📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

དཱིགྷནིཀཱཡེ

སཱིལཀྑནྡྷཝགྒཨབྷིནཝཊཱིཀཱ

(དུཏིཡོ བྷཱགོ)

༢. སཱམཉྙཕལསུཏྟཝཎྞནཱ

རཱཛཱམཙྩཀཐཱཝཎྞནཱ

༡༥༠. ཨིདཱནི ¶ ¶ སཱམཉྙཕལསུཏྟསྶ སཾཝཎྞནཱཀྐམོ ཨནུཔྤཏྟོཏི དསྶེཏུཾ ‘‘ཨེཝཾ…པེ… སུཏྟ’’ནྟིཨཱདིམཱཧ. ཏཏྠ ཨནུཔུབྦཔདཝཎྞནཱཏི ཨནུཀྐམེན པདཝཎྞནཱ, པདཾ པདཾ པཏི ཨནུཀྐམེན ཝཎྞནཱཏི ཝུཏྟཾ ཧོཏི. པུབྦེ ཝུཏྟཉྷི, ཨུཏྟཱནཾ ཝཱ པདམཉྙཏྲ ཝཎྞནཱཔི ‘‘ཨནུཔུབྦཔདཝཎྞནཱ’’ ཏྭེཝ ཝུཙྩཏི. ཨེཝཉྩ ཀཏྭཱ ‘‘ཨཔུབྦཔདཝཎྞནཱ’’ཏིཔི པཋནྟི, པུབྦེ ཨཝཎྞིཏཔདཝཎྞནཱཏི ཨཏྠོ. དུགྒཛནཔདཊྛཱནཝིསེསསམྤདཱདིཡོགཏོ པདྷཱནབྷཱཝེན རཱཛཱུཧི གཧིཏཊྛེན ཨེཝཾནཱམཀཾ, ན པན ནཱམམཏྟེནཱཏི ཨཱཧ ‘‘ཏཉྷཱི’’ཏིཨཱདི. ནནུ ¶ མཧཱཝགྒེ མཧཱགོཝིནྡསུཏྟེ ཨཱགཏོ ཨེས པུརོཧིཏོ ཨེཝ, ན རཱཛཱ, ཀསྨཱ སོ རཱཛསདྡཝཙནཱིཡབྷཱཝེན གཧིཏོཏི? མཧཱགོཝིནྡེན པུརོཧིཏེན པརིགྒཧིཏམྤི ཙེཏཾ རེཎུནཱ ནཱམ མགདྷརཱཛེན པརིགྒཧིཏམེཝཱཏི ཨཏྠསམྦྷཝཏོ ཨེཝཾ ཝུཏྟཾ, ན པན སོ རཱཛསདྡཝཙནཱིཡབྷཱཝེན གཧིཏོ ཏསྶ རཱཛཱབྷཱཝཏོ. མཧཱགོཝིནྡཔརིགྒཧིཏབྷཱཝཀིཏྟནཉྷི ཏདཱ རེཎུརཉྙཱ པརིགྒཧིཏབྷཱཝཱུཔལཀྑཎཾ. སོ ཧི ཏསྶ སབྦཀིཙྩཀཱརཀོ པུརོཧིཏོ, ཨིདམྤི ཙ ལོཀེ སམུདཱཙིཎྞཾ ¶ ‘‘རཱཛཀམྨཔསུཏེན ཀཏམྤི རཉྙཱ ཀཏ’’ནྟི. ཨིདཾ ཝུཏྟཾ ཧོཏི – མནྡྷཱཏུརཉྙཱ ཙེཝ མཧཱགོཝིནྡཾ བོདྷིསཏྟཾ པུརོཧིཏམཱཎཱཔེཏྭཱ རེཎུརཉྙཱ ཙ ཨཉྙེཧི ཙ རཱཛཱུཧི པརིགྒཧིཏཏྟཱ རཱཛགཧནྟི. ཀེཙི པན ‘‘མཧཱགོཝིནྡོ’’ཏི མཧཱནུབྷཱཝོ ཨེཀོ པུརཱཏནོ རཱཛཱཏི ཝདནྟི. པརིགྒཧིཏཏྟཱཏི རཱཛདྷཱནཱིབྷཱཝེན པརིགྒཧིཏཏྟཱ. གཡ྄ཧཏཱིཏི ཧི གཧཾ, རཱཛཱུནཾ, རཱཛཱུཧི ཝཱ གཧནྟི རཱཛགཧཾ. ནགརསདྡཱཔེཀྑཱཡ ནཔུཾསཀནིདྡེསོ.

ཨཉྙེཔེཏྠ པཀཱརེཏི ནགརམཱཔནེན རཉྙཱ ཀཱརིཏསབྦགེཧཏྟཱ རཱཛགཧཾ, གིཛ྄ཛྷཀཱུཊཱདཱིཧི པཉྩཧི པབྦཏེཧི པརིཀྑིཏྟཏྟཱ པབྦཏརཱཛེཧི པརིཀྑིཏྟགེཧསདིསནྟིཔི རཱཛགཧཾ, སམྤནྣབྷཝནཏཱཡ རཱཛམཱནཾ གེཧནྟིཔི རཱཛགཧཾ, སུསཾཝིཧིཏཱརཀྑཏཱཡ ཨནཏྠཱཝཧིཏུཀཱམེན ཨུཔགཏཱནཾ པཊིརཱཛཱུནཾ གཧཾ གཧཎབྷཱུཏནྟིཔི རཱཛགཧཾ, རཱཛཱུཧི དིསྭཱ སམྨཱ པཏིཊྛཱཔིཏཏྟཱ ཏེསཾ གཧཾ གེཧབྷཱུཏནྟིཔི རཱཛགཧཾ, ཨཱརཱམརཱམཎེཡྻཏཱདཱིཧི རཱཛཏི, ནིཝཱསསུཁཏཱདིནཱ ཙ སཏྟེཧི མམཏྟཝསེན གཡ྄ཧཏི པརིགྒཡ྄ཧཏཱིཏིཔི རཱཛགཧནྟི ཨེདིསེ པཀཱརེ. ནཱམམཏྟམེཝ པུབྦེ ཝུཏྟནཡེནཱཏི ཨཏྠོ. སོ པན པདེསོ ཝིསེསཊྛཱནབྷཱཝེན ཨུལཱ༹རསཏྟཔརིབྷོགོཏི ཨཱཧ ‘‘ཏཾ པནེཏ’’ནྟིཨཱདི. ཏཏྠ ‘‘བུདྡྷཀཱལེ, ཙཀྐཝཏྟིཀཱལེ ཙཱ’’ཏི ཨིདཾ ཡེབྷུཡྻཝསེན ཝུཏྟཾ ཨཉྙདཱཔི ཀདཱཙི སམྦྷཝཏོ, ‘‘ནགརཾ ཧོཏཱི’’ཏི ཙ ཨིདཾ ཨུཔལཀྑཎམེཝ མནུསྶཱཝཱསསྶེཝ ཨསམྦྷཝཏོ. ཏཐཱ ཧི ཝུཏྟཾ ‘‘སེསཀཱལེ སུཉྙཾ ཧོཏཱི’’ཏིཨཱདི. ཏེསནྟི ཡཀྑཱནཾ. ཝསནཝནནྟི ཨཱཔཱནབྷཱུམིབྷཱུཏཾ ཨུཔཝནཾ.

ཨཝིསེསེནཱཏི ཝིཧཱརབྷཱཝསཱམཉྙེན, སདྡནྟརསནྣིདྷཱནསིདྡྷཾ ཝིསེསཔརཱམསནམནྟརེནཱཏི ཨཏྠོ. ཨིདཾ ཝུཏྟཾ ཧོཏི – ‘‘པཱཏིམོཀྑསཾཝརསཾཝུཏོ ཝིཧརཏི, (ཨ. ནི. ༥.༡༠༡; པཱཙི. ༡༤༧; པརི. ༤༤༡) པཋམཾ ཛྷཱནཾ ཨུཔསམྤཛྫ ཝིཧརཏི, (དྷ. ས. ༡༦༠) མེཏྟཱསཧགཏེན ཙེཏསཱ ཨེཀཾ དིསཾ ཕརིཏྭཱ ཝིཧརཏི, (དཱི. ནི. ༣.༧༡, ༣༠༨; མ. ནི. ༡.༧༧, ༤༥༩, ༥༠༩; ༢.༣༠༩, ༣༡༥; ༣.༢༣༠; ཝིབྷ. ༦༤༢) སབྦནིམིཏྟཱནཾ ཨམནསིཀཱརཱ ཨནིམིཏྟཾ ཙེཏོསམཱདྷིཾ ཨུཔསམྤཛྫ ཝིཧརཏཱི’’ཏིཨཱདཱིསུ (མ. ནི. ༡.༤༥༩) སདྡནྟརསནྣིདྷཱནསིདྡྷེན ཝིསེསཔརཱམསནེན ཡཐཱཀྐམཾ ཨིརིཡཱཔཐཝིཧཱརཱདིཝིསེསཝིཧཱརསམངྒཱིཔརིདཱིཔནཾ ¶ ¶ , ན ཨེཝམིདཾ, ཨིདཾ པན ཏཐཱ ཝིསེསཔརཱམསནམནྟརེན ཨཉྙཏརཝིཧཱརསམངྒཱིཔརིདཱིཔནནྟི.

སཏིཔི ཙ ཝུཏྟནཡེན ཨཉྙཏརཝིཧཱརསམངྒཱིཔརིདཱིཔནེ ཨིདྷ ཨིརིཡཱཔཐསངྑཱཏཝིསེསཝིཧཱརསམངྒཱིཔརིདཱིཔནམེཝ སམྦྷཝཏཱིཏི དསྶེཏི ‘‘ཨིདྷ པནཱ’’ཏིཨཱདིནཱ. ཀསྨཱ པན སདྡནྟརསནྣིདྷཱནསིདྡྷསྶ ཝིསེསཔརཱམསནསྶཱབྷཱཝེཔི ཨིདྷ ཝིསེསཝིཧཱརསམངྒཱིཔརིདཱིཔནཾ སམྦྷཝཏཱིཏི? ཝིསེསཝིཧཱརསམངྒཱིཔརིདཱིཔནསྶ སདྡནྟརསངྑཱཏཝིསེསཝཙནསྶ ཨབྷཱཝཏོ ཨེཝ. ཝིསེསཝཙནེ ཧི ཨསཏི ཝིསེསམིཙྪཏཱ ཝིསེསོ པཡོཛིཏབྦོཏི. ཨཔིཙ ཨིརིཡཱཔཐསམཱཡོགཔརིདཱིཔནསྶ ཨཏྠཏོ སིདྡྷཏྟཱ ཏཐཱདཱིཔནམེཝ སམྦྷཝཏཱིཏི. ཀསྨཱ ཙཱཡམཏྠོ སིདྡྷོཏི? དིབྦཝིཧཱརཱདཱིནམྤི སཱདྷཱརཎཏོ. ཀདཱཙིཔི ཧི ཨིརིཡཱཔཐཝིཧཱརེན ཝིནཱ ན བྷཝཏི ཏམནྟརེན ཨཏྟབྷཱཝཔརིཧརཎཱབྷཱཝཏོཏི.

ཨིརིཡནཾ པཝཏྟནཾ ཨིརིཡཱ, ཀཱཡིཀཀིརིཡཱ, ཏསྶཱ པཝཏྟནུཔཱཡབྷཱཝཏོ པཐོཏི ཨིརིཡཱཔཐོ, ཋཱནནིསཛྫཱདཡོ. ན ཧི ཋཱནནིསཛྫཱདིཨཝཏྠཱཧི ཝིནཱ ཀཉྩི ཀཱཡིཀཾ ཀིརིཡཾ པཝཏྟེཏུཾ སཀྐཱ, ཏསྨཱ སོ ཏཱཡ པཝཏྟནུཔཱཡོཏི ཝུཙྩཏི. ཝིཧརཏི པཝཏྟཏི ཨེཏེན, ཝིཧརཎམཏྟཾ ཝཱ ཏནྟི ཝིཧཱརོ, སོ ཨེཝ ཝིཧཱརོ ཏཐཱ, ཨཏྠཏོ པནེས ཋཱནནིསཛྫཱདིཨཱཀཱརཔྤཝཏྟོ ཙཏུསནྟཏིརཱུཔཔྤབནྡྷོཝ. དིཝི བྷཝོ དིབྦོ, ཏཏྠ བཧུལཾ པཝཏྟིཡཱ བྲཧྨཔཱརིསཛྫཱདིདེཝལོཀེ བྷཝོཏི ཨཏྠོ, ཡོ ཝཱ ཏཏྠ དིབྦཱནུབྷཱཝོ, ཏདཏྠཱཡ སཾཝཏྟཏཱིཏི དིབྦོ, ཨབྷིཉྙཱབྷིནཱིཧཱརཱདིཝསེན ཝཱ མཧཱགཏིཀཏྟཱ དིབྦོ, སོཝ ཝིཧཱརོ, དིབྦབྷཱཝཱཝཧོ ཝཱ ཝིཧཱརོ དིབྦཝིཧཱརོ, མཧགྒཏཛ྄ཛྷཱནཱནི. ནེཏྟིཡཾ [ནེཏྟི. ༨༦ (ཨཏྠཏོ སམཱནཾ)] པན ཙཏསྶོ ཨཱརུཔྤསམཱཔཏྟིཡོ ཨཱནེཉྫཝིཧཱརཱཏི ཝིསུཾ ཝུཏྟཾ, ཏཾ པན མེཏྟཱཛ྄ཛྷཱནཱདཱིནཾ བྲཧྨཝིཧཱརཏཱ ཝིཡ ཏཱསཾ བྷཱཝནཱཝིསེསབྷཱཝཾ སནྡྷཱཡ ཝུཏྟཾ. ཨཊྛཀཐཱསུ པན དིབྦབྷཱཝཱཝཧསཱམཉྙཏོ ཏཱཔི ‘‘དིབྦཝིཧཱརཱ’’ ཏྭེཝ ཝུཏྟཱ. བྲཧྨཱནཾ, བྲཧྨབྷཱུཏཱ ཝཱ ཧིཏཱུཔསཾཧཱརཱདིཝསེན པཝཏྟིཡཱ སེཊྛབྷཱུཏཱ ཝིཧཱརཱཏི བྲཧྨཝིཧཱརཱ, མེཏྟཱཛ྄ཛྷཱནཱདིཝསེན པཝཏྟཱ ཙཏསྶོ ཨཔྤམཉྙཱཡོ. ཨརིཡཱ ཨུཏྟམཱ, ཨནཉྙསཱདྷཱརཎཏྟཱ ཝཱ ཨརིཡཱནཾ ཝིཧཱརཱཏི ཨརིཡཝིཧཱརཱ, ཙཏསྶོཔི ཕལསམཱཔཏྟིཡོ. ཨིདྷ པན རཱུཔཱཝཙརཙཏུཏྠཛ྄ཛྷཱནཾ, ཏབྦསེན པཝཏྟཱ ཨཔྤམཉྙཱཡོ ¶ , ཙཏུཏྠཛ྄ཛྷཱནིཀཨགྒཕལསམཱཔཏྟི ཙ བྷགཝཏོ དིབྦབྲཧྨཨརིཡཝིཧཱརཱ.

ཨཉྙཏརཝིཧཱརསམངྒཱིཔརིདཱིཔནནྟི ཏཱསམེཀཏོ ཨཔྤཝཏྟཏྟཱ ཨེཀེན ཝཱ དྭཱིཧི ཝཱ སམངྒཱིབྷཱཝཔརིདཱིཔནཾ, བྷཱཝལོཔེནཱཡཾ བྷཱཝཔྤདྷཱནེན ཝཱ ནིདྡེསོ. བྷགཝཱ ཧི ལོབྷདོསམོཧུསྶནྣེ ལོཀེ ¶ སཀཔཊིཔཏྟིཡཱ ཝེནེཡྻཱནཾ ཝིནཡནཏྠཾ ཏཾ ཏཾ ཝིཧཱརེ ཨུཔསམྤཛྫ ཝིཧརཏི. ཏཐཱ ཧི ཡདཱ སཏྟཱ ཀཱམེསུ ཝིཔྤཊིཔཛྫནྟི, ཏདཱ ཀིར བྷགཝཱ དིབྦེན ཝིཧཱརེན ཝིཧརཏི ཏེསཾ ཨལོབྷཀུསལམཱུལུཔྤཱདནཏྠཾ ‘‘ཨཔྤེཝ ནཱམ ཨིམཾ པཊིཔཏྟིཾ དིསྭཱ ཨེཏྠ རུཙིམུཔྤཱདེཏྭཱ ཀཱམེསུ ཝིརཛྫེཡྻུ’’ནྟི. ཡདཱ པན ཨིསྶརིཡཏྠཾ སཏྟེསུ ཝིཔྤཊིཔཛྫནྟི, ཏདཱ བྲཧྨཝིཧཱརེན ཝིཧརཏི ཏེསཾ ཨདོསཀུསལམཱུལུཔྤཱདནཏྠཾ ‘‘ཨཔྤེཝ ནཱམ ཨིམཾ པཊིཔཏྟིཾ དིསྭཱ ཨེཏྠ རུཙིམུཔྤཱདེཏྭཱ ཨདོསེན དོསཾ ཝཱུཔསམེཡྻུ’’ནྟི. ཡདཱ པན པབྦཛིཏཱ དྷམྨཱདྷིཀརཎཾ ཝིཝདནྟི, ཏདཱ ཨརིཡཝིཧཱརེན ཝིཧརཏི ཏེསཾ ཨམོཧཀུསལམཱུལུཔྤཱདནཏྠཾ ‘‘ཨཔྤེཝ ནཱམ ཨིམཾ པཊིཔཏྟིཾ དིསྭཱ ཨེཏྠ རུཙིམུཔྤཱདེཏྭཱ ཨམོཧེན མོཧཾ ཝཱུཔསམེཡྻུ’’ནྟི. ཨེཝཉྩ ཀཏྭཱ ཨིམེཧི དིབྦབྲཧྨཨརིཡཝིཧཱརེཧི སཏྟཱནཾ ཝིཝིདྷཾ ཧིཏསུཁཾ ཧརཏི, ཨིརིཡཱཔཐཝིཧཱརེན ཙ ཨེཀཾ ཨིརིཡཱཔཐབཱདྷནཾ ཨཉྙེན ཨིརིཡཱཔཐེན ཝིཙྪིནྡིཏྭཱ ཨཔརིཔཏནྟཾ ཨཏྟབྷཱཝཾ ཧརཏཱིཏི ཝུཏྟཾ ‘‘ཨཉྙཏརཝིཧཱརསམངྒཱིཔརིདཱིཔན’’ནྟི.

‘‘ཏེནཱ’’ཏིཨཱདི ཡཐཱཝུཏྟསཾཝཎྞནཱཡ གུཎདསྶནཾ, ཏསྨཱཏི ཨཏྠོ, ཡཐཱཝུཏྟཏྠསམཏྠནཾ ཝཱ. ཏེན ཨིརིཡཱཔཐཝིཧཱརེན ཝིཧརཏཱིཏི སམྦནྡྷོ. ཏཐཱ ཝདམཱནོ པན ཝིཧརཏཱིཏི ཨེཏྠ ཝི-སདྡོ ཝིཙྪེདནཏྠཛོཏཀོ, ‘‘ཧརཏཱི’’ཏི ཨེཏསྶ ཙ ནེཏི པཝཏྟེཏཱིཏི ཨཏྠོཏི ཉཱཔེཏི ‘‘ཋིཏོཔཱི’’ཏིཨཱདིནཱ ཝིཙྪེདནཡནཱཀཱརེན ཝུཏྟཏྟཱ. ཨེཝཉྷི སཏི ཏཏྠ ཀསྶ ཀེན ཝིཙྪིནྡནཾ, ཀཐཾ ཀསྶ ནཡནནྟི ཨནྟོལཱིནཙོདནཾ སནྡྷཱཡཱཧ. ‘‘སོ ཧཱི’’ཏིཨཱདཱིཏི ཨཡམྤི སམྦནྡྷོ ཨུཔཔནྣོ ཧོཏི. ཡདིཔི བྷགཝཱ ཨེཀེནེཝ ཨིརིཡཱཔཐེན ཙིརཏརཾ ཀཱལཾ པཝཏྟེཏུཾ སཀྐོཏི, ཏཐཱཔི ཨུཔཱདིནྣཀསྶ ནཱམ སརཱིརསྶ ཨཡཾ སབྷཱཝོཏི དསྶེཏུཾ ‘‘ཨེཀཾ ཨིརིཡཱཔཐབཱདྷན’’ནྟིཨཱདི ཝུཏྟཾ. ཨཔརིཔཏནྟནྟི བྷཱཝནཔུཾསཀནིདྡེསོ, ཨཔཏམཱནཾ ཀཏྭཱཏི ཨཏྠོ. ཡསྨཱ པན བྷགཝཱ ཡཏྠ ཀཏྠཙི ཝསནྟོ ཝེནེཡྻཱནཾ དྷམྨཾ དེསེནྟོ, ནཱནཱསམཱཔཏྟཱིཧི ཙ ཀཱལཾ ¶ ཝཱིཏིནཱམེནྟོ ཝསཏི, སཏྟཱནཾ, ཨཏྟནོ ཙ ཝིཝིདྷཾ སུཁཾ ཧརཏི, ཏསྨཱ ཝིཝིདྷཾ ཧརཏཱིཏི ཝིཧརཏཱིཏི ཨེཝམྤེཏྠ ཨཏྠོ ཝེདིཏབྦོ.

གོཙརགཱམནིདསྶནཏྠཾ ‘‘རཱཛགཧེ’’ཏི ཝཏྭཱ བུདྡྷཱནམནུརཱུཔནིཝཱསཊྛཱནདསྶནཏྠཾ པུན ‘‘ཨམྦཝནེ’’ཏི ཝུཏྟནྟི དསྶེནྟོ ‘‘ཨིདམསྶཱ’’ཏིཨཱདིམཱཧ. ཨསྶཱཏི བྷགཝཏོ. ཏསྶཱཏི རཱཛགཧསངྑཱཏསྶ གོཙརགཱམསྶ. ཡསྶ སམཱིཔཝསེན ‘‘རཱཛགཧེ’’ཏི བྷུམྨཝཙནཾ པཝཏྟཏི, སོཔི ཏསྶ སམཱིཔཝསེན ཝཏྟབྦོཏི དསྶེཏི ‘‘རཱཛགཧསམཱིཔེ ཨམྦཝནེ’’ཏི ཨིམིནཱ. སམཱིཔཏྠེཏི ཨམྦཝནསྶ སམཱིཔཏྠེ. ཨེཏནྟི ‘‘རཱཛགཧེ’’ཏི ཝཙནཾ. བྷུམྨཝཙནནྟི ཨཱདྷཱརཝཙནཾ. བྷཝནྟི ཨེཏྠཱཏི ཧི བྷུམྨཾ, ཨཱདྷཱརོ, ཏདེཝ ཝཙནཾ ཏཐཱ, བྷུམྨེ པཝཏྟཾ ཝཱ ཝཙནཾ ཝིབྷཏྟི བྷུམྨཝཙནཾ ¶ , ཏེན ཡུཏྟཾ ཏཐཱ, སཏྟམཱིཝིབྷཏྟིཡུཏྟཔདནྟི ཨཏྠོ. ཨིདཾ ཝུཏྟཾ ཧོཏི – ཀཱམཾ བྷགཝཱ ཨམྦཝནེཡེཝ ཝིཧརཏི. ཏསྶམཱིཔཏྟཱ པན གོཙརགཱམདསྶནཏྠཾ བྷུམྨཝཙནཝསེན ‘‘རཱཛགཧེ’’ཏིཔི ཝུཏྟཾ ཡཐཱ ཏཾ ‘‘གངྒཱཡཾ གཱཝོ ཙརནྟི, ཀཱུཔེ གགྒཀུལ’’ནྟི ཙཱཏི. ཨནེནེཝ ཡདི བྷགཝཱ རཱཛགཧེ ཝིཧརཏི, ཨཐ ན ཝཏྟབྦཾ ‘‘ཨམྦཝནེ’’ཏི. ཡདི ཙ ཨམྦཝནེ, ཨེཝམྤི ན ཝཏྟབྦཾ ‘‘རཱཛགཧེ’’ཏི. ན ཧི ‘‘པཱཊལིཔུཏྟེ པཱསཱདེ ཝསཏཱི’’ཏིཨཱདཱིསུ ཝིཡ ཨིདྷ ཨདྷིཀརཎཱདྷིཀརཎསྶ ཨབྷཱཝཏོ ཨདྷིཀརཎསྶ དྭཡནིདྡེསོ ཡུཏྟོ སིཡཱཏི ཙོདནཱ ཨནཝཀཱསཱ ཀཏཱཏི དཊྛབྦཾ. ཀུམཱརབྷཏོ ཨེཝ ཀོམཱརབྷཙྩོ སཀཏྠཝུཏྟིཔཙྩཡེན, ནིརུཏྟིནཡེན ཝཱ ཡཐཱ ‘‘བྷིསགྒམེཝ བྷེསཛྫ’’ནྟི. ‘‘ཡཐཱཧཱ’’ཏིཨཱདིནཱ ཁནྡྷཀཔཱལི༹ཝསེན ཏདཏྠཾ སཱདྷེཏི. ཀསྨཱ ཙ ཨམྦཝནཾ ཛཱིཝཀསམྦནྡྷཾ ཀཏྭཱ ཝུཏྟནྟི ཨནུཡོགེན མཱུལཏོ པཊྛཱཡ ཏམཏྠཾ དསྶེནྟོ ‘‘ཨཡཾ པནཱ’’ཏིཨཱདིམཱཧ.

དོསཱབྷིསནྣནྟི ཝཱཏཔིཏྟཱདིཝསེན ཨུསྶནྣདོསཾ. ཝིརེཙེཏྭཱཏི དོསཔྤཀོཔཏོ ཝིཝེཙེཏྭཱ. སིཝེཡྻཀཾ དུསྶཡུགནྟི སིཝིརཊྛེ ཛཱཏཾ མཧགྒྷཾ དུསྶཡུགཾ. དིཝསསྶ དྭཏྟིཀྑཏྟུནྟི ཨེཀསྶེཝ དིཝསསྶ དྭིཝཱརེ ཝཱ ཏིཝཱརེ ཝཱ བྷཱགེ, བྷུམྨཏྠེ ཝཱ ཨེཏཾ སཱམིཝཙནཾ, ཨེཀསྨིཾཡེཝ དིཝསེ དྭིཝཱརཾ ཝཱ ཏིཝཱརཾ ཝཱཏི ཨཏྠོ. ཏམྦཔཊྚཝཎྞེནཱཏི ཏམྦལོཧཔཊྚཝཎྞེན. སཙཱིཝརབྷཏྟེནཱཏི ཙཱིཝརེན, བྷཏྟེན ཙ. ‘‘ཏཾ སནྡྷཱཡཱ’’ཏི ཨིམིནཱ ན བྷགཝཱ ཨམྦཝནམཏྟེཡེཝ ཝིཧརཏི, ཨཐ ཁོ ཨེཝཾ ཀཏེ ཝིཧཱརེ. སོ པན ཏདདྷིཀརཎཏཱཡ ཝིསུཾ ཨདྷིཀརཎབྷཱཝེན ན ཝུཏྟོཏི སནྡྷཱཡབྷཱསིཏམཏྠཾ ¶ དསྶེཏི. སཱམཉྙེ ཧི སཏི སནྡྷཱཡབྷཱསིཏནིདྡྷཱརཎཾ.

ཨཌྜྷེན ཏེལ༹ས ཨཌྜྷཏེལ༹ས. ཏཱདིསེཧི བྷིཀྑུསཏེཧི. ཨཌྜྷོ པནེཏྠ སཏསྶེཝ. ཡེན ཧི པཡུཏྟོ ཏབྦྷཱགཝཱཙཀོ ཨཌྜྷསདྡོ, སོ ཙ ཁོ པཎྞཱསཱཝ, ཏསྨཱ པཉྙཱསཱཡ ཨཱུནཱནི ཏེལ༹ས བྷིཀྑུསཏཱནཱིཏི ཨཏྠཾ ཝིཉྙཱཔེཏུཾ ‘‘ཨཌྜྷསཏེནཱ’’ཏིཨཱདི ཝུཏྟཾ. ཨཌྜྷམེཝ སཏཾ སཏསྶ ཝཱ ཨཌྜྷཾ ཏཐཱ.

རཱཛཏཱིཏི ཨཏྟནོ ཨིསྶརིཡསམྤཏྟིཡཱ དིབྦཏི སོབྷཏི ཙ. རཉྫེཏཱིཏི དཱནཱདིནཱ, སསྶམེདྷཱདིནཱ ཙ ཙཏཱུཧི སངྒཧཝཏྠཱུཧི རམེཏི, ཨཏྟནི ཝཱ རཱགཾ ཀརོཏཱིཏི ཨཏྠོ. ཙ-སདྡོ ཙེཏྠ ཝིཀཔྤནཏྠོ. ཛནཔདཝཱཙིནོ པུཐུཝཙནཔརཏྟཱ ‘‘མགདྷཱན’’ནྟི ཝུཏྟཾ, ཛནཔྤདཱཔདེསེན ཝཱ ཏབྦཱསིཀཱནཾ གཧིཏཏྟཱ. རཉྙོཏི པིཏུ བིམྦིསཱརརཉྙོ. སསཏི ཧིཾསཏཱིཏི སཏྟུ, ཝེརཱི, ཨཛཱཏོཡེཝ སཏྟུ ཨཛཱཏསཏྟུ. ‘‘ནེམིཏྟཀེཧི ནིདྡིཊྛོ’’ཏི ཝཙནེན ཙ ཨཛཱཏསྶ ཏསྶ སཏྟུབྷཱཝོ ན ཏཱཝ ཧོཏི, སཏྟུབྷཱཝསྶ པན ཏཐཱ ནིདྡིཊྛཏྟཱ ཨེཝཾ ཝོཧརཱིཡཏཱིཏི དསྶེཏི. ཨཛཱཏསྶེཝ ¶ པན ཏསྶ ‘‘རཉྙོ ལོཧིཏཾ པིཝེཡྻ’’ནྟི དེཝིཡཱ དོཧལ༹སྶ པཝཏྟཏྟཱ ཨཛཱཏོཡེཝེས རཉྙོ སཏྟཱུཏིཔི ཝདནྟི.

‘‘ཏསྨི’’ནྟིཨཱདིནཱ ཏདཏྠཾ ཝིཝརཏི, སམཏྠེཏི ཙ. དོཧལོ༹ཏི ཨབྷིལཱསོ. བྷཱརིཡེཏི གརུཀེ, ཨཉྙེསཾ ཨསཀྐུཎེཡྻེ ཝཱ. ཨསཀྐོནྟཱིཏི ཨསཀྐུཎམཱནཱ. ཨཀཐེནྟཱིཏི ཨཀཐཡམཱནཱ སམཱནཱ. ནིབནྡྷིཏྭཱཏི ཝཙསཱ བནྡྷིཏྭཱ. སུཝཎྞསཏྠཀེནཱཏི སུཝཎྞམཡེན སཏྠཀེན, གྷནསུཝཎྞཀཏེནཱཏི ཨཏྠོ. ཨཡོམཡཉྷི རཉྙོ སརཱིརཾ ཨུཔནེཏུཾ ཨཡུཏྟནྟི ཝདནྟི. སུཝཎྞཔརིཀྑཏེན ཝཱ ཨཡོམཡསཏྠེནཱཏི ཨཏྠེཔི ཨཡམེཝཱདྷིཔྤཱཡོ. བཱཧུཾ ཕཱལཱཔེཏྭཱཏི ལོཧིཏསིརཱཝེདྷཝསེན བཱཧུཾ ཕཱལཱཔེཏྭཱ. ཀེཝལསྶ ལོཧིཏསྶ གབྦྷིནིཡཱ དུཛྫཱིརབྷཱཝཏོ ཨུདཀེན སམྦྷིནྡིཏྭཱ པཱཡེསི. ཧཉྙིསྶཏཱིཏི ཧཉྙིསྶཏེ, ཨཱཡཏིཾ ཧནཱིཡཏེཏི ཨཏྠོ. ནེམིཏྟཀཱནཾ ཝཙནཾ ཏཐཾ ཝཱ སིཡཱ, ཝིཏཐཾ ཝཱཏི ཨདྷིཔྤཱཡེན ‘‘པུཏྟོཏི ཝཱ དྷཱིཏཱཏི ཝཱ ན པཉྙཱཡཏཱི’’ཏི ཝུཏྟཾ. ‘‘ཨཏྟནོ’’ཏིཨཱདིནཱ ཨཉྙམྤི ཀཱརཎཾ དསྶེཏྭཱ ནིཝཱརེསི. རཉྙོ བྷཱཝོ རཛྫཾ, རཛྫསྶ སམཱིཔེ པཝཏྟཏཱིཏི ཨོཔརཛྫཾ, ཋཱནནྟརཾ.

མཧཱཏི ¶ མཧཏཱི. སམཱསེ ཝིཡ ཧི ཝཱཀྱེཔི མཧནྟསདྡསྶ མཧཱདེསོ. དྷུརཱཏི གཎསྶ དྷུརབྷཱུཏཱ, དྷོརཡ྄ཧཱ ཛེཊྛཀཱཏི ཨཏྠོ. དྷུརཾ ནཱིཧརཱམཱིཏི གཎདྷུརམཱཝཧཱམི, གཎབནྡྷིཡཾ ནིབྦཏྟེསྶཱམཱིཏི ཝུཏྟཾ ཧོཏི. ‘‘སོ ན སཀྐཱ’’ཏིཨཱདིནཱ པུན ཙིནྟནཱཀཱརཾ དསྶེཏི. ཨིདྡྷིཔཱཊིཧཱརིཡེནཱཏི ཨཧིམེཁལིཀཀུམཱརཝཎྞཝིཀུབྦནིདྡྷིནཱ. ཏེནཱཏི ཨཔྤཱཡུཀབྷཱཝེན. ཧཱིཏི ནིཔཱཏམཏྟཾ. ཏེན ཧཱིཏི ཝཱ ཨུཡྻོཛནཏྠེ ནིཔཱཏོ. ཏེན ཝུཏྟཾ ‘‘ཀུམཱརཾ…པེ… ཨུཡྻོཛེསཱི’’ཏི. བུདྡྷོ བྷཝིསྶཱམཱིཏི ཨེཏྠ ཨིཏི-སདྡོ ཨིདམཏྠོ, ཨིམིནཱ ཁནྡྷཀེ ཨཱགཏནཡེནཱཏི ཨཏྠོ. པུབྦེ ཁོཏིཨཱདཱིཧིཔི ཁནྡྷཀཔཱལི༹ཡེཝ (ཙཱུལ༹ཝ. ༣༣༩).

པོཏྠནིཡནྟི ཚུརིཀཾ. ཡཾ ‘‘ནཁར’’ནྟིཔི ཝུཙྩཏི, དིཝཱ དིཝསེཏི (དཱི. ནི. ཊཱི. ༡.༡༥༠) དིཝསསྶཔི དིཝཱ. སཱམྱཏྠེ ཧེཏཾ བྷུམྨཝཙནཾ ‘‘དིཝཱ དིཝསསྶཱ’’ཏི ཨཉྙཏྠ དསྶནཏོ. དིཝསྶ དིཝསེཏིཔི ཝཊྚཏི ཨཀཱརནྟསྶཔི དིཝསདྡསྶ ཝིཛྫམཱནཏྟཱ. ནེཔཱཏིཀམྤི དིཝཱསདྡམིཙྪནྟི སདྡཝིདཱུ, མཛ྄ཛྷནྷིཀཝེལཱཡནྟི ཨཏྠོ. སཱ ཧི དིཝསསྶ ཝིསེསོ དིཝསོཏི. ‘‘བྷཱིཏོ’’ཏིཨཱདི པརིཡཱཡོ, ཀཱཡཐམྦྷནེན ཝཱ བྷཱིཏོ. ཧདཡམཾསཙལནེན ཨུབྦིགྒོ. ‘‘ཛཱནེཡྻུཾ ཝཱ, མཱ ཝཱ’’ཏི པརིསངྐཱཡ ཨུསྶངྐཱི. ཉཱཏེ སཏི ཨཏྟནོ ཨཱགཙྪམཱནབྷཡཝསེན ཨུཏྲསྟོ. ཝུཏྟཔྤཀཱརནྟི དེཝདཏྟེན ཝུཏྟཱཀཱརཾ ཝིཔྤཀཱརནྟི ཨཔཀཱརཾ ཨནུཔཀཱརཾ, ཝིཔརཱིཏཀིཙྩཾ ཝཱ. སབྦེ བྷིཀྑཱུཏི དེཝདཏྟཔརིསཾ སནྡྷཱཡཱཧ.

ཨཙྪིནྡིཏྭཱཏི ¶ ཨཔནཡནཝསེན ཝིལུམྤིཏྭཱ. རཛྫེནཱཏི ཝིཛིཏེན. ཨེཀསྶ རཉྙོ ཨཱཎཱཔཝཏྟིཊྛཱནཾ ‘‘རཛྫ’’ནྟི ཧི ཝུཏྟཾ, རཱཛབྷཱཝེན ཝཱ.

མནསོ ཨཏྠོ ཨིཙྪཱ མནོརཐོ ར-ཀཱརཱགམཾ, ཏ-ཀཱརལོཔཉྩ ཀཏྭཱ, ཙིཏྟསྶ ཝཱ ནཱནཱརམྨཎེསུ ཝིབྦྷམཀརཎཏོ མནསོ རཐོ ཨིཝ མནོརཐོ, མནོ ཨེཝ རཐོ ཝིཡཱཏི ཝཱ མནོརཐོཏིཔི ནེརུཏྟིཀཱ ཝདནྟི. སུཀིཙྩཀཱརིམྷཱིཏི སུཀིཙྩཀཱརཱི ཨམྷི. ཨཝམཱནནྟི ཨཝམཉྙནཾ ཨནཱདརཾ. མཱུལགྷཙྩནྟི ཛཱིཝིཏཱ ཝོརོཔནཾ སནྡྷཱཡཱཧ, བྷཱཝནཔུཾསཀམེཏཾ. རཱཛཀུལཱནཾ ཀིར སཏྠེན གྷཱཏནཾ རཱཛཱུནམནཱཙིཎྞཾ, ཏསྨཱ སོ ‘‘ནནུ བྷནྟེ’’ཏིཨཱདིམཱཧ. ཏཱཔནགེཧཾ ནཱམ ཨུཎྷགཧཱཔནགེཧཾ, ཏཾ པན དྷཱུམེནེཝ ཨཙྪིནྣཱ. ཏེན ཝུཏྟཾ ‘‘དྷཱུམགྷར’’ནྟི. ཀམྨཀརཎཏྠཱཡཱཏི ཏཱཔན ཀམྨཀརཎཏྠམེཝ. ཀེནཙི ཚཱདིཏཏྟཱ ཨུཙྩོ ཨངྒོཏི ཨུཙྩངྒོ ¶ , ཡསྶ ཀསྶཙི གཧཎཏྠཾ པཊིཙྪནྣོ ཨུནྣཏངྒོཏི ཨིདྷ ཨདྷིཔྤེཏོ. ཏེན ཝུཏྟཾ ‘‘ཨུཙྩངྒཾ ཀཏྭཱ པཝིསིཏུཾ མཱ དེཐཱ’’ཏི. ‘‘ཨུཙྪངྒེ ཀཏྭཱ’’ཏིཔི པཱཋོ, ཨེཝཾ སཏི མཛ྄ཛྷིམངྒོཝ, ཨུཙྪངྒེ ཀིཉྩི གཧེཏབྦཾ ཀཏྭཱཏི ཨཏྠོ. མོལི༹ཡནྟི ཙཱུལཱ༹ཡཾ ‘‘ཚེཏྭཱན མོལི༹ཾ ཝརགནྡྷཝཱསིཏ’’ནྟིཨཱདཱིསུ (མ. ནི. ཨཊྛ. ༢.༡; སཾ. ནི. ཨཊྛ. ༢.༢.༥༥; ཨཔ. ཨཊྛ. ༡.ཨཝིདཱུརེནིདཱནཀཐཱ; བུ. ཝཾ. ཨཊྛ. ༢༧.ཨཝིདཱུརེནིདཱནཀཐཱ; ཛཱ. ཨཊྛ. ༡.ཨཝིདཱུརེནིདཱནཀཐཱ) ཝིཡ. ཏེནཱཧ ‘‘མོལི༹ཾ བནྡྷིཏྭཱ’’ཏི. ཙཏུམདྷུརེནཱཏི སཔྤིསཀྐརམདྷུནཱལི༹ཀེརསྣེཧསངྑཱཏེཧི ཙཏཱུཧི མདྷུརེཧི ཨབྷིསངྑཏཔཱནཝིསེསེནཱཏི ཝདནྟི, ཏཾ མཧཱདྷམྨསམཱདཱནསུཏྟཔཱལི༹ཡཱ (མ. ནི. ༡.༤༧༣) ན སམེཏི. ཝུཏྟཉྷི ཏཏྠ ‘‘དདྷི ཙ མདྷུ ཙ སཔྤི ཙ ཕཱཎིཏཉྩ ཨེཀཛ྄ཛྷཾ སཾསཊྛ’’ནྟི, (མ. ནི. ༡.༤༨༥) ཏདཊྛཀཐཱཡཉྩ ཝུཏྟཾ ‘‘དདྷི ཙ མདྷུ ཙཱཏི སུཔརིསུདྡྷཾ དདྷི ཙ སུམདྷུརཾ མདྷུ ཙ. ཨེཀཛ྄ཛྷཾ སཾསཊྛནྟི ཨེཀཏོ ཀཏྭཱ མིསྶིཏཾ ཨཱལུལི༹ཏཾ. ཏསྶ ཏནྟི ཏསྶ ཏཾ ཙཏུམདྷུརབྷེསཛྫཾ པིཝཏོ’’ཏི ‘‘ཨཏྟུཔཀྐམེན མརཎཾ ན ཡུཏྟ’’ནྟི མནསི ཀཏྭཱ རཱཛཱ ཏསྶཱ སརཱིརཾ ལེཧིཏྭཱ ཡཱཔེཏི. ན ཧི ཨརིཡཱ ཨཏྟཱནཾ ཝིནིཔཱཏེནྟི.

མགྒཕལསུཁེནཱཏི མགྒཕལསུཁཝཏཱ, སོཏཱཔཏྟིམགྒཕལསུཁཱུཔསཉྷིཏེན ཙངྐམེན ཡཱཔེཏཱིཏི ཨཏྠོ. ཧཱརེསྶཱམཱིཏི ཨཔནེསྶཱམི. ཝཱིཏཙྩིཏེཧཱིཏི ཝིགཏཨཙྩིཏེཧི ཛཱལཝིགཏེཧི སུདྡྷངྒཱརེཧི. ཀེནཙི སཉྙཏྟོཏི ཀེནཙི སམྨཱ ཉཱཔིཏོ, ཨོཝདིཏོཏི ཝུཏྟཾ ཧོཏི. མསྶུཀརཎཏྠཱཡཱཏི མསྶུཝིསོདྷནཏྠཱཡ. མནཾ ཀརོཐཱཏི ཡཐཱ རཉྙོ མནཾ ཧོཏི, ཏཐཱ ཀརོཐ. པུབྦེཏི པུརིམབྷཝེ. ཙེཏིཡངྒཎེཏི གནྡྷཔུཔྥཱདཱིཧི པཱུཛནཊྛཱནབྷཱུཏེ ཙེཏིཡསྶ བྷཱུམིཏལེ. ནིསཛྫནཏྠཱཡཱཏི བྷིཀྑུསངྒྷསྶ ནིསཱིདནཏྠཱཡ. པཉྙཏྟཀཊསཱརཀནྟི པཉྙཔེཏབྦཨུཏྟམཀིལཉྫཾ. ཏཐཱཝིདྷོ ¶ ཀིལཉྫོ ཧི ‘‘ཀཊསཱརཀོ’’ཏི ཝུཙྩཏི. ཏསྶཱཏི ཡཐཱཝུཏྟསྶ ཀམྨདྭཡསྶ. ཏཾ པན མནོཔདོསཝསེནེཝ ཏེན ཀཏནྟི དཊྛབྦཾ. ཡཐཱཧ –

‘‘མནོཔུབྦངྒམཱ དྷམྨཱ, མནོསེཊྛཱ མནོམཡཱ;

མནསཱ ཙེ པདུཊྛེན, བྷཱསཏི ཝཱ ཀརོཏི ཝཱ;

ཏཏོ ནཾ དུཀྑམནྭེཏི, ཙཀྐཾཝ ཝཧཏོ པད’’ནྟི. (དྷ. པ. ༡; ནེཏྟི. ༩༠);

པརིཙཱརཀོཏི སཧཱཡཀོ. ཨབྷེདེཔི བྷེདམིཝ ཝོཧཱརོ ལོཀེ པཱཀཊོཏི ཝུཏྟཾ ‘‘ཡཀྑོ ཧུཏྭཱ ནིབྦཏྟཱི’’ཏི. ཨེཀཱཡཔི ཧི ཨུཔྤཱདཀིརིཡཱཡ ¶ ཨིདྷ བྷེདཝོཧཱརོ, པཊིསནྡྷིཝསེན ཧུཏྭཱ, པཝཏྟིཝསེན ནིབྦཏྟཱིཏི ཝཱ པཙྩེཀཾ ཡོཛེཏབྦཾ, པཊིསནྡྷིཝསེན ཝཱ པཝཏྟནསངྑཱཏཾ སཱཏིསཡནིབྦཏྟནཾ ཉཱཔེཏུཾ ཨེཀཱཡེཝ ཀིརིཡཱ པདདྭཡེན ཝུཏྟཱ. ཏཐཱཝཙནཉྷི པཊིསནྡྷིཝསེན ནིབྦཏྟནེཡེཝ དིསྶཏི ‘‘མཀྐཊཀོ ནཱམ དེཝཔུཏྟོ ཧུཏྭཱ ནིབྦཏྟི (དྷ. པ. ཨཊྛ. ༡.༥) ཀཎྚཀོ ནཱམ…པེ… ནིབྦཏྟི, (ཛཱ. ཨཊྛ. ༡.ཨཝིདཱུརེནིདཱནཀཐཱ) མཎྜཱུཀོ ནཱམ…པེ… ནིབྦཏྟཱི’’ཏིཨཱདཱིསུ ཝིཡ. དྭིནྣཾ ཝཱ པདཱནཾ བྷཱཝཏྠམཔེཀྑིཏྭཱ ‘‘ཡཀྑོ’’ཏིཨཱདཱིསུ སཱམིཨཏྠེ པཙྩཏྟཝཙནཾ ཀཏཾ པུརིམཱཡ པཙྪིམཝིསེསནཏོ, པརིཙཱརཀསྶ…པེ… ཡཀྑསྶ བྷཱཝེན ནིབྦཏྟཱིཏི ཨཏྠོ, ཧེཏྭཏྠེ ཝཱ ཨེཏྠ ཏྭཱ-སདྡོ ཡཀྑསྶ བྷཱཝཏོ པཝཏྟནཧེཏཱུཏི. ཨསྶ པན རཉྙོ མཧཱཔུཉྙསྶཔི སམཱནསྶ ཏཏྠ བཧུལཾ ནིབྦཏྟཔུབྦཏཱཡ ཙིརཔརིཙིཏནིཀནྟི ཝསེན ཏཏྠེཝ ནིབྦཏྟི ཝེདིཏབྦཱ.

ཏཾ དིཝསམེཝཱཏི རཉྙོ མརཎདིཝསེཡེཝ. ཁོབྷེཏྭཱཏི པུཏྟསྣེཧསྶ བལཝབྷཱཝཏོ, ཏཾསཧཛཱཏཔཱིཏི ཝེགསྶ ཙ སཝིཔྥཱརཏཱཡ ཏཾ སམུཊྛཱནརཱུཔདྷམྨེཧི ཕརཎཝསེན སཀལསརཱིརཾ ཨཱལོལེ༹ཏྭཱ. ཏེནཱཧ ‘‘ཨཊྛིམིཉྫཾ ཨཱཧཙྩ ཨཊྛཱསཱི’’ཏི. པིཏུགུཎནྟི པིཏུནོ ཨཏྟནི སིནེཧགུཎཾ. ཏེན ཝུཏྟཾ ‘‘མཡི ཛཱཏེཔཱི’’ཏིཨཱདི. ཝིསྶཛྫེཐ ཝིསྶཛྫེཐཱཏི ཏུརིཏཝསེན, སོཀཝསེན ཙ ཝུཏྟཾ.

ཨནུཊྛུབྷིཏྭཱཏི ཨཚཌྜེཏྭཱ.

ནཱལཱ༹གིརིཧཏྠིཾ མུཉྩཱཔེཏྭཱཏི ཨེཏྠ ཨིཏི-སདྡོ པཀཱརཏྠོ, ཏེན ‘‘ཨབྷིམཱརཀཔུརིསཔེསེནཱདིཔྤཀཱརེནཱ’’ཏི པུབྦེ ཝུཏྟཔྤཀཱརཏྟཡཾ པཙྩཱམསཏི, ཀཏྠཙི པན སོ ན ¶ དིཊྛོ. པཉྩ ཝཏྠཱུནཱིཏི ‘‘སཱདྷུ བྷནྟེ བྷིཀྑཱུ ཡཱཝཛཱིཝཾ ཨཱརཉྙིཀཱ ཨསྶཱུ’’ཏིཨཱདིནཱ (པཱརཱ. ༤༠༩; ཙཱུལ༹ཝ. ༣༤༣) ཝིནཡེ ཝུཏྟཱནི པཉྩ ཝཏྠཱུནི. ཡཱཙིཏྭཱཏི ཨེཏྠ ཡཱཙནཾ ཝིཡ ཀཏྭཱཏི ཨཏྠོ. ན ཧི སོ པཊིཔཛྫིཏུཀཱམོ ཡཱཙཏཱིཏི ཨཡམཏྠོ ཝིནཡེ (པཱརཱ. ཨཊྛ. ༢.༤༡༠) ཝུཏྟོཡེཝ. སཉྙཱཔེསྶཱམཱིཏི ཙིནྟེཏྭཱ སངྒྷབྷེདཾ ཀཏྭཱཏི སམྦནྡྷོ. ཨིདཉྩ ཏསྶ ཨནིཀྑིཏྟདྷུརཏཱདསྶནཝསེན ཝུཏྟཾ, སོ པན ཨཀཏེཔི སངྒྷབྷེདེ ཏེཧི སཉྙཱཔེཏིཡེཝ. ཨུཎྷལོཧིཏནྟི བལཝསོཀསམུཊྛིཏཾ ཨུཎྷབྷཱུཏཾ ལོཧིཏཾ. མཧཱནིརཡེཏི ཨཝཱིཙིནིརཡེ. ཝིཏྠཱརཀཐཱནཡོཏི ཨཛཱཏསཏྟུཔསཱདནཱདིཝསེན ཝིཏྠཱརཏོ ཝཏྟབྦཱཡ ཀཐཱཡ ནཡམཏྟཾ. ཀསྨཱ པནེཏྠ ¶ སཱ ན ཝུཏྟཱ, ནནུ སངྒཱིཏིཀཐཱ ཝིཡ ཁནྡྷཀེ (ཙཱུལ༹ཝ. ༣༤༣) ཨཱགཏཱཔི སཱ ཝཏྟབྦཱཏི ཙོདནཱཡ ཨཱཧ ‘‘ཨཱགཏཏྟཱ པན སབྦཾ ན ཝུཏྟ’’ནྟི, ཁནྡྷཀེ ཨཱགཏཏྟཱ, ཀིཉྩིམཏྟསྶ ཙ ཝཙནཀྐམསྶ ཝུཏྟཏྟཱ ན ཨེཏྠ ཀོཙི ཝིརོདྷོཏི ཨདྷིཔྤཱཡོ. ‘‘ཨེཝ’’ནྟིཨཱདི ཡཐཱནུསནྡྷིནཱ ནིགམནཾ.

ཀོསལརཉྙོཏི པསེནདིཀོསལསྶ པིཏུ མཧཱཀོསལརཉྙོ. ནནུ ཝིདེཧསྶ རཉྙོ དྷཱིཏཱ ཝེདེཧཱིཏི ཨཏྠོ སམྦྷཝཏཱིཏི ཙོདནམཔནེཏི ‘‘ན ཝིདེཧརཉྙོ’’ཏི ཨིམིནཱ. ཨཐ ཀེནཊྛེནཱཏི ཨཱཧ ‘‘པཎྜིཏཱདྷིཝཙནམེཏ’’ནྟི, པཎྜིཏཝེཝཙནཾ, པཎྜིཏནཱམནྟི ཝཱ ཨཏྠོ. ཨཡཾ པན པདཏྠོ ཀེན ནིབྦཙནེནཱཏི ཝུཏྟཾ ‘‘ཏཏྲཱཡ’’ནྟིཨཱདི. ཝིདནྟཱིཏི ཛཱནནྟི. ཝེདེནཱཏི ཀརཎབྷཱུཏེན ཉཱཎེན. ‘‘ཨཱིཧཏཱི’’ཏི ཨེཏསྶ པཝཏྟཏཱིཏིཔི ཨཏྠོ ཊཱིཀཱཡཾ ཝུཏྟོ. ཝེདེཧཱིཏི ཨིདྷ ནདཱདིགཎོཏི ཨཱཧ ‘‘ཝེདེཧིཡཱ’’ཏི.

སོཡེཝ ཨཧོ ཏདཧོ, སཏྟམཱིཝཙནེན པན ‘‘ཏདཧཱུ’’ཏི པདསིདྡྷི. ཨེཏྠཱཏི ཨེཏསྨིཾ དིཝསེ. ཨུཔསདྡེན ཝིསིཊྛོ ཝསསདྡོ ཨུཔཝསནེཡེཝ, ན ཝསནམཏྟེ, ཨུཔཝསནཉྩ སམཱདཱནམེཝཱཏི དསྶེཏུཾ ‘‘སཱིལེནཱ’’ཏིཨཱདི ཝུཏྟཾ. ཨེཏྠ ཙ སཱིལེནཱཏི སཱསནེ ཨརིཡུཔོསཐཾ སནྡྷཱཡ ཝུཏྟཾ. ཨནསནེནཱཏི ཨབྷུཉྫནམཏྟསངྑཱཏཾ བཱཧིརུཔོསཐཾ. ཝཱ-སདྡོ ཙེཏྠ ཨནིཡམཏྠོ, ཏེན ཨེཀཙྩཾ མནོདུཙྩརིཏཾ, དུསྶཱིལྱཱདིཉྩ སངྒཎྷཱཏི. ཏཐཱ ཧི གོཔཱལཀུཔོསཐོ ཨབྷིཛ྄ཛྷཱསཧགཏསྶ ཙིཏྟསྶ ཝསེན ཝུཏྟོ, ནིགཎྛུཔོསཐོ མོསཝཛྫཱདིཝསེན. ཡཐཱཧ ཝིསཱཁུཔོསཐེ ‘‘སོ ཏེན ཨབྷིཛ྄ཛྷཱསཧགཏེན ཙེཏསཱ དིཝསཾ ཨཏིནཱམེཏཱི’’ཏི, (ཨ. ནི. ༣.༧༡) ‘‘ཨིཏི ཡསྨིཾ སམཡེ སཙྩེ སམཱདཔེཏབྦཱ, མུསཱཝཱདེ ཏསྨིཾ སམཡེ སམཱདཔེཏཱི’’ཏི (ཨ. ནི. ༣.༧༡) ཙ ཨཱདི.

ཨེཝཾ ཨདྷིཔྤེཏཏྠཱནུརཱུཔཾ ནིབྦཙནཾ དསྶེཏྭཱ ཨིདཱནི ཨཏྠུདྡྷཱརཝསེན ནིབྦཙནཱནུརཱུཔཾ ཨདྷིཔྤེཏཏྠཾ ¶ དསྶེཏུཾ ‘‘ཨཡཾ པནཱ’’ཏིཨཱདིམཱཧ. ཨེཏྠཱཏི ཨུཔོསཐསདྡེ. སམཱནསདྡཝཙནཱིཡཱནཾ ཨནེཀཔྤབྷེདཱནཾ ཨཏྠཱནམུདྡྷརཎཾ ཨཏྠུདྡྷཱརོ སམཱནསདྡཝཙནཱིཡེསུ ཝཱ ཨཏྠེསུ ཨདྷིཔྤེཏསྶེཝ ཨཏྠསྶ ཨུདྡྷརཎཾ ཨཏྠུདྡྷཱརོཏིཔི ཝཊྚཏི. ཨནེཀཏྠདསྶནཉྷི ཨདྷིཔྤེཏཏྠསྶ ཨུདྡྷརཎཏྠམེཝ. ནནུ ཙ ‘‘ཨཏྠམཏྟཾ པཏི སདྡཱ ཨབྷིནིཝིསནྟཱི’’ཏིཨཱདིནཱ ཨཏྠུདྡྷཱརེ ¶ ཙོདནཱ, སོདྷནཱ ཙ ཧེཊྛཱ ཝུཏྟཱཡེཝ. ཨཔིཙ ཝིསེསསདྡསྶ ཨཝཱཙཀབྷཱཝཏོ པཱཏིམོཀྑུདྡེསཱདིཝིསཡོཔི ཨུཔོསཐསདྡོ སཱམཉྙརཱུཔོ ཨེཝ, ཨཐ ཀསྨཱ པཱཏིམོཀྑུདྡེསཱདིཝིསེསཝིསཡོ ཝུཏྟོཏི? སཙྩམེཏཾ, ཨཡཾ པནཏྠོ ཏཱདིསཾ སདྡསཱམཉྙམནཱདིཡིཏྭཱ ཏཏྠ ཏཏྠ སམྦྷཝཏྠདསྶནཝསེནེཝ ཝུཏྟོཏི, ཨེཝཾ སབྦཏྠ. སཱིལདིཊྛིཝསེན (སཱིལསུདྡྷིཝསེན དཱི. ནི. ཊཱི. ༡.༡༥༠) ཨུཔེཏེཧི སམགྒེཧི ཝསཱིཡཏི ན ཨུཊྛཱིཡཏཱིཏི ཨུཔོསཐོ, པཱཏིམོཀྑུདྡེསོ. སམཱདཱནཝསེན, ཨདྷིཊྛཱནཝསེན ཝཱ ཨུཔེཙྩ ཨརིཡཝཱསཱདིཨཏྠཱཡ ཝསིཏབྦོ ཨཱཝསིཏབྦོཏི ཨུཔོསཐོ, སཱིལཾ. ཨནསནཱདིཝསེན ཨུཔེཙྩ ཝསིཏབྦོ ཨནུཝསིཏབྦོཏི ཨུཔོསཐོ, ཝཏསམཱདཱནསངྑཱཏོ ཨུཔཝཱསོ. ནཝམཧཏྠིཀུལཔརིཡཱཔནྣེ ཧཏྠིནཱགེ ཀིཉྩི ཀིརིཡམནཔེཀྑིཏྭཱ ཏཾཀུལསམྦྷཱུཏཏཱམཏྟཾ པཏི རུལ༹ྷིཝསེནེཝ ཨུཔོསཐོཏི སམཉྙཱ, ཏསྨཱ ཏཏྠ ནཱམཔཉྙཏྟི ཝེདིཏབྦཱ. ཨརཡོ ཨུཔགནྟྭཱ ཨུསེཏི དཱཧེཏཱིཏི ཨུཔོསཐོ, ཨུསསདྡོ དཱཧེཏིཔི སདྡཝིདཱུ ཝདནྟི. དིཝསེ པན ཨུཔོསཐ སདྡཔཝཏྟི ཨཊྛཀཐཱཡཾ ཝུཏྟཱཡེཝ. ‘‘སུདྡྷསྶ ཝེ སདཱཕགྒཱུ’’ཏིཨཱདཱིསུ སུདྡྷསྶཱཏི སབྦསོ ཀིལེསམལཱབྷཱཝེན པརིསུདྡྷསྶ. ཝེཏི ནིཔཱཏམཏྟཾ, བྱཏྟནྟི ཝཱ ཨཏྠོ. སདཱཏི ནིཙྩཀཱལམྤི. ཕགྒཱུཏི ཕགྒུཎཱིནཀྑཏྟམེཝ ཡུཏྟཾ བྷཝཏི, ནིརུཏྟིནཡེན ཙེཏསྶ སིདྡྷི. ཡསྶ ཧི སུནྡརིཀབྷཱརདྭཱཛསྶ ནཱམ བྲཱཧྨཎསྶ ཕགྒུཎམཱསེ ཨུཏྟརཕགྒུཎཱིཡུཏྟདིཝསེ ཏིཏྠནྷཱནཾ ཀརོནྟསྶ སཾཝཙྪརམྤི ཀཏཔཱཔཔཝཱཧནཾ ཧོཏཱིཏི ལདྡྷི. ཏཏོ ཏཾ ཝིཝེཙེཏུཾ ཨིདཾ མཛ྄ཛྷིམཱགམཱཝརེ མཱུལཔཎྞཱསཀེ ཝཏྠསུཏྟེ བྷགཝཏཱ ཝུཏྟཾ. སུདྡྷསྶུཔོསཐོ སདཱཏི ཡཐཱཝུཏྟཀིལེསམལསུདྡྷིཡཱ པརིསུདྡྷསྶ ཨུཔོསཐངྒཱནི, ཝཏསམཱདཱནཱནི ཙ ཨསམཱདིཡཏོཔི ནིཙྩཀཱལཾ ཨུཔོསཐཝཱསོ ཨེཝ བྷཝཏཱིཏི ཨཏྠོ. ‘‘ན བྷིཀྑཝེ’’ཏིཨཱདཱིསུ ‘‘ཨབྷིཀྑུཀོ ཨཱཝཱསོ ན གནྟབྦོ’’ཏི ནཱིཧརིཏྭཱ སམྦནྡྷོ. ཨུཔཝསིཏབྦདིཝསོཏི ཨུཔཝསནཀརཎདིཝསོ, ཨདྷིཀརཎེ ཝཱ ཏབྦསདྡོ དཊྛབྦོ. ཨེཝཉྷི ཨཊྛཀཐཱཡཾ ཝུཏྟནིབྦཙནེན སམེཏི. ཨནྟོགདྷཱཝདྷཱརཎེན, ཨཉྙཏྠཱཔོཧནེན ཙ ནིཝཱརཎཾ སནྡྷཱཡ ‘‘སེསདྭཡནིཝཱརཎཏྠ’’ནྟི ཝུཏྟཾ. ‘‘པནྣརསེ’’ཏི པདམཱརབྦྷ དིཝསཝསེན ཡཐཱཝུཏྟནིབྦཙནཾ ཀཏནྟི ¶ དསྶེནྟོ ‘‘ཏེནེཝ ཝུཏྟ’’ནྟིཨཱདིམཱཧ. པཉྩདསནྣཾ ཏིཐཱིནཾ པཱུརཎཝསེན ‘‘པནྣརསོ’’ཏི ཧི དིཝསོ ཝུཏྟོ.

‘‘ཏཱནི ཨེཏྠ སནྟཱི’’ཏི ཨེཏྟཀེཡེཝ ཝུཏྟེ ནནྭེཏཱནི ཨཉྙཏྠཱཔི སནྟཱིཏི ཙོདནཱ སིཡཱཏི ཏཾ ནིཝཱརེཏུཾ ‘‘ཏདཱ ཀིརཱ’’ཏིཨཱདི ཝུཏྟཾ. ཨནེན བཧུསོ, ཨཏིསཡཏོ ཝཱ ཨེཏྠ ཏདྡྷིཏཝིསཡོ ¶ པཡུཏྟོཏི དསྶེཏི. ཙཱཏུམཱསཱི, ཙཱཏུམཱསིནཱིཏི ཙ པཙྩཡཝིསེསེན ཨིཏྠིལིངྒེཡེཝ པརིཡཱཡཝཙནཾ. པརིཡོསཱནབྷཱུཏཱཏི ཙ པཱུརཎབྷཱཝམེཝ སནྡྷཱཡ ཝདཏི ཏཱཡ སཧེཝ ཙཏུམཱསཔརིཔུཎྞབྷཱཝཏོ. ཨིདྷཱཏི པཱལི༹ཡཾ. ཏཱིཧི ཨཱཀཱརེཧི པཱུརེཏཱིཏི པུཎྞཱཏི ཨཏྠཾ དསྶེཏི ‘‘མཱསཔུཎྞཏཱཡཱ’’ཏིཨཱདིནཱ. ཏཏྠ ཏདཱ ཀཏྟིཀམཱསསྶ པུཎྞཏཱཡ མཱསཔུཎྞཏཱ. པུརིམཔུཎྞམིཏོ ཧི པཊྛཱཡ ཡཱཝ ཨཔརཱ པུཎྞམཱི, ཏཱཝ ཨེཀོ མཱསོཏི ཏཏྠ ཝོཧཱརོ. ཝསྶཱནསྶ ཨུཏུནོ པུཎྞཏཱཡ ཨུཏུཔུཎྞཏཱ. ཀཏྟིཀམཱསལཀྑིཏསྶ སཾཝཙྪརསྶ པུཎྞཏཱཡ སཾཝཙྪརཔུཎྞཏཱ. པུརིམཀཏྟིཀམཱསཏོ པབྷུཏི ཡཱཝ ཨཔརཀཏྟིཀམཱསོ, ཏཱཝ ཨེཀོ ཀཏྟིཀསཾཝཙྪརོཏི ཨེཝཾ སཾཝཙྪརཔུཎྞཏཱཡཱཏི ཝུཏྟཾ ཧོཏི. ལོཀིཀཱནཾ མཏེན པན མཱསཝསེན སཾཝཙྪརསམཉྙཱ ལཀྑིཏཱ. ཏཐཱ ཙ ལཀྑཎཾ གརུསངྐནྟིཝསེན. ཝུཏྟཉྷི ཛོཏིསཏྠེ –

‘‘ནཀྑཏྟེན སཧོདཡ-མཏྠཾ ཡཱཏི སཱུརམནྟི;

ཏསྶ སངྐཾ ཏཏྲ ཝཏྟབྦཾ, ཝསྶཾ མཱསཀམེནེཝཱ’’ཏི.

མིནཱིཡཏི དིཝསོ ཨེཏེནཱཏི མཱ. ཏསྶ ཧི གཏིཡཱ དིཝསོ མིནིཏབྦོ ‘‘པཱཊིཔདོ དུཏིཡཱ, ཏཏིཡཱ’’ཏིཨཱདིནཱ. ཨེཏྠ པུཎྞོཏི ཨེཏིསྶཱ རཏྟིཡཱ སབྦཀལཱཔཱརིཔཱུརིཡཱ པུཎྞོ. ཙནྡསྶ ཧི སོལ༹སམོ བྷཱགོ ‘‘ཀལཱ’’ཏི ཝུཙྩཏི, ཏདཱ ཙ ཙནྡོ སབྦཱསམྤི སོལ༹སནྣཾ ཀལཱནཾ ཝསེན པརིཔུཎྞོ ཧུཏྭཱ དིསྶཏི. ཨེཏྠ ཙ ‘‘ཏདཧུཔོསཐེ པནྣརསེ’’ཏི པདཱནི དིཝསཝསེན ཝུཏྟཱནི, ‘‘ཀོམུདིཡཱ’’ཏིཨཱདཱིནི ཏདེཀདེསརཏྟིཝསེན.

ཀསྨཱ པན རཱཛཱ ཨམཙྩཔརིཝུཏོ ནིསིནྣོ, ན ཨེཀཀོཝཱཏི ཙོདནཱཡ སོདྷནཱལེསཾ དསྶེཏུཾ པཱལི༹པདཏྠམེཝ ཨཝཏྭཱ ‘‘ཨེཝརཱུཔཱཡཱ’’ཏིཨཱདཱིནིཔི ཝདཏི. ཨེཏེཧི ཙཱཡཾ སོདྷནཱལེསོ དསྶིཏོ ‘‘ཨེཝཾ རུཙིཡམཱནཱཡ རཏྟིཡཱ ཏདཱ པཝཏྟཏྟཱ ཏཐཱ པརིཝུཏོ ནིསིནྣོ’’ཏི. དྷོཝིཡམཱནདིསཱབྷཱགཱཡཱཏི ¶ ཨེཏྠཱཔི ཝིཡསདྡོ ཡོཛེཏབྦོ. རཛཏཝིམཱནནིཙྪརིཏེཧཱིཏི རཛཏཝིམཱནཏོ ནིཀྑནྟེཧི, རཛཏཝིམཱནཔྤབྷཱཡ ཝཱ ཝིཔྥུརིཏེཧི. ‘‘ཝིསརོ’’ཏི ཨིདཾ མུཏྟཱཝལི༹ཨཱདཱིནམྤི ཝིསེསནཔདཾ. ཨབྦྷཾ དྷཱུམོ རཛོ རཱཧཱུཏི ཨིམེ ཙཏྟཱརོ ཨུཔཀྐིལེསཱ པཱལི༹ནཡེན (ཨ. ནི. ༤.༥༠; པཱཙི. ༤༤༧). རཱཛཱམཙྩེཧཱིཏི རཱཛཀུལསམུདཱགཏེཧི ཨམཙྩེཧི. ཨཐ ཝཱ ཨནུཡུཏྟཀརཱཛཱུཧི ཙེཝ ཨམཙྩེཧི ཙཱཏི ཨཏྠོ. ཀཉྩནཱསནེཏི སཱིཧཱསནེ. ‘‘རཉྙཾ ཏུ ཧེམམཱསནཾ, སཱིཧཱསནམཐོ ཝཱལ༹བཱིཛནིཏྠཱི ཙ ཙཱམར’’ནྟི ཧི ཝུཏྟཾ. ཀསྨཱ ནིསིནྣོཏི ནིསཱིདནམཏྟེ ཙོདནཱ. ཨེཏ ནྟི ཀནྡནཾ, པབོདྷནཾ ཝཱ. ཨིཏཱིཏི ཨིམིནཱ ཧེཏུནཱ. ནཀྑཏྟ ནྟི ཀཏྟིཀཱནཀྑཏྟཚཎཾ. སམྨཱ གྷོསིཏབྦཾ ཨེཏརཧི ནཀྑཏྟནྟི སངྒྷུཊྛཾ. པཉྩཝཎྞཀུསུམེཧི ¶ ལཱཛེན, པུཎྞགྷཊེཧི ཙ པཊིམཎྜིཏཾ གྷརེསུ དྭཱརཾ ཡསྶ ཏདེཏཾ ནགརཾ པཉྩ…པེ… དྭཱརཾ. དྷཛོ ཝཊོ. པཊཱཀོ པཊྚོཏི སཱིཧལི༹ཡཱ ཝདནྟི. ཏདཱ ཀིར པདཱིཔུཛྫལནསཱིསེན ཀཏནཀྑཏྟཾ. ཏཐཱ ཧི ཨུམྨཱདནྟིཛཱཏཀཱདཱིསུཔི (ཛཱ. ༢.༡༨.༥༧) ཀཏྟིཀམཱསེ ཨེཝམེཝ ཝུཏྟཾ. ཏེནཱཧ ‘‘སམུཛྫལིཏདཱིཔམཱལཱལངྐཏསབྦདིསཱབྷཱག’’ནྟི. ཝཱིཐི ནཱམ རཐིཀཱ མཧཱམགྒོ. རཙྪཱ ནཱམ ཨནིབྦིདྡྷཱ ཁུདྡཀམགྒོ. ཏཏྠ ཏཏྠ ནིསིནྣཝསེན སམཱནབྷཱགེན པཱཊིཡེཀྐཾ ནཀྑཏྟཀཱིལ༹ཾ ཨནུབྷཝམཱནེན སམབྷིཀིཎྞནྟི ཝུཏྟཾ ཧོཏི. མཧཱཨཊྛཀཐཱཡཾ ཨེཝཾ ཝཏྭཱཔི ཏཏྠེཝ ཨིཏི སནྣིཊྛཱནཾ ཀཏནྟི ཨཏྠོ.

ཨུདཱནཾ ཨུདཱཧཱརོཏི ཨཏྠཏོ ཨེཀཾ. མཱནནྟི མཱནཔཏྟཾ ཀཏྟུབྷཱུཏཾ. ཚཌྜནཝསེན ཨཝསེཀོ. སོཏཝསེན ཨོགྷོ. པཱིཏིཝཙནནྟི པཱིཏིསམུཊྛཱནཝཙནཾ ཀམྨབྷཱུཏཾ. ཧདཡནྟི ཙིཏྟཾ ཀཏྟུབྷཱུཏཾ. གཧེཏུནྟི བཧི ཨནིཙྪརཎཝསེན གཎྷིཏུཾ, ཧདཡནྟོཡེཝ ཋཔེཏུཾ ན སཀྐོཏཱིཏི ཨདྷིཔྤཱཡོ. ཏེན ཝུཏྟཾ ‘‘ཨདྷིཀཾ ཧུཏྭཱ’’ཏིཨཱདི. ཨིདཾ ཝུཏྟཾ ཧོཏི – ཡཾ ཝཙནཾ པཊིགྒཱཧཀ ནིརཔེཀྑཾ ཀེཝལཾ ཨུལཱ༹རཱཡ པཱིཏིཡཱ ཝསེན སརསཏོ སཧསཱཝ མུཁཏོ ནིཙྪརཏི, ཏདེཝིདྷ ‘‘ཨུདཱན’’ནྟི ཨདྷིཔྤེཏནྟི.

དོསེཧི ཨིཏཱ གཏཱ ཨཔགཏཱཏི དོསིནཱ ཏ-ཀཱརསྶ ན-ཀཱརཾ ཀཏྭཱ ཡཐཱ ‘‘ཀིལེསེ ཛིཏོ ཝིཛིཏཱཝཱིཏི ཛིནོ’’ཏི ཨཱཧ ‘‘དོསཱཔགཏཱ’’ཏི. ཡདིཔི སུཏྟེ ཝུཏྟཾ ‘‘ཙཏྟཱརོམེ བྷིཀྑཝེ ཙནྡིམསཱུརིཡཱནཾ ཨུཔཀྐིལེསཱ, ཡེཧི ཨུཔཀྐིལེསེཧི ཨུཔཀྐིལིཊྛཱ ཙནྡིམསཱུརིཡཱ ན ¶ ཏཔནྟི ན བྷཱསནྟི ན ཝིརོཙནྟི. ཀཏམེ ཙཏྟཱརོ? ཨབྦྷཱ བྷིཀྑཝེ…པེ… མཧིཀཱ. དྷཱུམོ རཛོ. རཱཧུ བྷིཀྑཝེ ཙནྡིམསཱུརིཡཱནཾ ཨུཔཀྐིལེསོ’’ཏི, (ཙཱུལ༹ཝ. ༤༤༧) ཏཐཱཔི ཏཏིཡུཔཀྐིལེསསྶ པབྷེདདསྶན ཝསེན ཨཊྛཀཐཱནཡེན དསྶེཏུཾ ‘‘པཉྩཧི ཨུཔཀྐིལེསེཧཱི’’ཏི ཝུཏྟཾ. ཨཡམཏྠོ ཙ རམཎཱིཡཱདིསདྡཡོགཏོ ཉཱཡཏཱིཏི ཨཱཧ ‘‘ཏསྨཱ’’ཏིཨཱདི. ཨནཱིཡ-སདྡོཔི བཧུལཱ ཀཏྭཏྠཱབྷིདྷཱཡཀོ ཡཐཱ ‘‘ནིཡྻཱནིཀཱ དྷམྨཱ’’ཏི (དྷ. ས. དུཀམཱཏིཀཱ ༩༦) དསྶེཏི ‘‘རམཡཏཱི’’ཏི ཨིམིནཱ. ཛུཎྷཱཝསེན རཏྟིཡཱ སུརཱུཔཏྟམཱཧ ‘‘ཝུཏྟདོསཝིམུཏྟཱཡཱ’’ཏིཨཱདིནཱ. ཨབྦྷཱདཡོ ཙེཏྠ ཝུཏྟདོསཱ. ཨཡཉྩ ཧེཏུ ‘‘དསྶིཏུཾ ཡུཏྟཱ’’ཏི ཨེཏྠཱཔི སམྦཛ྄ཛྷིཏབྦོ. ཏེན ཀཱརཎེན, ཨུཏུསམྤཏྟིཡཱ ཙ པཱསཱདིཀཏཱ དཊྛབྦཱ. ཨཱིདིསཱཡ རཏྟིཡཱ ཡུཏྟོ དིཝསོ མཱསོ ཨུཏུ སཾཝཙྪརོཏི ཨེཝཾ དིཝསམཱསཱདཱིནཾ ལཀྑཎཱ སལླཀྑཎུཔཱཡཱ བྷཝིཏུཾ ཡུཏྟཱ, ཏསྨཱ ལཀྑིཏབྦཱཏི ལཀྑཎིཡཱ, སཱ ཨེཝ ལཀྑཉྙཱ ཡ-ཝཏོ ཎ-ཀཱརསྶ ཉ-ཀཱརཱདེསཝསེན ཡཐཱ ‘‘པོཀྑརཉྙོ སུམཱཔིཏཱ’’ཏི ཨཱཧ ‘‘དིཝསམཱསཱདཱིན’’ནྟིཨཱདི.

‘‘ཡཾ ¶ ནོ པཡིརུཔཱསཏོ ཙིཏྟཾ པསཱིདེཡྻཱ’’ཏི ཝཙནཏོ སམཎཾ ཝཱ བྲཱཧྨཎཾ ཝཱཏི ཨེཏྠ པརམཏྠསམཎོ, པརམཏྠབྲཱཧྨཎོ ཙ ཨདྷིཔྤེཏོ, ན པན པབྦཛྫཱམཏྟསམཎོ, ན ཙ ཛཱཏིམཏྟབྲཱཧྨཎོཏི ཝུཏྟཾ ‘‘སམིཏཔཱཔཏཱཡཱ’’ཏིཨཱདི. བཧཏི པཱཔེ བཧི ཀརོཏཱིཏི བྲཱཧྨཎོ ནིརུཏྟིནཡེན. བཧུཝཙནེ ཝཏྟབྦེ ཨེཀཝཙནཾ, ཨེཀཝཙནེ ཝཱ ཝཏྟབྦེ བཧུཝཙནཾ ཝཙནབྱཏྟཡོ ཝཙནཝིཔལླཱསོཏི ཨཏྠོ. ཨིདྷ པན ‘‘པཡིརུཔཱསཏ’’ནྟི ཝཏྟབྦེ ‘‘པཡིརུཔཱསཏོ’’ཏི ཝུཏྟཏྟཱ བཧུཝཙནེ ཝཏྟབྦེ ཨེཀཝཙནཝསེན ཝཙནབྱཏྟཡོ དསྶིཏོ. ཨཏྟནི, གརུཊྛཱནིཡེ ཙ ཧི ཨེཀསྨིམྤི བཧུཝཙནཔྤཡོགོ ནིརུལ༹ྷོ. པཡིརུཔཱསཏོཏི ཙ ཝཎྞཝིཔརིཡཱཡནིདྡེསོ ཨེས ཡཐཱ ‘‘པཡིརུདཱཧཱསཱི’’ཏི. ཨཡཉྷི བཧུལཾ དིཊྛཔཡོགོ, ཡདིདཾ པརིསདྡེ ཡ-ཀཱརཔརེ ཝཎྞཝིཔརིཡཱཡོ. ཏཐཱ ཧི ཨཀྑརཙིནྟཀཱ ཝདནྟི ‘‘པརིཡཱདཱིནཾ རཡཱདིཝཎྞསྶ ཡརཱདཱིཧི ཝིཔརིཡཱཡོ’’ཏི. ཡནྟི སམཎཾ ཝཱ བྲཱཧྨཎཾ ཝཱ. ཨིམིནཱ སབྦེནཔི ཝཙནེནཱཏི ‘‘རམཎཱིཡཱ ཝཏཱ’’ཏིཨཱདིཝཙནེན. ཨོབྷཱསནིམིཏྟཀམྨནྟི ཨོབྷཱསབྷཱུཏཾ ནིམིཏྟཀམྨཾ ¶ , པརིབྱཏྟཾ ནིམིཏྟཀརཎནྟི ཨཏྠོ. མཧཱཔརཱདྷཏཱཡཱཏི མཧཱདོསཏཱཡ.

‘‘ཏེན ཧཱི’’ཏིཨཱདི ཏདཏྠཝིཝརཎཾ. དེཝདཏྟོ ཙཱཏི ཨེཏྠ ཙ-སདྡོ སམུཙྩཡཝསེན ཨཏྠུཔནཡནེ, ཏེན ཡཐཱ རཱཛཱ ཨཛཱཏསཏྟུ ཨཏྟནོ པིཏུ ཨརིཡསཱཝཀསྶ སཏྠུ ཨུཔཊྛཱཀསྶ གྷཱཏནེན མཧཱཔརཱདྷོ, ཨེཝཾ བྷགཝཏོ མཧཱནཏྠཀརསྶ དེཝདཏྟསྶ ཨཔསྶཡབྷཱཝེནཱཔཱིཏི ཨིམམཏྠཾ ཨུཔནེཏི. ཏསྶ པིཊྛིཚཱཡཱཡཱཏི ཝོཧཱརམཏྟཾ, ཏསྶ ཛཱིཝཀསྶ པིཊྛིཨཔསྶཡེན, ཏཾ པམུཁཾ ཀཏྭཱ ཨཔསྶཱཡཱཏི ཝུཏྟཾ ཧོཏི. ཝིཀྑེཔཔཙྪེདནཏྠནྟི ཝཀྑམཱནཱཡ ཨཏྟནོ ཀཐཱཡ ཨུཔྤཛྫནཀཝིཀྑེཔསྶ པཙྪིནྡནཏྠཾ, ཨནུཔྤཛྫནཏྠནྟི ཨདྷིཔྤཱཡོ. ཏེནཱཧ ‘‘ཏསྶཾ ཧཱི’’ཏིཨཱདི. ཨསིཀྑིཏཱནནྟི ཀཱཡཝཙཱིསཾཡམནེ ཝིགཏསིཀྑཱནཾ. ཀུལཱུཔཀེཏི ཀུལམུཔགཏེ སཏྠཱརེ. གཧིཏཱསཱརཏཱཡཱཏི གཧེཏབྦགུཎསཱརཝིགཏཏཱཡ. ནིབྦིཀྑེཔནྟི ཨཉྙེསམཔནཡནཝིརཧིཏཾ.

བྷདྡནྟི ཨཝསྶཡསམྤནྣཏཱཡ སུནྡརཾ.

༡༥༡. ཨཡཉྩཏྠོ ཨིམཱཡ པཱལི༹ཙྪཱཡཱཡ ཨདྷིགཏོ, ཨིམམཏྠམེཝ ཝཱ ཨནྟོགདྷཾ ཀཏྭཱ པཱལི༹ཡམེཝཾ ཝུཏྟནྟི དསྶེཏི ‘‘ཏེནཱཧཱ’’ཏིཨཱདིནཱ. ཨསཏྠཱཔི སམཱནོ སཏྠཱ པཊིཉྙཱཏོ ཡེནཱཏི སཏྠུཔཊིཉྙཱཏོ, ཏསྶ ཨབུདྡྷསྶཱཔི སམཱནསྶ བུདྡྷཔཊིཉྙཱཏསྶ ‘‘ཨཧམེཀོ ལོཀེ ཨཏྠདྷམྨཱནུསཱསཀོ’’ཏི ཨཱཙརིཡཔཊིཉྙཱཏབྷཱཝཾ ཝཱ སནྡྷཱཡ ཨེཝཾ ཝུཏྟཾ. ‘‘སོ ཀིརཱ’’ཏིཨཱདིནཱ ཨནུསྶུཏིམཏྟཾ པཏི པོརཱཎཊྛཀཐཱནཡོཝ ཀིརསདྡེན ཝུཏྟོ. ཨེས ནཡོ པརཏོ མཀྑལིཔདནིབྦཙནེཔི ¶ . ཨེཀཱུནདཱསསཏཾ པཱུརཡམཱནོཏི ཨེཀེནཱུནདཱསསཏཾ ཨཏྟནཱ སདྡྷིཾ ཨནཱུནདཱསསཏཾ ཀཏྭཱ པཱུརཡམཱནོ. ཨེཝཾ ཛཱཡམཱནོ ཙེས མངྒལདཱསོ ཛཱཏོ. ཛཱཏརཱུཔེནེཝཱཏི མཱཏུཀུཙྪིཏོ ཝིཛཱཏཝེསེནེཝ, ཡཐཱ ཝཱ སཏྟཱ ཨནིཝཏྠཱ ཨཔཱརུཏཱ ཛཱཡནྟི, ཏཐཱ ཛཱཏརཱུཔེནེཝ. ཨུཔསངྐམནྟཱིཏི ཨུཔགཏཱ བྷཛནྟཱ ཧོནྟི. ཏདེཝ པབྦཛྫཾ ཨགྒཧེསཱིཏི ཏདེཝ ནགྒརཱུཔཾ ‘‘ཨཡམེཝ པབྦཛྫཱ ནཱམ སིཡཱ’’ཏི པབྦཛྫཾ ཀཏྭཱ ཨགྒཧེསི. པབྦཛིཾསཱུཏི ཏཾ པབྦཛིཏམནུཔབྦཛིཾསུ.

‘‘པབྦཛིཏསམཱུཧསངྑཱཏོ’’ཏི ཨེཏེན པབྦཛིཏསམཱུཧཏཱམཏྟེན སངྒྷོ, ན ནིཡྻཱནིཀདིཊྛིཝིསུདྡྷསཱིལསཱམཉྙཝསེན སཾཧཏཏྟཱཏི དསྶེཏི. ཨསྶ ཨཏྠཱིཏི ¶ ཨསྶ སཏྠུཔཊིཉྙཱཏསྶ པརིཝཱརབྷཱཝེན ཨཏྠི. ‘‘སངྒྷཱི གཎཱི’’ཏི ཙེདཾ པརིཡཱཡཝཙནཾ, སངྐེཏམཏྟཏོ ནཱནནྟི ཨཱཧ ‘‘སྭེཝཱ’’ཏིཨཱདི. སྭེཝཱཏི ཙ པབྦཛིཏསམཱུཧསངྑཱཏོ ཨེཝ. ཀེཙི པན ‘‘པབྦཛིཏསམཱུཧཝསེན སངྒྷཱི, གཧཊྛསམཱུཧཝསེན གཎཱི’’ཏི ཝདནྟི, ཏཾ ཏེསཾ མཏིམཏྟཾ གཎེ ཨེཝ ལོཀེ སངྒྷ-སདྡསྶ ནིརུལ༹ྷཏྟཱ. ཨཙེལཀཝཏཙརིཡཱདི ཨཏྟནཱ པརིཀཔྤིཏམཏྟཾ ཨཱཙཱརོ. པཉྙཱཏོ པཱཀཊོ སངྒྷཱིཨཱདིབྷཱཝེན. ཨཔྤིཙྪོ སནྟུཊྛོཏི ཨཏྠཏོ ཨེཀཾ. ཏཏྠ ལབྦྷམཱནཱཔྤིཙྪཏཾ དསྶེཏུཾ ‘‘ཨཔྤིཙྪཏཱཡ ཝཏྠམྤི ན ནིཝཱསེཏཱི’’ཏི ཝུཏྟཾ. ན ཧི ཏསྨིཾ སཱསནིཀེ ཝིཡ སནྟགུཎནིགྒཱུཧཎལཀྑཎཱ ཨཔྤིཙྪཏཱ ལབྦྷཏི. ཡསོཏི ཀིཏྟིསདྡོ. ཏརནྟི ཨེཏེན སཾསཱརོགྷནྟི ཨེཝཾ སམྨཏཏཱཡ ལདྡྷི ཏིཏྠཾ ནཱམ ‘‘སཱདྷཱུ’’ཏི སམྨཏོ, ན ཙ སཱདྷཱུཧི སམྨཏོཏི ཨཏྠམཱཧ ‘‘ཨཡ’’ནྟིཨཱདིནཱ. ན ཧི ཏསྶ སཱདྷཱུཧི སམྨཏཏཱ ལབྦྷཏི. སུནྡརོ སཔྤུརིསོཏི དྭིདྷཱ ཨཏྠོ. ཨསྶུཏཝཏོཏི ཨསྶུཏཱརིཡདྷམྨསྶ, ཀཏྟུཏྠེ ཙེཏཾ སཱམིཝཙནཾ. ‘‘ཨིམཱནི མེ ཝཏསམཱདཱནཱནི ཨེཏྟཀཾ ཀཱལཾ སུཙིཎྞཱནཱི’’ཏི བཧཱུ རཏྟིཡོ ཛཱནཱཏི. ཏཱ པནསྶ རཏྟིཡོ ཙིརཀཱལབྷཱུཏཱཏི ཀཏྭཱ ‘‘ཙིརཾ པབྦཛིཏསྶཱ’’ཏིཨཱདི ཝུཏྟཾ, ཨནྟཏྠཨཉྙཔདཏྠསམཱསོ ཙེས ཡཐཱ ‘‘མཱསཛཱཏོ’’ཏི. ཨཐ ཏསྶ པདདྭཡསྶ ཀོ ཝིསེསོཏི ཙེ? ཙིརཔབྦཛིཏགྒཧཎེནསྶ བུདྡྷིསཱིལཏཱ, རཏྟཉྙཱུགཧཎེན ཏཏྠ སམྤཛཱནཏཱ དསྶིཏཱ, ཨཡམེཏསྶ ཝིསེསོཏི. ཀིཾ པན ཨཏྠཾ སནྡྷཱཡ སོ ཨམཙྩོ ཨཱཧཱཏི ཝུཏྟཾ ‘‘ཨཙིརཔབྦཛིཏསྶཱ’’ཏིཨཱདི. ཨོཀཔྤནཱིཡཱཏི སདྡཧནཱིཡཱ. ཨདྡྷཱནནྟི དཱིགྷཀཱལཾ. ཀིཏྟཀོ པན སོཏི ཨཱཧ ‘‘དྭེ ཏཡོ རཱཛཔརིཝཊྚེ’’ཏི, དྭིནྣཾ, ཏིཎྞཾ ཝཱ རཱཛཱུནཾ རཛྫཱནུསཱསནཔཊིཔཱཊིཡོཏི ཨཏྠོ. ‘‘ཨདྡྷགཏོ’’ཏི ཝཏྭཱཔི པུན ཀཏཾ ཝཡགྒཧཎཾ ཨོསཱནཝཡཱཔེཀྑཾ པདདྭཡསྶ ཨཏྠཝིསེསསམྦྷཝཏོཏི དསྶེཏི ‘‘པཙྪིམཝཡ’’ནྟི ཨིམིནཱ. ཨུབྷཡནྟི ‘‘ཨདྡྷགཏོ, ཝཡོཨནུཔྤཏྟོ’’ཏི པདདྭཡཾ.

ཀཱཛརོ ¶ ནཱམ ཨེཀོ རུཀྑཝིསེསོ, ཡོ ‘‘པཎྞཀརུཀྑོ’’ཏིཔི ཝུཙྩཏི. དིསྭཱ ཝིཡ ཨནཏྟམནོཏི སམྦནྡྷོ. པུབྦེ པིཏརཱ སདྡྷིཾ སཏྠུ སནྟིཀཾ གནྟྭཱ དེསནཱཡ སུཏཔུབྦཏཾ སནྡྷཱཡཱཧ ‘‘ཛྷཱནཱ…པེ… ཀཱམོ’’ཏི. ཏིལཀྑཎབྦྷཱཧཏནྟི ཏཱིཧི ལཀྑཎེཧི ཨབྷིགྷཊིཏཾ. དསྶནེནཱཏི ནིདསྶནམཏྟཾ. སོ ཧི དིསྭཱ ཏེན སདྡྷིཾ ཨལླཱཔསལླཱཔཾ ཀཏྭཱ ¶ , ཏཏོ ཨཀིརིཡཝཱདཾ སུཏྭཱ ཙ ཨནཏྟམནོ ཨཧོསི. གུཎཀཐཱཡཱཏི ཨབྷཱུཏགུཎཀཐཱཡ. ཏེནཱཧ ‘‘སུཊྛུཏརཾ ཨནཏྟམནོ’’ཏི. ཡདི ཨནཏྟམནོ, ཀསྨཱ ཏུཎྷཱི ཨཧོསཱིཏི ཙོདནཾ ཝིསོདྷེཏི ‘‘ཨནཏྟམནོ སམཱནོཔཱི’’ཏིཨཱདིནཱ.

༡༥༢. གོསཱལཱཡཱཏི ཨེཝཾནཱམཀེ གཱམེཏི ཝུཏྟཾ. ཝསྶཱནཀཱལེ གུནྣཾ པཏིཊྛིཏསཱལཱཡཱཏི པན ཨཏྠེ ཏབྦསེན ཏསྶ ནཱམཾ སཱཏིསཡམུཔཔནྣཾ ཧོཏི བཧུལམནཉྙསཱདྷཱརཎཏྟཱ, ཏཐཱཔི སོ པོརཱཎེཧི ཨནནུསྶུཏོཏི ཨེཀཙྩཝཱདོ ནཱམ ཀཏོ. ‘‘མཱ ཁལཱིཏི སཱམིཀོ ཨཱཧཱ’’ཏི ཨིམིནཱ ཏཐཱཝཙནམུཔཱདཱཡ ཏསྶ ཨཱཁྱཱཏཔདེན སམཉྙཱཏི དསྶེཏི. སཉྙཱཡ ཧི ཝཏྟུམིཙྪཱཡ ཨཱཁྱཱཏཔདམྤི ནཱམིཀཾ བྷཝཏི ཡཐཱ ‘‘ཨཉྙཱསིཀོཎྜཉྙོ’’ཏི (མཧཱཝ. ༡༧). སེསནྟི ‘‘སོ པཎྞེན ཝཱ’’ཏིཨཱདིཝཙནཾ.

༡༥༣. དཱསཱདཱིསུ སིརིཝཌྜྷཀཱདིནཱམམིཝ ཨཛིཏོཏི ཏསྶ ནཱམམཏྟཾ. ཀེསེཧི ཝཱཡིཏོ ཀམྦལོ ཡསྶཱཏིཔི ཡུཛྫཏི. པཊིཀིཊྛཏརནྟི ནིཧཱིནཏརཾ. ‘‘ཡཐཱཧཱ’’ཏིཨཱདིནཱ ཨངྒུཏྟརཱགམེ ཏིཀནིཔཱཏེ མཀྑལིསུཏྟ (ཨ. ནི. ༣.༡༣༨) མཱཧརི. ཏནྟཱཝུཏཱནཱིཏི ཏནྟེ ཝཱིཏཱནི. ‘‘སཱིཏེ སཱིཏོ’’ཏིཨཱདིནཱ ཚཧཱཀཱརེཧི ཏསྶ པཊིཀིཊྛཏརཾ དསྶེཏི.

༡༥༤. པཀུཛ྄ཛྷཏི སམྨཱདིཊྛིཀེསུ བྱཱཔཛྫཏཱིཏི པཀུདྷོ. ཝཙྩཾ ཀཏྭཱཔཱིཏི ཨེཏྠ པི-སདྡེན བྷོཛནཾ བྷུཉྫིཏྭཱཔི ཀེནཙི ཨསུཙིནཱ མཀྑིཏྭཱཔཱིཏི ཨིམམཏྠཾ སམྤིཎྜེཏི. ཝཱལིཀཱཐཱུཔཾ ཀཏྭཱཏི ཝཏསམཱདཱནསཱིསེན ཝཱལིཀཱསཉྩཡཾ ཀཏྭཱ, ཏཐཱརཱུཔེ ཨནུཔགམནཱིཡཊྛཱནེ པུན ཝཏཾ སམཱདཱཡ གཙྪཏཱིཏི ཝུཏྟཾ ཧོཏི.

༡༥༦. ‘‘གཎྛནཀིལེསོ’’ཏི ཨེཏསྶ ‘‘པལིབུནྡྷནཀིལེསོ’’ཏི ཨཏྠཝཙནཾ, སཾསཱརེ པརིབུནྡྷནཀིཙྩོ ཁེཏྟཝཏྠུཔུཏྟདཱརཱདིཝིསཡོ རཱགཱདིཀིལེསོཏི ཨཏྠོ. ‘‘ཨེཝཾཝཱདིཏཱཡཱ’’ཏི ཨིམིནཱ ལདྡྷིཝསེནསྶ ནཱམཾ, ན པནཏྠཏོཏི དསྶེཏི. ཡཱཝ ཧི སོ མགྒེན སམུགྒྷཱཊིཏོ, ཏཱཝ ཨཏྠིཡེཝ. ཨཡཾ པན ཝཙནཏྠོ – ‘‘ནཏྠི མཡ྄ཧཾ གཎྛོ’’ཏི གཎྷཱཏཱིཏི ནིགཎྛོཏི. ནཱཊསྶཱཏི ཨེཝཾནཱམཀསྶ.

ཀོམཱརབྷཙྩཛཱིཝཀཀཐཱཝཎྞནཱ

༡༥༧. སབྦཐཱ ¶ ¶ ཏུཎྷཱིབྷཱུཏབྷཱཝཾ སནྡྷཱཡ ‘‘ཨེས ནཱག…པེ… ཝིཡཱ’’ཏི ཝུཏྟཾ. སུཔཎྞོཏི གརུལོ༹, གརུཌོ ཝཱ སཀྐཊམཏེན. ‘‘ཌ-ལཱ༹ན’མཝིསེསོ’’ཏི ཧི ཏཏྠ ཝདནྟི. ཡཐཱདྷིཔྤཱཡཾ ན ཝཏྟཏཱིཏི ཀཏྭཱ ‘‘ཨནཏྠོ ཝཏ མེ’’ཏི ཝུཏྟཾ. ཨུཔསནྟསྶཱཏི སབྦཐཱ སཉྙམེན ཨུཔསམཾ གཏསྶ. ཛཱིཝཀསྶ ཏུཎྷཱིབྷཱཝོ མམ ཨདྷིཔྤཱཡསྶ མདྡནསདིསོ, ཏསྨཱ ཏདེཝ ཏུཎྷཱིབྷཱཝཾ པུཙྪིཏྭཱ ཀཐཱཔནེན མམ ཨདྷིཔྤཱཡོ སམྤཱདེཏབྦོཏི ཨཡམེཏྠ རཉྙོ ཨདྷིཔྤཱཡོཏི དསྶེནྟོ ‘‘ཧཏྠིམྷི ཁོ པནཱ’’ཏིཨཱདིམཱཧ. ཀིནྟི ཀཱརཎཔུཙྪཱཡཾ ནིཔཱཏོཏི དསྶེཏི ‘‘ཀེན ཀཱརཎེནཱ’’ཏི ཨིམིནཱ, ཡེན ཏུཝཾ ཏུཎྷཱི, ཀིཾ ཏཾ ཀཱརཎནྟི ཝཱ ཨཏྠཾ དསྶེཏི. ཏཏྠ ཡཐཱསམྦྷཝཾ ཀཱརཎཾ ཨུདྡྷརིཏྭཱ ཨདྷིཔྤཱཡཾ དསྶེཏུཾ ‘‘ཨིམེས’’ནྟིཨཱདི ཝུཏྟཾ. ཡཐཱ ཨེཏེསནྟི ཨེཏེསཾ ཀུལཱུཔཀོ ཨཏྠི ཡཐཱ, ཨིམེསཾ ནུ ཁོ ཏིཎྞཾ ཀཱརཎཱནཾ ཨཉྙཏརེན ཀཱརཎེན ཏུཎྷཱི བྷཝསཱིཏི པུཙྪཏཱིཏི ཨདྷིཔྤཱཡོ.

ཀཐཱཔེཏཱིཏི ཀཐཱཔེཏུཀཱམོ ཧོཏི. པཉྩཔཏིཊྛིཏེནཱཏི ཨེཏྠ པཉྩཧི ཨངྒེཧི ཨབྷིམུཁཾ ཋིཏེནཱཏི ཨཏྠོ, པཱདཛཱཎུ ཀཔྤར ཧཏྠ སཱིསསངྑཱཏཱནི པཉྩ ཨངྒཱནི སམཾ ཀཏྭཱ ཨོནཱམེཏྭཱ ཨབྷིམུཁཾ ཋིཏེན པཋམཾ ཝནྡིཏྭཱཏི ཝུཏྟཾ ཧོཏི. ཡམྤི ཝདནྟི ‘‘ནཝཀཏརེནུཔཱལི བྷིཀྑུནཱ ཝུཌྜྷཏརསྶ བྷིཀྑུནོ པཱདེ ཝནྡནྟེན ཨིམེ པཉྩ དྷམྨེ ཨཛ྄ཛྷཏྟཾ ཨུཔཊྛཱཔེཏྭཱ པཱདཱ ཝནྡིཏབྦཱ’ཏིཨཱདིཀཾ (པརི. ༤༦༩) ཝིནཡཔཱལི༹མཱཧརིཏྭཱ ཨེཀཾསཀརཎཨཉྫལིཔགྒཧཎཔཱདསམྦཱཧནཔེམགཱརཝུཔཊྛཱཔནཝསེན པཉྩཔཏིཊྛིཏཝནྡནཱ’’ཏི, ཏམེཏྠཱནདྷིཔྤེཏཾ དཱུརཏོ ཝནྡནེ ཡཐཱཝུཏྟཔཉྩངྒསྶ ཨཔརིཔུཎྞཏྟཱ. ཝནྡནཱ ཙེཏྠ པཎམནཱ ཨཉྫལིཔགྒཧཎཀརཔུཊསམཱཡོགོ. ‘‘པཉྩཔཏིཊྛིཏེན ཝནྡིཏྭཱ’’ཏི ཙ ཀཱཡཔཎཱམོ ཝུཏྟོ, ‘‘མམ སཏྠུནོ’’ཏིཨཱདིནཱ པན ཝཙཱིཔཎཱམོ, ཏདུབྷཡཔུརེཙརཱནུཙརཝསེན མནོཔཎཱམོཏི. ཀཱམཾ སབྦཱཔི ཏཐཱགཏསྶ པཊིཔཏྟི ཨནཉྙསཱདྷཱརཎཱ ཨཙྪརིཡབྦྷུཏརཱུཔཱཝ, ཏཐཱཔི གབྦྷོཀྐནྟི ཨབྷིཛཱཏི ཨབྷིནིཀྑམན ཨབྷིསམྦོདྷི དྷམྨཙཀྐཔྤཝཏྟན (སཾ. ནི. ༥.༡༠༨༡; པཊི. མ. ༣.༣༠) ཡམཀཔཱཊིཧཱརིཡདེཝོརོཧནཱནི སདེཝཀེ ལོཀེ ཨཏིཝིཡ སུཔཱཀཊཱནི, ན སཀྐཱ ཀེནཙི པཊིབཱཧིཏུནྟི ཏཱནིཡེཝེཏྠ ཨུདྡྷཊཱནི.

ཨིཏྠཾ ¶ ཨིམཾ པཀཱརཾ བྷཱུཏོ པཏྟོཏི ཨིཏྠམྦྷཱུཏོ, ཏསྶ ཨཱཁྱཱནཾ ཨིཏྠམྦྷཱུཏཱཁྱཱནཾ, སོཡེཝཏྠོ ཨིཏྠམྦྷཱུཏཱཁྱཱནཏྠོ. ཨཐ ཝཱ ཨིཏྠཾ ཨེཝཾཔཀཱརོ བྷཱུཏོ ཛཱཏོཏི ཨིཏྠམྦྷཱུཏོ, ཏཱདིསོཏི ཨཱཁྱཱནཾ ཨིཏྠམྦྷཱུཏཱཁྱཱནཾ, ཏདེཝཏྠོ ཨིཏྠམྦྷཱུཏཱཁྱཱནཏྠོ, ཏསྨིཾ ཨུཔཡོགཝཙནནྟི ཨཏྠོ. ཨབྦྷུགྒཏོཏི ཨེཏྠ ¶ ཧི ཨབྷིསདྡོ པདྷཱནཝསེན ཨིཏྠམྦྷཱུཏཱཁྱཱནཏྠཛོཏཀོ ཀམྨཔྤཝཙནཱིཡོ ཨབྷིབྷཝིཏྭཱ ཨུགྒམནཀིརིཡཱཔཀཱརསྶ དཱིཔནཏོ, ཏེན པཡོགཏོ ‘‘ཏཾ ཁོ པན བྷགཝནྟ’’ནྟི ཨིདཾ ཨུཔཡོགཝཙནཾ སཱམིཨཏྠེ སམཱནམྤི ཨཔྤདྷཱནཝསེན ཨིཏྠམྦྷཱུཏཱཁྱཱནཏྠདཱིཔནཏོ ‘‘ཨིཏྠམྦྷཱུཏཱཁྱཱནཏྠེ’’ཏི ཝུཏྟཾ. ཏེནེཝཱཧ ‘‘ཏསྶ ཁོ པན བྷགཝཏོཏི ཨཏྠོ’’ཏི. ནནུ ཙ ‘‘སཱདྷུ དེཝདཏྟོ མཱཏརམབྷཱི’’ཏི ཨེཏྠ ཝིཡ ‘‘ཏཾ ཁོ པན བྷགཝནྟ’’ནྟི ཨེཏྠ ཨབྷིསདྡོ ཨཔྤཡུཏྟོ, ཀཐམེཏྠ ཏཾཔཡོགཏོ ཨུཔཡོགཝཙནཾ སིཡཱཏི? ཨཏྠཏོ པཡུཏྟཏྟཱ. ཨཏྠསདྡཔཡོགེསུ ཧི ཨཏྠཔཡོགོཡེཝ པདྷཱནོཏི. ཨིདཾ ཝུཏྟཾ ཧོཏི – ཡཐཱ ‘‘སཱདྷུ དེཝདཏྟོ མཱཏརམབྷཱི’’ཏི ཨེཏྠ ཨབྷིསདྡཔཡོགཏོ ཨིཏྠམྦྷཱུཏཱཁྱཱནེ ཨུཔཡོགཝཙནཾ ཀཏཾ, ཨེཝམིདྷཱཔི ‘‘ཏཾ ཁོ པན བྷགཝནྟཾ ཨབྷི ཨེཝཾ ཀལྱཱཎོ ཀིཏྟིསདྡོ ཨུགྒཏོ’’ཏི ཨབྷིསདྡཔཡོགཏོ ཨིཏྠམྦྷཱུཏཱཁྱཱནེ ཨུཔཡོགཝཙནཾ ཀཏནྟི. ཡཐཱ ཧི ‘‘སཱདྷུ དེཝདཏྟོ མཱཏརམབྷཱི’’ཏི ཨེཏྠ ‘‘དེཝདཏྟོ མཱཏརམབྷི མཱཏུཝིསཡེ, མཱཏུཡཱ ཝཱ སཱདྷཱུ’’ཏི ཨེཝཾ ཨདྷིཀརཎཏྠེ, སཱམིཨཏྠེ ཝཱ བྷུམྨཝཙནསྶ, སཱམིཝཙནསྶ ཝཱ པསངྒེ ཨིཏྠམྦྷཱུཏཱཁྱཱནཛོཏཀེན ཀམྨཔྤཝཙནཱིཡེན ཨབྷིསདྡེན པཡོགཏོ ཨུཔཡོགཝཙནཾ ཀཏཾ, ཨེཝམིདྷཱཔི སཱམིཨཏྠེ སཱམིཝཙནཔྤསངྒེ ཡཐཱ ཙ ཏཏྠ ‘‘དེཝདཏྟོ མཱཏུཝིསཡེ, མཱཏུ སམྦནྡྷཱི ཝཱ སཱདྷུཏྟཔྤཀཱརཔྤཏྟོ’’ཏི ཨཡམཏྠོ ཝིཉྙཱཡཏི, ཨེཝམིདྷཱཔི ‘‘བྷགཝཏོ སམྦནྡྷཱི ཀིཏྟིསདྡོ ཨབྦྷུགྒཏོ ཨབྷིབྷཝིཏྭཱ ཨུགྒམནཔྤཀཱརཔྤཏྟོ’’ཏི ཨཡམཏྠོ ཝིཉྙཱཡཏི. ཏཏྠ ཧི དེཝདཏྟགྒཧཎཾ ཝིཡ ཨིདྷ ཀིཏྟིསདྡགྒཧཎཾ, ‘‘མཱཏར’’ནྟི ཝཙནཾ ཝིཡ ‘‘བྷགཝནྟ’’ནྟི ཝཙནཾ, སཱདྷུསདྡོ ཝིཡ ཨུགྒཏསདྡོ ཝེདིཏབྦོ.

ཀལྱཱཎོཏི བྷདྡཀོ. ཀལྱཱཎབྷཱཝོ ཙསྶ ཀལྱཱཎགུཎཝིསཡཏཱཡཱཏི ཨཱཧ ‘‘ཀལྱཱཎགུཎསམནྣཱགཏོ’’ཏི, ཀལྱཱཎེཧི གུཎེཧི སམནྣཱགཏོ ཏབྦིསཡཏཱཡ ཡུཏྟོཏི ཨཏྠོ. ཏཾ ཝིསཡཏཱ ཧེཏྠ སམནྣཱགམོ, ཀལྱཱཎགུཎཝིསཡཏཱཡ ཏནྣིསྶིཏོཏི ¶ ཨདྷིཔྤཱཡོ. སེཊྛོཏི པརིཡཱཡཝཙནེཔི ཨེསེཝ ནཡོ. སེཊྛགུཎཝིསཡཏཱ ཨེཝ ཧི ཀིཏྟིསདྡསྶ སེཊྛཏཱ ‘‘བྷགཝཱཏི ཝཙནཾ སེཊྛཾ, བྷགཝཱཏི ཝཙནམུཏྟམ’’ནྟིཨཱདཱིསུ (ཝིསུདྡྷི. ༡.༡༤༢; པཱརཱ. ཨཊྛ. ༡.ཝེརཉྫཀཎྜཝཎྞནཱ; ཨུདཱ. ཨཊྛ. ༡; ཨིཏིཝུ. ཨཊྛ. ནིདཱནཝཎྞནཱ; མཧཱནི. ཨཊྛ. ༤༩) ཝིཡ. ‘‘ཨརཧཾ སམྨཱསམྦུདྡྷོ’’ཏིཨཱདིནཱ གུཎཱནཾ སཾཀིཏྟནཏོ, སདྡནཱིཡཏོ ཙ ཝཎྞོཡེཝ ཀིཏྟིསདྡོ ནཱམཱཏི ཨཱཧ ‘‘ཀིཏྟིཡེཝཱ’’ཏི. ཝཎྞོ ཨེཝ ཧི ཀིཏྟེཏབྦཏོ ཀིཏྟི, སདྡནཱིཡཏོ སདྡོཏི ཙ ཝུཙྩཏི. ཀིཏྟིཔརིཡཱཡོ ཧི སདྡསདྡོ ཡཐཱ ‘‘ཨུལཱ༹རསདྡཱ ཨིསཡོ, གུཎཝནྟོ ཏཔསྶིནོ’’ཏི. ཀིཏྟིཝསེན པཝཏྟོ སདྡོ ཀིཏྟིསདྡོཏི བྷིནྣཱདྷིཀརཎཏཾ དསྶེཏི ‘‘ཐུཏིགྷོསོ’’ཏི ཨིམིནཱ. ཀིཏྟིསདྡོ ཧེཏྠ ཐུཏིཔརིཡཱཡོ ཀིཏྟནམབྷིཏྠཝནཾ ཀིཏྟཱིཏི. ཐུཏིཝསེན པཝཏྟོ གྷོསོ ཐུཏིགྷོསོ, ཨབྷིཏྠཝུདཱཧཱརོཏི ཨཏྠོ. ཨབྷིསདྡོ ཨབྷིབྷཝནེ, ཨབྷིབྷཝནཉྩེཏྠ ¶ ཨཛ྄ཛྷོཏྠརཎམེཝཱཏི ཝུཏྟཾ ‘‘ཨཛ྄ཛྷོཏྠརིཏྭཱ’’ཏི, ཨནཉྙསཱདྷཱརཎེ གུཎེ ཨཱརབྦྷ པཝཏྟཏྟཱ ཨབྷིབྱཱཔེཏྭཱཏི ཨཏྠོ. ཀིནྟི-སདྡོ ཨབྦྷུགྒཏོཏི ཙོདནཱཡ ‘‘ཨིཏིཔི སོ བྷགཝཱ’’ཏིཨཱདིམཱཧཱཏི ཨནུསནྡྷིཾ དསྶེཏུཾ ‘‘ཀིནྟཱི’’ཏི ཝུཏྟཾ.

པདཱནཾ སམྦཛ྄ཛྷནཾ པདསམྦནྡྷོ. སོ བྷགཝཱཏི ཡོ སོ སམཏིཾས པཱརམིཡོ པཱུརེཏྭཱ སབྦཀིལེསེ བྷཉྫིཏྭཱ ཨནུཏྟརཾ སམྨཱསམྦོདྷིཾ ཨབྷིསམྦུདྡྷོ དེཝཱནམཏིདེཝོ སཀྐཱནམཏིསཀྐོ བྲཧྨཱནམཏིབྲཧྨཱ ལོཀནཱཐོ བྷཱགྱཝནྟཏཱདཱིཧི ཀཱརཎེཧི སདེཝཀེ ལོཀེ ‘‘བྷགཝཱ’’ཏི པཏྠཊཀིཏྟིསདྡོ, སོ བྷགཝཱ. ཡཾ ཏཾ-སདྡཱ ཧི ནིཙྩསམྦནྡྷཱ. ‘‘བྷགཝཱ’’ཏི ཙ ཨིདམཱདིཔདཾ སཏྠུ ནཱམཀིཏྟནཾ. ཏེནཱཧ ཨཱཡསྨཱ དྷམྨསེནཱཔཏི ‘‘བྷགཝཱཏི ནེཏཾ ནཱམཾ མཱཏརཱ ཀཏཾ, ན པིཏརཱ ཀཏ’’ནྟིཨཱདི (མཧཱནི. ༦; ཙཱུལ༹ནི. ༢). པརཏོ པན ‘‘བྷགཝཱ’’ཏི པདཾ གུཎཀིཏྟནཾ. ཡཐཱ ཀམྨཊྛཱནིཀེན‘‘ཨརཧ’’ནྟིཨཱདཱིསུ ནཝསུ ཋཱནེསུ པཙྩེཀཾ ཨིཏིཔིསདྡཾ ཡོཛེཏྭཱ བུདྡྷགུཎཱ ཨནུསྶརཱིཡནྟི, ཨེཝམིདྷ བུདྡྷགུཎསཾཀིཏྟཀེནཱཔཱིཏི དསྶེནྟོ ‘‘ཨིཏིཔི ཨརཧཾ…པེ… ཨིཏིཔི བྷགཝཱ’’ཏི ཨཱཧ. ཨེཝཉྷི སཏི‘‘ཨརཧ’’ནྟིཨཱདཱིཧི ནཝཧི པདེཧི ཡེ སདེཝཀེ ལོཀེ ཨཏིཝིཡ པཱཀཊཱ པཉྙཱཏཱ བུདྡྷགུཎཱ, ཏེ ནཱནཔྤཀཱརཏོ ཝིབྷཱཝིཏཱ ཧོནྟི ‘‘ཨིཏིཔཱི’’ཏི པདདྭཡེན ཏེསཾ ནཱནཔྤཀཱརཏཱདཱིཔནཏོ. ‘‘ཨིཏིཔེཏཾ བྷཱུཏཾ, ཨིཏིཔེཏཾ ¶ ཏཙྪ’’ནྟིཨཱདཱིསུ (དཱི. ནི. ༡.༦) ཝིཡ ཧི ཨིཏི-སདྡོ ཨིདྷ ཨཱསནྣཔཙྩཀྑཀརཎཏྠོ, པི-སདྡོ སམྤིཎྜནཏྠོ, ཏེན ཙ ནེསཾ ནཱནཔྤཀཱརབྷཱཝོ དཱིཔིཏོ, ཏཱནི ཙ གུཎསལླཀྑཎཀཱརཎཱནི སདྡྷཱསམྤནྣཱནཾ ཝིཉྙུཛཱཏིཀཱནཾ པཙྩཀྑཱནི ཧོནྟི, ཏསྨཱ ཏཱནི སཾཀིཏྟེནྟེན ཝིཉྙུནཱ ཙིཏྟསྶ སམྨུཁཱིབྷཱུཏཱནེཝ ཀཏྭཱ སཾཀིཏྟེཏབྦཱནཱིཏི དསྶེནྟོ ‘‘ཨིམིནཱ ཙ ཨིམིནཱ ཙ ཀཱརཎེནཱཏི ཝུཏྟཾ ཧོཏཱི’’ཏི ཨཱཧ. ཨེཝཉྷི ནིརཱུཔེཏྭཱ ཀིཏྟེནྟེ ཡསྶ སཾཀིཏྟེཏི, ཏསྶ བྷགཝཏི ཨཏིཝིཡ པསཱདོ ཧོཏི.

ཨཱརཀཏྟཱཏི ཀིལེསེཧི སུཝིདཱུརཏྟཱ. ཨརཱིནནྟི ཀིལེསཱརཱིནཾ. ཨརཱནནྟི སཾསཱརཙཀྐསྶ ཨརཱནཾ. ཧཏཏྟཱཏི ཝིདྡྷཾསིཏཏྟཱ. པཙྩཡཱདཱིནནྟི ཙཱིཝརཱདིཔཙྩཡཱནཉྩེཝ པཱུཛཱ ཝིསེསཱནཉྩ. རཧཱབྷཱཝཱཏི ཙཀྑུརཧཱདཱིནམབྷཱཝཏོ. རཧོཔཱཔཀརཎཱབྷཱཝོ ཧི པདམནཏིཀྐམྨ རཧཱབྷཱཝོཏི ཝུཏྟཾ. ཨེཝམྤི ཧི ཡཐཱདྷིཔྤེཏམཏྠོ ལབྦྷཏཱིཏི. ཏཏོཏི ཝིསུདྡྷིམགྒཏོ (ཝིསུདྡྷི. ༡.༡༢༣). ཡཐཱ ཙ ཝིསུདྡྷིམགྒཏོ, ཨེཝཾ ཏཾསཾཝཎྞནཱཡ པརམཏྠམཉྫཱུསཱཡཾ (ཝིསུདྡྷི. ཊཱི. ༡.༡༢༤) ནེསཾ ཝིཏྠཱརོ གཧེཏབྦོ.

ཡསྨཱ ཛཱིཝཀོ བཧུསོ སཏྠུ སནྟིཀེ བུདྡྷགུཎེ སུཏྭཱ ཋིཏོ, དིཊྛསཙྩཏཱཡ ཙ སཏྠུསཱསནེ ¶ ཝིགཏཀཐཾཀཐོ, སཏྠུགུཎཀཐནེ ཙ ཝེསཱརཛྫཔྤཏྟོ, ཏསྨཱ སོ ཨེཝཾ ཝིཏྠཱརཏོ ཨེཝ ཨཱཧཱཏི ཝུཏྟཾ ‘‘ཛཱིཝཀོ པནཱ’’ཏིཨཱདི. ‘‘ཨེཏྠ ཙཱ’’ཏིཨཱདིནཱ སཱམཏྠིཡཏྠམཱཧ. ཐཱམོ དེསནཱཉཱཎམེཝ, བལཾ པན དསབལཉཱཎཾ. ཝིསྶཏྠནྟི བྷཱཝནཔུཾསཀཔདཾ, ཨནཱསངྐནྟི ཨཏྠོ.

པཉྩཝཎྞཱཡཱཏི ཁུདྡིཀཱདིཝསེན པཉྩཔཀཱརཱཡ. ནིརནྟརཾ ཕུཊཾ ཨཧོསི ཀཏཱདྷིཀཱརབྷཱཝཏོ. ཀམྨནྟརཱཡཝསེན ཧིསྶ རཉྙོ གུཎསརཱིརཾ ཁཏཱུཔཧཏཾ ཧོཏི. ཀསྨཱ པནེས ཛཱིཝཀམེཝ གམནསཛྫཱཡ ཨཱཎཱཔེཏཱིཏི ཨཱཧ ‘‘ཨིམཱཡཱ’’ཏིཨཱདི.

༡༥༨. ‘‘ཨུཏྟམ’’ནྟི ཝཏྭཱ ན ཀེཝལཾ ཨུཏྟམབྷཱཝོཡེཝེཏྠ ཀཱརཎཾ, ཨཐ ཁོ ཨཔྤསདྡཏཱཔཱིཏི དསྶེཏུཾ ‘‘ཨསྶཡཱནརཐཡཱནཱནཱི’’ཏིཨཱདི ཝུཏྟཾ. ཧཏྠིཡཱནེསུ ཙ ནིབྦིསེཝནམེཝ གཎྷནྟོ ཧཏྠིནིཡོཔི ཀཔྤཱཔེསི. པདཱནུཔདནྟི པདམནུགཏཾ པདཾ པུརཏོ གཙྪནྟསྶ ཧཏྠིཡཱནསྶ པདེ ཏེསཾ པདཾ ཀཏྭཱ, པདསདྡོ ཙེཏྠ པདཝལ༹ཉྫེ. ནིབྦུཏསྶཱཏི སབྦཀིལེསདརཐཝཱུཔསམསྶ ¶ . ནིབྦུཏེཧེཝཱཏི ཨཔྤསདྡཏཱཡ སདྡསངྑོབྷནཝཱུཔསམེཧེཝ.

ཀརེཎཱུཏི ཧཏྠིནིཔརིཡཱཡཝཙནཾ. ཀཎཏི སདྡཾ ཀརོཏཱིཏི ཧི ཀརེཎུ, ཀརོཝ ཡསྶཱ, ན དཱིགྷོ དནྟོཏི ཝཱ ཀརེཎུ, ‘‘ཀརེཎུཀཱ’’ཏིཔི པཱཋོ, ནིརུཏྟིནཡེན པདསིདྡྷི. ཨཱརོཧནསཛྫནཾ ཀུཐཱདཱིནཾ བནྡྷནམེཝ. ཨོཔཝཡ྄ཧནྟི རཱཛཱནམུཔཝཧིཏུཾ སམཏྠཾ. ‘‘ཨོཔགུཡ྄ཧ’’ནྟིཔི པཋནྟི, རཱཛཱནམུཔགཱུཧིཏུཾ གོཔིཏུཾ སམཏྠནྟི ཨཏྠོ. ‘‘ཨེཝཾ ཀིརསྶཱ’’ཏིཨཱདི པཎྜིཏབྷཱཝཝིབྷཱཝནཾ. ཀཐཱ ཝཏྟཏཱིཏི ལདྡྷོཀཱསབྷཱཝེན དྷམྨཀཐཱ པཝཏྟཏི. ‘‘རཉྙོ ཨཱསངྐཱནིཝཏྟནཏྠཾ ཨཱསནྣཙཱརཱིབྷཱཝེན ཧཏྠིནཱིསུ ཨིཏྠིཡོ ནིསཛྫཱཔིཏཱ’’ཏི (དཱི. ནི. ཊཱི. ༡.༡༥༨) ཨཱཙརིཡདྷམྨཔཱལཏྠེརེན ཝུཏྟཾ. ཨཊྛཀཐཱཡཾ པན ‘‘ཨིཏྠིཡོ ནིསྶཱཡ པུརིསཱནཾ བྷཡཾ ནཱམ ནཏྠི, སུཁཾ ཨིཏྠིཔརིཝུཏོ གམིསྶཱམཱི’’ཏི ཏཏྠ ཀཱརཎཾ ཝུཏྟམེཝ. ཨིམིནཱཔི ཀཱརཎེན བྷཝིཏབྦནྟི པན ཨཱཙརིཡེན ཨེཝཾ ཝུཏྟཾ སིཡཱ. རཉྙོ པརེསཾ དཱུརུཔསངྐམནབྷཱཝདསྶནཏྠཾ ཏཱ པུརིསཝེསཾ གཱཧཱཔེཏྭཱ ཨཱཝུདྷཧཏྠཱ ཀཱརིཏཱ. ཧཏྠིནིཀཱསཏཱནཱིཏི ཨེཏྠ ཧཏྠིནིཡོ ཨེཝ ཧཏྠིནིཀཱ. ‘‘པཉྩ ཧཏྠིནིཡཱ སཏཱནཱི’’ཏིཔི ཀཏྠཙི པཱཋོ, སོ ཨཡུཏྟོཝ ‘‘པཉྩམཏྟེཧི བྷིཀྑུསཏེཧཱི’’ཏིཨཱདཱིསུ (པཱརཱ. ༡) ཝིཡ ཨཱིདིསེསུ པཙྪིམཔདསྶ སམཱསསྶེཝ དསྶནཏོ. ཀསྶཙིདེཝཱཏི སནྣིཔཏིཏེ མཧཱཛནེ ཡསྶ ཀསྶཙི ཨེཝ, ཏདཉྙེསམྤི ཨཱཡཏིཾ མགྒཕལཱནམུཔནིསྶཡོཏི ཨཱཧ ‘‘སཱ མཧཱཛནསྶ ཨུཔཀཱརཱཡ བྷཝིསྶཏཱི’’ཏི.

པཊིཝེདེསཱིཏི ཉཱཔེསི. ཨུཔཙཱརཝཙནནྟི ཝོཧཱརཝཙནམཏྟཾ ཏེནེཝ ཨདྷིཔྤེཏཏྠསྶ ཨཔརིཡོསཱནཏོ ¶ . ཏེནཱཧ ‘‘ཏདེཝ ཨཏྟནོ རུཙིཡཱ ཀརོཧཱི’’ཏི. ཨིམིནཱཡེཝ ཧི ཏདཏྠཔརིཡོསཱནཾ. མཉྙསཱིཏི པཀཏིཡཱཝ ཛཱནཱསི. ཏདེཝཱཏི གམནཱགམནམེཝ. ཡདི གནྟུཀཱམོ, གཙྪ, ཨཐ ན གནྟུཀཱམོ, མཱ གཙྪ, ཨཏྟནོ རུཙིཡེཝེཏྠ པམཱཎནྟི ཝུཏྟཾ ཧོཏི.

༡༥༩. པཱཊིཨེཀྐཱཡེཝ སནྡྷིཝསེན པཙྩེཀཱ. ‘‘མཧཉྩ’’ནྟི པདེ ཀརཎཏྠེ པཙྩཏྟཝཙནནྟི ཨཱཧ ‘‘མཧཏཱ’’ཏི. མཧནྟསྶ བྷཱཝོ མཧཉྩཾ. ན ཀེཝལཾ ནིགྒཧཱིཏནྟཝསེནེཝ པཱཋོ, ཨཐ ཁོ ཨཱཀཱརནྟཝསེནཱཔཱིཏི ཨཱཧ ¶ ‘‘མཧཙྩཱཏིཔི པཱལཱི༹’’ཏི. ཡཐཱ ‘‘ཁཏྟིཡཱ’’ཏི ཝཏྟབྦེ ‘‘ཁཏྱཱ’’ཏི, ཨེཝཾ ‘‘མཧཏིཡཱ’’ཏི ཝཏྟབྦེ མཧཏྱཱ. པུན ཙ-ཀཱརཾ ཀཏྭཱ མཧཙྩཱཏི སནྡྷིཝསེན པདསིདྡྷི. པུལླིངྒཝསེན ཝཏྟབྦེ ཨིཏྠིལིངྒཝསེན ཝིཔལླཱསོ ལིངྒཝིཔརིཡཱཡོ. ཝིསེསནཉྷི བྷིཡྻོ ཝིསེསྱལིངྒཱདིགཱཧཀཾ. ཏིཡོཛནསཏཱནནྟི པཙྩེཀཾ ཏིཡོཛནསཏཔརིམཎྜལཱནཾ. དྭིནྣཾ མཧཱརཊྛཱནཾ ཨིསྶརིཡསིརཱིཏི ཨངྒམགདྷརཊྛཱནམཱདྷིཔཙྩམཱཧ. ཏདཏྠཾ ཝིཝརཏི ‘‘ཏསྶཱ’’ཏིཨཱདིནཱ. པཊིམུཀྐཝེཋནཱནཱིཏི ཨཱབནྡྷསིརོཝེཋནཱནི. ཨཱསཏྟཁགྒཱནཱིཏི ཨཾསེ ཨོལམྦནཝསེན སནྣདྡྷཱསཱིནི. མཎིདཎྜཏོམརེཏི མཎིདཎྜངྐུསེ.

‘‘ཨཔརཱཔཱི’’ཏིཨཱདིནཱ པདསཱ པརིཝཱརཱ ཝུཏྟཱ. ཁུཛྫཝཱམནཀཱ ཝེསཝསེན, ཀིརཱཏསཝརཨནྡྷཀཱདཡོ ཛཱཏིཝསེན ཏཱསཾ པརིཙཱརཀིནིཡོ དསྶིཏཱ. ཝིསྶཱསིཀཔུརིསཱཏི ཝསྶཝརེ སནྡྷཱཡཱཧ. ཀུལབྷོགཨིསྶརིཡཱདིཝསེན མཧཏཱི མཏྟཱ པམཱཎམེཏེསནྟི མཧཱམཏྟཱ, མཧཱནུབྷཱཝཱ རཱཛཱམཙྩཱ. ཝིཛྫཱདྷརཏརུཎཱ ཝིཡཱཏི མནྟཱནུབྷཱཝེན ཝིཛྫཱམཡིདྡྷིསམྤནྣཱ ཝིཛྫཱདྷརཀུམཱརཀཱ ཝིཡ. རཊྛིཡཔུཏྟཱཏི བྷོཛཔུཏྟཱ. རཊྛེ པརིཙརནྟཱིཏི ཧི ལུདྡཀཱ རཊྛིཡཱ, ཏེསཾ ནཱནཱཝུདྷཔརིཙཡཏཱཡ རཱཛབྷཊབྷཱུཏཱ པུཏྟཱཏི ཨཏྠོ, ཨནྟརརཊྛབྷོཛཀཱནཾ ཝཱ པུཏྟཱ རཊྛིཡཔུཏྟཱ, ཁཏྟིཡཱ བྷོཛརཱཛཱནོ. ‘‘ཨནུཡུཏྟཱ བྷཝནྟུ ཏེ’’ཏིཨཱདཱིསུ ཝིཡ ཧི ཊཱིཀཱཡཾ (དཱི. ནི. ཊཱི. ༡.༡༥༩) ཝུཏྟོ བྷོཛསདྡོ བྷོཛཀཝཱཙཀོཏི དཊྛབྦཾ. ཨུསྶཱཔེཏྭཱཏི ཨུདྡྷཾ པསཱརེཏྭཱ. ཛཡསདྡནྟི ‘‘ཛཡཏུ མཧཱརཱཛཱ’’ཏིཨཱདིཛཡཔཊིབདྡྷཾ སདྡཾ. དྷནུཔནྟིཔརིཀྑེཔོཏི དྷནུཔནྟིཔརིཝཱརོ. སབྦཏྠ ཏཾགཱཧཀཝསེན ཝེདིཏབྦོ. ཧཏྠིགྷཊཱཏི ཧཏྠིསམཱུཧཱ. པཧརམཱནཱཏི ཕུསམཱནཱ. ཨཉྙམཉྙསངྒྷཊྚནཱཏི ཨཝིཙྪེདགམནེན ཨཉྙམཉྙསམྦནྡྷཱ. སེཎིཡོཏི གནྡྷིཀསེཎཱིདུསྶིཀསེཎཱིཨཱདཡོ ‘‘ཨནཔལོཀེཏྭཱ རཱཛཱནཾ ཝཱ སངྒྷཾ ཝཱ གཎཾ ཝཱ པཱུགཾ ཝཱ སེཎིཾ ཝཱ ཨཉྙཏྲ ཀཔྤཱ ཝུཊྛཱཔེཡྻཱ’’ཏིཨཱདཱིསུ (པཱཙི. ༦༨༢) ཝིཡ. ‘‘ཨཊྛཱརས ཨཀྑོབྷིཎཱི སེནིཡོ’’ཏི ཀཏྠཙི ལིཁནྟི, སོ ཨནེཀེསུཔི པོཏྠཀེསུ ན དིཊྛོ. ཨནེཀསངྑྱཱ ཙ སེནཱ ཧེཊྛཱ ¶ གཎིཏཱཏི ཨཡུཏྟོཡེཝ. ཏདཱ སབྦཱཝུདྷཏོ སརོཝ དཱུརགཱམཱིཏི ཀཏྭཱ སརཔཏནཱཏིཀྐམཔྤམཱཎེན རཉྙོ པརིསཾ སཾཝིདཧཏི. ཀིམཏྠནྟི ཨཱཧ ‘‘སཙེ’’ཏིཨཱདི.

སཡཾ ¶ བྷཱཡནཊྛེན ཙིཏྟུཏྲཱསོ བྷཡཾ ཡཐཱ ཏཐཱ བྷཱཡཏཱིཏི ཀཏྭཱ. བྷཱཡིཏབྦེ ཨེཝ ཝཏྠུསྨིཾ བྷཡཏོ ཨུཔཊྛིཏེ ‘‘བྷཱཡིཏབྦམིད’’ནྟི བྷཱཡིཏབྦཱཀཱརེན ཏཱིརཎཏོ ཉཱཎཾ བྷཡཾ བྷཡཏོ ཏཱིརེཏཱིཏི ཀཏྭཱ. ཏེནེཝཱཧ ཝིསུདྡྷིམགྒེ (ཝིསུདྡྷི. ༢.༧༥༡) ‘‘བྷཡཏུཔཊྛཱནཉཱཎཾ པན བྷཱཡཏི, ན བྷཱཡཏཱིཏི? ན བྷཱཡཏི. ཏཉྷི ‘ཨཏཱིཏཱ སངྑཱརཱ ནིརུདྡྷཱ, པཙྩུཔྤནྣཱ ནིརུཛ྄ཛྷནྟི, ཨནཱགཏཱ ནིརུཛ྄ཛྷིསྶནྟཱི’ཏི ཏཱིརཎམཏྟམེཝ ཧོཏཱི’’ཏི. བྷཱཡནཊྛཱནཊྛེན ཨཱརམྨཎཾ བྷཡཾ བྷཱཡཏི ཨེཏསྨཱཏི ཀཏྭཱ. བྷཱཡནཧེཏུཊྛེན ཨོཏྟཔྤཾ བྷཡཾ པཱཔཏོ བྷཱཡཏི ཨེཏེནཱཏི ཀཏྭཱ. བྷཡཱནཀནྟི བྷཱཡནཱཀཱརོ. ཏེཔཱིཏི དཱིགྷཱཡུཀཱ དེཝཱཔི. དྷམྨདེསནནྟི པཉྩསུ ཁནྡྷེསུ པནྣརསལཀྑཎཔཊིམཎྜིཏཾ དྷམྨདེསནཾ. ཡེབྷུཡྻེནཱཏི ཋཔེཏྭཱ ཁཱིཎཱསཝདེཝེ ཏདཉྙེསཾ ཝསེན བཱཧུལླཏོ. ཁཱིཎཱསཝཏྟཱ ཧི ཏེསཾ ཙིཏྟུཏྲཱསབྷཡམྤི ན ཨུཔྤཛྫཏི. ཀཱམཾ སཱིཧོཔམསུཏྟཊྛཀཐཱཡཾ (ཨ. ནི. ཨཊྛ. ༢.༤.༣༣) ཙིཏྟུཏྲཱསབྷཡམྤི ཏདཏྠབྷཱཝེན ཝུཏྟཾ, ཨིདྷ པན པཀརཎཱནུརཱུཔཏོ ཉཱཎབྷཡམེཝ གཧིཏཾ. སཾཝེགནྟི སཧོཏྟཔྤཉཱཎཾ. སནྟཱསནྟི སབྦསོ ཨུབྦིཛྫནཾ. བྷཱཡིཏབྦཊྛེན བྷཡམེཝ བྷཱིམབྷཱཝེན བྷེརཝནྟི བྷཡབྷེརཝཾ, བྷཱིཏབྦཝཏྠུ. ཏེནཱཧ ‘‘ཨཱགཙྪཏཱི’’ཏི, ཨེཏཾ ནརཾ ཏཾ བྷཡབྷེརཝཾ ཨཱགཙྪཏི ནཱུནཱཏི ཨཏྠོ.

བྷཱིརུཾ པསཾསནྟཱིཏི པཱཔཏོ བྷཱཡནཏོ ཨུཏྲཱསནཏོ བྷཱིརུཾ པསཾསནྟི པཎྜིཏཱ. ན ཧི ཏཏྠ སཱུརནྟི ཏསྨིཾ པཱཔཀརཎེ སཱུརཾ པགབྦྷདྷཾསིནཾ ན ཧི པསཾསནྟི. ཏེནཱཧ ‘‘བྷཡཱ ཧི སནྟོ ན ཀརོནྟི པཱཔ’’ནྟི. ཏཏྠ བྷཡཱཏི པཱཔུཏྲཱསཏོ, ཨོཏྟཔྤཧེཏཱུཏི ཨཏྠོ.

ཚམྦྷིཏསྶཱཏི ཐམྦྷིཏསྶ, ཐ-ཀཱརསྶ ཚ-ཀཱརཱདེསོ. ཏདཏྠམཱཧ ‘‘སཀལསརཱིརཙལན’’ནྟི, བྷཡཝསེན སཀལཀཱཡཔཀམྤནནྟི ཨཏྠོ. ཨུཡྻོདྷནཾ སམྤཧཱརོ.

ཨེཀེཏི ཨུཏྟརཝིཧཱརཝཱསིནོ. ‘‘རཱཛགཧེ’’ཏིཨཱདི ཏེསམདྷིཔྤཱཡཝིཝརཎཾ. ཨེཀེཀསྨིཾ མཧཱདྭཱརེ དྭེ དྭེ ཀཏྭཱ ཙཏུསཊྛི ཁུདྡཀདྭཱརཱནི. ‘‘ཏདཱ’’ཏིཨཱདིནཱ ཨཀཱརཎབྷཱཝེ ཧེཏུཾ དསྶེཏི.

ཨིདཱནི སཀཝཱདཾ དསྶེཏུཾ ‘‘ཨཡཾ པནཱ’’ཏིཨཱདི ཝུཏྟཾ. ‘‘ཛཱིཝཀོ ཀིརཱ’’ཏིཨཱདི ཨཱསངྐནཱཀཱརདསྶནཾ. ཨསྶཱཏི ཨཛཱཏསཏྟུརཉྙོ. ཨུཀྐཎྛིཏོཏི ཨནབྷིརཏོ. ཚཏྟཾ ཨུསྶཱཔེཏུཀཱམོ ¶ མཉྙེཏི སམྦནྡྷོ ¶ . བྷཱཡིཏྭཱཏི བྷཱཡནཧེཏུ. ཏསྶཱཏི ཛཱིཝཀསྶ. སམྨསདྡོ སམཱནཏྠོ, སམཱནབྷཱཝོ ཙ ཝཡེནཱཏི ཨཱཧ ‘‘ཝཡསྶཱབྷིལཱཔོ’’ཏི. ཝཡེན སམཱནོ ཝཡསྶོ ཡཐཱ ‘‘ཨེཀརཱཛཱ ཧརིསྶཝཎྞོ’’ཏི (ཛཱ. ༡.༢.༡༧). སམཱནསདྡསྶ ཧི སཱདེསམིཙྪནྟི སདྡཝིདཱུ, ཏེན ཨབྷིལཱཔོ ཨཱལཔནཾ ཏཐཱ, རུལ༹ྷཱིནིདྡེསོ ཨེས, ‘‘མཱརིསཱ’’ཏི ཨཱལཔནམིཝ. ཡཐཱ ཧི མཱརིསཱཏི ནིདྡུཀྑཏཱབྷིལཱཔོ སདུཀྑེཔི ནེརཡིཀེ ཝུཙྩཏི ‘‘ཡདཱ ཁོ ཏེ མཱརིས སངྐུནཱ སངྐུ ཧདཡེ སམཱགཙྪེཡྻཱ’’ཏིཨཱདཱིསུ, (མ. ནི. ༡.༥༡༢) ཨེཝཾ ཡོ ཀོཙི སཧཱཡོ ཨསམཱནཝཡོཔི ‘‘སམྨཱ’’ཏི ཝུཙྩཏཱིཏི, ཏསྨཱ སཧཱཡཱབྷིལཱཔོ ཨིཙྩེཝ ཨཏྠོ. ཀཙྩི ན ཝཉྩེསཱིཏི པཱལི༹ཡཱ སམྦནྡྷོ. ‘‘ན པལམྦྷེསཱི’’ཏི ཝུཏྟེཔི ཨིདྷ པརིཀཔྤཏྠོཝ སམྦྷཝཏཱིཏི ཝུཏྟཾ ‘‘ན ཝིཔྤལམྦྷེཡྻཱསཱི’’ཏི, ན པལོབྷེཡྻཱསཱིཏི ཨཏྠོ. ཀཐཱཡ སལླཱཔོ, སོ ཨེཝ ནིགྒྷོསོ ཏཐཱ.

ཝིནསྶེཡྻཱཏི ཙིཏྟཝིགྷཱཏེན ཝིཧཉྙེཡྻ. ‘‘ན ཏཾ དེཝཱ’’ཏིཨཱདིཝཙནཾ སནྡྷཱཡ ‘‘དལ༹ྷཾ ཀཏྭཱ’’ཏི ཝུཏྟཾ. ཏུརིཏཝསེནིདམཱམེཌིཏནྟི དསྶེཏི ‘‘ཏརམཱནོཝཱ’’ཏི ཨིམིནཱ. ‘‘ཨབྷིཀྐམ མཧཱརཱཛཱ’’ཏི ཝཏྭཱ ཏཏྠ ཀཱརཎཾ དསྶེཏུཾ ‘‘ཨེཏེ’’ཏིཨཱདི ཝུཏྟནྟི སསམྦནྡྷམཏྠཾ དསྶེནྟོ ‘‘མཧཱརཱཛ ཙོརབལཾ ནཱམཱ’’ཏིཨཱདིམཱཧ.

སཱམཉྙཕལཔུཙྪཱཝཎྞནཱ

༡༦༠. ཨཡཾ བཧིདྭཱརཀོཊྛཀོཀཱསོ ནཱགསྶ བྷཱུམི ནཱམ. ཏེནཱཧ ‘‘ཝིཧཱརསྶཱ’’ཏིཨཱདི. བྷགཝཏོ ཏེཛོཏི བུདྡྷཱནུབྷཱཝོ. རཉྙོ སརཱིརཾ ཕརི ཡཐཱ ཏཾ སོཎདཎྜསྶ བྲཱཧྨཎསྶ བྷགཝཏོ སནྟིཀཾ ཨཱགཙྪནྟསྶ ཨནྟོཝནསཎྜགཏསྶ. ‘‘ཨཏྟནོ ཨཔརཱདྷཾ སརིཏྭཱ མཧཱབྷཡཾ ཨུཔྤཛྫཱི’’ཏི ཨིདཾ སེདམུཉྩནསྶ ཀཱརཎདསྶནཾ. ན ཧི བུདྡྷཱནུབྷཱཝཏོ སེདམུཉྩནཾ སམྦྷཝཏི ཀཱཡཙིཏྟཔསྶདྡྷིཧེཏུབྷཱཝཏོ.

ཨེཀེཏི ཨུཏྟརཝིཧཱརཝཱསིནོཡེཝ. ཏདཡུཏྟམེཝཱཏི དསྶེཏི ‘‘ཨིམིནཱ’’ཏིཨཱདིནཱ. ཨབྷིམཱརེཏི དྷནུགྒཧེ. དྷནཔཱལནྟི ནཱལཱ༹གིརིཾ. སོ ཧི ཏདཱ ནཱགརེཧི པཱུཛིཏདྷནརཱསིནོ ལབྦྷནཏོ ‘‘དྷནཔཱལོ’’ཏི ཝོཧརཱིཡཏི. ན ཀེཝལཾ དིཊྛཔུབྦཏོཡེཝ, ཨཐ ཁོ པཀཏིཡཱཔི བྷགཝཱ སཉྙཱཏོཏི ¶ དསྶེཏུཾ ‘‘བྷགཝཱ ཧཱི’’ཏིཨཱདིམཱཧ. ཨཱཀིཎྞཝརལཀྑཎོཏི བཏྟིཾས མཧཱཔུརིསལཀྑཎེ སནྡྷཱཡཱཧ. ཨནུབྱཉྫནཔཊིམཎྜིཏོཏི ཨསཱིཏཱནུབྱཉྫནེ (ཛིནཱལངྐཱརཊཱིཀཱཡ ཝིཛཱཏམངྒལཝཎྞནཱཡཾ ཝིཏྠཱརོ). ཚབྦཎྞཱཧི རསྨཱིཧཱིཏི ཏདཱ ཝཏྟམཱནཱ རསྨིཡོ. ཨིསྶརིཡལཱིལཱ༹ཡཱཏི ¶ ཨིསྶརིཡཝིལཱསེན. ནནུ ཙ བྷགཝཏོ སནྟིཀེ ཨིསྶརིཡལཱིལཱཡ པུཙྪཱ ཨགཱརཝོཡེཝ སིཡཱཏི ཙོདནཱཡ ‘‘པཀཏི ཧེསཱ’’ཏིཨཱདིམཱཧ, པཀཏིཡཱ པུཙྪནཏོ ན ཨགཱརཝོཏི ཨདྷིཔྤཱཡོ. པརིཝཱརེཏྭཱ ནིསིནྣེན བྷིཀྑུསངྒྷེན པུརེ ཀཏེཔི ཨཏྠཏོ ཏསྶ པུརཏོ ནིསིནྣོ ནཱམ. ཏེནཱཧ ‘‘པརིཝཱརེཏྭཱ’’ཏིཨཱདི.

༡༦༡. ཡེན, ཏེནཱཏི ཙ བྷུམྨཏྠེ ཀརཎཝཙནནྟི དསྶེཏི ‘‘ཡཏྠ, ཏཏྠཱ’’ཏི ཨིམིནཱ. ཡེན མཎྜལསྶ དྭཱརཾ, ཏེནཱུཔསངྐམཱིཏི སམྤཏྟབྷཱཝསྶ ཝུཏྟཏྟཱ ཨིདྷ ཨུཔགམནམེཝ ཡུཏྟནྟི ཨཱཧ ‘‘ཨུཔགཏོ’’ཏི. ཨནུཙྪཝིཀེ ཨེཀསྨིཾ པདེསེཏི ཡཏྠ ཝིཉྙུཛཱཏིཀཱ ཨཊྛཾསུ, ཏསྨིཾ. ཀོ པནེས ཨནུཙྪཝིཀཔདེསོ ནཱམ? ཨཏིདཱུརཏཱདིཚནིསཛྫདོསཝིརཧིཏོ པདེསོ, ནཔཙྪཏཱདིཨཊྛནིསཛྫདོསཝིརཧིཏོ ཝཱ. ཡཐཱཧུ ཨཊྛཀཐཱཙརིཡཱ –

‘‘ན པཙྪཏོ ན པུརཏོ, ནཱཔི ཨཱསནྣདཱུརཏོ;

ན ཀཙྪེ ནོ པཊིཝཱཏེ, ན ཙཱཔི ཨོནཏུནྣཏེ;

ཨིམེ དོསེ ཝིསྶཛྫེཏྭཱ, ཨེཀམནྟཾ ཋིཏཱ ཨཧཱུ’’ཏི. (ཁུ. པཱ. ཨཊྛ. ཨེཝམིཙྩཱདིཔཱཋཝཎྞནཱ; སུ. ནི. ཨཊྛ. ༢.༢༦༡);

ཏདཱ བྷིཀྑུསངྒྷེ ཏུཎྷཱིབྷཱཝསྶ ཨནཝསེསཏོ བྱཱཔིཏབྷཱཝཾ དསྶེཏུཾ ‘‘ཏུཎྷཱིབྷཱུཏཾ ཏུཎྷཱིབྷཱུཏ’’ནྟི ཝིཙྪཱཝཙནཾ ཝུཏྟནྟི ཨཱཧ ‘‘ཡཏོ…པེ… མེཝཱ’’ཏི, ཡཏོ ཡཏོ བྷིཀྑུཏོཏི ཨཏྠོ. ཧཏྠེན, ཧཏྠསྶ ཝཱ ཀུཀཏབྷཱཝོ ཧཏྠཀུཀྐུཙྩཾ, ཨསཉྙམོ, ཨསམྤཛཉྙཀིརིཡཱ ཙ. ཏཐཱ པཱདཀུཀྐུཙྩནྟི ཨེཏྠཱཔི. ཝཱ-སདྡོ ཨཝུཏྟཝིཀཔྤནེ, ཏེན ཏདཉྙོཔི ཙཀྑུསོཏཱདིཨསཉྙམོ ནཏྠཱིཏི ཝིབྷཱཝིཏོ. ཏཏྠ པན ཙཀྑུཨསཾཡམོ སབྦཔཋམོ དུནྣིཝཱརིཏོ ཙཱཏི ཏདབྷཱཝཾ དསྶེཏུཾ ‘‘སབྦཱལངྐཱརཔཊིམཎྜིཏ’’ནྟིཨཱདི ཝུཏྟཾ.

ཝིཔྤསནྣརཧདམིཝཱཏི ཨནཱཝིལོདཀསརམིཝ. ཡེནེཏརཧི…པེ… ཨིམིནཱ མེ…པེ… ཧོཏཱུཏི སམྦནྡྷོ. ཨཉྙོ ཧི ཨཏྠཀྐམོ, ཨཉྙོ སདྡཀྐམོཏི ¶ ཨཱཧ ‘‘ཡེནཱ’’ཏིཨཱདི. ཏཏྠ ཀཱཡིཀ-ཝཱཙསིཀེན ཨུཔསམེན ལདྡྷེན མཱནསིཀོཔི ཨུཔསམོ ཨནུམཱནཏོ ལདྡྷོ ཨེཝཱཏི ཀཏྭཱ ‘‘མཱནསིཀེན ཙཱ’’ཏི ཝུཏྟཾ. སཱིལཱུཔསམེནཱཏི སཱིལསཉྙམེན. ཝུཏྟམཏྠཾ ལོཀཔཀཏིཡཱ སཱདྷེནྟོ ‘‘དུལླབྷཉྷཱི’’ཏིཨཱདིམཱཧ. ལདྡྷཱཏི ལབྷིཏྭཱ.

ཨུཔསམནྟི ཨཱཙཱརསམྤཏྟིསངྑཱཏཾ སཾཡམཾ. ‘‘ཨེཝ’’ནྟིཨཱདིནཱ ཏཐཱ ཨིཙྪཱཡ ཀཱརཎཾ དསྶེཏི ¶ . སོཏི ཨཡྻཀོ, ཨུདཡབྷདྡོ ཝཱ. ‘‘ཀིཉྩཱཔཱི’’ཏིཨཱདི ཏདཏྠ-སམཏྠནཾ. གྷཱཏེསྶཏིཡེཝཱཏི ཏཾཀཱལཱཔེཀྑཱཡ ཝུཏྟཾ. ཏེནཱཧ ‘‘གྷཱཏེསཱི’’ཏི. ཨིདཉྷི སམྤཏིཔེཀྑཝཙནཾ. པཉྩཔརིཝཊྚོཏི པཉྩརཱཛཔརིཝཊྚོ.

ཀསྨཱ ཨེཝམཱཧ, ནནུ བྷགཝནྟམུདྡིསྶ རཱཛཱ ན ཀིཉྩི ཝདཏཱིཏི ཨདྷིཔྤཱཡོ. ཝཙཱིབྷེདེཏི ཡཐཱཝུཏྟཨུདཱནཝཙཱིབྷེདེ. ཏུཎྷཱི ནིརཝོཏི པརིཡཱཡཝཙནམེཏཾ. ‘‘ཨཡ’’ནྟིཨཱདི ཙིཏྟཛཱནནཱཀཱརདསྶནཾ. ཨཡཾ…པེ… ན སཀྑིསྶཏཱིཏི ཉཏྭཱཏི སམྦནྡྷོ. ཝཙནཱནནྟརནྟི ཨུདཱནཝཙནཱནནྟརཾ. ཡེནཱཏི ཡཏྠ པདེསེ, ཡེན ཝཱ སོཏཔཐེན. ཡེན པེམནྟི ཨེཏྠཱཔི ཡཐཱརཧམེས ནཡོ.

ཀཏཱཔརཱདྷསྶ ཨཱལཔནཾ ནཱམ དུཀྐརནྟི སནྡྷཱཡ ‘‘མུཁཾ ནཔྤཧོཏཱི’’ཏི ཝུཏྟཾ. ‘‘ཨཱགམཱ ཁོ ཏྭཾ མཧཱརཱཛ ཡཐཱཔེམ’’ནྟི ཝཙནནིདྡིཊྛཾ ཝཱ ཏདཱ ཏདཏྠདཱིཔནཱཀཱརེན པཝཏྟཾ ནཱནཱནཡཝིཙིཏྟཾ བྷགཝཏོ མདྷུརཝཙནམྤི སནྡྷཱཡ ཨེཝཾ ཝུཏྟནྟི དཊྛབྦཾ. ཨེཀམྤི ཧི ཨཏྠཾ བྷགཝཱ ཡཐཱ སོཏཱུནཾ ཉཱཎཾ པཝཏྟཏི, ཏཐཱ དེསེཏི. ཡཾ སནྡྷཱཡ ཨཊྛཀཐཱསུ ཝུཏྟཾ ‘‘བྷགཝཏཱ ཨབྱཱཀཏཾ ཏནྟིཔདཾ ནཱམ ནཏྠི, སབྦེསཉྙེཝ ཨཏྠོཔི བྷཱསིཏོ’’ཏི. པཉྩཧཱཀཱརེཧཱིཏི ཨིཊྛཱནིཊྛེསུ སམབྷཱཝཱདིསངྑཱཏེཧི པཉྩཧི ཀཱརཎེཧི. ཝུཏྟཉྷེཏཾ མཧཱནིདྡེསེ (མཧཱནི. ༣༨, ༡༦༢) –

‘‘པཉྩཧཱཀཱརེཧི ཏཱདཱི ཨིཊྛཱནིཊྛེ ཏཱདཱི, ཙཏྟཱཝཱིཏི ཏཱདཱི, ཏིཎྞཱཝཱིཏི ཏཱདཱི, མུཏྟཱཝཱིཏི ཏཱདཱི, ཏཾནིདྡེསཱ ཏཱདཱི.

ཀཐཾ ཨརཧཱ ཨིཊྛཱནིཊྛེ ཏཱདཱི? ཨརཧཱ ལཱབྷེཔི ཏཱདཱི, ཨལཱབྷེཔི, ཡསེཔི, ཨཡསེཔི, པསཾསཱཡཔི, ནིནྡཱཡཔི, སུཁེཔི, དུཀྑེཔི ཏཱདཱི, ཨེཀཾ ཙེ བཱཧཾ གནྡྷེན ལིམྤེཡྻུཾ, ཨེཀཾ ཙེ བཱཧཾ ཝཱསིཡཱ ¶ ཏཙྪེཡྻུཾ, ཨམུསྨིཾ ནཏྠི རཱགོ, ཨམུསྨིཾ ནཏྠི པཊིགྷཾ, ཨནུནཡཔཊིགྷཝིཔྤཧཱིནོ, ཨུགྒྷཱཏིནིགྷཱཏིཝཱིཏིཝཏྟོ, ཨནུརོདྷཝིརོདྷསམཏིཀྐནྟོ, ཨེཝཾ ཨརཧཱ ཨིཊྛཱནིཊྛེ ཏཱདཱི.

ཀཐཾ ཨརཧཱ ཙཏྟཱཝཱིཏི ཏཱདཱི? ཨརཧཏོ…པེ… ཐམྦྷོ, སཱརམྦྷོ, མཱནོ, ཨཏིམཱནོ, མདོ, པམཱདོ, སབྦེ ཀིལེསཱ, སབྦེ དུཙྩརིཏཱ, སབྦེ དརཐཱ, སབྦེ པརིལཱ༹ཧཱ ¶ , སབྦེ སནྟཱཔཱ, སབྦཱ ཀུསལཱབྷིསངྑཱརཱ ཙཏྟཱ ཝནྟཱ མུཏྟཱ པཧཱིནཱ པཊིནིསྶཊྛཱ, ཨེཝཾ ཨརཧཱ ཙཏྟཱཝཱིཏི ཏཱདཱི.

ཀཐཾ ཨརཧཱ ཏིཎྞཱཝཱིཏི ཏཱདཱི? ཨརཧཱ ཀཱམོགྷཾ ཏིཎྞོ, བྷཝོགྷཾ ཏིཎྞོ, དིཊྛོགྷཾ ཏིཎྞོ, ཨཝིཛྫོགྷཾ ཏིཎྞོ, སབྦཾ སཾསཱརཔཐཾ ཏིཎྞོ ཨུཏྟིཎྞོ ནིཏྟིཎྞོ ཨཏིཀྐནྟོ སམཏིཀྐནྟོ ཝཱིཏིཝཏྟོ, སོ ཝུཊྛཝཱསོ ཙིཎྞཙརཎོ ཛཱཏིམརཎསངྑཡོ, ཛཱཏིམརཎསཾསཱརོ (མཧཱནི. ༣༨) ནཏྠི ཏསྶ པུནབྦྷཝོཏི, ཨེཝཾ ཨརཧཱ ཏིཎྞཱཝཱིཏི ཏཱདཱི.

ཀཐཾ ཨརཧཱ མུཏྟཱཝཱིཏི ཏཱདཱི? ཨརཧཏོ རཱགཱ ཙིཏྟཾ མུཏྟཾ ཝིམུཏྟཾ སུཝིམུཏྟཾ, དོསཱ, མོཧཱ, ཀོདྷཱ, ཨུཔནཱཧཱ, མཀྑཱ, པལཱ༹སཱ, ཨིསྶཱཡ, མཙྪརིཡཱ, མཱཡཱཡ, སཱཋེཡྻཱ, ཐམྦྷཱ, སཱརམྦྷཱ, མཱནཱ, ཨཏིམཱནཱ, མདཱ, པམཱདཱ, སབྦཀིལེསེཧི, སབྦདུཙྩརིཏེཧི, སབྦདརཐེཧི, སབྦཔརིལཱ༹ཧེཧི, སབྦསནྟཱཔེཧི, སབྦཱཀུསལཱབྷིསངྑཱརེཧི ཙིཏྟཾ མུཏྟཾ ཝིམུཏྟཾ སུཝིམུཏྟཾ; ཨེཝཾ ཨརཧཱ མུཏྟཱཝཱིཏི ཏཱདཱི.

ཀཐཾ ཨརཧཱ ཏཾནིདྡེསཱ ཏཱདཱི? ཨརཧཱ ‘སཱིལེ སཏི སཱིལཝཱ’ཏི ཏཾནིདྡེསཱ ཏཱདཱི, ‘སདྡྷཱཡ སཏི སདྡྷོ’ཏི, ‘ཝཱིརིཡེ སཏི ཝཱིརིཡཝཱ’ཏི, ‘སཏིཡཱ སཏི སཏིམཱ’ཏི, ‘སམཱདྷིམྷི སཏི སམཱཧིཏོ’ཏི, ‘པཉྙཱཡ སཏི པཉྙཝཱ’ཏི, ‘ཝིཛྫཱཡ སཏི ཏེཝིཛྫོ’ཏི, ‘ཨབྷིཉྙཱཡ སཏི ཚལ༹བྷིཉྙོ’ཏི ཏཾནིདྡེསཱ ཏཱདཱི, ཨེཝཾ ཨརཧཱ ཏཾནིདྡེསཱ ཏཱདཱི’’ཏི.

བྷགཝཱ པན སབྦེསམྤི ཏཱདཱིནམཏིསཡོ ཏཱདཱི. ཏེནཱཧ ‘‘སུཔྤཏིཊྛིཏོ’’ཏི. ཝུཏྟམྤི ཙེཏཾ བྷགཝཏཱ ཀཱལ༹ཀཱརཱམསུཏྟནྟེ ‘‘ཨིཏི ཁོ བྷིཀྑཝེ ¶ ཏཐཱགཏོ དིཊྛསུཏམུཏཝིཉྙཱཏབྦེསུ དྷམྨེསུ ཏཱདཱིཡེཝ ཏཱདཱི, ཏམྷཱ ཙ པན ཏཱདིམྷཱ ཨཉྙོ ཏཱདཱི ཨུཏྟརིཏརོ ཝཱ པཎཱིཏཏརོ ཝཱ ནཏྠཱིཏི ཝདཱམཱི’’ཏི (ཨ. ནི. ༤.༢༤). ཨཐ ཝཱ པཉྩཝིདྷཱརིཡིདྡྷིསིདྡྷེཧི པཉྩཧཱཀཱརེཧི ཏཱདིལཀྑཎེ སུཔྤཏིཊྛིཏོཏི ཨཏྠོ. ཝུཏྟཉྷེཏཾ ཨཱཡསྨཏཱ དྷམྨསེནཱཔཏིནཱ པཊིསམྦྷིདཱམགྒེ –

‘‘ཀཏམཱ ཨརིཡཱ ཨིདྡྷི? ཨིདྷ བྷིཀྑུ སཙེ ཨཱཀངྑཏི ‘པཊིཀཱུལེ ཨཔྤཊིཀཱུལསཉྙཱི ཝིཧརེཡྻ’ནྟི, ཨཔྤཊིཀཱུལསཉྙཱི ཏཏྠ ཝིཧརཏི, སཙེ ཨཱཀངྑཏི ‘ཨཔྤཊིཀཱུལེ ¶ པཊིཀཱུལསཉྙཱི ཝིཧརེཡྻ’ནྟི, པཊིཀཱུལསཉྙཱི ཏཏྠ ཝིཧརཏི, སཙེ ཨཱཀངྑཏི ‘པཊིཀཱུལེ ཙ ཨཔྤཊིཀཱུལེ ཙ ཨཔྤཊིཀཱུལསཉྙཱི ཝིཧརེཡྻ’ནྟི, ཨཔྤཊིཀཱུལསཉྙཱི ཏཏྠ ཝིཧརཏི, སཙེ ཨཱཀངྑཏི ‘ཨཔྤཊིཀཱུལེ ཙ པཊིཀཱུལེ ཙ པཊིཀཱུལསཉྙཱི ཝིཧརེཡྻ’ནྟི, པཊིཀཱུལསཉྙཱི ཏཏྠ ཝིཧརཏི, སཙེ ཨཱཀངྑཏི ‘པཊིཀཱུལེ ཙ ཨཔྤཊིཀཱུལེ ཙ ཏདུབྷཡཾ ཨབྷིནིཝཛྫེཏྭཱ ཨུཔེཀྑཀོ ཝིཧརེཡྻཾ སཏོ སམྤཛཱནོ’ཏི, ཨུཔེཀྑཀོ ཏཏྠ ཝིཧརཏི སཏོ སམྤཛཱནོ’’ཏི (པཊི. མ. ༣.༡༧).

བཧིདྡྷཱཏི སཱསནཏོ བཧིསམཡེ.

༡༦༢. ཨེསཱཏི བྷིཀྑུསངྒྷསྶ ཝནྡནཱཀཱརོ. ཏམཏྠཾ ལོཀསིདྡྷཱཡ ཨུཔམཱཡ སཱདྷེཏུཾ ‘‘རཱཛཱན’’ནྟིཨཱདི ཝུཏྟཾ. ཨོཀཱསནྟི པུཙྪིཏབྦཊྛཱནཾ.

ན མེ པཉྷཝིསྶཛྫནེ བྷཱརོ ཨཏྠཱིཏི སཏྠུ སབྦཏྠ ཨཔྤཊིཧཏཉཱཎཙཱརཏཱཡ ཨཏྠཏོ ཨཱཔནྣཱཡ དསྶནཾ. ‘‘ཡདི ཨཱཀངྑསཱི’’ཏི ཝུཏྟེཡེཝ ཧི ཨེས ཨཏྠོ ཨཱཔནྣོ ཧོཏི. སབྦཾ ཏེ ཝིསྶཛྫེསྶཱམཱིཏི ཨེཏྠཱཔི ཨཡཾ ནཡོ. ‘‘ཡཾ ཨཱཀངྑསི, ཏཾ པུཙྪཱ’’ཏི ཝཙནེནེཝ ཧི ཨཡམཏྠོ སིཛ྄ཛྷཏི. ཨསཱདྷཱརཎཾ སབྦཉྙུཔཝཱརཎནྟི སམྦནྡྷོ. ཡདི ‘‘ཡདཱཀངྑསཱི’’ཏི ན ཝདནྟི, ཨཐ ཀཐཾ ཝདནྟཱིཏི ཨཱཧ ‘‘སུཏྭཱ’’ཏིཨཱདི. པདེསཉཱཎེཡེཝ ཋིཏཏྟཱ ཏཐཱ ཝདནྟཱིཏི ཝེདིཏབྦཾ. བུདྡྷཱ པན སབྦཉྙུཔཝཱརཎཾ པཝཱརེནྟཱིཏི སམྦནྡྷོ.

‘‘པུཙྪཱཝུསོ ཡདཱཀངྑསཱི’’ཏིཨཱདཱིནི སུཏྟཔདཱནི ཡེསཾ པུགྒལཱནཾ ཝསེན ཨཱགཏཱནི, ཏཾ དསྶནཏྠཾ ‘‘ཡཀྑནརིནྡདེཝསམཎབྲཱཧྨཎཔརིབྦཱཛཀཱན’’ནྟི ཝུཏྟཾ. ཏཏྠ ཧི ‘‘པུཙྪཱཝུསོ ཡདཱཀངྑསཱི’’ཏི ཨཱལ༹ཝཀསྶ ཡཀྑསྶ ¶ ཨོཀཱསཀརཎཾ, ‘‘པུཙྪ མཧཱརཱཛཱ’’ཏི ནརིནྡཱནཾ, ‘‘པུཙྪ ཝཱསཝཱ’’ཏིཨཱདི དེཝཱནམིནྡསྶ, ‘‘ཏེན ཧཱི’’ཏིཨཱདི སམཎཱནཾ, ‘‘བཱཝརིསྶ ཙཱ’’ཏིཨཱདི བྲཱཧྨཎཱནཾ, ‘‘པུཙྪ མཾ སབྷིཡཱ’’ཏིཨཱདི པརིབྦཱཛཀཱནཾ ཨོཀཱསཀརཎནྟི དཊྛབྦཾ. ཝཱསཝཱཏི དེཝཱནམིནྡཱལཔནཾ. ཏདེཏཉྷི སཀྐཔཉྷསུཏྟེ. མནསིཙྪསཱིཏི མནསཱ ཨིཙྪསི.

ཀཏཱཝཀཱསཱཏི ཡསྨཱ ཏུམྷེ མཡཱ ཀཏོཀཱསཱ, ཏསྨཱ བཱཝརིསྶ ཙ ཏུཡ྄ཧཾ ཨཛིཏསྶ ཙ སབྦེསཉྩ སེསཱནཾ ཡཾ ཀིཉྩི སབྦཾ སཾསཡཾ ཡཐཱ མནསཱ ཨིཙྪཐ, ཏཐཱ པུཙྪཝ྄ཧོ པུཙྪཐཱཏི ཡོཛནཱ. ཨེཏྠ ཙ བཱཝརིསྶ སཾསཡཾ མནསཱ པུཙྪཝ྄ཧོ, ཏུམྷཱཀཾ པན སབྦེསཾ སཾསཡཾ མནསཱ ཙ ¶ ཨཉྙཐཱ ཙ ཡཐཱ ཨིཙྪཐ, ཏཐཱ པུཙྪཝ྄ཧོཏི ཨདྷིཔྤཱཡོ. བཱཝརཱི ཧི ‘‘ཨཏྟནོ སཾསཡཾ མནསཱཝ པུཙྪཐཱ’’ཏི ཨནྟེཝཱསིཀེ ཨཱཎཱཔེསི. ཝུཏྟཉྷི –

‘‘ཨནཱཝརཎདསྶཱཝཱི, ཡདི བུདྡྷོ བྷཝིསྶཏི;

མནསཱ པུཙྪིཏེ པཉྷེ, ཝཱཙཱཡ ཝིསྶཛེསྶཏཱི’’ཏི. (སུ. ནི. ༡༠༡༡);

ཏདེཏཾ པཱརཱཡནཝགྒེ. ཏཐཱ ‘‘པུཙྪ མཾ སབྷིཡཱ’’ཏིཨཱདིཔི.

བུདྡྷབྷཱུམིནྟི བུདྡྷཊྛཱནཾ, ཨཱསཝཀྑཡཉཱཎཾ, སབྦཉྙུཏཉྙཱཎཉྩ. བོདྷིསཏྟབྷཱུམི ནཱམ བོདྷིསཏྟཊྛཱནཾ པཱརམཱིསམྦྷརཎཉཱཎཾ, བྷཱུམིསདྡོ ཝཱ ཨཝཏྠཱཝཱཙཀོ, བུདྡྷཱཝཏྠཾ, བོདྷིསཏྟཱཝཏྠཱཡནྟི ཙ ཨཏྠོ. ཨེཀཏྟནཡེན ཧི པཝཏྟེསུ ཁནྡྷེསུ ཨཝཏྠཱཡེཝ ཏཾ ཏདཱཀཱརནིསྶིཏཱ.

ཡོ བྷགཝཱ བོདྷིསཏྟབྷཱུམིཡཾ པདེསཉཱཎེ ཋིཏོ སབྦཉྙུཔཝཱརཎཾ པཝཱརེསི, ཏསྶ ཏདེཝ ཨཙྪརིཡནྟི སམྦནྡྷོ. ཀཐནྟི ཨཱཧ ‘‘ཀོཎྜཉྙ པཉྷཱནཱི’’ཏིཨཱདི. ཏཏྠ ཀོཎྜཉྙཱཏི གོཏྟཝསེན སརབྷངྒམཱལཔནྟི. ཝིཡཱཀརོཧཱིཏི བྱཱཀརོཧི. སཱདྷུརཱུཔཱཏི སཱདྷུསབྷཱཝཱ. དྷམྨོཏི སནནྟནོ པཝེཎཱིདྷམྨོ. ཡནྟི ཨཱགམནཀིརིཡཱཔརཱམསནཾ, ཡེན ཝཱ ཀཱརཎེན ཨཱགཙྪཏི, ཏེན ཝིཡཱཀརོཧཱིཏི སམྦནྡྷོ. ཝུདྡྷནྟི སཱིལཔཉྙཱདཱིཧི ཝུདྡྷིཔྤཏྟཾ, གརུནྟི ཨཏྠོ. ཨེས བྷཱརོཏི སཾསཡུཔཙྪེདནསངྑཱཏོ ཨེསོ བྷཱརོ, ཨཱགཏོ བྷཱརོ ཏཡཱ ཨཝསྶཾ ཝཧིཏབྦོཏི ཨདྷིཔྤཱཡོ.

མཡཱ ¶ ཀཏཱཝཀཱསཱ བྷོནྟོ པུཙྪནྟུ. ཀསྨཱཏི ཙེ? ཨཧཉྷི ཏཾ ཏཾ ཝོ བྱཱཀརིསྶཾ ཉཏྭཱ སཡཾ ལོཀམིམཾ, པརཉྩཱཏི. སཡནྟི ཙ སཡམེཝ པརཱུཔདེསེན ཝིནཱ. ཨེཝཾ སརབྷངྒཀཱལེ སབྦཉྙུཔཝཱརཎཾ པཝཱརེསཱིཏི སམྦནྡྷོ.

པཉྷཱནནྟི དྷམྨཡཱགཔཉྷཱནཾ. ཨནྟཀརནྟི ནིཊྛཱནཀརཾ. སུཙིརཏེནཱཏི ཨེཝཾ ནཱམཀེན བྲཱཧྨཎེན. པུཊྛུནྟི པུཙྪིཏུཾ. ཛཱཏིཡཱཏི པཊིསནྡྷིཡཱ, ‘‘ཝིཛཱཏིཡཱ’’ཏིཔི ཝདནྟི. པཾསུཾ ཀཱིལ༹ནྟོ སམྦྷཝཀུམཱརོ ནིསིནྣོཝ ཧུཏྭཱ པཝཱརེསཱིཏི ཡོཛེཏབྦཾ.

ཏགྒྷཱཏི ཨེཀཾསཏྠེ ནིཔཱཏོ. ཡཐཱཔི ཀུསལོ ཏཐཱཏི ཡཐཱ སབྦདྷམྨཀུསལོ སབྦདྷམྨཝིདཱུ བུདྡྷོ ཛཱནཱཏི ཀཐེཏི, ཏཐཱ ཏེ ཨཧམཀྑིསྶནྟི ཨཏྠོ. ཛཱནཱཏི-སདྡོ ཧི ཨིདྷ སམྦནྡྷམུཔགཙྪཏི ¶ . ཡཐཱཧ ‘‘ཡེན ཡསྶ ཧི སམྦནྡྷོ, དཱུརཊྛམྤི ཙ ཏསྶ ཏ’’ནྟི (སཱརཏྠ. ཊཱི. ༡.པཋམམཧཱསངྒཱིཏིཀཐཱཝཎྞནཱ). ཛཱནནཱ ཙེཏྠ ཀཐནཱ. ཡཐཱ ‘‘ཨིམིནཱ ཨིམཾ ཛཱནཱཏཱི’’ཏི ཝུཏྟོཝཱཡམཏྠོ ཨཱཙརིཡེན. རཱཛཱ ཙ ཁོ ཏཾ ཡདི ཀཱཧཏི ཝཱ, ན ཝཱཏི ཡོ ཏཾ ཨིདྷ པུཙྪིཏུཾ པེསེསི, སོ ཀོརབྱརཱཛཱ ཏཾ ཏཡཱ པུཙྪིཏམཏྠཾ, ཏཡཱ ཝཱ པུཊྛེན མཡཱ ཨཀྑཱཏམཏྠཾ ཡདི ཀརོཏུ ཝཱ, ན ཝཱ ཀརོཏུ, ཨཧཾ པན ཡཐཱདྷམྨཾ ཏེ ཨཀྑིསྶཾ ཨཱཙིཀྑིསྶཱམཱིཏི ཝུཏྟཾ ཧོཏི. ཛཱཏཀཊྛཀཐཱཡཾ པན –

‘‘རཱཛཱ ཙ ཁོ ཏནྟི ཨཧཾ ཏཾ པཉྷཾ ཡཐཱ ཏུམྷཱཀཾ རཱཛཱ ཛཱནཱཏི ཛཱནིཏུཾ སཀྐོཏི, ཏཐཱ ཨཀྑིསྶཾ. ཏཏོ ཨུཏྟརི རཱཛཱ ཡཐཱ ཛཱནཱཏི, ཏཐཱ ཡདི ཀརིསྶཏི ཝཱ, ན ཝཱ ཀརིསྶཏི, ཀརོནྟསྶ ཝཱ ཨཀརོནྟསྶ ཝཱ ཏསྶེཝེཏཾ བྷཝིསྶཏི, མཡ྄ཧཾ པན དོསོ ནཏྠཱིཏི དཱིཔེཏཱི’’ཏི (ཛཱ. ཨཊྛ. ༥.༡༦.༡༧༢) –

ཛཱནཱཏི-སདྡོ ཝཱཀྱདྭཡསཱདྷཱརཎཝསེན ཝུཏྟོ.

༡༦༣. སིཔྤམེཝ སིཔྤཱཡཏནཾ ཨཱཡཏནསདྡསྶ ཏབྦྷཱཝཝུཏྟིཏྟཱ. ཨཔིཙ སིཀྑིཏབྦཏཱཡ སིཔྤཉྩ ཏཾ སཏྟཱནཾ ཛཱིཝིཏཝུཏྟིཡཱ ཀཱརཎབྷཱཝཏོ, ནིསྶཡབྷཱཝཏོ ཝཱ ཨཱཡཏནཉྩཱཏི སིཔྤཱཡཏནཾ. སེཡྻཐིདནྟི ཨེཀོཝ ནིཔཱཏོ, ནིཔཱཏསམུདཱཡོ ཝཱ. ཏསྶ ཏེ ཀཏམེཏི ¶ ཨིདྷ ཨཏྠོཏི ཨཱཧ ‘‘ཀཏམེ པན ཏེ’’ཏི. ཨིམེ ཀཏམེཏིཔི པཙྩེཀམཏྠོ ཡུཛྫཏི. ཨེཝཾ སབྦཏྠ. ཨིདཉྩ ཝཏྟབྦཱཔེཀྑནཝསེན ཝུཏྟཾ, ཏསྨཱ ཏེ སིཔྤཱཡཏནིཀཱ ཀཏམེཏི ཨཏྠོ. ‘‘པུཐུསིཔྤཱཡཏནཱནཱི’’ཏི ཧི སཱདྷཱརཎཏོ སིཔྤཱནི ཨུདྡིསིཏྭཱ ཨུཔརི ཏཾཏཾསིཔྤཱུཔཛཱིཝིནོཝ ནིདྡིཊྛཱ པུགྒལཱདྷིཊྛཱནཱཡ ཀཐཱཡ. ཀསྨཱཏི ཙེ? པཔཉྩཾ པརིཧརིཏུཀཱམཏྟཱ. ཨཉྙཐཱ ཧི ཡཐཱདྷིཔྤེཏཱནི ཏཱཝ སིཔྤཱཡཏནཱནི དསྶེཏྭཱ པུན ཏཾཏཾསིཔྤཱུཔཛཱིཝིནོཔི དསྶེཏབྦཱ སིཡུཾ ཏེསམེཝེཏྠ པདྷཱནཏོ ཨདྷིཔྤེཏཏྟཱ. ཨེཝཉྩ སཏི ཀཐཱཔཔཉྩོ བྷཝེཡྻ, ཏསྨཱ ཏཾ པཔཉྩཾ པརིཧརིཏུཾ སིཔྤཱུཔཛཱིཝཱིཧི ཏཾཏཾསིཔྤཱཡཏནཱནི སངྒཧེཏྭཱ ཨེཝམཱཧཱཏི ཏམཏྠཾ དསྶེཏུཾ ‘‘ཧཏྠཱརོཧཱཏིཨཱདཱིཧི ཡེ ཏཾ ཏཾ སིཔྤཾ ནིསྶཱཡ ཛཱིཝནྟི, ཏེ དསྶེཏཱི’’ཏི ཝུཏྟཾ. ཀསྨཱཏི ཨཱཧ ‘‘ཨཡཉྷཱི’’ཏིཨཱདི. སིཔྤཾ ཨུཔནིསྶཱཡ ཛཱིཝནྟཱིཏི སིཔྤཱུཔཛཱིཝིནོ.

ཧཏྠིམཱརོཧནྟཱིཏི ཧཏྠཱརོཧཱ, ཧཏྠཱརུལ༹ྷཡོདྷཱ. ཧཏྠིཾ ཨཱརོཧཱཔཡནྟཱིཏི ཧཏྠཱརོཧཱ, ཧཏྠཱཙརིཡ ཧཏྠིཝེཛྫ ཧཏྠིམེཎྜཱདཡོ. ཡེན ཧི པཡོགེན པུརིསོ ཧཏྠིནོ ཨཱརོཧནཡོགྒོ ཧོཏི, ཏཾ ཧཏྠིསྶ པཡོགཾ ཝིདྷཱཡནྟཱནཾ སབྦེསམྤེཏེསཾ གཧཎཾ. ཏེནཱཧ ‘‘སབྦེཔཱི’’ཏིཨཱདི. ཏཏྠ ¶ ཧཏྠཱཙརིཡཱ ནཱམ ཡེ ཧཏྠིནོ, ཧཏྠཱརོཧཀཱནཉྩ སིཀྑཱཔཀཱ. ཧཏྠིཝེཛྫཱ ནཱམ ཧཏྠིབྷིསཀྐཱ. ཧཏྠིམེཎྜཱ ནཱམ ཧཏྠཱིནཾ པཱདརཀྑཀཱ. ཧཏྠིཾ མཎྜཡནྟི རཀྑནྟཱིཏི ཧཏྠིམཎྜཱ, ཏེཡེཝ ཧཏྠིམེཎྜཱ, ཧཏྠིཾ མིནེནྟི སམྨཱ ཝིདཧནེན ཧིཾསནྟཱིཏི ཝཱ ཧཏྠིམེཎྜཱ. ཨཱདི-སདྡེན ཧཏྠཱིནཾ ཡཝཔདཱཡཀཱདཡོ སངྒཎྷཱཏི. ཨསྶཱརོཧཱཏི ཨེཏྠཱཔི སུདྡྷཧེཏུཀཏྟུཝསེན ཡཐཱཝུཏྟོཝ ཨཏྠོ. རཐེ ནིཡུཏྟཱ རཐིཀཱ. རཐརཀྑཱ ནཱམ རཐསྶ ཨཱཎིརཀྑཀཱ. དྷནུཾ གཎྷནྟཱིཏི དྷནུགྒཧཱ, ཨིསྶཱསཱ, དྷནུཾ གཎྷཱཔེནྟཱིཏི དྷནུགྒཧཱ, དྷནུསིཔྤསིཀྑཱཔཀཱ དྷནྭཱཙརིཡཱ.

ཙེལེན ཙེལཔཊཱཀཱཡ ཡུདྡྷེ ཨཀནྟི གཙྪནྟཱིཏི ཙེལཀཱ, ཛཡདྡྷཛགཱཧཀཱཏི ཨཱཧ ‘‘ཡེ ཡུདྡྷེ’’ཏིཨཱདི. ཛཡདྷཛནྟི ཛཡནཏྠཾ, ཛཡཀཱལེ ཝཱ པགྒཧིཏདྷཛཾ. པུརཏོཏི སེནཱཡ པུབྦེ. ཡཐཱ ཏཐཱ ཋིཏེ སེནིཀེ བྱཱུཧཝིཙཱརཎཝསེན ཏཏོ ཏཏོ ཙལཡནྟི ཨུཙྩཱལེནྟཱིཏི ཙལཀཱཏི ཝུཏྟཾ ‘‘ཨིདྷ རཉྙོ’’ཏིཨཱདི. སཀུཎགྒྷིཨཱདཡོ ཝིཡ མཾསཔིཎྜཾ པརསེནཱསམཱུཧསངྑཱཏཾ པིཎྜཾ སཱཧསིཀཏཱཡ ཚེཏྭཱ ཚེཏྭཱ ¶ དཡནྟི ཨུཔྤཏིཏྭཱ ཨུཔྤཏིཏྭཱ ནིགྒཙྪནྟཱིཏི པིཎྜདཱཡཀཱ. ཏེནཱཧ ‘‘ཏེ ཀིརཱ’’ཏིཨཱདི. སཱཧསཾ ཀརོནྟཱིཏི སཱཧསིཀཱ, ཏེཡེཝ མཧཱཡོདྷཱ. པིཎྜམིཝཱཏི ཏཱལཕལཔིཎྜམིཝཱཏི ཝདནྟི, ‘‘མཾསཔིཎྜམིཝཱ’’ཏི (དཱི. ནི. ཊཱི. ༡.༡༦༣) ཨཱཙརིཡེན ཝུཏྟཾ. སབྦཏྠ ‘‘ཨཱཙརིཡེནཱ’’ཏི ཝུཏྟེ ཨཱཙརིཡདྷམྨཔཱལཏྠེརོཝ གཧེཏབྦོ. དུཏིཡཝིཀཔྤེ པིཎྜེ ཛནསམཱུཧསངྑཱཏེ སམྨདྡེ དཡནྟི ཨུཔྤཏནྟཱ ཝིཡ གཙྪནྟཱིཏི པིཎྜདཱཡཀཱ, དཡ-སདྡོ གཏིཡཾ, ཨཡ-སདྡསྶ ཝཱ ད-ཀཱརཱགམེན ནིཔྥཏྟི.

ཨུགྒཏུགྒཏཱཏི སངྒཱམཾ པཏྭཱ ཛཝཔརཀྐམཱདིཝསེན ཨཏིཝིཡ ཨུགྒཏཱ. ཏདེཝཱཏི པརེཧི ཝུཏྟཾ ཏམེཝ སཱིསཾ ཝཱ ཨཱཝུདྷཾ ཝཱ. པཀྑནྡནྟཱིཏི ཝཱིརསཱུརབྷཱཝེན ཨསཛྫམཱནཱ པརསེནམནུཔཝིསནྟི. ཐཱམཛཝབལཔརཀྐམཱདིསམྤཏྟིཡཱ མཧཱནཱགསདིསཏཱ. ཏེནཱཧ ‘‘ཧཏྠིཨཱདཱིསུཔཱི’’ཏིཨཱདི. ཨེཀནྟསཱུརཱཏི ཨེཀཙརསཱུརཱ ཨནྟསདྡསྶ ཏབྦྷཱཝཝུཏྟིཏོ, སཱུརབྷཱཝེན ཨེཀཱཀིནོ ཧུཏྭཱ ཡུཛ྄ཛྷནཀཱཏི ཨཏྠོ. སཛཱལིཀཱཏི སཝམྨིཀཱ. སནྣཱཧོ ཀངྐཊོ ཝམྨཾ ཀཝཙོ ཨུརཙྪདོ ཛཱལིཀཱཏི ཧི ཨཏྠཏོ ཨེཀཾ. སཙམྨིཀཱཏི ཛཱལིཀཱ ཝིཡ སརཱིརཔརིཏྟཱཎེན ཙམྨེན སཙམྨིཀཱ. ཙམྨཀཉྩུཀནྟི ཙམྨམཡཀཉྩུཀཾ. པཝིསིཏྭཱཏི ཏསྶ ཨནྟོ ཧུཏྭཱ, པཊིམུཉྩིཏྭཱཏི ཝུཏྟཾ ཧོཏི. སརཔརིཏྟཱཎཾ ཙམྨནྟི ཙམྨཔཊིསིབྦིཏཾ ཙེལཀཾ, ཙམྨམཡཾ ཝཱ ཕལཀཾ. བལཝསིནེཧཱཏི སཱམིནི ཨཏིསཡཔེམཱ. གྷརདཱསཡོདྷཱཏི ཨནྟོཛཱཏདཱསཔརིཡཱཔནྣཱ ཡོདྷཱ, ‘‘གྷརདཱསིཀཔུཏྟཱ’’ཏིཔི པཱཋོ, ཨནྟོཛཱཏདཱསཱིནཾ པུཏྟཱཏི ཨཏྠོ.

ཨཱལཱ༹རཾ ¶ ཝུཙྩཏི མཧཱནསཾ, ཏཏྠ ནིཡུཏྟཱ ཨཱལཱ༹རིཀཱ. པཱུཝིཀཱཏི པཱུཝསམྤཱདཀཱ, ཡེ པཱུཝམེཝ ནཱནཔྤཀཱརཏོ སམྤཱདེཏྭཱ ཝིཀྐིཎནྟཱ ཛཱིཝནྟི. ཀེསནཁསཎྛཔནཱདིཝསེན མནུསྶཱནཾ ཨལངྐཱརཝིདྷིཾ ཀཔྤེནྟི སཾཝིདཧནྟཱིཏི ཀཔྤཀཱ. ཙུཎྞཝིལེཔནཱདཱིཧི མལཧརཎཝཎྞསམྤཱདནཝིདྷིནཱ ནྷཱཔེནྟི ནཧཱནཾ ཀརོནྟཱིཏི ནྷཱཔིཀཱ. ནཝནྟཱདིཝིདྷིནཱ པཝཏྟོ གཎནགནྠོ ཨནྟརཱ ཚིདྡཱབྷཱཝེན ཨཙྪིདྡཀོཏི ཝུཙྩཏི, ཏདེཝ པཋེནྟཱིཏི ཨཙྪིདྡཀཔཱཋཀཱ. ཧཏྠེན ཨདྷིཔྤཱཡཝིཉྙཱཔནཾ, གཎནཾ ཝཱ ཧཏྠམུདྡཱ. ཨངྒུལིསངྐོཙནཉྷི མུདྡཱཏི ཝུཙྩཏི, ཏེན ཙ ཝིཉྙཱཔནཾ, གཎནཾ ཝཱ ཧོཏི. ཧཏྠསདྡོ ཙེཏྠ ཏདེཀདེསེསུ ཨངྒུལཱིསུ དཊྛབྦོ ‘‘ན བྷུཉྫམཱནོ སབྦཾ ¶ ཧཏྠཾ མུཁེ པཀྑིཔིསྶཱམཱི’’ཏིཨཱདཱིསུ (པཱཙི. ༦༡༨) ཝིཡ, ཏམུཔནིསྶཱཡ ཛཱིཝནྟཱིཏི མུདྡིཀཱ. ཏེནཱཧ ‘‘ཧཏྠམུདྡཱཡཱ’’ཏིཨཱདི.

ཨཡཀཱརོ ཀམྨཱརཀཱརཀོ. དནྟཀཱརོ བྷམཀཱརོ. ཙིཏྟཀཱརོ ལེཔཙིཏྟཀཱརོ. ཨཱདི-སདྡེན ཀོཊྚཀལེཁཀཝིལཱིཝཀཱརཨིཊྛཀཀཱརདཱརུཀཱརཱདཱིནཾ སངྒཧོ. དིཊྛེཝ དྷམྨེཏི ཨིམསྨིཾཡེཝ ཨཏྟབྷཱཝེ. ཀརཎནིཔྥཱདནཝསེན དསྶེཏྭཱ. སནྡིཊྛིཀམེཝཱཏི ཨསམྤརཱཡིཀཏཱཡ སཱམཾ དཊྛབྦཾ, སཡམནུབྷཝིཏབྦཾ ཨཏྟཔཙྩཀྑནྟི ཨཏྠོ. ཨུཔཛཱིཝནྟཱིཏི ཨུཔནིསྶཱཡ ཛཱིཝནྟི. སུཁིཏནྟི སུཁཔྤཏྟཾ. ཐཱམབལཱུཔེཏབྷཱཝོཝ པཱིཎནནྟི ཨཱཧ ‘‘པཱིཎིཏཾ ཐཱམབལཱུཔེཏ’’ནྟི. ཨུཔརཱིཏི དེཝལོཀེ. ཏཐཱ ཨུདྡྷནྟིཔི. སོ ཧི མནུསྶལོཀཏོ ཨུཔརིམོ. ཨགྒཾ ཝིཡཱཏི ཨགྒཾ, ཕལཾ. ‘‘ཀམྨསྶ ཀཏཏྟཱ ཕལསྶ ནིབྦཏྟནཏོ ཏཾ ཀམྨསྶ ཨགྒིསིཁཱ ཝིཡ ཧོཏཱི’’ཏི ཨཱཙརིཡེན ཝུཏྟཾ. ཨཔིཙ སགྒནྟི ཨུཏྟམཾ, ཕལཾ. སགྒནྟི སུཊྛུ ཨགྒཾ, རཱུཔསདྡཱདིདསཝིདྷཾ ཨཏྟནོ ཕལཾ ནིཔྥཱདེཏུཾ ཨརཧཏཱིཏི ཨཏྠོ. སུཨགྒིཀཱཝ ནིརུཏྟིནཡེན སོཝགྒིཀཱ, དཀྑིཎཱསདྡཱཔེཀྑཱཡ ཙ སབྦཏྠ ཨིཏྠིལིངྒནིདྡེསོ. སུཁོཏི སུཁཱུཔཱཡོ ཨིཊྛོ ཀནྟོ. ཨགྒེཏི ཨུལཱ༹རེ. ཨཏྟནཱ པརིབྷུཉྫིཏབྦཾ བཱཧིརཾ རཱུཔཾ, ཨཏྟནོ ཝཎྞཔོཀྑརཏཱ ཝཎྞོཏི ཨཡམེཏེསཾ ཝིསེསོ. དཀྑནྟི ཝཌྜྷནྟི ཨེཏཱཡཱཏི དཀྑིཎཱ, པརིཙྩཱགམཡཾ པུཉྙནྟི ཨཱཧ ‘‘དཀྑིཎཾ དཱན’’ནྟི.

མགྒོ སཱམཉྙཾ སམིཏཔཱཔསངྑཱཏསྶ སམཎསྶ བྷཱཝོཏི ཀཏྭཱ, ཏསྶ ཝིཔཱཀཏྟཱ ཨརིཡཕལཾ སཱམཉྙཕལཾ. ‘‘ཡཐཱཧཱ’’ཏིཨཱདིནཱ མཧཱཝགྒསཾཡུཏྟཔཱལི༹ཝསེན ཏདཏྠཾ སཱདྷེཏི. ཏཾ ཨེས རཱཛཱ ན ཛཱནཱཏི ཨརིཡདྷམྨསྶ ཨཀོཝིདཏཱཡ. ཡསྨཱ པནེས ‘‘དཱསཀསྶཀཱདིབྷཱུཏཱནཾ པབྦཛིཏཱནཾ ལོཀཏོ ཨབྷིཝཱདནཱདིལཱབྷོ སནྡིཊྛིཀཾ སཱམཉྙཕལཾ ནཱམཱ’’ཏི ཙིནྟེཏྭཱ ‘‘ཨཏྠི ནུ ཁོ ཀོཙི སམཎོ ཝཱ བྲཱཧྨཎོ ཝཱ ཨཱིདིསམཏྠཾ ཛཱནནྟོ’’ཏི ཝཱིམཾསནྟོ པཱུརཎཱདིཀེ པུཙྪིཏྭཱ ཏེསཾ ཀཐཱཡ ཨནདྷིགཏཝིཏྟོ བྷགཝནྟམྤི ཨེཏམཏྠཾ པུཙྪི. ཏསྨཱ ཝུཏྟཾ ‘‘དཱསཀསྶཀོཔམཾ སནྡྷཱཡ པུཙྪཏཱི’’ཏི.

རཱཛཱམཙྩཱཏི ¶ ¶ རཱཛཀུལསམུདཱགཏཱ ཨམཙྩཱ, ཨནུཡུཏྟཀརཱཛཱནོ ཙེཝ ཨམཙྩཱ ཙཱཏིཔི ཨཏྠོ. ཀཎྷཔཀྑནྟི ཡཐཱཔུཙྪིཏེ ཨཏྠེ ལབྦྷམཱནདིཊྛིགཏཱུཔསཾཧིཏཾ སཾཀིལེསཔཀྑཾ. སུཀྐཔཀྑནྟི ཏབྦིདྷུརཾ ཨུཔརི སུཏྟཱགཏཾ ཝོདཱནཔཀྑཾ. སམཎཀོལཱཧལནྟི སམཎཀོཏཱུཧལཾ ཏཾ ཏཾ སམཎཝཱདཱནཾ ཨཉྙམཉྙཝིརོདྷཾ. སམཎབྷཎྜནནྟི ཏེནེཝ ཝིརོདྷེན ‘‘ཨེཝཾཝཱདཱིནཾ ཏེསཾ སམཎབྲཱཧྨཎཱནཾ ཨཡཾ དོསོ, ཨེཝཾཝཱདཱིནཾ ཏེསཾ ཨཡཾ དོསོ’’ཏི ཨེཝཾ ཏཾ ཏཾ ཝཱདསྶ པརིབྷཱསནཾ. ཨིསྶརཱནུཝཏྟཀོ ཧི ལོཀོཏི དྷམྨཏཱདསྶནེན ཏདཏྠསམཏྠནཾ. ཨཏྟནོ དེསནཱཀོསལླེན རཉྙོ བྷཱརཾ ཀརོནྟོ, ན ཏདཉྙེན པརཝམྦྷནཱདིཀཱརཎེན.

༡༦༤. ནུ-སདྡོ ཝིཡ ནོ-སདྡོཔི པུཙྪཱཡཾ ནིཔཱཏོཏི ཨཱཧ ‘‘ཨབྷིཛཱནཱསི ནཱུ’’ཏི. ཨཡཉྩཱཏི ཨེཏྠ ཙ-སདྡོ ན ཀེཝལཾ ཨབྷིཛཱནཱསིཔདེནེཝ, ཨཐ ཁོ ‘‘པུཙྪིཏཱ’’ཏི པདེན ཙཱཏི སམུཙྩཡཏྠོ. ཀཐཾ ཡོཛེཏབྦོཏི ཨནུཡོགམཔནེཏི ‘‘ཨིདཉྷཱི’’ཏིཨཱདིནཱ. པུཙྪིཏཱ ནཱུཏི པུབྦེ པུཙྪཾ ཀཏྟཱ ནུ. ནཾ པུཊྛབྷཱཝནྟི ཏཱདིསཾ པུཙྪིཏབྷཱཝཾ ཨབྷིཛཱནཱསི ནུ. ན ཏེ སམྨུཊྛནྟི ཏཝ ན པམུཊྛཾ ཝཏཱཏི ཨཏྠོ. ཨཕཱསུཀབྷཱཝོཏི ཏཐཱ བྷཱསནེན ཨསུཁབྷཱཝོ. པཎྜིཏཔཏིརཱུཔཀཱནནྟི (སཱམཾ ཝིཡ ཨཏྟནོ སཀྐཱརཱནཾ པཎྜིཏབྷཱསཱནཾ) ཨཱམཾ ཝིཡ པཀྐཱནཾ པཎྜིཏཱ བྷཱསཱནཾ. (དཱི. ནི. ཊཱི. ༡.༡༦༣) པཱལི༹པདཨཏྠབྱཉྫནེསཱུཏི པཱལི༹སངྑཱཏེ པདེ, ཏདཏྠེ ཏཔྤརིཡཱཔནྣཀྑརེ ཙ, ཝཱཀྱཔརིཡཱཡོ ཝཱ བྱཉྫནསདྡོ ‘‘ཨཀྑརཾ པདཾ བྱཉྫན’’ནྟིཨཱདཱིསུ (ནེཏྟི. ༢༨) ཝིཡ. བྷགཝཏོ རཱུཔཾ སབྷཱཝོ ཝིཡ རཱུཔམསྶཱཏི བྷགཝནྟརཱུཔོ, བྷགཝཱ ཝིཡ ཨེཀནྟཔཎྜིཏོཏི ཨཏྠོ.

པཱུརཎཀསྶཔཝཱདཝཎྞནཱ

༡༦༥. ཨེཀམིདཱཧནྟི ཨེཏྠ ཨིདནྟི ནིཔཱཏམཏྟཾ, ཨེཀཾ སམཡམིཙྩེཝ ཨཏྠོ. སམྨོདེཏི སམྨོདནཾ ཀརོཏཱིཏི སམྨོདནཱིཡཾ. ཨནཱིཡསདྡོ ཧི བཧུལཱ ཀཏྭཏྠཱབྷིདྷཱཡཀོ ཡཐཱ ‘‘ནིཡྻཱནིཀཱ’’ཏི, (དྷ. ས. སུཏྟནྟདུཀམཱཏིཀཱ ༩༧) སམྨོདནཾ ཝཱ ཛནེཏཱིཏི སམྨོདནིཡཾ ཏདྡྷིཏཝསེན. སརིཏབྦནྟི སཱརཎཱིཡཾ, སརཎསྶ ཨནུཙྪཝིཀནྟི ཝཱ སཱརཎིཡཾ, ཨེཏམཏྠཾ དསྶེཏུཾ ‘‘སམྨོདཛནཀཾ སརིཏབྦཡུཏྟཀ’’ནྟི ཝུཏྟཾ, སརིཏབྦཡུཏྟཀནྟི ཙ སརཎཱནུཙྪཝིཀནྟི ཨཏྠོ.

༡༦༦. སཧཏྠཱཏི ¶ སཧཏྠེནེཝ, ཏེན སུདྡྷཀཏྟཱརཾ དསྶེཏི, ཨཱཎཏྟིཡཱཏི པན ཧེཏུཀཏྟཱརཾ, ནིསྶགྒིཡཐཱཝརཱདཡོཔི ཨིདྷ སཧཏྠ ཀརཎེནེཝ སངྒཧིཏཱ. ཧཏྠཱདཱིནཱིཏི ཧཏྠཔཱདཀཎྞནཱསཱདཱིནི. པཙནཾ དཧནཾ ཝིབཱདྷནནྟི ཨཱཧ ‘‘དཎྜེན ཨུཔྤཱིལེ༹ནྟསྶཱ’’ཏི. པཔཉྩསཱུདནིཡཾ ནཱམ མཛ྄ཛྷིམཱགམཊྛཀཐཱཡཾ ¶ པན ‘‘པཙཏོ’’ཏི ཨེཏསྶ ‘‘ཏཛྫེནྟསྶ ཝཱ’’ཏི (མ. ནི. ཨཊྛ. ༣.༩༧) དུཏིཡོཔི ཨཏྠོ ཝུཏྟོ, ཨིདྷ པན ཏཛྫནཾ, པརིབྷཱསནཉྩ དཎྜེན སངྒཧེཏྭཱ ‘‘དཎྜེན ཨུཔྤཱིལེ༹ནྟསྶ ཨིཙྩེཝ ཝུཏྟ’’ནྟི (དཱི. ནི. ཊཱི. ༡.༡༦༦) ཨཱཙརིཡེན ཝུཏྟཾ, ཨདྷུནཱ པན པོཏྠཀེསུ ‘‘ཏཛྫེནྟསྶ ཝཱ’’ཏི པཱཋོཔི བཧུསོ དིསྶཏི. སོཀནྟི སོཀཀཱརཎཾ, སོཙནནྟིཔི ཡུཛྫཏི ཀཱརཎསམྤཱདནེན ཕལསྶཔི ཀཏྟབྦཏོ. པརེཧཱིཏི ཨཏྟནོ ཝཙནཀརེཧི ཀམྨབྷཱུཏེཧི. ཕནྡཏོཏི ཨེཏྠ པརསྶ ཕནྡནཝསེན སུདྡྷཀཏྟུཏྠོ ན ལབྦྷཏི, ཨཐ ཁོ ཨཏྟནོ ཕནྡནཝསེནེཝཱཏི ཨཱཧ ‘‘པརཾ ཕནྡནྟཾ ཕནྡནཀཱལེ སཡམྤི ཕནྡཏོ’’ཏི, ཨཏྟནཱ ཀཏེན པརསྶ ཝིབཱདྷནཔཡོགེན སཡམྤི ཕནྡཏོཏི ཨཏྠོ. ‘‘ཨཏིཔཱཏཱཔཡཏོ’’ཏི པདཾ སུདྡྷཀཏྟརི, ཧེཏུཀཏྟརི ཙ པཝཏྟཏཱིཏི དསྶེཏི ‘‘ཧནནྟསྶཱཔི ཧནཱཔེནྟསྶཱཔཱི’’ཏི ཨིམིནཱ. སབྦཏྠཱཏི ‘‘ཨཱདིཡཏོ’’ཏིཨཱདཱིསུ. ཀརཎཀཱརཎཝསེནཱཏི སཡཾཀཱརཔརཾཀཱརཝསེན.

གྷརབྷིཏྟིཡཱ ཨནྟོ ཙ བཧི ཙ སནྡྷི གྷརསནྡྷི. ཀིཉྩིཔི ཨསེསེཏྭཱ ནིརཝསེསོ ལོཔོ ཝིལུམྤནཾ ནིལློཔོཏི ཨཱཧ ‘‘མཧཱཝིལོཔ’’ནྟི. ཨེཀཱགཱརེ ནིཡུཏྟོ ཝིལོཔོ ཨེཀཱགཱརིཀོ. ཏེནཱཧ ‘‘ཨེཀམེཝཱ’’ཏིཨཱདི. ‘‘པརིཔནྠེ ཏིཊྛཏོ’’ཏི ཨེཏྠ ཨཙྪིནྡནཏྠམེཝ ཏིཊྛཏཱིཏི ཨཡམཏྠོ པཀརཎཏོ སིདྡྷོཏི དསྶེཏི ‘‘ཨཱགཏཱགཏཱན’’ནྟིཨཱདིནཱ. ‘‘པརིཏོ སབྦསོ པནྠེ ཧནནཾ པརིཔནྠོ’’ཏི (དཱི. ནི. ཊཱི. ༡.༡༦༦) ཨཡམཏྠོཔི ཨཱཙརིཡེན ཝུཏྟོ. ཀརོམཱིཏི སཉྙཱཡཱཏི སཉྩེཏནིཀབྷཱཝམཱཧ, ཏེནེཏཾ དསྶེཏི ‘‘སཉྩིཙྩ ཀརོཏོཔི ན ཀརཱིཡཏི ནཱམ, པགེཝ ཨསཉྩིཙྩཱ’’ཏི. པཱཔཾ ན ཀརཱིཡཏཱིཏི པུབྦེ ཨསཏོ ཨུཔྤཱདེཏུཾ ཨསཀྐུཎེཡྻཏྟཱ པཱཔཾ ཨཀཏམེཝ ནཱམ. ཏེནཱཧ ‘‘ནཏྠི པཱཔ’’ནྟི.

ཡདི ཨེཝཾ ཀཐཾ སཏྟཱ པཱཔེ པཝཏྟནྟཱིཏི ཨཏྟནོ ཝཱདེ པརེཧི ཨཱརོཔིཏཾ དོསམཔནེཏུཀཱམོ པཱུརཎོ ཨིམམཏྠམྤི དསྶེཏཱིཏི ཨཱཧ ‘‘སཏྟཱ པནཱ’’ཏིཨཱདི. སཉྙཱམཏྟམེཏཾ ‘‘པཱཔཾ ཀརོནྟཱི’’ཏི, པཱཔཾ ¶ པན ནཏྠེཝཱཏི ཝུཏྟཾ ཧོཏི. ཨེཝཾ ཀིརསྶ ཧོཏི – ཨིམེསཾ སཏྟཱནཾ ཧིཾསཱདིཀིརིཡཱ ཨཏྟཱནཾ ན པཱཔུཎཱཏི ཏསྶ ནིཙྩཏཱཡ ནིབྦིཀཱརཏྟཱ, སརཱིརཾ པན ཨཙེཏནཾ ཀཊྛཀལིངྒརཱུཔམཾ, ཏསྨིཾ ཝིཀོཔིཏེཔི ན ཀིཉྩི པཱཔནྟི. པརིཡནྟོ ཝུཙྩཏི ནེམི པརིཡོསཱནེ ཋིཏཏྟཱ. ཏེན ཝུཏྟཾ ཨཱཙརིཡེན ‘‘ནིསིཏཁུརམཡནེམིནཱ’’ཏི (དཱི. ནི. ཊཱི. ༡.༡༦༦). དུཏིཡཝིཀཔྤེ ཙཀྐཔརིཡོསཱནམེཝ པརིཡནྟོ, ཁུརེན སདིསོ པརིཡནྟོ ཡསྶཱཏི ཁུརཔརིཡནྟོ. ཁུརགྒཧཎེན ཙེཏྠ ཁུརདྷཱརཱ གཧིཏཱ ཏདཝརོདྷཏོ. པཱལི༹ཡཾ ཙཀྐེནཱཏི ཙཀྐཱཀཱརཀཏེན ཨཱཝུདྷཝིསེསེན. ཏཾ མཾསཁལཀརཎསངྑཱཏཾ ནིདཱནཾ ཀཱརཎཾ ཡསྶཱཏི ཏཏོནིདཱནཾ, ‘‘པཙྩཏྟཝཙནསྶ ཏོཨཱདེསོ, སམཱསེ ཙསྶ ལོཔཱབྷཱཝོ’’ཏི (པཱརཱ. ཨཊྛ. ༡.༢༡) ཨཊྛཀཐཱསུ ¶ ཝུཏྟོ. ‘‘པཙྩཏྟཏྠེ ནིསྶཀྐཝཙནམྤི ཡུཛྫཏཱི’’ཏི (སཱརཏྠ. ཊཱི. པཋམམཧཱསངྒཱིཏིཀཐཱཝཎྞནཱ) ཨཱཙརིཡསཱརིཔུཏྟཏྠེརོ. ‘‘ཀཱརཎཏྠེ ནིཔཱཏསམུདཱཡོ’’ཏིཔི ཨཀྑརཙིནྟཀཱ.

གངྒཱཡ དཀྑིཎདིསཱ ཨཔྤཏིརཱུཔདེསོ, ཨུཏྟརདིསཱ པན པཏིརཱུཔདེསོཏི ཨདྷིཔྤཱཡེན ‘‘དཀྑིཎཉྩེ’’ཏིཨཱདི ཝུཏྟཾ, ཏཉྩ དེསདིསཱཔདེསེན ཏནྣིཝཱསིནོ སནྡྷཱཡཱཏི དསྶེཏུཾ ‘‘དཀྑིཎཏཱིརེ’’ཏིཨཱདིམཱཧ. ཧནནདཱནཀིརིཡཱ ཧི ཏདཱཡཏྟཱ. མཧཱཡཱགནྟི མཧཱཝིཛིཏརཉྙོ ཡཉྙསདིསམྤི མཧཱཡཱགཾ. དམསདྡོ ཨིནྡྲིཡསཾཝརསྶ, ཨུཔོསཐསཱིལསྶ ཙ ཝཱཙཀོཏི ཨཱཧ ‘‘ཨིནྡྲིཡདམེན ཨུཔོསཐཀམྨེནཱ’’ཏི. ཀེཙི པན ཨུཔོསཐཀམྨེནཱ’ཏི ཨིདཾ ཨིནྡྲིཡདམསྶ ཝིསེསནཾ, ཏསྨཱ ‘ཨུཔོསཐཀམྨབྷཱུཏེན ཨིནྡྲིཡདམེནཱ’ཏི’’ ཨཏྠཾ ཝདནྟི, ཏདཡུཏྟམེཝ ཏདུབྷཡཏྠཝཱཙཀཏྟཱ དམསདྡསྶ, ཨཏྠདྭཡསྶ ཙ ཝིསེསཝུཏྟིཏོ. ཨདྷུནཱ ཧི ཀཏྠཙི པོཏྠཀེ ཝཱ-སདྡོ, ཙ-སདྡོཔི དིསྶཏི. སཱིལསཾཡམེནཱཏི ཏདཉྙེན ཀཱཡིཀཝཱཙསིཀསཾཝརེན. སཙྩཝཙནེནཱཏི ཨམོསཝཛྫེན. ཏསྶ ཝིསུཾ ཝཙནཾ ལོཀེ གརུཏརཔུཉྙསམྨཏབྷཱཝཏོ. ཡཐཱ ཧི པཱཔདྷམྨེསུ མུསཱཝཱདོ གརུཏརོ, ཨེཝཾ པུཉྙདྷམྨེསུ ཨམོསཝཛྫོ. ཏེནཱཧ བྷགཝཱ ཨིཏིཝུཏྟཀེ –

‘‘ཨེཀདྷམྨཾ ¶ ཨཏཱིཏསྶ, མུསཱཝཱདིསྶ ཛནྟུནོ;

ཝིཏིཎྞཔརལོཀསྶ, ནཏྠི པཱཔཾ ཨཀཱརིཡ’’ནྟི. (ཨིཏིཝུ. ༢༧);

པཝཏྟཱིཏི ཡོ ཀརོཏི, ཏསྶ སནྟཱནེ ཕལུཔྤཱདཔཙྩཡབྷཱཝེན ཨུཔྤཏྟི. ཨེཝཉྷི ‘‘ནཏྠི ཀམྨཾ, ནཏྠི ཀམྨཕལ’’ནྟི ཨཀིརིཡཝཱདསྶ པརིཔུཎྞཏཱ. སཏི ཧི ཀམྨཕལེ ཀམྨཱནམཀིརིཡབྷཱཝོ ཀཐཾ བྷཝིསྶཏི. སབྦཐཱཔཱིཏི ‘‘ཀརོཏོ’’ཏིཨཱདིནཱ ཝུཏྟེན སབྦཔྤཀཱརེནཔི.

ལབུཛནྟི ལིཀུཙཾ. པཱཔཔུཉྙཱནཾ ཀིརིཡམེཝ པཊིཀྑིཔཏི, ན རཉྙཱ པུཊྛཾ སནྡིཊྛིཀཾ སཱམཉྙཕལཾ བྱཱཀརོཏཱིཏི ཨདྷིཔྤཱཡོ. ཨིདཉྷི ཨཝདྷཱརཎཾ ཝིཔཱཀཔཊིཀྑེཔནིཝཏྟནཏྠཾ. ཡོ ཧི ཀམྨཾ པཊིཀྑིཔཏི, ཏེན ཨཏྠཏོ ཝིཔཱཀོཔི པཊིཀྑིཏྟོཡེཝ ནཱམ ཧོཏི. ཏཐཱ ཧི ཝཀྑཏི ‘‘ཀམྨཾ པཊིབཱཧནྟེནཱཔཱི’’ཏིཨཱདི (དཱི. ནི. ཨཊྛ. ༡.༡༧༠-༡༧༢).

པཊིརཱཛཱུཧི ཨནབྷིབྷཝནཱིཡབྷཱཝེན ཝིསེསཏོ ཛིཏནྟི ཝིཛིཏཾ, ཨེཀསྶ རཉྙོ ཨཱཎཱཔཝཏྟིདེསོ. ‘‘མཱ མཡ྄ཧཾ ཝིཛིཏེ ཝསཐཱ’’ཏི ཨཔསཱདནཱ པབྦཛིཏསྶ པབྦཱཛནསངྑཱཏཱ ཝིཧེཋནཱཡེཝཱཏི ¶ ཝུཏྟཾ ‘‘ཝིཧེཋེཏབྦ’’ནྟི. ཏེན ཝུཏྟསྶ ཨཏྠསྶ ‘‘ཨེཝམེཏ’’ནྟི ཨུཔདྷཱརཎཾ སལླཀྑཎཾ ཨུགྒཎྷནཾ, ཏདམིནཱ པཊིཀྑིཔཏཱིཏི ཨཱཧ ‘‘སཱརཏོ ཨགྒཎྷནྟོ’’ཏི. ཏསྶ པན ཨཏྠསྶ ཨདྡྷནིཡབྷཱཝཱཔཱདནཝསེན ཙིཏྟེན སནྡྷཱརཎཾ ནིཀྐུཛྫནཾ, ཏདམིནཱ པཊིཀྑིཔཏཱིཏི དསྶེཏི ‘‘སཱརཝསེནེཝ…པེ… ཨཊྛཔེནྟོ’’ཏི ཨིམིནཱ. སཱརཝསེནེཝཱཏི ཨུཏྟམཝསེནེཝ, ཨཝིཏཐཏྟཱ ཝཱ པརེཧི ཨནུཙྩཱལིཏོ ཐིརབྷཱུཏོ ཨཏྠོ ཨཕེགྒུབྷཱཝེན སཱརོཏི ཝུཙྩཏི, ཏཾཝསེནེཝཱཏི ཨཏྠོ. ནིསྶརཎནྟི ཝཊྚཏོ ནིཡྻཱནཾ. པརམཏྠོཏི ཨཝིཔརཱིཏཏྠོ, ཨུཏྟམསྶ ཝཱ ཉཱཎསྶཱརམྨཎབྷཱུཏོ ཨཏྠོ. བྱཉྫནཾ པན ཏེན ཨུགྒཧིཏཉྩེཝ ནིཀྐུཛྫིཏཉྩ ཏཐཱཡེཝ བྷགཝཏོ སནྟིཀེ བྷཱསིཏཏྟཱ.

མཀྑལིགོསཱལཝཱདཝཎྞནཱ

༡༦༨. ཨུབྷཡེནཱཏི ཧེཏུཔཙྩཡཔཊིསེདྷཝཙནེན. ‘‘ཝིཛྫམཱནམེཝཱ’’ཏི ཨིམིནཱ སབྷཱཝཏོ ཝིཛྫམཱནསྶེཝ པཊིཀྑིཔནེ ཏསྶ ཨཉྙཱཎམེཝ ཀཱརཎནྟི དསྶེཏི. སཾཀིལེསཔཙྩཡནྟི སཾཀིལིསྶནསྶ མལཱིནསྶ ཀཱརཎཾ ¶ . ཝིསུདྡྷིཔཙྩཡནྟི སཾཀིལེསཏོ ཝིསུདྡྷིཡཱ ཝོདཱནསྶ པཙྩཡཾ. ཨཏྟཀཱརེཏི པཙྩཏྟཝཙནསྶ ཨེ-ཀཱརཝསེན པདསིདྡྷི ཡཐཱ ‘‘ཝནཔྤགུམྦེ ཡཐཱ ཕུསིཏགྒེ’’ཏི, (ཁུ. པཱ. ༡༣; སུ. ནི. ༢༣༦) པཙྩཏྟཏྠེ ཝཱ བྷུམྨཝཙནཾ ཡཐཱ ‘‘ཨིདམྤིསྶ ཧོཏི སཱིལསྨི’’ནྟི (དཱི. ནི. ༡.༡༩༤), ཏདེཝཏྠཾ དསྶེཏི ‘‘ཨཏྟཀཱརོ’’ཏི ཨིམིནཱ. སོ ཙ ཏེན ཏེན སཏྟེན ཨཏྟནཱ ཀཱཏབྦཀམྨཾ, ཨཏྟནཱ ནིཔྥཱདེཏབྦཔཡོགོ ཝཱ. ཏེནཱཧ ‘‘ཡེནཱ’’ཏིཨཱདི. སབྦཉྙུཏནྟི སམྨཱསམྦོདྷིཾ. ཏནྟི ཨཏྟནཱ ཀཏཀམྨཾ. དུཏིཡཔདེནཱཏི ‘‘ནཏྠི པརཀཱརེ’’ཏི པདེན. པརཀཱརོ ཙ ནཱམ པརསྶ ཝཱཧསཱ ཨིཛ྄ཛྷནཀཔཡོགོ. ཏེན ཝུཏྟཾ ‘‘ཡཾ པརཀཱར’’ནྟིཨཱདི. ཨོཝཱདཱནུསཱསནིནྟི ཨོཝཱདབྷཱུཏམནུསཱསནིཾ, པཋམཾ ཝཱ ཨོཝཱདོ, པཙྪཱ ཨནུསཱསནཱི. ‘‘པརཀཱར’’ནྟི པདསྶ ཨུཔལཀྑཎཝསེན ཨཏྠདསྶནཉྩེཏཾ, ལོཀུཏྟརདྷམྨེ པརཀཱརཱཝསྶཡོ ནཏྠཱིཏི ཨཱཧ ‘‘ཋཔེཏྭཱ མཧཱསཏྟ’’ནྟི. ཨཏྠེཝེས ལོཀིཡདྷམྨེ ཡཐཱ ཏཾ ཨམྷཱཀཾ བོདྷིསཏྟསྶ ཨཱལཱ༹རུདཀེ ནིསྶཱཡ པཉྩཱབྷིཉྙཱལོཀིཡསམཱཔཏྟིལཱབྷོ, ཏཉྩ པཙྪིམབྷཝིཀམཧཱསཏྟཾ སནྡྷཱཡ ཝུཏྟཾ, པཙྩེཀབོདྷིསཏྟསྶཔི ཨེཏྠེཝ སངྒཧོ ཏེསམྤི ཏདབྷཱཝཏོ. མནུསྶསོབྷགྱཏནྟི མནུསྶེསུ སུབྷགབྷཱཝཾ. ཨེཝནྟི ཝུཏྟཔྤཀཱརེན ཀམྨཝཱདསྶ, ཀིརིཡཝཱདསྶ ཙ པཊིཀྑིཔནེན. ཛིནཙཀྐེཏི ‘‘ཨཏྠི བྷིཀྑཝེ ཀམྨཾ ཀཎྷཾ ཀཎྷཝིཔཱཀ’’ནྟིཨཱདི (ཨ. ནི. ༤.༢༣༢) ནཡཔྤཝཏྟེ ཀམྨཱནཾ, ཀམྨཕལཱནཉྩ ཨཏྠིཏཱཔརིདཱིཔནེ བུདྡྷསཱསནེ. པཙྩནཱིཀཀཐནཾ པཧཱརདཱནསདིསནྟི ‘‘པཧཱརཾ དེཏི ནཱམཱ’’ཏི.

ཡཐཱཝུཏྟཨཏྟཀཱརཔརཀཱརཱབྷཱཝཏོ ¶ ཨེཝ སཏྟཱནཾ པཙྩཏྟཔུརིསཀཱརོ ནཱམ ཀོཙི ནཏྠཱིཏི སནྡྷཱཡ ‘‘ནཏྠིཔུརིསཀཱརེ’’ཏི ཏསྶ པཊིཀྑིཔནཾ དསྶེཏུཾ ‘‘ཡེནཱ’’ཏིཨཱདི ཝུཏྟཾ. ‘‘དེཝཏྟམྤཱི’’ཏིཨཱདིནཱ, ‘‘མནུསྶསོབྷགྱཏ’’ནྟིཨཱདིནཱ ཙ ཝུཏྟཔྤཀཱརཱ. ‘‘བལེ པཏིཊྛིཏཱ’’ཏི ཝཏྭཱ ཝཱིརིཡམེཝིདྷ བལནྟི དསྶེཏུཾ ‘‘ཝཱིརིཡཾ ཀཏྭཱ’’ཏི ཝུཏྟཾ. སཏྟཱནཉྷི དིཊྛདྷམྨིཀསམྤརཱཡིཀ ནིབྦཱནསམྤཏྟིཨཱཝཧཾ ཝཱིརིཡབལཾ ནཏྠཱིཏི སོ པཊིཀྑིཔཏི, ནིདསྶནམཏྟཉྩེཏཾ ཝོདཱནིཡབལསྶ པཊིཀྑིཔནཾ སཾཀིལེསིཀསྶཱཔི བལསྶ ཏེན པཊིཀྑིཔནཏོ. ཡདི ཝཱིརིཡཱདཱིནི པུརིསཀཱརཝེཝཙནཱནི, ཨཐ ཀསྨཱ ཏེསཾ ཝིསུཾ གཧཎནྟི ཨཱཧ ‘‘ཨིདཾ ནོ ཝཱིརིཡེནཱ’’ཏིཨཱདི. ཨིདཾ ནོ ཝཱིརིཡེནཱཏི ཨིདཾ ཕལཾ ཨམྷཱཀཾ ཝཱིརིཡེན པཝཏྟཾ. པཝཏྟཝཙནཔཊིཀྑེཔཀརཎཝསེནཱཏི ཨཉྙེསཾ པཝཏྟཝོཧཱརཝཙནསྶ པཊིཀྑེཔཀརཎཝསེན ¶ . ཝཱིརིཡཐཱམཔརཀྐམསམྦནྡྷནེན པཝཏྟབལཝཱདཱིནཾ ཝཱདསྶ པཊིཀྑེཔཀརཎཝསེན ‘‘ནཏྠི བལ’’ནྟི པདམིཝ སབྦཱནིཔེཏཱནི ཏེན ཨཱདཱིཡནྟཱིཏི ཨདྷིཔྤཱཡོ. ཏཉྩ ཝཙནཱིཡཏྠཏོ ཝུཏྟཾ, ཝཙནཏྠཏོ པན ཏསྶཱ ཏསྶཱ ཀིརིཡཱཡ ཨུསྶནྣཊྛེན བལཾ. སཱུརཝཱིརབྷཱཝཱཝཧཊྛེན ཝཱིརིཡཾ. ཏདེཝ དལ༹ྷབྷཱཝཏོ, པོརིསདྷུརཾ ཝཧནྟེན པཝཏྟེཏབྦཏོ ཙ པུརིསཐཱམོ. པརཾ པརཾ ཋཱནཾ ཨཀྐམནཝསེན པཝཏྟིཡཱ པུརིསཔརཀྐམོཏི ཝེདིཏབྦཾ.

རཱུཔཱདཱིསུ སཏྟཝིསཏྟཏཱཡ སཏྟཱ. ཨསྶསནཔསྶསནཝསེན པཝཏྟིཡཱ པཱཎནཏོ པཱཎཱཏི ཨིམིནཱ ཨཏྠེན སམཱནེཔི པདདྭཡེ ཨེཀིནྡྲིཡཱདིཝསེན པཱཎེ ཝིབྷཛིཏྭཱ སཏྟཏོ ཝིསེསཾ ཀཏྭཱ ཨེས ཝདཏཱིཏི ཨཱཧ ‘‘ཨེཀིནྡྲིཡོ’’ཏིཨཱདི. བྷཝནྟཱིཏི བྷཱུཏཱཏི སཏྟཔཱཎཔརིཡཱཡེཔི སཏི ཨཎྜཀོསཱདཱིསུ སམྦྷཝནཊྛེན ཏཏོ ཝིསེསཱཝ, ཏེན ཝུཏྟཱཏི དསྶེཏི ‘‘ཨཎྜ…པེ… ཝདཏཱི’’ཏི ཨིམིནཱ. ཝཏྠིཀོསོ གབྦྷཱསཡོ. ཛཱིཝནཏོ པཱཎཾ དྷཱརེནྟོ ཝིཡ ཝཌྜྷནཏོ ཛཱིཝཱ. ཏེནཱཧ ‘‘སཱལིཡཝཱ’’ཏིཨཱདི. ཨཱདིསདྡེན ཝིརུལ༹ྷདྷམྨཱ ཏིཎརུཀྑཱ གཧིཏཱ. ནཏྠི ཨེཏེསཾ སཾཀིལེསཝིསུདྡྷཱིསུ ཝསོ སཱམཏྠིཡནྟི ཨཝསཱ. ཏཐཱ ཨབལཱ ཨཝཱིརིཡཱ. ཏེནཱཧ ‘‘ཏེས’’ནྟིཨཱདི. ནིཡཏཱཏི ནིཡམནཱ, ཨཚེཛྫསུཏྟཱཝུཏསྶ ཨབྷེཛྫམཎིནོ ཝིཡ ནིཡཏཔྤཝཏྟིཏཱཡ གཏིཛཱཏིབནྡྷཱཔཝགྒཝསེན ནིཡཱམོཏི ཨཏྠོ. ཏཏྠ ཏཏྠཱཏི ཏཱསུ ཏཱསུ ཛཱཏཱིསུ. ཚནྣཾ ཨབྷིཛཱཏཱིནཾ སམྦནྡྷཱིབྷཱུཏཱནཾ གམནཾ སམཝཱཡེན སམཱགམོ. སམྦནྡྷཱིནིརཔེཀྑོཔི བྷཱཝསདྡོ སམྦནྡྷཱིསཧིཏོ ཝིཡ པཀཏིཡཏྠཝཱཙཀོཏི ཨཱཧ ‘‘སབྷཱཝོཡེཝཱ’’ཏི, ཡཐཱ ཀཎྚཀསྶ ཏིཀྑཏཱ, ཀཔིཏྠཕལཱདཱིནཾ པརིམཎྜལཏཱ, མིགཔཀྑཱིནཾ ཝིཙིཏྟཱཀཱརཏཱ ཙ, ཨེཝཾ སབྦསྶཱཔི ལོཀསྶ ཧེཏུཔཙྩཡམནྟརེན ཏཐཱ ཏཐཱ པརིཎཱམོ ཨཀུཏྟིམོ སབྷཱཝོཡེཝཱཏི ཨཏྠོ. ཏེན ཝུཏྟཾ ‘‘ཡེནཱ’’ཏིཨཱདི. པརིཎམནཾ ནཱནཔྤཀཱརཏཱཔཏྟི. ཡེནཱཏི སཏྟཔཱཎཱདིནཱ. ཡཐཱ བྷཝིཏབྦཾ, ཏཐེཝཱཏི སམྦནྡྷོ.

ཚལ༹བྷིཛཱཏིཡོ ¶ པརཏོ ཝིཏྠཱརཱིཡིསྶནྟི. ‘‘སུཁཉྩ དུཀྑཉྩ པཊིསཾཝེདེནྟཱི’’ཏི ཝདནྟོ མཀྑལི ཨདུཀྑམསུཁབྷཱུམིཾ སབྦེན སབྦཾ ན ཛཱནཱཏཱིཏི ཝུཏྟཾ ‘‘ཨཉྙཱ ཨདུཀྑམསུཁབྷཱུམི ནཏྠཱིཏི དསྶེཏཱི’’ཏི. ཨཡཾ ‘‘སུཁཉྩ དུཀྑཉྩ པཊིསཾཝེདེནྟཱི’’ཏི ¶ ཝཙནཾ ཀརཎབྷཱཝེན གཧེཏྭཱ ཝུཏྟཱ ཨཱཙརིཡསྶ མཏི. པོཏྠཀེསུ པན ‘‘ཨཉྙཱ སུཁདུཀྑབྷཱུམི ནཏྠཱིཏི དསྶེཏཱི’’ཏི ཨཡམེཝ པཱཋོ དིཊྛོ, ན ‘‘ཨདུཀྑམསུཁབྷཱུམཱི’’ཏི. ཨེཝཾ སཏི ‘‘ཚསྭེཝཱབྷིཛཱཏཱིསཱུ’’ཏི ཝཙནཾ ཨདྷིཀརཎབྷཱཝེན གཧེཏྭཱ ཚསུ ཨེཝ ཨབྷིཛཱཏཱིསུ སུཁདུཀྑཔཊིསཾཝེདནཾ, ན ཏེཧི ཨཉྙཏྠ, ཏཱཡེཝ སུཁདུཀྑབྷཱུམི, ན ཏདཉྙཱཏི དསྶེཏཱིཏི ཝུཏྟནྟི ཝེདིཏབྦཾ. ཨཡམེཝ ཙ ཡུཏྟཏརོ པཊིཀྑེཔིཏབྦསྶ ཨཏྠསྶ བྷཱུམིཝསེན ཝུཏྟཏྟཱ. ཡདི ཧི ‘‘སུཁཉྩ དུཀྑཉྩ པཊིསཾཝེདེནྟཱི’’ཏི ཝཙནེན པཊིཀྑེཔིཏབྦསྶ དསྶནཾ སིཡཱ, ཨཐ ‘‘ཨཉྙཱ ཨདུཀྑམསུཁཱ ནཏྠཱི’’ཏི དསྶེཡྻ, ན ‘‘ཨདུཀྑམསུཁབྷཱུམཱི’’ཏི དསྶནཧེཏུཝཙནསྶ བྷཱུམིཨཏྠཱབྷཱཝཏོ. དསྶེཏི ཙེཏཾ ཏཱསཾ བྷཱུམིཡཱ ཨབྷཱཝམེཝ, ཏེན ཝིཉྙཱཡཏི ཨཡཾ པཱཋོ, ཨཡཉྩཏྠོ ཡུཏྟཏརོཏི.

པམུཁཡོནཱིནནྟི མནུསྶེསུ ཁཏྟིཡབྲཱཧྨཎཱདིཝསེན, ཏིརཙྪཱནཱདཱིསུ སཱིཧབྱགྒྷཱདིཝསེན པདྷཱནཡོནཱིནཾ, པདྷཱནཏཱ ཙེཏྠ ཨུཏྟམཏཱ. ཏེནཱཧ ‘‘ཨུཏྟམཡོནཱིན’’ནྟི. སཊྛི སཏཱནཱིཏི ཚ སཧསྶཱནི. ‘‘པཉྩ ཙ ཀམྨུནོ སཏཱནཱི’’ཏི པདསྶ ཨཏྠདསྶནཾ ‘‘པཉྩ ཀམྨསཏཱནི ཙཱ’’ཏི. ‘‘ཨེསེཝ ནཡོ’’ཏི ཨིམིནཱ ‘‘ཀེཝལཾ ཏཀྐམཏྟཀེན ནིརཏྠཀཾ དིཊྛིཾ དཱིཔེཏཱི’’ཏི ཨིམམེཝཏྠམཏིདིསཏི. ཨེཏྠ ཙ ‘‘ཏཀྐམཏྟཀེནཱ’’ཏི ཝདནྟོ ཡསྨཱ ཏཀྐིཀཱ ཨཝསྶཡབྷཱུཏཏཐཏྠགྒཧཎཨངྐུསནཡམནྟརེན ནིརངྐུསཏཱཡ པརིཀཔྤནསྶ ཡཾ ཀིཉྩི ཨཏྟནཱ པརིཀཔྤིཏཾ སཱརཏོ མཉྙམཱནཱ ཏཐེཝ ཨབྷིནིཝིསྶ ཏཏྠ ཙ དིཊྛིགཱཧཾ གཎྷནྟི, ཏསྨཱ ན ཏེསཾ དིཊྛིཝཏྠུསྨིཾ ཝིཉྙཱུཧི ཝིཙཱརཎཱ ཀཱཏབྦཱཏི ཨིམམདྷིཔྤཱཡཾ ཝིབྷཱཝེཏི. ཀེཙཱིཏི ཨུཏྟརཝིཧཱརཝཱསིནོ. པཉྩིནྡྲིཡཝསེནཱཏི ཙཀྑཱདིཔཉྩིནྡྲིཡཝསེན. ཏེ ཧི ‘‘ཙཀྑུསོཏགྷཱནཛིཝ྄ཧཱཀཱཡསངྑཱཏཱནི ཨིམཱནི པཉྩིནྡྲིཡཱནི ‘པཉྩ ཀམྨཱནཱི’ཏི ཏིཏྠིཡཱ པཉྙཔེནྟཱི’’ཏི ཝདནྟི ‘‘ཀཱཡཝཙཱིམནོཀམྨཱནི ཙ ‘ཏཱིཎི ཀམྨཱནཱི’ཏི’’. ཀམྨནྟི ལདྡྷཱིཏི ཏདུབྷཡཾ ཨོལཱ༹རིཀཏྟཱ པརིཔུཎྞཀམྨནྟི ལདྡྷི. མནོཀམྨཾ ཨནོལཱ༹རིཀཏྟཱ ཨུཔཌྜྷཀམྨནྟི ལདྡྷཱིཏི ཡོཛནཱ. ‘‘དྭཱསཊྛི པཊིཔདཱ’’ཏི ཝཏྟབྦེ སབྷཱཝནིརུཏྟིཾ ཨཛཱནནྟོ ‘‘དྭཊྛིཔཊིཔདཱ’’ཏི ཝདཏཱིཏི ཨཱཧ ‘‘དྭཱསཊྛི པཊིཔདཱ’’ཏི. སདྡརཙཀཱ པན ‘‘དྭཱསཊྛིཡཱ སལོཔོ, ཨཏྟམཱ’’ཏི ཝདནྟི, ཏདཡུཏྟམེཝ སབྷཱཝནིརུཏྟིཡཱ ཡོགཏོ ཨསིདྡྷཏྟཱ ¶ . ཡདི ཧི སཱ ཡོགེན སིདྡྷཱ ཨསྶ, ཨེཝཾ སབྷཱཝནིརུཏྟིཡེཝ སིཡཱ, ཏཐཱ ཙ སཏི ཨཱཙརིཡཱནཾ མཏེན ཝིརུཛ྄ཛྷཏཱིཏི ཝདནྟི. ‘‘ཙུལླཱསཱིཏི སཧསྶཱནཱི’’ཏིཨཱདིཀཱ པན ཨཉྙཏྲ དིཊྛཔཡོགཱ སབྷཱཝནིརུཏྟིཡེཝ. དིསྶཏི ཧི ཝིསུདྡྷིམགྒཱདཱིསུ –

‘‘ཙུལླཱསཱིཏི ¶ སཧསྶཱནི, ཀཔྤཱ ཏིཊྛནྟི ཡེ མརཱུ;

ན ཏྭེཝ ཏེཔི ཏིཊྛནྟི, དྭཱིཧི ཙིཏྟེཧི སམོཧིཏཱ’’ཏི. (ཝིསུདྡྷི. ༢.༧༡༥; མཧཱནི. ༡༠, ༣༩);

ཨེཀསྨིཾ ཀཔྤེཏི ཙཏུནྣམསངྑྱེཡྻཀཔྤཱནཾ ཨཉྙཏརབྷཱུཏེ ཨེཀསྨིཾ ཨསངྑྱེཡྻཀཔྤེ. ཏཏྠཱཔི ཙ ཝིཝཊྚཊྛཱཡཱིསཉྙིཏཾ ཨེཀམེཝ སནྡྷཱཡ ‘‘དྭཊྛནྟརཀཔྤཱ’’ཏི ཝུཏྟཾ. ན ཧི སོ ཨསྶུཏསཱསནདྷམྨོ ཨིཏརེ ཛཱནཱཏི བཱཧིརཀཱནམཝིསཡཏྟཱ, ཨཛཱནནྟོ ཨེཝམཱཧཱཏི ཨཏྠོ.

ཨུརབྦྷེ ཧནནྟི, ཧནྟྭཱ ཝཱ ཛཱིཝིཏཾ ཀཔྤེནྟཱིཏི ཨོརབྦྷིཀཱ. ཨེས ནཡོ སཱཀུཎིཀཱདཱིསུཔི. ལུདྡཱཏི ཝུཏྟཱཝསེསཀཱ ཡེ ཀེཙི ཙཱཏུཔྤདཛཱིཝིཀཱ ནེསཱདཱ. མཱགཝིཀཔདསྨིཉྷི རོཧིཏཱདིམིགཛཱཏིཡེཝ གཧིཏཱ. བནྡྷནཱགཱརེ ནིཡོཛེནྟཱིཏི བནྡྷནཱགཱརིཀཱ. ཀུརཱུརཀམྨནྟཱཏི དཱརུཎཀམྨནྟཱ. ཨཡཾ སབྦོཔི ཀཎྷཀམྨཔསུཏཏཱཡ ཀཎྷཱབྷིཛཱཏཱིཏི ཝདཏི ཀཎྷསྶ དྷམྨསྶ ཨབྷིཛཱཏི ཨབྦྷུཔྤཏྟི ཡསྶཱཏི ཀཏྭཱ. བྷིཀྑཱུཏི བུདྡྷསཱསནེ བྷིཀྑཱུ. ཀཎྚཀེཏི ཚནྡརཱགེ. སཉྙོགཝསེན ཏེསཾ པཀྑིཔནཾ. ཀཎྚཀསདིསཚནྡརཱགེན སཉྙུཏྟཱ བྷུཉྫནྟཱིཏི ཧི ཨདྷིཔྤཱཡེན ‘‘ཀཎྚཀེ པཀྑིཔིཏྭཱ’’ཏི ཝུཏྟཾ. ཀསྨཱཏི ཙེ? ཡསྨཱ ‘‘ཏེ པཎཱིཏཔཎཱིཏེ པཙྩཡེ པཊིསེཝནྟཱི’’ཏི ཏསྶ མིཙྪཱགཱཧོ, ཏསྨཱ ཉཱཡལདྡྷེཔི པཙྩཡེ བྷུཉྫམཱནཱ ཨཱཛཱིཝཀསམཡསྶ ཝིལོམགཱཧིཏཱཡ པཙྩཡེསུ ཀཎྚཀེ པཀྑིཔིཏྭཱ ཁཱདནྟི ནཱམཱཏི ཝདཏི ཀཎྚཀཝུཏྟིཀཱཏི ཀཎྚཀེན ཡཐཱཝུཏྟེན སཧ ཛཱིཝིཀཱ. ཨཡཉྷིསྶ པཱལི༹ཡེཝཱཏི ཨཡཾ མཀྑལིསྶ ཝཱདདཱིཔནཱ ཨཏྟནཱ རཙིཏཱ པཱལི༹ཡེཝཱཏི ཡཐཱཝུཏྟམཏྠཾ སམཏྠེཏི. ཀཎྚཀཝུཏྟིཀཱ ཨེཝ ནཱམ ཨེཀེ ཨཔརེ པབྦཛིཏཱ བཱཧིརཀཱ སནྟི, ཏེ ནཱིལཱབྷིཛཱཏཱིཏི ཝདཏཱིཏི ཨཏྠོ. ཏེ ཧི སཝིསེསཾ ཨཏྟཀིལམཐཱནུཡོགམནུཡུཏྟཱ. ཏཐཱ ཧི ཏེ ཀཎྚཀེ ཝཏྟནྟཱ ཝིཡ བྷཝནྟཱིཏི ཀཎྚཀཝུཏྟིཀཱཏི ཝུཏྟཱ. ནཱིལསྶ དྷམྨསྶ ཨབྷིཛཱཏི ཡསྶཱཏི ནཱིལཱབྷིཛཱཏི. ཨེཝམིཏརེསུཔི.

ཨམྷཱཀཾ ¶ སཉྙོཛནགཎྛོ ནཏྠཱིཏི ཝཱདིནོ བཱཧིརཀཔབྦཛིཏཱ ནིགཎྛཱ. ཨེཀམེཝ སཱཊཀཾ པརིདཧནྟཱ ཨེཀསཱཊཀཱ. ཀཎྷཏོ པརིསུདྡྷོ ནཱིལོ, ཏཏོ པན ལོཧིཏོཏིཨཱདིནཱ ཡཐཱཀྐམཾ ཏསྶ པརིསུདྡྷཾ ཝཱདཾ དསྶེཏུཾ ‘‘ཨིམེ ཀིརཱ’’ཏིཨཱདི ཝུཏྟཾ. པཎྜརཏརཱཏི བྷུཉྫནནཧཱནཔཊིཀྑེཔཱདིཝཏསམཱཡོགེན པརིསུདྡྷཏརཱ ཀཎྷནཱིལམུཔཱདཱཡ ལོཧིཏསྶཱཔི པརིསུདྡྷབྷཱཝེན ཝཏྟབྦཏོ. ཨོདཱཏཝསནཱཏི ཨོདཱཏཝཏྠཔརིདཧནཱ. ཨཙེལཀསཱཝཀཱཏི ཨཱཛཱིཝཀསཱཝཀབྷཱུཏཱ. ཏེ ཀིར ཨཱཛཱིཝཀལདྡྷིཡཱ ཝིསུདྡྷཙིཏྟཏཱཡ ནིགཎྛེཧིཔི པཎྜརཏརཱ ཧལིདྡཱབྷཱནམྤི ¶ པུརིམེ ཨུཔཱདཱཡ པརིསུདྡྷབྷཱཝཔྤཏྟིཏོ. ‘‘ཨེཝ’’ནྟིཨཱདིནཱ ཏསྶ ཚནྡཱགམནཾ དསྶེཏི. ནནྡཱདཱིནཾ སཱཝཀབྷཱུཏཱ པབྦཛིཏཱ ཨཱཛཱིཝཀཱ. ཏཐཱ ཨཱཛཱིཝཀིནིཡོ. ནནྡཱདཡོ ཀིར ཏཐཱརཱུཔཾ ཨཱཛཱིཝཀཔཊིཔཏྟིཾ ཨུཀྐཾསཾ པཱཔེཏྭཱ ཋིཏཱ, ཏསྨཱ ནིགཎྛེཧི ཨཱཛཱིཝཀསཱཝཀེཧི པབྦཛིཏེཧི པཎྜརཏརཱ ཝུཏྟཱ པརམསུཀྐཱབྷིཛཱཏཱིཏི ཨཡཾ ཏསྶ ལདྡྷི.

པུརིསབྷཱུམིཡོཏི པདྷཱནནིདྡེསོ. ཨིཏྠཱིནམྤི ཧེཏཱ བྷཱུམིཡོ ཨེས ཨིཙྪཏེཝ. སཏྟ དིཝསེཏི ཨཙྩནྟསཉྙོགཝཙནཾ, ཨེཏྟཀམྤི མནྡཱ མོམཱུཧཱཏི. སམྦཱདྷཊྛཱནཏོཏི མཱཏུཀུཙྪིཾ སནྡྷཱཡཱཧ. རོདནྟི ཙེཝ ཝིརཝནྟི ཙ ཏམནུསྶརིཏྭཱ. ཁེདནཾ, ཀཱིལ༹ནཉྩ ཁིཌྜཱསདྡེནེཝ སངྒཧེཏྭཱ ཁིཌྜཱབྷཱུམི ཝུཏྟཱ. པདསྶ ནིཀྑིཔནཾ པདནིཀྑིཔནཾ. ཡདཱ ཏཐཱ པདཾ ནིཀྑིཔིཏུཾ སམཏྠོ, ཏདཱ པདཝཱིམཾསབྷཱུམི ནཱམཱཏི བྷཱཝོ. ཝཏཱཝཏསྶ ཛཱནནཀཱལེ. བྷིཀྑུ ཙ པནྣཀོཏིཨཱདིཔི ཏེསཾ བཱཧིརཀཱནཾ པཱལི༹ཡེཝ. ཏཏྠ པནྣཀོཏི བྷིཀྑཱཡ ཝིཙརཎཀོ, ཏེསཾ ཝཱ པཊིཔཏྟིཡཱ པཊིཔནྣཀོ. ཛིནོཏི ཛིཎྞོ ཛརཱཝསེན ཧཱིནདྷཱཏུཀོ, ཨཏྟནོ ཝཱ པཊིཔཏྟིཡཱ པཊིཔཀྑཾ ཛིནིཏྭཱ ཋིཏོ. སོ ཀིར ཏཐཱབྷཱུཏོ དྷམྨམྤི ཀསྶཙི ན ཀཐེསི. ཏེནཱཧ ‘‘ན ཀིཉྩི ཨཱཧཱ’’ཏི. ཨོཊྛཝདནཱདིཝིཔྤཀཱརེ ཀཏེཔི ཁམནཝསེན ན ཀིཉྩི ཀཐེཏཱིཏིཔི ཝདནྟི. ཨལཱབྷིནྟི ‘‘སོ ན ཀུམྦྷིམུཁཱ པཊིགྒཎྷཱཏཱི’’ཏིཨཱདིནཱ ནཡེན མཧཱསཱིཧནཱདསུཏྟེ (དཱི. ནི. ༡.༣༩༤; མ. ནི. ༡.༡༥༥) ཝུཏྟཨལཱབྷཧེཏུསམཱཡོགེན ཨལཱབྷིཾ. ཏཏོཡེཝ ཛིགྷཙྪཱདུབྦལཔརེཏཏཱཡ སཡནཔརཱཡནཊྛེན སམཎཾ པནྣབྷཱུམཱིཏི ཝདཏི.

ཨཱཛཱིཝཝུཏྟིསཏཱནཱིཏི སཏྟཱནམཱཛཱིཝབྷཱུཏཱནི ཛཱིཝིཀཱཝུཏྟིསཏཱནི. ‘‘པརིབྦཱཛཀསཏཱནཱི’’ཏི ཝུཙྩམཱནེཔི ཙེས སབྷཱཝལིངྒམཛཱནནྟོ ‘‘པརིབྦཱཛཀསཏེ’’ཏི ¶ ཝདཏི. ཨེཝམཉྙེསུཔི. ཏེནཱཧ ‘‘པརིབྦཱཛཀཔབྦཛྫཱསཏཱནཱི’’ཏི. ནཱགབྷཝནཾ ནཱགམཎྜལཾ ཡཐཱ ‘‘མཧིཾསཀམཎྜལ’’ནྟི. པརམཱཎུཨཱདི རཛོ. པསུགྒཧཎེན ཨེལ༹ཀཛཱཏི གཧིཏཱ. མིགགྒཧཎེན རུརུགཝཡཱདི མིགཛཱཏི. གཎྛིམྷཱིཏི ཕལུ༹མྷི, པབྦེཏི ཨཏྠོ. ཙཱཏུམཧཱརཱཛིཀཱདིབྲཧྨཀཱཡིཀཱདིཝསེན, ཏེསཉྩ ཨནྟརབྷེདཝསེན བཧཱུ དེཝཱ. ཏཏྠ ཙཱཏུམཧཱརཱཛིཀཱནཾ ཨེཀཙྩཨནྟརབྷེདོ མཧཱསམཡསུཏྟེན (དཱི. ནི. ༢.༣༣༡) དཱིཔེཏབྦོ. ‘‘སོ པནཱ’’ཏིཨཱདིནཱ ཨཛཱནནྟོ པནེས བཧཱུ དེཝེཔི སཏྟ ཨེཝ ཝདཏཱིཏི ཏསྶ ཨཔྤམཱཎཏཾ དསྶེཏི. མནུསྶཱཔི ཨནནྟཱཏི དཱིཔདེསཀུལཝཾསཱཛཱིཝཱདིཝིབྷཱགཝསེན. པིསཱཙཱ ཨེཝ པེསཱཙཱ, ཏེ ཨཔརཔེཏཱདིཝསེན མཧནྟམཧནྟཱ, བཧུཏརཱཏི ཨཏྠོ. བཱཧིརཀསམཡེ པན ‘‘ཚདྡནྟདཧམནྡཱཀིནིཡོ ཀུཝཱལི༹ཡམུཙལིནྡནཱམེན ཝོཧརིཏཱ’’ཏི (དཱི. ནི. ཊཱི. ༡.༡༦༨) ཨཱཙརིཡེན ཝུཏྟཾ.

གཎྛིཀཱཏི ¶ པབྦགཎྛིཀཱ. པབྦགཎྛིམྷི ཧི པཝུཊསདྡོ. མཧཱཔཔཱཏཱཏི མཧཱཏཊཱ. པཱརིསེསནཡེན ཁུདྡཀཔཔཱཏསཏཱནི. ཨེཝཾ སུཔིནེསུཔི. ‘‘མཧཱཀཔྤིནོ’’ཏི ཨིདཾ ‘‘མཧཱཀཔྤཱན’’ནྟི ཨཏྠཏོ ཝེདིཏབྦཾ. སདྡཏོ པནེས ཨཛཱནནྟོ ཨེཝཾ ཝདཏཱིཏི ན ཝིཙཱརཎཀྑམཾ. ཏཐཱ ‘‘ཙུལླཱསཱིཏི སཏསཧསྶཱནཱི’’ཏི ཨིདམྤི. སོ ཧི ‘‘ཙཏུརཱསཱིཏི སཏསཧསྶཱནཱི’’ཏི ཝཏྟུམསཀྐོནྟོ ཨེཝཾ ཝདཏི. སདྡརཙཀཱ པན ‘‘ཙཏུརཱསཱིཏིཡཱ ཏུལོཔོ, ཙསྶ ཙུ, རསྶ ལོ, དྭིཏྟཉྩཱ’’ཏི ཝདནྟི. ཨེཏྟཀཱ མཧཱསརཱཏི ཨེཏཔྤམཱཎཝཏཱ མཧཱསརཏོ, སཏྟམཧཱསརཏོཏི ཝུཏྟཾ ཧོཏི. ཀིརཱཏི ཏསྶ ཝཱདཱནུསྶཝནེ ནིཔཱཏོ. པཎྜིཏོཔི…པེ… ན གཙྪཏི, ཀསྨཱ? སཏྟཱནཾ སཾསརཎཀཱལསྶ ནིཡཏབྷཱཝཏོ.

‘‘ཨཙེལཀཝཏེན ཝཱ ཨཉྙེན ཝཱ ཡེན ཀེནཙཱི’’ཏི ཝུཏྟམཏིདིསཏི ‘‘ཏཱདིསེནེཝཱ’’ཏི ཨིམིནཱ. ཏཔོཀམྨེནཱཏི ཏཔཀརཎེན. ཨེཏྠཱཔི ‘‘ཏཱདིསེནེཝཱ’’ཏི ཨདྷིཀཱརོ. ཡོ…པེ… ཝིསུཛ྄ཛྷཏི, སོ ཨཔརིཔཀྐཾ ཀམྨཾ པརིཔཱཙེཏི ནཱམཱཏི ཡོཛནཱ. ཨནྟརཱཏི ཙཏུརཱསཱིཏིམཧཱཀཔྤསཏསཧསྶཱནམབྦྷནྟརེ. ཕུསྶ ཕུསྶཱཏི པཏྭཱ པཏྭཱ. ཝུཏྟཔརིམཱཎཾ ཀཱལནྟི ཙཏུརཱསཱིཏིམཧཱཀཔྤསཏསཧསྶཔམཱཎཾ ཀཱལཾ. ཨིདཾ ཝུཏྟཾ ཧོཏི – ཨཔརིཔཀྐཾ སཾསརཎནིམིཏྟཾ ཀམྨཾ སཱིལཱདིནཱ སཱིགྷཾཡེཝ ཝིསུདྡྷཔྤཏྟིཡཱ ¶ པརིཔཱཙེཏི ནཱམ. པརིཔཀྐཾ ཀམྨཾ ཕུསྶ ཕུསྶ ཀཱལེན པརིཔཀྐབྷཱཝཱནཱཔཱདནེན བྱནྟིཾ ཝིགམནཾ ཀརོཏི ནཱམཱཏི. དོཎེནཱཏི པརིམིནནདོཎཏུམྦེན. རཱུཔཀཝསེནཏྠོ ལབྦྷཏཱིཏི ཝུཏྟཾ ‘‘མིཏཾ ཝིཡཱ’’ཏི. ན ཧཱཔནཝཌྜྷནཾ པཎྜིཏབཱལཝསེནཱཏི དསྶེཏི ‘‘ན སཾསཱརོ’’ཏིཨཱདིནཱ. ཝཌྜྷནཾ ཨུཀྐཾསོ. ཧཱཔནཾ ཨཝཀཾསོ.

ཀཏསུཏྟགུལེ༹ཏི ཀཏསུཏྟཝཊྚིཡཾ. པལེཏཱིཏི པརེཏི ཡཐཱ ‘‘ཨབྷིསམྤརཱཡོ’’ཏི, (མཧཱནི. ༦༩; ཙཱུལ༹ནི. ༨༥; པཊི. མ. ༣.༤) ར-ཀཱརསྶ པན ལ-ཀཱརཾ ཀཏྭཱ ཨེཝཾ ཝུཏྟཾ ཡཐཱ ‘‘པལིབུདྡྷོ’’ཏི (ཙཱུལ༹ནི. ༡༥; མི. པ. ༣.༦). སོ ཙ ཙུརཱདིགཎཝསེན གཏིཡནྟི ཝུཏྟཾ ‘‘གཙྪཏཱི’’ཏི. ཨིམཱཡ ཨུཔམཱཡ ཙེས སཏྟཱནཾ སཾསཱརོ ཨནུཀྐམེན ཁཱིཡཏེཝ, ན ཝཌྜྷཏི པརིཙྪིནྣརཱུཔཏྟཱཏི ཨིམམཏྠཾ ཝིབྷཱཝེཏཱིཏི ཨཱཧ ‘‘སུཏྟེ ཁཱིཎེ’’ཏིཨཱདི. ཏཏྠེཝཱཏི ཁཱིཡནཊྛཱནེཡེཝ.

ཨཛིཏཀེསཀམྦལཝཱདཝཎྞནཱ

༡༧༡. དིནྣནྟི དེཡྻདྷམྨསཱིསེན དཱནཙེཏནཱཡེཝ ཝུཏྟཱ. ཏཾམུཁེན ཙ ཕལནྟི དསྶེཏི ‘‘དིནྣསྶ ཕལཱབྷཱཝ’’ནྟི ཨིམིནཱ. དིནྣཉྷི མུཁྱཏོ ཨནྣཱདིཝཏྠུ, ཏཾ ཀཐམེས པཊིཀྑིཔིསྶཏི ¶ . ཨེས ནཡོ ཡིཊྛཾ ཧུཏནྟི ཨེཏྠཱཔི. སབྦསཱདྷཱརཎཾ མཧཱདཱནཾ མཧཱཡཱགོ. པཱཧུནབྷཱཝེན ཀཏྟབྦསཀྐཱརོ པཱཧུནཀསཀྐཱརོ. ཕལནྟི ཨཱནིསཾསཕལཾ, ནིསྶནྡཕལཉྩ. ཝིཔཱཀོཏི སདིསཕལཾ. ཙཏུརངྒསམནྣཱགཏེ དཱནེ ཋཱནནྟརཱདིཔཏྟི ཝིཡ ཧི ཨཱནིསཾསོ, སངྑབྲཱཧྨཎསྶ དཱནེ (ཛཱ. ༡.༡༠.༣༩) ཏཱཎལཱབྷམཏྟཾ ཝིཡ ནིསྶནྡོ, པཊིསནྡྷིསངྑཱཏཾ སདིསཕལཾ ཝིཔཱཀོ. ཨཡཾ ལོཀོ, པརལོཀོཏི ཙ ཀམྨུནཱ ལདྡྷབྦོ ཝུཏྟོ ཕལཱབྷཱཝམེཝ སནྡྷཱཡ པཊིཀྑིཔནཏོ. པཙྩཀྑདིཊྛོ ཧི ལོཀོ ཀཐཾ ཏེན པཊིཀྑིཏྟོ སིཡཱ. ‘‘སབྦེ ཏཏྠ ཏཏྠེཝ ཨུཙྪིཛྫནྟཱི’’ཏི ཨིམིནཱ ཀཱརཎམཱཧ, ཡཏྠ ཡཏྠ བྷཝཡོནིཨཱདཱིསུ ཋིཏཱ ཨིམེ སཏྟཱ, ཏཏྠ ཏཏྠེཝ ཨུཙྪིཛྫནྟི, ནིརུདཡཝིནཱསཝསེན ཝིནསྶནྟཱིཏི ཨཏྠོ. ཏེསཱུཏི མཱཏཱཔིཏཱུསུ. ཕལཱབྷཱཝཝསེནེཝ ཝདཏི, ན མཱཏཱཔིཏཱུནཾ, ནཱཔི ཏེསུ ཨིདཱནི ཀརིཡམཱནསཀྐཱརཱསཀྐཱརཱནམབྷཱཝཝསེན ཏེསཾ ལོཀེ པཙྩཀྑཏྟཱ. པུབྦུལ༹སྶ ཝིཡ ཨིམེསཾ སཏྟཱནཾ ཨུཔྤཱདོ ནཱམ ཀེཝལོ, ན ཙཝིཏྭཱ ཨཱགམནཔུབྦཀོ ཨཏྠཱིཏི དསྶནཏྠཾ ¶ ‘‘ནཏྠི སཏྟཱ ཨོཔཔཱཏིཀཱ’’ཏི ཝུཏྟནྟི ཨཱཧ ‘‘ཙཝིཏྭཱ ཨུཔཔཛྫནཀཱ སཏྟཱ ནཱམ ནཏྠཱི’’ཏི. སམཎེན ནཱམ ཡཱཐཱཝཏོ ཛཱནནྟེན ཀསྶཙི ཨཀཐེཏྭཱ སཉྙཏེན བྷཝིཏབྦཾ, ཨཉྙཐཱ ཨཧོཔུརིསིཀཱ ནཱམ སིཡཱ. ཀིཉྷི པརོ པརསྶ ཀརིསྶཏི, ཏཐཱ ཙ ཨཏྟནོ སམྤཱདནསྶ ཀསྶཙི ཨཝསྶཡོ ཨེཝ ན སིཡཱ ཏཏྠ ཏཏྠེཝ ཨུཙྪིཛྫནཏོཏི ཨིམམཏྠཾ སནྡྷཱཡ ‘‘ཡེ ཨིམཉྩ…པེ… པཝེདེནྟཱི’’ཏི ཨཱཧ. ཨཡཾ ཨཊྛཀཐཱཝསེསཀོ ཨཏྠོ.

ཙཏཱུསུ མཧཱབྷཱུཏེསུ ནིཡུཏྟོ ཙཱཏུམཧཱབྷཱུཏིཀོ, ཨཏྠམཏྟཏོ པན དསྶེཏུཾ ‘‘ཙཏུམཧཱབྷཱུཏམཡོ’’ཏི ཝུཏྟཾ. ཡཐཱ ཧི མཏྟིཀཱཡ ནིབྦཏྟཾ བྷཱཛནཾ མཏྟིཀཱམཡཾ, ཨེཝམཡམྤི ཙཏཱུཧི མཧཱབྷཱུཏེཧི ནིབྦཏྟོ ཙཏུམཧཱབྷཱུཏམཡོཏི ཝུཙྩཏི. ཨཛ྄ཛྷཏྟིཀཔཐཝཱིདྷཱཏཱུཏི སཏྟསནྟཱནགཏཱ པཐཝཱིདྷཱཏུ. བཱཧིརཔཐཝཱིདྷཱཏུནྟི བཧིདྡྷཱ མཧཱཔཐཝིཾ, ཏེན པཐཝཱིཡེཝ ཀཱཡོཏི དསྶེཏི. ཨནུགཙྪཏཱིཏི ཨནུབནྡྷཏི. ཨུབྷཡེནཱཔཱིཏི པདདྭཡེནཔི. ཨུཔེཏི ཨུཔགཙྪཏཱིཏི བཱཧིརཔཐཝིཀཱཡཏོ ཏདེཀདེསབྷཱུཏཱ པཐཝཱི ཨཱགནྟྭཱ ཨཛ྄ཛྷཏྟིཀབྷཱཝཔྤཏྟི ཧུཏྭཱ སཏྟབྷཱཝེན སཎྛིཏཱ, སཱ ཙ མཧཱཔཐཝཱི གྷཊཱདིགཏཔཐཝཱི ཝིཡ ཨིདཱནི ཏམེཝ བཱཧིརཾ པཐཝིཀཱཡཾ སམུདཱཡབྷཱུཏཾ པུན ཨུཔེཏི ཨུཔགཙྪཏི, སབྦསོ ཏེན བཱཧིརཔཐཝིཀཱཡེན ནིབྦིསེསཏཾ ཨེཀཱིབྷཱཝམེཝ གཙྪཏཱིཏི ཨཏྠོ. ཨཱཔཱདཱིསུཔི ཨེསེཝ ནཡོཏི ཨེཏྠ པཛྫུནྣེན མཧཱསམུདྡཏོ གཧིཏཨཱཔོ ཝིཡ ཝསྶོདཀབྷཱཝེན པུནཔི མཧཱསམུདྡཾ, སཱུརིཡརཾསིཏོ གཧིཏཨིནྡགྒིསངྑཱཏཏེཛོ ཝིཡ པུནཔི སཱུརིཡརཾསིཾ, མཧཱཝཱཡུཀྑནྡྷཏོ ནིགྒཏམཧཱཝཱཏོ ཝིཡ པུནཔི མཧཱཝཱཡུཀྑནྡྷཾ ཨུཔེཏི ཨུཔགཙྪཏཱིཏི པརིཀཔྤནཱམཏྟེན དིཊྛིགཏིཀསྶ ཨདྷིཔྤཱཡོ.

མནཙྪཊྛཱནི ¶ ཨིནྡྲིཡཱནཱིཏི མནམེཝ ཚཊྛཾ ཡེསཾ ཙཀྑུསོཏགྷཱནཛིཝ྄ཧཱཀཱཡཱནཾ, ཏཱནི ཨིནྡྲིཡཱནི. ཨཱཀཱསཾ པཀྑནྡནྟི ཏེསཾ ཝིསཡབྷཱཝཱཏི ཝདནྟི. ཝིསཡཱིགཧཎེན ཧི ཝིསཡཱཔི གཧིཏཱ ཨེཝ ཧོནྟི. ཀཐཾ གཎིཏཱ མཉྩཔཉྩམཱཏི ཨཱཧ ‘‘མཉྩོ ཙེཝ…པེ… ཨཏྠོ’’ཏི. ཨཱལཱ༹ཧནཾ སུསཱནནྟི ཨཏྠཏོ ཨེཀཾ. གུཎཱགུཎཔདཱནཱིཏི གུཎདོསཀོཊྛཱསཱནི. སརཱིརམེཝ ཝཱ པདཱནི ཏཾཏཾཀིརིཡཱཡ པཛྫིཏབྦཏོ. པཱརཱཝཏཔཀྑིཝཎྞཱནཱིཏི པཱརཱཝཏསྶ ནཱམ པཀྑིནོ ཝཎྞཱནི. ‘‘པཱརཱཝཏཔཀྑཝཎྞཱནཱི’’ཏི པཱཋོ, པཱརཱཝཏསཀུཎསྶ པཏྟཝཎྞཱནཱིཏི ཨཏྠོ. བྷསྨནྟཱཏི ¶ ཚཱརིཀཱཔརིཡནྟཱ. ཏེནཱཧ ‘‘ཚཱརིཀཱཝསཱནམེཝཱ’’ཏི. ཨཱཧུཏིསདྡེནེཏྠ ‘‘དིནྣཾ ཡིཊྛཾ ཧུཏ’’ནྟི ཝུཏྟཔྤཀཱརཾ དཱནཾ སབྦམྤི གཧིཏནྟི དསྶེཏི ‘‘པཱཧུནཀསཀྐཱརཱདིབྷེདཾ དིནྣདཱན’’ནྟི ཨིམིནཱ, ཝིརཱུཔེཀསེསནིདྡེསོ ཝཱ ཨེས. ཨཏྠོཏི ཨདྷིཔྤཱཡཏོ ཨཏྠོ སདྡཏོ ཏསྶ ཨནདྷིགམིཏཏྟཱ. ཨེཝམཱིདིསེསུ. དབྦནྟི མུཡ྄ཧནྟཱིཏི དཏྟཱུ, བཱལཔུགྒལཱ, ཏེཧི དཏྟཱུཧི. ཀིཾ ཝུཏྟཾ ཧོཏཱིཏི ཨཱཧ ‘‘བཱལཱ དེནྟཱི’’ཏིཨཱདི. པཱལི༹ཡཾ ‘‘ལོཀོ ཨཏྠཱི’’ཏི མཏི ཡེསཾ ཏེ ཨཏྠིཀཱ, ‘‘ཨཏྠཱི’’ཏི ཙེདཾ ནེཔཱཏིཀཔདཾ, ཏེསཾ ཝཱདོ ཨཏྠིཀཝཱདོ, ཏཾ ཨཏྠིཀཝཱདཾ.

ཏཏྠཱཏི ཏེསུ ཡཐཱཝུཏྟེསུ ཏཱིསུ མིཙྪཱཝཱདཱིསུ. ཀམྨཾ པཊིབཱཧཏི ཨཀིརིཡཝཱདིབྷཱཝཏོ. ཝིཔཱཀཾ པཊིབཱཧཏི སབྦེན སབྦཾ ཨཱཡཏིཾ ཨུཔཔཏྟིཡཱ པཊིཀྑིཔནཏོ. ཝིཔཱཀནྟི ཙ ཨཱནིསཾསནིསྶནྡསདིསཕལཝསེན ཏིཝིདྷམྤི ཝིཔཱཀཾ. ཨུབྷཡཾ པཊིབཱཧཏི སབྦསོ ཧེཏུཔཊིསེདྷནེནེཝ ཕལསྶཱཔི པཊིསེདྷིཏཏྟཱ. ཨུབྷཡནྟི ཙ ཀམྨཾ ཝིཔཱཀམྤི. སོ ཧི ‘‘ཨཧེཏཱུ ཨཔྤཙྩཡཱ སཏྟཱ སཾཀིལིསྶནྟི, ཝིསུཛ྄ཛྷནྟི ཙཱ’’ཏི ཝདནྟོ ཀམྨསྶ ཝིཡ ཝིཔཱཀསྶཱཔི སཾཀིལེསཝིསུདྡྷཱིནཾ པཙྩཡཏྟཱབྷཱཝཛོཏནཏོ ཏདུབྷཡཾ པཊིབཱཧཏི ནཱམ. ཝིཔཱཀོ པཊིབཱཧིཏོ ཧོཏི ཨསཏི ཀམྨསྨིཾ ཝིཔཱཀཱབྷཱཝཏོ. ཀམྨཾ པཊིབཱཧིཏཾ ཧོཏི ཨསཏི ཝིཔཱཀེ ཀམྨསྶ ནིརཏྠཀཏཱཔཏྟིཏོ. ཨིཏཱིཏི ཝུཏྟཏྠནིདསྶནཾ. ཨཏྠཏོཏི སརཱུཔཏོ, ཝིསུཾ ཝིསུཾ ཏཾཏཾདིཊྛིདཱིཔཀབྷཱཝེན པཱལི༹ཡཾ ཨཱགཏཱཔི ཏདུབྷཡཔཊིབཱཧཀཱཝཱཏི ཨཏྠོ. པཙྩེཀཾ ཏིཝིདྷདིཊྛིཀཱ ཨེཝ ཏེ ཨུབྷཡཔཊིབཱཧཀཏྟཱ. ‘‘ཨུབྷཡཔྤཊིབཱཧཀཱ’’ཏི ཧི ཧེཏུཝཙནཾ ཧེཏུགབྦྷཏྟཱ ཏསྶ ཝིསེསནསྶ. ཨཧེཏུཀཝཱདཱ ཙེཝཱཏིཨཱདི པཊིཉྙཱཝཙནཾ ཏཔྥལབྷཱཝེན ནིཙྪིཏཏྟཱ. ཏསྨཱ ཝིཔཱཀཔཊིབཱཧཀཏྟཱ ནཏྠིཀཝཱདཱ, ཀམྨཔཊིབཱཧཀཏྟཱ ཨཀིརིཡཝཱདཱ, ཏདུབྷཡཔཊིབཱཧཀཏྟཱ ཨཧེཏུཀཝཱདཱཏི ཡཐཱལཱབྷཾ ཧེཏུཕལཏཱསམྦནྡྷོ ཝེདིཏབྦོ. ཡོ ཧི ཝིཔཱཀཔཊིབཱཧནེན ནཏྠིཀདིཊྛིཀོ ཨུཙྪེདཝཱདཱི, སོ ཨཏྠཏོ ཀམྨཔཊིབཱཧནེན ཨཀིརིཡདིཊྛིཀོ, ཨུབྷཡཔཊིབཱཧནེན ཨཧེཏུཀདིཊྛིཀོ ཙ ཧོཏི. སེསདྭཡེཔི ཨེསེཝ ནཡོ.

‘‘ཡེ ཝཱ པནཱ’’ཏིཨཱདིནཱ ཏེསམནུདིཊྛིཀཱནཾ ནིཡཱམོཀྐནྟིཝིནིཙྪཡོ ཝུཏྟོ. ཏཏྠ ཏེསནྟི ¶ པཱུརཎཱདཱིནཾ. སཛ྄ཛྷཱཡནྟཱིཏི ཏཾ དིཊྛིདཱིཔཀཾ གནྠཾ ཡཐཱ ¶ ཏཐཱ ཏེཧི ཀཏཾ ཨུགྒཧེཏྭཱ པཋནྟི. ཝཱིམཾསནྟཱིཏི ཏསྶ ཨཏྠཾ ཝིཙཱརེནྟི. ‘‘ཏེས’’ནྟིཨཱདི ཝཱིམཾསནཱཀཱརདསྶནཾ. ‘‘ཀརོཏོ…པེ… ཨུཙྪིཛྫཏཱི’’ཏི ཨེཝཾ ཝཱིམཾསནྟཱནཾ ཏེསནྟི སམྦནྡྷོ. ཏསྨིཾ ཨཱརམྨཎེཏི ཡཐཱཔརིཀཔྤིཏེ ཀམྨཕལཱབྷཱཝཱདིཀེ ‘‘ཀརོཏོ ན ཀརཱིཡཏི པཱཔ’’ནྟིཨཱདི ནཡཔྤཝཏྟཱཡ མིཙྪཱདསྶནསངྑཱཏཱཡ ལདྡྷིཡཱ ཨཱརམྨཎེ. མིཙྪཱསཏི སནྟིཊྛཏཱིཏི མིཙྪཱསཏིསངྑཱཏཱ ལདྡྷིསཧགཏཱ ཏཎྷཱ སནྟིཊྛཏི. ‘‘ཀརོཏོ ན ཀརཱིཡཏི པཱཔ’’ནྟིཨཱདིཝསེན ཧི ཨནུསྶཝཱུཔལདྡྷེ ཨཏྠེ ཏདཱཀཱརཔརིཝིཏཀྐནེཧི སཝིགྒཧེ ཝིཡ སརཱུཔཏོ ཙིཏྟསྶ པཙྩུཔཊྛིཏེ ཙིརཀཱལཔརིཙཡེན ‘‘ཨེཝམེཏ’’ནྟི ནིཛ྄ཛྷཱནཀྑམབྷཱཝཱུཔགམནེ, ནིཛ྄ཛྷཱནཀྑནྟིཡཱ ཙ ཏཐཱ ཏཐཱ གཧིཏེ པུནཔྤུནཾ ཏཐེཝ ཨཱསེཝནྟསྶ བཧུལཱིཀརོནྟསྶ མིཙྪཱཝིཏཀྐེན སམཱནཱིཡམཱནཱ མིཙྪཱཝཱཡཱམུཔཏྠམྦྷིཏཱ ཨཏཾསབྷཱཝམྤི ‘‘ཏཾསབྷཱཝ’’ནྟི གཎྷནྟཱི མིཙྪཱལདྡྷིསཧགཏཱ ཏཎྷཱ མུསཱ ཝིཏཐཾ སརཎཏོ པཝཏྟནཏོ མིཙྪཱསཏཱིཏི ཝུཙྩཏི. ཙཏུརངྒུཏྟརཊཱིཀཱཡམྤི (ཨ. ནི. ཨཊྛ. ༢.༤.༣༠) ཙེས ཨཏྠོ ཝུཏྟོཡེཝ. མིཙྪཱསངྐཔྤཱདཡོ ཝིཡ ཧི མིཙྪཱསཏི ནཱམ པཱཊིཡེཀྐོ ཀོཙི དྷམྨོ ནཏྠི, ཏཎྷཱསཱིསེན གཧིཏཱནཾ ཙཏུནྣམྤི ཨཀུསལཀྑནྡྷཱནམེཏཾ ཨདྷིཝཙནནྟི མཛ྄ཛྷིམཱགམཊྛཀཐཱཡམྤི སལླེཁསུཏྟཝཎྞནཱཡཾ (མ. ནི. ཨཊྛ. ༡.༨༣) ཝུཏྟཾ.

ཙིཏྟཾ ཨེཀགྒཾ ཧོཏཱིཏི ཡཐཱསཀཾ ཝིཏཀྐཱདིཔཙྩཡལཱབྷེན ཏསྨིཾ ཨཱརམྨཎེ ཨཝཊྛིཏཏཱཡ ཨནེཀགྒཏཾ པཧཱཡ ཨེཀགྒཾ ཨཔྤིཏཾ ཝིཡ ཧོཏི, ཙིཏྟསཱིསེན ཙེཏྠ མིཙྪཱསམཱདྷི ཨེཝ ཝུཏྟོ. སོ ཧི པཙྩཡཝིསེསེཧི ལདྡྷབྷཱཝནཱབལོ ཨཱིདིསེ ཋཱནེ སམཱདྷཱནཔཏིརཱུཔཀཀིཙྩཀརོཡེཝ ཧོཏི ཝཱལཝིཛ྄ཛྷནཱདཱིསུ ཝིཡཱཏི དཊྛབྦཾ. ཛཝནཱནི ཛཝནྟཱིཏི ཨནེཀཀྑཏྟུཾ ཏེནཱཀཱརེན པུབྦབྷཱགིཡེསུ ཛཝནཝཱརེསུ པཝཏྟེསུ སནྣིཊྛཱནབྷཱུཏེ སབྦཔཙྪིམེ ཛཝནཝཱརེ སཏྟ ཛཝནཱནི ཛཝནྟི. ‘‘པཋམཛཝནེ སཏེཀིཙྪཱ ཧོནྟི, ཏཐཱ དུཏིཡཱདཱིསཱུ’’ཏི ཨིདཾ དྷམྨསབྷཱཝདསྶནམེཝ, ན པན ཏསྨིཾ ཁཎེ ཏེསཾ ཏིཀིཙྪཱ ཀེནཙི སཀྐཱ ཀཱཏུནྟི དསྶནཾ ཏེསྭེཝ ཋཏྭཱ སཏྟམཛཝནསྶ ཨཝསྶམུཔྤཛྫམཱནསྶ ནིཝཏྟིཏུཾ ཨསཀྐུཎེཡྻཏྟཱ, ཨེཝཾ ལཧུཔརིཝཏྟེ ཙ ཙིཏྟཝཱརེ ཨོཝཱདཱནུསཱསན ཝསེན ཏིཀིཙྪཱཡ ཨསམྦྷཝཏོ. ཏེནཱཧ ‘‘བུདྡྷཱནམྤི ཨཏེཀིཙྪཱ ཨནིཝཏྟིནོ’’ཏི ¶ . ཨརིཊྛཀཎྚཀསདིསཱཏི ཨརིཊྛབྷིཀྑུཀཎྚཀསཱམཎེརསདིསཱ, ཏེ ཝིཡ ཨཏེཀིཙྪཱ ཨནིཝཏྟིནོ མིཙྪཱདིཊྛིགཏིཀཱཡེཝ ཛཱཏཱཏི ཝུཏྟཾ ཧོཏི.

ཏཏྠཱཏི ཏེསུ ཏཱིསུ མིཙྪཱདསྶནེསུ. ཀོཙི ཨེཀཾ དསྶནཾ ཨོཀྐམཏཱིཏི ཡསྶ ཨེཀསྨིཾཡེཝ ཨབྷིནིཝེསོ, ཨཱསེཝནཱ ཙ པཝཏྟཱ, སོ ཨེཀམེཝ དསྶནཾ ཨོཀྐམཏི. ཀོཙི དྭེ, ཀོཙི ཏཱིཎིཔཱིཏི ཡསྶ དྭཱིསུ, ཏཱིསུཔི ཝཱ ཨབྷིནིཝེསོ, ཨཱསེཝནཱ ཙ པཝཏྟཱ, སོ དྭེ ¶ , ཏཱིཎིཔི ཨོཀྐམཏི, ཨེཏེན པན ཝཙནེན ཡཱ པུབྦེ ‘‘ཨིཏི སབྦེཔེཏེ ཨཏྠཏོ ཨུབྷཡཔྤཊིབཱཧཀཱ’’ཏིཨཱདིནཱ ཨུབྷཡཔྤཊིབཱཧཀཏཱམུཁེན དཱིཔིཏཱ ཨཏྠཏོ སིདྡྷཱ སབྦདིཊྛིཀཏཱ, སཱ པུབྦབྷཱགིཡཱ. ཡཱ པན མིཙྪཏྟནིཡཱམོཀྐནྟིབྷཱུཏཱ, སཱ ཡཐཱསཀཾ པཙྩཡསམུདཱགམསིདྡྷིཏོ བྷིནྣཱརམྨཎཱནཾ ཝིཡ ཝིསེསཱདྷིགམཱནཾ ཨེཀཛ྄ཛྷཾ ཨནུཔྤཏྟིཡཱ ཨཉྙམཉྙཾ ཨབྦོཀིཎྞཱ ཨེཝཱཏི དསྶེཏི. ‘‘ཨེཀསྨིཾ ཨོཀྐནྟེཔཱི’’ཏིཨཱདིནཱ ཏིསྶནྣམྤི དིཊྛཱིནཾ སམཱནསཱམཏྠིཡཏཾ, སམཱནཕལཏཉྩ ཝིབྷཱཝེཏི. སགྒཱཝརཎཱདིནཱ ཧེཏཱ སམཱནསཱམཏྠིཡཱ ཙེཝ སམཱནཕལཱ ཙ, ཏསྨཱ ཏིསྶོཔི ཙེཏཱ ཨེཀསྶ ཨུཔྤནྣཱཔི ཨབྦོཀིཎྞཱ ཨེཝ, ཨེཀཱཡ ཝིཔཱཀེ དིནྣེ ཨིཏརཱ ཏསྶཱ ཨནུབལཔྤདཱཡིཀཱཡོཏི དཊྛབྦཾ. ‘‘པཏྟོ སགྒམགྒཱཝརཎཉྩེཝཱ’’ཏིཨཱདིཾ ཝཏྭཱ ‘‘ཨབྷབྦོ’’ཏིཨཱདིནཱ ཏདེཝཏྠཾ ཨཱཝིཀརོཏི. མོཀྑམགྒཱཝརཎནྟི ནིབྦཱནཔཐབྷཱུཏསྶ ཨརིཡམགྒསྶ ནིཝཱརཎཾ. པགེཝཱཏི པཊིཀྑེཔཏྠེ ནིཔཱཏོ, མོཀྑསངྑཱཏཾ པན ནིབྦཱནཾ གནྟུཾ ཀཱ ནཱམ ཀཐཱཏི ཨཏྠོ. ཨཔིཙ པགེཝཱཏི པཱ ཨེཝ, པཋམཏརམེཝ མོཀྑཾ གནྟུམབྷབྦོ, མོཀྑགམནཏོཔི དཱུརཏརམེཝཱཏི ཝུཏྟཾ ཧོཏི. ཨེཝམཉྙཏྠཱཔི ཡཐཱརཧཾ.

‘‘ཝཊྚཁཱཎུ ནཱམེས སཏྟོ’’ཏི ཨིདཾ ཝཙནཾ ནེཡྻཏྠམེཝ, ན ནཱིཏཏྠཾ. ཏཐཱ ཧི ཝུཏྟཾ པཔཉྩསཱུདནིཡཾ ནཱམ མཛ྄ཛྷིམཱགམཊྛཀཐཱཡཾ ‘‘ཀིཾ པནེས ཨེཀསྨིཾཡེཝ ཨཏྟབྷཱཝེ ནིཡཏོ ཧོཏི, ཨུདཱཧུ ཨཉྙསྨིམྤཱིཏི? ཨེཀསྨིཾཡེཝ ནིཡཏོ, ཨཱསེཝནཝསེན པན བྷཝནྟརེཔི ཏཾ ཏཾ དིཊྛིཾ རོཙེཏིཡེཝཱ’’ཏི (མ. ནི. ཨཊྛ. ༣.༡༠༣). ཨཀུསལཉྷི ནཱམེཏཾ ཨབལཾ དུབྦལཾ, ན ཀུསལཾ ཝིཡ སབལཾ མཧཱབལཾ, ཏསྨཱ ‘‘ཨེཀསྨིཾཡེཝ ཨཏྟབྷཱཝེ ནིཡཏོ’’ཏི ཏཏྠ ཝུཏྟཾ. ཨཉྙཐཱ སམྨཏྟནིཡཱམོ ཝིཡ མིཙྪཏྟནིཡཱམོཔི ཨཙྩནྟིཀོ སིཡཱ, ན ཙ ཨཙྩནྟིཀོ. ཡདེཝཾ ཝཊྚཁཱཎུཛོཏནཱ ཀཐཾ ཡུཛྫེཡྻཱཏི ཨཱཧ ¶ ‘‘ཨཱསེཝནཝསེནཱ’’ཏིཨཱདི, ཏསྨཱ ཡཐཱ སཏྟངྒུཏྟརཔཱལི༹ཡཾ ‘‘སཀིཾ ནིམུགྒོཔི ནིམུགྒོ ཨེཝ བཱལོ’’ཏི [ཨ. ནི. ༧.༡༥ (ཨཏྠཏོ སམཱནཾ)] ཝུཏྟཾ, ཨེཝཾ ཝཊྚཁཱཎུཛོཏནཱཔི ཝུཏྟཱ. ཡཱདིསེ ཧི པཙྩཡེ པཊིཙྩ ཨཡཾ ཏཾ ཏཾ དསྶནཾ ཨོཀྐནྟོ, པུན ཀདཱཙི ཏཔྤཊིཔཀྑེ པཙྩཡེ པཊིཙྩ ཏཏོ སཱིསུཀྑིཔནམསྶ ན ཧོཏཱིཏི ན ཝཏྟབྦཾ. ཏསྨཱ ཏཏྠ, (མ. ནི. ཨཊྛ. ༣.༡༠༢) ཨིདྷ ཙ ཨཊྛཀཐཱཡཾ ‘‘ཨེཝརཱུཔསྶ ཧི ཡེབྷུཡྻེན བྷཝཏོ ཝུཊྛཱནཾ ནཱམ ནཏྠཱི’’ཏི ཡེབྷུཡྻགྒཧཎཾ ཀཏཾ, ཨིཏི ཨཱསེཝནཝསེན བྷཝནྟརེཔི ཏཾཏཾདིཊྛིཡཱ རོཙནཏོ ཡེབྷུཡྻེནསྶ བྷཝཏོ ཝུཊྛཱནཾ ནཏྠཱིཏི ཀཏྭཱ ཝཊྚཁཱཎུཀོ ནཱམེས ཛཱཏོ, ན པན མིཙྪཏྟནིཡཱམསྶ ཨཙྩནྟིཀཏཱཡཱཏི ནཱིཧརིཏྭཱ ཉཱཏབྦཏྠཏཱཡ ནེཡྻཏྠམིདཾ, ན ནཱིཏཏྠནྟི ཝེདིཏབྦཾ. ཡཾ སནྡྷཱཡ ཨབྷིདྷམྨེཔི ‘‘ཨརཧཱ, ཡེ ཙ པུཐུཛྫནཱ མགྒཾ ན པཊིལབྷིསྶནྟི, ཏེ རཱུཔཀྑནྡྷཉྩ ན པརིཛཱནནྟི, ཝེདནཱཀྑནྡྷཉྩ ན པརིཛཱནིསྶནྟཱི’’ཏིཨཱདི ¶ (ཡམ. ༡.ཁནྡྷཡམཀ ༢༡༠) ཝུཏྟཾ. པཐཝིགོཔཀོཏི ཡཐཱཝུཏྟཀཱརཎེན པཐཝིཔཱལཀོ. ཏདཏྠཾ སམཏྠེཏུཾ ‘‘ཡེབྷུཡྻེནཱ’’ཏིཨཱདི ཝུཏྟཾ.

ཨེཝཾ མིཙྪཱདིཊྛིཡཱ པརམསཱཝཛྫཱནུསཱརེན སོཏཱུནཾ སཏིམུཔྤཱདེནྟོ ‘‘ཏསྨཱ’’ཏིཨཱདིམཱཧ. ཏཏྠ ཏསྨཱཏི ཡསྨཱ ཨེཝཾ སཾསཱརཁཱཎུབྷཱཝསྶཱཔི པཙྩཡོ ཨཔཎྞཀཛཱཏོ, ཏསྨཱ པརིཝཛྫེཡྻཱཏི སམྦནྡྷོ. ཨཀལྱཱཎཛནནྟི ཀལྱཱཎདྷམྨཝིརཧིཏཛནཾ ཨསཱདྷུཛནཾ. ཨཱསཱིཝིསནྟི ཨཱསུམཱགཏཧལཱཧལཾ. བྷཱུཏིཀཱམོཏི དིཊྛདྷམྨིཀསམྤརཱཡིཀཔརམཏྠཱནཾ ཝསེན ཨཏྟནོ གུཎེཧི ཝུཌྜྷིཀཱམོ. ཝིཙཀྑཎོཏི པཉྙཱཙཀྑུནཱ ཝིཝིདྷཏྠསྶ པསྶཀོ, དྷཱིརོཏི ཨཏྠོ.

པཀུདྷཀཙྩཱཡནཝཱདཝཎྞནཱ

༡༧༤. ‘‘ཨཀཊཱ’’ཏི ཨེཏྠ ཏ-ཀཱརསྶ ཊ-ཀཱརཱདེསོཏི ཨཱཧ ‘‘ཨཀཏཱ’’ཏི, སམེན, ཝིསམེན ཝཱ ཀེནཙིཔི ཧེཏུནཱ ཨཀཏཱ, ན ཝིཧིཏཱཏི ཨཏྠོ. ཏཐཱ ཨཀཊཝིདྷཱཏི ཨེཏྠཱཔི. ནཏྠི ཀཏཝིདྷོ ཀརཎཝིདྷི ཨེཏེསནྟི ཨཀཊཝིདྷཱ. པདདྭཡེནཱཔི ལོཀེ ཀེནཙི ཧེཏུཔཙྩཡེན ནེསཾ ཨནིབྦཏྟབྷཱཝཾ དསྶེཏི. ཏེནཱཧ ‘‘ཨེཝཾ ཀརོཧཱི’’ཏིཨཱདི. ཨིདྡྷིཡཱཔི ན ནིམྨིཏཱཏི ཀསྶཙི ཨིདྡྷིམཏོ ཙེཏོཝསིཔྤཏྟསྶ པུགྒལསྶ, དེཝསྶ, ཨིསྶརཱདིནོ ཙ ཨིདྡྷིཡཱཔི ན ནིམྨིཏཱ. ཨནིམྨཱཔིཏཱཏི ཀསྶཙི ¶ ཨནིམྨཱཔིཏཱ. ཀཱམཾ སདྡཏོ ཡུཏྟཾ, ཨཏྠཏོ ཙ པུརིམེན སམཱནཾ, ཏཐཱཔི པཱལི༹ཡམཊྛཀཐཱཡཉྩ ཨནཱགཏམེཝ ཨགཧེཏབྦབྷཱཝེ ཀཱརཎནྟི དསྶེཏི ‘‘ཏཾ ནེཝ པཱལི༹ཡ’’ནྟིཨཱདིནཱ.

བྲཧྨཛཱལསུཏྟསཾཝཎྞནཱཡཾ (དཱི. ནི. ཨཊྛ. ༡.༣༠) ཝུཏྟཏྠམེཝ. ཨིདམེཏྠ ཡོཛནཱམཏྟཾ – ཝཉྫྷཱཏི ཧི ཝཉྫྷཔསུཝཉྫྷཏཱལཱདཡོ ཝིཡ ཨཕལཱ ཀསྶཙི ཨཛནཀཱ, ཏེན པཐཝིཀཱཡཱདཱིནཾ རཱུཔཱདིཛནཀབྷཱཝཾ པཊིཀྑིཔཏི. རཱུཔསདྡཱདཡོ ཧི པཐཝིཀཱཡཱདཱིཧི ཨཔྤཊིབདྡྷཝུཏྟིཀཱཏི ཏསྶ ལདྡྷི. པབྦཏསྶ ཀཱུཊམིཝ ཋིཏཱཏི ཀཱུཊཊྛཱ, ཡཐཱ པབྦཏཀཱུཊཾ ཀེནཙི ཨནིབྦཏྟིཏཾ ཀསྶཙི ཙ ཨནིབྦཏྟཀཾ, ཨེཝམེཏེཔི སཏྟཀཱཡཱཏི ཨདྷིཔྤཱཡོ. ཡམིདཾ ‘‘བཱིཛཏོ ཨངྐུརཱདི ཛཱཡཏཱི’’ཏི ཝུཙྩཏི, ཏཾ ཝིཛྫམཱནམེཝ ཏཏོ ནིཀྑམཏི, ན ཨཝིཛྫམཱནཾ, ཨིཏརཐཱ ཨཉྙཏོཔི ཨཉྙསྶ ཨུཔལདྡྷི སིཡཱ, ཨེཝམེཏེཔི སཏྟཀཱཡཱ, ཏསྨཱ ཨེསིཀཊྛཱཡིཊྛིཏཱཏི. ཋིཏཏྟཱཏི ནིབྦིཀཱརབྷཱཝེན སུཔྤཏིཊྛིཏཏྟཱ. ན ཙལནྟཱིཏི ན ཝིཀཱརམཱཔཛྫནྟི. ཝིཀཱརཱབྷཱཝཏོ ཧི ཏེསཾ སཏྟནྣཾ ཀཱཡཱནཾ ཨེསིཀཊྛཱཡིཊྛིཏཏཱ, ཨནིཉྫནཉྩ ཨཏྟནོ པཀཏིཡཱ ཨཝཊྛཱནམེཝ. ཏེནཱཧ ‘‘ན ཝིཔརིཎམནྟཱི’’ཏི. པཀཏིནྟི སབྷཱཝཾ ¶ . ཨཝིཔརིཎཱམདྷམྨཏྟཱ ཨེཝ ན ཨཉྙམཉྙཾ ཨུཔཧནནྟི. སཏི ཧི ཝིཀཱརམཱཔཱདེཏབྦབྷཱཝེ ཨུཔགྷཱཏཀཏཱ སིཡཱ, ཏཐཱ ཨནུགྒཧེཏབྦབྷཱཝེ སཏི ཨནུགྒཱཧཀཏཱཔཱིཏི ཏདབྷཱཝཾ དསྶེཏུཾ པཱལི༹ཡཾ ‘‘ནཱལ’’ནྟིཨཱདི ཝུཏྟཾ. པཐཝཱིཡེཝ ཀཱཡེཀདེསཏྟཱ པཐཝིཀཱཡོ ཡཐཱ ‘‘སམུདྡོ དིཊྛོ’’ཏི, པཐཝིསམཱུཧོ ཝཱ ཀཱཡསདྡསྶ སམཱུཧཝཱཙཀཏྟཱ ཡཐཱ ‘‘ཧཏྠིཀཱཡོ’’ཏི. ཛཱིཝསཏྟམཱནཾ ཀཱཡཱནཾ ནིཙྩཏཱཡ ནིབྦིཀཱརབྷཱཝཏོ ན ཧནྟབྦཏཱ, ན གྷཱཏེཏབྦཏཱ ཙ, ཏསྨཱ ནེཝ ཀོཙི ཧནྟཱ, གྷཱཏེཏཱ ཝཱ ཨཏྠཱིཏི དསྶེཏུཾ པཱལི༹ཡཾ ‘‘སཏྟནྣཾ ཏྭེཝ ཀཱཡཱན’’ནྟིཨཱདི ཝུཏྟཾ. ཡདི ཀོཙི ཧནྟཱ ནཏྠི, ཀཐཾ ཏེསཾ སཏྠཔྤཧཱརོཏི ཏཏྠ ཙོདནཱཡཱཧ ‘‘ཡཐཱ’’ཏིཨཱདི. ཏཏྠ སཏྟནྣཾ ཏྭེཝཱཏི སཏྟནྣམེཝ. ཨིཏིསདྡོ ཧེཏྠ ནིཔཱཏམཏྟཾ. པཧཏནྟི པཧརིཏཾ. ཨེཀཏོདྷཱརཱདིཀཾ སཏྠཾ. ཨནྟརེནེཝ པཝིསཏི, ན ཏེསུ. ཨིདཾ ཝུཏྟཾ ཧོཏི – ཀེཝལཾ ‘‘ཨཧཾ ཨིམཾ ཛཱིཝིཏཱ ཝོརོཔེམཱི’’ཏི ཏེསཾ ཏཐཱ སཉྙཱམཏྟམེཝ, ཧནནགྷཱཏནཱདི པན པརམཏྠཏོ ནཏྠེཝ ཀཱཡཱནཾ ཨཝིཀོཔནཱིཡབྷཱཝཏོཏི.

ནིགཎྛནཱཊཔུཏྟཝཱདཝཎྞནཱ

༡༧༧. ཙཏྟཱརོ ¶ ཡཱམཱ བྷཱགཱ ཙཏུཡཱམཾ, ཙཏུཡཱམཾ ཨེཝ ཙཱཏུཡཱམཾ. བྷཱགཏྠོ ཧི ཨིདྷ ཡཱམ-སདྡོ ཡཐཱ ‘‘རཏྟིཡཱ པཋམོ ཡཱམོ’’ཏི (སཾ. ནི. ཨཊྛ. ༣.༣༦༨). སོ པནེཏྠ བྷཱགོ སཾཝརལཀྑིཏོཏི ཨཱཧ ‘‘ཙཏུཀོཊྛཱསེན སཾཝརེན སཾཝུཏོ’’ཏི, སཾཡམཏྠོ ཝཱ ཡཱམསདྡོ ཡམནཾ སཉྙམནཾ ཡཱམོཏི ཀཏྭཱ. ‘‘ཡཏཏྟོ’’ཏིཨཱདཱིསུ ཝིཡ ཧི ཨནུཔསགྒོཔི སཨུཔསགྒོ ཝིཡ སཉྙམཏྠཝཱཙཀོ, སོ པན ཙཏཱུཧི ཨཱཀཱརེཧཱིཏི ཨཱཧ ‘‘ཙཏུཀོཊྛཱསེན སཾཝརེནཱ’’ཏི. ཨཱཀཱརོ ཀོཊྛཱསོཏི ཧི ཨཏྠཏོ ཨེཀཾ. ཝཱརིཏོ སབྦཝཱརི ཡསྶཱཡཾ སབྦཝཱརིཝཱརིཏོ ཡཐཱ ‘‘ཨགྱཱཧིཏོ’’ཏི. ཏེནཱཧ ‘‘ཝཱརིཏསབྦཨུདཀོ’’ཏི. ཝཱརིསདྡེན ཙེཏྠ ཝཱརིཔརིབྷོགོ ཝུཏྟོ ཡཐཱ ‘‘རཏྟཱུཔརཏོ’’ཏི. པཊིཀྑིཏྟོ སབྦསཱིཏོདཀོ ཏཔྤརིབྷོགོ ཡསྶཱཏི ཏཐཱ. ཏནྟི སཱིཏོདཀཾ. སབྦཝཱརིཡུཏྟོཏི སཾཝརལཀྑཎམཏྟཾ ཀཐིཏཾ. སབྦཝཱརིདྷུཏོཏི པཱཔནིཛྫརལཀྑཎཾ. སབྦཝཱརིཕུཊོཏི ཀམྨཀྑཡལཀྑཎནྟི ཨིམམཏྠཾ དསྶེནྟོ ‘‘སབྦེནཱ’’ཏིཨཱདིམཱཧ, སབྦེན པཱཔཝཱརཎེན ཡུཏྟོཏི ཧི སབྦཔྤཀཱརེན སཾཝརལཀྑཎེན པཱཔཝཱརཎེན སམནྣཱགཏོ. དྷུཏཔཱཔོཏི སབྦེན ནིཛྫརལཀྑཎེན པཱཔཝཱརཎེན ཝིདྷུཏཔཱཔོ. ཕུཊྛོཏི ཨཊྛནྣམྤི ཀམྨཱནཾ ཁེཔནེན མོཀྑཔྤཏྟིཡཱ ཀམྨཀྑཡལཀྑཎེན སབྦེན པཱཔཝཱརཎེན ཕུཊྛོ, ཏཾ པཏྭཱ ཋིཏོཏི ཨཏྠོ. ‘‘དྭེཡེཝ གཏིཡོ བྷཝནྟི, ཨནཉྙཱ’’ཏིཨཱདཱིསུ (དཱི. ནི. ༡.༢༥༨; ༢.༣༤; ༣.༡༩༩, ༢༠༠; མ. ནི. ༢.༣༨༤, ༣༩༨) ཝིཡ གམུསདྡོ ནིཊྛཱནཏྠོཏི ཝུཏྟཾ ‘‘ཀོཊིཔྤཏྟཙིཏྟོ’’ཏི, མོཀྑཱདྷིགམེན ཨུཏྟམམརིཡཱདཔྤཏྟཙིཏྟོཏི ཨཏྠོ. ཀཱཡཱདཱིསུ ཨིནྡྲིཡེསུ སཾཡམེཏབྦསྶ ཨབྷཱཝཏོ ¶ སཾཡཏཙིཏྟོ. ཨཏཱིཏེ ཧེཏྠ ཏ-སདྡོ. སཾཡམེཏབྦསྶ ཨཝསེསསྶ ཨབྷཱཝཏོ སུཔྤཏིཊྛིཏཙིཏྟོ. ཀིཉྩི སཱསནཱནུལོམནྟི པཱཔཝཱརཎཾ སནྡྷཱཡ ཝུཏྟཾ. ཨསུདྡྷལདྡྷིཏཱཡཱཏི ‘‘ཨཏྠི ཛཱིཝོ, སོ ཙ སིཡཱ ནིཙྩོ, སིཡཱ ཨནིཙྩོ’’ཏི (དཱི. ནི. ཊཱི. ༡.༡༧༧). ཨེཝམཱདིམལཱིནལདྡྷིཏཱཡ. སབྦཱཏི ཀམྨཔཀཏིཝིབྷཱགཱདིཝིསཡཱཔི སབྦཱ ནིཛ྄ཛྷཱནཀྑནྟིཡོ. དིཊྛིཡེཝཱཏི མིཙྪཱདིཊྛིཡོ ཨེཝ ཛཱཏཱ.

སཉྩཡབེལཊྛཔུཏྟཝཱདཝཎྞནཱ

༡༧༩-༡༨༡. ཨམརཱཝིཀྑེཔེ ¶ ཝུཏྟནཡོ ཨེཝཱཏི བྲཧྨཛཱལེ ཨམརཱཝིཀྑེཔཝཱདཝཎྞནཱཡཾ (དཱི. ནི. ཨཊྛ. ༡.༦༡) ཝུཏྟནཡོ ཨེཝ. ཀསྨཱ? ཝིཀྑེཔབྱཱཀརཎབྷཱཝཏོ, ཏཐེཝ ཙ ཏཏྠ ཝིཀྑེཔཝཱདསྶ ཨཱགཏཏྟཱ.

པཋམསནྡིཊྛིཀསཱམཉྙཕལཝཎྞནཱ

༡༨༢. པཱིལེ༹ཏྭཱཏི ཏེལཡནྟེན ཨུཔྤཱིལེ༹ཏྭཱ, ཨིམིནཱ རཉྙོ ཨཱབྷོགམཱཧ. ཝདཏོ ཧི ཨཱབྷོགཝསེན སབྦཏྠ ཨཏྠནིཙྪཡོ. ཨཊྛཀཐཱཙརིཡཱ ཙ ཏདཱབྷོགཉྙཱུ, པརམྤརཱབྷཏཏྠསྶཱཝིརོདྷིནོ ཙ, ཏསྨཱ སབྦཏྠ ཡཐཱ ཏཐཱ ཝཙནོཀཱསལདྡྷབྷཱཝམཏྟེན ཨཏྠོ ན ཝུཏྟོ, ཨཐ ཁོ ཏེསཾ ཝཏྟུམིཙྪིཏཝསེནཱཏི གཧེཏབྦཾ, ཨེཝཉྩ ཀཏྭཱ ཏཏྠ ཏཏྠ ཨཏྠུདྡྷཱརཱདིཝསེན ཨཏྠཝིཝེཙནཱ ཀཏཱཏི.

༡༨༣. ཡཐཱ ཏེ རུཙྩེཡྻཱཏི ཨིདཱནི མཡཱ པུཙྪིཡམཱནོ ཨཏྠོ ཡཐཱ ཏཝ ཙིཏྟེ རུཙྩེཡྻ, ཏཡཱ ཙིཏྟེ རུཙྩེཐཱཏི ཨཏྠོ. ཀམྨཏྠེ ཧེཏཾ ཀིརིཡཱཔདཾ. མཡཱ ཝཱ དཱནི པུཙྪིཡམཱནམཏྠཾ ཏཝ སམྤདཱནབྷཱུཏསྶ རོཙེཡྻཱཏིཔི ཝཊྚཏི. གྷརདཱསིཡཱ ཀུཙྪིསྨིཾ ཛཱཏོ ཨནྟོཛཱཏོ. དྷནེན ཀཱིཏོ དྷནཀྐཱིཏོ. བནྡྷགྒཱཧགཧིཏོ ཀརམརཱནཱིཏོ. སཱམམེཝ ཡེན ཀེནཙི ཧེཏུནཱ དཱསབྷཱཝམུཔགཏོ སཱམཾདཱསབྱོཔགཏོ. སཱམནྟི ཧི སཡམེཝ. དཱསབྱནྟི དཱསབྷཱཝཾ. ཀོཙི དཱསོཔི སམཱནོ ཨལསོ ཀམྨཾ ཨཀརོནྟོ ‘‘ཀམྨཀཱརོ’’ཏི ན ཝུཙྩཏི, སོ པན ན ཏཐཱབྷཱུཏོཏི ཝིསེསནམེཏནྟི ཨཱཧ ‘‘ཨནལསོ’’ཏིཨཱདི. དཱུརཏོཏི དཱུརདེསཏོ ཨཱགཏཾ. པཋམམེཝཱཏི ཨཏྟནོ ཨཱསནྣཏརཊྛཱནུཔསངྐམནཏོ པགེཝ པུརེཏརམེཝ. ཨུཊྛཧཏཱིཏི གཱརཝཝསེན ཨུཊྛཧིཏྭཱ ཏིཊྛཏི, པཙྩུཊྛཱཏཱིཏི ཝཱ ཨཏྠོ. པཙྪཱཏི སཱམིཀསྶ ནིཔཛྫཱཡ པཙྪཱ. སཡནཏོ ཨཝུཊྛིཏེཏི རཏྟིཡཱ ཝིབྷཱཡནཝེལཱཡ སེཡྻཏོ ཨཝུཊྛིཏེ. པཙྩཱུསཀཱལཏོཏི ཨཏཱིཏརཏྟིཡཱ པཙྩཱུསཀཱལཏོ ¶ . ཡཱཝ སཱམིནོ རཏྟིཾ ནིདྡོཀྐམནནྟི ཨཔརཱཡ བྷཱཝིནིཡཱ རཏྟིཡཱ པདོསཝེལཱཡཾ ཡཱཝ ནིདྡོཀྐམནཾ. ཡཱ ཨཏཱིཏརཏྟིཡཱ པཙྩཱུསཝེལཱ, བྷཱཝིནིཡཱ ཙ པདོསཝེལཱ, ཨེཏྠནྟརེ སབྦཀིཙྩཾ ཀཏྭཱ པཙྪཱ ནིཔཏཏཱིཏི ཝུཏྟཾ ¶ ཧོཏི. ཀིཾ ཀཱརམེཝཱཏི ཀིཾ ཀརཎཱིཡམེཝ ཀིནྟི པུཙྪཱཡ ཀཱཏབྦཏོ, པུཙྪིཏྭཱ ཀཱཏབྦཝེཡྻཱཝཙྩནྟི ཨཏྠོ. པཊིསྶཝེནེཝ སམཱིཔཙཱརིཏཱ ཝུཏྟཱཏི ཨཱཧ ‘‘པཊིསུཎནྟོ ཝིཙརཏཱི’’ཏི. པཊིཀུདྡྷཾ མུཁཾ ཨོལོཀེཏུཾ ན ཝིསཧཏཱིཏིཔི དསྶེཏི ‘‘ཏུཊྛཔཧཊྛ’’ནྟི ཨིམིནཱ.

དེཝོ ཝིཡཱཏི ཨཱདྷིཔཙྩཔརིཝཱརཱདིསམནྣཱགཏོ པདྷཱནདེཝོ ཝིཡ, ཏེན མཉྙེ-སདྡོ ཨིདྷ ཨུཔམཏྠོཏི ཉཱཔེཏི ཡཐཱ ‘‘ཨཀྑཱཧཏཾ མཉྙེ ཨཊྛཱསི རཉྙོ མཧཱསུདསྶནསྶ ཨནྟེཔུརཾ ཨུཔསོབྷཡམཱན’’ནྟི (དཱི. ནི. ༢.༢༤༥). སོ ཝཏསྶཱཧནྟི ཨེཏྠ སོ ཝཏ ཨསྶཾ ཨཧནྟི པདཙྪེདོ, སོ རཱཛཱ ཝིཡ ཨཧམྤི བྷཝེཡྻཾ. ཀེནཱཏི ཙེ? ཡདི པུཉྙཱནི ཀརེཡྻཾ, ཏེནཱཏི ཨཏྠོཏི ཨཱཧ ‘‘སོ ཝཏ ཨཧ’’ནྟིཨཱདི. ཝཏསདྡོ ཨུཔམཱཡཾ. ཏེནཱཧ ‘‘ཨེཝརཱུཔོ’’ཏི. པུཉྙཱནཱིཏི ཨུལཱ༹རཏརཾ པུཉྙཾ སནྡྷཱཡ ཝུཏྟཾ ཨཉྙདཱ ཀཏཔུཉྙཏོ ཨུལཱ༹རཱཡ པབྦཛྫཱཡ ཨདྷིཔྤེཏཏྟཱ. ‘‘སོ ཝཏསྶཱཡ’’ནྟིཔི པཱཋེ སོ རཱཛཱ ཝིཡ ཨཡཾ ཨཧམྤི ཨསྶཾ. ཀཐཾ? ‘‘ཡདི པུཉྙཱནི ཀརེཡྻ’’ནྟི ཨཏྠསམྦྷཝཏོ ‘‘ཨཡམེཝཏྠོ’’ཏི ཝུཏྟཾ. ཨསྶནྟི ཧི ཨུཏྟམཔུརིསཡོགེ ཨཧཾ-སདྡོ ཨཔྤཡུཏྟོཔི ཨཡཾ-སདྡེན པརཱམསནཏོ པཡུཏྟོ ཝིཡ ཧོཏི. སོ ཨཧཾ ཨེཝརཱུཔོ ཨསྶཾ ཝཏ, ཡདི པུཉྙཱནི ཀརེཡྻནྟི པཋམཔཱཋསྶ ཨཏྠམིཙྪནྟི ཀེཙི. ཨེཝཾ སཏི དུཏིཡཔཱཋེ ‘‘ཨཡམེཝཏྠོ’’ཏི ཨཝཏྟབྦོ སིཡཱ ཏཏྠ ཨཡཾ-སདྡེན ཨཧཾ-སདྡསྶ པརཱམསནཏོ, ‘‘སོ’’ཏི ཙ པརཱམསིཏབྦསྶ ཨཉྙསྶ སམྦྷཝཏོ. ཡནྟི དཱནཾ. སཏབྷཱགམྤཱིཏི སཏབྷཱུཏཾ བྷཱགམྤི, རཉྙཱ དིནྣདཱནཾ སཏདྷཱ ཀཏྭཱ ཏཏྠ ཨེཀབྷཱགམྤཱིཏི ཝུཏྟཾ ཧོཏི. ཡཱཝཛཱིཝཾ ན སཀྑིསྶཱམི དཱཏུནྟི ཡཱཝཛཱིཝཾ དཱནཏྠཱཡ ཨུསྶཱཧཾ ཀརོནྟོཔི སཏབྷཱགམཏྟམྤི དཱཏུཾ ན སཀྑིསྶཱམི, ཏསྨཱ པབྦཛིསྶཱམཱིཏི པབྦཛྫཱཡཾ ཨུསྶཱཧཾ ཀཏྭཱཏི ཨཏྠོ. ‘‘ཡཾནཱུནཱ’’ཏི ནིཔཱཏོ པརིཝིཏཀྐནཏྠེཏི ཝུཏྟཾ ‘‘ཨེཝཾ ཙིནྟནབྷཱཝ’’ནྟི.

ཀཱཡེན པིཧིཏོཏི ཀཱཡེན སཾཝརིཏབྦསྶ ཀཱཡདྭཱརེན པཝཏྟནཀསྶ པཱཔདྷམྨསྶ སཾཝརཎཝསེན པིདཧིཏོ. ཨུསྶུཀྐཝཙནཝསེན པནཏྠོ ཝིཧརེཡྻ-པདེན སམྦཛ྄ཛྷིཏབྦཏྟཱཏི ཨཱཧ ‘‘ཨཀུསལཔཝེསནདྭཱརཾ ཐཀེཏྭཱ’’ཏི. ཧུཏྭཱཏི ཧི སེསོ. ཨཀུསལཔཝེསནདྭཱརནྟི ཙ ཀཱཡཀམྨབྷཱུཏཱནམཀུསལཱནཾ པཝེསནབྷཱུཏཾ ཀཱཡཝིཉྙཏྟིསངྑཱཏཾ དྭཱརཾ. སེསཔདདྭཡེཔཱིཏི ¶ ‘‘ཝཱཙཱཡ སཾཝུཏོ, མནསཱ སཾཝུཏོ’’ཏི པདདྭཡེཔི. གྷཱསཙྪཱདནེན པརམཏཱཡཱཏི གྷཱསཙྪཱདནཔརིཡེསནེ སལླེཁཝསེན པརམཏཱཡ, ཨུཀྐཊྛབྷཱཝེ ཝཱ སཎྛིཏོ གྷཱསཙྪཱདནམཏྟམེཝ པརམཾ པམཱཎཾ ཀོཊི ཨེཏསྶ ¶ , ན ཏཏོ པརཾ ཀིཉྩི ཨཱམིསཛཱཏཾ པརིཡེསཏི, པཙྩཱསིསཏི ཙཱཏི གྷཱསཙྪཱདནཔརམོ, ཏསྶ བྷཱཝོ གྷཱསཙྪཱདནཔརམཏཱཏིཔི ཨཊྛཀཐཱམུཏྟཀོ ནཡོ. གྷསིཏབྦོ ཨསིཏབྦོཏི གྷཱསོ, ཨཱཧཱརོ, ཨཱབྷུསོ ཚཱདེཏི པརིདཧཏི ཨེཏེནཱཏི ཨཙྪཱདནཾ, ནིཝཱསནཾ, ཨཔིཙ གྷསནཾ གྷཱསོ, ཨཱབྷུསོ ཚཱདཱིཡཏེ ཨཙྪཱདནནྟིཔི ཡུཛྫཏི. ཨེཏདཏྠམྤཱིཏི གྷཱསཙྪཱདནཏྠཱཡཱཔི. ཨནེསནནྟི ཨེཀཝཱིསཏིཝིདྷམྤི ཨནནུརཱུཔམེསནཾ.

ཝིཝེཀཊྛཀཱཡཱནནྟི གཎསངྒཎིཀཏོ པཝིཝིཏྟེ ཋིཏཀཱཡཱནཾ, སམྦནྡྷཱིབྷཱུཏཱནཾ ཀཱཡཝིཝེཀོཏི སམྦནྡྷོ. ནེཀྑམྨཱབྷིརཏཱནནྟི ཛྷཱནཱབྷིརཏཱནཾ. པརམཝོདཱནཔྤཏྟཱནནྟི ཏཱཡ ཨེཝ ཛྷཱནཱབྷིརཏིཡཱ པརམཾ ཨུཏྟམཾ ཝོདཱནཾ ཙིཏྟཝིསུདྡྷིཾ པཏྟཱནཾ. ནིརུཔདྷཱིནནྟི ཀིལེསཱུཔདྷིཨབྷིསངྑཱརཱུཔདྷཱིཧི ཨཙྩནྟཝིགཏཱནཾ. ཝིསངྑཱརཾ ཝུཙྩཏི ནིབྦཱནཾ, ཏདདྷིགམནེཏཱ ཝིསངྑཱརགཏཱ, ཨརཧནྟོ, ཏེསཾ. ‘‘ཨེཝཾ ཝུཏྟེ’’ཏི ཨིམིནཱ མཧཱནིདྡེསེ (མཧཱནི. ༧, ༩) ཨཱགཏབྷཱཝཾ དསྶེཏི. ཨེཏྠ ཙ པཋམོ ཝིཝེཀོ ཨིཏརེཧི དྭཱིཧི ཝིཝེཀེཧི སཧཱཔི ཝཏྟབྦོ ཨིཏརེསུ སིདྡྷེསུ ཏསྶཱཔི སིཛ྄ཛྷནཏོ, ཝིནཱ ཙ ཏསྨིཾ སིདྡྷེཔི ཨིཏརེ སམསིཛ྄ཛྷནཏོ. ཏཐཱ དུཏིཡོཔི. ཏཏིཡོ པན ཨིཏརེཧི སཧེཝ ཝཏྟབྦོ. ན ཝིནཱ ཨིཏརེསུ སིདྡྷེསུཡེཝ ཏསྶ སིཛ྄ཛྷནཏོཏི དཊྛབྦཾ. ‘‘གཎསངྒཎིཀཾ པཧཱཡཱ’’ཏིཨཱདི ཏདདྷིཔྤཱཡཝིབྷཱཝནཾ. ཏཏྠ གཎེ ཛནསམཱགམེ སནྣིཔཏནཾ གཎསངྒཎིཀཱ, ཏཾ པཧཱཡ. ཀཱཡེན ཨེཀོ ཝིཧརཏི ཝིཙརཏི པུགྒལཝསེན ཨསཧཱཡཏྟཱ. ཙིཏྟེ ཀིལེསཱནཾ སནྣིཔཏནཾ ཙིཏྟཀིལེསསངྒཎིཀཱ, ཏཾ པཧཱཡ. ཨེཀོ ཝིཧརཏི ཀིལེསཝསེན ཨསཧཱཡཏྟཱ. མགྒསྶ ཨེཀཙིཏྟཀྑཎིཀཏྟཱ, གོཏྲབྷུཨཱདཱིནཉྩ ཨཱརམྨཎཀརཎམཏྟཏྟཱ ན ཏེསཾ ཝསེན སཱཏིསཡཱ ནིབྦུཏིསུཁསམྥུསནཱ, ཕལསམཱཔཏྟིནིརོདྷསམཱཔཏྟིཝསེན པན སཱཏིསཡཱཏི ཨཱཧ ‘‘ཕལསམཱཔཏྟིཾ ཝཱ ནིརོདྷསམཱཔཏྟིཾ ཝཱ’’ཏི. ཕལཔརིཡོསཱནོ ཧི ནིརོདྷོ. པཝིསིཏྭཱཏི སམཱཔཛྫནཝསེན ཨནྟོཀཏྭཱ. ནིབྦཱནཾ པཏྭཱཏི ཨེཏྠ ཨུསྶུཀྐཝཙནམེཏཾ ཨཱརམྨཎཀརཎེན, ཙིཏྟཙེཏསིཀཱནཾ ནིརོདྷེན ཙ ¶ ནིབྦུཏིཔཛྫནསྶ ཨདྷིཔྤེཏཏྟཱ. ཙོདནཏྠེཏི ཛཱནཱཔེཏུཾ ཨུསྶཱཧཀརཎཏྠེ.

༡༨༤. ཨབྷིཧརིཏྭཱཏི ཨབྷིམུཁབྷཱཝེན ནེཏྭཱ. ནནྟི ཏཐཱ པབྦཛྫཱཡ ཝིཧརནྟཾ. ཨབྷིཧཱརོཏི ནིམནྟནཝསེན ཨབྷིཧརཎཾ. ‘‘ཙཱིཝརཱདཱིཧི པཡོཛནཾ སཱདྷེསྶཱམཱི’’ཏི ཝཙནསེསེན ཡོཛནཱ. ཏཐཱ ‘‘ཡེནཏྠོ, ཏཾ ཝདེཡྻཱཐཱ’’ཏི. ཙཱིཝརཱདིཝེཀལླནྟི ཙཱིཝརཱདཱིནཾ ལཱུཁཏཱཡ ཝིཀལབྷཱཝཾ. ཏདུབྷཡམྤཱིཏི ཏདེཝ ཨབྷིཧཱརདྭཡམྤི. སཔྤཱཡནྟི སབྦགེལཉྙཱཔཧརཎཝསེན ཨུཔཀཱརཱཝཧཾ. བྷཱཝིནོ ཨནཏྠསྶ ཨཛནནཝསེན པརིཔཱལནཾ རཀྑཱགུཏྟི. པཙྩུཔྤནྣསྶ པན ཨནཏྠསྶ ¶ ནིསེདྷཝསེན པརིཔཱལནཾ ཨཱཝརཎགུཏྟི. ཀིམཏྠིཡཾ ‘‘དྷམྨིཀ’ནྟི ཝིསེསནནྟི ཨཱཧ ‘‘སཱ པནེསཱ’’ཏིཨཱདི. ཝིཧཱརསཱིམཱཡཱཏི ཨུཔཙཱརསཱིམཱཡ, ལཱབྷསཱིམཱཡ ཝཱ.

༡༨༥. ཀེཝལོ ཡདི-ཨེཝཾ-སདྡོ པུབྦེ ཝུཏྟཏྠཱཔེཀྑཀོཏི ཝུཏྟཾ ‘‘ཡདི ཏཝ དཱསོ’’ཏིཨཱདི. ཨེཝཾ སནྟེཏི ཨེཝཾ ལབྦྷམཱནེ སཏི. དུཏིཡཾ ཨུཔཱདཱཡ པཋམབྷཱཝོ, ཏསྨཱ ‘‘པཋམ’’ནྟི བྷཎནྟོ ཨཉྙསྶཱཔི ཨཏྠིཏཾ དཱིཔེཏི. ཏདེཝ ཙ ཀཱརཎཾ ཀཏྭཱ རཱཛཱཔི ཨེཝམཱཧཱཏི དསྶེཏུཾ ‘‘པཋམནྟི བྷཎནྟོ’’ཏིཨཱདི ཝུཏྟཾ. ཏེནེཝཱཏི པཋམསདྡེན ཨཉྙསྶཱཔི ཨཏྠིཏཱདཱིཔནེནེཝ.

དུཏིཡསནྡིཊྛིཀསཱམཉྙཕལཝཎྞནཱ

༡༨༦. ཀསཏཱིཏི ཝིལེཁཏི ཀསིཾ ཀརོཏི. གཧཔཏིཀོཏི ཨེཏྠ ཀ-སདྡོ ཨཔྤཏྠོཏི ཝུཏྟཾ ‘‘ཨེཀགེཧམཏྟེ ཛེཊྛཀོ’’ཏི. ཨིདཾ ཝུཏྟཾ ཧོཏི – གཧསྶ པཏི གཧཔཏི, ཁུདྡཀོ གཧཔཏི གཧཔཏིཀོ ཨེཀསྨིཉྙེཝ གེཧམཏྟེ ཛེཊྛཀཏྟཱཏི, ཁུདྡཀབྷཱཝོ པནསྶ གེཧཝསེནེཝཱཏི ཀཏྭཱ ‘‘ཨེཀགེཧམཏྟེ’’ཏི ཝུཏྟཾ. ཏེན ཧི ཨནེཀཀུལཛེཊྛཀབྷཱཝཾ པཊིཀྑིཔཏི, གཧཾ, གེཧནྟི ཙ ཨཏྠཏོ སམཱནམེཝ. ཀརསདྡོ བལིམྷཱིཏི ཝུཏྟཾ ‘‘བལིསངྑཱཏ’’ནྟི. ཀརོཏཱིཏི ཨབྷིནིཔྥཱདེཏི སམྤཱདེཏི. ཝཌྜྷེཏཱིཏི ཨུཔརཱུཔརི ཨུཔྤཱདནེན མཧནྟཾ སནྣིཙཡཾ ཀརོཏི.

ཀསྨཱ ཏདུབྷཡམྤི ཝུཏྟནྟི ཨཱཧ ‘‘ཡཐཱ ཧཱི’’ཏིཨཱདི. ཨཔྤམྤི པཧཱཡ པབྦཛིཏུཾ དུཀྐརནྟི དསྶནཉྩ པགེཝ མཧནྟནྟི ཝིཉྙཱཔནཏྠཾ. ཨེསཱ ཧི ཀཐིཀཱནཾ ¶ པཀཏི, ཡདིདཾ ཡེན ཀེནཙི པཀཱརེན ཨཏྠནྟརཝིཉྙཱཔནནྟི. ཨཔྤམྤི པཧཱཡ པབྦཛིཏུཾ དུཀྐརབྷཱཝོ པན མཛ྄ཛྷིམནིཀཱཡེ མཛ྄ཛྷིམཔཎྞཱསཀེ ལཊུཀིཀོཔམསུཏྟེན (མ. ནི. ༢.༡༤༨ ཨཱདཡོ) དཱིཔེཏབྦོ. ཝུཏྟཉྷི ཏཏྠ ‘‘སེཡྻཐཱཔི ཨུདཱཡི པུརིསོ དལིདྡོ ཨསྶཀོ ཨནཱལ༹ྷིཡོ, ཏསྶ’སྶ ཨེཀཾ ཨགཱརཀཾ ཨོལུགྒཝིལུགྒཾ ཀཱཀཱཏིདཱཡིཾ ནཔརམརཱུཔཾ, ཨེཀཱ ཁཊོཔིཀཱ ཨོལུགྒཝིལུགྒཱ ནཔརམརཱུཔཱ’’ཏི ཝིཏྠཱརོ. ཡདི ཨཔྤམྤི བྷོགཾ པཧཱཡ པབྦཛིཏུཾ དུཀྐརཾ, ཀསྨཱ དཱསཝཱརེཔི བྷོགགྒཧཎཾ ན ཀཏནྟི ཨཱཧ ‘‘དཱསཝཱརེ པནཱ’’ཏིཨཱདི. ཨཏྟནོཔི ཨནིསྶརོཏི ཨཏྟཱནམྤི སཡམནིསྶརོ. ཡཐཱ ཙ དཱསསྶ བྷོགཱཔི ཨབྷོགཱཡེཝ པརཱཡཏྟབྷཱཝཏོ, ཨེཝཾ ཉཱཏཡོཔཱིཏི དཱསཝཱརེ ཉཱཏིཔརིཝཊྚགྒཧཎམྤི ན ཀཏནྟི དཊྛབྦཾ. པརིཝཊྚཏི པརམྤརབྷཱཝེན སམནྟཏོ ཨཱཝཊྚཏཱིཏི པརིཝཊྚོ, ཉཱཏིཡེཝ. ཏེནཱཧ ‘‘ཉཱཏིཡེཝ ཉཱཏིཔརིཝཊྚོ’’ཏི.

པཎཱིཏཏརསཱམཉྙཕལཝཎྞནཱ

༡༨༩. ཏནྟི ¶ ཡཐཱ དཱསཝཱརེ ‘‘ཨེཝམེཝཱ’’ཏི ཝུཏྟཾ, ན ཏཐཱ ཨིདྷ ཀསྶཀཝཱརེ, ཏདཝཙནཾ ཀསྨཱཏི ཨནུཡུཉྫེཡྻ ཙེཏི ཨཏྠོ. ཨེཝམེཝཱཏི ཝུཙྩམཱནེཏི ཡཐཱ པཋམདུཏིཡཱནི སཱམཉྙཕལཱནི པཉྙཏྟཱནི, ཏཐཱཡེཝ པཉྙཔེཏུཾ སཀྐཱ ནུ ཁོཏི ཝུཏྟེ. ཨེཝརཱུཔཱཧཱིཏི ཡཐཱཝུཏྟདཱསཀསྶཀཱུཔམཱསདིསཱཧི ཨུཔམཱཧི. སཱམཉྙཕལཾ དཱིཔེཏུཾ པཧོཏི ཨནནྟཔཊིབྷཱནཏཱཡ ཝིཙིཏྟནཡདེསནབྷཱཝཏོ. ཏཏྠཱཏི ཨེཝཾ དཱིཔནེ. པརིཡནྟཾ ནཱམ ནཏྠི ཨནནྟནཡདེསནབྷཱཝཏོ, སཝནེ ཝཱ ཨསནྟོསནེན བྷིཡྻོ བྷིཡྻོ སོཏུཀཱམཏཱཛནནཏོ སོཏུཀཱམཏཱཡ པརིཡནྟཾ ནཱམ ནཏྠཱིཏི ཨཏྠོ. ཏཐཱཔཱིཏི ‘‘དེསནཱཡ ཨུཏྟརུཏྟརཱདྷིཀནཱནཱནཡཝིཙིཏྟབྷཱཝེ སཏིཔཱི’’ཏི (དཱི. ནི. ཊཱི. ༡.༡༨༩) ཨཱཙརིཡེན ཝུཏྟཾ, སཏིཔི ཨེཝཾ ཨཔརིཡནྟབྷཱཝེཏིཔི ཡུཛྫཏི. ཨནུམཱནཉཱཎེན ཙིནྟེཏྭཱ. ཨུཔརི ཝིསེསནྟི ཏཾ ཋཔེཏྭཱ ཏདུཔརི ཝིསེསམེཝ སཱམཉྙཕལཾ པུཙྪནྟོ. ཀསྨཱཏི ཨཱཧ ‘‘སཝནེ’’ཏིཨཱདི. ཨེཏེན ཨིམམཏྠཾ དཱིཔེཏི – ཨནེཀཏྠཱ སམཱནཱཔི སདྡཱ ཝཏྟིཙྪཱནུཔུབྦིཀཱཡེཝ ཏཾཏདཏྠདཱིཔཀཱཏི.

སཱདྷུཀཾ སཱདྷཱུཏི ཨེཀཏྠམེཏཾ སཱདྷུསདྡསྶེཝ ཀ-ཀཱརེན ཝཌྜྷེཏྭཱ ཝུཏྟཏྟཱ. ཏེནེཝ ཧི སཱདྷུཀསདྡསྶཏྠཾ ཝདནྟེན སཱདྷུསདྡོ ཨཏྠུདྡྷཱརཝསེན ¶ ཨུདཱཧཊོ. ཏེན ཙ ནནུ སཱདྷུཀསདྡསྶེཝ ཨཏྠུདྡྷཱརོ ཝཏྟབྦོ, ན སཱདྷུསདྡསྶཱཏི ཙོདནཱ ནིསེདྷིཏཱ. ཨཱཡཱཙནེཏི ཨབྷིམུཁཾ ཡཱཙནེ, ཨབྷིཔཏྠནཱཡནྟི ཨཏྠོ. སམྤཊིཙྪནེཏི པཊིགྒཧཎེ. སམྤཧཾསནེཏི སཾཝིཛྫམཱནགུཎཝསེན ཧཾསནེ ཏོསནེ, ཨུདགྒཏཱཀརཎེཏི ཨཏྠོ.

སཱདྷུ དྷམྨརུཙཱིཏི གཱཐཱ ཨུམྨཱདནྟཱིཛཱཏཀེ (ཛཱ. ༢.༡༨.༡༠༡). ཏཏྠཱཡམཊྛཀཐཱཝིནིཙྪཡཔཝེཎཱི – སུཙརིཏདྷམྨེ རོཙེཏཱིཏི དྷམྨརུཙི, དྷམྨརཏོཏི ཨཏྠོ. ཏཱདིསོ ཧི ཛཱིཝིཏཾ ཛཧནྟོཔི ཨཀཏྟབྦཾ ན ཀརོཏི. པཉྙཱཎཝཱཏི པཉྙཝཱ ཉཱཎསམྤནྣོ. མིཏྟཱནམདྡུབྦྷོཏི མིཏྟཱནཾ ཨདུསྶནབྷཱཝོ. ‘‘ཨདཱུསཀོ ཨནུཔགྷཱཏཀོ’’ཏི (དཱི. ནི. ཊཱི. ༡.༡༨༩) ཨཱཙརིཡེན ཝུཏྟཾ. ‘‘ཨདྲུབྦྷོ’’ཏིཔི པཱཋོ ད-ཀཱརསྶ དྲ-ཀཱརཾ ཀཏྭཱ.

དལ༹ྷཱིཀམྨེཏི སཱཏཙྩཀིརིཡཱཡཾ. ཨཱཎཏྟིཡནྟི ཨཱཎཱཔནེ. ཨིདྷཱཔཱིཏི སཱམཉྙཕལེཔི. ཨསྶཱཏི སཱདྷུཀསདྡསྶ. ‘‘སུཎོཧི སཱདྷུཀཾ མནསི ཀརོཧཱི’’ཏི ཧི སཱདྷུཀསདྡེན སཝནམནསིཀཱརཱནཾ སཱཏཙྩཀིརིཡཱཔི ཏདཱཎཱཔནམྤི ཛོཏིཏཾ ཧོཏི. ཨཱཡཱཙནེནེཝ ཙ ཨུཡྻོཛནསཱམཉྙཏོ ཨཱཎཏྟི སངྒཧིཏཱཏི ན སཱ ཝིསུཾ ཨཏྠུདྡྷཱརེ ཝུཏྟཱ. ཨཱཎཱརཧསྶ ཧི ཨཱཎཏྟི ¶ , ཏདནརཧསྶ ཨཱཡཱཙནནྟི ཝིསེསོ. སུནྡརེཔཱིཏི སུནྡརཏྠེཔི. ཨིདཱནི ཡཐཱཝུཏྟེན སཱདྷུཀསདྡསྶ ཨཏྠཏྟཡེན པཀཱསིཏཾ ཝིསེསཾ དསྶེཏུཾ, ཏསྶ ཝཱ ཨཏྠཏྟཡསྶ ཨིདྷ ཡོགྱཏཾ ཝིབྷཱཝེཏུཾ ‘‘དལ༹ྷཱིཀམྨཏྠེན ཧཱི’’ཏིཨཱདི ཝུཏྟཾ. སུགྒཧིཏཾ གཎྷནྟོཏི སུགྒཧིཏཾ ཀཏྭཱ གཎྷནྟོ. སུནྡརནྟི བྷཱཝནཔུཾསཀཾ. བྷདྡཀནྟི པསཏྠཾ, ‘‘དྷམྨ’’ནྟི ཨིམིནཱ སམྦནྡྷོ. སུནྡརཾ བྷདྡཀནྟི ཝཱ སཝནཱནུགྒཧཎེ པརིཡཱཡཝཙནཾ.

མནསི ཀརོཧཱིཏི ཨེཏྠ ན ཨཱརམྨཎཔཊིཔཱདནལཀྑཎོ མནསིཀཱརོ, ཨཐ ཁོ ཝཱིཐིཔཊིཔཱདནཛཝནཔཊིཔཱདནམནསིཀཱརཔུབྦཀེ ཙིཏྟེ ཋཔནལཀྑཎོཏི དསྶེནྟོ ‘‘ཨཱཝཛྫ, སམནྣཱཧརཱ’’ཏི ཨཱཧ. ཨཝིཀྑིཏྟཙིཏྟོཏི ཡཐཱཝུཏྟམནསིཀཱརདྭཡཔུབྦཀཱཡ ཙིཏྟཔཊིཔཱཊིཡཱ ཨེཀཱརམྨཎེ ཋཔནཝསེན ཨནུདྡྷཏཙིཏྟོ ཧུཏྭཱ. ནིསཱམེཧཱིཏི སུཎཱཧི, ཨནགྒྷརཏནམིཝ ཝཱ སུཝཎྞམཉྫུསཱཡ དུལླབྷདྷམྨརཏནཾ ཙིཏྟེ པཊིསཱམེཧཱིཏིཔི ཨཏྠོ ¶ . ཏེན ཝུཏྟཾ ‘‘ཙིཏྟེ ཀརོཧཱི’’ཏི. ཨེཝཾ པདདྭཡསྶ པཙྩེཀཾ ཡོཛནཱཝསེན ཨཏྠཾ དསྶེཏྭཱ ཨིདཱནི པཊིཡོགཱིཝསེན དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ཏཏྠ སོཏིནྡྲིཡཝིཀྑེཔཝཱརཎཾ སཝནེ ནིཡོཛནཝསེན ཀིརིཡནྟརཔཊིསེདྷནཏོ, ཏེན སོཏཾ ཨོདཧཱཏི ཨཏྠཾ དསྶེཏི. མནིནྡྲིཡཝིཀྑེཔཝཱརཎཾ མནསིཀཱརེན དལ༹ྷཱིཀམྨནིཡོཛནེན ཨཉྙཙིནྟཱཔཊིསེདྷནཏོ. བྱཉྫནཝིཔལླཱསགྒཱཧཝཱརཎཾ ‘‘སཱདྷུཀ’’ནྟི ཝིསེསེཏྭཱ ཝུཏྟཏྟཱ. ཨཏྠཝིཔལླཱསགྒཱཧཝཱརཎེཔི ཨེས ནཡོ.

དྷཱརཎཱུཔཔརིཀྑཱདཱིསཱུཏི ཨེཏྠ ཨཱདི-སདྡེན ཏུལནཏཱིརཎཱདིཀེ, དིཊྛིཡཱ སུཔྤཊིཝེདྷེ ཙ སངྒཎྷཱཏི. ཡཐཱདྷིཔྤེཏམཏྠཾ བྱཉྫེཏི པཀཱསེཏི, སཡམེཏེནཱཏི ཝཱ བྱཉྫནཾ, སབྷཱཝནིརུཏྟི, སཧ བྱཉྫནེནཱཏི སབྱཉྫནོ, བྱཉྫནསམྤནྣོཏི ཨཏྠོ. སཧཔྤཝཏྟི ཧི ‘‘སམྤནྣཏཱ སམཝཱཡཏཱ ཝིཛྫམཱནཏཱ’’ཏིཨཱདིནཱ ཨནེཀཝིདྷཱ, ཨིདྷ པན སམྤནྣཏཱཡེཝ ཏདཉྙསྶ ཨསམྦྷཝཏོ, ཏསྨཱ ‘‘སཧ བྱཉྫནེནཱ’’ཏི ནིབྦཙནཾ ཀཏྭཱཔི ‘‘བྱཉྫནསམྤནྣོ’’ཏི (དཱི. ནི. ཊཱི. ༡.༡༨༩) ཨཏྠོ ཨཱཙརིཡེན ཝུཏྟོཏི དཊྛབྦཾ, ཡཐཱ ཏཾ ‘‘ན ཀུསལཱ ཨཀུསལཱ, ཀུསལཔཊིཔཀྑཱ’’ཏི (དྷ. ས. ༡) ཨརཎཱིཡཏོ ཨུཔགནྟབྦཏོ ཨནུདྷཱཏབྦཏོ ཨཏྠོ, ཙཏུཔཱརིསུདྡྷིསཱིལཱདི, སཧ ཨཏྠེནཱཏི སཱཏྠོ, ཝུཏྟནཡེན ཨཏྠསམྤནྣོཏི ཨཏྠོ. སཱདྷུཀཔདཾ ཨེཀམེཝ སམཱནཾ ཨཱཝུཏྟིནཡཱདིཝསེན ཨུབྷཡཏྠ ཡོཛེཏབྦཾ. ཀཐནྟི ཨཱཧ ‘‘ཡསྨཱ’’ཏིཨཱདི. དྷམྨོ ནཱམ ཏནྟི. དེསནཱ ནཱམ ཏསྶཱ མནསཱ ཝཝཏྠཱཔིཏཱཡ ཏནྟིཡཱ དེསནཱ. ཨཏྠོ ནཱམ ཏནྟིཡཱ ཨཏྠོ. པཊིཝེདྷོ ནཱམ ཏནྟིཡཱ, ཏནྟིཨཏྠསྶ ཙ ཡཐཱབྷཱུཏཱཝབོདྷོ. ཡསྨཱ ཙེཏེ དྷམྨདེསནཱཏྠཔཊིཝེདྷཱ སསཱདཱིཧི ཝིཡ མཧཱསམུདྡོ མནྡབུདྡྷཱིཧི དུཀྑོགཱཧཱ, ཨལབྦྷནེཡྻཔཏིཊྛཱ ཙ, ཏསྨཱ གམྦྷཱིརཱ. ཏེན ཝུཏྟཾ ‘‘ཡསྨཱ…པེ… མནསི ཀརོཧཱི’’ཏི. ཨེཏྠ ཙ པཊིཝེདྷསྶ དུཀྐརབྷཱཝཏོ ¶ དྷམྨཏྠཱནཾ དུཀྑོགཱཧཏཱ, དེསནཱཉཱཎསྶ དུཀྐརབྷཱཝཏོ དེསནཱཡ, ཨུཔྤཱདེཏུམསཀྐུཎེཡྻཏཱཡ, ཏབྦིསཡཉཱཎུཔྤཏྟིཡཱ ཙ དུཀྐརབྷཱཝཏོ པཊིཝེདྷསྶ དུཀྑོགཱཧཏཱ ཝེདིཏབྦཱ. ཡམེཏྠ ཝཏྟབྦཾ, ཏཾ ནིདཱནཝཎྞནཱཡཾ ཝུཏྟམེཝ.

‘‘སུཎཱཧི སཱདྷུཀ’’ནྟི ‘‘སཱདྷུཀཾ མནསི ཀརོཧཱི’’ཏི ཝདནྟོ ན ཀེཝལཾ ཨཏྠཀྐམཏོ ཨེཝ ཨཡཾ ཡོཛནཱ, ཨཐ ཁོ སདྡཀྐམཏོཔི ཨུབྷཡཏྠ སམྦནྡྷཏྟཱཏི དསྶེཏི. ‘‘སཀྐཱ མཧཱརཱཛཱ’’ཏི ཨིདྷཱཔི ‘‘ཨཉྙམྤི དིཊྛེཝ ¶ དྷམྨེ སནྡིཊྛིཀཾ སཱམཉྙཕལཾ…པེ… པཎཱིཏཏརཉྩཱ’’ཏི ཨིདམནུཝཏྟཏཱིཏི ཨཱཧ ‘‘ཨེཝཾ པཊིཉྙཱཏཾ སཱམཉྙཕལདེསན’’ནྟི. ཝིཏྠཱརཏོ བྷཱསནནྟི ཨཏྠམེཝ དལ༹ྷཾ ཀརོཏི ‘‘དེསེསྶཱམཱིཏི སཾཁིཏྟདཱིཔན’’ནྟིཨཱདིནཱ. ཧི-སདྡོ ཙེཏྠ ལུཏྟནིདྡིཊྛོ. ཨིདཾ ཝུཏྟཾ ཧོཏི – དེསནཾ ནཱམ ཨུདྡིསནཾ. བྷཱསནཾ ནཱམ ནིདྡིསནཾ པརིབྱཏྟཀཐནཾ. ཏེནཱཡམཏྠོ སམྦྷཝཏཱིཏི ཡཐཱཝུཏྟམཏྠཾ སགཱཐཱཝགྒསཾཡུཏྟེ ཝངྒཱིསསུཏྟེ (སཾ. ནི. ༡.༢༡༤) གཱཐཱཔདེན སཱདྷེཏུཾ ‘‘ཏེནཱཧཱ’’ཏིཨཱདི ཝུཏྟཾ.

སཱལི༹ཀཱཡིཝ ནིགྒྷོསོཏི སཱལི༹ཀཱཡ ནིགྒྷོསོ ཝིཡ, ཡཐཱ སཱལི༹ཀཱཡ ཨཱལཱཔོ མདྷུརོ ཀཎྞསུཁོ པེམནཱིཡོ, ཨེཝནྟི ཨཏྠོ. པཊིབྷཱནནྟི ཙེཏསྶ ཝིསེསནཾ ལིངྒབྷེདསྶཔི ཝིསེསནསྶ དིསྶནཏོ ཡཐཱ ‘‘གུཎོ པམཱཎ’’ནྟི. པཊིབྷཱནནྟི ཙ སདྡོ ཝུཙྩཏི པཊིབྷཱཏི ཏཾཏདཱཀཱརེན དིསྶཏཱིཏི ཀཏྭཱ. ཨུདཱིརཡཱིཏི ཨུཙྩཱརཡི, ཝུཙྩཏི ཝཱ, ཀམྨགབྦྷཉྩེཏཾ ཀིརིཡཱཔདཾ. ཨིམིནཱ ཙེཏཾ དཱིཔེཏི – ཨཱཡསྨནྟཾ དྷམྨསེནཱཔཏིཾ ཐོམེཏུཀཱམེན དེསནཱབྷཱསནཱནཾ ཝིསེསཾ དསྶེནྟེན པབྷིནྣཔཊིསམྦྷིདེན ཨཱཡསྨཏཱ ཝངྒཱིསཏྠེརེན ‘‘སངྑིཏྟེན, ཝིཏྠཱརེནཱ’’ཏི ཙ ཝིསེསནཾ ཀཏཾ, ཏེནཱཡམཏྠོ ཝིཉྙཱཡཏཱིཏི.

ཨེཝཾ ཝུཏྟེཏི ‘‘བྷཱསིསྶཱམཱི’’ཏི ཝུཏྟེ. ‘‘ན ཀིར བྷགཝཱ སངྑེཔེནེཝ དེསེསྶཏི, ཨཐ ཁོ ཝིཏྠཱརེནཔི བྷཱསིསྶཏཱི’’ཏི ཧི ཏཾ པདཾ སུཏྭཱཝ ཨུསྶཱཧཛཱཏོ སཉྫཱཏུསྶཱཧོ, ཧཊྛཏུཊྛོཏི ཨཏྠོ. ཨཡམཱཙརིཡསྶ ཨདྷིཔྤཱཡོ. ཨཔིཙ ‘‘ཏེན ཧི མཧཱརཱཛ སུཎོཧི སཱདྷུཀཾ མནསི ཀརོཧི, བྷཱསིསྶཱམཱི’’ཏི ཝུཏྟཾ སབྦམྤི ཨུཡྻོཛནཔཊིཉྙཱཀརཎཔྤཀཱརཾ ཨུསྶཱཧཛནནཀཱརཎཾ སབྦེནེཝ ཨུསྶཱཧསམྦྷཝཏོ, ཏསྨཱ ཨེཝཾ ཝུཏྟེཏི ‘‘སུཎོཧི, སཱདྷུཀཾ མནསི ཀརོཧི, བྷཱསིསྶཱམཱི’’ཏི ཝུཏྟེ སབྦེཧེཝ ཏཱིཧིཔི པདེཧི ཨུསྶཱཧཛཱཏོཏི ཨཏྠོ དཊྛབྦོ. པཙྩསྶོསཱིཏི པཏི ཨསྶོསི བྷགཝཏོ ཝཙནསམནནྟརམེཝ པཙྪཱ ཨསྶོསི, ‘‘སཀྐཱ པན བྷནྟེ’’ཏིཨཱདིནཱ ཝཱ པུཙྪིཏྭཱ པུན ‘‘ཨེཝཾ བྷནྟེ’’ཏི ཨསྶོསཱིཏི ཨཏྠོ. ཏཾ པན པཏིསྶཝནཾ ཨཏྠཏོ སམྤཊིཙྪནམེཝཱཏི ¶ ཨཱཧ ‘‘སམྤཊིཙྪི, པཊིགྒཧེསཱི’’ཏི. ཏེནེཝ ཧི ‘‘ཨིཏི ཨཏྠོ’’ཏི ཨཝཏྭཱ ‘‘ཨིཏི ཝུཏྟཾ ཧོཏཱི’’ཏི ཝུཏྟཾ.

༡༩༠. ‘‘ཨཐསྶ ¶ བྷགཝཱ ཨེཏདཝོཙཱ’’ཏི ཝཙནསམྦནྡྷམཏྟཾ དསྶེཏྭཱ ‘‘ཨེཏཾ ཨཝོཙཱ’’ཏི པདཾ ཝིབྷཛིཏྭཱ ཨཏྠཾ དསྶེནྟོ ‘‘ཨིདཱནཱི’’ཏིཨཱདིམཱཧ. ‘‘ཨིདྷཱ’’ཏི ཨིམིནཱ ཝུཙྩམཱནཾ ཨདྷིཀརཎཾ ཏཐཱགཏསྶ ཨུཔྤཏྟིཊྛཱནབྷཱུཏཾ ལོཀམེཝཱདྷིཔྤེཏནྟི དསྶེཏི ‘‘དེསོཔདེསེ ནིཔཱཏོ’’ཏི ཨིམིནཱ. དེསསྶ ཨུཔདིསནཾ དེསོཔདེསོ, ཏསྨིཾ. ཡདི སབྦཏྠ དེསོཔདེསེ, ཨཐཱཡམཏྠོ ན ཝཏྟབྦོ ཨཝུཏྟེཔི ལབྦྷམཱནཏྟཱཏི ཙོདནཱཡཱཧ ‘‘སྭཱཡ’’ནྟིཨཱདི. སཱམཉྙབྷཱུཏཾ ཨིདྷསདྡཾ གཎྷིཏྭཱ ‘‘སྭཱཡ’’ནྟི ཝུཏྟཾ, ན ཏུ ཡཐཱཝིསེསིཏབྦཾ. ཏཐཱ ཧི ཝཀྑཏི ‘‘ཀཏྠཙི པདཔཱུརཎམཏྟམེཝཱ’’ཏི (དཱི. ནི. ཨཊྛ. ༡.༡༩༠). ལོཀཾ ཨུཔཱདཱཡ ཝུཙྩཏི ལོཀསདྡེན སམཱནཱདྷིཀརཎབྷཱཝཏོ. ཨིདྷ ལོཀེཏི ཙ ཛཱཏིཀྑེཏྟཾ, ཏཏྠཱཔི ཨཡཾ ཙཀྐཝཱལོ༹ ཨདྷིཔྤེཏོ. སཱསནམུཔཱདཱཡ ཝུཙྩཏི ‘‘སམཎོ’’ཏི སདྡནྟརསནྣིདྷཱནཏོ. ཨཡཉྷི ཙཏུཀངྒུཏྟརཔཱལི༹. ཏཏྠ པཋམོ སམཎོཏི སོཏཱཔནྣོ. དུཏིཡོ སམཎོཏི སཀདཱགཱམཱི. ཝུཏྟཉྷེཏཾ ཏཏྠེཝ –

‘‘ཀཏམོ ཙ བྷིཀྑཝེ པཋམོ སམཎོ? ཨིདྷ བྷིཀྑཝེ བྷིཀྑུ ཏིཎྞཾ སཾཡོཛནཱནཾ པརིཀྑཡཱ སོཏཱཔནྣོ ཧོཏཱི’’ཏི, (ཨ. ནི. ༤.༢༤༡) ‘‘ཀཏམོ ཙ བྷིཀྑཝེ དུཏིཡོ སམཎོ? ཨིདྷ བྷིཀྑཝེ བྷིཀྑུ ཏིཎྞཾ སཾཡོཛནཱནཾ པརིཀྑཡཱ རཱགདོསམོཧཱནཾ ཏནུཏྟཱ སཀདཱགཱམཱི ཧོཏཱི’’ཏི (ཨ. ནི. ༤.༢༤༡) ཙ ཨཱདི.

ཨོཀཱསནྟི ཀཉྩི པདེསམུཔཱདཱཡ ཝུཙྩཏི ‘‘ཏིཊྛམཱནསྶཱ’’ཏི སདྡནྟརསནྣིདྷཱནཏོ.

ཨིདྷེཝ ཏིཊྛམཱནསྶཱཏི ཨིམིསྶཾཡེཝ ཨིནྡསཱལགུཧཱཡཾ པཏིཊྛམཱནསྶ, དེཝབྷཱུཏསྶ མེ སཏོཏི དེཝབྷཱཝེན, དེཝོ ཧུཏྭཱ ཝཱ བྷཱུཏསྶ སམཱནསྶ. མེཏི ཨནཱདརཡོགེ སཱམིཝཙནཾ. པུན མེཏི ཀཏྟུཏྠེ. ཨིདཉྷི སཀྐཔཉྷཏོ ཨུདཱཧཊཾ.

པདཔཱུརཎམཏྟམེཝ ཨོཀཱསཱཔདིསནསྶཱཔི ཨསམྦྷཝེན ཨཏྠནྟརསྶ ཨབོདྷནཏོ. པུབྦེ ཝུཏྟཾ ཏཐཱགཏསྶ ཨུཔྤཏྟིཊྛཱནབྷཱུཏམེཝ སནྡྷཱཡ ‘‘ལོཀ’’ནྟི ཝུཏྟཾ. པུརིམཾ ཨུཡྻོཛནཔཊིཉྙཱཀརཎཝིསཡེ ཨཱལཔནནྟི ¶ པུན ‘‘མཧཱརཱཛཱ’’ཏི ཨཱལཔཏི. ‘‘ཨརཧ’’ནྟི ཨཱདཡོ སདྡཱ ཝིཏྠཱརིཏཱཏི ཡོཛནཱ. ཨཏྠཏོ ཧི ཝིཏྠཱརཎཾ སདྡམུཁེནེཝ ཧོཏཱིཏི ཨུབྷཡཏྠ སདྡགྒཧཎཾ ཀཏཾ. ཡསྨཱ པན ‘‘ཨཔརེཧིཔི ཨཊྛཧི ཀཱརཎེཧི བྷགཝཱ ཏཐཱགཏོ’’ཏིཨཱདིནཱ (ཨུདཱ. ཨཊྛ. ༡༨; ཨིཏིཝུ. ཨཊྛ. ༣༨) ཏཐཱགཏ-སདྡོ ¶ ཨུདཱནཊྛཀཐཱདཱིསུ, ‘‘ཨརཧ’’ནྟི ཨཱདཡོ ཙ ཝིསུདྡྷིམགྒཊཱིཀཱཡཾ (ཝིསུདྡྷི. ཊཱི. ༡.༡༣༠) ཨཔརེཧིཔི པཀཱརེཧི ཝིཏྠཱརིཏཱ ཨཱཙརིཡེན, ཏསྨཱ ཏེསུ ཝུཏྟནཡེནཔི ཏེསམཏྠོ ཝེདིཏབྦོ. ཏཐཱགཏསྶ སཏྟནིཀཱཡནྟོགདྷཏཱཡ ‘‘ཨིདྷ པན སཏྟལོཀོ ཨདྷིཔྤེཏོ’’ཏི ཝཏྭཱ ཏཏྠཱཡཾ ཡསྨིཾ སཏྟནིཀཱཡེ, ཡསྨིཉྩ ཨོཀཱསེ ཨུཔྤཛྫཏི, ཏཾ དསྶེཏུཾ ‘‘སཏྟལོཀེ ཨུཔྤཛྫམཱནོཔི ཙཱ’’ཏིཨཱདི ཝུཏྟཾ. ན དེཝལོཀེ, ན བྲཧྨལོཀེཏི ཨེཏྠ ཡཾ ཝཏྟབྦཾ, ཏཾ པརཏོ ཨཱགམིསྶཏི.

ཏསྶཱཔརེནཱཏི ཏསྶ ནིགམསྶ ཨཔརེན, ཏཏོ བཧཱིཏི ཝུཏྟཾ ཧོཏི. ཏཏོཏི མཧཱསཱལཏོ. ཨོརཏོ མཛ྄ཛྷེཏི ཨབྦྷནྟརཾ མཛ྄ཛྷིམཔདེསོ. ཨེཝཾ པརིཙྪིནྣེཏི པཉྩནིམིཏྟབདྡྷཱ སཱིམཱ ཝིཡ པཉྩཧི ཡཐཱཝུཏྟནིམིཏྟེཧི པརིཙྪིནྣེ. ཨཌྜྷཏེཡྻཡོཛནསཏེཏི པཎྞཱསཡོཛནེཧི ཨཱུནཏིཡོཛནསཏེ. ཨཡཉྷི མཛ྄ཛྷིམཛནཔདོ མུདིངྒསཎྛཱནོ, ན སམཔརིཝཊྚོ, ན ཙ སམཙཏུརསྶོ, ཨུཛུཀེན ཀཏྠཙི ཨསཱིཏིཡོཛནོ ཧོཏི, ཀཏྠཙི ཡོཛནསཏིཀོ, ཏཐཱཔི ཙེས ཀུཊིལཔརིཙྪེདེན མིནིཡམཱནོ པརིཡནྟ པརིཀྑེཔཏོ ནཝཡོཛནསཏིཀོ ཧོཏི. ཏེན ཝུཏྟཾ ‘‘ནཝཡོཛནསཏེ’’ཏི. ཨསཱིཏིམཧཱཐེརཱཏི ཡེབྷུཡྻཝསེན ཝུཏྟཾ སུནཱཔརནྟཀསྶ པུཎྞཏྠེརསྶཱཔི མཧཱསཱཝཀེསུ པརིཡཱཔནྣཏྟཱ. སུནཱཔརནྟཛནཔདོ ཧི པཙྩནྟཝིསཡོ. ཏཐཱ ཧི ‘‘ཙནྡནམཎྜལམཱལ༹པཊིགྒཧཎེ བྷགཝཱ ན ཏཏྠ ཨརུཎཾ ཨུཊྛཔེཏཱི’’ཏི མཛ྄ཛྷིམཱགམ- (མ. ནི. ཨཊྛ. ༤.༣༩༧) སཾཡུཏྟཱགམཊྛཀཐཱསུ (སཾ. ནི. ཨཊྛ. ༣.༤.༨༨-༨༩) ཝུཏྟཾ. སཱརཔྤཏྟཱཏི ཀུལབྷོགིསྶརིཡཱདིཝསེན, སཱིལསཱརཱདིཝསེན ཙ སཱརབྷཱུཏཱ. བྲཱཧྨཎགཧཔཏིཀཱཏིབྲཧྨཱཡུཔོཀྑརསཱཏིཨཱདིབྲཱཧྨཎཱ ཙེཝ ཨནཱཐཔིཎྜིཀཱདིགཧཔཏིཀཱ ཙ.

ཏཏྠཱཏི མཛ྄ཛྷིམཔདེསེ, ཏསྨིཾཡེཝ ‘‘ཨུཔྤཛྫཏཱི’’ཏི ཝཙནེ ཝཱ. སུཛཱཏཱཡཱཏི ཨེཝཾནཱམིཀཱཡ པཋམཾ སརཎགམནིཀཱཡ ཡསཏྠེརམཱཏུཡཱ. ཙཏཱུསུ པནེཏེསུ ཝིཀཔྤེསུ པཋམོ བུདྡྷབྷཱཝཱཡ ཨཱསནྣཏརཔཊིཔཏྟིདསྶནཝསེན ¶ ཝུཏྟོ. ཨཱསནྣཏརཱཡ ཧི པཊིཔཏྟིཡཱ ཋིཏོཔི ‘‘ཨུཔྤཛྫཏཱི’’ཏི ཝུཙྩཏི ཨུཔྤཱདསྶ ཨེཀནྟིཀཏྟཱ, པགེཝ པཊིཔཏྟིཡཱ མཏྠཀེ ཋིཏོ. དུཏིཡོ བུདྡྷབྷཱཝཱཝཧཔབྦཛྫཏོ པཊྛཱཡ ཨཱསནྣམཏྟཔཊིཔཏྟིདསྶནཝསེན, ཏཏིཡོ བུདྡྷཀརདྷམྨཔཱརིཔཱུརིཏོ པཊྛཱཡ བུདྡྷབྷཱཝཱཡ པཊིཔཏྟིདསྶནཝསེན. ན ཧི མཧཱསཏྟཱནཾ ཨནྟིམབྷཝཱུཔཔཏྟིཏོ པཊྛཱཡ བོདྷིསམྦྷཱརསམྦྷརཎཾ ནཱམ ཨཏྠི བུདྡྷཏྠཱཡ ཀཱལམཱགམཡམཱནེནེཝ ཏཏྠ པཏིཊྛནཏོ. ཙཏུཏྠོ བུདྡྷབྷཱཝཀརདྷམྨསམཱརམྦྷཏོ པཊྛཱཡ བོདྷིཡཱ ནིཡཏབྷཱཝདསྶནེན. བོདྷིཡཱ ཧི ནིཡཏབྷཱཝཔྤཏྟིཏོ པབྷུཏི ‘‘བུདྡྷོ ཨུཔྤཛྫཏཱི’’ཏི ཝིཉྙཱུཧི ཝཏྟུཾ སཀྐཱ ཨུཔྤཱདསྶ ཨེཀནྟིཀཏྟཱ. ཡཐཱ པན ‘‘སནྡནྟི ནདིཡོ’’ཏི སནྡནཀིརིཡཱཡ ཨཝིཙྪེདམུཔཱདཱཡ ཝཏྟམཱནཔྤཡོགོ ¶ , ཨེཝཾ ཨུཔྤཱདཏྠཱཡ པཊིཔཛྫནཀིརིཡཱཡ ཨཝིཙྪེདམུཔཱདཱཡ ཙཏཱུསུཔི ཝིཀཔྤེསུ ‘‘ཨུཔྤཛྫཏི ནཱམཱ’’ཏི ཝུཏྟཾ, པཝཏྟཱཔརཏཝཏྟམཱནཝཙནཉྩེཏཾ. ཙཏུབྦིདྷཉྷི ཝཏྟམཱནལཀྑཎཾ སདྡསཏྠེ པཀཱསིཏཾ –

‘‘ནིཙྩཔཝཏྟི སམཱིཔོ, པཝཏྟུཔརཏོ ཏཐཱ;

པཝཏྟཱཔརཏོ ཙེཝ, ཝཏྟམཱནོ ཙཏུབྦིདྷོ’’ཏི.

ཡསྨཱ པན བུདྡྷཱནཾ སཱཝཀཱནཾ ཝིཡ ན པཊིཔཱཊིཡཱ ཨིདྡྷིཝིདྷཉཱཎཱདཱིནི ཨུཔྤཛྫནྟི, སཧེཝ པན ཨརཧཏྟམགྒེན སཀལོཔི སབྦཉྙུཏཉྙཱཎཱདིགུཎརཱསི ཨཱགཏོ ནཱམ ཧོཏི, ཏསྨཱ ཏེསཾ ནིཔྥཏྟསབྦཀིཙྩཏྟཱ ཨརཧཏྟཕལཀྑཎེ ཨུཔྤནྣོ ནཱམཱཏི ཨེཀངྒུཏྟརཝཎྞནཱཡཾ (ཨ. ནི. ཨཊྛ. ༡.༡.༡༧༠) ཝུཏྟཾ. ཨསཏི ཧི ནིཔྥཏྟསབྦཀིཙྩཏྟེ ན ཏཱཝཏཱ ‘‘ཨུཔྤནྣོ’’ཏི ཝཏྟུམརཧཏི. སབྦཔཋམཾ ཨུཔྤནྣབྷཱཝནྟི ཙཏཱུསུ ཝིཀཔྤེསུ སབྦཔཋམཾ ‘‘ཏཐཱགཏོ སུཛཱཏཱཡ…པེ… ཨུཔྤཛྫཏི ནཱམཱ’’ཏི ཝུཏྟཾ ཏཐཱགཏསྶ ཨུཔྤནྣཏཱསངྑཱཏཾ ཨཏྠིབྷཱཝཾ. ཏདེཝ སནྡྷཱཡ ཨུཔྤཛྫཏཱིཏི ཝུཏྟཾ བུདྡྷབྷཱཝཱཡ ཨཱསནྣཏརཔཊིཔཏྟིཡཾ ཋིཏསྶེཝ ཨདྷིཔྤེཏཏྟཱ. ཨཡམེཝ ཧི ཨཏྠོ མུཁྱཏོ ཨུཔྤཛྫཏཱིཏི ཝཏྟབྦོ. ཏེནཱཧ ‘‘ཏཐཱགཏོ…པེ… ཨཏྠོ’’ཏི.

ཨེཏྠ ཙ ‘‘ཨུཔྤནྣོ’’ཏི ཝུཏྟེ ཨཏཱིཏཀཱལཝསེན ཀོཙི ཨཏྠཾ གཎྷེཡྻཱཏི ཏནྣིཝཏྟནཏྠཾ ‘‘ཨུཔྤནྣོ ཧོཏཱི’’ཏི ཝུཏྟཾ. ‘‘ཨུཔྤནྣཱ དྷམྨཱ’’ཏིཨཱདཱིསུ (དྷ. ས. ཏིཀམཱཏིཀཱ ༡༧) ཝིཡ ཧི ཨིདྷ ཨུཔྤནྣསདྡོ པཙྩུཔྤནྣཀཱལིཀོ. ནནུ ཙ ཨརཧཏྟཕལསམངྒཱིསངྑཱཏོ ཨུཔྤནྣོཡེཝ ཏཐཱགཏོ པཝེདནདེསནཱདཱིནི སཱདྷེཏི, ཨཐ ཀསྨཱ ¶ ཡཐཱཝུཏྟོ ཨརཧཏྟམགྒཔརིཡོསཱནོ ཨུཔྤཛྫམཱནོཡེཝ ཏཐཱགཏོ ཨདྷིཔྤེཏོ. ན ཧི སོ པཝེདནདེསནཱདཱིནི སཱདྷེཏི མདྷུཔཱཡཱསབྷོཛནཏོ ཡཱཝ ཨརཧཏྟམགྒོ, ཏཱཝ ཏེསཾ ཀིཙྩཱནམསཱདྷནཏོཏི? ན ཧེཝཾ དཊྛབྦཾ, བུདྡྷབྷཱཝཱཡ ཨཱསནྣཏརཔཊིཔཏྟིཡཾ ཋིཏསྶ ཨུཔྤཛྫམཱནསྶ གཧཎེནེཝ ཨརཧཏྟཕལསམངྒཱིསངྑཱཏསྶ ཨུཔྤནྣསྶཱཔི གཧིཏཏྟཱ. ཀཱརཎགྒཧཎེནེཝ ཧི ཕལམྤི གཧིཏཾ ཏདཝིནཱབྷཱཝིཏྟཱ. ཨིཏི པཝེདནདེསནཱདིསཱདྷཀསྶ ཨརཧཏྟཕལསམངྒིནོཔི ཏཐཱགཏསྶ གཧེཏབྦཏྟཱ ནེཡྻཏྠམིདཾ ‘‘ཨུཔྤཛྫཏཱི’’ཏི ཝཙནཾ དཊྛབྦནྟི. ཏཐཱ ཧི ཨངྒུཏྟརཊྛཀཐཱཡཾ (ཨ. ནི. ཨཊྛ. ༡.༡.༡༧༠) ཨུཔྤཛྫམཱནོ, ཨུཔྤཛྫཏི, ཨུཔྤནྣོཏི ཏཱིཧི ཀཱལེཧི ཨཏྠཝིབྷཛནེ ‘‘དཱིཔངྐརཔཱདམཱུལེ ལདྡྷབྱཱཀརཎཏོ ཡཱཝ ཨནཱགཱམིཕལཱ ཨུཔྤཛྫམཱནོ ནཱམ, ཨརཧཏྟམགྒཀྑཎེ པན ཨུཔྤཛྫཏི ནཱམ, ཨརཧཏྟཕལཀྑཎེ ཨུཔྤནྣོ ནཱམཱ’’ཏི ཝུཏྟཾ. ཨཡམེཏྠ ཨཱཙརིཡདྷམྨཔཱལཏྠེརསྶ མཏི. ཡསྨཱ པན ཨེཀངྒུཏྟརཊྛཀཐཱཡཾ ‘‘ཨེཀཔུགྒལོ བྷིཀྑཝེ ལོཀེ ཨུཔྤཛྫམཱནོ ཨུཔྤཛྫཏཱི’’ཏི (ཨ. ནི. ༡.༡༧༠) སུཏྟཔདཝཎྞནཱཡཾ ¶ ‘‘ཨིམསྨིམྤི སུཏྟེ ཨརཧཏྟཕལཀྑཎཾཡེཝ སནྡྷཱཡ ཨུཔྤཛྫཏཱི’’ཏི ཝུཏྟཾ, ‘‘ཨུཔྤནྣོ ཧོཏཱིཏི ཨཡཉྷེཏྠ ཨཏྠོ’’ཏི (ཨ. ནི. ཨཊྛ. ༡.༡.༡༧༠) ཨཱགཏཾ, ཏསྨཱ ཨིདྷཱཔི ཨརཧཏྟཕལཀྑཎམེཝ སནྡྷཱཡ ཨུཔྤཛྫཏཱིཏི ཝུཏྟནྟི དསྶེཏི ‘‘སབྦཔཋམཾ ཨུཔྤནྣབྷཱཝཾ སནྡྷཱཡཱ’’ཏི ཨིམིནཱ. ཏེནཱཧ ‘‘ཨུཔྤནྣོ ཧོཏཱིཏི ཨཡཉྷེཏྠ ཨཏྠོ’’ཏི. སབྦཔཋམཾ ཨུཔྤནྣབྷཱཝནྟི ཙ སབྦཝེནེཡྻཱནཾ པཋམཏརཾ ཨརཧཏྟཕལཝསེན ཨུཔྤནྣབྷཱཝནྟི ཨཏྠོ. ‘‘ཨུཔྤནྣོ ཧོཏཱི’’ཏི ཙ ཨིམིནཱ ཨརཧཏྟཕལཀྑཎཝསེན ཨཏཱིཏཀཱལཾ དསྶེཏཱིཏི. ཨཡམེཝ ཙ ནཡོ ཨངྒུཏྟརཊཱིཀཱཀཱརེན ཨཱཙརིཡསཱརིཔུཏྟཏྠེརེན ཨདྷིཔྤེཏོཏི.

སོ བྷགཝཱཏི ཡོ སོ ཏཐཱགཏོ ‘‘ཨརཧ’’ནྟིཨཱདིནཱ པཀིཏྟིཏགུཎོ, སོ བྷགཝཱ. ཨིདཱནི ཝཏྟབྦཾ ཨིམསདྡེན ནིདསྶེཏི ཝུཙྩམཱནཏྠསྶ པརཱམསནཏོ. ཨིདཾ ཝུཏྟཾ ཧོཏི – ནཡིདཾ མཧཱཛནསྶ སམྨུཁམཏྟཾ སནྡྷཱཡ ‘‘ཨིམཾ ལོཀ’’ནྟི ཝུཏྟཾ, ཨཐ ཁོ ‘‘སདེཝཀ’’ནྟིཨཱདིནཱ ཝཀྑམཱནཾ ཨནཝསེསཔརིཡཱདཱནཾ སནྡྷཱཡཱཏི. ‘‘སཧ དེཝེཧི སདེཝཀ’’ནྟིཨཱདིནཱ ཡཐཱཝཱཀྱཾ པདནིབྦཙནཾ ཝུཏྟཾ, ཡཐཱཔདཾ པན ‘‘སདེཝཀོ’’ཏིཨཱདིནཱ ཝཏྟབྦཾ, ཨིམེ ཙ ཏགྒུཎསཾཝིཉྙཱཎབཱཧིརཏྠསམཱསཱ. ཨེཏྠ ཧི ཨཝཡཝེན ཝིགྒཧོ, སམུདཱཡོ སམཱསཏྠོ ཧོཏི ལོཀཱཝཡཝེན ¶ ཀཏཝིགྒཧེན ལོཀསམུདཱཡསྶ ཡཐཱརཧཾ ལབྦྷམཱནཏྟཱ. སམཝཱཡཛོཏཀསཧསདྡཡོགེ ཧི ཨཡམེཝ སམཱསོ ཝིཉྙཱཡཏི. དེཝེཧཱིཏི ཙ པཉྩཀཱམཱཝཙརདེཝེཧི, ཨརཱུཔཱཝཙརདེཝེཧི ཝཱ. བྲཧྨུནཱཏི རཱུཔཱཝཙརཱརཱུཔཱཝཙརབྲཧྨུནཱ, རཱུཔཱཝཙརབྲཧྨུནཱ ཨེཝ ཝཱ, བཧུཀཏྟུཀཱདཱིནམིཝ ནེསཾ སིདྡྷི. པཛཱཏཏྟཱཏི ཡཐཱསཀཾ ཀམྨཀིལེསེཧི པཀཱརེན ནིབྦཏྟཀཏྟཱ.

ཨེཝཾ ཝཙནཏྠཏོ ཨཏྠཾ དསྶེཏྭཱ ཝཙནཱིཡཏྠཏོ དསྶེཏུཾ ‘‘ཏཏྠཱ’’ཏིཨཱདི ཝུཏྟཾ. པཉྩཀཱམཱཝཙརདེཝགྒཧཎཾ པཱརིསེསཉཱཡེན ཨིཏརེསཾ པདནྟརེཧི ཝིསུཾ གཧིཏཏྟཱ. ཚཊྛཀཱམཱཝཙརདེཝགྒཧཎཾ པཙྩཱསཏྟིཉཱཡེན. ཏཏྠ ཧི མཱརོ ཛཱཏོ, ཏནྣིཝཱསཱི ཙ. ཡསྨཱ ཙེས དཱམརིཀརཱཛཔུཏྟོ ཝིཡ ཏཏྠ ཝསིཏཏྟཱ པཱཀཊོ, ཏསྨཱ སནྟེསུཔི ཨཉྙེསུ ཝསཝཏྟིམཧཱརཱཛཱདཱིསུ པཱཀཊཏརེན ཏེནེཝ ཝིསེསེཏྭཱ ཝུཏྟོཏི, ཨཡཉྩ ནཡོ མཛ྄ཛྷིམཱགམཊྛཀཐཱཡཾ (མ. ནི. ཨཊྛ. ༢.༢༩༠) པཀཱསིཏོཝ. མཱརགྒཧཎེན ཙེཏྠ ཏཾསམྦནྡྷིནོ དེཝཱཔི གཧིཏཱ ཨོཀཱསལོཀེན སདྡྷིཾ སཏྟལོཀསྶ གཧཎཏོ. ཨེཝཉྷི ཝསཝཏྟིསཏྟལོཀསྶ ཨནཝསེསཔརིཡཱདཱནཾ ཧོཏི. བྲཧྨཀཱཡིཀཱདིབྲཧྨགྒཧཎམྤི པཙྩཱསཏྟིཉཱཡེན. པཙྩཏྠིཀཔཙྩཱམིཏྟསམཎབྲཱཧྨཎགྒཧཎནྟི པཙྩཏྠིཀཱ ཨེཝ པཙྩཱམིཏྟཱ, ཏེཡེཝ སམཎབྲཱཧྨཎཱ, ཏེསཾ གཧཎཾ ཏཐཱ, ཏེན བཱཧིརཀསམཎབྲཱཧྨཎགྒཧཎཾ ཝུཏྟཾ, ནིདསྶནམཏྟཉྩེཏཾ ཨཔཙྩཏྠིཀཔཙྩཱམིཏྟཱནམྤི ཏེསཾ ཨིམིནཱ གཧཎཏོ. སམིཏཔཱཔབཱཧིཏཔཱཔསམཎབྲཱཧྨཎགྒཧཎནྟི ¶ པན སཱསནིཀསམཎབྲཱཧྨཎཱནཾ གཧཎཾ ཝེདིཏབྦཾ. ཀཱམཾ ‘‘སདེཝཀ’’ནྟིཨཱདིཝིསེསནཱནཾ ཝསེནེཝ སཏྟཝིསཡོཔི ལོཀསདྡོ ཝིཉྙཱཡཏི སམཝཱཡཏྠཝསེན ཏུལྱཡོགཝིསཡཏྟཱ ཏེསཾ, ‘‘སལོམཀོ སཔཀྑཀོ’’ཏིཨཱདཱིསུ པན ཝིཛྫམཱནཏྠཝསེན ཨཏུལྱཡོགཝིསཡེཔི ཨཡཾ སམཱསོ ལབྦྷཏཱིཏི བྱབྷིཙཱརདསྶནཏོ ཨབྱབྷིཙཱརེནཏྠཉཱཔཀཾ པཛཱགཧཎནྟི ཨཱཧ ‘‘པཛཱཝཙནེན སཏྟལོཀགྒཧཎ’’ནྟི, ན པན ལོཀསདྡེན སཏྟལོཀསྶ ཨགྒཧིཏཏྟཱ ཨེཝཾ ཝུཏྟཾ. ཏེནཱཧ ‘‘ཏཱིཧི པདེཧི ཨོཀཱསལོཀེན སདྡྷིཾ སཏྟལོཀོ’’ཏི. སདེཝཀཱདིཝཙནེན ཨུཔཔཏྟིདེཝཱནཾ, སསྶམཎབྲཱཧྨཎཱིཝཙནེན ཝིསུདྡྷིདེཝཱནཉྩ གཧིཏཏྟཱ ཝུཏྟཾ ‘‘སདེཝ…པེ… མནུསྶགྒཧཎ’’ནྟི. ཏཏྠ སམྨུཏིདེཝཱ རཱཛཱནོ ¶ . ཨཝསེསམནུསྶགྒཧཎནྟི སམྨུཏིདེཝེཧི, སམཎབྲཱཧྨཎེཧི ཙ ཨཝསིཊྛམནུསྶཱནཾ གཧཎཾ. ཨེཏྠཱཏི ཨེཏེསུ པདེསུ. ཏཱིཧི པདེཧཱིཏི སདེཝཀསམཱརཀསབྲཧྨཀཔདེཧི. དྭཱིཧཱིཏི སསྶམཎབྲཱཧྨཎཱིསདེཝམནུསྶཔདེཧི. སམཱསཔདཏྠེསུ སཏྟལོཀསྶཔི ཝུཏྟནཡེན གཧིཏཏྟཱ ‘‘ཨོཀཱསལོཀེན སདྡྷིཾ སཏྟལོཀོ’’ཏི ཝུཏྟཾ.

‘‘ཨཔརོ ནཡོ’’ཏིཨཱདིནཱ ཨཔརམྤི ཝཙནཱིཡཏྠམཱཧ. ཨརཱུཔིནོཔི སཏྟཱ ཨཏྟནོ ཨཱནེཉྫཝིཧཱརེན ཝིཧརནྟོ ‘‘དིབྦནྟཱིཏི དེཝཱ’’ཏི ཨིདཾ ནིབྦཙནཾ ལདྡྷུམརཧནྟཱིཏི ཨཱཧ ‘‘སདེཝཀགྒཧཎེན ཨརཱུཔཱཝཙརལོཀོ གཧིཏོ’’ཏི. ཏེནེཝཱཧ བྷགཝཱ བྲཧྨཛཱལཱདཱིསུ ‘‘ཨཱཀཱསཱནཉྩཱཡཏནཱུཔགཱནཾ དེཝཱནཾ སཧབྱཏ’’ནྟིཨཱདི, (ཨ. ནི. ༣.༡༩༧) ཨརཱུཔཱཝཙརབྷཱུཏོ ཨོཀཱསལོཀོ, སཏྟལོཀོ ཙ གཧིཏོཏི ཨཏྠོ. ཨེཝཾ ཚཀཱམཱཝཙརདེཝལོཀོ, རཱུཔཱི བྲཧྨལོཀོཏི ཨེཏྠཱཔི. ཚཀཱམཱཝཙརདེཝལོཀསྶ སཝིསེསཾ མཱརཝསེ པཝཏྟནཏོ ཝུཏྟཾ ‘‘སམཱརཀགྒཧཎེན ཚཀཱམཱཝཙརདེཝལོཀོ’’ཏི. སོ ཧི ཏསྶ དཱམརིཀསྶ ཝིཡ ཝསཔཝཏྟནོཀཱསོ. རཱུཔཱི བྲཧྨལོཀོ གཧིཏོ པཱརིསེསཉཱཡེན ཨརཱུཔཱིབྲཧྨལོཀསྶ ཝིསུཾ གཧིཏཏྟཱ. ཙཏུཔརིསཝསེནཱཏི ཁཏྟིཡབྲཱཧྨཎགཧཔཏིསམཎཙཱཏུམཧཱརཱཛིཀཏཱཝཏིཾསམཱརབྲཧྨསངྑཱཏཱསུ ཨཊྛསུ པརིསཱསུ ཁཏྟིཡཱདིཙཏུཔརིསཝསེནེཝ ཏདཉྙཱསཾ སདེཝཀཱདིགྒཧཎེན གཧིཏཏྟཱ. ཀཐཾ པནེཏྠ ཙཏུཔརིསཝསེན མནུསྶལོཀོ གཧིཏོཏི? ‘‘སསྶམཎབྲཱཧྨཎི’’ནྟི ཨིམིནཱ སམཎཔརིསཱ, བྲཱཧྨཎཔརིསཱ ཙ གཧིཏཱ, ‘‘སདེཝམནུསྶ’’ནྟི ཨིམིནཱ ཁཏྟིཡཔརིསཱ, གཧཔཏིཔརིསཱ ཙཱཏི. ‘‘པཛ’’ནྟི ཨིམིནཱ པན ཨིམཱཡེཝ ཙཏསྶོ པརིསཱ ཝུཏྟཱ. ཙཏུཔརིསསངྑཱཏཾ པཛནྟི ཧི ཨིདྷ ཨཏྠོ.

ཨཉྙཐཱ གཧེཏབྦམཱཧ ‘‘སམྨུཏིདེཝེཧི ཝཱ སཧ མནུསྶལོཀོ’’ཏི. ཀཐཾ པན གཧིཏོཏི? ‘‘སསྶམཎབྲཱཧྨཎི’’ནྟི ཨིམིནཱ སམཎབྲཱཧྨཎཱ གཧིཏཱ, ‘‘སདེཝམནུསྶ’’ནྟི ཨིམིནཱ སམྨུཏིདེཝསངྑཱཏཱ ཁཏྟིཡཱ, གཧཔཏིསུདྡསངྑཱཏཱ ཙ ཨཝསེསམནུསྶཱཏི. ཨིཏོ པན ཨཉྙེསཾ མནུསྶསཏྟཱནམབྷཱཝཏོ ¶ ‘‘པཛ’’ནྟི ཨིམིནཱ ཨེཏེཡེཝ ཙཏཱུཧི པཀཱརེཧི ཋིཏཱ མནུསྶསཏྟཱ ཝུཏྟཱ. ཙཏུཀུལཔྤབྷེདཾ པཛནྟི ཧི ཨིདྷ ཨཏྠོ. ཨེཝཾ ཝིཀཔྤདྭཡེཔི པཛཱགཧཎེན ཙཏུཔརིསཱདིཝསེན མནུསྶཱནཉྙེཝ གཧིཏཏྟཱ ¶ ཨིདཱནི ཨཝསེསསཏྟེཔི སངྒཧེཏྭཱ དསྶེཏུཾ ‘‘ཨཝསེསསབྦསཏྟལོཀོ ཝཱ’’ཏི ཝུཏྟཾ. ཨེཏྠཱཔི ཙཏུཔརིསཝསེན གཧིཏེན མནུསྶལོཀེན སཧ ཨཝསེསསབྦསཏྟལོཀོ གཧིཏོ, སམྨུཏིདེཝེཧི ཝཱ སཧ ཨཝསེསསབྦསཏྟལོཀོཏི ཡོཛེཏབྦཾ. ནཱགགརུལཱ༹དིཝསེན ཙ ཨཝསེསསབྦསཏྟལོཀོ. ཨིདཾ ཝུཏྟཾ ཧོཏི – ཙཏུཔརིསསཧིཏོ ཨཝསེསསུདྡནཱགསུཔཎྞནེརཡིཀཱདིསཏྟལོཀོ, ཙཏུཀུལཔྤབྷེདམནུསྶསཧིཏོ ཝཱ ཨཝསེསནཱགསུཔཎྞནེརཡིཀཱདིསཏྟལོཀོ གཧིཏོཏི.

ཨེཏྟཱཝཏཱ བྷཱགསོ ལོཀཾ གཧེཏྭཱ ཡོཛནཾ དསྶེཏྭཱ ཨིདཱནི ཏེན ཏེན ཝིསེསེན ཨབྷཱགསོ ལོཀཾ གཧེཏྭཱ ཡོཛནཾ དསྶེཏུཾ ‘‘ཨཔིཙེཏྠཱ’’ཏིཨཱདི ཝུཏྟཾ. ཏཏྠ ཨུཀྐཊྛཔརིཙྪེདཏོཏི ཨུཀྐཾསགཏིཔརིཙྪེདཏོ, ཏབྦིཛཱནནེནཱཏི ཝུཏྟཾ ཧོཏི. པཋམནཡེན ཧི པཉྩསུ གཏཱིསུ དེཝགཏིཔརིཡཱཔནྣཱཝ པཉྩཀཱམགུཎསམངྒིཏཱཡ, དཱིགྷཱཡུཀཏཱཡཱཏི ཨེཝམཱདཱིཧི ཝིསེསེཧི སེཊྛཱ. དུཏིཡནཡེན པན ཨརཱུཔིནོ དཱུརསམུགྒྷཱཊིཏཀིལེསདུཀྑཏཱཡ, སནྟཔཎཱིཏཨཱནེཉྫཝིཧཱརསམངྒིཏཱཡ, ཨཏིཝིཡ དཱིགྷཱཡུཀཏཱཡཱཏི ཨེཝམཱདཱིཧི ཝིསེསེཧི ཨཏིཝིཡ ཨུཀྐཊྛཱ. ཨཱཙརིཡེཧི པན དུཏིཡནཡམེཝ སནྡྷཱཡ ཝུཏྟཾ. ཨེཝཾ པཋམཔདེནེཝ པདྷཱནནཡེན སབྦལོཀསྶ སཙྪིཀཏབྷཱཝེ སིདྡྷེཔི ཨིམིནཱ ཀཱརཎཝིསེསེན སེསཔདཱནི ཝུཏྟཱནཱིཏི དསྶེཏི ‘‘ཏཏོ ཡེས’’ནྟིཨཱདིནཱ. ཏཏོཏི པཋམཔདཏོ པརཾ ཨཱཧཱཏི སམྦནྡྷོ. ‘‘ཚཀཱམཱཝཙརིསྶརོ’’ ཏིཡེཝ ཝུཏྟེ སཀྐཱདཱིནམྤི ཏསྶ ཨཱདྷིཔཙྩཾ སིཡཱཏི ཨཱསངྐཱནིཝཏྟནཏྠཾ ‘‘ཝསཝཏྟཱི’’ཏི ཝུཏྟཾ, ཏེན སཱཧསིཀཀརཎེན ཝསཝཏྟཱཔནམེཝ ཏསྶཱདྷིཔཙྩནྟི དསྶེཏི. སོ ཧི ཚཊྛདེཝལོཀེཔི ཨནིསྶརོ ཏཏྠ ཝསཝཏྟིདེཝརཱཛསྶེཝ ཨིསྶརཏྟཱ. ཏེནཱཧ བྷགཝཱ ཨངྒུཏྟརཱགམཝརེ ཨཊྛནིཔཱཏེ དཱནཱནིསཾསསུཏྟེ ‘‘ཏཏྲ བྷིཀྑཝེ ཝསཝཏྟཱི དེཝཔུཏྟོ དཱནམཡཾ པུཉྙཀིརིཡཝཏྠུཾ ཨཏིརེཀཾ ཀརིཏྭཱ…པེ… པརནིམྨིཏཝསཝཏྟཱི དེཝེ དསཧི ཋཱནེཧི ཨདྷིགཎྷཱཏཱི’’ཏི (ཨ. ནི. ༨.༣༦) ཝིཏྠཱརོ. མཛ྄ཛྷིམཱགམཊྛཀཐཱཡམྤི ཝུཏྟཾ ‘‘ཏཏྲ ཧི ཝསཝཏྟིརཱཛཱ རཛྫཾ ཀཱརེཏི, མཱརོ པན ཨེཀསྨིཾ པདེསེ ཨཏྟནོ པརིསཱཡ ཨིསྶརིཡཾ པཝཏྟེནྟོ རཛྫཔཙྩནྟེ དཱམརིཀརཱཛཔུཏྟོ ཝིཡ ཝསཏཱི’’ཏི (མ. ནི. ༡.༦༠) ‘‘བྲཧྨཱ མཧཱནུབྷཱཝོ’’ཏིཨཱདི ¶ དསསཧསྶིཡཾ མཧཱབྲཧྨུནོ ཝསེན ཝདཏི. ‘‘ཨུཀྐཊྛཔརིཙྪེདཏོ’’ཏི ཧི ཧེཊྛཱ ཝུཏྟམེཝ. ‘‘ཨེཀངྒུལིཡཱ’’ཏིཨཱདི ཨེཀདེསེན མཧཱནུབྷཱཝཏཱདསྶནཾ. ཨནུཏྟརནྟི སེཊྛཾ ནཝལོཀུཏྟརཾ. པུཐཱུཏི བཧུཀཱ, ཝིསུཾ བྷཱུཏཱ ཝཱ. ཨུཀྐཊྛཊྛཱནཱནནྟི ཨུཀྐཾསགཏིཀཱནཾ. བྷཱཝཱནུཀྐམོཏི བྷཱཝཝསེན པརེསམཛ྄ཛྷཱསཡཱནུརཱུཔཾ ‘‘སདེཝཀ’’ནྟིཨཱདིཔདཱནཾ ཨནུཀྐམོ, བྷཱཝཝསེན ¶ ཨནུསནྡྷིཀྐམོ ཝཱ བྷཱཝཱནུཀྐམོ, ཨཏྠཱནཉྩེཝ པདཱནཉྩ ཨནུསནྡྷཱནཔཊིཔཱཊཱིཏི ཨཏྠོ, ཨཡམེཝ ཝཱ པཱཋོ ཏཐཱཡེཝ སམནྟཔཱསཱདིཀཱཡཾ (པཱརཱ. ཨཊྛ. ཝེརཉྫཀཎྜཝཎྞནཱ ༡) དིཊྛཏྟཱ, ཨཱཙརིཡསཱརིཔུཏྟཏྠེརེན (སཱརཏྠ. ཊཱི. ༡.ཝེརཉྫཀཎྜཝཎྞནཱ) ཙ ཝཎྞིཏཏྟཱ. ‘‘ཝིབྷཱཝནཱནུཀྐམོ’’ཏིཔི པཱཋོ དིསྶཏི, སོ པན ཏེསུ ཨདིཊྛཏྟཱ ན སུནྡརོ.

ཨིདཱནི པོརཱཎཀཱནཾ སཾཝཎྞནཱནཡཾ དསྶེཏུཾ ‘‘པོརཱཎཱ པནཱཧཱུ’’ཏིཨཱདི ཝུཏྟཾ. ཏཏྠ ཨཉྙཔདེན ནིརཝསེསསཏྟལོཀསྶ གཧིཏཏྟཱ སབྦཏྠ ཨཝསེསལོཀནྟི ཨནཝསེསཔརིཡཱདཱནཾ ཝུཏྟཾ. ཏེནཱཧ ‘‘ཏིབྷཝཱུཔགེ སཏྟེ’’ཏི, ཏེདྷཱཏུཀསངྑཱཏེ ཏཡོ བྷཝེ ཨུཔགཏསཏྟེཏི ཨཏྠོ. ཏཱིཧཱཀཱརེཧཱིཏི དེཝམཱརབྲཧྨསཧིཏཏཱསངྑཱཏེཧི ཏཱིཧི ཨཱཀཱརེཧི. ཏཱིསུ པདེསཱུཏི ‘‘སདེཝཀ’’ནྟིཨཱདཱིསུ ཏཱིསུ པདེསུ. པཀྑིཔིཏྭཱཏི ཨཏྠཝསེན སངྒཧེཏྭཱ. ཏེཡེཝ ཏིབྷཝཱུཔགེ སཏྟེ ‘‘སསྶམཎབྲཱཧྨཎིཾ, སདེཝམནུསྶ’’ནྟི པདདྭཡེ པཀྑིཔཏཱིཏི ཉཱཔེཏུཾ ‘‘པུནཱ’’ཏི ཝུཏྟཾ. ཏེན ཏེནཱཀཱརེནཱཏི སདེཝཀཏྟཱདིནཱ, སསྶམཎབྲཱཧྨཎཱིབྷཱཝཱདིནཱ ཙ ཏེན ཏེན པཀཱརེན. ‘‘ཏིབྷཝཱུཔགེ སཏྟེ’’ཏི ཝཏྭཱ ‘‘ཏེདྷཱཏུཀམེཝཱ’’ཏི ཝདནྟཱ ཨོཀཱསལོཀེན སདྡྷིཾ སཏྟལོཀོ གཧིཏོཏི དསྶེནྟི. ཏེདྷཱཏུཀམེཝ པརིཡཱདིནྣནྟི པོརཱཎཱ པནཱཧཱུཏི ཡོཛནཱ.

སཱམནྟི ཨཏྟནཱ. ཨཉྙཏྠཱཔོཧནེན, ཨནྟོགདྷཱཝདྷཱརཎེན ཝཱ ཏཔྤཊིསེདྷནམཱཧ ‘‘ཨཔརནེཡྻོ ཧུཏྭཱ’’ཏི, ཨཔརེཧི ཨནབྷིཛཱནཱཔེཏབྦོ ཧུཏྭཱཏི ཨཏྠོ. ཨབྷིཉྙཱཏི ཡ-ཀཱརལོཔནིདྡེསོ ཡཐཱ ‘‘པཊིསངྑཱ ཡོནིསོ’’ཏི (མ. ནི. ༡.༢༣, ༤༢༢; ༢.༢༤; ༣.༧༥; སཾ. ནི. ༤.༡༢༠; ཨ. ནི. ༦.༥༨; མཧཱནི. ༢༠༦) ཝུཏྟཾ ‘‘ཨབྷིཉྙཱཡཱ’’ཏི. ཨབྷིསདྡེན ན ཝིསེསནམཏྟཾ ཛོཏིཏཾ, ཨཐ ཁོ ཝིསེསནམུཁེན ཀརཎམྤཱིཏི དསྶེཏི ‘‘ཨདྷིཀེན ཉཱཎེནཱ’’ཏི ཨིམིནཱ. ཨནུམཱནཱདིཔཊིཀྑེཔོཏི ཨེཏྠ ཨཱདིསདྡེན ¶ ཨུཔམཱནཨཏྠཱཔཏྟིསདྡནྟརསནྣིདྷཱནསམྤཡོགཝིཔྤཡོགསཧཙརཎཱདིནཱ ཀཱརཎལེསམཏྟེན པཝེདནཾ སངྒཎྷཱཏི ཨེཀཔྤམཱཎཏྟཱ. སབྦཏྠ ཨཔྤཊིཧཏཉཱཎཙཱརཏཱཡ ཧི སབྦདྷམྨཔཙྩཀྑཱ བུདྡྷཱ བྷགཝནྟོ. བོདྷེཏི ཝིཉྙཱཔེཏཱིཏི སདྡཏོ ཨཏྠཝཙནཾ. པཀཱསེཏཱིཏི ཨདྷིཔྤཱཡཏོ. ཨེཝཾ སབྦཏྠ ཝིཝེཙིཏབྦོ.

ཨནུཏྟརཾ ཝིཝེཀསུཁནྟི ཕལསམཱཔཏྟིསུཁཾ. ཧིཏྭཱཔཱིཏི པི-སདྡགྒཧཎཾ ཕལསམཱཔཏྟིཡཱ ཨནྟརཱ ཋིཏིཀཱཔི ཀདཱཙི བྷགཝཏོ དེསནཱ ཧོཏཱིཏི ཀཏྭཱ ཀཏཾ. བྷགཝཱ ཧི དྷམྨཾ དེསེནྟོ ཡསྨིཾ ཁཎེ པརིསཱ སཱདྷུཀཱརཾ ཝཱ དེཏི, ཡཐཱསུཏཾ ཝཱ དྷམྨཾ པཙྩཝེཀྑཏི, ཏཾ ཁཎམྤི པུབྦཱབྷོགེན པརིཙྪིནྡིཏྭཱ ཕལསམཱཔཏྟིཾ སམཱཔཛྫཏི, ཡཐཱཔརིཙྪེདཉྩ སམཱཔཏྟིཏོ ཝུཊྛཱཡ པུབྦེ ¶ ཋིཏཊྛཱནཏོ པཊྛཱཡ དྷམྨཾ དེསེཏཱིཏི ཨཊྛཀཐཱསུ (མ. ནི. ཨཊྛ. ༢.༣༨༧) ཝུཏྟོཝཱཡམཏྠོ. ཨཔྤཾ ཝཱ བཧུཾ ཝཱ དེསེནྟོཏི ཨུགྒྷཊིཏཉྙུསྶ ཝསེན ཨཔྤཾ ཝཱ ཝིཔཉྩིཏཉྙུསྶ, ནེཡྻསྶ ཙ ཝསེན བཧུཾ ཝཱ དེསེནྟོ. ཀཐཾ དེསེཏཱིཏི ཨཱཧ ‘‘ཨཱདིམྷིཔཱི’’ཏིཨཱདི. དྷམྨསྶ ཀལྱཱཎཏཱ ནིཡྻཱནིཀཏཱཡ, ནིཡྻཱནིཀཏཱ ཙ སབྦསོ ཨནཝཛྫབྷཱཝེནེཝཱཏི ཝུཏྟཾ ‘‘ཨནཝཛྫམེཝ ཀཏྭཱ’’ཏི. དེསནཱཡཱཏི པརིཡཏྟིདྷམྨསྶ དེསཀཱཡཏྟེན ཧི ཨཱཎཱདིཝིདྷིནཱ ཨཏིསཛྫནཾ པབོདྷནཾ དེསནཱཏི པརིཡཏྟིདྷམྨོ ཝུཙྩཏི. ཀིཉྩཱཔི ཨཝཡཝཝིནིམུཏྟོ སམུདཱཡོ ནཱམ པརམཏྠཏོ ཀོཙི ནཏྠི, ཡེསུ པན ཨཝཡཝེསུ སམུདཱཡརཱུཔེན ཨཝེཀྑིཏེསུ གཱཐཱདིསམཉྙཱ, ཏཾ ཏཏོ བྷིནྣཾ ཝིཡ ཀཏྭཱ སཾསཱམིཝོཧཱརམཱརོཔེཏྭཱ དསྶེནྟོ ‘‘ཨཏྠི དེསནཱཡ ཨཱདིམཛ྄ཛྷཔརིཡོསཱན’’ནྟི ཨཱཧ. སཱསནསྶཱཏི པཊིཔཏྟིདྷམྨསྶ. སཱསིཏབྦཔུགྒལགཏེན ཧི ཡཐཱཔརཱདྷཱདིནཱ སཱསིཏབྦབྷཱཝེན ཨནུསཱསནཾ, ཏདངྒཝིནཡཱདིཝསེན ཝིནཡནནྟི ཀཏྭཱ པཊིཔཏྟིདྷམྨོ ‘‘སཱསན’’ནྟི ཝུཙྩཏི. ཨཏྠི སཱསནསྶ ཨཱདིམཛ྄ཛྷཔརིཡོསཱནནྟི སམྦནྡྷོ. ཙཏུཔྤདིཀཱཡཔཱིཏི ཨེཏྠ པི-སདྡོ སམྦྷཱཝནེ, ཏེན ཨེཝཾ ཨཔྤཀཏརཱཡཔི ཨཱདིམཛ྄ཛྷཔརིཡོསཱནེསུ ཀལྱཱཎཏཱ, པགེཝ བཧུཏརཱཡཱཏི སམྦྷཱཝེཏི. པདཉྩེཏྠ གཱཐཱཡ ཙཏུཏྠཾསོ, ཡཾ ‘‘པཱདོ’’ཏིཔི ཝུཙྩཏི, ཨེཏེནེཝ ཏིཔཱདིཀཚཔཱདིཀཱསུཔི ཡཐཱསམྦྷཝཾ ཝིབྷཱགཾ དསྶེཏི. ཨེཝཾ སུཏྟཱཝཡཝེ ཀལྱཱཎཏྟཡཾ དསྶེཏྭཱ སཀལེཔི སུཏྟེ དསྶེཏུཾ ‘‘ཨེཀཱནུསནྡྷིཀསྶཱ’’ཏིཨཱདི ཝུཏྟཾ. ཏཏྠ ནཱཏིབཧུཝིབྷཱགཾ ཡཐཱནུསནྡྷིནཱ ཨེཀཱནུསནྡྷིཀཾ ¶ སནྡྷཱཡ ‘‘ཨེཀཱནུསནྡྷིཀསྶཱ’’ཏི ཨཱཧ. ཨིཏརསྨིཾ པན ཏེནེཝ དྷམྨཝིབྷཱགེན ཨཱདིམཛ྄ཛྷཔརིཡོསཱནཱ ལབྦྷནྟཱིཏི ‘‘ཨནེཀཱནུསནྡྷིཀསྶཱ’’ཏིཨཱདི ཝུཏྟཾ. ནིདཱནནྟི ཨཱནནྡཏྠེརེན ཋཔིཏཾ ཀཱལདེསདེསཀཔརིསཱདིཨཔདིསནལཀྑཎཾ ནིདཱནགནྠཾ. ཨིདམཝོཙཱཏི ནིགམནཾ ཨུཔལཀྑཎམེཝ ‘‘ཨིཏི ཡཾ ཏཾ ཝུཏྟཾ, ཨིདམེཏཾ པཊིཙྩ ཝུཏྟ’’ནྟི ནིགམནསྶཔི གཧེཏབྦཏོ. སངྒཱིཏིཀཱརཀེཧི ཋཔིཏཱནིཔི ཧི ནིདཱནནིགམནཱནི སཏྠུ དེསནཱཡ ཨནུཝིདྷཱནཏོ ཏདནྟོགདྷཱནེཝཱཏི ཝེདིཏབྦཾ. ཨནྟེ ཨནུསནྡྷཱིཏི སབྦཔཙྪིམོ ཨནུསནྡྷི.

‘‘སཱིལསམཱདྷིཝིཔསྶནཱ’’ཏིཨཱདིནཱ སཱསནསྶ ཨིདྷ པཊིཔཏྟིདྷམྨཏཾ ཝིབྷཱཝེཏི. ཝིནཡཊྛཀཐཱཡཾ པན ‘‘སཱསནདྷམྨོ’’ཏི ཝུཏྟཏྟཱ –

‘‘སབྦཔཱཔསྶ ཨཀརཎཾ, ཀུསལསྶ ཨུཔསམྤདཱ;

སཙིཏྟཔརིཡོདཔནཾ, ཨེཏཾ བུདྡྷཱན སཱསན’’ནྟི. (དཱི. ནི. ༢.༩༠; དྷ. པ. ༡༨༣; ནེཏྟི. ༣༠, ༥༠, ༡༡༦, ༡༢༤);

ཨེཝཾ ¶ ཝུཏྟསྶ སཏྠུསཱསནསྶ པཀཱསཀོ པརིཡཏྟིདྷམྨོ ཨེཝ སཱིལཱདིཨཏྠཝསེན ཀལྱཱཎཏྟཡཝིབྷཱཝནེ ཝུཏྟོ. ཨིདྷ པན པཊིཔཏྟིཡེཝ. ཏེན ཝཀྑཏི ‘‘ཨིདྷ དེསནཱཡ ཨཱདིམཛ྄ཛྷཔརིཡོསཱནཾ ཨདྷིཔྤེཏ’’ནྟི. སཱིལསམཱདྷིཝིཔསྶནཱ ཨཱདི ནཱམ སཱསནསམྤཏྟིབྷཱུཏཱནཾ ཨུཏྟརིམནུསྶདྷམྨཱནཾ མཱུལབྷཱཝཏོ. ཀུསལཱནཾ དྷམྨཱནནྟི ཨནཝཛྫདྷམྨཱནཾ. དིཊྛཱིཏི ཝིཔསྶནཱ, ཨཝིནཱབྷཱཝཏོ པནེཏྠ སམཱདྷིགྒཧཎཾ. མཧཱཝགྒསཾཡུཏྟེ བཱཧིཡསུཏྟཔདམིདཾ (སཾ. ནི. ༥.༣༨༡). ཀཱམཾ སུཏྟེ ཨརིཡམགྒསྶ ཨནྟདྭཡཝིགམེན ཏེསཾ མཛ྄ཛྷིམཔཊིཔདཱབྷཱཝོ ཝུཏྟོ, མཛ྄ཛྷིམབྷཱཝསཱམཉྙཏོ པན སམྨཱཔཊིཔཏྟིཡཱ ཨཱརམྦྷནིཔྥཏྟཱིནཾ མཛ྄ཛྷིམབྷཱཝསྶཱཔི སཱདྷཀབྷཱཝེ ཡུཏྟནྟི ཨཱཧ ‘‘ཨཏྠི བྷིཀྑཝེ, མཛ྄ཛྷིམཱ པཊིཔདཱ ཏཐཱགཏེན ཨབྷིསམྦུདྡྷཱཏི ཨེཝཾ ཝུཏྟོ ཨརིཡམགྒོ མཛ྄ཛྷཾ ནཱམཱ’’ཏི, སཱིལསམཱདྷིཝིཔསྶནཱསངྑཱཏཱནཾ ཨཱརམྦྷཱནཾ, ཕལནིབྦཱནསངྑཱཏཱནཉྩ ནིཔྥཏྟཱིནཾ ཝེམཛ྄ཛྷབྷཱཝཏོ ཨརིཡམགྒོ མཛ྄ཛྷཾ ནཱམཱཏི ཨདྷིཔྤཱཡོ. སཨུཔཱདིསེསནིབྦཱནདྷཱཏུཝསེན ཕལཾ པརིཡོསཱནཾ ནཱམ, ཨནུཔཱདིསེསནིབྦཱནདྷཱཏུཝསེན པན ནིབྦཱནཾ. སཱསནཔརིཡོསཱནཱ ཧི ནིབྦཱནདྷཱཏུ. མགྒསྶ ནིཔྥཏྟི ཕལཝསེན, ནིབྦཱནསཙྪིཀིརིཡཱཡ ཙ ཧོཏི ཏཏོ པརཾ ཀཏྟབྦཱབྷཱཝཏོཏི ཝཱ ཨེཝཾ ཝུཏྟཾ. ཨིདཱནི ཏེསཾ དྭིནྣམྤི སཱསནསྶ པརིཡོསཱནཏཾ ཨཱགམེན སཱདྷེཏུཾ ‘‘ཨེཏདཏྠཾ ཨིད’’ནྟིཨཱདིམཱཧ. ཨེཏདེཝ ¶ ཕལཾ ཨཏྠོ ཡསྶཱཏི ཨེཏདཏྠཾ. བྲཱཧྨཎཱཏི པིངྒལཀོཙྪབྲཱཧྨཎཾ བྷགཝཱ ཨཱལཔཏི. ཨིདཉྷི མཛ྄ཛྷིམཱགམེ མཱུལཔཎྞཱསཀེ ཙཱུལ༹སཱརོཔམསུཏྟ (མ. ནི. ༡.༣༡༢ ཨཱདཡོ) པདཾ. ཨེཏདེཝ ཕལཾ སཱརཾ ཡསྶཱཏི ཨེཏཾསཱརཾ ནིགྒཧིཏཱགམེན. ཏཐཱ ཨེཏཾཔརིཡོསཱནཾ. ནིབྦཱནོགདྷནྟི ནིབྦཱནནྟོགདྷཾ. ཨཱཝུསོ ཝིསཱཁཱཏི དྷམྨདིནྣཱཡ ཐེརིཡཱ ཝིསཱཁགཧཔཏིམཱལཔནཾ. ཨིདཉྷི ཙཱུལ༹ཝེདལླསུཏྟེ (མ. ནི. ༡.༤༦༠ ཨཱདཡོ) ‘‘སཱཏྠཾ སབྱཉྫན’’ནྟིཨཱདིསདྡནྟརསནྣིདྷཱནཏོ ‘‘ཨིདྷ དེསནཱཡ ཨཱདིམཛ྄ཛྷཔརིཡོསཱནཾ ཨདྷིཔྤེཏ’’ནྟི ཝུཏྟཾ.

ཨེཝཾ སདྡཔབནྡྷཝསེན དེསནཱཡ ཀལྱཱཎཏྟཡཝིབྷཱགཾ དསྶེཏྭཱ ཏདཏྠཝསེནཔི དསྶེནྟོ ‘‘བྷགཝཱ ཧཱི’’ཏིཨཱདིམཱཧ. ཨཏྠཏོཔི ཧི ཏསྶཱདྷིཔྤེཏབྷཱཝཾ ཧི-སདྡེན སམཏྠེཏི. ཏཐཱ སམཏྠནམུཁེན ཙ ཨཏྠཝསེན ཀལྱཱཎཏྟཡཝིབྷཱགཾ དསྶེཏཱིཏི. ཨཏྠཏོ པནེཏཾ དསྶེནྟོ ཡོ ཏསྨིཾ ཏསྨིཾ ཨཏྠེ ཀཏཝིདྷི སདྡཔབནྡྷོ གཱཐཱསུཏྟཝསེན ཝཝཏྠིཏོ པརིཡཏྟིདྷམྨོཡེཝ ཨིདྷ དེསནཱཏི ཝུཏྟོ, ཏསྶ ཙཏྠོ ཝིསེསཏོ སཱིལཱདི ཨེཝཱཏི ཨཱཧ ‘‘ཨཱདིམྷི སཱིལ’’ནྟིཨཱདི. ཝིསེསཀཐནཉྷེཏཾ. སཱམཉྙཏོ པན སཱིལགྒཧཎེན སསམྦྷཱརསཱིལཾ གཧིཏཾ, ཏཐཱ མགྒགྒཧཎེན སསམྦྷཱརམགྒོཏི ཨཏྠཏྟཡཝསེན ཨནཝསེསཏོ པརིཡཏྟིཨཏྠཾ པརིཡཱདཱཡ ཏིཊྛཏི. ཨིཏརཐཱ ཧི ཀལྱཱཎཏྟཡཝིབྷཱགོ ཨསབྦསཱདྷཱརཎོ སིཡཱ. ཨེཏྠ ཙ སཱིལམཱུལཀཏྟཱ སཱསནསྶ སཱིལེན ཨཱདིཀལྱཱཎཏཱ ཝུཏྟཱ, སཱསནསམྤཏྟིཡཱ ཝེམཛ྄ཛྷབྷཱཝཏོ མགྒེན མཛ྄ཛྷེཀལྱཱཎཏཱ. ནིབྦཱནཱདྷིགམཏོ ¶ ཨུཏྟརི ཀརཎཱིཡཱབྷཱཝཏོ ནིབྦཱནེན པརིཡོསཱནཀལྱཱཎཏཱ. ཏེནཱཏི སཱིལཱདིདསྶནེན. ཨཏྠཝསེན ཧི ཨིདྷ དེསནཱཡ ཨཱདིཀལྱཱཎཱདིབྷཱཝོ ཝུཏྟོ. ‘‘ཏསྨཱ’’ཏིཨཱདི ཡཐཱཝུཏྟཱནུསཱརེན སོཏཱུནམནུསཱསནཱིདསྶནཾ.

ཨེསཱཏི ཡཐཱཝུཏྟཱཀཱརེན ཀཐནཱ. ཀཐིཀསཎྛིཏཱིཏི དྷམྨཀཐིཀསྶ སཎྛཱནཾ ཀཐནཝསེན སམཝཊྛཱནཾ.

ཝཎྞནཱ ཨཏྠཝིཝརཎཱ, པསཾསནཱ ཝཱ. ན སོ སཱཏྠཾ དེསེཏི ནིཡྻཱནཏྠཝིརཧཏོ ཏསྶཱ དེསནཱཡ. ཏསྨཱཏི ཙཏུསཏིཔཊྛཱནཱདིནིཡྻཱནཏྠདེསནཏོ. ཨེཀབྱཉྫནཱདིཡུཏྟཱཏི སིཐིལདྷནིཏཱདིབྷེདེསུ དསསུ ¶ བྱཉྫནེསུ ཨེཀཔྤཀཱརེནེཝ, དྭིཔྤཀཱརེནེཝ ཝཱ བྱཉྫནེན ཡུཏྟཱ དམིལ༹བྷཱསཱ ཝིཡ. སབྦནིརོཊྛབྱཉྫནཱཏི ཝིཝཊཀརཎཏཱཡ ཨོཊྛེ ཨཕུསཱཔེཏྭཱ ཨུཙྩཱརེཏབྦཏོ སབྦཐཱ ཨོཊྛཕུསནརཧིཏཝིམུཏྟབྱཉྫནཱ ཀིརཱཏབྷཱསཱ ཝིཡ. སབྦཝིསྶཊྛབྱཉྫནཱཏི སབྦསྶེཝ ཝིསྶཛྫནཱིཡཡུཏྟཏཱཡ སབྦཐཱ ཝིསྶགྒབྱཉྫནཱ སཝརབྷཱསཱ ཝིཡ. སབྦནིགྒཧིཏབྱཉྫནཱཏི སབྦསྶེཝ སཱནུསཱརཏཱཡ སབྦཐཱ བིནྡུསཧིཏབྱཉྫནཱ པཱརསིཀཱདིམིལཀྑུབྷཱསཱ ཝིཡ. ཨེཝཾ ‘‘དམིལ༹ཀིརཱཏསཝརམིལཀྑཱུནཾ བྷཱསཱ ཝིཡཱ’’ཏི ཨིདཾ པཙྩེཀཾ ཡོཛེཏབྦཾ. མིལཀྑཱུཏི ཙ པཱརསིཀཱདཡོ. སབྦཱཔེསཱ བྱཉྫནེཀདེསཝསེནེཝ པཝཏྟིཡཱ ཨཔརིཔུཎྞབྱཉྫནཱཏི ཝུཏྟཾ ‘‘བྱཉྫནཔཱརིཔཱུརིཡཱ ཨབྷཱཝཏོ ཨབྱཉྫནཱ ནཱམཱ’’ཏི.

ཋཱནཀརཎཱནི སིཐིལཱནི ཀཏྭཱ ཨུཙྩཱརེཏབྦམཀྑརཾ པཉྩསུ ཝགྒེསུ པཋམཏཏིཡཾ སིཐིལཾ. ཏཱནི ཨསིཐིལཱནི ཀཏྭཱ ཨུཙྩཱརེཏབྦམཀྑརཾ ཏེསྭེཝ དུཏིཡཙཏུཏྠཾ དྷནིཏཾ. དྭིམཏྟཀཱལམཀྑརཾ དཱིགྷཾ. ཨེཀམཏྟཀཱལཾ རསྶཾ.

པམཱཎཾ ཨེཀམཏྟསྶ, ནིམཱིསུམཱིསཏོ’ བྲཝུཾ;

ཨངྒུལིཕོཊཀཱལསྶ, པམཱཎེནཱཔི ཨབྲཝུཾ.

སཉྙོགཔརཾ, དཱིགྷཉྩ གརུཀཾ. ཨསཾཡོགཔརཾ རསྶཾ ལཧུཀཾ. ཋཱནཀརཎཱནི ནིགྒཧེཏྭཱ ཨཝིཝཊེན མུཁེན ཨུཙྩཱརེཏབྦཾ ནིགྒཧིཏཾ. པརཔདེན སམྦཛ྄ཛྷིཏྭཱ ཨུཙྩཱརེཏབྦཾ སམྦནྡྷཾ. ཏཐཱ ཨསམྦཛ྄ཛྷིཏབྦཾ ཝཝཏྠིཏཾ. ཋཱནཀརཎཱནི ཝིསྶཊྛཱནི ཀཏྭཱ ཝིཝཊེན མུཁེན ཨུཙྩཱརེཏབྦཾ ཝིམུཏྟཾ. དསདྷཱཏིཨཱདཱིསུ ཨེཝཾ སིཐིལཱདིཝསེན བྱཉྫནབུདྡྷིསངྑཱཏསྶ ཨཀྑརུཔྤཱདཀཙིཏྟསྶ དསཧི པཀཱརེཧི བྱཉྫནཱནཾ པབྷེདོཏི ཨཏྠོ. སབྦཱནི ཧི ཨཀྑརཱནི ཙིཏྟསམུཊྛཱནཱནི, ཡཐཱདྷིཔྤེཏཏྠསྶ ¶ ཙ བྱཉྫནཏོ པཀཱསནཏོ བྱཉྫནཱནཱིཏི, བྱཉྫནབུདྡྷིཡཱ ཝཱ ཀརཎབྷཱུཏཱཡ བྱཉྫནཱནཾ དསདྷཱ པབྷེདོཏིཔི ཡུཛྫཏི.

ཨམཀྑེཏྭཱཏི ཨམིལེཙྪེཏྭཱ ཨཝིནཱསེཏྭཱ, ཨཧཱཔེཏྭཱཏི ཨཏྠོ. ཏདཏྠམཱཧ ‘‘པརིཔུཎྞབྱཉྫནམེཝ ཀཏྭཱ’’ཏི, ཡམཏྠཾ བྷགཝཱ ཉཱཔེཏུཾ ཨེཀགཱཐཾ, ཨེཀཝཱཀྱམྤི དེསེཏི, ཏམཏྠཾ པརིམཎྜལཔདབྱཉྫནཱཡ ཨེཝ དེསནཱཡ དེསེཏཱིཏི ཝུཏྟཾ ཧོཏི. ཏསྨཱཏི པརིཔུཎྞབྱཉྫནདྷམྨདེསནཏོ ¶ . ཀེཝལསདྡོ ཨིདྷ ཨནཝསེསཝཱཙཀོ. ན ཨཝོམིསྶཏཱདིཝཱཙཀོཏི ཨཱཧ ‘‘སཀལཱདྷིཝཙན’’ནྟི. པརིཔུཎྞནྟི སབྦསོ པུཎྞཾ. ཏཾ པནཏྠཏོ ཨཱུནཱདྷིཀནིསེདྷནནྟི ཝུཏྟཾ ‘‘ཨནཱུནཱདྷིཀཝཙན’’ནྟི. ཏཏྠ ཡདཏྠཾ དེསིཏོ, ཏསྶ སཱདྷཀཏྟཱ ཨནཱུནཏཱ ཝེདིཏབྦཱ, ཏབྦིདྷུརསྶ པན ཨསཱདྷཀཏྟཱ ཨནདྷིཀཏཱ. ཨུཔནེཏབྦསྶ ཝཱ ཝོདཱནཏྠསྶ ཨཝུཏྟསྶ ཨབྷཱཝཏོ ཨནཱུནཏཱ, ཨཔནེཏབྦསྶ སཾཀིལེསཏྠསྶ ཝུཏྟསྶ ཨབྷཱཝཏོ ཨནདྷིཀཏཱ. སཀལནྟི སབྦབྷཱགཝནྟཾ. པརིཔུཎྞནྟི སབྦསོ པུཎྞམེཝ. ཏེནཱཧ ‘‘ཨེཀདེསེནཱཔི ཨཔརིཔུཎྞཱ ནཏྠཱི’’ཏི. ཨཔརིསུདྡྷཱ དེསནཱ ཧོཏི ཏཎྷཱཡ སཾཀིལིཊྛཏྟཱ. ལོཀེཧི ཏཎྷཱཡ ཨཱམསིཏབྦཏོ ལོཀཱམིསཱ, ཙཱིཝརཱདཡོ པཙྩཡཱ, ཏེསུ ཨགདྷིཏཙིཏྟཏཱཡ ལོཀཱམིསནིརཔེཀྑོ. ཧིཏཕརཎེནཱཏི ཧིཏཏོ ཕརཎེན ཧིཏཱུཔསཾཧཱརེན ཝིསེསནབྷཱུཏེན. མེཏྟཱབྷཱཝནཱཡ ཀརཎབྷཱུཏཱཡ མུདུཧདཡོ. ཨུལླུམྤནསབྷཱཝསཎྛིཏེནཱཏི སཀལསཾཀིལེསཏོ, ཝཊྚདུཀྑཏོ ཙ ཨུདྡྷརཎཱཀཱརསཎྛིཏེན, ཀཱརུཉྙཱདྷིཔྤཱཡེནཱཏི ཝུཏྟཾ ཧོཏི.

‘‘ཨིཏོ པཊྛཱཡ དསྶཱམི, ཨེཝཉྩ དསྶཱམཱི’’ཏི སམཱདཱཏབྦཊྛེན དཱནཾ ཝཏཾ. པཎྜིཏཔཉྙཏྟཏཱཡ སེཊྛཊྛེན བྲཧྨཾ, བྲཧྨཱནཾ ཝཱ སེཊྛཱནཾ ཙརིཡནྟི དཱནམེཝ བྲཧྨཙརིཡཾ. མཙྪརིཡལོབྷཱདིནིགྒཧཎེན སམཱཙིཎྞཏྟཱ དཱནམེཝ སུཙིཎྞཾ. ཨིདྡྷཱིཏི དེཝིདྡྷི. ཛུཏཱིཏི པབྷཱ, ཨཱནུབྷཱཝོ ཝཱ. བལཝཱིརིཡཱུཔཔཏྟཱིཏི མཧཏཱ བལེན, ཝཱིརིཡེན ཙ སམནྣཱགམོ. ནཱགཱཏི ཝརུཎནཱགརཱཛཱནཾ ཝིདྷུརཔཎྜིཏསྶ ཨཱལཔནཾ.

དཱནཔཏཱིཏི དཱནསཱམིནོ. ཨོཔཱནབྷཱུཏནྟི ཨུདཀཏིཏྠམིཝ བྷཱུཏཾ.

དྷཱིརཱཏི སོ ཝིདྷུརཔཎྜིཏམཱལཔཏི.

མདྷུསྶཝོཏི མདྷུརསསནྡནཾ. པུཉྙནྟི པུཉྙཕལཾ, ཀཱརཎཝོཧཱརེན ཝུཏྟཾ. བྲཧྨཾ, བྲཧྨཱནཾ ཝཱ ཙརིཡནྟི བྲཧྨཙརིཡཾ, ཝེཡྻཱཝཙྩཾ. ཨེས ནཡོ སེསེསུཔི.

ཏིཏྟིརིཡནྟི ¶ ཏིཏྟིརསཀུཎརཱཛེན བྷཱསིཏཾ.

ཨཉྙཏྲ ཏཱཧཱིཏི པརདཱརབྷཱུཏཱཧི ཝཛྫེཏྭཱ. ཨམྷནྟི ཨམྷཱཀཾ.

ཏཔསྶཱི ¶ , ལཱུཁོ, ཛེགུཙྪཱི, པཝིཝིཏྟོཏི ཙཏུབྦིདྷསྶ དུཀྐརསྶ ཀཏཏྟཱ ཙཏུརངྒསམནྣཱགཏཾ. སུདནྟི ནིཔཱཏམཏྟཾ. ལོམཧཾསནསུཏྟཾ མཛ྄ཛྷིམཱགམེ མཱུལཔཎྞཱསཀེ, ‘‘མཧཱསཱིཧནཱདསུཏྟ’’ནྟིཔི (མ. ནི. ༡.༡༤༦) ཏཾ ཝདནྟི.

ཨིདྡྷནྟི སམིདྡྷཾ. ཕཱིཏནྟི ཕུལླིཏཾ. ཝིཏྠཱརིཀནྟི ཝིཏྠཱརབྷཱུཏཾ. བཱཧུཛཉྙནྟི བཧཱུཧི ཛནེཧི ནིཡྻཱནིཀབྷཱཝེན ཉཱཏཾ. པུཐུབྷཱུཏནྟི བཧུབྷཱུཏཾ. ཡཱཝ དེཝམནུསྶེཧཱིཏི ཨེཏྠ དེཝལོཀཏོ ཡཱཝ མནུསྶལོཀཱ སུཔཀཱསིཏནྟི ཨདྷིཔྤཱཡཝསེན པཱསཱདིཀསུཏྟཊྛཀཐཱཡཾ (དཱི. ནི. ཨཊྛ. ༣.༡༧༠) ཝུཏྟཾ, ཡཱཝ དེཝཱ ཙ མནུསྶཱ ཙཱཏི ཨཏྠོ. ཏསྨཱཏི ཡསྨཱ སིཀྑཏྟཡསངྒཧཾ སཀལསཱསནཾ ཨིདྷ ‘‘བྲཧྨཙརིཡ’’ནྟི ཨདྷིཔྤེཏཾ, ཏསྨཱ. ‘‘བྲཧྨཙརིཡ’’ནྟི ཨིམིནཱ སམཱནཱདྷིཀརཎཱནི སབྦཔདཱནི ཡོཛེཏྭཱ ཨཏྠཾ དསྶེནྟོ ‘‘སོ དྷམྨཾ དེསེཏཱི’’ཏིཨཱདིམཱཧ. ‘‘ཨེཝཾ དེསེནྟོ ཙཱ’’ཏི ཧི ཨིམིནཱ བྲཧྨཙརིཡསདྡེན དྷམྨསདྡཱདཱིནཾ སམཱནཏྠཏཾ དསྶེཏི, ‘‘དྷམྨཾ དེསེཏཱི’’ཏི ཝཏྭཱཔི ‘‘བྲཧྨཙརིཡཾ པཀཱསེཏཱི’’ཏི ཝཙནཾ སརཱུཔཏོ ཨཏྠཔྤཀཱསནཏྠནྟི ཙ ཝིབྷཱཝེཏི.

༡༩༡. ཝུཏྟཔྤཀཱརསམྤདནྟི ཡཐཱཝུཏྟཨཱདིཀལྱཱཎཏཱདིཔྤབྷེདགུཎསམྤདཾ. དཱུརསམུསྶཱརིཏམཱནསྶེཝ སཱསནེ སམྨཱཔཊིཔཏྟི སམྦྷཝཏི, ན མཱནཛཱཏིཀསྶཱཏི ཝུཏྟཾ ‘‘ནིཧཏམཱནཏྟཱ’’ཏི. ཨུསྶནྣཏྟཱཏི བཧུལབྷཱཝཏོ. བྷོགརཱུཔཱདིཝཏྠུཀཱ མདཱ སུཔྤཧེཡྻཱ ཧོནྟི ནིམིཏྟསྶ ཨནཝཊྛཱནཏོ, ན ཏཐཱ ཀུལཝིཛྫཱདིམདཱ ནིམིཏྟསྶ སམཝཊྛཱནཏོ. ཏསྨཱ ཁཏྟིཡབྲཱཧྨཎཀུལཱིནཱནཾ པབྦཛིཏཱནམྤི ཛཱཏིཝིཛྫཾ ནིསྶཱཡ མཱནཛཔྤནཾ དུཔྤཛཧནྟི ཨཱཧ ‘‘ཡེབྷུཡྻེན…པེ… མཱནཾ ཀརོནྟཱི’’ཏི. ཝིཛཱཏིཏཱཡཱཏི ཝིཔརཱིཏཛཱཏིཏཱཡ, ཧཱིནཛཱཏིཏཱཡཱཏི ཨཏྠོ. ཡེབྷུཡྻེན ཨུཔནིསྶཡསམྤནྣཱ སུཛཱཏིཀཱ ཨེཝ, ན དུཛྫཱཏིཀཱཏི ཨེཝཾ ཝུཏྟཾ. པཏིཊྛཱཏུཾ ན སཀྐོནྟཱིཏི སཱིལེ པཏིཊྛཧིཏུཾ ན ཨུསྶཧནྟི, སུཝིསུདྡྷཾ ཀཏྭཱ སཱིལཾ རཀྑིཏུཾ ན སཀྐོནྟཱིཏི ཝུཏྟཾ ཧོཏི. སཱིལམེཝ ཧི སཱསནེ པཏིཊྛཱ, པཏིཊྛཱཏུནྟི ཝཱ སཙྩཔཊིཝེདྷེན ལོཀུཏྟརཱཡ པཏིཊྛཱཡ པཏིཊྛཱཏུཾ. སཱ ཧི ནིཔྤརིཡཱཡཏོ སཱསནེ པཏིཊྛཱ ནཱམ.

ཨེཝཾ བྱཏིརེཀཏོ ཨཏྠཾ ཝཏྭཱ ཨནྭཡཏོཔི ཝདཏི ‘‘གཧཔཏིདཱརཀཱ པནཱ’’ཏིཨཱདིནཱ. ཀཙྪེཧི ¶ སེདཾ མུཉྩནྟེཧཱིཏི ཨིཏྠམྦྷཱུཏལཀྑཎེ ཀརཎཝཙནཾ. ཏཐཱ པིཊྛིཡཱ ལོཎཾ པུཔྥམཱནཱཡཱཏི, སེདཾ མུཉྩནྟཀཙྪཱ ¶ ལོཎཾ པུཔྥམཱནཔིཊྛིཀཱ ཧུཏྭཱ, ཏེཧི ཝཱ པཀཱརེཧི ལཀྑིཏཱཏི ཨཏྠོ. བྷཱུམིཾ ཀསིཏྭཱཏི བྷཱུམིཡཱ ཀསྶནཏོ, ཁེཏྟཱུཔཛཱིཝནཏོཏི ཝུཏྟཾ ཧོཏི. ཏཱདིསསྶཱཏི ཛཱཏིམནྟཱུཔནིསྶཡསྶ. དུབྦལཾ མཱནཾ. བལཝཾ དཔྤཾ. ཀམྨནྟི པརིཀམྨཾ. ‘‘ཨིཏརེཧཱི’’ཏིཨཱདིནཱ ‘‘ཨུསྶནྣཏྟཱ’’ཏི ཧེཏུཔདཾ ཝིཝརཏི. ‘‘ཨིཏཱི’’ཏི ཝཏྭཱ ཏདཔརཱམསིཏབྦཾ དསྶེཏི ‘‘ནིཧཏམཱནཏྟཱ’’ཏིཨཱདིནཱ, ཨིཏིསདྡོ ཝཱ ནིདསྶནེ, ཨེཝཾ ཡཐཱཝུཏྟནཡེནཱཏི ཨཏྠོ. ཨེས ནཡོ ཨཱིདིསེསུ.

པཙྩཱཛཱཏོཏི ཨེཏྠ ཨཱཀཱརོ ཨུཔསགྒམཏྟནྟི ཨཱཧ ‘‘པཏིཛཱཏོ’’ཏི. པརིསུདྡྷནྟི རཱགཱདཱིནཾ ཨཙྩནྟམེཝ པཧཱནདཱིཔནཏོ ནིརུཔཀྐིལེསཏཱཡ སབྦཐཱ སུདྡྷཾ. དྷམྨསྶ སཱམཱི ཏདུཔྤཱདཀཊྛེན, དྷམྨེན ཝཱ སདེཝཀསྶ ལོཀསྶ སཱམཱིཏི དྷམྨསྶཱམཱི. སདྡྷནྟི པོཐུཛྫནིཀསདྡྷཱཝསེན སདྡཧནཾ. ཝིཉྙཱུཛཱཏིཀཱནཉྷི དྷམྨསམྤཏྟིགཧཎཔུབྦིཀཱ སདྡྷཱསིདྡྷི ཙཏཱུསུ པུགྒལེསུ དྷམྨཔྤམཱཎདྷམྨཔྤསནྣཔུགྒལབྷཱཝཏོ. ‘‘ཡོ ཨེཝཾ སྭཱཀྑཱཏདྷམྨོ, སམྨཱསམྦུདྡྷོ ཝཏ སོ བྷགཝཱ’’ཏི སདྡྷཾ པཊིལབྷཏི. ཡོཛནསཏནྟརེཔི ཝཱ པདེསེ. ཛཱཡམྤཏིཀཱཏི ཛཱནིཔཏིཀཱ. ཀཱམཾ ‘‘ཛཱཡམྤཏིཀཱ’’ཏི ཝུཏྟེཡེཝ གྷརསཱམིཀགྷརསཱམིནཱིཝསེན དྭིནྣམེཝ གཧཎཾ ཝིཉྙཱཡཏི, ཡསྶ པན པུརིསསྶ ཨནེཀཱ པཛཱཔཏིཡོ, ཏསྶ ཝཏྟབྦམེཝ ནཏྠི. ཨེཀཱཡཔི ཏཱཝ སཾཝཱསོ སམྦཱདྷོཡེཝཱཏི དསྶནཏྠཾ ‘‘དྭེ’’ཏི ཝུཏྟཾ. རཱགཱདིནཱ ཀིཉྩནཾ, ཁེཏྟཝཏྠཱདིནཱ པལིབོདྷནཾ, ཏདུབྷཡེན སཧ ཝཏྟཏཱིཏི སཀིཉྩནཔལིབོདྷནོ, སོཡེཝཏྠོ ཏཐཱ. རཱགོ ཨེཝ རཛོ, ཏདཱདིཀཱ དོསམོཧརཛཱ. ཝུཏྟཉྷི ‘‘རཱགོ རཛོ ན ཙ པན རེཎུ ཝུཙྩཏཱི’’ཏིཨཱདི (མཧཱནི. ༢༠༩; ཙཱུལ༹ནི. ༧༤) ཨཱགམནཔཐཏཱཔི ཨུཊྛཱནཊྛཱནཏཱ ཨེཝཱཏི དྭེཔི སཾཝཎྞནཱ ཨེཀཏྠཱ, བྱཉྫནམེཝ ནཱནཾ. ཨལགྒནཊྛེནཱཏི ཨསཛྫནཊྛེན ཨཔྤཊིབནྡྷསབྷཱཝེན. རཱུཔཀཝསེན, ཏདྡྷིཏཝསེན ཝཱ ཨབྦྷོཀཱསོཏི དསྶེཏུཾ ཝིཡ-སདྡགྒཧཎཾ. ཨེཝཾ ཨཀུསལཀུསལཔྤཝཏྟཱིནཾ ཋཱནཱཋཱནབྷཱཝེན གྷརཱཝཱསཔབྦཛྫཱནཾ སམྦཱདྷབྦྷོཀཱསཏཾ དསྶེཏྭཱ ཨིདཱནི ཀུསལཔྤཝཏྟིཡཱ ཨེཝ ཨཊྛཱནཊྛཱནབྷཱཝེན ཏེསཾ ཏབྦྷཱཝཾ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. རཛཱནཾ སནྣིཔཱཏཊྛཱནཾ ཝིཡཱཏི སམྦནྡྷོ.

ཝིསུཾ ཝིསུཾ པདུདྡྷཱརམཀཏྭཱ སམཱསཏོ ཨཏྠཝཎྞནཱ སངྑེཔཀཐཱ. ཨེཀམྤི དིཝསནྟི ཨེཀདིཝསམཏྟམྤི. ཨཁཎྜཾ ཀཏྭཱཏི དུཀྐཊམཏྟསྶཱཔི ཨནཱཔཛྫནེན ¶ ཨཚིདྡཾ ཀཏྭཱ. ཙརིམཀཙིཏྟནྟི ཙུཏིཙིཏྟཾ. ཀིལེསམལེནཱཏི ཏཎྷཱསཾཀིལེསཱདིམལེན. ཨམལཱིནནྟི ཨསཾཀིལིཊྛཾ. པརིཡོདཱཏཊྛེན ནིམྨལབྷཱཝེན སངྑཾ ཝིཡ ལིཁིཏཾ དྷོཏནྟི སངྑལིཁིཏཾ. ཨཏྠམཏྟཾ པན ¶ དསྶེཏུཾ ‘‘ལིཁིཏསངྑསདིས’’ནྟི ཝུཏྟཾ. དྷོཏསངྑསཔྤཊིབྷཱགནྟི ཏདཏྠསྶེཝ ཝིཝརཎཾ. ཨཔིཙ ལིཁིཏཾ སངྑཾ སངྑལིཁིཏཾ ཡཐཱ ‘‘ཨགྱཱཧིཏོ’’ཏི, ཏསྶདིསཏྟཱ པན ཨིདཾ སངྑལིཁིཏནྟིཔི དསྶེཏི, བྷཱཝནཔུཾསཀཉྩེཏཾ. ཨཛ྄ཛྷཱཝསཏཱཏི ཨེཏྠ ཨདྷི-སདྡེན ཀམྨཔྤཝཙནཱིཡེན ཡོགཏོ ‘‘ཨགཱར’’ནྟི ཨེཏཾ བྷུམྨཏྠེ ཨུཔཡོགཝཙནནྟི ཨཱཧ ‘‘ཨགཱརམཛ྄ཛྷེ’’ཏི. ཡཾ ནཱུན ཡདི པན པབྦཛེཡྻཾ, སཱདྷུ ཝཏཱཏི སམྦནྡྷོ. ཀསཱཡེན རཏྟཱནི ཀཱསཱཡཱནཱིཏི དསྶེཏི ‘‘ཀསཱཡརསཔཱིཏཏཱཡཱ’’ཏི ཨིམིནཱ. ཀསྨཱ ཙེཏཱནི གཧིཏཱནཱིཏི ཨཱཧ ‘‘བྲཧྨཙརིཡཾ ཙརནྟཱནཾ ཨནུཙྪཝིཀཱནཱི’’ཏི. ཨཙྪཱདེཏྭཱཏི ཝོཧཱརཝཙནམཏྟཾ, པརིདཧིཏྭཱཏི ཨཏྠོ, ཏཉྩ ཁོ ནིཝཱསནཔཱརུཔནཝསེན. ཨགཱརཝཱསོ ཨགཱརཾ ཨུཏྟརཔདལོཔེན, ཏསྶ ཧིཏཾ ཝུཌྜྷིཨཱཝཧཾ ཀསིཝཱཎིཛྫཱདིཀམྨཾ. ཏཾ ཨནགཱརིཡནྟི ཏསྨིཾ ཨནགཱརིཡེ.

༡༩༢. སཧསྶཏོཏི ཀཧཱཔཎསཧསྶཏོ. བྷོགཀྑནྡྷོ བྷོགརཱསི. ཨཱབནྡྷནཊྛེནཱཏི ‘‘པུཏྟོ ནཏྟཱ པནཏྟཱ’’ཏིཨཱདིནཱ པེམཝསེན པརིཙྪེདཾ ཀཏྭཱ བནྡྷནཊྛེན, ཨེཏེན ཨཱབནྡྷནཏྠོ པརིཝཊྚ-སདྡོཏི དསྶེཏི. ཨཐ ཝཱ པིཏཱམཧཔིཏུཔུཏྟཱདིཝསེན པརིཝཏྟནཊྛེན པརིཝཊྚོཏིཔི ཡུཛྫཏི. ‘‘ཨམྷཱཀམེཏེ’’ཏི ཉཱཡནྟཱིཏི ཉཱཏཡོ.

༡༩༣. པཱཏིམོཀྑསཾཝརེན པིཧིཏཀཱཡཝཙཱིདྭཱརོ སམཱནོ ཏེན སཾཝརེན ཨུཔེཏོ ནཱམཱཏི ཀཏྭཱ ‘‘པཱཏིམོཀྑསཾཝརེན སམནྣཱགཏོ’’ཏི ཝུཏྟཾ. ཨཱཙཱརགོཙརཱནཾ ཝིཏྠཱརོ ཝིབྷངྒཊྛཀཐཱདཱིསུ (ཝིབྷ. ཨཊྛ. ༥༠༣) གཧེཏབྦོ. ‘‘ཨཱཙཱརགོཙརསམྤནྣོ’’ཏིཨཱདི ཙ ཏསྶེཝ པཱཏིམོཀྑསཾཝརསཾཝུཏབྷཱཝསྶ པཙྩཡདསྶནཾ. ཨཎུསདིསཏཱཡ ཨཔྤམཏྟཀཾ ‘‘ཨཎཱུ’’ཏི ཝུཏྟནྟི ཨཱཧ ‘‘ཨཔྤམཏྟཀེསཱུ’’ཏི. ཨསཉྩིཙྩ ཨཱཔནྣཨནུཁུདྡཀཱཔཏྟིཝསེན, སཧསཱ ཨུཔྤནྣཨཀུསལཙིཏྟུཔྤཱདཝསེན ཙ ཨཔྤམཏྟཀཏཱ. བྷཡདསྶཱིཏི བྷཡདསྶནསཱིལོ. སམྨཱཏི ཨཝིཔརཱིཏཾ, སུནྡརཾ ཝཱ, ཏབྦྷཱཝོ ཙ སཀྐཙྩཾ ཡཱཝཛཱིཝཾ ཨཝཱིཏིཀྐམཝསེན. ‘‘སིཀྑཱཔདེསཱུ’’ཏི ཝུཏྟེཡེཝ ཏདཝཡཝབྷཱུཏཾ ¶ ‘‘སིཀྑཱཔདཾ སམཱདཱཡ སིཀྑཏཱི’’ཏི ཨཏྠསྶ གམྱམཱནཏྟཱ ཀམྨཔདཾ ན ཝུཏྟནྟི ཨཱཧ ‘‘ཏཾ ཏཾ སིཀྑཱཔད’’ནྟི, ཏཾ ཏཾ སིཀྑཱཀོཊྛཱསཾ, སིཀྑཱཡ ཝཱ ཨདྷིགམུཔཱཡཾ, ཏསྶཱ ཝཱ ནིསྶཡནྟི ཨཏྠོ.

ཨེཏྠཱཏི ཨེཏསྨིཾ ‘‘པཱཏིམོཀྑསཾཝརསཾཝུཏོ’’ཏིཨཱདིཝཙནེ. ཨཱཙཱརགོཙརགྒཧཎེནེཝཱཏི ‘‘ཨཱཙཱརགོཙརསམྤནྣོ’’ཏི ཝཙནེནེཝ. ཏེནཱཧ ‘‘ཀུསལེ ཀཱཡཀམྨཝཙཱིཀམྨེ གཧིཏེཔཱི’’ཏི. ན ཧི ཨཱཙཱརགོཙརསདྡམཏྟེན ཀུསལཀཱཡཝཙཱིཀམྨགྒཧཎཾ སམྦྷཝཏི, ཨིམིནཱ པུནརུཏྟིཏཱཡ ཙོདནཱལེསཾ དསྶེཏི. ཏསྶཱཏི ཨཱཛཱིཝཔཱརིསུདྡྷིསཱིལསྶ. ཨུཔྤཏྟིདྭཱརདསྶནཏྠནྟི ཨུཔྤཏྟིཡཱ ཀཱཡཝཙཱིཝིཉྙཏྟིསངྑཱཏསྶ ¶ དྭཱརསྶ ཀམྨཱཔདེསེན དསྶནཏྠཾ, ཨེཏེན ཡཐཱཝུཏྟཙོདནཱཡ སོདྷནཾ དསྶེཏི. ཨིདཾ ཝུཏྟཾ ཧོཏི – སིདྡྷེཔི སཏི པུནཱརམྦྷོ ནིཡམཱཡ ཝཱ ཧོཏི, ཨཏྠནྟརབོདྷནཱཡ ཝཱ, ཨིདྷ པན ཨཏྠནྟརཾ བོདྷེཏི, ཏསྨཱ ཨུཔྤཏྟིདྭཱརདསྶནཏྠཾ ཝུཏྟནྟི. ཀུསལེནཱཏི ཙ སབྦསོ ཨནེསནཔཧཱནཏོ ཨནཝཛྫེན. ཀཐཾ ཏེན ཨུཔྤཏྟིདྭཱརདསྶནནྟི ཨཱཧ ‘‘ཡསྨཱ པནཱ’’ཏིཨཱདི. ཀཱཡཝཙཱིདྭཱརེསུ ཨུཔྤནྣེན ཨནཝཛྫེན ཀཱཡཀམྨཝཙཱིཀམྨེན སམནྣཱགཏཏྟཱ པརིསུདྡྷཱཛཱིཝོཏི ཨདྷིཔྤཱཡོ. ཏདུབྷཡམེཝ ཧི ཨཱཛཱིཝཧེཏུཀཾ ཨཱཛཱིཝཔཱརིསུདྡྷིསཱིལཾ.

ཨིདཱནི སུཏྟནྟརེན སཾསནྡིཏུཾ ‘‘མུཎྜིཀཔུཏྟསུཏྟནྟཝསེན ཝཱ ཨེཝཾ ཝུཏྟ’’ནྟི ཨཱཧ. ཝཱ-སདྡོ ཙེཏྠ སུཏྟནྟརསཾསནྡནཱསངྑཱཏཨཏྠནྟརཝིཀཔྤནཏྠོ. མུཎྜིཀཔུཏྟསུཏྟནྟཾ ནཱམ མཛ྄ཛྷིམཱགམཝརེ མཛ྄ཛྷིམཔཎྞཱསཀེ, ཡཾ ‘‘སམཎམུཎྜིཀཔུཏྟསུཏྟ’’ནྟིཔི ཝདནྟི. ཏཏྠ ཐཔཏཱིཏི པཉྩཀངྒཾ ནཱམ ཝཌྜྷཀིཾ བྷགཝཱ ཨཱལཔཏི. ཐཔཏི-སདྡོ ཧི ཝཌྜྷཀིཔརིཡཱཡོ. ཨིདཾ ཝུཏྟཾ ཧོཏི – ཡསྨཱ ‘‘ཀཏམེ ཙ ཐཔཏི ཀུསལཱ སཱིལཱ? ཀུསལཾ ཀཱཡཀམྨཾ ཀུསལཾ ཝཙཱིཀམྨ’’ནྟི སཱིལསྶ ཀུསལཀཱཡཀམྨཝཙཱིཀམྨབྷཱཝཾ དསྶེཏྭཱ ‘‘ཨཱཛཱིཝཔཱརིསུདྡྷམྤི ཁོ ཨཧཾ ཐཔཏི སཱིལསྨིཾ ཝདཱམཱི’’ཏི (མ. ནི. ༢.༢༦༥) ཨེཝཾ པཝཏྟཱཡ མུཎྜིཀཔུཏྟསུཏྟདེསནཱཡ ‘‘ཀཱཡཀམྨཝཙཱིཀམྨེན སམནྣཱགཏོ ཀུསལེནཱ’’ཏི སཱིལསྶ ཀུསལཀཱཡཀམྨཝཙཱིཀམྨབྷཱཝཾ དསྶེཏྭཱ ‘‘པརིསུདྡྷཱཛཱིཝོ’’ཏི ཨེཝཾ པཝཏྟཱ ཨཡཾ སཱམཉྙཕལསུཏྟདེསནཱ ཨེཀསངྒཧཱ ཨཉྙདཏྠུ སཾསནྡཏི སམེཏི ཡཐཱ ཏཾ གངྒོདཀེན ཡམུནོདཀཾ, ཏསྨཱ ཨཱིདིསཱིཔི བྷགཝཏོ དེསནཱཝིབྷཱུཏི ཨཏྠེཝཱཏི ¶ . སཱིལསྨིཾ ཝདཱམཱིཏི སཱིལནྟི ཝདཱམི, སཱིལསྨིཾ ཝཱ ཨཱདྷཱརབྷཱུཏེ ཨནྟོགདྷཾ པརིཡཱཔནྣཾ, ནིདྡྷཱརཎསམུདཱཡབྷཱུཏེ ཝཱ ཨེཀཾ སཱིལནྟི ཝདཱམི.

ཏིཝིདྷེནཱཏི ཙཱུལ༹སཱིལམཛ྄ཛྷིམསཱིལམཧཱསཱིལཏོ ཏིཝིདྷེན. ‘‘མནཙྪཊྛེསཱུ’’ཏི ཨིམིནཱ ཀཱཡཔཉྩམཱནམེཝ གཧཎཾ ནིཝཏྟེཏི. ཨུཔརི ནིདྡེསེ ཝཀྑམཱནེསུ སཏྟསུ ཋཱནེསུ. ཏིཝིདྷེནཱཏི ཙཏཱུསུ པཙྩེཀཾ ཡཐཱལཱབྷཡཐཱབལཡཐཱསཱརུཔྤཏཱཝསེན ཏིབྦིདྷེན.

ཙཱུལ༹མཛ྄ཛྷིམམཧཱསཱིལཝཎྞནཱ

༡༩༤-༢༡༡. ཨེཝནྟི ‘‘སོ ཨེཝཾ པབྦཛིཏོ སམཱནོ པཱཏིམོཀྑསཾཝརསཾཝུཏོ ཝིཧརཏཱི’’ཏིཨཱདིནཱ ནཡེན. ‘‘སཱིལསྨི’’ནྟི ཨིདཾ ནིདྡྷཱརཎེ བྷུམྨཾ ཏཏོ ཨེཀསྶ ནིདྡྷཱརཎཱིཡཏྟཱཏི ཨཱཧ ‘‘ཨེཀཾ སཱིལ’’ནྟི. ཨཔིཙ ཨིམིནཱ ཨཱདྷཱརེ བྷུམྨཾ དསྶེཏི སམུདཱཡསྶ ཨཝཡཝཱདྷིཊྛཱནཏྟཱ ཡཐཱ ‘‘རུཀྑེ སཱཁཱ’’ཏི. ‘‘ཨིད’’ནྟི པདེན ཀཏྭཏྠཝསེན སམཱནཱདྷིཀརཎཾ བྷུམྨཝཙནསྶ ¶ ཀཏྭཏྠེ པཝཏྟནཏོ ཡཐཱ ‘‘ཝནཔྤགུམྦེ ཡཐ ཕུསིཏགྒེ’’ཏི (ཁུ. པཱ. ༦.༡༣; སུ. ནི. ༢༣༦) དསྶེཏི ‘‘པཙྩཏྟཝཙནཏྠེ ཝཱ ཨེཏཾ བྷུམྨ’’ནྟི ཨིམིནཱ. ཨཡམེཝཏྠོཏི པཙྩཏྟཝཙནཏྠོ ཨེཝ. བྲཧྨཛཱལེཏི བྲཧྨཛཱལསུཏྟཝཎྞནཱཡཾ, (དཱི. ནི. ཨཊྛ. ༡.༧) བྲཧྨཛཱལསུཏྟཔདེ ཝཱ. སཾཝཎྞནཱཝསེན ཝུཏྟནཡེནཱཏི ཨཏྠོ. ‘‘ཨིདམསྶ ཧོཏི སཱིལསྨི’’ནྟི ཨེཏྠ མཧཱསཱིལཔརིཡོསཱནེན ནིདྡྷཱརིཡམཱནསྶ ཨབྷཱཝཏོ པཙྩཏྟཝཙནཏྠོཡེཝ སམྦྷཝཏཱིཏི ཨཱཧ ‘‘ཨིདཾ ཨསྶ སཱིལཾ ཧོཏཱིཏི ཨཏྠོ’’ཏི, ཏཏོཡེཝ ཙ པཱལི༹ཡཾ ཨཔིགྒཧཎམཀཏནྟི དཊྛབྦཾ.

༢༡༢. ཨཏྟཱནུཝཱདཔརཱནུཝཱདདཎྜབྷཡཱདཱིནི ཨསཾཝརམཱུལཀཱནི བྷཡཱནི. ‘‘སཱིལསྶཱསཾཝརཏོཏི སཱིལསྶ ཨསཾཝརཎཏོ, སཱིལསཾཝརཱབྷཱཝཏོཏི ཨཏྠོ’’ཏི (དཱི. ནི. ཊཱི. ༡.༢༨༠) ཨཱཙརིཡེན ཝུཏྟཾ, ‘‘ཡདིདཾ སཱིལསཾཝརཏོ’’ཏི པན པདསྶ ‘‘ཡཾ ཨིདཾ བྷཡཾ སཱིལསཾཝརཏོ བྷཝེཡྻཱ’’ཏི ཨཏྠཝཙནཏོ, ‘‘སཱིལསཾཝརཧེཏུ བྷཡཾ ན སམནུཔསྶཏཱི’’ཏི ཙ ཨཏྠསྶ ཨུཔཔཏྟིཏོ སཱིལསཾཝརཏོ སཱིལསཾཝརཧེཏཱུཏི ཨཏྠོཡེཝ སམྦྷཝཏི. ‘‘ཡཾ ཨིདཾ བྷཡཾ སཱིལསཾཝརཏོ བྷཝེཡྻཱ’’ཏི ཧི པཱཋོཔི དིསྶཏི. ‘‘སཾཝརཏོ’’ཏི ཧེཏུཾ ཝཏྭཱ ཏདདྷིགམིཏཨཏྠཝསེན ‘‘ཨསཾཝརམཱུལཀསྶ བྷཡསྶ ཨབྷཱཝཱ’’ཏིཔི ཧེཏུཾ ¶ ཝདཏི. ཡཐཱཝིདྷཱནཝིཧིཏེནཱཏི ཡཐཱཝིདྷཱནཾ སམྤཱདིཏེན. ཁཏྟིཡཱབྷིསེཀེནཱཏི ཁཏྟིཡབྷཱཝཱཝཧེན ཨབྷིསེཀེན. མུདྡྷནི ཨཝསིཏྟོཏི མཏྠཀེཡེཝ ཨབྷིསིཏྟོ. ཨེཏྠ ཙ ‘‘ཡཐཱཝིདྷཱནཝིཧིཏེནཱ’’ཏི ཨིམིནཱ པོརཱཎཀཱཙིཎྞཝིདྷཱནསམངྒིཏཱསངྑཱཏཾ ཨེཀཾ ཨངྒཾ དསྶེཏི, ‘‘ཁཏྟིཡཱབྷིསེཀེནཱ’’ཏི ཨིམིནཱ ཁཏྟིཡབྷཱཝཱཝཧཏཱསངྑཱཏཾ, ‘‘མུདྡྷནི ཨཝསིཏྟོ’’ཏི ཨིམིནཱ མུདྡྷནིཡེཝ ཨབྷིསིཉྩིཏབྷཱཝསངྑཱཏཾ. ཨིཏི ཏིཝངྒསམནྣཱགཏོ ཁཏྟིཡཱབྷིསེཀོ ཝུཏྟོ ཧོཏི. ཡེན ཨབྷིསིཏྟརཱཛཱུནཾ རཱཛཱནུབྷཱཝོ སམིཛ྄ཛྷཏི. ཀེན པནཱཡམཏྠོ ཝིཉྙཱཡཏཱིཏི? པོརཱཎཀསཏྠཱགཏནཡེན. ཝུཏྟཉྷི ཨགྒཉྙསུཏྟཊྛཀཐཱཡཾ མཧཱསམྨཏཱབྷིསེཀཝིབྷཱཝནཱཡ ‘‘ཏེ པནསྶ ཁེཏྟསཱམིནོ ཏཱིཧི སངྑེཧི ཨབྷིསེཀམྤི ཨཀཾསཱུ’’ཏི (དཱི. ནི. ཨཊྛ. ༣.༡༣༡) མཛ྄ཛྷིམཱགམཊྛཀཐཱཡཉྩ མཧཱསཱིཧནཱདསུཏྟཝཎྞནཱཡཾ ཝུཏྟཾ ‘‘མུདྡྷཱཝསིཏྟེནཱཏི ཏཱིཧི སངྑེཧི ཁཏྟིཡཱབྷིསེཀེན མུདྡྷནི ཨབྷིསིཏྟེནཱ’’ཏི (མ. ནི. ཨཊྛ. ༡.༡༦༠) སཱིཧལ༹ཊྛཀཐཱཡམྤི ཙཱུལ༹སཱིཧནཱདསུཏྟཝཎྞནཱཡཾ ‘‘པཋམཾ ཏཱཝ ཨབྷིསེཀཾ གཎྷནྟཱནཾ རཱཛཱུནཾ སུཝཎྞམཡཱདཱིནི ཏཱིཎི སངྑཱནི ཙ གངྒོདཀཉྩ ཁཏྟིཡཀཉྙཉྩ ལདྡྷུཾ ཝཊྚཏཱི’’ཏིཨཱདི ཝུཏྟཾ.

ཨཡཾ པན ཏཏྠཱགཏནཡེན ཨབྷིསེཀཝིདྷཱནཝིནིཙྪཡོ – ཨབྷིསེཀམངྒལཏྠཉྷི ཨལངྐཏཔཊིཡཏྟསྶ མཎྜཔསྶ ཨནྟོཀཏསྶ ཨུདུམྦརསཱཁམཎྜཔསྶ མཛ྄ཛྷེ སུཔྤཏིཊྛིཏེ ཨུདུམྦརབྷདྡཔཱིཋམྷི ཨབྷིསེཀཱརཧཾ ཨབྷིཛཙྩཾ ཁཏྟིཡཾ ནིསཱིདཱཔེཏྭཱ པཋམཾ ཏཱཝ མངྒལཱབྷརཎབྷཱུསིཏཱ ¶ ཛཱཏིསམྤནྣཱ ཁཏྟིཡཀཉྙཱ གངྒོདཀཔུཎྞཾ སུཝཎྞམཡསཱམུདྡིཀདཀྑིཎཱཝཊྚསངྑཾ ཨུབྷོཧི ཧཏྠེཧི སཀྐཙྩཾ གཧེཏྭཱ སཱིསོཔརི ཨུསྶཱཔེཏྭཱ ཏེན ཏསྶ མུདྡྷནི ཨབྷིསེཀོདཀཾ ཨབྷིསིཉྩཏི, ཨེཝཉྩ ཝདེཏི ‘‘དེཝ ཏཾ སབྦེཔི ཁཏྟིཡགཎཱ ཨཏྟཱནམཱརཀྑཏྠཾ ཨིམིནཱ ཨབྷིསེཀེན ཨབྷིསེཀིཀཾ མཧཱརཱཛཾ ཀརོནྟི, ཏྭཾ རཱཛདྷམྨེསུ ཋིཏོ དྷམྨེན སམེན རཛྫཾ ཀཱརེཧི, ཨེཏེསུ ཁཏྟིཡགཎེསུ ཏྭཾ པུཏྟསིནེཧཱནུཀམྤཱཡ སཧིཏཙིཏྟོ, ཧིཏསམམེཏྟཙིཏྟོ ཙ བྷཝ, རཀྑཱཝརཎགུཏྟིཡཱ ཏེསཾ རཀྑིཏོ ཙ བྷཝཱཧཱི’’ཏི. ཏཏོ པུན པུརོཧིཏོཔི པོརོཧིཙྩཋཱནཱནུརཱུཔཱལངྐཱརེཧི ཨལངྐཏཔཊིཡཏྟོ གངྒོདཀཔུཎྞཾ རཛཏམཡཾ སངྑཾ ཨུབྷོཧི ཧཏྠེཧི སཀྐཙྩཾ གཧེཏྭཱ ཏསྶ སཱིསོཔརི ཨུསྶཱཔེཏྭཱ ཏེན ཏསྶ མུདྡྷནི ཨབྷིསེཀོདཀཾ ཨབྷིསིཉྩཏི, ཨེཝཉྩ ཝདེཏི ‘‘དེཝ ཏཾ སབྦེཔི བྲཱཧྨཎགཎཱ ¶ ཨཏྟཱནམཱརཀྑཏྠཾ ཨིམིནཱ ཨབྷིསེཀེན ཨབྷིསེཀིཀཾ མཧཱརཱཛཾ ཀརོནྟི, ཏྭཾ རཱཛདྷམྨེསུ ཋིཏོ དྷམྨེན སམེན རཛྫཾ ཀཱརེཧི, ཨེཏེསུ བྲཱཧྨཎགཎེསུ ཏྭཾ པུཏྟསིནེཧཱནུཀམྤཱཡ སཧིཏཙིཏྟོ, ཧིཏསམམེཏྟཙིཏྟོ ཙ བྷཝ, རཀྑཱཝརཎགུཏྟིཡཱ ཏེསཾ རཀྑིཏོ ཙ བྷཝཱཧཱི’’ཏི. ཏཏོ པུན སེཊྛིཔི སེཊྛིཊྛཱནབྷཱུསནབྷཱུསིཏོ གངྒོདཀཔུཎྞཾ རཏནམཡཾ སངྑཾ ཨུབྷོཧི ཧཏྠེཧི སཀྐཙྩཾ གཧེཏྭཱ ཏསྶ སཱིསོཔརི ཨུསྶཱཔེཏྭཱ ཏེན ཏསྶ མུདྡྷནི ཨབྷིསེཀོདཀཾ ཨབྷིསིཉྩཏི, ཨེཝཉྩ ཝདེཏི ‘‘དེཝ ཏཾ སབྦེཔི གཧཔཏིགཎཱ ཨཏྟཱནམཱརཀྑཏྠཾ ཨིམིནཱ ཨབྷིསེཀེན ཨབྷིསེཀིཀཾ མཧཱརཱཛཾ ཀརོནྟི, ཏྭཾ རཱཛདྷམྨེསུ ཋིཏོ དྷམྨེན སམེན རཛྫཾ ཀཱརེཧི, ཨེཏེསུ གཧཔཏིགཎེསུ ཏྭཾ པུཏྟསིནེཧཱནུཀམྤཱཡ སཧིཏཙིཏྟོ, ཧིཏསམམེཏྟཙིཏྟོ ཙ བྷཝ, རཀྑཱཝརཎགུཏྟིཡཱ ཏེསཾ རཀྑིཏོ ཙ བྷཝཱཧཱི’’ཏི. ཏེ པན ཏསྶ ཨེཝཾ ཝདནྟཱ ‘‘སཙེ ཏྭཾ ཨམྷཱཀཾ ཝཙནཱནུརཱུཔཾ རཛྫཾ ཀརིསྶསི, ཨིཙྩེཏཾ ཀུསལཾ. ནོ ཙེ ཀརིསྶསི, ཏཝ མུདྡྷཱ སཏྟདྷཱ ཕལཏཱུ’’ཏི ཨེཝཾ རཉྙོ ཨབྷིསཔནྟི ཝིཡཱཏི དཊྛབྦནྟི. ཝཌྜྷཀཱིསཱུཀརཛཱཏཀཱདཱིཧི ཙཱཡམཏྠོ ཝིབྷཱཝེཏབྦོ, ཨབྷིསེཀོཔཀརཎཱནིཔི སམནྟཔཱསཱདིཀཱདཱིསུ (པཱརཱ. ཨཊྛ. ༡.ཏཏིཡསངྒཱིཏིཀཐཱ) གཧེཏབྦཱནཱིཏི.

ཡསྨཱ ནིཧཏཔཙྩཱམིཏྟོ, ཏསྨཱ ན སམནུཔསྶཏཱིཏི སམྦནྡྷོ. ཨནཝཛྫཏཱ ཀུསལབྷཱཝེནཱཏི ཨཱཧ ‘‘ཀུསལཾ སཱིལཔདཊྛཱནེཧཱི’’ཏིཨཱདི. ཨིདཾ ཝུཏྟཾ ཧོཏི – ཀུསལསཱིལཔདཊྛཱནཱ ཨཝིཔྤཊིསཱརཔཱམོཛྫཔཱིཏིཔསྶདྡྷིདྷམྨཱ, ཨཝིཔྤཊིསཱརཱདིནིམིཏྟཉྩ ཨུཔྤནྣཾ ཙེཏསིཀསུཁཾ པཊིསཾཝེདེཏི, ཙེཏསིཀསུཁསམུཊྛཱནེཧི ཙ པཎཱིཏརཱུཔེཧི ཕུཊྛསརཱིརསྶ ཨུཔྤནྣཾ ཀཱཡིཀསུཁནྟི.

ཨིནྡྲིཡསཾཝརཀཐཱཝཎྞནཱ

༢༡༣. སཱམཉྙསྶ ¶ ཝིསེསཱཔེཀྑཏཱཡ ཨིདྷཱདྷིཔྤེཏོཔི ཝིསེསོ ཏེན ཨཔརིཙྩཏྟོ ཨེཝ ཧོཏཱིཏི ཨཱཧ ‘‘ཙཀྑུསདྡོ ཀཏྠཙི བུདྡྷཙཀྑུམྷི ཝཏྟཏཱི’’ཏིཨཱདི. ཝིཛྫམཱནམེཝ ཧི ཨབྷིདྷེཡྻབྷཱཝེན ཝིསེསཏྠཾ ཝིསེསནྟརནིཝཏྟནེན ཝིསེསསདྡོ ཝིབྷཱཝེཏི, ན ཨཝིཛྫམཱནཾ. སེསཔདེསུཔི ཨེསེཝ ནཡོ. ཨཉྙེཧི ཨསཱདྷཱརཎཾ བུདྡྷཱནམེཝ ཙཀྑུ དསྶནནྟི ¶ བུདྡྷཙཀྑུ, ཨཱསཡཱནུསཡཉཱཎཾ, ཨིནྡྲིཡཔརོཔརིཡཏྟཉཱཎཉྩ. སམནྟཏོ སབྦསོ དསྶནཊྛེན ཙཀྑཱུཏི སམནྟཙཀྑུ, སབྦཉྙུཏཉྙཱཎཾ. ཏཐཱུཔམནྟི པབྦཏམུདྡྷཱུཔམཾ, དྷམྨམཡཾ པཱསཱདནྟི སམྦནྡྷོ. སུམེདྷ སམནྟཙཀྑུ ཏྭཾ ཛནཏམཝེཀྑསྶཱུཏི ཨཏྠོ. ཨརིཡམགྒཏྟཡཔཉྙཱཏི ཧེཊྛིམཱརིཡམགྒཏྟཡཔཉྙཱ. ‘‘དྷམྨཙཀྑུ ནཱམ ཧེཊྛིམཱ ཏཡོ མགྒཱ, ཏཱིཎི ཙ ཕལཱནཱི’’ཏི སལཱ༹ཡཏནཝགྒཊྛཀཐཱཡཾ (སཾ. ནི. ཨཊྛ. ༣.༤.༤༡༨) ཝུཏྟཾ, ཨིདྷ པན མགྒེཧེཝ ཕལཱནི སངྒཧེཏྭཱ དསྶེཏི. ཙཏུསཙྩསངྑཱཏེ དྷམྨེ ཙཀྑཱུཏི ཧི དྷམྨཙཀྑུ. པཉྙཱཡེཝ དསྶནཊྛེན ཙཀྑཱུཏི པཉྙཱཙཀྑུ, པུབྦེནིཝཱསཱསཝཀྑཡཉཱཎཾ. དིབྦཙཀྑུམྷཱིཏི དུཏིཡཝིཛྫཱཡ. ཨིདྷཱཏི ‘‘ཙཀྑུནཱ རཱུཔཾ དིསྭཱ’’ཏི ཨིམསྨིཾ པཱཋེ. ཨཡནྟི ཙཀྑུསདྡོ. ‘‘པསཱདཙཀྑུཝོཧཱརེནཱ’’ཏི ཨིམིནཱ ཨིདྷ ཙཀྑུསདྡོ ཙཀྑུཔསཱདེཡེཝ ནིཔྤརིཡཱཡཏོ ཝཏྟཏི, པརིཡཱཡཏོ པན ནིསྶཡཝོཧཱརེན ནིསྶིཏསྶ ཝཏྟབྦཏོ ཙཀྑུཝིཉྙཱཎེཔི ཡཐཱ ‘‘མཉྩཱ ཨུཀྐུཊྛིཾ ཀརོནྟཱི’’ཏི དསྶེཏི. ཨིདྷཱཔི སསམྦྷཱརཀཐཱ ཨཝསིཊྛཱཏི ཀཏྭཱ སེསཔདེསུཔཱིཏི པི-སདྡགྒཧཎཾ, ‘‘ན ནིམིཏྟགྒཱཧཱི’’ཏིཨཱདིཔདེསུཔཱིཏི ཨཏྠོ. ཝིཝིདྷཾ ཨསནཾ ཁེདནཾ བྱཱསེཀོ, ཀིལེསོ ཨེཝ བྱཱསེཀོ, ཏེན ཝིརཧིཏོ ཏཐཱ, ཝིརཧིཏཏཱ ཙ ཨསམྨིསྶཏཱ, ཨསམྨིསྶབྷཱཝོ ཙ སམྤཡོགཱབྷཱཝཏོ པརིསུདྡྷཏཱཏི ཨཱཧ ‘‘ཨསམྨིསྶཾ པརིསུདྡྷ’’ནྟི, ཀིལེསདུཀྑེན ཨཝོམིསྶཾ, ཏཏོ ཙ སུཝིསུདྡྷནྟི ཨཏྠོ. སཏི ཙ སུཝིསུདྡྷེ ཨིནྡྲིཡསཾཝརེ ནཱིཝརཎེསུ པདྷཱནབྷཱུཏཔཱཔདྷམྨཝིགམེན ཨདྷིཙིཏྟཱནུཡོགོ ཧཏྠགཏོ ཨེཝ ཧོཏི, ཏསྨཱ ཨདྷིཙིཏྟསུཁམེཝ ‘‘ཨབྱཱསེཀསུཁ’’ནྟི ཝུཙྩཏཱིཏི དསྶེཏི ‘‘ཨདྷིཙིཏྟསུཁ’’ནྟི ཨིམིནཱ.

སཏིསམྤཛཉྙཀཐཱཝཎྞནཱ

༢༡༤. སམནྟཏོ པཀཱརེཧི, པཀཊྛཾ ཝཱ སཝིསེསཾ ཛཱནཱཏཱིཏི སམྤཛཱནོ, ཏསྶ བྷཱཝོ སམྤཛཉྙཾ, ཏཐཱཔཝཏྟཉཱཎཾ, ཏསྶ ཝིབྷཛནཾ སམྤཛཉྙབྷཱཛནཱིཡཾ, ཏསྨིཾ སམྤཛཉྙབྷཱཛནཱིཡམྷི. ‘‘གམན’’ནྟི ཨིམིནཱ ཨབྷིཀྐམནཾ ཨབྷིཀྐནྟནྟི བྷཱཝསཱདྷནམཱཧ. ཏཐཱ པཊིཀྐམནཾ པཊིཀྐནྟནྟི ཝུཏྟཾ ‘‘ནིཝཏྟན’’ནྟི. གམནཉྩེཏྠ ནིཝཏྟེཏྭཱ, ཨནིཝཏྟེཏྭཱ ཙ གམནཾ, ནིཝཏྟནཾ པན ¶ ནིཝཏྟིམཏྟམེཝ, ཨཉྙམཉྙམུཔཱདཱནཀིརིཡཱམཏྟཉྩེཏཾ དྭཡཾ. ཀཐཾ ལབྦྷཏཱིཏི ཨཱཧ ‘‘གམནེ’’ཏིཨཱདི. ཨབྷིཧརནྟོཏི གམནཝསེན ཀཱཡཾ ཨུཔནེནྟོ. པཊིནིཝཏྟེནྟོཏི ¶ ཏཏོ པུན ནིཝཏྟེནྟོ. ཨཔནཱམེནྟོཏི ཨཔཀྐམནཝསེན པརིཎཱམེནྟོ. ཨཱསནསྶཱཏི པཱིཋཀཱདིཨཱསནསྶ. པུརིམཨངྒཱབྷིམུཁོཏི ཨཊནིཀཱདིཔུརིམཱཝཡཝཱབྷིམུཁོ. སཾསརནྟོཏི སཾསཔྤནྟོ. པཙྪིམཨངྒཔདེསནྟི ཨཊནིཀཱདིཔཙྪིམཱཡཝཔྤདེསཾ. པཙྩཱསཾསརནྟོཏི པཊིཨཱསཔྤནྟོ. ‘‘ཨེསེཝ ནཡོ’’ཏི ཨིམིནཱ ནིཔནྣསྶེཝ ཨབྷིམུཁཾ སཾསཔྤནཔཊིཨཱསཔྤནཱནི དསྶེཏི. ཋཱནནིསཛྫཱསཡནེསུ ཧི ཡོ གམནཝིདྷུརོ ཀཱཡསྶ པུརཏོ ཨབྷིཧཱརོ, སོ ཨབྷིཀྐམོ. པཙྪཏོ ཨཔཧཱརོ པཊིཀྐམོཏི ལཀྑཎཾ.

སམྤཛཱནནཾ སམྤཛཱནཾ, ཏེན ཨཏྟནཱ ཀཏྟབྦཀིཙྩསྶ ཀརཎསཱིལོ སམྤཛཱནཀཱརཱིཏི ཨཱཧ ‘‘སམྤཛཉྙེན སབྦཀིཙྩཀཱརཱི’’ཏི. ‘‘སམྤཛཉྙམེཝ ཝཱ ཀཱརཱི’’ཏི ཨིམིནཱ སམྤཛཱནསྶ ཀརཎསཱིལོ སམྤཛཱནཀཱརཱིཏི དསྶེཏི. ‘‘སོ ཧཱི’’ཏིཨཱདི དུཏིཡཝིཀཔྤསྶ སམཏྠནཾ. ‘‘སམྤཛཉྙ’’ནྟི ཙ ཨིམིནཱ སམྤཛཱན-སདྡསྶ སམྤཛཉྙཔརིཡཱཡཏཱ ཝུཏྟཱ. ཏཐཱ ཧི ཨཱཙརིཡཱནནྡཏྠེརེན ཝུཏྟཾ ‘‘སམནྟཏོ, སམྨཱ, སམཾ ཝཱ པཛཱནནཾ སམྤཛཱནཾ, ཏདེཝ སམྤཛཉྙ’’ནྟི (ཝིབྷ. མཱུལཊཱི. ༢.༥༢༣) ཨཡཾ ཨཊྛཀཐཱཏོ ཨཔརོ ནཡོ – ཡཐཱ ཨཏིཀྐནྟཱདཱིསུ ཨསམྨོཧཾ ཨུཔྤཱདེཏི, ཏཐཱ སམྤཛཱནསྶ ཀཱརོ ཀརཎཾ སམྤཛཱནཀཱརོ, སོ ཨེཏསྶ ཨཏྠཱིཏི སམྤཛཱནཀཱརཱིཏི.

དྷམྨཏོ ཝཌྜྷིསངྑཱཏེན ཨཏྠེན སཧ ཝཏྟཏཱིཏི སཱཏྠཀཾ, ཨབྷིཀྐནྟཱདི, སཱཏྠཀསྶ སམྤཛཱནནཾ སཱཏྠཀསམྤཛཉྙཾ. སཔྤཱཡསྶ ཨཏྟནོ པཏིརཱུཔསྶ སམྤཛཱནནཾ སཔྤཱཡསམྤཛཉྙཾ. ཨབྷིཀྐམཱདཱིསུ བྷིཀྑཱཙཱརགོཙརེ, ཨཉྙཏྠ ཙ པཝཏྟེསུ ཨཝིཛཧིཏཀམྨཊྛཱནསངྑཱཏེ གོཙརེ སམྤཛཱནནཾ གོཙརསམྤཛཉྙཾ. སཱམཉྙནིདྡེསེན, ཧི ཨེཀསེསནཡེན ཝཱ གོཙརསདྡོ ཏདཏྠདྭཡེཔི པཝཏྟཏི. ཨཏིཀྐམཱདཱིསུ ཨསམྨུཡ྄ཧནསངྑཱཏཾ ཨསམྨོཧམེཝ སམྤཛཉྙཾ ཨསམྨོཧསམྤཛཉྙཾ. ཙིཏྟཝསེནེཝཱཏི ཙིཏྟསྶ ཝསེནེཝ, ཙིཏྟཝསམནུགཏེནེཝཱཏི ཨཏྠོ. པརིགྒཧེཏྭཱཏི ཏུལཡིཏྭཱ ཏཱིརེཏྭཱ, པཊིསངྑཱཡཱཏི ཨཏྠོ. སངྒྷདསྶནེནེཝ ཨུཔོསཐཔཝཱརཎཱདིཨཏྠཱཡ གམནཾ སངྒཧིཏཾ. ཨཱདིསདྡེན ཀསིཎཔརིཀམྨཱདཱིནཾ སངྒཧོ. སངྑེཔཏོ ཝུཏྟཾ ཏདཏྠམེཝ ཝིཝརིཏུཾ ‘‘ཙེཏིཡཾ ཝཱ’’ཏིཨཱདི ཝུཏྟཾ. ཨརཧཏྟཾ པཱཔུཎཱཏཱིཏི ཨུཀྐཊྛནིདྡེསོ ཨེས. སམཐཝིཔསྶནུཔྤཱདནམྤི ཧི བྷིཀྑུནོ ཝཌྜྷིཡེཝ. ཏཏྠཱཏི ཨསུབྷཱརམྨཎེ. ཀེཙཱིཏི ཨབྷཡགིརིཝཱསིནོ. ཨཱམིསཏོཏི ¶ ཙཱིཝརཱདིཨཱམིསཔཙྩཡཏོ. ཀསྨཱཏི ཨཱཧ ‘‘ཏཾ ནིསྶཱཡཱ’’ཏིཨཱདི.

ཏསྨིནྟི ¶ སཱཏྠཀསམྤཛཉྙཝསེན པརིགྒཧིཏཨཏྠེ. ཡསྨཱ པན དྷམྨཏོ ཝཌྜྷིཡེཝ ཨཏྠོ ནཱམ, ཏསྨཱ ཡཾ ‘‘སཱཏྠཀ’’ནྟི ཨདྷིཔྤེཏཾ གམནཾ, ཏཾ སབྦམྤི སཔྤཱཡམེཝཱཏི སིཡཱ ཨཝིསེསེན ཀསྶཙི ཨཱསངྐཱཏི ཏནྣིཝཏྟནཏྠཾ ‘‘ཙེཏིཡདསྶནཾ ཏཱཝཱ’’ཏིཨཱདི ཨཱརདྡྷཾ. མཧཱཔཱུཛཱཡཱཏི མཧཏིཡཱ པཱུཛཱཡ, བཧཱུནཾ པཱུཛཱདིཝསེཏི ཝུཏྟཾ ཧོཏི. ཙིཏྟཀམྨརཱུཔཀཱནཱི ཝིཡཱཏི ཙིཏྟཀམྨཀཏཔཊིམཱཡོ ཝིཡ, ཡནྟཔཡོགེན ཝཱ ནཱནཔྤཀཱརཝིཙིཏྟཀིརིཡཱ པཊིམཱཡོ ཝིཡ. ཏཏྲཱཏི ཏཱསུ པརིསཱསུ. ཨསྶཱཏི བྷིཀྑུནོ. ཨསམཔེཀྑནཾ ནཱམ གེཧསྶིཏཨཉྙཱཎུཔེཀྑཱཝསེན ཨཱརམྨཎསྶ ཨཡོནིསོ གཧཎཾ. ཡཾ སནྡྷཱཡ ཝུཏྟཾ ‘‘ཙཀྑུནཱ རཱུཔཾ དིསྭཱ ཨུཔྤཛྫཏི ཨུཔེཀྑཱ བཱལསྶ མཱུལ༹ྷསྶ པུཐུཛྫནསྶཱ’’ཏིཨཱདི (མ. ནི. ༣.༣༠༨) མཱཏུགཱམསམྥསྶཝསེན ཀཱཡསཾསགྒཱཔཏྟི. ཧཏྠིཨཱདིསམྨདྡེན ཛཱིཝིཏནྟརཱཡོ. ཝིསབྷཱགརཱུཔདསྶནཱདིནཱ བྲཧྨཙརིཡནྟརཱཡོ. ‘‘དསདྭཱདསཡོཛནནྟརེ པརིསཱ སནྣིཔཏནྟཱི’’ཏིཨཱདིནཱ ཝུཏྟཔྤཀཱརེནེཝ. མཧཱཔརིསཔརིཝཱརཱནནྟི ཀདཱཙི དྷམྨསྶཝནཱདིཨཏྠཱཡ ཨིཏྠིཔུརིསསམྨིསྶཔརིཝཱརེ སནྡྷཱཡ ཝུཏྟཾ.

ཏདཏྠདཱིཔནཏྠནྟི ཨསུབྷདསྶནསྶ སཱཏྠཀབྷཱཝསངྑཱཏསྶ ཨཏྠསྶ དཱིཔནཏྠཾ. པབྦཛིཏདིཝསཏོ པཊྛཱཡ པཊིཝཙནདཱནཝསེན བྷིཀྑཱུནཾ ཨནུཝཏྟནཀཐཱ ཨཱཙིཎྞཱ, ཏསྨཱ པཊིཝཙནསྶ ཨདཱནཝསེན ཨནནུཝཏྟནཀཐཱ ཏསྶ དུཏིཡཱ ནཱམ ཧོཏཱིཏི ཨཱཧ ‘‘དྭེ ཀཐཱ ནཱམ ན ཀཐིཏཔུབྦཱ’’ཏི. དྭེ ཀཐཱཏི ཧི ཝཙནཀརཎཱཀརཎཀཐཱ. ཏཏྠ ཝཙནཀརཎཀཐཱཡེཝ ཀཐིཏཔུབྦཱ, དུཏིཡཱ ན ཀཐིཏཔུབྦཱ. ཏསྨཱ སུབྦཙཏྟཱ པཊིཝཙནམདཱསཱིཏི ཨཏྠོ.

ཨེཝནྟི ཨིམིནཱ. ‘‘སཙེ པན ཙེཏིཡསྶ མཧཱཔཱུཛཱཡཱ’’ཏིཨཱདིཀཾ སབྦམྤི ཝུཏྟཔྤཀཱརཾ པཙྩཱམསཏི, ན ‘‘པུརིསསྶ མཱཏུགཱམཱསུབྷ’’ནྟིཨཱདིཀམེཝ. པརིགྒཧིཏཾ སཱཏྠཀཾ, སཔྤཱཡཉྩ ཡེན སོ པརིགྒཧིཏསཱཏྠཀསཔྤཱཡོ, ཏསྶ, ཏེན ཡཐཱནུཔུབྦིཀཾ སམྤཛཉྙཔརིགྒཧཎཾ དསྶེཏི. ཝུཙྩམཱནཡོགཀམྨསྶ པཝཏྟིཊྛཱནཏཱཡ བྷཱཝནཱཡ ཨཱརམྨཎཾ ཀམྨཊྛཱནཾ, ཏདེཝ བྷཱཝནཱཡ ¶ ཝིསཡབྷཱཝཏོ གོཙརནྟི ཨཱཧ ‘‘ཀམྨཊྛཱནསངྑཱཏཾ གོཙར’’ནྟི. ཨུགྒཧེཏྭཱཏི ཡཐཱ ཨུགྒཧནིམིཏྟཾ ཨུཔྤཛྫཏི, ཨེཝཾ ཨུགྒཧཀོསལླསྶ སམྤཱདནཝསེན ཨུགྒཧཎཾ ཀཏྭཱ. བྷིཀྑཱཙཱརགོཙརེཏི བྷིཀྑཱཙཱརསངྑཱཏེ གོཙརེ, ཨནེན ཀམྨཊྛཱནེ, བྷིཀྑཱཙཱརེ ཙ གོཙརསདྡོཏི དསྶེཏི.

ཨིདྷཱཏི སཱསནེ. ཧརཏཱིཏི ཀམྨཊྛཱནཾ པཝཏྟནཝསེན ནེཏི, ཡཱཝ པིཎྜཔཱཏཔཊིཀྐམཱ ཨནུཡུཉྫཏཱིཏི ཨཏྠོ. ན པཙྩཱཧརཏཱིཏི ཨཱཧཱརཱུཔཡོགཏོ ཡཱཝ དིཝཱཋཱནུཔསངྐམནཱ ཀམྨཊྛཱནཾ ན པཊིནེཏི. ཏཏྠཱཏི ཏེསུ ཙཏཱུསུ བྷིཀྑཱུསུ. ཨཱཝརཎཱིཡེཧཱིཏི ནཱིཝརཎེཧི. པགེཝཱཏི པཱཏོཡེཝ ¶ . སརཱིརཔརིཀམྨནྟི མུཁདྷོཝནཱདིསརཱིརཔཊིཛགྒནཾ. དྭེ ཏཡོ པལླངྐེཏི དྭེ ཏཡོ ནིསཛྫཱཝཱརེ. ཨཱུརུབདྡྷཱསནཉྷེཏྠ པལླངྐོ. ཨུསུམནྟི དྭེ ཏཱིཎི ཨུཎྷཱཔནཱནི སནྡྷཱཡ ཝུཏྟཾ. ཀམྨཊྛཱནཾ ཨནུཡུཉྫིཏྭཱཏི ཏདཧེ མཱུལབྷཱུཏཾ ཀམྨཊྛཱནཾ ཨནུཡུཉྫིཏྭཱ. ཀམྨཊྛཱནསཱིསེནེཝཱཏི ཀམྨཊྛཱནམུཁེནེཝ, ཀམྨཊྛཱནམཝིཛཧནྟོ ཨེཝཱཏི ཝུཏྟཾ ཧོཏི, ཏེན ‘‘པཏོཔི ཨཙེཏནོ’’ཏིཨཱདིནཱ (དཱི. ནི. ཨཊྛ. ༡.༢༡༤; མ. ནི. ཨཊྛ. ༡.༢༠༩; སཾ. ནི. ཨཊྛ. ༣.༥.༡༦༨; ཝིབྷ. ཨཊྛ. ༥༢༣) ཝཀྑམཱནཾ ཀམྨཊྛཱནཾ, ཡཐཱཔརིཧརིཡམཱནཾ ཝཱ ཨཝིཛཧིཏྭཱཏི དསྶེཏི.

གནྟྭཱཏི པཱཔུཎིཏྭཱ. བུདྡྷཱནུསྶཏིཀམྨཊྛཱནཾ ཙེ, ཏདེཝ ནིཔཙྩཀཱརསཱདྷནཾ. ཨཉྙཉྩེ, ཨནིཔཙྩཀཱརཀརཎམིཝ ཧོཏཱིཏི དསྶེཏུཾ ‘‘སཙེ’’ཏིཨཱདི ཝུཏྟཾ. ཨཏབྦིསཡེན ཏཾ ཋཔེཏྭཱ. ‘‘མཧནྟཾ ཙེཏིཡཾ ཙེ’’ཏིཨཱདིནཱ ཀམྨཊྛཱནིཀསྶ མཱུལཀམྨཊྛཱནམནསིཀཱརསྶ པཔཉྩཱབྷཱཝདསྶནཾ. ཨཉྙེན པན ཏཐཱཔི ཨཉྙཐཱཔི ཝནྡིཏབྦམེཝ. ཏཐེཝཱཏི ཏིཀྑཏྟུམེཝ. པརིབྷོགཙེཏིཡཏོ སཱརཱིརིཀཙེཏིཡཾ གརུཏརནྟི ཀཏྭཱ ‘‘ཙེཏིཡཾ ཝནྡིཏྭཱ’’ཏི པུབྦཀཱལཀིརིཡཱཝསེན ཝུཏྟཾ. ཡཐཱཧ ཨཊྛཀཐཱཡཾ ‘‘ཙེཏིཡཾ བཱདྷཡམཱནཱ བོདྷིསཱཁཱ ཧརིཏབྦཱ’’ཏི, (མ. ནི. ཨཊྛ. ༤.༡༢༨; ཨ. ནི. ཨཊྛ. ༡.༡.༢༧༥; ཝིབྷ. ཨཊྛ. ༨༠༩) ཨཡཾ ཨཱཙརིཡསྶ མཏི, ‘‘བོདྷིཡངྒཎཾ པཏྟེནཱཔཱི’’ཏི པན ཝཙནཏོ ཡདི ཙེཏིཡངྒཎཏོ གཏེ བྷིཀྑཱཙཱརམགྒེ བོདྷིཡངྒཎཾ བྷཝེཡྻ, སཱཔི ཝནྡིཏབྦཱཏི མགྒཱནུཀྐམེནེཝ ‘‘ཙེཏིཡཾ ཝནྡིཏྭཱ’’ཏི པུབྦཀཱལཀིརིཡཱཝཙནཾ, ན ཏུ གརུཀཱཏབྦཏཱནུཀྐམེན. ཨེཝཉྷི སཏི བོདྷིཡངྒཎཾ པཋམཾ པཏྟེནཱཔི བོདྷིཾ ཝནྡིཏྭཱ ཙེཏིཡཾ ཝནྡིཏབྦཾ, ཨེཀམེཝ པཏྟེནཱཔི ཏདེཝ ཝནྡིཏབྦཾ, ཏདུབྷཡམྤི ¶ ཨཔྤཏྟེན ན ཝནྡིཏབྦནྟི ཨཡམཏྠོ སུཝིཉྙཱཏོ ཧོཏི. བྷིཀྑཱཙཱརགཏམགྒེན ཧི པཏྟཊྛཱནེ ཀཏྟབྦཨནྟརཱཝཏྟདསྶནམེཏཾ, ན པན དྷུཝཝཏྟདསྶནཾ. པུབྦེ ཧེས ཀཏཝཏྟོཡེཝ. ཏེནཱཧ ‘‘པགེཝ ཙེཏིཡངྒཎབོདྷིཡངྒཎཝཏྟཾ ཀཏྭཱ’’ཏིཨཱདི. བུདྡྷགུཎཱནུསྶརཎཝསེནེཝ བོདྷིཨཱདིཔརིབྷོགཙེཏིཡེཔི ནིཔཙྩཀརཎཾ ཨུཔཔནྣནྟི དསྶེཏི ‘‘བུདྡྷསྶ བྷགཝཏོ སམྨུཁཱ ཝིཡ ནིཔཙྩཀཱརཾ དསྶེཏྭཱ’’ཏི ཨིམིནཱ. པཊིསཱམིཏཊྛཱནནྟི སོཔཱནམཱུལབྷཱཝསཱམཉྙེན ཝུཏྟཾ, བུདྡྷཱརམྨཎཔཱིཏིཝིསཡབྷཱུཏཙེཏིཡངྒཎབོདྷིཡངྒཎཏོ བཱཧིརཊྛཱནཾ པཏྭཱཏི ཝུཏྟཾ ཧོཏི.

གཱམསམཱིཔེཏི གཱམཱུཔཙཱརེ. ཏཱཝ པཉྷཾ ཝཱ པུཙྪནྟི, དྷམྨཾ ཝཱ སོཏུཀཱམཱ ཧོནྟཱིཏི སམྦནྡྷོ. ཛནསངྒཧཏྠནྟི ‘‘མཡི ཨཀཐེནྟེ ཨེཏེསཾ ཀོ ཀཐེསྶཏཱི’’ཏི དྷམྨཱནུགྒཧེན མཧཱཛནསྶ སངྒཧཎཏྠཾ. ཨཊྛཀཐཱཙརིཡཱནཾ ཝཙནཾ སམཏྠེཏུཾ ‘‘དྷམྨཀཐཱ ཧི ཀམྨཊྛཱནཝིནིམུཏྟཱ ནཱམ ནཏྠཱི’’ཏི ཝུཏྟཾ. ཏསྨཱཏི ཡསྨཱ ¶ ‘‘དྷམྨཀཐཱ ནཱམ ཀཱཏབྦཱཡེཝཱ’’ཏི ཨཊྛཀཐཱཙརིཡཱ ཝདནྟི, ཡསྨཱ ཝཱ དྷམྨཀཐཱ ཀམྨཊྛཱནཝིནིམུཏྟཱ ནཱམ ནཏྠི, ཏསྨཱ དྷམྨཀཐཾ ཀཐེཏྭཱཏི སམྦནྡྷོ. ཨཱཙརིཡཱནནྡཏྠེརེན (ཝིབྷ. མཱུལཊཱི. ༥༢༣) པན ‘‘ཏསྨཱ’’ཏི ཨེཏསྶ ‘‘ཀཐེཏབྦཱཡེཝཱཏི ཝདནྟཱི’’ཏི ཨེཏེན སམྦནྡྷོ ཝུཏྟོ. ཀམྨཊྛཱནསཱིསེནེཝཱཏི ཨཏྟནཱ པརིཧརིཡམཱནཾ ཀམྨཊྛཱནཾ ཨཝིཛཧནཝསེན, ཏདནུགུཎཾཡེཝ དྷམྨཀཐཾ ཀཐེཏྭཱཏི ཨཏྠོ, དུཏིཡཔདེཔི ཨེསེཝ ནཡོ. ཨནུམོདནཾ ཀཏྭཱཏི ཨེཏྠཱཔི ‘‘ཀམྨཊྛཱནསཱིསེནེཝཱ’’ཏི ཨདྷིཀཱརོ. ཏཏྠཱཏི གཱམཏོ ནིཀྑམནཊྛཱནེཡེཝ.

‘‘པོརཱཎཀབྷིཀྑཱུ’’ཏིཨཱདིནཱ པོརཱཎཀཱཙིཎྞདསྶནེན ཡཐཱཝུཏྟམཏྠཾ དལ༹ྷཾ ཀརོཏི. སམྤཏྟཔརིཙྪེདེནེཝཱཏི ‘‘པརིཙིཏོ ཨཔརིཙིཏོ’’ཏིཨཱདིཝིབྷཱགཾ ཨཀཏྭཱ སམྤཏྟཀོཊིཡཱ ཨེཝ, སམཱགམམཏྟེནེཝཱཏི ཨཏྠོ. ཨཱནུབྷཱཝེནཱཏི ཨནུགྒཧབལེན. བྷཡེཏི པརཙཀྐཱདིབྷཡེ. ཚཱཏཀེཏི དུབྦྷིཀྑེ.

‘‘པཙྪིམཡཱམེཔི ནིསཛྫཱཙངྐམེཧི ཝཱིཏིནཱམེཏྭཱ’’ཏིཨཱདིནཱ ཝུཏྟཔྤཀཱརཾ. ཀརོནྟསྶཱཏི ཀརམཱནསྶེཝ, ཨནཱདརེ ཙེཏཾ སཱམིཝཙནཾ. ཀམྨཛཏེཛོཏི གཧཎིཾ སནྡྷཱཡཱཧ. པཛྫལཏཱིཏི ཨུཎྷབྷཱཝཾ ཛནེཏི. ཏཏོཡེཝ ཨུཔཱདིནྣཀཾ གཎྷཱཏི, སེདཱ མུཙྩནྟི. ཀམྨཊྛཱནཾ ཝཱིཐིཾ ནཱརོཧཏི ¶ ཁུདཱཔརིསྶམེན ཀིལནྟཀཱཡསྶ སམཱདྷཱནཱབྷཱཝཏོ. ཨནུཔཱདིནྣཾ ཨོདནཱདིཝཏྠུ. ཨུཔཱདིནྣཾ ཨུདརཔཊལཾ. ཨནྟོཀུཙྪིཡཉྷི ཨོདནཱདིཝཏྠུསྨིཾ ཨསཏི ཀམྨཛཏེཛོ ཨུཊྛཧིཏྭཱ ཨུདརཔཊལཾ གཎྷཱཏི, ‘‘ཚཱཏོསྨི, ཨཱཧཱརཾ མེ དེཐཱ’’ཏི ཝདཱཔེཏི, བྷུཏྟཀཱལེ ཨུདརཔཊལཾ མུཉྩིཏྭཱ ཝཏྠུཾ གཎྷཱཏི, ཨཐ སཏྟོ ཨེཀགྒོ ཧོཏི, ཡཏོ ‘‘ཚཱཡཱརཀྑསོ ཝིཡ ཀམྨཛཏེཛོ’’ཏི ཨཊྛཀཐཱསུ ཝུཏྟོ. སོ པགེཝཱཏི ཨེཏྠ ‘‘ཏསྨཱ’’ཏི སེསོ. གོརཱུཔཱནནྟི གུནྣཾ, གོསམཱུཧཱནཾ ཝཱ, ཝཛཏོ གོཙརཏྠཱཡ ནིཀྑམནཝེལཱཡམེཝཱཏི ཨཏྠོ. ཝུཏྟཝིཔརཱིཏནཡེན ཨུཔཱདིནྣཀཾ མུཉྩིཏྭཱ ཨནུཔཱདིནྣཀཾ གཎྷཱཏི. ཨནྟརཱབྷཏྟེཏི བྷཏྟསྶ ཨནྟརེ, ཡཱཝ བྷཏྟཾ ན བྷུཉྫཏི, ཏཱཝཱཏི ཨཏྠོ. ཏེནཱཧ ‘‘ཀམྨཊྛཱནསཱིསེན ཨཱཧཱརཉྩ པརིབྷུཉྫིཏྭཱ’’ཏི. ཨཝསེསཊྛཱནེཏི ཡཱགུཡཱ ཨགྒཧིཏཊྛཱནེ. ཏཏོཏི བྷུཉྫནཏོ. པོངྑཱནུཔོངྑནྟི ཀམྨཊྛཱནཱནུཔཊྛཱནསྶ ཨནཝཙྪེདདསྶནམེཏཾ, ཨུཏྟརུཏྟརིནྟི ཨཏྠོ, ཡཐཱ པོངྑཱནུཔོངྑཾ པཝཏྟཱཡ སརཔཊིཔཱཊིཡཱ ཨནཝཙྪེདོ, ཨེཝམེཏསྶཱཔི ཀམྨཊྛཱནུཔཊྛཱནསྶཱཏི ཝུཏྟཾ ཧོཏི. ‘‘ཨེདིསཱ ཙཱ’’ཏིཨཱདིནཱ ཏཐཱ ཀམྨཊྛཱནམནསིཀཱརསྶཱཔི སཱཏྠཀབྷཱཝཾ དསྶེཏི. ཨཱསནནྟི ནིསཛྫཱསནཾ.

ནིཀྑིཏྟདྷུརོཏི བྷཱཝནཱནུཡོགེ ཨནུཀྑིཏྟདྷུརོ ཨནཱརདྡྷཝཱིརིཡོ. ཝཏྟཔཊིཔཏྟིཡཱ ཨཔརིཔཱུརཎེན ¶ སབྦཝཏྟཱནི བྷིནྡིཏྭཱ. པཉྩཝིདྷཙེཏོཁཱིལཝིནིབནྡྷཙིཏྟོཏི པཉྩཝིདྷེན ཙེཏོཁཱིལེན, ཝིནིབནྡྷེན ཙ སམྤཡུཏྟཙིཏྟོ. ཝུཏྟཉྷི མཛ྄ཛྷིམཱགམེ ཙེཏོཁཱིལསུཏྟེ –

‘‘ཀཏམསྶ པཉྩ ཙེཏོཁཱིལཱ ཨཔྤཧཱིནཱ ཧོནྟི? ཨིདྷ བྷིཀྑཝེ བྷིཀྑུ སཏྠརི ཀངྑཏི, དྷམྨེ ཀངྑཏི, སངྒྷེ ཀངྑཏི, སིཀྑཱཡ ཀངྑཏི, སབྲཧྨཙཱརཱིསུ ཀུཔིཏོ ཧོཏཱི’’ཏི, (མ. ནི. ༡.༡༨༥)

‘‘ཀཏམསྶ པཉྩ ཙེཏསོ ཝིནིབནྡྷཱ ཨསམུཙྪིནྣཱ ཧོནྟི? ཨིདྷ བྷིཀྑཝེ བྷིཀྑུ ཀཱམེ ཨཝཱིཏརཱགོ ཧོཏི, ཀཱཡེ ཨཝཱིཏརཱགོ ཧོཏི, རཱུཔེ ཨཝཱིཏརཱགོ ཧོཏི, ཡཱཝདཏྠཾ ཨུདརཱཝདེཧཀཾ བྷུཉྫིཏྭཱ སེཡྻསུཁཾ པསྶསུཁཾ མིདྡྷསུཁཾ ཨནུཡུཏྟོ ཝིཧརཏི, ཨཉྙཏརཾ དེཝནིཀཱཡཾ པཎིདྷཱཡ བྲཧྨཙརིཡཾ ཙརཏཱི’’ཏི (མ. ནི. ༡.༡༨༦). ཙ –

ཝིཏྠཱརོ ¶ . ཨཱཙརིཡེན (དཱི. ནི. ཊཱི. ༡.༢༡༥) པན པཉྩཝིདྷཙེཏོཝིནིབནྡྷཙིཏྟབྷཱཝོཡེཝ པདེཀདེསམུལླིངྒེཏྭཱ དསྶིཏོ. ཙིཏྟསྶ ཀཙཝརཁཱཎུཀབྷཱཝོ ཧི ཙེཏོཁཱིལོ, ཙིཏྟཾ བནྡྷིཏྭཱ མུཊྛིཡཾ ཝིཡ ཀཏྭཱ གཎྷནབྷཱཝོ ཙེཏསོ ཝིནིབནྡྷོ. པཋམོ ཙེཏྠ ཝིཙིཀིཙྪཱདོསཝསེན, དུཏིཡོ ལོབྷཝསེནཱཏི ཨཡམེཏེསཾ ཝིསེསོ. ཙརིཏྭཱཏི ཝིཙརིཏྭཱ. ཀམྨཊྛཱནཝིརཧཝསེན ཏུཙྪོ.

བྷཱཝནཱསཧིཏམེཝ བྷིཀྑཱཡ གཏཾ, པཙྩཱགཏཉྩ ཡསྶཱཏི གཏཔཙྩཱགཏིཀཾ, ཏདེཝ ཝཏྟཾ, ཏསྶ ཝསེན. ཨཏྟཀཱམཱཏི ཨཏྟནོ ཧིཏསུཁམིཙྪནྟཱ, དྷམྨཙྪནྡཝནྟོཏི ཨཏྠོ. དྷམྨོ ཧི ཧིཏཾ, སུཁཉྩ ཏནྣིམིཏྟཀནྟི. ཨཐ ཝཱ ཝིཉྙཱུནཾ ཨཏྟཏོ ནིབྦིསེསཏྟཱ, ཨཏྟབྷཱཝཔརིཡཱཔནྣཏྟཱ ཙ དྷམྨོ ཨཏྟཱ ནཱམ, ཏཾ ཀཱམེནྟི ཨིཙྪནྟཱིཏི ཨཏྟཀཱམཱ. ཨདྷུནཱ པན ཨཏྠཀཱམཱཏི ཧིཏཝཱཙཀེན ཨཏྠསདྡེན པཱཋོ དིསྶཏི, དྷམྨསཉྙུཏྟཾ ཧིཏམིཙྪནྟཱ, ཧིཏབྷཱུཏཾ ཝཱ དྷམྨམིཙྪནྟཱཏི ཏསྶཏྠོ. ཨིཎཊྚཱཏི ཨིཎེན པཱིལི༹ཏཱ. ཏཐཱ སེསཔདདྭཡེཔི. ཨེཏྠཱཏི སཱསནེ.

ཨུསབྷཾ ནཱམ ཝཱིསཏི ཡཊྛིཡོ, གཱཝུཏཾ ནཱམ ཨསཱིཏི ཨུསབྷཱ. ཏཱཡ སཉྙཱཡཱཏི ཏཱདིསཱཡ པཱསཱཎསཉྙཱཡ, ཀམྨཊྛཱནམནསིཀཱརེན ‘‘ཨེཏྟཀཾ ཋཱནམཱགཏཱ’’ཏི ཛཱནནྟཱ གཙྪནྟཱིཏི ཨདྷིཔྤཱཡོ. ནནྟི ཀིལེསཾ. ཀམྨཊྛཱནཝིཔྤཡུཏྟཙིཏྟེན པཱདུདྡྷཱརཎམཀཏྠུཀཱམཏོ ཏིཊྛཏི, པཙྪཱགཏོ པན ཋིཏིམནཏིཀྐམིཏུཀཱམཏོ. སོཏི ཨུཔྤནྣཀིལེསོ བྷིཀྑུ. ཨཡནྟི པཙྪཱགཏོ ¶ . ཨེཏནྟི པརསྶ ཛཱནནཾ. ཏཏྠེཝཱཏི པཏིཊྛིཏཊྛཱནེཡེཝ. སོཡེཝ ནཡོཏི ‘‘ཨཡཾ བྷིཀྑཱུ’’ཏིཨཱདིཀཱ ཡོ པཏིཊྛཱནེ ཝུཏྟོ, སོ ཨེཝ ནིསཛྫཱཡཔི ནཡོ. པཙྪཏོ ཨཱགཙྪནྟཱནཾ ཚིནྣབྷཏྟབྷཱཝབྷཡེནཱཔི ཡོནིསོམནསིཀཱརཾ པརིབྲཱུཧེཏཱིཏི ཨིདམྤི པརསྶ ཛཱནནེནེཝ སངྒཧིཏནྟི དཊྛབྦཾ. པུརིམཔཱདེཡེཝཱཏི པཋམཾ ཀམྨཊྛཱནཝིཔྤཡུཏྟཙིཏྟེན ཨུདྡྷརིཏཔཱདཝལ༹ཉྫེཡེཝ. ཨེཏཱིཏི གཙྪཏི. ‘‘ཨཱལིནྡཀཝཱསཱི མཧཱཕུསྶདེཝཏྠེརོ ཝིཡཱ’’ཏིཨཱདིནཱ ཨཊྛཱནེཡེཝེཏཾ ཀཐིཏཾ. ‘‘ཀྭཱཡཾ ཨེཝཾ པཊིཔནྣཔུབྦོ’’ཏི ཨཱསངྐཾ ནིཝཏྟེཏི.

མདྡནྟཱཏི དྷཉྙཀརཎཊྛཱནེ སཱལིསཱིསཱདཱིནི མདྡནྟཱ. ཨསྶཱཏི ཐེརསྶ, ཨུབྷཡཱཔེཀྑཝཙནམེཏཾ. ཨསྶ ཨརཧཏྟཔྤཏྟདིཝསེ ཙངྐམནཀོཊིཡནྟི ཙ ¶ . ཨདྷིགམཔྤིཙྪཏཱཡ ཝིཀྑེཔཾ ཀཏྭཱ, ནིབནྡྷིཏྭཱ ཙ པཊིཛཱནིཏྭཱཡེཝ ཨཱརོཙེསི.

པཋམཾ ཏཱཝཱཏི པདསོབྷནཏྠཾ པརིཡཱཡཝཙནཾ. མཧཱཔདྷཱནནྟི བྷགཝཏོ དུཀྐརཙརིཡཾ, ཨམྷཱཀཾ ཨཏྠཱཡ ལོཀནཱཐེན ཚབྦསྶཱནི ཀཏཾ དུཀྐརཙརིཡཾ ‘‘ཨེཝཱཧཾ ཡཐཱབལཾ པཱུཛེསྶཱམཱི’’ཏི ཨཏྠོ. པཊིཔཏྟིཔཱུཛཱཡེཝ ཧི པསཏྠཏརཱ སཏྠུཔཱུཛཱ, ན ཏཐཱ ཨཱམིསཔཱུཛཱ. ཋཱནཙངྐམམེཝཱཏི ཨདྷིཊྛཱཏབྦཨིརིཡཱཔཐཝསེན ཝུཏྟཾ, ན བྷོཛནཀཱལཱདཱིསུ ཨཝསྶཾ ཀཏྟབྦནིསཛྫཱཡ པཊིཀྑེཔཝསེན. ཨེཝསདྡེན ཧི ཨིཏརཱཡ ནིསཛྫཱཡ, སཡནསྶ ཙ ནིཝཏྟནཾ ཀརོཏི. ཝིཔྤཡུཏྟེན ཨུདྡྷཊེ པཊིནིཝཏྟེནྟོཏི སམྤཡུཏྟེན ཨུདྡྷརིཏཔཱདེཡེཝ པུན ཋཔནཾ སནྡྷཱཡཱཧ. ‘‘གཱམསམཱིཔཾ གནྟྭཱ’’ཏི ཝཏྭཱ ཏདཏྠཾ ཝིཝརཏི ‘‘གཱཝཱི ནཱུ’’ཏིཨཱདིནཱ. ཀཙྪཀནྟརཏོཏི ཨུཔཀཙྪནྟརཏོ, ཨུཔཀཙྪེ ལགྒིཏཀམཎྜལུཏོཏི ཝུཏྟཾ ཧོཏི. ཨུདཀགཎྜཱུསནྟི ཨུདཀཱཝགཎྜཀཱརཀཾ. ཀཏིནཾ ཏིཐཱིནཾ པཱུརཎཱི ཀཏིམཱི, ‘‘པཉྩམཱི ནུ ཁོ པཀྑསྶ, ཨཊྛམཱི’’ཏིཨཱདིནཱ དིཝསཾ ཝཱ པུཙྪིཏོཏི ཨཏྠོ. ཨནཱརོཙནསྶ ཨཀཏྟབྦཏྟཱ ཨཱརོཙེཏི. ཏཐཱ ཧི ཝུཏྟཾ ‘‘ཨནུཛཱནཱམི བྷིཀྑཝེ སབྦེཧེཝ པཀྑགཎནཾ ཨུགྒཧེཏུ’’ནྟིཨཱདི (མཧཱཝ. ༡༥༦).

‘‘ཨུདཀཾ གིལིཏྭཱ ཨཱརོཙེཏཱི’’ཏི ཝུཏྟནཡེན. ཏཏྠཱཏི གཱམདྭཱརེ. ནིཊྛུབྷནནྟི ཨུདཀནིཊྛུབྷནཊྛཱནཾ. ཏེསཱུཏི མནུསྶེསུ. ཉཱཎཙཀྑུསམྤནྣཏྟཱ ཙཀྑུམཱ. ཨཱིདིསོཏི སུསམྨཊྛཙེཏིཡངྒཎཱདིཀོ. ཝིསུདྡྷིཔཝཱརཎནྟི ཁཱིཎཱསཝབྷཱཝེན པཝཱརཎཾ.

ཝཱིཐིཾ ཨོཏརིཏྭཱ ཨིཏོ ཙིཏོ ཙ ཨནོལོཀེཏྭཱ པཋམམེཝ ཝཱིཐིཡོ སལླཀྑེཏབྦཱཏི ཨཱཧ ‘‘ཝཱིཐིཡོ སལླཀྑེཏྭཱ’’ཏི. ཡཾ སནྡྷཱཡ ཝུཏྟཾ ‘‘པཱསཱདིཀེན ཨབྷིཀྐནྟེན པཊིཀྐནྟེནཱ’’ཏིཨཱདི ¶ (པཱརཱ. ༤༣༢). ཏཾ གམནཾ དསྶེཏུཾ ‘‘ཏཏྠ ཙཱ’’ཏིཨཱདིམཱཧ. ‘‘ན ཧི ཛཝེན པིཎྜཔཱཏིཡདྷུཏངྒཾ ནཱམ ཀིཉྩི ཨཏྠཱི’’ཏི ཨིམིནཱ ཛཝེན གམནེ ལོལུཔྤཙཱརིཏཱ ཝིཡ ཨསཱརུཔྤཏཾ དསྶེཏི. ཨུདཀསཀཊནྟི ཨུདཀསཱརསཀཊཾ. ཏཉྷི ཝིསམབྷཱུམིབྷཱགཔྤཏྟཾ ནིཙྩལམེཝ ཀཱཏུཾ ཝཊྚཏི. ཏདནུརཱུཔནྟི བྷིཀྑཱདཱནཱནུརཱུཔཾ. ‘‘ཨཱཧཱརེ པཊིཀཱུལསཉྙཾ ཨུཔཊྛཔེཏྭཱ’’ཏིཨཱདཱིསུ ཡཾ ཝཏྟབྦཾ, ཏཾ པརཏོ ཨཱགམིསྶཏི. རཐསྶ ཨཀྑཱནཾ ཏེལེན ཨབྦྷཉྫནཾ, ཝཎསྶ ལེཔནཾ, པུཏྟམཾསསྶ ཁཱདནཉྩ ཏིདྷཱ ཨུཔམཱ ཡསྶ ཨཱཧརཎསྶཱཏི ཏཐཱ. ཨཊྛངྒསམནྣཱགཏནྟི ‘‘ཡཱཝདེཝ ¶ ཨིམསྶ ཀཱཡསྶ ཋིཏིཡཱ, ཡཱཔནཱཡཱ’’ཏིཨཱདིནཱ (མ. ནི. ༡.༢༣; ༢.༢༤, ༣༨༧; སཾ. ནི. ༤.༡༢༠; ཨ. ནི. ༦.༥༨; ༥.༩; ཝིབྷ. ༥༡༨; མཧཱནི. ༢༠༦) ཝུཏྟེཧི ཨཊྛཧི ཨངྒེཧི སམནྣཱགཏཾ ཀཏྭཱ. ‘‘ནེཝ དཝཱཡཱ’’ཏིཨཱདི པན པཊིཀྑེཔམཏྟདསྶནཾ. བྷཏྟཀིལམཐནྟི བྷཏྟཝསེན ཨུཔྤནྣཀིལམཐཾ. པུརེབྷཏྟཱདི དིཝཱཝསེན ཝུཏྟཾ. པུརིམཡཱམཱདི རཏྟིཝསེན.

གཏཔཙྩཱགཏེསུ ཀམྨཊྛཱནསྶ ཧརཎཾ ཝཏྟནྟི ཨཏྠཾ དསྶེནྟོ ‘‘ཧརཎཔཙྩཱཧརཎསངྑཱཏ’’ནྟི ཨཱཧ. ‘‘ཡདི ཨུཔནིསྶཡསམྤནྣོ ཧོཏཱི’’ཏི ཨིདཾ ‘‘དེཝཔུཏྟོ ཧུཏྭཱ’’ཏིཨཱདཱིསུཔི སབྦཏྠ སམྦཛ྄ཛྷིཏབྦཾ. ཏཏྠ པཙྩེཀབོདྷིཡཱ ཨུཔནིསྶཡསམྤདཱ ཀཔྤཱནཾ དྭེ ཨསངྑྱེཡྻཱནི, སཏསཧསྶཉྩ ཏཛྫཱ པུཉྙཉཱཎསམྦྷཱརསམྦྷརཎཾ, སཱཝཀབོདྷིཡཱ ཨགྒསཱཝཀཱནཾ ཨེཀམསངྑྱེཡྻཾ, ཀཔྤསཏསཧསྶཉྩ, མཧཱསཱཝཀཱནཾ (ཐེརགཱ. ཨཊྛ. ༢.ཝངྒཱིསཏྠེརགཱཐཱཝཎྞནཱ ཝིཏྠཱརོ) ཀཔྤསཏསཧསྶམེཝ, ཨིཏརེསཾ པན ཨཏཱིཏཱསུ ཛཱཏཱིསུ ཝིཝཊྚུཔནིསྶཡཝསེན ཀཱལནིཡམམནྟརེན ནིབྦཏྟིཏཾ ནིབྦེདྷབྷཱགིཡཀུསལཾ. ‘‘སེཡྻཐཱཔཱི’’ཏིཨཱདིནཱ ཏསྨིཾ ཏསྨིཾ ཋཱནནྟརེ ཨེཏདགྒཊྛཔིཏཱནཾ ཐེརཱནཾ སཀྑིདསྶནཾ. ཏཏྠ ཐེརོ བཱཧིཡོ དཱརུཙཱིརིཡོཏི བཱཧིཡཝིསཡེ སཉྫཱཏསཾཝཌྜྷཏཱཡ བཱཧིཡོ, དཱརུཙཱིརཔརིཧརཎཏོ དཱརུཙཱིརིཡོཏི ཙ སམཉྙིཏོ ཐེརོ. སོ ཧཱཡསྨཱ –

‘‘ཏསྨཱ ཏིཧ ཏེ བཱཧིཡ ཨེཝཾ སིཀྑིཏབྦཾ ‘དིཊྛེ དིཊྛམཏྟཾ བྷཝིསྶཏི, སུཏེ, མུཏེ, ཝིཉྙཱཏེ ཝིཉྙཱཏམཏྟཾ བྷཝིསྶཏཱི’ཏི, ཨེཝཉྷི ཏེ བཱཧིཡ སིཀྑིཏབྦཾ. ཡཏོ ཁོ ཏེ བཱཧིཡ དིཊྛེ དིཊྛམཏྟཾ བྷཝིསྶཏི, སུཏེ, མུཏེ, ཝིཉྙཱཏེ ཝིཉྙཱཏམཏྟཾ བྷཝིསྶཏི, ཏཏོ ཏྭཾ བཱཧིཡ ན ཏེན. ཡཏོ ཏྭཾ བཱཧིཡ ན ཏེན, ཏཏོ བཱཧིཡ ན ཏཏྠ. ཡཏོ ཏྭཾ བཱཧིཡ ན ཏཏྠ, ཏཏོ ཏྭཾ བཱཧིཡ ནེཝིདྷ ན ཧུརཾ ན ཨུབྷཡམནྟརེན, ཨེསེཝནྟོ དུཀྑསྶཱ’ཏི’’ (ཨུདཱ. ༡༠).

ཨེཏྟཀཱཡ ¶ དེསནཱཡ ཨརཧཏྟཾ སཙྪཱཀཱསི. ཨེཝཾ སཱརིཔུཏྟཏྠེརཱདཱིནམྤི མཧཱཔཉྙཏཱདིདཱིཔནཱནི སུཏྟཔདཱནི ཝིཏྠཱརཏོ ཝཏྟབྦཱནི. ཝིསེསཏོ པན ཨངྒུཏྟརཱགམེ ཨེཏདགྒསུཏྟཔདཱནི (ཨ. ནི. ༡.༡༨༨) སིཁཱཔཏྟནྟི ཀོཊིཔྤཏྟཾ ནིཊྛཱནཔྤཏྟཾ སབྦཐཱ པརིཔུཎྞཏོ.

ཏནྟི ¶ ཨསམྨུཡ྄ཧནཾ. ཨེཝནྟི ཨིདཱནི ཝུཙྩམཱནཱཀཱརེན ཝེདིཏབྦཾ. ‘‘ཨཏྟཱ ཨབྷིཀྐམཏཱི’’ཏི ཨིམིནཱ དིཊྛིགཱཧཝསེན, ‘‘ཨཧཾ ཨབྷིཀྐམཱམཱི’’ཏི ཨིམིནཱ མཱནགཱཧཝསེན, ཏདུབྷཡསྶ པན ཝིནཱ ཏཎྷཱཡ ཨཔྤཝཏྟནཏོ ཏཎྷཱགཱཧཝསེནཱཏི ཏཱིཧིཔི མཉྙནཱཧི ཨནྡྷབཱལཔུཐུཛྫནསྶ ཨབྷིཀྐམེ སམྨུཡ྄ཧནཾ དསྶེཏི. ‘‘ཏཐཱ ཨསམྨུཡ྄ཧནྟོ’’ཏི ཝཏྭཱ ཏདེཝ ཨསམྨུཡ྄ཧནཾ ཡེན གྷནཝིནིབྦྷོགེན ཧོཏི, ཏཾ དསྶེནྟོ ‘‘ཨབྷིཀྐམཱམཱི’’ཏིཨཱདིམཱཧ. ཙིཏྟསམུཊྛཱནཝཱཡོདྷཱཏཱུཏི ཏེནེཝ ཨབྷིཀྐམནཙིཏྟེན སམུཊྛཱནཱ, ཏཾཙིཏྟསམུཊྛཱནིཀཱ ཝཱ ཝཱཡོདྷཱཏུ. ཝིཉྙཏྟིནྟི ཀཱཡཝིཉྙཏྟིཾ. ཛནཡམཱནཱ ཨུཔྤཛྫཏི ཏསྶཱ ཝིཀཱརབྷཱཝཏོ. ཨིཏཱིཏི ཏསྨཱ ཨུཔྤཛྫནཏོ. ཙིཏྟཀིརིཡཝཱཡོདྷཱཏུཝིཔྥཱརཝསེནཱཏི ཀིརིཡམཡཙིཏྟསམུཊྛཱནཝཱཡོདྷཱཏུཡཱ ཝིཙལནཱཀཱརསངྑཱཏཀཱཡཝིཉྙཏྟིཝསེན. ཏསྶཱཏི ཨཊྛིསངྒྷཱཊསྶ. ཨབྷིཀྐམཏོཏི ཨབྷིཀྐམནྟསྶ. ཨོམཏྟཱཏི ཨཝམཏྟཱ ལཱམཀཔྤམཱཎཱ. ཝཱཡོདྷཱཏུཏེཛོདྷཱཏུཝསེན ཨིཏརཱ དྭེ དྷཱཏུཡོ.

ཨིདཾ ཝུཏྟཾ ཧོཏི – ཡསྨཱ ཙེཏྠ ཝཱཡོདྷཱཏུཡཱ ཨནུགཏཱ ཏེཛོདྷཱཏུ ཨུདྡྷརཎསྶ པཙྩཡོ. ཨུདྡྷརཎགཏིཀཱ ཧི ཏེཛོདྷཱཏུ, ཏེན ཏསྶཱ ཨུདྡྷརཎེ ཝཱཡོདྷཱཏུཡཱ ཨནུགཏབྷཱཝོ ཧོཏི, ཏསྨཱ ཨིམཱསཾ དྭིནྣམེཏྠ སཱམཏྠིཡཏོ ཨདྷིམཏྟཏཱ, ཏཐཱ ཨབྷཱཝཏོ པན ཨིཏརཱསཾ ཨོམཏྟཏཱཏི. ཡསྨཱ པན ཏེཛོདྷཱཏུཡཱ ཨནུགཏཱ ཝཱཡོདྷཱཏུ ཨཏིཧརཎཝཱིཏིཧརཎཱནཾ པཙྩཡོ. ཀིརིཡགཏིཀཱཡ ཧི ཝཱཡོདྷཱཏུཡཱ ཨཏིཧརཎཝཱིཏིཧརཎེསུ སཱཏིསཡོ བྱཱཔཱརོ, ཏེན ཏསྶཱ ཏཏྠ ཏེཛོདྷཱཏུཡཱ ཨནུགཏབྷཱཝོ ཧོཏི, ཏསྨཱ ཨིམཱསཾ དྭིནྣམེཏྠ སཱམཏྠིཡཏོ ཨདྷིམཏྟཏཱ, ཨིཏརཱསཉྩ ཏདབྷཱཝཏོ ཨོམཏྟཏཱཏི དསྶེཏི ‘‘ཏཐཱ ཨཏིཧརཎཝཱིཏིཧརཎེསཱུ’’ཏི ཨིམིནཱ. སཏིཔི ཙེཏྠ ཨནུགམཀཱནུགནྟབྦཏཱཝིསེསེ ཏེཛོདྷཱཏུཝཱཡོདྷཱཏུབྷཱཝམཏྟཾ སནྡྷཱཡ ཏཐཱསདྡགྒཧཎཾ ཀཏཾ. པཋམེ ཧི ནཡེ ཏེཛོདྷཱཏུཡཱ ཨནུགམཀཏཱ, ཝཱཡོདྷཱཏུཡཱ ཨནུགནྟབྦཏཱ, དུཏིཡེ པན ཝཱཡོདྷཱཏུཡཱ ཨནུགམཀཏཱ, ཏེཛོདྷཱཏུཡཱ ཨནུགནྟབྦཏཱཏི. ཏཏྠ ཨཀྐནྟཊྛཱནཏོ པཱདསྶ ཨུཀྑིཔནཾ ཨུདྡྷརཎཾ, ཋིཏཊྛཱནཾ ཨཏིཀྐམིཏྭཱ པུརཏོ ཧརཎཾ ཨཏིཧརཎཾ. ཁཱཎུཨཱདིཔརིཧརཎཏྠཾ, པཏིཊྛིཏཔཱདགྷཊྚནཱཔརིཧརཎཏྠཾ ཝཱ པསྶེན ཧརཎཾ ¶ ཝཱིཏིཧརཎཾ, ཡཱཝ པཏིཊྛིཏཔཱདོ, ཏཱཝ ཧརཎཾ ཨཏིཧརཎཾ, ཏཏོ པརཾ ཧརཎཾ ཝཱིཏིཧརཎནྟི ཝཱ ཨཡམེཏེསཾ ཝིསེསོ.

ཡསྨཱ ¶ པཐཝཱིདྷཱཏུཡཱ ཨནུགཏཱ ཨཱཔོདྷཱཏུ ཝོསྶཛྫནེ པཙྩཡོ. གརུཏརསབྷཱཝཱ ཧི ཨཱཔོདྷཱཏུ, ཏེན ཏསྶཱ ཝོསྶཛྫནེ པཐཝཱིདྷཱཏུཡཱ ཨནུགཏབྷཱཝོ ཧོཏི, ཏསྨཱ ཏཱསཾ དྭིནྣམེཏྠ སཱམཏྠིཡཏོ ཨདྷིམཏྟཏཱ, ཨིཏརཱསཉྩ ཏདབྷཱཝཏོ ཨོམཏྟཏཱཏི དསྶེནྟོ ཨཱཧ ‘‘ཝོསྶཛྫནེ…པེ… བལཝཏིཡོ’’ཏི. ཡསྨཱ པན ཨཱཔོདྷཱཏུཡཱ ཨནུགཏཱ པཐཝཱིདྷཱཏུ སནྣིཀྑེཔནསྶ པཙྩཡོ. པཏིཊྛཱབྷཱཝེ ཝིཡ པཏིཊྛཱཔནེཔི ཏསྶཱ སཱཏིསཡཀིཙྩཏྟཱ ཨཱཔོདྷཱཏུཡཱ ཏསྶཱ ཨནུགཏབྷཱཝོ ཧོཏི, ཏཐཱ གྷཊྚནཀིརིཡཱཡ པཐཝཱིདྷཱཏུཡཱ ཝསེན སནྣིརུཛ྄ཛྷནསྶ སིཛ྄ཛྷནཏོ ཏསྶཱ སནྣིརུཛ྄ཛྷནེཔི ཨཱཔོདྷཱཏུཡཱ ཨནུགཏབྷཱཝོ ཧོཏི, ཏསྨཱ ཝུཏྟཾ ‘‘ཏཐཱ སནྣིཀྑེཔནསནྣིརུཛ྄ཛྷནེསཱུ’’ཏི.

ཨནུགམཀཱནུགནྟབྦཏཱཝིསེསེཔི སཏི པཐཝཱིདྷཱཏུཨཱཔོདྷཱཏུབྷཱཝམཏྟཾ སནྡྷཱཡ ཏཐཱསདྡགྒཧཎཾ ཀཏཾ. པཋམེ ཧི ནཡེ པཐཝཱིདྷཱཏུཡཱ ཨནུགམཀཏཱ, ཨཱཔོདྷཱཏུཡཱ ཨནུགནྟབྦཏཱ, དུཏིཡེ པན ཨཱཔོདྷཱཏུཡཱ ཨནུགམཀཏཱ, པཐཝཱིདྷཱཏུཡཱ ཨནུགནྟབྦཏཱཏི. ཝོསྶཛྫནཉྩེཏྠ པཱདསྶ ཨོནཱམནཝསེན ཝོསྶགྒོ, ཏཏོ པརཾ བྷཱུམིཨཱདཱིསུ པཏིཊྛཱཔནཾ སནྣིཀྑེཔནཾ, པཏིཊྛཱཔེཏྭཱ ནིམྨདྡནཝསེན གམནསྶ སནྣིརོདྷོ སནྣིརུཛ྄ཛྷནཾ.

ཏཏྠཱཏི ཏསྨིཾ ཨཏིཀྐམནེ, ཏེསུ ཝཱ ཡཐཱཝུཏྟེསུ ཨུདྡྷརཎཱཏིཧརཎཝཱིཏིཧརཎཝོསྶཛྫནསནྣིཀྑེཔནསནྣིརུཛ྄ཛྷནསངྑཱཏེསུ ཚསུ ཀོཊྛཱསེསུ. ཨུདྡྷརཎེཏི ཨུདྡྷརཎཀྑཎེ. རཱུཔཱརཱུཔདྷམྨཱཏི ཨུདྡྷརཎཱཀཱརེན པཝཏྟཱ རཱུཔདྷམྨཱ, ཏཾསམུཊྛཱཔཀཱ ཙ ཨརཱུཔདྷམྨཱ. ཨཏིཧརཎཾ ན པཱཔུཎནྟི ཁཎམཏྟཱཝཊྛཱནཏོ. སབྦཏྠ ཨེས ནཡོ. ཏཏྠ ཏཏྠེཝཱཏི ཡཏྠ ཡཏྠ ཨུདྡྷརཎཱདིཀེ ཨུཔྤནྣཱ, ཏཏྠ ཏཏྠེཝ. ན ཧི དྷམྨཱནཾ དེསནྟརསངྐམནཾ ཨཏྠི ལཧུཔརིཝཏྟནཏོ. པབྦཾ པབྦནྟི པརིཙྪེདཾ པརིཙྪེདཾ. སནྡྷི སནྡྷཱིཏི གཎྛི གཎྛི. ཨོདྷི ཨོདྷཱིཏི བྷཱགཾ བྷཱགཾ. སབྦཉྩེཏཾ ཨུདྡྷརཎཱདིཀོཊྛཱསེ སནྡྷཱཡ སབྷཱགསནྟཏིཝསེན ཝུཏྟནྟི ཝེདིཏབྦཾ. ཨིཏརོ ཨེཝ ཧི རཱུཔདྷམྨཱནམྤི པཝཏྟིཀྑཎོ གམནཡོགགམནསྶཱདཱནཾ དེཝཔུཏྟཱནཾ ཧེཊྛུཔརིཡེན པཊིམུཁཾ དྷཱཝནྟཱནཾ སིརསི, པཱདེ ཙ བནྡྷཁུརདྷཱརཱསམཱགམཏོཔི སཱིགྷཏརོ, ཡཐཱ ཏིལཱནཾ བྷིཛྫཡམཱནཱནཾ པཊཔཊཱཡནེན ¶ བྷེདོ ལཀྑཱིཡཏི, ཨེཝཾ སངྑཏདྷམྨཱནཾ ཨུཔྤཱདེནཱཏི དསྶནཏྠཾ ‘‘པཊཔཊཱཡནྟཱ’’ཏི ཝུཏྟཾ, ཨུཔྤཱདཝསེན པཊཔཊ-སདྡཾ ཨཀརོནྟཱཔི ཀརོནྟཱ ཝིཡཱཏི ཨཏྠོ. ཏིལབྷེདལཀྑཎཾ པཊཔཊཱཡནཾ ཝིཡ ཧི སངྑཏབྷེདལཀྑཎཾ ཨུཔྤཱདོ ཨུཔྤནྣཱནམེཀནྟཏོ བྷིནྣཏྟཱ. ཏཏྠཱཏི ཨབྷིཀྐམནེ. ཀོ ཨེཀོ ཨབྷིཀྐམཏི ནཱབྷིཀྐམཏིཡེཝ. ཀསྶ ཝཱ ཨེཀསྶ ཨབྷིཀྐམནཾ སིཡཱ, ན སིཡཱ ཨེཝ. ཀསྨཱ? པརམཏྠཏོ ཧི…པེ… དྷཱཏཱུནཾ སཡནཾ, ཏསྨཱཏི ཨཏྠོ. ཨནྡྷབཱལཔུཐུཛྫནསམྨཱུལ༹ྷསྶ ཨཏྟནོ ཨབྷིཀྐམནནིཝཏྟནཉྷེཏཾ ཝཙནཾ. ཨཐ ཝཱ ¶ ‘‘ཀོ ཨེཀོ…པེ… ཨབྷིཀྐམན’’ནྟི ཙོདནཱཡ ‘‘པརམཏྠཏོ ཧཱི’’ཏིཨཱདིནཱ སོདྷནཱ ཝུཏྟཱ.

ཏསྨིཾ ཏསྨིཾ ཀོཊྛཱསེཏི ཡཐཱཝུཏྟེ ཚབྦིདྷེཔི ཀོཊྛཱསེ གམནཱདིཀསྶ ཨཔཙྩཱམཊྛཏྟཱ. ‘‘སདྡྷིཾ རཱུཔེན ཨུཔྤཛྫཏེ, ནིརུཛ྄ཛྷཏཱི’’ཏི ཙ སིལོཀཔདེན སཧ སམྦནྡྷོ. ཏཏྠ པཋམཔདསམྦནྡྷེ རཱུཔེནཱཏི ཡེན ཀེནཙི སཧུཔྤཛྫནཀེན རཱུཔེན. དུཏིཡཔདསམྦནྡྷེ པན ‘‘རཱུཔེནཱ’’ཏི ཨིདཾ ཡཾ ཏཏོ ནིརུཛ྄ཛྷམཱནཙིཏྟཏོ ཨུཔརི སཏྟརསམཙིཏྟསྶ ཨུཔྤཱདཀྑཎེ ཨུཔྤནྣཾ, ཏདེཝ ཏསྶ ནིརུཛ྄ཛྷམཱནཙིཏྟསྶ ནིརོདྷེན སདྡྷིཾ ནིརུཛ྄ཛྷནཀཾ སཏྟརསཙིཏྟཀྑཎཱཡུཀཾ རཱུཔཾ སནྡྷཱཡ ཝུཏྟཾ, ཨཉྙཐཱ རཱུཔཱརཱུཔདྷམྨཱ སམཱནཱཡུཀཱ སིཡུཾ. ཡདི ཙ སིཡུཾ, ཨཐ ‘‘རཱུཔཾ གརུཔརིཎཱམཾ དནྡྷནིརོདྷ’’ནྟིཨཱདི (ཝིབྷ. ཨཊྛ. པཀིཎྞཀཀཐཱ) ཨཊྛཀཐཱཝཙནེཧི, ‘‘ནཱཧཾ བྷིཀྑཝེ ཨཉྙཾ ཨེཀདྷམྨམྤི སམནུཔསྶཱམི, ཡཾ ཨེཝཾ ལཧུཔརིཝཏྟཾ, ཡཐཡིདཾ ཙིཏྟ’’ནྟི (ཨ. ནི. ༡.༣༨) ཨེཝམཱདིཔཱལི༹ཝཙནེཧི ཙ ཝིརོདྷོ སིཡཱ. ཙིཏྟཙེཏསིཀཱ ཧི སཱརམྨཎསབྷཱཝཱ ཡཐཱབལཾ ཨཏྟནོ ཨཱརམྨཎཔཙྩཡབྷཱུཏམཏྠཾ ཝིབྷཱཝེནྟོ ཨེཝ ཨུཔྤཛྫནྟི, ཏསྨཱ ཏེསཾ ཏཾསབྷཱཝནིཔྥཏྟིཨནནྟརཾ ནིརོདྷོ, རཱུཔདྷམྨཱ པན ཨནཱརམྨཎཱ པཀཱསེཏབྦཱ, ཨེཝཾ ཏེསཾ པཀཱསེཏབྦབྷཱཝནིཔྥཏྟི སོལ༹སཧི ཙིཏྟེཧི ཧོཏི, ཏསྨཱ ཨེཀཙིཏྟཀྑཎཱཏཱིཏེན སཧ སཏྟརསཙིཏྟཀྑཎཱཡུཀཏཱ རཱུཔདྷམྨཱནམིཙྪིཏཱཏི. ལཧུཔརིཝཏྟནཝིཉྙཱཎཝིསེསསྶ སངྒཏིམཏྟཔཙྩཡཏཱཡ ཏིཎྞཾ ཁནྡྷཱནཾ, ཝིསཡསངྒཏིམཏྟཏཱཡ ཙ ཝིཉྙཱཎསྶ ལཧུཔརིཝཏྟིཏཱ, དནྡྷམཧཱབྷཱུཏཔཙྩཡཏཱཡ རཱུཔསྶ གརུཔརིཝཏྟིཏཱ. ཡཐཱབྷཱུཏཾ ནཱནཱདྷཱཏུཉཱཎཾ ཁོ པན ཏཐཱགཏསྶེཝ, ཏེན ཙ པུརེཛཱཏཔཙྩཡོ རཱུཔདྷམྨོཝ ཝུཏྟོ, པཙྪཱཛཱཏཔཙྩཡོ ཙ ཏཐེཝཱཏི རཱུཔཱརཱུཔདྷམྨཱནཾ སམཱནཀྑཎཏཱ ན ཡུཛྫཏེཝ, ཏསྨཱ ཝུཏྟནཡེནེཝེཏྠ ཨཏྠོ ཝེདིཏབྦོཏི ཨཱཙརིཡེན (དཱི. ནི. ཊཱི. ༡.༢༡༤) ཝུཏྟཾ ¶ , ཏདེཏཾ ཙིཏྟཱནུཔརིཝཏྟིཡཱ ཝིཉྙཏྟིཡཱ ཨེཀནིརོདྷབྷཱཝསྶ སུཝིཉྙེཡྻཏྟཱ ཨེཝཾ ཝུཏྟཾ. ཏཏོ སཝིཉྙཏྟིཀེན པུརེཏརཾ སཏྟརསམཙིཏྟསྶ ཨུཔྤཱདཀྑཎེ ཨུཔྤནྣེན རཱུཔེན སདྡྷིཾ ཨཉྙཾ ཙིཏྟཾ ནིརུཛ྄ཛྷཏཱིཏི ཨཏྠོ ཝེདིཏབྦོ. ཨཉྙཾ ཙིཏྟཾ ནིརུཛ྄ཛྷཏི, ཨཉྙཾ ཨུཔྤཛྫཏེ ཙིཏྟནྟི ཡོཛེཏབྦཾ. ཨཉྙོ ཧི སདྡཀྐམོ, ཨཉྙོ ཨཏྠཀྐམོཏི. ཡཉྷི པུརིམུཔྤནྣཾ ཙིཏྟཾ, ཏཾ ནིརུཛ྄ཛྷནྟཾ ཨཉྙསྶ པཙྪཱ ཨུཔྤཛྫམཱནསྶ ཨནནྟརཱདིཔཙྩཡབྷཱཝེནེཝ ནིརུཛ྄ཛྷཏི, ཏཐཱ ལདྡྷཔཙྩཡམེཝ ཨཉྙམྤི ཨུཔྤཛྫཏེ ཙིཏྟཾ, ཨཝཏྠཱཝིསེསཏོ ཙེཏྠ ཨཉྙཐཱ. ཡདི ཨེཝཾ ཏེསམུབྷིནྣཾ ཨནྟརོ ལབྦྷེཡྻཱཏི ཙོདནཾ ‘‘ནོ’’ཏི ཨཔནེཏུམཱཧ ‘‘ཨཝཱིཙི མནུསམྦནྡྷོ’’ཏི, ཡཐཱ ཝཱིཙི ཨནྟརོ ན ལབྦྷཏི, ཏདེཝེདནྟི ཨཝིསེསཾ ཝིདཱུ མཉྙནྟི, ཨེཝཾ ཨནུ ཨནུ སམྦནྡྷོ ཙིཏྟསནྟཱནོ, རཱུཔསནྟཱནོ ཙ ནདཱིསོཏོཝ ནདིཡཾ ¶ ཨུདཀཔྤཝཱཧོ ཝིཡ ཝཏྟཏཱིཏི ཨཏྠོ. ཨཝཱིཙཱིཏི ཧི ནིརནྟརཏཱཝསེན བྷཱཝནཔུཾསཀཝཙནཾ.

ཨབྷིམུཁཾ ལོཀིཏཾ ཨཱལོཀིཏནྟི ཨཱཧ ‘‘པུརཏོཔེཀྑན’’ནྟི. ཡཾདིསཱབྷིམུཁོ གཙྪཏི, ཏིཊྛཏི, ནིསཱིདཏི, སཡཏི ཝཱ, ཏདབྷིམུཁཾ པེཀྑནནྟི ཝུཏྟཾ ཧོཏི. ཡསྨཱ ཙ ཏཱདིསམཱལོཀིཏཾ ནཱམ ཧོཏི, ཏསྨཱ ཏདནུགཏདིསཱལོཀནཾ ཝིལོཀིཏནྟི ཨཱཧ ‘‘ཨནུདིསཱཔེཀྑན’’ནྟི, ཨབྷིམུཁདིསཱནུརཱུཔགཏེསུ ཝཱམདཀྑིཎཔསྶེསུ ཝིཝིདྷཱ པེཀྑནནྟི ཝུཏྟཾ ཧོཏི. ཧེཊྛཱཨུཔརིཔཙྪཱཔེཀྑནཉྷི ‘‘ཨོལོཀིཏཨུལློཀིཏཱཔལོཀིཏཱནཱི’’ཏི གཧིཏཱནི. སཱརུཔྤཝསེནཱཏི སམཎཔཏིརཱུཔཝསེན, ཨིམིནཱཝ ཨསཱརུཔྤཝསེན ཨིཏརེསམགྒཧཎནྟི སིཛ྄ཛྷཏི. སམྨཛྫནཔརིབྷཎྜཱདིཀརཎེ ཨོལོཀིཏསྶ, ཨུལློཀཧརཎཱདཱིསུ ཨུལློཀིཏསྶ, པཙྪཏོ ཨཱགཙྪནྟཔརིསྶཡཔརིཝཛྫནཱདཱིསུ ཨཔལོཀིཏསྶ ཙ སིཡཱ སམྦྷཝོཏི ཨཱཧ ‘‘ཨིམིནཱ ཝཱ’’ཏིཨཱདི, ཨེཏེན ཨུཔལཀྑཎམཏྟཉྩེཏནྟི དསྶེཏི.

ཀཱཡསཀྑིནྟི ཀཱཡེན སཙྪིཀཏཾ པཙྩཀྑཀཱརིནཾ, སཱདྷཀནྟི ཨཏྠོ. སོ ཧི ཨཱཡསྨཱ ཝིཔསྶནཱཀཱལེ ‘‘ཡམེཝཱཧཾ ཨིནྡྲིཡེསུ ཨགུཏྟདྭཱརཏཾ ནིསྶཱཡ སཱསནེ ཨནབྷིརཏིཨཱདིཝིཔྤཀཱརཾ པཏྟོ, ཏམེཝ སུཊྛུ ནིགྒཧེསྶཱམཱི’’ཏི ཨུསྶཱཧཛཱཏོ བལཝཧིརོཏྟཔྤོ, ཏཏྠ ཙ ཀཏཱདྷིཀཱརཏྟཱ ཨིནྡྲིཡསཾཝརེ ཨུཀྐཾསཔཱརམིཔྤཏྟོ, ཏེནེཝ ནཾ སཏྠཱ ‘‘ཨེཏདགྒཾ བྷིཀྑཝེ མམ སཱཝཀཱནཾ བྷིཀྑཱུནཾ ཨིནྡྲིཡེསུ གུཏྟདྭཱརཱནཾ, ཡདིདཾ ནནྡོ’’ཏི (ཨ. ནི. ༡.༢༣༠) ཨེཏདགྒེ ཋཔེསི. ནནྡསྶཱཏི ཀཏྟུཏྠེ སཱམིཝཙནཾ. ཨིཏཱིཏི ཨིམིནཱ ཨཱལོཀནེན.

སཱཏྠཀཏཱ ¶ ཙ སཔྤཱཡཏཱ ཙ ཝེདིཏབྦཱ ཨཱལོཀིཏཝིལོཀིཏསྶཱཏི ཨཛ྄ཛྷཱཧརིཏྭཱ སམྦནྡྷོ. ཏསྨཱཏི ཀམྨཊྛཱནཱཝིཛཧནསྶེཝ ཨཱལོཀིཏཝིལོཀིཏེ. གོཙརསམྤཛཉྙབྷཱཝཏོ ཨེཏྠཱཏི ཨཱལོཀིཏཝིལོཀིཏེ. ཨཏྟནོ ཀམྨཊྛཱནཝསེནེཝཱཏི ཁནྡྷཱདིཀམྨཊྛཱནཝསེནེཝ ཨཱལོཀནཝིལོཀནཾ ཀཱཏབྦཾ, ན ཨཉྙོ ཨུཔཱཡོ གཝེསིཏབྦོཏི ཨདྷིཔྤཱཡོ. ཀམྨཊྛཱནསཱིསེནེཝཱཏི ཝཀྑམཱནཀམྨཊྛཱནམུཁེནེཝ. ཡསྨཱ པན ཨཱལོཀིཏཱདི ནཱམ དྷམྨམཏྟསྶེཝ པཝཏྟིཝིསེསོ, ཏསྨཱ ཏསྶ ཡཱཐཱཝཏོ ཛཱནནཾ ཨསམྨོཧསམྤཛཉྙནྟི དསྶེཏུཾ ‘‘ཨབྦྷནྟརེ’’ཏིཨཱདི ཝུཏྟཾ. ཨཱལོཀེཏཱཏི ཨཱལོཀེནྟོ. ཏཐཱ ཝིལོཀེཏཱ. ཝིཉྙཏྟིནྟི ཀཱཡཝིཉྙཏྟིཾ. ཨིཏཱིཏི ཏསྨཱ ཨུཔྤཛྫནཏོ. ཙིཏྟཀིརིཡཝཱཡོདྷཱཏུཝིཔྥཱརཝསེནཱཏི ཀིརིཡམཡཙིཏྟསམུཊྛཱནཱཡ ཝཱཡོདྷཱཏུཡཱ ཝིཙལནཱཀཱརསངྑཱཏཀཱཡཝིཉྙཏྟིཝསེན. ཨཀྑིདལནྟི ཨཀྑིཔཊལཾ. ཨདྷོ སཱིདཏཱིཏི ཨོསཱིདནྟཾ ཝིཡ ཧེཊྛཱ གཙྪཏི. ཨུདྡྷཾ ལངྒྷེཏཱིཏི ལངྒྷེནྟཾ ཝིཡ ཨུཔརི ¶ གཙྪཏི. ཡནྟཀེནཱཏི ཨཀྑིདལེསུ ཡོཛིཏརཛྫུཡོ གཧེཏྭཱ པརིབྦྷམནཀཙཀྐེན. ཏཏོཏི ཏཐཱ ཨཀྑིདལཱནམོསཱིདནུལླངྒྷནཏོ. མནོདྭཱརིཀཛཝནསྶ མཱུལཀཱརཎཔརིཛཱནནཾ མཱུལཔརིཉྙཱ. ཨཱགནྟུཀསྶ ཨབྦྷཱགཏསྶ, ཏཱཝཀཱལིཀསྶ ཙ ཏངྑཎམཏྟཔཝཏྟཀསྶ བྷཱཝོ ཨཱགནྟུཀཏཱཝཀཱལིཀབྷཱཝོ, ཏེསཾ ཝསེན.

ཏཏྠཱཏི ཏེསུ གཱཐཱཡ དསྶིཏེསུ སཏྟསུ ཙིཏྟེསུ. ཨངྒཀིཙྩཾ སཱདྷཡམཱནནྟི པདྷཱནབྷཱུཏཨངྒཀིཙྩཾ ནིཔྥཱདེནྟཾ, སརཱིརཾ ཧུཏྭཱཏི ཝུཏྟཾ ཧོཏི. བྷཝངྒཉྷི པཊིསནྡྷིསདིསཏྟཱ པདྷཱནམངྒཾ, པདྷཱནཉྩ ‘‘སརཱིར’’ནྟི ཝུཙྩཏི, ཨཝིཙྪེདཔྤཝཏྟིཧེཏུབྷཱཝེན ཝཱ ཀཱརཎཀིཙྩཾ སཱདྷཡམཱནནྟི ཨཏྠོ. ཏཾ ཨཱཝཊྚེཏྭཱཏི བྷཝངྒསཱམཉྙཝསེན ཝུཏྟཾ, པཝཏྟཱཀཱརཝིསེསཝསེན པན ཨཏཱིཏཱདིནཱ ཏིབྦིདྷཾ, ཏཏྠ ཙ བྷཝངྒུཔཙྪེདསྶེཝ ཨཱཝཊྚནཾ. ཏནྣིརོདྷཱཏི ཏསྶ ནིརུཛ྄ཛྷནཏོ, ཨནནྟརཔཙྩཡཝསེན ཧེཏུཝཙནཾ. ‘‘པཋམཛཝནེཔི…པེ… སཏྟམཛཝནེཔཱི’’ཏི ཨིདཾ པཉྩདྭཱརིཀཝཱིཐིཡཾ ‘‘ཨཡཾ ཨིཏྠཱི, ཨཡཾ པུརིསོ’’ཏི རཛྫནདུསྶནམུཡ྄ཧནཱནམབྷཱཝཾ སནྡྷཱཡ ཝུཏྟཾ. ཏཏྠ ཧི ཨཱཝཛྫནཝོཊྛབྦནཱནཾ པུརེཏརཾ པཝཏྟཱཡོནིསོམནསིཀཱརཝསེན ཨཡོནིསོ ཨཱཝཛྫནཝོཊྛབྦནཱཀཱརེན པཝཏྟནཏོ ཨིཊྛེ ཨིཏྠིརཱུཔཱདིམྷི ལོབྷསཧགཏམཏྟཾ ཛཝནཾ ཨུཔྤཛྫཏི, ཨནིཊྛེ ཙ དོསསཧགཏམཏྟཾ, ན པནེཀནྟརཛྫནདུསྶནཱདི, མནོདྭཱརེ ¶ ཨེཝ ཨེཀནྟརཛྫནདུསྶནཱདི ཧོཏི, ཏསྶ པན མནོདྭཱརིཀསྶ རཛྫནདུསྶནཱདིནོ པཉྩདྭཱརིཀཛཝནཾ མཱུལཾ, ཡཐཱཝུཏྟཾ ཝཱ སབྦམྤི བྷཝངྒཱདི, ཨེཝཾ མནོདྭཱརིཀཛཝནསྶ མཱུལཀཱརཎཝསེན མཱུལཔརིཉྙཱ ཝུཏྟཱ, ཨཱགནྟུཀཏཱཝཀཱལིཀཏཱ པན པཉྩདྭཱརིཀ ཛཝནསྶེཝ ཨཔུབྦབྷཱཝཝསེན, ཨིཏྟརཏཱཝསེན ཙ. ཡུདྡྷམཎྜལེཏི སངྒཱམཔྤདེསེ. ཧེཊྛུཔརིཡཝསེནཱཏི ཧེཊྛཱ ཙ ཨུཔརི ཙ པརིཝཏྟམཱནཝསེན, ཨཔརཱཔརཾ བྷཝངྒུཔྤཏྟིཝསེནཱཏི ཨཏྠོ. ཏཐཱ བྷཝངྒུཔྤཱདཝསེན ཧི ཏེསཾ བྷིཛྫིཏྭཱ པཏནཾ, ཨིམིནཱ པན ཧེཊྛིམསྶ, ཨུཔརིམསྶ ཙ བྷཝངྒསྶ ཨཔརཱཔརུཔྤཏྟིཝསེན པཉྩདྭཱརིཀཛཝནཏོ ཝིསདིསསྶ མནོདྭཱརིཀཛཝནསྶ ཨུཔྤཱདཾ དསྶེཏི ཏསྶ ཝསེནེཝ རཛྫནཱདིཔཝཏྟནཏོ. ཏེནེཝཱཧ ‘‘རཛྫནཱདིཝསེན ཨཱལོཀིཏཝིལོཀིཏཾ ཧོཏཱི’’ཏི.

ཨཱཔཱཐནྟི གོཙརབྷཱཝཾ. སཀཀིཙྩནིཔྥཱདནཝསེནཱཏི ཨཱཝཛྫནཱདིཀིཙྩནིཔྥཱདནཝསེན. ཏནྟི ཛཝནཾ. ཙཀྑུདྭཱརེ རཱུཔསྶ ཨཱཔཱཐགམནེན ཨཱཝཛྫནཱདཱིནཾ པཝཏྟནཏོ པཝཏྟིཀཱརཎཝསེནེཝ ‘‘གེཧབྷཱུཏེ’’ཏི ཝུཏྟཾ, ན ནིསྶཡཝསེན. ཨཱགནྟུཀཔུརིསོ ཝིཡཱཏི ཨབྦྷཱགཏཔུརིསོ ཝིཡ. དུཝིདྷཱ ཧི ཨཱགནྟུཀཱ ཨཏིཐིཨབྦྷཱགཏཝསེན. ཏཏྠ ཀཏཔརིཙཡོ ‘‘ཨཏིཐཱི’’ཏི ཝུཙྩཏི, ཨཀཏཔརིཙཡོ ‘‘ཨབྦྷཱགཏོ’’ཏི, ཨཡམེཝིདྷཱདྷིཔྤེཏོ. ཏེནཱཧ ‘‘ཡཐཱ པརགེཧེ’’ཏིཨཱདི ¶ . ཏསྶཱཏི ཛཝནསྶ རཛྫནདུསྶནམུཡ྄ཧནཾ ཨཡུཏྟནྟི སམྦནྡྷོ. ཨཱསིནེསཱུཏི ནིསིནྣེསུ. ཨཱཎཱཀརཎནྟི ཨཏྟནོ ཝསཀརཎཾ.

སདྡྷིཾ སམྤཡུཏྟདྷམྨེཧི ཕསྶཱདཱིཧི. ཏཏྠ ཏཏྠེཝ སཀཀིཙྩནིཔྥཱདནཊྛཱནེ བྷིཛྫནྟི. ཨིཏཱིཏི ཏསྨཱ ཨཱཝཛྫནཱདིཝོཊྛབྦནཔརིཡོསཱནཱནཾ བྷིཛྫནཏོ. ཨིཏྟརཱནཱིཏི ཨཙིརཊྛིཏིཀཱནི. ཏཏྠཱཏི ཏསྨིཾ ཝཙནེ ཨཡཾ ཨུཔམཱཏི ཨཏྠོ. ཨུདཡབྦཡཔརིཙྪིནྣོ ཏཱཝ ཏཏྟཀོ ཀཱལོ ཨེཏེསནྟི ཏཱཝཀཱལིཀཱནི, ཏསྶ བྷཱཝོ, ཏཾཝསེན.

ཨེཏནྟི ཨསམྨོཧསམྤཛཉྙཾ. ཨེཏྠཱཏི ཨེཏསྨིཾ ཡཐཱཝུཏྟདྷམྨསམུདཱཡེ. དསྶནཾ ཙཀྑུཝིཉྙཱཎཾ, ཏསྶ ཝསེནེཝ ཨཱལོཀནཝིལོཀནཔཉྙཱཡནཏོ ཨཱཝཛྫནཱདཱིནམགྒཧཎཾ.

སམཝཱཡེཏི སཱམགྒིཡཾ. ཏཏྠཱཏི པཉྩཀྑནྡྷཝསེན ཨཱལོཀནཝིལོཀན པཉྙཱཡམཱནེ. ནིམིཏྟཏྠེ ཙེཏཾ བྷུམྨཾ, ཏབྦིནིམུཏྟཀོ ཀོ ཨེཀོ ¶ ཨཱལོཀེཏི ན ཏྭེཝ ཨཱལོཀེཏི. ཀོ ཙ ཨེཀོ ཝིལོཀེཏི ནཏྭེཝ ཝིལོཀེཏཱིཏི ཨཏྠོ.

‘‘ཏཐཱ’’ཏིཨཱདི ཨཱཡཏནཝསེན, དྷཱཏུཝསེན ཙ དསྶནཾ. ཙཀྑུརཱུཔཱནི ཡཐཱརཧཾ དསྶནསྶ ནིསྶཡཱརམྨཎཔཙྩཡོ, ཏཐཱ ཨཱཝཛྫནཱ ཨནནྟརཱདིཔཙྩཡོ, ཨཱལོཀོ ཨུཔནིསྶཡཔཙྩཡོཏི དསྶནསྶ སུཏྟནྟནཡེན པརིཡཱཡཏོ པཙྩཡཏཱ ཝུཏྟཱ. སཧཛཱཏཔཙྩཡོཔི དསྶནསྶེཝ, ནིདསྶནམཏྟཉྩེཏཾ ཨཉྙམཉྙསམྤཡུཏྟཨཏྠིཨཝིགཏཱདིཔཙྩཡཱནམྤི ལབྦྷནཏོ, ‘‘སཧཛཱཏཱདིཔཙྩཡཱ’’ཏིཔི ཨདྷུནཱ པཱཋོ དིསྶཏི. ‘‘ཨེཝ’’ནྟིཨཱདི ནིགམནཾ.

ཨིདཱནི ཡཐཱཔཱཋཾ སམིཉྫནཔསཱརཎེསུ སམྤཛཱནཾ ཝིབྷཱཝེནྟོ ‘‘སམིཉྫིཏེ པསཱརིཏེ’’ཏིཨཱདིམཱཧ. ཏཏྠ པབྦཱནནྟི པབྦབྷཱུཏཱནཾ. ཏཾསམིཉྫནཔསཱརཎེནེཝ ཧི སབྦེསཾ ཧཏྠཔཱདཱནཾ སམིཉྫནཔསཱརཎཾ ཧོཏི, པབྦམེཏེསནྟི ཝཱ པབྦཱ ཡཐཱ ‘‘སདྡྷོ’’ཏི, པབྦཝནྟཱནནྟི ཨཏྠོ. ཙིཏྟཝསེནེཝཱཏི ཙིཏྟརུཙིཡཱ ཨེཝ, ཙིཏྟསཱམཏྠིཡཱ ཝཱ. ཡཾ ཡཾ ཙིཏྟཾ ཨུཔྤཛྫཏི སཱཏྠེཔི ཨནཏྠེཔི སམིཉྫིཏུཾ, པསཱརིཏུཾ ཝཱ, ཏཾཏཾཙིཏྟཱནུགཏེནེཝ སམིཉྫནཔསཱརཎམཀཏྭཱཏི ཝུཏྟཾ ཧོཏི. ཏཏྠཱཏི སམིཉྫནཔསཱརཎེསུ ཨཏྠཱནཏྠཔརིགྒཎྷནཾ ཝེདིཏབྦནྟི སམྦནྡྷོ. ཁཎེ ཁཎེཏི ཏཐཱ ཋིཏཀྑཎསྶ བྱཱཔནིཙྪཱཝཙནཾ. ཝེདནཱཏི སནྠམྦྷནཱདཱིཧི རུཛྫནཱ. ‘‘ཝེདནཱ ཨུཔྤཛྫཏཱི’’ཏིཨཱདིནཱ པརམྤརཔཡོཛནཾ དསྶེཏི. ཏཐཱ ‘‘ཏཱ ཝེདནཱ ¶ ནུཔྤཛྫནྟཱི’’ཏིཨཱདིནཱཔི. པུརིམཾ པུརིམཉྷི པཙྪིམསྶ པཙྪིམསྶ ཀཱརཎཝཙནཾ. ཀཱལེཏི སམིཉྫིཏུཾ, པསཱརིཏུཾ ཝཱ ཡུཏྟཀཱལེ. ཕཱཏིནྟི ཝུདྡྷིཾ. ཛྷཱནཱདི པན ཝིསེསོ.

ཏཏྲཱཡཾ ནཡོཏི སཔྤཱཡཱསཔྤཱཡཨཔརིགྒཎྷནེ ཝཏྠུསནྡསྶནསཾངྑཱཏོ ནཡོ. ཏདཔརིགྒཧཎེ ཨཱདཱིནཝདསྶནེནེཝ པརིགྒཧཎེཔི ཨཱནིསཾསོ ཝིབྷཱཝིཏོཏི ཏེསམིདྷ ཨུདཱཧརཎཾ ཝེདིཏབྦཾ. མཧཱཙེཏིཡངྒཎེཏི དུཊྛགཱམཎིརཉྙཱ ཀཏསྶ ཧེམམཱལཱིནཱམཀསྶ མཧཱཙེཏིཡསྶ ཨངྒཎེ. ཝུཏྟཉྷི –

‘‘དཱིཔཔྤསཱདཀོ ཐེརོ, རཱཛིནོ ཨཡྻཀསྶ མེ;

ཨེཝཾ ཀིརཱཧ ནཏྟཱ ཏེ, དུཊྛགཱམཎི བྷཱུཔཏི.

མཧཱཔུཉྙོ ¶ མཧཱཐཱུཔཾ, སོཎྞམཱལིཾ མནོརམཾ;

ཝཱིསཾ ཧཏྠསཏཾ ཨུཙྩཾ, ཀཱརེསྶཏི ཨནཱགཏེ’’ཏི.

བྷཱུམིཔྤདེསོ ཙེཏྠ ཨངྒཎཾ ‘‘ཨུདངྒཎེ ཏཏྠ པཔཾ ཨཝིནྡུ’’ནྟིཨཱདིསུ (ཛཱ. ༡.༡.༢) ཝིཡ, ཏསྨཱ ཨུཔཙཱརབྷཱུཏེ སུསངྑཏེ བྷཱུམིཔྤདེསེཏི ཨཏྠོ. ཏེནེཝ ཀཱརཎེན གིཧཱི ཛཱཏོཏི ཀཱཡསཾསགྒསམཱཔཛྫནཧེཏུནཱ ཨུཀྐཎྛིཏོ ཧུཏྭཱ ཧཱིནཱཡཱཝཏྟོ. ཛྷཱཡཱིཏི ཛྷཱཡནཾ ཌཡ྄ཧནམཱཔཛྫི. མཧཱཙེཏིཡངྒཎེཔི ཙཱིཝརཀུཊིཾ ཀཏྭཱ ཏཏྠ སཛ྄ཛྷཱཡཾ གཎྷནྟཱིཏི ཝུཏྟཾ ‘‘ཙཱིཝརཀུཊིདཎྜཀེ’’ཏི, ཙཱིཝརཀུཊིཡཱ ཙཱིཝརཚདནཏྠཱཡ ཀཏདཎྜཀེཏི ཨཏྠོ. ‘‘མཎིསཔྤོ ནཱམ སཱིཧལ༹དཱིཔེ ཝིཛྫམཱནཱ ཨེཀཱ སཔྤཛཱཏཱིཏི ཝདནྟཱི’’ཏི ཨཱཙརིཡཱནནྡཏྠེརེན, (ཝིབྷ. མཱུལཊཱི. ༢༤༢) ཨཱཙརིཡདྷམྨཔཱལཏྠེརེན (དཱི. ནི. ཊཱི. ༡.༢༡༤) ཙ ཝུཏྟཾ. ‘‘ཀེཙི, ཨཔརེ, ཨཉྙེ’’ཏི ཝཱ ཨཝཏྭཱ ‘‘ཝདནྟི’’ཙྩེཝ ཝཙནཉྩ སཱརཏོ གཧེཏབྦཏཱཝིཉྙཱཔནཏྠཾ ཨཉྙཐཱ གཧེཏབྦསྶ ཨཝཙནཏོ, ཏསྨཱ ན ནཱིལསཔྤཱདི ཨིདྷ ‘‘མཎིསཔྤོ’’ཏི ཝེདིཏབྦོ.

མཧཱཐེརཝཏྠུནཱཏི ཨེཝཾནཱམཀསྶ ཐེརསྶ ཝཏྠུནཱ. ཨནྟེཝཱསིཀེཧཱིཏི ཏཏྠ ནིསིནྣེསུ བཧཱུསུ ཨནྟེཝཱསིཀེསུ ཨེཀེན ཨནྟེཝཱསིཀེན. ཏེནཱཧ ‘‘ཏཾ ཨནྟེཝཱསིཀཱ པུཙྪིཾསཱུ’’ཏི. ཀམྨཊྛཱནནྟི ‘‘ཨབྦྷནྟརེ ཨཏྟཱ ནཱམཱ’’ཏིཨཱདིནཱ (དཱི. ནི. ཨཊྛ. ༡.༢༡༤) ཝཀྑམཱནཔྤཀཱརཾ དྷཱཏུཀམྨཊྛཱནཾ. པཀརཎཏོཔི ཧི ཨཏྠོ ཝིཉྙཱཡཏཱིཏི. ཏཏྠ ཋིཏཱནཾ པུཙྪནྟཱནཾ སངྒཧཎཝསེན ‘‘ཏུམྷེཧཱི’’ཏི པུན པུཐུཝཙནཀརཎཾ. ཨེཝཾ རཱུཔཾ སབྷཱཝོ ཡསྶཱཏི ཨེཝརཱུཔོ ནིགྒཧིཏལོཔཝསེན ཏེན ¶ , ཀམྨཊྛཱནམནསིཀཱརསབྷཱཝེནཱཏི ཨཏྠོ. ཨེཝམེཏྠཱཔཱིཏི ཨཔི-སདྡེན ཧེཊྛཱ ཝུཏྟཾ ཨཱལོཀིཏཝིལོཀིཏཔཀྑམཔེཀྑནཾ ཀརོཏི. ཨཡཾ ནཡོ ཨུཔརིཔི.

སུཏྟཱཀཌྜྷནཝསེནཱཏི ཡནྟེ ཡོཛིཏསུཏྟཱནཾ ཨཱཝིཉྪནཝསེན. དཱརུཡནྟསྶཱཏི དཱརུནཱ ཀཏཡནྟརཱུཔསྶ. ཏཾ ཏཾ ཀིརིཡཾ ཡཱཏི པཱཔུཎཱཏི, ཧཏྠཔཱདཱདཱིཧི ཝཱ ཏཾ ཏཾ ཨཱཀཱརཾ ཀུརུམཱནཾ ཡཱཏི གཙྪཏཱིཏི ཡནྟཾ, ནཊཀཱདིཔཉྩཱལིཀཱརཱུཔཾ, དཱརུནཱ ཀཏཾ ཡནྟཾ ཏཐཱ, ནིདསྶནམཏྟཉྩེཏཾ. ཏཐཱ ཧི ནཾ པོཏྠེན ཝཏྠེན ཨལངྐརིཡཏྟཱ པོཏྠལིཀཱ, པཉྩ ཨངྒཱནི ཡསྶཱ སཛཱིཝསྶེཝཱཏི པཉྩཱལིཀཱཏི ཙ ཝོཧརནྟི. ཧཏྠཔཱདལལ༹ནནྟི ཧཏྠཔཱདཱནཾ ཀམྤནཾ, ཧཏྠཔཱདེཧི ཝཱ ལཱིལཱ༹ཀརཎཾ.

སངྒྷཱཊིཔཏྟཙཱིཝརདྷཱརཎེཏི ¶ ཨེཏྠ སངྒྷཱཊིཙཱིཝརཱནཾ སམཱནདྷཱརཎཏཱཡ ཨེཀཏོདསྶནཾ གནྠགརུཏཱཔནཡནཏྠཾ, ཨནྟརཝཱསཀསྶ ནིཝཱསནཝསེན, སེསཱནཾ པཱརུཔནཝསེནཱཏི ཡཐཱརཧམཏྠོ. ཏཏྠཱཏི སངྒྷཱཊིཙཱིཝརདྷཱརཎཔཏྟདྷཱརཎེསུ. ཝུཏྟཔྤཀཱརོཏི པཙྩཝེཀྑཎཝིདྷིནཱ སུཏྟེ ཝུཏྟཔྤབྷེདོ.

ཨུཎྷཔཀཏིཀསྶཱཏི ཨུཎྷཱལུཀསྶ པརིལཱ༹ཧབཧུལཀཱཡསྶ. སཱིཏཱལུཀསྶཱཏི སཱིཏབཧུལཀཱཡསྶ. གྷནནྟི ཨཔྤིཏཾ. དུཔཊྚནྟི ནིདསྶནམཏྟཾ. ‘‘ཨུཏུདྡྷཊཱནཾ དུསྶཱནཾ ཙཏུགྒུཎཾ སངྒྷཱཊིཾ, དིགུཎཾ ཨུཏྟརཱསངྒཾ, དིགུཎཾ ཨནྟརཝཱསཀཾ, པཾསུཀཱུལེ ཡཱཝདཏྠ’’ནྟི (མཧཱཝ. ༣༤༨) ཧི ཝུཏྟཾ. ཝིཔརཱིཏནྟི ཏདུབྷཡཏོ ཝིཔརཱིཏཾ, ཏེསཾ ཏིཎྞམྤི ཨསཔྤཱཡཾ. ཀསྨཱཏི ཨཱཧ ‘‘ཨགྒལཱ༹དིདཱནེནཱ’’ཏིཨཱདི. ཨུདྡྷརིཏྭཱ ཨལླཱིཡཱཔནཁཎྜཾ ཨགྒལ༹ཾ. ཨཱདིསདྡེན ཏུནྣཀམྨཱདཱིནི སངྒཎྷཱཏི. ཏཐཱ-སདྡོ ཨནུཀཌྜྷནཏྠོ, ཨསཔྤཱཡམེཝཱཏི. པཊྚུཎྞདེསེ པཱཎཀེཧི སཉྫཱཏཝཏྠཾ པཊྚུཎྞཾ. ཝཱཀཝིསེསམཡཾ སེཏཝཎྞཾ དུཀཱུལཾ. ཨཱདིསདྡེན ཀོསེཡྻཀམྦལཱདིཀཾ སཱནུལོམཾ ཀཔྤིཡཙཱིཝརཾ སངྒཎྷཱཏི. ཀསྨཱཏི ཝུཏྟཾ ‘‘ཏཱདིསཉྷཱི’’ཏིཨཱདི. ཨརཉྙེ ཨེཀཀསྶ ནིཝཱསནྟརཱཡཀརནྟི བྲཧྨཙརིཡནྟརཱཡེཀདེསམཱཧ. ཙོརཱདིསཱདྷཱརཎཏོ ཙ ཏཐཱ ཝུཏྟཾ. ནིཔྤརིཡཱཡེན ཏཾ ཨསཔྤཱཡནྟི སམྦནྡྷོ. ཨནེནེཝ ཡཐཱཝུཏྟམསཔྤཱཡཾ ཨནེཀནྟཾ ཏཐཱརཱུཔཔཙྩཡེན ཀསྶཙི ཀདཱཙི སཔྤཱཡསམྦྷཝཏོ. ཨིདཾ པན དྭཡཾ ཨེཀནྟམེཝ ཨསཔྤཱཡཾ ཀསྶཙི ཀདཱཙིཔི སཔྤཱཡཱབྷཱཝཏོཏི དསྶེཏི. མིཙྪཱ ཨཱཛཱིཝནྟི ཨེཏེནཱཏི མིཙྪཱཛཱིཝོ, ཨནེསནཝསེན པཙྩཡཔརིཡེསནཔཡོགོ. ནིམིཏྟཀམྨཱདཱིཧི པཝཏྟོ མིཙྪཱཛཱིཝོ ཏཐཱ, ཨེཏེན ཨེཀཝཱིསཏིཝིདྷཾ ཨནེསནཔཡོགམཱཧ. ཝུཏྟཉྷི སུཏྟནིཔཱཏཊྛཀཐཱཡཾ ཁུདྡཀཔཱཋཊྛཀཐཱཡཉྩ མེཏྟསུཏྟཝཎྞནཱཡཾ –

‘‘ཡོ ཨིམསྨིཾ སཱསནེ པབྦཛིཏྭཱ ཨཏྟཱནཾ ན སམྨཱ པཡོཛེཏི, ཁཎྜསཱིལོ ཧོཏི ¶ , ཨེཀཝཱིསཏིཝིདྷཾ ཨནེསནཾ ནིསྶཱཡ ཛཱིཝིཀཾ ཀཔྤེཏི. སེཡྻཐིདཾ? ཝེལུ༹དཱནཾ, པཏྟདཱནཾ, པུཔྥ, ཕལ, དནྟཀཊྛ, མུཁོདཀ, སིནཱན, ཙུཎྞ, མཏྟིཀཱདཱནཾ, ཙཱཊུཀམྱཏཾ, མུགྒསཱུཔྱཏཾ, པཱརིབྷཊུཏཾ, ཛངྒྷཔེསནིཀཾ, ཝེཛྫཀམྨཾ, དཱུཏཀམྨཾ, པཧིཎགམནཾ, པིཎྜཔཊིཔིཎྜཾ, དཱནཱནུཔྤདཱནཾ, ཝཏྠུཝིཛྫཾ, ནཀྑཏྟཝིཛྫཾ, ཨངྒཝིཛྫ’’ནྟི.

ཨབྷིདྷམྨཊཱིཀཱཀཱརེན པན ¶ ཨཱཙརིཡཱནནྡཏྠེརེན ཨེཝཾ ཝུཏྟཾ –

‘‘ཨེཀཝཱིསཏི ཨནེསནཱ ནཱམ ཝེཛྫཀམྨཾ ཀརོཏི, དཱུཏཀམྨཾ ཀརོཏི, པཧིཎཀམྨཾ ཀརོཏི, གཎྜཾ ཕཱལེཏི, ཨརུམཀྑནཾ དེཏི, ཨུདྡྷཾཝིརེཙནཾ དེཏི, ཨདྷོཝིརེཙནཾ དེཏི, ནཏྠུཏེལཾ པཙཏི, ཝཎཏེལཾ པཙཏི, ཝེལུ༹དཱནཾ དེཏི, པཏྟ, པུཔྥ, ཕལ, སིནཱན, དནྟཀཊྛ, མུཁོདཀ, ཙུཎྞ, མཏྟིཀཱདཱནཾ དེཏི, ཙཱཊུཀམྨཾ ཀརོཏི, མུགྒསཱུཔིཡཾ, པཱརིབྷཊུཾ, ཛངྒྷཔེསནིཀཾ དྭཱཝཱིསཏིམཾ དཱུཏཀམྨེན སདིསཾ, ཏསྨཱ ཨེཀཝཱིསཏཱི’’ཏི (དྷ. ས. མཱུལཊཱི. ༡༥༠-༥༡).

ཨཊྛཀཐཱཝཙནཉྩེཏྠ བྲཧྨཛཱལཱདིསུཏྟནྟནཡེན ཝུཏྟཾ, ཊཱིཀཱཝཙནཾ པན ཁུདྡཀཝཏྠུཝིབྷངྒཱདིཨབྷིདྷམྨནཡེན, ཨཏོ ཙེཏྠ ཀེསཉྩི ཝིསམཏཱཏི ཝདནྟི, ཝཱིམཾསིཏྭཱ གཧེཏབྦཾ. ཨཔིཙ ‘‘ནིམིཏྟཀམྨཱདཱི’’ཏི ཨིམིནཱ ནིམིཏྟོབྷཱསཔརིཀཐཱཡོ ཝུཏྟཱ. ‘‘མིཙྪཱཛཱིཝོ’’ཏི པན ཡཐཱཝུཏྟཔཡོགོ, ཏསྨཱ ནིམིཏྟཀམྨཉྩ མིཙྪཱཛཱིཝོ ཙ, ཏབྦསེན ཨུཔྤནྣཾ ཨསཔྤཱཡཾ སཱིལཝིནཱསནེན ཨནཏྠཱཝཧཏྟཱཏི ཨཏྠོ. སམཱཧཱརདྭནྡེཔི ཧི ཀཏྠཙི པུལླིངྒཔཡོགོ དིསྶཏི ཡཐཱ ‘‘ཙིཏྟུཔྤཱདོ’’ཏི. ཨཏིརུཙིཡེ རཱགཱདཡོ, ཨཏིཨརུཙིཡེ ཙ དོསཱདཡོཏི ཨཱཧ ‘‘ཨཀུསལཱ དྷམྨཱ ཨབྷིཝཌྜྷནྟཱི’’ཏི. ཏནྟི ཏདུབྷཡཾ. ཀམྨཊྛཱནཱཝིཛཧནཝསེནཱཏི ཝཀྑམཱནཀམྨཊྛཱནསྶ ཨཝིཛཧནཝསེན.

‘‘ཨབྦྷནྟརེ ཨཏྟཱ ནཱམཱ’’ཏིཨཱདིནཱ སངྑེཔཏོ ཨསམྨོཧསམྤཛཉྙཾ དསྶེཏྭཱ ‘‘ཏཏྠ ཙཱིཝརམྤི ཨཙེཏན’’ནྟིཨཱདིནཱ ཙཱིཝརསྶ ཝིཡ ‘‘ཀཱཡོཔི ཨཙེཏནོ’’ཏི ཀཱཡསྶ ཨཏྟསུཉྙཏཱཝིབྷཱཝནེན ཏམཏྠཾ པརིདཱིཔེནྟོ ‘‘ཏསྨཱ ནེཝ སུནྡརཾ ཙཱིཝརཾ ལབྷིཏྭཱ’’ཏིཨཱདིནཱ ཝུཏྟསྶ ཨིཏརཱིཏརསནྟོསསྶ ཀཱརཎཾ ཝིབྷཱཝེཏཱིཏི དཊྛབྦཾ. ཨེཝཉྷི སམྦནྡྷོ ཝཏྟབྦོ – ཨསམྨོཧསམྤཛཉྙཾ དསྶེནྟོ ‘‘ཨབྦྷནྟརེ’’ཏིཨཱདིམཱཧ. ཨཏྟསུཉྙཏཱཝིབྷཱཝནེན པན ཏདཏྠཾ པརིདཱིཔིཏུཾ ཝུཏྟཾ ‘‘ཏཏྠ ཙཱིཝར’’ནྟིཨཱདི. ཨིདཱནི ཨཏྟསུཉྙཏཱཝིབྷཱཝནསྶ པཡོཛནབྷཱུཏཾ ཨིཏརཱིཏརསནྟོསསངྑཱཏཾ ལདྡྷགུཎཾ པཀཱསེནྟོ ཨཱཧ ‘‘ཏསྨཱ ནེཝ སུནྡར’’ནྟིཨཱདཱིཏི.

ཏཏྠ ¶ ¶ ཨབྦྷནྟརེཏི ཨཏྟནོ སནྟཱནེ. ཏཏྠཱཏི ཏསྨིཾ ཙཱིཝརཔཱརུཔནེ. ཏེསུ ཝཱ པཱརུཔཀཏྟཔཱརུཔིཏབྦཙཱིཝརེསུ. ཀཱཡོཔཱིཏི ཨཏྟཔཉྙཏྟིམཏྟོ ཀཱཡོཔི. ‘‘ཏསྨཱ’’ཏི ཨཛ྄ཛྷཱཧརིཏབྦཾ, ཨཙེཏནཏྟཱཏི ཨཏྠོ. ཨཧནྟི ཀམྨབྷཱུཏོ ཀཱཡོ. དྷཱཏུཡོཏི ཙཱིཝརསངྑཱཏོ བཱཧིརཱ དྷཱཏུཡོ. དྷཱཏུསམཱུཧནྟི ཀཱཡསངྑཱཏཾ ཨཛ྄ཛྷཏྟིཀཾ དྷཱཏུསམཱུཧཾ. པོཏྠཀརཱུཔཔཊིཙྪཱདནེ དྷཱཏུཡོ དྷཱཏུསམཱུཧཾ པཊིཙྪཱདེནྟི ཝིཡཱཏི སམྦནྡྷོ. པུསནཾ སྣེཧསེཙནཾ, པཱུརཎཾ ཝཱ པོཏྠཾ, ལེཔནཁནནཀིརིཡཱ, ཏེན ཀཏནྟི པོཏྠཀཾ, ཏམེཝ རཱུཔཾ ཏཐཱ, ཁནནཀམྨནིབྦཏྟཾ དཱརུམཏྟིཀཱདིརཱུཔམིདྷཱདྷིཔྤེཏཾ. ཏསྨཱཏི ཨཙེཏནཏྟཱ, ཨཏྟསུཉྙབྷཱཝཏོ ཝཱ.

ནཱགཱནཾ ནིཝཱསོ ཝམྨིཀོ ནཱགཝམྨིཀོ. ཙིཏྟཱིཀརཎཊྛཱནབྷཱུཏོ རུཀྑོ ཙེཏིཡརུཀྑོ. ཀེཧིཙི སཀྐཏསྶཱཔི ཀེཧིཙི ཨསཀྐཏསྶ ཀཱཡསྶ ཨུཔམཱནབྷཱཝེན ཡོགྱཏྟཱ ཏེསམིདྷ ཀཐནཾ. ཏེཧཱིཏི མཱལཱགནྡྷགཱུཐམུཏྟཱདཱིཧི. ཨཏྟསུཉྙཏཱཡ ནཱགཝམྨིཀཙེཏིཡརུཀྑཱདཱིཧི ཝིཡ ཀཱཡསངྑཱཏེན ཨཏྟནཱ སོམནསྶཾ ཝཱ དོམནསྶཾ ཝཱ ན ཀཱཏབྦནྟི ཝུཏྟཾ ཧོཏི.

‘‘ལབྷིསྶཱམི ཝཱ, ནོ ཝཱ’’ཏི པཙྩཝེཀྑཎཔུབྦཀེན ‘‘ལབྷིསྶཱམཱི’’ཏི ཨཏྠསམྤསྶནེནེཝ གཧེཏབྦཾ. ཨེཝཉྷི སཱཏྠཀསམྤཛཉྙཾ བྷཝཏཱིཏི ཨཱཧ ‘‘སཧསཱཝ ཨགྒཧེཏྭཱ’’ཏིཨཱདི.

གརུཔཏྟོཏི ཨཏིབྷཱརབྷཱུཏོ པཏྟོ. ཙཏྟཱརོ ཝཱ པཉྩ ཝཱ གཎྛིཀཱ ཙཏུཔཉྩགཎྛིཀཱ ཡཐཱ ‘‘དྭཏྟིཔཏྟཱ (པཱཙི. ༢༣༢), ཚཔྤཉྩཝཱཙཱ’’ཏི (པཱཙི. ༦༡) ཨཉྙཔདབྷཱུཏསྶ ཧི ཝཱ-སདྡསྶེཝ ཨཏྠོ ཨིདྷ པདྷཱནོ ཙཏུགཎྛིཀཱཧཏོ ཝཱ པཉྩགཎྛིཀཱཧཏོ ཝཱ པཏྟོ དུབྦིསོདྷནཱིཡོཏི ཝིཀཔྤནཝསེན ཨཏྠསྶ གཡ྄ཧམཱནཏྟཱ. ཨཱཧཏཱ ཙཏུཔཉྩགཎྛིཀཱ ཡསྶཱཏི ཙཏུཔཉྩགཎྛིཀཱཧཏོ ཡཐཱ ‘‘ཨགྱཱཧིཏོ’’ཏི, ཙཏུཔཉྩགཎྛིཀཱཧི ཝཱ ཨཱཧཏོ ཏཐཱ, དུབྦིསོདྷནཱིཡབྷཱཝསྶ ཧེཏུགབྦྷཝཙནཉྩེཏཾ. ཀཱམཉྩཨཱུནཔཉྩབནྡྷནསིཀྑཱཔདེ (པཱརཱ. ༦༡༢) པཉྩགཎྛིཀཱཧཏོཔི པཏྟོ པརིབྷུཉྫིཏབྦབྷཱཝེན ཝུཏྟོ, དུབྦིསོདྷནཱིཡཏཱམཏྟེན པན པལིབོདྷཀརཎཏོ ཨིདྷ ཨསཔྤཱཡོཏི དཊྛབྦཾ. དུདྡྷོཏཔཏྟོཏི ཨགཎྛིཀཱཧཏམྤི པཀཏིཡཱཝ དུབྦིསོདྷནཱིཡཔཏྟཾ སནྡྷཱཡཱཧ. ‘‘ཏཾ དྷོཝནྟསྶེཝཱ’’ཏིཨཱདི ཏདུབྷཡསྶཱཔི ¶ ཨསཔྤཱཡབྷཱཝེ ཀཱརཎཾ. ‘‘མཎིཝཎྞཔཏྟོ པན ལོབྷནཱིཡོ’’ཏི ཨིམིནཱ ཀིཉྩཱཔི སོ ཝིནཡཔརིཡཱཡེན ཀཔྤིཡོ, སུཏྟནྟཔརིཡཱཡེན པན ཨནྟརཱཡཀརཎཏོ ཨསཔྤཱཡོཏི དསྶེཏི. ‘‘པཏྟཾ བྷམཾ ཨཱརོཔེཏྭཱ མཛྫིཏྭཱ པཙནྟི ‘མཎིཝཎྞཾ ཀརིསྶཱམཱ’ཏི, ན ཝཊྚཏཱི’’ཏི (པཱརཱ. ཨཊྛ. ༡.པཱལི༹མུཏྟཀཝིནིཙྪཡོ) ཧི ཝིནཡཊྛཀཐཱསུ པཙནཀིརིཡཱམཏྟམེཝ པཊིཀྑིཏྟཾ. ཏཐཱ ཧི ཝདནྟི ¶ ‘‘མཎིཝཎྞཾ པན པཏྟཾ ཨཉྙེན ཀཏཾ ལབྷིཏྭཱ པརིབྷུཉྫིཏུཾ ཝཊྚཏཱི’’ཏི (སཱརཏྠ. ཊཱི. ༢.༨༥) ‘‘ཏཱདིསཉྷི ཨརཉྙེ ཨེཀཀསྶ ནིཝཱསནྟརཱཡཀར’’ནྟིཨཱདིནཱ ཙཱིཝརེ ཝུཏྟནཡེན ‘‘ནིམིཏྟཀམྨཱདིཝསེན ལདྡྷོ པན ཨེཀནྟཨཀཔྤིཡོ སཱིལཝིནཱསནེན ཨནཏྠཱཝཧཏྟཱ’’ཏིཨཱདིནཱ ཨམྷེཧི ཝུཏྟནཡོཔི ཡཐཱརཧཾ ནེཏབྦོ. སེཝམཱནསྶཱཏི ཧེཏྭནྟོ གདྷཝཙནཾ ཨབྷིཝཌྜྷནཔརིཧཱཡནསྶ.

‘‘ཨབྦྷནྟརེ’’ཏིཨཱདི སངྑེཔོ. ‘‘ཏཏྠཱ’’ཏིཨཱདི ཨཏྟསུཉྙཏཱཝིབྷཱཝནེན ཝིཏྠཱརོ. སཎྜཱསེནཱཏི ཀམྨཱརཱནཾ ཨཡོགཧཎཝིསེསེན. ཨགྒིཝཎྞཔཏྟགྒཧཎེཏི ཨགྒིནཱ ཛྷཱཔིཏཏྟཱ ཨགྒིཝཎྞབྷཱུཏཔཏྟསྶ གཧཎེ. རཱགཱདིཔརིལཱ༹ཧཛནཀཔཏྟསྶ ཨཱིདིསམེཝ ཨུཔམཱནཾ ཡུཏྟནྟི ཨེཝཾ ཝུཏྟཾ.

‘‘ཨཔིཙཱ’’ཏིཨཱདིནཱ སངྒྷཱཊིཙཱིཝརཔཏྟདྷཱརཎེསུ ཨེཀཏོ ཨསམྨོཧསམྤཛཉྙཾ དསྶེཏི. ཚིནྣཧཏྠཔཱདེ ཨནཱཐམནུསྶེཏི སམྦནྡྷོ. ནཱིལམཀྑིཀཱ ནཱམ ཨཱསཱཊིཀཀཱརིཀཱ. གཝཱདཱིནཉྷི ཝཎེསུ ནཱིལམཀྑིཀཱཧི ཀཏཱ ཨནཡབྱསནཧེཏུབྷཱུཏཱ ཨཎྜཀཱ ཨཱསཱཊིཀཱ ནཱམ ཝུཙྩཏི. ཨནཱཐསཱལཱཡནྟི ཨནཱཐཱནཾ ནིཝཱསསཱལཱཡཾ. དཡཱལུཀཱཏི ཀརུཎཱབཧུལཱ. ཝཎམཏྟཙོལ༹ཀཱནཱིཏི ཝཎཔྤམཱཎེན པཊིཙྪཱདནཏྠཱཡ ཚིནྣཙོལ༹ཁཎྜཀཱནི. ཀེསཉྩཱིཏི བཧཱུསུ ཀེསཉྩི ཨནཱཐམནུསྶཱནཾ. ཐཱུལཱནཱིཏི ཐདྡྷཱནི. ཏཏྠཱཏི ཏསྨིཾ པཱཔུཎནེ, བྷཱཝལཀྑཎེ, ནིམིཏྟེ ཝཱ ཨེཏཾ བྷུམྨཾ. ཀསྨཱཏི ཝུཏྟཾ ‘‘ཝཎཔཊིཙྪཱདནམཏྟེནེཝཱ’’ཏིཨཱདི. ཙོལ༹ཀེན, ཀཔཱལེནཱཏི ཙ ཨཏྠཡོགེ ཀམྨཏྠེ ཏཏིཡཱ, ཀརཎཏྠེ ཝཱ. ཝཎཔཊིཙྪཱདནམཏྟེནེཝ བྷེསཛྫཀརཎམཏྟེནེཝཱཏི པན ཝིསེསནཾ, ན པན མཎྜནཱནུབྷཝནཱདིཔྤཀཱརེན ཨཏྠོཏི. སངྑཱརདུཀྑཏཱདཱིཧི ནིཙྩཱཏུརསྶ ཀཱཡསྶ པརིབྷོགབྷཱུཏཱནཾ པཏྟཙཱིཝརཱནཾ ཨེདིསམེཝ ཨུཔམཱནམུཔཔནྣནྟི ཏཐཱ ཝཙནཾ དཊྛབྦཾ. སུཁུམཏྟསལླཀྑཎེན ཨུཏྟམསྶ སམྤཛཱནསྶ ཀརཎསཱིལཏྟཱ, པུརིམེཧི ཙ སམྤཛཱནཀཱརཱིཧི ཨུཏྟམཏྟཱ ཨུཏྟམསམྤཛཱནཀཱརཱི.

ཨསནཱདིཀིརིཡཱཡ ¶ ཀམྨཝིསེསཡོགཏོ ཨསིཏཱདིཔདེཧེཝ ཀམྨཝིསེསསཧིཏོ ཀིརིཡཱཝིསེསོ ཝིཉྙཱཡཏཱིཏི ཝུཏྟཾ ‘‘ཨསིཏེཏི པིཎྜཔཱཏབྷོཛནེ’’ཏིཨཱདི. ཨཊྛཝིདྷོཔི ཨཏྠོཏི ཨཊྛཔྤཀཱརོཔི པཡོཛནཝིསེསོ.

ཏཏྠ པིཎྜཔཱཏབྷོཛནཱདཱིསུ ཨཏྠོ ནཱམ ཨིམིནཱ མཧཱསིཝཏྠེརཝཱདཝསེན ‘‘ཨིམསྶ ཀཱཡསྶ ཋིཏིཡཱ’’ཏིཨཱདིནཱ (སཾ. ནི. ༤.༡༢༠; ཨ. ནི. ༦.༥༨; ༨.༩; དྷ. ས. ༡༣༥༥; མཧཱནི. ༢༠༦) སུཏྟེ ¶ ཝུཏྟཾ ཨཊྛཝིདྷམྤི པཡོཛནཾ དསྶེཏི. མཧཱསིཝཏྠེརོ (དྷ. ས. ༡.༡༣༥༥) ཧི ‘‘ཧེཊྛཱ ཙཏྟཱརི ཨངྒཱནི པཊིཀྑེཔོ ནཱམ, ཨུཔརི པན ཨཊྛངྒཱནི པཡོཛནཝསེན སམོདྷཱནེཏབྦཱནཱི’’ཏི ཝདཏི. ཏཏྠ ‘‘ཡཱཝདེཝ ཨིམསྶ ཀཱཡསྶ ཋིཏིཡཱ’’ཏི ཨེཀམངྒཾ, ‘‘ཡཱཔནཱཡཱ’’ཏི ཨེཀཾ, ‘‘ཝིཧིཾསཱུཔརཏིཡཱ’’ཏི ཨེཀཾ, ‘‘བྲཧྨཙརིཡཱནུགྒཧཱཡཱ’’ཏི ཨེཀཾ, ‘‘ཨིཏི པུརཱཎཉྩ ཝེདནཾ པཊིཧངྑཱམཱི’’ཏི ཨེཀཾ, ‘‘ནཝཉྩ ཝེདནཾ ན ཨུཔྤཱདེསྶཱམཱི’’ཏི ཨེཀཾ, ‘‘ཡཱཏྲཱ ཙ མེ བྷཝིསྶཏཱི’’ཏི ཨེཀཾ, ‘‘ཨནཝཛྫཏཱ ཙཱ’’ཏི ཨེཀཾ, ཕཱསུཝིཧཱརོ པན བྷོཛནཱནིསཾསམཏྟནྟི ཨེཝཾ ཨཊྛ ཨངྒཱནི པཡོཛནཝསེན སམོདྷཱནེཏབྦཱནི. ཨཉྙཐཱ པན ‘‘ནེཝ དཝཱཡཱ’’ཏི ཨེཀམངྒཾ, ‘‘ན མདཱཡཱ’’ཏི ཨེཀཾ, ‘‘ན མཎྜནཱཡཱ’’ཏི ཨེཀཾ, ‘‘ན ཝིབྷཱུསནཱཡཱ’’ཏི ཨེཀཾ, ‘‘ཡཱཝདེཝ ཨིམསྶ ཀཱཡསྶ ཋིཏིཡཱ ཡཱཔནཱཡཱ’’ཏི ཨེཀཾ, ‘‘ཝིཧིཾསཱུཔརཏིཡཱ བྲཧྨཙརིཡཱནུགྒཧཱཡཱ’’ཏི ཨེཀཾ, ‘‘ཨིཏི པུརཱཎཉྩ ཝེདནཾ པཊིཧངྑཱམི, ནཝཉྩ ཝེདནཾ ན ཨུཔྤཱདེསྶཱམཱི’’ཏི ཨེཀཾ, ‘‘ཡཱཏྲཱ ཙ མེ བྷཝིསྶཏཱི’’ཏི ཨེཀཾ, ‘‘ཨནཝཛྫཏཱ ཙ ཕཱསུཝིཧཱརོ ཙཱ’’ཏི པན བྷོཛནཱནིསཾསམཏྟནྟི ཝུཏྟཱནི ཨཊྛངྒཱནི ཨིདྷཱནདྷིཔྤེཏཱནི. ཀསྨཱཏི ཙེ? པཡོཛནཱནམེཝ ཨབྷཱཝཏོ, ཏེསམེཝ ཙ ཨིདྷ ཨཏྠསདྡེན ཝུཏྟཏྟཱ. ནནུ ཙ ‘‘ནེཝདཝཱཡཱཏིཨཱདིནཱ ནཡེན ཝུཏྟོ’’ཏི མརིཡཱདཝཙནེན དུཏིཡནཡསྶེཝ ཨིདྷཱདྷིཔྤེཏབྷཱཝོ ཝིཉྙཱཡཏཱིཏི? ན, ‘‘ནེཝ དཝཱཡཱ’’ཏིཨཱདིནཱ པཊིཀྑེཔངྒདསྶནམུཁེན པཙྩཝེཀྑཎཔཱལི༹ཡཱ དེསིཏཏྟཱ, ཡཐཱདེསིཏཏནྟིཀྐམསྶེཝ མརིཡཱདབྷཱཝེན དསྶནཏོ. པཱཋཀྐམེནེཝ ཧི ‘‘ནེཝ དཝཱཡཱཏིཨཱདིནཱ ནཡེནཱ’’ཏི ཝུཏྟཾ, ན ཨཏྠཀྐམེན, ཏེན པན ‘‘ཨིམསྶ ཀཱཡསྶ ཋིཏིཡཱཏིཨཱདིནཱ ནཡེནཱ’’ཏི ཝཏྟབྦནྟི.

ཏིདྷཱ ¶ དེནྟེ དྭིདྷཱ གཱཧཾ སནྡྷཱཡ ‘‘པཊིགྒཧཎཾ ནཱམཱ’’ཏི ཝུཏྟཾ, བྷོཛནཱདིགཧཎཏྠཱཡ ཧཏྠཨོཏཱརཎཾ བྷུཉྫནཱདིཨཏྠཱཡ ཨཱལོཔཀརཎནྟིཨཱདིནཱ ཨནུཀྐམེན བྷུཉྫནཱདིཔཡོགོ ཝཱཡོདྷཱཏུཝསེནེཝ ཝིབྷཱཝིཏོ. ཝཱཡོདྷཱཏུཝིཔྥཱརེནེཝཱཏི ཨེཏྠ ཨེཝ-སདྡེན ནིཝཏྟེཏབྦཾ དསྶེཏི ‘‘ན ཀོཙཱི’’ཏིཨཱདིནཱ. ཀུཉྩིཀཱ ནཱམ ཨཝཱཔུརཎཾ, ཡཾ ‘‘ཏཱལོ༹’’ཏིཔི ཝདནྟི. ཡནྟཀེནཱཏི ཙཀྐཡནྟཀེན. ཡཏཏི ཨུགྒྷཱཊནནིགྒྷཱཊནཨུཀྑིཔནནིཀྑིཔནཱདཱིསུ ཝཱཡམཏི ཨེཏེནཱཏི ཧི ཡནྟཀཾ. སཉྩུཎྞཀརཎཾ མུསལཀིཙྩཾ. ཨནྟོཀཏྭཱ པཏིཊྛཱཔནཾ ཨུདུཀྑལཀིཙྩཾ. ཨཱལོལི༹ཏཝིལོལི༹ཏཝསེན པརིཝཏྟནཾ ཧཏྠཀིཙྩཾ. ཨིཏཱིཏི ཨེཝཾ. ཏཏྠཱཏི ཧཏྠཀིཙྩསཱདྷནེ, བྷཱཝལཀྑཎེ, ནིམིཏྟེ ཝཱ བྷུམྨཾ. ཏནུཀཁེལོ༹ཏི པསནྣཁེལོ༹. བཧལཁེལོ༹ཏི ཨཱཝིལཁེལོ༹. ཛིཝ྄ཧཱསངྑཱཏེན ཧཏྠེན ཨཱལོལི༹ཏཝིལོལི༹ཏཝསེན ཨིཏོ ཙིཏོ ཙ པརིཝཏྟཀཾ ཛིཝ྄ཧཱཧཏྠཔརིཝཏྟཀཾ. ཀཊཙྪུ, དབྦཱིཏི ཀཏྠཙི པརིཡཱཡཝཙནཾ. ‘‘པུམེ ཀཊཙྪུ དབྦིཏྠཱི’’ཏི ཧི ཝུཏྟཾ. ཨིདྷ པན ཡེན བྷོཛནཱདཱིནི ཨནྟོཀཏྭཱ གཎྷཱཏི, སོ ཀཊཙྪུ, ཡཱཡ པན ཏེསམུདྡྷརཎཱདཱིནི ཀརོཏི, སཱ ¶ དབྦཱིཏི ཝེདིཏབྦཾ. པལཱལསནྠཱརནྟི པཏིཊྛཱནབྷཱུཏཾ པལཱལཱདིསནྠཱརཾ. ནིདསྶནམཏྟཉྷེཏཾ. དྷཱརེནྟོཏི པཏིཊྛཱནབྷཱཝེན སམྤཊིཙྪནྟོ. པཐཝཱིསནྡྷཱརཀཛལསྶ ཏཾསནྡྷཱརཀཝཱཡུནཱ ཝིཡ པརིབྷུཏྟཱཧཱརསྶ ཝཱཡོདྷཱཏུནཱཝ ཨཱམཱསཡེ ཨཝཊྛཱནནྟི དསྶེཏི ‘‘ཝཱཡོདྷཱཏུཝསེནེཝ ཏིཊྛཏཱི’’ཏི ཨིམིནཱ. ཏཐཱ པརིབྷུཏྟཉྷི ཨཱཧཱརཾ ཝཱཡོདྷཱཏུ ཧེཊྛཱ ཙ ཏིརིཡཉྩ གྷནཾ པརིཝཊུམཾ ཀཏྭཱ ཡཱཝ པཀྐཱ སནྣིརུཛ྄ཛྷནཝསེན ཨཱམཱསཡེ པཏིཊྛིཏཾ ཀརོཏཱིཏི. ཨུདྡྷནཾ ནཱམ ཡཏྠ ཨུཀྑལིཡཱདཱིནི པཏིཊྛཱཔེཏྭཱ པཙནྟི, ཡཱ ‘‘ཙུལླཱི’’ཏིཔི ཝུཙྩཏི. རསྶདཎྜོ དཎྜཀོ. པཏོདོ ཡཊྛི. ཨིཏཱིཏི ཝུཏྟཔྤཀཱརམཏིདིསཏི. ཝུཏྟཔྤཀཱརསྶེཝ ཧི དྷཱཏུཝསེན ཝིབྷཱཝནཱ. ཏཏྠ ཨཏིཧརཏཱིཏི ཡཱཝ མུཁཱ ཨབྷིཧརཏི. ཝཱིཏིཧརཏཱིཏི ཏཏོ ཀུཙྪིཡཾ ཝིམིསྶཾ ཀརོནྟོ ཧརཏཱི’’ཏི (དཱི. ནི. ཊཱི. ༡.༢༡༤) ཨཱཙརིཡདྷམྨཔཱལཏྠེརོ, ཨཱཙརིཡཱནནྡཏྠེརོ པན ‘‘ཏཏོ ཡཱཝ ཀུཙྪི, ཏཱཝ ཧརཏཱི’’ཏི (ཝིབྷ. མཱུལཊཱི. ༥༢༣) ཨཱཧ. ཏདུབྷཡམྤི ཨཏྠཏོ ཨེཀམེཝ ཨུབྷཡཏྠཱཔི ཀུཙྪིསམྦནྡྷམཏྟཾ ཧརཎསྶེཝ ཨདྷིཔྤེཏཏྟཱ.

ཨཔིཙ ཨཏིཧརཏཱིཏི མུཁདྭཱརཾ ཨཏིཀྐཱམེནྟོ ཧརཏི. ཝཱིཏིཧརཏཱིཏི ཀུཙྪིགཏཾ པསྶཏོ ཧརཏི. དྷཱརེཏཱིཏི ཨཱམཱསཡེ པཏིཊྛིཏཾ ཀརོཏི ¶ . པརིཝཏྟེཏཱིཏི ཨཔརཱཔརཾ པརིཝཏྟནཾ ཀརོཏི. སཉྩུཎྞེཏཱིཏི མུསལེན ཝིཡ སཉྩུཎྞནཾ ཀརོཏི. ཝིསོསེཏཱིཏི ཝིསོསནཾ ནཱཏིསུཀྑཾ ཀརོཏི. ནཱིཧརཏཱིཏི ཀུཙྪིཏོ བཧི ནིདྡྷཱརེཏི. པཐཝཱིདྷཱཏུཀིཙྩེསུཔི ཡཐཱཝུཏྟོཡེཝ ཨཏྠོ. ཏཱནི པན ཨཱཧཱརསྶ དྷཱརཎཔརིཝཏྟནསཉྩུཎྞནཝིསོསནཱནི པཐཝཱིསཧིཏཱ ཨེཝ ཝཱཡོདྷཱཏུ ཀཱཏུཾ སཀྐོཏི, ན ཀེཝལཱ, ཏསྨཱ ཏཱནི པཐཝཱིདྷཱཏུཡཱཔི ཀིཙྩབྷཱཝེན ཝུཏྟཱནི. སིནེཧེཏཱིཏི ཏེམེཏི. ཨལླཏྟཉྩ ཨནུཔཱལེཏཱིཏི ཡཐཱ ཝཱཡོདྷཱཏུཨཱདཱིཧི ཨཏིཝིཡ སོསནཾ ན ཧོཏི, ཏཐཱ ཨལླབྷཱཝཉྩ ནཱཏིཨལླཏཱཀརཎཝསེན ཨནུཔཱལེཏི. ཨཉྫསོཏི ཨཱཧཱརསྶ པཝིསནཔརིཝཏྟནནིཀྑམནཱདཱིནཾ མགྒོ. ཝིཉྙཱཎདྷཱཏཱུཏི མནོཝིཉྙཱཎདྷཱཏུ པརིཡེསནཛ྄ཛྷོཧརཎཱདིཝིཛཱནནསྶ ཨདྷིཔྤེཏཏྟཱ. ཏཏྠ ཏཏྠཱཏི ཏསྨིཾ ཏསྨིཾ པརིཡེསནཛ྄ཛྷོཧརཎཱདིཀིཙྩེ. ཏཾཏཾཝིཛཱནནསྶ པཙྩཡབྷཱུཏོ ཏཾནིཔྥཱདཀོཡེཝ པཡོགོ སམྨཱཔཡོགོ ནཱམ. ཡེན ཧི པཡོགེན པརིཡེསནཱདི ནིཔྥཛྫཏི,. སོ ཏབྦིསཡཝིཛཱནནམྤི ནིཔྥཱདེཏི ནཱམ ཏདཝིནཱབྷཱཝཏོ. ཏམནྭཱཡ ཨཱགམྨཱཏི ཨཏྠོ. ཨཱབྷུཛཏཱིཏི པརིཡེསནཝསེན, ཨཛ྄ཛྷཱཧརཎཛིཎྞཱཛིཎྞཏཱདིཔཊིསཾཝེདནཝསེན ཙ ཏཱནི པརིཡེསནཛ྄ཛྷོཧརཎཛིཎྞཱཛིཎྞཏཱདཱིནི ཨཱཝཛྫེཏི ཝིཛཱནཱཏི. ཨཱཝཛྫནཔུབྦཀཏྟཱ ཝིཛཱནནསྶ ཝིཛཱནནམྤེཏྠ གཧིཏནྟི ཝེདིཏབྦཾ. ཨཐ ཝཱ སམྨཱཔཡོགོ ནཱམ སམྨཱཔཊིཔཏྟི. ཏམནྭཱཡ ཨཱགམྨ. ‘‘ཨབྦྷནྟརེ ཨཏྟཱ ནཱམ ཀོཙི བྷུཉྫནཀོ ནཏྠཱི’’ཏིཨཱདིནཱ ཨཱབྷུཛཏི སམནྣཱཧརཏི, ཝིཛཱནཱཏཱིཏི ཨཏྠོ. ཨཱབྷོགཔུབྦཀོ ཧི སབྦོ ཝིཉྙཱཎབྱཱཔཱརོཏི ‘‘ཨཱབྷུཛཏི’’ཙྩེཝ ཝུཏྟཾ.

གམནཏོཏི ¶ བྷིཀྑཱཙཱརཝསེན གོཙརགཱམཾ ཨུདྡིསྶ གམནཏོ. པཙྩཱགམནམྤི གམནསབྷཱཝཏྟཱ ཨིམིནཱཝ སངྒཧིཏཾ. པརིཡེསནཏོཏི གོཙརགཱམེ བྷིཀྑཱཡ ཨཱཧིཎྜནཏོ. པརིཡེསནསབྷཱཝཏྟཱ ཨིམིནཱཝ པཊིཀྐམནསཱལཱདིཨུཔསངྐམནམྤི སངྒཧིཏཾ. པརིབྷོགཏོཏི དནྟམུསལེཧི སཉྩུཎྞེཏྭཱ ཛིཝ྄ཧཱཡ སམྤརིཝཏྟནཀྑཎེཡེཝ ཨནྟརཧིཏཝཎྞགནྡྷསངྑཱརཝིསེསཾ སུཝཱནདོཎིཡཾ སུཝཱནཝམཐུ ཝིཡ པརམཛེགུཙྪཾ ཨཱཧཱརཾ པརིབྷུཉྫནཏོ. ཨཱསཡཏོཏི ཨེཝཾ པརིབྷུཏྟསྶ ཨཱཧཱརསྶ པིཏྟསེམྷཔུབྦལོཧིཏཱསཡབྷཱཝཱུཔགམནེན པརམཛིགུཙྪནཧེཏུབྷཱུཏཏོ ཨཱམཱསཡསྶ ཨུཔརི པཏིཊྛཱནཀཔིཏྟཱདིཙཏུབྦིདྷཱསཡཏོ. ཨཱསཡཏི ཨེཀཛ྄ཛྷཾ པཝཏྟམཱནོཔི ¶ ཀམྨབལཝཝཏྠིཏོ ཧུཏྭཱ མརིཡཱདཝསེན ཨཉྙམཉྙཾ ཨསངྐརཏོ ཏིཊྛཏི པཝཏྟཏི ཨེཏྠཱཏི ཧི ཨཱསཡོ, ཨཱམཱསཡསྶ ཨུཔརི པཏིཊྛཱནཀོ པིཏྟཱདི ཙཏུབྦིདྷཱསཡོ. མརིཡཱདཏྠོ ཧི ཨཡམཱཀཱརོ. ནིདྷཱནཏོཏི ཨཱམཱསཡཏོ. ནིདྷེཏི ཡཐཱབྷུཏྟོ ཨཱཧཱརོ ནིཙིཏོ ཧུཏྭཱ ཏིཊྛཏི ཨེཏྠཱཏི ཧི ཨཱམཱསཡོ ‘‘ནིདྷཱན’’ནྟི ཝུཙྩཏི. ཨཔརིཔཀྐཏོཏི བྷུཏྟཱཧཱརཔརིཔཱཙནེན གཧཎཱིསངྑཱཏེན ཀམྨཛཏེཛསཱ ཨཔརིཔཱཀཏོ. པརིཔཀྐཏོཏི ཡཐཱཝུཏྟཀམྨཛཏེཛསཱཝ པརིཔཱཀཏོ. ཕལཏོཏི ནིཔྥཏྟིཏོ, སམྨཱཔརིཔཙྩམཱནསྶ, ཨསམྨཱཔརིཔཙྩམཱནསྶ ཙ བྷུཏྟཱཧཱརསྶ ཡཐཱཀྐམཾ ཀེསཱདིཀུཎཔདདྡུཨཱདིརོགཱབྷིནིཔྥཏྟིསངྑཱཏཔཡོཛནཏོཏི ཝཱ ཨཏྠོ. ‘‘ཨིདམསྶ ཕལ’’ནྟི ཧི ཝུཏྟཾ. ནིསྶནྡནཏོཏི ཨཀྑིཀཎྞཱདཱིསུ ཨནེཀདྭཱརེསུ ཨིཏོ ཙིཏོ ཙ ཝིསྶནྡནཏོ. ཝུཏྟཉྷི –

‘‘ཨནྣཾ པཱནཾ ཁཱདནཱིཡཾ, བྷོཛནཉྩ མཧཱརཧཾ;

ཨེཀདྭཱརེན པཝིསིཏྭཱ, ནཝདྭཱརེཧི སནྡཏཱི’’ཏི. (ཝིསུདྡྷི. ༡.༣༠༣);

སམྨཀྑནཏོཏི ཧཏྠཨོཊྛཱདིཨངྒེསུ ནཝསུ དྭཱརེསུ པརིབྷོགཀཱལེ, པརིབྷུཏྟཀཱལེ ཙ ཡཐཱརཧཾ སབྦསོ མཀྑནཏོ. སབྦཏྠ ཨཱཧཱརེ པཊིཀྐཱུལཏཱ པཙྩཝེཀྑིཏབྦཱཏི སཧ པཱཋསེསེན ཡོཛནཱ. ཏཾཏཾཀིརིཡཱནིཔྥཏྟིཔཊིཔཱཊིཝསེན ཙཱཡཾ ‘‘གམནཏོ’’ཏིཨཱདིཀཱ ཨནུཔུབྦཱི ཋཔིཏཱ. སམྨཀྑནཾ པན པརིབྷོགཱདཱིསུ ལབྦྷམཱནམྤི ནིསྶནྡཝསེན ཝིསེསཏོ པཊིཀྐཱུལནྟི སབྦཔཙྪཱ ཋཔིཏནྟི དཊྛབྦཾ.

པཏྟཀཱལེཏི ཡུཏྟཀཱལེ, ཡཐཱཝུཏྟེན ཝཱ ཏེཛེན པརིཔཙྩནཏོ ཨུཙྩཱརཔསྶཱཝབྷཱཝཾ པཏྟཀཱལེ. ཝེགསནྡྷཱརཎེན ཨུཔྤནྣཔརིལཱ༹ཧཏྟཱ སཀལསརཱིརཏོ སེདཱ མུཙྩནྟི. ཏཏོཡེཝ ཨཀྑཱིནི པརིབྦྷམནྟི, ཙིཏྟཉྩ ཨེཀགྒཾ ན ཧོཏི. ཨཉྙེ ཙ སཱུལབྷགནྡརཱདཡོ རོགཱ ཨུཔྤཛྫནྟི. སབྦཾ ཏནྟི སེདམུཙྩནཱདིཀཾ.

ཨཊྛཱནེཏི ¶ མནུསྶཱམནུསྶཔརིགྒཧིཏེ ཁེཏྟདེཝཱཡཏནཱདིཀེ ཨཡུཏྟཊྛཱནེ. ཏཱདིསེ ཧི ཀརོནྟཾ ཀུདྡྷཱ མནུསྶཱ, ཨམནུསྶཱ ཝཱ ཛཱིཝིཏཀྑཡམྤི པཱཔེནྟི. ཨཱཔཏྟཱིཏི པན བྷིཀྑུབྷིཀྑུནཱིནཾ ཡཐཱརཧཾ དུཀྐཊཔཱཙིཏྟིཡཱ. པཏིརཱུཔེ ཋཱནེཏི ཝུཏྟཝིཔརཱིཏེ ཋཱནེ. སབྦཾ ཏནྟི ཨཱཔཏྟིཨཱདིཀཾ.

ནིཀྑམཱཔེཏཱ ¶ ཨཏྟཱ ནཱམ ཨཏྠི, ཏསྶ ཀཱམཏཱཡ ནིཀྑམནནྟི བཱལམཉྙནཾ ནིཝཏྟེཏུཾ ‘‘ཨཀཱམཏཱཡཱ’’ཏི ཝུཏྟཾ, ཨཏྟནོ ཨནིཙྪཱཡ ཨཔཡོགེན ཝཱཡོདྷཱཏུཝིཔྥཱརེནེཝ ནིཀྑམཏཱིཏི ཝུཏྟཾ ཧོཏི. སནྣིཙིཏཱཏི སམུཙྩཡེན ཋིཏཱ. ཝཱཡུཝེགསམུཔྤཱིལི༹ཏཱཏི ཝཱཡོདྷཱཏུཡཱ ཝེགེན སམནྟཏོ ཨཝཔཱིལི༹ཏཱ, ནིཀྑམནསྶ ཙེཏཾ ཧེཏུཝཙནཾ. ‘‘སནྣིཙིཏཱ ཨུཙྩཱརཔསྶཱཝཱ’’ཏི ཝཏྭཱ ‘‘སོ པནཱཡཾ ཨུཙྩཱརཔསྶཱཝོ’’ཏི པུན ཝཙནཾ སམཱཧཱརདྭནྡེཔི པུལླིངྒཔཡོགསྶ སམྦྷཝཏཱདསྶནཏྠཾ. ཨེཀཏྟམེཝ ཧི ཏསྶ ནིཡཏལཀྑཎནྟི. ཨཏྟནཱ ནིརཔེཀྑཾ ནིསྶཊྛཏྟཱ ནེཝ ཨཏྟནོ ཨཏྠཱཡ སནྟཀཾ ཝཱ ཧོཏི, ཀསྶཙིཔི དཱིཡནཝསེན ཨནིསྶཛྫིཏཏྟཱ, ཛིགུཙྪནཱིཡཏྟཱ ཙ ན པརསྶཔཱིཏི ཨཏྠོ. སརཱིརནིསྶནྡོཝཱཏི སརཱིརཏོ ཝིསྶནྡནམེཝ ནིཀྑམནམཏྟཾ. སརཱིརེ སཏི སོ ཧོཏི, ནཱསཏཱིཏི སརཱིརསྶ ཨཱནིསཾསམཏྟནྟིཔི ཝདནྟི. ཏདཡུཏྟམེཝ ནིདསྶནེན ཝིསམབྷཱཝཏོ. ཏཏྠ ཧི ‘‘པཊིཛགྒནམཏྟམེཝཱ’’ཏི ཝུཏྟཾ, པཊིསོདྷནམཏྟཾ ཨེཝཱཏི ཙསྶ ཨཏྠོ. ཝེལུ༹ནཱལི༹ཨཱདིཨུདཀབྷཱཛནཾ ཨུདཀཏུམྦོ. ཏནྟི ཚཌྜིཏཨུདཀཾ.

‘‘གཏེཏི གམནེ’’ཏི པུབྦེ ཨབྷིཀྐམཔཊིཀྐམགཧཎེན གམནེཔི པུརཏོ, པཙྪཏོ ཙ ཀཱཡསྶ ཨཏིཧརཎཾ ཝུཏྟནྟི ཨིདྷ གམནམེཝ གཧིཏ’’ནྟི (ཝིབྷ. མཱུལཊཱི. ༥༢༥) ཨཱཙརིཡཱནནྡཏྠེརེན ཝུཏྟཾ, ཏཾ ཀེཙིཝཱདོ ནཱམ ཨཱཙརིཡདྷམྨཔཱལཏྠེརེན ཀཏཾ. ཀསྨཱཏི ཙེ? གམནེ པཝཏྟསྶ པུརཏོ, པཙྪཏོ ཙ ཀཱཡཱཏིཧརཎསྶ ཏདཝིནཱབྷཱཝཏོ པདཝཱིཏིཧཱརནིཡམིཏཱཡ གམནཀིརིཡཱཡ ཨེཝ སངྒཧིཏཏྟཱ, ཝིབྷངྒཊྛཀཐཱདཱིཧི (ཨབྷི. ཨཊྛ. ༢.༥༢༣) ཙ ཝིརོདྷནཏོ. ཝུཏྟཉྷི ཏཏྠ གམནསྶ ཨུབྷཡཏྠ སམཝརོདྷཏྟཾ, བྷེདཏྟཉྩ –

‘‘ཨེཏྠ ཙ ཨེཀོ ཨིརིཡཱཔཐོ དྭཱིསུ ཋཱནེསུ ཨཱགཏོ. སོ ཧེཊྛཱ ‘ཨབྷིཀྐནྟེ པཊིཀྐནྟེ’ཏི ཨེཏྠ བྷིཀྑཱཙཱརགཱམཾ གཙྪཏོ ཙ ཨཱགཙྪཏོ ཙ ཨདྡྷཱནགམནཝསེན ཀཐིཏོ. ‘གཏེ ཋིཏེ ནིསིནྣེ’ཏི ཨེཏྠ ཝིཧཱརེ ཙུཎྞིཀཔཱདུདྡྷཱརཨིརིཡཱཔཐཝསེན ཀཐིཏོཏི ཝེདིཏབྦོ’’ཏི.

‘‘གཏེ’’ཏིཨཱདཱིསུ ཨཝཏྠཱབྷེདེན ཀིརིཡཱབྷེདོཡེཝ, ན པན ཨཏྠབྷེདོཏི དསྶེཏུཾ ‘‘གཙྪནྟོ ཝཱ’’ཏིཨཱདི ཝུཏྟཾ. ཏེནཱཧ ‘‘ཏསྨཱ’’ཏིཨཱདི ¶ . ཏཏྠ སུཏྟེཏི དཱིགྷནིཀཱཡེ, མཛ྄ཛྷིམནིཀཱཡེ ཙ སངྒཱིཏེ ¶ སཏིཔཊྛཱནསུཏྟེ (དཱི. ནི. ༢.༣༧༢; མ. ནི. ༡.༡༠༥) ཨདྡྷཱནཨིརིཡཱཔཐཱཏི ཙིརཔཝཏྟཀཱ དཱིགྷཀཱལིཀཱ ཨིརིཡཱཔཐཱ ཨདྡྷཱནསདྡསྶ ཙིརཀཱལཝཙནཏོ ‘‘ཨདྡྷནིཡཾ ཨསྶ ཙིརཊྛིཏིཀ’’ནྟིཨཱདཱིསུ (དཱི. ནི. ༢.༡༨༤; ༣.༡༧༧; པཱརཱ. ༢༡) ཝིཡ, ཨདྡྷཱནགམནཔཝཏྟཀཱ ཝཱ དཱིགྷམགྒིཀཱ ཨིརིཡཱཔཐཱ. ཨདྡྷཱནསདྡོ ཧི དཱིགྷམགྒཔརིཡཱཡོ ‘‘ཨདྡྷཱནགམནསམཡོ’’ཏིཨཱདཱིསུ (པཱཙི. ༢༡༣, ༢༡༧) ཝིཡ. མཛ྄ཛྷིམཱཏི བྷིཀྑཱཙཱརཱདིཝསེན པཝཏྟཱ ནཱཏིཙིརཀཱལིཀཱ, ནཱཏིདཱིགྷམགྒིཀཱ ཝཱ ཨིརིཡཱཔཐཱ. ཙུཎྞིཡཨིརིཡཱཔཐཱཏི ཝིཧཱརེ, ཨཉྙཏྠ ཝཱ ཨིཏོ ཙིཏོ ཙ པརིཝཏྟནཱདིཝསེན པཝཏྟཱ ཨཔྤམཏྟཀབྷཱཝེན ཙུཎྞཝིཙུཎྞིཡབྷཱུཏཱ ཨིརིཡཱཔཐཱ. ཨཔྤམཏྟཀམྤི ཧི ‘‘ཙུཎྞཝིཙུཎྞ’’ནྟི ལོཀེ ཝདནྟི. ‘‘ཁུདྡཀཙུཎྞིཀཨིརིཡཱཔཐཱ’’ཏིཔི པཱཋོ, ཁུདྡཀཱ ཧུཏྭཱ ཝུཏྟནཡེན ཙུཎྞིཀཱ ཨིརིཡཱཔཐཱཏི ཨཏྠོ. ཏསྨཱཏི ཨེཝཾ ཨཝཏྠཱབྷེདེན ཨིརིཡཱཔཐབྷེདམཏྟསྶ ཀཐནཏོ. ཏེསུཔཱིཏི ‘‘གཏེ ཋིཏེ’’ཏིཨཱདཱིསུཔི. ཝུཏྟནཡེནཱཏི ‘‘ཨབྷིཀྐནྟེ’’ཏིཨཱདཱིསུ ཝུཏྟནཡེན.

ཨཔརབྷཱགེཏི གམནཨིརིཡཱཔཐཏོ ཨཔརབྷཱགེ. ཋིཏོཏི ཋིཏཨིརིཡཱཔཐསམྤནྣོ. ཨེཏྠེཝཱཏི ཙངྐམནེཡེཝ. ཨེཝཾ སབྦཏྠ ཡཐཱརཧཾ.

གམནཋཱནནིསཛྫཱནཾ ཝིཡ ནིསཱིདནསཡནསྶ ཀམཝཙནམཡུཏྟཾ ཡེབྷུཡྻེན ཏཐཱ ཀམཱབྷཱཝཏོཏི ‘‘ཨུཊྛཱཡ’’ མིཙྩེཝ ཝུཏྟཾ.

ཛཱགརིཏསདྡསནྣིདྷཱནཏོ ཙེཏྠ བྷཝངྒོཏརཎཝསེན ནིདྡོཀྐམནམེཝ སཡནཾ, ན པན པིཊྛིཔསཱརཎམཏྟནྟི དསྶེཏི ‘‘ཀིརིཡཱམཡཔཝཏྟཱན’’ནྟིཨཱདིནཱ. དིཝཱསེཡྻསིཀྑཱཔདེ (པཱརཱ. ༧༧) ཝིཡ པིཊྛིཔསཱརཎསྶཱཔི སཡནཨིརིཡཱཔཐབྷཱཝེན ཨེཀལཀྑཎཏྟཱ ཨེཏྠཱཝརོདྷནཾ དཊྛབྦཾ. ཀརཎཾ ཀིརིཡཱ, ཀཱཡཱདིཀིཙྩཾ, ཏཾ ནིབྦཏྟེནྟཱིཏི ཀིརིཡཱམཡཱནི ཏདྡྷིཏསདྡཱནམནེཀཏྠཝུཏྟིཏོ. ཨཐ ཝཱ ཨཱཝཛྫནདྭཡཀིཙྩཾ ཀིརིཡཱ, ཏཱཡ པཀཏཱནི, ནིབྦཏྟཱནི ཝཱ ཀིརིཡཱམཡཱནི. ཨཱཝཛྫནཝསེན ཧི བྷཝངྒུཔཙྪེདེ སཏི ཝཱིཐིཙིཏྟཱནི ཨུཔྤཛྫནྟཱིཏི. ཨཔརཱཔརུཔྤཏྟིཡཱ ནཱནཔྤཀཱརཏོ ཝཏྟནྟི པརིཝཏྟནྟཱིཏི པཝཏྟཱནི. ཀཏྠཙི པན ‘‘ཙིཏྟཱན’’ནྟི པཱཋོ, སོ ཨབྷིདྷམྨཊྛཀཐཱདཱིཧི, (ཝིབྷ. ཨཊྛ. ༥༢༣) ཏཊྚཱིཀཱཧི ཙ ཝིརུདྡྷཏྟཱ ན པོརཱཎཔཱཋོཏི ཝེདིཏབྦོ. ཀིརིཡཱམཡཱནི ཨེཝ པཝཏྟཱནི ཏཐཱ, ཛཝནཾ, སབྦམྤི ཝཱ ཚདྭཱརིཀཝཱིཐིཙིཏྟཾ. ཏེནཱཧ ཨབྷིདྷམྨཊཱིཀཱཡཾ (ཝིབྷ. མཱུལཊཱི. ༥༢༥) ‘‘ཀཱཡཱདིཀིརིཡཱམཡཏྟཱ ¶ , ཨཱཝཛྫནཀིརིཡཱསམུཊྛིཏཏྟཱ ཙ ཛཝནཾ, སབྦམྤི ཝཱ ཚདྭཱརཔྤཝཏྟཾ ཀིརིཡཱམཡཔཝཏྟཾ ནཱམཱ’’ཏི. ཨཔྤཝཏྟནྟི ནིདྡོཀྐམནཀཱལེ ཨནུཔྤཛྫནཾ སུཏྟཾ ནཱམཱཏི ཨཏྠོ གཧེཏབྦོ. ནེཡྻཏྠཝཙནཉྷི ¶ ཨིདཾ, ཨིཏརཐཱ ཚདྭཱརིཀཙིཏྟཱནཾ པུརེཙརཱནུཙརཝསེན ཨུཔྤཛྫནྟཱནཾ སབྦེསམྤི དྭཱརཝིམུཏྟཙིཏྟཱནཾ པཝཏྟཾ སུཏྟཾ ནཱམ སིཡཱ, ཨེཝཉྩ ཀཏྭཱ ནིདྡོཀྐམནཀཱལཏོ ཨཉྙསྨིཾ ཀཱལེ ཨུཔྤཛྫནྟཱནཾ དྭཱརཝིམུཏྟཙིཏྟཱནམྤི པཝཏྟཾ ཛཱགརིཏེ སངྒཡ྄ཧཏཱིཏི ཝེདིཏབྦཾ.

ཙིཏྟསྶ པཡོགཀཱརཎབྷཱུཏེ ཨོཊྛཱདིཀེ པཊིཙྩ ཡཐཱསཀཾ ཋཱནེ སདྡོ ཛཱཡཏཱིཏི ཨཱཧ ‘‘ཨོཊྛེ ཙ པཊིཙྩཱ’’ཏིཨཱདི. ཀིཉྩཱཔི སདྡོ ཡཐཱཋཱནཾ ཛཱཡཏི, ཨོཊྛཱལནཱདིནཱ པན པཡོགེནེཝ ཛཱཡཏི, ན ཝིནཱ ཏེན པཡོགེནཱཏི ཨདྷིཔྤཱཡོ. ཀེཙི པན ཝདནྟི ‘‘ཨོཊྛེ ཙཱཏིཨཱདི སདྡུཔྤཏྟིཊྛཱནནིདསྶན’’ནྟི, ཏདཡུཏྟམེཝ ཏཐཱ ཨཝཙནཏོ. ན ཧི ‘‘ཨོཊྛེ ཙ པཊིཙྩཱ’’ཏིཨཱདིནཱ སསམུཙྩཡེན ཀམྨཝཙནེན ཋཱནཝཙནཾ སམྦྷཝཏཱིཏི. ཏདནུརཱུཔནྟི ཏསྶ སདྡསྶ ཨནུརཱུཔཾ. བྷཱསནསྶ པཊིསཉྩིཀྑནཝིརོདྷཏོ ཏུཎྷཱིབྷཱཝཔཀྑེ ‘‘ཨཔརབྷཱགེ བྷཱསིཏོ ཨིཏི པཊིསཉྩིཀྑཏཱི’’ཏི ན ཝུཏྟཾ, ཏེན ཙ ཝིཉྙཱཡཏི ‘‘ཏུཎྷཱིབྷཱུཏོཝ པཊིསཉྩིཀྑཏཱིཏི ཨཏྠོ’’ཏི.

བྷཱསནཏུཎྷཱིབྷཱཝཱནཾ སབྷཱཝཏོ བྷེདེ སཏི ཨཡཾ ཝིབྷཱགོ ཡུཏྟོ སིཡཱ, ནཱསཏཱིཏི ཨནུཡོགེནཱཧ ‘‘ཨུཔཱདཱརཱུཔཔཝཏྟིཡཉྷཱི’’ཏིཨཱདི. ཨུཔཱདཱརཱུཔསྶ སདྡཱཡཏནསྶ པཝཏྟི ཏཐཱ, སདྡཱཡཏནསྶ པཝཏྟནཾ བྷཱསནཾ, ཨཔྤཝཏྟནཾ ཏུཎྷཱིཏི ཝུཏྟཾ ཧོཏི.

ཡསྨཱ པན མཧཱསིཝཏྠེརཝཱདེ ཨནནྟརེ ཨནནྟརེ ཨིརིཡཱཔཐེ པཝཏྟརཱུཔཱརཱུཔདྷམྨཱནཾ ཏཏྠ ཏཏྠེཝ ནིརོདྷདསྶནཝསེན སམྤཛཱནཀཱརིཏཱ གཧིཏཱ, ཏསྨཱ ཏཾ མཧཱསཏིཔཊྛཱནསུཏྟེ (དཱི. ནི. ༢.༣༧༦; མ. ནི. ༡.༡༠༩) ཨཱགཏཨསམྨོཧསམྤཛཉྙཝིཔསྶནཱཝཱརཝསེན ཝེདིཏབྦཾ, ན ཙཏུབྦིདྷསམྤཛཉྙཝིབྷཱགཝསེན, ཨཏོ ཏཏྠེཝ ཏམདྷིཔྤེཏཾ, ན ཨིདྷཱཏི དསྶེནྟོ ‘‘ཏཡིད’’ནྟིཨཱདིམཱཧ. ཨསམྨོཧསངྑཱཏཾ དྷུརཾ ཛེཊྛཀཾ ཡསྶ ཝཙནསྶཱཏི ཨསམྨོཧདྷུརཾ, མཧཱསཏིཔཊྛཱནསུཏྟེཡེཝ ཏསྶ ཝཙནསྶ ཨདྷིཔྤེཏབྷཱཝསྶ ཧེཏུགབྦྷམིདཾ ཝཙནཾ. ཡསྨཱ པནེཏྠ སབྦམྤི ཙཏུབྦིདྷཾ སམྤཛཉྙཾ ལབྦྷཏི ཡཱཝདེཝ སཱམཉྙཕལཝིསེསདསྶནཔདྷཱནཏྟཱ ¶ ཨིམིསྶཱ དེསནཱཡ, ཏསྨཱ ཏཾ ཨིདྷ ཨདྷིཔྤེཏནྟི དསྶེཏུཾ ‘‘ཨིམསྨིཾ པནཱ’’ཏིཨཱདི ཝུཏྟཾ. ཝུཏྟནཡེནེཝཱཏི ཨབྷིཀྐནྟཱདཱིསུ ཝུཏྟནཡེནེཝ. ནནུ ‘‘སཏིསམྤཛཉྙེན སམནྣཱགཏོ’’ཏི ཨེཏསྶ ཨུདྡེསསྶཱཡཾ ནིདྡེསོ, ཨཐ ཀསྨཱ སམྤཛཉྙཝསེནེཝ ཝིཏྠཱརོ ཀཏོཏི ཙོདནཾ སོདྷེནྟོ ‘‘སམྤཛཱནཀཱརཱིཏི ཙཱ’’ཏིཨཱདིམཱཧ, སཏིསམྤཡུཏྟསྶེཝ སམྤཛཱནསྶ ཝསེན ཨཏྠསྶ ཝིདིཏབྦཏྟཱ ཨེཝཾ ཝིཏྠཱརོ ཀཏོཏི ཝུཏྟཾ ཧོཏི. ‘‘སཏིསམྤཡུཏྟསྶེཝཱ’’ཏི ཙ ཨིམིནཱ ཡཐཱ སམྤཛཉྙསྶ ཀིཙྩཏོ པདྷཱནཏཱ ¶ གཧིཏཱ, ཨེཝཾ སཏིཡཱཔཱིཏི ཨཏྠཾ དསྶེཏི, ན པནེཏཾ སཏིཡཱ སམྤཛཉྙེན སཧ བྷཱཝམཏྟདསྶནཾ. ན ཧི ཀདཱཙི སཏིརཧིཏཱ ཉཱཎཔྤཝཏྟི ཨཏྠཱིཏི.

ནནུ ཙ སམྤཛཉྙཝསེནེཝཱཡཾ ཝིཏྠཱརོ, ཨཐ ཀསྨཱ སཏིསམྤཡུཏྟསྶ སམྤཛཉྙསྶ ཝསེན ཨཏྠོ ཝེདིཏབྦོཏི ཙོདནམྤི སོདྷེཏི ‘‘སཏིསམྤཛཉྙེན སམནྣཱགཏོཏི ཨེཏསྶ ཧི པདསྶ ཨཡཾ ཝིཏྠཱརོ’’ཏི ཨིམིནཱ. ཨིདཾ ཝུཏྟཾ ཧོཏི – ‘‘སཏིསམྤཛཉྙེན སམནྣཱགཏོ’’ཏི ཨེཝཾ ཨེཀཏོ ཨུདྡིཊྛསྶ ཨཏྠསྶ ཝིཏྠཱརཏྟཱ ཨུདྡེསེ ཝིཡ ནིདྡེསེཔི ཏདུབྷཡཾ སམདྷུརབྷཱཝེནེཝ གཧིཏནྟི. ཨིམིནཱཔི ཧི སཏིཡཱ སམྤཛཉྙེན སམདྷུརཏཾཡེཝ ཝིབྷཱཝེཏི ཨེཀཏོ ཨུདྡིཊྛསྶ ཨཏྠསྶ ཝིཏྠཱརབྷཱཝདསྶནེན ཏདཏྠསྶ སིདྡྷཏྟཱ. ཨིདཱནི ཝིབྷངྒནཡེནཱཔི ཏདཏྠཾ སམཏྠེཏུཾ ‘‘ཝིབྷངྒཔྤཀརཎེ པནཱ’’ཏིཨཱདི ཝུཏྟཾ. ཨིམིནཱཔི ཧི སམྤཛཉྙསྶ ཝིཡ སཏིཡཱཔེཏྠ པདྷཱནཏཾཡེཝ ཝིབྷཱཝེཏི. ཏཏྠ ཨེཏཱནི པདཱནཱིཏི ‘‘ཨབྷིཀྐནྟེ པཊིཀྐནྟེ སམྤཛཱནཀཱརཱི ཧོཏཱི’’ཏིཨཱདཱིནི ཨུདྡེསཔདཱནི. ཝིབྷཏྟཱནེཝཱཏི སཏིཡཱ སམྤཛཉྙེན སམྤཡོགམཀཏྭཱ སབྦཊྛཱནེསུ ཝིསུཾ ཝིསུཾ ཝིབྷཏྟཱནིཡེཝ.

མཛ྄ཛྷིམབྷཱཎཀཱ, པན ཨཱབྷིདྷམྨིཀཱ (ཝིབྷ. ཨཊྛ. ༥༢༣) ཙ ཨེཝཾ ཝདནྟི – ཨེཀོ བྷིཀྑུ གཙྪནྟོ ཨཉྙཾ ཙིནྟེནྟོ ཨཉྙཾ ཝིཏཀྐེནྟོ གཙྪཏི, ཨེཀོ ཀམྨཊྛཱནཾ ཨཝིསྶཛྫེཏྭཱཝ གཙྪཏི. ཏཐཱ ཨེཀོ ཏིཊྛནྟོ ཨཉྙཾ ཙིནྟེནྟོ ཨཉྙཾ ཝིཏཀྐེནྟོ ཏིཊྛཏི, ཨེཀོ ཀམྨཊྛཱནཾ ཨཝིསྶཛྫེཏྭཱཝ ཏིཊྛཏི. ཨེཀོ ནིསཱིདནྟོ ཨཉྙཾ ཙིནྟེནྟོ ཨཉྙཾ ཝིཏཀྐེནྟོ ནིསཱིདཏི, ཨེཀོ ཀམྨཊྛཱནཾ ཨཝིསྶཛྫེཏྭཱཝ ནིསཱིདཏི. ཨེཀོ སཡནྟོ ཨཉྙཾ ཙིནྟེནྟོ ཨཉྙཾ ཝིཏཀྐེནྟོ སཡཏི, ཨེཀོ ཀམྨཊྛཱནཾ ཨཝིསྶཛྫེཏྭཱཝ སཡཏི. ཨེཏྟཀེན པན གོཙརསམྤཛཉྙཾ ན པཱཀཊཾ ཧོཏཱིཏི ཙངྐམནེན དཱིཔེནྟི. ཡོ ཧི བྷིཀྑུ ཙངྐམཾ ཨོཏརིཏྭཱ ཙངྐམནཀོཊིཡཾ ཋིཏོ པརིགྒཎྷཱཏི ‘‘པཱཙཱིནཙངྐམནཀོཊིཡཾ པཝཏྟཱ རཱུཔཱརཱུཔདྷམྨཱ ¶ པཙྪིམཙངྐམནཀོཊིཾ ཨཔྤཏྭཱ ཨེཏྠེཝ ནིརུདྡྷཱ, པཙྪིམཙངྐམནཀོཊིཡཾ པཝཏྟཱཔི པཱཙཱིནཙངྐམནཀོཊིཾ ཨཔྤཏྭཱ ཨེཏྠེཝ ནིརུདྡྷཱ, ཙངྐམནཝེམཛ྄ཛྷེ པཝཏྟཱ ཨུབྷོ ཀོཊིཡོ ཨཔྤཏྭཱ ཨེཏྠེཝ ནིརུདྡྷཱ, ཙངྐམནེ པཝཏྟཱ རཱུཔཱརཱུཔདྷམྨཱ ཋཱནཾ ཨཔྤཏྭཱ ཨེཏྠེཝ ནིརུདྡྷཱ, ཋཱནེ པཝཏྟཱ ནིསཛྫཾ, ནིསཛྫཱཡ པཝཏྟཱ སཡནཾ ཨཔྤཏྭཱ ཨེཏྠེཝ ནིརུདྡྷཱ’’ཏི ཨེཝཾ པརིགྒཎྷནྟོ པརིགྒཎྷནྟོཡེཝ བྷཝངྒཾ ཨོཏཱརེཏི, ཨུཊྛཧནྟོ ཀམྨཊྛཱནཾ གཧེཏྭཱཝ ཨུཊྛཧཏི. ཨཡཾ བྷིཀྑུ གཏཱདཱིསུ སམྤཛཱནཀཱརཱི ནཱམ ཧོཏི.

ཨེཝཾ པན སུཏྟེ ཀམྨཊྛཱནཾ ཨཝིབྷཱུཏཾ ཧོཏི, ཀམྨཊྛཱནཾ ཨཝིབྷཱུཏཾ ན ཀཱཏབྦཾ, ཏསྨཱ ཡོ ¶ བྷིཀྑུ ཡཱཝ སཀྐོཏི, ཏཱཝ ཙངྐམིཏྭཱ ཋཏྭཱ ནིསཱིདིཏྭཱ སཡམཱནོ ཨེཝཾ པརིགྒཧེཏྭཱ སཡཏི ‘‘ཀཱཡོ ཨཙེཏནོ, མཉྩོ ཨཙེཏནོ, ཀཱཡོ ན ཛཱནཱཏི ‘ཨཧཾ མཉྩེ སཡིཏོ’ཏི, མཉྩོཔི ན ཛཱནཱཏི ‘མཡི ཀཱཡོ སཡིཏོ’ཏི. ཨཙེཏནོ ཀཱཡོ ཨཙེཏནེ མཉྩེ སཡིཏོ’’ཏི. ཨེཝཾ པརིགྒཎྷནྟོ པརིགྒཎྷནྟོཡེཝ ཙིཏྟཾ བྷཝངྒཾ ཨོཏཱརེཏི, པབུཛ྄ཛྷནྟོ ཀམྨཊྛཱནཾ གཧེཏྭཱཝ པབུཛ྄ཛྷཏི, ཨཡཾ སུཏྟེ སམྤཛཱནཀཱརཱི ནཱམ ཧོཏི.

‘‘ཀཱཡཱདིཀིརིཡཱནིཔྥཏྟནེན ཏམྨཡཏྟཱ, ཨཱཝཛྫནཀིརིཡཱསམུཊྛིཏཏྟཱ ཙ ཛཝནཾ, སབྦམྤི ཝཱ ཚདྭཱརཔྤཝཏྟཾ ཀིརིཡཱམཡཔཝཏྟཾ ནཱམ, ཏསྨིཾ སཏི ཛཱགརིཏཾ ནཱམ ཧོཏཱི’’ཏི པརིགྒཎྷནྟོ བྷིཀྑུ ཛཱགརིཏེ སམྤཛཱནཀཱརཱི ནཱམ. ཨཔིཙ རཏྟིནྡིཝཾ ཚ ཀོཊྛཱསེ ཀཏྭཱ པཉྩ ཀོཊྛཱསེ ཛགྒནྟོཔི ཛཱགརིཏེ སམྤཛཱནཀཱརཱི ནཱམ ཧོཏི.

ཝིམུཏྟཱཡཏནསཱིསེན དྷམྨཾ དེསེནྟོཔི, བཱཏྟིཾས ཏིརཙྪཱནཀཐཱ པཧཱཡ དསཀཐཱཝཏྠུནིསྶིཏཾ སཔྤཱཡཀཐཾ ཀཐེནྟོཔི བྷཱསིཏེ སམྤཛཱནཀཱརཱི ནཱམ.

ཨཊྛཏིཾསཱཡ ཨཱརམྨཎེསུ ཙིཏྟརུཙིཡཾ མནསིཀཱརཾ པཝཏྟེནྟོཔི དུཏིཡཛ྄ཛྷཱནཾ སམཱཔནྣོཔི ཏུཎྷཱིབྷཱཝེ སམྤཛཱནཀཱརཱི ནཱམ. དུཏིཡཉྷི ཛྷཱནཾ ཝཙཱིསངྑཱརཝིརཧཏོ ཝིསེསཏོ ཏུཎྷཱིབྷཱཝོ ནཱམཱཏི. ཨཡམྤི ནཡོ པུརིམནཡཏོ ཝིསེསནཡཏྟཱ ཨིདྷཱཔི ཨཱཧརིཏྭཱ ཝཏྟབྦོ. ཏཐཱ ཧེས ཨབྷིདྷམྨཊྛཀཐཱདཱིསུ (ཝིབྷ. ཨཊྛ. ༥༢༣) ‘‘ཨཡཾ པནེཏྠ ཨཔརོཔི ནཡོ’’ཏི ཨཱརབྷིཏྭཱ ¶ ཡཐཱཝུཏྟནཡོ ཝིབྷཱཝིཏོཏི. ‘‘ཨེཝཾ ཁོ མཧཱརཱཛཱ’’ཏིཨཱདི ཡཐཱནིདྡིཊྛསྶ ཨཏྠསྶ ནིགམནཾ, ཏསྨཱ ཏཏྠ ནིདྡེསཱནུརཱུཔཾ ཨཏྠཾ དསྶེནྟོ ‘‘ཨེཝ’’ནྟིཨཱདིམཱཧ. སཏིསམྤཡུཏྟསྶ སམྤཛཉྙསྶཱཏི ཧི ནིདྡེསཱནུརཱུཔཾ ཨཏྠཝཙནཾ. ཏཏྠ ཝིནིཙྪཡོ ཝུཏྟོཡེཝ. ཨེཝནྟི ཨིམིནཱ ཝུཏྟཔྤཀཱརེན ཨབྷིཀྐནྟཔཊིཀྐནྟཱདཱིསུ སཏྟསུ ཋཱནེསུ པཙྩེཀཾ ཙཏུབྦིདྷེན པཀཱརེནཱཏི ཨཏྠོ.

སནྟོསཀཐཱཝཎྞནཱ

༢༡༥. ཨཏྠདསྶནེན པདསྶཔི ཝིཉྙཱཡམཱནཏྟཱ པདམནཔེཀྑིཏྭཱ སནྟོསསྶ ཨཏྟནི ཨཏྠིཏཱཡ བྷིཀྑུ སནྟུཊྛོཏི པཝུཙྩཏཱིཏི ཨཏྠམཏྟཾ དསྶེཏུཾ ‘‘ཨིཏརཱིཏརཔཙྩཡསནྟོསེན སམནྣཱགཏོ’’ཏི ཝུཏྟཾ. སནྟུསྶཏི ན ལུདྡྷོ བྷཝཏཱིཏི ཧི པདནིབྦཙནཾ. ཨཔིཙ པདནིབྦཙནཝསེན ཨཏྠེ ཝུཏྟེ ཡསྶ སནྟོསསྶ ཨཏྟནི ཨཏྠིབྷཱཝཏོ སནྟུཊྛོ ནཱམ, སོ ཨཔཱཀཊོཏི ཏཾ པཱཀཊཀརཎཏྠཾ ‘‘ཨིཏརཱིཏརཔཙྩཡསནྟོསེན སམནྣཱགཏོ’’ཏི ཨཏྠམཏྟམཱཧ, ཙཱིཝརཱདིཀེ ¶ ཡཏྠ ཀཏྠཙི ཀཔྤིཡཔཙྩཡེ སནྟོསེན སམངྒཱིབྷཱུཏོཏི ཨཏྠོ. ཨིཏར-སདྡོ ཧི ཨནིཡམཝཙནོ དྭིཀྑཏྟུཾ ཝུཙྩམཱནོ ཡཾ ཀིཉྩི-སདྡེན སམཱནཏྠོ ཧོཏི. ཏེན ཝུཏྟཾ ‘‘ཡཏྠ ཀཏྠཙི ཀཔྤིཡཔཙྩཡེ’’ཏི. ཨཐ ཝཱ ཨིཏརཾ ཝུཙྩཏི ཧཱིནཾ པཎཱིཏཏོ ཨཉྙཏྟཱ, ཏཐཱ པཎཱིཏམྤི ཧཱིནཏོ ཨཉྙཏྟཱ. ཨཉྙམཉྙཱཔེཀྑཱསིདྡྷཱ ཧི ཨིཏརཏཱ, ཏསྨཱ ཧཱིནེན ཝཱ པཎཱིཏེན ཝཱ ཙཱིཝརཱདིཀཔྤིཡཔཙྩཡེན སནྟོསེན སམངྒཱིབྷཱུཏོཏི ཨཏྠོ དཊྛབྦོ. སནྟུསྶཏི ཏེན, སནྟུསྶནམཏྟནྟི ཝཱ སནྟོསོ, ཏཐཱ པཝཏྟོ ཨལོབྷོ, ཨལོབྷཔདྷཱནཱ ཝཱ ཙཏྟཱརོ ཁནྡྷཱ. ལབྷནཾ ལཱབྷོ, ཨཏྟནོ ལཱབྷསྶ ཨནུརཱུཔཾ སནྟོསོ ཡཐཱལཱབྷསནྟོསོ. བལནྟི ཀཱཡབལཾ, ཨཏྟནོ བལསྶ ཨནུརཱུཔཾ སནྟོསོ ཡཐཱབལསནྟོསོ. སཱརུཔྤནྟི སཔྤཱཡཾ པཏིརཱུཔཾ བྷིཀྑུནོ ཨནུཙྪཝིཀཏཱ, ཨཏྟནོ སཱརུཔྤསྶ ཨནུརཱུཔཾ སནྟོསོ ཡཐཱསཱརུཔྤསནྟོསོ.

ཨཔརོ ནཡོ – ལབྦྷཏེཏི ལཱབྷོ, ཡོ ཡོ ལཱབྷོ ཡཐཱལཱབྷཾ, ཨིཏརཱིཏརཔཙྩཡོ, ཡཐཱལཱབྷེན སནྟོསོ ཡཐཱལཱབྷསནྟོསོ. བལསྶ ཨནུརཱུཔཾ པཝཏྟཏཱིཏི ཡཐཱབལཾ, ཨཏྟནོ བལཱནུཙྪཝིཀཔཙྩཡོ, ཡཐཱ-སདྡོ ཙེཏྠ སསཱདྷནཾ ཨནུརཱུཔཀིརིཡཾ ¶ ཝདཏི, ཡཐཱ ཏཾ ‘‘ཨདྷིཙིཏྟ’’ནྟི ཨེཏྠ ཨདྷི-སདྡོ སསཱདྷནཾ ཨདྷིཀརཎཀིརིཡནྟི. ཡཐཱབལེན སནྟོསོ ཡཐཱབལསནྟོསོ. སཱརུཔྤཏི པཏིརཱུཔཾ བྷཝཏི, སོབྷནཾ ཝཱ ཨཱརོཔེཏཱིཏི སཱརུཔྤཾ, ཡཾ ཡཾ སཱརུཔྤཾ ཡཐཱསཱརུཔྤཾ, བྷིཀྑུནོ སཔྤཱཡཔཙྩཡོ, ཡཐཱསཱརུཔྤེན སནྟོསོ ཡཐཱསཱརུཔྤསནྟོསོ. ཡཐཱཝུཏྟཾ པབྷེདམནུགཏཱ ཝཎྞནཱ པབྷེདཝཎྞནཱ.

ཨིདྷཱཏི སཱསནེ. ཨཉྙཾ ན པཏྠེཏཱིཏི ཨཔྤཏྟཔཏྠནབྷཱཝམཱཧ, ལབྷནྟོཔི ན གཎྷཱཏཱིཏི པཏྟཔཏྠནཱབྷཱཝཾ. པཋམེན ཨཔྤཏྟཔཏྠནཱབྷཱཝེཡེཝ ཝུཏྟེ ཡཐཱལདྡྷཏོ ཨཉྙསྶ ཨཔཏྠནཱ ནཱམ ཨཔྤིཙྪཏཱཡཔི སིཡཱ པཝཏྟིཨཱཀཱརོཏི ཨཔྤིཙྪཏཱཔསངྒབྷཱཝཏོ ཏཏོཔི ནིཝཏྟམེཝ སནྟོསསྶ སརཱུཔཾ དསྶེཏུཾ དུཏིཡེན པཏྟཔཏྠནཱབྷཱཝོ ཝུཏྟོཏི དཊྛབྦཾ. ཨེཝམུཔརིཔི. པཀཏིདུབྦལོཏི ཨཱབཱདྷཱདིཝིརཧེཔི སབྷཱཝདུབྦལོ. སམཱནོ སཱིལཱདིབྷཱགོ ཡསྶཱཏི སབྷཱགོ, སཧ ཝཱ སཱིལཱདཱིཧི གུཎབྷཱགེཧི ཝཏྟཏཱིཏི སབྷཱགོ, ལཛྫཱིཔེསལོ བྷིཀྑུ, ཏེན. ཏཾ པརིཝཏྟེཏྭཱཏི པཀཏིདུབྦལཱདཱིནཾ གརུཙཱིཝརཾ ན ཕཱསུབྷཱཝཱཝཧཾ, སརཱིརཁེདཱཝཧཉྩ ཧོཏཱིཏི པཡོཛནཝསེན པརིཝཏྟནཾ ཝུཏྟཾ, ན ཨཏྲིཙྪཏཱདིཝསེན. ཨཏྲིཙྪཏཱདིཔྤཀཱརེན ཧི པརིཝཏྟེཏྭཱ ལཧུཀཙཱིཝརཔརིབྷོགོ སནྟོསཝིརོདྷཱི ཧོཏི, ཏསྶ པན ཏདབྷཱཝཏོ ཡཐཱཝུཏྟཔྤཡོཛནཝསེན པརིཝཏྟེཏྭཱ ལཧུཀཙཱིཝརཔརིབྷོགོཔི ན སནྟོསཝིརོདྷཱིཏི ཨཱཧ ‘‘ལཧུཀེན ཡཱཔེནྟོཔི སནྟུཊྛོཝ ཧོཏཱི’’ཏི. པཡོཛནཝསེན པརིཝཏྟེཏྭཱ ལཧུཀཙཱིཝརཔརིབྷོགོཔི ན ཏཱཝ སནྟོསཝིརོདྷཱི, པགེཝ ཏཐཱ ཨཔརིཝཏྟེཏྭཱ པརིབྷོགེཏི སམྦྷཱཝིཏསྶ ཨཏྠསྶ དསྶནཏྠཉྷེཏྠ ཨཔི-སདྡགྒཧཎཾ. ཙཱིཝརནིདྡེསེཔི ¶ ‘‘པཏྟཙཱིཝརཱདཱིནཾ ཨཉྙཏར’’ནྟི ཝཙནཾ ཡཐཱརུཏཾ གཧིཏཱཝསེསཔཙྩཡསནྟོསསྶ ཙཱིཝརསནྟོསེ སམཝརོདྷིཏཱདསྶནཏྠཾ. ‘‘ཐེརཀོ ཨཡམཱཡསྨཱ མལླཀོ’’ཏིཨཱདཱིསུ ཐེརཝོཧཱརསྶ པཉྙཏྟིམཏྟེཔི པཝཏྟིཏོ དསཝསྶཏོ པབྷུཏི ཙིརཝསྶཔབྦཛིཏེསྭེཝ ཨིདྷ པཝཏྟིཉཱཔནཏྠཾ ‘‘ཐེརཱནཾ ཙིརཔབྦཛིཏཱན’’ནྟི ཝུཏྟཾ, ཐེརཱནནྟི ཝཱ སངྒྷཏྠེརཾ ཝདཏི. ཙིརཔབྦཛིཏཱནནྟི པན ཏདཝསེསེ ཝུཌྜྷབྷིཀྑཱུ. སངྐཱརཀཱུཊཱདིཏོཏི ཀཙཝརརཱསིཨཱདིཏོ. ཨནནྟཀཱནཱིཏི ནནྟཀཱནི པིལོཏིཀཱནི. ‘‘ཨ-ཀཱརོ ¶ ཙེཏྠ ནིཔཱཏམཏྟ’’ནྟི (ཝི. ཝ. ཨཊྛ. ༡༡༦༥) ཝིམཱནཊྛཀཐཱཡཾ ཝུཏྟཾ. ཏཐཱ ཙཱཧུ ‘‘ནནྟཀཾ ཀཔྤཊོ ཛིཎྞཝསནཾ ཏུ པཊཙྩར’’ནྟི ནཏྠི དསཱསངྑཱཏོ ཨནྟོ ཀོཊི ཡེསནྟི ཧི ནནྟཀཱནི, ན-སདྡསྶ ཏུ ཨནཱདེསེ ཨནནྟཀཱནཱིཏིཔི ཡུཛྫཏི. སངྐེཏཀོཝིདཱནཾ པན ཨཱཙརིཡཱནཾ ཏཐཱ ཨཝུཏྟཏྟཱ ཝཱིམཾསིཏྭཱ གཧེཏབྦཾ. ‘‘སནནྟཀཱནཱི’’ཏིཔི པཱཋོ, ནནྟཀེན སཧ སཾསིབྦིཏཱནི པཾསུཀཱུལཱནི ཙཱིཝརཱནཱིཏི ཨཏྠོ. སངྒྷཱཊིནྟི ཏིཎྞཾ ཙཱིཝརཱནཾ ཨཉྙཏརཾ ཙཱིཝརཾ. ཏཱིཎིཔི ཧི ཙཱིཝརཱནི སངྒྷཊིཏཏྟཱ ‘‘སངྒྷཱཊཱི’’ཏི ཝུཙྩནྟི. མཧགྒྷཾ ཙཱིཝརཾ, བཧཱུནི ཝཱ ཙཱིཝརཱནི ལབྷིཏྭཱ ཏཱནི ཝིསྶཛྫེཏྭཱ ཏདཉྙསྶ གཧཎམྤི མཧིཙྪཏཱདིནཡེ ཨཊྛཏྭཱ ཡཐཱསཱརུཔྤནཡེ ཨེཝ ཋིཏཏྟཱ ན སནྟོསཝིརོདྷཱིཏི ཨཱཧ ‘‘ཏེསཾ…པེ… དྷཱརེནྟོཔི སནྟུཊྛོཝ ཧོཏཱི’’ཏི. ཡཐཱསཱརུཔྤནཡེན ཡཐཱལདྡྷཾ ཝིསྶཛྫེཏྭཱ ཏདཉྙགཧཎམྤི ན ཏཱཝ སནྟོསཝིརོདྷཱི, པགེཝ ཨནཉྙགཧཎེན ཡཐཱལདྡྷསྶེཝ ཡཐཱསཱརུཔྤཾ པརིབྷོགེཏི སམྦྷཱཝིཏསྶ ཨཏྠསྶ དསྶནཏྠཉྷེཏྠ ཨཔི-སདྡགྒཧཎཾ, ཨེཝཾ སེསཔཙྩཡེསུཔི ཡཐཱབལཡཐཱསཱརུཔྤནིདྡེསེསུ ཨཔི-སདྡགྒཧཎེ ཨདྷིཔྤཱཡོ ཝེདིཏབྦོ.

པཀཏིཝིརུདྡྷནྟི སབྷཱཝེནེཝ ཨསཔྤཱཡཾ. སམཎདྷམྨཀརཎསཱིསེན སཔྤཱཡཔཙྩཡཔརིཡེསནཾ, པརིབྷུཉྫནཉྩ ཝིསེསཏོ ཡུཏྟཏརནྟི ཨཏྠནྟརཾ ཝིཉྙཱཔེཏུཾ ‘‘ཡཱཔེནྟོཔཱི’’ཏི ཨཝཏྭཱ ‘‘སམཎདྷམྨཾ ཀརོནྟོཔཱི’’ཏི ཝུཏྟཾ. མིསྶཀཱཧཱརནྟི ཏཎྜུལམུགྒཱདཱིཧི ནཱནཱཝིདྷཔུབྦཎྞཱཔརཎྞེཧི མིསྶེཏྭཱ ཀཏཾ ཨཱཧཱརཾ.

ཨཉྙམྤི སེནཱསནེ ཡཐཱསཱརུཔྤསནྟོསཾ དསྶེནྟོ ཨཱཧ ‘‘ཡོ ཧཱི’’ཏིཨཱདི. པཋམེ ཧི ནཡེ ཡཐཱལདྡྷསྶ ཝིསྶཛྫནེན, དུཏིཡེ པན ཡཐཱཔཏྟསྶ ཨསམྤཊིཙྪནེན ཡཐཱསཱརུཔྤསནྟོསོ ཝུཏྟོཏི ཨཡམེཏེསཾ ཝིསེསོ. ཧི-སདྡོ ཙེཏྠ པཀྑནྟརཛོཏཀོ. མཛ྄ཛྷིམཱགམཊྛཀཐཱཡཾ པན པི-སདྡོ དིསྶཏི. ‘‘ཨུཏྟམསེནཱསནཾ ནཱམ པམཱདཊྛཱན’’ནྟི ཝཏྭཱ ཏབྦྷཱཝམེཝ དསྶེཏུཾ ‘‘ཏཏྠ ནིསིནྣསྶཱ’’ཏིཨཱདི ཝུཏྟཾ. ནིདྡཱབྷིབྷཱུཏསྶཱཏི ཐིནམིདྡོཀྐམནེན ཙིཏྟཙེཏསིཀགེལཉྙབྷཱཝཏོ བྷཝངྒསནྟཏིསངྑཱཏཱཡ ནིདྡཱཡ ཨབྷིབྷཱུཏསྶ, ནིདྡཱཡནྟསྶཱཏི ཨཏྠོ. པཊིབུཛ྄ཛྷཏོཏི ཏཐཱརཱུཔེན ཨཱརམྨཎནྟརེན ¶ པཊིབུཛ྄ཛྷནྟསྶ པཊིབུཛ྄ཛྷནཧེཏུ ¶ ཀཱམཝིཏཀྐཱ པཱཏུབྷཝནྟཱིཏི ཝུཏྟཾ ཧོཏི. ‘‘པཊིབུཛ྄ཛྷནཏོ’’ཏིཔི ཧི ཀཏྠཙི པཱཋོ དིསྶཏི. ཨཡམྤཱིཏི པཋམནཡཾ ཨུཔཱདཱཡ ཝུཏྟཾ.

ཏེསཾ ཨཱབྷཏེནཱཏི ཏེཧི ཐེརཱདཱིཧི ཨཱབྷཏེན, ཏེསཾ ཝཱ ཡེན ཀེནཙི སནྟཀེནཱཏི ཨཛ྄ཛྷཱཧརིཏྭཱ སམྦནྡྷོ. མུཏྟཧརཱིཏཀནྟི གོམུཏྟཔརིབྷཱཝིཏཾ, པཱུཏིབྷཱཝེན ཝཱ མོཙིཏཾ ཚཌྜིཏཾ ཧརཱིཏཀཾ, ཨིདཱནི པན པོཏྠཀེསུ ‘‘གོམུཏྟཧརཱིཏཀ’’ནྟི པཱཋོ, སོ ན པོརཱཎཔཱཋོ ཏབྦཎྞནཱཡ (དཱི. ནི. ཊཱི. ༡.༢༡༥) ཝིརུདྡྷཏྟཱ. ཙཏུམདྷུརནྟི མཛ྄ཛྷིམཱགམཝརེ མཧཱདྷམྨསམཱདཱནསུཏྟེ (མ. ནི. ༡.༤༨༤ ཨཱདཡོ) ཝུཏྟཾ དདྷིམདྷུསཔྤིཕཱཎིཏསངྑཱཏཾ ཙཏུམདྷུརཾ, ཨེཀསྨིཉྩ བྷཱཛནེ ཙཏུམདྷུརཾ ཋཔེཏྭཱ ཏེསུ ཡདིཙྪསི, ཏཾ གཎྷཱཧི བྷནྟེཏི ཨཏྠོ. ‘‘སཙསྶཱ’’ཏིཨཱདིནཱ ཏདུབྷཡསྶ རོགཝཱུཔསམནབྷཱཝཾ དསྶེཏི. བུདྡྷཱདཱིཧི ཝཎྞིཏནྟི ‘‘པཱུཏིམུཏྟབྷེསཛྫཾ ནིསྶཱཡ པབྦཛྫཱ’’ཏིཨཱདིནཱ (མཧཱཝ. ༧༣, ༡༢༨) སམྨཱསམྦུདྡྷཱདཱིཧི པསཏྠཾ. ཨཔྤིཙྪཏཱཝིསིཊྛཱཡ སནྟུཊྛིཡཱ ནིཡོཛནཏོ པརམེན ཨུཀྐཾསགཏེན སནྟོསེན སནྟུསྶཏཱིཏི པརམསནྟུཊྛོ.

ཀཱམཉྩ སནྟོསཔྤབྷེདཱ ཡཐཱཝུཏྟཏོཔི ཨདྷིཀཏརཱ ཙཱིཝརེ ཝཱིསཏི སནྟོསཱ, པིཎྜཔཱཏེ པནྣརས, སེནཱསནེ ཙ པནྣརས, གིལཱནཔཙྩཡེ ཝཱིསཏཱིཏི, ཨིདྷ པན སངྑེཔེན དྭཱདསཝིདྷོཡེཝ སནྟོསོ ཝུཏྟོ. ཏདདྷིཀཏརཔྤབྷེདོ པན ཙཏུརངྒུཏྟརེ མཧཱཨརིཡཝཾསསུཏྟཊྛཀཐཱཡ (ཨ. ནི. ཨཊྛ. ༢.༤.༢༨) གཧེཏབྦོ. ཏེནཱཧ ‘‘ཨིམིནཱ པནཱ’’ཏིཨཱདི. ཨེཝཾ ‘‘ཨིདྷ མཧཱརཱཛ བྷིཀྑུ སནྟུཊྛོ ཧོཏཱི’’ཏི ཨེཏྠ པུགྒལཱདྷིཊྛཱནནིདྡིཊྛེན སནྟུཊྛཔདེནེཝ སནྟོསཔྤབྷེདཾ དསྶེཏྭཱ ཨིདཱནི ‘‘ཀཱཡཔརིཧཱརིཀེན ཙཱིཝརེན ཀུཙྪིཔརིཧཱརིཀེན པིཎྜཔཱཏེནཱ’’ཏིཨཱདི དེསནཱནུརཱུཔཾ ཏེན སནྟོསེན སནྟུཊྛསྶ ཨནུཙྪཝིཀཾ པཙྩཡཔྤབྷེདཾ, ཏསྶ ཙ ཀཱཡཀུཙྪིཔརིཧཱརིཡབྷཱཝཾ ཝིབྷཱཝེནྟོ ཨེཝམཱཧཱཏི ཨཡམེཏྠ སམྦནྡྷོ. ཀཱམཉྩསྶ ཙཱིཝརཔིཎྜཔཱཏེཧེཝ ཡཐཱཀྐམཾ ཀཱཡཀུཙྪིཔརིཧཱརིཡེཧི སནྟུཊྛཏཱ པཱལི༹ཡཾ ཝུཏྟཱ, ཏཐཱཔི སེསཔརིཀྑཱརཙཏུཀྐེན ཙ ཝིནཱ ཝིཙརཎམཡུཏྟཾ, སབྦཏྠ ཙ ཀཱཡཀུཙྪིཔརིཧཱརིཡཏཱ ལདྡྷབྦཱཏི ཨཊྛཀཐཱཡཾ ཨཡཾ ཝིནིཙྪཡོ ཝུཏྟོཏི དཊྛབྦཾ. དནྟཀཊྛཙྪེདནཝཱསཱིཏི ལཀྑཎམཏྟཾ ཏདཉྙཀིཙྩསྶཱཔི ཏཱཡ སཱདྷེཏབྦཏྟཱ, ཏེན ཝཀྑཏི ‘‘མཉྩཔཱིཋཱནཾ ཨངྒཔཱདཙཱིཝརཀུཊིདཎྜཀསཛྫནཀཱལེ ཙཱ’’ཏིཨཱདི. ཝུཏྟམྤི ཙེཏཾ པོརཱཎཊྛཀཐཱསུ ‘‘ན ཧེཏཾ ཀཏྠཙིཔི པཱལི༹ཡམཱགཏ’’ནྟི.

བནྡྷནནྟི ¶ ཀཱཡབནྡྷནཾ. པརིསྶཱཝནེན པརིསྶཱཝནཉྩ, ཏེན སཧཱཏི ཝཱ ཨཏྠོ. ཡུཏྟོ ཀམྨཊྛཱནབྷཱཝནཱསངྑཱཏོ ཡོགོ ཡསྶ, ཏསྨིཾ ཝཱ ཡོགོ ཡུཏྟོཏི ཡུཏྟཡོགོ, ཏསྶ.

ཀཱཡཾ ¶ པརིཧརནྟི པོསེནྟི, ཀཱཡསྶ ཝཱ པརིཧཱརོ པོསནམཏྟཾ པཡོཛནམེཏེཧཱིཏི ཀཱཡཔརིཧཱརིཡཱ ཀ-ཀཱརསྶ ཡ-ཀཱརཾ ཀཏྭཱ. པོསནཉྩེཏྠ ཝཌྜྷནཾ, བྷརཎཾ ཝཱ, ཏཐཱ ཀུཙྪིཔརིཧཱརིཡཱཔི ཝེདིཏབྦཱ. བཧིདྡྷཱཝ ཀཱཡསྶ ཨུཔཀཱརཀབྷཱཝེན ཀཱཡཔརིཧཱརིཡཏཱ, ཨཛ྄ཛྷོཧརཎཝསེན སརཱིརཊྛིཏིཡཱ ཨུཔཀཱརཀབྷཱཝེན ཀུཙྪིཔརིཧཱརིཡཏཱཏི ཨཡམེཏེསཾ ཝིསེསོ. ཏེནཱཧ ‘‘ཏིཙཱིཝརཾ ཏཱཝཱ’’ཏིཨཱདི. ‘‘པརིཧརཏཱི’’ཏི ཨེཏསྶ པོསེཏཱིཏི ཨཏྠཝཙནཾ. ཨིཏཱིཏི ནིདསྶནེ ནིཔཱཏོ, ཨེཝཾ ཝུཏྟནཡེན ཀཱཡཔརིཧཱརིཡཾ ཧོཏཱིཏི ཀཱརཎཛོཏནེ ཝཱ, ཏསྨཱ པོསནཏོ ཀཱཡཔརིཧཱརིཡཾ ཧོཏཱིཏི. ཨེཝམུཔརིཔི. ཙཱིཝརཀཎྞེནཱཏི ཙཱིཝརཔརིཡནྟེན.

ཀུཊིཔརིབྷཎྜཀརཎཀཱལེཏི ཀུཊིཡཱ སམནྟཏོ ཝིལིམྤནེན སམྨཊྛཀརཎཀཱལེ.

ཨངྒཾ ནཱམ མཉྩཔཱིཋཱནཾ པཱདཱུཔརི ཋཔིཏོ པདྷཱནསམྦྷཱརཝིསེསོ. ཡཏྠ པདརསཉྩིནནཔིཊྛིཨཔསྶཡནཱདཱིནི ཀརོནྟི, ཡོ ‘‘ཨཊནཱི’’ཏིཔི ཝུཙྩཏི.

མདྷུདྡུམཔུཔྥཾ མདྷུཀཾ ནཱམ, མཀྑིཀཱམདྷཱུཧི ཀཏཔཱུཝཾ ཝཱ. པརིཀྑཱརམཏྟཱ པརིཀྑཱརཔམཱཎཾ. སེཡྻཾ པཝིསནྟསྶཱཏི པཙྩཏྠརཎཀུཉྩིཀཱནཾ ཏཱདིསེ ཀཱལེ པརིབྷུཏྟབྷཱཝཾ སནྡྷཱཡ ཝུཏྟཾ. ཏེནཱཧ ‘‘ཏཏྲཊྛཀཾ པཙྩཏྠརཎ’’ནྟི. ཨཏྟནོ སནྟཀབྷཱཝེན པཙྩཏྠརཎཱདྷིཊྛཱནེན ཨདྷིཊྛཧིཏྭཱ ཏཏྠེཝ སེནཱསནེ ཏིཊྛནཀཉྷི ‘‘ཏཏྲཊྛཀ’’ནྟི ཝུཙྩཏི. ཝིཀཔྤནཝཙནཏོ པན ཏེསམཉྙཏརསྶ ནཝམཏཱ, ཡཐཱཝུཏྟཔཊིཔཱཊིཡཱ ཙེཏྠ ནཝམབྷཱཝོ, ན ཏུ ཏེསཾ ཏཐཱཔཏིནིཡཏབྷཱཝེན. ཀསྨཱཏི ཙེ? ཏཐཱཡེཝ ཏེསམདྷཱརཎཏོ. ཨེས ནཡོ དསམཱདཱིསུཔི. ཏེལཾ པཊིསཱམེཏྭཱ ཧརིཏཱ ཝེལུ༹ནཱལི༹ཨཱདིཀཱ ཏེལནཱལི༹. ནནུ སནྟུཊྛཔུགྒལདསྶནེ སནྟུཊྛོཝ ཨཊྛཔརིཀྑཱརིཀོ དསྶེཏབྦོཏི ཨནུཡོགེ ཡཐཱརཧཾ ཏེསམྤི སནྟུཊྛབྷཱཝཾ དསྶེནྟོ ‘‘ཨེཏེསུ ཙཱ’’ཏིཨཱདིམཱཧ. མཧནྟོ པརིཀྑཱརསངྑཱཏོ བྷཱརོ ཨེཏེསནྟི མཧཱབྷཱརཱ, ཨཡཾ ཨདྷུནཱ པཱཋོ, ཨཱཙརིཡདྷམྨཔཱལཏྠེརེན པན ‘‘མཧཱགཛཱ’’ཏི པཱཋསྶ དིཊྛཏྟཱ ‘‘དུཔྤོསབྷཱཝེན ¶ མཧཱགཛཱ ཝིཡཱཏི མཧཱགཛཱ’’ཏི (དཱི. ནི. ཊཱི. ༡.༢༡༥) ཝུཏྟཾ, ན ཏེ ཨེཏྟཀེཧི པརིཀྑཱརེཧི ‘‘མཧིཙྪཱ, ཨསནྟུཊྛཱ, དུབྦྷརཱ, བཱཧུལླཝུཏྟིནོ’’ཏི ཙ ཝཏྟབྦཱཏི ཨདྷིཔྤཱཡོ. ཡདི ཨིཏརེཔི སནྟུཊྛཱ ཨཔྤིཙྪཏཱདིསབྷཱཝཱ, ཀིམེཏེསམྤི ཝསེན ཨཡཾ དེསནཱ ཨིཙྪིཏཱཏི ཙོདནཾ སོདྷེཏུཾ ‘‘བྷགཝཱ པནཱ’’ཏིཨཱདི ཝུཏྟཾ. ཨཊྛཔརིཀྑཱརིཀསྶ ཝསེན ཨིམིསྶཱ དེསནཱཡ ཨིཙྪིཏབྷཱཝོ ཀཐཾ ཝིཉྙཱཡཏཱིཏི ཨནུཡོགམྤི ཨཔནེཏི ‘‘སོ ཧཱི’’ཏིཨཱདིནཱ, ཏསྶེཝ ཏཐཱ པཀྐནྟབྷཱཝེན ‘‘ཀཱཡཔརིཧཱརིཀེན ཙཱིཝརེནཱ’’ཏིཨཱདི པཱལི༹ཡཱ ཡོགྱཏོ ཏསྶ ཝསེན ཨིཙྪིཏབྷཱཝོ ཝིཉྙཱཡཏཱིཏི ཝུཏྟཾ ཧོཏི. ཝཙནཱིཡསྶ ཧེཏུབྷཱཝདསྶནེན ཧི ཝཱཙཀསྶཱཔི ཧེཏུབྷཱཝོ དསྶིཏོཏི ¶ . ཨེཝཉྩ ཀཏྭཱ ‘‘ཨིཏི ཨིམསྶཱ’’ཏིཨཱདི ལདྡྷགུཎཝཙནམྤི ཨུཔཔནྣཾ ཧོཏི. སལླཧུཀཱ ཝུཏྟི ཛཱིཝིཀཱ ཡསྶཱཏི སལླཧུཀཝུཏྟི, ཏསྶ བྷཱཝོ སལླཧུཀཝུཏྟིཏཱ, ཏཾ. ཀཱཡཔཱརིཧཱརིཡེནཱཏི བྷཱཝཔྤདྷཱནནིདྡེསོ, བྷཱཝལོཔནིདྡེསོ ཝཱཏི དསྶེཏི ‘‘ཀཱཡཾ པརིཧརཎམཏྟཀེནཱ’’ཏི ཨིམིནཱ, ཀཱཡཔོསནཔྤམཱཎེནཱཏི ཨཏྠོ. ཏཐཱ ཀུཙྪིཔརིཧཱརིཡེནཱཏི ཨེཏྠཱཔི. ཝུཏྟནཡེན ཙེཏྠ དྭིདྷཱ ཝཙནཏྠོ, ཊཱིཀཱཡཾ (དཱི. ནི. ཊཱི. ༡.༢༡༥) པན པཋམསྶ ཝཙནཏྠསྶ ཧེཊྛཱ ཝུཏྟཏྟཱ དུཏིཡོཝ ཨིདྷ ཝུཏྟོཏི དཊྛབྦཾ. མམཱཡནཏཎྷཱཡ ཨཱསངྒོ. པརིགྒཧཏཎྷཱཡ བནྡྷོ. ཛིཡཱམུཏྟོཏི དྷནུཛིཡཱཡ མུཏྟོ. ཡཱུཐཱཏི ཧཏྠིགཎཏོ. ཏིདྷཱ པབྷིནྣམདོ མདཧཏྠཱི. ཝནཔབྦྷཱརནྟི ཝནེ པབྦྷཱརཾ.

ཙཏཱུསུ དིསཱསུ སུཁཝིཧཱརིཏཱཡ སུཁཝིཧཱརཊྛཱནབྷཱུཏཱ, ‘‘ཨེཀཾ དིསཾ ཕརིཏྭཱ’’ཏིཨཱདིནཱ (དཱི. ནི. ༣.༣༠༨; མ. ནི. ༡.༧༧, ༤༥༩, ༥༠༩; ༢.༣༠༩) ཝཱ ནཡེན བྲཧྨཝིཧཱརབྷཱཝནཱཕརཎཊྛཱནབྷཱུཏཱ ཙཏསྶོ དིསཱ ཨེཏསྶཱཏི ཙཏུདྡིསོ, སོ ཨེཝ ཙཱཏུདྡིསོ, ཙཏསྶོ ཝཱ དིསཱ ཙཏུདྡིསཾ, ཝུཏྟནཡེན ཏམསྶཱཏི ཙཱཏུདྡིསོ ཡཐཱ ‘‘སདྡྷོ’’ཏི. ཏཱསྭེཝ དིསཱསུ ཀཏྠཙིཔི སཏྟེ ཝཱ སངྑཱརེ ཝཱ བྷཡེན ན པཊིཧནཏི, སཡཾ ཝཱ ཏེཧི ན པཊིཧཉྙཏེཏི ཨཔྤཊིགྷོ. སནྟུསྶམཱནོཏི སཀེན, སནྟེན ཝཱ, སམམེཝ ཝཱ ཏུསྶནཀོ. ཨིཏརཱིཏརེནཱཏི ཡེན ཀེནཙི པཙྩཡེན, ཨུཙྩཱཝཙེན ཝཱ. པརིཙྩ སཡནྟི པཝཏྟནྟི ཀཱཡཙིཏྟཱནི, ཏཱནི ཝཱ པརིསཡནྟི ཨབྷིབྷཝནྟཱིཏི པརིསྶཡཱ, སཱིཧབྱགྒྷཱདཡོ བཱཧིརཱ, ཀཱམཙྪནྡཱདཡོ ཙ ཨཛ྄ཛྷཏྟིཀཱ ཀཱཡཙིཏྟུཔདྡཝཱ, ཨུཔཡོགཏྠེ ¶ ཙེཏཾ སཱམིཝཙནཾ. སཧིཏཱཏི ཨདྷིཝཱསནཁནྟིཡཱ, ཝཱིརིཡཱདིདྷམྨེཧི ཙ ཡཐཱརཧཾ ཁནྟཱ, གཧནྟཱ ཙཱཏི ཨཏྠོ. ཐདྡྷབྷཱཝཀརབྷཡཱབྷཱཝེན ཨཚམྦྷཱི. ཨེཀོ ཙརེཏི ཨསཧཱཡོ ཨེཀཱཀཱི ཧུཏྭཱ ཙརིཏུཾ ཝིཧརིཏུཾ སཀྐུཎེཡྻ. སམཏྠནེ ཧི ཨེཡྻ-སདྡོ ཡཐཱ ‘‘ཀོ ཨིམཾ ཝིཛཊཡེ ཛཊ’’ནྟི (སཾ. ནི. ༡.༢༣) ཁགྒཝིསཱཎཀཔྤཏཱཡ ཨེཀཝིཧཱརཱིཏི དསྶེཏི ‘‘ཁགྒཝིསཱཎཀཔྤོ’’ཏི ཨིམིནཱ. སཎྛཱནེན ཁགྒསདིསཾ ཨེཀམེཝ མཏྠཀེ ཨུཊྛིཏཾ ཝིསཱཎཾ ཡསྶཱཏི ཁགྒོ; ཁགྒསདྡེན ཏཾསདིསཝིསཱཎསྶ གཧིཏཏྟཱ, མཧིཾསཔྤམཱཎོ མིགཝིསེསོ, ཡོ ལོཀེ ‘‘པལཱསཱདོ, གཎྛཀོ’’ཏི ཙ ཝུཙྩཏི, ཏསྶ ཝིསཱཎེན ཨེཀཱིབྷཱཝེན སདིསོཏི ཨཏྠོ. ཨཔིཙ ཨེཀཝིཧཱརིཏཱཡ ཁགྒཝིསཱཎཀཔྤོཏི དསྶེཏུམྤི ཨེཝཾ ཝུཏྟཾ. ཝིཏྠཱརོ པནསྶཱ ཨཏྠོ ཁགྒཝིསཱཎསུཏྟཝཎྞནཱཡཾ, (སུ. ནི. ཨཊྛ. ༡.༤༢) ཙཱུལ༹ནིདྡེསེ (ཙཱུལ༹ནི. ༡༢༨) ཙ ཝུཏྟནཡེན ཝེདིཏབྦོ.

ཨེཝཾ ཝཎྞིཏནྟི ཁགྒཝིསཱཎསུཏྟེ བྷགཝཏཱ ཏཐཱ དེསནཱཡ ཝིཝརིཏཾ, ཐོམིཏཾ ཝཱ. ཁགྒསྶ ¶ ནཱམ མིགསྶ ཝིསཱཎེན ཀཔྤོ སདིསོ ཏཐཱ. ཀཔྤ-སདྡོ ཧེཏྠ ‘‘སཏྠུཀཔྤེན ཝཏ བྷོ ཀིར སཱཝཀེན སདྡྷིཾ མནྟཡམཱནཱ’’ཏིཨཱདཱིསུ (མ. ནི. ༡.༢༦༠) ཝིཡ པཊིབྷཱགེ ཝཏྟཏི, ཏསྶ བྷཱཝོ ཁགྒཝིསཱཎཀཔྤཏཱ, ཏཾ སོ ཨཱཔཛྫཏཱིཏི སམྦནྡྷོ.

ཝཱཏཱབྷིགྷཱཏཱདཱིཧི སིཡཱ སཀུཎོ ཚིནྣཔཀྑོ, ཨསཉྫཱཏཔཀྑོ ཝཱ, ཨིདྷ པན ཌེཏུཾ སམཏྠོ སཔཀྑིཀོཝ ཨདྷིཔྤེཏོཏི ཝིསེསདསྶནཏྠཾ པཱལི༹ཡཾ ‘‘པཀྑཱི སཀུཎོ’’ཏི ཝུཏྟཾ, ན ཏུ ‘‘ཨཱཀཱསེ ཨནྟལིཀྑེ ཙངྐམཏཱི’’ཏིཨཱདཱིསུ (པཊི. མ. ༣.༡༡) ཝིཡ པརིཡཱཡམཏྟདསྶནཏྠནྟི ཨཱཧ ‘‘པཀྑཡུཏྟོ སཀུཎོ’’ཏི. ཨུཔྤཏཏཱིཏི ཨུདྡྷཾ པཏཏི གཙྪཏི, པཀྑནྡཏཱིཏི ཨཏྠོ. ཝིདྷུནནྟཱཏི ཝིབྷིནྡནྟཱ, ཝིཙཱལེནྟཱ ཝཱ. ཨཛྫཏནཱཡཱཏི ཨཛྫབྷཱཝཏྠཱཡ. ཏཐཱ སྭཱཏནཱཡཱཏི ཨེཏྠཱཔི. ཨཏྟནོ པཏྟཾ ཨེཝ བྷཱརོ ཡསྶཱཏི སཔཏྟབྷཱརོ. མམཱཡནཏཎྷཱབྷཱཝེན ནིསྶངྒོ. པརིགྒཧཏཎྷཱབྷཱཝེན ནིརཔེཀྑོ. ཡེན ཀཱམནྟི ཡཏྠ ཨཏྟནོ རུཙི, ཏཏྠ. བྷཱཝནཔུཾསཀཾ ཝཱ ཨེཏཾ. ཡེན ཡཐཱ པཝཏྟོ ཀཱམོཏི ཧི ཡེནཀཱམོ, ཏཾ, ཡཐཱཀཱམནྟི ཨཏྠོ.

ནཱིཝརཎཔྤཧཱནཀཐཱཝཎྞནཱ

༢༡༦. པུབྦེ ¶ ཝུཏྟསྶེཝ ཨཏྠཙཏུཀྐསྶ པུན སམྤིཎྜེཏྭཱ ཀཐནཾ ཀིམཏྠནྟི ཨདྷིཔྤཱཡེན ཨནུཡོགཾ ཨུདྡྷརིཏྭཱ སོདྷེཏི ‘‘སོ…པེ… ཀིཾ དསྶེཏཱི’’ཏིཨཱདིནཱ. པཙྩཡསམྤཏྟིནྟི སམྦྷཱརཔཱརིཔཱུརིཾ. ཨིམེ ཙཏྟཱརོཏི སཱིལསཾཝརོ ཨིནྡྲིཡསཾཝརོ སམྤཛཉྙཾ སནྟོསོཏི པུབྦེ ཝུཏྟཱ ཙཏྟཱརོ ཨཱརཉྙིཀསྶ སམྦྷཱརཱ. ན ཨིཛ྄ཛྷཏཱིཏི ན སམྤཛྫཏི ན སཕལོ བྷཝཏི. ན ཀེཝལཾ ཨནིཛ྄ཛྷནམཏྟཾ, ཨཐ ཁོ ཨཡམྤི དོསོཏི དསྶེཏི ‘‘ཏིརཙྪཱནགཏེཧི ཝཱ’’ཏིཨཱདིནཱ. ཝཏྟབྦཏཾ ཨཱཔཛྫཏཱིཏི ‘‘ཨསུཀསྶ བྷིཀྑུནོ ཨརཉྙེ ཏིརཙྪཱནགཏཱནཾ ཝིཡ, ཝནཙརཀཱནཾ ཝིཡ ཙ ནིཝཱསནམཏྟམེཝ, ན པན ཨརཉྙཝཱསཱནུཙྪཝིཀཱ ཀཱཙི སམྨཱཔཊིཔཏྟི ཨཏྠཱི’’ཏི ཨཔཝཱདཝསེན ཝཙནཱིཡབྷཱཝམཱཔཛྫཏི, ཨིམསྶཏྠསྶ པན དསྶནེན ཝིརུཛ྄ཛྷནཏོ སདྡྷིཾ-སདྡོ ན པོརཱཎོཏི དཊྛབྦཾ. ཨཐ ཝཱ ཨཱརཉྙཀེཧི ཏིརཙྪཱནགཏེཧི, ཝནཙརཝིསབྷཱགཛནེཧི ཝཱ སདྡྷིཾ ཝིཔྤཊིཔཏྟིཝསེན ཝསནཱིཡབྷཱཝཾ ཨཱཔཛྫཏི. ‘‘ན བྷིཀྑཝེ པཎིདྷཱཡ ཨརཉྙེ ཝཏྠབྦཾ, ཡོ ཝསེཡྻ, ཨཱཔཏྟི དུཀྐཊསྶཱ’’ཏིཨཱདཱིསུ (པཱརཱ. ༢༢༣) ཝིཡ ཧི ཝཏྠབྦ-སདྡོ ཝསིཏབྦཔརིཡཱཡོ. ཏཐཱ ཧི ཝིབྷངྒཊྛཀཐཱཡམྤི ཝུཏྟཾ ‘‘ཨེཝརཱུཔསྶ ཧི ཨརཉྙཝཱསོ ཀཱལ༹མཀྐཊཨཙྪཏརཙྪདཱིཔིམིགཱནཾ ཨཊཝིཝཱསསདིསོ ཧོཏཱི’’ཏི (ཝིབྷ. ཨཊྛ. ༥༢༦) ཨདྷིཝཏྠཱཏི ཨདྷིཝསནྟཱ. པཋམཾ བྷེརཝསདྡཾ སཱཝེནྟི. ཏཱཝཏཱ ཨཔལཱཡནྟསྶ ཧཏྠེཧིཔི སཱིསཾ པཧརིཏྭཱ ¶ པལཱཔནཱཀཱརཾ ཀརོནྟཱིཏི ཨཱཙརིཡསཱརིཔུཏྟཏྠེརེན ཀཐིཏཾ. ཨེཝཾ བྱཏིརེཀཏོ པཙྩཡསམྤཏྟིཡཱ དསྶིཏབྷཱཝཾ པཀཱསེཏྭཱ ཨིདཱནི ཨནྭཡཏོཔི པཀཱསེཏུཾ ‘‘ཡསྶ པནེཏེ’’ཏིཨཱདི ཝུཏྟཾ. ཀཐཾ ཨིཛ྄ཛྷཏཱིཏི ཨཱཧ ‘‘སོ ཧཱི’’ཏིཨཱདི. ཀཱལ༹ཀོ ཏིལཀོཏི ཝཎྞཝིཀཱརཱཔནརོགཝསེན ཨཉྙཏྠ པརིཡཱཡཝཙནཾ. ཝུཏྟཉྷི –

‘‘དུནྣཱམཀཉྩ ཨརིསཾ, ཚདྡིཀོ ཝམཐཱུརིཏོ;

དཝཐུ པརིཏཱཔོཐ, ཏིལཀོ ཏིལཀཱལ༹ཀོ’’ཏི.

ཏིལསཎྛཱནཾ ཝིཡ ཛཱཡཏཱིཏི ཧི ཏིལཀོ, ཀཱལོ༹ ཧུཏྭཱ ཛཱཡཏཱིཏི ཀཱལ༹ཀོ. ཨིདྷ པན པཎྞཏྟིཝཱིཏིཀྐམསངྑཱཏཾ ཐུལླཝཛྫཾ ཀཱལ༹ཀསདིསཏྟཱ ཀཱལ༹ཀཾ, མིཙྪཱཝཱིཏིཀྐམསངྑཱཏཾ ཨཎུམཏྟཝཛྫཾ ཏིལཀསདིསཏྟཱ ཏིལཀནྟི ¶ ཨཡཾ ཝིསེསོ. ཏནྟི ཏཐཱ ཨུཔྤཱདིཏཾ པཱིཏིཾ. ཝིགཏབྷཱཝེན ཨུཔཊྛཱནཏོ ཁཡཝཡཝསེན སམྨསནཾ. ཁཱིཡནཊྛེན ཧི ཁཡོཝ ཝིགཏོ, ཝིཔརཱིཏོ ཝཱ ཧུཏྭཱ ཨཡནཊྛེན ཝཡོཏིཔི ཝུཙྩཏི. ཨརིཡབྷཱུམི ནཱམ ལོཀུཏྟརབྷཱུམི. ཨིཏཱིཏི ཨརིཡབྷཱུམིཨོཀྐམནཏོ, དེཝཏཱནཾ ཝཎྞབྷཎནཏོ ཝཱ, ཏཏྠ ཏཏྠ དེཝཏཱནཾ ཝཙནཾ སུཏྭཱ ཏསྶ ཡསོ པཏྠཊོཏི ཝུཏྟཾ ཧོཏི, ཨེཝཉྩ ཀཏྭཱ ཧེཊྛཱ ཝུཏྟཾ ཨཡསཔཏྠརཎམྤི དེཝཏཱནམཱརོཙནཝསེནཱཏི གཧེཏབྦཾ.

ཝིཝིཏྟ-སདྡོ ཛནཝིཝེཀེཏི ཨཱཧ ‘‘སུཉྙ’’ནྟི. ཏཾ པན ཛནསདྡནིགྒྷོསཱབྷཱཝེན ཝེདིཏབྦཾ སདྡཀཎྚཀཏྟཱ ཛྷཱནསྶཱཏི དསྶེཏུཾ ‘‘ཨཔྤསདྡཾ ཨཔྤནིགྒྷོསནྟི ཨཏྠོ’’ཏི ཝུཏྟཾ. ཛནཀགྒཧཎེནེཝ ཧི ཨིདྷ ཛཉྙཾ གཧིཏཾ. ཏཐཱ ཧི ཝུཏྟཾ ཝིབྷངྒེ ‘‘ཡདེཝ ཏཾ ཨཔྤནིགྒྷོསཾ, ཏདེཝ ཏཾ ཝིཛནཝཱཏ’’ནྟི (ཝིབྷ. ༥༣༣). ཨཔྤསདྡནྟི ཙ པཀཏིསདྡཱབྷཱཝམཱཧ. ཨཔྤནིགྒྷོསནྟི ནགརནིགྒྷོསཱདིསདྡཱབྷཱཝཾ. ཨཱིདིསེསུ ཧི བྱཉྫནཾ སཱཝསེསཾ ཝིཡ, ཨཏྠོ པན ནིརཝསེསོཏི ཨཊྛཀཐཱསུ ཝུཏྟཾ. མཛ྄ཛྷིམཱགམཊྛཀཐཱཝཎྞནཱཡཾ (མ. ནི. ཨཊྛ. ༣.༣༦༤) པན ཨཱཙརིཡདྷམྨཔཱལཏྠེརོ ཨེཝམཱཧ ‘‘ཨཔྤསདྡསྶ པརིཏྟཔརིཡཱཡཾ མནསི ཀཏྭཱ ཝུཏྟཾ ‘བྱཉྫནཾ སཱཝསེསཾ སིཡཱ’ཏི. ཏེནཱཧ ‘ན ཧི ཏསྶཱ’ཏིཨཱདི. ཨཔྤསདྡོ པནེཏྠ ཨབྷཱཝཏྠོཏིཔི སཀྐཱ ཝིཉྙཱཏུཾ ‘ཨཔྤཱབཱདྷཏཉྩ སཉྫཱནཱམཱི’ཏིཨཱདཱིསུ (མ. ནི. ༡.༢༢༥) ཝིཡཱ’’ཏི. ཏམཏྠཾ ཝིབྷངྒཔཱལི༹ཡཱ (ཝིབྷ. ༥༢༨) སཾསནྡནྟོ ‘‘ཨེཏདེཝཱ’’ཏིཨཱདིམཱཧ. ཨེཏདེཝཱཏི ཙ མཡཱ སཾཝཎྞིཡམཱནཾ ནིསྶདྡཏཾ ཨེཝཱཏི ཨཏྠོ. སནྟིཀེཔཱིཏི གཱམཱདཱིནཾ སམཱིཔེཔི ཨེདིསཾ ཝིཝིཏྟཾ ནཱམ, པགེཝ དཱུརེཏི ཨཏྠོ. ཨནཱཀིཎྞནྟི ཨསངྐིཎྞཾ ཨསམྦཱདྷཾ. ཡསྶ སེནཱསནསྶ སམནྟཱ གཱཝུཏམྤི ཨཌྜྷཡོཛནམྤི པབྦཏགཧནཾ ཝནགཧནཾ ནདཱིགཧནཾ ཧོཏི, ན ཀོཙི ཨཝེལཱཡ ཨུཔསངྐམིཏུཾ ¶ སཀྐོཏི, ཨིདཾ སནྟིཀེཔི ཨནཱཀིཎྞཾ ནཱམ. སེཏཱིཏི སཡཏི. ཨཱསཏཱིཏི ནིསཱིདཏི. ‘‘ཨེཏྠཱ’’ཏི ཨིམིནཱ སེན-སདྡསྶ, ཨཱསན-སདྡསྶ ཙ ཨདྷིཀརཎཏྠབྷཱཝཾ དསྶེཏི, ཙ-སདྡེན ཙ ཏདུབྷཡཔདསྶ ཙཏྠསམཱསབྷཱཝཾ. ‘‘ཏེནཱཧཱ’’ཏིཨཱདིནཱ ཝིབྷངྒཔཱལི༹མེཝ ཨཱཧརཏི.

ཨིདཱནི ཏསྶཱཡེཝཏྠཾ སེནཱསནཔྤབྷེདདསྶནཝསེན ཝིབྷཱཝེཏུཾ ‘‘ཨཔིཙཱ’’ཏིཨཱདི ཝུཏྟཾ. ཝིབྷངྒཔཱལི༹ཡཾ ནིདསྶནནཡེན སརཱུཔཏོ དསྶིཏསེནཱསནསྶེཝ ཧི ཨཡཾ ཝིབྷཱགོ. ཏཏྠ ཝིཧཱརོ པཱཀཱརཔརིཙྪིནྣོ སཀལོ ¶ ཨཱཝཱསོ. ཨཌྜྷཡོགོ དཱིགྷཔཱསཱདོ, ‘‘གརུལ༹སཎྛཱནཔཱསཱདོ’’ཏིཔི ཝདནྟི. པཱསཱདོ ཙཏུརསྶཔཱསཱདོ. ཧམྨིཡཾ མུཎྜཙྪདནཔཱསཱདོ. ཨཊྚོ པཊིརཱཛཱུནཾ པཊིབཱཧནཡོགྒོ ཙཏུཔཉྩབྷཱུམཀོ པཏིསྶཡཝིསེསོ. མཱལོ༹ ཨེཀཀཱུཊསངྒཧིཏོ ཨནེཀཀོཎཝནྟོ པཏིསྶཡཝིསེསོ. ཨཔརོ ནཡོ – ཝིཧཱརོ དཱིགྷམུཁཔཱསཱདོ. ཨཌྜྷཡོགོ ཨེཀཔསྶཚདནཀགེཧཾ. ཏསྶ ཀིར ཨེཀཔསྶེ བྷིཏྟི ཨུཙྩཏརཱ ཧོཏི, ཨིཏརཔསྶེ ནཱིཙཱ, ཏེན ཏཾ ཨེཀཚདནཀཾ ཧོཏི. པཱསཱདོ ཨཱཡཏཙཏུརསྶཔཱསཱདོ. ཧམྨིཡཾ མུཎྜཙྪདནཀཾ ཙནྡིཀངྒཎཡུཏྟཾ. གུཧཱ ཀེཝལཱ པབྦཏགུཧཱ. ལེཎཾ དྭཱརབནྡྷཾ པབྦྷཱརཾ. སེསཾ ཝུཏྟནཡམེཝ. ‘‘མཎྜཔོཏི སཱཁཱམཎྜཔོ’’ཏི (དཱི. ནི. ཊཱི. ༡.༢༡༦) ཨེཝཾ ཨཱཙརིཡདྷམྨཔཱལཏྠེརེན, ཨངྒུཏྟརཊཱིཀཱཀཱརེན ཙ ཨཱཙརིཡསཱརིཔུཏྟཏྠེརེན ཝུཏྟཾ.

ཝིབྷངྒཊྛཀཐཱཡཾ (ཝིབྷ. ཨཊྛ. ༥༢༧) པན ཝིཧཱརོཏི སམནྟཱ པརིཧཱརཔཐཾ, ཨནྟོཡེཝ ཙ རཏྟིཊྛཱནདིཝཱཊྛཱནཱནི དསྶེཏྭཱ ཀཏསེནཱསནཾ. ཨཌྜྷཡོགོཏི སུཔཎྞཝངྐགེཧཾ. པཱསཱདོཏི དྭེ ཀཎྞིཀཱནི གཧེཏྭཱ ཀཏོ དཱིགྷཔཱསཱདོ. ཨཊྚོཏི པཊིརཱཛཱདིཔཊིབཱཧནཏྠཾ ཨིཊྛཀཱཧི ཀཏོ བཧལབྷིཏྟིཀོ ཙཏུཔཉྩབྷཱུམཀོ པཏིསྶཡཝིསེསོ. མཱལོ༹ཏི བྷོཛནསཱལཱསདིསོ མཎྜལམཱལོ༹. ཝིནཡཊྛཀཐཱཡཾ པན ‘‘ཨེཀཀཱུཊསངྒཧིཏོ ཙཏུརསྶཔཱསཱདོ’’ཏི (པཱརཱ. ཨཊྛ. ༢.༤༨༢-༤༨༧) ཝུཏྟཾ. ལེཎནྟི པབྦཏཾ ཁཎིཏྭཱ ཝཱ པབྦྷཱརསྶ ཨཔྤཧོནཀཊྛཱནེ ཀུཊྚཾ ཨུཊྛཱཔེཏྭཱ ཝཱ ཀཏསེནཱསནཾ. གུཧཱཏི བྷཱུམིདརི ཝཱ ཡཏྠ རཏྟིནྡིཝཾ དཱིཔཾ ལདྡྷུཾ ཝཊྚཏི, པབྦཏགུཧཱ ཝཱ བྷཱུམིགུཧཱ ཝཱཏི ཝུཏྟཾ.

ཏཾ ཨཱཝསཐབྷཱུཏཾ པཏིསྶཡསེནཱསནཾ ཝིཧརིཏབྦཊྛེན, ཝིཧཱརཊྛཱནཊྛེན ཙ ཝིཧཱརསེནཱསནཾ ནཱམ. མསཱརཀཱདིཙཏུབྦིདྷོ མཉྩོ. ཏཐཱ པཱིཋཾ. ཨུཎྞབྷིསིཨཱདིཔཉྩཝིདྷཱ བྷིསི. སཱིསཔྤམཱཎཾ བིམྦོཧནཾ. ཝིཏྠཱརཏོ ཝིདཏྠིཙཏུརངྒུལཏཱ, དཱིགྷཏོ མཉྩཝིཏྠཱརཔྤམཱཎཏཱ ཙེཏྠ སཱིསཔྤམཱཎཾ. མསཱརཀཱདཱིནི མཉྩཔཱིཋབྷཱཝཏོ, བྷིསིཨུཔདྷཱནཉྩ མཉྩཔཱིཋསམྦནྡྷཏོ མཉྩཔཱིཋསེནཱསནཾ. མཉྩཔཱིཋབྷཱུཏཉྷི སེནཱསནཾ, མཉྩཔཱིཋསམྦནྡྷཉྩ སཱམཉྙནིདྡེསེན, ཨེཀསེསེན ཝཱ ‘‘མཉྩཔཱིཋསེནཱསན’’ནྟི ¶ ཝུཙྩཏི. ཨཱཙརིཡསཱརིཔུཏྟཏྠེརོཔི ཨེཝམེཝ ཝདཏི. ཨཱཙརིཡདྷམྨཔཱལཏྠེརེན པན ‘‘མཉྩཔཱིཋསེནཱསནནྟི མཉྩཔཱིཋཉྩེཝ མཉྩཔཱིཋསམྦནྡྷསེནཱསནཉྩཱ’’ཏི (དཱི. ནི. ཊཱི. ༡.༢༡༦) ཝུཏྟཾ. ཙིམིལིཀཱ ¶ ནཱམ སུདྷཱཔརིཀམྨཀཏཱཡ བྷཱུམིཡཱ ཝཎྞཱནུརཀྑཎཏྠཾ པཊཁཎྜཱདཱིཧི སིབྦེཏྭཱ ཀཏཱ. ཙམྨཁཎྜོ ནཱམ སཱིཧབྱགྒྷདཱིཔིཏརཙྪཙམྨཱདཱིསུཔི ཡཾ ཀིཉྩི ཙམྨཾ. ཨཊྛཀཐཱསུ (པཱཙི. ཨཊྛ. ༡༡༢; ཝི. སངྒ. ཨཊྛ. ༨༢) ཧི སེནཱསནཔརིབྷོགེ པཊིཀྑིཏྟཙམྨཾ ན དིསྶཏི. ཏིཎསནྠཱརོཏི ཡེསཾ ཀེསཉྩི ཏིཎཱནཾ སནྠཱརོ. ཨེསེཝ ནཡོ པཎྞསནྠཱརེཔི. ཙིམིལིཀཱདི བྷཱུམིཡཾ སནྠརིཏབྦཏཱཡ སནྠཏསེནཱསནཾ. ཡཏྠ ཝཱ པན བྷིཀྑཱུ པཊིཀྐམནྟཱིཏི ཋཔེཏྭཱ ཝཱ ཨེཏཱནི མཉྩཱདཱིནི ཡཏྠ བྷིཀྑཱུ སནྣིཔཏནྟི, སབྦམེཏཾ སེནཱསནཾ ནཱམཱཏི ཨེཝཾ ཝུཏྟཾ ཨཝསེསཾ རུཀྑམཱུལཱདིཔཊིཀྐམིཏབྦཊྛཱནཾ ཨབྷིསངྑརཎཱབྷཱཝཏོ ཀེཝལཾ སཡནསྶ, ནིསྶཛྫཱཡ ཙ ཨོཀཱསབྷཱུཏཏྟཱ ཨོཀཱསསེནཱསནཾ. སེནཱསནགྒཧཎེནཱཏི ‘‘ཝིཝིཏྟཾ སེནཱསན’’ནྟི ཨིམིནཱ སེནཱསནསདྡེན ཝིཝིཏྟསེནཱསནསྶ ཝཱ ཨཱདཱནེན, ཝཙནེན ཝཱ གཧིཏམེཝ སཱམཉྙཛོཏནཱཡ ཝིསེསེ ཨཝཊྛཱནཏོ, ཝིསེསཏྠིནཱ ཙ ཝིསེསསྶ པཡུཛྫིཏབྦཏོ.

ཡདེཝཾ ཀསྨཱ ‘‘ཨརཉྙ’’ནྟིཨཱདི པུན ཝུཏྟནྟི ཨནུཡོགེན ‘‘ཨིདྷ པནསྶཱ’’ཏིཨཱདིམཱཧ. ཨེཝཾ གཧིཏེསུཔི སེནཱསནེསུ ཡཐཱཝུཏྟསྶ བྷིཀྑུནོ ཨནུཙྪཝིཀམེཝ སེནཱསནཾ དསྶེཏུཀཱམཏྟཱ པུན ཨེཝཾ ཝུཏྟནྟི ཨདྷིཔྤཱཡོ. ‘‘བྷིཀྑུནཱིནཾ ཝསེན ཨཱགཏ’’ནྟི ཨིདཾ ཝིནཡེ ཨཱགཏམེཝ སནྡྷཱཡ ཝུཏྟཾ, ན ཨབྷིདྷམྨེ. ཝིནཡེ ཧི གཎམྷཱཨོཧཱིཡནསིཀྑཱཔདེ (པཱཙི. ༦༩༡) བྷིཀྑུནཱིནཾ ཨཱརཉྙཀདྷུཏངྒསྶ པཊིཀྑིཏྟཏྟཱ ཨིདམྤི ཙ ཏཱསཾ ཨརཉྙཾ ནཱམ, ན པན པཉྩདྷནུསཏིཀཾ པཙྪིམཾ ཨརཉྙམེཝ སེནཱསནཾ, ཨིདམྤི ཙ ཏཱསཾ གཎམྷཱཨོཧཱིཡནཱཔཏྟིཀརཾ, ན ཏུ པཉྩདྷནུསཏིཀཱདིམེཝ ཨརཉྙཾ. ཝུཏྟཉྷི ཏཏྠ –

‘‘ཨེཀཱ ཝཱ གཎམྷཱ ཨོཧཱིཡེཡྻཱཏི ཨགཱམཀེ ཨརཉྙེ དུཏིཡིཀཱཡ བྷིཀྑུནིཡཱ དསྶནཱུཔཙཱརཾ ཝཱ སཝནཱུཔཙཱརཾ ཝཱ ཝིཛཧནྟིཡཱ ཨཱཔཏྟི ཐུལླཙྩཡསྶ, ཝིཛཧིཏེ ཨཱཔཏྟི སངྒྷཱདིསེསསྶཱ’’ཏི.

ཝིནཡཊྛཀཐཱསུཔི (པཱཙི. ཨཊྛ. ༦༩༢) ཧི ཏཐཱཝ ཨཏྠོ ཝུཏྟོཏི. ཨབྷིདྷམྨེ པན ‘‘ཨརཉྙནྟི ནིཀྑམིཏྭཱ བཧི ཨིནྡཁཱིལཱ སབྦམེཏཾ ཨརཉྙ’’ནྟི (ཝིབྷ. ༥༢༩) ཨཱགཏཾ. ཝིནཡསུཏྟནྟཱ ཧི ཨུབྷོཔི པརིཡཱཡདེསནཱ ནཱམ, ཨབྷིདྷམྨོ པན ནིཔྤརིཡཱཡདེསནཱ, ཏསྨཱ ཡཾ ན གཱམཔདེསནྟོགདྷཾ, ཏཾ ཨརཉྙནྟི ནིཔྤརིཡཱཡེན དསྶེཏུཾ ཏཐཱ ཝུཏྟཾ. ཨིནྡཁཱིལཱ བཧི ནིཀྑམིཏྭཱ ¶ ཡཾ ཋཱནཾ པཝཏྟཾ ¶ , སབྦམེཏཾ ཨརཉྙཾ ནཱམཱཏི ཙེཏྠ ཨཏྠོ. ཨཱརཉྙཀཾ ནཱམ…པེ… པཙྪིམནྟི ཨིདཾ པན སུཏྟནྟནཡེན ཨཱརཉྙཀསིཀྑཱཔདེ (པཱརཱ. ༦༥༢) ཨཱརཉྙིཀཾ བྷིཀྑུཾ སནྡྷཱཡ ཝུཏྟཾ ཨིམསྶ བྷིཀྑུནོ ཨནུརཱུཔཾ, ཏསྨཱ ཝིསུདྡྷིམགྒེ དྷུཏངྒནིདྡེསེ (ཝིསུདྡྷི. ༡.༡༩) ཡཾ ཏསྶ ལཀྑཎཾ ཝུཏྟཾ, ཏཾ ཡུཏྟམེཝ, ཨཏོ ཏཏྠ ཝུཏྟནཡེན གཧེཏབྦནྟི ཨདྷིཔྤཱཡོ.

སནྡཙྪཱཡནྟི སཱིཏཙྪཱཡཾ. ཏེནཱཧ ‘‘ཏཏྠ ཧཱི’’ཏིཨཱདི. རུཀྑམཱུལནྟི རུཀྑསམཱིཔཾ. ཝུཏྟཉྷེཏཾ ‘‘ཡཱཝཏཱ མཛ྄ཛྷནྷིཀེ ཀཱལེ སམནྟཱ ཚཱཡཱ ཕརཏི, ནིཝཱཏེ པཎྞཱནི ནིཔཏནྟི, ཨེཏྟཱཝཏཱ རུཀྑམཱུལ’’ནྟི. པབྦཏནྟི སུདྡྷཔཱསཱཎསུདྡྷཔཾསུཨུབྷཡམིསྶཀཝསེན ཏིཝིདྷོཔི པབྦཏོ ཨདྷིཔྤེཏོ, ན སིལཱམཡོ ཨེཝ. སེལ-སདྡོ པན ཨཝིསེསཏོ པབྦཏཔརིཡཱཡོཏི ཀཏྭཱ ཨེཝཾ ཝུཏྟཾ. ‘‘ཏཏྠ ཧཱི’’ཏིཨཱདིནཱ ཏདུབྷཡསྶ ཨནུརཱུཔཏཾ དསྶེཏི. དིསཱསུ ཁཱཡམཱནཱསཱུཏི དསསུ དིསཱསུ ཨབྷིམུཁཱིབྷཱཝེན དིསྶམཱནཱསུ. ཏཐཱརཱུཔེནཔི ཀཱརཎེན སིཡཱ ཙིཏྟསྶ ཨེཀགྒཏཱཏི ཨེཏཾ ཝུཏྟཾ, སབྦདིསཱཧི ཨཱགཏེན ཝཱཏེན བཱིཛིཡམཱནབྷཱཝཧེཏུདསྶནཏྠནྟི ཀེཙི. ཀཾ ཝུཙྩཏི ཨུདཀཾ པིཔཱསཝིནོདནསྶ ཀཱརཀཏྟཱ. ‘‘ཡཾ ནདཱིཏུམྦནྟིཔི ནདཱིཀུཉྫནྟིཔི ཝདནྟི, ཏཾ ཀནྡརནྟི ཨཔབྦཏཔདེསེཔི ཝིདུགྒནདཱིནིཝཏྟནཔདེསཾ ཀནྡརནྟི དསྶེཏཱི’’ཏི (ཝིབྷ. མཱུལཊཱི. ༥༣༠) ཨཱཙརིཡཱནནྡཏྠེརོ, ཏེནེཝ ཝིཉྙཱཡཏི ‘‘ནདཱིཏུམྦནདཱིཀུཉྫསདྡཱ ནདཱིནིཝཏྟནཔདེསཝཱཙཀཱ’’ཏི. ནདཱིནིཝཏྟནཔདེསོ ཙ ནཱམ ནདིཡཱ ནིཀྑམནཨུདཀེན པུན ནིཝཏྟིཏྭཱ གཏོ ཝིདུགྒཔདེསོ. ‘‘ཨཔབྦཏཔདེསེཔཱི’’ཏི ཝདནྟོ པན ཨཊྛཀཐཱཡཾ ནིདསྶནམཏྟེན པཋམཾ པབྦཏཔདེསནྟི ཝུཏྟཾ, ཡཐཱཝུཏྟོ པན ནདཱིཔདེསོཔི ཀནྡརོ ཨེཝཱཏི དསྶེཏི.

‘‘ཏཏྠ ཧཱི’’ཏིཨཱདིནཱཔི ནིདསྶནམཏྟེནེཝ ཏསྶཱནུརཱུཔབྷཱཝམཱཧ. ཨུསྶཱཔེཏྭཱཏི པུཉྫཾ ཀཏྭཱ. ‘‘དྭིནྣཾ པབྦཏཱནམྤི ཨཱསནྣཏརེ ཋིཏཱནཾ ཨོཝརཀཱདིསདིསཾ ཝིཝརཾ ཧོཏི, ཨེཀསྨིཾཡེཝ པན པབྦཏེ ཨུམངྒསདིས’’ནྟི ཝདནྟི ཨཱཙརིཡཱ. ཨེཀསྨིཾཡེཝ ཧི ཨུམངྒསདིསཾ ཨནྟོལེཎཾ ཧོཏི ཨུཔརི པཊིཙྪནྣཏྟཱ, ན དྭཱིསུ ཏཐཱ ཨཔྤཊིཙྪནྣཏྟཱ, ཏསྨཱ ‘‘ཨུམངྒསདིས’’ནྟི ཨིདཾ ‘‘ཨེཀསྨིཾ ཡེཝཱ’’ཏི ཨིམིནཱ སམྦནྡྷནཱིཡཾ. ‘‘མཧཱཝིཝར’’ནྟི ཨིདཾ པན ཨུབྷཡེཧིཔི. ཨུམངྒསདིསནྟི ཙ ‘‘སུདུངྒཱསདིས’’ནྟི (དཱི. ནི. ཊཱི. ༡.༢༡༦) ཨཱཙརིཡེན ཝུཏྟཾ. སུདུངྒཱཏི ཧི བྷཱུམིགྷརསྶེཏཾ ¶ ཨདྷིཝཙནཾ, ‘‘ཏཾ གཧེཏྭཱ སུདུངྒཱཡ རཝནྟཾ ཡཀྑིནཱི ཁིཔཱི’’ཏིཨཱདཱིསུ ཝིཡ. མནུསྶཱནཾ ཨནུཔཙཱརཊྛཱནནྟི པཀཏིསཉྩཱརཝསེན མནུསྶེཧི ན སཉྩརིཏབྦཊྛཱནཾ. ཀསྶནཝཔྤནཱདིཝསེན ཧི པཀཏིསཉྩཱརཔཊིཀྑེཔོ ཨིདྷཱདྷིཔྤེཏོ. ཏེནཱཧ ‘‘ཡཏྠ ¶ ན ཀསནྟི ན ཝཔནྟཱི’’ཏི. ཨཱདིསདྡེན པན ‘‘ཝནཔཏྠནྟི ཝནསཎྛཱནམེཏཾ སེནཱསནཱནཾ ཨདྷིཝཙནཾ, ཝནཔཏྠནྟི བྷཱིསནཀཱནམེཏཾ, ཝནཔཏྠནྟི སལོམཧཾསཱནམེཏཾ, ཝནཔཏྠནྟི པརིཡནྟཱནམེཏཾ, ཝནཔཏྠནྟི ན མནུསྶཱུཔཙཱརཱནམེཏཾ སེནཱསནཱནཾ ཨདྷིཝཙན’’ནྟི (ཝིབྷ. ༥༣༡) ཨིམཾ ཝིབྷངྒཔཱལི༹སེསཾ སངྒཎྷཱཏི. པཏྠོཏི ཧི པབྦཏསྶ སམཱནབྷཱུམི, ཡོ ‘‘སཱནཱུ’’ཏིཔི ཝུཙྩཏི, ཏསྶདིསཏྟཱ པན མནུསྶཱནམསཉྩརཎབྷཱུཏཾ ཝནཾ, ཏསྨཱ པཏྠསདིསཾ ཝནཾ ཝནཔཏྠོཏི ཝིསེསནཔརནིཔཱཏོ དཊྛབྦོ. སབྦེསཾ སབྦཱསུ དིསཱསུ ཨབྷིམུཁོ ཨོཀཱསོ ཨབྦྷོཀཱསོཏི ཨཱཧ ‘‘ཨཙྪནྣ’’ནྟི, ཀེནཙི ཚདནེན ཨནྟམསོ རུཀྑསཱཁཱཡཔི ན ཚཱདིཏནྟི ཨཏྠོ. དཎྜཀཱནཾ ཨུཔརི ཙཱིཝརཾ ཚཱདེཏྭཱ ཀཏཱ ཙཱིཝརཀུཊི. ནིཀྐཌྜྷིཏྭཱཏི ནཱིཧརིཏྭཱ. ཨནྟོཔབྦྷཱརལེཎསདིསོ པལཱལརཱསིཡེཝ ཨདྷིཔྤེཏོ, ཨིཏརཐཱ ཏིཎཔཎྞསནྠཱརསངྒོཔི སིཡཱཏི ཝུཏྟཾ ‘‘པབྦྷཱརལེཎསདིསེ ཨཱལཡེ’’ཏི, པབྦྷཱརསདིསེ, ལེཎསདིསེ ཝཱཏི ཨཏྠོ. གཙྪགུམྦཱདཱིནམྤཱིཏི པི-སདྡེན པུརིམནཡཾ སམྤིཎྜེཏི.

པིཎྜཔཱཏསྶ པརིཡེསནཾ པིཎྜཔཱཏོ ཨུཏྟརཔདལོཔེན, ཏཏོ པཊིཀྐནྟོ པིཎྜཔཱཏཔཊིཀྐནྟོཏི ཨཱཧ ‘‘པིཎྜཔཱཏཔརིཡེསནཏོ པཊིཀྐནྟོ’’ཏི. པལླངྐནྟི ཨེཏྠ པརི-སདྡོ ‘‘སམནྟཏོ’’ཏི ཨེཏསྨིཾ ཨཏྠེ, ཏསྨཱ པརིསམནྟཏོ ཨངྐནཾ ཨཱསནཾ པལླངྐོ ར-ཀཱརསྶ ལ-ཀཱརཾ, དྭིབྷཱཝཉྩ ཀཏྭཱ ཡཐཱ ‘‘པལིབུདྡྷོ’’ཏི, (མི. པ. ༦.༣.༦) སམནྟབྷཱཝོ ཙ ཝཱམོརུཾ, དཀྑིཎོརུཉྩ སམཾ ཋཔེཏྭཱ ཨུབྷིནྣཾ པཱདཱནཾ ཨཉྙམཉྙསམྦནྡྷནཀརཎཾ. ཏེནཱཧ ‘‘སམནྟཏོ ཨཱུརུབདྡྷཱསན’’ནྟི. ཨཱུརཱུནཾ བནྡྷནཝསེན ནིསཛྫཱཝ ཨིདྷ པལླངྐོ, ན ཨཱཧརིམེཧི ཝཱལེ༹ཧི ཀཏོཏི ཝུཏྟཾ ཧོཏི. ཨཱབྷུཛིཏྭཱཏི ཙ ཡཐཱ པལླངྐཝསེན ནིསཛྫཱ ཧོཏི, ཏཐཱ ཨུབྷོ པཱདེ ཨཱབྷུགྒེ སམིཉྫིཏེ ཀཏྭཱ, ཏཾ པན ཨུབྷིནྣཾ པཱདཱནཾ ཏཐཱབནྡྷཏཱཀརཎམེཝཱཏི ཨཱཧ ‘‘བནྡྷིཏྭཱ’’ཏི. ཨུཛུཾ ཀཱཡནྟི ཨེཏྠ ཀཱཡ-སདྡོ ཨུཔརིམཀཱཡཝིསཡོ ཧེཊྛིམཀཱཡསྶ ཨནུཛུཀཾ ཋཔནསྶ ནིསཛྫཱཝཙནེནེཝ ཝིཉྙཱཔིཏཏྟཱཏི ཝུཏྟཾ ‘‘ཨུཔརིམཾ སརཱིརཾ ཨུཛུཾ ཋཔེཏྭཱ’’ཏི. ཏཾ པན ཨུཔརིམཀཱཡསྶ ¶ ཨུཛུཀཾ ཋཔནཾ སརཱུཔཏོ དསྶེཏི ‘‘ཨཊྛཱརསཱ’’ཏིཨཱདིནཱ, ཨཊྛཱརསནྣཾ པིཊྛིཀཎྚཀཊྛིཀཱནཾ ཀོཊིཡཱ ཀོཊིཾ པཊིཔཱདནམེཝ ཏཐཱ ཋཔནནྟི ཨདྷིཔྤཱཡོ.

ཨིདཱནི ཏཐཱ ཋཔནསྶ པཡོཛནཾ དསྶེནྟོ ‘‘ཨེཝཉྷཱི’’ཏིཨཱདིམཱཧ. ཏཏྠ ཨེཝནྟི ཏཐཱ ཋཔནེ སཏི, ཨིམིནཱ ཝཱ ཏཐཱཋཔནཧེཏུནཱ. ན པཎམནྟཱིཏི ན ཨོནམནྟི. ‘‘ཨཐསྶཱ’’ཏིཨཱདི པན པརམྤརཔཡོཛནདསྶནཾ. ཨཐཱཏི ཨེཝཾ ཨནོནམནེ. ཝེདནཱཏི པིཊྛིགིལཱནཱདིཝེདནཱ. ན པརིཔཏཏཱིཏི ན ཝིགཙྪཏི ཝཱིཐིཾ ན ཝིལངྒྷེཏི. ཏཏོ ཨེཝ པུབྦེནཱཔརཾ ཝིསེསཔྤཏྟིཡཱ ཀམྨཊྛཱནཾ ཝུདྡྷིཾ ཕཱཏིཾ ཝེཔུལླཾ ཨུཔགཙྪཏི. པརིསདྡོ ཙེཏྠ ཨབྷིསདྡཔརིཡཱཡོ ཨབྷིམུཁཏྠོཏི ཝུཏྟཾ ¶ ‘‘ཀམྨཊྛཱནཱབྷིམུཁ’’ནྟི, བཧིདྡྷཱ པུཐུཏྟཱརམྨཎཏོ ནིཝཱརེཏྭཱ ཀམྨཊྛཱནཾཡེཝ པུརཀྑཏྭཱཏི ཨཏྠོ. པརིསདྡསྶ སམཱིཔཏྠཏཾ དསྶེཏི ‘‘མུཁསམཱིཔེ ཝཱ ཀཏྭཱ’’ཏི ཨིམིནཱ, མུཁསྶ སམཱིཔེ ཝིཡ ཙིཏྟེ ནིབདྡྷཾ ཨུཔཊྛཱཔནཝསེན ཀཏྭཱཏི ཝུཏྟཾ ཧོཏི. པརིསདྡསྶ སམཱིཔཏྠཏཾ ཝིབྷངྒཔཱལི༹ཡཱ (ཝིབྷ. ༥༣༧) སཱདྷེཏུཾ ‘‘ཏེནེཝཱ’’ཏིཨཱདི ཝུཏྟཾ. ནཱསིཀགྒེཏི ནཱསཔུཊགྒེ. མུཁནིམིཏྟཾ ནཱམ ཨུཏྟརོཊྛསྶ ཝེམཛ྄ཛྷཔྤདེསོ, ཡཏྠ ནཱསིཀཝཱཏོ པཊིཧཉྙཏི.

ཨེཏྠ ཙ ཡཐཱ ‘‘ཝིཝིཏྟཾ སེནཱསནཾ བྷཛཏཱི’’ཏིཨཱདིནཱ (ཝིབྷ. ༥༠༨) བྷཱཝནཱནུརཱུཔཾ སེནཱསནཾ དསྶིཏཾ, ཨེཝཾ ‘‘ནིསཱིདཏཱི’’ཏི ཨིམིནཱ ཨལཱིནཱནུདྡྷཙྩཔཀྑིཀོ སནྟོ ཨིརིཡཱཔཐོ དསྶིཏོ, ‘‘པལླངྐཾ ཨཱབྷུཛིཏྭཱ’’ཏི ཨིམིནཱ ནིསཛྫཱཡ དལ༹ྷབྷཱཝོ, ‘‘པརིམུཁཾ སཏིཾ ཨུཔཊྛཔེཏྭཱ’’ཏི ཨིམིནཱ ཨཱརམྨཎཔརིགྒཧཎཱུཔཱཡོཏི. པརི-སདྡོ པརིགྒཧཊྛོ ‘‘པརིཎཱཡིཀཱ’’ཏིཨཱདཱིསུ (དྷ. ས. ༡༦) ཝིཡ. མུཁ-སདྡོ ནིཡྻཱནཊྛོ ‘‘སུཉྙཏཝིམོཀྑམུཁ’’ནྟིཨཱདཱིསུ ཝིཡ. པཊིཔཀྑཏོ ནིཀྑམནམེཝ ཧི ནིཡྻཱནཾ. ཨསམྨོསནབྷཱཝོ ཨུཔཊྛཱནཊྛོ. ཏཏྲཱཏི པཊིསམྦྷིདཱནཡེ. པརིགྒཧིཏནིཡྻཱནནྟི སབྦཐཱ གཧིཏཱསམྨོསཏཱཡ པརིགྒཧིཏཾ, པརིཙྩཏྟསམྨོསཔཊིཔཀྑཏཱཡ ཙ ནིཡྻཱནཾ སཏིཾ ཀཏྭཱ, པརམཾ སཏིནེཔཀྐཾ ཨུཔཊྛཔེཏྭཱཏི ཝུཏྟཾ ཧོཏི. ཨཡཾ ཨཱཙརིཡདྷམྨཔཱལཏྠེརསྶ, ཨཱཙརིཡསཱརིཔུཏྟཏྠེརསྶ ཙ མཏི. ཨཐ ཝཱ ‘‘ཀཱཡཱདཱིསུ སུཊྛུཔཝཏྟིཡཱ པརིགྒཧིཏཾ, ཏཏོ ཨེཝ ཙ ནིཡྻཱནབྷཱཝཡུཏྟཾ, ཀཱཡཱདིཔརིགྒཧཎཉཱཎསམྤཡུཏྟཏཱཡ ཝཱ པརིགྒཧིཏཾ, ཏཏོཡེཝ ཙ ནིཡྻཱནབྷཱུཏཾ ¶ ཨུཔཊྛཱནཾ ཀཏྭཱཏི ཨཏྠོ’’ཏི ཨཡཾ ཨཱཙརིཡཱནནྡཏྠེརསྶ (ཝིབྷ. མཱུལཊཱི. ༥༣༧) མཏི.

༢༡༧. ཨབྷིཛ྄ཛྷཱཡཏི གིཛ྄ཛྷཏི ཨབྷིཀངྑཏི ཨེཏཱཡཱཏི ཨབྷིཛ྄ཛྷཱ, ཀཱམཙྪནྡནཱིཝརཎཾ. ལུཙྩནཊྛེནཱཏི བྷིཛྫནཊྛེན, ཁཎེ ཁཎེ བྷིཛྫནཊྛེནཱཏི ཨཏྠོཏི ཨཱཙརིཡདྷམྨཔཱལཏྠེརེན, (དཱི. ནི. ཊཱི. ༡.༢༡༧) ཨངྒུཏྟརཊཱིཀཱཀཱརེན ཙ ཨཱཙརིཡསཱརིཔུཏྟཏྠེརེན ཝུཏྟཾ. སུཏྟེསུ ཙ དིསྶཏི ‘‘ལུཙྩཏཱིཏི ཁོ བྷིཀྑུ ལོཀོཏི ཝུཙྩཏི. ཀིཉྩ ལུཙྩཏི? ཙཀྑུ ཁོ བྷིཀྑུ ལུཙྩཏི, རཱུཔཱ ལུཙྩནྟི, ཙཀྑུཝིཉྙཱཎཾ ལུཙྩཏཱི’’ཏིཨཱདི. (སཾ. ནི. ༤.༨༢) ཨབྷིདྷམྨཊྛཀཐཱཡཾ, (དྷ. ས. ཨཊྛ. ༧-༡༣) པན ཨིདྷ ཙ ཨདྷུནཱ པོཏྠཀེ ‘‘ལུཙྩནཔལུཙྩནཊྛེནཱ’’ཏི ལིཁིཏཾ. ཏཏྠ ལུཙྩནམེཝ པལུཙྩནཔརིཡཱཡེན ཝིསེསེཏྭཱ ཝུཏྟཾ. ལུཙསདྡོ ཧི ཨཔེཀྑནཱདིཨཏྠོཔི བྷཝཏི ‘‘ཨོལོཀེཏཱི’’ཏིཨཱདཱིསུ, བྷིཛྫནཔབྷིཛྫནཊྛེནཱཏི ཨཏྠོ. ཝཾསཏྠཔཀཱསིནིཡཾ པན ཝུཏྟཾ ‘‘ཁཎབྷངྒཝསེན ལུཙྩནསབྷཱཝཏོ, ཙུཏིབྷངྒཝསེན ཙ པལུཙྩནསབྷཱཝཏོ ལོཀོ ནཱམཱ’’ཏི (ཝཾསཏྠཔཀཱསིནིཡཾ ནཱམ མཧཱཝཾསཊཱིཀཱཡཾ པཋམཔརིཙྪེདེ པཉྩམགཱཐཱ ཝཎྞནཱཡཾ) ཀེཙི པན ‘‘བྷིཛྫནཨུཔྤཛྫནཊྛེནཱ’’ཏི ཨཏྠཾ ཝདནྟི. ཨཱཧཙྩབྷཱསིཏཝཙནཏྠེན ཝིརུཛ྄ཛྷནཏོ, ལུཙསདྡསྶ ཙ ¶ ཨནུཔྤཱདཝཱཙཀཏྟཱ ཨཡུཏྟམེཝེཏཾ. ཨཔིཙ ཨཱཙརིཡེཧིཔི ‘‘ལུཙྩནཔལུཙྩནཊྛེནཱ’’ཏི པཱཋམེཝ ཨུལླིངྒེཏྭཱ ཏཐཱ ཨཏྠོ ཝུཏྟོ སིཡཱ, པཙྪཱ པན པརམྤརཱབྷཏཝསེན པམཱདལེཁཏྟཱ ཏཏྠ ཏཏྠ ན དིཊྛོཏི དཊྛབྦཾ, ན ལུཙྩཏི ན པལུཙྩཏཱིཏི ཡོ གཧིཏོཔི ཏཐཱ ན ཧོཏི, སྭེཝ ལོཀོ, ཨནིཙྩཱནུཔསྶནཱཡ ཝཱ ལུཙྩཏི བྷིཛྫཏི ཝིནསྶཏཱིཏི གཧེཏབྦོཝ ལོཀོཏི ཏཾགཧཎརཧིཏཱནཾ ལོཀུཏྟརཱནཾ ནཏྠི ལོཀཏཱ, དུཀྑསཙྩཾ ཝཱ ལོཀོཏི ཝུཏྟཾ ‘‘པཉྩུཔཱདཱནཀྑནྡྷཱ ལོཀོ’’ཏི. ཨེཝཾ ཏཏྠ ཏཏྠ ཝཙནཏོཔི ཡཐཱཝུཏྟོ ཀེསཉྩི ཨཏྠོ ན ཡུཏྟོཏི.

ཏསྨཱཏི པཉྩུཔཱདཱནཀྑནྡྷཱནམེཝ ལོཀབྷཱཝཏོ. ཝིཀྑམྦྷནཝསེནཱཏི ཨེཏྠ ཝིཀྑམྦྷནཾ ཏདངྒཔྤཧཱནཝསེནེཝ ཨནུཔྤཱདནཾ ཨཔྤཝཏྟནཾ, ན པན ཝིཀྑམྦྷནཔྤཧཱནཝསེན པཊིཔཀྑཱནཾ སུཊྛུཔཧཱིནཾ. ‘‘པཧཱིནཏྟཱ’’ཏི ཧི ཏཐཱཔཧཱིནསདིསཏཾ ཨེཝ སནྡྷཱཡ ཝུཏྟཾ. ཀསྨཱཏི ཙེ? ཛྷཱནསྶ ཨནདྷིགཏཏྟཱ. ཨེཝཾ པན པུབྦབྷཱགབྷཱཝནཱཡ ཏཐཱ པཧཱནཏོཡེཝེཏཾ ཙིཏྟཾ ཝིགཏཱབྷིཛ྄ཛྷཾ ནཱམ, ན ¶ ཏུ ཙཀྑུཝིཉྙཱཎམིཝ སབྷཱཝཏོ ཨབྷིཛ྄ཛྷཱཝིརཧིཏཏྟཱཏི དསྶེཏུཾ ‘‘ན ཙཀྑུཝིཉྙཱཎསདིསེནཱ’’ཏི ཝུཏྟཾ. ཡཐཱ ཏནྟི ཨེཏྠ ཏནྟི ནིཔཱཏམཏྟཾ, ཏཾ ཙིཏྟཾ ཝཱ. ཨདྷུནཱ མུཉྩནསྶ, ཨནཱགཏེ ཙ པུན ཨནཱདཱནསྶ ཀརཎཾ པརིསོདྷནཾ ནཱམཱཏི ཝུཏྟཾ ཧོཏི. ཡཐཱ ཙ ཨིམསྶ ཙིཏྟསྶ པུབྦབྷཱགབྷཱཝནཱཡ པརིསོདྷིཏཏྟཱ ཝིགཏཱབྷིཛ྄ཛྷཏཱ, ཨེཝཾ ཨབྱཱཔནྣཏཱ, ཝིགཏཐིནམིདྡྷཏཱ, ཨནུདྡྷཏཏཱ, ནིབྦིཙིཀིཙྪཏཱ ཙ ཝེདིཏབྦཱཏི ནིདསྶེནྟོ ‘‘བྱཱཔཱདཔདོསཾ པཧཱཡཱཏིཨཱདཱིསུཔི ཨེསེཝ ནཡོ’’ཏི ཨཱཧ. པཱུཏིཀུམྨཱསཱདཡོཏི ཨཱབྷིདོསིཀཡཝཀུམྨཱསཱདཡོ. པུརིམཔཀཏིནྟི པརིསུདྡྷཔཎྜརསབྷཱཝཾ, ཨིམིནཱ ཝིཀཱརམཱཔཛྫཏཱིཏི ཨཏྠཾ དསྶེཏི. ཝིཀཱརཱཔཏྟིཡཱཏི པུརིམཔཀཏིཝིཛཧནསངྑཱཏེན ཝིཀཱརམཱཔཛྫནེན. ‘‘ཨུབྷཡ’’ནྟིཨཱདིནཱ ཏུལྱཏྠསམཱསབྷཱཝམཱཧ. ‘‘ཡཱ ཏསྨིཾ སམཡེ ཙིཏྟསྶ ཨཀལླཏཱ’’ཏིཨཱདིནཱ (དྷ. ས. ༡༡༦༢; ཝིབྷ. ༥༤༦) ཐིནསྶ, ‘‘ཡཱ ཏསྨིཾ སམཡེ ཀཱཡསྶ ཨཀལླཏཱ’’ཏིཨཱདིནཱ ཙ མིདྡྷསྶ ཨབྷིདྷམྨེ ནིདྡིཊྛཏྟཱ ‘‘ཐིནཾ ཙིཏྟགེལཉྙཾ, མིདྡྷཾ ཙེཏསིཀགེལཉྙ’’ནྟི ཝུཏྟཾ. སཏིཔི ཧི ཐིནམིདྡྷསྶ ཨཉྙམཉྙཾ ཨཝིཔྤཡོགེ ཙིཏྟཀཱཡལཧུཏཱདཱིནཾ ཝིཡ ཙིཏྟཙེཏསིཀཱནཾ ཡཐཱཀྐམཾ ཏཾཏཾཝིསེསསྶ ཡཱ ཏེསཾ ཨཀལླཏཱདཱིནཾ ཝིསེསཔཙྩཡཏཱ, ཨཡམེཏེསཾ སབྷཱཝོཏི དཊྛབྦཾ. དིཊྛཱལོཀོ ནཱམ པསྶིཏོ རཏྟིཾ ཙནྡཱལོཀདཱིཔཱལོཀཨུཀྐཱལོཀཱདི, དིཝཱ ཙ སཱུརིཡཱལོཀཱདི. རཏྟིམྤི དིཝཱཔི ཏསྶ སཉྫཱནནསམཏྠཱ སཉྙཱ ཨཱལོཀསཉྙཱ, ཏསྶཱ ཙ ཝིགཏནཱིཝརཎཱཡ པརིསུདྡྷཱཡ ཨཏྠིཏཱ ཨིདྷ ཨདྷིཔྤེཏཱ. ཨཏིསཡཏྠཝིསིཊྛསྶ ཧི ཨཏྠིཨཏྠསྶ ཨཝབོདྷཀོ ཨཡམཱིཀཱརོཏི དསྶེནྟོ ‘‘རཏྟིམྤཱི’’ཏིཨཱདིམཱཧ, ཝིགཏཐིནམིདྡྷབྷཱཝསྶ ཀཱརཎཏྟཱ ཙེཏཾ ཝུཏྟཾ. སུཏྟེསུ པཱཀཊོཝཱཡམཏྠོ.

སརཏཱིཏི ¶ སཏོ, སམྤཛཱནཱཏཱིཏི སམྤཛཱནོཏི ཨེཝཾ པུགྒལནིདྡེསོཏི དསྶེཏི ‘‘སཏིཡཱ ཙ ཉཱཎེན ཙ སམནྣཱགཏོ’’ཏི ཨིམིནཱ. སནྟེསུཔི ཨཉྙེསུ ཝཱིརིཡསམཱདྷིཨཱདཱིསུ ཀསྨཱ ཨིདམེཝ ཨུབྷཡཾ ཝུཏྟཾ, ཝིགཏཱབྷིཛ྄ཛྷཱདཱིསུ ཝཱ ཨིདཾ ཨུབྷཡཾ ཨཝཏྭཱ ཀསྨཱ ཨིདྷེཝ ཝུཏྟནྟི ཨནུཡོགམཔནེཏུཾ ‘‘ཨིདཾ ཨུབྷཡ’’ནྟིཨཱདི ཝུཏྟཾ, པུགྒལཱདྷིཊྛཱནེན ནིདྡིཊྛསཏིསམྤཛཉྙསངྑཱཏཾ ཨིདཾ ཨུབྷཡནྟི ཨཏྠོ. ཨཏིཀྐམིཏྭཱ ཋིཏོཏི ཏ-སདྡསྶ ཨཏཱིཏཏྠཏཾ ཨཱཧ, པུབྦབྷཱགབྷཱཝནཱཡ པཛཧནམེཝ ཙ ཨཏིཀྐམནཾ. ‘‘ཀཐཾ ཨིདཾ ¶ ཀཐཾ ཨིད’’ནྟི པཝཏྟཏཱིཏི ཀཐཾཀཐཱ, ཝིཙིཀིཙྪཱ, སཱ ཨེཏསྶ ཨཏྠཱིཏི ཀཐཾཀཐཱི, ན ཀཐཾཀཐཱི ཨཀཐཾཀཐཱི, ནིབྦིཙིཀིཙྪོཏི ཝཙནཏྠོ, ཨཏྠམཏྟཾ པན དསྶེཏུཾ ‘‘ཀཐཾ ཨིདཾ ཀཐཾ ཨིད’ནྟི ཨེཝཾ ནཔྤཝཏྟཏཱིཏི ཨཀཐཾཀཐཱི’’ཏི ཝུཏྟཾ. ‘‘ཀུསལེསུ དྷམྨེསཱུ’’ཏི ཨིདཾ ‘‘ཨཀཐཾཀཐཱི’’ཏི ཨིམིནཱ སམྦཛ྄ཛྷིཏབྦནྟི ཨཱཧ ‘‘ན ཝིཙིཀིཙྪཏི, ན ཀངྑཏཱིཏི ཨཏྠོ’’ཏི. ཝཙནཏྠལཀྑཎཱདིབྷེདཏོཏི ཨེཏྠ ཨཱདིསདྡེན པཙྩཡཔཧཱནཔཧཱཡཀཱདཱིནམྤི སངྒཧོ དཊྛབྦོ. ཏེཔི ཧི པབྷེདཏོ ཝཏྟབྦཱཏི.

༢༡༨. ཝཌྜྷིཡཱ གཧིཏཾ དྷནཾ ཨིཎཾ ནཱམཱཏི ཝུཏྟཾ ‘‘ཝཌྜྷིཡཱ དྷནཾ གཧེཏྭཱ’’ཏི. ཝིགཏོ ཨནྟོ བྱནྟོ, སོ ཡསྶཱཏི བྱནྟཱི. ཏེནཱཧ ‘‘ཝིགཏནྟ’’ནྟི, ཝིརཧིཏདཱཏབྦཨིཎཔརིཡནྟཾ ཀརེཡྻཱཏི ཙེཏསྶ ཨཏྠོ. ཏེསནྟི ཝཌྜྷིཡཱ གཧིཏཱནཾ ཨིཎདྷནཱནཾ. པརིཡནྟོ ནཱམ ཏདུཏྟརི དཱཏབྦཨིཎསེསོ. ནཏྠི ཨིཎམསྶཱཏི ཨཎཎོ. ཏསྶ བྷཱཝོ ཨཱཎཎྱཾ. ཏམེཝ ནིདཱནཾ ཨཱཎཎྱནིདཱནཾ, ཨཱཎཎྱཧེཏུ ཨཱཎཎྱཀཱརཎཱཏི ཨཏྠོ. ཨཱཎཎྱམེཝ ཧི ནིདཱནཾ ཀཱརཎམསྶཱཏི ཝཱ ཨཱཎཎྱནིདཱནཾ, ‘‘པཱམོཛྫཾ སོམནསྶ’’ནྟི ཨིམེཧི སམྦནྡྷོ. ‘‘ཨིཎཔལིབོདྷཏོ མུཏྟོམྷཱི’’ཏི བལཝཔཱམོཛྫཾ ལབྷཏི. ‘‘ཛཱིཝིཀཱནིམིཏྟམྤི མེ ཨཝསིཊྛཾ ཨཏྠཱི’’ཏི སོམནསྶཾ ཨདྷིགཙྪཏི.

༢༡༩. ཝིསབྷཱགཝེདནཱ ནཱམ དུཀྑཝེདནཱ. སཱ ཧི ཀུསལཝིཔཱཀསནྟཱནསྶ ཝིརོདྷིབྷཱཝཏོ སུཁཝེདནཱཡ ཝིསབྷཱགཱ, ཏསྶཱ ཨུཔྤཏྟིཡཱ ཀརཎབྷཱུཏཱཡ. ཀཀཙེནེཝཱཏི ཀཀཙེན ཨིཝ. ཙཏུཨིརིཡཱཔཐནྟི ཙཏུབྦིདྷམྤི ཨིརིཡཱཔཐཾ. བྱཱདྷིཏོ ཧི ཡཐཱ ཋཱནགམནེསུ ཨསམཏྠོ, ཨེཝཾ ནིསཛྫཱདཱིསུཔི. ཨཱབཱདྷེཏཱིཏི པཱིལེ༹ཏི. ཝཱཏཱདཱིནཾ ཝིཀཱརབྷཱུཏཱ ཝིསམཱཝཏྠཱཡེཝ ‘‘ཨཱབཱདྷོ’’ཏི ཝུཙྩཏི. ཏེནཱཧ ‘‘ཏཾསམུཊྛཱནེན དུཀྑེན དུཀྑིཏོ’’ཏི, ཨཱབཱདྷསམུཊྛཱནེན དུཀྑཝེདནཱསངྑཱཏེན དུཀྑེན དུཀྑིཏོ དུཀྑསམནྣཱགཏོཏི ཨཏྠོ. དུཀྑཝེདནཱཡ པན ཨཱབཱདྷབྷཱཝེན ཨཱདིམྷི བཱདྷཏཱིཏི ཨཱབཱདྷོཏི ཀཏྭཱ ཨཱབཱདྷསངྑཱཏེན མཱུལབྱཱདྷིནཱ ཨཱབཱདྷིཀོ, ཨཔརཱཔརཾ སཉྫཱཏདུཀྑསངྑཱཏེན ཨནུབནྡྷབྱཱདྷིནཱ དུཀྑིཏོཏི ཨཏྠོ གཧེཏབྦོ. ཨེཝཉྷི སཏི དུཀྑཝེདནཱཝསེན ཝུཏྟསྶ དུཀྑིཏཔདསྶ ཨཱབཱདྷིཀཔདེན ཝིསེསིཏབྦཏཱ པཱཀཊཱ ཧོཏཱིཏི ཨཡམེཏྠ ¶ ¶ ཨཱཙརིཡདྷམྨཔཱལཏྠེརེན (དཱི. ནི. ཊཱི. ༡.༢༡༩) ཝུཏྟནཡོ. ཨདྷིཀཾ མཏྟཾ པམཱཎཾ ཨདྷིམཏྟཾ, བཱལ༹ྷཾ, ཨདྷིམཏྟཾ གིལཱནོ དྷཱཏུསངྑཡེན པརིཀྑཱིཎསརཱིརོཏི ཨདྷིམཏྟགིལཱནོ. ཨདྷིམཏྟབྱཱདྷིཔརེཏཏཱཡཱཏི ཨདྷིམཏྟབྱཱདྷིཔཱིལི༹ཏཏཱཡ. ན རུཙྩེཡྻཱཏི ན རུཙྩེཐ, ཀམྨཏྠཔདཉྩེཏཾ ‘‘བྷཏྟཉྩསྶཱ’’ཏི ཨེཏྠ ‘‘ཨསྶཱ’’ཏི ཀཏྟུདསྶནཏོ. མཏྟཱསདྡོ ཨནཏྠཀོཏི ཝུཏྟཾ ‘‘བལམཏྟཱཏི བལམེཝཱ’’ཏི, ཨཔྤམཏྟཀཾ ཝཱ བལཾ བལམཏྟཱ. ཏདུབྷཡནྟི པཱམོཛྫཾ, སོམནསྶཉྩ. ལབྷེཐ པཱམོཛྫཾ ‘‘རོགཏོ མུཏྟོམྷཱི’’ཏི. ཨདྷིགཙྪེཡྻ སོམནསྶཾ ‘‘ཨཏྠི མེ ཀཱཡབལ’’ནྟི པཱལི༹ཡཱ ཨཏྠོ.

༢༢༠. ཀཱཀཎིཀམཏྟཾ ནཱམ ‘‘ཨེཀགུཉྫམཏྟ’’ནྟི ཝདནྟི. ‘‘དིཡཌྜྷཝཱིཧིམཏྟ’’ནྟི ཝིནཡཊཱིཀཱཡཾ ཝུཏྟཾ. ཨཔིཙ ཀཎ-སདྡོ ཀུཎྜཀེ –

‘‘ཨཀཎཾ ཨཐུསཾ སུདྡྷཾ, སུགནྡྷཾ ཏཎྜུལཔྥལཾ;

ཏུཎྜིཀཱིརེ པཙིཏྭཱན, ཏཏོ བྷུཉྫནྟི བྷོཛན’’ནྟི. (དཱི. ནི. ༣.༢༨༡) ཨཱདཱིསུ ཝིཡ;

‘‘ཀཎོ ཏུ ཀུཎྜཀོ བྷཝེ’’ཏི (ཨབྷིདྷཱནེ བྷཀཎྜེ ཙཏུབྦཎྞཝགྒེ ༤༥༤ གཱཐཱ) ཧི ཝུཏྟཾ. ཨཔྤཀོ པན ཀཎོ ཀཱཀཎོཏི ཝུཙྩཏི ཡཐཱ ‘‘ཀཱལཝཎ’’ནྟི, ཏསྨཱ ཀཱཀཎོཝ པམཱཎམསྶཱཏི ཀཱཀཎིཀཾ, ཀཱཀཎིཀམེཝ ཀཱཀཎིཀམཏྟཾ, ཁུདྡཀཀུཎྜཀཔྤམཱཎམེཝཱཏི ཨཏྠོ དཊྛབྦོ. ཨེཝཉྷི སཏི ‘‘རཱཛདཱཡོ ནཱམ ཀཱཀཎིཀམཏྟཾ ན ཝཊྚཏི, ཨཌྜྷམཱསགྒྷནིཀཾ མཾསཾ དེཏཱི’’ཏི (ཛཱ. ཨཊྛ. ༦.ཨུམངྒཛཱཏཀཝཎྞནཱཡ) ཝུཏྟེན ཨུམངྒཛཱཏཀཝཙནེན ཙ ཨཝིརུདྡྷཾ ཧོཏི. ཝཡོཏི ཁཡོ བྷངྒོ, ཏསྶ ‘‘བནྡྷནཱ མུཏྟོམྷཱི’’ཏི ཨཱཝཛྫཡཏོ ཏདུབྷཡཾ ཧོཏི. ཏེན ཝུཏྟཾ ‘‘ལབྷེཐ པཱམོཛྫཾ, ཨདྷིགཙྪེཡྻ སོམནསྶ’’ནྟི. ཝཙནཱཝསེསཾ སནྡྷཱཡ ‘‘སེསཾ ཝུཏྟནཡེནེཝཱ’’ཏིཨཱདི ཝུཏྟཾ. ཝུཏྟནཡེནེཝཱཏི ཙ པཋམདུཏིཡཔདེསུ ཝུཏྟནཡེནེཝ. སབྦཔདེསཱུཏི ཏཏིཡཱདཱིསུ ཏཱིསུ ཀོཊྛཱསེསུ. ཨེཀེཀོ ཧི ཨུཔམཱཔཀྑོ ‘‘པད’’ནྟི ཝུཏྟོ.

༢༢༡-༢༢༢. ཨདྷཱིནོཏི ཨཱཡཏྟོ, ན སེརིབྷཱཝཡུཏྟོ. ཏེནཱཧ ‘‘ཨཏྟནོ རུཙིཡཱ ཀིཉྩི ཀཱཏུཾ ན ལབྷཏཱི’’ཏི. ཨེཝམིཏརསྨིམྤི. ཡེན གནྟུཀཱམོ, ཏེན ཀཱམཾ གམོ ན ཧོཏཱིཏི སཔཱཋསེསཡོཛནཾ དསྶེཏུཾ ‘‘ཡེནཱ’’ཏིཨཱདི ཝུཏྟཾ. ཀཱམནྟི ཙེཏཾ བྷཱཝནཔུཾསཀཝཙནཾ, ཀཱམེན ཝཱ ཨིཙྪཱཡ གམོ ཀཱམཾགམོ ནིགྒཧཱིཏཱགམེན. དཱསབྱཱཏི ¶ ཨེཏྠ བྱ-སདྡསྶ བྷཱཝཏྠཏཾ དསྶེཏི ‘‘དཱསབྷཱཝཱ’’ཏི ཨིམིནཱ. ཨཔརཱདྷཱིནཏཱཡ ཨཏྟནོ བྷུཛོ ཝིཡ སཀིཙྩེ ཨེསིཏབྦོ པེསིཏབྦོཏི ¶ བྷུཛིསྶོ, སཡཾཝསཱིཏི ནིབྦཙནཾ. ‘‘བྷུཛོ ནཱམ ཨཏྟནོ ཡཐཱསུཁཾ ཝིནིཡོགོ, སོ ཨིསྶོ ཨིཙྪིཏབྦོ ཨེཏྠཱཏི བྷུཛིསྶོ, ཨསྶཱམིཀོ’’ཏི མཱུལཔཎྞཱསཀཊཱིཀཱཡཾ ཝུཏྟཾ. ཨཏྠམཏྟཾ པན དསྶེནྟོ ‘‘ཨཏྟནོ སནྟཀོ’’ཏི ཨཱཧ, ཨཏྟཱཝ ཨཏྟནོ སནྟཀོ, ན པརསྶཱཏི ཝུཏྟཾ ཧོཏི. ཨནུདཀཏཱཡ ཀཾ པཱནཱིཡཾ ཏཱརེནྟི ཨེཏྠཱཏི ཀནྟཱརོ, ཨདྡྷཱནསདྡོ ཙ དཱིགྷཔརིཡཱཡོཏི ཝུཏྟཾ ‘‘ནིརུདཀཾ དཱིགྷམགྒ’’ནྟི.

༢༢༣. སེསཱནཱིཏི བྱཱཔཱདཱདཱིནི. ཏཏྲཱཏི དསྶནེ. ཨཡནྟི ཨིདཱནི ཝུཙྩམཱནཱ སདིསཏཱ, ཡེན ཨིཎཱདཱིནཾ ཨུཔམཱབྷཱཝོ, ཀཱམཙྪནྡཱདཱིནཉྩ ཨུཔམེཡྻབྷཱཝོ ཧོཏི, སོ ནེསཾ ཨུཔམོཔམེཡྻསམྦནྡྷོ སདིསཏཱཏི དཊྛབྦཾ. ཏེཧཱིཏི པརེཧི ཨིཎསཱམིཀེཧི. ཀིཉྩི པཊིབཱཧིཏུནྟི ཕརུསཝཙནཱདིཀཾ ཀིཉྩིཔི པཊིསེདྷེཏུཾ ན སཀྐོཏི ཨིཎཾ དཱཏུམསཀྐུཎཏྟཱ. ཀསྨཱཏི ཝུཏྟཾ ‘‘ཏིཏིཀྑཱཀཱརཎ’’ནྟིཨཱདི, ཨིཎསྶ ཏིཏིཀྑཱཀཱརཎཏྟཱཏི ཨཏྠོ. ཡོ ཡམྷི ཀཱམཙྪནྡེན རཛྫཏཱིཏི ཡོ པུགྒལོ ཡམྷི ཀཱམཙྪནྡསྶ ཝཏྠུབྷཱུཏེ པུགྒལེ ཀཱམཙྪནྡེན རཛྫཏི. ཏཎྷཱསཧགཏེན ཏཾ ཝཏྠུཾ གཎྷཱཏཱིཏི ཏཎྷཱབྷཱུཏེན ཀཱམཙྪནྡེན ཏཾ ཀཱམཙྪནྡསྶ ཝཏྠུབྷཱུཏཾ པུགྒལཾ ‘‘མམེཏ’’ནྟི གཎྷཱཏི. སཧགཏསདྡོ ཧེཏྠ ཏབྦྷཱཝམཏྟོ ‘‘ཡཱཡཾ ཏཎྷཱ པོནོབྷཝིཀཱ ནནྡཱིརཱགསཧགཏཱ’’ཏིཨཱདཱིསུ (དཱི. ནི. ༢.༤༠༠; མ. ནི. ༡.༡༣༣, ༤༨༠; ༣.༣༧༣; སཾ. ནི. ༥.༡༠༨༡; མཧཱཝ. ༡༥; པཊི. མ. ༢.༣༠) ཝིཡ. ཏེནཱཏི ཀཱམཙྪནྡསྶ ཝཏྠུབྷཱུཏེན པུགྒལེན. ཀསྨཱཏི ཨཱཧ ‘‘ཏིཏིཀྑཱཀཱརཎ’’ནྟིཨཱདི, ཀཱམཙྪནྡསྶ ཏིཏིཀྑཱཀཱརཎཏྟཱཏི ཨཏྠོ. ཏིཏིཀྑཱསདིསོ ཙེཏྠ རཱགཔདྷཱནོ ཨཀུསལཙིཏྟུཔྤཱདོ ‘‘ཏིཏིཀྑཱ’’ཏི ཝུཏྟོ, ན ཏུ ‘‘ཁནྟཱི པརམཾ ཏཔོ ཏིཏིཀྑཱ’’ཏིཨཱདཱིསུ (དཱི. ནི. ༢.༩༡; དྷ. པ. ༡༨༤) ཝིཡ ཏཔབྷཱུཏོ ཨདོསཔདྷཱནོ ཙིཏྟུཔྤཱདོ. གྷརསཱམིཀེཧཱིཏི གྷརསྶ སཱམིཀབྷཱུཏེཧི སསྶུསསུརསཱམིཀེཧི. ཨིཏྠཱིནཾ ཀཱམཙྪནྡོ ཏིཏིཀྑཱཀཱརཎཾ ཧོཏི ཝིཡཱཏི སམྦནྡྷོ.

‘‘ཡཐཱ པནཱ’’ཏིཨཱདིནཱ སེསཱནཾ རོགཱདིསདིསཏཱ ཝུཏྟཱ. ཏཏྠ པིཏྟདོསཀོཔནཝསེན པིཏྟརོགཱཏུརོ. ཏསྶ པིཏྟཀོཔནཏོ སབྦམྤི ¶ མདྷུསཀྐརཱདིཀཾ ཨམདྷུརབྷཱཝེན སམྤཛྫཏཱིཏི ཝུཏྟཾ ‘‘ཏིཏྟཀཾ ཏིཏྟཀནྟི ཨུགྒིརཏིཡེཝཱ’’ཏི. ཏུམྷེ ཨུཔདྡཝེཐཱཏི ཊཱིཀཱཡཾ (དཱི. ནི. ཊཱི. ༡.༢༢༣) ཨུདྡྷཊཔཱཋོ, ‘‘ཨུཔདྡཝཾ ཀརོཐཱ’’ཏི ནཱམདྷཱཏུཝསེན ཨཏྠོ, ཨིདཱནི པན ‘‘ཏུམྷེཧི ཨུཔདྡུཏཱ’’ཏི པཱཋོ དིསྶཏི. ཝིབྦྷམཏཱིཏི ཨིཏོ ཙིཏོ ཙ ཨཱཧིཎྜཏི, ཧཱིནཱཡ ཝཱ ཨཱཝཏྟཏི. མདྷུསཀྐརཱདཱིནཾ རསཾ ན ཝིནྡཏི ནཱནུབྷཝཏི ན ཛཱནཱཏི ན ལབྷཏི ཙ ཝིཡཱཏི སམྦནྡྷོ. སཱསནརསནྟི སཱསནསྶ རསཾ, སཱསནམེཝ ཝཱ རསཾ.

ནཀྑཏྟཚཎཾ ¶ ནཀྑཏྟཾ. ཏེནཱཧ ‘‘ཨཧོ ནཙྩཾ, ཨཧོ གཱིཏ’’ནྟི. མུཏྟོཏི བནྡྷནཏོ པམུཏྟོ. དྷམྨསྶཝནསྶཱཏི སོཏབྦདྷམྨསྶ.

སཱིགྷཾ པཝཏྟེཏབྦཀིཙྩཾ ཨཙྩཱཡིཀཾ. སཱིགྷཏྠོ ཧི ཨཏིསདྡོ ‘‘པཱཎཱཏིཔཱཏོ’’ཏིཨཱདཱིསུ (མ. ནི. ༢.༡༩༣; ཝིབྷ. ༩༦༨) ཝིཡ. ཝིནཡེ ཨཔཀཏཉྙུནཱཏི ཝིནཡཀྐམེ ཨཀུསལེན. པཀཏཾ ནིཊྛཱནཾ ཝིནིཙྪཡཾ ཛཱནཱཏཱིཏི པཀཏཉྙཱུ, ན པཀཏཉྙཱུ ཏཐཱ. སོ ཧི ཀཔྤིཡཱཀཔྤིཡཾ ཡཱཐཱཝཏོ ན ཛཱནཱཏི. ཏེནཱཧ ‘‘ཀིསྨིཉྩིདེཝཱ’’ཏིཨཱདི. ཀཔྤིཡམཾསེཔཱིཏི སཱུཀརམཾསཱདིཀེཔི. ཨཀཔྤིཡམཾསསཉྙཱཡཱཏི ཨཙྪམཾསཱདིསཉྙཱཡ.

དཎྜཀསདྡེནཱཔཱིཏི སཱཁཱདཎྜཀསདྡེནཔི. ཨུསྶངྐིཏཔརིསངྐིཏོཏི ཨཝསངྐིཏོ ཙེཝ སམནྟཏོ སངྐིཏོ ཙ, ཨཏིཝིཡ སངྐིཏོཏི ཝུཏྟཾ ཧོཏི. ཏདཱཀཱརདསྶནཾ ‘‘གཙྪཏིཔཱི’’ཏིཨཱདི. སོ ཧི ཐོཀཾ གཙྪཏིཔི. གཙྪནྟོ པན ཏཱཡ ཨུསྶངྐིཏཔརིསངྐིཏཏཱཡ ཏཏྠ ཏཏྠ ཏིཊྛཏིཔི. ཨཱིདིསེ ཀནྟཱརེ གཏེ ‘‘ཀོ ཛཱནཱཏི, ཀིཾ བྷཝིསྶཏཱི’’ཏི ནིཝཏྟཏིཔི, ཏསྨཱ ཙ གཏཊྛཱནཏོ ཨགཏཊྛཱནམེཝ བཧུཏརཾ ཧོཏི, ཏཏོ ཨེཝ ཙ སོ ཀིཙྪེན ཀསིརེན ཁེམནྟབྷཱུམིཾ པཱཔུཎཱཏི ཝཱ, ན ཝཱ པཱཔུཎཱཏི. ཀིཙྪེན ཀསིརེནཱཏི པརིཡཱཡཝཙནཾ, ཀཱཡིཀདུཀྑེན ཁེདནཾ ཝཱ ཀིཙྪཾ, ཙེཏསིཀདུཀྑེན པཱིལ༹ནཾ ཀསིརཾ. ཁེམནྟབྷཱུམིནྟི ཁེམབྷཱུཏཾ བྷཱུམིཾ ཨནྟསདྡསྶ ཏབྦྷཱཝཏྟཱ, བྷཡསྶ ཁཱིཡནཾ ཝཱ ཁེམོ, སོཝ ཨནྟོ པརིཙྪེདོ ཡསྶཱ ཏཐཱ, སཱ ཨེཝ བྷཱུམཱིཏི ཁེམནྟབྷཱུམི, ཏཾ ནིབྦྷཡཔྤདེསནྟི ཨཏྠོ. ཨཊྛསུ ཋཱནེསཱུཏི ‘‘ཏཏྠ ཀཏམཱ ཝིཙིཀིཙྪཱ? སཏྠརི ཀངྑཏི ཝིཙིཀིཙྪཏི. དྷམྨེ. སངྒྷེ. སིཀྑཱཡ. པུབྦནྟེ. ཨཔརནྟེ. པུབྦནྟཱཔརནྟེ. ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསུ ཀངྑཏི ཝིཙིཀིཙྪཏཱི’’ཏི (ཝིབྷ. ༩༡༥) ཝིབྷངྒེ ¶ ཝུཏྟེསུ ཨཊྛསུ ཋཱནེསུ. ཨདྷིམུཙྩིཏྭཱཏི ཝིནིཙྪིནིཏྭཱ, སདྡཧིཏྭཱ ཝཱ. སདྡྷཱཡ གཎྷིཏུནྟི སདྡྷེཡྻཝཏྠུཾ ‘‘ཨིདམེཝ’’ནྟི སདྡཧནཝསེན གཎྷིཏུཾ, སདྡཧིཏུཾ ན སཀྐོཏཱིཏི ཨཏྠོ. ཨིཏཱིཏི ཏསྨཱ ཝུཏྟནཡེན ཨསཀྐུཎནཏོ ཨནྟརཱཡཾ ཀརོཏཱིཏི སམྦནྡྷོ. ‘‘ཨཏྠི ནུ ཁོ, ནཏྠི ནུ ཁོ’’ཏི ཨརཉྙཾ པཝིཊྛསྶ ཨཱདིམྷི ཨེཝ སཔྤནཾ སཾསཡོ ཨཱསཔྤནཾ. ཏཏོ པརཾ སམནྟཏོ, ཨུཔརཱུཔརི ཝཱ སཔྤནཾ པརིསཔྤནཾ. ཨུབྷཡེནཔི ཏཏྠེཝ སཾསཡཝསེན པརིབྦྷམནཾ དསྶེཏི. ཏེནཱཧ ‘‘ཨཔརིཡོགཱཧན’’ནྟི, ‘‘ཨེཝམིད’’ནྟི སམནྟཏོ ཨནོགཱཧནནྟི ཨཏྠོ. ཚམྦྷིཏཏྟནྟི ཨརཉྙསཉྙཱཡ ཨུཔྤནྣཾ ཚམྦྷིཏབྷཱཝཾ ཧདཡམཾསཙལནཾ, ཨུཏྲཱསནྟི ཝུཏྟཾ ཧོཏི. ཨུཔམེཡྻཔཀྑེཔི ཡཐཱརཧམེསམཏྠོ.

༢༢༤. ཏཏྲཱཡཾ སདིསཏཱཏི ཨེཏྠ པན ཨཔྤཧཱིནཔཀྑེ ཝུཏྟནཡཱནུསཱརེན སདིསཏཱ ཝེདིཏབྦཱ ¶ . ཡདགྒེན ཧི ཀཱམཙྪནྡཱདཡོ ཨིཎཱདིསདིསཱ, ཏདགྒེན ཙ ཏེསཾ པཧཱནཾ ཨཱཎཎྱཱདིསདིསཏཱཏི. ཨིདཾ པན ཨནུཏྟཱནཔདཏྠམཏྟཾ – སམིདྡྷཏནྟི ཨཌྜྷཏཾ. པུབྦེ པཎྞམཱརོཔིཏཱཡ ཝཌྜྷིཡཱ སཧ ཝཏྟཏཱིཏི སཝཌྜྷིཀཾ. པཎྞནྟི ཨིཎདཱནགྒཧཎེ སལླཀྑཎཝསེན ལིཁིཏཔཎྞཾ. པུན པཎྞནྟི ཨིཎཡཱཙནཝསེན སཱསནལིཁིཏཔཎྞཾ. ནིལླེཔཏཱཡཱཏི དྷནསམྦནྡྷཱབྷཱཝེན ཨཝིལིམྤནཏཱཡ. ཏཐཱ ཨལགྒཏཱཡ. པརིཡཱཡཝཙནཉྷེཏཾ དྭཡཾ. ཨཐ ཝཱ ནིལླེཔཏཱཡཱཏི ཝུཏྟནཡེན ཨཝིལིམྤནབྷཱཝེན ཝིསེསནབྷཱུཏེན ཨལགྒཏཱཡཱཏི ཨཏྠོ. ཚ དྷམྨེཏི ཨསུབྷནིམིཏྟསྶ ཨུགྒཧོ, ཨསུབྷབྷཱཝནཱནུཡོགོ, ཨིནྡྲིཡེསུ གུཏྟདྭཱརཏཱ, བྷོཛནེ མཏྟཉྙུཏཱ, ཀལྱཱཎམིཏྟཏཱ, སཔྤཱཡཀཐཱཏི ཨིམེ ཚ དྷམྨེ. བྷཱཝེཏྭཱཏི བྲཱུཧེཏྭཱ, ཨཏྟནི ཝཱ ཨུཔྤཱདེཏྭཱ. ཨནུཔྤནྣཨནུཔྤཱདནཨུཔྤནྣཔྤཧཱནཱདིཝིབྷཱཝནཝསེན མཧཱསཏིཔཊྛཱནསུཏྟེ སཝིསེསཾ པཱལི༹ཡཱ ཨཱགཏཏྟཱ ‘‘མཧཱསཏིཔཊྛཱནེ ཝཎྞཡིསྶཱམཱ’’ཏི ཝུཏྟཾ. ‘‘མཧཱསཏིཔཊྛཱནེ’’ཏི ཙ ཨིམསྨིཾ དཱིགྷཱགམེ (དཱི. ནི. ༢.༣༧༢ ཨཱདཡོ) སངྒཱིཏམཱཧ, ན མཛ྄ཛྷིམཱགམེ ནིཀཱཡནྟརཏྟཱ. ནིཀཱཡནྟརཱགཏོཔི ཧི ཨཏྠོ ཨཱཙརིཡེཧི ཨཉྙཏྠ ཡེབྷུཡྻེན ཝུཏྟོཏི ཝདནྟི. ཨེས ནཡོ བྱཱཔཱདཱདིཔྤཧཱནབྷཱགེཔི. པརཝཏྠུམྷཱིཏི ཨཱརམྨཎབྷཱུཏེ པརསྨིཾ ཝཏྠུསྨིཾ. མམཱཡནཱབྷཱཝེན ནེཝ སངྒོ. པརིགྒཧཱབྷཱཝེན ན བདྡྷོ. དིབྦཱནིཔི རཱུཔཱནི པསྶཏོ ཀིལེསོ ན སམུདཱཙརཏི, པགེཝ མཱནུསིཡཱནཱིཏི སམྦྷཱཝནེ ཨཔི-སདྡོ.

ཨནཏྠཀརོཏི ¶ ཨཏྟནོ, པརསྶ ཙ ཨཧིཏཀརོ. ཚ དྷམྨེཏི མེཏྟཱནིམིཏྟསྶ ཨུགྒཧོ, མེཏྟཱབྷཱཝནཱནུཡོགོ, ཀམྨསྶཀཏཱ, པཊིསངྑཱནབཧུལཏཱ, ཀལྱཱཎམིཏྟཏཱ, སཔྤཱཡཀཐཱཏི ཨིམེ ཚ དྷམྨེ. ཏཏྠེཝཱཏི མཧཱསཏིཔཊྛཱནེཡེཝ. ཙཱརིཏྟསཱིལམེཝ ཨུདྡིསྶ པཉྙཏྟསིཀྑཱཔདཾ ‘‘ཨཱཙཱརཔཎྞཏྟཱི’’ཏི ཝུཏྟཾ. ཨཱདི-སདྡེན ཝཱརིཏྟཔཎྞཏྟིསིཀྑཱཔདཾ སངྒཎྷཱཏི.

པཝེསིཏོཏི པཝེསཱཔིཏོ. བནྡྷནཱགཱརཾ པཝེསཱཔིཏཏྟཱ ཨལདྡྷནཀྑཏྟཱནུབྷཝནོ པུརིསོ ཧི ‘‘ནཀྑཏྟདིཝསེ བནྡྷནཱགཱརཾ པཝེསིཏོ པུརིསོ’’ཏི ཝུཏྟོ, ནཀྑཏྟདིཝསེ ཨེཝ ཝཱ ཏདནནུབྷཝནཏྠཾ ཏཐཱ ཀཏོ པུརིསོ ཨེཝཾ ཝུཏྟོཏིཔི ཝཊྚཏི. ཨཔརསྨིནྟི ཏཏོ པཙྪིམེ, ཨཉྙསྨིཾ ཝཱ ནཀྑཏྟདིཝསེ. ཨོཀཱསནྟི ཀམྨཀཱརཎཱཀཱརཎཾ, ཀམྨཀཱརཎཀྑཎཾ ཝཱ. མཧཱནཏྠཀརནྟི དིཊྛདྷམྨིཀཱདིཨཏྠཧཱཔནམུཁེན མཧཏོ ཨནཏྠསྶ ཀཱརཀཾ. ཚ དྷམྨེཏི ཨཏིབྷོཛནེ ནིམིཏྟགྒཱཧོ, ཨིརིཡཱཔཐསམྤརིཝཏྟནཏཱ, ཨཱལོཀསཉྙཱམནསིཀཱརོ, ཨབྦྷོཀཱསཝཱསོ, ཀལྱཱཎམིཏྟཏཱ, སཔྤཱཡཀཐཱཏི ཨིམེ ཚ དྷམྨེ, དྷམྨནཀྑཏྟསྶཱཏི ཡཐཱཝུཏྟསོཏབྦདྷམྨསངྑཱཏསྶ མཧསྶ. སཱདྷཱུནཾ རཏིཛནནཏོ ཧི དྷམྨོཔི ཚཎསདིསཊྛེན ‘‘ནཀྑཏྟ’’ནྟི ཝུཏྟོ.

ཨུདྡྷཙྩཀུཀྐུཙྩེ ¶ མཧཱནཏྠཀརནྟི པརཱཡཏྟཏཱཔཱདནེན ཝུཏྟནཡེན མཧཏོ ཨནཏྠསྶ ཀཱརཀཾ. ཚ དྷམྨེཏི བཧུསྶུཏཏཱ, པརིཔུཙྪཀཏཱ, ཝིནཡེ པཀཏཉྙུཏཱ, ཝུཌྜྷསེཝིཏཱ, ཀལྱཱཎམིཏྟཏཱ, སཔྤཱཡཀཐཱཏི ཨིམེ ཚ དྷམྨེ. བལསྶ, བལེན ཝཱ ཨཏྟནཱ ཨིཙྪིཏསྶ ཀརཎཾ བལཀྐཱརོ, ཏེན. ནེཀྑམྨཔཊིཔདནྟི ནཱིཝརཎཏོ ནིཀྑམནཔཊིཔདཾ ཨུཔཙཱརབྷཱཝནམེཝ, ན པཋམཾ ཛྷཱནཾ. ཨཡཉྷི ཨུཔཙཱརབྷཱཝནཱདྷིཀཱརོ.

བལཝཱཏི པཙྩཏྠིཀཝིདྷམནསམཏྠེན བལེན བལཝཱ ཝནྟུ-སདྡསྶ ཨབྷིསཡཏྠཝིསིཊྛསྶ ཨཏྠིཡཏྠསྶ བོདྷནཏོ. ཧཏྠསཱརནྟི ཧཏྠགཏདྷནསཱརཾ. སཛྫཱཝུདྷོཏི སཛྫིཏདྷནྭཱདིཨཱཝུདྷོ, སནྣདྡྷཔཉྩཱཝུདྷོཏི ཨཏྠོ. སཱུརཝཱིརསེཝཀཛནཝསེན སཔརིཝཱརོ. ཏནྟི ཡཐཱཝུཏྟཾ པུརིསཾ. བལཝནྟཏཱཡ, སཛྫཱཝུདྷཏཱཡ, སཔརིཝཱརཏཱཡ ཙ ཙོརཱ དཱུརཏོཝ དིསྭཱ པལཱཡེཡྻུཾ. ཨནཏྠཀཱརིཀཱཏི སམྨཱཔཊིཔཏྟིཡཱ ཝིབནྡྷཀརཎཏོ ཝུཏྟནཡེན ཨཧིཏཀཱརིཀཱ. ཚ དྷམྨེཏི བཧུསྶུཏཏཱ, པརིཔུཙྪཀཏཱ ¶ , ཝིནཡེ པཀཏཉྙུཏཱ, ཨདྷིམོཀྑབཧུལཏཱ, ཀལྱཱཎམིཏྟཏཱ, སཔྤཱཡཀཐཱཏི ཨིམེ ཚ དྷམྨེ. ཡཐཱ བཱཧུསཙྩཱདཱིནི ཨུདྡྷཙྩཀུཀྐུཙྩསྶ པཧཱནཱཡ སཾཝཏྟནྟི, ཨེཝཾ ཝིཙིཀིཙྪཱཡཔཱིཏི ཨིདྷཱཔི བཧུསྶུཏཏཱདཡོ ཏཡོཔི དྷམྨཱ གཧིཏཱ, ཀལྱཱཎམིཏྟཏཱ, པན སཔྤཱཡཀཐཱ ཙ པཉྩནྣམྤི པཧཱནཱཡ སཾཝཏྟནྟི, ཏསྨཱ ཏཱསུ ཏསྶ ཏསྶ ནཱིཝརཎསྶ ཨནུཙྪཝིཀསེཝནཏཱ དཊྛབྦཱ. ཏིཎཾ ཝིཡཱཏི ཏིཎཾ བྷཡཝསེན ན གཎེཏི ཝིཡ. དུཙྩརིཏཀནྟཱརཾ ནིཏྠརིཏྭཱཏི དུཙྩརིཏཙརཎཱུཔཱཡབྷཱུཏཱཡ ཝིཙིཀིཙྪཱཡ ནིཏྠརཎཝསེན དུཙྩརིཏསངྑཱཏཾ ཀནྟཱརཾ ནིཏྠརིཏྭཱ. ཝིཙིཀིཙྪཱ ཧི སམྨཱཔཊིཔཏྟིཡཱ ཨཔྤཊིཔཛྫནནིམིཏྟཏཱམུཁེན མིཙྪཱཔཊིཔཏྟིམེཝ པརིབྲཱུཧེཏཱིཏི ཏསྶཱ ཨཔྤཧཱནཾ དུཙྩརིཏཙརཎཱུཔཱཡོ, པཧཱནཉྩ དུཙྩརིཏཝིདྷཱུནནཱུཔཱཡོཏི.

༢༢༥. ‘‘ཏུཊྛཱཀཱརོ’’ཏི ཨིམིནཱ པཱམོཛྫཾ ནཱམ ཏརུཎཔཱིཏིཾ དསྶེཏི. སཱ ཧི ཏརུཎཏཱཡ ཀཐཉྩིཔི ཏུཊྛཱཝཏྠཱ ཏུཊྛཱཀཱརམཏྟཾ. ‘‘ཏུཊྛསྶཱ’’ཏི ཨིདཾ ‘‘པམུདིཏསྶཱ’’ཏི ཨེཏསྶ ཨཏྠཝཙནཾ, ཏསྶཏྠོ ‘‘ཨོཀྐནྟིཀབྷཱཝཔྤཏྟཱཡ པཱིཏིཡཱ ཝསེན ཏུཊྛསྶཱ’’ཏི ཊཱིཀཱཡཾ ཝུཏྟོ, ཨེཝཾ སཏི པཱམོཛྫཔདེན ཨོཀྐནྟིཀཱ པཱིཏིཡེཝ གཧིཏཱ སིཡཱ. ‘‘སཀལསརཱིརཾ ཁོབྷཡམཱནཱ པཱིཏི ཛཱཡཏཱི’’ཏི ཨེཏསྶཱ ཙཏྠོ ‘‘ཨཏྟནོ སཝིཔྥཱརིཀཏཱཡ, ཨཏྟསམུཊྛཱནཔཎཱིཏརཱུཔུཔྤཏྟིཡཱ ཙ སཀལསརཱིརཾ ཁོབྷཡམཱནཱ ཕརཎལཀྑཎཱ པཱིཏི ཛཱཡཏཱི’’ཏི ཝུཏྟོ, ཨེཝཉྩ སཏི པཱིཏིཔདེན ཕརཎཱ པཱིཏིཡེཝ གཧིཏཱ སིཡཱ, ཀཱརཎཾ པནེཏྠ གཝེསིཏབྦཾ. ཨིདྷ, པན ཨཉྙཏྠ ཙ ཏརུཎབལཝཏཱམཏྟསཱམཉྙེན པདདྭཡསྶ ཨཏྠདཱིཔནཏོ ཡཱ ཀཱཙི ཏརུཎཱ པཱིཏི པཱམོཛྫཾ, བལཝཏཱི པཱིཏི, པཉྩཝིདྷཱཡ ཝཱ པཱིཏིཡཱ ཡཐཱཀྐམཾ ཏརུཎབལཝཏཱསམྦྷཝཏོ པུརིམཱ པུརིམཱ པཱམོཛྫཾ ¶ , པཙྪིམཱ པཙྪིམཱ པཱིཏཱིཏིཔི ཝདནྟི, ཨཡམེཏྠ ཏདནུཙྪཝིཀོ ཨཏྠོ. ཏུཊྛསྶཱཏི པཱམོཛྫསངྑཱཏཱཡ ཏརུཎཔཱིཏིཡཱ ཝསེན ཏུཊྛསྶ. ཏ-སདྡོ ཧི ཨཏཱིཏཏྠོ, ཨིཏརཐཱ ཧེཏུཕལསམྦནྡྷཱབྷཱཝཱཔཏྟིཏོ, ཧེཏུཕལསམྦནྡྷབྷཱཝསྶ ཙ ཝུཏྟཏྟཱ. ‘‘སཀལསརཱིརཾ ཁོབྷཡམཱནཱ’’ཏི ཨིམིནཱ པཱིཏི ནཱམ ཨེཏྠ བལཝཔཱིཏཱིཏི དསྶེཏི. སཱ ཧི ཨཏྟནོ སཝིཔྥཱརིཀཏཱཡ, ཨཏྟསམུཊྛཱནཔཎཱིཏརཱུཔུཔྤཏྟིཡཱ ཙ སཀལསརཱིརཾ སངྑོབྷཡམཱནཱ ཛཱཡཏི. སཀལསརཱིརེ པཱིཏིཝེགསྶ པཱིཏིཝིཔྥཱརསྶ ཨུཔྤཱདནཉྩེཏྠ སངྑོབྷནཾ.

པཱིཏིསཧིཏཾ ¶ པཱིཏི ཨུཏྟརཔདལོཔེན. ཀིཾ པན ཏཾ? མནོ, པཱིཏི མནོ ཨེཏསྶཱཏི སམཱསོ. པཱིཏིཡཱ སམྤཡུཏྟཾ མནོ ཡསྶཱཏིཔི ཝཊྚཏི, ཏསྶ. ཨཏྠམཏྟཾ པན དསྶེཏུཾ ‘‘པཱིཏིསམྤཡུཏྟཙིཏྟསྶ པུགྒལསྶཱ’’ཏི ཝུཏྟཾ. ཀཱཡོཏི ཨིདྷ སབྦོཔི ཨརཱུཔཀལཱཔོ ཨདྷིཔྤེཏོ, ན པན ཀཱཡལཧུཏཱདཱིསུ ཝིཡ ཝེདནཱདིཀྑནྡྷཏྟཡམེཝ, ན ཙ ཀཱཡཱཡཏནཱདཱིསུ ཝིཡ རཱུཔཀཱཡམྤཱིཏི དསྶེཏི ‘‘ནཱམཀཱཡོ’’ཏི ཨིམིནཱ. པསྶདྡྷིདྭཡཝསེནེཝ ཧེཏྠ པསྶམྦྷནམདྷིཔྤེཏཾ, པསྶམྦྷནཾ པན ཝིགཏཀིལེསདརཐཏཱཏི ཨཱཧ ‘‘ཝིགཏདརཐོ ཧོཏཱི’’ཏི, པཧཱིནཨུདྡྷཙྩཱདིཀིལེསདརཐོཏི ཨཏྠོ. ཝུཏྟཔྤཀཱརཱཡ པུབྦབྷཱགབྷཱཝནཱཡ ཝསེན ཙེཏསིཀསུཁཾ པཊིསཾཝེདེནྟོཡེཝ ཏཾསམུཊྛཱནཔཎཱིཏརཱུཔཕུཊསརཱིརཏཱཡ ཀཱཡིཀམྤི སུཁཾ པཊིསཾཝེདེཏཱིཏི ཝུཏྟཾ ‘‘ཀཱཡིཀམྤི ཙེཏསིཀམྤི སུཁཾ ཝེདཡཏཱི’’ཏི. ཨིམིནཱ ནེཀྑམྨསུཁེནཱཏི ‘‘སུཁཾ ཝེདེཏཱི’’ཏི ཨེཝཾ ཝུཏྟེན སཾཀིལེསནཱིཝརཎཔཀྑཏོ ནིཀྑནྟཏྟཱ, པཋམཛ྄ཛྷཱནཔཀྑིཀཏྟཱ ཙ ཡཐཱརཧཾ ནེཀྑམྨསངྑཱཏེན ཨུཔཙཱརསུཁེན ཨཔྤནཱསུཁེན ཙ. སམཱདྷཱནམྤེཏྠ ཏདུབྷཡེནེཝཱཏི ཝུཏྟཾ ‘‘ཨུཔཙཱརཝསེནཱཔི ཨཔྤནཱཝསེནཱཔཱི’’ཏི.

ཨེཏྠ པནཱཡམདྷིཔྤཱཡོ – ཀཱམཙྪནྡཔྤཧཱནཏོ པཊྛཱཡ ཡཱཝ པསྶདྡྷཀཱཡསྶ སུཁཔཊིསཾཝེདནཱ, ཏཱཝ ཡཐཱ པུབྦེ, ཏཐཱ ཨིདྷཱཔི པུབྦབྷཱགབྷཱཝནཱཡེཝ ཝུཏྟཱ, ན ཨཔྤནཱ. ཏཐཱ ཧི ཀཱམཙྪནྡཔྤཧཱནེ ཨཱཙརིཡདྷམྨཔཱལཏྠེརེན ཝུཏྟཾ ‘‘ཝིཀྑམྦྷནཝསེནཱཏི ཨེཏྠ ཝིཀྑམྦྷནཾ ཨནུཔྤཱདནཾ ཨཔྤཝཏྟནཾ, ན པཊིཔཀྑཱནཾ སུཔྤཧཱིནཏཱ, པཧཱིནཏྟཱཏི ཙ པཧཱིནསདིསཏཾ སནྡྷཱཡ ཝུཏྟཾ ཛྷཱནསྶ ཨནདྷིགཏཏྟཱ’’ཏི (དཱི. ནི. ཊཱི. ༡.༢༦༡). པསྶདྡྷཀཱཡསྶ སུཁཔཊིསཾཝེདནཱཡ ཙ ཝུཏྟཔྤཀཱརཱཡ པུབྦབྷཱགབྷཱཝནཱཡ ཝསེན ཙེཏསིཀསུཁཾ པཊིསཾཝེདེནྟོཡེཝ ཏཾསམུཊྛཱནཔཎཱིཏརཱུཔཕུཊསརཱིརཏཱཡ ཀཱཡིཀམྤི སུཁཾ པཊིསཾཝེདེཏཱིཏི. ཨཔིཙ ཀཱ ནཱམ ཀཐཱ ཨཉྙེཧི ཝཏྟབྦཱ ཨཊྛཀཐཱཡམེཝ ‘‘ཚ དྷམྨེ བྷཱཝེཏྭཱ’’ཏི ཏཏྠ ཏཏྠ པུབྦབྷཱགབྷཱཝནཱཡ ཝུཏྟཏྟཱ. སུཁིནོ ཙིཏྟསམཱདྷཱནེ པན སུཁསྶ ཨུཔཙཱརབྷཱཝནཱཡ ཝིཡ ཨཔྤནཱཡཔི ཀཱརཎཏྟཱ, ‘‘སོ ཝིཝིཙྩེཝ ཀཱམེཧཱི’’ཏིཨཱདིནཱ ཙ ཝཀྑམཱནཱཡ ཨཔྤནཱཡ ཧེཏུཕལཝསེན སམྦཛ྄ཛྷནཏོ པུབྦབྷཱགསམཱདྷི ¶ , ཨཔྤནཱསམཱདྷི ཙ ཝུཏྟོ, པུབྦབྷཱགསུཁམིཝ ཝཱ ཨཔྤནཱསུཁམྤི ཨཔྤནཱསམཱདྷིསྶ ཀཱརཎམེཝཱཏི ཏམྤི ཨཔྤནཱསུཁཾ ཨཔྤནཱསམཱདྷིནོ ¶ ཀཱརཎབྷཱཝེན ཨཱཙརིཡདྷམྨཔཱལཏྠེརེན གཧིཏནྟི ཨིམམཏྠམསལླཀྑེནྟཱ ནེཀྑམྨཔདཏྠཾ ཡཐཱཏཐཾ ཨགྒཧེཏྭཱ པཱལི༹ཡཾ, ཨཊྛཀཐཱཡམྤི སཾཀིཎྞཱཀུལཾ ཀེཙི ཀརོནྟཱིཏི.

པཋམཛ྄ཛྷཱནཀཐཱཝཎྞནཱ

༢༢༦. ཡདེཝཾ ‘‘སུཁིནོ ཙིཏྟཾ སམཱདྷིཡཏཱི’’ཏི ཨེཏེནེཝ ཨུཔཙཱརཝསེནཔི ཨཔྤནཱཝསེནཔི ཙིཏྟསྶ སམཱདྷཱནཾ ཀཐིཏཾ སིཡཱ, ཨེཝཾ སནྟེ ‘‘སོ ཝིཝིཙྩེཝ ཀཱམེཧཱི’’ཏིཨཱདིཀཱ དེསནཱ ཀིམཏྠིཡཱཏི ཙོདནཱཡ ‘‘སོ ཝིཝིཙྩེཝ…པེ… ཝུཏྟནྟི ཝེདིཏབྦ’’ནྟི ཝུཏྟཾ. ཏཏྠ ‘‘སམཱཧིཏེ’’ཏི པདདྭཡཾ ‘‘དསྶནཏྠཾ ཝུཏྟ’’ནྟི ཨིམེཧི སམྦནྡྷིཏྭཱ སམཱཧིཏཏྟཱ ཏཐཱ དསྶནཏྠཾ ཝུཏྟནྟི ཨདྷིཔྤཱཡོ ཝེདིཏབྦོ. ཨུཔརིཝིསེསདསྶནཏྠནྟི ཨུཔཙཱརསམཱདྷིཏོ, པཋམཛ྄ཛྷཱནཱདིསམཱདྷིཏོ ཙ ཨུཔརི པཏྟབྦསྶ པཋམདུཏིཡཛ྄ཛྷཱནཱདིཝིསེསསྶ དསྶནཏྠཾ. ཨུཔཙཱརསམཱདྷིསམདྷིགམེནེཝ ཧི པཋམཛ྄ཛྷཱནཱདིཝིསེསོ སམདྷིགནྟུཾ སཀྐཱ, ན པན ཏེན ཝིནཱ, དུཏིཡཛ྄ཛྷཱནཱདིསམདྷིགམེཔི པཱམོཛྫུཔྤཱདཱདིཀཱརཎཔརམྤརཱ ཨིཙྪིཏབྦཱ, དུཏིཡམགྒཱདིསམདྷིགམེ པཊིཔདཱཉཱཎདསྶནཝིསུདྡྷི ཝིཡཱཏི དཊྛབྦཾ. ཨཔྤནཱསམཱདྷིནཱཏི པཋམཛ྄ཛྷཱནཱདིཨཔྤནཱསམཱདྷིནཱ. ཏསྶ སམཱདྷིནོཏི ཡོ ཨཔྤནཱལཀྑཎོ སམཱདྷི ‘‘སུཁིནོ ཙིཏྟཾ སམཱདྷིཡཏཱི’’ཏི སབྦསཱདྷཱརཎཝསེན ཝུཏྟོ, ཏསྶ སམཱདྷིནོ. པབྷེདདསྶནཏྠནྟི དུཏིཡཛ྄ཛྷཱནཱདིཝིབྷཱགསྶ ཙེཝ པཋམཱབྷིཉྙཱདིཝིབྷཱགསྶ ཙ པབྷེདདསྶནཏྠཾ. ཀརཛཀཱཡནྟི ཙཏུསནྟཏིརཱུཔསམུདཱཡབྷཱུཏཾ ཙཱཏུམཧཱབྷཱུཏིཀཀཱཡཾ. སོ ཧི གབྦྷཱསཡེ ཀརཱིཡཏཱིཏི ཀཏྭཱ ཀརསངྑཱཏཏོ པུཔྥསམྦྷཝཏོ ཛཱཏཏྟཱ ཀརཛོཏི ཝུཙྩཏི. ཀརོཏི ཧི མཱཏུ སོཎིཏསངྑཱཏཔུཔྥསྶ, པིཏུ སུཀྐསངྑཱཏསམྦྷཝསྶ ཙ ནཱམཾ, ཏཏོ ཛཱཏོ པན ཨཎྜཛཛལཱབུཛཝསེན གབྦྷསེཡྻཀཀཱཡོཝ. ཀཱམཾ ཨོཔཔཱཏིཀཱདཱིནམྤི ཧེཏུསམྤནྣཱནཾ ཡཐཱཝུཏྟསམཱདྷིསམདྷིགམོ སམྦྷཝཏི, ཏཐཱཔི ཡེབྷུཡྻཏྟཱ, པཱཀཊཏྟཱ ཙ སྭེཝ ཀཱཡོ ཝུཏྟོཏི. ཀརོཏི པུཏྟེ ནིབྦཏྟེཏཱིཏི ཀརོ, སུཀྐསོཎིཏཾ, ཀརེན ཛཱཏོ ཀརཛོཏིཔི ཝདནྟི.

ནནུ ཙ ནཱམཀཱཡོཔི ཝིཝེཀཛེན པཱིཏིསུཁེན ཏཐཱ ལདྡྷཱུཔཀཱརོཝ སིཡཱ, ཨཐ ཀསྨཱ ཡཐཱཝུཏྟོ རཱུཔཀཱཡོཝ ཨིདྷ གཧིཏོཏི? སདྡནྟརཱབྷིསམྦནྡྷེན ཨདྷིགཏཏྟཱ. ‘‘ཨབྷིསནྡེཏཱི’’ཏིཨཱདིསདྡནྟརཱབྷིསམྦནྡྷཏོ ཧི རཱུཔཀཱཡོ ¶ ཨེཝ ཨིདྷ བྷགཝཏཱ ཝུཏྟོཏི ཨདྷིགམཱིཡཏི ཏསྶེཝ ཨབྷིསནྡནཱདིཀིརིཡཱཡོགྱཏྟཱཏི. ཨབྷིསནྡེཏཱིཏི ཨབྷིསནྡནཾ ཀརོཏི, སོ ¶ ཨིམམེཝ ཀཱཡཾ ཝིཝེཀཛེན པཱིཏིསུཁེནཱཏི ཧི བྷེདཝསེན, སམུདཱཡཱཝཡཝཝསེན ཙ པརིཀཔྤནཱམཏྟསིདྡྷཱ ཧེཏུཀིརིཡཱ ཨེཏྠ ལབྦྷཏི, ཨབྷིསནྡནཾ པནེཏཾ ཛྷཱནམཡེན པཱིཏིསུཁེན ཀརཛཀཱཡསྶ ཏིནྟབྷཱཝཱཔཱདནཾ, སབྦཏྠཀམེཝ ཙ ལཱུཁབྷཱཝསྶཱཔནཡནནྟི ཨཱཧ ‘‘ཏེམེཏི སྣེཧེཏཱི’’ཏི, ཨཝསྶུཏབྷཱཝཾ, ཨལླབྷཱཝཉྩ ཀརོཏཱིཏི ཨཏྠོ. ཨཏྠཏོ པན ཨབྷིསནྡནཾ ནཱམ ཡཐཱཝུཏྟཔཱིཏིསུཁསམུཊྛཱནེཧི པཎཱིཏརཱུཔེཧི ཀཱཡསྶ པརིཔྥརཎཾ དཊྛབྦཾ. ཏེནེཝཱཧ ‘‘སབྦཏྠ པཝཏྟཔཱིཏི སུཁཾ ཀརོཏཱི’’ཏི. ཏཾསམུཊྛཱནརཱུཔཕརཎཝསེནེཝ ཧི སབྦཏྠ པཝཏྟཔཱིཏིསུཁཏཱ. པརིསནྡེཏཱིཏིཨཱདཱིསུཔི ཨེསེཝ ནཡོ. བྷསྟཾ ནཱམ ཙམྨཔསིབྦཀཾ. པརིཔྥརཏཱིཏི སུདྡྷཀིརིཡཱཔདཾ. ཏེན ཝུཏྟཾ ‘‘སམནྟཏོ ཕུསཏཱི’’ཏི, སོ ཨིམམེཝ ཀཱཡཾ ཝིཝེཀཛེན པཱིཏིསུཁེན སམནྟཏོ ཕུཊྛོ བྷཝཏཱིཏི ཨཏྠོ. ཕུསནཀིརིཡཱཡེཝེཏྠ ཨུཔཔནྣཱ, ན བྱཱཔནཀིརིཡཱ བྷིཀྑུསྶེཝ སུདྡྷཀཏྟུབྷཱཝཏོ. སབྦཾ ཨེཏསྶ ཨཏྠཱིཏི སབྦཝཱ ཡཐཱ ‘‘གུཎཝཱ’’ཏི, ཏསྶ སབྦཝཏོ, ‘‘ཨཝཡཝཱཝཡཝཱིསམྦནྡྷེ ཨཝཡཝིནི སཱམིཝཙན’’ནྟི སདྡལཀྑཎེན པནེཏསྶ ‘‘ཀིཉྩཱི’’ཏི ཨཝཡཝེན སམྦཛ྄ཛྷནཏོ ཨཝཡཝཱིཝིསཡོཡེཝེས སབྦསདྡོཏི མནྟྭཱ ཚཝིམཾསཱདིཀོཊྛཱསསངྑཱཏེན ཨཝཡཝེན ཨཝཡཝཱིབྷཱཝཾ དསྶེནྟོ ཨཱཧ ‘‘སབྦཀོཊྛཱསཝཏོ ཀཱཡསྶཱ’’ཏི. ‘‘ཀིཉྩཱི’’ཏི ཨེཏསྶ ‘‘ཨུཔཱ…པེ… ཋཱན’’ནྟི ཨཏྠཝཙནཾ. ཨུཔཱདིནྣཀསནྟཏིཔཝཏྟིཊྛཱནེཏི ཀམྨཛརཱུཔསནྟཏིཡཱ པཝཏྟིཊྛཱནེ ཨཕུཊཾ ནཱམ ན ཧོཏཱིཏི སམྦནྡྷོ. ཚཝིམཾསལོཧིཏཱནུགཏནྟི ཚཝིམཾསལོཧིཏཱདིཀམྨཛརཱུཔམནུགཏཾ. ཡཏྠ ཡཏྠ ཀམྨཛརཱུཔཾ, ཏཏྠ ཏཏྠ ཙིཏྟཛརཱུཔསྶཱཔི བྱཱཔནཏོ ཏེན ཏསྶ ཀཱཡསྶ ཕུཊབྷཱཝཾ སནྡྷཱཡ ‘‘ཨཕུཊཾ ནཱམ ན ཧོཏཱི’’ཏི ཝུཏྟཾ.

༢༢༧. ཚེཀོཏི ཀུསལོ, ཏཾ པན ཀོསལླཾ ‘‘ཀཾསཐཱལེ ནྷཱནིཡཙུཎྞཱནི ཨཱཀིརིཏྭཱ’’ཏིཨཱདིསདྡནྟརསནྣིདྷཱནཏོ, པཀརཎཏོ ཙ ནྷཱནིཡཙུཎྞཱནཾ ཀརཎེ, པཡོཛནེ, པིཎྜནེ ཙ སམཏྠཏཱཝསེན ཝེདིཏབྦནྟི དསྶེཏི ‘‘པཊིབལོ’’ཏིཨཱདིནཱ. ཀཾསསདྡོ པན ‘‘མཧཏིཡཱ ཀཾསཔཱཏིཡཱ’’ཏིཨཱདཱིསུ ¶ (མ. ནི. ༡.༦༡) སུཝཎྞེ ཨཱགཏོ, ‘‘ཀཾསོ ཨུཔཧཏོ ཡཐཱ’’ཏིཨཱདཱིསུ (དྷ. པ. ༡༣༤) ཀིཏྟིམལོཧེ, ‘‘ཨུཔཀཾསོ ནཱམ རཱཛཱ མཧཱཀཾསསྶ ཨཏྲཛོ’’ཏིཨཱདཱིསུ [ཛཱ. ཨཊྛ. ༤.༡༠.༡༦༤ (ཨཏྠཏོ སམཱནཾ)] པཎྞཏྟིམཏྟེ. ཨིདྷ པན ཡཏྠ ཀཏྠཙི ལོཧེཏི ཨཱཧ ‘‘ཡེན ཀེནཙི ལོཧེན ཀཏབྷཱཛནེ’’ཏི. ནནུ ཨུཔམཱཀརཎམཏྟམེཝིདཾ, ཨཐ ཀསྨཱ ཀཾསཐཱལཀསྶ སཝིསེསསྶ གཧཎཾ ཀཏནྟི ཨནུཡོགཾ པརིཧརཏི ‘‘མཏྟིཀཱབྷཱཛན’’ནྟིཨཱདིནཱ. ‘‘སནྡེནྟསྶཱ’’ཏི པརིམདྡེཏྭཱ པིཎྜཾ ཀརོནྟསྶེཝ བྷིཛྫཏི, ན པན སནྡནཀྑམཾ ཧོཏི, ཨནཱདརལཀྑཎེ ཙེཏཾ སཱམིཝཙནཾ. ཀིརིཡནྟརསྶ པཝཏྟནཀྑཎེཡེཝ ཀིརིཡནྟརསྶ པཝཏྟནཉྷི ཨནཱདརལཀྑཎཾ. ‘‘པརིཔྥོསཀཾ པརིཔྥོསཀ’’ནྟི ཨིདཾ བྷཱཝནཔུཾསཀནྟི ¶ དསྶེཏི ‘‘སིཉྩིཏྭཱ སིཉྩིཏྭཱ’’ཏི ཨིམིནཱ. ཕུསསདྡོ ཙེཏྠ པརིསིཉྩནེ ཡཐཱ ཏཾ ཝཱཏཝུཊྛིསམཡེ ‘‘དེཝོ ཙ ཐོཀཾ ཐོཀཾ ཕུསཱཡཏཱི’’ཏི, (པཱཙི. ༣༦༢) ཏསྨཱ ཏཏོ ཏཏོ ནྷཱནིཡཙུཎྞཏོ ཨུཔརི ཨུདཀེན བྱཱཔནཀརཎཝསེན པརིསིཉྩིཏྭཱ པརིསིཉྩིཏྭཱཏི ཨཏྠོ. ཨནུཔསགྒོཔི ཧི སདྡོ སཨུཔསགྒོ ཝིཡ པཀརཎཱདྷིགཏསྶ ཨཏྠསྶ དཱིཔཀོ, ‘‘སིཉྩིཏྭཱ སིཉྩིཏྭཱ’’ཏི པན ཝཙནཾ ‘‘པརིཔྥོསཀཾ པརིཔྥོསཀ’’ནྟི ཨེཏསྶ ‘‘སནྡེཡྻཱ’’ཏི ཨེཏྠ ཝིསེསནབྷཱཝཝིཉྙཱཔནཏྠཾ. ཨེཝམཱིདིསེསུ. ‘‘སནྡེཡྻཱ’’ཏི ཨེཏྠ སནྡ-སདྡོ པིཎྜཀརཎེཏི ཝུཏྟཾ ‘‘པིཎྜཾ ཀརེཡྻཱ’’ཏི. ཨནུགཏཱཏི ཨནུཔཝིསནཝསེན གཏཱ ཨུཔགཏཱ. པརིགྒཧིཏཱཏི པརིཏོ གཧིཏཱ སམནྟཏོ ཕུཊྛཱ.

ཨནྟརོ ཙ བཱཧིརོ ཙ པདེསོ, ཏེཧི སཧ པཝཏྟཏཱིཏི སནྟརབཱཧིརཱ, ནྷཱནིཡཔིཎྜི, ‘‘སམནྟརབཱཧིརཱ’’ཏིཔི པཱཋོ, མ-ཀཱརོ པདསནྡྷིཝསེན ཨཱགམོ. ཡཐཱཝུཏྟེན པརིགྒཧིཏཏཱཀཱརཎེནེཝ སནྟརབཱཧིརོ ནྷཱནིཡཔིཎྜི ཕུཊཱ ཨུདཀསྣེཧེནཱཏི ཨཱཧ ‘‘སབྦཏྠཀམེཝ ཨུདཀསིནེཧེན ཕུཊཱ’’ཏི. སབྦཏྠ པཝཏྟནཾ སབྦཏྠཀཾ, བྷཱཝནཔུཾསཀཉྩེཏཾ, སབྦཔདེསེ ཧུཏྭཱ ཨེཝ ཕུཊཱཏི ཨཏྠོ. ‘‘སནྟརབཱཧིརཱ ཕུཊཱ’’ཏི ཙ ཨིམིནཱ ནྷཱནིཡཔིཎྜིཡཱ སབྦསོ ཨུདཀེན ཏེམིཏབྷཱཝམཱཧ, ‘‘ན ཙ པགྒྷརཎཱི’’ཏི པན ཨིམིནཱ ཏིནྟཱཡཔི ཏཱཡ གྷནཐདྡྷབྷཱཝཾ. ཏེནཱཧ ‘‘ན ཙ བིནྡུཾ བིནྡུ’’ནྟིཨཱདི. ཨུདཀསྶ ཕུསིཏཾ ཕུསིཏཾ, ¶ ན ཙ པགྒྷརཎཱི སཱུདནཱིཏི ཨཏྠོ, ‘‘བིནྡུཾ ཨུདཀཾ’’ ཏིཔི ཀཏྠཙི པཱཋོ, ཨུདཀསངྑཱཏཾ བིནྡུནྟི ཏསྶཏྠོ. བིནྡུསདྡོ ཧི ‘‘བྱཱལམྦམྦུདྷརབིནྡཱུ’’ཏིཨཱདཱིསུ ཝིཡ དྷཱརཱཝཡཝེ. ཨེཝཾ པན ཨཔགྒྷརཎཏོ ཧཏྠེནཔི དྭཱིཧིཔི ཏཱིཧིཔི ཨངྒུལེཧི གཧེཏུཾ, ཨོཝཊྚིཀཱཡ ཝཱ ཀཱཏུཾ སཀྐཱ. ཡདི ཧི སཱ པགྒྷརཎཱི ཨསྶ, ཨེཝཾ སཏི སྣེཧཝིགམནེན སུཀྑཏྟཱ ཐདྡྷཱ ཧུཏྭཱ ཏཐཱ གཧེཏུཾ, ཀཱཏུཾ ཝཱ ན སཀྐཱཏི ཝུཏྟཾ ཧོཏི. ཨོཝཊྚིཀཱཡཱཏི པརིཝཊྚུལཝསེན, གུལི༹ཀཱཝསེན སཱ པིཎྜི ཀཱཏུཾ སཀྐཱཏི ཨཏྠོ.

དུཏིཡཛ྄ཛྷཱནཀཐཱཝཎྞནཱ

༢༢༩. ཏཱཧི ཏཱཧི ཨུདཀསིརཱཧི ཨུབྦྷིཛྫཏི ཨུདྡྷཾ ནིཀྑམཏཱིཏི ཨུབྦྷིདཾ, ཏཱདིསཾ ཨུདཀཾ ཡསྶཱཏི ཨུབྦྷིདོདཀོ, ད-ཀཱརསྶ པན ཏ-ཀཱརེ ཀཏེ ཨུབྦྷིཏོདཀོ, ཨིམམཏྠཾ དསྶེཏུཾ ‘‘ཨུབྦྷིནྣཨུདཀོ’’ཏི ཝུཏྟཾ, ནདཱིཏཱིརེ ཁཏཀཱུཔཀོ ཝིཡ ཨུབྦྷིཛྫནཀཨུདཀོཏི ཨཏྠོ. ཨུབྦྷིཛྫནཀམྤི ཨུདཀཾ ཀཏྠཙི ཧེཊྛཱ ཨུབྦྷིཛྫིཏྭཱ དྷཱརཱཝསེན ཨུཊྛཧིཏྭཱ བཧི གཙྪཏི, ན ཏཾ ཀོཙི ཨནྟོཡེཝ པཏིཊྛིཏཾ ཀཱཏུཾ སཀྐོཏི དྷཱརཱཝསེན ཨུཊྛཧནཏོ, ཨིདྷ པན ཝཱལིཀཱཏཊེ ཝིཡ ཨུདཀརཧདསྶ ཨནྟོཡེཝ ཨུབྦྷིཛྫིཏྭཱ ཏཏྠེཝ ཏིཊྛཏི, ན དྷཱརཱཝསེན ཨུཊྛཧིཏྭཱ བཧི གཙྪཏཱིཏི ¶ ཝིཉྙཱཡཏི ཨཁོབྷཀསྶ སནྣིསིནྣསྶེཝ ཨུདཀསྶ ཨདྷིཔྤེཏཏྟཱཏི ཨིམམཏྠཾ སནྡྷཱཡཱཧ ‘‘ན ཧེཊྛཱ’’ཏིཨཱདི. ཧེཊྛཱཏི ཨུདཀརཧདསྶ ཧེཊྛཱ མཧཱཨུདཀསིརཱ, ལོཧིཏཱནུགཏཱ ལོཧིཏསིརཱ ཝིཡ ཨུདཀཱནུགཏོ པཐཝིཔདེསོ ‘‘ཨུདཀསིརཱ’’ཏི ཝུཙྩཏི. ཨུགྒཙྪནཀཨུདཀོཏི དྷཱརཱཝསེན ཨུཊྛཧནཀཨུདཀོ. ཨནྟོཡེཝཱཏི ཨུདཀརཧདསྶ ཨནྟོ སམཏལཔདེསེ ཨེཝ. ཨུབྦྷིཛྫནཀཨུདཀོཏི ཨུབྦྷིཛྫིཏྭཱ ཏཏྠེཝ ཏིཊྛནཀཨུདཀོ. ཨཱགམནམགྒོཏི བཱཧིརཏོ ཨུདཀརཧདཱབྷིམུཁཾ ཨཱགམནམགྒོ. ཀཱལེན ཀཱལནྟི རུལ༹ྷཱིཔདཾ ‘‘ཨེཀོ ཨེཀཱཡཱ’’ཏིཨཱདི (པཱརཱ. ༤༤༣, ༤༤༤, ༤༥༢) ཝིཡཱཏི ཝུཏྟཾ ‘‘ཀཱལེ ཀཱལེ’’ཏི. ཨནྭདྡྷམཱསནྟི ཨེཏྠ ཨནུསདྡོ བྱཱཔནེ. ཝསྶཱནསྶ ཨདྡྷམཱསཾ ཨདྡྷམཱསནྟི ཨཏྠོ. ཨེཝཾ ཨནུདསཱཧནྟི ཨེཏྠཱཔི. ཝུཊྛིནྟི ཝསྶནཾ. ཨནུཔྤཝཙྪེཡྻཱཏི ན ཨུཔཝཙྪེཡྻ. ཝསྶསདྡཏོ ཙསྶ སིདྡྷཱིཏི དསྶེཏི ‘‘ན ཝསྶེཡྻཱ’’ཏི ཨིམིནཱ.

‘‘སཱིཏཱ ¶ ཝཱརིདྷཱརཱ’’ཏི ཨིཏྠིལིངྒཔདསྶ ‘‘སཱིཏཾ དྷཱར’’ནྟི ནཔུཾསཀལིངྒེན ཨཏྠཝཙནཾ དྷཱརསདྡསྶ དྭིལིངྒིཀབྷཱཝཝིཉྙཱཔནཏྠཾ. སཱིཏནྟི ཁོབྷནཱབྷཱཝེན སཱིཏལཾ, པུརཱཎཔཎྞཏིཎཀཊྛཱདིསཾཀིཎྞཱབྷཱཝེན ཝཱ སེཏཾ པརིསུདྡྷཾ. སེཏཾ སཱིཏནྟི ཧི པརིཡཱཡོ. ཀསྨཱ པནེཏྠ ཨུབྦྷིདོདཀོཡེཝ རཧདོ གཧིཏོ, ན ཨིཏརེཏི ཨནུཡོགམཔནེཏི ‘‘ཧེཊྛཱ ཨུགྒཙྪནཨུདཀཉྷཱི’’ཏིཨཱདིནཱ. ཨུགྒནྟྭཱ ཨུགྒནྟྭཱ བྷིཛྫནྟནྟི ཨུཊྛཧིཏྭཱ ཨུཊྛཧིཏྭཱ དྷཱརཱཀིརཎཝསེན ཨུབྦྷིཛྫནྟཾ, ཝིནསྶནྟཾ ཝཱ. ཁོབྷེཏཱིཏི ཨཱལོལེ༹ཏི. ཝུཊྛཱིཏི ཝསྶནཾ. དྷཱརཱནིཔཱཏཔུབྦུལ༹ཀེཧཱིཏི ཨུདཀདྷཱརཱནིཔཱཏེཧི ཙ ཏཏོཡེཝ ཨུཊྛིཏཨུདཀཔུབྦུལ༹ཀསངྑཱཏེཧི ཕེཎཔཊལེཧི ཙ. ཨེཝཾ ཡཐཱཀྐམཾ ཏིཎྞམྤི རཧདཱནམགཧེཏབྦཏཾ ཝཏྭཱ ཨུབྦྷིདོདཀསྶེཝ གཧེཏབྦཏཾ ཝདཏི ‘‘སནྣིསིནྣམེཝཱ’’ཏིཨཱདིནཱ. ཏཏྠ སནྣིསིནྣམེཝཱཏི སམྨཱ, སམཾ ཝཱ ནིསིནྣམེཝ, ཨཔརིཀྑོབྷཏཱཡ ནིཙྩལམེཝ, སུཔྤསནྣམེཝཱཏི ཨདྷིཔྤཱཡོ. ཨིདྡྷིནིམྨིཏམིཝཱཏི ཨིདྡྷིམཏཱ ཨིདྡྷིཡཱ ཏཐཱ ནིམྨིཏཾ ཨིཝ. ཏཏྠཱཏི ཏསྨིཾ ཨུཔམོཔམེཡྻཝཙནེ. སེསནྟི ‘‘ཨབྷིསནྡེཏཱི’’ཏིཨཱདིཀཾ.

ཏཏིཡཛ྄ཛྷཱནཀཐཱཝཎྞནཱ

༢༣༡. ‘‘ཨུཔྤལིནཱི’’ཏིཨཱདི གཙྪསྶཔི ཝནསྶཔི ཨདྷིཝཙནཾ. ཨིདྷ པན ‘‘ཡཱཝ ཨགྒཱ, ཡཱཝ ཙ མཱུལཱ’’ཏི ཝཙནཡོགེན ‘‘ཨཔྤེཀཙྩཱནཱི’’ཏིཨཱདིནཱ ཨུཔྤལགཙྪཱདཱིནམེཝ གཧེཏབྦཏཱཡ ཝནམེཝཱདྷིཔྤེཏཾ, ཏསྨཱ ‘‘ཨུཔྤལཱནཱིཏི ཨུཔྤལགཙྪཱནི. ཨེཏྠཱཏི ཨུཔྤལཝནེ’’ཏིཨཱདིནཱ ཨཏྠོ ཝེདིཏབྦོ. ཨཝཡཝེན ཧི སམུདཱཡསྶ ནིབྦཙནཾ ཀཏཾ. ཨེཀཉྷི ཨུཔྤལགཙྪཱདི ¶ ཨུཔྤལཱདིཡེཝ, ཙཏུཔཉྩམཏྟམྤི པན ཨུཔྤལཱདིཝནནྟི ཝོཧརཱིཡཏི, སཱརཏྠདཱིཔནིཡཾ པན ཛལཱསཡོཔི ཨུཔྤལིནིཨཱདིབྷཱཝེན ཝུཏྟོ. ཨེཏྠ ཙཱཏི ཨེཏསྨིཾ པདཏྟཡེ, ཨེཏེསུ ཝཱ ཏཱིསུ ཨུཔྤལཔདུམཔུཎྜརཱིཀསངྑཱཏེསུ ཨཏྠེསུ. ‘‘སེཏརཏྟནཱིལེསཱུ’’ཏི ཨུཔྤལམེཝ ཝུཏྟཾ, སེཏུཔྤལརཏྟུཔྤལནཱིལུཔྤལེསཱུཏི ཨཏྠོ. ཡཾ ཀིཉྩི ཨུཔྤལཾ ཨུཔྤལམེཝ ཨུཔྤལསདྡསྶ སཱམཉྙནཱམཝསེན ཏེསུ སབྦེསུཔི པཝཏྟནཏོ. སཏཔཏྟནྟི ཨེཏྠ སཏསདྡོ བཧུཔརིཡཱཡོ ‘‘སཏགྒྷཱི སཏརཾསི སཱུརིཡོ’’ཏིཨཱདཱིསུ ཝིཡ ཨནེཀསངྑྱཱབྷཱཝཏོ. ཨེཝཉྩ ཀཏྭཱ ཨནེཀཔཏྟསྶཱཔི པདུམབྷཱཝེ སངྒཧོ སིདྡྷོ ཧོཏི. པཏྟནྟི ཙ པུཔྥདལམདྷིཔྤེཏཾ. ཝཎྞནིཡམེན སེཏཾ པདུམཾ, རཏྟཾ ¶ པུཎྜརཱིཀནྟི སཱསནཝོཧཱརོ, ལོཀེ པན ‘‘རཏྟཾ པདུམཾ, སེཏཾ པུཎྜརཱིཀ’’ནྟི ཝདནྟི. ཝུཏྟཉྷི ‘‘པུཎྜརཱིཀཾ སིཏཾ རཏྟཾ, ཀོཀནདཾ ཀོཀཱསཀོ’’ཏི. རཏྟཝཎྞཏཱཡ ཧི ཀོཀནཱམཀཱནཾ སུནཁཱནཾ ནཱདཡཏོ སདྡཱཔཡཏོ, ཏེཧི ཙ ཨསིཏབྦཏོ ‘‘ཀོཀནདཾ, ཀོཀཱསཀོ’’ཏི ཙ པདུམཾ ཝུཙྩཏི. ཡཐཱཧ ‘‘པདྨཾ ཡཐཱ ཀོཀནདཾ སུགནྡྷ’’ནྟི. ཨཡཾ པནེཏྠ ཝཙནཏྠོ ཨུདཀཾ པཱཏི, ཨུདཀེ ཝཱ པླཝཏཱིཏི ཨུཔྤལཾ. པངྐེ དཝཏི གཙྪཏི, པཀཱརེན ཝཱ དཝཏི ཝིརུཧཏཱིཏི པདུམཾ. པཎྜརཾ ཝཎྞམསྶ, མཧནྟཏཱཡ ཝཱ མུཌིཏབྦཾཁཎྜེཏབྦནྟི པུཎྜརཱིཀཾ མ-ཀཱརསྶ པ-ཀཱརཱདིཝསེན. མུཌིསདྡཉྷི མུཌརིསདྡཾ ཝཱ ཁཎྜནཏྠམིཙྪནྟི སདྡཝིདཱུ, སདྡསཏྠཏོ ཙེཏྠ པདསིདྡྷི. ཡཱཝ ཨགྒཱ, ཡཱཝ ཙ མཱུལཱ ཨུདཀེན ཨབྷིསནྡནཱདིབྷཱཝདསྶནཏྠཾ པཱལི༹ཡཾ ‘‘ཨུདཀཱནུགྒཏཱནཱི’’ཏི ཝཙནཾ, ཏསྨཱ ཨུདཀཏོ ན ཨུགྒཏཱནིཙྩེཝ ཨཏྠོ, ན ཏུ ཨུདཀེ ཨནུརཱུཔགཏཱནཱིཏི ཨཱཧ ‘‘ཨུདཀཱ…པེ… གཏཱནཱི’’ཏི. ཨིདྷ པན ཨུཔྤལཱདཱིནི ཝིཡ ཀརཛཀཱཡོ, ཨུདཀཾ ཝིཡ ཏཏིཡཛ྄ཛྷཱནསུཁཾ དཊྛབྦཾ.

ཙཏུཏྠཛ྄ཛྷཱནཀཐཱཝཎྞནཱ

༢༣༣. ཡསྨཱ པན ཙཏུཏྠཛ྄ཛྷཱནཙིཏྟམེཝ ‘‘ཙེཏསཱ’’ཏི ཝུཏྟཾ, ཏཉྩ རཱགཱདིཨུཔཀྐིལེསམལཱཔགམཏོ ནིརུཔཀྐིལེསཾ ནིམྨལཾ, ཏསྨཱ ཨུཔཀྐིལེསཝིགམནམེཝ པརིསུདྡྷབྷཱཝོཏི ཨཱཧ ‘‘ནིརུཔཀྐིལེསཊྛེན པརིསུདྡྷ’’ནྟི. ཡསྨཱ ཙ པརིསུདྡྷསྶེཝ པཙྩཡཝིསེསེན པཝཏྟིཝིསེསོ པརིཡོདཱཏཏཱ སུདྡྷནྟསུཝཎྞསྶ ནིགྷཾསནེན པབྷསྶརཏཱ ཝིཡ, ཏསྨཱ པབྷསྶརཏཱཡེཝ པརིཡོདཱཏཏཱཏི ཨཱཧ ‘‘པབྷསྶརཊྛེན པརིཡོདཱཏ’’ནྟི. ཝིཛྫུ ཝིཡ པབྷཱཡ ཨིཏོ ཙིཏོ ཙ ནིཙྪརཎཾ པབྷསྶརཾ ཡཐཱ ‘‘ཨཱབྷསྶརཱ’’ཏི. ཨོདཱཏེན ཝཏྠེནཱཏི ཨེཏྠ ‘‘ཨོདཱཏེནཱ’’ཏི གུཎཝཙནཾ སནྡྷཱཡ ‘‘ཨོདཱཏེན…པེ… ཨིད’’ནྟི ཝུཏྟཾ. ཨུཏུཕརཎཏྠནྟི ཨུཎྷསྶ ཨུཏུནོ ཕརཎདསྶནཏྠཾ. ཀསྨཱཏི ཨཱཧ ‘‘ཀིལིཊྛཝཏྠེནཱ’’ཏིཨཱདི. ཨུཏུཕརཎཾ ན ཧོཏཱིཏི ཨོདཱཏཝཏྠེན ཝིཡ སཝིསེསཾ ཨུཏུཕརཎཾ ན ཧོཏི, ཨཔྤཀམཏྟམེཝ ཧོཏཱིཏི ཨདྷིཔྤཱཡོ ¶ . ཏེནཱཧ ‘‘ཏངྑཎ…པེ… བལཝཾ ཧོཏཱི’’ཏི. ‘‘ཏངྑཎདྷོཏཔརིསུདྡྷེནཱ’’ཏི ཙ ཨེཏེན ཨོདཱཏསདྡོ ཨེཏྠ པརིསུདྡྷཝཙནོ ཨེཝ ‘‘གིཧཱི ཨོདཱཏཝཏྠཝསནོ’’ཏིཨཱདཱིསུ ཝིཡ ¶ , ན སེཏཝཙནོ ཡེན ཀེནཙི ཏངྑཎདྷོཏཔརིསུདྡྷེནེཝ ཨུཏུཕརཎསམྦྷཝཏོཏི དསྶེཏི.

ནནུ ཙ པཱལི༹ཡཾ ‘‘ནཱསྶ ཀིཉྩི སབྦཱཝཏོ ཀཱཡསྶ ཨོདཱཏེན ཝཏྠེན ཨཕུཊཾ ཨསྶཱ’’ཏི ཀཱཡསྶ ཨོདཱཏཝཏྠཕརཎཾ ཝུཏྟཾ, ན པན ཝཏྠསྶ ཨུཏུཕརཎཾ, ཨཐ ཀསྨཱ ཨུཏུཕརཎཾ ཨིདྷ ཝུཏྟནྟི ཨནུཡོགེནཱཧ ‘‘ཨིམིསྶཱཡ ཧཱི’’ཏིཨཱདི. ཡསྨཱ ཝཏྠཾ ཝིཡ ཀརཛཀཱཡོ, ཨུཏུཕརཎཾ ཝིཡ ཙཏུཏྠཛ྄ཛྷཱནསུཁཾ, ཏསྨཱ ཨེཝམཏྠོ ཝེདིཏབྦོཏི ཝུཏྟཾ ཧོཏི, ཨེཏེན ཙ ཨོདཱཏེན ཝཏྠེན སབྦཱཝཏོ ཀཱཡསྶ ཕརཎཱསམྦྷཝཏོ, ཨུཔམེཡྻེན ཙ ཨཡུཏྟཏྟཱ ཀཱཡགྒཧཎེན ཏནྣིསྶིཏཝཏྠཾ གཧེཏབྦཾ, ཝཏྠགྒཧཎེན ཙ ཏཔྤཙྩཡཾ ཨུཏུཕརཎནྟི དསྶེཏི. ནེཡྻཏྠཏོ ཧི ཨཡཾ ཨུཔམཱ ཝུཏྟཱ. ཝིཙིཏྲདེསནཱ ཧི བུདྡྷཱ བྷགཝནྟོཏི. ཡོགིནོ ཧི ཀརཛཀཱཡོ ཝཏྠཾ ཝིཡ དཊྛབྦོ ཨུཏུཕརཎསདིསེན ཙཏུཏྠཛ྄ཛྷཱནསུཁེན ཕརིཏབྦཏྟཱ, ཨུཏུཕརཎཾ ཝིཡ ཙཏུཏྠཛ྄ཛྷཱནསུཁཾ ཝཏྠསྶ ཝིཡ ཏེན ཀརཛཀཱཡསྶ ཕརཎཏོ, པུརིསསྶ སརཱིརཾ ཝིཡ ཙཏུཏྠཛ྄ཛྷཱནཾ ཨུཏུཕརཎཊྛཱནིཡསྶ སུཁསྶ ནིསྶཡབྷཱཝཏོ. ཏེནཱཧ ‘‘ཏསྨཱ’’ཏིཨཱདི. ཨིདཉྷི ཡཐཱཝུཏྟཝཙནསྶ གུཎདསྶནཾ. ཨེཏྠ ཙ པཱལི༹ཡཾ ‘‘པརིསུདྡྷེན ཙེཏསཱ’’ཏི ཙེཏོགཧཎེན ཙཏུཏྠཛ྄ཛྷཱནསུཁཾ བྷགཝཏཱ ཝུཏྟནྟི ཉཱཔེཏུཾ ‘‘ཙཏུཏྠཛ྄ཛྷཱནསུཁཾ, ཙཏུཏྠཛ྄ཛྷཱནསུཁེནཱ’’ཏི ཙ ཝུཏྟནྟི དཊྛབྦཾ. ནནུ ཙ ཙཏུཏྠཛ྄ཛྷཱནསུཁཾ ནཱམ སཱཏལཀྑཎཾ ནཏྠཱིཏི? སཙྩཾ, སནྟསབྷཱཝཏྟཱ པནེཏྠ ཨུཔེཀྑཱཡེཝ ‘‘སུཁ’’ནྟི ཨདྷིཔྤེཏཱ. ཏེན ཝུཏྟཾ སམྨོཧཝིནོདནིཡཾ ‘‘ཨུཔེཀྑཱ པན སནྟཏྟཱ, སུཁམིཙྩེཝ བྷཱསིཏཱ’’ཏི (ཝིབྷ. ཨཊྛ. ༢༣༢; ཝིསུདྡྷི. ༢.༦༤༤; མཧཱནི. ཨཊྛ. ༢༧; པཊི. མ. ཨཊྛ. ༡.༡༠༥).

ཨེཏྟཱཝཏཱཏི པཋམཛ྄ཛྷཱནཱདྷིགམཔརིདཱིཔནཏོ པཊྛཱཡ ཡཱཝ ཙཏུཏྠཛ྄ཛྷཱནཱདྷིགམཔརིདཱིཔནཱ, ཏཱཝཏཱ ཝཙནཀྐམེན. ལབྷནཾ ལཱབྷོ, སོ ཨེཏསྶཱཏི ལཱབྷཱི, རཱུཔཛ྄ཛྷཱནཱནཾ ལཱབྷཱི རཱུཔཛ྄ཛྷཱནལཱབྷཱི ཡཐཱ ‘‘ལཱབྷཱི ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱན’’ནྟི, (སཾ. ནི. ༢.༧༠; ཨུདཱ. ༣༨) ལབྷནསཱིལོ ཝཱ ལཱབྷཱི. ཀིཾ ལབྷནསཱིལོ? རཱུཔཛ྄ཛྷཱནཱནཱིཏིཔི ཡུཛྫཏི. ཨེཝམིཏརསྨིམྤི. ན ཨརཱུཔཛ྄ཛྷཱནལཱབྷཱིཏི ན ཝེདིཏབྦོཏི ཡོཛེཏབྦཾ. ཀསྨཱཏི ཝུཏྟཾ ‘‘ན ཧཱི’’ཏིཨཱདི, ཨཊྛནྣམྤི སམཱཔཏྟཱིནཾ ཨུཔརི ཨབྷིཉྙཱདྷིགམེ ཨཝིནཱབྷཱཝཏོཏི ¶ ཝུཏྟཾ ཧོཏི. ཙུདྡསཧཱཀཱརེཧཱིཏི ‘‘ཀསིཎཱནུལོམཏོ, ཀསིཎཔཊིལོམཏོ ཀསིཎཱནུལོམཔཊིལོམཏོ, ཛྷཱནཱནུལོམཏོ, ཛྷཱནཔཊིལོམཏོ, ཛྷཱནཱནུལོམཔཊིལོམཏོ, ཛྷཱནུཀྐནྟིཀཏོ, ཀསིཎུཀྐནྟིཀཏོ, ཛྷཱནཀསིཎུཀྐནྟིཀཏོ, ཨངྒསངྐནྟིཏོ, ཨཱརམྨཎསངྐནྟིཏོ ¶ , ཨངྒཱརམྨཎསངྐནྟིཏོ ཨངྒཝཝཏྠཱནཏོ, ཨཱརམྨཎཝཝཏྠཱནཏོ’’ཏི (ཝིསུདྡྷི. ༢.༣༦༥) ཝིསུདྡྷིམགྒེ ཝུཏྟེཧི ཨིམེཧི ཙུདྡསཧཱཀཱརེཧི. སཏིཔི ཛྷཱནེསུ ཨཱཝཛྫནཱདིཔཉྩཝིདྷཝསཱིབྷཱཝེ ཨཡམེཝ ཙུདྡསཝིདྷོ ཝསཱིབྷཱཝོ ཨབྷིཉྙཱ ནིབྦཏྟནེ ཨེཀནྟེན ཨིཙྪིཏབྦོཏི དསྶེནྟེན ‘‘ཙུདྡསཧཱཀཱརེཧི ཙིཎྞཝསཱིབྷཱཝ’’ནྟི ཝུཏྟཾ, ཨིམིནཱ ཙ ཨརཱུཔསམཱཔཏྟཱིསུ ཙིཎྞཝསཱིབྷཱཝཾ ཝིནཱ རཱུཔསམཱཔཏྟཱིསུ ཨེཝ ཙིཎྞཝསཱིབྷཱཝེན སམཱཔཏྟི ན ཨིཛ྄ཛྷཏཱིཏི ཏཱསཾ ཨབྷིཉྙཱདྷིགམེ ཨཝིནཱབྷཱཝཾ དསྶེཏཱིཏི ཝེདིཏབྦཾ.

ནནུ ཡཐཱཔཱཋམེཝ ཝིནིཙྪཡོ ཝཏྟབྦོཏི ཙོདནཾ སོདྷེཏི ‘‘པཱལི༹ཡཾ པནཱ’’ཏིཨཱདིནཱ, སཱཝསེསཔཱཋབྷཱཝཏོ ནཱིཧརིཏྭཱ ཨེས ཝིནིཙྪཡོ ཝཏྟབྦོཏི ཝུཏྟཾ ཧོཏི. ཡཛྫེཝཾ ཨརཱུཔཛ྄ཛྷཱནཱནིཔི པཱལི༹ཡཾ གཧེཏབྦཱནི, ཨཐ ཀསྨཱ ཏཱནི ཨགྒཧེཏྭཱ སཱཝསེསཔཱཋོ བྷགཝཏཱ ཀཏོཏི? སབྦཱབྷིཉྙཱནཾ ཝིསེསཏོ རཱུཔཱཝཙརཙཏུཏྠཛ྄ཛྷཱནཔཱདཀཏྟཱ. སཏིཔི ཧི ཏཱསཾ ཏཐཱ ཨཝིནཱབྷཱཝེ ཝིསེསཏོ པནེཏཱ རཱུཔཱཝཙརཙཏུཏྠཛ྄ཛྷཱནཔཱདཀཱ, ཏསྨཱ ཏཱསཾ ཏཔྤཱདཀབྷཱཝཝིཉྙཱཔནཏྠཾ ཏཏྠེཝ ཋཏྭཱ དེསནཱ ཀཏཱ, ན པན ཨརཱུཔཱཝཙརཛ྄ཛྷཱནཱནཾ ཨིདྷ ཨནནུཔཡོགཏོ. ཏེནཱཧ ‘‘ཨརཱུཔཛ྄ཛྷཱནཱནི ཨཱཧརིཏྭཱ ཀཐེཏབྦཱནཱི’’ཏི.

ཝིཔསྶནཱཉཱཎཀཐཱཝཎྞནཱ

༢༣༤. ‘‘པུན ཙཔརཾ མཧཱརཱཛ (པཱལི༹ཡཾ ནཏྠི) བྷིཀྑཱུ’’ཏི ཝཏྭཱཔི ཀིམཏྠཾ དསྶེཏུཾ ‘‘སོ’’ཏི པདཾ པུན ཝུཏྟནྟི ཙོདནཱཡཱཧ ‘‘སོ…པེ… དསྶེཏཱི’’ཏི, ཡཐཱརུཏཝསེན, ནེཡྻཏྠཝསེན ཙ ཝུཏྟཱསུ ཨཊྛསུ སམཱཔཏྟཱིསུ ཙིཎྞཝསིཏཱཝིསིཊྛཾ བྷིཀྑུཾ དསྶེཏུཾ ཨེཝཾ ཝུཏྟནྟི ཨདྷིཔྤཱཡོ. སེསནྟི ‘‘སོ’’ཏི པདཏྠཏོ སེསཾ ‘‘ཨེཝཾ སམཱཧིཏེ’’ཏིཨཱདཱིསུ ཝཏྟབྦཾ སཱདྷིཔྤཱཡམཏྠཛཱཏཾ. ཉེཡྻཾ ཛཱནཱཏཱིཏི ཉཱཎཾ, ཏདེཝ པཙྩཀྑཾ ཀཏྭཱ པསྶཏཱིཏི དསྶནཾ, ཉཱཎམེཝ དསྶནཾ ན ཙཀྑཱདིཀནྟི ཉཱཎདསྶནཾ, པཉྩཝིདྷམྤི ཉཱཎཾ, ཏཡིདཾ པན ཉཱཎདསྶནཔདཾ ¶ སཱསནེ ཡེསུ ཉཱཎཝིསེསེསུ ནིརུལ༹ྷཾ, ཏཾ སབྦཾ ཨཏྠུདྡྷཱརཝསེན དསྶེནྟོ ‘‘ཉཱཎདསྶནནྟི མགྒཉཱཎམྤི ཝུཙྩཏཱི’’ཏིཨཱདིམཱཧ. ཉཱཎདསྶནཝིསུདྡྷཏྠནྟི ཉཱཎདསྶནསྶ ཝིསུདྡྷིཔཡོཛནཱཡ. ཕཱསུཝིཧཱརོཏི ཨརིཡཝིཧཱརབྷཱུཏོ སུཁཝིཧཱརོ. བྷགཝཏོཔཱིཏི ན ཀེཝལཾ དེཝཏཱརོཙནམེཝ, ཨཐ ཁོ ཏདཱ བྷགཝཏོཔི ཉཱཎདསྶནཾ ཨུདཔཱདཱིཏི ཨཏྠོ. སཏྟཱཧཾ ཀཱལངྐཏསྶ ཨསྶཱཏི སཏྟཱཧཀཱལངྐཏོ. ‘‘ཀཱལཱམོ’’ཏི གོཏྟཝསེན ཝུཏྟཾ. ཙེཏོཝིམུཏྟི [ཝིམུཏྟི (ཨཊྛཀཐཱཡཾ)] ནཱམ ཨརཧཏྟཕལསམཱཔཏྟི. ཡསྨཱ ཝིཔསྶནཱཉཱཎཾ ཉེཡྻསངྑཱཏེ ཏེབྷཱུམཀསངྑཱརེ ཨནིཙྩཱདིཏོ ¶ ཛཱནཱཏི, བྷངྒཱནུཔསྶནཏོ ཙ པཊྛཱཡ པཙྩཀྑཏོ ཏེ པསྶཏི, ཏསྨཱ ཡཐཱཝུཏྟཊྛེན ཉཱཎདསྶནཾ ནཱམ ཛཱཏནྟི དསྶེཏི ‘‘ཨིདྷ པནཱ’’ཏིཨཱདིནཱ.

ཨབྷིནཱིཧརཏཱིཏི ཝིཔསྶནཱབྷིམུཁཾ ཙིཏྟཾ ཏདཉྙཀརཎཱིཡཏོ ནཱིཧརིཏྭཱ ཧརཏཱིཏི ཨཡཾ སདྡཏོ ཨཏྠོ, ཨདྷིཔྤཱཡཏོ པན ཏཾ དསྶེཏུཾ ‘‘ཝིཔསྶནཱཉཱཎསྶཱ’’ཏིཨཱདི ཝུཏྟཾ. ཏདབྷིམུཁབྷཱཝོཡེཝ ཧིསྶ ཏནྣིནྣཏཱདིཀརཎཾ, ཏཾ པན ཝུཏྟནཡེན ཨཊྛངྒསམནྣཱགཏེ ཏསྨིཾ ཙིཏྟེ ཝིཔསྶནཱཀྐམེན ཛཱཏེ ཝིཔསྶནཱབྷིམུཁཾ ཙིཏྟཔེསནམེཝཱཏི དཊྛབྦཾ. ཏནྣིནྣནྟི ཏསྶཾ ཝིཔསྶནཱཡཾ ནིནྣཾ. ཨིཏརདྭཡཾ ཏསྶེཝ ཝེཝཙནཾ. ཏསྶཾ པོཎཾ ཝངྐཾ པབྦྷཱརཾ ནཱིཙནྟི ཨཏྠོ. བྲཧྨཛཱལེ ཝུཏྟོཡེཝ. ཨོདནཀུམྨཱསེཧི ཨུཔཙཱིཡཏི ཝཌྜྷཱཔཱིཡཏི, ཨུཔཙཡཏི ཝཱ ཝཌྜྷཏཱིཏི ཨཏྠཾ སནྡྷཱཡ ‘‘ཨོདནེནཱ’’ཏིཨཱདི ཝུཏྟཾ. ཨནིཙྩུཙྪཱདནཔརིམདྡནབྷེདནཝིདྡྷཾསནདྷམྨོཏི ཨེཏྠ ‘‘ཨནིཙྩདྷམྨོ’’ཏིཨཱདིནཱ དྷམྨསདྡོ པཙྩེཀཾ ཡོཛེཏབྦོ. ཏཏྠ ཨནིཙྩདྷམྨོཏི པབྷངྒུཏཱཡ ཨདྡྷུཝསབྷཱཝོ. དུགྒནྡྷཝིགྷཱཏཏྠཱཡཱཏི སརཱིརེ དུགྒནྡྷསྶ ཝིགམཱཡ. ཨུཙྪཱདནདྷམྨོཏི ཨུཙྪཱདེཏབྦཏཱསབྷཱཝོ, ཨིམསྶ པཱུཏིཀཱཡསྶ དུགྒནྡྷབྷཱཝཏོ གནྡྷོདཀཱདཱིཧི ཨུབྦཊྚནཝིལིམྤནཛཱཏིཀོཏི ཨཏྠོ. ཨུཙྪཱདནེན ཧི པཱུཏིཀཱཡེ སེདཝཱཏཔིཏྟསེམྷཱདཱིཧི གརུབྷཱཝདུགྒནྡྷཱནམཔགམོ ཧོཏི. མཧཱསམྦཱཧནཾ མལླཱདཱིནཾ བཱཧུཝཌྜྷནཱདིཨཏྠཾཝ ཧོཏི, ཨངྒཔཙྩངྒཱབཱདྷཝིནོདནཏྠཾ པན ཁུདྡཀསམྦཱཧནམེཝ ཡུཏྟནྟི ཨཱཧ ‘‘ཁུདྡཀསམྦཱཧནེནཱ’’ཏི, མནྡསམྦཱཧནེནཱཏི ཨཏྠོ. པརིམདྡནདྷམྨོཏི པརིམདྡིཏབྦཏཱསབྷཱཝོ.

ཨེཝཾ ¶ ཨནིཡམིཏཀཱལཝསེན ཨཏྠཾ ཝཏྭཱ ཨིདཱནི ནིཡམིཏཀཱལཝསེན ཨཏྠཾ ཝདཏི ‘‘དཧརཀཱལེ’’ཏིཨཱདིནཱ. ཝཱ-སདྡོ ཙེཏྠ ཨཏྠདསྶནཝསེནེཝ ཨཏྠནྟརཝིཀཔྤནསྶ ཝིཉྙཱཡམཱནཏྟཱ ན པཡུཏྟོ, ལུཏྟནིདྡིཊྛོ ཝཱ. དཧརཀཱལེཏི ཨཙིརཝིཛཱཏཀཱལེ. སཡཱཔེཏྭཱ ཨཉྪནཔཱིལ༹ནཱདིཝསེན པརིམདྡནདྷམྨོཏི སམྦནྡྷོ. མིཏནྟི བྷཱཝནཔུཾསཀནིདྡེསོ, ཏེན ཡཐཱཔམཱཎཾ, མནྡཾ ཝཱ ཨཉྪནཔཱིལ༹ནཱདཱིནི དསྶེཏི. ཨཉྪནཉྩེཏྠ ཨཱཀཌྜྷནཾ. པཱིལ༹ནཾ སམྦཱཧནཾ. ཨཱདིསདྡེན སམིཉྫནཨུགྒམནཱདཱིནི སངྒཎྷཱཏི. ཨེཝཾ པརིཧརིཏོཔཱིཏི ཨུཙྪཱདནཱདིནཱ སུཁེདྷིཏོཔི. བྷིཛྫཏི ཙེཝཱཏི ཨནིཙྩཏཱདིཝསེན ནསྶཏི ཙ. ཝིཀིརཏི ཙཱཏི ཨེཝཾ བྷིནྡནྟོ ཙ ཀིཉྩི པཡོཛནཾ ཨསཱདྷེནྟོ ཝིཔྤཀིཎྞོཝ ཧོཏི. ཨེཝཾ ནཝཧི པདེཧི ཡཐཱརཧཾ ཀཱཡེ སམུདཡཝཡདྷམྨཱནུཔསྶིཏཱ དསྶིཏཱཏི ཨིམམཏྠཾ ཝིབྷཱཝེནྟོ ‘‘ཏཏྠཱ’’ཏིཨཱདིམཱཧ. ཏཏྠ ཚཧི པདེཧཱིཏི ‘‘རཱུཔཱི, ཙཱཏུམཧཱབྷཱུཏིཀོ, མཱཏཱཔེཏྟིཀསམྦྷཝོ, ཨོདནཀུམྨཱསཱུཔཙཡོ, ཨུཙྪཱདནདྷམྨོ, པརིམདྡནདྷམྨོ’’ཏི ཨིམེཧི ཚཧི པདེཧི. ཡུཏྟཾ ཏཱཝ ཧོཏུ མཛ྄ཛྷེ ཏཱིཧིཔི པདེཧི ཀཱཡསྶ སམུདཡཀཐནཾ ཏེསཾ ཏདཏྠདཱིཔནཏོ, ‘‘རཱུཔཱི, ཨུཙྪཱདནདྷམྨོ, པརིམདྡནདྷམྨོ’’ཏི པན ཏཱིཧི ¶ ཏྤདེཧི ཀཐཾ ཏསྶ ཏཐཱཀཐནཾ ཡུཏྟཾ སིཡཱ ཏེསཾ ཏདཏྠསྶ ཨདཱིཔནཏོཏི? ཡུཏྟམེཝ ཏེསམྤི ཏདཏྠསྶ དཱིཔིཏཏྟཱ. ‘‘རཱུཔཱི’’ཏི ཧི ཨིདཾ ཨཏྟནོ པཙྩཡབྷཱུཏེན ཨུཏུཨཱཧཱརལཀྑཎེན རཱུཔེན རཱུཔཝཱཏི ཨཏྠསྶ དཱིཔཀཾ. པཙྩཡསངྒམཝིསིཊྛེ ཧི ཏདསྶཏྠིཨཏྠེ ཨཡམཱིཀཱརོ. ‘‘ཨུཙྪཱདནདྷམྨོ, པརིམདྡནདྷམྨོ’’ཏི ཙ ཨིདཾ པདདྭཡཾ ཏཐཱཝིདྷརཱུཔུཔྤཱདནེན སཎྛཱནསམྤཱདནཏྠསྶ དཱིཔཀནྟི. དྭཱིཧཱིཏི ‘‘བྷེདནདྷམྨོ, ཝིདྡྷཾསནདྷམྨོ’’ཏི དྭཱིཧི པདེཧི. ནིསྶིཏཉྩ ཀཱཡཔརིཡཱཔནྣེ ཧདཡཝཏྠུམྷི ནིསྶིཏཏྟཱ ཝིཔསྶནཱཙིཏྟསྶ. ཏདཱ པཝཏྟཉྷི ཝིཔསྶནཱཙིཏྟམེཝ ‘‘ཨིདཉྩ མེ ཝིཉྙཱཎ’’ནྟི ཨཱསནྣཔཙྩཀྑཝསེན ཝུཏྟཾ. པཊིབདྡྷཉྩ ཀཱཡེན ཝིནཱ ཨཔྤཝཏྟནཏོ, ཀཱཡསཉྙིཏཱནཉྩ རཱུཔདྷམྨཱནཾ ཨཱརམྨཎཀརཎཏོ.

༢༣༥. སུཊྛུ ཨོབྷཱསཏཱིཏི སུབྷོ, པབྷཱསམྤནྣོ མཎི, ཏཱཡ ཨེཝ པབྷཱསམྤཏྟིཡཱ མཎིནོ བྷདྲཏཱཏི ཨཏྠམཏྟཾ དསྶེཏུཾ ‘‘སུབྷོཏི སུནྡརོ’’ཏི ཝུཏྟཾ. པརིསུདྡྷཱཀརསམུཊྛཱནམེཝ མཎིནོ སུཝིསུདྡྷཛཱཏིཏཱཏི ཨཱཧ ‘‘ཛཱཏིམཱཏི པརིསུདྡྷཱཀརསམུཊྛིཏོ’’ཏི. སུཝིསུདྡྷརཏནཱཀརཏོ སམུཊྛིཏོཏི ཨཏྠོ. ཨཱཀརཔརིཝིསུདྡྷིམཱུལཀོ ཨེཝ ཧི ¶ མཎིནོ ཀུརུཝིནྡཛཱཏིཨཱདིཛཱཏིཝིསེསོཏི. ཨིདྷཱདྷིཔྤེཏསྶ པན ཝེལུ༹རིཡམཎིནོ ཝིལཱུ༹ར (ཝི. ཝ. ཨཊྛ. ༣༤ ཨཱདཡོ ཝཱཀྱཀྑྑྣྡྷེསུ པསྶིཏབྦཾ) པབྦཏསྶ, ཝིལཱུ༹ར གཱམསྶ ཙ ཨཝིདཱུརེ པརིསུདྡྷཱཀརོ. ཡེབྷུཡྻེན ཧི སོ ཏཏོ སམུཊྛིཏོ. ཏཐཱ ཧེས ཝིལཱུ༹རནཱམཀསྶ པབྦཏསྶ, གཱམསྶ ཙ ཨཝིདཱུརེ སམུཊྛིཏཏྟཱ ཝེལུ༹རིཡོཏི པཉྙཱཡིཏྠ, དེཝལོཀེ པཝཏྟསྶཔི ཙ ཏཾསདིསཝཎྞནིབྷཏཱཡ ཏདེཝ ནཱམཾ ཛཱཏཾ ཡཐཱ ཏཾ མནུསྶལོཀེ ལདྡྷནཱམཝསེན དེཝལོཀེ དེཝཏཱནཾ, སོ པན མཡཱུརགཱིཝཱཝཎྞོ ཝཱ ཧོཏི ཝཱཡསཔཏྟཝཎྞོ ཝཱ སིནིདྡྷཝེཎུཔཏྟཝཎྞོ ཝཱཏི ཨཱཙརིཡདྷམྨཔཱལཏྠེརེན པརམཏྠདཱིཔནིཡཾ (ཝི. ཝ. ཨཊྛ. ༣༤) ཝུཏྟཾ. ཝིནཡསཾཝཎྞནཱསུ (ཝི. ཝི. ཊཱི. ༡.༢༨༡) པན ‘‘ཨལླཝེལུ༹ཝཎྞོ’’ཏི ཝདནྟི. ཏཐཱ ཧིསྶ ‘‘ཝཾསཝཎྞོ’’ཏིཔི ནཱམཾ ཛཱཏཾ. ‘‘མཉྫཱརཀྑིམཎྜལཝཎྞོ’’ཏི ཙ ཝུཏྟོ, ཏཏོཡེཝ སོ ཨིདྷ པདེསེ མཉྫཱརམཎཱིཏི པཱཀཊོ ཧོཏི. ཙཀྐཝཏྟིཔརིབྷོགཱརཧཔཎཱིཏཏརམཎིབྷཱཝཏོ པན ཏསྶེཝ པཱལི༹ཡཾ ཝཙནཾ དཊྛབྦཾ. ཡཐཱཧ ‘‘པུན ཙཔརཾ ཨཱནནྡ རཉྙོ མཧཱསུདསྶནསྶ མཎིརཏནཾ པཱཏུརཧོསི, སོ ཨཧོསི མཎི ཝེལུ༹རིཡོ སུབྷོ ཛཱཏིམཱ ཨཊྛཾསོ’’ཏིཨཱདི (དཱི. ནི. ༢.༢༤༨). པཱསཱཎསཀྑརཱདིདོསནཱིཧརཎཝསེནེཝ པརིཀམྨནིཔྥཏྟཱིཏི དསྶེཏི ‘‘ཨཔནཱིཏཔཱསཱཎསཀྑརོ’’ཏི ཨིམིནཱ.

ཚཝིཡཱ ཨེཝ སཎྷབྷཱཝེན ཨཙྪཏཱ, ན སངྒྷཱཏསྶཱཏི ཨཱཧ ‘‘ཨཙྪོཏི ཏནུཙྪཝཱི’’ཏི. ཏཏོ ཙེཝ ཝིསེསེན པསནྣོཏི དསྶེཏུཾ ‘‘སུཊྛུ པསནྣོ’’ཏི ཝུཏྟཾ. པརིབྷོགམཎིརཏནཱཀཱརསམྤཏྟི སབྦཱཀཱརསམྤནྣཏཱ ¶ . ཏེནཱཧ ‘‘དྷོཝནཝེདྷནཱདཱིཧཱི’’ཏིཨཱདི. པཱསཱཎཱདཱིསུ དྷོཏཏཱ དྷོཝནཾ, ཀཱལ༹ཀཱདིཨཔཧརཎཏྠཱཡ ཙེཝ སུཏྟེན ཨཱཝུནཏྠཱཡ ཙ ཝིཛ྄ཛྷིཏབྦཏཱ ཝེདྷནཾ. ཨཱདིསདྡེན ཏཱཔསཎྷཀརཎཱདཱིནཾ སངྒཧོ. ཝཎྞསམྤཏྟིནྟི ཨཱཝུནིཏསུཏྟསྶ ཝཎྞསམྤཏྟིཾ. ཀསྨཱཏི ཝུཏྟཾ ‘‘ཏཱདིས’’ནྟིཨཱདི, ཏཱདིསསྶེཝ ཨཱཝུཏསྶ པཱཀཊབྷཱཝཏོཏི ཝུཏྟཾ ཧོཏི.

མཎི ཝིཡ ཀརཛཀཱཡོ པཙྩཝེཀྑིཏབྦཏོ. ཨཱཝུཏསུཏྟཾ ཝིཡ ཝིཉྙཱཎཾ ཨནུཔཝིསིཏྭཱ ཋིཏཏྟཱ. ཙཀྑུམཱ པུརིསོ ཝིཡ ཝིཔསྶནཱལཱབྷཱི བྷིཀྑུ ¶ སམྨདེཝ ཏསྶ དསྶནཏོ, ཏསྶ པུརིསསྶ མཎིནོ ཨཱཝིབྷཱུཏཀཱལོ ཝིཡ ཏསྶ བྷིཀྑུནོ ཀཱཡསྶ ཨཱཝིབྷཱུཏཀཱལོ ཏནྣིསྶཡསྶ པཱཀཊབྷཱཝཏོ. སུཏྟསྶཱཝིབྷཱུཏཀཱལོ ཝིཡ ཏེསཾ དྷམྨཱནམཱཝིབྷཱུཏཀཱལོ ཏནྣིསྶིཏསྶ པཱཀཊབྷཱཝཏོཏི ཨཡམེཏྠ ཨུཔམཱསམྤཱདནེ ཀཱརཎཝིབྷཱཝནཱ, ‘‘ཨཱཝུཏསུཏྟཾ ཝིཡ ཝིཔསྶནཱཉཱཎ’’ནྟི ཀཏྠཙི པཱཋོ, ‘‘ཨིདཉྩ ཝིཉྙཱཎ’’ནྟི ཝཙནཏོ པན ‘‘ཝིཉྙཱཎ’’ནྟི པཱཋོཝ སུནྡརཏརོ, ‘‘ཝིཔསྶནཱཝིཉྙཱཎ’’ནྟི ཝཱ བྷཝིཏབྦཾ. ཝིཔསྶནཱཉཱཎཾ ཨབྷིནཱིཧརིཏྭཱཏི ཝིཔསྶནཱཉཱཎཱབྷིམུཁཾ ཙིཏྟཾ ནཱིཧརིཏྭཱ.

ཏཏྲཱཏི ཝེལུ༹རིཡམཎིམྷི. ཏདཱརམྨཎཱནནྟི ཀཱཡསཉྙིཏརཱུཔདྷམྨཱརམྨཎཱནཾ. ‘‘ཕསྶཔཉྩམཀཱན’’ནྟིཨཱདིཔདཏྟཡསྶེཏཾ ཝིསེསནཾ ཨཏྠཝསཱ ལིངྒཝིབྷཏྟིཝཙནཝིཔརིཎཱམོཏི ཀཏྭཱ པཙྪིམཔདསྶཱཔི ཝིསེསནབྷཱཝཏོ. ཕསྶཔཉྩམཀགྒཧཎེན, སབྦཙིཏྟཙེཏསིཀགྒཧཎེན ཙ གཧིཏདྷམྨཱ ཝིཔསྶནཱཙིཏྟུཔྤཱདཔརིཡཱཔནྣཱ ཨེཝཱཏི དཊྛབྦཾ. ཨེཝཉྷི ཏེསཾ ཝིཔསྶནཱཝིཉྙཱཎགཏིཀཏྟཱ ཨཱཝུཏསུཏྟཾ ཝིཡ ‘‘ཝིཔསྶནཱཝིཉྙཱཎ’’ནྟི ཧེཊྛཱ ཝུཏྟཝཙནཾ ཨཝིརོདྷིཏཾ ཧོཏི. ཀསྨཱ པན ཝིཔསྶནཱཝིཉྙཱཎསྶེཝ གཧཎནྟི? ‘‘ཨིདཉྩ མེ ཝིཉྙཱཎཾ ཨེཏྠ སིཏཾ ཨེཏྠ པཊིབདྡྷ’’ནྟི ཨིམིནཱ ཏསྶེཝ ཝཙནཏོ. ‘‘ཨཡཾ ཁོ མེ ཀཱཡོ’’ཏིཨཱདིནཱ ཧི ཝིཔསྶནཱཉཱཎེན ཝིཔསྶིཏྭཱ ‘‘ཏདེཝ ཝིཔསྶནཱཉཱཎསམྤཡུཏྟཾ ཝིཉྙཱཎཾ ཨེཏྠ སིཏཾ ཨེཏྠ པཊིབདྡྷ’’ནྟི ནིསྶཡཝིསཡཱདིཝསེན མནསི ཀརོཏི, ཏསྨཱ ཏསྶེཝ ཨིདྷ གཧཎཾ སམྦྷཝཏི, ནཱཉྙསྶཱཏི དཊྛབྦཾ. ཏེནཱཧ ‘‘ཝིཔསྶནཱཝིཉྙཱཎསྶེཝ ཝཱ ཨཱཝིབྷཱུཏཀཱལོ’’ཏི. དྷམྨསངྒཧཱདཱིསུ (དྷ. ས. ༢ ཨཱདཡོ) དེསིཏནཡེན པཱཀཊབྷཱཝཏོ ཙེཏྠ ཕསྶཔཉྩམཀཱནཾ གཧཎཾ, ནིརཝསེསཔརིགྒཧཎཏོ སབྦཙིཏྟཙེཏསིཀཱནཾ, ཡཐཱརུཏཾ དེསིཏཝསེན པདྷཱནབྷཱཝཏོ ཝིཔསྶནཱཝིཉྙཱཎསྶཱཏི ཝེདིཏབྦཾ. ཀིཾ པནེཏེ པཙྩཝེཀྑཎཉཱཎསྶ ཨཱཝིབྷཝནྟི, ཨུདཱཧུ པུགྒལསྶཱཏི? པཙྩཝེཀྑཎཉཱཎསྶེཝ, ཏསྶ པན ཨཱཝིབྷཱུཏཏྟཱ པུགྒལསྶཱཔི ཨཱཝིབྷཱུཏཱ ནཱམ ཧོནྟི, ཏསྨཱ ‘‘བྷིཀྑུནོ ཨཱཝིབྷཱུཏཀཱལོ’’ཏི ཝུཏྟནྟི.

ཡསྨཱ ¶ པནིདཾ ཝིཔསྶནཱཉཱཎཾ མགྒཉཱཎཱནནྟརཾ ཧོཏི, ཏསྨཱ ལོཀིཡཱབྷིཉྙཱནཾ པརཏོ, ཚཊྛབྷིཉྙཱཡ ཙ པུརཏོ ཝཏྟབྦཾ, ཨཐ ཀསྨཱ སབྦཱབྷིཉྙཱནཾ པུརཏོཝ ཝུཏྟནྟི ཙོདནཱལེསཾ དསྶེཏྭཱ པརིཧརནྟོ ¶ ‘‘ཨིདཉྩ ཝིཔསྶནཱཉཱཎ’’ནྟིཨཱདིམཱཧ. ‘‘ཨིདཉྩ མགྒཉཱཎཱནནྟར’’ནྟི ཧི ཨིམིནཱ ཡཐཱཝུཏྟཾ ཙོདནཱལེསཾ དསྶེཏི. ཏཏྠ ‘‘མགྒཉཱཎཱནནྟར’’ནྟི སིཁཱཔྤཏྟཝིཔསྶནཱབྷཱུཏཾ གོཏྲབྷུཉཱཎཾ སནྡྷཱཡ ཝུཏྟཾ. ཏདེཝ ཧི ཨརཧཏྟམགྒསྶ, སབྦེསཾ ཝཱ མགྒཕལཱནམནནྟརཾ ཧོཏི, པདྷཱནཏོ པན ཏབྦཙནེནེཝ སབྦསྶཔི ཝིཔསྶནཱཉཱཎསྶ གཧཎཾ དཊྛབྦཾ ཨཝིསེསཏོ ཏསྶ ཨིདྷ ཝུཏྟཏྟཱ. མགྒསདྡེན ཙ ཨརཧཏྟམགྒསྶེཝ གཧཎཾ ཏསྶེཝཱབྷིཉྙཱཔརིཡཱཔནྣཏྟཱ, ཨབྷིཉྙཱསམྦནྡྷེན ཙ ཙོདནཱསམྦྷཝཏོ. ལོཀིཡཱབྷིཉྙཱནཾ པུརཏོ ཝུཏྟཾ ཝིཔསྶནཱཉཱཎཾ ཏཱསཾ ནཱནནྟརཏཱཡ ཨནུཔཀཱརཾ, ཨཱསཝཀྑཡཉཱཎསངྑཱཏཱཡ པན ལོཀུཏྟརཱབྷིཉྙཱཡ པུརཏོ ཝུཏྟཾ ཏསྶཱ ཨནནྟརཏཱཡ ཨུཔཀཱརཾ, ཏསྨཱ ཨིདཾ ལོཀིཡཱབྷིཉྙཱནཾ པརཏོ, ཚཊྛཱབྷིཉྙཱཡ ཙ པུརཏོ ཝཏྟབྦཾ. ཀསྨཱ པན ཨུཔཀཱརཊྛཱནེ ཏཐཱ ཨཝཏྭཱ ཨནུཔཀཱརཊྛཱནེཝ བྷགཝཏཱ ཝུཏྟནྟི ཧི ཙོདནཱ སམྦྷཝཏི. ‘‘ཨེཝཾ སནྟེཔཱི’’ཏིཨཱདི པརིཧཱརདསྶནཾ. ཏཏྠ ཨེཝཾ སནྟེཔཱིཏི ཡདིཔི ཉཱཎཱནུཔུབྦིཡཱ མགྒཉཱཎསྶ ཨནནྟརཏཱཡ ཨུཔཀཱརཾ ཧོཏི, ཨེཝཾ སཏིཔཱིཏི ཨཏྠོ.

ཨབྷིཉྙཱཝཱརེཏི ཚལ༹བྷིཉྙཱཝསེན ཝུཏྟེ དེསནཱཝཱརེ. ཨེཏསྶ ཨནྟརཱ ཝཱརོ ནཏྠཱིཏི པཉྩསུ ལོཀིཡཱབྷིཉྙཱསུ ཀཐིཏཱསུ ཨཱཀངྑེཡྻསུཏྟཱདཱིསུ (མ. ནི. ༡.༦༥) ཝིཡ ཚཊྛཱབྷིཉྙཱཔི ཨཝསྶཾ ཀཐེཏབྦཱ ཨབྷིཉྙཱལཀྑཎབྷཱཝེན ཏཔྤརིཡཱཔནྣཏོ, ན ཙ ཝིཔསྶནཱཉཱཎཾ ལོཀིཡཱབྷིཉྙཱནཾ, ཚཊྛཱབྷིཉྙཱཡ ཙ ཨནྟརཱ པཝེསེཏྭཱ ཀཐེཏབྦཾ ཨནབྷིཉྙཱལཀྑཎབྷཱཝེན ཏདཔརིཡཱཔནྣཏོ. ཨིཏི ཨེཏསྶ ཝིཔསྶནཱཉཱཎསྶ ཏཱསམབྷིཉྙཱནཾ ཨནྟརཱ ཝཱརོ ནཏྠི, ཏསྨཱ ཏཏྠ ཨཝསརཱབྷཱཝཏོ ཨིདྷེཝ རཱུཔཱཝཙརཙཏུཏྠཛ྄ཛྷཱནཱནནྟརཾ ཝིཔསྶནཱཉཱཎཾ ཀཐིཏནྟི ཨདྷིཔྤཱཡོ. ‘‘ཡསྨཱ ཙཱ’’ཏིཨཱདིནཱ ཨཏྠནྟརམཱཧ. ཏཏྠ ཙ-སདྡོ སམུཙྩཡཏྠོ, ཏེན ན ཀེཝལཾ ཝིཔསྶནཱཉཱཎསྶ ཨིདྷ དསྶནེ ཏདེཝ ཀཱརཎཾ, ཨཐ ཁོ ཨིདམྤཱིཏི ཨིམམཏྠཾ སམུཙྩིནཱཏཱིཏི ཨཱཙརིཡེན (དཱི. ནི. ཊཱི. ༡.༢༣༥) ཝུཏྟཾ. སདྡཝིདཱུ པན ཨཱིདིསེ ཋཱནེ ཙ-སདྡོ ཝཱ-སདྡཏྠོ, སོ ཙ ཝིཀཔྤཏྠོཏི ཝདནྟི, ཏམྤི ཡུཏྟམེཝ ཨཏྠནྟརདསྶནེ པཡུཏྟཏྟཱ. ཨཏྟནཱ པཡུཛྫིཏབྦསྶ ཧི ཝིཛྫམཱནཏྠསྶེཝ ཛོཏཀཱ ཨུཔསགྒནིཔཱཏཱ ཡཐཱ མགྒནིདསྶནེ སཱཁཱབྷངྒཱ, ཡཐཱ ཙ ཨདིསྶམཱནཱ ཛོཏནེ པདཱིཔཱཏི ཨེཝམཱིདིསེསུ. ཧོཏི ཙེཏྠ –

‘‘ཨཏྠནྟརདསྶནམྷི ¶ , ཙ སདྡོ ཡདི དིསྶཏི;

སམུཙྩཡེ ཝིཀཔྤེ སོ, གཧེཏབྦོ ཝིབྷཱཝིནཱ’’ཏི.

ཨཀཏསམྨསནསྶཱཏི ¶ ཧེཏུགབྦྷཔདཾ. ཏཐཱ ཀཏསམྨསནསྶཱཏི ཙ. ‘‘དིབྦེན ཙཀྑུནཱ བྷེརཝམྤི རཱུཔཾ པསྶཏོཏི ཨེཏྠ ཨིདྡྷིཝིདྷཉཱཎེན བྷེརཝཾ རཱུཔཾ ནིམྨིནིཏྭཱ མཾསཙཀྑུནཱ པསྶཏོཏིཔི ཝཏྟབྦཾ. ཨེཝམྤི ཧི ཨབྷིཉྙཱལཱབྷིནོ ཨཔརིཉྙཱཏཝཏྠུཀསྶ བྷཡཾ སནྟཱསོ ཨུཔྤཛྫཏི ཨུཙྩཝཱལིཀཝཱསིམཧཱནཱགཏྠེརསྶ ཝིཡཱ’’ཏི ཨཱཙརིཡེན (དཱི. ནི. ཊཱི. ༡.༢༣༥) ཝུཏྟཾ. ཡཐཱ ཙེཏྠ, ཨེཝཾ དིབྦཱཡ སོཏདྷཱཏུཡཱ བྷེརཝཾ སདྡཾ སུཎཏོཏི ཨེཏྠཱཔི ཨིདྡྷིཝིདྷཉཱཎེན བྷེརཝཾ སདྡཾ ནིམྨིནིཏྭཱ མཾསསོཏེན སུཎཏོཔཱིཏི ཝཏྟབྦམེཝ. ཨེཝམྤི ཧི ཨབྷིཉྙཱལཱབྷིནོ ཨཔརིཉྙཱཏཝཏྠུཀསྶ བྷཡཾ སནྟཱསོ ཨུཔྤཛྫཏི ཨུཙྩཝཱལིཀཝཱསིམཧཱནཱགཏྠེརསྶ ཝིཡ. ཐེརོ ཧི ཀོཉྩནཱདསཧིཏཾ སབྦསེཏཾ ཧཏྠིནཱགཾ མཱཔེཏྭཱ དིསྭཱ, སུཏྭཱ ཙ སཉྫཱཏབྷཡསནྟཱསོཏི ཨཊྛཀཐཱསུ (ཝིབྷ. ཨཊྛ. ༢.༨༨༢; མ. ནི. ཨཊྛ. ༡.༨༡; ཝིསུདྡྷི. ༢.༧༣༣) ཝུཏྟོ. ཨནིཙྩཱདིཝསེན ཀཏསམྨསནསྶ དིབྦཱཡ…པེ… བྷཡཾ སནྟཱསོ ན ཨུཔྤཛྫཏཱིཏི སམྦནྡྷོ. བྷཡཝིནོདནཧེཏུ ནཱམ ཝིཔསྶནཱཉཱཎེན ཀཏསམྨསནཏཱ, ཏསྶ, ཏེན ཝཱ སམྤཱདནཏྠནྟི ཨཏྠོ. ཨིདྷེཝཱཏི ཙཏུཏྠཛ྄ཛྷཱནཱནནྟརམེཝ. ‘‘ཨཔིཙཱ’’ཏིཨཱདིནཱ ཡཐཱཔཱཋཾ ཡུཏྟཏརནཡཾ དསྶེཏི. ཝིཔསྶནཱཡ པཝཏྟཾ པཱམོཛྫཔཱིཏིཔསྶདྡྷིཔརམྤརཱགཏསུཁཾ ཝིཔསྶནཱསུཁཾ. པཱཊིཡེཀྐནྟི ཛྷཱནཱབྷིཉྙཱདཱིཧི ཨསམྨིསྶཾ ཝིསུཾ བྷཱུཏཾ སནྡིཊྛིཀཾ སཱམཉྙཕལཾ. ཏེནཱཧ བྷགཝཱ དྷམྨཔདེ –

‘‘ཡཏོ ཡཏོ སམྨསཏི, ཁནྡྷཱནཾ ཨུདཡབྦཡཾ;

ལབྷཏཱི པཱིཏིཔཱམོཛྫཾ, ཨམཏཾ ཏཾ ཝིཛཱནཏ’’ནྟིཨཱདི. (དྷ. པ. ༣༧༤);

ཨིདྷཱཔི ཝུཏྟཾ ‘‘ཨིདམྤི ཁོ མཧཱརཱཛ སནྡིཊྛིཀཾ སཱམཉྙཕལཾ…པེ… པཎཱིཏཏརཉྩཱ’’ཏི, ཏསྨཱ པཱལི༹ཡཱ སཾསནྡནཏོ ཨིམམེཝ ནཡཾ ཡུཏྟཏརནྟི ཝདནྟི. ཨཱདིཏོཝཱཏི ཨབྷིཉྙཱནམཱདིམྷིཡེཝ.

མནོམཡིདྡྷིཉཱཎཀཐཱཝཎྞནཱ

༢༣༦-༧. མནོམཡནྟི ཨེཏྠ པན མཡསདྡོ ཨཔརཔཉྙཏྟིཝིཀཱརཔདཔཱུརཎནིབྦཏྟིཨཱདཱིསུ ཨནེཀེསྭཏྠེསུ ཨཱགཏོ. ཨིདྷ པན ནིབྦཏྟིཨཏྠེཏི དསྶེཏུཾ ¶ ‘‘མནེན ནིབྦཏྟིཏ’’ནྟི ཝུཏྟཾ. ‘‘ཨབྷིཉྙཱམནེན ནིབྦཏྟིཏ’’ནྟི ཨཏྠོཏི ཨཱཙརིཡེནཱཏི (དཱི. ནི. ཊཱི. ༡.༢༣༦, ༢༣༧) ཝུཏྟཾ. ཝིསུདྡྷིམགྒེ (ཝིསུདྡྷི. ༢.༣༩༧) པན ‘‘ཨདྷིཊྛཱནམནེན ནིམྨིཏཏྟཱ མནོམཡ’’ནྟི ཨཱགཏཾ, ཨབྷིཉྙཱམནེན, ཨདྷིཊྛཱནམནེན ཙཱཏི ཨུབྷཡཐཱཔི ནིབྦཏྟཏྟཱ ཨུབྷཡམྤེཏཾ ཡུཏྟམེཝ ¶ . ཨངྒཾ ནཱམ ཧཏྠཔཱདཱདིཏཾཏཾསམུདཱཡཾ, པཙྩངྒཾ ནཱམ ཀཔྤརཛཎྞུཨཱདི ཏསྨིཾ ཏསྨིཾ སམུདཱཡེ ཨཝཡཝཾ. ‘‘ཨཧཱིནིནྡྲིཡ’’ནྟི ཨེཏྠ པརིཔུཎྞཏཱཡེཝ ཨཧཱིནཏཱ, ན ཏུ ཨཔྤཎཱིཏཏཱ, པརིཔུཎྞབྷཱཝོ ཙ ཙཀྑུསོཏཱདཱིནཾ སཎྛཱནཝསེནེཝ. ནིམྨིཏརཱུཔེ ཧི པསཱདོ ནཱམ ནཏྠཱིཏི དསྶེཏུཾ ‘‘སཎྛཱནཝསེན ཨཝིཀལིནྡྲིཡ’’ནྟི ཝུཏྟཾ, ཨིམིནཱཝ ཏསྶ ཛཱིཝིཏིནྡྲིཡཱདཱིནམྤི ཨབྷཱཝོ ཝུཏྟོཏི དཊྛབྦཾ. སཎྛཱནཝསེནཱཏི ཙ ཀམལདལཱདིསདིསསཎྛཱནམཏྟཝསེན, ན རཱུཔཱབྷིགྷཱཏཱརཧབྷཱུཏཔྤསཱདཱདིཨིནྡྲིཡཝསེན. ‘‘སབྦངྒཔཙྩངྒིཾ ཨཧཱིནིནྡྲིཡ’’ནྟི ཝུཏྟམེཝཏྠཾ སམཏྠེནྟོ ‘‘ཨིདྡྷིམཏཱ’’ཏིཨཱདིམཱཧ. ཨཝིདྡྷཀཎྞོཏི ཀུལཙཱརིཏྟཝསེན ཀཎྞཱལངྐཱརཔིལ༹ནྡྷནཏྠཾ ཨཝིཛ྄ཛྷིཏཀཎྞོ, ནིདསྶནམཏྟམེཏཾ. ཏེནཱཧ ‘‘སབྦཱཀཱརེཧཱི’’ཏི, ཝཎྞསཎྛཱནཱཝཡཝཝིསེསཱདིསབྦཱཀཱརེཧཱིཏི ཨཏྠོ. ཏེནཱཏི ཨིདྡྷིམཏཱ.

ཨཡམེཝཏྠོ པཱལི༹ཡམྤི ཝིབྷཱཝིཏོཏི ཨཱཧ ‘‘མུཉྫམྷཱ ཨཱིསིཀནྟིཨཱདིཨུཔམཱཏྟཡམྤི ཧི…པེ… ཝུཏྟ’’ནྟི. ཀཏྠཙི པན ‘‘མུཉྫམྷཱ ཨཱིསིཀནྟིཨཱདི ཨུཔམཱམཏྟཾ. ཡམྤི ཧི སདིསབྷཱཝདསྶནཏྠམེཝ ཝུཏྟ’’ནྟི པཱཋོ དིསྶཏི. ཏཏྠ ‘‘ཨུཔམཱམཏྟ’’ནྟི ཨིམིནཱ ཨཏྠནྟརདསྶནཾ ནིཝཏྟེཏི, ‘‘ཡམྤི ཧཱི’’ཏིཨཱདིནཱ པན ཏསྶ ཨུཔམཱབྷཱཝཾ སམཏྠེཏི. ནིཡཏཱནཔེཀྑེན ཙ ཡཾ-སདྡེན ‘‘མུཉྫམྷཱ ཨཱིསིཀ’’ནྟིཨཱདིཝཙནམེཝ པཙྩཱམསཏི. སདིསབྷཱཝདསྶནཏྠམེཝཱཏི སཎྛཱནཏོཔི ཝཎྞཏོཔི ཨཝཡཝཝིསེསཏོཔི སདིསབྷཱཝདསྶནཏྠཾཡེཝ. ཀཐཾ སདིསབྷཱཝོཏི ཝུཏྟཾ ‘‘མུཉྫསདིསཱ ཨེཝ ཧཱི’’ཏིཨཱདི. མུཉྫཾ ནཱམ ཏིཎཝིསེསོ, ཡེན ཀོཙྪཱདཱིནི ཀརོནྟི. ‘‘པཝཱཧེཡྻཱ’’ཏི ཝཙནཏོ ཨནྟོ ཋིཏཱ ཨེཝ ཨཱིསིཀཱ ཨདྷིཔྤེཏཱཏི དསྶེཏི ‘‘ཨནྟོ ཨཱིསིཀཱ ཧོཏཱི’’ཏི ཨིམིནཱ. ཨཱིསིཀཱཏི ཙ ཀལཱི༹རོ. ཝིསུདྡྷིམགྒཊཱིཀཱཡཾ པན ‘‘ཀཎྜ’’ནྟི (ཝིསུདྡྷི. ཊཱི. ༢.༣༩༩) ཝུཏྟཾ. ཝཊྚཱཡ ཀོསིཡཱཏི པརིཝཊྚུལཱཡ ཨསིཀོསིཡཱ. པཏྠཊཱཡཱཏི པཊྚིཀཱཡ. ཀརཌིཏབྦོ བྷཱཛེཏབྦོཏི ཀརཎྜོ, པེལཱ༹. ཀརཌིཏབྦོ ཛིགུཙྪིཏབྦོཏི ཀརཎྜོ, ནིམྨོཀཾ. ཨིདྷཱཔི ¶ ནིམྨོཀམེཝཱཏི ཨཱཧ ‘‘ཀརཎྜཱཏི ཨིདམྤཱི’’ཏིཨཱདི. ཝིལཱིཝཀརཎྜོ ནཱམ པེལཱ༹. ཀསྨཱ ཨཧིཀཉྩུཀསྶེཝ ནཱམཾ, ན ཝིལཱིཝཀརཎྜཀསྶཱཏི ཙོདནཾ སོདྷེཏི ‘‘ཨཧིཀཉྩུཀོ ཧཱི’’ཏིཨཱདིནཱ, སྭེཝ ཨཧིནཱ སདིསོ, ཏསྨཱ ཏསྶེཝ ནཱམནྟི ཝུཏྟཾ ཧོཏི. ཝིསུདྡྷིམགྒཊཱིཀཱཡཾ པན ‘‘ཀརཎྜཱཡཱཏི པེལཱ༹ཡ, ནིམྨོཀཏོཏི ཙ ཝདནྟཱི’’ཏི (ཝིསུདྡྷི. ཊཱི. ༢.༣༩༩) ཝུཏྟཾ. ཏཏྠ པེལཱ༹གཧཎཾ ཨཧིནཱ ཨསདིསཏཱཡ ཝིཙཱརེཏབྦཾ.

ཡཛྫེཝཾ ‘‘སེཡྻཐཱཔི པན མཧཱརཱཛ པུརིསོ ཨཧིཾ ཀརཎྜཱ ཨུདྡྷརེཡྻཱ’’ཏི པུརིསསྶ ཀརཎྜཏོ ཨཧིཨུདྡྷརཎཱུཔམཱཡ ཨཡམཏྠོ ཝིརུཛ྄ཛྷེཡྻ. ན ཧི སོ ཧཏྠེན ཏཏོ ཨུདྡྷརིཏུཾ སཀྐཱཏི ¶ ཨནུཡོགེནཱཧ ‘‘ཏཏྠཱ’’ཏིཨཱདི. ‘‘ཨུདྡྷརེཡྻཱ’’ཏི ཧི ཨནིཡམཝཙནེཔི ཧཏྠེན ཨུདྡྷརཎསྶེཝ པཱཀཊཏྟཱ ཏཾདསྶནམིཝ ཛཱཏཾ. ཏེནཱཧ ‘‘ཧཏྠེན ཨུདྡྷརམཱནོ ཝིཡ དསྶིཏོ’’ཏི. ‘‘ཨཡཉྷཱི’’ཏིཨཱདི ཙིཏྟེན ཨུདྡྷརཎསྶ ཧེཏུདསྶནཾ. ཨཧིནོ ནཱམ པཉྩསུ ཋཱནེསུ སཛཱཏིཾ ནཱཏིཝཏྟནྟི ཨུཔཔཏྟིཡཾ, ཙུཏིཡཾ, ཝིསྶཊྛནིདྡོཀྐམནེ, སམཱནཛཱཏིཡཱ མེཐུནཔཊིསེཝནེ, ཛིཎྞཏཙཱཔནཡནེཏི ཝུཏྟཾ ‘‘སཛཱཏིཡཾ ཋིཏོ’’ཏི. ཨུརགཛཱཏིཡམེཝ ཋིཏོ པཛཧཏི, ན ནཱགིདྡྷིཡཱ ཨཉྙཛཱཏིརཱུཔོཏི ཨཏྠོ. ཨིདཉྷི མཧིདྡྷིཀེ ནཱགེ སནྡྷཱཡ ཝུཏྟཾ. སརཱིརཾ ཁཱདཡམཱནཾ ཝིཡཱཏི ཨཏྟནོཡེཝ ཏཙཾ ཨཏྟནོ སརཱིརཾ ཁཱདཡམཱནཾ ཝིཡ. པུརཱཎཏཙཾ ཛིགུཙྪནྟོཏི ཛིཎྞཏཱཡ ཀཏྠཙི མུཏྟཾ ཀཏྠཙི ཨོལམྦིཏཾ ཛིཎྞཏཙཾ ཛིགུཙྪནྟོ. ཙཏཱུཧཱིཏི ‘‘སཛཱཏིཡཾ ཋིཏོ, ནིསྶཱཡ, ཐཱམེན, ཛིགུཙྪནྟོ’’ཏི ཡཐཱཝུཏྟེཧི ཙཏཱུཧི ཀཱརཎེཧི. ཏཏོཏི ཀཉྩུཀཏོ. ཨཉྙེནཱཏི ཨཏྟཏོ ཨཉྙེན. ཙིཏྟེནཱཏི པུརིསསྶ ཙིཏྟེནེཝ, ན ཧཏྠེན. སེཡྻཐཱཔི ནཱམ པུརིསོ ཨཧིཾ པསྶིཏྭཱ ‘‘ཨཧོ ཝཏཱཧཾ ཨིམཾ ཨཧིཾ ཀཉྩུཀཏོ ཨུདྡྷརེཡྻ’’ནྟི ཨཧིཾ ཀརཎྜཱ ཙིཏྟེན ཨུདྡྷརེཡྻ, ཏསྶ ཨེཝམསྶ ‘‘ཨཡཾ ཨཧི, ཨཡཾ ཀརཎྜོ, ཨཉྙོ ཨཧི, ཨཉྙོ ཀརཎྜོ, ཀརཎྜཱ ཏྭེཝ ཨཧི ཨུབྦྷཏོ’’ཏི, ཨེཝམེཝ…པེ… སོ ཨིམམྷཱ ཀཱཡཱ ཨཉྙཾ ཀཱཡཾ ཨབྷིནིམྨིནཱཏི…པེ… ཨཧཱིནིནྡྲིཡནྟི ཨཡམེཏྠ ཨདྷིཔྤཱཡོ.

ཨིདྡྷིཝིདྷཉཱཎཱདིཀཐཱཝཎྞནཱ

༢༣༩. བྷཱཛནཱདིཝིཀཏིཀིརིཡཱནིསྶཡབྷཱུཏཱ ¶ སུཔརིཀམྨཀཏམཏྟིཀཱདཡོ ཝིཡ ཝིཀུབྦནཀིརིཡཱནིསྶཡབྷཱཝཏོ ཨིདྡྷིཝིདྷཉཱཎཾ དཊྛབྦཾ.

༢༤༡. པུབྦེ ནཱིཝརཎཔྤཧཱནཝཱརེ ཝིཡ ཀནྟཱརགྒཧཎཾ ཨཀཏྭཱ ཀེཝལཾ ཨདྡྷཱནམགྒགྒཧཎཾ ཁེམམགྒདསྶནཏྠཾ. ཀསྨཱ པན ཁེམམགྒསྶེཝ དསྶནཾ, ན ཀནྟཱརམགྒསྶ, ནནུ ཨུཔམཱདསྶནམཏྟམེཏནྟི ཙོདནཾ པརིཧརནྟོ ‘‘ཡསྨཱ’’ཏིཨཱདིམཱཧ. ‘‘ཨཔྤཊིབྷཡཉྷཱི’’ཏིཨཱདི པན ཁེམམགྒསྶེཝ གཧཎཀཱརཎདསྶནཾ. ཝཱཏཱཏཔཱདིནིཝཱརཎཏྠཾ སཱིསེ སཱཊཀཾ ཀཏྭཱ. ཏཐཱ ཏཐཱ པན པརིཔུཎྞཝཙནཾ ཨུཔམཱསམྤཏྟིཡཱ ཨུཔམེཡྻསམྤཱདནཏྠཾ, ཨདྷིཔྤེཏསྶ ཙ ཨུཔམེཡྻཏྠསྶ སུཝིཉྙཱཔནཏྠཾ, ཧེཏུདཱཧརཎབྷེདྱབྷེདཀཱདིསམྤནྣཝཙནེན ཙ ཝིཉྙཱུཛཱཏིཀཱནཾ ཙིཏྟཱརཱདྷནཏྠནྟི ཝེདིཏབྦཾ. ཨེཝཾ སབྦཏྠ. སུཁཾ ཝཝཏྠཔེཏཱིཏི ཨཀིཙྪཾ ཨཀསིརེན སལླཀྑེཏི, པརིཙྪིནྡཏི ཙ.

༢༤༣. མནྡོ ཨུཏྟཱནསེཡྻཀདཱརཀོཔི ‘‘དཧརོ’’ཏི ཝུཙྩཏཱིཏི ཏཏོ ཝིསེསནཏྠཾ ‘‘ཡུཝཱ’’ཏི ¶ ཝུཏྟནྟི མནྟྭཱ ཡུཝསདྡེན ཝིསེསིཏབྦམེཝ དཧརསདྡསྶ ཨཏྠཾ དསྶེཏུཾ ‘‘ཏརུཎོ’’ཏི ཝུཏྟཾ. ཏཐཱ ཡུཝཱཔི ཀོཙི ཨནིཙྪནཀོ, ཨནིཙྪནཏོ ཙ ཨམཎྜནཛཱཏིཀོཏི ཏཏོ ཝིསེསནཏྠཾ ‘‘མཎྜནཛཱཏིཀོ’’ཏིཨཱདི ཝུཏྟནྟི མནྟྭཱ མཎྜནཛཱཏིཀཱདིསདྡེན ཝིསེསིཏབྦམེཝ ཡུཝསདྡསྶ ཨཏྠཾ དསྶེཏུཾ ‘‘ཡོབྦནྣེན སམནྣཱགཏོ’’ཏི ཝུཏྟཾ. པཱལི༹ཡཉྷི ཡཐཱཀྐམཾ པདཏྟཡསྶ ཝིསེསིཏབྦཝིསེསཀབྷཱཝེན ཝཙནཏོ ཏཐཱ སཾཝཎྞནཱ ཀཏཱ, ཨིཏརཐཱ ཨེཀཀེནཱཔི པདེན ཨདྷིཔྤེཏཏྠཱདྷིགམིཀཱ སཔརིཝཱརཱ སཾཝཎྞནཱཝ ཀཱཏབྦཱ སིཡཱཏི. ‘‘མཎྜནཔཀཏིཀོ’’ཏི ཝུཏྟམེཝ ཝིཝརིཏུཾ ‘‘དིཝསསྶཱ’’ཏིཨཱདིམཱཧ. ཀཎིཀསདྡོ དོསཔརིཡཱཡོ, དོསོ ཙ ནཱམ ཀཱལ༹ཏིལཀཱདཱིཏི དསྶེཏི ‘‘ཀཱལ༹ཏིལཀཱ’’ཏིཨཱདིནཱ. ཀཱལ༹ཏིལཔྤམཱཎཱ བིནྡཝོ ཀཱལ༹ཏིལཀཱནི, ཀཱལཱ༹ ཝཱ ཀམྨཱསཱ, ཡེ ‘‘སཱསཔབཱིཛིཀཱ’’ཏིཔི ཝུཙྩནྟི. ཏིལཔྤམཱཎཱ བིནྡཝོ ཏིལཀཱནི. ཝངྒཾ ནཱམ ཝིཡངྒཾ ཝིཔརིཎཱམིཏམངྒཾ. ཡོབྦནྣཔཱིལ༹ཀཱདཡོ མུཁདཱུསིཔཱིལ༹ཀཱ, ཡེ ‘‘ཁརཔཱིལ༹ཀཱ’’ ཏིཔི ཝུཙྩནྟི. མུཁནིམིཏྟནྟི མུཁཙྪཱཡཾ. མུཁེ གཏོ དོསོ མུཁདོསོ ¶ . ལཀྑཎཝཙནམཏྟམེཏཾ མུཁེ ཨདོསསྶཔི པཱཀཊབྷཱཝསྶ ཨདྷིཔྤེཏཏྟཱ, ཡཐཱ ཝཱ མུཁེ དོསོ, ཨེཝཾ མུཁེ ཨདོསོཔི མུཁདོསོཏི སརལོཔེན ཝུཏྟོ སཱམཉྙནིདྡེསཏོཔི ཨནེཀཏྠསྶ ཝིཉྙཱཏབྦཏྟཱ, པིསདྡལོཔེན ཝཱ ཨཡམཏྠོ ཝེདིཏབྦོ. ཨཝུཏྟོཔི ཧི ཨཏྠོ སམྤིཎྜནཝསེན ཝུཏྟོ ཝིཡ ཝིཉྙཱཡཏི, མུཁདོསོ ཙ མུཁཨདོསོ ཙ མུཁདོསོཏི ཨེཀདེསསརཱུཔེཀསེསནཡེནཔེཏྠ ཨཏྠོ དཊྛབྦོ. ཨེཝཉྷི ཨཏྠསྶ པརིཔུཎྞཏཱཡ ‘‘པརེསཾ སོལ༹སཝིདྷཾ ཙིཏྟཾ པཱཀཊཾ ཧོཏཱི’’ཏི ཝཙནཾ སམཏྠིཏཾ ཧོཏི. ཏེནེཏཾ ཝུཙྩཏི –

‘‘ཝཏྟབྦསྶཱཝསིཊྛསྶ, གཱཧོ ནིདསྶནཱདིནཱ;

ཨཔིསདྡཱདིལོཔེན, ཨེཀསེསནཡེན ཝཱ.

ཨསམཱནེ སདྡེ ཏིདྷཱ, ཙཏུདྷཱ ཙ སམཱནཀེ;

སཱམཉྙནིདྡེསཏོཔི, ཝེདིཏབྦོ ཝིབྷཱཝིནཱ’’ཏི.

‘‘སརཱགཾ ཝཱ ཙིཏྟ’’ནྟིཨཱདིནཱ པཱལི༹ཡཾ ཝུཏྟཾ སོལ༹སཝིདྷཾ ཙིཏྟཾ.

༢༤༥. པུབྦེནིཝཱསཉཱཎཱུཔམཱཡནྟི པུབྦེནིཝཱསཉཱཎསྶ, པུབྦེནིཝཱསཉཱཎེ ཝཱ དསྶིཏཱཡ ཨུཔམཱཡ. ཀསྨཱ པན པཱལི༹ཡཾ གཱམཏྟཡམེཝ ཨུཔམཱནེ གཧིཏནྟི ཙོདནཾ སོདྷེཏུཾ ‘‘ཏཾ དིཝས’’ནྟིཨཱདི ཝུཏྟཾ. ཏཾ དིཝསཾ ཀཏཀིརིཡཱ ནཱམ པཱཀཏིཀསཏྟསྶཱཔི ཡེབྷུཡྻེན པཱཀཊཱ ཧོཏི. ཏསྨཱ ཏཾ དིཝསཾ གནྟུཾ སཀྐུཎེཡྻཾ གཱམཏྟཡམེཝ བྷགཝཏཱ གཧིཏཾ, ན ཏདུཏྟརཱིཏི ཨདྷིཔྤཱཡོ ¶ . ཀིཉྩཱཔི པཱལི༹ཡཾ ཏཾདིཝསགྒཧཎཾ ནཏྠི, གཱམཏྟཡགྒཧཎེན པན ཏདཧེཝ ཀཏཀིརིཡཱ ཨདྷིཔྤེཏཱཏི མནྟྭཱ ཨཊྛཀཐཱཡཾ ཏཾདིཝསགྒཧཎཾ ཀཏནྟི དཊྛབྦཾ. ཏཾདིཝསགཏགཱམཏྟཡགྒཧཎེནེཝ ཙ མཧཱབྷིནཱིཧཱརེཧི ཨཉྙེསམྤི པུབྦེནིཝཱསཉཱཎལཱབྷཱིནཾ ཏཱིསུཔི བྷཝེསུ ཀཏཀིརིཡཱ ཡེབྷུཡྻེན པཱཀཊཱ ཧོཏཱིཏི དཱིཔིཏནྟི དཊྛབྦཾ. ཨེཏདཏྠམྤི ཧི གཱམཏྟཡགྒཧཎནྟི. ཏཱིསུ བྷཝེསུ ཀཏཀིརིཡཱཡཱཏི ཨབྷིསམྤརཱཡེསུ པུབྦེ དིཊྛདྷམྨེ པན ཨིདཱནི, པུབྦེ ཙ ཀཏཀིཙྩསྶ.

༢༤༧. པཱལི༹ཡཾ རཐིཀཱཡ ཝཱིཐིཾ སཉྩརནྟེཏི ཨཉྙཱཡ རཐིཀཱཡ ཨཉྙཾ རཐིཾ སཉྩརནྟེཏི ཨཏྠོ, ཏེན ཨཔརཱཔརཾ སཉྩརཎཾ དསྶིཏནྟི ཨཱཧ ‘‘ཨཔརཱཔརཾ སཉྩརནྟེ’’ཏི, ཏཾཏཾཀིཙྩཝསེན ཨིཏོ ཙིཏོ ཙ སཉྩརནྟེཏི ཝུཏྟཾ ཧོཏི, ཨཡམེཝཏྠོ རཐིཝཱིཐིསདྡཱནམེཀཏྠཏྟཱ. སིངྒྷཱཊཀམྷཱིཏི ཝཱིཐིཙཏུཀྐེ. པཱསཱདོ ཝིཡ བྷིཀྑུསྶ ཀརཛཀཱཡོ དཊྛབྦོ ¶ ཏཏྠ པཏིཊྛིཏསྶ དཊྛབྦདསྶནསིདྡྷིཏོ. མཾསཙཀྑུམཏོ ཧི དིབྦཙཀྑུསམདྷིགམོ. ཡཐཱཧ ‘‘མཾསཙཀྑུསྶ ཨུཔྤཱདོ, མགྒོ དིབྦསྶ ཙཀྑུནོ’’ཏི (ཨིཏིཝུ. ༦༡). ཙཀྑུམཱ པུརིསོ ཝིཡ ཨཡམེཝ དིབྦཙཀྑུཾ པཏྭཱ ཋིཏོ བྷིཀྑུ དཊྛབྦསྶ དསྶནཏོ. གེཧཾ པཝིསནྟོ, ཏཏོ ནིཀྑམནྟོ ཝིཡ ཙ མཱཏུཀུཙྪིཾ པཊིསནྡྷིཝསེན པཝིསནྟོ, ཏཏོ ཙ ཝིཛཱཏིཝསེན ནིཀྑམནྟོ མཱཏུཀུཙྪིཡཱ གེཧསདིསཏྟཱ. ཏཐཱ ཧི ཝུཏྟཾ ‘‘མཱཏརཾ ཀུཊིཀཾ བྲཱུསི, བྷརིཡཾ བྲཱུསི ཀུལཱཝཀ’’ནྟི (སཾ. ནི. ༡.༡༩). ཨཡཾ ཨཊྛཀཐཱམུཏྟཀོ ནཡོ – གེཧཾ པཝིསནྟོ ཝིཡ ཨཏྟབྷཱཝཾ ཨུཔཔཛྫནཝསེན ཨོཀྐམནྟོ, གེཧཱ ནིཀྑམནྟོ ཝིཡ ཙ ཨཏྟབྷཱཝཏོ ཙཝནཝསེན ཨཔཀྐམནྟོ ཨཏྟབྷཱཝསྶ གེཧསདིསཏྟཱ. ཝུཏྟཉྷི ‘‘གཧཀཱརཀ དིཊྛོསི, པུན གེཧཾ ན ཀཱཧསཱི’’ཏི (དྷ. པ. ༡༥༤).

ཨཔརཱཔརཾ སཉྩརཎཀསཏྟཱཏི པུནཔྤུནཾ སཾསཱརེ པརིབྦྷམནཀསཏྟཱ. ཨབྦྷོཀཱསཊྛཱནེཏི ཨཛ྄ཛྷོཀཱསདེསབྷཱུཏེ. མཛ྄ཛྷེཏི ནགརསྶ མཛ྄ཛྷབྷཱུཏེ སིངྒྷཱཊཀེ. ཏཏྠ ཏཏྠཱཏི ཏསྨིཾ ཏསྨིཾ བྷཝེཀདེསེ. ནིབྦཏྟསཏྟཱཏི ཨུཔྤཛྫམཱནཀསཏྟཱ. ཨིམིནཱ ཧི ཏསྨིཾ ཏསྨིཾ བྷཝེ ཛཱཏསཾཝདྡྷེ སཏྟེ ཝདཏི, ‘‘ཨཔརཱཔརཾ སཉྩརཎཀསཏྟཱ’’ཏི པན ཨེཏེན ཏཐཱ ཨནིཡམིཏཀཱལིཀེ སཱདྷཱརཎསཏྟེ. ཨེཝཉྷི ཏེསཾ ཡཐཱཀྐམཾ སཉྩརཎཀསནྣིསིནྣཀཛནོཔམཏཱ ཨུཔཔནྣཱ ཧོཏཱིཏི. ཏཱིསུ བྷཝེསུ ནིབྦཏྟསཏྟཱནཾ ཨཱཝིབྷཱུཏཀཱལོཏི ཨེཏྠ པན ཝུཏྟཔྤཀཱརཱནཾ སབྦེསམྤི སཏྟཱནཾ ཨནིཡམཏོ གཧཎཾ ཝེདིཏབྦཾ.

ནནུ ཙཱཡཾ དིབྦཙཀྑུཀཐཱ, ཨཐ ཀསྨཱ ‘‘ཏཱིསུ བྷཝེསཱུ’’ཏི ཙཏུཝོཀཱརབྷཝསྶཱཔི སངྒཧོ ཀཏོ. ན ཧི སོ ཨརཱུཔདྷམྨཱརམྨཎོཏི ཨནུཡོགཾ པརིཧརནྟོ ‘‘ཨིདཉྩཱ’’ཏིཨཱདིམཱཧ. ཏཏྠ ¶ ‘‘ཨིདནྟི ཏཱིསུ བྷཝེསུ ནིབྦཏྟསཏྟཱནནྟི ཨིདཾ ཝཙན’’ནྟི (དཱི. ནི. ཊཱི. ༡.༢༤༧) ཨཡམེཏྠ ཨཱཙརིཡསྶ མཏི, ཨེཝཾ སཏི ཨཊྛཀཐཱཙརིཡེཧི ཨཊྛཀཐཱཡམེཝ ཡཐཱཝུཏྟོ ཨནུཡོགོ པརིཧརིཏོཏི. ཨཡཾ པནེཏྠ ཨམྷཱཀཾ ཁནྟི – ནནུ ཙཱཡཾ དིབྦཙཀྑུཀཐཱ, ཨཐ ཀསྨཱ ‘‘དིབྦེན ཙཀྑུནཱ ཝིསུདྡྷེན ཨཏིཀྐནྟམཱནུསཀེན སཏྟེ པསྶཏི ཙཝམཱནེ ཨུཔཔཛྫམཱནེ’’ཏིཨཱདིནཱ ཨཝིསེསཏོ ཙཏུཝོཀཱརབྷཝཱུཔགསྶཱཔི སངྒཧོ ཀཏོ. ན ཧི ¶ སོ ཨརཱུཔདྷམྨཱརམྨཎོཏི ཨནུཡོགཾ པརིཧརནྟོ ‘‘ཨིདཉྩཱ’’ཏིཨཱདིམཱཧ. ཏཏྠ ཨིདནྟི ‘‘སཏྟེ པསྶཏི ཙཝམཱནེ ཨུཔཔཛྫམཱནེ’’ཏིཨཱདིཝཙནཾ. ཨེཝཉྷི སཏི ཨཊྛཀཐཱཙརིཡེཧི པཱལི༹ཡམེཝ ཡཐཱཝུཏྟོ ཨནུཡོགོ པརིཧརིཏོཏི. ཡདགྒེན སོ པཱལི༹ཡཾ པརིཧརིཏོ, ཏདགྒེན ཨཊྛཀཐཱཡམྤི ཏསྶཱ ཨཏྠཝཎྞནཱབྷཱཝཏོ. དེསནཱསུཁཏྠམེཝཱཏི ཀེཝལཾ དེསནཱསུཁཏྠཾ ཨེཝ ཨཝིསེསེན ཝུཏྟཾ, ན པན ཙཏུཝོཀཱརབྷཝཱུཔགཱནཾ དིབྦཙཀྑུསྶ ཨཱཝིབྷཱཝསབྦྷཱཝཏོ. ‘‘ཋཔེཏྭཱ ཨརཱུཔབྷཝ’’ནྟི ཝཱ ‘‘དྭཱིསུ བྷཝེསཱུ’’ཏི ཝཱ སཏྟེ པསྶཏི ཀཱམཱཝཙརབྷཝཏོ, རཱུཔཱཝཙརབྷཝཏོ ཙ ཙཝམཱནེཏི ཝཱ ཀཱམཱཝཙརབྷཝེ, རཱུཔཱཝཙརབྷཝེ ཙ ཨུཔཔཛྫམཱནེཏི ཝཱ ཝུཙྩམཱནཱ ཧི དེསནཱ ཡཐཱརཧཾ བྷེདྱབྷེདཀཱདིཝིབྷཱཝནེན སུཁཱསུཁཱཝབོདྷཱ ཙ ན ཧོཏི, ཨཝིསེསེན པན ཨེཝམེཝ ཝུཙྩམཱནཱ སུཁཱསུཁཱཝབོདྷཱ ཙ. དེསེཏུཾ, ཨཝབོདྷེཏུཉྩ སུཀརཏཱཔཡོཛནཉྷི ‘‘དེསནཱསུཁཏྠ’’ནྟི ཝུཏྟཾ. ཀསྨཱཏི ཨཱཧ ‘‘ཨཱརུཔྤེ…པེ… ནཏྠཱི’’ཏི, དིབྦཙཀྑུགོཙརབྷཱུཏཱནཾ རཱུཔདྷམྨཱནམབྷཱཝཏོཏི ཝུཏྟཾ ཧོཏི.

ཨཱསཝཀྑཡཉཱཎཀཐཱཝཎྞནཱ

༢༤༨. ཨིདྷ ཝིཔསྶནཱཔཱདཀཾ ཙཏུཏྠཛ྄ཛྷཱནཙིཏྟཾ ཝེདིཏབྦཾ, ན ལོཀིཡཱབྷིཉྙཱསུ ཝིཡ ཨབྷིཉྙཱཔཱདཀཾ. ཝིཔསྶནཱཔཱདཀནྟི ཙ ཝིཔསྶནཱཡ པདཊྛཱནབྷཱུཏཾ, ཝིཔསྶནཱ ཙ ནཱམེསཱ ཏིཝིདྷཱ ཝིཔསྶཀཔུགྒལབྷེདེན མཧཱབོདྷིསཏྟཱནཾ ཝིཔསྶནཱ, པཙྩེཀབོདྷིསཏྟཱནཾ ཝིཔསྶནཱ, སཱཝཀཱནཾ ཝིཔསྶནཱ ཙཱཏི. ཏཏྠ མཧཱབོདྷིསཏྟཱནཾ, པཙྩེཀབོདྷིསཏྟཱནཉྩ ཝིཔསྶནཱ ཙིནྟཱམཡཉཱཎསམྦནྡྷིཀཱ སཡམྦྷུཉཱཎབྷཱུཏཱ, སཱཝཀཱནཾ པན སུཏམཡཉཱཎསམྦནྡྷིཀཱ པརོཔདེསསམྦྷཱུཏཱ. སཱ ‘‘ཋཔེཏྭཱ ནེཝསཉྙཱནཱསཉྙཱཡཏནཾ ཨཝསེསརཱུཔཱརཱུཔཛ྄ཛྷཱནཱནཾ ཨཉྙཏརཏོ ཝུཊྛཱཡཱ’’ཏིཨཱདིནཱ ཨནེཀདྷཱ, ཨརཱུཔམུཁཝསེན ཙཏུདྷཱཏུཝཝཏྠཱནེ ཝུཏྟཱནཾ ཏེསཾ ཏེསཾ དྷཱཏུཔརིགྒཧམུཁཱནཉྩ ཨཉྙཏརམུཁཝསེན ཨནེཀདྷཱ ཙ ཝིསུདྡྷིམགྒེ (ཝིསུདྡྷི. ༢.༦༦༤) ནཱནཱནཡཏོ ཝིབྷཱཝིཏཱ, མཧཱབོདྷིསཏྟཱནཾ པན ཙཏུཝཱིསཏིཀོཊིསཏསཧསྶམུཁེན པབྷེདགམནཏོ ནཱནཱནཡཾ སབྦཉྙུཏཉྙཱཎསནྣིསྶཡསྶ ཨརིཡམགྒཉཱཎསྶ ཨདྷིཊྛཱནབྷཱུཏཾ པུབྦབྷཱགཉཱཎགབྦྷཾ གཎྷཱཔེནྟཾ ¶ པརིཔཱཀཾ གཙྪནྟཾ པརམགམྦྷཱིརཾ སཎྷསུཁུམཏརཾ ཨནཉྙསཱདྷཱརཎཾ ཝིཔསྶནཱཉཱཎཾ ཧོཏི ¶ , ཡཾ ཨཊྛཀཐཱསུ ‘‘མཧཱཝཛིརཉཱཎ’’ནྟི ཝུཙྩཏི, ཡསྶ ཙ པཝཏྟིཝིབྷཱགེན ཙཏུཝཱིསཏིཀོཊིསཏསཧསྶཔྤབྷེདསྶ པཱདཀབྷཱཝེན སམཱཔཛྫིཡམཱནཱ ཙཏུཝཱིསཏིཀོཊིསཏསཧསྶསངྑྱཱ དེཝསིཀཾ སཏྠུ ཝལ༹ཉྫནསམཱཔཏྟིཡོ ཝུཙྩནྟི. སྭཱཡཾ བུདྡྷཱནཾ ཝིཔསྶནཱཙཱརོ པརམཏྠམཉྫུསཱཡཾ ཝིསུདྡྷིམགྒཝཎྞནཱཡཾ (ཝིསུདྡྷི. ཊཱི. ༡.༡༤༤) ཨུདྡེསཏོ ཨཱཙརིཡེན དསྶིཏོ, ཏཏོ སོ ཨཏྠིཀེཧི གཧེཏབྦོ. ཨིདྷ པན སཱཝཀཱནཾ ཝིཔསྶནཱཝ ཨདྷིཔྤེཏཱ.

‘‘ཨཱསཝཱནཾ ཁཡཉཱཎཱཡཱ’’ཏི ཨིདཾ ཀིརིཡཱཔཡོཛནབྷཱུཏེ ཏདཏྠེ སམྤདཱནཝཙནཾ, ཏསྨཱ ཨསཏིཔི པཡོཛནཝཱཙཀེ པཡོཛནཝསེནེཝ ཨཏྠོ ཝེདིཏབྦོཏི ཨཱཧ ‘‘ཁཡཉཱཎནིབྦཏྟནཏྠཱཡཱ’’ཏི. ཨེཝམཱིདིསེསུ. ནིབྦཱནཾ, ཨརཧཏྟམགྒོ ཙ ཨུཀྐཊྛནིདྡེསེན ཨིདྷ ཁཡོ ནཱམ, ཏཏྠ ཉཱཎཾ ཁཡཉཱཎཾ, ཏསྶ ནིབྦཏྟནསངྑཱཏོ ཨཏྠོ པཡོཛནཾ, ཏདཏྠཱཡཱཏི ཨཏྠོ. ཁེཔེཏི པཱཔདྷམྨེ སམུཙྪིནྡཏཱིཏི ཁཡོ, མགྒོ. སོ པན པཱཔཀྑཡོ ཨཱསཝཀྑཡེན ཝིནཱ ནཏྠི, ཏསྨཱ ‘‘ཁཡེ ཉཱཎ’’ནྟི (དྷ. ས. སུཏྟནྟདུཀམཱཏིཀཱ ༡༤༨) ཨེཏྠ ཁཡགྒཧཎེན ཨཱསཝཀྑཡོཝ ཝུཏྟོཏི དསྶེཏི ‘‘ཨཱསཝཱནཾ ཁཡོ’’ཏི ཨིམིནཱ. ཨནུཔྤཱདེ ཉཱཎནྟི ཨཱསཝཱནམནུཔྤཱདབྷཱུཏེ ཨརིཡཕལེ ཉཱཎཾ. ཁཱིཡིཾསུ ཨཱསཝཱ ཨེཏྠཱཏི ཁཡོ, ཕལཾ. སམིཏཔཱཔཏཱཡ སམཎོ, སམིཏཔཱཔཏཱ ཙ ནིཔྤརིཡཱཡཏོ ཨརཧཏྟཕལེནེཝཱཏི ཨཱཧ ‘‘ཨཱསཝཱནཾ ཁཡཱ སམཎོ ཧོཏཱིཏི ཨེཏྠ ཕལ’’ནྟི. ཁཡཱཏི ཙ ཁཱིཎཏྟཱཏི ཨཏྠོ. ཁཱིཡནྟི ཨཱསཝཱ ཨེཏྠཱཏི ཁཡོ, ནིབྦཱནཾ. ‘‘ཨཱསཝཀྑཡཱ’’ཏི པན སམཱསཝསེན དྭིབྷཱཝཾ ཀཏྭཱ ཝུཏྟཏྟཱ ‘‘ཨཱསཝཱནཾ ཁཡོ’’ཏི པདསྶ ཨཏྠུདྡྷཱརེ ཨཱསཝཀྑཡཔདགྒཧཎཾ.

‘‘པརཝཛྫཱནུཔསྶིསྶཱ’’ཏིཨཱདིགཱཐཱ དྷམྨཔདེ (དྷ. པ. ༢༥༣). ཏཏྠ ཨུཛ྄ཛྷཱནསཉྙིནོཏི གརཧསཉྙིནོ. ཨརཱཏི དཱུརཱ. ‘‘ཨརཱ སིངྒྷཱམི ཝཱརིཛ’’ནྟིཨཱདཱིསུ (སཾ. ནི. ༡.༢༣༤; ཛཱ. ༡.༦.༡༡༦) ཝིཡ ཧི དཱུརཏྠོཡཾ ནིཔཱཏོ. ‘‘ཨཱརཱ’’ཏིཔི པཱཋོ. ཨརཱསདྡོ ཝིཡ ཨཱརཱསདྡོཔི དཱུརཏྠེ ཨེཀོ ནིཔཱཏོཏི ཝེདིཏབྦོ. ཏདེཝ ཧི པདཾ སདྡསཏྠེ ཨུདཱཧཊཾ. ཀཱམཉྩ དྷམྨཔདཊྛཀཐཱཡཾ ‘‘ཨརཧཏྟམགྒསངྑཱཏཱ ཨཱརཱ དཱུརཾ གཏོཝ ཧོཏཱི’’ཏི (དྷ. པ. ཨཊྛ. ༢.༢༥༣) ཝུཏྟཾ, ཏཐཱཔི ཨཱསཝཝཌྜྷིཡཱ སངྑཱརེ ཝཌྜྷེནྟོ ¶ ཝིསངྑཱརཏོ སུཝིདཱུརདཱུརོ, ཏསྨཱ ‘‘ཨཱརཱ སོ ཨཱསཝཀྑཡཱ’’ཏི ཨེཏྠ ཨཱསཝཀྑཡཔདཾ ཝིསངྑཱརཱདྷིཝཙནམྤི སམྦྷཝཏཱིཏི ཨཱཧ ‘‘ནིབྦཱན’’ནྟི. ཁཡནཾ ཁཡོ, ཨཱསཝཱནཾ ཁཎནིརོདྷོ. སེསཾ ཏསྶ པརིཡཱཡཝཙནཾ. བྷངྒོ ཨཱསཝཱནཾ ཁཡོཏི ཝུཏྟོཏི ཡོཛནཱ. ཨིདྷ པན ནིབྦཱནམྤི མགྒོཔི ཨཝིནཱབྷཱཝཏོ. ན ཧི ནིབྦཱནམནཱརབྦྷ མགྒེནེཝ ཨཱསཝཱནཾ ཁཡོ ཧོཏཱིཏི.

ཏནྣིནྣནྟི ¶ ཏསྨིཾ ཨཱསཝཱནཾ ཁཡཉཱཎེ ནིནྣཾ. སེསཾ ཏསྶེཝ ཝེཝཙནཾ. པཱལི༹ཡཾ ཨིདཾ དུཀྑནྟི དུཀྑསྶ ཨརིཡསཙྩསྶ པརིཙྪིནྡིཏྭཱ, ཨནཝསེསེཏྭཱ ཙ ཏདཱ ཏསྶ བྷིཀྑུནོ པཙྩཀྑཏོ གཧིཏབྷཱཝདསྶནནྟི དསྶེཏུཾ ‘‘ཨེཏྟཀ’’ནྟིཨཱདི ཝུཏྟཾ. ཏཏྠ ཧི ཨེཏྟཀཾ དུཀྑནྟི ཏསྶ པརིཙྪིཛྫ གཧིཏབྷཱཝདསྶནཾ. ན ཨིཏོ བྷིཡྻོཏི ཨནཝསེསེཏྭཱ གཧིཏབྷཱཝདསྶནཾ. ཏེནཱཧ ‘‘སབྦམྤི དུཀྑསཙྩ’’ནྟིཨཱདི. སརསལཀྑཎཔཊིཝེདྷཝསེན པཛཱནནམེཝ ཡཐཱབྷཱུཏཾ པཛཱནནཾ ནཱམཱཏི དསྶེཏི ‘‘སརསལཀྑཎཔཊིཝེདྷེནཱ’’ཏི ཨིམིནཱ. རསོཏི སབྷཱཝོ རསིཏབྦོ ཛཱནིཏབྦོཏི ཀཏྭཱ, ཨཏྟནོ རསོ སརསོ, སོ ཨེཝ ལཀྑཎཾ, ཏསྶ ཨསམྨོཧཏོ པཊིཝིཛ྄ཛྷནེནཱཏི ཨཏྠོ. ཨསམྨོཧཏོ པཊིཝིཛ྄ཛྷནཉྩ ནཱམ ཡཐཱ ཏསྨིཾ ཉཱཎེ པཝཏྟེ པཙྪཱ དུཀྑསཙྩསྶ སརཱུཔཱདིཔརིཙྪེདེ སམྨོཧོ ན ཧོཏི, ཏཐཱ ཏསྶ པཝཏྟིཡེཝ. ཏེན ཝུཏྟཾ ‘‘ཡཐཱབྷཱུཏཾ པཛཱནཱཏཱི’’ཏི. ‘‘ནིབྦཏྟིཀ’’ནྟི ཨིམིནཱ ‘‘དུཀྑཾ སམུདེཏི ཨེཏསྨཱཏི དུཀྑསམུདཡོ’’ཏི ནིབྦཙནཾ དསྶེཏི. ཏདུབྷཡནྟི དུཀྑཾ, དུཀྑསམུདཡོ ཙ. ཡཾ ཋཱནཾ པཏྭཱཏི ཡཾ ནིབྦཱནཾ མགྒསྶ ཨཱརམྨཎཔཙྩཡཊྛེན ཀཱརཎབྷཱུཏཾ ཨཱགམྨ. ཋཱནནྟི ཧི ཀཱརཎཾ ཝུཙྩཏི ཏིཊྛཏི ཨེཏྠ ཕལཾ ཏདཱཡཏྟཏཱཡཱཏི ཀཏྭཱ. ཏདུབྷཡཾ པཏྭཱཏི ཙ ཏདུབྷཡཝཏོ པུགྒལསྶ ཏདུབྷཡསྶ པཏྟི ཝིཡ ཝུཏྟཱ. པུགྒལསྶེཝ ཧི ཨཱརམྨཎཀརཎཝསེན ནིབྦཱནཔྤཏྟི, ན ཏདུབྷཡསྶ. ཨཔིཙ པཏྭཱཏི པཱཔུཎནཧེཏུ, པུགྒལསྶ ཨཱརམྨཎཀརཎཝསེན སམཱཔཛྫནཏོཏི ཨཏྠོ. ཨསམཱནཀཏྟུཀེ ཝིཡ ཧི སམཱནཀཏྟུཀེཔི ཏྭཱཔཙྩཡསྶ ཧེཏྭཏྠེ པཝཏྟི སདྡསཏྠེསུ པཱཀཊཱ. ཨཔྤཝཏྟཱིཏི ཨཔྤཝཏྟིནིམིཏྟཾ ‘‘ན པཝཏྟཏི ཏདུབྷཡམེཏེནཱ’’ཏི ཀཏྭཱ, ཨཔྤཝཏྟིཊྛཱནཾ ཝཱ ‘‘ན པཝཏྟཏི ཏདུབྷཡམེཏྠཱ’’ཏི ཀཏྭཱ, ཨནེན ཙ ‘‘དུཀྑཾ ནིརུཛ྄ཛྷཏི ཨེཏྠ, ཨེཏེནཱཏི ཝཱ དུཀྑནིརོདྷོ’’ཏི ནིབྦཙནཾ དསྶེཏི, དུཀྑསམུདཡསྶ པན གཧཎཾ ཏཾནིབྦཏྟཀསྶ ནིརུཛ྄ཛྷནཏོ ཏསྶཱཔི ནིརུཛ྄ཛྷནདསྶནཏྠནྟི དཊྛབྦཾ. ནིབྦཱནཔདེཡེཝ ¶ ཏ-སདྡོ ནིཝཏྟཏཱིཏི ཨཡཾ-སདྡོ པུན ཝུཏྟོ. སབྦནཱམིཀཉྷི པདཾ ཝུཏྟསྶ ཝཱ ལིངྒསྶ གཱཧཀཾ, ཝུཙྩམཱནསྶ ཝཱ. ཏསྶཱཏི དུཀྑནིརོདྷསྶ. སམྤཱཔཀནྟི སཙྪིཀརཎཝསེན སམྨདེཝ པཱཔཀཾ, ཨེཏེན ཙ ‘‘དུཀྑནིརོདྷཾ གམཡཏི, གཙྪཏི ཝཱ ཨེཏཱཡཱཏི དུཀྑནིརོདྷགཱམིནཱི, སཱཡེཝ པཊིཔདཱ དུཀྑནིརོདྷགཱམིནིཔཊིཔདཱ’’ཏི ནིབྦཙནཾ དསྶེཏི.

ཀིལེསཝསེནཱཏི ཨཱསཝསངྑཱཏཀིལེསཝསེན. ཏདེཝ ཨཱསཝཔརིཡཱཡེན དསྶེནྟོ པུན ཨཱཧ, ཏསྨཱ ན ཨེཏྠ པུནརུཏྟིདོསོཏི ཨདྷིཔྤཱཡོ. པརིཡཱཡདེསནཱབྷཱཝོ ནཱམ ཧི ཨཱཝེཎིཀོ བུདྡྷདྷམྨོཏི ཧེཊྛཱ ཝུཏྟོཝཱཡམཏྠོ. ནནུ ཙ ཨཱསཝཱནཾ དུཀྑསཙྩཔརིཡཱཡོཝ ཨཏྠི, ན སེསསཙྩཔརིཡཱཡོ, ཨཐ ཀསྨཱ སརཱུཔཏོ དསྶིཏསཙྩཱནིཡེཝ ཀིལེསཝསེན པརིཡཱཡཏོ པུན དསྶེནྟོ ཨེཝམཱཧཱཏི ཝུཏྟནྟི? སཙྩཾ, ཏཾསམྦནྡྷཏྟཱ པན སེསསཙྩཱནཾ ཏཾསམུདཡཱདིཔརིཡཱཡོཔི ལབྦྷཏཱིཏི ¶ ཀཏྭཱ ཨེཝཾ ཝུཏྟནྟི ཝེདིཏབྦཾ. དུཀྑསཙྩཔརིཡཱཡབྷཱུཏཨཱསཝསམྦནྡྷཱནི ཧི ཨཱསཝསམུདཡཱདཱིནཱིཏི, སཙྩཱནི དསྶེནྟོཏིཔི ཡོཛེཏབྦཾ. ‘‘ཨཱསཝཱནཾ ཁཡཉཱཎཱཡཱ’’ཏི ཨཱརདྡྷཏྟཱ ཙེཏྠ ཨཱསཝཱནམེཝ གཧཎཾ, ན སེསཀིལེསཱནཾ ཏཐཱ ཨནཱརདྡྷཏྟཱཏི དཊྛབྦཾ. ཏཐཱ ཧི ‘‘ཀཱམཱསཝཱཔི ཙིཏྟཾ ཝིམུཙྩཏཱི’’ཏིཨཱདིནཱ (དཱི. ནི. ༡.༢༤༨; མ. ནི. ༡.༤༣༣; ༣.༡༩) ཨཱསཝཝིམུཏྟསཱིསེནེཝ སབྦཀིལེསཝིམུཏྟི ཝུཏྟཱ. ‘‘ཨིདཾ དུཀྑནྟི ཡཐཱབྷཱུཏཾ པཛཱནཱཏཱི’’ཏིཨཱདིནཱ མིསྶཀམགྒོཝ ཨིདྷ ཀཐིཏོ ལོཀིཡཝིཔསྶནཱཡ ལོཀུཏྟརམགྒསྶ མིསྶཀཏྟཱཏི ཝུཏྟཾ ‘‘སཧ ཝིཔསྶནཱཡ ཀོཊིཔྤཏྟཾ མགྒཾ ཀཐེསཱི’’ཏི. ‘‘ཛཱནཏོ པསྶཏོ’’ཏི ཨིམིནཱ ཏཡོཔི པརིཉྙཱསཙྪིཀིརིཡཱབྷཱཝནཱབྷིསམཡཱ ཝུཏྟཱ ཙཏུསཙྩཔཛཱནནཱཡ ཨེཝ ཙཏུཀིཙྩསིདྡྷིཏོ, པཧཱནཱབྷིསམཡོ པན པཱརིསེསཏོ ‘‘ཝིམུཙྩཏཱི’’ཏི ཨིམིནཱ ཝུཏྟོཏི ཨཱཧ ‘‘མགྒཀྑཎཾ དསྶེཏཱི’’ཏི. ཙཏྟཱརི ཧི ཀིཙྩཱནི ཙཏུསཙྩཔཛཱནནཱཡ ཨེཝ སིདྡྷཱནི. ཡཐཱཧ ‘‘ཏཾ ཁོ པནིདཾ དུཀྑཾ ཨརིཡསཙྩཾ པརིཉྙཱཏནྟི མེ བྷིཀྑཝེ པུབྦེ ཨནནུསྶུཏེསུ དྷམྨེསུ ཙཀྑུཾ ཨུདཔཱདཱི’’ཏིཨཱདི (སཾ. ནི. ༥.༡༠༨༡; མཧཱཝ. ༡༥; པཊི. མ. ༢.༢༩). ཨཡཾ ཨཊྛཀཐཱམུཏྟཀོ ནཡོ – ཛཱནཏོ པསྶཏོཏི ཙ ཧེཏུནིདྡེསོ, ‘‘ཛཱནནཧེཏུ པསྶནཧེཏུ ཀཱམཱསཝཱཔི ཙིཏྟཾ ཝིམུཙྩཏཱི’’ཏིཨཱདིནཱ ཡོཛནཱ. ཀཱམཉྩེཏྠ ཛཱནནཔསྶནཀིརིཡཱནཾ, ཝིམུཙྩནཀིརིཡཱཡ ཙ སམཱནཀཱལཏཱ, ཏཐཱཔི ¶ དྷམྨཱནཾ སམཱནཀཱལིཀཱནམྤི པཙྩཡཔཙྩཡུཔྤནྣཏཱ སཧཛཱཏཱདིཀོཊིཡཱ ལབྦྷཏཱིཏི, ཧེཏུགབྦྷཝིསེསནཏཱདསྶནམེཏནྟིཔི ཝདནྟི.

བྷཝཱསཝགྒཧཎེན ཙེཏྠ བྷཝརཱགསྶ ཝིཡ བྷཝདིཊྛིཡཱཔི སམཝརོདྷོཏི དིཊྛཱསཝསྶཱཔི སངྒཧོ དཊྛབྦོ, ཨདྷུནཱ པན ‘‘དིཊྛཱསཝཱཔི ཙིཏྟཾ ཝིམུཙྩཏཱི’’ཏི ཀཏྠཙི པཱཋོ དིསྶཏི, སོ ན པོརཱཎོ, པཙྪཱ པམཱདལིཁིཏོཏི ཝེདིཏབྦོ. བྷཡབྷེརཝསུཏྟསཾཝཎྞནཱདཱིསུ (མ. ནི. ཨཊྛ. ༡.༥༤) ཨནེཀཱསུཔི ཏཐེཝ སཾཝཎྞིཏཏྟཱ. ཨེཏྠ ཙ ཀིཉྩཱཔི པཱལི༹ཡཾ སཙྩཔཊིཝེདྷོ ཨནིཡམིཏཔུགྒལསྶ ཨནིཡམིཏཀཱལཝསེན ཝུཏྟོ, ཏཐཱཔི ཨབྷིསམཡཀཱལེ ཏསྶ པཙྩུཔྤནྣཏཾ ཨུཔཱདཱཡ ‘‘ཨེཝཾ ཛཱནཏོ ཨེཝཾ པསྶཏོ’’ཏི ཝཏྟམཱནཀཱལནིདྡེསོ ཀཏོ, སོ ཙ ཀཱམཾ ཀསྶཙི མགྒཀྑཎཏོ པརཾ ཡཱཝཛྫཏནཱ ཨཏཱིཏཀཱལིཀོ ཨེཝ, སབྦཔཋམཾ པནསྶ ཨཏཱིཏཀཱལིཀཏྟཾ ཕལཀྑཎེན ཝེདིཏབྦནྟི ཨཱཧ ‘‘ཝིམུཏྟསྨིནྟི ཨིམིནཱ ཕལཀྑཎ’’ནྟི. པཙྩཝེཀྑཎཉཱཎནྟི ཕལཔཙྩཝེཀྑཎཉཱཎཾ ཏཐཱ ཙེཝ ཝུཏྟཏྟཱ. ཏགྒཧཎེན པན ཏདཝིནཱབྷཱཝཏོ སེསཱནི ནིརཝསེསཱནི གཧེཏབྦཱནི, ཨེཀདེསཱནི ཝཱ ཨཔརིཔུཎྞཱཡཔི པཙྩཝེཀྑཎཱཡ སམྦྷཝཏོ. ‘‘ཁཱིཎཱ ཛཱཏཱི’’ཏིཨཱདཱིཧི པདེཧི ‘‘ནཱཔརཾ ཨིཏྠཏྟཱཡཱ’’ཏི པདཔརིཡོསཱནེཧི. ཏསྶཱཏི པཙྩཝེཀྑཎཉཱཎསྶ. བྷཱུམིནྟི པཝཏྟིཊྛཱནཾ. ནནུ ཙ ‘‘ཝིམུཏྟསྨིཾ ཝིམུཏྟ’’ནྟི ཝུཏྟཾ ཕལམེཝ ཏསྶ ཨཱརམྨཎསངྑཱཏཱ བྷཱུམི, ཨཐ ཀཐཾ ‘‘ཁཱིཎཱ ཛཱཏཱི’’ཏིཨཱདཱིཧི ཏསྶ བྷཱུམིདསྶནནྟི ཙོདནཾ ¶ སོདྷེཏུཾ ‘‘ཏེན ཧཱི’’ཏིཨཱདི ཝུཏྟཾ. ཡསྨཱ པན པཧཱིནཀིལེསཔཙྩཝེཀྑཎེན ཝིཛྫམཱནསྶཱཔི ཀམྨསྶ ཨཱཡཏིཾ ཨཔྤཊིསནྡྷིཀབྷཱཝཏོ ‘‘ཁཱིཎཱ ཛཱཏཱི’’ཏི པཛཱནཱཏི, ཡསྨཱ ཙ མགྒཔཙྩཝེཀྑཎཱདཱིཧི ‘‘ཝུསིཏཾ བྲཧྨཙརིཡ’’ནྟིཨཱདཱིནི པཛཱནཱཏི, ཏསྨཱ ‘‘ཁཱིཎཱ ཛཱཏཱི’’ཏིཨཱདཱིཧི ཏསྶ བྷཱུམིདསྶནནྟི ཝུཏྟཾ ཧོཏི. ‘‘ཏེན ཉཱཎེནཱ’’ཏི ཧི ཡཐཱརུཏཏོ, ཨཝིནཱབྷཱཝཏོ ཙ གཧིཏེན པཉྩཝིདྷེན པཙྩཝེཀྑཎཉཱཎེནཱཏི ཨཏྠོ.

‘‘ཁཱིཎཱ ཛཱཏཱི’’ཏི ཨེཏྠ སོཏུཛནཱནཾ སུཝིཉྙཱཔནཏྠཾ པརམྨུཁཱ ཝིཡ ཙོདནཾ སམུཊྛཱཔེཏི ‘‘ཀཏམཱ པནཱ’’ཏིཨཱདིནཱ. ཡེན པནཱདྷིཔྤཱཡེན ཙོདནཱ ཀཏཱ, ཏདདྷིཔྤཱཡཾ པཀཱསེཏྭཱ པརིཧཱརཾ ཝཏྟུཀཱམོ ‘‘ན ཏཱཝསྶཱ’’ཏིཨཱདིམཱཧ. ‘‘ན ཏཱཝ…པེ… ཝིཛྫམཱནཏྟཱ’’ཏི ཝཀྑམཱནམེཝ ཧི ཨཏྠཾ མནསི ཀཏྭཱ ཨཡཾ ཙོདནཱ སམུཊྛཱཔིཏཱ, ཏཏྠ ན ཏཱཝསྶ ཨཏཱིཏཱ ¶ ཛཱཏི ཁཱིཎཱཏི ཨསྶ བྷིཀྑུནོ ཨཏཱིཏཱ ཛཱཏི, ན ཏཱཝ མགྒབྷཱཝནཱཡ ཁཱིཎཱ. ཏཏྠ ཀཱརཎམཱཧ ‘‘པུབྦེཝ ཁཱིཎཏྟཱ’’ཏི, མགྒབྷཱཝནཱཡ པུརིམཏརམེཝ ནིརུཛ྄ཛྷནཝསེན ཁཱིཎཏྟཱཏི ཨདྷིཔྤཱཡོ. ན ཨནཱགཏཱ ཨསྶ ཛཱཏི ཁཱིཎཱ མགྒབྷཱཝནཱཡཱཏི ཡོཛནཱ. ཏཏྠ ཀཱརཎམཱཧ ‘‘ཨནཱགཏེ ཝཱཡཱམཱབྷཱཝཏོ’’ཏི, ཨིདཉྩ ཨནཱགཏབྷཱཝསཱམཉྙམེཝ གཧེཏྭཱ ལེསེན ཙོདནཱདྷིཔྤཱཡཝིབྷཱཝནཏྠཾ ཝདཏི, ན ཨནཱགཏཝིསེསཾ ཨནཱགཏེ མགྒབྷཱཝནཱཡ ཁེཔནཔཡོགཱབྷཱཝཏོཏི ཨཏྠོ. ཝིཛྫམཱནེཡེཝ ཧི པཡོགོ སམྦྷཝཏི, ན ཨཝིཛྫམཱནེཏི ཝུཏྟཾ ཧོཏི. ཨནཱགཏཝིསེསོ པནེཏྠ ཨདྷིཔྤེཏོ, ཏསྶ ཙ ཁེཔནེ ཝཱཡཱམོཔི ལབྦྷཏེཝ. ཏེནཱཧ ‘‘ཡཱ པན མགྒསྶཱ’’ཏིཨཱདི. ཨནཱགཏཝིསེསོཏི ཙ ཨབྷཱཝིཏེ མགྒེ ཨུཔྤཛྫནཱརཧོ ཨནནྟརཛཱཏིབྷེདོ ཝུཙྩཏི. ན པཙྩུཔྤནྣཱ ཨསྶ ཛཱཏི ཁཱིཎཱ མགྒབྷཱཝནཱཡཱཏི ཡོཛནཱ. ཏཏྠ ཀཱརཎམཱཧ ‘‘ཝིཛྫམཱནཏྟཱ’’ཏི, ཨེཀབྷཝཔརིཡཱཔནྣཏཱཡ ཝིཛྫམཱནཏྟཱཏི ཨཏྠོ. ཏཏྠ ཏཏྠ བྷཝེ པཋམཱབྷིནིབྦཏྟིལཀྑཎཱ ཧི ཛཱཏི. ‘‘ཡཱ པནཱ’’ཏིཨཱདིནཱ པན མགྒབྷཱཝནཱཡ ཀིལེསཧེཏུཝིནཱསནམུཁེན ཨནཱགཏཛཱཏིཡཱ ཨེཝ ཁཱིཎབྷཱཝོ པཀཱསིཏོཏི དཊྛབྦཾ. ཨེཀཙཏུཔཉྩཝོཀཱརབྷཝེསཱུཏི བྷཝཏྟཡགྒཧཎཾ ཝུཏྟནཡེན ཨནཝསེསཏོ ཛཱཏིཡཱ ཁཱིཎབྷཱཝདསྶནཏྠཾ, པུབྦཔདདྭཡེཔེཏྠ ཨུཏྟརཔདལོཔོ. ཨེཀཙཏུཔཉྩཀྑནྡྷཔྤབྷེདཱཏི ཨེཏྠཱཔི ཨེསེཝ ནཡོ. ‘‘ཏཾ སོ’’ཏིཨཱདི ‘‘ཀཐཉྩ ནཾ པཛཱནཱཏཱི’’ཏི ཙོདནཱཡ སོདྷནཱཝཙནཾ. ཏཏྠ ཏནྟི ཡཐཱཝུཏྟཾ ཛཱཏིཾ. སོཏི ཁཱིཎཱསཝོ བྷིཀྑུ. པཙྩཝེཀྑིཏྭཱཏི པཛཱནནཱཡ པུབྦབྷཱགེ པཧཱིནཀིལེསཔཙྩཝེཀྑཎདསྶནཾ. ཨེཝཉྩ ཀཏྭཱ པཙྩཝེཀྑཎཔརམྤརཱཡ ཏཐཱ པཛཱནནཱ སིདྡྷཱཏི དཊྛབྦཾ. པཙྩཝེཀྑཎནྟརཝིབྷཱཝནཏྠམེཝ ཧི ‘‘ཛཱནནྟོ པཛཱནཱཏཱི’’ཏི ཝཏྟམཱནཝཙནདྭཡཾ ཝུཏྟཾ, ཛཱནནྟོ ཧུཏྭཱ, ཛཱནནཧེཏུ ཝཱ པཛཱནཱཏི ནཱམཱཏི ཨཏྠོ.

བྲཧྨཙརིཡཝཱསོ ¶ ནཱམ ཨུཀྐཊྛནིདྡེསཏོ མགྒབྲཧྨཙརིཡསྶ ནིབྦཏྟནམེཝཱཏི ཨཱཧ ‘‘པརིཝུཏྠ’’ནྟི, སམནྟཏོ ནིརཝསེསེན ཝསིཏཾ པརིཙིཎྞནྟི ཨཏྠོ. ཀསྨཱ པནིདཾ སོ ཨཏཱིཏཀཱལཝསེན པཛཱནཱཏཱིཏི ཨནུཡོགེནཱཧ ‘‘པུཐུཛྫནཀལྱཱཎཀེན ཧི སདྡྷི’’ནྟིཨཱདི. པུཐུཛྫནཀལྱཱཎཀོཔི ཧི ཧེཊྛཱ ཝུཏྟལཀྑཎོ སོཏཱཔཏྟིཕལསཙྪིཀིརིཡཱཡ པཊིཔནྣོ ¶ ནཱམ དཀྑིཎཝིབྷངྒསུཏྟཱདཱིསུ (མ. ནི. ༣.༣༧༩) ཏཐཱ ཨེཝ ཝུཏྟཏྟཱ. ཝསནྟི ནཱམཱཏི ཝསནྟཱ ཨེཝ ནཱམ ཧོནྟི, ན ཝུཏྠཝཱསཱ. ཏསྨཱཏི ཝུཏྠཝཱསཏྟཱ. ནནུ ཙ ‘‘སོ ‘ཨིདཾ དུཀྑ’’ནྟི ཡཐཱབྷཱུཏཾ པཛཱནཱཏཱི’’ཏིཨཱདིནཱ པཱལི༹ཡཾ སམྨཱདིཊྛིཡེཝ ཝུཏྟཱ, ན སམྨཱསངྐཔྤཱདཡོ, ཨཐ ཀསྨཱ ‘‘ཙཏཱུསུ སཙྩེསུ ཙཏཱུཧི མགྒེཧི པརིཉྙཱཔཧཱནསཙྪིཀིརིཡཱབྷཱཝནཱཝསེན སོལ༹སཝིདྷཾ ཀིཙྩཾ ནིཊྛཱཔིཏ’’ནྟི ཨཊྛངྒིཀསྶ མགྒསྶ སཱདྷཱརཎཏོ ཝུཏྟནྟི? སམྨཱསངྐཔྤཱདཱིནམྤི ཙཏུཀིཙྩསཱདྷནཝསེན པཝཏྟིཏོ. སམྨཱདིཊྛིཡཱ ཧི ཙཏཱུསུ སཙྩེསུ པརིཉྙཱདིཀིཙྩསཱདྷནཝསེན པཝཏྟམཱནཱཡ སམྨཱསངྐཔྤཱདཱིནམྤི སེསཱནཾ དུཀྑསཙྩེ པརིཉྙཱབྷིསམཡཱནུགུཎཱཝ པཝཏྟི, ཨིཏརསཙྩེསུ ཙ ནེསཾ པཧཱནཱབྷིསམཡཱདིཝསེན པཝཏྟི པཱཀཊཱ ཨེཝཱཏི. དུཀྑནིརོདྷམགྒེསུ ཡཐཱཀྐམཾ པརིཉྙཱསཙྪིཀིརིཡཱབྷཱཝནཱཔི ཡཱཝདེཝ སམུདཡཔཧཱནཏྠཱཏི ཀཏྭཱ ཏདཏྠེཡེཝ ཏཱསཾ པཀྑིཔནེན ‘‘ཀཏཾ ཀརཎཱིཡ’’ནྟི པདསྶ ཨདྷིཔྤཱཡཾ ཝིབྷཱཝེཏུཾ ‘‘ཏེནཱ’’ཏིཨཱདི ཝུཏྟཾ. ‘‘དུཀྑམཱུལཾ སམུཙྪིནྣ’’ནྟི ཨིམིནཱཔི ཏདེཝ པཀཱརནྟརེན ཝིབྷཱཝེཏི.

ཀསྨཱ པནེཏྠ ‘‘ཀཏཾ ཀརཎཱིཡ’’ནྟི ཨཏཱིཏནིདྡེསོ ཀཏོཏི ཨཱཧ ‘‘པུཐུཛྫནཀལྱཱཎཀཱདཡོ’’ཏིཨཱདི. ཨིམེ པཀཱརཱ ཨིཏྠཾ, ཏབྦྷཱཝོ ཨིཏྠཏྟནྟི དསྶེཏི ‘‘ཨིཏྠབྷཱཝཱཡཱ’’ཏི ཨིམིནཱ, ཨཱཡ-སདྡོ ཙ སམྤདཱནཏྠེ, ཏདཏྠཱཡཱཏི ཨཏྠོ. ཏེ པན པཀཱརཱ ཨརིཡམགྒབྱཱཔཱརབྷཱུཏཱ པརིཉྙཱདཡོ ཨིདྷཱདྷིཔྤེཏཱཏི ཝུཏྟཾ ‘‘ཨེཝཾ སོལ༹སཀིཙྩབྷཱཝཱཡཱ’’ཏི. ཏེ ཧི མགྒཾ པཙྩཝེཀྑཏོ མགྒཱནུབྷཱཝེན པཱཀཊཱ ཧུཏྭཱ ཨུཔཊྛཧནྟི མགྒེ པཙྩཝེཀྑིཏེ ཏཾཀིཙྩཔཙྩཝེཀྑཎཱཡཔི སུཁེན སིདྡྷིཏོ. ཨེཝཾ སཱདྷཱརཎཏོ ཙཏཱུསུ མགྒེསུ པཙྩེཀཾ ཙཏུཀིཙྩཝསེན སོལ༹སཀིཙྩབྷཱཝཾ པཀཱསེཏྭཱ ཏེསུཔི ཀིཙྩེསུ པཧཱནམེཝ པདྷཱནཾ ཏདཏྠཏྟཱ ཨིཏརེསཾ པརིཉྙཱདཱིནནྟི ཏདེཝ ཝིསེསཏོ པཀཱསེཏུཾ ‘‘ཀིལེསཀྑཡབྷཱཝཱཡ ཝཱ’’ཏི ཨཱཧ.

ཨཔིཙ པུརིམནཡེན པཙྩཝེཀྑཎཔརམྤརཱཡ པཙྩཝེཀྑཎཝིདྷིཾ དསྶེཏྭཱ ཨིདཱནི པདྷཱནཏྟཱ པཧཱིནཀིལེསཔཙྩཝེཀྑཎཝིདྷིམེཝ དསྶེཏུཾ ཨེཝཾ ཝུཏྟནྟིཔི དཊྛབྦཾ. དུཏིཡཝིཀཔྤེ ཨཡཾ པཀཱརོ ཨིཏྠཾ, ཏབྦྷཱཝོ ཨིཏྠཏྟཾ, ཨཱཡསདྡོ ཙེཏྠ སམྤདཱནཝཙནསྶ ཀཱརིཡབྷཱུཏོ ནིསྶཀྐཏྠེཏི དསྶེཏི ‘‘ཨིཏྠབྷཱཝཏོ’’ཏི ཨིམིནཱ. ‘‘ཨིམསྨཱ ཨེཝཾ པཀཱརཱ’’ཏི པན ཝདནྟོ པཀཱརོ ནཱམ ¶ པཀཱརཝནྟཏོ ཨཏྠཏོ བྷེདོ ནཏྠི. ཡདི ཧི སོ བྷེདོ ཨསྶ, ཏསྶེཝ སོ པཀཱརོ ན སིཡཱ, ཏསྨཱ ¶ ཨིཏྠཾ-སདྡོ པཀཱརཝནྟཝཱཙཀོ, ཨཏྠཏོ པན ཨབྷེདེཔི སཏི ཨཝཡཝཱཝཡཝིཏཱདིནཱ བྷེདཔརིཀཔྤནཱཝསེན སིཡཱ ཀིཉྩི བྷེདམཏྠཾ, ཏསྨཱ ཨིཏྠཏྟསདྡོ པཀཱརཝཱཙཀོཏི དསྶེཏི. ཨཡམིདྷ ཊཱིཀཱཡཾ, (དཱི. ནི. ཊཱི. ༡.༢༤༨) མཛ྄ཛྷིམཱགམཊཱིཀཱཝིནཡཊཱིཀཱདཱིསུ (སཱརཏྠ. ཊཱི. ༡.༡༤) ཙ ཨཱགཏནཡོ.

སདྡཝིདཱུ པན པཝཏྟིནིམིཏྟཱནུསཱརེན ཨེཝམིཙྪནྟི – ཨཡཾ པཀཱརོ ཨསྶཱཏི ཨིཏྠཾ, པཀཱརཝནྟོ. ཝིཙིཏྲཱ ཧི ཏདྡྷིཏཝུཏྟི. ཏསྶ བྷཱཝོ ཨིཏྠཏྟཾ, པཀཱརོ, ཨིམམཏྠཾ དསྶེནྟོ ‘‘ཨིཏྠབྷཱཝཏོ ཨིམསྨཱ ཨེཝཾ པཀཱརཱ’’ཏི ཨཱཧཱཏི. པཋམཝིཀཔྤེཔི ཡཐཱརཧཾ ཨེས ནཡོ. ཨིདཱནི ཝཏྟམཱནཁནྡྷསནྟཱནཱཏི སརཱུཔཀཐནཾ. ཨཔརནྟི ཨནཱགཏཾ. ‘‘ཨིམེ པན པཉྩཀྑནྡྷཱ པརིཉྙཱཏཱ ཏིཊྛནྟཱི’’ཏི ཨིདཱནི པཱཋོ, ‘‘ཨིམེ པན ཙརིམཀཏྟབྷཱཝསངྑཱཏཱ པཉྩཀྑནྡྷཱ པརིཉྙཱཏཱ ཏིཊྛནྟཱི’’ཏི པན མཛ྄ཛྷིམཱགམཝིནཡཊཱིཀཱདཱིསུ, (སཱརཏྠ. ཊཱི. ༡.༡༤) ཨིདྷ ཙ ཊཱིཀཱཡཾ (དཱི. ནི. ཊཱི. ༡.༢༤༨) ཨུལླིངྒིཏཔཱཋོ. ཏཏྠ ཙརིམཀཏྟབྷཱཝསངྑཱཏཱཏི ཨེཀསནྟཏིཔརིཡཱཔནྣབྷཱཝེན པཙྪིམཀཏྟབྷཱཝཀཐིཏཱ. པརིཉྙཱཏཱཏི མགྒེན པརིཙྪིཛྫ ཉཱཏཱ. ཏིཊྛནྟཱིཏི ཨཔྤཏིཊྛཱ ཨནོཀཱསཱ ཏིཊྛནྟི. ཨེཏེན ཧི ཏེསཾ ཁནྡྷཱནཾ ཨཔརིཉྙཱམཱུལཱབྷཱཝེན ཨཔཏིཊྛཱབྷཱཝཾ དསྶེཏི. ཨཔརིཉྙཱམཱུལིཀཱ ཧི པཏིཊྛཱ, ཏདབྷཱཝཏོ པན ཨཔྤཏིཊྛཱབྷཱཝོ. ཡཐཱཧ ‘‘ཀབལཱི༹ཀཱརེ ཙེ བྷིཀྑཝེ ཨཱཧཱརེ ཨཏྠི རཱགོ, ཨཏྠི ནནྡཱི, ཨཏྠི ཏཎྷཱ, པཏིཊྛིཏཾ ཏཏྠ ཝིཉྙཱཎཾ ཝིརུལ༹ྷ’’ནྟིཨཱདི (སཾ. ནི. ༢.༦༤; ཀཐཱ. ༢༩༦; མཧཱནི. ༧). ཏདུཔམཾ ཝིབྷཱཝེཏི ‘‘ཚིནྣམཱུལཀཱ རུཀྑཱ ཝིཡཱ’’ཏི ཨིམིནཱ, ཡཐཱ ཚིནྣམཱུལཀཱ རུཀྑཱ མཱུལཱབྷཱཝཏོ ཨཔྤཏིཊྛཱ ཨནོཀཱསཱ ཏིཊྛནྟི, ཨེཝམེཏེཔི ཨཔརིཉྙཱམཱུལཱབྷཱཝཏོཏི. ཨཡམེཏྠ ཨོཔམྨསཾསནྡནཱ. ཙརིམཀཙིཏྟནིརོདྷེནཱཏི པརིནིབྦཱནཙིཏྟནིརོདྷེན. ཨནུཔཱདཱནོཏི ཨནིནྡྷནོ. ཨཔཎྞཏྟིཀབྷཱཝནྟི ཡེསུ ཁནྡྷེསུ ཝིཛྫམཱནེསུ ཏཐཱ ཏཐཱ པརིཀཔྤནཱསིདྡྷཱ པཉྙཏྟི, ཏདབྷཱཝཏོ ཏསྶཱཔི དྷརམཱནཀཔཉྙཏྟིཡཱ ཨབྷཱཝེན ཨཔཉྙཏྟིཀབྷཱཝཾ གམིསྶནྟི. པཎྞཏྟི པཉྙཏྟཱིཏི ཧི ཨཏྠཏོ ཨེཀཾ ཡཐཱ ‘‘པཉྙཱས པཎྞཱསཱ’’ཏི. པཉྙཱས པཎྞཱདེསོཏི ཧི ཨཀྑརཙིནྟཀཱ ཝདནྟི.

༢༤༩. ཡེབྷུཡྻེན ¶ སཾཁིཔཏི སངྐུཙིཏོ བྷཝཏཱིཏི སངྑེཔོ, པབྦཏམཏྠཀཾ. ཏཉྷི པབྦཏཔཱདཏོ ཨནུཀྐམེན བཧུལཾ སཾཁིཏྟཾ སངྐུཙིཏཾ ཧོཏི. ཏེནཱཧ ‘‘པབྦཏམཏྠཀེ’’ཏི, པབྦཏསིཁརེཏི ཨཏྠོ. ཨཡཾ ཨཊྛཀཐཱམུཏྟཀོ ནཡོ – སངྑིཔཱིཡཏི པབྦཏབྷཱཝེན གཎཱིཡཏཱིཏི སངྑེཔོ, པབྦཏཔརིཡཱཔནྣོ པདེསོ, ཏསྨིཾ པབྦཏཔརིཡཱཔནྣེ པདེསེཏི ཨཏྠོཏི. ཨནཱཝིལོཏི ཨཀཱལུསིཡོ, སཱ ཙསྶ ཨནཱཝིལཏཱ ཀདྡམཱབྷཱཝེན ཧོཏཱིཏི ཨཱཧ ‘‘ནིཀྐདྡམོ’’ཏི. སཔཏི ཨཔདཱཔི ¶ སམཱནཱ གཙྪཏཱིཏི སིཔྤི, ཁུདྡཀཱ སིཔྤི སིཔྤིཡོ ཀཱ-ཀཱརསྶ ཡ-ཀཱརཾ ཀཏྭཱ, ཡོ ‘‘མུཏྟིཀོ’’ཏིཔི ཝུཙྩཏི. སཝཏི པསཝཏཱིཏི སམྦུཀོ, ཡཾ ‘‘ཛལསུཏྟི, སངྑལིཀཱ’’ཏི ཙ ཝོཧརནྟི. སམཱཧཱརེ ཡེབྷུཡྻཏོ ནཔུཾསཀཔཡོགོཏི ཝུཏྟཾ ‘‘སིཔྤིཡསམྦུཀ’’ནྟི. ཨེཝམཱིདིསེསུ. སཀྑརཱཏི མུཊྛིཔྤམཱཎཱ པཱསཱཎཱ. ཀཐལཱནཱིཏི ཀཔཱལཁཎྜཱནི. སམཱུཧཝཱཙཀསྶ གྷཊཱསདྡསྶ ཨིཏྠི ལིངྒསྶཱཔི དིསྶནཏོ ‘‘གུམྦ’’ནྟི པདསྶཏྠཾ དསྶེཏི ‘‘གྷཊཱ’’ཏི ཨིམིནཱ.

ཀཱམཉྩ ‘‘སིཔྤིཡསམྦུཀམྤི སཀྑརཀཐལམྤི མཙྪགུམྦམྤི ཏིཊྛནྟམྤི ཙརནྟམྤཱི’’ཏི ཨེཏྠ སཀྑརཀཐལཾ ཏིཊྛཏིཡེཝ, སིཔྤིཡསམྦུཀམཙྪགུམྦཱནི ཙརནྟིཔི ཏིཊྛནྟིཔི, ཏཐཱཔི སཧཙརཎནཡེན སབྦཱནེཝ ཙརནྟི ཝིཡ ཨེཝཾ ཝུཏྟནྟི ཨཏྠཾ དསྶེནྟོ ‘‘ཏིཊྛནྟམྤི ཙརནྟམྤཱིཏི ཨེཏྠཱ’’ཏིཨཱདིམཱཧ. ཏཏྠ ཧི ‘‘སཀྑརཀཐལཾ ཏིཊྛཏིཡེཝཱ’’ཏིཨཱདིནཱ ཡཐཱསམྦྷཝམཏྠཾ དསྶེཏི, ‘‘ཡཐཱ པནཱ’’ཏིཨཱདིནཱ པན སཧཙརཎནཡཾ. པན-སདྡོ ཨརུཙིསཾསཱུཙནེ, ཏཐཱཔཱིཏི ཨཏྠོ. ཨནྟརནྟརཱཏི བཧཱུནཾ གཱཝཱིནམནྟརནྟརཱ ཋིཏཱསུ གཱཝཱིསུ ཝིཛྫམཱནཱསུཔི. གཱཝོཏི གཱཝིཡོ. ཨིཏརཱཔཱིཏི ཋིཏཱཔི ནིསིནྣཱཔི. ཙརནྟཱིཏི ཝུཙྩནྟི སཧཙརཎནཡེན. ཏིཊྛནྟམེཝཱཏིཨཱདཱིསུ ཨཡམདྷིཔྤཱཡོ – སིཔྤིཡསམྦུཀམཙྪགུམྦཱནཾ ཙརཎཀིརིཡཱཡཔི ཡོགཏོ ཋཱནཀིརིཡཱཡ ཨནེཀནྟཏྟཱ ཨེཀནྟཏོ ཏིཊྛནྟམེཝ ན ཀདཱཙིཔི ཙརནྟཾ སཀྑརཀཐལཾ ཨུཔཱདཱཡ སིཔྤིཡསམྦུཀམྤི མཙྪགུམྦམྤི ཏིཊྛནྟནྟི ཝུཏྟཾ, ན ཏུ ཏེསཾ ཋཱནཀིརིཡམུཔཱདཱཡ. ཏེསཾ པན ཙརཎཀིརིཡམུཔཱདཱཡ ‘‘ཙརནྟམྤཱི’’ཏི པི-སདྡལོཔོ ཧེཏྠ དཊྛབྦོ. ཨིཏརམྤི དྭཡནྟི སིཔྤིཡསམྦུཀམཙྪགུམྦཾ པདཝསེན ཨེཝཾ ཝུཏྟཾ. ཨིཏརཉྩ དྭཡནྟི སིཔྤིཡསམྦུཀམཙྪགུམྦམེཝ. ཙརནྟནྟི ཝུཏྟནྟི ཨེཏྠཱཔི ཏེསཾ ཋཱནཀིརིཡམུཔཱདཱཡ ‘‘ཏིཊྛནྟམྤཱི’’ཏི པི-སདྡལོཔོ, ཨེཝམེཏྠ ཨཊྛཀཐཱཙརིཡེཧི སཧཙརཎནཡོ དསྶིཏོ, ཨཱཙརིཡདྷམྨཔཱལཏྠེརེན པན ཡཐཱལཱབྷནཡོཔི. ཏཐཱ ¶ ཧི ཝུཏྟཾ ‘‘ཀིཾ ཝཱ ཨིམཱཡ སཧཙརིཡཱཡ, ཡཐཱལཱབྷགྒཧཎཾ པནེཏྠ དཊྛབྦཾ. སཀྑརཀཐལསྶ ཧི ཝསེན ཏིཊྛནྟནྟི, སིཔྤིསམྦུཀསྶ མཙྪགུམྦསྶ ཙ ཝསེན ཏིཊྛནྟམྤི ཙརནྟམྤཱིཏི ཨེཝཾ ཡོཛནཱ ཀཱཏབྦཱ’’ཏི (དཱི. ནི. ཊཱི. ༡.༢༤༩). ཨལབྦྷམཱནསྶཱཔི ཨཏྠསྶ སཧཡོགཱིཝསེན དེསནཱམཏྟཾ པཏི སཧཙརཎནཡོ, སཱདྷཱརཎཏོ དེསིཏསྶཱཔི ཨཏྠསྶ སམྦྷཝཝསེན ཝིཝེཙནཾ པཏི ཡཐཱལཱབྷནཡོཏི ཨུབྷཡཐཱཔི ཡུཛྫཏི.

ཨེཝམྤེཏྠ ཝདནྟི – ཨཊྛཀཐཱཡཾ ‘‘སཀྑརཀཐལཾ ཏིཊྛཏིཡེཝ, ཨིཏརཱནི ཙརནྟིཔི ཏིཊྛནྟིཔཱི’’ཏི ཨིམིནཱ ཡཐཱལཱབྷནཡོ དསྶིཏོ ཡཐཱསམྦྷཝཾ ཨཏྠསྶ ཝིཝེཙིཏཏྟཱ, ‘‘ཡཐཱ པནཱ’’ཏིཨཱདིནཱ པན སཧཙརཎནཡོ ཨལབྦྷམཱནསྶཱཔི ཨཏྠསྶ སཧཡོགཱིཝསེན དེསནཱམཏྟསྶ ཝིབྷཱཝིཏཏྟཱཏི ¶ , ཏདེཏམྤི ཨནུཔཝཛྫམེཝ ཨཏྠསྶ ཡུཏྟཏྟཱ, ཨཊྛཀཐཱཡཉྩ ཏཐཱ དསྶནསྶཱཔི སམྦྷཝཏོཏི དཊྛབྦཾ. ‘‘ཏཏྠཱ’’ཏིཨཱདི ཨུཔམཱསཾསནྡནཾ. ཏཱིརེཏི ཨུདཀརཧདསྶ ཏཱིརེ. ཨུདཀརཧདོ ཙ ནཱམ ཀཏྠཙི སམུདྡོཔི ཝུཙྩཏི ‘‘རཧདོཔི ཏཏྠ གམྦྷཱིརོ, སམུདྡོ སརིཏོདཀོ’’ཏིཨཱདཱིསུ (དཱི. ནི. ༣.༢༧༨). ཀཏྠཙི ཛལཱསཡོཔི ‘‘རཧདོཔི ཏཏྠ དྷརཎཱི ནཱམ, ཡཏོ མེགྷཱ པཝསྶནྟི, ཝསྶཱ ཡཏོ པཏཱཡནྟཱི’’ཏིཨཱདཱིསུ, (དཱི. ནི. ༣.༢༨༡) ཨིདྷཱཔི ཛལཱསཡོཡེཝ. སོ ཧི ཨུདཀཝསེན རཧོ ཙཀྑུརཧཱདིཀཾ དདཱཏཱིཏི ཨུདཀརཧདོ ཨོ-ཀཱརསྶ ཨ-ཀཱརཾ ཀཏྭཱ. སདྡཝིདཱུ པན ‘‘ཨུདཀཾ ཧརཏཱིཏི ཨུདཀརཧདོ ནིརུཏྟིནཡེནཱ’’ཏི ཝདནྟི.

‘‘ཨེཏྟཱཝཏཱ’’ཏིཨཱདིནཱ ཙཏུཏྠཛ྄ཛྷཱནཱནྟརཾ དསྶིཏཝིཔསྶནཱཉཱཎཏོ པཊྛཱཡ ཡཐཱཝུཏྟཏྠསྶ སམྤིཎྜནཾ. ཏཏྠ ཨེཏྟཱཝཏཱཏི ‘‘པུན ཙཔརཾ མཧཱརཱཛ བྷིཀྑུ ཨེཝཾ སམཱཧིཏེ ཙིཏྟེ…པེ… ཉཱཎདསྶནཱཡ ཙིཏྟཾ ཨབྷིནཱིཧརཏཱི’’ཏིཨཱདིནཱ ཨེཏྟཀེན, ཨེཏཔརིམཱཎཝནྟེན ཝཱ ཝཙནཀྐམེན. ཝིཔསྶནཱཉཱཎནྟི ཉཱཎདསྶནནཱམེན དསྶིཏཾ ཝིཔསྶནཱཉཱཎཾ, ཏསྶ ཙ ཝིསུཾ གཎནདསྶནེན ཧེཊྛཱ ཙཏུཏྠཛ྄ཛྷཱནཱནནྟརཾ ཝཏྟབྦཏཱཀཱརཎེསུ ཏཱིསུ ནཡེསུ ཏཏིཡནཡསྶེཝ ཡུཏྟཏརབྷཱཝོཔི དཱིཔིཏོཏི དཊྛབྦཾ. མནོམཡཉཱཎསྶ ཨིདྡྷིཝིདྷསམཝརོདྷིཏབྷཱཝེ ཝིསུདྡྷིམགྒེ (ཝིསུདྡྷི. ༢.༣༧༩ ཨཱདཡོ) ཝུཏྟེཔི ཨིདྷ པཱལི༹ཡཾ ཝིསུཾ དེསིཏཏྟཱ ཝིསུཾ ཨེཝ གཧཎཾ, ཏཐཱ དེསནཱ ཙ པཱཊིཡེཀྐསནྡིཊྛིཀསཱམཉྙཕལཏྠཱཏི དཊྛབྦཾ. ཨནཱགཏཾསཉཱཎཡཐཱཀམྨཱུཔགཉཱཎདྭཡསྶ ¶ པཱལི༹ཡཾ ཨནཱགཏཏྟཱ ‘‘དིབྦཙཀྑུཝསེན ནིཔྥནྣ’’ནྟི ཝུཏྟཾ, ཏབྦསེན ནིཔྥནྣཏྟཱ ཏགྒཧཎེནེཝ གཧིཏཾ ཏཾ ཉཱཎདྭཡནྟི ཝུཏྟཾ ཧོཏི. དིབྦཙཀྑུསྶ ཧི ཨནཱགཏཾསཉཱཎཾ, ཡཐཱཀམྨཱུཔགཉཱཎཉྩཱཏི དྭེཔི ཉཱཎཱནི པརིབྷཎྜཱནི ཧོནྟཱིཏི. དིབྦཙཀྑུཉཱཎནྟི ཙུཏཱུཔཔཱཏཉཱཎནཱམེན དསྶིཏཾ དིབྦཙཀྑུཉཱཎཾ.

སབྦེསཾ པན དསནྣཾ ཉཱཎཱནཾ ཨཱརམྨཎཝིབྷཱགསྶ ཝིསུདྡྷིམགྒེ ཨནཱགཏཏྟཱ ཏཏྠཱནཱགཏཉཱཎཱནཾ ཨཱརམྨཎཝིབྷཱགཾ དསྶེཏུཾ ‘‘ཏེས’’ནྟིཨཱདི ཝུཏྟཾ. ཏེསནྟི དསནྣཾ ཉཱཎཱནཾ. ཏཏྠཱཏི ཏསྨིཾ ཨཱརམྨཎཝིབྷཱགེ, ཏེསུ ཝཱ དསསུ ཉཱཎེསུ. བྷཱུམིབྷེདཏོ པརིཏྟམཧགྒཏཾ, ཀཱལབྷེདཏོ ཨཏཱིཏཱནཱགཏཔཙྩུཔྤནྣཾ, སནྟཱནབྷེདཏོ ཨཛ྄ཛྷཏྟབཧིདྡྷཱ ཙཱཏི ཝིཔསྶནཱཉཱཎཾ སཏྟཝིདྷཱརམྨཎཾ. པརིཏྟཱརམྨཎཱདིཏིཀཏྟཡེནེཝ ཧི ཏསྶ ཨཱརམྨཎཝིབྷཱགོ, ན མགྒཱརམྨཎཏིཀེན. ནིམྨིཏརཱུཔཱཡཏནམཏྟམེཝཱཏི ཨཏྟནཱ ནིམྨིཏཾ རཱུཔཱརམྨཎམེཝ, ཨཏྟནཱ ཝཱ ནིམྨིཏེ མནོམཡེ ཀཱཡེ ཝིཛྫམཱནཾ རཱུཔཱཡཏནམེཝཱཏིཔི ཡུཛྫཏི. ཨིདཉྷི ཏསྶ ཉཱཎསྶ ཨབྷིནིམྨིཡམཱནེ མནོམཡེ ཀཱཡེ རཱུཔཱཡཏནམེཝཱརབྦྷ པཝཏྟནཏོ ཝུཏྟཾ, ན པན ཏཏྠ གནྡྷཱཡཏནཱདཱིནམབྷཱཝཏོ ¶ . ན ཧི རཱུཔཀལཱཔོ གནྡྷཱཡཏནཱདིཝིརཧིཏོ ཨཏྠཱིཏི སབྦཐཱ པརིནིཔྥནྣམེཝ ནིམྨིཏརཱུཔཾ. ཏེནཱཧ ‘‘པརིཏྟཔཙྩུཔྤནྣབཧིདྡྷཱརམྨཎ’’ནྟི, ཡཐཱཀྐམཾ བྷཱུམིཀཱལསནྟཱནབྷེདཏོ ཏིབྦིདྷཱརམྨཎནྟི ཨཏྠོ. ནིབྦཱནཝསེན ཨེཀདྷམྨཱརམྨཎམྤི སམཱནཾ ཨཱསཝཀྑཡཉཱཎཾ པརིཏྟཱརམྨཎཱདིཏིཀཝསེན ཏིཝིདྷཱརམྨཎཾ དསྶེཏུཾ ‘‘ཨཔྤམཱཎབཧིདྡྷཱནཝཏྟབྦཱརམྨཎ’’ནྟི ཝུཏྟཾ. ཏཉྷི པརིཏྟཏིཀཝསེན ཨཔྤམཱཎཱརམྨཎཾ, ཨཛ྄ཛྷཏྟིཀཝསེན བཧིདྡྷཱརམྨཎཾ, ཨཏཱིཏཏིཀཝསེན ནཝཏྟབྦཱརམྨཎཉྩ ཧོཏི.

ཨུཏྟརིཏརསདྡོ, པཎཱིཏཏརསདྡོ ཙ པརིཡཱཡོཏི དསྶེཏི ‘‘སེཊྛཏར’’ནྟི ཨིམིནཱ. རཏནཀཱུཊཾ ཝིཡ ཀཱུཊཱགཱརསྶ ཨརཧཏྟཾ ཀཱུཊཾ ཨུཏྟམངྒབྷཱུཏཾ བྷགཝཏོ དེསནཱཡ ཨརཧཏྟཔརིཡོསཱནཏྟཱཏི ཨཱཧ ‘‘ཨརཧཏྟནིཀཱུཊེནཱ’’ཏི. དེསནཾ ནིཊྛཱཔེསཱིཏི ཏིཏྠཀརམཏཧརཝིབྷཱཝིནིཾ ནཱནཱཝིདྷཀུཧནལཔནཱདིམིཙྪཱཛཱིཝཝིདྡྷཾསིནིཾ ཏིཝིདྷསཱིལཱལངྐཏཔརམསལླེཁཔཊིཔཏྟིཔརིདཱིཔིནིཾ ཛྷཱནཱབྷིཉྙཱདིཨུཏྟརིམནུསྶདྷམྨཝིབྷཱུསིནིཾ ཙུདྡསཝིདྷམཧཱསཱམཉྙྥལཔཊིམཎྜིཏཾ ཨནཉྙསཱདྷཱརཎཾ སཱམཉྙཕལདེསནཾ རཏནཱགཱརཾ ¶ ཝིཡ རཏནཀཱུཊེན ཨརཧཏྟཀཱུཊེན ནིཊྛཱཔེསི ‘‘ཝིམུཏྟསྨི’’ནྟི ཨིམིནཱ, ཨརཧཏྟཕལསྶ དེསིཏཏྟཱཏི ཨཏྠོ.

ཨཛཱཏསཏྟུཨུཔཱསཀཏྟཔཊིཝེདནཱཀཐཱཝཎྞནཱ

༢༥༠. ཨེཏྟཱཝཏཱ བྷགཝཏཱ དེསིཏསྶ སཱམཉྙཕལསུཏྟསྶ ཨཏྠཝཎྞནཾ ཀཏྭཱ ཨིདཱནི དྷམྨསངྒཱཧཀེཧི སངྒཱིཏསྶ ‘‘ཨེཝཾ ཝུཏྟེ’’ཏིཨཱདིཔཱཋསྶཔི ཨཏྠཝཎྞནཾ ཀརོནྟོ པཋམཾ སམྦནྡྷཾ དསྶེཏུཾ ‘‘རཱཛཱ’’ཏིཨཱདིམཱཧ. ཏཏྠ ཏཏྠཱཏི ཏསྨིཾ ཏསྨིཾ སཱམཉྙཕལེ, སུཏྟཔདེསེ ཝཱ. ཀརཎཾ ཀཱརོ, སཱདྷུ ཨིཏི ཀཱརོ ཏཐཱ, ‘‘སཱདྷུ བྷགཝཱ, སཱདྷུ སུགཏཱ’’ཏིཨཱདིནཱ ཏཾ པཝཏྟེནྟོ. ཨཱདིམཛ྄ཛྷཔརིཡོསཱནནྟི དེསནཱཡ ཨཱདིཉྩ མཛ྄ཛྷཉྩ པརིཡོསཱནཉྩ. སཀྐཙྩཾ སཱདརཾ གཱརཝཾ སུཏྭཱ, ‘‘ཙིནྟེཏྭཱ’’ཏི ཨེཏྠ ཨིདཾ པུབྦཀཱལཀིརིཡཱཝཙནཾ. ཨིམེ པཉྷེ པུཐཱུ སམཎབྲཱཧྨཎེ པུཙྪནྟོ ཨཧཾ ཙིརཾ ཝཏ ཨམྷི, ཨེཝཾ པུཙྪནྟོཔི ཨཧཾ ཐུསེ ཀོཊྚེནྟོ ཝིཡ ཀཉྩི སཱརཾ ནཱལཏྠནྟི ཡོཛནཱ. ཏཐཱ ཡོ…པེ… ཝིསྶཛྫེསི, ཏསྶ བྷགཝཏོ གུཎསམྤདཱ ཨཧོ ཝཏ. དསབལསྶ གུཎཱནུབྷཱཝཾ ཨཛཱནནྟོ ཨཧཾ ཝཉྩིཏོ སུཙིརཾ ཝཏ ཨམྷཱིཏི. ཝཉྩིཏོཏི ཙ ཨཉྙཱཎེན ཝཉྩིཏོ ཨཱཝཊྚིཏོ, མོཧེན པཊིཙྪཱདིཏོ ཨམྷཱིཏི ཝུཏྟཾ ཧོཏི. ཏེནཱཧ ‘‘དསབལསྶ གུཎཱནུབྷཱཝཾ ཨཛཱནནྟོ’’ཏི. སཱམཉྙཛོཏནཱ ཧི ཝིསེསེ ཨཝཏིཊྛཏི. ཙིནྟེཏྭཱ ཨཱཝིཀརོནྟོཏི སམྦནྡྷོ. ཨུལླངྒྷནསམཏྠཱཡཔི ཨུབྦེགཔཱིཏིཡཱ ཨནུལླངྒྷནམྤི སིཡཱཏི ཨཱཧ ‘‘པཉྩཝིདྷཱཡ པཱིཏིཡཱ ཕུཊསརཱིརོ’’ཏི. ཕུཊསརཱིརོཏི ཙ ཕུསིཏསརཱིརོཏི ཨཏྠོ, ན བྱཱཔིཏསརཱིརོཏི ¶ སབྦཱཡ པཱིཏིཡཱ ཨབྱཱཔིཏཏྟཱ. ཏནྟི ཨཏྟནོ པསཱདསྶ ཨཱཝིཀརཎཾ, ཨུཔཱསཀཏྟཔཝེདནཉྩ. ཨཱརདྡྷཾ དྷམྨསངྒཱཧཀེཧི.

ཨབྷིཀྐནྟཱཏི ཨཏིཀྐནྟཱ ཝིགཏཱ, ཝིགཏབྷཱཝོ ཙ ཁཡོ ཨེཝཱཏི ཨཱཧ ‘‘ཁཡེ དིསྶཏཱི’’ཏི. ཏཐཱ ཧི ཝུཏྟཾ ‘‘ནིཀྑནྟོ པཋམོ ཡཱམོ’’ཏི. ཨབྷིཀྐནྟཏརོཏི ཨཏིཝིཡ ཀནྟཏརོ མནོརམོ, ཏཱདིསོ ཙ སུནྡརོ བྷདྡཀོ ནཱམཱཏི ཝུཏྟཾ ‘‘སུནྡརེ’’ཏི.

‘‘ཀོ མེ’’ཏིཨཱདི གཱཐཱ ཝིམཱནཝཏྠུམྷི (ཝི. ཝ. ༨༥༧). ཏཏྠ ཀོཏི དེཝནཱགཡཀྑགནྡྷབྦཱདཱིསུ ཀཏམོ. མེཏི མམ. པཱདཱནཱིཏི པཱདེ, ལིངྒཝིཔརིཡཱཡོཡཾ. ཨིདྡྷིཡཱཏི ཨཱིདིསཱཡ དེཝིདྡྷིཡཱ. ཡསསཱཏི ཨཱིདིསེན པརིཝཱརེན, པརིཛནེན ¶ ཙ. ཛལནྟི ཛལནྟོ ཝིཛྫོཏམཱནོ. ཨབྷིཀྐནྟེནཱཏི ཨཏིཝིཡ ཀནྟེན ཀམནཱིཡེན, ཨབྷིརཱུཔེནཱཏི ཝུཏྟཾ ཧོཏི. ཝཎྞེནཱཏི ཚཝིཝཎྞེན སརཱིརཝཎྞནིབྷཱཡ. སབྦཱ ཨོབྷཱསཡཾ དིསཱཏི སབྦཱ དསཔི དིསཱ ཨོབྷཱསཡནྟོ. ཙནྡོ ཝིཡ, སཱུརིཡོ ཝིཡ ཙ ཨེཀོབྷཱསཾ ཨེཀཱལོཀཾ ཀརོནྟོ ཀོ ཝནྡཏཱིཏི སམྦནྡྷོ.

ཨབྷིརཱུཔེཏི ཨཏིརེཀརཱུཔེ ཨུལཱ༹རཝཎྞེན སམྤནྣརཱུཔེ. ཨབྦྷཱནུམོདནེཏི ཨབྷིཨནུམོདནེ ཨབྷིཔྤམོདིཏབྷཱཝེ. ཀིམཏྠིཡཾ ‘‘ཨབྦྷཱནུམོདནེ’’ཏི ཝཙནནྟི ཨཱཧ ‘‘ཏསྨཱ’’ཏིཨཱདི. ཡུཏྟཾ ཏཱཝ ཧོཏུ ཨབྦྷཱནུམོདནེ, ཀསྨཱ པནཱཡཾ དྭིཀྑཏྟུཾ ཝུཏྟོཏི ཙོདནཱཡ སོདྷནཱམུཁེན ཨཱམེཌིཏཝིསཡཾ ནིདྡྷཱརེཏི ‘‘བྷཡེ ཀོདྷེ’’ཏིཨཱདིནཱ, ཨིམིནཱ སདྡལཀྑཎེན ཧེཏུབྷཱུཏེན ཨེཝཾ ཝུཏྟོ, ཨིམིནཱ ཙ ཨིམིནཱ ཙ ཝིསཡེནཱཏི ཝུཏྟཾ ཧོཏི. ‘‘སཱདྷུ སཱདྷུ བྷནྟེ’’ཏི ཨཱམེཌིཏཝསེན ཨཏྠཾ དསྶེཏྭཱ ཏསྶ ཝིསཡཾ ནིདྡྷཱརེནྟོ ཨེཝམཱཧཱཏིཔི སམྦནྡྷཾ ཝདནྟི. ཏཏྠ ‘‘ཙོརོ ཙོརོ, སཔྤོ སཔྤོ’’ཏིཨཱདཱིསུ བྷཡེ ཨཱམེཌིཏཾ, ‘‘ཝིཛ྄ཛྷ ཝིཛ྄ཛྷ, པཧར པཧརཱ’’ཏིཨཱདཱིསུ ཀོདྷེ, ‘‘སཱདྷུ སཱདྷཱུ’’ཏིཨཱདཱིསུ (སཾ. ནི. ༢.༡༢༧; ༣.༣༥; ༥.༡༠༨༥) པསཾསཱཡཾ, ‘‘གཙྪ གཙྪ, ལུནཱཧི ལུནཱཧཱི’’ཏིཨཱདཱིསུ ཏུརིཏེ, ‘‘ཨཱགཙྪ ཨཱགཙྪཱ’’ཏིཨཱདཱིསུ ཀོཏཱུཧལེ, ‘‘བུདྡྷོ བུདྡྷོཏི ཙིནྟེནྟོ’’ཏིཨཱདཱིསུ (བུ. ཝཾ. ༢.༤༤) ཨཙྪརེ, ‘‘ཨབྷིཀྐམཐཱཡསྨནྟོ ཨབྷིཀྐམཐཱཡསྨནྟོ’’ཏིཨཱདཱིསུ (དཱི. ནི. ༣.༢༠; ཨ. ནི. ༩.༡༡) ཧཱསེ, ‘‘ཀཧཾ ཨེཀཔུཏྟཀ, ཀཧཾ ཨེཀཔུཏྟཀཱ’’ཏིཨཱདཱིསུ (སཾ. ནི. ༢.༦༣) སོཀེ, ‘‘ཨཧོ སུཁཾ, ཨཧོ སུཁ’’ནྟིཨཱདཱིསུ (ཨུདཱ. ༢༠; དཱི. ནི. ༣.༣༠༥) པསཱདེ. ཙསདྡོ ཨཝུཏྟསམུཙྩཡཏྠོ, ཏེན གརཧཱ ཨསམྨཱནཱདཱིནཾ སངྒཧོ དཊྛབྦོ. ‘‘པཱཔོ པཱཔོ’’ཏིཨཱདཱིསུ ཧི གརཧཱཡཾ, ‘‘ཨབྷིརཱུཔཀ ཨབྷིརཱུཔཀཱ’’ཏིཨཱདཱིསུ ཨསམྨཱནེ. ཨེཝམེཏེསུ ནཝསུ, ཨཉྙེསུ ཙ ཝིསཡེསུ ཨཱམེཌིཏཝཙནཾ ¶ བུདྷོ ཀརེཡྻ, ཡོཛེཡྻཱཏི ཨཏྠོ. ཨཱམེཌནཾ པུནཔྤུནམུཙྩཱརཎཾ, ཨཱམེཌཱིཡཏི ཝཱ པུནཔྤུནམུཙྩཱརཱིཡཏཱིཏི ཨཱམེཌིཏཾ, ཨེཀསྶེཝཏྠསྶ དྭཏྟིཀྑཏྟུཾ ཝཙནཾ. མེཌིསདྡོ ཧི ཨུམྨཱདནེ, ཨཱཔུབྦོ ཏུ དྭཏྟིཀྑཏྟུམུཙྩཱརཎེ ཝཏྟཏི ཡཐཱ ‘‘ཨེཏདེཝ ཡདཱ ཝཱཀྱ-མཱམེཌཡཏི ཝཱསཝོ’’ཏི.

ཨེཝཾ ¶ ཨཱམེཌིཏཝསེན དྭིཀྑཏྟུཾ ཝུཏྟབྷཱཝཾ དསྶེཏྭཱ ཨིདཱནི ནཡིདཾ ཨཱམེཌིཏཝསེནེཝ དྭིཀྑཏྟུཾ ཝུཏྟཾ, ཨཐ ཁོ པཙྩེཀམཏྠདྭཡཝསེནཔཱིཏི དསྶེནྟོ ‘‘ཨཐ ཝཱ’’ཏིཨཱདིམཱཧ. ཨཱམེཌིཏཝསེན ཨཏྠཾ དསྶེཏྭཱ ཝིཙྪཱཝསེནཱཔི དསྶེནྟོ ཨེཝམཱཧཱཏིཔི ཝདནྟི, ཏདཡུཏྟམེཝ བྱཱཔེཏབྦསྶ དྭིཀྑཏྟུམཝུཏྟཏྟཱ. བྱཱཔེཏབྦསྶ ཧི བྱཱཔཀེན གུཎཀིརིཡཱདབྦེན བྱཱཔནིཙྪཱཡ དྭཏྟིཀྑཏྟུཾ ཝཙནཾ ཝིཙྪཱ ཡཐཱ ‘‘གཱམོ གཱམོ རམཎཱིཡོ’’ཏི. ཏཏྠ ཨབྷིཀྐནྟནྟི ཨབྷིཀྐམནཱིཡཾ, ཏབྦྷཱཝོ ཙ ཨཏིཨིཊྛཏཱཡཱཏི ཝུཏྟཾ ‘‘ཨཏིཨིཊྛ’’ནྟིཨཱདི, པདཏྟཡཉྩེཏཾ པརིཡཱཡཝཙནཾ. ཨེཏྠཱཏི དྭཱིསུ ཨབྷིཀྐནྟསདྡེསུ. ‘‘ཨབྷིཀྐནྟ’’ནྟི ཝཙནཾ ཨཔེཀྑིཏྭཱ ནཔུཾསཀལིངྒེན ཝུཏྟཾ, ཏཾ པན བྷགཝཏོ ཝཙནཾ དྷམྨདེསནཱཡེཝཱཏི ཀཏྭཱ ‘‘ཡདིདཾ བྷགཝཏོ དྷམྨདེསནཱ’’ཏི ཨཱཧ, ཡཱཡཾ བྷགཝཏོ དྷམྨདེསནཱ མཡཱ སུཏཱ, ཏདིདཾ བྷགཝཏོ དྷམྨདེསནཱསངྑཱཏཾ ཝཙནཾ ཨབྷིཀྐནྟནྟི ཨཏྠོ. ཨེཝཾ པཊིནིདྡེསོཔི ཧི ཨཏྠཏོ ཨབྷེདཏྟཱ ཡུཏྟོ ཨེཝ ‘‘ཡཏྠ ཙ དིནྣཾ མཧཔྥལམཱཧཱུ’’ཏིཨཱདཱིསུ (ཝི. ཝ. ༨༨༨) ཝིཡ. ‘‘ཨབྷིཀྐནྟ’’ནྟི ཝུཏྟསྶ ཝཱ ཨཏྠམཏྟདསྶནཾ ཨེཏཾ, ཏསྨཱ ཨཏྠཝསེན ལིངྒཝིབྷཏྟིཝིཔརིཎཱམོ ཝེདིཏབྦོ, ཀཱརིཡཝིཔརིཎཱམཝསེན ཙེཏྠ ཝིབྷཏྟིཝིཔརིཎཱམཏཱ. ཝཙནནྟི ཧེཏྠ སེསོ, ཨབྷིཀྐནྟཾ བྷགཝཏོ ཝཙནཾ, ཡཱཡཾ བྷགཝཏོ དྷམྨདེསནཱ མཡཱ སུཏཱ, སཱ ཨབྷིཀྐནྟཾ ཨབྷིཀྐནྟཱཏི ཨཏྠོ. དུཏིཡཔདེཔི ‘‘ཨབྷིཀྐནྟནྟི པསཱདནཾ ཨཔེཀྑིཏྭཱ ནཔུཾསཀལིངྒེན ཝུཏྟ’’ནྟིཨཱདིནཱ ཡཐཱརཧམེས ནཡོ ནེཏབྦོ.

‘‘བྷགཝཏོ ཝཙན’’ནྟིཨཱདིནཱ ཨཏྠདྭཡསརཱུཔཾ དསྶེཏི. ཏཏྠ དོསནཱསནཏོཏི རཱགཱདིཀིལེསདོསཝིདྡྷཾསནཏོ. གུཎཱདྷིགམནཏོཏི སཱིལཱདིགུཎཱནཾ སམྤཱདནཝསེན ཨདྷིགམཱཔནཏོ. ཡེ གུཎེ དེསནཱ ཨདྷིགམེཏི, ཏེསུ ‘‘གུཎཱདྷིགམནཏོ’’ཏི ཝུཏྟེསུཡེཝ གུཎེསུ པདྷཱནབྷཱུཏཱ གུཎཱ དསྶེཏབྦཱཏི ཏེ པདྷཱནབྷཱུཏེ གུཎེ ཏཱཝ དསྶེཏུཾ ‘‘སདྡྷཱཛནནཏོ པཉྙཱཛནནཏོ’’ཏི ཝུཏྟཾ. སདྡྷཱཔདྷཱནཱ ཧི ལོཀིཡཱ གུཎཱ, པཉྙཱཔདྷཱནཱ ལོཀུཏྟརཱཏི, པདྷཱནནིདྡེསོ ཙེས དེསནཱཡ ཨདྷིགམེཏབྦེཧི སཱིལསམཱདྷིདུཀཱདཱིཧིཔི ཡོཛནཱསམྦྷཝཏོ. ཨཉྙམྤི ཨཏྠདྭཡཾ དསྶེཏི ‘‘སཱཏྠཏོ’’ཏིཨཱདིནཱ. སཱིལཱདིཨཏྠསམྤཏྟིཡཱ ¶ སཱཏྠཏོ. སབྷཱཝནིརུཏྟིསམྤཏྟིཡཱ སབྱཉྫནཏོ. སུཝིཉྙེཡྻསདྡཔཡོགཏཱཡ ཨུཏྟཱནཔདཏོ. སཎྷསུཁུམབྷཱཝེན དུབྦིཉྙེཡྻཏྠཏཱཡ ¶ གམྦྷཱིརཏྠཏོ. སིནིདྡྷམུདུམདྷུརསདྡཔཡོགཏཱཡ ཀཎྞསུཁཏོ. ཝིཔུལཝིསུདྡྷཔེམནཱིཡཏྠཏཱཡ ཧདཡངྒམཏོ. མཱནཱཏིམཱནཝིདྷམནེན ཨནཏྟུཀྐཾསནཏོ. ཐམྦྷསཱརམྦྷནིམྨདྡནེན ཨཔརཝམྦྷནཏོ. ཧིཏཱདྷིཔྤཱཡཔྤཝཏྟིཡཱ པརེསཾ རཱགཔརིལཱ༹ཧཱདིཝཱུཔསམནེན ཀརུཎཱསཱིཏལཏོ. ཀིལེསནྡྷཀཱརཝིདྷམནེན པཉྙཱཝདཱཏཏོ. ཨཝདཱཏཾ, ཨོདཱཏནྟི ཙ ཨཏྠཏོ ཨེཀཾ. ཀརཝཱིཀརུཏམཉྫུཏཱཡ ཨཱཔཱཐརམཎཱིཡཏོ. པུབྦཱཔརཱཝིརུདྡྷསུཝིསུདྡྷཏཱཡ ཝིམདྡཀྑམཏོ. ཨཱཔཱཐརམཎཱིཡཏཱཡ ཨེཝ སུཡྻམཱནསུཁཏོ. ཝིམདྡཀྑམཏཱཡ, ཧིཏཛ྄ཛྷཱསཡཔྤཝཏྟིཏཱཡ ཙ ཝཱིམཾསིཡམཱནཧིཏཏོཏི ཨེཝམེཏྠ ཨཏྠོ ཝེདིཏབྦོ. ཨཱདིསདྡེན པན སཾསཱརཙཀྐནིཝཏྟནཏོ, སདྡྷམྨཙཀྐཔྤཝཏྟནཏོ, མིཙྪཱཝཱདཝིདྡྷཾསནཏོ, སམྨཱཝཱདཔཏིཊྛཱཔནཏོ, ཨཀུསལམཱུལསམུདྡྷརཎཏོ, ཀུསལམཱུལསཾརོཔནཏོ, ཨཔཱཡདྭཱརཝིདྷཱནཏོ, སགྒམགྒདྭཱརཝིཝརཎཏོ, པརིཡུཊྛཱནཝཱུཔསམནཏོ, ཨནུསཡསམུགྒྷཱཊནཏོཏི ཨེཝམཱདཱིནཾ སངྒཧོ དཊྛབྦོ.

ན ཀེཝལཾ པདདྭཡེནེཝ, ཏཏོ པརམྤི ཙཏཱུཧི ཨུཔམཱཧཱིཏི པི-སདྡོ སམྤིཎྜནཏྠོ. ‘‘ཙཀྑུམནྟོ རཱུཔཱནི དཀྑནྟཱི’’ཏི ཨིདཾ ‘‘ཏེལཔཛྫོཏཾ དྷཱརེཡྻཱ’’ཏི ཙཏུཏྠཨུཔམཱཡ ཨཱཀཱརམཏྟདསྶནཾ, ན པན ཨུཔམནྟརདསྶནནྟི ཨཱཧ ‘‘ཙཏཱུཧི ཨུཔམཱཧཱི’’ཏི. ཨདྷོམུཁཊྛཔིཏནྟི ཀེནཙི ཨདྷོམུཁཾ ཋཔིཏཾ. ཧེཊྛཱམུཁཛཱཏནྟི སབྷཱཝེནེཝ ཧེཊྛཱམུཁཾ ཛཱཏཾ. ཨུགྒྷཱཊེཡྻཱཏི ཝིཝཊཾ ཀརེཡྻ. ‘‘ཧཏྠེ གཧེཏྭཱ’’ཏི སམཱཙིཀྑཎདསྶནཏྠཾ ཝུཏྟཾ, ‘‘པུརཏྠཱབྷིམུཁོ, ཨུཏྟརཱབྷིམུཁོ ཝཱ གཙྪཱ’’ཏིཨཱདིནཱ ཝཙནམཏྟཾ ཨཝཏྭཱ ‘‘ཨེས མགྒོ, ཨེཝཾ གཙྪཱ’’ཏི ཧཏྠེ གཧེཏྭཱ ནིསྶནྡེཧཾ དསྶེཡྻཱཏི ཝུཏྟཾ ཧོཏི. ཀཱལ༹པཀྑེ ཙཱཏུདྡསཱི ཀཱལ༹པཀྑཙཱཏུདྡསཱི. ནིརནྟརརུཀྑགཧནེན ཨེཀགྒྷནོ ཝནསཎྜོ གྷནཝནསཎྜོ. མེགྷསྶ པཊལཾ མེགྷཔཊལཾ, མེགྷཙྪནྣཏཱཏི ཝུཏྟཾ ཧོཏི. ནིཀྐུཛྫིཏཾ ཨུཀྐུཛྫེཡྻཱཏི ཀསྶཙིཔི ཨཱདྷེཡྻསྶ ཨནཱདྷཱརབྷཱུཏཾ ཀིཉྩི བྷཱཛནཾ ཨཱདྷཱརབྷཱཝཱཔཱདནཝསེན ཨུཀྐུཛྫེཡྻ ཨུཔརི མུཁཾ ཋཔེཡྻ. ཧེཊྛཱམུཁཛཱཏཏཱཡ ཝིམུཁཾ, ཨདྷོམུཁཊྛཔིཏཏཱཡ ཨསདྡྷམྨེ པཏིཏནྟི ཨེཝཾ པདདྭཡཾ ནིཀྐུཛྫིཏཔདསྶ ཡཐཱདསྶིཏེན ¶ ཨཏྠདྭཡེན ཡཐཱརཧཾ ཡོཛེཏབྦཾ, ན ཡཐཱསངྑྱཾ. ཨཏྟནོ སབྷཱཝེནེཝ ཧི ཨེས རཱཛཱ སདྡྷམྨཝིམུཁོ, པཱཔམིཏྟེན པན དེཝདཏྟེན པིཏུགྷཱཏཱདཱིསུ ཨུཡྻོཛིཏཏྟཱ ཨསདྡྷམྨེ པཏིཏོཏི. ཝུཊྛཱཔེནྟེན བྷགཝཏཱཏི སམྦནྡྷོ.

‘‘ཀསྶཔསྶ བྷགཝཏོ’’ཏིཨཱདིནཱ ཏདཱ རཉྙཱ ཨཝུཏྟསྶཱཔི ཨཏྠཱཔཏྟིམཏྟདསྶནཾ. ཀཱམཉྩ ཀཱམཙྪནྡཱདཡོཔི པཊིཙྪཱདཀཱ ནཱིཝརཎབྷཱཝཏོ, མིཙྪཱདིཊྛི པན སཝིསེསཾ པཊིཙྪཱདིཀཱ སཏྟེ མིཙྪཱབྷིནིཝེསཝསེནཱཏི ཨཱཧ ‘‘མིཙྪཱདིཊྛིགཧནཔཊིཙྪནྣ’’ནྟི. ཏེནཱཧ བྷགཝཱ ‘‘མིཙྪཱདིཊྛིཔརམཱཧཾ བྷིཀྑཝེ ཝཛྫཾ ཝདཱམཱི’’ཏི, [ཨ. ནི. ༡.༣༡༠ (ཨཏྠཏོ སམཱནཾ)] མིཙྪཱདིཊྛིསངྑཱཏགུམྦཔཊིཙྪནྣནྟི ¶ ཨཏྠོ. ‘‘མིཙྪཱདིཊྛིགཧནཔཊིཙྪནྣཾ སཱསནཾ ཝིཝརནྟེནཱ’’ཏི ཝདནྟོ སབྦབུདྡྷཱནཾ ཨེཀཱཝ ཨནུསནྡྷི, ཨེཀཾཝ སཱསནནྟི ཀཏྭཱ ཀསྶཔསྶ བྷགཝཏོ སཱསནམྤི ཨིམིནཱ སདྡྷིཾ ཨེཀསཱསནཾ ཀརོཏཱིཏི དཊྛབྦཾ. ཨངྒུཏྟརཊྛཀཐཱདཱིསུཔི ཧི ཏཐཱ ཙེཝ ཝུཏྟཾ, ཨེཝཉྩ ཀཏྭཱ མིཙྪཱདིཊྛིགཧནཔཊིཙྪནྣསྶ སཱསནསྶ ཝིཝརཎཝཙནཾ ཨུཔཔནྣཾ ཧོཏཱིཏི.

སབྦོ ཨཀུསལདྷམྨསངྑཱཏོ ཨཔཱཡགཱམིམགྒོ ཀུམྨགྒོ ཀུཙྪིཏོ མགྒོཏི ཀཏྭཱ. སམྨཱདིཊྛིཨཱདཱིནཾ ཨུཛུཔཊིཔཀྑཏཱཡ མིཙྪཱདིཊྛིཨཱདཡོ ཨཊྛ མིཙྪཏྟདྷམྨཱ མིཙྪཱམགྒོ མོཀྑམགྒཏོ མིཙྪཱ ཝིཏཐོ མགྒོཏི ཀཏྭཱ. ཏེནེཝ ཧི ཏདུབྷཡསྶ པཊིཔཀྑཏཾ སནྡྷཱཡ ‘‘སགྒམོཀྑམགྒཾ ཨཱཝིཀརོནྟེནཱ’’ཏི ཝུཏྟཾ. སབྦོ ཧི ཀུསལདྷམྨོ སགྒམགྒོ. སམྨཱདིཊྛིཨཱདཡོ ཨཊྛ སམྨཏྟདྷམྨཱ མོཀྑམགྒོ. སཔྤིཨཱདིསནྣིསྶཡོ པདཱིཔོ ན ཏཐཱ ཨུཛྫལོ, ཡཐཱ ཏེལསནྣིསྶཡོཏི ཏེལཔཛྫོཏགྒཧཎཾ. དྷཱརེཡྻཱཏི དྷརེཡྻ, སམཱཧརེཡྻ སམཱདཧེཡྻཱཏི ཨཏྠོ. བུདྡྷཱདིརཏནརཱུཔཱནཱིཏི བུདྡྷཱདཱིནཾ ཏིཎྞཾ རཏནཱནཾ ཝཎྞཱཡཏནཱནི. ཏེསཾ བུདྡྷཱདིརཏནརཱུཔཱནཾ པཊིཙྪཱདཀསྶ མོཧནྡྷཀཱརསྶ ཝིདྡྷཾསཀཾ ཏཐཱ. དེསནཱསངྑཱཏཾ པཛྫོཏཾ ཏཐཱ. ཏདུབྷཡཾ ཏུལྱཱདྷིཀརཎཝསེན ཝིཡཱུཧིཏྭཱ ཏསྶ དྷཱརཀོ སམཱདཧཀོཏི ཨཏྠེན ‘‘ཏཔྤཊིཙྪཱདཀམོཧནྡྷཀཱརཝིདྡྷཾསཀདེསནཱཔཛྫོཏདྷཱརཀེནཱ’’ཏི ཝུཏྟཾ. ཨེཏེཧི པརིཡཱཡེཧཱིཏི ཡཐཱཝུཏྟེཧི ནིཀྐུཛྫིཏུཀྐུཛྫནཔཊིཙྪནྣཝིཝརཎམགྒཱཙིཀྑཎཏེལཔཛྫོཏདྷཱརཎ སངྑཱཏ ཙཏུབྦིདྷོཔམོཔམིཏབྦཔྤཀཱརེཧི, ཡཐཱཝུཏྟེཧི ¶ ཝཱ ནཱནཱཝིདྷཀུཧནལཔནཱདིམིཙྪཱཛཱིཝཝིདྷམནཱདིཝིབྷཱཝནཔརིཡཱཡེཧི. ཏེནཱཧ ‘‘ཨནེཀཔརིཡཱཡེན དྷམྨོ པཀཱསིཏོ’’ཏི.

‘‘ཨེཝ’’ནྟིཨཱདིནཱ ‘‘ཨེསཱཧ’’ནྟིཨཱདིཔཱཋསྶ སམྦནྡྷཾ དསྶེཏི. པསནྣཙིཏྟཏཱཡཔསནྣཱཀཱརཾ ཀརོཏི. པསནྣཙིཏྟཏཱ ཙ ཨིམཾ དེསནཾ སུཏྭཱ ཨེཝཱཏི ཨཏྠཾ ཉཱཔེཏུཾ ‘‘ཨིམཱཡ དེསནཱཡཱ’’ཏིཨཱདི ཝུཏྟཾ. ཨིམཱཡ དེསནཱཡ ཧེཏུབྷཱུཏཱཡ. པསནྣཱཀཱརནྟི པསནྣེཧི སཱདྷུཛནེཧི ཀཏྟབྦསཀྐཱརཾ. སརཎནྟི པཊིསརཎཾ. ཏེནཱཧ ‘‘པརཱཡཎ’’ནྟི. པརཱཡཎཏཱ པན ཨནཏྠནིསེདྷནེན, ཨཏྠསམྤཱདནེན ཙཱཏི ཝུཏྟཾ ‘‘ཨགྷསྶ ཏཱཏཱ, ཧིཏསྶ ཙ ཝིདྷཱཏཱ’’ཏི. ཨགྷསྶཱཏི ནིསྶཀྐེ སཱམིཝཙནཾ, པཱཔཏོཏི ཨཏྠོ. དུཀྑཏོཏིཔི ཝདནྟི ཀེཙི. ཏཱཡཏི ཨཝསྶཡཾ ཀརོཏཱིཏི ཏཱཏཱ. ཧིཏསྶཱཏི ཨུཔཡོགཏྠེ སཱམིཝཙནཾ. ཝིདཧཏི སཾཝིདྷཱནཾ ཀརོཏཱིཏི ཝིདྷཱཏཱ. ‘‘ཨིཏི ཨིམིནཱ ཨདྷིཔྤཱཡེནཱ’’ཏི ཝདནྟོ ‘‘ཨིཏིསདྡོ ཙེཏྠ ལུཏྟནིདྡིཊྛོ, སོ ཙ ཨཱཀཱརཏྠོ’’ཏི དསྶེཏི. སརཎནྟི གམནཾ. ཧིཏཱདྷིཔྤཱཡེན བྷཛནཾ, ཛཱནནཾ ཝཱ, ཨེཝཉྩ ཀཏྭཱ ཝིནཡཊྛཀཐཱདཱིསུ ‘‘སརཎནྟི གཙྪཱམཱི’’ཏི སཧེཝ ཨིཏིསདྡེན ཨཏྠོ ཝུཏྟོཏི. ཨེཏྠ ཧི ནཱཡཾ གམི-སདྡོ ¶ ནཱི-སདྡཱདཡོ ཝིཡ དྭིཀམྨིཀོ, ཏསྨཱ ཡཐཱ ‘‘ཨཛཾ གཱམཾ ནེཏཱི’’ཏི ཝུཙྩཏི, ཨེཝཾ ‘‘བྷགཝནྟཾ སརཎཾ གཙྪཱམཱི’’ཏི ཝཏྟུཾ ན སཀྐཱ, ‘‘སརཎནྟི གཙྪཱམཱི’’ཏི པན ཝཏྟབྦཾ, ཏསྨཱ ཨེཏྠ ཨིཏིསདྡོ ལུཏྟནིདྡིཊྛོཏི ཝེདིཏབྦཾ, ཨེཝཉྩ ཀཏྭཱ ‘‘ཡོ བུདྡྷཾ སརཎཾ གཙྪཏི, སོ བུདྡྷཾ ཝཱ གཙྪེཡྻ སརཎཾ ཝཱ’’ཏི (ཁུ. པཱ. ཨཊྛ. ༡.གམཏཱིཡདཱིཔནཱ) ཁུདྡཀནིཀཱཡཊྛཀཐཱཡ ཨུདྡྷཊཱ ཙོདནཱ ཨནཝཀཱསཱ. ན ཧི གམི-སདྡཾ དུཧཱདིནྱཱདིགཎིཀཾ ཀརོནྟི ཨཀྑརཙིནྟཀཱཏི. ཧོཏུ ཏཱཝ གམི-སདྡསྶ ཨེཀཀམྨབྷཱཝོ, ཏཐཱཔི ‘‘གཙྪཏེཝ པུབྦཾ དིསཾ, གཙྪཏི པཙྪིམཾ དིས’’ནྟིཨཱདཱིསུ (སཾ. ནི. ༡.༡༥༩; ༣.༨༧) ཝིཡ ‘‘བྷགཝནྟཾ, སརཎ’’ནྟི པདདྭཡསྶ སམཱནཱདྷིཀརཎཏཱ ཡུཏྟཱཏི? ན, ཏསྶ པདདྭཡསྶ སམཱནཱདྷིཀརཎབྷཱཝཱནུཔཔཏྟིཏོ. ཏསྶ ཧི སམཱནཱདྷིཀརཎབྷཱཝེ ཨདྷིཔྤེཏེ པཊིཧཏཙིཏྟོཔི བྷགཝནྟཾ ཨུཔསངྐམནྟོ བུདྡྷཾ སརཎཾ གཏོ ནཱམ སིཡཱ. ཡཉྷི ཏཾ ‘‘བུདྡྷོ’’ཏི ཝིསེསིཏཾ སརཎཾ, ཏམེཝེས གཏོཏི, ན ཙེཏྠ ཨནུཔཔཏྟིཀེན ཨཏྠེན ཨཏྠོ, ཏསྨཱ ‘‘བྷགཝནྟ’’ནྟི གམནཱིཡཏྠསྶ དཱིཔནཾ, ‘‘སརཎ’’ནྟི པན གམནཱཀཱརསྶཱཏི ཝུཏྟནཡེན ¶ ཨིཏིལོཔཝསེནེཝ ཨཏྠོ གཧེཏབྦོཏི. དྷམྨཉྩ སངྒྷཉྩཱཏི ཨེཏྠཱཔི ཨེསེཝ ནཡོ. ཧོནྟི ཙེཏྠ –

‘‘གམིསྶ ཨེཀཀམྨཏྟཱ, ཨིཏིལོཔཾ ཝིཛཱནིཡཱ;

པཊིགྷཱཏཔྤསངྒཏྟཱ, ན ཙ ཏུལྱཏྠཏཱ སིཡཱ.

ཏསྨཱ གམནཱིཡཏྠསྶ, པུབྦཔདཾཝ ཛོཏཀཾ;

གམནཱཀཱརསྶ པརཾ, ཨིཏྱུཏྟཾ སརཎཏྟཡེ’’ཏི.

‘‘ཨིཏི ཨིམིནཱ ཨདྷིཔྤཱཡེན བྷགཝནྟཾ གཙྪཱམཱི’’ཏི པན ཝདནྟོ ཨནེནེཝ ཨདྷིཔྤཱཡེན བྷཛནཾ, ཛཱནནཾ ཝཱ སརཎགམནཾ ནཱམཱཏི ནིཡམེཏི. ཏཏྠ ‘‘གཙྪཱམཱི’’ཏིཨཱདཱིསུ པུརིམསྶ པུརིམསྶ པཙྪིམཾ པཙྪིམཾ ཨཏྠཝཙནཾ, ‘‘གཙྪཱམཱི’’ཏི ཨེཏསྶ ཝཱ ཨནཉྙསཱདྷཱརཎཏཱདསྶནཝསེན པཱཊིཡེཀྐམེཝ ཨཏྠཝཙནཾ ‘‘བྷཛཱམཱི’’ཏིཨཱདིཔདཏྟཡཾ. བྷཛནཉྷི སརཎཱདྷིཔྤཱཡེན ཨུཔསངྐམནཾ, སེཝནཾ སནྟིཀཱཝཙརབྷཱཝོ, པཡིརུཔཱསནཾ ཝཏྟཔཊིཝཏྟཀརཎེན ཨུཔཊྛཱནནྟི ཨེཝཾ སབྦཐཱཔི ཨནཉྙསཱདྷཱརཎཏཾཡེཝ དསྶེཏི. ཨེཝཾ ‘‘གཙྪཱམཱི’’ཏི པདསྶ གཏིཨཏྠཾ དསྶེཏྭཱ བུདྡྷིཨཏྠམྤི དསྶེཏུཾ ‘‘ཨེཝཾ ཝཱ’’ཏིཨཱདིམཱཧ, ཏཏྠ ཨེཝནྟི ‘‘བྷགཝཱ མེ སརཎ’’ནྟིཨཱདིནཱ ཨདྷིཔྤཱཡེན. ཀསྨཱ པན ‘‘གཙྪཱམཱི’’ཏི པདསྶ ‘‘བུཛ྄ཛྷཱམཱི’’ཏི ཨཡམཏྠོ ལབྦྷཏཱིཏི ཙོདནཾ སོདྷེཏི ‘‘ཡེསཉྷཱི’’ཏིཨཱདིནཱ, ཨནེན ཙ ནིརུཏྟིནཡམནྟརེན སབྷཱཝཏོཝ གམུདྷཱཏུསྶ བུདྡྷིཨཏྠོཏི དཱིཔེཏི. དྷཱཏཱུནནྟི མཱུལསདྡསངྑཱཏཱནཾ ཨི, ཡཱ, ཀམུ, གམུཨིཙྩཱདཱིནཾ.

‘‘ཨདྷིགཏམགྒེ ¶ , སཙྪིཀཏནིརོདྷེ’’ཏི པདདྭཡེནཱཔི ཕལཊྛཱ ཨེཝ དསྶིཏཱ, ན མགྒཊྛཱཏི ཏེ དསྶེནྟོ ‘‘ཡཐཱནུསིཊྛཾ པཊིཔཛྫམཱནེ ཙཱ’’ཏི ཨཱཧ. ནནུ ཙ ཀལྱཱཎཔུཐུཛྫནོཔི ‘‘ཡཐཱནུསིཊྛཾ པཊིཔཛྫཏཱི’’ཏི ཝུཙྩཏཱིཏི? ཀིཉྩཱཔི ཝུཙྩཏི, ནིཔྤརིཡཱཡེན པན མགྒཊྛཱ ཨེཝ ཏཐཱ ཝཏྟབྦཱ, ན ཨིཏརོ ནིཡཱམོཀྐམནཱབྷཱཝཏོ. ཏཐཱ ཧི ཏེ ཨེཝ ‘‘ཨཔཱཡེསུ ཨཔཏམཱནེ དྷཱརེཏཱི’’ཏི ཝུཏྟཱ. སམྨཏྟནིཡཱམོཀྐམནེན ཧི ཨཔཱཡཝིནིམུཏྟིསམྦྷཝོཏི. ཨེཝཾ ཨནེཀེཧིཔི ཝིནཡ- (སཱརཏྠ. ཊཱི. ༡.ཝེརཉྫཀཎྜཝཎྞནཱ) སུཏྟནྟཊཱིཀཱཀཱརེཧཱི (དཱི. ནི. ཊཱི. ༡.༢༥༠) ཝུཏྟཾ, ཏདེཏཾ སམྨཏྟནིཡཱམོཀྐམནཝསེན ནིཔྤརིཡཱཡཏོ ཨཔཱཡཝིནིམུཏྟཀེ སནྡྷཱཡ ཝུཏྟཾ, ཏདནུཔཔཏྟིཝསེན པན པརིཡཱཡཏོ ཨཔཱཡཝིནིམུཏྟཀཾ ཀལྱཱཎཔུཐུཛྫནམྤི ‘‘ཡཐཱནུསིཊྛཾ པཊིཔཛྫམཱནེ’’ཏི པདེན དསྶེཏཱིཏི དཊྛབྦཾ. ཏཐཱ ¶ ཧེས དཀྑིཎཝིབྷངྒསུཏྟཱདཱིསུ (མ. ནི. ༣.༣༧༩) སོཏཱཔཏྟིཕལསཙྪིཀིརིཡཱཡ པཊིཔནྣབྷཱཝེན ཝུཏྟོཏི, ཚཏྟཝིམཱནེ (ཝི. ཝ. ༨༨༦ ཨཱདཡོ) ཚཏྟམཱཎཝཀོ ཙེཏྠ ནིདསྶནཾ. ཨདྷིགཏམགྒེ, སཙྪིཀཏནིརོདྷེ ཙ ཡཐཱནུསིཊྛཾ པཊིཔཛྫམཱནེ ཙ པུགྒལེ ཨཔཱཡེསུ ཨཔཏམཱནེ ཀཏྭཱ དྷཱརེཏཱིཏི སཔཱཋསེསཡོཛནཱ. ཨཏཱིཏཀཱལིཀེན ཧི པུརིམཔདདྭཡེན ཕལཊྛཱནམེཝ གཧཎཾ, ཝཏྟམཱནཀཱལིཀེན ཙ པཙྪིམེན པདེན སཧ ཀལྱཱཎཔུཐུཛྫནེན མགྒཊྛཱནམེཝ. ‘‘ཨཔཏམཱནེ’’ཏི པན པདེན དྷཱརཎཱཀཱརདསྶནཾ ཨཔཏནཀརཎཝསེནེཝ དྷཱརེཏཱིཏི, དྷཱརཎསརཱུཔདསྶནཾ ཝཱ. དྷཱརཎཾ ནཱམ ཨཔཏནཀརཎམེཝཱཏི, ཨཔཏནཀརཎཉྩ ཨཔཱཡཱདིནིབྦཏྟཀཀིལེསཝིདྡྷཾསནཝསེན ཝཊྚཏོ ནིཡྻཱནམེཝ. ‘‘ཨཔཱཡེསཱུ’’ཏི ཧི དུཀྑབཧུལཊྛཱནཏཱཡ པདྷཱནཝསེན ཝུཏྟཾ, ཝཊྚདུཀྑེསུ པན སབྦེསུཔི ཨཔཏམཱནེ ཀཏྭཱ དྷཱརེཏཱིཏི ཨཏྠོ ཝེདིཏབྦོ. ཏཐཱ ཧི ཨབྷིདྷམྨཊྛཀཐཱཡཾ ཝུཏྟཾ ‘‘སོཏཱཔཏྟིམགྒོ ཙེཏྠ ཨཔཱཡབྷཝཏོ ཝུཊྛཱཏི, སཀདཱགཱམིམགྒོ སུགཏིཀཱམབྷཝེཀདེསཏོ, ཨནཱགཱམིམགྒོ ཀཱམབྷཝཏོ, ཨརཧཏྟམགྒོ རཱུཔཱརཱུཔབྷཝཏོ, སབྦབྷཝེཧིཔི ཝུཊྛཱཏི ཨེཝཱཏི ཝདནྟཱི’’ཏི (དྷ. ས. ཨཊྛ. ༣༥༠) ཨེཝཉྩ ཀཏྭཱ ཨརིཡམགྒོ ནིཡྻཱནིཀཏཱཡ, ནིབྦཱནཉྩ ཏསྶ ཏདཏྠསིདྡྷིཧེཏུཏཱཡཱཏི ཨུབྷཡམེཝ ནིཔྤརིཡཱཡེན དྷམྨོ ནཱམཱཏི སརཱུཔཏོ དསྶེཏུཾ ‘‘སོ ཨཏྠཏོ ཨརིཡམགྒོ ཙེཝ ནིབྦཱནཉྩཱ’’ཏི ཝུཏྟཾ. ནིབྦཱནཉྷི ཨཱརམྨཎཾ ལབྷིཏྭཱ ཨརིཡམགྒསྶ ཏདཏྠསིདྡྷི, སྭཱཡམཏྠོ ཙ པཱལི༹ཡཱ ཨེཝ སིདྡྷོཏི ཨཱཧ ‘‘ཝུཏྟཉྩེཏ’’ནྟིཨཱདི. ཡཱཝཏཱཏི ཡཏྟཀཱ. ཏེསནྟི ཏཏྟཀཱནཾ དྷམྨཱནཾ. ‘‘ཨགྒོ ཨཀྑཱཡཏཱི’’ཏི ཝཏྟབྦེ ཨོ-ཀཱརསྶ ཨ-ཀཱརཾ, མ-ཀཱརཱགམཉྩ ཀཏྭཱ ‘‘ཨགྒམཀྑཱཡཏཱི’’ཏི ཝུཏྟཾ. ‘‘ཨཀྑཱཡཏཱི’’ཏི ཙེཏྠ ཨིཏིསདྡོ ཨཱདིཨཏྠོ, པཀཱརཏྠོ ཝཱ, ཏེན ‘‘ཡཱཝཏཱ བྷིཀྑཝེ དྷམྨཱ སངྑཏཱ ཝཱ ཨསངྑཏཱ ཝཱ, ཝིརཱགོ ཏེསཾ ཨགྒམཀྑཱཡཏཱི’’ཏིཨཱདི (ཨིཏིཝུ. ༩༠; ཨ. ནི. ༤.༣༤) སུཏྟཔདཾ སངྒཎྷཱཏི, ‘‘ཝིཏྠཱརོ’’ཏི ཨིམིནཱ ཝཱ ཏདཝསེསསངྒཧོ.

ཡསྨཱ ¶ པན ཨརིཡཕལཱནཾ ‘‘ཏཱཡ སདྡྷཱཡ ཨཝཱུཔསནྟཱཡཱ’’ཏིཨཱདི ཝཙནཏོ མགྒེན སམུཙྪིནྣཱནཾ ཀིལེསཱནཾ པཊིཔྤསྶདྡྷིཔྤཧཱནཀིཙྩཏཱཡ ནིཡྻཱནཱནུགུཎཏཱ, ནིཡྻཱནཔརིཡོསཱནཏཱ ཙ, པརིཡཏྟིཡཱ པན ནིཡྻཱནདྷམྨསམདྷིགམཧེཏུཏཱཡ ¶ ནིཡྻཱནཱནུགུཎཏཱཏི ཨིམིནཱ པརིཡཱཡེན ཝུཏྟནཡེན དྷམྨབྷཱཝོ ལབྦྷཏི, ཏསྨཱ ཏདུབྷཡམྤི སངྒཎྷནྟོ ‘‘ན ཀེཝལཉྩཱ’’ཏིཨཱདིམཱཧ. སྭཱཡམཏྠོ ཙ པཱཋཱརུལ༹ྷོ ཨེཝཱཏི དསྶེཏི ‘‘ཝུཏྟཉྷེཏ’’ནྟིཨཱདིནཱ. ཏཏྠ ཚཏྟམཱཎཝཀཝིམཱནེཏི ཚཏྟོ ཀིར ནཱམ སེཏབྱཱཡཾ བྲཱཧྨཎམཱཎཝཀོ, སོ ཨུཀྐཊྛཱཡཾ པོཀྑརསཱཏིབྲཱཧྨཎསྶ སནྟིཀེ སིཔྤཾ ཨུགྒཧེཏྭཱ ‘‘གརུདཀྑིཎཾ དསྶཱམཱི’’ཏི ཨུཀྐཊྛཱབྷིམུཁོ གཙྪཏི, ཨཐསྶ བྷགཝཱ ཨནྟརཱམགྒེ ཙོརནྟརཱཡཾ, ཏཱཝཏིཾསབྷཝནེ ནིབྦཏྟམཱནཉྩ དིསྭཱ གཱཐཱབནྡྷཝསེན སརཎགམནཝིདྷིཾ དེསེསི, ཏསྶ ཏཱཝཏིཾསབྷཝནུཔགསྶ ཏིཾསཡོཛནིཀཾ ཝིམཱནཾ ཚཏྟམཱཎཝཀཝིམཱནཾ. དེཝལོཀེཔི ཧི ཏསྶ མནུསྶཀཱལེ སམཉྙཱ ཡཐཱ ‘‘མཎྜཱུཀོ དེཝཔུཏྟོ, (ཝི. ཝ. ༨༥༨ ཨཱདཡོ) ཀུཝེརོ དེཝརཱཛཱ’’ཏི, ཨིདྷ པན ཚཏྟམཱཎཝཀཝིམཱནཾ ཝཏྠུ ཀཱརཎཾ ཨེཏསྶཱཏི ཀཏྭཱ ཨུཏྟརཔདལོཔེན ‘‘ན ཏཐཱ ཏཔཏི ནབྷེ སཱུརིཡོ, ཙནྡོ ཙ ན བྷཱསཏི ན ཕུསྶོ, ཡཐཱ’’ཏིཨཱདིཀཱ (ཝི. ཝ. ༨༨༩) དེསནཱ ‘‘ཚཏྟམཱཎཝཀཝིམཱན’’ནྟི ཝུཙྩཏི, ཏཏྲཱཡཾ གཱཐཱ པརིཡཱཔནྣཱ, ཏསྨཱ ཚཏྟམཱཎཝཀཝིམཱནཝཏྠུདེསནཱཡནྟི ཨཏྠོ ཝེདིཏབྦོ.

ཀཱམརཱགོ བྷཝརཱགོཏི ཨེཝམཱདིབྷེདོ ཨནཱདིཀཱལཝིབྷཱཝིཏོ སབྦོཔི རཱགོ ཝིརཛྫཏི པཧཱིཡཏི ཨེཏེནཱཏི རཱགཝིརཱགོ, མགྒོ. ཨེཛཱསངྑཱཏཱཡ ཏཎྷཱཡ, ཨནྟོནིཛ྄ཛྷཱནལཀྑཎསྶ ཙ སོཀསྶ ཏདུཔྤཏྟིཡཾ སབྦསོ པརིཀྑཱིཎཏྟཱ ནཏྠི ཨེཛཱ, སོཀོ ཙ ཨེཏསྨིནྟི ཨནེཛཾ, ཨསོཀཉྩ, ཕལཾ. ཏདཊྛཀཐཱཡཾ (ཝི. ཝ. ཨཊྛ. ༨༨༧) པན ‘‘ཏཎྷཱཝསིཊྛཱནཾ སོཀནིམིཏྟཱནཾ ཀིལེསཱནཾ པཊིཔྤསྶམྦྷནཏོ ཨསོཀ’’ནྟི ཝུཏྟཾ. དྷམྨམསངྑཏནྟི སམྤཛྫ སམྦྷཱུཡ པཙྩཡེཧི ཨཔྤཊིསངྑཏཏྟཱ ཨསངྑཏཾ ཨཏྟནོ སབྷཱཝདྷཱརཎཏོ པརམཏྠདྷམྨབྷཱུཏཾ ནིབྦཱནཾ. ཏདཊྛཀཐཱཡཾ པན ‘‘དྷམྨནྟི སབྷཱཝདྷམྨཾ. སབྷཱཝཏོ གཧེཏབྦདྷམྨོ ཧེས, ཡདིདཾ མགྒཕལནིབྦཱནཱནི, ན པརིཡཏྟིདྷམྨོ ཝིཡ པཉྙཏྟིདྷམྨཝསེནཱ’’ཏི (ཝི. ཝ. ཨཊྛ. ༨༨༧) ཝུཏྟཾ, ཨེཝཾ སཏི དྷམྨསདྡོ ཏཱིསུཔི ཋཱནེསུ ཡོཛེཏབྦོ. ཨཔྤཊིཀཱུལསདྡེན ཙ ཏཏྠ ནིབྦཱནམེཝ གཧིཏཾ ‘‘ནཏྠི ཨེཏྠ ཀིཉྩིཔི པཊིཀཱུལ’’ནྟི ཀཏྭཱ, ཨཔྤཊིཀཱུལནྟི ཙ ཨཝིརོདྷདཱིཔནཏོ ཀིཉྩི ཨཝིརུདྡྷཾ, ཨིཊྛཾ པཎཱིཏནྟི ཝཱ ཨཏྠོ. པགུཎརཱུཔེན ¶ པཝཏྟིཏཏྟཱ, པཀཊྛགུཎཝིབྷཱཝནཏོ ཝཱ པགུཎཾ. ཡཐཱཧ ‘‘ཝིཧིཾསསཉྙཱི པགུཎཾ ན བྷཱསིཾ, དྷམྨཾ པཎཱིཏཾ མནུཛེསུ བྲཧྨེ’’ཏི (མ. ནི. ༡.༢༨༣; ༢.༣༣༩; མཧཱཝ. ༩).

དྷམྨཀྑནྡྷཱ ཀཐིཏཱཏི ཡོཛནཱ. ཨེཝཾ ཨིདྷ ཙཏཱུཧིཔི པདེཧི པརིཡཏྟིདྷམྨོཡེཝ གཧིཏོ, ཏདཊྛཀཐཱཡཾ ¶ པན ‘‘སཝནཝེལཱཡཾ, ཨུཔཔརིཀྑཎཝེལཱཡཾ, པཊིཔཛྫནཝེལཱཡནྟི སབྦདཱཔི ཨིཊྛམེཝཱཏི མདྷུརཾ, སབྦཉྙུཏཉྙཱཎསནྣིསྶཡཱཡ པཊིབྷཱནསམྤདཱཡ པཝཏྟིཏཏྟཱ སུཔྤཝཏྟིབྷཱཝཏོ, ནིཔུཎབྷཱཝཏོ ཙ པགུཎཾ, ཝིབྷཛིཏབྦསྶ ཨཏྠསྶ ཁནྡྷཱདིཝསེན, ཀུསལཱདིཝསེན, ཨུདྡེསཱདིཝསེན ཙ སུཊྛུ ཝིབྷཛནཏོ སུཝིབྷཏྟནྟི ཏཱིཧིཔི པདེཧི པརིཡཏྟིདྷམྨམེཝ ཝདཏཱི’’ཏི (ཝི. ཝ. ཨཊྛ. ༨༨༧) ཝུཏྟཾ. ཨཱཔཱཐཀཱལེ ཝིཡ མཛྫནཀཱལེཔི, ཀཐེནྟསྶ ཝིཡ སུཎནྟསྶཱཔི སམྨུཁཱིབྷཱཝཏོ ཨུབྷཏོཔཙྩཀྑཏཱདསྶནཏྠཾ ཨིདྷེཝ ‘‘ཨིམ’’ནྟི ཨཱསནྣཔཙྩཀྑཝཙནམཱཧ. པུན ‘‘དྷམྨ’’ནྟི ཨིདཾ ཡཐཱཝུཏྟསྶ ཙཏུབྦིདྷསྶཱཔི དྷམྨསྶ སཱདྷཱརཎཝཙནཾ. པརིཡཏྟིདྷམྨོཔི ཧི སརཎེསུ ཙ སཱིལེསུ ཙ པཏིཊྛཱནམཏྟཱཡཔི ཡཱཐཱཝཔཊིཔཏྟིཡཱ ཨཔཱཡཔཏནཏོ དྷཱརེཏི, ཨིམསྶ ཙ ཨཏྠསྶ ཨིདམེཝ ཚཏྟམཱཎཝཀཝིམཱནཾ སཱདྷཀནྟི དཊྛབྦཾ. སཱདྷཱརཎབྷཱཝེན ཡཐཱཝུཏྟཾ དྷམྨཾ པཙྩཀྑཾ ཀཏྭཱ དསྶེནྟོ པུན ‘‘ཨིམ’’ནྟི ཨཱཧ. ཡསྨཱ ཙེསཱ བྷ-ཀཱརཏྟཡེན ཙ པཊིམཎྜིཏཱ དོདྷཀགཱཐཱ, ཏསྨཱ ཏཏིཡཔཱདེ མདྷུརསདྡེ མ-ཀཱརོ ཨདྷིཀོཔི ཨརིཡཙརིཡཱདིཔདེཧི ཝིཡ ཨནེཀཀྑརཔདེན ཡུཏྟཏྟཱ ཨནུཔཝཛྫོཏི དཊྛབྦཾ.

དིཊྛིསཱིལསངྒྷཱཏེནཱཏི ‘‘ཡཱཡཾ དིཊྛི ཨརིཡཱ ནིཡྻཱནིཀཱ ནིཡྻཱཏི ཏཀྐརསྶ སམྨཱ དུཀྑཀྑཡཱཡ, ཏཐཱརཱུཔཱཡ དིཊྛིཡཱ དིཊྛིསཱམཉྙགཏོ ཝིཧརཏཱི’’ཏི (དཱི. ནི. ༣.༣༢༤, ༣༥༦; ཨ. ནི. ༦.༡༡; པརི. ༢༧༤) ཨེཝཾ ཝུཏྟཱཡ དིཊྛིཡཱ ཙེཝ ‘‘ཡཱནི ཏཱནི སཱིལཱནི ཨཁཎྜཱནི ཨཙྪིདྡཱནི ཨསབལཱནི ཨཀམྨཱསཱནི བྷུཛིསྶཱནི ཝིཉྙུཔསཏྠཱནི ཨཔརཱམཊྛཱནི སམཱདྷིསཾཝཏྟནིཀཱནི, ཏཐཱརཱུཔེཧི སཱིལེཧི སཱིལསཱམཉྙགཏོ ཝིཧརཏཱི’’ཏི (དཱི. ནི. ༣.༣༢༤, ༣༥༦; མ. ནི. ༡.༤༩༢; ༣.༥༤; ཨ. ནི. ༦.༩༢; པརི. ༢༧༤) ཨེཝཾ ཝུཏྟཱནཾ སཱིལཱནཉྩ སཾཧཏབྷཱཝེན, དིཊྛིསཱིལསཱམཉྙེནཱཏི ཨཏྠོ. སཾཧཏོཏི སངྒྷཊིཏོ, སམེཏོཏི ཝུཏྟཾ ཧོཏི. ཨརིཡཔུགྒལཱ ¶ ཧི ཡཏྠ ཀཏྠཙི དཱུརེ ཋིཏཱཔི ཨཏྟནོ གུཎསཱམགྒིཡཱ སཾཧཏཱ ཨེཝ. ‘‘ཝུཏྟཉྷེཏ’’ནྟིཨཱདིནཱ ཨཱཧཙྩཔཱཋེན སམཏྠེཏི.

ཡཏྠཱཏི ཡསྨིཾ སངྒྷེ. དིནྣནྟི པརིཙྩཏྟཾ ཨནྣཱདིདེཡྻདྷམྨཾ, གཱཐཱབནྡྷཏྟཱ ཙེཏྠ ཨནུནཱསིཀལོཔོ. དོདྷཀགཱཐཱ ཧེསཱ. མཧཔྥལམཱཧཱུཏི ‘‘མཧཔྥལ’’ནྟི བུདྡྷཱདཡོ ཨཱཧུ. ཙཏཱུསཱུཏི ཙེཏྠ ཙ-ཀཱརོ ཨདྷིཀོཔི ཝུཏྟནཡེན ཨནུཔཝཛྫོ. ཨཙྩནྟམེཝ ཀིལེསཱསུཙིཏོ ཝིསུདྡྷཏྟཱ སུཙཱིསུ. ‘‘སོཏཱཔནྣོ སོཏཱཔཏྟིཕལསཙྪིཀིརིཡཱཡ པཊིཔནྣོ’’ཏིཨཱདིནཱ (སཾ. ནི. ༥.༤༨༨) ཝུཏྟེསུ ཙཏཱུསུ པུརིསཡུགེསུ. ཙཏུསཙྩདྷམྨསྶ, ནིབྦཱནདྷམྨསྶ ཙ པཙྩཀྑཏོ དསྶནེན, ཨརིཡདྷམྨསྶ པཙྩཀྑདསྶཱཝིཏཱཡ ཝཱ དྷམྨདསཱ. ཏེ པུགྒལཱ མགྒཊྛཕལཊྛེ ¶ ཡུགལེ ཨཀཏྭཱ ཝིསུཾ ཝིསུཾ པུགྒལགཎནེན ཨཊྛ ཙ ཧོནྟི. ཨིམཾ སངྒྷཾ སརཎཏྠཾ སརཎཱཡ པརཱཡཎཱཡ ཨཔཱཡདུཀྑཝཊྚདུཀྑཔརིཏཱཎཱཡ ཨུཔེཧི ཨུཔགཙྪ བྷཛ སེཝ, ཨེཝཾ ཝཱ ཛཱནཱཧི བུཛ྄ཛྷསྶཱུཏི སཧ ཡོཛནཱཡ ཨཏྠོ. ཡཏྠ ཡེསུ སུཙཱིསུ ཙཏཱུསུ པུརིསཡུགེསུ དིནྣཾ མཧཔྥལམཱཧུ, དྷམྨདསཱ ཏེ པུགྒལཱ ཨཊྛ ཙ, ཨིམཾ སངྒྷཾ སརཎཏྠམུཔེཧཱིཏི ཝཱ སམྦནྡྷོ. ཨེཝམྤི ཧི པཊིནིདྡེསོ ཡུཏྟོ ཨེཝ ཨཏྠཏོ ཨབྷིནྣཏྟཱཏི དཊྛབྦཾ. གཱཐཱསུཁཏྠཉྩེཏྠ པུརིསཔདེ ཨཱིཀཱརཾ, པུགྒལཱཔདེ ཙ རསྶཾ ཀཏྭཱ ནིདྡེསོ.

ཨེཏྟཱཝཏཱཏི ‘‘ཨེསཱཧ’’ནྟིཨཱདིཝཙནཀྐམེན. ཏཱིཎི ཝཏྠཱུནི ‘‘སརཎ’’ནྟི གམནཱནི, ཏིཀྑཏྟུཾ ཝཱ ‘‘སརཎ’’ནྟི གམནཱནཱིཏི སརཎགམནཱནི. པཊིཝེདེསཱིཏི ཨཏྟནོ ཧདཡགཏཾ ཝཱཙཱཡ པཝེདེསི.

སརཎགམནཀཐཱཝཎྞནཱ

སརཎགམནསྶ ཝིསཡཔྤབྷེདཕལསཾཀིལེསབྷེདཱནཾ ཝིཡ, ཀཏྟུ ཙ ཝིབྷཱཝནཱ ཏཏྠ ཀོསལླཱཡ ཧོཏི ཡེཝཱཏི སཧ ཀཏྟུནཱ ཏཾ ཝིདྷིཾ དསྶེཏུཾ ‘‘ཨིདཱནི ཏེསུ སརཎགམནེསུ ཀོསལླཏྠཾ…པེ… ཝེདིཏབྦོ’’ཏི ཝུཏྟཾ. ‘‘ཡོ ཙ སརཎཾ གཙྪཏཱི’’ཏི ཨིམིནཱ ཧི ཀཏྟཱརཾ ཝིབྷཱཝེཏི ཏེན ཝིནཱ སརཎགམནསྶེཝ ཨསམྦྷཝཏོ, ‘‘སརཎགམན’’ནྟི ཨིམིནཱ ཙ སརཎགམནམེཝ, ‘‘སརཎ’’ནྟིཨཱདཱིཧི པན ཡཐཱཀྐམཾ ཝིསཡཱདཡོ. ཀསྨཱ པནེཏྠ ཝོདཱནཾ ན གཧིཏཾ, ནནུ ཝོདཱནཝིབྷཱཝནཱཔི ཏཏྠ ཀོསལླཱཡ ཧོཏཱིཏི? སཙྩམེཏཾ, ཏཾ པན སཾཀིལེསགྒཧཎེནེཝ ཨཏྠཏོ ¶ ཝིབྷཱཝིཏཾ ཧོཏཱིཏི ན གཧིཏཾ. ཡཱནི ཧི ནེསཾ སཾཀིལེསཀཱརཎཱནི ཨཉྙཱཎཱདཱིནི, ཏེསཾ སབྦེན སབྦཾ ཨནུཔྤནྣཱནཾ ཨནུཔྤཱདནེན, ཨུཔྤནྣཱནཉྩ པཧཱནེན ཝོདཱནཾ ཧོཏཱིཏི. ཨཏྠཏོཏི སརཎསདྡཏྠཏོ, ‘‘སརཎཏྠཏོ’’ཏིཔི པཱཋོ, ཨཡམེཝཏྠོ. ཧིཾསཏྠསྶ སརསདྡསྶ ཝསེནེཏཾ སིདྡྷནྟི དསྶེནྟོ དྷཱཏྭཏྠཝསེན ‘‘ཧིཾསཏཱིཏི སརཎ’’ནྟི ཝཏྭཱ ཏཾ པན ཧིཾསནཾ ཀེསཾ, ཀཐཾ, ཀསྶ ཝཱཏི ཙོདནཾ སོདྷེཏི ‘‘སརཎགཏཱན’’ནྟིཨཱདིནཱ. ཀེསནྟི ཧི སརཎགཏཱནཾ. ཀཐནྟི ཏེནེཝ སརཎགམནེན. ཀསྶཱཏི བྷཡཱདཱིནནྟི ཡཐཱཀྐམཾ སོདྷནཱ. ཏཏྠ སརཎགཏཱནནྟི ‘‘སརཎ’’ནྟི གཏཱནཾ. སརཎགམནེནཱཏི ‘‘སརཎ’’ནྟི གམནེན ཀུསལདྷམྨེན. བྷཡནྟི ཝཊྚབྷཡཾ. སནྟཱསནྟི ཙིཏྟུཏྲཱསཾ ཏེནེཝ ཙེཏསིཀདུཀྑསྶ སངྒཧིཏཏྟཱ. དུཀྑནྟི ཀཱཡིཀདུཀྑགྒཧཎཾ. དུགྒཏིཔརིཀིལེསནྟི དུགྒཏིཔརིཡཱཔནྣཾ སབྦམྤི དུཀྑཾ ‘‘དུགྒཏིཡཾ པརིཀིལིསྶནཾ སཾཝིབཱདྷནཾ, སམུཔཏཱཔནཾ ཝཱ’’ཏི ཀཏྭཱ, ཏཡིདཾ སབྦཾ པརཏོ ཕལཀཐཱཡཾ ཨཱཝི བྷཝིསྶཏི. ཧིཾསནཉྩེཏྠ ཝིནཱསནམེཝ, ན པན སཏྟཧིཾསནམིཝཱཏི དསྶེཏི ‘‘ཧནཏི ཝིནཱསེཏཱི’’ཏི ¶ ཨིམིནཱ. ཨེཏནྟི སརཎཔདཾ. ཨདྷིཝཙནནྟི ནཱམཾ, པསིདྡྷཝཙནཾ ཝཱ, ཡཐཱབྷུཙྩཾ ཝཱ གུཎཾ ཨདྷིཀིཙྩ པཝཏྟཝཙནཾ. ཏེནཱཧ ‘‘རཏནཏྟཡསྶེཝཱ’’ཏི.

ཨེཝཾ ཧིཾསནཏྠཝསེན ཨཝིསེསཏོ སརཎསདྡཏྠཾ དསྶེཏྭཱ ཨིདཱནི ཏདཏྠཝསེནེཝ ཝིསེསཏོ དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ. རཏནཏྟཡསྶ པཙྩེཀཾ ཧིཾསནཀཱརཎདསྶནམེཝ ཧི པུརིམནཡཏོ ཨིམསྶ ཝིསེསོཏི. ཏཏྠ ཧིཏེ པཝཏྟནེནཱཏི ‘‘སམྤནྣསཱིལཱ བྷིཀྑཝེ ཝིཧརཐཱ’’ཏིཨཱདིནཱ (མ. ནི. ༡.༦༤, ༦༩) ཨཏྠེ སཏྟཱནཾ ནིཡོཛནེན. ཨཧིཏཱ ཙ ནིཝཏྟནེནཱཏི ‘‘པཱཎཱཏིཔཱཏསྶ ཁོ པཱཔཀོ ཝིཔཱཀོ, པཱཔཀཾ ཨབྷིསམྤརཱཡ’’ནྟིཨཱདིནཱ ཨཱདཱིནཝདསྶནཱདིམུཁེན ཨནཏྠཏོ ཙ སཏྟཱནཾ ནིཝཏྟནེན. བྷཡཾ ཧིཾསཏཱིཏི ཧིཏཱཧིཏེསུ ཨཔྤཝཏྟིཔཝཏྟིཧེཏུཀཾ བྱསནཾ ཨཔྤཝཏྟིཀརཎེན ཝིནཱསེཏི. བྷཝཀནྟཱརཱ ཨུཏྟཱརཎེན མགྒསངྑཱཏོ དྷམྨོ, ཕལནིབྦཱནསངྑཱཏོ པན ཨསྶཱསདཱནེན སཏྟཱནཾ བྷཡཾ ཧིཾསཏཱིཏི ཡོཛནཱ. ཀཱརཱནནྟི དཱནཝསེན, པཱུཛཱཝསེན ཙ ཨུཔནཱིཏཱནཾ སཀྐཱརཱནཾ. ཨནུཔསགྒོཔི ཧི སདྡོ སཨུཔསགྒོ ཝིཡ ཨཏྠཝིསེསཝཱཙཀོ ‘‘ཨཔྤཀམྤི ཀཏཾ ཀཱརཾ, པུཉྙཾ ཧོཏི མཧཔྥལ’’ནྟིཨཱདཱིསུ ཝིཡ. ཨནུཏྟརདཀྑིཎེཡྻབྷཱཝཏོ ¶ ཝིཔུལཕལཔཊིལཱབྷཀརཎེན སཏྟཱནཾ བྷཡཾ ཧིཾ སཏཱིཏི ཡོཛེཏབྦཾ. ཨིམིནཱཔི པརིཡཱཡེནཱཏི རཏནཏྟཡསྶ པཙྩེཀཾ ཧིཾསཀབྷཱཝཀཱརཎདསྶནཝསེན ཝིབྷཛིཏྭཱ ཝུཏྟེན ཨིམིནཱཔི ཀཱརཎེན. ཡསྨཱ པནིདཾ སརཎཔདཾ ནཱཐཔདཾ ཝིཡ སུདྡྷནཱམཔདཏྟཱ དྷཱཏྭཏྠཾ ཨནྟོནཱིཏཾ ཀཏྭཱ སངྐེཏཏྠམྤི ཝདཏི, ཏསྨཱ ཧེཊྛཱ སརཎཾ པརཱཡཎནྟི ཨཏྠོ ཝུཏྟོཏི དཊྛབྦཾ.

ཨེཝཾ སརཎཏྠཾ དསྶེཏྭཱ ཨིདཱནི སརཎགམནཏྠཾ དསྶེནྟོ ‘‘ཏཔྤསཱདཱ’’ཏིཨཱདིམཱཧ. ཏཏྠ ‘‘སམྨཱསམྦུདྡྷོ བྷགཝཱ, སྭཱཀྑཱཏོ དྷམྨོ, སུཔྤཊིཔནྣོ སངྒྷོ’’ཏི ཨེཝམཱདིནཱ ཏསྨིཾ རཏནཏྟཡེ པསཱདོ ཏཔྤསཱདོ, ཏདེཝ རཏནཏྟཡཾ གརུ ཨེཏསྶཱཏི ཏགྒརུ, ཏསྶ བྷཱཝོ ཏགྒརུཏཱ, ཏཔྤསཱདོ ཙ ཏགྒརུཏཱ ཙ ཏཔྤསཱདཏགྒརུཏཱ, ཏཱཧི. ཝིཧཏཀིལེསོ ཝིདྷུཏཝིཙིཀིཙྪཱསམྨོཧཱསདྡྷིཡཱདིཔཱཔདྷམྨཏྟཱ, ཏདེཝ རཏནཏྟཡཾ པརཱཡཎཾ པརཱགཏི ཏཱཎཾ ལེཎཾ ཨེཏསྶཱཏི ཏཔྤརཱཡཎོ, ཏསྶ བྷཱཝོ ཏཔྤརཱཡཎཏཱ, སཱཡེཝ ཨཱཀཱརོ ཏཔྤརཱཡཎཏཱཀཱརོ, ཏེན པཝཏྟོ ཏཔྤརཱཡཎཏཱཀཱརཔྤཝཏྟོ. ཨེཏྠ ཙ པསཱདགྒཧཎེན ལོཀིཡཾ སརཎགམནམཱཧ. ཏཉྷི སདྡྷཱཔདྷཱནཾ, ན ཉཱཎཔདྷཱནཾ, གརུཏཱགཧཎེན པན ལོཀུཏྟརཾ. ཨརིཡཱ ཧི རཏནཏྟཡཾ གུཎཱབྷིཉྙཏཱཡ པཱསཱཎཙྪཏྟཾ ཝིཡ གརུཾ ཀཏྭཱ པསྶནྟི, ཏསྨཱ ཏཔྤསཱདེན ཏདངྒཔྤཧཱནཝསེན ཝིཧཏཀིལེསོ, ཏགྒརུཏཱཡ ཙ ཨགཱརཝཀརཎཧེཏཱུནཾ སམུཙྪེདཝསེནཱཏི ཡོཛེཏབྦཾ. ཏཔྤརཱཡཎཏཱ པནེཏྠ ཏགྒཏིཀཏཱཏི ཏཱཡ ཙཏུབྦིདྷམྤི ཝཀྑམཱནཾ སརཎགམནཾ གཧིཏནྟི དཊྛབྦཾ. ཨཝིསེསེན ཝཱ ¶ པསཱདགརུཏཱ ཛོཏིཏཱཏི པསཱདགྒཧཎེན ཨནཝེཙྩཔྤསཱདསྶ ལོཀིཡསྶ, ཨཝེཙྩཔྤསཱདསྶ ཙ ལོཀུཏྟརསྶ གཧཎཾ, ཏཐཱ གརུཏཱགཧཎེན ལོཀིཡསྶ གརུཀརཎསྶ, ལོཀུཏྟརསྶ ཙཱཏི ཨུབྷཡེནཔི པདེན ཨུབྷཡམྤི ལོཀིཡལོཀུཏྟརསརཎགམནཾ ཡོཛེཏབྦཾ. ཨུཔྤཛྫཏི ཙིཏྟམེཏེནཱཏི ཨུཔྤཱདོ, སམྤཡུཏྟདྷམྨསམཱུཧོ, ཙིཏྟཉྩ ཏཾ ཨུཔྤཱདོ ཙཱཏི ཙིཏྟུཔྤཱདོ. སམཱཧཱརདྭནྡེཔི ཧི ཀཏྠཙི པུལླིངྒམིཙྪནྟི སདྡཝིདཱུ, ཏདཱཀཱརཔྤཝཏྟཾ སདྡྷཱཔཉྙཱདིསམྤཡུཏྟདྷམྨསཧིཏཾ ཙིཏྟཾ སརཎགམནཾ ནཱམ ‘‘སརཎནྟི གཙྪཏི ཨེཏེནཱཏི ཀཏྭཱ’’ཏི ཝུཏྟཾ ཧོཏི. ‘‘ཏཾསམངྒཱི’’ཏིཨཱདི ཀཏྟུཝིབྷཱཝནཱ. ཏེན ཡཐཱཝུཏྟཙིཏྟུཔྤཱདེན སམངྒཱིཏི ཏཾསམངྒཱི. ཏེནཱཧ ‘‘ཝུཏྟཔྤཀཱརེན ཙིཏྟུཔྤཱདེནཱ’’ཏི ¶ . ཨུཔེཏཱིཏི བྷཛཏི སེཝཏི པཡིརུཔཱསཏི, ཛཱནཱཏི ཝཱ, བུཛ྄ཛྷཏཱིཏི ཨཏྠོ.

ལོཀུཏྟརཾ སརཎགམནཾ ཀེསནྟི ཨཱཧ ‘‘དིཊྛསཙྩཱན’’ནྟི, ཨཊྛནྣཾ ཨརིཡཔུགྒལཱནནྟི ཨཏྠོ. ཀདཱ ཏཾ ཨིཛ྄ཛྷཏཱིཏི ཨཱཧ ‘‘མགྒཀྑཎེ’’ཏི, ‘‘ཨིཛ྄ཛྷཏཱི’’ཏི པདེན ཙེཏསྶ སམྦནྡྷོ. མགྒཀྑཎེ ཨིཛ྄ཛྷམཱནེནེཝ ཧི ཙཏུསཙྩཱདྷིགམེན ཕལཊྛཱནམྤི སརཎགམཀཏཱ སིཛ྄ཛྷཏི ལོཀུཏྟརསརཎགམནསྶ བྷེདཱབྷཱཝཏོ, ཏེསཉྩ ཨེཀསནྟཱནཏྟཱ. ཀཐཾ ཏཾ ཨིཛ྄ཛྷཏཱིཏི ཨཱཧ ‘‘སརཎགམནུཔཀྐིལེསསམུཙྪེདེནཱ’’ཏིཨཱདི, ཨུཔཔཀྐིལེསསམུཙྪེདཏོ, ཨཱརམྨཎཏོ, ཀིཙྩཏོ ཙ སཀལེཔི རཏནཏྟཡེ ཨིཛ྄ཛྷཏཱིཏི ཝུཏྟཾ ཧོཏི. སརཎགམནུཔཀྐིལེསསམུཙྪེདེནཱཏི ཙེཏྠ པཧཱནཱབྷིསམཡཾ སནྡྷཱཡ ཝུཏྟཾ, ཨཱརམྨཎཏོཏི སཙྪིཀིརིཡཱབྷིསམཡཾ. ནིབྦཱནཱརམྨཎཾ ཧུཏྭཱ ཨཱརམྨཎཏོ ཨིཛ྄ཛྷཏཱིཏི ཧི ཡོཛེཏབྦཾ, ཏྭཱ-སདྡོ ཙ ཧེཏུཏྠཝཱཙཀོ ཡཐཱ ‘‘སཀྐོ ཧུཏྭཱ ནིབྦཏྟཱི’’ཏི (དྷ. པ. ཨཊྛ. ༡.༢.༢༩). ཨཔིཙ ‘‘ཨཱརམྨཎཏོ’’ཏི ཝུཏྟམེཝཏྠཾ སརཱུཔཏོ ནིཡམེཏི ‘‘ནིབྦཱནཱརམྨཎཾ ཧུཏྭཱ’’ཏི ཨིམིནཱ. ‘‘ཀིཙྩཏོ’’ཏི ཏདཝསེསཾ བྷཱཝནཱབྷིསམཡཾ པརིཉྙཱབྷིསམཡཉྩ སནྡྷཱཡ ཝུཏྟཾ. ‘‘ཨཱརམྨཎཏོ ནིབྦཱནཱརམྨཎཾ ཧུཏྭཱ’’ཏི ཨེཏེན ཝཱ མགྒཀྑཎཱནུརཱུཔཾ ཨེཀཱརམྨཎཏཾ དསྶེཏྭཱ ‘‘ཀིཙྩཏོ’’ཏི ཨིམིནཱ པཧཱནཏོ ཨཝསེསཾ ཀིཙྩཏྟཡཾ དསྶིཏནྟི དཊྛབྦཾ. ‘‘མགྒཀྑཎེ, ནིབྦཱནཱརམྨཎཾ ཧུཏྭཱ’’ཏི ཙ ཝུཏྟཏྟཱ ཨཏྠཏོ མགྒཉཱཎསངྑཱཏོ ཙཏུསཙྩཱདྷིགམོ ཨེཝ ལོཀུཏྟརསརཎགམནནྟི ཝིཉྙཱཡཏི. ཏཏྠ ཧི ཙཏུསཙྩཱདྷིགམནེ སརཎགམནུཔཀྐིལེསསྶ པཧཱནཱབྷིསམཡཝསེན སམུཙྪིནྡནཾ བྷཝཏི, ནིབྦཱནདྷམྨོ པན སཙྪིཀིརིཡཱབྷིསམཡཝསེན, མགྒདྷམྨོ ཙ བྷཱཝནཱབྷིསམཡཝསེན པཊིཝིཛ྄ཛྷིཡམཱནོཡེཝ སརཎགམནཏྠཾ སཱདྷེཏི, བུདྡྷགུཎཱ པན སཱཝཀགོཙརབྷཱུཏཱ པརིཉྙཱབྷིསམཡཝསེན པཊིཝིཛ྄ཛྷིཡམཱནཱ སརཎགམནཏྠཾ སཱདྷེནྟི, ཏཐཱ ཨརིཡསངྒྷགུཎཱ. ཏེནཱཧ ‘‘སཀལེཔི རཏནཏྟཡེ ཨིཛ྄ཛྷཏཱི’’ཏི.

ཕལཔརིཡཏྟཱིནམྤེཏྠ ཝུཏྟནཡེན མགྒཱནུགུཎཔྤཝཏྟིཡཱ གཧཎཾ, ཨཔརིཉྙེཡྻབྷཱུཏཱནཉྩ བུདྡྷསངྒྷགུཎཱནཾ ¶ ཏགྒུཎསཱམཉྙཏཱཡཱཏི དཊྛབྦཾ. ཨེཝཉྷི སཀལབྷཱཝཝིསིཊྛཝཙནཾ ཨུཔཔནྣཾ ཧོཏཱིཏི. ཨིཛ྄ཛྷནྟཉྩ སཧེཝ ཨིཛ྄ཛྷཏི, ན ལོཀིཡཾ ཝིཡ པཊིཔཱཊིཡཱ ཨསམྨོཧཔཊིཝེདྷེན པཊིཝིདྡྷཏྟཱཏི གཧེཏབྦཾ. པདཱིཔསྶ ¶ ཝིཡ ཧི ཨེཀཀྑཎེཡེཝ མགྒསྶ ཙཏུཀིཙྩསཱདྷནནྟི. ཡེ པན ཝདནྟི ‘‘སརཎགམནཾ ནིབྦཱནཱརམྨཎཾ ཧུཏྭཱ ན པཝཏྟཏི, མགྒསྶ ཨདྷིགཏཏྟཱ པན ཨདྷིགཏམེཝ ཏཾ ཧོཏི ཨེཀཙྩཱནཾ ཏེཝིཛྫཱདཱིནཾ ལོཀིཡཝིཛྫཱདཡོ ཝིཡཱ’’ཏི, ཏེསཾ པན ཝཙནེ ལོཀིཡམེཝ སརཎགམནཾ སིཡཱ, ན ལོཀུཏྟརཾ, ཏཉྩ ཨཡུཏྟམེཝ དུཝིདྷསྶཱཔི ཏསྶ ཨིཙྪིཏབྦཏྟཱ. ཏདངྒཔྤཧཱནེན སརཎགམནུཔཀྐིལེསཝིཀྑམྦྷནཾ. ཨཱརམྨཎཏོ བུདྡྷཱདིགུཎཱརམྨཎཾ ཧུཏྭཱཏི ཨེཏྠཱཔི ཝུཏྟནཡེན ཨཏྠོ, སརཎགམནུཔཀྐིལེསཝིཀྑམྦྷནཏོ, ཨཱརམྨཎཏོ ཙ སཀལེཔི རཏནཏྟཡེ ཨིཛ྄ཛྷཏཱིཏི ཝུཏྟཾ ཧོཏི.

ཏནྟི ལོཀིཡསརཎགམནཾ. ‘‘སམྨཱསམྦུདྡྷོ བྷགཝཱ’’ཏིཨཱདིནཱ སདྡྷཱཔཊིལཱབྷོ. སདྡྷཱམཱུལིཀཱཏི ཡཐཱཝུཏྟསདྡྷཱཔུབྦངྒམཱ. སཧཛཱཏཝསེན པུབྦངྒམཏཱཡེཝ ཧི ཏམྨཱུལིཀཏཱ སདྡྷཱཝིརཧིཏསྶ བུདྡྷཱདཱིསུ སམྨཱདསྶནསྶ ཨསམྦྷཝཏོ. སམྨཱདིཊྛི ནཱམ བུདྡྷསུབུདྡྷཏཾ, དྷམྨསུདྷམྨཏཾ སངྒྷསུཔྤཊིཔནྣཏཉྩ ལོཀིཡཱཝབོདྷཝསེན སམྨཱ ཉཱཡེན དསྶནཏོ. ‘‘སདྡྷཱཔཊིལཱབྷོ’’ཏི ཨིམིནཱ སམྨཱདིཊྛིཝིརཧིཏཱཔི སདྡྷཱ ལོཀིཡསརཎགམནནྟི དསྶེཏི, ‘‘སདྡྷཱམཱུལིཀཱ ཙ སམྨཱདིཊྛཱི’’ཏི པན ཨེཏེན སདྡྷཱུཔནིསྶཡཱ ཡཐཱཝུཏྟཱ པཉྙཱཏི. ལོཀིཡམྤི ཧི སརཎགམནཾ དུཝིདྷཾ ཉཱཎསམྤཡུཏྟཾ, ཉཱཎཝིཔྤཡུཏྟཉྩ. ཏཏྠ པཋམེན པདེན མཱཏཱདཱིཧི ཨུསྶཱཧིཏདཱརཀཱདཱིནཾ ཝིཡ ཉཱཎཝིཔྤཡུཏྟཾ སརཎགམནཾ གཧིཏཾ, དུཏིཡེན པན ཉཱཎསམྤཡུཏྟཾ. ཏདུབྷཡམེཝ པུཉྙཀིརིཡཝཏྠུ ཝིསེསབྷཱཝེན དསྶེཏུཾ ‘‘དསསུ པུཉྙཀིརིཡཝཏྠཱུསུ དིཊྛིཛུཀམྨནྟི ཝུཙྩཏཱི’’ཏི ཨཱཧ. དིཊྛི ཨེཝ ཨཏྟནོ པཙྩཡེཧི ཨུཛུཾ ཀརཱིཡཏཱིཏི ཧི ཨཏྠེན སམྨཱདིཊྛིཡཱ དིཊྛིཛུཀམྨབྷཱཝོ, དིཊྛི ཨུཛུཾ ཀརཱིཡཏི ཨེཏེནཱཏི ཨཏྠེན པན སདྡྷཱཡཔི. སདྡྷཱསམྨཱདིཊྛིགྒཧཎེན ཙེཏྠ ཏཔྤདྷཱནསྶཱཔི ཙིཏྟུཔྤཱདསྶ གཧཎཾ, དིཊྛིཛུཀམྨཔདེན ཙ ཡཐཱཝུཏྟེན ཀརཎསཱདྷནེན, ཨེཝཉྩ ཀཏྭཱ ‘‘ཏཔྤརཱཡཎཏཱཀཱརཔྤཝཏྟོ ཙིཏྟུཔྤཱདོ’’ཏི ཧེཊྛཱ ཝུཏྟཝཙནཾ སམཏྠིཏཾ ཧོཏི, སདྡྷཱསམྨཱདིཊྛཱིནཾ པན ཝིསུཾ གཧཎཾ ཏཾསམྤཡུཏྟཙིཏྟུཔྤཱདསྶ ཏཔྤདྷཱནཏཱཡཱཏི དཊྛབྦཾ.

ཏཡིདནྟི ལོཀིཡཾ སརཎགམནམེཝ པཙྩཱམསཏི ལོཀུཏྟརསྶ ཏཐཱ བྷེདཱབྷཱཝཏོ. ཏསྶ ཧི མགྒཀྑཎེཡེཝ ཝུཏྟནཡེན ཨིཛ྄ཛྷནཏོ ཏཐཱཝིདྷསྶ སམཱདཱནསྶ ཨཝིཛྫམཱནཏྟཱ ཨེས བྷེདོ ན ¶ སམྦྷཝཏཱིཏི. ཨཏྟཱ སནྣིཡྻཱཏཱིཡཏི ཨཔྤཱིཡཏི པརིཙྩཛཱིཡཏི ཨེཏེནཱཏི ཨཏྟསནྣིཡྻཱཏནཾ, ཡཐཱཝུཏྟཾ སརཎགམནསངྑཱཏཾ དིཊྛིཛུཀམྨཾ. ཏཾ རཏནཏྟཡཾ པརཱཡཎཾ པཊིསརཎམེཏསྶཱཏི ཏཔྤརཱཡཎོ ¶ , པུགྒལོ, ཙིཏྟུཔྤཱདོ ཝཱ, ཏསྶ བྷཱཝོ ཏཔྤརཱཡཎཏཱ, ཏདེཝ དིཊྛིཛུཀམྨཾ. ‘‘སརཎ’’ནྟི ཨདྷིཔྤཱཡེན སིསྶབྷཱཝཾ ཨནྟེཝཱསིཀབྷཱཝསངྑཱཏཾ ཝཏྟཔཊིཝཏྟཱདིཀརཎཾ ཨུཔགཙྪཏི ཨེཏེནཱཏི སིསྶབྷཱཝཱུཔགམནཾ. སརཎགམནཱདྷིཔྤཱཡེནེཝ པཎིཔཏཏི ཨེཏེནཱཏི པཎིཔཱཏོ, པཎིཔཏནཉྩེཏྠ ཨབྷིཝཱདནཔཙྩུཊྛཱནཨཉྫལིཀམྨསཱམཱིཙིཀམྨམེཝ, སབྦཏྠ ཙ ཨཏྠཏོ ཡཐཱཝུཏྟདིཊྛིཛུཀམྨམེཝ ཝེདིཏབྦཾ.

སཾསཱརདུཀྑནིཏྠརཎཏྠཾ ཨཏྟནོ ཨཏྟབྷཱཝསྶ པརིཙྩཛནཾ ཨཏྟཔརིཙྩཛནཾ. ཏཔྤརཱཡཎཏཱདཱིསུཔི ཨེསེཝ ནཡོ. ཧིཏོཔདེསཀཐཱཔརིཡཱཡེན དྷམྨསྶཱཔི ཨཱཙརིཡབྷཱཝོ སམུདཱཙརཱིཡཏི ‘‘ཕལོ ཨམྦོ ཨཕལོ ཙ, ཏེ སཏྠཱརོ ཨུབྷོ མམཱ’’ཏིཨཱདཱིསུ ཝིཡཱཏི ཨཱཧ ‘‘དྷམྨསྶ ཨནྟེཝཱསིཀོ’’ཏི. ‘‘ཨབྷིཝཱདནཱ’’ཏིཨཱདི པཎིཔཱཏསྶ ཨཏྠདསྶནཾ. བུདྡྷཱདཱིནཾཡེཝཱཏི ཨཝདྷཱརཎསྶ ཨཏྟསནྣིཡྻཱཏནཱདཱིསུཔི སཱིཧགཏིཀཝསེན ཨདྷིཀཱརོ ཝེདིཏབྦོ. ཨེཝཉྷི ཏདཉྙནིཝཏྟནཾ ཀཏཾ ཧོཏཱིཏི. ‘‘ཨིམེསཉྷཱི’’ཏིཨཱདི ཙཏུདྷཱ པཝཏྟནསྶ སམཏྠནཾ, ཀཱརཎདསྶནཾ ཝཱ.

ཨེཝཾ ཨཏྟསནྣིཡྻཱཏནཱདཱིནི ཨེཀེན པཀཱརེན དསྶེཏྭཱ ཨིདཱནི ཨཔརེཧིཔི པཀཱརེཧི དསྶེཏུཾ ‘‘ཨཔིཙཱ’’ཏིཨཱདི ཨཱརདྡྷཾ, ཨེཏེན ཨཏྟསནྣིཡྻཱཏནཏཔྤརཱཡཎཏཱདཱིནཾ ཙཏུནྣཾ པརིཡཱཡནྟརེཧིཔི ཨཏྟསནྣིཡྻཱཏནཏཔྤརཱཡཎཏཱདི ཀཏམེཝ ཧོཏི ཨཏྠསྶ ཨབྷིནྣཏྟཱ ཡཐཱ ཏཾ ‘‘སིཀྑཱཔཙྩཀྑཱནཨབྷཱུཏཱརོཙནཱནཱི’’ཏི དསྶེཏི. ཛཱིཝིཏཔརིཡནྟིཀནྟི བྷཱཝནཔུཾསཀཝཙནཾ, ཡཱཝཛཱིཝཾ གཙྪཱམཱིཏི ཨཏྠོ. མཧཱཀསྶཔོ ཀིར སཡམེཝ པབྦཛིཏཝེསཾ གཧེཏྭཱ མཧཱཏིཏྠབྲཱཧྨཎགཱམཏོ ནིཀྑམིཏྭཱ གཙྪནྟོ ཏིགཱཝུཏམགྒཾ པཙྩུགྒམནཾ ཀཏྭཱ ཨནྟརཱ ཙ རཱཛགཧཾ, ཨནྟརཱ ཙ ནཱལ༹ནྡཾ བཧུཔུཏྟཀནིགྲོདྷརུཀྑམཱུལེ ཨེཀཀམེཝ ནིསིནྣཾ བྷགཝནྟཾ པསྶིཏྭཱ ‘‘ཨཡཾ བྷགཝཱ ཨརཧཾ སམྨཱསམྦུདྡྷོ’’ཏི ཨཛཱནནྟོཡེཝ ‘‘སཏྠཱརཉྩ ཝཏཱཧཾ པསྶེཡྻཾ, བྷགཝནྟམེཝ ¶ པསྶེཡྻ’’ནྟིཨཱདིནཱ (སཾ. ནི. ༢.༡༥༤) སརཎགམནམཀཱསི. ཏེན ཝུཏྟཾ ‘‘མཧཱཀསྶཔསྶ སརཎགམནཾ ཝིཡཱ’’ཏི. ཝིཏྠཱརོ ཀསྶཔསཾཡུཏྟཊྛཀཐཱཡཾ (སཾ. ནི. ཨཊྛ. ༢.༢.༡༥༤) གཧེཏབྦོ. ཏཏྠ སཏྠཱརཉྩཝཏཱཧཾ པསྶེཡྻཾ, བྷགཝནྟམེཝ པསྶེཡྻནྟི སཙེ ཨཧཾ སཏྠཱརཾ པསྶེཡྻཾ, ཨིམཾ བྷགཝནྟཾཡེཝ པསྶེཡྻཾ. ན ཧི མེ ཨིཏོ ཨཉྙེན སཏྠཱརཱ བྷཝིཏུཾ སཀྐཱ. སུགཏཉྩ ཝཏཱཧཾ པསྶེཡྻཾ, བྷགཝནྟམེཝ པསྶེཡྻནྟི སཙེ ཨཧཾ སམྨཱཔཊིཔཏྟིཡཱ སུཊྛུ གཏཏྟཱ སུགཏཾ ནཱམ པསྶེཡྻཾ, ཨིམཾ བྷགཝནྟཾཡེཝ པསྶེཡྻཾ. ན ཧི མེ ཨིཏོ ཨཉྙེན སུགཏེན བྷཝིཏུཾ སཀྐཱ. སམྨཱསམྦུདྡྷཉྩ ཝཏཱཧཾ པསྶེཡྻཾ, བྷགཝནྟམེཝ པསྶེཡྻནྟི སཙེ ཨཧཾ སམྨཱ སཱམཉྩ སཙྩཱནི བུདྡྷཏྟཱ སམྨཱསམྦུདྡྷཾ ནཱམ པསྶེཡྻཾ, ཨིམཾ བྷགཝནྟཾཡེཝ པསྶེཡྻཾ, ན ཧི མེ ¶ ཨིཏོ ཨཉྙེན སམྨཱསམྦུདྡྷེན བྷཝིཏུཾ སཀྐཱཏི ཨཡམེཏྠ ཨཊྛཀཐཱ. སབྦཏྠ ཙ-སདྡོ, ཝཏ-སདྡོ ཙ པདཔཱུརཎམཏྟཾ, ཙེ-སདྡེན ཝཱ བྷཝིཏབྦཾ ‘‘སཙེ’’ཏི ཨཊྛཀཐཱཡཾ (སཾ. ནི. ཨཊྛ. ༢.༢.༡༥༤) ཝུཏྟཏྟཱ. ཝཏ-སདྡོ ཙ པསྶིཏུཀཱམཏཱཡ ཨེཀཾསཏྠཾ དཱིཔེཏཱིཏིཔི ཡུཛྫཏི.

‘‘སོ ཨཧ’’ནྟིཨཱདི སུཏྟནིཔཱཏེ ཨཱལ༹ཝཀསུཏྟེ. ཏཏྠ ཀིཉྩཱཔི མགྒེནེཝ ཏསྶ སརཎགམནམཱགཏཾ, སོཏཱཔནྣབྷཱཝདསྶནཏྠཾ, པན པསཱདཱནུརཱུཔདསྶནཏྠཉྩ ཨེཝཾ ཝཱཙཾ བྷིནྡཏཱིཏི ཏདཊྛཀཐཱཡཾ (སུ. ནི. ཨཊྛ. ༡.༡༨༡) ཝུཏྟཾ. གཱམཱ གཱམནྟི ཨཉྙསྨཱ དེཝགཱམཱ ཨཉྙཾ དེཝགཱམཾ, དེཝཏཱནཾ ཝཱ ཁུདྡཀཾ, མཧནྟཉྩ གཱམནྟིཔི ཨཏྠོ. པུརཱ པུརནྟི ཨེཏྠཱཔི ཨེསེཝ ནཡོ. དྷམྨསྶ ཙ སུདྷམྨཏནྟི བུདྡྷསྶ སུབུདྡྷཏཾ, དྷམྨསྶ སུདྷམྨཏཾ, སངྒྷསྶ སུཔྤཊིཔནྣཏཉྩ ཨབྷིཏྠཝིཏྭཱཏི སཧ སམུཙྩཡེན, པཱཋསེསེན ཙ ཨཏྠོ, སམྦུདྡྷཾ ནམསྶམཱནོ དྷམྨགྷོསཀོ ཧུཏྭཱ ཝིཙརིསྶཱམཱིཏི ཝུཏྟཾ ཧོཏི.

ཨཱལ༹ཝཀཱདཱིནནྟི ཨཱདི-སདྡེན སཱཏཱགིརཧེམཝཏཱདཱིནམྤི སངྒཧོ. ནནུ ཙ ཨེཏེ ཨཱལ༹ཝཀཱདཡོ ཨདྷིགཏམགྒཏྟཱ མགྒེནེཝ ཨཱགཏསརཎགམནཱ, ཀསྨཱ ཏེསཾ ཏཔྤརཱཡཎཏཱསརཎགམནཾ ཝུཏྟནྟི? མགྒེནཱགཏསརཎགམནེཧིཔི ཏེཧི ཏཔྤརཱཡཎཏཱཀཱརསྶ པཝེདིཏཏྟཱ. ‘‘སོ ཨཧཾ ཝིཙརིསྶཱམི…པེ… སུདྷམྨཏཾ, (སཾ. ནི. ༡.༢༤༦; སུ. ནི. ༡༩༤) ཏེ མཡཾ ཝིཙརིསྶཱམ, གཱམཱ གཱམཾ ནགཱ ནགཾ…པེ… སུདྷམྨཏ’’ནྟི (སུ. ནི. ༡༨༢) ཙ ཧི ཨེཏེཧི ཏཔྤརཱཡཎཏཱཀཱརོ པཝེདིཏོ. ཏསྨཱ སརཎགམནཝིསེསམནཔེཀྑིཏྭཱ པཝེདནཱཀཱརམཏྟཾ ཨུཔདིསནྟེན ཨེཝཾ ཝུཏྟནྟི དཊྛབྦཾ. ཨཐཱཏི ‘‘ཀཐཾ ཁོ བྲཱཧྨཎོ ཧོཏཱི’’ཏིཨཱདིནཱ པུཊྛསྶ ཨཊྛཝིདྷཔཉྷསྶ ‘‘པུབྦེནིཝཱསཾ ཡོ ཝེདཱི’’ཏིཨཱདིནཱ བྱཱཀརཎཔརིཡོསཱནཀཱལེ. ཨིདཉྷི མཛ྄ཛྷིམཔཎྞཱསཀེ བྲཧྨཱཡུསུཏྟེ (མ. ནི. ༢.༣༩༤) པརིཙུམྦཏཱིཏི པརིཕུསཏི ¶ . པརིསམྦཱཧཏཱིཏི པརིམཛྫཏི. ཨེཝམྤི པཎིཔཱཏོ དཊྛབྦོཏི ཨེཝམྤི པརམནིཔཙྩཀཱརེན པཎིཔཱཏོ དཊྛབྦོ.

སོ པནེསཱཏི པཎིཔཱཏོ. ཉཱཏི…པེ… ཝསེནཱཏི ཨེཏྠ ཉཱཏིཝསེན, བྷཡཝསེན, ཨཱཙརིཡཝསེན, དཀྑིཎེཡྻཝསེནཱཏི པཙྩེཀཾ ཡོཛེཏབྦཾ དྭནྡཔརཏོ སུཡྻམཱནཏྟཱ. ཏཏྠ ཉཱཏིཝསེནཱཏི ཉཱཏིབྷཱཝཝསེན. བྷཱཝཔྤདྷཱནནིདྡེསོ ཧི ཨཡཾ, བྷཱཝལོཔནིདྡེསོ ཝཱ ཏབྦྷཱཝསྶེཝ ཨདྷིཔྤེཏཏྟཱ. ཨེཝཾ སེསེསུཔི པཎིཔཱཏཔདེན ཙེཏེསཾ སམྦནྡྷོ ཏབྦསེན པཎིཔཱཏསྶ ཙཏུབྦིདྷཏྟཱ. ཏེནཱཧ ‘‘དཀྑིཎེཡྻཔཎིཔཱཏེནཱ’’ཏི, དཀྑིཎེཡྻཏཱཧེཏུཀེན པཎིཔཱཏེནེཝཱཏི ཨཏྠོ. ཨིཏརེཧཱིཏི ཉཱཏིབྷཱཝཱདིཧེཏུཀེཧི པཎིཔཱཏེཧི. ‘‘སེཊྛཝསེནེཝཱ’’ཏིཨཱདི ཏསྶེཝཏྠསྶ སམཏྠནཾ ¶ . ཨིདཱནི ‘‘ན ཨིཏརེཧཱི’’ཏིཨཱདིནཱ ཝུཏྟམེཝ ཨཏྠཏྟཡཾ ཡཐཱཀྐམཾ ཝིཏྠཱརཏོ དསྶེཏུཾ ‘‘ཏསྨཱ’’ཏིཨཱདི ཝུཏྟཾ. ‘‘སཱཀིཡོ ཝཱ’’ཏི པིཏུཔཀྑཏོ ཉཱཏིཀུལདསྶནཾ, ‘‘ཀོལིཡོ ཝཱ’’ཏི པན མཱཏུཔཀྑཏོ. ཝནྡཏཱིཏི པཎིཔཱཏསྶ ཨུཔལཀྑཎཝཙནཾ. རཱཛཔཱུཛིཏོཏི རཱཛཱུཧི, རཱཛཱུནཾ ཝཱ པཱུཛིཏོ ཡཐཱ ‘‘གཱམཔཱུཛིཏོ’’ཏི. པཱུཛཱཝཙནཔཡོགེ ཧི ཀཏྟརི སཱམིཝཙནམིཙྪནྟི སདྡཝིདཱུ. བྷགཝཏོཏི བོདྷིསཏྟབྷཱུཏསྶ, བུདྡྷབྷཱུཏསྶ ཝཱ བྷགཝཏོ. ཨུགྒཧིཏནྟི སིཀྑིཏསིཔྤཾ.

‘‘ཙཏུདྷཱ’’ཏིཨཱདི སིངྒཱལོཝཱདསུཏྟེ (དཱི. ནི. ༣.༢༦༥) གྷརམཱཝསནྟི གྷརེ ཝསནྟོ, ཀམྨཔྤཝཙནཱིཡཡོགཏོ ཙེཏྠ བྷུམྨཏྠེ ཨུཔཡོགཝཙནཾ. ཀམྨཾ པཡོཛཡེཏི ཀསིཝཱཎིཛྫཱདིཀམྨཾ པཡོཛེཡྻ. ཀུལཱནཉྷི ན སབྦཀཱལཾ ཨེཀསདིསཾ ཝཏྟཏི, ཀདཱཙི རཱཛཱདིཝསེན ཨཱཔདཱཔི ཨུཔྤཛྫཏི, ཏསྨཱ ‘‘ཨཱཔདཱསུ ཨུཔྤནྣཱསུ བྷཝིསྶཏཱི’’ཏི ཨེཝཾ མནསི ཀཏྭཱ ནིདྷཱཔེཡྻཱཏི ཨཱཧ ‘‘ཨཱཔདཱསུ བྷཝིསྶཏཱི’’ཏི. ཨིམེསུ པན ཙཏཱུསུ ཀོཊྛཱསེསུ ‘‘ཨེཀེན བྷོགེ བྷུཉྫེཡྻཱ’’ཏི ཝུཏྟཀོཊྛཱསཏོཡེཝ གཧེཏྭཱ བྷིཀྑཱུནམྤི ཀཔཎདྡྷིཀཱདཱིནམྤི དཱནཾ དཱཏབྦཾ, པེསཀཱརནྷཱཔིཏཀཱདཱིནམྤི ཝེཏནཾ དཱཏབྦནྟི ཨཡཾ བྷོགཔརིགྒཧཎཱནུསཱསནཱི, ཨེཝརཱུཔཾ ཨནུསཱསནིཾ ཨུགྒཧེཏྭཱཏི ཨཏྠོ. ཨིདཉྷི དིཊྛདྷམྨིཀཾཡེཝ སནྡྷཱཡ ཝདཏི, སམྤརཱཡིཀཾ, པན ནིཡྻཱནིཀཾ ཝཱ ཨནུསཱསནིཾ པཙྩཱསིསནྟོཔི དཀྑིཎེཡྻཔཎིཔཱཏམེཝ ཀརོཏི ནཱམཱཏི དཊྛབྦཾ. ‘‘ཡོ པནཱ’’ཏིཨཱདི ‘‘སེཊྛཝསེནེཝ…པེ… གཎྷཱཏཱི’’ཏི ཝུཏྟསྶཏྠསྶ ཝིཏྠཱརཝཙནཾ.

‘‘ཨེཝ’’ནྟིཨཱདི ¶ པན ‘‘སེཊྛཝསེན ཙ བྷིཛྫཏཱི’’ཏི ཝུཏྟསྶ བྱཏིརེཀདསྶནཾ. ཨཏྠཝསཱ ལིངྒཝིབྷཏྟིཝིཔརིཎཱམོཏི ཀཏྭཱ གཧིཏསརཎཱཡ ཨུཔཱསིཀཱཡ ཝཱཏིཔི ཡོཛེཏབྦཾ. ཨེཝམཱིདིསེསུ. པབྦཛིཏམྤཱིཏི པི-སདྡོ སམྦྷཱཝནཏྠོཏི ཝུཏྟཾ ‘‘པགེཝ ཨཔབྦཛིཏ’’ནྟི. སརཎགམནཾ ན བྷིཛྫཏི སེཊྛཝསེན ཨཝནྡིཏཏྟཱ. ཏཐཱཏི ཨནུཀཌྜྷནཏྠེ ནིཔཱཏོ ‘‘སརཎགམནཾ ན བྷིཛྫཏཱི’’ཏི. རཊྛཔཱུཛིཏཏྟཱཏི རཊྛེ, རཊྛཝཱསཱིནཾ ཝཱ པཱུཛིཏཏྟཱ. ཏཡིདཾ བྷཡཝསེན ཝནྡིཏབྦབྷཱཝསྶེཝ སམཏྠནཾ, ན ཏུ ཨབྷེདསྶ ཀཱརཎདསྶནཾ, ཏསྶ པན ཀཱརཎཾ སེཊྛཝསེན ཨཝནྡིཏཏྟཱཏི ཝེདིཏབྦཾ. ཝུཏྟཉྷི ‘‘སེཊྛཝསེན ཙ བྷིཛྫཏཱི’’ཏི. སེཊྛཝསེནཱཏི ལོཀེ ཨགྒདཀྑིཎེཡྻཏཱཡ སེཊྛབྷཱཝཝསེནཱཏི ཨཏྠོ. ཏེནཱཧ ‘‘ཨཡཾ ལོཀེ ཨགྒདཀྑིཎེཡྻོཏི ཝནྡཏཱི’’ཏི. ཏིཏྠིཡམྤི ཝནྡཏོ ན བྷིཛྫཏི, པགེཝ ཨིཏརཾ. སརཎགམནཔྤབྷེདོཏི སརཎགམནཝིབྷཱགོ, ཏབྦིབྷཱགསམྦནྡྷཏོ ཙེཏྠ སཀྐཱ ཨབྷེདོཔི སུཁེན དསྶེཏུནྟི ཨབྷེདདསྶནཾ ཀཏཾ.

ཨརིཡམགྒོ ¶ ཨེཝ ལོཀུཏྟརསརཎགམནནྟི ཙཏྟཱརི སཱམཉྙཕལཱནི ཝིཔཱཀཕལབྷཱཝེན ཝུཏྟཱནི. སབྦདུཀྑཀྑཡོཏི སཀལསྶ ཝཊྚདུཀྑསྶ ཨནུཔྤཱདནིརོདྷོ ནིབྦཱནཾ. ཨེཏྠ ཙ ཀམྨསདིསཾ ཝིཔཱཀཕལཾ, ཏབྦིཔརཱིཏཾ ཨཱནིསཾསཕལནྟི དཊྛབྦཾ. ཡཐཱ ཧི སཱལིབཱིཛཱདཱིནཾ ཕལཱནི ཏཾསདིསཱནི ཝིཔཀྐཱནི ནཱམ ཧོནྟི, ཝིཔཱཀནིརུཏྟིཉྩ ལབྷནྟི, ན མཱུལངྐུརཔཏྟཀྑནྡྷནཱལཱ༹ནི, ཨེཝཾ ཀུསལཱཀུསལཱནཾ ཕལཱནི ཨརཱུཔདྷམྨབྷཱཝེན, སཱརམྨཎབྷཱཝེན ཙ སདིསཱནི ཝིཔཀྐཱནི ནཱམ ཧོནྟི, ཝིཔཱཀནིརུཏྟིཉྩ ལབྷནྟི, ན ཏདཉྙཱནི ཀམྨནིབྦཏྟཱནིཔི ཀམྨཨསདིསཱནི, ཏཱནི པན ཨཱནིསཾསཱནི ནཱམ ཧོནྟི, ཨཱནིསཾསནིརུཏྟིམཏྟཉྩ ལབྷནྟཱིཏི. ‘‘ཝུཏྟཉྷེཏ’’ནྟིཨཱདིནཱ དྷམྨཔདེ ཨགྒིདཏྟབྲཱཧྨཎཝཏྠུཔཱལི༹མཱཧརིཏྭཱ དསྶེཏི.

ཡོ ཙཱཏི ཨེཏྠ ཙ-སདྡོ བྱཏིརེཀེ, ཡོ པནཱཏི ཨཏྠོ. ཏཏྲཱཡམདྷིཔྤཱཡོ – བྱཏིརེཀཏྠདཱིཔནེ ཡདི ‘‘བཧུཾ ཝེ སརཎཾ ཡནྟི, པབྦཏཱནི ཝནཱནི ཙཱ’’ཏིཨཱདིནཱ (དྷ. པ. ༡༨༨) ཝུཏྟཾ ཁེམཾ སརཎཾ ན ཧོཏི, ན ཨུཏྟམཾ སརཎཾ, ཨེཏཉྩ སརཎམཱགམྨ སབྦདུཀྑཱ ན པམུཙྩཏི, ཨེཝཾ སཏི ཀིཾ ནཱམ ཝཏྠུ ཁེམཾ སརཎཾ ཧོཏི, ཨུཏྟམཾ སརཎཾ, ཀིཾ ནཱམ ཝཏྠུཾ སརཎམཱགམྨ སབྦདུཀྑཱ པམུཙྩཏཱིཏི ཙེ?

ཡོ ¶ ཙ བུདྡྷཉྩ དྷམྨཉྩ, སངྒྷཉྩ སརཎཾ གཏོ…པེ…

ཨེཏཾ ཁོ སརཎཾ ཁེམཾ, ཨེཏཾ སརཎམུཏྟམཾ;

ཨེཏཾ སརཎམཱགམྨ, སབྦདུཀྑཱ པམུཙྩཏཱིཏི. (དྷ. པ. ༡༩༠-༩༢);

ཨེཝམཱིདིསེསུ. ལོཀིཡསྶ སརཎགམནསྶ ཨཉྙཏིཏྠིཡཱཝནྡནཱདིནཱ ཀུཔྤནཏོ, ཙལནཏོ ཙ ཨཀུཔྤཾ ཨཙལཾ ལོཀུཏྟརམེཝ སརཎགམནཾ པཀཱསེཏུཾ ‘‘ཙཏྟཱརི ཨརིཡསཙྩཱནི, སམྨཔྤཉྙཱཡ པསྶཏཱི’’ཏི ཝུཏྟཾ. ཝཱཙཱསིལིཊྛཏྠཉྩེཏྠ སམྨཱསདྡསྶ རསྶཏྟཾ. ‘‘དུཀྑ’’ནྟིཨཱདི ‘‘ཙཏྟཱརི ཨརིཡསཙྩཱནཱི’’ཏི ཝུཏྟསྶ སརཱུཔདསྶནཾ. དུཀྑསྶ ཙ ཨཏིཀྐམནྟི དུཀྑནིརོདྷཾ. དུཀྑཱུཔསམགཱམིནནྟི དུཀྑནིརོདྷགཱམིཾ. ‘‘ཨེཏ’’ནྟི ‘‘ཙཏྟཱརི…པེ… པསྶཏཱི’’ཏི (དྷ. པ. ༡༩༠) ཨེཝཾ ཝུཏྟཾ ལོཀུཏྟརསརཎགམནསངྑཱཏཾ ཨརིཡསཙྩདསྶནཾ. ཁོ-སདྡོ ཨཝདྷཱརཎཏྠོ པདཏྟཡེཔི ཡོཛེཏབྦོ.

ནིཙྩཏོ ཨནུཔགམནཱདིཝསེནཱཏི ‘‘ནིཙྩ’’ནྟི ཨགྒཧཎཱདིཝསེན, ཨིཏིནཱ ནིདྡིསིཏབྦེཧི ཏོ-སདྡམིཙྪནྟི སདྡཝིདཱུ. ‘‘ཝུཏྟཉྷེཏ’’ནྟིཨཱདིནཱ ཉཱཎཝིབྷངྒཱདཱིསུ (མ. ནི. ༣.༡༢༦; ཨ. ནི. ༡.༢༦༨) ཨཱགཏཾ ¶ པཱལི༹ཾ སཱདྷཀབྷཱཝེན ཨཱཧརཏི. ཨཊྛཱནནྟི ཛནཀཧེཏུཔཊིཀྑེཔོ. ཨནཝཀཱསོཏི པཙྩཡཧེཏུཔཊིཀྑེཔོ. ཨུབྷཡེནཱཔི ཀཱརཎམེཝ པཊིཀྑིཔཏི. ཡནྟི ཡེན ཀཱརཎེན. དིཊྛིསམྤནྣོཏི མགྒདིཊྛིཡཱ སམྤནྣོ སོཏཱཔནྣོ. ཀཉྩི སངྑཱརནྟི ཙཏུབྷཱུམཀེསུ སངྑཏསངྑཱརེསུ ཨེཀམྤི སངྑཱརཾ. ནིཙྩཏོ ཨུཔགཙྪེཡྻཱཏི ‘‘ནིཙྩོ’’ཏི གཎྷེཡྻ. སུཁཏོ ཨུཔགཙྪེཡྻཱཏི ‘‘ཨེཀནྟསུཁཱི ཨཏྟཱ ཧོཏི ཨརོགོ པརཾ མརཎཱ’’ཏི (དཱི. ནི. ༡.༧༦) ཨེཝཾ ཨཏྟདིཊྛིཝསེན ‘‘སུཁོ’’ཏི གཎྷེཡྻ, དིཊྛིཝིཔྤཡུཏྟཙིཏྟེན པན ཨརིཡསཱཝཀོ པརིལཱ༹ཧཝཱུཔསམཏྠཾ མཏྟཧཏྠིཔརིཏྟཱསིཏོ ཙོཀྑབྲཱཧྨཎོ ཝིཡ ཨུཀྐཱརབྷཱུམིཾ ཀཉྩི སངྑཱརཾ སུཁཏོ ཨུཔགཙྪཏི. ཨཏྟཝཱརེ ཀསིཎཱདིཔཎྞཏྟིསངྒཧཎཏྠཾ ‘‘སངྑཱར’’ནྟི ཨཝཏྭཱ ‘‘དྷམྨ’’ནྟི ཝུཏྟཾ. ཡཐཱཧ པརིཝཱརེ –

‘‘ཨནིཙྩཱ སབྦེ སངྑཱརཱ, དུཀྑཱནཏྟཱ ཙ སངྑཏཱ;

ནིབྦཱནཉྩེཝ པཉྙཏྟི, ཨནཏྟཱ ཨིཏི ནིཙྪཡཱ’’ཏི. (པརི. ༢༥༧);

ཨིམེསུ པན ཏཱིསུཔི ཝཱརེསུ ཨརིཡསཱཝཀསྶ ཙཏུབྷཱུམཀཝསེནེཝ པརིཙྪེདོ ཝེདིཏབྦོ, ཏེབྷཱུམཀཝསེནེཝ ཝཱ. ཡཾ ཡཉྷི པུཐུཛྫནོ ‘‘ནིཙྩཾ ¶ སུཁཾ ཨཏྟཱ’’ཏི གཱཧཾ གཎྷཱཏི, ཏཾ ཏཾ ཨརིཡསཱཝཀོ ‘‘ཨནིཙྩཾ དུཀྑཾ ཨནཏྟཱ’’ཏི གཎྷནྟོ གཱཧཾ ཝིནིཝེཋེཏི.

‘‘མཱཏར’’ནྟིཨཱདཱིསུ ཛནིཀཱ མཱཏཱ, ཛནཀོ པིཏཱ, མནུསྶབྷཱུཏོ ཁཱིཎཱསཝོ ཨརཧཱཏི ཨདྷིཔྤེཏོ. ཀིཾ པན ཨརིཡསཱཝཀོ ཏེཧི ཨཉྙམྤི པཱཎཾ ཛཱིཝིཏཱ ཝོརོཔེཡྻཱཏི? ཨེཏམྤི ཨཊྛཱནམེཝ. ཙཀྐཝཏྟིརཛྫསཀཛཱིཝིཏཧེཏུཔི ཧི སོ ཏཾ ཛཱིཝིཏཱ ན ཝོརོཔེཡྻ, ཏཐཱཔི པུཐུཛྫནབྷཱཝསྶ མཧཱསཱཝཛྫཏཱདསྶནཏྠཾ ཨརིཡབྷཱཝསྶ ཙ བལཝཏཱཔཀཱསནཏྠཾ ཨེཝཾ ཝུཏྟནྟི དཊྛབྦཾ. པདུཊྛཙིཏྟོཏི ཝདྷཀཙིཏྟེན པདཱུསནཙིཏྟོ, པདཱུསིཏཙིཏྟོ ཝཱ. ལོཧིཏཾ ཨུཔྤཱདེཡྻཱཏི ཛཱིཝམཱནཀསརཱིརེ ཁུདྡཀམཀྑིཀཱཡ པིཝནམཏྟམྤི ལོཧིཏཾ ཨུཔྤཱདེཡྻ. སངྒྷཾ བྷིནྡེཡྻཱཏི སམཱནསཾཝཱསཀཾ སམཱནསཱིམཱཡཾ ཋིཏཾ སངྒྷཾ པཉྩཧི ཀཱརཎེཧི བྷིནྡེཡྻ, ཝུཏྟཉྷེཏཾ ‘‘པཉྩཧུཔཱལི ཨཱཀཱརེཧི སངྒྷོ བྷིཛྫཏི ཀམྨེན, ཨུདྡེསེན, ཝོཧརནྟོ, ཨནུསྶཱཝནེན, སལཱཀགྒཱཧེནཱ’’ཏི (པརི. ༤༥༨) ཨཉྙཾ སཏྠཱརནྟི ཨིཏོ ཨཉྙཾ ཏིཏྠཀརཾ ‘‘ཨཡཾ མེ སཏྠཱ’’ཏི ཨེཝཾ གཎྷེཡྻ, ནེཏཾ ཋཱནཾ ཝིཛྫཏཱིཏི ཨཏྠོ. བྷཝསམྤདཱཏི སུགཏིབྷཝེན སམྤདཱ, ཨིདཾ ཝིཔཱཀཕལཾ. བྷོགསམྤདཱཏི མནུསྶབྷོགདེཝབྷོགེཧི སམྤདཱ, ཨིདཾ པན ཨཱནིསཾསཕལཾ. ‘‘ཝུཏྟཉྷེཏ’’ནྟིཨཱདིནཱ དེཝཏཱསཾཡུཏྟཱདིཔཱལི༹ཾ (སཾ. ནི. ༡.༣༧) སཱདྷཀབྷཱཝེན དསྶེཏི.

གཏཱ ¶ སེཏི ཨེཏྠ སེ-ཨིཏི ནིཔཱཏམཏྟཾ. ན ཏེ གམིསྶནྟི ཨཔཱཡབྷཱུམིནྟི ཏེ བུདྡྷཾ སརཎཾ གཏཱ ཏནྣིམིཏྟཾ ཨཔཱཡཾ ན གམིསྶནྟི. མཱནུསནྟི ཙ གཱཐཱབནྡྷཝསེན ཝིསཉྙོགནིདྡེསོ, མནུསྶེསུ ཛཱཏནྟི ཨཏྠོ. དེཝཀཱཡནྟི དེཝསངྒྷཾ, དེཝཔུརཾ ཝཱ ‘‘དེཝཱནཾ ཀཱཡོ སམཱུཧོ ཨེཏྠཱ’’ཏི ཀཏྭཱ.

‘‘ཨཔརམྤཱི’’ཏིཨཱདིནཱ སལཱ༹ཡཏནཝགྒེ མོགྒལླཱནསཾཡུཏྟེ (སཾ. ནི. ༤.༣༤༡) ཨཱགཏཾ ཨཉྙམྤི ཕལམཱཧ, ཨཔརམྤི ཕལཾ མཧཱམོགྒལླཱནཏྠེརེན ཝུཏྟནྟི ཨཏྠོ. ཨཉྙེ དེཝེཏི ཨསརཎངྒཏེ དེཝེ. དསཧི ཋཱནེཧཱིཏི དསཧི ཀཱརཎེཧི. ‘‘དིབྦེནཱ’’ཏིཨཱདི ཏསྶརཱུཔདསྶནཾ. ཨདྷིགཎྷནྟཱིཏི ཨབྷིབྷཝནྟི ཨཏིཀྐམིཏྭཱ ཏིཊྛནྟི. ‘‘ཨེས ནཡོ’’ཏི ཨིམིནཱ ‘‘སཱདྷུ ཁོ དེཝཱནམིནྡ དྷམྨསརཎགམནཾ ཧོཏཱི’’ཏི (སཾ. ནི. ༤.༣༤༡) སུཏྟཔདཾ ཨཏིདིསཏི. ཝེལཱམསུཏྟཾ ¶ ནཱམ ཨངྒུཏྟརནིཀཱཡེ ནཝནིཔཱཏེ ཛཱཏིགོཏྟརཱུཔབྷོགསདྡྷཱཔཉྙཱདཱིཧི མརིཡཱདཝེལཱཏིཀྐནྟེཧི ཨུལཱ༹རེཧི གུཎེཧི སམནྣཱགཏཏྟཱ ཝེལཱམནཱམཀསྶ བོདྷིསཏྟབྷཱུཏསྶ ཙཏུརཱསཱིཏིསཧསྶརཱཛཱུནཾ ཨཱཙརིཡབྲཱཧྨཎསྶ དཱནཀཐཱཔཊིསཉྙུཏྟཾ སུཏྟཾ (ཨ. ནི. ༩.༢༠) ཏཏྠ ཧི ཀརཱིསསྶ ཙཏུཏྠབྷཱགཔྤམཱཎཱནཾ ཙཏུརཱསཱིཏིསཧསྶསངྑྱཱནཾ སུཝཎྞཔཱཏིརཱུཔིཡཔཱཏིཀཾསཔཱཏཱིནཾ ཡཐཱཀྐམཾ རཱུཔིཡསུཝཎྞ ཧིརཉྙཔཱུརཱནཾ, སབྦཱལངྐཱརཔཊིམཎྜིཏཱནཾ, ཙཏུརཱསཱིཏིཡཱ ཧཏྠིསཧསྶཱནཾ ཙཏུརཱསཱིཏིཡཱ ཨསྶསཧསྶཱནཾ, ཙཏུརཱསཱིཏིཡཱ རཐསཧསྶཱནཾ, ཙཏུརཱསཱིཏིཡཱ དྷེནུསཧསྶཱནཾ, ཙཏུརཱསཱིཏིཡཱ ཀཉྙཱསཧསྶཱནཾ, ཙཏུརཱསཱིཏིཡཱ པལླངྐསཧསྶཱནཾ, ཙཏུརཱསཱིཏིཡཱ ཝཏྠཀོཊིསཧསྶཱནཾ, ཨཔརིམཱཎསྶ ཙ ཁཛྫབྷོཛྫཱདིབྷེདསྶ ཨཱཧཱརསྶ པརིཙྩཛནཝསེན སཏྟམཱསཱདྷིཀཱནི སཏྟསཾཝཙྪརཱནི ནིརནྟརཾ པཝཏྟཝེལཱམམཧཱདཱནཏོ ཨེཀསྶ སོཏཱཔནྣསྶ དིནྣདཱནཾ མཧཔྥལཏརཾ, ཏཏོ སཏཾསོཏཱཔནྣཱནཾ དིནྣདཱནཏོ ཨེཀསྶ སཀདཱགཱམིནོ, ཏཏོ ཨེཀསྶ ཨནཱགཱམིནོ, ཏཏོ ཨེཀསྶ ཨརཧཏོ, ཏཏོ ཨེཀསྶ པཙྩེཀབུདྡྷསྶ, ཏཏོ སམྨཱསམྦུདྡྷསྶ, ཏཏོ བུདྡྷཔྤམུཁསྶ སངྒྷསྶ དིནྣདཱནཾ མཧཔྥལཏརཾ, ཏཏོ ཙཱཏུདྡིསཾ སངྒྷཾ ཨུདྡིསྶ ཝིཧཱརཀརཎཾ, ཏཏོ སརཎགམནཾ མཧཔྥལཏརནྟི ཨཡམཏྠོ པཀཱསིཏོ. ཝུཏྟཉྷེཏཾ –

‘‘ཡཾ གཧཔཏི ཝེལཱམོ བྲཱཧྨཎོ དཱནཾ ཨདཱསི མཧཱདཱནཾ, ཡོ ཙེཀཾ དིཊྛིསམྤནྣཾ བྷོཛེཡྻ, ཨིདཾ ཏཏོ མཧཔྥལཏརཾ, ཡོ ཙ སཏཾ དིཊྛིསམྤནྣཱནཾ བྷོཛེཡྻ, ཡོ ཙེཀཾ སཀདཱགཱམིཾ བྷོཛེཡྻ, ཨིདཾ ཏཏོ མཧཔྥལཏར’’ནྟིཨཱདི (ཨ. ནི. ༩.༢༠).

ཨིམིནཱ ཙ ཨུཀྐཊྛཔརིཙྪེདཏོ ལོཀུཏྟརསྶེཝ སརཎགམནསྶ ཕལཾ དསྶིཏནྟི ཝེདིཏབྦཾ. ཏཐཱ ཧི ¶ ཝེལཱམསུཏྟཊྛཀཐཱཡཾ ཝུཏྟཾ ‘‘སརཎཾ གཙྪེཡྻཱཏི ཨེཏྠ མགྒེནཱགཏཾ ཨནིཝཏྟནསརཎཾ ཨདྷིཔྤེཏཾ, ཨཔརེ པནཱཧུ ‘ཨཏྟཱནཾ ནིཡྻཱཏེཏྭཱ དིནྣཏྟཱ སརཎགམནཾ ཏཏོ མཧཔྥལཏར’ནྟི ཝུཏྟ’’ནྟི (ཨ. ནི. ཨཊྛ. ༣.༩.༢༠) ཀཱུཊདནྟསུཏྟཊྛཀཐཱཡཾ པན ཝཀྑཏི ‘‘ཡསྨཱ ཙ སརཎགམནཾ ནཱམ ཏིཎྞཾ རཏནཱནཾ ཛཱིཝིཏཔརིཙྩཱགམཡཾ པུཉྙཀམྨཾ སགྒསམྤཏྟིཾ དེཏི, ཏསྨཱ མཧཔྥལཏརཉྩ མཧཱནིསཾསཏརཉྩཱཏི ཝེདིཏབྦ’’ནྟི (དཱི. ནི. ཨཊྛ. ༡.༣༥༠, ༣༥༡) ཨིམིནཱ པན ¶ ནཡེན ལོཀིཡསྶཱཔི སརཎགམནསྶ ཕལཾ ཨིདྷ དསྶིཏམེཝཱཏི གཧེཏབྦཾ. ཨཱཙརིཡདྷམྨཔཱལཏྠེརེནཔི (དཱི. ནི. ཊཱི. ༡.༢༥༠) ཧི ཨཡམེཝཏྠོ ཨིཙྪིཏོཏི ཝིཉྙཱཡཏི ཨིདྷ ཙེཝ ཨཉྙཱསུ ཙ མཛ྄ཛྷིམཱགམཊཱིཀཱདཱིསུ ཨཝིསེསཏོཡེཝ ཝུཏྟཏྟཱ, ཨཱཙརིཡསཱརིཔུཏྟཏྠེརེནཱཔི ཨཡམཏྠོ ཨབྷིམཏོ སིཡཱ སཱརཏྠདཱིཔནིཡཾ, (སཱརཏྠ. ཊཱི. ཝེརཉྫཀཨཎྜཝཎྞནཱ.༡༥) ཨངྒུཏྟརཊཱིཀཱཡཉྩ ཏདུབྷཡསཱདྷཱརཎཝཙནཏོ. ཨཔརེ པན ཝདནྟི ‘‘ཀཱུཊདནྟསུཏྟཊྛཀཐཱཡམྤི (དཱི. ནི. ཊཱི. ༡.༢༤༩) ལོཀུཏྟརསྶེཝ སརཎགམནསྶ ཕལཾ ཝུཏྟ’’ནྟི, ཏདཡུཏྟམེཝ ཏཐཱ ཨཝུཏྟཏྟཱ. ‘‘ཡསྨཱ…པེ… དེཏཱི’’ཏི ཧི ཏདུབྷཡསཱདྷཱརཎཀཱརཎཝསེན ཏདུབྷཡསྶཱཔི ཕལཾ ཏཏྠ ཝུཏྟནྟི. ཝེལཱམསུཏྟཱདཱིནནྟི ཨེཏྠ ཨཱདིསདྡེན (ཨ. ནི. ༤.༣༤; ཨིཏིཝུ. ༩༠) ཨགྒཔྤསཱདསུཏྟཚཏྟམཱཎཝཀཝིམཱནཱདཱིནཾ (ཝི. ཝ. ༨༨༦ ཨཱདཡོ) སངྒཧོ དཊྛབྦོ.

ཨཉྙཱཎཾ ནཱམ ཝཏྠུཏྟཡསྶ གུཎཱནམཛཱནནཾ ཏཏྠ སམྨོཧོ. སཾསཡོ ནཱམ ‘‘བུདྡྷོ ནུ ཁོ, ན ནུ ཁོ’’ཏིཨཱདིནཱ (དཱི. ནི. ཨཊྛ. ༢.༢༡༦) ཝིཙིཀིཙྪཱ. མིཙྪཱཉཱཎཾ ནཱམ ཝཏྠུཏྟཡསྶ གུཎཱནཾ ཨགུཎབྷཱཝཔརིཀཔྤནེན ཝིཔརཱིཏགྒཱཧོ. ཨཱདིསདྡེན ཨནཱདརཱགཱརཝཱདཱིནཾ སངྒཧོ. སཾཀིལིསྶཏཱིཏི སཾཀིལིཊྛཾ མལཱིནཾ བྷཝཏི. ན མཧཱཛུཏིཀནྟིཨཱདིཔི སཾཀིལེསཔརིཡཱཡོ ཨེཝ. ཏཏྠ ན མཧཱཛུཏིཀནྟི ན མཧུཛྫལཾ, ཨཔརིསུདྡྷཾ ཨཔརིཡོདཱཏནྟི ཨཏྠོ. ན མཧཱཝིཔྥཱརནྟི ན མཧཱནུབྷཱཝཾ, ཨཔཎཱིཏཾ ཨནུལཱ༹རནྟི ཨཏྠོ. སཱཝཛྫོཏི ཏཎྷཱདིཊྛཱདིཝསེན སདོསོ. ཏདེཝ ཕལཝསེན ཝིབྷཱཝེཏུཾ ‘‘ཨནིཊྛཕལོ’’ཏི ཝུཏྟཾ, སཱཝཛྫཏྟཱ ཨཀནྟིཕལོ ཧོཏཱིཏི ཨཏྠོ. ལོཀིཡསརཎགམནཾ སིཀྑཱསམཱདཱནཾ ཝིཡ ཨགཧིཏཀཱལཔརིཙྪེདཾ ཛཱིཝིཏཔརིཡནྟམེཝ ཧོཏི, ཏསྨཱ ཏསྶ ཁནྡྷབྷེདེན བྷེདོ, སོ ཙ ཏཎྷཱདིཊྛཱདིཝིརཧིཏཏྟཱ ཨདོསོཏི ཨཱཧ ‘‘ཨནཝཛྫོ ཀཱལཀིརིཡཱཡ ཧོཏཱི’’ཏི. སོཏི ཨནཝཛྫོ སརཎགམནབྷེདོ. སཏིཔི ཨནཝཛྫཏྟེ ཨིཊྛཕལོཔི ན ཧོཏི, པགེཝ ཨནིཊྛཕལོ ཨཝིཔཱཀཏྟཱ. ན ཧི ཏཾ ཨཀུསལཾ ཧོཏི, ཨཐ ཁོ བྷེདནམཏྟནྟི ཨདྷིཔྤཱཡོ. བྷཝནྟརེཔཱིཏི ཨཉྙསྨིམྤི བྷཝེ.

དྷརསདྡསྶ དྭིཀམྨིཀཏྟཱ ‘‘ཨུཔཱསཀ’’ནྟི ཨིདམྤི ཀམྨམེཝ, ཏཉྩ ཁོ ཨཱཀཱརཊྛཱནེཏི ཨཏྠམཏྟཾ དསྶེཏུཾ ‘‘ཨུཔཱསཀོ ཨཡནྟི ཨེཝཾ དྷཱརེཏཱུ’’ཏི ¶ ཝུཏྟཾ. དྷཱརེཏཱུཏི ཙ ཨུཔདྷཱརེཏཱུཏི ཨཏྠོ. ཨུཔདྷཱརཎཉྩེཏྠ ¶ ཛཱནནམེཝཱཏི དསྶེཏི ‘‘ཛཱནཱཏཱུ’’ཏི ཨིམིནཱ. ཨུཔཱསཀཝིདྷིཀོསལླཏྠནྟི ཨུཔཱསཀབྷཱཝཝིདྷཱནཀོསལླཏྠཾ. ཀོ ཨུཔཱསཀོཏི སརཱུཔཔུཙྪཱ, ཀིཾ ལཀྑཎོ ཨུཔཱསཀོ ནཱམཱཏི ཝུཏྟཾ ཧོཏི. ཀསྨཱཏི ཧེཏུཔུཙྪཱ, ཀེན པཝཏྟིནིམིཏྟེན ཨུཔཱསཀསདྡོ ཏསྨིཾ པུགྒལེ ནིརུལ༹ྷོཏི ཨདྷིཔྤཱཡོ. ཏེནཱཧ ‘‘ཀསྨཱ ཨུཔཱསཀོཏི ཝུཙྩཏཱི’’ཏི. སདྡསྶ ཧི ཨབྷིདྷེཡྻེ པཝཏྟིནིམིཏྟམེཝ ཏདཏྠསྶ ཏབྦྷཱཝཀཱརཎཾ. ཀིམསྶ སཱིལནྟི ཝཏསམཱདཱནཔུཙྪཱ, ཀཱིདིསཾ ཨསྶ ཨུཔཱསཀསྶ སཱིལཾ, ཀིཏྟཀེན ཝཏསམཱདཱནེནཱཡཾ སཱིལསམྤནྣོ ནཱམ ཧོཏཱིཏི ཨཏྠོ. ཀོ ཨཱཛཱིཝོཏི ཀམྨསམཱདཱནཔུཙྪཱ, ཀོ ཨསྶ སམྨཱཨཱཛཱིཝོ, ཀེན ཀམྨསམཱདཱནེན ཨསྶ ཨཱཛཱིཝོ སམྦྷཝཏཱིཏི པུཙྪཏི, སོ པན མིཙྪཱཛཱིཝསྶ པརིཝཛྫནེན ཧོཏཱིཏི མིཙྪཱཛཱིཝོཔི ཝིབྷཛཱིཡཏི. ཀཱ ཝིཔཏྟཱིཏི ཏདུབྷཡེསཾ ཝིཔྤཊིཔཏྟིཔུཙྪཱ, ཀཱ ཨསྶ ཨུཔཱསཀསྶ སཱིལསྶ, ཨཱཛཱིཝསྶ ཙ ཝིཔཏྟཱིཏི ཨཏྠོ. སཱམཉྙནིདྡིཊྛེ ཧི སཏི ཨནནྟརསྶེཝ ཝིདྷི ཝཱ པཊིསེདྷོ ཝཱཏི ཨནནྟརསྶ གཧཎཾ. ཀཱ སམྤཏྟཱིཏི ཏདུབྷཡེསམེཝ སམྨཱཔཊིཔཏྟིཔུཙྪཱ, ཀཱ ཨསྶ ཨུཔཱསཀསྶ སཱིལསྶ, ཨཱཛཱིཝསྶ ཙ སམྤཏྟཱིཏི ཝུཏྟནཡེན ཨཏྠོ. སརཱུཔཝཙནཏྠཱདིསངྑཱཏེན པཀཱརེན ཀིརཏཱིཏི པཀིཎྞཾ, ཏདེཝ པཀིཎྞཀཾ, ཨནེཀཱཀཱརེན པཝཏྟཾ ཨཏྠཝིནིཙྪཡནྟི ཨཏྠོ.

ཡོ ཀོཙཱིཏི ཁཏྟིཡབྲཱཧྨཎཱདཱིསུ ཡོ ཀོཙི, ཨིམིནཱ པདེན ཨཀཱརཎམེཏྠ ཛཱཏིཨཱདིཝིསེསོཏི དསྶེཏི, ‘‘སརཎགཏོ’’ཏི ཨིམིནཱ པན སརཎགམནམེཝེཏྠ པམཱཎནྟི. ‘‘གཧཊྛོ’’ཏི ཙ ཨིམིནཱ ཨཱགཱརིཀེསྭེཝ ཨུཔཱསཀསདྡོ ནིརུལ༹ྷོ, ན པབྦཛྫཱུཔགཏེསཱུཏི. ཏམཏྠཾ མཧཱཝགྒསཾཡུཏྟེ མཧཱནཱམསུཏྟེན (སཾ. ནི. ༥.༡༠༣༣) སཱདྷེནྟོ ‘‘ཝུཏྟཉྷེཏ’’ནྟིཨཱདིམཱཧ. ཏཏྠ ཡཏོཏི བུདྡྷཱདིསརཎགམནཏོ. མཧཱནཱམཱཏི ཨཏྟནོ ཙཱུལ༹པིཏུནོ སུཀྐོདནསྶ པུཏྟཾ མཧཱནཱམཾ ནཱམ སཀྱརཱཛཱནཾ བྷགཝཱ ཨཱལཔཏི. ཨེཏྟཱཝཏཱཏི ཨེཏྟཀེན བུདྡྷཱདིསརཎགམནེན ཨུཔཱསཀོ ནཱམ ཧོཏི, ན ཛཱཏིཨཱདཱིཧི ཀཱརཎེཧཱིཏི ཨདྷིཔྤཱཡོ. ཀཱམཉྩ ཏཔུསྶབྷལླིཀཱནཾ ཝིཡ དྭེཝཱཙིཀཨུཔཱསཀབྷཱཝོཔི ཨཏྠི, སོ པན ཏདཱ ཝཏྠུཏྟཡཱབྷཱཝཏོ ཀདཱཙིཡེཝ ཧོཏཱིཏི སབྦདཱ པཝཏྟཾ ཏེཝཱཙིཀཨུཔཱསཀབྷཱཝཾ ¶ དསྶེཏུཾ ‘‘སརཎགཏོ’’ཏི ཝུཏྟཾ. ཏེཔི ཧི པཙྪཱ ཏིསརཎགཏཱ ཨེཝ, ན ཙེཏྠ སམྦྷཝཏི ཨཉྙཾ པཊིཀྑིཔིཏྭཱ ཨེཀཾ ཝཱ དྭེ ཝཱ སརཎགཏོ ཨུཔཱསཀོ ནཱམཱཏི ཨིམམཏྠམྤི ཉཱཔེཏུཾ ཨེཝཾ ཝུཏྟནྟི དཊྛབྦཾ.

ཨུཔཱསནཏོཏི ཏེནེཝ སརཎགམནེན, ཏཏྠ ཙ སཀྐཙྩཀཱརིཏཱཡ གཱརཝབཧུམཱནཱདིཡོགེན པཡིརུཔཱསནཏོ, ཨིམིནཱ ཀཏྭཏྠཾ དསྶེཏི. ཏེནཱཧ ‘‘སོ ཧཱི’’ཏིཨཱདི.

ཝེརམཎིཡོཏི ¶ ཨེཏྠ ཝེརཾ ཝུཙྩཏི པཱཎཱཏིཔཱཏཱདིདུསྶཱིལྱཾ, ཏསྶ མཎནཏོ ཧནནཏོ ཝིནཱསནཏོ ཝེརམཎིཡོ ནཱམ, པཉྩ ཝིརཏིཡོ ཝིརཏིཔདྷཱནཏྟཱ ཏསྶ སཱིལསྶ. ཏཐཱ ཧི ཨུདཱཧཊེ མཧཱནཱམསུཏྟེ ཝུཏྟཾ ‘‘པཱཎཱཏིཔཱཏཱ པཊིཝིརཏོ ཧོཏཱི’’ཏིཨཱདི (སཾ. ནི. ༥.༡༠༣༣) ‘‘ཡཐཱཧཱ’’ཏིཨཱདིནཱ སཱདྷཀཾ, སརཱུཔཉྩ དསྶེཏི ཡཐཱ ཏཾ ཨུཡྻཱནཔཱལསྶ ཨེཀེནེཝ ཨུདཀཔཏིཊྛཱནཔཡོགེན ཨམྦསེཙནཾ, གརུསིནཱནཉྩ. ཡཐཱཧ ཨམྦཝིམཱནེ (ཝི. ཝ. ༡༡༥༡ ཨཱདཡོ) –

‘‘ཨམྦོ ཙ སིཏྟོ སམཎོ ཙ ནྷཱཔིཏོ,

མཡཱ ཙ པུཉྙཾ པསུཏཾ ཨནཔྤཀཾ;

ཨིཏི སོ པཱིཏིཡཱ ཀཱཡཾ, སབྦཾ ཕརཏི ཨཏྟནོ’’ཏི.

[‘‘ཨམྦོ ཙ སིཉྩཏོ ཨཱསི, སམཎོ ཙ ནཧཱཔིཏོ;

བཧུཉྩ པུཉྙཾ པསུཏཾ, ཨཧོ སཕལཾ ཛཱིཝིཏ’’ནྟི. (ཨིདྷ ཊཱིཀཱཡཾ མཱུལཔཱཋོ)]

ཨེཝམཱིདིསེསུ. ཨེཏྟཱཝཏཱཏི ཨེཏྟཀེན པཉྩཝེརཝིརཏིམཏྟེན.

མིཙྪཱཝཎིཛྫཱཏི ཨཡུཏྟཝཎིཛྫཱ, ན སམྨཱཝཎིཛྫཱ, ཨསཱརུཔྤཝཎིཛྫཀམྨཱནཱིཏི ཨཏྠོ. པཧཱཡཱཏི ཨཀརཎེནེཝ པཛཧིཏྭཱ. དྷམྨེནཱཏི དྷམྨཏོ ཨནཔེཏེན, ཏེན མིཙྪཱཝཎིཛྫཀམྨེན ཨཱཛཱིཝནཏོ ཨཉྙམྤི ཨདྷམྨིཀཾ ཨཱཛཱིཝནཾ པཊིཀྑིཔཏི. སམེནཱཏི ཨཝིསམེན, ཏེན ཀཱཡཝིསམཱདིདུཙྩརིཏཾ ཝཛྫེཏྭཱ ཀཱཡསམཱདིནཱ སུཙརིཏེན ཨཱཛཱིཝནཾ དསྶེཏི. ‘‘ཝུཏྟཉྷེཏ’’ནྟིཨཱདིནཱ པཉྩངྒུཏྟརཔཱལི༹མཱཧརིཏྭཱ སཱདྷཀཾ, སརཱུཔཉྩ དསྶེཏི. ཝཱཎིཛཱནཾ ཨཡནྟི ཝཎིཛྫཱ, ཡསྶ ཀསྶཙི ཝིཀྐཡོ, ཨིཏྠིལིངྒཔདམེཏཾ. སཏྠཝཎིཛྫཱཏི ཨཱཝུདྷབྷཎྜཾ ཀཏྭཱ ཝཱ ཀཱརེཏྭཱ ཝཱ ¶ ཡཐཱཀཏཾ པཊིལབྷིཏྭཱ ཝཱ ཏསྶ ཝིཀྐཡོ. སཏྟཝཎིཛྫཱཏི མནུསྶཝིཀྐཡོ. མཾསཝཎིཛྫཱཏི སཱུནཀཱརཱདཡོ ཝིཡ མིགསཱུཀརཱདིཀེ པོསེཏྭཱ མཾསཾ སམྤཱདེཏྭཱ ཝིཀྐཡོ. མཛྫཝཎིཛྫཱཏི ཡཾ ཀིཉྩི མཛྫཾ ཡོཛེཏྭཱ ཏསྶ ཝིཀྐཡོ. ཝིསཝཎིཛྫཱཏི ཝིསཾ ཡོཛེཏྭཱ, སངྒཧེཏྭཱ ཝཱ ཏསྶ ཝིཀྐཡོ. ཏཏྠ སཏྠཝཎིཛྫཱ པརོཔརོདྷནིམིཏྟཏཱཡ ཨཀརཎཱིཡཱཏི ཝུཏྟཱ, སཏྟཝཎིཛྫཱ ཨབྷུཛིསྶབྷཱཝཀརཎཏོ, མཾསཝཎིཛྫཱ ཝདྷཧེཏུཏོ, མཛྫཝཎིཛྫཱ པམཱདཊྛཱནཏོ, ཝིསཝཎིཛྫཱ པརཱུཔགྷཱཏཀཱརཎཏོ.

ཏསྶེཝཱཏི ཡཐཱཝུཏྟསྶ པཉྩཝེརམཎིལཀྑཎསྶ སཱིལསྶ ཙེཝ པཉྩམིཙྪཱཝཎིཛྫཱདིཔྤཧཱནལཀྑཎསྶ ཨཱཛཱིཝསྶ ཙ པཊིནིདྡེསོ. ཝིཔཏྟཱིཏི བྷེདོ, པཀོཔོ ཙ ¶ . ཨེཝཾ སཱིལཨཱཛཱིཝཝིཔཏྟིཝསེན ཨུཔཱསཀསྶ ཝིཔཏྟིཾ དསྶེཏྭཱ ཨསྶདྡྷིཡཱདིཝསེནཔི དསྶེནྟོ ‘‘ཨཔིཙཱ’’ཏིཨཱདིམཱཧ. ཡཱཡཱཏི ཨསྶདྡྷིཡཱདིཝིཔྤཊིཔཏྟིཡཱ. ཙཎྜཱལོཏི ནཱིཙདྷམྨཛཱཏིཀཊྛེན ཨུཔཱསཀཙཎྜཱལོ. མལནྟི མལཱིནཊྛེན ཨུཔཱསཀམལཾ. པཏིཀིཊྛོཏི ལཱམཀཊྛེན ཨུཔཱསཀནིཧཱིནོ. སཱཔིསྶཱཏི སཱཔི ཨསྶདྡྷིཡཱདིཝིཔྤཊིཔཏྟི ཨསྶ ཨུཔཱསཀསྶ ཝིཔཏྟཱིཏི ཝེདིཏབྦཱ. ཀཱ པནཱཡནྟི ཝུཏྟཾ ‘‘ཏེ ཙཱ’’ཏིཨཱདི. ཨུཔཱསཀཙཎྜཱལསུཏྟཾ, (ཨ. ནི. ༥.༡༧༥) ཨུཔཱསཀརཏནསུཏྟཉྩ པཉྩངྒུཏྟརེ. ཏཏྠ བུདྡྷཱདཱིསུ, ཀམྨཀམྨཕལེསུ ཙ སདྡྷཱཝིཔརིཡཱཡོ མིཙྪཱཝིམོཀྑོ ཨསྶདྡྷིཡཾ, ཏེན སམནྣཱགཏོ ཨསྶདྡྷོ. ཡཐཱཝུཏྟསཱིལཝིཔཏྟིཨཱཛཱིཝཝིཔཏྟིཝསེན དུསྶཱིལོ. ‘‘ཨིམིནཱ དིཊྛཱདིནཱ ཨིདཾ ནཱམ མངྒལཾ ཧོཏཱི’’ཏི ཨེཝཾ བཱལཛནཔརིཀཔྤིཏེན ཀོཏཱུཧལསངྑཱཏེན དིཊྛསུཏམུཏམངྒལེན སམནྣཱགཏོ ཀོཏཱུཧལམངྒལིཀོ. མངྒལཾ པཙྩེཏཱིཏི དིཊྛམངྒལཱདིབྷེདཾ མངྒལམེཝ པཏྟིཡཱཡཏི ནོ ཀམྨནྟི ཀམྨསྶཀཏཾ ནོ པཏྟིཡཱཡཏི. ཨིཏོ ཙ བཧིདྡྷཱཏི ཨིཏོ སབྦཉྙུབུདྡྷསཱསནཏོ བཧིདྡྷཱ བཱཧིརཀསམཡེ. ཙ-སདྡོ ཨཊྛཱནཔཡུཏྟོ, སབྦཏྠ ‘‘ཨསྶདྡྷོ’’ཏིཨཱདཱིསུ ཡོཛེཏབྦོ. དཀྑིཎེཡྻཾ པརིཡེསཏཱིཏི དུཔྤཊིཔནྣཾ དཀྑིཎཱརཧསཉྙཱི གཝེསཏི. ཏཏྠཱཏི བཧིདྡྷཱ བཱཧིརཀསམཡེ. པུབྦཀཱརཾ ཀརོཏཱིཏི པཋམཏརཾ དཱནམཱནནཱདིཀཾ ཀུསལཀིརིཡཾ ཀརོཏི, བཱཧིརཀསམཡེ པཋམཏརཾ ཀུསལཀིརིཡཾ ཀཏྭཱ པཙྪཱ སཱསནེ ཀརོཏཱིཏི ཝུཏྟཾ ཧོཏཱིཏི ¶ . ཏཏྠཱཏི ཝཱ ཏེསཾ བཱཧིརཀཱནཾ ཏིཏྠིཡཱནནྟིཔི ཝདནྟི. ཨེཏྠ ཙ དཀྑིཎེཡྻཔརིཡེསནཔུབྦཀཱརེ ཨེཀཾ ཀཏྭཱ པཉྩ དྷམྨཱ ཝེདིཏབྦཱ.

ཨསྶཱཏི ཨུཔཱསཀསྶ. སཱིལསམྤདཱཏི ཡཐཱཝུཏྟེན པཉྩཝེརམཎིལཀྑཎེན སཱིལེན སམྤདཱ. ཨཱཛཱིཝསམྤདཱཏི པཉྩམིཙྪཱཝཎིཛྫཱདིཔྤཧཱནལཀྑཎེན ཨཱཛཱིཝེན སམྤདཱ. ཨེཝཾ སཱིལསམྤདཱཨཱཛཱིཝསམྤདཱཝསེན ཨུཔཱསཀསྶ སམྤཏྟིཾ དསྶེཏྭཱ སདྡྷཱདིཝསེནཔི དསྶེནྟོ ‘‘ཡེ ཙསྶཱ’’ཏིཨཱདིམཱཧ. ཡེ ཙ པཉྩ དྷམྨཱ, ཏེཔི ཨསྶ སམྤཏྟཱིཏི ཡོཛནཱ. དྷམྨེཧཱིཏི གུཎེཧི. ཙཏུནྣཾ པརིསཱནཾ རཏིཛནནཊྛེན ཨུཔཱསཀོཝ རཏནཾ ཨུཔཱསཀརཏནཾ. གུཎསོབྷཱཀིཏྟིསདྡསུགནྡྷཏཱདཱིཧི ཨུཔཱསཀོཝ པདུམཾ ཨུཔཱསཀཔདུམཾ. ཏཐཱ ཨུཔཱསཀཔུཎྜརཱིཀཾ. སེསཾ ཝིཔཏྟིཡཾ ཝུཏྟཝིཔརིཡཱཡེན ཝེདིཏབྦཾ.

ནིགཎྛཱིནནྟི ནིགཎྛསམཎཱིནཾ. ཨཱདིམྷཱིཏི པཋམཏྠེ. ཨུཙྪགྒནྟི ཨུཙྪུཨགྒཾ ཨུཙྪུཀོཊི. ཏཐཱ ཝེལ༹གྒནྟི ཨེཏྠཱཔི. ཀོཊིཡནྟི པརིཡནྟཀོཊིཡཾ, པརིཡནྟཏྠེཏི ཨཏྠོ. ཨམྦིལགྒནྟི ཨམྦིལཀོཊྛཱསཾ. ཏཐཱ ཏིཏྟཀགྒནྟི ཨེཏྠཱཔི. ཝིཧཱརགྒེནཱཏི ཨོཝརཀཀོཊྛཱསེན ‘‘ཨིམསྨིཾ གབྦྷེ ཝསནྟཱནཾ ཨིདཾ ནཱམ ཕལཾ པཱཔུཎཱཏཱི’’ཏིཨཱདིནཱ ཏཾཏཾཝསནཊྛཱནཀོཊྛཱསེནཱཏི ཨཏྠོ ¶ . པརིཝེཎགྒེནཱཏི ཨེཏྠཱཔི ཨེསེཝ ནཡོ. ཨགྒེཏི ཨེཏྠ ཨུཔཡོགཝཙནསྶ ཨེཀཱརཱདེསོ, ཝཙནཝིཔལླཱསོ ཝཱ, ཀཏྭཱ-སདྡོ ཙ སེསོཏི ཝུཏྟཾ ‘‘ཨཱདིཾ ཀཏྭཱ’’ཏི. བྷཱཝཏྠེ ཏཱ-སདྡོཏི དསྶེཏི ‘‘ཨཛྫབྷཱཝ’’ནྟི ཨིམིནཱ, ཨཛྫབྷཱཝོ ཙ ནཱམ ཏསྨིཾ དྷམྨསྶཝནསམཡེ དྷརམཱནཀཏཱཔཱཔུཎཀབྷཱཝོ. ཏདཱ ཧི ཏཾ ནིསྶཡཝསེན དྷརམཱནཏཾ ནིམིཏྟཾ ཀཏྭཱ ཏཾདིཝསནིསྶིཏཨརུཎུགྒམནཏོ པཊྛཱཡ ཡཱཝ པུན ཨརུཎུགྒམནཱ ཨེཏྠནྟརེ ཨཛྫསདྡོ པཝཏྟཏི, ཏསྨཱ ཏསྨིཾ སམཡེ དྷརམཱནཀཏཱསངྑཱཏཾ ཨཛྫབྷཱཝཾ ཨཱདིཾ ཀཏྭཱཏི ཨཏྠོ དཊྛབྦོ. ཨཛྫཏནྟི ཝཱ ཨཛྫཨིཙྩེཝ ཨཏྠོ ཏཱ-སདྡསྶ སཀཏྠཝུཏྟིཏོ ཡཐཱ ‘‘དེཝཏཱ’’ཏི, ཨཡཾ ཨཱཙརིཡཱནཾ མཏི. ཨེཝཾ པཋམཀྑརེན དིསྶམཱནཔཱཋཱནུརཱུཔཾ ཨཏྠཾ དསྶེཏྭཱ ཨིདཱནི ཏཏིཡཀྑརེན དིསྶམཱནཔཱཋཱནུརཱུཔཾ ཨཏྠཾ དསྶེཏུཾ ‘‘ཨཛྫདགྒེཏི ཝཱ པཱཋོ’’ཏིཨཱདི ཝུཏྟཾ. ཨཱགམམཏྟཏྟཱ དཀཱརོ པདསནྡྷིཀརོ. ཨཛྫཱཏི ཧི ནེཔཱཏིཀམིདཾ པདཾ. ཏེནཱཧ ‘‘ཨཛྫ ཨགྒནྟི ཨཏྠོ’’ཏི.

‘‘པཱཎོ’’ཏི ཨིདཾ པརམཏྠཏོ ཛཱིཝིཏིནྡྲིཡེ ཨེཝ, ‘‘པཱཎུཔེཏ’’ནྟི ཙ ཀརཎཏྠེནེཝ སམཱསོཏི ཉཱཔེཏུཾ ‘‘ཡཱཝ མེ ཛཱིཝིཏཾ པཝཏྟཏི, ཏཱཝ ¶ ཨུཔེཏ’’ནྟི ཨཱཧ. ཨུཔེཏི ཨུཔགཙྪཏཱིཏི ཧི ཨུཔེཏོ, པཱཎེཧི ཀརཎབྷཱུཏེཧི ཨུཔེཏོ པཱཎུཔེཏོཏི ཨཏྠོ ཨཱཙརིཡེཧི ཨབྷིམཏོ. ཨིམིནཱ ཙ ‘‘པཱཎུཔེཏནྟི ཨིདཾ པདཾ ཏསྶ སརཎགམནསྶ ཨཱཔཱཎཀོཊིཀཏཱདསྶན’’ནྟི ཨིམམཏྠཾ ཝིབྷཱཝེཏི. ‘‘པཱཎུཔེཏ’’ནྟི ཧི ཨིམིནཱ ཡཱཝ མེ པཱཎཱ དྷརནྟི, ཏཱཝ སརཎཾ ཨུཔེཏོ, ཨུཔེནྟོ ཙ ན ཝཱཙཱམཏྟེན, ན ཙ ཨེཀཝཱརཾ ཙིཏྟུཔྤཱདམཏྟེན, ཨཐ ཁོ པཱཎཱནཾ པརིཙྩཛནཝསེན ཡཱཝཛཱིཝཾ ཨུཔེཏོཏི ཨཱཔཱཎཀོཊིཀཏཱ དསྶིཏཱ. ‘‘ཏཱིཧི…པེ… གཏ’’ནྟི ཨིདཾ ‘‘སརཎཾ གཏ’’ནྟི ཨེཏསྶ ཨཏྠཝཙནཾ. ‘‘ཨནཉྙསཏྠུཀ’’ནྟི ཨིདཾ པན ཨནྟོགདྷཱཝདྷཱརཎེན, ཨཉྙཏྠཱཔོཧནེན ཙ ནིཝཏྟེཏབྦཏྠདསྶནཾ. ཨེཀཙྩོ ཀཔྤིཡཀཱརཀསདྡསྶ ཨཏྠོ ཨུཔཱསཀསདྡསྶ ཝཙནཱིཡོཔི བྷཝཏཱིཏི ཝུཏྟཾ ‘‘ཨུཔཱསཀཾ ཀཔྤིཡཀཱརཀ’’ནྟི, ཨཏྟསནྣིཡྻཱཏནསརཎགམནཾ ཝཱ སནྡྷཱཡ ཨེཝཾ ཝུཏྟནྟི དཊྛབྦཾ. ཨེཝཾ ‘‘པཱཎུཔེཏ’’ནྟི ཨིམིནཱ ནཱིཏཏྠཏོ དསྶིཏཾ ཏསྶ སརཎགམནསྶ ཨཱཔཱཎཀོཊིཀཏཾ དསྶེཏྭཱ ཨེཝཾ ཝདནྟོ པནེས རཱཛཱ ‘‘ཛཱིཝིཏེན སཧ ཝཏྠུཏྟཡཾ པཊིཔཱུཛེནྟོ སརཎགམནཾ རཀྑཱམཱི’’ཏི ཨདྷིཔྤཱཡཾ ཝིབྷཱཝེཏཱིཏི ནེཡྻཏྠཏོ ཝིབྷཱཝིཏཾ ཏསྶ རཉྙོ ཨདྷིཔྤཱཡཾ ཝིབྷཱཝེནྟོ ‘‘ཨཧཉྷཱི’’ཏིཨཱདིམཱཧ. ཏཏྠ ཧི-སདྡོ སམཏྠནེ, ཀཱརཎཏྠེ ཝཱ, ཏེན ཨིམཱཡ ཡུཏྟིཡཱ, ཨིམིནཱ ཝཱ ཀཱརཎེན ཨུཔཱསཀཾ མཾ བྷགཝཱ དྷཱརེཏཱུཏི ཨཡམཏྠོ པཀཱསིཏོ.

ཨཙྩཡནཾ སཱདྷུམརིཡཱདཾ ཨཏིཀྐམྨ མདྡིཏྭཱ པཝཏྟནཾ ཨཙྩཡོ, ཀཱཡིཀཱདིཨཛ྄ཛྷཱཙཱརསངྑཱཏོ དོསོཏི ཨཱཧ ‘‘ཨཔརཱདྷོ’’ཏི, ཨཙྩེཏི ཨབྷིབྷཝིཏྭཱ པཝཏྟཏི ཨེཏེནཱཏི ¶ ཝཱ ཨཙྩཡོ, ཀཱཡིཀཱདིཝཱིཏིཀྐམསྶ པཝཏྟནཀོ ཨཀུསལདྷམྨསངྑཱཏོ དོསོ ཨེཝ, སོ ཙ ཨཔརཛ྄ཛྷཏི ཨེཏེནཱཏི ཨཔརཱདྷོཏི ཝུཙྩཏི. སོ ཧི ཨཔརཛ྄ཛྷནྟཾ པུརིསཾ ཨབྷིབྷཝིཏྭཱ པཝཏྟཏི. ཏེནཱཧ ‘‘ཨཏིཀྐམྨ ཨབྷིབྷཝིཏྭཱ པཝཏྟོ’’ཏི. དྷམྨནྟི དསརཱཛདྷམྨཾ. ཝིཏྠཱརོ པནེཏསྶ མཧཱཧཾསཛཱཏཀཱདཱིཧི ཝིབྷཱཝེཏབྦོ. ཙརཏཱིཏི ཨཱཙརཏི ཀརོཏི. དྷམྨེནེཝཱཏི དྷམྨཏོ ཨནཔེཏེནེཝ, ཨནཔེཏཀུསལདྷམྨེནེཝཱཏི ཨཏྠོ. ཏེནཱཧ ‘‘ན པིཏུགྷཱཏནཱདིནཱ ཨདྷམྨེནཱ’’ཏི. ‘‘པཊིགྒཎྷཱཏཱུ’’ཏི ཨེཏསྶ ཨདྷིཝཱསནཾ སམྤཊིཙྪཏཱུཏི སདྡཏོ ཨཏྠོ, ཨདྷིཔྤཱཡཏོ པན ¶ ཨཏྠཾ དསྶེཏུཾ ‘‘ཁམཏཱུ’’ཏི ཝུཏྟཾ. པུན ཨཀརཎམེཏྠ སཾཝརོཏི དསྶེཏི ‘‘པུན ཨེཝརཱུཔསྶཱ’’ཏིཨཱདིནཱ. ‘‘ཨཔརཱདྷསྶཱ’’ཏིཨཱདི ཨཉྙམཉྙཾ ཝེཝཙནཾ.

༢༥༡. ‘‘ཡཐཱདྷམྨོ ཋིཏོ, ཏཐེཝཱ’’ཏི ཨིམིནཱཔི ཡཐཱ-སདྡསྶ ཨནུརཱུཔཏྠམཱཧ, སཱདྷུསམཱཙིཎྞཀུསལདྷམྨཱནུརཱུཔནྟི ཨཏྠོ. པཊིསདྡསྶ ཨནཏྠཀཏཾ དསྶེཏི ‘‘ཀརོསཱི’’ཏི ཨིམིནཱ. པཊིཀམྨཾ ཀརོསཱིཏིཔི ཝདནྟི. ཡཐཱདྷམྨཾ པཊིཀརཎཾ ནཱམ ཀཏཱཔརཱདྷསྶ ཁམཱཔནམེཝཱཏི ཨཱཧ ‘‘ཁམཱཔེསཱིཏི ཝུཏྟཾ ཧོཏཱི’’ཏི. ‘‘པཊིགྒཎྷཱམཱ’’ཏི ཨེཏསྶ ཨདྷིཝཱསནཾ སམྤཊིཙྪཱམཱཏི ཨཏྠཾ དསྶེཏི ‘‘ཁམཱམཱ’’ཏི ཨིམིནཱ. ཝུདྡྷི ཧེསཱཏི ཨེཏྠ ཧ-ཀཱརོ པདསིལིཊྛཏཱཡ ཨཱགམོ, ཧི-སདྡོ ཝཱ ནིཔཱཏམཏྟཾ. ཨེསཱཏི ཡཐཱདྷམྨཾ པཊིཀིརིཡཱ, ཨཱཡཏིཾ སཾཝརཱཔཛྫནཱ ཙ. ཏེནཱཧ ‘‘ཡོ ཨཙྩཡཾ…པེ… ཨཱཔཛྫཏཱི’’ཏི. སདེཝཀེན ལོཀེན ‘‘སརཎ’’ནྟི ཨརཎཱིཡཏོ ཨུཔགནྟབྦཏོ ཏཐཱགཏོ ཨརིཡོ ནཱམཱཏི ཝུཏྟཾ ‘‘བུདྡྷསྶ བྷགཝཏོ’’ཏི. ཝིནེཏི སཏྟེ ཨེཏེནཱཏི ཝིནཡོ, སཱསནཾ. ཝདྡྷཏི སགྒམོཀྑསམྤཏྟི ཨེཏཱཡཱཏི ཝུདྡྷི. ཀཏམཱ པན སཱ, ཡཱ ‘‘ཨེསཱ’’ཏི ནིདྡིཊྛཱ ཝུདྡྷཱིཏི ཙོདནམཔནེཏུཾ ‘‘ཡོ ཨཙྩཡ’’ནྟིཨཱདི ཝུཏྟནྟི སམྦནྡྷཾ དསྶེཏི ‘‘ཀཏམཱ’’ཏིཨཱདིནཱ, ཡཱ ཨཡཾ སཾཝརཱཔཛྫནཱ, སཱ ‘‘ཨེསཱ’’ཏི ནིདྡིཊྛཱ ཝུདྡྷི ནཱམཱཏི ཨཏྠོ. ‘‘ཡཐཱདྷམྨཾ པཊིཀརོཏཱི’’ཏི ཨིདཾ ཨཱཡཏིཾ སཾཝརཱཔཛྫནཱཡ པུབྦཀིརིཡཱདསྶནནྟི ཝིཉྙཱཔནཏྠཾ ‘‘ཡཐཱདྷམྨཾ པཊིཀརིཏྭཱ ཨཱཡཏིཾ སཾཝརཱཔཛྫནཱ’’ཏི ཝུཏྟཾ. ཨེསཱ ཧི ཨཱཙརིཡཱནཾ པཀཏི, ཡདིདཾ ཡེན ཀེནཙི པཀཱརེན ཨདྷིཔྤཱཡནྟརཝིཉྙཱཔནཾ, ཨེཏཔདེན པན ཏསྶཱཔི པཊིནིདྡེསོ སམྦྷཝཏི ‘‘ཡཐཱདྷམྨཾ པཊིཀརོཏཱི’’ ཏིཔི པཊིནིདྡིསིཏབྦསྶ དསྶནཏོ. ཀེཙི པན ‘‘ཡཐཱདྷམྨཾ པཊིཀརོཏཱི’ཏི ཨིདཾ པུབྦཀིརིཡཱམཏྟསྶེཝ དསྶནཾ, ན པཊིནིདྡིསིཏབྦསྶ. ‘ཨཱཡཏིཉྩ སཾཝརཾ ཨཱཔཛྫཏཱི’ཏི ཨིདཾ པན པཊིནིདྡིསིཏབྦསྶེཝཱཏི ཝིཉྙཱཔནཏྠཾ ཨེཝཾ ཝུཏྟ’’ནྟི ཝདནྟི, ཏདཡུཏྟམེཝ ཁམཱཔནསྶཱཔི ཝུདྡྷིཧེཏུབྷཱཝེན ཨརིཡཱུཔཝཱདེ ཝུཏྟཏྟཱ. ཨིཏརཐཱ ཧི ཁམཱཔནཱབྷཱཝེཔི ཨཱཡཏིཾ སཾཝརཱཔཛྫནཱཡ ཨེཝ ཨརིཡཱུཔཝཱདཱཔགམནཾ ཝུཏྟཾ སིཡཱ, ན ཙ པན ཝུཏྟཾ, ཏསྨཱ ཝུཏྟནཡེནེཝ ཨཏྠོ ཝེདིཏབྦོཏི.

ཀསྨཱ པན ¶ ‘‘ཡཱཡ’’ནྟིཨཱདིནཱ དྷམྨནིདྡེསོ དསྶིཏོ, ནནུ པཱལི༹ཡཾ ‘‘ཡོ ཨཙྩཡ’’ནྟིཨཱདིནཱ པུགྒལནིདྡེསོ ཀཏོཏི ཙོདནཾ སོདྷེཏུཾ ‘‘དེསནཾ པནཱ’’ཏིཨཱདི ཨཱརདྡྷཾ. པུགྒལཱདྷིཊྛཱནཾ ཀརོནྟོཏི པུགྒལཱདྷིཊྛཱནདྷམྨདེསནཾ ¶ ཀརོནྟོ. པུགྒལཱདྷིཊྛཱནཱཔི ཧི པུགྒལཱདྷིཊྛཱནདྷམྨདེསནཱ, པུགྒལཱདྷིཊྛཱནཔུགྒལདེསནཱཏི དུཝིདྷཱ ཧོཏི. ཨཡམེཏྠཱདྷིཔྤཱཡོ – ཀིཉྩཱཔི ‘‘ཝུདྡྷི ཧེསཱ’’ཏིཨཱདིནཱ དྷམྨཱདྷིཊྛཱནདེསནཱ ཨཱརདྡྷཱ, ཏཐཱཔི པུན པུགྒལཱདྷིཊྛཱནཾ ཀརོནྟེན ‘‘ཡོ ཨཙྩཡ’’ནྟིཨཱདིནཱ པུགྒལཱདྷིཊྛཱནདེསནཱ ཨཱརདྡྷཱ དེསནཱཝིལཱསཝསེན, ཝེནེཡྻཛ྄ཛྷཱསཡཝསེན ཙཱཏི. ཏདུབྷཡཝསེནེཝ ཧི དྷམྨཱདྷིཊྛཱནཱདིབྷེདེན ཙཏུབྦིདྷཱ དེསནཱ.

༢༥༢. ཝཙསཱཡཏྟེཏི ཝཙསཱ ཨཱཡཏྟེ. ཝཱཙཱཔཊིབནྡྷཏྟེཏི ཝདནྟི, ཏཾ ‘‘སོ ཧཱི’’ཏིཨཱདིནཱ ཝིརུདྡྷཾ ཝིཡ དིསྶཏི. ཝཙསཱཡཏྠེཏི པན ཝཱཙཱཔརིཡོསཱནཏྠེཏི ཨཏྠོ ཡུཏྟོ ཨོསཱནཀརཎཏྠསྶ སཱསདྡསྶ ཝསེན སཱཡསདྡནིཔྥཏྟིཏོ ཡཐཱ ‘‘དཱཡོ’’ཏི. ཨེཝཉྷི སམཏྠནཝཙནམྤི ཨུཔཔནྣཾ ཧོཏི. གམནཱཡ ཀཏཾ ཝཱཙཱཔརིཡོསཱནཾ ཀཏྭཱ ཝུཏྟཏྟཱ ཏསྨིཾཡེཝ ཨཏྠེ ཝཏྟཏཱིཏི. ཧནྡསདྡཉྷི ཙོདནཏྠེ, ཝཙསགྒཏྠེ ཙ ཨིཙྪནྟི. ‘‘ཧནྡ དཱནི བྷིཀྑཝེ ཨཱམནྟཡཱམཱི’’ཏིཨཱདཱིསུ (དཱི. ནི. ༢.༢༡༨; སཾ. ནི. ༡.༡༨༦) ཧི ཙོདནཏྠེ, ‘‘ཧནྡ དཱནི ཨཔཱཡཱམཱི’’ཏིཨཱདཱིསུ (ཛཱ. ༢.༢༢.༨༤༣) ཝཙསགྒཏྠེ, ཝཙསགྒོ ཙ ནཱམ ཝཱཙཱཝིསྶཛྫནཾ, ཏཉྩ ཝཱཙཱཔརིཡོསཱནམེཝཱཏི དཊྛབྦཾ. དུཀྐརཀིཙྩཝསེན བཧུཀིཙྩཏཱཏི ཨཱཧ ‘‘བལཝཀིཙྩཱ’’ཏི. ‘‘ཨཝསྶཾ ཀཏྟབྦཾ ཀིཙྩཾ, ཨིཏརཾ ཀརཎཱིཡཾ. པཋམཾ ཝཱ ཀཏྟབྦཾ ཀིཙྩཾ, པཙྪཱ ཀཏྟབྦཾ ཀརཎཱིཡཾ. ཁུདྡཀཾ ཝཱ ཀིཙྩཾ, མཧནྟཾ ཀརཎཱིཡ’’ནྟིཔི ཨུདཱནཊྛཀཐཱདཱིསུ (ཨུདཱ. ཨཊྛ. ༡༥) ཝུཏྟཾ. ཡཾ-ཏཾ-སདྡཱནཾ ནིཙྩསམྦནྡྷཏྟཱ, གམནཀཱལཛཱནནཏོ, ཨཉྙཀིརིཡཱཡ ཙ ཨནུཔཡུཏྟཏྟཱ ‘‘ཏསྶ ཀཱལཾ ཏྭམེཝ ཛཱནཱསཱི’’ཏི ཝུཏྟཾ. ཨིདཾ ཝུཏྟཾ ཧོཏི ‘‘ཏཡཱ ཉཱཏཾ གམནཀཱལཾ ཏྭམེཝ ཉཏྭཱ གཙྪཱཧཱི’’ཏི. ཨཐ ཝཱ ཡཐཱ ཀཏྟབྦཀིཙྩནིཡོཛནེ ‘‘ཨིམཾ ཛཱན, ཨིམཾ དེཧི, ཨིམཾ ཨཱཧརཱ’’ཏི (པཱཙི. ༨༨, ༩༣) ཝུཏྟཾ, ཏཐཱ ཨིདྷཱཔི ཏཡཱ ཉཱཏཾ ཀཱལཾ ཏྭམེཝ ཛཱནཱསི, གམནཝསེན ཀརོཧཱིཏི གམནེ ནིཡོཛེཏཱིཏི དསྶེཏུཾ ‘‘ཏྭམེཝ ཛཱནཱསཱི’’ཏི པཱཋསེསོ ཝུཏྟོཏི དཊྛབྦཾ. ‘‘ཏིཀྑཏྟུཾ པདཀྑིཎཾ ཀཏྭཱ’’ཏིཨཱདི ཡཐཱསམཱཙིཎྞཾ པཀརཎཱདྷིགཏམཏྟཾ དསྶེཏུཾ ཝུཏྟཾ. ཏཏྠ པདཀྑིཎནྟི པཀཱརཏོ ཀཏཾ དཀྑིཎཾ. ཏེནཱཧ ‘‘ཏིཀྑཏྟུ’’ནྟི. དསནཁསམོདྷཱནསམུཛྫལནྟི དྭཱིསུ ཧཏྠེསུ ཛཱཏཱནཾ དསནྣཾ ནཁཱནཾ སམོདྷཱནེན ཨེཀཱིབྷཱཝེན སམུཛྫལནྟཾ, ཏེན དྭིནྣཾ ཀརཏལཱནཾ སམཊྛཔནཾ ¶ དསྶེཏི. ཨཉྫལིནྟི ཧཏྠཔུཊཾ. ཨཉྫཏི བྱཏྟིཾ པཀཱསེཏི ཨེཏཱཡཱཏི ཨཉྫལི. ཨཉྫུ-སདྡཉྷི བྱཏྟིཡཾ, ཨལིཔཙྩཡཉྩ ཨིཙྪནྟི སདྡཝིདཱུ. ཨབྷིམུཁོཝཱཏི སམྨུཁོ ཨེཝ, ན བྷགཝཏོ པིཊྛིཾ དསྶེཏྭཱཏི ཨཏྠོ. པཉྩཔྤཏིཊྛིཏཝནྡནཱནཡོ ཝུཏྟོ ཨེཝ.

༢༥༣. ཨིམསྨིཾཡེཝ ¶ ཨཏྟབྷཱཝེ ཝིཔཙྩནཀཱནཾ ཨཏྟནོ པུབྦེ ཀཏཀུསལམཱུལཱནཾ ཁཎནེན ཁཏོ, ཏེསམེཝ ཨུཔཧནནེན ཨུཔཧཏོ, པདདྭཡེནཔི ཏསྶ ཀམྨཱཔརཱདྷམེཝ དསྶེཏི པརིཡཱཡཝཙནཏྟཱ པདདྭཡསྶ. ཀུསལམཱུལསངྑཱཏཔཏིཊྛཱབྷེདནེན ཁཏཱུཔཧཏབྷཱཝཾ དསྶེཏུཾ ‘‘བྷིནྣཔཏིཊྛོ ཛཱཏོ’’ཏི ཝུཏྟཾ. པཏིཊྛཱ, མཱུལནྟི ཙ ཨཏྠཏོ ཨེཀཾ. པཏིཊྛཧཏི སམྨཏྟནིཡཱམོཀྐམནཾ ཨེཏཱཡཱཏི ཧི པཏིཊྛཱ, ཏསྶ ཀུསལཱུཔནིསྶཡསམྤདཱ, སཱ ཀིརིཡཱཔརཱདྷེན བྷིནྣཱ ཝིནཱསིཏཱ ཨེཏེནཱཏི བྷིནྣཔཏིཊྛོ. ཏདེཝ ཝིཏྠཱརེནྟོ ‘‘ཏཐཱ’’ཏིཨཱདིམཱཧ. ཡཐཱ ཀུསལམཱུལསངྑཱཏཱ ཨཏྟནོ པཏིཊྛཱནཛཱཏཱ, ཏཐཱ ཨནེན རཉྙཱ ཨཏྟནཱཝ ཨཏྟཱ ཁཏོ ཁནིཏོཏི ཡོཛནཱ. ཁཏོཏི ཧི ཨིདཾ ཨིདྷ ཀམྨཝསེན སིདྡྷཾ, པཱལི༹ཡཾ པན ཀཏྟུཝསེནཱཏི དཊྛབྦཾ. པདདྭཡསྶ པརིཡཱཡཏྟཱ ‘‘ཨུཔཧཏོ’’ཏི ཨིདྷ ན ཝུཏྟཾ.

‘‘རཱགོ རཛོ ན ཙ པན རེཎུ ཝུཙྩཏཱི’’ཏིཨཱདི (མཧཱནི. ༢༠༩; ཙཱུལ༹ནི. ༧༤) ཝཙནཏོ རཱགདོསམོཧཱཝ ཨིདྷ རཛོ ནཱམཱཏི ཝུཏྟཾ ‘‘རཱགརཛཱདིཝིརཧིཏ’’ནྟི. ཝཱིཏསདྡསྶ ཝིགཏཔརིཡཱཡཏཾ དསྶེཏི ‘‘ཝིགཏཏྟཱ’’ཏི ཨིམིནཱ. དྷམྨེསུ ཙཀྑུནྟི ཙཏུསཙྩདྷམྨེསུ པཝཏྟཾ ཏེསཾ དསྶནཊྛེན ཙཀྑུཾ. དྷམྨེསཱུཏི ཝཱ ཧེཊྛིམེསུ ཏཱིསུ མགྒདྷམྨེསུ. ཙཀྑུནྟི སོཏཱཔཏྟིམགྒསངྑཱཏཾ ཨེཀཾ ཙཀྑུཾ, སམུདཱཡེཀདེསཝསེན ཨཱདྷཱརཏྠསམཱསོཡཾ, ན ཏུ ནིདྡྷཱརཎཏྠསམཱསོ. སོ ཧི སཱསནགནྠེསུ, སཀྐཏགནྠེསུ ཙ སབྦཏྠ པཊིསིདྡྷོཏི. དྷམྨམཡནྟི སམཐཝིཔསྶནཱདྷམྨེན ནིབྦཏྟཾ, ཨིམིནཱ ‘‘དྷམྨེན ནིབྦཏྟཾ ཙཀྑུ དྷམྨཙཀྑཱུ’’ཏི ཨཏྠམཱཧ. ཨཔིཙ དྷམྨམཡནྟི སཱིལཱདིཏིཝིདྷདྷམྨཀྑནྡྷོཡེཝ མཡ-སདྡསྶ སཀཏྠེ པཝཏྟནཏོ, ཨནེན ‘‘དྷམྨོཡེཝ ཙཀྑུ དྷམྨཙཀྑཱུ’’ཏི ཨཏྠམཱཧ. ཨཉྙེསུ ཋཱནེསཱུཏི ཨཉྙེསུ སུཏྟཔདེསེསུ, ཨེཏེན ཡཐཱཔཱཋཾ ཏིཝིདྷཏྠཏཾ དསྶེཏི. ཨིདྷ པན སོཏཱཔཏྟིམགྒསྶེཝེཏཾ ཨདྷིཝཙནཾ, ཏསྨིམྤི ཨནདྷིགཏེ ཨཉྙེསཾ ཝཏྟབྦཏཱཡེཝ ཨབྷཱཝཏོཏི ཨདྷིཔྤཱཡོ.

ཨིདཱནི ¶ ‘‘ཁཏཱཡཾ བྷིཀྑཝེ རཱཛཱ’’ཏིཨཱདིཔཱཋསྶ སུཝིཉྙེཡྻམདྷིཔྤཱཡཾ དསྶེནྟོ ‘‘ཨིདཾ ཝུཏྟཾ ཧོཏཱི’’ཏིཨཱདིམཱཧ. ཏཏྠ ནཱབྷཝིསྶཱཏི སཙེ ན ཨབྷཝིསྶཐ, ཨེཝཾ སཏཱིཏི ཨཏྠོ. ཨཏཱིཏེ ཧི ཨིདཾ ཀཱལཱཏིཔཏྟིཝཙནཾ, ན ཨནཱགཏེཏི དཊྛབྦཾ. ཨེས ནཡོ སོཏཱཔཏྟིམགྒཾ པཏྟོ ཨབྷཝིསྶཱཏི ཨེཏྠཱཔི. ནནུ ཙ མགྒཔཱཔུཎནཝཙནཾ བྷཝིསྶམཱནཏྟཱ ཨནཱགཏཀཱལིཀནྟི? སཙྩཾ ཨནིཡམིཏེ, ཨིདྷ པན ‘‘ཨིདྷེཝཱསནེ ནིསིནྣོ’’ཏི ནིཡམིཏཏྟཱ ཨཏཱིཏཀཱལིཀམེཝཱཏི ཝེདིཏབྦཾ. ཨིདཉྷི བྷགཝཱ རཉྙོ ཨཱསནཱ ཝུཊྛཱཡ ཨཙིརཔཀྐནྟསྶེཝ ཨཝོཙཱཏི. པཱཔམིཏྟསཾསགྒེནཱཏི དེཝདཏྟེན, དེཝདཏྟཔརིསཱསངྑཱཏེན ཙ པཱཔམིཏྟེན སཾསགྒཏོ. ཨསྶཱཏི སོཏཱཔཏྟིམགྒསྶ. ‘‘ཨེཝཾ སནྟེཔཱི’’ཏིཨཱདིནཱ པཱཋཱནཱརུལ༹ྷཾ ཝཙནཱཝསེསཾ དསྶེཏི. ཏསྨཱཏི སརཎཾ ¶ གཏཏྟཱ མུཙྩིསྶཏཱིཏི སམྦནྡྷོ. ‘‘མམ ཙ སཱསནམཧནྟཏཱཡཱ’’ཏི པཱཋོ ཡུཏྟོ, ཀཏྠཙི པན ཙ-སདྡོ ན དིསྶཏི, ཏཏྠ སོ ལུཏྟནིདྡིཊྛོཏི དཊྛབྦཾ. ན ཀེཝལཾ སརཎཾ གཏཏྟཱཡེཝ མུཙྩིསྶཏི, ཨཐ ཁོ ཡཏྠ ཨེས པསནྣོ, པསནྣཱཀཱརཉྩ ཀརོཏི, ཏསྶ ཙ ཏིཝིདྷསྶཔི སཱསནསྶ ཨུཏྟམཏཱཡཱཏི ཧི སཧ སམུཙྩཡེན ཨཏྠོ ཨདྷིཔྤེཏོཏི.

‘‘ཡཐཱ ནཱམཱ’’ཏིཨཱདི དུཀྐརཀམྨཝིཔཱཀཏོ སུཀརེན མུཙྩནེན ཨུཔམཱདསྶནཾ. ཀོཙཱིཏི ཀོཙི པུརིསོ. ཀསྶཙཱིཏི ཀསྶཙི པུརིསསྶ, ‘‘ཝདྷ’’ནྟི ཨེཏྠ བྷཱཝཡོགེ ཀམྨཏྠེ སཱམིཝཙནཾ. པུཔྥམུཊྛིམཏྟེན དཎྜེནཱཏི པུཔྥམུཊྛིམཏྟསངྑཱཏེན དྷནདཎྜེན. མུཙྩེཡྻཱཏི ཝདྷཀམྨདཎྜཏོ མུཙྩེཡྻ, དཎྜེནཱཏི ཝཱ ནིསྶཀྐཏྠེ ཀརཎཝཙནཾ ‘‘སུམུཏྟཱ མཡཾ ཏེན མཧཱསམཎེནཱ’’ཏིཨཱདཱིསུ (དཱི. ནི. ༢.༢༣༢; ཙཱུལ༹ཝ. ༤༣༧) ཝིཡ, པུཔྥམུཊྛིམཏྟེན དྷནདཎྜཏོ, ཝདྷདཎྜཏོ ཙ མུཙྩེཡྻཱཏི ཨཏྠོ. ལོཧཀུམྦྷིཡནྟི ལོཧཀུམྦྷིནརཀེ. ཏཏྠ ཧི ཏདནུབྷཝནཀཱནཾ སཏྟཱནཾ ཀམྨབལེན ལོཧམཡཱ མཧཏཱི ཀུམྦྷཱི ནིབྦཏྟཱ, ཏསྨཱ ཏཾ ‘‘ལོཧཀུམྦྷཱི’’ཏི ཝུཙྩཏི. ཨུཔརིམཏལཏོ ཨདྷོ པཏནྟོ, ཧེཊྛིམཏལཏོ ཨུདྡྷཾ གཙྪནྟོ, ཨུབྷཡཐཱ པན སཊྛིཝསྶསཧསྶཱནི ཧོནྟི. ཝུཏྟཉྩ –

‘‘སཊྛིཝསྶསཧསྶཱནི, པརིཔུཎྞཱནི སབྦསོ;

ནིརཡེ པཙྩམཱནཱནཾ, ཀདཱ ཨནྟོ བྷཝིསྶཏཱི’’ཏི. (པེ. ཝ. ༨༠༢; ཛཱ. ༡.༤.༥༤);

‘‘ཧེཊྛིམཏལཾ ¶ པཏྭཱ, ཨུཔརིམཏལཾ པཱཔུཎིཏྭཱ མུཙྩིསྶཏཱི’’ཏི ཝདནྟོ ཨིམམཏྠཾ དཱིཔེཏི – ཡཐཱ ཨཉྙེ སེཊྛིཔུཏྟཱདཡོ ཨཔརཱཔརཾ ཨདྷོ པཏནྟཱ, ཨུདྡྷཾ གཙྪནྟཱ ཙ ཨནེཀཱནི ཝསྶསཏསཧསྶཱནི ཏཏྠ པཙྩནྟི, ན ཏཐཱ ཨཡཾ, ཨཡཾ པན རཱཛཱ ཡཐཱཝུཏྟཀཱརཎེན ཨེཀཝཱརམེཝ ཨདྷོ པཏནྟོ, ཨུདྡྷཉྩ གཙྪནྟོ སཊྛིཝསྶསཧསྶཱནིཡེཝ པཙྩིཏྭཱ མུཙྩིསྶཏཱིཏི. ཨཡཾ པན ཨཏྠོ ཀུཏོ ལདྡྷོཏི ཨནུཡོགཾ པརིཧརནྟོ ‘‘ཨིདམྤི ཀིར བྷགཝཏཱ ཝུཏྟམེཝཱ’’ཏི ཨཱཧ. ཀིརསདྡོ ཙེཏྠ ཨནུསྶཝནཏྠོ, ཏེན བྷགཝཏཱ ཝུཏྟབྷཱཝསྶ ཨཱཙརིཡཔརམྤརཏོ སུཡྻམཱནཏཾ, ཨིམསྶ ཙ ཨཏྠསྶ ཨཱཙརིཡཔརམྤརཱབྷཏབྷཱཝཾ དཱིཔེཏི. ཨཐ པཱལི༹ཡཾ སངྒཱིཏཾ སིཡཱཏི ཙོདནམཔནེཏི ‘‘པཱལི༹ཡཾ པན ན ཨཱརུལ༹ྷ’’ནྟི ཨིམིནཱ, པཀིཎྞཀདེསནཱབྷཱཝེན པཱལི༹ཡམནཱརུལ༹ྷཏྟཱ པཱཋབྷཱཝེན ན སངྒཱིཏནྟི ཨདྷིཔྤཱཡོ. པཀིཎྞཀདེསནཱ ཧི པཱལི༹ཡམནཱརུལ༹ྷཱཏི ཨཊྛཀཐཱསུ ཝུཏྟཾ.

ཡདི ¶ ཨནནྟརེ ཨཏྟབྷཱཝེ ནརཀེ པཙྩཏི, ཨེཝཾ སཏི ཨིམཾ དེསནཾ སུཏྭཱ ཀོ རཉྙོ ཨཱནིསཾསོ ལདྡྷོཏི ཀསྶཙི ཨཱསངྐཱ སིཡཱཏི ཏདཱསངྐཱནིཝཏྟནཏྠཾ ཙོདནཾ ཨུདྡྷརིཏྭཱ པརིཧརིཏུཾ ‘‘ཨིདཾ པནཱ’’ཏིཨཱདི ཝུཏྟཾ. ‘‘ཨཡཉྷཱི’’ཏིཨཱདིནཱ ནིདྡཱལཱབྷཱདིཀཾ དིཊྛདྷམྨིཀསམྤརཱཡིཀཾ ཨནེཀཝིདྷཾ མཧཱནིསཾསཾ སརཱུཔཏོ ནིཡམེཏྭཱ དསྶེཏི. ཨེཏྠ ཧི ‘‘ཨཡཾ…པེ… ནིདྡཾ ལབྷཏཱི’’ཏི ཨིམིནཱ ནིདྡཱལཱབྷཾ དསྶེཏི, ཏདཱ ཀཱཡིཀཙེཏསིཀདུཀྑཱཔགཏབྷཱཝཉྩ ནིདྡཱལཱབྷསཱིསེན, ‘‘ཏིཎྞཾ…པེ… ཨཀཱསཱི’’ཏི ཨིམིནཱ ཏིཎྞཾ རཏནཱནཾ མཧཱསཀྐཱརཀིརིཡཾ, ‘‘པོཐུཛྫནིཀཱཡ…པེ… ནཱཧོསཱི’’ཏི ཨིམིནཱ སཱཏིསཡཾ པོཐུཛྫནིཀསདྡྷཱཔཊིལཱབྷཾ དསྶེཏཱིཏི ཨེཝམཱདི དིཊྛདྷམྨིཀོ, ‘‘ཨནཱགཏེ…པེ… པརིནིབྦཱཡིསྶཏཱི’’ཏི ཨིམིནཱ པན ཨུཀྐཾསཏོ སམྤརཱཡིཀོ དསྶིཏོ, ཨནཝསེསཏོ པན ཨཔརཱཔརེསུ བྷཝེསུ ཨཔརིམཱཎོཡེཝ སམྤརཱཡིཀོ ཝེདིཏབྦོ.

ཏཏྠ མདྷུརཱཡཱཏི མདྷུརརསབྷཱུཏཱཡ. ཨོཛཝནྟིཡཱཏི མདྷུརརསསྶཱཔི སཱརབྷཱུཏཱཡ ཨོཛཱཡ ཨོཛཝཏིཡཱ. པུཐུཛྫནེ བྷཝཱ པོཐུཛྫནིཀཱ. པཉྩ མཱརེ ཝིསེསཏོ ཛིཏཝཱཏི ཝིཛིཏཱཝཱི, པརཱུཔདེསཝིརཧཏཱ ཙེཏྠ ཝིསེསབྷཱཝོ. པཙྩེཀཾ ཨབྷིསམྦུདྡྷོཏི པཙྩེཀབུདྡྷོ, ཨནཱཙརིཡཀོ ཧུཏྭཱ སཱམཉྙེཝ སམྦོདྷིཾ ཨབྷིསམྦུདྡྷོཏི ཨཏྠོ. ཏཐཱ ཧི ‘‘པཙྩེཀབུདྡྷཱ སཡམེཝ བུཛ྄ཛྷནྟི, ན པརེ བོདྷེནྟི, ཨཏྠརསམེཝ ¶ པཊིཝིཛ྄ཛྷནྟི, ན དྷམྨརསཾ. ན ཧི ཏེ ལོཀུཏྟརདྷམྨཾ པཉྙཏྟིཾ ཨཱརོཔེཏྭཱ དེསེཏུཾ སཀྐོནྟི, མཱུགེན དིཊྛསུཔིནོ ཝིཡ, ཝནཙརཀེན ནགརེ སཱཡིཏབྱཉྫནརསོ ཝིཡ ཙ ནེསཾ དྷམྨཱབྷིསམཡོ ཧོཏི, སབྦཾ ཨིདྡྷིསམཱཔཏྟིཔཊིསམྦྷིདཱཔབྷེདཾ པཱཔུཎནྟཱི’’ཏི (སུ. ནི. ཨཊྛ. ༡.ཁགྒཝིསཱཎསུཏྟཝཎྞནཱ; ཨཔ. ཨཊྛ. ༡.༩༠, ༩༡) ཨཊྛཀཐཱསུ ཝུཏྟཾ.

ཨེཏྠཱཧ – ཡདི རཉྙོ ཀམྨནྟརཱཡཱབྷཱཝེ ཏསྨིཾཡེཝ ཨཱསནེ དྷམྨཙཀྑུ ཨུཔྤཛྫིསྶཐ, ཨཐ ཀཐཾ ཨནཱགཏེ པཙྩེཀབུདྡྷོ ཧུཏྭཱ པརིནིབྦཱཡིསྶཏི. ཡདི ཙ ཨནཱགཏེ པཙྩེཀབུདྡྷོ ཧུཏྭཱ པརིནིབྦཱཡིསྶཏི, ཨཐ ཀཐཾ ཏསྨིཾཡེཝ ཨཱསནེ དྷམྨཙཀྑུ ཨུཔྤཛྫིསྶཐ, ནནུ ཨིམེ སཱཝཀབོདྷིཔཙྩེཀབོདྷིཨུཔནིསྶཡཱ བྷིནྣནིསྶཡཱ དྭིནྣཾ བོདྷཱིནཾ ཨསཱདྷཱརཎབྷཱཝཏོ. ཨསཱདྷཱརཎཱ ཧི ཨེཏཱ དྭེ ཡཐཱཀྐམཾ པཉྩངྒདྭཡངྒསམྤཏྟིཡཱ, ཨབྷིནཱིཧཱརསམིདྡྷིཝསེན, པཱརམཱིསམྦྷརཎཀཱལཝསེན, ཨབྷིསམྦུཛ྄ཛྷནཝསེན ཙཱཏི? ནཱཡཾ ཝིརོདྷོ ཨིཏོ པརཏོཡེཝསྶ པཙྩེཀབོདྷིསམྦྷཱརཱནཾ སམྦྷརཎཱིཡཏྟཱ. སཱཝཀབོདྷིཡཱ བུཛ྄ཛྷནཀསཏྟཱཔི ཧི ཨསཏི ཏསྶཱ སམཝཱཡེ ཀཱལནྟརེ པཙྩེཀབོདྷིཡཱ བུཛ྄ཛྷིསྶནྟི ཏཐཱབྷིནཱིཧཱརསྶ སམྦྷཝཏོཏི. ཨཔརེ པན བྷཎནྟི – ‘‘པཙྩེཀབོདྷིཡཱཡེཝཱཡཾ རཱཛཱ ཀཏཱབྷིནཱིཧཱརོ. ཀཏཱབྷིནཱིཧཱརཱཔི ཧི ཏཏྠ ནིཡཏིམཔྤཏྟཱ ¶ ཏསྶ ཉཱཎསྶ པརིཔཱཀཾ ཨནུཔགཏཏྟཱ སཏྠུ སམྨུཁཱིབྷཱཝེ སཱཝཀབོདྷིཾ པཱཔུཎིསྶནྟཱིཏི བྷགཝཱ ‘སཙཱཡཾ བྷིཀྑཝེ རཱཛཱ’ཏིཨཱདིམཝོཙ, མཧཱབོདྷིསཏྟཱནམེཝ ཙ ཨཱནནྟརིཡཔརིམུཏྟི ཧོཏི, ན ཨིཏརེསཾ བོདྷིསཏྟཱནཾ. ཏཐཱ ཧི པཙྩེཀབོདྷིཡཾ ནིཡཏོ སམཱནོ དེཝདཏྟོ ཙིརཀཱལསམྦྷཱུཏེན ལོཀནཱཐེ ཨཱགྷཱཏེན གརུཏརཱནི ཨཱནནྟརིཡཀམྨཱནི པསཝི, ཏསྨཱ ཀམྨནྟརཱཡེན ཨཡཾ ཨིདཱནི ཨསམཝེཏདསྶནཱབྷིསམཡོ རཱཛཱ པཙྩེཀབོདྷིནིཡཱམེན ཨནཱགཏེ ཝིཛིཏཱཝཱི ནཱམ པཙྩེཀབུདྡྷོ ཧུཏྭཱ པརིནིབྦཱཡིསྶཏཱི’’ཏི དཊྛབྦཾ, ཡུཏྟཏརམེཏྠ ཝཱིམཾསིཏྭཱ གཧེཏབྦཾ.

ཡཐཱཝུཏྟཾ པཱལི༹མེཝ སཾཝཎྞནཱཡ ནིགམཝསེན དསྶེནྟོ ‘‘ཨིདམཝོཙཱ’’ཏིཨཱདིམཱཧ. ཏསྶཏྠོ ཧི ཧེཊྛཱ ཝུཏྟོཏི. ཨཔིཙ པཱལི༹ཡམནཱརུལ༹ྷམྤི ཨཏྠཾ སངྒཧེཏུཾ ‘‘ཨིདམཝོཙཱ’’ཏིཨཱདིནཱ ནིགམནཾ ཀརོཏཱིཏི དཊྛབྦཾ.

ཨིཏི ¶ སུམངྒལཝིལཱསིནིཡཱ དཱིགྷནིཀཱཡཊྛཀཐཱཡ པརམསུཁུམགམྦྷཱིརདུརནུབོདྷཏྠཔརིདཱིཔནཱཡ སུཝིམལཝིཔུལཔཉྙཱཝེཡྻཏྟིཡཛནནཱཡ ཨཛྫཝམདྡཝསོརཙྩསདྡྷཱསཏིདྷིཏིབུདྡྷིཁནྟིཝཱིརིཡཱདིདྷམྨསམངྒིནཱ སཱཊྛཀཐེ པིཊཀཏྟཡེ ཨསངྒཱསཾཧིརཝིསཱརདཉཱཎཙཱརིནཱ ཨནེཀཔྤབྷེདསཀསམཡསམཡནྟརགཧནཛ྄ཛྷོགཱཧིནཱ མཧཱགཎིནཱ མཧཱཝེཡྻཱཀརཎེན ཉཱཎཱབྷིཝཾསདྷམྨསེནཱཔཏིནཱམཐེརེན མཧཱདྷམྨརཱཛཱདྷིརཱཛགརུནཱ ཀཏཱཡ སཱདྷུཝིལཱསིནིཡཱ ནཱམ ལཱིནཏྠཔྤཀཱསནིཡཱ སཱམཉྙཕལསུཏྟཝཎྞནཱཡ ལཱིནཏྠཔྤཀཱསནཱ.

སཱམཉྙཕལསུཏྟཝཎྞནཱ ནིཊྛིཏཱ.

༣. ཨམྦཊྛསུཏྟཝཎྞནཱ

ཨདྡྷཱནགམནཝཎྞནཱ

༢༥༤. ཨེཝཾ ¶ ¶ སཱམཉྙཕལསུཏྟཾ སཾཝཎྞེཏྭཱ ཨིདཱནི ཨམྦཊྛསུཏྟཾ སཾཝཎྞེནྟོ ཡཐཱནུཔུབྦཾ སཾཝཎྞོཀཱསསྶ པཏྟབྷཱཝཾ ཝིབྷཱཝེཏུཾ, སཱམཉྙཕལསུཏྟསྶཱནནྟརཾ སངྒཱིཏསྶ སུཏྟསྶ ཨམྦཊྛསུཏྟབྷཱཝཾ པཀཱསེཏུཾ ‘‘ཨེཝཾ མེ སུཏཾ…པེ… ཀོསལེསཱུཏི ཨམྦཊྛསུཏྟ’’ནྟི ཨཱཧ. ཨེཝམཱིདིསེསུ. ཨིཏིསདྡོ ཙེཏྠ ཨཱདིཨཏྠོ, པདཏྠཝིཔལླཱསཛོཏཀོ པན ཨིཏིསདྡོ ལུཏྟནིདྡིཊྛོ, ཨཱདིསདྡལོཔོ ཝཱ ཨེས, ཨུཔལཀྑཎནིདྡེསོ ཝཱ. ཨཔུབྦཔདཝཎྞནཱ ནཱམ ཧེཊྛཱ ཨགྒཧིཏཏཱཡ ཨཔུབྦསྶ པདསྶ ཨཏྠཝིབྷཛནཱ. ‘‘ཧིཏྭཱ པུནཔྤུནཱགཏ-མཏྠཾ ཨཏྠཾ པཀཱསཡིསྶཱམཱི’’ཏི (དཱི. ནི. ཨཊྛ. ༡.གནྠཱརམྦྷཀཐཱ) ཧི ཝུཏྟཾ, ‘‘ཨནུཔུབྦཔདཝཎྞནཱ’’ཏི ཀཏྠཙི པཱཋོ, སོ ཨཡུཏྟོཝ ཊཱིཀཱཡ ཨནུདྡྷཊཏྟཱ, ཏཐཱ ཨསཾཝཎྞིཏཏྟཱ ཙ.

‘‘རཱཛཀུམཱརཱ གོཏྟཝསེན ཀོསལཱ ནཱམཱ’’ཏི (དཱི. ནི. ཊཱི. ༡.༢༥༤) ཨཱཙརིཡེན ཝུཏྟཾ. ཨཀྑརཙིནྟཀཱ པན ཝདནྟི ‘‘ཀོསཾ ལནྟི གཎྷནྟི, ཀུསལཾ ཝཱ པུཙྪནྟཱིཏི ཀོསལཱ’’ཏི. ཛནཔདིནོཏི ཛནཔདཝནྟོ, ཛནཔདསྶ ཝཱ ཨིསྶརཱ. ‘‘ཀོསལཱ ནཱམ རཱཛཀུམཱརཱ’’ཏི ཝུཏྟེཡེཝ སིདྡྷེཔི ‘‘ཛནཔདིནོ’’ཏི ཝཙནཾ སནྟེསུཔི ཨཉྙེསུ ཏཾཏཾནཱམཔཉྙཱཏེསུ ཏཏྠ ནིཝསནྟེསུ ཛནཔདིབྷཱཝཏོ ཏེསམེཝ ནིཝསནམུཔཱདཱཡ ཛནཔདསྶཱཡཾ སམཉྙཱཏི དསྶནཏྠཾ. ‘‘ཏེསཾ ནིཝཱསོ’’ཏི ཨིམིནཱ ‘‘ཀོསལཱནཾ ནིཝཱསཱ ཀོསལཱ’’ཏི ཏདྡྷིཏཾ དསྶེཏི. ‘‘ཨེཀོཔི ཛནཔདོ’’ཏི ཨིམིནཱ པན སདྡཏོཡེཝེཏཾ པུཐུཝཙནཾ, ཨཏྠཏོ པནེས ཨེཀོ ཨེཝཱཏི ཝིབྷཱཝེཏི. ཨཔི-སདྡོ ཙེཏྠ ཨནུགྒཧེ, ཏེན ཀཱམཾ ཨེཀོཡེཝེས ཛནཔདོ, ཏཐཱཔི ཨིམིནཱ ཀཱརཎེན པུཐུཝཙནམུཔཔནྣནྟི ཨནུགྒཎྷཱཏི. ཡདི ཨེཀོཝ ཛནཔདོ, ཀཐཾ ཏཏྠ བཧུཝཙནནྟི ཨཱཧ ‘‘རུལ༹ྷིསདྡེནཱ’’ཏིཨཱདི, རུལ༹ྷིསདྡཏྟཱ བཧུཝཙནམུཔཔནྣནྟི ཝུཏྟཾ ཧོཏི. ནིསྶིཏེསུ པཡུཏྟསྶ པུཐུཝཙནསྶ, པུཐུབྷཱཝསྶ ཝཱ ནིསྶཡེ ཨབྷིནིརོཔནཱ ཨིདྷ རུལ༹ྷི, ཏེན ཝུཏྟཾ ¶ ཨཱཙརིཡེན ཨིདྷ ཙེཝ ཨཉྙཏྠ ཙ མཛ྄ཛྷིམཱགམཊཱིཀཱདཱིསུ ‘‘ཨཀྑརཙིནྟཀཱ ཧི ཨཱིདིསེསུ ཋཱནེསུ ཡུཏྟེ ཝིཡ ཨཱིདིསལིངྒཝཙནཱནི ཨིཙྪནྟི, ཨཡམེཏྠ རུལ༹ྷི ཡཐཱ ‘ཨཉྙཏྠཱཔི ཀུརཱུསུ ཝིཧརཏི, ཨངྒེསུ ཝིཧརཏཱི’ཏི ¶ ཙཱ’’ཏི. ཀེཙི པན ཀོསལནཱམཱབྷིནིརོཔནམིཙྪནྟི, ཨཡུཏྟམེཏཾ པུཐུཝཙནསྶ ཨཔྤཡུཛྫིཏབྦཏྟཱ. ནཱམཱབྷིནིརོཔནཱཡ ཧི ཨེཀཝཙནམྤི བྷཝཏི ཡཐཱ ‘‘སཱིཧོ གཱཡཏཱི’’ཏི. ཏབྦིསེསིཏེཔི ཛནཔདསདྡེ ཛཱཏིསདྡཏྟཱ ཨེཀཝཙནམེཝ. ཏེནཱཧ ‘‘ཏསྨིཾ ཀོསལེསུ ཛནཔདེ’’ཏི, ཀོསལནཱམཀེ ཏསྨིཾ ཛནཔདེཏི ཨཏྠོ. ཨབྷཱུཏཏོ ཧི ཝོཧཱརམཏྟཾ རུལ༹ྷི, བྷཱུཏཏོཡེཝ ཨཏྠོ ཝིནིཙྪིནིཏབྦོ. ཡཐཱ ཧི –

‘‘སནྟི པུཏྟཱ ཝིདེཧཱནཾ, དཱིགྷཱཝུ རཊྛཝཌྜྷནོ;

ཏེ རཛྫཾ ཀཱརཡིསྶནྟི, མིཐིལཱཡཾ པཛཱཔཏཱི’’ཏི. (ཛཱ. ༢.༢༢.༢༧༦) ཨཱདཱིསུ –

ཏཾཔུཏྟསངྑཱཏསྶ ཨེཀཏྠསྶ རུལ༹ྷིཝསེན ‘‘པུཏྟཱ’’ཏི བཧུཝཙནཔཡོགོ, ཏཐཱ ཨིདྷཱཔི ཏནྣིཝཱསསངྑཱཏསྶ ཨེཀཏྠསྶ རུལ༹ྷིཝསེན ‘‘ཀོསལེསཱུ’’ཏི བཧུཝཙནཔཡོགོ ཧོཏི. ཡཐཱ ཙ ‘‘པཱཎཾ ན ཧཉྙེ, ན ཙ’དིནྣམཱདིཡེ’’ཏིཨཱདཱིསུ (ཨ. ནི. ༨.༤༢, ༤༣, ༤༥) ཛཱཏིཝསེན བཧྭཏྠཱནམེཀཝཙནཔཡོགོ, ཏཐཱ ཨིདྷཱཔི ཛཱཏིཝསེན ཨཝཡཝཔྤབྷེདེན བཧྭཏྠསྶ ‘‘ཛནཔདེ’’ཏི ཨེཀཝཙནཔཡོགོ ཧོཏི. ཝུཏྟཉྩ ཨཱཙརིཡེན མཛ྄ཛྷིམཱགམཊཱིཀཱཡཾ ‘‘ཏབྦིསེསནེཔི ཛནཔདསདྡེ ཛཱཏིསདྡེ ཨེཀཝཙནམེཝ. ཏེནཱཧ ‘ཏསྨིཾ ཨངྒེསུ ཛནཔདེ’ཏི’’.

ཨེཝཾ རུལ༹ྷིཝསེན བཧུམྷི ཝིཡ ཝཏྟབྦེ བཧུཝཙནཾ དསྶེཏྭཱ ཨིདཱནི བཧྭཏྠཝསེན བཧུམྤི ཨེཝ ཝཏྟབྦེ བཧུཝཙནཾ དསྶེནྟོ ‘‘པོརཱཎཱ པནཱཧཱུ’’ཏིཨཱདིམཱཧ. པན-སདྡོ ཙེཏྠ ཝིསེསཏྠཛོཏནོ, ཏེན པུཐུཨཏྠཝིསཡཏཱཡ ཨེཝེཏཾ པུཐུཝཙནཾ, ན རུལ༹ྷིཝསེནཱཏི ཝཀྑམཱནཾ ཝིསེསཾ ཛོཏེཏི. སོ ཧི པདེསོ ཏིཡོཛནསཏཔརིམཱཎཏཱཡ བཧུཔྤབྷེདོཏི, ཨིམསྨིཾ པན ནཡེ ཏེསུ ཀོསལེསུ ཛནཔདེསཱུཏི ཨཏྠོ ཝེདིཏབྦོ. མཧཱཔནཱདནྟི མཧཱཔནཱདཛཱཏཀ (ཛཱ. ༡.༣.༤༠, ༤༡, ༤༢) སུརུཙིཛཱཏཀེསུ (ཛཱ. ༡.༡༤.༡༠༢ ཨཱདཡོ) ཨཱགཏཾ སུརུཙིནོ ནཱམ ཝིདེཧརཉྙོ པུཏྟཾ མཧཱཔནཱདནཱམཀཾ རཱཛཀུམཱརཾ. ནཱནཱནཱཊཀཱནཱིཏི བྷཎྜུཀཎྜཔཎྜུཀཎྜཔམུཁཱནི ཚསཏསཧསྶཱནི ནཱནཱཝིདྷནཱཊཀཱནི, ཀཏྠཙི པན ཨཱདིསདྡོཔི དིཊྛོ, སོ ཛཱཏཀཊྛཀཐཱཡཾ ན དིསྶཏི, ཡདི ཙ དིསྶཏི, ཏེན ནཊལངྒྷཀཱདཱིནཾ སངྒཧོ དཊྛབྦོ. སིཏམཏྟམྤཱིཏི མིཧིཏམཏྟམྤི. ཏསྶ ¶ ཀིར དིབྦནཱཊཀཱནཾ ཨནནྟརབྷཝེཡེཝ དིཊྛཏྟཱ མནུསྶནཱཊཀཱནཾ ནཙྩཾ ཨམནུཉྙཾ ཨཧོསི. ནངྒལཱནིཔི ཚཌྜེཏྭཱཏི ཀསིཀམྨཔྤཧཱནཝསེན ནངྒལཱནི ¶ པཧཱཡ, ནིདསྶནམཏྟཉྩེཏཾ. ན ཧི ཀེཝལཾ ཀསྶཀཱ ཨེཝ, ཨཐ ཁོ ཨཉྙེཔི ཨུབྷཡརཊྛཝཱསིནོ མནུསྶཱ ཨཏྟནོ ཨཏྟནོ ཀིཙྩཾ པཧཱཡ ཏསྨིཾ མངྒལཊྛཱནེ སནྣིཔཏིཾསུ. ཏདཱ ཀིར མཧཱཔནཱདཀུམཱརསྶ པཱསཱདམངྒལཾ, ཚཏྟམངྒལཾ, ཨཱཝཱཧམངྒལནྟི ཏཱིཎི མངྒལཱནི ཨེཀཏོ ཨཀཾསུ, ཀཱསིཝིདེཧརཊྛཝཱསིནོཔི ཏཏྠ སནྣིཔཏིཏྭཱ ཨཏིརེཀསཏྟཝསྶཱནི ཚཎམནུབྷཝིཾསཱུཏི, ཨདྷུནཱ པན ‘‘ནངྒལཱདཱིནཱི’’ཏི པཱཋོ དིསྶཏི, སོ ན པོརཱཎཔཱཋོ ཊཱིཀཱཡམནུདྡྷཊཏྟཱ.

མཧཱཛནཀཱཡེ སནྣིཔཏིཏེཏི ཀེཙི ‘‘པཧཾསནཝིདྷིཾ དསྶེཏྭཱ རཱཛཀུམཱརཾ ཧཱསཱཔེསྶཱམཱ’’ཏི, ཀེཙི ‘‘ཏཾ ཀཱིལ༹ནཾ པསྶིསྶཱམཱ’’ཏི ཨེཝཾ མཧཱཛནསམཱུཧེ སནྣིཔཏིཏེ. ཨཏུལམྦཱབྷིརུཧནདཱརུཙིཏཀཔཝེསནཱདི ནཱནཱཀཱིལཱ༹ཡོ དསྶེཏྭཱ. སཀྐཔེསིཏོ ཀིར དིབྦནཱཊཀོ རཱཛངྒཎེ ཨཱཀཱསེ ཋཏྭཱ ཨུཔཌྜྷབྷཱགཾ ནཱམ དསྶེཏི, ཨེཀོཝ ཧཏྠོ, ཨེཀོ པཱདོ, ཨེཀཾ ཨཀྑི, ཨེཀཱ དཱཋཱ ནཙྩཏི ཙལཏི, ཨུཔཌྜྷཾ ཕནྡཏི, སེསཾ ནིཙྩལམཧོསི, ཏཾ དིསྭཱ མཧཱཔནཱདོ ཐོཀཾ ཧསིཏམཀཱསི, ཨིམམཏྠཾ སནྡྷཱཡ ‘‘སོ དིབྦནཱཊཀཾ དསྶེཏྭཱ ཧསཱཔེསཱི’’ཏི ཝུཏྟཾ. སུཧཛྫཱ ནཱམ ཝིསྶཱསིཀཱ ‘‘སུཊྛུ ཧདཡམེཏེས’’ནྟི ཀཏྭཱ. ཨཱདིསདྡེན ཉཱཏཀཔརིཛནཱདཱིནཾ སངྒཧོ. ཏསྨཱཏི ཏཐཱ ཝཙནཏོ. ཏཾ ཀུསལནྟི ཝཙནཾ ཨུཔཱདཱཡཱཏི ཨེཏྠ ‘‘ཀཙྩི ཀུསལཾ? ཨཱམ ཀུསལ’’ནྟི ཝཙནཔཊིཝཙནཝསེན པཝཏྟཀུསལཝཱདིཏཱཡ ཏེ མནུསྶཱ ཨཱདིཏོ ‘‘ཀུསལཱ’’ཏི སམཉྙཾ ལབྷིཾསུ, ཏེསཾ ཀུསལཱནཾ ཨིསྶརཱཏི རཱཛཀུམཱརཱ ཀོསལཱ ནཱམ ཛཱཏཱ, ཏེསཾ ནིཝཱསཊྛཱནཏཱཡ པན པདེསོ ཀོསལཱཏི པུབྦེ ཝུཏྟནཡམེཝ. ཏེནཱཧ ‘‘སོ པདེསོ ཀོསལཱཏི ཝུཙྩཏཱི’’ཏི. ཨེཝཾ མཛ྄ཛྷིམཱགམཊཱིཀཱཡཾ ཨཱཙརིཡེནེཝ ཝུཏྟཾ. ཏཏྲཱཡམདྷིཔྤཱཡོ སིཡཱ – ‘‘སོ པདེསོ ཀོསལཱཏི ཝུཙྩཏཱི’’ཏི སཉྙཱིསཉྙཱ ཡཐཱཀྐམཾ ཨེཀཝཙནབཧུཝཙནཝསེན ཝུཏྟཏྟཱ པུརིམནཡེ ཝིཡ ཨིདྷཱཔི རུལ༹ྷིཝསེནེཝ བཧུཝཙནཾ ཧོཏི. རཱཛཀུམཱརཱནཾ ནཱམལཱབྷཧེཏུམཏྟཉྷེཏྠ ཝིསེསོཏི. ཨིདྷ པན ཨཱཙརིཡེན ཨེཝཾ ཝུཏྟཾ སོ པདེསོཏི པདེསསཱམཉྙཏོ ཝུཏྟཾ, ཝཙནཝིཔལླཱསེན ཝཱ, ཏེ པདེསཱཏི ཨཏྠོ. ཀོསལཱཏི ཝུཙྩཏི ཀུསལཱ ¶ ཨེཝ ཀོསལཱཏི ཀཏྭཱ’’ཏི (དཱི. ནི. ཊཱི. ༡.༢༥༤) ཏཏྲཱཡམདྷིཔྤཱཡོ སིཡཱ – སོ པདེསོཏི ཛཱཏིསདྡཝསེན, ཝཙནཝིཔལླཱསེན ཝཱ ཝུཏྟཏྟཱ པུཐུཨཏྠཝིསཡཏཱཡ ཨེཝ བཧུཝཙནཾ ཧོཏི. པདེསསྶ ནཱམལཱབྷཧེཏུ ཧེཏྠ ཝིསེསོཏི. ‘‘ཀུསལ’’ནྟི ཧི ཝཙནམུཔཱདཱཡ རུལ༹ྷིནཱམཝསེན ཝུཏྟནཡེན ཀོསལཱ ཡཐཱ ‘‘ཡེཝཱཔནཀཾ, ནཏུམྷཱཀཝགྒོ’’ཏི. ཨཔིཙ ཝཙནཔཊིཝཙནཝསེན ‘‘ཀུསལ’’ནྟི ཝདནྟི ཨེཏྠཱཏི ཀོསལཱ. ཝིཙིཏྲཱ ཧི ཏདྡྷིཏཝུཏྟཱིཏི. ཀུསལནྟི ཙ ཨཱརོགྱཾ ‘‘ཀཙྩི ནུ བྷོཏོ ཀུསལཾ, ཀཙྩི བྷོཏོ ཨནཱམཡ’’ནྟིཨཱདཱིསུ (ཛཱ. ༡.༡༥.༡༤༥; ཛཱ. ༢.༢༠.༡༢༩) ཝིཡ, ཀཙྩི ཏུམྷཱཀཾ ཨཱརོགྱཾ ཧོཏཱིཏི ཨཏྠོ, ཚེཀཾ ཝཱ ‘‘ཀུསལཱ ནཙྩགཱིཏསྶ ¶ , སིཀྑིཏཱ ཙཱཏུརིཏྠིཡོ’’ཏིཨཱདཱིསུ (ཛཱ. ༢.༢༢.༩༤) ཝིཡ, ཀཙྩི ཏེསཾ ནཱཊཀཱནཾ ཚེཀཏཱ ཧོཏཱིཏི ཨཏྠོ.

ཙརཎཾ ཙཱརིཀཱ, ཙརཎཾ ཝཱ ཙཱརོ, སོ ཨེཝ ཙཱརིཀཱ, ཏཡིདཾ མགྒགམནམེཝ ཨིདྷཱདྷིཔྤེཏཾ, ན ཙུཎྞིཀགམནམཏྟནྟི དསྶེཏུཾ ‘‘ཨདྡྷཱནགམན’’ནྟི ཝུཏྟཾ, བྷཱཝནཔུཾསཀཉྩེཏཾ, ཨདྡྷཱནགམནསངྑཱཏཱཡ ཙཱརིཀཱཡ ཙརམཱནོཏི ཝུཏྟཾ ཧོཏི, ཨབྷེདེཔི ཝཱ བྷེདཝོཧཱརེན ཝུཏྟཾ ཡཐཱ ‘‘དིཝཱཝིཧཱརཾ ནིསཱིདཱི’’ཏི, (མ. ནི. ༡.༢༥༦) ཨདྡྷཱནགམནསངྑཱཏཾ ཙཱརིཀཾ ཙརམཱནོ, ཙརཎཾ ཀརོནྟོཏི ཨཏྠོ. སབྦཏྠཀོ ཧི ཀརབྷཱུདྷཱཏཱུནམཏྠོཏི. ‘‘ཨདྡྷཱནམགྒ’’ནྟིཔི ཀཏྠཙི པཱཋོ, སོ ན སུནྡརོ. ན ཧི ཙཱརིཀཱསདྡོ མགྒཝཱཙཀོཏི. ཨིདཱནི ཏཾ ཝིབྷཱགེན དསྶེཏྭཱ ཨིདྷཱདྷིཔྤེཏཾ ནིཡམེནྟོ ‘‘ཙཱརིཀཱ ཙ ནཱམེསཱ’’ཏིཨཱདིམཱཧ. སཱཝཀཱནམྤི རུལ༹ྷིཝསེན ཙཱརིཀཱཡ སམྦྷཝཏོ ཏཏོ ཝིསེསེཏི ‘‘བྷགཝཏོ’’ཏི ཨིམིནཱ. ཏཐཱ ཧི མཛ྄ཛྷིམཱགམཊྛཀཐཱཡཾ ཝུཏྟཾ ‘‘ཙཱརིཀཾ ཙརམཱནོཏི ཨེཏྠ ཀིཉྩཱཔི ཨཡཾ ཙཱརིཀཱ ནཱམ མཧཱཛནསངྒཧཏྠཾ བུདྡྷཱནཾཡེཝ ལབྦྷཏི, བུདྡྷེ ཨུཔཱདཱཡ པན རུལ༹ྷིསདྡེན སཱཝཀཱནམྤི ཝུཙྩཏི ཀིལཉྫཱདཱིཧི ཀཏབཱིཛནཱིཔི ཏཱལཝཎྚཾ ཝིཡཱ’’ཏི. དཱུརེཔཱིཏི ཨེཏྠ པི-སདྡེན, ཨཔི-སདྡེན ཝཱ ནཱཏིདཱུརེཔཱིཏི སམྤིཎྜནཾ ཏཏྠཱཔི ཙཱརིཀཱསམྦྷཝཏོ. བོདྷནེཡྻཔུགྒལནྟི ཙཏུསཙྩཔཊིཝེདྷཝསེན བོདྷནཱརཧཔུགྒལཾ. སཧསཱ གམནནྟི སཱིགྷགམནཾ. ‘‘མཧཱཀསྶཔསྶ པཙྩུགྒམནཱདཱིསཱུ’’ཏི ཝུཏྟམེཝ སརཱུཔཏོ དསྶེཏི ‘‘བྷགཝཱ ཧཱི’’ཏིཨཱདིནཱ. པཙྩུགྒཙྪནྟོཏི པཊིམུཁཾ གཙྪནྟོ, པཙྩུཊྛཧནྟོཏི ཨཏྠོ. ‘‘ཏཐཱ’’ཏི ཨིམིནཱ ‘‘ཏིཾསཡོཛན’’ནྟི པདམནུཀཌྜྷཏི. པཀྐུསཱཏི ནཱམ གནྡྷཱརརཱཛཱ. མཧཱཀཔྤིནོ ¶ ནཱམ ཀུཀྐུཊཝཏཱིརཱཛཱ. དྷནིཡོ ནཱམ ཀོརཎྜསེཊྛིཔུཏྟོ གོཔོ.

ཨེཝཾ དྷམྨགརུཏཱཀིཏྟནམུཁེན མཧཱཀསྶཔཔཙྩུགྒམནཱདཱིནི (སཾ. ནི. ཨཊྛ. ༢.༡༥༤) ཨེཀདེསེན དསྶེཏྭཱ ཨིདཱནི ཝནཝཱསིཏིསྶསཱམཎེརསྶ ཝཏྠུཾ ཝིཏྠཱརེཏྭཱ ཙཱརིཀཾ དསྶེཏུཾ ‘‘ཨེཀདིཝས’’ནྟིཨཱདི ཨཱརདྡྷཾ. ཀོ པནེས ཏིསྶསཱམཎེརོ ནཱམ? སཱཝཏྠིཡཾ དྷམྨསེནཱཔཏིནོ ཨུཔཊྛཱཀཀུལེ ཛཱཏོ མཧཱཔུཉྙོ ‘‘པིཎྜཔཱཏདཱཡཀཏིསྶོ, ཀམྦལདཱཡཀཏིསྶོ’’ཏི ཙ པུབྦེ ལདྡྷནཱམོ པཙྪཱ ‘‘ཝནཝཱསིཏིསྶོ’’ཏི པཱཀཊོ ཁཱིཎཱསཝསཱམཎེརོ. ཝིཏྠཱརོ དྷམྨཔདེ (དྷ. པ. ཨཊྛ. ༡.༧༤ ཝནཝཱསཱིཏིསྶསཱམཎེརཝཏྠུ). ཨཱཀཱསགཱམཱིཧི སདྡྷིཾ ཨཱཀཱསེནེཝ གནྟུཀཱམོ བྷགཝཱ ‘‘ཚལ༹བྷིཉྙཱནཾ ཨཱརོཙེཧཱི’’ཏི ཨཝོཙ. ཏསྶཱཏི ཏིསྶསཱམཎེརསྶ. ཏནྟི བྷགཝནྟཾ སདྡྷིཾ བྷིཀྑུསངྒྷེན ཙཱིཝརཾ པཱརུཔནྟཾ. ནོ ཐེརོ ནོ ཨོརམཏྟཀོ ཝཏཱཏི སམྦནྡྷོ, གུཎེན ལཱམཀཔྤམཱཎིཀོ ནོ ཧོཏཱིཏི ཨཏྠོ.

ཨཏྟནོ ¶ པཏྟཱསནེཏི བྷིཀྑཱུནཾ ཨཱསནཔརིཡནྟེ. ཏེསཾ གཱམིཀཱནཾ དཱནཔཊིསཾཡུཏྟཾ མངྒལཾ ཝཏྭཱ. ཀསྨཱ པན སདེཝཀསྶ ལོཀསྶ མགྒདེསཀོཔི སམཱནོ བྷགཝཱ ཨེཝམཱཧཱཏི ཙོདནཾ སོདྷེཏུཾ ‘‘བྷགཝཱ ཀིརཱ’’ཏིཨཱདི ཝུཏྟཾ. མགྒདེསཀོཏི ནིབྦཱནམགྒསྶ, སུགཏིམགྒསྶ ཝཱ དེསཀོ.

ཏཱཡཱཏི ཨརཉྙསཉྙཱཡ. སངྒྷཀམྨཝསེན སིཛ྄ཛྷམཱནཱཔི ཨུཔསམྤདཱ སཏྠུ ཨཱཎཱཝསེན སིཛ྄ཛྷནཏོ ‘‘བུདྡྷདཱཡཛྫཾ ཏེ དསྶཱམཱི’’ཏི ཝུཏྟནྟི ཝདནྟི. ཨཔརེ པན ‘‘ཨཔརིཔུཎྞཝཱིསཏིཝསྶསྶེཝ ཏསྶ ཨུཔསམྤདཾ ཨནུཛཱནནྟོ སཏྠཱ ‘བུདྡྷདཱཡཛྫཾ ཏེ དསྶཱམཱི’ཏི ཨཝོཙཱ’’ཏི ཝདནྟི. དྷམྨསེནཱཔཏིནཱ ཨུཔཛ྄ཛྷཱཡེན ཨུཔསམྤཱདེཏྭཱ, ཏཏོཡེཝེས དྷམྨསེནཱཔཏིནོ སདྡྷིཝིཧཱརིཀོཏི ཨཊྛཀཐཱསུ ཝུཏྟོ. དྷམྨཔདཊྛཀཐཱཡཾ པན དྷམྨསེནཱཔཏིཨཱདིཐེརཱནཾ ཙཏྟཱལཱིསབྷིཀྑུསཧསྶཔརིཝཱརཱནཾ ཨཏྟནོ ཨཏྟནོ པརིཝཱརེཧི སདྡྷིཾ པཙྩེཀཾ གམནཾ, བྷགཝཏོ ཙ ཨེཀཀསྶེཝ གམནཾ ཁུདྡཀབྷཱཎཀཱནཾ མཏེན ཝུཏྟཾ, ཨིདྷ, པན མཛ྄ཛྷིམཱགམཊྛཀཐཱཡཉྩ (མ. ནི. ཨཊྛ. ༢.༦༥) ཨཉྙཐཱ གམནཾ དཱིགྷབྷཱཎཀམཛ྄ཛྷིམབྷཱཎཀཱནཾ མཏེནཱཏི དཊྛབྦཾ. ཨཡནྟི མཧཱཀསྶཔཱདཱིནམཏྠཱཡ ཙཱརིཀཱ. ཡཾ པན ཨནུགྒཎྷནྟསྶ བྷགཝཏོ གམནཾ, ཨཡཾ ཨཏུརིཏཙཱརིཀཱ ནཱམཱཏི སམྦནྡྷོ.

ཨིམཾ ¶ པན ཙཱརིཀནྟི ཨཏུརིཏཙཱརིཀཾ. མཧཱམཎྜལནྟི མཛ྄ཛྷིམདེསཔརིཡཱཔནྣེནེཝ བཱཧིརིམེན པམཱཎེན པརིཙྪིནྣཏྟཱ མཧནྟཏརཾ མཎྜལཾ. མཛ྄ཛྷིམམཎྜལནྟི ཨིཏརེསཾ ཨུབྷིནྣཾ ཝེམཛ྄ཛྷེ པཝཏྟཾ མཎྜལཾ. ཨནྟོམཎྜལནྟི ཨིཏརེཧི ཁུདྡཀཾ མཎྜལཾ, ཨིཏརེསཾ ཝཱ ཨནྟོགདྷཏྟཱ ཨནྟིམཾ མཎྜལཾ, ཨབྦྷནྟརིམཾ མཎྜལནྟི ཝུཏྟཾ ཧོཏི. ཀིཾ པནིམེསཾ པམཱཎནྟི ཨཱཧ ‘‘ཀཏྠཱ’’ཏིཨཱདི. ཏཏྠ ནཝཡོཛནསཏིཀཏཱ མཛ྄ཛྷིམདེསཔརིཡཱཔནྣཝསེནེཝ གཧེཏབྦཱ ཏཏོ པརཾ ཨཏུརིཏཙཱརིཀཱཡ ཨགམནཏོ. ཏདུཏྟརི ཧི ཏུརིཏཙཱརིཀཱཡ ཨེཝ ཏཐཱགཏོ གཙྪཏི, ན ཨཏུརིཏཙཱརིཀཱཡ. པཝཱརེཏྭཱཝ ཙཱརིཀཱཙརཎཾ བུདྡྷཱཙིཎྞནྟི ཝུཏྟཾ ‘‘མཧཱཔཝཱརཎཱཡ པཝཱརེཏྭཱ’’ཏིཨཱདི. པཱཊིཔདདིཝསེཏི པཋམཀཏྟིཀཔུཎྞམིཡཱ ཨནནྟརེ པཱཊིཔདཝསེ. སམནྟཱཏི གཏགཏཊྛཱནསྶ ཙཏཱུསུ པསྶེསུ སམནྟཏོ. མཧཱཛནཀཱཡསྶ སནྣིཔཏནཏོ པུརིམཾ པུརིམཾ ཨཱགཏཱ ནིམནྟེཏུཾ ལབྷནྟི. ཏཐཱ སནྣིཔཏནམེཝ དསྶེཏུཾ ‘‘ཨིཏརེསཱུ’’ཏིཨཱདི ཝུཏྟཾ. སམཐཝིཔསྶནཱ ཏརུཎཱ ཧོནྟཱིཏི ཨེཏྠ སམཐསྶ ཏརུཎབྷཱཝོ ཨུཔཙཱརསམཱདྷིཝསེན, ཝིཔསྶནཱཡ པན སངྑཱརཔརིཙྪེདཉཱཎཾ, ཀངྑཱཝིཏརཎཉཱཎཾ, སམྨསནཉཱཎཾ, མགྒཱམགྒཉཱཎནྟི ཙཏུནྣཾ ཉཱཎཱནཾ ཝསེན ཝེདིཏབྦོ. ཏརུཎཝིཔསྶནཱཏི ཧི ཏེསཾ ཙཏུནྣཾ ཉཱཎཱནམདྷིཝཙནཾ. པཝཱརཎཱསངྒཧཾ དཏྭཱཏི ཨནུམཏིདཱནཝསེན དཏྭཱ. ཀཏྟིཀཔུཎྞམཱཡནྟི པཙྪིམཀཏྟིཀཔུཎྞམིཡཾ. ‘‘མིགསིརསྶ པཋམཔཱཊིཔདདིཝསེ’’ཏི ¶ ཨིདཾ མཛ྄ཛྷིམདེསཝོཧཱརཝསེན མིགསིརམཱསསྶ པཋམཾ པཱཊིཔདདིཝསཾ སནྡྷཱཡ ཝུཏྟཾ, ཨེཏརཧི པཝཏྟཝོཧཱརཝསེན པན པཙྪིམཀཏྟིཀམཱསསྶ ཀཱལ༹པཀྑཔཱཊིཔདདིཝསོ ཝེདིཏབྦོ.

ཨཉྙེནཔི ཀཱརཎེནཱཏི བྷིཀྑཱུནཾ སམཐཝིཔསྶནཱཏརུཎབྷཱཝཏོ ཨཉྙེནཔི མཛ྄ཛྷིམམཎྜལེ ཝེནེཡྻཱནཾ ཉཱཎཔརིཔཱཀཱདིཀཱརཎེན. ཙཏུམཱསནྟི ཨཱསལ༹ྷཱིཔུཎྞམིཡཱ པཱཊིཔདཏོ ཡཱཝ པཙྪིམཀཏྟིཀཔུཎྞམཱི, ཏཱཝ ཙཏུམཱསཾ. ‘‘སམནྟཱ ཡོཛནསཏ’’ནྟིཨཱདིནཱ ཝུཏྟནཡེནེཝ. ཝསནཾ ཝསྶཾ, ཝསནཀིརིཡཱ, ཝུཏྠཾ ཝསིཏཾ ཝསྶམསྶཱཏི ཝུཏྠཝསྶོ, ཏསྶ. ཏཐཱགཏེན ཝིནེཏབྦཏྟཱ ‘‘བྷགཝཏོ ཝེནེཡྻསཏྟཱ’’ཏི སཱམིནིདྡེསོ ཝུཏྟོ, ཀཏྟུནིདྡེསོ ཝཱ ཨེས. ཝེནེཡྻསཏྟཱཏི ཙ ཙརིཏཱནུརཱུཔཾ ཝིནེཏབྦསཏྟཱ. ཨིནྡྲིཡཔརིཔཱཀཾ ཨཱགམཡམཱནོཏི སདྡྷཱདིཨིནྡྲིཡཱནཾ ཝིམུཏྟིཔརིཔཱཙནབྷཱཝེན པརིཔཀྐཾ པཊིམཱནེནྟོ. ཕུསྶམཱགྷཕགྒུཎཙིཏྟམཱསཱནཾ ¶ ཨཉྙཏརམཱསསྶ པཋམདིཝསེ ནིཀྑམནཏོ མཱསནིཡམོ ཨེཏྠ ན ཀཏོཏི དཊྛབྦཾ. ཏེནཱཧ ‘‘ཨེཀམཱསཾ ཝཱ དྭིཏིཙཏུམཱསཾ ཝཱ ཏཏྠེཝ ཝསིཏྭཱ’’ཏི. ཏཏྠེཝཱཏི ཝསྶཱུཔགམནཊྛཱནེ ཨེཝ. ‘‘སཏྟཧི ཝཱ’’ཏིཨཱདི ‘‘ཨེཀམཱསཾ ཝཱ’’ཏིཨཱདིནཱ ཡཐཱཀྐམཾ ཡོཛེཏབྦཾ – ཡདི ཨཔརམྤི ཨེཀམཱསཾ ཏཏྠེཝ ཝསཏི, སཏྟཧི མཱསེཧི ཙཱརིཀཾ པརིཡོསཱཔེཏི. ཡདི དྭིམཱསཾ ཚཧི, ཡདི ཏིམཱསཾ པཉྩཧི, ཡདི ཙཏུམཱསཾ ཏཏྠེཝ ཝསཏི, ཙཏཱུཧི མཱསེཧི ཙཱརིཀཾ པརིཡོསཱཔེཏཱིཏི. ཀསྨཱ པན ཙཱརིཀཱགམནནྟི ཨཱསངྐཱནིཝཏྟནཏྠཾ ‘‘ཨིཏཱི’’ཏིཨཱདི ཝུཏྟཾ. ཨཏིརེཀཾ ཛརཱདུབྦལོ བཱལ༹ྷཛིཎྞོ. ཏེ ཀདཱ པསྶིསྶནྟི, ན པསྶིསྶནྟི ཨེཝ. ལོཀཱནུཀམྤཀཱཡཱཏི ལོཀཱནུཀམྤཀཱཡ ཨེཝ. ཏེན ཝུཏྟཾ ‘‘ན ཙཱིཝརཱདིཧེཏཱུ’’ཏི.

ཛངྒྷཝིཧཱརཝསེནཱཏི ཛངྒྷཱཧི ཝིཙརཎཝསེན, ཛངྒྷཱཧི ཝིཙརིཏྭཱ ཏཏྠ ཏཏྠ ཀཏིཔཱཧཾ ནིཝསནཝསེན ཝཱ. སབྦིརིཡཱཔཐསཱདྷཱརཎཉྷི ཝིཧཱརཝཙནཾ. སརཱིརཕཱསུཀཏྠཱཡཱཏི ཨེཀསྨིཾཡེཝ ཋཱནེ ནིབདྡྷཝཱསཝསེན ཨུསྶནྣདྷཱཏུཀསྶ སརཱིརསྶ ཝིཙརཎེན ཕཱསུབྷཱཝཏྠཱཡ. ཨཊྛུཔྤཏྟིཀཱལཱབྷིཀངྑནཏྠཱཡཱཏི ཨགྒིཀྑནྡྷོཔམསུཏྟ (ཨ. ནི. ༧.༧༢) མགྷདེཝཛཱཏཀཱདི (ཛཱ. ༡.༡.༩) དེསནཱནཾ ཝིཡ དྷམྨདེསནཱཡ ཨབྷིཀངྑིཏབྦཨཊྛུཔྤཏྟིཀཱལཏྠཱཡ, ཨཊྛུཔྤཏྟིཀཱལསྶ ཝཱ ཨབྷིཀངྑནཏྠཱཡ, ཨཊྛུཔྤཏྟིཀཱལེ དྷམྨདེསནཏྠཱཡཱཏི ཝུཏྟཾ ཧོཏི. སིཀྑཱཔདཔཉྙཱཔནཏྠཱཡཱཏི སུརཱཔཱནསིཀྑཱཔདཱདི (པཱཙི. ༣༢༧, ༣༢༨, ༣༢༩) པཉྙཱཔནེ ཝིཡ སིཀྑཱཔདཱནཾ པཉྙཱཔནཏྠཱཡ. བོདྷནཏྠཱཡཱཏི ཨངྒུལིམཱལཱདཡོ (མ. ནི. ༢.༣༤༧) ཝིཡ བོདྷནེཡྻསཏྟེ ཙཏུསཙྩབོདྷནཏྠཱཡ. མཧཏཱཏི མཧཏིཡཱ. ཀཉྩི, ཀཏིཔཡེ ཝཱ པུགྒལེ ཨུདྡིསྶ ¶ ཙཱརིཀཱ ནིབདྡྷཙཱརིཀཱ. ཏདཉྙཱ སམྦཧུལེ ཨུདྡིསྶ གཱམནིགམནགརཔཊིཔཱཊིཡཱ ཙཱརིཀཱ ཨནིབདྡྷཙཱརིཀཱ. ཏེནཱཧ ‘‘ཏཏྠཱ’’ཏིཨཱདི. ཡཾ ཙརཏཱིཏི ཀིརིཡཱཔརཱམསནཾ.

‘‘ཨེསཱ ཨིདྷ ཨདྷིཔྤེཏཱ’’ཏི ཝུཏྟམེཝ ཝིཏྠཱརཏོ དསྶེཏུཾ ‘‘ཏདཱ ཀིརཱ’’ཏིཨཱདི ཝུཏྟཾ. དསསཧསྶིལོཀདྷཱཏུཡཱཏི ཛཱཏིཀྑེཏྟབྷཱུཏཾ དསསཧསྶཙཀྐཝཱལ༹ཾ སནྡྷཱཡ ཝུཏྟཾ. ཀསྨཱཏི ཙེ? ཏཏྠེཝ བྷབྦསཏྟཱནཾ སམྦྷཝཏོ. ཏཏྠ ཧི སཏྟེ བྷབྦེ པརིཔཀྐིནྡྲིཡེ པསྶིཏུཾ བུདྡྷཉཱཎཾ ཨབྷིནཱིཧརིཏྭཱ ཋིཏོ བྷགཝཱ ཉཱཎཛཱལཾ པཏྠརཏཱིཏི ཝུཙྩཏི, ཨིདཉྩ དེཝབྲཧྨཱནཾ ¶ ཝསེན ཝུཏྟཾ. མནུསྶཱ པན ཨིམསྨིཾཡེཝ ཙཀྐཝཱལེ༹, ཨིམསྨིཾཡེཝ ཙ སཔརིཝཱརེ ཛམྦུདཱིཔེ བོདྷནེཡྻཱ ཧོནྟི. བོདྷནེཡྻབནྡྷཝེཏི བོདྷནེཡྻསཏྟསངྑཱཏེ བྷགཝཏོ བནྡྷཝེ. གོཏྟཱདིསམྦནྡྷཱ ཝིཡ ཧི སཙྩཔཊིཝེདྷསམྦནྡྷཱ ཝེནེཡྻཱ བྷགཝཏོ བནྡྷཝཱ ནཱམཱཏི. གོཙརབྷཱཝཱུཔགམནཾ སནྡྷཱཡ ‘‘སབྦཉྙུཏཉྙཱཎཛཱལསྶ ཨནྟོ པཝིཊྛོ’’ཏི ཝུཏྟཾ. བྷགཝཱ ཀིར མཧཱཀརུཎཱསམཱཔཏྟིཾ སམཱཔཛྫིཏྭཱ ཏཏོ ཝུཊྛཱཡ ‘‘ཡེ སཏྟཱ བྷབྦཱ པརིཔཀྐཉཱཎཱ, ཏེ མཡ྄ཧཾ ཉཱཎསྶ ཨུཔཊྛཧནྟཱུ’’ཏི ཙིཏྟཾ ཨདྷིཊྛཱཡ སམནྣཱཧརཏི, ཏསྶ སཧསམནྣཱཧཱརཱ ཨེཀོ ཝཱ དྭེ ཝཱ སམྦཧུལཱ ཝཱ ཏདཱ ཝིནཡཱུཔགཱ ཝེནེཡྻཱ ཉཱཎསྶ ཨཱཔཱཐམཱགཙྪནྟི, ཨཡམེཏྠ བུདྡྷཱནུབྷཱཝོ. ཨེཝམཱཔཱཐགཏཱནཾ པན ནེསཾ ཨུཔནིསྶཡཾ པུབྦཙརིཡཾ, པུབྦཧེཏུཾ, སམྤཏི ཝཏྟམཱནཉྩ པཊིཔཏྟིཾ ཨོལོཀེཏི. ཝེནེཡྻསཏྟཔརིགྒཎྷནཏྠཉྷི སམནྣཱཧཱརེ ཀཏེ པཋམཾ ནེསཾ ཝེནེཡྻབྷཱཝེན ཨུཔཊྛཱནཾ ཧོཏི, ཨཐ ‘‘ཀིཾ ནུ ཁོ བྷཝིསྶཏཱི’’ཏི སརཎགམནཱདིཝསེན ཀཉྩི ནིཔྥཏྟིཾ ཝཱིམཾསམཱནོ པུབྦཱུཔནིསྶཡཱདཱིནི ཨོལོཀེཏི. ཏེནཱཧ ‘‘ཨཐ བྷགཝཱ’’ཏིཨཱདི. སོཏི ཨམྦཊྛོ. ཝཱདཔཊིཝཱདཾ ཀཏྭཱཏི ‘‘ཨེཝཾ ནུ ཏེ ཨམྦཊྛཱ’’ཏིཨཱདིནཱ (དཱི. ནི. ༡.༢༦༢) མཡཱ ཝུཏྟཝཙནསྶ ‘‘ཡེ ཙ ཁོ ཏེ བྷོ གོཏམ མུཎྜཀཱ སམཎཀཱ’’ཏིཨཱདིནཱ (དཱི. ནི. ༡.༢༦༣) པཊིཝཙནཾ དཏྭཱ, ཨསབྦྷིཝཱཀྱནྟི ཨསཔྤུརིསཝཱཙཾ, ཏིཀྑཏྟུཾ ཨིབྦྷཝཱདནིཔཱཏནཝསེན ནཱནཔྤཀཱརཾ སཱདྷུསབྷཱཝཱཡ ཝཱཙཱཡ ཝཏྟུམཡུཏྟཾ ཝཱཀྱཾ ཝཀྑཏཱིཏི ཝུཏྟཾ ཧོཏི. ནིབྦིསེཝནནྟི ཝིགཏཏུདནཾ, མཱནདཔྤཝསེན ཨཔགཏཔརིནིཔྥནྡནནྟི ཨཏྠོ.

ཨཝསརིཏབྦནྟི ཨུཔགནྟབྦཾ. ཏསྶ གཱམསྶ ཨིདཾ ནཱམམཏྟཾ, ཀིམེཏྠ ཨཏྠཔརིཡེསནཱཡཱཏི ཝུཏྟཾ ‘‘ཨིཛ྄ཛྷཱནངྒལནྟིཔི པཱཋོ’’ཏི. ‘‘ཡེན དིསཱབྷཱགེནཱ’’ཏི ཀརཎནིདྡེསཱནུརཱུཔཾ ཀརཎཏྠེ ཨུཔཡོགཝཙནནྟི དསྶེཏི ‘‘ཏེན ཨཝསརཱི’’ཏི ཨིམིནཱ. ‘‘ཡསྨིཾ པདེསེ’’ཏི པན བྷུམྨནིདྡེསཱནུརཱུཔཾ ‘‘ཏཾ ཝཱ ཨཝསརཱི’’ཏི ཝུཏྟཾ. ཏདུབྷཡམེཝཏྠཾ ཝིཝརཏི ‘‘ཏེན དིསཱབྷཱགེནཱ’’ཏིཨཱདིནཱ. གཏོཏི ཨུཔགཏོ, ཨགམཱསཱིཏི ཨཏྠོ. པུན གཏོཏི སམྤཏྟོ, སམྤཱཔུཎཱིཏི ཨཏྠོ. ‘‘ཨིཙྪཱནངྒལེ’’ཏི ཨིདཾ ཏདཱ བྷགཝཏོ གོཙརགཱམནིདསྶནཾ, སམཱིཔཏྠེ ཙེཏཾ བྷུམྨཾ ¶ . ‘‘ཨིཙྪཱནངྒལཝནསཎྜེ’’ཏི ཨིདཾ པན ནིཝཱསཊྛཱནདསྶནཾ, ནིཔྤརིཡཱཡཏོ ཨདྷིཀརཎེ ཙེཏཾ བྷུམྨནྟི ཏདུབྷཡམྤི པདཾ ཝིསེསཏྠདསྶནེན ཝིཝརནྟོ ‘‘ཨིཙྪཱནངྒལཾ ཨུཔནིསྶཱཡཱ’’ཏིཨཱདིམཱཧ ¶ . ‘‘སཱིལཁནྡྷཱཝཱར’’ནྟིཨཱདི ཝུཏྟནཡེན ཝེནེཡྻཧིཏསམཔེཀྑནཝསེནེཝ བྷགཝཏོ ཝིཧཱརདསྶནཾ. ཏཏྠ དྷམྨརཱཛསྶ བྷགཝཏོ སབྦསོ ཨདྷམྨནིགྒཎྷནཔརཱ ཨེཝ པཊིཔཏྟི, སཱ ཙ སཱིལསམཱདྷིཔཉྙཱཝསེནཱཏི སཱིལཱདིཏྟཡསྶེཝ གཧཎཾ. སཱིལཁནྡྷཱཝཱརནྟི ཙཀྐཝཏྟིརཉྙོ དཱརུཨིཊྛཀཱདིཀཏཾ ཁནྡྷཱཝཱརསདིསཾ སཱིལསངྑཱཏཾ ཁནྡྷཱཝཱརཾ བནྡྷིཏྭཱ ཝིཧརཏཱིཏི སམྦནྡྷོ. དཱརུཀྑནྡྷཱདཱིཧི ཨཱསམནྟཏོ ཝརནྟི པརིཀྑིཔནྟི ཨེཏྠཱཏི ཧི ཁནྡྷཱཝཱརོ ཨ-ཀཱརསྶ དཱིགྷཾ ཀཏྭཱ, རཱཛཱུནཾ ཨཙིརནིཝཱསཊྛཱནཾ. ཏཏྠ པན བྷགཝཏོ ཨཙིརནིཝསནཀིརིཡཱསམྦནྡྷམཏྟེན བྷཡནིཝཱརཎཊྛེན ཏཾསདིསཏཱཡ སཱིལམྤི ཏཐཱ ཝུཙྩཏི. སམཱདྷིཀོནྟནྟི སམྨཱསམཱདྷིསངྑཱཏཾ མངྒལསཏྟིཾ. སབྦཉྙུཏཉྙཱཎཔདནྟི སབྦཉྙུཏཉྙཱཎསངྑཱཏཾ ཛཡམནྟཔདཾ. པརིཝཏྟཡམཱནོཏི པརིཛཔྤམཱནོ. ‘‘སབྦཉྙུཏཉྙཱཎསར’’ནྟིཔི པཱཋོ, སབྦཉྙུཏཉྙཱཎཝཛིརགྒསརཾ ཨཔརཱཔརཾ སམྤརིཝཏྟམཱནོཏི ཨཏྠོ. ཡཐཱབྷིརུཙིཏེན ཝིཧཱརེནཱཏི སབྦཝིཧཱརསཱདྷཱརཎདསྶནཾ, དིབྦཝིཧཱརཱདཱིསུ ཡེན ཡེན ཨཏྟནཱ ཨབྷིརུཙིཏེན ཝིཧཱརེན ཝིཧརཏཱིཏི ཨཏྠོ.

པོཀྑརསཱཏིཝཏྠུཝཎྞནཱ

༢༥༥. མནྟེཏི ཨིརུཝེདཱདིམནྟསཏྠེ. ཨིརུཝེདཱདཡོ ཧི གུཏྟབྷཱསིཏབྦཊྛེན ‘‘མནྟཱ’’ཏི ཝུཙྩནྟི. ཨཎ-སདྡོ སདྡེཏི ཨཱཧ ‘‘སཛ྄ཛྷཱཡཏཱི’’ཏི. ལོཀིཡཱ པན ཝདནྟི ‘‘བྲཧྨུནོ ཨཔཙྩཾ བྲཱཧྨཎོ, ནཱགམོ, ཎཏྟཾ, དཱིགྷཱདཱི’’ཏི. ཀསྨཱ ཨཡམེཝ ཝཙནཏྠོ ཝུཏྟོཏི ཨཱཧ ‘‘ཨིདམེཝཱ’’ཏིཨཱདི. ཨཐ ཀེསཾ ཨིཏརོ ཝཙནཏྠོཏི ཙོདནམཔནེཏི ‘‘ཨརིཡཱ པནཱ’’ཏིཨཱདིནཱ. ཨཐ ཝཱ ཡཾ ལོཀིཡཱ ཝདནྟི ‘‘བྲཧྨུནཱ ཛཱཏོ བྲཱཧྨཎོ’’ཏིཨཱདིནིརུཏྟིཾ, ཏཾ པཊིཀྑིཔིཏུཾ ཨེཝཾ ཝུཏྟཾ. ‘‘ཨིདམེཝཱ’’ཏི ཧི ཨཝདྷཱརཎེན ཏཾ པཊིཀྑིཔཏི. ‘‘ཛཱཏིབྲཱཧྨཎཱན’’ནྟི པན ཨིམིནཱ སདྡནྟརེན དསྶིཏེསུ ཛཱཏིབྲཱཧྨཎཝིསུདྡྷིབྲཱཧྨཎཝསེན དུཝིདྷེསུ བྲཱཧྨཎེསུ ཝིསུདྡྷིབྲཱཧྨཎཱནཾ ནིརུཏྟིཾ དསྶེནྟོ ‘‘ཨརིཡཱ པནཱ’’ཏིཨཱདིམཱཧ. བཧནྟི པཱཔེ བཧི ཀརོནྟཱིཏི ཧི ཨརིཡཱ བྲཱཧྨཎཱ ནིརུཏྟིནཡེན. ‘‘ཏསྶ ཀིར ཀཱཡོ སེཏཔོཀྑརསདིསོ’’ཏི ཨིདམེཝསྶ ནཱམལཱབྷཧེཏུདསྶནཾ, སེསཾ པན ཏཔྤསངྒེན ཡཐཱཝིཛྫམཱནཝིསེསདསྶནམེཝ. ཏེནཱཧ ‘‘ཨིཏི ནཾ པོཀྑརསདིསཏྟཱ པོཀྑརསཱཏཱིཏི སཉྫཱནནྟཱི’’ཏི. པོཀྑརེན སདིསོ ཀཱཡོ ཡསྶཱཏི ཧི པོཀྑརསཱཏཱི ནིརུཏྟིནཡེན ¶ . སཱཏསདྡོ ཝཱ སདིསཏྠོ, པོཀྑརེན སཱཏོ སདིསོ ཀཱཡོ ཏཐཱ, སོ ཡསྶཱཏི པོཀྑརསཱཏཱི. སེཏཔོཀྑརསདིསོཏི སེཏཔདུམཝཎྞོ. དེཝནགརེཏི ཨཱལཀམནྡཱདིདེཝཔུརེ. ཨུསྶཱཔིཏརཛཏཏོརཎནྟི གམྦྷཱིརནེམནིཁཱཏཾ ཨཙྩུགྒཏཾ རཛཏམཡཾ ཨིནྡཁཱིལཾ ¶ . ཀཱལ༹མེགྷརཱཛཱིཏི ཀདཱཙི དིསྶམཱནཱ ཀཱལ༹ཨབྦྷལེཁཱ. རཛཏཔནཱལི༹ཀཱཏི རཛཏམཡཏུམྦཾ. སུཝཊྚིཏཱཏི ཝཊྚབྷཱཝསྶ ཡུཏྟཊྛཱནེ སུཊྛུ ཝཊྚུལཱ. ཀཱལ༹ཝངྒཏིལཀཱདཱིནམབྷཱཝེན སུཔརིསུདྡྷཱ. ‘‘ཨརཱཛཀེ’’ཏིཨཱདིནཱཔི སོབྷགྒཔྤཏྟབྷཱཝམེཝ ནིདསྶེཏི.

ཨིདཱནི ཨཔརམྤི ཏསྶ ནཱམལཱབྷཧེཏུཾ དསྶེནྟོ ‘‘ཨཡཾ པནཱ’’ཏིཨཱདིམཱཧ. ཏཏྠ ཙ ‘‘ཧིམཝནྟཔདེསེ མཧཱསརེ པདུམགབྦྷེ ནིབྦཏྟཱི’’ཏི ཨིདམེཝསྶ ནཱམལཱབྷཧེཏུདསྶནཾ. སེསཾ པན ཏཔྤསངྒེན ཏཐཱཔཝཏྟཱཀཱརདསྶནམེཝ. ཏེནཱཧ ‘‘ཨིཏི ནཾ པོཀྑརེ སཡིཏཏྟཱ པོཀྑརསཱཏཱིཏི སཉྫཱནནྟཱི’’ཏི. པོཀྑརེ ཀམལེ སཡཏཱིཏི ཧི པོཀྑརསཱཏཱི, སཱཏཾ ཝཱ ཝུཙྩཏི སམསཎྛཱནཾ, པོཀྑརེ ཛཱཏཾ སམསཎྛཱནཾ ཏཐཱ, ཏམསྶཏྠཱིཏིཔི པོཀྑརསཱཏཱི. ཡཾ པན ཨཱཙརིཡེན ཝུཏྟཾ ‘‘ཨིམསྶ བྲཱཧྨཎསྶ ཀཱིདིསོ པུབྦཡོགོ, ཡེན ནཾ བྷགཝཱ ཨནུགྒཎྷིཏུཾ ཏཾ ཋཱནཾ ཨུཔགཏོཏི ཨཱཧཱ’’ཏི, (དཱི. ནི. ཊཱི. ༡.༢༥༥) ཏདེཏཾ ‘‘ཨཡཾ པནཱ’’ཏིཨཱདིཝཙནཾ ཨེཀདེསམེཝ སནྡྷཱཡ ཝུཏྟཾ. ‘‘སོ ཏཏོ མནུསྶལོཀ’’ནྟིཨཱདིཝཙནཏོ དེཝལོཀེ ནིབྦཏྟཱིཏི ཨེཏྠ ཨཔརཱཔརཾ ནིབྦཏྟི ཨེཝ ཝུཏྟཱཏི དཊྛབྦཾ. ཏཐཱརཱུཔེན ཀམྨེན ནིབྦཏྟིམེཝ སནྡྷཱཡ ‘‘མཱཏུཀུཙྪིཝཱསཾ ཛིགུཙྪིཏྭཱ’’ཏིཨཱདི ཝུཏྟཾ. ‘‘པདུམགབྦྷེ ནིབྦཏྟཱི’’ཏི ཨིམིནཱ སཾསེདཛོཡེཝ ཧུཏྭཱ ནིབྦཏྟཱིཏི དསྶེཏི. ན པུཔྥཏཱིཏི ན ཝིཀསཏི. ཏེནཱཏི ཏཱཔསེན. ནཱལ༹ཏོཏི པུཔྥདཎྜཏོ. སུཝཎྞཙུཎྞེཧི པིཉྫརཾ ཧེམཝཎྞོ ཡསྶཱཏི སུཝཎྞཙུཎྞཔིཉྫརོ, ཏཾ, སུཝཎྞཙུཎྞེཧི ཝིཀིཎྞབྷཱཝེན ཧེམཝཎྞནྟི ཨཏྠོ. པིཉྫརསདྡོ ཧི ཧེམཝཎྞཔརིཡཱཡོཏི སཱརཏྠདཱིཔནིཡཾ (སཱརཏྠ. ཊཱི. ༡.༢༢) ཝུཏྟཾ. ཨེས ནཡོ པདུམརེཎུཔིཉྫརནྟི ཨེཏྠཱཔི. རཛཏབིམྦཀནྟི རཱུཔིཡམཡརཱུཔཀཾ. པཊིཛགྒཱམཱིཏི པོསེམི. པཱརནྟི པརིཡོསཱནཾ, ནིཔྥཏྟི ཝཱ ཝུཙྩཏི ནདཱིསམུདྡཱདཱིནཾ པརིཡོསཱནབྷཱུཏཾ པཱརཾ ཝིཡཱཏི ཀཏྭཱ. པཊིསནྡྷིཔཉྙཱསངྑཱཏེན སབྷཱཝཉཱཎེན པཎྜིཏོ. ཨིཏི ཀཏྟབྦེསུ, ཝེདེསུ ཝཱ ཝིསཱརདཔཉྙཱསངྑཱཏེན ཝེཡྻཏྟིཡེན ¶ བྱཏྟོ. ཨགྒབྲཱཧྨཎོཏི དིསཱཔཱམོཀྑབྲཱཧྨཎོ. སིཔྤནྟི ཝེདསིཔྤཾ ཏསྶེཝ པཀརཎཱདྷིགཏཏྟཱ. བྲཧྨདེཡྻཾ ཨདཱསཱིཏི ཝཀྑམཱནནཡེན བྲཧྨདེཡྻཾ ཀཏྭཱ ཨདཱསི.

‘‘ཨཛ྄ཛྷཱཝསཏཱི’’ཏི ཨེཏྠ ཨདྷི-སདྡོ, ཨཱ-སདྡོ ཙ ཨུཔསགྒམཏྟཾ, ཏཏོ ‘‘ཨུཀྐཊྛ’’ནྟི ཨིདཾ ཨཛ྄ཛྷཱཔུབྦཝསཡོགེ བྷུམྨཏྠེ ཨུཔཡོགཝཙནཾ. ཨདྷི-སདྡོ ཝཱ ཨིསྶརིཡཏྠོ, ཨཱ-སདྡོ མརིཡཱདཏྠོ ཏཏོ ‘‘ཨུཀྐཊྛ’’ནྟི ཨིདཾ ཀམྨཔྤཝཙནཱིཡཡོགེ བྷུམྨཏྠེ ཨུཔཡོགཝཙནནྟི དསྶེཏི ‘‘ཨུཀྐཊྛནཱམཀེ’’ཏིཨཱདིནཱ. ཏདེཝཏྠཾ ཝིཝརིཏུཾ ‘‘ཏསྶཱ’’ཏིཨཱདི ཝུཏྟཾ. ‘‘ཏསྶ ནགརསྶ སཱམིཀོ ཧུཏྭཱ’’ཏི ཧི ‘‘ཨབྷིབྷཝིཏྭཱ’’ཏི ཨེཏསྶཏྠཝིཝརཎཾ, ཏེནེཏཾ དཱིཔེཏི ‘‘སཱམིབྷཱཝོ ཨབྷིབྷཝན’’ནྟི. ‘‘ཡཱཡ མརིཡཱདཱཡཱ’’ཏིཨཱདི པན ཨཱ-སདྡསྶཏྠཝིཝརཎཾ, ཏེནེཏཾ དཱིཔེཏི ‘‘ཨཱསདྡོ ¶ མརིཡཱདཏྠོ, མརིཡཱདཱ ཙ ནཱམ ཡཱཡ ཏཏྠ ཝསིཏབྦཾ, སཱཡེཝ ཨཔརཱདྷཱིནཏཱ’’ཏི. ཡཱཡ མརིཡཱདཱཡཱཏི ཧི ཡཱཡ ཨཔརཱདྷཱིནཏཱསངྑཱཏཱཡ ཨནཉྙསཱདྷཱརཎཱཡ ཨཝཏྠཱཡཱཏི ཨཏྠོ. ‘‘ཨུཔསགྒཝསེནཱ’’ཏིཨཱདི པན ‘‘ཨུཀྐཊྛནཱམཀེ’’ཏི ཨེཏསྶཏྠཝིཝརཎཾ, ཏེནེཏཾ དཱིཔེཏི ‘‘སཏིཔི བྷུམྨཝཙནཔྤསངྒེ དྷཱཏྭཏྠཱནུཝཏྟཀཝིསེསཀབྷཱུཏེཧི དུཝིདྷེཧིཔི ཨུཔསགྒེཧི ཡུཏྟཏྟཱ ཨུཔཡོགཝཙནམེཝེཏྠ ཝིཧིཏ’’ནྟི. ‘‘ཏསྶ ཀིརཱ’’ཏིཨཱདི པན ཨཏྠཱནུགཏསམཉྙཱཔརིདཱིཔནཾ. ཝཏྠུ ནཱམ ནགརམཱཔནཱརཧབྷཱུམིཔྤདེསོ ‘‘ཨཱརཱམཝཏྠུ, ཝིཧཱརཝཏྠཱུ’’ཏིཨཱདཱིསུ ཝིཡ.

ཨུཀྐཱཏི དཎྜདཱིཔིཀཱ. ཨགྒཧེསུནྟི ‘‘ཨཛྫ མངྒལདིཝསོ, ཏསྨཱ སུནཀྑཏྟཾ, ཏཏྠཱཔི ཨཡཾ སུཁཎོ མཱ ཨཏིཀྐམཱི’’ཏི རཏྟིཝིབྷཱཡནཾ ཨནུརཀྑནྟཱ, རཏྟིཡཾ ཨཱལོཀཀརཎཏྠཱཡ ཨུཀྐཱ ཋཔེཏྭཱ ཨུཀྐཱསུ ཛལམཱནཱསུ ནགརསྶ ཝཏྠུཾ ཨགྒཧེསུཾ, ཏེནེཏཾ དཱིཔེཏི – ཨུཀྐཱསུ ཋིཏཱཏི ཨུཀྐཊྛཱ. མཱུལཝིབྷུཛཱདི ཨཱཀཏིགཎཔཀྑེཔེན, ནིརུཏྟིནཡེན ཝཱ ཨུཀྐཱསུ ཝིཛྫོཏཡནྟཱིསུ ཋིཏཱཏི ཨུཀྐཊྛཱ, ཏཐཱ ཨུཀྐཱསུ ཋིཏཱསུ ཋིཏཱ ཨཱསཱིཏིཔི ཨུཀྐཊྛཱཏི. མཛ྄ཛྷིམཱགམཊྛཀཐཱཡཾ པན ཨེཝཾ ཝུཏྟཾ ‘‘ཏཉྩ ནགརཾ ‘མངྒལདིཝསོ སུཁཎོ, སུནཀྑཏྟཾ མཱ ཨཏིཀྐམཱི’ཏི རཏྟིམྤི ཨུཀྐཱསུ ཋིཏཱསུ མཱཔིཏཏྟཱ ཨུཀྐཊྛཱཏིཔི ཝུཙྩཏི, དཎྜདཱིཔིཀཱསུ ཛཱལེཏྭཱ དྷཱརིཡམཱནཱསུ མཱཔིཏཏྟཱཏི ཝུཏྟཾ ཧོཏཱི’’ཏི, (མ. ནི. ཨཊྛ. ༡.མཱུལཔརིཡཱཡསུཏྟཝཎྞནཱ) ཏདཔིམིནཱ སཾསནྡཏི ཙེཝ སམེཏི ¶ ཙ ནགརཝཏྠུཔརིགྒཧསྶཔི ནགརམཱཔནཔརིཡཱཔནྣཏྟཱཏི དཊྛབྦཾ. ཨཔརེ པན བྷཎནྟི ‘‘བྷཱུམིབྷཱགསམྤཏྟིཡཱ, ཨུཔཀརཎསམྤཏྟིཡཱ, མནུསྶསམྤཏྟིཡཱ ཙ ཏཾ ནགརཾ ཨུཀྐཊྛགུཎཡོགཏོ ཨུཀྐཊྛཱཏི ནཱམཾ ལབྷཏཱི’’ཏི. ལོཀིཡཱ པན ཝདནྟི ‘‘ཨུཀྐཱ དྷཱརཱིཡཏི ཨེཏསྶ མཱཔིཏཀཱལེཏི ཨུཀྐཊྛཱ, ཝཎྞཝིཀཱརོཡ’’ནྟི, ཨིཏྠིལིངྒཝསེན ཙཱཡཾ སམཉྙཱ, ཏེནེཝིདྷ པཡོགོ དིསྶཏི ‘‘ཡཐཱ ཙ བྷཝཾ གོཏམོ ཨུཀྐཊྛཱཡ ཨཉྙཱནི ཨུཔཱསཀཀུལཱནི ཨུཔསངྐམཏཱི’’ཏི (དཱི. ནི. ༡.༢༩༩) མཱུལཔརིཡཱཡསུཏྟཱདཱིསུ (མ. ནི. ༡.༡) ཙ ‘‘ཨེཀཾ སམཡཾ བྷགཝཱ ཨུཀྐཊྛཱཡཾ ཝིཧརཏི སུབྷགཝནེ སཱལརཱཛམཱུལེ’’ཏིཨཱདི. ཨེཝམེཏྠ ཧོཏུ ཨུཔསགྒཝསེན ཨུཔཡོགཝཙནཾ, ཀཐཾ པནེཏཾ སེསཔདེསུ སིཡཱཏི ཨནུཡོགེནཱཧ ‘‘ཏསྶ ཨནུཔཡོགཏྟཱ སེསཔདེསཱུ’’ཏི. ཏཏྠ ཏསྶཱཏི ཨུཔསགྒཝསེན ཨུཔཡོགསཉྙུཏྟསྶ ‘‘ཨུཀྐཊྛ’’ནྟི པདསྶ. ཨནུཔཡོགཏྟཱཏི ཝིསེསནབྷཱཝེན ཨནུཔཡུཏྟཏྟཱ. སེསཔདེསཱུཏི ‘‘སཏྟུསྶད’’ནྟིཨཱདཱིསུ སཏྟསུ པདེསུ.

ཀིཾ ནུ ཁྭཱཡཾ སདྡཔཡོགོ སདྡལཀྑཎཱནུགཏོཏི ཙོདནམཔནེཏི ‘‘ཏཏྠ…པེ… པརིཡེསིཏབྦ’’ནྟི ཨིམིནཱ. ཏཏྠཱཏི ཨུཔསགྒཝསེན, ཨནུཔཡོགཝསེན ཙ ཨུཔཡོགཝཙནནྟི ཝུཏྟེ དུབྦིདྷེཔི ཝིདྷཱནེ. ལཀྑཎནྟི གཧཎཱུཔཱཡཉཱཡབྷཱུཏཾ སདྡལཀྑཎཾ, སུཏྟཾ ཝཱ. པརིཡེསིཏབྦནྟི སདྡསཏྠེསུ ¶ ཝིཛྫམཱནཏྟཱ ཉཱཎེན གཝེསིཏབྦཾ, གཧེཏབྦནྟི ཝུཏྟཾ ཧོཏི. ཨེཏེན ཧི སདྡལཀྑཎཱནུགཏོཝཱཡཾ སདྡཔཡོགོཏི དསྶེཏི, སདྡཝིདཱུ ཙ ཨིཙྪནྟི ‘‘ཨུཔཨནུཨདྷིཨཱཨིཙྩཱདིཔུབྦཝསཡོགེ སཏྟམིཡཏྠེ ཨུཔཡོགཝཙནཾ པཱཔུཎཱཏི, ཝིསེསིཏབྦཔདེ ཙ ཡཐཱཝིདྷིམནུཔཡོགོ ཝིསེསནཔདཱནཾ སམཱནཱདྷིཀརཎབྷཱུཏཱན’’ནྟི. ཏཏྲ ཡདཱ ཨདྷི-སདྡོ, ཨཱ-སདྡོ ཙ ཨུཔསགྒམཏྟཾ, ཏདཱ ‘‘ཏཏིཡཱསཏྟམཱིནཉྩཱ’’ཏི ལཀྑཎེན ཨཛ྄ཛྷཱཔུབྦཝསཡོགེ ཨུཔཡོགཝཙནཾ. ཏཐཱ ཧི ཝདནྟི ‘‘སཏྟམིཡཏྠེ ཀཱལདིསཱསུ ཨུཔཱནྭཛ྄ཛྷཱཝསཡོགེ, ཨདྷིཔུབྦསིཋཱཝསཱནཾ པཡོགེ, ཏཔྤཱནཙཱརེསུ ཙ དུཏིཡཱ. ཀཱལེ པུབྦཎྷསམཡཾ ནིཝཱསེཏྭཱ, ཨེཀཾ སམཡཾ བྷགཝཱ, ཀཉྩི ཀཱལཾ པུརེཛཱཏཔཙྩཡེན པཙྩཡོ, ཨིམཾ རཏྟིཾ ཙཏྟཱརོ མཧཱརཱཛཱནོ. དིསཱཡཾ པུརིམཾ དིསཾ དྷཏརཊྛོ. ཨུཔཱདིཔུབྦཝསཡོགེ གཱམཾ ཨུཔཝསཏི, གཱམཾ ཨནུཝསཏི, གཱམཾ ཨཱཝསཏི, ཨགཱརཾ ཨཛ྄ཛྷཱཝསཏི, ཨདྷིཔུབྦསིཋཱཝསཱནཾ པཡོགེ ¶ པཐཝིཾ ཨདྷིསེསྶཏི, གཱམཾ ཨདྷིཏིཊྛཏི, གཱམཾ ཨཛ྄ཛྷཱཝསཏི. ཏཔྤཱནཙཱརེསུ ནདིཾ པིཝཏི, གཱམཾ ཙརཏི ཨིཙྩཱདཱིཏི.

ཡདཱ པན ཨདྷི-སདྡོ ཨིསྶརིཡཏྠོ, ཨཱ-སདྡོ ཙ མརིཡཱདཏྠོ, ཏདཱ ‘‘ཀམྨཔྤཝཙནཱིཡཡུཏྟེ’’ཏི ལཀྑཎེན ཀམྨཔྤཝཙནཱིཡཡོགེ ཨུཔཡོགཝཙནཾ. ཏཐཱ ཧི ཝདནྟི ‘‘ཨནུཨཱདཡོ ཨུཔསགྒཱ, དྷཱིཨཱདཡོ ནིཔཱཏཱ ཙ ཀམྨཔྤཝཙནཱིཡསཉྙཱ ཧོནྟི ཀིརིཡཱསངྑཱཏཾ ཀམྨཾ པཝཙནཱིཡཾ ཡེསཾ ཏེ ཀམྨཔྤཝཙནཱིཡཱ’’ཏི. སེསཔདཱནཾ པན ཡཐཱཝིདྷིམནུཔཡོགེ ཀཏརེན ལཀྑཎེན ཨུཔཡོགཝཙནནྟི? ཡཐཱཝུཏྟལཀྑཎེནེཝ. ཡཛྫེཝཾ ཏེསམྤི ཨཱདྷཱརབྷཱཝཏོ ནཱནཱདྷཱརཏཱ སིཡཱཏི? ན, བཧཱུནམྤི པདཱནཾ ནགརཝསེན ཨེཀཏྠབྷཱཝཏོ. སཀཏྠམཏྟཉྷི ཏེསཾ ནཱནཱཀརཎནྟི. ཨཉྙེ པན སདྡཝིདཱུ ཨེཝམིཙྪནྟི ‘‘སམཱནཱདྷིཀརཎཔདཱནཾ པཙྩེཀཾ ཀིརིཡཱསམྦནྡྷནེན ཝིསེསིཏབྦཔདེན སམཱནཝཙནཏཱ ཡཐཱ ‘ཀཊཾ ཀརོཏི, ཝིཔུལཾ, དསྶནཱིཡ’ནྟི ཨེཏྠ ‘ཀཊཾ ཀརོཏི, ཝིཔུལཾ ཀརོཏི, དསྶནཱིཡཾ ཀརོཏཱི’ཏི པཙྩེཀཾ ཀིརིཡཱསམྦནྡྷནེན ཀམྨཏྠེཡེཝ དུཏིཡཱ’’ཏི, ཏདེཏཾ ཝིཙཱརེཏབྦཾ ཝིསེསནཔདཱནཾ སམཱནཱདྷིཀརཎཱནཾ ཀིརིཡཱསམྦཛ྄ཛྷནཱབྷཱཝཏོ. ཡདཱ ཧི ཀིརིཡཱསམྦཛ྄ཛྷནཾ, ཏདཱ ཝིསེསནམེཝ ན ཧོཏཱིཏི.

ཨུསྶདཏཱ ནཱམེཏྠ བཧུལཏཱཏི ཝུཏྟཾ ‘‘བཧུཛན’’ནྟི. ཏཾ པན བཧུལཏཾ དསྶེཏི ‘‘ཨཱཀིཎྞམནུསྶ’’ནྟིཨཱདིནཱ. ཨརཉྙཱདཱིསུ གཧེཏྭཱ པོསེཏབྦཱ པོསཱཝནིཡཱ, ཨེཏེན ཏེསཾ དྷམྨབྷཱཝཾ དསྶེཏི. ཨཱཝིཛ྄ཛྷིཏྭཱཏི པརིཀྑིཔིཏྭཱ. ཁཎིཏྭཱ ཀཏཱ པོཀྑརཎཱི, ཨཱབནྡྷིཏྭཱ ཀཏཾ ཏལཱ༹ཀཾ. ཨཙྪིནྣཱུདཀཊྛཱནེཡེཝ ཛལཛཀུསུམཱནི ཛཱཏཱནཱིཏི ཝུཏྟཾ ‘‘ཨུདཀསྶ ནིཙྩབྷརིཏཱནེཝཱ’’ཏི. ཨུདཀསྶཱཏི ཙ པཱུརཎཀིརིཡཱཡོགེ ཀརཎཏྠེ སཱམིཝཙནཾ ‘‘མཧནྟེ མཧནྟེ སཱཎིཔསིབྦཀེ ཀཱརཱཔེཏྭཱ ཧིརཉྙསུཝཎྞསྶ པཱུརཱཔེཏྭཱ’’ཏིཨཱདཱིསུ (པཱརཱ. ༣༤) ཝིཡ. སཧ དྷཉྙེནཱཏི ¶ སདྷཉྙནྟི ནགརསདྡཱཔེཀྑཱཡ ནཔུཾསཀལིངྒེན ཝུཏྟཾ, ཡཐཱཝཱཀྱཾ ཝཱ ཨུཔཡོགཝཙནེན. ཨེཝཾ སབྦཏྠ. པུབྦཎྞཱཔརཎྞཱདིབྷེདཾ བཧུདྷཉྙསནྣིཙཡནྟི ཨེཏྠ ཨཱདིསདྡེན ཏདུབྷཡཝིནིམུཏྟཾ ཨལཱབུཀུམྦྷཎྜཱདིསཱུཔེཡྻཾ སངྒཎྷཱཏི. ཏེནཱཡམཏྠོ ཝིཉྙཱཡཏི – ནཡིདྷ དྷཉྙསདྡོ སཱལིཨཱདིདྷཉྙཝིསེསཝཱཙཀོ, པོསནེ སཱདྷུཏྟམཏྟེན པན ནིརཝསེསཔུབྦཎྞཱཔརཎྞསཱུཔེཡྻཝཱཙཀོ, ཝིརཱུཔེཀསེསཝསེན ¶ ཝཱ པཡུཏྟོཏི. ཨེཏྟཱཝཏཱཏི ཡཐཱཝུཏྟཔདཏྟཡེན. རཱཛལཱིལཱཡཱཏི རཱཛཱུནཾ ཝིལཱསེན. སམིདྡྷིཡཱ ཨུཔབྷོགཔརིབྷོགསམྤུཎྞབྷཱཝེན སམྤཏྟི སམིདྡྷིསམྤཏྟི.

‘‘རཱཛབྷོགྒ’’ནྟི ཝུཏྟེ ‘‘ཀེན དིནྣ’’ནྟི ཨཝསྶཾ པུཙྪིཏབྦཏོ ཨེཝཾ ཝུཏྟནྟི དསྶེཏི ‘‘ཀེནཱ’’ཏིཨཱདིནཱ. རཉྙཱ ཝིཡ བྷུཉྫིཏབྦནྟི ཝཱ རཱཛབྷོགྒནྟི ཨཊྛཀཐཱཏོ ཨཔརོ ནཡོ. ཡཱཝ པུཏྟནཏྟཔནཏྟཔརམྤརཱ ཀུལསནྟཀབྷཱཝེན རཱཛཏོ ལདྡྷཏྟཱ ‘‘རཉྙོ དཱཡབྷཱུཏ’’ནྟི ཝུཏྟཾ. ‘‘དྷམྨདཱཡཱདཱ མེ བྷིཀྑཝེ བྷཝཐཱ’’ཏིཨཱདཱིསུ (མ. ནི. ༡.༢༩) ཝིཡ ཙ དཱཡསདྡོ དཱཡཛྫཔརིཡཱཡོཏི ཨཱཧ ‘‘དཱཡཛྫནྟི ཨཏྠོ’’ཏི. ཀཐཾ དིནྣཏྟཱ བྲཧྨདེཡྻཾ ནཱམཱཏི ཙོདནཾ པརིཧརཏི ‘‘ཚཏྟཾ ཨུསྶཱཔེཏྭཱ’’ཏིཨཱདིནཱ. རཱཛནཱིཧཱརེན པརིབྷུཉྫིཏབྦཏོ ཧི ཨུདྡྷཾ པརིབྷོགལཱབྷསྶ བྲཧྨདེཡྻཏཱ ནཱམ ནཏྠི, ཨིདཉྩ ཏཐཱ དིནྣམེཝ, ཏསྨཱ བྲཧྨདེཡྻཾ ནཱམཱཏི ཝུཏྟཾ ཧོཏི. ཚེཛྫབྷེཛྫནྟི སརཱིརདཎྜདྷནདཎྜཱདིབྷེདཾ དཎྜམཱཧ. ནདཱིཏིཏྠཔབྦཏཱདཱིསཱུཏི ནདཱིཏིཏྠཔབྦཏཔཱདགཱམདྭཱརཨཊཝིམུཁཱདཱིསུ. སེཏཙྪཏྟགྒཧཎེན སེསརཱཛཀཀུདྷབྷཎྜམྤི གཧིཏཾ ཏཔྤམུཁཏྟཱཏི ཝེདིཏབྦཾ. ‘‘རཉྙཱ བྷུཉྫིཏབྦ’’ནྟྭེཝ ཝུཏྟེ ཨིདྷཱདྷིཔྤེཏཏྠོ ན པཱཀཊོཏི ཧུཏྭཱ-སདྡགྒཧཎཾ ཀཏཾ. ཏཉྷི སོ རཱཛཀུལཏོ ཨསམུདཱགཏོཔི རཱཛཱ ཧུཏྭཱ བྷུཉྫིཏུཾ ལབྷཏཱིཏི ཨཡམིདྷཱདྷིཔྤེཏོ ཨཏྠོ. དཱཏབྦནྟི དཱཡཾ, ‘‘རཱཛདཱཡ’’ནྟི ཨིམིནཱཝ རཉྙཱ དིནྣབྷཱཝེ སིདྡྷེ ‘‘རཉྙཱ པསེནདིནཱ ཀོསལེན དིནྣ’’ནྟི པུན ཙ ཝཙནཾ ཀིམཏྠིཡནྟི ཨཱཧ ‘‘དཱཡཀརཱཛདཱིཔནཏྠ’’ནྟིཨཱདི. ཨསུཀེན རཉྙཱ དིནྣནྟི དཱཡཀརཱཛསྶ ཨདཱིཔིཏཏྟཱ ཨེཝཾ ཝུཏྟནྟི ཨདྷིཔྤཱཡོ. ཨེཏྠ ཙ པཋམནཡེ ‘‘རཱཛབྷོགྒ’’ནྟི པདེ པུཙྪཱསམྦྷཝཏོ ཨིདཾ ཝུཏྟཾ, དུཏིཡནཡེ པན ‘‘རཱཛདཱཡ’’ནྟི པདེཏི ཨཡམྤི ཝིསེསོ དཊྛབྦོ. ཏཏྠ ཨཏིབཧུལཏཱཡ པུརཏོ ཋཔནོཀཱསཱབྷཱཝཏོ པསྶེནཔི ཨོདནསཱུཔབྱཉྫནཱདི དཱིཡཏི ཨེཏསྶཱཏི པསེནདི, ཨལུཏྟསམཱསཝསེན. སོ ཧི རཱཛཱ ཏཎྜུལདོཎསྶ ཨོདནམྤི ཏདུཔིཡེན སཱུཔབྱཉྫནེན བྷུཉྫཏི. ཏཐཱ ཧི ནཾ བྷུཏྟཔཱཏརཱསཀཱལེ སཏྠུ སནྟིཀམཱགནྟྭཱ ཨིཏོ ཙིཏོ ཙ སམྤརིཝཏྟནྟཾ ནིདྡཱཡ ཨབྷིབྷུཡྻམཱནཾ ཨུཛུཀཾ ནིསཱིདིཏུམསཀྐོནྟཾ བྷགཝཱ –

‘‘མིདྡྷཱི ¶ ཡདཱ ཧོཏི མཧགྒྷསོ ཙ,

ནིདྡཱཡིཏཱ སམྤརིཝཏྟསཱཡཱི;

མཧཱཝརཱཧོཝ ¶ ནིཝཱཔཝུཊྛོ,

པུནཔྤུནཾ གབྦྷམུཔེཏི མནྡོ’’ཏི. (དྷ. པ. ༣༢༥; ནེཏྟི. ༢༦, ༩༠);

ཨིམཱཡ གཱཐཱཡ ཨོཝདི. བྷཱགིནེཡྻཉྩ སོ སུདསྶནཾ ནཱམ མཱཎཝཾ –

‘‘མནུཛསྶ སདཱ སཏཱིམཏོ,

མཏྟཾ ཛཱནཏོ ལདྡྷབྷོཛནེ;

ཏནུཀསྶ བྷཝནྟི ཝེདནཱ,

སཎིཀཾ ཛཱིརཏི ཨཱཡུཔཱལཡ’’ནྟི. (སཾ. ནི. ༡.༢༤) –

ཨིམཾ གཱཐཾ བྷགཝཏོ སནྟིཀེ ཨུགྒཧཱཔེཏྭཱ ཨཏྟནོ བྷུཉྫནྟསྶ ཨོསཱནཔིཎྜཀཱལེ དེཝསིཀཾ བྷཎཱཔེཏི, སོ ཨཔརེན སམཡེན ཏསྶཱ གཱཐཱཡ ཨཏྠཾ སལླཀྑེཏྭཱ པུནཔྤུནཾ ཨོསཱནཔིཎྜཔརིཧརཎེན ནཱལི༹ཀོདནམཏྟཱཡ སཎྛཧིཏྭཱ ཏནུསརཱིརོ བལཝཱ སུཁཔྤཏྟོ ཨཧོསཱིཏི. ཨུདཱནཊྛཀཐཱཡཾ (ཨུདཱ. ཨཊྛ. ༡༢) པན ཨེཝཾ ཝུཏྟཾ ‘‘པཙྩཱམིཏྟཾ པརསེནཾ ཛིནཱཏཱིཏི པསེནདཱི’’ཏི. སདྡཝིདཱུཔི ཧི ཛ-ཀཱརསྶ ད-ཀཱརེ ཨིདམུདཱཧརནྟི. སོ ཧི ཨཏྟནོ བྷཱགིནེཡྻཾ ཨཛཱཏསཏྟུརཱཛཱནཾ, པཉྩཙོརསཏཱདཱིནི ཙ ཨཝརུདྡྷཀཱནི ཛིནཱཏཱིཏི. ཀོསལརཊྛསྶཱདྷིཔཏིབྷཱཝཏོ ཀོསལོ, ཏསྨཱ ཀོསལཱདྷིཔཏིནཱ པསེནདི ནཱམཀེན རཉྙཱ དིནྣནྟི ཨཏྠོ ཝེདིཏབྦོ. ནིསྶཊྛཔརིཙྩཏྟཏཱསངྑཱཏེན པུན ཨགྒཧེཏབྦབྷཱཝེནེཝ དིནྣཏྟཱ ཨིདྷ བྲཧྨདེཡྻཾ ནཱམ, ན ཏུ པུརིམནཡེ ཝིཡ རཱཛསངྑེཔེན པརིབྷུཉྫིཏབྦབྷཱཝེན དིནྣཏྟཱཏི ཨཱཧ ‘‘ཡཐཱ’’ཏིཨཱདི. ནིསྶཊྛཾ ཧུཏྭཱ, ནིསྶཊྛབྷཱཝེན ཝཱ པརིཙྩཏྟཾ ནིསྶཊྛཔརིཙྩཏྟཾ, མུཏྟཙཱགཝསེན ཙཛིཏནྟི ཨཏྠོ.

སཝནཾ ཨུཔལབྦྷོཏི དསྶེཏི ‘‘ཨུཔལབྷཱི’’ཏི ཨིམིནཱ, སོ ཙཱཡམུཔལབྦྷོ སཝནཝསེནེཝ ཛཱནནནྟི ཝུཏྟཾ ‘‘སོཏདྭཱརསམྤཏྟཝཙནནིགྒྷོསཱནུསཱརེན ཨཉྙཱསཱི’’ཏི. སོཏདྭཱརཱནུསཱརཝིཉྙཱཎཝཱིཐིཝསེན ཛཱནནམེཝ ཧི ཨིདྷ སཝནཾ ཏེནེཝ ‘‘སམཎོ ཁལུ བྷོ གོཏམོ’’ཏིཨཱདིནཱ ཝུཏྟསྶཏྠསྶ ཨདྷིགཏཏྟཱ, ན པན སོཏདྭཱརཝཱིཐིཝསེན སུཏམཏྟཾ ¶ ཏེན ཏདཏྠསྶ ཨནདྷིགཏཏྟཱ. ཨཝདྷཱརཎཕལཏྟཱ སདྡཔཡོགསྶ སབྦམྤི ཝཱཀྱཾ ཨནྟོགདྷཱཝདྷཱརཎཾ. ཏསྨཱ ཏདཏྠཛོཏཀསདྡེན ཝིནཱཔི ཨཉྙཏྠཱཔོཧནཝསེན ཨསྶོསི ཨེཝ, ནཱསྶ ཀོཙི སཝནནྟརཱཡོ ཨཧོསཱིཏི ཨཡམཏྠོ ཝིཉྙཱཡཏཱིཏི ཨཱཧ ‘‘པདཔཱུརཎམཏྟེ ནིཔཱཏོ’’ཏི, ཨནྟོགདྷཱཝདྷཱརཎེཔི ¶ ཙ སབྦསྨིཾ ཝཱཀྱེ ནཱིཏཏྠཏོ ཨཝདྷཱརཎཏྠཾ ཁོ-སདྡགྒཧཎཾ ‘‘ཨེཝཱ’’ཏི སཱམཏྠིཡཱ སཱཏིསཡཾ ཨེཏདཏྠསྶ ཝིཉྙཱཡམཱནཏྟཱཏི པཋམཝིཀཔྤོ ཝུཏྟོ, ནཱིཏཏྠཏོ ཨཝདྷཱརཎེན ཀོ ཨཏྠོ ཨེཀནྟིཀོ ཀཏོ, ཨཝདྷཱརིཏོ ཙཱཏི ཝུཏྟཾ ‘‘ཏཏྠཱ’’ཏིཨཱདི. ཨཐ པདཔཱུརཎམཏྟེན ཁོ-སདྡེན ཀིཾ པཡོཛནནྟི ཙོདནམཔནེཏི ‘‘པདཔཱུརཎེནཱ’’ཏིཨཱདིནཱ, ཨཀྑརསམཱུཧཔདསྶ, པདསམཱུཧཝཱཀྱསྶ ཙ སིལིཊྛཏཱཔཡོཛནམཏྟམེཝཱཏི ཨཏྠོ. ‘‘ཨསྶོསཱི’’ཏི ཧིདཾ པདཾ ཁོ-སདྡེ གཧིཏེ ཏེན ཕུལླིཏཾ མཎྜིཏཾ ཝིབྷཱུསིཏཾ ཝིཡ ཧོནྟཾ པཱུརིཏཾ ནཱམ ཧོཏི, ཏེན ཙ པུརིམཔཙྪིམཔདཱནི སུཁུཙྩཱརཎཝསེན སིལིཊྛཱནི ཧོནྟི, ན ཏསྨིཾ ཨགྒཧིཏེ, ཏསྨཱ པདཔཱུརཎམཏྟམྤི པདབྱཉྫནསིལིཊྛཏཱཔཡོཛནནྟི ཝུཏྟཾ ཧོཏི. མཏྟསདྡོ ཙེཏྠ ཝིསེསནིཝཏྟིཨཏྠོ, ཏེནསྶ ཨནཏྠནྟརདཱིཔནཏཱ དསྶིཏཱ, ཨེཝ-སདྡེན པན པདབྱཉྫནསིལིཊྛཏཱཡ ཨེཀནྟིཀཏཱ.

‘‘སམཎོ ཁལཱུ’’ཏིཨཱདི ཡཐཱསུཏཏྠནིདསྶནནྟི དསྶེཏི ‘‘ཨིདཱནཱི’’ཏིཨཱདིནཱ. སམིཏཔཱཔཏྟཱཏི ཨེཏྠ ཨཙྩནྟཾ ཨནཝསེསཏོ སཝཱསནཾ སམིཏཔཱཔཏྟཱཏི ཨཏྠོ གཧེཏབྦོ. ཨེཝཉྷི བཱཧིརཀཝཱིཏརཱགསེཀྑཱསེཀྑཔཱཔསམནཏོ བྷགཝཏོ པཱཔསམནཾ ཡཐཱརཧཾ ཝིསེསིཏཾ ཧོཏི. ཏེན ཝུཏྟཾ ‘‘བྷགཝཱ ཙ ཨནུཏྟརེན ཨརིཡམགྒེན སམིཏཔཱཔོ’’ཏི. ཏདེཝཏྠཾ ནིདྡེསཔཱཋེན སཱདྷེཏུཾ ‘‘ཝུཏྟཉྷེཏ’’ནྟིཨཱདིམཱཧ. ཨསྶཱཏི ཨནེན བྷིཀྑུནཱ, བྷགཝཏཱ ཝཱ. སམིཏཱཏི སམཱཔིཏཱ, སམབྷཱཝཾ ཝཱ ཨཱཔཱདཡིཏཱ, ཨསྶ ཝཱ སམྤདཱནབྷཱུཏསྶ སནྟཱ ཧོནྟཱིཏི ཨཏྠོ. ཨཏྠཱནུགཏཱ ཙཱཡཾ བྷགཝཏི སམཉྙཱཏི ཝུཏྟཾ ‘‘བྷགཝཱ ཙཱ’’ཏིཨཱདི. ཏེནཱཏི ཏཐཱ སམིཏཔཱཔཏྟཱ. ཡཐཱབྷཱུཏཾ པཝཏྟོ ཡཐཱབྷུཙྩཾ, ཏདེཝ གུཎོ, ཏེན ཨདྷིགཏཾ ཏཐཱ. ‘‘ཁལཱུ’’ཏི ཨིདཾ ནེཔཱཏིཀཾ ཁལུཔཙྪཱབྷཏྟིཀཔདེ (མི. པ. ༤.༡.༨) ཝིཡ, ན ནཱམཾ, ཨནེཀཏྠཏྟཱ ཙ ནིཔཱཏཱནཾ ཨནུསྶཝནཏྠོཝ ཨིདྷཱདྷིཔྤེཏོཏི ཨཱཧ ‘‘ཨནུསྶཝནཏྠེ ནིཔཱཏོ’’ཏི, པརམྤརསཝནཉྩེཏྠ ¶ ཨནུསྶཝནཾ. བྲཱཧྨཎཛཱཏིསམུདཱགཏནྟི བྲཱཧྨཎཛཱཏིཡཱ ཨཱགཏཾ, ཛཱཏིསིདྡྷནྟི ཝུཏྟཾ ཧོཏི. ཨཱལཔནམཏྟནྟི པིཡཱལཔནཝཙནམཏྟཾ, ན ཏདུཏྟརི ཨཏྠཔརིདཱིཔནཾ. པིཡསམུདཱཧཱརཱ ཧེཏེ ‘‘བྷོ’’ཏི ཝཱ ‘‘ཨཱཝུསོ’’ཏི ཝཱ ‘‘དེཝཱནཾ པིཡཱ’’ཏི ཝཱ. དྷམྨཔདེ བྲཱཧྨཎཝཏྠུཔཱཋེན, (དྷ. པ. ༣༡༥ ཨཱདཡོ) སུཏྟནིཔཱཏེ ཙ ཝཱསེཊྛསུཏྟཔདེན བྲཱཧྨཎཛཱཏིསམུདཱགཏཱལཔནབྷཱཝཾ སམཏྠེཏུཾ ‘‘ཝུཏྟམྤི ཙེཏ’’ནྟིཨཱདིམཱཧ.

ཏཏྲཱཡམཏྠོ – སཙེ རཱགཱདིཀིཉྩནེཧི སཀིཉྩནོ ཨསྶ, སོ ཨཱམནྟནཱདཱིསུ ‘‘བྷོ བྷོ’’ཏི ཝདནྟོ ཧུཏྭཱ ཝིཙརཎཏོ བྷོཝཱདཱིཡེཝ ནཱམ ཧོཏི, ན བྲཱཧྨཎོ. ‘‘ཨཀིཉྩནཾ ཨནཱདཱནཾ, ཏམཧཾ བྲཱུམི བྲཱཧྨཎ’’ནྟི (དྷ. པ. ༣༩༦, སུ. ནི. ༦༢༥) སེསགཱཐཱཔདཾ. ཏཏྠ ¶ རཱགཱདཡོ སཏྟེ ཀིཉྩནྟི མདྡནྟི པལིབུདྡྷནྟཱིཏི ཀིཉྩནཱནི. མནུསྶཱ ཀིར གོཎེཧི ཁལཾ མདྡཱཔེནྟཱ ‘‘ཀིཉྩེཧི ཀཔིལ, ཀིཉྩེཧི ཀཱལ༹ཀཱ’’ཏི ཝདནྟི, ཏསྨཱ ཀིཉྩནསདྡོ མདྡནཏྠོ ཝེདིཏབྦོ. ཡཐཱཧ ནིདྡེསེ ‘‘ཨཀིཉྩནནྟི རཱགཀིཉྩནཾ, དོས, མོཧ, མཱན, དིཊྛི, ཀིལེསཀིཉྩནཾ, དུཙྩརིཏཀིཉྩནཾ, ཡསྶེཏེ ཀིཉྩནཱ པཧཱིནཱ སམུཙྪིནྣཱ ཝཱུཔསནྟཱ པཊིཔྤསྶདྡྷཱ ཨབྷབྦུཔྤཏྟིཀཱ ཉཱཎགྒིནཱ དཌྜྷཱ, སོ ཝུཙྩཏི ཨཀིཉྩནོ’’ཏི (ཙཱུལ༹ནི. ༢༨, ༣༢, ༦༠, ༦༣). གོཏམོཏི གོཏྟཝསེན པརིཀིཏྟནཾ, ཡཾ ‘‘ཨཱདིཙྩགོཏྟ’’ནྟིཔི ལོཀེ ཝདནྟི, སཀྱཔུཏྟོཏི པན ཛཱཏིཝསེན སཱཀིཡོཏི ཙ ཏསྶེཝ ཝེཝཙནཾ. ཝུཏྟཉྷེཏཾ པབྦཛྫཱསུཏྟེ –

‘‘ཨཱདིཙྩཱ ནཱམ གོཏྟེན, སཱཀིཡཱ ནཱམ ཛཱཏིཡཱ;

ཏམྷཱ ཀུལཱ པབྦཛིཏོམྷི, ན ཀཱམེ ཨབྷིཔཏྠཡ’’ནྟི. (སུ. ནི. ༤༢༥);

ཏཐཱ ཙཱཧ ‘‘གོཏམོཏི བྷགཝནྟཾ གོཏྟཝསེན པརིཀིཏྟེཏཱི’’ཏིཨཱདི. ཏཏྠ གཾ ཏཱཡཏཱིཏི གོཏྟཾ, ‘‘གོཏམོ’’ཏི པཝཏྟམཱནཾ ཨབྷིདྷཱནཾ, བུདྡྷིཉྩ ཨེཀཾསིཀཝིསཡཏཱཡ རཀྑཏཱིཏི ཨཏྠོ. ཡཐཱ ཧི བུདྡྷི ཨཱརམྨཎབྷཱུཏེན ཨཏྠེན ཝིནཱ ན ཝཏྟཏི, ཨེཝཾ ཨབྷིདྷཱནཾ ཨབྷིདྷེཡྻབྷཱུཏེན, ཏསྨཱ སོ གོཏྟསངྑཱཏོ ཨཏྠོ ཏཱནི རཀྑཏཱིཏི ཝུཙྩཏི, གོ-སདྡོ ཙེཏྠ ཨབྷིདྷཱནེ, བུདྡྷིཡཉྩ ཝཏྟཏི. ཏཐཱ ཧི ཝདནྟི –

‘‘གོ ¶ གོཎེ ཙེནྡྲིཡེ བྷུམྱཾ, ཝཙནེ ཙེཝ བུདྡྷིཡཾ;

ཨཱདིཙྩེ རསྨིཡཉྩེཝ, པཱནཱིཡེཔི ཙ ཝཏྟཏེ;

ཏེསུ ཨཏྠེསུ གོཎེ ཐཱི, པུམཱ ཙ ཨིཏརེ པུམཱ’’ཏི.

ཏཏྠ ‘‘གོསུ དུཡ྄ཧམཱནཱསུ གཏོ, གོཔཉྩམོ’’ཏིཨཱདཱིསུ གོསདྡོ གོཎེ ཝཏྟཏི. ‘‘གོཙརོ’’ཏིཨཱདཱིསུ ཨིནྡྲིཡེ. ‘‘གོརཀྑ’’ནྟིཨཱདཱིསུ བྷཱུམིཡཾ. ཏཐཱ ཧི སུཏྟནིཔཱཏཊྛཀཐཱཡ ཝཱསེཊྛསུཏྟསཾཝཎྞནཱཡཾ ཝུཏྟཾ ‘‘གོརཀྑནྟི ཁེཏྟརཀྑཾ, ཀསིཀམྨནྟི ཝུཏྟཾ ཧོཏི. པཐཝཱི ཧི ‘གོ’ཏི ཝུཙྩཏི, ཏཔྤབྷེདོ ཙ ‘‘ཁེཏྟ’’ནྟི (སུ. ནི. ཨཊྛ. ༢.༦༡༩-༦༢༦). ‘‘གོཏྟཾ ནཱམ དྭེ གོཏྟཱནི ཧཱིནཉྩ གོཏྟཾ, ཨུཀྐཊྛཉྩ གོཏྟ’’ནྟིཨཱདཱིསུ (པཱཙི. ༡༥) ཝཙནེ, བུདྡྷིཡཉྩ ཝཏྟཏི. ‘‘གོགོཏྟཾ གོཏམཾ ནམེ’’ཏི པོརཱཎཀཝིརཙནཱཡ ཨཱདིཙྩེ, ཨཱདིཙྩབནྡྷུཾ གོཏམཾ སམྨཱསམྦུདྡྷཾ ནམཱམཱིཏི ཧི ཨཏྠོ, ‘‘ཨུཎྷགཱུ’’ཏིཨཱདཱིསུ རསྨིཡཾ, ཨུཎྷཱ གཱཝོ རསྨིཡོ ཨེཏསྶཱཏི ཧི ཨུཎྷགུ, སཱུརིཡོ. ‘‘གོསཱིཏཙནྡན’’ནྟིཨཱདཱིསུ (ཨ. ནི. ཊཱི. ༡.༤༩) པཱནཱིཡེ ¶ , གོསངྑཱཏཾ པཱནཱིཡཾ ཝིཡ སཱིཏཾ, ཏདེཝ ཙནྡནཾ ཏཐཱ. ཏསྨིཉྷི ཨུདྡྷནཏོ ཨུདྡྷརིཏཔཀྐུཐིཏཏེལསྨིཾ པཀྑིཏྟེ ཏངྑཎཉྙེཝ ཏཾ ཏེལཾ སཱིཏལཾ ཧོཏཱིཏི. ཨེཏེསུ པན ཨཏྠེསུ གོཎེ ཝཏྟམཱནོ གོ-སདྡོ ཡཐཱརཧཾ ཨིཏྠིལིངྒོ ཙེཝ པུལླིངྒོ ཙ, སེསེསུ པན པུལླིངྒོཡེཝ.

ཀིཾ པནེཏཾ གོཏྟཾ ནཱམཱཏི? ཨཉྙཀུལཔརམྤརཱཡ ཨསཱདྷཱརཎཾ ཏསྶ ཀུལསྶ ཨཱདིཔུརིསསམུདཱགཏཾ ཏཾཀུལཔརིཡཱཔནྣསཱདྷཱརཎཾ སཱམཉྙརཱུཔནྟི དཊྛབྦཾ. སཱདྷཱརཎམེཝ ཧི ཨིདཾ ཏཾཀུལཔརིཡཱཔནྣཱནཾ སཱདྷཱརཎཏོ ཙ སཱམཉྙརཱུཔཾ. ཏཐཱ ཧི ཏཾཀུལེ ཛཱཏཱ སུདྡྷོདནམཧཱརཱཛཱདཡོཔི ‘‘གོཏམོ’’ ཏྭེཝ ཝུཙྩནྟི, ཏེནེཝ བྷགཝཱ ཨཏྟནོ པིཏརཾ སུདྡྷོདནམཧཱརཱཛཱནཾ ‘‘ཨཏིཀྐནྟཝརཱ ཁོ གོཏམ ཏཐཱགཏཱ’’ཏི (མཧཱཝ. ༡༠༥) ཨཝོཙ, ཝེསྶཝཎོཔི མཧཱརཱཛཱ བྷགཝནྟཾ ‘‘ཝིཛྫཱཙརཎསམྤནྣཾ, བུདྡྷཾ ཝནྡཱམ གོཏམ’’ནྟི, (དཱི. ནི. ༣.༢༨༨) ཨཱཡསྨཱཔི ཝངྒཱིསོ ཨཱཡསྨནྟཾ ཨཱནནྡཾ ‘‘སཱདྷུ ནིབྦཱཔནཾ བྲཱུཧི, ཨནུཀམྤཱཡ གོཏམཱ’’ཏི (སཾ. ནི. ༡.༢༡༢). ཨིདྷ པན བྷགཝནྟམེཝ. ཏེནཱཧ ‘‘བྷགཝནྟཾ གོཏྟཝསེན པརིཀིཏྟེཏཱི’’ཏི. ཏསྨཱཏི ཡཐཱཝུཏྟམཏྠཏྟཡཾ པཙྩཱམསཏི. ཨེཏྠ ཙ ‘‘སམཎོ’’ཏི ཨིམིནཱ ¶ སརིཀྑཀཛནེཧི བྷགཝཏོ བཧུམཏབྷཱཝོ དསྶིཏོ ཏབྦིསཡསམིཏཔཱཔཏཱཔརིཀིཏྟནཏོ, ‘‘གོཏམོ’’ཏི ཨིམིནཱ ལོཀིཡཛནེཧི ཏབྦིསཡཨུལཱ༹རགོཏྟསམྦྷཱུཏཏཱཔརིཀིཏྟནཏོ.

སཀྱསྶ སུདྡྷོདནམཧཱརཱཛསྶ པུཏྟོ སཀྱཔུཏྟོ, ཨིམིནཱ པན ཨུཙྩཱཀུལཔརིདཱིཔནཾ ཨུདིཏོདིཏཝིཔུལཁཏྟིཡཀུལསམྦྷཱུཏཏཱཔརིཀིཏྟནཏོ. སབྦཁཏྟིཡཱནཉྷི ཨཱདིབྷཱུཏམཧཱསམྨཏམཧཱརཱཛཏོ པཊྛཱཡ ཨསམྦྷིནྣཾ ཨུལཱ༹རཏམཾ སཀྱརཱཛཀུལཾ. ཡཐཱཧ –

‘‘མཧཱསམྨཏརཱཛསྶ, ཝཾསཛོ ཧི མཧཱམུནི;

ཀཔྤཱདིསྨིཉྷི རཱཛཱསི, མཧཱསམྨཏནཱམཀོ’’ཏི. (མཧཱཝཾསེ དུཏིཡཔརིཙྪེདེ པཋམགཱཐཱ);

ཀཐཾ སདྡྷཱཔབྦཛིཏབྷཱཝཔརིདཱིཔནནྟི ཨཱཧ ‘‘ཀེནཙཱི’’ཏིཨཱདི. པརིཛིཡནཾ པརིཧཱཡནཾ པཱརིཛུཉྙཾ, པརིཛིརཏཱིཏི ཝཱ པརིཛིཎྞོ, ཏསྶ བྷཱཝོ པཱརིཛུཉྙཾ, ཏེན. ཉཱཏིཔཱརིཛུཉྙབྷོགཔཱརིཛུཉྙཱདིནཱ ཀེནཙི པཱརིཛུཉྙེན པརིཧཱནིཡཱ ཨནབྷིབྷཱུཏོ ཨནཛ྄ཛྷོཏྠཊོ ཧུཏྭཱ པབྦཛིཏོཏི ཨཏྠོ. ཏདེཝ པརིཡཱཡནྟརེན ཝིབྷཱཝེཏུཾ ‘‘ཨཔརིཀྑཱིཎཾཡེཝ ཏཾ ཀུལཾ པཧཱཡཱ’’ཏི ཝུཏྟཾ. ཨཔརིཀྑཱིཎནྟི ཧི ཉཱཏིཔཱརིཛུཉྙབྷོགཔཱརིཛུཉྙཱདིནཱ ཀེནཙི པཱརིཛུཉྙེན ཨཔརིཀྑཡཾ. སདྡྷཱཡ པབྦཛིཏོཏི སདྡྷཱཡ ཨེཝ པབྦཛིཏོ. ཨེཝཉྷི ‘‘ཀེནཙཱི’’ཏིཨཱདིནཱ ¶ ནིཝཏྟིཏཝཙནཾ སཱུཔཔནྣཾ ཧོཏི. ནནུ ཙ ‘‘སཀྱཀུལཱ པབྦཛིཏོ’’ཏི ཨིདཾ ཨུཙྩཱཀུལཱ པབྦཛིཏབྷཱཝཔརིདཱིཔནམེཝ སིཡཱ ཏདཏྠསྶེཝ ཝིཉྙཱཡམཱནཏྟཱ, ན སདྡྷཱཔབྦཛིཏབྷཱཝཔརིདཱིཔནཾ ཏདཏྠསྶ ཨཝིཉྙཱཡམཱནཏྟཱཏི? ན ཁོ པནེཝཾ དཊྛབྦཾ མཧནྟཾ ཉཱཏིཔརིཝཊྚཾ, མཧནྟཉྩ བྷོགཀྑནྡྷཾ པཧཱཡ སདྡྷཱཔབྦཛིཏབྷཱཝསྶ ཨཏྠཏོ སིདྡྷཏྟཱ. ཏཐཱ ཧི ལོཀནཱཐསྶ ཨབྷིཛཱཏིཡཾ ཏསྶ ཀུལསྶ ན ཀིཉྩི པཱརིཛུཉྙཾ, ཨཐ ཁོ ཝུཌྜྷིཡེཝ, ཏཏོ ཏསྶ སམིདྡྷཏམབྷཱཝོ ལོཀེ པཱཀཊོ པཉྙཱཏོ ཧོཏི, ཏསྨཱ ‘‘སཀྱཀུལཱ པབྦཛིཏོ’’ཏི ཨེཏྟཀེཡེཝ ཝུཏྟེ ཏཐཱ སམིདྡྷཏམཾ ཀུལཾ པཧཱཡ སདྡྷཱཔབྦཛིཏབྷཱཝོ སིདྡྷོཡེཝཱཏི, ཨིམཾ པརིཧཱརཾ ‘‘ཀེནཙི པཱརིཛུཉྙེནཱ’’ཏིཨཱདིནཱ ཝིབྷཱཝེཏཱིཏི དཊྛབྦཾ. ཏཏོ པརནྟི ‘‘ཀོསལེསུ ཙཱརིཀཾ ཙརམཱནོ’’ཏིཨཱདིཝཙནཾ.

‘‘སཱདྷུ དྷམྨརུཙི རཱཛཱ, སཱདྷུ པཉྙཱཎཝཱ ནརོ;

སཱདྷུ མིཏྟཱནམདུབྦྷོ, པཱཔསྶཱཀརཎཾ སུཁ’’ནྟི. ཨཱདཱིསུ –

ཝིཡ ¶ སཱདྷུསདྡོ ཨིདྷ སུནྡརཏྠོཏི ཨཱཧ ‘‘སུནྡརཾ ཁོ པནཱ’’ཏི. ཁོཏི ཨཝདྷཱརཎཏྠེ ནིཔཱཏོ, པནཱཏི པཀྑནྟརཏྠེ. ཨེཝཾ སཱཏྠཀཏཱཝིཉྙཱཔནཏྠཉྷི སཾཝཎྞནཱཡམེཏེསཾ གཧཎཾ. སུནྡརནྟི ཙ བྷདྡཀཾ, བྷདྡཀཏཱ ཙ པསྶནྟཱནཾ ཧིཏསུཁཱཝཧབྷཱཝེནཱཏི ཝུཏྟཾ ‘‘ཨཏྠཱཝཧཾ སུཁཱཝཧ’’ནྟི. ཨཏྠོ ཙེཏྠ དིཊྛདྷམྨིཀསམྤརཱཡིཀཔརམཏྠཝསེན ཏིཝིདྷཾ ཧིཏཾ སུཁམྤི ཏཐེཝ ཏིཝིདྷཾ སུཁཾ.

ཏཐཱརཱུཔཱནནྟི ཏཱདིསཱནཾ, ཨཡཾ སདྡཏོ ཨཏྠོ. ཨཏྠམཏྟཾ པན དསྶེཏུཾ ‘‘ཨེཝརཱུཔཱན’’ནྟི ཝུཏྟཾ. ཡཱདིསེཧི ཙ གུཎེཧི བྷགཝཱ སམནྣཱགཏོ ཙཏུཔྤམཱཎིཀསྶ ལོཀསྶ སབྦཀཱལམྤི-ཨཙྩནྟཱཡ-སདྡྷཱཡ-པསཱདནཱིཡོ ཏེསཾ ཡཐཱབྷཱུཏསབྷཱཝཏྟཱ, ཏཱདིསེཧི གུཎེཧི སམནྣཱགཏབྷཱཝཾ སནྡྷཱཡ ‘‘ཏཐཱརཱུཔཱནཾ ཨརཧཏ’’ནྟི ཝུཏྟནྟི དསྶེནྟོ ‘‘ཡཐཱརཱུཔོ’’ཏིཨཱདིམཱཧ. ལདྡྷསདྡྷཱནནྟི ལདྡྷསདྡཧཱནཾ, པརཛནསྶ སདྡྷཾ པཊིལབྷནྟཱནནྟི ཝུཏྟཾ ཧོཏི. ལདྡྷསདྡཱནནྟི ཝཱ པཊིལདྡྷཀིཏྟིསདྡཱནཾ, ཨེཏེན ‘‘ཨརཧཏ’’ནྟི པདསྶ ཨརཧནྟཱནནྟི ཨཏྠོ, ཨརཧནྟསམཉྙཱཡ ཙ པཱཀཊབྷཱཝོ དསྶིཏོ, ཨཔིཙ ‘‘ཡཐཱརཱུཔོ སོ བྷཝཾ གོཏམོ’’ཏི ཨིམིནཱ ‘‘ཏཐཱརཱུཔཱན’’ནྟི པདསྶ ཨནིཡམཝསེན ཨཏྠཾ དསྶེཏྭཱ སརཱུཔནིཡམཝསེནཔི དསྶེཏུཾ ‘‘ཡཐཱབྷུཙྩགུཎཱདྷིགམེན ལོཀེ ཨརཧནྟོཏི ལདྡྷསདྡྷཱན’’ནྟི ཝུཏྟཾ, ཨིདམྤི ཧི ‘‘ཏཐཱརཱུཔཱན’’ནྟི པདསྶེཝ ཨཏྠདསྶནཾ, ཨཡམེཝ ཙ ནཡོ ཨཱཙརིཡེཧི ཨདྷིཔྤེཏོ ཨིདྷ ཊཱིཀཱཡཾ, (དཱི. ནི. ཊཱི. ༡.༢༥༥) སཱརཏྠདཱིཔནིཡཉྩ ཏཐེཝ ཝུཏྟཏྟཱ. ‘‘ཡཐཱརཱུཔཱ ཏེ བྷཝནྟོ ཨརཧནྟོ’’ཏི ཨཝཏྭཱ ‘‘ཡཐཱརཱུཔོ སོ བྷཝཾ གོཏམོ’’ཏི ཝཙནཾ བྷགཝཏིཡེཝ གརུགཱརཝཝསེན ‘‘ཏཐཱརཱུཔཱནཾ ཨརཧཏ’’ནྟི པུཐུཝཙནནིདྡིཊྛབྷཱཝཝིཉྙཱཔནཏྠཾ ¶ . ཨཏྟནི, གརཱུསུ ཙ ཧི བཧུཝཙནཾ ཨིཙྪནྟི སདྡཝིདཱུ. ‘‘ཡཐཱབྷུཙྩ…པེ… ཨརཧཏ’’ནྟི ཨིམིནཱ ཙ དྷམྨཔྤམཱཎཱནཾ, ལཱུཁཔྤམཱཎཱནཉྩ སཏྟཱནཾ བྷགཝཏོ པསཱདཱཝཧཏཾ ཡཐཱརུཏཏོ དསྶེཏི ཨརཧནྟབྷཱཝསྶ ཏེསཉྙེཝ ཡཐཱརཧཾ ཝིསཡཏྟཱ, ཏཾདསྶནེན པན ཨིཏརེསམྤི རཱུཔཔྤམཱཎགྷོསཔྤམཱཎཱནཾ པསཱདཱཝཧཏཱ དསྶིཏཱཡེཝ ཏདཝིནཱབྷཱཝཏོཏི དཊྛབྦཾ.

པསཱདསོམྨཱནཱིཏི པསནྣཱནི, སཱིཏལཱནི ཙ, པསཱདཝསེན ཝཱ སཱིཏལཱནི, ཨནེན པསནྣམནཏཾ དསྶེཏི. ‘‘དསྶན’’ནྟི ཝུཏྟེཔི ཏདུཏྟརི ཀཏྟབྦཏཱསམྦྷཝཏོ ¶ ཨཡཾ སམྦྷཱཝནཏྠོ ལབྦྷཏཱིཏི ཨཱཧ ‘‘དསྶནམཏྟམྤི སཱདྷུ ཧོཏཱི’’ཏི. ཨིཏརཐཱ ཧི ‘‘དསྶནཉྙེཝ སཱདྷུ, ན ཏདུཏྟརི ཀརཎ’’ནྟི ཨནདྷིཔྤེཏཏྠོ ཨཱཔཛྫཏི, སམྦྷཱཝནཏྠོ ཙེཏྠ པི-སདྡོ, ཨཔི-སདྡོ ཝཱ ལུཏྟནིདྡིཊྛོ. ‘‘བྲཧྨཙརིཡཾ པཀཱསེཏཱི’’ཏི ཨེཏྠ ཨིཏི-སདྡོ ‘‘ཨབྦྷུགྒཏོ’’ཏི ཨིམིནཱ སམྦནྡྷམུཔགཏོ, ཏསྨཱ ཨཡཾ ‘‘སཱདྷུ ཧོཏཱི’’ཏི ཨིདྷ ཨིཏི-སདྡོ ‘‘བྲཱཧྨཎོ པོཀྑརསཱཏཱི ཨམྦཊྛཾ མཱཎཝཾ ཨཱམནྟེསཱི’’ཏི ཨིམིནཱ སམྦཛ྄ཛྷིཏབྦོ, ‘‘ཨཛ྄ཛྷཱསཡཾ ཀཏྭཱ’’ཏི ཙ པཱཋསེསོ ཏདཏྠསྶ ཝིཉྙཱཡམཱནཏྟཱ. ཡསྶ ཧི ཨཏྠོ ཝིཉྙཱཡཏི, སདྡོ ན པཡུཛྫཏི, སོ ‘‘པཱཋསེསོ’’ཏི ཝུཙྩཏི, ཨིམམཏྠཾ ཝིབྷཱཝེནྟོ ཨཱཧ ‘‘དསྶནམཏྟམྤི སཱདྷུ ཧོཏཱིཏི ཨེཝཾ ཨཛ྄ཛྷཱསཡཾ ཀཏྭཱ’’ཏི. མཱུལཔཎྞཱསཀེ ཙཱུལ༹སཱིཧནཱདསུཏྟཊྛཀཐཱཡ (མ. ནི. ཨཊྛ. ༡.༡༤༤) ཨཱགཏཾ ཀོསིཡསཀུཎཝཏྠུ ཙེཏྠ ཀཐེཏབྦཾ.

ཨམྦཊྛམཱཎཝཀཐཱཝཎྞནཱ

༢༥༦. ‘‘ཨཛ྄ཛྷཱཡཀོ’’ཏི ཨིདཾ པཋམཔཀཏིཡཱ གརཧཱཝཙནམེཝ, དུཏིཡཔཀཏིཡཱ པསཾསཱཝཙནཾ ཀཏྭཱ ཝོཧརནྟི ཡཐཱ ཏཾ ‘‘པུརིསོ ནརོ’’ཏི དསྶེཏུཾ ཨགྒཉྙསུཏྟཔད (དཱི. ནི. ༣.༡༣༢) མུདཱཧཊཾ. ཏཏྠ ཨིམེཏི ཛྷཱཡཀནཱམེན སམཉྙིཏཱ ཛནཱ. ན ཛྷཱཡནྟཱིཏི པཎྞཀུཊཱིསུ ཛྷཱནཾ ན ཨཔྤེནྟི ན ནིཔྥཱདེནྟི, གཱམནིགམསཱམནྟཾ ཨོསརིཏྭཱ ཝེདགནྠེ ཀརོནྟཱཝ ཨཙྪནྟཱིཏི ཨཏྠོ. ཏཾ པནེཏེསཾ བྲཱཧྨཎཛྷཱཡཀསངྑཱཏཾ པཋམདུཏིཡནཱམཾ ཨུཔཱདཱཡ ཏཏིཡམེཝ ཛཱཏནྟི ཨཱཧ ‘‘ཨཛ྄ཛྷཱཡཀཱཏྭེཝ ཏཏིཡཾ ཨཀྑརཾ ཨུཔནིབྦཏྟ’’ནྟི, ཨཀྑརནྟི ཙ ནིརུཏྟི སམཉྙཱ. སཱ ཧི ཏསྨིཾཡེཝ ནིརུལ༹ྷབྷཱཝེན ཨཉྙཏྠ ཨསཉྩརཎཏོ ‘‘ཨཀྑར’’ནྟི ཝུཙྩཏི. མནྟེ པརིཝཏྟེཏཱིཏི ཝེདེ སཛ྄ཛྷཱཡཏི, པརིཡཱཔུཎཱཏཱིཏི ཨཏྠོ. ཨིདྷ ཧི ཨདྷིཨཱཔུབྦཨི-སདྡཝསེན པདསནྡྷི, ཨིཏརཏྠ པན ཛྷེ-སདྡཝསེན. མནྟེ དྷཱརེཏཱིཏི ཡཐཱཨདྷཱིཏེ མནྟེ ཨསམྨཱུལ༹ྷེ ཀཏྭཱ ཧདཡེ ཋཔེཏི.

ཨཱཐབྦཎཝེདོ ¶ པརཱུཔགྷཱཏཀརཏྟཱ སཱདྷཱུནམཔརིབྷོགོཏི ཀཏྭཱ ‘‘ཨིརུཝེདཡཛུཝེདསཱམཝེདཱན’’ནྟི ཝུཏྟཾ. ཏཏྠ ཨིཙྩནྟེ ཐོམཱིཡནྟེ དེཝཱ ཨེཏཱཡཱཏི ཨིརུ ཨིཙ-དྷཱཏུཝསེན ཙ-ཀཱརསྶ ར-ཀཱརཾ ཀཏྭཱ, ཨིཏྠིལིངྒོཡཾ ¶ . ཡཛྫནྟེ པུཛྫནྟེ དེཝཱ ཨནེནཱཏི ཡཛུ པུནྣཔུཾསཀལིངྒཝསེན. སོཡནྟི ཨནྟཾ ཀརོནྟི, སཱཡནྟི ཝཱ ཏནུཾ ཀརོནྟི པཱཔམནེནཱཏི སཱམཾ སོ-དྷཱཏུཔཀྑེ ཨོ-ཀཱརསྶ ཨཱ-ཀཱརཾ ཀཏྭཱ. ཝིདནྟི དྷམྨཾ, ཀམྨཾ ཝཱ ཨེཏེཧཱིཏི ཝེདཱ, ཏེ ཨེཝ མནྟཱ ‘‘སུགཏིཡོཔི མུནནྟི, སུཡྻནྟི ཙ ཨེཏེཧཱི’’ཏི ཀཏྭཱ. པཧརཎཾ སངྒྷཊྚནཾ པཧཏཾ, ཨོཊྛཱནཾ པཧཏཾ ཏཐཱ, ཏསྶ ཀརཎཝསེན, ཨོཊྛཱནི ཙཱལེཏྭཱ པགུཎབྷཱཝཀརཎཝསེན པཱརཾ གཏོ, ན ཨཏྠཝིབྷཱཝནཝསེནཱཏི ཝུཏྟཾ ཧོཏི. པཱརགཱུཏི ཙ ནིཙྩསཱཔེཀྑཏཱཡ ཀིཏནྟསམཱསོ.

‘‘སཧ ནིགྷཎྚུནཱ’’ཏིཨཱདིནཱ ཡཐཱཝཱཀྱཾ ཝིབྷཏྱནྟཝསེན ནིབྦཙནདསྶནཾ. ནིགྷཎྚུརུཀྑཱདཱིནནྟི ནིགྷཎྚུ ནཱམ རུཀྑཝིསེསོ, ཏདཱདིཀཱནམཏྠཱནནྟི ཨཏྠོ, ཨེཏེན ནིགྷཎྚུརུཀྑཔརིཡཱཡཾ ཨཱདིཾ ཀཏྭཱ ཏཔྤམུཁེན སེསཔརིཡཱཡཱནཾ ཏཏྠ དསྶིཏཏྟཱ སོ གནྠོ ནིགྷཎྚུ ནཱམ ཡཐཱ ཏཾ ‘‘པཱརཱཛིཀཀཎྜོ, ཀུསལཏྟིཀོ’’ཏི ཨཡམཏྠོ དསྶིཏོ ཨིམིནཱ ཡཐཱརུཏམེཝ ཏདཏྠསྶ ཨདྷིགཏཏྟཱ. ཨཱཙརིཡཱ པན ཨེཝཾ ཝདནྟི ‘‘ཝཙནཱིཡཝཱཙཀབྷཱཝེན ཨཏྠཾ, སདྡཉྩ ནིཁཌཏི བྷིནྡཏི ཝིབྷཛྫ དསྶེཏཱིཏི ནིཁཎྜུ, སོ ཨེཝ ཁ-ཀཱརསྶ གྷ-ཀཱརཾ ཀཏྭཱ ‘ནིགྷཎྜཱུ’ཏི ཝུཏྟོ’’ཏི (དཱི. ནི. ཊཱི. ༡.༢༥༦), ཏདེཏཾ ཨཊྛཀཐཱནཡཏོ ཨཉྙནཡདསྶནནྟི གཧེཏབྦཾ. ཨིཏརཐཱ ཧི སོ ཨཊྛཀཐཱཡ ཝིརོདྷོ སིཡཱ, ཝིཙཱརེཏབྦམེཏཾ. ཨཀྑརཙིནྟཀཱ པན ཨེཝམིཙྪནྟི ‘‘ཏཏྠ ཏཏྠཱགཏཱནི ནཱམཱནི ནིསྶེསཏོ གྷཊེནྟི རཱསིཾ ཀརོནྟི ཨེཏྠཱཏི ནིགྷཎྚུ ནིགྒཧིཏཱགམེནཱ’’ཏི. ཝེཝཙནཔྤཀཱསཀནྟི པརིཡཱཡསདྡདཱིཔཀཾ, ཨེཀེཀསྶ ཨཏྠསྶ ཨནེཀཔརིཡཱཡཝཙནཝིབྷཱཝཀནྟི ཨཏྠོ. ནིདསྶནམཏྟཉྩེཏཾ ཨནེཀེསམྤི ཨཏྠཱནཾ ཨེཀསདྡཝཙནཱིཡཏཱཝིབྷཱཝནཝསེནཔི ཏསྶ གནྠསྶ པཝཏྟཏྟཱ. ཀོ པནེསོཏི? ཨེཏརཧི ནཱམལིངྒཱནུསཱསནརཏནམཱལཱབྷིདྷཱནཔྤདཱིཔིཀཱདི. ཝཙཱིབྷེདཱདིལཀྑཎཱ ཀིརིཡཱ ཀཔྤཱིཡཏི ཨེཏེནཱཏི ཀིརིཡཱཀཔྤོ, ཏཐེཝ ཝིཝིདྷཾ ཀཔྤཱིཡཏི ཨེཏེནཱཏི ཝིཀཔྤོ, ཀིརིཡཱཀཔྤོ ཙ སོ ཝིཀཔྤོ ཙཱཏི ཀིརིཡཱཀཔྤཝིཀཔྤོ. སོ ཧི ཝཎྞཔདསམྦནྡྷཔདཏྠཱདིཝིབྷཱགཏོ བཧུཝིཀཔྤོཏི ཀཏྭཱ ‘‘ཀིརིཡཱཀཔྤཝིཀཔྤོ’’ཏི ཝུཙྩཏི, སོ ཙ གནྠཝིསེསོཡེཝཱཏི ཝུཏྟཾ ‘‘ཀཝཱིནཾ ཨུཔཀཱརཱཝཧཾ སཏྠ’’ནྟི, ཙཏུནྣམྤི ཀཝཱིནཾ ཀཝིབྷཱཝསམྤདཱབྷོགསམྤདཱདིཔཡོཛནཝསེན ཨུཔཀཱརཱཝཧོ གནྠོཏི ཨཏྠོ ¶ . ཀོ པནེསོཏི? ཀབྱབནྡྷནཝིདྷིཝིདྷཱཡཀོ ཀབྱཱལངྐཱརགཱིཏཱསུབོདྷཱལངྐཱརཱདི. ཨིདཾ པན མཱུལཀིརིཡཱཀཔྤགནྠཾ སནྡྷཱཡ ཝུཏྟཾ. སོ ཧི མཧཱཝིསཡོ སཏསཧསྶགཱཐཱཔརིམཱཎོ, ཡཾ ‘‘ནཡཙརིཡཱདིཔཀརཎ’’ནྟིཔི ཝདནྟི. ཝཙནཏྠཏོ པན ཀིཊཡཏི གམེཏི ཉཱཔེཏི ཀིརིཡཱདིཝིབྷཱགནྟི ཀེཊུབྷཾ ཀིཊ-དྷཱཏུཏོ ཨབྷཔཙྩཡཝསེན, ཨ-ཀཱརསྶ ¶ ཙ ཨུཀཱརོ. ཨཐ ཝཱ ཀིརིཡཱདིཝིབྷཱགཾ ཨནཝསེསཔརིཡཱདཱནཏོ ཀིཊེནྟོ གམནྟོ ཨོབྷེཏི པཱུརེཏཱིཏི ཀེཊུབྷཾ ཀིཊ-སདྡཱུཔཔདཨུབྷདྷཱཏུཝསེན. ཨཔིཙ ཀིཊནྟི གཙྪནྟི ཀཝཡོ བནྡྷེསུ ཀོསལླམེཏེནཱཏི ཀེཊུབྷཾ, པུརིམནཡེནེཝེཏྠ པདསིདྡྷི. ཋཱནཀརཎཱདིཝིབྷཱགཏོ, ནིབྦཙནཝིབྷཱགཏོ ཙ ཨཀྑརཱ པབྷེདཱིཡནྟི ཨེཏེནཱཏི ཨཀྑརཔྤབྷེདོ, ཏཾ པན ཚསུ ཝེདངྒེསུ པརིཡཱཔནྣཾ པཀརཎདྭཡམེཝཱཏི ཝུཏྟཾ ‘‘སིཀྑཱ ཙ ནིརུཏྟི ཙཱ’’ཏི. ཏཏྠ སིཀྑནྟི ཨཀྑརསམཡམེཏཱཡཱཏི སིཀྑཱ, ཨཀཱརཱདིཝཎྞཱནཾ ཋཱནཀརཎཔཡཏནཔཊིཔཱདཀསཏྠཾ. ནིཙྪཡེན, ནིསྶེསཏོ ཝཱ ཨུཏྟི ནིརུཏྟི, ཝཎྞཱགམཝཎྞཝིཔརིཡཱཡཱདིལཀྑཎཾ. ཝུཏྟཉྩ –

‘‘ཝཎྞཱགམོ ཝཎྞཝིཔརིཡཱཡོ,

དྭེ ཙཱཔརེ ཝཎྞཝིཀཱརནཱསཱ;

དྷཱཏུསྶ ཨཏྠཱཏིསཡེན ཡོགོ,

ཏདུཙྩཏེ པཉྩཝིདྷཱ ནིརུཏྟཱི’’ཏི. (པཱརཱ. ཨཊྛ. ༡.ཝེརཉྫཀཎྜཝཎྞནཱ; ཝིསུདྡྷི. ༡.༡༤༤; མཧཱནི. ཨཊྛ. ༡.༥༠);

ཨིདྷ པན ཏབྦསེན ཨནེཀདྷཱ ནིབྦཙནཔརིདཱིཔཀཾ སཏྠཾ ཨུཏྟརཔདལོཔེན ‘‘ནིརུཏྟཱི’’ཏི ཨདྷིཔྤེཏཾ ནིབྦཙནཝིབྷཱགཏོཔི ཨཀྑརཔབྷེདབྷཱཝསྶ ཨཱཙརིཡེཧི (དཱི. ནི. ཊཱི. ༡.༢༥༦) ཝུཏྟཏྟཱ, ཏམནྟརེན ནིབྦཙནཝིབྷཱགསྶ ཙ བྱཱཀརཎངྒེན སངྒཧིཏཏྟཱ. བྱཱཀརཎཾ, ནིརུཏྟི ཙ ཧི པཙྩེཀམེཝ ཝེདངྒཾ ཡཐཱཧུ –

‘‘ཀཔྤོ བྱཱཀརཎཾ ཛོཏི-སཏྠཾ སིཀྑཱ ནིརུཏྟི ཙ;

ཚནྡོཝིཙིཏི ཙེཏཱནི, ཝེདངྒཱནི ཝདནྟི ཚཱ’’ཏི.

ཏསྨཱ བྱཱཀརཎངྒེན ཨསངྐརབྷཱུཏམེཝ ནིརུཏྟིནཡེན ནིབྦཙནམིདྷཱདྷིཔྤེཏཾ, ན ཚསུ བྱཉྫནཔདེསུ ཝིཡ ཏདུབྷཡསཱདྷཱརཎནིབྦཙནཾ ཝེདངྒཝིསཡཏྟཱཏི ཝེདིཏབྦཾ. ཨཡཾ པནེཏྠ མཧཱནིདྡེསཊྛཀཐཱཡ (མཧཱནི. ཨཊྛ. ༥༠) ཨཱགཏནིརུཏྟིནཡཝིནིཙྪཡོ ¶ . ཏཏྠ ཧི ‘‘ནཀྑཏྟརཱཛཱརིཝ ཏཱརཀཱན’’ནྟི (ཛཱ. ༡.༡.༡༡, ༢༥) ཨེཏྠ ར-ཀཱརཱགམོ ཝིཡ ཨཝིཛྫམཱནསྶ ཨཀྑརསྶ ཨཱགམོ ཝཎྞཱགམོ ནཱམ. ཧིཾསནཏྟཱ ‘‘ཧིཾསོ’’ཏི ཝཏྟབྦེ ‘‘སཱིཧོ’’ཏི པརིཝཏྟནཾ ཝིཡ ཝིཛྫམཱནཱནམཀྑརཱནཾ ཧེཊྛུཔརིཡཝསེན པརིཝཏྟནཾ ཝཎྞཝིཔརིཡཱཡོ ནཱམ. ‘‘ནཝཚནྣཀེདཱནི དིཡྻཏཱི’’ཏི (ཛཱ. ༡.༦.༨༨) ཨེཏྠ ཨ-ཀཱརསྶ ཨེ-ཀཱརཱཔཛྫནཾ ཝིཡ ཨཉྙཀྑརསྶ ཨཉྙཀྑརཱཔཛྫནཾ ཝཎྞཝིཀཱརོ ནཱམ. ‘‘ཛཱིཝནསྶ མཱུཏོ ཛཱིཝནམཱུཏོ’’ཏི ཝཏྟབྦེ ¶ ‘‘ཛཱིམཱུཏོ’’ཏི ཝ-ཀཱར ན-ཀཱརཱནཾ ཝིནཱསོ ཝིཡ ཝིཛྫམཱནཀྑརཱནཾ ཝིནཱསོ ཝཎྞཝིནཱསོ ནཱམ. ‘‘ཕརུསཱཧི ཝཱཙཱཧི པཀུབྦམཱནོ, ཨཱསཛྫ མཾ ཏྭཾ ཝདསེ ཀུམཱརཱ’’ཏི (ཛཱ. ༡.༡༠.༨༥) ཨེཏྠ ‘‘པཀུབྦམཱནོ’’ཏི པདསྶ ཨབྷིབྷཝམཱནོཏི ཨཏྠཔཊིཔཱདནཾ ཝིཡ ཏཏྠ ཏཏྠ ཡཐཱཡོགཾ ཝིསེསཏྠཔཊིཔཱདནཾ དྷཱཏཱུནམཏྠཱཏིསཡེན ཡོགོ ནཱམཱཏི.

ཡཐཱཝུཏྟཔྤབྷེདཱནཾ ཏིཎྞཾ ཝེདཱནཾ ཨཡཾ ཙཏུཏྠོཡེཝ སིཡཱ, ཨཐ ཀེན སདྡྷིཾ པཉྩམོཏི ཨཱཧ ‘‘ཨཱཐབྦཎཝེདཾ ཙཏུཏྠཾ ཀཏྭཱ’’ཏི. ཨཱཐབྦཎཝེདོ ནཱམ ཨཱཐབྦཎཝེདིཀེཧི ཝིཧིཏོ པརཱུཔགྷཱཏཀརོ མནྟོ, སོ པན ཨིཏིཧཱསཔཉྩམབྷཱཝཔྤཀཱསནཏྠཾ གཎིཏཏཱམཏྟེན གཧིཏོ, ན སརཱུཔཝསེན, ཨེཝཉྩ ཀཏྭཱ ‘‘ཨེཏེས’’ནྟི པདསྶ ཏེསཾ ཏིཎྞཾ ཝེདཱནནྟྭེཝ ཨཏྠོ གཧེཏབྦོ. ཏཉྷི ‘‘ཏིཎྞཾ ཝེདཱན’’ནྟི ཨེཏསྶ ཝིསེསནནྟི. ཨིཏིཧ ཨསཱཏི ཨེཝཾ ཨིདྷ ལོཀེ ཨཧོསི ‘‘ཨཱསཱ’’ཏིཔི ཀཏྠཙི པཱཋོ, སོཡེཝཏྠོ. ཨིཧ ཋཱནེ ཨིཏི ཨེཝཾ, ཨིདཾ ཝཱ ཀམྨཾ, ཝཏྠུཾ ཝཱ ཨཱས ཨིཙྪཱཧཱིཏིཔི ཨཏྠོ. ཏསྶ གནྠསྶ མཧཱཝིསཡཏཱདཱིཔནཏྠཉྩེཏྠ ཝིཙྪཱཝཙནཾ, ཨིམིནཱ ‘‘ཨིཏིཧཱསཱ’’ཏི ཝཙནེན པཊིསཾཡུཏྟོ ཨིཏིཧཱསོ ཏདྡྷིཏཝསེནཱཏི ཨཏྠཾ དསྶེཏི. ཨིཏིཧ ཨཱས, ཨིཏིཧ ཨཱསཱ’’ཏི ཨཱིདིསཝཙནཔཊིསཾཡུཏྟོ ཨིཏིཧཱསོ ནིརུཏྟིནཡེནཱཏི ཨཏྠདསྶནནྟིཔི ཝདནྟི. ཨཀྑརཙིནྟཀཱ པན ཨེཝམིཙྪནྟི ‘‘ཨིཏིཧ-སདྡོ པཱརམྤརིཡོཔདེསེ ཨེཀོཝ ནིཔཱཏོ, ཨསཏི ཝིཛྫཏཱིཏི ཨསོ, ཨིཏིཧ ཨསོ ཨེཏསྨིནྟི ཨིཏིཧཱསོ སམཱསཝསེནཱ’’ཏི, ཏེསཾ མཏེ ‘‘ཨིཏིཧ ཨསཱ’’ཏི ཨེཏྠ ཨེཝཾ པཱརམྤརིཡོཔདེསོ ཨས ཝིཛྫམཱནོ ཨཧོསཱིཏི ཨཏྠོ. ‘‘པུརཱཎཀཐཱསངྑཱཏོ’’ཏི ཨིམིནཱ ཏསྶ གནྠཝིསེསབྷཱཝམཱཧ, བྷཱརཏནཱམཀཱནཾ དྭེབྷཱཏིཀརཱཛཱུནཾ ཡུདྡྷཀཐཱ, རཱམརཉྙོ སཱིཏཱཧརཎཀཐཱ, ནརསཱིཧརཱཛུཔྤཏྟིཀཐཱཏི ཨེཝམཱདིཔུརཱཎཀཐཱསངྑཱཏོ ¶ བྷཱརཏཔུརཱཎརཱམཔུརཱཎནརསཱིཧཔུརཱཎཱདིགནྠོ ཨིཏིཧཱསོ ནཱམཱཏི ཝུཏྟཾ ཧོཏི. ‘‘ཏེསཾ ཨིཏིཧཱསཔཉྩམཱནཾ ཝེདཱན’’ནྟི ཨིམིནཱ ཡཐཱཝཱཀྱཾ ‘‘ཏིཎྞཾ ཝེདཱན’’ནྟི ཨེཏྠ ཝིསེསནབྷཱཝཾ དསྶེཏི.

པཛྫཏི ཨཏྠོ ཨེཏེནཱཏི པདཾ, ནཱམཱཁྱཱཏོཔསགྒནིཔཱཏཱདིཝསེན ཨནེཀཝིབྷཱགཾ ཝིབྷཏྟིཡནྟཔདཾ. ཏདཔི བྱཱཀརཎེ ཨཱགཏམེཝཱཏི ཝུཏྟཾ ‘‘ཏདཝསེས’’ནྟི, པདཏོ ཨཝསེསཾ པཀཏིཔཙྩཡཱདིསདྡལཀྑཎབྷཱུཏནྟི ཨཏྠོ. ཏཾ ཏཾ སདྡཾ, ཏདཏྠཉྩ བྱཱཀརོཏི བྱཱཙིཀྑཏི ཨེཏེནཱཏི བྱཱཀརཎཾ, ཝིསེསེན ཝཱ ཨཱཀརཱིཡནྟེ པཀཏིཔཙྩཡཱདཡོ ཨབྷིནིཔྥཱདཱིཡནྟེ ཨེཏྠ, ཨནེནཱཏི ཝཱ བྱཱཀརཎཾ, སཱདྷུསདྡཱནམནྭཱཁྱཱཡཀཾ མུདྡྷབོདྷབྱཱཀརཎ སཱརསྶཏབྱཱཀརཎ པཱཎིནཱིབྱཱཀརཎཙནྡྲབྱཱཀརཎཱདི ཨདྷུནཱཔི ཝིཛྫམཱནསཏྠཾ. ཨདྷཱིཡཏཱིཏི ཨཛ྄ཛྷཱཡཏི. ཝེདེཏཱིཏི པརེསཾ ཝཱཙེཏི. ཙ-སདྡོ ཨཏྠདྭཡསམུཙྩིནནཏྠོ, ཝིཀཔྤནཏྠོ ཝཱ ཨཏྠནྟརསྶ ཝིཀཔྤིཏཏྟཱ. ཝིཙིཏྲཱ ¶ ཧི ཏདྡྷིཏཝུཏྟི. པདཀོཏི བྱཱཀརཎེསུ ཨཱགཏཔདཀོསལླཾ སནྡྷཱཡ ཝུཏྟཾ, ཝེཡྻཱཀརཎོཏི ཏདཝསིཊྛཔཀཏིཔཙྩཡཱདིསདྡཝིདྷིཀོསལླནྟི ཨིམསྶཏྠསྶ ཝིཉྙཱཔནཏྠཾ པདདྭཡསྶ ཨེཀཏོ ཨཏྠཝཙནཾ. ཨེསཱ ཧི ཨཱཙརིཡཱནཾ པཀཏི, ཡདིདཾ ཡེན ཀེནཙི པཀཱརེན ཨཏྠནྟརཝིཉྙཱཔནཾ. ཨཡཾ ཨཊྛཀཐཱཏོ ཨཔརོ ནཡོ – ཏེ ཨེཝ ཝེདེ པདསོ ཀཱཡཏཱིཏི པདཀོཏི. ཏཏྠ པདསོཏི གཛྫབནྡྷཔཛྫབནྡྷཔདེན. ཀཱཡཏཱིཏི ཀཐེཏི ཡཐཱ ‘‘ཛཱཏཀ’’ནྟི, ཨིམིནཱ ཝེདཀཱརཀསམཏྠཏཾ དསྶེཏི. ཨེཝཉྷི ‘‘ཨཛ྄ཛྷཱཡཀོ’’ཏིཨཱདཱིཧི ཨིམསྶ ཝིསེསོ པཱཀཊོ ཧོཏཱིཏི.

ཨཱཡཏིཾ ཧིཏཾ བཱལཛནསངྑཱཏོ ལོཀོ ན ཡཏཏི ན ཨཱིཧཏི ཨནེནཱཏི ལོཀཱཡཏཾ. ཏཉྷི གནྠཾ ནིསྶཱཡ སཏྟཱ པུཉྙཀིརིཡཱཡ ཙིཏྟམྤི ན ཨུཔྤཱདེནྟི, ལོཀཱ ཝཱ བཱལཛནཱ ཨཱཡཏནྟི ཨུསྶཧནྟི ཝཱདསྶཱདེན ཨེཏྠཱཏི ལོཀཱཡཏཾ. ཨཉྙམཉྙཝིརུདྡྷཾ, སགྒམོཀྑཝིརུདྡྷཾ ཝཱ ཏནོནྟི ཨེཏྠཱཏི ཝིཏཎྜོ ཌ-པཙྩཡཝསེན, ན-ཀཱརསྶ ཙ ཎ-ཀཱརཾ ཀཏྭཱ, ཝིརུདྡྷེན ཝཱདདཎྜེན ཏཱལེ༹ནྟི ཝཱདིནོ ཨེཏྠཱཏི ཝིཏཎྜོ ཏཌི-དྷཱཏུཝསེན, ནིགྒཧཱིཏཱགམཉྩ ཀཏྭཱ. ཨདེསམྤི ཡཾ ནིསྶཱཡ ཝཱདཱིནཾ ཝཱདོ པཝཏྟོ, ཏཾ ཏེསཾ དེསཏོཔི ཨུཔཙཱརཝསེན ཝུཙྩཏི ཡཐཱ ‘‘ཙཀྑུཾ ¶ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ པཧཱིཡམཱནཱ པཧཱིཡཏི, ཨེཏྠ ནིརུཛ྄ཛྷམཱནཱ ནིརུཛ྄ཛྷཏཱི’’ཏི, (དཱི. ནི. ༢.༤༠༡; མ. ནི. ༡.༡༣༣; ཝིབྷ. ༢༠༤) ཝིསེསེན ཝཱ པཎྜིཏཱནཾ མནཾ ཏཌེནྟི ཙཱལེནྟི ཨེཏེནཱཏི ཝིཏཎྜོ, ཏཾ ཝདནྟི, སོ ཝཱདོ ཝཱ ཨེཏེསནྟི ཝིཏཎྜཝཱདཱ, ཏེསཾ སཏྠཾ ཏཐཱ. ལཀྑཎདཱིཔཀསཏྠཾ ཨུཏྟརཔདལོཔེན, ཏདྡྷིཏཝསེན ཝཱ ལཀྑཎནྟི དསྶེཏི ‘‘ལཀྑཎདཱིཔཀ’’ནྟིཨཱདིནཱ. ལཀྑཱིཡཏི བུདྡྷབྷཱཝཱདི ཨནེནཱཏི ལཀྑཎཾ, ནིགྲོདྷབིམྦཏཱདི. ཏེནཱཧ ‘‘ཡེསཾ ཝསེནཱ’’ཏིཨཱདི. དྭཱདསསཧསྶགནྠཔམཱཎནྟི ཨེཏྠ བྷཱཎཝཱརཔྤམཱཎཱདཱིསུ ཝིཡ བཱཏྟིཾསཀྑརགནྠོཝ ཨདྷིཔྤེཏོ. ཝུཏྟཉྷི –

‘‘ཨཊྛཀྑརཱ ཨེཀཔདཾ, ཨེཀཱ གཱཐཱ ཙཏུཔྤདཾ;

གཱཐཱ ཙེཀཱ མཏོ གནྠོ, གནྠོ བཱཏྟིཾསཏཀྑརོ’’ཏི.

དྭཱདསཧི གུཎིཏསཧསྶབཱཏྟིཾསཀྑརགནྠཔྤམཱཎནྟི ཨཏྠོ. ཡཏྠཱཏི ཡསྨིཾ ལཀྑཎསཏྠེ, ཨཱདྷཱརེ ཙེཏཾ བྷུམྨཾ ཡཐཱ ‘‘རུཀྑེ སཱཁཱ’’ཏི. སོལ༹ས ཙ སཧསྶཉྩ སོལ༹སསཧསྶཾ, སོལ༹སཱདྷིཀསཧསྶགཱཐཱཔརིམཱཎཱཏི ཨཏྠོ. ཨེཝཉྷི ཨཱདྷཱརཱདྷེཡྻཝཙནཾ སཱུཔཔནྣཾ ཧོཏཱིཏི. པདྷཱནཝསེན བུདྡྷཱནཾ ལཀྑཎདཱིཔནཏོ བུདྡྷམནྟཱ ནཱམ. པཙྩེཀབུདྡྷཱདཱིནམྤི ཧི ལཀྑཎཾ ཏཏྠ དཱིཔིཏམེཝ. ཏེན ཝུཏྟཾ ‘‘ཡེསཾ ཝསེནཱ’’ཏིཨཱདི.

‘‘ཨནཱུནོ ¶ པརིཔཱུརཀཱརཱི’’ཏི ཨཏྠམཏྟདསྶནཾ, སདྡཏོ པན ཨདྷིགཏམཏྠཾ དསྶེཏུཾ ‘‘ཨཝཡོ ན ཧོཏཱི’’ཏི ཝུཏྟཾ. ཀོ པནེས ཨཝཡོཏི ཨནུཡོགམཔནེཏི ‘‘ཨཝཡོ ནཱམཱ’’ཏིཨཱདིནཱ. ཨཡམེཏྟཱདྷིཔྤཱཡོ – ཡོ ཏཱནི སནྡྷཱརེཏུཾ སཀྐོཏི, སོ ‘‘ཝཡོ’’ཏི ཝུཙྩཏི. ཡོ པན ན སཀྐོཏི, སོ ཨཝཡོ ནཱམ. ཡོ ཙ ཨཝཡོ ན ཧོཏི, སོ ‘‘དྭེ པཊིསེདྷཱ པཀཏིཡཏྠགམཀཱ’’ཏི ཉཱཡེན ཝཡོ ཨེཝཱཏི. ཝཡཏཱིཏི ཧི ཝཡོ, ཨཱདིམཛ྄ཛྷཔརིཡོསཱནེསུ ཀཏྠཙིཔི ཨཔརིཀིལམནྟོ ཨཝིཏྠཱཡནྟོ ཏེ གནྠེ སནྟཱནེ པཎེཏི བྱཝཧརཏཱིཏི ཨཏྠོ. ཨཡཾ པན ཝིནཡཊྛཀཐཱནཡོ (པཱརཱ. ༨༤) – ཨནཝཡོཏི ཨནུ ཨཝཡོ, སནྡྷིཝསེན ཨུ-ཀཱརལོཔོ, ཨནུ ཨནུ ཨཝཡོ ཨནཱུནོ, པརིཔུཎྞསིཔྤོཏི ཨཏྠོ. ཝཡོཏི ཧི ཧཱནི ‘‘ཨཱཡཝཡོ’’ཏིཨཱདཱིསུ ཝིཡ, ནཏྠི ཨེཏསྶ ཡཐཱཝུཏྟགནྠེསུ ཝཡོ ཨཱུནཏཱཏི ཨཝཡོ, ཨནུ ཨནུ ཨཝཡོ ཨནཝཡོཏི.

‘‘ཨནུཉྙཱཏོ’’ཏི ¶ པདསྶ ཀམྨསཱདྷནཝསེན, ‘‘པཊིཉྙཱཏོ’’ཏི པདསྶ ཙ ཀཏྟུསཱདྷནཝསེན ཨཏྠཾ དསྶེནྟོ ‘‘ཨཱཙརིཡེནཱ’’ཏིཨཱདིམཱཧ. ཨསྶཱཏི ཨམྦཊྛསྶ. པཱལི༹ཡཾ ‘‘ཡམཧཾ ཛཱནཱམི, ཏཾ ཏྭཾ ཛཱནཱསཱི’’ཏི ཨིདཾ ཨནུཛཱནནཱཀཱརདསྶནཾ, ‘‘ཡཾ ཏྭཾ ཛཱནཱསི, ཏམཧཾ ཛཱནཱམཱི’’ཏི ཨིདཾ པན པཊིཛཱནནཱཀཱརདསྶནནྟི དསྶེཏི ‘‘ཡཾ ཨཧ’’ནྟིཨཱདིནཱ. ‘‘ཨཱམ ཨཱཙརིཡཱ’’ཏི ཧི ཡཐཱགཏཾ པཊིཛཱནནཝཙནམེཝ ཨཏྠཝསེན ཝུཏྟཾ. ཡནྟི ཏེཝིཛྫཀཾ པཱཝཙནཾ. ཏསྶཱཏི ཨཱཙརིཡསྶ. པཊིཝཙནདཱནམེཝ པཊིཉྙཱ ཏཐཱ, ཏཱཡ སཡམེཝ པཊིཉྙཱཏོཏི ཨཏྠོ. ‘‘སཀེ’’ཏིཨཱདི ཨནུཛཱནནཔཊིཛཱནནཱདྷིཀཱརདསྶནཾ. ཨདེསསྶཔི དེསམིཝ ཀཔྤནཱམཏྟེནཱཏི ཝུཏྟཾ ‘‘ཀཏརསྨི’’ནྟིཨཱདི. སསྶ ཨཏྟནོ སནྟཀཾ སཀཾ. ཨཱཙརིཡཱནཾ པརམྤརཏོ, པརམྤརབྷཱུཏེཧི ཝཱ ཨཱཙརིཡེཧི ཨཱགཏཾ ཨཱཙརིཡཀཾ. ཏིསྶོ ཝིཛྫཱ, ཏཱསཾ སམཱུཧོ ཏེཝིཛྫཀཾ, ཝེདཏྟཡཾ. པདྷཱནཾ ཝཙནཾ, པཀཊྛཱནཾ ཝཱ ཨཊྛཀཱདཱིནཾ ཝཙནཾ པཱཝཙནཾ.

༢༥༧. ཨིདཱནི ཡེནཱདྷིཔྤཱཡེན བྲཱཧྨཎོ པོཀྑརསཱཏཱི ཨམྦཊྛཾ མཱཎཝཾ ཨཱམནྟེཏྭཱ ‘‘ཨཡཾ ཏཱཏཱ’’ཏིཨཱདིཝཙནམབྲྭི, ཏདདྷིཔྤཱཡཾ ཝིབྷཱཝེནྟོ ‘‘ཨེས ཀིརཱ’’ཏིཨཱདིམཱཧ. ཏཏྠ ཨུགྒཏསྶཱཏི པུབྦེ པཱཀཊསྶ ཀིཏྟིམཏོ པོརཱཎཛནསྶ. བཧཱུ ཛནཱཏི པཱུརཎཀསྶཔཱདཡོ སནྡྷཱཡ ཝུཏྟཾ. ཨེཀཙྩནྟི ཁཏྟིཡཱདིཛཱཏིམནྟཾ, ལོཀསམྨཏཾ ཝཱ ཛནཾ. གརཱུཏི བྷཱརིཡཾ, ཨཏྟཱནཾ ཏཏོ མོཙེཏྭཱ ཨཔགམནམཏྟམྤི དུཀྐརཾ ཧོཏི, པགེཝ ཏདུཏྟརི ཀརཎནྟི ཝུཏྟཾ ཧོཏི. ཨནཏྠོ ནཱམ ཏཐཱཔགམནཱདིནཱ ནིནྡཱབྱཱརོསཨུཔཱརམྦྷཱདི.

‘‘ཨབྦྷུགྒཏོ’’ཏི ཨེཏྠ ཨབྷིསདྡཡོགེན ཨིཏྠམྦྷཱུཏཱཁྱཱནཏྠཝསེནེཝ ‘‘གོཏམ’’ནྟི ཨུཔཡོགཝཙནཾ ¶ . ‘‘ཏཾ བྷཝནྟཾ, ཏཐཱ སནྟཾཡེཝཱ’’ཏི པདེསུཔི ཏསྶ ཨནུཔཡོགཏྟཱ ཏདཏྠཝསེནེཝཱཏི དསྶེཏི ‘‘ཏསྶ བྷོཏོ’’ཏིཨཱདིནཱ. ཏེནཱཧ ‘‘ཨིདྷཱཔཱི’’ཏིཨཱདི. ཏཐཱ སཏོཡེཝཱཏི ཡེནཱཀཱརེན ཨརཧཏཱདིནཱ སདྡོ ཨབྦྷུགྒཏོ, ཏེནཱཀཱརེན སནྟསྶ བྷཱུཏསྶ ཨེཝ ཏསྶ བྷཝཏོ གོཏམསྶ སདྡོ ཡདི ཝཱ ཨབྦྷུགྒཏོཏི ཨཏྠོ. ཨཔིཙ ཏཾ བྷཝནྟཾ གོཏམཾ ཏཐཱ སནྟཾཡེཝཱཏི ཨེཀསྶཔི ཨཏྠསྶ དྭིཀྑཏྟུཾ སམྦནྡྷབྷཱཝེན ཝཙནཾ སཱམཉྙཝིསིཊྛཏཱཔརིཀཔྤནེན ཨཏྠཝིསེསཝིཉྙཱཔནཏྠཾ, ཏསྨཱ ‘‘ཏསྶ བྷོཏོ གོཏམསྶཱ’’ཏི སཱམཉྙསམྦནྡྷབྷཱཝེན ཝིཙྪིནྡིཏྭཱ ‘‘ཏཐཱ སཏོཡེཝཱ’’ཏི ¶ ཝིསེསསམྦནྡྷབྷཱཝེན ཡོཛེཏབྦཾ. ཡདི-སདྡོ ཙེཏྠ སཾསཡཏྠོ དྭིནྣམྤི ཨཏྠཱནཾ སཾསཡིཏབྦཏྟཱ. ཝཱ-སདྡོ ཙ ཝིཀཔྤནཏྠོ ཏེསུ ཨེཀསྶ ཝིཀཔྤེཏབྦཏྟཱ. སདྡཝིདཱུ པན ཨེཝཾ ཝདནྟི – ‘‘ཨིམསྶ ཝཙནཾ སཙྩཾ ཝཱ ཡདི ཝཱ མུསཱ’’ཏིཨཱདཱིསུ ཝིཡ ཡདི-སདྡོ ཝཱ-སདྡོ ཙ ཨུབྷོཔི ཝིཀཔྤཏྠཱཡེཝ. ཡདི-སདྡོཔི ཧི ‘‘ཡཾ ཡདེཝ པརིསཾ ཨུཔསངྐམཏི ཡདི ཁཏྟིཡཔརིསཾ ཡདི བྲཱཧྨཎཔརིས’’ནྟིཨཱདཱིསུ (ཨ. ནི. ༥.༣༤) ཝཱ-སདྡཏྠོ དིསྶཏི. ‘‘ཨཔྤཾ ཝསྶསཏཾ ཨཱཡུ, ཨིདཱནེཏརཧི ཝིཛྫཏཱི’’ཏིཨཱདཱིསུ ཝིཡ ཙ ཨིདྷ སམཱནཏྠསདྡཔཡོགོཏི. པཱལི༹ཡཾ ‘‘ཡདི ཝཱ ནོ ཏཐཱ’’ཏི ཨིདམྤི ‘‘སནྟཾཡེཝ སདྡོ ཨབྦྷུགྒཏོ’’ཏི ཨིམིནཱ སམྦཛ྄ཛྷིཏྭཱ ཡཐཱཝུཏྟནཡེནེཝ ཡོཛེཏབྦཾ. ནནུ ‘‘གོཏམ’’ནྟི པདེཡེཝ ཨུཔཡོགཝཙནཾ སིཡཱ, ན ཨེཏྠཱཏི ཙོདནཱཡ ‘‘ཨིདྷཱཔཱི’’ཏིཨཱདི ཝུཏྟཾ, ཏསྶ ཨནུཔཡོགཏྟཱ, ཝིཙྪིནྡིཏྭཱ སམྦནྡྷཝིསེསབྷཱཝེན ཡོཛེཏབྦཏྟཱ ཝཱ ཨིདྷཱཔི ཨིཏྠམྦྷཱུཏཱཁྱཱནཏྠཝསེནེཝ ཨུཔཡོགཝཙནཾ ནཱམཱཏི ཝུཏྟཾ ཧོཏི. ཨིཏྠམྦྷཱུཏཱཁྱཱནཾ ཨཏྠོ ཡསྶ ཏཐཱ, ཨབྷིསདྡོ, ཨིཏྠམྦྷཱུཏཱཁྱཱནམེཝ ཝཱ ཨཏྠོ ཏཐཱ, སོཡེཝཏྠོ. ཡདགྒེན ཧི སདྡཡོགོ ཧོཏི, ཏདགྒེན ཨཏྠཡོགོཔཱིཏི.

༢༥༨. བྷོཏི ཨཏྟནོ ཨཱཙརིཡཾ ཨཱལཔཏི. ཡཐཱ-སདྡཾ སཱཏྠཀཾ ཀཏྭཱ སཧ པཱཋསེསེན ཡོཛེཏུཾ ‘‘ཡཐཱ སཀྐཱ’’ཏིཨཱདི ཝུཏྟཾ. སོཏི བྷགཝཱ. པུརིམནཡེ ཨཱཀཱརཏྠཛོཏནཡཐཱ-སདྡཡོགྱཏོ ཀཐནྟི པུཙྪཱམཏྟཾ, ཨིདྷ པན ཏདཡོགྱཏོ ‘‘ཨཱཀཱརཔུཙྪཱ’’ཏི ཝུཏྟཾ. བཱཧིརཀསམཡེ ཨཱཙརིཡམྷི ཨུཔཛ྄ཛྷཱཡསམུདཱཙཱརོཏི ཨཱཧ ‘‘ཨཐ ནཾ ཨུཔཛ྄ཛྷཱཡོ’’ཏི, ཨུཔཛ྄ཛྷཱཡསཉྙིཏོ ཨཱཙརིཡབྲཱཧྨཎོཏི ཨཏྠོ.

ཀཱམཉྩ མནྟོ, བྲཧྨཾ, ཀཔྤོཏི ཏིབྦིདྷོ ཝེདོ, ཏཐཱཔི ཨཊྛཀཱདི ཝུཏྟཾ པདྷཱནབྷཱུཏཾ མཱུལཾ མནྟོ, ཏདཏྠཝིཝརཎམཏྠཾ བྲཧྨཾ, ཏཏྠ ཝུཏྟནཡེན ཡཉྙཀིརིཡཱཝིདྷཱནཾ ཀཔྤོཏི མནྟསྶེཝ པདྷཱནབྷཱཝཏོ, ཨིཏརེསཉྩ ཏནྣིསྶཡེནེཝ ཛཱཏཏྟཱ མནྟགྒཧཎེན བྲཧྨཀཔྤཱནམྤི གཧཎཾ སིདྡྷམེཝཱཏི དསྶེཏི ‘‘ཏཱིསུ ཝེདེསཱུ’’ཏི ཨིམིནཱ. མནྟོཏི ཧི ཨཊྛཀཱདཱིཧི ཨིསཱིཧི ཝུཏྟམཱུལཝེདསྶེཝ ནཱམཾ, ཝེདོཏི སབྦསྶ, ཏསྨཱ ‘‘ཝེདེསཱུ’’ཏི ཝུཏྟེ ¶ སབྦེསམྤི གཧཎཾ སིཛ྄ཛྷཏཱིཏི ¶ ཝེདིཏབྦཾ. ལཀྑཎཱནཱིཏི ལཀྑཎདཱིཔཀཱནི མནྟཔདཱནི. པཛྫགཛྫབནྡྷཔཝེསནཝསེན པཀྑིཔིཏྭཱ. བྲཱཧྨཎཝེསེནེཝཱཏི ཝེདཝཱཙཀབྲཱཧྨཎལིངྒེནེཝ. ཝེདེཏི མཧཱཔུརིསལཀྑཎམནྟེ. མཧེསཀྑཱ སཏྟཱཏི མཧཱཔུཉྙཝནྟོ པཎྜིཏསཏྟཱ. ཛཱནིསྶནྟི ཨིཏི མནསི ཀཏྭཱ ཝཱཙེནྟཱིཏི སམྦནྡྷོ. ཏེནཱཏི ཏཐཱ ཝཱཙནཏོ. པུབྦེཏི ‘‘ཏཐཱགཏོ ཨུཔྤཛྫིསྶཏཱི’’ཏི ཝཏྟབྦཀཱལཏོ པབྷུཏི ཏཐཱགཏསྶ དྷརམཱནཀཱལེ. ཨཛ྄ཛྷཱཡིཏབྦཝཱཙེཏབྦབྷཱཝེན ཨཱགཙྪནྟི པཱཀཊཱ བྷཝནྟི. ཨེཀགཱཐཱདྭིགཱཐཱདིཝསེན ཨནུཀྐམེན ཨནྟརདྷཱཡནྟི. ན ཀེཝལཾ ལཀྑཎམནྟཱཡེཝ, ཨཐ ཁོ ཨཉྙེཔི ཝེདཱ བྲཱཧྨཎཱནཾ ཨཉྙཱཎབྷཱཝེན ཨནུཀྐམེན ཨནྟརདྷཱཡནྟི ཨེཝཱཏི ཨཱཙརིཡེན (དཱི. ནི. ཊཱི. ༡.༢༥༨) ཝུཏྟཾ.

བུདྡྷབྷཱཝཔཏྠནཱ པཎིདྷི, པཱརམཱིསམྦྷརཎཾ སམཱདཱནཾ, ཀམྨསྶཀཏཱདིཔཉྙཱ ཉཱཎཾ. ‘‘པཎིདྷིམཧཏོ སམཱདཱནམཧཏོཏིཨཱདིནཱ པཙྩེཀཾ མཧནྟསདྡོ ཡོཛེཏབྦོ’’ཏི (དཱི. ནི. ཊཱི. ༡.༢༥༨) ཨཱཙརིཡེན ཝུཏྟཾ. ཨེཝཉྩ སཏི ཀརུཎཱ ཨཱདི ཡེསཾ སདྡྷཱསཱིལཱདཱིནཾ ཏེ ཀརུཎཱདཡོ, ཏེ ཨེཝ གུཎཱ ཀརུཎཱདིགུཎཱ, པཎིདྷི ཙ སམཱདཱནཉྩ ཉཱཎཉྩ ཀརུཎཱདིགུཎཱ ཙ, ཏེཧི མཧནྟོ པཎིདྷིསམཱདཱནཉཱཎཀརུཎཱདིགུཎམཧནྟོཏི ནིབྦཙནཾ ཀཱཏབྦཾ. ཨེཝཉྷི དྭནྡཏོཔརཏྟཱ མཧནྟསདྡོ པཙྩེཀཾ ཡོཛཱིཡཏཱིཏི. ཨཔིཙ པཎིདྷི ཙ སམཱདཱནཉྩ ཉཱཎཉྩ ཀརུཎཱ ཙ, ཏམཱདི ཡེསཾ ཏེ ཏཐཱ, ཏེཡེཝ གུཎཱ, ཏེཧི མཧནྟོཏི ནིབྦཙནེནཔི ཨཏྠོ སཱུཔཔནྣོ ཧོཏི, པཎིདྷིམཧནྟཏཱདི ཙསྶ བུདྡྷཝཾས (བུ. ཝཾ. ༩ ཨཱདཡོ) ཙརིཡཱཔིཊཀཱདི (ཙརིཡཱ. ༡ ཨཱདཡོ) ཝསེན ཝེདིཏབྦོ. མཧཱཔདཱནསུཏྟཊྛཀཐཱཡཾ པན ‘‘མཧཱཔུརིསསྶཱཏི ཛཱཏིགོཏྟཀུལཔདེསཱདིཝསེན མཧནྟསྶ པུརིསསྶཱ’’ཏི (དཱི. ནི. ཨཊྛ. ༢.༣༣) ཝུཏྟཾ. ཏཏྠ ‘‘ཁཏྟིཡོ, བྲཱཧྨཎོ’’ཏི ཨེཝམཱདི ཛཱཏི. ‘‘ཀོཎྜཉྙོ, གོཏམོ’’ཏི ཨེཝམཱདི གོཏྟཾ. ‘‘པོཎིཀཱ, ཙིཀྑལླིཀཱ, སཱཀིཡཱ, ཀོལིཡཱ’’ཏི ཨེཝམཱདི ཀུལཔདེསོ, ཏདེཏཾ སབྦམྤི ཨིདྷ ཨཱདིསདྡེན སངྒཧིཏནྟི དཊྛབྦཾ. ཨེཝཉྷི སཏི ‘‘དྭེཡེཝ གཏིཡོ བྷཝནྟཱི’’ཏི ཨུབྷིནྣཾ སཱདྷཱརཎཝཙནཾ སམཏྠིཏཾ ཧོཏཱིཏི.

ནིཊྛཱཏི ནིཔྥཏྟིཡོ སིདྡྷིཡོ. ནནྭཱཡཾ གཏི-སདྡོ ཨནེཀཏྠོ, ཀསྨཱ ནིཊྛཱཡམེཝ ཝུཏྟོཏི ཨཱཧ‘‘ཀཱམཉྩཱཡ’’ནྟིཨཱདི. བྷཝབྷེདེཏི ¶ ནིརཡཱདིབྷཝཝིསེསེ. སོ ཧི སུཙརིཏདུཙྩརིཏཀམྨེན སཏྟེཧི ཨུཔཔཛྫནཝསེན གནྟབྦཱཏི གཏི. གཙྪཏི པཝཏྟཏི ཨེཏྠཱཏི གཏི, ནིཝཱསཊྛཱནཾ. གམཏི ཡཐཱསབྷཱཝཾ ཛཱནཱཏཱིཏི གཏི. པཉྙཱ, གམནཾ བྱཱཔནཾ གཏི, ཝིསྶཊབྷཱཝོ, སོ པན ཨིཏོ ཙ ཨེཏྟོ ཙ བྱཱཔེཏྭཱ ཋིཏཏཱཝ. གམནཾ ནིཔྥཏྟནཾ གཏི, ནིཊྛཱ ¶ , ཨཛ྄ཛྷཱསཡཔཊིསརཎཏྠཱཔི ནིདསྶནནཡེན གཧིཏཱ. ཏཐཱ ཧེས ‘‘ཨིམེསཾ ཁོ ཨཧཾ བྷིཀྑཱུནཾ སཱིལཝནྟཱནཾ ཀལྱཱཎདྷམྨཱནཾ ནེཝ ཛཱནཱམི ཨཱགཏིཾ ཝཱ གཏིཾ ཝཱ’’ཏི (མ. ནི. ༡.༥༠༨) ཨེཏྠ ཨཛ྄ཛྷཱསཡེ ཝཏྟཏི, ‘‘ནིབྦཱནཾ ཨརཧཏོ གཏཱི’’ཏི (པརི. ༣༣༩) ཨེཏྠ པཊིསརཎེ, པརཱཡཎེ ཨཔསྶཡེཏི ཨཏྠོ. གཙྪཏི ཡཐཱརུཙི པཝཏྟཏཱིཏི གཏི, ཨཛ྄ཛྷཱསཡོ. གཙྪཏི ཨཝཙརཏི, ཨཝཙརཎཝསེན ཝཱ པཝཏྟཏི ཨེཏྠཱཏི གཏི, པཊིསརཎཾ. སབྦསངྑཏཝིསཉྙུཏྟསྶ ཧི ཨརཧཏོ ནིབྦཱནམེཝ པཊིསརཎཾ, ཨིདྷ པན ནིཊྛཱཡཾ ཝཏྟཏཱིཏི ཝེདིཏབྦོ ཏདཉྙེསམཝིསཡཏྟཱ.

ནནུ དྭིནྣཾ ནིཔྥཏྟཱིནཾ ནིམིཏྟབྷཱུཏཱནི ལཀྑཎཱནི ཝིསདིསཱནེཝ, ཨཐ ཀསྨཱ ‘‘ཡེཧི སམནྣཱགཏསྶཱ’’ཏིཨཱདིནཱ ཏེསཾ སདིསབྷཱཝོ ཝུཏྟོཏི ཙོདནཱལེསཾ དསྶེཏྭཱ སོདྷེནྟོ ‘‘ཏཏྠ ཀིཉྩཱཔཱི’’ཏིཨཱདིམཱཧ. སམཱནེཔི ནིགྲོདྷབིམྦཏཱདིལཀྑཎབྷཱཝེ ཨཏྠེཝ ཀོཙི ནེསཾ ཝིསེསོཏི དསྶེཏུཾ ‘‘ན ཏེཧེཝ བུདྡྷོ ཧོཏཱི’’ཏི ཝུཏྟཾ. ‘‘ཡཐཱ ཧི བུདྡྷཱནཾ ལཀྑཎཱནི སུཝིསདཱནི, སུཔརིབྱཏྟཱནི, པརིཔུཎྞཱནི ཙ ཧོནྟི, ན ཨེཝཾ ཙཀྐཝཏྟཱིན’’ནྟི ཨཡཾ པན ཝིསེསོ ཨཱཙརིཡདྷམྨཔཱལཏྠེརེན (དཱི. ནི. ཊཱི. ༡.༢༥༨) པཀཱསིཏོ. ཛཱཡནྟི བྷིནྣེསུཔི ཨཏྠེསུ ཨབྷིནྣདྷཱིསདྡཱ ཨེཏཱཡཱཏི ཛཱཏི, ལཀྑཎབྷཱཝམཏྟཾ. ཝུཏྟཉྷི –

‘‘སབལཱདཱིསུ བྷིནྣེསུ, ཡཱཡ ཝཏྟནྟུབྷིནྣདྷཱི;

སདྡཱ སཱ ཛཱཏིརེསཱ ཙ, མཱལཱསུཏྟམིཝནྭིཏཱ’’ཏི.

ཏསྨཱ ལཀྑཎཏཱམཏྟེན སམཱནབྷཱཝཏོ ཝིསདིསཱནིཔི ཏཱནིཡེཝ ཙཀྐཝཏྟིནིཔྥཏྟིནིམིཏྟབྷཱུཏཱནི ལཀྑཎཱནི སདིསཱནི ཝིཡ ཀཏྭཱ ཏཱནི བུདྡྷནིཔྥཏྟིནིམིཏྟབྷཱུཏཱནི ལཀྑཎཱནི ནཱམཱཏི ཨིདཾ ཝཙནཾ ཝུཙྩཏཱིཏི ཨཏྠོ. ཨདྷིཨཱཔུབྦཝསཡོགེ བྷུམྨཏྠེ ཨུཔཡོགཝཙནནྟི ཨཱཧ ‘‘ཨགཱརེ ཝསཏཱི’’ཏི ཙཏཱུཧི ཨཙྪརིཡདྷམྨེཧཱིཏི ཨབྷིརཱུཔཏཱ, དཱིགྷཱཡུཀཏཱ, ཨཔྤཱབཱདྷཏཱ, བྲཱཧྨཎགཧཔཏིཀཱནཾ པིཡམནཱཔཏཱཏི ཨིམེཧི ཙཏཱུཧི ཨཙྪརིཡསབྷཱཝབྷཱུཏཱཧི ཨིདྡྷཱིཧི. ཡཐཱཧ –

‘‘རཱཛཱ ¶ ཨཱནནྡ, མཧཱསུདསྶནོ ཙཏཱུཧི ཨིདྡྷཱིཧི སམནྣཱགཏོ ཨཧོསི. ཀཏམཱཧི ཙཏཱུཧི ཨིདྡྷཱིཧི? ཨིདྷཱནནྡ, རཱཛཱ མཧཱསུདསྶནོ ཨབྷིརཱུཔོ ཨཧོསི དསྶནཱིཡོ པཱསཱདིཀོ’’ཏིཨཱདི (དཱི. ནི. ༢.༢༥༢).

ཙེཏིཡཛཱཏཀེ ¶ (ཛཱ. ཨཊྛ. ༣.༨.༤༤) ཨཱགཏནཡཾ གཧེཏྭཱཔི ཨེཝཾ ཝདནྟི ‘‘སརཱིརཏོ ཙནྡནགནྡྷོ ཝཱཡཏི, ཨཡཾ ཨེཀཱ ཨིདྡྷི. མུཁཏོ ཨུཔྤལགནྡྷོ ཝཱཡཏི, ཨཡཾ དུཏིཡཱ. ཙཏྟཱརོ དེཝཔུཏྟཱ ཙཏཱུསུ དིསཱསུ སབྦཀཱལཾ ཁགྒཧཏྠཱ ཨཱརཀྑཾ གཎྷནྟི, ཨཡཾ ཏཏིཡཱ. ཨཱཀཱསེན ཝིཙརཏི, ཨཡཾ ཙཏུཏྠཱི’’ཏི. ཨནཱགཏཝཾསསཾཝཎྞནཱཡཾ པན ‘‘ཨབྷིརཱུཔབྷཱཝོ ཨེཀཱ ཨིདྡྷི, སམཝེཔཱཀིནིཡཱ གཧཎིཡཱ སམནྣཱགཏབྷཱཝོ དུཏིཡཱ, ཡཱཝཏཱཡུཀམྤི སཀལལོཀསྶ དསྶནཱཏིཏྟིཀབྷཱཝོ ཏཏིཡཱ, ཨཱཀཱསཙཱརིབྷཱཝོ ཙཏུཏྠཱི’’ཏི ཝུཏྟཾ. ཏཏྠ སམཝེཔཱཀིནིཡཱ གཧཎིཡཱ སམནྣཱགཏབྷཱཝོཏི སམཝིཔཱཙནིཡཱ ཀམྨཛཏེཛོདྷཱཏུཡཱ སམྤནྣཏཱ. ཡསྶ ཧི བྷུཏྟམཏྟོཝ ཨཱཧཱརོ ཛཱིརཏི, ཡསྶ ཝཱ པན པུཊབྷཏྟཾ ཝིཡ ཏཐེཝ ཏིཊྛཏི, ཨུབྷོཔེཏེ ན སམཝེཔཱཀིནིཡཱ སམནྣཱགཏཱ. ཡསྶ པན པུན བྷཏྟཀཱལེ བྷཏྟཙྪནྡོ ཨུཔྤཛྫཏེཝ, ཨཡཾ སམཝེཔཱཀིནིཡཱ སམནྣཱགཏོ ནཱམ, ཏཐཱརཱུཔཏཱཏི ཨཏྠོ. སངྒཧཝཏྠཱུཧཱིཏི དཱནཾ, པིཡཝཙནཾ, ཨཏྠཙརིཡཱ, སམཱནཏྟཏཱཏི ཨིམེཧི སངྒཧོཔཱཡེཧི. ཡཐཱཧ –

‘‘དཱནཉྩ པེཡྻཝཛྫཉྩ, ཨཏྠཙརིཡཱ ཙ ཡཱ ཨིདྷ;

སམཱནཏྟཏཱ ཙ དྷམྨེསུ, ཏཏྠ ཏཏྠ ཡཐཱརཧཾ;

ཨེཏེ ཁོ སངྒཧཱ ལོཀེ, རཐསྶཱཎཱིཝ ཡཱཡཏོ.

ཨེཏེ ཙ སངྒཧཱ ནཱསྶུ, ན མཱཏཱ པུཏྟཀཱརཎཱ;

ལབྷེཐ མཱནཾ པཱུཛཾ ཝཱ, པིཏཱ ཝཱ པུཏྟཀཱརཎཱ.

ཡསྨཱ ཙ སངྒཧཱ ཨེཏེ, སམཔེཀྑནྟི པཎྜིཏཱ;

ཏསྨཱ མཧཏྟཾ པཔྤོནྟི, པཱསཾསཱ ཙ བྷཝནྟི ཏེ’’ཏི. (དཱི. ནི. ༣.༢༧༣);

རཉྫནཏོཏི པཱིཏིསོམནསྶཝསེན རཉྫནཏོ, ན རཱགཝསེན, པཱིཏིསོམནསྶཱནཾ ཛནནཏོཏི ཝུཏྟཾ ཧོཏི. ཙཏཱུཧི སངྒཧཝཏྠཱུཧི རཉྫནཊྛེན རཱཛཱཏི པན སབྦེསཾ རཱཛཱུནཾ སམཉྙཱ ཏཐཱ ཨཀརོནྟཱནམྤི ཝིལཱིཝབཱིཛནཱདཱིསུ ¶ ཏཱལཝཎྚཝོཧཱརོ ཝིཡ རུལ༹ྷིཝསེན པཝཏྟིཏོ, ཏསྨཱ ‘‘ཨཙྪརིཡདྷམྨེཧཱི’’ཏི ཨསཱདྷཱརཎནིབྦཙནཾ ཝུཏྟནྟི དཊྛབྦཾ.

སདྡསཱམཏྠིཡཏོ ཨནེཀདྷཱ ཙཀྐཝཏྟཱིསདྡསྶ ཝཙནཏྠཾ དསྶེནྟོ པདྷཱནབྷཱུཏཾ ཝཙནཏྠཾ པཋམཾ དསྶེཏུཾ ‘‘ཙཀྐརཏན’’ནྟིཨཱདིམཱཧ. ཨིདམེཝ ཧི པདྷཱནཾ ཙཀྐརཏནསྶ པཝཏྟནམནྟརེན ཙཀྐཝཏྟིབྷཱཝཱནཱཔཏྟིཏོ. ཏཐཱ ཧི ཨཊྛཀཐཱསུ ཝུཏྟཾ ‘‘ཀིཏྟཱཝཏཱ ཙཀྐཝཏྟཱི ཧོཏཱིཏི? ཨེཀངྒུལདྭངྒུལམཏྟམྤི ¶ ཙཀྐརཏནེ ཨཱཀཱསཾ ཨབྦྷུགྒནྟྭཱ པཝཏྟེ’’ཏི (དཱི. ནི. ཨཊྛ. ༢.༢༤༣; མ. ནི. ཨཊྛ. ༣.༢༥༦). ཡསྨཱ པན རཱཛཱ ཙཀྐཝཏྟཱི ཨེཀཾསཾ ཨུཏྟརཱསངྒཾ ཀརིཏྭཱ ཝཱམཧཏྠེན ཧཏྠིསོཎྜསདིསཔནཱལི༹ཾ སུཝཎྞབྷིངྐཱརཾ ཨུཀྑིཔིཏྭཱ དཀྑིཎཧཏྠེན ཙཀྐརཏནཾ ཨུདཀེན ཨབྦྷུཀྐིརིཏྭཱ ‘‘པཝཏྟཏུ བྷཝཾ ཙཀྐརཏནཾ, ཨབྷིཝིཛིནཱཏུ བྷཝཾ ཙཀྐརཏན’’ནྟི (དཱི. ནི. ༢.༢༤༤) ཝཙནེན ཙཀྐརཏནཾ ཝེཧཱསཾ ཨབྦྷུགྒནྟྭཱ པཝཏྟེསི, ཏསྨཱ ཏཱདིསཾ པཝཏྟཱཔནཾ སནྡྷཱཡ ‘‘ཙཀྐརཏནཾ ཝཏྟེཏཱི’’ཏི ཝུཏྟཾ. ཡཐཱཧ ‘‘ཨཐ ཁོ ཨཱནནྡ རཱཛཱ མཧཱསུདསྶནོ ཨུཊྛཱཡཱསནཱ…པེ… ཙཀྐརཏནཾ ཨབྦྷུཀྐིརི ‘པཝཏྟཏུ བྷཝཾ ཙཀྐརཏན’ནྟི’’ཨཱདི (དཱི. ནི. ༢.༢༤༤). ན ཀེཝལཉྩ ཙཀྐསདྡོ ཙཀྐརཏནེཡེཝ ཝཏྟཏི ཨཐ ཁོ སམྤཏྟིཙཀྐཱདཱིསུཔི, ཏསྨཱ ཏཾཏདཏྠཝཱཙཀསདྡསཱམཏྠིཡཏོཔི ཝཙནཏྠཾ དསྶེཏི ‘‘སམྤཏྟིཙཀྐེཧཱི’’ཏིཨཱདིནཱ. ཏཏྠ སམྤཏྟིཙཀྐེཧཱིཏི –

‘‘པཏིརཱུཔེ ཝསེ དེསེ, ཨརིཡམིཏྟཀརོ སིཡཱ;

སམྨཱཔཎིདྷིསམྤནྣོ, པུབྦེ པུཉྙཀཏོ ནརོ;

དྷཉྙཾ དྷནཾ ཡསོ ཀིཏྟི, སུཁཉྩེཏཾདྷིཝཏྟཏཱི’’ཏི. (ཨ. ནི. ༤.༣༡) –

ཝུཏྟེཧི པཏིརཱུཔདེསཝཱསཱདིསམྤཏྟིཙཀྐེཧི. ཝཏྟཏཱིཏི པཝཏྟཏི སམྤཛྫཏི, ཨུཔརཱུཔརི ཀུསལདྷམྨཾ ཝཱ པཊིཔཛྫཏི. ཏེཧཱིཏི སམྤཏྟིཙཀྐེཧི. པརནྟི སཏྟནིཀཱཡཾ, ཡཐཱ སཡཾསདྡོ སུདྡྷཀཏྟུཏྠསྶ ཛོཏཀོ, ཏཐཱ པརཾསདྡོཔི ཧེཏུཀཏྟུཏྠསྶཱཏི ཝེདིཏབྦཾ. ཝཏྟེཏཱིཏི པཝཏྟེཏི སམྤཱདེཏི, ཨུཔརཱུཔརི ཀུསལདྷམྨཾ ཝཱ པཊིཔཛྫཱཔེཏི. ཡཐཱཧ –

‘‘རཱཛཱ མཧཱསུདསྶནོ ཨེཝམཱཧ ‘པཱཎོ ན ཧནྟབྦོ, ཨདིནྣཾ ན ཨཱདཱཏབྦཾ, ཀཱམེསུ མིཙྪཱ ན ཙརིཏབྦཱ, མུསཱ ན བྷཎིཏབྦཱ, མཛྫཾ ན པཱཏབྦཾ, ཡཐཱབྷུཏྟཉྩ བྷུཉྫཐཱ’ཏི. ཡེ ཁོ པནཱནནྡ ¶ པུརཏྠིམཱཡ དིསཱཡ པཊིརཱཛཱནོ, ཏེ རཉྙོ མཧཱསུདསྶནསྶ ཨནུཡནྟཱ ཨཧེསུ’’ནྟིཨཱདི (དཱི. ནི. ༢.༢༤༤).

ཨིརིཡཱཔཐཙཀྐཱནནྟི ཨིརིཡཱཔཐབྷཱུཏཱནཾ ཙཀྐཱནཾ. ཨིརིཡཱཔཐོཔི ཧི ‘‘ཙཀྐ’’ནྟི ཝུཙྩཏི ‘‘ཙཏུཙཀྐཾ ནཝདྭཱར’’ནྟིཨཱདཱིསུ (སཾ. ནི. ༡.༢༩, ༡༠༩). ཡཐཱཧ –

‘‘རཐངྒེ ¶ ལཀྑཎེ དྷམྨོ-རཙཀྐེསྭིརིཡཱཔཐེ;

ཙཀྐཾ སམྤཏྟིཡཾ ཙཀྐ-རཏནེ མཎྜལེ བལེ;

ཀུལཱལབྷཎྜེ ཨཱཎཱཡ-མཱཡུདྷེ དཱནརཱསིསཱུ’’ཏི.

ཝཏྟོཏི པཝཏྟནཾ ཨུཔྤཛྫནཾ, ཨིམིནཱཝ ཨིརིཡཱཔཐཙཀྐཾ ཝཏྟེཏི པརཧིཏཱཡ ཨུཔྤཱདེཏཱིཏི ནིབྦཙནམྤི དསྶེཏི ཨཏྠཏོ སམཱནཏྟཱ. ཏཐཱ ཙཱཧ –

‘‘ཨཐ ཁོ ཏཾ ཨཱནནྡ ཙཀྐརཏནཾ པུརཏྠིམཾ དིསཾ པཝཏྟི, ཨནྭདེཝ རཱཛཱ མཧཱསུདསྶནོ སདྡྷིཾ ཙཏུརངྒིནིཡཱ སེནཱཡ. ཡསྨིཾ ཁོ པནཱནནྡ, པདེསེ ཙཀྐརཏནཾ པཏིཊྛཱསི, ཏཏྠ རཱཛཱ མཧཱསུདསྶནོ ཝཱསཾ ཨུཔགཙྪི སདྡྷིཾ ཙཏུརངྒིནིཡཱ སེནཱཡཱ’’ཏིཨཱདི (དཱི. ནི. ༢.༢༤༤).

ཨཡཾ ཨཊྛཀཐཱཏོ ཨཔརོ ནཡོ – ཨཔྤཊིཧཏཾ ཨཱཎཱསངྑཱཏཾ ཙཀྐཾ ཝཏྟེཏཱིཏི ཙཀྐཝཏྟཱི. ཏཐཱ ཧི ཝུཏྟཾ –

‘‘པཉྩཧི བྷིཀྑཝེ དྷམྨེཧི སམནྣཱགཏོ རཱཛཱ ཙཀྐཝཏྟཱི དྷམྨེནེཝ ཙཀྐཾ ཝཏྟེཏི, ཏཾ ཧོཏི ཙཀྐཾ ཨཔྤཊིཝཏྟིཡཾ ཀེནཙི མནུསྶབྷཱུཏེན པཙྩཏྠིཀེན པཱཎིནཱ. ཀཏམེཧི པཉྩཧི? ཨིདྷ བྷིཀྑཝེ རཱཛཱ ཙཀྐཝཏྟཱི ཨཏྠཉྙཱུ ཙ ཧོཏི, དྷམྨཉྙཱུ ཙ མཏྟཉྙཱུ, ཙ ཀཱལཉྙཱུ ཙ པརིསཉྙཱུ ཙ. ཨིམེཧི ཁོ…པེ… པཱཎིནཱ’’ཏིཨཱདི (ཨ. ནི. ༥.༡༣༡).

ཁཏྟིཡམཎྜལཱདིསཉྙིཏཾ ཙཀྐཾ སམཱུཧཾ ཨཏྟནོ ཝསེ ཝཏྟེཏི ཨནུཝཏྟེཏཱིཏིཔི ཙཀྐཝཏྟཱི. ཝུཏྟཉྷི ‘‘ཡེ ཁོ པནཱནནྡ པུརཏྠིམཱཡ དིསཱཡ པཊིརཱཛཱནོ, ཏེ རཉྙོ མཧཱསུདསྶནསྶ ཨནུཡནྟཱ ཨཧེསུ’’ནྟིཨཱདི (དཱི. ནི. ༢.༢༤༤). ཙཀྐལཀྑཎཾ ཝཏྟཏི ཨེཏསྶཱཏིཔི ཙཀྐཝཏྟཱི. ཏེནཱཧ ‘‘ཨིམསྶ དེཝ ཀུམཱརསྶ ཧེཊྛཱ ¶ པཱདཏལེསུ ཙཀྐཱནི ཛཱཏཱནི སཧསྶཱརཱནི སནེམིཀཱནི སནཱབྷིཀཱནི སབྦཱཀཱརཔརིཔཱུརཱནཱི’’ཏིཨཱདི (དཱི. ནི. ༢.༣༥). ཙཀྐཾ མཧནྟཾ ཀཱཡབལཾ ཝཏྟཏི ཨེཏསྶཱཏིཔི ཙཀྐཝཏྟཱི. ཝུཏྟཉྷེཏཾ ‘‘ཨཡཉྷི དེཝ ཀུམཱརོ སཏྟུསྶདོ…པེ… ཨཡཉྷི དེཝ ཀུམཱརོ སཱིཧཔུབྦདྡྷཀཱཡོ’’ཏིཨཱདི (དཱི. ནི. ༢.༣༥). ཏེན ཧིསྶ ལཀྑཎེན མཧབྦལབྷཱཝོ ཝིཉྙཱཡཏི. ཙཀྐཾ དསཝིདྷཾ, དྭཱདསཝིདྷཾ ཝཱ ཝཏྟདྷམྨཾ ཝཏྟཏི པཊིཔཛྫཏཱིཏི ཙཀྐཝཏྟཱི. ཏེན ཝུཏྟཾ ‘‘ན ཧི ཏེ ཏཱཏ དིབྦཾ ཙཀྐརཏནཾ པེཏྟིཀཾ དཱཡཛྫཾ ¶ , ཨིངྒྷ ཏྭཾ ཏཱཏ ཨརིཡེ ཙཀྐཝཏྟིཝཏྟེ ཝཏྟཱཧཱི’’ཏིཨཱདི (དཱི. ནི. ༣.༨༣). ཙཀྐཾ མཧནྟཾ དཱནཾ ཝཏྟེཏི པཝཏྟེཏཱིཏིཔི ཙཀྐཝཏྟཱི. ཝུཏྟཉྩ –

‘‘པཊྛཔེསི ཁོ ཨཱནནྡ རཱཛཱ མཧཱསུདསྶནོ ཏཱསཾ པོཀྑརཎཱིནཾ ཏཱིརེ ཨེཝརཱུཔཾ དཱནཾ ཨནྣཾ ཨནྣཏྠིཀསྶ, པཱནཾ པཱནཏྠིཀསྶ, ཝཏྠཾ ཝཏྠཏྠིཀསྶ, ཡཱནཾ ཡཱནཏྠིཀསྶ, སཡནཾ སཡནཏྠིཀསྶ, ཨིཏྠིཾ ཨིཏྠིཏྠིཀསྶ, ཧིརཉྙཾ ཧིརཉྙཏྠིཀསྶ, སུཝཎྞཾ སུཝཎྞཏྠིཀསྶཱ’’ཏིཨཱདི (དཱི. ནི. ༢.༢༥༤).

རཱཛཱཏི སཱམཉྙཾ ཏདཉྙསཱདྷཱརཎཏོ. ཙཀྐཝཏྟཱིཏི ཝིསེསཾ ཨནཉྙསཱདྷཱརཎཏོ. དྷམྨསདྡོ ཉཱཡེ, སམོ ཨེཝ ཙ ཉཱཡོ ནཱམཱཏི ཨཱཧ ‘‘ཉཱཡེན སམེནཱ’’ཏི. ཝཏྟཏི ཨུཔྤཛྫཏི, པཊིཔཛྫཏཱིཏི ཝཱ ཨཏྠོ. ‘‘ཨིདཾ ནཱམ ཙརཏཱི’’ཏི ཨཝུཏྟེཔི སཱམཉྙཛོཏནཱཡ ཝིསེསེ ཨཝཊྛཱནཏོ, ཝིསེསཏྠིནཱ ཙ ཝིསེསསྶ པཡུཛྫིཏབྦཏྟཱ ‘‘སདཏྠཔརཏྠེ’’ཏི ཡོཛཱིཡཏི. པདེསགྒཧཎེ ཧི ཨསཏི གཧེཏབྦསྶ ནིཔྤདེསཏཱ ཝིཉྙཱཡཏི ཡཐཱ ‘‘དིཀྑིཏོ ན དདཱཏཱི’’ཏི. ཡསྨཱ ཙཀྐཝཏྟིརཱཛཱ དྷམྨེནེཝ རཛྫམདྷིགཙྪཏི, ན ཨདྷམྨེན པརཱུཔགྷཱཏཱདིནཱ. ཏསྨཱ ཝུཏྟཾ ‘‘དྷམྨེན རཛྫཾ ལབྷིཏྭཱ’’ཏིཨཱདི, དྷམྨེནཱཏི ཙ ཉཱཡེན, ཀུསལདྷམྨེན ཝཱ. རཉྙོ བྷཱཝོ རཛྫཾ, ཨིསྶརིཡཾ.

པརེསཾ ཧིཏོཔཱཡབྷཱུཏཾ དྷམྨཾ ཀརོཏི, ཙརཏཱིཏི ཝཱ དྷམྨིཀོ. ཨཏྟནོ ཧིཏོཔཱཡབྷཱུཏསྶ དྷམྨསྶ ཀཱརཀོ, ཙརཀོ ཝཱ རཱཛཱཏི དྷམྨརཱཛཱཏི ཨིམཾ སཝིསེསཾ ཨཏྠཾ དསྶེཏི ‘‘པརཧིཏདྷམྨཀརཎེན ཝཱ’’ཏིཨཱདིནཱ. ཨཡཾ པན མཧཱཔདཱནཊྛཀཐཱནཡོ – དསཝིདྷེ ཀུསལདྷམྨེ, ཨགཏིརཧིཏེ ཝཱ རཱཛདྷམྨེ ནིཡུཏྟོཏི དྷམྨིཀོ; ཏེནེཝ དྷམྨེན ལོཀཾ ¶ རཉྫེཏཱིཏི དྷམྨརཱཛཱ. པརིཡཱཡཝཙནམེཝ ཧི ཨིདཾ པདདྭཡནྟི. ཨཱཙརིཡེན པན ཨེཝཾ ཝུཏྟཾ ‘‘ཙཀྐཝཏྟིཝཏྟསངྑཱཏཾ དྷམྨཾ ཙརཏི, ཙཀྐཝཏྟིཝཏྟསངྑཱཏོ ཝཱ དྷམྨོ ཨེཏསྶ, ཨེཏསྨིཾ ཝཱ ཨཏྠཱིཏི དྷམྨིཀོ, དྷམྨཏོ ཨནཔེཏཏྟཱ དྷམྨོ ཙ སོ རཉྫནཊྛེན རཱཛཱ ཙཱཏི དྷམྨརཱཛཱ’’ཏི (དཱི. ནི. ཊཱི. ༡.༢༥༨). ‘‘རཱཛཱ ཧོཏི ཙཀྐཝཏྟཱི’’ཏི ཝཙནཏོ ‘‘ཙཱཏུརནྟོ’’ཏི ཨིདཾ ཙཏུདཱིཔིསྶརཏཾ ཝིབྷཱཝེཏཱིཏི ཨཱཧ ‘‘ཙཱཏུརནྟཱཡཱ’’ཏིཨཱདི. ཙཏྟཱརོ སམུདྡཱ ཨནྟཱ པརིཡོསཱནཱ ཨེཏིསྶཱཏི ཙཱཏུརནྟཱ, པཐཝཱི. སཱ ཧི ཙཏཱུསུ དིསཱསུ པུརཏྠིམསམུདྡཱདིཙཏུསམུདྡཔརིཡོསཱནཏྟཱ ཨེཝཾ ཝུཙྩཏི. ཏེན ཝུཏྟཾ ‘‘ཙཏུསམུདྡ ཨནྟཱཡཱ’’ཏི, སཱ པན ཨཝཡཝབྷཱུཏེཧི ཙཏུབྦིདྷེཧི དཱིཔེཧི ཝིབྷཱུསིཏཱ ཨེཀལོཀདྷཱཏུཔརིཡཱཔནྣཱ པཐཝཱིཡེཝཱཏི དསྶེཏི ‘‘ཙཏུབྦིདྷདཱིཔཝིབྷཱུསིཏཱཡ པཐཝིཡཱ’’ཏི ཨིམིནཱ. ཡཐཱཧ –

‘‘ཡཱཝཏཱ ¶ ཙནྡིམསཱུརིཡཱ, པརིཧརནྟི དིསཱ བྷནྟི ཝིརོཙནཱ;

སབྦེཝ དཱསཱ མནྡྷཱཏུ, ཡེ ཙ པཱཎཱ པཐཝིསྶིཏཱ’’ཏི.

ཨེཏྠ ཙ ‘‘ཙཏུདཱིཔཝིབྷཱུསིཏཱཡཱ’’ཏི ཨཝཏྭཱ ཙཏུབྦིདྷདཱིཔཝིབྷཱུསིཏཱཡཱཏི ཝིདྷསདྡགྒཧཎཾ པཙྩེཀཾ པཉྩསཏཔརིཏྟདཱིཔཱནམྤི མཧཱདཱིཔེཡེཝ སངྒཧཎཏྠཾ སདྡཱཏིརིཏྟེན ཨཏྠཱཏིརིཏྟསྶ ཝིཉྙཱཡམཱནཏྟཱ, ཀོཊྛཱསཝཱཙཀེན ཝཱ ཝིདྷསདྡེན སམཱནབྷཱགཱནཾ གཧིཏཏྟཱཏི དཊྛབྦཾ. ཀོཔཱདིཔཙྩཏྠིཀེཏི ཨེཏྠ ཨཱདིསདྡེན ཀཱམམོཧམཱནམདཱདིཀེ སངྒཎྷཱཏི. ཝིཛེཏཱིཏི ཏཾཀཱལཱཔེཀྑཱཡ ཝཏྟམཱནཝཙནཾ, ཝིཛིཏཝཱཏི ཨཏྠོ. སདྡཝིདཱུ ཧི ཨཏཱིཏེ ཏཱཝཱིསདྡམིཙྪནྟི. ‘‘སབྦརཱཛཱནོ ཝིཛེཏཱི’’ཏི ཝདནྟོ ཀཱམཾ ཙཀྐཝཏྟིནོ ཀེནཙི ཡུདྡྷཾ ནཱམ ནཏྠི, ཡུདྡྷེན པན སཱདྷེཏབྦསྶ ཝིཛཡསྶ སིདྡྷིཡཱ ‘‘ཝིཛིཏསངྒཱམོ’’ ཏྭེཝ ཝུཏྟོཏི དསྶེཏི.

ཐཱཝརསྶ དྷུཝསྶ བྷཱཝོ ཐཱཝརིཡཾ, ཡཐཱ ཛནཔདེ ཐཱཝརིཡཾ པཏྟོ, ཏཾ དསྶེཏུཾ ‘‘ན སཀྐཱ ཀེནཙཱི’’ཏིཨཱདི ཝུཏྟཾ, ཨིམིནཱ ཀེནཙི ཨཀམྤིཡཊྛེན ཛནཔདེ ཐཱཝརིཡཔྤཏྟོཏི ཏཔྤུརིསསམཱསཾ དསྶེཏི, ཨིཏརེན ཙ དལ༹ྷབྷཏྟིབྷཱཝཏོ ཛནཔདོ ཐཱཝརིཡཔྤཏྟོ ཨེཏསྨིནྟི ཨཉྙཔདཏྠསམཱསཾ. ཏམྷཱིཏི ཨསྨིཾ རཱཛིནི. ཡཐཱ ཛནཔདོ ཏསྨིཾ ཐཱཝརིཡཾ པཏྟོ, ཏདཱཝིཀརོནྟོ ‘‘ཨནུཡུཏྟོ’’ཏིཨཱདིམཱཧ. ཏཏྠ ཨནུཡུཏྟོཏི ནིཙྩཔཡུཏྟོ. སཀམྨནིརཏོཏི ཙཀྐཝཏྟིནོ རཛྫཀམྨེ སདཱ པཝཏྟོ ¶ . ཨཙལོ ཨསམྤཝེདྷཱིཏི པརིཡཱཡཝཙནམེཏཾ, ཙོརཱནཾ ཝཱ ཝིལོཔནམཏྟེན ཨཙལོ, དཱམརིཀཏྟེན ཨསམྤཝེདྷཱི. ཙོརེཧི ཝཱ ཨཙལོ, པཊིརཱཛཱུཧི ཨསམྤཝེདྷཱི. ཨནཏིམུདུབྷཱཝེན ཝཱ ཨཙལོ, ཨནཏིཙཎྜབྷཱཝེན ཨསམྤཝེདྷཱི. ཏཐཱ ཧི ཨཏིཙཎྜསྶ རཉྙོ བལིཁཎྜཱདཱིཧི ལོཀཾ པཱིལ༹ཡཏོ མནུསྶཱ མཛ྄ཛྷིམཛནཔདཾ ཚཌྜེཏྭཱ པབྦཏསམུདྡཏཱིརཱདཱིནི ནིསྶཱཡ པཙྩནྟེ ཝཱསཾ ཀཔྤེནྟི, ཨཏིམུདུཀསྶ ཙ རཉྙོ ཙོརསཱཧསིཀཛནཝིལོཔཔཱིལི༹ཏཱ མནུསྶཱ པཙྩནྟཾ པཧཱཡ ཛནཔདམཛ྄ཛྷེ ཝཱསཾ ཀཔྤེནྟི, ཨིཏི ཨེཝརཱུཔེ རཱཛིནི ཛནཔདོ ཐཱཝརབྷཱཝཾ ན པཱཔུཎཱཏི. ཨེཏསྨིཾ པན ཏདུབྷཡཝིརཧིཏེ སུཝཎྞཏུལཱ ཝིཡ སམབྷཱཝཔྤཏྟེ རཱཛིནི རཛྫཾ ཀཱརཡམཱནེ ཛནཔདོ པཱསཱཎཔིཊྛིཡཾ ཋཔེཏྭཱ ཨཡོཔཊྚེན པརིཀྑིཏྟོ ཝིཡ ཨཙལོ ཨསམྤཝེདྷཱི ཐཱཝརིཡཔྤཏྟོཏི.

སེཡྻཐིདནྟི ཨེཀོཝ ནིཔཱཏོ, ‘‘སོ ཀཏམོ, ཏཾ ཀཏམཾ, སཱ ཀཏམཱ’’ཏིཨཱདིནཱ ཡཐཱརཧཾ ལིངྒཝིབྷཏྟིཝཙནཝསེན པཡོཛིཡམཱནོཝ ཧོཏི, ཨིདྷ ཏཱནི ཀཏམཱནཱིཏི པཡུཏྟོཏི ཨཱཧ ‘‘ཏསྶ ཙེཏཱནཱི’’ཏིཨཱདི. ཙཙཏི ཙཀྐཝཏྟིནོ ཡཐཱརུཙི ཨཱཀཱསཱདིགམནཱཡ པརིབྦྷམཏཱིཏི ཙཀྐཾ. ཙཀྐརཏནཉྷི ཨནྟོསམུཊྛིཏཝཱཡོདྷཱཏུཝསེན རཉྙོ ཙཀྐཝཏྟིསྶ ཝཙནསམནནྟརམེཝ ¶ པཝཏྟཏི, ན ཙནྡསཱུརིཡཝིམཱནཱདི ཝིཡ བཧིསམུཊྛིཏཝཱཡོདྷཱཏུཝསེནཱཏི ཝིམཱནཊྛཀཐཱཡཾ (ཝི. ཝ. ཨཊྛ. ༡.པཋམཔཱིཋཝིམཱནཝཎྞནཱ) ཝུཏྟཾ. རཏིཛནནཊྛེནཱཏི པཱིཏིསོམནསྶུཔྤཱདནཊྛེན. ཏཉྷི པསྶནྟསྶ, སུཎནྟསྶ ཙ ཨནཔྤཀཾ པཱིཏིསོམནསྶཾ ཨུཔྤཛྫཏི ཨཙྪརིཡདྷམྨཏྟཱ. ཝཙནཏྠཏོ པན རམེཏི རཏིཾ ཀརོཏཱིཏི རཏནཾ, རམནཾ ཝཱ རཏཾ, ཏཾ ནེཏཱིཏི རཏནཾ, རཏཾ ཝཱ ཛནེཏཱིཏི རཏནཾ ཛ-ཀཱརལོཔཝསེནཱཏིཔི ནེརུཏྟིཀཱ. སབྦཏྠཱཏི ཧཏྠིརཏནཱདཱིསུ.

ཙིཏྟཱིཀཏབྷཱཝཱདིནཱཔི ཙཀྐསྶ རཏནཊྛོ ཝེདིཏབྦོ, སོ པན རཏིཛནནཊྛེནེཝ ཨེཀསངྒཧཏཱཡ ཝིསུཾ ན གཧིཏོ. ཀསྨཱ ཨེཀསངྒཧོཏི ཙེ? ཙིཏྟཱིཀཏཱདིབྷཱཝསྶཔི རཏིནིམིཏྟཏྟཱ. ཨཐ ཝཱ གནྠབྱཱསཾ པརིཧརིཏུཀཱམེན ཙིཏྟཱིཀཏཱདིབྷཱཝོ ན གཧིཏོཏི ཝེདིཏབྦཾ. ཨཉྙཱསུ པན ཨཊྛཀཐཱསུ (དཱི. ནི. ཨཊྛ. ༢.༣༣; སཾ. ནི. ཨཊྛ. ༣.༥.༢༢༣; ཁུ. པཱ. ཨཊྛ. ༦.༣.ཡཱནཱིདྷཱཏིགཱཐཱཝཎྞནཱ; སུ. ནི. ཨཊྛ. ༡.༢༢༦; མཧཱནི. ཨཊྛ. ༡༥༦) ཨེཝཾ ཝུཏྟཾ –

‘‘རཏིཛནནཊྛེན ¶ རཏནཾ. ཨཔིཙ –

ཙིཏྟཱིཀཏཾ མཧགྒྷཉྩ, ཨཏུལཾ དུལླབྷདསྶནཾ;

ཨནོམསཏྟཔརིབྷོགཾ, རཏནཾ ཏེན ཝུཙྩཏི.

‘‘ཙཀྐརཏནསྶ ཙ ནིབྦཏྟཀཱལཏོ པཊྛཱཡ ཨཉྙཾ དེཝཊྛཱནཾ ནཱམ ན ཧོཏི, སབྦེཔི གནྡྷཔུཔྥཱདཱིཧི ཏསྶེཝ པཱུཛཉྩ ཨབྷིཝཱདནཱདཱིནི ཙ ཀརོནྟཱིཏི ཙིཏྟཱིཀཏཊྛེན རཏནཾ. ཙཀྐརཏནསྶ ཙ ཨེཏྟཀཾ ནཱམ དྷནཾ ཨགྒྷཏཱིཏི ཨགྒྷོ ནཏྠི, ཨིཏི མཧགྒྷཊྛེནཔི རཏནཾ. ཙཀྐརཏནཉྩ ཨཉྙེཧི ལོཀེ ཝིཛྫམཱནརཏནེཧི ཨསདིསནྟི ཨཏུལཊྛེན རཏནཾ. ཡསྨཱ པན ཡསྨིཾ ཀཔྤེ བུདྡྷཱ ཨུཔྤཛྫནྟི, ཏསྨིཾཡེཝ ཙཀྐཝཏྟིནོ ཨུཔྤཛྫནྟི, བུདྡྷཱ ཙ ཀདཱཙི ཀརཧཙི ཨུཔྤཛྫནྟི, ཏསྨཱ དུལླབྷདསྶནཊྛེནཔི རཏནཾ. ཏདེཏཾ ཛཱཏིརཱུཔཀུལཨིསྶརིཡཱདཱིཧི ཨནོམསྶ ཨུལཱ༹རསཏྟསྶེཝ ཨུཔྤཛྫཏི, ན ཨཉྙསྶཱཏི ཨནོམསཏྟཔརིབྷོགཊྛེནཔི རཏནཾ. ཡཐཱ ཙ ཙཀྐརཏནཾ, ཨེཝཾ སེསཱནིཔཱི’’ཏི.

ཏཏྲཱཡཾ ཏཊྚཱིཀཱཡ, ཨཉྙཏྠ ཙ ཝུཏྟནཡེན ཨཏྠཝིབྷཱཝནཱ – ཨིདཉྷི ‘‘ཙིཏྟཱིཀཏ’’ནྟིཨཱདིཝཙནཾ ནིབྦཙནཏྠཝསེན ཝུཏྟཾ ན ཧོཏི, ཨཐ ཀིནྟི ཙེ? ལོཀེ ‘‘རཏན’’ནྟི ¶ སམྨཏསྶ ཝཏྠུནོ གརུཀཱཏབྦབྷཱཝེན ཝུཏྟཾ. སརཱུཔཏོ པནེཏཾ ལོཀིཡམཧཱཛནེན སམྨཏཾ ཧིརཉྙསུཝཎྞཱདིཀཾ, ཙཀྐཝཏྟིརཉྙོ ཨུཔྤནྣཾ ཙཀྐརཏནཱདིཀཾ, ཀཏཉྙུཀཏཝེདིཔུགྒལཱདིཀཾ, སབྦུཀྐཊྛཔརིཙྪེདཝསེན བུདྡྷཱདིསརཎཏྟཡཉྩ དཊྛབྦཾ. ‘‘ཨཧོ མནོཧར’’ནྟི ཙིཏྟེ ཀཏྟབྦཏཱཡ ཙིཏྟཱིཀཏཾ, སྭཱཡཾ ཙིཏྟཱིཀཱརོ ཏསྶ པཱུཛནཱིཡཏཱཡཱཏི ཀཏྭཱ པཱུཛནཱིཡནྟི ཨཏྠཾ ཝདནྟི. ཀེཙི པན ‘‘ཝིཙིཏྲཀཏཊྛེན ཙིཏྟཱིཀཏ’’ནྟི བྷཎནྟི, ཏཾ ན གཧེཏབྦཾ ཨིདྷ ཙིཏྟསདྡསྶ ཧདཡཝཱཙཀཏྟཱ ‘‘ཙིཏྟཱིཀཏྭཱ སུཎཱཐ མེ’’ཏི (བུ. ཝཾ. ༡.༨༠) ཨཱཧཙྩབྷཱསིཏཔཱལི༹ཡཾ ཝིཡ. ཏཐཱ ཙཱཧུ ‘‘ཡཐཱརཧམིཝཎྞཱགམོ བྷཱུཀརེསཱུ’’ཏི. ‘‘པསྶ ཙིཏྟཱིཀཏཾ རཱུཔཾ, མཎིནཱ ཀུཎྜལེན ཙཱ’’ཏིཨཱདཱིསུ (མ. ནི. ༢.༣༠༢) པན པུབྦེ ཨཝིཙིཏྲཾ ཨིདཱནི ཝིཙིཏྲཾ ཀཏནྟི ཙིཏྟཱིཀཏནྟི ཨཏྠོ གཧེཏབྦོ ཏཏྠ ཙིཏྟསདྡསྶ ཝིཙིཏྲཝཱཙཀཏྟཱ. མཧནྟཾ ཝིཔུལཾ ཨཔརིམིཏཾ ཨགྒྷཏཱིཏི མཧགྒྷཾ. ནཏྠི ཨེཏསྶ ཏུལཱ ཨུཔམཱ, ཏུལཾ ཝཱ སདིསནྟི ཨཏུལཾ. ཀདཱཙིདེཝ ཨུཔྤཛྫནཏོ དུཀྑེན ¶ ལདྡྷབྦདསྶནཏྟཱ དུལླབྷདསྶནཾ. ཨནོམེཧི ཨུལཱ༹རགུཎེཧེཝ སཏྟེཧི པརིབྷུཉྫིཏབྦཏོ ཨནོམསཏྟཔརིབྷོགཾ.

ཨིདཱནི ནེསཾ ཙིཏྟཱིཀཏཱདིཨཏྠཱནཾ སཝིསེསཾ ཙཀྐརཏནེ ལབྦྷམཱནཏཾ དསྶེཏྭཱ ཨིཏརེསུཔི ཏེ ཨཏིདིསིཏུཾ ‘‘ཡཐཱ ཙ ཙཀྐརཏན’’ནྟིཨཱདི ཨཱརདྡྷཾ. ཏཏྠ ཨཉྙཾ དེཝཊྛཱནཾ ནཱམ ན ཧོཏི རཉྙོ ཨནཉྙསཱདྷཱརཎིསྶརིཡཱདིསམྤཏྟིཔཊིལཱབྷཧེཏུཏོ, ཨཉྙེསཾ སཏྟཱནཾ ཡཐིཙྪིཏཏྠཔཊིལཱབྷཧེཏུཏོ ཙ. ཨགྒྷོ ནཏྠི ཨཏིཝིཡ ཨུལཱ༹རསམུཛྫལརཏནཏྟཱ, ཨཙྪརིཡབྦྷུཏདྷམྨཏཱཡ ཙ. ཡདགྒེན ཙ མཧགྒྷཾ, ཏདགྒེན ཨཏུལཾ. སཏྟཱནཾ པཱཔཛིགུཙྪནེན ཝིགཏཀཱལ༹ཀོ པུཉྙཔསུཏཏཱཡ མཎྜབྷཱུཏོ ཡཱདིསོ ཀཱལོ བུདྡྷུཔྤཱདཱརཧོ, ཏཱདིསེ ཨེཝ ཙཀྐཝཏྟཱིནམྤི སམྦྷཝོཏི ཨཱཧ ‘‘ཡསྨཱ པནཱ’’ཏིཨཱདི. ཀདཱཙི ཀརཧཙཱིཏི པརིཡཱཡཝཙནཾ, ‘‘ཀདཱཙཱི’’ཏི ཝཱ ཡཐཱཝུཏྟཀཱལཾ སནྡྷཱཡ ཝུཏྟཾ, ‘‘ཀརཧཙཱི’’ཏི ཛམྦུསིརིདཱིཔསངྑཱཏཾ དེསཾ. ཏེནཱཧ –

‘‘ཀཱལཾ དཱིཔཉྩ དེསཉྩ, ཀུལཾ མཱཏརམེཝ ཙ;

ཨིམེ པཉྩ ཝིལོཀེཏྭཱ, ཨུཔྤཛྫཏི མཧཱཡསོ’’ཏི. (དྷ. པ. ཨཊྛ. ༡.༡.༡༠);

ཨུཔམཱཝསེན ཙེཏཾ ཝུཏྟཾ. ཨུཔམོཔམེཡྻཱནཉྩ ན ཨཙྩནྟམེཝ སདིསཏཱ, ཏསྨཱ ཡཐཱ བུདྡྷཱ ཀདཱཙི ཀརཧཙི ཨུཔྤཛྫནྟི, ན ཏཐཱ ཙཀྐཝཏྟིནོ, ཙཀྐཝཏྟིནོ པན ཨནེཀདཱཔི བུདྡྷུཔྤཱདཀཔྤེ ཨུཔྤཛྫནྟཱིཏི ཨཏྠོ གཧེཏབྦོ. ཨེཝཾ སནྟེཔི ཙཀྐཝཏྟིཝཏྟཔཱུརཎསྶ དུཀྐརབྷཱཝཏོ ¶ དུལླབྷུཔྤཱདོཡེཝཱཏི ཨིམིནཱ དུལླབྷུཔྤཱདཏཱསཱམཉྙེན ཏེསཾ དུལླབྷདསྶནཏཱ ཝུཏྟཱཏི ཝེདིཏབྦཾ. ཀཱམཾ ཙཀྐརཏནཱནུབྷཱཝེན སམིཛ྄ཛྷམཱནོ གུཎོ ཙཀྐཝཏྟིཔརིཝཱརཛནསཱདྷཱརཎོ, ཏཐཱཔི ཙཀྐཝཏྟཱི ཨེཝ ནཾ སཱམིབྷཱཝེན ཝིསཝིཏཱཡ པརིབྷུཉྫཏཱིཏི ཝཏྟབྦཏཾ ཨརཧཏི ཏདཏྠམེཝ ཨུཔྤཛྫནཏོཏི དསྶེནྟོ ‘‘ཏདེཏ’’ནྟིཨཱདིམཱཧ. ཡཐཱཝུཏྟཱནཾ པཉྩནྣཾ, ཚནྣམྤི ཝཱ ཨཏྠཱནཾ སེསརཏནེསུཔི ལབྦྷནཏོ ‘‘ཨེཝཾ སེསཱནིཔཱི’’ཏི ཝུཏྟཾ.

ཨིམེཧི པན རཏནེཧི རཱཛཱ ཙཀྐཝཏྟཱི ཀིམཏྠཾ པཙྩནུབྷོཏི, ནནུ ཝིནཱཔི ཏེསུ ཀེནཙི རཉྙཱ ཙཀྐཝཏྟིནཱ བྷཝིཏབྦནྟི ཙོདནཱཡ ཏསྶ ཏེཧི ཧཐཱརཧམཏྠཔཙྩནུབྷཝནདསྶནེན ཀེནཙིཔི ཨཝིནཱབྷཱཝིཏཾ ཝིབྷཱཝེཏུཾ ‘‘ཨིམེསུ པནཱ’’ཏིཨཱདི ཨཱརདྡྷཾ. ཨཛིཏཾ པུརཏྠིམཱདིདིསཱཡ ཁཏྟིཡམཎྜལཾ ¶ ཛིནཱཏི མཧེསཀྑཏཱསཾཝཏྟནིཡཀམྨནིསྶནྡབྷཱཝཏོ. ཡཐཱསུཁཾ ཨནུཝིཙརཏི ཧཏྠིརཏནཾ, ཨསྶརཏནཉྩ ཨབྷིརུཧིཏྭཱ ཏེསཾ ཨཱནུབྷཱཝེན ཨནྟོཔཱཏརཱསཾཡེཝ སམུདྡཔརིཡནྟཾ པཐཝིཾ ཨནུཔརིཡཱཡིཏྭཱ རཱཛདྷཱནིཡཱ ཨེཝ པཙྩཱགམནཏོ. པརིཎཱཡཀརཏནེན ཝིཛིཏམནུརཀྑཏི ཏཏྠ ཏཏྠ ཀཏྟབྦཀིཙྩསཾཝིདཧནཏོ. ཨཝསེསེཧི མཎིརཏནཨིཏྠིརཏནགཧཔཏིརཏནེཧི ཨུཔབྷུཉྫནེན པཝཏྟཾ ཨུཔབྷོགསུཁཾ ཨནུབྷཝཏི ཡཐཱརཧཾ ཏེཧི ཏཐཱནུབྷཝནསིདྡྷིཏོ. སོ ཧི མཎིརཏནེན ཡོཛནཔྤམཱཎེ པདེསེ ཨནྡྷཀཱརཾ ཝིདྷམེཏྭཱ ཨཱལོཀདསྶནཱདིནཱ སུཁམནུབྷཝཏི, ཨིཏྠིརཏནེན ཨཏིཀྐནྟམཱནུསཀརཱུཔདསྶནཱདིཝསེན, གཧཔཏིརཏནེན ཨིཙྪིཏིཙྪིཏམཎིཀནཀརཛཏཱདིདྷནཔཊིལཱབྷཝསེན སུཁམནུབྷཝཏི.

ཨིདཱནི སཏྟིཡཱ, སཏྟིཕལེན ཙ ཡཐཱཝུཏྟམཏྠཾ ཝིབྷཱཝེཏུཾ ‘‘པཋམེནཱ’’ཏིཨཱདི ཝུཏྟཾ. ཏིཝིདྷཱ ཧི སཏྟིཡོ ‘‘སཀྐོནྟི སམཏྠེནྟི རཱཛཱནོ ཨེཏཱཡཱ’’ཏི ཀཏྭཱ. ཡཐཱཧུ –

‘‘པབྷཱཝུསྶཱཧམནྟཱནཾ, ཝསཱ ཏིསྶོ ཧི སཏྟིཡོ;

པབྷཱཝོ དཎྜཛོ ཏེཛོ, པཏཱཔོ ཏུ ཙ ཀོསཛོ.

མནྟོ ཙ མནྟནཾ སོ ཏུ, ཙཏུཀྐཎྞོ དྭིགོཙརོ;

ཏིགོཙརོ ཏུ ཚཀྐཎྞོ, རཧསྶཾ གུཡ྄ཧམུཙྩཏེ’’ཏི.

ཏཏྠ ཝཱིརིཡབལཾ ཨུསྶཱཧསཏྟི. པཋམེན ཙསྶ ཙཀྐརཏནེན ཏདནུཡོགོ པརིཔུཎྞོ ཧོཏི. ཀསྨཱཏི ཙེ? ཏེན ཨུསྶཱཧསཏྟིཡཱ པཝཏྟེཏབྦསྶ ཨཔྤཊིཧཏཱཎཱཙཀྐབྷཱཝསྶ སིདྡྷིཏོ. པཉྙཱབལཾ མནྟསཏྟི. པཙྪིམེན ཙསྶ པརིཎཱཡཀརཏནེན ཏདནུཡོགོ. ཀསྨཱཏི ཙེ ¶ ? ཏསྶ སབྦརཱཛཀིཙྩེསུ ཀུསལབྷཱཝེན མནྟསཏྟིཡཱ ཝིཡ ཨཝིརཛ྄ཛྷནཔཡོགཏྟཱ. དམནེན, དྷནེན ཙ པབྷུཏྟཾ པབྷཱུསཏྟི. ཧཏྠིཨསྶགཧཔཏིརཏནེཧི ཙསྶ ཏདནུཡོགོ པརིཔུཎྞོ ཧོཏི. ཀསྨཱཏི ཙེ? ཧཏྠིཨསྶརཏནཱནཾ མཧཱནུབྷཱཝཏཱཡ, གཧཔཏིརཏནཏོ པཊིལདྡྷཀོསསམྤཏྟིཡཱ ཙ པབྷཱཝསཏྟིཡཱ ཝིཡ པབྷཱཝསམིདྡྷིསིདྡྷིཏོ. ཨིཏྠིམཎིརཏནེཧི ཏིཝིདྷསཏྟིཡོགཕལཾ པརིཔུཎྞཾ ཧོཏཱིཏི སམྦནྡྷོ, ཡཐཱཝུཏྟཱཧི ཏིཝིདྷཱཧི སཏྟཱིཧི པཡུཛྫནཏོ ཡཾ ཕལཾ ལདྡྷབྦཾ. ཏཾ སབྦཾ ཏེཧི ¶ པརིཔུཎྞཾ ཧོཏཱིཏི ཨཏྠོ. ཀསྨཱཏི ཙེ? ཏེཧེཝ ཨུཔབྷོགསུཁསྶ སིཛ྄ཛྷནཏོ.

དུཝིདྷསུཁཝསེནཔི ཡཐཱཝུཏྟམཏྠཾ ཝིབྷཱཝེཏུཾ ‘‘སོ ཨིཏྠིམཎིརཏནེཧཱི’’ཏིཨཱདི ཀཐིཏཾ. བྷོགསུཁནྟི སམཱིཔེ ཀཏྭཱ པརིབྷོགཝསེན པཝཏྟསུཁཾ. སེསེཧཱིཏི ཏདཝསེསེཧི ཙཀྐཱདིཔཉྩརཏནེཧི. ཨཔཙྩཏྠིཀཏཱཝསེན པཝཏྟསུཁཾ ཨིསྶརིཡསུཁཾ. ཨིདཱནི ཏེསཾ སམྤནྣཧེཏུཝསེནཔི ཀེནཙི ཨཝིནཱབྷཱཝིཏམེཝ ཝིབྷཱཝེཏུཾ ‘‘ཝིསེསཏོ’’ཏིཨཱདིམཱཧ. ཨདོསཀུསལམཱུལཛནིཏཀམྨཱནུབྷཱཝེནཱཏི ཨདོསསངྑཱཏེན ཀུསལམཱུལེན སཧཛཱཏཱདིཔཙྩཡཝསེན ཨུཔྤཱདིཏཀམྨསྶ ཨཱནུབྷཱཝེན སམྤཛྫནྟི སོམྨཏརརཏནཛཱཏིཀཏྟཱ. ཀམྨཕལཉྷི ཡེབྷུཡྻེན ཀམྨསརིཀྑཀཾ. མཛ྄ཛྷིམཱནི མཎིཨིཏྠིགཧཔཏིརཏནཱནི ཨལོབྷཀུསལམཱུལཛནིཏཀམྨཱནུབྷཱཝེན སམྤཛྫནྟི ཨུལཱ༹རདྷནསྶ, ཨུལཱ༹རདྷནཔཊིལཱབྷཀཱརཎསྶ ཙ པརིཙྩཱགསམྤདཱཧེཏུཀཏྟཱ. པཙྪིམཾ པརིཎཱཡཀརཏནཾ ཨམོཧཀུསལམཱུལཛནིཏཀམྨཱནུབྷཱཝེན སམྤཛྫཏི མཧཱཔཉྙེནེཝ ཙཀྐཝཏྟིརཱཛཀིཙྩསྶ པརིནེཏབྦཏྟཱ, མཧཱཔཉྙབྷཱཝསྶ ཙ ཨམོཧཀུསལམཱུལཛནིཏཀམྨནིསྶནྡབྷཱཝཏོ. བོཛ྄ཛྷངྒསཾཡུཏྟེཏི མཧཱཝགྒེ དུཏིཡེ བོཛ྄ཛྷངྒསཾཡུཏྟེ (སཾ. ནི. ༥.༢༢༣). རཏནསུཏྟསྶཱཏི ཏཏྠ པཉྩམཝགྒེ སངྒཱིཏསྶ དུཏིཡསྶ རཏནསུཏྟསྶ (སཾ. ནི. ༥.༢༢༣). ཨུཔདེསོ ནཱམ སཝིསེསཾ སཏྟནྣཾ རཏནཱནཾ ཝིཙཱརཎཝསེན པཝཏྟོ ནཡོ.

སརཎཏོ པཊིཔཀྑཝིདྷམནཏོ སཱུརཱ སཏྟིཝནྟོ, ནིབྦྷཡཱཝཧཱཏི ཨཏྠོ. ཏེནཱཧ ‘‘ཨབྷཱིརུཀཛཱཏིཀཱ’’ཏི. ཨསུརེ ཝིཛིནིཏྭཱ ཋིཏཏྟཱ སཀྐོ དེཝཱནམིནྡོ དྷཱིརོ ནཱམ, ཏསྶ སེནངྒབྷཱཝཏོ དེཝཔུཏྟོ ‘‘ཨངྒ’’ནྟི ཝུཙྩཏི, དྷཱིརསྶ ཨངྒཾ, ཏསྶ རཱུཔམིཝ རཱུཔཾ ཡེསཾ ཏེ དྷཱིརངྒརཱུཔཱ, ཏེན ཝུཏྟཾ ‘‘དེཝཔུཏྟསདིསཀཱཡཱ’’ཏི. ཨེཀེཏི སཱརསམཱསནཱམཀཱ ཨཱཙརིཡཱ, ཏདཀྑམནྟོ ཨཱཧ ‘‘ཨཡཾ པནེཏྠཱ’’ཏིཨཱདི. སབྷཱཝོཏི སབྷཱཝབྷཱུཏོ ཨཏྠོ. ཨུཏྟམསཱུརཱཏི ཨུཏྟམཡོདྷཱ. སཱུརསདྡོ ཧི ཨིདྷ ཡོདྷཏྠོ. ཨེཝཉྷི པུརིམནཡཏོ ཨིམསྶ ཝིསེསཏཱ ཧོཏི, ‘‘ཨུཏྟམཏྠོ སཱུརསདྡོ’’ཏིཔི ཝདནྟི, ‘‘ཨུཏྟམཱ སཱུརཱ ཝུཙྩནྟཱི’’ཏིཔི ཧི པཱཋོ དིསྶཏི. ཝཱིརཱནནྟི ཝཱིརིཡཝནྟཱནཾ. ཨངྒནྟི ཀཱརཎཾ ‘‘ཨངྒཱིཡཏི ཉཱཡཏི ཕལམེཏེནཱ’’ཏི ཀཏྭཱ. ཡེན ཝཱིརིཡེན ‘‘དྷཱིརཱ’’ཏི ཝུཙྩནྟི, ཏདེཝ དྷཱིརངྒཾ ནཱམཱཏི ¶ ཨཱཧ ‘‘ཝཱིརིཡནྟི ཝུཏྟཾ ཧོཏཱི’’ཏི. རཱུཔནྟི ¶ སརཱིརཾ. ཏེན ཝུཏྟཾ ‘‘ཝཱིརིཡམཡསརཱིརཱ ཝིཡཱ’’ཏི. ཝཱིརིཡམེཝ ཝཱིརིཡམཡཾ ཡཐཱ ‘‘དཱནམཡ’’ནྟི, (དཱི. ནི. ༣.༣༠༥; ཨིཏིཝུ. ༦༠; ནེཏྟི. ༣༤) ཏསྨཱ ཝཱིརིཡསངྑཱཏསརཱིརཱ ཝིཡཱཏི ཨཏྠོ. ཝཱིརིཡཾ པན ན ཨེཀནྟརཱུཔནྟི ཝིཡ-སདྡགྒཧཎཾ ཀཏཾ. ཨཔིཙ དྷཱིརངྒེན ནིབྦཏྟཾ དྷཱིརངྒནྟི ཨཏྠཾ དསྶེཏུཾ ‘‘ཝཱིརིཡམཡསརཱིརཱ ཝིཡཱ’’ཏི ཝུཏྟཾ, ཨེཝམྤི ཝཱིརིཡཏོ རཱུཔཾ ན ཨེཀནྟཾ ནིབྦཏྟནྟི ཝིཡ-སདྡེན དསྶེཏི. ཨཐ ཝཱ རཱུཔཾ སརཱིརབྷཱུཏཾ དྷཱིརངྒཾ ཝཱིརིཡམེཏེསནྟི ཡོཛེཏབྦཾ, ཏཐཱཔི ཝཱིརིཡཾ ནཱམ ཀིཉྩི སཝིགྒཧཾ ན ཧོཏཱིཏི དཱིཔེཏི ‘‘ཝཱིརིཡམཡསརཱིརཱ ཝིཡཱ’’ཏི ཨིམིནཱ, ཨིདྷཱཔི མཡསདྡོ སཀཏྠེཡེཝ དཊྛབྦོ, ཏསྨཱ སཝིགྒཧཝཱིརིཡསདིསཱཏི ཨཏྠོ. ཨིདཾ ཝུཏྟཾ ཧོཏི – སཝིགྒཧཾ ཙེ ཝཱིརིཡཾ ནཱམ སིཡཱ, ཏེ ཙསྶ པུཏྟཱ ཏཾསདིསཱཡེཝ བྷཝེཡྻུནྟི ཨཡམེཝ ཙཏྠོ ཨཱཙརིཡེན (དཱི. ནི. ཊཱི. ༡.༢༥༨) ཨནུམཏོ. མཧཱཔདཱནཊྛཀཐཱཡཾ པན ཨེཝཾ ཝུཏྟཾ ‘‘དྷཱིརངྒཾ རཱུཔམེཏེསནྟི དྷཱིརངྒརཱུཔཱ, ཝཱིརིཡཛཱཏིཀཱ ཝཱིརིཡསབྷཱཝཱ ཝཱིརིཡམཡཱ ཨཀིལཱསུནོ ཨཧེསུཾ, དིཝསམྤི ཡུཛ྄ཛྷནྟཱ ན ཀིལམནྟཱིཏི ཝུཏྟཾ ཧོཏཱི’’ཏི, (དཱི. ནི. ཨཊྛ. ༢.༣༤) ཏདེཏཾ རཱུཔསདྡསྶ སབྷཱཝཏྠཏཾ སནྡྷཱཡ ཝུཏྟནྟི དཊྛབྦཾ. ཨིདྷ ཙེཝ ཨཉྙཏྠ ཀཏྠཙི ‘‘དྷིཏངྒརཱུཔཱ’’ཏི པཱཋོ དིསྶཏི. ཝཱིརིཡཏྠོཔི ཧི དྷིཏིསདྡོ ཧོཏི ‘‘སཙྩཾ དྷམྨོ དྷིཏི ཙཱགོ, དིཊྛཾ སོ ཨཏིཝཏྟཏཱི’’ཏིཨཱདཱིསུ (ཛཱ. ༡.༡.༥༧) དྷིཏིསདྡོ ཝིཡ. ཀཏྠཙི པན ‘‘ཝཱིརངྒ’’ནྟི པཱཋོཝ དིཊྛོ. ཡཐཱ རུཙྩཏི, ཏཐཱ གཧེཏབྦཾ.

ནནུ ཙ རཉྙོ ཙཀྐཝཏྟིསྶ པཊིསེནཱ ནཱམ ནཏྠི, ཡ’མསྶ པུཏྟཱ པམདྡེཡྻུཾ, ཨཐ ཀསྨཱ ‘‘པརསེནཔྤམདྡནཱ’’ཏི ཝུཏྟནྟི ཙོདནཾ སོདྷེནྟོ ‘‘སཙེ’’ཏིཨཱདིམཱཧ, པརསེནཱ ཧོཏུ ཝཱ, མཱ ཝཱ, ‘‘སཙེ པན བྷཝེཡྻཱ’’ཏི པརིཀཔྤནཱམཏྟེན ཏེསཾ ཨེཝམཱནུབྷཱཝཏཾ དསྶེཏུཾ ཏཐཱ ཝུཏྟནྟི ཨདྷིཔྤཱཡོ, ‘‘པརསེནཔྤམདྡནཱ’’ཏི ཝུཏྟེཔི པརསེནཾ པམདྡིཏུཾ སམཏྠཱཏི ཨཏྠོ གཧེཏབྦོ པཀརཎཏོཔི ཨཏྠནྟརསྶ ཝིཉྙཱཡམཱནཏྟཱ, ཡཐཱ ‘‘སིཀྑམཱནེན བྷིཀྑཝེ བྷིཀྑུནཱ ཨཉྙཱཏབྦཾ པརིཔུཙྪིཏབྦཾ པརིཔཉྷིཏབྦ’’ནྟི (པཱཙི. ༤༣༤) ཨེཏསྶ པདབྷཱཛནཱིཡེ (པཱཙི. ༤༣༦) ‘‘སིཀྑིཏུཀཱམེནཱ’’ཏི ཨཏྠགྒཧཎནྟི ཨིམམཏྠཾ དསྶེཏུཾ ‘‘ཏཾ པརིམདྡིཏུཾ སམཏྠཱ’’ཏི ཝུཏྟཾ. ན ཧི ཏེ པརསེནཾ པམདྡནྟཱ ཏིཊྛནྟི, ཨཐ ཁོ པམདྡནསམཏྠཱ ཨེཝ ཧོནྟི ¶ . ཨེཝམཉྙཏྲཔི ཡཐཱརཧཾ. པརསེནཾ པམདྡནཱཡ སམཏྠེནྟཱིཏི པརསེནཔྤམདྡནཱཏི ཨཏྠཾ དསྶེཏཱིཏིཔི ཝདནྟི.

པུབྦེ ཀཏཱུཔཙིཏསྶ ཨེཏརཧི ཝིཔཙྩམཱནཀསྶ པུཉྙདྷམྨསྶ ཙིརཏརཾ ཝིཔཙྩིཏུཾ པཙྩཡབྷཱུཏཾ ཙཀྐཝཏྟིཝཏྟསམུདཱགཏཾ པཡོགསམྤཏྟིསངྑཱཏཾ དྷམྨཾ དསྶེཏུཾ ‘‘དྷམྨེནཱ’’ཏི པདསྶ ‘‘པཱཎོ ¶ ན ཧནྟབྦོཏིཨཱདིནཱ པཉྩསཱིལདྷམྨེནཱ’’ཏི ཨཏྠམཱཧ. ཨཡཉྷི ཨཏྠོ ‘‘ཡེ ཁོ པནཱནནྡ པུརཏྠིམཱཡ དིསཱཡ པཊིརཱཛཱནོ, ཏེ རཱཛཱནཾ མཧཱསུདསྶནཾ ཨུཔསངྐམིཏྭཱ ཨེཝམཱཧཾསུ ‘ཨེཧི ཁོ མཧཱརཱཛ, སྭཱགཏཾ ཏེ མཧཱརཱཛ, སཀཾ ཏེ མཧཱརཱཛ, ཨནུསཱས མཧཱརཱཛཱ’ཏི. རཱཛཱ མཧཱསུདསྶནོ ཨེཝམཱཧ ‘པཱཎོ ན ཧནྟབྦོ, ཨདིནྣཾ ན ཨཱདཱཏབྦཾ, ཀཱམེསུ མིཙྪཱ ན ཙརིཏབྦཱ, མུསཱ ན བྷཎིཏབྦཱ, མཛྫཾ ན པཱཏབྦཾ, ཡཐཱབྷུཏྟཉྩ བྷུཉྫཐཱ’ཏི. ཡེ ཁོ པནཱནནྡ པུརཏྠིམཱཡ དིསཱཡ པཊིརཱཛཱནོ, ཏེ རཉྙོ མཧཱསུདསྶནསྶ ཨནུཡནྟཱ ཨཧེསུ’’ནྟིཨཱདིནཱ (དཱི. ནི. ༢.༢༤༤) ཨཱགཏཾ རཉྙོ ཨོཝཱདདྷམྨཾ སནྡྷཱཡ ཝུཏྟོ. ཨེཝཉྷི ‘‘ཨདཎྜེན ཨསཏྠེནཱ’’ཏི ཨིདམྤི ཝིསེསནཝཙནཾ སུསམཏྠིཏཾ ཧོཏི. ཨཉྙཱསུཔི སུཏྟནིཔཱཏཊྛཀཐཱདཱིསུ (སུ. ནི. ཨཊྛ. ༢༢༦; ཁུ. པཱ. ཨཊྛ. ༦.༣; དཱི. ནི. ཨཊྛ. ༢.༣༣; སཾ. ནི. ཨཊྛ. ༣.༢༢༣) ཨཡམེཝཏྠོ ཝུཏྟོ.

མཧཱཔདཱནཊྛཀཐཱཡཾ པན ‘‘ཨདཎྜེནཱཏི ཡེ ཀཏཱཔརཱདྷེ སཏྟེ སཏམྤི སཧསྶམྤི གཎྷནྟི, ཏེ དྷནདཎྜེན རཛྫཾ ཀཱརེནྟི ནཱམ, ཡེ ཚེཛྫབྷེཛྫཾ ཨནུསཱསནྟི, ཏེ སཏྠདཎྜེན. ཨཡཾ པན དུཝིདྷམྤི དཎྜཾ པཧཱཡ ཨདཎྜེན ཨཛ྄ཛྷཱཝསཏི. ཨསཏྠེནཱཏི ཡེ ཨེཀཏོདྷཱརཱདིནཱ སཏྠེན པརཾ ཝིཧེསནྟི, ཏེ སཏྠེན རཛྫཾ ཀཱརེནྟི ནཱམ. ཨཡཾ པན སཏྠེན ཁུདྡཀམཀྑིཀཱཡཔི པིཝནམཏྟཾ ལོཧིཏཾ ཀསྶཙི ཨནུཔྤཱདེཏྭཱ དྷམྨེནེཝ, ‘ཨེཧི ཁོ མཧཱརཱཛཱ’ཏི ཨེཝཾ པཊིརཱཛཱུཧི སམྤཊིཙྪིཏཱགམནོ ཝུཏྟཔྤཀཱརཾ པཐཝིཾ ཨབྷིཝིཛིནིཏྭཱ ཨཛ྄ཛྷཱཝསཏི ཨབྷིབྷཝིཏྭཱ སཱམཱི ཧུཏྭཱ ཝསཏཱིཏི ཨཏྠོ’’ཏི (དཱི. ནི. ཨཊྛ. ༢.༣༤) ཝུཏྟཾ, ཏདེཏཾ ‘‘དྷམྨེནཱ’’ཏི པདསྶ ‘‘པུབྦེ ཀཏཱུཔཙིཏེན ཨེཏརཧི ཝིཔཙྩམཱནཀེན ཡེན ཀེནཙི པུཉྙདྷམྨེནཱ’’ཏི ཨཏྠཾ སནྡྷཱཡ ཝུཏྟཾ. ཏེནེཝ ཧི ‘‘དྷམྨེན པཊིརཱཛཱུཧི སམྤཊིཙྪིཏཱགམནོ ཝུཏྟཔྤཀཱརཾ པཐཝིཾ ¶ ཨབྷིཝིཛིནིཏྭཱ ཨཛ྄ཛྷཱཝསཏཱི’’ཏི. ཨཱཙརིཡེནཔི (དཱི. ནི. ཊཱི. ༡.༢༥༨) ཝུཏྟཾ དྷམྨེནཱཏི ཀཏཱུཔཙིཏེན ཨཏྟནོ པུཉྙདྷམྨེན. ཏེན ཧི སཉྩོདིཏཱ པཐཝིཡཾ སབྦརཱཛཱནོ པཙྩུགྒནྟྭཱ ‘‘སྭཱགཏཾ ཏེ མཧཱརཱཛཱ’’ཏིཨཱདཱིནི ཝཏྭཱ ཨཏྟནོ རཛྫཾ རཉྙོ ཙཀྐཝཏྟིསྶ ནིཡྻཱཏེནྟི. ཏེན ཝུཏྟཾ ‘‘སོ ཨིམཾ པཐཝིཾ སཱགརཔརིཡནྟཾ ཨདཎྜེན ཨསཏྠེན དྷམྨེན ཨབྷིཝིཛིཡ ཨཛ྄ཛྷཱཝསཏཱི’’ཏི, ཏེནཔི ཡཐཱཝུཏྟམེཝཏྠཾ དསྶེཏི, ཏསྨཱ ཨུབྷཡཐཱཔི ཨེཏྠ ཨཏྠོ ཡུཏྟོ ཨེཝཱཏི དཊྛབྦཾ. ཙཀྐཝཏྟིཝཏྟཔཱུརཎཱདིཔཡོགསམྤཏྟིམནྟརེན ཧི པུབྦེ ཀཏཱུཔཙིཏཀམྨེནེཝ ཨེཝམཛ྄ཛྷཱཝསནཾ ན སམྦྷཝཏི, ཏཐཱ པུབྦེ ཀཏཱུཔཙིཏཀམྨམནྟརེན ཙཀྐཝཏྟིཝཏྟཔཱུརཎཱདིཔཡོགསམྤཏྟིཡཱ ཨེཝཱཏི.

ཨེཝཾ ཨེཀཾ ནིཔྥཏྟིཾ ཀཐེཏྭཱ དུཏིཡཾ ནིཔྥཏྟིཾ ཀཐེཏུཾ ཡདེཏཾ ‘‘སཙེ ཁོ པནཱ’’ཏིཨཱདིཝཙནཾ ཝུཏྟཾ, ཏཏྠ ཨནུཏྟཱནམཏྠཾ དསྶེནྟོ ‘‘ཨརཧཾ…པེ… ཝིཝཊྚཙྪདོཏི ཨེཏྠཱ’’ཏིཨཱདིམཱཧ ¶ . ཡསྨཱ རཱགཱདཡོ སཏྟ པཱཔདྷམྨཱ ལོཀེ ཨུཔྤཛྫནྟི, ཨུཔྤཛྫམཱནཱ ཙ ཏེ སཏྟསནྟཱནཾ ཚཱདེཏྭཱ པརིཡོནནྡྷིཏྭཱ ཀུསལཔྤཝཏྟིཾ ནིཝཱརེནྟི, ཏསྨཱ ཏེ ཨིདྷ ཚདསདྡེན ཝུཏྟཱཏི དསྶེཏི ‘‘རཱགདོསཱ’’ཏིཨཱདིནཱ. དུཙྩརིཏནྟི མིཙྪཱདིཊྛིཏོ ཨཉྙེན མནོདུཙྩརིཏེན སཧ ཏཱིཎི དུཙྩརིཏཱནི, མིཙྪཱདིཊྛི པན ཝིསེསེན སཏྟཱནཾ ཚདནཏོ, པརམསཱཝཛྫཏྟཱ ཙ ཝིསུཾ གཧིཏཱ. ཝུཏྟཉྩ ‘‘སབྦེ ཏེ ཨིམེཧེཝ དྭཱསཊྛིཡཱ ཝཏྠཱུཧི ཨནྟོཛཱལཱིཀཏཱ, ཨེཏྠ སིཏཱཝ ཨུམྨུཛྫམཱནཱ ཨུམྨུཛྫནྟཱི’’ཏིཨཱདི (དཱི. ནི. ༡.༡༤༦). ཏཐཱ མུཡ྄ཧནཊྛེན མོཧོ, ཨཝིདིཏཀརཎཊྛེན ཨཝིཛྫཱཏི པཝཏྟིཨཱཀཱརབྷེདེན ཨཉྙཱཎམེཝ དྭིདྷཱ ཝུཏྟཾ. ཏཐཱ ཧིསྶ དྭིདྷཱཔི ཚདནཏྠོ ཀཐིཏོ ‘‘ཨནྡྷཏམཾ ཏདཱ ཧོཏི, ཡཾ མོཧོ སཧཏེ ནར’’ནྟི, (མཧཱནི. ༥, ༡༥༦, ༡༩༥) ‘‘ཨཝིཛྫཱཡ ནིཝུཏོ ལོཀོ, ཝེཝིཙྪཱ པམཱདཱ ནཔྤཀཱསཏཱི’’ཏི (སུ. ནི. ༡༠༣༩; ཙཱུལ༹ནི. པཱརཱཡནཝགྒ.༢) ཙ. ཨེཝཾ རཱགདོསཱདཱིནམྤི ཚདནཏྠོ ཝཏྟབྦོ. མཧཱཔདཱནཊྛཀཐཱཡཾ (དཱི. ནི. ཨཊྛ. ༢.༣༣) པན རཱགདོསམོཧམཱནདིཊྛིཀིལེསཏཎྷཱཝསེན སཏྟ པཱཔདྷམྨཱ གཧིཏཱ. ཏཏྲ རཉྫནཊྛེན རཱགོ, ཏཎྷཱཡནཊྛེན ཏཎྷཱཏི པཝཏྟིཨཱཀཱརབྷེདེན ལོབྷོ ཨེཝ དྭིདྷཱ ཝུཏྟོ. ཏཐཱ ཧིསྶ དྭིདྷཱཔི ཚདནཏྠོ ཨེཀནྟིཀོཝ. ཡཐཱཧ ‘‘ཨནྡྷཏམཾ ཏདཱ ཧོཏི, ཡཾ རཱགོ སཧཏེ ནར’’ནྟི, ‘‘ཀཱམནྡྷཱ ཛཱལསཉྪནྣཱ, ཏཎྷཱཚདནཚཱདིཏཱ’’ཏི ¶ (ཨུདཱ. ༩༤) ཙ, ཀིལེསགྒཧཎེན ཙ ཝུཏྟཱཝསིཊྛཱ ཝིཙིཀིཙྪཱདཡོ ཝུཏྟཱ.

སཏྟཧི པཊིཙྪནྣེཏི ཧེཏུགབྦྷཝཙནཾ, སཏྟཧི པཱཔདྷམྨེཧི པཊིཙྪནྣཏྟཱ ཀིལེསཝསེན ཨནྡྷཀཱརེ ལོཀེཏི ཨཏྠོ. ཏཾ ཚདནནྟི སཏྟཔཱཔདྷམྨསངྑཱཏཾ ཚདནཾ. ཝིཝཊྚེཏྭཱཏི ཝིཝཊྚཾ ཀཏྭཱ ཝིགམེཏྭཱ. ཏདེཝ པརིཡཱཡནྟརེན ཝུཏྟཾ ‘‘སམནྟཏོ སཉྫཱཏཱལོཀོ ཧུཏྭཱ’’ཏི. ཀིལེསཚདནཝིགམོ ཨེཝ ཧི ཨཱལོཀོ, ཨེཏེན ཝིཝཊྚཡིཏབྦོ ཝིགམེཏབྦོཏི ཝིཝཊྚོ, ཚཱདེཏི པཊིཙྪཱདེཏཱིཏི ཚདོ, ཝིཝཊྚོ ཚདོ ཨནེནཱཏི ཝིཝཊྚཙྪདཱ, ཝིཝཊྚཙྪདོ ཝཱཏི ཨཏྠཾ དསྶེཏི. ཨཡཉྷི ཝིཝཊྚཙྪདསདྡོ དལ༹ྷདྷམྨཔཙྩཀྑདྷམྨསདྡཱདཡོ ཝིཡ པུལླིངྒཝསེན ཨཱཀཱརནྟོ, ཨོཀཱརནྟོ ཙ ཧོཏི. ཏཐཱ ཧི མཧཱཔདཱནཊྛཀཐཱཡཾ ཝུཏྟཾ ‘‘རཱགདོསམོཧམཱནདིཊྛིཀིལེསཏཎྷཱསངྑཱཏཾ ཚདནཾ ཨཱཝརཎཾ ཝིཝཊཾ ཝིདྡྷཾསིཏཾ ཝིཝཊཀཾ ཨེཏེནཱཏི ཝིཝཊཙྪདོ, ‘ཝིཝཊྚཙྪདཱ’ཏིཔི པཱཋོ, ཨཡམེཝཏྠོ’’ཏི, (དཱི. ནི. ཨཊྛ. ༢.༣༣) ཏསྶཱ ལཱིནཏྠཔྤཀཱསནིཡམྤི ཝུཏྟཾ ‘‘ཝིཝཊྚཙྪདཱཏི ཨོཀཱརསྶ ཨཱཀཱརཾ ཀཏྭཱ ནིདྡེསོ’’ཏི. སདྡཝིདཱུ པན ‘‘ཨཱདྷནྭཱདིཏོཏི ལཀྑཎེན སམཱསནྟགཏེཧི དྷནུསདྡཱདཱིཧི ཀྭཙི ཨཱཔཙྩཡོ’’ཏི ཝཏྭཱ ‘‘ཀཎྜིཝདྷནྭཱ, པཙྩཀྑདྷམྨཱ, ཝིཝཊྚཙྪདཱ’’ཏི པཡོགམུདཱཧརནྟི.

ཀསྨཱ པདཏྟཡམེཏཾ ཝུཏྟནྟི ཨནུཡོགཾ ཧེཏཱལངྐཱརནཡེན པརིཧརནྟོ ‘‘ཏཏྠཱ’’ཏིཨཱདིམཱཧ, ཏཏྠཱཏི ཙ ¶ ཏཱིསུ པདེསཱུཏི ཨཏྠོ. པཱུཛཱཝིསེསཾ པཊིགྒཎྷིཏུཾ ཨརཧཏཱིཏི ཨརཧནྟི ཨཏྠེན པཱུཛཱརཧཏཱ ཝུཏྟཱ. ཡསྨཱ སམྨཱསམྦུདྡྷོ, ཏསྨཱ པཱུཛཱརཧཏཱཏི ཏསྶཱ པཱུཛཱརཧཏཱཡ ཧེཏུ ཝུཏྟོ. སཝཱསནསབྦཀིལེསཔྤཧཱནཔུབྦཀཏྟཱ བུདྡྷབྷཱཝསྶ བུདྡྷཏྟཧེཏུབྷཱུཏཱ ཝིཝཊྚཙྪདཏཱ ཝུཏྟཱ. ཀམྨཱདིཝསེན ཏིཝིདྷཾ ཝཊྚཉྩ རཱགཱདིཝསེན སཏྟཝིདྷོ ཚདོ ཙ ཝཊྚཙྪདཱ, ཝཊྚཙྪདེཧི ཝིགཏོ, ཝིགཏཱ ཝཱ ཝཊྚཙྪདཱ ཡསྶཱཏི ཝིཝཊྚཙྪདོ, ཝིཝཊྚཙྪདཱ ཝཱ, དྭནྡཔུབྦགོ པན ཝི-སདྡོ ཨུབྷཡཏྠ ཡོཛེཏབྦོཏི ཨིམམཏྠཾ དསྶེཏུཾ ‘‘ཝིཝཊྚོ ཙ ཝིཙྪདོ ཙཱ’’ཏི ཝུཏྟཾ. ཨེཝམྤི ཝདནྟི ‘‘ཝིཝཊྚོ ཙ སོ ཝིཙྪདོ ཙཱཏི ཝིཝཊྚཙྪདོ, ཨུཏྟརཔདེ ¶ པུབྦཔདལོཔོཏི ཨཏྠཾ དསྶེཏཱི’’ཏི. ‘‘ཨརཧཾ ཝཊྚཱབྷཱཝེནཱ’’ཏི ཨིདཾ ཀིལེསེཧི ཨཱརཀཏྟཱ, ཀིལེསཱརཱིནཾ སཾསཱརཙཀྐསྶཱརཱནཉྩ ཧཏཏྟཱ, པཱཔཀརཎེ ཙ རཧཱབྷཱཝཱཏི ཨཏྠཾ སནྡྷཱཡ ཝུཏྟཾ. ཨིདཉྷི ཕལེན ཧེཏཱནུམཱནདསྶནཾ – ཡཐཱ ཏཾ དྷཱུམེན ཨགྒིསྶ, ཨུདཀོགྷེན ཨུཔརི ཝུཊྛིཡཱ, ཨེཏེན ཙ ཨཏྠེན ཨརཧབྷཱཝོ ཧེཏུ, ཝཊྚཱབྷཱཝོ ཕལནྟི ཨཡཾ ཨཱཙརིཡམཏི. ‘‘པཙྩཡཱདཱིནཾ, པཱུཛཱཝིསེསསྶ ཙ ཨརཧཏྟཱ’’ཏི པན ཧེཏུནཱ ཕལཱནུམཱནདསྶནམྤི སིཡཱ ཡཐཱ ཏཾ ཨགྒིནཱ དྷཱུམསྶ, ཨུཔརི ཝུཊྛིཡཱ ཨུདཀོགྷསྶ. ‘‘སམྨཱསམྦུདྡྷོ ཚདནཱབྷཱཝེནཱ’’ཏི ཨིདཾ པན ཧེཏུནཱ ཕལཱནུམཱནདསྶནཾ སཝཱསནསབྦཀིལེསཙྪདནཱབྷཱཝཔུབྦཀཏྟཱ སམྨཱསམྦུདྡྷབྷཱཝསྶ. ཨརཧཏྟམགྒེན ཧི ཝིཙྪདཏཱ, སབྦཉྙུཏཉྙཱཎེན སམྨཱསམྦུདྡྷབྷཱཝོ. ‘‘ཝིཝཊྚོ ཙ ཝིཙྪདོ ཙཱ’’ཏི ཨིདཾ ཧེཏུདྭཡཾ. ཀཱམཉྩ ཨཱཙརིཡམཏིཡཱ ཕལེན ཧེཏུཨནུམཱནདསྶནེ ཝིཝཊྚཏཱ ཕལམེཝ ཧོཏི, ཧེཏུཨནུམཱནདསྶནསྶ, པན ཏཐཱཉཱཎསྶ ཙ ཧེཏུབྷཱཝཏོ ཧེཏུཡེཝ ནཱམཱཏི ཝེདིཏབྦཾ.

ཨེཝཾ པདཏྟཡཝཙནེ ཧེཏཱལངྐཱརནཡེན པཡོཛནཾ དསྶེཏྭཱ ཨིདཱནི ཙཏུཝེསཱརཛྫཝསེནཔི དསྶེནྟོ ‘‘དུཏིཡེནཱ’’ཏིཨཱདིམཱཧ. ཏཏྠ དུཏིཡེན ཝེསཱརཛྫེནཱཏི ‘‘ཙཏྟཱརིམཱནི བྷིཀྑཝེ ཏཐཱགཏསྶ ཝེསཱརཛྫཱནི, ཡེཧི ཝེསཱརཛྫེཧི སམནྣཱགཏོ ཏཐཱགཏོ ཨཱསབྷཾ ཋཱནཾ པཊིཛཱནཱཏི, པརིསཱསུ སཱིཧནཱདཾ ནདཏི, བྲཧྨཙཀྐཾ པཝཏྟེཏཱི’’ཏིཨཱདིནཱ (ཨ. ནི. ༤.༨; མ. ནི. ༡.༡༥༠) བྷགཝཏཱ ཝུཏྟཀྐམེན དུཏིཡབྷཱུཏེན ‘‘ཁཱིཎཱསཝསྶ ཏེ པཊིཛཱནཏོ ‘ཨིམེ ཨཱསཝཱ ཨཔརིཀྑཱིཎཱ’ཏི, ཏཏྲ ཝཏ མཾ སམཎོ ཝཱ བྲཱཧྨཎོ ཝཱ དེཝོ ཝཱ མཱརོ ཝཱ བྲཧྨཱ ཝཱ ཀོཙི ཝཱ ལོཀསྨིཾ སཧ དྷམྨེན པཊིཙོདེསྶཏཱིཏི ནིམིཏྟམེཏཾ བྷིཀྑཝེ ན སམནུཔསྶཱམི, ཨེཏམཧཾ བྷིཀྑཝེ ནིམིཏྟཾ ཨསམནུཔསྶནྟོ ཁེམཔྤཏྟོ ཨབྷཡཔྤཏྟོ ཝེསཱརཛྫཔྤཏྟོ ཝིཧརཱམཱི’’ཏི པརིདཱིཔིཏེན ཝེསཱརཛྫེན. པུརིམསིདྡྷཱིཏི པུརིམསྶ ‘‘ཨརཧ’’ནྟི པདསྶ ཨཏྠསིདྡྷི ཨརཧཏྟསིདྡྷི, དུཏིཡཝེསཱརཛྫསྶ ཏདཏྠབྷཱཝཏོ ཏེན ཝེསཱརཛྫེན ཏདཏྠསིདྡྷཱིཏི ཝུཏྟཾ ཧོཏི. ‘‘ཁཱིཎཱསཝསྶ ཏེ པཊིཛཱནཏོ ‘ཨིམེ ཨཱསཝཱ ཨཔརིཀྑཱིཎཱ’ ཏི’’ཨཱདིནཱ ཝུཏྟམེཝ ཧི དུཏིཡཝེསཱརཛྫཾ ‘‘ཀིལེསེཧི ཨཱརཀཏྟཱ’’ཏིཨཱདིནཱ ཝུཏྟོ ‘‘ཨརཧ’’ནྟི པདསྶ ཨཏྠོཏི ¶ . ཏཏོ ཙ ཝིཉྙཱཡཏི ‘‘ཡཐཱ དུཏིཡེན ¶ ཝེསཱརཛྫེན པུརིམསིདྡྷི, ཨེཝཾ པུརིམེནཔི ཨཏྠེན དུཏིཡཝེསཱརཛྫསིདྡྷཱི’’ཏི. ཨེཝཉྩ ཀཏྭཱ ཨིམིནཱ ནཡེན ཙཏུཝེསཱརཛྫཝསེན པདཏྟཡཝཙནེ པཡོཛནདསྶནཾ ཨུཔཔནྣཾ ཧོཏི. ཨིཏརཐཱ ཧི ཀིཉྩིཔཡོཛནཱབྷཱཝཏོ ཨིདཾཡེཝ ཝཙནཾ ཨིདྷ ཨཝཏྟབྦཾ སིཡཱཏི. ཨེས ནཡོ སེསེསུཔི.

པཋམེནཱཏི ཝུཏྟནཡེན པཋམབྷཱུཏེན ‘‘སམྨཱསམྦུདྡྷསྶ ཏེ པཊིཛཱནཏོ ‘ཨིམེ དྷམྨཱ ཨནབྷིསམྦུདྡྷཱ’ཏི, ཏཏྲ…པེ… ཝིཧརཱམཱི’’ཏི པརིདཱིཔིཏེན ཝེསཱརཛྫེན. དུཏིཡསིདྡྷཱིཏི དུཏིཡསྶ ‘‘སམྨཱསམྦུདྡྷོ’’ཏི པདསྶ ཨཏྠསིདྡྷི བུདྡྷཏྟསིདྡྷི ཏསྶ ཏདཏྠབྷཱཝཏོ. ཏཏིཡཙཏུཏྠེཧཱིཏི ཝུཏྟནཡེནེཝ ཏཏིཡཙཏུཏྠབྷཱུཏེཧི ‘‘ཡེ ཁོ པན ཏེ ཨནྟརཱཡིཀཱ དྷམྨཱ ཝུཏྟཱ, ཏེ པཊིསེཝཏོ ནཱལཾ ཨནྟརཱཡཱཡཱཏི, ཏཏྲ…པེ… ཝིཧརཱམཱི’’ཏི ཙ ‘‘ཡསྶ ཁོ པན ཏེ ཨཏྠཱཡ དྷམྨོ དེསིཏོ, སོ ན ནིཡྻཱཏི ཏཀྐརསྶ སམྨཱ དུཀྑཀྑཡཱཡཱཏི, ཏཏྲ…པེ… ཝིཧརཱམཱི’’ཏི (ཨ. ནི. ༤.༨; མ. ནི. ༡.༡༥༠) ཙ པརིདཱིཔིཏེཧི ཝེསཱརཛྫེཧི. ཏཏིཡསིདྡྷཱིཏི ཏཏིཡསྶ ‘‘ཝིཝཊྚཙྪདཱ’’ཏི པདསྶ ཨཏྠསིདྡྷི ཝིཝཊྚཙྪདཏྠསིདྡྷི ཏེཧི ཏསྶ པཱཀཊབྷཱཝཏོཏི ཨཏྠོ. ‘‘ཡཱཐཱཝཏོ ཨནྟརཱཡིཀནིཡྻཱནིཀདྷམྨཱཔདེསེན ཧི སཏྠུ ཝིཝཊྚཙྪདབྷཱཝོ ལོཀེ པཱཀཊོ ཨཧོསཱི’’ཏི (དཱི. ནི. ཊཱི. ༡.༢༥༨) ཨཱཙརིཡེན ཝུཏྟཾ, ཝིཝཊྚཙྪདབྷཱཝེནེཝ ཨནྟརཱཡིཀནིཡྻཱནིཀདྷམྨདེསནཱསིདྡྷིཏོ ‘‘ཏཏིཡེན ཏཏིཡཙཏུཏྠསིདྡྷཱི’’ཏིཔི ཝཏྟུཾ ཡུཛྫཏི.

ཨེཝཾ པདཏྟཡཝཙནེ ཙཏུཝེསཱརཛྫཝསེན པཡོཛནཾ དསྶེཏྭཱ ཨིདཱནི ཙཀྑུཏྟཡཝསེནཔི དསྶེནྟོ ‘‘པུརིམཉྩཱ’’ཏིཨཱདིམཱཧ. ཏཏྠ ཙ-སདྡོ ཨུཔནྱཱསཏྠོ. པུརིམཾ ‘‘ཨརཧ’’ནྟི པདཾ བྷགཝཏོ ཧེཊྛིམམགྒཕལཏྟཡཉཱཎསངྑཱཏཾ དྷམྨཙཀྑུཾ སཱདྷེཏི ཀིལེསཱརཱིནཾ, སཾསཱརཙཀྐསྶ ཨརཱནཉྩ ཧཏབྷཱཝདཱིཔནཏོ. དུཏིཡཾ ‘‘སམྨཱསམྦུདྡྷོ’’ཏི པདཾ ཨཱསཡཱནུསཡཨིནྡྲིཡཔརོཔརིཡཏྟཉཱཎསངྑཱཏཾ བུདྡྷཙཀྑུཾ སཱདྷེཏི སམྨཱསམྦུདྡྷསྶེཝ ཏཾསམྦྷཝཏོ. ཏདེཏཉྷི ཉཱཎདྭཡཾ སཱཝཀཔཙྩེཀབུདྡྷཱནཾ ན སམྦྷཝཏི. ཏཏིཡཾ ‘‘ཝིཝཊྚཙྪདཱ’’ཏི པདཾ སབྦཉྙུཏཉྙཱཎསངྑཱཏཾ སམནྟཙཀྑུཾ སཱདྷེཏི སཝཱསནསབྦཀིལེསཔྤཧཱནདཱིཔནཏོ. ‘‘སམྨཱསམྦུདྡྷོ’’ཏི ཧི ཝཏྭཱ ‘‘ཝིཝཊྚཙྪདཱ’’ཏི ཝཙནཾ སམྨཱསམྦུདྡྷབྷཱཝཱཡ སཝཱསནསབྦཀིལེསཔྤཧཱནཾ ཝིབྷཱཝེཏཱིཏི. ‘‘ཨཧཾ ཁོ པན ཏཱཏ ཨམྦཊྛ མནྟཱནཾ དཱཏཱ’’ཏི ཨིདཾ ཨཔྤདྷཱནཾ, ‘‘ཏྭཾ མནྟཱནཾ པཊིགྒཧེཏཱ’’ཏི ཨིདམེཝ པདྷཱནཾ སམུཏྟེཛནཱཝཙནནྟི སནྡྷཱཡ ¶ ‘‘ཏྭཾ མནྟཱནཾ པཊིགྒཧེཏཱཏི ཨིམིནཱ’སྶ མནྟེསུ སཱུརབྷཱཝཾ ཛནེཏཱི’’ཏི ཝུཏྟཾ, ལཀྑཎཝིབྷཱཝནེ ཝིསདཉཱཎཏཱསངྑཱཏཾ སཱུརབྷཱཝཾ ཛནེཏཱིཏི ཨཏྠོ.

༢༥༩. ཨེཝཾ ¶ བྷོཏི ཨེཏྠ ཨེཝཾ-སདྡོ ཝཙནསམྤཊིཙྪནེ ནིཔཱཏོ, ཝཙནསམྤཊིཙྪནཉྩེཏྠ ཏཐཱ མཡཾ ཏཾ བྷཝནྟཾ གོཏམཾ ཝེདིསྶཱམ, ཏྭཾ མནྟཱནཾ པཊིགྒཧེཏཱཏི ཙ ཨེཝཾ པཝཏྟསྶ པོཀྑརསཱཏིནོ ཝཙནསྶ སམྤཊིགྒཧོ. ‘‘ཏསྶཏྠོ’’ཏིཨཱདིནཱཔི ཧི ཏདེཝཏྠཾ དསྶེཏི. ཏཐཱ ཙ ཝུཏྟཾ ‘‘བྲཱཧྨཎསྶ པོཀྑརསཱཏིསྶ པཊིསྶུཏྭཱ’’ཏི, ཏཾ པནེས ཨཱཙརིཡསྶ སམུཏྟེཛནཱཡ ལཀྑཎེསུ ཝིགཏསམྨོཧབྷཱཝེན བུདྡྷམནྟེ སམྤསྶམཱནཏྟཱ ཝདཏཱིཏི དསྶེནྟོ ‘‘སོཔཱི’’ཏིཨཱདིམཱཧ. ཏཏྠ ‘‘ཏཱཡཱཏི ཏཱཡ ཡཐཱཝུཏྟཱཡ སམུཏྟེཛནཱཡཱ’’ཏི (དཱི. ནི. ཊཱི. ༡.༢༥༩) ཨཱཙརིཡེན ཝུཏྟཾ, ཨདྷུནཱ པན པོཏྠཀེསུ ‘‘ཏཱཡ ཨཱཙརིཡཀཐཱཡཱ’’ཏི པཱཋོ དིསྶཏི. ཨཏྠཏོ ཙེས ཨཝིརུདྡྷོཡེཝ. མནྟེསུ སཏིསམུཔྤཱདིཀཱ ཧི ཀཐཱ སམུཏྟེཛནཱཏི.

ཨཡཱནབྷཱུམིནྟི ཡཱནསྶ ཨབྷཱུམིཾ, ཡཱནེན ཡཱཏུམསཀྐུཎེཡྻཊྛཱནབྷཱུཏཾ, དྭཱརཀོཊྛཀསམཱིཔཾ གནྟྭཱཏི ཨཏྠོ.

ཨཝིསེསེན ཝུཏྟསྶཔི ཝཙནསྶ ཨཏྠོ ཨཊྛཀཐཱཔམཱཎཏོ ཝིསེསེན གཧེཏབྦོཏི ཨཱཧ ‘‘ཋིཏམཛ྄ཛྷནྷིཀསམཡེ’’ཏི. སབྦེསམཱཙིཎྞཝསེན པཋམནཡཾ ཝཏྭཱ པདྷཱནིཀཱནམེཝ ཨཱཝེཎིཀཱཙིཎྞཝསེན དུཏིཡནཡོ ཝུཏྟོ. དིཝཱཔདྷཱནིཀཱཏི དིཝཱཔདྷཱནཱནུཡུཉྫནཀཱ, དིཝསབྷཱགེ སམཎདྷམྨཀརཎཏྠཾ ཏེ ཨེཝཾ ཙངྐམནྟཱིཏི ཝུཏྟཾ ཧོཏི. ཏེནཱཧ ‘‘ཏཱདིསཱནཉྷཱི’’ཏིཨཱདི. ‘‘པརིཝེཎཏོ པརིཝེཎམཱགཙྪནྟོ པཔཉྩོ ཧོཏི, པུཙྪིཏྭཱཝ པཝིསིསྶཱམཱི’’ཏི ཨམྦཊྛསྶ ཏདུཔསངྐམནཱདྷིཔྤཱཡཾ ཝིབྷཱཝེནྟོ ‘‘སོ ཀིརཱ’’ཏིཨཱདིམཱཧ.

༢༦༠. ཨབྷིཉྙཱཏཀུལེ ཛཱཏོ ཨབྷིཉྙཱཏཀོལཉྙོ. ཀཱམཉྩ ཝཀྑམཱནནཡེན པུབྦེ ཨམྦཊྛཀུལམཔཉྙཱཏཾ, ཏདཱ པན པཉྙཱཏནྟི ཨཱཧ ‘‘ཏདཱ ཀིརཱ’’ཏིཨཱདི. རཱུཔཛཱཏིམནྟཀུལཱཔདེསེཧཱིཏི ‘‘ཨཡམཱིདིསོ’’ཏི ཨཔདིསནཧེཏུབྷཱུཏེཧི ཙཏཱུཧི རཱུཔཛཱཏིམནྟཀུལེཧི. ཡེན ཏེ ¶ བྷིཀྑཱུ ཙིནྟཡིཾསུ, ཏདདྷིཔྤཱཡཾ ཨཱཝི ཀཱཏུཾ ‘‘ཡོ ཧཱི’’ཏིཨཱདི ཝུཏྟཾ. ཨཝིསེསཏོ ཝུཏྟམྤི ཝིསེསཏོ ཝིཉྙཱཡམཱནཏྠཾ སནྡྷཱཡ བྷཱསིཏཝཙནནྟི དསྶེཏི ‘‘གནྡྷཀུཊིཾ སནྡྷཱཡཱ’’ཏི ཨིམིནཱ. ཨེཝམཱིདིསེསུ.

ཨཏུརིཏོཏི ཨཝེགཱཡནྟོ, ‘‘ཨཏུརནྟོ’’ཏིཔི པཱཋོ, སོཡེཝཏྠོ. ཀཐཾ པཝིསནྟོ ཨཏརམཱནོ པཝིསཏི ནཱམཱཏི ཨཱཧ ‘‘སཎིཀ’’ནྟིཨཱདི. ཏཏྠ པདཔྤམཱཎཊྛཱནེཏི དྭིནྣཾ པདཱནཾ ཨནྟརེ མུཊྛིརཏནཔམཱཎཊྛཱནེ. སིནྡུཝཱརོ ནཱམ ཨེཀོ པུཔྥཱུཔགརུཀྑོ, ཡསྶ སེཏཾ པུཔྥཾ ཧོཏི, ཡོ ¶ ‘‘ནིགྒུཎྜཱི’’ ཏིཔི ཝུཙྩཏི. པམུཁནྟི གནྡྷཀུཊིགབྦྷཔམུཁཾ. ‘‘ཀུཉྩིཀཙྪིདྡསམཱིཔེ’’ཏི ཝུཏྟཝཙནཾ སམཏྠེཏུཾ ‘‘དྭཱརཾ ཀིརཱ’’ཏིཨཱདི ཝུཏྟཾ.

༢༦༡. ‘‘དཱནཾ དདམཱནེཧཱི’’ཏི ཨིམིནཱ པཱརམིཏཱནུབྷཱཝེན སཡམེཝ དྭཱརཝིཝརཎཾ དསྶེཏི.

བྷགཝཏཱ སདྡྷིཾ སམྨོདིཾསཱུཏི ཨེཏྠ སམཏྠེན སཾ-སདྡེན ཝིཉྙཱཡམཱནཾ བྷགཝཏོ ཏེཧི སདྡྷིཾ པཋམཾ པཝཏྟམོདཏཱསངྑཱཏཾ ནེཡྻཏྠཾ དསྶེནྟོ ‘‘ཡཐཱ’’ཏིཨཱདིམཱཧ. བྷགཝཱཔི ཧི ‘‘ཀཙྩི བྷོ མཱཎཝཱ ཁམནཱིཡཾ, ཀཙྩི ཡཱཔནཱིཡ’’ནྟིཨཱདཱིནི པུཙྪནྟོ ཏེཧི མཱཎཝེཧི སདྡྷིཾ པུབྦབྷཱསིཏཱཡ པཋམཉྙེཝ པཝཏྟམོདོ ཨཧོསི. སམཔྤཝཏྟམོདཱཏི བྷགཝཏོ ཏདནུཀརཎེན སམཾ པཝཏྟསཾསནྡནཱ. ཏདཏྠཾ སཧ ཨུཔམཱཡ དསྶེཏུཾ ‘‘སཱིཏོདཀཾ ཝིཡཱ’’ཏིཨཱདི ཝུཏྟཾ. ཏཏྠ པརམནིབྦུཏཀིལེསདརཐཏཱཡ བྷགཝཏོ སཱིཏོདཀསདིསཏཱ, ཨནིབྦུཏཀིལེསདརཐཏཱཡ ཙ མཱཎཝཱནཾ ཨུཎྷོདཀསདིསཏཱ དཊྛབྦཱ. སམྨོདིཏནྟི སཾསནྡིཏཾ. མུདསདྡོ ཧེཏྠ སཾསནྡནེཡེཝ, ན པཱམོཛྫེ, ཨེཝཉྷི ཡཐཱཝུཏྟཨུཔམཱཝཙནཾ སམཏྠིཏཾ ཧོཏི. ཏཐཱ ཧི ཝུཏྟཾ ‘‘ཨེཀཱིབྷཱཝ’’ནྟི, སམྨོདནཀིརིཡཱཡ སམཱནཏཾ ཨེཀརཱུཔཏནྟི ཨཏྠོ.

ཁམནཱིཡནྟི ‘‘ཙཏུཙཀྐཾ ནཝདྭཱརཾ སརཱིརཡནྟཾ དུཀྑབཧུལཏཱཡ སབྷཱཝཏོ དུསྶཧཾ ཀཙྩི ཁམིཏུཾ སཀྐུཎེཡྻ’’ནྟི པུཙྪནྟི, ཡཱཔནཱིཡནྟི ཨཱཧཱརཱདིཔཙྩཡཔཊིབདྡྷཝུཏྟིཀཾ ཙིརཔྤབནྡྷསངྑཱཏཱཡ ཡཱཔནཱཡ ཀཙྩི ཡཱཔེཏུཾ སཀྐུཎེཡྻཾ, སཱིསརོགཱདིཨཱབཱདྷཱབྷཱཝེན ཀཙྩི ཨཔྤཱབཱདྷཾ, དུཀྑཛཱིཝིཀཱབྷཱཝེན ཀཙྩི ཨཔྤཱཏངྐཾ, ཏཾཏཾཀིཙྩཀརཎེ ཨུཊྛཱནསུཁཏཱཡ ཀཙྩི ལཧུཊྛཱནཾ, ཏདནུརཱུཔབལཡོགཏོ ཀཙྩི བལཾ, སུཁཝིཧཱརཕལསབྦྷཱཝེན ཀཙྩིཕཱསུཝིཧཱརོ ཨཏྠཱིཏི སབྦཏྠ ཀཙྩི-སདྡཾ ཡོཛེཏྭཱ ཨཏྠོ ཝེདིཏབྦོ. བལཔྤཏྟཱ ¶ པཱིཏི པཱིཏིཡེཝ. ཏརུཎཱ པཱིཏི པཱམོཛྫཾ. སམྨོདནཾ ཛནེཏི ཀརོཏཱིཏི སམྨོདནིཀཾ, ཏདེཝ སམྨོདནིཡཾ ཀ-ཀཱརསྶ ཡ-ཀཱརཾ ཀཏྭཱ. སམྨོདེཏབྦཏོ སམྨོདནཱིཡནྟི ཨིམམཏྠཾ དསྶེཏི ‘‘སམྨོདིཏུཾ ཡུཏྟབྷཱཝཏོ’’ཏི ཨིམིནཱ. ཨེཝཾ ཨཱཙརིཡེཧི ཝུཏྟཾ. སམྨོདིཏུཾ ཨརཧཏཱིཏི སམྨོདནིཀཾ, ཏདེཝ སམྨོདནིཡཾ ཡཐཱཝུཏྟནཡེནཱཏི ཨིམམཏྠམྤི དསྶེཏཱིཏི དཊྛབྦཾ. ‘‘སཱརེཏུ’’ནྟི ཨེཏསྶ ‘‘ནིརནྟརཾ པཝཏྟེཏུ’’ནྟི ཨཏྠཝཙནཾ. སརིཏབྦབྷཱཝཏོཏི ཨནུསྶརིཏབྦབྷཱཝཏོ. ‘‘སཱརེཏུཾ ཨརཧཏཱི’’ཏི ཨཏྠེ ཡཐཱཔདཾ དཱིགྷེན ‘‘སཱརཎཱིཡ’’ནྟི ཝུཏྟཾ. ‘‘སརིཏབྦ’’ནྟི ཨཏྠེ པན ‘‘སརཎཱིཡ’’ནྟི ཝཏྟབྦེ དཱིགྷཾ ཀཏྭཱ ‘‘སཱརཎཱིཡ’’ནྟི ཝུཏྟནྟི ཝེདིཏབྦཾ. ཨེཝཾ སདྡཏོ ཨཏྠཾ དསྶེཏྭཱ ཨིདཱནི ཨཏྠམཏྟཏོ དསྶེཏུཾ ‘‘སུཡྻམཱནསུཁཏོ’’ཏིཨཱདི ཝུཏྟཾ. ཏཏྠ སུཡྻམཱནསུཁཏོཏི ཨཱཔཱཐམདྷུརཏྟམཱཧ, ཨནུསྶརིཡམཱནསུཁཏོཏི ཝིམདྡརམཎཱིཡཏྟཾ. བྱཉྫནཔརིསུདྡྷཏཱཡཱཏི སབྷཱཝནིརུཏྟིབྷཱཝེན ཏསྶཱ ཀཐཱཡ ¶ ཝཙནཙཱཏུརིཡཾ, ཨཏྠཔརིསུདྡྷཏཱཡཱཏི ཨཏྠསྶ ནིརུཔཀྐིལེསཏྟཾ. ཨནེཀེཧི པརིཡཱཡེཧཱིཏི ཨནེཀེཧི ཀཱརཎེཧི.

ཨཔསཱདེསྶཱམཱིཏི མངྐུཾ ཀརིསྶཱམི. ཨུབྷོསུ ཁནྡྷེསུ སཱཊཀཾ ཨཱསཛྫེཏྭཱ ཀཎྛེ ཨོལམྦནཾ སནྡྷཱཡ ‘‘ཀཎྛེ ཨོལམྦིཏྭཱ’’ཏི ཝུཏྟཾ. དུསྶཀཎྞཾ གཧེཏྭཱཏི ནིཝཏྠསཱཊཀསྶ ཀོཊིཾ ཨེཀེན ཧཏྠེན གཧེཏྭཱ. ཙངྐམིཏུམཱརུཧནཾ སནྡྷཱཡ ‘‘ཙངྐམཾ ཨབྷིརུཧིཏྭཱ’’ཏི ཨཱཧ. དྷཱཏུསམཏཱཏི རསཱདིདྷཱཏཱུནཾ སམཱཝཏྠཏཱ, ཨརོགཏཱཏི ཨཏྠོ. པཱསཱདིཀཏྠནྟི པསཱདཛནནཏྠཾ ‘‘གཏགཏཊྛཱནེ’’ཏི ཨིམིནཱ སམྦནྡྷོ. ‘‘པཱསཱདིཀཏྟཱ’’ཏིཔི པཱཋོ, ཏསྶཏྠོ – ཨངྒཔཙྩངྒཱནཾ པསཱདཱཝཧཏྟཱཏི, ‘‘ཨུཔྤནྣབཧུམཱནཱ’’ཏི ཨིམིནཱ སམྦནྡྷོ. ཨུཔྤཎྜནཀཐནྟི ཨཝཧསིཏབྦཏཱཡུཏྟཀཐཾ. ‘‘ཨནཱཙཱརབྷཱཝསཱརཎཱིཡ’’ནྟི ཏསྶ ཝིསེསནཾ, ཨནཱཙཱརབྷཱཝེན སཱརཎཱིཡཾ ‘‘ཨནཱཙཱརོ ཝཏཱཡ’’ནྟི སརིཏབྦཀནྟི ཨཏྠོ.

༢༦༢. ཀཱཏུཾ དུཀྐརམསཀྐུཎེཡྻཾ ཀིཙྩམཡཾ ཨཱརབྷཱིཏི དསྶེཏུཾ ‘‘བྷཝགྒཾ གཧེཏུཀཱམོ ཝིཡཱ’’ཏིཨཱདི ཝུཏྟཾ. ཨསཀྐུཎེཡྻཉྷེཏཾ སདེཝཀེནཔི ལོཀེན, ཡདིདཾ བྷགཝཏོ ཨཔསཱདནཾ. ཏེནཱཧ ‘‘ཨཊྛཱནེ ཝཱཡམཏཱི’’ཏི. ཧནྡ ཏེན སདྡྷིཾ མནྟེམཱིཏི ཨེཝཾ ཨཊྛཱནེ ཝཱཡམནྟོཔི ཨཡཾ བཱལོ ‘‘མཡི ཀིཉྩི ཨཀཐེནྟེ མཡཱ སདྡྷིཾ ཨུཏྟརི ཀཐེཏུམྤི ¶ ན ཝིསཧཏཱི’’ཏི མཱནམེཝ པགྒཎྷིསྶཏི, ཀཐེནྟེ པན ཀཐཱཔསངྒེནསྶ ཛཱཏིགོཏྟེ ཝིབྷཱཝིཏེ མཱནནིགྒཧོ བྷཝིསྶཏི, ‘‘ཧནྡ ཏེན སདྡྷིཾ མནྟེམཱི’’ཏི བྷགཝཱ ཨམྦཊྛཾ མཱཎཝཾ ཨེཏདཝོཙཱཏི ཨཏྠོ. ཨཱཙཱརསམཱཙཱརསིཀྑཱཔནེན ཨཱཙརིཡཱ, ཏེསཾ པན ཨཱཙརིཡཱནཾ པཀཊྛཱ ཨཱཙརིཡཱཏི པཱཙརིཡཱ ཡཐཱ ‘‘པཔིཏཱམཧོ’’ཏི ཨིམམཏྠཾ དསྶེཏུཾ ‘‘ཨཱཙརིཡེཧི ཙ ཏེསཾ ཨཱཙརིཡེཧི ཙཱ’’ཏི ཝུཏྟཾ.

པཋམཨིབྦྷཝཱདཝཎྞནཱ

༢༦༣. ཀིཉྩཱཔི ‘‘སཡཱནོ ཝཱ’’ཏིཨཱདིཝཙནཾ ན ཝཏྟབྦཾ, མཱནཝསེན པན ཡུགགྒཱཧཾ ཀརོནྟོ ཝདཏཱིཏི དསྶེནྟོ ‘‘ཀཱམཾ ཏཱིསཱུ’’ཏིཨཱདིམཱཧ. ཏཏྠ ཏཱིསུ ཨིརིཡཱཔཐེསཱུཏི ཋཱནགམནནིསཛྫཱསུ. ཏེསྭེཝ ཧི ཨཱཙརིཡེན སདྡྷིཾ སལླཔིཏུམརཧཏི, ན ཏུ སཡནེ གརུཀརཎཱིཡཱནཾ སཡཱནཱནམྤི སམྨུཁཱ གརུཀཱརེཧི སཡནསྶ ཨཀཏྟབྦབྷཱཝཏོ. ཀཐཱསལླཱཔནྟི ཀཐཱཝསེན ཡུགགྒཱཧཀརཎཏྠཾ སལླཔནཾ. སཡཱནེན ཧི ཨཱཙརིཡེན སདྡྷིཾ སཡཱནསྶ ཀཐཱ ནཱམ ཨཱཙཱརོ ན ཧོཏི, ཏཐཱཔེཏཾ ཨིཏརེཧི སདིསཾ ཀཏྭཱ ཀཐནཾ ཨིདྷ ཀཐཱསལླཱཔོ.

ཡཾ ¶ པནེཏཾ ‘‘སཡཱནོ ཝཱ ཧི བྷོ གོཏམ བྲཱཧྨཎོ སཡཱནེན བྲཱཧྨཎེན སདྡྷིཾ སལླཔིཏུམརཧཏཱི’’ཏི ཝུཏྟསྶ སལླཱཔསྶ ཨནཱཙཱརབྷཱཝཝིབྷཱཝནཾ སཏྠཱརཱ ཨམྦཊྛེན སདྡྷིཾ ཀཐེནྟེན ཀཏཾ, ཏཾ པཱལི༹ཝསེན སངྒཱིཏིམནཱརུལ༹ྷམྤི ཨགརཧིཏཱཡ ཨཱཙརིཡཔརམྤརཱཡ ཡཱཝཛྫཏནཱ སམཱབྷཏནྟི ‘‘ཡེ ཙ ཁོ ཏེ བྷོ གོཏམཱ’’ཏིཨཱདིཀཱཡ ཨུཔརིཔཱལི༹ཡཱ སམྦནྡྷབྷཱཝེན དསྶེནྟོ ‘‘ཏཏོ ཀིརཱ’’ཏིཨཱདིམཱཧ. གོརཱུཔནྟི གོ ནཱུན རཱུཔཀཝསེན ཝུཏྟཏྟཱ, རཱུཔསདྡསྶ ཙ ཏབྦྷཱཝཝུཏྟིཏོ. ཡདི ཨཧཱིལེ༹ནྟོ བྷཝེཡྻ, ‘‘མུཎྜཱ སམཎཱ’’ཏི ཝདེཡྻ, ཧཱིལེ༹ནྟོ པན གརཧཏྠེན ཀ-སདྡེན པདཾ ཝཌྜྷེཏྭཱ ‘‘མུཎྜཀཱ སམཎཀཱ’’ཏི ཝདཏཱིཏི དསྶེཏུཾ ‘‘མུཎྜེ མུཎྜཱ’’ཏིཨཱདི ཝུཏྟཾ. ཨིབྦྷཱཏི གཧཔཏིཀཱཏི ཨཏྠམཏྟཝཙནཾ, སདྡཏོ པན ཨིབྷསྶ པཡོགོ ཨིབྷོ ཨུཏྟརཔདལོཔེན, ཏཾ ཨིབྷཾ ཨརཧནྟཱིཏི ཨིབྦྷཱ དྭིཏྟཾ ཀཏྭཱ. ཀིཾ ཝུཏྟཾ ཧོཏི – ཡཐཱ སོབྷནཾ གམནཏོ ཨིབྷསངྑཱཏོ ཧཏྠིཝཱཧནབྷཱུཏོ པརསྶ ཝསེན པཝཏྟཏི, ན ཨཏྟནོ, ཨེཝམེཏེཔི བྲཱཧྨཎཱནཾ སུསྶཱུསཀཱ སུདྡཱ པརསྶ ཝསེན ¶ པཝཏྟནྟི, ན ཨཏྟནོ, ཏསྨཱ ཨིབྷསདིསཔཡོགཏཱཡ ཨིབྦྷཱཏི. ཏེ པན ཀུཊུམྦིཀཏཱཡ གྷརཝཱསིནོ གྷརསཱམིཀཱ ཧོནྟཱིཏི ཨཏྠམཏྟཾ དསྶེཏི ‘‘གཧཔཏིཀཱ’’ཏི ཨིམིནཱ.

ཀཎྷཱཏི ཀཎྷཛཱཏིཀཱ. དྭིཛཱ ཨེཝ ཧི སུདྡྷཛཱཏིཀཱ, ན ཨིཏརེཏི ཏསྶཱདྷིཔྤཱཡོ. ཏེནཱཧ ‘‘ཀཱལ༹ཀཱ’’ཏི. པིཏཱམཧབྷཱཝེན ཉཱཏིབནྡྷཝཏྟཱ བནྡྷུ. ཏེནཱཧ ‘‘པིཏཱམཧོཏི ཝོཧརནྟཱི’’ཏི. ཨཔཙྩཱཏི པུཏྟཱ. མུཁཏོ ནིཀྑནྟཱཏི བྲཱཧྨཎཱནཾ པུབྦཔུརིསཱ བྲཧྨུནོ མུཁཏོ ནིཀྑནྟཱ, ཨཡཾ ཏེསཾ པཋམུཔྤཏྟཱིཏི ཨདྷིཔྤཱཡོ. སེསཔདེསུཔི ཨེསེཝ ནཡོ. ཨཡཾ པནེཏྠ ཝིསེསོ – ‘‘ཨིབྦྷཱ ཀཎྷཱ’’ཏི ཝཏྭཱ ‘‘བནྡྷུཔཱདཱཔཙྩཱ’’ཏི ཝདནྟོ ཀུལཝསེན སམཎཱ ཝེསྶཀུལཔརིཡཱཔནྣཱ, པཋམུཔྤཏྟིཝསེན པན བྲཧྨུནོ པིཊྛིཔཱདཏོ ནིཀྑནྟཱ, ན པཀཏིཝེསྶཱ ཝིཡ ནཱབྷིཏོཏི དསྶེཏཱིཏི, ཨིདཾ པནསྶ ‘‘མུཁཏོ ནིཀྑནྟཱ’’ཏིཨཱདིཝཙནཏོཔི ཨཏིཝིཡ ཨསམཝེཀྑིཏཔུབྦཝཙནཾ ཙཏུཝཎྞཔརིཡཱཔནྣསྶེཝ སམཎབྷཱཝསམྦྷཝཏོ. ཨནིཡམེཏྭཱཏི ཨཝིསེསེཏྭཱ, ཨནུདྡེསིཀབྷཱཝེནཱཏི ཨཏྠོ.

མཱནམེཝ ནིསྶཱཡ ཀཐེསཱིཏི མཱནམེཝཱཔསྶཡཾ ཀཏྭཱ ཨཏྟཱནཾ ཨུཀྐཾསེནྟོ, པརེ ཙ ཝམྦྷེནྟོ ‘‘མུཎྜཀཱ སམཎཀཱ’’ཏིཨཱདིཝཙནཾ ཀཐེསི. ཛཱནཱཔེསྶཱམཱིཏི ཨཏྟནོ གོཏྟཔམཱཎཾ ཡཱཐཱཝཏོ ཝིབྷཱཝནེན ཝིཉྙཱཔེསྶཱམི. ཨཏྠོཏི ཧིཏཾ, ཨིཙྪིཏཝཏྠུ ཝཱ, ཏཾ པན ཀཏྟབྦཀིཙྩམེཝཱཏི ཝུཏྟཾ ‘‘ཨཱགནྟྭཱ ཀཏྟབྦཀིཙྩསངྑཱཏོ ཨཏྠོ’’ཏི, སོ ཨེཏསྶ ཨཏྠཱིཏི ཨཏྠིཀཾ ཡཐཱ ‘‘དཎྜིཀོ’’ཏི. དུཏིཡསྶཔི པུགྒལཝཱཙཀསྶ ཏདསྶཏྠིཔཙྩཡསྶ ཝིཛྫམཱནཏྟཱ པཋམེན ¶ ཏདཱརམྨཎིཀཙིཏྟམེཝ ཝིཉྙཱཡཏཱིཏི ཨཱཧ ‘‘ཏསྶ མཱཎཝསྶ ཙིཏྟ’’ནྟི. ཨཏྠིཀམསྶ ཨཏྠཱིཏི ཨཏྠིཀཝཱ ཡཐཱ ‘‘གུཎཝཱ’’ཏི.

‘‘ཡཱཡེཝ ཁོ པནཏྠཱཡཱ’’ཏི ལིངྒཝིཔལླཱསཝསེན ཝུཏྟནྟི དསྶེཏི ‘‘ཡེནེཝ ཁོ པནཏྠེནཱ’’ཏི ཨིམིནཱ. ཏེནེཝཱཧ ‘‘ཏམེཝ ཨཏྠནྟི ཨིདཾ པུརིསལིངྒཝསེནེཝ ཝུཏྟ’’ནྟི. ཏཏྠ ཧི སཱབྷཱཝིཀལིངྒཏཱདསྶནེན ཨིདྷ ཨསཱབྷཱཝིཀལིངྒཏཱསིདྡྷཱིཏི. ཨཡཾ པནེཏྠ ཨཊྛཀཐཱཏོ ཨཔརོ ནཡོ – ཡཱཡ ཨཏྠཱཡཱཏི པུལླིངྒཝསེནེཝ ཏདཏྠེ སམྤདཱནཝཙནཾ, ཡསྶ ཀཏྟབྦཀིཙྩསངྑཱཏསྶ ཨཏྠསྶ ཨཏྠཱཡཱཏི ཨཏྠོཏི. ཨསྶཱཏི ཨམྦཊྛསྶ ¶ དསྶེཏྭཱཏི སམྦནྡྷོ. ཨཉྙེསཾ སནྟིཀཾ ཨཱགཏཱནནྟི གརུཊྛཱནིཡཱནཾ སནྟིཀམུཔགཏཱནཾ སཱདྷུརཱུཔཱནཾ. ཝཏྟནྟི ཏེསཾ སམཱཙིཎྞཾ. པཀརཎཏོཡེཝ ‘‘ཨཱཙརིཡཀུལེ’’ཏི ཨཏྠོ ཝིཉྙཱཡཏི, ‘‘ཨཝུསིཏཝཱ’’ཏི ཙ ཨསིཀྑིཏབྷཱཝོཡེཝ ཝོཧཱརཝསེན ཝུཏྟོ ཡཐཱ ཏཾ ཙཱིཝརདཱནཾ ཏིཙཱིཝརེན ཨཙྪཱདེསཱིཏི. ཏེནཱཧ ‘‘ཨཱཙརིཡཀུལེ ཨཝུསིཏཝཱ ཨསིཀྑིཏོ’’ཏི. ཨསིཀྑིཏཏྟཱ ཨེཝ ཨཔྤསྶུཏོ, ‘‘ཝུསིཏམཱནཱི’’ཏི ཙ པདཱཔེཀྑཱཡ ཨཔརིཡོསིཏཝཙནཏྟཱ སམཱནོཏི པཱཋསེསོཏི དསྶེཏི ‘‘ཨཔྤསྶུཏོཝ སམཱནོ’’ཏི ཨིམིནཱ. བཱཧུསཙྩཉྷི ནཱམ ཡཱཝདེཝ ཨུཔསམཏྠཾ ཨིཙྪིཏབྦཾ, ཏདབྷཱཝཏོ པནཱཡཾ ཨམྦཊྛོ ཨཝུསིཏཝཱ ཨསིཀྑིཏོ ཨཔྤསྶུཏོཏི ཝིཉྙཱཡཏཱིཏི ཨེཝམྤི ཨཏྠཱཔཏྟིཏོ ཀཱརཎཾ ཝིབྷཱཝེནྟོ ཨཱཧ ‘‘ཀིམཉྙཏྲ ཨཝུསིཏཏྟཱ’’ཏི. ཨིམམྤི སམྦནྡྷཾ དཱིཔེཏི ‘‘ཨེཏསྶ ཧཱི’’ཏིཨཱདིནཱ. ཡཐཱརུཏཏོ པན ཕརུསཝཙནསམུདཱཙཱརེན ཨནུཔསམཀཱརཎདསྶནམེཏཾ. ཏཏྲཱཡཾ ཡོཛནཱ – ‘‘ཀིམཉྙཏྲ ཨཝུསིཏཏྟཱ’’ཏི ཨིདཾ ཀཱརཎཾ ཨེཏསྶ ཨམྦཊྛསྶ ཕརུསཝཙནསམུདཱཙཱརེ ཀཱརཎནྟི. ‘‘ཕརུསཝཙནསམུདཱཙཱརེནཱ’’ཏིཔི པཱཋོ, ཏཐཱ སམུདཱཙཱརཝསེན ཝུཏྟཾ ཀཱརཎནྟི ཨཏྠོ. ཨེཝམྤི ཡོཛེནྟི – ཨཝུསིཏཏྟཱ ཨཝུསིཏབྷཱཝཾ ཨཉྙཏྲ ཋཔེཏྭཱ ཨེཏསྶ ཨེཝཾ ཕརུསཝཙནསམུདཱཙཱརེ ཀཱརཎཾ ཀིམཉྙཾ ཨཏྠཱིཏི. པུརིམཡོཛནཱཝེཏྠ ཡུཏྟཏརཱ ཡཐཱཔཱཋཾ ཡོཛེཏབྦཏོ. ‘‘ཨཉྙཏྲཱ’’ཏི ནིཔཱཏཡོགཏོ ཨཝུསིཏཏྟཱཏི ཨུཔཡོགཏྠེ ནིསྶཀྐཝཙནཾ. ཏདེཝ ཀཱརཎཾ སམཏྠེཏི ‘‘ཨཱཙརིཡཀུལེ’’ཏིཨཱདིནཱ.

༢༦༤. ཀོདྷསངྑཱཏསྶ པརསྶ ཝསཱནུགཏཙིཏྟཏཱཡ ཨསཀམནོ. མཱནནིམྨདནཏྠནྟི མཱནསྶ ནིམྨདནཏྠཾ ཨབྷིམདྡནཏྠཾ, ཨམདནཏྠཾ ཝཱ, མཱནམདཝིརཧཏྠནྟི ཨཏྠོ. དོསཾ ཨུགྒིལེཏྭཱཏི སིནེཧཔཱནེན ཀིལིནྣཾ ཝཱཏཔིཏྟསེམྷདོསཾ ཨུབྦམནཾ ཀཏྭཱ. གོཏྟེན གོཏྟནྟི ཨམྦཊྛེནེཝ བྷགཝཏཱ པུཊྛེན ཝུཏྟེན སཱཝཛྫེན པུརཱཏནགོཏྟེན ཨདྷུནཱ ཨནཝཛྫསཉྙིཏཾ གོཏྟཾ. ཀུལཱཔདེསེན ཀུལཱཔདེསནྟི ཨེཏྠཱཔི ཨེསེཝ ནཡོ. ཨུཊྛཱཔེཏྭཱཏི སཱཝཛྫཏོ ཨུཊྛཧནཾ ཀཏྭཱ, ཨུདྡྷརིཏྭཱཏི ཝུཏྟཾ ཧོཏི. གོཏྟཉྩེཏྠ ཨཱདིཔུརིསཝསེན, ཀུལཱཔདེསོ པན ཏདནྭཡེ ཨུཔྤནྣཱབྷིཉྙཱཏཔུརིསཝསེན ¶ གཧེཏབྦོ ཡཐཱ ‘‘ཨཱདིཙྩོ མཱགྷཝོ’’ཏི. སཱཀིཡཱནཉྷི ཨཱདིཙྩགོཏྟཾ ཨདིཏིཡཱ ནཱམ དེཝདྷཱིཏཱཡ པུཏྟབྷཱུཏཾ ཨཱདིཔུརིསཾ ¶ པཏི ཧོཏི, ཏཾ ‘‘གོཏམགོཏྟ’’ནྟིཔི ཝདནྟི. ཡཐཱཧ པབྦཛྫཱསུཏྟེ –

‘‘ཨཱདིཙྩཱ ནཱམ གོཏྟེན, སཱཀིཡཱ ནཱམ ཛཱཏིཡཱ;

ཏམྷཱ ཀུལཱ པབྦཛིཏོམྷི, ན ཀཱམེ ཨབྷིཔཏྠཡ’’ནྟི. (སུ. ནི. ༤༢༥);

མཱགྷཝཀུལཾ པན ཏདནྭཡེ ཨབྷིཉྙཱཏཾ མཙལགཱམིཀཔུརིསཾ པཏི ཧོཏཱིཏི. གོཏྟམཱུལསྶ གཱརཡ྄ཧཏཱཡ ཨམཱནཝཏྠུབྷཱཝཔཝེདནཏོ ‘‘མཱནདྡྷཛཾ མཱུལེ ཚེཏྭཱ ནིཔཱཏེསྶཱམཱི’’ཏི ཝུཏྟཾ. གྷཊྚེནྟོཏི ཛཱཏིགོཏྟཝསེན ཨོམསནྟོ. ཧཱིལེ༹ནྟོཏི ཧཱིལ༹ནཾ གརཧཾ ཀརོནྟོ. ‘‘ཙཎྜཱ བྷོ གོཏམ སཀྱཛཱཏཱི’’ཏིཨཱདིནཱ སཱཀིཡེསུ ཙཎྜབྷཱཝཱདིདོསཾ པཱཔིཏེསུ སམཎོཔི གོཏམོ པཱཔིཏོ བྷཝིསྶཏཱིཏི ཨདྷིཔྤཱཡོ.

ཡསྨིཾ མཱནུསྶཡཀོདྷུསྶཡཱ ཨཉྙམཉྙཱུཔཏྠདྡྷཱ, སོ ‘‘ཙཎྜོ’’ཏི ཝུཙྩཏཱིཏི དསྶེཏི ‘‘མཱནནིསྶིཏཀོདྷཡུཏྟཱ’’ཏི ཨིམིནཱ, པཀཏཱུཔནིསྶཡཱརམྨཎཝསེན ཙེཏྠ ནིསྶིཏབྷཱཝོ, ན སཧཛཱཏཱདིཝསེན. ཁརཱཏི ཙིཏྟེན, ཝཱཙཱཡ ཙ ཀཀྑལཱ༹. ལཧུཀཱཏི ཏརུཎཱ ཨཝུདྡྷཀམྨཱ. ཏེནཱཧ ‘‘ཨཔྤཀེནེཝཱ’’ཏིཨཱདི. ཨལཱབུཀཊཱཧནྟི ལཱབུཕལསྶ ཨབྷེཛྫཀཔཱལཾ. ཨཊྛཀཐཱམུཏྟཀནཡཾ དསྶེཏུཾ ‘‘བྷསྶཱཏི སཱཧསིཀཱཏི ཀེཙི ཝདནྟི, སཱརམྦྷཀཱཏི ཨཔརེ’’ཏི (དཱི. ནི. ཊཱི. ༡.༢༦༤) ཨཱཙརིཡེན ཝུཏྟཾ. སམཱནཱཏི ཧོནྟཱ བྷཝམཱནཱཏི ཨསསདྡཝསེནཏྠོཏི ཨཱཧ ‘‘སནྟཱཏི པུརིམཔདསྶེཝ ཝེཝཙན’’ནྟི. ན སཀྐརོནྟཱིཏི སཀྐཱརཾ ན ཀརོནྟཱིཏི ཨཏྠམེཝ ཝིཉྙཱཔེཏི ‘‘ན བྲཱཧྨཎཱན’’ནྟིཨཱདིནཱ. ཨཔཙིཏིཀམྨནྟི པཎིཔཱཏཀམྨཾ. ‘‘ཡདིམེ སཀྱཱ’’ཏི པཙྪིམཝཱཀྱེ ཡ-སདྡསྶ ཀིརིཡཱཔརཱམསནསྶ ཨནིཡམསྶ ‘‘ཏཡིདཾ བྷོ གོཏམཱ’’ཏི པུརིམཝཱཀྱེ ཏ-སདྡེན ནིཡམནཾ ཝེདིཏབྦནྟི ཨཱཧ ‘‘ཡཾ ཨིམེ སཀྱཱ’’ཏིཨཱདི. ནཱནུལོམནྟི ཨཏྟནོ ཛཱཏིཡཱ ན ཨནུཙྪཝིཀཾ.

དུཏིཡཨིབྦྷཝཱདཝཎྞནཱ

༢༦༥. སནྡྷཱགཱརཔདནིབྦཙནཾ ཧེཊྛཱ ཝུཏྟམེཝ. ཏདཱ ཨབྷིསིཏྟསཀྱརཱཛཱུནམྤི བཧུཏཾ སནྡྷཱཡཱཧ ‘‘ཨབྷིསིཏྟསཀྱརཱཛཱནོ’’ཏི. ཀཱམཉྷི སཀྱརཱཛཀུལེ ཡོ སབྦེསཾ ཝུདྡྷཏརོ, སམཏྠོ ཙ, སོ ཨེཝ ཨབྷིསེཀཾ ལབྷཏི ¶ . ཨེཀཙྩོ པན ཨབྷིསིཏྟོ སམཱནོ ‘‘ཨིདཾ རཛྫཾ ནཱམ བཧུཀིཙྩཾ ¶ བཧུབྱཱཔཱར’’ནྟི ཏཏོ ནིབྦིཛྫ རཛྫཾ ཝཡསཱ ཨནནྟརསྶ ནིཡྻཱཏེཏི, ཀདཱཙི སོཔི ཨཉྙསྶཱཏི ཨེཝཾ པརམྤརཱནིཡྻཱཏནཝསེན ཏདཱ བཧཱུ ཨབྷིསིཏྟཔུབྦཱ སཀྱརཱཛཱནོ ཧོནྟཱིཏི ཨིདཾ ཨཱཙརིཡསྶཱབྷིམཏཾ (དཱི. ནི. ཊཱི. ༡.༢༦༥). ཨཔིཙ ཡཐཱརཧཾ ཋཱནནྟརེསུ ཨབྷིསིཏྟསཀྱརཱཛཱུནམྤི བཧུཏཾ སནྡྷཱཡ ཨེཝམཱཧཱཏིཔི ཡུཛྫཏི. ཏེ ཧི ‘‘རཱཛཱནོ’’ཏི ཝུཙྩནྟི. ཡཐཱཧ –

‘‘རཱཛཱནོ ནཱམ པཐབྱཱརཱཛཱ, པདེསརཱཛཱ, མཎྜལིཀཱ, ཨནྟརབྷོགིཀཱ, ཨཀྑདསྶཱ, མཧཱམཏྟཱ, ཡེ ཝཱ པན ཚེཛྫབྷེཛྫཾ ཀརོནྟཱ ཨནུསཱསནྟི, ཨེཏེ རཱཛཱནོ ནཱམཱ’’ཏི (པཱརཱ. ༩༢).

སཾཧཱརིམེཧི ཝཱལ༹རཱུཔེཧི ཀཏོ པལླངྐོ, བྷདྡཔཱིཋཾ ཝེཏྟཱསནཾ. མིཧིཏམཏྟཾ ཧསིཏམཏྟཾ. ཨནུཧསནྟཱིཏི མམུདྡེསིཀཾ མཧཱཧསིཏཾ ཀརོནྟི, ཨིདཉྷི ‘‘ཨནུཛགྒྷནྟཱ’’ཏི ཨེཏསྶ སཾཝཎྞནཱཔདཾ. ཛགྒྷསདྡོ ཙ མཧཱཧསནེ པཝཏྟཏི ‘‘ན ཨུཛྫགྒྷིཀཱཡ ཨནྟརགྷརེ གམིསྶཱམཱི’’ཏིཨཱདཱིསུ (པཱཙི. ༥༨༦) ཝིཡ.

ཀཎྷཱཡནཏོ པཊྛཱཡ པརམྤརཱགཏཾ ཀུལཝཾསཾ ཨནུསྶཝཝསེན ཛཱནནྟི. ཀུལཱབྷིམཱནིནོ ཧི ཡེབྷུཡྻེན པརེསཾ ཨུཙྩཱཝཙཾ ཀུལཾ ཏཐཱ ཏཐཱ ཨུདཱཧརནྟི, ཨཏྟནོ ཙ ཀུལཝཾསཾ ཛཱནནྟི, ཨེཝཾ ཨམྦཊྛོཔི, ཏཐཱ ཧེས པརཏོ བྷགཝཏཱ པུཙྪིཏོ ཝཛིརཔཱཎི བྷཡེན ཨཏྟནོ ཀུལཝཾསཾ ཡཱཐཱཝཏོ ཀཐེསཱིཏི. ཨོལམྦེཏྭཱཏི ཧཏྠིསོཎྜསཎྛཱནཱདིནཱ སཱཊཀཾ ཨཝལམྦེཏྭཱ. ཏཏོཏི ཏཐཱཛཱནནཏོ, གམནཏོ ཙ. མམཉྙེཝ མཉྙེཏི མམམེཝ ཨནུཛགྒྷནྟཱ མཉྙེ.

ཏཏིཡཨིབྦྷཝཱདཝཎྞནཱ

༢༦༦. ཁེཏྟལེཌྜཱུནནྟི ཁེཏྟེ ཀསནཝསེན ཨུཊྛཱཔིཏམཏྟིཀཱཁཎྜཱནཾ. ལེཌྜུཀཱནམནྟརེ ནིཝཱསིཏཏྟཱ ‘‘ལེཌྜུཀིཀཱ’’ ཨིཙྩེཝ (དཱི. ནི. ཊཱི. ༡.༢༦༦) སཉྙཱཏཱ ཁུདྡཀསཀུཎིཀཱ. མཛ྄ཛྷིམཔཎྞཱསཀེ ལེཌྜུཀིཀོཔམསུཏྟཝཎྞནཱཡཾ ‘‘ཙཱཏཀསཀུཎིཀཱ’’ཏི (མ. ནི. ཨཊྛ. ༣.༡༥༠) ཝུཏྟཱ, ནིགྷཎྚུསཏྠེསུ པན ཏཾ ‘‘ལཱཔསཀུཎིཀཱ’’ཏི ཝདནྟི. ཀོདྷཝསེན ལགྒིཏུནྟི ཨུཔནཡ྄ཧིཏུཾ, ཨཱགྷཱཏཾ བནྡྷིཏུནྟི ཨཏྠོ.

‘‘ཨམྷེ ¶ ཧཾསཀོཉྩམོརསམེ ཀརོཏཱི’’ཏི ཝདནྟོ ཧེཊྛཱ གཧིཏཾ ‘‘ན ཏཾ ཀོཙི ཧཾསོ ཝཱ ཀོཉྩོ ¶ ཝཱ མོརོ ཝཱ ཨཱགནྟྭཱ ཀིཾ ཏྭཾ ལཔསཱིཏི ནིསེདྷེཏཱི’’ཏི ཨིདམྤི ཝཙནཾ སངྒཱིཏིམནཱརུལ༹ྷཾ ཏདཱ བྷགཝཏཱ ཝུཏྟམེཝཱཏི དསྶེཏི. ཏདཱ ཝདནྟོཡེཝ ཧི ཨེཝཾ ཀརོཏཱིཏི ཝཏྟུམརཧཏི. ‘‘ཨེཝཾ ནུ ཏེ’’ཏིཨཱདིཝཙནཾ, ‘‘ཨཝུསིཏཝཱཡེཝཱ’’ཏིཨཱདིཝཙནཉྩ མཱནཝསེན སམཎེན གོཏམེན ཝུཏྟནྟི ཨམྦཊྛོ མཉྙཏཱིཏི ཨདྷིཔྤཱཡེནཱཧ ‘‘ནིམྨཱནོ དཱནི ཛཱཏོཏི མཉྙམཱནོ’’ཏི.

དཱསིཔུཏྟཝཱདཝཎྞནཱ

༢༦༧. ནིམྨཱདེཏཱིཏི ཨ-ཀཱརསྶ ཨཱ-ཀཱརཾ ཀཏྭཱ ནིདྡེསོ ཨུམྨཱདེ མདསདྡེན ནིཔྥནྣཏྟཱཏི དསྶེཏི ‘‘ནིམྨདེཏཱི’’ཏི ཨིམིནཱ. ནིམྨཱནེཏི ཝིགཏམཱནེ. ཡདི པནཱཧཾ གོཏྟཾ པུཙྪེཡྻཾ སཱདྷུ ཝཏཱཏི ཨཏྠོ. པཱཀཊཾ ཀཱཏུཀམྱཏཱཡ ཏིཀྑཏྟུཾ མཧཱསདྡེན ཨཝོཙ. ཀསྨཱ ཨཝོཙཱཏི པན ཨསུདྡྷབྷཱཝཾ ཛཱནནྟསྶཱཔི ཏཐཱཝཙནེ ཀཱརཎཔུཙྪཱ. གོཏྟབྷཱུཏཾ ནཱམམེཝ ཨདྷིཔྤེཏཾ, ན ཝིསུཾ གོཏྟནྟི ཨཱཧ ‘‘མཱཏཱཔེཏྟིཀནྟི མཱཏཱཔིཏཱུནཾ སནྟཀ’’ནྟི. གོཏྟཉྷི པིཏིཏོ ལདྡྷབྦཾ པེཏྟིཀམེཝ, ན མཱཏཱཔེཏྟིཀཾ. ན ཧི བྲཱཧྨཎཱནཾ སགོཏྟཱཡ ཨེཝ ཨཱཝཱཧཝིཝཱཧོ ཨིཙྪིཏོ, གོཏྟནཱམཾ པན ཛཱཏིསིདྡྷཾ, ན ཀིཏྟིམཾ, ན གུཎནཱམཾ ཝཱ, ཛཱཏི ཙ ཨུབྷཡསམྦནྡྷིནཱིཏི མཱཏཱཔེཏྟིཀམེཝ, ན པེཏྟིཀམཏྟཾ. ནཱམགོཏྟནྟི གོཏྟབྷཱུཏཾ ནཱམཾ, ན ཀིཏྟིམཾ, ན གུཎནཱམཾ ཝཱ ཝིསེསནཔརནིཔཱཏཝསེན ཝུཏྟཏྟཱ ཡཐཱ ‘‘ཨགྱཱཧིཏོ’’ཏི. ནཱམཉྩ ཏདེཝ པཝེཎཱིཝསེན པཝཏྟཏྟཱ གོཏྟཉྩཱཏི ཧི ནཱམགོཏྟཾ. ཏཏྠ ཡཱ ‘‘ཀཎྷཱཡནོ’’ཏི ནཱམཔཎྞཏྟི ནིརུལ༹ྷཱ, ཏཾ སནྡྷཱཡཱཧ ‘‘པཎྞཏྟིཝསེན ནཱམ’’ནྟི. ཏཾ པནེཏཾ ནཱམཾ ཀཎྷཨིསིཏོ པཊྛཱཡ ཏསྨིཾ ཀུལཔརམྤརཱཝསེན ཨཱགཏཾ, ན ཨེཏསྨིཾཡེཝ ནིརུལ༹ྷནྟི ཝུཏྟཾ ‘‘པཝེཎཱིཝསེན གོཏྟ’’ནྟི. གོཏྟཔདསྶ ཝཙནཏྠོ ཧེཊྛཱ ཝུཏྟོཡེཝ.

‘‘ཨནུསྶརཏོ’’ཏི ཨེཏྠ ན ཀེཝལཾ ཨནུསྶརཎམཏྟཾ ཨདྷིཔྤེཏཾ, ཨཐ ཁོ ཀུལསུདྡྷིཝཱིམཾསནཝསེནེཝཱཏི ཨཱཧ ‘‘ཀུལཀོཊིཾ སོདྷེནྟསྶཱ’’ཏི, ཀུལགྒཾ ཝིསོདྷེནྟསྶཱཏི ཨཏྠོ. ‘‘ཨཡྻཔུཏྟཱ’’ཏི ཨེཏྠ ཨཡྻསདྡོ ཨཡྻིརཀེཏི ཝུཏྟཾ ‘‘སཱམིནོ པུཏྟཱ’’ཏི. ཙཏཱུསུ དཱསཱིསུ ¶ དིསཱ ཨོཀྐཱཀརཉྙོ ཨནྟོཛཱཏདཱསཱི. ཏེནཱཧ ‘‘གྷརདཱསིཡཱ པུཏྟོ’’ཏི. ཨེཏྠ ཙ ཡསྨཱ ཨམྦཊྛོ ཛཱཏིཾ ནིསྶཱཡ མཱནཐདྡྷོ, ན ཙ ཏསྶ ཡཱཐཱཝཏོ ཛཱཏིཡཱ ཨཝིབྷཱཝིཏཱཡ མཱནནིགྒཧོ ཀརཱིཡཏི, ཨཀཏེ ཙ མཱནནིགྒཧེ མཱནཝསེན རཏནཏྟཡཾ ཨཔརཛ྄ཛྷིསྶཏི, ཀཏེ པན མཱནནིགྒཧེ ཨཔརབྷཱགེ རཏནཏྟཡེ པསཱིདིསྶཏི, ན ཙེདིསཱི ཝཱཙཱ ཕརུསཝཱཙཱ ནཱམ ཧོཏི ཙིཏྟསྶ སཎྷབྷཱཝཏོ. མཛ྄ཛྷིམཔཎྞཱསཀེ ཨབྷཡསུཏྟཉྩ (མ. ནི. ༢.༨༣) ཨེཏྠ ནིདསྶནཾ ¶ . ཀེཙི ཙ ཛནཱ ཀཀྑལཱ༹ཡ ཝཱཙཱཡ ཝུཏྟཱ ཨགྒིནཱ ཝིཡ ལོཧཱདཡོ མུདུབྷཱཝཾ གཙྪནྟི, ཏསྨཱ བྷགཝཱ ཨམྦཊྛཾ ནིབྦིསེཝནཾ ཀཏྟུཀཱམོ ‘‘ཨཡྻཔུཏྟཱ སཀྱཱ བྷཝནྟི, དཱསིཔུཏྟོ ཏྭམསི སཀྱཱན’’ནྟི ཨཝོཙ.

‘‘ཨིདྷེཀཙྩོ པཱཔབྷིཀྑུ ཏཐཱགཏཔྤཝེདིཏཾ དྷམྨཝིནཡཾ པརིཡཱཔུཎིཏྭཱ ཨཏྟནོ དཧཏཱི’’ཏིཨཱདཱིསུ (པཱརཱ. ༡༩༥) ཝིཡ དཧསདྡོ དྷཱརཎཏྠོ, དྷཱརཎཉྩེཏྠ པུབྦཔུརིསཝསེན སཉྙཱཔནནྟི ཨཱཧ ‘‘ཨོཀྐཱཀོ ནོ པུབྦཔུརིསོ’’ཏིཨཱདི. དཧསདྡཉྷི བྷསྨཱིཀརཎེ, དྷཱརཎེ ཙ ཨིཙྪནྟི སདྡཝིདཱུ. པབྷཱ ནིཙྪརཏཱིཏི པབྷསྶརཾ ཧུཏྭཱ ནིཀྑམཏི ཏཐཱརཱུཔེན པུཉྙཀམྨེན དནྟཱནཾ པབྷསྶརབྷཱཝཏོ.

ཏེཏི ཛེཊྛཀུམཱརེ. པཋམཀཔྤིཀཱནནྟི པཋམཀཔྤསྶ ཨཱདིཀཱལེ ནིབྦཏྟཱནཾ. ཀིརསདྡེན ཙེཏྠ ཨནུསྶཝཏྠེན, ཡོ ཝུཙྩམཱནཱཡ རཱཛཔརམྤརཱཡ ཀེསཉྩི མཏིབྷེདོ, ཏཾ ཨུལླིངྒེཏི. ཨནུསྶཝཝཙནེནེཝ ཧི ཨནནུསྶུཏོ ཨུཏྟརཝིཧཱརཝཱསིཨཱདཱིནཾ མཏིབྷེདོ ནིརཱཀརཱིཡཏཱིཏི. མཧཱསམྨཏསྶཱཏི ཨགྒཉྙསུཏྟེ ཝཀྑམཱནནཡེན ‘‘ཨཡཾ ནོ རཱཛཱ’’ཏི མཧཱཛནེན སམྨནྣིཏྭཱ ཋཔིཏཏྟཱ ‘‘མཧཱསམྨཏོ’’ཏི ཨེཝཾ སམྨཏསྶ. ཡཾ སནྡྷཱཡ ཝདནྟི –

‘‘ཨཱདིཙྩཀུལསམྦྷཱུཏོ, སུཝིསུདྡྷགུཎཱཀརོ;

མཧཱནུབྷཱཝོ རཱཛཱསི, མཧཱསམྨཏནཱམཀོ.

ཡོ ཙཀྑུབྷཱུཏོ ལོཀསྶ, གུཎརཾསིསམུཛྫལོ;

ཏམོནུདོ ཝིརོཙིཏྠ, དུཏིཡོ ཝིཡ བྷཱཎུམཱ.

ཋཔིཏཱ ¶ ཡེན མརིཡཱདཱ, ལོཀེ ལོཀཧིཏེསིནཱ;

ཝཝཏྠིཏཱ སཀྐུཎནྟི, ན ཝིལངྒྷཡིཏུ ཛནཱ.

ཡསསྶིནཾ ཏེཛསྶིནཾ, ལོཀསཱིམཱནུརཀྑཀཾ;

ཨཱདིབྷཱུཏཾ མཧཱཝཱིརཾ, ཀཐཡནྟི ‘མནཱུ’ཏི ཡ’’ནྟི. (དཱི. ནི. ཊཱི. ༡.༢༦༧);

ཏསྶ ཙ པུཏྟཔཔུཏྟཔརམྤརཾ སནྡྷཱཡ ཨེཝཾ ཝདནྟི –

‘‘ཏསྶ ¶ པུཏྟོ མཧཱཏེཛོ, རོཛོ ནཱམ མཧཱིཔཏི;

ཏསྶ པུཏྟོ ཝརརོཛོ, པཝརོ རཱཛམཎྜལེ.

ཏསྶཱསི ཀལྱཱཎགུཎོ, ཀལྱཱཎོ ནཱམ ཨཏྲཛོ;

རཱཛཱ ཏསྶཱསི ཏནཡོ, ཝརཀལྱཱཎནཱམཀོ.

ཏསྶ པུཏྟོ མཧཱཝཱིརོ, མནྡྷཱཏཱ ཀཱམབྷོགིནཾ;

ཨགྒབྷཱུཏོ མཧིནྡེན, ཨཌྜྷརཛྫེན པཱུཛིཏོ.

ཏསྶ སཱུནུ མཧཱཏེཛོ, ཝརམནྡྷཱཏུནཱམཀོ;

‘ཨུཔོསཐོ’ཏི ནཱམེན, ཏསྶ པུཏྟོ མཧཱཡསོ.

ཝརོ ནཱམ མཧཱཏེཛོ, ཏསྶ པུཏྟོ མཧཱཝརོ;

ཏསྶཱསི ཨུཔཝརོཏི, པུཏྟོ རཱཛཱ མཧཱབལོ.

ཏསྶ པུཏྟོ མགྷདེཝོ, དེཝཏུལྱོ མཧཱིཔཏི;

ཙཏུརཱསཱིཏི སཧསྶཱནི, ཏསྶ པུཏྟཔརམྤརཱ.

ཏེསཾ པཙྪིམཀོ རཱཛཱ, ‘ཨོཀྐཱཀོ’ཨིཏི ཝིསྶུཏོ;

མཧཱཡསོ མཧཱཏེཛོ, ཨཁུདྡོ རཱཛམཎྜལེ’’ཏི. (དཱི. ནི. ཊཱི. ༡.༢༦༧);

ཨིདཾ ཨཊྛཀཐཱནུཔརོདྷཝཙནཾ. ཡཾ པན དཱིཔཝཾསེ ཝུཏྟཾ –

‘‘པཋམཱབྷིསིཏྟོ རཱཛཱ, བྷཱུམིཔཱལོ ཛུཏིནྡྷརོ;

མཧཱསམྨཏོ ནཱམེན, རཛྫཾ ཀཱརེསི ཁཏྟིཡོ.

ཏསྶ པུཏྟོ རོཛོ ནཱམ, ཝརརོཛོ ཙ ཁཏྟིཡོ;

ཀལྱཱཎོ ཝརཀལྱཱཎོ, ཨུཔོསཐོ མཧིསྶརོ.

མནྡྷཱཏཱ ¶ སཏྟམོ ཏེསཾ, ཙཏུདཱིཔམྷི ཨིསྶརོ;

ཝརོ ¶ ཨུཔཝརོ རཱཛཱ, ཙེཏིཡོ ཙ མཧིསྶརོ’’ཏིཨཱདི.

ཡཉྩ མཧཱཝཾསཱདཱིསུ ཝུཏྟཾ –

‘‘མཧཱསམྨཏརཱཛསྶ, ཝཾསཛོ ཧི མཧཱམུནི;

ཀཔྤཱདིསྨིཾ རཱཛཱསི, མཧཱསམྨཏནཱམཀོ.

རོཛོ ཙ ཝརརོཛོ ཙ, ཏཐཱ ཀལྱཱཎཀཱ དུཝེ;

ཨུཔོསཐོ ཙ མནྡྷཱཏཱ, ཝརཀོ པཝརཱ དུཝེ’’ཏིཨཱདི.

སབྦམེཏཾ ཡེབྷུཡྻཏོ ཨཊྛཀཐཱཝིརོདྷཝཙནཾ. ཨཊྛཀཐཱཡཉྷི མནྡྷཱཏུརཱཛཱ ཚཊྛོ ཝུཏྟོ, མགྷདེཝརཱཛཱ ཨེཀཱདསམོ, ཏསྶ ཙ པུཏྟཔརམྤརཱཡ ཙཏུརཱསཱིཏིསཧསྶརཱཛཱུནཾ པཙྪིམཀོ ཨོཀྐཱཀརཱཛཱ, ཏེསུ པན མནྡྷཱཏུརཱཛཱ སཏྟམོ ཝུཏྟོ, མགྷདེཝརཱཛཱ ཨནེཀེསཾ རཱཛསཧསྶཱནཾ པཙྪིམཀོ, ཏསྶ ཙ པུཏྟཔརམྤརཱཡ ཨནེཀརཱཛསཧསྶཱནཾ པཙྪིམཀོ ཨོཀྐཱཀརཱཛཱཏི ཨེཝམཱདིནཱ ཨནེཀདྷཱ ཝིརོདྷཝཙནཾ ཨཊྛཀཐཱཡཾ ནིརཱཀརོཏི. ནནུ ཨཝོཙུམྷ ‘‘ཀིརསདྡེན ཙེཏྠ ཨནུསྶཝཏྠེན, ཡོ ཝུཙྩམཱནཱཡ རཱཛཔརམྤརཱཡ ཀེསཉྩི མཏིབྷེདོ, ཏཾ ཨུལླིངྒེཏཱི’’ཏི. ཏེསཾ པཙྪཏོཏི མགྷདེཝཔརམྤརཱབྷཱུཏཱནཾ ཀལཱ༹རཛནཀཔརིཡོསཱནཱནཾ ཙཏུརཱསཱིཏིཁཏྟིཡསཧསྶཱནཾ ཨཔརབྷཱགེཏི ཡཐཱནུསྶུཏཾ ཨཱཙརིཡེན ཝུཏྟཾ. དཱིཔཝཾསཱདཱིསུ པན ‘‘ཀལཱ༹རཛནཀརཉྙོ པུཏྟཔརམྤརཱཡ ཨནེཀཁཏྟིཡསཧསྶཱནཾ པཙྪིམཀོ རཱཛཱ སུཛཱཏོ ནཱམ, ཏསྶ པུཏྟོ ཨོཀྐཱཀོ རཱཛཱ’’ཏི ཝུཏྟཾ. མགྷདེཝཔརམྤརཱཡ ཨནེཀསཧསྶརཱཛཱུནཾ ཨཔརབྷཱགེ པཋམོ ཨོཀྐཱཀོ ནཱམ རཱཛཱ ཨཧོསི, ཏསྶ པརམྤརཱབྷཱུཏཱནཾ པན ཨནེཀསཧསྶརཱཛཱུནཾ ཨཔརབྷཱགེ དུཏིཡོ ཨོཀྐཱཀོ ནཱམ རཱཛཱ ཨཧོསི, ཏསྶཔི པརམྤརཱཡ ཨནེཀསཧསྶརཱཛཱུནཾ ཨཔརབྷཱགེ ཏཏིཡོ ཨོཀྐཱཀོ ནཱམ རཱཛཱ ཨཧོསི. ཏཾ སནྡྷཱཡཱཧ ‘‘ཏཡོ ཨོཀྐཱཀཝཾསཱ ཨཧེསུ’’ནྟིཨཱདི.

ཛཱཏིཡཱ པཉྩམདིཝསེ ནཱམཀམྨཱདིམངྒལཾ ལོཀཱཙིཎྞནྟི ཝུཏྟཾ ‘‘པཉྩམདིཝསེ ཨལངྐརིཏྭཱ’’ཏི. སཧསཱ ཝརཾ ཨདཱསིནྟི པུཏྟདསྶནེན བལཝསོམནསྶཔྤཏྟོ ¶ ཏུརིཏཾ ཨཝཱིམཾསིཏྭཱ ཏུཊྛིདཱཡཝསེན ཝརཾ ཨདཱསིཾ ‘‘ཡཾ ཨིཙྪསི, ཏཾ གཎྷཱཧཱི’’ཏི. སཱཏི ཛནྟུཀུམཱརམཱཏཱ. རཛྫཾ པརིཎཱམེཏུཾ ཨིཙྪཏཱིཏི མམ ཝརདཱནཾ ཨནྟརཾ ཀཏྭཱ ཨིམཾ རཛྫཾ པརིཎཱམེཏུཾ ཨིཙྪཏི.

རཛྫཾ ¶ ཀཱརེསྶནྟཱིཏི རཱཛབྷཱཝཾ མཧཱཛནེན མཧཱཛནཾ ཝཱ ཀཱརཱཔེསྶནྟི. ནཔྤསཧེཡྻཱཏི ནིཝཱསཏྠཱཡ པརིཡཏྟོ ན བྷཝེཡྻ.

ཀལཱ༹རཝཎྞཏཱཡ ཀཔིལབྲཱཧྨཎོ ནཱམ ཨཧོསི. ནིཀྑམྨཱཏི གྷརཱཝཱསཏོ ཀཱམེཧི ཙ ནིཀྑམིཏྭཱ. སཱཀོ ནཱམ སབྦསཱརམཡོ རུཀྑཝིསེསོ, ཡེན པཱསཱདཱདི ཀརཱིཡཏེ, ཏཾསམུདཱཡབྷཱུཏེ ཝནསཎྜེཏི ཨཏྠོ. བྷཱུམིཡཱ པཝཏྟཾ བྷུམྨཾ, ཏཾ གུཎདོསཾ ཛཱལེཏི ཛོཏེཏི, ཏཾ ཝཱ ཛལཏི ཛོཏཏི པཱཀཊཾ བྷཝཏི ཨེཏཱཡཱཏི བྷུམྨཛཱལཱ. ཧེཊྛཱ ཙཱཏི ཨེཏྠ ཙ-སདྡེན ‘‘ཨསཱིཏིཧཏྠེ’’ཏི ཨིདམནུཀཌྜྷཏི. ཨེཏསྨིཾ པདེསེཏི སཱཀཝནསཎྜམཱཧ. ཁནྡྷཔནྟིཝསེན དཀྑིཎཱཝཊྚཱ. སཱཁཱཔནྟིཝསེན པཱཙཱིནཱབྷིམུཁཱ. ཏེཧཱིཏི མིགསཱུཀརེཧི, མཎྜཱུཀམཱུསིཀེཧི ཙ. ཏེཏི སཱིཧབྱགྒྷཱདཡོ སཔྤབིལཱ༹རཱ ཙ.

ཨེཏྠཱཏི ཨེཝཾ མཱཔིཡམཱནེ ནགརེ. ཏུམྷཱཀཾ པུརིསེསུ པརིཡཱཔནྣཾ ཨེཀེཀམྤི པུརིསཾ པཙྩཏྠིཀབྷཱུཏཾ ཨཉྙཾ པུརིསསཏམྤི པུརིསསཧསྶམྤི ཨབྷིབྷཝིཏུཾ ན སཀྑིསྶཏཱིཏི ཡོཛནཱ. ཙཀྐཝཏྟིབལེནཱཏི ཙཀྐཝཏྟིབལབྷཱཝེན. ཨཏིསེཡྻོཏི ཨཏིཝིཡ ཨུཏྟམོ བྷཝེཡྻ. ཀཔིལསྶ ཨིསིནོ ཝསནཊྛཱནཏྟཱ ཀཔིལཝཏྠུ.

ནེསཾ སནྟིཀེ བྷཝེཡྻཱཏི སམྦནྡྷོ. ཨསདིསསཾཡོགེཏི ཛཱཏིཡཱ ཨསདིསཱནཾ གྷརཱཝཱསཔཡོགེ ཧེཏུབྷཱུཏེ. ཨཝསེསཱཧི ཨཏྟནོ ཨཏྟནོ ཀཎིཊྛཱཧི.

ཝཌྜྷམཱནཱནནྟི ཨནཱདརེ སཱམིཝཙནཾ, ཨནནྟརཱཡིཀཱཡ པུཏྟདྷཱིཏུཝཌྜྷནཱཡ ཝཌྜྷམཱནེསུ ཨེཝ ཨུདཔཱདཱིཏི ཨཏྠོ. ལོཧིཏཀཏཱཡ ཀོཝིལཱ༹རཔུཔྥསདིསཱནི. ཀུཊྛརོགོ ནཱམ སཱསམསཱུརཱིརོགཱ ཝིཡ ཡེབྷུཡྻེན སངྐམནསབྷཱཝོཏི ཝུཏྟཾ ‘‘ཨཡཾ རོགོ སངྐམཏཱི’’ཏི. ཨུཔརི པདརེན པཊིཙྪཱདེཏྭཱ པཾསུཾ རཱསིཀརཎེན དཏྭཱ. ནཱཊཀིཏྠིཡོ ¶ ནཱམ ནཙྩནྟིཡོ. རཱཛབྷརིཡཱཡོ ཨོརོདྷཱ ནཱམ. ཏསྶཱཏི སུསིརསྶ. མིགསཀུཎཱདཱིནནྟི ཨེཏྠ ཨཱདིསདྡེན ཝནཙརཀཔེཏཱདིཀེ སངྒཎྷཱཏི.

ཏསྨིཾ རཱམརཉྙེ ནིསིནྣེཏི སམྦནྡྷོ. པདརེཏི དཱརུཕལཀེ. ཁཏྟིཡམཱཡཱརོཙནེན ཨཏྟནོ ཁཏྟིཡབྷཱཝཾ ཛཱནཱཔེཏྭཱ.

མཱཏིཀནྟི མཱཏིཏོ ཨཱགཏཾ. པཱབྷཏནྟི མཱུལབྷཎྜཾ, པཎྞཱཀཱརོ ཝཱ. རཉྙོཏི རཱམརཱཛསྶ ཛེཊྛཔུཏྟབྷཱུཏསྶ བཱརཱཎསིརཉྙོ. ཏཏྠཱཏི བཱརཱཎསིཡཾ. ཨིདྷེཝཱཏི ཧིམཝནྟཔསྶེཡེཝ. ནགརནྟི རཱཛདྷཱནཱིབྷཱུཏཾ མཧཱནགརཾ. ཀོལརུཀྑོ ¶ ནཱམ ཀུཊྛབྷེསཛྫུཔགོ ཨེཀོ རུཀྑཝིསེསོ. བྱགྒྷཔཐེཏི བྱགྒྷམགྒེ.

མཱཏུལཱཏི མཱཏུ བྷཱཏརོ. ཀེསགྒཧཎནྟི ཀེསཝེཎིབནྡྷནཾ. དུསྶགྒཧཎནྟི ཝཏྠསྶ ནིཝསནཱཀཱརོ. ནྷཱནཏིཏྠནྟི ཡཐཱཝུཏྟཱཡ པོཀྑརཎིཡཱ ཨུདཀནྷཱནཏིཏྠཾ. ཨིདཱནིཔི ཏེསཾ ཛཱཏིསམྦྷེདཱབྷཱཝཾ དསྶེནྟོ ‘‘ཨེཝཾ ཏེས’’ནྟིཨཱདིམཱཧ. ཨཱཝཱཧོ དཱརིཀཱཧརཎཾ. ཝིཝཱཧོ དཱརིཀཱདཱནཾ. ཏཏྠཱཏི ཏེསུ སཀྱཀོལིཡེསུ. དྷཱཏུསདྡཱནམནེཀཏྠཏྟཱ སམུསདྡོ ནིཝཱསཏྠོཏི ཝུཏྟཾ ‘‘ཝསནྟཱི’’ཏི. ཨགྒེཏི ཨུཔཡོགཏྠེ བྷུམྨཝཙནཾ, ཨཱདྱཏྠེ ཙ ཨགྒསདྡོ, ཀིརིཡཱཝིསེསོཏི ཙ དསྶེཏི ‘‘ཏཾ ཨགྒ’’ནྟིཨཱདིནཱ. ཡདེཏྠ བྷགཝཏཱ ཝུཏྟཾ ‘‘ཨཐ ཁོ ཨམྦཊྛ རཱཛཱ ཨོཀྐཱཀོ ཨུདཱནཾ ཨུདཱནེསི ‘སཀྱཱ ཝཏ བྷོ ཀུམཱརཱ, པརམསཀྱཱ ཝཏ བྷོ ཀུམཱརཱ’ཏི, ཏདགྒེ ཁོ པན ཨམྦཊྛ སཀྱཱ པཉྙཱཡནྟཱི’’ཏི, ཏདེཏཾ སདྡཏོ, ཨཏྠཏོ ཙ སཱབྷཱཝིཀནིབྦཙནནིདསྶནཾ ‘‘སཀཱཧི བྷགིནཱིཧིཔི སདྡྷིཾ སཾཝཱསཝསེན ཛཱཏིསམྦྷེདམཀཏྭཱ ཀུལཝཾསཾ ཨནུརཀྑིཏུཾ སཀྐུཎནྟི སམཏྠེནྟཱིཏི སཀྱཱ’’ཏི ཏེཡེཝ སདྡརཙནཱཝིསེསེན སཱཀིཡཱ. ཡཾ པནེཏཾ སཀྐཏནིགྷཎྚུསཏྠེསུ ཝུཏྟཾ –

‘‘སཱཀརུཀྑཔཊིཙྪནྣཾ, ཝཱསཾ ཡསྨཱ པུརཱཀཾསུ;

ཏསྨཱ དིཊྛཱ ཝཾསཛཱཏེ, བྷུཝི ‘སཀྱཱ’ཏི ཝིསྶུཏཱ’’ཏི.

ཏདེཏཾ སདྡམཏྟཾ པཏི ཨསཱབྷཱཝིཀནིབྦཙནནིདསྶནཾ ‘‘ཀཔིལམུནིནོ ཝསནཊྛཱནེ སཱཀཝནེ ཝསནྟཱིཏི སཀྱཱ, སཱཀིཡཱ’’ཏི ཙ.

ཀཱལ༹ཝཎྞཏཱཡ ¶ ཀཎྷོ ནཱམཱཏི ཝུཏྟཾ ‘‘ཀཱལ༹ཝཎྞ’’ནྟིཨཱདི. ཧནུཡཾ ཛཱཏཱ མསྶཱུ, ཨུཏྟརོཊྛསྶ ཨུབྷོསུ པསྶེསུ དཱཋཱཀཱརེན ཛཱཏཱ དཱཋིཀཱ. ཨིདཉྩ ཨཏྠམཏྟེན ཝུཏྟཾ, ཏདྡྷིཏཝསེན པན ཡཐཱ ཨེཏརཧི ཡཀྑེ ‘‘པིསཱཙོ’’ཏི སམཉྙཱ, ཨེཝཾ ཏདཱ ‘‘ཀཎྷོ’’ཏི, ཏསྨཱ ཛཱཏམཏྟེཡེཝ སབྱཱཧརཎེན པིསཱཙསདིསཏཱཡ ཀཎྷོཏི. ཏཐཱཧི ཝུཏྟཾ ‘‘ཡཐཱ ཁོ པན ཨམྦཊྛ ཨེཏརཧི མནུསྶཱ པིསཱཙེ དིསྭཱ ‘པིསཱཙཱ’ཏི སཉྫཱནནྟི, ཨེཝམེཝ ཁོ ཨམྦཊྛ ཏེན ཁོ པན སམཡེན མནུསྶཱ པིསཱཙེ ‘ཀཎྷཱ’ཏི སཉྫཱནནྟཱི’’ཏིཨཱདི. ཏཏྠ པིསཱཙོ ཛཱཏོཏི ཨིདཱནི པཱཀཊནཱམེན སུཝིཉྙཱཔནཏྠཾ པུརིམཔདསྶེཝ ཝེཝཙནཾ ཝུཏྟཾ. ‘‘ན སཀབལེ༹ན མུཁེན བྱཱཧརིསྶཱམཱི’’ཏིཨཱདཱིསུ (པཱཙི. ༦༡༩) ཝིཡ ཨུཔསགྒཝསེན སདྡཀརཎཏྠོ ཧརསདྡོ, པུན དུཏིཡོཔསགྒེན ཡུཏྟོ ཨུཙྩཱསདྡཀརཎེ ཝཏྟཏཱིཏི ཝུཏྟཾ ‘‘ཨུཙྩཱསདྡམཀཱསཱི’’ཏི.

༢༦༨. ཨཏྟནོ ¶ ཨུཔཱརམྦྷམོཙནཏྠཱཡཱཏི ཨཱཙརིཡེན, ཨམྦཊྛེན ཙ ཨཏྟནོ ཨཏྟནོ ཨུཔརི པཱཔེཏབྦོཔཝཱདསྶ ཨཔནཡནཏྠཾ. ‘‘ཨཏྟནོ’’ཏི ཧེཏཾ ཝིཙྪཱལོཔཝཙནཾ. པརིབྷིནྡིསྶཏཱིཏི ཨནཏྠཀཱམཏཱཔཝེདནེན པརིབྷེདཾ ཀརིསྶཏི, པེསུཉྙཾ ཨུཔསཾཧརིསྶཏཱིཏི ཝུཏྟཾ ཧོཏི. ཨཏྠཝིཉྙཱཔནེ སཱདྷནཏཱཡ ཝཱཙཱ ཨེཝ ཀརཎཾ ཝཱཀྐརཎཾ ནིརུཏྟིནཡེན, ཏཾ ཀལྱཱཎམསྶཱཏི ཀལྱཱཎཝཱཀྐརཎོ. ཨསྨིཾ ཝཙནེཏི ཨེཏྠ ཏསདྡེན ཀཱམཾ ‘‘ཙཏྟཱརོམེ བྷོ གོཏམ ཝཎྞཱ’’ཏིཨཱདིནཱ (དཱི. ནི. ༡.༢༦༦) ཨམྦཊྛེན ཧེཊྛཱ ཝུཏྟོ ཛཱཏིཝཱདོ པརཱམསིཏབྦོ ཧོཏི, ཏཐཱཔེས ཛཱཏིཝཱདོ ཝེདེ ཝུཏྟཝིདྷིནཱཡེཝ ཏེན པཊིམནྟེཏབྦོ, ཏསྨཱ པཊིམནྟནཧེཏུབྷཱཝེན པསིདྡྷཾ ཝེདཏྟཡཝཙནམེཝ པརཱམསིཏབྦནྟི དསྶེཏུཾ ཝུཏྟཾ ‘‘ཨཏྟནཱ ཨུགྒཧིཏེ ཝེདཏྟཡཝཙནེ’’ཏི. ཨིདཱནི ‘‘པོརཱཎཾ ཁོ པན ཏེ ཨམྦཊྛ མཱཏཱཔེཏྟིཀ’’ནྟིཨཱདིནཱ བྷགཝཏཱ ཝུཏྟཝཙནསྶཔི པརཱམསནཾ དསྶེནྟོ ‘‘ཨེཏསྨིཾ ཝཱ དཱསིཔུཏྟཝཙནེ’’ཏི ཨཱཧ. ཨཔིཙ པཊིམནྟེཏུནྟི ཨེཏྠ པཊིམནྟནཱ ནཱམ པཉྷཱཝིསྶཛྫནཱ, ཨུཏྟརིཀཐནཱ ཝཱ, ཏསྨཱ ཨཏྠདྭཡཱནུརཱུཔཾ ཏབྦིསཡསྶ ཏ-སདྡེན པརཱམསནཾ དསྶེཏཱིཏི དཊྛབྦཾ.

༢༦༩. ཏཱཝཱཏི མནྟནཱཡ པཋམམེཝ, ཨཀཏཱཡ ཨེཝ མནྟནཱཡཱཏི ཝུཏྟཾ ཧོཏི. དུཛྫཱནཱཏི དུབྦིཉྙེཡྻཱ, པཋམམེཝ སཱིསམུཀྑིཔིཏུཾ ཨསམཏྠནཏོ ¶ , ཛཱཏིཡཱ ཙ དུབྦིཉྙེཡྻཏྟཱ, ཨཊྚསྶ ཙ དུཀྐརཎཏོ ཨམྦཊྛོ སཡམེཝ མོཙེཏཱུཏི ཨདྷིཔྤཱཡོ. ཨཏྟནཱཝ སཀྱེསུ ཨིབྦྷཝཱདནིཔཱཏནེན ཨཏྟནོ ཨུཔརི པཱཔུཎནཾ སནྡྷཱཡ ‘‘ཨཏྟནཱ བདྡྷཾ པུཊཀ’’ནྟི ཝུཏྟཾ, ཨཏྟནཱཝ བདྡྷཾ པུཊོལི༹ནྟི ཨཏྠོ.

༢༧༠. དྷམྨོ ནཱམ ཀཱརཎཾ ‘‘དྷམྨཔཊིསམྦྷིདཱ’’ཏིཨཱདཱིསུ (ཝིབྷ. ༧༡༨ ཨཱདཡོ) ཝིཡ, དྷམྨེན སཧ ཝཏྟཏཱིཏི སཧདྷམྨོ, སོ ཨེཝ སཧདྷམྨིཀོཏི ཨཱཧ ‘‘སཧེཏུཀོ’’ཏིཨཱདི, པརིཡཱཡཝཙནམེཏཾ. ཛནཀོ ཝཱ ཧེཏུ, ཨུཔཏྠམྦྷཀོ ཀཱརཎཾ. ཨཉྙེན ཨཊྛཱནགཏེན ཨཉྙཾ ཨཊྛཱནགཏཾ ཝཙནཾ. ཏེནཱཧ ‘‘ཡོ ཧཱི’’ཏིཨཱདི.

ཏཏོཏི དྭིཀྑཏྟུཾ ཙོདནཱཏོ པརཾ, ཏཏིཡཙོདནཱཡ ཨནཱགཏཱཡ ཨེཝ པཀྐམིསྶཱམཱིཏི ཝུཏྟཾ ཧོཏི.

༢༧༡. པཱུཛིཏབྦཏོ སཀྐོ དེཝརཱཛཱ ཡཀྑོ ནཱམ. ཡོ ཨགྒིསྶ པཀཏིཝཎྞོ, ཏེན སམནྣཱགཏནྟི ཝུཏྟཾ ‘‘ཨཱདིཏྟནྟི ཨགྒིཝཎྞ’’ནྟི. ཀནྡལོ ནཱམ པུཔྥཱུཔགརུཀྑཝིསེསོ, ཡསྶ སེཏཾ ¶ པུཔྥཾ པུཔྥཏི, མཀུལ༹མྤིསྶ སེཏཝཎྞཾ དཱཋཱཀཱརཾ ཧོཏི. ཝིརཱུཔརཱུཔནྟི ཝིཔརཱིཏརཱུཔསཎྛཱནཾ.

ཨཊྛམསཏྟཱཧེ ཨཛཔཱལནིགྲོདྷམཱུལེ ནིསིནྣསྶ སབྦབུདྡྷསྶ ཨཱཙིཎྞསམཱཙིཎྞཾ ཨཔྤོསྶུཀྐཏཾ སནྡྷཱཡ ‘‘ཨཧཉྩེཝཱ’’ཏིཨཱདི ཝུཏྟཾ. ཨཝཏྟམཱནེཏི ཨཔྤཊིཔཛྫམཱནེ, ཨནནུཝཏྟམཱནེ ཝཱ. ཏསྨཱཏི ཏདཱ ཏཐཱཔཊིཉྙཱཏཏྟཱ. ཏཱསེཏྭཱ པཉྷཾ ཝིསྶཛྫཱཔེསྶཱམཱིཏི ཨཱགཏོ ཡཐཱ ཏཾ མཱུལཔཎྞཱསཀེ ཨཱགཏསྶ སཙྩཀཔརིབྦཱཛཀསྶ སམཱགམེ (མ. ནི. ༡.༣༥༧).

‘‘བྷགཝཱ ཙེཝ པསྶཏི ཨམྦཊྛོ ཙཱ’’ཏི ཨེཏྠ ཨིཏརེསམདསྶནེ དུཝིདྷམྤི ཀཱརཎཾ དསྶེནྟོ ‘‘ཡདི ཧཱི’’ཏིཨཱདིམཱཧ. ཧི-སདྡོ ཀཱརཎཏྠེ ནིཔཱཏོ. ཡསྨཱ ཨགརུ, ཡསྨཱ ཙ ཝདེཡྻུཾ, ཏསྨཱཏི སམྦནྡྷོ. ཨཉྙེསམྤི སཱདྷཱརཎཏོ ཨགརུ ཨབྷཱརིཡཾ. ཨཱཝཱཧེཏྭཱཏི མནྟབལེན ཨཝ྄ཧཱནཾ ཀཏྭཱ. ཏསྶཱཏི ཨམྦཊྛསྶ. ཨནྟོཀུཙྪི ཨནྟཨནྟགུཎཱདིཀོ. ཝཱདསངྒྷཊྚེཏི ཝཱཙཱསངྒྷཊྚནེ. མཉྙམཱནོཏི མཉྙནཏོ. སམྦནྡྷདསྶནཉྷེཏཾ.

༢༧༢. ཏཱཎཾ གཝེསམཱནོཏི ‘‘ཨཡམེཝ སམཎོ གོཏམོ ཨིཏོ བྷཡཏོ མམ ཏཱཡཀོ’’ཏི བྷགཝནྟཾཡེཝ ‘‘ཏཱཎ’’ནྟི པརིཡེསནྟོ ¶ , ཨུཔགཙྪནྟོཏི ཝུཏྟཾ ཧོཏི. སེསཔདདྭཡེཔི ཨེསེཝ ནཡོ. ཏཱཡཏཱིཏི ཡཐཱུཔཊྛིཏབྷཡཏོ པཱལེཏི. ཏེནཱཧ ‘‘རཀྑཏཱི’’ཏི, ཀཏྟུསཱདྷནམེཏཾ. ནིལཱིཡཏཱིཏི ཡཐཱུཔཊྛིཏེནེཝ བྷཡེན ཨུཔདྡུཏོ ནིལཱིནོ ཧོཏི, ཨདྷིཀརཎསཱདྷནམེཏཾ. སརསདྡོ ཧིཾསནེ, ཏཉྩ ཝིདྡྷཾསནམེཝ ཨདྷིཔྤེཏནྟི ཝུཏྟཾ ‘‘བྷཡཾ ཧིཾསཏི ཝིདྡྷཾསེཏཱི’’ཏི, ཀཏྟུསཱདྷནམེཏཾ.

ཨམྦཊྛཝཾསཀཐཱཝཎྞནཱ

༢༧༤. གངྒཱཡ དཀྑིཎཏོཏི གངྒཱཡ ནཱམ ནདིཡཱ དཀྑིཎདིསཱབྷཱགེ. བྲཱཧྨཎཏཱཔསཱཏི བྲཧྨཀུལིནོ ཏཱཔསཱ. སརཾ ཝཱ སཏྟིཨཱདཡོ ཝཱ པརསྶ ཨུཔརི ཁིཔིཏུཀཱམསྶ མནྟཱནུབྷཱཝེན ཧཏྠཾ ན པརིཝཏྟཏི, ཧཏྠེ པན ཨཔརིཝཏྟནྟེ ཀུཏོ ཨཱཝུདྷཾ པརིཝཏྟིསྶཏཱིཏི ཏཐཱ ཨཔརིཝཏྟནཾ སནྡྷཱཡ ‘‘ཨཱཝུདྷཾ ན པརིཝཏྟཏཱི’’ཏི ཝུཏྟཾ. བྷདྲཾ བྷོཏི སམྤཊིཙྪནཾ, སཱདྷཱུཏི ཨཏྠོ. དྷནུནཱ ཁིཏྟསརེན ཨགམནཱིཡཾ སསམྦྷཱརཀཐཱནཡེན ‘‘དྷནུ ཨགམནཱིཡ’’ནྟི ཝུཏྟཾ ཡཐཱ ‘‘དྷནུནཱ ཝིཛ྄ཛྷཏི, ཙཀྑུནཱ པསྶཏཱི’’ཏི. ཨམྦཊྛཾ ནཱམ ཝིཛྫནྟི སཏྟཱནཾ སརཱིརེ ཨབྦྷངྒཾ ཋཔེཏཱིཏི ཨམྦཊྛཱ ནིརུཏྟིནཡེན, ཨེཝཾལདྡྷནཱམཾ མནྟཝིཛྫནྟི ཨཏྠོ. ཡཏོ ཨམྦཊྛཱ ཝིཛྫཱ ཨེཏསྨིཾ ཨཏྠཱིཏི ཀཏྭཱ ¶ ཀཎྷོ ཨིསི ‘‘ཨམྦཊྛོ’’ཏི པཉྙཱཡིཏྠ, ཏབྦཾསཛཱཏཏཱཡ པནཱཡཾ མཱཎཝོ ‘‘ཨམྦཊྛོ’’ཏི ཝོཧརཱིཡཏི. སོ ཀིར ‘‘ཀཐཾ ནཱམཱཧཾ དིསཱཡ དཱསིཡཱ ཀུཙྪིམྷི ནིབྦཏྟོ’’ཏི ཏཾ ཧཱིནཾ ཛཱཏིཾ ཛིགུཙྪནྟོ ‘‘ཧནྡཱཧཾ ཡཐཱ ཏཐཱ ཨིམཾ ཛཱཏིཾ སོདྷེསྶཱམཱི’’ཏི ནིགྒཏོ. ཏེན ཝུཏྟཾ ‘‘ཨིདཱནི མེ མནོརཐཾ པཱུརེསྶཱམཱི’’ཏི. ཨཡཉྷིསྶ མནོརཐོ – ཝིཛྫཱབལེན རཱཛཱནཾ ཏཱསེཏྭཱ ཏསྶ དྷཱིཏརཾ ལདྡྷཀཱལཏོ པཊྛཱཡ མྱཱཡཾ དཱསཛཱཏི སོདྷིཏཱ བྷཝིསྶཏཱིཏི.

སེཊྛམནྟེཏི སེཊྛབྷཱུཏེ ཝེདམནྟེ. ཀོ ནུ ཀིཾ ཀཱརཎཱ དཱསིཔུཏྟོ སམཱནོ མདྡརཱུཔིཾ དྷཱིཏརཾ ཡཱཙཏཱིཏི ཨཏྠོ. ཁུརཏི ཚིནྡཏི, ཁུརཾ ཝཱ པཱཏི པིཝཏཱིཏི ཁུརཔྤོ, ཁུརམསྶ ཨགྒེ ཨཔྤཱིཡཏི ཋཔཱིཡཏཱིཏི ཝཱ ཁུརཔྤོ, སརོ. མནྟཱནུབྷཱཝེན རཉྙོ བཱཧུཀྑམྦྷམཏྟཾ ཛཱཏཾ, ཏེན པན བཱཧུཀྑམྦྷེན ‘‘ཀོ ཛཱནཱཏི, ཀིཾ བྷཝིསྶཏཱི’’ཏི རཱཛཱ བྷཱིཏོ ཨུསྶངྐཱི ཨུཏྲསྟོ ཨཧོསི. ཏཐཱ ཙ ཝུཏྟཾ ‘‘བྷཡེན ཝེདྷམཱནོ ཨཊྛཱསཱི’’ཏི.

སརབྷངྒཛཱཏཀེ ¶ (ཛཱ. ༢.༡༧.༥༢) ཨཱགཏཱནཾ དཎྜཀཱིརཱཛཱདཱིནཾ པཙྪཱ ཨོཀྐཱཀརཱཛཱ ཨཧོསི, ཏེསཾ པཝཏྟི ཙ སབྦཏྠ ཙིརཀཱལཾ པཱཀཊཱཏི ཨཱཧ ‘‘དཎྜཀཱིརཉྙོ’’ཏིཨཱདི. ཨཔརདྡྷསྶ དཎྜཀཱིརཉྙོ, ཨཔརདྡྷོ ནཱལི༹ཀེརོ, ཨཛྫུནོ ཙཱཏི སམྦནྡྷོ. སཏིཔི ཝཱལུཀཱདིཝསྶེ ཨཱཝུདྷཝསྶེནེཝ ཝིནཱསོཏི ཝུཏྟཾ ‘‘ཨཱཝུདྷཝུཊྛིཡཱ’’ཏི. ‘‘ཨཡམྤི ཨཱིདིསོ མཧཱནུབྷཱཝོ’’ཏི མཉྙམཱནཱ ཨེཝཾ ཙིནྟཡནྟཱ བྷཡེན ཨཝོཙུནྟི དཊྛབྦཾ.

ཨུནྡྲིཡིསྶཏཱིཏི བྷིནྡིཡིསྶཏི. ཀམྨརཱུཔཉྷེཏཾ ‘‘པཐཝཱི’’ཏི ཀམྨཀཏྟུཝསེན ཝུཏྟཏྟཱ ཡཐཱ ‘‘ཀུསུལོ བྷིཛྫཏཱི’’ཏི. ཏེནཱཧ ‘‘བྷིཛྫིསྶཏཱི’’ཏི. ཐུསམུཊྛཱིཏི པལཱསམུཊྛི, བྷུསམུཊྛི ཝཱ. ཀསྨཱཏི ཨཱཧ ‘‘སརསནྠམྦྷནམཏྟེ’’ཏིཨཱདི.

བྷཱིཏཏསིཏཱ བྷཡཝསེན ཚམྦྷིཏསརཱིརཱ ཨུདྡྷགྒལོམཱ ཧོནྟི ཧཊྛལོམཱ, ཨབྷཱིཏཏསིཏཱ པན བྷཡུཔདྡཝཱབྷཱཝཏོ ཨཙྪམྦྷིཏསརཱིརཱ པཏིཏལོམཱ ཧོནྟི ཨཧཊྛལོམཱ, ཁེམེན སོཏྠིནཱ ཏིཊྛནྟི, ཏཱཡ པན པཏིཏལོམཏཱཡ ཏསྶ སོཏྠིབྷཱཝོ པཱཀཊོ ཧོཏཱིཏི ཕལེན ཀཱརཎཾ ཝིབྷཱཝེཏུཾ པཱལི༹ཡཾ ‘‘པལློམོ’ཏི ཝུཏྟནྟི དསྶེཏི ‘‘པནྣལོམོ’’ཏིཨཱདིནཱ. ནིརུཏྟིནཡེན པདསིདྡྷི ཡཐཱ ཏཾ བྷཡབྷེརཝསུཏྟེ ‘‘བྷིཡྻོ པལློམམཱཔཱདིཾ ཨརཉྙེ ཝིཧཱརཱཡཱ’’ཏི (མ. ནི. ༡.༣༦ ཨཱདཡོ). ཨིདནྟི ཨོསཱནཝཙནཾ. ‘‘སཙེ མེ རཱཛཱ ཏཾ དཱརིཀཾ དསྶེཏི, ཀུམཱརོ སོཏྠི པལློམོ བྷཝིསྶཏཱི’’ཏི པཊིཉྙཱཀརཎཾ པཀརཎཏོཡེཝ པཱཀཊཾ. ཏེནཱཏི ཀཎྷེན. མནྟེཏི བཱཧུཀྑམྦྷཀམནྟསྶ པཊིཔྤསྶམྦྷཀཝིཛྫཱསངྑཱཏེ མནྟེ. ཨེཝརཱུཔཱནཉྷི བྷཡུཔདྡཝཀརཱནཾ མནྟཱནཾ ཨེཀཾསེནེཝ ¶ པཊིཔྤསྶམྦྷཀམནྟཱཧོནྟི ཡཐཱ ཏཾ ཀུསུམཱརཀཝིཛྫཱདཱིནཾ. པརིཝཏྟིཏེཏི པཛཔྤིཏེ. ཨཏྟནོ དྷཱིཏུཡཱ ཨཔཝཱདམོཙནཏྠཾ ཏཾ ཨདཱསཾ བྷུཛིསྶཾ ཀརོཏི. ཏསྶཱ ཨནུརཱུཔེ ཨིསྶརིཡེ ཋཔནཏྠཾ ཨུལཱ༹རེ ཙ ནཾ ཋཱནེ ཋཔེསི. ཨེཀེན པཀྑེནཱཏི མཱཏུཔཀྑེན. ཀརུཎཱཡནྟོ སམསྶཱསནཏྠཾ ཨཱཧ, ན པན ཨུཙྩཱཀུལཱིནབྷཱཝདསྶནཏྠཾ. ཏེནཱཧ ‘‘ཨཐ ཁོ བྷགཝཱ’’ཏིཨཱདི.

ཁཏྟིཡསེཊྛབྷཱཝཝཎྞནཱ

༢༧༥. བྲཱཧྨཎེསཱུཏི ཝོཧཱརམཏྟཾ, བྲཱཧྨཎཱནཾ སམཱིཔེ བྲཱཧྨཎེཧི ལདྡྷབྦཱནི ཨཱསནཱདཱིནི ལབྷེཐཱཏི ཝུཏྟཾ ཧོཏི. ཏེན ཝུཏྟཾ ‘‘བྲཱཧྨཎཱནཾ ¶ ཨནྟརེ’’ཏི. ཀེཝལཾ ཝེདསཏྠཱནུརཱུཔཾ པརལོཀགཏེ སདྡྷཱཡ ཨེཝ ཀཱཏབྦཾ, ན ཏདཉྙཾ ཀིཉྩི ཨབྷིཔཏྠེནྟེནཱཏི སདྡྷནྟི ནིབྦཙནཾ དསྶེཏུཾ ‘‘མཏཀེ ཨུདྡིསྶ ཀཏབྷཏྟེ’’ཏི ཝུཏྟཾ. མངྒལཱདིབྷཏྟེཏི ཨེཏྠ ཨཱདིསདྡེན ཨུསྶཝདེཝཏཱརཱདྷནཱདིབྷཏྟེ སངྒཎྷཱཏི. ཡཉྙབྷཏྟེཏི པཱཔསཉྙམཱདིཝསེན ཀཏབྷཏྟེ. ‘‘པཱཔསཉྙམཱདིབྷཏྟོ བྷཝིསྶཏཱི’’ཏིཨཱདིནཱ ཧི ཨགྒིཧོམོ ཨིདྷ ཡཉྙཾ. པཱཧུནཀཱནནྟི ཨཏིཐཱིནཾ. ཨནཱགནྟུཀཱནམྤི པཱཧེཎཀབྷཏྟཾ ‘‘པཱཧུན’’ནྟྭེཝ ཝུཙྩཏཱིཏི ཨཱཧ ‘‘པཎྞཱཀཱརབྷཏྟེ ཝཱ’’ཏི. ཨཱཝཊཾ ནིཝཱརཎཾ. ཨནཱཝཊཾ ཨནིཝཱརཎཾ. ཁཏྟིཡབྷཱཝཾ ཨཔྤཏྟོ ཨུབྷཏོསུཛཱཏཱབྷཱཝཏོ. ཏེནཱཧ ‘‘ཨཔརིསུདྡྷོ’’ཏི.

༢༧༦. ཨིཏྠིཡཱ ཝཱ ཨིཏྠིཾ ཀརིཏྭཱཏི ཨེཏྠ ཀརཎཾ ནཱམ ཀིརིཡཱསཱམཉྙཝིསཡཾ ཀརབྷཱུདྷཱཏཱུནཾ ཨཏྠཝསེན སབྦདྷཱཏྭནྟོགདྷཏྟཱཏི ཨཱཧ ‘‘པརིཡེསིཏྭཱ’’ཏི. ཁཏྟིཡཀུམཱརསྶ བྷརིཡཱབྷཱུཏཾ བྲཱཧྨཎཀཉྙཾ ཨིཏྠིཾ པརིཡེསིཏྭཱ གཧེཏྭཱ བྲཱཧྨཎཱནཾ ཨིཏྠིཡཱ ཝཱ ཁཏྟིཡཱཝ སེཊྛཱ, ‘‘ཧཱིནཱ བྲཱཧྨཎཱ’’ཏི པཱལི༹མུདཱཧརིཏྭཱ ཡོཛེཏབྦཾ. ‘‘པུརིསེན ཝཱ པུརིསཾ ཀརིཏྭཱཏི ཨེཏྠཱཔི ཨེསེཝ ནཡོ’’ཏི (དཱི. ནི. ཊཱི. ༡.༢༧༦) ཨཱཙརིཡེན ཝུཏྟཾ. ཏཏྠཱཔི ཧི ཁཏྟིཡཀཉྙཱཡ པཏིབྷཱུཏཾ བྲཱཧྨཎཀུམཱརཾ པུརིསཾ པརིཡེསིཏྭཱ གཧེཏྭཱ བྲཱཧྨཎཱནཾ པུརིསེན ཝཱ ཁཏྟིཡཱཝ སེཊྛཱ, ཧཱིནཱ བྲཱཧྨཎཱཏི ཡོཛནཱ. ཀིསྨིཉྩིདེཝ པཀརཎེཏི ཨེཏྠ པཀརཎཾ ནཱམ ཀཱརཎཾ ‘‘ཨེཏསྨིཾ ནིདཱནེ ཨེཏསྨིཾ པཀརཎེ’’ཏིཨཱདཱིསུ (པཱཙི. ༤༢, ༩༠) ཝིཡ, ཏསྨཱ རཱགཱདིཝསེན པཀྑལིཏེ ཋཱནེ ཧེཏུབྷཱུཏེཏི ཨཏྠོ, ཏཾ པན ཨཏྠཏོ ཨཔརཱདྷོཝ, སོ ཙ ཨཀཏྟབྦཀརཎནྟི ཨཱཧ ‘‘ཀིསྨིཉྩིདེཝ དོསེ’’ཏིཨཱདི. བྷསྶསདྡོ བྷསྨཔརིཡཱཡོ. བྷསཱིཡཏི ནིརཏྠཀབྷཱཝེན ཁིཔཱིཡཏཱིཏི ཧི བྷསྶཾ, ཚཱརིཀཱ. ‘‘ཝདྷིཏྭཱ’’ཏི ཨེཏསྶ ཨཏྠཝཙནཾ ‘‘ཨོཀིརིཏྭཱ’’ཏི.

༢༧༧. ཀམྨཀིལེསེཧི ཛནེཏབྦོ, ཏེཧི ཝཱ ཛཱཡཏཱིཏི ཛནིཏོ, སྭེཝ ཛནེཏོ, མནུསྶོཝ ¶ . ཏཐཱ ཧི ཝུཏྟཾ ‘‘ཡེ གོཏྟཔཊིསཱརིནོ’’ཏི. ཏདེཏཾ པཛཱཝཙནཾ ཝིཡ ཛཱཏིསདྡཝསེན བཧུམྷི ཨེཀཝཙནནྟི ཨཱཧ ‘‘པཛཱཡཱཏི ཨཏྠོ’’ཏི. ཨེཏསྨིཾ ཛནེཏིཔི ཡུཛྫཏི. པཊིསརནྟཱིཏི གོཏྟཾ པཊིཙྩ ‘‘ཨཧཾ གོཏམོ, ཨཧཾ ཀསྶཔོ’’ཏིཨཱདིནཱ སརཎཾ ཀརོནྟི ཝིཙིནནྟི.

པཋམབྷཱཎཝཱརཝཎྞནཱ ནིཊྛིཏཱ.

ཝིཛྫཱཙརཎཀཐཱཝཎྞནཱ

༢༧༨. ཨིམསྨིཾ ¶ པན སིལོཀེ ཨཱཧརིཡམཱནེ བྲཧྨགརུཀཱ སདྡྷེཡྻཏཾ ཨཱཔཛྫིསྶནྟི, ཨམྦཊྛོ ཙ ‘‘ཝིཛྫཱཙརཎསམྤནྣོ’’ཏི པདཾ སུཏྭཱ ཝིཛྫཱཙརཎཾ པུཙྪིསྶཏི, ཨེཝམཡཾ ཝིཛྫཱཙརཎཔརིདཱིཔནཱི དེསནཱ མཧཱཛནསྶ སཱཏྠིཀཱ བྷཝིསྶཏཱིཏི པསྶིཏྭཱ ལོཀནཱཐོ ཨིམཾ སིལོཀཾ སནངྐུམཱརབྷཱསིཏཾ ཨཱཧརཱིཏི ཨིམམཏྠམྤི ཝིབྷཱཝེནྟོ ‘‘ཨིམཱཡ པན གཱཐཱཡཱ’’ཏིཨཱདིམཱཧ. ཨིཏརཐཱ ཧི བྷགཝཱཔི ཨསབྦཉྙཱུ པརཱཝསྶཡོ བྷཝེཡྻ, ན ཙ ཡུཛྫཏི བྷགཝཏོ པརཱཝསྶཡཏཱ སམྨཱསམྦུདྡྷབྷཱཝཏོ. ཏེནཱཧ ‘‘ཨཧམྤི ཧི, ཨམྦཊྛ, ཨེཝཾ ཝདཱམཱི’’ཏིཨཱདི. བྲཱཧྨཎསམཡེ སིདྡྷནྟི བྲཱཧྨཎལདྡྷིཡཱ པཱཀཊཾ. ཝཀྑམཱནནཡེན ཛཱཏིཝཱདཱདིཔཊིསཾཡུཏྟཾ. ‘‘སཾསནྡིཏྭཱཏི གྷཊེཏྭཱ, ཨཝིརུདྡྷཾ ཀཏྭཱཏི ཨཏྠོ’’ཏི (དཱི. ནི. ཊཱི. ༡.༢༧༧) ཨཱཙརིཡེནཝུཏྟཾ. ཨིདཱནི པན པོཏྠཀེསུ ‘‘པཊིཀྑིཔིཏྭཱ’’ཏི པཱཋོ དིསྶཏི, སོ ཨཡུཏྟོཝ. ཀསྨཱཏི ཙེ? ན ཧི པཱལི༹ཡཾ བྲཱཧྨཎསམཡསིདྡྷཾ ཝིཛྫཱཙརཎཾ པཊིཀྑིཔཏི, ཏདེཝ ཨམྦཊྛེན ཙིནྟིཏཾ ཝིཛྫཱཙརཎཾ གྷཊེཏྭཱ ཨཝིརུདྡྷཾ ཀཏྭཱ ཨནུཏྟརཾ ཝིཛྫཱཙརཎཾ དེསེཏཱིཏི.

ཝཱདོཏི ལདྡྷི, ཝཙཱིབྷེདོ ཝཱ. ཏེནཱཧ ‘‘བྲཱཧྨཎ…པེ…ཨཱདིཝཙན’’ནྟི. ལདྡྷིཔི ཧི ཝཏྟབྦཏྟཱ ཝཙནམེཝ. ཨིདནྟི ཨཛ྄ཛྷེནཛ྄ཛྷཱཔནཡཛནཡཱཛནཱདིཀམྨཾ, ན ཝེསྶསྶ, ན ཁཏྟིཡསྶ, ན ཏདཉྙེསནྟི ཨཏྠཾ ཨཱདིསདྡེན སངྒཎྷཱཏི. སབྦཏྠཱཏི གོཏྟཝཱདམཱནཝཱདེསུ. ཏཏྠཱཔི ཧི གོཏྟཝཱདོཏི གོཏྟཾ ཨཱརབྦྷ ཝཱདོ, ཀསྶཔསྶེཝིདཾ ཝཊྚཏི, ན ཀོསིཡསྶཱཏིཨཱདིཝཙནནྟི ཨཏྠོ. མཱནཝཱདོཏི མཱནཾ ཨཱརབྦྷ ཨཏྟུཀྐཾསནཔརཝམྦྷནཝསེན ཝཱདོ, བྲཱཧྨཎསྶེཝིདཾ ཝཊྚཏི, ན སུདྡསྶཱཏིཨཱདིཝཙནནྟི ཨཏྠོ. ཛཱཏིཝཱདེ ཝིནིབདྡྷཱཏི ཛཱཏིསནྣིསྶིཏཝཱདེ པཊིབདྡྷཱ. སབྦཏྠཱཏི ¶ གོཏྟཝཱདཝིནིབདྡྷཱདཱིསུ. གོཏྟཝཱདཝིནིབདྡྷཱཏི ཧི གོཏྟཝཱདེ ཝིནིབདྡྷཱ. མཱནཝཱདཝིནིབདྡྷཱཏི མཱནཝཱདེ ཝིནིབདྡྷཱ, ཡེ ཧི བྲཱཧྨཎསྶེཝ ཨཛ྄ཛྷེནཛ྄ཛྷཱཔནཡཛནཡཱཛནཱདཡོཏི ཨེཝཾ ཨཏྟུཀྐཾསནཔརཝམྦྷནཝསེན པཝཏྟཱ, ཏེ མཱནཝཱདཝིནིབདྡྷཱ ཙ ཧོནྟི. ཨཱཝཱཧཝིཝཱཧཝིནིབདྡྷཱཏི ཨཱཝཱཧཝིཝཱཧེསུ ཝིནིབདྡྷཱ. ཡེ ཧི ཝིནིབདྡྷཏྟཡཝསེན ‘‘ཨརཧསི ཝཱ མཾ ཏྭཾ, ན ཝཱ མཾ ཏྭཾ ཨརཧསཱི’’ཏི ཨེཝཾ པཝཏྟནཀཱ, ཏེ ཨཱཝཱཧཝིཝཱཧཝིནིབདྡྷཱ ཙ ཧོནྟཱིཏི ཨིམམཏྠསེསཾ སནྡྷཱཡ ‘‘ཨེས ནཡོ’’ཏི ¶ ཝུཏྟཾ. ཨཱཝཱཧཝིཝཱཧཝིནིབདྡྷབྷཱཝཝིབྷཱཝནཏྠཉྷི ‘‘ཨརཧསི ཝཱ མཾ ཏྭཾ, ན ཝཱ མཾ ཏྭཾ ཨརཧསཱི’’ཏི པཱལི༹ཡཾ ཝུཏྟཾ, ཏདེཏཾ ཛཱཏིཝཱདཱདཱིཧི ཏཱིཧི པདེཧི ཡོཛེཏབྦཾ. ཨཱཝུཏྟིཨཱདིནཡེན ཧི ཛཱཏིཝཱདཱདཡོ དྭིཀྑཏྟུམཏྠདཱིཔཀཱ. ཏཐཱ ཧི ཨཱཙརིཡེན ཝུཏྟཾ ‘‘ཡེ པན ཨཱཝཱཧཝིཝཱཧཝིནིབདྡྷཱ, ཏེ ཨེཝ སམྦནྡྷཏྟཡཝསེན ‘ཨརཧསི ཝཱ མཾ ཏྭཾ, ན ཝཱ མཾ ཏྭཾ ཨརཧསཱི’ཏི ཨེཝཾ པཝཏྟནཀཱ’’ཏི (དཱི. ནི. ཊཱི. ༡.༢༧༨).

ནནུ པུབྦེ ཝིཛྫཱཙརཎཾ པུཊྛཾ, ཀསྨཱ ཏཾ པུན པུཙྪཏཱིཏི ཙོདནཾ སོདྷེནྟོ ‘‘ཏཏོ ཨམྦཊྛོ’’ཏིཨཱདིམཱཧ. ཏཏྠ ཡཏྠཱཏི ཡསྶཾ ཝིཛྫཱཙརཎསམྤཏྟིཡཾ. བྲཱཧྨཎསམཡསིདྡྷཾ སནྡྷཱཡ ཝུཏྟཾ. ལགྒིསྶཱམཱཏི ཨོལགྒཱ ཨནྟོགདྷཱ བྷཝིསྶཱམ. ཏཏོཏི ཏཱཡ ཝིཛྫཱཙརཎསམྤདཱཡ. ཨཝཀྑིཔཱིཏི ཨཝཙཱསི. པརམཏྠཏོ ཨཝིཛྫཱཙརཎཱནིཡེཝ ‘‘ཝིཛྫཱཙརཎཱནཱི’’ཏི གཧེཏྭཱ ཋིཏོ ཧི པརམཏྠཏོ ཝིཛྫཱཙརཎེསུ ཝིབྷཛིཡམཱནེསུ སོ ཏཏོ དཱུརཏོ ཨཔནཱིཏོ ནཱམ ཧོཏི. ཡཏྠཱཏི ཡསྶཾ པན ཝིཛྫཱཙརཎསམྤཏྟིཡཾ. ཨནུཏྟརཝིཛྫཱཙརཎཾ སནྡྷཱཡ ཝུཏྟཾ. ཛཱནནཀིརིཡཱཡོགེ ཀམྨམྤི ཡུཛྫནཀིརིཡཱཡོགེ ཀཏྟཱཡེཝ ཨུཔཔནྣོ. པདྷཱནཀིརིཡཱཔེཀྑཱ ཧི ཀཱརཀཱཏི ཝུཏྟཾ ‘‘ཨཡཾ ནོ ཝིཛྫཱཙརཎསམྤདཱ ཉཱཏུཾ ཝཊྚཏཱི’’ཏི. ཨེཝམཱིདིསེསུ. སམུདཱགམཏོཏི ཨཱདིསམུཊྛཱནཏོ.

༢༧༩. ཀཱམཾ ཙརཎཔརིཡཱཔནྣཏྟཱ ཙརཎཝསེན ནིཡྻཱཏེཏུཾ ཝཊྚཏི, ཨམྦཊྛསྶ པན ཨསམཔཐགམནཾ ནིཝཱརེནྟོ སཱིལཝསེནེཝ ནིཡྻཱཏེཏཱིཏི ཨིམམཏྠཾ ཝིབྷཱཝེཏུཾ ‘‘ཙརཎཔརིཡཱཔནྣམྤཱི’’ཏི ཝུཏྟཾ. བྲཧྨཛཱལེ (དཱི. ནི. ༡.༧, ༡༡, ༢༡) ཝུཏྟནཡེན ཁུདྡཀཱདིབྷེདཾ ཏིཝིདྷཾ སཱིལཾ. སཱིལཝསེནེཝཱཏི སཱིལཔརིཡཱཡཝསེནེཝ. ཀིཉྩི ཀིཉྩི སཱིལནྟི བྲཱཧྨཎཱནཾ ཛཱཏིསིདྡྷཾ ཨཧིཾསནཱདིཡམནིཡམལཀྑཎཾ ཨཔྤམཏྟཀཾ སཱིལཾ. ཏསྨཱཏི ཏཐཱ ཝིཛྫམཱནཏྟཱ, ཨཏྟནི ཝིཛྫམཱནཾ སཱིལམཏྟམྤི ནིསྶཱཡ ལགྒེཡྻཱཏི ཨདྷིཔྤཱཡོ. ‘‘ཏཏྠ ཏཏྠེཝ ལགྒེཡྻཱཏི ཏསྨིཾ ཏསྨིཾཡེཝ བྲཱཧྨཎསམཡསིདྡྷེ སཱིལམཏྟེ ‘ཙརཎ’ནྟི ལགྒེཡྻཱ’’ཏི (དཱི. ནི. ཊཱི. ༡.༢༧༩) ཨཱཙརིཡེན ཝུཏྟཾ, ཏདེཏཾ ཨཊྛཀཐཱཡམེཝ སཱཀཱརཝཙནསྶ ཝུཏྟཏྟཱ ཝིཙཱརེཏབྦཾ, ཨདྷིཔྤཱཡམཏྟདསྶནཾ ཝཱ ཨེཏཾ. ཨཡཾ པནེཏྠ ¶ ཨཏྠོ – ཏཏྠ ཏཏྠེཝ ལགྒེཡྻཱཏི ཏསྨིཾ ཏསྨིཾཡེཝ ཨཏྟནི ཝིཛྫམཱནསཱིལམཏྟཔཊིསཾཡུཏྟཊྛཱནེ ‘‘མཡམྤི ཙརཎསམྤནྣཱ’’ཏི ལགྒེཡྻ, ཏསྨཱ སཱིལཝསེནེཝ ནིཡྻཱཏེཏཱིཏི སམྦནྡྷོ. ཏཐཱཔསངྒཱབྷཱཝཏོ པན ཨུཔརི ཙརཎཝསེནེཝ ནིཡྻཱཏེཏཱིཏི ¶ དསྶེནྟོ ‘‘ཡཾ པནཱ’’ཏིཨཱདིམཱཧ. རཱུཔཱཝཙརཙཏུཏྠཛ྄ཛྷཱནནིདྡེསེནེཝ ཨརཱུཔཱཝཙརཛ྄ཛྷཱནཱནམྤི ནིདྡིཊྛབྷཱཝཱཔཏྟིཏོ ‘‘ཨཊྛཔི སམཱཔཏྟིཡོ ‘ཙརཎ’ནྟི ནིཡྻཱཏིཏཱ’’ཏི ཝུཏྟཾ. ཏཱནིཔི ཧི ཨངྒསམཏཱཡ ཙཏུཏྠཛ྄ཛྷཱནཱནེཝཱཏི. ནིཡྻཱཏིཏཱཏི ཙ ཨསེསཏོ ནཱིཧརིཏྭཱ གཧིཏཱ, ནིདསྶིཏཱཏི ཨཏྠོ. ཝིཔསྶནཱཉཱཎཏོ པནཱཏི ‘‘སོ ཨེཝཾ སམཱཧིཏེ ཙིཏྟེ པརིསུདྡྷེ པརིཡོདཱཏེ ཨནངྒཎེ ཝིགཏཱུཔཀྐིལེསེ མུདུབྷཱུཏེ ཀམྨནཱིཡེ ཋིཏེ ཨཱནེཉྫཔྤཏྟེ ཉཱཎདསྶནཱཡ ཙིཏྟཾ ཨབྷིནཱིཧརཏི ཨབྷིནིནྣཱམེཏཱི’’ཏིཨཱདིནཱ ནཡེན ཝིཔསྶནཱཉཱཎཏོ པཊྛཱཡ.

ཙཏུཨཔཱཡམུཁཀཐཱཝཎྞནཱ

༢༨༠. ཨསམྤཱཔུཎནྟོཏི ཨཱརབྷིཏྭཱཔི སམྤཛྫིཏུམསཀྐོནྟོ. ཨཝིསཧམཱནོཏི ཨཱརབྷིཏུམེཝ ཨསཀྐོནྟོ. ‘‘ཁཱརཱི’’ཏི ཏཱཔསཔརིཀྑཱརསྶེཏཾ ཨདྷིཝཙནཾ, སོ ཙ ཨནེཀབྷེདོཏི ཝིབྷཛིཏྭཱ དསྶེཏུཾ ‘‘ཨརཎཱི’’ཏིཨཱདི ཝུཏྟཾ. ཏཏྠ ཨརཎཱིཏི ཧེཊྛིམུཔརིམཝསེན ཨགྒིདྷམནཀཾ ཨརཎཱིདྭཡཾ. ཀམཎྜལཱུཏི ཀུཎྜིཀཱ. སུཛཱཏི ཧོམདབྦི. སུཛཱསདྡོ ཧི ཧོམཀམྨནི ཧབྱནྣཱདཱིནམུདྡྷརཎཏྠཾ ཀཏདབྦིཡཾ ཝཏྟཏི ཡཐཱ ཏཾ ཀཱུཊདནྟསུཏྟེ ‘‘པཋམོ ཝཱ དུཏིཡོ ཝཱ སུཛཾ པགྒཎྷནྟཱན’’ནྟི (དཱི. ནི. ༡.༣༤༡). ཏཐཱ ཧི ཨིམསྨིཾཡེཝ ཋཱནེ ཨཱཙརིཡེན ཝུཏྟཾ ‘‘སུཛཱཏི དབྦཱི’’ཏི (དཱི. ནི. ཊཱི. ༡.༢༨༠). ཧབྱནྣཱདཱིནཾ སུཁགྒཧཎཏྠཾ ཛཱཡཏཱིཏི ཧི སུཛཱ. ཀེཙི པན ཨིམམཏྠམཝིཙཱརེཏྭཱ ཏུནྣཏྠམེཝ གཧེཏྭཱ ‘‘སཱུཙཱི’’ཏི པཋནྟི, ཏདཡུཏྟམེཝ ཨཱཙརིཡེན ཏཐཱ ཨཝཎྞིཏཏྟཱ. ཙམཏི ཨདཏཱིཏི ཙམརོ, མིགཝིསེསོ, ཏསྶ ཝཱལེན ཀཏཱ བཱིཛནཱི ཙཱམརཱ. ཨཱདིསདྡེན ཏིདཎྜཏིགྷཊིཀཱདཱིནི སངྒཎྷཱཏི. ཀུཙྪིཏེན ཝངྐཱཀཱརེན ཛཱཡཏཱིཏི ཀཱཛོ ཡཐཱ ‘‘ཀཱལཝཎ’’ནྟི; ཀཙཏི བྷཱརཾ བནྡྷཏི ཨེཏྠཱཏི ཝཱ ཀཱཙོ. དུཝིདྷམྤི ཧི པདམིཙྪནྟི སདྡཝིདཱུ. ཁཱརིབྷརིཏནྟི ཁཱརཱིཧི པརིཔུཎྞཾ. ཨེཀེན ཝི-ཀཱརེན པདཾ ཝཌྜྷེཏྭཱ ‘‘ཁཱརིཝིཝིདྷ’’ནྟི པཋནྟཱནཾ ཝཱདེ སམུཙྩཡསམཱསེན ཨཏྠཾ དསྶེནྟོ ‘‘ཡེ པནཱ’’ཏིཨཱདིམཱཧ.

ནནུ ཨུཔསམྤནྣསྶ བྷིཀྑུནོ སཱསནིཀོཔི ཡོ ཀོཙི ཨནུཔསམྤནྣོ ཨཏྠཏོ པརིཙཱརཀོཝ ཧོཏི ཨཔི ཁཱིཎཱསཝསཱམཎེརོ, ཀིམངྒཾ པན བཱཧིརཀཔབྦཛིཏེཏི ཨནུཡོགཾ པཏི ཏཏྠ ཝིསེསཾ དསྶེཏུཾ ‘‘ཀཱམཉྩཱ’’ཏིཨཱདི ཝུཏྟཾ. ཝུཏྟནཡེནཱཏི ‘‘ཀཔྤིཡ…པེ… ཝཏྟཀརཎཝསེནཱ’’ཏི ¶ ¶ ཨེཝཾ ཝུཏྟནཡེན. ཨནེཀསཏསཧསྶསཾཝརཝིནཡསམཱདཱནཝསེན ཨུཔསམྤནྣབྷཱཝསྶ ཝིསིཊྛབྷཱཝཏོ ཁཱིཎཱསཝསཱམཎེརོཔི པུཐུཛྫནབྷིཀྑུནོ པརིཙཱརཀོཏི ཝུཏྟོ.

‘‘ནཝཀོཊིསཧསྶཱནི, ཨསཱིཏིསཏཀོཊིཡོ;

པཉྙཱསསཏསཧསྶཱནི, ཚཏྟིཾས ཙ པུནཱཔརེ;

ཨེཏེ སཾཝརཝིནཡཱ, སམྦུདྡྷེན པཀཱསིཏཱ;

པེཡྻཱལམུཁེན ནིདྡིཊྛཱ, སིཀྑཱ ཝིནཡསཾཝརེ’’ཏི. (ཝིསུདྡྷི. ༡.༢༠; ཨཔ. ཨཊྛ. ༢.༥༥; པཊི. མ. ཨཊྛ. ༡.༢.༣༧);

ཨེཝཾ ཝུཏྟཔྤབྷེདཱནཾ ཨནེཀསཏསཧསྶཱནཾ སཾཝརཝིནཡཱནཾ སམཱདཱཡ སིཀྑནེན ཨུཔརིབྷཱུཏཱ ཨགྒབྷཱུཏཱ སམྤདཱཏི ཧི ཨུཔསམྤདཱ, ཏཱཡ ཙེས ཨུཔསམྤདཱཡ པུཐུཛྫནབྷིཀྑུ ཨུཔསམྤནྣོཏི.

ཨཡཾ པནཱཏི ཡཐཱཝུཏྟལཀྑཎོ ཏཱཔསོ. ཏཱཔསཱ ཧི ཀམྨཝཱདིཀིརིཡཝཱདིནོ, ན སཱསནསྶ པཊཱཎཱིབྷཱུཏཱ, ཡཏོ ནེསཾ པབྦཛིཏུམཱགཏཱནཾ ཝིནཱཝ ཏིཏྠིཡཔརིཝཱསེན ཁནྡྷཀེ པབྦཛྫཱ ཨནུཉྙཱཏཱ. ཏཔོ ཨེཏེསམཏྠཱིཏི ཏཱཔསཱ ཏ-ཀཱརསྶ དཱིགྷཾ ཀཏྭཱ. ‘‘ལོམསཱ’’ཏིཨཱདཱིསུ ཝིཡ ཧི ས-པཙྩཡམིཙྪནྟི སདྡཝིདཱུ. ཨིདཾ ཝུཏྟཾ ཧོཏི – ཀཱམཾ ཁཱིཎཱསཝོཔི སཱམཎེརོ པུཐུཛྫནསྶ བྷིཀྑུནོ ཨཏྠཏོ པརིཙཱརཀོཝ ཧོཏི, སོ པན ཝཏྟཀརཎམཏྟེནེཝ པརིཙཱརཀོ, ན ལཱམཀབྷཱཝེན. ཏཱཔསོ ཏུ གུཎཝསེན ཙེཝ ཝེཡྻཱཝཙྩཀརཎཝསེན ཙ ལཱམཀབྷཱཝེནེཝ པརིཙཱརཀོ, ན ཝཏྟཀརཎམཏྟེན, ཨེཝམིམེསཾ ནཱནཱཀརཎཾ སནྡྷཱཡ ཏཱཔསསྶེཝ པརིཙཱརཀཏཱ ཝུཏྟཱཏི.

‘‘ཀསྨཱ’’ཏིཨཱདིནཱ ཙོདཀོ ཀཱརཎཾ ཙོདེཏི. ‘‘ཡསྨཱ’’ཏིཨཱདིནཱ ཨཱཙརིཡོ ཀཱརཎཾ དསྶེཏྭཱ པརིཧརཏི. ཨེཝཾ སངྑེཔཏོ པརིཧརིཏམཏྠཾ ཝིཝརིཏུཾ ‘‘ཨིམསྨིཉྷཱི’’ཏིཨཱདི ཝུཏྟཾ. ཨསཀྐོནྟནྟི ཨསམཏྠནེན ཝིཔྤཊིཔཛྫནྟཾ ཨལཛྫིཾ. ཁུརདྷཱརཱུཔམནྟི ཁུརདྷཱརཱནཾ མཏྠཀེནེཝ ཨཀྐམིཏྭཱ གམནཱུཔམཾ. བཧུཛནསམྨཏཱཏི མཧཱཛནེན སེཊྛསམྨཏཱ. ཨཉྙེཏི ཨཔརེ བྷིཀྑཱུ. ཨིདྷཱཏི ཏཱཔསཔབྦཛྫཱཡ. ཚནྡེན སཧ ཙརནྟཱིཏི སཚནྡཙཱརིནོ, ཡཐཱཀཱམཾ པཊིཔནྣཀཱཏི ཝུཏྟཾ ཧོཏི. ཨནུསིཀྑནྟོཏི དིཊྛཱནུགཏིཡཱ སིཀྑནྟོ. ཏཱཔསཱཝ བཧུཀཱ ཧོནྟི, ན བྷིཀྑཱུ.

ཀུདཱལཔིཊཀཱནཾ ¶ ནིབྦཙནཾ ཧེཊྛཱ ཝུཏྟམེཝ. བཧུཛནཀུཧཱཔནཏྠནྟི བཧུནོ ཛནསྶ ཝིམྷཱཔནཏྠཾ ¶ . ཨགྒིསཱལནྟི ཨགྒིཧུཏྟསཱལཾ. ནཱནཱདཱརཱུཧཱིཏི པལཱསརུཀྑདཎྜཱདཱིཧི ནཱནཱཝིདྷསམིདྷཱདཱརཱུཧི. ཧོམཀརཎཝསེནཱཏི ཡཉྙཀརཎཝསེན.

ཨུདཀཝསེནེཏྠ པཱནཱགཱརཾ. ཏེནཱཧ ‘‘པཱནཱིཡཾ ཨུཔཊྛཔེཏྭཱ’’ཏིཨཱདི. ཡཾ བྷཏྟཔུཊཾ ཝཱ ཡཱནི ཏཎྜུལཱདཱིནི ཝཱཏི སམྦནྡྷོ. ཨམྦིལཡཱགུ ནཱམ ཏཀྐཱདིཨམྦིལསཾཡུཏྟཱ ཡཱགུ. ཏཎྷཱདཱིཧི ཨཱམསིཏབྦཏོ ཙཱིཝརཱདི ཨཱམིསཾ ནཱམ. ཝཌྜྷིཡཱཏི དིགུཎཏིགུཎཱདིཝཌྜྷིཡཱ. ཀུཊུམྦཾ སཎྛཔེཏཱིཏི དྷནཾ པཏིཊྛཱཔེཏི. ཡཐཱཝུཏྟམཏྠཾ པཱལི༹ཡཾ ནིདསྶནམཏྟེན ཝུཏྟནྟི ཨཱཧ ‘‘ཨིདཾ པནསྶ པཊིཔཏྟིམུཁ’’ནྟི, ཨིདཾ པན པཱལི༹ཝཙནཾ ཨསྶ ཙཏུཏྠསྶ པུགྒལསྶ ཀོཧཉྙཔཊིཔཏྟིཡཱ མུཁམཏྟནྟི ཨཏྠོ. ཀསྨཱཏི ཙེ? སོ ཧི ནཱནཱཝིདྷེན ཀོཧཉྙེན ལོཀཾ ཝིམྷཱཔཡནྟོ ཏཏྠ ཨཙྪཏི. ཏེནཱཧ ‘‘ཨིམིནཱ ཧཱི’’ཏིཨཱདི. ཨེཝནྟི ‘‘ཏཏྠ པཱནཱིཡཾ ཨུཔཊྛཔེཏྭཱ’’ཏིཨཱདིནཱ ཝུཏྟནཡེན.

‘‘སབྦཱཔི ཏཱཔསཔབྦཛྫཱ ནིདྡིཊྛཱ’’ཏི དྷམྨཱདྷིཊྛཱནནཡེན དསྶིཏམེཝ པུགྒལཱདྷིཊྛཱནནཡེན ཝིཝརིཏུཾ ‘‘ཨཊྛཝིདྷཱ ཧཱི’’ཏིཨཱདི ཝུཏྟཾ. ཁལཱདཱིསུ མནུསྶཱནཾ སནྟིཀེ ཨུཔཏིཊྛིཏྭཱ ཝཱིཧིམུགྒམཱསཏིལཱདཱིནི བྷིཀྑཱཙརིཡནིཡཱམེན སངྐཌྜྷིཏྭཱ ཨུཉྪནཾ ཨུཉྪཱ, སཱ ཨེཝ ཙརིཡཱ ཝུཏྟི ཨེཏེསནྟི ཨུཉྪཱཙརིཡཱ. ཨགྒིཔཀྐིཀཱཡ བྷཏྟབྷིཀྑཱཡ ཛཱིཝནྟཱིཏི ཨགྒིཔཀྐིཀཱ, ན ཨགྒིཔཀྐིཀཱ ཨནགྒིཔཀྐིཀཱ, ཏཎྜུལབྷིཀྑཱཡ ཨེཝ ཛཱིཝིཀཱཏི ཝུཏྟཾ ཧོཏི. ཨུཉྪཱཙརིཡཱ ཧི ཁལཱདཱིནི གནྟྭཱ ཨུཔཏིཊྛིཏྭཱ མནུསྶེཧི དིཡྻམཱནཾ ཁལགྒཾ ནཱམ དྷཉྙཾ པཊིགྒཎྷནྟི, ཨནགྒིཔཀྐིཀཱ པན ཏཱདིསམཔཊིགྒཎྷིཏྭཱ ཏཎྜུལམེཝ པཊིགྒཎྷནྟཱིཏི ཨཡམེཏེསཾ ཝིསེསོ. ན སཡཾ པཙནྟཱིཏི ཨསཱམཔཱཀཱ, པཀྐབྷིཀྑཱཡ ཨེཝ ཛཱིཝིཀཱ. ཨཡོ ཝིཡ ཀཊྛིནོ མུཊྛིཔྤམཱཎོ པཱསཱཎོ ཨཡམུཊྛི ནཱམ, ཏེན ཝཏྟནྟཱིཏི ཨཡམུཊྛིཀཱ. དནྟེན ཨུཔྤཱཊིཏཾ ཝཀྐལཾ རུཀྑཏྟཙོ དནྟཝཀྐལཾ, ཏེན ཝཏྟནྟཱིཏི དནྟཝཀྐལིཀཱ. པཝཏྟཾ རུཀྑཱདིཏོ པཱཏཱཔིཏཾ ཕལཾ བྷུཉྫནྟི སཱིལེནཱཏི པཝཏྟཕལབྷོཛིནོ. པཎྜུཔལཱསསདྡསྶ ཨེཀསེསནཡེན དྭིདྷཱ ཨཏྠོ, ཛིཎྞཏཱཡ པཎྜུབྷཱུཏཾ པལཱསཉྩེཝ ཛིཎྞཔཀྐབྷཱཝེན ཏཾསདིསཾ པུཔྥཕལཱདི ¶ ཙཱཏི. ཏེན ཝཀྑཏི ‘‘སཡཾ པཏིཏཱནེཝ པུཔྥཕལཔཎྜུཔལཱསཱདཱིནི ཁཱདནྟཱ ཡཱཔེནྟཱི’’ཏི, (དཱི. ནི. ཨཊྛ. ༡.༢༨༠) ཏེན ཝཏྟནྟཱིཏི པཎྜུཔལཱསིཀཱ, སཡཾཔཏིཏཔཎྞཔུཔྥཕལབྷོཛིནོ. ཨིདཱནི ཏེ ཨཊྛཝིདྷེཔི སརཱུཔཏོ དསྶེཏུཾ ‘‘ཏཏྠཱ’’ཏིཨཱདི ཝུཏྟཾ. ཀེཎིཡཛཊིལཝཏྠུ ཁནྡྷཀཝཎྞནཱཡ (མཧཱཝ. ཨཊྛ. ༣༠༠) གཧེཏབྦཾ.

སངྐཌྜྷིཏྭཱཏི བྷིཀྑཱཙརིཡཱཝསེན ཨེཀཛ྄ཛྷཾ ཀཏྭཱ.

ཏཎྜུལབྷིཀྑནྟི ¶ ཏཎྜུལམེཝ བྷིཀྑཾ. བྷིཀྑིཏབྦཱ ཡཱཙིཏབྦཱ, བྷིཀྑཱུནཾ ཨཡནྟི ཝཱ བྷིཀྑཱཏི ཧི བྷིཀྑཱསདྡོ ཏཎྜུལཱདཱིསུཔི ནིརུལ༹ྷོ. ཏེན ཝུཏྟཾ ‘‘པཙིཏྭཱ པརིབྷུཉྫནྟཱི’’ཏི.

བྷིཀྑཱཔརིཡེཊྛི ནཱམ དུཀྑཱཏི པརེསཾ གེཧཏོ གེཧཾ གནྟྭཱ བྷིཀྑཱཡ པརིཡེསནཱ ནཱམ དཱིནཝུཏྟིབྷཱཝེན དུཀྑཱ.

ཡེ པན ‘‘པཱསཱཎསྶ པརིགྒཧོ ནཱམ དུཀྑོ པབྦཛིཏསྶཱ’’ཏི དནྟེཧེཝ ཨུཔྤཱཊེཏྭཱ ཁཱདནྟི, ཏེ དནྟཝཀྐལིཀཱ ནཱམཱཏི ཨཡཾ ཨཊྛཀཐཱམུཏྟཀནཡོ.

པཎྜུཔལཱསསདྡོ པུཔྥཕལཝིསཡོཔི སདིསཏཱཀཔྤནེནཱཏི དསྶེཏི ‘‘པུཔྥཕལཔཎྜུཔལཱསཱདཱིནཱི’’ཏི ཨིམིནཱ.

ཏེཏི པཎྜུཔལཱསིཀཱ. ནིདསྶནམཏྟམེཏཾ ཨཉྙེསམྤི ཏཐཱ བྷེདསམྦྷཝཏོ. པཱཔུཎནཊྛཱནེཏི གཧེཏུཾ སམྤཱཔུཎནཊྛཱནེ. ཨེཀརུཀྑཏོཏི པཋམཾ ཨུཔགཏརུཀྑཏོ.

ཀཐམེཏྟཱཝཏཱ སབྦཱཔི ཏཱཔསཔབྦཛྫཱ ནིདྡིཊྛཱཏི ཙོདནཱ ན ཏཱཝ ཝིསོདྷིཏཱཏི ཨཱཧ ‘‘ཨིམཱ པནཱ’’ཏིཨཱདི. ཙཏཱུཧིཡེཝཱཏི ‘‘ཁཱརིཝིདྷམཱདཱཡཱ’’ཏིཨཱདིནཱ ཝུཏྟཱཧི པཝཏྟཕལབྷོཛནིཀཱ, ཀནྡམཱུལཕལབྷོཛནིཀཱ, ཨགྱཱགཱརིཀཱ, ཨཱགཱརིཀཱ ཙེཏི ཙཏཱུཧི ཨེཝ ཏཱཔསཔབྦཛྫཱཧི. ཨགཱརཾ བྷཛནྟཱིཏི ཨགཱརཾ ནིཝཱསབྷཱཝེན ཨུཔགཙྪནྟི. ཨིམིནཱ ཧི ‘‘ཙཏུདྭཱརཾ ཨགཱརཾ ཀརིཏྭཱ ཨཙྪཏཱི’’ཏིཨཱདིནཱ ཨིདྷ ཝུཏྟཱཡ ཙཏུཏྠཱཡ ཏཱཔསཔབྦཛྫཱཡ ཏེསམཝརོདྷཏཾ དསྶེཏི. ཨེཝམིཏརེསུཔི པཊིལོམཏོ ཡོཛནཱ ཝེདིཏབྦཱ. ཨགྒིཔརིཙརཎཝསེན ཨགྱཱགཱརཾ བྷཛནྟི ¶ . ཨེཝཾ པན ཏེསམཝརོདྷཏཾ ཝདནྟོ ཏདནུརཱུཔཾ ཨིམེསམྤི པཙྩེཀཾ དུཝིདྷཏཾ དསྶེཏཱིཏི དཊྛབྦཾ.

༢༨༡. ཨཱཙརིཡེན པོཀྑརསཱཏིནཱ སཧ པཝཏྟཏཱིཏི སཱཙརིཡཀོ, ཏསྶ. ཨཔཱཡམུཁམྤཱིཏི ཝིནཱསཀཱརཎམྤི. པགེཝ ཝིཛྫཱཙརཎསམྤདཱཡ སནྡིསྶནེཏི པི-སདྡོ གརཧཱཡཾ. ཏེན ཝུཏྟཾ ‘‘ཨཔི ནུ ཏྭཾ ཨིམཱཡ ཨནུཏྟརཱཡ ཝིཛྫཱཙརཎསམྤདཱཡ སནྡིསྶསི སཱཙརིཡཀོ’’ཏིཨཱདི. ཏཏྲཱཡམཊྛཀཐཱམུཏྟཀནཡོ – ‘‘ནོ ཧིདཾ བྷོ གོཏམཱ’’ཏི སནྡིསྶནཾ པཊིཀྑིཔིཏྭཱ ཨསནྡིསྶནཱཀཱརམེཝ ཝིབྷཱཝེཏུཾ ‘‘ཀོ ཙཱཧ’’ནྟིཨཱདི ཝུཏྟཾ. སཱཙརིཡཀོ ཨཧཾ ཀོ ཙ ཀཱིདིསོ ཧུཏྭཱ ཨནུཏྟརཱཡ ཝིཛྫཱཙརཎསམྤདཱཡ སནྡིསྶཱམི, ཨནུཏྟརཱ ཝིཛྫཱཙརཎསམྤདཱ ¶ ཀཱ ཙ ཀཱིདིསཱ ཧུཏྭཱ སཱཙརིཡཀེ མཡི སནྡིསྶཏི, ཨཱརཀཱ ཨཧཾ…པེ… སཱཙརིཡཀོཏི སཧ པཱཋསེསེན ཡོཛནཱ.

༢༨༢. ཨཔཱཡེ ཝིནཱསནུཔཱཡེ ནིཡུཏྟོ ཨཱཔཱཡིཀོ. ཏབྦྷཱཝཾ ན པརིཔཱུརེཏི པརིཔཱུརེཏུཾ ན སཀྐོཏཱིཏི ཨཔརིཔཱུརམཱནོ, ཏབྦྷཱཝེན ཨཔརིཔུཎྞོཏི ཨཏྠོ. ཨཏྟནཱ ཨཱཔཱཡིཀེན ཧོནྟེནཱཔི ཏབྦྷཱཝཾ ཨཔརིཔཱུརམཱནེན པོཀྑརསཱཏིནཱ ཨེསཱ ཝཱཙཱ བྷཱསིཏཱཏི ཨཏྠཏོ སམྦནྡྷཏྟཱ ཀཏྭཏྠེ ཙེཏཾ པཙྩཏྟཝཙནནྟི ཨཱཧ ‘‘ཨཱཔཱཡིཀེནཱཔི ཨཔརིཔཱུརམཱནེནཱ’’ཏི. ཨཔིཙ ཨཏྟནཱ ཨཔརིཔཱུརམཱནེན ཨཱཔཱཡིཀེནཱཔི སཡཾ ཨཔརིཔཱུརམཱནཱཔཱཡིཀེན ཧུཏྭཱཔི པོཀྑརསཱཏིནཱ ཨེསཱ ཝཱཙཱ བྷཱསིཏཱཏི ཨཏྠཡུཏྟིཏོ ཨིཏྠམྦྷཱུཏལཀྑཎེ ཙེཏཾ པཙྩཏྟཝཙནནྟིཔི ཨེཝཾ ཝུཏྟཾ. ཨཉྙོ ཧི སདྡཀྐམོ, ཨཉྙོ ཨཏྠཀྐམོཏི. ཀེཙི པན ‘‘ཀརཎཏྠམེཝ དསྶེཏུཾ ཨེཝཾ ཝུཏྟ’’ནྟི ཝདནྟི, ཏདཡུཏྟམེཝ པདདྭཡསྶ ཀཏྟུཔདེན སམཱནཏྠཏྟཱ, སམཱནཏྠཱནཉྩ པདཱནཾ ཨཉྙམཉྙཾ ཀརཎབྷཱཝཱནུཔཔཏྟིཏོ, ཨལམཏིཔཔཉྩེན.

པུབྦཀཨིསིབྷཱཝཱནུཡོགཝཎྞནཱ

༢༨༣. དཱིཡཏེཏི དཏྟི, སཱ ཨེཝ དཏྟིཀནྟི ཨཱཧ ‘‘དིནྣཀ’’ནྟི. ཨདཱཏུཀཱམམྤི དཱཏུཀཱམཾ ཀཏྭཱ སམྨུཁཱ པརམཱཝཊྚེཏི སམྨཱུལ༹ྷཾ ཀརོཏི ཨེཏཱཡཱཏི སམྨུཁཱཝཊྚནཱི. ཏེནཱཧ ‘‘ན དེམཱིཏི ཝཏྟུཾ ན སཀྐོཏཱི’’ཏི. པུན ཏསྶཱཏི བྲཱཧྨཎསྶ. ཀཱརཎཱནུརཱུཔཾ རཱཛཱུནཾ པུཎྞཔཏྟནྟི ཨཱཧ ‘‘ཀསྨཱ མེ ¶ དིནྣོ’’ཏི. སངྑཔལིཏཀུཊྛནྟི དྷོཏསངྑམིཝ སེཏཀུཊྛཾ. སེཏཔོཀྑརརཛཏཏོ གུཎསམཱནཀཱཡཏྟཱ ཨེཝམཱཧ. ཨནུགཙྪཏཱིཏི པརམནུབནྡྷཏི.

ཡདི དུཝིདྷེནཔི ཀཱརཎེན རཱཛཱ བྲཱཧྨཎསྶ སམྨུཁཱབྷཱཝཾ ན དེཏི, ཨཐ ཀསྨཱ ཏདུཔསངྐམནཾ ན པཊིཀྑིཏྟནྟི ཨཱཧ ‘‘ཡསྨཱ པནཱ’’ཏིཨཱདི. ‘‘ཁེཏྟཝིཛྫཱཡཱཏི ནཱིཏིསཏྠེ’’ཏི (དཱི. ནི. ཊཱི. ༡.༢༨༣) ཨཱཙརིཡེན ཝུཏྟཾ. ཧེཊྛཱཔི བྲཧྨཛཱལཝཎྞནཱཡཾ ཨེཝཾ ཝུཏྟཾ ‘‘ཁེཏྟཝིཛྫཱཏི ཨབྦྷེཡྻམཱསུརཀྑརཱཛསཏྠཱདིནཱིཏིསཏྠ’’ནྟི. (དཱི. ནི. ཨཊྛ. ༡.༢༡) དུསྶམེཏྠ ཏིརོཀརཎིཡཾ. ཏེནཱཧ ‘‘སཱཎིཔཱཀཱརསྶ ཨནྟོ ཋཏྭཱ’’ཏི. ཨནྟསདྡེན པན ཏབྦྷཱཝེན པདེ ཝཌྜྷིཡམཱནེ དུསྶནྟཾ ཡཐཱ ‘‘ཝནནྟོ’’ཏི. ‘‘པཡཱཏནྟི སདྡྷཾ, སསྶཏིཀཾ ཝཱ. ཏེནཱཧ ཨབྷིཧརིཏྭཱ དིནྣ’’ནྟི ཨཱཙརིཡེན ཝུཏྟཾ, ཏསྨཱ མཏཀབྷཏྟསངྑེཔེན ཝཱ ནིཙྩབྷཏྟསངྑེཔེན ཝཱ ཨབྷིཧརིཏྭཱ དིནྣཾ བྷིཀྑནྟི ཨཏྠོ ཝེདིཏབྦོ. ‘‘ཨཡཾ པནཱ’’ཏིཨཱདི ཨཏྠཱཔཏྟིཝཙནཾ. ནིཊྛནྟི ནིཙྪཡཾ. ཀསྨཱ པན བྷགཝཱ བྲཱཧྨཎསྶ ཨེཝརཱུཔཾ ཨམནཱཔཾ མམྨཝཙནཾ ཨཝོཙཱཏི ཙོདནཾ ¶ ཀཱརཎཾ དསྶེཏྭཱ སོདྷེཏུཾ ‘‘ཨིདཾ པནཱ’’ཏིཨཱདི ཝུཏྟཾ. རཧསྶམྤི པཊིཙྪནྣམྤི མམྨཝཙནཾ པཀཱསེསཱིཏི སམྦནྡྷོ.

༢༨༤. རཱཛཱསནཾ ནཱམ ཧཏྠིཀྑནྡྷཔདེསཾ སནྡྷཱཡ ‘‘ཧཏྠིགཱིཝཱཡ ཝཱ ནིསིནྣོ’’ཏི པཱལི༹ཡཾ ཝུཏྟཾ. རཐཱུཔཏྠརེཏི རཐསྶ ཨུཔརི ཨཏྠརིཏཔདེསེ. ཏེནཱཧ ‘‘རཐམྷཱི’’ཏིཨཱདི. ཨུགྒཏུགྒཏེཧཱིཏི ཨུགྒཏཱནམཏིསཡེན ཨུགྒཏེཧི. ན ཧི ཝིཙྪཱསམཱསོ ལོཀིཀེཧི ཨབྷིམཏོཏི. རཉྙོ ཨཔཙྩཾ རཱཛཉྙོ, བཧུཀཏྟཾ པཏི, ཨེཀསེསནཡེན ཝཱ ‘‘རཱཛཉྙེཧཱི’’ཏི ཝུཏྟཾ. པཱཀཊམནྟནནྟི པཀཱསབྷཱུཏཾ མནྟནཾ. ཏདེཝིདྷཱདྷིཔྤེཏཾ, ན རཧསྶམནྟནཾ སུདྡཱདཱིཧིཔི སུཡྻམཱནསྶ ཨིཙྪིཏཏྟཱ. ཏེན ཝུཏྟཾ ‘‘ཨཐ ཨཱགཙྪེཡྻ སུདྡོ ཝཱ སུདྡདཱསོ ཝཱ’’ཏིཨཱདི. ཏཱདིསེཧིཡེཝཱཏི རཉྙོ ཨཱཀཱརསདིསེཧེཝ. ཏསྶཏྠསྶ སཱདྷནསམཏྠཾ ཝཙནཾ རཉྙཱ བྷཎིཏཾ ཡཐཱ, ཏཐཱ སོཔི ཏསྶཏྠསྶ སཱདྷནསམཏྠམེཝ བྷཎིཏཾ ཝཙནཾ ཨཔིནུ བྷཎཏཱིཏི ཡོཛེཏབྦཾ.

༢༨༥. ‘‘པཝཏྟཱརོ’’ཏི ཨེཏསྶ པཱཝཙནབྷཱཝེན ཝཏྟཱརོཏི སདྡཏོ ཨཏྠོ. ཡསྨཱ པན ཏེ ཏཐཱབྷཱུཏཱ མནྟཱནཾ པཝཏྟཀཱ ནཱམ, ཏསྨཱ ¶ ཨདྷིཔྤཱཡཏོ ཨཏྠཾ དསྶེཏུཾ ‘‘པཝཏྟཡིཏཱརོ’’ཏི ཝུཏྟཾ. ཝདསདྡེན, ཧི ཏུཔཙྩཡེན ཙ ‘‘ཝཏྟཱརོ’’ཏི པདསིདྡྷི, ཏཐཱ ཝཏུསདྡེན ‘‘པཝཏྟཡིཏཱརོ’’ཏི. ཨིདཾ ཨཱཙརིཡསྶ (དཱི. ནི. ཊཱི. ༡.༢༨༥) ཙ ཨཱཙརིཡསཱརིཔུཏྟཏྠེརསྶ ཙ མཏཾ. ཝཏུསདྡེནེཝ ‘‘པཝཏྟཱརོ’’ཏི པདསིདྡྷིཾ དསྶེཏཱིཏིཔི ཀེཙི ཝདནྟི. པདདྭཡསྶ ཏུལྱཱདྷིཀརཎཏྟཱ ‘‘མནྟམེཝཱ’’ཏི ཝུཏྟཾ. ‘‘སུདྡེ བཧི ཀཏྭཱ རཧོ བྷཱསིཏབྦཊྛེན མནྟཱ ཨེཝ ཏཾ ཏཾ ཨཏྠཔཊིཔཏྟིཧེཏུཏཱཡ པད’’ནྟི ཧི ཏུལྱཱདྷིཀརཎཾ ཧོཏི, ཨནུཔནཱིཏཱསཱདྷཱརཎཏཱཡ རཧསྶབྷཱཝེན ཝཏྟབྦཱཡ མནྟནཀིརིཡཱཡ པདམདྷིགམུཔཱཡནྟིཔི མནྟཔདནྟི ཨཊྛཀཐཱམུཏྟཀོ ནཡོ. གཱིཏནྟི གཱཡནཝསེན སཛ྄ཛྷཱཡིཏཾ, གཱཡནམྤིདྷ ཨུདཏྟཱནུདཏྟཱདིསརསམྤཱདནཝསེནེཝ ཨདྷིཔྤེཏནྟི ཝུཏྟཾ ‘‘སརསམྤཏྟིཝསེནཱ’’ཏི. པཱཝཙནབྷཱཝེན ཨཉྙེསཾ ཝུཏྟཾ. ཏམཉྙེསཾ ཝཱདཱཔནཝསེན ཝཱཙིཏཾ. སངྒཧེཏྭཱ ཨུཔརཱུཔརི སཉྙཱུལ༹ྷཱཝསེན སམུཔབྱཱུལ༹ྷཾ. ཨིརུཝེདཡཛུཝེདསཱམཝེདཱདིཝསེན, ཏཏྠཱཔི པཙྩེཀཾ མནྟབྲཧྨཱདིཝསེན, ཨཛ྄ཛྷཱཡཱནུཝཱཀཱདིཝསེན ཙ རཱསིཀཏཾ. ཡཐཱཝུཏྟནཡེནེཝ པིཎྜཾ ཀཏྭཱ ཋཔིཏཾ. ཨཉྙེསཾ ཝཱཙིཏཾ ཨནུཝཱཙེནྟཱིཏི ཨཉྙེསཾ ཀམྨབྷཱུཏཱནཾ ཏེཧི ཝཱཙཱཔིཏཾ མནྟཔདཾ ཨེཏརཧི བྲཱཧྨཎཱ ཨཉྙེསཾ ཨནུཝཱཙཱཔེནྟི.

ཏེསནྟི མནྟཀཏྟཱུནཾ. དིབྦཙཀྑུཔརིབྷཎྜཾ ཡཐཱཀམྨཱུཔགཉཱཎཾ, པཙྩཀྑཏོ དསྶནཊྛེན དིབྦཙཀྑུསདིསཉྩ པུབྦེནིཝཱསཱནུསྶཏིཉཱཎཾ སནྡྷཱཡ ‘‘དིབྦེན ཙཀྑུནཱ’’ཏི ཝུཏྟཾ. ཨཏོ དིབྦཙཀྑུཔརིབྷཎྜེན ¶ ཡཐཱཀམྨཱུཔགཉཱཎེན སཏྟཱནཾ ཀམྨསྶཀཏཱདཱིནི ཙེཝ དིབྦཙཀྑུསདིསེན པུབྦེནིཝཱསཱནུསྶཏིཉཱཎེན ཨཏཱིཏཀཔྤེ བྲཱཧྨཎཱནཾ མནྟཛ྄ཛྷེནཝིདྷིཉྩ ཨོལོཀེཏྭཱཏི ཨཏྠོ གཧེཏབྦོ. རཱུཔམེཝ ཧི པཙྩུཔྤནྣཾ དིབྦཙཀྑུསྶ ཨཱརམྨཎནྟི ཏམིདྷ ཨཊྛཱནགཏཾ ཧོཏི. པཱཝཙནེན སཧ སཾསནྡིཏྭཱཏི ཡཾ ཀསྶཔསམྨཱསམྦུདྡྷེན ཝུཏྟཾ ཝཊྚསནྣིསྶིཏཾ ཝཙནཾ, ཏེན སཧ སཾསནྡིཏྭཱ ཨཝིརུདྡྷཾ ཀཏྭཱ. ན ཧི ཏེསཾ ཝིཝཊྚསནྣིསྶིཏོ ཨཏྠོ པཙྩཀྑཏོ ཧོཏི. གནྠིཾསཱུཏི པཛྫགཛྫབནྡྷཝསེན སཀྐཏབྷཱསཱཡ བནྡྷིཾསུ. ཨཔརཱ པརེཏི ཨཊྛཀཱདཱིཧི ཨཔརཱ ཨཉྙེཔི པརེ པཙྪིམཱ ཨོཀྐཱཀརཱཛཀཱལཱདཱིསུ ཨུཔྤནྣཱ. པཱཎཱཏིཔཱཏཱདཱིནི པཀྑིཔིཏྭཱཏི ཨཊྛཀཱདཱིཧི གནྠིཏམནྟཔདེསྭེཝ པཱཎཱཏིཔཱཏཱདིཀིལེསསནྣིསྶིཏཔདཱནཾ ཏཏྠ ཏཏྠ པཀྑིཔནཾ ཀཏྭཱ. ཝིརུདྡྷེ ཨཀཾསཱུཏི སུཏྟནིཔཱཏེ བྲཱཧྨཎདྷམྨིཀསུཏྟཱདཱིསུ (སུ. ནི. བྲཱཧྨཎདྷམྨིཀསུཏྟ) ཨཱགཏནཡེན སཾཀིལེསིཀཏྠདཱིཔནཏོ ¶ པཙྩནཱིཀབྷཱུཏེ ཨཀཾསུ. ཨིསཱིཏི ནིདསྶནམཏྟཾ. ‘‘ཨིསི ཝཱ ཨིསིཏྠཱཡ པཊིཔནྣོ ཝཱ’’ཏི ཧི ཝཏྟབྦཾ. ཀསྨཱ པནེཏྠ པཊིཉྙཱགཧཎཝསེན དེསནཱསོཏཔཏིཏཾ ན ཀརོཏཱིཏི ཨཱཧ ‘‘ཨིདྷ བྷགཝཱ’’ཏིཨཱདི. ཨིདྷཱཏི ‘‘ཏྱཱཧཾ མནྟེ ཨདྷཱིཡཱམི, ‘སཱཙརིཡཀོ’ཏི ཏྭཾ མཉྙསཱི’’ཏི ཝུཏྟཊྛཱནེ. པཊིཉྙཾ ཨགྒཧེཏྭཱཏི ཡཐཱ ཧེཊྛཱ པཊིཉྙཱ གཧིཏཱ, ཏཐཱ ‘‘ཏཾ ཀིཾ མཉྙསི ཨམྦཊྛ, ཏཱཝཏཱ ཏྭཾ བྷཝིསྶསི ཨིསི ཝཱ ཨིསིཏྠཱཡ ཝཱ པཊིཔནྣོ སཱཙརིཡཀོཏི, ནོ ཧིདཾ བྷོ གོཏམཱ’’ཏི ཨེཝཾ ཨིདྷ པཊིཉྙཾ ཨགྒཧེཏྭཱ.

༢༨༦. ནིརཱམགནྡྷཱཏི ཀིལེསཱསུཙིཝསེན ཝིསྶགནྡྷརཧིཏཱ. ཨནིཏྠིགནྡྷཱཏི ཨིཏྠཱིནཾ གནྡྷམཏྟསྶཔི ཨཝིསཧནེན ཨིཏྠིགནྡྷརཧིཏཱ. རཛོཛལླདྷརཱཏི པཀཏིརཛསེདཱདིཛལླདྷརཱ. པཱཀཱརཔུརིསགུཏྟཱིཏི པཱཀཱརཱཝརཎཾ, པུརིསཱཝརཎཉྩ. ཨེཏྠ པན ‘‘ནིརཱམགནྡྷཱ’’ཏི ཨེཏེན ཏེསཾ དསནྣཾ བྲཱཧྨཎཱནཾ ཝིཀྑམྦྷིཏཀིལེསཏཾ དསྶེཏི, ‘‘ཨནིཏྠིགནྡྷཱ, བྲཧྨཙཱརིནོ’’ཏི ཙ ཨེཏེན ཨེཀཝིཧཱརིཏཾ, ‘‘རཛོཛལླདྷརཱ’’ཏི ཨེཏེན མཎྜནཝིབྷཱུསནཱབྷཱཝཾ, ‘‘ཨརཉྙཱཡཏནེ པབྦཏཔཱདེསུ ཝསིཾསཱུ’’ཏི ཨེཏེན མནུསྶཱུཔཙཱརཾ པཧཱཡ ཝིཝིཏྟཝཱསཾ, ‘‘ཝནམཱུལཕལཱཧཱརཱ ཝསིཾསཱུ’’ཏི ཨེཏེན སཱལིམཾསོདནཱདིཔཎཱིཏཱཧཱར པཊིཀྑེཔཾ, ‘‘ཡདཱ’’ཏིཨཱདིནཱ ཡཱནཝཱཧནཔཊིཀྑེཔཾ, ‘‘སབྦདིསཱསཱུ’’ཏིཨཱདིནཱ རཀྑཱཝརཎཔཊིཀྑེཔཾ. ཨེཝཉྩ དསྶེནྟོ མིཙྪཱཔཊིཔདཱཔཀྑིཀཾ སཱཙརིཡཀསྶ ཨམྦཊྛསྶ ཝུཏྟིཾ ཨུཔཱདཱཡ སམྨཱཔཊིཔདཱཔཀྑིཀཱཔི ཏེསཾ བྲཱཧྨཎཱནཾ ཝུཏྟི ཨརིཡཝིནཡེ སམྨཱཔཊིཔཏྟིཾ ཨུཔཱདཱཡ མིཙྪཱཔཊིཔདཱཡེཝ. ཀཐཉྷི ནཱམ ཏེ བྷཝིསྶཏི སལླེཁཔཊིཔཏྟིཡུཏྟཏཱཏི. ‘‘ཨེཝཾ སུ ཏེ’’ཏིཨཱདིནཱ བྷགཝཱ ཨམྦཊྛཾ སནྟཛྫེནྟོ ནིགྒཎྷཱཏཱིཏིཔི ཝིབྷཱཝེཏི. ཨིདཉྷི ཝཀྑམཱནཱཡ པཱལི༹ཡཱ པིཎྜཏྠདསྶནནྟི.

དུསྶཔཊྚིཀཱ དུསྶཔཊྚཾ. དུསྶཀལཱཔོ དུསྶཝེཎཱི. ཝེཋཀེཧཱིཏི ཝེཋཀཔཊྚཀེཧི, དུསྶེཧི སཾཝེཋེཏྭཱ ¶ ཀཏནམིཏཕཱསུཀཱཧཱིཏི ཝུཏྟཾ ཧོཏི. ཀཔྤེཏུནྟི ཀཏྟརིཀཱཡ ཚིནྡིཏུཾ. ཀཔྤིཏཝཱལེཧཱིཏི ཨེཏྠཱཔི ཨེསེཝ ནཡོ. ‘‘ན བྷིཀྑཝེ མསྶུ ཀཔྤཱཔེཏབྦ’’ནྟིཨཱདཱིསུ (ཙཱུལ༹ཝ. ༢༧༥) ཝིཡ ཧི ཀཔུསདྡོ ཚེདནེ ཝཏྟཏི. ཡུཏྟཊྛཱནེསཱུཏི གཱིཝཱསཱིསཝཱལདྷཱིསུ. ཝཱལཱཏི ཏེསུ ཋཱནེསུ ཛཱཡམཱནཱ ལོམཱ. སཧཙརཎཝསེན, ཋཱནཱིནཱམེན ཝཱ ‘‘ཀུཏྟཝཱལཱ’’ཏི ¶ ཝུཏྟཱ. ཀེཙི པན ‘‘ཝཱལ༹ཡུཏྟཏྟཱ’’ཏི པཱཋཾ ཀཔྤེཏྭཱ ཝཱལ༹རཱུཔཡུཏྟཏྟཱཏི ཨཏྠཾ ཝདནྟི, པཱལི༹ཡཱནཔེཀྑནམེཝ ཏེསཾ དོསོ. ‘‘ཀུཏྟཝཱལེཧི ཝལ༹ཝཱརཐེཧཱི’’ཏི པཱལི༹ཡཾ ཝུཏྟཾ. སམནྟཱནགརནྟི ནགརསྶ སམནྟཏོ. པཱཀཱརསྶ ཨདྷོབྷཱགེ ཀཏསུདྷཱཀམྨཾ ཋཱནཾ ནགརསྶ སམཱིཔེ ཀཏྟབྦཏོ, ཨུཔཀཱརཀརཎཏོ ཙ ‘‘ཨུཔཀཱརིཀཱ’’ཏི ཝུཙྩཏི. ནགརསྶ ཨུཔཀཱརིཀཱ ཨེཏཱསནྟི ནགརཱུཔཀཱརིཀཱཡོ, རཱཛདྷཱནཱིཨཔེཀྑཱཡ ཨིཏྠིལིངྒནིདྡེསོ. ཏེནཱཧ ‘‘ཨིདྷ པནཱ’’ཏིཨཱདི. མཏཱིཏི ཝིཙིཀིཙྪཱཝསེན ཨནེཀཾསིཀཛཱནནཱ. ཨུཔརི དེསནཱཡ ཨཝཌྜྷཀཱརཎཾ དསྶེནྟོ ‘‘ཨིདཾ བྷགཝཱ’’ཏིཨཱདིམཱཧ. པཱལི༹ཡཾ སོ མཾ པཉྷེནཱཏི སོ ཛནོ མཾ པུཙྪཱཝསེན སོདྷེཡྻ. ཨཧཾ ཝེཡྻཱཀརཎེན སོདྷེསྶཱམཱིཏི ཨཧམྤིམཾ ཝིསྶཛྫནཱཝསེན སོདྷེསྶཱམཱིཏི ཡཐཱརཧམདྷིཀཱརཝསེན ཨཏྠོ ཝེདིཏབྦོ.

དྭེལཀྑཎདསྶནཝཎྞནཱ

༢༨༧. ‘‘ནིསིནྣཱན’’ནྟིཨཱདི ཨནཱདརེ སཱམིཝཙནཾ, ཝིསེསནཾ ཝཱ. སངྐུཙིཏེ ཨིརིཡཱཔཐེ ཨནཝསེསཏོ ལཀྑཎཱནཾ དུབྦིབྷཱཝནཏོ ‘‘ན སཀྐོཏཱི’’ཏི ཝུཏྟཾ, ཏཐཱ སུཝིབྷཱཝནཏོ པན ‘‘སཀྐོཏཱི’’ཏི. པརིཡེསནསུཁཏྠམེཝ ཏདཱཙིཎྞཏཱ དཊྛབྦཱ. ཏེནཱཏི དུཝིདྷེནཔི ཀཱརཎེན.

གཝེསཱིཏི ཉཱཎེན པརིཡེསནམཀཱསི. གཎཡནྟོཏི ཉཱཎེནེཝ སངྐལཡནྟོ. སམཱནཡཱིཏི སམྨཱ ཨཱནཡི སམཱཧརི. ‘‘ཀངྑཏཱི’’ཏི པདསྶ ཨཱཀངྑཏཱིཏི ཨཏྠོཏི ཨཱཧ ‘‘ཨཧོ ཝཏཱ’’ཏིཨཱདི. ཨནུཔསགྒམྤི ཧི པདཾ ཀཏྠཙི སཨུཔསགྒམིཝ ཨཏྠཝིསེསཝཱཙཀཾ ཡཐཱ ‘‘གོཏྲབྷཱུ’’ཏི. ཏཏོ ཏཏོ སརཱིརཔྤདེསཏོ. ཀིཙྪཏཱིཏི ཀིལམཏི. ཏེནཱཧ ‘‘ན སཀྐོཏི དཊྛུ’’ནྟི. ཏཱཡཱཏི ‘‘ཝིཙིནནྟོ ཀིཙྪཏཱི’’ཏི ཝུཏྟཱཡ ཝིཙིཀིཙྪཱཡ. ཏཏོཏི སནྣིཊྛཱནཾ ཨགམནཏོ. ཨེཝཾ ‘‘ཀངྑཏཱི’’ཏི པདསྶ ཨཱསིསནཏྠཏཾ དསྶེཏྭཱ ཨིདཱནི སཾསཡཏྠཏཾ དསྶེནྟོ ‘‘ཀངྑཱཡ ཝཱ’’ཏིཨཱདིམཱཧ. ཏཏྠ ཀངྑཱཡཱཏི ‘‘ཀངྑཏཱི’’ཏི པདེན ཝུཏྟཱཡ ཀངྑཱཡ. ཨསཏྭཔདྷཱནཉྷི ཨཱཁྱཱཏིཀཾ. ཨེས ནཡོ སེསེསུཔི. ཨཝཏྠཱཔབྷེདགཏཱ ཝིམཏི ཨེཝ ‘‘ཏཱིཧི དྷམྨེཧཱི’’ཏི ཝུཏྟཱ, ཏིཔྤཀཱརེཧི སཾསཡདྷམྨེཧཱིཏི ཨཏྠོ. ཀཱལུསིཡབྷཱཝོཏི ཨཔྤསནྣཏཱཡ ཧེཏུབྷཱུཏོ ཨཱཝིལབྷཱཝོ.

ཝཏྠིཀོསེནཱཏི ¶ ¶ ནཱབྷིཡཱ ཨདྷོབྷཱགསངྑཱཏེ ཝཏྠིམྷི ཛཱཏེན ལིངྒཔསིབྦཀེན. ‘‘ཨཎྜཀོསོ’’ཏིཨཱདཱིསུ (མ. ནི. ༡.༡༥༢, ༡༨༩; ༢.༢༧; ཨ. ནི. ༧.༧༡; པཱརཱ. ༡༡) ཝིཡ ཧི ཀོསསདྡོ པརིཝེཋཀཔསིབྦཀེ ཝཏྟཏི. ཝཏྠེན གུཧིཏབྦཏྟཱ ཝཏྠགུཡ྄ཧཾ. ཡསྨཱ བྷགཝཏོ ཀོསོཧིཏཾ ཝཏྠགུཡ྄ཧཾ སབྦབུདྡྷཱཝེཎིཀཾ ཨཉྙེཧི ཨསཱདྷཱརཎཾ སུཝིསུདྡྷཀཉྩནམཎྜལསནྣིབྷཾ, ཨཏྟནོ སཎྛཱནསནྣིཝེསསུནྡརཏཱཡ ཨཱཛཱནེཡྻགནྡྷཧཏྠིནོ ཝརངྒཔརམཙཱརུབྷཱཝཾ, ཝིཀསམཱནཏཔནིཡཱརཝིནྡསམུཛྫལཀེསརཱཝཏྟཝིལཱསཾ, སཉྫྷཱཔབྷཱནུརཉྫིཏཛལཝནནྟརཱབྷིལཀྑིཏསམྤུཎྞཙནྡམཎྜལསོབྷཉྩ ཨཏྟནོ སིརིཡཱ ཨབྷིབྷུཡྻ ཝིརཱཛཏི, ཡཾ བཱཧིརབྦྷནྟརམལེཧི ཨནུཔཀྐིལིཊྛཏཱཡ, ཙིརཀཱལཔརིཙིཏབྲཧྨཙརིཡཱདྷིཀཱརཏཱཡ, སཎྛིཏསཎྛཱནསམྤཏྟིཡཱ ཙ ཀོཔཱིནམྤི སམཱནཾ ཨཀོཔཱིནམེཝ ཛཱཏཾ. ཏེན ཝུཏྟཾ ‘‘བྷགཝཏོ ཧཱི’’ཏིཨཱདི. ཝརཝཱརཎསྶེཝཱཏི ཝརགནྡྷཧཏྠིནོ ཨིཝ. པཧཱུཏབྷཱཝནྟི པུཐུལབྷཱཝཾ. ཨེཏྠེཝ ཧི ཏསྶ སཾསཡོ. ཏནུམུདུསུཀུམཱརཱདཱིསུ པནསྶ གུཎེསུ ཝིཙཱརཎཱ ཨེཝ ནཱཧོསི.

༢༨༨. ‘‘ཏཐཱརཱུཔ’’ནྟི ཨིདཾ སམཱསཔདནྟི ཨཱཧ ‘‘ཏཾརཱུཔ’’ནྟི. ཨེཏྠཱཏི ཡཐཱ ཨམྦཊྛོ ཀོསོཧིཏཾ ཝཏྠགུཡ྄ཧམདྡསྶ, ཏཐཱ ཨིདྡྷཱབྷིསངྑཱརམབྷིསངྑརཎེ. ཨིམིནཱ ཧི ‘‘ཏཐཱརཱུཔཾ ཨིདྡྷཱབྷིསངྑཱརཾ ཨབྷིསངྑརཱི’’ཏིཨཱདིཔཱལི༹པརཱམསནཾ, ཨཏོ ཙེཏྠ སཧ ཨིདྡྷཱབྷིསངྑཱརནཡེན ཝཏྠགུཡ྄ཧདསྶནཀཱརཎཾ མིལིནྡཔཉྷཱཔཱཋེན (མི. པ. ༣.༣) ཝིབྷཱཝིཏཾ ཧོཏི. ཀེཙི པན ‘‘ཝཏྠགུཡ྄ཧདསྶནེ’’ཏི པརཱམསནྟི, ཏདཡུཏྟམེཝ. ན ཧི ཏཾ པཱལི༹ཡཾ, ཨཊྛཀཐཱཡཉྩ ཨཏྠི, ཡཾ ཨེཝཾ པརཱམསིཏབྦཾ སིཡཱ, ཨིདྡྷཱབྷིསངྑཱརནཡོ ཙ ཨཝིབྷཱཝིཏོ ཧོཏི. ཀིམེཏྠ ཨཉྙེན ཝཏྟབྦཾ ཙཏུཔཊིསམྦྷིདཱཔཏྟེན ཚལ༹བྷིཉྙེན ཝཱདཱིཝརེན བྷདནྟནཱགསེནཏྠེརེན ཝུཏྟནཡེནེཝ སམྤཊིཙྪིཏབྦཏྟཱ. ཧིརཱི ཀརཱིཡཏེ ཨེཏྠཱཏི ཧིརིཀརཎཾ, ཏདེཝ ཨོཀཱསོ ཏཐཱ, ཧིརིཡིཏབྦཊྛཱནཾ. ཨུཏྟརསྶཱཏི སུཏྟནིཔཱཏེ ཨཱགཏསྶ ཨུཏྟརམཱཎཝསྶ (མ. ནི. ༢.༣༨༤). སབྦེསམྤི ཙེཏེསཾ ཝཏྠུ སུཏྟནིཔཱཏཏོ གཧེཏབྦཾ.

ཚཱཡནྟི པཊིབིམྦཾ. ཀཐཾ དསྶེསི, ཀཱིདིསཾ ཝཱཏི ཨཱཧ ‘‘ཨིདྡྷིཡཱ’’ཏིཨཱདི. ཚཱཡཱརཱུཔཀམཏྟནྟི བྷགཝཏོ པཊིབིམྦརཱུཔཀམེཝ, ན པཀཏིཝཏྠགུཡ྄ཧཾ, ཏཉྩ བུདྡྷསནྟཱནཏོ ཝིནིམུཏྟཏྟཱ རཱུཔཀམཏྟཾ བྷགཝཏཱ སདིསཝཎྞསཎྛཱནཱཝཡཝཾ ཨིདྡྷིམཡཾ བིམྦཀམེཝ ཧོཏི, ཨེཝཉྩ ཀཏྭཱ ཨཔྤཀཏྠེན ཀ-ཀཱརེན ཝིསེསིཏཝཙནཾ ཨུཔཔནྣཾ ཧོཏི. ཚཱཡཱརཱུཔཀམཏྟཾ ཨིདྡྷིཡཱ ཨབྷིསངྑརིཏྭཱ དསྶེསཱིཏི སམྦནྡྷོ. ‘‘ཏཾ པན དསྶེནྟོ བྷགཝཱ ཡཐཱ ཨཏྟནོ བུདྡྷརཱུཔཾ ན ¶ དིསྶཏི, ཏཐཱ ཀཏྭཱ དསྶེཏཱི’’ཏི (དཱི. ནི. ཊཱི. ༡.༢༨༨) ཨཱཙརིཡཱ ཝདནྟི. ཏདེཏཾ བྷདནྟནཱགསེནཏྠེརེན ཝུཏྟེན ཨིདྡྷཱབྷིསངྑཏཚཱཡཱརཱུཔཀམཏྟདསྶནཝཙནེན སཾསནྡཏི ཙེཝ སམེཏི ཙ ཡཐཱ ¶ ཏཾ ‘‘ཁཱིརེན ཁཱིརཾ, གངྒོདཀེན ཡམུནོདཀ’’ནྟི དཊྛབྦཾ. ཏཐཱཝཙནེནེཝ ཧི སེསབུདྡྷརཱུཔསྶ ཏངྑཎེ ཨདསྶིཏབྷཱཝོ ཨཏྠཏོ ཨཱཔནྣོ ཧོཏི. ནིཝཱསནནིཝཏྠཏཱདིཝཙནེན པནེཏྠ བུདྡྷསནྟཱནཏོ ཝིནིམུཏྟསྶཔི ཚཱཡཱརཱུཔཀསྶ ནིཝཱསནཱདིཨབཧིགཏབྷཱཝོ དསྶིཏོ, ན ཙ ཙོདེཏབྦཾ ‘‘ཀཐཾ ནིཝཱསནཱདིཨནྟརགཏཾ ཚཱཡཱརཱུཔཀཾ བྷགཝཱ དསྶེཏི, ཀཐཉྩ ཨམྦཊྛོ པསྶཏཱི’’ཏི. ཨཙིནྟེཡྻོ ཧི ཨིདྡྷིཝིསཡོཏི. ཚཱཡཾ དིཊྛེཏི ཚཱཡཱཡ དིཊྛཱཡ. ཨེཏནྟི ཚཱཡཱརཱུཔཀཾ. བུཛ྄ཛྷནཀེ སཏི ཛཱིཝིཏནིམིཏྟམྤི ཧདཡམཾསཾ དསྶེཡྻཱཏི ཨདྷིཔྤཱཡོ. ནིནྣེཏྭཱཏི ནཱིཧརིཏྭཱ. ཨཡམེཝ ཝཱ པཱཋོ. ཀལློསཱིཏི ཝིསྶཛྫནེ ཏྭཾ ཀུསལོ ཚེཀོ ཨསི, ཡཐཱཝུཏྟོ ཝཱ ཝིསྶཛྫནཱམགྒོ ཨུཔཔནྣོ ཡུཏྟོ ཨསཱིཏི ཨཏྠོ. ‘‘ཀུསལོ’’ཏི ཀེཙི པཋནྟི, ཨཡུཏྟམེཏཾ. མིལིནྡཔཉྷེ ཧི སབྦཏྠ ཝིསྶཛྫནཱཝསཱནེ ‘‘ཀལློ’’ ཨིཙྩེཝ དིཊྛོཏི.

ནིནྣཱམེཏྭཱཏི མུཁཏོ ནཱིཧརཎཝསེན ཀཎྞསོཏཱདིཨབྷིམུཁཾ པཎཱམེཏྭཱ, ཨདྷིཔྤཱཡམེཝ དསྶེཏུཾ ‘‘ནཱིཧརིཏྭཱ’’ཏི ཝུཏྟཾ. ཀཐིནསཱུཙིཾ ཝིཡཱཏི གྷནསུཁུམབྷཱཝཱཔཱདནེན ཀཀྑལ༹སཱུཙིམིཝ ཀཏྭཱ. ཏཐཱཀརཎེནཱཏི ཀཐིནསཱུཙིཾ ཝིཡ ཀརཎེན. ཨེཏྠཱཏི པཧཱུཏཛིཝ྄ཧཱཡ. མུདུབྷཱཝོ, དཱིགྷབྷཱཝོ, ཏནུབྷཱཝོ ཙ དསྶིཏོ ཨམུདུནོ གྷནསུཁུམབྷཱཝཱཔཱདནཏྠམསཀྐུཎེཡྻཏྟཱཏི ཨཱཙརིཡེན (དཱི. ནི. ཊཱི. ༡.༢༨༨) ཝུཏྟཾ. ཏཏྲཱཡམདྷིཔྤཱཡོ – ཡསྨཱ མུདུམེཝ གྷནསུཁུམབྷཱཝཱཔཱདནཏྠཾ སཀྐོཏི, ཏསྨཱ ཏཐཱཀརཎེན མུདུབྷཱཝོ དསྶིཏོ ཨགྒི ཝིཡ དྷཱུམེན. ཡསྨཱ ཙ མུདུཡེཝ གྷནསུཁུམབྷཱཝཱཔཛྫནེན དཱིགྷགཱམི, ཏསྨཱ ཀཎྞསོཏཱནུམསནེན དཱིགྷབྷཱཝོ དསྶིཏོ. ཡསྨཱ པན མུདུ ཨེཝ གྷནསུཁུམབྷཱཝཱཔཛྫནེན ཏནུ ཧོཏི, ཏསྨཱ ནཱསིཀཱསོཏཱནུམསནེན ཏནུབྷཱཝོ དསྶིཏོཏི. ཨཔུཐུལསྶ ཏཐཱཔཊིཙྪཱདནཏྠམསཀྐུཎེཡྻཏྟཱ ནལཱཊཙྪཱདནེན པུཐུལབྷཱཝོ དསྶིཏོ.

༢༨༩. པཏྠེནྟོ ཧུཏྭཱ ཨུདིཀྑནྟོཏི ཡོཛེཏབྦཾ.

༢༩༠. མཱུལཝཙནཾ ¶ ཀཐཱ. པཊིཝཙནཾ སལླཱཔོ.

༢༩༡. ‘‘ཨུདྡྷུམཱཏཀ’’ནྟིཨཱདཱིསུ (སཾ. ནི. ༥.༢༤༢; ཝིསུདྡྷི. ༡.༡༠༢) ཝིཡ ཀ-སདྡོ ཛིགུཙྪནཏྠོཏི ཝུཏྟཾ ‘‘ཏམེཝ ཛིགུཙྪནྟོ’’ཏི. ཏམེཝཱཏི པཎྜིཏབྷཱཝམེཝ, ཨམྦཊྛམེཝཱཏིཔི ཨཏྠོ. ཨམྦཊྛཉྷི སནྡྷཱཡ ཨེཝམཱཧ. ཏཐཱ ཧི པཱལི༹ཡཾ ཝུཏྟཾ ‘‘ཨེཝཾ…པེ… ཨམྦཊྛཾ མཱཎཝཾ ཨེཏདཝོཙཱ’’ཏི. ཀཱམཉྩ ཨམྦཊྛཾ སནྡྷཱཡ ཨེཝཾ ཝུཏྟཾ, ནཱམགོཏྟཝསེན པན ཨནིཡམཾ ཀཏྭཱ གརཧནྟོ པུཐུཝཙནེན ཝདཏཱིཏི ཝེདིཏབྦཾ. ‘‘ཡདེཝ ཁོ ཏྭ’’ནྟི ཨེཏསྶ ཨནིཡམཝཙནསྶ ‘‘ཨེཝརཱུཔེནཱ’’ཏི ཨིདཾ ནིཡམཝཙནནྟི དསྶེཏི ‘‘ཡཱདིསོ’’ཏིཨཱདིནཱ. བྷཱཝེནབྷཱཝལཀྑཎེ ¶ བྷུམྨཝཙནཏྠེ ཀརཎཝཙནནྟི ཝུཏྟཾ ‘‘ཨེདིསེ ཨཏྠཙརཀེ’’ཏི. ན ཨཉྙཏྲཱཏི ན ཨཉྙཏྠ སུགཏིཡཾ. ཨེཏྠ པན ‘‘ཨཏྠཙརཀེནཱ’’ཏི ཨིམིནཱ བྱཏིརེཀམུཁེན ཨནཏྠཙརཀཏཾཡེཝ ཝིབྷཱཝེཏཱིཏི དཊྛབྦཾ. ‘‘ཨུཔནེཡྻ ཨུཔནེཡྻཱ’’ཏི ཨིདཾ ཏྭཱདྱནྟཾ ཝིཙྪཱཝཙནནྟི ཨཱཧ ‘‘བྲཱཧྨཎོ ཁོ པནཱ’’ཏིཨཱདི. ཨེཝཾ ཨུཔནེཏྭཱ ཨུཔནེཏྭཱཏི ཏཾ ཏཾ དོསཾ ཨུཔནཱིཡ ཨུཔནཱིཡ. ཏེནཱཧ ‘‘སུཊྛུ དཱསཱདིབྷཱཝཾ ཨཱརོཔེཏྭཱ’’ཏི. པཱཏེསཱིཏི པཝཊྚནཝསེན པཱཏེསི. ཡཉྩ ཨགམཱསི, ཏམྤི ཨསྶ ཏཐཱགམནསངྑཱཏཾ ཋཱནཾ ཨཙྪིནྡིཏྭཱཏི ཡོཛནཱ.

པོཀྑརསཱཏིབུདྡྷཱུཔསངྐམནཝཎྞནཱ

༢༩༢-༣-༦. ཀིཏྟཀོ པན སོཏི ཝུཏྟཾ ‘‘སམྨོདནཱིཡཀཐཱཡཔི ཀཱལོ ནཏྠཱི’’ཏི. ཨཱགམཱ ནཱུཏི ཨཱགཏོ ནུ. ཁོཏི ནིཔཱཏམཏྟཾ. ཨིདྷཱཏི ཨེཏྠ, ཏུམྷཱཀཾ སནྟིཀནྟི ཨཏྠོ. ཨདྷིཝཱསེཏཱུཏི སཱདིཡཏུ, ཏཾ པན སཱདིཡནཾ ཨིདྷ མནསཱཝ སམྤཊིགྒཧོ, ན ཀཱཡཝཱཙཱཧཱིཏི ཨཱཧ ‘‘སམྤཊིཙྪཏཱུ’’ཏི. ཨཛྫ པཝཏྟམཱནཾ ཨཛྫཏནཾ, པུཉྙཾ, པཱིཏིཔཱམོཛྫཉྩ, ཨིམམཏྠཾ དསྶེཏུཾ ‘‘ཡཾ མེ’’ཏིཨཱདི ཝུཏྟཾ. ཀཱརནྟི ཨུཔཀཱརཾ, སཀྐཱརཾ ཝཱ. ཨཙོཔེཏྭཱཏི ཨཙཱལེཏྭཱ.

༢༩༧. ‘‘སཧཏྠཱ’’ཏི ཨིདཾ ཀརཎཏྠེ ནིསྶཀྐཝཙནཾ. ཏེནཱཧ ‘‘སཧཏྠེནཱ’’ཏི. སུཧིཏནྟི དྷཱཏཾ, ཛིགྷཙྪཱདུཀྑཱབྷཱཝེན ཝཱ སུཁིཏཾ. ཡཱཝདཏྠནྟི ཡཱཝ ཨཏྠོ, ཏཱཝ བྷོཛནེན ཏདཱ ཀཏཾ. པཊིཀྑེཔཔཝཱརཎཱཝེཏྠ ཨདྷིཔྤེཏཱ, ན ནིམནྟནཔཝཱརཎཱཏི ཨཱཧ ‘‘ཨལ’’ནྟིཨཱདི. ‘‘ཧཏྠསཉྙཱཡཱ’’ཏི ནིདསྶནམཏྟཾ ཨཉྙཏྠ མུཁཝིཀཱརེན, ཝཙཱིབྷེདེན ཙ པཊིཀྑེཔསྶ ཝུཏྟཏྟཱ ¶ , ཨེཀཀྑཎེཔི ཙ ཏཐཱཔཊིཀྑེཔསྶ ལབྦྷནཏོ. ཨོནཱིཏཱ པཏྟཏོ པཱཎི ཨེཏསྶཱཏི ཨོནཱིཏཔཏྟཔཱཎཱིཏི བྷིནྣཱདྷིཀརཎཝིསཡོ ཏིཔདོ བཱཧིརཏྠསམཱསོ. མུདྡྷཛཎ-ཀཱརེན, པན སཉྙོགཏ-ཀཱརེན ཙ ཨོཎིཏྟསདྡོ ཝིནཱབྷཱུཏེཏི དསྶེཏི ‘‘ཨོཎིཏྟཔཏྟཔཱཎིནྟིཔི པཱཋོ’’ཏིཨཱདིནཱ. སུཙིཀརཎཏྠེ ཝཱ ཨོཎིཏྟསདྡོ. ཨོཎིཏྟཾ ཨཱམིསཱཔནཡནེན སུཙིཀཏཾ པཏྟཾ པཱཎི ཙ ཨསྶཱཏི ཧི ཨོཎིཏྟཔཏྟཔཱཎི. ཏེནཱཧ ‘‘ཧཏྠེ ཙ པཏྟཉྩ དྷོཝིཏྭཱ’’ཏི. ‘‘ཨོཎིཏྟཾ ནཱནཱབྷཱུཏཾ ཝིནཱབྷཱུཏཾ, ཨཱམིསཱཔནཡནེན ཝཱ སུཙིཀཏཾ པཏྟཾ པཱཎིཏོ ཨསྶཱཏི ཨོཎིཏྟཔཏྟཔཱཎཱི’’ཏི (སཱརཏྠ. ཊཱི. ༡.༢༣) སཱརཏྠདཱིཔནིཡཾ ཝུཏྟཾ. ཏཏྠ པཙྪིམཝཙནཾ ‘‘ཧཏྠེ ཙ པཏྟཉྩ དྷོཝིཏྭཱ’’ཏི ཨིམིནཱ ཨསཾསནྡནཏོ ཝིཙཱརེཏབྦཾ. ཨེཝཾབྷཱུཏནྟི ‘‘བྷུཏྟཱཝིཾ ཨོནཱིཏཔཏྟཔཱཎི’’ནྟི ཝུཏྟཔྤཀཱརེན བྷཱུཏཾ.

༢༩༨. ཨནུཔུབྦིཾ ཀཐནྟི ཨནུཔུབྦཾ ཀཐེཏབྦཾ ཀཐཾ. ཏེནཱཧ ‘‘ཨནུཔཊིཔཱཊིཀཐ’’ནྟི. ཀཱ ¶ པན སཱཏི ཨཱཧ ‘‘དཱནཱནནྟརཾ སཱིལ’’ནྟིཨཱདི, ཏེནཱཡམཏྠོ བོདྷིཏོ ཧོཏི – དཱནཀཐཱ ཏཱཝ པཙུརཛནེསུཔི པཝཏྟིཡཱ སབྦསཱདྷཱརཎཏྟཱ, སུཀརཏྟཱ, སཱིལེ པཏིཊྛཱནསྶ ཨུཔཱཡབྷཱཝཏོ ཙ ཨཱདིཏོ ཀཐེཏབྦཱ. པརིཙྩཱགསཱིལོ ཧི པུགྒལོ པརིགྒཧཝཏྠཱུསུ ཝིནིསྶཊབྷཱཝཏོ སུཁེནེཝ སཱིལཱནི སམཱདིཡཏི, ཏཏྠ ཙ སུཔྤཏིཊྛིཏོ ཧོཏི, སཱིལེན དཱཡཀཔཊིགྒཱཧཀསུདྡྷིཏོ པརཱནུགྒཧཾ ཝཏྭཱ པརཔཱིལཱ༹ནིཝཏྟིཝཙནཏོ, ཀིརིཡདྷམྨཾ ཝཏྭཱ ཨཀིརིཡདྷམྨཝཙནཏོ, བྷོགསམྤཏྟིཧེཏུཾ ཝཏྭཱ བྷཝསམྤཏྟིཧེཏུཝཙནཏོ ཙ དཱནཀཐཱནནྟརཾ སཱིལཀཐཱ ཀཐེཏབྦཱ. ཏཉྩེ དཱནསཱིལཾ ཝཊྚནིསྶིཏཾ, ཨཡཾ བྷཝསམྤཏྟི ཏསྶ ཕལནྟི དསྶནཏྠཾ སཱིལཀཐཱནནྟརཾ སགྒཀཐཱ. ཏཱཡ ཧི ཨེཝཾ དསྶིཏཾ ཧོཏི ‘‘ཨིམེཧི དཱནསཱིལམཡེཧི, པཎཱིཏཔཎཱིཏཏརཱདིབྷེདབྷིནྣེཧི ཙ པུཉྙཀིརིཡཝཏྠཱུཧི ཨེཏཱ ཙཱཏུམཧཱརཱཛིཀཱདཱིསུ པཎཱིཏཔཎཱིཏཏརཱདིབྷེདབྷིནྣཱ ཨཔརིམེཡྻཱ དིབྦསམྤཏྟིཡོ ལདྡྷབྦཱ’’ཏི. སྭཱཡཾ སགྒོ རཱགཱདཱིཧི ཨུཔཀྐིལིཊྛོ, སབྦཐཱ པན ཏེཧི ཨནུཔཀྐིལིཊྛོ ཨརིཡམགྒོཏི དསྶནཏྠཾ སགྒཀཐཱནནྟརཾ མགྒཀཐཱ. མགྒཉྩ ཀཐེནྟེན ཏདདྷིགམུཔཱཡདསྶནཏྠཾ ཀཱམཱནཾ ཨཱདཱིནཝོ, ཨོཀཱརོ, སཾཀིལེསོ, ནེཀྑམྨེ ཨཱནིསཾསོ ཙ ཀཐེཏབྦོ. སགྒཔརིཡཱཔནྣཱཔི ཧི སབྦེ ཀཱམཱ ནཱམ བཧྭཱདཱིནཝཱ ཨནིཙྩཱ ཨདྡྷུཝཱ ཝིཔརིཎཱམདྷམྨཱ, པགེཝ ཨིཏརེཏི ¶ ཨཱདཱིནཝོ, སབྦེཔི ཀཱམཱ ཧཱིནཱ གམྨཱ པོཐུཛྫནིཀཱ ཨནརིཡཱ ཨནཏྠསཾཧིཏཱཏི ལཱམཀབྷཱཝོ ཨོཀཱརོ, སབྦེཔི བྷཝཱ ཀིལེསཱནཾ ཝཏྠུབྷཱུཏཱཏི སཾཀིལེསོ, སབྦསཾཀིལེསཝིཔྤཡུཏྟཾ ནིབྦཱནནྟི ནེཀྑམྨེ ཨཱནིསཾསོ ཙ ཀཐེཏབྦོཏི. ཨཡམྤི ཨཏྠོ བོདྷིཏོཏི ཝེདིཏབྦོ. མགྒོཏི ཧི ཨེཏྠ ཨིཏི-སདྡེན ཨཱདྱཏྠེན ཀཱམཱདཱིནཝཱདཱིནམྤི སངྒཧོཏི ཨཡམཏྠཝཎྞནཱ ཀཏཱ. ཏེནཱཧ ‘‘སེཡྻཐིདཾ – དཱནཀཐཾ སཱིལཀཐཾ སགྒཀཐཾ ཀཱམཱནཾ ཨཱདཱིནཝཾ ཨོཀཱརཾ སཾཀིལེསཾ ནེཀྑམྨེ ཨཱནིསཾསཾ པཀཱསེཏཱི’’ཏི. ཝིཏྠཱརོ སཱརཏྠདཱིཔནིཡཾ (སཱརཏྠ. ཊཱི. ༣.༢༦) གཧེཏབྦོ.

ཀསི-སདྡོ ཉཱཎེན གཧཎེཏི ཨཱཧ ‘‘གཧིཏཱ’’ཏིཨཱདི. སཱམཾསདྡེན ནིཝཏྟེཏབྦམཏྠཾ དསྶེཏི ‘‘ཨསཱདྷཱརཎཱ ཨཉྙེས’’ནྟི ཨིམིནཱ, ལོཀུཏྟརདྷམྨཱདྷིགམེ པརཱུཔདེསཝིགཏཏྟཱ, ཨེཀེནེཝ ལོཀེ པཋམཾ ཨནུཏྟརཱཡ སམྨཱསམྦོདྷིཡཱ ཨབྷིསམྦུདྡྷཏྟཱ ཙ ཨཉྙེསམསཱདྷཱརཎཱཏི ཝུཏྟཾ ཧོཏི. དྷམྨཙཀྑུནྟི ཨེཏྠ སོཏཱཔཏྟིམགྒོཝ ཨདྷིཔྤེཏོ, ན བྲཧྨཱཡུསུཏྟེ (མ. ནི. ༢.༣༨༣ ཨཱདཡོ) ཝིཡ ཧེཊྛིམཱ ཏཡོ མགྒཱ, ན ཙ ཙཱུལ༹རཱཧུལོཝཱདསུཏྟེ (མ. ནི. ༣.༤༡༦) ཝིཡ ཨཱསཝཀྑཡོ. ‘‘ཏསྶ ཨུཔྤཏྟིཨཱཀཱརདསྶནཏྠ’’ནྟི ཀསྨཱ ཝུཏྟཾ, ནནུ མགྒཉཱཎཾ ཨསངྑཏདྷམྨཱརམྨཎམེཝ, ན སངྑཏདྷམྨཱརམྨཎནྟི ཙོདནཾ སོདྷེནྟོ ‘‘ཏཉྷཱི’’ཏིཨཱདིམཱཧ. ཀིཙྩཝསེནཱཏི ཨསམྨོཧཔཊིཝེདྷཀིཙྩཝསེན.

པོཀྑརསཱཏིཨུཔཱསཀཏྟཔཊིཝེདནཱཀཐཱཝཎྞནཱ

༢༩༩. པཱལི༹ཡཾ ¶ ‘‘དིཊྛདྷམྨོ’’ཏིཨཱདཱིསུ དསྶནཾ ནཱམ ཉཱཎཏོ ཨཉྙམྤི ཙཀྑཱདིདསྶནཾ ཨཏྠཱིཏི ཏནྣིཝཏྟནཏྠཾ ‘‘པཏྟདྷམྨོ’’ཏི ཝུཏྟཾ. པཏྟི ཙ ཉཱཎཔཏྟིཏོ ཨཉྙཱཔི ཀཱཡགམནཱདིཔཏྟི ཝིཛྫཏཱིཏི ཏཏོ ཝིསེསདསྶནཏྠཾ ‘‘ཝིདིཏདྷམྨོ’’ཏི ཝུཏྟཾ. སཱ པནེསཱ ཝིདིཏདྷམྨཏཱ ཨེཀདེསཏོཔི ཧོཏཱིཏི ནིཔྤདེསཏོ ཝིདིཏདྷམྨཏཾ དསྶེཏུཾ ‘‘པརིཡོགཱལ༹ྷདྷམྨོ’’ཏི ཝུཏྟཾ, ཏེནསྶ སཙྩཱབྷིསམྦོདྷམེཝ དཱིཔེཏི. མགྒཉཱཎཉྷི ཨེཀཱབྷིསམཡཝསེན པརིཉྙཱདིཙཏུཀིཙྩཾ སཱདྷེནྟཾ ནིཔྤདེསེན ཙཏུསཙྩདྷམྨཾ སམནྟཏོ ཨོགཱལ༹ྷཾ ནཱམ ཧོཏི. ཏེནཱཧ ‘‘དིཊྛོ ཨརིཡསཙྩདྷམྨོ ཨེཏེནཱཏི དིཊྛདྷམྨོ’’ཏི. ‘‘ཀཐཾ པན ཨེཀམེཝ ཉཱཎཾ ཨེཀསྨིཾ ཁཎེ ཙཏྟཱརི ཀིཙྩཱནི སཱདྷེནྟཾ པཝཏྟཏི. ན ཧི ཏཱདིསཾ ལོཀེ དིཊྛཾ, ན ཨཱགམོ ཝཱ ཏཱདིསོ ཨཏྠཱི’’ཏི ¶ ན ཝཏྟབྦཾ. ཡཐཱ ཧི པདཱིཔོ ཨེཀསྨིཾཡེཝ ཁཎེ ཝཊྚིཾ དཧཏི, སྣེཧཾ པརིཡཱདིཡཏི, ཨནྡྷཀཱརཾ ཝིདྷམཏི, ཨཱལོཀཉྩཱཔི དསྶེཏི, ཨེཝམེཏཾ ཉཱཎནྟི དཊྛབྦཾ. ‘‘མགྒསམངྒིསྶ ཉཱཎཾ དུཀྑེཔེཏཾ ཉཱཎཾ, དུཀྑསམུདཡེཔེཏཾ ཉཱཎཾ, དུཀྑནིརོདྷེཔེཏཾ ཉཱཎཾ, དུཀྑནིརོདྷགཱམིནིཡཱ པཊིཔདཱཡཔེཏཾ ཉཱཎ’’ནྟི (ཝིབྷ. ༧༩༤) སུཏྟཔདམྤེཏྠ ཨུདཱཧརིཏབྦནྟི.

ཏིཎྞཱ ཝིཙིཀིཙྪཱཏི སཔྤཊིབྷཡཀནྟཱརསདིསཱ སོལ༹སཝཏྠུཀཱ, ཨཊྛཝཏྠུཀཱ ཙ ཝིཙིཀིཙྪཱ ཨནེན ཝིཏིཎྞཱ. ཝིགཏཱ ཀཐཾཀཐཱཏི པཝཏྟིཨཱདཱིསུ ‘‘ཨེཝཾ ནུ ཁོ, ན ནུ ཁོ’’ཏི ཨེཝཾ པཝཏྟིཀཱ ཀཐཾཀཐཱ ཨསྶ ཝིགཏཱ སམུཙྪིནྣཱ. ཝིསཱརདབྷཱཝཾ པཏྟོཏི སཱརཛྫཀརཱནཾ པཱཔདྷམྨཱནཾ པཧཱིནཏྟཱ, ཏཔྤཊིཔཀྑེསུ ཙ སཱིལཱདིགུཎེསུ སུཔྤཏིཊྛིཏཏྟཱ ཝིསཱརདབྷཱཝཾ ཝེཡྻཏྟིཡཾ པཏྟོ ཨདྷིགཏོ. སཱཡཾ ཝེསཱརཛྫཔྤཏྟི སུཔྤཏིཊྛིཏཏཱ ཀཏྠཱཏི ཙོདནཱཡ ‘‘སཏྠུསཱསནེ’’ཏི ཝུཏྟནྟི དསྶེནྟོ ‘‘ཀཏྠ? སཏྠུསཱསནེ’’ཏི ཨཱཧ. ཨཏྟནཱཝ པཙྩཀྑཏོ དིཊྛཏྟཱ, ཨདྷིགཏཏྟཱ ཙ ན ཨསྶ པཙྩཡོ པཙྩེཏབྦོ པརོ ཨཏྠཱིཏི ཨཏྠོ. ཏཏྠཱདྷིཔྤཱཡམཱཧ ‘‘ན པརསྶཱ’’ཏིཨཱདིནཱ. ན ཝཏྟཏཱིཏི ན པཝཏྟཏི, ན པཊིཔཛྫཏི ཝཱ, ན པརཾ པཙྩེཏི པཏྟིཡཱཡཏཱིཏི ཨཔརཔྤཙྩཡོཏིཔི ཡུཛྫཏི. ཡཾ པནེཏྠ ཝཏྟབྦམྤི ཨཝུཏྟཾ, ཏདེཏཾ པུབྦེ ཝུཏྟཏྟཱ, པརཏོ ཝུཙྩམཱནཏྟཱ ཙ ཨཝུཏྟནྟི ཝེདིཏབྦཾ.

ཨིཏི སུམངྒལཝིལཱསིནིཡཱ དཱིགྷནིཀཱཡཊྛཀཐཱཡ པརམསུཁུམགམྦྷཱིརདུརནུབོདྷཏྠཔརིདཱིཔནཱཡ སུཝིམལཝིཔུལཔཉྙཱཝེཡྻཏྟིཡཛནནཱཡ ཨཛྫཝམདྡཝསོརཙྩསདྡྷཱསཏིདྷིཏིབུདྡྷིཁནྟིཝཱིརིཡཱདིདྷམྨསམངྒིནཱ སཱཊྛཀཐེ པིཊཀཏྟཡེ ཨསངྒཱསཾཧཱིརཝིསཱརདཉཱཎཙཱརིནཱ ཨནེཀཔྤབྷེདསཀསམཡསམཡནྟརགཧནཛ྄ཛྷོགཱཧིནཱ ¶ མཧཱགཎིནཱ མཧཱཝེཡྻཱཀརཎེན ཉཱཎཱབྷིཝཾསདྷམྨསེནཱཔཏིནཱམཏྠེརེན མཧཱདྷམྨརཱཛཱདྷིརཱཛགརུནཱ ཀཏཱཡ སཱདྷུཝིལཱསིནིཡཱ ནཱམ ལཱིནཏྠཔཀཱསནིཡཱ ཨམྦཊྛསུཏྟཝཎྞནཱཡ ལཱིནཏྠཔཀཱསནཱ.

ཨམྦཊྛསུཏྟཝཎྞནཱ ནིཊྛིཏཱ.

༤. སོཎདཎྜསུཏྟཝཎྞནཱ

༣༠༠. ཨེཝཾ ¶ ¶ ཨམྦཊྛསུཏྟཾ སཾཝཎྞེཏྭཱ ཨིདཱནི སོཎདཎྜསུཏྟཾ སཾཝཎྞེནྟོ ཡཐཱནུཔུབྦཾ སཾཝཎྞནོཀཱསསྶ པཏྟབྷཱཝཾ ཝིབྷཱཝེཏུཾ, ཨམྦཊྛསུཏྟསྶཱནནྟརཾ སངྒཱིཏསྶ སུཏྟསྶ སོཎདཎྜསུཏྟབྷཱཝཾ ཝཱ པཀཱསེཏུཾ ‘‘ཨེཝཾ མེ སུཏཾ…པེ… ཨངྒེསཱུཏི སོཎདཎྜསུཏྟ’’ནྟི ཨཱཧ. སུནྡརབྷཱཝེན སཱཏིསཡཱནི ཨངྒཱནི ཨེཏེསམཏྠཱིཏི ཨངྒཱ. ཏདྡྷིཏཔཙྩཡསྶ ཨཏིསཡཝིསིཊྛེ ཨཏྠིཏཱཨཏྠེ པཝཏྟིཏོ, པདྷཱནཏོ རཱཛཀུམཱརཱ, རུལ༹ྷིཝསེན པན ཛནཔདོཏི ཝུཏྟཾ ‘‘ཨངྒཱ ནཱམཱ’’ཏིཨཱདི. ཨིདྷཱཔི ཨདྷིཔྤེཏཱ, ན ཨམྦཊྛསུཏྟེ ཨེཝ. ‘‘ཏདཱ ཀིརཱ’’ཏིཨཱདི ཏསྶཱ ཙཱརིཀཱཡ ཀཱརཎཝཙནཾ. ཨཱགམནེ ཨཱདཱིནཝཾ དསྶེཏྭཱ པཊིཀྑིཔནཝསེན ཨཱགནྟུཾ ན དསྶནྟི, ནཱནུཛཱནིསྶནྟཱིཏི ཨདྷིཔྤཱཡོ.

ནཱིལཱསོཀཀཎིཀཱརཀོཝིལཱ༹རཀུནྡརཱཛརུཀྑཱདིསམྨིསྶཏཱཡ ཏཾ ཙམྤཀཝནཾ ནཱིལཱདིཔཉྩཝཎྞཀུསུམཔཊིམཎྜིཏཾ, ན ཙམྤཀརུཀྑཱནཉྙེཝ ནཱིལཱདིཔཉྩཝཎྞཀུསུམཏཱཡཱཏི ཝདནྟི, ཏཐཱརཱུཔཱཡ པན དྷཱཏུཡཱ ཙམྤཀརུཀྑཱཝ ནཱིལཱདིཔཉྩཝཎྞམྤི ཀུསུམཾ པུཔྥནྟི. ཨིདཱནིཔི ཧི ཀཏྠཙི དེསེ དིསྶནྟི, ཨེཝཉྩ ཡཐཱརུཏམྤི ཨཊྛཀཐཱཝཙནཾ ཨུཔཔནྣཾ ཧོཏི. ཀུསུམགནྡྷསུགནྡྷེཏི ཝུཏྟནཡེན སམྨིསྶཀཱནཾ, སུདྡྷཙམྤཀཱནཾ ཝཱ ཀུསུམཱནཾ གནྡྷེཧི སུགནྡྷེ. ཨེཝཾ པན ཝདནྟོ ན མཱཔནཀཱལེཡེཝ ཏསྨིཾ ནགརེ ཙམྤཀརུཀྑཱ ཨུསྶནྣཱ, ཨཐ ཁོ ཨཔརབྷཱགེཔཱིཏི དསྶེཏི. མཱཔནཀཱལེ ཧི ཙམྤཀརུཀྑཱནམུསྶནྣཏཱཡ ཏཾ ནགརཾ ‘‘ཙམྤཱ’’ཏི ནཱམཾ ལབྷི. ཨིསྶརཏྟཱཏི ཨདྷིཔཏིབྷཱཝཏོ. སེནཱ ཨེཏསྶ ཨཏྠཱིཏི སེནིཀོ, སྭེཝ སེནིཡོ. བཧུབྷཱཝཝིསིཊྛཱ ཙེཏྠ ཨཏྠིཏཱ ཏདྡྷིཏཔཙྩཡེན ཛོཏིཏཱཏི ཝུཏྟཾ ‘‘མཧཏིཡཱ སེནཱཡ སམནྣཱགཏཏྟཱ’’ཏི. སཱརསུཝཎྞསདིསཏཱཡཱཏི ཨུཏྟམཛཱཏིསུཝཎྞསདིསཏཱཡ. ཙཱུལ༹དུཀྑཀྑནྡྷསུཏྟཊྛཀཐཱཡཾ པན ཨེཝཾ ཝུཏྟཾ ‘‘སེནིཡོ’’ཏི ཏསྶ ནཱམཾ, བིམྦཱིཏི ཨཏྟབྷཱཝསྶ ནཱམཾ ཝུཙྩཏི, སོ ཏསྶ སཱརབྷཱུཏོ དསྶནཱིཡོ པཱསཱདིཀོ ཨཏྟབྷཱཝསམིདྡྷིཡཱ བིམྦིསཱརོཏི ཝུཙྩཏཱི’’ཏི (མ. ནི. ཨཊྛ. ༡.༡༨༠).

༣༠༡-༢. སཾཧཏཱཏི ¶ སནྣིཔཏནཝསེན སངྒྷཊིཏཱ, སནྣིཔཏིཏཱཏི ཝུཏྟཾ ཧོཏི. ཨེཀེཀིསྶཱཡ དིསཱཡཱཏི ཨེཀེཀཱཡ པདེསབྷཱུཏཱཡ དིསཱཡ. པཱལི༹ཡཾ བྲཱཧྨཎགཧཔཏིཀཱནམདྷིཔྤེཏཏྟཱ ‘‘སངྒྷིནོ’’ཏི ཝཏྟབྦེ ¶ ‘‘སངྒྷཱི’’ཏི པུཐུཏྟེ ཨེཀཝཙནཾ ཝུཏྟནྟི དསྶེཏི ‘‘ཨེཏེས’’ནྟི ཨིམིནཱ. ཨེཝཾ ཨཱཙརིཡེན (དཱི. ནི. ཊཱི. ༡.༣༠༡, ༣༠༢) ཝུཏྟཾ, སངྒྷཱིཏི པན དཱིགྷཝསེན བཧུཝཙནམྤི དིསྶཏི. ཨགཎཱཏི ཨསམཱུཧབྷཱུཏཱ ཨགཎབནྡྷཱ, ‘‘ཨགཎནཱ’’ཏིཔི པཱཋོ, ཨཡམེཝཏྠོ, སངྑྱཱཏྠསྶ ཨཡུཏྟཏྟཱ. ན ཧི ཏེསཾ སངྑྱཱ ཨཏྠཱིཏི. ཨིདཾ ཝུཏྟཾ ཧོཏི – པུབྦེ ཨནྟོནགརེ ཨགཎཱཔི པཙྪཱ བཧིནགརེ གཎཾ བྷཱུཏཱ པཏྟཱཏི གཎཱིབྷཱུཏཱཏི. ཨབྷཱུཏཏབྦྷཱཝེ ཧི ཀརཱསབྷཱུཡོགེ ཨ-ཀཱརསྶ ཨཱི-ཀཱརཱདེསོ, ཨཱིཔཙྩཡོ ཝཱ. རཱཛརཱཛཉྙཱདཱིནཾ དཎྜདྷརོ པུརིསོཝ ཏཏོ ཏཏོ ཁཏྟིཡཱནཾ ཏཱཡནཏོ རཀྑཎཏོ ཁཏྟཱ ནིརུཏྟིནཡེན. སོ ཧི ཡཏྠ ཏེཧི པེསིཏོ, ཏཏྠ ཏེསཾ དོསཾ པརིཧརནྟོ ཡུཏྟཔཏྟཝསེན པུཙྪིཏམཏྠཾ ཀཐེཏི. ཏེནཱཧ ‘‘པུཙྪིཏཔཉྷེ བྱཱཀརཎསམཏྠོ’’ཏི. ཀུལཱཔདེསཱདིནཱ མཧཏཱི མཏྟཱ པམཱཎམེཏསྶཱཏི མཧཱམཏྟོ.

སོཎདཎྜགུཎཀཐཱཝཎྞནཱ

༣༠༣. ཨེཀསྶ རཉྙོ ཨཱཎཱཔཝཏྟིཊྛཱནཱནི རཛྫཱནི ནཱམ, ཝིསིཊྛཱནི རཛྫཱནི ཝིརཛྫཱནི, ཏཱནེཝ ཝེརཛྫཱནི, ནཱནཱཝིདྷཱནི ཝེརཛྫཱནི ཏཐཱ, ཏེསུ ཛཱཏཱཏིཨཱདིནཱ ཏིདྷཱ ཏདྡྷིཏནིབྦཙནཾ. ཝིཙིཏྲཱ ཧི ཏདྡྷིཏཝུཏྟཱིཏི. ཡཉྙཱནུབྷཝནཏྠནྟི ཡསྶ ཀསྶཙི ཡཉྙསྶ ཨནུབྷཝནཏྠཾ. ཏེཏི ནཱནཱཝེརཛྫཀཱ བྲཱཧྨཎཱ. ཏསྶཱཏི སོཎདཎྜབྲཱཧྨཎསྶ. ཨུཏྟམབྲཱཧྨཎོཏི ཨབྷིཛནསམྤཏྟིཡཱ, ཝིཏྟསམྤཏྟིཡཱ, ཝིཛྫཱསམྤཏྟིཡཱ ཙ ཨུགྒཏཏརོ, ཨུལཱ༹རོ ཝཱ བྲཱཧྨཎོ. ཨཱཝཊྚནཱིམཱཡཱ ཝུཏྟཱཝ. ལཱབྷམཙྪེརེན ནིཔྤཱིལི༹ཏཏཱཡ ཨསནྣིཔཱཏོ བྷཝིསྶཏི.

ཨངྒེཏི གམེཏི ཨཏྟནོ ཕལཾ ཉཱཔེཏི, སཡཾ ཝཱ ཨངྒཱིཡཏི གམཱིཡཏི ཉཱཡཏཱིཏི ཨངྒཾ, ཧེཏུ. ཏེནཱཧ ‘‘ཀཱརཎེནཱ’’ཏི. ལོཀདྷམྨཏཱནུསྶརཎེན ཨཔརཱནིཔི ཀཱརཎཱནི ཨཱཧཾསཱུཏི དསྶེནྟོ ‘‘ཨེཝ’’ནྟིཨཱདིམཱཧ.

དྭཱིཧི པཀྑེཧཱིཏི མཱཏུཔཀྑེན, པིཏུཔཀྑེན ཙཱཏི དྭཱིཧི ཉཱཏིཔཀྑེཧི. ‘‘ཨུབྷཏོ སུཛཱཏོ’’ཏི ཧི ཨེཏྠཀེཡེཝ ཝུཏྟེ ཡེཧི ཀེཧིཙི དྭཱིཧི བྷཱགེཧི སུཛཱཏཏྟཾ ཝིཛཱནེཡྻ, སུཛཱཏསདྡོ ཙ ‘‘སུཛཱཏོ ཙཱརུདསྶནོ’’ཏིཨཱདཱིསུ (མ. ནི. ༢.༣༩༩) ཨཱརོཧསམྤཏྟིཔརིཡཱཡོཔི ཧོཏཱིཏི ཛཱཏིཝསེནེཝ ¶ སུཛཱཏཏྟཾ ཝིབྷཱཝེཏུཾ ‘‘མཱཏིཏོ ཙ པིཏིཏོ ཙཱ’’ཏི ཝུཏྟཾ. ཏེནཱཧ ‘‘བྷོཏོ མཱཏཱ བྲཱཧྨཎཱི’’ཏིཨཱདི. ཨེཝནྟི ཝུཏྟཔྤཀཱརེན, མཱཏུཔཀྑཏོ ཙ ¶ པིཏུཔཀྑཏོ ཙ པཙྩེཀཾ ཏིཝིདྷེན ཉཱཏིཔརིཝཊྚེནཱཏི ཝུཏྟཾ ཧོཏི. ‘‘སཾསུདྡྷགཧཎིཀོ’’ཏི ཨིམིནཱཔི ‘‘མཱཏིཏོ ཙ པིཏིཏོ ཙཱ’’ཏི ཝུཏྟམེཝཏྠཾ སམཏྠེཏཱིཏི ཨཱཧ ‘‘སཾསུདྡྷཱ ཏེ མཱཏུགཧཎཱི’’ཏི, སཾསུདྡྷཱཝ ཨནཉྙཔུརིསསཱདྷཱརཎཱཏི ཨཏྠོ. ཨནོརསཔུཏྟཝསེནཱཔི ཧི ལོཀེ མཱཏཱཔིཏུསམཉྙཱ དིསྶཏི, ཨིདྷ པནསྶ ཨོརསཔུཏྟཝསེནེཝ ཨིཙྪིཏཱཏི དསྶེཏུཾ ‘‘སཾསུདྡྷགཧཎིཀོ’’ཏི ཝུཏྟཾ. གབྦྷཾ གཎྷཱཏི དྷཱརེཏཱིཏི གཧཎཱི, ཏཏིཡཱཝཊྚསངྑཱཏོ གབྦྷཱསཡསཉྙིཏོ མཱཏུཀུཙྪིཔདེསོ སམཝེཔཱཀིནིཡཱཏི སམཝིཔཱཙནིཡཱ. ཨེཏྠཱཏི མཧཱསུདསྶནསུཏྟེ. ཡཐཱབྷུཏྟམཱཧཱརཾ ཝིཔཱཙནཝསེན གཎྷཱཏི ན ཚཌྜེཏཱིཏི གཧཎཱི, ཀམྨཛཏེཛོདྷཱཏུ, ཡཱ ‘‘ཨུདརགྒཱི’’ཏི ལོཀེ པཉྙཱཡཏི.

པིཏུཔིཏཱཏི པིཏུནོ པིཏཱ. པིཏཱམཧོཏི ཨཱམཧ-པཙྩཡེན ཏདྡྷིཏསིདྡྷི. ‘‘ཙཏུཡུག’’ནྟིཨཱདཱིསུ ཝིཡ ཏཾ ཏདཏྠེ ཡུཛྫིཏབྦཏོ ཀཱལཝིསེསོ ཡུགཾ ནཱམ. ཨེཏཾ ཡུགསདྡེན ཨཱཡུཔྤམཱཎཝཙནཾ ཨབྷིལཱཔམཏྟཾ ལོཀཝོཧཱརཝཙནམཏྟམེཝ, ཨདྷིཔྤེཏཏྠཏོ པན པིཏཱམཧོཡེཝ པིཏཱམཧཡུགསདྡེན ཝུཏྟོ ཏསྶེཝ པདྷཱནབྷཱཝེན ཨདྷིཔྤེཏཏྟཱཏི ཨདྷིཔྤཱཡོ. ཏཏོ ཨུདྡྷནྟི པིཏཱམཧཏོ ཨུཔརི. ཏེནཱཧ ‘‘པུབྦཔུརིསཱ’’ཏི, ཏདཝསེསཱ པུབྦཀཱ ཚ པུརིསཱཏི ཨཏྠོ. པུརིསགྒཧཎཉྩེཏྠ ཨུཀྐཊྛནིདྡེསེན ཀཏནྟི དཊྛབྦཾ. ཨེཝཉྷི ‘‘མཱཏིཏོ’’ཏི པཱལི༹ཝཙནཾ སམཏྠིཏཾ ཧོཏི.

ཏཏྲཱཡམཊྛཀཐཱམུཏྟཀནཡོ – མཱཏཱ ཙ པིཏཱ ཙ པིཏརོ, པིཏཱུནཾ པིཏརོ པིཏཱམཧཱ, ཏེསཾ ཡུགོ དྭནྡོ པིཏཱམཧཡུགོ, ཏསྨཱ, ཡཱཝ སཏྟམཱ པིཏཱམཧཡུགཱ པིཏཱམཧདྭནྡཱཏི ཨཏྠོ ཝེདིཏབྦོ, ཨེཝཉྩ པིཏཱམཧགྒཧཎེནེཝ མཱཏཱམཧོཔི གཧིཏོ. ཡུགསདྡོ ཙེཏྠ ཨེཀསེསོ ‘‘ཡུགོ ཙ ཡུགོ ཙ ཡུགོ’’ཏི, ཨཏོ ཏཏྠ ཏཏྠ ཉཱཏིཔརིཝཊྚེ པིཏཱམཧདྭནྡཾ གཧིཏཾ ཧོཏཱིཏི.

‘‘ཡཱཝ སཏྟམཱ པིཏཱམཧཡུགཱ’’ཏི ཨིདཾ ཀཱཀཱཔེཀྑནམིཝ ཨུབྷཡཏྠ སམྦནྡྷགཏནྟི ཨཱཧ ‘‘ཨེཝ’’ནྟིཨཱདི. ཡཱཝ སཏྟམོ པུརིསོ, ཏཱཝ ཨཀྑིཏྟོ ¶ ཨནུཔཀུཊྛོ ཛཱཏིཝཱདེནཱཏི སམྦནྡྷོ. ཨཀྑིཏྟོཏི ཨཔྤཏྟཁེཔོ. ཨནཝཀྑིཏྟོཏི སདྡྷཐཱལིཔཱཀཱདཱིསུ ན ཚཌྜིཏོ. ན ཨུཔཀུཊྛོཏི ན ཨུཔཀྐོསིཏོ. ‘‘ཛཱཏིཝཱདེནཱ’’ཏི ཨིདཾ ཧེཏུམྷི ཀརཎཝཙནནྟི དསྶེཏུཾ ‘‘ཀེན ཀཱརཎེནཱ’’ཏིཨཱདི ཝུཏྟཾ. ཨིཏིཔཱིཏི ཨིམིནཱཔི ཀཱརཎེན. ཨེཏྠ ཙ ‘‘ཨུབྷཏོ…པེ… ཡུགཱ’’ཏི ཨེཏེན བྲཱཧྨཎསྶ ཡོནིདོསཱབྷཱཝོ དསྶིཏོ སཾསུདྡྷགཧཎིཀབྷཱཝཀིཏྟནཏོ, ‘‘ཨཀྑིཏྟོ’’ཏི ཨེཏེན ཀིརིཡཱཔརཱདྷཱབྷཱཝོ. ཀིརིཡཱཔརཱདྷེན ཧི སཏྟཱ ཁེཔཾ པཱཔུཎནྟི. ‘‘ཨནུཔཀུཊྛོ’’ཏི ཨེཏེན ཨཡུཏྟསཾསགྒཱབྷཱཝོ. ཨཡུཏྟསཾསགྒཉྷི པཊིཙྩ སཏྟཱ ཨཀྐོསཾ ལབྷནྟཱིཏི.

ཨིསྶརོཏི ¶ ཨཱདྷིཔཏེཡྻསཾཝཏྟནིཡཀམྨབལེན ཨཱིསནསཱིལོ, སཱ པནསྶ ཨིསྶརཏཱ ཝིབྷཝསམྤཏྟིཔཙྩཡཱ པཱཀཊཱ ཛཱཏཱ, ཏསྨཱ ཨཌྜྷབྷཱཝཔརིཡཱཡེན དསྶེནྟོ ‘‘ཨཌྜྷོཏི ཨིསྶརོ’’ཏི ཨཱཧ. མཧནྟཾ དྷནམསྶ བྷཱུམིགཏཾ, ཝེཧཱསགཏཉྩཱཏི མཧདྡྷནོ. ཏསྶཱཏི ཏསྶ ཏསྶ གུཎསྶ, ཨཡམེཝ ཙ པཱཋོ ཨདྷུནཱ དིསྶཏི. ཨགུཎཾཡེཝ དསྶེམཱཏི ཨནྭཡཏོ ཏསྶ གུཎཾ ཝཏྭཱ བྱཏིརེཀཏོ བྷགཝཏོ ཨནུཔསངྐམནཀཱརཎཾ ཨགུཎམེཝ དསྶེམ.

ཨདྷིཀརཱུཔོཏི ཝིསིཊྛརཱུཔོ ཨུཏྟམསརཱིརོ. དསྶནཾ ཨརཧཏཱིཏི དསྶནཱིཡོཏི ཨཱཧ ‘‘དསྶནཡོགྒོ’’ཏི. པསཱདཾ ཨཱཝཧཏཱིཏི པཱསཱདིཀོ. ཏེནཱཧ ‘‘པསཱདཛནནཏོ’’ཏི. པོཀྑརསདྡོ ཨིདྷ སུནྡརཏྠེ, སརཱིརཏྠེ ཙ ནིརུལ༹ྷོ. ཝཎྞསྶཱཏི ཝཎྞདྷཱཏུཡཱ. པཀཱསནིཡེན པརིསུདྡྷནིམིཏྟེན ཝཎྞསདྡསྶ ཝཎྞདྷཱཏུཡཾ པཝཏྟནཏོ ཏནྣིམིཏྟམེཝ ཝཎྞཏཱ, སཱ ཙ ཝཎྞནིསྶིཏཱཏི ཨབྷེདཝསེན ཝུཏྟཾ ‘‘ཨུཏྟམེན པརིསུདྡྷེན ཝཎྞེནཱ’’ཏི. སརཱིརཾ པན སནྣིཝེསཝིསིཊྛཾ ཀརཙརཎགཱིཝཱསཱིསཱདིསམུདཱཡཾ, ཏཉྩ ཨཝཡཝབྷཱུཏེན སཎྛཱནནིམིཏྟེན གཡ྄ཧཏི, ཏསྨཱ ཏནྣིམིཏྟམེཝ པོཀྑརཏཱཏི ཝུཏྟཾ ‘‘སརཱིརསཎྛཱནསམྤཏྟིཡཱ’’ཏི, ཨུཏྟམཱཡ སརཱིརསཎྛཱནསམྤཏྟིཡཱཏིཔི ཡོཛེཏབྦཾ. ཨཏྠཝསཱ ཧི ལིངྒཝིབྷཏྟིཝིཔརིཎཱམོ. སབྦེསུ ཝཎྞེསུ སུཝཎྞཝཎྞོཝ ཨུཏྟམོཏི ཨཱཧ ‘‘པརིསུདྡྷཝཎྞེསུཔི སེཊྛེན སུཝཎྞཝཎྞེན སམནྣཱགཏོ’’ཏི. ཏཐཱ ཧི བུདྡྷཱ, ཙཀྐཝཏྟིནོ ཙ སུཝཎྞཝཎྞཱཝ ཧོནྟི. ཡསྨཱ པན ཝཙྪསསདྡོ སརཱིརཱབྷེ པཝཏྟཏི, ཏསྨཱ བྲཧྨཝཙྪསཱིཏི ཨུཏྟམསརཱིརཱབྷོ, སུཝཎྞཱབྷོ ཨིཙྩེཝ ཨཏྠོ. ཨིམམེཝ ཧི ཨཏྠཾ སནྡྷཱཡ ‘‘མཧཱབྲཧྨུནོ སརཱིརསདིསེནེཝ སརཱིརེན སམནྣཱགཏོ’’ཏི ¶ ཝུཏྟཾ, ན བྲཧྨུཛུགཏྟཏཾ. ཨོཀཱསོཏི སབྦངྒཔཙྩངྒཊྛཱནཾ. ཨཱརོཧཔརིཎཱཧསམྤཏྟིཡཱ, ཨཝཡཝཔཱརིཔཱུརིཡཱ ཙ དསྶནསྶ ཨོཀཱསོ ན ཁུདྡཀོཏི ཨཏྠོ. ཏེནཱཧ ‘‘སབྦཱནེཝཱ’’ཏིཨཱདི.

སཱིལནྟི ཡམནིཡམལཀྑཎཾ སཱིལཾ, ཏཾ པནསྶ རཏྟཉྙུཏཱཡ ཝུདྡྷཾ ཝདྡྷིཏནྟི ཝིསེསཏོ ‘‘ཝུདྡྷསཱིལཱི’’ཏི ཝུཏྟཾ. ཝུདྡྷསཱིལེནཱཏི སབྦདཱ སམྨཱཡོགཏོ ཝུདྡྷེན དྷུཝསཱིལེན. ཨེཝཉྩ ཀཏྭཱ པདཏྟཡམྤེཏཾ ཨདྷིཔྤེཏཏྠཏོ ཝིསིཊྛཾ ཧོཏི, སདྡཏྠམཏྟཾ པན སནྡྷཱཡ ‘‘ཨིདཾ ཝུདྡྷསཱིལཱིཔདསྶེཝ ཝེཝཙན’’ནྟི ཝུཏྟཾ. པཉྩསཱིལཏོ པརཾ ཏཏྠ སཱིལསྶ ཨབྷཱཝཏོ, ཏེསམཛཱནནཏོ ཙ ‘‘པཉྩསཱིལམཏྟམེཝཱ’’ཏི ཨཱཧ.

ཝཱཙཱཡ པརིམཎྜལཔདབྱཉྫནཏཱ ཨེཝ སུནྡརབྷཱཝོཏི ཝུཏྟཾ ‘‘སུནྡརཱ པརིམཎྜལཔདབྱཉྫནཱ’’ཏི. ཋཱནཀརཎསམྤཏྟིཡཱ, སིཀྑཱསམྤཏྟིཡཱ ཙ ཀསྶཙིཔི ཨནཱུནཏཱཡ པརིམཎྜལཔདཱནི བྱཉྫནཱནི ཨཀྑརཱནི ཨེཏིསྶཱཏི པརིམཎྜལཔདབྱཉྫནཱ. ཨཀྑརམེཝ ཧི ཏཾཏདཏྠཝཱཙཀབྷཱཝེན ¶ པརིཙྪིནྣཾ པདཾ. ཨཐ ཝཱ པདམེཝ ཨཏྠསྶ བྱཉྫཀཏྟཱ བྱཉྫནཾ, སིཐིལདྷནིཏཱདིཨཀྑརཔཱརིཔཱུརིཡཱ ཙ པདབྱཉྫནསྶ པརིམཎྜལཏཱ, པརིམཎྜལཾ པདབྱཉྫནམེཏིསྶཱཏི ཏཐཱ. ཨཔིཙ པཛྫཏི ཨཏྠོ ཨེཏེནཱཏི པདཾ, ནཱམཱདི, ཡཐཱདྷིཔྤེཏམཏྠཾ བྱཉྫེཏཱིཏི བྱཉྫནཾ, ཝཱཀྱཾ, ཏེསཾ པརིཔུཎྞཏཱཡ པརིམཎྜལཔདབྱཉྫནཱ. ཨཏྠཝིཉྙཱཔནེ སཱདྷནཏཱཡ ཝཱཙཱཝ ཀརཎཾ ཝཱཀྐརཎནྟི ཏུལྱཱདྷིཀརཎཏཾ དསྶེཏུཾ ‘‘ཨུདཱཧརཎགྷོསོ’’ཏི ཝུཏྟཾ, ཝཙཱིབྷེདསདྡོཏི ཨཏྠོ. ཏསྶ བྲཱཧྨཎསྶ, ཏེན ཝཱ བྷཱསིཏབྦསྶ ཨཏྠསྶ གུཎཔརིཔུཎྞབྷཱཝེན པཱུརེ གུཎེཧི པརིཔུཎྞབྷཱཝེ བྷཝཱཏི པོརཱི. པུན པུརེཏི རཱཛདྷཱནཱིམཧཱནགརེ. བྷཝཏྟཱཏི སཾཝཌྜྷཏྟཱ. སུཁུམཱལཏྟནེནཱཏི སུཁུམཱལབྷཱཝེན, ཨིམིནཱ ཏསྶཱ ཝཱཙཱཡ མུདུསཎྷཏྟམཱཧ. ཨཔལིབུདྡྷཱཡཱཏི པིཏྟསེམྷཱདཱིཧི ཨཔརིཡོནདྡྷཱཡ, ཧེཏུགབྦྷཔདམེཏཾ. ཏཏོ ཨེཝ ཧི ཡཐཱཝུཏྟདོསཱབྷཱཝོཏི. ཌཾསེཏྭཱ ཝིཡ ཨེཀདེསཀཐནཾ སནྡིཊྛཾ, སཎིཀཾ ཙིརཱཡིཏྭཱ ཀཐནཾ ཝིལམྦིཏཾ, ‘‘སནྣིདྡྷཝིལམྦིཏཱདཱི’’ཏིཔི པཱཋོ. སདྡེན ཨཛནཀཾ ཝཙིནཾ, མམྨཀསངྑཱཏཾ ཝཱ ཨེཀཀྑརམེཝ དྭཏྟིཀྑཏྟུམུཙྩཱརཎཾ སནྣིདྡྷཾ. ཨཱདིསདྡེན དུཀྑལིཏཱནུཀཌྜྷིཏཱདཱིནི སངྒཎྷཱཏི. ཨེལཱ༹གལེ༹ནཱཏི ཨེལཱ༹པགྒྷརཎེན. ‘‘ཨེལཱ༹ གལ༹ནྟཱི’’ཏི ཝུཏྟསྶེཝ དྭིདྷཱ ཨཏྠཾ དསྶེཏུཾ ‘‘ལཱལཱ ཝཱ པགྒྷརནྟཱི’’ཏིཨཱདི ¶ ཝུཏྟཾ. ‘‘པསྶེ’ལ༹མཱུགཾ ཨུརགཾ དུཛིཝ྄ཧ’’ནྟིཨཱདཱིསུ (ཛཱ. ༡.༧.༤༩) ཝིཡ ཧི ཨེལཱ༹སདྡོ ལཱལཱཡ, ཁེལེ༹ ཙ པཝཏྟཏི. ཁེལ༹ཕུསིཏཱནཱིཏི ཁེལ༹བིནྡཱུནི.

ཏཏྲཱཡམཊྛཀཐཱམུཏྟཀནཡོ – ཨེལནྟི དོསོ ཝུཙྩཏི ‘‘ཡཱ སཱ ཝཱཙཱ ནེལཱ ཀཎྞསུཁཱ’’ཏིཨཱདཱིསུ (དཱི. ནི. ༡.༨, ༡༩༤) ཝིཡ. དུཔྤཉྙཱ ཙ སདོསམེཝ ཀཐཾ ཀཐེནྟཱ ཨེལཾ པགྒྷརཱཔེནྟི, ཏསྨཱ ཏེསཾ ཝཱཙཱ ཨེལགལཱ༹ ནཱམ ཧོཏི, ཏབྦིཔརཱིཏཱཡཱཏི ཨཏྠོ. ‘‘ཨཱདིམཛ྄ཛྷཔརིཡོསཱནཾ པཱཀཊཾ ཀཏྭཱ’’ཏི ཨིམིནཱ ཏསྶཱ ཝཱཙཱཡ ཨཏྠཔཱརིཔཱུརིཾ ཝདཏི. ཝིཉྙཱཔནསདྡེན ཨེཏསྶ སམྦནྡྷོ.

ཛརཱཛིཎྞཏཱཡ ཛིཎྞོཏི ཁཎྜིཙྩཔཱལིཙྩཱདིབྷཱཝམཱཔཱདིཏོ. ཝུདྡྷིམརིཡཱདཔྤཏྟོཏི ཝུདྡྷིཡཱ པརིཙྪེདཾ པརིཡནྟཾ པཏྟོ. ཛཱཏིམཧལླཀཏཱཡཱཏི ཨུཔཔཏྟིཡཱ མཧལླཀབྷཱཝེན. ཏེནཱཧ ‘‘ཙིརཀཱལཔྤསུཏོ’’ཏི. ཨདྡྷསདྡོ ཨདྡྷཱནཔརིཡཱཡོ དཱིགྷཀཱལཝཱཙཀོ. ཀིཏྟཀོ པན སོཏི ཨཱཧ ‘‘དྭེ ཏཡོ རཱཛཔརིཝཊྚེ’’ཏི, དྭིནྣཾ ཏིཎྞཾ རཱཛཱུནཾ རཛྫཔསཱསནཔཊིཔཱཊིཡོཏི ཨཏྠོ. ‘‘ཨདྡྷགཏོ’’ཏི ཝཏྭཱཔི ཀཏཾ ཝཡོགཧཎཾ ཨོསཱནཝཡཱཔེཀྑནྟི ཝུཏྟཾ ‘‘པཙྪིམཝཡཾ སམྤཏྟོ’’ཏི. པཙྪིམོ ཏཏིཡབྷཱགོཏི ཝསྶསཏསྶ ཏིདྷཱ ཀཏེསུ བྷཱགེསུ ཏཏིཡོ ཨོསཱནབྷཱགོ. པཙྩེཀཾ ཏེཏྟིཾསཝསྶཏོ ཙ ཨདྷིཀམཱསཔཀྑཱདིཔི ཝིབྷཛཱིཡཏི, ཏསྨཱ སཏྟསཊྛིམེ ཝསྶེ ཡཐཱརཧཾ ལབྦྷམཱནམཱསཔཀྑདིཝསཏོ པཊྛཱཡ པཙྪིམཝཡོ ཝེདིཏབྦོ. ཨཱཙརིཡསཱརིཔུཏྟཏྠེརེནཔི ¶ ཧི ཨིམམེཝཏྠཾ སནྡྷཱཡ ‘‘སཏྟསཊྛིཝསྶཏོ པཊྛཱཡ པཙྪིམཝཡོ ཀོཊྛཱསོ’’ཏི (སཱརཏྠ. ཊཱི. ༡.ཝེརཉྫཀཎྜཝཎྞནཱ) ཝུཏྟཾ. ཨིཏརཐཱ ཧི ‘‘པཙྪིམཝཡོ ནཱམ ཝསྶསཏསྶ པཙྪིམོ ཏཏིཡབྷཱགོ’’ཏི ཨཊྛཀཐཱཝཙནེན ཝིརོདྷོ བྷཝེཡྻཱཏི.

ཨེཝཾ ཀེཝལཛཱཏིཝསེན པཋམཝིཀཔྤཾ ཝཏྭཱ གུཎམིསྶཀཝསེནཔི དུཏིཡཝིཀཔྤཾ ཝདནྟེན ‘‘ཨཔིཙཱ’’ཏིཨཱདི ཨཱརདྡྷཾ. ཏཏྠ ནཱཡཾ ཛིཎྞཏཱ ཝཡོམཏྟེན, ཨཐ ཁོ ཀུལཔརིཝཊྚེན པུརཱཎཏཱཏི ཨཱཧ ‘‘ཛིཎྞོཏི པོརཱཎོ’’ཏིཨཱདི. ཙིརཀཱལཔྤཝཏྟཀུལནྭཡོཏི ཙིརཀཱལཾ པཝཏྟཀུལཔརིཝཊྚོ, ཏེནཱསྶ ཀུལཝསེན ཨུདིཏོདིཏབྷཱཝམཱཧ. ‘‘ཝཡོཨནུཔྤཏྟོ’’ཏི ཨིམིནཱ ཛཱཏིཝུདྡྷིཡཱ ཝཀྑམཱནཏྟཱ, གུཎཝུདྡྷིཡཱ ¶ ཙ ཏཏོ སཱཏིསཡཏྟཱ ‘‘ཝུདྡྷོཏི སཱིལཱཙཱརཱདིགུཎཝུདྡྷིཡཱ ཡུཏྟོ’’ཏི ཝུཏྟཾ. ཝཀྑམཱནཾ པཏི པཱརིསེསགྒཧཎཉྷེཏཾ. ཏཐཱ ཛཱཏིམཧལླཀཏཱཡཔི ཏེནེཝ པདེན ཝཀྑམཱནཏྟཱ, ཝིབྷཝམཧཏྟཏཱཡ ཙ ཨནཝསེསིཏཏྟཱ ‘‘མཧལླཀོཏི ཝིབྷཝམཧནྟཏཱཡ སམནྣཱགཏོ’’ཏི ཨཱཧ. མགྒཔཊིཔནྣོཏི བྲཱཧྨཎཱནཾ ཡུཏྟཔཊིཔཏྟིཝཱིཐིཾ ཨཝོཀྐམྨ ཙརཎཝསེན ཨུཔགཏོཏི ཨཏྠཾ དསྶེཏི ‘‘བྲཱཧྨཎཱན’’ནྟིཨཱདིནཱ. ཛཱཏིཝུདྡྷབྷཱཝམནུཔྤཏྟོ, ཏམྤི ཨནྟིམཝཡཾ པཙྪིམཝཡམེཝ ཨནུཔྤཏྟོཏི སཱདྷིཔྤཱཡཡོཛནཱ. ཨིམིནཱ ཧི པཙྪིམཝཡཝསེན ཛཱཏིཝུདྡྷབྷཱཝཾ དསྶེཏཱིཏི.

བུདྡྷགུཎཀཐཱཝཎྞནཱ

༣༠༤. ཏཱདིསེཧི མཧཱནུབྷཱཝེཧི སདྡྷིཾ ཡུགགྒཱཧཝསེན ཋཔནམྤི ན མཱདིསཱནཾ པཎྜིཏཛཱཏཱིནམནུཙྪཝིཀཾ, ཀུཏོ པན ཨུཀྐཾསཝསེན ཋཔནནྟི ཨིདཾ བྲཱཧྨཎསྶ ན ཡུཏྟརཱུཔནྟི དསྶེནྟོ ‘‘ན ཁོ པན མེཏ’’ནྟིཨཱདིམཱཧ. ཏཏྠ ཡེཔི གུཎཱ ཨཏྟནོ གུཎེཧི སདིསཱ, ཏེཔི གུཎེ ཨུཏྟརིཏརེཡེཝ མཉྙམཱནོ པཀཱསེཏཱིཏི སམྦནྡྷོ. སདིསཱཏི ཙ ཨེཀདེསེན སདིསཱ. ན ཧི བུདྡྷཱནཾ གུཎེཧི སབྦཐཱ སདིསཱ ཀེཙིཔི གུཎཱ ཨཉྙེསུ ལབྦྷནྟི. ‘‘ཀོ ཙཱཧ’’ནྟིཨཱདི ཨུཏྟརིཏརཱཀཱརདསྶནཾ. ཨཧཉྩ ཀཱིདིསོ ནཱམ ཧུཏྭཱ སདིསོ བྷཝིསྶཱམི, སམཎསྶ…པེ… གུཎཱ ཙ ཀཱིདིསཱ ནཱམ ཧུཏྭཱ སདིསཱ བྷཝིསྶནྟཱིཏི སཱདྷིཔྤཱཡཡོཛནཱ. ཀེཙི ནཝཾ པཱཋཾ ཀརོནྟི, ཨཡམེཝ མཱུལཔཱཋོ ཡཐཱ ཏཾ ཨམྦཊྛསུཏྟེ ‘‘ཀོ ཙཱཧཾ བྷོ གོཏམ སཱཙརིཡཀོ, ཀཱ ཙ ཨནུཏྟརཱ ཝིཛྫཱཙརཎསམྤདཱ’’ཏི. ཨིཏརེཏི ཨཏྟནོ གུཎེཧི ཨསདིསེ གུཎེ, ‘‘པཀཱསེཏཱི’’ཏི ཨིམིནཱཝ སམྦནྡྷོ. ཨེཀནྟེནེཝཱཏི སདིསགུཎཱནཾ ཝིཡ པསངྒཱབྷཱཝེན.

ཨེཝཾ ནིཡཱམེནྟོ སོཎདཎྜོ ཨིདཾ ཨཏྠཛཱཏཾ དཱིཔེཏི. ཡཐཱ ཧཱིཏི ཨེཏྠ ཧི-སདྡོ ཀཱརཎེ. ཏེནཱཧ ¶ ‘‘ཏསྨཱ མཡམེཝ ཨརཧཱམཱ’’ཏི. གོཔདཀནྟི གཱཝིཡཱ ཁུརཊྛཱནེ ཋིཏཨུདཀཾ. གུཎེཏི སདིསགུཎེཔི, པགེཝ ཨསདིསགུཎེ.

སཊྛིཀུལསཏསཧསྶནྟི སཊྛིསཧསྶཱདྷིཀཾ ཀུལསཏསཧསྶཾ. དྷམྨཔདཊྛཀཐཱདཱིསུ (དྷ. པ. ཨཊྛ. ༡༦) པན ཀཏྠཙི བྷགཝཏོ ཨསཱིཏིཀུལསཧསྶཏཱཝཙནཾ ཨེཀེཀཔཀྑམེཝ སནྡྷཱཡཱཏི ཝེདིཏབྦཾ.

སུདྷཱམཊྛཔོཀྑརཎིཡོཏི ¶ སུདྷཱཡ པརིཀམྨཀཏཱ པོཀྑརཎིཡོ. སཏྟརཏནཱནནྟི སཏྟཧི རཏནེཧི. པཱུརཡོགེ ཧི ཀརཎཏྠེ བཧུལཾ ཚཊྛཱིཝཙནཾ. པཱསཱདནིཡཱུཧཱདཡོཏི ཨུཔརིཔཱསཱདེ ཋིཏཏུལཱསཱིསཱདཡོ. ‘‘སཏྟརཏནཱན’’ནྟི ཨདྷིཀཱརོ, ཨབྷེདེཔི བྷེདཝོཧཱརོ ཨེས. ཀུལཔརིཡཱཡེནཱཏི སུདྡྷོདནམཧཱརཱཛསྶ ཨསམྦྷིནྣཁཏྟིཡཀུལཱནུཀྐམེན. ཏེསུཔཱིཏི ཙཏཱུསུ ནིདྷཱིསུཔི. གཧིཏཾ གཧིཏཾ ཋཱནཾ པཱུརཏིཡེཝ དྷནེན པཱཀཏིཀམེཝ ཧོཏི, ན ཨཱུནཾ.

བྷདྡཀེནཱཏི སུནྡརེན. པཙྪིམཝཡེ ཝུཏྟནཡེན པཋམཝཡོ ཝེདིཏབྦོ. མཱཏཱཔིཏཱུནཾ ཨནིཙྪཱཡ པབྦཛྫཱཝ ཨནཱདརོ ཏེན ཡུཏྟེ ཨཏྠེ སཱམིཝཙནནྟི ཝུཏྟཾ ཧོཏི. ཨེཏེསནྟི མཱཏཱཔིཏཱུནཾ. ཀནྡིཏྭཱཏི ‘‘ཀཧཾ པིཡཔུཏྟཀཱ’’ཏིཨཱདིནཱ པརིདེཝིཏྭཱ.

ཨཔརིམཱཎོཡེཝཱཏི ‘‘ཨེཏྟཀོ ཨེསོ’’ཏི ཀེནཙི པརིཙྪིནྡིཏུམསཀྐུཎེཡྻཏཱཡ ཨཔརིཙྪིནྣོཡེཝ. དྭེ ཝེལཱུ༹ ཨདྷོཀཊིམཏྟཀམེཝ ཧོནྟཱིཏི ཨཱཧ ‘‘དྭིནྣཾ ཝེལཱུ༹ནཾ ཨུཔརི ཀཊིམཏྟམེཝཱ’’ཏི. པཱརམིཏཱནུབྷཱཝེན བྲཱཧྨཎསྶ ཨེཝ པཉྙཱཡཏི, བྷགཝཱ པན ཏདཱ པཀཏིཔྤམཱཎོཝཱཏི དསྶེཏུཾ ‘‘པཉྙཱཡམཱནོ’’ཏི ཝུཏྟམིཝ དིསྶཏི, ཝཱིམཾསིཏྭཱ གཧེཏབྦཾ. ‘‘ན ཧཱི’’ཏིཨཱདིནཱ པཱརམིཏཱབལེནེཝ ཨེཝཾ ཨཔརིམཱཎཏཱ, ན ཨིདྡྷིབལེནཱཏི དསྶེཏཱི’’ཏི ཝདནྟི. ཨཏུལོཏི ཨསདིསོ. ‘‘དྷམྨཔདེ གཱཐམཱཧཱ’’ཏི ཀཏྠཙི པཱཋོ ཨཡུཏྟོཝ. ན ཧི དྷམྨཔདེ ཨཡཾ གཱཐཱ དིསྶཏི. སུདྷཱཔིཎྜིཡཏྠེརཱཔདཱནཱདཱིསུ (ཨཔ. ༡.༡༠.སུདྷཱཔིཎྜིཡཏྠེརཱཔདཱན) པནཱཡཾ གཱཐཱ ཨཱགཏཱ, སཱ ཙ ཁོ ཨཉྙཝཏྠུསྨིཾ ཨེཝ, ན ཨིམསྨིཾ ཝཏྠུམྷི, ཏསྨཱ པཱལི༹ཝསེན སངྒཱིཏིམནཱརུལ༹ྷཱ པཀིཎྞཀདེསནཱཡེཝཱཡཾ གཱཐཱཏི དཊྛབྦཾ.

ཏཏྠ ཏེ ཏཱདིསེཏི པརིཡཱཡཝཙནམེཏཾ ‘‘ཨཔྤཾ ཝསྶསཏཾ ཨཱཡུ, ཨིདཱནེཏརཧི ཝིཛྫཏཱི’’ཏིཨཱདཱིསུ (བུ. ཝཾ. ༢༧.༢༡) ཝིཡ, ‘‘ཨེཏཱདིསེ’’ཏིཔི པཋནྟི, ཏདསུནྡརཾ ཨཔདཱནཱདཱིསུ ¶ ཏཐཱ ཨདིསྶནཏོ. ཀིལེསཔརིནིབྦཱནེན པརིནིབྦུཏེ ཀུཏོཙིཔི ཨབྷཡེ ཏེ ཏཱདིསེ པཱུཛཡཏོ ཨེཏྠ ཨིདཾ པུཉྙཾ ཀེནཙི མཧཱནུབྷཱཝེན ཨཔི སངྑཱཏུཾ ན སཀྐཱཏི ཨཏྠོ.

བཱཧནྟརནྟི ¶ དྭིནྣཾ བཱཧཱུནམནྟརཾ. དྭཱདས ཡོཛནསཏཱནཱིཏི དྭཱདསཱདྷིཀཱནི ཡོཛནསཏཱནི. བཧལནྟརེནཱཏི སམནྟཱ སརཱིརཔརིཎཱཧཔྤམཱཎེན. པུཐུལཏོཏི ཝིཏྠཱརཏོ. ཨངྒུལིཔབྦཱནཱིཏི ཨེཀེཀཱནི ཨངྒུལིཔབྦཱནི. བྷམུཀནྟརནྟི དྭིནྣཾ བྷམུཀཱནམནྟརཾ. མུཁཾ ཝིཏྠཱརཏོ དྭིཡོཛནསཏཾ པརིམཎྜལཏོ ཝིསུཾ ཝུཏྟཏྟཱ. ‘‘ཨེདིསོ བྷགཝཱ’’ཏི ཡཱ པརེཧི ཝུཏྟཱ ཀཐཱ, ཏསྶཱ ཨནུརཱུཔནྟི ཡཐཱཀཐཾ, ཨིམིནཱ ཨཉྙེཧི ཝུཏྟཾ བྷགཝཏོ ཝཎྞཀཐཾ སུཏྭཱ ཨོལོཀེཏུཀཱམཏཱཡ ཨཱགཏོཏི དསྶེཏི, ཡཐཱཀཐནྟི ཝཱ ཀཱིདིསཾ. ‘‘ཡཐཱཀཐཾ པན ཏུམྷེ བྷིཀྑཝེ སམགྒཱ སམྨོདམཱནཱ ཨཝིཝདམཱནཱ ཕཱསུཀཾ ཝསྶཾ ཝསིཏྠཱ’’ཏིཨཱདཱིསུ (པཱརཱ. ༡༩༤) ཝིཡ ཧི པུཙྪཱཡཾ ཨེས ནིཔཱཏསམུདཱཡོ, ཨེཀོ ཝཱ ནིཔཱཏོ.

གནྡྷཀུཊིཔརིཝེཎེཏི གནྡྷཀུཊིཡཱ པརིཝེཎེ, གནྡྷཀུཊིཏོ བཧི པརིཝེཎབྦྷནྟརེཏི ཨཏྠོ. ཏཏྠཱཏི མཉྩཀེ. ‘‘སཱིཧསེཡྻཾ ཀཔྤེསཱི’’ཏི ཡཐཱ རཱཧུ ཨསུརིནྡོ ཨཱཡཱམཏོ, ཝིཏྠཱརཏོ, ཨུབྦེདྷཏོ ཙ བྷགཝཏོ རཱུཔཀཱཡསྶ པརིཙྪེདཾ གཧེཏུཾ ན སཀྐོཏི, ཏཐཱ རཱུཔཾ ཨིདྡྷཱབྷིསངྑཱརཾ ཨབྷིསངྑརོནྟོ སཱིཧསེཡྻཾ ཀཔྤེསཱི’’ཏི (དཱི. ནི. ཊཱི. ༡.༣༠༤) ཨེཝཾ ཨཱཙརིཡེན ཝུཏྟཾ, ‘‘ཏདེཏཾ ‘ན མཡཱ ཨསུརིནྡ ཨདྷོམུཁེན པཱརམིཡོ པཱུརིཏཱ, ཨུདྡྷགྒམེཝ ཀཏྭཱ དཱནཾ དིནྣ’’ནྟི ཨཊྛཀཐཱཝཙནེན ཨཙྩནྟམེཝ ཝིརུདྡྷཾ ཧོཏི. ཨེཏཉྷི གནྡྷཀུཊིདྭཱརཝིཝརཎཱདཱིསུ ཝིཡ པཱརམིཏཱནུབྷཱཝསིདྡྷིདསྶནཾ, ཨཉྙཐཱ ཏདེཝ ཝཙནཾ ཝཏྟབྦཾ བྷཝེཡྻཱ’’ཏི ཝདནྟི, ཝཱིམཾསིཏྭཱ སམྤཊིཙྪིཏབྦཾ. ཨདྷོམུཁེནཱཏི ཨོསཀྐིཏཝཱིརིཡཏཾ སནྡྷཱཡ ཝུཏྟཾ, ཨུདྡྷགྒམེཝཱཏི ཨནོསཀྐིཏཝཱིརིཡཏཾ, ཨུབྦྷཀོཊིཀཾ ཀཏྭཱཏི ཨཏྠོ. ཏདཱ རཱཧུ ཨུཔཱསཀབྷཱཝཾ པཊིཝེདེསཱིཏི ཨཱཧ ‘‘ཏཾ དིཝས’’ནྟིཨཱདི.

ཀིལེསེཧི ཨཱརཀཏྟཱ ཨརིཡཾ ནིརུཏྟིནཡེན, ཨཏོཡེཝ ཨུཏྟམཏཱ པརིསུདྡྷཏཱཏི ཝུཏྟཾ ‘‘ཨུཏྟམཾ པརིསུདྡྷ’’ནྟི. ཨནཝཛྫཊྛེན ཀུསལཾ, ན སུཁཝིཔཱཀཊྛེན ཏསྶ ཨརཧཏམསམྦྷཝཏོ. ཀུསལསཱིལེནཱཏི ཨནཝཛྫེནེཝ ཝིདྡྷསྟསཝཱསནཀིལེསེན སཱིལེན. ཨེཝཉྩ ཀཏྭཱ པདཙཏུཀྐམྤེཏཾ ཨདྷིཔྤེཏཏྠཏོ ཝིསིཊྛཾ ཧོཏི, སདྡཏྠམཏྟཾ པན སནྡྷཱཡ ‘‘ཨིདམསྶ ཝེཝཙན’’ནྟི ཝུཏྟཾ.

ཀཏྠཙི ¶ ཙཏུརཱསཱིཏིཔཱཎསཧསྶཱནི, ཀཏྠཙི ཨཔརིམཱཎཱཔི དེཝམནུསྶཱཏི ཨཏྠཾ སནྡྷཱཡ ‘‘བྷགཝཏོ ¶ ཨེཀེཀཱཡ དྷམྨདེསནཱཡཱ’’ཏིཨཱདིམཱཧ. མཧཱསམཡསུཏྟ (དཱི. ནི. ༢.༣༣༡ ཨཱདཡོ) མངྒལསུཏྟ- (ཁུ. པཱ. ༥.༡ ཨཱདཡོ; སུ. ནི. ༢༦༡ ཨཱདཡོ) དེསནཱདཱིསུ ཧི ཙཏུཝཱིསཏིཡཱ ཋཱནེསུ ཨསངྑྱེཡྻཱ ཨཔརིམེཡྻཱ དེཝམནུསྶཱ མགྒཕལཱམཏཾ པིཝིཾསུ. ཀོཊིསཏསཧསྶཱདིཔརིམཱཎེནཔི བཧཱུ ཨེཝ, ནིདསྶནཝསེན པནེཝཾ ཝུཏྟཾ. ཏསྨཱ ཨནུཏྟརསིཀྑཱཔཀབྷཱཝེན བྷགཝཱ བཧཱུནཾ ཨཱཙརིཡོ, ཏེསཾ ཨཱཙརིཡབྷཱུཏཱནཾ སཱཝཀཱནམཱཙརིཡབྷཱཝེན སཱཝཀཝེནེཡྻཱནཾ པཱཙརིཡོ. བྷགཝཏཱ ཧི དིནྣནཡེ ཋཏྭཱ སཱཝཀཱ ཝེནེཡྻཾ ཝིནེནྟི, ཏསྨཱ བྷགཝཱཝ ཏེསཾ པདྷཱནོ ཨཱཙརིཡོཏི.

ཝདནྟསྶཱདྷིཔྤེཏོཝ ཨཏྠོ པམཱཎཾ, ན ལཀྑཎཧཱརཱདིཝིསཡོཏི ཨཱཧ ‘‘བྲཱཧྨཎོ པནཱ’’ཏིཨཱདི. ‘‘ཨིམསྶ ཝཱ པཱུཏིཀཱཡསྶཱ’’ཏི པཱཋཱཝསཱནེ པེཡྻཱལཾ ཀཏྭཱ ‘‘ཀེལནཱ པཊིཀེལནཱ’’ཏི ཝུཏྟཾ. ཨཡཉྷི ཁུདྡཀཝཏྠུཝིབྷངྒཔཱལི༹ (ཝིབྷ. ༨༥༤) ‘‘བཱཧིརཱནཾ ཝཱ པརིཀྑཱརཱནཾ མཎྜནཱ’’ཏིཨཱདི པེཡྻཱལཝསེན གཡ྄ཧཏི. ཏཏྠ ཨིམསྶ ཝཱ པཱུཏིཀཱཡསྶཱཏི ཨིམསྶ ཝཱ མནུསྶསརཱིརསྶ. ཡཐཱ ཧི ཏདཧུཛཱཏོཔི སིངྒཱལོ ‘‘ཛརསིངྒཱལོ’’ ཏྭེཝ, ཨཱུརུཔྤམཱཎཱཔི ཙ གལོཙིལཏཱ ‘‘པཱུཏིལཏཱ’’ ཏྭེཝ སངྑྱཾ གཙྪཏི, ཨེཝཾ སུཝཎྞཝཎྞོཔི མནུསྶསརཱིརོ ‘‘པཱུཏིཀཱཡོ’’ ཏྭེཝ, ཏསྶ མཎྜནཱཏི ཨཏྠོ. ཀེལནཱཏི ཀཱིལ༹ནཱ. ‘‘ཀེལཱཡནཱ’’ཏིཔི པཋནྟི. པཊིཀེལནཱཏི པཊིཀཱིལ༹ནཱ. ཙཔལསྶ བྷཱཝོ ཙཱཔལྱཾ, ཙཱཔལླཾ ཝཱ, ཡེན སམནྣཱགཏོ པུགྒལོ ཝསྶསཏིཀོཔི སམཱནོ ཏདཧུཛཱཏདཱརཀོ ཝིཡ ཧོཏི, ཏསྶེདམདྷིཝཙནནྟི ཝེདིཏབྦཾ.

ཨཔཱཔེ པུརེ ཀརོཏི, ན ཝཱ པཱཔཾ པུརེ ཀརོཏཱིཏི ཨཔཱཔཔུརེཀྑཱརོཏི ཡུཏྟཱཡུཏྟསམཱསེན དུཝིདྷམཏྠཾ དསྶེཏུཾ ‘‘ཨཔཱཔེ ནཝལོཀུཏྟརདྷམྨེ’’ཏིཨཱདི ཝུཏྟཾ. ཨཔཱཔེཏི ཙ པཱཔཔཊིཔཀྑེ, པཱཔཝིརཧིཏེ ཝཱ. བྲཧྨནི སེཊྛེ བྷགཝཏི བྷཝཱ ཏསྶ དྷམྨདེསནཱཝསེན ཨརིཡཱཡ ཛཱཏིཡཱ ཛཱཏཏྟཱ, བྲཧྨུནོ ཝཱ བྷགཝཏོ ཨཔཙྩཾ གརུཀརཎཱདིནཱ, ཡཐཱནུསིཊྛཾ པཊིཔཏྟིཡཱ ཙ, བྲཧྨཾ ཝཱ སེཊྛཾ ཨརིཡམགྒཾ ཛཱནཱཏཱིཏི བྲཧྨཉྙཱ, ཨརིཡསཱཝཀསངྑཱཏཱ པཛཱ. ཏེནཱཧ ‘‘སཱརིཔུཏྟམོགྒལླཱནཱ’’ཏིཨཱདི. བྲཱཧྨཎཔཛཱཡཱཏི བཧིཏཔཱཔཔཛཱཡ. ‘‘ཨཔཱཔཔུརེཀྑཱརོ’’ཏི ཨེཏྠ ‘‘པུརེཀྑཱརོ’’ཏི པདམདྷིཀཱརོཏི དསྶེཏི ‘‘ཨེཏིསྶཱཡ ¶ ཙ པཛཱཡ པུརེཀྑཱརོ’’ཏི ཨིམིནཱ. ཙ-སདྡོ སམུཙྩཡཏྠོ ‘‘ན ཀེཝལཾ ཨཔཱཔཔུརེཀྑཱརོ ཨེཝ, ཨཐ ཁོ བྲཧྨཉྙཱཡ ཙ པཛཱཡ སམྦནྡྷབྷཱུཏཱཡ པུརེཀྑཱརོ’’ཏི. ‘‘ཨཡཉྷཱི’’ཏིཨཱདི ཨདྷིཔྤཱཡམཏྟདསྶནཾ. ‘‘ཨཔཱཔཔུརེཀྑཱརོ’’ཏི ཨིདཾ ‘‘བྲཧྨཉྙཱཡ པཛཱཡཱ’’ཏི ཨིམིནཱཝ སམྦནྡྷིཏབྦཾ, ན ཙ པཙྩེཀམཏྠདཱིཔཀཾ, པཀཏིབྲཱཧྨཎཛཱཏིཝསེནཔི ཙེཏསྶ ཨཏྠོ ཝེདིཏབྦོཏི དསྶེནྟོ ‘‘ཨཔིཙཱ’’ཏིཨཱདིམཱཧ. ཨཡུཏྟསམཱསོ ཙཱཡཾ. པཱཔནྟི པཱཔཀམྨཾ, ཨཧིཏཾ དུཀྑནྟི ཨཏྠོ. ཏསྶ ¶ སམྦནྡྷིཔེཀྑཏྟཱ ཀསྶཱ ཨཔཱཔཔུརེཀྑཱརོཏི པུཙྪཱཡ ཨེཝམཱཧཱཏི དསྶེཏུཾ ‘‘ཀསྶཱ’’ཏིཨཱདི ཝུཏྟཾ. ‘‘ཨཏྟནཱ’’ཏིཨཱདི ཏདཏྠཝིཝརཎཾ. བྲཱཧྨཎཔཛཱཡཱཏི བྲཱཧྨཎཛཱཏིཔཛཱཡ.

རཉྫནྟི ཨཊྚཾ བྷཛནྟི རཱཛཱནོ ཨེཏེནཱཏི རཊྛཾ, ཨེཀསྶ རཉྙོ རཛྫབྷཱུཏཀཱསིཀོསལཱདིམཧཱཛནཔདཱ. ཛནཱ པཛྫནྟི སུཁཛཱིཝིཀཾ པཱཔུཎནྟི ཨེཏྠཱཏི ཛནཔདོ, ཨེཀསྶ རཉྙོ རཛྫེ ཨེཀེཀཀོཊྛཱསབྷཱུཏཱ ཨུཏྟརཔཐདཀྑིཎཔཐཱདིཁུདྡཀཛནཔདཱ. ཏཏྠཱཏི ཏཐཱ ཨཱགཏེསུ. པུཙྪཱཡཱཏི ཨཏྟནཱ ཨབྷིསངྑཏཱཡ པུཙྪཱཡ. ཝིསྶཛྫནཱསམྤཊིཙྪནེཏི ཝིསྶཛྫནཱཡ ཨཏྟནོ ཉཱཎེན སམྤཊིགྒཧཎེ. ཀེསཉྩི ཨུཔནིསྶཡསམྤཏྟིཾ, ཉཱཎཔརིཔཱཀཾ, ཙིཏྟཱཙཱརཉྩ ཉཏྭཱ བྷགཝཱཝ པུཙྪཱཡ ཨུསྶཱཧཾ ཛནེཏྭཱ ཝིསྶཛྫེཏཱིཏི ཨདྷིཔྤཱཡོ.

‘‘ཏཏྠ ཀཏམཾ སཱཁལྱ’’ནྟིཨཱདི ནིཀྑེཔཀཎྜཔཱལི༹ (དྷ. ས. ༡༣༥༠). ཨདྡྷཱནདརཐནྟི དཱིགྷམགྒཱགམནཔརིསྶམཾ. ཨསྶཱཏི བྷགཝཏོ, མུཁཔདུམནྟི སམྦནྡྷོ. བཱལཱཏཔསམྥསྶནེནེཝཱཏི ཨབྷིནཝུགྒཏསཱུརིཡརཾསིསམྥསྶནེན ཨིཝ. ཏཐཱ ཧི སཱུརིཡོ ‘‘པདྨབནྡྷཱུ’’ཏི ལོཀེ པཱཀཊོ, ཙནྡོ པན ‘‘ཀུམུདབནྡྷཱུ’’ཏི. པུཎྞཙནྡསྶ སིརིཡཱ སམཱནཱ སིརཱི ཨེཏསྶཱཏི པུཎྞཙནྡསསྶིརིཀཾ. ཀཐཾ ནིཀྐུཛྫིཏསདིསཏཱཏི ཨཱཧ ‘‘སམྤཏྟཱཡཱ’’ཏིཨཱདི. ཨེཏྠ པན ‘‘ཨེཧི སྭཱགཏཝཱདཱི’’ཏི ཨིམིནཱ སུཁསམྦྷཱསཔུབྦཀཾ པིཡཝཱདིཏཾ དསྶེཏི, ‘‘སཁིལོ’’ཏི ཨིམིནཱ སཎྷཝཱཙཏཾ, ‘‘སམྨོདཀོ’’ཏི ཨིམིནཱ པཊིསནྡྷཱརཀུསལཏཾ, ‘‘ཨབྦྷཱཀུཊིཀོ’’ཏི ཨིམིནཱ སབྦཏྠེཝ ཝིཔྤསནྣམུཁཏཾ, ‘‘ཨུཏྟཱནམུཁོ’’ཏི ཨིམིནཱ སུཁསལླཱཔཏཾ, ‘‘པུབྦབྷཱསཱི’’ཏི ཨིམིནཱ དྷམྨཱནུགྒཧསྶ ཨོཀཱསཀརཎེན ཧིཏཛ྄ཛྷཱསཡཏཾ དསྶེཏཱིཏི ཝེདིཏབྦཾ.

ཡཏྠ ¶ ཀིརཱཏི ཨེཏྠ ཀིར-སདྡོ ཨརུཙིསཱུཙནེ –

‘‘ཁཎཝཏྠུཔརིཏྟཏྟཱ, ཨཱཔཱཐཾ ན ཝཛནྟི ཡེ;

ཏེ དྷམྨཱརམྨཎཱ ནཱམ, ཡེ’སཾ རཱུཔཱདཡོ ཀིརཱ’’ཏི. –

ཨཱདཱིསུ (ཨབྷིདྷམྨཱཝཏཱར-ཨཊྛཀཐཱཡཾ ཨཱརམྨཎཝིབྷཱགེ ཚཊྛཨནུཙྪེདེ – ༧༧) ཝིཡ, ཏེན བྷགཝཏཱ ཨདྷིཝུཏྠཔདེསེ ན དེཝཏཱནུབྷཱཝེན མནུསྶཱནཾ ཨནུཔདྡཝཏཱ, ཨཐ ཁོ བུདྡྷཱནུབྷཱཝེནཱཏི དསྶེཏི. བུདྡྷཱནུབྷཱཝེནེཝ ཧི ཏཱ ཨཱརཀྑཾ གཎྷནྟི. པཾསུཔིསཱཙཀཱདཡོཏི པཾསུནིསྶིཏཔིསཱཙཀཱདཡོ ¶ . ཨཱདིསདྡེན བྷཱུཏརཀྑསཱདཱིནཾ གཧཎཾ. ཨིདཱནི བུདྡྷཱནུབྷཱཝམེཝ པཱཀཊཾ ཀཏྭཱ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ.

ཨནུསཱསིཏབྦོ སངྒྷོ ནཱམ སབྦོཔི ཝེནེཡྻཛནསམཱུཧོ. སཡཾ ཨུཔྤཱདིཏོ སངྒྷོ ནཱམ ནིབྦཏྟིཏཨརིཡཔུགྒལསམཱུཧོ. ‘‘ཏཱདིསོ’’ཏི ཨིམིནཱ ‘‘སཡཾ ཝཱ ཨུཔྤཱདིཏོ’’ཏི ཝུཏྟཝིཀཔྤོ ཨེཝ པཙྩཱམཊྛོ ཨནནྟརསྶ ཝིདྷི པཊིསེདྷོཝཱཏི ཀཏྭཱ, ཏསྨཱ ‘‘པུརིམཔདསྶེཝ ཝཱ’’ཏི ཝིཀཔྤནྟརགཧཎནྟི ཨཱཙརིཡེན (དཱི. ནི. ཊཱི. ༡.༣༠༤) ཝུཏྟཾ. ཏཏྲཱཡམདྷིཔྤཱཡོ – ཀཱམཾ ‘‘གཎཱི’’ཏི ཨིདཾ ‘‘སངྒྷཱི’’ཏི པདསྶེཝ ཝེཝཙནཾ, ཨཏྠམཏྟཾ པན དསྶེཏུཾ ཡཐཱཝུཏྟཝིཀཔྤདྭཡེ དུཏིཡཝིཀཔྤམེཝ པཙྩཱམསིཏྭཱ ‘‘ཏཱདིསོཝསྶ གཎོ ཨཏྠཱི’’ཏི ཝུཏྟཏྟཱ ཨཝསིཊྛསྶཔི པཋམཝིཀཔྤསྶ སངྒཧཎཏྠཾ ‘‘པུརིམཔདསྶེཝ ཝཱ ཝེཝཙནམེཏ’’ནྟི ཝུཏྟནྟི. ཨེཝམྤི ཝདནྟི – དྷམྨསེནཱཔཏིཏྠེརཱདཱིནཾ པཙྩེཀགཎཱིནཾ གཎཾ, སུཏྟནྟིཀཱདིགཎཾ ཝཱ སནྡྷཱཡ ‘‘ཏཱདིསོ’’ཏིཨཱདི ཝུཏྟཾ. ཏཏྠཱཔི ཧི སབྦོཝ བྷིཀྑུགཎོ ཨནུསཱསིཏབྦོ ནཱམ, ནིབྦཏྟིཏཨརིཡགཎོ པན སཡཾ ཨུཔྤཱདིཏོ ནཱམ, ཏསྨཱ ‘‘ཏཱདིསོ’’ཏི ཨིམིནཱ ཝིཀཔྤདྭཡསྶཱཔི པཙྩཱམསནཾ ཨུཔཔནྣཾ ཧོཏི. ཨེཝཾ པདདྭཡསྶ ཝིསེསཏྠཏཾ དསྶེཏྭཱ སབྦཐཱ སམཱནཏྠཏཾ དསྶེཏུཾ ‘‘པུརིམཔདསྶེཝཱ’’ཏིཨཱདི ཝུཏྟནྟི. པཱུརཎམཀྑལིཨཱདཱིནཾ བཧཱུནཾ ཏིཏྠཀརཱནཾ, ནིདྡྷཱརཎེ ཙེཏཾ སཱམིཝཙནཾ. ཨཙེལཀཱདིམཏྟཀེནཔི ཀཱརཎེནཱཏི ནིཙྩོལ༹ཏཱདིམཏྟཀེནཔི ཨཔྤིཙྪསནྟུཊྛཏཱདིསམཱརོཔནལཀྑཎེན ཀཱརཎེན.

ནཝཀཱཏི ཨབྷིནཝཱ. པཱཧུནཀཱཏི པཧེཎཀཾ པཊིགྒཎྷིཏུམནུཙྪཝིཀཱ, ཨེཏེན དུཝིདྷེསུ ཨཱགནྟུཀེསུ པུརེཏརམཱགཏཝསེན ཨིདྷ ཨཏིཐིནོ, ན བྷོཛནཝེལཱཡམཱགཏཝསེན ¶ ཨབྦྷཱགཏཱཏི དསྶེཏི. པརིཡཱཔུཎཱམཱིཏི པརིཙྪིནྡིཏུཾ ཛཱནཱམི, དྷཱཏྭཏྠམཏྟཾ པན དསྶེཏུཾ ‘‘ཛཱནཱམཱི’’ཏི ཝུཏྟཾ.

ཀཔྤམྤཱིཏི ཨཱཡུཀཔྤམྤི, བྷཎེཡྻ ཙེཏི སམྦནྡྷོ. ཙིརཾ ཙིརཀཱལེ ཀཔྤོ ཁཱིཡེཐ, དཱིགྷམནྟརེ དཱིགྷཀཱལནྟརེཔི ཏཐཱགཏསྶ ཝཎྞོ ན ཁཱིཡེཐཱཏི ཡོཛནཱ. ‘‘ཙིར’’ནྟི ཙེཏྠ ཝཏྟབྦེཔི ཚནྡཧཱནིབྷཡཱ རསྶཏྠཾ ནིགྒཧིཏལོཔོ, ཨཏིདཱིགྷཀཱལཾ ཝཱ སནྡྷཱཡ ‘‘ཙིརདཱིགྷམནྟརེ’’ཏི ཝུཏྟཾ, ཨུབྷཡཏྠ སམྦནྡྷིཏབྦམེཏཾ, ཀིརིཡཱརཧཱདིཡོགེ ཝིཡ ཙ ཨནྟརཡོགེ ཨདྷིཀཀྑརཔཱདོ ཨནུཔཝཛྫོ, ཨཡཉྩ གཱཐཱ ཨབྷཱུཏཔརིཀཔྤནཱཝསེན ཨཊྛཀཐཱསུ (དཱི. ནི. ཨཊྛ. ༡.༣༠༤; ༣.༡༤༡; མ. ནི. ཨཊྛ. ༢.༤༢༥; ཨུདཱ. ཨཊྛ. ༥༣; བུ. ཝཾ. ཨཊྛ. ༤.༤; ཙརིཡཱ. ཨཊྛ. ནིདཱནཀཐཱ, པཀིཎྞཀཀཐཱ; ཨཔ. ཨཊྛ. ༢.༧.༢༠) ཝུཏྟཱ ¶ ཏཐཱ བྷཱསམཱནསྶ ཨབྷཱཝཏོ.

༣༠༥. ནནྟི ཨཱཙརིཡཾ. ཨལཾ-སདྡོ ཨིདྷ ཨརཧཏྠོ ‘‘ཨལམེཝ ནིབྦིནྡིཏུ’’ནྟིཨཱདཱིསུ (དཱི. ནི. ༢.༢༧༢; སཾ. ནི. ༢.༡༣༤, ༡༤༣) ཝིཡཱཏི ཨཱཧ ‘‘ཡུཏྟམེཝཱ’’ཏི. པུཊེན ནེཏྭཱ ཨསིཏབྦཏོ པརིབྷུཉྫིཏབྦཏོ པུཊོསཾ ཝུཙྩཏི པཱཐེཡྻཾ. ཨིཏྠམྦྷཱུཏལཀྑཎེ ཀརཎཝཙནཾ དསྶེཏི ‘‘ཏཾ གཧེཏྭཱ’’ཏི ཨིམིནཱ. པཱལི༹ཡཾ པུཊཾསེནཔི ཀུལཔུཏྟེནཱཏི སམྦནྡྷཾ དསྶེཏུཾ ‘‘ཏེན པུཊཾསེནཱ’’ཏི ཝུཏྟཾ. ‘‘ཨཾསེནཱ’’ཏིཨཱདི ཨདྷིཔྤཱཡམཏྟདསྶནཾ, ཝཧནྟེན ཀུལཔུཏྟེན ཨུཔསངྐམིཏུཾ ཨལམེཝཱཏི ཨཏྠོ.

སོཎདཎྜཔརིཝིཏཀྐཝཎྞནཱ

༣༠༦-༧. ན ཨིདྷ ཏིརོ-སདྡོ ‘‘ཏིརོཀུཌྜེ ཝཱ ཏིརོཔཱཀཱརེ ཝཱ ཚཌྜེཡྻ ཝཱ ཚཌྜཱཔེཡྻ ཝཱ’’ཏིཨཱདཱིསུ (པཱཙི. ༨༢༥) ཝིཡ བཧིཨཏྠོཏི ཨཱཧ ‘‘ཨནྟོཝནསཎྜེ གཏསྶཱ’’ཏི. ཏཏྠ ཝིཧཱརོཔི ཝནསཎྜཔརིཡཱཔནྣོཏི དསྶེཏི ‘‘ཝིཧཱརབྦྷནྟརཾ པཝིཊྛསྶཱ’’ཏི ཨིམིནཱ. ཨེཏེ ཨཉྫལིཾ པཎཱམེཏྭཱ ནིསིནྣཱ མིཙྪཱདིཊྛིཝསེན ཨུབྷཏོཔཀྑིཀཱ, ‘‘ཨིཏརེ པན སམྨཱདིཊྛིཝསེན ཨེཀཏོཔཀྑིཀཱ’’ཏི ཨཏྠཏོ ཨཱཔནྣོ ཧོཏི. དལིདྡཏྟཱ, ཉཱཏིཔཱརིཛུཉྙཱདིནཱ ཛིཎྞཏྟཱ ཙ ནཱམགོཏྟཝསེན ཨཔཱཀཊཱ ཧུཏྭཱ པཱཀཊཱ བྷཝིཏུཀཱམཱ ཨེཝམཀཾསཱུཏི ཨདྷིཔྤཱཡོ. ཀེརཱཊིཀཱཏི སཋཱ. ཏཏྠཱཏི དྭཱིསུ ཛནེསུ. ཏཏོཏི ཝིསྶཱསཏོ, དཱནཏོ ཝཱ.

བྲཱཧྨཎཔཉྙཏྟིཝཎྞནཱ

༣༠༩. ཨནོནཏཀཱཡཝསེན ¶ ཐདྡྷགཏྟོ, ན མཱནཝསེན. ཏེན པཱལི༹ཡཾ ཝཀྑཏི ‘‘ཨབྦྷུནྣཱམེཏྭཱ’’ཏི. ཙེཏོཝིཏཀྐཾ སནྡྷཱཡ ཙིཏྟསཱིསེན ‘‘ཙིཏྟཾ ཨཉྙཱསཱི’’ཏི ཝུཏྟཾ. ཝིགྷཱཏནྟི ཙིཏྟདུཀྑཾ.

༣༡༡. སཀསམཡེཏི བྲཱཧྨཎལདྡྷིཡཾ. མཱིཡམཱནོཏི མརིཡམཱནོ. དིཊྛིསཉྫཱནནེནེཝཱཏི ཨཏྟནོ ལདྡྷིསཉྫཱནནེནེཝ. སུཛནྟི ཧོམདབྦིཾ, ནིབྦཙནཾ ཝུཏྟམེཝ. གཎྷནྟེསཱུཏི ཛུཧནཏྠཾ གཎྷནཀེསུ, ཨིརུཝིཛྫེསཱུཏི ཨཏྠོ. ཨིརུཝེདཝསེན ཧོམཀརཎཏོ ཧི ཡཉྙཡཛཀཱ ‘‘ཨིརུཝིཛྫཱ’’ཏི ཝུཙྩནྟི. པཋམོ ཝཱཏི ཏཏྠ སནྣིཔཏིཏེསུ སུཛཱཀིརིཡཱཡཾ སབྦཔདྷཱནོ ཝཱ. དུཏིཡོ ¶ ཝཱཏི ཏདནནྟརིཀོ ཝཱ. ‘‘སུཛ’’ནྟི ཨིདཾ ཀརཎཏྠེ ཨུཔཡོགཝཙནནྟི ཨཱཧ ‘‘སུཛཱཡཱ’’ཏི. ཨགྒིཧུཏྟམུཁཏཱཡ ཡཉྙསྶ ཡཉྙེ དིཡྻམཱནཾ སུཛཱམུཁེན དིཡྻཏི. ཝུཏྟཉྩ ‘‘ཨགྒིཧུཏྟམུཁཱ ཡཉྙཱ, སཱཝིཏྟཱི ཚནྡསོ མུཁ’’ནྟི (མ. ནི. ༢.༤༠༠). ཏསྨཱ ‘‘དིཡྻམཱན’’ནྟི ཨཡཾ པཱཋསེསོ ཝིཉྙཱཡཏཱིཏི ཨཱཙརིཡེན (དཱི. ནི. ཊཱི. ༡.༣༡༡) ཝུཏྟཾ. ཨཔིཙ སུཛཱཡ དིཡྻམཱནཾ སུཛནྟི ཏདྡྷིཏཝསེན ཨཏྠཾ དསྶེཏུཾ ཨེཝམཱཧ. པོརཱཎཱཏི ཨཊྛཀཐཱཙརིཡཱ. པུརིམཝཱདེ ཙེཏྠ དཱནཝསེན པཋམོ ཝཱ དུཏིཡོ ཝཱ, པཙྪིམཝཱདེ ཨཱདཱནཝསེནཱཏི ཨཡམེཏེསཾ ཝིསེསོ. ཝིསེསཏོཏི ཝིཛྫཱཙརཎཝིསེསཏོ, ན བྲཱཧྨཎེཧི ཨིཙྪིཏཝིཛྫཱཙརཎམཏྟཏོ. ཨུཏྟམབྲཱཧྨཎསྶཱཏི ཨནུཏྟརདཀྑིཎེཡྻཏཱཡ ཨུཀྐཊྛབྲཱཧྨཎསྶ. ཡཐཱདྷིཔྤེཏསྶ ཧི ཝིཛྫཱཙརཎཝིསེསདཱིཔཀསྶ ‘‘ཀཏམཾ པན ཏཾ བྲཱཧྨཎསཱིལཾ, ཀཏམཱ སཱ པཉྙཱ’’ཏིཨཱདིཝཙནསྶ ཨོཀཱསཀརཎཏྠམེཝ ‘‘ཨིམེསཾ པན བྲཱཧྨཎ པཉྩནྣཾ ཨངྒཱན’’ནྟིཨཱདིཝཙནཾ བྷགཝཱ ཨཝོཙ, ཏསྨཱ པདྷཱནཝཙནཱནུརཱུཔམནུསནྡྷིཾ དསྶེཏུཾ ‘‘བྷགཝཱ པནཱ’’ཏིཨཱདི ཝུཏྟནྟི དཊྛབྦཾ.

༣༡༣. ཨཔཝདཏཱིཏི ཝཎྞཱདཱིནི ཨཔནེཏྭཱ ཝདཏི, ཨཏྠམཏྟཾ པན དསྶེཏུཾ ‘‘པཊིཀྑིཔཏཱི’’ཏི ཝུཏྟཾ. ཨིདནྟི ‘‘མཱ བྷཝཾ སོཎདཎྜོ ཨེཝཾ ཨཝཙཱ’’ཏིཨཱདིཝཙནཾ. བྲཱཧྨཎསམཡནྟི བྲཱཧྨཎསིདྡྷནྟཾ. མཱ བྷིནྡཱིཏི མཱ ཝིནཱསེསི.

༣༡༦. སམོཡེཝ ཧུཏྭཱ སམོཏི སམསམོ, སབྦཐཱ སམོཏི ཨཏྠོ. པརིཡཱཡདྭཡཉྷི ཨཏིསཡཏྠདཱིཔཀཾ ཡཐཱ ‘‘དུཀྑདུཀྑཾ, རཱུཔརཱུཔ’’ནྟི. ཨེཀདེསམཏྟཏོ པན ཨངྒཀེན མཱཎཝེན ཏེསཾ སམབྷཱཝཏོ ¶ ཏཾ ནིཝཏྟེནྟོ ‘‘ཋཔེཏྭཱ ཨེཀདེསམཏྟ’’ནྟིཨཱདིམཱཧ. ཀུལཀོཊིཔརིདཱིཔནནྟི ཀུལསྶ ཨཱདིཔརིདཱིཔནཾ. ཡསྨཱ ཨཏྟནོ བྷགིནིཡཱ…པེ… ན ཛཱནིསྶཏི, ཏསྨཱ ན ཏསྶ མཱཏཱཔིཏུམཏྟཾ སནྡྷཱཡ ཝདཏི, ཀུལཀོཊིཔརིདཱིཔནཾ པན སནྡྷཱཡ ཝདཏཱིཏི ཨདྷིཔྤཱཡོ. ‘‘ཨཏྠབྷཉྫནཀ’’ནྟི ཨིམིནཱ ཀམྨཔཐཔཏྟཾ ཝདཏི. གུཎེཏི ཡཐཱཝུཏྟེ པཉྩསཱིལེ. ཨཐཱཔི སིཡཱཏི ཡདིཔི ཏུམྷཱཀཾ ཨེཝཾ པརིཝིཏཀྐོ སིཡཱ, བྷིནྣསཱིལསྶཱཔི པུན པཀཏིསཱིལེ ཋིཏསྶ བྲཱཧྨཎབྷཱཝཾ ཝཎྞཱདཡོ སཱདྷེནྟཱིཏི ཨེཝཾ སིཡཱཏི ཨཏྠོ. ‘‘སཱདྷེཏཱི’’ཏི པཱཋེ ‘‘ཝཎྞོ’’ཏི ཀཏྟཱ ཨཱཙརིཡེན (དཱི. ནི. ཊཱི. ༡.༣༡༦) ཨཛ྄ཛྷཱཧཊོ, ནིདསྶནཉྩེཏཾ. མནྟཛཱཏཱིསུཔི ཧི ཨེསེཝ ནཡོ. སཱིལམེཝཱཏི པུན པཀཏིབྷཱུཏཾ སཱིལམེཝ བྲཱཧྨཎབྷཱཝཾ སཱདྷེསྶཏི, ཀསྨཱཏི ཙེ ‘‘ཏསྨིཾ ཧི…པེ… ཝཎྞཱདཡོ’’ཏི. ཏཏྠ སམྨོཧམཏྟཾ ཝཎྞཱདཡོཏི ཝཎྞམནྟཛཱཏིཡོ བྲཱཧྨཎབྷཱཝསྶ ཨངྒནྟི སམྨོཧམཏྟམེཏཾ, ཨསམཝེཀྑིཏྭཱ ཀཐིཏམིདཾ.

སཱིལཔཉྙཱཀཐཱཝཎྞནཱ

༣༡༧. ཀཐིཏོ ¶ བྲཱཧྨཎེན པཉྷོཏི ‘‘སཱིལཝཱ ཙ ཧོཏཱི’’ཏིཨཱདིནཱ དྭིནྣམེཝ ཨངྒཱནཾ ཝསེན ཡཐཱཔུཙྪིཏོ པཉྷོ ཡཱཐཱཝཏོ ཝིསྶཛྫིཏོ. ཨེཏྠཱཏི ཡཐཱཝིསྶཛྫིཏེ ཨཏྠེ, ཨངྒདྭཡེ ཝཱ. ཏསྶཱཏི སོཎདཎྜསྶ. ཡདི ཨེཀམངྒཾ ཋཔེཡྻ, ཨཐ པཏིཊྛཱཏུཾ ན སཀྐུཎེཡྻ. ཡདི པན ན ཋཔེཡྻ, ཨཐ སཀྐུཎེཡྻ, ཀིཾ པནེས ཏཐཱ སཀྑིསྶཏི ནུ ཁོ, ནོཏི ཝཱིམཾསནཏྠམེཝ ཨེཝམཱཧ, ན ཏུ ཨེཀསྶ ཨངྒསྶ ཋཔནཱིཡཏྟཱཏི ཝུཏྟཾ ཧོཏི. ཏཐཱ ཙཱཧ ‘‘ཨེཝམེཏཾ བྲཱཧྨཎཱ’’ཏིཨཱདི. དྷོཝིཏཏྟཱཝ པརིསུཛ྄ཛྷནནྟི ཨཱཧ ‘‘སཱིལཔརིསུདྡྷཱ’’ཏི, སཱིལསམྤཏྟིཡཱ སབྦསོ སུདྡྷཱ ཨནུཔཀྐིལིཊྛཱཏི ཨཏྠོ. ཀུཏོ དུསྶཱིལེ པཉྙཱ ཨསམཱཧིཏཏྟཱ ཏསྶ. ཀུཏོ ཝཱ པཉྙཱརཧིཏེ ཛལེ༹ ཨེལ༹མཱུགེ སཱིལཾ སཱིལཝིབྷཱགསྶ, སཱིལཔརིསོདྷནཱུཔཱཡསྶ ཙ ཨཛཱནནཏོ. ཨེལཱ༹ མུཁེ གལ༹ཏི ཡསྶཱཏི ཨེལ༹མཱུགོ ཁ-ཀཱརསྶ ག-ཀཱརཾ ཀཏྭཱ, ཨེལམུཁོ, ཨེལམཱུཀོ ཝཱ. ཨིཏི བཧུདྷཱ པཱཋོཏི བྷཡབྷེརཝསུཏྟཊྛཀཐཱཡཾ (མ. ནི. ཨཊྛ. ༡.༤༨) ཝུཏྟོ. པཀཊྛཾ ཨུཀྐཊྛཾ ཉཱཎཾ པཉྙཱཎནྟི ཀཏྭཱ པཱཀཏིཀཾ ཉཱཎཾ ནིཝཏྟེཏུཾ ‘‘པཉྙཱཎ’’ནྟི ཝུཏྟཾ. ཝིཔསྶནཱདིཉཱཎཉྷི ཨིདྷཱདྷིཔྤེཏཾ, ཏདེཏཾ པཀཱརེཧི ཛཱནནཏོ པཉྙཱཝཱཏི ཨཱཧ ‘‘པཉྙཱཡེཝཱ’’ཏི.

ཙཏུཔཱརིསུདྡྷིསཱིལེན ¶ དྷོཏཱཏི སམཱདྷིཔདཊྛཱནེན ཙཏུཔཱརིསུདྡྷིསཱིལེན སཀལསཾཀིལེསམལཝིསུདྡྷིཡཱ དྷོཝིཏཱ ཝིསུདྡྷཱ. ཏེནཱཧ ‘‘ཀཐཾ པནཱ’’ཏིཨཱདི. ཏཏྠ དྷོཝཏཱིཏི སུཛ྄ཛྷཏི. སཊྛིཨསཱིཏིཝསྶཱནཱིཏི སཊྛིཝསྶཱནི ཝཱ ཨསཱིཏིཝསྶཱནི ཝཱ. མརཎཀཱལེཔི, པགེཝ ཨཉྙསྨིཾ ཀཱལེ. མཧཱསཊྛིཝསྶཏྠེརོ ཝིཡཱཏི སཊྛིཝསྶམཧཱཐེརོ ཝིཡ. ཝེདནཱཔརིགྒཧམཏྟམྤཱིཏི ཨེཏྠ ཝེདནཱཔརིགྒཧོ ནཱམ ཡཐཱཨུཔྤནྣཾ ཝེདནཾ སབྷཱཝསརསཏོ ཨུཔདྷཱརེཏྭཱ པུན པདཊྛཱནཏོ ‘‘ཨཡཾ ཝེདནཱ ཕསྶཾ པཊིཙྩ ཨུཔྤཛྫཏི, སོ ཙ ཕསྶོ ཨནིཙྩོ དུཀྑོ ཝིཔརིཎཱམདྷམྨོ’’ཏི ལཀྑཎཏྟཡཾ ཨཱརོཔེཏྭཱ པཝཏྟིཏཝིཔསྶནཱ. ཨེཝཾ པསྶནྟེན ཧི སུཁེན སཀྐཱ སཱ ཝེདནཱ ཨདྷིཝཱསེཏུཾ ‘‘ཝེདནཱ ཨེཝ ཝེདཡཏཱི’’ཏི. ཝེདནཾ ཝིཀྑམྦྷེཏྭཱཏི ཡཐཱཨུཔྤནྣཾ དུཀྑཝེདནཾ ཨནུཝཏྟིཏྭཱ ཝིཔསྶནཾ ཨཱརབྷིཏྭཱ ཝཱིཐིཔཊིཔནྣཱཡ ཝིཔསྶནཱཡ ཏཾ ཝིནོདེཏྭཱ. སཾསུམཱརཔཏིཏེནཱཏི ཀུམྦྷཱིལེན ཝིཡ བྷཱུམིཡཾ ཨུརེན ནིཔཛྫམཱནེན. ‘‘ནཱཧ’’ནྟིཨཱདིཾ ཏཐཱ སཱིལརཀྑཎམེཝ དུཀྐརནྟི ཀཏྭཱ ཝདཏི. སཱིལེ པཏིཊྛིཏསྶ ཧི ཨརཧཏྟཾ ཧཏྠགཏཾཡེཝ. ཡཐཱཧ ‘‘སཱིལེ པཏིཊྛཱཡ…པེ… ཝིཛཊཡེ ཛཊ’’ནྟི (སཾ. ནི. ༡.༢༣, ༡༩༢; པེཊཀོ. ༢༢; མི. པ. ༢.༩) ཙཏཱུསུ པུགྒལེསུ ཨུགྒྷཱཊིཏཉྙུནོ ཨེཝཱཡཾ ཝིསཡོཏི ཨཱཧ ‘‘ཨུགྒྷཱཊིཏཉྙུཏཱཡཱ’’ཏི. པཉྙཱཡ སཱིལཾ དྷོཝིཏྭཱཏི སཱིལཾ ཨཱདིམཛ྄ཛྷཔརིཡོསཱནེསུ ཨཁཎྜཱདིབྷཱཝཱཔཱདནེན ¶ པཉྙཱཡ སུཝིསོདྷིཏཾ ཀཏྭཱ. སནྟཏིམཧཱམཏྟཝཏྠུ དྷམྨཔདེ (དྷ. པ. ཨཊྛ. ༢.སནྟིམཧཱམཏྟཝཏྠུ).

༣༡༨. ‘‘ཀསྨཱ ཨཱཧཱ’’ཏི ཨུཔརིདེསནཱཡ ཀཱརཎཾ པུཙྪཏི. ལཛྫཱ ནཱམ ‘‘སཱིལསྶ ཙ ཛཱཏིཡཱ ཙ གུཎདོསཔྤཀཱསནེན སམཎེན གོཏམེན པུཙྪིཏཔཉྷཾ ཝིསྶཛྫེསཱི’’ཏི པརིསཱཡ པཉྙཱཏཏཱ, སཱ ཏཐཱ ཝིསྶཛྫིཏུམསམཏྠཏཱཡ བྷིཛྫིསྶཏཱིཏི ཨཏྠོ, པཋམཾ ཨལཛྫམཱནོཔི ཨིདཱནི ལཛྫིསྶཱམཱིཏི ཝུཏྟཾ ཧོཏི. པརམནྟི པམཱཎཾ. ‘‘ཨེཏྟཀཔརམཱ མཡ’’ནྟི པདཱནཾ ཏུལྱཱདྷིཀརཎཏཾ དསྶེཏུཾ ‘‘ཏེ མཡ’’ནྟི ཝུཏྟཾ. ཨིདཾ ཝུཏྟཾ ཧོཏི – ‘‘སཱིལཔཉྙཱཎ’’ནྟི ཝཙནམེཝ ཨམྷཱཀཾ པརམཾ, ཏདཏྠབྷཱུཏཱནི པཉྩསཱིལཱནི, ཝེདཏྟཡཝིབྷཱཝནཾ པཉྙཉྩ ལཀྑཎཱདིཏོ ནིདྡྷཱརེཏྭཱ ཛཱནནཾ ནཏྠི, ཀེཝལཾ ཏཏྠ ཝཙཱིཔརམཱཝ མཡནྟི. ཨཡཾ པནེཏྠ ཨཊྛཀཐཱམུཏྟཀནཡོ – ཨེཏྟཀཔརམཱཏི ཨེཏྟཀཨུཀྐཾསཀོཊིཀཱ, པཋམཾ པཉྷཱཝིསྶཛྫནཱཝ ཨམྷཱཀཾ ¶ ཨུཀྐཾསཀོཊཱིཏི ཨཏྠོ. ཏེནཱཧ ‘‘མཡཱ སཀསམཡཝསེན པཉྷོ ཝིསྶཛྫིཏོ’’ཏི. པརནྟི ཨཏིརེཀཾ. བྷཱསིཏསྶཱཏི ཝཙནསྶ སདྡསྶ.

ཨཡཾ པན ཝིསེསོཏི སཱིལནིདྡེསེ ནིཡྻཱཏནམཏྟཾ ཨཔེཀྑིཏྭཱ ཝུཏྟཾ. ཏེནཱཧ ‘‘སཱིལམིཙྩེཝ ནིཡྻཱཏིཏ’’ནྟི. སཱམཉྙཕལསུཏྟེ (དཱི. ནི. ༡.༡༥༠) ཧི སཱིལཾ ནིཡྻཱཏེཏྭཱཔི པུན སཱམཉྙཕལམིཙྩེཝ ནིཡྻཱཏིཏཾ. སབྦེསམྤི མཧགྒཏཙིཏྟཱནཾ ཉཱཎསམྤཡུཏྟཏྟཱ, ཛྷཱནཱནཉྩ ཏཾ སམྤཡོགཏོ ‘‘ཨཏྠཏོ པཉྙཱསམྤདཱ’’ཏི ཝུཏྟཾ. པཉྙཱནིདྡེསེ ཧི ཛྷཱནཔཉྙཾ ཨདྷིཊྛཱནཾ ཀཏྭཱ པཋམཾ ཝིཔསྶནཱཔཉྙཱ ནིཡྻཱཏིཏཱ. ཏེནཱཧ ‘‘ཝིཔསྶནཱཔཉྙཱཡཱ’’ཏིཨཱདི.

སོཎདཎྜཨུཔཱསཀཏྟཔཊིཝེདནཱཀཐཱཝཎྞནཱ

༣༢༡. དཧརོ ཡུཝཱཏི ཨེཏྠ དཧརཝཙནེན པཋམཡོབྦནབྷཱཝཾ དསྶེཏི. པཋམཡོབྦནཀཱལགཏོ ཧི ‘‘དཧརོ’’ཏི ཝུཙྩཏི. པུཏྟསྶ པུཏྟོ ནཏྟཱ ནཱམ. ནཔྤཧོཏཱིཏི ན སམྤཛྫཏི, པུཏྟནཏྟཔྤམཱཎོཔི ན ཧོཏཱིཏི ཨཏྠོ. ‘‘ཨཱསནཱ མེ ཏཾ ཝུཊྛཱན’’ནྟི ཨེཏསྶ ཨཏྠཱཔཏྟིཾ དསྶེཏུཾ ‘‘མམ ཨགཱརཝེནཱ’’ཏིཨཱདི ཝུཏྟཾ. ཨེཏནྟི ཨཉྫལིཔགྒཧཎཾ. ཨཡཉྷི ཡཐཱ ཏཐཱ ཨཏྟནོ མཧཱཛནསྶ སམྦྷཱཝནཾ ཨུཔྤཱདེཏྭཱ ཀོཧཉྙེན པརེ ཝིམྷཱཔེཏྭཱ ལཱབྷུཔྤཱདནཾ ནིཛིགཱིསནྟོ ཝིཙརཏི, ཏསྨཱསྶ ཨཏིཝིཡ ཀུཧཀབྷཱཝཾ དསྶེནྟོ ‘‘ཨིམིནཱ ཀིརཱ’’ཏིཨཱདིཾ ཝདཏི ¶ . ཨགཱརཝཾ ནཱམ ནཏྠཱིཏི ཨགཱརཝཝཙནཾ ནཱམ ནཏྠི, ནཱཡཾ བྷགཝཏི ཨགཱརཝེན ‘‘ཨཧཉྩེཝ ཁོ པནཱ’’ཏིཨཱདིམཱཧ, ཨཐ ཁོ ཨཏྟནོ ལཱབྷཔརིཧཱནིབྷཡེནེཝཱཏི ཝུཏྟཾ ཧོཏི.

༣༢༢. ཏངྑཎཱནུརཱུཔཱཡཱཏི ཡཱདིསཱི ཏདཱ ཏསྶ ཨཛ྄ཛྷཱསཡཔྤཝཏྟི, ཏདནུརཱུཔཱཡཱཏི མཛ྄ཛྷེཔདལོཔེན ཨཏྠོ. ཏདཱ ཏསྶ ཝིཝཊྚསནྣིསྶིཏསྶ ཏཱདིསསྶ ཉཱཎཔརིཔཱཀསྶ ཨབྷཱཝཏོ ཀེཝལཾ ཨབྦྷུདཡསནྣིསྶིཏོ ཨེཝ ཨཏྠོ དསྶིཏོཏི ཨཱཧ ‘‘དིཊྛདྷམྨིཀསམྤརཱཡིཀཾ ཨཏྠཾ སནྡསྶེཏྭཱ’’ཏི, པཙྩཀྑཏོ ཝིབྷཱཝེཏྭཱཏི ཨཏྠོ. ཀུསལེ དྷམྨེཏི ཏེབྷཱུམཀེ ཀུསལདྷམྨེ, ཨཡམེཏྠ ནིཔྤརིཡཱཡཏོ ཨཏྠོ. པརིཡཱཡཏོ པན ‘‘ཙཏུབྷཱུམཀེ’’ཏིཔི ཝཏྟུཾ ཝཊྚཏི ལོཀུཏྟརཀུསལསྶཔི ཨཱཡཏིཾ ལབྦྷམཱནཏྟཱ. ཏཐཱ ཧི ཝཀྑཏི ‘‘ཨཱཡཏིཾ ནིབྦཱནཏྠཱཡ, ཝཱསནཱབྷཱགིཡཱཡ ¶ ཝཱ’’ཏི. ཏཏྠཱཏི ཀུསལེ དྷམྨེ ཡཐཱསམཱདཔིཏེ. ནནྟི སོཎདཎྜབྲཱཧྨཎཾ. སམུཏྟེཛེཏྭཱཏི སམྨདེཝ ཨུཔརཱུཔརི ནིསཱནེཏྭཱ པུཉྙཀིརིཡཱཡ ཏིཀྑཝིསདབྷཱཝམཱཔཱདེཏྭཱ. ཏཾ པན ཨཏྠཏོ ཏཏྠ ཨུསྶཱཧཛནནམེཝ ཧོཏཱིཏི ཨཱཧ ‘‘སཨུསྶཱཧཾ ཀཏྭཱ’’ཏི. ཏཱཡ ཙ སཨུསྶཱཧཏཱཡཱཏི ཨེཝཾ པུཉྙཀིརིཡཱཡ སཨུསྶཱཧཏཱ ནིཡམཏོ དིཊྛདྷམྨིཀཱདིཨཏྠསམྤཱདནཱིཏི ཡཐཱཝུཏྟཱཡ སཨུསྶཱཧཏཱཡ ཙ སམྤཧཾསེཏྭཱཏི སམྦནྡྷོ. ཨཉྙེཧི ཙ ཝིཛྫམཱནགུཎེཧཱིཏི ཨེཝརཱུཔཱ ཏེ གུཎསམངྒིཏཱ ཙ ཨེཀནྟེན དིཊྛདྷམྨིཀཱདིཨཏྠནིཔྥཱདནཱིཏི ཏསྨིཾ ཝིཛྫམཱནེཧི, ཨཉྙེཧི ཙ གུཎེཧི སམྤཧཾསེཏྭཱ སམྨདེཝ ཧཊྛཏུཊྛབྷཱཝམཱཔཱདེཏྭཱཏི ཨཏྠོ.

ཡདི བྷགཝཱ དྷམྨརཏནཝསྶཾ ཝསྶི, ཨཐ ཀསྨཱ སོ ཝིསེསཾ ནཱདྷིགཙྪཱིཏི ཙོདནཾ སོདྷེཏུཾ ‘‘བྲཱཧྨཎོ པནཱ’’ཏིཨཱདི ཝུཏྟཾ. ཀུཧཀཏཱཡཱཏི ཝུཏྟནཡེན ཀོཧཉྙཀཏྟཱ, ཨིམིནཱ པཡོགསམྤཏྟིཨབྷཱཝཾ དསྶེཏི. ཡཛྫེཝཾ ཀསྨཱ བྷགཝཱ ཏསྶ ཏཐཱ དྷམྨརཏནཝསྶཾ ཝསྶཱིཏི པཊིཙོདནམྤི སོདྷེནྟོ ‘‘ཀེཝལམསྶཱ’’ཏིཨཱདིམཱཧ. ཏཏྠ ཀེཝལནྟི ནིབྦེདྷཱསེཀྑབྷཱགིཡེན ཨསམྨིསྶཾ. ནིབྦཱནཏྠཱཡཱཏི ནིབྦཱནཱདྷིགམཏྠཱཡ, པརིནིབྦཱནཏྠཱཡ ཝཱ. ཨཱཡཏིཾ ཝིསེསཱདྷིགམནཱུཔཱཡབྷཱུཏཱ པུཉྙཀིརིཡཱསུ པརིཙཡསངྑཱཏཱ ཝཱསནཱ ཨེཝ བྷཱགོ, ཏསྨིཾ ཨུཔཱཡབྷཱཝེན པཝཏྟཱཏི ཝཱསནཱབྷཱགིཡཱ. ན ཧི བྷགཝཏོ ནིརཏྠཀཱ ཙཏུཔྤདིཀགཱཐཱམཏྟཱཔི དྷམྨདེསནཱ ཨཏྠི. ཏེནཱཧ ‘‘སབྦཱ པུརིམཔཙྪིམཀཐཱ’’ཏི. ཨཱདིཏོ ཙེཏྠ པབྷུཏི ཡཱཝ བྲཱཧྨཎསྶ ཝིསྶཛྫནཱཔརིཡོསཱནཾ, ཏཱཝ པུརིམཀཐཱ, བྷགཝཏོ པན སཱིལཔཉྙཱཝིསྶཛྫནཱ པཙྪིམཀཐཱ. བྲཱཧྨཎེན ཝུཏྟཱཔི ཧི བུདྡྷགུཎཱདིཔཊིསཉྙུཏྟཱ ཀཐཱ ཨཱཡཏིཾ ནིབྦཱནཏྠཱཡ ཝཱསནཱབྷཱགིཡཱ ཨེཝཱཏི. སེསཾ སུཝིཉྙེཡྻམེཝ.

ཨིཏི སུམངྒལཝིལཱསིནིཡཱ དཱིགྷནིཀཱཡཊྛཀཐཱཡ པརམསུཁུམགམྦྷཱིརདུརནུབོདྷཏྠཔརིདཱིཔནཱཡ སུཝིམལཝིཔུལཔཉྙཱཝེཡྻཏྟིཡཛནནཱཡ ¶ སཱདྷུཝིལཱསིནིཡཱ ནཱམ ལཱིནཏྠཔཀཱསནིཡཱ སོཎདཎྜསུཏྟཝཎྞནཱཡ ལཱིནཏྠཔཀཱསནཱ.

སོཎདཎྜསུཏྟཝཎྞནཱ ནིཊྛིཏཱ.

༥. ཀཱུཊདནྟསུཏྟཝཎྞནཱ

༣༢༣. ཨེཝཾ ¶ ¶ སོཎདཎྜསུཏྟཾ སཾཝཎྞེཏྭཱ ཨིདཱནི ཀཱུཊདནྟསུཏྟཾ སཾཝཎྞེནྟོ ཡཐཱནུཔུབྦཾ སཾཝཎྞནོཀཱསསྶ པཏྟབྷཱཝཾ ཝིབྷཱཝེཏུཾ, སོཎདཎྜ སུཏྟསྶཱནནྟརཾ སངྒཱིཏསྶ སུཏྟསྶ ཀཱུཊདནྟསུཏྟབྷཱཝཾ ཝཱ པཀཱསེཏུཾ ‘‘ཨེཝཾ མེ སུཏཾ…པེ… མགདྷེསཱུཏི ཀཱུཊདནྟསུཏྟ’’ནྟི ཨཱཧ. ‘‘མགདྷཱ ནཱམ ཛནཔདིནོ རཱཛཀུམཱརཱ’’ཏིཨཱདཱིསུ ཨམྦཊྛསུཏྟེ ཀོསལཛནཔདཝཎྞནཱཡཾ ཨམྷེཧི ཝུཏྟནཡོ ཡཐཱརཧཾ ནེཏབྦོ. ཨཡཾ པནེཏྠ ཝིསེསོ – མགེན སདྡྷིཾ དྷཱཝནྟཱིཏི མགདྷཱ, རཱཛཀུམཱརཱ, མཾསེསུ ཝཱ གིཛ྄ཛྷནྟཱིཏི མགདྷཱ ནིརུཏྟིནཡེན. རུལ༹ྷིཏོ, པཙྩཡལོཔཏོ ཙ ཏེསཾ ནིཝཱསབྷཱུཏེཔི ཛནཔདེ ཝུདྡྷི ན ཧོཏཱིཏི ནེརུཏྟིཀཱ. ཛནཔདནཱམེཡེཝ བཧུཝཙནཾ, ན ཛནཔདསདྡེ ཛཱཏིསདྡཏྟཱཏི ཝུཏྟཾ ‘‘ཏསྨིཾ མགདྷེསུ ཛནཔདེ’’ཏི. ཨིཏོ པརནྟི ‘‘མགདྷེསཱུ’’ཏི པདཏོ པརཾ ‘‘ཙཱརིཀཾ ཙརམཱནོ’’ཏིཨཱདིཝཙནཾ. པུརིམསུཏྟདྭཡེཏི ཨམྦཊྛསོཎདཎྜསུཏྟདྭཡེ. ཝུཏྟནཡམེཝཱཏི ཡཾ ཏཏྠ ཨཱགཏསདིསཾ ཨིདྷཱགཏཾ, ཏཾ ཨཏྠཝཎྞནཱཏོ ཝུཏྟནཡམེཝ, ཏཏྠ ཝུཏྟནཡེནེཝ ཝེདིཏབྦནྟི ཝུཏྟཾ ཧོཏི. ‘‘ཏརུཎོ ཨམྦརུཀྑོ ཨམྦལཊྛིཀཱ’’ཏི བྲཧྨཛཱལསུཏྟཝཎྞནཱཡཾ (དཱི. ནི. ཨཊྛ. ༡.༢) ཝུཏྟཏྟཱ ‘‘ཨམྦལཊྛིཀཱ བྲཧྨཛཱལེ ཝུཏྟསདིསཱཝཱ’’ཏི ཨཱཧ.

ཡཉྙཱཝཱཊཾ སམྤཱདེཏྭཱ མཧཱཡཉྙཾ ཨུདྡིསྶ སཝིཉྙཱཎཀཱནི, ཨཝིཉྙཱཎཀཱནི ཙ ཡཉྙཱུཔཀརཎཱནི ཨུཔཊྛཔིཏཱནཱིཏི ཨཏྠཾ སནྡྷཱཡ ‘‘མཧཱཡཉྙོ ཨུཔཀྑཊོ’’ཏི པཱལི༹ཡཾ ཝུཏྟཾ, ཏཾ པནེཏཾ ཨུཔཀརཎཾ ཏེསཾ ཏཐཱ སཛྫནམེཝཱཏི དསྶེཏི ‘‘སཛྫིཏོ’’ཏི ཨིམིནཱ. ཝཙྪཏརསཏཱནཱིཏི ཡུཝབྷཱཝཔྤཏྟཱནི བལཝཝཙྪསཏཱནི. ཝཙྪཱནཾ ཝིསེསཱཏི ཧི ཝཙྪཏརཱ, ཏེ པན ཝཙྪཱ ཨེཝ ཧོནྟི, ན དམྨཱ, ན ཙ བལཱིབདྡཱཏི ཨཱཧ ‘‘ཝཙྪསཏཱནཱི’’ཏི. ཨཡཾ ཨཱཙརིཡམཏི (དཱི. ནི. ཊཱི. ༡.༣༢༣). ཏར-སདྡོ ཝཱ ཨནཏྠཀོཏི ཝུཏྟཾ ‘‘ཝཙྪསཏཱནཱི’’ཏི. ཨེཝཉྷི སབྦོཔི ཝཙྪཔྤབྷེདོ སངྒཧིཏོ ཧོཏི. ཨེཏེཏི ཨུསབྷཱདཡོ ཨུརབྦྷཔརིཡོསཱནཱ. ཨནེཀེསནྟི ཨནེཀཛཱཏིཀཱནཾ. མིགཔཀྑཱིནནྟི མཧིཾསརུརུཔསདཀུརུངྒགོཀཎྞམིགཱནཉྩེཝ མོརཀཔིཉྫརཝཊྚཀཏིཏྟིར ¶ ལཱཔཱདིཔཀྑཱིནཉྩ. སངྑྱཱཝསེན ཨནེཀཏཾ སཏྟསཏགྒཧཎེན པརིཙྪིནྡིཏུཾ ‘‘སཏྟསཏྟསཏཱནཱི’’ཏི ཝུཏྟཾ, སཏྟསཏཱནི, སཏྟསཏཱནི ¶ ཙཱཏི ཨཏྠོ. ཐཱུཎནྟི ཡཉྙོཔཀརཎཱནཾ མིགཔཀྑཱིནཾ བནྡྷནཏྠམྦྷཾ. ཡཱུཔོཏིཔི ཏསྶ ནཱམཾ. ཏེནཱཧ ‘‘ཡཱུཔསངྑཱཏ’’ནྟི.

༣༢༨. ཝིདྷཱཏི ཝིཔྤཊིསཱརཝིནོདནཱ. ཡོ ཧི ཡཉྙསངྑཱཏསྶ པུཉྙསྶ ཨུཔཀྐིལེསོ, ཏསྶ ཝིདྷམནཏོ ནིཝཱརཎཏོ ནིརོདྷནཏོ ཝིདྷཱ ཝུཙྩནྟི ཝིཔྤཊིསཱརཝིནོདནཱ, ཏཱ ཨེཝ པུཉྙཱབྷིསནྡཾ ཨཝིཙྪིནྡིཏྭཱ ཋཔེནྟཱིཏི ‘‘ཋཔནཱ’’ཏི ཙ ཝུཏྟཱ. ཨཝིཔྤཊིསཱརཏོ ཨེཝ ཧི ཨུཔརཱུཔརི པུཉྙཱབྷིསནྡཔྤཝཏྟཱིཏི. ཋཔནཱ ཙེཏཱ ཡཉྙསྶ ཨཱདིམཛ྄ཛྷཔརིཡོསཱནཝསེན ཏཱིསུ ཀཱལེསུ པཝཏྟིཡཱ ཏིཔྤཀཱརཱཏི ཨཱཧ ‘‘ཏིཊྛཔན’’ནྟི. པརིཀྑཱརསདྡོ ཙེཏྠ པརིཝཱརཔརིཡཱཡོ ‘‘པརིཀརོནྟི ཡཉྙཾ ཨབྷིསངྑརོནྟཱི’’ཏི ཀཏྭཱ. ཏེནཱཧ ‘‘སོལ༹སཔརིཝཱར’’ནྟི.

མཧཱཝིཛིཏརཱཛཡཉྙཀཐཱཝཎྞནཱ

༣༣༦. པུབྦེ བྷཱུཏཾ བྷཱུཏཔུབྦཾ ཡཐཱ ‘‘དིཊྛཔུབྦ’’ནྟི ཨཱཧ ‘‘པུབྦཙརིཏ’’ནྟི, ཨཏྟནོ པུརིམཛཱཏིསམྦྷཱུཏཾ བོདྷིསམྦྷཱརབྷཱུཏཾ པུཉྙཙརིཡནྟི ཨཏྠོ. ཏཐཱ ཧི ཏསྶ ཨནུགཱམིནིདྷིསྶ ཐཱཝརནིདྷིནཱ ནིདསྶནཾ ཨུཔཔནྣཾ ཧོཏི. སདྡཝིདཱུ པན ཝདནྟི ‘‘བྷཱུཏཔུབྦནྟི ཨིདཾ ཀཱལསཏྟམིཡཱ ནེཔཱཏིཀཔད’’ནྟི. ཨཏཱིཏཀཱལེཏི ཧི ཏེསཾ མཏེན ཨཏྠོ. ཨསྶཱཏི ཨནེན. མཧནྟཾ པཐཝཱིམཎྜལཾ ཝིཛིཏནྟི སམྦནྡྷོ. མཧནྟཾ ཝཱ ཝིཛིཏཾ པཐཝཱིམཎྜལམསྶ ཨཏྠཱིཏི ཨཏྠོ. ‘‘ཨནྟོརཊྛེཏི ཡསྶ ཝིཛིཏེ ཝིཧརཏི, ཏསྶ རཊྛེ’’ཏིཨཱདཱིསུ ཝིཡ ཧི ཝིཛིཏསདྡོ རཛྫེ པཝཏྟཏི, ཨིམིནཱ ཏསྶ ཨེཀརཱཛབྷཱཝཾ དཱིཔེཏི, ན ཙཀྐཝཏྟིརཱཛབྷཱཝཾ སཏྟརཏནསམྤནྣཏཱཨཝཙནཏོ. པཱལི༹ཡཾ ན ཡེན ཀེནཙི སནྟཀམཏྟེན ཨཌྜྷཏཱཏི དསྶེཏུཾ ‘‘ཨཌྜྷོ’’ཏི ཝཏྭཱ ‘‘མཧདྡྷནོ’’ཏི ཝུཏྟཾ. ཏེནཱཧ ‘‘ཡོ ཀོཙཱི’’ཏིཨཱདི. ཨཌྜྷཏཱ ཧི ནཱམ ཝིབྷཝསམྤནྣཏྟཱ སཱ ཙ ཏཾ ཏདུཔཱདཱཡ ཝུཙྩཏི. ཏཐཱ མཧདྡྷནཏཱཔཱིཏི ཏཾ ཐཱམཔྤཏྟཾ ཨུཀྐཾསགཏཾ དསྶེཏུཾ ‘‘ཨཔརིམཱཎསངྑྱེནཱ’’ཏི ཨཱཧ. བྷུཉྫིཏབྦཊྛེན ཝིསེསཏོ ཀཱམཱ ཨིདྷ བྷོགཱ ནཱམཱཏི དསྶེཏི. ‘‘པཉྩཀཱམགུཎཝསེནཱ’’ཏི ཨིམིནཱ. པིཎྜཔིཎྜཝསེནཱཏི བྷཱཛནཱལངྐཱརཱདིཝིབྷཱགཾ ཨཧུཏྭཱ ཀེཝལཾ ཁཎྜཁཎྜཝསེན.

རཱུཔཾ ཨཔྤེཏྭཱ, ཨནཔྤེཏྭཱ ཝཱ མཱསཔྤམཱཎེན ཀཏོ མཱསཀོ. ཨཱདིསདྡེན ཐཱལཀཱདཱིནི སངྒཎྷཱཏི. ཨནེཀཀོཊིསངྑྱེནཱཏི ཀཧཱཔཎཱནཾ ¶ ཀོཊིསཏཱདིཔྤམཱཎཾ སནྡྷཱཡ ཝུཏྟཾ ཧེཊྛིམནྟེན ཀོཊིསཏཔྤམཱཎེནེཝ ཁཏྟིཡམཧཱསཱལབྷཱཝཔྤཏྟིཏོ.

ཏུཊྛཱིཏི ¶ སུམནཏཱ. ཨུཔཀརཎསདྡོ ཙེཏྠ ཀཱརཎཔརིཡཱཡོ. ཀིཾ པན ཏནྟི ཨཱཧ ‘‘ནཱནཱཝིདྷཱལངྐཱརསུཝཎྞརཛཏབྷཱཛནཱདིབྷེད’’ནྟི. ཨཱདིསདྡེན ཝཏྠསེཡྻཱཝསཐཱདཱིནི སངྒཡ྄ཧནྟི, སུཝཎྞརཛཏམཎིམུཏྟཱཝེལུ༹རིཡཝཛིརཔཝཱལཱ༹ནི སཏྟ རཏནཱནཱིཏི ཝདནྟི. ཡཐཱཧུ –

‘‘སུཝཎྞཾ རཛཏཾ མུཏྟཱ, མཎིཝེལུ༹རིཡཱནི ཙ;

ཝཛིརཉྩ པཝཱལ༹ནྟི, སཏྟཱཧུ རཏནཱནིམེ’’ཏི.

སཱལིཝཱིཧིཨཱདི སཏྟདྷཉྙཾ སཱནུལོམཾ པུབྦནྣཾ ནཱམ པུརེཀྑཏཾ སསྶཕལནྟི ཀཏྭཱ. ཏབྦིཔརིཡཱཡཏོ མུགྒམཱསཱདི ཏདཝསེསཾ ཨཔརནྣཾ ནཱམ. ཨཔརནྣཏོ པུབྦེ པཝཏྟམནྣཾ པུབྦནྣཾ, ཏཏོ ཨཔརསྨིཾ པཝཏྟམནྣཾ ཨཔརནྣཾ. ནྣ-ཀཱརསྶ པན ཎྞ-ཀཱརེ ཀཏེ པུབྦཎྞཾ, ཨཔརཎྞཉྩཱཏི ནེརུཏྟིཀཱ. པུབྦཱཔརབྷཱཝོ པནེཏེསཾ ཨཱདིཀཔྤེ སམྦྷཝཱསམྦྷཝཝསེན ཝེདིཏབྦོ. པུརིམཾ ‘‘ཨཌྜྷོ མཧདྡྷནོ པཧཱུཏཛཱཏརཱུཔརཛཏོ’’ཏི ཝཙནཾ དེཝསིཀཾ པརིབྦཡདཱནགཧཎཱདིཝསེན, པརིཝཏྟནདྷནདྷཉྙཝསེན ཙ ཝུཏྟཾ, ཨིདཾ པན ‘‘པཧཱུཏདྷནདྷཉྙོ’’ཏི ཝཙནཾ ནིདྷཱནགཏདྷནཝསེན, སངྒཧིཏདྷཉྙཝསེན ཙཱཏི ཨིམཾ ཝིསེསཾ སནྡྷཱཡ ཨཡཾ ནཡོ དསྶིཏོ. ཝཱིསཀཧཱཔཎམྦཎཱདིདེཝསིཀཝལ༹ཉྫནམྤི ཧི མཧཱསཱལལཀྑཎཾ.

ཨིདཱནི ཏབྦིཔརཱིཏཝསེན ཝིསེསཾ དསྶེཏུཾ ‘‘ཨཐ ཝཱ’’ཏིཨཱདིནཱ དུཏིཡནཡོ ཨཱརདྡྷོ. ཨིམིནཱ ཨེཝ ཧི པུརིམཝཙནཾ ནིདྷཱནགཏདྷནཝསེན, སངྒཧིཏདྷཉྙཝསེན ཙ ཝུཏྟནྟི ཨཏྠཏོ སིདྡྷཾ ཧོཏི. ཏཏྠ ཨིདནྟི ‘‘པཧཱུཏདྷནདྷཉྙོ’’ཏི ཝཙནཾ. ཨསྶཱཏི མཧཱཝིཛིཏརཉྙོ. དིཝསེ དིཝསེ པརིབྷུཉྫིཏབྦཾ དེཝསིཀཾ, བྷཱཝནཔུཾསཀམེཏཾ. དཱསཀམྨཀརཔོརིསཱདཱིནཾ ཝེཏྟནཱནུཔྤདཱནཾ པརིབྦཡདཱནཾ. ཨིཎསོདྷནཱདིཝསེན དྷནདྷཉྙཱནམཱདཱནཾ གཧཎཾ. ཨཱདིསདྡེན ཨིཎདཱནཱདཱིནཾ སངྒཧོ. པརིཝཏྟནདྷནདྷཉྙཝསེནཱཏི ཀཡཝིཀྐཡཀརཎེན པརིཝཏྟིཏབྦཱནཾ དྷནདྷཉྙཱནཾ ཝསེན. ཀཏྠཙི པན སམུཙྩཡཝིརཧིཏཔཱཋོ དིསྶཏི. ཏཏྠ ‘‘པརིབྦཡདཱནགྒཧཎཱདིཝསེནཱ’’ཏི ཨིདཾ པརིཝཏྟནཔདེན སམྦནྡྷཾ ཀཏྭཱ ཏཱདིསེན ཝིདྷིནཱ ཨིཏོ ཙིཏོ ཙ པརིཝཏྟེཏབྦཱནཾ དྷནདྷཉྙཱནཾ ཝསེནཱཏི ཨཏྠོ ཝེདིཏབྦོ.

ཀོཊྛཾ ¶ ཝུཙྩཏི དྷཉྙཊྛཔནཊྛཱནཾ, ཏདེཝ ཨགཱརཾ ཏཐཱ. ཏེནཱཧ ‘‘དྷཉྙེན པརིཔུཎྞཀོཊྛཱགཱརོ’’ཏི. ཨེཝཾ སཱརགབྦྷཾ ཀོསོ, དྷཉྙཊྛཔནཊྛཱནཾ ཀོཊྛཱགཱརནྟི དསྶེཏྭཱ ཨིདཱནི ཏཏོ ཨཉྙཐཱཔི ཏཾ དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ. ཏཏྠ ཡཐཱ ཨསིནོ ཏིཀྑབྷཱཝཔརིཧཱརཏོ པརིཙྪདོ ‘‘ཀོསོ’’ཏི ཝུཙྩཏི, ཨེཝཾ རཉྙོ ཏིཀྑབྷཱཝཔརིཧཱརཀཏྟཱ ཙཏུརངྒིནཱི ¶ སེནཱ ‘‘ཀོསོ’’ཏི ཨཱཧ ‘‘ཙཏུབྦིདྷོ ཀོསོ’’ཏིཨཱདི. ‘‘དྭཱདསཔུརིསོ ཧཏྠཱི’’ཏིཨཱདིནཱ (པཱཙི. ༣༡༤) ཝུཏྟལཀྑཎེན ཙེཏྠ ཧཏྠིཨཱདཡོ གཧེཏབྦཱ. ཝཏྠཀོཊྛཱགཱརགྒཧཎེནེཝ སབྦསྶཔི ཀུཔྤབྷཎྜཊྛཔནཊྛཱནསྶ གཧིཏཏྟཱ ‘‘ཀོཊྛཱགཱརཾ ཏིཝིདྷ’’ནྟིཨཱདི ཝུཏྟཾ. ཛཱཏརཱུཔརཛཏཏོ ཧི ཨཉྙཾ ལོཧཨཡདཱརུཝིསཱཎཝཏྠཱདིཀམསཱརདབྦཾ གོཔེཏབྦཏོ ག-ཀཱརསྶ ཀ-ཀཱརཾ ཀཏྭཱ ཀུཔྤཾ ཝུཙྩཏི. ཛཱཏརཱུཔརཛཏནིདྷཱནཾ དྷནཀོཊྛཱགཱརཾ. ཏཏྠ ཏཏྠ རཏནཾ ཝིལོཀེཏྭཱ ཙརཎཾ རཏནཝིལོཀནཙཱརིཀཱ. ཀཱམཾ ཏམཏྠཾ རཱཛཱ ཛཱནཱཏི, བྷཎྜཱགཱརིཀེན པན ཀཐཱཔེཏྭཱ པརིསཱཡ ནིསྶདྡབྷཱཝཱཔཱདནཏྠམེཝ ཨེཝཾ པུཙྪཏི. ཏཐཱ ཀཐཱཔནེ ཧི ཨསཏི པརིསཱ སདྡཾ ཀརིསྶཏི ‘‘ཀསྨཱ རཱཛཱ པརམྤརཱགཏཾ ཀུལདྷནཾ ཝིནཱསེཏཱི’’ཏི, ཏཏོ ཙ པཀཏིཀྑོབྷོ བྷཝིསྶཏི, སཏི པན ཏཐཱ ཀཐཱཔནེ ‘‘ཨེཏཾཀཱརཎཱ ཏཾ ཚཌྜེཏཱི’’ཏི ནིསྶདྡབྷཱཝམཱཔཛྫིསྶཏི. ཏཏོ ཙ པཀཏིཀྑོབྷོ ན བྷཝིསྶཏི, ཏསྨཱ ཏཐཱ པུཙྪཏཱིཏི ཝེདིཏབྦཾ. མརཎཝསནྟི མརཎསྶ, མརཎསངྑཱཏཾ ཝཱ ཝིསཡཾ.

༣༣༧. པཱལི༹ཡཾ ‘‘ཨཱམནྟེཏྭཱ’’ཏི ཨེཏསྶ མནྟིཏུཀཱམོ ཧུཏྭཱཏི ཨཏྠཾ ཝིཉྙཱཔེཏུཾ ‘‘ཨེཀེན པཎྜིཏེན སདྡྷིཾ མནྟེཏྭཱ’’ཏི ཝུཏྟཾ. དྷཱཏྭཏྠཱནུཝཏྟཀོ ཧེཏྠ ཨུཔསགྒོ, པཀརཎཱདྷིགཏོ ཙ ཀཏྠཙི ཨཏྠཝིསེསོ ཡཐཱ ‘‘སིཀྑམཱནེན བྷིཀྑཝེ བྷིཀྑུནཱ ཨཉྙཱཏབྦཾ པརིཔུཙྪིཏབྦཾ པརིཔཉྷིཏབྦ’’ནྟི (པཱཙི. ༤༣༤). ཏཐཱ ཧིསྶ པདབྷཱཛནེ ཝུཏྟཾ ‘‘སིཀྑམཱནེནཱཏི སིཀྑིཏུཀཱམེན. ཨཉྙཱཏབྦནྟི ཛཱནིཏབྦ’’ནྟིཨཱདི (པཱཙི. ༤༣༦). ཨཱམནྟེསཱིཏི མནྟིཏུཀཱམོསི. ཛནཔདསྶ ཨནུཔདྡཝཏྠཾ, ཡཉྙསྶ ཙ ཙིརཱནཔྤཝཏྟནཏྠཾ བྲཱཧྨཎོ ཙིནྟེསཱིཏི ཨཱཧ ‘‘ཨཡཾ རཱཛཱ’’ཏིཨཱདི. ཨཱཧརནྟཱནཾ མནུསྶཱནཾ གེཧཱནཱིཏི སམྦནྡྷོ, ཨནཱདརེ ཝཱ ཨེཏཾ སཱམིཝཙནཾ.

༣༣༨. སཏྟཱནཾ ¶ ཧིཏསུཁསྶ ཝིདཱུསནཏོ, ཨཧིཏདུཀྑསྶ ཙ ཨཱཝཧནཏོ ཀཎྚཀསདིསཏཱཡ ཙོརཱ ཨེཝ ཨིདྷ ‘‘ཀཎྚཀཱ’’ཏི ཝུཏྟཾ ‘‘ཙོརཀཎྚཀེཧི སཀཎྚཀོ’’ཏི. ཡཐཱ གཱམཝཱསཱིནཾ གྷཱཏཀཱ གཱམགྷཱཏཀཱ ཨབྷེདཝསེན, ཨུཔཙཱརེན ཙ ནིསྶཡནཱམསྶ ནིསྶིཏེཔི པཝཏྟནཏོ, ཨེཝཾ པནྠིཀཱནཾ དུཧནཱ བཱདྷནཱ པནྠདུཧཱ. དྷམྨཏོ ཨཔེཏསྶ ཨཡུཏྟསྶ ཀརཎསཱིལོ ཨདྷམྨཀཱརཱི, ཡོ ཝཱ ཨཏྟནོ ཝིཛིཏེ ཛནཔདཱདཱིནཾ ཏཏོ ཏཏོ ཨནཏྠཏོ ཏཱཡནེན ཁཏྟིཡེན ཀཏྟབྦདྷམྨོ, ཏསྶ ཨཀརཎསཱིལོཏི ཨཏྠོ. དསྶཱུཏི ཙོརཱནམེཏཾ ཨདྷིཝཙནཾ. དཾསེནྟི ཝིདྡྷཾསེནྟཱིཏི ཧི དསྶཝོ ནིགྒཧཱིཏལོཔེན, ཏེ ཨེཝ ཁཱིལསདིསཏྟཱ ཁཱིལནྟི དསྶུཁཱིལཾ. ཡཐཱ ཧི ཁེཏྟེ ཁཱིལཾ ཀསནཱདཱིནཾ སུཁཔྤཝཏྟིཾ, མཱུལསནྟཱནེན སསྶཔརིབུདྡྷིཉྩ ཝིབནྡྷཏི, ཨེཝཾ དསྶཝོཔི རཛྫེ རཱཛཱཎཱཡ སུཁཔྤཝཏྟིཾ, མཱུལཝིརུལ༹ྷིཡཱ ཛནཔདཔརིབུདྡྷིཉྩ ཝིབནྡྷནྟཱི. པཱཎཙཱགཾ ¶ དསྶེཏུཾ ‘‘མཱརཎེནཱ’’ཏི ཝུཏྟཾ, ཧིཾསནཾ དསྶེཏུཾ ‘‘ཀོཊྚནེནཱ’’ཏི. ཝདྷསདྡོ ཧི ཧིཾསནཏྠོཔི ཧོཏི ‘‘ཝདྷཏི ན རོདཏི, ཨཱཔཏྟི དུཀྐཊསྶཱ’’ཏིཨཱདཱིསུ (པཱཙི. ༨༨༠) ཝིཡ, ཀཔྤརཱདཱིཧི པོཐནེནཱཏི ཨཏྠོ. ཨདྡུ ནཱམ དཱརུཀྑནྡྷེན ཀཏོ བནྡྷནོཔཀརཎཝིསེསོ, ཏེན བནྡྷནཾ ཏཐཱ. ཨཱདིསདྡེན རཛྫུབནྡྷནསངྑལིཀབནྡྷནགྷརབནྡྷནཱདཱིནི སངྒཎྷཱཏི. ཧཱ-དྷཱཏུཡཱ ཛཱནིཔདནིཔྥཏྟིཾ དསྶེཏི ‘‘ཧཱནིཡཱ’’ཏི ཨིམིནཱ, སཱ ཙ དྷནཧཱཡནམེཝཱཏི ཝུཏྟཾ ‘‘སཏཾ གཎྷཐཱ’’ཏིཨཱདི.

པཉྩསིཁམཏྟཾ ཋཔེཏྭཱ མུཎྜཱཔནཾ པཉྩསིཁམུཎྜཀརཎཾ. ཏཾ ‘‘ཀཱཀཔཀྑཀརཎ’’ནྟིཔི ཝོཧརནྟི. སཱིསེ ཚཀཎོདཀཱཝསེཙནཾ གོམཡསིཉྩནཾ. ཀུདཎྜཀོ ནཱམ ཙཏུཧཏྠཏོ ཨཱུནོ རསྶདཎྜཀོ, ཡོ ‘‘གདྡུལོ’’ཏིཔི ཝུཙྩཏི, ཏེན བནྡྷནཾ ཀུདཎྜཀབནྡྷནཾ. ཨཱདིསདྡེན ཁུརམུཎྜཾ ཀརིཏྭཱ བྷསྨཔུཊཝདྷནཱདཱིནཾ སངྒཧོ. སམྨཱསདྡོ ཉཱཡཏྠོཏི ཨཱཧ ‘‘ཧེཏུནཱ’’ཏིཨཱདི, པརིཡཱཡཝཙནམེཏཾ. ཨཱུཧནིསྶཱམཱིཏི ཨུདྡྷརིསྶཱམི, ཨཔནེསྶཱམཱིཏི ཨཏྠོ. པུབྦེ ཏཏྠ ཀཏཔརིཙཡཏཱཡ ཨུསྶཱཧཾ ཀརོནྟི. ‘‘ཨནུཔྤདེཏཱུ’’ཏི ཨེཏསྶ ཨནུ ཨནུ པདེཏཱུཏི ཨཏྠཾ སནྡྷཱཡ ‘‘དིནྣེ ཨཔྤཧོནྟེ’’ཏིཨཱདི ཝུཏྟཾ. ཀསིཨུཔཀརཎབྷཎྜཾ ཕཱལཔཱཛནཡུགནངྒལཱདི, ཨིམིནཱ པཱལི༹ཡཾ བཱིཛབྷཏྟམེཝ ནིདསྶནཝསེན ཝུཏྟནྟི དསྶེཏི. སཀྑིཀརཎཔཎྞཱརོཔནནིབནྡྷནཾ ¶ ཝཌྜྷིཡཱ སཧ ཝཱ ཝིནཱ ཝཱ པུན གཧེཏུཀཱམསྶ དཱནེ ཧོཏི, ཨིདྷ པན ཏདུབྷཡམྤི ནཏྠི པུན ཨགྒཧེཏུཀཱམཏྟཱཏི ཝུཏྟཾ ‘‘སཀྑིཾ ཨཀཏྭཱ’’ཏིཨཱདི. ཏེནཱཧ ‘‘མཱུལཙྪེཛྫཝསེནཱ’’ཏི. སཀྑིནྟི ཏདཱ པཙྩཀྑཀཛནཾ. པཎྞེ ཨནཱརོཔེཏྭཱཏི ཏཱལཱདིཔཎྞེ ཡཐཱཙིཎྞཾ ལིཁནཝསེན ཨནཱརོཔེཏྭཱ. ཨཉྙཏྠ པཎྞཱཀཱརེཔི པཱབྷཏསདྡོ, ཨིདྷ པན བྷཎྜམཱུལེཡེཝཱཏི ཨཱཧ ‘‘བྷཎྜམཱུལསྶཱ’’ཏིཨཱདི. བྷཎྜམཱུལཉྷི པཀཱརཏོ ཨུདཡབྷཎྜཱནི ཨཱབྷརཏི སཾཧརཏི ཨེཏེནཱཏི པཱབྷཏཾ. ཨུདཡདྷནཏོ པགེཝ ཨཱབྷཏཾ པཱབྷཏནྟི སདྡཝིདཱུ, པཎྞཱཀཱརོ པན ཏཾ ཏདཏྠཾ པཏྠེནྟེཧི ཨཱབྷརཱིཡཏེཏི པཱབྷཏཾ. པཏྠནཏྠཛོཏཀོ ཧི ཨཡཾ པ-སདྡོ.

‘‘ཡཐཱཧཱ’’ཏིཨཱདིནཱ པཱབྷཏསདྡསྶ མཱུལབྷཎྜཏྠཏཾ ཙཱུལ༹སེཊྛིཛཱཏཀཔཱཋེན (ཛཱ. ༡.༡.༤) སཱདྷེཏི. ཏཏྲཱཡམཊྛཀཐཱ (ཛཱ. ཨཊྛ. ༡.༡.༤) ‘‘ཨཔྤཀེནཔཱིཏི ཐོཀེནཔི པརིཏྟཀེནཔི. མེདྷཱཝཱིཏི པཉྙཝཱ. པཱབྷཏེནཱཏི བྷཎྜམཱུལེན. ཝིཙཀྑཎོཏི ཝོཧཱརཀུསལོ. སམུཊྛཱཔེཏི ཨཏྟཱནནྟི མཧནྟཾ དྷནཉྩ ཡསཉྩ ཨུཔྤཱདེཏྭཱ ཏཏྠ ཨཏྟཱནཾ སཎྛཱཔེཏི པཏིཊྛཱཔེཏི. ཡཐཱ ཀིཾ? ཨཎུཾ ཨགྒིཾཝ སནྡྷམཾ, ཡཐཱ པཎྜིཏཔུརིསོ པརིཏྟཾ ཨགྒིཾ ཨནུཀྐམེན གོམཡཙུཎྞཱདཱིནི པཀྑིཔིཏྭཱ མུཁཝཱཏེན དྷམནྟོ སམུཊྛཱཔེཏི ཝཌྜྷེཏི མཧནྟཾ ཨགྒིཀྑནྡྷཾ ཀརོཏི, ཨེཝམེཝ པཎྜིཏོ ཐོཀམྤི པཱབྷཏཾ ལབྷིཏྭཱ ནཱནཱཨུཔཱཡེཧི པཡོཛེཏྭཱ དྷནཉྩ ཡསཉྩ ཝཌྜྷེཏི, ཝཌྜྷེཏྭཱ ཙ ¶ པན ཏཏྠ ཨཏྟཱནཾ པཏིཊྛཱཔེཏི, ཏཱཡ ཨེཝ ཝཱ པན དྷནཡསམཧནྟཏཱཡ ཨཏྟཱནཾ སམུཊྛཱཔེཏི, ཨབྷིཉྙཱཏཾ པཱཀཊཾ ཀརོཏཱིཏི ཨཏྠོ’’ཏི.

དིཝསེ དིཝསེ དཱཏབྦཾ དེཝསིཀཾ. མཱསེ མཱསེ དཱཏབྦཾ མཱསིཀཾ. ཨཱདིསདྡེན ཨནུཔོསཐིཀཱདཱིནི སངྒཎྷཱཏི. ཏསྶ ཏསྶ པུརིསསྶ. ཀུསལཱནུརཱུཔེན, ཀམྨཱནུརཱུཔེན སཱུརབྷཱཝཱནུརཱུཔེནཱཏི དྭནྡཏོ པརཾ སུཡྻམཱནོ ཨནུརཱུཔསདྡོ པཙྩེཀཾ ཡོཛེཏབྦོ. ཚེཀབྷཱཝཱནུརཱུཔཏཱ ཙེཏྠ ཀུསལཱནུརཱུཔཾ. ཀཏྠཙི ཀུལསདྡོ དིསྶཏི, སོ ཙ ཛཱཎུསོཎིཨཱདིཀུལཱནམིཝ ཀུལཱནུརཱུཔམྤི དཱཏབྦཏོ ཡུཛྫཏེཝ. སེནཱཔཙྩཱདི ཋཱནནྟརཾ, ཨིམིནཱ བྷཏྟཝེཏནཾ ནིདྡིཊྛམཏྟནྟི དསྶེཏི. སཀཀམྨཔསུཏཏྟཱ, ཨནུཔདྡཝཏྟཱ ཙ དྷནདྷཉྙཱནཾ རཱསིཀོ རཱསིཀཱརབྷཱུཏོ. ཁེམེན ཋིཏཱཏི ¶ ཨནུཔདྡཝེན པཝཏྟཱ. ཏེནཱཧ ‘‘ཨབྷཡཱ’’ཏི, ཀུཏོཙིཔི བྷཡརཧིཏཱཏི ཨཏྠོ. མོདཱ མོདམཱནཱཏི མོདཱཡ མོདམཱནཱ, སོམནསྶེནེཝ མོདམཱནཱ, ན སཾསནྡནམཏྟེནཱཏི ཝུཏྟཾ ཧོཏི. ‘‘བྷགཝཏཱ སདྡྷིཾ སམྨོདཱི’’ཏིཨཱདཱིསུ (དཱི. ནི. ༡.༣༨༡) ཧི མུདསདྡོ སཾསནྡནེཔི པཝཏྟཏི, ཨཉྙེ མོདཱ ཧུཏྭཱ ཨཔརེཔི མོདམཱནཱ ཝིཧརནྟཱིཏི ཝཱ ཨཏྠོ. ཏེནཱཧ ‘‘ཨཉྙམཉྙཾ པམུདིཏཙིཏྟཱཏི, ཨསཉྙོགེཔི ཝཏྟིཙྪཱཡེཝ ཝུདྡྷཱིཏི དྭིདྷཱ པཱཋོ ཝུཏྟོ. ཨིདྡྷཕཱིཏབྷཱཝནྟི སམིདྡྷཝེཔུལླབྷཱཝཾ.

ཙཏུཔརིཀྑཱརཝཎྞནཱ

༣༣༩. ཏསྨིཾ ཏསྨིཾ ཀིཙྩེ ཨནུཡནྟི ཨནུཝཏྟནྟཱིཏི ཨནུཡནྟཱ. ཏེཡེཝ ཨཱནུཡནྟཱ ཡཐཱ ‘‘ཨནུབྷཱཝོ ཨེཝ ཨཱནུབྷཱཝོ’’ཏི, ‘‘ཨཱནུཡུཏྟཱ’’ཏིཔི པཱཋོ, ཏསྨིཾ ཏསྨིཾ ཀིཙྩེ ཨནུཡུཛྫནྟཱིཏི ཧི ཨཱནུཡུཏྟཱ ཝུཏྟནཡེན. ཨསྶཱཏི རཉྙོ. ཏེཏི ཨཱནུཡནྟཁཏྟིཡཱདཡོ. ‘‘ཨམྷེ ཨེཏྠ བཧི ཀརོཏཱི’’ཏི ཨཏྟམནཱ ན བྷཝིསྶནྟི. ‘‘ནིབནྡྷཝིཔུལཱཡཱགམོ གཱམོ ནིགམོ. ཝིཝཌྜྷིཏམཧཱཨཱཡོ མཧཱགཱམོ’’ཏི (དཱི. ནི. ཊཱི. ༡.༣༣༨) ཨཱཙརིཡེན ཝུཏྟཾ. ‘‘ཨཔཱཀཱརཔརིཀྑེཔོ སཱཔཎོ ནིགམོ, སཔཱཀཱརཱཔཎཾ ནགརཾ, ཏཾ ཏབྦིཔརཱིཏོ གཱམོ’’ཏི (ཀངྑཱཝིཏརཎཱི ཨབྷིནཝཊཱིཀཱཡཾ སངྒྷཱདིསེསཀཎྜེ ཀུལདཱུསཀསིཀྑཱཔདེ པསྶིཏབྦཾ) ཝིནཡཊཱིཀཱསུ. གསནྟི མདནྟི ཨེཏྠཱཏི གཱམོ, སྭེཝ པཱཀཊོ ཙེ, ནིགམོ ནཱམ ཨཏིརེཀོ གཱམོཏི ཀཏྭཱ. བྷུསཏྠོ ཧེཏྠ ནཱི-སདྡོ, སཉྙཱསདྡཏྟཱ ཙ རསྶོཏི སདྡཝིདཱུ. ཛནཔདཏྠོ ཝུཏྟོཝ. ‘‘སཱམྱཱམཙྩོ སཁཱ ཀོསོ, དུགྒཉྩ ཝིཛིཏཾ བལ’’ནྟི ཝུཏྟཱསུ སཏྟསུ རཱཛཔཀཏཱིསུ རཉྙོ ཏདཝསེསཱནཾ ཚནྣཾ ཝསེན ཧིཏསུཁཱཏིཝུདྡྷི, ཏདེཀདེསཱ ཙ ཨཱནུཡནྟཱདཡོཏི ཨཱཧ ‘‘ཡཾ ཏུམྷཱཀ’’ནྟིཨཱདི.

ཏཾཏཾཀིཙྩེསུ ¶ རཉྙཱ ཨམཱ སཧ བྷཝནྟཱིཏི ཨམཙྩཱ. ‘‘ཨམཱཝཱསཱི’’ཏིཨཱདཱིསུ ཝིཡ ཧི སམཀིརིཡཱཡ ཨམཱཏི ཨབྱཡཔདཾ, ཙ-པཙྩཡེན ཏདྡྷིཏསིདྡྷཱིཏི ནེརུཏྟིཀཱ. རཛྫཀིཙྩཝོསཱསནཀཱལེ པན ཏེ རཉྙཱ པིཡཱ, སཧཔཝཏྟནཀཱ ཙ བྷཝནྟཱིཏི དསྶེཏི ‘‘པིཡསཧཱཡཀཱ’’ཏི ཨིམིནཱ. རཉྙོ པརིསཏི བྷཝཱ ‘‘པཱརིསཛྫཱ. ཀེ པན ཏེཏི ཝུཏྟཾ ‘‘སེསཱ ཨཱཎཏྟིཀཱརཀཱ’’ཏི ¶ , ཡཐཱཝུཏྟཱནུཡུཏྟཁཏྟིཡཱདཱིཧི ཨཝསེསཱ རཉྙོ ཨཱཎཱཀརཱཏི ཨཏྠོ. སཏིཔི དེཡྻདྷམྨེ ཨཱནུབྷཱཝསམྤཏྟིཡཱ, པརིཝཱརསམྤཏྟིཡཱ ཙ ཨབྷཱཝེ ཏཱདིསཾ དཱཏུཾ ན སཀྐཱ. ཝུདྡྷཀཱལེ ཙ ཏཱདིསཱནམྤི རཱཛཱུནཾ ཏདུབྷཡཾ ཧཱཡཏེཝ, དེཡྻདྷམྨེ པན ཨསཏི པགེཝཱཏི དསྶེཏུཾ ‘‘དེཡྻདྷམྨསྨིཉྷཱི’’ཏིཨཱདིམཱཧ. དེཡྻདྷམྨསྨིཾ ཨསཏི ཙ མཧལླཀཀཱལེ ཙ དཱཏུཾ ན སཀྐཱཏི ཡོཛནཱ. ཨེཏེནཱཏི ཡཐཱཝུཏྟཀཱརཎདྭཡེན. ཨནུམཏིཡཱཏི ཨནུཛཱནནེན. པཀྑཱཏི སཔཀྑཱ ཡཉྙསྶ ཨངྒབྷཱུཏཱ. ཡཉྙཾ པརིཀརོནྟཱིཏི པརིཀྑཱརཱ, སམྦྷཱརཱ, ཏེ ཙ ཏསྶ ཡཉྙསྶ ཨངྒབྷཱུཏཏྟཱ པརིཝཱརཱ ཝིཡ ཧོནྟཱིཏི ཨཱཧ ‘‘པརིཝཱརཱ བྷཝནྟཱི’’ཏི. ‘‘རཐོ’’ཏིཨཱདིནཱ ཨིདྷཱནདྷིཔྤེཏམཏྠཾ ནིསེདྷེཏི.

‘‘རཐོ སེཏཔརིཀྑཱརོ, ཛྷཱནཀྑོ ཙཀྐཝཱིརིཡོ;

ཨུཔེཀྑཱ དྷུརསམཱདྷི, ཨནིཙྪཱ པརིཝཱརཎ’’ནྟི. (སཾ. ནི. ༥.༤);

ཧི སཾཡུཏྟམཧཱཝགྒཔཱལི༹. ཏཏྠ རཐོཏི བྲཧྨཡཱནསཉྙིཏོ ཨཊྛངྒིཀམགྒརཐོ. སེཏཔརིཀྑཱརོཏི ཙཏུཔཱརིསུདྡྷིསཱིལཱལངྐཱརོ. ‘‘སཱིལཔརིཀྑཱརོ’’ཏིཔི པཱཋོ. ཛྷཱནཀྑོཏི ཝིཔསྶནཱསམྤཡུཏྟཱནཾ པཉྩནྣཾ ཛྷཱནངྒཱནཾ ཝསེན ཛྷཱནམཡཨཀྑོ. ཙཀྐཝཱིརིཡོཏི ཝཱིརིཡཙཀྐོ. ཨུཔེཀྑཱ དྷུརསམཱདྷཱིཏི ཨུཔེཀྑཱ དྭིནྣཾ དྷུརཱནཾ སམཏཱ. ཨནིཙྪཱ པརིཝཱརཎནྟི ཨལོབྷོ སཱིཧདྷམྨཱདཱིནི ཝིཡ པརིཝཱརཎཾ.

ཨཊྛཔརིཀྑཱརཝཎྞནཱ

༣༤༠. ཨུབྷཏོ སུཛཱཏཱདཱིཧི ཝུཙྩམཱནེཧི. ཡསསཱཏི པཉྩཝིདྷེན ཨཱནུབྷཱཝེན. ཏེནཱཧ ‘‘ཨཱཎཱཋཔནསམཏྠཏཱཡཱ’’ཏི. ‘‘སདྡྷོ’’ཏི ཨེཏསྶ ‘‘དཱཏཱདཱནསྶ ཕལཾ པཙྩནུབྷོཏི པཏྟིཡཱཡཏཱི’’ཏི ཨཏྠཾ དསྶེཏུཾ ‘‘དཱནསྶཱ’’ཏིཨཱདི ཝུཏྟཾ. དཱནེ སཱུརོཏི དཱནསཱུརོ, དེཡྻདྷམྨེ ཨཱིསཀམྤི སངྒཾ ཨཀཏྭཱ མུཏྟཙཱགོ, ཏབྦྷཱཝོ པན ཀམྨསྶཀཏཱཉཱཎསྶ ཏིཀྑཝིསདབྷཱཝེན ཝེདིཏབྦོ. ཏསྶ ཧི ཏིཀྑཝིསདབྷཱཝཾ ཝིབྷཱཝེཏུཾ ‘‘སདྡོ’’ཏི ཝཏྭཱ ‘‘དཱནསཱུརོ’’ཏི ཝུཏྟནྟི དཊྛབྦཾ. ཏེནཱཧ ‘‘ན སདྡྷཱམཏྟཀེནཱ’’ཏིཨཱདི. ཡསྶ ཧི ཀམྨསྶཀཏཱ པཙྩཀྑམིཝ ཨུཔཊྛཱཏི, སོ ¶ ཨེཝཾ ཝུཏྟོ. ཡཾ དཱནཾ དེཏཱིཏི ཡཾ དེཡྻདྷམྨཾ པརསྶ དེཏི. ཏསྶ པཏི ཧུཏྭཱཏི ཏབྦིསཡཾ ལོབྷཾ སུཊྛུམབྷིབྷཝནྟོ ཏསྶ ཨདྷིཔཏི ཧུཏྭཱ ¶ དེཏི. ཀཱརཎོཔཙཱརཝཙནཉྷེཏཾ. པརཏོཔི ཨེསེཝ ནཡོ. ཏབྦིསཡེན ལོབྷེན ཨནཱཀཌྜྷནཱིཡཏྟཱ ན དཱསོ, ན སཧཱཡོ.

ཏདེཝཏྠཾ བྱཏིརེཀཏོ, ཨནྭཡཏོ ཙ ཝིཝརིཏྭཱ དསྶེནྟོ ‘‘ཡོ ཧཱི’’ཏིཨཱདིམཱཧ. ཨིདྷཱནདྷིཔྤེཏསྶ ཧི དཱསཱདིདྭཡསྶ བྱཏིརེཀཏོ དསྶནཾ. ཁཱདནཱིཡབྷོཛནཱིཡཱདཱིསུ མདྷུརསྶེཝ པཎཱིཏཏྟཱ ‘‘མདྷུརཾ བྷུཉྫཏཱི’’ཏི ཝུཏྟཾ, ནིདསྶནམཏྟཾ ཝཱ ཨེཏཾ, པཎཱིཏཾ པརིབྷུཉྫཏཱིཏི ཝུཏྟཾ ཧོཏི. དཱསོ ཧུཏྭཱ དེཏི ཏཎྷཱཡ དཱསབྱཏཾ ཨུཔགཏཏྟཱ. སཧཱཡོ ཧུཏྭཱ དེཏི ཏསྶ པིཡབྷཱཝཱནིསྶཛྫནཏོ. སཱམཱི ཧུཏྭཱ དེཏི ཏཏྠ ཏཎྷཱདཱསབྱཏོ ཨཏྟཱནཾ མོཙེཏྭཱ ཨབྷིབྷུཡྻ པཝཏྟནཏོ. ཡཾ པནེཏཾ ཨཱཙརིཡེན ཝུཏྟཾ ‘‘སཱམིཔརིབྷོགསདིསཱ’’ཏི, (དཱི. ནི. ཊཱི. ༡.༣༤༠) ཏཾ ཏཎྷཱདཱསབྱམཏིཀྐནྟཏཱསཱམཉྙཾ སནྡྷཱཡ ཝུཏྟཾ. ན ཧི ཁཱིཎཱསཝསྶ པརིབྷོགོ སཱམིཔརིབྷོགོ ཝིཡ ཁཱིཎཱསཝསྶེཝ དཱནཾ དཱནསཱམཱིཏི ཨཏྠོ ཨུཔཔནྣོ ཧོཏི, པཙྪཱ ཝཱ པམཱདལིཁིཏམེཏཾ. ཏཱདིསོཏི དཱནསཱམིསབྷཱཝོ.

སམིཏཔཱཔསམཎབཱཧིཏཔཱཔབྲཱཧྨཎཱ ཨུཀྐཊྛནིདྡེསེནེཏྠ ཝུཏྟཱ, པབྦཛྫཱམཏྟསམཎཛཱཏིམཏྟབྲཱཧྨཎཱ ཝཱ ཀཔཎཱདིགྒཧཎེན གཧིཏཱཏི ཝེདིཏབྦཾ. དུགྒཏཱཏི དུཀྐརཾ ཛཱིཝིཀམུཔགཏཱ ཀསིརཝུཏྟིཀཱ. ཏེནཱཧ ‘‘དལིདྡམནུསྶཱ’’ཏི. པཐཱཝིནོཏི མགྒགཱམིནོ. ཝཎིབྦཀཱཏི དཱཡཀཱནཾ གུཎཀིཏྟནཝསེན, ཀམྨཕལཀིཏྟནམུཁེན ཙ ཡཱཙནཀཱ སེཡྻཐཱཔི ནགྒཙརིཡཱདཡོཏི ཨཏྠཾ དསྶེཏུཾ ‘‘ཡེ ཨིཊྛཾ དིནྣ’’ནྟིཨཱདི ཝུཏྟཾ. ཏདུབྷཡེནེཝ ཧི དཱནསྶ ཝཎྞཐོམནཱ སམྦྷཝཏི. ཡེ ཝིཙརནྟི, ཏེ ཝཎིབྦཀཱ ནཱམཱཏི ཡོཛེཏབྦཾ. པསཏམཏྟནྟི ཝཱིཧིཏཎྜུལཱདིཝསེན ཝུཏྟཾ, སརཱཝམཏྟནྟི ཡཱགུབྷཏྟཱདིཝསེན. ཨོཔཱནཾ ཝུཙྩཏི ཨོགཱཧེཏྭཱ པཱཏབྦཏོ ནདཱིཏལཱ༹ཀཱདཱིནཾ སབྦསཱདྷཱརཎཾ ཏིཏྠཾ, ཨོཔཱནམིཝབྷཱུཏོཏི ཨོཔཱནབྷཱུཏོ. ཏེནཱཧ ‘‘ཨུདཔཱནབྷཱུཏོ’’ཏིཨཱདི. ཧུཏྭཱཏི བྷཱཝཏོ. སུཏམེཝ སུཏཛཱཏནྟི ཛཱཏསདྡསྶ ཨནཏྠནྟརཝཱཙཀཏྟམཱཧ ཡཐཱ ‘‘ཀོསཛཱཏ’’ནྟི.

ཨཏཱིཏཱདིཨཏྠཙིནྟནསམཏྠཏཱ ནཱམ ཏསྶ རཉྙོ ཨནུམཱནཝསེན, ཨིཏིཀཏྟབྦཏཱཝསེན ཙ ཝེདིཏབྦཱ, ན བུདྡྷཱནཾ ཝིཡ ཏཏྠ པཙྩཀྑདསྶིཏཱཡཱཏི དསྶེཏུཾ ‘‘ཨཏཱིཏེ’’ཏིཨཱདི ཝུཏྟཾ. པུཉྙཱཔུཉྙཱནིསཾསཙིནྟནཉྩེཏྠ པཀརཎཱདྷིགཏཝསེན ¶ ཝེདིཏབྦཾ. པུཉྙསྶཱཏི ཡཉྙཔུཉྙསྶ. དཱཡཀཙིཏྟམྤཱིཏི དཱཡཀཱནཾ, དཱཡཀཾ ཝཱ ཙིཏྟམྤི, དཱཏུཀམྱཏཱཙིཏྟམྤཱིཏི ཝུཏྟཾ ཧོཏི. ཨིམེསུ པན ཨཊྛསུ ཨངྒེསུ ཨཌྜྷཏཱདཡོ པཉྩ ཡཉྙསྶ ཏཱཝ པརིཀྑཱརཱ ཧོནྟུ ཏེཧི ཝིནཱ ཏསྶ ཨསིཛ྄ཛྷནཏོ ¶ , སུཛཱཏཏཱ, པན སཱུརཱུཔཏཱ ཙ ཀཐཾ ཡཉྙསྶ པརིཀྑཱརོ སིཡཱ ཏདུབྷཡེན ཝིནཱཔི ཏསྶ སིཛ྄ཛྷནཏོཏི ཙོདནཱཡ སབྦེསམྤི ཨཊྛནྣམངྒཱནཾ པརིཀྑཱརབྷཱཝཾ ཨནྭཡཏོ, བྱཏིརེཀཏོ ཙ དསྶེནྟོ ‘‘ཨེཏེ ཧི ཀིརཱ’’ཏིཨཱདིམཱཧ. ཨེཏྠ ཙ ཀེཙི ཨེཝཾ ཝདནྟི ‘‘ཡཐཱ ཨཌྜྷཏཱདཡོ པཉྩ ཡཉྙསྶ ཨེཀཾསཏོཝ ཨངྒཱནི, ན ཨེཝཾ སུཛཱཏཏཱ, སུརཱུཔཏཱ ཙ, ཏདུབྷཡཾ པན ཨནེཀཾསཏོཝ ཨངྒནྟི དཱིཔེཏུཾ ཨརུཙིསཱུཙཀསྶ ཀིརསདྡསྶ གཧཎཾ ཀཏ’’ནྟི. ཏེ ཧི ‘‘ཨཡཾ དུཛྫཱཏོཏིཨཱདིཝཙནསྶ ཨནེཀཾསིཀཏཾ མཉྙམཱནཱ ཏཐཱ ཝདནྟི, ཏཡིདཾ ཨསཱརཾ. སབྦསཱདྷཱརཎཝསེན ཧེཏཾ བྱཏིརེཀཏོ ཡཉྙསྶ ཨངྒབྷཱཝདསྶནཾ ཏཏྠ སིཡཱ ཀེསཉྩི ཏཐཱ པརིཝིཏཀྐོ’’ཏི ཏསྶཱཔི ཨཝཀཱསཱབྷཱཝདསྶནཏྠམེཝ ཨེཝཾ ཝུཏྟཏྟཱ, ཏདུབྷཡསཱདྷཱརཎཝསེནེཝ ཨནེཀཾསཏོ ཨངྒབྷཱཝསྶ ཨདསྶནཏོ ཙ. ཀིརསདྡོ པནེཏྠ ཏདཱ བྲཱཧྨཎསྶ ཙིནྟིཏཱཀཱརསཱུཙནཏྠོ དཊྛབྦོ. ཨེཝམནེན ཙིནྟེཏྭཱ ‘‘ཨིམཱནིཔི ཨཊྛངྒཱནི ཏསྶེཝ ཡཉྙསྶ པརིཀྑཱརཱ བྷཝནྟཱིཏི ཝུཏྟཱནཱི’’ཏི ཀིརསདྡེན ཏསྶ ཙིནྟིཏཱཀཱརོ སཱུཙིཏོ ཧོཏི. ཨེཝམཱདཱིནཱིཏི ཨེཏྠ ཨཱདིསདྡེན ‘‘ཨཡཾ ཝིརཱུཔོ ཀིཏྟཀཾ…པེ… ཨུཔཙྪིནྡིསྶཏི, ཨཡཾ དལིདྡོ, ཨཔྤེསཀྑོ, ཨསྶདྡྷོ, ཨཔྤསྶུཏོ, ན ཨཏྠཉྙཱུ, ན མེདྷཱཝཱི ཀིཏྟཀཾ…པེ… ཨུཔཙྪིནྡིསྶཏཱི’’ཏི ཨེཏེསཾ སངྒཧོ ཝེདིཏབྦོ.

ཙཏུཔརིཀྑཱརཱདིཝཎྞནཱ

༣༤༡. ‘‘སུཛཾ པགྒཎྷནྟཱན’’ནྟི ཨེཏྠ སོཎདཎྜསུཏྟཝཎྞནཱཡཾ (དཱི. ནི. ཨཊྛ. ༡.༣༡༡-༣༡༣) ཝུཏྟེསུ དྭཱིསུ ཝིཀཔྤེསུ དུཏིཡཝིཀཔྤཾ ནིསེདྷེནྟོ ‘‘མཧཱཡཱག’’ནྟིཨཱདིམཱཧ, ཏེན ཙ པུརོཧིཏསྶ སཡམེཝ ཀཊཙྪུགྒཧཎཛོཏནེན ཨེཝཾ སཧཏྠཱ སཀྐཙྩཾ དཱནེ ཡུཏྟཔཡུཏྟཏཱ ཨིཙྪིཏབྦཱཏི དསྶེཏི. ཨེཝཾ དུཛྫཱཏསྶཱཏི ཨེཏྠཱཔི ‘‘སུཛཱཏཏཱཡ ཨནེཀཾསཏོ ཨངྒབྷཱཝདསྶནམེཝིད’’ནྟི ཨགྒཧེཏྭཱ ཧེཊྛཱ ཝུཏྟནཡེན སབྦསཱདྷཱརཎཝསེནེཝ ཨཏྠོ གཧེཏབྦོ. ཨཱདིསདྡེན ཧི ‘‘ཨེཝཾ ཨནཛ྄ཛྷཱཡཀསྶ…པེ… དུསྶཱིལསྶ…པེ… དུཔྤཉྙསྶ ¶ སཾཝིདྷཱནེན པཝཏྟདཱནཾ ཀིཏྟཀཾ ཀཱལཾ པཝཏྟིསྶཏཱི’’ཏི ཨེཏེསཾ སངྒཧོ དཊྛབྦོ. ཏསྨཱཏི ཏདུབྷཡཀཱརཎཏོ.

ཏིསྶོཝིདྷཱཝཎྞནཱ

༣༤༢. ཏིཎྞཾ ཋཱནཱནནྟི དཱནསྶ ཨཱདིམཛ྄ཛྷཔརིཡོསཱནསངྑཱཏཱནཾ ཏིསྶནྣཾ བྷཱུམཱིནཾ, ཨཝཏྠཱནཱནནྟི ཨཏྠོ. ཙལནྟཱིཏི ཀམྤནྟི པུརིམཱཀཱརེན ན ཏིཊྛནྟི. ཀརཎཏྠེཏི ཏཏིཡཱཝིབྷཏྟིཨཏྠེ. ཀརཎཱིཡསདྡཱཔེཀྑཱཡ ཧི ཀཏྟརི ཨེཝ ཨེཏཾ སཱམིཝཙནཾ, ན ཀརཎེ. ཡེབྷུཡྻེན ¶ ཧི ཀརཎཛོཏཀཝཙནསྶ ཨཏྠབྷཱཝཏོ ཨནུཏྟཀཏྟཱཝ ཀརཎཏྠོཏི ཨིདྷཱདྷིཔྤེཏོ. པཙྪཱནུཏཱཔསྶ ཨཀརཎཱུཔཱཡཾ དསྶེཏུཾ ‘‘པུབྦ…པེ… པཏིཊྛཔེཏབྦཱ’’ཏི ཝུཏྟཾ. ཏཏྠ ཨཙལཱཏི དལ༹ྷཱ ཀེནཙི ཨསཾཧཱིརཱ. པཏིཊྛཔེཏབྦཱཏི སུཔྤཏིཊྛིཏཱ ཀཱཏབྦཱ. ཏཐཱ པཏིཊྛཱཔནཱུཔཱཡམྤི དསྶེནྟོ ‘‘ཨེཝཉྷཱི’’ཏིཨཱདིམཱཧ. ཏཐཱ པཏིཊྛཱཔནེན ཧི ཡཐཱ ཏཾ དཱནཾ སམྤཏི ཡཐཱདྷིཔྤཱཡཾ ནིཔྤཛྫཏི, ཨེཝཾ ཨཱཡཏིམྤི ཝིཔུལཕལཏཱཡ མཧཔྥལཾ ཧོཏི ཝིཔྤཊིསཱརེན ཨནུཔཀྐིལིཊྛབྷཱཝཏོ. དྭཱིསུ ཋཱནེསཱུཏི ཡཛམཱནཡིཊྛཊྛཱནེསུ. ཝིཔྤཊིསཱརོ…པེ… ན ཀཏྟབྦོཏི ཨཏྠཾ སནྡྷཱཡ ‘‘ཨེསེཝ ནཡོ’’ཏི ཝུཏྟཾ. མུཉྩཙེཏནཱཏི པརིཙྩཱགཙེཏནཱ, ཏསྶཱ ནིཙྩལབྷཱཝོ ནཱམ མུཏྟཙཱགཏཱ པུབྦཱབྷིསངྑཱརཝསེན ཨུལཱ༹རབྷཱཝོ. པཙྪཱསམནུསྶརཎཙེཏནཱཏི པརཙེཏནཱ, ཏསྶཱ པན ནིཙྩལབྷཱཝོ ‘‘ཨཧོ མཡཱ དཱནཾ དིནྣཾ སཱདྷུ སུཊྛཱུ’’ཏི དཱནསྶ སཀྐཙྩཾ པཙྩཝེཀྑཎཝསེན ཝེདིཏབྦོ. ཏདུབྷཡཙེཏནཱནཾ ནིཙྩལཀརཎཱུཔཱཡཾ བྱཏིརེཀཏོ དསྶེཏུཾ ‘‘ཏཐཱ…པེ… ཧོཏཱི’’ཏི ཝུཏྟཾ. ཏཏྠ ཏཐཱ ཨཀརོནྟསྶཱཏི མུཉྩཙེཏནཾ, པཙྪཱསམནུསྶརཎཙེཏནཉྩ ནིཙྩལམཀརོནྟསྶ, ཝིཔྤཊིསཱརཾ, ཨུཔྤཱདེནྟསྶཱཏི ཝུཏྟཾ ཧོཏི. ‘‘ནཱཔི ཨུལཱ༹རེསུ བྷོགེསུ ཙིཏྟཾ ནམཏཱི’’ཏི ཨིདཾ པན པཙྪཱསམནུསྶརཎཙེཏནཱཡ ཨེཝ བྱཏིརེཀཏོ ནིཙྩལཀརཎཱུཔཱཡདསྶནཾ. ཨེཝཉྷི ཡཐཱནིདྡིཊྛནིདསྶནཾ ཨུཔཔནྣཾ ཧོཏི. ཏཏྠ ཨུལཱ༹རེསུ བྷོགེསཱུཏི ཁེཏྟཝིསེསེ པརིཙྩཱགསྶ ཀཏཏྟཱ ལདྡྷེསུཔི ཨུལཱ༹རེསུ བྷོགེསུ. ནཱཔི ཙིཏྟཾ ནམཏི པཙྪཱ ཝིཔྤཊིསཱརེན ཨུཔཀྐིལིཊྛབྷཱཝཏོ. ཡཐཱ ཀཐནྟི ཨཱཧ ‘‘མཧཱརོརུཝ’’ནྟིཨཱདི. ཏསྶ ཧི སེཊྛིསྶ གཧཔཏིནོ ཝཏྠུ ཀོསལསཾཡུཏྟེ, (སཾ. ནི. ༡.༡༣༡) མཡ྄ཧཀཛཱཏཀེ (ཛཱ. ཨཊྛ. ༣.༦.མཡ྄ཧཀཛཱཏཀཝཎྞནཱ) ཙ ཨཱགཏཾ. ཏཐཱ ཧི ཝུཏྟཾ –

‘‘བྷཱུཏཔུབྦཾ ¶ སོ མཧཱརཱཛ སེཊྛི གཧཔཏི ཏགརསིཁིཾ ནཱམ པཙྩེཀསམྦུདྡྷཾ པིཎྜཔཱཏེན པཊིཔཱདེསི, ‘དེཐ སམཎསྶ པིཎྜཔཱཏ’ནྟི ཝཏྭཱ ཨུཊྛཱཡཱསནཱ པཀྐཱམི, དཏྭཱ ཙ པན པཙྪཱ ཝིཔྤཊིསཱརཱི ཨཧོསི ‘‘ཝརམེཏཾ པིཎྜཔཱཏཾ དཱསཱ ཝཱ ཀམྨཀརཱ ཝཱ བྷུཉྫེཡྻུ’’’ནྟིཨཱདི.

སོ ཀིར ཨཉྙེསུཔི དིཝསེསུ ཏཾ པཙྩེཀབུདྡྷཾ པསྶཏི, དཱཏུཾ པནསྶ ཙིཏྟཾ ན ཨུཔྤཛྫཏི, ཏསྨིཾ པན དིཝསེ ཨཡཾ པདུམཝཏིཡཱ དེཝིཡཱ ཏཏིཡཔུཏྟོ ཏགརསིཁཱི པཙྩེཀབུདྡྷོ གནྡྷམཱདནཔབྦཏེ ཕལསམཱཔཏྟིསུཁེན ཝཱིཏིནཱམེཏྭཱ པུབྦཎྷསམཡེ ཝུཊྛཱཡ ཨནོཏཏྟདཧེ མུཁཾ དྷོཝིཏྭཱ མནོསིལཱཏལེ ནིཝཱསེཏྭཱ ཀཱཡབནྡྷནཾ བནྡྷིཏྭཱ པཏྟཙཱིཝརམཱདཱཡ ཨབྷིཉྙཱཔཱདཀཾ ཛྷཱནཾ སམཱཔཛྫིཏྭཱ ཨིདྡྷིཡཱ ཝེཧཱསཾ ཨབྦྷུགྒནྟྭཱ ནགརདྭཱརེ ཨོརུཡ྄ཧ ཙཱིཝརཾ པཱརུཔིཏྭཱ པཏྟམཱདཱཡ ནགརཝཱསཱིནཾ གྷརདྭཱརེསུ སཧསྶབྷཎྜིཀཾ ཋཔེནྟོ ཝིཡ པཱསཱདིཀེཧི ཨབྷིཀྐམནཱདཱིཧི ¶ ཨནུཔུབྦེན སེཊྛིནོ གྷརདྭཱརཾ སམྤཏྟོ, ཏཾ དིཝསཉྩ སེཊྛི པཱཏོཝ ཨུཊྛཱཡ པཎཱིཏཾ བྷོཛནཾ བྷུཉྫིཏྭཱ གྷརདྭཱརཀོཊྛཀེ ཨཱསནཾ པཉྙཔེཏྭཱ དནྟནྟརཱནི སོདྷེནྟོ ནིསིནྣོ ཧོཏི. སོ པཙྩེཀབུདྡྷཾ དིསྭཱ ཏཾ དིཝསཾ པཱཏོཝ བྷུཏྭཱ ནིསིནྣཏྟཱ དཱནཙིཏྟཾ ཨུཔྤཱདེཏྭཱ བྷརིཡཾ པཀྐོསཱཔེཏྭཱ ‘‘ཨིམསྶ སམཎསྶ པིཎྜཔཱཏཾ དེཧཱི’’ཏི ཝཏྭཱ རཱཛུཔཊྛཱནཏྠཾ པཀྐཱམི. སེཊྛིབྷརིཡཱ སམྤཛཉྙཛཱཏིཀཱ ཙིནྟེསི ‘‘མཡཱ ཨེཏྟཀེན ཀཱལེན ཨིམསྶ ‘དེཐཱ’ཏི ཝཙནཾ ན སུཏཔུབྦཾ, དཱཔེནྟོཔི ཙ ཨཛྫ ན ཡསྶ ཝཱ ཏསྶ ཝཱ དཱཔེཏི, ཝཱིཏརཱགདོསམོཧསྶ ཝནྟཀིལེསསྶ ཨོཧིཏབྷཱརསྶ པཙྩེཀབུདྡྷསྶ དཱཔེཏི, ཡཾ ཝཱ ཏཾ ཝཱ ཨདཏྭཱ པཎཱིཏཾ པིཎྜཔཱཏཾ དསྶཱམཱི’’ཏི གྷརཱ ནིཀྑམྨ པཙྩེཀབུདྡྷཾ པཉྩཔཏིཊྛིཏེན ཝནྡིཏྭཱ པཏྟཾ ཨཱདཱཡ ཨནྟོནིཝེསནེ པཉྙཏྟཱསནེ ནིསཱིདཱཔེཏྭཱ སུཔརིསུདྡྷེཧི སཱལིཏཎྜུལེཧི བྷཏྟཾ སམྤཱདེཏྭཱ ཏདནུརཱུཔཾ ཁཱདནཱིཡཾ, བྱཉྫནཾ, སཱུཔེཡྻཉྩ ཨབྷིསངྑརིཏྭཱ པཏྟཾ པཱུརེཏྭཱ བཧི གནྡྷེཧི ཨལངྐརིཏྭཱ པཙྩེཀབུདྡྷསྶ ཧཏྠེསུ པཏིཊྛཔེཏྭཱ ཝནྡི. པཙྩེཀབུདྡྷོ ‘‘ཨཉྙེསམྤི པཙྩེཀབུདྡྷཱནཾ སངྒཧཾ ཀརིསྶཱམཱི’’ཏི ཨཔརིབྷུཉྫིཏྭཱཝ ཨནུམོདནཾ ཝཏྭཱ པཀྐཱམི. སོཔི ཁོ སེཊྛི རཱཛུཔཊྛཱནཾ ཀཏྭཱ ཨཱགཙྪནྟོ པཙྩེཀབུདྡྷཾ དིསྭཱ ཨཱཧ ‘‘མཡཾ ཏུམྷཱཀཾ པིཎྜཔཱཏཾ དེཐཱ’’ཏི ཝཏྭཱ པཀྐནྟཱ, ཨཔི ཝོ ལདྡྷོ པིཎྜཔཱཏོ’’ཏི? ཨཱམ, སེཊྛི ལདྡྷོཏི. ‘‘པསྶཱམཱ’’ཏི གཱིཝཾ ཨུཀྑིཔིཏྭཱ ཨོལོཀེསི ¶ , ཨཐསྶ པིཎྜཔཱཏགནྡྷོ ཨུཊྛཧིཏྭཱ ནཱསཔུཊཾ པཧརི. སོ ཙིཏྟཾ སཾཡམེཏུཾ ཨསཀྐོནྟོ པཙྪཱ ཝིཔྤཊིསཱརཱི ཨཧོསི, ཏསྶ པན ཝིཔྤཊིསཱརསྶ ཨུཔྤནྣཱཀཱརོ ‘‘ཝརམེཏ’’ནྟིཨཱདིནཱ པཱལི༹ཡཾ ཝུཏྟོཡེཝ. པིཎྜཔཱཏདཱནེན པནེས སཏྟཀྑཏྟུཾ སུགཏིཾ སགྒཾ ལོཀཾ ཨུཔཔནྣོ, སཏྟཀྑཏྟུམེཝ ཙ སཱཝཏྠིཡཾ སེཊྛིཀུལེ ནིབྦཏྟོ, ཨཡཉྩསྶ སཏྟམོ བྷཝོ, པཙྪཱ ཝིཔྤཊིསཱརེན པན ནཱཔི ཨུལཱ༹རེསུ བྷོགེསུ ཙིཏྟཾ ནམཏི. ཝུཏྟཉྷེཏཾ སཾཡུཏྟཝརལཉྪཀེ –

‘‘ཡཾ ཁོ སོ མཧཱརཱཛ སེཊྛི གཧཔཏི དཏྭཱ པཙྪཱ ཝིཔྤཊིསཱརཱི ཨཧོསི ‘ཝརམེཏཾ པིཎྜཔཱཏཾ དཱསཱ ཝཱ ཀམྨཀརཱ ཝཱ བྷུཉྫེཡྻུ’ནྟི, ཏསྶ ཀམྨསྶ ཝིཔཱཀེན ནཱསྶུལཱ༹རཱཡ བྷཏྟབྷོགཱཡ ཙིཏྟཾ ནམཏི, ནཱསྶུལཱ༹རཱཡ ཝཏྠབྷོགཱཡ, ཡཱནབྷོགཱཡ, ནཱསྶུལཱ༹རཱནཾ པཉྩནྣཾ ཀཱམགུཎཱནཾ བྷོགཱཡ ཙིཏྟཾ ནམཏཱི’’ཏི (སཾ. ནི. ༡.༡༣༡).

མཡ྄ཧཀཛཱཏཀེཔི ཝུཏྟཾ –

‘‘ཨིཏི མཧཱརཱཛ ཨཱགནྟུཀསེཊྛི ཏགརསིཁིཔཙྩེཀབུདྡྷསྶ དིནྣཔཙྩཡེན བཧུཾ དྷནཾ ལབྷི ¶ , དཏྭཱ ཨཔརཙེཏནཾ པཎཱིཏཾ ཀཱཏུཾ ཨསམཏྠཏཱཡ པཎཱིཏེ བྷོགེ བྷུཉྫིཏུཾ ནཱསཀྑཱི’’ཏི (ཛཱ. ཨཊྛ. ༣.༦.མཡ྄ཧཀཛཱཏཀཝཎྞནཱ).

བྷཱཏུ པནེས ཨེཀཾ པུཏྟཾ (དྷ. པ. ཨཊྛ. ༢.༣༥༤) སཱཔཏེཡྻསྶ ཀཱརཎཱ ཛཱིཝིཏཾ ཝོརོཔེསི, ཏེན ཀམྨེན བཧཱུནི ཝསྶཱནི ནིརཡེ པཙྩིཏྠ, སཏྟཀྑཏྟུཉྩ ཨཔུཏྟཀོ ཛཱཏོ, ཨིདཱནིཔི ཏེནེཝ ཀམྨེན མཧཱརོརུཝཾ ཨུཔཔནྣོ. ཏེན ཝུཏྟཾ ‘‘མཧཱརོརུཝཾ ཨུཔཔནྣསྶ སེཊྛིགཧཔཏིནོ ཝིཡཱ’’ཏི, པུརིམཔཙྪིམཙེཏནཱཝསེན ཙེཏྠ ཨཏྠོ ཝེདིཏབྦོ. ཨེཀཱ ཧི ཙེཏནཱ དྭེ པཊིསནྡྷིཡོ ན དེཏཱིཏི.

དསཨཱཀཱརཝཎྞནཱ

༣༤༣. ཨཱཀརོཏི ཨཏྟནོ ཨནུརཱུཔཏཱཡ སམརིཡཱདཔརིཙྪེདཾ ཕལཾ ནིབྦཏྟེཏཱིཏི ཨཱཀཱརོ, ཀཱརཎནྟི ཨཱཧ ‘‘དསཧི ཀཱརཎེཧཱི’’ཏི. མརིཡཱདཏྠོ ཧེཏྠ ཨཱ-སདྡོ. ན དུསྶཱིལེསྭེཝ, ཨཐ ཁོ སཱིལཝནྟེསུཔི ཝིཔྤཊིསཱརཾ ཨུཔྤཱདེསྶཏི. ཏདུབྷཡེཔི ན ཨུཔྤཱདེཏབྦོཏི ཧི དསྶེཏུཾ ¶ ཨཔི-སདྡེན, པི-སདྡེན ཝཱ སམྤིཎྜནཾ ཀརོཏི. པཊིགྒཱཧཀཏོཝ ཨུཔྤཛྫཏཱིཏི བལཝཏརཾ ཝིཔྤཊིསཱརཾ སནྡྷཱཡ ཝུཏྟཾ, དུབྦལོ པན དེཡྻདྷམྨཏོ, པརིཝཱརཛནཏོཔི ཨུཔྤཛྫཏེཝ. ཨུཔྤཛྫིཏུཾ ཡུཏྟནྟི ཨུཔྤཛྫནཱརཧཾ. ཝིཔྤཊིསཱརམྤི ཝིནོདེསཱིཏི སམྦནྡྷོ. ཏེསཾཡེཝཱཏི པཱཎཱཏིཔཱཏཱིནམེཝ. ཡཛནཾ ནཱམེཏྠ དཱནམེཝཱདྷིཔྤེཏཾ, ན ཨགྒིཛུཧནནྟི ཨཱཧ ‘‘དེཏུ བྷཝ’’ནྟི. ཝིསྶཛྫཏཱུཏི མུཏྟཙཱགཝསེན ཙཛཏུ. ཨབྦྷནྟརནྟི ཨཛ྄ཛྷཏྟཾ སཀསནྟཱནེ.

སོལ༹སཱཀཱརཝཎྞནཱ

༣༤༤. ཨནུམཏིཔཀྑཱདཡོ ཨེཝ ཧེཊྛཱ ཡཉྙསྶ ཝཏྠུཾ ཀཏྭཱ ‘‘སོལ༹སཔརིཀྑཱརཱ’’ཏི ཝུཏྟཱ, ཨིདྷ པན སནྡསྶནཱདིཝསེན ཨནུམོདནཱཡ ཨཱརདྡྷཏྟཱ ཝུཏྟཾ ‘‘སོལ༹སཧི ཨཱཀཱརེཧཱི’’ཏི. དསྶེཏྭཱཏི ཨཏྟནོ དེསནཱནུབྷཱཝེན པཙྩཀྑམིཝ ཕལཾ དསྶེཏྭཱ, ཨནེཀཝཱརཾ པན དསྶནཏོ ‘‘དསྶེཏྭཱ དསྶེཏྭཱ’’ཏི བྱཱཔནཝཙནཾ, ཏདེཝ ཨཱབྷུསོ མེཌནཊྛེན ཨཱམེཌིཏཝཙནནྟི ཨཱཙརིཡེན (དཱི. ནི. ཊཱི. ༡.༣༤༤) ཝུཏྟཾ. ‘‘སམཱདཔེཏྭཱ སམཱདཔེཏྭཱ’’ཏིཨཱདཱིསུཔི ཨེསེཝ ནཡོ. ཏམཏྠནྟི དཱནཕལཝསེན ཀམྨཕལསམྦནྡྷམཏྠཾ. སམཱདཔེཏྭཱཏི སུཏམཏྟཾ ཨཀཏྭཱ ཡཐཱ རཱཛཱ ཏམཏྠཾ སམྨདེཝ ཨཱདིཡཏི ཙིཏྟེ ཀརོནྟོ སུགྒཧིཏཾ ཀཏྭཱ གཎྷཱཏི, ཏཐཱ སཀྐཙྩཾ ཨཱདཱཔེཏྭཱ.

‘‘ཝིཔྤཊིསཱརཝིནོདནེནཱ’’ཏི ¶ ཨིདཾ ནིདསྶནམཏྟཾ. ལོབྷདོསམོཧཨིསྶཱམཙྪརིཡམཱནཱདཡོཔི ཧི དཱནཙིཏྟསྶ ཨུཔཀྐིལེསཱ, ཏེསཾ ཝིནོདནེནཔི ཏཾ ཝོདཱཔིཏཾ སམུཏྟེཛིཏཾ ནཱམ ཧོཏི ཏིཀྑཝིསདབྷཱཝཱཔཏྟིཏོ, ཨཱསནྣཏརབྷཱཝཏོ པན ཝིཔྤཊིསཱརཝིནོདནམེཝ གཧིཏཾ. པཝཏྟིཏེ ཧི དཱནེ ཏསྶ སམྦྷཝོཏི. ཡཱཐཱཝཏོ ཝིཛྫམཱནེཧི གུཎེཧི ཧཊྛཔཧཊྛབྷཱཝཱཔཱདནཾ སམྤཧཾསནནྟི ཨཱཧ ‘‘སུནྡར’’ནྟིཨཱདི. དྷམྨཏོཏི སཙྩཏོ. ཏདཏྠམེཝ དསྶེཏུཾ ‘‘དྷམྨེན སམེན ཀཱརཎེནཱ’’ཏི ཝུཏྟཾ. སཙྩཉྷི དྷམྨཏོ ཨནཔེཏཏྟཱ དྷམྨཾ, ཨུཔསམཙརིཡབྷཱཝཏོ སམཾ, ཡུཏྟབྷཱཝེན ཀཱརཎནྟི ཙ ཝུཙྩཏི.

༣༤༥. ཏསྨིཾ ཡཉྙེ རུཀྑཏིཎཙྪེདོཔི ནཱམ ནཱཧོསི, ཀུཏོ པཱཎཝདྷོཏི པཱཎཝདྷཱབྷཱཝསྶེཝ དལ༹ྷཱིཀརཎཏྠཾ, སབྦསོ ཝིཔརཱིཏགྒཱཧེཧི ཨཝིདཱུསིཏཏཱདསྶནཏྠཉྩ པཱལི༹ཡཾ ‘‘ནེཝ གཱཝོ ཧཉྙིཾསཱུ’’ཏིཨཱདཱིནི ཝཏྭཱཔི ¶ ‘‘ན རུཀྑཱ ཚིཛྫིཾསཱུ’’ཏིཨཱདི ཝུཏྟནྟི དསྶེནྟོ ‘‘ཡེ ཡཱུཔནཱམཀེ’’ཏིཨཱདིམཱཧ. བརིཧིསཏྠཱཡཱཏི པརིཙྪེདཏྠཱཡ. ཝནམཱལཱསངྑེཔེནཱཏི ཝནཔུཔྥེཧི གནྡྷིཏམཱལཱནིཡཱམེན. ཨེཝཾ ཨཱཙརིཡེན (དཱི. ནི. ཊཱི. ༡.༣༤༥) ཝུཏྟཾ, ཝནཔནྟིཨཱཀཱརེནཱཏི ཨཏྠོ. བྷཱུམིཡཾ ཝཱ པཏྠརནྟཱིཏི ཝེདིབྷཱུམིཾ པརིཀྑིཔནྟཱ ཏཏྠ ཏཏྠ པཏྠརནྟི. མནྟཱདིནཱ ཧི པརིསངྑཏཱ བྷཱུམི ཝིནྡཏི ཨསྶ ལཱབྷསཀྐཱརེཏི ཀཏྭཱ ‘‘ཝེདཱི’’ཏི ཝུཙྩཏི. ཏེཔི རུཀྑཱ ཏེཔི དབྦཱཏི སམྦནྡྷོ, ཀམྨཀཏྟཱ ཙེཏཾ དྭཡཾ, ཨབྷིཧིཏཀམྨཾ ཝཱ. ཝཏྟིཙྪཱཡ ཧི ཡཐཱསཏྟིཾ ཀཱརཀཱ བྷཝནྟི. ཝུཏྟནཡེན པཱཎཝདྷཱབྷཱཝསྶ དལ༹ྷཱིཀརཎཏྠཾ, ཝིཔརཱིཏགྒཱཧེན ཨཝིདཱུསིཏབྷཱཝདསྶནཏྠཉྩེཏནྟི དསྶེཏི ཀིཾ པནཱ’’ཏིཨཱདིནཱ. ཨནྟོགེཧདཱསོ ཨནྟོཛཱཏོ. ཨཱདིསདྡེན དྷནཀྐཱིཏཀརམརཱནཱིཏསཱམཾདཱསབྱཱུཔགཏཱནཾ སངྒཧོ. པུབྦམེཝཱཏི བྷཏིཀརཎཏོ པགེཝ. དྷནཾ གཧེཏྭཱཏི དིཝསེ དིཝསེ ཡཐཱཀམྨཾ གཧེཏྭཱ. བྷཏྟཝེཏནནྟི དེཝསིཀཾ བྷཏྟཉྩེཝ མཱསིཀཱདིཔརིབྦཡཉྩ. ཝུཏྟོཝཱཡམཏྠོ. ཏཛྫིཏཱཏི སནྟཛྫིཏཱ. པརིཀམྨཱནཱིཏི སབྦབྷཱགིཡཱནི ཀམྨཱནི, ཨུཙྩཱཝཙཱནི ཀམྨཱནཱིཏི ཨཏྠོ. པིཡསམུདཱཙཱརེནེཝཱཏི ཨིཊྛཝཙནེནེཝ. ཡཐཱནཱམཝསེནེཝཱཏི པཱཀཊནཱམཱནུརཱུཔེནེཝ. སཔྤིཏེལནཝནཱིཏདདྷིམདྷུཕཱཎིཏེན ཙེཝཱཏི ཨེཏྠ ཙ-སདྡོ ཨཝུཏྟསམུཙྩཡཏྠོ, ཏེན པཎཱིཏཔཎཱིཏཱནཾ ནཱནཔྤཀཱརཱནཾ ཁཱདནཱིཡབྷོཛནཱིཡཱདཱིནཉྩེཝ ཝཏྠཡཱནམཱལཱགནྡྷཝིལེཔནསེཡྻཱཝསཐཱདཱིནཉྩ སངྒཧོ དཊྛབྦོ, ཏེནཱཧ ‘‘པཎཱིཏེཧི སཔྤིཏེལཱདིསམྨིསྶེཧེཝཱ’’ཏིཨཱདི. ཏསྶ ཏསྶ ཀཱལསྶ ཨནུརཱུཔེཧི ཡཱགུ…པེ… པཱནཀཱདཱིཧཱིཏི སམྦནྡྷོ. སཔྤིཨཱདཱིནནྟི སཔྤིཨཱདཱིཧི.

༣༤༦. པཊིསཱམེཏབྦཏོ, ཨཏྟནོ ཨཏྟནོ སནྟཀབྷཱཝཏོ ཙ སཾ ནཱམ དྷནཾ ཝུཙྩཏི, ཏསྶ པཏཱིཏི སཔཏི ནིགྒཧིཏལོཔེན, དྷནཝཱ, དིཊྛདྷམྨིཀསམྤརཱཡིཀཧིཏཱཝཧཏྟཱ ཏསྶ ཧིཏནྟི སཱཔཏེཡྻཾ ¶ , ཏདེཝ དྷནཾ. ཏེནཱཧ ‘‘པཧཱུཏཾ དྷན’’ནྟི. ཨཀྑཡདྷམྨམེཝཱཏི ཨཁཡསབྷཱཝམེཝ. གཱམབྷཱགེནཱཏི སཾཀིཏྟནཝསེན གཱམེ ཝཱ གཧེཏབྦབྷཱགེན, ཨེཝཾ ཨཱཙརིཡེན (དཱི. ནི. ཊཱི. ༡.༣༤༦) ཝུཏྟཾ, པཙྩེཀཾ སབྷཱགགཱམཀོཊྛཱསེནཱཏིཔི ཨཏྠོ. སེསེསུཔི ཨེསེཝ ནཡོ.

༣༤༧. ཡཉྙཱཝཱཊོཏི ¶ ཁཎིཏཱཝཱཊསྶ ཨསྶམེདྷཱདིཡཉྙཡཛནཊྛཱནསྶེཏཾ ཨདྷིཝཙནཾ, ཏབྦོཧཱརེན པན ཨིདྷ དཱནསཱལཱཡ ཨེཝ, ཏཱཡ ཙ པུརཏྠིམནགརདྭཱརེ ཀཏཱཡ པུརཏྠིམབྷཱགེ ཨེཝཱཏི ཨཏྠཾ དསྶེཏི ‘‘པུརཏྠིམཏོ ནགརདྭཱརེ’’ཏིཨཱདིནཱ. ཏཾ པན ཋཱནཾ རཉྙོ དཱནསཱལཱཡ ནཱཏིདཱུརེ ཨེཝཱཏི ཨཱཧ ‘‘ཡཐཱ’’ཏིཨཱདི. ཡཏོ ཏཏྠ པཱཏརཱསཾ བྷུཉྫིཏྭཱ ཨཀིལནྟརཱུཔཱཡེཝ སཱཡནྷེ རཉྙོ དཱནསཱལཾ སམྤཱཔུཎནྟི. ‘‘དཀྑིཎེན ཡཉྙཱཝཱཊསྶཱ’’ཏིཨཱདཱིསུཔི ཨེསེཝ ནཡོ. ཡཱགུཾ པིཝིཏྭཱཏི ཧི ཡཱགུསཱིསེན པཱཏརཱསབྷོཛནམཱཧ.

༣༤༨. མདྷུརནྟི སཱདུརསཾ. ཨུཔརི ཝཏྟབྦམཏྠནྟི ‘‘ཨཔིཙ མེ བྷོ ཨེཝཾ ཧོཏཱི’’ཏིཨཱདིནཱ ཝུཙྩམཱནམཏྠཾ. པརིཧཱརེནཱཏི བྷགཝནྟཾ གརུཾ ཀཏྭཱ ཨགཱརཝཔརིཧཱརེན, ཨུཛུཀབྷཱཝཱཔནཡནེན ཝཱ, ཨུཛུཀཝུཏྟིཾ པརིཧརིཏྭཱ ཝངྐཝུཏྟིཡཱཝ ཡཐཱཙིནྟིཏམཏྠཾ པུཙྪནྟོ ཨེཝམཱཧཱཏི ཝུཏྟཾ ཧོཏི. ཏེནཱཧ ‘‘ཨུཛུཀམེཝ པུཙྪཡམཱནོ ཨགཱརཝོ ཝིཡ ཧོཏཱི’’ཏི.

ནིཙྩདཱནཨནུཀུལཡཉྙཝཎྞནཱ

༣༤༩. ཨུཊྛཱཡཱཏི དཱནེ ཨུཊྛཱནཝཱིརིཡམཱཧ, སམུཊྛཱཡཱཏི ཏསྶ སཱཏཙྩཀིརིཡཾ. ཀསིཝཱཎིཛྫཱདིཀམྨཱནི ཨཀརོནྟོ དལིདྡིཡཱདིཨནཏྠཱཔཏྟིཡཱ ནསྶིསྶཏཱིཏི ཨདྷིཔྤཱཡོ. ཨཔྤསམྦྷཱརཏརོ ཙེཝ མཧཔྥལཏརོ ཙཱཏི སངྑེཔཏོ ཨཊྛཀཐཱཡཾ ཝུཏྟོ པཱལི༹ཡཾ པན ‘‘ཨཔྤཏྠཏརོ ཙ ཨཔྤསམཱརམྦྷཏརོ ཙ མཧཔྥལཏརོ ཙ མཧཱནིསཾསཏརོ ཙཱ’’ཏི པཱཋོ. ཏཏྠ ཨཔྤསམྦྷཱརཏརོཏི ཨཏིཝིཡ པརིཏྟསམྦྷཱརོ, ཨསམཱརབྦྷིཡསམྦྷཱརོ. ཨཔྤཏྠཏརོཏི པན ཨཏིཝིཡ ཨཔྤཀིཙྩོ, ཨཏྠོ ཙེཏྠ ཀིཙྩཾ, ཏྠ-ཀཱརསྶ ཊྛ-ཀཱརཾ ཀཏྭཱ ‘‘ཨཔྤཊྛཏརོ’’ཏིཔི པཱཋོ. སམྨཱ ཨཱརབྷཱིཡཏི ཡཉྙོ ཨེཏེནཱཏི སམཱརམྦྷོ, སམྦྷཱརསམྦྷརཎཝསེན པཝཏྟསཏྟཔཱིལཱ༹, ཨཔྤོ སམཱརམྦྷོ ཨེཏསྶཱཏི ཏཐཱ, ཨཡཾ པནཱཏིསཡེནཱཏི ཨཔྤསམཱརམྦྷཏརོ. ཝིཔཱཀསཉྙིཏཾ མཧནྟཾ སདིསཾ ཕལམེཏསྶཱཏི མཧཔྥལོ, ཨཡཾ པནཱཏིསཡེནཱཏི མཧཔྥལཏརོ. ཨུདཡསཉྙིཏཾ མཧནྟཾ ནིསྶནྡཱདིཕལམེཏསྶཱཏི མཧཱནིསཾསོ, ཨཡཾ པནཱཏིསཡེནཱཏི མཧཱནིསཾསཏརོ. དྷུཝདཱནཱནཱིཏི དྷུཝཱནི ཐིརཱནི ཨཝིཙྪིནྣཱནི ཀཏྭཱ དཱཏབྦདཱནཱནི. ནིཙྩབྷཏྟཱནཱིཏི ཨེཏྠ བྷཏྟསཱིསེན ཙཏུཔཙྩཡགྒཧཎཾ. ཨནུཀུལཡཉྙཱནཱིཏི ཨནུཀུལཾ ཀུལཱནུཀྐམཾ ཨུཔཱདཱཡ དཱཏབྦདཱནཱནི ¶ . ཏེནཱཧ ¶ ‘‘ཨམྷཱཀ’’ནྟིཨཱདི. ཡཱནི པཝཏྟེཏབྦཱནི, ཏཱནི ཨནུཀུལཡཉྙཱནི ནཱམཱཏི ཡོཛེཏབྦཾ. ནིབདྡྷདཱནཱནཱིཏི ནིབནྡྷེཏྭཱ ནིཡམེཏྭཱ པཝེཎཱིཝསེན པཝཏྟིཏདཱནཱནི.

ཧཏྠིདནྟེན ཀཏཱ དནྟམཡསལཱཀཱ, ཡཏྠ དཱཡཀཱནཾ ནཱམཾ ཨངྐནྟི, ཨིམིནཱ ཏཾ ནིཙྩབྷཏྟཾ སལཱཀདཱནཝསེནཱཏི དསྶེཏི. ཏཾ ཀུལནྟི ཨནཱཐཔིཎྜིཀཀུལཾ. དཱལིདྡིཡེནཱཏི དལིདྡབྷཱཝེན. ‘‘ཨེཀསལཱཀཏོ ཨུདྡྷཾ དཱཏུཾ ནཱསཀྑཱི’’ཏི ཨིམིནཱ ཨེཀེནཔི སལཱཀདཱནེན ནིབདྡྷདཱནཾ ཨུཔཙྪིནྡིཏུམདཏྭཱ ཨནུརཀྑཎམཱཧ. རཉྙོཏི སེཏཝཱཧནརཉྙོ.

ཨཱདཱིནི ཝཏྭཱཏི ཨེཏྠ ཨཱདིསདྡེན ‘‘ཀསྨཱ སེནོ ཝིཡ མཾསཔེསིཾ པཀྑནྡིཏྭཱ གཎྷཱསཱི’’ཏི ཨེཝམཱདཱིནཾ སམསམདཱནེ ཨུསྶུཀྐནཝཙནཱནཾ སངྒཧོ. གལགྒཱཧཱཏི གལགྒཧཎཱ. ‘‘ཀམྨཙྪེདཝསེནཱ’’ཏི ཨིམིནཱ ཨཏྟནོ ཨཏྟནོ ཀམྨོཀཱསཱདཱནམྤི པཱིལཱ༹ཡེཝཱཏི དསྶེཏི. སམཱརམྦྷསདྡོ ཙེཏྠ པཱིལ༹ནཏྠོཏི ཨཱཧ ‘‘པཱིལཱ༹སངྑཱཏོ སམཱརམྦྷོ’’ཏི. པུབྦཙེཏནཱམུཉྩཙེཏནཱཨཔརཙེཏནཱསམྤཏྟིཡཱ དཱཡཀཝསེན ཏཱིཎི ཨངྒཱནི, ཝཱིཏརཱགཏཱཝཱིཏདོསཏཱཝཱིཏམོཧཏཱཔཊིཔཏྟིཡཱ དཀྑིཎེཡྻཝསེན ཙ ཏཱིཎཱིཏི ཨེཝཾ ཚལ༹ངྒསམནྣཱགཏཱ ཧོཏི དཀྑིཎཱ, ཚལ༹ངྒུཏྟརེ ནནྡམཱཏཱསུཏྟཉྩ (ཨ. ནི. ༦.༣༧) ཏསྶཏྠསྶ སཱདྷཀཾ. ཨཔརཱཔརཾ ཨུཔྤཛྫནཀཙེཏནཱཝསེན མཧཱནདཱི ཝིཡ, མཧོགྷོ ཝིཡ ཙ ཨིཏོ ཙིཏོ ཙ ཨབྷིསནྡིཏྭཱ པཀྑནྡིཏྭཱ པཝཏྟིཏོ པུཉྙམེཝ པུཉྙཱབྷིསནྡོ. ཏཐཱཝིདྷནྟི པམཱཎསྶ ཀཱཏུཾ ཨསུཀརཏྟམཱཧ. ཀཱརཎམཧཏྟེན ཕལམཧཏྟམྤི ཝེདིཏབྦཾ ཨུཔརི ནཛྫཱ ཝུཊྛིཡཱ མཧོགྷོ ཝིཡཱཏི ཝུཏྟཾ ‘‘ཏསྨཱ’’ཏིཨཱདི.

༣༥༠. ནཝནཝོཏི སབྦདཱ ཨབྷིནཝོ, དིཝསེ དིཝསེ དཱཡཀསྶ བྱཱཔཱརཱཔཛྫནཏོ ཀིཙྩཔརིཡོསཱནཾ ནཏྠཱིཏི ཝུཏྟཾ ‘‘ཨེཀེནཱ’’ཏིཨཱདི. ཡཐཱརདྡྷསྶ ཨཱཝཱསསྶ ཀཏིཔཡེནཱཔི ཀཱལེན པརིསམཱཔེཏབྦཏོ ཀིཙྩཔརིཡོསཱནཾ ཨཏྠཱིཏི ཨཱཧ ‘‘པཎྞསཱལ’’ནྟིཨཱདི. མཧཱཝིཧཱརེཔི ཀིཙྩཔརིཡོསཱནསྶ ཨཏྠིཏཱཨུཔཱཡཾ དསྶེཏུཾ ‘‘ཨེཀཝཱརཾ དྷནཔརིཙྩཱགཾ ཀཏྭཱ’’ཏི ཝུཏྟཾ. སུཏྟནྟཔརིཡཱཡེནཱཏི སབྦཱསཝསུཏྟནྟཱདིཔཱལི༹ནཡེན. ནཝཱནིསཾསཱཏི སཱིཏཔཊིགྷཱཏཱདཡོ པཊིསལླཱནཱརཱམཔརིཡོསཱནཱ ཡཐཱཔཙྩཝེཀྑཎཾ གཎིཏཱ ནཝ ཨུདཡཱ, ཨཔྤམཏྟཏཱཡ ཙེཏེ ཝུཏྟཱ.

ཡསྨཱ ¶ པན ཨཱཝཱསཾ དེནྟེན ནཱམ སབྦམྤི པཙྩཡཛཱཏཾ དིནྣམེཝ ཧོཏི. ཡཐཱཧ སཾཡུཏྟཱགམཝརལཉྪཀེ ‘‘སོ ཙ སབྦདདོ ཧོཏི ཡོ དདཱཏི ཨུཔསྶཡ’’ནྟི (སཾ. ནི. ༡.༤༢), སདཱ པུཉྙཔཝཌྜྷནཱུཔཱཡཉྩ ཨེཏཾ. ཝུཏྟཉྷི ཏཏྠེཝ ‘‘ཡེ དདནྟི ཨུཔསྶཡཾ, ཏེསཾ དིཝཱ ¶ ཙ རཏྟོ ཙ, སདཱ པུཉྙཾ པཝཌྜྷཏཱི’’ཏི (སཾ. ནི. ༡.༤༧) ཏཐཱ ཧི དྭེ ཏཡོ གཱམེ པིཎྜཱཡ ཙརིཏྭཱ ཀིཉྩི ཨལདྡྷཱ ཨཱགཏསྶཱཔི ཚཱཡཱུདཀསམྤནྣཾ ཨཱརཱམཾ པཝིསིཏྭཱ ནཧཱཡིཏྭཱ པཏིསྶཡེ མུཧུཏྟཾ ནིཔཛྫིཏྭཱ ཨུཊྛཱཡ ནིསིནྣསྶ ཀཱཡེ བལཾ ཨཱཧརིཏྭཱ པཀྑིཏྟཾ ཝིཡ ཧོཏི. བཧི ཝིཙརནྟསྶ ཙ ཀཱཡེ ཝཎྞདྷཱཏུ ཝཱཏཱཏཔེཧི ཀིལམཏི, པཏིསྶཡཾ པཝིསིཏྭཱ དྭཱརཾ པིདྷཱཡ མུཧུཏྟཾ ནིཔནྣསྶ ཝིསབྷཱགསནྟཏི ཝཱུཔསམྨཏི, སབྷཱགསནྟཏི པཏིཊྛཱཏི, ཝཎྞདྷཱཏུ ཨཱཧརིཏྭཱ པཀྑིཏྟཱ ཝིཡ ཧོཏི. བཧི ཝིཙརནྟསྶ ཙ པཱདེ ཀཎྚཀོ ཝིཛ྄ཛྷཏི, ཁཱཎུ པཧརཏི, སརཱིསཔཱདིཔརིསྶཡཱ ཙེཝ ཙོརབྷཡཉྩ ཨུཔྤཛྫཏི, པཏིསྶཡཾ པཝིསིཏྭཱ དྭཱརཾ པིདྷཱཡ ནིཔནྣསྶ སབྦེ ཏེ པརིསྶཡཱ ན ཧོནྟི, སཛ྄ཛྷཱཡནྟསྶ དྷམྨཔཱིཏིསུཁཾ, ཀམྨཊྛཱནཾ མནསི ཀརོནྟསྶ ཨུཔསམསུཁཉྩ ཨུཔྤཛྫཏི བཧིདྡྷཱ ཝིཀྑེཔཱབྷཱཝཏོ. བཧི ཝིཙརནྟསྶ ཙ ཀཱཡེ སེདཱ མུཙྩནྟི ཨཀྑཱིནི ཕནྡནྟི, སེནཱསནཾ པཝིསནཀྑཎེ མཉྩཔཱིཋཱདཱིནི ན པཉྙཱཡནྟི, མུཧུཏྟཾ ནིཔནྣསྶ པན ཨཀྑིཔསཱདོ ཨཱཧརིཏྭཱ པཀྑིཏྟོ ཝིཡ ཧོཏི, དྭཱརཝཱཏཔཱནམཉྩཔཱིཋཱདཱིནི པཉྙཱཡནྟི. ཨེཏསྨིཉྩ ཨཱཝཱསེ ཝསནྟཾ དིསྭཱ མནུསྶཱ ཙཏཱུཧི པཙྩཡེཧི སཀྐཙྩཾ ཨུཔཊྛཧནྟི. ཏེན ཝུཏྟཾ ‘‘ཨཱཝཱསཾ དེནྟེན…པེ… ཧོཏཱི’’ཏི ‘‘སདཱ པུཉྙཔཝཌྜྷནཱུཔཱཡཉྩ ཨེཏ’’ནྟི ཙ, ཏསྨཱ ཨེཏེ ཡཐཱཝུཏྟཱ སབྦེཔི ཨཱནིསཾསཱ ཝེདིཏབྦཱ.

ཁནྡྷཀཔརིཡཱཡེནཱཏི སེནཱསནཀྑནྡྷཀེ (ཙཱུལ༹ཝ. ༢༩༤) ཨཱགཏཝིནཡཔཱལི༹ནཡེན. ཏཏྠ ཧི ཨཱགཏཱ –

‘‘སཱིཏཾ ཨུཎྷཾ པཊིཧནྟི, ཏཏོ ཝཱལ༹མིགཱནི ཙ;

སརཱིསཔེ ཙ མཀསེ, སིསིརེ ཙཱཔི ཝུཊྛིཡོ.

ཏཏོ ཝཱཏཱཏཔོ གྷོརོ, སཉྫཱཏོ པཊིཧཉྙཏི;

ལེཎཏྠཉྩ སུཁཏྠཉྩ, ཛྷཱཡིཏུཉྩ ཝིཔསྶིཏུཾ.

ཝིཧཱརདཱནཾ སངྒྷསྶ, ཨགྒཾ བུདྡྷེན ཝཎྞིཏཾ;

ཏསྨཱ ཧི པཎྜིཏོ པོསོ, སམྤསྶཾ ཨཏྠམཏྟནོ.

ཝིཧཱརེ ¶ ཀཱརཡེ རམྨེ, ཝཱསཡེཏྠ བཧུསྶུཏེ;

ཏེསཾ ཨནྣཉྩ པཱནཉྩ, ཝཏྠསེནཱསནཱནི ཙ.

དདེཡྻ ¶ ཨུཛུབྷཱུཏེསུ, ཝིཔྤསནྣེན ཙེཏསཱ;

ཏེ ཏསྶ དྷམྨཾ དེསེནྟི, སབྦདུཀྑཔནཱུདནཾ;

ཡཾ སོ དྷམྨཾ ཨིདྷཉྙཱཡ, པརིནིབྦཱཏི ཨནཱསཝོ’’ཏི. –

རཱཛགཧསེཊྛཱདཱིནཾ ཝིཧཱརདཱནེན ཨནུམོདནཱགཱཐཱཡོ པེཡྻཱལཝསེན དསྶིཏཱ. ཏཏྠ སཱིཏཾ ཨུཎྷནྟི ཨུཏུཝིསབྷཱགཝསེན ཝུཏྟཾ. སིསིརེ ཙཱཔི ཝུཊྛིཡོཏི ཨེཏྠ སིསིརོཏི སམྥུསིཏཀཝཱཏོ ཝུཙྩཏི. ཝུཊྛིཡོཏི ཨུཛུཀམེགྷཝུཊྛིཡོ ཨེཝ. ཨེཏཱནི སབྦཱནི ‘‘པཊིཧནྟཱི’’ཏི ཨིམིནཱཝ པདེན ཡོཛེཏབྦཱནི.

པཊིཧཉྙཏཱིཏི ཝིཧཱརེན པཊིཧཉྙཏི. ལེཎཏྠནྟི ནིལཱིཡནཏྠཾ. སུཁཏྠནྟི སཱིཏཱདིཔརིསྶཡཱབྷཱཝེན སུཁཝིཧཱརཏྠཾ. ‘‘ཛྷཱཡིཏུཉྩ ཝིཔསྶིཏུ’’ནྟི ཨིདམྤི པདདྭཡཾ ‘‘སུཁཏྠཉྩཱ’’ཏི ཨིམིནཱཝ པདེན ཡོཛེཏབྦཾ. ཨིདཉྷི ཝུཏྟཾ ཧོཏི – སུཁཏྠཉྩ ཝིཧཱརདཱནཾ, ཀཏམསུཁཏྠཾ? ཛྷཱཡིཏུཾ, ཝིཔསྶིཏུཉྩ ཡཾ སུཁཾ ཏདཏྠཾ. ཨཐ ཝཱ པརཔདེནཔི ཡོཛེཏབྦཾ – ཛྷཱཡིཏུཉྩ ཝིཔསྶིཏུཉྩ ཝིཧཱརདཱནཾ, ‘‘ཨིདྷ ཛྷཱཡིསྶཏི ཝིཔསྶིསྶཏཱི’’ཏི དདཏོ ཝིཧཱརདཱནཾ སངྒྷསྶ ཨགྒཾ བུདྡྷེན ཝཎྞིཏཾ. ཝུཏྟཉྷེཏཾ ‘‘སོ ཙ སབྦདདོ ཧོཏི, ཡོ དདཱཏི ཨུཔསྶཡ’’ནྟི (སཾ. ནི. ༡.༤༢).

ཡསྨཱ ཙ ཨགྒཾ ཝཎྞིཏཾ, ཏསྨཱ ཧི པཎྜིཏོ པོསོཏི གཱཐཱ. ཝཱསཡེཏྠ བཧུསྶུཏེཏི ཨེཏྠ ཝིཧཱརེ པརིཡཏྟིབཧུསྶུཏེ ཙ པཊིཝེདྷབཧུསྶུཏེ ཙ ཝཱསེཡྻ. ཏེསཾ ཨནྣཉྩཱཏི ཡཾ ཏེསཾ ཨནུཙྪཝིཀཾ ཨནྣཉྩ པཱནཉྩ ཝཏྠཱནི ཙ མཉྩཔཱིཋཱདིསེནཱསནཱནི ཙ, ཏཾ སབྦཾ ཏེསུ ཨུཛུབྷཱུཏེསུ ཨཀུཊིལཙིཏྟེསུ. དདེཡྻཱཏི ནིདཧེཡྻ. ཏཉྩ ཁོ ཝིཔྤསནྣེན ཙེཏསཱ, ན ཙིཏྟཔྤསཱདཾ ཝིརཱདྷེཏྭཱ. ཨེཝཾ ཝིཔྤསནྣཙིཏྟསྶ ཧི ཏེ ཏསྶ དྷམྨཾ དེསེནྟི…པེ… པརིནིབྦཱཏི ཨནཱསཝོཏི ཨཡམེཏྠ ཨཊྛཀཐཱནཡོ.

ཨཡཾ པན ཨཱཙརིཡདྷམྨཔཱལཏྠེརེན (དཱི. ནི. ཊཱི. ༡.༣༥༠) ཙེཝ ཨཱཙརིཡསཱརིཔུཏྟཏྠེརེན (སཱརཏྠ. ཊཱི. ༣.༢༩༥) ཙ སཾཝཎྞིཏོ ཊཱིཀཱནཡོ – སཱིཏནྟི ཨཛ྄ཛྷཏྟཾ དྷཱཏུཀྑོབྷཝསེན ཝཱ བཧིདྡྷཱ ¶ ཨུཏུཝིཔརིཎཱམཝསེན ཝཱ ཨུཔྤཛྫནཀསཱིཏཾ. ཨུཎྷནྟི ཨགྒིསནྟཱཔཾ, ཏསྶ ཝནཌཱཧཱདཱིསུ སམྦྷཝོ དཊྛབྦོ. པཊིཧནྟཱིཏི པཊིབཱདྷཏི ཡཐཱ ཏདུབྷཡཝསེན ཀཱཡཙིཏྟཱནཾ བཱདྷནཾ ན ཧོཏི, ཨེཝཾ ཀརོཏི. སཱིཏུཎྷབྦྷཱཧཏེ ཧི སརཱིརེ ཝིཀྑིཏྟཙིཏྟོ བྷིཀྑུ ཡོནིསོ པདཧིཏུཾ ན སཀྐོཏི, ཝཱལ༹མིགཱནཱིཏི སཱིཧབྱགྒྷཱདིཙཎྜམིགེ ¶ . གུཏྟསེནཱསནཉྷི ཨཱརཉྙཀམྤི པཝིསིཏྭཱ དྭཱརཾ པིདྷཱཡ ནིསིནྣསྶ ཏེ པརིསྶཡཱ ན ཧོནྟི. སརཱིསཔེཏི ཡེ ཀེཙི སརནྟེ གཙྪནྟེ དཱིགྷཛཱཏིཀེ སཔྤཱདིཀེ. མཀསེཏི ནིདསྶནམཏྟམེཏཾ, ཊཾསཱདཱིནམྤི ཨེཏེནེཝ སངྒཧོ དཊྛབྦོ. སིསིརེཏི སིསིརཀཱལཝསེན, སཏྟཱཧཝདྡལིཀཱདིཝསེན ཙ ཨུཔྤནྣེ སིསིརསམྥསྶེ. ཝུཊྛིཡོཏི ཡདཱ ཏདཱ ཨུཔྤནྣཱ ཝསྶཝུཊྛིཡོ པཊིཧནྟཱིཏི ཡོཛནཱ.

ཝཱཏཱཏཔོ གྷོརོཏི རུཀྑགཙྪཱདཱིནཾ ཨུམྨཱུལབྷཉྫནཱདིཝསེན པཝཏྟིཡཱ གྷོརོ སརཛཨརཛཱདིབྷེདོ ཝཱཏོ ཙེཝ གིམྷཔརིལཱ༹ཧསམཡེསུ ཨུཔྤཏྟིཡཱ གྷོརོ སཱུརིཡཱཏཔོ ཙ པཊིཧཉྙཏི པཊིབཱཧཱིཡཏི. ལེཎཏྠནྟི ནཱནཱརམྨཎཏོ ཙིཏྟཾ ནིཝཏྟེཏྭཱ པཊིསལླཱནཱརཱམཏྠཾ. སུཁཏྠནྟི ཝུཏྟཔརིསྶཡཱབྷཱཝེན ཕཱསུཝིཧཱརཏྠཾ. ཛྷཱཡིཏུནྟི ཨཊྛཏིཾསཱཡ ཨཱརམྨཎེསུ ཡཏྠ ཀཏྠཙི ཙིཏྟཾ ཨུཔནིབནྡྷིཏྭཱ ཨུཔནིཛ྄ཛྷཱཡིཏུཾ. ཝིཔསྶིཏུནྟི ཨནིཙྩཱདིཏོ སངྑཱརེ སམྨསིཏུཾ.

ཝིཧཱརེཏི པཏིསྶཡེ. ཀཱརཡེཏི ཀཱརཱཔེཡྻ. རམྨེཏི མནོརམེ ནིཝཱསསུཁེ. ཝཱསཡེཏྠ བཧུསྶུཏེཏི ཀཱརེཏྭཱ པན ཨེཏྠ ཝིཧཱརེ བཧུསྶུཏེ སཱིལཝནྟེ ཀལྱཱཎདྷམྨེ ནིཝཱསེཡྻ, ཏེ ནིཝཱསེནྟོ པན ཏེསཾ བཧུསྶུཏཱནཾ ཡཐཱ པཙྩཡེཧི ཀིལམཐོ ན ཧོཏི, ཨེཝཾ ཨནྣཉྩ པཱནཉྩ ཝཏྠསེནཱསནཱནི ཙ དདེཡྻ ཨུཛུབྷཱུཏེསུ ཨཛ྄ཛྷཱསཡསམྤནྣེསུ ཀམྨཀམྨཕལཱནཾ, རཏནཏྟཡགུཎཱནཉྩ སདྡཧནེན ཝིཔྤསནྣེན ཙེཏསཱ.

ཨིདཱནི གཧཊྛཔབྦཛིཏཱནཾ ཨཉྙམཉྙཱུཔཀཱརིཏཾ དསྶེཏུཾ ‘‘ཏེ ཏསྶཱ’’ཏི གཱཐམཱཧ. ཏཏྠ ཏེཏི བཧུསྶུཏཱ. ཏསྶཱཏི ཨུཔཱསཀསྶ. དྷམྨཾ དེསེནྟཱིཏི སཀལཝཊྚདུཀྑཔནཱུདནཾ སདྡྷམྨཾ དེསེནྟི. ཡཾ སོ དྷམྨཾ ཨིདྷཉྙཱཡཱཏི སོ ཨུཔཱསཀོ ཡཾ སདྡྷམྨཾ ཨིམསྨིཾ སཱསནེ སམྨཱཔཊིཔཛྫནེན ཛཱནིཏྭཱ ཨགྒམགྒཱདྷིགམནེན ཨནཱསཝོ ཧུཏྭཱ པརིནིབྦཱཏི ཨེཀཱདསགྒིཝཱུཔསམེན སཱིཏི བྷཝཏཱིཏི.

སཱིཏཔཊིགྷཱཏཱདིཀཱ ¶ ཝིཔསྶནཱཝསཱནཱ ཏེརས, ཨནྣཱདིལཱབྷོ, དྷམྨསྶཝནཾ, དྷམྨཱཝབོདྷོ, པརིནིབྦཱནནྟི ཨེཝམེཏྠ སཏྟརས ཨཱནིསཾསཱ ཝུཏྟཱ.

པཊིགྒཧཎཀཱནཾ ཝིཧཱརཝསེན ཨུཔྤནྣཕལཱནུརཱུཔམྤི དཱཡཀཱནཾ ཝིཧཱརདཱནཕལཾ ཝེདིཏབྦཾ. ཡེབྷུཡྻེན ཧི ཀམྨསརིཀྑཀཕལཾ ལབྷནྟཱིཏི ཨཱཧ ‘‘ཏསྨཱ’’ཏིཨཱདི. ‘‘སངྒྷསྶ པན པརིཙྩཏྟཏྟཱ’’ཏི ཨིམིནཱ སངྒྷིཀཝིཧཱརམེཝ པདྷཱནཝསེན ཝདཏི, སངྒྷིཀཝིཧཱརོ ནཱམེས ཙཱཏུདྡིསཾ སངྒྷཾ ¶ ཨུདྡིསྶ ཀཏཝིཧཱརོ, ཡཾ སནྡྷཱཡ པདབྷཱཛནིཡཾ ཝུཏྟཾ ‘‘སངྒྷིཀོ ནཱམ ཝིཧཱརོ སངྒྷསྶ དིནྣོ ཧོཏི པརིཙྩཏྟོ’’ཏི. ཡཏྠ ཧི ཙེཏིཡཾ པཏིཊྛིཏཾ ཧོཏི, དྷམྨསྶཝནཾ ཀརཱིཡཏི, ཙཏཱུཧི དིསཱཧི བྷིཀྑཱུ ཨཱགནྟྭཱ ཨཔྤཊིཔུཙྪིཏྭཱཡེཝ པཱདེ དྷོཝིཏྭཱ ཀུཉྩིཀཱཡ དྭཱརཾ ཝིཝརིཏྭཱ སེནཱསནཾ པཊིཛགྒིཏྭཱ ཡཐཱཕཱསུཀཾ གཙྪནྟི, སོ ཨནྟམསོ ཙཏུརཏནིཀཱཔི པཎྞསཱལཱ ཧོཏུ, ཙཱཏུདྡིསཾ སངྒྷཾ ཨུདྡིསྶ ཀཏཝིཧཱརོཏྭེཝ ཝུཙྩཏི.

༣༥༡. ལོབྷཾ ནིགྒཎྷིཏུཾ ཨསཀྐོནྟསྶ དུཔྤརིཙྩཛཱ. ‘‘ཨེཀབྷིཀྑུསྶ ཝཱ’ཏིཨཱདི ཨུཔཱསཀཱནཾ ཏཐཱ སམཱདཱནེ ཨཱཙིཎྞཾ, དལ༹ྷཏརཾ སམཱདཱནཉྩ དསྶེཏུཾ ཝུཏྟཾ, སརཎཾ པན ཏེསཾ སཱམཾ སམཱདིནྣམྤི སམཱདིནྣམེཝ ཧོཏཱི’’ཏི ཝདནྟི. སངྒྷསྶ ཝཱ གཎསྶ ཝཱ སནྟིཀེཏི ཡོཛནཱ. ཏཏྠཱཏི ཡཐཱགཧིཏེ སརཎེ, ‘‘ཏསྶཱ’’ཏིཔི པཱཋོ, ཡཐཱགཧིཏསརཎསྶཱཏི ཨཏྠོ. ནཏྠི པུནཔྤུནཾ ཀཏྟབྦཏཱཏི ཝིཉྙཱུཛཱཏིཀེ སནྡྷཱཡ ཝུཏྟཾ. ཝིཉྙཱུཛཱཏིཀཱནམེཝ ཧི སརཎཱདིཨཏྠཀོསལླཱནཾ སུཝཎྞགྷཊེ སཱིཧཝསཱ ཝིཡ ཨཀུཔྤཾ སརཎགམནཾ ཏིཊྛཏི. ‘‘ཛཱིཝིཏཔརིཙྩཱགམཡཾ པུཉྙ’’ནྟི ཙ ཨིདཾ ‘‘སཙེ ཏྭཾ ཡཐཱགཧིཏཾ སརཎཾ ན བྷིནྡིསྶཏི, ཨེཝཱཧཾ ཏཾ མཱརེམཱི’’ཏི ཀཱམཾ ཀོཙི ཏིཎྷེན སཏྠེན ཛཱིཝིཏཱ ཝོརོཔེཡྻ, ཏཐཱཔི ‘‘ནེཝཱཧཾ བུདྡྷཾ ‘ན བུདྡྷོ’ཏི, དྷམྨཾ ‘ན དྷམྨོ’ཏི, སངྒྷཾ ‘ན སངྒྷོ’ཏི ཝདཱམཱི’’ཏི དལ༹ྷཏརཾ ཀཏྭཱ གཧིཏསརཎསྶ ཝསེན ཝུཏྟཾ. ‘‘སགྒསམྤཏྟིཾ དེཏཱི’’ཏི ནིདསྶནམཏྟམེཏཾ. ཕལཱནིསཾསཱནི པནསྶ སརཎགམནཝཎྞནཱཡཾ (དཱི. ནི. ཨཊྛ. ༡.༢༥༠ སརཎགམནཀཐཱ) ཝུཏྟཱནེཝ.

༣༥༢. ཝཀྑམཱནནཡེན ཝེརཧེཏུཏཱཡ ཝེརཾ ཝུཙྩཏི པཱཎཱཏིཔཱཏཱདིཔཱཔདྷམྨོ, ཏཾ མཎཏི ‘‘མཡི ཨིདྷ ཋིཏཱཡ ཀཐམཱགཙྪསཱི’’ཏི ཏཛྫེནྟཱི ཝིཡ ནིཝཱརེཏཱིཏི ¶ ཝེརམཎཱི, ཏཏོ ཝཱ པཱཔདྷམྨཏོ ཝིརམཏི ཨེཏཱཡཱཏི ‘‘ཝིརམཎཱི’’ཏི ཝཏྟབྦེ ནིརུཏྟིནཡེན ཨི-ཀཱརསྶ ཨེ-ཀཱརཾ ཀཏྭཱ ‘‘ཝེརམཎཱི’’ཏི ཝུཏྟཾ. ཁུདྡཀཔཱཋཊྛཀཐཱཡཾ པནཱཧ ‘‘ཝེརམཎིསིཀྑཱཔདཾ, ཝིརམཎིསིཀྑཱཔདནྟི དྭིདྷཱསཛ྄ཛྷཱཡཾ ཀརོནྟཱི’’ཏི (ཁུ. པཱ. ཨཊྛ. སཱདྷཱརཎཝིབྷཱཝནཱ) ཀུསལཙིཏྟསམྤཡུཏྟཱཝེཏྠ ཝིརཏི ཨདྷིཔྤེཏཱ, ན ཕལསམྤཡུཏྟཱ ཡཉྙཱདྷིཀརཎཏོ. ཨསམཱདིནྣསཱིལསྶ སམྤཏྟཏོ ཡཐཱུཔཊྛིཏཝཱིཏིཀྐམིཏབྦཝཏྠུཏོ ཝིརཏི སམྤཏྟཝིརཏི. སམཱདཱནཝསེན ཨུཔྤནྣཱ ཝིརཏི སམཱདཱནཝིརཏི. སེཏུ ཝུཙྩཏི ཨརིཡམགྒོ, ཏཔྤརིཡཱཔནྣཱ ཧུཏྭཱ པཱཔདྷམྨཱནཾ སམུཙྪེདཝསེན གྷཱཏནཔྤཝཏྟཱ ཝིརཏི སེཏུགྷཱཏཝིརཏི. ཨཉྙཏྲ ‘‘སམུཙྪེདཝིརཏཱི’’ཏིཔི ཝུཏྟཱ. ཨིདཱནི ཏཱ སརཱུཔཏོ དསྶེཏུཾ ‘‘ཏཏྠཱ’’ཏིཨཱདི ཝུཏྟཾ. ཛཱཏི…པེ… དཱིནཱིཏི ཨཔདིསིཏབྦཛཱཏིགོཏྟཀུལཱདཱིནི. ཨཱདིསདྡེན ཝཡབཱཧུསཙྩཱདཱིནཾ སངྒཧོ ¶ . པརིཧརཏཱིཏི ཨཝཱིཏིཀྐམཝསེན པརིཝཛྫེཏི, སཱིཧལ༹དཱིཔེ ཙཀྐནཨུཔཱསཀསྶ ཝིཡ སམྤཏྟཝིརཏི ཝེདིཏབྦཱ.

‘‘པཱཎཾ ན ཧནཱམཱི’’ཏིཨཱདཱིསུ ཨཱདཡཏྠེན ཨིཏི-སདྡེན, ཝིཀཔྤཏྠེན ཝཱ-སདྡེན ཝཱ ‘‘ཨདིནྣཾ ནཱདིཡཱམི, ཨདིནྣཱདཱནཱ ཝིརམཱམི, ཝེརམཎིཾ སམཱདིཡཱམཱི’’ཏི ཨེཝམཱདཱིནཾ པཙྩེཀམཏྠཱནཾ སངྒཧོ དཊྛབྦོ. ཨེཝཉྩ ཀཏྭཱ ‘‘སིཀྑཱཔད’’ མིཙྩེཝ ཨཝཏྭཱ ‘‘སིཀྑཱཔདཱནཱི’’ཏི ཝུཏྟཾ. པཱཎཱཏིཔཱཏཱ ཝེརམཎིནྟི སམྦནྡྷོ. སམཱདིཡཱམཱིཏི སམྨཱ ཨཱདིཡཱམི, ཨཝཱིཏིཀྐམཱདྷིཔྤཱཡེན, ཨཁཎྜཱ’ ཚིདྡཱ’ ཀམྨཱསཱ’ སབལཀཱརིཏཱཡ ཙ གཎྷཱམཱིཏི ཝུཏྟཾ ཧོཏི. ཨུཏྟརཝཌྜྷམཱནཔབྦཏཝཱསིཨུཔཱསཀསྶ (མ. ནི. ཨཊྛ. ༡.༨༩ ཀུསལཀམྨཔཐཝཎྞནཱ; སཾ. ནི. ཨཊྛ. ༢.༢.༡༠༩-༡༡༡; དྷ. ས. ཨཊྛ. ཀུསལཀམྨཔཐཝཎྞནཱ) ཝིཡ སམཱདཱནཝིརཏི ཝེདིཏབྦཱ.

མགྒསམྤཡུཏྟཱཏི སམྨཱདིཊྛིཡཱདིམགྒསམྤཡུཏྟཱ. ཨིདཱནི ཏཏྠཱ ཏཏྠཱགཏེསུ དྷམྨཏོ, ཀོཊྛཱསཏོ, ཨཱརམྨཎཏོ, ཝེདནཱཏོ, མཱུལཏོ, ཨཱདཱནཏོ, བྷེདཏོཏིཨཱདིནཱ ཨནེཀདྷཱ ཝིནིཙྪཡེསུ སངྑེཔེནེཝ ཨཱརམྨཎཏོ ཝིནིཙྪཡཾ དསྶེཏུཾ ‘‘ཏཏྠཱ’’ཏིཨཱདི ཝུཏྟཾ. པུརིམཱ དྭེཏི སམྤཏྟསམཱདཱནཝིརཏིཡོ. ‘‘ཛཱིཝིཏིནྡྲིཡཱདིཝཏྠཱུ’’ཏི པརམཏྠཏོ པཱཎོ ཝུཏྟོ, པཉྙཏྟིཏོ པན ‘‘སཏྟཱདིཝཏྠཱུ’’ཏི ཝཏྟབྦཾ, ཨེཝཉྷི ‘‘སཏྟེཡེཝ ཨཱརབྷིཏྭཱ པཱཎཱཏིཔཱཏཱ, ཨབྲཧྨཙརིཡཱ ཙ ཝིརམཏཱི’’ཏི (ཁུ. པཱ. ཨཊྛ. ཨེཀཏཱནཱནཏཱདིཝིནིཙྪཡ) ཁུདྡཀཱགམཊྛཀཐཱཝཙནེན སཾསནྡཏི སམེཏཱིཏི. ཨཱདིསདྡེན ཙེཏྠ སཏྟསངྑཱརཝསེན ¶ ཨདིནྣཝཏྠུ, ཏཐཱ ཕོཊྛབྦཝཏྠུ, ཝིཏཐཝཏྠུ, སངྑཱརཝསེནེཝ སུརཱམེརཡཝཏྠཱུཏི ཨེཏེསཾ སངྒཧོ དཊྛབྦོ. ཏཾ ཨཱརམྨཎཾ ཀཏྭཱ པཝཏྟནྟཱིཏི ཡཐཱཝུཏྟཾ ཝཱིཏིཀྐམཝཏྠུཾ ཨཱལམྦིཏྭཱ ཝཱིཏིཀྐམནཙེཏནཱསངྑཱཏཝིརམིཏབྦཝཏྠུཏོ ཝིརམཎཝསེན པཝཏྟནྟི. པཙྪིམཱཏི སེཏུགྷཱཏཝིརཏི. ནིབྦཱནཱརམྨཎཱཝ ཏཐཱཔི ཀིཙྩསཱདྷནཏོ. ཨིམིནཱ པན ཏཏྠེཝ ཨཱགཏེསུ ཏཱིསུ ཨཱཙརིཡཝཱདེསུ དྭེ པཊིབཱཧིཏྭཱ ཨེཀསྶེཝཱནུཛཱནནཾ ཝེདིཏབྦཾ.

‘‘སམྤཏྟཝིརཏི, ཧི སམཱདཱནཝིརཏི ཙ ཡདེཝ པཛཧཏི, ཏཾ ཨཏྟནོ པཱཎཱཏིཔཱཏཱདིཨཀུསལམེཝཱརམྨཎཾ ཀཏྭཱ པཝཏྟཏཱི’’ཏི ཀེཙི ཝདནྟི. ‘‘སམཱདཱནཝིརཏི ཡཏོ ཝིརམཏི, ཏཾ ཨཏྟནོ ཝཱ པརེསཾ ཝཱ པཱཎཱཏིཔཱཏཱདིཨཀུསལམེཝཱལམྦཎཾ ཀཏྭཱ པཝཏྟཏི. སམྤཏྟཝིརཏི པན ཡཏོ ཝིརམཏི, ཏེསཾ པཱཎཱཏིཔཱཏཱདཱིནཾ ཨཱལམྦཎཱནེཝ ཨཱརམྨཎཾ ཀཏྭཱ པཝཏྟཏཱི’’ཏི ཨཔརེ. ‘‘དྭཡམྤི ཙེཏཾ ཡཏོ པཱཎཱཏིཔཱཏཱདིཨཀུསལཏོ ཝིརམཏི, ཏེསམཱརམྨཎབྷཱུཏཾ ཝཱིཏིཀྐམིཏབྦཝཏྠུམེཝཱལམྦཎཾ ཀཏྭཱ པཝཏྟཏི. པུརིམཔུརིམཔདཏྠཉྷི ཝཱིཏིཀྐམཝཏྠུམཱལམྦཎཾ ¶ ཀཏྭཱ པཙྪིམཔཙྪིམཔདཏྠཏོ ཝིརམིཏབྦཝཏྠུཏོ ཝིརམཏཱི’’ཏི ཨཉྙེ. པཋམཝཱདོ ཙེཏྠ ཨཡུཏྟོཡེཝ. ཀསྨཱ? ཏསྶ ཨཏྟནོ པཱཎཱཏིཔཱཏཱདིཨཀུསལསྶ པཙྩུཔྤནྣཱབྷཱཝཏོ, ཨབཧིདྡྷཱབྷཱཝཏོ ཙ. སིཀྑཱཔདཝིབྷངྒེ ཧི པཉྩནྣཾ སིཀྑཱཔདཱནཾ པཙྩུཔྤནྣཱརམྨཎཏཱ, བཧིདྡྷཱརམྨཎཏཱ ཙ ཝུཏྟཱ. ཏཐཱ དུཏིཡཝཱདོཔི ཨཡུཏྟོཡེཝ. ཀསྨཱ? པུརིམཝཱདེན སམྨིསྶཏྟཱ, པརེསཾ པཱཎཱཏིཔཱཏཱདིཨཀུསལཱརམྨཎབྷཱཝེ ཙ ཨནེཀནྟི ཀཏྟཱ, དྭིནྣཾ ཨཱལམྦཎཔྤབྷེདཝཙནཏོ ཙ. ཏཏིཡཝཱདོ པན ཡུཏྟོ སབྦབྷཱཎཀཱནམབྷིམཏོ, ཏསྨཱ ཏདེཝ ཨནུཛཱནཱཏཱིཏི དཊྛབྦཾ. ཏེན ཝུཏྟཾ ‘‘ཏཱིསུ ཨཱཙརིཡཝཱདེསུ དྭེ པཊིབཱཧིཏྭཱ ཨེཀསྶེཝཱནུཛཱནནཾ ཝེདིཏབྦ’’ནྟི.

ཨེཏྠཱཧ – ཡཛྫེཏཾ ཝིརཏིདྭཡཾ ཛཱིཝིཏིནྡྲིཡཱདིཝཱིཏིཀྐམིཏབྦཝཏྠུམེཝཱལམྦཎཾ ཀཏྭཱ པཝཏྟེཡྻ, ཨེཝཾ སཏི ཨཉྙཾ ཙིནྟེནྟོ ཨཉྙཾ ཀརེཡྻ, ཡཉྩ པཛཧཏི, ཏཾ ན ཛཱནེཡྻཱཏི ཨཡ’མནདྷིཔྤེཏོ ཨཏྠོ ཨཱཔཛྫཏཱིཏི? ཝུཙྩཏེ – ན ཧི ཀིཙྩསཱདྷནཝསེན པཝཏྟེནྟོ ‘‘ཨཉྙཾ ཙིནྟེནྟོ ཨཉྙཾ ཀརོཏཱི’’ཏི ཝཱ ‘‘ཡཉྩ པཛཧཏི, ཏཾ ན ཛཱནཱཏཱི’’ཏི ཝཱ ཝུཙྩཏི. ཡཐཱ པན ཨརིཡམགྒོ ནིབྦཱནཱརམྨཎོཝ ཀིལེསེ པཛཧཏི, ཨེཝཾ ཛཱིཝིཏིནྡྲིཡཱདིཝཏྠཱརམྨཎམྤེཏཾ ཝིརཏིདྭཡཾ པཱཎཱཏིཔཱཏཱདཱིནི དུསྶཱིལྱཱནི པཛཧཏི. ཏེནཱཧུ པོརཱཎཱ –

‘‘ཨཱརབྷིཏྭཱན ¶ ཨམཏཾ, ཛཧནྟོ སབྦཔཱཔཀེ;

ནིདསྶནཉྩེཏྠ བྷཝེ, མགྒཊྛོརིཡཔུགྒལོ’’ཏི. (ཁུ. པཱ. ཨཊྛ. ཨེཀཏཱནཱནཏཱཝིནིཙྪཡ);

ཨིདཱནི སངྑེཔེནེཝ ཨཱདཱནཏོ, བྷེདཏོ ཝཱ ཝིནིཙྪཡཾ དསྶེཏུཾ ‘‘ཨེཏྠཱ’’ཏིཨཱདི ཝུཏྟཾ. ‘‘པཉྩངྒསམནྣཱགཏཾ སཱིལཾ སམཱདིཡཱམཱི’’ཏིཨཱདིནཱ ཨེཀཏོ ཨེཀཛ྄ཛྷཾ གཎྷཱཏི. ཨེཝམྤི ཧི ཀིཙྩཝསེན ཨེཏཱསཾ པཉྩཝིདྷཏཱ ཝིཉྙཱཡཏི. སབྦཱནིཔི བྷིནྣཱནི ཧོནྟི ཨེཀཛ྄ཛྷཾ སམཱདིནྣཏྟཱ. ན ཧི ཏདཱ པཉྩངྒིཀཏྟཾ སཱིལསྶ སམྤཛྫཏི. ཡཾ ཏུ ཝཱིཏིཀྐནྟཾ, ཏེནེཝ ཀམྨབདྡྷོ. ‘‘པཱཎཱཏིཔཱཏཱ ཝེརམཎིསིཀྑཱཔདཾ སམཱདིཡཱམཱི’’ཏིཨཱདིནཱ ཨེཀེཀཾ ཝིསུཾ ཝིསུཾ གཎྷཱཏི. ‘‘ཝེརམཎིསིཀྑཱཔད’’ནྟི ཙ ཨིདཾ སམཱསབྷཱཝེན ཁུདྡཀཔཱཋཊྛཀཐཱཡཾ (ཁུ. པཱ. ཨཊྛ. སཱདྷཱརཎཝིབྷཱཝནཱ) ཝུཏྟཾ, པཱལི༹པོཏྠཀེསུ པན ‘‘ཝེརམཎི’’ནྟི ནིགྒཧིཏནྟམེཝ བྱཱསབྷཱཝེན དིསྶཏི. གཧཊྛཝསེན ཙེཏཾ ཝུཏྟཾ. སཱམཎེརཱནཾ པན ཡཐཱ ཏཐཱ ཝཱ སམཱདཱནེ ཨེཀསྨིཾ བྷིནྣེ སབྦཱནིཔི བྷིནྣཱནི ཧོནྟི པཱརཱཛིཀཱཔཏྟིཏོ. ཨིཏི ཨེཀཛ྄ཛྷཾ, པཙྩེཀཉྩ སམཱདཱནེ ཝིསེསོ ཨིདྷ ཝུཏྟོ, ཁུདྡཀཱགམཊྛཀཐཱཡཾ པན ‘‘ཨེཀཛ྄ཛྷཾ སམཱདིཡཏོ ཨེཀཱཡེཝ ཝིརཏི ཨེཀཱཝ ¶ ཙེཏནཱ ཧོཏི, ཀིཙྩཝསེན པནེཏཱསཾ པཉྩཝིདྷཏྟཾ ཝིཉྙཱཡཏི. པཙྩེཀཾ སམཱདིཡཏོ པན པཉྩེཝ ཝིརཏིཡོ, པཉྩ ཙ ཙེཏནཱ ཧོནྟཱི’’ཏི (ཁུ. པཱ. ཨཊྛ. ཨེཀཏཱནཱནཏཱདིཝིནིཙྪཡ) ཨཡཾ ཝིསེསོ ཝུཏྟོ. བྷེདེཔི ‘‘ཡཐཱ ཏཐཱ ཝཱ སམཱདིཡནྟུ, སཱམཎེརཱནཾ ཨེཀསྨིཾ བྷིནྣེ སབྦཱནིཔི བྷིནྣཱནི ཧོནྟི. པཱརཱཛིཀཊྛཱནིཡཱནི ཧི ཏཱནི ཏེསཾ. ཡཾ ཏུ ཝཱིཏིཀྐནྟཾ ཧོཏི, ཏེནེཝ ཀམྨབདྡྷོ. གཧཊྛཱནཾ པན ཨེཀསྨིཾ བྷིནྣེ ཨེཀམེཝ བྷིནྣཾ ཧོཏི, ཡཏོ ཏེསཾ ཏཾསམཱདཱནེནེཝ པུན པཉྩངྒིཀཏྟཾ སཱིལསྶ སམྤཛྫཏཱི’’ཏི ཝུཏྟཾ. ཡཐཱཝུཏྟོཔི དཱིགྷབྷཱཎཀཱནཾ ཝཱདོ ཨཔརེཝཱདོ ནཱམ ཏཏྠ ཀཏོ.

སེཏུགྷཱཏཝིརཏིཡཱ པན བྷེདོ ནཱམ ནཏྠི པཊིཔཀྑསམུཙྪིནྡནེན ཨཀུཔྤསབྷཱཝཏྟཱ. ཏདེཝཏྠཾ དསྶེནྟེན ‘‘བྷཝནྟརེཔཱི’’ཏིཨཱདི ཝུཏྟཾ. ཏཏྠ ‘‘བྷཝནྟརེཔཱི’’ཏི ཨིམིནཱ ཨཏྟནོ ཨརིཡབྷཱཝཾ ཨཛཱནནྟོཔཱིཏི ཨཏྠཾ ཝིཉྙཱཔེཏི. ཛཱིཝིཏཧེཏུཔི, པགེཝ ཨཉྙཧེཏུ. ‘‘ནེཝ པཱཎཾ ཧནཏི, ན སུརཾ པིཝཏཱི’’ཏི ཨིདཾ མཛ྄ཛྷེཔེཡྻཱལནིདྡིཊྛཾ, མིགཔདཝལ༹ཉྫནནཡེན ཝཱ ཝུཏྟཾ ¶ . སུརནྟི ཙ ནིདསྶནམཏྟཾ. སབྦམྤི ཧི སུརཱམེརཡམཛྫཔམཱདཊྛཱནཱནུཡོགཾ ན ཀརོཏི. ‘‘མཛྫནྟི ཏདེཝ ཨུབྷཡཾ, ཡཾ ཝཱ པནཉྙམྤི སུརཱསཝཝིནིམུཏྟཾ མདནཱིཡ’’ནྟི (སཾ. ནི. ཨཊྛ. ༣.༥.༡༡༣༤) སཾཡུཏྟམཧཱཝགྒཊྛཀཐཱཡཾ ཝུཏྟཾ. ཁུདྡཀཔཱཋཊྛཀཐཱཡཉྩ ‘‘ཏདུབྷཡམེཝ མདནཱིཡཊྛེན མཛྫཾ, ཡཾ ཝཱ པནཉྙམྤི ཀིཉྩི ཨཏྠི མདནཱིཡཾ, ཡེན པཱིཏེན མཏྟོ ཧོཏི པམཏྟོ, ཨིདཾ ཝུཙྩཏི མཛྫ’’ནྟི (ཁུ. པཱ. ཨཊྛ. པུརིམཔཉྩསིཀྑཱཔདཝཎྞནཱ) ‘‘སཙེ པིསྶཱ’’ཏིཨཱདིནཱ ཏཏྠེཝ ཝིསེསདསྶནཾ, ཨཛཱནནྟསྶཔི ཁཱིརམེཝ མུཁཾ པཝིསཏི, ན སུརཱ, པགེཝ ཛཱནནྟསྶ. ཀོཉྩསཀུཎཱནནྟི ཀུནྟསཀུཎཱནཾ. སཙེཔི མུཁེ ཁཱིརམིསྶཀེ ཨུདཀེ པཀྑིཔནྟཱིཏི ཡོཛེཏབྦཾ. ‘‘ན ཙེཏྠ ཨུཔམོཔམེཡྻཱནཾ སམྦདྡྷཏཱ སིཡཱ ཀོཉྩསཀུཎཱནཾ ཡོནིསིདྡྷཏྟཱ’’ཏི ཀོཙི ཝདེཡྻཱཏི ཨཱཧ ‘‘ཨིད’’ནྟིཨཱདི. ཡོནིསིདྡྷནྟི མནུསྶཏིརཙྪཱནཱནཾ ཨུདྡྷཾ ཏིརིཡམེཝ དཱིགྷཏཱ ཝིཡ, བཀཱནཾ མེགྷསདྡེན, ཀུཀྐུཊཱིནཾ ཝཱཏེན གབྦྷགྒཧཎཾ ཝིཡ ཙ ཛཱཏིསིདྡྷཾ, ཨིཏི ཀོཙི ཝདེཡྻ ཙེཏི ཨཏྠོ. ‘‘ཙེཝཱ’’ཏིཔི པཱཋཾ ཝཏྭཱ སམུཙྩཡཏྠམིཙྪནྟི ཀེཙི. དྷམྨཏཱསིདྡྷནྟི བོདྷིསཏྟེ ཀུཙྪིགཏེ བོདྷིསཏྟམཱཏུ སཱིལཾ ཝིཡ, ཝིཛཱཏེ ཏསྶཱ དིཝངྒམནཾ ཝིཡ ཙ སབྷཱཝེན སིདྡྷཾ, མགྒདྷམྨཏཱཡ ཝཱ ཨརིཡམགྒཱནུབྷཱཝེན སིདྡྷནྟི ཝེདིཏབྦནྟི ཝིསྶཛྫེཡྻཱཏི ཨཏྠོ.

དིཊྛིཛུཀརཎཾ ནཱམ བྷཱརིཡཾ དུཀྐརཾ, ཏསྨཱ སརཎགམནཾ སིཀྑཱཔདསམཱདཱནཏོ མཧཊྛཏརམེཝ, ན ཨཔྤཊྛཏརནྟི ཨདྷིཔྤཱཡོ. ཨེཏནྟི སིཀྑཱཔདཾ. ཡཐཱ ཝཱ ཏཐཱ ཝཱ གཎྷནྟསྶཱཔཱིཏི ཨཱདརཾ གཱརཝམཀཏྭཱ སམཱདིཡནྟསྶཱཔི. སཱདྷུཀཾ གཎྷནྟསྶཱཔཱིཏི སཀྐཙྩཾ སཱིལཱནི ¶ སམཱདིཡནྟསྶཱཔི ཨཔྤཊྛཏརམེཝ, ཨཔྤསམཱརམྦྷཏརཉྩ, ན དིགུཎཾ ཨུསྶཱཧོ ཀརཎཱིཡོཏི ཝུཏྟཾ ཧོཏི. སཱིལཾ ཨིདྷ ཨབྷཡདཱནཏཱཡ དཱནཾ, ཨནཝསེསཾ ཝཱ སཏྟནིཀཱཡཾ དཡཏི རཀྑཏཱིཏི དཱནཾ. ཨཡམེཏྠ ཨཊྛཀཐཱམུཏྟཀནཡོ – སརཎཾ ཨུཔགཏེན ཀཱཡཝཱཙཱཙིཏྟེཧི སཀྐཙྩཾ ཝཏྠུཏྟཡཔཱུཛཱ ཀཱཏབྦཱ, ཏཏྠ ཙ སཾཀིལེསོ སཱདྷུཀཾ པརིཧརིཏབྦོ, སིཀྑཱཔདཱནི པན སམཱདཱནམཏྟཾ, སམྤཏྟཝཏྠུཏོ ཝིརམཎམཏྟཉྩཱཏི སརཎགམནཏོ སཱིལསྶ ཨཔྤཊྛཏརཏཱ, ཨཔྤསམཱརམྦྷཏརཏཱ ཙ ཝེདིཏབྦཱ. སབྦེསཾ སཏྟཱནཾ ཛཱིཝིཏདཱནཱདིནཱ དཎྜནིདྷཱནཏོ, སཀལལོཀིཡལོཀུཏྟར གུཎཱདྷིཊྛཱནཏོ ཙསྶ མཧཔྥལཏརཏཱ, མཧཱནིསཾསཏརཏཱ ཙ དཊྛབྦཱཏི.

ཏམཏྠཾ ¶ པཱལི༹ཡཱ སཱདྷེནྟོ ‘‘ཝུཏྟཉྷེཏ’’ནྟིཨཱདིམཱཧ. ཏཏྠ ‘‘ཨགྒཱནཱི’’ཏི ཉཱཏཏྟཱ ཨགྒཉྙཱནི. ཙིརརཏྟཏཱཡ ཉཱཏཏྟཱ རཏྟཉྙཱནི. ‘‘ཨརིཡཱནཾ སཱདྷཱུནཾ ཝཾསཱནཱི’’ཏི ཉཱཏཏྟཱ ཝཾསཉྙཱནི. པུརིམཀཱནཾ ཨཱདིཔུརིསཱནཾ ཨེཏཱནཱིཏི པོརཱཎཱནི. སབྦསོ ཀེནཙིཔི པཀཱརེན སཱདྷཱུཧི ན ཀིཎྞཱནི ན ཚཌྜིཏཱནཱིཏི ཨསཾཀིཎྞཱནི. ཨཡཉྩ ནཡོ ནེསཾ ཡཐཱ ཨཏཱིཏེ, ཨེཝཾ ཨེཏརཧི, ཨནཱགཏེ ཙཱཏི ཨཱཧ ‘‘ཨསཾཀིཎྞཔུབྦཱནཱི’’ཏིཨཱདི. ཨཏཱིཏེ ཧི ཀཱལེ ཨསཾཀིཎྞབྷཱཝསྶ ‘‘ཨསཾཀིཎྞཔུབྦཱནཱི’’ཏི ནིདསྶནཾ, པཙྩུཔྤནྣེ ‘‘ན སངྐིཡནྟཱི’’ཏི, ཨནཱགཏེ ‘‘ན སངྐིཡིསྶནྟཱི’’ཏི. ཨཏོཡེཝ ཨཔྤཊིཀུཊྛཱནི ན པཊིཀྑིཏྟཱནི. ན ཧི ཀདཱཙིཔི ཝིཉྙཱུ སམཎབྲཱཧྨཎཱ ཧིཾསཱདིཔཱཔདྷམྨཾ ཨནུཛཱནནྟི. ཨཔརིམཱཎཱནཾ སཏྟཱནཾ ཨབྷཡཾ དེཏཱིཏི སབྦེསུ བྷཱུཏེསུ ནིཧིཏདཎྜཏྟཱ སཀལསྶཔི སཏྟནིཀཱཡསྶ བྷཡཱབྷཱཝཾ དེཏི. ན ཧི ཨརིཡསཱཝཀཏོ ཀསྶཙི བྷཡཾ ཧོཏི. ཨཝེརནྟི ཝེརཱབྷཱཝཾ. ཨབྱཱཔཛ྄ཛྷནྟི ནིདྡུཀྑཏཾ. ‘‘ཨཔརིམཱཎཱནཾ སཏྟཱནཾ ཨབྷཡཾ དཏྭཱ’’ཏིཨཱདི ཨཱནིསཾསདསྶནཾ, ཧེཏུམྤི ཙེཏྠ ཏྭཱ-སདྡོ ཡཐཱ ‘‘མཱཏརཾ སརིཏྭཱ རོདཏཱི’’ཏི.

ཡཾ ཀིཉྩི ཙཛནལཀྑཎཾ, སབྦཾ ཏཾ ཡཉྙོཏི ཨཱཧ ‘‘ཨིདཉྩ པནཱ’’ཏིཨཱདི. ན ནུ ཙ པཉྩསཱིལཾ སབྦཀཱལིཀཾ. ཨབུདྡྷུཔྤཱདཀཱལེཔི ཧི ཝིཉྙཱུ ཏཾ སམཱདིཡནྟི, ན ཙ ཨེཀནྟཏོ ཝིམུཏྟཱཡཏནཾ བཱཧིརཀཱནམྤི སམཱདིནྣཏྟཱ. སརཎགམནཾ པན བུདྡྷུཔྤཱདཧེཏུཀཾ, ཨེཀནྟཏོ ཙ ཝིམུཏྟཱཡཏནཾ, ཀཐཾ ཏཏྠ སརཎགམནཏོ པཉྩསཱིལསྶ མཧཔྥལཏཱཏི ཨཱཧ ‘‘ཀིཉྩཱཔཱི’’ཏིཨཱདི. ཛེཊྛཀནྟི མཧཔྥལབྷཱཝེན ཨུཏྟམཾ. ‘‘སརཎགམནེཡེཝ པཏིཊྛཱཡཱ’’ཏི ཨིམིནཱ ཏསྶ སཱིལསྶ སརཎགམནེན ཨབྷིསངྑཏཏྟཱ ཏཏོ མཧཔྥལཏཾ, ཏཐཱ ཨནབྷིསངྑཏསྶ ཙ སཱིལསྶ ཨཔྤཕལཏཾ དསྶེཏི.

༣༥༣. ཨཱིདིསམེཝཱཏི ཨེཝཾ སཾཀིལེསཔཊིཔཀྑམེཝ ཧུཏྭཱ. ནནུ ཙ པཋམཛ྄ཛྷཱནཱདིཡཉྙཱཡེཝ ¶ དེསེཏབྦཱ, ཀསྨཱ བུདྡྷུཔྤཱདཏོ པཊྛཱཡ དེསནམཱརབྷཏཱིཏི ཨནུཡོགཾ པརིཧརིཏུཾ ‘‘ཏིཝིདྷ…པེ… དསྶེཏུཀཱམོ’’ཏི ཝུཏྟཾ. ཏིཝིདྷསཱིལཔཱརིཔཱུརིཡཾ ཋིཏསྶ ཧི ནེསཾ ཡཉྙཱནཾ ཨཔྤཊྛཏརཏཱ, མཧཔྥལཏརཏཱ ཙ ཧོཏི, ཏསྨཱ ཏཾ དསྶེཏུཀཱམཏྟཱ བུདྡྷུཔྤཱདཏོ པཊྛཱཡ དེསནཾ ཨཱརབྷཏཱིཏི ཝུཏྟཾ ཧོཏི. ཏེནཱཧ ‘‘ཏཏྠཱ’’ཏིཨཱདི. ཧེཊྛཱ ¶ ཝུཏྟེཧི གུཎེཧཱིཏི ཨེཏྠ ‘‘སོ ཏཾ དྷམྨཾ སུཏྭཱ ཏཐཱགཏེ སདྡྷཾ པཊིལབྷཏཱི’’ཏིཨཱདིནཱ (དཱི. ནི. ༡.༡༩༡) ཧེཊྛཱ ཝུཏྟཱ སརཎགམནཾ, སཱིལསམྤདཱ, ཨིནྡྲིཡེསུ གུཏྟདྭཱརཏཱཏི ཨེཝམཱདཡོ གུཎཱ ཝེདིཏབྦཱ. པཋམཾ ཛྷཱནཾ ནིབྦཏྟེནྟོ ན ཀིལམཏཱིཏི ཡོཛནཱ. ཏཱནཱིཏི པཋམཛ྄ཛྷཱནཱདཱིནི. ‘‘པཋམཾ ཛྷཱན’’ནྟིཨཱདིནཱ པཱལི༹ཡཾ པཎཱིཏཱནམེཝ ཛྷཱནཱནཾ ཨུཀྐཊྛནིདྡེསོ ཀཏོཏི མནྟཝཱ ‘‘ཨེཀཾ ཀཔྤཾ, ཨཊྛ ཀཔྤེ’’ཏིཨཱདི ཝུཏྟཾ, མཧཱཀཔྤཝསེན ཙེཏྠ ཨཏྠོ. ཧཱིནཾ པན པཋམཾ ཛྷཱནཾ ཨསངྑྱེཡྻཀཔྤསྶ ཏཏིཡབྷཱགཾ ཨཱཡུཾ དེཏི. མཛ྄ཛྷིམཾ ཨུཔཌྜྷཀཔྤཾ. ཧཱིནཾ དུཏིཡཾ ཛྷཱནཾ དྭེ ཀཔྤཱནི, མཛ྄ཛྷིམཾ ཙཏྟཱརཱིཏིཨཱདིནཱ ཨཏྠོ ནེཏབྦོ. ཨཔིཙ ཡསྨཱ པཎཱིཏཱནིཡེཝེཏྠ ཛྷཱནཱནི ཨདྷིཔྤེཏཱནི མཧཔྥལཏརབྷཱཝདསྶནཔརཏྟཱ དེསནཱཡ, ཏསྨཱ ‘‘པཋམཾ ཛྷཱནཾ ཨེཀཾ ཀཔྤ’’ནྟིཨཱདིནཱ པཎཱིཏཱནེཝ ཛྷཱནཱནི ནིདྡིཊྛཱནཱིཏི དཊྛབྦཾ.

ཏདེཝཱཏི ཙཏུཏྠཛ྄ཛྷཱནམེཝ. ཙཏུཀྐནཡེན ཧི དེསནཱ ཨཱགཏཱ. ཡདི ཨེཝཾ ཀཐཾ ཨཱརུཔྤཏཱཏི ཨཱཧ ‘‘ཨཱཀཱསཱནཉྩཱཡཏནཱདིསམཱཔཏྟིཝསེན བྷཱཝིཏ’’ནྟི, ཏཐཱ བྷཱཝིཏཏྟཱ ཙཏུཏྠཛ྄ཛྷཱནམེཝ ཨཱརུཔྤཾ ཧུཏྭཱ ཝཱིསཏིཀཔྤསཧསྶཱདཱིནི ཨཱཡུཾ དེཏཱིཏི ཨདྷིཔྤཱཡོ. ཨཡཾ ཨཱཙརིཡསྶ མཏི. ཨཐ ཝཱ ཏདེཝཱཏི ཨཱརུཔྤསངྑཱཏཾ ཙཏུཏྠཛ྄ཛྷཱནམེཝ, ཏཾ པན ཀསྨཱ ཝཱིསཏིཀཔྤསཧསྶཱདཱིནི ཨཱཡུཾ དེཏཱིཏི ཝུཏྟཾ ‘‘ཨཱཀཱསཱནཉྩཱཡཏནཱདིསམཱཔཏྟིཝསེན བྷཱཝིཏ’’ནྟི, ཏཐཱ བྷཱཝིཏཏྟཱ ཨེཝཾ དེཏཱིཏི ཨདྷིཔྤཱཡོ. ཨཔརོ ནཡོ ‘‘ཏདེཝཱ’’ཏི ཝུཏྟེ རཱུཔཱཝཙརཙཏུཏྠཛ྄ཛྷཱནམེཝཱཏི ཨཏྠོ ཨཱཔཛྫེཡྻཱཏི ཏཾ ནིཝཏྟེཏུཾ ‘‘ཨཱཀཱསཱནཉྩཱཡཏནཱདིསམཱཔཏྟིཝསེན བྷཱཝིཏ’’ནྟི ཨཱཧ, ཏཐཱ བྷཱཝིཏཾ ཨངྒསམཏཱཡ ཙཏུཏྠཛ྄ཛྷཱནསངྑཱཏཾ ཨཱརུཔྤཛ྄ཛྷཱནམེཝཱདྷིཔྤེཏནྟི ཝུཏྟཾ ཧོཏི.

སམྨདེཝ ནིཙྩསཉྙཱདིཔཊིཔཀྑཝིདྷམནཝསེན པཝཏྟམཱནཱ པུབྦབྷཱགིཡེ ཨེཝ བོདྷིཔཀྑིཡདྷམྨེ སམཱནེནྟཱི ཝིཔསྶནཱ ཝིཔསྶཀཔུགྒལསྶ ཨནཔྤཀཾ པཱིཏིསོམནསྶཾ སམཱཝཧཏཱིཏི ཝུཏྟཾ ‘‘ཝིཔསྶནཱསུཁསདིསསྶ པན སུཁསྶ ཨབྷཱཝཱ མཧཔྥལ’’ནྟི. ཡཐཱཧ དྷམྨརཱཛཱ དྷམྨཔདེ –

‘‘ཡཏོ ¶ ཡཏོ སམྨསཏི, ཁནྡྷཱནཾ ཨུདཡབྦཡཾ;

ལབྷཏཱི པཱིཏིཔཱམོཛྫཾ, ཨམཏཾ ཏཾ ཝིཛཱནཏ’’ནྟི. (དྷ. པ. ༣༧༤);

ཡསྨཱ ¶ པནཱཡཾ དེསནཱ ཨིམིནཱ ཨནུཀྐམེན ཨིམཱནི ཉཱཎཱནི ནིབྦཏྟེནྟསྶ ཝསེན པཝཏྟིཏཱ, ཏསྨཱ ‘‘ཝིཔསྶནཱཉཱཎེ པཏིཊྛཱཡཱ’’ཏིཨཱདིནཱ ཧེཊྛིམཾ ཧེཊྛིམཾ ཨུཔརིམསྶ ཨུཔརིམསྶ པཏིཊྛཱབྷཱུཏཾ ཀཏྭཱ ཝུཏྟཾ. སམཱནརཱུཔནིམྨཱནཾ ནཱམ མནོམཡིདྡྷིཡཱ ཨཉྙེཧི ཨསཱདྷཱརཎཀིཙྩནྟི ཨཱཧ ‘‘ཨཏྟནོ…པེ… མཧཔྥལཱ’’ཏི. ཧཏྠིཨསྶཱདིཝིཝིདྷརཱུཔཀརཎཾ ཝིཀུབྦནཾ, ཏསྶ དསྶནསམཏྠཏཱཡ. ཨིཙྪིཏིཙྪིཏཊྛཱནཾ ནཱམ པུརིམཛཱཏཱིསུ ཨིཙྪིཏིཙྪིཏོ ཁནྡྷཔདེསོ. ཨརཧཏྟམགྒེནེཝ མགྒསུཁཾ ནིཊྛིཏནྟི ཝུཏྟཾ ‘‘ཨཏི…པེ… མཧཔྥལ’’ནྟི. སམཱཔེནྟོཏི པརིཡོསཱཔེནྟོ.

ཀཱུཊདནྟཨུཔཱསཀཏྟཔཊིཝེདནཱདིཀཐཱཝཎྞནཱ

༣༥༤-༨. ‘‘ཨབྷིཀྐནྟཾ བྷོ གོཏམཱ’’ཏིཨཱདི དེསནཱཡ པསཱདཝཙནཾ, ‘‘ཨེསཱཧཾ བྷཝནྟ’’ནྟིཨཱདི པན སརཎགམནཝཙནནྟི ཏདུབྷཡསམྦནྡྷཾ དསྶེནྟོ ‘‘དེསནཱཡཱ’’ཏིཨཱདིམཱཧ. ཏནཱུཏི མནྡོ ཀཱཡིཀཙེཏསིཀསུཁསམུཔབྱཱུཧཏོ. སབྦེ ཏེ པཱཎཡོཏི ‘‘སཏྟ ཙ ཨུསབྷསཏཱནཱི’’ཏིཨཱདིནཱ ཝུཏྟེ སབྦེ ཏེ པཱཎིནོ. ཏཾ པཝཏྟིནྟི ཏེསཾ པཱཎཱིནཾ མོཙནཱཀཱརཾ. ཨཱཀུལབྷཱཝོཏི བྷགཝཏོ སནྟིཀེ དྷམྨསྶ སུཏཏྟཱ པཱཎཱིསུ ཨནུདྡཡཾ ཨུཔཊྛཔེཏྭཱ ཋིཏསྶ ‘‘ཀཐཉྷི ནཱམ མཡཱ ཏཱཝ བཧཱུ པཱཎིནོ མཱརཎཏྠཱཡ བནྡྷཱཔིཏཱ’’ཏི ཙིཏྟེ པརིབྱཱཀུལབྷཱཝོ, ཡསྨཱ ཨཏྠི, ཏསྨཱ ན དེསེཏཱིཏི ཡོཛནཱ, ‘‘ཨུདཔཱདཱི’’ཏིཔི པཱཋོ. སུཏྭཱཏི ‘‘མུཏྟཱ བྷོ ཏེ པཱཎཡོ’’ཏི ཨཱརོཙིཏཝཙནཾ སུཏྭཱ. ཙིཏྟཙཱརོཏི ཙིཏྟཔྤཝཏྟི. ‘‘ཀལླཙིཏྟཾ མུདུཙིཏྟཾ ཝིནཱིཝརཎཙིཏྟཾ ཨུདགྒཙིཏྟཾ པསནྣཙིཏྟ’’ནྟི ཨིདཾ པདཔཉྩཀཾ སནྡྷཱཡ‘‘ཀལླཙིཏྟནྟིཨཱདཱི’’ཏི ཝུཏྟཾ. ཏཏྠ ‘‘དཱནཀཐཾ སཱིལཀཐ’’ནྟིཨཱདིནཱ ཝུཏྟཱཡ ཨནུཔུབྦིཀཐཱཡ ཨཱནུབྷཱཝེན. ཀཱམཙྪནྡཝིགམེན ཀལླཙིཏྟཏཱ ཨརོགཙིཏྟཏཱ, བྱཱཔཱདཝིགམེན མེཏྟཱཝསེན མུདུཙིཏྟཏཱ ཨཀཐིནཙིཏྟཏཱ, ཨུདྡྷཙྩཀུཀྐུཙྩཝིགམེན ཝིཀྑེཔཱབྷཱཝཏོ ཝིནཱིཝརཎཙིཏྟཏཱ ཏེཧི ཨམལཱིནཙིཏྟཏཱ, ཐིནམིདྡྷཝིགམེན སམྤགྒཧཎཝསེན ཨུདགྒཙིཏྟཏཱ ཨམལཱིནཙིཏྟཏཱ, ཝིཙིཀིཙྪཱཝིགམེན སམྨཱཔཊིཔཏྟིཡཱ ཨཝིམུཏྟཏཱཡ པསནྣཙིཏྟཏཱ ཨནཱཝིལཙིཏྟཏཱ ཙ ཧོཏཱིཏི ཨཱཧ ‘‘ཨནུཔུབྦིཀཐཱནུབྷཱཝེན ཝིཀྑམྦྷིཏནཱིཝརཎཏཾ སནྡྷཱཡ ཝུཏྟ’’ནྟི. ཡཾ པནེཏྠ ཨཏྠཏོ ཨཝིབྷཏྟཾ, ཏཾ སུཝིཉྙེཡྻམེཝ.

ཨིཏི ¶ ¶ སུམངྒལཝིལཱསིནིཡཱ དཱིགྷནིཀཱཡཊྛཀཐཱཡ པརམསུཁུམགམྦྷཱིརདུརནུབོདྷཏྠཔརིདཱིཔནཱཡ སུཝིམལཝིཔུལཔཉྙཱཝེཡྻཏྟིཡཛནནཱཡ སཱདྷུཝིལཱསིནིཡཱ ནཱམ ལཱིནཏྠཔཀཱསནིཡཱ ཀཱུཊདནྟསུཏྟཝཎྞནཱཡ ལཱིནཏྠཔཀཱསནཱ.

ཀཱུཊདནྟསུཏྟཝཎྞནཱ ནིཊྛིཏཱ.

༦. མཧཱལིསུཏྟཝཎྞནཱ

བྲཱཧྨཎདཱུཏཝཏྠུཝཎྞནཱ

༣༥༩. ཨེཝཾ ¶ ¶ ཀཱུཊདནྟསུཏྟཾ སཾཝཎྞེཏྭཱ ཨིདཱནི མཧཱལིསུཏྟཾ སཾཝཎྞེནྟོ ཡཐཱནུཔུབྦཾ སཾཝཎྞནོཀཱསསྶ པཏྟབྷཱཝཾ ཝིབྷཱཝེཏུཾ, ཀཱུཊདནྟསུཏྟསྶཱནནྟརཾ སངྒཱིཏསྶ སུཏྟསྶ མཧཱལིསུཏྟབྷཱཝཾ ཝཱ པཀཱསེཏུཾ ‘‘ཨེཝཾ མེ སུཏཾ…པེ… ཝེསཱལིཡནྟི མཧཱལིསུཏྟ’’ནྟི ཨཱཧ. པུནཔྤུནཾ ཝིསཱལབྷཱཝཱུཔགམནཏོཏི ཨེཏྠཱཡཾ སངྑེཔོ – བཱརཱཎསིརཉྙོ ཀིར ཨགྒམཧེསིཡཱ མཾསཔེསིགབྦྷེན དྭེ དཱརཀཱ ནིབྦཏྟཱ དྷཱིཏཱ ཙ པུཏྟོ ཙ, ཏེསཾ ཨཉྙམཉྙཾ ཝིཝཱཧེན སོལ༹སཀྑཏྟུཾ པུཏྟདྷཱིཏུཝསེན དྭེ དྭེ དཱརཀཱ ཝིཛཱཏཱ. ཏཏོ ཏེསཾ དཱརཀཱནཾ ཡཐཱཀྐམཾ ཝཌྜྷེནྟཱནཾ པཙྩེཀཾ སཔརིཝཱརཱནཾ ཨཱརཱམུཡྻཱནནིཝཱསཊྛཱནཔརིཝཱརསམྤཏྟིཾ གཧེཏུཾ ཨཔྤཧོནཀཏཱཡ ནགརཾ ཏིཀྑཏྟུཾ གཱཝུཏནྟརེན གཱཝུཏནྟརེན པརིཀྑིཔིཾསུ, ཨེཝཾ ཏསྶ པུནཔྤུནཾ ཏིཔཱཀཱརཔརིཀྑེཔེན ཝིསཱལབྷཱཝམུཔགཏཏྟཱ ‘‘ཝེསཱལཱི’’ཏྭེཝ ནཱམཾ ཛཱཏཾ. ཏེན ཝུཏྟཾ ‘‘པུནཔྤུནཾ ཝིསཱལབྷཱཝཱུཔགམནཏོ ཝེསཱལཱིཏི ལདྡྷནཱམཀེ ནགརེ’’ཏི. ཝིཏྠཱརཀཐཱ ཙེཏྠ མཧཱསཱིཧནཱདསུཏྟཝཎྞནཱཡ, (མ. ནི. ཨཊྛ. ༡.༡༤༦) རཏནསུཏྟཝཎྞནཱཡ (ཁུ. པཱ. ཨཊྛ. ཝེསཱལིཝཏྠུ; སུ. ནི. ཨཊྛ. ༡.རཏནསུཏྟཝཎྞནཱ) ཙ གཧེཏབྦཱ. བཧིནགརེཏི ནགརཏོ བཧི, ན ཨམྦཔཱལིཝནཾ ཝིཡ ཨནྟོནགརསྨིཾ. སཡཾཛཱཏནྟི སཡམེཝ ཛཱཏཾ ཨརོཔིམཾ. མཧནྟབྷཱཝེནཱཏི རུཀྑགཙྪཱནཾ, ཋིཏོཀཱསསྶ ཙ མཧནྟབྷཱཝེན. ཏེནེཝཱཧ ‘‘ཧིམཝནྟེན སདྡྷིཾ ཨེཀཱབདྡྷཾ ཧུཏྭཱ’’ཏི. ཡཾ པན ཝེནཡིཀཱནཾ མཏེན ཝིནཡཊྛཀཐཱཡཾ ཝུཏྟཾ –

‘‘ཏཏྠ མཧཱཝནཾ ནཱམ སཡཾཛཱཏཾ ཨརོཔིམཾ སཔརིཙྪེདཾ མཧནྟཾ ཝནཾ. ཀཔིལཝཏྠུསཱམནྟཱ པན མཧཱཝནཾ ཧིམཝནྟེན སཧ ཨེཀཱབདྡྷཾ ཨཔརིཙྪེདཾ ཧུཏྭཱ མཧཱསམུདྡཾ ཨཱཧཙྩ ཋིཏཾ, ཨིདཾ ཏཱདིསཾ ན ཧོཏཱི’’ཏི (པཱརཱ. ཨཊྛ. ༢.༡༦༢).

ཏཾ ¶ མཛ྄ཛྷིམབྷཱཎཀསཾཡུཏྟབྷཱཎཀཱནམྤི སམཱནཀཐཱ. མཛ྄ཛྷིམཊྛཀཐཱཡཉྷི (མ. ནི. ཨཊྛ. ༢.༣༥༢) སཾཡུཏྟཊྛཀཐཱཡཉྩ (སཾ. ནི. ཨཊྛ. ༡.༣༧) ཏཐེཝ ཝུཏྟཾ. ཨིདྷ པན དཱིགྷབྷཱཎཀཱནཾ མཏེན ཨེཝཾ ཝུཏྟནྟི དཊྛབྦཾ. ཡདི ཙ ‘‘ཨཧུཏྭཱ’’ཏི ཀཏྠཙི པཱཋོ དིསྶཏི, ཨེཝཾ སཏི སབྦེསམྤི ¶ སམཱནཝཱདོ སིཡཱཏི. ཀཱུཊཱགཱརསཱལཱསངྑེཔེནཱཏི ཧཾསམཎྜལཱཀཱརསངྑཱཏཧཾསཝཊྚཀཙྪནྣེན ཀཱུཊཱགཱརསཱལཱནིཡཱམེན, ཏཐཱ ཀཏཏྟཱ པཱསཱདོཡེཝ ‘‘ཀཱུཊཱགཱརསཱལཱ’’ཏི ཝུཏྟོ, ཏབྦོཧཱརེན པན སཀལོཔི སངྒྷཱརཱམོཏི ཝུཏྟཾ ཧོཏི. ཝིནཡཊྛཀཐཱཡཾ (པཱརཱ. ཨཊྛ. ༢.༡༦༢) ཏུ ཨེཝཾ ཝུཏྟཾ –

‘‘ཀཱུཊཱགཱརསཱལཱ པན མཧཱཝནཾ ནིསྶཱཡ ཀཏེ ཨཱརཱམེ ཀཱུཊཱགཱརཾ ཨནྟོཀཏྭཱ ཧཾསཝཊྚཀཙྪདནེན ཀཏཱ སབྦཱཀཱརསམྤནྣཱ བུདྡྷསྶ བྷགཝཏོ གནྡྷཀུཊི ཝེདིཏབྦཱ’’ཏི.

ཀོསལེསུ ཛཱཏཱ, བྷཝཱ, ཏེ ཝཱ ནིཝཱསོ ཨེཏེསནྟི ཀོསལཀཱ. ཨེཝཾ མཱགདྷཀཱ. ཛནཔདཝཱཙིནོ ཧི པཱཡཏོ པུལླིངྒཔུཐུཝཙནཱ. ཡསྶ ཨཀརཎེ པུགྒལོ མཧཱཛཱནིཡོ ཧོཏི, ཏཾ ཀརཎཾ ཨརཧཏཱིཏི ཀརཎཱིཡནྟི ཝུཙྩཏི. ཏེནཱཧ ‘‘ཨཝསྶཾ ཀཏྟབྦཀམྨེནཱ’’ཏི. ཨཀཱཏུམྤི ཝཊྚཏི ཨསཏི སམཝཱཡེ, ཏསྨཱ སམཝཱཡེ སཏི ཀཏྟབྦཏོ ཏཾ ཀིཙྩནྟི ཝུཙྩཏཱིཏི ཨདྷིཔྤཱཡོ.

༣༦༠. ཡཱ བུདྡྷཱནཾ ཨུཔྤཛྫནཱརཧཱ ནཱནཏྟསཉྙཱ, ཏཱསཾ ཝསེན ‘‘ནཱནཱརམྨཎཙཱརཏོ’’ཏི ཝུཏྟཾ, ནཱནཱརམྨཎཔྤཝཏྟིཏོཏི ཨཏྠོ. སམྦྷཝནྟསྶེཝ ཧི པཊིསེདྷོ, ན ཨསམྦྷཝནྟསྶ. པཊིཀྐམྨཱཏི ནིཝཏྟེཏྭཱ ཏཐཱ ཙིཏྟཾ ཨནུཔྤཱདེཏྭཱ. སལླཱིནོཏི ཛྷཱནསམཱཔཏྟིཡཱ ཨེཀཏྟཱརམྨཎཾ ཨལླཱིནོ. ནིལཱིནོཏི ཏསྶེཝ ཝེཝཙནཾ. ཏེན ཝུཏྟཾ ‘‘ཨེཀཱིབྷཱཝ’’ནྟིཨཱདི. སཔརིཝཱརཏྟཱ ཨནེཀོཔི ཏདཱ ཨེཀོ ཝིཡ བྷཝཏཱིཏི ཨེཀཱིབྷཱཝོ, ཏཾ ཨེཀཱིབྷཱཝཾ. ཡེནཱཡསྨཱ ནཱགིཏོ, ཏཾ སནྡྷཱཡ ‘‘ཏསྨཱ ཋཱནཱ’’ཏི ཝུཏྟཾ.

ཨོཊྛདྡྷལིཙྪཝིཝཏྠུཝཎྞནཱ

༣༦༡. ཨདྡྷོཊྛཏཱཡཱཏི ཨུཔཌྜྷོཊྛཏཱཡ. ཏསྶ ཀིར ཨུཏྟརོཊྛསྶ ཨཔྤཀཏཱཡ ཏིརིཡཾ ཕཱལེཏྭཱ ཨདྡྷམཔནཱིཏཾ ཝིཡ ཁཱཡཏི ཙཏྟཱརོ དནྟེ, དྭེ ཙ དཱཋཱ ན ཚཱདེཏི, ཏེན ནཾ ‘‘ཨོཊྛདྡྷོ’’ཏི ཝོཧརཏི. ཀེཙི པན ‘‘ཨདྷོ-སདྡེན པཱཋཾ པརིཀཔྤེཏྭཱ ཧེཊྛཱ ཨོཊྛསྶ ཨོལམྦཀཏཱཡ ‘‘ཨོཊྛཱདྷོ’’ཏི ཨཏྠཾ ཝདནྟི, ཏདཡུཏྟམེཝ ཏཐཱ པཱཋསྶ ཨདིསྶནཏོ, ཨཱཙརིཡེན ¶ (དཱི. ནི. ཊཱི. ༡.༣༦༡) ཙ ཨཝཎྞིཏཏྟཱ. ཨཡཾ ཀིར ཨུཔོསཐིཀོ དཱཡཀོ དཱནཔཏི ¶ སདྡྷོ པསནྣོ བུདྡྷམཱམཀོ དྷམྨསངྒྷམཱམཀོ. ཏེནཱཧ ‘‘པུརེབྷཏྟ’’ནྟིཨཱདི. ཁནྡྷཀེ, (མཧཱཝ. ༢༨༩) མཧཱཔརིནིབྦཱནསུཏྟེ (དཱི. ནི. ༢.༡༦༡) ཙ ཨཱགཏནཡེན ‘‘ནཱིལཔཱིཏཱདི…པེ… ཏཱཝཏིཾསཔརིསསཔྤཊིབྷཱགཱཡཱ’’ཏི ཝུཏྟཾ. ཨཡཾ པན ཝེསཱལཱི བྷགཝཏོ ཀཱལེ ཨིདྡྷཱ ཙེཝ ཝེཔུལླཔྤཏྟཱ ཙ ཨཧོསི. ཏཏྠ ཧི རཱཛཱུནམེཝ སཏྟ སཧསྶཱནི, སཏྟ སཏཱནི, སཏྟ ཙ རཱཛཱནོ ཨཧེསུཾ, ཏཐཱ ཡུཝརཱཛསེནཱཔཏིབྷཎྜཱགཱརིཀཔབྷུཏཱིནམྤི, པཱསཱདཀཱུཊཱགཱརཨཱརཱམཔོཀྑརཎིཨཱདཡོཔི ཏཔྤརིམཱཎཱཡེཝ, བཧུཛནཱ, ཨཱཀིཎྞམནུསྶཱ, སུབྷིཀྑཱ ཙ. ཏེན ཝུཏྟཾ ‘‘མཧཏིཡཱ ལིཙྪཝིཔརིསཱཡཱ’’ཏི. ཏསྶ པན ཀུལསྶ ཨཱདིབྷཱུཏཱནཾ ཡཐཱཝུཏྟཱནཾ མཾསཔེསིཡཱ ནིབྦཏྟདཱརཀཱནཾ ཏཱཔསེན པཱཡིཏཾ ཡཾ ཁཱིརཾ ཨུདརཾ པཝིསཏི, སབྦཾ ཏཾ མཎིབྷཱཛནགཏཾ ཝིཡ དིསྶཏི, ཙརིམཀབྷཝེ བོདྷིསཏྟེ ཀུཙྪིགཏེ བོདྷིསཏྟམཱཏུ ཝིཡ ཨུདརཙྪཝིཡཱ ཨཏིཝིཔྤསནྣཏཱཡ ཏེ ནིཙྪཝཱི ཨཧེསུཾ. ཨཔརེ པནཱཧུ ‘‘སིབྦེཏྭཱ ཋཔིཏཱ ཝིཡ ནེསཾ ཨཉྙམཉྙཾ ལཱིནཱ ཚཝི ཨཧོསཱི’’ཏི. ཨེཝཾ ཏེ ནིཙྪཝིཏཱཡ ཝཱ ལཱིནཙྪཝིཏཱཡ ཝཱ ལིཙྪཝཱིཏི པཉྙཱཡིཾསུ, ནིརུཏྟིནཡེན ཙེཏྠ པདསིདྡྷི, ཏབྦཾསེ ཨུཔྤནྣཱ སབྦེཔི ལིཙྪཝཡོ ནཱམ ཛཱཏཱ. ཏེནཱཧ ‘‘ལིཙྪཝིཔརིསཱཡཱ’’ཏི, ལིཙྪཝིརཱཛཱུནཾ, ལིཙྪཝིཝཾསབྷཱུཏཱཡ ཝཱ པརིསཱཡཱཏི ཨཏྠོ. མཧནྟཾ ཡསཾ ལཱཏི གཎྷཱཏཱིཏི མཧཱལི ཡཐཱ ‘‘བྷདྡཱལཱི’’ཏི. མཱུལནཱམནྟི མཱཏཱཔིཏཱུཧི ཀཏནཱམཾ.

༣༦༢. སཱསནེ ཡུཏྟཔཡུཏྟོཏི བྷཱཝནམནུཡུཏྟོ. སབྦཏྠ སཱིཧསམཱནཝུཏྟིནོཔི བྷགཝཏོ པརིསཱཡ མཧཏྟེ སཏི ཏདཛ྄ཛྷཱསཡཱནུརཱུཔཾ པཝཏྟིཡམཱནཱཡ དྷམྨདེསནཱཡ ཝིསེསོ ཧོཏཱིཏི ཨཱཧ ‘‘མཧནྟེན ཨུསྶཱཧེན དྷམྨཾ དེསེསྶཏཱི’’ཏི.