུརཱསཱིཏི དྷམྨཀྑནྡྷསཧསྶཱནཱི’’ཏི སམྦནྡྷཾ ཝདནྟི, ཨཡཉྩ སམྦནྡྷོ ‘‘ཨེཏྟཀཱཡེཝ དྷམྨཀྑནྡྷཱ’’ཏི སནྣིཊྛཱནསྶ ཨཝིཉྙཱཡམཱནཏྟཱ ཀེཙིཝཱདོ ནཱམ ཀཏོ.

‘‘སཧཱཔི ¶ ན སཀྐཱ’’ཏི ཝཏྟབྦཧེཏུཏོ ‘‘ཝིནཱཔི ན སཀྐཱ’’ཏི ཝཏྟབྦཧེཏུཡེཝ བལཝཏརོ སངྒཱིཏིཡཱ བཧུཀཱརཏྟཱ. ཏསྨཱ ཏཏྠ ཙོདནཾ དསྶེཏྭཱ པརིཧརིཏུཾ ‘‘ཡདི ཨེཝ’’ནྟིཨཱདི ཝུཏྟཾ. ཏཏྠ ཡདི ཨེཝནྟི ཨེཝཾ ཝིནཱ ཡདི ན སཀྐཱ, ཏཐཱ སཏཱིཏི ཨཏྠོ. སེཀྑོཔི སམཱནོཏི སེཀྑཔུགྒལོ སམཱནོཔི. མཱན-སདྡོ ཧེཏྠ ལཀྑཎེ. བཧུཀཱརཏྟཱཏི བཧཱུཔཀཱརཏྟཱ. ཨུཔཀཱརཝཙནོ ཧི ཀཱར-སདྡོ ‘‘ཨཔྤཀམྤི ¶ ཀཏཾ ཀཱརཾ, པུཉྙཾ ཧོཏི མཧཔྥལ’’ནྟིཨཱདཱིསུ ཝིཡ. ཨསྶཱཏི བྷཝེཡྻ. ཨཐ-སདྡོ པུཙྪཱཡཾ. པཉྷེ ‘‘ཨཐ ཏྭཾ ཀེན ཝཎྞེནཱ’’ཏི ཧི པཡོགམུདཱཧརནྟི. ‘‘ཨེཝཾ སནྟེ’’ཏི པན ཨཏྠོ ཝཏྟབྦོ. པརཱུཔཝཱདཝིཝཛྫནཏོཏི ཡཐཱཝུཏྟཀཱརཎཾ ཨཛཱནནྟཱནཾ པརེསཾ ཨཱརོཔིཏཨུཔཝཱདཏོ ཝིཝཛྫིཏུཀཱམཏྟཱ. ཏཾ ཝིཝརཏི ‘‘ཐེརོ ཧཱི’’ཏིཨཱདིནཱ. ཨཏིཝིཡ ཝིསྶཏྠོཏི ཨཏིརེཀཾ ཝིསྶཱསིཀོ. ཀེན ཝིཉྙཱཡཏཱིཏི ཨཱཧ ‘‘ཏཐཱ ཧཱི’’ཏིཨཱདི. དལ༹ྷཱིཀརཎཾ ཝཱ ཨེཏཾ ཝཙནཾ. ‘‘ཝུཏྟཉྷི, ཏཐཱ ཧི ཨིཙྩེཏེ དལ༹ྷཱིཀརཎཏྠེ’’ཏི ཧི ཝདནྟི སདྡཝིདཱུ. ནནྟི ཨཱནནྡཏྠེརཾ. ‘‘ཨོཝདཏཱི’’ཏི ཨིམིནཱ སམྦནྡྷོ. ཨཱནནྡཏྠེརསྶ ཡེབྷུཡྻེན ནཝཀཱཡ པརིསཱཡ ཝིབྦྷམནེ མཧཱཀསྶཔཏྠེརོ ‘‘ན ཝཱཡཾ ཀུམཱརཀོ མཏྟམཉྙཱསཱི’’ཏི (སཾ. ནི. ༢.༡༥༤) ཨཱཧ. ཏཐཱ ཧི པརིནིབྦུཏེ བྷགཝཏི མཧཱཀསྶཔཏྠེརོ བྷགཝཏོ པརིནིབྦཱནེ སནྣིཔཏིཏསྶ བྷིཀྑུསངྒྷསྶ མཛ྄ཛྷེ ནིསཱིདིཏྭཱ དྷམྨཝིནཡསངྒཱཡནཏྠཾ པཉྩསཏེ བྷིཀྑཱུ ཨུཙྩིནིཏྭཱ ‘‘རཱཛགཧེ ཨཱཝུསོ ཝསྶཾ ཝསནྟཱ དྷམྨཝིནཡཾ སངྒཱཡིསྶཱམ, ཏུམྷེ པུརེ ཝསྶཱུཔནཱཡིཀཱཡ ཨཏྟནོ ཨཏྟནོ པལིབོདྷཾ པཙྪིནྡིཏྭཱ རཱཛགཧེ སནྣིཔཏཐཱ’’ཏི ཝཏྭཱ ཨཏྟནཱ རཱཛགཧཾ གཏོ.

ཨཱནནྡཏྠེརོཔི བྷགཝཏོ པཏྟཙཱིཝརམཱདཱཡ མཧཱཛནཾ སཉྙཱཔེནྟོ སཱཝཏྠིཾ གནྟྭཱ ཏཏོ ནིཀྑམྨ རཱཛགཧཾ གཙྪནྟོ དཀྑིཎཱགིརིསྨིཾ ཙཱརིཀཾ ཙརི. ཏསྨིཾ སམཡེ ཨཱནནྡཏྠེརསྶ ཏིཾསམཏྟཱ སདྡྷིཝིཧཱརིཀཱ ཡེབྷུཡྻེན ཀུམཱརཀཱ ཨེཀཝསྶིཀདུཝསྶིཀབྷིཀྑཱུ ཙེཝ ཨནུཔསམྤནྣཱ ཙ ཝིབྦྷམིཾསུ. ཀསྨཱ པནེཏེ པབྦཛིཏཱ, ཀསྨཱ ཙ ཝིབྦྷམིཾསཱུཏི? ཏེསཾ ཀིར མཱཏཱཔིཏརོ ཙིནྟེསུཾ ‘‘ཨཱནནྡཏྠེརོ སཏྠུཝིསྶཱསིཀོ ཨཊྛ ཝརེ ཡཱཙིཏྭཱ ཨུཔཊྛཧཏི, ཨིཙྪིཏིཙྪིཏཊྛཱནཾ སཏྠཱརཾ གཧེཏྭཱ གནྟུཾ སཀྐོཏི, ཨམྷཱཀཾ དཱརཀེ ཨེཏསྶ སནྟིཀེ པབྦཛེཡྻཱམ, ཨེཝཾ སོ སཏྠཱརཾ གཧེཏྭཱ ཨཱགམིསྶཏི, ཏསྨིཾ ཨཱགཏེ མཡཾ མཧཱསཀྐཱརཾ ཀཱཏུཾ ལབྷིསྶཱམཱ’’ཏི. ཨིམིནཱ ཏཱཝ ཀཱརཎེན ནེསཾ ཉཱཏཀཱ ཏེ པབྦཱཛེསུཾ, སཏྠརི པན པརིནིབྦུཏེ ཏེསཾ སཱ པཏྠནཱ ཨུཔཙྪིནྣཱ, ཨཐ ནེ ཨེཀདིཝསེནེཝ ཨུཔྤབྦཱཛེསུཾ. ཨཐ ཨཱནནྡཏྠེརཾ དཀྑིཎཱགིརིསྨིཾ ཙཱརིཀཾ ཙརིཏྭཱ རཱཛགཧམཱགཏཾ དིསྭཱ མཧཱཀསྶཔཏྠེརོ ཨེཝམཱཧཱཏི. ཝུཏྟཉྷེཏཾ ཀསྶཔསཾཡུཏྟེ –

‘‘ཨཐ ¶ ཀིཉྩརཧི ཏྭཾ ཨཱཝུསོ ཨཱནནྡ ཨིམེཧི ནཝེཧི བྷིཀྑཱུཧི ཨིནྡྲིཡེསུ ཨགུཏྟདྭཱརེཧི ¶ བྷོཛནེ ཨམཏྟཉྙཱུཧི ཛཱགརིཡཾ ཨནནུཡུཏྟེཧི སདྡྷིཾ ཙཱརིཀཾ ཙརསི, སསྶགྷཱཏཾ མཉྙེ ཙརསི, ཀུལཱུཔགྷཱཏཾ མཉྙེ ཙརསི, ཨོལུཛྫཏི ཁོ ཏེ ཨཱཝུསོ ཨཱནནྡ པརིསཱ, པལུཛྫནྟི ཁོ ཏེ ཨཱཝུསོ ནཝཔྤཱཡཱ, ན ཝཱཡཾ ཀུམཱརཀོ མཏྟམཉྙཱསཱིཏི.

ཨཔི མེ བྷནྟེ ཀསྶཔ སིརསྨིཾ པལིཏཱནི ཛཱཏཱནི, ཨཐ ཙ པན མཡཾ ཨཛྫཱཔི ཨཱཡསྨཏོ མཧཱཀསྶཔསྶ ཀུམཱརཀཝཱདཱ ན མུཙྩཱམཱཏི. ཏཐཱ ཧི པན ཏྭཾ ཨཱཝུསོ ཨཱནནྡ ཨིམེཧི ནཝེཧི བྷིཀྑཱུཧི ཨིནྡྲིཡེསུ ཨགུཏྟདྭཱརེཧི བྷོཛནེ ཨམཏྟཉྙཱུཧི ཛཱགརིཡཾ ཨནནུཡུཏྟེཧི སདྡྷིཾ ཙཱརིཀཾ ཙརསི, སསྶགྷཱཏཾ མཉྙེ ཙརསི, ཀུལཱུཔགྷཱཏཾ མཉྙེ ཙརསི, ཨོལུཛྫཏི ཁོ ཏེ ཨཱཝུསོ ཨཱནནྡ པརིསཱ, པལུཛྫནྟི ཁོ ཏེ ཨཱཝུསོ ནཝཔྤཱཡཱ, ན ཝཱཡཾ ཀུམཱརཀོ མཏྟམཉྙཱསཱི’’ཏི (སཾ. ནི. ༢.༡༥༤).

ཏཏྠ སསྶགྷཱཏཾ མཉྙེ ཙརསཱིཏི སསྶཾ གྷཱཏེནྟོ ཝིཡ ཨཱཧིཎྜསི. ཀུལཱུཔགྷཱཏཾ མཉྙེ ཙརསཱིཏི ཀུལཱནི ཨུཔགྷཱཏེནྟོ ཝིཡ ཨཱཧིཎྜསི. ཨོལུཛྫཏཱིཏི པལུཛྫཏི བྷིཛྫཏི. པལུཛྫནྟི ཁོ ཏེ ཨཱཝུསོ ནཝཔྤཱཡཱཏི ཨཱཝུསོ ཨཱནནྡ ཨེཏེ ཏུཡ྄ཧཾ པཱཡེན ཡེབྷུཡྻེན ནཝཀཱ ཨེཀཝསྶིཀདུཝསྶིཀདཧརཱ ཙེཝ སཱམཎེརཱ ཙ པལུཛྫནྟི. ན ཝཱཡཾ ཀུམཱརཀོ མཏྟམཉྙཱསཱིཏི ཨཡཾ ཀུམཱརཀོ ཨཏྟནོ པམཱཎཾ ན ཝཏ ཛཱནཱཏཱིཏི ཐེརཾ ཏཛྫེནྟོ ཨཱཧ. ཀུམཱརཀཝཱདཱ ན མུཙྩཱམཱཏི ཀུམཱརཀཝཱདཏོ ན མུཙྩཱམ. ཏཐཱ ཧི པན ཏྭནྟི ཨིདམསྶ ཨེཝཾ ཝཏྟབྦཏཱཡ ཀཱརཎདསྶནཏྠཾ ཝུཏྟཾ. ཨཡཉྷེཏྠ ཨདྷིཔྤཱཡོ – ཡསྨཱ ཏྭཾ ཨིམེཧི ནཝེཧི ཨིནྡྲིཡསཾཝརཝིརཧིཏེཧི བྷོཛནེ ཨམཏྟཉྙཱུཧི སདྡྷིཾ ཝིཙརསི, ཏསྨཱ ཀུམཱརཀེཧི སདྡྷིཾ ཝིཙརནྟོ ‘‘ཀུམཱརཀོ’’ཏི ཝཏྟབྦཏཾ ཨརཧསཱིཏི.

ན ཝཱཡཾ ཀུམཱརཀོ མཏྟམཉྙཱསཱིཏི ཨེཏྠ ཝཱ-སདྡོ པདཔཱུརཎེ. ཝཱ-སདྡོ ཧི ཨུཔམཱནསམུཙྩཡསཾསཡཝིསྶགྒཝིཀཔྤཔདཔཱུརཎཱདཱིསུ བཧཱུསུ ཨཏྠེསུ དིསྶཏི. ཏཐཱ ཧེས ‘‘པཎྜིཏོ ཝཱཔི ཏེན སོ’’ཏིཨཱདཱིསུ (དྷ. པ. ༦༣) ཨུཔམཱནེ ¶ དིསྶཏི, སདིསབྷཱཝེཏི ཨཏྠོ. ‘‘ཏཾ ཝཱཔི དྷཱིརཱ མུནི ཝེདཡནྟཱི’’ཏིཨཱདཱིསུ (སུ. ནི. ༢༡༣) སམུཙྩཡེ. ‘‘ཀེ ཝཱ ཨིམེ ཀསྶ ཝཱ’’ཏིཨཱདཱིསུ (པཱརཱ. ༢༩༦) སཾསཡེ. ‘‘ཨཡཾ ཝཱ ཨིམེསཾ སམཎབྲཱཧྨཎཱནཾ སབྦབཱལོ སབྦམཱུལ༹ྷོ’’ཏིཨཱདཱིསུ (དཱི. ནི. ༡༨༡) ཝཝསྶགྒེ. ‘‘ཡེ ཧི ཀེཙི བྷིཀྑཝེ སམཎཱ ཝཱ བྲཱཧྨཎཱ ཝཱ’’ཏིཨཱདཱིསུཔི (མ. ནི. ༡.༡༧༠; སཾ. ནི. ༢.༡༣) ཝིཀཔྤེ. ‘‘ན ཝཱཧཾ པཎྞཾ བྷུཉྫཱམི, ན ཧེཏཾ མཡ྄ཧ བྷོཛན’’ནྟིཨཱདཱིསུ པདཔཱུརཎེ. ཨིདྷཱཔི པདཔཱུརཎེ ¶ དཊྛབྦོ. ཏེནེཝ ཙ ཨཱཙརིཡདྷམྨཔཱལཏྠེརེན ཝཱ-སདྡསྶ ཨཏྠུདྡྷཱརཾ ཀརོནྟེན ཝུཏྟཾ ‘‘ན ཝཱཡཾ ཀུམཱརཀོ མཏྟམཉྙཱསཱི’’ཏིཨཱདཱིསུ པདཔཱུརཎེ’’ཏི. སཾཡུཏྟཊྛཀཐཱཡམྤི ཨིདམེཝ ཝུཏྟཾ ‘‘ན ཝཱཡཾ ཀུམཱརཀོ མཏྟམཉྙཱསཱིཏི ཨཡཾ ཀུམཱརཀོ ཨཏྟནོ པམཱཎཾ ན ཝཏ ཛཱནཱསཱིཏི ཐེརཾ ཏཛྫེནྟོ ཨཱཧཱ’’ཏི (སཾ. ནི. ཨཊྛ. ༢.༡༥༤). ཨེཏྠཱཔི ‘‘ཝཏཱ’’ཏི ཝཙནསིལིཊྛཏཱཡ ཝུཏྟཾ. ‘‘ན ཝཱཡ’’ནྟི ཨེཏསྶ ཝཱ ‘‘ན ཝེ ཨཡ’’ནྟི པདཙྪེདཾ ཀཏྭཱ ཝེ-སདྡསྶཏྠཾ དསྶེནྟེན ‘‘ཝཏཱ’’ཏི ཝུཏྟཾ. ཏཐཱ ཧི ཝེ-སདྡསྶ ཨེཀཾསཏྠབྷཱཝེ ཏདེཝ པཱལི༹ཾ པཡོགཾ ཀཏྭཱ ཨུདཱཧརནྟི ནེརུཏྟིཀཱ. ཝཛིརབུདྡྷིཏྠེརོ པན ཨེཝཾ ཝདཏི ‘‘ན ཝཱཡནྟི ཨེཏྠ ཙ ཝཱཏི ཝིབྷཱསཱ, ཨཉྙཱསིཔི ན ཨཉྙཱསིཔཱི’’ཏི, (ཝཛིར. ཊཱི. པཋམམཧཱསངྒཱིཏིཀཐཱཝཎྞནཱ) ཏཾ ཏསྶ མཏིམཏྟཾ སཾཡུཏྟཊྛཀཐཱཡ ཏཐཱ ཨཝུཏྟཏྟཱ. ཨིདམེཀཾ པརཱུཔཝཱདསམྦྷཝཀཱརཎཾ ‘‘ཏཏྠ ཀེཙཱི’’ཏིཨཱདིནཱ སམྦཛ྄ཛྷིཏབྦཾ.

ཨཉྙམྤི ཀཱརཎམཱཧ ‘‘སཀྱཀུལཔྤསུཏོ ཙཱཡསྨཱ’’ཏི. སཱཀིཡཀུལེ ཛཱཏོ, སཱཀིཡཀུལབྷཱཝེན ཝཱ པཱཀཊོ ཙ ཨཱཡསྨཱ ཨཱནནྡོ. ཏཏྠ…པེ… ཨུཔཝདེཡྻུནྟི སམྦནྡྷོ. ཨཉྙམྤི ཀཱརཎཾ ཝདཏི ‘‘ཏཐཱགཏསྶ བྷཱཏཱ ཙཱུལ༹པིཏུཔུཏྟོ’’ཏི. བྷཱཏཱཏི ཙེཏྠ ཀནིཊྛབྷཱཏཱ ཙཱུལ༹པིཏུཔུཏྟབྷཱཝེན, ན པན ཝཡསཱ སཧཛཱཏབྷཱཝཏོ.

‘‘སུདྡྷོདནོ དྷོཏོདནོ, སཀྐསུཀྐཱམིཏོདནཱ;

ཨམིཏཱ པཱལིཏཱ ཙཱཏི, ཨིམེ པཉྩ ཨིམཱ དུཝེ’’ཏི.

ཝུཏྟེསུ ཧི སབྦཀནིཊྛསྶ ཨམིཏོདནསཀྐསྶ པུཏྟོ ཨཱཡསྨཱ ཨཱནནྡོ. ཝུཏྟཉྷི མནོརཐཔཱུརཎིཡཾ –

‘‘ཀཔྤསཏསཧསྶཾ ¶ པན དཱནཾ དདམཱནོ ཨམྷཱཀཾ བོདྷིསཏྟེན སདྡྷིཾ ཏུསིཏཔུརེ ནིབྦཏྟིཏྭཱ ཏཏོ ཙུཏོ ཨམིཏོདནསཀྐསྶ གེཧེ ནིབྦཏྟི, ཨཐསྶ སབྦེ ཉཱཏཀེ ཨཱནནྡིཏེ པམོདིཏེ ཀརོནྟོ ཛཱཏོཏི ‘ཨཱནནྡོ’ཏྭེཝ ནཱམམཀཾསཱུ’’ཏི.

ཏཐཱཡེཝ ཝུཏྟཾ པཔཉྩསཱུདནིཡམྤི –

‘‘ཨཉྙེ པན ཝདནྟི – ནཱཡསྨཱ ཨཱནནྡོ བྷགཝཏཱ སཧཛཱཏོ, ཝཡསཱ ཙ ཙཱུལ༹པིཏུཔུཏྟཏཱཡ ¶ ཙ བྷགཝཏོ ཀནིཊྛབྷཱཏཱཡེཝ. ཏཐཱ ཧི མནོརཐཔཱུརཎིཡཾ ཨེཀནིཔཱཏཝཎྞནཱཡཾ སཧཛཱཏགཎནེ སོ ན ཝུཏོ’’ཏི.

ཡཾ ཝུཙྩཏི, ཏཾ གཧེཏབྦཾ. ཏཏྠཱཏི ཏསྨིཾ ཝིསྶཏྠཱདིབྷཱཝེ སཏི. ཨཏིཝིསྶཏྠསཀྱཀུལཔྤསུཏཏཐཱགཏབྷཱཏུབྷཱཝཏོཏི ཝུཏྟཾ ཧོཏི. བྷཱཝེནབྷཱཝལཀྑཎེ ཧི ཀཏྠཙི ཧེཏྭཏྠོ སམྤཛྫཏི. ཏཐཱ ཧི ཨཱཙརིཡདྷམྨཔཱལཏྠེརེན ནེཏྟིཊྛཀཐཱཡཾ ‘‘གུནྣཉྩེ ཏརམཱནཱན’’ནྟི གཱཐཱཝཎྞནཱཡཾ ཝུཏྟཾ –

‘‘སབྦཱ ཏཱ ཛིམྷཾ གཙྪནྟཱིཏི སབྦཱ ཏཱ གཱཝིཡོ ཀུཊིལམེཝ གཙྪནྟི, ཀསྨཱ? ནེཏྟེ ཛིམྷགཏེ སཏི ནེཏྟེ ཀུཊིལཾ གཏེ སཏི, ནེཏྟསྶ ཀུཊིལཾ གཏཏྟཱཏི ཨཏྠོ’’ཏི.

ཨུདཱནཊྛཀཐཱཡམྤི ‘‘ཨིཏི ཨིམསྨིཾ སཏི ཨིདཾ ཧོཏཱི’’ཏི སུཏྟཔདཝཎྞནཱཡཾ ‘‘ཧེཏུཨཏྠཏཱ བྷུམྨཝཙནསྶ ཀཱརཎསྶ བྷཱཝེན ཏདཝིནཱབྷཱཝཱི ཕལསྶ བྷཱཝོ ལཀྑཱིཡཏཱིཏི ཝེདིཏབྦཱ’’ཏི (ཨུདཱ. ཨཊྛ. ༡.༡). ཏཏྠཱཏི ཝཱ ནིམིཏྟབྷཱུཏེ ཝིསྶཏྠཱདིམྷཱིཏི ཨཏྠོ, ཏསྨིཾ ཨུཙྩིནནེཏིཔི ཝདནྟི. ཚནྡཱགམནཾ ཝིཡཱཏི ཨེཏྠ ཚནྡཱ ཨཱགམནཾ ཝིཡཱཏི པདཙྪེདོ. ཚནྡཱཏི ཙ ཧེཏུམྷི ནིསྶཀྐཝཙནཾ, ཚནྡེན ཨཱགམནཾ པཝཏྟནཾ ཝིཡཱཏི ཨཏྠོ, ཚནྡེན ཨཀཏྟབྦཀརཎམིཝཱཏི ཝུཏྟཾ ཧོཏི, ཚནྡཾ ཝཱ ཨཱགཙྪཏི སམྤཡོགཝསེནཱཏི ཚནྡཱགམནཾ, ཏཐཱ པཝཏྟོ ཨཔཱཡགམནཱིཡོ ཨཀུསལཙིཏྟུཔྤཱདོ. ཨཐ ཝཱ ཨནནུརཱུཔཾ གམནཾ ཨགམནཾ. ཚནྡེན ཨགམནཾ ཚནྡཱགམནཾ, ཚནྡེན སིནེཧེན ཨནནུརཱུཔཾ གམནཾ པཝཏྟནཾ ཝིཡ ཨཀཏྟབྦཀརཎཾ ཝིཡཱཏི ཝུཏྟཾ ཧོཏི. ཨསེཀྑབྷཱུཏཱ པཊིསམྦྷིདཱ, ཏཾཔཏྟཱཏི ¶ ཏཐཱ, ཨསེཀྑཱ ཙ ཏེ པཊིསམྦྷིདཱཔྤཏྟཱ ཙཱཏི ཝཱ ཏཐཱ, ཏཱདིསེ. སེཀྑཔཊིསམྦྷིདཱཔྤཏྟནྟི ཨེཏྠཱཔི ཨེས ནཡོ. པརིཝཛྫེནྟོཏི ཧེཏྭཏྠེ ཨནྟསདྡོ, པརིཝཛྫནཧེཏཱུཏི ཨཏྠོ. ཨནུམཏིཡཱཏི ཨནུཉྙཱཡ, ཡཱཙནཱཡཱཏི ཝུཏྟཾ ཧོཏི.

‘‘ཀིཉྩཱཔི སེཀྑོ’’ཏི ཨིདཾ ཨསེཀྑཱནཾཡེཝ ཨུཙྩིནིཏཏྟཱ ཝུཏྟཾ, ན སེཀྑཱནཾ ཨགཏིགམནསམྦྷཝེན. པཋམམགྒེནེཝ ཧི ཙཏྟཱརི ཨགཏིགམནཱནི པཧཱིཡནྟི, ཏསྨཱ ཀིཉྩཱཔི སེཀྑོ, ཏཐཱཔི ཐེརོ ཨཱཡསྨནྟཾ ཨཱནནྡཾ ཨུཙྩིནཏཱུཏི སམྦནྡྷོ. ན པན ཀིཉྩཱཔི སེཀྑོ, ཏཐཱཔི ཨབྷབྦོ ཨགཏིཾ གནྟུནྟི. ‘‘ཨབྷབྦོ’’ཏིཨཱདིནཱ པན དྷམྨསངྒཱིཏིཡཱ ཏསྶ ཨརཧབྷཱཝཾ དསྶེནྟོ ཝིཛྫམཱནགུཎེ ཀཐེཏི, ཏེན སངྒཱིཏིཡཱ དྷམྨཝིནཡཝིནིཙྪཡེ སམྤཏྟེ ཚནྡཱདིཝསེན ཨཉྙཐཱ ¶ ཨཀཐེཏྭཱ ཡཐཱབྷཱུཏམེཝ ཀཐེསྶཏཱིཏི དསྶེཏི. ན གནྟབྦཱ, ཨནནུརཱུཔཱ ཝཱ གཏཱིཏི ཨགཏི, ཏཾ. པརིཡཏྟོཏི ཨདྷིགཏོ ཨུགྒཧིཏོ.

‘‘ཨེཝ’’ནྟིཨཱདིནཱ སནྣིཊྛཱནགཎནཾ དསྶེཏི. ཨུཙྩིནིཏེནཱཏི ཨུཙྩིནིཏྭཱ གཧིཏེན. ཨཔིཙ ཨེཝཾ…པེ… ཨུཙྩིནཱིཏི ནིགམནཾ, ‘‘ཏེནཱཡསྨཏཱ’’ཏིཨཱདི པན སནྣིཊྛཱནགཎནདསྶནནྟིཔི ཝདནྟི.

ཨེཝཾ སངྒཱཡཀཝིཙིནནཔྤཀཱརཾ དསྶེཏྭཱ ཨཉྙམྤི སངྒཱཡནཏྠཾ དེསཝིཙིནནཱདིཔྤཀཱརཾ དསྶེནྟོ ‘‘ཨཐ ཁོ’’ཏིཨཱདིམཱཧ. ཏཏྠ ཨེཏདཧོསཱིཏི ཨེཏཾ པརིཝིཏཀྐནཾ ཨཧོསི. ནུ-སདྡེན ཧི པརིཝིཏཀྐནཾ དསྶེཏི. རཱཛགཧནྟི ‘‘རཱཛགཧསཱམནྟཾ གཧེཏྭཱ ཝུཏྟ’’ནྟི གཎྛིཔདེསུ ཝདནྟི. གཱཝོ ཙརནྟི ཨེཏྠཱཏི གོཙརོ, གུནྣཾ ཙརཎཊྛཱནཾ, སོ ཝིཡཱཏི གོཙརོ, བྷིཀྑཱུནཾ ཙརཎཊྛཱནཾ, མཧནྟོ སོ ཨསྶ, ཨེཏྠཱཏི ཝཱ མཧཱགོཙརཾ. ཨཊྛཱརསནྣཾ མཧཱཝིཧཱརཱནམྤི ཨཏྠིཏཱཡ པཧཱུཏསེནཱསནཾ.

ཐཱཝརཀམྨནྟི ཙིརཊྛཱཡིཀམྨཾ. ཝིསབྷཱགཔུགྒལོ སུབྷདྡསདིསོ. ཨུཀྐོཊེཡྻཱཏི ནིཝཱརེཡྻ. ཨིཏི-སདྡོ ཨིདམཏྠེ, ཨིམིནཱ མནསིཀཱརེན ཧེཏུབྷཱུཏེན ཨེཏདཧོསཱིཏི ཨཏྠོ. གརུབྷཱཝཛནནཏྠཾ ཉཏྟིདུཏིཡེན ཀམྨེན སངྒྷཾ སཱཝེསི, ན ཨཔལོཀནཉཏྟིཀམྨམཏྟེནཱཏི ཨདྷིཔྤཱཡོ.

ཀདཱ པནཱཡཾ ཀཏཱཏི ཨཱཧ ‘‘ཨཡཾ པནཱ’’ཏིཨཱདི. ཨེཝཾ ཀཏབྷཱཝོ ཙ ཨིམཱཡ གཎནཱཡ ཝིཉྙཱཡཏཱིཏི དསྶེཏི ‘‘བྷགཝཱ ཧཱི’’ཏིཨཱདིནཱ. ཨཐཱཏི ཨནནྟརཏྠེ ནིཔཱཏོ, པརིནིབྦཱནནྟརམེཝཱཏི ཨཏྠོ. སཏྟཱཧནྟི ¶ ཧི པརིནིབྦཱནདིཝསམྤི སངྒཎྷིཏྭཱ ཝུཏྟཾ. ཨསྶཱཏི བྷགཝཏོ, ‘‘སརཱིར’’ནྟི ཨིམིནཱ སམྦནྡྷོ. སཾཝེགཝཏྠུཾ ཀིཏྟེཏྭཱ ཀིཏྟེཏྭཱ ཨནིཙྩཏཱཔཊིསཉྙུཏྟཱནི གཱིཏཱནི གཱཡིཏྭཱ པཱུཛཱཝསེན ཀཱིལ༹ནཏོ སུནྡརཾ ཀཱིལ༹ནདིཝསཱ སཱདྷུཀཱིལ༹ནདིཝསཱ ནཱམ, སཔརཧིཏསཱདྷནཊྛེན ཝཱ སཱདྷཱུཏི ཝུཏྟཱནཾ སཔྤུརིསཱནཾ སཾཝེགཝཏྠུཾ ཀིཏྟེཏྭཱ ཀིཏྟེཏྭཱ ཀཱིལ༹ནདིཝསཱཏིཔི ཡུཛྫཏི. ཨིམསྨིཉྩ པུརིམསཏྟཱཧེ ཨེཀདེསེནེཝ སཱདྷུཀཱིལ༹ནམཀཾསུ. ཝིསེསཏོ པན དྷཱཏུཔཱུཛཱདིཝསེསུཡེཝ. ཏཐཱ ཧི ཝུཏྟཾ མཧཱཔརིནིབྦཱནསུཏྟཊྛཀཐཱཡཾ (དཱི. ནི. ཨཊྛ. ༢.༢༣༥) –

‘‘ཨིཏོ པུརིམེསུ ཧི དྭཱིསུ སཏྟཱཧེསུ ཏེ བྷིཀྑཱུ སངྒྷསྶ ཋཱནནིསཛྫོཀཱསཾ ཀརོནྟཱ ཁཱདནཱིཡཾ བྷོཛནཱིཡཾ སཾཝིདཧནྟཱ སཱདྷུཀཱིལི༹ཀཱཡ ཨོཀཱསཾ ན ལབྷིཾསུ, ཏཏོ ནེསཾ ¶ ཨཧོསི ‘ཨིམཾ སཏྟཱཧཾ སཱདྷུཀཱིལི༹ཏཾ ཀཱིལི༹སྶཱམ, ཋཱནཾ ཁོ པནེཏཾ ཝིཛྫཏི, ཡཾ ཨམྷཱཀཾ པམཏྟབྷཱཝཾ ཉཏྭཱ ཀོཙིདེཝ ཨཱགནྟྭཱ དྷཱཏུཡོ གཎྷེཡྻ, ཏསྨཱ ཨཱརཀྑཾ ཋཔེཏྭཱ ཀཱིལི༹སྶཱམཱ’ཏི, ཏེན ཏེ ཨེཝམཀཾསཱུ’’ཏི.

ཏཐཱཔི ཏེ དྷཱཏུཔཱུཛཱཡཔི ཀཏཏྟཱ དྷཱཏུཔཱུཛཱདིཝསཱ ནཱམ. ཨིམེཡེཝ ཝིསེསེན བྷགཝཏི ཀཏྟབྦསྶ ཨཉྙསྶ ཨབྷཱཝཏོ ཨེཀདེསེན ཀཏམྤི སཱདྷུཀཱིལ༹ནཾ ཨུཔཱདཱཡ ‘‘སཱདྷུཀཱིལ༹ནདིཝསཱ’’ཏི པཱཀཊཱ ཛཱཏཱཏི ཨཱཧ ‘‘ཨེཝཾ སཏྟཱཧཾ སཱདྷུཀཱིལ༹ནདིཝསཱ ནཱམ ཨཧེསུ’’ནྟི.

ཙིཏཀཱཡཱཏི ཝཱིསསཏརཏནུཙྩཱཡ ཙནྡནདཱརུཙིཏཀཱཡ, པདྷཱནཀིཙྩཝསེནེཝ ཙ སཏྟཱཧཾ ཙིཏཀཱཡཾ ཨགྒིནཱ ཛྷཱཡཱིཏི ཝུཏྟཾ. ན ཧི ཨཙྩནྟསཾཡོགཝསེན ནིརནྟརཾ སཏྟཱཧམེཝ ཨགྒིནཱ ཛྷཱཡི ཏཏྠ པཙྪིམདིཝསེཡེཝ ཛྷཱཡིཏཏྟཱ, ཏསྨཱ སཏྟཱཧསྨིནྟི ཨཏྠོ ཝེདིཏབྦོ. པུརིམཔཙྪིམཱནཉྷི དྭིནྣཾ སཏྟཱཧཱནམནྟརེ སཏྟཱཧེ ཡཏྠ ཀཏྠཙིཔི དིཝསེ ཛྷཱཡམཱནེ སཏི ‘‘སཏྟཱཧེ ཛྷཱཡཱི’’ཏི ཝཏྟུཾ ཡུཛྫཏི. ཡཐཱཧ –

‘‘ཏེན ཁོ པན སམཡེན ཙཏྟཱརོ མལླཔཱམོཀྑཱ སཱིསཾ ནྷཱཏཱ ཨཧཏཱནི ཝཏྠཱནི ནིཝཏྠཱ ‘མཡཾ བྷགཝཏོ ཙིཏཀཾ ཨཱལི༹མྤེསྶཱམཱ’ཏི ན སཀྐོནྟི ཨཱལི༹མྤེཏུ’’ནྟིཨཱདི (དཱི. ནི. ༢.༢༣༣).

སཏྟིཔཉྫརཾ ¶ ཀཏྭཱཏི སཏྟིཁགྒཱདིཧཏྠེཧི པུརིསེཧི མལླརཱཛཱུནཾ བྷགཝཏོ དྷཱཏུཨཱརཀྑཀརཎཾ ཨུཔལཀྑཎཝསེནཱཧ. སཏྟིཧཏྠཱ པུརིསཱ ཧི སཏྟིཡོ ཡཐཱ ‘‘ཀུནྟཱ པཙརནྟཱི’’ཏི, ཏཱཧི སམནྟཏོ རཀྑཱཔནཝསེན པཉྫརཔཊིབྷཱགཏྟཱ སཏྟིཔཉྫརཾ. སནྡྷཱགཱརཾ ནཱམ རཱཛཱུནཾ ཨེཀཱ མཧཱསཱལཱ. ཨུཡྻོགཀཱལཱདཱིསུ ཧི རཱཛཱནོ ཏཏྠ ཋཏྭཱ ‘‘ཨེཏྟཀཱ པུརཏོ གཙྪནྟུ, ཨེཏྟཀཱ པཙྪཏོ, ཨེཏྟཀཱ ཨུབྷོཧི པསྶེཧི, ཨེཏྟཀཱ ཧཏྠཱིསུ ཨབྷིརུཧནྟུ, ཨེཏྟཀཱ ཨསྶེསུ, ཨེཏྟཀཱ རཐེསཱུ’’ཏི ཨེཝཾ སནྡྷིཾ ཀརོནྟི མརིཡཱདཾ བནྡྷནྟི, ཏསྨཱ ཏཾ ཋཱནཾ ‘‘སནྡྷཱགཱར’’ནྟི ཝུཙྩཏི. ཨཔིཙ ཨུཡྻོགཊྛཱནཏོ ཨཱགནྟྭཱཔི ཡཱཝ གེཧེསུ ཨལླགོམཡཔརིབྷཎྜཱདཱིནི ཀརོནྟི, ཏཱཝ དྭེ ཏཱིཎི དིཝསཱནི རཱཛཱནོ ཏཏྠ སནྠམྦྷནྟི ཝིསྶམནྟི པརིསྶཡཾ ཝིནོདེནྟཱིཏིཔི སནྡྷཱགཱརཾ, རཱཛཱུནཾ ཝཱ སཧ ཨཏྠཱནུསཱསནཾ ཨགཱརནྟིཔི སནྡྷཱགཱརཾ ཧ-ཀཱརསྶ དྷ-ཀཱརཾ, ཨནུསརཱགམཉྩ ཀཏྭཱ, ཡསྨཱ ཝཱ རཱཛཱནོ ཏཏྠ སནྣིཔཏིཏྭཱ ‘‘ཨིམསྨིཾ ཀཱལེ ཀསིཏུཾ ཝཊྚཏི, ཨིམསྨིཾ ཀཱལེ ཝཔིཏུ’’ནྟི ཨེཝམཱདིནཱ ནཡེན གྷརཱཝཱསཀིཙྩཱནི སམྨནྟཡནྟི, ཏསྨཱ ཚིནྣཝིཙྪིནྣཾ གྷརཱཝཱསཾ ཏཏྠ སནྡྷཱརེནྟཱིཏིཔི སནྡྷཱགཱརཾ. ཝིསཱཁཔུཎྞམིཏོ ¶ པཊྛཱཡ ཡཱཝ ཝིསཱཁམཱསསྶ ཨམཱཝཱསཱི, ཏཱཝ སོལ༹ས དིཝསཱ སཱིཧལ༹ཝོཧཱརཝསེན གཧིཏཏྟཱ, ཛེཊྛམཱུལམཱསསྶ སུཀྐཔཀྑེ ཙ པཉྩ དིཝསཱཏི ཨཱཧ ‘‘ཨིཏི ཨེཀཝཱིསཏི དིཝསཱ གཏཱ’’ཏི. ཏཏྠ ཙརིམདིཝསེཡེཝ དྷཱཏུཡོ བྷཱཛཡིཾསུ, ཏསྨིཾཡེཝ ཙ དིཝསེ ཨཡཾ ཀམྨཝཱཙཱ ཀཏཱ. ཏེན ཝུཏྟཾ ‘‘ཛེཊྛམཱུལསུཀྐཔཀྑཔཉྩམིཡ’’ནྟིཨཱདི. ཏཏྠ ཛེཊྛནཀྑཏྟཾ ཝཱ མཱུལནཀྑཏྟཾ ཝཱ ཏསྶ མཱསསྶ པུཎྞམིཡཾ ཙནྡེན ཡུཏྟཾ, ཏསྨཱ སོ མཱསོ ‘‘ཛེཊྛམཱུལམཱསོ’’ཏི ཝུཙྩཏི. ཨནཱཙཱརནྟི ཧེཊྛཱ ཝུཏྟཾ ཨནཱཙཱརཾ.

ཡདི ཨེཝཾ ཀསྨཱ ཝིནཡཊྛཀཐཱཡཾ, (པཱརཱ. ཨཊྛ. ༡.པཋམམཧཱསངྒཱིཏིཀཐཱཝཎྞནཱ) མངྒལསུཏྟཊྛཀཐཱཡཉྩ (ཁུ. པཱ. ཨཊྛ. མངྒལསུཏྟཝཎྞནཱ) ‘‘སཏྟསུ སཱདྷུཀཱིལ༹ནདིཝསེསུ, སཏྟསུ ཙ དྷཱཏུཔཱུཛཱདིཝསེསུ ཝཱིཏིཝཏྟེསཱུ’’ཏི ཝུཏྟནྟི? སཏྟསུ དྷཱཏུཔཱུཛཱདིཝསེསུ གཧིཏེསུ ཏདཝིནཱབྷཱཝཏོ མཛ྄ཛྷེ ཙིཏཀཱཡ ཛྷཱཡནསཏྟཱཧམྤི གཧིཏམེཝཱཏི ཀཏྭཱ ཝིསུཾ ན ཝུཏྟཾ ཝིཡ དིསྶཏི. ཡདི ཨེཝཾ ཀསྨཱ ‘‘ཨཌྜྷམཱསོ ཨཏིཀྐནྟོ, དིཡཌྜྷམཱསོ སེསོ’’ཏི ཙ ཝུཏྟནྟི? ནཱཡཾ དོསོ. ཨཔྤཀཉྷི ཨཱུནམདྷིཀཾ ཝཱ གཎནཱུཔགཾ ན ཧོཏི, ཏསྨཱ ཨཔྤཀེན ཨདྷིཀོཔི སམུདཱཡོ ཨནདྷིཀོ ཝིཡ ཧོཏཱིཏི ཀཏྭཱ ཨཌྜྷམཱསཏོ ཨདྷིཀེཔི པཉྩདིཝསེ ‘‘ཨཌྜྷམཱསོ ཨཏིཀྐནྟོ’’ཏི ཝུཏྟཾ དྭཱསཱིཏིཁནྡྷཀཝཏྟཱནཾ ཀཏྠཙི ‘‘ཨསཱིཏི ཁནྡྷཀཝཏྟཱནཱི’’ཏི ཝཙནཾ ཝིཡ, ཏཐཱ ཨཔྤཀེན ཨཱུནོཔི སམུདཱཡོ ཨནཱུནོ ཝིཡ ཧོཏཱིཏི ¶ ཀཏྭཱ དིཡཌྜྷམཱསཏོ ཨཱུནེཔི པཉྩདིཝསེ ‘‘དིཡཌྜྷམཱསོ སེསོ’’ཏི ཝུཏྟཾ སཏིཔཊྛཱནཝིབྷངྒཊྛཀཐཱཡཾ (ཝིབྷ. ༣༥༦) ཚམཱསཏོ ཨཱུནེཔི ཨཌྜྷམཱསེ ‘‘ཚམཱསཾ སཛ྄ཛྷཱཡོ ཀཱཏབྦོ’’ཏི ཝཙནཾ ཝིཡ, ཨཉྙཐཱ ཨཊྛཀཐཱནཾ ཨཉྙམཉྙཝིརོདྷོ སིཡཱ. ཨཔིཙ དཱིགྷབྷཱཎཀཱནཾ མཏེན ཏིཎྞཾ སཏྟཱཧཱནཾ ཝསེན ‘‘ཨེཀཝཱིསཏི དིཝསཱ གཏཱ’’ཏི ཨིདྷ ཝུཏྟཾ. ཝིནཡསུཏྟནིཔཱཏཁུདྡཀཔཱཋཊྛཀཐཱསུ པན ཁུདྡཀབྷཱཎཀཱནཾ མཏེན ཨེཀམེཝ ཛྷཱཡནདིཝསཾ ཀཏྭཱ ཏདཝསེསཱནཾ དྭིནྣཾ སཏྟཱཧཱནཾ ཝསེན ‘‘ཨཌྜྷམཱསོ ཨཏིཀྐནྟོ, དིཡཌྜྷམཱསོ སེསོ’’ཏི ཙ ཝུཏྟཾ. པཋམབུདྡྷཝཙནཱདཱིསུ ཝིཡ ཏཾ ཏཾ བྷཱཎཀཱནཾ མཏེན ཨཊྛཀཐཱསུཔི ཝཙནབྷེདོ ཧོཏཱིཏི གཧེཏབྦཾ. ཨེཝམྤེཏྠ ཝདནྟི – པརིནིབྦཱནདིཝསཏོ པཊྛཱཡ ཨཱདིམྷི ཙཏྟཱརོ སཱདྷུཀཱིལ༹ནདིཝསཱཡེཝ, ཏཏོ པརཾ ཏཡོ སཱདྷུཀཱིལ༹ནདིཝསཱ ཙེཝ ཙིཏཀཛྷཱཡནདིཝསཱ ཙ, ཏཏོ པརཾ ཨེཀོ ཙིཏཀཛྷཱཡནདིཝསོཡེཝ, ཏཏོ པརཾ ཏཡོ ཙིཏཀཛྷཱཡནདིཝསཱ ཙེཝ དྷཱཏུཔཱུཛཱདིཝསཱ ཙ, ཏཏོ པརཾ ཙཏྟཱརོ དྷཱཏུཔཱུཛཱདིཝསཱཡེཝ, ཨིཏི ཏཾ ཏཾ ཀིཙྩཱནུརཱུཔགཎནཝསེན ཏཱིཎི སཏྟཱཧཱནི པརིཔཱུརེནྟི, ཨགཧིཏགྒཧཎེན པན ཨཌྜྷམཱསོཝ ཧོཏི. ‘‘ཨེཀཝཱིསཏི དིཝསཱ གཏཱ’’ཏི ཨིདྷ ཝུཏྟཝཙནཉྩ ཏཾ ཏཾ ཀིཙྩཱནུརཱུཔགཎནེནེཝ. ཨེཝཉྷི ཙཏཱུསུཔི ཨཊྛཀཐཱསུ ཝུཏྟཝཙནཾ སམེཏཱིཏི ཝིཙཱརེཏྭཱ གཧེཏབྦཾ. ཝཛིརབུདྡྷིཏྠེརེན པན ཝུཏྟཾ ‘‘ཨཌྜྷམཱསོ ཨཏིཀྐནྟོཏི ཨེཏྠ ཨེཀོ དིཝསོ ནཊྛོ, སོ པཱཊིཔདདིཝསོ, ཀོལཱཧལདིཝསོ ¶ ནཱམ སོ, ཏསྨཱ ཨིདྷ ན གཧིཏོ’’ཏི, (ཝཛིར. ཊཱི. པཋམམཧཱསངྒཱིཏིཀཐཱཝཎྞནཱ) ཏཾ ན སུནྡརཾ པརིནིབྦཱནསུཏྟནྟཔཱལི༹ཡཾ (དཱི. ནི. ༢.༢༢༧) པཱཊིཔདདིཝསཏོཡེཝ པཊྛཱཡ སཏྟཱཧསྶ ཝུཏྟཏྟཱ, ཨཊྛཀཐཱཡཉྩ པརིནིབྦཱནདིཝསེན སདྡྷིཾ ཏིཎྞཾ སཏྟཱཧཱནཾ གཎིཏཏྟཱ. ཏཐཱ ཧི པརིནིབྦཱནདིཝསེན སདྡྷིཾ ཏིཎྞཾ སཏྟཱཧཱནཾ གཎནེནེཝ ཛེཊྛམཱུལསུཀྐཔཀྑཔཉྩམཱི ཨེཀཝཱིསཏིམོ དིཝསོ ཧོཏི.

ཙཏྟཱལཱིས དིཝསཱཏི ཛེཊྛམཱུལསུཀྐཔཀྑཚཊྛདིཝསཏོ ཡཱཝ ཨཱསལ༹ྷཱི པུཎྞམཱི, ཏཱཝ གཎེཏྭཱ ཝུཏྟཾ. ཨེཏྠནྟརེཏི ཙཏྟཱལཱིསདིཝསབྦྷནྟརེ. རོགོ ཨེཝ རོགཔལིབོདྷོ. ཨཱཙརིཡུཔཛ྄ཛྷཱཡེསུ ཀཏྟབྦཀིཙྩམེཝ ཨཱཙརིཡུཔཛ྄ཛྷཱཡཔལིབོདྷོ ¶ , ཏཐཱ མཱཏཱཔིཏུཔལིབོདྷོ. ཡཐཱདྷིཔྤེཏཾ ཨཏྠཾ, ཀམྨཾ ཝཱ པརིབུནྡྷེཏི ཨུཔརོདྷེཏི པཝཏྟིཏུཾ ན དེཏཱིཏི པལིབོདྷོ ར-ཀཱརསྶ ལ-ཀཱརཾ ཀཏྭཱ. ཏཾ པལིབོདྷཾ ཚིནྡིཏྭཱ ཏཾ ཀརཎཱིཡཾ ཀརོཏཱུཏི སངྒཱཧཀེན ཚིནྡིཏབྦཾ ཏཾ སབྦཾ པལིབོདྷཾ ཚིནྡིཏྭཱ དྷམྨཝིནཡསངྒཱཡནསངྑཱཏཾ ཏདེཝ ཀརཎཱིཡཾ ཀརོཏུ.

ཨཉྙེཔི མཧཱཐེརཱཏི ཨནུརུདྡྷཏྠེརཱདཡོ. སོཀསལླསམཔྤིཏནྟི སོཀསངྑཱཏེན སལླེན ཨནུཔཝིཊྛཾ པཊིཝིདྡྷཾ. ཨསམུཙྪིནྣཨཝིཛྫཱཏཎྷཱནུསཡཏྟཱ ཨཝིཛྫཱཏཎྷཱབྷིསངྑཱཏེན ཀམྨུནཱ བྷཝཡོནིགཏིཊྛིཏིསཏྟཱཝཱསེསུ ཁནྡྷཔཉྩཀསངྑཱཏཾ ཨཏྟབྷཱཝཾ ཛནེཏི ཨབྷིནིབྦཏྟེཏཱིཏི ཛནོ. ཀིལེསེ ཛནེཏི, ཨཛནི, ཛནིསྶཏཱིཏི ཝཱ ཛནོ, མཧནྟོ ཛནོ ཏཐཱ, ཏཾ. ཨཱགཏཱགཏནྟི ཨཱགཏམཱགཏཾ ཡཐཱ ‘‘ཨེཀེཀོ’’ཏི. ཨེཏྠ སིཡཱ – ‘‘ཐེརོ ཨཏྟནོ པཉྩསཏཱཡ པརིསཱཡ པརིཝུཏྟོ རཱཛགཧཾ གཏོ, ཨཉྙེཔི མཧཱཐེརཱ ཨཏྟནོ ཨཏྟནོ པརིཝཱརེ གཧེཏྭཱ སོཀསལླསམཔྤིཏཾ མཧཱཛནཾ ཨསྶཱསེཏུཀཱམཱ ཏཾ ཏཾ དིསཾ པཀྐནྟཱ’’ཏི ཨིདྷ ཝུཏྟཝཙནཾ སམནྟཔཱསཱདིཀཱཡ ‘‘མཧཱཀསྶཔཏྠེརོ ‘རཱཛགཧཾ ཨཱཝུསོ གཙྪཱམཱ’ཏི ཨུཔཌྜྷཾ བྷིཀྑུསངྒྷཾ གཧེཏྭཱ ཨེཀཾ མགྒཾ གཏོ, ཨནུརུདྡྷཏྠེརོཔི ཨུཔཌྜྷཾ གཧེཏྭཱ ཨེཀཾ མགྒཾ གཏོ’’ཏི (པཱརཱ. ཨཊྛ. པཋམམཧཱསངྒཱིཏིཀཐཱཝཎྞནཱ) ཝུཏྟཝཙནཉྩ ཨཉྙམཉྙཾ ཝིརུདྡྷཾ ཧོཏི. ཨིདྷ ཧི མཧཱཀསྶཔཏྠེརཱདཡོ ཨཏྟནོ ཨཏྟནོ པརིཝཱརབྷིཀྑཱུཧིཡེཝ སདྡྷིཾ ཏཾ ཏཾ དིསཾ གཏཱཏི ཨཏྠོ ཨཱཔཛྫཏི, ཏཏྠ པན མཧཱཀསྶཔཏྠེརཨནུརུདྡྷཏྠེརཱཡེཝ པཙྩེཀམུཔཌྜྷསངྒྷེན སདྡྷིཾ ཨེཀེཀཾ མགྒཾ གཏཱཏི? ཝུཙྩཏེ – ཏདུབྷཡམྤི ཧི ཝཙནཾ ན ཝིརུཛ྄ཛྷཏི ཨཏྠཏོ སཾསནྡནཏྟཱ. ཨིདྷ ཧི ནིརཝསེསེན ཐེརཱནཾ པཙྩེཀགམནཝཙནམེཝ ཏཏྠ ནཡཝསེན དསྶེཏི, ཨིདྷ ཨཏྟནོ ཨཏྟནོ པརིསཱཡ གམནཝཙནཉྩ ཏཏྠ ཨུཔཌྜྷསངྒྷེན སདྡྷིཾ གམནཝཙནེན. ཨུཔཌྜྷསངྒྷོཏི ཧི སཀསཀཔརིསཱབྷཱུཏོ བྷིཀྑུགཎོ གཡ྄ཧཏི ཨུཔཌྜྷསདྡསྶ ཨསམེཔི བྷཱགེ པཝཏྟཏྟཱ. ཡདི ཧི སནྣིཔཏིཏེ སངྒྷེ ཨུཔཌྜྷསངྒྷེན སདྡྷིནྟི ཨཏྠཾ གཎྷེཡྻ, ཏདཱ སངྒྷསྶ གཎནཔཐམཏཱིཏཏྟཱ ན ཡུཛྫཏེཝ ¶ , ཡདི ཙ སངྒཱཡནཏྠཾ ཨུཙྩིནིཏཱནཾ པཉྩནྣཾ བྷིཀྑུསཏཱནཾ མཛ྄ཛྷེ ཨུཔཌྜྷསངྒྷེན སདྡྷིནྟི ཨཏྠཾ གཎྷེཡྻ, ཨེཝམྤི ཏེསཾ གཎཔཱམོཀྑཱནཾཡེཝ ཨུཙྩིནིཏཏྟཱ ན ཡུཛྫཏེཝ. པཙྩེཀགཎིནོ ཧེཏེ. ཝུཏྟཉྷི ‘‘སཏྟསཏསཧསྶཱནི, ཏེསུ པཱམོཀྑབྷིཀྑཝོ’’ཏི ¶ , ཨིཏི ཨཏྠཏོ སཾསནྡནཏྟཱ ཏདེཏཾ ཨུབྷཡམྤི ཝཙནཾ ཨཉྙམཉྙཾ ན ཝིརུཛ྄ཛྷཏཱིཏི. ཏཾཏཾབྷཱཎཀཱནཾ མཏེནེཝཾ ཝུཏྟནྟིཔི ཝདནྟི.

‘‘ཨཔརིནིབྦུཏསྶ བྷགཝཏོ’’ཏིཨཱདིནཱ ཡོཛེཏབྦཾ. པཏྟཙཱིཝརམཱདཱཡཱཏི ཨེཏྠ ཙཏུམཧཱརཱཛདཏྟིཡསེལམཡཔཏྟཾ, སུགཏཙཱིཝརཉྩ གཎྷིཏྭཱཏི ཨཏྠོ. སོཡེཝ ཧི པཏྟོ བྷགཝཏཱ སདཱ པརིབྷུཏྟོ. ཝུཏྟཉྷི སམཙིཏྟཔཊིཔདཱསུཏྟཊྛཀཐཱཡཾ ‘‘ཝསྶཾཝུཏྠཱནུསཱརེན ཨཏིརེཀཝཱིསཏིཝསྶཀཱལེཔི ཏསྶེཝ པརིབྷུཏྟབྷཱཝཾ དཱིཔེཏུཀཱམེན པཱཏོཝ སརཱིརཔཊིཛགྒནཾ ཀཏྭཱ སུནིཝཏྠནིཝཱསནོ སུགཏཙཱིཝརཾ པཱརུཔིཏྭཱ སེལམཡཔཏྟམཱདཱཡ བྷིཀྑུསངྒྷཔརིཝུཏོ དཀྑིཎདྭཱརེན ནགརཾ པཝིསིཏྭཱ པིཎྜཱཡ ཙརནྟོ’’ཏི (ཨ. ནི. ཨཊྛ. ༢.༣༧) གནྡྷམཱལཱདཡོ ནེསཾ ཧཏྠེཏི གནྡྷམཱལཱདིཧཏྠཱ.

ཏཏྲཱཏི ཏིསྶཾ སཱཝཏྠིཡཾ. སུདནྟི ནིཔཱཏམཏྟཾ. ཨནིཙྩཏཱདིཔཊིསཾཡུཏྟཱཡཱཏི ‘‘སབྦེ སངྑཱརཱ ཨནིཙྩཱ’’ཏིཨཱདིནཱ (དྷ. པ. ༢༧༧) ཨནིཙྩསབྷཱཝཔཊིསཉྙུཏྟཱཡ. དྷམྨེན ཡུཏྟཱ, དྷམྨསྶ ཝཱ པཏིརཱུཔཱཏི དྷམྨཱི, ཏཱདིསཱཡ. སཉྙཱཔེཏྭཱཏི སུཊྛུ ཛཱནཱཔེཏྭཱ, སམསྶཱསེཏྭཱཏི ཝུཏྟཾ ཧོཏི. ཝསིཏགནྡྷཀུཊིནྟི ནིཙྩསཱཔེཀྑཏྟཱ སམཱསོ. པརིབྷོགཙེཏིཡབྷཱཝཏོ ‘‘གནྡྷཀུཊིཾ ཝནྡིཏྭཱ’’ཏི ཝུཏྟཾ. ‘‘ཝནྡིཏྭཱ’’ཏི ཙ ‘‘ཝིཝརིཏྭཱ’’ཏི ཨེཏྠ པུབྦཀཱལཀིརིཡཱ. ཏཐཱ ཧི ཨཱཙརིཡསཱརིཔུཏྟཏྠེརེན ཝུཏྟཾ ‘‘གནྡྷཀུཊིཡཱ དྭཱརཾ ཝིཝརིཏྭཱཏི པརིབྷོགཙེཏིཡབྷཱཝཏོ གནྡྷཀུཊིཾ ཝནྡིཏྭཱ གནྡྷཀུཊིཡཱ དྭཱརཾ ཝིཝརཱིཏི ཝེདིཏབྦ’’ནྟི (སཱརཏྠ. ཊཱི. ༡.པཋམམཧཱསངྒཱིཏིཀཐཱ) མིལཱཏཱ མཱལཱ, སཱཡེཝ ཀཙཝརཾ, མིལཱཏཾ ཝཱ མཱལཱསངྑཱཏཾ ཀཙཝརཾ ཏཐཱ. ཨཏིཧརིཏྭཱཏི པཋམཾ ཋཔིཏཊྛཱནམབྷིམུཁཾ ཧརིཏྭཱ. ཡཐཱཋཱནེ ཋཔེཏྭཱཏི པཋམཾ ཋཔིཏཊྛཱནཾ ཨནཏིཀྐམིཏྭཱ ཡཐཱཋིཏཊྛཱནེཡེཝ ཋཔེཏྭཱ. བྷགཝཏོ ཋིཏཀཱལེ ཀརཎཱིཡཾ ཝཏྟཾ སབྦམཀཱསཱིཏི སེནཱསནེ ཀཏྟབྦཝཏྟཾ སནྡྷཱཡ ཝུཏྟཾ. ཀུརུམཱནོ ཙཱཏི ཏཾ སབྦཾ ཝཏྟཾ ཀརོནྟོ ཙ. ལཀྑཎེ ཧི ཨཡཾ མཱན-སདྡོ. ནྷཱནཀོཊྛཀསྶ སམྨཛྫནཉྩ ཏསྨིཾ ཨུདཀསྶ ཨུཔཊྛཱཔནཉྩ, ཏཱནི ཨཱདཱིནི ཡེསཾ དྷམྨདེསནཱཨོཝཱདཱདཱིནནྟི ཏཐཱ, ཏེསཾ ཀཱལེསཱུཏི ཨཏྠོ. སཱིཧསྶ མིགརཱཛསྶ སེཡྻཱ སཱིཧསེཡྻཱ, ཏདྡྷིཏཝསེན, སདིསཝོཧཱརེན ཝཱ བྷགཝཏོ སེཡྻཱཔི ‘‘སཱིཧསེཡྻཱ’’ཏི ཝུཙྩཏི. ཏེཛུསྶདཨིརིཡཱཔཐཏྟཱ ཨུཏྟམསེཡྻཱ ཝཱ, ཡཾ སནྡྷཱཡ ཝུཏྟཾ ‘‘ཨཐ ཁོ བྷགཝཱ དཀྑིཎེན པསྶེན སཱིཧསེཡྻཾ ¶ ཀཔྤེསི ¶ པཱདེ པཱདཾ ཨཙྩཱདྷཱཡ སཏོ སམྤཛཱནོ’’ཏི, (དཱི. ནི. ༢.༡༩༨) ཏཾ. ཀཔྤནཀཱལོ ཀརཎཀཱལོ ནནཱུཏི ཡོཛེཏབྦཾ.

‘‘ཡཐཱ ཏ’’ནྟིཨཱདིནཱ ཡཐཱཝུཏྟམཏྠཾ ཨུཔམཱཡ ཨཱཝི ཀརོཏི. ཏཏྠ ཡཐཱ ཨཉྙོཔི བྷགཝཏོ…པེ… པཏིཊྛིཏཔེམོ ཙེཝ ཨཁཱིཎཱསཝོ ཙ ཨནེཀེསུ…པེ… ཨུཔཀཱརསཉྫནིཏཙིཏྟམདྡཝོ ཙ ཨཀཱསི, ཨེཝཾ ཨཱཡསྨཱཔི ཨཱནནྡོ བྷགཝཏོ གུཎ…པེ… མདྡཝོ ཙ ཧུཏྭཱ ཨཀཱསཱིཏི ཡོཛནཱ. ནྟི ནིཔཱཏམཏྟཾ. ཨཔིཙ ཨེཏེན ཏཐཱཀརཎཧེཏུཾ དསྶེཏི, ཡཐཱ ཨཉྙེཔི ཡཐཱཝུཏྟསབྷཱཝཱ ཨཀཾསུ, ཏཐཱ ཨཱཡསྨཱཔི ཨཱནནྡོ བྷགཝཏོ…པེ… པཏིཊྛིཏཔེམཏྟཱ ཙེཝ ཨཁཱིཎཱསཝཏྟཱ ཙ ཨནེཀེསུ…པེ… ཨུཔཀཱརསཉྫནིཏཙིཏྟམདྡཝཏྟཱ ཙཱཏི ཧེཏུཨཏྠསྶ ལབྦྷམཱནཏྟཱ. ཧེཏུགབྦྷཱནི ཧི ཨེཏཱནི པདཱནི ཏདཏྠསྶེཝ ཏཐཱཀརཎཧེཏུབྷཱཝཏོ. དྷནཔཱལདམན (ཙཱུལ༹ཝ. ༣༤༢), སུཝཎྞཀཀྐཊ (ཛཱ. ༡.༥.༩༤), ཙཱུལ༹ཧཾས (ཛཱ. ༡.༡༥.༡༣༣) -མཧཱཧཾསཛཱཏཀཱདཱིཧི (ཛཱ. ༢.༢༡.༨༩) ཙེཏྠ ཝིབྷཱཝེཏབྦོ. གུཎཱནཾ གཎོ, སོཡེཝ ཨམཏནིཔྥཱདཀརསསདིསཏཱཡ ཨམཏརསོ. ཏཾ ཛཱནནཔཀཏིཏཱཡཱཏི པཏིཊྛིཏཔདེ ཧེཏུ. ཨུཔཀཱར…པེ… མདྡཝོཏི ཨུཔཀཱརཔུབྦབྷཱཝེན སམྨཱཛནིཏཙིཏྟམུདུཀོ. ཨེཝམྤི སོ ཨིམིནཱ ཀཱརཎེན ཨདྷིཝཱསེསཱིཏི དསྶེནྟོ ‘‘ཏམེན’’ནྟིཨཱདིམཱཧ. ཏཏྠ ཏམེནནྟི ཏཾ ཨཱཡསྨནྟཾ ཨཱནནྡཾ. ཨེཏ-སདྡོ ཧི པདཱལངྐཱརམཏྟཾ. ཨཡཉྷི སདྡཔཀཏི, ཡདིདཾ དྭཱིསུ སབྦནཱམེསུ པུབྦཔདསྶེཝ ཨཏྠཔདཏཱ. སཾཝེཛེསཱིཏི ‘‘ནནུ བྷགཝཏཱ པཊིཀཙྩེཝ ཨཀྑཱཏཾ ‘སབྦེཧེཝ པིཡེཧི མནཱཔེཧི ནཱནཱབྷཱཝོ ཝིནཱབྷཱཝོ’ཏིཨཱདིནཱ (དཱི. ནི. ༢.༡༨༣; སཾ. ནི. ༥.༣༧༩; ཨ. ནི. ༡༠.༤༨) སཾཝེགཾ ཛནེསཱི’’ཏི (དཱི. ནི. ཊཱི. པཋམམཧཱསངྒཱིཏིཀཐཱཝཎྞནཱ) ཨཱཙརིཡདྷམྨཔཱལཏྠེརེན ཝུཏྟཾ, ཨེཝཾ སཏི ‘‘བྷནྟེ…པེ… ཨསྶཱསེསྶཐཱཏི པཋམཾ ཝཏྭཱ’’ཏི སཧ པཱཋསེསེན ཡོཛནཱ ཨསྶ. ཡཐཱརུཏཏོ པན ཨཱདྱཏྠེན ཨིཏི-སདྡེན ‘‘ཨེཝམཱདིནཱ སཾཝེཛེསཱི’’ཏི ཡོཛནཱཔི ཡུཛྫཏེཝ. ཡེན ཀེནཙི ཧི ཝཙནེན སཾཝེགཾ ཛནེསི, ཏཾ སབྦམྤི སཾཝེཛནསྶ ཀརཎཾ སམྦྷཝཏཱིཏི. སནྠམྦྷིཏྭཱཏི པརིདེཝནཱདིཝིརཧེན ཨཏྟཱནཾ པཊིབནྡྷེཏྭཱ པཏིཊྛཱཔེཏྭཱ. ཨུསྶནྣདྷཱཏུཀནྟི ཨུཔཙིཏཔིཏྟསེམྷཱདིདོསཾ. པིཏྟསེམྷཝཱཏཝསེན ཧི ཏིསྶོ དྷཱཏུཡོ ཨིདྷ བྷེསཛྫཀརཎཡོགྱཏཱཡ ¶ ཨདྷིཔྤེཏཱ, ཡཱ ‘‘དོསཱ, མལཱ’’ཏི ཙ ལོཀེ ཝུཙྩནྟི, པཐཝཱི ཨཱཔོ ཏེཛོ ཝཱཡོ ཨཱཀཱསོཏི ཙ བྷེདེན པཙྩེཀཾ པཉྩཝིདྷཱ. ཝུཏྟཉྷི –

‘‘ཝཱཡུཔིཏྟཀཕཱ དོསཱ, དྷཱཏཝོ ཙ མལཱ ཏཐཱ;

ཏཏྠཱཔི པཉྩདྷཱཁྱཱཏཱ, པཙྩེཀཾ དེཧདྷཱརཎཱ.

སརཱིརདཱུསནཱ ¶ དོསཱ, མལཱིནཀརཎཱ མལཱ;

དྷཱརཎཱ དྷཱཏཝོ ཏེ ཏུ, ཨིཏྠམནྭཏྠསཉྙཀཱ’’ཏི.

སམསྶཱསེཏུནྟི སནྟཔྤེཏུཾ. དེཝཏཱཡ སཾཝེཛིཏདིཝསཏོ, ཛེཏཝནཝིཧཱརཾ པཝིཊྛདིཝསཏོ ཝཱ དུཏིཡདིཝསེ. ཝིརིཙྩཏི ཨེཏེནཱཏི ཝིརེཙནཾ, ཨོསདྷཔརིབྷཱཝིཏཾ ཁཱིརམེཝ ཝིརེཙནཾ ཏཐཱ. ཡཾ སནྡྷཱཡཱཏི ཡཾ བྷེསཛྫཔཱནཾ སནྡྷཱཡ. ཨངྒཔཙྩངྒེན སོབྷཏཱིཏི སུབྷོ, མནུནོ ཨཔཙྩཾ མཱནཝོ, ན-ཀཱརསྶ པན ཎ-ཀཱརེ ཀཏེ མཱཎཝོ. མནཱུཏི ཧི པཋམཀཔྤིཀཀཱལེ མནུསྶཱནཾ མཱཏཱཔིཏུཊྛཱནེ ཋིཏོ པུརིསོ, ཡོ སཱསནེ ‘‘མཧཱསམྨཏརཱཛཱ’’ཏི ཝུཏྟོ. སོ ཧི སཀལལོཀསྶ ཧིཏཾ མནབྷི ཛཱནཱཏཱིཏི མནཱུཏི ཝུཙྩཏི. ཨེཝམྤེཏྠ ཝདནྟི ‘‘དནྟཛ ན-ཀཱརསཧིཏོ མཱནཝསདྡོ སབྦསཏྟསཱདྷཱརཎཝཙནོ, མུདྡྷཛ ཎ-ཀཱརསཧིཏོ པན མཱཎཝསདྡོ ཀུཙྪིཏམཱུལ༹ྷཱཔཙྩཝཙནོ’’ཏི. ཙཱུལ༹ཀམྨཝིབྷངྒསུཏྟཊྛཀཐཱཡམྤི (མ. ནི. ཨཊྛ. ༤.༢༨༩) ཧི མུདྡྷཛ ཎ-ཀཱརསཧིཏསྶེཝ མཱཎཝསདྡསྶ ཨཏྠོ ཝཎྞིཏོ. ཏཊྚཱིཀཱཡམྤི ‘‘ཡཾ ཨཔཙྩཾ ཀུཙྪིཏཾ མཱུལ༹ྷཾ ཝཱ, ཏཏྠ ལོཀེ མཱཎཝཝོཧཱརོ, ཡེབྷུཡྻེན ཙ སཏྟཱ དཧརཀཱལེ མཱུལ༹ྷདྷཱཏུཀཱ ཧོནྟཱིཏི ཏསྶེཝཏྠོ པཀཱསིཏོ’’ཏི ཝདནྟི ཨཱཙརིཡཱ. ཨཉྙཏྠ ཙ ཝཱིསཏིཝསྶབྦྷནྟརོ ཡུཝཱ མཱཎཝོ, ཨིདྷ པན ཏབྦོཧཱརེན མཧལླཀོཔི. ཝུཏྟཉྷི ཙཱུལ༹ཀམྨཝིབྷངྒསུཏྟཝཎྞནཱཡཾ ‘‘མཱཎཝོཏི པན ཏཾ ཏརུཎཀཱལེ ཝོཧརིཾསུ, སོ མཧལླཀཀཱལེཔི ཏེནེཝ ཝོཧཱརེན ཝོཧརཱིཡཏཱི’’ཏི, (མ. ནི. ཨཊྛ. ༤.༢༨༩) སུབྷནཱམཀེན ལདྡྷམཱཎཝཝོཧཱརེནཱཏི ཨཏྠོ. སོ པན ‘‘སཏྠཱ པརིནིབྦུཏོ, ཨཱནནྡཏྠེརོ ཀིརསྶ པཏྟཙཱིཝརམཱདཱཡ ཨཱགཏོ, མཧཱཛནོ ཏཾ དསྶནཱཡ ཨུཔསངྐམཏཱི’’ཏི སུཏྭཱ ‘‘ཝིཧཱརཾ ཁོ པན གནྟྭཱ མཧཱཛནམཛ྄ཛྷེ ན སཀྐཱ སུཁེན པཊིསནྠཱརཾ ཝཱ ཀཱཏུཾ, དྷམྨཀཐཾ ཝཱ སོཏུཾ, གེཧམཱགཏཾཡེཝ ནཾ དིསྭཱ སུཁེན པཊིསནྠཱརཾ ཀརིསྶཱམི ¶ , ཨེཀཱ ཙ མེ ཀངྑཱ ཨཏྠི, ཏམྤི ནཾ པུཙྪིསྶཱམཱི’’ཏི ཙིནྟེཏྭཱ ཨེཀཾ མཱཎཝཀཾ པེསེསི, ཏཾ སནྡྷཱཡཱཧ ‘‘པཧིཏཾ མཱཎཝཀ’’ནྟི ཁུདྡཀེ ཙེཏྠ ཀཔཙྩཡོ. ཨེཏདཝོཙཱཏི ཨེཏཾ ‘‘ཨཀཱལོ’’ཏིཨཱདིཀཾ ཝཙནཾ ཨཱནནྡཏྠེརོ ཨཝོཙ.

ཨཀཱལོཏི ཨཛྫ གནྟུཾ ཨཡུཏྟཀཱལོ. ཀསྨཱཏི ཙེ ‘‘ཨཏྠི མེ’’ཏིཨཱདིམཱཧ. བྷེསཛྫམཏྟཱཏི ཨཔྤཀཾ བྷེསཛྫཾ. ཨཔྤཏྠོ ཧེཏྠ མཏྟཱསདྡོ ‘‘མཏྟཱ སུཁཔརིཙྩཱགཱ’’ཏིཨཱདཱིསུ (དྷ. པ. ༢༩༠) ཝིཡ. པཱིཏཱཏི པིཝིཏཱ. སྭེཔཱིཏི ཨེཏྠ ‘‘ཨཔི-སདྡོ ཨཔེཀྑོ མནྟཱ ནུཉྙཱཡཱ’’ཏི (ཝཛིར. ཊཱི. པཋམམཧཱསངྒཱིཏིཀཐཱཝཎྞནཱ) ཝཛིརབུདྡྷིཏྠེརེན ཝུཏྟཾ. ཨཡཾ པན ཏསྶཱདྷིཔྤཱཡོ – ‘‘ཨཔྤེཝ ནཱམཱ’’ཏི སཾསཡམཏྟེ ཝུཏྟེ ཨནུཉྙཱཏབྷཱཝོ ན སིདྡྷོ, ཏསྨཱ ཏཾ སཱདྷནཏྠཾ ¶ ‘‘ཨཔཱི’’ཏི ཝུཏྟཾ, ཏེན ཨིམམཏྠཾ དཱིཔེཏི ‘‘ཨཔྤེཝ ནཱམ སྭེ མཡཾ ཨུཔསངྐམེཡྻཱམ, ཨུཔསངྐམིཏུཾ པཊིབལཱ སམཱནཱ ཨུཔསངྐམིསྶཱམ ཙཱ’’ཏི.

དུཏིཡདིཝསེཏི ཁཱིརཝིརེཙནཔཱིཏདིཝསཏོ དུཏིཡདིཝསེ. ཙེཏཀཏྠེརེནཱཏི ཙེཏིཡརཊྛེ ཛཱཏཏྟཱ ཙེཏཀོཏི ཨེཝཾ ལདྡྷནཱམེན ཐེརེན. པཙྪཱསམཎེནཱཏི པཙྪཱནུགཏེན སམཎེན. སཧཏྠེ ཙེཏཾ ཀརཎཝཙནཾ. སུབྷེན མཱཎཝེན པུཊྛོཏི ‘‘ཡེསུ དྷམྨེསུ བྷཝཾ གོཏམོ ཨིམཾ ལོཀཾ པཏིཊྛཔེསི, ཏེ ཏསྶ ཨཙྩཡེན ནཊྛཱ ནུ ཁོ, དྷརནྟི ནུ ཁོ, སཙེ དྷརནྟི, བྷཝཾ (ནཏྠི དཱི. ནི. ཨཊྛ. ༡.༤༤༨) ཨཱནནྡོ ཛཱནིསྶཏི, ཧནྡ ནཾ པུཙྪཱམཱི’’ཏི ཨེཝཾ ཙིནྟེཏྭཱ ‘‘ཡེསཾ སོ བྷཝཾ གོཏམོ དྷམྨཱནཾ ཝཎྞཝཱདཱི ཨཧོསི, ཡཏྠ ཙ ཨིམཾ ཛནཏཾ སམཱདཔེསི ནིཝེསེསི པཏིཊྛཱཔེསི, ཀཏམེསཱནཾ ཁོ བྷོ ཨཱནནྡ དྷམྨཱནཾ སོ བྷཝཾ གོཏམོ ཝཎྞཝཱདཱི ཨཧོསཱི’’ཏིཨཱདིནཱ (དཱི. ནི. ༡.༤༤༨) པུཊྛོ, ཨཐསྶ ཐེརོ ཏཱིཎི པིཊཀཱནི སཱིལཀྑནྡྷཱདཱིཧི ཏཱིཧི ཁནྡྷེཧི སངྒཧེཏྭཱ དསྶེནྟོ ‘‘ཏིཎྞཾ ཁོ མཱཎཝ ཁནྡྷཱནཾ སོ བྷགཝཱ ཝཎྞཝཱདཱི’’ཏིཨཱདིནཱ (དཱི. ནི. ༡.༤༤༩) ཨིདྷ སཱིལཀྑནྡྷཝགྒེ དསམཾ སུཏྟམབྷཱསི, ཏཾ སནྡྷཱཡཱཧ ‘‘ཨིམསྨིཾ…པེ… མབྷཱསཱི’’ཏི.

ཁཎྜནྟི ཚིནྣཾ. ཕུལླནྟི བྷིནྣཾ, སེཝཱལཱཧིཚཏྟཀཱདིཝིཀསྶནཾ ཝཱ, ཏེསཾ པཊིསངྑརཎཾ སམྨཱ པཱཀཏིཀཀརཎཾ, ཨབྷིནཝཔཊིཀརཎནྟི ཝུཏྟཾ ཧོཏི. ཨུཔཀཊྛཱཡཱཏི ཨཱསནྣཱཡ. ཝསྶཾ ཨུཔནེནྟི ཨུཔགཙྪནྟི ཨེཏྠཱཏི ཝསྶཱུཔནཱཡིཀཱ, ཝསྶཱུཔགཏཀཱལོ, ཏཱཡ. སངྒཱིཏིཔཱལི༹ཡཾ (ཙཱུལ༹ཝ. ༤༤༠) སཱམཉྙེན ཝུཏྟམྤི ཝཙནཾ ¶ ཨེཝཾ གཏེཡེཝ སནྡྷཱཡ ཝུཏྟནྟི སཾསནྡེཏུཾ སཱདྷེཏུཾ ཝཱ ཨཱཧ ‘‘ཨེཝཉྷཱི’’ཏིཨཱདི.

རཱཛགཧཾ པརིཝཱརེཏྭཱཏི བཧིནགརེ ཋིཏབྷཱཝེན ཝུཏྟཾ. ཚཌྜིཏཔཏིཏཨུཀླཱཔཱཏི ཚཌྜིཏཱ ཙ པཏིཏཱ ཙ ཨུཀླཱཔཱ ཙ. ཨིདཾ ཝུཏྟཾ ཧོཏི – བྷགཝཏོ པརིནིབྦཱནཊྛཱནཾ གཙྪནྟེཧི བྷིཀྑཱུཧི ཚཌྜིཏཱ ཝིསྶཊྛཱ, ཏཏོཡེཝ ཙ ཨུཔཙིཀཱདཱིཧི ཁཱདིཏཏྟཱ ཨིཏོ ཙིཏོ ཙ པཏིཏཱ, སམྨཛྫནཱབྷཱཝེན ཨཱཀིཎྞཀཙཝརཏྟཱ ཨུཀླཱཔཱ ཙཱཏི. ཏདེཝཏྠཾ ‘‘བྷགཝཏོ ཧཱི’’ཏིཨཱདིནཱ ཝིབྷཱཝེཏི. ཨཝཀུཐི པཱུཏིབྷཱཝམགམཱསཱིཏི ཨུཀླཱཔོ ཐ-ཀཱརསྶ ལ-ཀཱརཾ ཀཏྭཱ, ཨུཛ྄ཛྷིཊྛོ ཝཱ ཀལཱཔོསམཱུཧོཏི ཨུཀླཱཔོ, ཝཎྞསངྒམནཝསེནེཝཾ ཝུཏྟཾ ཡཐཱ ‘‘ཨུཔཀླེསོ, སྣེཧོ’’ – ཨིཙྩཱདི, ཏེན ཡུཏྟཱཏི ཏཐཱ. པརིཙྪེདཝསེན ཝེཎཱིཡནྟི དིསྶནྟཱིཏི པརིཝེཎཱ. ཀུརུམཱནཱཏི ཀཏྟུཀཱམཱ. སེནཱསནཝཏྟཱནཾ པཉྙཏྟཏྟཱ, སེནཱསནཀྑནྡྷཀེ ཙ སེནཱསནཔཊིབདྡྷཱནཾ བཧཱུནམྤི ཝཙནཱནཾ ཝུཏྟཏྟཱ སེནཱསནཔཊིསངྑརཎམྤི ཏསྶ པཱུཛཱཡེཝ ནཱམཱཏི ཨཱཧ ‘‘བྷགཝཏོ ཝཙནཔཱུཛནཏྠ’’ནྟི. པཋམཾ མཱསནྟི ¶ ཝསྶཱནསྶ པཋམཾ མཱསཾ. ཨཙྩནྟསཾཡོགེ ཙེཏཾ ཨུཔཡོགཝཙནཾ. ‘‘ཏིཏྠིཡཝཱདཔརིམོཙནཏྠཉྩཱ’’ཏི ཝུཏྟམཏྠཾ པཱཀཊཾ ཀཱཏུཾ ‘‘ཏིཏྠིཡཱ ཧཱི’’ཏིཨཱདི ཝུཏྟཾ.

ཡནྟི ཀཏིཀཝཏྟཀརཎཾ. ཨེདིསེསུ ཧི ཋཱནེསུ ཡཾ-སདྡོ ཏཾ-སདྡཱནཔེཀྑོ ཏེནེཝ ཨཏྠསྶ པརིཔུཎྞཏྟཱ. ཡཾ ཝཱ ཀཏིཀཝཏྟཾ སནྡྷཱཡ ‘‘ཨཐ ཁོ’’ཏིཨཱདི ཝུཏྟཾ, ཏདེཝ མཡཱཔི ཝུཏྟནྟི ཨཏྠོ. ཨེས ནཡོ ཨཱིདིསེསུ བྷགཝཏཱ…པེ… ཝཎྞིཏནྟི སེནཱསནཝཏྟཾ པཉྙཔེནྟེན སེནཱསནཀྑནྡྷཀེ (ཙཱུལ༹ཝ. ༣༠༨) ཙ སེནཱསནཔཊིབདྡྷཝཙནཾ ཀཐེནྟེན ཝཎྞིཏཾ. སངྒཱཡིསྶཱམཱཏི ཨེཏྠ ཨིཏི-སདྡསྶ ‘‘ཝུཏྟཾ ཨཧོསཱི’’ཏི ཙ ཨུབྷཡཏྠ སམྦནྡྷོ, ཨེཀསྶ ཝཱ ཨིཏི-སདྡསྶ ལོཔོ.

དུཏིཡདིཝསེཏི ཨེཝཾ ཙིནྟིཏདིཝསཏོ དུཏིཡདིཝསེ, སོ ཙ ཁོ ཝསྶཱུཔནཱཡིཀདིཝསཏོ དུཏིཡདིཝསོཝ. ཐེརཱ ཧི ཨཱསལ༹ྷིཔུཎྞམིཏོ པཱཊིཔདདིཝསེཡེཝ སནྣིཔཏིཏྭཱ ཝསྶམུཔགནྟྭཱ ཨེཝཾ ཙིནྟེསུནྟི. རཱཛདྭཱརེཏི རཱཛགེཧདྭཱརེ. ཧཏྠཀམྨནྟི ཧཏྠཀིརིཡཾ, ཧཏྠཀམྨསྶ ཀརཎནྟི ཝུཏྟཾ ཧོཏི. པཊིཝེདེསུནྟི ཛཱནཱཔེསུཾ. ཝིསཊྛཱཏི ནིརཱསངྐཙིཏྟཱ. ཨཱཎཱཡེཝ ¶ ཨཔྤཊིཧཏཝུཏྟིཡཱ པཝཏྟནཊྛེན ཙཀྐནྟི ཨཱཎཱཙཀྐཾ. ཏཐཱ དྷམྨོཡེཝ ཙཀྐནྟི དྷམྨཙཀྐཾ, ཏཾ པནིདྷ དེསནཱཉཱཎཔཊིཝེདྷཉཱཎཝསེན དུཝིདྷམྤི ཡུཛྫཏི ཏདུབྷཡེནེཝ སངྒཱིཏིཡཱ པཝཏྟནཏོ. ‘‘དྷམྨཙཀྐནྟི ཙེཏཾ དེསནཱཉཱཎསྶཱཔི ནཱམཾ, པཊིཝེདྷཉཱཎསྶཱཔཱི’’ཏི (སཾ. ནི. ཨཊྛ. ༢.༣.༧༨) ཧི ཨཊྛཀཐཱསུ ཝུཏྟཾ. སནྣིསཛྫཊྛཱནནྟི སནྣིཔཏིཏྭཱ ནིསཱིདནཊྛཱནཾ. སཏྟ པཎྞཱནི ཡསྶཱཏི སཏྟཔཎྞཱི, ཡོ ‘‘ཚཏྟཔཎྞོ, ཝིསམཙྪདོ’’ ཏིཔི ཝུཙྩཏི, ཏསྶ ཛཱཏགུཧདྭཱརེཏི ཨཏྠོ.

ཝིསྶཀམྨུནཱཏི སཀྐསྶ དེཝཱནམིནྡསྶ ཀམྨཱཀམྨཝིདྷཱཡཀཾ དེཝཔུཏྟཾ སནྡྷཱཡཱཧ. སུཝིབྷཏྟབྷིཏྟིཐམྦྷསོཔཱནནྟི ཨེཏྠ སུཝིབྷཏྟཔདསྶ དྭནྡཏོ པུབྦེ སུཡྻམཱནཏྟཱ སབྦེཧི དྭནྡཔདེཧི སམྦནྡྷོ, ཏཐཱ ‘‘ནཱནཱཝིདྷ…པེ… ཝིཙིཏྟ’’ནྟིཨཱདཱིསུཔི. རཱཛབྷཝནཝིབྷཱུཏིནྟི རཱཛབྷཝནསམྤཏྟིཾ, རཱཛབྷཝནསོབྷཾ ཝཱ. ཨཝཧསནྟམིཝཱཏི ཨཝཧཱསཾ ཀུརུམཱནཾ ཝིཡ. སིརིཡཱཏི སོབྷཱསངྑཱཏཱཡ ལཀྑིཡཱ. ནིཀེཏནམིཝཱཏི ཝསནཊྛཱནམིཝ, ‘‘ཛལནྟམིཝཱ’’ཏིཔི པཱཋོ. ཨེཀསྨིཾཡེཝ པཱནཱིཡཏིཏྠེ ནིཔཏནྟཱ པཀྑིནོ ཝིཡ སབྦེསམྤི ཛནཱནཾ ཙཀྑཱུནི མཎྜཔེཡེཝ ནིཔཏནྟཱིཏི ཝུཏྟཾ ‘‘ཨེཀནིཔཱཏ…པེ… ཝིཧངྒཱན’’ནྟི. ནཡནཝིཧངྒཱནནྟི ནཡནསངྑཱཏཝིཧངྒཱནཾ. ལོཀརཱམཎེཡྻཀམིཝ སམྤིཎྜིཏནྟི ཡདི ལོཀེ ཝིཛྫམཱནཾ རཱམཎེཡྻཀཾ སབྦམེཝ ཨཱནེཏྭཱ ཨེཀཏྠ སམྤིཎྜིཏཾ སིཡཱ, ཏཾ ཝིཡཱཏི ཝུཏྟཾ ཧོཏི, ཡཾ ཡཾ ཝཱ ལོཀེ རམིཏུམརཧཏི, ཏཾ སབྦཾ སམྤིཎྜིཏམིཝཱཏིཔི ¶ ཨཏྠོ. དཊྛབྦསཱརམཎྜནྟི ཕེགྒུརཧིཏཾ སཱརཾ ཝིཡ, ཀསཊཝིནིམུཏྟཾ པསནྣཾ ཝིཡ ཙ དཊྛུམརཧརཱུཔེསུ སཱརབྷཱུཏཾ, པསནྣབྷཱུཏཉྩ. ཨཔིཙ དཊྛབྦོ དསྶནཱིཡོ སཱརབྷཱུཏོ ཝིསིཊྛཏརོ མཎྜོ མཎྜནཾ ཨལངྐཱརོ ཨེཏསྶཱཏི དཊྛབྦསཱརམཎྜོ, ཏཾ. མཎྜཾ སཱུརིཡརསྨིཾ པཱཏི ནིཝཱརེཏི, སབྦེསཾ ཝཱ ཛནཱནཾ མཎྜཾ པསནྣཾ པཱཏི རཀྑཏི, མཎྜནམལངྐཱརཾ ཝཱ པཱཏི པིཝཏི ཨལངྐརིཏུཾ ཡུཏྟབྷཱཝེནཱཏི མཎྜཔོ, ཏཾ.

ཀུསུམདཱམཱནི ཙ ཏཱནི ཨོལམྦཀཱནི ཙེཏི ཀུསུམདཱམོལམྦཀཱནི. ཝིསེསནསྶ ཙེཏྠ པརནིཔཱཏོ ཡཐཱ ‘‘ཨགྱཱཧིཏོ’’ཏི. ཝིཝིདྷཱནིཡེཝ ཀུསུམདཱམོལམྦཀཱནི ཏཐཱ, ཏཱནི ཝིནིགྒལནྟཾ ཝིསེསེན ཝམེནྟཾ ནིཀྑཱམེནྟམིཝ ཙཱརུ སོབྷནཾ ཝིཏཱནཾ ཨེཏྠཱཏི ཏཐཱ. ཀུཊྚེན གཧིཏོ སམཾ ཀཏོཏི ཀུཊྚིམོ, ཀོཊྚིམོ ཝཱ, ཏཱདིསོཡེཝ མཎཱིཏི མཎིཀོཊྚིམོ ¶ , ནཱནཱརཏནེཧི ཝིཙིཏྟོ མཎིཀོཊྚིམོ, ཏསྶ ཏལཾ ཏཐཱ. ཨཐ ཝཱ མཎིཡོ ཀོཊྚེཏྭཱ ཀཏཏལཏྟཱ མཎིཀོཊྚེན ནིཔྥཏྟནྟི མཎིཀོཊྚིམཾ, ཏམེཝ ཏལཾ, ནཱནཱརཏནཝིཙིཏྟཾ མཎིཀོཊྚིམཏལཾ ཏཐཱ. ཏམིཝ ཙ ནཱནཱཔུཔྥཱུཔཧཱརཝིཙིཏྟཾ སུཔརིནིཊྛིཏབྷཱུམིཀམྨནྟི སམྦནྡྷོ. པུཔྥཔཱུཛཱ པུཔྥཱུཔཧཱརོ. ཨེཏྠ ཧི ནཱནཱརཏནཝིཙིཏྟགྒཧཎཾ ནཱནཱཔུཔྥཱུཔཧཱརཝིཙིཏྟཏཱཡནིདསྶནཾ, མཎིཀོཊྚིམཏལགྒཧཎཾ སུཔརིནིཊྛིཏབྷཱུམིཀམྨཏཱཡཱཏི དཊྛབྦཾ. ནནྟི མཎྜཔཾ. བྲཧྨཝིམཱནསདིསནྟི བྷཱཝནཔུཾསཀཾ, ཡཐཱ བྲཧྨཝིམཱནཾ སོབྷཏི, ཏཐཱ ཨལངྐརིཏྭཱཏི ཨཏྠོ. ཝིསེསེན མཱནེཏབྦནྟི ཝིམཱནཾ. སདྡཝིདཱུ པན ‘‘ཝིཧེ ཨཱཀཱསེ མཱཡནྟི གཙྪནྟི དེཝཱ ཡེནཱཏི ཝིམཱན’’ནྟི ཝདནྟི. ཝིསེསེན ཝཱ སུཙརིཏཀམྨུནཱ མཱིཡཏི ནིམྨཱིཡཏཱིཏི ཝིམཱནཾ, ཝཱིཏི ཝཱ སཀུཎོ ཝུཙྩཏི, ཏཾ སཎྛཱནེན མཱིཡཏི ནིམྨཱིཡཏཱིཏི ཝིམཱནནྟིཨཱདིནཱཔི ཝཏྟབྦོ. ཝིམཱནཊྛཀཐཱཡཾ པན ‘‘ཨེཀཡོཛནདྭིཡོཛནཱདིབྷཱཝེན པམཱཎཝིསེསཡུཏྟཏཱཡ, སོབྷཱཏིསཡཡོགེན ཙ ཝིསེསཏོ མཱནནཱིཡཏཱཡ ཝིམཱན’’ནྟི (ཝི. ཝ. ཨཊྛ. གནྠཱརམྦྷཀཐཱ) ཝུཏྟཾ. ནཏྠི ཨགྒྷམེཏེསནྟི ཨནགྒྷཱནི, ཨཔརིམཱཎགྒྷཱནི ཨགྒྷིཏུམསཀྐུཎེཡྻཱནཱིཏི ཝུཏྟཾ ཧོཏི. པཏིརཱུཔཾ, པཙྩེཀཾ ཝཱ ཨཏྠརིཏབྦཱནཱིཏི པཙྩཏྠརཎཱནི, ཏེསཾ སཏཱནི ཏཐཱ. ཨུཏྟརཱབྷིམུཁནྟི ཨུཏྟརདིསཱབྷིམུཁཾ. དྷམྨོཔི སཏྠཱཡེཝ སཏྠུཀིཙྩནིཔྥཱདནཏོཏི ཝུཏྟཾ ‘‘བུདྡྷསྶ བྷགཝཏོ ཨཱསནཱརཧཾ དྷམྨཱསནཾ པཉྙཔེཏྭཱ’’ཏི. ཡཐཱཧ ‘‘ཡོ ཁོ…པེ… མམཙྩཡེན སཏྠཱ’’ཏིཨཱདི, (དཱི. ནི. ༢.༢༡༦) ཏཐཱགཏཔྤཝེདིཏདྷམྨདེསཀསྶ ཝཱ སཏྠུཀིཙྩཱཝཧཏྟཱ ཏཐཱརཱུཔེ ཨཱསནེ ནིསཱིདིཏུམརཧཏཱིཏི དསྶེཏུམྤི ཨེཝཾ ཝུཏྟཾ. ཨཱསནཱརཧནྟི ནིསཱིདནཱརཧཾ. དྷམྨཱསནནྟི དྷམྨདེསཀཱསནཾ, དྷམྨཾ ཝཱ ཀཐེཏུཾ ཡུཏྟཱསནཾ. དནྟཁཙིཏནྟི དནྟེཧི ཁཙིཏཾ, ཧཏྠིདནྟེཧི ཀཏནྟི ཝུཏྟཾ ཧོཏི. ‘‘དནྟོ ནཱམ ཧཏྠིདནྟོ ཝུཙྩཏཱི’’ཏི ཧི ཝུཏྟཾ. ཨེཏྠཱཏི ཨེཏསྨིཾ དྷམྨཱསནེ. མམ ཀིཙྩནྟི མམ ཀམྨཾ, མཡཱ ཝཱ ཀརཎཱིཡཾ.

ཨིདཱནི ¶ ཨཱཡསྨཏོ ཨཱནནྡསྶ ཨསེཀྑབྷཱུམིསམཱཔཛྫནཾ དསྶེནྟོ ‘‘ཏསྨིཉྩ པནཱ’’ཏིཨཱདིམཱཧ. ཏཏྠ ཏསྨིཉྩ པན དིཝསཨེཏི ཏཐཱ རཉྙཱ ཨཱརོཙཱཔིཏདིཝསེ, སཱཝཎམཱསསྶ ཀཱལ༹པཀྑཙཏུཏྠདིཝསེཏི ཝུཏྟཾ ཧོཏི. ཨནཏྠཛནནཏོ ཝིསསངྐཱསཏཱཡ ཀིལེསོ ཝིསཾ, ཏསྶ ཁཱིཎཱསཝབྷཱཝཏོ ཨཉྙཐཱབྷཱཝསངྑཱཏཱ སཏྟི གནྡྷོ. ཏཐཱ ཧི སོ ¶ བྷགཝཏོ པརིནིབྦཱནཱདཱིསུ ཝིལཱཔཱདིམཀཱསི. ཨཔིཙ ཝིསཛནནཀཔུཔྥཱདིགནྡྷཔཊིབྷཱགཏཱཡ ནཱནཱཝིདྷདུཀྑཧེཏུཀིརིཡཱཛནནཀོ ཀིལེསོཝ ‘‘ཝིསགནྡྷོ’’ཏི ཝུཙྩཏི. ཏཐཱ ཧི སོ ‘‘ཝིསཾ ཧརཏཱིཏི ཝིསཏྟིཀཱ, ཝིསམཱུལཱཏི ཝིསཏྟིཀཱ, ཝིསཕལཱཏི ཝིསཏྟིཀཱ, ཝིསཔརིབྷོགཱཏི ཝིསཏྟིཀཱ’’ཏིཨཱདིནཱ (མཧཱནི. ༣) ཝུཏྟོཏི. ཨཔིཙ ཝིསགནྡྷོནཱམ ཝིརཱུཔོ མཾསཱདིགནྡྷོ, ཏཾསདིསཏཱཡ པན ཀིལེསོ. ‘‘ཝིསྶསདྡོ ཧི ཝིརཱུཔེ’’ཏི (དྷ. ས. ཊཱི. ༦༢༤) ཨབྷིདྷམྨཊཱིཀཱཡཾཝུཏྟཾ. ཨདྡྷཱཏི ཨེཀཾསཏོ. སཾཝེགནྟི དྷམྨསཾཝེགཾ. ‘‘ཨོཧིཏབྷཱརཱན’’ནྟི ཧི ཡེབྷུཡྻེན, པདྷཱནེན ཙ ཝུཏྟཾ. ཨེདིསེསུ པན ཋཱནེསུ ཏདཉྙེསམྤི དྷམྨསཾཝེགོཡེཝ ཨདྷིཔྤེཏོ. ཏཐཱ ཧི ‘‘སཾཝེགོ ནཱམ སཧོཏྟཔྤཾ ཉཱཎཾ, སོ ཏསྶཱ བྷགཝཏོ དསྶནེ ཨུཔྤཛྫཱི’’ཏི (ཝི. ཝ. ཨཊྛ. ༨༣༨) རཛྫུམཱལཱཝིམཱནཝཎྞནཱཡཾཝུཏྟཾ, སཱ ཙ ཏདཱ ཨཝིཉྙཱཏསཱསནཱ ཨནཱགཏཕལཱཏི. ཨིཏརཐཱ ཧི ཙིཏྟུཏྲཱསཝསེན དོསོཡེཝ སཾཝེགོཏི ཨཱཔཛྫཏི, ཨེཝཉྩ སཏི སོ ཏསྶ ཨསེཀྑབྷཱུམིསམཱཔཛྫནསྶ ཨེཀཾསཀཱརཎཾ ན སིཡཱ. ཨེཝམབྷཱུཏོ ཙ སོ ཨིདྷ ན ཝཏྟབྦོཡེཝཱཏི ཨལམཏིཔཔཉྩེན. ཏེནཱཏི ཏསྨཱ སྭེ སངྒྷསནྣིཔཱཏསྶ ཝཏྟམཱནཏྟཱ, སེཀྑསཀརཎཱིཡཏྟཱ ཝཱ. ཏེ ན ཡུཏྟནྟི ཏཝ ན ཡུཏྟཾ, ཏཡཱ ཝཱ སནྣིཔཱཏཾ གནྟུཾ ན པཏིརཱུཔཾ.

མེཏནྟི མམ ཨེཏཾ གམནཾ. ཡྭཱཧནྟི ཡོ ཨཧཾ, ཡནྟི ཝཱ ཀིརིཡཱཔརཱམསནཾ, ཏེན ‘‘གཙྪེཡྻ’’ནྟི ཨེཏྠ གམནཀིརིཡཾ པརཱམསཏི, ཀིརིཡཱཔརཱམསནསྶ ཙ ཡཾ ཏཾ-སདྡསྶ ཨཡཾ པཀཏི, ཡདིདཾ ནཔུཾསཀལིངྒེན, ཨེཀཝཙནེན ཙ ཡོགྱཏཱ ཏཐཱཡེཝ ཏཏྠ ཏཏྠ དསྶནཏོ. ཀིརིཡཱཡ ཧི སབྷཱཝཏོ ནཔུཾསཀཏྟམེཀཏྟཉྩ ཨིཙྪནྟི སདྡཝིདཱུ. ཨཱཝཛྫེསཱིཏི ཨུཔནཱམེསི. མུཏྟཱཏི མུཙྩིཏཱ. ཨཔྤཏྟཉྩཱཏི ཨགཏཉྩ, བིམྦོཧནེ ན ཏཱཝ ཋཔིཏནྟི ཝུཏྟཾ ཧོཏི. ཨེཏསྨིཾ ཨནྟརེཏི ཨེཏྠནྟརེ, ཨིམིནཱ པདདྭཡེན དསྶིཏཀཱལཱནཾ ཝེམཛ྄ཛྷཀྑཎེ, ཏཐཱདསྶིཏཀཱལདྭཡསྶ ཝཱ ཝིཝརེཏི ཝུཏྟཾ ཧོཏི.

‘‘ཀཱརཎེ ཙེཝ ཙིཏྟེ ཙ, ཁཎསྨིཾ ཝིཝརེཔི ཙ;

ཝེམཛ྄ཛྷཱདཱིསུ ཨཏྠེསུ ‘ཨནྟརཱ’ཏི རཝོ གཏོ’’ཏི.

ཧི ¶ ཝུཏྟཾ. ཨནུཔཱདཱཡཱཏི ཏཎྷཱདིཊྛིཝསེན ཀཉྩི དྷམྨཾ ཨགྒཧེཏྭཱ, ཡེཧི ཝཱ ཀིལེསེཧི མུཙྩཏི, ཏེསཾ ལེསམཏྟམྤི ཨགྒཧེཏྭཱ. ཨཱསཝེཧཱིཏི ¶ བྷཝཏོ ཨཱ བྷཝགྒཾ, དྷམྨཏོ ཙ ཨཱ གོཏྲབྷུཾ སཝནཏོ པཝཏྟནཏོ ཨཱསཝསཉྙིཏེཧི ཀིལེསེཧི. ཨུཔལཀྑཎཝཙནམཏྟཉྩེཏཾ. ཏདེཀཊྛཏཱཡ ཧི སབྦེཧིཔི ཀིལེསེཧི སབྦེཧིཔི པཱཔདྷམྨེཧི ཙིཏྟཾ ཝིམུཙྩཏིཡེཝ. ཙིཏྟཾ ཝིམུཙྩཱིཏི ཙིཏྟཾ ཨརཧཏྟམགྒཀྑཎེ ཨཱསཝེཧི ཝིམུཙྩམཱནཾ ཧུཏྭཱ ཨརཧཏྟཕལཀྑཎེ ཝིམུཙྩི. ཏདཏྠཾ ཝིཝརཏི ‘‘ཨཡཉྷཱི’’ཏིཨཱདིནཱ. ཙངྐམེནཱཏི ཙངྐམནཀིརིཡཱཡ. ཝིསེསནྟི ཨཏྟནཱ ལདྡྷམགྒཕལཏོ ཝིསེསམགྒཕལཾ. ཝིཝཊྚཱུཔནིསྶཡབྷཱུཏཾ ཀཏཾ ཨུཔཙིཏཾ པུཉྙཾ ཡེནཱཏི ཀཏཔུཉྙོ, ཨརཧཏྟཱདྷིགམཱཡ ཀཏཱདྷིཀཱརོཏི ཨཏྠོ. པདྷཱནམནུཡུཉྫཱཏི ཝཱིརིཡམནུཡུཉྫཱཧི, ཨརཧཏྟསམཱཔཏྟིཡཱ ཨནུཡོགཾ ཀརོཧཱིཏི ཝུཏྟཾ ཧོཏི. ཧོཧིསཱིཏི བྷཝིསྶསི. ཀཐཱདོསོཏི ཀཐཱཡ དོསོ ཝིཏཐབྷཱཝོ. ཨཙྩཱརདྡྷནྟི ཨཏིཝིཡ ཨཱརདྡྷཾ. ཨུདྡྷཙྩཱཡཱཏི ཨུདྡྷཏབྷཱཝཱཡ. ཧནྡཱཏི ཝོསྶགྒཝཙནཾ. ཏེན ཧི ཨདྷུནཱཡེཝ ཡོཛེམི, ན པནཱཧཾ པཔཉྩཾ ཀརོམཱིཏི ཝོསྶགྒཾ ཀརོཏི. ཝཱིརིཡསམཏཾ ཡོཛེམཱིཏི ཙངྐམནཝཱིརིཡསྶ ཨདྷིམཏྟཏྟཱ ཏསྶ ཧཱཔནཝསེན སམཱདྷིནཱ སམཏཱཔཱདནེན ཝཱིརིཡསྶ སམཏཾ སམབྷཱཝཾ ཡོཛེམི, ཝཱིརིཡེན ཝཱ སམཐསངྑཱཏཾ སམཱདྷིཾ ཡོཛེམཱིཏིཔི ཨཏྠོ. དྭིདྷཱཔི ཧི པཱཋོ དིསྶཏི. ཝིསྶམིསྶཱམཱིཏི ཨསྶསིསྶཱམི. ཨིདཱནི ཏསྶ ཝིསེསཏོ པསཾསནཱརཧབྷཱཝཾ དསྶེཏུཾ ‘‘ཏེནཱ’’ཏིཨཱདི ཝུཏྟཾ. ཏེནཱཏི ཙཏུཨིརིཡཱཔཐཝིརཧིཏཏཱཀཱརཎེན. ‘‘ཨནིཔནྣོ’’ཏིཨཱདཱིནི པཙྩུཔྤནྣཝཙནཱནེཝ. པརིནིབྦུཏོཔི སོ ཨཱཀཱསེཡེཝ པརིནིབྦཱཡི. ཏསྨཱ ཐེརསྶ ཀིལེསཔརིནིབྦཱནཾ, ཁནྡྷཔརིནིབྦཱནཉྩ ཝིསེསེན པསཾསཱརཧཾ ཨཙྪརིཡབྦྷུཏམེཝཱཏི.

དུཏིཡདིཝསེཏི ཐེརེན ཨརཧཏྟཔཏྟདིཝསཏོ དུཏིཡདིཝསེ. པཉྩམིཡནྟི ཏིཐཱིཔེཀྑཱཡ ཝུཏྟཾ, ‘‘དུཏིཡདིཝསེ’’ཏི ཨིམིནཱ ཏུལྱཱདྷིཀརཎཾ. བྷིནྣལིངྒམྤི ཧི ཏུལྱཏྠཔདཾ དིསྶཏི ཡཐཱ ‘‘གུཎོ པམཱཎཾ, ཝཱིསཏི ཙིཏྟཱནི’’ ཨིཙྩཱདི. ཀཱལ༹པཀྑསྶཱཏི སཱཝཎམཱསཀཱལ༹པཀྑསྶ. པཋམཉྷི མཱསཾ ཁཎྜཕུལླཔཊིསངྑརཎམཀཾསུ, པཋམམཱསབྷཱཝོ ཙ མཛ྄ཛྷིམཔྤདེསཝོཧཱརེན. ཏཏྠ ཧི པུརིམཔུཎྞམིཏོ ཡཱཝ ཨཔརཱ པུཎྞམཱི, ཏཱཝ ཨེཀོ མཱསོཏི ཝོཧརནྟི. ཏཏོ ཏཱིཎི དིཝསཱནི རཱཛཱ མཎྜཔམཀཱསི, ཏཏོ དུཏིཡདིཝསེ ཐེརོ ཨརཧཏྟཾ སཙྪཱཀཱསི, ཏཏིཡདིཝསེ པན སནྣིཔཏིཏྭཱ ཐེརཱ སངྒཱིཏིམཀཾསུ, ཏསྨཱ ཨཱསལ༹ྷིམཱསཀཱལ༹པཀྑཔཱཊིཔདཏོ ཡཱཝ སཱཝཎམཱསཀཱལ༹པཀྑཔཉྩམཱི ¶ , ཏཱཝ པཉྩདིཝསཱདྷིཀོ ཨེཀམཱསོ ཧོཏི. སམཱནོཏི ཨུཔྤཛྫམཱནོ. ཧཊྛཏུཊྛཙིཏྟོཏི ཨཏིཝིཡ སོམནསྶཙིཏྟོ, པཱམོཛྫེན ཝཱ ཧཊྛཙིཏྟོ པཱིཏིཡཱ ཏུཊྛཙིཏྟོ. ཨེཀཾསནྟི ཨེཀསྨིཾ ཨཾསེ, ཝཱམཾསེཏི ཨཏྠོ. ཏཐཱ ཧི ཝངྒཱིསསུཏྟཝཎྞནཱཡཾ ཝུཏྟཾ –

‘‘ཨེཀཾསཾ ¶ ཙཱིཝརནྟི ཨེཏྠ པུན སཎྛཱཔནཝསེན ཨེཝཾ ཝུཏྟཾ, ཨེཀཾསནྟི ཙ ཝཱམཾསཾ པཱརུཔིཏྭཱ ཋིཏསྶེཏཾ ཨདྷིཝཙནཾ. ཡཏོ ཡཐཱ ཝཱམཾསཾ པཱརུཔིཏྭཱ ཋིཏཾ ཧོཏི, ཏཐཱ ཙཱིཝརཾ ཀཏྭཱཏི ཨེཝམསྶཏྠོ ཝེདིཏབྦོ’’ཏི (སུ. ནི. ཨཊྛ. ༢.༣༤༥).

བནྡྷ…པེ… ཝིཡཱཏི ཝཎྚཏོ པཝུཏྟསུཔརིཔཀྐཏཱལཕལམིཝ. པཎྜུ…པེ… ཝིཡཱཏི སིཏཔཱིཏཔབྷཱཡུཏྟཔཎྜུརོམཛཀམྦལེ ཋཔིཏོ ཛཱཏིམཱ མཎི ཝིཡ, ཛཱཏིཝཙནེན ཙེཏྠ ཀུཏྟིམཾ ནིཝཏྟེཏི. སམུགྒཏཔུཎྞཙནྡོ ཝིཡཱཏི ཛུཎྷཔཀྑཔནྣརསུཔོསཐེ སམུགྒཏོ སོལ༹སཀལཱཔརིཔུཎྞོ ཙནྡོ ཝིཡ. བཱལཱ…པེ… ཝིཡཱཏི ཏརུཎསཱུརིཡཔབྷཱསམྥསྶེན ཕུལླིཏསུཝཎྞཝཎྞཔརཱགགབྦྷཾ སཏཔཏྟཔདྡྷཾ ཝིཡ. ‘‘པིཉྫརསདྡོ ཧི ཧེམཝཎྞཔརིཡཱཡོ’’ཏི (སཱརཏྠ. ཊཱི. ༡.༢༢) སཱརཏྠདཱིཔནིཡཾ ཝུཏྟོ. པརིཡོདཱཏེནཱཏི པབྷསྶརེན. སཔྤབྷེནཱཏི ཝཎྞཔྤབྷཱཡ, སཱིལཔྤབྷཱཡ ཙ སམནྣཱགཏེན. སསྶིརིཀེནཱཏི སརཱིརསོབྷགྒཱདིསངྑཱཏཱཡ སིརིཡཱ ཨཏིཝིཡ སིརིམཏཱ. མུཁཝརེནཱཏི ཡཐཱཝུཏྟསོབྷཱསམལངྐཏཏྟཱ ཨུཏྟམམུཁེན. ཀཱམཾ ‘‘ཨཧམསྨི ཨརཧཏྟཾ པཏྟོ’’ཏི ནཱརོཙེསི, ཏཐཱརཱུཔཱཡ པན ཨུཏྟམལཱིལཱ༹ཡ གམནཏོ པསྶནྟཱ སབྦེཔི ཏམཏྠཾ ཛཱནནྟི, ཏསྨཱ ཨཱརོཙེནྟོ ཝིཡ ཧོཏཱིཏི ཨཱཧ ‘‘ཨཏྟནོ ཨརཧཏྟཔྤཏྟིཾ ཨཱརོཙཡམཱནོ ཝིཡ ཨགམཱསཱི’’ཏི.

ཀིམཏྠཾ པནཱཡཾ ཨེཝམཱརོཙཡམཱནོ ཝིཡ ཨགམཱསཱིཏི? ཝུཙྩཏེ – སོ ཧི ‘‘ཨཏྟུཔནཱཡིཀཾ ཨཀཏྭཱ ཨཉྙབྱཱཀརཎཾ བྷགཝཏཱ སཾཝཎྞིཏ’’ནྟི མནསི ཀརིཏྭཱ ‘‘སེཀྑཏཱཡ དྷམྨཝིནཡསངྒཱིཏིཡཱ གཧེཏུམཡུཏྟམྤི བཧུསྶུཏཏྟཱ གཎྷིསྶཱམཱ’’ཏི ནིསིནྣཱནཾ ཐེརཱནཾ ཨརཧཏྟཔྤཏྟིཝིཛཱནནེན སོམནསྶུཔྤཱདནཏྠཾ, ‘‘ཨཔྤམཏྟོ ཧོཧཱི’’ཏི བྷགཝཏཱ དིནྣཨོཝཱདསྶ ཙ སཕལཏཱདཱིཔནཏྠཾ ཨེཝམཱརོཙཡམཱནོ ཝིཡ ཨགམཱསཱིཏི. ཨཱཡསྨཏོ མཧཱཀསྶཔསྶ ¶ ཨེཏདཧོསི སམསམཊྛཔནཱདིནཱ ཡཐཱཝུཏྟཀཱརཎེན སཏྠུཀཔྤཏྟཱ. དྷརེཡྻཱཏི ཝིཛྫམཱནོ བྷཝེཡྻ. ‘‘སོབྷཏི ཝཏ ཏེ ཨཱཝུསོ ཨཱནནྡ ཨརཧཏྟསམདྷིགམཏཱ’’ཏིཨཱདིནཱ སཱདྷུཀཱརམདཱསི. ཨཡམིདྷ དཱིགྷབྷཱཎཀཱནཾ ཝཱདོ. ཁུདྡཀབྷཱཎཀེསུ ཙ སུཏྟནིཔཱཏཁུདྡཀཔཱཋབྷཱཎཀཱནཾ ཝཱདོཏིཔི ཡུཛྫཏི ཏདཊྛཀཐཱསུཔི ཏཐཱ ཝུཏྟཏྟཱ.

མཛ྄ཛྷིམཾ ནིཀཱཡཾ བྷཎནྟི སཱིལེནཱཏི མཛ྄ཛྷིམབྷཱཎཀཱ, ཏཔྤགུཎཱ ཨཱཙརིཡཱ. ཡཐཱཝུཌྜྷནྟི ཝུཌྜྷཔཊིཔཱཊིཾ, ཏདནཏིཀྐམིཏྭཱ ཝཱ. ཏཏྠཱཏི ཏསྨིཾ བྷིཀྑུསངྒྷེ. ཨཱནནྡསྶ ཨེཏམཱསནནྟི སམྦནྡྷོ. ཏསྨིཾ སམཡེཏི ཏསྨིཾ ཨེཝཾཀཐནསམཡེ. ཐེརོ ཙིནྟེསི ‘‘ཀུཧིཾ གཏོ’’ཏི པུཙྪནྟཱནཾ ཨཏྟཱནཾ དསྶེནྟེ ཨཏིཝིཡ པཱཀཊབྷཱཝེན བྷཝིསྶམཱནཏྟཱ, ཨཡམྤི མཛ྄ཛྷིམབྷཱཎཀེསྭེཝ ཨེཀཙྩཱནཾ ཝཱདོ, ཏསྨཱ ཨིཏིཔི ཨེཀེ ཝདནྟཱིཏི སམྦནྡྷོ. ཨཱཀཱསེན ཨཱགནྟྭཱ ཨཏྟནོ ཨཱསནེཡེཝ ¶ ཨཏྟཱནཾ དསྶེསཱིཏིཔི ཏེསམེཝ ཨེཀཙྩེ ཝདནྟི. པུལླིངྒཝིསཡེ ཧི ‘‘ཨེཀེ’’ཏི ཝུཏྟེ སབྦཏྠ ‘‘ཨེཀཙྩེ’’ཏི ཨཏྠོ ཝེདིཏབྦོ. ཏཱིསུཔི ཙེཏྠ ཝཱདེསུ ཏེསཾ ཏེསཾ བྷཱཎཀཱནཾ ཏེན ཏེནཱཀཱརེན ཨཱགཏམཏྟཾ ཋཔེཏྭཱ ཝིསུཾ ཝིསུཾ ཝཙནེ ཨཉྙཾ ཝིསེསཀཱརཎཾ ནཏྠི. སཏྟམཱསཾ ཀཏཱཡ ཧི དྷམྨཝིནཡསངྒཱིཏིཡཱ ཀདཱཙི པཀཏིཡཱཝ, ཀདཱཙི པཐཝིཡཾ ནིམུཛྫིཏྭཱ, ཀདཱཙི ཨཱཀཱསེན ཨཱགཏཏྟཱ ཏཾ ཏདཱགམནམུཔཱདཱཡ ཏཐཱ ཏཐཱ ཝདནྟི. ཨཔིཙ སངྒཱིཏིཡཱ ཨཱདིདིཝསེཡེཝ པཋམཾ པཀཏིཡཱ ཨཱགནྟྭཱ ཏཏོ པརཾ ཨཱཀཱསམབྦྷུགྒནྟྭཱ པརིསཾ པཏྟཀཱལེ ཏཏོ ཨོཏརིཏྭཱ བྷིཀྑུཔནྟིཾ ཨཔཱིལེ༹ནྟོ པཐཝིཡཾ ནིམུཛྫིཏྭཱ ཨཱསནེ ཨཏྟཱནཾ དསྶེསཱིཏིཔི ཝདནྟི. ཡཐཱ ཝཱ ཏཐཱ ཝཱ ཨཱགཙྪཏུ, ཨཱགམནཱཀཱརམཏྟཾ ན པམཱཎཾ, ཨཱགནྟྭཱ གཏཀཱལེ ཨཱཡསྨཏོ མཧཱཀསྶཔསྶ སཱདྷུཀཱརདཱནམེཝ པམཱཎཾ སཏྠཱརཱ དཱཏབྦསཱདྷུཀཱརདཱནེནེཝ ཨརཧཏྟཔྤཏྟིཡཱ ཨཉྙེསམྤི ཉཱཔིཏཏྟཱ, བྷགཝཏི དྷརམཱནེ པཊིགྒཧེཏབྦཱཡ ཙ པསཾསཱཡ ཐེརསྶ པཊིགྒཧིཏཏྟཱ. ཏསྨཱ ཏམཏྠཾ དསྶེནྟོ ‘‘ཡཐཱ ཝཱ’’ཏིཨཱདིམཱཧ. སབྦཏྠཱཔཱིཏི སབྦེསུཔི ཏཱིསུ ཝཱདེསུ.

བྷིཀྑཱུ ཨཱམནྟེསཱིཏི བྷིཀྑཱུ ཨཱལཔཱིཏི ཨཡམེཏྠ ཨཏྠོ, ཨཉྙཏྲ པན ཉཱཔནེཔི དིསྶཏི ཡཐཱ ‘‘ཨཱམནྟཡཱམི ཝོ བྷིཀྑཝེ, (དཱི. ནི. ༢.༢༡༨) པཊིཝེདཡཱམི ཝོ བྷིཀྑཝེ’’ཏི ¶ (ཨ. ནི. ༧.༧༢) པཀྐོསནེཔི དིསྶཏི ཡཐཱ ‘‘ཨེཧི ཏྭཾ བྷིཀྑུ མམ ཝཙནེན སཱརིཔུཏྟཾ ཨཱམནྟེཧཱི’’ཏི (ཨ. ནི. ༩.༡༡) ཨཱལཔནེཔི དིསྶཏི ཡཐཱ ‘‘ཏཏྲ ཁོ བྷགཝཱ བྷིཀྑཱུ ཨཱམནྟེསི ‘བྷིཀྑཝོ’ཏི’’ (སཾ. ནི. ༡.༢༤༩), ཨིདྷཱཔི ཨཱལཔནེཏི སཱརཏྠདཱིཔནིཡཾ (སཱརཏྠ. ཊཱི. ༡.པཋམམཧཱསངྒཱིཏིཀཐཱཝཎྞནཱ) ཝུཏྟཾ. ཨཱལཔནམཏྟསྶ པན ཨབྷཱཝཏོ ‘‘ཀིཾ པཋམཾ སངྒཱཡཱམཱ’’ཏིཨཱདིནཱ ཝུཏྟེན ཝིཉྙཱཔིཡམཱནཏྠནྟརེན ཙ སཧཙརཎཏོ ཉཱཔནེཝ ཝཊྚཏི, ཏསྨཱ ཨཱམནྟེསཱིཏི པཊིཝེདེསི ཝིཉྙཱཔེསཱིཏི ཨཏྠོ ཝཏྟབྦོ. ‘‘ཏཏྲ ཁོ བྷགཝཱ བྷིཀྑཱུ ཨཱམནྟེསི ‘བྷིཀྑཝོ’ཏི, ‘བྷདྡནྟེ’ཏི ཏེ བྷིཀྑཱུ བྷགཝཏོ པཙྩསྶོསུ’’ནྟིཨཱདཱིསུ (སཾ. ནི. ༡.༢༤༩) ཧི ཨཱལཔནམཏྟམེཝ དིསྶཏི, ན ཝིཉྙཱཔིཡམཱནཏྠནྟརཾ, ཏཾ པན ‘‘བྷཱུཏཔུབྦཾ བྷིཀྑཝེ’’ཏིཨཱདིནཱ (སཾ. ནི. ༡.༢༤༩) པཙྩེཀམེཝ ཨཱརདྡྷཾ. ཏསྨཱ ཏཱདིསེསྭེཝ ཨཱལཔནེ ཝཊྚཏཱིཏི ནོ ཏཀྐོ. སདྡཝིདཱུ པན ཝདནྟི ‘‘ཨཱམནྟཡིཏྭཱ དེཝིནྡོ, ཝིསྶཀམྨཾ མཧིདྡྷིཀ’ནྟིཨཱདཱིསུ (ཙརིཡཱ. ༡༠༧) ཝིཡ མནྟསདྡོ གུཏྟབྷཱསནེ. ཏསྨཱ ‘ཨཱམནྟེསཱི’ཏི ཨེཏསྶ སམྨནྟཡཱིཏི ཨཏྠོ’’ཏི. ‘‘ཨཱཝུསོ’’ཏིཨཱདི ཨཱམནྟནཱཀཱརདཱིཔནཾ. དྷམྨཾ ཝཱ ཝིནཡཾ ཝཱཏི ཨེཏྠ ཝཱ-སདྡོ ཝིཀཔྤནེ, ཏེན ‘‘ཀིམེཀཾ ཏེསུ པཋམཾ སངྒཱཡཱམཱ’’ཏི དསྶེཏི. ཀསྨཱ ཨཱཡཱུཏི ཨཱཧ ‘‘ཝིནཡེ ཋིཏེ’’ཏིཨཱདི. ‘‘ཡསྨཱ, ཏསྨཱ’’ཏི ཙ ཨཛ྄ཛྷཱཧརིཏྭཱ ཡོཛེཏབྦཾ. ཏསྨཱཏི ཏཱཡ ཨཱཡུསརིཀྑཏཱཡ ¶ . དྷུརནྟི ཛེཊྛཀཾ. ནོ ནཔྤཧོཏཱིཏི པཧོཏིཡེཝ. དྭིཔཊིསེདྷོ ཧི སཧ ཨཏིསཡེན པཀཏྱཏྠདཱིཔཀོ.

ཨེཏདགྒནྟི ཨེསོ ཨགྒོ. ལིངྒཝིཔལླཱསེན ཧི ཨཡཾ ནིདྡེསོ. ཡདིདནྟི ཙ ཡོ ཨཡཾ, ཡདིདཾ ཁནྡྷཔཉྩཀནྟི ཝཱ ཡོཛེཏབྦཾ. ཨེཝཉྷི སཏི ‘‘ཨེཏདགྒ’’ནྟི ཡཐཱརུཏལིངྒམེཝ. ‘‘ཡདིད’’ནྟི པདསྶ ཙ ཨཡཾ སབྷཱཝོ, ཡཱ ཏསྶ ཏསྶ ཨཏྠསྶ ཝཏྟབྦསྶ ལིངྒཱནུརཱུཔེན ‘‘ཡོ ཨཡ’’ནྟི ཝཱ ‘‘ཡཱ ཨཡ’’ནྟི ཝཱ ‘‘ཡཾ ཨིད’’ནྟི ཝཱ ཡོཛེཏབྦཏཱ ཏཐཱཡེཝསྶ ཏཏྠ ཏཏྠ དསྶིཏཏྟཱ. བྷིཀྑཱུནཾ ཝིནཡདྷརཱནནྟི ནིདྡྷཱརཎཚཊྛཱིནིདྡེསོ.

ཨཏྟནཱཝ ཨཏྟཱནཾ སམྨནྣཱིཏི སཡམེཝ ཨཏྟཱནཾ སམྨཏཾ ཨཀཱསི. ‘‘ཨཏྟནཱ’’ཏི ཧི ཨིདཾ ཏཏིཡཱཝིསེསནཾ བྷཝཏི, ཏཉྩ པརེཧི སམྨནྣནཾ ནིཝཏྟེཏི, ‘‘ཨཏྟནཱ’’ཏི ཝཱ ཨཡཾ ཝིབྷཏྱནྟཔཏིརཱུཔཀོ ཨབྱཡསདྡོ ¶ . ཀེཙི པན ‘‘ལིངྒཏྠེ ཏཏིཡཱ ཨབྷིཧིཏཀཏྟུབྷཱཝཏོ’’ཏི ཝདནྟི. ཏདཡུཏྟམེཝ ‘‘ཐེརོ’’ཏི ཀཏྟུནོ ཝིཛྫམཱནཏྟཱ. ཝིསྶཛྫནཏྠཱཡ ཨཏྟནཱཝ ཨཏྟཱནཾ སམྨནྣཱིཏི ཡོཛེཏབྦཾ. པུཙྪདྷཱཏུསྶ དྭིཀམྨིཀཏྟཱ ‘‘ཨུཔཱལིཾ ཝིནཡ’’ནྟི ཀམྨདྭཡཾ ཝུཏྟཾ.

བཱིཛནིཾ གཧེཏྭཱཏི ཨེཏྠ བཱིཛནཱིགཧཎཾ དྷམྨཀཐིཀཱནཾ དྷམྨཏཱཏི ཝེདིཏབྦཾ. ཏཱཡ ཧི དྷམྨཀཐིཀཱནཾ པརིསཱཡ ཧཏྠཀུཀྐུཙྩམུཁཝིཀཱརཱདི པཊིཙྪཱདཱིཡཏི. བྷགཝཱ ཙ དྷམྨཀཐིཀཱནཾ དྷམྨཏཱདསྶནཏྠམེཝ ཝིཙིཏྲབཱིཛནིཾ གཎྷཱཏི. ཨཉྙཐཱ ཧི སབྦསྶཔི ལོཀསྶ ཨལངྐཱརབྷཱུཏཾ པརམུཀྐཾསགཏསིཀྑཱསཾཡམཱནཾ བུདྡྷཱནཾ མུཁཙནྡམཎྜལཾ པཊིཙྪཱདེཏབྦཾ ན སིཡཱ. ‘‘པཋམཾ ཨཱཝུསོ ཨུཔཱལི པཱརཱཛིཀཾ ཀཏྠ པཉྙཏྟ’’ནྟི ཀསྨཱ ཝུཏྟཾ, ནནུ ཏསྶ སངྒཱིཏིཡཱ པུརིམཀཱལེ པཋམབྷཱཝོ ན ཡུཏྟོཏི? ནོ ན ཡུཏྟོ བྷགཝཏཱ པཉྙཏྟཱནུཀྐམེན, པཱཏིམོཀྑུདྡེསཱནུཀྐམེན ཙ པཋམབྷཱཝསྶ སིདྡྷཏྟཱ. ཡེབྷུཡྻེན ཧི ཏཱིཎི པིཊཀཱནི བྷགཝཏོ དྷརམཱནཀཱལེ ཋིཏཱནུཀྐམེནེཝ སངྒཱིཏཱནི, ཝིསེསཏོ ཝིནཡཱབྷིདྷམྨཔིཊཀཱནཱིཏི དཊྛབྦཾ. ཀིསྨིཾ ཝཏྠུསྨིནྟི, མེཐུནདྷམྨེཏི ཙ ནིམིཏྟཏྠེ བྷུམྨཝཙནཾ. ‘‘ཀཏྠ པཉྙཏྟ’’ནྟིཨཱདིནཱ དསྶིཏེན སཧ ཏདཝསིཊྛམྤི སངྒཧེཏྭཱ དསྶེཏུཾ ‘‘ཝཏྠུམྤི པུཙྪཱི’’ཏིཨཱདི ཝུཏྟཾ.

སངྒཱིཏིཀཱརཀཝཙནསམྨིསྶཾ ཝཱ ནུ ཁོ, སུདྡྷཾ ཝཱ བུདྡྷཝཙནནྟི ཨཱསངྐཱཔརིཧརཎཏྠཾ, ཡཐཱསངྒཱིཏསྶེཝ པམཱཎབྷཱཝཾ དསྶནཏྠཉྩ པུཙྪཾ སམུདྡྷརིཏྭཱ ཝིསྶཛྫེནྟོ ‘‘ཀིཾ པནེཏྠཱ’’ཏིཨཱདིམཱཧ. ཨེཏྠ པཋམཔཱརཱཛིཀེཏི ཨེཏིསྶཾ ཏཐཱསངྒཱིཏཱཡ པཋམཔཱརཱཛིཀཔཱལི༹ཡཾ. ཏེནེཝཱཧ ‘‘ན ཧི ཏཐཱགཏཱ ཨེཀབྱཉྫནམྤི ནིརཏྠཀཾ ཝདནྟཱི’’ཏི. ཨཔནེཏབྦནྟི ཨཏིརེཀབྷཱཝེན ¶ ནིརཏྠཀཏཱཡ, ཝིཏཐབྷཱཝེན ཝཱ ཨཡུཏྟཏཱཡ ཚཌྜེཏབྦཝཙནཾ. པཀྑིཔིཏབྦནྟི ཨསམྤུཎྞཏཱཡ ཨུཔནེཏབྦཝཙནཾ. ཀསྨཱཏི ཨཱཧ ‘‘ན ཧཱི’’ཏིཨཱདི. སཱཝཀཱནཾ པན དེཝཏཱནཾ ཝཱ བྷཱསིཏེཏི བྷགཝཏོ པུཙྪཱཐོམནཱདིཝསེན བྷཱསིཏཾ སནྡྷཱཡཱཧ. སབྦཏྠཱཔཱིཏི བྷགཝཏོ སཱཝཀཱནཾ དེཝཏཱནཉྩ བྷཱསིཏེཔི. ཏཾ པན པཀྑིཔནཾ སམྦནྡྷཝཙནམཏྟསྶེཝ, ན སབྷཱཝཱཡུཏྟིཡཱ ཨཏྠསྶཱཏི དསྶེཏི ‘‘ཀིཾ པན ཏ’’ནྟིཨཱདིནཱ སམྦནྡྷཝཙནམཏྟནྟི པུབྦཱཔརསམྦནྡྷཝཙནམེཝ. ཨིདཾ པཋམཔཱརཱཛིཀནྟི ཝཝཏྠཔེཏྭཱ ཋཔེསུཾ ཨིམིནཱཝ ཝཱཙནཱམགྒེན ཨུགྒཧཎདྷཱརཎཱདིཀིཙྩནིཔྥཱདནཏྠཾ, ཏདཏྠམེཝ ཙ གཎསཛ྄ཛྷཱཡམཀཾསུ ‘‘ཏེན…པེ… ཝིཧརཏཱི’’ཏི. སཛ྄ཛྷཱཡཱརམྦྷཀཱལེཡེཝ པཐཝཱི ཨཀམྤིཏྠཱཏི ཝདནྟི, ཏདིདཾ པན པཐཝཱིཀམྤནཾ ཐེརཱནཾ དྷམྨསཛ྄ཛྷཱཡཱནུབྷཱཝེནཱཏི ¶ ཉཱཔེཏུཾ ‘‘སཱདྷུཀཱརཾ དདམཱནཱ ཝིཡཱ’’ཏི ཝུཏྟཾ. ཨུདཀཔརིཡནྟནྟི པཐཝཱིསནྡྷཱརཀཨུདཀཔརིཡནྟཾ. ཏསྨིཉྷི ཙལིཏེཡེཝ སཱཔི ཙལཏི, ཨེཏེན ཙ པདེསཔཐཝཱིཀམྤནཾ ནིཝཏྟེཏི.

ཀིཉྩཱཔི པཱལི༹ཡཾ གཎནཱ ནཏྠི, སངྒཱིཏིམཱརོཔིཏཱནི པན ཨེཏྟཀཱནེཝཱཏི དཱིཔེཏུཾ ‘‘པཉྩསཏྟཏི སིཀྑཱཔདཱནཱི’’ཏི ཝུཏྟཾ ‘‘པུརིམནཡེནེཝཱ’’ཏི ཨེཏེན སཱདྷུཀཱརཾ དདམཱནཱ ཝིཡཱཏི ཨཏྠམཱཧ. ན ཀེཝལཾ སིཀྑཱཔདཀཎྜཝིབྷངྒནིཡམེནེཝ, ཨཐ ཁོ པམཱཎནིཡམེནཱཔཱིཏི དསྶེཏུཾ ‘‘ཙཏུསཊྛིབྷཱཎཝཱརཱ’’ཏི ཝུཏྟཾ. ཨེཏྠ ཙ བྷཱཎཝཱརོཏི –

‘‘ཨཊྛཀྑརཱ ཨེཀཔདཾ, ཨེཀགཱཐཱ ཙཏུཔྤདཾ;

གཱཐཱ ཙེཀཱ མཏོ གནྠོ, གནྠོ བཱཏྟིཾསཏཀྑརོ.

བཱཏྟིཾསཀྑརགནྠཱནཾ, པཉྙཱསདྭིསཏཾ པན;

བྷཱཎཝཱརོ མཏོ ཨེཀོ, སྭཊྛཀྑརསཧསྶཀོ’’ཏི.

ཨེཝཾ ཨཊྛཀྑརསཧསྶཔརིམཱཎོ པཱཋོ ཝུཙྩཏི. བྷཎིཏབྦོ ཝཱརོ ཡསྶཱཏི ཧི བྷཱཎཝཱརོ, ཨེཀེན སཛ྄ཛྷཱཡནམགྒེན ཀཐེཏབྦཝཱརོཏི ཨཏྠོ. ཁནྡྷཀནྟི མཧཱཝགྒཙཱུལ༹ཝགྒཾ. ཁནྡྷཱནཾ སམཱུཧཏོ, པཀཱསནཏོ ཝཱ ཁནྡྷཀོཏི ཧི ཝུཙྩཏི, ཁནྡྷཱཏི ཙེཏྠ པབྦཛྫཱུཔསམྤདཱདིཝིནཡཀམྨསངྑཱཏཱ, ཙཱརིཏྟཝཱརིཏྟསིཀྑཱཔདསངྑཱཏཱ ཙ པཉྙཏྟིཡོ ཨདྷིཔྤེཏཱ. པབྦཛྫཱདཱིནི ཧི བྷགཝཏཱ པཉྙཏྟཏྟཱ པཉྙཏྟིཡོཏི ཝུཙྩནྟི. པཉྙཏྟིཡཉྩ ཁནྡྷསདྡོ དིསྶཏི ‘‘དཱརུཀྑནྡྷོ, (ཨ. ནི. ༦.༤༡) ཨགྒིཀྑནྡྷོ (ཨ. ནི. ༧.༧༢), ཨུདཀཀྑནྡྷོ’’ཏིཨཱདཱིསུ (ཨ. ནི. ༥.༤༥; ༦.༣༧) ཝིཡ. ཨཔིཙ བྷཱགརཱསཊྛཏཱཔི ¶ ཡུཛྫཏིཡེཝ ཏཱསཾ པཉྙཏྟཱིནཾ བྷཱགཏོ, རཱསིཏོ ཙ ཝིབྷཏྟཏྟཱ, ཏཾ པན ཝིནཡཔིཊཀཾ བྷཱཎཀེཧི རཀྑིཏཾ གོཔིཏཾ སངྒཧཱརུལ༹ྷནཡེནེཝ ཙིརཀཱལཾ ཨནསྶམཱནཾ ཧུཏྭཱ པཏིཊྛཧིསྶཏཱིཏི ཨཱཡསྨནྟཾ ཨུཔཱལིཏྠེརཾ པཊིཙྪཱཔེསུཾ ‘‘ཨཱཝུསོ ཨིམཾ ཏུཡ྄ཧཾ ནིསྶིཏཀེ ཝཱཙེཧཱི’’ཏི.

དྷམྨཾ སངྒཱཡིཏུཀཱམོཏི སུཏྟནྟཱབྷིདྷམྨསངྒཱིཏིཾ ཀཏྟུཀཱམོ ‘‘དྷམྨོ ཙ ཝིནཡོ ཙ དེསིཏོ པཉྙཏྟོ’’ཏིཨཱདཱིསུ (དཱི. ནི. ༢.༢༡༦) ཝིཡ པཱརིསེསནཡེན དྷམྨསདྡསྶ སུཏྟནྟཱབྷིདྷམྨེསྭེཝ པཝཏྟནཏོ. ཨཡམཏྠོ ཨུཔརི ཨཱཝི བྷཝིསྶཏི.

སངྒྷཾ ཉཱཔེསཱིཏི ཨེཏྠ ཧེཊྛཱ ཝུཏྟནཡེན ཨཏྠོ ཝེདིཏབྦོ. ཀཏརཾ ཨཱཝུསོ པིཊཀནྟི ཝིནཡཱཝསེསེསུ དྭཱིསུ པིཊཀེསུ ཀཏརཾ པིཊཀཾ. ཝིནཡཱབྷིདྷམྨཱནམྤི ¶ ཁུདྡཀསངྒཱིཏིཔརིཡཱཔནྣཏྟཱ ཏམནྟརེན ཝུཏྟཾ ‘‘སུཏྟནྟཔིཊཀེ ཙཏསྶོ སངྒཱིཏིཡོ’’ཏི. སངྒཱིཏིཡོཏི ཙ སངྒཱཡནཀཱལེ དཱིགྷཱདིཝསེན ཝིསུཾ ཝིསུཾ ནིཡམེཏྭཱ སངྒཡ྄ཧམཱནཏྟཱ ནིཀཱཡཱཝ ཝུཙྩནྟི. ཏེནཱཧ ‘‘དཱིགྷསངྒཱིཏི’’ནྟིཨཱདི. སུཏྟཱནེཝ སམྤིཎྜེཏྭཱ ཝགྒཀརཎཝསེན ཏཡོ ཝགྒཱ, ནཱཉྙཱནཱིཏི དསྶེཏུཾ ‘‘ཙཏུཏྟིཾས སུཏྟཱནི ཏཡོ ཝགྒཱ’’ཏི ཝུཏྟཾ. ཏསྨཱ ཙཏུཏྟིསཾ སུཏྟཱནི ཏཡོ ཝགྒཱ ཧོནྟི, སུཏྟཱནི ཝཱ ཙཏུཏྟིཾས, ཏེསཾ ཝགྒཀརཎཝསེན ཏཡོ ཝགྒཱ, ཏེསུ ཏཱིསུ ཝགྒེསཱུཏི ཡོཛེཏབྦཾ. ‘‘བྲཧྨཛཱལསུཏྟཾ ནཱམ ཨཏྠི, ཏཾ པཋམཾ སངྒཱཡཱམཱ’’ཏི ཝུཏྟེ ཀསྨཱཏི ཙོདནཱསམྦྷཝཏོ ‘‘ཏིཝིདྷསཱིལཱལངྐཏ’’ནྟིཨཱདིམཱཧ. ཧེཏུགབྦྷཱནི ཧི ཨེཏཱནི. ཙཱུལ༹མཛ྄ཛྷིམམཧཱསཱིལཝསེན ཏིཝིདྷསྶཱཔི སཱིལསྶ པཀཱསནཏྟཱ ཏེན ཨལངྐཏཾ ཝིབྷཱུསིཏཾ ཏཐཱ ནཱནཱཝིདྷེ མིཙྪཱཛཱིཝབྷཱུཏེ ཀུཧནལཔནཱདཡོ ཝིདྡྷཾསེཏཱིཏི ནཱནཱཝིདྷམིཙྪཱཛཱིཝཀུཧནལཔནཱདིཝིདྡྷཾསནཾ. ཏཏྠ ཀུཧནཱཏི ཀུཧཱཡནཱ, པཙྩཡཔཊིསེཝནསཱམནྟཛཔྤནཨིརིཡཱཔཐསནྣིསྶིཏསངྑཱཏེན ཏིཝིདྷེན ཝཏྠུནཱ ཝིམྷཱཔནཱཏི ཨཏྠོ. ལཔནཱཏི ཝིཧཱརཾ ཨཱགཏེ མནུསྶེ དིསྭཱ ‘‘ཀིམཏྠཱཡ བྷོནྟོ ཨཱགཏཱ, ཀིཾ བྷིཀྑཱུ ནིམནྟེཏུཾ. ཡདི ཨེཝཾ གཙྪཐ, ཨཧཾ པཙྪཏོ བྷིཀྑཱུ གཧེཏྭཱ ཨཱགཙྪཱམཱི’’ཏི ཨེཝམཱདིནཱ བྷཱསནཱ. ཨཱདིསདྡེན པུཔྥདཱནཱདཡོ, ནེམིཏྟིཀཏཱདཡོ ཙ སངྒཎྷཱཏི. ཨཔིཙེཏྠ མིཙྪཱཛཱིཝསདྡེན ཀུཧནལཔནཱཧི སེསཾ ཨནེསནཾ གཎྷཱཏི. ཨཱདིསདྡེན པན ཏདཝསེསཾ མཧིཙྪཏཱདིཀཾ དུསྶིལྱནྟི དཊྛབྦཾ. དྭཱསཊྛི དིཊྛིཡོ ཨེཝ པལིཝེཋནཊྛེན ཛཱལསརིཀྑཏཱཡ ཛཱལཾ, ཏསྶ ཝིནིཝེཋནཾ ཨཔལིཝེཋཀརཎཾ ཏཐཱ.

ཨནྟརཱ ཙ བྷནྟེ རཱཛགཧཾ ཨནྟརཱ ཙ ནཱལ༹ནྡནྟི ཨེཏྠ ཨནྟརཱསདྡོ ཝིཝརེ ‘‘ཨཔིཙཱཡཾ བྷིཀྑཝེ ¶ ཏཔོདཱདྭིནྣཾ མཧཱནིརཡཱནཾ ཨནྟརིཀཱཡ ཨཱགཙྪཏཱི’’ཏིཨཱདཱིསུ (པཱརཱ. ༢༣༡) ཝིཡ. ཏསྨཱ རཱཛགཧསྶ ཙ ནཱལ༹ནྡསྶ ཙ ཝིཝརེཏི ཨཏྠོ དཊྛབྦོ. ཨནྟརཱསདྡེན པན ཡུཏྟཏྟཱ ཨུཔཡོགཝཙནཾ ཀཏཾ. ཨཱིདིསེསུ ཋཱནེསུ ཨཀྑརཙིནྟཀཱ ‘‘ཨནྟརཱ གཱམཉྩ ནདིཉྩ ཡཱཏཱི’’ཏི ཨེཝཾ ཨེཀམེཝ ཨནྟརཱསདྡཾ པཡུཛྫནྟི, སོ དུཏིཡཔདེནཔི ཡོཛེཏབྦོ ཧོཏི. ཨཡོཛིཡམཱནེ ཧི ཨུཔཡོགཝཙནཾ ན པཱཔུཎཱཏི སཱམིཝཙནསྶ པསངྒེ ཨནྟརཱསདྡཡོགེན ཨུཔཡོགཝཙནསྶ ཨིཙྪིཏཏྟཱ. ཏཏྠ རཉྙོ ཀཱིལ༹ནཏྠཾ པཊིབྷཱནཙིཏྟཝིཙིཏྲཨགཱརམཀཾསུ, ཏཾ ‘‘རཱཛཱགཱརཀ’’ནྟི ཝུཙྩཏི, ཏསྨིཾ. ཨམྦལཊྛིཀཱཏི རཉྙོ ¶ ཨུཡྻཱནཾ. ཏསྶ ཀིར དྭཱརསམཱིཔེ ཏརུཎོ ཨམྦརུཀྑོ ཨཏྠི, ཏཾ ‘‘ཨམྦལཊྛིཀཱ’’ཏི ཝདནྟི, ཏསྶ སམཱིཔེ པཝཏྟཏྟཱ ཨུཡྻཱནམྤི ‘‘ཨམྦལཊྛིཀཱ’’ ཏྭེཝ སངྑྱཾ གཏཾ ཡཐཱ ‘‘ཝརུཎནགར’’ནྟི, ཏསྨཱ ཨམྦལཊྛིཀཱཡཾ ནཱམ ཨུཡྻཱནེ རཱཛཱགཱརཀེཏི ཨཏྠོ. ཨཝིཉྙཱཡམཱནསྶ ཧི ཝིཉྙཱཔནཏྠཾ ཨེཏཾ ཨཱདྷཱརདྭཡཾ ཝུཏྟཾ རཱཛཱགཱརམེཏསྶཱཏི ཝཱ རཱཛཱགཱརཀཾ, ཨུཡྻཱནཾ, རཱཛཱགཱརཝཏི ཨམྦལཊྛིཀཱཡཾ ནཱམ ཨུཡྻཱནེཏི ཨཏྠོ. བྷིནྣལིངྒམྤི ཧི ཝིསེསནཔདམཏྠཱི’’ཏི ཀེཙི ཝདནྟི, ཨེཝཾ སཏི རཱཛཱགཱརཾ ཨཱདྷཱརོ ན སིཡཱ. ‘‘རཱཛཱགཱརཀེཏི ཨེཝཾནཱམཀེ ཨུཡྻཱནེ ཨབྷིརམནཱརཧཾ ཀིར རཱཛཱགཱརམྤི. ཏཏྠ, ཡསྶ ཝསེནེཏཾ ཨེཝཾ ནཱམཾ ལབྷཏཱི’’ཏི (ཝཛིར. ཊཱི. པཋམམཧཱསངྒཱིཏིཀཐཱཝཎྞནཱ) ཝཛིརབུདྡྷིཏྠེརོ. ཨེཝཾ སཏི ‘‘ཨམྦལཊྛིཀཱཡ’’ནྟི ཨཱསནྣཏརུཎམྦརུཀྑེན ཝིསེསེཏྭཱ ‘‘རཱཛཱགཱརཀེ’’ཏི ཨུཡྻཱནམེཝ ནཱམཝསེན ཝུཏྟནྟི ཨཏྠོ ཨཱཔཛྫཏི, ཏཐཱ ཙ ཝུཏྟདོསོཝ སིཡཱ. སུཔྤིཡཉྩ པརིབྦཱཛཀནྟི སུཔྤིཡཾ ནཱམ སཉྩཡསྶ ཨནྟེཝཱསིཾ ཚནྣཔརིབྦཱཛཀཉྩ. བྲཧྨདཏྟཉྩ མཱཎཝནྟི ཨེཏྠ ཏརུཎོ ‘‘མཱཎཝོ’’ཏི ཝུཏྟོ ‘‘ཨམྦཊྛོ མཱཎཝོ, ཨངྒཀོ མཱཎཝོ’’ཏིཨཱདཱིསུ (དཱི. ནི. ༡.༢༥༩, ༢༡༡) ཝིཡ, ཏསྨཱ བྲཧྨདཏྟཾ ནཱམ ཏརུཎཔུརིསཉྩ ཨཱརབྦྷཱཏི ཨཏྠོ. ཝཎྞཱཝཎྞེཏི པསཾསཱཡ ཙེཝ གརཧཱཡ ཙ. ཨཐ ཝཱ གུཎོ ཝཎྞོ, ཨགུཎོ ཨཝཎྞོ, ཏེསཾ བྷཱསནཾ ཨུཏྟརཔདལོཔེན ཏཐཱ ཝུཏྟཾ ཡཐཱ ‘‘རཱུཔབྷཝོ རཱུཔ’’ནྟི.

‘‘ཏཏོ པར’’ནྟིཨཱདིམྷི ཨཡཾ ཝཙནཀྐམོ – སཱམཉྙཕལཾ པནཱཝུསོ ཨཱནནྡ ཀཏྠ བྷཱསིཏནྟི? རཱཛགཧེ བྷནྟེ ཛཱིཝཀམྦཝནེཏི. ཀེན སདྡྷིནྟི? ཨཛཱཏསཏྟུནཱ ཝེདེཧིཔུཏྟེན སདྡྷིནྟི. ཨཐ ཁོ ཨཱཡསྨཱ མཧཱཀསྶཔོ ཨཱཡསྨནྟཾ ཨཱནནྡཾ སཱམཉྙཕལསྶ ནིདཱནམྤི པུཙྪི, པུགྒལམྤི པུཙྪཱིཏི. ཨེཏྠ ཧི ‘‘ཀཾ ཨཱརབྦྷཱ’’ཏི ཨཝཏྭཱ ‘‘ཀེན སདྡྷི’’ནྟི ཝཏྟབྦཾ. ཀསྨཱཏི ཙེ? ན བྷགཝཏཱ ཨེཝ ཨེཏཾ སུཏྟཾ བྷཱསིཏཾ, རཉྙཱཔི ‘‘ཡཐཱ ནུ ཁོ ཨིམཱནི པུཐུསིཔྤཱཡཏནཱནཱི’’ཏིཨཱདིནཱ (དཱི. ནི. ༡.༡༦༣) ཀིཉྩི ཀིཉྩི ཝུཏྟམཏྠི, ཏསྨཱ ཨེཝམེཝ ཝཏྟབྦནྟི. ཨིམིནཱཝ ནཡེན སབྦཏྠ ‘‘ཀཾ ཨཱརབྦྷཱ’’ཏི ཝཱ ‘‘ཀེན སདྡྷི’’ནྟི ཝཱ ཡཐཱརཧཾ ཝཏྭཱ སངྒཱིཏིམཀཱསཱིཏི དཊྛབྦཾ. ཏནྟིནྟི སུཏྟཝགྒསམུདཱཡཝསེན ཝཝཏྠིཏཾ པཱལི༹ཾ. ཨེཝཉྩ ¶ ཀཏྭཱ ‘‘ཏིཝགྒསངྒཧཾ ཙཏུཏྟིཾསསུཏྟཔཊིམཎྜིཏ’’ནྟི ཝཙནཾ ཨུཔཔནྣཾ ཧོཏི. པརིཧརཐཱཏི ཨུགྒཧཎཝཱཙནཱདིཝསེན དྷཱརེཐ. ཏཏོ ཨནནྟརཾ སངྒཱཡིཏྭཱཏི སམྦནྡྷོ.

‘‘དྷམྨསངྒཧོ ¶ ཙཱ’’ཏིཨཱདིནཱ སམཱསོ. ཨེཝཾ སཾཝཎྞིཏཾ པོརཱཎཀེཧཱིཏི ཨཏྠོ. ཨེཏེན ‘‘མཧཱདྷམྨཧདཡེན, མཧཱདྷཱཏུཀཐཱཡ ཝཱ སདྡྷིཾ སཏྟཔྤཀརཎཾ ཨབྷིདྷམྨཔིཊཀཾ ནཱམཱ’’ཏི ཝུཏྟཾ ཝིཏཎྜཝཱདིམཏཾ པཊིཀྑིཔིཏྭཱ ‘‘ཀཐཱཝཏྠུནཱཝ སདྡྷི’’ནྟི ཝུཏྟཾ སམཱནཝཱདིམཏཾ དསྶེཏི. སཎྷཉཱཎསྶ, སཎྷཉཱཎཝནྟཱནཾ ཝཱ ཝིསཡབྷཱཝཏོ སུཁུམཉཱཎགོཙརཾ.

ཙཱུལ༹ནིདྡེསམཧཱནིདྡེསཝསེན དུཝིདྷོཔི ནིདྡེསོ. ཛཱཏཀཱདིཀེ ཁུདྡཀནིཀཱཡཔརིཡཱཔནྣེ, ཡེབྷུཡྻེན ཙ དྷམྨནིདྡེསབྷཱུཏེ ཏཱདིསེ ཨབྷིདྷམྨཔིཊཀེཝ སངྒཎྷིཏུཾ ཡུཏྟཾ, ན པན དཱིགྷནིཀཱཡཱདིཔྤཀཱརེ སུཏྟནྟཔིཊཀེ, ནཱཔི པཉྙཏྟིནིདྡེསབྷཱུཏེ ཝིནཡཔིཊཀེཏི དཱིགྷབྷཱཎཀཱ ཛཱཏཀཱདཱིནཾ ཨབྷིདྷམྨཔིཊཀེ སངྒཧཾ ཝདནྟི. ཙརིཡཱཔིཊཀབུདྡྷཝཾསཱནཉྩེཏྠ ཨགྒཧཎཾ ཛཱཏཀགཏིཀཏྟཱ, ནེཏྟིཔེཊཀོཔདེསཱདཱིནཉྩ ནིདྡེསཔཊིསམྦྷིདཱམགྒགཏིཀཏྟཱ. མཛ྄ཛྷིམབྷཱཎཀཱ པན ཨཊྛུཔྤཏྟིཝསེན དེསིཏཱནཾ ཛཱཏཀཱདཱིནཾ ཡཐཱནུལོམདེསནཱབྷཱཝཏོ ཏཱདིསེ སུཏྟནྟཔིཊཀེ སངྒཧོ ཡུཏྟོ, ན པན སབྷཱཝདྷམྨནིདྡེསབྷཱུཏེ ཡཐཱདྷམྨསཱསནེ ཨབྷིདྷམྨཔིཊཀེ, ནཱཔི པཉྙཏྟིནིདྡེསབྷཱུཏེ ཡཐཱཔརཱདྷསཱསནེ ཝིནཡཔིཊཀེཏི ཛཱཏཀཱདཱིནཾ སུཏྟནྟཔིཊཀཔརིཡཱཔནྣཏཾ ཝདནྟི. ཡུཏྟམེཏྠ ཝིཙཱརེཏྭཱ གཧེཏབྦཾ.

ཨེཝཾ ནིམིཏྟཔཡོཛནཀཱལདེསཀཱརཀཀརཎཔྤཀཱརེཧི པཋམཾ སངྒཱིཏིཾ དསྶེཏྭཱ ཨིདཱནི ཏཏྠ ཝཝཏྠཱཔིཏེསུ དྷམྨཝིནཡེསུ ནཱནཔྤཀཱརཀོསལླཏྠཾ ཨེཀཝིདྷཱདིབྷེདཾ དསྶེཏུཾ ‘‘ཨེཝམེཏ’’ནྟིཨཱདིམཱཧ. ཏཏྠ ‘‘ཨེཝ’’ནྟི ཨིམིནཱ ཨེཏསདྡེན པརཱམསིཏབྦཾ ཡཐཱཝུཏྟསངྒཱིཏིཔྤཀཱརཾ ནིདསྶེཏི. ‘‘ཡཉྷཱི’’ཏིཨཱདི ཝིཏྠཱརོ. ཨནུཏྟརཾ སམྨཱསམྦོདྷིནྟི ཨནཱཝརཎཉཱཎཔདཊྛཱནཾ མགྒཉཱཎཾ, མགྒཉཱཎཔདཊྛཱནཉྩ ཨནཱཝརཎཉཱཎཾ. ཨེཏྠནྟརེཏི ཨབྷིསམྦུཛ྄ཛྷནསྶ, པརིནིབྦཱཡནསྶ ཙ ཝིཝརེ. ཏདེཏཾ པཉྩཙཏྟཱལཱིས ཝསྶཱནཱིཏི ཀཱལཝསེན ནིཡམེཏི. པཙྩཝེཀྑནྟེན ཝཱཏི ཨུདཱནཱདིཝསེན པཝཏྟདྷམྨཾ སནྡྷཱཡཱཧ. ཡཾ ཝཙནཾ ཝུཏྟཾ, སབྦཾ ཏནྟི སམྦནྡྷོ. ཀིཾ པནེཏནྟི ཨཱཧ ‘‘ཝིམུཏྟིརསམེཝཱ’’ཏི, ན ཏདཉྙརསནྟི ཝུཏྟཾ ཧོཏི. ཝིམུཙྩིཏྠཱཏི ཝིམུཏྟི, རསིཏབྦཾ ཨསྶཱདེཏབྦནྟི རསཾ, ཝིམུཏྟིསངྑཱཏཾ རསམེཏསྶཱཏི ཝིམུཏྟིརསཾ, ཨརཧཏྟཕལསྶཱདནྟི ཨཏྠོ. ཨཡཾ ཨཱཙརིཡསཱརིཔུཏྟཏྠེརསྶ མཏི (སཱརཏྠ. ཊཱི. པཋམམཧཱསངྒཱིཏིཀཐཱཝཎྞནཱ). ཨཱཙརིཡདྷམྨཔཱལཏྠེརོ པན ཏཾ ཀེཙིཝཱདཾ ཀཏྭཱ ཨིམམཏྠམཱཧ ¶ ‘‘ཝིམུཙྩཏི ཝིམུཙྩིཏྠཱཏི ཝིམུཏྟི, ཡཐཱརཧཾ མགྒོ ཕལཉྩ. རསནྟི གུཎོ, སམྤཏྟིཀིཙྩཾ ཝཱ ¶ , ཝུཏྟནཡེན སམཱསོ. ཝིམུཏྟཱནིསཾསཾ, ཝིམུཏྟིསམྤཏྟིཀཾ ཝཱ མགྒཕལནིཔྥཱདནཏོ, ཝིམུཏྟིཀིཙྩཾ ཝཱ ཀིལེསཱནམཙྩནྟཝིམུཏྟིསམྤཱདནཏོཏི ཨཏྠོ’’ཏི (དཱི. ནི. ཊཱི. ༡.པཋམམཧཱསངྒཱིཏིཀཐཱཝཎྞནཱ). ཨངྒུཏྟརཊྛཀཐཱཡཾ པན ‘‘ཨཏྠརསསྶཱདཱིསུ ཨཏྠརསོ ནཱམ ཙཏྟཱརི སཱམཉྙཕལཱནི, དྷམྨརསོ ནཱམ ཙཏྟཱརོ མགྒཱ, ཝིམུཏྟིརསོ ནཱམ ཨམཏནིབྦཱན’’ནྟི (ཨ. ནི. ཨཊྛ. ༡.༡.༣༣༥) ཝུཏྟཾ.

ཀིཉྩཱཔི ཨཝིསེསེན སབྦམྤི བུདྡྷཝཙནཾ ཀིལེསཝིནཡནེན ཝིནཡོ, ཡཐཱནུསིཊྛཾ པཊིཔཛྫམཱནེ ཨཔཱཡཔཏནཱདིཏོ དྷཱརཎེན དྷམྨོ ཙ ཧོཏི, ཏཐཱཔི ཨིདྷཱདྷིཔྤེཏེཡེཝ དྷམྨཝིནཡེ ཝཏྟིཙྪཱཝསེན སརཱུཔཏོ ནིདྡྷཱརེཏུཾ ‘‘ཏཏྠ ཝིནཡཔིཊཀ’’ནྟིཨཱདིམཱཧ. ཨཝསེསཾ བུདྡྷཝཙནཾ དྷམྨོ ཁནྡྷཱདིཝསེན སབྷཱཝདྷམྨདེསནཱབཱཧུལླཏོ. ཨཐ ཝཱ ཡདིཔི ཝིནཡོ ཙ དྷམྨོཡེཝ པརིཡཏྟིཡཱདིབྷཱཝཏོ, ཏཐཱཔི ཝིནཡསདྡསནྣིདྷཱནེ བྷིནྣཱདྷིཀརཎབྷཱཝེན པཡུཏྟོ དྷམྨསདྡོ ཝིནཡཏནྟི ཝིཔརཱིཏཾ ཏནྟིམེཝ དཱིཔེཏི ཡཐཱ ‘‘པུཉྙཉཱཎསམྦྷཱརཱ, གོབལཱིབདྡ’’ནྟི. པཡོགཝསེན ཏཾ དསྶེནྟེན ‘‘ཏེནེཝཱཧཱ’’ཏིཨཱདི ཝུཏྟཾ. ཡེན ཝིནཡ…པེ… དྷམྨོ, ཏེནེཝ ཏེསཾ ཏཐཱབྷཱཝཾ སངྒཱིཏིཀྑནྡྷཀེ (ཙཱུལ༹ཝ. ༣༤༧) ཨཱཧཱཏི ཨཏྠོ.

‘‘ཨནེཀཛཱཏིསཾསཱར’’ནྟི ཨཡཾ གཱཐཱ བྷགཝཏཱ ཨཏྟནོ སབྦཉྙུཏཉྙཱཎཔདཊྛཱནཾ ཨརཧཏྟཔྤཏྟིཾ པཙྩཝེཀྑནྟེན ཨེཀཱུནཝཱིསཏིམསྶ པཙྩཝེཀྑཎཉཱཎསྶ ཨནནྟརཾ བྷཱསིཏཱ, ཏསྨཱ ‘‘པཋམབུདྡྷཝཙན’’ནྟི ཝུཏྟཱ. ཨིདཾ ཀིར སབྦབུདྡྷེཧི ཨཝིཛཧིཏཾ ཨུདཱནཾ. ཨཡམསྶ སངྑེཔཏྠོ – ཨཧཾ ཨིམསྶ ཨཏྟབྷཱཝསངྑཱཏསྶ གེཧསྶ ཀཱརཀཾ ཏཎྷཱཝཌྜྷཀིཾ གཝེསནྟོ ཡེན ཉཱཎེན ཏཾ དཊྛུཾ སཀྐཱ, ཏསྶ བོདྷིཉཱཎསྶཏྠཱཡ དཱིཔངྐརཔཱདམཱུལེ ཀཏཱབྷིནཱིཧཱརོ ཨེཏྟཀཾ ཀཱལཾ ཨནེཀཛཱཏིསཾསཱརཾ ཨནེཀཛཱཏིསཏསཧསྶསངྑྱཾ སཾསཱརཝཊྚཾ ཨནིབྦིསཾ ཨནིབྦིསནྟོ ཏཾ ཉཱཎཾ ཨཝིནྡནྟོ ཨལབྷནྟོཡེཝ སནྡྷཱཝིསྶཾ སཾསརིཾ. ཡསྨཱ ཛརཱབྱཱདྷིམརཎམིསྶཏཱཡ ཛཱཏི ནཱམེསཱ པུནཔྤུནཾ ཨུཔགནྟུཾ དུཀྑཱ, ན ཙ སཱ ཏསྨིཾ ཨདིཊྛེ ནིཝཏྟཏི, ཏསྨཱ ཏཾ གཝེསནྟོ སནྡྷཱཝིསྶནྟི ཨཏྠོ. ཨིདཱནི བྷོ ཨཏྟབྷཱཝསངྑཱཏསྶ གེཧསྶ ཀཱརཀ ཏཎྷཱཝཌྜྷཀི ཏྭཾ མཡཱ སབྦཉྙུཏཉྙཱཎཾ པཊིཝིཛ྄ཛྷནྟེན དིཊྛོ ཨསི. པུན ཨིམཾ ཨཏྟབྷཱཝསངྑཱཏཾ མམ གེཧཾ ན ཀཱཧསི ན ཀརིསྶསི. ཏཝ སབྦཱ ཨཝསེསཀིལེས ཕཱསུཀཱ མཡཱ བྷགྒཱ བྷཉྫིཏཱ ¶ . ཨིམསྶ ཏཡཱ ཀཏསྶ ཨཏྟབྷཱཝསངྑཱཏསྶ གེཧསྶ ཀཱུཊཾ ཨཝིཛྫཱསངྑཱཏཾ ཀཎྞིཀམཎྜལཾ ཝིསངྑཏཾ ཝིདྡྷཾསིཏཾ. ཨིདཱནི མམ ཙིཏྟཾ ཝིསངྑཱརཾ ནིབྦཱནཾ ཨཱརམྨཎཀརཎཝསེན གཏཾ ཨནུཔཝིཊྛཾ. ཨཧཉྩ ཏཎྷཱནཾ ཁཡ སངྑཱཏཾ ཨརཧཏྟམགྒཾ, ཨརཧཏྟཕལཾ ཝཱ ཨཛ྄ཛྷགཱ ཨདྷིགཏོ པཏྟོསྨཱིཏི. གཎྛིཔདེསུ པན ཝིསངྑཱརགཏཾ ¶ ཙིཏྟམེཝ ཏཎྷཱནཾ ཁཡསངྑཱཏཾ ཨརཧཏྟམགྒཾ, ཨརཧཏྟཕལཾ ཝཱ ཨཛ྄ཛྷགཱ ཨདྷིགཏནྟི ཨཏྠོ ཝུཏྟོ.

‘‘སནྡྷཱཝིསྶ’’ནྟི ཨེཏྠ ཙ ‘‘གཱཐཱཡམཏཱིཏཏྠེ ཨིམིསྶ’’ནྟི ནེརུཏྟིཀཱ. ‘‘ཏཾཀཱལཝཙནིཙྪཱཡམཏཱིཏེཔི བྷཝིསྶནྟཱི’’ཏི ཀེཙི. པུནཔྤུནནྟི ཨབྷིཎྷཏྠེ ནིཔཱཏོ. པཱཏབྦཱ རཀྑིཏབྦཱཏི ཕཱསུ པ-ཀཱརསྶ ཕ-ཀཱརཾ ཀཏྭཱ, ཕུསིཏབྦཱཏི ཝཱ ཕཱསུ, སཱཡེཝ ཕཱསུཀཱ. ཨཛ྄ཛྷགཱཏི ཙ ‘‘ཨཛྫཏནིཡམཱཏྟམིཾ ཝཱ ཨཾ ཝཱ’’ཏི ཝདནྟི. ཡདི པན ཙིཏྟམེཝ ཀཏྟཱ, ཏདཱ པརོཀྑཱཡེཝ. ཨནྟོཛཔྤནཝསེན ཀིར བྷགཝཱ ‘‘ཨནེཀཛཱཏིསཾསཱར’’ནྟི གཱཐཱདྭཡམཱཧ, ཏསྨཱ ཨེསཱ མནསཱ པཝཏྟིཏདྷམྨཱནམཱདི. ‘‘ཡདཱ ཧཝེ པཱཏུབྷཝནྟི དྷམྨཱ’’ཏི ཨཡཾ པན ཝཱཙཱཡ པཝཏྟིཏདྷམྨཱནནྟི ཝདནྟི.

ཀེཙཱིཏི ཁནྡྷཀབྷཱཎཀཱ. པཋམཾ ཝུཏྟོ པན དྷམྨཔདབྷཱཎཀཱནཾ ཝཱདོ. ཡདཱ…པེ… དྷམྨཱཏི ཨེཏྠ ནིདསྶནཏྠོ, ཨཱདྱཏྠོ ཙ ཨིཏི-སདྡོ ལུཏྟནིདྡིཊྛོ. ནིདསྶནེན ཧི མརིཡཱདཝཙནེན ཝིནཱ པདཏྠཝིཔལླཱསཀཱརིནཱཝ ཨཏྠོ པརིཔུཎྞོ ན ཧོཏི. ཏཏྠ ཨཱདྱཏྠམེཝ ཨིཏི-སདྡཾ གཧེཏྭཱ ཨིཏི-སདྡོ ཨཱདིཨཏྠོ, ‘‘ཏེན ཨཱཏཱཔིནོ…པེ… སཧེཏུདྷམྨ’ནྟིཨཱདིགཱཐཱཏྟཡཾ སངྒཎྷཱཏཱི’’ཏི (སཱརཏྠ. ཊཱི. པཋམམཧཱསངྒཱིཏིཀཐཱཝཎྞནཱ) ཨཱཙརིཡསཱརིཔུཏྟཏྠེརེན ཝུཏྟཾ. ཁནྡྷཀེཏི མཧཱཝགྒེ. ཨུདཱནགཱཐནྟི ཛཱཏིཡཱ ཨེཀཝཙནཾ, ཏཏྠཱཔི ཝཱ པཋམགཱཐམེཝ གཧེཏྭཱ ཝུཏྟནྟི ཝེདིཏབྦཾ.

ཨེཏྠ ཙ ཁནྡྷཀབྷཱཎཀཱ ཨེཝཾ ཝདནྟི ‘‘དྷམྨཔདབྷཱཎཀཱནཾ གཱཐཱ མནསཱཝ དེསིཏཏྟཱ ཏདཱ མཧཏོ ཛནསྶ ཨུཔཀཱརཱཡ ནཱཧོསི, ཨམྷཱཀཾ པན གཱཐཱ ཝཙཱིབྷེདཾ ཀཏྭཱ དེསིཏཏྟཱ ཏདཱ སུཎནྟཱནཾ དེཝབྲཧྨཱནཾ ཨུཔཀཱརཱཡ ཨཧོསི, ཏསྨཱ ཨིདམེཝ པཋམབུདྡྷཝཙན’’ནྟི. དྷམྨཔདབྷཱཎཀཱ པན ‘‘དེསནཱཡ ཛནསྶ ཨུཔཀཱརཱནུཔཀཱརབྷཱཝོ པཋམབྷཱཝེ ལཀྑཎཾ ན ཧོཏི, བྷགཝཏཱ མནསཱ པཋམཾ དེསིཏཏྟཱ ཨིདམེཝ པཋམབུདྡྷཝཙན’’ནྟི ཝདནྟི ¶ . ཏསྨཱ ཨུབྷཡམྤི ཨུབྷཡཐཱ ཡུཛྫཏཱིཏི ཝེདིཏབྦཾ. ནནུ ཙ ཡདི ‘‘ཨནེཀཛཱཏིསཾསཱར’’ནྟི གཱཐཱ མནསཱཝ དེསིཏཱ, ཨཐ ཀསྨཱ དྷམྨཔདཊྛཀཐཱཡཾ ‘‘ཨནེཀཛཱཏིསཾསཱར’ནྟི ཨིམཾ དྷམྨདེསནཾ སཏྠཱ བོདྷིརུཀྑམཱུལེ ནིསིནྣོ ཨུདཱནཝསེན ཨུདཱནེཏྭཱ ཨཔརབྷཱགེ ཨཱནནྡཏྠེརེན པུཊྛོ ཀཐེསཱི’’ཏི (དྷ. པ. ཨཊྛ. ༢.༡༥༢ ཨུདཱནཝཏྠུ) ཝུཏྟནྟི? ཨཏྠཝསེན ཏཐཱཡེཝ གཧེཏབྦཏྟཱ. ཏཏྠཱཔི ཧི མནསཱ ཨུདཱནེཏྭཱཏི ཨཏྠོཡེཝ གཧེཏབྦོ. དེསནཱ ཝིཡ ཧི ཨུདཱནམྤི མནསཱ ཨུདཱནཾ, ཝཙསཱ ཨུདཱནནྟི དྭིདྷཱ ཝིཉྙཱཡཏི. ཡདི ཙཱཡཾ ཝཙསཱ ཨུདཱནཾ སིཡཱ, ཨུདཱནཔཱལི༹ཡམཱརུལ༹ྷཱ བྷཝེཡྻ ¶ , ཏསྨཱ ཨུདཱནཔཱལི༹ཡམནཱརུལ༹ྷབྷཱཝོཡེཝ ཝཙསཱ ཨནུདཱནེཏྭཱ མནསཱ ཨུདཱནབྷཱཝེ ཀཱརཎནྟི དཊྛབྦཾ. ‘‘པཱཊིཔདདིཝསེ’’ཏི ཨིདཾ ‘‘སབྦཉྙུབྷཱཝཔྤཏྟསྶཱ’’ཏི ཨེཏེན ན སམྦཛ྄ཛྷིཏབྦཾ, ‘‘པཙྩཝེཀྑནྟསྶ ཨུཔྤནྣཱ’’ཏི ཨེཏེན པན སམྦཛ྄ཛྷིཏབྦཾ. ཝིསཱཁཔུཎྞམཱཡམེཝ ཧི བྷགཝཱ པཙྩཱུསསམཡེ སབྦཉྙུཏཾ པཏྟོ. ལོཀིཡསམཡེ པན ཨེཝམྤི སམྦཛ྄ཛྷནཾ བྷཝཏི, ཏཐཱཔི ནེས སཱསནསམཡོཏི ན གཧེཏབྦཾ. སོམནསྶམེཝ སོམནསྶམཡཾ ཡཐཱ ‘‘དཱནམཡཾ, སཱིལམཡ’’ནྟི, (དཱི. ནི. ༣.༣༠༥; ཨིཏིཝུ. ༦༠; ནེཏྟི. ༣༤) ཏཾསམྤཡུཏྟཉཱཎེནཱཏི ཨཏྠོ. སོམནསྶེན ཝཱ སཧཛཱཏཱདིསཏྟིཡཱ པཀཏཾ, ཏཱདིསེན ཉཱཎེནཱཏིཔི ཝཊྚཏི.

ཧནྡཱཏི ཙོདནཏྠེ ནིཔཱཏོ. ཨིངྒྷ སམྤཱདེཐཱཏི ཧི ཙོདེཏི. ཨཱམནྟཡཱམཱིཏི པཊིཝེདཡཱམི, བོདྷེམཱིཏི ཨཏྠོ. ཝོཏི པན ‘‘ཨཱམནྟཡཱམཱི’’ཏི ཨེཏསྶ ཀམྨཔདཾ. ‘‘ཨཱམནྟནཏྠེ དུཏིཡཱཡེཝ, ན ཙཏུཏྠཱི’’ཏི ཧི ཝཏྭཱ ཏམེཝུདཱཧརནྟི ཨཀྑརཙིནྟཀཱ. ཝཡདྷམྨཱཏི ཨནིཙྩལཀྑཎམུཁེན སངྑཱརཱནཾ དུཀྑཱནཏྟལཀྑཎམྤི ཝིབྷཱཝེཏི ‘‘ཡདནིཙྩཾ, ཏཾ དུཀྑཾ. ཡཾ དུཀྑཾ, ཏདནཏྟཱ’’ཏི (སཾ. ནི. ༢.༡༥, ༤༥, ༧༦, ༧༧; ༢.༣.༡, ༤; པཊི. མ. ༢.༡༠) ཝཙནཏོ. ལཀྑཎཏྟཡཝིབྷཱཝནནཡེནེཝ ཙ ཏདཱརམྨཎཾ ཝིཔསྶནཾ དསྶེནྟོ སབྦཏིཏྠིཡཱནཾ ཨཝིསཡབྷཱུཏཾ བུདྡྷཱཝེཎིཀཾ ཙཏུསཙྩཀམྨཊྛཱནཱདྷིཊྛཱནཾ ཨཝིཔརཱིཏཾ ནིབྦཱནགཱམིནིཔཊིཔདཾ པཀཱསེཏཱིཏི དཊྛབྦཾ. ཨིདཱནི ཏཏྠ སམྨཱཔཊིཔཏྟིཡཾ ནིཡོཛེཏི ‘‘ཨཔྤམཱདེན སམྤཱདེཐཱ’’ཏི, ཏཱཡ ཙཏུསཙྩཀམྨཊྛཱནཱདྷིཊྛཱནཱཡ ཨཝིཔརཱིཏནིབྦཱནགཱམིནིཔཊིཔདཱཡ ཨཔྤམཱདེན སམྤཱདེཐཱཏི ཨཏྠོ. ཨཔིཙ ‘‘ཝཡདྷམྨཱ སངྑཱརཱ’’ཏི ཨེཏེན སངྑེཔེན སཾཝེཛེཏྭཱ ‘‘ཨཔྤམཱདེན སམྤཱདེཐཱ’’ཏི སངྑེཔེནེཝ ནིརཝསེསཾ སམྨཱཔཊིཔཏྟིཾ དསྶེཏི ¶ . ཨཔྤམཱདཔདཉྷི སིཀྑཏྟཡསངྒཧིཏཾ ཀེཝལཔརིཔུཎྞཾ སཱསནཾ པརིཡཱདིཡིཏྭཱ ཏིཊྛཏི, སིཀྑཏྟཡསངྒཧིཏཱཡ ཀེཝལཔརིཔུཎྞཱཡ སཱསནསངྑཱཏཱཡ སམྨཱཔཊིཔཏྟིཡཱ ཨཔྤམཱདེན སམྤཱདེཐཱཏི ཨཏྠོ. ཨུབྷིནྣམནྟརེཏི དྭིནྣཾ ཝཙནཱནམནྟརཱལེ༹ ཝེམཛ྄ཛྷེ. ཨེཏྠ ཧི ཀཱལཝཏཱ ཀཱལོཔི ནིདསྶིཏོ ཏདཝིནཱབྷཱཝིཏྟཱཏི ཝེདིཏབྦོ.

སུཏྟནྟཔིཊཀནྟི ཨེཏྠ སུཏྟམེཝ སུཏྟནྟཾ ཡཐཱ ‘‘ཀམྨནྟཾ, ཝནནྟ’’ནྟི. སངྒཱིཏཉྩ ཨསངྒཱིཏཉྩཱཏི སབྦསརཱུཔམཱཧ. ‘‘ཨསངྒཱིཏནྟི ཙ སངྒཱིཏིཀྑནྡྷཀཀཐཱཝཏྠུཔྤཀརཎཱདི. ཀེཙི པན ‘སུབྷསུཏྟཾ (དཱི. ནི. ༡.༤༤༤) པཋམསངྒཱིཏིཡམསངྒཱིཏ’ནྟི ཝདནྟི, ཏཾ ན ཡུཛྫཏི. པཋམསངྒཱིཏིཏོ པུརེཏརམེཝ ཧི ཨཱཡསྨཏཱ ཨཱནནྡཏྠེརེན ཛེཏཝནེ ཝིཧརནྟེན སུབྷསྶ མཱཎཝསྶ བྷཱསིཏ’’ནྟི (དཱི. ནི. ཊཱི. པཋམམཧཱསངྒཱིཏིཀཐཱཝཎྞནཱ) ཨཱཙརིཡདྷམྨཔཱལཏྠེརེན ཝུཏྟཾ. སུབྷསུཏྟཾ པན ‘‘ཨེཝཾ མེ སུཏྟཾ ཨེཀཾ སམཡཾ ཨཱཡསྨཱ ཨཱནནྡོ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ¶ ཨཱརཱམེ ཨཙིརཔརིནིབྦུཏེ བྷགཝཏཱི’’ཏིཨཱདིནཱ (དཱི. ནི. ༡.༤༤༤) ཨཱགཏཾ. ཏཏྠ ‘‘ཨེཝཾ མེ སུཏ’’ནྟིཨཱདིཝཙནཾ པཋམསངྒཱིཏིཡཾ ཨཱཡསྨཏཱ ཨཱནནྡཏྠེརེནེཝ ཝཏྟུཾ ཡུཏྟརཱུཔཾ ན ཧོཏི. ན ཧི ཨཱནནྡཏྠེརོ སཡམེཝ སུབྷསུཏྟཾ དེསེཏྭཱ ‘‘ཨེཝཾ མེ སུཏ’’ནྟིཨཱདཱིནི ཝདཏི. ཨེཝཾ པན ཝཏྟབྦཾ སིཡཱ ‘‘ཨེཀམིདཱཧཾ བྷནྟེ སམཡཾ སཱཝཏྠིཡཾ ཝིཧརཱམི ཛེཏཝནེ ཨནཱཐཔིཎྜིཀསྶ ཨཱརཱམེ’’ཏིཨཱདི. ཏསྨཱ དུཏིཡཏཏིཡསངྒཱིཏིཀཱརཀེཧི ‘‘ཨེཝཾ མེ སུཏ’’ནྟིཨཱདིནཱ སུབྷསུཏྟཾ སངྒཱིཏིམཱརོཔིཏཾ ཝིཡ དིསྶཏི. ཨཐཱཙརིཡདྷམྨཔཱལཏྠེརསྶ ཨེཝམདྷིཔྤཱཡོ སིཡཱ ‘‘ཨཱནནྡཏྠེརེནེཝ ཝུཏྟམྤི སུབྷསུཏྟཾ པཋམསངྒཱིཏིམཱརོཔེཏྭཱ ཏནྟིཾ ཋཔེཏུཀཱམེཧི མཧཱཀསྶཔཏྠེརཱདཱིཧི ཨཉྙེསུ སུཏྟེསུ ཨཱགཏནཡེནེཝ ‘ཨེཝཾ མེ སུཏ’ནྟིཨཱདིནཱ ཏནྟི ཋཔིཏཱ’’ཏི. ཨེཝཾ སཏི ཡུཛྫེཡྻ. ཨཐ ཝཱ ཨཱཡསྨཱ ཨཱནནྡོ སུབྷསུཏྟཾ སཡཾ དེསེནྟོཔི སཱམཉྙཕལཱདཱིསུ བྷགཝཏཱ དེསིཏནཡེནེཝ དེསེསཱིཏི བྷགཝཏོ སམྨུཁཱ ལདྡྷནཡེ ཋཏྭཱ དེསིཏཏྟཱ བྷགཝཏཱ དེསིཏཾ དྷམྨཾ ཨཏྟནི ཨདཧནྟོ ‘‘ཨེཝཾ མེ སུཏ’’ནྟིཨཱདིམཱཧཱཏི ཨེཝམདྷིཔྤཱཡེཔི སཏི ཡུཛྫཏེཝ. ‘‘ཨནུསངྒཱིཏཉྩཱ’’ཏིཔི པཱཋོ. དུཏིཡཏཏིཡསངྒཱིཏཱིསུ པུན སངྒཱིཏཉྩཱཏི ཨཏྠཝསེན ནིནྣཱནཱཀརཎམེཝ. སམོདྷཱནེཏྭཱ ཝིནཡཔིཊཀཾ ནཱམ ཝེདིཏབྦཾ, སུཏྟ…པེ… ཨབྷིདྷམྨཔིཊཀཾ ནཱམ ཝེདིཏབྦནྟི ཡོཛནཱ.

བྷིཀྑུབྷིཀྑུནཱིཔཱཏིམོཀྑཝསེན ¶ ཨུབྷཡཱནི པཱཏིམོཀྑཱནི. བྷིཀྑུབྷིཀྑུནཱིཝིབྷངྒཝསེན དྭེ ཝིབྷངྒཱ. མཧཱཝགྒཙཱུལ༹ཝགྒེསུ ཨཱགཏཱ དྭཱཝཱིསཏི ཁནྡྷཀཱ. པཙྩེཀཾ སོལ༹སཧི ཝཱརེཧི ཨུཔལཀྑིཏཏྟཱ སོལ༹ས པརིཝཱརཱཏི ཝུཏྟཾ. པརིཝཱརཔཱལི༹ཡཉྷི མཧཱཝིབྷངྒེ སོལ༹ས ཝཱརཱ, བྷིཀྑུནཱིཝིབྷངྒེ སོལ༹ས ཝཱརཱ ཙཱཏི བཱཏྟིཾས ཝཱརཱ ཨཱགཏཱ. པོཏྠཀེསུ པན ཀཏྠཙི ‘‘པརིཝཱརཱ’’ཏི ཨེཏྟཀམེཝ དིསྶཏི, བཧཱུསུ པན པོཏྠཀེསུ ཝིནཡཊྛཀཐཱཡཾ, ཨབྷིདྷམྨཊྛཀཐཱཡཉྩ ‘‘སོལ༹ས པརིཝཱརཱ’’ཏི ཨེཝམེཝ དིསྶམཱནཏྟཱ ཨཡམྤི པཱཋོ ན སཀྐཱ པཊིབཱཧིཏུནྟི ཏསྶེཝཏྠོ ཝུཏྟོ. ‘‘ཨིཏཱི’’ཏི ཡཐཱཝུཏྟཾ བུདྡྷཝཙནཾ ནིདསྶེཏྭཱ ‘‘ཨིད’’ནྟི ཏཾ པརཱམསཏི. ཨིཏི-སདྡོ ཝཱ ཨིདམཏྠེ, ཨིདནྟི ཝཙནསིལིཊྛཏཱམཏྟཾ, ཨིཏི ཨིདནྟི ཝཱ པརིཡཱཡདྭཡཾ ཨིདམཏྠེཡེཝ ཝཏྟཏི ‘‘ཨིདཱནེཏརཧི ཝིཛྫཏཱི’’ཏིཨཱདཱིསུ ཝིཡ. ཨེས ནཡོ ཨཱིདིསེསུ. བྲཧྨཛཱལཱདཱིནི ཙཏུཏྟིཾས སུཏྟཱནི སངྒཡ྄ཧནྟི ཨེཏྠ, ཨེཏེན ཝཱ, ཏེསཾ ཝཱ སངྒཧོ གཎནཱ ཨེཏསྶཱཏི བྲཧྨཛཱལཱདིཙཏུཏྟིཾསསུཏྟསངྒཧོ. ཨེཝམིཏརེསུཔི. ཧེཊྛཱ ཝུཏྟེསུ དཱིགྷབྷཱཎཀམཛ྄ཛྷིམབྷཱཎཀཱནཾ ཝཱདེསུ མཛ྄ཛྷིམབྷཱཎཀཱནཉྙེཝ ཝཱདསྶ ཡུཏྟཏརཏྟཱ ཁུདྡཀཔཱཋཱདཡོཔི སུཏྟནྟཔིཊཀེཡེཝ སངྒཧེཏྭཱ དསྶེནྟོ ‘‘ཁུདྡཀ…པེ… སུཏྟནྟཔིཊཀཾ ནཱམཱ’’ཏི ཨཱཧ. ཏཏྠ ‘‘སུཎཱཐ བྷཱཝིཏཏྟཱནཾ, གཱཐཱ ཨཏྠཱུཔནཱཡིཀཱཏི (ཐེརགཱ. ནིདཱནགཱཐཱ) ཝུཏྟཏྟཱ ‘‘ཐེརགཱཐཱ ཐེརཱིགཱཐཱ’’ཏི ཙ པཱཋོ ཡུཏྟོ.

ཨེཝཾ ¶ སརཱུཔཏོ པིཊཀཏྟཡཾ ནིཡམེཏྭཱ ཨིདཱནི ནིབྦཙནཾ དསྶེཏུཾ ‘‘ཏཏྠཱ’’ཏིཨཱདི ཝུཏྟཾ. ཏཏྠཱཏི ཏེསུ ཏིབྦིདྷེསུ པིཊཀེསུ. ཝིཝིདྷཝིསེསནཡཏྟཱཏི ཝིཝིདྷནཡཏྟཱ, ཝིསེསནཡཏྟཱ ཙ. ཝིནཡནཏོཏི ཝིནཡནབྷཱཝཏོ, བྷཱཝཔྤདྷཱནནིདྡེསོཡཾ, བྷཱཝལོཔོ ཝཱ, ཨིཏརཐཱ དབྦམེཝ པདྷཱནཾ སིཡཱ, ཏཐཱ ཙ སཏི ཝིནཡནཏཱགུཎསམངྒིནཱ ཝིནཡདབྦེནེཝ ཧེཏུབྷཱུཏེན ཝིནཡོཏི ཨཀྑཱཏོ, ན པན ཝིནཡནཏཱགུཎེནཱཏི ཨནདྷིཔྤེཏཏྠཔྤསངྒོ བྷཝེཡྻ. ཨཡཾ ནཡོ ཨེདིསེསུ. ཝིནཱིཡཏེ ཝཱ ཝིནཡནཾ, ཏཏོཏི ཨཏྠོ. ཨཡཾ ཝིནཡོཏི ཨཏྠཔཉྙཏྟིབྷཱུཏོ སཉྙཱིསངྑཱཏོ ཨཡཾ ཏནྟི ཝིནཡོ. ཝིནཡོཏི ཨཀྑཱཏོཏི སདྡཔཉྙཏྟིབྷཱུཏོ སཉྙཱསངྑཱཏོ ཝིནཡོ ནཱམཱཏི ཀཐིཏོ. ཨཏྠཔཉྙཏྟིཡཱ ཧི ནཱམཔཉྙཏྟིཝིབྷཱཝནཾ ནིབྦཙནནྟི.

ཨིདཱནི ¶ ཨིམིསྶཱ གཱཐཱཡ ཨཏྠཾ ཝིབྷཱཝེནྟོ ཨཱཧ ‘‘ཝིཝིདྷཱ ཧཱི’’ཏིཨཱདི. ‘‘ཝིཝིདྷཱ ཨེཏྠ ནཡཱ, ཏསྨཱ ཝིཝིདྷནཡཏྟཱ ཝིནཡོཏི ཨཀྑཱཏོ’’ཏིཨཱདིནཱ ཡོཛེཏབྦཾ. ཝིཝིདྷཏྟཾ སརཱུཔཏོ དསྶེཏི ‘‘པཉྩཝིདྷཱ’’ཏིཨཱདིནཱ, ཏཐཱ ཝིསེསཏྟམྤི ‘‘དལ༹ྷཱིཀམྨཱ’’ཏིཨཱདིནཱ. ལོཀཝཛྫེསུ སིཀྑཱཔདེསུ དལ༹ྷཱིཀམྨཔཡོཛནཱ, པཎྞཏྟིཝཛྫེསུ སིཐིལཀརཎཔཡོཛནཱ. སཉྙམཝེལཾ ཨབྷིབྷཝིཏྭཱ པཝཏྟོ ཨཱཙཱརོ ཨཛ྄ཛྷཱཙཱརོ, ཝཱིཏིཀྐམོ, ཀཱཡེ, ཝཱཙཱཡ ཙ པཝཏྟོ སོ, ཏསྶ ནིསེདྷནཾ ཏཐཱ, ཏེན ཏཐཱནིསེདྷནམེཝ པརིཡཱཡེན ཀཱཡཝཱཙཱཝིནཡནཾ ནཱམཱཏི དསྶེཏི. ‘‘ཏསྨཱ’’ཏི ཝཏྭཱ ཏསྶཱནེཀདྷཱ པརཱམསནམཱཧ ‘‘ཝིཝིདྷནཡཏྟཱ’’ཏིཨཱདི. ཡཐཱཝུཏྟཱ ཙ གཱཐཱ ཨཱིདིསསྶ ནིབྦཙནསྶ པཀཱསནཏྠཾ ཝུཏྟཱཏི དསྶེཏུཾ ‘‘ཏེནཱ’’ཏིཨཱདི ཝུཏྟཾ. ཏེནཱཏི ཝིཝིདྷནཡཏྟཱདིཧེཏུནཱ ཀརཎབྷཱུཏེནཱཏི ཝདནྟི. ཨཔིཙ ‘‘ཝིཝིདྷཱ ཧཱི’’ཏིཨཱདིཝཱཀྱསྶ ཡཐཱཝུཏྟསྶ གུཎཾ དསྶེནྟོ ‘‘ཏེནཱ’’ཏིཨཱདིམཱཧཱཏིཔི སམྦནྡྷཾ ཝདནྟི. ཨེཝཾ སཏི ཏེནཱཏི ཝིཝིདྷནཡཏྟཱདིནཱ ཧེཏུབྷཱུཏེནཱཏི ཨཏྠོ. ཨཐ ཝཱ ཡཐཱཝུཏྟཝཙནམེཝ སནྡྷཱཡ པོརཱཎེཧི ཨཡཾ གཱཐཱ ཝུཏྟཱཏི སཾསནྡེཏུཾ ‘‘ཏེནཱ’’ཏིཨཱདི ཝུཏྟནྟིཔི ཝདནྟི, དུཏིཡནཡེ ཝིཡ ‘‘ཏེནཱ’’ཏི པདསྶ ཨཏྠོ. ཨེཏནྟི གཱཐཱཝཙནཾ. ཨེཏསྶཱཏི ཝིནཡསདྡསྶ, ‘‘ཝཙནཏྠཱ’’ཏི པདེན སམྦནྡྷོ. ‘‘ཝཙནསྶ ཨཏྠོ’’ཏི ཧི སམྦནྡྷེ ཝུཏྟེཔི ཏསྶ ཝཙནསཱམཉྙཏོ ཝིསེསཾ དསྶེཏུཾ ‘‘ཨེཏསྶཱ’’ཏི པུན ཝུཏྟཾ. ནེརུཏྟིཀཱ པན སམཱསཏདྡྷིཏེསུ སིདྡྷེསུ སཱམཉྙཏྟཱ, ནཱམསདྡཏྟཱ ཙ ཨེདིསེསུ སདྡནྟརེན ཝིསེསིཏབྷཱཝཾ ཨིཙྪནྟི.

‘‘ཨཏྠཱན’’ནྟི པདཾ ‘‘སཱུཙནཏོ…པེ… སུཏྟཱཎཱ’’ཏི པདེཧི ཡཐཱརཧཾ ཀམྨསམྦནྡྷཝསེན ཡོཛེཏབྦཾ. ཏམཏྠཾ ཝིཝརཏི ‘‘ཏཉྷཱི’’ཏིཨཱདིནཱ. ཨཏྟཏྠཔརཏྠཱདིབྷེདེ ཨཏྠེཏི ཡོ ཏཾ སུཏྟཾ སཛ྄ཛྷཱཡཏི, སུཎཱཏི, ཝཱཙེཏི, ཙིནྟེཏི, དེསེཏི ཙ, སུཏྟེན སངྒཧིཏོ སཱིལཱདིཨཏྠོ ཏསྶཔི ཧོཏི, ཏེན པརསྶ སཱདྷེཏབྦཏོ པརསྶཔཱིཏི ཏདུབྷཡཾ ཏཾ སུཏྟཾ སཱུཙེཏི དཱིཔེཏི, ཏཐཱ དིཊྛདྷམྨིཀསམྤརཱཡིཀཏྠེ ¶ ལོཀིཡལོཀུཏྟརཏྠེ ཙཱཏི ཨེཝམཱདིབྷེདེ ཨཏྠེ ཨཱདི-སདྡེན སངྒཎྷཱཏི. ཨཏྠསདྡོ ཙཱཡཾ ཧིཏཔརིཡཱཡོ, ན བྷཱསིཏཏྠཝཙནོ. ཡདི སིཡཱ, སུཏྟཾ ཨཏྟནོཔི བྷཱསིཏཏྠཾ སཱུཙེཏི, པརསྶཔཱིཏི ཨཡམནདྷིཔྤེཏཏྠོ ཝུཏྟོ སིཡཱ. སུཏྟེན ཧི ཡོ ཨཏྠོ པཀཱསིཏོ, སོ ཏསྶེཝ པཀཱསཀསྶ ¶ སུཏྟསྶ ཧོཏི, ཏསྨཱ ན ཏེན པརཏྠོ སཱུཙིཏོ, ཏེན སཱུཙེཏབྦསྶ པརཏྠསྶ ནིཝཏྟེཏབྦསྶ ཨབྷཱཝཱ ཨཏྟཏྠགྒཧཎཉྩ ན ཀཏྟབྦཾ. ཨཏྟཏྠཔརཏྠཝིནིམུཏྟསྶ བྷཱསིཏཏྠསྶ ཨབྷཱཝཱ ཨཱདིགྒཧཎཉྩ ན ཀཏྟབྦཾ, ཏསྨཱ ཡཐཱཝུཏྟསྶ ཧིཏཔརིཡཱཡསྶ ཨཏྠསྶ སུཏྟེ ཨསམྦྷཝཏོ སུཏྟཱདྷཱརསྶ པུགྒལསྶ ཝསེན ཨཏྟཏྠཔརཏྠཱ ཝུཏྟཱ.

ཨཐ ཝཱ སུཏྟཾ ཨནཔེཀྑིཏྭཱ ཡེ ཨཏྟཏྠཱདཡོ ཨཏྠཔྤབྷེདཱ ‘‘ན ཧ’ཉྙདཏྠ’ཏྠི པསཾསལཱབྷཱ’’ཏི ཨེཏསྶ པདསྶ ནིདྡེསེ (མཧཱནི. ༦༣) ཝུཏྟཱ ‘‘ཨཏྟཏྠོ, པརཏྠོ, ཨུབྷཡཏྠོ, དིཊྛདྷམྨིཀོ ཨཏྠོ, སམྤརཱཡིཀོ ཨཏྠོ, ཨུཏྟཱནོ ཨཏྠོ, གམྦྷཱིརོ ཨཏྠོ, གཱུལ༹ྷོ ཨཏྠོ, པཊིཙྪནྣོ ཨཏྠོ, ནེཡྻོ ཨཏྠོ, ནཱིཏོ ཨཏྠོ, ཨནཝཛྫོ ཨཏྠོ, ནིཀྐིལེསོ ཨཏྠོ, ཝོདཱནོ ཨཏྠོ, པརམཏྠོ’’ཏི, (མཧཱནི. ༦༣) ཏེ ཨཏྠཔྤབྷེདེ སཱུཙེཏཱིཏི ཨཏྠོ གཧེཏབྦོ. ཀིཉྩཱཔི ཧི སུཏྟནིརཔེཀྑཾ ཨཏྟཏྠཱདཡོ ཝུཏྟཱ སུཏྟཏྠབྷཱཝེན ཨནིདྡིཊྛཏྟཱ, ཏེསུ པན ཨེཀོཔི ཨཏྠཔྤབྷེདོ སུཏྟེན དཱིཔེཏབྦཏཾ ནཱཏིཝཏྟཏཱིཏི. ཨིམསྨིཉྩ ཨཏྠཝིཀཔྤེ ཨཏྠསདྡོ བྷཱསིཏཏྠཔརིཡཱཡོཔི ཧོཏི. ཨེཏྠ ཧི པུརིམཀཱ པཉྩ ཨཏྠཔྤབྷེདཱ ཧིཏཔརིཡཱཡཱ, ཏཏོ པརེ ཚ བྷཱསིཏཏྠཔྤབྷེདཱ, པཙྪིམཀཱ ཙཏྟཱརོ ཨུབྷཡསབྷཱཝཱ. ཏཏྠ སུཝིཉྙེཡྻཏཱཡ ཝིབྷཱཝེན ཨནགཱདྷབྷཱཝོ ཨུཏྟཱནོ. དུརདྷིགམཏཱཡ ཝིབྷཱཝེན ཨགཱདྷབྷཱཝོ གམྦྷཱིརོ. ཨཝིཝཊོ གཱུལ༹ྷོ. མཱུལུདཀཱདཡོ ཝིཡ པཾསུནཱ ཨཀྑརསནྣིཝེསཱདིནཱ ཏིརོཧིཏོ པཊིཙྪནྣོ. ནིདྡྷཱརེཏྭཱ ཉཱཔེཏབྦོ ནེཡྻོ. ཡཐཱརུཏཝསེན ཝེདིཏབྦོ ནཱིཏོ. ཨནཝཛྫནིཀྐིལེསཝོདཱནཱ པརིཡཱཡཝསེན ཝུཏྟཱ, ཀུསལཝིཔཱཀཀིརིཡཱདྷམྨཝསེན ཝཱ ཡཐཱཀྐམཾ ཡོཛེཏབྦཱ. པརམཏྠོ ནིབྦཱནཾ, དྷམྨཱནཾ ཨཝིཔརཱིཏསབྷཱཝོ ཨེཝ ཝཱ.

ཨཐ ཝཱ ‘‘ཨཏྟནཱ ཙ ཨཔྤིཙྪོ ཧོཏཱི’’ཏི ཨཏྟཏྠཾ, ‘‘ཨཔྤིཙྪཀཐཉྩ པརེསཾ ཀཏྟཱ ཧོཏཱི’’ཏི པརཏྠཾ སཱུཙེཏི. ཨེཝཾ ‘‘ཨཏྟནཱ ཙ པཱཎཱཏིཔཱཏཱ པཊིཝིརཏོ ཧོཏི, པརཉྩ པཱཎཱཏིཔཱཏཱ ཝེརམཎིཡཱ སམཱདཔེཏཱི’’ཏིཨཱདིསུཏྟཱནི (ཨ. ནི. ༤.༩༩, ༢༦༥) ཡོཛེཏབྦཱནི. ཨཔརེ པན ‘‘ཡཐཱསབྷཱཝཾ བྷཱསིཏཾ ཨཏྟཏྠཾ, པཱུརཎཀསྶཔཱདཱིནམཉྙཏིཏྠིཡཱནཾ སམཡབྷཱུཏཾ པརཏྠཾ སཱུཙེཏི, སུཏྟེན ཝཱ སངྒཧིཏཾ ཨཏྟཏྠཾ, སུཏྟཱནུལོམབྷཱུཏཾ པརཏྠཾ, སུཏྟནྟནཡབྷཱུཏཾ ཝཱ ཨཏྟཏྠཾ, ཝིནཡཱབྷིདྷམྨནཡབྷཱུཏཾ པརཏྠཾ ¶ སཱུཙེཏཱི’’ཏིཔི ཝདནྟི. ཝིནཡཱབྷིདྷམྨེཧི ཙ ཝིསེསེཏྭཱ སུཏྟསདྡསྶ ཨཏྠོ ཝཏྟབྦོ, ཏསྨཱ ཝེནེཡྻཛ྄ཛྷཱསཡཝསཔྤཝཏྟཱཡ དེསནཱཡ སཱཏིསཡཾ ཨཏྟཧིཏཔརཧིཏཱདཱིནི ¶ པཀཱསིཏཱནི ཧོནྟི ཏཔྤདྷཱནབྷཱཝཏོ, ན པན ཨཱཎཱདྷམྨསབྷཱཝ-ཝསཔྤཝཏྟཱཡཱཏི ཨིདམེཝ ‘‘ཨཏྠཱནཾ སཱུཙནཏོ སུཏྟ’’ནྟི ཝུཏྟཾ. སཱུཙ-སདྡསྶ ཙེཏྠ རསྶོ. ‘‘ཨེཝཉྩ ཀཏྭཱ ‘ཨེཏྟཀཾ ཏསྶ བྷགཝཏོ སུཏྟཱགཏཾ སུཏྟཔརིཡཱཔནྣ’ནྟི (པཱཙི. ༦༥༥, ༡༢༤༢) ཙ སཀཝཱདེ པཉྩ སུཏྟསཏཱནཱི’ཏི (ཨཊྛསཱ. ནིདཱནཀཐཱ, ཀཐཱ. ཨཊྛ. ནིདཱནཀཐཱ) ཙ ཨེཝམཱདཱིསུ སུཏྟསདྡོ ཨུཔཙརིཏོཏི གཧེཏབྦོ’’ཏི (སཱརཏྠ. ཊཱི. པཋམམཧཱསངྒཱིཏིཀཐཱཝཎྞནཱ) ཨཱཙརིཡསཱརིཔུཏྟཏྠེརེན ཝུཏྟཾ. ཨཉྙེ པན ཡཐཱཝུཏྟསདིསེནེཝ ནིབྦཙནེན སུཏྟསདྡསྶ ཝིནཡཱབྷིདྷམྨཱནམྤི ཝཱཙཀཏྟཾ ཝདནྟི.

སུཏྟེ ཙ ཨཱཎཱདྷམྨསབྷཱཝོ ཝེནེཡྻཛ྄ཛྷཱསཡམནུཝཏྟཏི, ན ཝིནཡཱབྷིདྷམྨེསུ ཝིཡ ཝེནེཡྻཛ྄ཛྷཱསཡོ ཨཱཎཱདྷམྨསབྷཱཝེ, ཏསྨཱ ཝེནེཡྻཱནཾ ཨེཀནྟཧིཏཔཊིལཱབྷསཾཝཏྟནིཀཱ སུཏྟནྟདེསནཱཏི ཨཱཧ ‘‘སུཝུཏྟཱ ཙེཏྠ ཨཏྠཱ’’ཏིཨཱདི. ‘‘ཨེཀནྟཧིཏཔཊིལཱབྷསཾཝཏྟནིཀཱ སུཏྟནྟདེསནཱ’’ཏི ཨིདམྤི ཝེནེཡྻཱནཾ ཧིཏསམྤཱདནེ སུཏྟནྟདེསནཱཡ ཏཔྤརབྷཱཝམེཝ སནྡྷཱཡ ཝུཏྟཾ. ཏཔྤརབྷཱཝོ ཙ ཝེནེཡྻཛ྄ཛྷཱསཡཱནུལོམཏོ དཊྛབྦོ. ཏེནེཝཱཧ ‘‘ཝེནེཡྻཛ྄ཛྷཱསཡཱནུལོམེན ཝུཏྟཏྟཱ’’ཏི. ཨེཏེན ཙ ཧེཏུནཱ ནནུ ཝིནཡཱབྷིདྷམྨཱཔི སུཝུཏྟཱ, ཨཐ ཀསྨཱ ཨིདམེཝ ཨེཝཾ ཝུཏྟནྟི ཨནུཡོགཾ པརིཧརཏི.

ཨནུཔུབྦསིཀྑཱདིཝསེན ཀཱལནྟརེན ཨཏྠཱབྷིནིཔྥཏྟིཾ དསྶེཏུཾ ‘‘སསྶམིཝ ཕལ’’ནྟི ཝུཏྟཾ. ཨིདཾ ཝུཏྟཾ ཧོཏི – ཡཐཱ སསྶཾ ནཱམ ཝཔནརོཔནཱདིཀྑཎེཡེཝ ཕལཾ ན པསཝཏི, ཨནུཔུབྦཛགྒནཱདིཝསེན ཀཱལནྟརེནེཝ པསཝཏི, ཏཐཱ ཨིདམྤི སཝནདྷཱརཎཱདིཀྑཎེཡེཝ ཨཏྠེ ན པསཝཏི, ཨནུཔུབྦསིཀྑཱདིཝསེན ཀཱལནྟརེནེཝ པསཝཏཱིཏི. པསཝཏཱིཏི ཙ ཕལཏི, ཨབྷིནིཔྥཱདེཏཱིཏི ཨཏྠོ. ཨབྷིནིཔྥཱདནམེཝ ཧི ཕལནཾ. ཨུཔཱཡསམངྒཱིནཉྙེཝ ཨཏྠཱབྷིནིཔྥཏྟིཾ དསྶེནྟོ ‘‘དྷེནུ ཝིཡ ཁཱིར’’ནྟི ཨཱཧ. ཨཡམེཏྠ ཨདྷིཔྤཱཡོ – ཡཐཱ དྷེནུ ནཱམ ཀཱལེ ཛཱཏཝཙྪཱ ཐནཾ གཧེཏྭཱ དུཧཏཾ ཨུཔཱཡཝནྟཱནམེཝ ཁཱིརཾ པགྒྷརཱཔེཏི, ན ཨཀཱལེ ཨཛཱཏཝཙྪཱ. ཀཱལེཔི ཝཱ ཝིསཱཎཱདིཀཾ གཧེཏྭཱ དུཧཏཾ ཨནུཔཱཡཝནྟཱནཾ, ཏཐཱ ཨིདམྤི ནིསྶརཎཱདིནཱ སཝནདྷཱརཎཱདཱིནི ཀུརུཏཾ ཨུཔཱཡཝནྟཱནམེཝ ¶ སཱིལཱདིཨཏྠེ པགྒྷརཱཔེཏི, ན ཨལགདྡཱུཔམཱཡ སཝནདྷཱརཎཱདཱིནི ཀུརུཏཾ ཨནུཔཱཡཝནྟཱནནྟི. ཡདིཔི ‘‘སཱུདཏཱི’’ཏི ཨེཏསྶ གྷརཏི སིཉྩཏཱིཏི ཨཏྠོ, ཏཐཱཔི སཀམྨིཀདྷཱཏུཏྟཱ པགྒྷརཱཔེཏཱིཏི ཀཱརིཏཝསེན ཨཏྠོ ཝུཏྟོ ཡཐཱ ‘‘ཏརཏཱི’’ཏི ཨེཏསྶ ནིཔཱཏེཏཱིཏི ཨཏྠོ’’ཏི. ‘‘སུཏྟཱཎཱ’’ཏི ཨེཏསྶ ཨཏྠམཱཧ ‘‘སུཊྛུ ཙ ནེ ཏཱཡཏཱི’’ཏི. ནེཏི ཨཏྠེ.

སུཏྟསབྷཱགནྟི ¶ སུཏྟསདིསཾ. ཏབྦྷཱཝཾ དསྶེཏི ‘‘ཡཐཱ ཧཱི’’ཏིཨཱདིནཱ. ཏཙྪཀཱནཾ སུཏྟནྟི ཝཌྜྷཀཱིནཾ ཀཱལ༹སུཏྟཾ. པམཱཎཾ ཧོཏི ཏདནུསཱརེན ཏཙྪནཏོ. ཨིདཾ ཝུཏྟཾ ཧོཏི – ཡཐཱ ཀཱལ༹སུཏྟཾ པསཱརེཏྭཱ སཉྙཱཎེ ཀཏེ གཧེཏབྦཾ, ཝིསྶཛྫེཏབྦཉྩ པཉྙཱཡཏི, ཏསྨཱ ཏཾ ཏཙྪཀཱནཾ པམཱཎཾ ཧོཏི, ཨེཝཾ ཝིཝཱདེསུ ཨུཔྤནྣེསུ སུཏྟེ ཨཱནཱིཏམཏྟེ ‘‘ཨིདཾ གཧེཏབྦཾ, ཨིདཾ ཝིསྶཛྫེཏབྦ’’ནྟི པཱཀཊཏྟཱ ཝིཝཱདོ ཝཱུཔསམྨཏི, ཏསྨཱ ཨེཏཾ ཝིཉྙཱུནཾ པམཱཎནྟི. ཨིདཱནི ཨཉྙཐཱཔི སུཏྟསབྷཱགཏཾ ཝིབྷཱཝེནྟོ ‘‘ཡཐཱ ཙཱ’’ཏིཨཱདིམཱཧ. སུཏྟེནཱཏི པུཔྥཱཝུཏེན ཡེན ཀེནཙི ཐིརསུཏྟེན. སངྒཧིཏཱནཱིཏི སུཊྛུ, སམཾ ཝཱ གཧིཏཱནི, ཨཱཝུཏཱནཱིཏི ཨཏྠོ. ན ཝིཀིརིཡནྟཱིཏི ཨིཏོ ཙིཏོ ཙ ཝིཔྤཀིཎྞཱབྷཱཝམཱཧ, ན ཝིདྡྷཾསཱིཡནྟཱིཏི ཚེཛྫབྷེཛྫཱབྷཱཝཾ. ཨཡམེཏྠཱདྷིཔྤཱཡོ – ཡཐཱ ཐིརསུཏྟེན སངྒཧིཏཱནི པུཔྥཱནི ཝཱཏེན ན ཝིཀིརིཡནྟི ན ཝིདྡྷཾསཱིཡནྟི, ཨེཝཾ སུཏྟེན སངྒཧིཏཱ ཨཏྠཱ མིཙྪཱཝཱདེན ན ཝིཀིརིཡནྟི ན ཝིདྡྷཾསཱིཡནྟཱིཏི. ཝེནེཡྻཛ྄ཛྷཱསཡཝསཔྤཝཏྟཱཡ ཙ དེསནཱཡ ཨཏྟཏྠཔརཏྠཱདཱིནཾ སཱཏིསཡཔྤཀཱསནཏོ ཨཱཎཱདྷམྨསབྷཱཝེཧི ཝིནཡཱབྷིདྷམྨེཧི ཝིསེསེཏྭཱ ཨིམསྶེཝ སུཏྟསབྷཱགཏཱ ཝུཏྟཱ. ‘‘ཏེནཱ’’ཏིཨཱདཱིསུ ཝུཏྟནཡཱནུསཱརེན སམྦནྡྷོ ཙེཝ ཨཏྠོ ཙ ཡཐཱརཧཾ ཝཏྟབྦོ. ཨེཏྠ ཙ ‘‘སུཏྟནྟཔིཊཀ’’ནྟི ཧེཊྛཱ ཝུཏྟེཔི ཨནྟསདྡསྶ ཨཝཙནཾ ཏསྶ ཝིསུཾ ཨཏྠཱབྷཱཝདསྶནཏྠཾ ཏབྦྷཱཝཝུཏྟིཏོ. སཧཡོགསྶ ཧི སདྡསྶ ཨཝཙནེན སེསཏཱ ཏསྶ ཏུལྱཱདྷིཀརཎཏཾ, ཨནཏྠཀཏཾ ཝཱ ཉཱཔེཏི.

ཡནྟི ཨེས ནིཔཱཏོ ཀཱརཎེ, ཡེནཱཏི ཨཏྠོ. ཨེཏྠ ཨབྷིདྷམྨེ ཝུཌྜྷིམནྟོ དྷམྨཱ ཡེན ཝུཏྟཱ, ཏེན ཨབྷིདྷམྨོ ནཱམ ཨཀྑཱཏོཏི པཙྩེཀཾ ཡོཛེཏབྦཾ. ཨབྷི-སདྡསྶ ཨཏྠཝསེནཱཡཾ པབྷེདོཏི ཏསྶ ཏདཏྠཔྤཝཏྟཏཱདསྶནེན ཏམཏྠཾ སཱདྷེནྟོ ‘‘ཨཡཉྷཱི’’ཏིཨཱདིམཱཧ. ཨབྷི-སདྡོ ¶ ཀམནཀིརིཡཱཡ ཝུཌྜྷིབྷཱཝསངྑཱཏམཏིརེཀཏྠཾ དཱིཔེཏཱིཏི ཝུཏྟཾ ‘‘ཨབྷིཀྐམནྟཱིཏིཨཱདཱིསུ ཝུཌྜྷིཡཾ ཨཱགཏོ’’ཏི. ཨབྷིཉྙཱཏཱཏི ཨཌྜྷཙནྡཱདིནཱ ཀེནཙི སཉྙཱཎེན ཉཱཏཱ, པཉྙཱཏཱ པཱཀཊཱཏི ཝུཏྟཾ ཧོཏི. ཨཌྜྷཙནྡཱདིབྷཱཝོ ཧི རཏྟིཡཱ ཨུཔལཀྑཎཝསེན པཉྙཱཎཾ ཧོཏི ‘‘ཡསྨཱ ཨཌྜྷོ, ཏསྨཱ ཨཊྛམཱི. ཡསྨཱ ཨཱུནོ, ཏསྨཱ ཙཱཏུདྡསཱི. ཡསྨཱ པུཎྞོ, ཏསྨཱ པནྣརསཱི’’ཏི. ཨབྷིལཀྑིཏཱཏི ཨེཏྠཱཔི ཨཡམེཝཏྠོ ཝེདིཏབྦོ, ཨིདཾ པན མཱུལཔཎྞཱསཀེ བྷཡབྷེརཝསུཏྟེ (མ. ནི. ༡.༣༤) ཨབྷིལཀྑིཏསདྡཔརིཡཱཡོ ཨབྷིཉྙཱཏསདྡོཏི ཨཱཧ ‘‘ཨབྷིཉྙཱཏཱ ཨབྷིལཀྑིཏཱཏིཨཱདཱིསུ ལཀྑཎེ’’ཏི. ཡཛྫེཝཾ ལཀྑིཏསདྡསྶེཝ ལཀྑཎཏྠདཱིཔནཏོ ཨབྷི-སདྡོ ཨནཏྠཀོཝ སིཡཱཏི? ནེཝཾ དཊྛབྦཾ ཏསྶཱཔི ཏདཏྠཛོཏནཏོ. ཝཱཙཀསདྡསནྣིདྷཱནེ ཧི ཨུཔསགྒནིཔཱཏཱ ཏདཏྠཛོཏཀམཏྟཱཏི ལཀྑིཏསདྡེན ཝཱཙཀབྷཱཝེན པཀཱསིཏསྶ ལཀྑཎཏྠསྶེཝ ཛོཏཀབྷཱཝེན པཀཱསནཏོ ཨབྷི-སདྡོཔི ལཀྑཎེ པཝཏྟཏཱིཏི ཝུཏྟོཏི དཊྛབྦཾ. རཱཛཱབྷིརཱཛཱཏི པརེཧི ¶ རཱཛཱུཧི པཱུཛིཏུམརཧོ རཱཛཱ. པཱུཛིཏེཏི པཱུཛཱརཧེ. ཨིདཾ པན སུཏྟནིཔཱཏེ སེལསུཏྟེ (སུ. ནི. ༥༥༣ ཨཱདཡོ).

ཨབྷིདྷམྨེཏི ‘‘སུཔིནནྟེན སུཀྐཝིསཊྛིཡཱ ཨནཱཔཏྟིབྷཱཝེཔི ཨཀུསལཙེཏནཱ ཨུཔལབྦྷཏཱི’’ཏིཨཱདིནཱ (སཱརཏྠ. ཊཱི. པཋམམཧཱསངྒཱིཏིཀཐཱཝཎྞནཱ) ཝིནཡཔཉྙཏྟིཡཱ སངྐརཝིརཧིཏེ དྷམྨེ. པུབྦཱཔརཝིརོདྷཱབྷཱཝེན ཡཐཱཝུཏྟདྷམྨཱནམེཝ ཨཉྙམཉྙསངྐརཝིརཧཏོ ཨཉྙམཉྙསངྐརཝིརཧིཏེ དྷམྨེཏིཔི ཝདནྟི. ‘‘པཱཎཱཏིཔཱཏོ ཨཀུསལ’’ནྟི (མ. ནི. ༢.༡༩༢) ཨེཝམཱདཱིསུ ཝཱ མརཎཱདྷིཔྤཱཡསྶ ཛཱིཝིཏིནྡྲིཡུཔཙྪེདཀཔཡོགསམུཊྛཱཔིཀཱ ཙེཏནཱ ཨཀུསལོ, ན པཱཎསངྑཱཏཛཱིཝིཏིནྡྲིཡསྶ ཨུཔཙྪེདསངྑཱཏོ ཨཏིཔཱཏོ. ཏཐཱ ‘‘ཨདིནྣསྶ པརསནྟཀསྶ ཨཱདཱནསངྑཱཏཱ ཝིཉྙཏྟི ཨབྱཱཀཏོ དྷམྨོ, ཏཾཝིཉྙཏྟིསམུཊྛཱཔིཀཱ ཐེཡྻཙེཏནཱ ཨཀུསལོ དྷམྨོ’’ཏི ཨེཝམཱདིནཱཔི ཨཉྙམཉྙསངྐརཝིརཧིཏེ དྷམྨེཏི ཨཏྠོ ཝེདིཏབྦོ. ཨབྷིཝིནཡེཏི ཨེཏྠ པན ‘‘ཛཱཏརཱུཔརཛཏཾ ན པཊིགྒཧེཏབྦ’’ནྟི ཝདནྟོ ཝིནཡེ ཝིནེཏི ནཱམ. ཨེཏྠ ཙ ‘‘ཨེཝཾ པཊིགྒཎྷཏོ པཱཙིཏྟིཡཾ, ཨེཝཾ པན དུཀྐཊ’’ནྟི ཝདནྟོ ཨབྷིཝིནཡེ ཝིནེཏི ནཱམཱཏི ཝདནྟི. ཏསྨཱ ཛཱཏརཱུཔརཛཏཾ པརསནྟཀཾ ཐེཡྻཙིཏྟེན གཎྷནྟསྶ ཡཐཱཝཏྠུཾ ¶ པཱརཱཛིཀཐུལླཙྩཡདུཀྐཊེསུ ཨཉྙཏརཾ, བྷཎྜཱགཱརིཀསཱིསེན གཎྷནྟསྶ པཱཙིཏྟིཡཾ, ཨཏྟནོ ཨཏྠཱཡ གཎྷནྟསྶ ནིསྶགྒིཡཾ པཱཙིཏྟིཡཾ, ཀེཝལཾ ལོལཏཱཡ གཎྷནྟསྶ ཨནཱམཱསདུཀྐཊཾ, རཱུཔིཡཚཌྜཀསམྨཏསྶ ཨནཱཔཏྟཱིཏི ཨེཝཾ ཨཉྙམཉྙསངྐརཝིརཧིཏེ ཝིནཡེཔི པཊིབལོ ཝིནེཏུནྟི ཨཏྠོ དཊྛབྦོ. ཨེཝཾ པན པརིཙྪིནྣཏཾ སརཱུཔཏོ སངྑེཔེནེཝ དསྶེནྟོ ‘‘ཨཉྙམཉྙ…པེ… ཧོཏཱི’’ཏི ཨཱཧ.

ཨབྷིཀྐནྟེནཱཏི ཨེཏྠ ཀནྟིཡཱ ཨདྷིཀཏྟཾ ཨབྷི-སདྡོ དཱིཔེཏཱིཏི ཝུཏྟཾ ‘‘ཨདྷིཀེ’’ཏི. ནནུ ཙ ‘‘ཨབྷིཀྐམནྟཱི’’ཏི ཨེཏྠ ཨབྷི-སདྡོ ཀམནཀིརིཡཱཡ ཝུཌྜྷིབྷཱཝཾ ཨཏིརེཀཏྟཾ དཱིཔེཏི, ‘‘ཨབྷིཉྙཱཏཱ ཨབྷིལཀྑིཏཱ’’ཏི ཨེཏྠ ཉཱཎལཀྑཎཀིརིཡཱནཾ སུཔཱཀཊཏཾ ཝིསེསཾ, ‘‘ཨབྷིཀྐནྟེནཱ’’ཏི ཨེཏྠ ཀནྟིཡཱ ཨདྷིཀཏྟཾ ཝིསིཊྛབྷཱཝཾ དཱིཔེཏཱིཏི ཨིདཾ ཏཱཝ ཡུཏྟཾ ཀིརིཡཱཝིསེསཀཏྟཱ ཨུཔསགྒསྶ. ‘‘པཱདཡོ ཀིརིཡཱཡོགེ ཨུཔསགྒཱ’’ཏི ཧི སདྡསཏྠེ ཝུཏྟཾ. ‘‘ཨབྷིརཱཛཱ, ཨབྷིཝིནཡེ’’ཏི པན པཱུཛིཏཔརིཙྪིནྣེསུ རཱཛཝིནཡེསུ ཨབྷི-སདྡོ ཝཏྟཏཱིཏི ཀཐམེཏཾ ཡུཛྫེཡྻ. ན ཧི ཨསཏྭཝཱཙཱི སདྡོ སཏྭཝཱཙཀོ སམྦྷཝཏཱིཏི? ནཏྠི ཨཏྲ དོསོ པཱུཛནཔརིཙྪེདནཀིརིཡཱནམྤི དཱིཔནཏོ, ཏཱཧི ཙ ཀིརིཡཱཧི ཡུཏྟེསུ རཱཛཝིནཡེསུཔི པཝཏྟཏྟཱ. ཨབྷིཔཱུཛིཏོ རཱཛཱཏི ཧི ཨཏྠེན ཀིརིཡཱཀཱརཀསམྦནྡྷཾ ནིམིཏྟཾ ཀཏྭཱ ཀམྨསཱདྷནབྷཱུཏཾ རཱཛདབྦཾ ཨབྷི-སདྡོ པདྷཱནཏོ ཝདཏི, པཱུཛནཀིརིཡཾ པན ཨཔྤདྷཱནཏོ. ཏཐཱ ཨབྷིཔརིཙྪིནྣོ ཝིནཡོཏི ¶ ཨཏྠེན ཀིརིཡཱཀཱརཀསམྦནྡྷཾ ནིམིཏྟཾ ཀཏྭཱ ཀམྨསཱདྷནབྷཱུཏཾ ཝིནཡདབྦཾ ཨབྷི-སདྡོ པདྷཱནཏོ ཝདཏི, པརིཙྪིནྡནཀིརིཡཾ པན ཨཔྤདྷཱནཏོ. ཏསྨཱ ཨཏིམཱལཱདཱིསུ ཨཏི-སདྡོ ཝིཡ ཨབྷི-སདྡོ ཨེཏྠ སཧ སཱདྷནེན ཀིརིཡཾ ཝདཏཱིཏི ཨབྷིརཱཛཨབྷིཝིནཡསདྡཱ སོཔསགྒཱཝ སིདྡྷཱ. ཨེཝཾ ཨབྷིདྷམྨསདྡེཔི ཨབྷིསདྡོ སཧ སཱདྷནེན ཝུཌྜྷིཡཱདིཀིརིཡཾ ཝདཏཱིཏི ཨཡམཏྠོ དསྶིཏོཏི ཝེདིཏབྦཾ.

ཧོཏུ ཨབྷི-སདྡོ ཡཐཱཝུཏྟེསུ ཨཏྠེསུ, ཏཔྤཡོགེན པན དྷམྨསདྡེན དཱིཔིཏཱ ཝུཌྜྷིམནྟཱདཡོ དྷམྨཱ ཨེཏྠ ཝུཏྟཱ ན བྷཝེཡྻུཾ, ཀཐཾ ཨཡམཏྠོ ཡུཛྫེཡྻཱཏི ཨནུཡོགེ སཏི ཏཾ པརིཧརནྟོ ‘‘ཨེཏྠ ཙཱ’’ཏིཨཱདིམཱཧ. ཏཏྠ ཨེཏྠཱཏི ཨེཏསྨིཾ ཨབྷིདྷམྨེ. ཨུཔནྱཱསེ ཙ-སདྡོ. བྷཱཝེཏཱིཏི ཙིཏྟསྶ ཝཌྜྷནཾ ཝུཏྟཾ, ཕརིཏྭཱཏི ཨཱརམྨཎསྶ ཝཌྜྷནཾ, ཏསྨཱ ཏཱཧི བྷཱཝནཱཕརཎཝུཌྜྷཱིཧི ཝུཌྜྷིམནྟོཔི དྷམྨཱ ཝུཏྟཱཏི ཨཏྠོ ¶ . ཨཱརམྨཎཱདཱིཧཱིཏི ཨཱརམྨཎསམྤཡུཏྟཀམྨདྭཱརཔཊིཔདཱདཱིཧི. ཨེཀནྟཏོ ལོཀུཏྟརདྷམྨཱནཉྙེཝ པཱུཛཱརཧཏྟཱ ‘‘སེཀྑཱ དྷམྨཱ’’ཏིཨཱདིནཱ ཏེཡེཝ པཱུཛིཏཱཏི དསྶིཏཱ. ‘‘པཱུཛཱརཧཱ’’ཏི ཨེཏེན ཀཏྟཱདིསཱདྷནཾ, ཨཏཱིཏཱདིཀཱལཾ, སཀྐུཎེཡྻཏྠཾ ཝཱ ནིཝཏྟེཏི. པཱུཛིཏབྦཱཡེཝ ཧི དྷམྨཱ ཀཱལཝིསེསནིཡམརཧིཏཱ པཱུཛཱརཧཱ ཨེཏྠ ཝུཏྟཱཏི ཨདྷིཔྤཱཡོ དསྶིཏོ. སབྷཱཝཔརིཙྪིནྣཏྟཱཏི ཕུསནཱདིསབྷཱཝེན པརིཙྪིནྣཏྟཱ. ཀཱམཱཝཙརེཧི མཧནྟབྷཱཝཏོ མཧགྒཏཱ དྷམྨཱ ཨདྷིཀཱ, ཏཏོཔི ཨུཏྟརཝིརཧཏོ ཨནུཏྟརཱ དྷམྨཱཏི དསྶེཏི ‘‘མཧགྒཏཱ’’ཏིཨཱདིནཱ. ཏེནཱཏི ‘‘ཝུཌྜྷིམནྟོ’’ཏིཨཱདིནཱ ཝཙནེན ཀརཎབྷཱུཏེན, ཧེཏུབྷཱུཏེན ཝཱ.

ཡཾ པནེཏྠཱཏི ཨེཏེསུ ཝིནཡཱདཱིསུ ཏཱིསུ ཨཉྙམཉྙཝིསིཊྛེསུ ཡཾ ཨཝིསིཊྛཾ སམཱནཾ, ཏཾ པིཊཀནྟི ཨཏྠོ. ཝིནཡཱདཡོ ཧི ཏཡོ སདྡཱ ཨཉྙམཉྙཱསཱདྷཱརཎཏྟཱ ཝིསིཊྛཱ ནཱམ, པིཊཀསདྡོ པན ཏེཧི ཏཱིཧིཔི སཱདྷཱརཎཏྟཱ ‘‘ཨཝིསིཊྛོ’’ཏི ཝུཙྩཏི. པརིཡཏྟིབྦྷཱཛནཏྠཏོཏི པརིཡཱཔུཎིཏབྦཏྠཔཏིཊྛཱནཏྠེཧི ཀརཎབྷཱུཏེཧི, ཝིསེསནབྷཱུཏེཧི ཝཱ. ཨཔིཙ པརིཡཏྟིབྦྷཱཛནཏྠཏོ པརིཡཏྟིབྷཱཛནཏྠནྟི ཨཱཧཱུཏི ཨཏྠོ དཊྛབྦོ. པཙྩཏྟཏྠེ ཧི ཏོ-སདྡོ ཨིཏི-སདྡེན ནིདྡིསིཏབྦཏྟཱ. ཨིཏིནཱ ནིདྡིསིཏབྦེཧིཏོ – སདྡམིཙྪནྟི ནེརུཏྟིཀཱ ཡཐཱ ‘‘ཨནིཙྩཏོ དུཀྑཏོ ཨནཏྟཏོ ཝིཔསྶནྟཱི’’ཏི (པཊྛཱ. ༡.༡.༤༠༦, ༤༠༨, ༤༡༡) ཨེཏེན པརིཡཱཔུཎིཏབྦཏོ, ཏཾཏདཏྠཱནཾ བྷཱཛནཏོ ཙ པིཊཀཾ ནཱམཱཏི དསྶེཏི. ཨནིཔྥནྣཔཱཊིཔདིཀཔདཉྷེཏཾ. སདྡཝིདཱུ པན ‘‘པིཊ སདྡསངྒྷཱཊེསཱུ’’ཏི ཝཏྭཱ ཨིདྷ ཝུཏྟམེཝ པཡོགམུདཱཧརནྟི, ཏསྨཱ ཏེསཾ མཏེན པིཊཱིཡཏི སདྡཱིཡཏི པརིཡཱཔུཎཱིཡཏཱིཏི པིཊཀཾ, པིཊཱིཡཏི ཝཱ སངྒྷཱཊཱིཡཏི ཏཾཏདཏྠོ ཨེཏྠཱཏི པིཊཀནྟི ནིབྦཙནཾ ཀཱཏབྦཾ. ‘‘ཏེནཱ’’ཏིཨཱདིནཱ སམཱསཾ དསྶེཏི.

མཱ ¶ པིཊཀསམྤདཱནེནཱཏི ཀཱལཱམསུཏྟེ, (ཨ. ནི. ༣.༦༦) སཱལ༹ྷསུཏྟེ (ཨ. ནི. ༣.༦༧) ཙ ཨཱགཏཾ པཱལི༹མཱཧ. ཏདཊྛཀཐཱཡཉྩ ‘‘ཨམྷཱཀཾ པིཊཀཏནྟིཡཱ སདྡྷིཾ སམེཏཱིཏི མཱ གཎྷིཏྠཱ’’ཏི (ཨ. ནི. ཨཊྛ. ༢.༣.༦༦) ཨཏྠོ ཝུཏྟོ. ཨཱཙརིཡསཱརིཔུཏྟཏྠེརེན པན ‘‘པཱལི༹སམྤདཱནཝསེན མཱ གཎྷཐཱ’’ཏི (སཱརཏྠ. ཊཱི. པཋམམཧཱསངྒཱིཏིཀཐཱཝཎྞནཱ) ཝུཏྟཾ. ཀུདཱལཔིཊཀམཱདཱཡཱཏི ཀུདཱལཉྩ ¶ པིཊཀཉྩ ཨཱདཱཡ. ཀུ ཝུཙྩཏི པཐཝཱི, ཏསྶཱ དཱལནཏོ ཝིདཱལནཏོ ཨཡོམཡཨུཔཀརཎཝིསེསོ ཀུདཱལཾ ནཱམ. ཏེསཾ ཏེསཾ ཝཏྠཱུནཾ བྷཱཛནབྷཱཝཏོ ཏཱལཔཎྞཝེཏྟལཏཱདཱིཧི ཀཏོ བྷཱཛནཝིསེསོ པིཊཀཾ ནཱམ. ཨིདཾ པན མཱུལཔཎྞཱསཀེ ཀཀཙཱུཔམསུཏྟེ (མ. ནི. ༡.༢༢༧).

‘‘ཏེན…པེ… ཉེཡྻཱ’’ཏི གཱཐཱཔདཾ ཨུལླིངྒེཏྭཱ ‘‘ཏེནཱ’’ཏིཨཱདིནཱ ཝིཝརཏི. སབྦཱདཱིཧི སབྦནཱམེཧི ཝུཏྟསྶ ཝཱ ལིངྒམཱདིཡཏེ, ཝུཙྩམཱནསྶ ཝཱ, ཨིདྷ པན ཝཏྟིཙྪཱཡ ཝུཏྟསྶེཝཱཏི ཀཏྭཱ ‘‘ཝིནཡོ ཙ སོ པིཊཀཉྩཱ’’ཏི ཝུཏྟཾ. ‘‘ཡཐཱཝུཏྟེནེཝ ནཡེནཱ’’ཏི ཨིམིནཱ ‘‘ཨེཝཾ དུཝིདྷཏྠེན…པེ… ཀཏྭཱ’’ཏི ཙ ‘‘པརིཡཏྟིབྷཱཝཏོ, ཏསྶ ཏསྶ ཨཏྠསྶ བྷཱཛནཏོ ཙཱ’’ཏི ཙ ཝུཏྟཾ སབྦམཏིདིསཏི. ཏཡོཔཱིཏི ཨེཏྠ ཨཔིསདྡོ, པི-སདྡོ ཝཱ ཨཝཡཝསམྤིཎྜནཏྠོ. ‘‘ཨཔཱི’’ཏི ཨཝཏྭཱ ‘‘པཱི’’ཏི ཝདནྟོ ཧི ཨཔི-སདྡོ ཝིཡ པི-སདྡོཔི ཝིསུཾ ནིཔཱཏོ ཨཏྠཱིཏི དསྶེཏི.

ཀཐེཏབྦཱནཾ ཨཏྠཱནཾ དེསཀཱཡཏྟེན ཨཱཎཱདིཝིདྷིནཱ ཨཏིསཛྫནཾ པབོདྷནཾ དེསནཱ. སཱསིཏབྦཔུགྒལགཏེན ཡཐཱཔརཱདྷཱདིསཱསིཏབྦབྷཱཝེན ཨནུསཱསནཾ ཝིནཡནཾ སཱསནཾ. ཀཐེཏབྦསྶ སཾཝརཱསཾཝརཱདིནོ ཨཏྠསྶ ཀཐནཾ ཝཙནཔཊིབདྡྷཏཱཀརཎཾ ཀཐཱ, ཨིདཾ ཝུཏྟཾ ཧོཏི – དེསིཏཱརཾ བྷགཝནྟམཔེཀྑིཏྭཱ དེསནཱ, སཱསིཏབྦཔུགྒལཝསེན སཱསནཾ, ཀཐེཏབྦསྶ ཨཏྠསྶ ཝསེན ཀཐཱཏི ཨེཝམིམེསཾ ནཱནཱཀརཎཾ ཝེདིཏབྦནྟི. ཨེཏྠ ཙ ཀིཉྩཱཔི དེསནཱདཡོ དེསེཏབྦཱདིནིརཔེཀྑཱ ན ཧོནྟི, ཨཱཎཱདཡོ པན ཝིསེསཏོ དེསཀཱདིཨདྷཱིནཱཏི ཏཾ ཏཾ ཝིསེསཡོགཝསེན དེསནཱདཱིནཾ བྷེདོ ཝུཏྟོ. ཡཐཱ ཧི ཨཱཎཱཝིདྷཱནཾ ཝིསེསཏོ ཨཱཎཱརཧཱདྷཱིནཾ ཏཏྠ ཀོསལླཡོགཏོ, ཨེཝཾ ཝོཧཱརཔརམཏྠཝིདྷཱནཱནི ཙ ཝིདྷཱཡཀཱདྷཱིནཱནཱིཏི ཨཱཎཱདིཝིདྷིནོ དེསཀཱཡཏྟཏཱ ཝུཏྟཱ. ཨཔརཱདྷཛ྄ཛྷཱསཡཱནུརཱུཔཾ ཝིཡ ཙ དྷམྨཱནུརཱུཔམྤི སཱསནཾ ཝིསེསཏོ, ཏཐཱ ཝིནེཏབྦཔུགྒལཱཔེཀྑནྟི སཱསིཏབྦཔུགྒལཝསེན སཱསནཾ ཝུཏྟཾ. སཾཝརཱསཾཝརནཱམརཱུཔཱནཾ ཝིཡ ཙ ཝིནིབྦེཋེཏབྦཱཡ དིཊྛིཡཱ ཀཐནཾ སཏི ཝཱཙཱཝཏྠུསྨིཾ, ནཱསཏཱིཏི ཝིསེསཏོ ཏདདྷཱིནཾ, ཏསྨཱ ཀཐེཏབྦསྶ ཨཏྠསྶ ཝསེན ཀཐཱ ཝུཏྟཱ. ཧོནྟི ཙེཏྠ –

‘‘དེསཀསྶ ¶ ¶ ཝསེནེཏྠ, དེསནཱ པིཊཀཏྟཡཾ;

སཱསིཏབྦཝསེནེཏཾ, སཱསནནྟི པཝུཙྩཏི.

ཀཐེཏབྦསྶ ཨཏྠསྶ, ཝསེནཱཔི ཀཐཱཏི ཙ;

དེསནཱསཱསནཀཐཱ-བྷེདམྤེཝཾ པཀཱསཡེ’’ཏི.

པདཏྟཡམྤེཏཾ སམོདྷཱནེཏྭཱ ཏཱསཾ བྷེདོཏི ཀཏྭཱ བྷེདསདྡོ ཝིསུཾ ཝིསུཾ ཡོཛེཏབྦོ དྭནྡཔདཏོ པརཾ སུཡྻམཱནཏྟཱ ‘‘དེསནཱབྷེདཾ, སཱསནབྷེདཾ, ཀཐཱབྷེདཉྩ ཡཐཱརཧཾ པརིདཱིཔཡེ’’ཏི. བྷེདནྟི ཙ ནཱནཏྟཾ, ཝིསེསཾ ཝཱ. ཏེསུ པིཊཀེསུ. སིཀྑཱ ཙ པཧཱནཉྩ གམྦྷཱིརབྷཱཝོ ཙ, ཏཉྩ ཡཐཱརཧཾ པརིདཱིཔཡེ.

དུཏིཡགཱཐཱཡ པརིཡཏྟིབྷེདཾ པརིཡཱཔུཎནསྶ པཀཱརཾ, ཝིསེསཉྩ ཝིབྷཱཝཡེ. ཡཧིཾ ཝིནཡཱདིཀེ པིཊཀེ. ཡཾ སམྤཏྟིཾ, ཝིཔཏྟིཉྩ ཡཐཱ བྷིཀྑུ པཱཔུཎཱཏི, ཏཐཱ ཏམྤི སབྦཾ ཏཧིཾ ཝིབྷཱཝཡེཏི སམྦནྡྷོ. ཨཐ ཝཱ ཡཾ པརིཡཏྟིབྷེདཾ སམྤཏྟིཾ, ཝིཔཏྟིཉྩ ཡཧིཾ ཡཐཱ བྷིཀྑུ པཱཔུཎཱཏི, ཏཐཱ ཏམྤི སབྦཾ ཏཧིཾ ཝིབྷཱཝཡེཏི ཡོཛེཏབྦཾ. ཡཐཱཏི ཙ ཡེཧི ཨུཔཱརམྦྷཱདིཧེཏུཔརིཡཱཔུཎནཱདིཔྤཀཱརེཧི, ཨུཔཱརམྦྷནིསྶརཎདྷམྨཀོསརཀྑཎཧེཏུཔརིཡཱཔུཎནཾ སུཔྤཊིཔཏྟིདུཔྤཊིཔཏྟཱིཏི ཨེཏེཧི པཀཱརེཧཱིཏི ཝུཏྟཾ ཧོཏི. སནྟེསུཔི ཙ ཨཉྙེསུ ཏཐཱ པཱཔུཎནྟེསུ ཛེཊྛསེཊྛཱསནྣསདཱསནྣིཧིཏབྷཱཝཏོ, ཡཐཱནུསིཊྛཾ སམྨཱཔཊིཔཛྫནེན དྷམྨཱདྷིཊྛཱནབྷཱཝཏོ ཙ བྷིཀྑཱུཏི ཝུཏྟཾ.

ཏཏྲཱཏི ཏཱསུ གཱཐཱསུ. ཨཡནྟི ཨདྷུནཱ ཝཀྑམཱནཱ ཀཐཱ. པརིདཱིཔནཱཏི སམནྟཏོ པཀཱསནཱ, ཀིཉྩིམཏྟམྤི ཨསེསེཏྭཱ ཝིབྷཛནཱཏི ཝུཏྟཾ ཧོཏི. ཝིབྷཱཝནཱཏི ཨེཝཾ པརིདཱིཔནཱཡཔི སཏི གཱུལ༹ྷཾ པཊིཙྪནྣམཀཏྭཱ སོཏཱུནཾ སུཝིཉྙེཡྻབྷཱཝེན ཨཱཝིབྷཱཝནཱ. སངྑེཔེན པརིདཱིཔནཱ, ཝིཏྠཱརེན ཝིབྷཱཝནཱཏིཔི ཝདནྟི. ཨཔིཙ ཨེཏཾ པདདྭཡཾ ཧེཊྛཱ ཝུཏྟཱནུརཱུཔཏོ ཀཐིཏཾ, ཨཏྠཏོ པན ཨེཀམེཝ. ཏསྨཱ པརིདཱིཔནཱ པཋམགཱཐཱཡ, ཝིབྷཱཝནཱ དུཏིཡགཱཐཱཡཱཏི ཡོཛེཏབྦཾ. ཙ-སདྡེན ཨུབྷཡཏྠཾ ཨཉྙམཉྙཾ སམུཙྩེཏི. ཀསྨཱ, ཝུཙྩནྟཱིཏི ཨཱཧ ‘‘ཨེཏྠ ཧཱི’’ཏིཨཱདི. ཧཱིཏི ཀཱརཎེ ནིཔཱཏོ ‘‘ཨཀྑརཝིཔཏྟིཡཾ ཧཱི’’ཏིཨཱདཱིསུ ཝིཡ. ཡསྨཱ, ཀསྨཱཏི ཝཱ ཨཏྠོ. ཨཱཎཾ པཎེཏུཾ [ཋཔེཏུཾ (སཱརཏྠ. ཊཱི. ༡.པཋམམཧཱསངྒཱིཏིཀཐཱཝཎྞནཱ)] ཨརཧཏཱིཏི ཨཱཎཱརཧོ, སམྨཱསམྦུདྡྷཏྟཱ, མཧཱཀཱརུཎིཀཏཱཡ ¶ ཙ ཨཝིཔརཱིཏཧིཏོཔདེསཀབྷཱཝེན པམཱཎཝཙནཏྟཱ ཨཱཎཱརཧེན བྷགཝཏཱཏི ཨཏྠོ. ཝོཧཱརཔརམཏྠདྷམྨཱནམྤི ཏཏྠ སབྦྷཱཝཏོ ‘‘ཨཱཎཱབཱཧུལླཏོ’’ཏི ¶ ཝུཏྟཾ, ཏེན ཡེབྷུཡྻནཡཾ དསྶེཏི. ཨིཏོ པརེསུཔི ཨེསེཝ ནཡོ. ཝིསེསེན སཏྟཱནཾ མནཾ ཨཝཧརཏཱིཏི ཝོཧཱརོ, པཉྙཏྟི, ཏསྨིཾ ཀུསལོ, ཏེན.

པཙུརོ བཧུལོ ཨཔརཱདྷོ དོསོ ཝཱིཏིཀྐམོ ཡེསཾ ཏེ པཙུརཱཔརཱདྷཱ, སེཡྻསཀཏྠེརཱདཡོ. ཡཐཱཔརཱདྷནྟི དོསཱནུརཱུཔཾ. ‘‘ཨནེཀཛ྄ཛྷཱསཡཱ’’ཏིཨཱདཱིསུ ཨཱསཡོཝ ཨཛ྄ཛྷཱསཡོ, སོ ཨཏྠཏོ དིཊྛི, ཉཱཎཉྩ, པབྷེདཏོ པན ཙཏུབྦིདྷོ ཧོཏི. ཝུཏྟཉྩ –

‘‘སསྶཏུཙྪེདདིཊྛཱི ཙ, ཁནྟི ཙེཝཱནུལོམིཀཱ;

ཡཐཱབྷཱུཏཉྩ ཡཾ ཉཱཎཾ, ཨེཏཾ ཨཱསཡསདྡིཏ’’ནྟི.

ཏཏྠ སབྦདིཊྛཱིནཾ སསྶཏུཙྪེདདིཊྛཱིཧི སངྒཧིཏཏྟཱ སབྦེཔི དིཊྛིགཏིཀཱ སཏྟཱ ཨིམཱ ཨེཝ དྭེ དིཊྛིཡོ སནྣིསྶིཏཱ. ཡཐཱཧ ‘‘དྭཡནིསྶིཏོ ཁོ པནཱཡཾ ཀཙྩཱན ལོཀོ ཡེབྷུཡྻེན ཨཏྠིཏཉྩ ནཏྠིཏཉྩཱ’’ཏི, (སཾ. ནི. ༢.༡༥) ཨཏྠིཏཱཏི ཧི སསྶཏགྒཱཧོ ཨདྷིཔྤེཏོ, ནཏྠིཏཱཏི ཨུཙྪེདགྒཱཧོ. ཨཡཾ ཏཱཝ ཝཊྚནིསྶིཏཱནཾ པུཐུཛྫནཱནཾ ཨཱསཡོ. ཝིཝཊྚནིསྶིཏཱནཾ པན སུདྡྷསཏྟཱནཾ ཨནུལོམིཀཱ ཁནྟི, ཡཐཱབྷཱུཏཉཱཎནྟི དུཝིདྷོ ཨཱསཡོ. ཏཏྠ ཙ ཨནུལོམིཀཱ ཁནྟི ཝིཔསྶནཱཉཱཎཾ. ཡཐཱབྷཱུཏཉཱཎཾ པན ཀམྨསཀཏཱཉཱཎཾ. ཙཏུབྦིདྷོ པེསོ ཨཱསཡནྟི སཏྟཱ ཨེཏྠ ནིཝསནྟི, ཙིཏྟཾ ཝཱ ཨཱགམྨ སེཏི ཨེཏྠཱཏི ཨཱསཡོ མིགཱསཡོ ཝིཡ. ཡཐཱ མིགོ གོཙརཱཡ གནྟྭཱཔི པཙྩཱགནྟྭཱ ཏཏྠེཝ ཝནགཧནེ སཡཏཱིཏི ཏཾ ཏསྶ ‘‘ཨཱསཡོ’’ཏི ཝུཙྩཏི, ཏཐཱ ཙིཏྟཾ ཨཉྙཐཱཔི པཝཏྟིཏྭཱ ཡཏྠ པཙྩཱགམྨ སེཏི, ཏསྶ སོ ‘‘ཨཱསཡོ’’ཏི. ཀཱམརཱགཱདཡོ སཏྟ ཨནུསཡཱ. མཱུསིཀཝིསཾ ཝིཡ ཀཱརཎལཱབྷེ ཨུཔྤཛྫམཱནཱརཧཱ ཨནཱགཏཱ, ཨཏཱིཏཱ, པཙྩུཔྤནྣཱ ཙ ཏཾསབྷཱཝཏྟཱ ཏཐཱ ཝུཙྩནྟི. ན ཧི དྷམྨཱནཾ ཀཱལབྷེདེན སབྷཱཝབྷེདོཏི. ཙརིཡཱཏི རཱགཙརིཡཱདིཀཱ ཚ མཱུལཙརིཡཱ, ཨནྟརབྷེདེན ཨནེཀཝིདྷཱ, སཾསགྒཝསེན པན ཏེསཊྛི ཧོནྟི. ཨཐ ཝཱ ཙརིཡཱཏི སུཙརིཏདུཙྩརིཏཝསེན དུཝིདྷཾ ཙརིཏཾ. ཏཉྷི ཝིབྷངྒེ ཙརིཏནིདྡེསེ ནིདྡིཊྛཾ.

‘‘ཨདྷིམུཏྟི ¶ ནཱམ ‘ཨཛྫེཝ པབྦཛིསྶཱམི, ཨཛྫེཝ ཨརཧཏྟཾ གཎྷིསྶཱམཱི’ཏིཨཱདིནཱ ཏནྣིནྣབྷཱཝེན པཝཏྟམཱནཾ སནྣིཊྛཱན’’ནྟི (སཱརཏྠ. ཊཱི. པཋམམཧཱསངྒཱིཏིཀཐཱཝཎྞནཱ) གཎྛིཔདེསུ ཝུཏྟཾ. ཨཱཙརིཡདྷམྨཔཱལཏྠེརེན པན ‘‘ཨདྷིམུཏྟི ནཱམ སཏྟཱནཾ པུབྦཙརིཡཝསེན ཨབྷིརུཙི, སཱ དུཝིདྷཱ ཧཱིནཔཎཱིཏབྷེདེནཱ’ཏི (དཱི. ནི. ཊཱི. པཋམམཧཱསངྒཱིཏིཀཐཱཝཎྞནཱ) ཝུཏྟཾ. ཏཐཱ ཧི ཡཱཡ ཧཱིནཱདྷིམུཏྟིཀཱ སཏྟཱ ཧཱིནཱདྷིམུཏྟིཀེཡེཝ སཏྟེ སེཝནྟི, པཎཱིཏཱདྷིམུཏྟིཀཱ པཎཱིཏཱདྷིམུཏྟིཀེཡེཝ ¶ . སཙེ ཧི ཨཱཙརིཡུཔཛ྄ཛྷཱཡཱ སཱིལཝནྟོ ན ཧོནྟི, སདྡྷིཝིཧཱརིཀཱ སཱིལཝནྟོ, ཏེ ཨཏྟནོ ཨཱཙརིཡུཔཛ྄ཛྷཱཡེཔི ན ཨུཔསངྐམནྟི, ཨཏྟནཱ སདིསེ སཱརུཔྤབྷིཀྑཱུཡེཝ ཨུཔསངྐམནྟི. སཙེ ཨཱཙརིཡུཔཛ྄ཛྷཱཡཱ སཱརུཔྤབྷིཀྑཱུ, ཨིཏརེ ཨསཱརུཔྤཱ, ཏེཔི ན ཨཱཙརིཡུཔཛ྄ཛྷཱཡེ ཨུཔསངྐམནྟི, ཨཏྟནཱ སདིསེ ཨསཱརུཔྤབྷིཀྑཱུཡེཝ ཨུཔསངྐམནྟི. དྷཱཏུསཾཡུཏྟཝསེན (སཾ. ནི. ༢.༨༥ ཨཱདཡོ) ཙེས ཨཏྠོ དཱིཔེཏབྦོ. ཨེཝམཡཾ ཧཱིནཱདྷིམུཏྟིཀཱདཱིནཾ ཨཉྙམཉྙོ པསེཝནཱདིནིཡམིཏཱ ཨབྷིརུཙི ཨཛ྄ཛྷཱསཡདྷཱཏུ ‘‘ཨདྷིམུཏྟཱི’’ཏི ཝེདིཏབྦཱ. ཨནེཀཱ ཨཛ྄ཛྷཱསཡཱདཡོ ཏེ ཡེསཾ ཨཏྠི, ཨནེཀཱ ཝཱ ཨཛ྄ཛྷཱསཡཱདཡོ ཡེསནྟི ཏཐཱ ཡཐཱ ‘‘བཧུཀཏྟུཀོ, བཧུནདིཀོ’’ཏི. ཡཐཱནུལོམནྟི ཨཛ྄ཛྷཱསཡཱདཱིནཾ ཨནུལོམཾ ཨནཏིཀྐམྨ, ཡེ ཡེ ཝཱ ཨཛ྄ཛྷཱསཡཱདཡོ ཨནུལོམཱ, ཏེཧི ཏེཧཱིཏི ཨཏྠོ. ཨཱསཡཱདཱིནཾ ཨནུལོམསྶ ཝཱ ཨནུརཱུཔནྟིཔི ཝདནྟི. གྷནཝིནིབྦྷོགཱབྷཱཝཏོ དིཊྛིམཱནཏཎྷཱཝསེན ‘‘ཨཧཾ མམ སནྟཀ’’ནྟི ཨེཝཾ པཝཏྟསཉྙིནོ. ཡཐཱདྷམྨནྟི ‘‘ནཏྠེཏྠ ཨཏྟཱ, ཨཏྟནིཡཾ ཝཱ, ཀེཝལཾ དྷམྨམཏྟམེཝེཏ’’ནྟི ཨེཝམཱདིནཱ དྷམྨསབྷཱཝཱནུརཱུཔནྟི ཨཏྠོ.

སཾཝརཎཾ སཾཝརོ, ཀཱཡཝཱཙཱཧི ཨཝཱིཏིཀྐམོ. མཧནྟོ སཾཝརོ ཨསཾཝརོ. ཝུཌྜྷིཨཏྠོ ཧི ཨཡཾ ཨ-ཀཱརོ ཡཐཱ ‘‘ཨསེཀྑཱ དྷམྨཱ’’ཏི (དྷ. ས. ཏིཀམཱཏིཀཱ ༢༡) ཏཾཡོགཏཱཡ ཙ ཁུདྡཀོ སཾཝརོ པཱརིསེསཱདིནཡེན སཾཝརོ, ཏསྨཱ ཁུདྡཀོ, མཧནྟོ ཙ སཾཝརོཏི ཨཏྠོ. ཏེནཱཧ ‘‘སཾཝརཱ སཾཝརོ’’ཏིཨཱདི. དིཊྛིཝིནིཝེཋནཱཏི དིཊྛིཡཱ ཝིམོཙནཾ, ཨཏྠཏོ པན ཏསྶ ཨུཛུཝིཔཙྩནིཀཱ སམྨཱདིཊྛིཨཱདཡོ དྷམྨཱ. ཏཐཱ ཙཱཧ ‘‘དྭཱསཊྛིདིཊྛིཔཊིཔཀྑབྷཱུཏཱ’’ཏི. ནཱམསྶ, རཱུཔསྶ, ནཱམརཱུཔསྶ ཙ པརིཙྪིནྡནཾ ནཱམརཱུཔཔརིཙྪེདོ, སོ པན ‘‘རཱགཱདིཔཊིཔཀྑབྷཱུཏོ’’ཏི ཝཙནཏོ ཏཐཱཔཝཏྟམེཝ ཉཱཎཾ.

‘‘ཏཱིསུཔཱི’’ཏིཨཱདིནཱ ¶ ཨཔརཌྜྷཾ ཝིཝརཏི. ཏཱིསུཔི ཏཱསཾ ཝཙནསམྦྷཝཏོ ‘‘ཝིསེསེནཱ’’ཏི ཝུཏྟཾ. ཏདེཏཾ སབྦཏྠ ཡོཛེཏབྦཾ. ཏཏྲ ‘‘ཡཱཡཾ ཨདྷིསཱིལསིཀྑཱ, ཨཡཾ ཨིམསྨིཾ ཨཏྠེ ཨདྷིཔྤེཏཱ སིཀྑཱ’’ཏི ཝཙནཏོ ཨཱཧ ‘‘ཝིནཡཔིཊཀེ ཨདྷིསཱིལསིཀྑཱ’’ཏི. སུཏྟནྟཔཱལི༹ཡཾ ‘‘ཝིཝིཙྩེཝ ཀཱམེཧཱི’’ཏིཨཱདིནཱ (དཱི. ནི. ༡.༢༢༦; སཾ. ནི. ༡.༡༥༢; ཨ. ནི. ༤.༡༢༣) སམཱདྷིདེསནཱབཱཧུལླཏོ ‘‘སུཏྟནྟ པིཊཀེ ཨདྷིཙིཏྟསིཀྑཱ’’ཏི ཝུཏྟཾ. ནཱམརཱུཔཔརིཙྪེདསྶ ཨདྷིཔཉྙཱཔདཊྛཱནཏོ, ཨདྷིཔཉྙཱཡ ཙ ཨཏྠཱཡ ཏདཝསེསནཱམརཱུཔདྷམྨཀཐནཏོ ཨཱཧ ‘‘ཨབྷིདྷམྨཔིཊཀེ ཨདྷིཔཉྙཱསིཀྑཱ’’ཏི.

ཀིལེསཱནནྟི སཾཀླེསདྷམྨཱནཾ, ཀམྨཀིལེསཱནཾ ཝཱ, ཨུབྷཡཱཔེཀྑཉྩེཏཾ ‘‘ཡོ ཀཱཡཝཙཱིདྭཱརེཧི ¶ ཀིལེསཱནཾ ཝཱིཏིཀྐམོ, ཏསྶ པཧཱནཾ, ཏསྶ པཊིཔཀྑཏྟཱ’’ཏི ཙ. ‘‘ཝཱིཏིཀྐམོ’’ཏི ཨཡཾ ‘‘པཊིཔཀྑ’’ནྟི བྷཱཝཡོགེ སམྦནྡྷོ, ‘‘སཱིལསྶཱ’’ཏི པན བྷཱཝཔཙྩཡེ. ཨེཝཾ སབྦཏྠ. ཨནུསཡཝསེན སནྟཱནེ ཨནུཝཏྟནྟཱ ཀིལེསཱ ཀཱརཎལཱབྷེ པརིཡུཊྛིཏཱཔི སཱིལབྷེདབྷཡཝསེན ཝཱིཏིཀྐམིཏུཾ ན ལབྷནྟཱིཏི ཨཱཧ ‘‘ཝཱིཏིཀྐམཔཊིཔཀྑཏྟཱ སཱིལསྶཱ’’ཏི. ཨོཀཱསཱདཱནཝསེན ཀིལེསཱནཾ ཙིཏྟེ ཀུསལཔྤཝཏྟིཾ པརིཡཱདིཡིཏྭཱ ཨུཊྛཱནཾ པརིཡུཊྛཱནཾ, ཏསྶ པཧཱནཾ, ཙིཏྟསནྟཱནེ ཨུཔྤཏྟིཝསེན ཀིལེསཱནཾ པརིཡུཊྛཱནསྶ པཧཱནནྟི ཝུཏྟཾ ཧོཏི. ‘‘ཀིལེསཱན’’ནྟི ཧི ཨདྷིཀཱརོ, ཏཾ པན པརིཡུཊྛཱནཔྤཧཱནཾ ཙིཏྟསམཱདཧནཝསེན བྷཝཏཱིཏི ཨཱཧ ‘‘པརིཡུཊྛཱནཔཊིཔཀྑཏྟཱ སམཱདྷིསྶཱ’’ཏི. ཨཔྤཧཱིནབྷཱཝེན སནྟཱནེ ཨནུ ཨནུ སཡནཀཱ ཨནུརཱུཔཀཱརཎལཱབྷེ ཨུཔྤཛྫནཱརཧཱ ཐཱམགཏཱ ཀཱམརཱགཱདཡོ སཏྟ ཀིལེསཱ ཨནུསཡཱ, ཏེསཾ པཧཱནཾ, ཏེ པན སབྦསོ ཨརིཡམགྒཔཉྙཱཡ པཧཱིཡནྟཱིཏི ཨཱཧ ‘‘ཨནུསཡཔཊིཔཀྑཏྟཱ པཉྙཱཡཱ’’ཏི.

དཱིཔཱལོཀེན ཝིཡ ཏམསྶ དཱནཱདིཔུཉྙཀིརིཡཝཏྠུགཏེན ཏེན ཏེན ཀུསལངྒེན ཏསྶ ཏསྶ ཨཀུསལསྶ པཧཱནཾ ཏདངྒཔྤཧཱནཾ. ཨིདྷ པན ཨདྷིསཱིལསིཀྑཱཡ ཝུཏྟཊྛཱནཏྟཱ ཏེན ཏེན སུསཱིལྱངྒེན ཏསྶ ཏསྶ དུསྶཱིལྱངྒསྶ པཧཱནཾ ‘‘ཏདངྒཔྤཧཱན’’ནྟི གཧེཏབྦཾ. ཨུཔཙཱརཔྤནཱབྷེདེན སམཱདྷིནཱ པཝཏྟིནིཝཱརཎེན གྷཊཔྤཧཱརེན ཝིཡ ཛལཏལེ སེཝཱལསྶ ཏེསཾ ཏེསཾ ནཱིཝརཎཱདིདྷམྨཱནཾ ཝིཀྑམྦྷནཝསེན པཧཱནཾ ཝིཀྑམྦྷནཔྤཧཱནཾ. ཙཏུནྣཾ ཨརིཡམགྒཱནཾ བྷཱཝིཏཏྟཱ ཏཾ ཏཾ མགྒཝཏོ སནྟཱནེ སམུདཡཔཀྑིཀསྶ ¶ ཀིལེསགཎསྶ ཨཙྩནྟམཔྤཝཏྟིསངྑཱཏ སམུཙྪིནྡནཝསེན པཧཱནཾ སམུཙྪེདཔྤཧཱནཾ. དུཊྛུ ཙརིཏཾ, སཾཀིལེསེཧི ཝཱ དཱུསིཏཾ ཙརིཏཾ དུཙྩརིཏཾ. ཏདེཝ ཡཏྠ ཨུཔྤནྣཾ, ཏཾ སནྟཱནཾ སམྨཱ ཀིལིསཏི ཝིབཱདྷཏི, ཨུཔཏཱཔེཏི ཙཱཏི སཾཀིལེསོ, ཏསྶ པཧཱནཾ. ཀཱཡཝཙཱིདུཙྩརིཏཝསེན པཝཏྟསཾཀིལེསསྶ ཏདངྒཝསེན པཧཱནཾ ཝུཏྟཾ སཱིལསྶ དུཙྩརིཏཔཊིཔཀྑཏྟཱ. སིཀྑཏྟཡཱནུསཱརེན ཧི ཨཏྠོ ཝེདིཏབྦོ. ཏསཏཱིཏི ཏཎྷཱ, སཱཝ ཝུཏྟནཡེན སཾཀིལེསོ, ཏསྶ ཝིཀྑམྦྷནཝསེན པཧཱནཾ ཝུཏྟཾ སམཱདྷིསྶ ཀཱམཙྪནྡཔཊིཔཀྑཏྟཱ. དིཊྛིཡེཝ ཡཐཱཝུཏྟནཡེན སཾཀིལེསོ, ཏསྶ སམུཙྪེདཝསེན པཧཱནཾ ཝུཏྟཾ པཉྙཱཡ ཨཏྟཱདིཝིནིམུཏྟསབྷཱཝ དྷམྨཔྤཀཱསནཏོ.

ཨེཀམེཀསྨིཉྩེཏྠཱཏི ཨེཏེསུ ཏཱིསུ པིཊཀེསུ ཨེཀམེཀསྨིཾ པིཊཀེ, ཙ-སདྡོ ཝཱཀྱཱརམྦྷེ, པཀྑནྟརེ ཝཱ. པི-སདྡོ, ཨཔི-སདྡོ ཝཱ ཨཝཡཝསམྤིཎྜནེ, ཏེན ན ཀེཝལཾ ཙཏུབྦིདྷསྶེཝ གམྦྷཱིརབྷཱཝོ, ཨཐ ཁོ པཙྩེཀཾ ཏདཝཡཝཱནམྤཱིཏི སམྤིཎྜནཾ ཀརོཏི. ཨེས ནཡོ ཨཱིདིསེསུ. ཨིདཱནི ཏེ སརཱུཔཏོ དསྶེཏུཾ ‘‘ཏཏྠཱ’’ཏིཨཱདི ཝུཏྟཾ. ཏཏྠ ཏནྟཱིཏི པཱལི༹. སཱ ཧི ཨུཀྐཊྛཱནཾ སཱིལཱདིཨཏྠཱནཾ ¶ བོདྷནཏོ, སབྷཱཝནིརུཏྟིབྷཱཝཏོ, བུདྡྷཱདཱིཧི བྷཱསིཏཏྟཱ ཙ པཀཊྛཱནཾ ཝཙནཱནཾ ཨཱལི༹ པནྟཱིཏི ‘‘པཱལཱི༹’’ཏི ཝུཙྩཏི.

ཨིདྷ པན ཝིནཡགཎྛིཔདཀཱརཱདཱིནཾ སདྡཝཱདཱིནཾ མཏེན པུབྦེ ཝཝཏྠཱཔིཏཱ པརམཏྠསདྡཔྤབནྡྷབྷཱུཏཱ ཏནྟི དྷམྨོ ནཱམ. ཨིཏི-སདྡོ ཧི ནཱམཏྠེ, ‘‘དྷམྨོ’’ཏི ཝཱ ཝུཙྩཏི. ཏསྶཱཡེཝཱཏི ཏསྶཱ ཡཐཱཝུཏྟཱཡ ཨེཝ ཏནྟིཡཱ ཨཏྠོ. མནསཱ ཝཝཏྠཱཔིཏཱཡཱཏི ཨུགྒཧཎ-དྷཱརཎཱདིཝསཔྤཝཏྟེན མནསཱ པུབྦེ ཝཝཏྠཱཔིཏཱཡ ཡཐཱཝུཏྟཱཡ པརམཏྠསདྡཔྤབནྡྷབྷཱུཏཱཡ ཏསྶཱ ཏནྟིཡཱ. དེསནཱཏི པཙྪཱ པརེསམཝབོདྷནཏྠཾ དེསནཱསངྑཱཏཱ པརམཏྠསདྡཔྤབནྡྷབྷཱུཏཱ ཏནྟིཡེཝ. ཨཔིཙ ཡཐཱཝུཏྟཏནྟི སངྑཱཏསདྡསམུཊྛཱཔཀོ ཙིཏྟུཔྤཱདོ དེསནཱ. ཏནྟིཡཱ, ཏནྟིཨཏྠསྶ ཙཱཏི ཡཐཱཝུཏྟཱཡ དུཝིདྷཱཡཔི ཏནྟིཡཱ, ཏདཏྠསྶ ཙ ཡཐཱབྷཱུཏཱཝབོདྷོཏི ཨཏྠོ ཝེདིཏབྦོ. ཏེ ཧི བྷགཝཏཱ ཝུཙྩམཱནསྶ ཨཏྠསྶ, ཝོཧཱརསྶ ཙ དཱིཔཀོ སདྡོཡེཝ ཏནྟི ནཱམཱཏི ཝདནྟི. ཏེསཾ པན ཝཱདེ དྷམྨསྶཱཔི སདྡསབྷཱཝཏྟཱ དྷམྨདེསནཱནཾ ཀོ ཝིསེསོཏི ཙེ? ཏེསཾ ཏེསཾ ཨཏྠཱནཾ བོདྷཀབྷཱཝེན ཉཱཏོ, ཨུགྒཧཎཱདིཝསེན ¶ ཙ པུབྦེ ཝཝཏྠཱཔིཏོ པརམཏྠསདྡཔྤབནྡྷོ དྷམྨོ, པཙྪཱ པརེསཾ ཨཝབོདྷནཏྠཾ པཝཏྟིཏོ ཏཾ ཏདཏྠཔྤཀཱསཀོ སདྡོ དེསནཱཏི ཨཡམིམེསཾ ཝིསེསོཏི. ཨཐ ཝཱ ཡཐཱཝུཏྟསདྡསམུཊྛཱཔཀོ ཙིཏྟུཔྤཱདོ དེསནཱ དེསཱིཡཏི སམུཊྛཱཔཱིཡཏི སདྡོ ཨེཏེནཱཏི ཀཏྭཱ མུསཱཝཱདཱདཡོ ཝིཡ ཏཏྠཱཔི ཧི མུསཱཝཱདཱདིསམུཊྛཱཔིཀཱ ཙེཏནཱ མུསཱཝཱདཱདིསདྡེཧི ཝོཧརཱིཡཏཱིཏི. ཀིཉྩཱཔི ཨཀྑརཱཝལིབྷཱུཏོ པཉྙཏྟིསདྡོཡེཝ ཨཏྠསྶ ཉཱཔཀོ, ཏཐཱཔི མཱུལཀཱརཎབྷཱཝཏོ ‘‘ཨཀྑརསཉྙཱཏོ’’ཏིཨཱདཱིསུ ཝིཡ ཏསྶཱཡེཝ ཨཏྠོཏི པརམཏྠསདྡོཡེཝ ཨཏྠསྶ ཉཱཔཀབྷཱཝེན ཝུཏྟོཏི དཊྛབྦཾ. ‘‘ཏསྶཱ ཏནྟིཡཱ དེསནཱ’’ཏི ཙ སདིསཝོཧཱརེན ཝུཏྟཾ ཡཐཱ ‘‘ཨུཔྤནྣཱ ཙ ཀུསལཱདྷམྨཱ བྷིཡྻོབྷཱཝཱཡ ཝེཔུལླཱཡ སཾཝཏྟནྟཱི’’ཏི.

ཨབྷིདྷམྨགཎྛིཔདཀཱརཱདཱིནཾ པན པཎྞཏྟིཝཱདཱིནཾ མཏེན སམྨུཏིཔརམཏྠབྷེདསྶ ཨཏྠསྶ ཨནུརཱུཔཝཱཙཀབྷཱཝེན པརམཏྠསདྡེསུ ཨེཀནྟེན བྷགཝཏཱ མནསཱ ཝཝཏྠཱཔིཏཱ ནཱམཔཉྙཏྟིཔབནྡྷབྷཱུཏཱ ཏནྟི དྷམྨོ ནཱམ, ‘‘དྷམྨོ’’ཏི ཝཱ ཝུཙྩཏི. ཏསྶཱཡེཝཱཏི ཏསྶཱ ནཱམཔཉྙཏྟིབྷཱུཏཱཡ ཏནྟིཡཱ ཨེཝ ཨཏྠོ. མནསཱ ཝཝཏྠཱཔིཏཱཡཱཏི སམྨུཏིཔརམཏྠབྷེདསྶ ཨཏྠསྶཱནུརཱུཔཝཱཙཀབྷཱཝེན པརམཏྠསདྡེསུ བྷགཝཏཱ མནསཱ ཝཝཏྠཱཔིཏཱཡ ནཱམཔཎྞཏྟིཔབནྡྷབྷཱུཏཱཡ ཏསྶཱ ཏནྟིཡཱ. དེསནཱཏི པརེསཾ པབོདྷནེན ཨཏིསཛྫནཱ ཝཱཙཱཡ པཀཱསནཱ ཝཙཱིབྷེདབྷཱུཏཱ པརམཏྠསདྡཔྤབནྡྷསངྑཱཏཱ ཏནྟི. ཏནྟིཡཱ, ཏནྟིཨཏྠསྶ ཙཱཏི ཡཐཱཝུཏྟཱཡ དུབྦིདྷཱཡཔི ཏནྟིཡཱ, ཏདཏྠསྶ ཙ ཡཐཱབྷཱུཏཱཝབོདྷོཏི ཨཏྠོ. ཏེ ཧི ཨེཝཾ ཝདནྟི – སབྷཱཝཏྠསྶ, སབྷཱཝཝོཧཱརསྶ ཙ ཨནུརཱུཔཝསེནེཝ བྷགཝཏཱ མནསཱ ཝཝཏྠཱཔིཏཱ པཎྞཏྟི ¶ ཨིདྷ ‘‘ཏནྟཱི’’ཏི ཝུཙྩཏི. ཡདི ཙ སདྡཝཱདཱིནཾ མཏེན སདྡོཡེཝ ཨིདྷ ཏནྟི ནཱམ སིཡཱ. ཏནྟིཡཱ, དེསནཱཡ ཙ ནཱནཏྟེན བྷཝིཏབྦཾ, མནསཱ ཝཝཏྠཱཔིཏཱཡ ཙ ཏནྟིཡཱ ཝཙཱིབྷེདཀརཎམཏྟཾ ཋཔེཏྭཱ དེསནཱཡ ནཱནཏྟཾ ནཏྠི. ཏཐཱ ཧི དེསནཾ དསྶེནྟེན མནསཱ ཝཝཏྠཱཔིཏཱཡ ཏནྟིཡཱ དེསནཱཏི ཝཙཱིབྷེདཀརཎམཏྟཾ ཝིནཱ ཏནྟིཡཱ སཧ དེསནཱཡ ཨནཉྙཏཱ ཝུཏྟཱ. ཏཐཱ ཙ ཨུཔརི ‘‘དེསནཱཏི པཉྙཏྟཱི’’ཏི ཝུཏྟཏྟཱ དེསནཱཡ ཨནཉྙབྷཱཝེན ཏནྟིཡཱཔི པཎྞཏྟིབྷཱཝོ ཀཐིཏོ ཧོཏི.

ཨཔིཙ ¶ ཡདི ཏནྟིཡཱ ཨཉྙཱཡེཝ དེསནཱ སིཡཱ, ‘‘ཏནྟིཡཱ ཙ ཏནྟིཨཏྠསྶ ཙ དེསནཱཡ ཙ ཡཐཱབྷཱུཏཱཝབོདྷོ’’ཏི ཝཏྟབྦཾ སིཡཱ. ཨེཝཾ པན ཨཝཏྭཱ ‘‘ཏནྟིཡཱ ཙ ཏནྟིཨཏྠསྶ ཙ ཡཐཱབྷཱུཏཱཝབོདྷོ’’ཏི ཝུཏྟཏྟཱ ཏནྟིཡཱ, དེསནཱཡ ཙ ཨནཉྙབྷཱཝོ དསྶིཏོ ཧོཏི. ཨེཝཉྩ ཀཏྭཱ ཨུཔརི ‘‘དེསནཱ ནཱམ པཉྙཏྟཱི’’ཏི དསྶེནྟེན དེསནཱཡ ཨནཉྙབྷཱཝཏོ ཏནྟིཡཱ པཎྞཏྟིབྷཱཝོ ཀཐིཏོ ཧོཏཱིཏི. ཏདུབྷཡམྤི པན པརམཏྠཏོ སདྡོཡེཝ པརམཏྠཝིནིམུཏྟཱཡ སམྨུཏིཡཱ ཨབྷཱཝཱ, ཨིམམེཝ ཙ ནཡཾ གཧེཏྭཱ ཀེཙི ཨཱཙརིཡཱ ‘‘དྷམྨོ ཙ དེསནཱ ཙ པརམཏྠཏོ སདྡོ ཨེཝཱ’’ཏི ཝོཧརནྟི, ཏེཔི ཨནུཔཝཛྫཱཡེཝ. ཡཐཱ ཀཱམཱཝཙརཔཊིསནྡྷིཝིཔཱཀཱ ‘‘པརིཏྟཱརམྨཎཱ’’ཏི ཝུཙྩནྟི, ཨེཝཾ སམྤདམིདཾ དཊྛབྦཾ. ན ཧི ཀཱམཱཝཙརཔཊིསནྡྷིཝིཔཱཀཱ ‘‘ནིབྦཏྟིཏཔརམཏྠཝིསཡཱཡེཝཱ’’ཏི སཀྐཱ ཝཏྟུཾ ཨིཏྠིཔུརིསཱདིཨཱཀཱརཔརིཝིཏཀྐཔུབྦཀཱནཾ རཱགཱདིཨཀུསལཱནཾ, མེཏྟཱདིཀུསལཱནཉྩ ཨཱརམྨཎཾ གཧེཏྭཱཔི སམུཔྤཛྫནཏོ. པརམཏྠདྷམྨམཱུལཀཏྟཱ པནསྶ པརིཀཔྤསྶ པརམཏྠཝིསཡཏཱ སཀྐཱ པཉྙཔེཏུཾ, ཨེཝམིདྷཱཔི དཊྛབྦནྟི ཙ. ཨེཝམྤི པཎྞཏྟིཝཱདཱིནཾ མཏཾ ཧོཏུ, སདྡཝཱདཱིནཾ མཏེཔི དྷམྨདེསནཱནཾ ནཱནཏྟཾ ཝུཏྟནཡེནེཝ ཨཱཙརིཡདྷམྨཔཱལཏྠེརཱ དཱིཧི པཀཱསིཏནྟི. ཧོཏི ཙེཏྠ –

‘‘སདྡོ དྷམྨོ དེསནཱ ཙ, ཨིཙྩཱཧུ ཨཔརེ གརཱུ;

དྷམྨོ པཎྞཏྟི སདྡོ ཏུ, དེསནཱ ཝཱཏི ཙཱཔརེ’’ཏི.

ཏཱིསུཔི ཙེཏེསུ ཨེཏེ དྷམྨཏྠདེསནཱཔཊིཝེདྷཱཏི ཨེཏྠ ཏནྟིཨཏྠོ, ཏནྟིདེསནཱ, ཏནྟིཨཏྠཔཊིཝེདྷོ ཙཱཏི ཨིམེ ཏཡོ ཏནྟིཝིསཡཱ ཧོནྟཱིཏི ཝིནཡཔིཊཀཱདཱིནཾ ཨཏྠདེསནཱཔཊིཝེདྷཱདྷཱརབྷཱཝོ ཡུཏྟོ, པིཊཀཱནི པན ཏནྟིཡེཝཱཏི ཏེསཾ དྷམྨཱདྷཱརབྷཱཝོ ཀཐཾ ཡུཛྫེཡྻཱཏི? ཏནྟིསམུདཱཡསྶ ཨཝཡཝཏནྟིཡཱ ཨཱདྷཱརབྷཱཝཏོ. སམུདཱཡོ ཧི ཨཝཡཝསྶ པརིཀཔྤནཱམཏྟསིདྡྷེན ཨཱདྷཱརབྷཱཝེན ཝུཙྩཏི ཡཐཱ ‘‘རུཀྑེ སཱཁཱ’’ཏི. ཨེཏྠ ཙ དྷམྨཱདཱིནཾ དུཀྑོགཱཧབྷཱཝཏོ ཏེཧི དྷམྨཱདཱིཧི ཝིནཡཱདཡོ གམྦྷཱིརཱཏི ཝིནཡཱདཱིནམྤི ཙཏུབྦིདྷོ གམྦྷཱིརབྷཱཝོ ¶ ཝུཏྟོཡེཝ, ཏསྨཱ དྷམྨཱདཡོ ཨེཝ དུཀྑོགཱཧཏྟཱ གམྦྷཱིརཱ, ན ཝིནཡཱདཡོཏི ན ཙོདེཏབྦམེཏཾ སམུཁེན, ཝིསཡཝིསཡཱིམུཁེན ཙ ཝིནཡཱདཱིནཉྙེཝ གམྦྷཱིརབྷཱཝསྶ ཝུཏྟཏྟཱ. དྷམྨོ ཧི ཝིནཡཱདཡོ ཨེཝ ཨབྷིནྣཏྟཱ. ཏེསཾ ཝིསཡོ ཨཏྠོ ཝཱཙཀབྷཱུཏཱནཾ ཏེསམེཝ ཝཱཙྩབྷཱཝཏོ, ཝིསཡིནོ དེསནཱཔཊིཝེདྷཱ ¶ དྷམྨཏྠཝིསཡབྷཱཝཏོཏི. ཏཏྠ པཊིཝེདྷསྶ དུཀྐརབྷཱཝཏོ དྷམྨཏྠཱནཾ, དེསནཱཉཱཎསྶ དུཀྐརབྷཱཝཏོ དེསནཱཡ ཙ དུཀྑོགཱཧབྷཱཝོ ཝེདིཏབྦོ, པཊིཝེདྷསྶ པན ཨུཔྤཱདེཏུཾ ཨསཀྐུཎེཡྻཏྟཱ, ཏབྦིསཡཉཱཎུཔྤཏྟིཡཱ ཙ དུཀྐརབྷཱཝཏོ དུཀྑོགཱཧཏཱ ཝེདིཏབྦཱ. དྷམྨཏྠདེསནཱནཾ གམྦྷཱིརབྷཱཝཏོ ཏབྦིསཡོ པཊིཝེདྷོཔི གམྦྷཱིརོ ཡཐཱ ཏཾ གམྦྷཱིརསྶ ཨུདཀསྶ པམཱཎགྒཧཎེ དཱིགྷེན པམཱཎེན བྷཝིཏབྦཾ, ཨེཝཾསམྤདམིདནྟི (ཝཛིར. ཊཱི. པཋམམཧཱསངྒཱིཏིཀཐཱཝཎྞནཱ) ཝཛིརབུདྡྷིཏྠེརོ. པིཊཀཱཝཡཝཱནཾ དྷམྨཱདཱིནཾ ཝུཙྩམཱནོ གམྦྷཱིརབྷཱཝོ ཏཾསམུདཱཡསྶ པིཊཀསྶཱཔི ཝུཏྟོཡེཝ, ཏསྨཱ ཏཐཱ ན ཙོདེཏབྦནྟིཔི ཝདནྟི, ཝིཙཱརེཏབྦམེཏཾ སབྦེསམྤི ཏེསཾ པིཊཀཱཝཡཝཱསམྦྷཝཏོ. མཧཱསམུདྡོ དུཀྑོགཱཧོ, ཨལབྦྷནེཡྻཔཏིཊྛོ ཝིཡ ཙཱཏི སམྦནྡྷོ. ཨཏྠཝསཱ ཧི ཝིབྷཏྟིཝཙནལིངྒཔརིཎཱམོཏི. དུཀྑེན ཨོགཡ྄ཧནྟི, དུཀྑོ ཝཱ ཨོགཱཧོ ཨནྟོ པཝིསནམེཏེསཱུཏི དུཀྑོགཱཧཱ. ན ལབྷིཏབྦོཏི ཨལབྦྷནཱིཡོ, སོཡེཝ ཨལབྦྷནེཡྻོ, ལབྷཱིཡཏེ ཝཱ ལབྦྷནཾ, ཏཾ ནཱརཧཏཱིཏི ཨལབྦྷནེཡྻོ. པཏིཊྛཧནྟི ཨེཏྠ ཨོཀཱསེཏི པཏིཊྛོ, པཏིཊྛཧནཾ ཝཱ པཏིཊྛོ, ཨལབྦྷནེཡྻོ སོ ཡེསུ ཏེ ཨལབྦྷནེཡྻཔཏིཊྛཱ. ཨེཀདེསེན ཨོགཱཧནྟེཧིཔི མནྡབུདྡྷཱིཧི པཏིཊྛཱ ལདྡྷུཾ ན སཀྐཱཡེཝཱཏི དསྶེཏུཾ ཨེཏཾ པུན ཝུཏྟཾ. ‘‘ཨེཝ’’ནྟིཨཱདི ནིགམནཾ.

ཨིདཱནི ཧེཏུཧེཏུཕལཱདཱིནམྤི ཝསེན གམྦྷཱིརབྷཱཝཾ དསྶེནྟོ ‘‘ཨཔརོ ནཡོ’’ཏིཨཱདིམཱཧ. ཏཏྠ ཧེཏཱུཏི པཙྩཡོ. སོ ཙ ཨཏྟནོ ཕལཾ དཧཏི ཝིདཧཏཱིཏི དྷམྨོ ད-ཀཱརསྶ དྷ-ཀཱརཾ ཀཏྭཱ. དྷམྨསདྡསྶ ཙེཏྠ ཧེཏུཔརིཡཱཡཏཱ ཀཐཾ ཝིཉྙཱཡཏཱིཏི ཨཱཧ ‘‘ཝུཏྟཉྷེཏ’’ནྟིཨཱདི. ཝུཏྟཾ པཊིསམྦྷིདཱཝིབྷངྒེ (ཝིབྷ. ༧༡༨). ནནུ ཙ ‘‘ཧེཏུམྷི ཉཱཎཾ དྷམྨཔཊིསམྦྷིདཱ’’ཏི ཨེཏེན ཝཙནེན དྷམྨསྶ ཧེཏུབྷཱཝོ ཀཐཾ ཝིཉྙཱཡཏཱིཏི? ‘‘དྷམྨཔཊིསམྦྷིདཱ’’ཏི ཨེཏསྶ སམཱསཔདསྶ ཨཝཡཝཔདཏྠཾ དསྶེནྟེན ‘‘ཧེཏུམྷི ཉཱཎ’’ནྟི ཝུཏྟཏྟཱ. ‘‘དྷམྨེ པཊིསམྦྷིདཱ དྷམྨཔཊིསམྦྷིདཱ’’ཏི ཨེཏྠ ཧི ‘‘དྷམྨེ’’ཏི ཨེཏསྶ ཨཏྠཾ དསྶེནྟེན ‘‘ཧེཏུམྷཱི’’ཏི ཝུཏྟཾ, ‘‘པཊིསམྦྷིདཱ’’ཏི ཨེཏསྶ ཨཏྠཾ དསྶེནྟེན ‘‘ཉཱཎ’’ནྟི. ཏསྨཱ ཧེཏུདྷམྨསདྡཱ ཨེཀཏྠཱ, ཉཱཎཔཊིསམྦྷིདཱ སདྡཱ ཙཱཏི ཨིམམཏྠཾ ཝདནྟེན སཱདྷིཏོ དྷམྨསྶ ཧེཏུབྷཱཝོཏི. ཏཐཱ ‘‘ཧེཏུཕལེ ཉཱཎཾ ཨཏྠཔཊིསམྦྷིདཱ’’ཏི ཨེཏེན ཝཙནེན སཱདྷིཏོ ཨཏྠསྶ ཧེཏུཕལབྷཱཝོཏི ¶ དཊྛབྦོ. ཧེཏུནོ ཕལཾ ཧེཏུཕལཾ, ཏཉྩ ཧེཏུཨནུསཱརེན ཨརཱིཡཏི ཨདྷིགམཱིཡཏཱིཏི ཨཏྠོཏི ཝུཙྩཏི.

དེསནཱཏི ¶ པཉྙཏྟཱིཏི ཨེཏྠ སདྡཝཱདཱིནཾ ཝཱདེ ཨཏྠབྱཉྫནཀཱ ཨཝིཔརཱིཏཱབྷིལཱཔདྷམྨནིརུཏྟིབྷཱུཏཱ པརམཏྠསདྡཔྤབནྡྷསངྑཱཏཱ ཏནྟི ‘‘དེསནཱ’’ཏི ཝུཙྩཏི, དེསནཱ ནཱམཱཏི ཝཱ ཨཏྠོ. དེསཱིཡཏི ཨཏྠོ ཨེཏཱཡཱཏི ཧི དེསནཱ. པཀཱརེན ཉཱཔཱིཡཏི ཨཏྠོ ཨེཏཱཡ, པཀཱརཏོ ཝཱ ཉཱཔེཏཱིཏི པཉྙཏྟི. ཏམེཝ སརཱུཔཏོ དསྶེཏུཾ ‘‘ཡཐཱདྷམྨཾ དྷམྨཱབྷིལཱཔོཏི ཨདྷིཔྤཱཡོ’’ཏི ཝུཏྟཾ. ཡཐཱདྷམྨནྟི ཨེཏྠ པན དྷམྨསདྡོ ཧེཏུཾ, ཧེཏུཕལཉྩ སབྦཾ སངྒཎྷཱཏི. སབྷཱཝཝཱཙཀོ ཧེས དྷམྨསདྡོ, ན པརིཡཏྟིཧེཏུཨཱདིཝཱཙཀོ, ཏསྨཱ ཡོ ཡོ ཨཝིཛྫཱསངྑཱརཱདིདྷམྨོ, ཏསྨིཾ ཏསྨིནྟི ཨཏྠོ. ཏེསཾ ཏེསཾ ཨཝིཛྫཱསངྑཱརཱདིདྷམྨཱནཾ ཨནུརཱུཔཾ ཝཱ ཡཐཱདྷམྨཾ. དེསནཱཔི ཧི པཊིཝེདྷོ ཝིཡ ཨཝིཔརཱིཏསཝིསཡཝིབྷཱཝནཏོ དྷམྨཱནུརཱུཔཾ པཝཏྟཏི, ཏཏོཡེཝ ཙ ཨཝིཔརཱིཏཱབྷིལཱཔོཏི ཝུཙྩཏི. དྷམྨཱབྷིལཱཔོཏི ཧི ཨཏྠབྱཉྫནཀོ ཨཝིཔརཱིཏཱབྷིལཱཔོ དྷམྨནིརུཏྟིབྷཱུཏོ ཏནྟིསངྑཱཏོ པརམཏྠསདྡཔྤབནྡྷོ. སོ ཧི ཨབྷིལཔྤཏི ཨུཙྩཱརཱིཡཏཱིཏི ཨབྷིལཱཔོ, དྷམྨོ ཨཝིཔརཱིཏོ སབྷཱཝབྷཱུཏོ ཨབྷིལཱཔོ དྷམྨཱབྷིལཱཔོཏི ཝུཙྩཏི, ཨེཏེན ‘‘ཏཏྲ དྷམྨནིརུཏྟཱབྷིལཱཔེ ཉཱཎཾ ནིརུཏྟིཔཊིསམྦྷིདཱ’’ཏི (ཝིབྷ. ༧༡༨) ཨེཏྠ ཝུཏྟཾ དྷམྨནིརུཏྟིཾ དསྶེཏི སདྡསབྷཱཝཏྟཱ དེསནཱཡ. ཏཐཱ ཧི ནིརུཏྟིཔཊིསམྦྷིདཱཡ པརིཏྟཱརམྨཎཱདིབྷཱཝོ པཊིསམྦྷིདཱཝིབྷངྒཔཱལི༹ཡཾ (ཝིབྷ. ༧༡༨) ཝུཏྟོ. ཏདཊྛཀཐཱཡ ཙ ‘‘ཏཾ སབྷཱཝནིརུཏྟིཾ སདྡཾ ཨཱརམྨཎཾ ཀཏྭཱ’’ཏིཨཱདིནཱ (ཝིབྷ. ཨཊྛ. ༧༡༨) ཏསྶཱ སདྡཱརམྨཎཏཱ དསྶིཏཱ. ‘‘ཨིམསྶ ཨཏྠསྶ ཨཡཾ སདྡོ ཝཱཙཀོ’’ཏི ཧི ཝཙནཝཙནཏྠེ ཝཝཏྠཔེཏྭཱ ཏཾ ཏཾ ཝཙནཏྠཝིབྷཱཝནཝསེན པཝཏྟིཏོ སདྡོ ‘‘དེསནཱ’’ཏི ཝུཙྩཏི. ‘‘ཨདྷིཔྤཱཡོ’’ཏི ཨེཏེན ‘‘དེསནཱཏི པཉྙཏྟཱི’’ཏི ཨེཏཾ ཝཙནཾ དྷམྨནིརུཏྟཱབྷིལཱཔཾ སནྡྷཱཡ ཝུཏྟཾ, ན ཏཏོ ཝིནིམུཏྟཾ པཉྙཏྟིཾ སནྡྷཱཡཱཏི དསྶེཏི ཨནེཀདྷཱ ཨཏྠསམྦྷཝེ ཨཏྟནཱ ཨདྷིཔྤེཏཏྠསྶེཝ ཝུཏྟཏྟཱཏི ཨཡཾ སདྡཝཱདཱིནཾ ཝཱདཏོ ཝིནིཙྪཡོ.

པཉྙཏྟིཝཱདཱིནཾ ཝཱདེ པན སམྨུཏིཔརམཏྠབྷེདསྶ ཨཏྠསྶཱནུརཱུཔཝཱཙཀབྷཱཝེན པརམཏྠསདྡེསུ བྷགཝཏཱ མནསཱ ཝཝཏྠཱཔིཏཱ ཏནྟིསངྑཱཏཱ ནཱམཔཉྙཏྟི དེསནཱ ནཱམ, ‘‘དེསནཱ’’ཏི ཝཱ ཝུཙྩཏཱིཏི ཨཏྠོ. ཏདེཝ མཱུལཀཱརཎབྷཱུཏསྶ ¶ སདྡསྶ དསྶནཝསེན ཀཱརཎཱུཔཙཱརེན དསྶེཏུཾ ‘‘ཡཐཱདྷམྨཾ དྷམྨཱབྷིལཱཔོཏི ཨདྷིཔྤཱཡོ’’ཏི ཝུཏྟཾ. ཀིཉྩཱཔི ཧི ‘‘དྷམྨཱབྷིལཱཔོ’’ཏི ཨེཏྠ ཨབྷིལཔྤཏི ཨུཙྩཱརཱིཡཏཱིཏི ཨབྷིལཱཔོཏི སདྡོ ཝུཙྩཏི, ན པཎྞཏྟི, ཏཐཱཔི སདྡེ ཝུཙྩམཱནེ ཏདནུརཱུཔཾ ཝོཧཱརཾ གཧེཏྭཱ ཏེན ཝོཧཱརེན དཱིཔིཏསྶ ཨཏྠསྶ ཛཱནནཏོ སདྡེ ཀཐིཏེ ཏདནུརཱུཔཱ པཎྞཏྟིཔི ཀཱརཎཱུཔཙཱརེན ཀཐིཏཱཡེཝ ཧོཏི. ཨཔིཙ ‘‘དྷམྨཱབྷིལཱཔོཏི ཨཏྠོ’’ཏི ཨཝཏྭཱ ‘‘དྷམྨཱབྷིལཱཔོཏི ཨདྷིཔྤཱཡོ’’ཏི ཝུཏྟཏྟཱ དེསནཱ ནཱམ སདྡོ ན ཧོཏཱིཏི དཱིཔིཏམེཝ. ཏེན ཧི ཨདྷིཔྤཱཡམཏྟམེཝ མཱུལཀཱརཎསདྡཝསེན ཀཐིཏཾ, ན ཨིདྷ གཧེཏབྦོ ‘‘དེསནཱ’’ཏི ཨེཏསྶ ཨཏྠོཏི ¶ ཨཡཾ པཉྙཏྟིཝཱདཱིནཾ ཝཱདཏོ ཝིནིཙྪཡོ. ཨཏྠནྟརམཱཧ ‘‘ཨནུལོམ…པེ… ཀཐན’’ནྟི, ཨེཏེན ཧེཊྛཱ ཝུཏྟཾ དེསནཱསམུཊྛཱཔཀཾ ཙིཏྟུཔྤཱདཾ དསྶེཏི. ཀཐཱིཡཏི ཨཏྠོ ཨེཏེནཱཏི ཧི ཀཐནཾ. ཨཱདིསདྡེན ནཱིཏནེཡྻཱདིཀཱ པཱལི༹གཏིཡོ, ཨེཀཏྟཱདིནནྡིཡཱཝཏྟཱདིཀཱ པཱལི༹ནིསྶིཏཱ ཙ ནཡཱ སངྒཧིཏཱ.

སཡམེཝ པཊིཝིཛ྄ཛྷཏི, ཨེཏེན ཝཱ པཊིཝིཛ྄ཛྷནྟཱིཏི པཊིཝེདྷོ, ཉཱཎཾ. ཏདེཝ ཨབྷིསམེཏི, ཨེཏེན ཝཱ ཨབྷིསམེནྟཱིཏི ཨབྷིསམཡོཏིཔི ཝུཙྩཏི. ཨིདཱནི ཏཾ པཊིཝེདྷཾ ཨབྷིསམཡཔྤབྷེདཏོ, ཨབྷིསམཡཱཀཱརཏོ, ཨཱརམྨཎཏོ, སབྷཱཝཏོ ཙ པཱཀཊཾ ཀཱཏུཾ ‘‘སོ ཙཱ’’ཏིཨཱདི ཝུཏྟཾ. ཏཏྠ ཧི ལོཀིཡལོཀུཏྟརོཏི པབྷེདཏོ, ཝིསཡཏོ, ཨསམྨོཧཏོཏི ཨཱཀཱརཏོ, དྷམྨེསུ, ཨཏྠེསུ, པཉྙཏྟཱིསཱུཏི ཨཱརམྨཎཏོ, ཨཏྠཱནུརཱུཔཾ, དྷམྨཱནུརཱུཔཾ, པཉྙཏྟིཔཐཱནུརཱུཔནྟི སབྷཱཝཏོ ཙ པཱཀཊཾ ཀརོཏི. ཏཏྠ ཝིསཡཏོ ཨཏྠཱདིཨནུརཱུཔཾ དྷམྨཱདཱིསུ ཨཝབོདྷོ ནཱམ ཨཝིཛྫཱདིདྷམྨཱརམྨཎོ, སངྑཱརཱདིཨཏྠཱརམྨཎོ, ཏདུབྷཡཔཉྙཱཔནཱརམྨཎོ ཙ ལོཀིཡོ ཨབྷིསམཡོ. ཨསམྨོཧཏོ ཨཏྠཱདིཨནུརཱུཔཾ དྷམྨཱདཱིསུ ཨཝབོདྷོ ནཱམ ནིབྦཱནཱརམྨཎོ མགྒསམྤཡུཏྟོ ཡཐཱཝུཏྟདྷམྨཏྠཔཉྙཏྟཱིསུ སམྨོཧཝིདྡྷཾསནོ ལོཀུཏྟརོ ཨབྷིསམཡོ. ཏཐཱ ཧི ‘‘ཨཡཾ ཧེཏུ, ཨིདམསྶ ཕལཾ, ཨཡཾ ཏདུབྷཡཱནུརཱུཔོ ཝོཧཱརོ’’ཏི ཨེཝཾ ཨཱརམྨཎཀརཎཝསེན ལོཀིཡཉཱཎཾ ཝིསཡཏོ པཊིཝིཛ྄ཛྷཏི, ལོཀུཏྟརཉཱཎཾ པན ཏེསུ ཧེཏུཧེཏུཕལཱདཱིསུ སམྨོཧསྶཉཱཎེན སམུཙྪིནྣཏྟཱ ཨསམྨོཧཏོ པཊིཝིཛ྄ཛྷཏི. ལོཀུཏྟརོ པན པཊིཝེདྷོ ¶ ཝིསཡཏོ ནིབྦཱནསྶ, ཨསམྨོཧཏོ ཙ ཨིཏརསྶཱཏིཔི ཝདནྟི ཨེཀེ.

ཨཏྠཱནུརཱུཔཾ དྷམྨེསཱུཏི ‘‘ཨཝིཛྫཱ ཧེཏུ, སངྑཱརཱ ཧེཏུསམུཔྤནྣཱ, སངྑཱརེ ཨུཔྤཱདེཏི ཨཝིཛྫཱ’’ཏི ཨེཝཾ ཀཱརིཡཱནུརཱུཔཾ ཀཱརཎེསཱུཏི ཨཏྠོ. ཨཐ ཝཱ ‘‘པུཉྙཱབྷིསངྑཱརཨཔུཉྙཱབྷིསངྑཱརཨཱནེཉྫཱབྷིསངྑཱརེསུ ཏཱིསུ ཨཔུཉྙཱབྷིསངྑཱརསྶ ཨཝིཛྫཱ སམྤཡུཏྟཔཙྩཡོ, ཨིཏརེསཾ ཡཐཱནུརཱུཔ’’ནྟིཨཱདིནཱ ཀཱརིཡཱནུརཱུཔཾ ཀཱརཎེསུ པཊིཝེདྷོཏིཔི ཨཏྠོ. དྷམྨཱནུརཱུཔཾ ཨཏྠེསཱུཏི ‘‘ཨཝིཛྫཱཔཙྩཡཱ སངྑཱརཱ’’ཏིཨཱདིནཱ (མ. ནི. ༣.༡༢༦; སཾ. ནི. ༢.༡; ཨུདཱ. ༡; ཝིབྷ. ༢༢༥) ཀཱརཎཱནུརཱུཔཾ ཀཱརིཡེསུ. ཚབྦིདྷཱཡ པཉྙཏྟིཡཱ པཐོ པཉྙཏྟིཔཐོ, ཏསྶ ཨནུརཱུཔཾ ཏཐཱ, པཉྙཏྟིཡཱ ཝུཙྩམཱནདྷམྨཱནུརཱུཔཾ པཉྙཏྟཱིསུ ཨཝབོདྷོཏི ཨཏྠོ. ཨབྷིསམཡཏོ ཨཉྙམྤི པཊིཝེདྷཏྠཾ དསྶེཏུཾ ‘‘ཏེས’’ནྟིཨཱདིམཱཧ. པཊིཝིཛ྄ཛྷཱིཡཏཱིཏི པཊིཝེདྷོཏི ཧི ཏཾཏཾརཱུཔཱདིདྷམྨཱནཾ ཨཝིཔརཱིཏསབྷཱཝོ ཝུཙྩཏི. ཏཏྠ ཏཏྠཱཏི ཏསྨིཾ ཏསྨིཾ པིཊཀེ, པཱལི༹པདེསེ ཝཱ. སལཀྑཎསངྑཱཏོཏི རུཔྤནནམནཕུསནཱདིསཀསཀལཀྑཎསངྑཱཏོ.

ཡཐཱཝུཏྟེཧི ¶ དྷམྨཱདཱིཧི པིཊཀཱནཾ གམྦྷཱིརབྷཱཝཾ དསྶེཏུཾ ‘‘ཨིདཱནཱི’’ཏིཨཱདིམཱཧ. དྷམྨཛཱཏནྟི ཀཱརཎཔྤབྷེདོ, ཀཱརཎམེཝ ཝཱ. ཨཏྠཛཱཏནྟི ཀཱརིཡཔྤབྷེདོ, ཀཱརིཡམེཝ ཝཱ. ཡཱ ཙཱཡཾ དེསནཱཏི སམྦནྡྷོ. ཏདཏྠཝིཛཱནནཝསེན ཨབྷིམུཁོ ཧོཏི. ཡོ ཙེཏྠཱཏི ཡོ ཨེཏཱསུ ཏཾ ཏཾ པིཊཀཱགཏཱསུ དྷམྨཏྠདེསནཱསུ པཊིཝེདྷོ, ཡོ ཙ ཨེཏེསུ པིཊཀེསུ ཏེསཾ ཏེསཾ དྷམྨཱནཾ ཨཝིཔརཱིཏསབྷཱཝོཏི ཨཏྠོ. སམྦྷརིཏབྦཏོ ཀུསལམེཝ སམྦྷཱརོ, སོ སམྨཱ ཨནུཔཙིཏོ ཡེཧི ཏེ ཨནུཔཙིཏཀུསལསམྦྷཱརཱ, ཏཏོཝ དུཔྤཉྙེཧི, ནིཔྤཉྙེཧཱིཏི ཨཏྠོ. ན ཧི པཉྙཝཏོ, པཉྙཱཡ ཝཱ དུཊྛུབྷཱཝོ དཱུསིཏབྷཱཝོ ཙ སམྦྷཝཏཱིཏི ནིཔྤཉྙཏྟཱཡེཝ དུཔྤཉྙཱ ཡཐཱ ‘‘དུསྶཱིལོ’’ཏི (ཨ. ནི. ༥.༢༡༣; ༡༠.༧༥; པཱརཱ. ༢༩༥; དྷ. པ. ༣༠༨). ཨེཏྠ ཙ ཨཝིཛྫཱསངྑཱརཱདཱིནཾ དྷམྨཏྠཱནཾ དུཔྤཊིཝིཛ྄ཛྷཏཱཡ དུཀྑོགཱཧཏཱ, ཏེསཾ པཉྙཱཔནསྶ དུཀྐརབྷཱཝཏོ ཏཾདེསནཱཡ, ཨབྷིསམཡསངྑཱཏསྶ པཊིཝེདྷསྶ ཨུཔྤཱདནཝིསཡཱིཀརཎཱནཾ ཨསཀྐུཎེཡྻཏྟཱ, ཨཝིཔརཱིཏསབྷཱཝསངྑཱཏསྶ པཊིཝེདྷསྶ དུབྦིཉྙེཡྻཏཱཡ དུཀྑོགཱཧཏཱ ཝེདིཏབྦཱ. ཨེཝམྤཱིཏི པི-སདྡོ པུབྦེ ¶ ཝུཏྟཾ པཀཱརནྟརཾ སམྤིཎྜེཏི. ཨེཝཾ པཋམགཱཐཱཡ ཨནཱུནཾ པརིཔུཎྞཾ པརིདཱིཔིཏཏྠབྷཱཝཾ དསྶེནྟོ ‘‘ཨེཏྟཱཝཏཱ’’ཏིཨཱདིམཱཧ. ‘‘སིདྡྷེ ཧི སཏྱཱརམྦྷོ ཨཏྠནྟརཝིཉྙཱཔནཱཡ ཝཱ ཧོཏི, ནིཡམཱཡ ཝཱ’’ཏི ཨིམིནཱ པུནཱརམྦྷཝཙནེན ཨནཱུནཾ པརིཔུཎྞཾ པརིདཱིཔིཏཏྠབྷཱཝཾ དསྶེཏི. ཨེཏྟཱཝཏཱཏི པརིཙྪེདཏྠེ ནིཔཱཏོ, ཨེཏྟཀེན ཝཙནཀྐམེནཱཏི ཨཏྠོ. ཨེཏཾ ཝཱ པརིམཱཎཾ ཡསྶཱཏི ཨེཏྟཱཝཾ, ཏེན, ཨེཏཔརིམཱཎཝཏཱ སདྡཏྠཀྐམེནཱཏི ཨཏྠོ. ‘‘སདྡེ ཧི ཝུཏྟེ ཏདཏྠོཔི ཝུཏྟོཡེཝ ནཱམཱ’’ཏི ཝདནྟི. ཝུཏྟོ སཾཝཎྞིཏོ ཨཏྠོ ཡསྶཱཏི ཝུཏྟཏྠཱ.

ཨེཏྠཱཏི ཨེཏིསྶཱ གཱཐཱཡ. ཨེཝཾ ཨཏྠོ, ཝིནིཙྪཡོཏི ཝཱ སེསོ. ཏཱིསུ པིཊཀེསཱུཏི ཨེཏྠ ‘‘ཨེཀེཀསྨི’’ནྟི ཨདྷིཀཱརཏོ, པཀརཎཏོ ཝཱ ཝེདིཏབྦཾ. ‘‘ཨེཀམེཀསྨིཉྩེཏྠཱ’’ཏི (དཱི. ནི. ཨཊྛ. ༡.པཋམམཧཱསངྒཱིཏིཀཐཱ) ཧི ཧེཊྛཱ ཝུཏྟཾ. ཨཐ ཝཱ ཝཏྟིཙྪཱནུཔུབྦིཀཏྟཱ སདྡཔཊིཔཏྟིཡཱ ནིདྡྷཱརཎམིདྷ ཨཝཏྟུཀཱམེན ཨཱདྷཱརོཡེཝ ཝུཏྟོ. ན ཙེཏྠ ཙོདེཏབྦཾ ‘‘ཏཱིསུཡེཝ པིཊཀེསུ ཏིཝིདྷོ པརིཡཏྟིབྷེདོ དཊྛབྦོ སིཡཱ’’ཏི སམུདཱཡཝསེན ཝུཏྟསྶཱཔི ཝཱཀྱསྶ ཨཝཡཝཱདྷིཔྤཱཡསམྦྷཝཏོ. དིསྶཏི ཧི ཨཝཡཝཝཱཀྱནིཔྥཏྟི ‘‘བྲཱཧྨཎཱདཡོ བྷུཉྫནྟཱུ’’ཏིཨཱདཱིསུ, ཏསྨཱ ཨལམཏིཔཔཉྩེན. ཡཐཱ ཨཏྠོ ན ཝིརུཛ྄ཛྷཏི, ཏཐཱཡེཝ གཧེཏབྦོཏི. ཨེཝཾ སབྦཏྠ. པརིཡཏྟིབྷེདོཏི པརིཡཱཔུཎནཾ པརིཡཏྟི. པརིཡཱཔུཎནཝཱཙཀོ ཧེཏྠ པརིཡཏྟིསདྡོ, ན པན པཱལི༹པརིཡཱཡོ, ཏསྨཱ པརིཡཱཔུཎནཔྤཀཱརོཏི ཨཏྠོ. ཨཐ ཝཱ ཏཱིཧི པཀཱརེཧི པརིཡཱཔུཎིཏབྦཱ པཱལི༹ཡོ ཨེཝ ‘‘པརིཡཏྟཱི’’ཏི ཝུཙྩནྟི. ཏཐཱ ཙེཝ ཨབྷིདྷམྨཊྛཀཐཱཡ སཱིཧལ༹གཎྛིཔདེ ཝུཏྟནྟི ཝདནྟི. ཨེཝམྤི ཧི ཨལགདྡཱུཔམཱཔརིཡཱཔུཎནཡོགཏོ ‘‘ཨལགདྡཱུཔམཱ པརིཡཏྟཱི’’ཏི པཱལི༹པི སཀྐཱ ཝཏྟུཾ. ཨེཝཉྩ ཀཏྭཱ ‘‘དུགྒཧིཏཱ ཨུཔཱརམྦྷཱདིཧེཏུ ¶ པརིཡཱཔུཊཱ ཨལགདྡཱུཔམཱ’’ཏི པརཏོ ནིདྡེསཝཙནམྤི ཨུཔཔནྣཾ ཧོཏི. ཏཏྠ ཧི པཱལི༹ཡེཝ ‘‘དུགྒཧིཏཱ, པརིཡཱཔུཊཱ’’ཏི ཙ ཝཏྟུཾ ཡུཏྟཱ.

ཨལགདྡོ ཨལགདྡགྒཧཎཾ ཨུཔམཱ ཨེཏིསྶཱཏི ཨལགདྡཱུཔམཱ. ཨལགདྡསྶ གཧཎཉྷེཏྠ ཨལགདྡསདྡེན ཝུཏྟནྟི དཊྛབྦཾ. ཨཱཔཱུཔིཀོཏི ཨེཏྠ ཨཱཔཱུཔ-སདྡེན ཨཱཔཱུཔཁཱདནཾ ཝིཡ, ཝེཎིཀོཏི ཨེཏྠ ཝཱིཎཱསདྡེན ཝཱིཎཱཝཱདནགྒཧཎཾ ཝིཡ ཙ. ཨལགདྡགྒཧཎེན ཧི པརིཡཏྟི ཨུཔམཱིཡཏི ¶ , ན ཨལགདྡེན. ‘‘ཨལགདྡགྒཧཎཱུཔམཱ’’ཏི ཝཱ ཝཏྟབྦེ མཛ྄ཛྷེཔདལོཔཾ ཀཏྭཱ ‘‘ཨལགདྡཱུཔམཱ’’ཏི ཝུཏྟཾ ‘‘ཨོཊྛམུཁོ’’ཏིཨཱདཱིསུ ཝིཡ. ཨལགདྡོཏི ཙ ཨཱསཱིཝིསོ ཝུཙྩཏི. གདོཏི ཧི ཝིསསྶ ནཱམཾ, ཏཉྩ ཏསྶ ཨལཾ པརིཔུཎྞཾ ཨཏྠི, ཏསྨཱ ཨལཾ པརིཡཏྟོ པརིཔུཎྞོ གདོ ཨསྶཱཏི ཨལགདྡོ ཨནུནཱསིཀལོཔཾ, ད-ཀཱརཱགམཉྩ ཀཏྭཱ, ཨལཾ ཝཱ ཛཱིཝིཏཧརཎེ སམཏྠོ གདོ ཡསྶཱཏི ཨལགདྡོ ཝུཏྟནཡེན. ཝཊྚདུཀྑཏོ ནིསྶརཎཾ ཨཏྠོ པཡོཛནམེཏིསྶཱཏི ནིསྶརཎཏྠཱ. བྷཎྜཱགཱརེ ནིཡུཏྟོ བྷཎྜཱགཱརིཀོ, རཱཛརཏནཱནུཔཱལཀོ, སོ ཝིཡཱཏི ཏཐཱ, དྷམྨརཏནཱནུཔཱལཀོ ཁཱིཎཱསཝོ. ཨཉྙམཏྠམནཔེཀྑིཏྭཱ བྷཎྜཱགཱརིཀསྶེཝ སཏོ པརིཡཏྟི བྷཎྜཱགཱརིཀཔརིཡཏྟི.

དུགྒཧིཏཱཏི དུཊྛུ གཧིཏཱ. ཏདེཝ སརཱུཔཏོ ནིཡམེཏུཾ ‘‘ཨུཔཱརམྦྷཱདིཧེཏུ པརིཡཱཔུཊཱ’’ཏི ཨཱཧ, ཨུཔཱརམྦྷཨིཏིཝཱདཔྤམོཀྑཱདིཧེཏུ ཨུགྒཧིཏཱཏི ཨཏྠོ. ལཱབྷསཀྐཱརཱདིཧེཏུ པརིཡཱཔུཎནམྤི ཨེཏྠེཝ སངྒཧིཏནྟི དཊྛབྦཾ. ཝུཏྟཉྷེཏཾ ཨལགདྡསུཏྟཊྛཀཐཱཡཾ –

‘‘ཡོ བུདྡྷཝཙནཾ ཨུགྒཧེཏྭཱ ‘ཨེཝཾ ཙཱིཝརཱདཱིནི ཝཱ ལབྷིསྶཱམི, ཙཏུཔརིསམཛ྄ཛྷེ ཝཱ མཾ ཛཱནིསྶནྟཱི’ཏི ལཱབྷསཀྐཱརཧེཏུ པརིཡཱཔུཎཱཏི, ཏསྶ སཱ པརིཡཏྟི ཨལགདྡཔརིཡཏྟི ནཱམ. ཨེཝཾ པརིཡཱཔུཎནཏོ ཧི བུདྡྷཝཙནཾ ཨཔརིཡཱཔུཎིཏྭཱ ནིདྡོཀྐམནཾ ཝརཏར’’ནྟི (མ. ནི. ཨཊྛ. ༢.༢༣༩).

ནནུ ཙ ཨལགདྡགྒཧཎཱུཔམཱ པརིཡཏྟི ‘‘ཨལགདྡཱུཔམཱ’’ཏི ཝུཙྩཏི, ཨེཝཉྩ སཏི སུགྒཧིཏཱཔི པརིཡཏྟི ‘‘ཨལགདྡཱུཔམཱ’’ཏི ཝཏྟུཾ ཝཊྚཏི ཏཏྠཱཔི ཨལགདྡགྒཧཎསྶ ཨུཔམཱབྷཱཝེན པཱལི༹ཡཾ ཝུཏྟཏྟཱ. ཝུཏྟཉྷེཏཾ –

‘‘སེཡྻཐཱཔི, བྷིཀྑཝེ, པུརིསོ ཨལགདྡཏྠིཀོ ཨལགདྡགཝེསཱི ཨལགདྡཔརིཡེསནཾ ཙརམཱནོ, སོ པསྶེཡྻ མཧནྟཾ ཨལགདྡཾ, ཏམེནཾ ཨཛཔདེན དཎྜེན སུནིགྒཧིཏཾ ནིགྒཎྷེཡྻ ¶ , ཨཛཔདེན དཎྜེན སུནིགྒཧིཏཾ ནིགྒཧིཏྭཱ གཱིཝཱཡ སུགྒཧིཏཾ གཎྷེཡྻ. ཀིཉྩཱཔི སོ བྷིཀྑཝེ, ཨལགདྡོ ཏསྶ པུརིསསྶ ཧཏྠཾ ཝཱ བཱཧཾ ཝཱ ཨཉྙཏརཾ ཝཱ ཨངྒཔཙྩངྒཾ བྷོགེཧི པལིཝེཋེཡྻ ¶ . ཨཐ ཁོ སོ ནེཝ ཏཏོནིདཱནཾ མརཎཾ ཝཱ ནིགཙྪེཡྻ མརཎམཏྟཾ ཝཱ དུཀྑཾ. ཏཾ ཀིསྶ ཧེཏུ, སུགྒཧིཏཏྟཱ བྷིཀྑཝེ, ཨལགདྡསྶ. ཨེཝམེཝ ཁོ བྷིཀྑཝེ, ཨིདྷེཀཙྩེ ཀུལཔུཏྟཱ དྷམྨཾ པརིཡཱཔུཎནྟི སུཏྟཾ གེཡྻ’’ནྟིཨཱདི (མ. ནི. ༡.༢༣༩).

ཏསྨཱ ཨིདྷ དུགྒཧིཏཱ ཨེཝ པརིཡཏྟི ཨལགདྡཱུཔམཱཏི ཨཡཾ ཝིསེསོ ཀུཏོ ཝིཉྙཱཡཏི, ཡེན དུགྒཧིཏཱ ཨུཔཱརམྦྷཱདིཧེཏུ པརིཡཱཔུཊཱ ‘‘ཨལགདྡཱུཔམཱ’’ཏི ཝུཙྩཏཱིཏི? སཙྩམེཏཾ, ཨིདཾ པན པཱརིསེསཉཱཡེན ཝུཏྟནྟི དཊྛབྦཾ. ཏཐཱ ཧི ནིསྶརཎཏྠབྷཎྜཱགཱརིཀཔརིཡཏྟཱིནཾ ཝིསུཾ གཧིཏཏྟཱ པཱརིསེསཏོ ཨལགདྡསྶ དུགྒཧཎཱུཔམཱཡེཝ པརིཡཏྟི ‘‘ཨལགདྡཱུཔམཱ’’ཏི ཝིཉྙཱཡཏི. ཨལགདྡསྶ སུགྒཧཎཱུཔམཱ ཧི པརིཡཏྟི ནིསྶརཎཏྠཱ ཝཱ ཧོཏི, བྷཎྜཱགཱརིཀཔརིཡཏྟི ཝཱ. ཏསྨཱ སུཝུཏྟམེཏཾ ‘‘དུགྒཧིཏཱ…པེ… པརིཡཏྟཱི’’ཏི. ཨིདཱནི ཏམཏྠཾ པཱལི༹ཡཱ སཱདྷེནྟོ ‘‘ཡཾ སནྡྷཱཡཱ’’ཏིཨཱདིམཱཧ. ཏཏྠ ཡནྟི ཡཾ པརིཡཏྟིདུགྒཧཎཾ. མཛ྄ཛྷིམནིཀཱཡེ མཱུལཔཎྞཱསཀེ ཨལགདྡསུཏྟེ (མ. ནི. ༡.༢༣༩) བྷགཝཏཱ ཝུཏྟཾ.

ཨལགདྡཏྠིཀོཏི ཨཱསཱིཝིསེན, ཨཱསཱིཝིསཾ ཝཱ ཨཏྠིཀོ, ཨལགདྡཾ གཝེསཏི པརིཡེསཏི སཱིལེནཱཏི ཨལགདྡགཝེསཱི. ཨལགདྡཔརིཡེསནཾ ཙརམཱནོཏི ཨཱསཱིཝིསཔརིཡེསནཏྠཾ ཙརམཱནོ. ཏདཏྠེ ཧེཏཾ པཙྩཏྟཝཙནཾ, ཨུཔཡོགཝཙནཾ ཝཱ, ཨལགདྡཔརིཡེསནཊྛཱནཾ ཝཱ ཙརམཱནོ. ཨལགདྡཾ པརིཡེསནྟི ཨེཏྠཱཏི ཧི ཨལགདྡཔརིཡེསནཾ. ཏམེནནྟི ཏཾ ཨལགདྡཾ. བྷོགེཏི སརཱིརེ. ‘‘བྷོགོ ཏུ ཕཎིནོ ཏནཱུ’’ཏི ཧི ཝུཏྟཾ. བྷུཛཱིཡཏི ཀུཊིལཾ ཀརཱིཡཏཱིཏི བྷོགོ. ཏསྶཱཏི པུརིསསྶ. ཧཏྠེ ཝཱ བཱཧཱཡ ཝཱཏི སམྦནྡྷོ. མཎིབནྡྷཏོ པཊྛཱཡ ཡཱཝ ཨགྒནཁཱ ཧཏྠོ. སདྡྷིཾ ཨགྒབཱཧཱཡ ཨཝསེསཱ བཱཧཱ, ཀཏྠཙི པན ཀཔྤརཏོ པཊྛཱཡ ཡཱཝ ཨགྒནཁཱ ‘‘ཧཏྠོ’’ཏི ཝུཏྟཾ བཱཧཱཡ ཝིསུཾ ཨནཱགཏཏྟཱ. ཝུཏྟལཀྑཎཾ ཧཏྠཉྩ བཱཧཉྩ ཋཔེཏྭཱ ཨཝསེསཾ སརཱིརཾ ཨངྒཔཙྩངྒཾ. ཏཏོནིདཱནནྟི ཏནྣིདཱནཾ, ཏཾཀཱརཎཱཏི ཨཏྠོ. ཏཾ ཧཏྠཱདཱིསུ ཌཾསནཾ ནིདཱནཾ ཀཱརཎཾ ཨེཏསྶཱཏི ‘‘ཏནྣིདཱན’’ནྟི ཧི ཝཏྟབྦེ ‘‘ཏཏོནིདཱན’’ནྟི པུརིམཔདེ པཙྩཏྟཏྠེ ནིསྶཀྐཝཙནཾ ཀཏྭཱ, ཏསྶ ཙ ལོཔམཀཏྭཱ ནིདྡེསོ, ཧེཏྭཏྠེ ཙ པཙྩཏྟཝཙནཾ. ཀཱརཎཏྠེ ནིཔཱཏཔདམེཏནྟིཔི ཝདནྟི. ཨཔིཙ ‘‘ཏཏོནིདཱན’’ནྟི ཨེཏཾ ‘‘མརཎཾ ཝཱ མརཎམཏྟཾ ཝཱ དུཀྑ’’ནྟི ཨེཏྠ ཝུཏྟནཡེན ཝིསེསནཾ. ཏཾ ¶ ཀིསྶ ཧེཏཱུཏི ཡཾ ཝུཏྟཾ ཧཏྠཱདཱིསུ ཌཾསནཾ, ཏནྣིདཱནཉྩ མརཎཱདིཨུཔགམནཾ ¶ , ཏཾ ཀིསྶ ཧེཏུ ཀེན ཀཱརཎེནཱཏི ཙེ? ཏསྶ པུརིསསྶ ཨལགདྡསྶ དུགྒཧིཏཏྟཱ.

ཨིདྷཱཏི ཨིམསྨིཾ སཱསནེ. མོགྷཔུརིསཱཏི གུཎསཱརརཧིཏཏཱཡ ཏུཙྪཔུརིསཱ. དྷམྨནྟི པཱལི༹དྷམྨཾ. པརིཡཱཔུཎནྟཱིཏི ཨུགྒཎྷནྟི, སཛ྄ཛྷཱཡནྟི ཙེཝ ཝཱཙུགྒཏཾ ཀརོནྟཱ དྷཱརེནྟི ཙཱཏི ཝུཏྟཾ ཧོཏི. ‘‘དྷམྨ’’ནྟི སཱམཉྙཏོ ཝུཏྟམེཝ སརཱུཔེན དསྶེཏི ‘‘སུཏྟ’’ནྟིཨཱདིནཱ. ན ཧི སུཏྟཱདིནཝངྒཏོ ཨཉྙོ དྷམྨོ ནཱམ ཨཏྠི. ཏཐཱ ཧི ཝུཏྟཾ ‘‘ཏེསཾ དྷམྨཱན’’ནྟི. ཨཏྠནྟི ཙེཏྠ སམྦནྡྷཱིནིདྡེསོ ཨེསོ, ཨཏྠནྟི ཙ ཡཐཱབྷཱུཏཾ བྷཱསིཏཏྠཾ, པཡོཛནཏྠཉྩ སཱམཉྙནིདྡེསེན, ཨེཀསེསནཡེན ཝཱ ཝུཏྟཾ. ཡཉྷི པདཾ སུཏིསཱམཉྙེན ཨནེཀདྷཱ ཨཏྠཾ དཱིཔེཏི, ཏཾ སཱམཉྙནིདྡེསེན, ཨེཀསེསནཡེན ཝཱཏི སབྦཏྠ ཝེདིཏབྦཾ. ན ཨུཔཔརིཀྑནྟཱིཏི ན པརིགྒཎྷནྟི ན ཝིཙཱརེནྟི. ཨིཀྑསདྡསྶ ཧི དསྶནངྐེསུ ཨིདྷ དསྶནམེཝ ཨཏྠོ, ཏསྶ ཙ པརིགྒཎྷནཙཀྑུལོཙནེསུ པརིགྒཎྷནམེཝ, ཏཉྩ ཝིཙཱརཎཱ པརིཡཱདཱནཝསེན དུབྦིདྷེསུ ཝིཙཱརཎཱཡེཝ, སཱ ཙ ཝཱིམཾསཱཡེཝ, ན ཝིཙཱརོ, ཝཱིམཾསཱ ཙ ནཱམེསཱ བྷཱསིཏཏྠཝཱིམཾསཱ, པཡོཛནཏྠཝཱིམཾསཱ ཙཱཏི ཨིདྷ དུབྦིདྷཱཝ ཨདྷིཔྤེཏཱ, ཏཱསུ ‘‘ཨིམསྨིཾ ཋཱནེ སཱིལཾ ཀཐིཏཾ, ཨིམསྨིཾ སམཱདྷི, ཨིམསྨིཾ པཉྙཱ, མཡཉྩ ཏཾ པཱུརེསྶཱམཱ’’ཏི ཨེཝཾ བྷཱསིཏཏྠཝཱིམཾསཉྩེཝ ‘‘སཱིལཾ སམཱདྷིསྶ ཀཱརཎཾ, སམཱདྷི ཝིཔསྶནཱཡཱ’’ཏིཨཱདིནཱ པཡོཛནཏྠཝཱིམཾསཉྩ ན ཀརོནྟཱིཏི ཨཏྠོ. ཨནུཔཔརིཀྑཏནྟི ཨནུཔཔརིཀྑནྟཱནཾ ཏེསཾ མོགྷཔུརིསཱནཾ. ན ནིཛ྄ཛྷཱནཀྑམནྟཱིཏི ནིཛ྄ཛྷཱནཾ ནིསྶེསེན པེཀྑནཾ པཉྙཾ ན ཁམནྟི. ཛྷེ-སདྡོ ཧི ཨིདྷ པེཀྑནེཡེཝ, ན ཙིནྟནཛྷཱཔནེསུ, ཏཉྩ ཉཱཎཔེཀྑནམེཝ, ན ཙཀྑུཔེཀྑནཾ, ཨཱརམྨཎཱུཔནིཛ྄ཛྷཱནམེཝ ཝཱ, ན ལཀྑཎཱུཔནིཛ྄ཛྷཱནཾ, ཏསྨཱ པཉྙཱཡ དིསྭཱ རོཙེཏྭཱ གཧེཏབྦཱ ན ཧོནྟཱིཏི ཨདྷིཔྤཱཡོ ཝེདིཏབྦོ. ནིསྶེསེན ཛྷཱཡཏེ པེཀྑཏེཏི ཧི ནིཛ྄ཛྷཱནཾ. སནྡྷིཝསེན ཨནུསྭཱརལོཔོ ནིཛ྄ཛྷཱནཀྑམནྟཱིཏི, ‘‘ནིཛ྄ཛྷཱནཾ ཁམནྟཱི’’ཏིཔི པཱཋོ, ཏེན ཨིམམཏྠཾ དཱིཔེཏི ‘‘ཏེསཾ པཉྙཱཡ ཨཏྠསྶ ཨནུཔཔརིཀྑནཏོ ཏེ དྷམྨཱ ན ཨུཔཊྛཧནྟི, ཨིམསྨིཾ ཋཱནེ སཱིལཾ, སམཱདྷི, ཝིཔསྶནཱ, མགྒོ, ཝཊྚཾ, ཝིཝཊྛཾ ཀཐིཏནྟི ཨེཝཾ ཛཱནིཏུཾ ན སཀྐཱ ཧོནྟཱི’’ཏི.

ཨུཔཱརམྦྷཱནིསཾསཱ ཙེཝཱཏི པརེསཾ ཝཱདེ དོསཱརོཔནཱནིསཾསཱ ཙ ཧུཏྭཱ. བྷུསོ ཨཱརམྦྷནཉྷི པརེསཾ ཝཱདེ དོསཱརོཔནཾ ཨུཔཱརམྦྷོ, པརིཡཏྟིཾ ¶ ནིསྶཱཡ པརཝམྦྷནནྟི ཝུཏྟཾ ཧོཏི. ཏཐཱ ཧེས ‘‘པརཝཛྫཱནུཔནཡནལཀྑཎོ’’ཏི ཝུཏྟོ. ཨིཏི ཝཱདཔྤམོཀྑཱནིསཾསཱ ཙཱཏི ཨིཏི ཨེཝཾ ཨེཏཱཡ པརིཡཏྟིཡཱ ཝཱདཔྤམོཀྑཱནིསཾསཱ ཨཏྟནོ ཨུཔརི པརེཧི ཨཱརོཔིཏསྶ ཝཱདསྶ ནིགྒཧསྶ ཨཏྟཏོ, སཀཝཱདཏོ ཝཱ པམོཀྑཔཡོཛནཱ ཙ ཧུཏྭཱ. ཨིཏི སདྡོ ཨིདམཏྠེ, ཏེན ‘‘པརིཡཱཔུཎནྟཱི’’ཏི ¶ ཨེཏྠ པརིཡཱཔུཎནཾ པརཱམསཏི. ཝདནྟི ནིགྒཎྷནྟི ཨེཏེནཱཏི ཝཱདོ, དོསོ, པམུཙྩནཾ, པམུཙྩཱཔནཾ ཝཱ པམོཀྑོ, ཨཏྟནོ ཨུཔརི ཨཱརོཔིཏསྶ པམོཀྑོ ཨཱནིསཾསོ ཡེསཾ ཏཐཱ. ཨཱརོཔིཏཝཱདོ ཧི ‘‘ཝཱདོ’’ཏི ཝུཏྟོ ཡཐཱ ‘‘དེཝེན དཏྟོ དཏྟོ’’ཏི. ཝཱདོཏི ཝཱ ཨུཔཝཱདོནིནྡཱ ཡཐཱཝུཏྟནཡེནེཝ སམཱསོ. ཨིདཾ ཝུཏྟཾ ཧོཏི – པརེཧི སཀཝཱདེ དོསེ ཨཱརོཔིཏེ, ནིནྡཱཡ ཝཱ ཨཱརོཔིཏཱཡ ཏཾ དོསཾ, ནིནྡཾ ཝཱ ཨེཝཉྩ ཨེཝཉྩ མོཙེསྶཱམཱཏི ཨིམིནཱ ཙ ཀཱརཎེན པརིཡཱཔུཎནྟཱིཏི. ཨཐ ཝཱ སོ སོ ཝཱདོ ཨིཏི ཝཱདོ ཨིཏི-སདྡསྶ སཧ ཝིཙྪཱཡ ཏ-སདྡཏྠེ པཝཏྟཏྟཱ. ཨིཏིཝཱདས པམོཀྑོ ཡཐཱཝུཏྟནཡེན, སོ ཨཱནིསཾསོ ཡེསཾ ཏཐཱ, ཏཾ ཏཾ ཝཱདཔམོཙནཱནིསཾསཱ ཧུཏྭཱཏི ཨཏྠོ. ཡསྶ ཙཏྠཱཡཱཏི ཡསྶ ཙ སཱིལཱདིཔཱུརཎསྶ, མགྒཕལནིབྦཱནབྷཱུཏསྶ ཝཱ ཨནུཔཱདཱཝིམོཀྑསྶ ཨཏྠཱཡ. ཨབྷེདེཔི བྷེདཝོཧཱརོ ཨེསོ ཡཐཱ ‘‘པཊིམཱཡ སརཱིར’’ནྟི, བྷེདྱབྷེདཀཾ ཝཱ ཨེཏཾ ཡཐཱ ‘‘ཀཐིནསྶཏྠཱཡ ཨཱབྷཏཾ དུསྶ’’ནྟི. ‘‘ཏཉྩསྶ ཨཏྠ’’ནྟི ཧི ཝུཏྟཾ. ཙ-སདྡོ ཨཝདྷཱརཎེ, ཏེན ཏདཏྠཱཡ ཨེཝ པརིཡཱཔུཎནཾ སམྦྷཝཏི, ནཱཉྙཏྠཱཡཱཏི ཝིནིཙྪིནོཏི. དྷམྨཾ པརིཡཱཔུཎནྟཱིཏི ཧི ཛཱཏིཨཱཙཱརཝསེན དུཝིདྷཱཔི ཀུལཔུཏྟཱ ཉཱཡེན དྷམྨཾ པརིཡཱཔུཎནྟཱིཏི ཨཏྠོ. ཏཉྩསྶ ཨཏྠཾ ནཱནུབྷོནྟཱིཏི ཨསྶ དྷམྨསྶ སཱིལཱདིཔཱུརཎསངྑཱཏཾ, མགྒཕལནིབྦཱནབྷཱུཏཾ ཝཱ ཨནུཔཱདཱཝིམོཀྑསངྑཱཏཾ ཨཏྠཾ ཨེཏེ དུགྒཧིཏགཱཧིནོ ནཱནུབྷོནྟི ན ཝིནྡནྟིཡེཝ.

ཨཔརོ ནཡོ – ཡསྶ ཨུཔཱརམྦྷསྶ, ཨིཏིཝཱདཔྤམོཀྑསྶ ཝཱ ཨཏྠཱཡ ཡེ མོགྷཔུརིསཱ དྷམྨཾ པརིཡཱཔུཎནྟི, ཏེ པརེཧི ‘‘ཨཡམཏྠོ ན ཧོཏཱི’’ཏི ཝུཏྟེ དུགྒཧིཏཏྟཱཡེཝ ‘‘ཏདཏྠོཝ ཧོཏཱི’’ཏི པཊིཔཱདནཀྑམཱ ན ཧོནྟི, ཏསྨཱ པརསྶ ཝཱདེ ཨུཔཱརམྦྷཾ ཨཱརོཔེཏུཾ ཨཏྟནོ ཝཱདཾ པམོཙེཏུཉྩ ཨསཀྐོནྟཱཔི ཏཾ ཨཏྠཾ ནཱནུབྷོནྟི ཙ ན ཝིནྡནྟིཡེཝཱཏི ཨེཝམྤེཏྠ ཨཏྠོ དཊྛབྦོ. ཨིདྷཱཔི ཧི ཙ-སདྡོ ཨཝདྷཱརཎཏྠོཝ. ‘‘ཏེས’’ནྟིཨཱདཱིསུ ¶ ཏེསཾ ཏེ དྷམྨཱ དུགྒཧིཏཏྟཱ ཨུཔཱརམྦྷམཱནདབྦམཀྑཔལཱསཱདིཧེཏུབྷཱཝེན དཱིགྷརཏྟཾ ཨཧིཏཱཡ དུཀྑཱཡ སཾཝཏྟནྟཱིཏི ཨཏྠོ. དུགྒཧིཏཱཏི ཧི ཧེཏུགབྦྷཝཙནཾ. ཏེནཱཧ ‘‘དུགྒཧིཏཏྟཱ བྷིཀྑཝེ, དྷམྨཱན’’ནྟི (མ. ནི. ༡.༢༣༨). ཨེཏྠ ཙ ཀཱརཎེ ཕལཝོཧཱརཝསེན ‘‘ཏེ དྷམྨཱ ཨཧིཏཱཡ དུཀྑཱཡ སཾཝཏྟནྟཱི’ཏི ཝུཏྟཾ ཡཐཱ ‘‘གྷཏམཱཡུ, དདྷི བལ’’ནྟི. ཏཐཱ ཧི ཀིཉྩཱཔི ན ཏེ དྷམྨཱ ཨཧིཏཱཡ དུཀྑཱཡ སཾཝཏྟནྟི, ཏཐཱཔི ཝུཏྟནཡེན པརིཡཱཔུཎནྟཱནཾ སཛ྄ཛྷཱཡནཀཱལེ, ཝིཝཱདཀཱལེ ཙ ཏམྨཱུལཀཱནཾ ཨུཔཱརམྦྷཱདཱིནཾ ཨནེཀེསཾ ཨཀུསལཱནཾ ཨུཔྤཏྟིསམྦྷཝཏོ ‘‘ཏེ…པེ… སཾཝཏྟནྟཱི’’ཏི ཝུཙྩཏི. ཏཾ ཀིསྶ ཧེཏཱུཏི ཨེཏྠ ནྟི ཡཐཱཝུཏྟསྶཏྠསྶ ཨནནུབྷཝནཾ, ཏེསཉྩ དྷམྨཱནཾ ཨཧིཏཱཡ དུཀྑཱཡ སཾཝཏྟནཾ པརཱམསཏི. ཀིསྶཱཏི སཱམིཝཙནཾ ཧེཏྭཏྠེ, ཏཐཱ ཧེཏཱུཏི པཙྩཏྟཝཙནཉྩ.

ཡཱ ¶ པནཱཏི ཨེཏྠ ཀིརིཡཱ པཱལི༹ཝསེན ཝུཏྟནཡེན ཨཏྠོ ཝེདིཏབྦོ. ཏཏྠ ཀིརིཡཱཔཀྑེ ཡཱ སུགྒཧིཏཱཏི ཨབྷེདེཔི བྷེདཝོཧཱརོ ‘‘ཙཱརིཀཾ པཀྐམཏི, ཙཱརིཀཾ ཙརམཱནོ’’ཏིཨཱདཱིསུ (དཱི. ནི. ༡.༢༥༤, ༣༠༠) ཝིཡ. ཏདེཝཏྠཾ ཝིཝརཏི ‘‘སཱིལཀྑནྡྷཱདཱི’’ཏིཨཱདིནཱ, ཨཱདིསདྡེན ཙེཏྠ སམཱདྷིཝིཔསྶནཱདཱིནཾ སངྒཧོ. ཡོ ཧི བུདྡྷཝཙནཾ ཨུགྒཎྷིཏྭཱ སཱིལསྶ ཨཱགཏཊྛཱནེ སཱིལཾ པཱུརེཏྭཱ, སམཱདྷིནོ ཨཱགཏཊྛཱནེ སམཱདྷིཾ གབྦྷཾ གཎྷཱཔེཏྭཱ, ཝིཔསྶནཱཡ ཨཱགཏཊྛཱནེ ཝིཔསྶནཾ པཊྛཔེཏྭཱ, མགྒཕལཱནཾ ཨཱགཏཊྛཱནེ ‘‘མགྒཾ བྷཱཝེསྶཱམི, ཕལཾ སཙྪིཀརིསྶཱམཱི’’ཏི ཨུགྒཎྷཱཏི, ཏསྶེཝ སཱ པརིཡཏྟི ནིསྶརཎཏྠཱ ནཱམ ཧོཏི. ཡནྟི ཡཾ པརིཡཏྟིསུགྒཧཎཾ. ཝུཏྟཾ ཨལགདྡསུཏྟེ. དཱིགྷརཏྟཾ ཧིཏཱཡ སུཁཱཡ སཾཝཏྟནྟཱིཏི སཱིལཱདཱིནཾ ཨཱགཏཊྛཱནེ སཱིལཱདཱིནི པཱུརེནྟཱནམྤི ཨརཧཏྟཾ པཏྭཱ པརིསམཛ྄ཛྷེ དྷམྨཾ དེསེཏྭཱ དྷམྨདེསནཱཡ པསནྣེཧི ཨུཔནཱིཏེ ཙཏྟཱརོ པཙྩཡེ པརིབྷུཉྫནྟཱནམྤི པརེསཾ ཝཱདེ སཧདྷམྨེན ཨུཔཱརམྦྷཾ ཨཱརོཔེནྟཱནམྤི སཀཝཱདཏོ པརེཧི ཨཱརོཔིཏདོསཾ པརིཧརནྟཱནམྤི དཱིགྷརཏྟཾ ཧིཏཱཡ སུཁཱཡ སཾཝཏྟནྟཱིཏི ཨཏྠོ. ཏཐཱ ཧི ན ཀེཝལཾ སུགྒཧིཏཔརིཡཏྟིཾ ནིསྶཱཡ མགྒབྷཱཝནཱཕལསཙྪིཀིརིཡཱདཱིནིཡེཝ, ཨཔི ཏུ པརཝཱདནིགྒཧསཀཝཱདཔཏིཊྛཱཔནཱནིཔི ཨིཛ྄ཛྷནྟི. ཏཐཱ ཙ ཝུཏྟཾ པརིནིབྦཱནསུཏྟཱ དཱིསུ ‘‘ཨུཔྤནྣཾ པརཔྤཝཱདཾ སཧདྷམྨེན སུནིགྒཧིཏཾ ནིགྒཧེཏྭཱ སཔྤཱཊིཧཱརིཡཾ དྷམྨཾ དེསེསྶནྟཱི’’ཏིཨཱདི (དཱི. ནི. ༢.༦༨).

ཡཾ ¶ པནཱཏི ཨེཏྠཱཔི ཝུཏྟནཡེན དུཝིདྷེན ཨཏྠོ. དུཀྑཔརིཛཱནེན པརིཉྙཱཏཀྑནྡྷོ. སམུདཡཔྤཧཱནེན པཧཱིནཀིལེསོ. པཊིཝིདྡྷཱརཧཏྟཕལཏཱཡ པཊིཝིདྡྷཱཀུཔྤོ. ཨཀུཔྤནྟི ཙ ཨརཧཏྟཕལསྶེཏཾ ནཱམ. སཏིཔི ཧི ཙཏྟུནྣཾ མགྒཱནཾ, ཙཏུནྣཉྩ ཕལཱནཾ ཨཝིནསྶནབྷཱཝེ སཏྟནྣཾ སེཀྑཱནཾ སཀསཀནཱམཔརིཙྩཱགེན ཨུཔརཱུཔརི ནཱམནྟརཔྤཏྟིཏོ ཏེསཾ མགྒཕལཱཏི ‘‘ཨཀུཔྤཱམི’’ཏི ན ཝུཙྩནྟི. ཨརཧཱ པན སབྦདཱཔི ཨརཧཱཡེཝ ནཱམཱཏི ཏསྶེཝ ཕལཾ པུགྒལནཱམཝསེན ‘‘ཨཀུཔྤ’’ནྟི ཝུཏྟཾ, ཨིམིནཱ ཙ ཨིམམཏྠཾ དསྶེཏི ‘‘ཁཱིཎཱསཝསྶེཝ པརིཡཏྟི བྷཎྜཱགཱརིཀཔརིཡཏྟི ནཱམཱ’’ཏི. ཏསྶ ཧི ཨཔརིཉྙཱཏཾ, ཨཔྤཧཱིནཾ ཨབྷཱཝིཏཾ, ཨསཙྪིཀཏཾ ཝཱ ནཏྠི, ཏསྨཱ སོ བུདྡྷཝཙནཾ པརིཡཱཔུཎནྟོཔི ཏནྟིདྷཱརཀོ པཝེཎཱིཔཱལཀོ ཝཾསཱནུརཀྑཀོཝ ཧུཏྭཱ པརིཡཱཔུཎཱཏི, ཏེནེཝཱཧ ‘‘པཝེཎཱིཔཱལནཏྠཱཡཱ’’ཏིཨཱདི. པཝེཎཱི ཙེཏྠ དྷམྨསནྟཏི དྷམྨསྶ ཨཝིཙྪེདེན པཝཏྟི. བུདྡྷསྶ བྷགཝཏོ ཝཾསོཏི ཙ ཡཐཱཝུཏྟཔཝེཎཱིཡེཝ.

ནནུ ཙ ཡདི པཝེཎཱིཔཱལནཏྠཱཡ བུདྡྷཝཙནསྶ པརིཡཱཔུཎནཾ བྷཎྜཱགཱརིཀཔརིཡཏྟི, ཨཐ ཀསྨཱ ‘‘ཁཱིཎཱསཝོ’’ཏི ཝིསེསེཏྭཱ ཝུཏྟཾ. ཨེཀཙྩསྶ ཧི པུཐུཛྫནསྶཱཔི ཨཡཾ ནཡོ ལབྦྷཏི. ཏཐཱ ཧི ཨེཀཙྩོ པུཐུཛྫནོ བྷིཀྑུ ཚཱཏཀབྷཡཱདིནཱ གནྠདྷུརེསུ ཨེཀསྨིཾ ཋཱནེ ཝསིཏུམསཀྐོནྟེསུ ¶ སཡཾ བྷིཀྑཱཙཱརེན ཨཏིཀིལམམཱནོ ‘‘ཨཏིམདྷུརཾ བུདྡྷཝཙནཾ མཱ ནསྶཏུ, ཏནྟིཾ དྷཱརེསྶཱམི, ཝཾསཾ ཋཔེསྶཱམི, པཝེཎིཾ པཱལེསྶཱམཱི’’ཏི པརིཡཱཔུཎཱཏི. ཏསྨཱ ཏསྶཱཔི པརིཡཏྟི བྷཎྜཱགཱརིཀཔརིཡཏྟི ནཱམ ཀསྨཱ ན ཧོཏཱིཏི? ཝུཙྩཏེ – ཨེཝཾ སནྟེཔི ཧི པུཐུཛྫནསྶ པརིཡཏྟི བྷཎྜཱགཱརིཀཔརིཡཏྟི ནཱམ ན ཧོཏི. ཀིཉྩཱཔི ཧི པུཐུཛྫནོ ‘‘པཝེཎིཾ པཱལེསྶཱམཱི’’ཏི ཨཛ྄ཛྷཱསཡེན པརིཡཱཔུཎཱཏི, ཨཏྟནོ པན བྷཝཀནྟཱརཏོ ཨཝིཏིཎྞཏྟཱ ཏསྶ སཱ པརིཡཏྟི ནིསྶརཎཏྠཱཡེཝ ནཱམ ཧོཏི, ཏསྨཱ པུཐུཛྫནསྶ པརིཡཏྟི ཨལགདྡུཔམཱ ཝཱ ཧོཏི, ནིསྶརཎཏྠཱ ཝཱ. སཏྟནྣཾ སེཀྑཱནཾ ནིསྶརཎཏྠཱཝ. ཁཱིཎཱསཝཱནཾ བྷཎྜཱགཱརིཀཔརིཡཏྟིཡེཝཱཏི ཝེདིཏབྦཾ. ཁཱིཎཱསཝོ ཧི བྷཎྜཱགཱརིཀ སདིསཏྟཱ ‘‘བྷཎྜཱགཱརིཀོ’’ཏི ཝུཙྩཏི. ཡཐཱ ཧི བྷཎྜཱགཱརིཀོ ཨལངྐཱརབྷཎྜཾ པཊིསཱམེཏྭཱ པསཱདྷནཀཱལེ ཏདུཔིཡཾ ཨལངྐཱརབྷཎྜཾ རཉྙོ ཨུཔནཱམེཏྭཱ ཏཾ ཨལངྐརོཏི, ཨེཝཾ ཁཱིཎཱསཝོཔི དྷམྨརཏནབྷཎྜཾ སམྤཊིཙྪིཏྭཱ མོཀྑཱདྷིགམཱཡ ¶ བྷབྦརཱུཔེ སཧེཏུཀེ སཏྟེ པསྶིཏྭཱ ཏདནུརཱུཔཾ དྷམྨདེསནཾ ཝཌྜྷེཏྭཱ མགྒངྒབོཛ྄ཛྷངྒཱདིསངྑཱཏེན ལོཀུཏྟརེན ཨལངྐཱརེན ཨལངྐརོཏཱིཏི.

ཨེཝཾ ཏིསྶོ པརིཡཏྟིཡོ ཝིབྷཛིཏྭཱ ཨིདཱནི ཏཱིསུཔི པིཊཀེསུ ཡཐཱརཧཾ སམྤཏྟིཝིཔཏྟིཡོ ནིདྡྷཱརེཏྭཱ ཝིབྷཛནྟོ ‘‘ཝིནཡེ པནཱ’’ཏིཨཱདིམཱཧ. ‘‘སཱིལསམྤདཾ ནིསྶཱཡ ཏིསྶོ ཝིཛྫཱ པཱཔུཎཱཏཱི’’ཏིཨཱདཱིསུ ཡསྨཱ སཱིལཾ ཝིསུཛ྄ཛྷམཱནཾ སཏིསམྤཛཉྙབལེན, ཀམྨསྶཀཏཱཉཱཎབལེན ཙ སཾཀིལེསམལཏོ ཝིསུཛ྄ཛྷཏི, པཱརིཔཱུརིཉྩ གཙྪཏི, ཏསྨཱ སཱིལསམྤདཱ སིཛ྄ཛྷམཱནཱ ཨུཔནིསྶཡསམྤཏྟིབྷཱཝེན སཏིབལཾ, ཉཱཎབལཉྩ པཙྩུཔཊྛཔེཏཱིཏི ཏསྶཱ ཝིཛྫཏྟཡཱུཔནིསྶཡཏཱ ཝེདིཏབྦཱ སབྷཱགཧེཏུསམྤཱདནཏོ. སཏིབལེན ཧི པུབྦེནིཝཱསཝིཛྫཱསིདྡྷི. སམྤཛཉྙབལེན སབྦཀིཙྩེསུ སུདིཊྛཀཱརིཏཱཔརིཙཡེན ཙུཏཱུཔཔཱཏཉཱཎཱནུབདྡྷཱཡ དུཏིཡཝིཛྫཱཡ སིདྡྷི. ཝཱིཏིཀྐམཱབྷཱཝེན སཾཀིལེསཔྤཧཱནསབྦྷཱཝཏོ ཝིཝཊྚཱུཔནིསྶཡཏཱཝསེན ཨཛ྄ཛྷཱསཡསུདྡྷིཡཱ ཏཏིཡཝིཛྫཱསིདྡྷི. པུརེཏརསིདྡྷཱནཾ སམཱདྷིཔཉྙཱནཾ པཱརིཔཱུརིཾ ཝིནཱ སཱིལསྶ ཨཱསཝཀྑཡཉཱཎཱུཔནིསྶཡཏཱ སུཀྑཝིཔསྶཀཁཱིཎཱསཝེཧི དཱིཔེཏབྦཱ. ‘‘སམཱཧིཏོ ཡཐཱབྷཱུཏཾ པཛཱནཱཏཱི’’ཏི (སཾ. ནི. ༣.༥; ༥.༡༠༧༡; ནེཏྟི. ༤༠; མི. པ. ༡༤) ཝཙནཏོ སམཱདྷིསམྤདཱ ཚལ༹བྷིཉྙཏཱཡ ཨུཔནིསྶཡོ. ‘‘ཡོགཱ ཝེ ཛཱཡཏེ བྷཱུརཱི’’ཏི (དྷ. པ. ༢༨༢) ཝཙནཏོ པུབྦཡོགེན གརུཝཱསདེསབྷཱསཱཀོསལླཨུགྒཧཎཔརིཔུཙྪཱདཱིཧི ཙ པརིབྷཱཝིཏཱ པཉྙཱསམྤདཱ པཊིསམྦྷིདཱཔྤབྷེདསྶ ཨུཔནིསྶཡོ. ཨེཏྠ ཙ ‘‘སཱིལསམྤདཾ ནིསྶཱཡཱ’’ཏི ཝུཏྟཏྟཱ ཡསྶ སམཱདྷིཝིཛམྦྷནབྷཱུཏཱ ཨནཝསེསཱ ཚ ཨབྷིཉྙཱ ན ཨིཛ྄ཛྷནྟི, ཏསྶ ཨུཀྐཊྛཔརིཙྪེདཝསེན ན སམཱདྷིསམྤདཱ ཨཏྠཱིཏི སཏིཔི ཝིཛྫཱནཾ ཨབྷིཉྙེཀདེསབྷཱཝེ སཱིལསམྤདཱསམུདཱགཏཱ ཨེཝ ཏིསྶོ ཝིཛྫཱ གཧིཏཱ, ཡཐཱ ཙ པཉྙཱསམྤདཱསམུདཱགཏཱ ཙཏསྶོ པཊིསམྦྷིདཱ ཨུཔནིསྶཡསམྤནྣསྶ ¶ མགྒེནེཝ ཨིཛ྄ཛྷནྟི མགྒཀྑཎེཡེཝ ཏཱསཾ པཊིལདྡྷཏྟཱ. ཨེཝཾ སཱིལསམྤདཱསམུདཱགཏཱ ཏིསྶོ ཝིཛྫཱ, སམཱདྷིསམྤདཱསམུདཱགཏཱ ཙ ཚ ཨབྷིཉྙཱ ཨུཔནིསྶཡསམྤནྣསྶ མགྒེནེཝ ཨིཛ྄ཛྷནྟཱིཏི མགྒཱདྷིགམེནེཝ ཏཱསཾ ཨདྷིགམོ ཝེདིཏབྦོ. པཙྩེཀབུདྡྷཱནཾ, སམྨཱསམྦུདྡྷཱནཉྩ པཙྩེཀབོདྷིསམྨཱསམྦོདྷིསམདྷིགམསདིསཱ ཧི ཨིམེསཾ ཨརིཡཱནཾ ཨིམེ ཝིསེསཱདྷིགམཱཏི.

ཏཱསཾཡེཝ ¶ ཙ ཏཏྠ པབྷེདཝཙནཏོཏི ཨེཏྠ ‘‘ཏཱསཾཡེཝཱ’’ཏི ཨཝདྷཱརཎཾ པཱཔུཎིཏབྦཱནཾ ཚལ༹བྷིཉྙཱཙཏུཔཊིསམྦྷིདཱནཾ ཝིནཡེ པབྷེདཝཙནཱབྷཱཝཾ སནྡྷཱཡ ཝུཏྟཾ. ཝེརཉྫཀཎྜེ (པཱརཱ. ༡༢) ཧི ཏིསྶོ ཝིཛྫཱཝ ཝིབྷཏྟཱཏི. ཙསདྡེན སམུཙྩིནནཉྩ ཏཱསཾ ཨེཏྠ ཨེཀདེསཝཙནཾ སནྡྷཱཡ ཝུཏྟཾ ཨབྷིཉྙཱཔཊིསམྦྷིདཱནམྤི ཨེཀདེསཱནཾ ཏཏྠ ཝུཏྟཏྟཱ. དུཏིཡེ ‘‘ཏཱསཾཡེཝཱ’’ཏི ཨཝདྷཱརཎཾ ཙཏསྶོ པཊིསམྦྷིདཱ ཨཔེཀྑིཏྭཱ ཀཏཾ, ན ཏིསྶོ ཝིཛྫཱ. ཏཱ ཧི ཚསུ ཨབྷིཉྙཱསུ ཨནྟོགདྷཏྟཱ སུཏྟེ ཝིབྷཏྟཱཡེཝཱཏི. ཙ-སདྡེན ཙ པཊིསམྦྷིདཱནམེཀདེསཝཙནཾ སམུཙྩིནོཏི. ཏཏིཡེ ‘‘ཏཱསཉྩཱ’’ཏི ཙ-སདྡེན སེསཱནམྤི ཏཏྠ ཨཏྠིབྷཱཝཾ དཱིཔེཏི. ཨབྷིདྷམྨེ ཧི ཏིསྶོ ཝིཛྫཱ, ཚ ཨབྷིཉྙཱ, ཙཏསྶོ ཙ པཊིསམྦྷིདཱ ཝུཏྟཱཡེཝ. པཊིསམྦྷིདཱནཾ པན ཨཉྙཏྠ པབྷེདཝཙནཱབྷཱཝཾ, ཏཏྠེཝ ཙ སམྨཱ ཝིབྷཏྟབྷཱཝཾ དཱིཔེཏུཀཱམོ ཧེཊྛཱ ཝུཏྟནཡེན ཨཝདྷཱརཎམཀཏྭཱ ‘‘ཏཏྠེཝཱ’’ཏི པརིཝཏྟེཏྭཱ ཨཝདྷཱརཎཾ ཋཔེཏི. ‘‘ཨབྷིདྷམྨེ པན ཏིསྶོ ཝིཛྫཱ, ཚ ཨབྷིཉྙཱ, ཙཏསྶོ ཙ པཊིསམྦྷིདཱ ཨཉྙེ ཙ སམྨཔྤདྷཱནཱདཡོ གུཎཝིསེསཱ ཝིབྷཏྟཱ. ཀིཉྩཱཔི ཝིབྷཏྟཱ, ཝིསེསཏོ པན པཉྙཱཛཱཏིཀཏྟཱ ཙཏསྶོཝ པཊིསམྦྷིདཱ པཱཔུཎཱཏཱིཏི དསྶནཏྠཾ ‘ཏཱསཉྩ ཏཏྠེཝཱ’ཏི ཨཝདྷཱརཎཝིཔལླཱསོ ཀཏོ’’ཏི ཝཛིརབུདྡྷིཏྠེརོ. ‘‘ཨེཝ’’ནྟིཨཱདི ནིགམནཾ.

སུཁོ སམྥསྶོ ཨེཏེསནྟི སུཁསམྥསྶཱནི, ཨནུཉྙཱཏཱནིཡེཝ ཏཱདིསཱནི ཨཏྠརཎཔཱཝུརཎཱདཱིནི, ཏེསཾ ཕསྶསཱམཉྙཏོ སུཁོ ཝཱ སམྥསྶོ ཏཐཱ, ཨནུཉྙཱཏོ སོ ཡེསནྟི ཨནུཉྙཱཏསུཁསམྥསྶཱནི, ཏཱདིསཱནི ཨཏྠརཎཔཱཝུརཎཱདཱིནི ཏེསཾ ཕསྶེན སམཱནཏཱཡ. ཨུཔཱདིནྣཀཕསྶོ ཨིཏྠིཕསྶོ, མེཐུནདྷམྨོཡེཝ. ཝུཏྟཾ ཨརིཊྛེན ནཱམ གདྡྷབཱདྷིཔུབྦེན བྷིཀྑུནཱ (མ. ནི. ༢༣༤; པཱཙི. ༤༡༧). སོ ཧི བཧུསྶུཏོ དྷམྨཀཐིཀོ ཀམྨཀིལེསཝིཔཱཀཨུཔཝཱདཨཱཎཱཝཱིཏིཀྐམཝསེན པཉྩཝིདྷེསུ ཨནྟརཱཡིཀེསུ ཨཱཎཱཝཱིཏིཀྐམནྟརཱཡིཀཾ ན ཛཱནཱཏི, སེསནྟརཱཡིཀེཡེཝ ཛཱནཱཏི, ཏསྨཱ སོ རཧོགཏོ ཨེཝཾ ཙིནྟེསི ‘‘ཨིམེ ཨགཱརིཀཱ པཉྩ ཀཱམགུཎེ པརིབྷུཉྫནྟཱ སོཏཱཔནྣཱཔི སཀདཱགཱམིནོཔི ཨནཱགཱམིནོཔི ཧོནྟི, བྷིཀྑཱུཔི མནཱཔིཀཱནི ཙཀྑུཝིཉྙེཡྻཱནི རཱུཔཱནི པསྶནྟི ¶ …པེ… ཀཱཡཝིཉྙེཡྻེ ¶ ཕོཊྛབྦེ ཕུསནྟི, མུདུཀཱནི ཨཏྠརཎཔཱཝུརཎཱནི པརིབྷུཉྫནྟི, ཨེཏཾ སབྦམྤི ཝཊྚཏི, ཀསྨཱ ཨིཏྠཱིནཾཡེཝ རཱུཔསདྡགནྡྷརསཕོཊྛབྦཱ ན ཝཊྚནྟི, ཨེཏེཔི ཝཊྚནྟིཡེཝཱ’’ཏི ཨནཝཛྫེན པཙྩཡཔརིབྷོགརསེན སཱཝཛྫཾ ཀཱམགུཎཔརིབྷོགརསཾ སཾསནྡིཏྭཱ སཚནྡརཱགཔརིབྷོགཉྩ ནིཙྪནྡརཱགཔརིབྷོགཉྩ ཨེཀཾ ཀཏྭཱ ཐུལླཝཱཀེཧི སདྡྷིཾ ཨཏིསུཁུམསུཏྟཾ གྷཊེནྟོ ཝིཡ, སཱསཔེན སདྡྷིཾ སིནེརུནོ སདིསཏཾ ཨུཔསཾཧརནྟོ ཝིཡ ཙ པཱཔཀཾ དིཊྛིགཏཾ ཨུཔྤཱདེཏྭཱ ‘‘ཀིཾ བྷགཝཏཱ མཧཱསམུདྡཾ བནྡྷནྟེན ཝིཡ མཧཏཱ ཨུསྶཱཧེན པཋམཔཱརཱཛིཀཾ པཉྙཏྟཾ, ནཏྠི ཨེཏྠ དོསོ’’ཏི སབྦཉྙུཏཉྙཱཎེན སདྡྷིཾ པཊིཝིརུཛ྄ཛྷནྟོ ཝེསཱརཛྫཉཱཎཾ པཊིབཱཧནྟོ ཨརིཡམགྒེ ཁཱཎུཀཎྚཀཱདཱིནི པཀྑིཔནྟོ ‘‘མེཐུནདྷམྨེ དོསོ ནཏྠཱི’’ཏི ཛིནཙཀྐེ པཧཱརམདཱསི, ཏེནཱཧ ‘‘ཏཐཱཧ’’ནྟིཨཱདི.

ཨནཏིཀྐམནཏྠེན ཨནྟརཱཡེ ནིཡུཏྟཱ, ཨནྟརཱཡཾ ཝཱ ཕལཾ ཨརཧནྟི, ཨནྟརཱཡསྶ ཝཱ ཀརཎསཱིལཱཏི ཨནྟརཱཡིཀཱ, སགྒམོཀྑཱནཾ ཨནྟརཱཡཀརཱཏི ཝུཏྟཾ ཧོཏི. ཏེ ཙ ཀམྨཀིལེསཝིཔཱཀཨུཔཝཱདཨཱཎཱཝཱིཏིཀྐམཝསེན པཉྩཝིདྷཱ. ཝིཏྠཱརོ ཨརིཊྛསིཀྑཱཔདཝཎྞནཱདཱིསུ (པཱཙི. ཨཊྛ. ༤༡༧) གཧེཏབྦོ. ཨཡཾ པནེཏྠ པདཏྠསམྦནྡྷོ – ཡེ ཨིམེ དྷམྨཱ ཨནྟརཱཡིཀཱ ཨིཏི བྷགཝཏཱ ཝུཏྟཱ དེསིཏཱ ཙེཝ པཉྙཏྟཱ ཙ, ཏེ དྷམྨེ པཊིསེཝཏོ པཊིསེཝནྟསྶ ཡཐཱ ཡེན པཀཱརེན ཏེ དྷམྨཱ ཨནྟརཱཡཱཡ སགྒམོཀྑཱནཾ ཨནྟརཱཡཀརཎཏྠཾ ནཱལཾ སམཏྠཱ ན ཧོནྟི, ཏཐཱ ཏེན པཀཱརེན ཨཧཾ བྷགཝཏཱ དེསིཏཾ དྷམྨཾ ཨཱཛཱནཱམཱིཏི. ཏཏོ དུསྶཱིལབྷཱཝཾ པཱཔུཎཱཏཱིཏི ཏཏོ ཨནཝཛྫསཉྙིབྷཱཝཧེཏུཏོ ཝཱིཏིཀྐམིཏྭཱ དུསྶཱིལབྷཱཝཾ པཱཔུཎཱཏི.

ཙཏྟཱརོ…པེ…ཨཱདཱིསཱུཏི ཨེཏྠ ཨཱདི-སདྡེན –

‘‘ཙཏྟཱརོམེ བྷིཀྑཝེ, པུགྒལཱ སནྟོ སཾཝིཛྫམཱནཱ ལོཀསྨིཾ. ཀཏམེ ཙཏྟཱརོ? ཨཏྟཧིཏཱཡ པཊིཔནྣོ ནོ པརཧིཏཱཡ, པརཧིཏཱཡ པཊིཔནྣོ ནོ ཨཏྟཧིཏཱཡ, ནེཝཏྟཧིཏཱཡ པཊིཔནྣོ ནོ པརཧིཏཱཡ, ཨཏྟཧིཏཱཡ ཙེཝ པཊིཔནྣོ པརཧིཏཱཡ ཙ…པེ… ཨིམེ ཁོ བྷིཀྑཝེ…པེ… ལོཀསྨི’’ནྟི (ཨ. ནི. ༤.༩༦) –

ཨེཝམཱདིནཱ ¶ པུགྒལདེསནཱཔཊིསཉྙུཏྟསུཏྟནྟཔཱལི༹ཾ ནིདསྶེཏི. ཨདྷིཔྤཱཡནྟི ‘‘ཨཡཾ པུགྒལདེསནཱཝོཧཱརཝསེན, ན པརམཏྠཏོ’’ཏི ཨེཝཾ བྷགཝཏོ ཨདྷིཔྤཱཡཾ. ཝུཏྟཉྷི –

‘‘དུཝེ ¶ སཙྩཱནི ཨཀྑཱསི, སམྦུདྡྷོ ཝདཏཾ ཝརོ;

སམྨུཏིཾ པརམཏྠཉྩ, ཏཏིཡཾ ནཱུཔལབྦྷཏི.

སངྐེཏཝཙནཾ སཙྩཾ, ལོཀསམྨུཏིཀཱརཎཱ;

པརམཏྠཝཙནཾ སཙྩཾ, དྷམྨཱནཾ བྷཱུཏཀཱརཎཱ.

ཏསྨཱ ཝོཧཱརཀུསལསྶ, ལོཀནཱཐསྶ སཏྠུནོ;

སམྨུཏིཾ ཝོཧརནྟསྶ, མུསཱཝཱདོ ན ཛཱཡཏཱི’’ཏི. (མ. ནི. ཨཊྛ. ༡.༥༧; ཨ. ནི. ཨཊྛ. ༡.༡.༡༧༠; ཨིཏིཝུ. ཨཊྛ. ༢༤);

ན ཧི ལོཀསམྨུཏིཾ བུདྡྷཱ བྷགཝནྟོ ཝིཛཧནྟི, ལོཀསམཉྙཱཡ ལོཀནིརུཏྟིཡཱ ལོཀཱབྷིལཱཔེ ཋིཏཱཡེཝ དྷམྨཾ དེསེནྟི. ཨཔིཙ ‘‘ཧིརོཏྟཔྤདཱིཔནཏྠཾ, ཀམྨསྶཀཏཱདཱིཔནཏྠ’’ནྟི (མ. ནི. ཨཊྛ. ༡.༥༧; ཨ. ནི. ཨཊྛ. ༡.༡.༢༠༢; ཨིཏིཝུ. ཨཊྛ. ༢༤; ཀཐཱ. ཨནུཊཱི. ༡) ཨེཝམཱདཱིཧིཔི ཨཊྛཧི ཀཱརཎེཧི བྷགཝཱ པུགྒལཀཐཾ ཀཐེཏཱི’’ཏི ཨེཝཾ ཨདྷིཔྤཱཡམཛཱནནྟོ. ཨཡམཏྠོ ཨུཔརི ཨཱཝི བྷཝིསྶཏི. དུགྒཧིཏཾ གཎྷཱཏཱིཏི ‘‘ཏཐཱཧཾ བྷགཝཏཱ དྷམྨཾ དེསིཏཾ ཨཱཛཱནཱམི, ཡཐཱ ཏདེཝིདཾ ཝིཉྙཱཎཾ སནྡྷཱཝཏི སཾསརཏི ཨནཉྙ’’ནྟིཨཱདིནཱ (མ. ནི. ༡.༡༤༤) དུགྒཧིཏཾ ཀཏྭཱ གཎྷཱཏི, ཝིཔརཱིཏཾ གཎྷཱཏཱིཏི ཝུཏྟཾ ཧོཏི. དུགྒཧིཏནྟི ཧི བྷཱཝནཔུཾསཀནིདྡེསོ ཀིརིཡཱཡཝིསེསནབྷཱཝེན ནཔུཾསཀལིངྒེན ནིདྡིསིཏབྦཏྟཱ. ཨཡཉྷི བྷཱཝནཔུཾསཀཔདསྶ པཀཏི, ཡདིདཾ ནཔུཾསཀལིངྒེན ནིདྡིསིཏབྦཏྟཱ, བྷཱཝཔྤཊྛཱནཏཱ, སཀམྨཱཀམྨཀིརིཡཱནུཡོགཾ པཙྩཏྟོཔཡོགཝཙནཏཱ ཙ. ཏེན ཝུཏྟཾ ‘‘དུགྒཧིཏཾ ཀཏྭཱ’’ཏི. ཡནྟི དུགྒཧིཏགཱཧཾ. མཛ྄ཛྷིམནིཀཱཡེ མཱུལཔཎྞཱསཀེ མཧཱཏཎྷཱསངྑཡསུཏྟེ (མ. ནི. ༡.༡༤༤) ཏཐཱཝཱདཱིནཾ སཱདྷིནཱམཀཾ ཀེཝཊྚཔུཏྟཾ བྷིཀྑུཾ ཨཱརབྦྷ བྷགཝཏཱ ཝུཏྟཾ. ཨཏྟནཱ དུགྒཧིཏེན དྷམྨེནཱཏི པཱཋསེསོ, མིཙྪཱསབྷཱཝེནཱཏི ཨཏྠོ. ཨཐ ཝཱ དུགྒཧཎཾ དུགྒཧིཏཾ, ཨཏྟནཱཏི ཙ སཱམིཨཏྠེ ཀརཎཝཙནཾ, ཝིབྷཏྟིཡནྟཔཏིརཱུཔཀཾ ཝཱ ཨབྱཡཔདཾ, ཏསྨཱ ཨཏྟནོ དུགྒཧཎེན ཝིཔརཱིཏགཱཧེནཱཏི ཨཏྠོ. ཨབྦྷཱཙིཀྑཏཱིཏི ཨབྦྷཀྑཱནཾ ཀརོཏི. ཨཏྟནོ ཀུསལམཱུལཱནི ཁནནྟོ ཨཏྟཱནཾ ཁནཏི ནཱམ. ཏཏོཏི དུགྒཧིཏབྷཱཝཧེཏུཏོ.

དྷམྨཙིནྟནྟི ¶ དྷམྨསབྷཱཝཝིཙཱརཾ. ཨཏིདྷཱཝནྟོཏི ཋཱཏབྦམརིཡཱདཱཡཾ ཨཊྛཏྭཱ ‘‘ཙིཏྟུཔྤཱདམཏྟེནཔི དཱནཾ ཧོཏི, སཡམེཝ ཙིཏྟཾ ཨཏྟནོ ཨཱརམྨཎཾ ཧོཏི, སབྦམྤི ཙིཏྟཾ སབྷཱཝདྷམྨཱརམྨཎམེཝ ཧོཏཱི’’ཏི ཙ ཨེཝམཱདིནཱ ཨཏིཀྐམིཏྭཱ པཝཏྟཡམཱནོ. ཙིནྟེཏུམསཀྐུཎེཡྻཱནི ¶ , ཨནརཧརཱུཔཱནི ཝཱ ཨཙིནྟེཡྻཱནི ནཱམ, ཏཱནི དསྶེནྟོ ‘‘ཝུཏྟཉྷེཏ’’ནྟིཨཱདིམཱཧ. ཏཏྠ ཨཙིནྟེཡྻཱནཱིཏི ཏེསཾ སབྷཱཝདསྶནཾ. ན ཙིནྟེཏབྦཱནཱིཏི ཏཏྠ ཀཏྟབྦཀིཙྩདསྶནཾ. ‘‘ཡཱནཱི’’ཏིཨཱདི ཏསྶ ཧེཏུདསྶནཾ. ཡཱནི ཙིནྟེནྟོ ཨུམྨཱདསྶ ཙིཏྟཀྑེཔསྶ, ཝིགྷཱཏསྶ ཝིཧེསསྶ ཙ བྷཱགཱི ཨསྶ, ཨཙིནྟེཡྻཱནི ཨིམཱནི ཙཏྟཱརི ན ཙིནྟེཏབྦཱནི, ཨིམཱནི ཝཱ ཙཏྟཱརི ཨཙིནྟེཡྻཱནི ནཱམ ན ཙིནྟེཏབྦཱནི, ཡཱནི ཝཱ…པེ… ཨསྶ, ཏསྨཱ ན ཙིནྟེཏབྦཱནི ཨཙིནྟེཏབྦབྷཱུཏཱནི ཨིམཱནི ཙཏྟཱརི ཨཙིནྟེཡྻཱནི ནཱམཱཏི ཡོཛནཱ. ཨིཏི-སདྡེན པན –

‘‘ཀཏམཱནི ཙཏྟཱརི? བུདྡྷཱནཾ བྷིཀྑཝེ བུདྡྷཝིསཡོ ཨཙིནྟེཡྻོ ན ཙིནྟེཏབྦོ, ཡཾ ཙིནྟེནྟོ ཨུམྨཱདསྶ ཝིགྷཱཏསྶ བྷཱགཱི ཨསྶ. ཛྷཱཡིསྶ བྷིཀྑཝེ ཛྷཱནཝིསཡོ ཨཙིནྟེཡྻོ…པེ… ཀམྨཝིཔཱཀོ བྷིཀྑཝེ ཨཙིནྟེཡྻོ…པེ… ལོཀཙིནྟཱ བྷིཀྑཝེ ཨཙིནྟེཡྻཱ…པེ… ཨིམཱནི…པེ… ཨསྶཱ’’ཏི (ཨ. ནི. ༤.༧༧) –

ཙཏུརངྒུཏྟརེ ཝུཏྟཾ ཨཙིནྟེཡྻསུཏྟཾ ཨཱདིཾ ཀཏྭཱ སབྦཾ ཨཙིནྟེཡྻབྷཱཝདཱིཔཀཾ པཱལི༹ཾ སངྒཎྷཱཏི. ཀཱམཾ ཨཙིནྟེཡྻཱནི ཚ ཨསཱདྷཱརཎཉཱཎཱདཱིནི, ཏཱནི པན ཨནུསྶརནྟསྶ ཀུསལུཔྤཏྟིཧེཏུབྷཱཝཏོ ཙིནྟེཏབྦཱནི, ཨིམཱནི པན ཨེཝཾ ན ཧོནྟི ཨཕལབྷཱཝཏོ, ཏསྨཱ ན ཙིནྟེཏབྦཱནི. ‘‘དུསྶཱིལྱ…པེ… པབྷེད’’ནྟི ཨིམིནཱ ཝིཔཏྟིཾ སརཱུཔཏོ དསྶེཏི. ‘‘ཀཐཾ? པིཊཀཝསེནཱ’’ཏིཨཱདིཝཙནསམྦཛ྄ཛྷནེན པུབྦཱཔརསམྦནྡྷཾ དསྶེནྟོ ‘‘ཨེཝཾ ནཱནཔྤཀཱརཏོ’’ཏིཨཱདིམཱཧ. པུབྦཱཔརསམྦནྡྷཝིརཧིཏཉྷི ཝཙནཾ བྱཱཀུལཾ. སོཏཱུནཉྩ ཨཏྠཝིཉྙཱཔཀཾ ན ཧོཏི, པུབྦཱཔརཉྙཱུནམེཝ ཙ ཏཐཱཝིཙཱརིཏཝཙནཾ ཝིསཡོ. ཡཐཱཧ –

‘‘པུབྦཱཔརཉྙཱུ ཨཏྠཉྙཱུ, ནིརུཏྟིཔདཀོཝིདོ;

སུགྒཧཱིཏཉྩ གཎྷཱཏི, ཨཏྠཉྩོ’ པཔརིཀྑཏཱི’’ཏི. (ཐེརགཱ. ༡༠༣༡);

ཏེསནྟི པིཊཀཱནཾ. ཨེཏནྟི བུདྡྷཝཙནཾ.

སཱིལཀྑནྡྷཝགྒམཧཱཝགྒཔཱཐིཀཝགྒསངྑཱཏེཧི ¶ ཏཱིཧི ཝགྒེཧི སངྒཧོ ཨེཏེསནྟི ཏིཝགྒསངྒཧཱནི. གཱཐཱཡ པན ཡསྶ ནིཀཱཡསྶ སུཏྟགཎནཏོ ཙཏུཏྟིཾསེཝ སུཏྟནྟཱ. ཝགྒསངྒཧཝསེན ཏཡོ ཝགྒཱ ཨསྶ སངྒཧསྶཱཏི ཏིཝགྒོ སངྒཧོ. པཋམོ ཨེས ནིཀཱཡོ དཱིགྷནིཀཱཡོཏི ¶ ཨནུལོམིཀོ ཨཔཙྩནཱིཀོ, ཨཏྠཱནུལོམནཏོ ཨཏྠཱནུལོམནཱམིཀོ ཝཱ, ཨནྭཏྠནཱམོཏི ཨཏྠོ. ཏཏྠ ‘‘ཏིཝགྒོ སངྒཧོ’’ཏི ཨེཏཾ ‘‘ཡསྶཱ’’ཏི ཨནྟརིཀེཔི སམཱསོཡེཝ ཧོཏི, ན ཝཱཀྱནྟི དཊྛབྦཾ ‘‘ནཝཾ པན བྷིཀྑུནཱ ཙཱིཝརལཱབྷེནཱ’’ཏི (པཱཙི. ༣༦༨) ཨེཏྠ ‘‘ནཝཾཙཱིཝརལཱབྷེནཱ’’ཏི པདཾ ཝིཡ. ཏཐཱ ཧི ཨཊྛཀཐཱཙརིཡཱ ཝཎྞཡནྟི ‘‘ཨལབྦྷཱིཏི ལབྷོ, ལབྷོ ཨེཝ ལཱབྷོ. ཀིཾ ཨལབྦྷི? ཙཱིཝརཾ. ཀཱིདིསཾ? ནཝཾ, ཨིཏི ‘ནཝཙཱིཝརལཱབྷེནཱ’ཏི ཝཏྟབྦེ ཨནུནཱསིཀལོཔཾ ཨཀཏྭཱ ‘ནཝཾཙཱིཝརལཱབྷེནཱ’ཏི ཝུཏྟཾ, པཊིལདྡྷནཝཙཱིཝརེནཱཏི ཨཏྠོ. མཛ྄ཛྷེ ཋིཏཔདདྭཡེ པནཱཏི ནིཔཱཏོ. བྷིཀྑུནཱཏི ཡེན ལདྡྷཾ, ཏསྶ ནིདསྶན’’ནྟི (པཱཙི. ཨཊྛ. ༣༦༨). ཨིདྷཱཔི སདྡཏོ, ཨཏྠཏོ ཙ ཝཱཀྱེ ཡུཏྟིཡཱཨབྷཱཝཏོ སམཱསོཡེཝ སམྦྷཝཏི. ‘‘ཏིཝགྒོ’’ཏི པདཉྷི ‘‘སངྒཧོ’’ཏི ཨེཏྠ ཡདི ཀརཎཾ, ཨེཝཾ སཏི ཀརཎཝཙནནྟམེཝ སིཡཱ. ཡདི ཙ པདདྭཡམེཏཾ ཏུལྱཱདྷིཀརཎཾ, ཏཐཱ ཙ སཏི ནཔུཾསཀལིངྒམེཝ སིཡཱ ‘‘ཏིལོཀ’’ནྟིཨཱདིཔདཾ ཝིཡ. ཏཐཱ ‘‘ཏིཝགྒོ’’ཏི ཨེཏསྶ ‘‘སངྒཧོ’’ཏི པདམནྟརེན ཨཉྙཏྠཱསམྦནྡྷོ ན སམྦྷཝཏི, ཏཏྠ ཙ ཏཱདིསེན ཝཱཀྱེན སམྦཛ྄ཛྷནཾ ན ཡུཏྟཾ, ཏསྨཱ སམཱནེཔི པདནྟརནྟརིཀེ སདྡཏྠཱཝིརོདྷབྷཱཝོཡེཝ སམཱསཏཱཀཱརཎནྟི སམཱསོ ཨེཝ ཡུཏྟོ. ཏཡོ ཝགྒཱ ཨསྶ སངྒཧསྶཱཏི ཧི ཏིཝགྒོསངྒཧོ ཨཀཱརསྶ ཨོཀཱརཱདེསཾ, ཨོཀཱརཱགམཾ ཝཱ ཀཏྭཱ ཡཐཱ ‘‘སཏྟཱཧཔརིནིབྦུཏོ, ཨཙིརཔཀྐནྟོ, མཱསཛཱཏོ’’ཏིཨཱདི, ཨསྶ སངྒཧསྶཱཏི ཙ སངྒཧིཏསྶ ཨསྶ ནིཀཱཡསྶཱཏི ཨཏྠོ. ཨཔརེ པན ‘‘ཏཡོ ཝགྒཱ ཡསྶཱཏི ཀཏྭཱ ‘སངྒཧོ’ཏི པདེན ཏུལྱཱདྷིཀརཎམེཝ སམྦྷཝཏི, སངྒཧོཏི ཙ གཎནཱ. ཊཱིཀཱཙརིཡེཧི (སཱརཏྠ. ཊཱི. ༡.པཋམམཧཱསངྒཱིཏིཀཐཱཝཎྞནཱ) པན ‘ཏཡོ ཝགྒཱ ཨསྶ སངྒཧསྶཱ’ཏི པདདྭཡསྶ ཏུལྱཱདྷིཀརཎཏཱཡེཝ དསྶིཏཱ’’ཏི ཝདནྟི, ཏདཡུཏྟམེཝ སངྑྱཱསངྑྱེཡྻཱནཾ མིསྶཀཏྟཱ, ཨཔཱཀཊཏྟཱ ཙ.

ཨཏྠཱནུལོམིཀཏྟཾ ཝིབྷཱཝེཏུམཱཧ ‘‘ཀསྨཱ’’ཏིཨཱདི. གུཎོཔཙཱརེན, ཏདྡྷིཏཝསེན ཝཱ དཱིགྷ-སདྡེན དཱིགྷཔྤམཱཎཱནི སུཏྟཱནིཡེཝ གཧིཏཱནི ¶ , ནིཀཱཡསདྡོ ཙ རུལ༹ྷིཝསེན སམཱུཧནིཝཱསཏྠེསུ ཝཏྟཏཱིཏི དསྶེཏི ‘‘དཱིགྷཔྤམཱཎཱན’’ནྟིཨཱདིནཱ. སངྐེཏསིདྡྷཏྟཱ ཝཙནཱིཡཝཱཙཀཱནཾ པཡོགཏོ ཏདཏྠེསུ ཏསྶ སངྐེཏསིདྡྷཏཾ ཉཱཔེནྟོ ‘‘ནཱཧ’’ནྟིཨཱདིམཱཧ. ཨེཀནིཀཱཡམྤཱིཏི ཨེཀསམཱུཧམྤི. ཨེཝཾ ཙིཏྟནྟི ཨེཝཾ ཝིཙིཏྟཾ. ཡཐཡིདནྟི ཡཐཱ ཨིམེ ཏིརཙྪཱནགཏཱ པཱཎཱ. པོཎིཀཱ, ཙིཀྑལླིཀཱ ཙ ཁཏྟིཡཱ, ཏེསཾ ནིཝཱསོ ‘‘པོཎིཀནིཀཱཡོ ཙིཀྑལླིཀནིཀཱཡོ’’ཏི ཝུཙྩཏི. ཨེཏྠཱཏི ནིཀཱཡསདྡསྶ སམཱུཧནིཝཱསཱནཾ ཝཱཙཀབྷཱཝེ. སཱདྷཀཱནཱིཏི ཨདྷིཔྤེཏསྶཏྠསྶ སཱདྷནཏོ ཨུདཱཧརཎཱནི ཝུཙྩནྟི. ‘‘སམཱནཱིཏཱནཱི’’ཏི པཱཋསེསེན ཙེཏསྶ སམྦནྡྷོ, སཀྑཱིནི ཝཱ ཡཐཱཝུཏྟནཡེན སཱདྷཀཱནི. ཡཉྷི ནིདྡྷཱརེཏྭཱ ཨདྷིཔྤེཏཏྠཾ སཱདྷེནྟི ¶ , ཏཾ ‘‘སཀྑཱི’’ཏི ཝདནྟི. ཏཐཱ ཧི མནོརཐཔཱུརཎིཡཾ ཝུཏྟཾ ‘‘པཉྩགརུཛཱཏཀཾ (ཛཱ. ༡.༡.༡༣༢) པན སཀྑིབྷཱཝཏྠཱཡ ཨཱཧརིཏྭཱ ཀཐེཏབྦ’’ནྟི (ཨ. ནི. ཨཊྛ. ༡.༡.༥) སཱསནཏོཏི སཱསནཔཡོགཏོ, སཱསནེ ཝཱ. ལོཀཏོཏི ལོཀིཡཔཡོགཏོ, ལོཀེ ཝཱ. ཨིདཾ པན པིཊཀཏྟཡེ ན ཝིཛྫཏི, ཏསྨཱ ཨེཝཾ ཝུཏྟནྟི ཝདནྟི. ཨེཏྠ ཙ པཋམམུདཱཧརཎཾ སཱསནཏོ སཱདྷཀཝཙནཾ, དུཏིཡཾ ལོཀཏོཏི དཊྛབྦཾ.

མཱུལཔརིཡཱཡ ཝགྒཱདིཝསེན པཉྩདསཝགྒསངྒཧཱནི. ཨཌྜྷེན དུཏིཡཾ དིཡཌྜྷཾ, ཏདེཝ སཏཾ, ཨེཀསཏཾ, པཉྙཱས ཙ སུཏྟཱནཱིཏི ཝུཏྟཾ ཧོཏི. ཡཏྠཱཏི ཡསྨིཾ ནིཀཱཡེ. པཉྩདསཝགྒཔརིགྒཧོཏི པཉྩདསཧི ཝགྒེཧི པརིགྒཧིཏོ སངྒཧིཏོ.

སཾཡུཛྫནྟི ཨེཏྠཱཏི སཾཡུཏྟཾ, ཀེསཾ སཾཡུཏྟཾ? སུཏྟཝགྒཱནཾ. ཡཐཱ ཧི བྱཉྫནསམུདཱཡེ པདཾ, པདསམུདཱཡེ ཙ ཝཱཀྱཾ, ཝཱཀྱསམུདཱཡེ སུཏྟཾ, སུཏྟསམུདཱཡེ ཝགྒོཏི སམཉྙཱ, ཨེཝཾ ཝགྒསམུདཱཡེ སཾཡུཏྟསམཉྙཱ. དེཝཏཱཡ པུཙྪིཏེན ཀཐིཏསུཏྟཝགྒཱདཱིནཾ སཾཡུཏྟཏྟཱ དེཝཏཱསཾཡུཏྟཱདིབྷཱཝོ (སཾ. ནི. ༡.༡), ཏེནཱཧ ‘‘དེཝཏཱསཾཡུཏྟཱདིཝསེནཱ’’ཏིཨཱདི. ‘‘སུཏྟནྟཱནཾ སཧསྶཱནི སཏྟ སུཏྟསཏཱནི ཙཱ’’ཏི པཱཋེ སུཏྟནྟཱནཾ སཏྟ སཧསྶཱནི, སཏྟ སུཏྟསཏཱནི ཙཱཏི ཡོཛེཏབྦཾ. ‘‘སཏྟ སུཏྟསཧསྶཱནི, སཏྟ སུཏྟསཏཱནི ཙཱ’’ཏིཔི པཱཋོ. སཾཡུཏྟསངྒཧོཏི སཾཡུཏྟནིཀཱཡསྶ སངྒཧོ གཎནཱ.

ཨེཀེཀེཧི ¶ ཨངྒེཧི ཨུཔརཱུཔརི ཨུཏྟརོ ཨདྷིཀོ ཨེཏྠཱཏི ཨངྒུཏྟརོཏི ཨཱཧ ‘‘ཨེཀེཀཨངྒཱཏིརེཀཝསེནཱ’’ཏིཨཱདི. ཏཏྠ ཧི ཨེཀེཀཏོ པཊྛཱཡ ཡཱཝ ཨེཀཱདས ཨངྒཱནི ཀཐིཏཱནི. ཨངྒནྟི ཙ དྷམྨཀོཊྛཱསོ.

པུབྦེཏི སུཏྟནྟཔིཊཀནིདྡེསེ. ཝུཏྟམེཝ པཀཱརནྟརེན སངྑིཔིཏྭཱ ཨཝིསེསེཏྭཱ དསྶེཏུཾ ‘‘ཋཔེཏྭཱ’’ཏིཨཱདི ཝུཏྟཾ. ‘‘སཀལཾ ཝིནཡཔིཊཀ’’ནྟིཨཱདིནཱ ཝུཏྟམེཝ ཧི ཨིམིནཱ པཀཱརནྟརེན སངྑིཔིཏྭཱ དསྶེཏི. ཨཔིཙ ཡཐཱཝུཏྟཏོ ཨཝསིཊྛཾ ཡཾ ཀིཉྩི བྷགཝཏཱ དིནྣནཡེ ཋཏྭཱ དེསིཏཾ, བྷགཝཏཱ ཙ ཨནུམོདིཏཾ ནེཏྟིཔེཊཀོཔདེསཱདིཀཾ, ཏཾ སབྦམྤི ཨེཏྠེཝ པརིཡཱཔནྣནྟི ཨནཝསེསཔརིཡཱདཱནཝསེན དསྶེཏུཾ ཨེཝཾ ཝུཏྟནྟིཔི དཊྛབྦཾ. སིདྡྷེཔི ཧི སཏི ཨཱརམྦྷོ ཨཏྠནྟརཝིཉྙཱཔནཱཡ ཝཱ ཧོཏི, ནིཡམཱཡ ཝཱཏི. ཨེཏྠ ཙ ཡཐཱ ‘‘དཱིགྷཔྤམཱཎཱན’’ནྟིཨཱདི ཝུཏྟཾ, ཨེཝཾ ‘‘ཁུདྡཀཔྤམཱཎཱན’’ནྟིཨཱདིམཝཏྭཱ སརཱུཔསྶེཝ ཀཐནཾ ཝིནཡཱབྷིདྷམྨཱདཱིནཾ དཱིགྷཔྤམཱཎཱནམྤི ཏདནྟོགདྷཏཱཡཱཏི དཊྛབྦཾ, ཏེན ཙ ཝིཉྙཱཡཏི ‘‘ན སབྦཏྠ ཁུདྡཀཔརིཡཱཔནྣེསུ ¶ ཏསྶ ཨནྭཏྠསམཉྙཏཱ, དཱིགྷནིཀཱཡཱདིསབྷཱཝཝིཔརཱིཏབྷཱཝསཱམཉྙེན པན ཀཏྠཙི ཏབྦོཧཱརཏཱ’’ཏི. ཏདཉྙནྟི ཏེཧི ཙཏཱུཧི ནིཀཱཡེཧི ཨཉྙཾ, ཨཝསེསནྟི ཨཏྠོ.

ནཝཔྤབྷེདནྟི ཨེཏྠ ཀཐཾ པནེཏཾ ནཝཔྤབྷེདཾ ཧོཏི. ཏཐཱ ཧི ནཝཧི ཨངྒེཧི ཝཝཏྠིཏེཧི ཨཉྙམཉྙསངྐརརཧིཏེཧི བྷཝིཏབྦཾ, ཏཐཱ ཙ སཏི ཨསུཏྟསབྷཱཝཱནེཝ གེཡྻངྒཱདཱིནི སིཡུཾ, ཨཐ སུཏྟསབྷཱཝཱནེཝ གེཡྻངྒཱདཱིནི, ཨེཝཾ སཏི སུཏྟནྟི ཝིསུཾ སུཏྟངྒམེཝ ན སིཡཱ, ཨེཝཾ སནྟེ ཨཊྛངྒཾ སཱསནནྟི ཨཱཔཛྫཏི. ཨཔིཙ ‘‘སགཱཐཀཾ སུཏྟཾ གེཡྻཾ, ནིགྒཱཐཀཾ སུཏྟཾ ཝེཡྻཱཀརཎ’’ནྟི (དཱི. ནི. ཨཊྛ., པཱརཱ. ཨཊྛ. པཋམམཧཱསངྒཱིཏིཀཐཱ) ཨཊྛཀཐཱཡཾ ཝུཏྟཾ. སུཏྟཉྩ ནཱམ སགཱཐཀཾ ཝཱ སིཡཱ, ནིགྒཱཐཀཾ ཝཱ, ཏསྨཱ ཨངྒདྭཡེནེཝ ཏདུབྷཡཾ སངྒཧིཏནྟི ཏདུབྷཡཝིནིམུཏྟཾ སུཏྟཾ ཨུདཱནཱདིཝིསེསསཉྙཱརཧིཏཾ ནཏྠི, ཡཾ སུཏྟངྒཾ སིཡཱ, ཨཐཱཔི ཀཐཉྩི ཝིསུཾ སུཏྟངྒཾ སིཡཱ, མངྒལསུཏྟཱདཱིནཾ (ཁུ. པཱ. ༡; སུ. ནི. ༢༦༡) སུཏྟངྒསངྒཧོ ན སིཡཱ གཱཐཱབྷཱཝཏོ དྷམྨཔདཱདཱིནཾ ཝིཡ. གེཡྻངྒསངྒཧོ ཝཱ སིཡཱ སགཱཐཀཏྟཱ སགཱཐཱཝགྒསྶ ཝིཡ. ཏཐཱ ཨུབྷཏོཝིབྷངྒཱདཱིསུ སགཱཐཀཔྤདེསཱནནྟི? ཝུཙྩཏེ –

སུཏྟནྟི ¶ སཱམཉྙཝིདྷི, ཝིསེསཝིདྷཡོ པརེ;

སནིམིཏྟཱ ནིརུལ༹ྷཏྟཱ, སཧཏཱཉྙེན ནཱཉྙཏོ. (དཱི. ནི. ཊཱི. ༡.པཋམམཧཱསངྒཱིཏིཀཐཱ);

ཡཐཱཝུཏྟསྶ དོསསྶ, ནཏྠི ཨེཏྠཱཝགཱཧཎཾ;

ཏསྨཱ ཨསངྐརཾཡེཝ, ནཝངྒཾ སཏྠུསཱསནཾ. (སཱརཏྠ. ཊཱི. ༡.པཋམམཧཱསངྒཱིཏིཀཐཱ);

སབྦསྶཱཔི ཧི བུདྡྷཝཙནསྶ སུཏྟནྟི ཨཡཾ སཱམཉྙཝིདྷི. ཏཐཱ ཧི ‘‘ཨེཏྟཀཾ ཏསྶ བྷགཝཏོ སུཏྟཱགཏཾ སུཏྟཔརིཡཱཔནྣཾ, (པཱཙི. ཨཊྛ. ༦༥༥, ༡༢༤༢) སཱཝཏྠིཡཱ སུཏྟཝིབྷངྒེ, (ཙཱུལ༹ཝ. ༤༥༦) སཀཝཱདེ པཉྩ སུཏྟསཏཱནཱི’’ཏིཨཱདི (དྷ. ས. ཨཊྛ. ནིདཱནཀཐཱ) ཝཙནཏོ ཝིནཡཱབྷིདྷམྨཔརིཡཏྟི ཝིསེསེསུཔི སུཏྟཝོཧཱརོ དིསྶཏི. ཏེནེཝ ཙ ཨཱཡསྨཱ མཧཱཀཙྩཱཡནོ ནེཏྟིཡཾ ཨཱཧ ‘‘ནཝཝིདྷསུཏྟནྟཔརིཡེཊྛཱི’’ཏི (ནེཏྟི. སངྒཧཝཱརཝཎྞནཱ) ཏཏྠ ཧི སུཏྟཱདིཝསེན ནཝངྒསྶ སཱསནསྶ པརིཡེཊྛི པརིཡེསནཱ ཨཏྠཝིཙཱརཎཱ ‘‘ནཝཝིདྷ སུཏྟནྟཔརིཡེཊྛཱི’’ཏི ཝུཏྟཱ. ཏདེཀདེསེསུ པན པརེ གེཡྻཱདཡོ སནིམིཏྟཱ ཝིསེསཝིདྷཡོ ཏེན ཏེན ནིམིཏྟེན པཏིཊྛིཏཱ. ཏཐཱ ཧི གེཡྻསྶ སགཱཐཀཏྟཾ ཏབྦྷཱཝནིམིཏྟཾ. ལོཀེཔི ཧི སསིལོཀཾ སགཱཐཀཾ ཙུཎྞིཡགནྠཾ ‘‘གེཡྻ’’ནྟི ¶ ཝདནྟི, གཱཐཱཝིརཧེ པན སཏི པུཙྪཾ ཀཏྭཱ ཝིསྶཛྫནབྷཱཝོ ཝེཡྻཱཀརཎསྶ ཏབྦྷཱཝནིམིཏྟཾ. པུཙྪཱཝིསྶཛྫནཉྷི ‘‘བྱཱཀརཎ’’ནྟི ཝུཙྩཏི, བྱཱཀརཎམེཝ ཝེཡྻཱཀརཎཾ. ཨེཝཾ སནྟེ སགཱཐཀཱདཱིནམྤི པུཙྪཾ ཀཏྭཱ ཝིསྶཛྫནཝསེན པཝཏྟཱནཾ ཝེཡྻཱཀརཎབྷཱཝོ ཨཱཔཛྫཏཱིཏི? ནཱཔཛྫཏི གེཡྻཱདིསཉྙཱནཾ ཨནོཀཱསབྷཱཝཏོ. སཨོཀཱསཝིདྷིཏོ ཧི ཨནོཀཱསཝིདྷི བལཝཱ. ཨཔིཙ ‘‘གཱཐཱཝིརཧེ སཏཱི’’ཏི ཝིསེསིཏཏྟཱ. ཡཐཱདྷིཔྤེཏསྶ ཧི ཨཏྠསྶ ཨནདྷིཔྤེཏཏོ བྱཝཙྪེདཀཾ ཝིསེསནཾ. ཏཐཱ ཧི དྷམྨཔདཱདཱིསུ ཀེཝལགཱཐཱབནྡྷེསུ, སགཱཐཀཏྟེཔི སོམནསྶཉཱཎམཡིཀགཱཐཱཔཊིསཉྙུཏྟེསུ, ‘‘ཝུཏྟཾ ཧེཏ’’ནྟིཨཱདིཝཙན སམྦནྡྷེསུ, ཨབྦྷུཏདྷམྨཔཊིསཾཡུཏྟེསུ ཙ སུཏྟཝིསེསེསུ ཡཐཱཀྐམཾ གཱཐཱཨུདཱནཨིཏིཝུཏྟཀ ཨབྦྷུཏདྷམྨསཉྙཱ པཏིཊྛིཏཱ. ཨེཏྠ ཧི སཏིཔི སཉྙཱནྟརནིམིཏྟཡོགེ ཨནོཀཱསསཉྙཱནཾ བལཝབྷཱཝེནེཝ གཱཐཱདིསཉྙཱ པཏིཊྛིཏཱ, ཏཐཱ སཏིཔི གཱཐཱབནྡྷབྷཱཝེ བྷགཝཏོ ཨཏཱིཏཱསུ ཛཱཏཱིསུ ཙརིཡཱནུབྷཱཝཔྤཀཱསཀེསུ ཛཱཏཀསཉྙཱ པཏིཊྛིཏཱ, སཏིཔི པཉྷཱཝིསྶཛྫནབྷཱཝེ ¶ , སགཱཐཀཏྟེ ཙ ཀེསུཙི སུཏྟནྟེསུ ཝེདསྶ ལབྷཱཔནཏོ ཝེདལླསཉྙཱ པཏིཊྛིཏཱ, ཨེཝཾ ཏེན ཏེན སགཱཐཀཏྟཱདིནཱ ནིམིཏྟེན ཏེསུ ཏེསུ སུཏྟཝིསེསེསུ གེཡྻཱདིསཉྙཱ པཏིཊྛིཏཱཏི ཝིསེསཝིདྷཡོ སུཏྟངྒཏོ པརེ གེཡྻཱདཡོ, ཡཾ པནེཏྠ གེཡྻངྒཱདིནིམིཏྟརཧིཏཾ, ཏཾ སུཏྟངྒམེཝ ཝིསེསསཉྙཱཔརིཧཱརེན སཱམཉྙསཉྙཱཡ པཝཏྟནཏོ. ནནུ ཙ ཨེཝཾ སནྟེཔི སགཱཐཀཾ སུཏྟཾ གེཡྻཾ, ནིགྒཱཐཀཾ སུཏྟཾ ཝེཡྻཱཀརཎནྟི ཏདུབྷཡཝིནིམུཏྟསྶ སུཏྟསྶ ཨབྷཱཝཏོ ཝིསུཾ སུཏྟངྒམེཝ ན སིཡཱཏི ཙོདནཱ ཏདཝཏྠཱ ཨེཝཱཏི? ན ཏདཝཏྠཱ སོདྷིཏཏྟཱ. སོདྷིཏཉྷི པུབྦེ གཱཐཱཝིརཧེ སཏི པུཙྪཱཝིསྶཛྫནབྷཱཝོ ཝེཡྻཱཀརཎསྶ ཏབྦྷཱཝནིམིཏྟནྟི.

ཡཉྩ ཝུཏྟཾ ‘‘གཱཐཱབྷཱཝཏོ མངྒལསུཏྟཱདཱིནཾ (ཁུ. པཱ. ༡; སུ. ནི. ༢༦༡) སུཏྟངྒསངྒཧོ ན སིཡཱ’’ཏི, ཏམྤི ན, ནིརུལ༹ྷཏྟཱ. ནིརུལ༹ྷོ ཧི མངྒལསུཏྟཱདཱིནཾ སུཏྟབྷཱཝོ. ན ཧི ཏཱནི དྷམྨཔདབུདྡྷཝཾསཱདཡོ ཝིཡ གཱཐཱབྷཱཝེན སཉྙིཏཱནི, ཨཐ ཁོ སུཏྟབྷཱཝེནེཝ. ཏེནེཝ ཧི ཨཀཐཱཡཾ ‘‘སུཏྟནཱམཀ’’ནྟི ནཱམགྒཧཎཾ ཀཏཾ. ཡཉྩ པན ཝུཏྟཾ ‘‘སགཱཐཀཏྟཱ གེཡྻངྒསངྒཧོ ཝཱ སིཡཱ’’ཏི, ཏམྤི ནཏྠི. ཀསྨཱཏི ཙེ? ཡསྨཱ སཧཏཱཉྙེན, ཏསྨཱ. སཧབྷཱཝོ ཧི ནཱམ ཨཏྟཏོ ཨཉྙེན ཧོཏི. སཧ གཱཐཱཧཱིཏི ཙ སགཱཐཀཾ, ན ཙ མངྒལསུཏྟཱདཱིསུ གཱཐཱཝིནིམུཏྟོ ཀོཙི སུཏྟཔདེསོ ཨཏྠི, ཡོ ‘‘སཧ གཱཐཱཧཱི’’ཏི ཝུཙྩེཡྻ, ནནུ ཙ གཱཐཱསམུདཱཡོ ཏདེཀདེསཱཧི གཱཐཱཧི ཨཉྙོ ཧོཏི, ཡསྶ ཝསེན ‘‘སཧ གཱཐཱཧཱི’’ཏི སཀྐཱ ཝཏྟུནྟི? ཏཾ ན. ན ཧི ཨཝཡཝཝིནིམུཏྟོ སམུདཱཡོ ནཱམ ཀོཙི ཨཏྠི, ཡོ ཏདེཀདེསེཧི སཧ བྷཝེཡྻ. ཀཏྠཙི པན ‘‘དཱིགྷསུཏྟངྐིཏསྶཱ’’ཏིཨཱདཱིསུ སམུདཱཡེཀདེསཱནཾ ཝིབྷཱགཝཙནཾ ཝོཧཱརམཏྟཾ པཏི པརིཡཱཡཝཙནམེཝ, ཨཡཉྩ ནིཔྤརིཡཱཡེན པབྷེདཝིབྷཱགདསྶནཀཐཱཏི ¶ . ཡམྤི ཝུཏྟཾ ‘‘ཨུབྷཏོཝིབྷངྒཱདཱིསུ སགཱཐཀཔྤདེསཱནཾ གེཡྻངྒསངྒཧོ སིཡཱ’’ཏི, ཏམྤི ན, ཨཉྙཏོ. ཨཉྙཱཡེཝ ཧི ཏཱ གཱཐཱ ཛཱཏཀཱདིཔརིཡཱཔནྣཏྟཱ. ཏཱདིསཱཡེཝ ཧི ཀཱརཎཱནུརཱུཔེན ཏཏྠ དེསིཏཱ, ཨཏོ ན ཏཱཧི ཨུབྷཏོཝིབྷངྒཱདཱིནཾ གེཡྻངྒབྷཱཝོཏི. ཨེཝཾ སུཏྟཱདིནཝངྒཱནཾ ཨཉྙམཉྙསངྐརཱབྷཱཝོ ཝེདིཏབྦོཏི.

ཨིདཱནི ¶ ཨེཏཱནི ནཝངྒཱནི ཝིབྷཛིཏྭཱ དསྶེནྟོ ‘‘ཏཏྠཱ’’ཏིཨཱདིམཱཧ. ནིདྡེསོ ནཱམ སུཏྟནིཔཱཏེ –

‘‘ཀཱམཾ ཀཱམཡམཱནསྶ, ཏསྶ ཙེ ཏཾ སམིཛ྄ཛྷཏི;

ཨདྡྷཱ པཱིཏིམནོ ཧོཏི, ལདྡྷཱ མཙྩོ ཡདིཙྪཏཱི’’ཏིཨཱདིནཱ. (སུ. ནི. ༧༧༢); –

ཨཱགཏསྶ ཨཊྛཀཝགྒསྶ;

‘‘ཀེནསྶུ ནིཝུཏོ ལོཀོ, (ཨིཙྩཱཡསྨཱ ཨཛིཏོ);

ཀེནསྶུ ན པཀཱསཏི;

ཀིསྶཱབྷིལེཔནཾ བྲཱུསི,

ཀིཾསུ ཏསྶ མཧབྦྷཡ’’ནྟིཨཱདིནཱ. (སུ. ནི. ༡༠༣༨); –

ཨཱགཏསྶ པཱརཱཡནཝགྒསྶ;

‘‘སབྦེསུ བྷཱུཏེསུ ནིདྷཱཡ དཎྜཾ,

ཨཝིཧེཋཡཾ ཨཉྙཏརམྤི ཏེསཾ;

ན པུཏྟམིཙྪེཡྻ ཀུཏོ སཧཱཡཾ,

ཨེཀོ ཙརེ ཁགྒཝིསཱཎཀཔྤོ’’ཏིཨཱདིནཱ. (སུ. ནི. ༣༥); –

ཨཱགཏསྶ ཁགྒཝིསཱཎསུཏྟསྶ ཙ ཨཏྠཝིབྷཱགཝསེན སཏྠུཀཔྤེན ཨཱཡསྨཏཱ དྷམྨསེནཱཔཏིསཱརིཔུཏྟཏྠེརེན ཀཏོ ནིདྡེསོ, ཡོ ‘‘མཧཱནིདྡེསོ, ཙཱུལ༹ནིདྡེསོ’’ཏི ཝུཙྩཏི. ཨེཝམིདྷ ནིདྡེསསྶ སུཏྟངྒསངྒཧོ བྷདནྟབུདྡྷདྷོསཱཙརིཡེན དསྶིཏོ, ཏཐཱ ཨཉྙཏྠཱཔི ཝིནཡཊྛཀཐཱདཱིསུ ¶ , ཨཱཙརིཡདྷམྨཔཱལཏྠེརེནཱཔི ནེཏྟིཔྤཀརཎཊྛཀཐཱཡཾ. ཨཔརེ པན ནིདྡེསསྶ གཱཐཱཝེཡྻཱཀརཎངྒེསུ དྭཱིསུ སངྒཧཾ ཝདནྟི. ཝུཏྟཉྷེཏཾ ནིདྡེསཊྛཀཐཱཡཾ ཨུཔསེནཏྠེརེན –

‘‘སོ པནེས ཝིནཡཔིཊཀཾ…པེ… ཨབྷིདྷམྨཔིཊཀནྟི ཏཱིསུ པིཊཀེསུ སུཏྟནྟཔིཊཀཔརིཡཱཔནྣོ, དཱིགྷནིཀཱཡོ…པེ… ཁུདྡཀནིཀཱཡོཏི པཉྩསུ ནིཀཱཡེསུ ཁུདྡཀམཧཱནིཀཱཡཔརིཡཱཔནྣོ, སུཏྟཾ…པེ… ཝེདལླནྟི ནཝསུ སཏྠུསཱསནངྒེསུ ཡཐཱསམྦྷཝཾ གཱཐངྒཝེཡྻཱཀརཎངྒདྭཡསངྒཧིཏོ’’ཏི (མཧཱནི. ཨཊྛ. གནྠཱརམྦྷཀཐཱ).

ཨེཏྠ ¶ ཏཱཝ ཀཏྠཙི པུཙྪཱཝིསྶཛྫནསབྦྷཱཝཏོ ནིདྡེསེཀདེསསྶ ཝེཡྻཱཀརཎངྒསངྒཧོ ཡུཛྫཏུ, ཨགཱཐཱབྷཱཝཏོ གཱཐངྒསངྒཧོ ཀཐཾ ཡུཛྫེཡྻཱཏི ཝཱིམཾསིཏབྦམེཏཾ. དྷམྨཱཔདཱདཱིནཾ ཝིཡ ཧི ཀེཝལཾ གཱཐཱབནྡྷབྷཱཝོ གཱཐངྒསྶ ཏབྦྷཱཝནིམིཏྟཾ. དྷམྨཔདཱདཱིསུ ཧི ཀེཝལཾ གཱཐཱབནྡྷེསུ གཱཐཱསམཉྙཱ པཏིཊྛིཏཱ, ནིདྡེསེ ཙ ན ཀོཙི ཀེཝལོ གཱཐཱབནྡཔྤདེསོ ཨུཔལབྦྷཏི. སམྨཱསམྦུདྡྷེན བྷཱསིཏཱནཾཡེཝ ཧི ཨཊྛཀཝགྒཱདིསངྒཧིཏཱནཾ གཱཐཱནཾ ནིདྡེསམཏྟཾ དྷམྨསེནཱཔཏིནཱ ཀཏཾ. ཨཏྠཝིབྷཛནཏྠཾ ཨཱནཱིཏཱཔི ཧི ཏཱ ཨཊྛཀཝགྒཱདིསངྒཧིཏཱ ནིདྡིསིཏབྦཱ མཱུལགཱཐཱཡོ སུཏྟནིཔཱཏཔརིཡཱཔནྣཏྟཱ ཨཉྙཱཡེཝཱཏི ན ནིདྡེསསངྑྱཾ གཙྪནྟི ཨུབྷཏོཝིབྷངྒཱདཱིསུ ཨཱགཏཱཔི ཏཾ ཝོཧཱརམལབྷམཱནཱ ཛཱཏཀཱདིཔརིཡཱཔནྣཱ གཱཐཱཡོ ཝིཡ, ཏསྨཱ ཀཱརཎནྟརམེཏྠ གཝེསིཏབྦཾ, ཡུཏྟཏརཾ ཝཱ གཧེཏབྦཾ.

ནཱལཀསུཏྟཾ ནཱམ དྷམྨཙཀྐཔྤཝཏྟིཏ དིཝསཏོ སཏྟམེ དིཝསེ ནཱལཀཏྠེརསྶ ‘‘མོནེཡྻཾ ཏེ ཨུཔཉྙིསྶ’’ནྟིཨཱདིནཱ (སུ. ནི. ༧༠༦) བྷགཝཏཱ བྷཱསིཏཾ མོནེཡྻ པཊིཔདཱཔརིདཱིཔཀཾ སུཏྟཾ. ཏུཝཊྚཀསུཏྟཾ ནཱམ མཧཱསམཡསུཏྟནྟདེསནཱཡ སནྣིཔཏིཏེསུ དེཝེསུ ‘‘ཀཱ ནུ ཁོ ཨརཧཏྟཔྤཏྟིཡཱ པཊིཔཏྟཱི’’ཏི ཨུཔྤནྣཙིཏྟཱནཾ ཨེཀཙྩཱནཾ དེཝཏཱནཾ ཏམཏྠཾ པཀཱསེཏུཾ ནིམྨིཏབུདྡྷེན ཨཏྟཱནཾ པུཙྪཱཔེཏྭཱ ‘‘མཱུལཾ པཔཉྩསངྑཱཡཱ’’ཏིཨཱདིནཱ (སུ. ནི. ༩༢༢) བྷགཝཏཱ བྷཱསིཏཾ སུཏྟཾ. ཨེཝམིདྷ སུཏྟནིཔཱཏེ ཨཱགཏཱནཾ མངྒལསུཏྟཱདཱིནཾ སུཏྟངྒསངྒཧོ དསྶིཏོ, ཏཏྠེཝ ཨཱགཏཱནཾ ཨསུཏྟནཱམིཀཱནཾ སུདྡྷིཀགཱཐཱནཾ གཱཐངྒསངྒཧཉྩ དསྶཡིསྶཏི, ཨེཝཾ སཏི སུཏྟནིཔཱཏཊྛཀཐཱརམྦྷེ –

‘‘གཱཐཱསཏསམཱཀིཎྞོ, གེཡྻབྱཱཀརཎངྐིཏོ;

ཀསྨཱ སུཏྟནིཔཱཏོཏི, སངྑམེས གཏོཏི ཙེ’’ཏི. (སུ. ནི. ཨཊྛ. ༡.གནྠཱརམྦྷཀཐཱ); –

སཀལསྶཱཔི ¶ སུཏྟནིཔཱཏསྶ གེཡྻཝེཡྻཱཀརཎངྒསངྒཧོ ཀསྨཱ ཙོདིཏོཏི? ནཱཡཾ ཝིརོདྷོ. ཀེཝལཉྷི ཏཏྠ ཙོདཀེན སགཱཐཀཏྟཾ, ཀཏྠཙི པུཙྪཱཝིསྶཛྫནཏྟཉྩ གཧེཏྭཱ ཙོདནཱམཏྟཾ ཀཏཾ, ཨཉྙཐཱ སུཏྟནིཔཱཏེ ནིགྒཱཐཀསྶ སུཏྟསྶེཝ ཨབྷཱཝཏོ ཝེཡྻཱཀརཎངྒསངྒཧོ ན ཙོདེཏབྦོ སིཡཱ, ཏསྨཱ ཙོདཀསྶ ཝཙནམེཏཾ ཨཔྤམཱཎནྟི ཨིདྷ, ཨཉྙཱསུ ཙ ཝིནཡཊྛཀཐཱདཱིསུ ཝུཏྟནཡེནེཝ ཏསྶ ¶ སུཏྟངྒགཱཐངྒསངྒཧོ དསྶིཏོཏི. སུཏྟནྟི ཙུཎྞིཡསུཏྟཾ. ཝིསེསེནཱཏི རཱསིབྷཱཝེན ཋིཏཾ སནྡྷཱཡཱཧ. སགཱཐཱཝགྒོ གེཡྻནྟི སམྦནྡྷོ.

‘‘ཨཊྛཧི ཨངྒེཧི ཨསངྒཧིཏཾ ནཱམ པཊིསམྦྷིདཱདཱི’’ཏི ཏཱིསུཔི ཀིར གཎྛིཔདེསུ ཝུཏྟཾ. ཨཔརེ པན པཊིསམྦྷིདཱམགྒསྶ གེཡྻཝེཡྻཱཀརཎངྒདྭཡསངྒཧཾ ཝདནྟི. ཝུཏྟཉྷེཏཾ ཏདཊྛཀཐཱཡཾ ‘‘ནཝསུ སཏྠུསཱསནངྒེསུ ཡཐཱསམྦྷཝཾ གེཡྻཝེཡྻཱཀརཎངྒདྭཡསངྒཧིཏ’’ནྟི (པཊི. མ. ཨཊྛ. ༡.གནྠཱརམྦྷཀཐཱ), ཨེཏྠཱཔི གེཡྻངྒསངྒཧིཏབྷཱཝོ ཝུཏྟནཡེན ཝཱིམཾསིཏབྦོ. ནོ སུཏྟནཱམིཀཱཏི ཨསུཏྟནཱམིཀཱ སངྒཱིཏིཀཱལེ སུཏྟསམཉྙཱཡ ཨཔཉྙཱཏཱ. ‘‘སུདྡྷིཀགཱཐཱ ནཱམ ཝཏྠུགཱཐཱ’’ཏི ཏཱིསུཔི ཀིར གཎྛིཔདེསུ ཝུཏྟཾ, ཝཏྠུགཱཐཱཏི ཙ པཱརཱཡནཝགྒསྶ ནིདཱནམཱརོཔེནྟེན ཨཱཡསྨཏཱ ཨཱནནྡཏྠེརེན སངྒཱིཏིཀཱལེ ཝུཏྟཱ ཚཔྤཉྙཱས གཱཐཱཡོ, ནཱལཀསུཏྟསྶ ནིདཱནམཱརོཔེནྟེན ཏེནེཝ ཏདཱ ཝུཏྟཱ ཝཱིསཏིམཏྟཱ གཱཐཱཡོ ཙ ཝུཙྩནྟི. སུཏྟནིཔཱཏཊྛཀཐཱཡཾ (སུ. ནི. ཨཊྛ. ༢.༦༨༥) པན ‘‘པརིནིབྦུཏེ བྷགཝཏི སངྒཱིཏིཾ ཀརོནྟེནཱཡསྨཏཱ མཧཱཀསྶཔེན ཏམེཝ མོནེཡྻཔཊིཔདཾ པུཊྛོ ཨཱཡསྨཱ ཨཱནནྡོ ཡེན, ཡདཱ ཙ སམཱདཔིཏོ ནཱལཀཏྠེརོ བྷགཝནྟཾ པུཙྪི, ཏཾ སབྦཾ པཱཀཊཾ ཀཏྭཱ དསྶེཏུཀཱམོ ‘ཨཱནནྡཛཱཏེ’ཏིཨཱདིཀཱ (སུ. ནི. ༦༨༤) ཝཱིསཏི ཝཏྠུགཱཐཱཡོ ཝཏྭཱ ཝིསྶཛྫེསི, ཏཾ སབྦམྤི ‘ནཱལཀསུཏྟ’’ནྟི ཝུཙྩཏཱི’’ཏི ཨཱགཏཏྟཱ ནཱལཀསུཏྟསྶ ཝཏྠུགཱཐཱཡོ ནཱལཀསུཏྟགྒཧཎེནེཝ གཧིཏཱཏི པཱརཱཡནཝགྒསྶ ཝཏྠུགཱཐཱཡོ ཨིདྷ སུདྡྷིཀགཱཐཱཏི གཧེཏབྦཾ. ཏཏྠེཝ ཙ པཱརཱཡནཝགྒེ ཨཛིཏམཱཎཝཀཱདཱིནཾ སོལ༹སནྣཾ བྲཱཧྨཎཱནཾ པུཙྪཱགཱཐཱ, བྷགཝཏོ ཝིསྶཛྫནགཱཐཱ ཙ པཱལི༹ཡཾ སུཏྟནཱམེན ཨཝཏྭཱ ‘ཨཛིཏམཱཎཝཀཔུཙྪཱ, ཏིསྶམེཏྟེཡྻམཱཎཝཀཔུཙྪཱ’’ཏིཨཱདིནཱ (སུ. ནི. ༡༠༣༨) ཨཱགཏཏྟཱ, ཙུཎྞིཡགནྠེ ཧི ཨསམྨིསྶཏྟཱ ཙ ‘‘ནོ སུཏྟནཱམིཀཱ སུདྡྷིཀགཱཐཱ ནཱམཱ’’ཏི ཝཏྟུཾ ཝཊྚཏི.

‘‘སོམནསྶཉཱཎམཡིཀགཱཐཱཔཊིསཾཡུཏྟཱ’’ཏི ཨེཏེན ཨུདཱནཊྛེན ཨུདཱནནྟི ཨནྭཏྠསཉྙཏཾ དསྶེཏི (ཨུདཱ. ཨཊྛ. གནྠཱརམྦྷཀཐཱ) ཀིམིདཾ ཨུདཱནཾ ནཱམ? པཱིཏིཝེགསམུཊྛཱཔིཏོ ཨུདཱཧཱརོ. ཡཐཱ ཧི ཡཾ ཏེལཱདི མིནིཏབྦཝཏྠུ མཱནཾ གཧེཏུཾ ན སཀྐོཏི, ཝིསྶནྡིཏྭཱ གཙྪཏི, ཏཾ ‘‘ཨཝསེསཀོ’’ཏི ཝུཙྩཏི. ཡཉྩ ¶ ཛལཾ ཏལཱ༹ཀཾ གཧེཏུཾ ན སཀྐོཏི, ཨཛ྄ཛྷོཏྠརིཏྭཱ གཙྪཏི, ཏཾ ‘‘མཧོགྷོ’ཏི ཝུཙྩཏི, ཨེཝམེཝ ཡཾ པཱིཏིཝེགསམུཊྛཱཔིཏཾ ཝིཏཀྐཝིཔྥཱརཾ ཨནྟོཧདཡཾ སནྡྷཱརེཏུཾ ¶ ན སཀྐོཏི, སོ ཨདྷིཀོ ཧུཏྭཱ ཨནྟོ ཨསཎྛཧིཏྭཱ བཧི ཝཙཱིདྭཱརེན ནིཀྑནྟོ པཊིགྒཱཧཀནིརཔེཀྑོ ཨུདཱཧཱརཝིསེསོ ‘‘ཨུདཱན’’ནྟི ཝུཙྩཏི (ཨུདཱ. ཨཊྛ. གནྠཱརམྦྷཀཐཱ) ‘‘ཨུད མོདེ ཀཱིལཱ༹ཡཉྩཱ’’ཏི ཧི ཨཀྑརཙིནྟཀཱ ཝདནྟི, ཨིདཉྩ ཡེབྷུཡྻེན ཝུཏྟཾ དྷམྨསཾཝེགཝསེན ཨུདིཏསྶཱཔི ‘‘སཙེ བྷཱཡཐ དུཀྑསྶཱ’’ཏིཨཱདིཨུདཱནསྶ (ཨུདཱ. ༤༤) ཨུདཱནཔཱལི༹ཡཾ ཨཱགཏཏྟཱ, ཏཐཱ‘‘གཱཐཱཔཊིསཾཡུཏྟཱ’’ཏི ཨིདམྤི ཡེབྷུཡྻེནེཝ ‘‘ཨཏྠི བྷིཀྑཝེ, ཏདཱཡཏནཾ, ཡཏྠ ནེཝ པཐཝཱི, ན ཨཱཔོ’’ཏིཨཱདིཀསྶ (ཨུདཱ. ༧༡) ཙུཎྞིཡཝཱཀྱཝསེན ཨུདིཏསྶཱཔི ཏཏྠ ཨཱགཏཏྟཱ. ནནུ ཙ ཨུདཱནཾ ནཱམ པཱིཏིསོམནསྶསམུཊྚཱཔིཏོ, དྷམྨསཾཝེགསམུཊྛཱཔིཏོ ཝཱ དྷམྨཔཊིགྒཱཧཀནིརཔེཀྑོ གཱཐཱབནྡྷཝསེན, ཙུཎྞིཡཝཱཀྱཝསེན ཙ པཝཏྟོ ཨུདཱཧཱརོ, ཏཐཱ ཙེཝ སབྦཏྠ ཨཱགཏཾ, ཨིདྷ ཀསྨཱ ‘‘བྷིཀྑཝེ’’ཏི ཨཱམནྟནཾ ཝུཏྟནྟི? ཏེསཾ བྷིཀྑཱུནཾ སཉྙཱཔནཏྠཾ ཨེཝ, ན པཊིགྒཱཧཀཀརཎཏྠཾ. ནིབྦཱནཔཊིསཾཡུཏྟཉྷི བྷགཝཱ དྷམྨཾ དེསེཏྭཱ ནིབྦཱནགུཎཱནུསྶརཎེན ཨུཔྤནྣཔཱིཏིསོམནསྶེན ཨུདཱནཾ ཨུདཱནེནྟོ ‘‘ཨཡཾ ནིབྦཱནདྷམྨོ ཀཐམཔཙྩཡོ ཨུཔལབྦྷཏཱི’’ཏི ཏེསཾ བྷིཀྑཱུནཾ ཙེཏོཔརིཝིཏཀྐམཉྙཱཡ ཏེསཾ ཏམཏྠཾ ཉཱཔེཏུཀཱམེན ‘‘ཏདཱཡཏན’’ནྟི ཝུཏྟཾ, ན པན ཨེཀནྟཏོ ཏེ པཊིགྒཱཧཀེ ཀཏྭཱཏི ཝེདིཏབྦནྟི.

ཏཡིདཾ སབྦཉྙུབུདྡྷབྷཱསིཏཾ པཙྩེཀབུདྡྷབྷཱསིཏཾ སཱཝཀབྷཱསིཏནྟི ཏིབྦིདྷཾ ཧོཏི. ཏཏྠ པཙྩེཀབུདྡྷབྷཱསིཏཾ –

‘‘སབྦེསུ བྷཱུཏེསུ ནིདྷཱཡ དཎྜཾ,

ཨཝིཧེཋཡཾ ཨཉྙཏརམྤི ཏེས’’ནྟི. ཨཱདིནཱ (སུ. ནི. ༣༥) –

ཁགྒཝིསཱཎསུཏྟེ ཨཱགཏཾ. སཱཝཀབྷཱསིཏམྤི –

‘‘སབྦོ ¶ རཱགོ པཧཱིནོ མེ,

སབྦོ དོསོ སམཱུཧཏོ;

སབྦོ མེ ཝིཧཏོ མོཧོ,

སཱིཏིབྷཱུཏོསྨི ནིབྦུཏོ’’ཏི. ཨཱདིནཱ (ཐེརགཱ. ༧༩) –

ཐེརགཱཐཱསུ ¶ ,

‘‘ཀཱཡེན སཾཝུཏཱ ཨཱསིཾ, ཝཱཙཱཡ ཨུད ཙེཏསཱ;

སམཱུལཾ ཏཎྷམབྦུཡ྄ཧ, སཱིཏིབྷཱུཏཱམྷི ནིབྦུཏཱ’’ཏི. (ཐེརཱིགཱ. ༡༥); –

ཐེརཱིགཱཐཱསུ ཙ ཨཱགཏཾ. ཨཉྙཱནིཔི སཀྐཱདཱིཧི དེཝེཧི བྷཱསིཏཱནི ‘‘ཨཧོ དཱནཾ པརམདཱནཾ, ཀསྶཔེ སུཔྤཏིཊྛིཏ’’ནྟིཨཱདཱིནི (ཨུདཱ. ༢༧). སོཎདཎྜབྲཱཧྨཎཱདཱིཧི མནུསྶེཧི ཙ བྷཱསིཏཱནི ‘‘ནམོ ཏསྶ བྷགཝཏོ’’ཏིཨཱདཱིནི (དཱི. ནི. ༢.༣༧༡; མ. ནི. ༡.༢༩༠; ༢.༢༩༠, ༣༥༧; སཾ. ནི. ༡༡༨༧; ༢.༣༨; ཨ. ནི. ༥.༡༩༤) ཏིསྶོ སངྒཱིཏིཡོ ཨཱརུལ༹ྷཱནི ཨུདཱནཱནི སནྟི ཨེཝ, ཏཱནི སབྦཱནིཔི ཨིདྷ ན ཨདྷིཔྤེཏཱནི. ཡཾ པན སམྨཱསམྦུདྡྷེན སཱམཾ ཨཱཧཙྩབྷཱསིཏཾ ཛིནཝཙནབྷཱུཏཾ, ཏདེཝ དྷམྨསངྒཱཧཀེཧི ‘‘ཨུདཱན’’ནྟི སངྒཱིཏཾ, ཏདེཝ ཙ སནྡྷཱཡ བྷགཝཏཱ པརིཡཏྟིདྷམྨཾ ནཝདྷཱ ཝིབྷཛིཏྭཱ ཨུདྡིསནྟེན ‘‘ཨུདཱན’’ནྟི ཝུཏྟཾ. ཡཱ པན ‘‘ཨནེཀཛཱཏིསཾསཱར’’ནྟིཨཱདིཀཱ (དྷ. པ. ༡༥༣) གཱཐཱ བྷགཝཏཱ བོདྷིམཱུལེ ཨུདཱནཝསེན པཝཏྟིཏཱ, ཨནེཀསཏསཧསྶཱནཾ སམྨཱསམྦུདྡྷཱནཾ ཨུདཱནབྷཱུཏཱ ཙ, ཏཱ ཨཔརབྷཱགེ དྷམྨབྷཎྜཱགཱརིཀསྶ བྷགཝཏཱ དེསིཏཏྟཱ དྷམྨསངྒཱཧཀེཧི ཨུདཱནཔཱལི༹ཡཾ སངྒཧཾ ཨནཱརོཔེཏྭཱ དྷམྨཔདེ སངྒཧིཏཱ, ཡཉྩ ‘‘ཨཉྙཱསི ཝཏ བྷོ ཀོཎྜཉྙོ ཨཉྙཱསི ཝཏ བྷོ ཀོཎྜཉྙོ’’ཏི (སཾ. ནི. ༥.༡༠༨༡; མཧཱཝ. ༡༧; པཊི. མ. ༢.༣༠) ཨུདཱནཝཙནཾ དསསཧསྶིལོཀདྷཱཏུཡཱ དེཝམནུསྶཱནཾ པཝེདནསམཏྠནིགྒྷོསཝིཔྥཱརཾ བྷགཝཏཱ བྷཱསིཏཾ, ཏདཔི པཋམབོདྷིཡཾ སབྦེསཾ ཨེཝ བྷིཀྑཱུནཾ སམྨཱཔཊིཔཏྟིཔཙྩཝེཀྑཎཧེཏུཀཾ ‘‘ཨཱརཱདྷཡིཾསུ ཝཏ མཾ བྷིཀྑཱུ ཨེཀཾ སམཡ’’ནྟིཨཱདིཝཙནཾ (མ. ནི. ༡.༢༢༥) ཝིཡ དྷམྨཙཀྐཔྤཝཏྟནསུཏྟནྟདེསནཱཔརིཡོསཱནེ ཨཏྟནཱཔི ཨདྷིགཏདྷམྨེཀདེསསྶ ཡཐཱདེསིཏསྶ ཨརིཡམགྒསྶ སབྦཔཋམཾ སཱཝཀེསུ ཐེརེན ཨདྷིགཏཏྟཱ ཨཏྟནོ པརིསྶམསྶ སཕལབྷཱཝཔཙྩཝེཀྑཎཧེཏུཏཾ པཱིཏིསོམནསྶཛནིཏཾ ¶ ཨུདཱཧཱརམཏྟཾ, ན པན ‘‘ཡདཱ ཧཝེ པཱཏུབྷཝནྟི དྷམྨཱ’’ཏིཨཱདིཝཙནཾ ཝིཡ (མཧཱཝ. ༡; ཨུདཱ. ༡) པཝཏྟིཡཱ, ནིཝཏྟིཡཱ ཝཱ པཀཱསནནྟི དྷམྨསངྒཱཧཀེཧི ཨུདཱནཔཱལི༹ཡཾ ན སངྒཱིཏནྟི དཊྛབྦཾ. ཨུདཱནཔཱལི༹ཡཾ པན ཨཊྛསུ ཝགྒེསུ དས དས ཀཏྭཱ ཨསཱིཏིཡེཝ སུཏྟནྟཱ སངྒཱིཏཱ. ཏཐཱ ཧི ཏདཊྛཀཐཱཡཾ ཝུཏྟཾ –

‘‘ཨསཱིཏིཡེཝ སུཏྟནྟཱ, ཝགྒཱ ཨཊྛ སམཱསཏོ’’ཏི. (ཨུདཱ. ཨཊྛ. གནྠཱརམྦྷཀཐཱ).

ཨིདྷ ¶ པན ‘‘དྭེཨསཱིཏི སུཏྟནྟཱ’’ཏི ཝུཏྟཾ, ཏཾ ཨུདཱནཔཱལི༹ཡཱ ན སམེཏི, ཏསྨཱ ‘‘ཨསཱིཏི སུཏྟནྟཱ’’ཏི པཱཋེན བྷཝིཏབྦཾ. ཨཔིཙ ན ཀེཝལཾ ཨིདྷེཝ, ཨཐ ཁོ ཨཉྙཱསུཔི (ཝི. ཨཊྛ. ༡.པཋམམཧཱསངྒཱིཏིཀཐཱ) ཝིནཡཱབྷིདྷམྨཊྛཀཐཱསུ (དྷ. སཾ. ནིདཱནཀཐཱ) ཏཐཱཡེཝ ཝུཏྟཏྟཱ ‘‘ཨཔྤཀཾ པན ཨཱུནམདྷིཀཾ ཝཱ གཎནཱུཔགཾ ན ཧོཏཱི’’ཏི པརིཡཱཡེན ཨནེཀཾསེན ཝུཏྟཾ སིཡཱ. ཡཐཱ ཝཱ ཏཐཱ ཝཱ ཨནུམཱནེན གཎནམེཝ ཧི ཏཏྠ ཏཏྠ ཨཱུནཱདྷིཀསངྑྱཱ, ཨིཏརཐཱ ཏཱཡེཝ ན སིཡུནྟིཔི ཝདནྟི, པཙྪཱ པམཱདལེཁཝཙནཾ ཝཱ ཨེཏཾ.

ཝུཏྟཉྷེཏཾ བྷགཝཏཱཏིཨཱདིནཡཔྤཝཏྟཱཏི ཨེཏྠ ཨཱདིསདྡེན ‘‘ཝུཏྟཉྷེཏཾ བྷགཝཏཱ, ཝུཏྟམརཧཏཱཏི མེ སུཏཾ. ཨེཀདྷམྨཾ བྷིཀྑཝེ, པཛཧཐ, ཨཧཾ ཝོ པཱཊིབྷོགོ ཨནཱགཱམིཏཱཡ. ཀཏམཾ ཨེཀདྷམྨཾ? ལོབྷཾ བྷིཀྑཝེ, ཨེཀདྷམྨཾ པཛཧཐ, ཨཧཾ ཝོ པཱཊིབྷོགོ ཨནཱགཱམིཏཱཡཱ’’ཏི (ཨིཏིཝུ. ༡) ཨེཝམཱདིནཱ ཨེཀདུཀཏིཀཙཏུཀྐནིཔཱཏཝསེན ཝུཏྟཾ དྭཱདསུཏྟརསཏསུཏྟསམཱུཧཾ སངྒཎྷཱཏི. ཏཐཱ ཧི ཨིཏིཝུཏྟཀཔཱལི༹ཡམེཝ ཨུདཱནགཱཐཱཧི དྭཱདསུཏྟརསཏསུཏྟཱནི གཎེཏྭཱ སངྒཱིཏཱནི, ཏདཊྛཀཐཱཡམྤི (ཨིཏིཝུ. ཨཊྛ. ནིདཱནཝཎྞནཱ) ཏཐཱཡེཝ ཝུཏྟཾ. ཏསྨཱ ‘‘དྭཱདསུཏྟརསཏསུཏྟནྟཱ’’ ཨིཙྩེཝ པཱཋེན བྷཝིཏབྦཾ, ཡཐཱཝུཏྟནཡེན ཝཱ ཨནེཀཾསཏོ ཝུཏྟནྟིཔི ཝཏྟུཾ སཀྐཱ, ཏཐཱཔི ཨཱིདིསེ ཋཱནེ པམཱཎཾ དསྶེནྟེན ཡཱཐཱཝཏོཝ ནིཡམེཏྭཱ དསྶེཏབྦནྟི ‘‘དསུཏྟརསཏསུཏྟནྟཱ’’ཏི ཨིདཾ པཙྪཱ པམཱདལེཁམེཝཱཏི གཧེཏབྦནྟི ཝདནྟི. ཨིཏི ཨེཝཾ བྷགཝཏཱ ཝུཏྟཾ ཨིཏིཝུཏྟཾ. ཨིཏིཝུཏྟནྟི སངྒཱིཏཾ ཨིཏིཝུཏྟཀཾ. རུལ༹ྷིནཱམཾ ཝཱ ཨེཏཾ ཡཐཱ ‘‘ཡེཝཱཔནཀཾ, ནཏུམྷཱཀཝགྒོ’’ཏི, ཝུཏྟཉྷེཏཾ བྷགཝཏཱ, ཝུཏྟམརཧཏཱཏི མེ སུཏནྟི ནིདཱནཝཙནེན སངྒཱིཏཾ ཡཐཱཝུཏྟསུཏྟསམཱུཧཾ.

ཛཱཏཾ ¶ བྷཱུཏཾ པུརཱཝུཏྠཾ བྷགཝཏོ པུབྦཙརིཏཾ ཀཱཡཏི ཀཐེཏི པཀཱསེཏི ཨེཏེནཱཏི ཛཱཏཀཾ, ཏཾ པན ཨིམཱནཱིཏི དསྶེཏུཾ ‘‘ཨཔཎྞཀཛཱཏཀཱདཱིནཱི’’ཏིཨཱདིམཱཧ. ཏཏྠ ‘‘པཉྙཱསཱདྷིཀཱནི པཉྩཛཱཏཀསཏཱནཱི’’ཏི ཨིདཾ ཨཔྤཀཾ པན ཨཱུནམདྷིཀཾ ཝཱ གཎནཱུཔགཾ ན ཧོཏཱིཏི ཀཏྭཱ ཨནེཀཾསེན, ཝོཧཱརསུཁཏཱམཏྟེན ཙ ཝུཏྟཾ. ཨེཀཾསཏོ ཧི སཏྟཙཏྟཱལཱིསཱདྷིཀཱནིཡེཝ ཡཐཱཝུཏྟགཎནཏོ ཏཱིཧི ཨཱུནཏྟཱ. ཏཐཱ ཧི ཨེཀནིཔཱཏེ པཉྙཱསསཏཾ, དུཀནིཔཱཏེ སཏཾ, ཏིཀནིཔཱཏེ པཉྙཱས, ཏཐཱ ཙཏུཀྐནིཔཱཏེ, པཉྩཀནིཔཱཏེ པཉྩཝཱིས, ཚཀྐནིཔཱཏེ ཝཱིས, སཏྟནིཔཱཏེ ཨེཀཝཱིས, ཨཊྛནིཔཱཏེ དས, ནཝནིཔཱཏེ དྭཱདས, དསནིཔཱཏེ སོལ༹ས, ཨེཀཱདསནིཔཱཏེ ནཝ, དྭཱདསནིཔཱཏེ དས, ཏཐཱ ཏེརསནིཔཱཏེ, པཀིཎྞཀནིཔཱཏེ ཏེརས, ཝཱིསཏིནིཔཱཏེ ཙུདྡས, ཏིཾསནིཔཱཏེ དས, ཙཏྟཱལཱིསནིཔཱཏེ པཉྩ, པཎྞཱསནིཔཱཏེ ཏཱིཎི, སཊྛིནིཔཱཏེ ¶ དྭེ, ཏཐཱ སཏྟཏིནིཔཱཏེ, ཨསཱིཏིནིཔཱཏེ པཉྩ, མཧཱནིཔཱཏེ དསཱཏི སཏྟཙཏྟཱལཱིསཱདྷིཀཱནེཝ པཉྩ ཛཱཏཀསཏཱནི སངྒཱིཏཱནཱིཏི.

ཨབྦྷུཏོ དྷམྨོ སབྷཱཝོ ཝུཏྟོ ཡཏྠཱཏི ཨབྦྷུཏདྷམྨཾ, ཏཾ པནིདནྟི ཨཱཧ ‘‘ཙཏྟཱརོམེ’’ཏིཨཱདི. ཨཱདིསདྡེན ཙེཏྠ –

‘‘ཙཏྟཱརོམེ བྷིཀྑཝེ, ཨཙྪརིཡཱ ཨབྦྷུཏཱ དྷམྨཱ ཨཱནནྡེ. ཀཏམེ ཙཏྟཱརོ? སཙེ བྷིཀྑཝེ, བྷིཀྑུཔརིསཱ ཨཱནནྡཾ དསྶནཱཡ ཨུཔསངྐམཏི, དསྶནེནཔི སཱ ཨཏྟམནཱ ཧོཏི. ཏཏྲ ཙེ ཨཱནནྡོ, དྷམྨཾ བྷཱསཏི, བྷཱསིཏེནཔི སཱ ཨཏྟམནཱ ཧོཏི, ཨཏིཏྟཱཝ བྷིཀྑཝེ བྷིཀྑུཔརིསཱ ཧོཏི, ཨཐ ཨཱནནྡོ ཏུཎྷཱི བྷཝཏི. སཙེ བྷིཀྑཝེ, བྷིཀྑུནཱིཔརིསཱ…པེ… ཨུཔཱསཀཔརིསཱ…པེ… ཨུཔཱསིཀཱ – པརིསཱ…པེ… ཏུཎྷཱི བྷཝཏི. ཨིམེ ཁོ བྷིཀྑཝེ…པེ… ཨཱནནྡེ’’ཏི (ཨ. ནི. ༤.༡༢༩) –

ཨེཝམཱདིནཡཔྤཝཏྟཾ ཏཏྠ ཏཏྠ བྷཱསིཏཾ སབྦམྤི ཨཙྪརིཡབྦྷུཏདྷམྨཔཊིསཾཡུཏྟཾ སུཏྟནྟཾ སངྒཎྷཱཏི.

ཙཱུལ༹ཝེདལླཱདཱིསུ (མ. ནི. ༡.༤༦༠) ཝིསཱཁེན ནཱམ ཨུཔཱསཀེན པུཊྛཱཡ དྷམྨདིནྣཱཡ ནཱམ བྷིཀྑུནིཡཱ བྷཱསིཏཾ སུཏྟཾ ཙཱུལ༹ཝེདལླཾ ནཱམ. མཧཱཀོཊྛིཀཏྠེརེན པུཙྪིཏེན ཨཱཡསྨཏཱ སཱརིཔུཏྟཏྠེརེན བྷཱསིཏཾ མཧཱཝེདལླཾ (མ. ནི. ༡.༤༤༩) ནཱམ. སམྨཱདིཊྛིསུཏྟམྤི ¶ (མ. ནི. ༡.༨༩) བྷིཀྑཱུཧི པུཊྛེན ཏེནེཝ བྷཱསིཏཾ, ཨེཏཱནི མཛ྄ཛྷིམནིཀཱཡཔརིཡཱཔནྣཱནི. སཀྐཔཉྷཾ (དཱི. ནི. ༢.༣༤༤) པན སཀྐེན པུཊྛོ བྷགཝཱ ཨབྷཱསི, ཏཾ དཱིགྷནིཀཱཡཔརིཡཱཔནྣཾ. མཧཱཔུཎྞམསུཏྟཾ (མ. ནི. ༣.༨༥) པན ཏདཧུཔོསཐེ པནྣརསེ པུཎྞམཱཡ རཏྟིཡཱ ཨཉྙཏརེན བྷིཀྑུནཱ པུཊྛེན བྷགཝཏཱ བྷཱསིཏཾ, ཏཾ མཛ྄ཛྷིམནིཀཱཡཔརིཡཱཔནྣཾ. ཨེཝམཱདཡོ སབྦེཔི ཏཏྠ ཏཏྠཱགཏཱ ཝེདཉྩ ཏུཊྛིཉྩ ལདྡྷཱ ལདྡྷཱ པུཙྪིཏསུཏྟནྟཱ ‘‘ཝེདལླ’’ནྟི ཝེདིཏབྦཾ. ཝེདནྟི ཉཱཎཾ. ཏུཊྛིནྟི ཡཐཱབྷཱསིཏདྷམྨདེསནཾ ཝིདིཏྭཱ ‘‘སཱདྷུ ཨཡྻེ སཱདྷཱཝུསོ’’ཏིཨཱདིནཱ ཨབྦྷནུམོདནཝསཔྤཝཏྟཾ པཱིཏིསོམནསྶཾ. ལདྡྷཱ ལདྡྷཱཏི ལབྷིཏྭཱ ལབྷིཏྭཱ, པུནཔྤུནཾ ལབྷིཏྭཱཏི ཝུཏྟཾ ཧོཏི, ཨེཏེན ཝེདསདྡོ ཉཱཎེ, སོམནསྶེ ཙ ཨེཀསེསནཡེན, སཱམཉྙནིདྡེསེན ཝཱ པཝཏྟཏི, ཝེདམྷི ནིསྶིཏཾ ཏསྶ ལབྷཱཔནཝསེནཱཏི ཝེདལླནྟི ཙ དསྶེཏི.

ཨེཝཾ ¶ ཨངྒཝསེན སཀལམྤི བུདྡྷཝཙནཾ ཝིབྷཛིཏྭཱ ཨིདཱནི དྷམྨཀྑནྡྷཝསེན ཝིབྷཛིཏུཀཱམོ ‘‘ཀཐ’’ནྟིཨཱདིམཱཧ. ཏཏྠ དྷམྨཀྑནྡྷཝསེནཱཏི དྷམྨརཱསིཝསེན. ‘‘དྭཱསཱིཏཱི’’ཏི ཨཡཾ གཱཐཱ ཝུཏྟཏྠཱཝ. ཨེཝཾ པརིདཱིཔིཏདྷམྨཀྑནྡྷཝསེནཱཏི གོཔཀམོགྒལླཱནེན ནཱམ བྲཱཧྨཎེན པུཊྛེན གོཔཀམོགྒལླཱནསུཏྟེ (མ. ནི. ༣.༧༩) ཨཏྟནོ གུཎཔྤཀཱསནཏྠཾ ཝཱ ཐེརགཱཐཱཡཾ (ཐེརགཱ. ༡༠༡༧ ཨཱདཡོ) ཨཱཡསྨཏཱ ཨཱནནྡཏྠེརེན སམནྟཏོ དཱིཔིཏདྷམྨཀྑནྡྷཝསེན ཨིམིནཱ ཨེཝཾ ཏེན ཨཔརིདཱིཔིཏཱཔི དྷམྨཀྑནྡྷཱ སནྟཱིཏི པཀཱསེཏི, ཏསྨཱ ཀཐཱཝཏྠུཔྤཀརཎ མཱདྷུརིཡསུཏྟཱདཱིནཾ (མ. ནི. ༢.༣༡༧) ཝིམཱནཝཏྠཱདཱིསུ ཀེསཉྩི གཱཐཱནཉྩ ཝསེན ཙཏུརཱསཱིཏིསཧསྶཏོཔི དྷམྨཀྑནྡྷཱནཾ ཨདྷིཀཏཱ ཝེདིཏབྦཱ.

ཨེཏྠ ཙ སུབྷསུཏྟཾ (དཱི. ནི. ༡.༤༤༤), གོཔཀམོགྒལླཱནསུཏྟཉྩ པརིནིབྦུཏེ བྷགཝཏི ཨཱནནྡཏྠེརེན བྷཱསིཏཏྟཱ ཙཏུརཱསཱིཏིདྷམྨཀྑནྡྷསཧསྶེསུ ཨནྟོགདྷཾ ཧོཏི, ན ཧོཏཱིཏི? པཊིསམྦྷིདཱགཎྛིཔདེ ཏཱཝ ཨིདཾ ཝུཏྟཾ ‘‘སཡཾ ཝུཏྟདྷམྨཀྑནྡྷཱནམྤི བྷིཀྑུཏོ གཧིཏེཡེཝ སངྒཧེཏྭཱ ཨེཝམཱཧཱཏི དཊྛབྦ’’ནྟི, བྷགཝཏཱ པན དིནྣནཡེ ཋཏྭཱ བྷཱསིཏཏྟཱ ‘‘སཡཾ ཝུཏྟམྤི ཙེཏཾ སུཏྟདྭཡཾ བྷགཝཏོ གཧིཏེཡེཝ སངྒཧེཏྭཱ ཝུཏྟ’’ནྟི ཨེཝམྤི ཝཏྟུཾ ཡུཏྟཏརཾ ཝིཡ དིསྶཏི. བྷགཝཏཱ ཧི དིནྣནཡེ ཋཏྭཱ སཱཝཀཱ དྷམྨཾ དེསེནྟི, ཏེནེཝ སཱཝཀབྷཱསིཏམྤི ཀཐཱཝཏྠཱདིཀཾ བུདྡྷབྷཱསིཏཾ ནཱམ ཛཱཏཾ ¶ , ཏཏོཡེཝ ཙ ཨཏྟནཱ བྷཱསིཏམྤི སུབྷསུཏྟཱདིཀཾ སངྒཱིཏིམཱརོཔེནྟེན ཨཱཡསྨཏཱ ཨཱནནྡཏྠེརེན ‘‘ཨེཝཾ མེ སུཏ’’ནྟི ཝུཏྟཾ.

ཨེཀཱནུསནྡྷིཀཾ སུཏྟཾ སཏིཔཊྛཱནཱདི. སཏིཔཊྛཱནསུཏྟཉྷི ‘‘ཨེཀཱཡནོ ཨཡཾ བྷིཀྑཝེ, མགྒོ སཏྟཱནཾ ཝིསུདྡྷིཡཱ’’ཏིཨཱདིནཱ (དཱི. ནི. ༢.༣༧༣; མ. ནི. ༡.༡༠༦; སཾ. ནི. ༣.༣༦༧-༣༨༤) ཙཏྟཱརོ སཏིཔཊྛཱནེ ཨཱརབྷིཏྭཱ ཏེསཾཡེཝ ཝིབྷཱགདསྶནཝསེན པཝཏྟཏྟཱ ‘‘ཨེཀཱནུསནྡྷིཀ’’ནྟི ཝུཙྩཏི. ཨནེཀཱནུསནྡྷིཀཾ པརིནིབྦཱནསུཏྟཱདི (དཱི. ནི. ༢.༡༣༡ ཨཱདཡོ) པརིནིབྦཱནསུཏྟཉྷི ནཱནཱཋཱནེསུ ནཱནཱདྷམྨདེསནཱནཾ ཝསེན པཝཏྟཏྟཱ ‘‘ཨནེཀཱནུསནྡྷིཀ’’ནྟི ཝུཙྩཏི.

‘‘ཀཏི ཚིནྡེ ཀཏི ཛཧེ, ཀཏི ཙུཏྟརི བྷཱཝཡེ;

ཀཏི སངྒཱཏིགོ བྷིཀྑུ, ‘ཨོགྷཏིཎྞོ’ཏི ཝུཙྩཏཱི’’ཏི. (སཾ. ནི. ༡.༥); –

ཨེཝམཱདིནཱ པཉྷཱཔུཙྪནཾ གཱཐཱབནྡྷེསུ ཨེཀོ དྷམྨཀྑནྡྷོ.

‘‘པཉྩ ¶ ཚིནྡེ པཉྩ ཛཧེ, པཉྩ ཙུཏྟརི བྷཱཝཡེ;

པཉྩ སངྒཱཏིགོ བྷིཀྑུ, ‘ཨོགྷཏིཎྞོ’ཏི ཝུཙྩཏཱི’’ཏི. (སཾ. ནི. ༡.༥); –

ཨེཝམཱདིནཱ ཙ ཝིསྶཛྫནཾ ཨེཀོ དྷམྨཀྑནྡྷོ.

ཏིཀདུཀབྷཱཛནཾ དྷམྨསངྒཎིཡཾ ནིཀྑེཔཀཎྜཨཊྛཀཐཱཀཎྜཝསེན གཧེཏབྦཾ. ཏསྨཱ ཡཾ ཀུསལཏྟིཀམཱཏིཀཱཔདསྶ (དྷ. ས. ༡) ཝིབྷཛནཝསེན ནིཀྑེཔཀཎྜེ ཝུཏྟཾ –

‘‘ཀཏམེ དྷམྨཱ ཀུསལཱ? ཏཱིཎི ཀུསལམཱུལཱནི…པེ… ཨིམེ དྷམྨཱ ཀུསལཱ. ཀཏམེ དྷམྨཱ ཨཀུསལཱ? ཏཱིཎི ཨཀུསལམཱུལཱནི…པེ… ཨིམེ དྷམྨཱ ཨཀུསལཱ. ཀཏམེ དྷམྨཱ ཨབྱཱཀཏཱ’’? ཀུསལཱཀུསལཱནཾ དྷམྨཱནཾ ཝིཔཱཀཱ…པེ… ཨིམེ དྷམྨཱ ཨབྱཱཀཏཱ’’ཏི (དྷ. ས. ༡༨༧),

ཨཡམེཀོ དྷམྨཀྑནྡྷོ. ཨེས ནཡོ སེསཏྟིཀདུཀཔདཝིབྷཛནེསུཔི. ཡདཔི ཨཊྛཀཐཱཀཎྜེ ཝུཏྟཾ –

‘‘ཀཏམེ དྷམྨཱ ཀུསལཱ? ཙཏཱུསུ བྷཱུམཱིསུ ཀུསལཾ. ཨིམེ དྷམྨཱ ཀུསལཱ. ཀཏམེ དྷམྨཱ ཨཀུསལཱ? དྭཱདས ཨཀུསལཙིཏྟུཔྤཱདཱ. ཨིམེ དྷམྨཱ ཨཀུསལཱ. ཀཏམེ དྷམྨཱ ཨབྱཱཀཏཱ? ཙཏཱུསུ ¶ བྷཱུམཱིསུ ཝིཔཱཀོ ཏཱིསུ བྷཱུམཱིསུ ཀིརིཡཱབྱཱཀཏཾ རཱུཔཉྩ ནིབྦཱནཉྩ. ཨིམེ དྷམྨཱ ཨབྱཱཀཏཱ’’ཏི (དྷ. ས. ༡༣༨༦),

ཨཡཾ ཀུསལཏྟིཀམཱཏིཀཱཔདསྶ ཝིབྷཛནཝསེན པཝཏྟོ ཨེཀོ དྷམྨཀྑནྡྷོ. ཨེས ནཡོ སེསེསུཔི. ཙིཏྟཝཱརབྷཱཛནཾ པན ཙིཏྟུཔྤཱདཀཎྜ ཝསེན (དྷ. ས. ༡) གཧེཏབྦཾ. ཡཉྷི ཏཏྠ ཝུཏྟཾ ཀུསལཙིཏྟཝིབྷཛནཏྠཾ –

‘‘ཀཏམེ དྷམྨཱ ཀུསལཱ? ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི སོམནསྶསཧགཏཾ ཉཱཎསམྤཡུཏྟཾ རཱུཔཱརམྨཎཾ ཝཱ…པེ… ཏསྨིཾ སམཡེ ཕསྶོ ཧོཏི…པེ… ཨཝིཀྑེཔོ ཧོཏཱི’’ཏི (དྷ. ས. ༡),

ཨཡམེཀོ ¶ དྷམྨཀྑནྡྷོ. ཨེཝཾ སེསཙིཏྟཝཱརཝིབྷཛནེསུ. ཨེཀོ དྷམྨཀྑནྡྷོཏི (ཨེཀམེཀོ དྷམྨཀྑནྡྷོ ཚལ༹ ཨཊྛ.) ཙ ཨེཀེཀོ དྷམྨཀྑནྡྷོཏི ཨཏྠོ. ‘‘ཨེཀམེཀཾ ཏིཀདུཀབྷཱཛནཾ, ཨེཀམེཀཾ ཙིཏྟཝཱརབྷཱཛན’’ནྟི ཙ ཝཙནཏོ ཧི ‘‘ཨེཀེཀོ’’ཏི ཨཝུཏྟེཔི ཨཡམཏྠོ སཱམཏྠིཡཏོ ཝིཉྙཱཡམཱནོཝ ཧོཏི.

ཝཏྠུ ནཱམ སུདིནྣཀཎྜཱདི. མཱཏིཀཱ ནཱམ ‘‘ཡོ པན བྷིཀྑུ བྷིཀྑཱུནཾ སིཀྑཱསཱཛཱིཝསམཱཔནྣོ’’ཏིཨཱདིནཱ (པཱརཱ. ༤༤) ཏསྨིཾ ཏསྨིཾ ཨཛ྄ཛྷཱཙཱརེ པཉྙཏྟཾ ཨུདྡེས སིཀྑཱཔདཾ. པདབྷཱཛནིཡནྟི ཏསྶ ཏསྶ སིཀྑཱཔདསྶ ‘‘ཡོ པནཱཏི ཡོ ཡཱདིསོ’’ཏིཨཱདི (པཱརཱ. ༤༥) ནཡཔྤཝཏྟཾ པདཝིབྷཛནཾ. ཨནྟརཱཔཏྟཱིཏི ‘‘པཊིལཱཏཾ ཨུཀྑིཔཏི, ཨཱཔཏྟི དུཀྐཊསྶཱ’’ཏི (པཱཙི. ༣༥༥) ཨེཝམཱདིནཱ སིཀྑཱཔདནྟརེསུ པཉྙཏྟཱ ཨཱཔཏྟི. ཨཱཔཏྟཱིཏི ཏཾཏཾསིཀྑཱཔདཱནུརཱུཔཾ ཝུཏྟོ ཏིཀཙྪེདམུཏྟོ ཨཱཔཏྟིཝཱརོ. ཨནཱཔཏྟཱིཏི ‘‘ཨནཱཔཏྟི ཨཛཱནནྟསྶ ཨསཱདིཡནྟསྶ ཁིཏྟཙིཏྟསྶ ཝེདནཱཊྚསྶ ཨཱདིཀམྨིཀསྶཱ’’ཏིཨཱདི (པཱརཱ. ༦༦) ནཡཔྤཝཏྟོ ཨནཱཔཏྟིཝཱརོ. ཏིཀཙྪེདོཏི ‘‘དསཱཧཱཏིཀྐནྟེ ཨཏིཀྐནྟསཉྙཱི ནིསྶགྒིཡཾ པཱཙིཏྟིཡཾ, དསཱཧཱཏིཀྐནྟེ ཝེམཏིཀོ…པེ… དསཱཧཱཏིཀྐནྟེ ཨནཏིཀྐནྟསཉྙཱི ནིསྶགྒིཡཾ པཱཙིཏྟིཡ’’ནྟི (པཱརཱ. ༤༦༨) ཨེཝམཱདིནཡཔྤཝཏྟོ ཏིཀཔཱཙིཏྟིཡ-ཏིཀ-དུཀྐཊཱདིབྷེདོ ཏིཀཔརིཙྪེདོ. ཏཏྠཱཏི ཏེསུ ཝཏྠུམཱཏིཀཱདཱིསུ.

ཨེཝཾ ¶ ཨནེཀནཡསམལངྐཏཾ སངྒཱིཏིཔྤཀཱརཾ དསྶེཏྭཱ ‘‘ཨཡཾ དྷམྨོ, ཨཡཾ ཝིནཡོ…པེ… ཨིམཱནི ཙཏུརཱསཱིཏི དྷམྨཀྑནྡྷསཧསྶཱནཱི’’ཏི བུདྡྷཝཙནཾ དྷམྨཝིནཡཱདིབྷེདེན ཝཝཏྠཔེཏྭཱ སངྒཱཡནྟེན མཧཱཀསྶཔཔྤམུཁེན ཝསཱིགཎེན ཨནེཀཙྪརིཡཔཱཏུབྷཱཝཔཊིམཎྜིཏཱཡ སངྒཱིཏིཡཱ ཨིམསྶ དཱིགྷཱགམསྶ དྷམྨབྷཱཝོ, མཛ྄ཛྷིམབུདྡྷཝཙནཱདིབྷཱཝོ ཙ ཝཝཏྠཱཔིཏོཏི དསྶེནྟོ ‘‘ཨེཝམེཏ’’ནྟིཨཱདིམཱཧ. སཱདྷཱརཎཝཙནེན དསྶིཏེཔི ཧི ‘‘ཡདཏྠཾ སཾཝཎྞེཏུཾ ཨིདམཱརབྷཏི, སོཡེཝ པདྷཱནཝསེན དསྶིཏོ’’ཏི ཨཱཙརིཡེཧི ཨཡཾ སམྦནྡྷོ ཝུཏྟོ. ཨཔརོ ནཡོ – ཧེཊྛཱ ཝུཏྟེསུ ཨེཀཝིདྷཱདིབྷེདབྷིནྣེསུ པཀཱརེསུ དྷམྨཝིནཡཱདིབྷཱཝོ སངྒཱིཏིཀཱརཀེ ཧེཝ སངྒཱིཏིཀཱལེ ཝཝཏྠཱཔིཏོ, ན པཙྪཱ ཀཔྤནམཏྟསིདྡྷོཏི དསྶེནྟོ ‘‘ཨེཝམེཏ’’ནྟིཨཱདིམཱཧཱཏིཔི ཝཏྟབྦོ. ན ཀེཝལཾ ཡཐཱཝུཏྟཔྤཀཱརམེཝ ཝཝཏྠཱཔེཏྭཱ སངྒཱིཏཾ, ཨཐ ཁོ ཨཉྙམྤཱིཏི དསྶེཏི ‘‘ན ཀེཝལཉྩཱ’’ཏིཨཱདིནཱ. ཨུདཱནསངྒཧོ ནཱམ པཋམཔཱརཱཛིཀཱདཱིསུ ཨཱགཏཱནཾ ཝིནཱིཏཝཏྠུཨཱདཱིནཾ སངྑེཔཏོ སངྒཧདསྶནཝསེན དྷམྨསངྒཱཧཀེཧི ཋཔིཏཱ –

‘‘མཀྐཊཱི ¶ ཝཛྫིཔུཏྟཱ ཙ, གིཧཱི ནགྒོ ཙ ཏིཏྠིཡཱ;

དཱརིཀུཔྤལཝཎྞཱ ཙ, བྱཉྫནེཧི པརེ དུཝེ’’ཏི. ཨཱདིཀཱ (པཱརཱ. ༦༦); –

གཱཐཱཡོ. ཝུཙྩམཱནསྶ ཧི ཝུཏྟསྶ ཝཱ ཨཏྠསྶ ཝིཔྤཀིཎྞབྷཱཝེན པཝཏྟིཏུཾ ཨདཏྭཱ ཨུདྡྷཾ དཱནཾ རཀྑཎཾ ཨུདཱནཾ, སངྒཧཝཙནནྟི ཨཏྠོ. སཱིལཀྑནྡྷཝགྒམཱུལཔརིཡཱཡཝགྒཱདིཝསེན ཝགྒསངྒཧོ. ཝགྒོཏི ཧི དྷམྨསངྒཱཧཀེཧེཝ ཀཏཱ སུཏྟསམུདཱཡསྶ སམཉྙཱ. ཨུཏྟརིམནུསྶཔེཡྻཱལནཱིལཔེཡྻཱལཱདིཝསེན པེཡྻཱལསངྒཧོ. པཱཏུཾ རཀྑིཏུཾ, ཝིཏྠཱརིཏུཾ ཝཱ ཨལནྟི ཧི པེཡྻཱལཾ, སངྑིཔིཏྭཱ དསྶནཝཙནཾ. ཨངྒུཏྟརནིཀཱཡཱདཱིསུ ནིཔཱཏསངྒཧོ, གཱཐངྒཱདིཝསེན ནིཔཱཏནཾ. སམུདཱཡཀརཎཉྷི ནིཔཱཏོ. དེཝཏཱསཾཡུཏྟཱདིཝསེན (སཾ. ནི. ༡.༡) སཾཡུཏྟསངྒཧོ. ཝགྒསམུདཱཡེ ཨེཝ དྷམྨསངྒཱཧཀེཧི ཀཏཱ སཾཡུཏྟསམཉྙཱ. མཱུལཔཎྞཱསཀཱདིཝསེན པཎྞཱསསངྒཧོ, པཉྙཱས པཉྙཱས སུཏྟཱནི གཎེཏྭཱ སངྒཧོཏི ཝུཏྟཾ ཧོཏི. ཨཱདིསདྡེན ཏསྶཾ ཏསྶཾ པཱལི༹ཡཾ དིསྶམཱནཾ སངྒཱིཏིཀཱརཀཝཙནཾ སངྒཎྷཱཏི. ཨུདཱནསངྒཧ…པེ… པཎྞཱསསངྒཧཱདཱིཧི ཨནེཀཝིདྷཾ ཏཐཱ. སཏྟཧི མཱསེཧཱིཏི ཀིརིཡཱཔཝགྒེ ཏཏིཡཱ ‘‘ཨེཀཱཧེནེཝ ¶ བཱརཱཎསིཾ པཱཡཱསི. ནཝཧི མཱསེཧི ཝིཧཱརཾ ནིཊྛཱཔེསཱི’’ཏིཨཱདཱིསུ ཝིཡ. ཀིརིཡཱཡ ཨཱསུཾ པརིནིཊྛཱཔནཉྷི ཀིརིཡཱཔཝགྒོ.

ཏདཱ ཨནེཀཙྪརིཡཔཱཏུབྷཱཝདསྶནེན སཱདྷཱུནཾ པསཱདཛནནཏྠམཱཧ ‘‘སངྒཱིཏིཔརིཡོསཱནེ ཙསྶཱ’’ཏིཨཱདི. ཨསྶ བུདྡྷཝཙནསྶ སངྒཱིཏིཔརིཡོསཱནེ སཉྫཱཏཔྤམོདཱ ཝིཡ, སཱདྷུཀཱརཾ དདམཱནཱ ཝིཡ ཙ སངྐམྤི…པེ… པཱཏུརཧེསུནྟི སམྦནྡྷོ. ཝིཡཱཏི ཧི ཨུབྷཡཏྠ ཡོཛེཏབྦཾ. པཝཏྟནེ, པཝཏྟནཱཡ ཝཱ སམཏྠཾ པཝཏྟནསམཏྠཾ. ཨུདཀཔརིཡནྟནྟི པཐཝཱིསནྡྷཱརཀཨུདཀཔརིཡོསཱནཾ ཀཏྭཱ, སཧ ཏེན ཨུདཀེན, ཏཾ ཝཱ ཨུདཀཾ ཨཱཧཙྩཱཏི ཝུཏྟཾ ཧོཏི, ཏེན ཨེཀདེསཀམྤནཾ ནིཝཱརེཏི. སངྐམྤཱིཏི ཨུདྡྷཾ ཨུདྡྷཾ གཙྪནྟཱི སུཊྛུ ཀམྤི. སམྤཀམྤཱིཏི ཨུདྡྷམདྷོ ཙ གཙྪནྟཱི སམྨཱ པཀཱརེན ཀམྤི. སམྤཝེདྷཱིཏི ཙཏཱུསུ དིསཱསུ གཙྪནྟཱི སུཊྛུ བྷིཡྻོ པཝེདྷི. ཨེཝཾ ཨེཏེན པདཏྟཡེན ཚཔྤཀཱརཾ པཐཝཱིཙལནཾ དསྶེཏི. ཨཐ ཝཱ པུརཏྠིམཏོ, པཙྪིམཏོ ཙ ཨུནྣམནཨོནམནཝསེན སངྐམྤི. ཨུཏྟརཏོ, དཀྑིཎཏོ ཙ ཨུནྣམནཨོནམནཝསེན སམྤཀམྤི. མཛ྄ཛྷིམཏོ, པརིཡནྟཏོ ཙ ཨུནྣམནཨོནམནཝསེན སམྤཝེདྷི. ཨེཝམྤི ཚཔྤཀཱརཾ པཐཝཱིཙལནཾ དསྶེཏི, ཡཾ སནྡྷཱཡ ཨཊྛཀཐཱསུ ཝུཏྟཾ –-

‘‘པུརཏྠིམཏོ ཨུནྣམཏི པཙྪིམཏོ ཨོནམཏི, པཙྪིམཏོ ཨུནྣམཏི པུརཏྠིམཏོ ཨོནམཏི, ཨུཏྟརཏོ ཨུནྣམཏི དཀྑིཎཏོ ཨོནམཏི, དཀྑིཎཏོ ཨུནྣམཏི ཨུཏྟརཏོ ཨོནམཏི ¶ , མཛ྄ཛྷིམཏོ ཨུནྣམཏི པརིཡནྟཏོ ཨོནམཏི, པརིཡནྟཏོ ཨུནྣམཏི མཛ྄ཛྷིམཏོ ཨོནམཏཱིཏི ཨེཝཾ ཚཔྤཀཱརཾ…པེ… ཨཀམྤིཏྠཱ’’ཏི (བུ. ཝཾ. ཨཊྛ. ༧༡).

ཨཙྪརཾ པཧརིཏུཾ ཡུཏྟཱནི ཨཙྪརིཡཱནི, པུཔྥཝསྶཙེལུཀྑེཔཱདཱིནི ཨཉྙཱཡཔི སཱ སམཉྙཱཡ པཱཀཊཱཏི དསྶེནྟོ ཨཱཧ ‘‘ཡཱ ལོཀེ’’ཏིཨཱདི. ཡཱ པཋམམཧཱསངྒཱིཏི དྷམྨསངྒཱཧཀེཧི མཧཱཀསྶཔཱདཱིཧི པཉྩཧི སཏེཧི ཡེན ཀཏཱ སངྒཱིཏཱ, ཏེན པཉྩ སཏཱནི ཨེཏིསྶཱཏི ‘‘པཉྩསཏཱ’’ཏི ཙ ཐེརེཧེཝ ཀཏཏྟཱ ཐེརཱ མཧཱཀསྶཔཱདཡོ ཨེཏིསྶཱ, ཐེརེཧི ཝཱ ཀཏཱཏི ‘‘ཐེརིཀཱ’’ཏི ཙ ལོཀེ པཝུཙྩཏི, ཨཡཾ པཋམམཧཱསངྒཱིཏི ནཱམཱཏི སམྦནྡྷོ.

ཨེཝཾ ¶ པཋམམཧཱསངྒཱིཏི དསྶེཏྭཱ ཡདཏྠཾ སཱ ཨིདྷ དསྶིཏཱ, ཨིདཱནི ཏཾ ནིདཱནཾ ནིགམནཝསེན དསྶེནྟོ ‘‘ཨིམིསྶཱ’’ཏིཨཱདིམཱཧ. ཨཱདིནིཀཱཡསྶཱཏི སུཏྟནྟཔིཊཀཔརིཡཱཔནྣེསུ པཉྩསུ ནིཀཱཡེསུ ཨཱདིབྷཱུཏསྶ དཱིགྷནིཀཱཡསྶ. ཁུདྡཀཔརིཡཱཔནྣོ ཧི ཝིནཡོ པཋམཾ སངྒཱིཏོ. ཏཐཱ ཧི ཝུཏྟཾ ‘‘སུཏྟནྟ པིཊཀེ’’ཏི. ཏེནཱཏི ཏཐཱཝུཏྟཏྟཱ, ཨིམིནཱ ཡཐཱཝུཏྟཔཋམམཧཱསངྒཱིཏིཡཾ ཏཐཱཝཙནམེཝ སནྡྷཱཡ མཡཱ ཧེཊྛཱ ཨེཝཾ ཝུཏྟནྟི པུབྦཱཔརསམྦནྡྷཾ, ཡཐཱཝུཏྟཝིཏྠཱརཝཙནསྶ ཝཱ གུཎཾ དསྶེཏཱིཏི.

ཨིཏི སུམངྒལཝིལཱསིནིཡཱ དཱིགྷནིཀཱཡཊྛཀཐཱཡ པརམསུཁུམགམྦྷཱིརདུརནུབོདྷཏྠཔརིདཱིཔནཱཡ སུཝིམལཝིཔུལཔཉྙཱཝེཡྻཏྟིཡཛནནཱཡ ཨཛྫཝམདྡཝསོརཙྩསདྡྷཱསཏིདྷིཏིབུདྡྷིཁནྟི ཝཱིརིཡཱདིདྷམྨསམངྒིནཱ སཱཊྛཀཐེ པིཊཀཏྟཡེ ཨསངྒཱསཾཧཱིརཝིསཱརདཉཱཎཙཱརིནཱ ཨནེཀཔྤབྷེདསཀསམཡསམཡནྟརགཧནཛ྄ཛྷོགཱཧིནཱ མཧཱགཎིནཱ མཧཱཝེཡྻཱཀརཎེན ཉཱཎཱབྷིཝཾསདྷམྨསེནཱཔཏིནཱམཐེརེན མཧཱདྷམྨརཱཛཱདྷིརཱཛགརུནཱ ཀཏཱཡ སཱདྷུཝིལཱསིནིཡཱ ནཱམ ལཱིནཏྠཔཀཱསནིཡཱ བཱཧིརནིདཱནཝཎྞནཱཡ ལཱིནཏྠཔཀཱསནཱ.

ནིདཱནཀཐཱཝཎྞནཱ ནིཊྛིཏཱ.

༡. བྲཧྨཛཱལསུཏྟཾ

པརིབྦཱཛཀཀཐཱཝཎྞནཱ

༡. ཨེཏྟཱཝཏཱ ¶ ¶ ཙ པརམསཎྷསུཁུམགམྦྷཱིརདུདྡསཱནེཀཝིདྷནཡསམལངྐཏཾ བྲཧྨཛཱལསྶ སཱདྷཱརཎཏོ བཱཧིརནིདཱནཾ དསྶེཏྭཱ ཨིདཱནི ཨབྦྷནྟརནིདཱནཾ སཾཝཎྞེནྟོ ཨཏྠཱདྷིགམསྶ སུནིཀྑིཏྟཔདམཱུལཀཏྟཱ, སུནིཀྑིཏྟཔདབྷཱཝསྶ ཙ ‘‘ཨིདམེཝ’’ནྟི སབྷཱཝཝིབྷཱཝནེན པདཝིབྷཱགེན སཱདྷེཏབྦཏྟཱ པཋམཾ ཏཱཝ པདཝིབྷཱགཾ དསྶེཏུཾ ‘‘ཏཏྠ ཨེཝ’’ནྟིཨཱདིམཱཧ. པདཝིབྷཱགེན ཧི ‘‘ཨིདཾ ནཱམ ཨེཏཾ པད’’ནྟི ཝིཛཱནནེན ཏཾཏཾཔདཱནུརཱུཔཾ ལིངྒཝིབྷཏྟི ཝཙན ཀཱལཔཡོགཱདིཀཾ སམྨཱཔཏིཊྛཱཔནཏོ ཡཐཱཝུཏྟསྶ པདསྶ སུནིཀྑིཏྟཏཱ ཧོཏི, ཏཱཡ ཙ ཨཏྠསྶ སམདྷིགམིཡཏཱ. ཡཐཱཧ ‘‘སུནིཀྑིཏྟསྶ བྷིཀྑཝེ – པདབྱཉྫནསྶ ཨཏྠོཔི སུནཡོཧོཏཱི’’ཏིཨཱདི. ཨཔིཙ སམྦནྡྷཏོ, པདཏོ, པདཝིབྷཱགཏོ, པདཏྠཏོ ཨནུཡོགཏོ, པརིཧཱརཏོ ཙཱཏི ཚཧཱཀཱརེཧི ཨཏྠཝཎྞནཱ ཀཱཏབྦཱ. ཏཏྠ སམྦནྡྷོ ནཱམ དེསནཱསམྦནྡྷོ, ཡཾ ལོཀིཡཱ ‘‘ཨུམྨུགྒྷཱཏོ’’ཏིཔི ཝདནྟི, སོ པན པཱལི༹ཡཱ ནིདཱནཔཱལི༹ཝསེན, ནིདཱནཔཱལི༹ཡཱ ཙ སངྒཱིཏིཝསེན ཝེདིཏབྦོ. པཋམམཧཱསངྒཱིཏིཾ དསྶེནྟེན ཧི ནིདཱནཔཱལི༹ཡཱ སམྦནྡྷོ དསྶིཏོ, ཏསྨཱ པདཱདིཝསེནེཝ སཾཝཎྞནཾ ཀརོནྟོ ‘‘ཨེཝ’’ནྟིཨཱདིམཱཧ. ཨེཏྠ ཙ ‘‘ཨེཝནྟི ནིཔཱཏཔདནྟིཨཱདིནཱ པདཏོ, པདཝིབྷཱགཏོ ཙ སཾཝཎྞནཾ ཀརོཏི པདཱནཾ ཏབྦིསེསཱནཉྩ དསྶིཏཏྟཱ. པདཝིབྷཱགོཏི ཧི པདཱནཾ ཝིསེསོཡེཝ ཨདྷིཔྤེཏོ, ན པདཝིགྒཧོ. པདཱནི ཙ པདཝིབྷཱགོ ཙ པདཝིབྷཱགོ. ཨཐ ཝཱ པདཝིབྷཱགོ ཙ པདཝིགྒཧོ ཙ པདཝིབྷཱགོཏི ཨེཀསེསཝསེན པདཔདཝིགྒཧཱཔི པདཝིབྷཱགསདྡེན ཝུཏྟཱཏི དཊྛབྦཾ. པདཝིགྒཧཏོ པན ‘‘བྷིཀྑཱུནཾ སངྒྷོ’’ཏིཨཱདིནཱ ཨུཔརི སཾཝཎྞནཾ ཀརིསྶཏི, ཏཐཱ པདཏྠཱནུཡོགཔརིཧཱརེཧིཔི. ཨེཝནྟི ཨེཏྠ ལུཏྟནིདྡིཊྛཨིཏི-སདྡོ ཨཱདིཨཏྠོ ཨནྟརཱསདྡ ཙ སདྡཱདཱིནམྤི སངྒཧིཏཏྟཱ, ནཡགྒཧཎེན ཝཱ ཏེ གཧིཏཱ. ཏེནཱཧ ‘‘མེཏིཨཱདཱིནི ནཱམཔདཱནཱི’’ཏི. ཨིཏརཐཱ ཧི ཨནྟརཱསདྡཾ ཙ སདྡཱདཱིནམྤི ནིཔཱཏབྷཱཝོ ཝཏྟབྦོ སིཡཱ. མེཏིཨཱདཱིནཱིཏི ཨེཏྠ པན ཨཱདི-སདྡེན ཡཱཝ ¶ པཊིསདྡོ ¶ , ཏཱཝ ཏདཝསིཊྛཱཡེཝ སདྡཱ སངྒཧིཏཱ. པཊཱིཏི ཨུཔསགྒཔདཾ པཏིསདྡསྶ ཀཱརིཡབྷཱཝཏོ.

ཨིདཱནི ཨཏྠུདྡྷཱརཀྐམེན པདཏྠཏོ སཾཝཎྞནཾ ཀརོནྟོ ‘‘ཨཏྠཏོ པནཱ’’ཏིཨཱདིམཱཧ. ཨིམསྨིཾ པན ཋཱནེ སོཏཱུནཾ སཾཝཎྞནཱནཡཀོསལླཏྠཾ སཾཝཎྞནཱཔྤཀཱརཱ ཝཏྟབྦཱ. ཀཐཾ?

ཨེཀནཱལི༹ཀཱ ཀཐཱ ཙ, ཙཏུརསྶཱ ཏཐཱཔི ཙ;

ནིསིནྣཝཏྟིཀཱ ཙེཝ, ཏིདྷཱ སཾཝཎྞནཾ ཝདེ.

ཏཏྠ པཱལི༹ཾ ཝཏྭཱ ཨེཀེཀཔདསྶ ཨཏྠཀཐནཾ ཨེཀཱཡ ནཱལི༹ཡཱ མིནིཏསདིསཏྟཱ, ཨེཀེཀཾ ཝཱ པདཾ ནཱལ༹ཾ མཱུལཾ, ཨེཀམེཀཾ པདཾ ཝཱ ནཱལི༹ཀཱ ཨཏྠནིགྒམནམགྒོ ཨེཏིསྶཱཏི ཀཏྭཱ ཨེཀནཱལི༹ཀཱ ནཱམ. པཊིཔཀྑཾ དསྶེཏྭཱ, པཊིཔཀྑསྶ ཙ ཨུཔམཾ དསྶེཏྭཱ, སཔཀྑཾ དསྶེཏྭཱ, སཔཀྑསྶ ཙ ཨུཔམཾ དསྶེཏྭཱ, ཀཐནཾ ཙཏཱུཧི བྷཱགེཧི ཝུཏྟཏྟཱ, ཙཏྟཱརོ ཝཱ རསྶཱ སལླཀྑཎཱུཔཱཡཱ ཨེཏིསྶཱཏི ཀཏྭཱ ཙཏུརསྶཱ ནཱམ, ཝིསབྷཱགདྷམྨཝསེནེཝ པརིཡོསཱནཾ གནྟྭཱ པུན སབྷཱགདྷམྨཝསེནེཝ པརིཡོསཱནགམནཾ ནིསཱིདཱཔེཏྭཱ པཏིཊྛཱཔེཏྭཱ ཨཱཝཏྟནཡུཏྟཏྟཱ, ནིཡམཏོ ཝཱ ནིསིནྣསྶ ཨཱརདྡྷསྶ ཝཏྟོ སཾཝཏྟོ ཨེཏིསྶཱཏི ཀཏྭཱ ནིསིནྣཝཏྟིཀཱ ནཱམ, ཡཐཱརདྡྷསྶ ཨཏྠསྶ ཝིསུཾ ཝིསུཾ པརིཡོསཱནཱཔི ནིཡུཏྟཱཏི ཝུཏྟཾ ཧོཏི, སོདཱཧརཎཱ པན ཀཐཱ ཨངྒུཏྟརཊྛཀཐཱཡ ཏཊྚཱིཀཱཡཾ ཨེཀཱདསནིཔཱཏེ གོཔཱལཀསུཏྟཝཎྞནཱཏོ གཧེཏབྦཱ.

བྷེདཀཐཱ ཏཏྭཀཐཱ, པརིཡཱཡཀཐཱཔི ཙ;

ཨིཏི ཨཏྠཀྐམེ ཝིདྭཱ, ཏིདྷཱ སཾཝཎྞནཾ ཝདེ.

ཏཏྠ པཀཏིཨཱདིཝིཙཱརཎཱ བྷེདཀཐཱ ཡཐཱ ‘‘བུཛ྄ཛྷཏཱིཏི བུདྡྷོ’’ཏིཨཱདི. སརཱུཔཝིཙཱརཎཱ ཏཏྭཀཐཱ ཡཐཱ ‘‘བུདྡྷོཏི ཡོ སོ བྷགཝཱ སཡམྦྷཱུ ཨནཱཙརིཡཀོ’’ཏིཨཱདི (མཧཱནི. ༡༩༢; ཙཱུལ༹ནི. ༩༧; པཊི. མ. ༡.༡༦༡). ཝེཝཙནཝིཙཱརཎཱ པརིཡཱཡཀཐཱ ཡཐཱ ‘‘བུདྡྷོ བྷགཝཱ སབྦཉྙཱུ ལོཀནཱཡཀོ’’ཏིཨཱདི (ནེཏྟི. ༣༨ ཝེཝཙནཱཧཱརཝིབྷངྒནིསྶིཏོ པཱལི༹).

པཡོཛནཉྩ པིཎྜཏྠོ, ཨནུསནྡྷི ཙ ཙོདནཱ;

པརིཧཱརོ ཙ སབྦཏྠ, པཉྩདྷཱ ཝཎྞནཾ ཝདེ.

ཏཏྠ ¶ ¶ པཡོཛནཾ ནཱམ དེསནཱཕལཾ, ཏཾ པན སུཏམཡཉཱཎཱདི. པིཎྜཏྠོ ནཱམ ཝིཔྤཀིཎྞསྶ ཨཏྠསྶ སུཝིཛཱནནཏྠཾ སམྤིཎྜེཏྭཱ ཀཐནཾ. ཨནུསནྡྷི ནཱམ པུཙྪཱནུསནྡྷཱདི. ཙོདནཱ ནཱམ ཡཐཱཝུཏྟསྶ ཝཙནསྶ ཝིརོདྷིཀཐནཾ. པརིཧཱརོ ནཱམ ཏསྶ ཨཝིརོདྷིཀཐནཾ.

ཨུམྨུགྒྷཱཏོ པདཉྩེཝ, པདཏྠོ པདཝིགྒཧོ;

ཙཱལནཱ པཙྩུཔཊྛཱནཾ, ཚདྷཱ སཾཝཎྞནཾ ཝདེ. (ཝཛིར. ཊཱི. པཋམམཧཱསངྒཱིཏིཝཎྞནཱ);

ཏཏྠ ཨཛ྄ཛྷཏྟིཀཱདིནིདཱནཾ ཨུམྨུགྒྷཱཏོ. ‘‘ཨེཝམིད’’ནྟི ནཱནཱཝིདྷེན པདཝིསེསཏཱཀཐནཾ པདཾ, སདྡཏྠཱདྷིཔྤཱཡཏྠཱདི པདཏྠོ. ཨནེཀདྷཱ ནིབྦཙནཾ པདཝིགྒཧོ. ཙཱལནཱ ནཱམ ཙོདནཱ. པཙྩུཔཊྛཱནཾ པརིཧཱརོ.

སམུཊྛཱནཾ པདཏྠོ ཙ, བྷཱཝཱནུཝཱདཝིདྷཡོ;

ཝིརོདྷོ པརིཧཱརོ ཙ, ནིགམནནྟི ཨཊྛདྷཱ.

ཏཏྠ སམུཊྛཱནནྟི ཨཛ྄ཛྷཏྟིཀཱདིནིདཱནཾ. པདཏྠོཏི ཨདྷིཔྤེཏཱནདྷིཔྤེཏཱདིཝསེན ཨནེཀདྷཱ པདསྶ ཨཏྠོ. བྷཱཝོཏི ཨདྷིཔྤཱཡོ. ཨནུཝཱདཝིདྷཡོཏི པཋམཝཙནཾ ཝིདྷི, ཏདཱཝིཀརཎཝསེན པཙྪཱ ཝཙནཾ ཨནུཝཱདོ, ཝིསེསནཝིསེསྱཱནཾ ཝཱ ཝིདྷཱནུཝཱད སམཉྙཱ. ཝིརོདྷོཏི ཨཏྠནིཙྪཡནཏྠཾ ཙོདནཱ. པརིཧཱརོཏི ཏསྶཱ སོདྷནཱ. ནིགམནནྟི ཨནུསནྡྷིཡཱ ཨནུརཱུཔཾ ཨཔྤནཱ.

ཨཱདིཏོ ཏསྶ ནིདཱནཾ, ཝཏྟབྦཾ ཏཔྤཡོཛནཾ;

པིཎྜཏྠོ ཙེཝ པདཏྠོ, སམྦནྡྷོ ཨདྷིཔྤཱཡཀོ;

ཙོདནཱ སོདྷནཱ ཙེཏི, ཨཊྛདྷཱ ཝཎྞནཾ ཝདེ.

ཏཏྠ སམྦནྡྷོ ནཱམ པུབྦཱཔརསམྦནྡྷོ, ཡོ ‘‘ཨནུསནྡྷཱི’’ཏི ཝུཙྩཏི. སེསཱ ཝུཏྟཏྠཱཝ, ཨེཝམཱདིནཱ ཏཏྠ ཏཏྠཱགཏེ སཾཝཎྞནཱཔྤཀཱརེ ཉཏྭཱ སབྦཏྠ ཡཐཱརཧཾ ཝིཙེཏབྦཱཏི.

ཨེཝམནེཀཏྠཔྤབྷེདཏཱ པཡོགཏོཝ ཉཱཏབྦཱཏི ཏབྦསེན ཏཾ སམཏྠེཏུཾ ‘‘ཏཐཱ ཧེསཱ’’ཏིཨཱདི ཝུཏྟཾ. ཨཐ ཝཱ ཨཡཾ སདྡོ ཨིམསྶཏྠསྶ ཝཱཙཀོཏི སངྐེཏཝཝཏྠིཏཱཡེཝ སདྡཱ ཏཾ ཏདཏྠསྶ ཝཱཙཀཱ ¶ , སངྐེཏོ ཙ ནཱམ པཡོགཝསེན སིདྡྷོཏི དསྶེཏུམྤི ཨིདཾ ཝུཏྟནྟི དཊྛབྦཾ. ཨེཝམཱིདིསེསུ. ནནུ ཙ –

‘‘ཡཐཱཔི ¶ པུཔྥརཱསིམྷཱ, ཀཡིརཱ མཱལཱགུཎེ བཧཱུ;

ཨེཝཾ ཛཱཏེན མཙྩེན, ཀཏྟབྦཾ ཀུསལཾ བཧུ’’ནྟི. (དྷ. པ. ༥༣);

ཨེཏྠ ཨེཝཾ-སདྡེན ཨུཔམཱཀཱརསྶེཝ ཝུཏྟཏྟཱ ཨཱཀཱརཏྠོཡེཝ ཨེཝཾ-སདྡོ སིཡཱཏི? ན, ཝིསེསསབྦྷཱཝཏོ. ‘‘ཨེཝཾ བྱཱ ཁོ’’ཏིཨཱདཱིསུ (མ. ནི. ༢༣༤, ༣༩༦) ཧི ཨཱཀཱརམཏྟཝཱཙཀོཡེཝ ཨཱཀཱརཏྠོཏི ཨདྷིཔྤེཏོ, ན པན ཨཱཀཱརཝིསེསཝཱཙཀོ. ཨེཏྠ ཧི ཀིཉྩཱཔི པུཔྥརཱསིསདིསཏོ མནུསྶཱུཔཔཏྟི སཔྤུརིསཱུཔནིསྶཡ སདྡྷམྨསཝན ཡོནིསོམནསིཀཱརབྷོགསམྤཏྟིཨཱདིདཱནཱདིཔུཉྙཀིརིཡཱཧེཏུསམུདཱཡཏོ སོབྷཱསུགནྡྷཏཱདིགུཎཡོགེན མཱལཱགུཎསདིསིཡོ བཧུཀཱ པུཉྙཀིརིཡཱ མརིཏབྦསབྷཱཝཏཱཡ མཙྩེན སཏྟེན ཀཏྟབྦཱཏི ཨཏྠསྶ ཛོཏིཏཏྟཱ པུཔྥརཱསིམཱལཱགུཎཱཝ ཨུཔམཱ ནཱམ ཨུཔམཱིཡཏི ཨེཏཱཡཱཏི ཀཏྭཱ, ཏེསཾ ཨུཔམཱཀཱརོ ཙ ཡཐཱསདྡེན ཨནིཡམཏོ ཛོཏིཏོ, ཏསྨཱ ‘‘ཨེཝཾ-སདྡོ ནིཡམཏོ ཨུཔམཱཀཱརནིགམནཏྠོ’’ཏི ཝཏྟུཾ ཡུཏྟཾ, ཏཐཱཔི སོ ཨུཔམཱཀཱརོ ནིཡམིཡམཱནོ ཨཏྠཏོ ཨུཔམཱཝ ཧོཏི ནིསྶཡབྷཱུཏཾ ཏམནྟརེན ནིསྶིཏབྷཱུཏསྶ ཨུཔམཱཀཱརསྶ ཨལབྦྷམཱནཏྟཱཏི ཨདྷིཔྤཱཡེནཱཧ ‘‘ཨུཔམཱཡཾ ཨཱགཏོ’’ཏི. ཨཐ ཝཱ ཨུཔམཱིཡནཾ སདིསཱིཀརཎནྟི ཀཏྭཱ པུཔྥརཱསིམཱལཱགུཎེཧི སདིསབྷཱཝསངྑཱཏོ ཨུཔམཱཀཱརོཡེཝ ཨུཔམཱ ནཱམ. ‘‘སདྡྷམྨཏྟཾ སིཡོཔམཱ’’ཏི ཧི ཝུཏྟཾ, ཏསྨཱ ཨཱཀཱརམཏྟཝཱཙཀོཝ ཨཱཀཱརཏྠོ ཨེཝཾ-སདྡོ. ཨུཔམཱསངྑཱཏཨཱཀཱརཝིསེསཝཱཙཀོ པན ཨུཔམཱཏྠོཡེཝཱཏི ཝུཏྟཾ ‘‘ཨུཔམཱཡཾ ཨཱགཏོ’’ཏི.

ཏཐཱ ‘‘ཨེཝཾ ཨིམིནཱ ཨཱཀཱརེན ཨབྷིཀྐམིཏབྦ’’ནྟིཨཱདིནཱ ཨུཔདིསིཡམཱནཱཡ སམཎསཱརུཔྤཱཡ ཨཱཀཔྤསམྤཏྟིཡཱ ཨུཔདིསནཱཀཱརོཔི ཨཏྠཏོ ཨུཔདེསོཡེཝཱཏི ཨཱཧ ‘‘ཨེཝཾ…པེ… ཨུཔདེསེ’’ཏི. ཨེཝམེཏནྟི ཨེཏྠ པན བྷགཝཏཱ ཡཐཱཝུཏྟམཏྠཾ ཨཝིཔརཱིཏཏོ ཛཱནནྟེཧི ཀཏཾ ཏཏྠ སཾཝིཛྫམཱནགུཎཱནཾ པཀཱརེཧི ཧཾསནཾ ཨུདགྒཏཱཀརཎཾ སམྤཧཾསནཾ. ཏཏྠ སམྤཧཾསནཱཀཱརོཔི ཨཏྠཏོ སམྤཧཾསནམེཝཱཏི ཝུཏྟཾ ‘‘སམྤཧཾསནེཏི. ཨེཝམེཝ པནཱཡནྟི ཨེཏྠ ཙ དོསཝིབྷཱཝནེན གཱརཡ྄ཧཝཙནཾ གརཧཎཾ, ཏདཱཀཱརོཔི ཨཏྠཏོ གརཧཎཾ ནཱམ, ཏསྨཱ ‘‘གརཧཎེ’’ཏི ¶ ཝུཏྟཾ. སོ ཙེཏྠ གརཧཎཱཀཱརོ ‘‘ཝསལཱི’’ཏིཨཱདིཁུཾསནསདྡསནྣིདྷཱནཏོ ཨེཝཾ-སདྡེན པཀཱསིཏོཏི ཝིཉྙཱཡཏི, ཡཐཱ ཙེཏྠ ཨེཝཾ ཨུཔམཱཀཱརཱདཡོཔི ཨུཔམཱདིཝསེན ཝུཏྟཱནཾ པུཔྥརཱསིཨཱདིསདྡཱནཾ སནྣིདྷཱནཏོཏི དཊྛབྦཾ. ཛོཏཀམཏྟཱ ཧི ནིཔཱཏཱཏི. ཨེཝམེཝཱཏི ཙ ཨདྷུནཱ བྷཱསིཏཱཀཱརེནེཝ. ཨཡཾ ¶ ཝསལགུཎཡོགཏོ ཝསལཱི ཀཱལ༹ཀཎྞཱི ཡསྨིཾ ཝཱ ཏསྨིཾ ཝཱ ཋཱནེ བྷཱསཏཱིཏི སམྦནྡྷོ. ཨེཝཾ བྷནྟེཏི སཱདྷུ བྷནྟེ, སུཊྛུ བྷནྟེཏི ཝུཏྟཾ ཧོཏི. ཨེཏྠ པན དྷམྨསྶ སཱདྷུཀཾ སཝནམནསིཀཱརེ སནྣིཡོཛིཏེཧི བྷིཀྑཱུཧི ཏཏྠ ཨཏྟནོ ཋིཏབྷཱཝསྶ པཊིཛཱནནམེཝ ཝཙནསམྤཊིགྒཧོ, ཏདཱཀཱརོཔི ཨཏྠཏོ ཝཙནསམྤཊིགྒཧོཡེཝ ནཱམ, ཏེནཱཧ ‘‘ཝཙནསམྤཊིགྒཧེ’’ཏི.

ཨེཝཾ བྱཱ ཁོཏི ཨེཝཾ ཝིཡ ཁོ. ཨེཝཾ ཁོཏི ཧི ཨིམེསཾ པདཱནམནྟརེ ཝིཡསདྡསྶ བྱཱཔདེསོཏི ནེརུཏྟིཀཱ ‘‘ཝ-ཀཱརསྶ, བ-ཀཱརཾ, ཡ-ཀཱརསཾཡོགཉྩ ཀཏྭཱ དཱིགྷཝསེན པདསིདྡྷཱི’’ཏིཔི ཝདནྟི. ཨཱཀཱརེཏི ཨཱཀཱརམཏྟེ. ཨཔྤཱབཱདྷནྟི ཝིསབྷཱགཝེདནཱབྷཱཝཾ. ཨཔྤཱཏངྐནྟི ཀིཙྪཛཱིཝིཏཀརརོགཱབྷཱཝཾ. ལཧུཊྛཱནནྟི ནིགྒེལཉྙཏཱཡ ལཧུཏཱཡུཏྟཾ ཨུཊྛཱནཾ. བལནྟི ཀཱཡབལཾ. ཕཱསུཝིཧཱརནྟི ཙཏཱུསུ ཨིརིཡཱཔཐེསུ སུཁཝིཧཱརཾ. ཝིཏྠཱརོ དསམ སུབྷསུཏྟཊྛཀཐཱཡ མེཝ (དཱི. ནི. ཨཊྛ. ༡.༤༤༥) ཨཱཝི བྷཝིསྶཏི. ཨེཝཉྩ ཝདེཧཱིཏི ཡཐཱཧཾ ཝདཱམི, ཨེཝམྤི སམཎཾ ཨཱནནྡཾ ཝདེཧི. ‘‘སཱདྷུ ཀིར བྷཝ’’ནྟིཨཱདིཀཾ ཨིདཱནི ཝཏྟབྦཝཙནཾ, སོ ཙ ཝདནཱཀཱརོ ཨིདྷ ཨེཝཾ-སདྡེན ནིདསྶཱིཡཏཱིཏི ཝུཏྟཾ ‘‘ནིདསྶནེ’’ཏི. ཀཱལཱམཱཏི ཀཱལཱམགོཏྟསམྦནྡྷེ ཛནེ ཨཱལཔཏི. ‘‘ཨིམེ…པེ… ཝཱ’’ཏི ཡཾ མཡཱ ཝུཏྟཾ, ཏཾ ཀིཾ མཉྙཐཱཏི ཨཏྠོ. སམཏྟཱཏི པརིཔཱུརིཏཱ. སམཱདིནྣཱཏི སམཱདིཡིཏཱ. སཾཝཏྟནྟི ཝཱ ནོ ཝཱ སཾཝཏྟནྟི ཨེཏྠ ཝཙནདྭཡེ ཀཐཾ ཝོ ཏུམྷཱཀཾ མཏི ཧོཏཱིཏི ཡོཛེཏབྦཾ. ཨེཝཾ ནོཏི ཨེཝམེཝ ཨམྷཱཀཾ མཏི ཨེཏྠ ཧོཏི, ཨམྷཱཀམེཏྠ མཏི ཧོཏི ཡེཝཱཏིཔི ཨཏྠོ. ཨེཏྠ ཙ ཏེསཾ ཡཐཱཝུཏྟདྷམྨཱནཾ ཨཧིཏདུཀྑཱཝཧབྷཱཝེ སནྣིཊྛཱནཛནནཏྠཾ ཨནུམཏིགྒཧཎཝསེན ‘‘སཾཝཏྟནྟི ནོ ཝཱ, ཀཐཾ ཝོ ཨེཏྠ ཧོཏཱི’’ཏི པུཙྪཱཡ ཀཏཱཡ ‘‘ཨེཝཾ ནོ ཨེཏྠ ཧོཏཱི’’ཏི ཝུཏྟཏྟཱ ཏདཱཀཱརསནྣིཊྛཱནཾ ཨེཝཾ-སདྡེན ཝིབྷཱཝིཏཾ, སོ ཙ ཏེསཾ དྷམྨཱནཾ ཨཧིཏཱཡ དུཀྑཱཡ སཾཝཏྟནཱཀཱརོ ནིཡམིཡམཱནོ ཨཏྠཏོ ¶ ཨཝདྷཱརཎམེཝཱཏི ཝུཏྟཾ ‘‘ཨཝདྷཱརཎེ’’ཏི. ཨཱཀཱརཏྠམཉྙཏྲ སབྦཏྠ ཝུཏྟནཡེན ཙོདནཱ, སོདྷནཱ ཙ ཝེདིཏབྦཱ.

ཨཱདིསདྡེན ཙེཏྠ ཨིདམཏྠཔུཙྪཱཔརིམཱཎཱདིཨཏྠཱནཾ སངྒཧོ དཊྛབྦོ. ཏཐཱ ཧི ‘‘ཨེཝཾགཏཱནི, ཨེཝཾཝིདྷོ, ཨེཝམཱཀཱརོ’’ཏི ཙ ཨཱདཱིསུ ཨིདམཏྠེ, གཏཝིདྷཱཀཱརསདྡཱ པན པཀཱརཔརིཡཱཡཱ. གཏཝིདྷཡུཏྟཱཀཱརསདྡེ ཧི ལོཀིཡཱ པཀཱརཏྠེ ཝདནྟི. ‘‘ཨེཝཾ སུ ཏེ སུནྷཱཏཱ སུཝིལིཏྟཱ ཀཔྤིཏཀེསམསྶཱུ ཨཱམུཏྟམཎིཀུཎྜལཱབྷརཎཱ ཨོདཱཏཝཏྠཝསནཱ པཉྩཧི ཀཱམགུཎེཧི སམཔྤིཏཱ སམངྒཱིབྷཱུཏཱ པརིཙཱརེནྟི, སེཡྻཐཱཔི ཏྭཾ ཨེཏརཧི སཱཙརིཡཀོཏི? ནོ ཧིདཾ བྷོ གོཏམཱ’’ཏིཨཱདཱིསུ (དཱི. ནི. ༡.༢༨༦) པུཙྪཱཡཾ. ‘‘ཨེཝཾ ལཧུཔརིཝཏྟཾ (ཨ. ནི. ༡.༤༨), ཨེཝམཱཡུཔརིཡནྟོ’’ཏི ¶ (པཱརཱ. ༡༢) ཙ ཨཱདཱིསུ པརིམཱཎེ. ཨེཏྠཱཔི ‘‘སུནྷཱཏཱ སུཝིལིཏྟཱ’’ཏིཨཱདིཝཙནཾ པུཙྪཱ, ལཧུཔརིཝཏྟཾ, ཨཱཡཱུནཾ པམཱཎཉྩ པརིམཱཎཾ, ཏདཱཀཱརོཔི ཨཏྠཏོ པུཙྪཱ ཙ པརིམཱཎཉྩ ནཱམ, ཏསྨཱ ཨེཏེསུ པུཙྪཏྠོ, པརིམཱཎཏྠོ ཙ ཨེཝཾསདྡོ ཝེདིཏབྦོཏི. ཨིདྷ པན སོ ཀཏམེསུ བྷཝཏི, སབྦཏྠ ཝཱ, ཨནིཡམཏོ པདེསེ ཝཱཏི ཙོདནཱཡ ‘‘སྭཱཡམིདྷཱ’’ཏིཨཱདི ཝུཏྟཾ.

ནནུ ཨེཀསྨིཾཡེཝ ཨཏྠེ སིཡཱ, ཀསྨཱ ཏཱིསུཔཱིཏི ཙ, ཧོཏུ ཏིབྦིདྷེསུ ཨཏྠེསུ, ཀེན ཀིམཏྠཾ དཱིཔེཏཱིཏི ཙ ཨནུཡོགཾ པརིཧརནྟོ ‘‘ཏཏྠཱ’’ཏིཨཱདིམཱཧ. ཏཏྠཱཏི ཏེསུ ཏཱིསུ ཨཏྠེསུ. ཨེཀཏྟནཱནཏྟཨབྱཱཔཱརཨེཝཾདྷམྨཏཱསངྑཱཏཱ, ནནྡིཡཱཝཏྟཏིཔུཀྑལསཱིཧཝིཀྐཱིལི༹ཏཨངྐུསདིསཱལོཙནསངྑཱཏཱ ཝཱ ཨཱདྷཱརཱདིབྷེདཝསེན ནཱནཱཝིདྷཱ ནཡཱ ནཱནཱནཡཱ, པཱལི༹གཏིཡོ ཝཱ ནཡཱ, ཏཱ ཙ པཉྙཏྟིཨནུཔཉྙཏྟི ཨཱདིཝསེན, སངྑེཔཝིཏྠཱརཱདིཝསེན, སཾཀིལེསབྷཱགིཡཱདིལོཀིཡཱདིཏདུབྷཡཝོམིསྶཀཱདིཝསེན, ཀུསལཱདིཝསེན, ཁནྡྷཱདིཝསེན, སངྒཧཱདིཝསེན, སམཡཝིམུཏྟཱདིཝསེན, ཋཔནཱདིཝསེན, ཀུསལམཱུལཱདིཝསེན, ཏིཀཔཊྛཱནཱདིཝསེན ཙ པིཊཀཏྟཡཱནུརཱུཔཾ ནཱནཱཔྤཀཱརཱཏི ནཱནཱནཡཱ. ཏེཧི ནིཔུཎཾ སཎྷཾ སུཁུམཾ ཏཐཱ. ཨཱསཡོཝ ཨཛ྄ཛྷཱསཡོ, ཏེ ཙ སསྶཏཱདིབྷེདེན, ཏཏྠ ཙ ཨཔྤརཛཀྑཏཱདིཝསེན ཨནེཀཱ, ཨཏྟཛ྄ཛྷཱསཡཱདཡོ ཨེཝ ཝཱ སམུཊྛཱནམུཔྤཏྟིཧེཏུ ཨེཏསྶཱཏི ཏཐཱ, ཨུཔནེཏབྦཱབྷཱཝཏོ ཨཏྠབྱཉྫནེ ¶ ཧི སམྤནྣཾ པརིཔུཎྞཾ ཏཐཱ. ཨཔིཙ སངྐཱསནཔཀཱསནཝིཝརཎཝིབྷཛནཨུཏྟཱནཱིཀརཎཔཉྙཏྟིཝསེན ཚཧི ཨཏྠཔདེཧི, ཨཀྑརཔདབྱཉྫནཨཱཀཱརནིརུཏྟིནིདྡེསཝསེན ཚཧི བྱཉྫནཔདེཧི ཙ སམྤནྣཾ སམནྣཱགཏཾ ཏཐཱ. ཨཐ ཝཱ ཝིཉྙཱུནཾ ཧདཡངྒམཏོ, སཝནེ ཨཏིཏྟིཛནནཏོ, བྱཉྫནརསཝསེན པརམགམྦྷཱིརབྷཱཝཏོ, ཝིཙཱརཎེ ཨཏིཏྟིཛནནཏོ, ཨཏྠརསཝསེན ཙ སམྤནྣཾ སཱདུརསཾ ཏཐཱ.

པཱཊིཧཱརིཡཔདསྶ ཝཙནཏྠཾ ‘‘པཊིཔཀྑཧརཎཏོ རཱགཱདིཀིལེསཱཔནཡནཏོ པཱཊིཧཱརིཡ’’ནྟི ཝདནྟི. བྷགཝཏོ པན པཊིཔཀྑཱ རཱགཱདཡོ ན སནྟི, ཡེ ཧརིཏབྦཱ བོདྷིམཱུལེཡེཝ སཝཱསནསཀལསཾཀིལེསཱནཾ པཧཱིནཏྟཱ. པུཐུཛྫནཱནམྤི ཙ ཝིགཏཱུཔཀྐིལེསེ ཨཊྛགུཎསམནྣཱགཏེ ཙིཏྟེ ཧཏཔཊིཔཀྑེ སཏིཡེཝ ཨིདྡྷིཝིདྷཾ པཝཏྟཏི, ཏསྨཱ པུཐུཛྫནེསུ པཝཏྟཝོཧཱརེནཔི ན སཀྐཱ ཨིདྷ ‘‘པཱཊིཧཱརིཡ’’ནྟི ཝཏྟུཾ, སཙེ པན མཧཱཀཱརུཎིཀསྶ བྷགཝཏོ ཝེནེཡྻགཏཱཝ ཀིལེསཱ པཊིཔཀྑཱ སཾསཱརཔངྐནིམུགྒསྶ སཏྟནིཀཱཡསྶ སམུདྡྷརིཏུཀཱམཏོ, ཏསྨཱ ཏེསཾ ཝེནེཡྻགཏཀིལེསསངྑཱཏཱནཾ པཊིཔཀྑཱནཾ ཧརཎཏོ པཱཊིཧཱརིཡནྟི ཝུཏྟཾ ཨསྶ, ཨེཝཾ སཏི ཡུཏྟམེཏཾ.

ཨཐ ¶ ཝཱ བྷགཝཏོ སཱསནསྶ པཊིཔཀྑཱ ཏིཏྠིཡཱ, ཏེསཾ ཏིཏྠིཡབྷཱུཏཱནཾ པཊིཔཀྑཱནཾ ཧརཎཏོ པཱཊིཧཱརིཡནྟིཔི ཡུཛྫཏི. ཀཱམཉྩེཏྠ ཏིཏྠིཡཱ ཧརིཏབྦཱ ནཱསྶུ, ཏེསཾ པན སནྟཱནགཏདིཊྛིཧརཎཝསེན དིཊྛིཔྤཀཱསནེ ཨསམཏྠཏཱཀཱརཎེན ཙ ཨིདྡྷིཨཱདེསནཱནུསཱསནཱིསངྑཱཏེཧི ཏཱིཧིཔི པཱཊིཧཱརིཡེཧི ཏེ ཧརིཏཱ ཨཔནཱིཏཱ ནཱམ ཧོནྟི. པཊཱིཏི ཝཱ ཨཡཾ སདྡོ ‘‘པཙྪཱ’’ཏི ཨེཏསྶ ཨཏྠཾ བོདྷེཏི ‘‘ཏསྨིཾ པཊིཔཝིཊྛམྷི, ཨཉྙོ ཨཱགཉྪི བྲཱཧྨཎོ’’ཏིཨཱདཱིསུ (སུ. ནི. ༩༨༥; ཙཱུལ༹ནི. ༤) ཝིཡ, ཏསྨཱ སམཱཧིཏེ ཙིཏྟེ ཝིགཏཱུཔཀླེསེ ཀཏཀིཙྩེན པཙྪཱ ཧརིཏབྦཾ པཝཏྟེཏབྦནྟི པཊིཧཱརིཡཾ, ཏདེཝ དཱིགྷཝསེན, སཀཏྠཝུཏྟིཔཙྩཡཝསེན ཝཱ པཱཊིཧཱརིཡཾ, ཨཏྟནོ ཝཱ ཨུཔཀླེསེསུ ཙཏུཏྠཛ྄ཛྷཱནམགྒེཧི ཧརིཏེསུ པཙྪཱ ཏདཉྙེསཾ ཧརཎཾ པཱཊིཧཱརིཡཾ ཝུཏྟནཡེན. ཨིདྡྷིཨཱདེསནཱནུསཱསནིཡོ ཧི ཝིགཏཱུཔཀླེསེན, ཀཏཀིཙྩེན ཙ སཏྟཧིཏཏྠཾ པུན པཝཏྟེཏབྦཱ, ཧཏེསུ ཙ ཨཏྟནོ ཨུཔཀླེསེསུ པརསཏྟཱནཾ ཨུཔཀླེསཧརཎཱནི ཙ ཧོནྟཱིཏི ཏདུབྷཡམྤི ནིབྦཙནཾ ཡུཛྫཏི.

ཨཔིཙ ¶ ཡཐཱཝུཏྟེཧི ནིབྦཙནེཧི ཨིདྡྷིཨཱདེསནཱནུསཱསནཱིསངྑཱཏོ སམུདཱཡོ པཊིཧཱརིཡཾ ནཱམ. ཨེཀེཀཾ པན ཏསྨིཾ བྷཝཾ ‘‘པཱཊིཧཱརིཡ’’ནྟི ཝུཙྩཏི ཝིསེསཏྠཛོཏཀཔཙྩཡནྟརེན སདྡརཙནཱཝིསེསསམྦྷཝཏོ, པཊིཧཱརིཡཾ ཝཱ ཙཏུཏྠཛ྄ཛྷཱནཾ, མགྒོ ཙ པཊིཔཀྑཧརཎཏོ, ཏཏྠ ཛཱཏཾ, ཏསྨིཾ ཝཱ ནིམིཏྟབྷཱུཏེ, ཏཏོ ཝཱ ཨཱགཏནྟི པཱཊིཧཱརིཡཾ. ཝིཙིཏྲཱ ཧི ཏདྡྷིཏཝུཏྟི. ཏསྶ པན ཨིདྡྷིཨཱདེསནཱནུསཱསནཱིབྷེདེན, ཝིསཡབྷེདེན ཙ བཧུཝིདྷསྶ བྷགཝཏོ དེསནཱཡ ལབྦྷམཱནཏྟཱ ‘‘ཝིཝིདྷཔཱཊིཧཱརིཡནྟི ཝུཏྟཾ. བྷགཝཱ ཧི ཀདཱཙི ཨིདྡྷིཝསེནཱཔི དེསནཾ ཀརོཏི ནིམྨིཏབུདྡྷེན སཧ པུཙྪཱཝིསྶཛྫནཱདཱིསུ, ཀདཱཙི ཨཱདེསནཱཝསེནཱཔི ཨཱམགནྡྷབྲཱཧྨཎསྶ དྷམྨདེསནཱདཱིསུ (སུ. ནི. ཨཊྛ. ༡.༢༤༡), ཡེབྷུཡྻེན པན ཨནུསཱསནིཡཱ. ཨནུསཱསནཱིཔཱཊིཧཱརིཡཉྷི བུདྡྷཱནཾ སཏཏཾ དྷམྨདེསནཱ. ཨིཏི ཏཾཏཾདེསནཱཀཱརེན ཨནེཀཝིདྷཔཱཊིཧཱརིཡཏཱ དེསནཱཡ ལབྦྷཏི. ཨཡམཏྠོ ཨུཔརི ཨེཀཱདསམསྶ ཀེཝཊྚསུཏྟསྶ ཝཎྞནཱཡ (དཱི. ནི. ཨཊྛ. ༡.༤༨༡) ཨཱཝི བྷཝིསྶཏི. ཨཐ ཝཱ ཏསྶ ཝིཝིདྷསྶཱཔི པཱཊིཧཱརིཡསྶ བྷགཝཏོ དེསནཱཡ སཾསཱུཙནཏོ ‘‘ཝིཝིདྷཔཱཊིཧཱརིཡ’’ནྟི ཝུཏྟཾ, ཨནེཀཝིདྷཔཱཊིཧཱརིཡདསྶནནྟི ཨཏྠོ.

དྷམྨནིརུཏྟིཡཱཝ བྷགཝཏི དྷམྨཾ དེསེནྟེ སབྦེསཾ སུཎནྟཱནཾ ནཱནཱབྷཱསིཏཱནཾ ཏཾཏཾབྷཱསཱནུརཱུཔཏོ དེསནཱ སོཏཔཐམཱགཙྪཏཱིཏི ཨཱཧ ‘‘སབྦ…པེ… མཱགཙྪནྟ’’ནྟི. སོཏམེཝ སོཏཔཐོ, སཝནཾ ཝཱ སོཏཾ, ཏསྶ པཐོ ཏཐཱ, སོཏདྭཱརནྟི ཨཏྠོ. སབྦཱཀཱརེནཱཏི ཡཐཱདེསིཏཱཀཱརེན. ཀོ སམཏྠོ ཝིཉྙཱཏུཾ, ཨསམཏྠོཡེཝ, ཏསྨཱཏི པཱཋསེསོ. པནཱཏི ཨེཀཾསཏྠེ ¶ , ཏེན སདྡྷཱསཏིདྷིཏིཝཱིརིཡཱདིབལསངྑཱཏེན སབྦཐཱམེན ཨེཀཾསེནེཝ སོཏུཀཱམཏཱསངྑཱཏཀུསལཙྪནྡསྶ ཛནནཾ དསྶེཏི. ཛནེཏྭཱཔཱིཏི ཨེཏྠ པི-སདྡོ, ཨཔི-སདྡོ ཝཱ སམྦྷཱཝནཏྠོ ‘‘བུདྡྷོཔི བུདྡྷབྷཱཝཾ བྷཱཝེཏྭཱ’’ཏིཨཱདཱིསུ (དཱི. ནི. ཨཊྛ ༡; མ. ནི. ཨཊྛ. ༡; སཾ. ནི. ཨཊྛ. ༡; ཨ. ནི. ཨཊྛ ༡.པཋམགནྠཱརམྦྷཀཐཱ) ཝིཡ, ཏེན ‘‘སབྦཐཱམེན ཨེཀཾསེནེཝ སོཏུཀཱམཏཾ ཛནེཏྭཱཔི ནཱམ ཨེཀེནཱཀཱརེན སུཏཾ, ཀིམངྒཾ པན ཨཉྙཐཱ’’ཏི ཏཐཱསུཏེ དྷམྨེ སམྦྷཱཝནཾ ཀརོཏི. ཀེཙི པན ‘‘ཨེདིསེསུ གརཧཏྠོ’’ཏི ཝདནྟི, ཏདཡུཏྟམེཝ གརཧཏྠསྶ ཨཝིཛྫམཱནཏྟཱ, ཝིཛྫམཱནཏྠསྶེཝ ཙ ཨུཔསགྒནིཔཱཏཱནཾ ཛོཏཀཏྟཱ. ‘‘ནཱནཱནཡནིཔུཎ’’ནྟིཨཱདིནཱ ¶ ཧི སབྦཔྤཀཱརེན སོཏུམསཀྐུཎེཡྻབྷཱཝེན དྷམྨསྶ ཨིདྷ སམྦྷཱཝནམེཝ ཀརོཏི, ཏསྨཱ ‘‘ཨཔི དིབྦེསུ ཀཱམེསུ, རཏིཾ སོ ནཱདྷིགཙྪཏཱི’’ཏིཨཱདཱིསུཡེཝ (དྷ. པ. ༡༨༧) གརཧཏྠསམྦྷཝེསུ གརཧཏྠོ ཝེདིཏབྦོཏི. ཨཔི-སདྡོ ཙ ཨཱིདིསེསུ ཋཱནེསུ ནིཔཱཏོཡེཝ, ན ཨུཔསགྒོ. ཏཐཱ ཧི ‘‘ཨཔི-སདྡོ ཙ ནིཔཱཏཔཀྑིཀོ ཀཱཏབྦོ, ཡཏྠ ཀིརིཡཱཝཱཙཀཏོ པུབྦོ ན ཧོཏཱི’’ཏི ཨཀྑརཙིནྟཀཱ ཝདནྟི. མཡཱཔཱིཏི ཨེཏྠ པན ན ཀེཝལཾ མཡཱཝ, ཨཐ ཁོ ཨཉྙེཧིཔི ཏཐཱརཱུཔེཧཱིཏི སམྤིཎྜནཏྠོ གཧེཏབྦོ.

སཱམཾ བྷཝཏཱིཏི སཡམྦྷཱུ, ཨནཱཙརིཡཀོ. ན མཡཾ ཨིདཾ སཙྪིཀཏནྟི ཨེཏྠ པན ‘‘ན ཨཏྟནོ ཉཱཎེནེཝ ཨཏྟནཱ སཙྪིཀཏ’’ནྟི པཀརཎཏོ ཨཏྠོ ཝིཉྙཱཡཏི. སཱམཉྙཝཙནསྶཱཔི ཧི སམྤཡོགཝིཔྤཡོགསཧཙརཎཝིརོདྷསདྡནྟརསནྣིདྷཱནལིངྒཨོཙིཏྱཀཱལདེསཔཀརཎཱདིཝསེན ཝིསེསཏྠགྒཧཎཾ སམྦྷཝཏི. ཨེཝཾ སབྦཏྠ. པརིམོཙེནྟོཏི ‘‘པུན ཙཔརཾ བྷིཀྑཝེ, ཨིདྷེཀཙྩོ པཱཔབྷིཀྑུ ཏཐཱགཏཔྤཝེདིཏཾ དྷམྨཝིནཡཾ པརིཡཱཔུཎིཏྭཱ ཨཏྟནོ དཧཏཱི’’ཏི (པཱརཱ. ༡༩༥) ཝུཏྟདོསཏོ པརིམོཙཱཔནཧེཏུ. ཧེཏྭཏྠེ ཧི ཨནྟ-སདྡོ ‘‘ཨསམྦུདྷཾ བུདྡྷནིསེཝིཏ’’ནྟིཨཱདཱིསུ (ཝི. ཨཊྛ. ༡.གནྠཱརམྦྷཀཐཱ) ཝིཡ. ཨིམསྶ སུཏྟསྶ སཾཝཎྞནཱཔྤཀཱརཝིཙཱརཎེན ཨཏྟནོ ཉཱཎསྶ པཙྩཀྑཏཾ སནྡྷཱཡ ‘‘ཨིདཱནི ཝཏྟབྦ’’ནྟི ཝུཏྟཾ. ཨེསཱ ཧི སཾཝཎྞནཱཀཱརཱནཾ པཀཏི, ཡདིདཾ སཾཝཎྞེཏབྦདྷམྨེ སབྦཏྠ ‘‘ཨཡམིམསྶ ཨཏྠོ, ཨེཝམིདྷ སཾཝཎྞཡིསྶཱམཱི’’ཏི པུརེཏརམེཝ སཾཝཎྞནཱཔྤཀཱརཝིཙཱརཎཱ.

ཨེཏདགྒཔདསྶཏྠོ ཝུཏྟོཝ. ‘‘བཧུསྶུཏཱན’’ནྟིཨཱདཱིསུ པན ཨཉྙེཔི ཐེརཱ བཧུསྶུཏཱ, སཏིམནྟོ, གཏིམནྟོ, དྷིཏིམནྟོ, ཨུཔཊྛཱཀཱ ཙ ཨཏྠི, ཨཡཾ པནཱཡསྨཱ བུདྡྷཝཙནཾ གཎྷནྟོ དསབལསྶ སཱསནེ བྷཎྜཱགཱརིཀཔརིཡཏྟིཡཾ ཋཏྭཱ གཎྷི, ཏསྨཱ བཧུསྶུཏཱནཾ ཨགྒོ ནཱམ ཛཱཏོ. ཨིམསྶ ཙ ཐེརསྶ བུདྡྷཝཙནཾ ཨུགྒཧེཏྭཱ དྷཱརཎསཏི ཨཉྙེཧི ཐེརེཧི བལཝཏརཱ ཨཧོསི, ཏསྨཱ སཏིམནྟཱནཾ ཨགྒོ ནཱམ ཛཱཏོ. ཨཡམེཝཱཡསྨཱ ཨེཀཔདེ ཋཏྭཱ སཊྛིཔདསཧསྶཱནི ¶ གཎྷནྟོ སཏྠཱརཱ ཀཐིཏནིཡཱམེན སབྦཔདཱནི ཛཱནཱཏི, ཏསྨཱ གཏིམནྟཱནཾ ཨགྒོ ནཱམ ཛཱཏོ ¶ . ཏསྶེཝ ཙཱཡསྨཏོ བུདྡྷཝཙནཾ ཨུགྒཎྷནཝཱིརིཡཾ, སཛ྄ཛྷཱཡནཝཱིརིཡཉྩ ཨཉྙེཧི ཨསདིསཾ ཨཧོསི, ཏསྨཱ དྷིཏིམནྟཱནཾ ཨགྒོ ནཱམ ཛཱཏོ. ཏཐཱགཏཾ ཨུཔཊྛཧནྟོ ཙེས ན ཨཉྙེསཾ ཨུཔཊྛཱཀབྷིཀྑཱུནཾ ཨུཔཊྛཧནཱཀཱརེན ཨུཔཊྛཧཏི. ཨཉྙེཔི ཧི ཏཐཱགཏཾ ཨུཔཊྛཧིཾསུ, ན ཙ པན བུདྡྷཱནཾ མནཾ གཧེཏྭཱ ཨུཔཊྛཧིཏུཾ སཀྐོནྟི, ཨཡཾ པན ཐེརོ ཨུཔཊྛཱཀཊྛཱནཾ ལདྡྷདིཝསཏོ པཊྛཱཡ ཨཱརདྡྷཝཱིརིཡོ ཧུཏྭཱ ཏཐཱགཏསྶ མནཾ གཧེཏྭཱ ཨུཔཊྛཧི, ཏསྨཱ ཨུཔཊྛཱཀཱནཾ ཨགྒོ ནཱམ ཛཱཏོ. ཨཏྠཀུསལོཏི བྷཱསིཏཏྠེ, པཡོཛནཏྠེ ཙ ཚེཀོ. དྷམྨོཏི པཱལི༹དྷམྨོ, ནཱནཱཝིདྷོ ཝཱ ཧེཏུ. བྱཉྫནནྟི ཨཀྑརཾ ཨཏྠསྶ བྱཉྫནཏོ. པདེན ཧི བྱཉྫིཏོཔི ཨཏྠོ ཨཀྑརམཱུལཀཏྟཱ པདསྶ ‘‘ཨཀྑརེན བྱཉྫིཏོ’’ཏི ཝུཙྩཏི. ཨཏྠསྶ ཝིཡཉྫནཏོ ཝཱ ཝཱཀྱམྤི ཨིདྷ བྱཉྫནཾ ནཱམ. ཝཱཀྱེན ཧི ཨཏྠོ པརིཔུཎྞཾ བྱཉྫཱིཡཏི, ཡཏོ ‘‘བྱཉྫནེཧི ཝིཝརཏཱི’’ཏི ཨཱཡསྨཏཱ མཧཱཀཙྩཱཡནཏྠེརེན ཝུཏྟཾ. ནིརུཏྟཱིཏི ནིབྦཙནཾ, པཉྩཝིདྷཱ ཝཱ ནིརུཏྟིནཡཱ. ཏེསམྤི ཧི སདྡརཙནཱཝིསེསེན ཨཏྠཱདྷིགམཧེཏུཏོ ཨིདྷ གཧཎཾ ཡུཛྫཏི. པུབྦཱཔརཾ ནཱམ པུབྦཱཔརཱནུསནྡྷི, སུཏྟསྶ ཝཱ པུབྦབྷཱགེན ཨཔརབྷཱགསྶ སཾསནྡནཾ. བྷགཝཏཱ ཙ པཉྩཝིདྷཨེཏདགྒཊྛཱནེན དྷམྨསེནཱཔཏིནཱ ཙ པཉྩཝིདྷཀོསལླེན པསཊྛབྷཱཝཱནུརཱུཔནྟི སམྦནྡྷོ. དྷཱརཎབལནྟི དྷཱརཎསངྑཱཏཾ བལཾ, དྷཱརཎེ ཝཱ བལཾ, ཨུབྷཡཏྠཱཔི དྷཱརེཏུཾ སཱམཏྠིཡནྟི ཝུཏྟཾ ཧོཏི. དསྶེནྟོ ཧུཏྭཱ, དསྶནཧེཏཱུཏིཔི ཨཏྠོ. ཏཉྩ ཁོ ཨཏྠཏོ ཝཱ བྱཉྫནཏོ ཝཱ ཨནཱུནམནདྷིཀནྟི ཨཝདྷཱརཎཕལམཱཧ. ན ཨཉྙཐཱ དཊྛབྦནྟི པན ནིཝཏྟེཏབྦཏྠཾ. ན ཨཉྙཐཱཏི ཙ བྷགཝཏོ སམྨུཁཱ སུཏཱཀཱརཏོ ན ཨཉྙཐཱ, ན པན བྷགཝཏཱ དེསིཏཱཀཱརཏོ. ཨཙིནྟེཡྻཱནུབྷཱཝཱ ཧི བྷགཝཏོ དེསནཱ, ཨེཝཉྩ ཀཏྭཱ ‘‘སབྦཔྤཀཱརེན ཀོ སམཏྠོ ཝིཉྙཱཏུ’’ནྟི ཧེཊྛཱ ཝུཏྟཝཙནཾ སམཏྠིཏཾ ཧོཏི, ཨིཏརཐཱ བྷགཝཏཱ དེསིཏཱཀཱརེནེཝ སོཏུཾ སམཏྠཏྟཱ ཏདེཏཾ ན ཝཏྟབྦཾ སིཡཱ. ཡཐཱཝུཏྟེན པན ཨཏྠེན དྷཱརཎབལདསྶནཉྩ ན ཝིརུཛ྄ཛྷཏི སུཏཱཀཱརཱཝིརུཛ྄ཛྷནཝསེན དྷཱརཎསྶ ཨདྷིཔྤེཏཏྟཱ, ཨཉྙཐཱ བྷགཝཏཱ དེསིཏཱཀཱརེནེཝ དྷཱརིཏུཾ སམཏྠནཏོ ཧེཊྛཱ ཝུཏྟཝཙནེན ཝིརུཛ྄ཛྷེཡྻ. ན ཧེཏྠ དྭིནྣཾ ཨཏྠཱནཾ ཨཏྠནྟརཏཱཔརིཧཱརོ ཡུཏྟོ ཏེསཾ དྭིནྣམྤི ཨཏྠཱནཾ སུཏབྷཱཝདཱིཔནེན ཨེཀཝིསཡཏྟཱ, ཨིཏརཐཱ ཐེརོ བྷགཝཏོ དེསནཱཡ སབྦཐཱ པཊིགྒཧཎེ པཙྪིམཏྠཝསེན སམཏྠོ, པུརིམཏྠཝསེན ཙ ཨསམཏྠོཏི ཨཱཔཛྫེཡྻཱཏི.

‘‘ཡོ ¶ པརོ ན ཧོཏི, སོ ཨཏྟཱ’’ཏི ཝུཏྟཱཡ ནིཡཀཛ྄ཛྷཏྟསངྑཱཏཱཡ སནྟཏིཡཱ པཝཏྟནཀོ ཏིཝིདྷོཔི མེ-སདྡོ, ཏསྨཱ ཀིཉྩཱཔི ནིཡཀཛ྄ཛྷཏྟསནྟཏིཝསེན ཨེཀསྨིཾ ཡེཝཏྠེ མེ-སདྡོ དིསྶཏི, ཏཐཱཔི ཀརཎསམྤདཱནསཱམིནིདྡེསཝསེན ཝིཛྫམཱནཝིབྷཏྟིབྷེདཾ སནྡྷཱཡ ཝུཏྟཾ ‘‘ཏཱིསུ ཨཏྠེསུ དིསྶཏཱི’’ཏི, ཏཱིསུ ཝིབྷཏྟིཡཏྠེསུ ཨཏྟནཱ སཉྙུཏྟཝིབྷཏྟིཏོ དིསྶཏཱིཏི ཨཏྠོ ¶ . གཱཐཱབྷིགཱིཏནྟི གཱཐཱཡ ཨབྷིགཱིཏཾ ཨབྷིམུཁཾ གཱཡིཏཾ. ཨབྷོཛནེཡྻནྟི བྷོཛནཾ ཀཱཏུམནརཧརཱུཔཾ. ཨབྷིགཱིཏཔདསྶ ཀཏྟུཔེཀྑཏྟཱ མཡཱཏི ཨཏྠོ. ཨེཝཾ སེསེསུཔི ཡཐཱརཧཾ. སུཏསདྡསྶ ཀམྨབྷཱཝསཱདྷནཝསེན དྭཱདྷིཔྤཱཡིཀཔདཏྟཱ ཡཐཱཡོགཾ ‘‘མཡཱ སུཏ’’ནྟི ཙ ‘‘མམ སུཏ’’ནྟི ཙ ཨཏྠདྭཡེ ཡུཛྫཏི.

ཀིཉྩཱཔི ཨུཔསགྒོ ཀིརིཡཾ ཝིསེསེཏི, ཛོཏཀམཏྟབྷཱཝཏོ པན སཏིཔི ཏསྨིཾ སུཏསདྡོཡེཝ ཏཾ ཏཾ ཨཏྠཾ ཝདཏཱིཏི ཨནུཔསགྒསྶ སུཏསདྡསྶ ཨཏྠུདྡྷཱརེ སཨུཔསགྒསྶ གཧཎཾ ན ཝིརུཛ྄ཛྷཏཱིཏི ཨཱཧ ‘‘སཨུཔསགྒོ ཙ ཨནུཔསགྒོ ཙཱ’’ཏི. ཨསྶཱཏི སུཏསདྡསྶ. ཨུཔསགྒཝསེནཔི དྷཱཏུསདྡོ ཝིསེསཏྠཝཱཙཀོ ཡཐཱ ‘‘ཨནུབྷཝཏི པརཱབྷཝཏཱི’’ཏི ཝུཏྟཾ ‘‘གཙྪནྟོཏི ཨཏྠོ’’ཏི. ཏཐཱ ཨནུཔསགྒོཔི དྷཱཏུསདྡོ སཨུཔསགྒོ ཝིཡ ཝིསེསཏྠཝཱཙཀོཏི ཨཱཧ ‘‘ཝིསྶུཏདྷམྨསྶཱཏི ཨཏྠོ’’ཏི. ཨེཝམཱིདིསེསུ. སོཏཝིཉྙེཡྻནྟི སོཏདྭཱརནིསྶིཏེན ཝིཉྙཱཎེན ཝིཉྙཱཏབྦཾ, སསམྦྷཱརཀཐཱ ཝཱ ཨེསཱ, སོཏདྭཱརེན ཝིཉྙཱཏབྦནྟི ཨཏྠོ. སོཏདྭཱརཱནུསཱརཝིཉྙཱཏདྷརོཏི སོཏདྭཱརཱནུསཱརེན མནོཝིཉྙཱཎེན ཝིཉྙཱཏདྷམྨདྷརོ. ན ཧི སོཏདྭཱརནིསྶིཏཝིཉྙཱཎམཏྟེན དྷམྨོ ཝིཉྙཱཡཏི, ཨཐ ཁོ ཏདནུསཱརམནོཝིཉྙཱཎེནེཝ, སུཏདྷརོཏི ཙ ཏཐཱ ཝིཉྙཱཏདྷམྨདྷརོ ཝུཏྟོ, ཏསྨཱ ཏདཏྠོཡེཝ སམྦྷཝཏཱིཏི ཨེཝཾ ཝུཏྟཾ. ཀམྨབྷཱཝསཱདྷནཱནི སུཏསདྡེ སམྦྷཝནྟཱིཏི དསྶེཏུཾ ‘‘ཨིདྷ པནཱ’’ཏིཨཱདིམཱཧ. པུབྦཱཔརཔདསམྦནྡྷཝསེན ཨཏྠསྶ ཨུཔཔནྣཏཱ, ཨནུཔཔནྣཏཱ ཙ ཝིཉྙཱཡཏི, ཏསྨཱ སུཏསདྡསྶེཝ ཝསེན ཨཡམཏྠོ ‘‘ཨུཔཔནྣོ, ཨནུཔཔནྣོ’’ཏི ཝཱ ན ཝིཉྙཱཏབྦོཏི ཙོདནཱཡ པུབྦཱཔརཔདསམྦནྡྷཝསེན ཨེཏདཏྠསྶ ཨུཔཔནྣཏཾ དསྶེཏུཾ ‘‘མེ-སདྡསྶ ཧཱི’’ཏིཨཱདི ཝུཏྟཾ. མཡཱཏི ཨཏྠེ སཏཱིཏི ཀཏྟུཏྠེ ཀརཎནིདྡེསཝསེན མཡཱཏི ཨཏྠེ ཝཏྟབྦེ སཏི, ཡདཱ མེ-སདྡསྶ ཀཏྟུཝསེན ཀརཎནིདྡེསོ, ཏདཱཏི ཝུཏྟཾ ཧོཏི. མམཱཏི ཨཏྠེ སཏཱིཏི སམྦནྡྷཱིཡཏྠེ སཱམིནིདྡེསཝསེན ¶ མམཱཏི ཨཏྠེ ཝཏྟབྦེ སཏི, ཡདཱ སམྦནྡྷཝསེན སཱམི ནིདྡེསོ, ཏདཱཏི ཝུཏྟཾ ཧོཏི.

ཨེཝཾ སདྡཏོ ཉཱཏབྦམཏྠཾ ཝིཉྙཱཔེཏྭཱ ཨིདཱནི ཏེཧི དསྶེཏབྦམཏྠཾ ནིདསྶེནྟོ ‘‘ཨེཝམེཏེསཱུ’’ཏིཨཱདིམཱཧ. སུཏསདྡསནྣིདྷཱནེ པཡུཏྟེན ཨེཝཾ-སདྡེན སཝནཀིརིཡཱཛོཏཀེནེཝ བྷཝིཏབྦཾ ཝིཛྫམཱནཏྠསྶ ཛོཏཀམཏྟཏྟཱ ནིཔཱཏཱནནྟི ཝུཏྟཾ ‘‘ཨེཝནྟི སོཏཝིཉྙཱཎཱདིཝིཉྙཱཎཀིཙྩནིདསྶན’’ནྟི. སཝནཱཡ ཨེཝ ཧི ཨཱཀཱརོ, ནིདསྶནཾ, ཨཝདྷཱརཎམྤི, ཏསྨཱ ཡཐཱཝུཏྟོ ཨེཝཾ-སདྡསྶ ཏིཝིདྷོཔི ཨཏྠོ སཝནཀིརིཡཱཛོཏཀབྷཱཝེན ཨིདྷཱདྷིཔྤེཏོཏི. ཨཱདི-སདྡེན ཙེཏྠ སམྤཊིཙྪནཱདཱིནཾ སོཏདྭཱརིཀཝིཉྙཱཎཱནཾ, ཏདབྷིནིཔཱཏཱནཉྩ མནོདྭཱརིཀ ¶ ཝིཉྙཱཎཱནཾ གཧཎཾ ཝེདིཏབྦཾ, ཡཏོ སོཏདྭཱརཱནུསཱརཝིཉྙཱཏཏྠེ ཨིདྷ སུཏསདྡོཏི ཝུཏྟོ. ཨཝདྷཱརཎཕལཏྟཱ སདྡཔཡོགསྶ སབྦམྤི ཝཱཀྱཾ ཨནྟོགདྷཱཝདྷཱརཎཾ, ཏསྨཱ ‘‘སུཏ’’ནྟི ཨེཏསྶ སུཏམེཝཱཏི ཨཡམཏྠོ ལབྦྷཏཱིཏི ཨཱཧ ‘‘ཨསྶཝནབྷཱཝཔཊིཀྑེཔཏོ’’ཏི. ཨེཏེན ཧི ཝཙནེན ཨཝདྷཱརཎེན ནིརཱཀཏཾ དསྶེཏི. ཡཐཱ པན ཡཾ སུཏཾ སུཏམེཝཱཏི ནིཡམེཏབྦཾ, ཏཐཱ ཙ ཏཾ སུཏཾ སམྨཱ སུཏཾ ཧོཏཱིཏི ཨཝདྷཱརཎཕལཾ དསྶེཏུཾ ཝུཏྟཾ ‘‘ཨནཱུནཱདྷིཀཱཝིཔརཱིཏགྒཧཎནིདསྶན’’ནྟི. ཨཐ ཝཱ སདྡནྟརཏྠཱཔོཧནཝསེན སདྡོ ཨཏྠཾ ཝདཏི, ཏསྨཱ ‘‘སུཏ’’ནྟི ཨེཏསྶ ཨསུཏཾ ན ཧོཏཱིཏི ཨཡམཏྠོ ལབྦྷཏཱིཏི སནྡྷཱཡ ‘‘ཨསྶཝནབྷཱཝཔཊིཀྑེཔཏོ’’ཏི ཝུཏྟཾ, ཨིམིནཱ དིཊྛཱདིནིཝཏྟནཾ ཀརོཏི དིཊྛཱདཱིནཾ ‘‘ཨསུཏ’’ནྟི སདྡནྟརཏྠབྷཱཝེན ནིཝཏྟེཏབྦཏྟཱ. ཨིདཾ ཝུཏྟཾ ཧོཏི – ན ཨིདཾ མཡཱ ཨཏྟནོ ཉཱཎེན དིཊྛཾ, ན ཙ སཡམྦྷུཉཱཎེན སཙྪིཀཏཾ, ཨཐ ཁོ སུཏཾ, ཏཉྩ ཁོ སུཏཾ སམྨདེཝཱཏི. ཏདེཝ སམྨཱ སུཏབྷཱཝཾ སནྡྷཱཡཱཧ ‘‘ཨནཱུནཱ…པེ… དསྶན’’ནྟི. ཧོཏི ཙེཏྠ –

‘‘ཨེཝཱདིསཏྟིཡཱ ཙེཝ, ཨཉྙཏྠཱཔོཧནེན ཙ;

དྭིདྷཱ སདྡོ ཨཏྠནྟརཾ, ནིཝཏྟེཏི ཡཐཱརཧ’’ནྟི.

ཨཔིཙ ཨཝདྷཱརཎཏྠེ ཨེཝཾ-སདྡེ ཨཡམཏྠཡོཛནཱ ཀརཱིཡཏཱིཏི ཏདཔེཀྑསྶ སུཏསདྡསྶ སཱཝདྷཱརཎཏྠོ ཝུཏྟོ ‘‘ཨསྶཝནབྷཱཝཔཊིཀྑེཔཏོ’’ཏི, ཏདཝདྷཱརཎཕལཾ དསྶེཏི ‘‘ཨནཱུ…པེ… དསྶན’’ནྟི ཨིམིནཱ. སཝན-སདྡོ ཙེཏྠ བྷཱཝསདྡེན ཡོགཏོ ཀམྨསཱདྷནོ ཝེདིཏབྦོ ‘‘སུཡྻཏཱི’’ཏི. ཨནཱུནཱདྷིཀཏཱཡ བྷགཝཏོ སམྨུཁཱ སུཏཱཀཱརཏོ ཨཝིཔརཱིཏཾ ¶ , ཨཝིཔརཱིཏསྶ ཝཱ སུཏྟསྶ གཧཎཾ, ཏསྶ ནིདསྶནཾ ཏཐཱ, ཨིཏི སཝནཧེཏུ སུཎནྟཔུགྒལསཝནཝིསེསཝསེན ཨཡཾ ཡོཛནཱ ཀཏཱ.

ཨེཝཾ པདཏྟཡསྶ ཨེཀེན པཀཱརེན ཨཏྠཡོཛནཾ དསྶེཏྭཱ ཨིདཱནི པཀཱརནྟརེནཱཔི ཏཾ དསྶེཏུཾ ‘‘ཏཐཱ’’ཏིཨཱདི ཝུཏྟཾ. ཏཏྠ ཏསྶཱཏི ཡཱ བྷགཝཏོ སམྨུཁཱ དྷམྨསྶཝནཱཀཱརེན པཝཏྟཱ མནོདྭཱརིཀཝིཉྙཱཎཝཱིཐི, ཏསྶཱ. སཱ ཧི ནཱནཱཔྤཀཱརེན ཨཱརམྨཎེ པཝཏྟིཏུཾ སམཏྠཱ, ན སོཏདྭཱརིཀ ཝིཉྙཱཎཝཱིཐི ཨེཀཱརམྨཎེཡེཝ པཝཏྟནཏོ, ཏཐཱ ཙེཝ ཝུཏྟཾ ‘‘སོཏདྭཱརཱནུསཱརེནཱ’’ཏི. ཏེན ཧི སོཏདྭཱརིཀཝིཉྙཱཎཝཱིཐི ནིཝཏྟཏི. ནཱནཔྤཀཱརེནཱཏི ཝཀྑམཱནེན ཨནེཀཝིཧིཏེན བྱཉྫནཏྠགྒཧཎཱཀཱརསངྑཱཏེན ནཱནཱཝིདྷེན ཨཱཀཱརེན, ཨེཏེན ཨིམིསྶཱ ཡོཛནཱཡ ཨཱཀཱརཏྠོ ཨེཝཾ-སདྡོ གཧིཏོཏི དསྶེཏི. པཝཏྟིབྷཱཝཔྤཀཱསནནྟི པཝཏྟིཡཱ ཨཏྠིབྷཱཝཔྤཀཱསནཾ. ཡསྨིཾ པཀཱརེ ཝུཏྟཔྤཀཱརཱ ཝིཉྙཱཎཝཱིཐི ནཱནཔྤཀཱརེན པཝཏྟཱ, ཏདེཝ ཨཱརམྨཎཾ སནྡྷཱཡ ‘‘དྷམྨཔྤཀཱསན’’ནྟི ¶ ཝུཏྟཾ, ན པན སུཏསདྡསྶ དྷམྨཏྠཾ, ཏེན ཝུཏྟཾ ‘‘ཨཡཾ དྷམྨོ སུཏོ’’ཏི. ཏསྶཱ ཧི ཝིཉྙཱཎཝཱིཐིཡཱ ཨཱརམྨཎམེཝ ‘‘ཨཡཾ དྷམྨོ སུཏོ’’ཏི ཝུཙྩཏི. ཏཉྩ ནིཡམིཡམཱནཾ ཡཐཱཝུཏྟཱཡ ཝིཉྙཱཎཝཱིཐིཡཱ ཨཱརམྨཎབྷཱུཏཾ སུཏྟམེཝ. ཨཡཉྷེཏྠཱཏིཨཱདི ཝུཏྟསྶེཝཏྠསྶ པཱཀཊཱིཀརཎཾ. ཏཔྤཱཀཊཱིཀརཎཏྠོ ཧེཏྠ ཧི-སདྡོ. ཝིཉྙཱཎཝཱིཐིཡཱ ཀརཎབྷཱུཏཱཡ མཡཱ ན ཨཉྙཾ ཀཏཾ, ཨིདཾ པན ཨཱརམྨཎཾ ཀཏཾ. ཀིཾ པན ཏནྟི ཙེ? ཨཡཾ དྷམྨོ སུཏོཏི. ཨཡཾ པནེཏྠཱདྷིཔྤཱཡོ – ཨཱཀཱརཏྠེ ཨེཝཾ-སདྡེ ‘‘ཨེཀེནཱཀཱརེནཱ’’ཏི ཡོ ཨཱཀཱརོ ཝུཏྟོ, སོ ཨཏྠཏོ སོཏདྭཱརཱནུསཱརཝིཉྙཱཎཝཱིཐིཡཱ ནཱནཔྤཀཱརེན ཨཱརམྨཎེ པཝཏྟིབྷཱཝོཡེཝ, ཏེན ཙ ཏདཱརམྨཎབྷཱུཏསྶ དྷམྨསྶེཝ སཝནཾ ཀཏཾ, ན ཨཉྙནྟི. ཨེཝཾ སཝནཀིརིཡཱཡ ཀརཎཀཏྟུཀམྨཝིསེསོ ཨིམིསྶཱ ཡོཛནཱཡ དསྶིཏོ.

ཨཉྙམྤི ཡོཛནམཱཧ ‘‘ཏཐཱ’’ཏིཨཱདིནཱ. ནིདསྶནཏྠཾ ཨེཝཾ-སདྡཾ གཧེཏྭཱ ནིདསྶནེན ཙ ནིདསྶིཏབྦསྶཱཝིནཱབྷཱཝཏོ ‘‘ཨེཝནྟི ནིདསྶིཏབྦཔྤཀཱསན’’ནྟི ཝུཏྟཾ. ཨིམིནཱ ཧི ཏདཝིནཱབྷཱཝཏོ ཨེཝཾསདྡེན སཀལམྤི སུཏྟཾ པཙྩཱམཊྛནྟི དསྶེཏི, སུཏསདྡསྶ ཀིརིཡཱཔརཏྟཱ, སཝནཀིརིཡཱཡ ཙ སཱདྷཱརཎཝིཉྙཱཎཔྤབནྡྷཔཊིབདྡྷཏྟཱ ཏསྨིཉྩ ཝིཉྙཱཎཔྤབནྡྷེ ¶ པུགྒལཝོཧཱརོཏི ཝུཏྟཾ ‘‘པུགྒལཀིཙྩཔྤཀཱསན’’ནྟི. སཱདྷཱརཎཝིཉྙཱཎཔྤབནྡྷོ ཧི པཎྞཏྟིཡཱ ཨིདྷ པུགྒལོ ནཱམ, སཝནཀིརིཡཱ པན ཏསྶ ཀིཙྩཾ ནཱམ. ན ཧི པུགྒལཝོཧཱརརཧིཏེ དྷམྨཔྤབནྡྷེ སཝནཀིརིཡཱ ལབྦྷཏི ཝོཧཱརཝིསཡཏྟཱ ཏསྶཱ ཀིརིཡཱཡཱཏི དཊྛབྦཾ. ‘‘ཨིད’’ནྟིཨཱདི པིཎྜཏྠདསྶནཾ མཡཱཏི ཡཐཱཝུཏྟཝིཉྙཱཎཔྤབནྡྷསངྑཱཏཔུགྒལབྷཱུཏེན མཡཱ. སུཏནྟི སཝནཀིརིཡཱསངྑཱཏེན པུགྒལཀིཙྩེན ཡོཛིཏཾ, ཨིམིསྶཱ པན ཡོཛནཱཡ པུགྒལབྱཱཔཱརཝིསཡསྶ པུགྒལསྶ, པུགྒལབྱཱཔཱརསྶ ཙ ནིདསྶནཾ ཀཏནྟི དཊྛབྦཾ.

ཨཱཀཱརཏྠམེཝ ཨེཝཾ-སདྡཾ གཧེཏྭཱ པུརིམཡོཛནཱཡ ཨཉྙཐཱཔི ཨཏྠཡོཛནཾ དསྶེཏུཾ ‘‘ཏཐཱ’’ཏིཨཱདི ཝུཏྟཾ. ཙིཏྟསནྟཱནསྶཱཏི ཡཐཱཝུཏྟཝིཉྙཱཎཔྤབནྡྷསྶ. ནཱནཱཀཱརཔྤཝཏྟིཡཱཏི ནཱནཔྤཀཱརེན ཨཱརམྨཎེ པཝཏྟིཡཱ. ནཱནཔྤཀཱརཾ ཨཏྠབྱཉྫནསྶ གཧཎཾ, ནཱནཔྤཀཱརསྶ ཝཱ ཨཏྠབྱཉྫནསྶ གཧཎཾ ཏཐཱ, ཏཏོཡེཝ སཱ ‘‘ཨཱཀཱརཔཉྙཏྟཱི’’ཏི ཝུཏྟཱཏི ཏདེཝཏྠཾ སམཏྠེཏི ‘‘ཨེཝནྟི ཧཱི’’ཏིཨཱདིནཱ. ཨཱཀཱརཔཉྙཏྟཱིཏི ཙ ཨུཔཱདཱཔཉྙཏྟིཡེཝ, དྷམྨཱནཾ པན པཝཏྟིཨཱཀཱརམུཔཱདཱཡ པཉྙཏྟཏྟཱ ཏདཉྙཱཡ ཨུཔཱདཱཔཉྙཏྟིཡཱ ཝིསེསནཏྠཾ ‘‘ཨཱཀཱརཔཉྙཏྟཱི’’ཏི ཝུཏྟཱ ཝིསཡནིདྡེསོཏི ཨུཔྤཏྟིཊྛཱནནིདྡེསོ. སོཏབྦབྷཱུཏོ ཧི དྷམྨོ སཝནཀིརིཡཱཀཏྟུབྷཱུཏསྶ པུགྒལསྶ སཝནཀིརིཡཱཝསེན པཝཏྟིཊྛཱནཾ ཀིརིཡཱཡ ཀཏྟུཀམྨཊྛཏྟཱ ཏབྦསེན ཙ ཏདཱདྷཱརསྶཱཔི དབྦསྶ ཨཱདྷཱརབྷཱཝསྶ ཨིཙྪིཏཏྟཱ, ཨིདྷ པན ཀིརིཡཱཡ ཀཏྟུཔཝཏྟིཊྛཱནབྷཱཝོ ཨིཙྪིཏོཏི ཀམྨམེཝ ¶ ཨཱདྷཱརཝསེན ཝུཏྟཾ, ཏེནཱཧ ‘‘ཀཏྟུ ཝིསཡགྒཧཎསནྣིཊྛཱན’’ནྟི, ཨཱརམྨཎམེཝ ཝཱ ཝིསཡོ. ཨཱརམྨཎཉྷི ཏདཱརམྨཎིཀསྶ པཝཏྟིཊྛཱནཾ. ཨེཝམྤི ཧི ཨཏྠོ སུཝིཉྙེཡྻཏརོ ཧོཏི. ཡཐཱཝུཏྟཝཙནེ པིཎྜཏྠཾ དསྶེཏུཾ ‘‘ཨེཏྟཱཝཏཱ’’ཏིཨཱདི ཝུཏྟཾ. ཨེཏྟཱཝཏཱ ཨེཏྟཀེན ཡཐཱཝུཏྟཏྠེན པདཏྟཡེན, ཀཏཾ ཧོཏཱིཏི སམྦནྡྷོ. ནཱནཱཀཱརཔྤཝཏྟེནཱཏི ནཱནཔྤཀཱརེན ཨཱརམྨཎེ པཝཏྟེན. ཙིཏྟསནྟཱནེནཱཏི ཡཐཱཝུཏྟཝིཉྙཱཎཝཱིཐིསངྑཱཏེན ཙིཏྟཔྤབནྡྷེན. གཧཎསདྡེ ཙེཏཾ ཀརཎཾ. ཙིཏྟསནྟཱནཝིནིམུཏྟསྶ ཀསྶཙི ཀཏྟུ པརམཏྠཏོ ཨབྷཱཝེཔི སདྡཝོཧཱརེན བུདྡྷིཔརིཀཔྤིཏབྷེདཝཙནིཙྪཱཡ ཙིཏྟསནྟཱནཏོ ཨཉྙམིཝ ཏཾསམངྒིཾ ཀཏྭཱ ཨབྷེདེཔི བྷེདཝོཧཱརེན ‘‘ཙིཏྟསནྟཱནེན ཏཾསམངྒིནོ’’ཏི ཝུཏྟཾ. ཝོཧཱརཝིསཡོ ཧི སདྡོ ནེཀནྟཔརམཏྠིཀོཏི ¶ (ཀཱརཀརཱུཔསིདྡྷིཡཾ ཡོ ཀཱརེཏི སཧེཏུསུཏྟཾ པསྶིཏབྦཾ) སཝནཀིརིཡཱཝིསཡོཔི སོཏབྦདྷམྨོ སཝནཀིརིཡཱཝསེན པཝཏྟཙིཏྟསནྟཱནསྶ ཨིདྷ པརམཏྠཏོ ཀཏྟུབྷཱཝཏོ ཏསྶ ཝིསཡོཡེཝཱཏི ཝུཏྟཾ ‘‘ཀཏྟུ ཝིསཡགྒཧཎསནྣིཊྛཱན’’ནྟི.

ཨཔིཙ སཝནཝསེན ཙིཏྟཔྤཝཏྟིཡཱ ཨེཝ སཝནཀིརིཡཱབྷཱཝཏོ ཏཾཝསེན ཏདཉྙནཱམརཱུཔདྷམྨསམུདཱཡབྷཱུཏསྶ ཏཾཀིརིཡཱཀཏྟུ ཙ ཝིསཡོ ཧོཏཱིཏི ཀཏྭཱ ཏཐཱ ཝུཏྟཾ. ཨིདཾ ཝུཏྟཾ ཧོཏི – པུརིམནཡེ སཝནཀིརིཡཱ, ཏཀྐཏྟཱ ཙ པརམཏྠཏོ ཏཐཱཔཝཏྟཙིཏྟསནྟཱནམེཝ, ཏསྨཱ ཀིརིཡཱཝིསཡོཔི ‘‘ཀཏྟུ ཝིསཡོ’’ཏི ཝུཏྟོ. པཙྪིམནཡེ པན ཏཐཱཔཝཏྟཙིཏྟསནྟཱནཾ ཀིརིཡཱ, ཏདཉྙདྷམྨསམུདཱཡོ པན ཀཏྟཱ, ཏསྨཱ ཀཱམཾ ཨེཀནྟཏོ ཀིརིཡཱཝིསཡོཡེཝེས དྷམྨོ, ཏཐཱཔི ཀིརིཡཱཝསེན ‘‘ཏབྦནྟཀཏྟུ ཝིསཡོ’’ཏི ཝུཏྟོཏི. ཏཾསམངྒིནོཏི ཏེན ཙིཏྟསནྟཱནེན སམངྒིནོ. ཀཏྟཱུཏི ཀཏྟཱརསྶ. ཝིསཡོཏི ཨཱརམྨཎཝསེན པཝཏྟིཊྛཱནཾ, ཨཱརམྨཎམེཝ ཝཱ. སུཏཱཀཱརསྶ ཙ ཐེརསྶ སམྨཱ ནིཙྪིཏབྷཱཝཏོ ‘‘གཧཎསནྣིཊྛཱན’’ནྟི ཝུཏྟཾ.

ཨཔརོ ནཡོ – ཡསྶ…པེ… ཨཱཀཱརཔཉྙཏྟཱིཏི ཨཱཀཱརཏྠེན ཨེཝཾ-སདྡེན ཡོཛནཾ ཀཏྭཱ ཏདེཝ ཨཝདྷཱརཎཏྠམྤི གཧེཏྭཱ ཨིམསྨིཾཡེཝ ནཡེ ཡོཛེཏུཾ ‘‘གཧཎཾ ཀཏཾ’’ ཨིཙྩེཝ ཨཝཏྭཱ ‘‘གཧཎསནྣིཊྛཱནཾ ཀཏ’’ནྟི ཝུཏྟནྟི དཊྛབྦཾ. ཨཝདྷཱརཎེན ཧི སནྣིཊྛཱནམིདྷཱདྷིཔྤེཏཾ, ཏསྨཱ ‘‘ཨེཏྟཱཝཏཱ’’ཏིཨཱདིནཱ ཨཝདྷཱརཎཏྠམྤི ཨེཝཾ-སདྡཾ གཧེཏྭཱ ཨཡམེཝ ཡོཛནཱ ཀཏཱཏི དསྶེཏཱིཏི ཝེདིཏབྦཾ, ཨིམིསྶཱ པན ཡོཛནཱཡ གཧཎཱཀཱརགཱཧཀཏབྦིསཡཝིསེསནིདསྶནཾ ཀཏནྟི དཊྛབྦཾ.

ཨཉྙམྤི ཡོཛནམཱཧ ‘‘ཨཐ ཝཱ’’ཏིཨཱདིནཱ. པུབྦེ ཨཏྟནཱ སུཏཱནཾ ནཱནཱཝིཧིཏཱནཾ སུཏྟསངྑཱཏཱནཾ ཨཏྠབྱཉྫནཱནཾ ཨུཔདྷཱརིཏརཱུཔསྶ ཨཱཀཱརསྶ ནིདསྶནསྶ, ཨཝདྷཱརཎསྶ ཝཱ པཀཱསནསབྷཱཝོ ཨེཝཾ-སདྡོཏི ཏདཱཀཱརཱདིབྷཱུཏསྶ ཨུཔདྷཱརཎསྶ པུགྒལཔཉྙཏྟིཡཱ ཨུཔཱདཱནབྷཱུཏདྷམྨཔྤབནྡྷབྱཱཔཱརཏཱཡ ¶ ‘‘པུགྒལཀིཙྩནིདྡེསོ’’ཏི ཝུཏྟཾ ཨཏྟནཱ སུཏཱནཉྷི ཨཏྠབྱཉྫནཱནཾ པུན ཨུཔདྷཱརཎཾ ཨཱཀཱརཱདིཏྟཡཾ, ཏཉྩ ཨེཝཾ-སདྡསྶ ཨཏྠོ. སོ པན ཡཾ དྷམྨཔྤབནྡྷཾ ཨུཔཱདཱཡ པུགྒལཔཉྙཏྟི པཝཏྟཱ, ཏསྶ བྱཱཔཱརབྷཱུཏཾ ཀིཙྩམེཝ ¶ , ཏསྨཱ ཨེཝཾ-སདྡེན པུགྒལཀིཙྩཾ ནིདྡིསཱིཡཏཱིཏི. ཀཱམཾ སཝནཀིརིཡཱ པུགྒལབྱཱཔཱརོཔི ཨཝིསེསེན, ཏཐཱཔི ཝིསེསཏོ ཝིཉྙཱཎབྱཱཔཱརོཝཱཏི ཝུཏྟཾ ‘‘ཝིཉྙཱཎཀིཙྩནིདྡེསོ’’ཏི. ཏཐཱ ཧི པུགྒལཝཱདཱིནམྤི སཝནཀིརིཡཱ ཝིཉྙཱཎནིརཔེཀྑཱ ནཏྠི སཝནཱདཱིནཾ ཝིསེསཏོ ཝིཉྙཱཎབྱཱཔཱརབྷཱཝེན ཨིཙྪིཏཏྟཱ. མེཏི སདྡཔྤཝཏྟིཡཱ ཨེཀནྟེནེཝ སཏྟཝིསཡཏྟཱ, ཝིཉྙཱཎཀིཙྩསྶ ཙ སཏྟཝིཉྙཱཎཱནམབྷེདཀརཎཝསེན ཏཏྠེཝ སམོདཧིཏབྦཏོ ‘‘ཨུབྷཡཀིཙྩཡུཏྟཔུགྒལནིདྡེསོ’’ཏི ཝུཏྟཾ. ‘‘ཨཡ’’ནྟིཨཱདི ཏཔྤཱཀཊཱིཀརཎཾ. ཨེཏྠ ཧི སཝནཀིཙྩཝིཉྙཱཎསམངྒིནཱཏི ཨེཝཾ-སདྡེན ནིདྡིཊྛཾ པུགྒལཀིཙྩཾ སནྡྷཱཡ ཝུཏྟཾ, ཏཾ པན པུགྒལསྶ སཝནཀིཙྩཝིཉྙཱཎསམངྒཱིབྷཱཝེན པུགྒལཀིཙྩཾ ནཱམཱཏི དསྶེཏུཾ ‘‘པུགྒལཀིཙྩསམངྒིནཱ’’ཏི ཨཝཏྭཱ ‘‘སཝནཀིཙྩཝིཉྙཱཎསམངྒིནཱ’’ཏི ཨཱཧ, ཏསྨཱ ‘‘པུགྒལཀིཙྩ’’ནྟི ནིདྡིཊྛསཝནཀིཙྩཝཏཱ ཝིཉྙཱཎེན སམངྒིནཱཏི ཨཏྠོ. ཝིཉྙཱཎཝསེན, ལདྡྷསཝནཀིཙྩཝོཧཱརེནཱཏི ཙ སུཏསདྡེན ནིདྡིཊྛཾ ཝིཉྙཱཎཀིཙྩཾ སནྡྷཱཡ ཝུཏྟཾ. སཝནམེཝ ཀིཙྩཾ ཡསྶཱཏི ཏཐཱ. སཝནཀིཙྩནྟི ཝོཧཱརོ སཝནཀིཙྩཝོཧཱརོ, ལདྡྷོ སོ ཡེནཱཏི ཏཐཱ. ལདྡྷསཝནཀིཙྩཝོཧཱརེན ཝིཉྙཱཎསངྑཱཏེན ཝསེན སཱམཏྠིཡེནཱཏི ཨཏྠོ. ཨཡཾ པན སམྦནྡྷོ – སཝནཀིཙྩཝིཉྙཱཎསམངྒིནཱ པུགྒལེན མཡཱ ལདྡྷསཝནཀིཙྩཝོཧཱརེན ཝིཉྙཱཎཝསེན ཀརཎབྷཱུཏེན སུཏནྟི.

ཨཔིཙ ‘‘ཨེཝ’’ནྟི སདྡསྶཏྠོ ཨཝིཛྫམཱནཔཉྙཏྟི, ‘‘སུཏ’’ནྟི སདྡསྶཏྠོ ཝིཛྫམཱནཔཉྙཏྟི, ཏསྨཱ ཏེ ཏཐཱརཱུཔཔཉྙཏྟི ཨུཔཱདཱནབྷཱུཏཔུགྒལབྱཱཔཱརབྷཱཝེནེཝ དསྶེནྟོ ཨཱཧ ‘‘ཨེཝནྟི པུགྒལཀིཙྩནིདྡེསོ. སུཏནྟི ཝིཉྙཱཎཀིཙྩནིདྡེསོ’’ཏི. ན ཧི པརམཏྠཏོཡེཝ ནིཡམིཡམཱནེ སཏི པུགྒལཀིཙྩཝིཉྙཱཎཀིཙྩཝསེན ཨཡཾ ཝིབྷཱགོ ལབྦྷཏཱིཏི. ཨིམིསྶཱ པན ཡོཛནཱཡ ཀཏྟུབྱཱཔཱརཀརཎབྱཱཔཱརཀཏྟུནིདྡེསོ ཀཏོཏི ཝེདིཏབྦོ.

སབྦསྶཱཔི སདྡཱདྷིགམནཱིཡསྶ ཨཏྠསྶ པཉྙཏྟིམུཁེནེཝ པཊིཔཛྫིཏབྦཏྟཱ, སབྦཱསཉྩ པཉྙཏྟཱིནཾ ཝིཛྫམཱནཱདིཝསེན ཚསུ པཉྙཏྟིབྷེདེསུ ཨནྟོགདྷཏྟཱ ཏཱསུ ‘‘ཨེཝ’’ནྟིཨཱདཱིནཾ པཉྙཏྟཱིནཾ སརཱུཔཾ ནིདྡྷཱརེཏྭཱ དསྶེནྟོ ‘‘ཨེཝནྟི ཙཱ’’ཏིཨཱདིམཱཧ. ཏཏྠ ‘‘ཨེཝ’’ནྟི ཙ ‘‘མེ’’ཏི ཙ ཝུཙྩམཱནསྶ ཨཏྠསྶ ཨཱཀཱརཱདིབྷཱུཏསྶ དྷམྨཱནཾ ཨསལླཀྑཎབྷཱཝཏོ ཨཝིཛྫམཱནཔཉྙཏྟིབྷཱཝོཏི ཨཱཧ ‘‘སཙྩིཀཊྛཔརམཏྠཝསེན ཨཝིཛྫམཱནཔཉྙཏྟཱི’’ཏི. སཙྩིཀཊྛཔརམཏྠཝསེནཱཏི ¶ ཙ བྷཱུཏཏྠཨུཏྟམཏྠཝསེནཱཏི ཨཏྠོ. ཨིདཾ ཝུཏྟཾ ཧོཏི – ཡོ མཱཡཱམརཱིཙིཨཱདཡོ ¶ ཝིཡ ཨབྷཱུཏཏྠོ, ཨནུསྶཝཱདཱིཧི གཧེཏབྦོ ཝིཡ ཨནུཏྟམཏྠོ ཙ ན ཧོཏི, སོ རཱུཔསདྡཱདིསབྷཱཝོ, རུཔྤནཱནུབྷཝནཱདིསབྷཱཝོ ཝཱ ཨཏྠོ ‘‘སཙྩིཀཊྛོ, པརམཏྠོ’’ཏི ཙ ཝུཙྩཏི, ‘‘ཨེཝཾ མེ’’ཏི པདཱནཾ པན ཨཏྠོ ཨབྷཱུཏཏྟཱ, ཨནུཏྟམཏྟཱ ཙ ན ཏཐཱ ཝུཙྩཏི, ཏསྨཱ བྷཱུཏཏྠཨུཏྟམཏྠསངྑཱཏེན སཙྩིཀཊྛཔརམཏྠཝསེན ཝིསེསནབྷཱུཏེན ཨཝིཛྫམཱནཔཉྙཏྟིཡེཝཱཏི. ཨེཏེན ཙ ཝིསེསནེན བཱལཛནེཧི ‘‘ཨཏྠཱི’’ཏི པརིཀཔྤིཏཾ པཉྙཏྟིམཏྟཾ ནིཝཏྟེཏི. ཏདེཝཏྠཾ པཱཀཊཾ ཀརོཏི, ཧེཏུནཱ ཝཱ སཱདྷེཏི ‘‘ཀིཉྷེཏྠ ཏ’’ནྟིཨཱདིནཱ. ཡཾ དྷམྨཛཱཏཾ, ཨཏྠཛཱཏཾ ཝཱ ‘‘ཨེཝ’’ནྟི ཝཱ ‘‘མེ’’ཏི ཝཱ ནིདྡེསཾ ལབྷེཐ, ཏཾ ཨེཏྠ རཱུཔཕསྶཱདིདྷམྨསམུདཱཡེ, ‘‘ཨེཝཾ མེ’’ཏི པདཱནཾ ཝཱ ཨཏྠེ. པརམཏྠཏོ ན ཨཏྠཱིཏི ཡོཛནཱ. རཱུཔཕསྶཱདིབྷཱཝེན ནིདྡིཊྛོ པརམཏྠཏོ ཨེཏྠ ཨཏྠེཝ, ‘‘ཨེཝཾ མེ’’ཏི པན ནིདྡིཊྛོ ནཏྠཱིཏི ཨདྷིཔྤཱཡོ. སུཏནྟི པན སདྡཱཡཏནཾ སནྡྷཱཡཱཧ ‘‘ཝིཛྫམཱནཔཉྙཏྟཱི’’ཏི. ‘‘སཙྩིཀཊྛཔརམཏྠཝསེནཱ’’ཏི ཙེཏྠ ཨདྷིཀཱརོ. ‘‘ཡཉྷཱི’’ཏིཨཱདི ཏཔྤཱཀཊཱིཀརཎཾ, ཧེཏུདསྶནཾ ཝཱ. ཡཾ ཏཾ སདྡཱཡཏནཾ སོཏེན སོཏདྭཱརེན, ཏནྣིསྶིཏཝིཉྙཱཎེན ཝཱ ཨུཔལདྡྷཾ ཨདྷིགམིཏབྦནྟི ཨཏྠོ. ཏེན ཧི སདྡཱཡཏནམིདྷ གཧིཏཾ ཀམྨསཱདྷནེནཱཏི དསྶེཏི.

ཨེཝཾ ཨཊྛཀཐཱནཡེན པཉྙཏྟིསརཱུཔཾ ནིདྡྷཱརེཏྭཱ ཨིདཱནི ཨཊྛཀཐཱམུཏྟཀེནཱཔི ནཡེན ཝུཏྟེསུ ཚསུ པཉྙཏྟིབྷེདེསུ ‘‘ཨེཝ’’ནྟིཨཱདཱིནཾ པཉྙཏྟཱིནཾ སརཱུཔཾ ནིདྡྷཱརེནྟོ ‘‘ཏཐཱ’’ཏིཨཱདིམཱཧ. ཨུཔཱདཱཔཉྙཏྟི ཨཱདཡོ ཧི པོརཱཎཊྛཀཐཱཏོ མུཏྟཱ སངྒཧཀཱརེནེཝ ཨཱཙརིཡེན ཝུཏྟཱ. ཝིཏྠཱརོ ཨབྷིདྷམྨཊྛཀཐཱཡ གཧེཏབྦོ. ཏཾ ཏནྟི ཏཾ ཏཾ དྷམྨཛཱཏཾ, སོཏཔཐམཱགཏེ དྷམྨེ ཨུཔཱདཱཡ ཏེསཾ ཨུཔདྷཱརིཏཱཀཱརནིདསྶནཱཝདྷཱརཎསྶ པཙྩཱམསནཝསེན ཨེཝནྟི ཙ སསནྟཏིཔརིཡཱཔནྣེ ཁནྡྷེ ཨུཔཱདཱཡ མེཏི ཙ ཝཏྟབྦཏྟཱཏི ཨཏྠོ. རཱུཔཝེདནཱདིབྷེདེཧི དྷམྨེ ཨུཔཱདཱཡ ནིསྶཱཡ ཀཱརཎཾ ཀཏྭཱ པཉྙཏྟི ཨུཔཱདཱཔཉྙཏྟི ཡཐཱ ‘‘ཏཱནི ཏཱནི ཨངྒཱནི ཨུཔཱདཱཡ རཐོ གེཧཾ, ཏེ ཏེ རཱུཔརསཱདཡོ ཨུཔཱདཱཡ གྷཊོ པཊོ, ཙནྡིམསཱུརིཡཔརིཝཏྟཱདཡོ ཨུཔཱདཱཡ ཀཱལོ དིསཱ’’ཏིཨཱདི. པཉྙཔེཏབྦཊྛེན ཙེསཱ པཉྙཏྟི ནཱམ, ན པཉྙཱཔནཊྛེན. ཡཱ པན ཏསྶ ཨཏྠསྶ པཉྙཱཔནཱ, ཨཡཾ ཨཝིཛྫམཱནཔཉྙཏྟིཡེཝ. དིཊྛཱདཱིནི ཨུཔནིདྷཱཡ ¶ ཝཏྟབྦཏོཏི དིཊྛམུཏཝིཉྙཱཏེ ཨུཔནིདྷཱཡ ཨུཔཏྠམྦྷཾ ཀཏྭཱ ཨཔེཀྑིཏྭཱ ཝཏྟབྦཏྟཱ. དིཊྛཱདིསབྷཱཝཝིརཧིཏེ སདྡཱཡཏནེ ཝཏྟམཱནོཔི ཧི སུཏཝོཧཱརོ ‘‘དུཏིཡཾ ཏཏིཡ’’ནྟིཨཱདིཀོ ཝིཡ པཋམཱདཱིནི དིཊྛམུཏཝིཉྙཱཏེ ཨཔེཀྑིཏྭཱ པཝཏྟོ ‘‘ཨུཔནིདྷཱཔཉྙཏཱི’’ཏི ཝུཙྩཏེ. སཱ པནེསཱ ཨནེཀཝིདྷཱ ཏདཉྙཔེཀྑཱུཔནིདྷཱ ཧཏྠགཏཱུཔནིདྷཱ སམྤཡུཏྟཱུཔནིདྷཱསམཱརོཔིཏཱུཔནིདྷཱ ཨཝིདཱུརགཏཱུཔནིདྷཱ པཊིབྷཱགཱུཔནིདྷཱ ཏབྦཧུལཱུཔནིདྷཱཏབྦིསིཊྛཱུཔནིདྷཱ’’ཏིཨཱདིནཱ. ཏཱསུ ཨཡཾ ‘‘དུཏིཡཾ ཏཏིཡ’’ནྟིཨཱདིཀཱ ཝིཡ པཋམཱདཱིནཾ དིཊྛཱདཱིནཾ ཨཉྙམཉྙམཔེཀྑིཏྭཱ ཝུཏྟཏྟཱ ཏདཉྙཔེཀྑཱུཔནིདྷཱཔཉྙཏྟི ནཱམ.

ཨེཝཾ པཉྙཏྟིཡཱཔི ¶ ཨཏྠཱདྷིགམནཱིཡཏཱསངྑཱཏཾ དསྶེཏབྦཏྠཾ དསྶེཏྭཱ ཨིདཱནི སདྡསཱམཏྠིཡེན དཱིཔེཏབྦམཏྠཾ ནིདྡྷཱརེཏྭཱ དཱིཔེནྟོ ‘‘ཨེཏྠ ཙཱ’’ཏིཨཱདིམཱཧ. ཨེཏྠཱཏི ཨེཏསྨིཾ ཝཙནཏྟཡེ. ཙ-སདྡོ ཨུཔནྱཱསོ ཨཏྠནྟརཾ ཨཱརབྷིཏུཀཱམེན ཡོཛིཏཏྟཱ. ‘‘སུཏ’’ནྟི ཝུཏྟེ ཨསུཏཾ ན ཧོཏཱིཏི པཀཱསིཏོཡམཏྠོ, ཏསྨཱ ཏཐཱ སུཏ-སདྡེན པཀཱསིཏཱ ཨཏྟནཱ པཊིཝིདྡྷསུཏྟསྶ པཀཱརཝིསེསཱ ‘‘ཨེཝ’’ནྟི ཐེརེན པཙྩཱམཊྛཱཏི ཏེན ཨེཝཾ-སདྡེན ཨསམྨོཧོ དཱིཔིཏོ ནཱམ, ཏེནཱཧ ‘‘ཨེཝནྟི ཝཙནེན ཨསམྨོཧཾ དཱིཔེཏཱི’’ཏི. ཨསམྨོཧནྟི ཙ ཡཐཱསུཏེ སུཏྟེ ཨསམྨོཧཾ. ཏདེཝ ཡུཏྟིཡཱ, བྱཏིརེཀེན ཙ སམཏྠེཧི ‘‘ན ཧཱི’’ཏིཨཱདིནཱ ཝཀྑམཱནཉྩ སུཏྟཾ ནཱནཔྤཀཱརཾ དུཔྤཊིཝིདྡྷཉྩ. ཨེཝཾ ནཱནཔྤཀཱརེ དུཔྤཊིཝིདྡྷེ སུཏྟེ ཀཐཾ སམྨཱུལ༹ྷོ ནཱནཔྤཀཱརཔཊིཝེདྷསམཏྠོ བྷཝིསྶཏི. ཨིམཱཡ ཡུཏྟིཡཱ, ཨིམིནཱ ཙ བྱཏིརེཀེན ཐེརསྶ ཏཏྠ ཨསམྨཱུལ༹ྷབྷཱཝསངྑཱཏོ དཱིཔེཏབྦོ ཨཏྠོ ཝིཉྙཱཡཏཱིཏི ཝུཏྟཾ ཧོཏི. ཨེཝམཱིདིསེསུ ཡཐཱརཧཾ. བྷགཝཏོ སམྨུཁཱ སུཏཱཀཱརསྶ ཡཱཐཱཝཏོ ཨུཔརི ཐེརེན དསྶིཡམཱནཏྟཱ ‘‘སུཏྟསྶ ཨསམྨོསཾ དཱིཔེཏཱི’’ཏི ཝུཏྟཾ. ཀཱལནྟརེནཱཏི སུཏཀཱལཏོ ཨཔརེན ཀཱལེན. ཡསྶ…པེ… པཊིཛཱནཱཏི, ཐེརསྶ པན སུཝཎྞབྷཱཛནེ པཀྑིཏྟསཱིཧཝསཱ ཝིཡ ཨནསྶམཱནཾ ཨསམྨུཊྛཾ ཏིཊྛཏི, ཏསྨཱ སོ ཨེཝཾ པཊིཛཱནཱཏཱིཏི ཝུཏྟཾ ཧོཏི. ཨེཝཾ དཱིཔིཏེན པན ཨཏྠེན ཀིཾ པཀཱསིཏནྟི ཨཱཧ ‘‘ཨིཙྩསྶཱ’’ཏིཨཱདི. ཏཏྠ ཨིཙྩསྶཱཏི ཨིཏི ཨསྶ, ཏསྨཱ ཨསམྨོཧསྶ, ཨསམྨོསསྶ ཙ དཱིཔིཏཏྟཱ ཨསྶ ཐེརསྶཔཉྙཱསིདྡྷཱིཏིཨཱདིནཱ སམྦནྡྷོ. ཨསམྨོཧེནཱཏི སམྨོཧཱབྷཱཝེན. པཉྙཱཝཛྫིཏསམཱདྷིཨཱདིདྷམྨཛཱཏེན ཏཾསམྤཡུཏྟཱཡ པཉྙཱཡ ¶ སིདྡྷི སཧཛཱཏཱདིསཏྟིཡཱ སིཛ྄ཛྷནཏོ. སམྨོཧཔཊིཔཀྑེན ཝཱ པཉྙཱསངྑཱཏེན དྷམྨཛཱཏེན. སཝནཀཱལསམྦྷཱུཏཱཡ ཧི པཉྙཱཡ ཏདུཏྟརིཀཱལཔཉྙཱསིདྡྷི ཨུཔནིསྶཡཱདིཀོཊིཡཱ སིཛ྄ཛྷནཏོ. ཨིཏརཏྠཱཔི ཡཐཱརཧཾ ནཡོ ནེཏབྦོ.

ཨེཝཾ པཀཱསིཏེན པན ཨཏྠེན ཀིཾ ཝིབྷཱཝིཏནྟི ཨཱཧ ‘‘ཏཏྠཱ’’ཏིཨཱདི. ཏཏྠཱཏི ཏེསུ དུབྦིདྷེསུ དྷམྨེསུ. བྱཉྫནཱནཾ པཊིཝིཛ྄ཛྷིཏབྦོ ཨཱཀཱརོ ནཱཏིགམྦྷཱིརོ, ཡཐཱསུཏདྷཱརཎམེཝ ཏཏྠ ཀརཎཱིཡཾ, ཏསྨཱ ཏཏྠ སཏིཡཱ བྱཱཔཱརོ ཨདྷིཀོ, པཉྙཱ པན གུཎཱིབྷཱུཏཱཏི ཝུཏྟཾ ‘‘པཉྙཱཔུབྦངྒམཱཡཱ’’ཏིཨཱདི. པཉྙཱཡ པུབྦངྒམཱ པཉྙཱཔུབྦངྒམཱཏི ཧི ནིབྦཙནཾ, པུབྦངྒམཏཱ ཙེཏྠ པདྷཱནབྷཱཝོ ‘‘མནོཔུབྦངྒམཱ དྷམྨཱ’’ཏིཨཱདཱིསུ (དྷ. པ. ༡) ཝིཡ. ཨཔིཙ ཡཐཱ ཙཀྑུཝིཉྙཱཎཱདཱིསུ ཨཱཝཛྫནཱདཡོ པུབྦངྒམཱ སམཱནཱཔི ཏདཱརམྨཎསྶ ཨཝིཛཱནནཏོ ཨཔྤདྷཱནབྷཱུཏཱ, ཨེཝཾ པུབྦངྒམཱཡཔི ཨཔྤདྷཱནཏྟེ སཏི པཉྙཱཔུབྦངྒམཱ ཨེཏིསྶཱཏི ནིབྦཙནམྤི ཡུཛྫཏི. པུབྦངྒམཏཱ ཙེཏྠ པུརེཙཱརིབྷཱཝོ. ཨིཏི སཧཛཱཏཔུབྦངྒམོ པུརེཛཱཏཔུབྦངྒམོཏི དུཝིདྷོཔི པུབྦངྒམོ ཨིདྷ སམྦྷཝཏི, ཡཐཱ ཙེཏྠ, ཨེཝཾ སཏི ‘‘པུབྦངྒམཱཡཱ’’ཏི ཨེཏྠཱཔི ཡཐཱསམྦྷཝམེས ¶ ནཡོ ཝེདིཏབྦོ. ཨེཝཾ ཝིབྷཱཝིཏེན སམཏྠཏཱཝཙནེན ཀིམནུབྷཱཝིཏནྟི ཨཱཧ ‘‘ཏདུབྷཡསམཏྠཏཱཡོགེནཱ’’ཏིཨཱདི. ཏཏྠ ཨཏྠབྱཉྫནསམྤནྣསྶཱཏི ཨཏྠབྱཉྫནེན པརིཔུཎྞསྶ, སངྐཱསནཱདཱིཧི ཝཱ ཚཧི ཨཏྠཔདེཧི, ཨཀྑརཱདཱིཧི ཙ ཚཧི བྱཉྫནཔདེཧི སམནྣཱགཏསྶ, ཨཏྠབྱཉྫནསངྑཱཏེན ཝཱ རསེན སཱདུརསསྶ. པརིཡཏྟིདྷམྨོཡེཝ ནཝལོཀུཏྟརརཏནསནྣིདྷཱནཏོ སཏྟཝིདྷསྶ, དསཝིདྷསྶ ཝཱ རཏནསྶ སནྣིདྷཱནོ ཀོསོ ཝིཡཱཏི དྷམྨཀོསོ, ཏཐཱ དྷམྨབྷཎྜཱགཱརོ, ཏཏྠ ནིཡུཏྟོཏི དྷམྨབྷཎྜཱགཱརིཀོ. ཨཐ ཝཱ ནཱནཱརཱཛབྷཎྜརཀྑཀོ བྷཎྜཱགཱརིཀོ ཝིཡཱཏི བྷཎྜཱགཱརིཀོ, དྷམྨསྶ ཨནུརཀྑཀོ བྷཎྜཱགཱརིཀོཏི ཏམེཝ སདིསཏཱཀཱརཎདསྶནེན ཝིསེསེཏྭཱ ‘‘དྷམྨབྷཎྜཱགཱརིཀོ’’ཏི ཝུཏྟོ. ཡཐཱཧ –

‘‘བཧུསྶུཏོ དྷམྨདྷརོ, སབྦཔཱཋཱི ཙ སཱསནེ;

ཨཱནནྡོ ནཱམ ནཱམེན, དྷམྨཱརཀྑོ ཏཝཾ མུནེ’’ཏི. (ཨཔ. ༡.༥༤༢);

ཨཉྙཐཱཔི དཱིཔེཏབྦམཏྠཾ དཱིཔེཏི ‘‘ཨཔརོ ནཡོ’’ཏིཨཱདིནཱ, ཨེཝཾ སདྡེན ཝུཙྩམཱནཱནཾ ཨཱཀཱརནིདསྶནཱཝདྷཱརཎཏྠཱནཾ ཨཝིཔརཱིཏསདྡྷམྨཝིསཡཏྟཱ ཏབྦིསཡེཧི ¶ ཏེཧི ཨཏྠེཧི ཡོནིསོ མནསིཀཱརསྶ དཱིཔནཾ ཡུཏྟནྟི ཝུཏྟཾ ‘‘ཡོནི…པེ… དཱིཔེཏཱི’’ཏི. ‘‘ཨཡོནིསོ’’ཏིཨཱདིནཱ བྱཏིརེཀེན ཉཱཔཀཧེཏུདསྶནཾ. ཏཏྠ ཀཏྠཙི ཧི-སདྡོ དིསྶཏི, སོ ཀཱརཎེ, ཀསྨཱཏི ཨཏྠོ, ཨིམིནཱ ཝཙནེནེཝ ཡོནིསོ མནསིཀརོཏོ ནཱནཔྤཀཱརཔཊིཝེདྷསམྦྷཝཏོ ཨགྒི ཝིཡ དྷཱུམེན ཀཱརིཡེན ཀཱརཎབྷཱུཏོ སོ ཝིཉྙཱཡཏཱིཏི ཏདནྭཡམྤི ཨཏྠཱཔཏྟིཡཱ དསྶེཏི. ཨེས ནཡོ སབྦཏྠ ཡཐཱརཧཾ. ‘‘བྲཧྨཛཱལཾ ཨཱཝུསོ ཀཏྠ བྷཱསིཏ’’ནྟིཨཱདི པུཙྪཱཝསེན ཨདྷུནཱ པཀརཎཔྤཏྟསྶ ཝཀྑམཱནསྶ སུཏྟསྶ ‘‘སུཏ’’ནྟི པདེན ཝུཙྩམཱནཾ བྷགཝཏོ སམྨུཁཱ སཝནཾ སམཱདྷཱནམནྟརེན ན སམྦྷཝཏཱིཏི ཀཏྭཱ ཝུཏྟཾ ‘‘ཨཝིཀྑེཔཾ དཱིཔེཏཱི’’ཏི. ‘‘ཝིཀྑིཏྟཙིཏྟསྶཱ’’ཏིཨཱདིནཱ བྱཏིརེཀཀཱརཎེན ཉཱཔཀཧེཏུཾ དསྶེཏྭཱ ཏདེཝ སམཏྠེཏི ‘‘ཏཐཱ ཧཱི’’ཏིཨཱདིནཱ. སབྦསམྤཏྟིཡཱཏི སབྦེན ཨཏྠབྱཉྫནདེསཀཔཡོཛནཱདིནཱ སམྤཏྟིཡཱ. ཀིཾ ཨིམིནཱ པཀཱསིཏནྟི ཨཱཧ ‘‘ཡོནིསོ མནསིཀཱརེན ཙེཏྠཱ’’ཏིཨཱདི. ཨེཏྠཱཏི ཨེཏསྨིཾ དྷམྨདྭཡེ. ‘‘ན ཧི ཝིཀྑིཏྟཙིཏྟོ’’ཏིཨཱདིནཱ ཀཱརཎབྷཱུཏེན ཨཝིཀྑེཔེན, སཔྤུརིསཱུཔནིསྶཡེན ཙ ཕལབྷཱུཏསྶ སདྡྷམྨསྶཝནསྶ སིདྡྷིཡཱ ཨེཝ སམཏྠནཾ ཝུཏྟཾ, ཨཝིཀྑེཔེན པན སཔྤུརིསཱུཔནིསྶཡསྶ སིདྡྷིཡཱ སམཏྠནཾ ན ཝུཏྟཾ. ཀསྨཱཏི ཙེ? ཝིཀྑིཏྟཙིཏྟཱནཾ སཔྤུརིསེ པཡིརུཔཱསནཱབྷཱཝསྶ ཨཏྠཏོ སིདྡྷཏྟཱ. ཨཏྠཝསེནེཝ ཧི སོ པཱཀཊོཏི ན ཝུཏྟོ.

ཨེཏྠཱཧ – ཡཐཱ ཡོནིསོ མནསིཀཱརེན ཕལབྷཱུཏེན ཨཏྟསམྨཱཔཎིདྷིཔུབྦེཀཏཔུཉྙཏཱནཾ ཀཱརཎབྷཱུཏཱནཾ ¶ སིདྡྷི ཝུཏྟཱ ཏདཝིནཱབྷཱཝཏོ, ཨེཝཾ ཨཝིཀྑེཔེན ཕལབྷཱུཏེན སདྡྷམྨསྶཝནསཔྤུརིསཱུཔནིསྶཡཱནཾ ཀཱརཎབྷཱུཏཱནཾ སིདྡྷི ཝཏྟབྦཱ སིཡཱ ཨསྶུཏཝཏོ, སཔྤུརིསཱུཔནིསྶཡཝིརཧིཏསྶ ཙ ཏདབྷཱཝཏོ. ཨེཝཾ སནྟེཔི ‘‘ན ཧི ཝིཀྑིཏྟཙིཏྟོ’’ཏིཨཱདིསམཏྠནཝཙནེན ཨཝིཀྑེཔེན, སཔྤུརིསཱུཔནིསྶཡེན ཙ ཀཱརཎབྷཱུཏེན སདྡྷམྨསྶཝནསྶེཝ ཕལབྷཱུཏསྶ སིདྡྷི ཝུཏྟཱ, ཀསྨཱ པནེཝཾ ཝུཏྟཱཏི? ཝུཙྩཏེ – ཨདྷིཔྤཱཡནྟརསམྦྷཝཏོ ཧི ཏཐཱ སིདྡྷི ཝུཏྟཱ. ཨཡཾ པནེཏྠཱདྷིཔྤཱཡོ – སདྡྷམྨསྶཝནསཔྤུརིསཱུཔནིསྶཡཱ ན ཨེཀནྟེན ཨཝིཀྑེཔསྶ ཀཱརཎཾ བཱཧིརཀཱརཎཏྟཱ, ཨཝིཀྑེཔོ པན སཔྤུརིསཱུཔནིསྶཡོ ཝིཡ སདྡྷམྨསྶཝནསྶ ཨེཀནྟཀཱརཎཾ ཨཛ྄ཛྷཏྟིཀཀཱརཎཏྟཱ, ཏསྨཱ ཨེཀནྟཀཱརཎེ ཧོནྟེ ཀིམཏྠིཡཱ ཨནེཀནྟཀཱརཎཾ པཏི ཕལབྷཱཝཔརིཀཔྤནཱཏི ཏཐཱཡེཝེཏསྶ ¶ སིདྡྷི ཝུཏྟཱཏི. ཨེཏྠ ཙ པཋམཾ ཕལེན ཀཱརཎསྶ སིདྡྷིདསྶནཾ ནདཱིཔཱུརེན ཝིཡ ཨུཔརི ཝུཊྛིསབྦྷཱཝསྶ, དུཏིཡཾ ཀཱརཎེན ཕལསྶ སིདྡྷིདསྶནཾ ཨེཀནྟཝསྶིནཱ ཝིཡ མེགྷཝུཊྛཱནེན ཝུཊྛིཔཝཏྟིཡཱ.

‘‘ཨཔརོ ནཡོ’’ཏིཨཱདིནཱ ཨཉྙཐཱཔི དཱིཔེཏབྦཏྠམཱཧ, ཡསྨཱ ན ཧོཏཱིཏི སམྦནྡྷོ. ཨེཝནྟི…པེ… ནཱནཱཀཱརནིདྡེསོཏི ཧེཊྛཱ ཝུཏྟཾ, སོ ཙ ཨཱཀཱརོཏི སོཏདྭཱརཱནུསཱརཝིཉྙཱཎཝཱིཐིསངྑཱཏསྶ ཙིཏྟསནྟཱནསྶ ནཱནཱཀཱརེན ཨཱརམྨཎེ པཝཏྟིཡཱ ནཱནཏྠབྱཉྫནགྒཧཎསངྑཱཏོ སོ བྷགཝཏོ ཝཙནསྶ ཨཏྠབྱཉྫནཔྤབྷེདཔརིཙྪེདཝསེན སཀལསཱསནསམྤཏྟིཨོགཱཧནཱཀཱརོ. ཨེཝཾ བྷདྡཀོཏི ནིརཝསེསཔརཧིཏཔཱརིཔཱུརིབྷཱཝཀཱརཎཏྟཱ ཨེཝཾ ཡཐཱཝུཏྟེན ནཱནཏྠབྱཉྫནགྒཧཎེན སུནྡརོ སེཊྛོ, སམཱསཔདཾ ཝཱ ཨེཏཾ ཨེཝཾ ཨཱིདིསོ བྷདྡོ ཡསྶཱཏི ཀཏྭཱ. ན པཎིཧིཏོ ཨཔྤཎིཧིཏོ, སམྨཱ ཨཔྤཎི ཧིཏོ ཨཏྟཱ ཡསྶཱཏི ཏཐཱ, ཏསྶ. པཙྪིམཙཀྐདྭཡསམྤཏྟིནྟི ཨཏྟསམྨཱཔཎིདྷིཔུབྦེཀཏཔུཉྙཏཱསངྑཱཏགུཎདྭཡསམྤཏྟིཾ. གུཎསྶེཝ ཧི ཨཔརཱཔརཝུཏྟིཡཱ པཝཏྟནཊྛེན ཙཀྐབྷཱཝོ. ཙརནྟི ཝཱ ཨེཏེན སཏྟཱ སམྤཏྟིབྷཝཾ, སམྤཏྟིབྷཝེསཱུཏི ཝཱ ཙཀྐཾ. ཡཾ སནྡྷཱཡ ཝུཏྟཾ ‘‘ཙཏྟཱརིམཱནི བྷིཀྑཝེ, ཙཀྐཱནི, ཡེཧི སམནྣཱགཏཱནཾ དེཝམནུསྶཱནཾ ཙཏུཙཀྐཾ ཝཏྟཏཱི’’ཏིཨཱདི (ཨ. ནི. ༤.༣༡) པཙྪིམབྷཱཝོ ཙེཏྠ དེསནཱཀྐམཝསེནེཝ. པུརིམཙཀྐདྭཡསམྤཏྟིནྟི པཏིརཱུཔདེསཝཱསསཔྤུརིསཱུཔནིསྶཡསངྑཱཏགུཎདྭཡསམྤཏྟིཾ. སེསཾ ཝུཏྟནཡམེཝ. ཏསྨཱཏི པུརིམཀཱརཎཾ པུརིམསྶེཝཱཏི ཨིདྷ ཀཱརཎམཱཧ ‘‘ན ཧཱི’’ཏིཨཱདིནཱ.

ཏེན ཀིཾ པཀཱསིཏནྟི ཨཱཧ ‘‘ཨིཙྩསྶཱ’’ཏིཨཱདི. ཨིཏི ཨིམཱཡ ཙཏུཙཀྐསམྤཏྟིཡཱ ཀཱརཎབྷཱུཏཱཡ. ཨསྶ ཐེརསྶ. པཙྪིམཙཀྐདྭཡསིདྡྷིཡཱཏི པཙྪིམཙཀྐདྭཡསྶ ཨཏྠིབྷཱཝེན སིདྡྷིཡཱ ¶ . ཨཱསཡསུདྡྷཱིཏི ཝིཔསྶནཱཉཱཎསངྑཱཏཱཡ ཨནུལོམིཀཁནྟིཡཱ, ཀམྨསྶཀཏཱཉཱཎ-མགྒཉཱཎསངྑཱཏསྶ ཡཐཱབྷཱུཏཉཱཎསྶ ཙཱཏི དུཝིདྷསྶཱཔི ཨཱསཡསྶ ཨསུདྡྷིཧེཏུབྷཱུཏཱནཾ ཀིལེསཱནཾ དཱུརཱིབྷཱཝེན སུདྡྷི. ཏདེཝ ཧི དྭཡཾ ཝིཝཊྚནིསྶིཏཱནཾ སུདྡྷསཏྟཱནཾ ཨཱསཡོ. སམྨཱཔཎིཧིཏཏྟོ ཧི པུབྦེ ཙ ཀཏཔུཉྙོ སུདྡྷཱསཡོ ཧོཏི. ཏཐཱ ཧི ཝུཏྟཾ ‘‘སམྨཱཔཎིཧིཏཾ ཙིཏྟཾ, སེཡྻསོ ནཾ ཏཏོ ཀརེ’’ཏི, (དྷ. པ. ༤༣) ‘‘ཀཏཔུཉྙོསི ཏྭཾ ཨཱནནྡ, པདྷཱནམནུཡུཉྫ ¶ ཁིཔྤཾ ཧོཧིསི ཨནཱསཝོ’’ཏི (དཱི. ནི. ༢.༢༠༧) ཙ. ཀེཙི པན ‘‘ཀཏྟུཀམྱཏཱཚནྡོ ཨཱསཡོ’’ཏི ཝདནྟི, ཏདཡུཏྟམེཝ ‘‘ཏཱཡ ཙ ཨཱསཡསུདྡྷིཡཱ ཨདྷིགམབྱཏྟིསིདྡྷཱི’’ཏི ཝཙནེན ཝིརོདྷཏོ. ཨེཝམྤི མགྒཉཱཎསངྑཱཏསྶ ཨཱསཡསྶ སུདྡྷི ན ཡུཏྟཱ ཏཱཡ ཨདྷིགམབྱཏྟིསིདྡྷིཡཱ ཨཝཏྟབྦཏོཏི? ནོ ན ཡུཏྟོ པུརིམསྶ མགྒསྶ, པཙྪིམཱནཾ མགྒཱནཾ, ཕལཱནཉྩ ཀཱརཎབྷཱཝཏོ. པཡོགསུདྡྷཱིཏི ཡོནིསོམནསིཀཱརཔུབྦངྒམསྶ དྷམྨསྶཝནཔཡོགསྶ ཝིསདབྷཱཝེན སུདྡྷི, སབྦསྶ ཝཱ ཀཱཡཝཙཱིཔཡོགསྶ ནིདྡོསབྷཱཝེན སུདྡྷི. པཏིརཱུཔདེསཝཱསཱི, ཧི སཔྤུརིསསེཝཱི ཙ ཡཐཱཝུཏྟཝིསུདྡྷཔཡོགོ ཧོཏི. ཏཐཱཝིསུདྡྷེན ཡོནིསོམནསིཀཱརཔུབྦངྒམེན དྷམྨསྶཝནཔཡོགེན, ཝིཔྤཊིསཱརཱབྷཱཝཱཝཧེན ཙ ཀཱཡཝཙཱིཔཡོགེན ཨཝིཀྑིཏྟཙིཏྟོ པརིཡཏྟིཡཾ ཝིསཱརདོ ཧོཏི, ཏཐཱབྷཱུཏོ ཙ ཐེརོ, ཏེན ཝིཉྙཱཡཏི པུརིམཙཀྐདྭཡསིདྡྷིཡཱ ཐེརསྶ པཡོགསུདྡྷི སིདྡྷཱཝཱཏི. ཏེན ཀིཾ ཝིབྷཱཝིཏནྟི ཨཱཧ ‘‘ཏཱཡ ཙཱ’’ཏིཨཱདི. ཨདྷིགམབྱཏྟིསིདྡྷཱིཏི པཊིཝེདྷསངྑཱཏེ ཨདྷིགམེ ཚེཀབྷཱཝསིདྡྷི. ཨདྷིགམེཏབྦཏོ ཧི པཊིཝིཛ྄ཛྷིཏབྦཏོ པཊིཝེདྷོ ‘‘ཨདྷིགམོ’’ཏི ཨཊྛཀཐཱསུ ཝུཏྟོ, ཨཱགམོཏི ཙ པརིཡཏྟི ཨཱགཙྪནྟི ཨཏྟཏྠཔརཏྠཱདཡོ ཨེཏེན, ཨཱབྷུསོ ཝཱ གམིཏབྦོ ཉཱཏབྦོཏི ཀཏྭཱ.

ཏེན ཀིམནུབྷཱཝིཏནྟི ཨཱཧ ‘‘ཨིཏཱི’’ཏིཨཱདི. ཨིཏཱིཏི ཨེཝཾ ཝུཏྟནཡེན, ཏསྨཱ སིདྡྷཏྟཱཏི ཝཱ ཀཱརཎནིདྡེསོ. ཝཙནནྟི ནིདཱནཝཙནཾ ལོཀཏོ, དྷམྨཏོ ཙ སིདྡྷཱཡ ཨུཔམཱཡ ཏམཏྠཾ ཉཱཔེཏུཾ ‘‘ཨརུཎུགྒཾ ཝིཡཱ’’ཏིཨཱདིམཱཧ. ‘‘ཨུཔམཱཡ མིདྷེཀཙྩེ, ཨཏྠཾ ཛཱནནྟི པཎྜིཏཱ’’ཏི (ཛཱ. ༢.༡༩.༢༤) ཧི ཝུཏྟཾ. ཨརུཎོཏི སཱུརིཡསྶ ཨུདཡཏོ པུབྦབྷཱགེ ཨུཊྛིཏརཾསི, ཏསྶ ཨུགྒཾ ཨུགྒམནཾ ཨུདཡཏོ ཨུདཡནྟསྶ ཨུདཡཱཝཱསམུགྒཙྪཏོ སཱུརིཡསྶ པུབྦངྒམཾ པུརེཙརཾ བྷཝིཏུཾ ཨརཧཏི ཝིཡཱཏི སམྦནྡྷོ. ཨིདཾ ཝུཏྟཾ ཧོཏི – ཨཱགམཱདྷིགམབྱཏྟིཡཱ ཨཱིདིསསྶ ཐེརསྶ ཝུཏྟནིདཱནཝཙནཾ བྷགཝཏོ ཝཙནསྶ པུབྦངྒམཾ བྷཝིཏུམརཧཏི, ནིདཱནབྷཱཝཾ གཏཾ ཧོཏཱིཏི ཨིདམཏྠཛཱཏཾ ཨནུབྷཱཝིཏནྟི.

ཨིདཱནི ཨཔརམྤི པུབྦེ ཝུཏྟསྶ ཨསམྨོཧཱསམྨོསསངྑཱཏསྶ དཱིཔེཏབྦསྶཏྠསྶ དཱིཔཀེཧི ཨེཝཾ-སདྡ སུཏ-སདྡེཧི པཀཱསེཏབྦམཏྠཾ པཀཱསེནྟོ ‘‘ཨཔརོ ནཡོ’’ཏིཨཱདིམཱཧ. ཏཏྠ ཧི ‘‘ནཱནཔྤཀཱརཔཊིཝེདྷདཱིཔཀེན ¶ , སོཏབྦཔྤབྷེདཔཊིཝེདྷདཱིཔཀེནཱ’’ཏི ཙ ཨིམིནཱ ཏེཧི སདྡེཧི པུབྦེ ¶ དཱིཔིཏཾ ཨསམྨོཧཱསམྨོསསངྑཱཏཾ དཱིཔེཏབྦཏྠམཱཧ ཨསམྨོཧེན ནཱནཔྤཀཱརཔཊིཝེདྷསྶ, ཨསམྨོསེན ཙ སོཏབྦཔྤབྷེདཔཊིཝེདྷསྶ སིཛ྄ཛྷནཏོ. ‘‘ཨཏྟནོ’’ཏིཨཱདཱིཧི པན པཀཱསེཏབྦཏྠཾ. ཏེན ཝུཏྟཾ ཨཱཙརིཡདྷམྨཔཱལཏྠེརེན ‘‘ནཱནཔྤཀཱརཔཊིཝེདྷདཱིཔཀེནཱཏིཨཱདིནཱ ཨེཝཾ-སདྡ སུཏ-སདྡཱནཾ ཐེརསྶ ཨཏྠབྱཉྫནེསུ ཨསམྨོཧཱསམྨོསདཱིཔནཏོ ཙཏུཔཊིསམྦྷིདཱཝསེན ཨཏྠཡོཛནཾ དསྶེཏཱི’’ཏི (དཱི. ནི. ཊཱི. ༡.༡). ཧེཏུགབྦྷཉྩེཏཾ པདདྭཡཾ, ནཱནཔྤཀཱརཔཊིཝེདྷསངྑཱཏསྶ, སོཏབྦཔྤབྷེད-པཊིཝེདྷསངྑཱཏསྶ ཙ དཱིཔེཏབྦཏྠསྶ དཱིཔཀཏྟཱཏི ཝུཏྟཾ ཧོཏི. སནྟསྶ ཝིཛྫམཱནསྶ བྷཱཝོ སབྦྷཱཝོ, ཨཏྠཔཊིབྷཱནཔཊིསམྦྷིདཱཧི སམྤཏྟིཡཱ སབྦྷཱཝོ ཏཐཱ. ‘‘སམྦྷཝ’’ནྟིཔི པཱཋོ, སམྦྷཝནཾ སམྦྷཝོ, ཨཏྠཔཊིབྷཱནཔཊིསམྦྷིདཱསམྤཏྟཱིནཾ སམྦྷཝོ ཏཐཱ. ཨེཝཾ ཨིཏརཏྠཱཔི. ‘‘སོཏབྦཔྤབྷེདཔཊིཝེདྷདཱིཔཀེནཱ’’ཏི ཨེཏེན པན ཨཡཾ སུཏ-སདྡོ ཨེཝཾ-སདྡསནྣིདྷཱནཏོ, ཝཀྑམཱནཱཔེཀྑཱཡ ཝཱ སཱམཉྙེནེཝ ཝུཏྟེཔི སོཏབྦདྷམྨཝིསེསཾ ཨཱམསཏཱིཏི དསྶེཏི. ཨེཏྠ ཙ སོཏབྦདྷམྨསངྑཱཏཱཡ པཱལི༹ཡཱ ནིདསྶེཏབྦཱནཾ བྷཱསིཏཏྠཔཡོཛནཏྠཱནཾ, ཏཱིསུ ཙ ཉཱཎེསུ པཝཏྟཉཱཎསྶ ནཱནཔྤཀཱརབྷཱཝཏོ ཏབྦྷཱཝཔཊིཝེདྷདཱིཔཀེན ཨེཝཾ-སདྡེན ཨཏྠཔཊིབྷཱནཔཊིསམྦྷིདཱསམྤཏྟིསབྦྷཱཝདཱིཔནཾ ཡུཏྟཾ, སོཏབྦདྷམྨསྶ པན ཨཏྠཱདྷིགམཧེཏུཏོ, ཏཾཝསེན ཙ ཏདཝསེསཧེཏུཔྤབྷེདསྶ གཧིཏཏྟཱ, ནིརུཏྟིབྷཱཝཏོ ཙ སོཏབྦཔྤབྷེདདཱིཔཀེན སུཏ-སདྡེན དྷམྨནིརུཏྟིཔཊིསམྦྷིདཱསམྤཏྟིསབྦྷཱཝདཱིཔནཾ ཡུཏྟནྟི ཝེདིཏབྦཾ. ཏདེཝཏྠཉྷི ཉཱཔེཏུཾ ‘‘ཨསམྨོཧདཱིཔཀེན, ཨསམྨོསདཱིཔཀེནཱ’’ཏི ཙ ཨཝཏྭཱ ཏཐཱ ཝུཏྟནྟི.

ཨེཝཾ ཨསམྨོཧཱསམྨོསསངྑཱཏསྶ དཱིཔེཏབྦསྶཏྠསྶ དཱིཔཀེཧི ཨེཝཾ-སདྡ སུཏ-སདྡེཧི པཀཱསེཏབྦམཏྠཾ པཀཱསེཏྭཱ ཨིདཱནི ཡོནིསོམནསིཀཱརཱཝིཀྑེཔསངྑཱཏསྶ དཱིཔེཏབྦསྶཏྠསྶ དཱིཔཀེཧིཔི ཏེཧི པཀཱསེཏབྦམཏྠཾ པཀཱསེནྟོ ‘‘ཨེཝནྟི ཙཱ’’ཏིཨཱདིམཱཧ. ཏཏྠ ཧི ‘‘ཨེཝནྟི…པེ… བྷཱསམཱནོ, སུཏནྟི ཨིདཾ…པེ… བྷཱསམཱནོ’’ཏི ཙ ཨིམིནཱ ཏེཧི སདྡེཧི པུབྦེ དཱིཔིཏཾ ཡོནིསོམནསིཀཱརཱཝིཀྑེཔསངྑཱཏཾ དཱིཔེཏབྦཏྠམཱཧ, ‘‘ཨེཏེ མཡཱ’’ཏིཨཱདཱིཧི པན པཀཱསེཏབྦཏྠཾ སཝནཡོགདཱིཔཀནྟི ཙ ཨཝིཀྑེཔཝསེན སཝནཡོགསྶ སིཛ྄ཛྷནཏོ ཏདེཝ སནྡྷཱཡཱཧ ¶ . ཏཐཱ ཧི ཨཱཙརིཡདྷམྨཔཱལཏྠེརེན ཝུཏྟཾ ‘‘སཝནདྷཱརཎཝཙཱིཔརིཙརིཡཱ པརིཡཏྟིདྷམྨཱནཾ ཝིསེསེན སོཏཱཝདྷཱརཎཔཊིབདྡྷཱཏི ཏེ ཨཝིཀྑེཔདཱིཔཀེན སུཏསདྡེན ཡོཛེཏྭཱ’’ཏི (དཱི. ནི. ཊཱི. ༡.༡). མནོདིཊྛཱིཧི པརིཡཏྟིདྷམྨཱནཾ ཨནུཔེཀྑནསུཔྤཊིཝེདྷཱ ཝིསེསཏོ མནསིཀཱརཔཊིབདྡྷཱ, ཏསྨཱ ཏདྡཱིཔཀཝཙནེནེཝ ཨེཏེ མཡཱ དྷམྨཱ མནསཱནུཔེཀྑིཏཱ དིཊྛིཡཱ སུཔྤཊིཝིདྡྷཱཏི ཨིམམཏྠཾ པཀཱསེཏཱིཏི ཝུཏྟཾ ‘‘ཨེཝནྟི ཙ…པེ… དཱིཔེཏཱི’’ཏི ཏཏྠ དྷམྨཱཏི པརིཡཏྟིདྷམྨཱ. མནསཱནུཔེཀྑིཏཱཏི ‘‘ཨིདྷ སཱིལཾ ཀཐིཏཾ, ཨིདྷ སམཱདྷི, ཨིདྷ པཉྙཱ, ཨེཏྟཀཱཝ ཨེཏྠ ¶ ཨནུསནྡྷཡོ’’ཏིཨཱདིབྷེདེན མནསཱ ཨནུཔེཀྑིཏཱ. དིཊྛིཡཱ སུཔྤཊིཝིདྡྷཱཏི ནིཛ྄ཛྷཱནཀྑནྟིསངྑཱཏཱཡ, ཉཱཏཔརིཉྙཱསངྑཱཏཱཡ ཝཱ དིཊྛིཡཱ ཏཏྠ ཝུཏྟརཱུཔཱརཱུཔདྷམྨེ ‘‘ཨིཏི རཱུཔཾ, ཨེཏྟཀཾ རཱུཔ’’ནྟིཨཱདིནཱ སུཊྛུ ཝཝཏྠཱཔེཏྭཱ པཊིཝིདྡྷཱ.

སཝནདྷཱརཎཝཙཱིཔརིཙརིཡཱ ཙ པརིཡཏྟིདྷམྨཱནཾ ཝིསེསེན སོཏཱཝདྷཱརཎཔཊིབདྡྷཱ, ཏསྨཱ ཏདྡཱིཔཀཝཙནེནེཝ བཧཱུ མཡཱ དྷམྨཱ སུཏཱ དྷཱཏཱ ཝཙསཱ པརིཙིཏཱཏི ཨིམམཏྠཾ པཀཱསེཏཱིཏི ཝུཏྟཾ ‘‘སུཏནྟི ཨིདཾ…པེ… དཱིཔེཏཱི’’ཏི. ཏཏྠ སུཏཱཏི སོཏདྭཱརཱནུསཱརེན ཝིཉྙཱཏཱ. དྷཱཏཱཏི སུཝཎྞབྷཱཛནེ པཀྑིཏྟསཱིཧཝསཱ ཝིཡ མནསི སུཔྤཏིཊྛིཏབྷཱཝསཱདྷནེན ཨུཔདྷཱརིཏཱ. ཝཙསཱ པརིཙིཏཱཏི པགུཎཏཱསམྤཱདནེན ཝཱཙཱཡ པརིཙིཏཱ སཛ྄ཛྷཱཡིཏཱ. ཨིདཱནི པཀཱསེཏབྦཏྠདྭཡདཱིཔཀེན ཡཐཱཝུཏྟསདྡདྭཡེན ཝིབྷཱཝེཏབྦམཏྠཾ ཝིབྷཱཝེནྟོ ‘‘ཏདུབྷཡེནཔཱི’’ཏིཨཱདིམཱཧ. ཏཏྠ ཏདུབྷཡེནཱཏི པུརིམནཡེ, པཙྪིམནཡེ ཙ ཡཐཱཝུཏྟསྶ པཀཱསེཏབྦསྶཏྠསྶ པཀཱསཀེན ཏེན དུབྦིདྷེན སདྡེན. ཨཏྠབྱཉྫནཔཱརིཔཱུརིཾ དཱིཔེནྟོཏི ཨཱདརཛནནསྶ ཀཱརཎཝཙནཾ. ཏདེཝ ཀཱརཎཾ བྱཏིརེཀེན ཝིཝརཏི, ཡུཏྟིཡཱ ཝཱ དལ༹ྷཾ ཀརོཏི ‘‘ཨཏྠབྱཉྫནཔརིཔུཎྞཉྷཱི’’ཏིཨཱདིནཱ. ཨསུཎནྟོཏི ཙེཏྠ ལཀྑཎེ, ཧེཏུམྷི ཝཱ ཨནྟ-སདྡོ. མཧཏཱ ཧིཏཱཏི མཧནྟཏོ ཧིཏསྨཱ. པརིབཱཧིརོཏི སབྦཏོ བྷཱགེན བཱཧིརོ.

ཨེཏེན པན ཝིབྷཱཝེཏབྦཏྠདཱིཔཀེན སདྡདྭཡེན ཨནུབྷཱཝེཏབྦཏྠམནུབྷཱཝེནྟོ ‘‘ཨེཝཾ མེ སུཏནྟི ཨིམིནཱ’’ཏིཨཱདིམཱཧ. པུབྦེ ཝིསུཾ ཝིསུཾ ཨཏྠེ ཡོཛིཏཱཡེཝ ཨེཏེ སདྡཱ ཨིདྷ ཨེཀསྶེཝཱནུབྷཱཝཏྠསྶ ཨནུབྷཱཝཀབྷཱཝེན གཧིཏཱཏི ཉཱཔེཏུཾ ‘‘སཀལེནཱ’’ཏི ཝུཏྟཾ. ཀཱམཉྩ མེ-སདྡོ ཨིམསྨིཾ ¶ ཋཱནེ པུབྦེན ཡོཛིཏོ, ཏདཔེཀྑཱནཾ པན ཨེཝཾ-སདྡ སུཏ-སདྡཱནཾ སཧཙརཎཏོ, ཨཝིནཱབྷཱཝཏོ ཙ ཏཐཱ ཝུཏྟནྟི དཊྛབྦཾ. ཏཐཱགཏཔྤཝེདིཏནྟི ཏཐཱགཏེན པཀཱརཏོ ཝིདིཏཾ, བྷཱསིཏཾ ཝཱ. ཨཏྟནོ ཨདཧནྟོཏི ཨཏྟནི ‘‘མམེད’’ནྟི ཨཊྛཔེནྟོ. བྷུམྨཏྠེ ཙེཏཾ སཱམིཝཙནཾ. ཨསཔྤུརིསབྷཱུམིནྟི ཨསཔྤུརིསཝིསཡཾ, སོ ཙ ཨཏྠཏོ ཨཔཀཏཉྙུཏཱསངྑཱཏཱ ‘‘ཨིདྷེཀཙྩོ པཱཔབྷིཀྑུ ཏཐཱགཏཔྤཝེདིཏཾ དྷམྨཝིནཡཾ པརིཡཱཔུཎིཏྭཱ ཨཏྟནོ དཧཏཱི’’ཏི (པཱརཱ. ༡༩༥) ཨེཝཾ མཧཱཙོརདཱིཔཀེན བྷགཝཏཱ ཝུཏྟཱ ཨནརིཡཝོཧཱརཱཝཏྠཱ, ཏཐཱ ཙཱཧ ‘‘ཏཐཱགཏ…པེ… ཨདཧནྟོ’’ཏི. ཧུཏྭཱཏི ཙེཏྠ སེསོ. ཏཐཱ སཱཝཀཏྟཾ པཊིཛཱནནྟོཏི སཔྤུརིསབྷཱུམིཨོཀྐམནསརཱུཔཀཐནཾ. ནནུ ཙ ཨཱནནྡཏྠེརསྶ ‘‘མམེཏཾ ཝཙན’’ནྟི ཨདྷིམཱནསྶ, མཧཱཀསྶཔཏྠེརཱདཱིནཉྩ ཏདཱསངྐཱཡ ཨབྷཱཝཏོ ཨསཔྤུརིསབྷཱུམིསམཏིཀྐམཱདིཝཙནཾ ནིརཏྠཀཾ སིཡཱཏི? ནཡིདམེཝཾ ‘‘ཨེཝཾ མེ སུཏ’’ནྟི ཝདནྟེན ཨཡམྤི ཨཏྠོ ཨནུབྷཱཝིཏོཏི ཨཏྠསྶེཝ དསྶནཏོ. ཏེན ཧི ཨནུབྷཱཝེཏབྦམཏྠཾཡེཝ ཏཐཱ དསྶེཏི, ན པན ཨཱནནྡཏྠེརསྶ ཨདྷིམཱནསྶ, མཧཱཀསྶཔཏྠེརཱདཱིནཉྩ ¶ ཏདཱསངྐཱཡ སམྦྷཝནྟི ནིཊྛམེཏྠ གནྟབྦཾ. ཀེཙི པན ‘‘དེཝཏཱནཾ པརིཝིཏཀྐཱཔེཀྑཾ ཏཐཱཝཙནཾ, ཏསྨཱ ཨེདིསཱི ཙོདནཱ ཨནཝཀཱསཱ’’ཏི ཝདནྟི. ཏསྨིཾ ཀིར སམཡེ ཨེཀཙྩཱནཾ དེཝཏཱནཾ ཨེཝཾ ཙེཏསོ པརིཝིཏཀྐོ ཨུདཔཱདི ‘‘བྷགཝཱ ཙ པརིནིབྦུཏོ, ཨཡཉྩཱཡསྨཱ ཨཱནནྡོ དེསནཱཀུསལོ, ཨིདཱནི དྷམྨཾ དེསེཏི, སཀྱཀུལཔྤསུཏོ ཏཐཱགཏསྶ བྷཱཏཱ, ཙཱུལ༹པིཏུཔུཏྟོ ཙ, ཀིཾ ནུ ཁོ སོ སཡཾ སཙྪིཀཏཾ དྷམྨཾ དེསེཏི, ཨུདཱཧུ བྷགཝཏོཡེཝ ཝཙནཾ ཡཐཱསུཏ’’ནྟི, ཏེསམེཝ ཙེཏོཔརིཝིཏཀྐམཉྙཱཡ ཏདབྷིཔརིཧརཎཏྠཾ ཨསཔྤུརིསབྷཱུམིསམཏིཀྐམནཱདིཨཏྠོ ཨནུབྷཱཝིཏོཏི. སཱཡེཝ ཡཐཱཝུཏྟཱ ཨནརིཡཝོཧཱརཱཝཏྠཱ ཨསདྡྷམྨོ, ཏདཝཏྠཱནོཀྐམནསངྑཱཏཱ ཙ སཱཝཀཏྟཔཊིཛཱནནཱ སདྡྷམྨོ. ཨེཝཾ སཏི པརིཡཱཡནྟརེན པུརིམཏྠམེཝ དསྶེཏཱིཏི གཧེཏབྦཾ. ཨཔིཙ ཀུཧནལཔནཱདིཝསེན པཝཏྟོ ཨཀུསལརཱསི ཨསདྡྷམྨོ, ཏབྦིརཧིཏབྷཱཝོ ཙ སདྡྷམྨོ. ‘‘ཀེཝལ’’ནྟིཨཱདིནཱཔི ཝུཏྟསྶེཝཏྠསྶ པརིཡཱཡནྟརེན དསྶནཾ, ཡཐཱཝུཏྟཱཡ ཨནརིཡཝོཧཱརཱཝཏྠཱཡ པརིམོཙེཏི. སཱཝཀཏྟཾ པཊིཛཱནནེན སཏྠཱརཾ ཨཔདིསཏཱིཏི ཨཏྠོ. ཨཔིཙ སཏྠུཀཔྤཱདིཀིརིཡཏོ ཨཏྟཱནཾ པརིམོཙེཏི ཏཀྐིརིཡཱསངྐཱཡ ¶ སམྦྷཝཏོ. ‘‘སཏྠུ བྷགཝཏོཡེཝ ཝཙནཾ མཡཱསུཏ’’ནྟི སཏྠཱརཾ ཨཔདིསཏཱིཏི ཨཏྠནྟརམནུབྷཱཝནཾ ཧོཏི. ‘‘ཛིནཝཙན’’ནྟིཨཱདིཔི པརིཡཱཡནྟརདསྶནཾ, ཨཏྠནྟརམནུབྷཱཝནམེཝ ཝཱ. ཨཔྤེཏཱིཏི ནིདསྶེཏི. དིཊྛདྷམྨིཀསམྤརཱཡིཀཔརམཏྠེསུ ཡཐཱརཧཾ སཏྟེ ནེཏཱིཏི ནེཏྟི, དྷམྨོཡེཝ ནེཏྟི ཏཐཱ. ཝུཏྟནཡེན ཙེཏྠ ཨུབྷཡཐཱ ཨདྷིཔྤཱཡོ ཝེདིཏབྦོ.

ཨཔརམྤི ཨནུབྷཱཝེཏབྦམཏྠམནུབྷཱཝེཏི ‘‘ཨཔིཙཱ’’ཏིཨཱདིནཱ. ཏཏྠ ཨུཔྤཱདིཏབྷཱཝཏནྟི དེསནཱཝསེན པཝཏྟིཏབྷཱཝཾ. པུརིམཝཙནཾ ཝིཝརནྟོཏི བྷགཝཏཱ དེསིཏཝསེན པུརིམཏརཾ སཾཝིཛྫམཱནཾ བྷགཝཏཱ ཝཙནམེཝ ཨུཏྟཱནིཾ ཀརོནྟོ, ཨིདཾ ཝཙནནྟི སམྦནྡྷོ. ཙཏཱུཧི ཝེསཱརཛྫཉཱཎེཧི ཝིསཱརདསྶ, ཝིསཱརདཧེཏུབྷཱུཏཙཏུཝེསཱརཛྫཉཱཎསམྤནྣསྶ ཝཱ. དསཉཱཎབལདྷརསྶ. སམྨཱསམྦུདྡྷབྷཱཝསངྑཱཏེ ཨུཏྟམཊྛཱནེ ཋིཏསྶ, ཨུསབྷསྶ ཨིདནྟི ཝཱ ཨཏྠེན ཨཱསབྷསངྑཱཏེ ཨཀམྤནསབྷཱཝབྷཱུཏེ ཋཱནེ ཋིཏསྶ. ‘‘ཨེཝམེཝ ཁོ བྷིཀྑཝེ, ཡདཱ ཏཐཱགཏོ ལོཀེ ཨུཔྤཛྫཏི…པེ… སོ དྷམྨཾ དེསེཏཱི’’ཏིཨཱདིནཱ (ཨ. ནི. ༤.༣༣) སཱིཧོཔམསུཏྟཱདཱིསུ ཨཱགཏེན ཨནེཀནཡེན སཱིཧནཱདནདིནོ. སབྦསཏྟེསུ, སབྦསཏྟཱནཾ ཝཱ ཨུཏྟམསྶ. ན ཙེཏྠ ནིདྡྷཱརཎལཀྑཎཱབྷཱཝཏོ ནིདྡྷཱརཎཝསེན སམཱསོ. སབྦཏྠ ཧི སཀྐཏགནྠེསུ, སཱསནགནྠེསུ ཙ ཨེཝམེཝ ཝུཏྟཾ. དྷམྨེན སཏྟཱནམིསྶརསྶ. དྷམྨསྶེཝ ཨིསྶརསྶ ཏདུཔྤཱདནཝསེནཱཏིཔི ཝདནྟི. སེསཔདདྭཡཾ ཏསྶེཝཏྠསྶ པརིཡཱཡནྟརདཱིཔནཾ. དྷམྨེན ལོཀསྶ པདཱིཔམིཝ བྷཱུཏསྶ, ཏདུཔྤཱདཀབྷཱཝེན ཝཱ དྷམྨསངྑཱཏཔདཱིཔསམྤནྣསྶ. ‘‘དྷམྨཀཱཡོཏི བྷིཀྑཝེ, ཏཐཱགཏསྶེཏཾ ཨདྷིཝཙན’’ནྟི (དཱི. ནི. ༣.༡༡༨) ཧི ཝུཏྟཾ. དྷམྨེན ལོཀཔཊིསརཎབྷཱུཏསྶ, དྷམྨསངྑཱཏེན ¶ ཝཱ པཊིསརཎེན སམྤནྣསྶ. ‘‘ཡཾནཱུནཱཧཾ…པེ… ཏམེཝ དྷམྨཾ སཀྐཏྭཱ གརུཾ ཀཏྭཱ མཱནེཏྭཱ པཱུཛེཏྭཱ ཨུཔནིསྶཱཡ ཝིཧརེཡྻ’’ནྟི (ཨ. ནི. ༤.༢༡; སཾ. ནི. ༡.༡༧༣) ཧི ཝུཏྟཾ. སདྡྷིནྡྲིཡཱདིསདྡྷམྨསངྑཱཏསྶ ཝརཙཀྐསྶ པཝཏྟིནོ, སདྡྷམྨཱནམེཏསྶ ཝཱ ཨཱཎཱཙཀྐཝརསྶ པཝཏྟིནོ སམྨཱསམྦུདྡྷསྶ ཏསྶ བྷགཝཏོ ཨིདཾ ཝཙནཾ སམྨུཁཱཝ མཡཱ པཊིགྒཧིཏནྟི ཡོཛེཏབྦཾ. བྱཉྫནེཏི པདསམུདཱཡབྷཱུཏེ ཝཱཀྱེ. ཀངྑཱ ཝཱ ཝིམཏི ཝཱཏི ཨེཏྠ དལ༹ྷཏརཾ ནིཝིཊྛཱ ཝིཙིཀིཙྪཱ ཀངྑཱ. ནཱཏིསཾསཔྤནཾ མཏིབྷེདམཏྟཾ ཝིམཏི. སམྨུཁཱ པཊིགྒཧིཏམིདཾ མཡཱཏི ཏཐཱ ཨཀཏྟབྦབྷཱཝཀཱརཎཝཙནཾ. ཨཏྟནཱ ཨུཔྤཱདིཏབྷཱཝཾ ཨཔྤཊིཛཱནནྟོ པུརིམཝཙནཾ ¶ ཝིཝརནྟོཏི པན ཨསྶདྡྷིཡཝིནཱསནསྶ, སདྡྷཱསམྤདམུཔྤཱདནསྶ ཙ ཀཱརཎཝཙནཾ. ‘‘ཏེནེཏ’’ནྟིཨཱདིནཱ ཡཐཱཝུཏྟམེཝཏྠཾ ཨུདཱནཝསེན དསྶེཏི.

‘‘ཨེཝཾ མེ སུཏ’’ནྟི ཨེཝཾ ཝདནྟོ གོཏམགོཏྟསྶ སམྨཱསམྦུདྡྷསྶ སཱཝཀོ, གོཏམགོཏྟསམྦནྡྷོ ཝཱ སཱཝཀོ ཨཱཡསྨཱ ཨཱནནྡོ བྷགཝཏཱ བྷཱསིཏབྷཱཝསྶ, སམྨུཁཱ པཊིགྒཧིཏབྷཱཝསྶ ཙ སཱུཙནཏོ, ཏཐཱསཱུཙནེནེཝ ཙ ཁལིཏདུནྣིརུཏྟཱདིགཧཎདོསཱབྷཱཝསྶ སིཛ྄ཛྷནཏོ སཱསནེ ཨསྶདྡྷཾ ཝིནཱསཡཏི, སདྡྷཾ ཝཌྜྷེཏཱིཏི ཨཏྠོ. ཨེཏྠ ཙ པཉྩམཱདཡོ ཏིསྶོ ཨཏྠཡོཛནཱ ཨཱཀཱརཱདིཨཏྠེསུ ཨགྒཧིཏཝིསེསམེཝ ཨེཝཾ-སདྡཾ གཧེཏྭཱ དསྶིཏཱ, ཏཏོ པརཱ ཏིསྶོ ཨཱཀཱརཏྠམེཝ ཨེཝཾ-སདྡཾ གཧེཏྭཱ ཝིབྷཱཝིཏཱ, པཙྪིམཱ པན ཏིསྶོ ཡཐཱཀྐམཾ ཨཱཀཱརཏྠཾ, ནིདསྶནཏྠཾ, ཨཝདྷཱརཎཏྠཉྩ ཨེཝཾ-སདྡཾ གཧེཏྭཱ ཡོཛིཏཱཏི དཊྛབྦཾ. ཧོནྟི ཙེཏྠ –

‘‘དསྶནཾ དཱིཔནཉྩཱཔི, པཀཱསནཾ ཝིབྷཱཝནཾ;

ཨནུབྷཱཝནམིཙྩཏྠོ, ཀིརིཡཱཡོགེན པཉྩདྷཱ.

དསྶིཏོ པརམྤརཱཡ, སིདྡྷོ ནེཀཏྠཝུཏྟིཡཱ;

ཨེཝཾ མེ སུཏམིཙྩེཏྠ, པདཏྟཡེ ནཡཉྙུནཱ’’ཏི.

ཨེཀ-སདྡོ པན ཨཉྙསེཊྛཱསཧཱཡསངྑྱཱདཱིསུ དིསྶཏི. ཏཐཱ ཧེས ‘‘སསྶཏོ ཨཏྟཱ ཙ ལོཀོ ཙ, ཨིདམེཝ སཙྩཾ མོགྷམཉྙནྟི ཨིཏྠེཀེ ཨབྷིཝདནྟཱི’’ཏིཨཱདཱིསུ (མ. ནི. ༣.༢༧) ཨཉྙཏྠེ དིསྶཏི, ‘‘ཙེཏསོ ཨེཀོདིབྷཱཝ’’ནྟིཨཱདཱིསུ (དཱི. ནི. ༡.༢༢༨; པཱརཱ. ༡༡) སེཊྛེ, ‘‘ཨེཀོཝཱུཔཀཊྛོ’’ཏིཨཱདཱིསུ (དཱི. ནི. ༡.༤༠༥; དཱི. ནི. ༢.༢༡༥; མ. ནི. ༡.༨༠; སཾ. ནི. ༣.༦༣; ཝིབྷ. ༤.༤༤༥) ཨསཧཱཡེ, ‘‘ཨེཀོཝ ཁོ བྷིཀྑཝེ, ཁཎོ ཙ སམཡོ ཙ བྲཧྨཙརིཡཝཱསཱཡཱ’’ཏིཨཱདཱིསུ (ཨ. ནི. ༨.༢༩) སངྑྱཱཡཾ, ཨིདྷཱཔི སངྑྱཱཡམེཝཱཏི ¶ དསྶེནྟོ ཨཱཧ ‘‘ཨེཀནྟི གཎནཔརིཙྪེདནིདྡེསོ’’ཏི (ཨིཏིཝུ. ཨཊྛ. ༡; དཱི. ནི. ཊཱི. ༡.པརིབྦཱཛཀཀཐཱཝཎྞནཱ) ཨེཀོཡེཝེས སམཡོ, ན དྭེ ཝཱ ཏཡོ ཝཱཏི ཨཱུནཱདྷིཀཱབྷཱཝེན གཎནསྶ པརིཙྪེདནིདྡེསོ ཨེཀནྟི ཨཡཾ སདྡོཏི ཨཏྠོ, ཏེན ཀསྶ པརིཙྪིནྡནནྟི ཨནུཡོགེ སཏི ¶ ‘‘སམཡ’’ནྟི ཝུཏྟནྟི དསྶེནྟོ ཨཱཧ ‘‘སམཡནྟི པརིཙྪིནྣནིདྡེསོ’’ཏི. ཨེཝཾ པརིཙྪེདཔརིཙྪིནྣཝསེན ཝུཏྟེཔི ‘‘ཨཡཾ ནཱམ སམཡོ’’ཏི སརཱུཔཏོ ཨནིཡམིཏཏྟཱ ཨནིཡམིཏཝཙནམེཝཱཏི དསྶེཏི ‘‘ཨེཀཾ…པེ…. དཱིཔན’’ནྟི ཨིམིནཱ.

ཨིདཱནི སམཡསདྡསྶ ཨནེཀཏྠཝུཏྟིཏཾ ཨཏྠུདྡྷཱརཝསེན དསྶེཏྭཱ ཨིདྷཱདྷིཔྤེཏམཏྠཾ ནིཡམེནྟོ ‘‘ཏཏྠཱ’’ཏིཨཱདིམཱཧ. ཏཏྠཱཏི ཏསྨིཾ ‘‘ཨེཀཾ སམཡ’’ནྟི པདདྭཡེ, སམབྷིནིཝིཊྛོ སམཡ སདྡོཏི སམྦནྡྷོ. ན པན དིསྶཏཱིཏི ཏེསྭེཀསྨིཾཡེཝ ཨཏྠེ ཨིདྷ པཝཏྟནཏོ. སམཝཱཡེཏི པཙྩཡསཱམགྒིཡཾ, ཀཱརཎསམཝཱཡེཏི ཨཏྠོ. ཁཎེཏི ཨོཀཱསེ. ཧེཏུདིཊྛཱིསཱུཏི ཧེཏུམྷི ཙེཝ ལདྡྷིཡཉྩ. ཨསྶཱཏི སམཡསདྡསྶ. ཀཱལཉྩ སམཡཉྩ ཨུཔཱདཱཡཱཏི ཨེཏྠ ཀཱལོ ནཱམ ཨུཔསངྐམནསྶ ཡུཏྟཀཱལོ. སམཡོ ནཱམ ཏསྶེཝ པཙྩཡསཱམགྒཱི, ཨཏྠཏོ པན ཏདནུརཱུཔསརཱིརབལཉྩེཝ ཏཔྤཙྩཡཔརིསྶཡཱབྷཱཝོ ཙ. ཨུཔཱདཱནཾ ནཱམ ཉཱཎེན ཏེསཾ གཧཎཾ, ཏསྨཱ ཡཐཱཝུཏྟཾ ཀཱལཉྩ སམཡཉྩ པཉྙཱཡ གཧེཏྭཱ ཨུཔདྷཱརེཏྭཱཏི ཨཏྠོ. ཨིདཾ ཝུཏྟཾ ཧོཏི – སཙེ ཨམྷཱཀཾ སྭེ གམནསྶ ཡུཏྟཀཱལོ བྷཝིསྶཏི, ཀཱཡེ བལམཏྟཱ ཙ ཕརིསྶཏི, གམནཔཙྩཡཱ ཙ ཨཉྙོ ཨཕཱསུཝིཧཱརོ ན བྷཝིསྶཏི, ཨཐེཏཾ ཀཱལཉྩ གམནཀཱརཎསམཝཱཡསངྑཱཏཾ སམཡཉྩ ཨུཔདྷཱརེཏྭཱ ཨཔྤེཝ ནཱམ སྭེཔི ཨཱགཙྪེཡྻཱམཱཏི. ཁཎོཏི ཨོཀཱསོ. ཏཐཱགཏུཔྤཱདཱདིཀོ ཧི མགྒབྲཧྨཙརིཡསྶ ཨོཀཱསོ ཏཔྤཙྩཡཔཊིལཱབྷཧེཏུཏྟཱ. ཁཎོ ཨེཝ ཙ སམཡོ. ཡོ ‘‘ཁཎོ’’ཏི ཙ ‘‘སམཡོ’’ཏི ཙ ཝུཙྩཏི, སོ ཨེཀོཝཱཏི ཨདྷིཔྤཱཡོ. དིཡཌྜྷོ མཱསོ སེསོ གིམྷཱནཾ ཨུཎྷསམཡོ. ཝསྶཱནསྶ པཋམོ མཱསོ པརིལཱ༹ཧསམཡོ. མཧཱསམཡོཏི མཧཱསམཱུཧོ. སམཱསོ ཝཱ ཨེས, བྱཱསོ ཝཱ. པཝུཊྛཾ ཝནཾ པཝནཾ, ཏསྨིཾ, ཀཔིལཝཏྠུསཱམནྟེ མཧཱཝནསངྑཱཏེ ཝནསཎྜེཏི ཨཏྠོ. སམཡོཔི ཁོཏི ཨེཏྠ སམཡོཏི སིཀྑཱཔདཔཱུརཎསྶ ཧེཏུ. བྷདྡཱལཱིཏི ཏསྶ བྷིཀྑུསྶ ནཱམཾ. ཨིདཾ ཝུཏྟཾ ཧོཏི – ཏཡཱ བྷདྡཱལི པཊིཝིཛ྄ཛྷིཏབྦཡུཏྟཀཾ ཨེཀཾ ཀཱརཎཾ ཨཏྠི, ཏམྤི ཏེ ན པཊིཝིདྡྷཾ ན སལླཀྑིཏནྟི. ཀིཾ ཏཾ ཀཱརཎནྟི ཨཱཧ ‘‘བྷགཝཱཔི ཁོ’’ཏིཨཱདི.

‘‘ཨུགྒཧམཱནོ’’ཏིཨཱདཱིསུ མཱནོཏི ཏསྶ པརིབྦཱཛཀསྶ པཀཏིནཱམཾ, ཀིཉྩི ཀིཉྩི པན སིཔྤཾ ཨུགྒཧེཏུཾ སམཏྠཏཱཡ ‘‘ཨུགྒཧམཱནོ’’ཏི ནཾ ¶ སཉྫཱནནྟི, ཏསྨཱ ‘‘ཨུགྒཧམཱནོ’’ཏི ཝུཙྩཏི. སམཎམུཎྜིཀསྶ པུཏྟོ སམཎམུཎྜིཀཱཔུཏྟོ. སོ ཀིར དེཝདཏྟསྶ ཨུཔཊྛཱཀོ. སམཡཾ དིཊྛིཾ ¶ པཀཱརེན ཝདནྟི ཨེཏྠཱཏི སམཡཔྤཝཱདཀོ, ཏསྨིཾ, དིཊྛིཔྤཝཱདཀེཏི ཨཏྠོ. ཏསྨིཾ ཀིར ཋཱནེ ཙངྐཱིཏཱརུཀྑཔོཀྑརསཱཏིཔྤབྷཱུཏཡོ བྲཱཧྨཎཱ, ནིགཎྛཱཙེལཀཔརིབྦཱཛཀཱདཡོ ཙ པབྦཛིཏཱ སནྣིཔཏིཏྭཱ ཨཏྟནོ ཨཏྟནོ སམཡཾ པཀཱརེན ཝདནྟི ཀཐེནྟི དཱིཔེནྟི, ཏསྨཱ སོ ཨཱརཱམོ ‘‘སམཡཔྤཝཱདཀོ’’ཏི ཝུཙྩཏི. སྭེཝ ཏིནྡུཀཱཙཱིརསངྑཱཏཱཡ ཏིམྦརཱུསཀརུཀྑཔནྟིཡཱ པརིཀྑིཏྟཏྟཱ ‘‘ཏིནྡུཀཱཙཱིརོ’’ཏི ཝུཙྩཏི. ཨེཀཱ སཱལཱ ཨེཏྠཱཏི ཨེཀསཱལཀོ. ཡསྨཱ པནེཏྠ པཋམཾ ཨེཀཱ སཱལཱ ཨཧོསི, པཙྪཱ པན མཧཱཔུཉྙཾ པོཊྛཔཱདཔརིབྦཱཛཀཾ ནིསྶཱཡ བཧཱུ སཱལཱ ཀཏཱ, ཏསྨཱ ཏམེཝ པཋམཾ ཀཏཾ ཨེཀཾ སཱལཾ ཨུཔཱདཱཡ ལདྡྷཔུབྦནཱམཝསེན ‘‘ཨེཀསཱལཀོ’’ཏི ཝུཙྩཏི. མལླིཀཱཡ ནཱམ པསེནདིརཉྙོ དེཝིཡཱ ཨུཡྻཱནབྷཱུཏོ སོ པུཔྥཕལསཙྪནྣོ ཨཱརཱམོ, ཏེན ཝུཏྟཾ ‘‘མལླིཀཱཡ ཨཱརཱམེ’’ཏི. པཊིཝསཏཱིཏི ཏསྨིཾ ཕཱསུཏཱཡ ཝསཏི.

དིཊྛེ དྷམྨེཏི པཙྩཀྑེ ཨཏྟབྷཱཝེ. ཨཏྠོཏི ཝུཌྜྷི. ཀམྨཀིལེསཝསེན སམྤརེཏབྦཏོ སམྨཱ པཱཔུཎིཏབྦཏོ སམྤརཱཡོ, པརལོཀོ, ཏཏྠ ནིཡུཏྟོ སམྤརཱཡིཀོ, པརལོཀཏྠོ. ཨཏྠཱབྷིསམཡཱཏི ཡཐཱཝུཏྟཨུབྷཡཏྠསངྑཱཏཧིཏཔཊིལཱབྷཱ. སམྤརཱཡིཀོཔི ཧི ཨཏྠོ ཀཱརཎསྶ ནིཔྥནྣཏྟཱ པཊིལདྡྷོ ནཱམ ཧོཏཱིཏི ཏཾ ཨཏྠདྭཡམེཀཏོ ཀཏྭཱ ‘‘ཨཏྠཱབྷིསམཡཱ’’ཏི ཝུཏྟཾ. དྷིཡཱ པཉྙཱཡ ཏཾཏདཏྠེ རཱཏི གཎྷཱཏི, དྷཱི ཝཱ པཉྙཱ ཨེཏསྶཏྠཱིཏི དྷཱིརོ. པཎྜཱ ཝུཙྩཏི པཉྙཱ. སཱ ཧི སུཁུམེསུཔི ཨཏྠེསུ པཌཏི གཙྪཏི, དུཀྑཱདཱིནཾ ཝཱ པཱིལ༹ནཱདིཨཱཀཱརཾ ཛཱནཱཏཱིཏི པཎྜཱ. ཏཱཡ ཨིཏོ གཏོཏི པཎྜིཏོ. ཨཐ ཝཱ ཨིཏཱ སཉྫཱཏཱ པཎྜཱ ཨེཏསྶ, པཌཏི ཝཱ ཉཱཎགཏིཡཱ གཙྪཏཱིཏི པཎྜིཏོ. སམྨཱ མཱནཱབྷིསམཡཱཏི མཱནསྶ སམྨཱ པཧཱནེན. སམྨཱཏི ཙེཏྠ ཨགྒམགྒཉཱཎེན སམུཙྪེདཔྤཧཱནཾ ཝུཏྟཾ. ཨནྟནྟི ཨཝསཱནཾ. པཱིལ༹ནཾ ཏཾསམངྒིནོ ཧིཾསནཾ ཨཝིཔྥཱརིཏཱཀརཎཾ. ཏདེཝ ཨཏྠོ ཏཐཱ ཏྠ-ཀཱརསྶ ཊྛ-ཀཱརཾ ཀཏྭཱ. སམེཙྩ པཙྩཡེཧི ཀཏབྷཱཝོ སངྑཏཊྛོ. དུཀྑདུཀྑཏཱདིཝསེན སནྟཱཔནཾ པརིདཧནཾ སནྟཱཔཊྛོ. ཛརཱཡ, མརཎེན ཙཱཏི དྭིདྷཱ ཝིཔརིཎཱམེཏབྦོ ཝིཔརིཎཱམཊྛོ ¶ . ཨབྷིསམེཏབྦོ པཊིཝིཛ྄ཛྷིཏབྦོ ཨབྷིསམཡཊྛོ, པཱིལ༹ནཱདཱིནིཡེཝ. ཏཱནི ཧི ཨབྷིསམེཏབྦབྷཱཝེན ཨེཀཱིབྷཱཝམུཔནེཏྭཱ ‘‘ཨབྷིསམཡཊྛོ’’ཏི ཝུཏྟཱནི. ཨབྷིསམཡསྶ ཝཱ པཊིཝེདྷསྶ ཨཏྠོ གོཙརོ ཨབྷིསམཡཊྛོཏི ཏཱནིཡེཝ ཏབྦིསཡ-བྷཱཝཱུཔགམན-སཱམཉྙཏོ ཨེཀཏྟེན ཝུཏྟཱནི. ཨེཏྠ ཙ ཨུཔསགྒཱནཾ ཛོཏཀམཏྟཏྟཱ ཏསྶ ཏསྶ ཨཏྠསྶ ཝཱཙཀོ སམཡསདྡོ ཨེཝཱཏི སམཡསདྡསྶ ཨཏྠུདྡྷཱརེཔི སཨུཔསགྒོ ཨབྷིསམཡོ ཝུཏྟོ.

ཏེསུ པན ཨཏྠེསུ ཨཡཾ ཝཙནཏྠོ – སཧཀཱརཱིཀཱརཎཝསེན སནྣིཛ྄ཛྷཾ སམེཏི སམཝེཏཱིཏི སམཡོ, སམཝཱཡོ. སམེཏི སམཱགཙྪཏི མགྒབྲཧྨཙརིཡམེཏྠ ཏདཱདྷཱརཔུགྒལཝསེནཱཏི སམཡོ, ཁཎོ. སམེནྟི ཨེཏྠ, ཨེཏེན ཝཱ སཾགཙྪནྟི དྷམྨཱ, སཏྟཱ ཝཱ སཧཛཱཏཱདཱིཧི, ཨུཔྤཱདཱདཱིཧི ཙཱཏི ¶ སམཡོ, ཀཱལོ. དྷམྨཔྤཝཏྟིམཏྟཏཱཡ ཧི ཨཏྠཏོ ཨབྷཱུཏོཔི ཀཱལོ དྷམྨཔྤཝཏྟིཡཱ ཨདྷིཀརཎཾ, ཀརཎཾ ཝིཡ ཙ པརིཀཔྤནཱམཏྟསིདྡྷེན རཱུཔེན ཝོཧརཱིཡཏི. སམཾ, སམྨཱ ཝཱ ཨཝཡཝཱནཾ ཨཡནཾ པཝཏྟི ཨཝཊྛཱནནྟི སམཡོ, སམཱུཧོ ཡཐཱ ‘‘སམུདཱཡོ’’ཏི. ཨཝཡཝཱནཾ སཧཱཝཊྛཱནམེཝ ཧི སམཱུཧོ, ན པན ཨཝཡཝཝིནིམུཏྟོ སམཱུཧོ ནཱམ ཀོཙི པརམཏྠཏོ ཨཏྠི. པཙྩཡནྟརསམཱགམེ ཨེཏི ཕལཾ ཨུཔྤཛྫཏི, པཝཏྟཏི ཝཱ ཨེཏསྨཱཏི སམཡོ, ཧེཏུ ཡཐཱ ‘‘སམུདཡོ’’ཏི. སོ ཧི པཙྩཡནྟརསམཱགམནེནེཝ ཨཏྟནོ ཕལཾ ཨུཔྤཱདཊྛིཏིསམངྒཱིབྷཱཝཾ ཀརོཏི. སམེཏི སཾཡོཛནབྷཱཝཏོ སམྦནྡྷོ ཧུཏྭཱ ཨེཏི ཨཏྟནོ ཝིསཡེ པཝཏྟཏི, དལ༹ྷགྒཎབྷཱཝཏོ ཝཱ ཏཾསཉྙུཏྟཱ སཏྟཱ ཨཡནྟི ཨེཏེན ཡཐཱབྷིནིཝེསཾ པཝཏྟནྟཱིཏི སམཡོ, དིཊྛི. དིཊྛིསཾཡོཛནེན ཧི སཏྟཱ ཨཏིཝིཡ བཛ྄ཛྷནྟི. སམིཏི སངྒཏི སམོདྷཱནཾ སམཡོ, པཊིལཱབྷོ. སམསྶ ནིརོདྷསྶ ཡཱནཾ པཱཔུཎནཾ, སམྨཱ ཝཱ ཡཱནཾ ཨཔགམོ ཨཔྤཝཏྟི སམཡོ, པཧཱནཾ. ཨབྷིམུཁཾ ཉཱཎེན སམྨཱ ཨེཏབྦོ ཨབྷིགནྟབྦོཏི ཨབྷིསམཡོ, དྷམྨཱནཾ ཨཝིཔརཱིཏོ སབྷཱཝོ. ཨབྷིམུཁབྷཱཝེན ཏཾ ཏཾ སབྷཱཝཾ སམྨཱ ཨེཏི གཙྪཏི བུཛ྄ཛྷཏཱིཏི ཨབྷིསམཡོ, དྷམྨཱནཾ ཡཐཱབྷཱུཏསབྷཱཝཱཝབོདྷོ.

ནནུ ཙ ཨཏྠམཏྟཾ ཡཐཱདྷིཔྤེཏཾ པཏི སདྡཱ ཨབྷིནིཝིསནྟཱིཏི ན ཨེཀེན སདྡེན ཨནེཀེ ཨཏྠཱ ཨབྷིདྷཱིཡནྟི, ཨཐ ཀསྨཱ ཨིདྷ སམཡསདྡསྶ ཨནེཀདྷཱ ཨཏྠོ ཝུཏྟོཏི? སཙྩམེཏཾ སདྡཝིསེསེ ཨཔེཀྑིཏེ སདྡཝིསེསེ ¶ ཧི ཨཔེཀྑིཏེ ན ཨེཀེན སདྡེན ཨནེཀཏྠཱབྷིདྷཱནཾ སམྦྷཝཏི. ན ཧི ཡོ ཀཱལཱདིཨཏྠོ སམཡ-སདྡོ, སོཡེཝ སམཱུཧཱདིཨཏྠཾ ཝདཏི. ཨེཏྠ པན ཏེསཾ ཏེསམཏྠཱནཾ སམཡསདྡཝཙནཱིཡཏཱསཱམཉྙམུཔཱདཱཡ ཨནེཀཏྠཏཱ སམཡ-སདྡསྶ ཝུཏྟཱཏི. ཨེཝཾ སབྦཏྠ ཨཏྠུདྡྷཱརེ. ཧོཏི ཙེཏྠ –

‘‘སཱམཉྙཝཙནཱིཡཏཾ, ཨུཔཱདཱཡ ཨནེཀདྷཱ;

ཨཏྠཾ ཝདེ ན ཧི སདྡོ, ཨེཀོ ནེཀཏྠཀོ སིཡཱ’’ཏི.

སམཝཱཡཱདིཨཏྠཱནཾ ཨིདྷ ཨསམྦྷཝཏོ, ཀཱལསྶེཝ ཙ ཨཔདིསིཏབྦཏྟཱ ‘‘ཨིདྷ པནསྶ ཀཱལོ ཨཏྠོ’’ཏི ཝུཏྟཾ. དེསདེསཀཱདཱིནཾ ཝིཡ ཧི ཀཱལསྶ ནིདཱནབྷཱཝེན ཨདྷིཔྤེཏཏྟཱ སོཔི ཨིདྷ ཨཔདིསཱིཡཏི. ‘ཨིམིནཱ ཀཱིདིསཾ ཀཱལཾ དཱིཔེཏཱིཏི ཨཱཧ ‘‘ཏེནཱ’’ཏིཨཱདི. ཏེནཱཏི ཀཱལཏྠེན སམཡ-སདྡེན. ཨཌྜྷམཱསོ པཀྑཝསེན ཝུཏྟོ, པུབྦཎྷཱདིཀོ དིཝསབྷཱགཝསེན, པཋམཡཱམཱདིཀོ པཧཱརཝསེན. ཨཱདི-སདྡེན ཁཎལཡཱདཡོ སངྒཧིཏཱ, ཨནིཡམིཏཝསེན ཨེཀཾ ཀཱལཾ དཱིཔེཏཱིཏི ཨཏྠོ.

ཀསྨཱ ¶ པནེཏྠ ཨནིཡམིཏཝསེན ཀཱལོ ནིདྡིཊྛོ, ན ཨུཏུསཾཝཙྪརཱདིནཱ ནིཡམིཏཝསེནཱཏི ཨཱཧ ‘‘ཏཏྠ ཀིཉྩཱཔཱི’’ཏིཨཱདི. ཀིཉྩཱཔི པཉྙཱཡ ཝིདིཏཾ སུཝཝཏྠཱཔིཏཾ, ཏཐཱཔཱིཏི སམྦནྡྷོ. ཝཙསཱ དྷཱརེཏུཾ ཝཱ སཡཾ ཨུདྡིསིཏུཾ ཝཱ པརེན ཨུདྡིསཱཔེཏུཾ ཝཱ ན སཀྐཱ ནཱནཔྤཀཱརབྷཱཝཏོ བཧུ ཙ ཝཏྟབྦཾ ཧོཏི ཡཱཝ ཀཱལཔྤབྷེདོ, ཏཱཝ ཝཏྟབྦཏྟཱ. ‘‘ཨེཀཾ སམཡ’’ནྟི ཝུཏྟེ པན ན སོ ཀཱལཔྤབྷེདོ ཨཏྠི, ཡོ ཨེཏྠཱནནྟོགདྷོ སིཡཱཏི དསྶེཏི ‘‘ཨེཀེནེཝ པདེན ཏམཏྠཾ སམོདྷཱནེཏྭཱ’’ཏི ཨིམིནཱ. ཨེཝཾ ལོཀིཡསམྨཏཀཱལཝསེན སམཡཏྠཾ དསྶེཏྭཱ ཨིདཱནི སཱསནེ པཱཀཊཀཱལཝསེན སམཡཏྠཾ དསྶེཏུཾ ‘‘ཡེ ཝཱ ཨིམེ’’ཏིཨཱདི ཝུཏྟཾ. ཨཔིཙ ཨུཏུསཾཝཙྪརཱདིཝསེན ནིཡམཾ ཨཀཏྭཱ སམཡསདྡསྶ ཝཙནེ ཨཡམྤི གུཎོ ལདྡྷོཡེཝཱཏི དསྶེནྟོ ‘‘ཡེ ཝཱ ཨིམེ’’ཏིཨཱདིམཱཧ. སཱམཉྙཛོཏནཱ ཧི ཝིསེསེ ཨཝཏིཊྛཏི ཏསྶཱ ཝིསེསཔརིཧཱརཝིསཡཏྟཱ. ཏཏྠ ཡེ ཨིམེ སམཡཱཏི སམྦནྡྷོ. བྷགཝཏོ མཱཏུཀུཙྪིཨོཀྐམནཀཱལོ ཙེཏྠ གབྦྷོཀྐནྟིསམཡོ. ཙཏྟཱརི ནིམིཏྟཱནི པསྶིཏྭཱ སཾཝེཛནཀཱལོ སཾཝེགསམཡོ. ཚབྦསྶཱནི སམྦོདྷིསམདྷིགམཱཡ ཙརིཡཀཱལོ ¶ དུཀྐརཀཱརིཀསམཡོ. དེཝསིཀཾ ཛྷཱནཕལསམཱཔཏྟཱིཧི ཝཱིཏིནཱམནཀཱལོ དིཊྛདྷམྨསུཁཝིཧཱརསམཡོ, ཝིསེསཏོ པན སཏྟསཏྟཱཧཱནི ཛྷཱནསམཱཔཏྟིཝལ༹ཉྫནཀཱལོ. པཉྩཙཏྟཱལཱིསཝསྶཱནི ཏཾཏཾདྷམྨདེསནཱཀཱལོ དེསནཱསམཡོ. ཨཱདི-སདྡེན ཡམཀཔཱཊིཧཱརིཡསམཡཱདཡོ སངྒཎྷཱཏི. པཀཱསཱཏི དསསཧསྶིལོཀདྷཱཏུཔཀམྤནཨོབྷཱསཔཱཏུབྷཱཝཱདཱིཧི པཱཀཊཱ. ‘‘ཨེཀཾ སམཡ’’ནྟི ཝུཏྟེ ཏདཉྙེཔི སམཡཱ སནྟཱིཏི ཨཏྠཱཔཏྟིཏོ ཏེསུ སམཡེསུ ཨིདྷ དེསནཱསམཡསངྑཱཏོ སམཡཝིསེསོ ‘‘ཨེཀཾ སམཡ’’ནྟི ཝུཏྟོཏི དཱིཔེཏཱིཏི ཨདྷིཔྤཱཡོ.

ཡཐཱཝུཏྟཔྤབྷེདེསུཡེཝ སམཡེསུ ཨེཀདེསཾ པཀཱརནྟརེཧི སངྒཧེཏྭཱ དསྶེཏུཾ ‘‘ཡོ ཙཱཡ’’ནྟིཨཱདི ཝུཏྟཾ. ཏཏྠ ཧི ཉཱཎཀིཙྩསམཡོ, ཨཏྟཧིཏཔཊིཔཏྟིསམཡོ ཙ ཨབྷིསམྦོདྷིསམཡོཡེཝ. ཨརིཡཏུཎྷཱིབྷཱཝསམཡོ དིཊྛདྷམྨསུཁཝིཧཱརསམཡོ. ཀརུཎཱཀིཙྩཔརཧིཏཔཊིཔཏྟིདྷམྨིཀཐཱསམཡོ དེསནཱསམཡོ, ཏསྨཱ ཏེསུ ཝུཏྟཔྤབྷེདེསུ སམཡེསུ ཨེཀདེསོཝ པཀཱརནྟརེན དསྶིཏོཏི དཊྛབྦཾ. ‘‘སནྣིཔཏིཏཱནཾ ཝོ བྷིཀྑཝེ དྭཡཾ ཀརཎཱིཡཾ དྷམྨཱི ཀཐཱ ཝཱ ཨརིཡོ ཝཱ ཏུཎྷཱིབྷཱཝོ’’ཏི (ཨུདཱ. ༡༢) ཝུཏྟསམཡེ སནྡྷཱཡ ‘‘སནྣིཔཏིཏཱནཾ ཀརཎཱིཡདྭཡསམཡེསཱུ’’ཏི ཝུཏྟཾ. ཏེསུཔི སམཡེསཱུཏི ཀརུཎཱཀིཙྩཔརཧིཏཔཊིཔཏྟིདྷམྨིཀཐཱདེསནཱསམཡེསུཔི. ཨཉྙཏརཾ སམཡཾ སནྡྷཱཡ ‘‘ཨེཀཾ སམཡ’’ནྟི ཝུཏྟཾ ཨཏྠཏོ ཨབྷེདཏྟཱ.

ཨཉྙཏྠ ཝིཡ བྷུམྨཝཙནེན ཙ ཀརཎཝཙནེན ཙ ནིདྡེསམཀཏྭཱ ཨིདྷ ཨུཔཡོགཝཙནེན ནིདྡེསཔཡོཛནཾ ནིདྡྷཱརེཏུཀཱམོ པརམྨུཁེན ཙོདནཾ སམུཊྛཔེཏི ‘‘ཀསྨཱ པནེཏྠཱ’’ཏིཨཱདིནཱ. ཨེཏྠཱཏི ¶ ‘‘ཨེཀཾ སམཡ’’ནྟི ཨིམསྨིཾ པདེ, ཀརཎཝཙནེན ནིདྡེསོ ཀཏོ ཡཐཱཏི སམྦནྡྷོ. བྷཝནྟི ཨེཏྠཱཏི བྷུམྨཾ, ཨོཀཱསོ, ཏཏྠ པཝཏྟཾ ཝཙནཾ ཝིབྷཏྟི བྷུམྨཝཙནཾ. ཀརོཏི ཀིརིཡམབྷིནིཔྥཱདེབྷི ཨེཏེནཱཏི ཀརཎཾ, ཀིརིཡཱནིཔྥཏྟིཀཱརཎཾ. ཨུཔཡུཛྫིཏབྦོ ཀིརིཡཱཡཱཏི ཨུཔཡོགོ, ཀམྨཾ, ཏཏྠ ཝཙནཾ ཏཐཱ. ‘‘ཏཏྠཱ’’ཏིཨཱདིནཱ ཡཐཱཝུཏྟཙོདནཾ པརིཧརཏི. ཏཏྠཱཏི ཏེསུ ཨབྷིདྷམྨཏདཉྙསུཏྟཔདཝིནཡེསུ. ཏཐཱཏི བྷུམྨཝཙནཀརཎཝཙནེཧི ཨཏྠསམྦྷཝཏོ ཙཱཏི ཡོཛེཏབྦཾ, ཨདྷིཀརཎབྷཱཝེནབྷཱཝལཀྑཎཏྠཱནཾ, ཧེཏུཀརཎཏྠཱནཉྩ ¶ སམྦྷཝཏོཏི ཨཏྠོ. ཨིདྷཱཏི ཨིདྷསྨིཾ སུཏྟཔདེ. ཨཉྙཐཱཏི ཨུཔཡོགཝཙནེན. ཨཏྠསམྦྷཝཏོཏི ཨཙྩནྟསཾཡོགཏྠསྶ སམྦྷཝཏོ.

‘‘ཏཏྠ ཧཱི’’ཏིཨཱདི ཏབྦིཝརཎཾ. ཨིཏོཏི ‘‘ཨེཀཾ སམཡ’’ནྟི སུཏྟཔདཏོ. ཨདྷིཀརཎཏྠོཏི ཨཱདྷཱརཏྠོ. བྷཝནཾ བྷཱཝོ, ཀིརིཡཱ, ཀིརིཡཱཡ ཀིརིཡནྟརལཀྑཎཾ བྷཱཝེནབྷཱཝལཀྑཎཾ, ཏདེཝཏྠོ ཏཐཱ. ཀེན སམཡཏྠེན ཨིདཾ ཨཏྠདྭཡཾ སམྦྷཝཏཱིཏི ཨནུཡོགེ སཏི ཏདཏྠདྭཡསམྦྷཝཱནུརཱུཔེན སམཡཏྠེན, ཏཾ དལ༹ྷཾ ཀརོནྟོ ‘‘ཨདྷིཀརཎཉྷཱི’’ཏིཨཱདིམཱཧ. པདཏྠཏོཡེཝ ཧི ཡཐཱཝུཏྟམཏྠདྭཡཾ སིདྡྷཾ, ཝིབྷཏྟི པན ཛོཏཀམཏྟཱ. ཏཏྠ ཀཱལསངྑཱཏོ, ཀཱལསདྡསྶ ཝཱ ཨཏྠོ ཡསྶཱཏི ཀཱལཏྠོ. སམཱུཧསངྑཱཏོ, ‘སམཱུཧསདྡསྶ ཝཱ ཨཏྠོ ཡསྶཱཏི སམཱུཧཏྠོ, ཀོ སོ? སམཡོ. ཨིདཾ ཝུཏྟཾ ཧོཏི – ཀཱལཏྠོ, སམཱུཧཏྠོ ཙ སམཡོ ཏཏྠ ཨབྷིདྷམྨེ ཝུཏྟཱནཾ ཕསྶཱདིདྷམྨཱནཾ ཨདྷིཀརཎཾ ཨཱདྷཱརོཏི, ཡསྨིཾ ཀཱལེ, དྷམྨཔུཉྫེ ཝཱ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི, ཏསྨིཾཡེཝ ཀཱལེ, དྷམྨཔུཉྫེ ཝཱ ཕསྶཱདཡོཔི ཧོནྟཱིཏི ཨཡཉྷི ཏཏྠ ཨཏྠོ. ནནུ ཙཱཡཾ ཨུཔཱདཱཔཉྙཏྟིམཏྟོ ཀཱལོ, ཝོཧཱརམཏྟོ ཙ སམཱུཧོ, སོ ཀཐཾ ཨདྷིཀརཎཾ སིཡཱ ཏཏྠ ཝུཏྟདྷམྨཱནནྟི? ནཱཡཾ དོསོ. ཡཐཱ ཧི ཀཱལོ སཡཾ པརམཏྠཏོ ཨཝིཛྫམཱནོཔི སབྷཱཝདྷམྨཔརིཙྪིནྣཏྟཱ ཨཱདྷཱརབྷཱཝེན པཉྙཱཏོ, སབྷཱཝདྷམྨཔརིཙྪིནྣོ ཙ ཏངྑཎཔྤཝཏྟཱནཾ ཏཏོ པུབྦེ, པརཏོ ཙ ཨབྷཱཝཏོ ‘‘པུབྦཎྷེཛཱཏོ, སཱཡནྷེ ཨཱགཙྪཏཱི’’ཏིཨཱདཱིསུ, སམཱུཧོ ཙ ཨཝཡཝཝིནིམུཏྟོ ཝིསུཾ ཨཝིཛྫམཱནོཔི ཀཔྤནཱམཏྟསིདྡྷཏྟཱ ཨཝཡཝཱནཾ ཨཱདྷཱརབྷཱཝེན པཉྙཱཔཱིཡཏི ‘‘རུཀྑེ སཱཁཱ, ཡཝརཱསིཡཾ པཏྟསམྦྷཱུཏོ’’ཏིཨཱདཱིསུ, ཨེཝམིདྷཱཔི སབྷཱཝདྷམྨཔརིཙྪིནྣཏྟཱ, ཀཔྤནཱམཏྟསིདྡྷཏྟཱ ཙ ཏདུབྷཡཾ ཏཏྠ ཝུཏྟདྷམྨཱནཾ ཨདྷིཀརཎབྷཱཝེན པཉྙཱཔཱིཡཏཱིཏི.

‘‘ཁཎསམཝཱཡཧེཏུསངྑཱཏསྶཱ’’ཏིཨཱདི བྷཱཝེནབྷཱཝལཀྑཎཏྠསམྦྷཝདསྶནཾ. ཏཏྠ ཁཎོ ནཱམ ཨཊྛཀྑཎཝིནིམུཏྟོ ནཝམོ བུདྡྷུཔྤཱདཀྑཎོ, ཡཱནི ཝཱ པནེཏཱནི ‘‘ཙཏྟཱརིམཱནི བྷིཀྑཝེ, ཙཀྐཱནི, ཡེཧི ¶ སམནྣཱགཏཱནཾ དེཝམུསྶཱནཾ ཙཏུཙཀྐཾ པཝཏྟཏཱི’’ཏི (ཨ. ནི. ༤.༣༡) ཨེཏྠ ¶ པཏིརཱུཔདེསཝཱསོ སཔྤུརིསཱུཔནིསྶཡོ ཨཏྟསམྨཱཔཎཱིདྷི པུབྦེཀཏཔུཉྙཏཱཏི ཙཏྟཱརི ཙཀྐཱནི ཝུཏྟཱནི, ཏཱནི ཨེཀཛ྄ཛྷཾ ཀཏྭཱ ཨོཀཱསཊྛེན ‘‘ཁཎོ’’ཏི ཝེདིཏབྦཱནི. ཏཱནི ཧི ཀུསལུཔྤཏྟིཡཱ ཨོཀཱསབྷཱུཏཱནི. སམཝཱཡོ ནཱམ ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎ’’ནྟིཨཱདིནཱ (མ. ནི. ༡.༢༠༤; ༣.༤༢༡, ༤༢༥, ༤༢༦; སཾ. ནི. ༢.༤༣, ༤༤; སཾ. ནི. ༣.༦༠; ཀཐཱ. ༤༦༥, ༤༦༧) ནིདྡིཊྛཱ ཙཀྑུཝིཉྙཱཎཱདིསཱདྷཱརཎཕལནིཔྥཱདཀཏྟེན སཎྛིཏཱ ཙཀྑུརཱུཔཱདིཔཙྩཡསཱམགྒཱི. ཙཀྑུརཱུཔཱདཱིནཉྷི ཙཀྑུཝིཉྙཱཎཱདི སཱདྷཱརཎཕལཾ. ཧེཏུ ནཱམ ཡོནིསོམནསིཀཱརཱདིཛནཀཧེཏུ. ཡཐཱཝུཏྟསྶ ཁཎསངྑཱཏསྶ, སམཝཱཡསངྑཱཏསྶ, ཧེཏུསངྑཱཏསྶ ཙ སམཡསྶ སཏྟཱསངྑཱཏེན བྷཱཝེན ཏེསཾ ཕསྶཱདཱིནཾ དྷམྨཱནཾ སཏྟཱསངྑཱཏོ བྷཱཝོ ལཀྑཱིཡཏི ཝིཉྙཱཡཏཱིཏི ཨཏྠོ. ཨིདཾ ཝུཏྟཾ ཧོཏི – ཡཐཱ ‘‘གཱཝཱིསུ དུཡ྄ཧམཱནཱསུ གཏོ, དུདྡྷཱསུ ཨཱགཏོ’’ཏི ཨེཏྠ དོཧནཀིརིཡཱཡ གམནཀིརིཡཱ ལཀྑཱིཡཏི, ཨེཝམིདྷཱཔི ཡཐཱཝུཏྟསྶ སམཡསྶ སཏྟཱཀིརིཡཱཡ ཙིཏྟསྶ ཨུཔྤཱདཀིརིཡཱ, ཕསྶཱདཱིནཾ བྷཝནཀིརིཡཱ ཙ ལཀྑཱིཡཏཱིཏི. ནནུ ཙེཏྠ སཏྟཱཀིརིཡཱ ཨཝིཛྫམཱནཱཝ, ཀཐཾ ཏཱཡ ལཀྑཱིཡཏཱིཏི? སཙྩཾ, ཏཐཱཔི ‘‘ཡསྨིཾ སམཡེ’’ཏི ཙ ཝུཏྟེ སཏཱིཏི ཨཡམཏྠོ ཝིཉྙཱཡམཱནོ ཨེཝཧོཏི ཨཉྙཀིརིཡཱསམྦནྡྷཱབྷཱཝེ པདཏྠསྶ སཏྟཱཝིརཧཱབྷཱཝཏོ, ཏསྨཱ ཨཏྠཏོ གམྱམཱནཱཡ ཏཱཡ སཏྟཱཀིརིཡཱཡ ལཀྑཱིཡཏཱིཏི. ཨཡཉྷི ཏཏྠ ཨཏྠོ – ཡསྨིཾ ཡཐཱཝུཏྟེ ཁཎེ, པཙྩཡསམཝཱཡེ, ཧེཏུམྷི ཝཱ སཏི ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི, ཏསྨིཾཡེཝ ཁཎེ, པཙྩཡསམཝཱཡེ, ཧེཏུམྷི ཝཱ སཏི ཕསྶཱདཡོཔི ཧོནྟཱིཏི. ཨཡཾ པན ཨཏྠོ ཨབྷིདྷམྨེཡེཝ (ཨཊྛསཱ. ཀཱམཱཝཙརཀུསལཔདབྷཱཛནཱིཡེ) ནིདསྶནཝསེན ཝུཏྟོ, ཡཐཱརཧམེས ནཡོ ཨཉྙེསུཔི སུཏྟཔདེསཱུཏི. ཏསྨཱཏི ཨདྷིཀརཎཏྠསྶ, བྷཱཝེནབྷཱཝལཀྑཎཏྠསྶ ཙ སམྦྷཝཏོ. ཏདཏྠཛོཏནཏྠནྟི ཏདུབྷཡཏྠསྶ སམཡསདྡཏྠབྷཱཝེན ཝིཛྫམཱནསྶེཝ བྷུམྨཝཙནཝསེན དཱིཔནཏྠཾ. ཝིབྷཏྟིཡོ ཧི པདཱིཔོ ཝིཡ ཝཏྠུནོ ཝིཛྫམཱནསྶེཝ ཨཏྠསྶ ཛོཏཀཱཏི, ཨཡམཏྠོ སདྡསཏྠེསུ པཱཀཊོཡེཝ.

ཧེཏུཨཏྠོ, ཀརཎཏྠོ ཙ སམྦྷཝཏཱིཏི ‘‘ཨནྣེན ཝསཏི, ཝིཛྫཱཡ ཝསཏཱི’’ཏིཨཱདཱིསུ ཝིཡ ཧེཏུཨཏྠོ, ‘‘ཕརསུནཱ ཚིནྡཏི, ཀུདཱལེན ཁཎཏཱི’’ཏིཨཱདཱིསུ ¶ ཝིཡ ཀརཎཏྠོ ཙ སམྦྷཝཏི. ཀཐཾ པན སམྦྷཝཏཱིཏི ཨཱཧ ‘‘ཡོ ཧི སོ’’ཏིཨཱདི. ཝིནཡེ (པཱརཱ. ༢༠) ཨཱགཏསིཀྑཱཔདཔཉྙཏྟིཡཱཙནཝཏྠུཝསེན ཐེརཾ མརིཡཱདཾ ཀཏྭཱ ‘‘སཱརིཔུཏྟཱདཱིཧིཔི དུཝིཉྙེཡྻོ’’ཏི ཝུཏྟཾ. ཏེན སམཡེན ཧེཏུབྷཱུཏེན ཀརཎབྷཱུཏེནཱཏི ཨེཏྠ པན ཏཾཏཾཝཏྠུཝཱིཏིཀྐམོཝ སིཀྑཱཔདཔཉྙཏྟིཡཱ ཧེཏུ ཙེཝ ཀརཎཉྩ. ཏཐཱ ཧི ཡདཱ བྷགཝཱ སིཀྑཱཔདཔཉྙཏྟིཡཱ པཋམམེཝ ཏེསཾ ཏེསཾ ཏཏྠ ཏཏྠ སིཀྑཱཔདཔཉྙཏྟིཧེཏུབྷཱུཏཾ ཏཾ ཏཾ ཝཱིཏིཀྐམཾ ཨཔེཀྑམཱནོ ཝིཧརཏི ¶ , ཏདཱ ཏཾ ཏཾ ཝཱིཏིཀྐམཾ ཨཔེཀྑིཏྭཱ ཏདཏྠཾ ཝསཏཱིཏི སིདྡྷོ ཝཏྠུཝཱིཏིཀྐམསྶ སིཀྑཱཔདཔཉྙཏྟིཧེཏུབྷཱཝོ ‘‘ཨནྣེནཝསཏཱི’’ཏིཨཱདཱིསུ ཨནྣམཔེཀྑིཏྭཱ ཏདཏྠཾ ཝསཏཱིཏིཨཱདིནཱ ཀཱརཎེན ཨནྣཱདཱིནཾ ཧེཏུབྷཱཝོ ཝིཡ. སིཀྑཱཔདཔཉྙཏྟིཀཱལེ པན ཏེནེཝ པུབྦསིདྡྷེན ཝཱིཏིཀྐམེན སིཀྑཱཔདཾ པཉྙཔེཏི, ཏསྨཱ སིཀྑཱཔདཔཉྙཏྟིཡཱ སཱདྷཀཏམཏྟཱ ཀརཎབྷཱཝོཔི ཝཱིཏིཀྐམསྶེཝ སིདྡྷོ ‘‘ཨསིནཱ ཚིནྡཏཱི’’ཏིཨཱདཱིསུ ཨསིནཱ ཚིནྡནཀིརིཡཾ སཱདྷེཏཱིཏིཨཱདིནཱ ཀཱརཎེན ཨསིཨཱདཱིནཾ ཀརཎབྷཱཝོ ཝིཡ. ཨེཝཾ སནྟེཔི ཝཱིཏིཀྐམཾ ཨཔེཀྑམཱནོ ཏེནེཝ སདྡྷིཾ ཏནྣིསྶིཏམྤི ཀཱལཾ ཨཔེཀྑིཏྭཱ ཝིཧརཏཱིཏི ཀཱལསྶཱཔི ཨིདྷ ཧེཏུབྷཱཝོ ཝུཏྟོ, སིཀྑཱཔདཾ པཉྙཔེནྟོ ཙ ཏཾ ཏཾ ཝཱིཏིཀྐམཀཱལཾ ཨནཏིཀྐམིཏྭཱ ཏེནེཝ ཀཱལེན སིཀྑཱཔདཾ པཉྙཔེཏཱིཏི ཝཱིཏིཀྐམནིསྶཡསྶ ཀཱལསྶཱཔི ཀརཎབྷཱཝོ ཝུཏྟོ, ཏསྨཱ ཨིམིནཱ པརིཡཱཡེན ཀཱལསྶཱཔི ཧེཏུབྷཱཝོ, ཀརཎབྷཱཝོ ཙ ལབྦྷཏཱིཏི ཝུཏྟཾ ‘‘ཏེན སམཡེན ཧེཏུབྷཱུཏེན ཀརཎབྷཱུཏེནཱ’’ཏི, ནིཔྤརིཡཱཡེན པན ཝཱིཏིཀྐམོཡེཝ ཧེཏུབྷཱུཏོ, ཀརཎབྷཱུཏོ ཙ. སོ ཧི ཝཱིཏིཀྐམཀྑཎེ ཧེཏུ ཧུཏྭཱ པཙྪཱ སིཀྑཱཔདཔཉྙཱཔནཀྑཎེ ཀརཎམྤི ཧོཏཱིཏི. སིཀྑཱཔདཱནི པཉྙཱཔཡནྟོཏི ཝཱིཏིཀྐམཾ པུཙྪིཏྭཱ བྷིཀྑུསངྒྷཾ སནྣིཔཱཏཱཔེཏྭཱ ཨོཏིཎྞཝཏྠུཾ ཏཾ པུགྒལཾ པཊིཔུཙྪིཏྭཱ, ཝིགརཧིཏྭཱ ཙ ཏཾ ཏཾ ཝཏྠུཨོཏིཎྞཀཱལཾ ཨནཏིཀྐམིཏྭཱ ཏེནེཝ ཀཱལེན ཀརཎབྷཱུཏེན སིཀྑཱཔདཱནི པཉྙཔེནྟོ. སིཀྑཱཔདཔཉྙཏྟིཧེཏུཉྩ ཨཔེཀྑམཱནོཏི ཏཏིཡཔཱརཱཛིཀཱདཱིསུ (པཱརཱ. ༡༦༢) ཝིཡ སིཀྑཱཔདཔཉྙཏྟིཡཱ ཧེཏུབྷཱུཏཾ ཏཾ ཏཾ ཝཏྠུཝཱིཏིཀྐམསམཡཾ ཨཔེཀྑམཱནོ ཏེན སམཡེན ཧེཏུབྷཱུཏེན བྷགཝཱ ཏཏྠ ཏཏྠ ཝིཧཱསཱིཏི ཨཏྠོ.

‘‘སིཀྑཱཔདཱནི ¶ པཉྙཱཔཡནྟོ, སིཀྑཱཔདཔཉྙཏྟིཧེཏུཉྩ ཨཔེཀྑམཱནོ’’ཏི ཨིདཾ ཡཐཱཀྐམཾ ཀརཎབྷཱཝསྶ, ཧེཏུབྷཱཝསྶ ཙ སམཏྠནཝཙནཾ, ཏསྨཱ ཏདནུརཱུཔཾ ‘‘ཏེནསམཡེན ཀརཎབྷཱུཏེན ཧེཏུབྷཱུཏེནཱ’’ཏི ཨེཝཾ ཝཏྟབྦེཔི པཋམཾ ‘‘ཧེཏུབྷཱུཏེནཱ’’ཏི ཨུཔྤཊིཔཱཊིཝཙནཾ ཏཏྠ ཧེཏུབྷཱཝསྶ སཱཏིསཡམདྷིཔྤེཏཏྟཱ ཝུཏྟནྟི ཝེདིཏབྦཾ. ‘‘བྷགཝཱ ཧི ཝེརཉྫཱཡཾ ཝིཧརནྟོ དྷམྨསེནཱཔཏིཏྠེརསྶ སིཀྑཱཔདཔཉྙཏྟིཡཱཙནཧེཏུབྷཱུཏཾ པརིཝིཏཀྐསམཡཾ ཨཔེཀྑམཱནོ ཏེན སམཡེན ཧེཏུབྷཱུཏེན ཝིཧཱསཱི’’ཏི ཏཱིསུཔི ཀིར གཎྛིཔདེསུ ཝུཏྟཾ. ‘‘ཀིཾ པནེཏྠ ཡུཏྟིཙིནྟཱཡ, ཨཱཙརིཡསྶ ཨིདྷ ཀམཝཙནིཙྪཱ ནཏྠཱིཏི ཨེཝམེཏཾ གཧེཏབྦཾ – ཨཉྙཱསུཔི ཧི ཨཊྛཀཐཱསུ ཨཡམེཝ ཨནུཀྐམོ ཝུཏྟོ, ན ཙ ཏཱསུ ‘ཏེན སམཡེན ཝེརཉྫཱཡཾ ཝིཧརཏཱི’ཏི ཝིནཡཔཱལི༹པདེ ཧེཏུཨཏྠསྶེཝ སཱཏིསཡཾ ཨདྷིཔྤེཏབྷཱཝདཱིཔནཏྠཾ ཝུཏྟོ ཨཝིསཡཏྟཱ, སིཀྑཱཔདཱནི པཉྙཱཔཡནྟོ ཧེཏུབྷཱུཏེན, ཀརཎབྷཱུཏེན ཙ སམཡེན ཝིཧཱསི, སིཀྑཱཔདཔཉྙཏྟིཧེཏུཉྩ ཨཔེཀྑམཱནོ ཧེཏུབྷཱུཏེན སམཡེན ཝིཧཱསཱིཏི ཨེཝམེཏྠ ཡཐཱལཱབྷཾ སམྦནྡྷབྷཱཝཏོ ཨེཝཾ ཝུཏྟོ’’ཏིཔི ཝདནྟི. ཏསྨཱཏི ¶ ཡཐཱཝུཏྟསྶ དུཝིདྷསྶཱཔི ཨཏྠསྶ སམྦྷཝཏོ. ཏདཏྠཛོཏནཏྠནྟི ཝུཏྟནཡེན ཀརཎཝཙནེན ཏདུབྷཡཏྠསྶ ཛོཏནཏྠཾ. ཏཏྠཱཏི ཏསྨིཾ ཝིནཡེ. ཨེཏྠ ཙ སིཀྑཱཔདཔཉྙཏྟིཡཱ ཨེཝ ཝཱིཏིཀྐམསམཡསྶ སཱདྷཀཏམཏྟཱ ཏསྶ ཀརཎབྷཱཝེ ‘‘སིཀྑཱཔདཱནི པཉྙཱཔཡནྟོ’’ཏི ཨཛ྄ཛྷཱཧརིཏཔདེན སམྦནྡྷོ, ཧེཏུབྷཱཝེ པན ཏདཔེཀྑནམཏྟཏྟཱ ‘‘ཝིཧརཏཱི’’ཏི པདེནེཝཱཏི དཊྛབྦཾ. ཏཐཱཡེཝ ཧི ཝུཏྟཾ ‘‘ཏེན སམཡེན ཧེཏུབྷཱུཏེན, ཀརཎབྷཱུཏེན ཙ སིཀྑཱཔདཱནི པཉྙཱཔཡནྟོ, སིཀྑཱཔདཔཉྙཏྟིཧེཏུཉྩ ཨཔེཀྑམཱནོ བྷགཝཱ ཏཏྠ ཏཏྠ ཝིཧཱསཱི’’ཏི. ཀརཎཉྷི ཀིརིཡཏྠཾ, ན ཧེཏུ ཝིཡ ཀིརིཡཱཀཱརཎཾ. ཧེཏུ པན ཀིརིཡཱཀཱརཎཾ, ན ཀརཎཾ ཝིཡ ཀིརིཡཏྠོཏི.

‘‘ཨིདྷ པནཱ’’ཏིཨཱདིནཱ ཨུཔཡོགཝཙནསྶ ཨཙྩནྟསཾཡོགཏྠསམྦྷཝདསྶནཾ, ཨཙྩནྟམེཝ དབྦགུཎཀིརིཡཱཧི སཾཡོགོ ཨཙྩནྟསཾཡོགོ, ནིརནྟརམེཝ ཏེཧི སཾཡུཏྟབྷཱཝོཏི ཝུཏྟཾ ཧོཏི. སོཡེཝཏྠོ ཏཐཱ. ཨེཝཾཛཱཏིཀེཏི ཨེཝཾསབྷཱཝེ. ཀཐཾ སམྦྷཝཏཱིཏི ཨཱཧ ‘‘ཡཉྷཱི’’ཏིཨཱདི. ཨཙྩནྟམེཝཱཏི ཨཱརབྦྷཏོ པཊྛཱཡ ཡཱཝ དེསནཱནིཊྛཱནཾ, ཏཱཝ ཨེཀཾསམེཝ, ནིརནྟརམེཝཱཏི ཨཏྠོ. ཀརུཎཱཝིཧཱརེནཱཏི པརཧིཏཔཊིཔཏྟིསངྑཱཏེན ཀརུཎཱཝིཧཱརེན. ཏཐཱ ཧི ཀརུཎཱནིདཱནཏྟཱ ¶ དེསནཱཡ ཨིདྷ པརཧིཏཔཊིཔཏྟི ‘‘ཀརུཎཱཝིཧཱརོ’’ཏི ཝུཏྟཱ, ན པན ཀརུཎཱསམཱཔཏྟིཝིཧཱརོ. ན ཧི དེསནཱཀཱལེ དེསེཏབྦདྷམྨཝིསཡསྶ དེསནཱཉཱཎསྶ སཏྟཝིསཡཱཡ མཧཱཀརུཎཱཡ སཧུཔྤཏྟི སམྦྷཝཏི བྷིནྣཝིསཡཏྟཱ, ཏསྨཱ ཀརུཎཱཡ པཝཏྟོ ཝིཧཱརོཏི ཀཏྭཱ པརཧིཏཔཊིཔཏྟིཝིཧཱརོ ཨིདྷ ‘‘ཀརུཎཱཝིཧཱརོ’’ཏི ཝེདིཏབྦོ. ཏསྨཱཏི ཨཙྩནྟསཾཡོགཏྠསམྦྷཝཏོ. ཏདཏྠཛོཏནཏྠནྟི ཝུཏྟནཡེན ཨུཔཡོགཝིབྷཏྟིཡཱ ཏདཏྠསྶ ཛོཏནཏྠཾ ཨུཔཡོགནིདྡེསོ ཀཏོ ཡཐཱ ‘‘མཱསཾ སཛ྄ཛྷཱཡཏི, དིཝསཾ བྷུཉྫཏཱི’’ཏི. ཏེནཱཏི ཡེན ཀཱརཎེན ཨབྷིདྷམྨེ, ཨིཏོ ཨཉྙེསུ ཙ སུཏྟཔདེསུ བྷུམྨཝཙནསྶ ཨདྷིཀརཎཏྠོ, བྷཱཝེནབྷཱཝལཀྑཎཏྠོ ཙ, ཝིནཡེ ཀརཎཝཙནསྶ ཧེཏུཨཏྠོ, ཀརཎཏྠོ ཙ ཨིདྷ ཨུཔཡོགཝཙནསྶ ཨཙྩནྟསཾཡོགཏྠོ སམྦྷཝཏི, ཏེནཱཏི ཨཏྠོ. ཨེཏནྟི ཡཐཱ ཝུཏྟསྶཏྠསྶ སངྒཧགཱཐཱཔདཾ ཨཉྙཏྲཱཏི ཨབྷིདྷམྨེ ཨིཏོ ཨཉྙེསུ སུཏྟཔདེསུ, ཝིནཡེ ཙ. སམཡོཏི སམཡསདྡོ. སདྡེཡེཝ ཧི ཝིབྷཏྟིཔརཱ བྷཝཏིཨཏྠེ ཨསམྦྷཝཏོ. སོཏི སྭེཝ སམཡསདྡོ.

ཨེཝཾ ཨཏྟནོ མཏིཾ དསྶེཏྭཱ ཨིདཱནི པོརཱཎཱཙརིཡམཏིཾ དསྶེཏུཾ ‘‘པོརཱཎཱ པནཱ’’ཏིཨཱདི ཝུཏྟཾ. པོརཱཎཱཏི ཙ པུརིམཱ ཨཊྛཀཐཱཙརིཡཱ. ‘‘ཏསྨིཾ སམཡེ’’ཏི ཝཱ…པེ… ‘‘ཨེཀཾ སམཡ’’ནྟི ཝཱ ཨེས བྷེདོཏི སམྦནྡྷོ. ཨབྷིལཱཔམཏྟབྷེདོཏི ཝཙནམཏྟེན བྷེདོ ཝིསེསོ, ན པན ཨཏྠེན, ཏེནཱཧ ‘‘སབྦཏྠ བྷུམྨམེཝཏྠོ’’ཏི, སབྦེསུཔི ཨཏྠཏོ ཨཱདྷཱརོ ཨེཝ ཨཏྠོཏི ཝུཏྟཾ ཧོཏི ¶ . ཨིམིནཱ ཙ ཝཙནེན སུཏྟཝིནཡེསུ ཝིབྷཏྟིཝིཔརིཎཱམོ ཀཏོ, བྷུམྨཏྠེ ཝཱ ཨུཔཡོགཀརཎཝིབྷཏྟིཡོ སིདྡྷཱཏི དསྶེཏི. ‘‘ཏསྨཱ’’ཏིཨཱདིནཱ ཏེསཾ མཏིདསྶནེ གུཎམཱཧ.

བྷཱརིཡཊྛེན གརུ. ཏདེཝཏྠཾ སངྐེཏཏོ སམཏྠེཏི ‘‘གརུཾ ཧཱི’’ཏིཨཱདིནཱ སངྐེཏཝིསཡོ ཧི སདྡོ ཏཾཝཝཏྠིཏོཡེཝ ཙེས ཨཏྠབོདྷཀོཏི. གརུནྟི གརུཀཱཏབྦཾ ཛནཾ. ‘‘ལོཀེ’’ཏི ཨིམིནཱ ན ཀེཝལཾ སཱསནེཡེཝ, ལོཀེཔི གརུཀཱཏབྦཊྛེན བྷགཝཱཏི སངྐེཏསིདྡྷཱིཏི དསྶེཏི. ཡདི གརུཀཱཏབྦཊྛེན བྷགཝཱ, ཨཐ ཨཡམེཝ སཱཏིསཡཾ བྷགཝཱ ནཱམཱཏི དསྶེནྟོ ‘‘ཨཡཉྩཱ’’ཏིཨཱདིམཱཧ. ཏཐཱ ཧི ལོཀནཱཐོ ཨཔརིམིཏནིརུཔམཔྤབྷཱཝསཱིལཱདིགུཎཝིསེསསམངྒིཏཱཡ, སབྦཱནཏྠཔརིཧཱརཔུབྦངྒམཱཡ ¶ ནིརཝསེསཧིཏསུཁཝིདྷཱནཏཔྤརཱཡ ནིརཏིསཡཱཡ པཡོགསམྤཏྟིཡཱ སདེཝམནུསྶཱཡ པཛཱཡ ཨཙྩནྟུཔཀཱརིཏཱཡ ཙ ཨཔརིམཱཎཱསུ ལོཀདྷཱཏཱུསུ ཨཔརིམཱཎཱནཾ སཏྟཱནཾ ཨུཏྟམཾ གཱརཝཊྛཱནནྟི. ན ཀེཝལཾ ལོཀེཡེཝ, ཨཐ ཁོ སཱསནེཔཱིཏི དསྶེཏི ‘‘པོརཱཎེཧཱི’’ཏིཨཱདིནཱ, པོརཱཎེཧཱིཏི ཙ ཨཊྛཀཐཱཙརིཡེཧཱིཏི ཨཏྠོ. སེཊྛཝཱཙཀཝཙནམྤི སེཊྛགུཎསཧཙརཎཏོ སེཊྛམེཝཱཏི ཝུཏྟཾ ‘‘བྷགཝཱཏི ཝཙནཾ སེཊྛ’’ནྟི. ཝུཙྩཏི ཨཏྠོ, ཨེཏེནཱཏི ཧི ཝཙནཾ, སདྡོ. ཨཐ ཝཱ ཝུཙྩཏཱིཏི ཝཙནཾ, ཨཏྠོ, ཏསྨཱ ཡོ ‘‘བྷགཝཱ’’ཏི ཝཙནེན ཝཙནཱིཡོ ཨཏྠོ, སོ སེཊྛོཏི ཨཏྠོ. བྷགཝཱཏི ཝཙནམུཏྟམནྟི ཨེཏྠཱཔི ཨེསེཝ ནཡོ. གཱརཝཡུཏྟོཏི གརུབྷཱཝཡུཏྟོ གརུགུཎཡོགཏྟཱ, སཱཏིསཡཾ ཝཱ གརུཀརཎཱརཧཏཱཡ གཱརཝཡུཏྟོ, གཱརཝཱརཧོཏི ཨཏྠོ. ཡེན ཀཱརཎཏྟཡེན སོ ཏཐཱགཏོ གརུ བྷཱརིཡཊྛེན, ཏེན ‘‘བྷགཝཱ’’ཏི ཝུཙྩཏཱིཏི སམྦནྡྷོ. གརུཏཱཀཱརཎདསྶནཉྷེཏཾ པདཏྟཡཾ. ‘‘སིཔྤཱདིསིཀྑཱཔཀཱཔི གརཱུཡེཝ ནཱམ ཧོནྟི, ན ཙ གཱརཝཡུཏྟཱ, ཨཡཾ པན ཏཱདིསོ ན ཧོཏི, ཏསྨཱ གརཱུཏི ཀཏྭཱ ‘གཱརཝཡུཏྟོ’ཏི ཝུཏྟ’’ནྟི ཀེཙི. ཨེཝཾ སཏི ཏདེཏཾ ཝིསེསནཔདམཏྟཾ, པུརིམཔདདྭཡམེཝ ཀཱརཎདསྶནཾ སིཡཱ.

ཨཔིཙཱཏི ཨཏྠནྟརཝིཀཔྤཏྠེ ནིཔཱཏོ, ཨཔརོ ནཡོཏི ཨཏྠོ. ཏཏྠ –

‘‘ཝཎྞགམོ ཝཎྞཝིཔརིཡཱཡོ,

དྭེ ཙཱཔརེ ཝཎྞཝིཀཱརནཱསཱ;

དྷཱཏཱུནམཏྠཱཏིསཡེན ཡོགོ,

ཏདུཙྩཏེ པཉྩཝིདྷཱ ནིརུཏྟཱི’’ཏི. –

ཝུཏྟཾ ནིརུཏྟིལཀྑཎཾ གཧེཏྭཱ, ‘‘པིསོདརཱདཱིནི ཡཐོཔདིཊྛ’’ནྟི ཝུཏྟསདྡནཡེན ཝཱ པིསོདརཱདིཨཱཀཏིགཎཔཀྑེཔལཀྑཎཾ ¶ གཧེཏྭཱ ལོཀིཡ ལོཀུཏྟརསུཁཱབྷིནིབྦཏྟཀཾ སཱིལཱདིཔཱརཔྤཏྟཾ བྷཱགྱམསྶ ཨཏྠཱིཏི ‘‘བྷཱགྱཝཱ’’ཏི ཝཏྟབྦེ ‘‘བྷགཝཱ’’ཏི ཝུཏྟནྟི ཨཱཧ ‘‘བྷཱགྱཝཱ’’ཏི. ཏཐཱ ཨནེཀབྷེདབྷིནྣཀིལེསསཏསཧསྶཱནི, སངྑེཔཏོ ཝཱ པཉྩམཱརེ ཨབྷཉྫཱིཏི ‘‘བྷགྒཝཱ’’ཏི ཝཏྟབྦེ ‘‘བྷགཝཱ’’ཏི ཝུཏྟནྟི དསྶེཏི ‘‘བྷགྒཝཱ’’ཏི ཨིམིནཱ. ལོཀེ ¶ ཙ བྷག-སདྡོ ཨིསྶརིཡདྷམྨཡསསིརཱིཀཱམཔཡཏྟེསུ ཚསུ དྷམྨེསུ པཝཏྟཏི, ཏེ ཙ བྷགསངྑཱཏཱ དྷམྨཱ ཨསྶ སནྟཱིཏི བྷགཝཱཏི ཨཏྠཾ དསྶེཏུཾ ‘‘ཡུཏྟོ བྷགེཧི ཙཱ’’ཏི ཝུཏྟཾ. ཀུསལཱདཱིཧི ཨནེཀབྷེདེཧི སབྦདྷམྨེ ཝིབྷཛི ཝིབྷཛིཏྭཱ ཝིཝརིཏྭཱ དེསེསཱིཏི ‘‘ཝིབྷཏྟཝཱ’’ཏི ཝཏྟབྦེ ‘‘བྷགཝཱ’’ཏི ཝུཏྟནྟི ཨཱཧ ‘‘ཝིབྷཏྟཝཱ’’ཏི. དིབྦབྲཧྨཨརིཡཝིཧཱརེ, ཀཱཡཙིཏྟཨུཔདྷིཝིཝེཀེ, སུཉྙཏཱནིམིཏྟཱཔྤཎིཧིཏཝིམོཀྑེ, ཨཉྙེ ཙ ལོཀིཡལོཀུཏྟརེ ཨུཏྟརིམནུསྶདྷམྨེ བྷཛི སེཝི བཧུལམཀཱསཱིཏི ‘‘བྷཏྟཝཱ’’ཏི ཝཏྟབྦེ ‘‘བྷགཝཱ’’ཏི ཝུཏྟནྟི དསྶེཏི ‘‘བྷཏྟཝཱ’’ཏི ཨིམིནཱ. ཏཱིསུ བྷཝེསུ ཏཎྷཱསངྑཱཏཾ གམནམནེན ཝནྟཾ ཝམིཏནྟི ‘‘བྷཝེསུ ཝནྟགམནོ’’ཏི ཝཏྟབྦེ བྷཝསདྡཏོ བྷ-ཀཱརཾ གམནསདྡཏོ ག-ཀཱརཾ ཝནྟསདྡཏོ ཝ-ཀཱརཾ ཨཱདཱཡ, ཏསྶ ཙ དཱིགྷཾ ཀཏྭཱ ཝཎྞཝིཔརིཡཱཡེན ‘‘བྷགཝཱ’’ཏི ཝུཏྟནྟི དསྶེཏུཾ ‘‘ཝནྟགམནོ བྷཝེསཱུ’’ཏི ཝུཏྟཾ. ‘‘ཡཏོ བྷཱགྱཝཱ, ཏཏོ བྷགཝཱ’’ཏིཨཱདིནཱ པཙྩེཀཾ ཡོཛེཏབྦཾ. ཨསྶ པདསྶཱཏི ‘‘བྷགཝཱ’’ཏི པདསྶ. ཝིཏྠཱརཏྠོཏི ཝིཏྠཱརབྷཱུཏོ ཨཏྠོ. ‘‘སོ ཙཱ’’ཏིཨཱདིནཱ གནྠམཧཏྟཾ པརིཧརཏི. ཝུཏྟོཡེཝ, ན པན ཨིདྷ པན ཝཏྟབྦོ ཝིསུདྡྷིམགྒསྶ ཨིམིསྶཱ ཨཊྛཀཐཱཡ ཨེཀདེསབྷཱཝཏོཏི ཨདྷིཔྤཱཡོ.

ཨཔིཙ བྷགེ ཝནི, ཝམཱིཏི ཝཱ བྷགཝཱ. སོ ཧི བྷགེ སཱིལཱདིགུཎེ ཝནི བྷཛི སེཝི, ཏེ ཝཱ བྷགསངྑཱཏེ སཱིལཱདིགུཎེ ཝིནེཡྻསནྟཱནེསུ ‘‘ཀཐཾ ནུ ཁོ ཨུཔྤཛྫེཡྻུ’’ནྟི ཝནི ཡཱཙི པཏྠཡི, ཨེཝཾ བྷགེ ཝནཱིཏི བྷགཝཱ, བྷགེ ཝཱ སིརིཾ, ཨིསྶརིཡཾ, ཡསཉྩ ཝམི ཁེལ༹པིཎྜཾ ཝིཡ ཚཌྜཡི. ཏཐཱ ཧི བྷགཝཱ ཧཏྠགཏཾ ཙཀྐཝཏྟིསིརིཾ, ཙཏུདཱིཔིསྶརིཡཾ, ཙཀྐཝཏྟིསམྤཏྟིསནྣིསྶཡཉྩ སཏྟརཏནསམུཛྫལཾ ཡསཾ ཨནཔེཀྑོ ཚཌྜཡི. ཨཐ ཝཱ བྷཱནི ནཱམ ནཀྑཏྟཱནི, ཏེཧི སམཾ གཙྪནྟི པཝཏྟནྟཱིཏི བྷགཱ ཨཱཀཱརསྶ རསྶཾ ཀཏྭཱ, སིནེརུཡུགནྡྷརཱདིགཏཱ བྷཱཛནལོཀསོབྷཱ. ཏཱ བྷགཱ ཝམི ཏཔྤཊིབདྡྷཚནྡརཱགཔྤཧཱནེན པཛཧི, ཨེཝཾ བྷགེ ཝམཱིཏི བྷགཝཱཏི ཨེཝམཱདཱིཧི ཏཏྠ ཏཏྠཱགཏནཡེཧི ཙསྶ ཨཏྠོ ཝཏྟབྦོ, ཨམྷེཧི པན སོ གནྠབྷཱིརུཛནཱནུགྒཧཎཏྠཾ, གནྠགརུཏཱཔརིཧརཎཏྠཉྩ ཨཛ྄ཛྷུཔེཀྑིཏོཏི.

ཨེཝམེཏེསཾ ཨཝཡཝཏྠཾ དསྶེཏྭཱ ཨིདཱནི སམུདཱཡཏྠཾ དསྶེནྟོ པུརིམཔདཏྟཡསྶ སམུདཱཡཏྠེན ཝུཏྟཱཝསེསེན ཏེསམཏྠཱནཾ པཊིཡོགིཏཱཡ ཏེནཱཔི སཧ དསྶེཏུཾ ‘‘ཨེཏྟཱཝཏཱ’’ཏིཨཱདིམཱཧ. ཨེཏྟཱཝཏཱཏི ¶ ¶ ཨེཏསྶ ‘‘ཨེཝཾ མེ སུཏ’’ནྟི ཝཙནེན ‘‘ཨེཀཾ སམཡཾ བྷགཝཱ’’ ཏིཝཙནེནཱཏི ཨིམེཧི སམྦནྡྷོ. ཨེཏྠཱཏི ཨེཏསྨིཾ ནིདཱནཝཙནེ. ཡཐཱསུཏཾ དྷམྨཾ དེསེནྟོཏི ཨེཏྠ ཨནྟ-སདྡོ ཧེཏུཨཏྠོ. ཏཐཱདེསིཏཏྟཱ ཧི པཙྩཀྑཾ ཀརོཏི ནཱམ. ཨེས ནཡོ ཨཔརཏྠཱཔི. ‘‘ཡོ ཁོ ཨཱནནྡ, མཡཱ དྷམྨོ ཙ…པེ… སཏྠཱ’’ཏི ཝཙནཏོ དྷམྨསྶ སཏྠུབྷཱཝཔརིཡཱཡོ ཝིཛྫཏེཝཱཏི ཀཏྭཱ ‘‘དྷམྨསརཱིརཾ པཙྩཀྑཾ ཀརོཏཱི’’ཏི ཝུཏྟཾ. དྷམྨཀཱཡནྟི ཧི བྷགཝཏོ སམྦནྡྷཱིབྷཱུཏཾ དྷམྨསངྑཱཏཾ ཀཱཡནྟི ཨཏྠོ. ཏཐཱ ཙ ཝུཏྟཾ ‘‘དྷམྨཀཱཡོཏི བྷིཀྑཝེ, ཏཐཱགཏསྶེཏཾ ཨདྷིཝཙན’’ནྟི. ཏཾ པན ཀིམཏྠིཡནྟི ཨཱཧ ‘‘ཏེནཱ’’ཏིཨཱདི. ཏེནཱཏི ཙ ཏཱདིསེན པཙྩཀྑཀརཎེནཱཏི ཨཏྠོ. ཨིདཾ ཨདྷུནཱ ཝཀྑམཱནསུཏྟཾ པཱཝཙནཾ པཀཊྛཾ ཨུཏྟམཾ བུདྡྷསྶ བྷགཝཏོ ཝཙནཾ ནཱམ. ཏསྨཱ ཏུམྷཱཀཾ ཨཏིཀྐནྟསཏྠུཀཾ ཨཏཱིཏསཏྠུཀབྷཱཝོ ན ཧོཏཱིཏི ཨཏྠོ. བྷཱཝཔྤདྷཱནོ ཧི ཨཡཾ ནིདྡེསོ, བྷཱཝལོཔོ ཝཱ, ཨིཏརཐཱ པཱཝཙནམེཝ ཨནཏིཀྐནྟསཏྠུཀཾ, སཏྠུཨདསྶནེན པན ཨུཀྐཎྛིཏསྶ ཛནསྶ ཨཏིཀྐནྟསཏྠུཀབྷཱཝོཏི ཨཏྠོ ཨཱཔཛྫེཡྻ, ཨེཝཉྩ སཏི ‘‘ཨཡཾ ཝོ སཏྠཱཏི སཏྠུཨདསྶནེན ཨུཀྐཎྛིཏཾ ཛནཾ སམསྶཱསེཏཱི’’ ཏིཝཙནེན སཧ ཝིརོདྷོ བྷཝེཡྻཱཏི ཝདནྟི. ཨིདཾ པཱཝཙནཾ སཏྠུཀིཙྩནིཔྥཱདནེན ན ཨཏཱིཏསཏྠུཀནྟི པན ཨཏྠོ. སཏྠཱུཏི ཀམྨཏྠེ ཚཊྛཱི, སམཱསཔདཾ ཝཱ ཨེཏཾ སཏྠུཨདསྶནེནཱཏི. ཨུཀྐཎྛནཾ ཨུཀྐཎྛོ, ཀིཙྪཛཱིཝིཏཱ. ‘‘ཀཋ ཀིཙྪཛཱིཝནེ’’ཏི ཧི ཝདནྟི. ཏམིཏོ པཏྟོཏི ཨུཀྐཎྛིཏོ, ཨནབྷིརཏིཡཱ ཝཱ པཱིལི༹ཏོ ཝིཀྑིཏྟཙིཏྟོ ཧུཏྭཱ སཱིསཾ ཨུཀྑིཔིཏྭཱ ཨུདྡྷཾ ཀཎྛཾ ཀཏྭཱ ཨིཏོ ཙིཏོ ཙ ཨོལོཀེནྟོ ཨཱཧིཎྜཏི, ཝིཧརཏི ཙཱཏི ཨུཀྐཎྛིཏོ ནིརུཏྟིནཡེན, ཏཾ ཨུཀྐཎྛིཏཾ. སདྡསཱམཏྠིཡཱདྷིགཏམཏྟོ ཙེས, ཝོཧཱརཏོ པན ཨནབྷིརཏིཡཱ པཱིལི༹ཏནྟི ཨཏྠོ. ཨེས ནཡོ སབྦཏྠ. སམསྶཱསེཏཱིཏི ཨསྶཱསཾ ཛནེཏི.

ཏསྨིཾ སམཡེཏི ཨིམསྶ སུཏྟསྶ སངྒཱིཏིསམཡེ. ཀཱམཾ ཝིཛྫམཱནེཔི བྷགཝཏི ཨེཝཾ ཝཏྟུམརཧཏི, ཨིདྷ པན ཨཝིཛྫམཱནེཡེཝ ཏསྨིཾ ཨེཝཾ ཝདཏི, ཏསྨཱ སནྡྷཱཡབྷཱསིཏཝསེན ཏདཏྠཾ དསྶེཏཱིཏི ཨཱཧ ‘‘ཨཝིཛྫམཱནབྷཱཝཾ དསྶེནྟོ’’ཏི. པརིནིབྦཱནནྟི ཨནུཔཱདིསེསནིབྦཱནདྷཱཏུཝསེན ཁནྡྷཔརིནིབྦཱནཾ. ཏེནཱཏི ཏཐཱསཱདྷནེན. ཨེཝཾཝིདྷསྶཱཏི ཨེཝཾཔཀཱརསྶ, ཨེཝཾསབྷཱཝསྶཱཏིཔི ¶ ཨཏྠོ. ནཱམ-སདྡོ གརཧཱཡཾ ནིཔཱཏོ ‘‘ཨཏྠི ནཱམ ཨཱནནྡ ཐེརཾ བྷིཀྑུཾ ཝིཧེསིཡམཱནཾ ཨཛ྄ཛྷུཔེཀྑིསྶཐཱ’’ཏིཨཱདཱིསུ (ཨ. ནི. ༥.༡༦༦) ཝིཡ, ཏེན ཨེདིསོ ཨཔི བྷགཝཱ པརིནིབྦུཏོ, ཀཱ ནཱམ ཀཐཱ ཨཉྙེསནྟི གརཧཏྠཾ ཛོཏེཏི. ཨརིཡདྷམྨསྶཱཏི ཨརིཡཱནཾ དྷམྨསྶ, ཨརིཡབྷཱུཏསྶ ཝཱ དྷམྨསྶ. དསཝིདྷསྶ ཀཱཡབལསྶ, ཉཱཎབལསྶ ཙ ཝསེན དསབལདྷརོ. ཝཛིརསྶ ནཱམ མཎིཝིསེསསྶ སངྒྷཱཏོ སམཱུཧོ ཨེཀགྒྷནོ, ཏེན སམཱནོ ཀཱཡོ ཡསྶཱཏི ཏཐཱ. ཨིདཾ ཝུཏྟཾ ཧོཏི – ཡཐཱ ཝཛིརསངྒྷཱཏོ ནཱམ ན ཨཉྙེན མཎིནཱ ¶ ཝཱ པཱསཱཎེན ཝཱ བྷེཛྫོ, ཨཔི ཏུ སོཡེཝ ཨཉྙཾ མཎིཾ ཝཱ པཱསཱཎཾ ཝཱ བྷིནྡཏི. ཏེནེཝ ཝུཏྟཾ ‘‘ཝཛིརསྶ ནཏྠི ཀོཙི ཨབྷེཛྫོ མཎི ཝཱ པཱསཱཎོ ཝཱ’’ཏི, ཨེཝཾ བྷགཝཱཔི ཀེནཙི ཨབྷེཛྫསརཱིརོ. ན ཧི བྷགཝཏོ རཱུཔཀཱཡེ ཀེནཙི ཨནྟརཱཡོ ཀཱཏུཾ སཀྐཱཏི. ནཱམསདྡསྶ གརཧཱཛོཏཀཏྟཱ པི-སདྡོ སམྤིཎྜནཛོཏཀོ ‘‘ན ཀེཝལཾ བྷགཝཱཡེཝ, ཨཐ ཁོ ཨཉྙེཔཱི’’ཏི. ཨེཏྠ ཙ ཨེཝཾགུཎསམནྣཱགཏཏྟཱ ཨཔརིནིབྦུཏསབྷཱཝེན བྷཝིཏུཾ ཡུཏྟོཔི ཨེས པརིནིབྦུཏོ ཨེཝཱཏི པཀརཎཱནུརཱུཔམཏྠཾ དསྶེཏུཾ ‘‘ཨེཝ’’ནྟིཨཱདི ཝུཏྟནྟི དཊྛབྦཾ. ཨཱསཱ པཏྠནཱ ཀེན ཛནེཏབྦཱ, ན ཛནེཏབྦཱ ཨེཝཱཏི ཨཏྠོ. ‘‘ཨཧཾ ཙིརཾ ཛཱིཝིཾ, ཙིརཾ ཛཱིཝཱམི, ཙིརཾ ཛཱིཝིསྶཱམི, སུཁཾ ཛཱིཝིཾ, སུཁཾ ཛཱིཝཱམི, སུཁཾ ཛཱིཝིསྶཱམཱི’’ཏི མཛྫནཝསེན ཨུཔྤནྣོ མཱནོ ཛཱིཝིཏམདོ ནཱམ, ཏེན མཏྟོ པམཏྟོ ཏཐཱ. སཾཝེཛེཏཱིཏི སཾཝེགཾ ཛནེཏི, ཏཏོཡེཝ ཨསྶ ཛནསྶ སདྡྷམྨེ ཨུསྶཱཧཾ ཛནེཏི. སཾཝེཛནཉྷི ཨུསྶཱཧཧེཏུ ‘‘སཾཝིགྒོ ཡོནིསོ པདཧཏཱི’’ཏི ཝཙནཏོ.

དེསནཱསམྤཏྟིཾ ནིདྡིསཏི ཝཀྑམཱནསྶ སཀལསུཏྟསྶ ‘‘ཨེཝ’’ནྟི ནིདསྶནཏོ. སཱཝཀསམྤཏྟིནྟི སུཎནྟཔུགྒལསམྤཏྟིཾ ནིདྡིསཏི པཊིསམྦྷིདཱཔྤཏྟེན པཉྩསུ ཋཱནེསུ བྷགཝཏཱ ཨེཏདགྒེ ཋཔིཏེན, པཉྩསུ ཙ ཀོསལླེསུ ཨཱཡསྨཏཱ དྷམྨསེནཱཔཏིནཱ པསཾསིཏེན མཡཱ མཧཱསཱཝཀེན སུཏཾ, ཏཉྩ ཁོ སཡམེཝ སུཏཾ ན ཨནུསྶུཏཾ, ན ཙ པརམྤརཱབྷཏནྟི ཨཏྠསྶ དཱིཔནཏོ. ཀཱལསམྤཏྟིཾ ནིདྡིསཏི བྷགཝཱཏིསདསནྣིདྷཱནེ པཡུཏྟསྶ སམཡསདྡསྶ བུདྡྷུཔྤཱད-པཊིམཎྜིཏ-སམཡ-བྷཱཝ-དཱིཔནཏོ. བུདྡྷུཔྤཱདཔརམཱ ཧི ཀཱལསམྤདཱ. ཏེནེཏཾ ཝུཙྩཏི –

‘‘ཀཔྤཀསཱཡཀལིཡུགེ ¶ , བུདྡྷུཔྤཱདོ ཨཧོ མཧཙྪརིཡཾ;

ཧུཏཝཧམཛ྄ཛྷེ ཛཱཏཾ, སམུདིཏམཀརནྡམརཝིནྡ’’ནྟི. (དཱི. ནི. ཊཱི. ༡.༡; སཾ. ནི. ཊཱི. ༡.༡);

ཏསྶཱཡམཏྠོ – ཀཔྤསངྑཱཏཀཱལསཉྩཡསྶ ལེཁནཝསེན པཝཏྟེ ཀལིཡུགསངྑཱཏེ སཀརཱཛསམྨཏེ ཝསྶཱདིསམཱུཧེ ཛཱཏོ བུདྡྷུཔྤཱདཁཎསངྑཱཏོ དིནསམཱུཧོ ཨནྡྷསྶ པབྦཏཱརོཧནམིཝ ཀདཱཙི པཝཏྟནཊྛེན, ཨཙྪརཾ པཧརིཏུཾ ཡུཏྟཊྛེན ཙ མཧཙྪརིཡཾ ཧོཏི. ཀིམིཝ ཛཱཏནྟི ཙེ? ཧུཏཝཧསངྑཱཏསྶ པཱཝཀསྶ མཛ྄ཛྷེ སམྨཱ ཨུདིཏམདྷུམནྟཾ ཨརཝིནྡསངྑཱཏཾ ཝཱརིཛམིཝ ཛཱཏནྟི. དེསཀསམྤཏྟིཾ ནིདྡིསཏི གུཎཝིསིཊྛསཏྟུཏྟམགཱརཝཱདྷིཝཙནཏོ.

ཨེཝཾ པདཚཀྐསྶ པདཱནུཀྐམེན ནཱནཔྤཀཱརཏོ ཨཏྠཝཎྞནཾ ཀཏྭཱ ཨིདཱནི ‘‘ཨནྟརཱ ཙ རཱཛགཧ’’ནྟིཨཱདཱིནཾ ¶ པདཱནམཏྠཝཎྞནཾ ཀརོནྟོ ‘‘ཨནྟརཱ ཙཱ’’ཏིཨཱདིམཱཧ. ཨནྟརཱ ཙ རཱཛགཧཾ ཨནྟརཱ ཙ ནཱལ༹ནྡནྟི ཨེཏྠ སམབྷིནིཝིཊྛོ ཨནྟརཱ-སདྡོ དིསྶཏི སཱམཉྙཝཙནཱིཡཏྠམཔེཀྑིཏྭཱ པཀརཎཱདིསཱམཏྠིཡཱདིགཏཏྠམནྟརེནཱཏི ཨཏྠོ. ཨེཝཾ པནསྶ ནཱནཏྠབྷཱཝོ པཡོགཏོ ཨཝགམཱིཡཏཱིཏི དསྶེཏི ‘‘ཏདནྟར’’ནྟིཨཱདིནཱ. ཏཏྠ ཏདནྟརནྟི ཏཾ ཀཱརཎཾ. མཉྩ ཏཉྩ མནྟེནྟི, ཀིམནྟརཾ ཀིཾ ཀཱརཎནྟི ཨཏྠོ. ཝིཛྫནྟརིཀཱཡཱཏི ཝིཛྫུནིཙྪརཎཀྑཎེ. དྷོཝནྟཱི ཨིཏྠཱི ཨདྡསཱཏི སམྦནྡྷོ. ཨནྟརཏོཏི ཧདཡེ. ཀོཔཱཏི ཙིཏྟཀཱལུསྶིཡཀརཎཏོ ཙིཏྟཔཀོཔཱ རཱགཱདཡོ. ཨནྟརཱ ཝོསཱནནྟི ཨཱརམྦྷནིཔྥཏྟཱིནཾ ཝེམཛ྄ཛྷེ པརིཡོསཱནཾ ཨཱཔཱདི. ཨཔིཙཱཏི ཏཐཱཔི, ཨེཝཾ པབྷཝསམྤནྣེཔཱིཏི ཨཏྠོ. དྭིནྣཾ མཧཱནིརཡཱནནྟི ལོཧཀུམྦྷཱིནིརཡེ སནྡྷཱཡཱཧ. ཨནྟརིཀཱཡཱཏི ཨནྟརེན. རཱཛགཧནགརཾ ཀིར ཨཱཝིཛ྄ཛྷིཏྭཱ མཧཱཔེཏལོཀོ. ཏཏྠ དྭིནྣཾ མཧཱལོཧཀུམྦྷཱིནིརཡཱནཾ ཨནྟརེན ཨཡཾ ཏཔོདཱ ནདཱི ཨཱགཙྪཏི, ཏསྨཱ སཱ ཀུཐིཏཱ སནྡཏཱིཏི. སྭཱཡམིདྷ ཝིཝརེ པཝཏྟཏི ཏདཉྙེསམསམྦྷཝཏོ. ཨེཏྠ ཙ ‘‘ཏདནྟརཾ ཀོ ཛཱནེཡྻ, (ཨ. ནི. ༦.༤༤; ༡༠.༧༥) ཨེཏེསཾ ཨནྟརཱ ཀཔྤཱ, གཎནཱཏོ ཨསངྑིཡཱ, (བུ. ཝཾ. ༢༨.༩) ཨནྟརནྟརཱ ཀཐཾ ཨོཔཱཏེཏཱི’’ཏིཨཱདཱིསུ (མ. ནི. ༢.༤༢༦; པཧཱ. ཝ. ༦༦; ཙཱུལ༹ཝ. ༣༧༦) ཝིཡ ཀཱརཎཝེམཛ྄ཛྷེསུ ཝཏྟམཱནཱ ཨནྟརཱསདྡཱཡེཝ ཨུདཱཧརིཏབྦཱ སིཡུཾ, ན པན ཙིཏྟཁཎཝིཝརེསུ ཝཏྟམཱནཱ ཨནྟརིཀཨནྟརསདྡཱ ¶ . ཨནྟརཱསདྡསྶ ཧི ཨཡམཏྠུདྡྷཱརོཏི. ཨཡཾ པནེཏྠཱདྷིཔྤཱཡོ སིཡཱ – ཡེསུ ཨཏྠེསུ ཨནྟརིཀསདྡོ, ཨནྟརསདྡོ ཙ པཝཏྟཏི, ཏེསུ ཨནྟརཱསདྡོཔཱིཏི སམཱནཏྠཏྟཱ ཨནྟརཱསདྡཏྠེ ཝཏྟམཱནོ ཨནྟརིཀསདྡོ, ཨནྟརསདྡོ, ཙ ཨུདཱཧཊོཏི. ཨཐ ཝཱ ཨནྟརཱསདྡོཡེཝ ‘‘ཡསྶནྟརཏོ’’ཏི (ཨུདཱ. ༢༠) ཨེཏྠ གཱཐཱབནྡྷསུཁཏྠཾ རསྶཾ ཀཏྭཱ ཝུཏྟོ –

‘‘ཡསྶནྟརཏོ ན སནྟི ཀོཔཱ,

ཨིཏིབྷཝཱབྷཝཏཉྩ ཝཱིཏིཝཏྟོ;

ཏཾ ཝིགཏབྷཡཾ སུཁིཾ ཨསོཀཾ,

དེཝཱ ནཱནུབྷཝནྟི དསྶནཱཡཱ’’ཏི. (ཨུདཱ. ༢༠); –

ཧི ཨཡཾ ཨུདཱནེ བྷདྡིཡསུཏྟེ གཱཐཱ. སོཡེཝ ཨིཀ-སདྡེན སཀཏྠཔཝཏྟེན པདཾ ཝཌྜྷེཏྭཱ ‘‘ཨནྟརིཀཱཡཱ’’ཏི ཙ ཝུཏྟོ, ཏསྨཱ ཨུདཱཧརཎོདཱཧརིཏབྦཱནམེཏྠ ཝིརོདྷཱབྷཱཝོ ཝེདིཏབྦོཏི. ཀིམཏྠཾ ཨཏྠཝིསེསནིཡམོ ཀཏོཏི ཨཱཧ ‘‘ཏསྨཱ’’ཏིཨཱདི. ནནུ ཙེཏྠ ཨུཔཡོགཝཙནམེཝ, ཨཐ ཀསྨཱ སམྦནྡྷཱིཡཏྠོ ཝུཏྟོ, སམྦནྡྷཱིཡཏྠེ ཝཱ ཀསྨཱ ཨུཔཡོགཝཙནཾ ཀཏནྟི ཨནུཡོགསམྦྷཝཏོ ཏཾ པརིཧརིཏུཾ ‘‘ཨནྟརཱསདྡེན པནཱ’’ཏིཨཱདི ཝུཏྟཾ, ཏེན སམྦནྡྷཱིཡཏྠེ སཱམིཝཙནཔྤསངྒེ ¶ སདྡནྟརཡོགེན ལདྡྷམིདཾ ཨུཔཡོགཝཙནནྟི དསྶེཏི, ན ཀེཝལཾ སཱསནེཝ, ལོཀེཔི ཨེཝམེཝིདཾ ལདྡྷནྟི དསྶེནྟོ ‘‘ཨཱིདིསེསུ ཙཱ’’ཏིཨཱདིམཱཧ. ཝིསེསཡོགཏཱདསྶནམུཁེན ཧི ཨཡམཏྠོཔི དསྶིཏོ. ཨེཀེནཔི ཨནྟརཱ-སདྡེན ཡུཏྟཏྟཱ དྭེ ཨུཔཡོགཝཙནཱནི ཀཱཏབྦཱནི. དྭཱིཧི པན ཡོགེ ཀཱ ཀཐཱཏི ཨཏྠསྶ སིཛ྄ཛྷནཏོ. ཨཀྑརཾ ཙིནྟེནྟི ལིངྒཝིབྷཏྟིཡཱདཱིཧཱིཏི ཨཀྑརཙིནྟཀཱ, སདྡཝིདཱུ. ཨཀྑར-སདྡེན ཙེཏྠ ཏམྨཱུལཀཱནི པདཱདཱིནིཔི གཧེཏབྦཱནི. ཡདིཔི སདྡཏོ ཨེཀམེཝ ཡུཛྫནྟི, ཨཏྠཏོ པན སོ དྭིཀྑཏྟུཾ ཡོཛེཏབྦོ ཨེཀསྶཱཔི པདསྶ ཨཱཝུཏྟིཡཱདིནཡེན ཨནེཀདྷཱ སམྤཛྫནཏོཏི དསྶེཏི ‘‘དུཏིཡཔདེནཔཱི’’ཏིཨཱདིནཱ. ཀོ པན དོསོ ཨཡོཛིཏེཏི ཨཱཧ ‘‘ཨཡོཛིཡམཱནེ ཨུཔཡོགཝཙནཾ ན པཱཔུཎཱཏཱི’’ཏི. དུཏིཡཔདཾ ན པཱཔུཎཱཏཱིཏི ཨཏྠོ སདྡནྟརཡོགཝསཱ སདྡེཡེཝ སཱམིཝཙནཔྤསངྒེ ཨུཔཡོགཝིབྷཏྟིཡཱ ཨིཙྪིཏཏྟཱ. སདྡཱདྷིཀཱརོ ཧི ཝིབྷཏྟིཔཡོགོ.

ཨདྡྷཱན-སདྡོ ¶ དཱིགྷཔརིཡཱཡོཏི ཨཱཧ ‘‘དཱིགྷམགྒ’’ནྟི. ཀིཏྟཱཝཏཱ པན སོ དཱིགྷོ ནཱམ ཏདཏྠབྷཱུཏོཏི ཙོདནམཔནེཏི ‘‘ཨདྡྷཱནགམནསམཡསྶ ཧཱི’’ཏིཨཱདིནཱ. ཨདྡྷཱནགམནསམཡསྶ ཝིབྷངྒེཏི གཎབྷོཛནསིཀྑཱཔདཱདཱིསུ ཨདྡྷཱནགམནསམཡསདྡསྶ པདབྷཱཛནཱིཡབྷཱུཏེ ཝིབྷངྒེ (པཱཙི. ༢༡༧). ཨཌྜྷཡོཛནམྤི ཨདྡྷཱནམགྒོ, པགེཝ ཏདུཏྟརི. ཨཌྜྷམེཝ ཡོཛནསྶ ཨཌྜྷཡོཛནཾ, དྭིགཱཝུཏམཏྟཾ. ཨིདྷ པན ཙཏུགཱཝུཏཔྤམཱཎཾ ཡོཛནམེཝ, ཏསྨཱ ‘‘ཨདྡྷཱནམགྒཔཊིཔནྣོ’’ཏི ཝདཏཱིཏི ཨདྷིཔྤཱཡོ.

མཧནྟསདྡོ ཨུཏྟམཏྠོ, བཧྭཏྠོ ཙ ཨིདྷཱདྷིཔྤེཏོཏི ཨཱཧ ‘‘མཧཏཱ’’ཏིཨཱདི. གུཎམཧཏྟེནཱཏི ཨཔྤིཙྪཏཱདིགུཎམཧནྟབྷཱཝེན. སངྑྱཱམཧཏྟེནཱཏི གཎནམཧནྟབྷཱཝེན. ཏདེཝཏྠཾ སམཏྠེཏི ‘‘སོ ཧཱི’’ཏིཨཱདིནཱ. སོ བྷིཀྑུསངྒྷོཏི ཨིདྷ ཨཱགཏོ ཏདཱ པརིཝཱརབྷཱུཏོ བྷིཀྑུསངྒྷོ. མཧཱཏི ཨུཏྟམོ. ཝཱཀྱེཔི ཧི ཏམིཙྪནྟི པཡོགཝསཱ. ཨཔྤིཙྪཏཱཏི ནིལློབྷཏཱ སདྡོ ཙེཏྠ སཱཝསེསོ, ཨཏྠོ པན ནིརཝསེསོ. ན ཧི ‘‘ཨཔྤལོབྷཏཱཏི ཨབྷིཏྠཝིཏུམརཧཏཱི’’ཏི ཨཊྛཀཐཱསུ ཝུཏྟཾ. མཛ྄ཛྷིམཱགམཊཱིཀཱཀཱརོ པན ཨཱཙརིཡདྷམྨཔཱལཏྠེརོ ཨེཝམཱཧ ‘‘ཨཔྤསདྡསྶ པརིཏྟཔརིཡཱཡཾ མནསི ཀཏྭཱ ‘བྱཉྫནཾ སཱཝསེསཾ ཝིཡཱ’ཏི (མཧཱནི. ཨཊྛ. ༨༥) ཨཊྛཀཐཱཡཾ ཝུཏྟཾ. ཨཔྤསདྡོ པནེཏྠ ‘ཨབྷཱཝཏྠོ’ ཏིཔི སཀྐཱ ཝིཉྙཱཏུཾ ‘ཨཔྤཱབཱདྷཏཉྩསཉྫཱནཱམཱི’ཏིཨཱདཱིསུ (མ. ནི. ༡.༢༢༥) ཝིཡཱ’’ཏི. སངྑྱཱཡཔི མཧཱཏི གཎནཱཡཔི བཧུ ཨཧོསི, ‘‘བྷིཀྑུསངྒྷོ’’ཏི པདཱཝཏྠིཀནྟཝཙནཝསེན སཾཝཎྞེཏབྦཔདསྶ ཚེདནམིཝ ཧོཏཱིཏི ཏདཔརཱམསིཏྭཱ ‘‘ཏེན བྷིཀྑུསངྒྷེནཱ’’ཏི པུན ཝཱཀྱཱཝཏྠིཀནྟཝཙནཝསེན སཾཝཎྞེཏབྦཔདེན སདིསཱིཀརཎཾ. ཨེསཱ ཧི སཾཝཎྞནཀཱནཾ པཀཏི, ཡདིདཾ ཝིབྷཏྟིཡཱནཔེཀྑཱཝསེན ཡཐཱརཧཾ སཾཝཎྞེཏབྦཔདཏྠཾ ¶ སཾཝཎྞེཏྭཱ པུན ཏཏྠ ཝིཛྫམཱནཝིབྷཏྟིཝསེན པརིཝཏྟེཏྭཱ ནིཀྑིཔནནྟི. དིཊྛིསཱིལསཱམཉྙེན སཾཧཏཏྟཱ སངྒྷོཏི ཨིམམཏྠཾ ཝིབྷཱཝེནྟོ ཨཱཧ ‘‘དིཊྛིསཱིལསཱམཉྙསངྒྷཱཏེན སམཎགཎེནཱ’’ཏི. ཨེཏྠ པན ‘‘ཡཱཡཾ དིཊྛི ཨརིཡཱ ནིཡྻཱནིཀཱ ནིཡྻཱཏི ཏཀྐརསྶ སམྨཱ དུཀྑཀྑཡཱཡ, ཏཐཱརཱུཔཱཡ དིཊྛིཡཱ དིཊྛིསཱམཉྙགཏོ ཝིཧརཏཱི’’ཏི (དཱི. ནི. ༣.༣༢༤, ༣༥༦; མ. ནི. ༡.༤༩༢; ༣.༥༤; པརི. ༢༧༤) ཨེཝཾ ཝུཏྟཱཡ དིཊྛིཡཱ. ‘‘ཡཱནི ཏཱནི སཱིལཱནི ཨཁཎྜཱནི ཨཙྪིདྡཱནི ཨསབལཱནི ཨཀམྨཱསཱནི བྷུཛིསྶཱནི ¶ ཝིཉྙུཔྤསཏྠཱནི ཨཔརཱམཊྛཱནི སམཱདྷིསཾཝཏྟནིཀཱནི, ཏཐཱརཱུཔེསུ སཱིལེསུ སཱིལསཱམཉྙགཏོ ཝིཧརཏཱི’’ཏི (དཱི. ནི. ༣.༣༢༣; མ. ནི. ༡.༤༩༢; ༣.༥༤; ཨ. ནི. ༦.༡༡; པརི. ༢༧༤) ཨེཝཾ ཝུཏྟཱནཉྩ སཱིལཱནཾ སཱམཉྙེན སངྒྷཱཏོ སངྒྷཊིཏོ སམེཏོཏི དིཊྛིསཱིལསཱམཉྙསངྒྷཱཏོ, སམཎགཎོ, དིཊྛིསཱིལསཱམཉྙེན སཾཧཏོཏི ཝུཏྟཾ ཧོཏི. ‘‘དིཊྛིསཱིལསཱམཉྙསངྒྷཱཊསངྑཱཏེནཱ’’ ཏིཔི པཱཋོ. ཏཐཱ སངྑཱཏེན ཀཏིཏེནཱཏི ཨཏྠོ. ཏཐཱ ཧི དིཊྛིསཱིལཱདཱིནཾ ནིཡཏསབྷཱཝཏྟཱ སོཏཱཔནྣཱཔི ཨཉྙམཉྙཾ དིཊྛིསཱིལསཱམཉྙེན སཾཧཏཱ, པགེཝ སཀདཱགཱམིཨཱདཡོ, ཏཐཱ ཙ ཝུཏྟཾ ‘‘ནིཡཏོ སམྦོདྷིཔརཱཡཎོ’’ཏི, (སཾ. ནི. ༢.༤༡; ༥.༡༩༨, ༡༠༠༤) ‘‘ཨཊྛཱནམེཏཾ བྷིཀྑཝེ, ཨནཝཀཱསོ, ཡཾ དིཊྛིསམྤནྣོ པུགྒལོ སཉྩིཙྩཔཱཎཾ ཛཱིཝིཏཱ ཝོརོཔེཡྻ, ནེཏཾ ཋཱནཾ ཝིཛྫཏཱི’’ཏི ཙ ཨཱདི. ཨརིཡཔུགྒལསྶ ཧི ཡཏྠ ཀཏྠཙི དཱུརེ ཋིཏཱཔི ཨཏྟནོ གུཎསཱམགྒིཡཱ སཾཧཏཏཱཡེཝ, ‘‘ཏཐཱརཱུཔཱཡ དིཊྛིཡཱ དིཊྛིསཱམཉྙགཏོ ཝིཧརཏི, (མ. ནི. ༡.༤༩༢) ཏཐཱརཱུཔེསུ སཱིལེསུ སཱིལསཱམཉྙགཏོ ཝིཧརཏཱི’’ཏི (མ. ནི. ༡.༤༩༢) ཝཙནཏོ པན པུཐུཛྫནཱནམྤི དིཊྛིསཱིལསཱམཉྙེན སཾཧཏབྷཱཝོ ལབྦྷཏིཡེཝ. སདྡྷིཾ-སདྡོ ཨེཀཏོཏི ཨཏྠེ ནིཔཱཏོ. པཉྩ…པེ… མཏྟཱནཱིཏི པཉྩ-སདྡེན མཏྟསདྡཾ སངྑིཔིཏྭཱ བཱཧིརཏྠསམཱསོ ཝུཏྟོ. ཨེཏེསནྟི བྷིཀྑུསཏཱནཾ. པུན པཉྩ མཏྟཱ པམཱཎཱཏི བྱཱསོ, ནིཀཱརལོཔོ ཙེཏྠ ནཔུཾསཀལིངྒཏྟཱ.

སུཔྤིཡོཏི ཏསྶ ནཱམམེཝ, ན གུཎཱདི. ན ཀེཝལཾ བྷིཀྑུསངྒྷེན སདྡྷིཾ བྷགཝཱཡེཝ, ཨཐ ཁོ སུཔྤིཡོཔི པརིབྦཱཛཀོ བྲཧྨདཏྟེན མཱཎཝེན སདྡྷིནྟི པུགྒལཾ སམྤིཎྜེཏི, ཏཉྩ ཁོ མགྒཔཊིཔནྣསབྷཱགཏཱཡ ཨེཝ, ན སཱིལཱཙཱརཱདིསབྷཱགཏཱཡཱཏི ཝུཏྟཾ ‘‘པི-ཀཱརོ’’ཏིཨཱདི. སུཁུཙྩཱརཎཝསེན པུབྦཱཔརཔདཱནཾ སམྦནྡྷམཏྟཀརབྷཱཝཾ སནྡྷཱཡ ‘‘པདསནྡྷིཀརོ’’ཏི ཝུཏྟཾ, ན པན སརབྱཉྫནཱདིསནྡྷིབྷཱཝཾ, ཏེནཱཧ ‘‘བྱཉྫནསིལིཊྛཏཱཝསེན ཝུཏྟོ’’ཏི, ཨེཏེན པདཔཱུརཎམཏྟནྟི དསྶེཏི. ཨཔིཙ ཨཝདྷཱརཎཏྠོཔི ཁོ-སདྡོ ཡུཏྟོ ‘‘ཨསྶོསི ཁོ ཝེརཉྫོ བྲཱཧྨཎོ’’ཏིཨཱདཱིསུ (པཱརཱ. ༡) ཝིཡ, ཏེན ཨདྡྷཱནམགྒཔཊིཔནྣོ ཨཧོསིཡེཝ, ནཱསྶ མགྒཔཊིཔཏྟིཡཱ ཀོཙི ཨནྟརཱཡོ ཨཧོསཱིཏི ཨཡམཏྠོ དཱིཔིཏོ ཧོཏི. སཉྫཡསྶཱཏི རཱཛགཧཝཱསིནོ ¶ སཉྫཡནཱམསྶ པརིབྦཱཛཀསྶ, ཡསྶ སནྟིཀེ པཋམཾ ཨུཔཏིསྶཀོལིཏཱཔི པབྦཛིཾསུ ཚནྣཔརིབྦཱཛཀོཝ ¶ , ན ཨཙེལཀཔརིབྦཱཛཀོ. ‘‘ཡདཱ, ཏདཱ’’ཏི ཙ ཨེཏེན སམཀཱལམེཝ ཨདྡྷཱནམགྒཔཊིཔནྣཏཾ དསྶེཏི. ཨཏཱིཏཀཱལཏྠོ པཱལི༹ཡཾ ཧོཏིསདྡོ ཡོགཝིབྷཱགེན, ཏཾཀཱལཱཔེཀྑཱཡ ཝཱ ཨེཝཾ ཝུཏྟཾ, ཏདཱ ཧོཏཱིཏི ཨཏྠོ.

ཨནྟེཏི སམཱིཔེ. ཝསཏཱིཏི ཝཏྟཔཊིཝཏྟཱདིཀརཎཝསེན སབྦིརིཡཱཔཐསཱདྷཱརཎཝཙནཾ, ཨཝཙརཏཱིཏི ཝུཏྟཾ ཧོཏི, ཏེནེཝཱཧ ‘‘སམཱིཔཙཱརོ སནྟིཀཱཝཙརོ སིསྶོ’’ཏི. ཙོདིཏཱ དེཝདཱུཏེཧཱིཏི དཧརཀུམཱརོ ཛརཱཛིཎྞསཏྟོ གིལཱནོ ཀམྨཀཱརཎཱ, ཀམྨཀཱརཎིཀཱ ཝཱ མཏསཏྟོཏི ཨིམེཧི པཉྩཧི དེཝདཱུཏེཧི ཙོདིཏཱ ཨོཝདིཏཱ སཾཝེགཾ ཨུཔྤཱདིཏཱ སམཱནཱཔི. ཏེ ཧི དེཝཱ ཝིཡ དཱུཏཱ, ཝིསུདྡྷིདེཝཱནཾ ཝཱ དཱུཏཱཏི དེཝདཱུཏཱ. ཧཱིནཀཱཡཱུཔགཱཏི ཨཔཱཡཀཱཡམུཔགཏཱ. ནརསངྑཱཏཱ ཏེ མཱཎཝཱཏི སམྦནྡྷོ. སཱམཉྙཝསེན ཙེཏྠ སཏྟོ ‘‘མཱཎཝོ’’ཏི ཝུཏྟོ, ཨིཏརེ པན ཝིསེསཝསེན. པཀརཎཱདྷིགཏོ ཧེས ཨཏྠུདྡྷཱརོཏི. ཀཏཀམྨེཧཱིཏི ཀཏཙོརཀམྨེཧི. ཏརུཎོཏི སོལ༹སཝསྶཏོ པཊྛཱཡ པཏྟཝཱིསཏིཝསྶོ, ཨུདཱནཊྛཀཐཱཡཉྷི ‘‘སཏྟཱ ཛཱཏདིཝསཏོ པཊྛཱཡ ཡཱཝ པཉྩདསཝསྶཀཱ, ཏཱཝ ‘ཀུམཱརཀཱ, བཱལཱ’ཏི ཙ ཝུཙྩནྟི. ཏཏོ པརཾ ཝཱིསཏིཝསྶཱནི ‘ཡུཝཱནོ’’’ཏི (ཨུདཱ. ཨཊྛ. ༤༤) ཝུཏྟཾ. ཏརུཎོ, མཱཎཝོ, ཡུཝཱཏི ཙ ཨཏྠཏོ ཨེཀཾ, ལོཀིཡཱ པན ‘‘དྭཱདསཝསྶཏོ པཊྛཱཡ ཡཱཝ ཛརམཔྤཏྟོ, ཏཱཝ ཏརུཎོ’’ཏིཔི ཝདནྟི.

ཏེསུ ཝཱ དྭཱིསུ ཛནེསཱུཏི ནིདྡྷཱརཎེ བྷུམྨཾ. ཡོ ཝཱ ‘‘ཨེཀཾ སམཡ’’ནྟི པུབྦེ ཨདྷིགཏོ ཀཱལོ, ཏསྶ པཊིནིདྡེསོ ཏཏྲཱཏི ཡཉྷི སམཡཾ བྷགཝཱ ཨནྟརཱ རཱཛགཧཉྩ ནཱལ༹ནྡཉྩ ཨདྡྷཱནམགྒཔཊིཔནྣོ, ཏསྨིཾཡེཝ སམཡེ སུཔྤིཡོཔི ཏཾ ཨདྡྷཱནམགྒཾ པཊིཔནྣོ ཨཝཎྞཾ བྷཱསཏི, བྲཧྨདཏྟོ ཙ ཝཎྞཾ བྷཱསཏཱིཏི. ནིཔཱཏམཏྟནྟི ཨེཏྠ མཏྟསདྡེན ཝིསེསཏྠཱབྷཱཝཏོ པདཔཱུརཎཏྟཾ དསྶེཏི. མདྷུཔིཎྜིཀཔརིཡཱཡོཏི མདྷུཔིཎྜིཀདེསནཱ ནཱམ ཨིཏི ནཾ སུཏྟནྟཾ དྷཱརེཧི, རཱཛཉྙཱཏི པཱཡཱསིརཱཛཉྙནཱམཀཾ རཱཛཱནམཱལཔཏི. པརིཡཱཡཏི པརིཝཏྟཏཱིཏི པརིཡཱཡོ, ཝཱརོ. པརིཡཱཡེཏི དེསེཏབྦམཏྠཾ པཊིཔཱདེཏཱིཏི པརིཡཱཡོ, དེསནཱ. པརིཡཱཡཏི ཨཏྟནོ ཕལཾ པཊིགྒཧེཏྭཱ པཝཏྟཏཱིཏི པརིཡཱཡོ, ཀཱརཎཾ. ཨནེཀསདྡེནེཝ ཨནེཀཝིདྷེནཱཏི ཨཏྠོ ཝིཉྙཱཡཏི ཨདྷིཔྤཱཡམཏྟེནཱཏི ¶ ཨཱཧ ‘‘ཨནེཀཝིདྷེནཱ’’ཏི. ཀཱརཎཉྩེཏྠ ཀཱརཎཔཏིརཱུཔཀམེཝ, ན ཨེཀཾསཀཱརཎཾ ཨཝཎྞཀཱརཎསྶ ཨབྷཱུཏཏྟཱ, ཏསྨཱ ཀཱརཎེནཱཏི ཀཱརཎཔཏིརཱུཔཀེནཱཏི ཨཏྠོ. ཏཐཱ ཧི ཝཀྑཏི ‘‘ཨཀཱརཎམེཝ ‘ཀཱརཎ’ནྟི ཝཏྭཱ’’ཏི (དཱི. ནི. ཨཊྛ. ༡.༡). ཛཱཏིཝསེནིདཾ བཧྭཏྠེ ཨེཀཝཙནནྟི དསྶེཏི ‘‘བཧཱུཧཱི’’ཏིཨཱདིནཱ.

‘‘ཨཝཎྞཝིརཧིཏསྶ ¶ ཨསམཱནཝཎྞསམནྣཱགཏསྶཔཱི’’ཏི ཝཀྑམཱནཀཱརཎསྶ ཨཀཱརཎབྷཱཝཧེཏུདསྶནཏྠཾ ཝུཏྟཾ, དོསཝིརཧིཏསྶཔི ཨསདིསགུཎསམནྣཱགཏསྶཱཔཱིཏི ཨཏྠོ. བུདྡྷསྶ བྷགཝཏོ ཨཝཎྞཾ དོསཾ ནིནྡནྟི སམྦནྡྷོ. ‘‘ཡཾ ལོཀེ’’ཏིཨཱདིནཱ ཨརསརཱུཔནིབྦྷོགཨཀིརིཡཝཱདཨུཙྪེདཝཱདཛེགུཙྪཱིཝེནཡིཀཏཔསྶཱིཨཔགབྦྷབྷཱཝཱནཾ ཀཱརཎཔཏིརཱུཔཀཾ དསྶེཏི. ཏསྨཱཏི ཧི ཨེཏཾ ‘‘ཨརསརཱུཔོ…པེ… ཨཔགབྦྷོ’’ཏི ཨིམེཧི པདེཧི སམྦནྡྷིཏབྦཾ. ཨིདཾ ཝུཏྟཾ ཧོཏི – ལོཀསམྨཏོ ཨབྷིཝཱདནཔཙྩུཊྛཱནཨཉྫལཱིཀམྨསཱམཱིཙིཀམྨཨཱསནཱབྷིནིམནྟནསངྑཱཏོ སཱམགྒཱིརསོ སམཎསྶ གོཏམསྶ ནཏྠི, ཏསྨཱ སོ སཱམགྒཱིརསསངྑཱཏེན རསེན ཨསམྤནྣསབྷཱཝོ, ཏེན སཱམགྒཱིརསསངྑཱཏེན པརིབྷོགེན ཨསམནྣཱགཏོ. ཏསྶ ཨཀཏྟབྦཏཱཝཱདོ, ཨུཙྪིཛྫིཏབྦཏཱཝཱདོ ཙ, ཏཾ སབྦཾ གཱུཐཾ ཝིཡ མཎྜནཛཱཏིཡོ པུརིསོ ཛེགུཙྪཱི. ཏསྶ ཝིནཱསཀོ སོཝ ཏདཀརཎཏོ ཝིནེཏབྦོ. ཏདཀརཎེན ཝཡོཝུཌྜྷེ ཏཱཔེཏི ཏདཱཙཱརཝིརཧིཏཏཱཡ ཝཱ ཀཔཎཔུརིསོ. ཏདཀརཎེན དེཝལོཀགབྦྷཏོ ཨཔགཏོ, ཏདཀརཎཏོ ཝཱ སོ ཧཱིནགབྦྷོ ཙཱཏི ཨེཝཾ ཏདེཝ ཨབྷིཝཱདནཱདིཨཀརཎཾ ཨརསརཱུཔཏཱདཱིནཾ ཀཱརཎཔཏིརཱུཔཀཾ དཊྛབྦཾ. ‘‘ནཏྠི…པེ… ཝིསེསོ’’ཏི ཨེཏསྶ པན ‘‘སུནྡརིཀཱཡ ནཱམ པརིབྦཱཛིཀཱཡ མརཎཱནཝབོདྷོ, སཾསཱརསྶ ཨཱདིཀོཊིཡཱ ཨཔཉྙཱཡནཔཊིཉྙཱ, ཋཔནཱིཡཔུཙྪཱཡ ཨབྱཱཀཏཝཏྠུབྱཱཀརཎ’’ནྟི ཨེཝམཱདཱིནི ཀཱརཎཔཏིརཱུཔཀཱནི ནིདྡྷཱརིཏབྦཱནི, ཏཐཱ ‘‘ཏཀྐཔརིཡཱཧཏཾ སམཎོ…པེ… སཡམྤཊིབྷཱན’’ནྟི ཨེཏསྶ ‘‘ཨནཱཙརིཡཀེན སཱམཾ པཊིཝེདྷེན ཏཏྠ ཏཏྠ ཏཐཱ ཏཐཱ དྷམྨདེསནཱ, ཀཏྠཙི པརེསཾ པཊིཔུཙྪཱཀཐནཾ, མཧཱམོགྒལླཱནཱདཱིཧི ཨཱརོཙིཏནཡེནེཝ བྱཱཀརཎ’’ནྟི ཨེཝམཱདཱིནི, ‘‘སམཎོ…པེ… ན ཨགྒཔུགྒལོ’’ཏི ཨེཏེསཾ པན ‘‘སབྦདྷམྨཱནཾ ཀམེནེཝ ¶ ཨནཝབོདྷོ, ལོཀནྟསྶ ཨཛཱནནཾ, ཨཏྟནཱ ཨིཙྪིཏཏཔཙཱརཱབྷཱཝོ’’ཏི ཨེཝམཱདཱིནི. ཛྷཱནཝིམོཀྑཱདི ཧེཊྛཱ ཝུཏྟནཡེན ཨུཏྟརིམནུསྶདྷམྨོ. ཨརིཡཾ ཝིསུདྡྷཾ, ཨུཏྟམཾ ཝཱ ཉཱཎསངྑཱཏཾ དསྶནཾ, ཨལཾ ཀིལེསཝིདྡྷཾསནསམཏྠཾ ཨརིཡཉཱཎདསྶནཾ ཨེཏྠ, ཨེཏསྶཱཏི ཝཱ ཨལམརིཡཉཱཎདསྶནོ. སྭེཝ ཝིསེསོ ཏཐཱ. ཨརིཡཉཱཎདསྶནམེཝ ཝཱ ཝིསེསཾ ཝུཏྟནཡེན ཨལཾ པརིཡཏྟཾ ཡསྶ, ཡསྨིནྟི ཝཱ ཨལམརིཡཉཱཎདསྶནཝིསེསོ, ཨུཏྟརིམནུསྶདྷམྨོཝ. ཏཀྐཔརིཡཱཧཏནྟི ཀཔྤནཱམཏྟེན སམནྟཏོ ཨཱཧརིཏཾ, ཝིཏཀྐེན ཝཱ པརིགྷཊིཏཾ. ཝཱིམཾསཱནུཙརིཏནྟི ཝཱིམཾསནཱཡ པུནཔྤུནཾ པརིམཛྫིཏཾ. སཡམྤཊིབྷཱནནྟི སཡམེཝ ཨཏྟནོ ཝིབྷཱུཏཾ, ཏཱདིསཾ དྷམྨནྟི སམྦནྡྷོ. ཨཀཱརཎནྟི ཨཡུཏྟཾ ཨནུཔཔཏྟིཾ. ཀཱརཎཔདེ ཙེཏཾ ཝིསེསནཾ. ན ཧི ཨརསརཱུཔཏཱདཡོ དོསཱ བྷགཝཏི སཾཝིཛྫནྟི, དྷམྨསངྒྷེསུ ཙ དུརཀྑཱཏདུཔྤཊིཔནྣཱདཡོ ཨཀཱརཎནྟི ཝཱ ཡུཏྟིཀཱརཎརཧིཏཾ ཨཏྟནཱ པཊིཉྙཱམཏྟཾ. པཀཏིཀམྨཔདཉྩེཏཾ. ཨིམསྨིཉྩ ཨཏྠེ ཀཱརཎཾ ཝཏྭཱཏི ཨེཏྠ ཀཱརཎཾ ཨིཝཱཏི ཨིཝ-སདྡཏྠོ རཱུཔཀནཡེན ཡོཛེཏབྦོ པཏིརཱུཔཀཀཱརཎསྶ ¶ ཨདྷིཔྤེཏཏྟཱ. ཏཐཱ ཏཐཱཏི ཛཱཏིཝུཌྜྷཱནམནབྷིཝཱདནཱདིནཱ ཏེན ཏེན ཨཱཀཱརེན. ཝཎྞསདྡསྶ གུཎཔསཾསཱསུ པཝཏྟནཏོ ཡཐཱཀྐམཾ ‘‘ཨཝཎྞཾ དོསཾ ནིནྡ’’ནྟི ཝུཏྟཾ.

དུརཀྑཱཏོཏི དུཊྛུམཱཀྑཱཏོ, ཏཐཱ དུཔྤཊིཝེདིཏོ. ཝཊྚཏོ ནིཡྻཱཏཱིཏི ནིཡྻཱནཾ, ཏདེཝ ནིཡྻཱནིཀོ, ཏཏོ ཝཱ ནིཡྻཱནཾ ནིསྶརཎཾ, ཏཏྠ ནིཡུཏྟོཏི ནིཡྻཱནིཀོ. ཝཊྚཏོ ཝཱ ནིཡྻཱཏཱིཏི ནིཡྻཱནིཀོ ཡ-ཀཱརསྶ ཀ-ཀཱརཾ, ཨཱི-ཀཱརསྶ ཙ རསྶཾ ཀཏྭཱ. ‘‘ཨནཱིཡ-སདྡོ ཧི བཧུལཱ ཀཏྟུཨབྷིདྷཱཡཀོ’’ཏི སདྡཝིདཱུ ཝདནྟི, ན ནིཡྻཱནིཀོ ཏཐཱ. སཾསཱརདུཀྑསྶ ཨནུཔསམསཾཝཏྟནིཀོ ཝུཏྟནཡེན. པཙྩནཱིཀཔཊིཔདནྟི སམྨཱཔཊིཔཏྟིཡཱ ཝིརུདྡྷཔཊིཔདཾ. ཨནནུལོམཔཊིཔདནྟི སཔྤུརིསཱནཾ ཨནནུལོམཔཊིཔདཾ. ཨདྷམྨཱནུལོམཔཊིཔདནྟི ལོཀུཏྟརདྷམྨསྶ ཨནནུལོམཔཊིཔདཾ. ཀསྨཱ པནེཏྠ ‘‘ཨཝཎྞཾ བྷཱསཏི, ཝཎྞཾ བྷཱསཏཱི’’ཏི ཙ ཝཏྟམཱནཀཱལནིདྡེསོ ཀཏོ, ནནུ སངྒཱིཏིཀཱལཏོ སོ ཨཝཎྞཝཎྞཱནཾ བྷཱསནཀཱལོ ཨཏཱིཏོཏི? སཙྩམེཏཾ, ‘‘ཨདྡྷཱནམགྒཔཊིཔནྣོ ཧོཏཱི’’ཏི ཨེཏྠ ཧོཏི-སདྡོ ཝིཡ ཨཏཱིཏཀཱལཏྠཏྟཱ པན བྷཱསཏི-སདྡསྶ ཨེཝཾ ཝུཏྟནྟི དཊྛབྦཾ. ཨཐ ཝཱ ཡསྨིཾ ཀཱལེ ཏེཧི ཨཝཎྞོ ཝཎྞོ ཙ བྷཱསཱིཡཏི, ཏམཔེཀྑིཏྭཱ ¶ ཨེཝཾ ཝུཏྟཾ, ཨེཝཉྩ ཀཏྭཱ ‘‘ཏཏྲཱ’’ཏི པདསྶ ཀཱལཔཊིནིདྡེསཝིཀཔྤནཾ ཨཊྛཀཐཱཡཾ ཨཝུཏྟམྤི སུཔཔནྣཾ ཧོཏི.

‘‘སུཔྤིཡསྶ པན…པེ… བྷཱསཏཱི’’ཏི པཱལི༹ཡཱ སམྦནྡྷདསྶནཾ ‘‘ཨནྟེཝཱསཱི པནསྶཱ’’ཏིཨཱདིཝཙནཾ. ཨཔརཱམསིཏབྦཾ ཨརིཡཱུཔཝཱདཀམྨཾ, ཏཐཱ ཨནཀྐམིཏབྦཾ. སྭཱཡནྟི སོ ཨཱཙརིཡོ. ཨསིདྷཱརནྟི ཨསིནཱ ཏིཁིཎབྷཱགཾ. ཀཀཙདནྟ པནྟིཡནྟི ཁནྡྷཀཀཙསྶ དནྟསངྑཱཏཱཡ ཝིསམཔནྟིཡཱ. ཧཏྠེན ཝཱ པཱདེན ཝཱ ཡེན ཀེནཙི ཝཱ ཨངྒཔཙྩངྒེན པཧརིཏྭཱ ཀཱིལ༹མཱནོ ཝིཡ. ཨཀྑིཀཎྞཀོསསངྑཱཏཊྛཱནཝསེན ཏཱིཧི པཀཱརེཧི བྷིནྣོ མདོ ཡསྶཱཏི པབྷིནྣམདོ, ཏཾ. ཨཝཎྞཾ བྷཱསམཱནོཏི ཨཝཎྞཾ བྷཱསནཧེཏུ. ཧེཏུཨཏྠོ ཧི ཨཡཾ མཱན-སདྡོ. ན ཨཡོ ཝུཌྜྷི ཨནཡོ. སོཡེཝ བྱསནཾ, ཨཏིརེཀབྱསནནྟི ཨཏྠོ, ཏཾ པཱཔུཎིསྶཏི ཨེཀནྟམཧཱསཱཝཛྫཏྟཱ རཏནཏྟཡོཔཝཱདསྶ. ཏེནེཝཱཧ –

‘‘ཡོ ནིནྡིཡཾ པསཾསཏི,

ཏཾ ཝཱ ནིནྡཏི ཡོ པསཾསིཡོ;

ཝིཙིནཱཏི མུཁེན སོ ཀལིཾ,

ཀལིནཱ ཏེན སུཁཾ ན ཝིནྡཏཱི’’ཏི. (སུ. ནི. ༦༦༣; སཾ ནི. ༡.༡༨༠-༡༨༡; ནེཏྟི. ༩༢);

‘‘ཨམྷཱཀཾ ¶ ཨཱཙརིཡོ’’ཏིཨཱདིནཱ བྲཧྨདཏྟསྶ སཾཝེགུཔྤཏྟིཾ, ཨཏྟནོ ཨཱཙརིཡེ ཙ ཀཱརུཉྙཔྤཝཏྟིཾ དསྶེཏྭཱ ཀིཉྩཱཔི ཨནྟེཝཱསིནཱ ཨཱཙརིཡསྶ ཨནུཀཱུལེན བྷཝིཏབྦཾ, ཨཡཾ པན པཎྜིཏཛཱཏིཀཏྟཱ ན ཨཱིདིསེསུ ཋཱནེསུ ཏམནུཝཏྟཏཱིཏི ཨིདཱནིསྶ ཀམྨསྶཀཏཱཉཱཎཔྤཝཏྟིཾ དསྶེནྟོ ‘‘ཨཱཙརིཡེ ཁོ པནཱ’’ཏིཨཱདིམཱཧ. ཧལཱཧལནྟི ཏངྑཎཉྙེཝ མཱརཎཀཾ ཝིསཾ. ཧནཏཱིཏི ཧི ཧལོ ན-ཀཱརསྶ ལ-ཀཱརཾ ཀཏྭཱ, ཧལཱནམྤི ཝིསེསོ ཧལོ ཧལཱཧལོ མཛ྄ཛྷེདཱིགྷཝསེན, ཨེཏེན ཙ ཨཉྙེ ཨཊྛཝིདྷེ ཝིསེ ནིཝཏྟེཏི. ཝུཏྟཉྩ –

‘‘པུམེ པཎྜེ ཙ ཀཱཀོལ, ཀཱལ༹ཀཱུཊཧལཱཧལཱ;

སརོཏྠིཀོསུངྐིཀེ ཡོ, བྲཧྨཔུཏྟོ པདཱིཔནོ;

དཱརདོ ཝཙྪནཱབྷོ ཙ, ཝིསབྷེདཱ ཨིམེ ནཝཱ’’ཏི.

ཁརོདཀནྟི ¶ ཙཎྜསོཏོདཀཾ. ‘‘ཁཱརོདཀ’’ནྟིཔི པཱཋོ, ཨཏིལོཎཏཱཡ ཏིཏྟོདཀནྟི ཨཏྠོ. ནརཀཔཔཱཏནྟི ཙོརཔཔཱཏཾ. མཱཎཝཀཱཏི ཨཏྟཱནམེཝ ཨོཝདིཏུཾ ཨཱལཔཏི ‘‘སམཡོཔི ཁོ ཏེ བྷདྡཱལི ཨཔྤཊིཝིདྡྷོཨཧོསཱི’’ཏིཨཱདཱིསུ (མ. ནི. ༢.༡༣༥) ཝིཡ. ‘‘ཀམྨསྶཀཱ’’ཏི ཀམྨམེཝ ཨཏྟསནྟཀབྷཱཝཾ ཝཏྭཱ ཏདེཝ ཝིཝརཏི ‘‘ཨཏྟནོ ཀམྨཱནུརཱུཔམེཝ གཏིཾ གཙྪནྟཱི’’ཏིཨཱདིནཱ. ཡོནིསོཏི ཨུཔཱཡེན ཉཱཡེན. ཨུམྨུཛྫིཏྭཱཏི ཨཱཙརིཡོ ཝིཡ ཨཡོནིསོ ཨརིཡཱུཔཝཱདེ ཨནིམྨུཛྫནྟོ ཡོནིསོ ཨརིཡཱུཔཝཱདཏོ ཨུམྨུཛྫིཏྭཱ, ཨུདྡྷཾ ཧུཏྭཱཏི ཨཏྠོ. མདྡམཱནོཏི མདྡནྟོ བྷིནྡནྟོ. ཨེཀཾསཀཱརཎམེཝ ཨིདྷ ཀཱརཎནྟི དསྶེཏུཀཱམེན ‘‘སམྨཱ’’ཏི ཝུཏྟཾ. ‘‘ཡཐཱ ཏ’’ནྟིཨཱདིནཱ ཏསྶ སམཱརདྡྷབྷཱཝཾ དསྶེཏི, ནྟི ཙ ནིཔཱཏམཏྟཾ. ཨིདཾ ཝུཏྟཾ ཧོཏི – ཡཐཱ ཨཉྙོ པཎྜིཏསབྷཱཝོ ཛཱཏི ཨཱཙཱརཝསེན ཀུལཔུཏྟོ ཨནེཀཔརིཡཱཡེན ཏིཎྞཾ རཏནཱནཾ ཝཎྞཾ བྷཱསིཏུམཱརབྷཏི, ཏཐཱ ཨཡམྤི ཨཱརདྡྷོ, ཏཉྩ ཁོ ཨཔི ནཱམཱཡམཱཙརིཡོ ཨེཏྟཀེནཱཔི རཏནཏྟཡཱཝཎྞབྷཱསཏོ ཨོརམེཡྻཱཏི.

སཔྤརཱཛཝཎྞནྟི ཨཧིརཱཛཝཎྞཾ. ཝཎྞཔོཀྑརཏཱཡཱཏི ཝཎྞསུནྡརཏཱཡ, ཝཎྞསརཱིརེན ཝཱ. ཝཱརིཛཾ ཀམལཾ ན པཧརཱམི ན བྷཉྫཱམི, ཨཱརཱ དཱུརཏོཝ ཨུཔསིངྒྷཱམཱིཏི ཨཏྠོ. ཨཐཱཏི ཨེཝཾ སནྟེཔི. གནྡྷཏྠེནོཏི གནྡྷཙོརོ. སཉྙཱུལ༹ྷཱཏི གནྠིཏཱ བནྡྷིཏཱ. གཧཔཏཱིཏི ཨུཔཱལིགཧཔཏིཾ ནཱཊཔུཏྟསྶ ཨཱལཔནཾ. ཨེཏྠ ཙ ཝཎྞིཏབྦོ ‘‘ཨཡམཱིདིསོ’’ཏི པཀཱསེཏབྦོཏི ཝཎྞོ, སཎྛཱནཾ. ཝཎྞཱིཡཏི ཨསངྐརཏོ ཝཝཏྠཱཔཱིཡཏཱིཏི ཝཎྞོ, ཛཱཏི. ཝཎྞེཏི ཝིཀཱརམཱཔཛྫམཱནཾ ཧདཡངྒཏབྷཱཝཾ པཀཱསེཏཱིཏི ཝཎྞོ, རཱུཔཱཡཏནཾ. ཝཎྞཱིཡཏི ཕལམེཏེན ཡཐཱསབྷཱཝཏོ ཝིབྷཱཝཱིཡཏཱིཏི ཝཎྞོ, ཀཱརཎཾ. ཝཎྞཱིཡཏི ཨཔྤམཧནྟཱདིཝསེན པམཱིཡཏཱིཏི ཝཎྞོ, པམཱཎཾ. ཝཎྞཱིཡཏི པསཾསཱིཡཏཱིཏི ཝཎྞོ ¶ , གུཎོ. ཝཎྞནཾ གུཎསཾཀིཏྟནཾ ཝཎྞོ, པསཾསཱ. ཨེཝཾ ཏཏྠ ཏཏྠ ཝཎྞསདྡསྶུཔྤཏྟི ཝེདིཏབྦཱ. ཨཱདིསདྡེན ཛཱཏརཱུཔཔུལི༹ནཀྑརཱདཡོ སངྒཎྷཱཏི. ‘‘ཨིདྷ གུཎོཔི པསཾསཱཔཱི’’ཏི ཝུཏྟམེཝ སམཏྠེཏི ‘‘ཨཡཾ ཀིརཱ’’ཏིཨཱདིནཱ. ཀིརཱཏི ཙེཏྠ ཨནུསྶཝནཏྠེ, པདཔཱུརཎམཏྟེ ཝཱ. གུཎཱུཔསཉྷིཏནྟི གུཎོཔསཉྙུཏཾ. ‘‘གུཎཱུཔསཉྷིཏཾ པསཾས’’ནྟི པན ཝདནྟོ པསཾསཱཡ ཨེཝ གུཎབྷཱསནཾ སིདྡྷཾ ཏསྶཱ ཏདཝིནཱབྷཱཝཏོ, ཏསྨཱ ཨིདམཏྠདྭཡཾ ཡུཛྫཏཱིཏི དསྶེཏི.

ཀཐཾ ¶ བྷཱསཏཱིཏི ཨཱཧ ‘‘ཏཏྠཱ’’ཏིཨཱདི. ཨེཀོ ཙ སོ པུགྒལོ ཙཱཏི ཨེཀཔུགྒལོ. ཀེནཊྛེན ཨེཀཔུགྒལོ? ཨསདིསཊྛེན, གུཎཝིསིཊྛཊྛེན, ཨསམསམཊྛེན ཙ. སོ ཧི པཋམཱབྷིནཱིཧཱརཀཱལེ དསནྣཾ པཱརམཱིནཾ པཊིཔཱཊིཡཱ ཨཱཝཛྫནཾ ཨཱདིཾ ཀཏྭཱ བོདྷིསམྦྷཱརསམྦྷརཎགུཎེཧི ཙེཝ བུདྡྷགུཎེཧི ཙ སེསམཧཱཛནེན ཨསདིསོ. ཡེ ཙསྶ གུཎཱ, ཏེཔི ཨཉྙསཏྟཱནཾ གུཎེཧི ཝིསིཊྛཱ, པུརིམཀཱ ཙ སམྨཱསམྦུདྡྷཱ སབྦསཏྟེཧི ཨསམཱ, ཏེཧི པན ཨཡམེཝེཀོ རཱུཔཀཱཡནཱམཀཱཡེཧི སམོ. ལོཀེཏི སཏྟལོཀེ. ‘‘ཨུཔྤཛྫམཱནོ ཨུཔྤཛྫཏཱི’’ཏི པན ཨིདཾ ཨུབྷཡམྤི ཝིཔྤཀཏཝཙནམེཝ ཨུཔྤཱདཀིརིཡཱཡ ཝཏྟམཱནཀཱལིཀཏྟཱ. ཨུཔྤཛྫམཱནོ བཧུཛནཧིཏཱཡ ཨུཔྤཛྫཏི, ན ཨཉྙེན ཀཱརཎེནཱཏི ཨེཝཾ པནེཏྠ ཨཏྠོ ཝེདིཏབྦོ. ལཀྑཎེ ཧེས མཱན-སདྡོ, ཨེཝརཱུཔཉྩེཏྠ ལཀྑཎཾ ན སཀྐཱ ཨཉྙེན སདྡལཀྑཎེན པཊིབཱཧིཏུཾ. ཨཔིཙ ཨུཔྤཛྫམཱནོ ནཱམ, ཨུཔྤཛྫཏི ནཱམ, ཨུཔྤནྣོ ནཱམཱཏི ཨཡམེཏྠ བྷེདོ ཝེདིཏབྦོ. ཨེས ཧི དཱིཔངྐརཔཱདམཱུལཏོ པཊྛཱཡ ཡཱཝ ཨནཱགཱམིཕལཾ, ཏཱཝ ཨུཔྤཛྫམཱནོ ནཱམ, ཨརཧཏྟམགྒཀྑཎེ ཨུཔྤཛྫཏི ནཱམ, ཨརཧཏྟཕལཀྑཎེ ཨུཔྤནྣོ ནཱམ. བུདྡྷཱནཉྷི སཱཝཀཱནཾ ཝིཡ ན པཊིཔཱཊིཡཱ ཨིདྡྷིཝིདྷཉཱཎཱདཱིནི ཨུཔྤཛྫནྟི, སཧེཝ པན ཨརཧཏྟམགྒེན སཀལོཔི སབྦཉྙུགུཎརཱསི ཨཱགཏོཝ ནཱམ ཧོཏི, ཏསྨཱ ནིབྦཏྟསབྦཀིཙྩཏྟཱ ཨརཧཏྟཕལཀྑཎེ ཨུཔྤནྣོ ནཱམ, ཏདནིབྦཏྟཏྟཱ ཏདཉྙཀྑཎེ ཡཐཱརཧཾ ‘‘ཨུཔྤཛྫམཱནོ ཨུཔྤཛྫཏི’’ ཙྩེཝ ཝུཙྩཏི. ཨིམསྨིམྤི སུཏྟེ ཨརཧཏྟཕལཀྑཎཾཡེཝ སནྡྷཱཡ ‘‘ཨུཔྤཛྫཏཱི’’ཏི ཝུཏྟཾ. ཨཏཱིཏཀཱལིཀསྶཱཔི ཝཏྟམཱནཔཡོགསྶ ཀཏྠཙི དིཊྛཏྟཱ ཨུཔྤནྣོ ཧོཏཱིཏི ཨཡཉྷེཏྠ ཨཏྠོ. ཨེཝཾ སཏི ‘‘ཨུཔྤཛྫམཱནོ’’ཏི ཙེཏྠ མཱན-སདྡོ སཱམཏྠིཡཏྠོ. ཡཱཝཏཱ སཱམཏྠིཡེན མཧཱབོདྷིསཏྟཱནཾ ཙརིམབྷཝེ ཨུཔྤཏྟི ཨིཙྪིཏབྦཱ, ཏཱཝཏཱ སཱམཏྠིཡེན བོདྷིསམྦྷཱརབྷཱུཏེན པརིཔུཎྞེན སམནྣཱགཏོ ཧུཏྭཱཏི ཨཏྠོ. ཏཐཱསཱམཏྠིཡཡོགེན ཧི ཨུཔྤཛྫམཱནོ ནཱམཱཏི. སབྦསཏྟེཧི ཨསམོ, ཨསམེཧི པུརིམབུདྡྷེཧེཝ སམོ མཛ྄ཛྷེ བྷིནྣསུཝཎྞ ནིཀྑཾ ཝིཡ ནིབྦིསིཊྛོ, ‘‘ཨེཀཔུགྒལོ’’ཏི ཙེཏསྶ ཝིསེསནཾ. ཨཱལཡསངྑཱཏཾ ཏཎྷཾ སམུགྒྷཱཏེཏི སམུཙྪིནྡཏཱིཏི ཨཱལཡསམུགྒྷཱཏོ. ཝཊྚཾ ཨུཔཙྪིནྡཏཱིཏི ཝཊྚུཔཙྪེདོ.

པཧོནྟེནཱཏི ¶ སཀྐོནྟེན. ‘‘པཉྩནིཀཱཡེ’’ཏི ཝཏྭཱཔི ཨནེཀཱཝཡཝཏྟཱ ཏེསཾ ན ཨེཏྟཀེན སབྦཐཱ པརིཡཱདཱནནྟི ‘‘ནཝངྒཾ སཏྠུསཱསནཾ ཙཏུརཱསཱིཏི ¶ དྷམྨཀྑནྡྷསཧསྶཱནཱི’’ཏི ཝུཏྟཾ. ཨཏིཏྠེནཱཏི ཨནོཏརཎཊྛཱནེན. ན ཝཏྟབྦོ ཨཔརིམཱཎཝཎྞཏྟཱ བུདྡྷཱདཱིནཾ, ནིརཝསེསཱནཉྩ ཏེསཾ ཨིདྷ པཀཱསནེན པཱལི༹སཾཝཎྞནཱཡ ཨེཝ སམྤཛྫནཏོ, ཙིཏྟསམྤཧཾསནཀམྨཊྛཱནསམྤཛྫནཝསེན ཙ སཕལཏྟཱ. ཐཱམོ ཝེདིཏབྦོ སབྦཐཱམེན པཀཱསིཏཏྟཱ. ཀིཾ པན སོ ཏཐཱ ཨོགཱཧེཏྭཱ བྷཱསཏཱིཏི ཨཱཧ. ‘‘བྲཧྨདཏྟོ པནཱ’’ཏིཨཱདི. ཨནུཀྐམེན པུནཔྤུནཾ ཝཱ སཝནཾ ཨནུསྶཝོ, པརམྤརསཝནཾ. ཨཱདི-སདྡེན ཨཱཀཱརཔརིཝིཏཀྐདིཊྛིནིཛ྄ཛྷཱནཀྑནྟིཡོ སངྒཎྷཱཏི. ཏཏྠ ‘‘སུནྡརམིདཾ ཀཱརཎ’’ནྟི ཨེཝཾ སཡམེཝ ཀཱརཎཔརིཝིཏཀྐནཾ ཨཱཀཱརཔརིཝིཏཀྐོ. ཨཏྟནོ དིཊྛིཡཱ ནིཛ྄ཛྷཱཡིཏྭཱ ཁམནཾ རུཙྩནཾ དིཊྛིནིཛ྄ཛྷཱནཀྑནྟཱིཏི ཨཊྛཀཐཱསུ ཝུཏྟཾ, ཏེཧིཡེཝ སམྦནྡྷིཏེནཱཏི ཨཏྠོ. མཏྟ-སདྡོ ཧེཏྠ ཝིསེསནིཝཏྟིཨཏྠོ, ཏེན ཡཐཱཝུཏྟཾ ཀཱརཎཾ ནིཝཏྟེཏི. ཨཏྟནོ ཐཱམེནཱཏི ཨཏྟནོ ཉཱཎབལེནེཝ, ན པན བུདྡྷཱདཱིནཾ གུཎཱནུརཱུཔནྟི ཨདྷིཔྤཱཡོ. ཨསངྑྱེཡྻཱཔརིམེཡྻཔྤབྷེདཱ ཧི བུདྡྷཱདཱིནཾ གུཎཱ. ཝུཏྟཉྷེཏཾ –

‘‘བུདྡྷོཔི བུདྡྷསྶ བྷཎེཡྻ ཝཎྞཾ,

ཀཔྤམྤི ཙེ ཨཉྙམབྷཱསམཱནོ;

ཁཱིཡེཐ ཀཔྤོ ཙིརདཱིགྷམནྟརེ,

ཝཎྞོ ན ཁཱིཡེཐ ཏཐཱགཏསྶཱ’’ཏི. (དཱི. ནི. ཨཊྛ. ༡.༣༠༤; ༣.༡༤༡; མ. ནི. ཨཊྛ. ༢.༤༢༥; ཨུདཱ. ཨཊྛ. ༥༣; བུ. ཝཾ. ཨཊྛ. ༤.༡; ཨཔ. ཨཊྛ. ༢.༩༡; ཙརིཡཱ. ཨཊྛ. ༩, ༣༢༩);

ཨིདྷཱཔི ཝཀྑཏི ‘‘ཨཔྤམཏྟཀཾ ཁོ པནེཏ’’ནྟིཨཱདི.

ཨིཏི-སདྡོ ནིདསྶནཏྠོ ཝུཏྟཔྤཀཱརཾ ནིདསྶེཏི. ཧ-ཀཱརོ ནིཔཱཏམཏྟནྟི ཨཱཧ ‘‘ཨེཝཾ ཏེ’’ཏི. ཨཉྙམཉྙསྶཱ’’ཏི ཨིདཾ རུལ༹ྷིཔདཾ ‘‘ཨེཀོ ཨེཀཱཡཱ’’ཏི (པཱརཱ. ༤༤༤, ༤༥༢) པདཾ ཝིཡཱཏི དསྶེནྟོ ‘‘ཨཉྙོཨཉྙསྶཱ’’ཏི རུལ༹ྷིཔདེནེཝ ཝིཝརཏི. ‘‘ཨུཛུམེཝཱ’’ཏི སཱཝདྷཱརཎསམཱསཏཾ ཝཏྭཱ ཏེན ནིཝཏྟེཏབྦཏྠཾ ཨཱཧ ‘‘ཨཱིསཀམྤི ཨཔརིཧརིཏྭཱ’’ཏི, ཐོཀཏརམྤི ཨཝིརཛ྄ཛྷིཏྭཱཏི ཨཏྠོ. ཀཐནྟི ཨཱཧ ‘‘ཨཱཙརིཡེན ཧཱི’’ཏིཨཱདི. པུབྦེ ཨེཀཝཱརམིཝ ཨཝཎྞཝཎྞབྷཱསནེ ནིདྡིཊྛེཔི ‘‘ཨུཛུཝིཔཙྩནཱིཀཝཱདཱ’’ཏི (དཱི. ནི. ༡.༡) ཝུཏྟཏྟཱ ཨནེཀཝཱརམེཝ ¶ ཏེ ཨེཝཾ བྷཱསནྟཱིཏི ཝེདིཏབྦནྟི དསྶེཏུཾ ‘‘པུན ཨིཏརོ ཨཝཎྞཾ ཨིཏརོ ཝཎྞ’’ནྟི ཝུཏྟཾ. ཏེན ཧི ཝིསདྡསྶ ཝིཝིདྷཏྠཏཾ སམཏྠེཏི. སཱརཕལཀེཏི སཱརདཱརུཕལཀེ ¶ , ཨུཏྟམཕལཀེ ཝཱ. ཝིསརུཀྑཨཱཎིནྟི ཝིསདཱརུམཡཔཊཱཎིཾ. ཨིརིཡཱཔཐཱནུབནྡྷནེན ཨནུབནྡྷཱ ཧོནྟི, ན སམྨཱཔཊིཔཏྟིཨནུབནྡྷནེན.

སཱིསཱནུལོཀིནོཏི སཱིསེན ཨནུལོཀིནོ, སཱིསཾ ཨུཀྑིཔིཏྭཱ མགྒཱནུཀྐམེན ཨོལོཀཡམཱནཱཏི ཨཏྠོ. ཏསྨིཾ ཀཱལེཏི ཡམྷི སཾཝཙྪརེ, ཨུཏུམྷི, མཱསེ, པཀྑེ ཝཱ བྷགཝཱ ཏཾ ཨདྡྷཱནམགྒཾ པཊིཔནྣོ, ཏསྨིཾ ཀཱལེ. ཏེན ཧི ཨནིཡམཏོ སཾཝཙྪརཨུཏུམཱསཌྜྷམཱསཱཝ ནིདྡིསིཏཱ ‘‘ཏཾ དིཝས’’ནྟི དིཝསསྶ ཝིསུཾ ནིདྡིཊྛཏྟཱ, མུཧུཏྟཱདཱིནཉྩ དིཝསཔརིཡཱཔནྣཏོ. ‘‘ཏཾ ཨདྡྷཱནཾ པཊིཔནྣོ’’ཏི ཙེཏྠ ཨཱདྷཱརཝཙནམེཏཾ. ཏེནེཝ ཧི ཀིརིཡཱཝིཙྪེདདསྶནཝསེན ‘‘རཱཛགཧེ པིཎྜཱཡ ཙརཏཱི’’ཏི སཧ པུབྦཀཱལཀིརིཡཱཧི ཝཏྟམཱནནིདྡེསོ ཀཏོ, ཨིཏརཐཱ ཏསྨིཾ ཀཱལེ རཱཛགཧེ པིཎྜཱཡ ཙརཏི, ཏཾ ཨདྡྷཱནམགྒཉྩ པཊིཔནྣོཏི ཨནདྷིཔྤེཏཏྠོ ཨཱཔཛྫེཡྻ. ན ཧི ཨསམཱནཝིསཡཱ ཀིརིཡཱ ཨེཀཱདྷཱརཱ སམྦྷཝནྟི, ཡཱ ཙེཏྠ ཨདྷིཔྤེཏཱ ཨདྡྷཱནཔཊིཔཛྫནཀིརིཡཱ, སཱ ཙ ཨནིཡམིཏཱ ན ཡུཏྟཱཏི. རཱཛགཧཔརིཝཏྟཀེསཱུཏི རཱཛགཧཾ པརིཝཏྟེཏྭཱ ཋིཏེསུ. ‘‘ཨཉྙཏརསྨི’’ནྟི ཨིམིནཱ ཏེསུ བྷགཝཏོ ཨནིབདྡྷཝཱསཾ དསྶེཏི. སོཏི ཨེཝཾ རཱཛགཧེ ཝསམཱནོ སོ བྷགཝཱ. པིཎྜཱཡ ཙརཎེནཔི ཧི ཏཏྠ པཊིབདྡྷབྷཱཝཝཙནཏོ སནྣིཝཱསཏྟམེཝ དསྶེཏི. ཡདི པན ‘‘པིཎྜཱཡ ཙརམཱནོ སོ བྷགཝཱ’’ཏི པཙྩཱམསེཡྻ, ཡཐཱཝུཏྟོཝ ཨནདྷིཔྤེཏཏྠོ ཨཱཔཛྫེཡྻཱཏི. ཏཾ དིཝསནྟི ཡཾ དིཝསཾ ཨདྡྷཱནམགྒཾ པཊིཔནྣོ, ཏཾ དིཝས. ཏཾ ཨདྡྷཱནཾ པཊིཔནྣོཏི ཨེཏྠ ཨཙྩནྟསཾཡོགཝཙནམེཏཾ. བྷཏྟབྷུཉྫནཏོ པཙྪཱ པཙྪཱབྷཏྟཾ, ཏསྨིཾ པཙྪཱབྷཏྟསམཡེ. པིཎྜཔཱཏཔཊིཀྐནྟོཏི ཡཏྠ པིཎྜཔཱཏཏྠཱཡ ཙརིཏྭཱ བྷུཉྫནྟི, ཏཏོ ཨཔཀྐནྟོ. ཏཾ ཨདྡྷཱནཾ པཊིཔནྣོཏི ‘‘ནཱལ༹ནྡཱཡཾ ཝེནེཡྻཱནཾ ཝིཝིདྷཧིཏསུཁནིཔྥཏྟིཾ ཨཱཀངྑམཱནོ ཨིམིསྶཱ ཨཊྛུཔྤཏྟིཡཱ ཏིཝིདྷསཱིལཱལངྐཏཾ ནཱནཱཝིདྷཀུཧནལཔནཱདིམིཙྪཱཛཱིཝཝིདྡྷཾསནཾ དྭཱསཊྛིདིཊྛིཛཱལཝིནིཝེཋནཾ དསསཧསྶིལོཀདྷཱཏུཔཀམྤནཾ བྲཧྨཛཱལསུཏྟཾ དེསེསྶཱམཱི’’ཏི ཏཾ ཡཐཱཝུཏྟཾ དཱིགྷམགྒཾ པཊིཔནྣོ, ཨིདཾ པན ཀཱརཎཾ པཀརཎཏོཝ པཱཀཊནྟི ན ཝུཏྟཾ. ཨེཏྟཱཝཏཱ ‘‘ཀསྨཱ པན བྷགཝཱ ཏཾ ཨདྡྷཱནཾ པཊིཔནྣོ’’ཏི ཙོདནཱ ཝིསོདྷིཏཱ ཧོཏི.

ཨིདཱནི ཨིཏརམྤི ཙོདནཾ ཝིསོདྷིཏུཾ ‘‘སུཔྤིཡོཔཱི’’ཏི ཝུཏྟཾ. ཏསྨིཾ ཀཱལེ, ཏཾ དིཝསཾ ཨནུབནྡྷོཏི ཙ ཝུཏྟནཡེན སམྦནྡྷོ. པཱཏོ ¶ ཨསིཏབྦོཏི པཱཏརཱསོ, སོ བྷུཏྟོ ཡེནཱཏི བྷུཏྟཔཱཏརཱསོ. ཨིཙྩེཝཱཏི ཨེཝམེཝ མནསི སནྣིདྷཱཡ, ན པན ‘‘བྷགཝནྟཾ, བྷིཀྑུསངྒྷཉྩ པིཊྛིཏོ ¶ པིཊྛིཏོ ཨནུབནྡྷིསྶཱམཱི’’ཏི. ཏེན ཝུཏྟཾ ‘‘བྷགཝཏོ ཏཾ མགྒཾ པཊིཔནྣབྷཱཝཾ ཨཛཱནནྟོཝཱ’’ཏི, ཏཐཱ ཨཛཱནནྟོ ཨེཝ ཧུཏྭཱ ཨནུབནྡྷོཏི ཨཏྠོ. ན ཧི སོ བྷགཝནྟཾ དཊྛུམེཝ ཨིཙྪཏི, ཏེནཱཧ ‘‘སཙེ པན ཛཱནེཡྻ, ནཱནུབནྡྷེཡྻཱ’’ཏི. ཨེཏྟཱཝཏཱ ‘‘ཀསྨཱ ཙ སུཔྤིཡོ ཨནུབནྡྷོ’’ཏི ཙོདནཱ ཝིསོདྷིཏཱ ཧོཏི. ‘‘སོ’’ཏིཨཱདིནཱ ཨཔརམྤི ཙོདནཾ ཝིསོདྷེཏི. ཀདཱཙི པན བྷགཝཱ ཨཉྙཏརཝེསེནེཝ གཙྪཏི ཨངྒུལིམཱལདམནཔཀྐུསཱཏིཨབྷིགྒམནཱདཱིསུ, ཀདཱཙི བུདྡྷསིརིཡཱ, ཨིདྷཱཔི ཨཱིདིསཱཡ བུདྡྷསིརིཡཱཏི དསྶེཏུཾ ‘‘བུདྡྷསིརིཡཱ སོབྷམཱན’’ནྟིཨཱདི ཝུཏྟཾ. སིརཱིཏི ཙེཏྠ སརཱིརསོབྷགྒཱདིསམྤཏྟི, ཏདེཝ ཨུཔམཱཝསེན དསྶེཏི ‘‘རཏྟཀམྦལཔརིཀྑིཏྟམིཝཱ’’ཏིཨཱདིནཱ. གཙྪཏཱིཏི ཛངྒམོ ཡཐཱ ‘‘ཙངྐམོ’’ཏི. ཙཉྩལམཱནོ གཙྪནྟོ གིརི, ཏཱདིསསྶ ཀནཀགིརིནོ སིཁརམིཝཱཏི ཨཏྠོ.

‘‘ཏསྨིཾ ཀིརཱ’’ཏིཨཱདི ཏབྦིཝརཎཾ, པཱལི༹ཡཾ ཨདསྶིཏཏྟཱ, པོརཱཎཊྛཀཐཱཡཉྩ ཨནཱགཏཏྟཱ ཨནུསྶཝསིདྡྷཱ ཨཡཾ ཀཐཱཏི དསྶེཏུཾ ‘‘ཀིརཱ’’ཏི ཝུཏྟནྟི ཝདནྟི, ཏཐཱ ཝཱ ཧོཏུ ཨཉྙཐཱ ཝཱ, ཨཏྟནཱ ཨདིཊྛཾ, ཨསུཏཾ, ཨམུཏཉྩ ཨནུསྶཝམེཝཱཏི དཊྛབྦཾ. ནཱིལཔཱིཏལོཧིཏོདཱཏམཉྫིཊྛཔབྷསྶརཝསེན ཚབྦཎྞཱ. སམནྟཱཏི སམནྟཏོ དསཧི དིསཱཧི. ཨསཱིཏིཧཏྠཔྤམཱཎེཏི ཏེསཾ རསྨཱིནཾ པཀཏིཡཱ པཝཏྟིཊྛཱནཝསེན ཝུཏྟཾ, ཏསྨཱ སམནྟཏོ, ཨུཔརི ཙ པཙྩེཀཾ ཨསཱིཏིཧཏྠམཏྟེ པདེསེ པཀཏིཡཱཝ གྷནཱིབྷཱུཏཱ རསྨིཡོ ཏིཊྛནྟཱིཏི དཊྛབྦཾ, ཝིནཡཊཱིཀཱཡཾ པན ‘‘ཏཱཡེཝ བྱཱམཔྤབྷཱ ནཱམ. ཡཏོ ཚབྦཎྞཱ རསྨིཡོ ཏལཱ༹ཀཏོ མཱཏིཀཱ ཝིཡ དསསུ དིསཱསུ དྷཱཝནྟི, སཱ ཡསྨཱ བྱཱམམཏྟཱ ཝིཡ ཁཱཡཏི, ཏསྨཱ བྱཱམཔྤབྷཱཏི ཝུཙྩཏཱི’’ཏི ཝུཏྟཾ, (ཝི. ཝི. ཊཱི. ༡.༡༦) སངྒཱིཏིསུཏྟཝཎྞནཱཡཾ པན ཝཀྑཏི ‘‘པུརཏྠིམཀཱཡཏོ སུཝཎྞཝཎྞཱ རསྨི ཨུཊྛཧིཏྭཱ ཨསཱིཏིཧཏྠཾ ཋཱནཾ གཎྷཱཏི. པཙྪིམཀཱཡཏོ. དཀྑིཎཧཏྠཏོ. ཝཱམཧཏྠཏོ སུཝཎྞཝཎྞཱ རསྨི ཨུཊྛཧིཏྭཱ ཨསཱིཏིཧཏྠཾ ཋཱནཾ གཎྷཱཏི. ཨུཔརི ཀེསནྟཏོ པཊྛཱཡ སབྦཀེསཱཝཊྚེཧི མོརགཱིཝཝཎྞཱ རསྨི ཨུཊྛཧིཏྭཱ གགནཏལེ ¶ ཨསཱིཏིཧཏྠཾ ཋཱནཾ གཎྷཱཏི. ཧེཊྛཱ པཱདཏལེཧི པཝཱལ༹ཝཎྞཱ རསྨི ཨུཊྛཧིཏྭཱ གྷནཔཐཝིཡཾ ཨསཱིཏིཧཏྠཾ ཋཱནཾ གཎྷཱཏི. ཨེཝཾ སམནྟཱ ཨསཱིཏིཧཏྠམཏྟཾ ཋཱནཾ ཚབྦཎྞཱ བུདྡྷརསྨིཡོ ཝིཛྫོཏམཱནཱ ཝིཔྥནྡམཱནཱ ཝིདྷཱཝནྟཱི’’ཏི (དཱི. ནི. ཨཊྛ. ༣.༢༩༩) ཀེཙི པན ཨཉྙཐཱཔི པརིཀཔྤནཱམཏྟེན ཝདནྟི, ཏཾ ན གཧེཏབྦཾ ཏཐཱ ཨཉྙཏྠ ཨནཱགཏཏྟཱ, ཨཡུཏྟཏྟཱ ཙ. ཏཱསཾ པན བུདྡྷརསྨཱིནཾ ཏདཱ ཨནིགྒཱུཧིཏབྷཱཝདསྶནཏྠཾ ‘‘ཏསྨིཾ ཀིར སམཡེ’’ཏི ཝུཏྟཾ. པཀྐུསཱཏིཨབྷིགྒམནཱདཱིསུ ཝིཡ ཧི ཏདཱ ཏཱསཾ ནིགྒཱུཧནེ ཀིཉྩི ཀཱརཎཾ ནཏྠི. ཨཱདྷཱཝནྟཱིཏི ཨབྷིམུཁཾ དིསཾ དྷཱཝནྟི. ཝིདྷཱཝནྟཱིཏི ཝིཝིདྷཱ ཧུཏྭཱ ཝིདིསཾ དྷཱཝནྟི.

ཏསྨིཾ ¶ ཝནནྟརེ དིསྶམཱནཱཀཱརེན ཏཱསཾ རསྨཱིནཾ སོབྷཱ ཝིཉྙཱཡཏཱིཏི ཨཱཧ ‘‘རཏནཱཝེལཱ༹’’ཏིཨཱདི. རཏནཱཝེལཱ༹ ནཱམ རཏནམཡཝཊཾསཀཾ མུདྡྷཾ ཨཝཏི རཀྑཏཱིཏི ཧི ཨཝེལཱ༹, ཨཱཝེལཱ༹ ཝཱ, མུདྡྷམཱལཱ. ཨུཀྐཱ ནཱམ ཡཱ སཛོཏིབྷཱུཏཱ, ཏཱསཾ སཏཾ, ནིཔཏནཾ ནིཔཱཏོ, ཏསྶ ནིཔཱཏོ, ཏེན སམཱཀུལཾ ཏཐཱ. པིསིཏབྦཏྟཱ པིཊྛཾ, ཙཱིནདེསེ ཛཱཏཾ པིཊྛཾ ཙཱིནཔིཊྛཾ, རཏྟཙུཎྞཾ, ཡཾ ‘‘སིནྡཱུརོ’’ཏིཔི ཝུཙྩཏི, ཙཱིནཔིཊྛམེཝ ཙུཎྞཾ. ཝཱཡུནོ ཝེགེན ཨིཏོ ཙིཏོ ཙ ཁིཏྟཾ ཏནྟི ཏཐཱ. ཨིནྡསྶ དྷནུ ལོཀསངྐེཏཝསེནཱཏི ཨིནྡདྷནུ, སཱུརིཡརསྨིཝསེན གགནེ པཉྙཱཡམཱནཱཀཱརཝིསེསོ. ཀུཊིལཾ ཨཙིརཊྛཱཡིཏྟཱ ཝིརཱུཔཾ ཧུཏྭཱ ཛཝཏི དྷཱཝཏཱིཏི ཝིཛྫུ, སཱཡེཝ ལཏཱ ཏཾསདིསབྷཱཝེནཱཏི ཏཐཱ, ཝཱཡུཝེགཏོ ཝལཱཧཀགྷཊྚནེནེཝ ཛཱཏརསྨི. ཏཱཡཏི ཨཝིཛཧནཝསེན ཨཱཀཱསཾ པཱལེཏཱིཏི ཏཱརཱ, གཎསདྡོ པཙྩེཀཾ ཡོཛེཏབྦོ. ཏསྶ པབྷཱ ཏཐཱ. ཝིཔྥུརིཏཝིཙྪརིཏམིཝཱཏི ཨཱབྷཱཡ ཝིཝིདྷཾ ཕརམཱནཾ, ཝིཛྫོཏཡམཱནཾ ཝིཡ ཙ. ཝནསྶ ཨནྟརཾ ཝིཝརཾ ཝནནྟརཾ, བྷགཝཏཱ པཏྟཔཏྟཝནཔྤདེསནྟི ཝུཏྟཾ ཧོཏི.

ཨསཱིཏིཡཱ ཨནུབྱཉྫནེཧི ཏམྦནཁཏཱདཱིཧི ཨནུརཉྫིཏཾ ཏཐཱ. ཀམལཾ པདུམཔུཎྜརཱིཀཱནི, ཨཝསེསཾ ནཱིལརཏྟསེཏབྷེདཾ སརོརུཧཾ ཨུཔྤལཾ, ཨིཏི པཉྩཝིདྷཱ པངྐཛཛཱཏི པརིགྒཧིཏཱ ཧོཏི. ཝིཀསིཏཾ ཕུལླིཏཾ ཏདུབྷཡཾ ཡསྶ སརསྶ ཏཐཱ. སབྦེན པཀཱརེན པརིཏོ སམནྟཏོ ཕུལླཏི ཝིཀསཏཱིཏི སབྦཔཱལིཕུལླཾ ཨ-ཀཱརསྶ ཨཱ-ཀཱརཾ, ར-ཀཱརསྶ ཙ ལ-ཀཱརཾ ཀཏྭཱ ཡཐཱ ‘‘པཱལིབྷདྡོ’’ཏི, ཏཱརཱནཾ མརཱིཙི པབྷཱ, ཏཱཡ ཝིཀསིཏཾ ཝིཛྫོཏིཏཾ ¶ ཏཐཱ. བྱཱམཔྤབྷཱཡ པརིཀྑེཔོ པརིམཎྜལོ, ཏེན ཝིལཱསིནཱི སོབྷིནཱི ཏཐཱ. མཧཱཔུརིསལཀྑཎཱནི ཨཉྙམཉྙཔཊིབདྡྷཏྟཱ མཱལཱཀཱརེནེཝ ཋིཏཱནཱིཏི ཝུཏྟཾ ‘‘དྭཏྟིཾསཝརལཀྑཎམཱལཱ’’ཏི. དྭཏྟིཾསཙནྡཱདཱིནཾ མཱལཱ ཀེནཙི གནྠེཏྭཱ པཊིཔཱཊིཡཱ ཙ ཋཔིཏཱཏི ན ཝཏྟབྦཱ ‘‘ཡདི སིཡཱ’’ཏི པརིཀཔྤནཱམཏྟེན ཧི ‘‘གནྠེཏྭཱ ཋཔིཏདྭཏྟིཾསཙནྡམཱལཱཡཱ’’ཏིཨཱདི ཝུཏྟཾ. པརིཀཔྤོཔམཱ ཧེསཱ, ལོཀེཔི ཙ དིསྶཏི.

‘‘མཡེཝ མུཁསོབྷཱསྶེ, ཏྱལམིནྡུཝིཀཏྠནཱ;

ཡཏོམྦུཛེཔི སཱཏྠཱིཏི, པརིཀཔྤོཔམཱ ཨཡ’’ནྟི.

དྭཏྟིཾསཙནྡམཱལཱཡ སིརིཾ ཨཏྟནོ སིརིཡཱ ཨབྷིབྷཝནྟཱི ཨིཝཱཏི སམྦནྡྷོ. ཨེས ནཡོ སེསེསུཔི.

ཨེཝཾ བྷགཝཏོ ཏདཱ སོབྷཾ དསྶེཏྭཱ ཨིདཱནི བྷིཀྑུསངྒྷསྶཱཔི སོབྷཾ དསྶེནྟོ ‘‘ཏཉྩ པནཱ’’ཏིཨཱདིམཱཧ ¶ . ཙཏུབྦིདྷཱཡ ཨཔྤིཙྪཏཱཡ ཨཔྤིཙྪཱ. དྭཱདསཧི སནྟོསེཧི སནྟུཊྛཱ. ཏིཝིདྷེན ཝིཝེཀེན པཝིཝིཏྟཱ. རཱཛརཱཛམཧཱམཏྟཱདཱིཧི ཨསཾསཊྛཱ. དུཔྤཊིཔཏྟིཀཱནཾ ཙོདཀཱ. པཱཔེ ཨཀུསལེ གརཧིནོ པརེསཾ ཧིཏཔཊིཔཏྟིཡཱ ཝཏྟཱརོ. པརེསཉྩ ཝཙནཀྑམཱ. ཝིམུཏྟིཉཱཎདསྶནཾ ནཱམ པཙྩཝེཀྑཎཉཱཎཾ. ‘‘ཏེས’’ནྟིཨཱདིནཱ ཏདབྷིསམྦནྡྷེན བྷགཝཏོ སོབྷཾ དསྶེཏི. རཏྟཔདུམཱནཾ སཎྜོ སམཱུཧོ ཝནཾ, ཏསྶ མཛ྄ཛྷེ གཏཱ ཏཐཱ. ‘‘རཏྟཾ པདུམཾ, སེཏཾ པུཎྜརཱིཀ’’ནྟི པཏྟནིཡམམནྟརེན ཏཐཱ ཝུཏྟཾ, པཏྟནིཡམེན པན སཏཔཏྟཾ པདུམཾ, ཨཱུནཀསཏཔཏྟཾ པུཎྜརཱིཀཾ. པཝཱལ༹ཾ ཝིདྡུམོ, ཏེན ཀཏཱཡ ཝེདིཀཱཡ པརིཀྑིཏྟོ ཝིཡ. མིགཔཀྑཱིནམྤཱིཏི པི-སདྡོ, ཨཔི-སདྡོ ཝཱ སམྦྷཱཝནཱཡཾ, ཏེནཱཧ ‘‘པགེཝ དེཝམནུསྶཱན’’ནྟི. མཧཱཐེརཱཏི མཧཱསཱཝཀེ སནྡྷཱཡཱཧ. སུརཉྫིཏབྷཱཝེན ཨཱིསཀཾ ཀཎྷཝཎྞཏཱཡ མེགྷཝཎྞཾ. ཨེཀཾསཾ ཀརིཏྭཱཏི ཨེཀཾསཔཱརུཔནཝསེན ཝཱམཾསེ ཀརིཏྭཱ. ཀཏྟརསྶ ཛིཎྞསྶ ཨཱལམྦནོ དཎྜོ ཀཏྟརདཎྜོ, བཱཧུལླཝསེནཱཡཾ སམཉྙཱ. སུཝམྨཾ ནཱམ སོབྷཎུརཙྪདོ, ཏེན ཝམྨིཏཱ སནྣདྡྷཱཏི སུཝམྨཝམྨིཏཱ, ཨིདཾ ཏེསཾ པཾསུཀཱུལདྷཱརཎནིདསྶནཾ. ཡེསཾ ཀུཙྪིགཏཾ སབྦམྤི ཏིཎཔལཱསཱདི གནྡྷཛཱཏམེཝ ཧོཏི, ཏེ གནྡྷཧཏྠིནོ ནཱམ, ཡེ ‘‘ཧེམཝཏཱ’’ཏིཔི ཝུཙྩནྟི, ཏེསམྤི ཐེརཱནཾ སཱིལཱདིགུཎགནྡྷཏཱཡ ཏཾསདིསཏཱ. ཨནྟོཛཊཱབཧིཛཊཱསངྑཱཏཱཡ ¶ ཏཎྷཱཛཊཱཡ ཝིཛཊིཏབྷཱཝཏོ ཝིཛཊིཏཛཊཱ. ཏཎྷཱབནྡྷནཱཡ ཚིནྣཏྟཱ ཚིནྣབནྡྷནཱ. ‘‘སོ’’ཏིཨཱདི ཡཐཱཝུཏྟཝཙནསྶ གུཎདསྶནཾ. ཨནུབུདྡྷེཧཱིཏི བུདྡྷཱནམནུབུདྡྷེཧི. ཏེཔི ཧི ཨེཀདེསེན བྷགཝཏཱ པཊིཝིདྡྷཔཊིབྷཱགེནེཝ ཙཏྟཱརི སཙྩཱནི བུཛ྄ཛྷནྟི. པཏྟཔརིཝཱརིཏནྟི པུཔྥདལེན པརིཝཱརིཏཾ. ཀཾ ཝུཙྩཏི ཀམལཱདི, ཏསྨིཾ སརཏི ཝིརཱཛཏཱིཏི ཀེསརཾ, ཀིཉྫཀྑོ. ཀཎྞེ ཀརཱིཡཏཱིཏི ཀཎྞིཀཱ. ཀཎྞཱལངྐཱརོ, ཏཾསདིསཎྛཱནཏཱཡ ཀཎྞིཀཱ, བཱིཛཀོསོ. ཚནྣཾ ཧཾསཀུལཱནཾ སེཊྛོ དྷཏརཊྛོ ཧཾསརཱཛཱ ཝིཡ, ཧཱརིཏོ ནཱམ མཧཱབྲཧྨཱ ཝིཡ.

ཨེཝཾ གཙྪནྟཾ བྷགཝནྟཾ, བྷིཀྑཱུ ཙ དིསྭཱ ཨཏྟནོ པརིསཾ ཨོལོཀེསཱིཏི སམྦནྡྷོ. ཀཱཛདཎྜཀེཏི ཀཱཛསངྑཱཏེ བྷཱརཱཝཧདཎྜཀེ, ཀཱཛསྨིཾ ཝཱ བྷཱརལགྒིཏདཎྜཀེ. ཁུདྡཀཾ པཱིཋཾ པཱིཋཀཾ. མཱུལེ, ཨགྒེ ཙ ཏིདྷཱ ཀཏོ དཎྜོ ཏིདཎྜོ. མོརཧཏྠཀོ མོརཔིཉྪཾ. ཁུདྡཀཾ པསིབྦཾ པསིབྦཀཾ. ཀུཎྜིཀཱ ཀམཎྜལུ. སཱ ཧི ཀཾ ཨུདཀཾ ཨུདེཏི པསཝེཏི, རཀྑཏཱིཏི ཝཱ ཀུཎྜིཀཱ ནིརུཏྟིནཡེན. གཧིཏཾ ཨོམཀཏོ ལུཛྫིཏཾ, ཝིཝིདྷཾ ལུཛྫིཏཉྩ པཱིཋཀ…པེ… ཀུཎྜིཀཱདིཨནེཀཔརིཀྑཱརསངྑཱཏཾ བྷཱརཾ བྷརཏི ཝཧཏཱིཏི གཧིཏ…པེ… བྷཱརབྷརིཏཱ. ཨིཏཱིཏི ནིདསྶནཏྠོ. ཨེཝནྟི ཨིདམཏྠོ. ཨེཝཾ ཨིདཾ ཝཙནམཱདི ཡསྶ ཝཙནསྶ ཏཐཱ, ཏདེཝ ནིརཏྠཀཾ ཝཙནཾ ཡསྶཱཏི ཨེཝམཱདིནིརཏྠཀཝཙནཱ. མུཁཾ ཨེཏསྶ ཨཏྠཱིཏི མུཁརཱ, སབྦེཔི མུཁཝནྟཱ ཨེཝ, ཨཡཾ པན ཕརུསཱབྷིལཱཔམུཁཝཏཱི, ཏསྨཱ ཨེཝཾ ཝུཏྟཾ. ནིནྡཱཡཉྷི ཨཡཾ རཔཙྩཡོ. མུཁེན ¶ ཝཱ ཨམནཱཔཾ ཀམྨཾ རཱཏི གཎྷཱཏཱིཏི མུཁརཱ. ཝིཝིདྷཱ ཀིཎྞཱ ཝཱཙཱ ཡསྶཱཏི ཝིཀིཎྞཝཱཙཱ. ཏསྶཱཏི སུཔྤིཡསྶ པརིབྦཱཛཀསྶ. ནྟི ཡཐཱཝུཏྟཔྤཀཱརཾ པརིསཾ.

ཨིདཱནཱིཏི ཏསྶ ཏཐཱརཱུཔཱཡ པརིསཱཡ དསྶནཀྑཎེ. པནཱཏི ཨརུཙིསཾསཱུཙནཏྠོ, ཏཐཱཔཱིཏི ཨཏྠོ. ལཱབྷ…པེ… ཧཱནིཡཱ ཙེཝ ཧེཏུབྷཱུཏཱཡ. ཀཐཾ ཧཱནཱིཏི ཨཱཧ ‘‘ཨཉྙཏིཏྠིཡཱནཉྷཱི’’ཏིཨཱདི. ནིསྶིརཱིཀཏནྟི ནིསོབྷཏཾ, ཨཡམཏྠོ མོརཛཱཏཀཱདཱིཧིཔི དཱིཔེཏབྦོ. ‘‘ཨུཔཏིསྶཀོལིཏཱནཉྩཱ’’ཏིཨཱདིནཱ པཀྑཧཱནིཏཱཡ ཝིཏྠཱརོ. ཨཱཡསྨཏོ སཱརིཔུཏྟསྶ, མཧཱམོགྒལླཱནསྶ ཙ བྷགཝཏོ སནྟིཀེ པབྦཛྫཾ སནྡྷཱཡ ‘‘ཏེསུ པན པཀྐནྟེསཱུ’’ཏི ཝུཏྟཾ. ཏེསཾ པབྦཛིཏཀཱལེཡེཝ ཨཌྜྷཏེཡྻསཏཾ པརིབྦཱཛཀཔརིསཱ པབྦཛི, ཏཏོ པརམྤི ¶ ཏདནུཔབྦཛིཏཱ པརིབྦཱཛཀཔརིསཱ ཨཔརིམཱཎཱཏི དསྶེཏི ‘‘སཱཔི ཏེསཾ པརིསཱ བྷིནྣཱ’’ཏི ཨིམིནཱ. ཡཱཡ ཀཱཡཙི ཧི པརིབྦཱཛཀཔརིསཱཡ པབྦཛིཏཱཡ ཏསྶ པརིསཱ བྷིནྣཱཡེཝ ནཱམ སམཱནགཎཏྟཱཏི ཏཐཱ ཝུཏྟཾ. ‘‘ཨིམེཧཱི’’ཏིཨཱདིནཱ ལཱབྷཔཀྑཧཱནིཾ ནིགམནཝསེན དསྶེཏི. ཨུསཱུཡསངྑཱཏསྶ ཝིསསྶ ཨུགྒཱརོ ཨུགྒིལནཾ ཨུསཱུཡཝིསུགྒཱརོ, ཏཾ. ཨེཏྠ ཙ ‘‘ཡསྨཱ པནེསཱ’’ཏིཨཱདིནཱཝ ‘‘ཀསྨཱ ཙ སོ རཏནཏྟཡསྶ ཨཝཎྞཾ བྷཱསཏཱི’’ཏི ཙོདནཾ ཝིསོདྷེཏི, ‘‘སཙེ’’ཏིཨཱདིཀཾ པན སབྦམྤི ཏཔྤརིཝཱརཝཙནམེཝཱཏི ཏེཧིཔི སཱ ཝིསོདྷིཏཱཡེཝ ནཱམ. བྷགཝཏོ ཝིརོདྷཱནུནཡཱབྷཱཝཝཱིམཾསནཏྠཾ ཨེཏེ ཨཝཎྞཾ ཝཎྞཾ བྷཱསནྟི. ‘‘མཱརེན ཨནྭཱཝིཊྛཱ ཨེཝཾ བྷཱསནྟཱི’’ཏི ཙ ཀེཙི ཝདནྟི, ཏདཡུཏྟམེཝ ཨཊྛཀཐཱཡ ཨུཛུཝིཔཙྩནཱིཀཏྟཱ. པཱཀཊོཡེཝཱཡམཏྠོཏི.

༢. ཡསྨཱ ཨཏྠངྒཏོ སཱུརིཡོ, ཏསྨཱ ཨཀཱལོ དཱནི གནྟུནྟི སམྦནྡྷོ.

ཨམྦལཊྛིཀཱཏི སཱམཱིཔིཀཝོཧཱརོ ཡཐཱ ‘‘ཝརུཎནགརཾ, གོདཱགཱམོ’’ཏི ཨཱཧ ‘‘ཏསྶ ཀིརཱ’’ཏིཨཱདི. ཏརུཎཔརིཡཱཡོ ལཊྛིཀཱ-སདྡོ རུཀྑཝིསཡེ ཡཐཱ ‘‘མཧཱཝནཾ ཨཛ྄ཛྷོགཱཧེཏྭཱ བེལུཝལཊྛིཀཱཡ མཱུལེ དིཝཱཝིཧཱརཾ ནིསཱིདཱི’’ཏིཨཱདཱིསཱུཏི དསྶེཏི’’ ‘‘ཏརུཎམྦརུཀྑོ’’ཏི ཨིམིནཱ. ཀེཙི པན ‘‘ཨམྦལཊྛིཀཱ ནཱམ ཝུཏྟནཡེན ཨེཀོ གཱམོ’’ཏི ཝདནྟི, ཏེསཾ མཏེ ཨམྦལཊྛིཀཱཡནྟི སམཱིཔཏྠེ བྷུམྨཝཙནཾ. ཚཱཡཱུདཀསམྤནྣནྟི ཚཱཡཱཡ ཙེཝ ཨུདཀེན ཙ སམྤནྣཾ. མཉྫུསཱཏི པེལཱ༹. པཊིབྷཱནཙིཏྟཝིཙིཏྟནྟི ཨིཏྠིཔུརིསསཉྙོགཱདིནཱ པཊིབྷཱནཙིཏྟེན ཝིཙིཏྟཾ, ཨེཏེན རཉྙོ ཨགཱརཾ, ཏདེཝ རཱཛཱགཱརཀནྟི དསྶེཏི. རཱཛཱགཱརཀཾ ནཱམ ཝེསྶཝཎམཧཱརཱཛསྶ དེཝཱཡཏནནྟི ཨེཀེ.

བཧུཔརིསྶཡོཏི ¶ བཧུཔདྡཝོ. ཀེཧཱིཏི ཝུཏྟཾ ‘‘ཙོརེ’ཧིཔཱི’’ཏིཨཱདི. ཧནྡཱཏི ཝཙནཝོསྶགྒཏྠེ ནིཔཱཏོ, ཏདཱནུབྷཱཝཏོ ནིཔྤརིསྶཡཏྠཱཡ ཨིདཱནི ཨུཔགནྟྭཱ སྭེ གམིསྶཱམཱིཏི ཨདྷིཔྤཱཡོ. ‘‘སདྡྷིཾ ཨནྟེཝཱསིནཱ བྲཧྨདཏྟེན མཱཎཝེནཱ’’ ཏིཙྩེཝ སཱིཧལ༹ཊྛཀཐཱཡཾ ཝུཏྟཾ, ཏཉྩ ཁོ པཱལི༹ཨཱརུལ༹ྷཝསེནེཝ, ན པན ཏདཱ སུཔྤིཡསྶ པརིསཱཡ ཨབྷཱཝཏོཏི ཨིམམཏྠཾ དསྶེཏུཾ ‘‘སདྡྷིཾ ཨཏྟནོ པརིསཱཡཱ’’ཏི ཨིདྷ ཝུཏྟཾ. ཀསྨཱ པནེཏྠ བྲཧྨདཏྟོཡེཝ པཱལི༹ཡམཱརུལ༹ྷོ, ན པན ཏདཝསེསཱ སུཔྤིཡསྶ པརིསཱཏི ¶ ? དེསནཱནདྷཱིནབྷཱཝེན པཡོཛནཱབྷཱཝཏོ. ཡཐཱ ཙེཏཾ, ཨེཝཾ ཨཉྙམྤི ཨེདིསཾ པཡོཛནཱབྷཱཝཏོ སངྒཱིཏིཀཱརཀེཧི ན སངྒཱིཏནྟི དཊྛབྦཾ. ཀེཙི པན ‘‘པཱལི༹ཡཾ ཝུཏྟ’’ནྟི ཨཱདྷཱརཾ ཝཏྭཱ ‘ཏདེཏཾ ན སཱིཧལ༹ཊྛཀཐཱནཡདསྶནཾ, པཱལི༹ཡཾ ཝུཏྟབྷཱཝདསྶནམེཝཱ’ཏི’’ ཝདནྟི, ཏཾ ན ཡུཛྫཏི. པཱལི༹ཨཱརུལ༹ྷཝསེནེཝ པཱལི༹ཡཾ ཝུཏྟནྟི ཨདྷིཔྤེཏཏྠསྶ ཨཱཔཛྫནཏོ. ཏསྨཱ ཡཐཱཝུཏྟནཡེནེཝ ཨཏྠོ གཧེཏབྦོཏི. ‘‘ཝུཏྟནྟི ཝཱ ཨམྷེཧིཔི ཨིདྷ ཝཏྟབྦནྟི ཨཏྠོ. ཨེཝཉྷི ཏདཱ ཨཉྙཱཡཔི པརིསཱཡ ཝིཛྫམཱནབྷཱཝདསྶནཏྠཾ ཨེཝཾ ཝུཏྟཾ, པཱལི༹ཡམཱརུལ༹ྷཝསེན པན ཨཉྙཐཱཔི ཨིདྷ ཝཏྟབྦནྟི ཨདྷིཔྤཱཡོ ཡུཏྟོ’’ཏི ཝདནྟི.

ཨིདཱནི ‘‘ཏཏྲཱཔི སུད’’ནྟིཨཱདིཔཱལི༹ཡཱ སམྦནྡྷཾ དསྶེཏུཾ ‘‘ཨེཝཾ ཝཱསཾ ཨུཔགཏོ པནཱ’’ཏིཨཱདི ཝུཏྟཾ. པརིཝཱརེཏྭཱ ནིསིནྣོ ཧོཏཱིཏི སམྦནྡྷོ. ཀུཙྪིཏཾ ཀཏྟབྦནྟི ཀུཀཏཾ, ཏསྶ བྷཱཝོ ཀུཀྐུཙྩཾ, ཀུཙྪིཏཀིརིཡཱ, ཨིཏོ ཙིཏོ ཙ ཙཉྩལནནྟི ཨཏྠོ, ཧཏྠསྶ ཀུཀྐུཙྩཾ ཏཐཱ. ‘‘སཱ ཧཱི’’ཏིཨཱདིནཱ ཏཐཱབྷཱུཏཏཱཡ ཀཱརཎཾ དསྶེཏི. ནིཝཱཏེཏི ཝཱཏཝིརཧིཏཊྛཱནེ. ཡཐཱཝུཏྟདོསཱབྷཱཝེན ནིཙྩལཱ. ཏཾ ཝིབྷཱུཏིནྟི ཏཱདིསཾ སོབྷཾ. ཝིཔྤལཔནྟཱིཏི སཏིཝོསྶགྒཝསེན ཝིཝིདྷཱ ལཔནྟི. ནིལླཱལིཏཛིཝ྄ཧཱཏི ཨིཏོ ཙིཏོ ཙ ནིཀྑནྟཛིཝ྄ཧཱ. ཀཱཀཙྪམཱནཱཏི ཀཱཀཱནཾ སདྡསདིསཾ སདྡཾ ཀུརུམཱནཱ. གྷརུགྷརུཔསྶཱསིནོཏི གྷརུགྷརུཨིཏི སདྡཾ ཛནེཏྭཱ པསྶསནྟཱ. ཨིསྶཱཝསེནཱཏི ཡཐཱཝུཏྟེཧི དྭཱིཧི ཀཱརཎེཧི ཨུསཱུཡནཝསེན. ‘‘སབྦཾ ཝཏྟབྦ’’ནྟི ཨིམིནཱ ‘‘ཨཱདིཔེཡྻཱལནཡོཡ’’ནྟི དསྶེཏི.

༣. སམྨཱ པཧོནྟི ཏཾ ཏཾ ཀམྨནྟི སམྤཧུལཱ, བཧཝོ, ཏེནཱཧ ‘‘བཧུཀཱན’’ནྟི. སབྦནྟིམེན པརིཙྪེདེན ཙཏུཝགྒསངྒྷེནེཝ ཝིནཡཀམྨསྶ ཀཏྟབྦཏྟཱ ‘‘ཝིནཡཔརིཡཱཡེནཱ’’ཏིཨཱདི ཝུཏྟཾ. ཏཡོ ཛནཱཏི ཙེས ཨུཔལཀྑཎནིདྡེསོ དྭིནྣམྤི སམྤཧུལཏྟཱ. ཏཏྠ ཏཏྠ ཏཐཱཡེཝཱགཏཏྟཱ ‘‘སུཏྟནྟཔརིཡཱཡེནཱ’’ཏིཨཱདིམཱཧ. ཏཾ ཏཾ པཱལི༹ཡཱ ཨཱགཏཝོཧཱརཝསེན ཧི ཨཡཾ བྷེདོ. ཏཡོ ཛནཱ ཏཡོ ཨེཝ ནཱམ, ཏཏོ པཊྛཱཡ ཨུཏྟརི ཙཏུཔཉྩཛནཱདིཀཱ སམྤཧུལཱཏི ཨཏྠོ. ཏཏོཏི ཙཱཡཾ མརིཡཱདཱཝདྷི. མཎྜལམཱལོ༹ཏི ཨནེཀཏྠཔཝཏྟཱ སམཉྙཱ, ཨིདྷ པན ཨཱིདིསཱཡ ཨེཝཱཏི ནིཡམེནྟོ ¶ ཨཱཧ ‘‘ཀཏྠཙཱི’’ཏིཨཱདི. ཀཎྞིཀཱ ཝུཙྩཏི ཀཱུཊཾ. ཧཾསཝཊྚཀཙྪནྣེནཱཏི ཧཾསམཎྜལཱཀཱརཚནྣེན. ཏདེཝ ཚནྣཾ ཨཉྙཏྠ ¶ ‘‘སུཔཎྞཝངྐཙྪདན’’ནྟི ཝུཏྟཾ. ཀཱུཊེན ཡུཏྟོ ཨགཱརོ, སོཡེཝ སཱལཱཏི ཀཱུཊཱགཱརསཱལཱ. ཐམྦྷཔནྟིཾ པརིཀྑིཔིཏྭཱཏི ཐམྦྷམཱལཾ པརིཝཱརེཏྭཱ, པརིམཎྜལཱཀཱརེན ཐམྦྷཔནྟིཾ ཀཏྭཱཏི ཝུཏྟཾ ཧོཏི. ཨུཔཊྛཱནསཱལཱ ནཱམ པཡིརུཔཱསནསཱལཱ. ཡཏྠ ཨུཔཊྛཱནམཏྟཾ ཀརོནྟི, ན ཨེཀརཏྟདིརཏྟཱདིཝསེན ནིསཱིདནཾ, ཨིདྷ པན ཏཐཱ ཀཏཱ ནིསཱིདནསཱལཱཡེཝཱཏི དསྶེཏི ‘‘ཨིདྷ པནཱ’’ཏིཨཱདིནཱ. ཏེནེཝ པཱལི༹ཡཾ ‘‘སནྣིཔཏིཏཱན’’ ནྟྭེཝ ཨཝཏྭཱ ‘‘སནྣིསིནྣཱན’’ནྟིཔི ཝུཏྟཾ. མཱནིཏབྦོཏི མཱལོ༹, མཱིཡཏི པམཱིཡཏཱིཏི ཝཱ མཱལོ༹. མཎྜལཱཀཱརེན པཊིཙྪནྣོ མཱལོ༹ཏི མཎྜལམཱལོ༹, ཨནེཀཀོཎཝནྟོ པཊིསྶཡཝིསེསོ. ‘‘སནྣིསིནྣཱན’’ནྟི ནིསཛྫནཝསེན ཝུཏྟཾ, ནིསཛྫནཝསེན ཝཱ ‘‘སནྣིསིནྣཱན’’ནྟི སཾཝཎྞེཏབྦཔདམཛ྄ཛྷཱཧརིཏྭཱ སམྦནྡྷོ. ཨིམིནཱ ནིསཱིདནཨིརིཡཱཔཐཾ, ཀཱཡསཱམགྒཱིཝསེན ཙ སམོདྷཱནཾ སནྡྷཱཡ པདདྭཡམེཏཾ ཝུཏྟནྟི དསྶེཏི. སངྑིཡཱ ཝུཙྩཏི ཀཐཱ སམྨཱ ཁིཡནཏོ ཀཐནཏོ. ཀཐཱདྷམྨོཏི ཀཐཱསབྷཱཝོ, ཨུཔཔརིཀྑཱ ཝིདྷཱིཏི ཀེཙི.

‘‘ཨཙྪརིཡ’’ནྟིཨཱདི ཏསྶ རཱུཔདསྶནནྟི ཨཱཧ ‘‘ཀཏམོ པན སོ’’ཏིཨཱདི. སོཏི ཀཐཱདྷམྨོ. ‘‘ནཱིཡཏཱིཏི ནཡོ, ཨཏྠོ, སདྡསཏྠཾ ཨནུགཏོ ནཡོ སདྡནཡོ’’ཏི (དཱི. ནི. ཊཱི. ༡.༣) ཨཱཙརིཡདྷམྨཔཱལཏྠེརེན ཝུཏྟཾ. ནཱིཡཏི ཨཏྠོ ཨེཏེནཱཏི ཝཱ ནཡོ, ཨུཔཱཡོ, སདྡསཏྠེ ཨཱགཏོ ནཡོ ཨཏྠགཧཎཱུཔཱཡོ སདྡནཡོ. ཏཏྠ ཧི ཨནབྷིཎྷཝུཏྟིཀེ ཨཙྪརིཡ-སདྡོ ཨིཙྪིཏོ རུལ༹ྷིཝསེན. ཏེནེཝཱཧ ‘‘ཨནྡྷསྶ པབྦཏཱརོཧཎཾ ཝིཡཱ’’ཏིཨཱདི. ཏསྶ ཧི ཏདཱརོཧཎཾ ན ནིཙྩཾ, ཀདཱཙིཡེཝ སིཡཱ, ཨེཝམིདམྤི. ཨཙྪརཱཡོགྒཾ ཨཙྪརིཡཾ ནིརུཏྟིནཡེན ཡོགྒསདྡསྶ ལོཔཏོ, ཏདྡྷིཏཝསེན ཝཱ ཎིཡཔཙྩཡསྶ ཝིཙིཏྲཝུཏྟིཏོ, སོ པན པོརཱཎཊྛཀཐཱཡམེཝ ཨཱགཏཏྟཱ ‘‘ཨཊྛཀཐཱནཡོ’’ཏི ཝུཏྟོ. པུབྦེ ཨབྷཱུཏནྟི ཨབྷཱུཏཔུབྦཾ, ཨེཏེན ན བྷཱུཏཾ ཨབྷཱུཏནྟི ནིབྦཙནཾ, བྷཱུཏ-སདྡསྶ ཙ ཨཏཱིཏཏྠཾ དསྶེཏི. ཡཱཝཉྩིདནྟི སནྡྷིཝསེན ནིགྒཧིཏཱགམོཏི ཨཱཧ ‘‘ཡཱཝ ཙ ཨིད’’ནྟི, ཨེཏསྶ ཙ ‘‘སུཔྤཊིཝིདིཏཱ’’ཏི ཨེཏེན སམྦནྡྷོ. ཡཱཝ ཙཡཏྟཀཾ ཨིདཾ ཨཡཾ ནཱནཱདྷིམུཏྟིཀཏཱ སུཔྤཊིཝིདིཏཱ, ཏཾ ‘‘ཨེཏྟཀམེཝཱ’’ཏི ན སཀྐཱ ཨམྷེཧི པཊིཝིཛ྄ཛྷིཏུཾ, ཨཀྑཱཏུཉྩཱཏི སཔཱཋསེསཏྠོ. ཏེནེཝཱཧ ‘‘ཏེན སུཔྤཊིཝིདིཏཏཱཡ ཨཔྤམེཡྻཏཾ དསྶེཏཱི’’ཏི.

‘‘བྷགཝཏཱ’’ཏིཨཱདཱིཧི ¶ པདེཧི སམཱནཱདྷིཀརཎབྷཱཝེན ཝུཏྟཏྟཱ ཏེནཱཏི ཨེཏྠ ཏ-སདྡོ སཀཏྠཔཊིནིདྡེསོ, ཏསྨཱ ཡེན ཨབྷིསམྦུདྡྷབྷཱཝེན བྷགཝཱ པཀཏོ སམཱནོ སུཔཱཀཊོ ནཱམ ཧོཏི, ཏདབྷིསམྦུདྡྷབྷཱཝཾ སདྡྷིཾ ཨཱགམནཔཊིཔདཱཡ ཏསྶ ཨཏྠབྷཱཝེན དསྶེནྟོ ‘‘ཡོ སོ’’ཏིཨཱདིམཱཧ ¶ . ན ཧེཏྠ སོ པུབྦེ ཝུཏྟོ ཨཏྠི, ཡོ ཨཏྠོ ཏེཧི ཐེརེཧི ཏ-སདྡེན པརཱམསིཏབྦོ བྷཝེཡྻ. ཏསྨཱ ཡཐཱཝུཏྟགུཎསངྑཱཏཾ སཀཏྠཾཡེཝེས པདྷཱནབྷཱཝེན པརཱམསཏཱིཏི དཊྛབྦཾ. ཨནུཏྟརཾ སམྨཱསམྦོདྷིནྟི ཨགྒམགྒཉཱཎཔདཊྛཱནཾ ཨནཱཝརཎཉཱཎཾ, ཨནཱཝརཎཉཱཎཔདཊྛཱནཉྩ ཨགྒམགྒཉཱཎཾ. ཏདུབྷཡཉྷི སམྨཱ ཨཝིཔརཱིཏཾ སཡམེཝ བུཛ྄ཛྷཏི, སམྨཱ ཝཱ པསཊྛཱ སུནྡརཾ བུཛ྄ཛྷཏཱིཏི སམྨཱསམྦོདྷི. སཱ པན བུདྡྷཱནཾ སབྦགུཎསམྤཏྟིཾ དེཏི ཨབྷིསེཀོ ཝིཡ རཉྙོ སབྦལོཀིསྶརིཡབྷཱཝཾ, ཏསྨཱ ‘‘ཨནུཏྟརཱ སམྨཱསམྦོདྷཱི’’ཏི ཝུཙྩཏི. ཨབྷིསམྦུདྡྷོཏི ཨབྦྷཉྙཱསི པཊིཝིཛ྄ཛྷི, ཏེན ཏཱདིསེན བྷགཝཏཱཏི ཨཏྠོ. སཏིཔི ཉཱཎདསྶནཱནཾ ཨིདྷ པཉྙཱཝེཝཙནབྷཱཝེ ཏེན ཏེན ཝིསེསེན ནེསཾ ཝིསཡཝིསེསཔྤཝཏྟིཾ དསྶེནྟོ ‘‘ཏེསཾ ཏེསཾ སཏྟཱན’’ནྟིཨཱདིམཱཧ. ཨེཏྠ ཧི པཋམམཏྠཾ ཨསཱདྷཱརཎཉཱཎཝསེན དསྶེཏི. ཨཱསཡཱནུསཡཉཱཎེན ཛཱནཏཱ སབྦཉྙུཏཱནཱཝརཎཉཱཎེཧི པསྶཏཱཏི ཨཏྠོ.

དུཏིཡཾ ཝིཛྫཏྟཡཝསེན. པུབྦེནིཝཱསཱདཱིཧཱིཏི པུབྦེནིཝཱསཱསཝཀྑཡཉཱཎེཧི. ཏཏིཡཾ ཨབྷིཉྙཱནཱཝརཎཉཱཎཝསེན. ཨབྷིཉྙཱཔརིཡཱཔནྣེཔི ‘‘ཏཱིཧི ཝིཛྫཱཧཱི’’ཏི ཏཱསཾ རཱསིབྷེདདསྶནཏྠཾ ཝུཏྟཾ. ཨནཱཝརཎཉཱཎསངྑཱཏེན སམནྟཙཀྑུནཱ པསྶཏཱཏི ཨཏྠོ. ཙཏུཏྠཾ སབྦཉྙུཏཉྙཱཎམཾསཙཀྑུཝསེན. པཉྙཱཡཱཏི སབྦཉྙུཏཉྙཱཎེན. ཀུཊྚསྶ བྷིཏྟིཡཱ ཏིརོ པརཾ, ཨནྟོ ཝཱ, ཏདཱདཱིསུ གཏཱནི. ཨཏིཝིསུདྡྷེནཱཏི ཨཏིཝིཡ ཝིསུདྡྷེན པཉྩཝཎྞསམནྣཱགཏེན སུནཱིལཔཱསཱདིཀཨཀྑིལོམསམལངྐཏེན རཏྟིཉྩེཝ དིཝཱ ཙ སམནྟཱ ཡོཛནཾ པསྶནྟེན མཾསཙཀྑུནཱ. པཉྩམཾ པཊིཝེདྷདེསནཱཉཱཎཝསེན. ‘‘ཨཏྟཧིཏསཱདྷིཀཱཡཱ’’ཏི ཨེཀཾསཏོ ཝུཏྟཾ, པརིཡཱཡཏོ པནེསཱ པརཧིཏསཱདྷིཀཱཔི ཧོཏི. ཏཱཡ ཧི དྷམྨསབྷཱཝཔཊིཙྪཱདཀཀིལེསསམུགྒྷཱཏཱཡ དེསནཱཉཱཎཱདི སམྦྷཝཏི. པཊིཝེདྷཔཉྙཱཡཱཏི ཨརིཡམགྒཔཉྙཱཡ. ཝིཔསྶནཱསཧགཏོ སམཱདྷི པདཊྛཱནཾ ¶ ཨཱསནྣཀཱརཎམེཏིསྶཱཏི སམཱདྷིཔདཊྛཱནཱ, ཏཱཡ. དེསནཱཔཉྙཱཡཱཏི དེསནཱཀིཙྩནིཔྥཱདཀེན སབྦཉྙུཏཉྙཱཎེན. ཨརཱིནནྟི ཀིལེསཱརཱིནཾ, པཉྩམཱརཱནཾ ཝཱ, སཱསནཔཙྩཏྠིཀཱནཾ ཝཱ ཨཉྙཏིཏྠིཡཱནཾ. ཏེསཾ ཧནནཾ པཱཊིཧཱརིཡེཧི ཨབྷིབྷཝནཾ ཨཔྤཊིབྷཱནཏཱཀརཎཾ, ཨཛ྄ཛྷུཔེཀྑནཉྩ མཛ྄ཛྷིམཔཎྞཱསཀེ པཉྩམཝགྒེ སངྒཱིཏཾ ཙངྐཱིསུཏྟཉྩེཏྠ (མ. ནི. ༢.༤༢༢) ནིདསྶནཾ, ཨེཏེན ཨརཡོ ཧཏཱ ཨནེནཱཏི ནིརུཏྟིནཡེན པདསིདྡྷིམཱཧ. ཨཏོ ནཱཝཙནསྶ ཏཱབྱཔྤདེསོ མཧཱཝིསཡེནཱཏི དཊྛབྦཾ. ཨཔིཙ ཨརཡོ ཧནཏཱིཏི ཨནྟསདྡེན པདསིདྡྷི, ཨིཀཱརསྶ ཙ ཨཀཱརོ. པཙྩཡཱདཱིནཾ སམྤདཱནབྷཱུཏཱནཾ, ཏེསཾ ཝཱ པཊིགྒཧཎཾ, པཊིགྒཧིཏུཾ ཝཱ ཨརཧཏཱིཏི ཨརཧནྟི དསྶེཏི ‘‘པཙྩཡཱདཱིནཉྩ ཨརཧཏྟཱ’’ཏི ཨིམིནཱ. སམྨཱཏི ཨཝིཔརཱིཏཾ. སཱམཉྩཱཏི སཡམེཝ, ཨཔརནེཡྻོ ཧུཏྭཱཏི ཝུཏྟཾ ཧོཏི. ཀཐཾ པནེཏྠ ‘‘སབྦདྷམྨཱན’’ནྟི ཨཡཾ ཝིསེསོ ལབྦྷཏཱིཏི? སཱམཉྙཛོཏནཱཡ ¶ ཝིསེསེ ཨཝཊྛཱནཏོ, ཝིསེསཏྠིནཱ ཙ ཝིསེསསྶ ཨནུཔཡོཛེཏབྦཏོ ཡཛྫེཝཾ ‘‘དྷམྨཱན’’ནྟི ཝིསེསོཝཱནུཔཡོཛིཏོ སིཡཱ, ཀསྨཱ སབྦདྷམྨཱནནྟི ཨཡམཏྠོ ཨནུཔཡོཛཱིཡཏཱིཏི? ཨེཀདེསསྶ ཨགྒཧཎཏོ. པདེསགྒཧཎེ ཧི ཨསཏི གཧེཏབྦསྶ ནིཔྤདེསཏཱ ཝིཉྙཱཡཏི ཡཐཱ ‘‘དིཀྑིཏོ ན དདཱཏཱི’’ཏི, ཨེས ནཡོ ཨཱིདིསེསུ.

ཨིདཱནི ཙ ཙཏཱུཧི པདེཧི ཙཏུཝེསཱརཛྫཝསེན ཨཏྟནཱ ཨདྷིཔྤེཏཏརཾ ཚཊྛམཏྠཾ དསྶེཏུཾ ‘‘ཨནྟརཱཡིཀདྷམྨེ ཝཱ’’ཏིཨཱདི ཝུཏྟཾ. ཏཐཱ ཧི ཏདེཝ ནིགམནཾ ཀརོཏི ‘‘ཨེཝ’’ནྟིཨཱདིནཱ. ཏཏྠ ཨནྟརཱཡཀརདྷམྨཉཱཎེན ཛཱནཏཱ, ནིཡྻཱནིཀདྷམྨཉཱཎེན པསྶཏཱ, ཨཱསཝཀྑཡཉཱཎེན ཨརཧཏཱ, སབྦཉྙུཏཉྙཱཎེན སམྨཱསམྦུདྡྷེནཨཱཏི ཡཐཱཀྐམཾ ཡོཛེཏབྦཾ. ཨནཏྠཙརཎེན ཀིལེསཱ ཨེཝ ཨརཡོཏི ཀིལེསཱརཡོ, ཏེསཾ ཀིལེསཱརཱིནཾ. ཨེཏྠཱཧ – ཡསྶ ཉཱཎསྶ ཝསེན སམྨཱ སཱམཉྩ སབྦདྷམྨཱནཾ བུདྡྷཏྟཱ བྷགཝཱ སམྨཱསམྦུདྡྷོ ནཱམ ཛཱཏོ, ཀིཾ པནིདཾ ཉཱཎཾ སབྦདྷམྨཱནཾ བུཛ྄ཛྷནཝསེན པཝཏྟམཱནཾ སཀིཾཡེཝ སབྦསྨིཾ ཝིསཡེ པཝཏྟཏི, ཨུདཱཧུ ཀམེནཱཏི. ཀིཉྩེཏྠ – ཡདི ཏཱཝ སཀིཾཡེཝ སབྦསྨིཾ ཝིསཡེ པཝཏྟཏི, ཨེཝཾ སཏི ཨཏཱིཏཱནཱགཏཔཙྩུཔྤནྣཨཛ྄ཛྷཏྟབཧིདྡྷཱདིབྷེདབྷིནྣཱནཾ སངྑཏདྷམྨཱནཾ, ཨསངྑཏསམྨུཏིདྷམྨཱནཉྩ ཨེཀཛ྄ཛྷཾ ཨུཔཊྛཱནེ དཱུརཏོ ཙིཏྟཔཊཾ པེཀྑནྟསྶ ཝིཡ པཊིབྷཱགེནཱཝབོདྷོ ན སིཡཱ, ཏཐཱ ཙ སཏི ‘‘སབྦེ དྷམྨཱ ཨནཏྟཱ’’ཏི ¶ (ཨ. ནི. ༣.༡༣༧; དྷ. པ. ༢༧༩; མཧཱནི. ༢༧; ཙཱུལ༹ནི. ༨, ༡༠; ནེཏྟི. ༥) ཝིཔསྶནྟཱནཾ ཨནཏྟཱཀཱརེན ཝིཡ སབྦེ དྷམྨཱ ཨནིརཱུཔིཏརཱུཔེན བྷགཝཏོ ཉཱཎཝིསཡཱ ཧོནྟཱིཏི ཨཱཔཛྫཏི. ཡེཔི ‘‘སབྦཉེཡྻདྷམྨཱནཾ ཋིཏིལཀྑཎཝིསཡཾ ཝིཀཔྤརཧིཏཾ སབྦཀཱལཾ བུདྡྷཱནཾ ཉཱཎཾ པཝཏྟཏི, ཏེན ཏེ ‘སབྦཝིདཱུ’ཏི ཝུཙྩནྟི. ཨེཝཉྩ ཀཏྭཱ –

‘གཙྪཾ སམཱཧིཏོ ནཱགོ, ཋིཏོ ནཱགོ སམཱཧིཏོ;

སེཡྻཾ སམཱཧིཏོ ནཱགོ, ནིསིནྣོཔི སམཱཧིཏོ’ཏི. (ཨ. ནི. ༦.༤༣); –

ཨིདམྤི སབྦདཱ ཉཱཎཔྤཝཏྟིདཱིཔཀཾ ཨངྒུཏྟརཱགམེ ནཱགོཔམསུཏྟཝཙནཾ སུཝུཏྟཾ ནཱམ ཧོཏཱི’’ཏི ཝདནྟི, ཏེསམྤི ཝཱདེ ཝུཏྟདོསཱ ནཱཏིཝཏྟི. ཋིཏིལཀྑཎཱརམྨཎཏཱཡ ཙ ཨཏཱིཏཱནཱགཏདྷམྨཱནཾ ཏདབྷཱཝཏོ ཨེཀདེསཝིསཡམེཝ བྷགཝཏོ ཉཱཎཾ སིཡཱ, ཏསྨཱ སཀིཉྙེཝ སབྦསྨིཾ ཝིསཡེ ཉཱཎཾ པཝཏྟཏཱིཏི ན ཡུཛྫཏི. ཨཐ ཀམེན སབྦསྨིམྤི ཝིསཡེ ཉཱཎཾ པཝཏྟཏི, ཨེཝམྤི ན ཡུཛྫཏི. ན ཧི ཛཱཏིབྷཱུམིསབྷཱཝཱདིཝསེན, དིསཱདེསཀཱལཱདིཝསེན ཙ ཨནེཀབྷེདབྷིནྣེ ཉེཡྻེ ཀམེན ¶ གཡ྄ཧམཱནེ ཏསྶ ཨནཝསེསཔཊིཝེདྷོ སམྦྷཝཏི ཨཔརིཡནྟབྷཱཝཏོ ཉེཡྻསྶ. ཡེ པན ‘‘ཨཏྠསྶ ཨཝིསཾཝཱདནཏོ ཉེཡྻསྶ ཨེཀདེསཾ པཙྩཀྑཾ ཀཏྭཱ སེསེཔི ཨེཝནྟི ཨདྷིམུཙྩིཏྭཱ ཝཝཏྠཱཔནེན སབྦཉྙཱུ ནཱམ བྷགཝཱ ཛཱཏོ, ཏཉྩ ཉཱཎཾ ན ཨནུམཱནིཀཾ ནཱམ སཾསཡཱབྷཱཝཏོ. སཾསཡཱནུབདྡྷཉྷི ཉཱཎཾ ལོཀེ ཨནུམཱནིཀ’’ནྟི ཝདནྟི, ཏེསམྤི ཏཾ ན ཡུཏྟམེཝ. སབྦསྶ ཧི ཨཔྤཙྩཀྑབྷཱཝེ ཨཏྠཱཝིསཾཝཱདནེན ཉེཡྻསྶ ཨེཀདེསཾ པཙྩཀྑཾ ཀཏྭཱ སེསེཔི ཨེཝནྟི ཨདྷིམུཙྩིཏྭཱ ཝཝཏྠཱཔནསྶེཝ ཨསམྦྷཝཏོ ཏཐཱ ཨསཀྐུཎེཡྻཏྟཱ ཙ. ཡཉྷི སེསཾ, ཏདཔཙྩཀྑམེཝ, ཨཐ ཏམྤི པཙྩཀྑཾ, ཏསྶ སེསབྷཱཝོ ཨེཝ ན སིཡཱ, ཨཔརིཡནྟབྷཱཝཏོ ཉེཡྻསྶ ཏཐཱཝཝཏྠིཏུམེཝ ན སཀྐཱཏི? སབྦམེཏཾ ཨཀཱརཎཾ. ཀསྨཱ? ཨཝིསཡཝིཙཱརཎབྷཱཝཏོ. ཝུཏྟཉྷེཏཾ བྷགཝཏཱ ‘‘བུདྡྷཱནཾ བྷིཀྑཝེ, བུདྡྷཝིསཡོ ཨཙིནྟེཡྻོ ན ཙིནྟེཏབྦོ, ཡཾ ཙིནྟེནྟོ ཨུམྨཱདསྶ ཝིགྷཱཏསྶ བྷཱགཱི ཨསྶཱ’’ཏི (ཨ. ནི. ༤.༧༧) ཨིདཾ པནེཏྠ སནྣིཊྛཱནཾ – ཡཾ ཀིཉྩི བྷགཝཏཱ ཉཱཏུཾ ཨིཙྪིཏཾ, སཀལམེཀདེསོ ཝཱ, ཏཏྠ ཏཏྠ ཨཔྤཊིཧཏཝུཏྟིཏཱཡ པཙྩཀྑཏོ ཉཱཎཾ པཝཏྟཏི ནིཙྩསམཱདྷཱནཉྩ ཝིཀྑེཔཱབྷཱཝཏོ, ཉཱཏུཾ ཨིཙྪིཏསྶ ཙ སཀལསྶ ཨཝིསཡབྷཱཝེ ཏསྶ ཨཱཀངྑཱཔཊིབདྡྷཝུཏྟིཏཱ ན སིཡཱ, ཨེཀནྟེནེཝ ¶ སཱ ཨིཙྪིཏབྦཱ, སབྦེ དྷམྨཱ བུདྡྷསྶ བྷགཝཏོ ཨཱཝཛྫནཔཊིབདྡྷཱ ཨཱཀངྑཱཔཊིབདྡྷཱ མནསིཀཱརཔཊིབདྡྷཱ ཙིཏྟུཔྤཱདཔཊིབདྡྷཱཏི (མཧཱནི. ༦༩, ༡༥༦; ཙཱུལ༹ནི. ༨༥; པཊི. མ. ༣.༥) ཝཙནཏོ. ཨཏཱིཏཱནཱགཏཝིསཡམྤི བྷགཝཏོ ཉཱཎཾ ཨནུམཱནཱགམཏཀྐགཧཎཝིརཧིཏཏྟཱ པཙྩཀྑམེཝ.

ནནུ ཙ ཨེཏསྨིམྤི པཀྑེ ཡདཱ སཀལཾ ཉཱཏུཾ ཨིཙྪིཏཾ, ཏདཱ སཀིཾཡེཝ སཀལཝིསཡཏཱཡ ཨནིརཱུཔིཏརཱུཔེན བྷགཝཏོ ཉཱཎཾ པཝཏྟེཡྻཱཏི ཝུཏྟདོསཱ ནཱཏིཝཏྟིཡེཝཱཏི? ན, ཏསྶ ཝིསོདྷིཏཏྟཱ. ཝིསོདྷིཏོ ཧི སོ བུདྡྷཝིསཡོ ཨཙིནྟེཡྻོཏི. ཨཉྙཐཱ པཙུརཛནཉཱཎསམཱནཝུཏྟིཏཱཡ བུདྡྷཱནཾ བྷགཝནྟཱནཾ ཉཱཎསྶ ཨཙིནྟེཡྻཏཱ ན སིཡཱ, ཏསྨཱ སཀལདྷམྨཱརམྨཎམྤི ཏཾ ཨེཀདྷམྨཱརམྨཎཾ ཝིཡ སུཝཝཏྠཱཔིཏེཡེཝ ཏེ དྷམྨེ ཀཏྭཱ པཝཏྟཏཱིཏི ཨིདམེཏྠ ཨཙིནྟེཡྻཾ, ‘‘ཡཱཝཏཀཾ ནེཡྻཾ, ཏཱཝཏཀཾ ཉཱཎཾ. ཡཱཝཏཀཾ ཉཱཎཾ, ཏཱཝཏཀཾ ནེཡྻཾ. ནེཡྻཔརིཡནྟིཀཾ ཉཱཎཾ, ཉཱཎཔརིཡནྟིཀཾ ནེཡྻཾ. ནེཡྻཾ ཨཏིཀྐམིཏྭཱ ཉཱཎཾ ནཔྤཝཏྟཏི, ཉཱཎཾ ཨཏིཀྐམིཏྭཱ ནེཡྻཔཐོ ནཏྠི. ཨཉྙམཉྙཔརིཡནྟཊྛཱཡིནོ ཏེ དྷམྨཱ, ཡཐཱ དྭིནྣཾ སམུགྒཔཊལཱནཾ སམྨཱ ཕུསིཏཱནཾ ཧེཊྛིམཾ སམུགྒཔཊལཾ ཨུཔརིམཾ ནཱཏིཝཏྟཏི, ཨུཔརིམཾ སམུགྒཔཊལཾ ཧེཊྛིམཾ ནཱཏིཝཏྟཏི. ཨཉྙམཉྙཔརིཡནྟཊྛཱཡིནོ, ཨེཝམེཝ བུདྡྷསྶ བྷགཝཏོ ནེཡྻཉྩ ཉཱཎཉྩ ཨཉྙམཉྙཔརིཡནྟཊྛཱཡིནོ…པེ… ཏེ དྷམྨཱ’’ཏི (མཧཱནི. ༦༩, ༡༥༦; ཙཱུལ༹ནི. ༨༥; པཊི. མ. ༣.༥) ཨེཝམེཀཛ྄ཛྷཾ, ཝིསུཾ, སཀིཾ, ཀམེན ཝཱ ཨིཙྪཱནུརཱུཔཾ ¶ པཝཏྟསྶ ཏསྶ ཉཱཎསྶ ཝསེན སམྨཱ སཱམཉྩ སབྦདྷམྨཱནཾ བུདྡྷཏྟཱ བྷགཝཱ སམྨཱསམྦུདྡྷོ ནཱམ ཛཱཏོཏི.

ཨཡཾ པནེཏྠ ཨཊྛཀཐཱམུཏྟཀོ ནཡོ – ཋཱནཱཋཱནཱདཱིནི ཚབྦིསཡཱནི ཚཧི ཉཱཎེཧི ཛཱནཏཱ, ཡཐཱཀམྨཱུཔགེ སཏྟེ ཙུཏཱུཔཔཱཏདིབྦཙཀྑུཉཱཎེཧི པསྶཏཱ, སཝཱསནཱནམཱསཝཱནཾ ཨཱསཝཀྑཡཉཱཎེན ཁཱིཎཏྟཱ ཨརཧཏཱ, ཛྷཱནཱདིདྷམྨེ སཾཀིལེསཝོདཱནཝསེན སཱམཾཡེཝ ཨཝིཔརཱིཏཱཝབོདྷཏོ སམྨཱསམྦུདྡྷེན, ཨེཝཾ དསབལཉཱཎཝསེན ཙཏཱུཧཱཀཱརེཧི ཐོམིཏེན. ཨཔིཙ ཏཱིསུ ཀཱལེསུ ཨཔྤཊིཧཏཉཱཎཏཱཡ ཛཱནཏཱ, ཏིཎྞམྤི ཀམྨཱནཾ ཉཱཎཱནུཔརིཝཏྟིཏོ ནིསམྨཀཱརིཏཱཡ པསྶཏཱ, དཝཱདཱིནཾ ཚནྣམབྷཱཝསཱདྷིཀཱཡ པཧཱནསམྤདཱཡ ཨརཧཏཱ, ཚནྡཱདཱིནཾ ཚནྣམཧཱནིཧེཏུབྷཱུཏཱཡ ཨཔརིཀྑཡཔཊིབྷཱནསཱདྷིཀཱཡ སབྦཉྙུཏཱཡ སམྨཱསམྦུདྡྷེན ¶ , ཨེཝཾ ཨཊྛཱརསཱཝེཎིཀབུདྡྷདྷམྨཝསེན (དཱི. ནི. ཨཊྛ. ༣.༣༠༥) ཙཏཱུཧཱཀཱརེཧི ཐོམིཏེནཱཏི ཨེཝམཱདིནཱ ཏེསཾ ཏེསཾ ཉཱཎདསྶནཔཧཱནབོདྷནཏྠེཧི སངྒཧིཏཱནཾ བུདྡྷགུཎཱནཾ ཝསེན ཡོཛནཱ ཀཱཏབྦཱཏི.

ཙཏུཝེསཱརཛྫཾ སནྡྷཱཡ ‘‘ཙཏཱུཧཱཀཱརེཧཱི’’ཏི ཝུཏྟཾ. ‘‘ཐོམིཏེནཱ’’ཏི ཨེཏེན ཨིམེསཾ ‘‘བྷགཝཏཱ’’ཏི པདསྶ ཝིསེསནཏཾ དསྶེཏི. ཡདིཔི ཧཱིནཔཎཱིཏབྷེདེན དུཝིདྷཱཝ ཨདྷིམུཏྟི པཱལི༹ཡཾ ཝུཏྟཱ, པཝཏྟིཨཱཀཱརཝསེན པན ཨནེཀབྷེདབྷིནྣཱཝཱཏི ཨཱཧ ‘‘ནཱནཱདྷིམུཏྟིཀཏཱ’’ཏི. སཱ པན ཨདྷིམུཏྟི ཨཛ྄ཛྷཱསཡདྷཱཏུཡེཝ, ཏདཔི ཏཐཱ ཏཐཱ དསྶནཾ, ཁམནཾ, རོཙནཉྩཱཏི ཨཏྠཾ ཝིཉྙཱཔེཏི ‘‘ནཱནཛ྄ཛྷཱསཡཏཱ’’ཏི ཨིམིནཱ. ཏཐཱ ཧི ཝཀྑཏི ‘‘ནཱནཱདྷིམུཏྟིཀཏཱ ནཱནཛ྄ཛྷཱསཡཏཱ ནཱནཱདིཊྛིཀཏཱ ནཱནཀྑནྟིཏཱ ནཱནཱརུཙིཏཱ’’ཏི. ‘‘ཡཱཝཉྩིད’’ནྟི ཨེཏསྶ ‘‘སུཔྤཊིཝིདིཏཱ’’ཏི ཨིམིནཱ སམྦནྡྷོ. ཏཏྠ ཙ ཨིདནྟི པདཔཱུརཎམཏྟཾ, ‘‘ནཱནཱདྷིམུཏྟིཀཏཱ’’ཏི ཨེཏེན ཝཱ པདེན སམཱནཱདྷིཀརཎཾ, ཏསྶཏྠོ པན པཱཀཊོཡེཝཱཏི ཨཱཧ ‘‘ཡཱཝ ཙ སུཊྛུ པཊིཝིདིཏཱ’’ཏི.

‘‘ཡཱ ཙ ཨཡ’’ནྟིཨཱདིནཱ དྷཱཏུསཾཡུཏྟཔཱལི༹ཾ དསྶེནྟོ ཏདེཝ སཾཡུཏྟཾ མནསི ཀརིཏྭཱ ཏེསཾ ཨཝཎྞཝཎྞབྷཱསནེན སདྡྷིཾ གྷཊེཏྭཱ ཐེརཱནམཡཾ སངྑིཡདྷམྨོ ཨུདཔཱདཱིཏི དསྶེཏི. ཨཏོ ཨསྶ བྷགཝཏོ དྷཱཏུསཾཡུཏྟདེསནཱནཡེན ཏཱསཾ སུཔྤཊིཝིདིཏབྷཱཝཾ སམཏྠནཝསེན དསྶེཏུཾ ‘‘ཨཡཾ ཧཱི’’ཏིཨཱདིམཱཧཱཏི ཨཏྠོ དཊྛབྦོ. སུཔྤཊིཝིདིཏབྷཱཝསམཏྠནཉྷི ‘‘ཨཡཾ ཧཱི’’ཏིཨཱདིཝཙནཾ. ཏཏྠ ཡཱ ཨཡཾ ནཱནཱདྷིམུཏྟིཀཏཱ…པེ… རུཙིཏཱཏི སམྦནྡྷོ. དྷཱཏུསོཏི ཨཛ྄ཛྷཱསཡདྷཱཏུཡཱ. སཾསནྡནྟཱིཏི སམྦནྡྷེནྟི ཝིསྶཱསེནྟི. སམེནྟཱིཏི སམྨཱ, སཧ ཝཱ བྷཝནྟི. ‘‘ཧཱིནཱདྷིམུཏྟིཀཱ’’ཏིཨཱདི ¶ ཏཐཱབྷཱཝཝིབྷཱཝནཾ. ཨཏཱིཏམྤི ཨདྡྷཱནནྟི ཨཏཱིཏསྨིཾ ཀཱལེ, ཨཙྩནྟསཾཡོགེ ཝཱ ཨེཏཾ ཨུཔཡོགཝཙནཾ. ནཱནཱདྷིམུཏྟིཀཏཱ-པདསྶ ནཱནཛ྄ཛྷཱསཡཏཱཏི ཨཏྠཝཙནཾ. ནཱནཱདིཊྛི…པེ… རུཙིཏཱཏི ཏསྶ སརཱུཔདསྶནཾ. སསྶཏཱདིལདྡྷིཝསེན ནཱནཱདིཊྛིཀཏཱ. པཱཔཱཙཱརཀལྱཱཎཱཙཱརཱདིཔཀཏིཝསེན ནཱནཀྑནྟིཏཱ. པཱཔིཙྪཱཨཔྤིཙྪཱདིཝསེན ནཱནཱརུཙིཏཱ. ནཱལི༹ཡཱཏི ཏུམྦེན, ཨཱལ༹ྷཀེན ཝཱ. ཏུལཱཡཱཏི མཱནེན. ནཱནཱདྷིམུཏྟིཀཏཱཉཱཎནྟི ཙེཏྠ སབྦཉྙུཏཉྙཱཎམེཝ ཨདྷིཔྤེཏཾ, ན དསབལཉཱཎནྟི ཨཱཧ ¶ ‘‘སབྦཉྙུཏཉྙཱཎེནཱ’’ཏི. ཨེཝཾ ཨཱཙརིཡདྷམྨཔཱལཏྠེརེན (དཱི. ནི. ཊཱི. ༡.༣) ཝུཏྟཾ, ཨབྷིདྷམྨཊྛཀཐཱཡཾ, དསབལསུཏྟཊྛཀཐཱསུ (མ. ནི. ཨཊྛ. ༡.༡༤༩; ཨ. ནི. ཨཊྛ. ༣.༡༠.༢༡; ཝིབྷ. ཨཊྛ. ༨༣༡) ཙ ཨེཝམཱགཏཾ.

པརཝཱདཱི པནཱཧ ‘‘དསབལཉཱཎཾ ནཱམ པཱཊིཡེཀྐཾ ནཏྠི, སབྦཉྙུཏཉྙཱཎསྶེཝཱཡཾ པབྷེདོ’’ཏི, ཏཾ ཏཐཱ ན དཊྛབྦཾ. ཨཉྙམེཝ ཧི དསབལཉཱཎཾ, ཨཉྙཾ སབྦཉྙུཏཉྙཱཎཾ. དསབལཉཱཎཉྷི སཀཀིཙྩམེཝ ཛཱནཱཏི, སབྦཉྙུཏཉྙཱཎཾ པན ཏམྤི ཏཏོ ཨཝསེསམྤི ཛཱནཱཏི. དསབལཉཱཎེསུ ཧི པཋམཾ ཀཱརཎཱཀཱརཎམེཝ ཛཱནཱཏི, དུཏིཡཾ ཀམྨནྟརཝིཔཱཀནྟརམེཝ, ཏཏིཡཾ ཀམྨཔརིཙྪེདམེཝ, ཙཏུཏྠཾ དྷཱཏུནཱནཏྟཀཱརཎམེཝ, པཉྩམཾ སཏྟཱནམཛ྄ཛྷཱསཡཱདྷིམུཏྟིམེཝ, ཚཊྛཾ ཨིནྡྲིཡཱནཾ ཏིཀྑམུདུབྷཱཝམེཝ, སཏྟམཾ ཛྷཱནཱདཱིཧི སདྡྷིཾ ཏེསཾ སཾཀིལེསཱདིམེཝ, ཨཊྛམཾ པུབྦེནིཝུཏྠཀྑནྡྷསནྟཏིམེཝ, ནཝམཾ སཏྟཱནཾ ཙུཏིཔཊིསནྡྷིམེཝ, དསམཾ སཙྩཔརིཙྪེདམེཝ, སབྦཉྙུཏཉྙཱཎཾ པན ཨེཏེཧི ཛཱནིཏབྦཉྩ ཏཏོ ཨུཏྟརིཉྩ ཛཱནཱཏི, ཨེཏེསཾ པན ཀིཙྩཾ ན སབྦཾ ཀརོཏི. ཏཉྷི ཛྷཱནཾ ཧུཏྭཱ ཨཔྤེཏུཾ ན སཀྐོཏི, ཨིདྡྷི ཧུཏྭཱ ཝིཀུབྦིཏུཾ ན སཀྐོཏི, མགྒོ ཧུཏྭཱ ཀིལེསེ ཁེཔེཏུཾ ན སཀྐོཏི. ཨཔིཙ པརཝཱདཱི ཨེཝཾ པུཙྪིཏབྦོ ‘‘དསབལཉཱཎཾ ནཱམ ཨེཏཾ སཝིཏཀྐསཝིཙཱརཾ ཨཝིཏཀྐཝིཙཱརམཏྟཾ ཨཝིཏཀྐཨཝིཙཱརཾ, ཀཱམཱཝཙརཾ རཱུཔཱཝཙརཾ ཨརཱུཔཱཝཙརཾ, ལོཀིཡཾ ལོཀུཏྟར’’ནྟི. ཛཱནནྟོ པཊིཔཱཊིཡཱ སཏྟ ཉཱཎཱནི ‘‘སཝིཏཀྐསཝིཙཱརཱནཱི’’ཏི ཝཀྑཏི, ཏཏོ པརཱནི དྭེ ‘‘ཨཝིཏཀྐཨཝིཙཱརཱནཱི’’ཏི ཝཀྑཏི, ཨཱསཝཀྑཡཉཱཎཾ ‘‘སིཡཱ སཝིཏཀྐསཝིཙཱརཾ, སིཡཱ ཨཝིཏཀྐཝིཙཱརམཏྟཾ, སིཡཱ ཨཝིཏཀྐཨཝིཙཱར’’ནྟི ཝཀྑཏི, ཏཐཱ པཊིཔཱཊིཡཱ སཏྟ ཀཱམཱཝཙརཱནི, ཏཏོ པརཾ དྭེ རཱུཔཱཝཙརཱནི, ཨཝསཱནེ ཨེཀཾ ‘‘ལོཀུཏྟར’ནྟི ཝཀྑཏི, སབྦཉྙུཏཉྙཱཎཾ པན སཝིཏཀྐསཝིཙཱརམེཝ, ཀཱམཱཝཙརམེཝ, ལོཀིཡམེཝཱཏི. ཨིཏི ཨཉྙདེཝ དསབལཉཱཎཾ, ཨཉྙཾ སབྦཉྙུཏཉྙཱཎནྟི, ཏསྨཱ པཉྩམབལཉཱཎསངྑཱཏེན ནཱནཱདྷིམུཏྟིཀཏཱཉཱཎེན ཙ སབྦཉྙུཏཉྙཱཎེན ཙ ཝིདིཏཱཏི ཨཏྠོ ཝེདིཏབྦོ. ཙ-ཀཱརོཔི ཧི པོཏྠཀེསུ དིསྶཏི. སཱཏི ཡཐཱཝུཏྟཱ ནཱནཱདྷིམུཏྟིཀཏཱ. ‘‘དྭེཔི ནཱམཱ’’ཏིཨཱདིནཱ ཡཐཱཝུཏྟསུཏྟསྶཏྠཾ ¶ སངྑེཔེན དསྶེཏྭཱ ‘‘ཨིམེསུ ཙཱཔཱི’’ཏིཨཱདིནཱ ཏསྶ སངྑིཡདྷམྨསྶ ཏདབྷིསམྦནྡྷཏཾ ཨཱཝི ཀརོཏི. ཨིཏི ཧ མེཏི ཨེཏྠ ཨེཝཾསདྡཏྠེ ཨིཏི-སདྡོ, ཧ-ཀཱརོ ནིཔཱཏམཏྟཾ, ཨཱགམོ ཝཱ. སནྡྷིཝསེན ¶ ཨིཀཱརལོཔོ, ཨཀཱརཱདེསོ ཝཱཏི དསྶེཏི ‘‘ཨེཝཾ ཨིམེ’’ཏི ཨིམིནཱ.

༤. ‘‘ཝིདིཏྭཱ’’ཏི ཨེཏྠ པཀཏིཡཏྠབྷཱུཏཱ ཝིཛཱནནཀིརིཡཱ སཱམཉྙེན ཨབྷེདཝཏཱིཔི སམཱནཱ ཏཾཏཾཀརཎཡོགྱཏཱཡ ཨནེཀཔྤབྷེདཱཏི དསྶེཏུཾ ‘‘བྷགཝཱ ཧཱི’’ཏིཨཱདི ཝུཏྟཾ. ཝཏྠཱུནཱིཏི གྷརཝཏྠཱུནི. ‘‘སབྦཉྙུཏཉྙཱཎེན དིསྭཱ ཨཉྙཱསཱི’’ཏི ཙ ཝོཧཱརཝཙནམཏྟམེཏཾ. ན ཧི ཏེན དསྶནཏོ ཨཉྙཾ ཛཱནནཾ ནཱམ ནཏྠི. ཏདིདཾ ཉཱཎཾ ཨཱཝཛྫནཔཊིབདྡྷཾ ཨཱཀངྑཱཔཊིབདྡྷཾ མནསིཀཱརཔཊིབདྡྷཾ ཙིཏྟུཔྤཱདཔཊིབདྡྷཾ ཧུཏྭཱ པཝཏྟཏི. ཀིཾ ནཱམ ཀརོནྟོ བྷགཝཱ ཏེན ཉཱཎེན ཨཱཝཛྫནཱདིཔཊིབདྡྷེན ཨཉྙཱསཱིཏི སོཏཱུནམཏྠསྶ སུཝིཉྙཱཔནཏྠཾ པརམྨུཁཱ ཝིཡ ཙོདནཾ སམུཊྛཱཔེཏི ‘‘ཀིཾ ཀརོནྟོ ཨཉྙཱསཱི’’ཏི ཨིམིནཱ, པཙྪིམཡཱམཀིཙྩཾ ཀརོནྟོ ཏཾ ཉཱཎཾ ཨཱཝཛྫནཱདིཔཊིབདྡྷཾ ཧུཏྭཱ ཏེན ཏཐཱ ཨཉྙཱསཱིཏི ཝུཏྟཾ ཧོཏི. སཱམཉྙསྨིཾ སཏི ཝིསེསཝཙནཾ སཱཏྠཀཾ སིཡཱཏི ཨནུཡོགེནཱཧ ‘‘ཀིཙྩཉྩནཱམེཏ’’ནྟིཨཱདི. ཨརཧཏྟམགྒེན སམུགྒྷཱཏཾ ཀཏཾ ཏསྶ སམུཊྛཱཔཀཀིལེསསམུགྒྷཱཊནེན, ཡཏོ ‘‘ནཏྠི ཨབྱཱཝཊམནོ’’ཏི ཨཊྛཱརསསུ བུདྡྷདྷམྨེསུ ཝུཙྩཏི. ནིརཏྠཀོ ཙིཏྟསམུདཱཙཱརོ ནཏྠཱིཏི ཧེཏྠ ཨཏྠོ. ཨེཝམྤི ཝུཏྟཱནུཡོགོ ཏདཝཏྠོཡེཝཱཏི ཙོདནམཔནེཏི ‘‘ཏཾ པཉྩཝིདྷ’’ནྟིཨཱདིནཱ. ཏཏྠ པུརིམཀིཙྩདྭཡཾ དིཝསབྷཱགཝསེན, ཨིཏརཏྟཡཾ རཏྟིབྷཱགཝསེན གཧེཏབྦཾ ཏཐཱཡེཝ ཝཀྑམཱནཏྟཱ.

‘‘ཨུཔཊྛཱཀཱནུགྒཧཎཏྠཾ, སརཱིརཕཱསུཀཏྠཉྩཱ’’ཏི ཨེཏེན ཨནེཀཀཔྤསམུཔཙིཏཔུཉྙསམྦྷཱརཛནིཏཾ བྷགཝཏོ མུཁཝརཾ དུགྒནྡྷཱདིདོསཾ ནཱམ ནཏྠི, ཏདུབྷཡཏྠམེཝ པན མུཁདྷོཝནཱདཱིནི ཀརོཏཱིཏི དསྶེཏི. སབྦོཔི ཧི བུདྡྷཱནཾ ཀཱཡོ བཱཧིརབྦྷནྟརེཧི མལེཧི ཨནུཔཀྐིལིཊྛོ སུདྷོཏམཎི ཝིཡ ཧོཏི. ཝིཝིཏྟཱསནེཏི ཕལསམཱཔཏྟཱིནམནུརཱུཔེ ཝིཝེཀཱནུབྲཱུཧནཱསནེ. ཝཱིཏིནཱམེཏྭཱཏི ཕལསམཱཔཏྟཱིཧི ཝཱིཏིནཱམནཾ ཝུཏྟཾ, ཏམྤི ན ཝིཝེཀནིནྣཏཱཡ, པརེསཉྩ དིཊྛཱནུགཏི ཨཱཔཛྫནཏྠཾ. སུརཏྟདུཔཊྚཾ ཨནྟརཝཱསཀཾ ཝིཧཱརནིཝཱསནཔརིཝཏྟནཝསེན ནིཝཱསེཏྭཱ ཝིཛྫུལཏཱསདིསཾ ཀཱཡབནྡྷནཾ བནྡྷིཏྭཱ མེགྷཝཎྞཾ སུགཏཙཱིཝརཾ པཱརུཔིཏྭཱ སེལམཡཔཏྟཾ ཨཱདཱཡཱཏི ཨདྷིཔྤཱཡོ. ཏཐཱཡེཝ ཧི ཏཏྠ ཏཏྠ ཝུཏྟོ. ‘‘ཀདཱཙི ཨེཀཀོ’’ཏིཨཱདི ¶ ཏེསཾ ཏེསཾ ཝིནེཡྻཱནཾ ཝིནཡནཱནུཀཱུལཾ བྷགཝཏོ ཨུཔསངྐམནདསྶནཾ. གཱམཾ ཝཱ ནིགམཾ ཝཱཏི ཨེཏྠ ཝཱ-སདྡོ ཝིཀཔྤནཏྠོ, ཏེན ནགརམྤི ཝིཀཔྤེཏི. ཡཐཱརུཙི ཝཏྟམཱནེཧི ཨནེཀེཧི པཱཊིཧཱརིཡེཧི པཝིསཏཱིཏི སམྦནྡྷོ.

‘‘སེཡྻཐིད’’ནྟིཨཱདིནཱ ¶ པཙྪིམཔཀྑཾ ཝིཏྠཱརེཏི. སེཡྻཐིདནྟི ཙ ཏཾ ཀཏམནྟི ཨཏྠེ ནིཔཱཏོ, ཨིདཾ ཝཱ སཔྤཱཊིཧཱིརཔཝིསནཾ ཀཏམནྟིཔི ཝཊྚཏི. མུདུགཏཝཱཏཱཏི མུདུབྷཱུཏཱ, མུདུབྷཱཝེན ཝཱ གཏཱ ཝཱཏཱ. ཨུདཀཕུསིཏཱནཱིཏི ཨུདཀབིནྡཱུནི. མུཉྩནྟཱཏི ཨོསིཉྩནྟཱ. རེཎུཾ ཝཱུཔསམེཏྭཱཏི རཛཾ སནྣིསཱིདཱཔེཏྭཱ ཨུཔརི ཝིཏཱནཾ ཧུཏྭཱ ཏིཊྛནྟི ཙཎྜ-ཝཱཏཱཏཔ-ཧིམཔཱཏཱདི-ཧརཎེན ཝིཏཱནཀིཙྩནིཔྥཱདཀཏྟཱ, ཏཏོ ཏཏོ ཧིམཝནྟཱདཱིསུ པུཔྥཱུཔགརུཀྑཏོ ཨུཔསཾཧརིཏྭཱཏི ཨཏྠསྶ ཝིཉྙཱཡམཱནཏྟཱ ཏཐཱ ན ཝུཏྟཾ. སམབྷཱགཀརཎམཏྟེན ཨོནམནྟི, ཨུནྣམནྟི ཙ, ཏཏོཡེཝ པཱདནིཀྑེཔསམཡེ སམཱཝ བྷཱུམི ཧོཏི. ནིདསྶནམཏྟཉྩེཏཾ སཀྑརཀཐལཀཎྚཀསངྐུཀལལཱདིཨཔགམནསྶཱཔི སམྦྷཝཏོ, ཏཉྩ སུཔྤཏིཊྛིཏཔཱདཏཱལཀྑཎསྶ ནིསྶནྡཕལཾ, ན ཨིདྡྷིནིམྨཱནཾ. པདུམཔུཔྥཱནི ཝཱཏི ཨེཏྠ ཝཱ-སདྡོ ཝིཀཔྤནཏྠོ, ཏེན ‘‘ཡདི ཡཐཱཝུཏྟནཡེན སམཱ བྷཱུམི ཧོཏི, ཨེཝཾ སཏི ཏཱནི ན པཊིགྒཎྷནྟི, ཏཐཱ པན ཨསཏིཡེཝ པཊིགྒཎྷནྟཱི’’ཏི བྷགཝཏོ ཡཐཱརུཙི པཝཏྟནཾ དསྶེཏི. སབྦདཱཝ བྷགཝཏོ གམནཾ པཋམཾ དཀྑིཎཔཱདུདྡྷརཎསངྑཱཏཱནུབྱཉྫནཔཊིམཎྜིཏནྟི ཨཱཧ ‘‘ཋཔིཏམཏྟེ དཀྑིཎཔཱདེ’’ཏི. བུདྡྷཱནཾ སབྦདཀྑིཎཏཱཡ ཏཐཱ ཝུཏྟནྟི ཨཱཙརིཡདྷམྨཔཱལཏྠེརོ,(དཱི. ནི. ཊཱི. ༡.༤) ཨཱཙརིཡསཱརིཔུཏྟཏྠེརོ (ཨ. ནི. ཨཊྛ. ༡.༥༣) ཙ ཝདཏི, སབྦེསཾ ཨུཏྟམཏཱཡ ཨེཝཾ ཝུཏྟནྟི ཨཏྠོ. ཨེཝཾ སཏི ཨུཏྟམཔུརིསཱནཾ ཏཐཱཔཀཏིཏཱཡཱཏི ཨཱཔཛྫཏི. ཋཔིཏམཏྟེ ནིཀྑམིཏྭཱ དྷཱཝནྟཱིཏི སམྦནྡྷོ. ཨིདཉྩ ཡཱཝདེཝ ཝིནེཡྻཛནཝིནཡནཏྠཾ སཏྠུ པཱཊིཧཱརིཡནྟི ཏེསཾ དསྶནཊྛཱནཾ སནྡྷཱཡ ཝུཏྟཾ. ‘‘ཚབྦཎྞརསྨིཡོ’’ཏི ཝཏྭཱཔི ‘‘སུཝཎྞརསཔིཉྫརཱནི ཝིཡཱ’’ཏི ཝཙནཾ བྷགཝཏོ སརཱིརེ པཱིཏཱབྷཱཡ ཡེབྷུཡྻཏཱཡཱཏི དཊྛབྦཾ. ‘‘རས-སདྡོ ཙེཏྠ ཨུདཀཔརིཡཱཡོ, པིཉྫར-སདྡོ ཧེམཝཎྞཔརིཡཱཡོ, སུཝཎྞཛལདྷཱརཱ ཝིཡ སུཝཎྞཝཎྞཱནཱིཏི ཨཏྠོ’’ཏི (སཱརཏྠ. ཊཱི. ༡.བུདྡྷཱཙིཎྞཀཐཱ.༢༢) སཱརཏྠདཱིཔནིཡཾ ཝུཏྟཾ. པཱསཱདཀཱུཊཱགཱརཱདཱིནི ཏེསུ ཏེསུ གཱམནིགམཱདཱིསུ སཾཝིཛྫམཱནཱནི ཨལངྐརོནྟིཡོ ཧུཏྭཱ.

‘‘ཏཐཱ’’ཏིཨཱདིནཱ ¶ སཡམེཝ དྷམྨཏཱཝསེན ཏེསཾ སདྡཀརཎཾ དསྶེཏི. ཏདཱ ཀཱཡཾ ཨུཔགཙྪནྟཱིཏི ཀཱཡཱུཔགཱནི, ན ཡཏྠ ཀཏྠཙི ཋིཏཱནི. ‘‘ཨནྟརཝཱིཐི’’ནྟི ཨིམིནཱ བྷགཝཏོ པིཎྜཱཡ གམནཱནུརཱུཔཝཱིཐིཾ དསྶེཏི. ན ཧི བྷགཝཱ ལོལུཔྤཙཱརཔིཎྜཙཱརིཀོ ཝིཡ ཡཏྠ ཀཏྠཙི གཙྪཏི. ཡེ པཋམཾ གཏཱ, ཡེ ཝཱ ཏདནུཙྪཝིཀཾ པིཎྜཔཱཏཾ དཱཏུཾ སམཏྠཱ, ཏེ བྷགཝཏོཔི པཏྟཾ གཎྷནྟཱིཏི ཝེདིཏབྦཾ. པཊིམཱནེནྟཱིཏི པཏིསྶམཱནསཱ པཱུཛེནྟི, བྷགཝནྟཾ ཝཱ པཊིམཱནཱཔེནྟི པཊིམཱནནྟཾ ཀརོནྟི. ཝོཧཱརམཏྟཉྩེཏཾ, བྷགཝཏོ པན ཨཔཊིམཱནནཱ ནཱམ ནཏྠི. ཙིཏྟསནྟཱནཱནཱིཏི ཨཏཱིཏེ, ཨེཏརཧི ཙ པཝཏྟཙིཏྟསནྟཱནཱནི. ཡཐཱ ཀེཙི ཨརཧཏྟེ པཏིཊྛཧནྟི, ཏཐཱ དྷམྨཾ དེསེཏཱིཏི སམྦནྡྷོ. ཀེཙི པབྦཛིཏྭཱཏི ཙ ཨརཧཏྟསམཱཔནྣཱནཾ པབྦཛྫཱསངྑེཔགཏདསྶནཏྠཾ ¶ , ན པན གིཧཱིནཾ ཨརཧཏྟསམཱཔནྣཏཱཔཊིཀྑེཔནཏྠཾ. ཨཡཉྷི ཨརཧཏྟཔྤཏྟཱནཾ གིཧཱིནཾ སབྷཱཝོ, ཡཱ ཏདཧེཝ པབྦཛྫཱ ཝཱ, ཀཱལཾ ཀིརིཡཱཝཱཏི. ཏཐཱ ཧི ཝུཏྟཾ ཨཱཡསྨཏཱ ནཱགསེནཏྠེརེན ‘‘ཝིསམཾ མཧཱརཱཛ, གིཧིལིངྒཾ, ཝིསམེ ལིངྒེ ལིངྒདུབྦལཏཱཡ ཨརཧཏྟཾ པཏྟོ གིཧཱི ཏསྨིཾཡེཝ དིཝསེ པབྦཛཏི ཝཱ པརིནིབྦཱཡཏི ཝཱ ནེསོ མཧཱརཱཛ, དོསོ ཨརཧཏྟསྶ, གིཧིལིངྒསྶེཝེསོ དོསོ ཡདིདཾ ལིངྒདུབྦལཏཱ’’ཏི (མི. པ. ༥.༢.༢) སབྦཾ ཝཏྟབྦཾ. ཨེཏྠ ཙ སཔྤཱཊིཧཱིརཔྤཝེསནསམྦནྡྷེནེཝ མཧཱཛནཱནུགྒཧཎཾ དསྶིཏཾ, ཨཔྤཱཊིཧཱིརཔྤཝེསནེན ཙ པན ‘‘ཏེ སུནིཝཏྠཱ སུཔཱརུཏཱ’’ཏིཨཱདིཝཙནཾ ཡཐཱརཧཾ སམྦནྡྷིཏྭཱ མཧཱཛནཱནུགྒཧཎཾ ཨཏྠཏོ ཝིབྷཱཝེཏབྦཾ ཧོཏི. ཏམྤི ཧི པུརེབྷཏྟཀིཙྩམེཝཱཏི. ཨུཔཊྛཱནསཱལཱ ཙེཏྠ མཎྜལམཱལོ༹. ཏཏྠ གནྟྭཱ མཎྜལམཱལེ༹ཏི ཨིདྷ པཱཋོ ལིཁིཏོ. ‘‘གནྡྷམཎྜལམཱལེ༹’’ཏིཔི (ཨ. ནི. ཨཊྛ. ༡.༥༣) མནོརཐཔཱུརཎིཡཱ དིསྶཏི, ཏཊྚཱིཀཱཡཉྩ ‘‘ཙཏུཛྫཱཏིཡགནྡྷེན པརིབྷཎྜེ མཎྜལམཱལེ༹’’ཏི ཝུཏྟཾ. གནྡྷཀུཊིཾ པཝིསཏཱིཏི ཙ པཝིསནཀིརིཡཱསམྦནྡྷཏཱཡ, ཏསྶམཱིཔཏཱཡ ཙ ཝུཏྟཾ, ཏསྨཱ པཝིསིཏུཾ གཙྪཏཱིཏི ཨཏྠོ དཊྛབྦོ, ན པན ཨནྟོ ཏིཊྛཏཱིཏི. ཨེཝཉྷི ‘‘ཨཐ ཁོ བྷགཝཱ’’ཏིཨཱདིཝཙནཾ (དཱི. ནི. ༡.༤) སཱུཔཔནྣཾ ཧོཏི.

ཨཐ ཁོཏི ཨེཝཾ གནྡྷཀུཊིཾ པཝིསིཏུཾ གམནཀཱལེ. ཨུཔཊྛཱནེཏི སམཱིཔཔདེསེ. ‘‘པཱདེ པཀྑཱལེཏྭཱ པཱདཔཱིཋེ ཋཏྭཱ བྷིཀྑུསངྒྷཾ ཨོཝདཏཱི’’ཏི ཨེཏྠ པཱདེ པཀྑཱལེནྟོཝ པཱདཔཱིཋེ ཏིཊྛནྟོ ཨོཝདཏཱིཏི ཝེདིཏབྦཾ. ཨེཏདཏྠཾཡེཝ ¶ ཧི བྷིཀྑཱུནཾ བྷཏྟཀིཙྩཔརིཡོསཱནཾ ཨཱགམཡམཱནོ ནིསཱིདི. དུལླབྷཱ སམྤཏྟཱིཏི སཏིཔི མནུསྶཏྟཔཊིལཱབྷེ པཏིརཱུཔདེསཝཱསཨིནྡྲིཡཱཝེཀལླསདྡྷཱཔཊིལཱབྷཱདཡོ སམྤཏྟིསངྑཱཏཱ གུཎཱ དུལླབྷཱཏི ཨཏྠོ. པོཏྠཀེསུ པན ‘‘དུལླབྷཱ སདྡྷཱསམྤཏྟཱི’’ཏི པཱཋོ དིསྶཏི, སོ ཨཡུཏྟོཝ. ཏཏྠཱཏི ཏསྨིཾ པཱདཔཱིཋེ ཋཏྭཱ ཨོཝདནཀཱལེ, ཏེསུ ཝཱ བྷིཀྑཱུསུ, རཏྟིཡཱ ཝསནཾ ཋཱནཾ རཏྟིཊྛཱནཾ, ཏཐཱ དིཝཱཋཱནཾ. ‘‘ཀེཙཱི’’ཏིཨཱདི ཏབྦིཝརཎཾ. ཙཱཏུམཧཱརཱཛིཀབྷཝནནྟི ཙཱཏུམཧཱརཱཛིཀདེཝལོཀེ སུཉྙཝིམཱནཱནི སནྡྷཱཡ ཝུཏྟཾ. ཨེས ནཡོ ཏཱཝཏིཾསབྷཝནཱདཱིསུཔི. ཏཏོ བྷགཝཱ གནྡྷཀུཊིཾ པཝིསིཏྭཱ པཙྪཱབྷཏྟཾ ཏཡོ བྷཱགེ ཀཏྭཱ པཋམབྷཱགེ སཙེ ཨཱཀངྑཏི, དཀྑིཎེན པསྶེན སཱིཧསེཡྻཾ ཀཔྤེཏི, སཙེ ནཱཀངྑཏི, བུདྡྷཱཙིཎྞཾ ཕལསམཱཔཏྟིཾ སམཱཔཛྫཏི, ཨཐ ཡཐཱཀཱལཔརིཙྪེདཾ ཏཏོ ཝུཊྛཧིཏྭཱ དུཏིཡབྷཱགེ པཙྪིམཡཱམསྶ ཏཏིཡཀོཊྛཱསེ ཝིཡ ལོཀཾ ཝོལོཀེཏི ཝེནེཡྻཱནཾ ཉཱཎཔརིཔཱཀཾ པསྶིཏུཾ, ཏེནཱཧ ‘‘སཙེ ཨཱཀངྑཏཱི’’ཏིཨཱདི. སཱིཧསེཡྻནྟིཨཱདཱིནམཏྠོ ཧེཊྛཱ ཝུཏྟོཝ. ཡཉྷི ཨཔུབྦཾ པདཾ ཨནུཏྟཱནཾ, ཏདེཝ ཝཎྞཡིསྶཱམ. སམྨཱ ཨསྶཱསིཏབྦོཏི གཱཧཱཔནཝསེན ཨུཔཏྠམྦྷིཏབྦོཏི སམསྶཱསིཏོ. ཏཱདིསོ ཀཱཡོ ཡསྶཱཏི ཏཐཱ. དྷམྨསྶཝནཏྠཾ སནྣིཔཏཏི. ཏསྶཱ པརིསཱཡ ཙིཏྟཱཙཱརཾ ཉཏྭཱ ཀཏབྷཱཝཾ སནྡྷཱཡཱཧ ¶ ‘‘སམྤཏྟཔརིསཱཡཨནུརཱུཔེན པཱཊིཧཱརིཡེནཱ’’ཏི. ཡཏྠ དྷམྨཾ སཧ བྷཱསནྟི, སཱ དྷམྨསབྷཱ ནཱམ. ཀཱལཡུཏྟནྟི ‘‘ཨིམིསྶཱ ཝེལཱཡ ཨིམསྶ ཨེཝཾ ཝཏྟབྦ’’ནྟི ཏཾཏཾཀཱལཱནུརཱུཔཾ. སམཡཡུཏྟནྟི ཏསྶེཝ ཝེཝཙནཾ, ཨཊྛུཔྤཏྟིཨནུརཱུཔཾ ཝཱ སམཡཡུཏྟཾ. ཨཐ ཝཱ སམཡཡུཏྟནྟི ཧེཏུདཱཧརཎེཧི ཡུཏྟཾ. ཀཱལེན སཱཔདེསཉྷི བྷགཝཱ དྷམྨཾ དེསེཏི. ཀཱལཾ ཝིདིཏྭཱ པརིསཾ ཨུཡྻོཛེཏི, ན ཡཱཝ སམནྡྷཀཱརཱ དྷམྨཾ དེསེཏཱིཏི ཨདྷིཔྤཱཡོ. ‘‘སམཡཾ ཝིདིཏྭཱ པརིསཾ ཨུཡྻོཛེསཱི’’ཏིཔི ཀཏྠཙི པརིཡཱཡཝཙནཔཱཋོ དིསྶཏི, སོ པཙྪཱ པམཱདལིཁིཏོ.

གཏྟཱནཱིཏི ཀཱཡོཡེཝ ཨནེཀཱཝཡཝཏྟཱ ཝུཏྟོ. ‘‘ཨུཏུཾ གཎྷཱཔེཏཱི’’ཏི ཨིམིནཱ ཨུཏུགཎྷཱཔནཏྠམེཝ ཨོསིཉྩནཾ, ན པན མལཝིཀྑཱལནཏྠནྟི དསྶེཏི. ན ཧི བྷགཝཏོ ཀཱཡེ རཛོཛལླཾ ཨུཔལིམྤཏཱིཏི. ཙཏུཛྫཱཏིཀེན གནྡྷེན པརིབྷཱཝིཏཱ ཀུཊཱི གནྡྷཀུཊཱི. ཏསྶཱ པརིཝེཎཾ ཏཐཱ. ཕལསམཱཔཏྟཱིཧི མུཧུཏྟཾ པཊིསལླཱིནོ. ཏཏོ ཏཏོཏི ཨཏྟནོ ཨཏྟནོ ¶ རཏྟིཊྛཱནདིཝཱཋཱནཏོ, ཨུཔགནྟྭཱ, སམཱིཔེ ཝཱ ཋཱནཾ ཨུཔཊྛཱནཾ, བྷཛནཾ སེཝནནྟི ཨཏྠོ. ཏཏྠཱཏི ཏསྨིཾ ནིསཱིདནཊྛཱནེ, པུརིམཡཱམེ ཝཱ, ཏེསུ ཝཱ བྷིཀྑཱུསུ.

པཉྷཱཀཐནཱདིཝསེན ཨདྷིཔྤཱཡཾ སམྤཱདེནྟོ ‘‘དསསཧསྶིལོཀདྷཱཏཱུ’’ཏི ཨེཝཾ ཨཝཏྭཱ ཏསྶཱ ཨནེཀཱཝཡཝསངྒཧཎཏྠཾ ‘‘སཀལདསསཧསྶིལོཀདྷཱཏཱུ’’ཏི ཝུཏྟཾ. པུརེབྷཏྟཔཙྪཱབྷཏྟཔུརིམཡཱམེསུ མནུསྶཔརིསཱབཱཧུལླཏོ ཨོཀཱསཾ ཨལབྷིཏྭཱ ཨིདཱནི མཛ྄ཛྷིམཡཱམེཡེཝ ཨོཀཱསཾ ལབྷམཱནཱ, བྷགཝཏཱ ཝཱ ཀཏོཀཱསཏཱཡ ཨོཀཱསཾ ལབྷམཱནཱཏི ཨདྷིཔྤཱཡོ. ཀཱིདིསཾ པན པུཙྪནྟཱིཏི ཨཱཧ ‘‘ཡཐཱབྷིསངྑཏཾ ཨནྟམསོ ཙཏུརཀྑརམྤཱི’’ཏི. ཡཐཱབྷིསངྑཏནྟི ཨབྷིསངྑཏཱནུརཱུཔཾ, ཏདནཏིཀྐམྨ ཝཱ, ཨེཏེན ཡཐཱ ཏཐཱ ཨཏྟནོ པཊིབྷཱནཱནུརཱུཔཾ པུཙྪནྟཱིཏི དསྶེཏི.

པཙྪཱབྷཏྟཀཱལསྶ ཏཱིསུ བྷཱགེསུ པཋམབྷཱགེ སཱིཧསེཡྻཱཀཔྤནཾ ཨེཀནྟཾ ན ཧོཏཱིཏི ཨཱཧ ‘‘པུརེབྷཏྟཏོ པཊྛཱཡ ནིསཛྫཱཡ པཱིལི༹ཏསྶ སརཱིརསྶཱ’’ཏི. ཏེནེཝ ཧི པུབྦེ ‘‘སཙེ ཨཱཀངྑཏཱི’’ཏི ཏདཱ སཱིཧསེཡྻཱཀཔྤནསྶ ཨནིབདྡྷཏཱ ཝིབྷཱཝིཏཱ. ཀིལཱསུབྷཱཝོ ཀིལམཐོ. སརཱིརསྶ ཀིལཱསུབྷཱཝམོཙནཏྠཾ ཙངྐམེན ཝཱིཏིནཱམེཏི སཱིཧསེཡྻཾ ཀཔྤེཏཱིཏི སམྦནྡྷོ. བུདྡྷཙཀྑུནཱཏི ཨཱསཡཱནུསཡཨིནྡྲིཡཔརོཔརིཡཏྟཉཱཎསངྑཱཏེན པཉྩམཚཊྛབལབྷཱུཏེན བུདྡྷཙཀྑུནཱ. ཏེན ཧི ལོཀཝོལོཀནབཱཧུལླཏཱཡ ཏཾ ‘‘བུདྡྷཙཀྑཱུ’’ཏི ཝུཙྩཏི, ཨིདཉྩ པཙྪིམཡཱམེ བྷགཝཏོ བཧུལཾ ཨཱཙིཎྞཝསེན ཝུཏྟཾ. ཨཔྤེཀདཱ ཨཝསིཊྛབལཉཱཎེཧི, སབྦཉྙུཏཉྙཱཎེནེཝ ཙ བྷགཝཱ ཏམཏྠཾ སཱདྷེཏི.

‘‘པཙྪིམཡཱམཀིཙྩཾ ¶ ཀརོནྟོ ཨཉྙཱསཱི’’ཏི པུབྦེ ཝུཏྟམཏྠཾ སམཏྠེནྟོ ‘‘ཏསྨིཾ པན དིཝསེ’’ཏིཨཱདིམཱཧ. བུདྡྷཱནཾ བྷགཝནྟཱནཾ ཡཏྠ ཀཏྠཙི ཝསནྟཱནཾ ཨིདཾ པཉྩཝིདྷཾ ཀིཙྩཾ ཨཝིཛཧིཏམེཝ ཧོཏི སབྦཀཱལཾ སུཔྤཏིཊྛིཏསཏིསམྤཛཉྙཏྟཱ, ཏསྨཱ ཏདཧེཔི ཏདཝིཛཧནབྷཱཝདསྶནཏྠཾ ཨིདྷ པཉྩཝིདྷཀིཙྩཔཡོཛནནྟི དཊྛབྦཾ. ཙངྐམནྟི ཏཏྠ ཙངྐམནཱནུརཱུཔཊྛཱནཾ. ཙངྐམམཱནོ ཨཉྙཱསཱིཏི ཡོཛེཏབྦཾ. པུབྦེ ཝུཏྟེ ཨཏྠདྭཡེ པཙྪིམཏྠཉྙེཝ གཧེཏྭཱ ‘‘སབྦཉྙུཏཉྙཱཎཾ ཨཱརབྦྷཱ’’ཏི ཝུཏྟཾ. པུརིམཏྠོ ཧི པཀརཎཱདྷིགཏཏྟཱ སུཝིཉྙེཡྻོཏི.

‘‘ཨཐ ¶ ཁོ བྷགཝཱ ཏེསཾ བྷིཀྑཱུནཾ ཨིམཾ སངྑིཡདྷམྨཾ ཝིདིཏྭཱ ཡེན མཎྜལམཱལོ༹, ཏེནུཔསངྐམཱི’’ཏི ཨཡཾ སཱཝསེསཔཱཋོ, ཏསྨཱ ཨེཏཾ ཝིདིཏྭཱ, ཨེཝཾ ཙིནྟེཏྭཱ ཙ ཨུཔསངྐམཱིཏི ཨཏྠོ ཝེདིཏབྦོཏི དསྶེཏུཾ ‘‘ཉཏྭཱ ཙ པནསྶཱ’’ཏིཨཱདི ཝུཏྟཾ. ཏཏྠ ཨསྶ ཨེཏདཧོསཱིཏི ཨསྶ བྷགཝཏོ ཨེཏཾ པརིཝིཏཀྐནཾ, ཨེསོ ཝཱ ཙེཏསོ པརིཝིཏཀྐོ ཨཧོསི, ལིངྒཝིཔལླཱསོཡཾ ‘‘ཨེཏདགྒ’’ནྟིཨཱདཱིསུ (ཨ. ནི. ༡.༡༨༨ ཨཱདཡོ) ཝིཡ. སབྦཉྙུཏཉྙཱཎཀིཙྩཾ ན སབྦཐཱ པཱཀཊཾ. ནིརནྟརནྟི ཨནུཔུབྦཱརོཙནཝསེན ནིབྦིཝརཾ, ཡཐཱབྷཱསིཏསྶ ཝཱ ཨཱརོཙནཝསེན ནིབྦིསེསཾ. བྷཱཝནཔུཾསཀཉྩེཏཾ. ཏཾ ཨཊྛུཔྤཏྟིཾ ཀཏྭཱཏི ཏཾ ཡཐཱརོཙིཏཾ ཝཙནཾ ཨིམསྶ སུཏྟསྶ ཨུཔྤཏྟིཀཱརཎཾ ཀཏྭཱ, ཨིམསྶ ཝཱ སུཏྟསྶ དེསནཱཡ ཨུཔྤནྣཾ ཀཱརཎཾ ཀཏྭཱཏིཔི ཨཏྠོ. ཨཏྠ-སདྡོ ཙེཏྠ ཀཱརཎེ, ཏེན ཨིམསྶ སུཏྟསྶ ཨཊྛུཔྤཏྟིཀཾ ནིཀྑེཔཾ དསྶེཏི. དྭཱསཊྛིཡཱ ཋཱནེསཱུཏི དྭཱསཊྛིདིཊྛིགཏཊྛཱནེསུ. ཨཔྤཊིཝཏྟིཡནྟི སམཎེན ཝཱ བྲཱཧྨཎེན ཝཱ དེཝེན ཝཱ མཱརེན ཝཱ བྲཧྨུནཱ ཝཱ ཀེནཙི ཝཱ ལོཀསྨིཾ ཨནིཝཏྟིཡཾ. སཱིཧནཱདཾ ནདནྟོཏི སེཊྛནཱདསངྑཱཏཾ ཨབྷཱིཏནཱདཾ ནདནྟོ. ཡཾ པན ལོཀིཡཱ ཝདནྟི –

‘‘ཨུཏྟརསྨིཾ པདེ བྱགྒྷཔུངྒཝོསབྷཀུཉྫརཱ;

སཱིཧསདྡཱུལནཱགཱདྱཱ, པུམེ སེཊྛཏྠགོཙརཱ’’ཏི.

ཏཾ ཡེབྷུཡྻཝསེནཱཏི དཊྛབྦཾ. སཱིཧནཱདསདིསཾ ཝཱ ནཱདཾ ནདནྟོ. ཨཡམཏྠོ སཱིཧནཱདསུཏྟེན (ཨ. ནི. ༦.༦༤; ༡༠.༢༡) དཱིཔེཏབྦོ. ཡཐཱ ཝཱ ཀེསརོ མིགརཱཛཱ སཧནཏོ, ཧནནཏོ, ཙ ‘‘སཱིཧོ’’ཏི ཝུཙྩཏི, ཨེཝཾ ཏཐཱགཏོཔི ལོཀདྷམྨཱནཾ སཧནཏོ, པརཔྤཝཱདཱནཾ ཧནནཏོ ཙ ‘‘སཱིཧོ’’ཏི ཝུཙྩཏི. ཏསྨཱ སཱིཧསྶ ཏཐཱགཏསྶ ནཱདཾ ནདནྟོཏིཔི ཨཏྠོ དཊྛབྦོ. ཡཐཱ ཧི སཱིཧོ སཱིཧབལེན སམནྣཱགཏོ སབྦཏྠ ཝིསཱརདོ ཝིགཏལོམཧཾསོ སཱིཧནཱདཾ ནདཏི, ཨེཝཾ ཏཐཱགཏསཱིཧོཔི ཏཐཱགཏབལེཧི སམནྣཱགཏོ ཨཊྛསུ པརིསཱསུ ཝིསཱརདོ ཝིགཏལོམཧཾསོ ‘‘ཨིམེ དིཊྛིཊྛཱནཱ’’ཏིཨཱདིནཱ ནཡེན ནཱནཱཝིདྷདེསནཱཝིལཱསསམྤནྣཾ སཱིཧནཱདཾ ནདཏི ¶ . ཡཾ སནྡྷཱཡ ཝུཏྟཾ ‘‘སཱིཧོཏི ཁོ བྷིཀྑཝེ, ཏཐཱགཏསྶེཏཾ ཨདྷིཝཙནཾ ཨརཧཏོ སམྨཱསམྦུདྡྷསྶ. ཡཾ ཁོ བྷིཀྑཝེ, ཏཐཱགཏོ པརིསཱཡ དྷམྨཾ དེསེཏི, ཨིདམསྶ ཧོཏི སཱིཧནཱདསྨི’’ནྟི (ཨ. ནི. ༡༠.༢༡). ‘‘ཨིམེ ¶ དིཊྛིཊྛཱནཱ’’ཏིཨཱདིཀཱ ཧི ཨིདྷ ཝཀྑམཱནདེསནཱཡེཝ སཱིཧནཱདོ. ཏེསཾ ‘‘ཝེདནཱཔཙྩཡཱ ཏཎྷཱ’’ཏིཨཱདིནཱ ཝཀྑམཱནནཡེན པཙྩཡཱཀཱརསྶ སམོདྷཱནམྤི ཝེདིཏབྦཾ. སིནེརུཾ…པེ… ཝིཡ ཙཱཏི ཨུཔམཱདྭཡེན བྲཧྨཛཱལདེསནཱཡ ཨནཉྙསཱདྷཱརཎཏྟཱ སུདུཀྐརཏཾ དསྶེཏི. སུཝཎྞཀཱུཊེནཱཏི སུཝཎྞམཡཔཧརཎོཔཀརཎཝིསེསེན. རཏནནིཀཱུཊེན ཝིཡ ཨགཱརཾ ཨརཧཏྟནིཀཱུཊེན བྲཧྨཛཱལསུཏྟནྟཾ ནིཊྛཔེནྟོ, ནིཀཱུཊེནཱཏི ཙ ནིཊྛཱནགཏེན ཨཙྩུགྒཏཀཱུཊེནཱཏི ཨཏྠོ. ཨིདཉྩ ཨརཧཏྟཕལཔརིཡོསཱནཏྟཱ སབྦགུཎཱནཾ ཏདེཝ སབྦེསཾ ཨུཏྟརིཏརནྟི ཝུཏྟཾ. པུརིམོ པན མེ-སདྡོ དེསནཱཔེཀྑོཏི པརིནིབྦུཏསྶཱཔི མེ སཱ དེསནཱ ཨཔརབྷཱགེ པཉྩཝསྶསཧསྶཱནཱིཏི ཨཏྠོ ཡུཏྟོ. སཝནཨུགྒཧཎདྷཱརཎཝཱཙནཱདིཝསེན པརིཙཡཾ ཀརོནྟེ, ཏཐཱ ཙ པཊིཔནྣེ ནིབྦཱནཾ སམྤཱཔིཀཱ བྷཝིསྶཏཱིཏི ཨདྷིཔྤཱཡོ.

ཡདགྒེན ཡེནཱཏི ཀརཎནིདྡེསོ, ཏདགྒེན ཏེནཱ ཏིཔི དཊྛབྦཾ. ཨེཏནྟི ‘‘ཡེན ཏེནཱ’’ཏི ཨེཏཾ པདདྭཡཾ. ཏཏྠཱཏི ཧི ཏསྨིཾ མཎྜལམཱལེ༹ཏི ཨཏྠོ. ཡེནཱཏི ཝཱ བྷུམྨཏྠེ ཀརཎཝཙནཾ. ཏེནཱཏི པན ཨུཔཡོགཏྠེ. ཏསྨཱ ཏཏྠཱཏི ཏཾ མཎྜལམཱལ༹ནྟིཔི ཝདནྟི. ཨུཔསངྐམཱིཏི ཙ ཨུཔསངྐམནྟོཏི ཨཏྠོ པཙྩུཔྤནྣཀཱལསྶ ཨདྷིཔྤེཏཏྟཱ, ཏདུཔསངྐམནསྶ པན ཨཏཱིཏབྷཱཝསྶ སཱུཙནཏོ ‘‘ཨུཔསངྐམཱི’’ཏི ཏཀྐཱལཱཔེཀྑནཝསེན ཨཏཱིཏཔཡོགོ ཝུཏྟོ. ཨེཝཉྷི ‘‘ཨུཔསངྐམིཏྭཱ’’ཏི ཝཙནཾ སཱུཔཔནྣཾ ཧོཏི. ཨིཏརཐཱ དྭིནྣམྤི ཝཙནཱནཾ ཨཏཱིཏཀཱལིཀཏྟཱ ཏཐཱཝཏྟབྦམེཝ ན སིཡཱ. ཨུཔསངྐམནསྶ ཙ གམནཾ, ཨུཔགམནཉྩཱཏི དྭིདྷཱ ཨཏྠོ, ཨིདྷ པན གམནམེཝ. སམྤཏྟུཀཱམཏཱཡ ཧི ཡཾ ཀིཉྩི ཋཱནཾ གཙྪནྟོ ཏཾ ཏཾ པདེསཱཏིཀྐམནཝསེན ‘‘ཏཾ ཋཱནཾ ཨུཔསངྐམི ཨུཔསངྐམནྟོ’’ཏི ཝཏྟབྦཏཾ ལབྷཏི, ཏེནཱཧ ‘‘ཏཏྠ གཏོ’’ཏི, ཏེན ཨུཔགམནཏྠཾ ནིཝཏྟེཏི. ཡཉྷི ཋཱནཾ པཏྟུམིཙྪནྟོ གཙྪཏི, ཏཾ པཏྟཏཱཡེཝ ‘‘ཨུཔགམན’’ནྟི ཝུཙྩཏི. ཡམེཏྠ ན སཾཝཎྞིཏཾ ‘‘ཨུཔསངྐམིཏྭཱ’’ཏི པདཾ, ཏཾ ཨུཔསངྐམནཔརིཡོསཱནདཱིཔནཾ. ཨཐ ཝཱ གཏོཏི ཨུཔགཏོ. ཨནུཔསགྒོཔི ཧི སདྡོ སཨུཔསགྒོ ཝིཡ ཨཏྠནྟརཾ ཝདཏི སཨུཔསགྒོཔི ཨནུཔསགྒོ ཝིཡཱཏི. ཨཏོ ‘‘ཨུཔསངྐམིཏྭཱ’’ཏི པདསྶ ཨེཝཾ ཨུཔགཏོ ཏཏོ ཨཱསནྣཏརཾ བྷིཀྑཱུནཾ སམཱིཔསངྑཱཏཾ པཉྷཾ ཝཱ ཀཐེཏུཾ, དྷམྨཾ ཝཱ དེསེཏུཾ སཀྐུཎེཡྻཊྛཱནཾ ཨུཔགནྟྭཱཏི ཨཏྠོ ཝེདིཏབྦོ. ཨཔིཙ ཡེནཱཏི ཧེཏུམྷི ཀརཎཝཙནཾ. ཡེན ཀཱརཎེན བྷགཝཏཱ སོ ¶ མཎྜལམཱལོ༹ ཨུཔསངྐམིཏབྦོ, ཏེན ཀཱརཎེན ཨུཔསངྐམཱིཏི ཨཏྠོ. ཀཱརཎཾ པན ‘‘ཨིམེ བྷིཀྑཱུ’’ཏིཨཱདིནཱ ཨཊྛཀཐཱཡཾ ཝུཏྟམེཝ.

པཉྙཏྟེ ¶ ཨཱསནེ ནིསཱིདཱིཏི ཨེཏྠ ཀེནིདཾ པཉྙཏྟནྟི ཨནུཡོགེ སཏི བྷིཀྑཱུཧཱིཏི དསྶེཏུཾ ‘‘བུདྡྷཀཱལེ ཀིརཱ’’ཏིཨཱདིམཱཧ. ཏཏྠ བུདྡྷཀཱལེཏི དྷརམཱནསྶ བྷགཝཏོ ཀཱལེ. ཝིསེསནྟི ཡཐཱལདྡྷཏོ ཨུཏྟརི ཛྷཱནམགྒཕལཾ. ཨཐཱཏི སཾསཡཏྠེ ནིཔཱཏོ, ཡདི པསྶཏཱིཏི ཨཏྠོ. ཝིཏཀྐཡམཱནཾ ནཾ བྷིཀྑུནྟི སམྦནྡྷོ, ཏཐཱ ཏཏོ པསྶནཧེཏུ དསྶེཏྭཱ, ཨོཝདིཏྭཱཏི ཙ. ཨནམཏགྒེཏི ཨནཱདིམཏི. ཨཱཀཱསཾ ཨུཔྤཏིཏྭཱཏི ཨཱཀཱསེ ཨུགྒནྟྭཱ. ཨཱིདིསེསུ ཧི བྷུམྨཏྠོ ཨེཝ ཡུཛྫཏཱིཏི ཨུདཱནཊྛཀཐཱཡཾ ཝུཏྟཾ. བྷཱརོཏི ཏངྑཎེཡེཝ བྷགཝཏོ ཨནུཙྪཝིཀཱསནསྶ དུལླབྷཏྟཱ གརུཀམྨཾ. ཕལཀནྟི ནིསཱིདནཏྠཱཡ ཀཏཾ ཕལཾ. ཀཊྛཀནྟི ནིསཱིདནཡོགྱཾ ཕལཀཏོ ཨཉྙཾ དཱརུཀྑནྡྷཾ. སངྐཌྜྷིཏྭཱཏི སཾཧརིཏྭཱ. ཏཏྠཱཏི པུརཱཎཔཎྞེསུ, ཀེཝལཾ ཏེསུ ཨེཝ ནིསཱིདིཏུམནནུཙྪཝིཀཏྟཱ ཏཐཱ ཝུཏྟཾ, ཏཏྠཱཏི ཝཱ ཏེསུ པཱིཋཱདཱིསུ. ཨེཝཾ སཏི སངྐཌྜྷིཏྭཱ པཉྙཔེནྟཱིཏི ཨཏྠཝསཱ ཝིབྷཏྟིཾ ཝིཔརིཎཱམེཏྭཱ སམྦནྡྷོ. པཔྥོཊེཏྭཱཏི ཡཐཱཋིཏཾ རཛོཛལླཱདི-སཾཀིཎྞམནནུརཱུཔནྟི ཏབྦིསོདྷནཏྠཾ སཉྩཱལེཏྭཱ. ‘‘ཨམྷཱཀཾ ཨཱིདིསཱ ཀཐཱ ཨཉྙཏརིསྶཱ དེསནཱཡ ཀཱརཎཾ བྷཝིཏུཾ ཡུཏྟཱ, ཨཝསྶཾ བྷགཝཱ ཨཱགམིསྶཏཱི’’ཏི ཉཏྭཱ ཡཐཱནིསཱིདནཾ སནྡྷཱཡ ཨེཝཾ ཝུཏྟཾ. ཨེཏྠ ཙ ‘‘ཨིདྷཱགཏོ སམཎོ ཝཱ བྲཱཧྨཎོ ཝཱ ཏཱཝཀཱལིཀཾ གཎྷིཏྭཱ པརིབྷུཉྫཏཱུ’’ཏི རཉྙཱ ཋཔིཏཾ, ཏེན ཙ ཨཱགཏཀཱལེ པརིབྷུཏྟཾ ཨཱསནཾ རཉྙོ ནིསཱིདནཱསནནྟི ཝེདིཏབྦཾ. ན ཧི ཏཐཱ ཨཊྛཔིཏཾ བྷིཀྑཱུཧི པརིབྷུཉྫིཏུཾ, བྷགཝཏོ ཙ པཉྙཔེཏུཾ ཝཊྚཏི. ཏསྨཱ ཏཱདིསཾ རཉྙོ ནིསཱིདནཱསནཾ པཱལི༹ཡཾ ཀཐིཏནྟི དསྶེཏུཾ ‘‘ཏཾ སནྡྷཱཡཱ’’ཏིཨཱདི ཝུཏྟཾ. ཨདྷིམུཏྟིཉཱཎནྟི ཙ སཏྟཱནཾ ནཱནཱདྷིམུཏྟིཀཏཱརམྨཎཾ སབྦཉྙུཏཉྙཱཎཾ, བལཉཱཎཉྩ, ཝུཏྟོཝཱཡམཏྠོ.

‘‘ནིསཛྫཱ’’ཏི ཨིདཾ ནིསཱིདནཔརིཡོསཱནདཱིཔནནྟི དསྶེཏི ‘‘ཨེཝ’’ནྟིཨཱདིནཱ. ‘‘ཏེསཾ བྷིཀྑཱུནཾ ཨིམེ སངྑིཡདྷམྨཾ ཝིདིཏྭཱ’’ཏི ཝུཏྟཏྟཱ ཛཱནནྟོཡེཝ པུཙྪཱིཏི ཨཡམཏྠོ སིདྡྷོཏི ཨཱཧ ‘‘ཛཱནནྟོཡེཝཱ’’ཏི. ཨསཏི ཀཐཱཝཏྠུམྷི ཏདནུརཱུཔཱ ཨུཔརཱུཔརི ཝཏྟབྦཱ ཝིསེསཀཐཱ ན སམཱུཔབྲཱུཧཏཱིཏི ཀཐཱསམུཊྛཱཔནཏྠཾ པུཙྪནཾ ཝེདིཏབྦཾ. ནུ-ཨིཏི པུཙྪནཏྠེ. ཨས-སདྡོ པཝཏྟནཏྠེཏི ཝུཏྟཾ ‘‘ཀཏམཱཡ ནུ…པེ… བྷཝཐཱ’’ཏི. ཨེཏྠཱཏི ཨེཏསྨིཾ ཋཱནེ ¶ སནྡྷིཝསེན ཨུཀཱརསྶ ཨོཀཱརཱདེསོཝ, ན པཋམཱཡ པཱལི༹ཡཱ ཨཏྠཏོ ཝིསེསོཏི དསྶེཏི ‘‘ཏསྶཱཔི པུརིམོཡེཝ ཨཏྠོ’’ཏི ཨིམིནཱ. པུརིམོཡེཝཏྠོཏི ཙ ‘‘ཀཏམཱཡ ནུ བྷཝཐཱ’’ཏི ཨེཝཾ ཝུཏྟོ ཨཏྠོ.

‘‘ཀཱ ཙ པནཱ’’ཏི ཨེཏྠ ཙ-སདྡོ བྱཏིརེཀེ ‘‘ཡོ ཙ བུདྡྷཉྩ དྷམྨཉྩ, སངྒྷཉྩ སརཎཾ གཏོ’’ཏིཨཱདཱིསུ ཝིཡ. བྱཏིརེཀོ ཙ ནཱམ པུབྦེ ཝུཏྟཏྠཱཔེཀྑཀོ ཝིསེསཱཏིརེཀཏྠོ, སོ ཙ ཏཾ པུབྦེ ཡཐཱཔུཙྪིཏཱཡ ཀཐཱཡ ཝཀྑམཱནཾ ཝིཔྤཀཏབྷཱཝསངྑཱཏཾ བྱཏིརེཀཏྠཾ ཛོཏེཏི. པན-སདྡོ ཝཙནཱལངྐཱརོ ¶ . ཏཱདིསོ པན ཨཏྠོ སདྡསཏྠཏོཝ སུཝིཉྙེཡྻོཏི ཀཏྭཱ ཏདཉྙེསམེཝ ཨཏྠཾ དསྶེཏུཾ ‘‘ཨནྟརཱཀཐཱཏི ཀམྨཊྛཱན…པེ… ཀཐཱ’’ཏིཨཱདིམཱཧ. ཀམྨཊྛཱནམནསིཀཱརཨུདྡེསཔརིཔུཙྪཱདཡོ སམཎཀརཎཱིཡབྷཱུཏཱཏི ཨནྟརཱསདྡེན ཨཔེཀྑིཏེ ཀརཎཱིཡཝིསེསེ སམྦནྡྷཱཔཱདཱནབྷཱཝེན ཝཏྟབྦེ ཏེསམེཝ ཝཏྟབྦརཱུཔཏྟཱ ‘‘ཀམྨཊྛཱནམནསིཀཱརཨུདྡེསཔརིཔུཙྪཱདཱིན’’ནྟི ཝུཏྟཾ. ཡཱཡ ཧི ཀཐཱཡ ཏེ བྷིཀྑཱུ སནྣིསིནྣཱ, སཱ ཨེཝ ཨནྟརཱཀཐཱ ཝིཔྤཀཏཱ ཝིསེསེན པུན པུཙྪཱིཡཏི, ན ཏདཉྙེ ཀམྨཊྛཱནམནསིཀཱརཨུདྡེསཔརིཔུཙྪཱདཡོཏི. ཨནྟརཱསདྡསྶ ཨཉྙཏྠམཱཧ ‘‘ཨཉྙཱ, ཨེཀཱ’’ཏི ཙ. པརིཡཱཡཝཙནཉྷེཏཾ པདདྭཡཾ. ཡསྨཱ ཨཉྙཏྠེ ཨཡཾ ཨནྟརཱསདྡོ ‘‘བྷཱུམནྟརཾ, སམཡནྟར’’ནྟིཨཱདཱིསུ ཝིཡ. ཏསྨཱ ‘‘ཀམྨཊྛཱནམནསིཀཱརཨུདྡེསཔརིཔུཙྪཱདཱིན’’ནྟི ནིསྶཀྐཏྠེ སཱམིཝཙནཾ དཊྛབྦཾ. ཝེམཛ྄ཛྷེ ཝཱ ཨནྟརཱསདྡོ, སཱ པན ཏེསཾ ཝེམཛ྄ཛྷབྷཱུཏཏྟཱ ཨཉྙཱཡེཝ, ཏེཧི ཙ ཨསམྨིསྶཏྟཱ ཝིསུཾ ཨེཀཱཡེཝཱཏི ཨདྷིཔྤཱཡཾ དསྶེཏུཾ ‘‘ཨཉྙཱ, ཨེཀཱ’’ཏི ཙ ཝུཏྟཾ. པཀཱརེན ཀརཎཾ པཀཏོ, ཏཏོ ཝིགཏཱ, ཝིགཏཾ ཝཱ པཀཏཾ ཡསྶཱཏི ཝིཔྤཀཏཱ, ཨཔརིནིཊྛིཏཱ. སིཁནྟི པརིཡོསཱནཾ. ཨཡཾ པན ཏདབྷིསམྦནྡྷཝསེན ཨུཏྟརི ཀཐེཏུཀམྱཏཱཔུཙྪཱ, ཏཾ སནྡྷཱཡཱཧ ‘‘ནཱཧ’’ནྟིཨཱདི. ཀཐཱབྷངྒཏྠནྟི ཀཐཱཡ བྷཉྫནཏྠཾ. ཨཏྠཏོ ཨཱཔནྣཏྟཱ སབྦཉྙུཔཝཱརཎཾ པཝཱརེཏི. ཨནིཡྻཱནིཀཏྟཱ སགྒམོཀྑམགྒཱནཾ ཏིརཙྪཱནབྷཱུཏཱ ཀཐཱ ཏིརཙྪཱནཀཐཱ. ཏིརཙྪཱནབྷཱུཏཱཏི ཙ ཏིརོཀརཎབྷཱུཏཱ, ཝིབནྡྷནབྷཱུཏཱཏི ཨཏྠོ. ཨཱདི-སདྡེན ཙེཏྠ ཙོརམཧཱམཏྟསེནཱབྷཡཀཐཱདིཀཾ ཨནེཀཝིཧིཏཾ ནིརཏྠཀཀཐཾ སངྒཎྷཱཏི. ཨཡཾ ཀཐཱ ཨེཝཱཏི ཨནྟོགདྷཱཝདྷཱརཎཏཾ ¶ , ཨཉྙཏྠཱཔོཧནཾ ཝཱ སནྡྷཱཡ ཙེཏཾ ཝུཏྟཾ. ཨཐཱཏི ཏསྶཱ ཨཝིཔྤཀཏཀཱལེཡེཝ. ‘‘ཏཾ ནོ’’ཏིཨཱདིནཱ ཨཏྠཏོ ཨཱཔནྣམཱཧ. ཨེས ནཡོ ཨཱིདིསེསུ. ནནུ ཙ ཏེཧི བྷིཀྑཱུཧི སཱ ཀཐཱ ‘‘ཨིཏི ཧ མེ’’ཏིཨཱདིནཱ ཡཐཱདྷིཔྤཱཡཾ ནིཊྛཱཔིཏཱཡེཝཱཏི? ན ནིཊྛཱཔིཏཱ བྷགཝཏོ ཨུཔསངྐམནེན ཨུཔཙྪིནྣཏྟཱ. ཡདི ཧི བྷགཝཱ ཏསྨིཾ ཁཎེ ན ཨུཔསངྐམེཡྻ, བྷིཡྻོཔི ཏཔྤཊིབདྡྷཱཡེཝ ཏཐཱ པཝཏྟེཡྻུཾ, བྷགཝཏོ ཨུཔསངྐམནེན པན ན པཝཏྟེསུཾ, ཏེནེཝཱཧ ‘‘ཨཡཾ ནོ…པེ… ཨནུཔྤཏྟོ’’ཏི.

ཨིདཱནི ནིདཱནསྶ, ནིདཱནཝཎྞནཱཡ ཝཱ པརིནིཊྛིཏབྷཱཝཾ དསྶེནྟོ ཏསྶ བྷགཝཏོ ཝཙནསྶཱནུཀཱུལབྷཱཝམྤི སམཏྠེཏུཾ ‘‘ཨེཏྟཱཝཏཱ’’ཏིཨཱདིམཱཧ. ཨེཏྟཱཝཏཱཏི ཧི ཨེཏྟཀེན ‘‘ཨེཝཾ མེ སུཏ’’ནྟིཨཱདིཝཙནཀྐམེན ཡཾ ནིདཱནཾ བྷཱསིཏནྟི ཝཱ ཨེཏྟཀེན ‘‘ཏཏྠ ཨེཝནྟི ནིཔཱཏཔད’’ནྟིཨཱདིཝཙནཀྐམེན ཨཏྠཝཎྞནཱ སམཏྟཱཏི ཝཱ དྭིདྷཱ ཨཏྠོ དཊྛབྦོ. ‘‘ཀམལ…པེ… སལིལཱཡཱ’’ཏིཨཱདིནཱ པན ཏསྶ ནིདཱནསྶ བྷགཝཏོ ཝཙནསྶཱནུཀཱུལབྷཱཝཾ དཱིཔེཏི. ཏཏྠ ཀམལཀུཝལཡུཛྫལཝིམལསཱདྷུརསསལིལཱཡཱཏི ཀམལསངྑཱཏེཧི པདུམཔུཎྜརཱིཀསེཏུཔྤལརཏྟུཔྤལེཧི ¶ ཙེཝ ཀུཝལཡསངྑཱཏེན ནཱིལུཔྤལེན ཙ ཨུཛྫལཝིམལསཱདྷུརསསལིལཝཏིཡཱ. ནིམྨལསིལཱཏལརཙནཝིལཱསསོབྷིཏརཏནསོཔཱནནྟི ནིམྨལེན སིལཱཏལེན རཙནཱཡ ཝིལཱསེན ལཱིལཱཡ སོབྷིཏརཏནསོཔཱནཝནྟཾ, ནིམྨལསིལཱཏལེན ཝཱ རཙནཝིལཱསེན, སུསངྑཏཀིརིཡཱསོབྷེན ཙ སོབྷིཏརཏནསོཔཱནཾ, ཝིལཱསསོབྷིཏསདྡེཧི ཝཱ ཨཏིཝིཡ སོབྷིཏབྷཱཝོ ཝུཏྟོ. ཝིཔྤཀིཎྞམུཏྟཱཏལསདིསཝཱལུཀཱཙུཎྞཔཎྜརབྷཱུམིབྷཱགནྟི ཝིཝིདྷེན པཀིཎྞཱཡ མུཏྟཱཡ ཏལསདིསཱནཾ ཝཱལུཀཱནཾ ཙུཎྞེཧི པཎྜརཝཎྞབྷཱུམིབྷཱགཝནྟཾ. སུཝིབྷཏྟབྷིཏྟིཝིཙིཏྲཝེདིཀཱཔརིཀྑིཏྟསྶཱཏི སུཊྛུ ཝིབྷཏྟཱཧི བྷིཏྟཱིཧི ཝིཙིཏྲསྶ, ཝེདིཀཱཧི པརིཀྑིཏྟསྶ ཙ. ཨུཙྩཏརེན ནཀྑཏྟཔཐཾ ཨཱཀཱསཾ ཕུསིཏུཀཱམཏཱཡ ཝིཡ, ཝིཛམྦྷིཏསདྡེན ཙེཏསྶ སམྦནྡྷོ. ཝིཛམྦྷིཏསམུསྶཡསྶཱཏི ཝིཀྐཱིལ༹ནསམཱུཧཝནྟསྶ. དནྟམཡསཎྷམུདུཕལཀཀཉྩནལཏཱཝིནདྡྷམཎིགཎཔྤབྷཱསམུདཡུཛྫལསོབྷནྟི དནྟམཡེ ཨཏིཝིཡ སིནིདྡྷཕལཀེ ཀཉྩནམཡཱཧི ལཏཱཧི ཝིནདྡྷཱནཾ མཎཱིནཾ གཎཔྤབྷཱསམུདཱཡེན སམུཛྫལསོབྷཱསམྤནྣཾ. སུཝཎྞཝལཡནུཔུརཱདིསངྒྷཊྚནསདྡསམྨིསྶིཏཀཐིཏཧསིཏ- མདྷུརསྶརགེཧཛནཝིཙརིཏསྶཱཏི སུཝཎྞམཡནིཡུརཔཱདཀཊཀཱདཱིནཾ ¶ ཨཉྙམཉྙཾ སངྒྷཊྚནེན ཛནིཏསདྡེཧི སམྨིསྶིཏཀཐིཏསརཧསིཏསརསངྑཱཏེན མདྷུརསྶརེན སམྤནྣཱནཾ གེཧནིཝཱསཱིནཾ ནརནཱརཱིནཾ ཝིཙརིཏཊྛཱནབྷཱུཏསྶ. ཨུལཱ༹རིསྶརིཡཝིབྷཝསོབྷིཏསྶཱཏི ཨུལཱ༹རཏཱསམྤནྣཛནཨིསྶརིཡསམྤནྣཛནཝིབྷཝསམྤནྣཛནེཧི, ཏནྣིཝཱསཱིནཾ ཝཱ ནརནཱརཱིནཾ ཨུཏྟམཱདྷིཔཙྩབྷོགེཧི སོབྷིཏསྶ. སུཝཎྞརཛཏམཎིམུཏྟཱཔཝཱལཱ༹དིཛུཏིཝིསྶརཝིཛྫོཏིཏསུཔྤཏིཊྛིཏཝིསཱལ དྭཱརབཱཧནྟི སུཝཎྞརཛཏནཱནཱམཎིམུཏྟཱཔཝཱལཱ༹དཱིནཾ ཛུཏཱིཧི པབྷསྶརཝིཛྫོཏིཏསུཔྤཏིཊྛིཏཝིཏྠཏདྭཱརབཱཧཾ.

ཏིཝིདྷསཱིལཱདིདསྶནཝསེན བུདྡྷསྶ གུཎཱནུབྷཱཝཾ སམྨཱ སཱུཙེཏཱིཏི བུདྡྷགུཎཱནུབྷཱཝསཾསཱུཙཀཾ, ཏསྶ. ཀཱལོ ཙ དེསོ ཙ དེསཀོ ཙ ཝཏྠུ ཙ པརིསཱ ཙ, ཏཱསཾ ཨཔདེསེན ནིདསྶནེན པཊིམཎྜིཏཾ ཏཐཱ.

ཀིམཏྠཾ པནེཏྠ དྷམྨཝིནཡསངྒཧེ ཀརིཡམཱནེ ནིདཱནཝཙནཾ ཝུཏྟཾ, ནནུ བྷགཝཏཱ བྷཱསིཏཝཙནསྶེཝ སངྒཧོ ཀཱཏབྦོཏི? ཝུཙྩཏེ – དེསནཱཡ ཋིཏིཨསམྨོསསདྡྷེཡྻབྷཱཝསམྤཱདནཏྠཾ. ཀཱལདེསདེསཀཝཏྠུཔརིསཱཔདེསེཧི ཨུཔནིབནྡྷིཏྭཱ ཋཔིཏཱ ཧི དེསནཱ ཙིརཊྛིཏིཀཱ ཧོཏི, ཨསམྨོསདྷམྨཱ, སདྡྷེཡྻཱ ཙ དེསཀཱལཝཏྠུཧེཏུནིམིཏྟེཧི ཨུཔནིབནྡྷོ ཝིཡ ཝོཧཱརཝིནིཙྪཡོ, ཏེནེཝ ཙཱཡསྨཏཱ མཧཱཀསྶཔེན ‘‘བྲཧྨཛཱལཾ ཨཱཝུསོ ཨཱནནྡ ཀཏྠ བྷཱསིཏ’’ནྟིཨཱདིནཱ (ཙཱུལ༹ཝ. ༤༣༩) དེསཱདིཔུཙྪཱསུ ཀཏཱསུ ཏཱསཾ ཝིསྶཛྫནཾ ¶ ཀརོནྟེན དྷམྨབྷཎྜཱགཱརིཀེན ཨཱཡསྨཏཱ ཨཱནནྡཏྠེརེན ནིདཱནཾ བྷཱསིཏནྟི ཏདེཝིདྷཱཔི ཝུཏྟཾ ‘‘ཀཱལདེསདེསཀཝཏྠུཔརིསཱཔདེསཔཊིམཎྜིཏཾ ནིདཱན’’ནྟི.

ཨཔིཙ སཏྠུསམྤཏྟིཔཀཱསནཏྠཾ ནིདཱནཝཙནཾ. ཏཐཱགཏསྶ ཧི བྷགཝཏོ པུབྦ-རཙནཱ-ནུམཱནཱགམ-ཏཀྐཱབྷཱཝཏོ སམྨཱསམྦུདྡྷཏྟསིདྡྷི. སམྨཱསམྦུདྡྷབྷཱཝེན ཧིསྶ པུརེཏརཾ རཙནཱཡ, ‘‘ཨེཝམྤི ནཱམ བྷཝེཡྻཱ’’ཏི ཨནུམཱནསྶ, ཨཱགམནྟརཾ ནིསྶཱཡ པརིཝིཏཀྐསྶ ཙ ཨབྷཱཝོ སབྦཏྠ ཨཔྤཊིཧཏཉཱཎཙཱརཏཱཡ ཨེཀཔྤམཱཎཏྟཱ ཉེཡྻདྷམྨེསུ. ཏཐཱ ཨཱཙརིཡམུཊྛིདྷམྨམཙྪརིཡསཱསནསཱཝཀཱནུརོདྷབྷཱཝཏོ ཁཱིཎཱསཝཏྟསིདྡྷི. ཁཱིཎཱསཝཏཱཡ ཧི ཨཱཙརིཡམུཊྛིཨཱདཱིནམབྷཱཝོ, ཝིསུདྡྷཱ ཙ པརཱནུགྒཧཔྤཝཏྟི. ཨིཏི དེསཀསཾཀིལེསབྷཱུཏཱནཾ དིཊྛིསཱིལསམྤཏྟིདཱུསཀཱནཾ ཨཝིཛྫཱཏཎྷཱནཾ ཨབྷཱཝསཾསཱུཙཀེཧི ¶ , ཉཱཎཔྤཧཱནསམྤདཱབྷིབྱཉྫནཀེཧི ཙ སམྦུདྡྷཝིསུདྡྷབྷཱཝེཧི པུརིམཝེསཱརཛྫདྭཡསིདྡྷི. ཏཏོཡེཝ ཙ ཨནྟརཱཡིཀནིཡྻཱནིཀེསུ སམྨོཧཱབྷཱཝསིདྡྷིཏོ པཙྪིམཝེསཱརཛྫདྭཡསིདྡྷཱིཏི བྷགཝཏོ ཙཏུཝེསཱརཛྫསམནྣཱགམོ, ཨཏྟཧིཏཔརཧིཏཔཊིཔཏྟི ཙ ནིདཱནཝཙནེན པཀཱསིཏཱ ཧོཏི སམྤཏྟཔརིསཱཡ ཨཛ྄ཛྷཱསཡཱནུརཱུཔཾ ཋཱནུཔྤཏྟིཀཔཊིབྷཱནེན དྷམྨདེསནཱདཱིཔནཏོ, ‘‘ཛཱནཏཱ པསྶཏཱ’’ཏིཨཱདིཝཙནཏོ ཙ, ཏེན ཝུཏྟཾ ‘‘སཏྠུསམྤཏྟིཔཀཱསནཏྠཾ ནིདཱནཝཙན’’ནྟི.

ཨཔིཙ སཱསནསམྤཏྟིཔཀཱསནཏྠཾ ནིདཱནཝཙནཾ. ཉཱཎཀརུཎཱཔརིགྒཧིཏསབྦཀིརིཡསྶ ཧི བྷགཝཏོ ནཏྠི ནིརཏྠིཀཱ པཝཏྟི, ཨཏྟཧིཏཏྠཱ ཝཱ, ཏསྨཱ པརེསཾཡེཝ ཧིཏཱཡ པཝཏྟསབྦཀིརིཡསྶ སམྨཱསམྦུདྡྷསྶ སཀལམྤི ཀཱཡཝཙཱིམནོཀམྨཾ ཡཐཱཔཝཏྟཾ ཝུཙྩམཱནཾ དིཊྛདྷམྨིཀསམྤརཱཡིཀཔརམཏྠེཧི ཡཐཱརཧཾ སཏྟཱནཾ ཨནུསཱསནཊྛེན སཱསནཾ, ན ཀབྦརཙནཱ. ཏཡིདཾ སཏྠུ ཙརིཏཾ ཀཱལདེསདེསཀཝཏྠུཔརིསཱཔདེསེཧི སདྡྷིཾ ཏཏྠ ཏཏྠ ནིདཱནཝཙནེཧི ཡཐཱསམྦྷཝཾ པཀཱསཱིཡཏི. ཨཐ ཝཱ སཏྠུནོ པམཱཎབྷཱཝཔྤཀཱསནེན སཱསནསྶ པམཱཎབྷཱཝཔྤཀཱསནཏྠཾ ནིདཱནཝཙནཾ, ཏཉྩསྶ པམཱཎབྷཱཝདསྶནཾ ‘‘བྷགཝཱ’’ཏི ཨིམིནཱ ཏཐཱགཏསྶ གུཎཝིསིཊྛསབྦསཏྟུཏྟམབྷཱཝདཱིཔནེན ཙེཝ ‘‘ཛཱནཏཱ པསྶཏཱ’’ཏིཨཱདིནཱ ཨཱསཡཱནུསཡཉཱཎཱདིཔཡོགདཱིཔནེན ཙ ཝིབྷཱཝིཏཾ ཧོཏི, ཨིདམེཏྠ ནིདཱནཝཙནཔཡོཛནསྶ མུཁམཏྟནིདསྶནཾ. ཀོ ཧི སམཏྠོ བུདྡྷཱནུབུདྡྷེན དྷམྨབྷཎྜཱགཱརིཀེན བྷཱསིཏསྶ ནིདཱནསྶ པཡོཛནཱནི ནིརཝསེསཏོ ཝིབྷཱཝིཏུནྟི. ཧོནྟི ཙེཏྠ –

‘‘དེསནཱཙིརཊྛིཏཏྠཾ, ཨསམྨོསཱཡ བྷཱསིཏཾ;

སདྡྷཱཡ ཙཱཔི ནིདཱནཾ, ཝེདེཧེན ཡསསྶིནཱ.

སཏྠུསམྤཏྟིཡཱ ¶ ཙེཝ, སཱསནསམྤདཱཡ ཙ;

ཏསྶ པམཱཎབྷཱཝསྶ, དསྶནཏྠམྤི བྷཱསིཏ’’ནྟི.

ཨིཏི སུམངྒལཝིལཱསིནིཡཱ དཱིགྷནིཀཱཡཊྛཀཐཱཡ པརམསུཁུམགམྦྷཱིརདུརནུབོདྷཏྠཔརིདཱིཔནཱཡ སུཝིམལཝིཔུལཔཉྙཱཝེཡྻཏྟིཡཛནནཱཡ ཨཛྫཝམདྡཝསོརཙྩསདྡྷཱསཏིདྷིཏིབུདྡྷིཁནྟིཝཱིརིཡཱདིདྷམྨསམངྒིནཱ སཱཊྛཀཐེ པིཊཀཏྟཡེ ཨསངྒཱསཾཧཱིརཝིསཱརདཉཱཎཙཱརིནཱ ཨནེཀཔྤབྷེདསཀསམཡསམཡནྟརགཧནཛ྄ཛྷོགཱཧིནཱ མཧཱགཎིནཱ མཧཱཝེཡྻཱཀརཎེན ཉཱཎཱབྷིཝཾསདྷམྨསེནཱཔཏིནཱམཐེརེན ¶ མཧཱདྷམྨརཱཛཱདྷིརཱཛགརུནཱ ཀཏཱཡ སཱདྷུཝིལཱསིནིཡཱ ནཱམ ལཱིནཏྠཔཀཱསནིཡཱ ཨབྦྷནྟརནིདཱནཝཎྞནཱཡ ལཱིནཏྠཔཀཱསནཱ.

ནིདཱནཝཎྞནཱ ནིཊྛིཏཱ.

༥. ཨེཝཾ ཨབྦྷནྟརནིདཱནསཾཝཎྞནཾ ཀཏྭཱ ཨིདཱནི ཡཐཱནིཀྑིཏྟསྶ སུཏྟསྶ སཾཝཎྞནཾ ཀརོནྟོ ཨནུཔུབྦཱཝིརོདྷིནཱི སཾཝཎྞནཱ ཀམཱནཏིཀྐམནེན བྱཱཀུལདོསཔྤཧཱཡིནཱི, ཝིཉྙཱུནཉྩ ཙིཏྟཱརཱདྷིནཱི, ཨཱགཏབྷཱརོ ཙ ཨཝསྶཾ ཨཱཝཧིཏབྦོཏི སཾཝཎྞཀསྶ སམྤཏྟབྷཱརཱཝཧནེན པཎྜིཏཱཙཱརསམཏིཀྐམཱབྷཱཝཝིབྷཱཝིནཱི, ཏསྨཱ ཏདཱཝིཀརཎསཱདྷཀཾ སཾཝཎྞནོཀཱསཝིཙཱརཎཾ ཀཱཏུམཱཧ ‘‘ཨིདཱནཱི’’ཏིཨཱདི. ནིཀྑིཏྟསྶཱཏི དེསིཏསྶ, ‘‘དེསནཱ ནིཀྑེཔོ’’ཏི ཧི ཨེཏཾ ཨཏྠཏོ བྷིནྣམྤི སརཱུཔཏོ ཨེཀམེཝ, དེསནཱཔི ཧི དེསེཏབྦསྶ སཱིལཱདིཨཏྠསྶ ཝེནེཡྻསནྟཱནེསུ ནིཀྑིཔནཏོ ‘‘ནིཀྑེཔོ’’ཏི ཝུཙྩཏི. ནནུ སུཏྟམེཝ སཾཝཎྞཱིཡཏཱིཏི ཨཱཧ ‘‘སཱ པནེསཱ’’ཏིཨཱདི. ཨིདཾ ཝུཏྟཾ ཧོཏི – སུཏྟནིཀྑེཔཾ ཝིཙཱརེཏྭཱ ཝུཙྩམཱནཱ སཾཝཎྞནཱ ‘‘ཨཡཾ དེསནཱ ཨེཝཾསམུཊྛཱནཱ’’ཏི སུཏྟསྶ སམྨདེཝ ནིདཱནཔརིཛ྄ཛྷཱནེན ཏབྦཎྞནཱཡ སུཝིཉྙེཡྻཏྟཱ པཱཀཊཱ ཧོཏི, ཏསྨཱ ཏདེཝ སཱདྷཱརཎཏོ པཋམཾ ཝིཙཱརཡིསྶཱམཱཏི. ཡཱ ཧི སཱ ཀཐཱ སུཏྟཏྠསཾཝཎྞནཱཔཱཀཊཀཱརིནཱི, སཱ སབྦཱཔི སཾཝཎྞཀེན ཝཏྟབྦཱ. ཏདཏྠཝིཛཱནནུཔཱཡཏྟཱ ཙ སཱ པརིཡཱཡེན སཾཝཎྞནཱཡེཝཱཏི. ཨིདྷ པན ཏསྨིཾ ཝིཙཱརིཏེ ཡསྶཱ ཨཊྛུཔྤཏྟིཡཱ ཨིདཾ སུཏྟཾ ནིཀྑིཏྟཾ, ཏསྶཱ ཝིབྷཱགཝསེན ‘‘མམཾ ཝཱ བྷིཀྑཝེ’’ཏིཨཱདིནཱ (དཱི. ནི. ༡.༥), ‘‘ཨཔྤམཏྟཀཾ ཁོ པནེཏ’’ནྟིཨཱདིནཱ (དཱི. ནི. ༡.༧), ‘‘ཨཏྠི བྷིཀྑཝེ’’ཏིཨཱདིནཱ (དཱི. ནི. ༡.༢༨) ཙ ཝུཏྟཱནཾ སུཏྟཔདེསཱནཾ སཾཝཎྞནཱ ཝུཙྩམཱནཱ ཏཾཏཾཨནུསནྡྷིདསྶནསུཁཏཱཡ སུཝིཉྙེཡྻཱཏི དཊྛབྦཾ. ཏཏྠ ཡཐཱ ཨནེཀསཏཨནེཀསཧསྶབྷེདཱནིཔི སུཏྟནྟཱནི སཾཀིལེསབྷཱགིཡཱདིསཱསནཔཊྛཱནནཡེན སོལ༹སཝིདྷབྷཱཝཾ ནཱཏིཝཏྟནྟི, ཨེཝཾ ཨཏྟཛ྄ཛྷཱསཡཱདི-སུཏྟ-ནིཀྑེཔཝསེན ཙཏུབྦིདྷབྷཱཝནྟི ཨཱཧ ‘‘ཙཏྟཱརོ སུཏྟནིཀྑེཔཱ’’ཏི. ནནུ སཾསགྒབྷེདོཔི ¶ སམྦྷཝཏི, ཨཐ ཀསྨཱ ‘‘ཙཏྟཱརོ སུཏྟནིཀྑེཔཱ’’ཏི ཝུཏྟནྟི? སཾསགྒབྷེདསྶ སབྦཏྠ ཨལབྦྷམཱནཏྟཱ. ཨཏྟཛ྄ཛྷཱསཡསྶ, ཧི ཨཊྛུཔྤཏྟིཡཱ ཙ པརཛ྄ཛྷཱསཡཔུཙྪཱཝསིཀེཧི སདྡྷིཾ སཾསགྒབྷེདོ སམྦྷཝཏི. ‘‘ཨཏྟཛ྄ཛྷཱསཡོ ¶ ཙ པརཛ྄ཛྷཱསཡོ ཙ, ཨཏྟཛ྄ཛྷཱསཡོ ཙ པུཙྪཱཝསིཀོ ཙ, ཨཏྟཛ྄ཛྷཱསཡོ ཙ པརཛ྄ཛྷཱསཡོ ཙ པུཙྪཱཝསིཀོ ཙ, ཨཊྛུཔྤཏྟིཀོ ཙ པརཛ྄ཛྷཱསཡོ ཙ ཨཊྛུཔྤཏྟིཀོ ཙ པུཙྪཱཝསིཀོ ཙ, ཨཊྛུཔྤཏྟིཀོ ཙ པརཛ྄ཛྷཱསཡོ ཙ པུཙྪཱཝསིཀོ ཙཱ’’ཏི ཨཛ྄ཛྷཱསཡཔུཙྪཱནུསནྡྷིསབྦྷཱཝཏོ. ཨཏྟཛ྄ཛྷཱསཡཊྛུཔྤཏྟཱིནཾ པན ཨཉྙམཉྙཾ སཾསགྒོ ནཏྠི, ཏསྨཱ ནིརཝསེསཾ པཏྠཱརནཡེན སཾསགྒབྷེདསྶ ཨལབྦྷནཏོ ཨེཝཾ ཝུཏྟནྟི དཊྛབྦཾ.

ཨཐ ཝཱ ཨཊྛུཔྤཏྟིཡཱ ཨཏྟཛ྄ཛྷཱསཡེནཔི སིཡཱ སཾསགྒབྷེདོ, ཏདནྟོགདྷཏྟཱ པན སཾསགྒཝསེན ཝུཏྟཱནཾ སེསནིཀྑེཔཱནཾ མཱུལནིཀྑེཔེཡེཝ སནྡྷཱཡ ‘‘ཙཏྟཱརོ སུཏྟནིཀྑེཔཱ’’ཏི ཝུཏྟཾ. ཨིམསྨིཾ པན ཨཏྠཝིཀཔྤེ ཡཐཱརཧཾ ཨེཀཀདུཀཏིཀཙཏུཀཝསེན སཱསནཔཊྛཱནནཡེན སུཏྟནིཀྑེཔཱ ཝཏྟབྦཱཏི ནཡམཏྟཾ དསྶེཏཱིཏི ཝེདིཏབྦཾ. ཏཏྲཱཡཾ ཝཙནཏྠོ – ནིཀྑིཔནཾ ཀཐནཾ ནིཀྑེཔོ, སུཏྟསྶ ནིཀྑེཔོ སུཏྟནིཀྑེཔོ, སུཏྟདེསནཱཏི ཨཏྠོ. ནིཀྑིཔཱིཡཏཱིཏི ཝཱ ནིཀྑེཔོ, སུཏྟམེཝ ནིཀྑེཔོ སུཏྟནིཀྑེཔོ. ཨཏྟནོ ཨཛ྄ཛྷཱསཡོ ཨཏྟཛ྄ཛྷཱསཡོ, སོ ཨསྶ ཨཏྠི ཀཱརཎཝསེནཱཏི ཨཏྟཛ྄ཛྷཱསཡོ, ཨཏྟནོ ཨཛ྄ཛྷཱསཡོ ཝཱ ཨེཏསྶ ཡཐཱཝུཏྟནཡེནཱཏི ཨཏྟཛ྄ཛྷཱསཡོ. པརཛ྄ཛྷཱསཡེཔི ཨེསེཝ ནཡོ. པུཙྪཱཡ ཝསོ པུཙྪཱཝསོ, སོ ཨེཏསྶ ཨཏྠི ཡཐཱཝུཏྟནཡེནཱཏི པུཙྪཱཝསིཀོ. ཨརཎཱིཡཏོ ཨཝགནྟབྦཏོ ཨཏྠོ ཝུཙྩཏི སུཏྟདེསནཱཡ ཝཏྠུ, ཏསྶ ཨུཔྤཏྟི ཨཏྠུཔྤཏྟི, སཱ ཨེཝ ཨཊྛུཔྤཏྟི ཏྠ-ཀཱརསྶ ཊྛ-ཀཱརཾ ཀཏྭཱ, སཱ ཨེཏསྶ ཨཏྠི ཝུཏྟནཡེནཱཏི ཨཊྛུཔྤཏྟིཀོ. ཨཔིཙ ནིཀྑིཔཱིཡཏི སུཏྟམེཏེནཱཏི ནིཀྑེཔོ, ཨཏྟཛ྄ཛྷཱསཡཱདིསུཏྟདེསནཱཀཱརཎམེཝ. ཨེཏསྨིཾ པན ཨཏྠཝིཀཔྤེ ཨཏྟནོ ཨཛ྄ཛྷཱསཡོ ཨཏྟཛ྄ཛྷཱསཡོ. པརེསཾ ཨཛ྄ཛྷཱསཡོ པརཛ྄ཛྷཱསཡོ. པུཙྪཱིཡཏཱིཏི པུཙྪཱ, པུཙྪིཏབྦོ ཨཏྠོ. ཏསྶཱ པུཙྪཱཡ ཝསེན པཝཏྟཾ དྷམྨཔཊིགྒཱཧཀཱནཾ ཝཙནཾ པུཙྪཱཝསིཀཾ. ཏདེཝ ནིཀྑེཔསདྡཱཔེཀྑཱཡ པུལླིངྒཝསེན ཝུཏྟཾ ‘‘པུཙྪཱཝསིཀོ’’ཏི. ཝུཏྟནཡེན ཨཊྛུཔྤཏྟིཡེཝ ཨཊྛུཔྤཏྟིཀོཏི ཨེཝཾ ཨཏྠོ དཊྛབྦོ.

ཨེཏྠ ཙ པརེསཾ ཨིནྡྲིཡཔརིཔཱཀཱདིཀཱརཎཾ ནིརཔེཀྑིཏྭཱ ཨཏྟནོ ཨཛ྄ཛྷཱསཡེནེཝ དྷམྨཏནྟིཋཔནཏྠཾ པཝཏྟིཏདེསནཏྟཱ ཨཏྟཛ྄ཛྷཱསཡསྶ ཝིསུཾ ནིཀྑེཔབྷཱཝོ ཡུཏྟོ. ཏེནེཝ ཝཀྑཏི ‘‘ཨཏྟནོ ཨཛ྄ཛྷཱསཡེནེཝ ¶ ཀཐེཏཱི’’ཏི (དཱི. ནི. ཨཊྛ. ༡.༥). པརཛ྄ཛྷཱསཡཔུཙྪཱཝསིཀཱནཾ པན པརེསཾ ཨཛ྄ཛྷཱསཡཔུཙྪཱནཾ དེསནཱནིམིཏྟབྷཱུཏཱནཾ ཨུཔྤཏྟིཡཾ པཝཏྟཏྟཱ ཀཐཾ ཨཊྛུཔྤཏྟིཀེ ཨནཝརོདྷོ སིཡཱ, པུཙྪཱཝསིཀཊྛུཔྤཏྟིཀཱནཾ ཝཱ པརཛ྄ཛྷཱསཡཱནུརོདྷེན པཝཏྟིཏདེསནཏྟཱ ཀཐཾ པརཛ྄ཛྷཱསཡེ ¶ ཨནཝརོདྷོ སིཡཱཏི ན ཙོདེཏབྦམེཏཾ. པརེསཉྷི ཨབྷིནཱིཧཱརཔརིཔུཙྪཱདིཝིནིམུཏྟསྶེཝ སུཏྟདེསནཱཀཱརཎུཔྤཱདསྶ ཨཊྛུཔྤཏྟིཝསེན གཧིཏཏྟཱ པརཛ྄ཛྷཱསཡཔུཙྪཱཝསིཀཱནཾ ཝིསུཾ གཧཎཾ. ཏཐཱ ཧི དྷམྨདཱཡཱདསུཏྟཱདཱིནཾ (མ. ནི. ༡.༢༩) ཨཱམིསུཔྤཱདཱདིདེསནཱནིམིཏྟཾ ‘‘ཨཊྛུཔྤཏྟཱི’’ཏི ཝུཙྩཏི. པརེསཾ པུཙྪཾ ཝིནཱ ཨཛ྄ཛྷཱསཡམེཝ ནིམིཏྟཾ ཀཏྭཱ དེསིཏོ པརཛ྄ཛྷཱསཡོ. པུཙྪཱཝསེན དེསིཏོ པུཙྪཱཝསིཀོཏི པཱཀཊོཝཱཡམཏྠོ.

ཨནཛ྄ཛྷིཊྛོཏི པུཙྪཱདིནཱ ཨནཛ྄ཛྷེསིཏོ ཨཡཱཙིཏོ, ཨཏྟནོ ཨཛ྄ཛྷཱསཡེནེཝ ཀཐེཏི དྷམྨཏནྟིཋཔནཏྠནྟི ཨདྷིཔྤཱཡོ. ཧཱརོཏི ཨཱཝལི༹ ཡཐཱ ‘‘མུཏྟཱཧཱརོ’’ཏི, སྭེཝ ཧཱརཀོ, སམྨཔྤདྷཱནསུཏྟནྟཱནཾ ཧཱརཀོ ཏཐཱ. ཨནུཔུབྦེན ཧི སཾཡུཏྟཀེ ནིདྡིཊྛཱནཾ སམྨཔྤདྷཱནཔཊིསཾཡུཏྟཱནཾ སུཏྟནྟཱནཾ ཨཱཝལི༹ ‘‘སམྨཔྤདྷཱནསུཏྟནྟཧཱརཀོ’’ཏི ཝུཙྩཏི, ཏཐཱ ཨིདྡྷིཔཱདཧཱརཀཱདི. ཨིདྡྷིཔཱདཨིནྡྲིཡབལབོཛ྄ཛྷངྒམགྒངྒསུཏྟནྟཧཱརཀོཏི པུབྦཔདེསུ པརཔདལོཔོ, དྭནྡགབྦྷསམཱསོ ཝཱ ཨེསོ, པེཡྻཱལནིདྡེསོ ཝཱ. ཏེསནྟི ཡཐཱཝུཏྟསུཏྟཱནཾ.

པརིཔཀྐཱཏི པརིཎཏཱ. ཝིམུཏྟིཔརིཔཱཙནཱིཡཱཏི ཨརཧཏྟཕལཾ པརིཔཱཙེནྟཱ སདྡྷིནྡྲིཡཱདཡོ དྷམྨཱ. ཁཡེཏི ཁཡནཏྠཾ, ཁཡཀཱརཎབྷཱུཏཱཡ ཝཱ དྷམྨདེསནཱཡ. ཨཛ྄ཛྷཱསཡནྟི ཨདྷིམུཏྟིཾ. ཁནྟིནྟི དིཊྛིནིཛ྄ཛྷཱནཀྑནྟིཾ. མནནྟི ཙིཏྟཾ. ཨབྷིནཱིཧཱརནྟི པཎིདྷཱནཾ. བུཛ྄ཛྷནབྷཱཝནྟི བུཛ྄ཛྷནསབྷཱཝཾ, བུཛ྄ཛྷནཱཀཱརཾ ཝཱ. ཨཝེཀྑིཏྭཱཏི པཙྩཝེཀྑིཏྭཱ, ཨཔེཀྑིཏྭཱ ཝཱ.

ཙཏྟཱརོ ཝཎྞཱཏི ཙཏྟཱརི ཀུལཱནི, ཙཏྟཱརོ ཝཱ རཱུཔཱདིཔམཱཎཱ སཏྟཱ. མཧཱརཱཛཱནོཏི ཙཏྟཱརོ མཧཱརཱཛཱནོ དེཝཱ. ཝུཙྩནྟི ཀིཾ, པཉྩུཔཱདཱནཀྑནྡྷཱ ཀིནྟི ཨཏྠོ.

ཀསྨཱཏི ཨཱཧ ‘‘ཨཊྛུཔྤཏྟིཡཾ ཧཱི’’ཏིཨཱདི. ཝཎྞཱཝཎྞེཏི ནིམིཏྟེ བྷུམྨཾ, ཝཎྞསདྡེན ཙེཏྠ ‘‘ཨཙྪརིཡཾ ཨཱཝུསོ’’ཏིཨཱདིནཱ (དཱི. ནི. ༡.༤) བྷིཀྑུསངྒྷེན ཝུཏྟོཔི ཝཎྞོ སངྒཧིཏོ. ཏམྤི ཧི ཨཊྛུཔྤཏྟིཾ ཀཏྭཱ ‘‘ཨཏྠི བྷིཀྑཝེ ཨཉྙེ ¶ དྷམྨཱ’’ཏིཨཱདིནཱ (དཱི. ནི. ༡.༢༨) ཨུཔརི དེསནཾ ཨཱརབྷིསྶཏི. ཏདེཝ ཝིཝརཏི ‘‘ཨཱཙརིཡོ’’ཏིཨཱདིནཱ. ‘‘མམཾ ཝཱ བྷིཀྑཝེ, པརེ ཝཎྞཾ བྷཱསེཡྻུ’’ནྟི ཨིམིསྶཱ དེསནཱཡ བྲཧྨདཏྟེན ཝུཏྟཾ ཝཎྞཾ ཨཊྛུཔྤཏྟིཾ ཀཏྭཱ དེསིཏཏྟཱ ཨཱཧ ‘‘ཨནྟེཝཱསཱི ཝཎྞ’’ནྟི. ཨིདཱནི པཱལི༹ཡཱ སམྦནྡྷཾ དསྶེཏུཾ ‘‘ཨིཏཱི’’ཏིཨཱདི ཝུཏྟཾ. དེསནཱཀུསལོཏི ‘‘ཨིམིསྶཱ ཨཊྛུཔྤཏྟིཡཱ ཨཡཾ དེསནཱ སམྦྷཝཏཱི’’ཏི དེསནཱཡ ཀུསལོ, ཨེཏེན པཀརཎཱནུགུཎཾ བྷགཝཏོ ཐོམནམཀཱསི. ཨེསཱ ཧི སཾཝཎྞནཀཱནཾ པཀཏི, ཡདིདཾ ཏཏྠ ཏཏྠ པཀརཎཱདྷིགཏགུཎེན བྷགཝཏོ ཐོམནཱ. ཝཱ-སདྡོ ཙེཏྠ ཨུཔམཱནསམུཙྩཡསཾསཡཝཙནཝོསྶགྒཔདཔཱུརཎསདིསཝིཀཔྤཱདཱིསུ ¶ བཧཱུསྭཏྠེསུ དིསྶཏི. ཏཐཱ ཧེས ‘‘པཎྜིཏོཝཱཔི ཏེན སོ’’ཏིཨཱདཱིསུ ཨུཔམཱནེ དིསྶཏི, སདིསབྷཱཝེཏི ཨཏྠོ. ‘‘ཏཾ ཝཱཔི དྷཱིརཱ མུནིཾ པཝེདཡནྟཱི’’ཏིཨཱདཱིསུ (སུ. ནི.༢༡༣) སམུཙྩཡེ. ‘‘ཀེ ཝཱ ཨིམེ ཀསྶ ཝཱ’’ཏིཨཱདཱིསུ (པཱརཱ. ༢༩༦) སཾསཡེ. ‘‘ཨཡཾ ཝཱ (ཨཡཉྩ) (དཱི. ནི. ༡.༡༨༡) ཨིམེསཾ སམཎབྲཱཧྨཎཱནཾ སབྦབཱལོ སབྦམཱུལ༹ྷོ’’ཏིཨཱདཱིསུ (དཱི. ནི. ༡.༡༨༡) ཝཙནཝོསྶགྒེ. ‘‘ན ཝཱཡཾ ཀུམཱརཀོ མཏྟམཉྙཱསཱི’’ཏིཨཱདཱིསུ (སཾ. ནི. ༢.༡༥༤) པདཔཱུརཎེ. ‘‘མདྷུཾ ཝཱ མཉྙཏི བཱལོ, ཡཱཝ པཱཔཾ ན པཙྩཏཱི’’ཏིཨཱདཱིསུ (དྷ. པ. ༦༩) སདིསེ. ‘‘ཡེ ཧི ཀེཙི བྷིཀྑཝེ, སམཎཱ ཝཱ བྲཱཧྨཎཱ ཝཱ’’ཏིཨཱདཱིསུ (མ. ནི. ༡.༡༧༠; སཾ. ནི. ༥.༡༠༩༢) ཝིཀཔྤེ. ཨིདྷཱཔི ཝིཀཔྤེཡེཝ. མམ ཝཱ དྷམྨསྶ ཝཱ སངྒྷསྶ ཝཱཏི ཝིཝིདྷཱ ཝིསུཾ ཝིཀཔྤནསྶ ཛོཏཀཏྟཱཏི ཨཱཧ ‘‘ཝཱ-སདྡོ ཝིཀཔྤནཏྠོ’’ཏི. པར-སདྡོ པན ཨཏྠེཝ ཨཉྙཏྠོ ‘‘ཨཧཉྩེཝ ཁོ པན དྷམྨཾ དེསེཡྻཾ, པརེ ཙ མེ ན ཨཱཛཱནེཡྻུ’’ནྟིཨཱདཱིསུ (དཱི. ནི. ༢.༦༤; མ. ནི. ༡.༢༨༡; ༢.༣༣༧; མཧཱཝ. ༧, ༨) ཨཏྠི ཨདྷིཀཏྠོ ‘‘ཨིནྡྲིཡཔརོཔརིཡཏྟ’’ནྟིཨཱདཱིསུ (ཝིབྷ. ༨༡༤; ཨ. ནི. ༡༠.༢༡; མ. ནི. ༡.༡༤༨; པཊི. མ. ༡.༦༨; ༡.༡༡༡) ཨཏྠི པཙྪཱབྷཱགཏྠོ ‘‘པརཏོ ཨཱགམིསྶཏཱི’’ཏིཨཱདཱིསུ. ཨཏྠི པཙྩནཱིཀཏྠོ ‘‘ཨུཔྤནྣཾ པརཔྤཝཱདཾ སཧདྷམྨེན སུནིགྒཧིཏཾ ནིགྒཧེཏྭཱ’’ཏིཨཱདཱིསུ (དཱི. ནི. ༢.༡༦༨; སཾ. ནི. ༥.༨༢༢; ཨ. ནི. ༨.༧༠; ཨུདཱ. ༥༡) ཨིདྷཱཔི པཙྩནཱིཀཏྠོཏི དསྶེཏི ‘‘པཊིཝིརུདྡྷཱ སཏྟཱ’’ཏི ཨིམིནཱ. སཱསནསྶ པཙྩནཱིཀབྷཱུཏཱ པཙྩཏྠིཀཱ སཏྟཱཏི ཨཏྠོ. ཏ-སདྡོ པརེཏི ཝུཏྟམཏྠཾ ཨཝཎྞབྷཱསནཀིརིཡཱཝིསིཊྛཾ པརཱམསཏཱིཏི ཝུཏྟཾ ‘‘ཡེ ཨཝཎྞཾ ཝདནྟི, ཏེསཱུ’’ཏི.

ནནུ ¶ ཏེསཾ ཨཱགྷཱཏོ ནཏྠི �