📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

མཛ྄ཛྷིམནིཀཱཡེ

མཛ྄ཛྷིམཔཎྞཱསཊཱིཀཱ

༡. གཧཔཏིཝགྒོ

༡. ཀནྡརཀསུཏྟཝཎྞནཱ

༡. ཨཱརཱམཔོཀྑརཎཱིཨཱདཱིསཱུཏི ¶ ¶ ཨཱརཱམཔོཀྑརཎཱིཨུཡྻཱནཙེཏིཡཊྛཱནཱདཱིསུ. ཨུསྶནྣཱཏི བཧུལཱ. ཨསོཀཀཎིཀཱརཀོཝིལཱ༹རཀུམྦྷཱིརཱཛརུཀྑེཧི སམྨིསྶཏཱཡ ཏཾ ཙམྤཀཝནཾ ནཱིལཱདིཔཉྩཝཎྞཀུསུམཔཊིམཎྜིཏནྟི དཊྛབྦཾ, ན ཙམྤཀརུཀྑཱནཾཡེཝ ནཱིལཱདིཔཉྩཝཎྞཀུསུམཏཱཡཱཏི ཝདནྟི. བྷགཝཱ ཀུསུམགནྡྷསུགནྡྷེ ཙམྤཀཝནེ ཝིཧརཏཱིཏི ཨིམིནཱ ན མཱཔནཀཱལེ ཨེཝ ཏསྨིཾ ནགརེ ཙམྤཀརུཀྑཱ ཨུསྶནྣཱ, ཨཐ ཁོ ཨཔརབྷཱགེཔཱིཏི དསྶེཏི. ‘‘པཉྩསཏམཏྟེཧི ཨཌྜྷཏེལ༹སེཧཱི’’ཏི ཨེཝཾ ཨདསྶིཏཔརིཙྪེདེན. ཧཏྠིནོ ཙཱརེཏི སིཀྑཱཔེཏཱིཏི ཧཏྠཱཙརིཡོ ཧཏྠཱིནཾ སིཀྑཱཔཀོ, ཏསྶ པུཏྟོཏི ཨཱཧ ‘‘ཧཏྠཱཙརིཡསྶ པུཏྟོ’’ཏི. ཏདཱ བྷགཝཱ ཏེསཾ པསཱདཛནནཏྠཾ ཨཏྟནོ བུདྡྷཱནུབྷཱཝཾ ཨནིགུཧིཏྭཱཝ ནིསིནྣོཏི དསྶེནྟོ ‘‘ཚབྦཎྞཱནཾ གྷནབུདྡྷརསྨཱིན’’ནྟིཨཱདིམཱཧ. བྷགཝཏོ ཙེཝ གཱརཝེནཱཏི བྷགཝཏོ གརུབྷཱཝེན, བྷགཝཏི གཱརཝེནཱཏི ཝཱ པཱཋོ.

ནིཙྩཾ ¶ ན ཧོཏཱིཏི ཨབྷིཎྷཾ ན ཧོཏི, ཀདཱཙིདེཝ ཧོཏཱིཏི ཨཏྠོ. ཨབྷིཎྷནིཙྩཏཱ ཧི ཨིདྷ ཨདྷིཔྤེཏཱ, ན ཀཱུཊཊྛནིཙྩཏཱ. ལོཀེ ཀིཉྩི ཝིམྷཡཱཝཧཾ དིསྭཱ ཧཏྠཝིཀཱརམྤི ཀརོནྟི, ཨངྒུལིཾ ཝཱ ཕོཊཡནྟི, ཏཾ སནྡྷཱཡ ཝུཏྟཾ ¶ ‘‘ཨཙྪརཾ པཧརིཏུཾ ཡུཏྟ’’ནྟི. ཨབྷཱུཏཔུབྦཾ བྷཱུཏནྟི ཨཡཾ ནིརུཏྟིནཡོ ཡེབྷུཡྻེན ཨུཔཱདཱཡ རུལ༹ྷཱིཝསེན ཝུཏྟོཏི ཝེདིཏབྦོ. ཏཐཱ ཧི པཱལི༹ཡཾ ‘‘ཡེཔི ཏེ, བྷོ གོཏམ, ཨཧེསུཾ ཨཏཱིཏམདྡྷཱན’’ནྟིཨཱདི ཝུཏྟཾ, ཀིཉྩི ཨཀཏྟབྦམྤི ཀརིཡམཱནཾ དུཀྐརབྷཱཝེན ཝིམྷཡཱཝཧཾ ཧོཏི, ཏཐཱ ཀིཉྩི ཀཏྟབྦཾ, པུརིམཾ གརཧཙྪརིཡཾ, པཙྪིམཾ པསཾསཙྪརིཡཾ, ཏདུབྷཡཾ སུཏྟཔདསོ དསྶེཏུཾ ‘‘ཏཏྠཱ’’ཏིཨཱདི ཝུཏྟཾ.

སམྨཱ པཊིཔཱདིཏོཏི སམྨཱཔཊིཔདཱཡཾ ཋཔིཏོ. ཨེསཱ པཊིཔདཱ པརམཱཏི ཨེཏཔརམཾ, བྷཱཝནཔུཾསཀནིདྡེསོཡཾ ཡཐཱ ‘‘ཝིསམཾ ཙནྡིམསཱུརིཡཱ པརིཝཏྟནྟཱི’’ཏི (ཨ. ནི. ༤.༧༠). ཨཡཉྷེཏྠ ཨཏྠོ – བྷགཝཱ བྷིཀྑུསངྒྷོ པཊིཔདཱཡ ཏུམྷེཧི པཊིཔཱདིཏོ, ཨཏཱིཏེཔི ཀཱལེ བུདྡྷཱ ཨེཏཔརམཾཡེཝ བྷིཀྑུསངྒྷཾ སམྨཱ པཊིཔཱདེསུཾ, ཨནཱགཏེཔི ཀཱལེ ཨེཏཔརམཾཡེཝ བྷིཀྑུསངྒྷཾ སམྨཱ པཊིཔཱདེསྶནྟཱིཏི པརིབྦཱཛཀོ ནཡགྒཱཧེན དིཊྛེན ཨདིཊྛཾ ཨནུམིནནྟོ སབྦེསམྤི བུདྡྷཱནཾ སཱསནེ སངྒྷསུཔྤཊིཔཏྟིཾ མཛ྄ཛྷེ བྷིནྣསུཝཎྞཾ ཝིཡ སམསམཾ ཀཏྭཱ དསྶེཏི, ཨེཝཾ དསྶེནྟོ ཙ ཏེསཾ སུདྷམྨཏཉྩ ཏཐཱ དསྶེཏི ཨེཝཱཏི ཝེདིཏབྦོ, བུདྡྷསུབུདྡྷཏཱ པན ནེསཾ སརཱུཔེནེཝ དསྶིཏཱཏི. ན ཨིཏོ བྷིཡྻོཏི ཨིམིནཱ པཱལི༹ཡཾ ཨེཏཔརམཾཡེཝཱཏི ཨཝདྷཱརཎེན ནིཝཏྟིཏཾ དསྶེཏི སཱིལཔདཊྛཱནཏྟཱ སམཱདྷིསྶ, སམཱདྷིཔདཊྛཱནཏྟཱ ཙ པཉྙཱཡ སཱིལེཔི ཙ ཨབྷིསམཱཙཱརིཀཔུབྦཀཏྟཱ ཨཱདིབྲཧྨཙརིཡཀསྶ ཝུཏྟཾ ‘‘ཨཱབྷིསམཱཙཱརིཀཝཏྟཾ ཨཱདིཾ ཀཏྭཱ’’ཏི.

༢. པུཙྪཱནུསནྡྷིཨཱདཱིསུ ཨནནྟོགདྷཏྟཱ ‘‘པཱཊིཨེཀྐོ ཨནུསནྡྷཱི’’ཏི ཝཏྭཱ ཏམེཝཏྠཾ པཱཀཊཾ ཀཱཏུཾ ‘‘བྷགཝཱ ཀིརཱ’’ཏིཨཱདི ཝུཏྟཾ. ཨུཔསནྟཀཱརཎནྟི ཨུཔསནྟབྷཱཝཀཱརཎཾ. ཏཉྷི ཨརིཡཱནཾཡེཝ ཝིསཡོ, ཏཏྠཱཔི ཙ བུདྡྷཱནཾ ཨེཝ ཨནཝསེསཏོ ཝིསཡོཏི ཨིམམཏྠཾ བྱཏིརེཀཏོ ཨནྭཡཏོ ཙ དསྶེཏུཾ ན ཧི ཏྭནྟིཨཱདི ཝུཏྟཾ. ཏཏྠ ཉཱཏཏྠཙརིཡཱ ཀཱཀཛཱཏཀཱདིཝསེན ཝེདིཏབྦཱ, ལོཀཏྠཙརིཡཱ ཏཾཏཾཔཱརམིཔཱུརཎཝསེན, བུདྡྷཏྠཙརིཡཱ མཧཱབོདྷིཛཱཏཀཱདིཝསེན. ཨཙྪརིཡཾ བྷོ གོཏམཱཏིཨཱདིནཱ ཀནྡརཀེན ཀཏཾ པསཱདཔཝེདནཾ དསྶེཏི.

ཡེཔི ཏེཏིཨཱདིནཱ ཏེན ཝུཏྟམཏྠཾ པཙྩནུབྷཱསནྟེན བྷགཝཏཱ སམྤཊིཙྪིཏནྟི ཙརིཏཏྟཱ ཨཱཧ – ‘‘སནྟི ཧི ཀནྡརཀཱཏི ཨཡམྤི པཱཊིཡེཀྐོ ཨནུསནྡྷཱི’’ཏི ¶ . ཡོ ཧི ཀནྡརཀེན བྷིཀྑུསངྒྷསྶ ཨུཔསནྟབྷཱཝོ ཀིཏྟིཏོ, ཏཾ ཝིབྷཛིཏྭཱ དསྶེནྟོཔི ཏེན ཨཔུཙྪིཏོཡེཝ ཨཏྟནོ ཨཛ྄ཛྷཱསཡེན བྷགཝཱ ‘‘སནྟི ཧཱི’’ཏིཨཱདིནཱ དེསནཾ ཨཱརབྷི. ཏེནཱཧ ‘‘བྷགཝཏོ ཀིར ཨེཏདཧོསཱི’’ ¶ ཏིཨཱདི. ཀཔྤེཏྭཱཏི ཨཉྙཐཱ སནྟམེཝ ཨཏྟཱནཾ ཨཉྙཐཱ ཝིདྷཱཡ. པཀཔྤེཏྭཱཏི སནིདསྶནཝསེན གཧེཏྭཱ. ཏེནཱཧ ‘‘ཀུཧཀབྷཱཝེནཱ’’ཏིཨཱདི. པཊིཔདཾ པཱུརཡམཱནཱཏི ཀཱམཾ ཨཝིསེསེན སེཀྑཱ ཝུཙྩནྟི, ཏེ པན ཨདྷིགཏམགྒཝསེན ‘‘པཱུརཡམཱནཱ’’ཏི ན ཝཏྟབྦཱ ཀིཙྩསྶ ནིཊྛིཏཏྟཱ. མགྒོ ཧི ཨེཀཙིཏྟཀྑཎིཀོཏི ཨཱཧ ‘‘ཨུཔརིམགྒསྶ ཝིཔསྶནཱཡ ཨུཔསནྟཱ’’ཏི. ཨིཏོ མུཏྟཱཏི མགྒེནཱགཏཱུཔསམཏོ མུཏྟཱ. ཀལྱཱཎཔུཐུཛྫནེ སནྡྷཱཡ ཝདཏི. ཏེནཱཧ ‘‘ཙཏཱུཧི སཏིཔཊྛཱནེཧི ཨུཔསནྟཱ’’ཏི.

སཏཏསཱིལཱཏི ཨཝིཙྪིནྣསཱིལཱ. སཱཏིསཡོ ཧི ཨེཏེསཾ སཱིལསྶ ཨཁཎྜཱདིབྷཱཝོ. སུཔརིསུདྡྷསཱིལཏཱཝསེན སནྟཏཱ ཝུཏྟི ཨེཏེསནྟི སནྟཏཝུཏྟིནོཏི ཨཱཧ ‘‘ཏསྶེཝ ཝེཝཙན’’ནྟི. ཨེཝཾ སཱིལཝུཏྟིཝསེན ‘‘སནྟཏཝུཏྟིནོ’’ཏི པདསྶ ཨཏྠཾ ཝཏྭཱ ཨིདཱནི ཛཱིཝིཏཝུཏྟིཝསེན དསྶེནྟོ ‘‘སནྟཏཛཱིཝིཀཱཝཱཏི ཨཏྠོ’’ཏི ཨཱཧ. སཱསནསྶ ཛཱིཝིཏཝུཏྟི སཱིལསནྣིསྶིཏཱ ཨེཝཱཏི ཨཱཧ ‘‘ཏསྨི’’ནྟིཨཱདི.

ནིཔཡཏི ཝིསོསེཏི རཱགཱདིསཾཀིལེསཾ, ཏཏོ ཝཱ ཨཏྟཱནཾ ནིཔཱཏཱིཏི ནིཔཀོ, པཉྙཝཱ. ཏེནཱཧ ‘‘པཉྙཝནྟོ’’ཏི. པཉྙཱཡ ཋཏྭཱ ཛཱིཝིཀཱཀཔྤནཾ ནཱམ བུདྡྷཔཊིཀུཊྛམིཙྪཱཛཱིཝཾ པཧཱཡ སམྨཱཛཱིཝེན ཛཱིཝནནྟི ཏཾ དསྶེནྟོ ‘‘ཡཐཱ ཨེཀཙྩོ’’ཏིཨཱདིམཱཧ. ཏཏྠ ཡཾ ཝཏྟབྦཾ, ཏཾ ཝིསུདྡྷིམགྒེ (ཝིསུདྡྷི. ༡.༡༤) ཏཾསཾཝཎྞནཱཡཉྩ (ཝིསུདྡྷི. མཧཱཊཱི. ༡.༡༤) ཝུཏྟནཡེནེཝ ཝེདིཏབྦཾ. རཐཝིནཱིཏཔཊིཔདཱདཡོ ཏེསུ ཏེསུ སུཏྟེསུ ཝུཏྟནཡེན ཝེདིཏབྦཱ. ཨིཏོ ཨཉྙཏྠ མཧཱགོཔཱལཀསུཏྟཱདཱིསུ (མ. ནི. ༡.༣༤༦ ཨཱདཡོ) ལོཀུཏྟརསཏིཔཊྛཱནཱ ཀཐིཏཱཏི ཨཱཧ – ‘‘ཨིདྷ པན ལོཀིཡལོཀུཏྟརམིསྶཀཱ སཏིཔཊྛཱནཱ ཀཐིཏཱ’’ཏི, སཏིཔཊྛཱནསུཏྟེཔི (དཱི. ནི. ༢.༣༧༣-༣༧༤; མ. ནི. ༡.༡༠༦ ཨཱདཡོ) ཝོམིསྶཀཱཝ ཀཐིཏཱཏི. ཨེཏྟཀེནཱཏི ཨེཏྟཀཱཡ དེསནཱཡ.

༣. ཀཱརཀབྷཱཝནྟི ¶ པཊིཔཏྟིཡཾ པཊིཔཛྫནཀབྷཱཝཾ. མཡམྤི ནཱམ གིཧཱི བཧུཀིཙྩཱ སམཱནཱ ཀཱལེན ཀཱལཾ སཏིཔཊྛཱནེསུ སུཔྤཏིཊྛིཏཙིཏྟཱ ཝིཧརཱམ, ཀིམངྒཾ པན ཝིཝེཀཝཱསིནོཏི ཨཏྟནོ ཀཱརཀབྷཱཝཾ པཝེདེནྟོ ཨེཝཾ བྷིཀྑུསངྒྷཉྩ ཨུཀྑིཔཏི. ཏེནཱཧ ‘‘ཨཡཉྷེཏྠ ཨདྷིཔྤཱཡོ’’ཏིཨཱདི. ནཱནཱརམྨཎེསུ ཨཔརཱཔརཾ ཨུཔྤཛྫམཱནཱནཾ རཱགཱདིཀིལེསཱནཾ གྷནཛཊིཏསངྑཱཏཱཀཱརེན པཝཏྟི ཀིལེསགཧནེན གཧནཏཱ, ཏེནཱཧ ‘‘ཨནྟོ ཛཊཱ བཧི ཛཊཱ, ཛཊཱཡ ཛཊིཏཱ པཛཱ’’ཏི (སཾ. ནི. ༡.༢༣, ༡༩༢). མནུསྶཱནཾ ཨཛ྄ཛྷཱསཡགཧཎེན སཱཋེཡྻམྤཱིཏི དསྶེནྟོ ཨཱཧ ‘‘ཀསཊསཱཋེཡྻེསུཔི ཨེསེཝ ནཡོ’’ཏི. ཡཐཱ སཔྤིམདྷུཕཱཎིཏཱདཱིསུ ཀཙཝརབྷཱཝོ, ¶ སོ ཀསཊོཏི ཝུཙྩཏི, ཨེཝཾ སནྟཱནེ ཨཔརིསུདྡྷོ སཾཀིལེསབྷཱཝོ ཀསཊནྟི ཨཱཧ ‘‘ཨཔརིསུདྡྷཊྛེན ཀསཊཏཱ’’ཏི. ཨཏྟནི ཨསནྟགུཎསམྦྷཱཝནཾ ཀེརཱཊིཡཊྛོ. ཛཱནཱཏཱིཏི ‘‘ཨིདཾ ཨཧིཏཾ ན སེཝིཏབྦཾ, ཨིདཾ ཧིཏཾ སེཝིཏབྦ’’ནྟི ཝིཙཱརེཏི དེསེཏི. ཝིཙཱརཎཏྠོཔི ཧི ཧོཏི ཛཱནཱཏི-སདྡོ ཡཐཱ ‘‘ཨཱཡསྨཱ ཛཱནཱཏཱི’’ཏི. སབྦཱཔི…པེ… ཨདྷིཔྤེཏཱ ‘‘པསུཔཱལཀཱ’’ཏིཨཱདཱིསུ ཝིཡ. ཨིདྷ ཨནྟར-སདྡོ ‘‘ཝིཛྫནྟརིཀཱཡཱ’’ཏིཨཱདཱིསུ (མ. ནི. ༢.༡༤༩) ཝིཡ ཁཎཏྠོཏི ཨཱཧ ‘‘ཡཏྟཀེན ཁཎེནཱ’’ཏི. ཏེནཱཏི ཧཏྠིནཱ. ཏཱནཱིཏི སཱཋེཡྻཱདཱིནི.

ཨཏྠཏོ ཀཱཡཙིཏྟུཛུཀཏཱཔཊིཔཀྑབྷཱུཏཱཝ ལོབྷསཧགཏཙིཏྟུཔྤཱདསྶ པཝཏྟིཨཱཀཱརཝིསེསཱཏི ཏཱནི པཝཏྟིཨཱཀཱརེན དསྶེཏུཾ ‘‘ཏཏྠཱ’’ཏིཨཱདི ཝུཏྟཾ. ཏཏྠ ཡསྶཱཏི པཱཎབྷཱུཏསྶ ཨསྶསྶ ཝཱ ཧཏྠིནོ ཝཱ. ཋསྶཱམཱིཏི ཏཏྠེཝ སཔྤཊིབྷཡེ ཋཱནེ གནྟྭཱ ཋསྶཱམཱིཏི ན ཧོཏི. ཨིམསྶ སཱཋེཡྻཏཱཡ པཱཀཊཀརཎཾ ཝཉྩནཱདྷིཔྤཱཡབྷཱཝཏོ. ཏཐཱ ཧི ཙཏཱུསུ ཋཱནེསུ ‘‘ཝཉྩེཏྭཱ’’ ཨིཙྩེཝ ཝུཏྟཾ, ནིགུཧནྟོ པན ཏཏྠེཝ གནྟྭཱ ཏིཊྛེཡྻ. ཨེས ནཡོ སེསེསུཔི. པཊིམགྒཾ ཨཱརོཧིཏུཀཱམསྶཱཏི ཨཱགཏམགྒམེཝ ནིཝཏྟིཏྭཱ གནྟུཀཱམསྶ. ལེཎྜཝིསྶཛྫནཱདཱིསུ ཀཱལནྟརཱཔེཀྑཱབྷཱཝཾ ‘‘ཏཐཱ’’ཏི ཨིམིནཱ ཨུཔསཾཧརཏི.

ཨནྟོཛཱཏཀཱཏི ཨཏྟནོ དཱསིཡཱ ཀུཙྪིམྷི ཛཱཏཱ. དྷནཀྐཱིཏཱཏི དྷནཾ དཏྭཱ དཱསབྷཱཝེན གཧིཏཱ. ཀརམརཱནཱིཏཱཏི དཱསབྷཱཝེན ཀརམརགྒཱཧགཧིཏཱ. དཱསབྱནྟི དཱསབྷཱཝཾ. པེསྶཱཏི ཨདཱསཱ ཨེཝ ཧུཏྭཱ ཝེཡྻཱཝཙྩཀརཱ. ཨིམཾ ཝིསྶཛྫེཏྭཱཏི ཨིམཾ ཨཏྟནོ ཧཏྠགཏཾ ཝིསྶཛྫེཏྭཱ. ཨིམཾ ¶ གཎྷནྟཱཏི ཨིམཾ ཏསྶ ཧཏྠགཏཾ གཎྷནྟཱ. སམྨུཁཏོ ཨཉྙཐཱ པརམྨུཁཀཱལེ ཀཱཡཝཱཙཱསམུདཱཙཱརདསྶནེནེཝ ཙིཏྟསྶ ནེསཾ ཨཉྙཐཱ ཋིཏབྷཱཝོ ནིདྡིཊྛོཏི ཝེདིཏབྦོ.

༤. ཨཡམྤི པཱཊིཡེཀྐོ ཨནུསནྡྷཱིཏི ཨེཏྠཱཔི ཨནནྟརེ ཝུཏྟནཡེནེཝ ཨནུསནྡྷིཡོཛནཱ ཝེདིཏབྦཱ. ཏེནེཝཱཧ ‘‘ཨཡཉྷཱི’’ཏིཨཱདི. ཙཏུཏྠོ ཧིཏཔཊིཔདཾ པཊིཔནྣོཏི ཡོཛནཱ. པུགྒལསཱིསེན པུགྒལཔཊིཔཏྟིཾ དསྶེནྟོ ‘‘པུགྒལེ པཧཱཡཱ’’ཏི ཨཱཧ. པཊིཔཏྟི ཧི ཨིདྷ པཧཱཏབྦཱ, ན པུགྒལཱ. ཡཐཱ ཨསྶདྡྷཱདིཔུགྒལཔརིཝཛྫནེན སདྡྷིནྡྲིཡཱདིབྷཱཝནཱ ཨིཛ྄ཛྷནྟི, ཨེཝཾ མིཙྪཱཔཊིཔནྣཔུགྒལཔརིཝཛྫནེན མིཙྪཱཔཊིཔདཱ ཝཛྫིཏབྦཱཏི ཨཱཧ – ‘‘པུརིམེ ཏཡོ པུགྒལེ པཧཱཡཱ’’ཏི. ཙཏུཏྠཔུགྒལསྶཱཏི ཨིམསྨིཾ ཙཏུཀྐེ ཝུཏྟཙཏུཏྠཔུགྒལསྶ ཧིཏཔཊིཔཏྟིཡཾཡེཝ པཊིཔཱདེམི པཝཏྟེམཱིཏི དསྶེནྟོ. སནྟཱཏི སམཾ ཝིནཱསཾ ནིརོདྷཾ པཏྟཱཏི ཨཡམེཏྠ ཨཏྠོཏི ཨཱཧ ‘‘ནིརུདྡྷཱ སནྟཱཏི ཝུཏྟཱ’’ཏི. པུན སནྟཱཏི བྷཱཝནཱཝསེན ཀིལེསཔརིལཱ༹ཧཝིགམཏོ སནྟཱཏི ¶ ཨཡམེཏྠ ཨཏྠོཏི ཨཱཧ ‘‘ནིབྦུཏཱ’’ཏི. སནྟཱཏི ཨཱནེཏྭཱ ཡོཛནཱ. སནྟོ ཧཝེཏི ཨེཏྠ སམབྷཱཝཀརེན སཱདྷུབྷཱཝསྶ ཝིསེསཔཙྩཡབྷཱུཏེན པཎྜིཙྩེན སམནྣཱགཏཱ ཨརིཡཱ ‘‘སནྟོ’’ཏི ཝུཏྟཱཏི ཨཱཧ – ‘‘སནྟོ ཧཝེ…པེ… པཎྜིཏཱ’’ཏི.

ཨཱཧིཏོ ཨཧཾམཱནོ ཨེཏྠཱཏི ཨཏྟཱ (ཨ. ནི. ཊཱི. ༢.༤.༡༩༨) ཨཏྟབྷཱཝོ, ཨིདྷ པན ཡོ པརོ ན ཧོཏི, སོ ཨཏྟཱ, ཏཾ ཨཏྟཱནཾ. པརནྟི ཨཏྟཏོ ཨཉྙཾ. ཚཱཏཾ ཝུཙྩཏི ཏཎྷཱ ཛིགྷཙྪཱཧེཏུཏཱཡ. ཨནྟོ ཏཱཔནཀིལེསཱནནྟི ཨཏྟནོ སནྟཱནེ ཨཏྟཔརིལཱ༹ཧཛནནསནྟཔྤནཀིལེསཱནཾ. ཙིཏྟཾ ཨཱརཱདྷེཏཱིཏི ཙིཏྟཾ པསཱདེཏི, སམྤཧཾསེཏཱིཏི ཨཏྠོ. ཡསྨཱ པན ཏཐཱབྷཱུཏོ ཙིཏྟཾ སམྤཱདེནྟོ ཨཛ྄ཛྷཱསཡཾ གཎྷནྟོ ནཱམ ཧོཏི, ཏསྨཱ ཝུཏྟཾ ‘‘ཙིཏྟཾ སམྤཱདེཏཱི’’ཏིཨཱདི.

༥. དུཀྑཾ པཊིཀྐཱུལཾ ཛེགུཙྪཾ ཨེཏསྶཱཏི དུཀྑཔཊིཀྐཱུལོ ཏཾ དུཀྑཔཊིཀྐཱུལཾ. ཝིསེསནཝིསེསིཏབྦཏཱ ཧི ཀཱམཙཱརཱ. ཨཊྛཀཐཱཡཾ པན དུཀྑསྶ ཝིསེསིཏབྦཏཾ སནྡྷཱཡ བཱཧིརཏྠསམཱསཾ ཨནཱདིཡིཏྭཱ ‘‘དུཀྑསྶ པཊིཀྐཱུལ’’ནྟི ཨཏྠོ ཝུཏྟོ. ཡེན ཧི བྷཱགེན པུརིསསྶ དུཀྑཾ པཊིཀྐཱུལཾ, ཏེན དུཀྑསྶ པུརིསོཔཱིཏི. ཏེནཱཧ – ‘‘པཙྩནཱིཀསཎྛིཏ’’ནྟི.

༦. ཙཏཱུཧི ¶ ཀཱརཎེཧཱིཏི དྷཱཏུཀུསལཏཱདཱིཧི ཙཏཱུཧི ཀཱརཎེཧི. ཀམྨཾ ཀརོཏཱིཏི ཡོགཀམྨཾ ཀརོཏི. ཡསྨཱ སམྦུདྡྷཱ པརེསཾ མགྒཕལཱདྷིགམཱཡ ཨུསྶཱཧཛཱཏཱ, ཏཏྠ ནིརནྟརཾ ཡུཏྟཔྤཡུཏྟཱ ཨེཝ ཧོནྟི, ཏེ པཊིཙྩ ཏེསཾ ཨནྟརཱཡོ ན ཧོཏིཡེཝཱཏི ཨཱཧ ‘‘ན པན བུདྡྷེ པཊིཙྩཱ’’ཏི. ཀིརིཡཔརིཧཱནིཡཱ དེསཀསྶ ཏསྶེཝ ཝཱ པུགྒལསྶ ཏཛྫཔཡོགཱབྷཱཝཏོ. ‘‘དེསཀསྶ ཝཱ’’ཏི ཨིདཾ སཱཝཀཱནཾ ཝསེན དཊྛབྦཾ. མཧཏཱ ཨཏྠེནཱཏི ཨེཏྠ ཨཏྠ-སདྡོ ཨཱནིསཾསཔརིཡཱཡོཏི ཨཱཧ ‘‘དྭཱིཧི ཨཱནིསཾསེཧཱི’’ཏི. པསཱདཾ པཊིལབྷཏི ‘‘ཨརཧནྟོ’’ཏིཨཱདིནཱ སངྒྷསུཔྤཊིཔཏྟིཡཱ སུཏཏྟཱ. ཨབྷིནཝོ ནཡོ ཨུདཔཱདི སནྟཏསཱིལཏཱདིཝསེན ཨནཏྟནྟཔཏཱདིཝསེན, སོཔི ཏཾ སུཏྭཱ དཱསཱདཱིསུ སཝིསེསཾ ལཛྫཱི དཡཱཔནྣོ ཧིཏཱནུཀམྤཱི ཧུཏྭཱ སེཀྑཔཊིཔདཾ སཱིལཾ སཱདྷེནྟོ ཨནུཀྐམེན སཏིཔཊྛཱནབྷཱཝནཾ པརིབྲཱུཧེཏི. ཏེནཱཧ བྷགཝཱ ‘‘མཧཏཱ ཨཏྠེན སཾཡུཏྟོ’’ཏི.

༨. པརེསཾ ཧནནགྷཱཏནཱདིནཱ རོདཱཔནཏོ ལུདྡོ, ཏཐཱ ཝིགྷཱཏཀབྷཱཝེན ཀཱཡཙིཏྟཱནཾ ཝིདཱརཎཏོ དཱརུཎོ, ཝིརུདྡྷཝཱདཏཱཡ ཀཀྑལོ༹, བནྡྷནཱགཱརེ ནིཡུཏྟོ བནྡྷནཱགཱརིཀོ.

༩. ཁཏྟིཡཱབྷིསེཀེནཱཏི ¶ ཁཏྟིཡཱནཾ ཀཏྟབྦཨབྷིསེཀེན. སནྠཱགཱརནྟི སནྠཱརཝསེན ཀཏཾ ཨགཱརཾ ཡཉྙཱཝཱཊཾ. སཔྤིཏེལེནཱཏི སཔྤིམཡེན ཏེལེན, ཡམཀསྣེཧེན ཧི ཏདཱ ཀཱཡཾ ཨབྦྷཉྫཏི. ཝཙྪབྷཱཝཾ ཏརིཏྭཱ ཋིཏོ ཝཙྪཏརོ. པརིཀྑེཔཀརཎཏྠཱཡཱཏི ཝནམཱལཱཧི སདྡྷིཾ དབྦྷེཧི ཝེདིཡཱ པརིཀྑེཔནཏྠཱཡ. ཡཉྙབྷཱུམིཡནྟི ཨཝསེསཡཉྙཊྛཱནེ. ཡཾ པནེཏྠ ཨཏྠཏོ ཨཝིབྷཏྟཾ ཏཾ སུཝིཉྙེཡྻམེཝ.

ཀནྡརཀསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༢. ཨཊྛཀནཱགརསུཏྟཝཎྞནཱ

༡༧. ཨཝིདཱུརེཏི ¶ ¶ ཨིམིནཱ པཱལི༹ཡཾ ‘‘ཝེསཱལིཡ’’ནྟི ཨིདཾ སམཱིཔེ བྷུམྨཝཙནནྟི དསྶེཏི. སཱརཔྤཏྟཀུལགཎནཱཡཱཏི (ཨ. ནི. ཊཱི. ༣.༡༡.༡༦) མཧཱསཱརམཧཔྤཏྟཀུལགཎནཱཡ. དསམེ ཋཱནེཏི ཨཉྙེ ཨཉྙེཏི དསགཎནཊྛཱནེ. ཨཊྛཀནགརེ ཛཱཏོ བྷཝོ ཨཊྛཀནཱགརོ. ཀུཀྐུཊཱརཱམོཏི པཱཊལིཔུཏྟེ ཀུཀྐུཊཱརཱམོ, ན ཀོསམྦིཡཾ.

༡༨. པཀཏཏྠནིདྡེསོ ཏ-སདྡོཏི ཏསྶ ‘‘བྷགཝཏཱ’’ཏིཨཱདཱིཧི པདེཧི སམཱནཱདྷིཀརཎབྷཱཝེན ཝུཏྟསྶ ཡེན ཨབྷིསམྦུདྡྷབྷཱཝེན བྷགཝཱ པཀཏོ ཨདྷིགཏོ སུཔཱཀཊོ ཙ, ཏཾ ཨབྷིསམྦུདྡྷབྷཱཝཾ སདྡྷིཾ ཨཱགམནཱིཡཔཊིཔདཱཡ ཨཏྠབྷཱཝེན དསྶེནྟོ ‘‘ཡོ སོ…པེ… ཨབྷིསམྦུདྡྷོ’’ཏི ཨཱཧ. སཏིཔི ཉཱཎདསྶན-སདྡཱནཾ ཨིདྷ པཉྙཱཝེཝཙནབྷཱཝེ ཏེན ཏེན ཝིསེསེན ཏེསཾ ཝིསཡཝིསེསེ པཝཏྟིདསྶནཏྠཾ ཨསཱདྷཱརཎཉཱཎཝིསེསཝསེན ཝིཛྫཱཏྟཡཝསེན ཝིཛྫཱཨབྷིཉྙཱནཱཝརཎཉཱཎཝསེན སབྦཉྙུཏཉཱཎམཾསཙཀྑུཝསེན པཊིཝེདྷདེསནཱཉཱཎཝསེན ཙ ཏདཏྠཾ ཡོཛེཏྭཱ དསྶེནྟོ ‘‘ཏེསཾ ཏེས’’ནྟིཨཱདིམཱཧ. ཏཏྠ ཨཱསཡཱནུསཡཾ ཛཱནཏཱ ཨཱསཡཱནུསཡཉཱཎེན སབྦཾ ཉེཡྻདྷམྨཾ པསྶཏཱ སབྦཉྙུཏཱནཱཝརཎཉཱཎེཧི. པུབྦེནིཝཱསཱདཱིཧཱིཏི པུབྦེནིཝཱསཱསཝཀྑཡཉཱཎེཧི. པཊིཝེདྷཔཉྙཱཡཱཏི ཨརིཡམགྒཔཉྙཱཡ. དེསནཱཔཉྙཱཡ པསྶཏཱཏི དེསེཏབྦདྷམྨཱནཾ དེསེཏབྦཔྤཀཱརཾ བོདྷནེཡྻཔུགྒལཱནཉྩ ཨཱསཡཱནུསཡཙརིཏཱདྷིམུཏྟིཨཱདིབྷེདཾ དྷམྨདེསནཱཔཉྙཱཡ ཡཱཐཱཝཏོ པསྶཏཱ. ཨརཱིནནྟི ཀིལེསཱརཱིནཾ, པཉྩཝིདྷམཱརཱནཾ ཝཱ, སཱསནསྶ ཝཱ པཙྩཏྠིཀཱནཾ ཨཉྙཏིཏྠིཡཱནཾ ཏེསཾ པན ཧནནཾ པཱཊིཧཱརིཡེཧི ཨབྷིབྷཝནཾ ཨཔྤཊིབྷཱནཏཱཀརཎཾ ཨཛ྄ཛྷུཔེཀྑནམེཝ ཝཱ, ཀེསིཝིནཡསུཏྟཉྩེཏྠ ནིདསྶནཾ.

ཏཐཱ ཋཱནཱཊྛཱནཱདིཝིབྷཱགཾ ཛཱནཏཱ ཡཐཱཀམྨཱུཔགསཏྟེ པསྶཏཱ, སཝཱསནཱནཾ ཨཱསཝཱནཾ ཁཱིཎཏྟཱ ཨརཧཏཱ, ཨབྷིཉྙེཡྻཱདིབྷེདེ དྷམྨེ ཨབྷིཉྙེཡྻཱདིཏོ ཨཝིཔརཱིཏཱཝབོདྷཏོ སམྨཱསམྦུདྡྷེན. ཨཐ ཝཱ ཏཱིསུ ཀཱལེསུ ཨཔྤཊིཧཏཉཱཎཏཱཡ ཛཱནཏཱ, ཀཱཡཀམྨཱདིཝསེན ཏིཎྞཾ ཀམྨཱནཾ ཉཱཎཱནུཔརིཝཏྟིཏོ ནིསམྨཀཱརིཏཱཡ པསྶཏཱ, དཝཱདཱིནཾ ཨབྷཱཝསཱདྷིཀཱཡ ¶ པཧཱནསམྤདཱཡ ཨརཧཏཱ, ཚནྡཱདཱིནཾ ཨཧཱནིཧེཏུབྷཱུཏཱཡ ཨཀྑཡཔཊིབྷཱནསཱདྷིཀཱཡ སབྦཉྙུཏཱཡ སམྨཱསམྦུདྡྷེནཱཏི ཨེཝཾ དསབལཨཊྛཱརསཨཱཝེཎིཀབུདྡྷདྷམྨཝསེནཔི ཡོཛནཱ ཀཱཏབྦཱ.

༡༩. ཨབྷིསངྑཏནྟི ¶ ཨཏྟནོ པཙྩཡེཧི ཨབྷིསམྨུཁབྷཱཝེན སམེཙྩ སམྦྷཱུཡྻ ཀཏཾ, སྭསྶ ཀཏབྷཱཝོ ཨུཔྤཱདནེན ཝེདིཏབྦོ, ན ཨུཔྤནྣསྶ པཊིསངྑརཎེནཱཏི ཨཱཧ ‘‘ཨུཔྤཱདིཏ’’ནྟི. ཏེ ཙསྶ པཙྩཡཱ ཙེཏནཱཔདྷཱནཱཏི དསྶེཏུཾ པཱལི༹ཡཾ ‘‘ཨབྷིསངྑཏཾ ཨབྷིསཉྩེཏཡིཏ’’ནྟི ཝུཏྟནྟི ‘‘ཙེཏཡིཏཾ པཀཔྤིཏ’’ནྟི ཨཏྠམཱཧ. ཨབྷིསངྑཏཾ ཨབྷིསཉྩེཏཡིཏནྟི ཙ ཛྷཱནསྶ པཱཏུབྷཱཝདསྶནམུཁེན ཝིདྡྷཾསནབྷཱཝཾ ཨུལླིངྒེཏི ཡཉྷི ཨཧུཏྭཱ སམྦྷཝཏི, ཏཾ ཧུཏྭཱ པཊིཝེཏི. ཏེནཱཧ པཱལི༹ཡཾ ‘ཨབྷིསངྑཏ’ནྟིཨཱདི. སམཐཝིཔསྶནཱདྷམྨེ ཋིཏོཏི སམཐདྷམྨེ ཋིཏཏྟཱ སམཱཧིཏོ ཝིཔསྶནཾ པཊྛཔེཏྭཱ ཨནིཙྩཱནུཔསྶནཱདཱིཧི ནིཙྩསཉྙཱདཡོ པཛཧནྟོ ཨནུཀྐམེན ཏཾ ཨནུལོམཉཱཎཾ པཱཔེཏཱ ཧུཏྭཱ ཝིཔསྶནཱདྷམྨེ ཋིཏོ. སམཐཝིཔསྶནཱསངྑཱཏེསུ དྷམྨེསུ རཉྫནཊྛེན རཱགོ, ནནྡནཊྛེན ནནྡཱིཏི. ཏཏྠ སུཁུམཱ ཨཔེཀྑཱ ཝུཏྟཱ, ཡཱ ‘‘ནིཀནྟཱི’’ཏི ཝུཙྩཏི.

ཨེཝཾ སནྟེཏི ཨེཝཾ ཡཐཱརུཏཝསེན ཙ ཨིམསྶ སུཏྟཔདསྶ ཨཏྠེ གཧེཏབྦེ སཏི. སམཐཝིཔསྶནཱསུ ཚནྡརཱགོ ཀཏྟབྦོཏི ཨནཱགཱམིཕལཾ ནིབྦཏྟེཏྭཱ ཏདཏྠཱཡ སམཐཝིཔསྶནཱཔི ཨནིབྦཏྟེཏྭཱ ཀེཝལཾ ཏཏྠ ཚནྡརཱགོ ཀཏྟབྦོ བྷཝིསྶཏི. ཀསྨཱ? ཏེསུ སམཐཝིཔསྶནཱསངྑཱཏེསུ དྷམྨེསུ ཚནྡརཱགམཏྟེན ཨནཱགཱམིནཱ ལདྡྷབྦསྶ ཨལདྡྷཱནཱགཱམིཕལེན ལདྡྷབྦཏྟཱ ཏཐཱ སཏི ཏེན ཨནཱགཱམིཕལམྤི ལདྡྷབྦམེཝ ནཱམ ཧོཏི. ཏེནཱཧ – ‘‘ཨནཱགཱམིཕལཾ པཊིཝིདྡྷཾ བྷཝིསྶཏཱི’’ཏི. སབྷཱཝཏོ རསིཏབྦཏྟཱ ཨཝིཔརཱིཏོ ཨཏྠོ ཨེཝ ཨཏྠརསོ. ཨཉྙཱཔི ཀཱཙི སུགཏིཡོཏི ཝིནིཔཱཏིཀེ སནྡྷཱཡཱཧ. ཨཉྙཱཔི ཀཱཙི དུགྒཏིཡོཏི ཨསུརཀཱཡམཱཧ.

སམཐདྷུརམེཝ དྷུརཾ སམཐཡཱནིཀསྶ ཝསེན དེསནཱཡ ཨཱགཏཏྟཱ. མཧཱམཱལུཀྱོཝཱདེ ‘‘ཝིཝིཙྩ ཨཀུསལེཧི དྷམྨེཧི སཝིཏཀྐཾ སཝིཙཱར’’ནྟི པཱདཀཛ྄ཛྷཱནཾ ཀཏྭཱ ‘‘སོ ཡདེཝ ཏཏྠ ཧོཏི རཱུཔགཏཾ ཝེདནཱགཏ’’ནྟིཨཱདིནཱ ཝིཔསྶནཾ ཝིཏྠཱརེཏྭཱ ‘‘སོ ཏཏྠ ཋིཏོ ཨཱསཝཱནཾ ཁཡཾ ¶ པཱཔུཎཱཏཱི’’ཏི (མ. ནི. ༢.༡༣༣) ཨཱགཏཏྟཱ ‘‘མཧཱམཱལུཀྱོཝཱདེ ཝིཔསྶནཱཝ དྷུར’’ནྟི ཨཱཧ. མཧཱསཏིཔཊྛཱནསུཏྟེ (དཱི. ནི. ༢.༣༧༣ ཨཱདཡོ; མ. ནི. ༡.༡༠༦ ཨཱདཡོ) སབྦཏྠཀམེཝ ཏིཀྑཏརཱཡ ཝིཔསྶནཱཡ ཨཱགཏཏྟཱ ཝུཏྟཾ ‘‘ཝིཔསྶནུཏྟརཾ ཀཐིཏ’’ནྟི. ཀཱཡགཏཱསཏིསུཏྟེ (མ. ནི. ༣.༡༥༣-༡༥༤) ཨཱནཱཔཱནཛ྄ཛྷཱནཱདིཝསེན སཝིསེསཾ སམཐཝིཔསྶནཱཡ ཨཱགཏཏྟཱ ཝུཏྟཾ ‘‘སམཐུཏྟརཾ ཀཐིཏ’’ནྟི.

ཨཔྤཾ ཡཱཙིཏེན བཧུཾ དེནྟེན ཨུལཱ༹རཔུརིསེན ཝིཡ ཨེཀཾ དྷམྨཾ པུཙྪིཏེན ‘‘ཨཡམྤི ཨེཀདྷམྨོ’’ཏི ¶ ཀཐིཏཏྟཱ ཨེཀཱདསཔི དྷམྨཱ པུཙྪཱཝསེན ཨེཀདྷམྨོ ནཱམ ཛཱཏོ པཙྩེཀཾ ཝཱཀྱཔརིསམཱཔནཉཱཡེན. ཨེཀཝཱིསཏི པབྦཱནི ཏེཧི བོདྷིཡམཱནཱཡ པཊིཔདཱཡ ཨེཀརཱུཔཏྟཱ པཊིཔདཱཝསེན ཨེཀདྷམྨོ ནཱམ ཛཱཏོཏི. ཨིདྷ ཨིམསྨིཾ ཨཊྛཀནཱགརསུཏྟེ. ནེཝསཉྙཱནཱསཉྙཱཡཏནདྷམྨཱནཾ སངྑཱརཱཝསེསསུཁུམབྷཱཝཔྤཏྟཏཱཡ ཏཏྠ སཱཝཀཱནཾ དུཀྐརནྟི ན ཙཏུཏྠཱརུཔྤཝསེནེཏྠ དེསནཱ ཨཱགཏཱཏི ཙཏུནྣཾ བྲཧྨཝིཧཱརཱནཾ, ཧེཊྛིམཱནཾ ཏིཎྞཾ ཨཱརུཔྤཱནཉྩ ཝསེན ཨེཀཱདས. པུཙྪཱཝསེནཱཏི ‘‘ཨཏྠི ནུ ཁོ, བྷནྟེ ཨཱནནྡ, ཏེན…པེ… སམྨཱསམྦུདྡྷེན ཨེཀདྷམྨོ ཨཀྑཱཏོ’’ཏི (མ. ནི. ༢.༡༨) ཨེཝཾ པཝཏྟཔུཙྪཱཝསེན. ཨམཏུཔྤཏྟིཡཏྠེནཱཏི ཨམཏབྷཱཝསྶ ཨུཔྤཏྟིཧེཏུཏཱཡ, སབྦཱནིཔི ཀམྨཊྛཱནཱནི ཨེཀརསམྤི ཨམཏཱདྷིགམཔཊིཔཏྟིཡཱཏི ཨཏྠོ, ཨེཝམེཏྠ ཨགྒཕལབྷཱུམི ཨནཱགཱམིཕལབྷཱུམཱིཏི དྭེཝ བྷཱུམིཡོ སརཱུཔཏོ ཨཱགཏཱ, ནཱནནྟརིཡཏཱཡ པན ཧེཊྛིམཱཔི དྭེ བྷཱུམིཡོ ཨཏྠཏོ ཨཱགཏཱ ཨེཝཱཏི དཊྛབྦཱ.

༢༡. པཉྩ སཏཱནི ཨགྒྷོ ཨེཏསྶཱཏི པཉྩསཏཾ. སེསཾ ཨུཏྟཱནམེཝ.

ཨཊྛཀནཱགརསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༣. སེཁསུཏྟཝཎྞནཱ

༢༢. སནྠཱགཱརནྟི ¶ ཨཏྠཱནུསཱསནཱགཱརཾ. ཏེནཱཧ – ‘‘ཨུཡྻོགཀཱལཱདཱིསཱུ’’ཏིཨཱདི. ཨཱདི-སདྡེན མངྒལམཧཱདཱིནཾ སངྒཧོ དཊྛབྦོ. སནྠམྦྷནྟཱིཏི ཝིསྶམནྟི, པརིསྶམཾ ཝིནོདེནྟཱིཏི ཨཏྠོ. སཧཱཏི སནྣིཝེསཝསེན ¶ ཨེཀཛ྄ཛྷཾ. སཧ ཨཏྠཱནུསཱསནཾ ཨགཱརནྟི ཨེཏསྨིཾ ཨཏྠེ ཏྠ-ཀཱརསྶ ནྠ-ཀཱརཾ ཀཏྭཱ སནྠཱགཱརནྟི ཝུཏྟནྟི དཊྛབྦཾ. སནྠརནྟཱིཏི སམྨནྟནཝསེན ཏིཊྛནྟི.

ཏེཔིཊཀཾ བུདྡྷཝཙནཾ ཨཱགཏམེཝ བྷཝིསྶཏཱིཏི བུདྡྷཝཙནསྶ ཨཱགམནསཱིསེན ཨརིཡཕལདྷམྨཱནམྤི ཨཱགམནཾ ཝུཏྟམེཝ, ཏིཡཱམརཏྟིཾ ཏཏྠ ཝསནྟཱནཾ ཕལསམཱཔཏྟིཝལ༹ཉྫནཾ ཧོཏཱིཏི. ཏསྨིཉྩ བྷིཀྑུསངྒྷེ ཀལྱཱཎཔུཐུཛྫནཱ ཝིཔསྶནཾ ཨུསྶུཀྐཱཔེནྟཱ ཧོནྟཱིཏི ཙེ? ཨརིཡམགྒདྷམྨཱནཾ ཏཏྠ ཨཱགམནཾ ཧོཏིཡེཝ.

ཨལླགོམཡེནཱཏི ཨཙྪེན ཨལླགོམཡརསེན. ཨོཔུཉྪཱཔེཏྭཱཏི ཝིལིམྤིཏྭཱ. ཙཏུཛྫཱཏིཡགནྡྷེཧཱིཏི ཏགརཀུངྐུམཡཝནཔུཔྥཏམཱལཔཏྟཱནི པིསིཏྭཱ ཀཏགནྡྷེཧི ནཱནཱཝཎྞེཏི ནཱིལཱདིཝསེན ནཱནཱཝཎྞེ, ན བྷིཏྟིཝིསེསཝསེན. བྷིཏྟིཝིསེསཝསེན པན ནཱནཱསཎྛཱནརཱུཔམེཝ. མཧཱཔིཊྛིཀཀོཛཝཀེཏི ཧཏྠིཔིཊྛཱིསུ ཨཏྠརིཏབྦཏཱཡ མཧཱཔིཊྛིཀཱཏི ལདྡྷསམཉྙེ ཀོཛཝེཏི ཝདནྟི. ཀུཏྟཀེ པན སནྡྷཱཡེཏཾ ཝུཏྟཾ ཧཏྠཏྠརཎཱ ཧཏྠིརཱུཔཝིཙིཏྟཱ. ཨསྶཏྠརཀསཱིཧཏྠརཀཱདཡོཔི ཨསྶསཱིཧརཱུཔཱདིཝིཙིཏྟཱ ཨེཝ ཨཏྠརཀཱ, ཙིཏྟཏྠརཀཾ ནཱནཱརཱུཔེཧི ཙེཝ ནཱནཱཝིདྷམཱལཱཀམྨཱདཱིཧི ཙ ཝིཙིཏྟཾ ཨཏྠརཀཾ.

ཨུཔདྷཱནནྟི ཨཔསྶཡནཾ ཨུཔདཧིཏྭཱཏི ཨཔསྶཡཡོགྒབྷཱཝེན ཋཔེཏྭཱ གནྡྷེཧི ཀཏམཱལཱ གནྡྷདཱམཾ, ཏམཱལཔཏྟཱདཱིཧི ཀཏཾ པཏྟདཱམཾ. ཨཱདི-སདྡེན ཧིངྒུལཏཀྐོལཛཱཏིཕལཛཱཏིཔུཔྥཱདཱིཧི ཀཏདཱམཾ སངྒཎྷཱཏི. པལླངྐཱཀཱརེན ཀཏཔཱིཋཾ པལླངྐཔཱིཋཾ, ཏཱིསུ པསྶེསུ, ཨེཀཔསྶེ ཨེཝ ཝཱ སཨུཔསྶཡཾ ཨཔསྶཡཔཱིཋཾ, ཨནཔསྶཡཾ མུཎྜཔཱིཋཾ ཡོཛནཱཝཊྚེཏི ཡོཛནཔརིཀྑེཔེ.

སཾཝིདྷཱཡཱཏི ཨནྟརཝཱསཀསྶ ཀོཎཔདེསཉྩ ཨིཏརཔདེསཉྩ སམཾ ཀཏྭཱ ཝིདྷཱཡ. ཏེནཱཧ – ‘‘ཀཏྟརིཡཱ པདུམཾ ཀནྟནྟོ ཝིཡཱ’’ཏི ཏིམཎྜལཾ པཊིཙྪཱདེནྟོཏི ཨེཏྠ ཙ ཡསྨཱ བུདྡྷཱནཾ རཱུཔསམྤདཱ ཝིཡ ཨཱཀཔྤསམྤདཱཔི པརམུཀྐཾསགཏཱ, ཏསྨཱ ཏདཱ བྷགཝཱ ཨེཝཾ སོབྷཏཱིཏི ¶ དསྶེནྟོ ‘‘སུཝཎྞཔཱམངྒེནཱ’’ཏིཨཱདིམཱཧ, ཏཏྠ ཨསམེན བུདྡྷཝེསེནཱཏིཨཱདིནཱ ¶ ཏདཱ བྷགཝཱ བུདྡྷཱནུབྷཱཝསྶ ནིགུཧཎེ ཀཱརཎཱབྷཱཝཏོ ཏཏྠ སནྣིཔཏིཏདེཝམནུསྶནཱགཡཀྑགནྡྷབྦཱདཱིནཾ པསཱདཛནནཏྠཾ ཨཏྟནོ སབྷཱཝཔཀཏིཀིརིཡཱཡེཝ ཀཔིལཝཏྠུཾ པཱཝིསཱིཏི དསྶེཏི. བུདྡྷཱནཾ ཀཱཡཔྤབྷཱ ནཱམ པཀཏིཡཱ ཨསཱིཏིཧཏྠམཏྟམེཝ པདེསཾ ཕརཏཱིཏི ཨཱཧ – ‘‘ཨསཱིཏིཧཏྠཊྛཱནཾ ཨགྒཧེསཱི’’ཏི ནཱིལཔཱིཏལོཧིཏོདཱཏམཉྫིཊྛཔབྷསྶརཱནཾ ཝསེན ཚབྦཎྞཱ བུདྡྷརསྨིཡོ.

སབྦཔཱལིཕུལློཏི མཱུལཏོ པཊྛཱཡ ཡཱཝ ཨགྒཱ ཕུལློ ཝིཀསིཏོ. པཊིཔཱཊིཡཱ ཋཔིཏཱནནྟིཨཱདི པརིཀཔྤཱུཔམཱ. ཡཐཱ ཏཾ…པེ… ཨལངྐཏཾ ཨཉྙོ ཝིརོཙཏི, ཨེཝཾ ཝིརོཙིཏྠ, སམཏིཾསཱཡ པཱརམིཏཱཧི ཨབྷིསངྑཏཏྟཱ ཨེཝཾ ཝིརོཙིཏྠཱཏི ཝུཏྟཾ ཧོཏི. པཉྩཝཱིསཏིཡཱ ནདཱིནནྟི གངྒཱདཱིནཾ ཙནྡབྷཱགཱཔརིཡོསཱནཱནཾ པཉྩཝཱིསཏིཡཱ མཧཱནདཱིནཾ. སམྦྷིཛྫཱཏི སམྦྷེདཾ མིསྶཱིབྷཱཝཾ པཏྭཱ མུཁདྭཱརེཏི སམུདྡཾ པཝིཊྛཊྛཱནེ.

དེཝམནུསྶནཱགསུཔཎྞགནྡྷབྦཡཀྑཱདཱིནཾ ཨཀྑཱིནཱིཏི ཙེཏཾ པརིཀཔྤནཝསེན ཝུཏྟཾ. སཧསྶེནཱཏི པདསཧསྶེན, བྷཱཎཝཱརཔྤམཱཎེན གནྠེནཱཏི ཨཏྠོ.

ཀམྤཡནྟོ ཝསུནྡྷརནྟི ཨཏྟནོ གུཎཝིསེསེཧི པཐཝཱིཀམྤཾ ཨུཔྤཱདེནྟོ, ཨེཝཾབྷཱུཏོཔི ཨཧེཋཡནྟོ པཱཎཱནི. སབྦདཀྑིཎཏྟཱ བུདྡྷཱནཾ དཀྑིཎཾ པཋམཾ པཱདཾ ཨུདྡྷརནྟོ. སམཾ སམྥུསཏེ བྷཱུམིཾ སུཔྤཏིཊྛིཏཔཱདཏཱཡ. ཡདིཔི བྷཱུམིཾ སམཾ ཕུསཏི, རཛསཱནུཔལིཔྤཏི སུཁུམཏྟཱ ཚཝིཡཱ. ནིནྣཊྛཱནཾ ཨུནྣམཏཱིཏིཨཱདི བུདྡྷཱནཾ སུཔྤཏིཊྛིཏཔཱདསངྑཱཏསྶ མཧཱཔུརིསལཀྑཎཔཊིལཱབྷསྶ ནིསྶནྡཕལཾ. ནཱཏིདཱུརེ ཨུདྡྷརཏཱིཏི ཨཏིདཱུརེ ཋཔེཏུཾ ན ཨུདྡྷརཏི. ནཙྩཱསནྣེ ཙ ནིཀྑིཔནྟི ཨཙྩཱསནྣེ ཙ ཋཱནེ ཨནིཀྑིཔནྟོ ནིཡྻཱཏི. ཧཱསཡནྟོ སདེཝཀེ ལོཀེ ཏོསཡནྟོ. ཙཏཱུཧི པཱདེཧི ཙརཏཱིཏི ཙཏུཙཱརཱི.

བུདྡྷཱནུབྷཱཝསྶ པཀཱསནཝསེན གཏཏྟཱ ཝཎྞཀཱལོ ནཱམ ཀིརེས. སརཱིརཝཎྞེ ཝཱ གུཎཝཎྞེ ཝཱ ཀཐིཡམཱནེ དུཀྐཐིཏནྟི ན ཝཏྟབྦཾ. ཀསྨཱ? ཨཔརིམཱཎཝཎྞཱ ཧི བུདྡྷཱ བྷགཝནྟོ, བུདྡྷགུཎསཾཝཎྞནཱ ཛཱནནྟསྶ ཡཐཱདྷམྨསཾཝཎྞནཾཡེཝ ཨནུཔཝིསཏཱིཏི.

དུཀཱུལཙུམྦཊཀེནཱཏི ¶ གནྠིཏྭཱ གཧིཏདུཀཱུལཝཏྠེན, ནཱགཝིཀྐནྟཙརཎོཏི ཧཏྠིནཱགསདིསཔདནིཀྑེཔོ. སཏཔུཉྙལཀྑཎོཏི ཨནེཀསཏཔུཉྙནིམྨིཏམཧཱཔུརིསལཀྑཎོ མཎིཝེརོཙནོ ཡཐཱཏི ཨཏིཝིཡ ཝིརོཙམཱནོ མཎི ཝིཡ ཝེརོཙནོ ནཱམ ཨེཀོ མཎིཝིསེསོཏི ཀེཙི མཧཱསཱལོཝཱཏི ¶ མཧནྟོ སཱལརུཀྑོ ཝིཡ, ཀོཝིལཱ༹རཱདིམཧཱརུཀྑོ ཝིཡ ཝཱ པདུམོ ཀོཀནདོ ཡཐཱཏི ཀོཀནདསངྑཱཏཾ མཧཱཔདུམཾ ཝིཡ, ཝིཀསམཱནཔདུམཾ ཝིཡ ཝཱ.

ཨཱཀཱསགངྒཾ ཨོཏཱརེནྟོ ཝིཡཱཏིཨཱདི ཏསྶཱ པཀིཎྞཀཀཐཱཡ ཨཉྙེསཾ དུཀྐརབྷཱཝདསྶནཉྩེཝ སུཎནྟཱནཾ ཨཙྩནྟསུཁཱཝཧབྷཱཝདསྶནཉྩ པཐཝཱིཛཾ ཨཱཀཌྜྷེནྟོ ཝིཡཱཏི ནཱལི༹ཡནྟཾ ཡོཛེཏྭཱ མཧཱཔཐཝིཡཱ ཧེཊྛིམཏལེ པཔྤཊཀོཛཾ ཨུདྡྷཾམུཁཾ ཀཏྭཱ ཨཱཀཌྜྷེནྟོ ཝིཡ ཡོཛནིཀནྟི ཡོཛནཔྤམཱཎཾ མདྷུབྷཎྜནྟི མདྷུཔཊལཾ.

མཧནྟནྟི ཨུལཱ༹རཾ. སབྦདཱནཾ དིནྣམེཝ ཧོཏཱིཏི སབྦམེཝ པཙྩཡཛཱཏཾ ཨཱཝཱསདཱཡཀེན དིནྣམེཝ ཧོཏི. ཏཐཱཧི དྭེ ཏཡོ གཱམེ པིཎྜཱཡ ཙརིཏྭཱ ཀིཉྩི ཨལདྡྷཱ ཨཱགཏསྶཔི ཚཱཡཱུདཀསམྤནྣཾ ཨཱརཱམཾ པཝིསིཏྭཱ ནྷཱཡིཏྭཱ པཊིསྶཡེ མུཧུཏྟཾ ནིཔཛྫིཏྭཱ ཨུཊྛཱཡ ནིསིནྣསྶ ཀཱཡེ བལཾ ཨཱཧརིཏྭཱ པཀྑིཏྟཾ ཝིཡ ཧོཏི. བཧི ཝིཙརནྟསྶ ཙ ཀཱཡེ ཝཎྞདྷཱཏུ ཝཱཏཱཏཔེཧི ཀིལམཏི, པཊིསྶཡཾ པཝིསིཏྭཱ དྭཱརཾ པིདྷཱཡ མུཧུཏྟཾ ནིསིནྣསྶ ཝིསབྷཱགསནྟཏི ཝཱུཔསམྨཏི, སབྷཱགསནྟཏི པཏིཊྛཱཏི, ཝཎྞདྷཱཏུ ཨཱཧརིཏྭཱ པཀྑིཏྟཱ ཝིཡ ཧོཏི, བཧི ཝིཙརནྟསྶ ཙ པཱདེ ཀཎྚཀོ ཝིཛ྄ཛྷཏི, ཁཱཎུ པཧརཏི, སརཱིསཔཱདིཔརིསྶཡོ ཙེཝ ཙོརབྷཡཉྩ ཨུཔྤཛྫཏི, པཊིསྶཡཾ པཝིསིཏྭཱ དྭཱརཾ པིདྷཱཡ ནིཔནྣསྶ པན སབྦེ པརིསྶཡཱ ན ཧོནྟི, ཨཛ྄ཛྷཡནྟསྶ དྷམྨཔཱིཏིསུཁཾ, ཀམྨཊྛཱནཾ མནསིཀརོནྟསྶ ཨུཔསམསུཁཾ ཨུཔྤཛྫཏི བཧིདྡྷཱ ཝིཀྑེཔཱབྷཱཝཏོ, བཧི ཝིཙརནྟསྶ ཙ ཀཱཡེ སེདཱ མུཙྩནྟི, ཨཀྑཱིནི ཕནྡནྟི, སེནཱསནཾ པཝིསནཀྑཎེ མཉྩཔཱིཋཱདཱིནི ན པཉྙཱཡནྟི, མུཧུཏྟཾ ནིསིནྣསྶ པན ཨཀྑིཔསཱདོ ཨཱཧརིཏྭཱ པཀྑིཏྟོ ཝིཡ ཧོཏི, དྭཱརཝཱཏཔཱནམཉྩཔཱིཋཱདཱིནི པཉྙཱཡནྟི, ཨེཏསྨིམྤི ཙ ཨཱཝཱསེ ཝསནྟཾ དིསྭཱ མནུསྶཱ ཙཏཱུཧི པཙྩཡེཧི སཀྐཙྩཾ ཨུཔཊྛཧནྟི. ཏེན ཝུཏྟཾ – ‘‘ཨཱཝཱསདཱནསྨིཾ དིནྣེ སབྦཾ དཱནཾ དིནྣམེཝ ཧོཏཱི’’ཏི. བྷཱུམཊྛཀ…པེ… ན སཀྐཱཏི ཨཡམཏྠོ མཧཱསུདསྶནཝཏྠུནཱ (དཱི. ནི. ༢.༢༤༡ ཨཱདཡོ) དཱིཔེཏབྦོ.

སཱིཏནྟི ¶ (སཱརཏྠ. ཊཱི. ཙཱུལ༹ཝགྒ ༣.༢༩༥; སཾ. ནི. ཊཱི. ༢.༤.༢༤༣) ཨཛ྄ཛྷཏྟདྷཱཏུཀྑོབྷཝསེན ཝཱ བཧིདྡྷཨུཏུཝིཔརིཎཱམཝསེན ཝཱ ཨུཔྤཛྫནཀསཱིཏཾ. ཨུཎྷནྟི ཨགྒིསནྟཱཔཾ. ཏསྶ པན དཝདཱཧཱདཱིསུ སམྦྷཝོ དཊྛབྦོ. པཊིཧནྟཱིཏི པཊིབཱཧཏི. ཡཐཱ ཏདུབྷཡཝསེན ཀཱཡཙིཏྟཱནཾ བཱདྷནཱནི ན ཧོནྟི, ཨེཝཾ ཀརོཏི. སཱིཏུཎྷབྦྷཱཧཏེ ཧི སརཱིརེ ཝིཀྑིཏྟཙིཏྟོ བྷིཀྑུ ཡོནིསོ པདཧིཏུཾ ན སཀྐོཏི. ཝཱལ༹མིགཱནཱིཏི སཱིཧབྱགྒྷཱདིཝཱལ༹མིགེ. གུཏྟསེནཱསནཉྷི པཝིསིཏྭཱ དྭཱརཾ པིདྷཱཡ ནིསིནྣསྶ ཏེ པརིསྶཡཱ ན ཧོནྟི ¶ . སརཱིསཔེཏི ཡེ ཀེཙི སརནྟཱ གཙྪནྟེ དཱིགྷཛཱཏིཀེ. མཀསེཏི ནིདསྶནམེཏཾ, ཌཾསཱདཱིནཾ ཨེཏེནེཝ སངྒཧོ དཊྛབྦོ. སིསིརེཏི སཱིཏཀཱལཝསེན སཏྟཱཧཝདྡལིཀཱདིཝསེན ཙ ཨུཔྤནྣེ སིསིརསམྥསྶེ. ཝུཊྛིཡོཏི ཡདཱ ཏདཱ ཨུཔྤནྣཱ ཝསྶཝུཊྛིཡོ པཊིཧནཏཱིཏི ཡོཛནཱ.

ཝཱཏཱཏཔོ གྷོརོཏི རུཀྑགཙྪཱདཱིནཾ ཨུམྨཱུལབྷཉྫནཝསེན པཝཏྟིཡཱ གྷོརོ སརཛཨརཛཱདིབྷེདོ ཝཱཏོ ཙེཝ གིམྷཔརིལཱ༹ཧསམཡེསུ ཨུཔྤཏྟིཡཱ གྷོརོ སཱུརིཡཱཏཔོ ཙ. པཊིཧཉྙཏཱིཏི པཊིབཱཧཱིཡཏི. ལེཎཏྠནྟི ནཱནཱརམྨཎཏོ ཙིཏྟཾ ནིཝཏྟེཏྭཱ པཊིསལླཱནཱརཱམཏྠཾ. སུཁཏྠནྟི ཝུཏྟཔརིསྶཡཱབྷཱཝེན ཕཱསུཝིཧཱརཏྠཾ. ཛྷཱཡིཏུནྟི ཨཊྛཏིཾསཱརམྨཎེསུ ཡཏྠ ཀཏྠཙི ཙིཏྟཾ ཨུཔནིཛ྄ཛྷཱཡིཏུཾ. ཝིཔསྶིཏུནྟི ཨནིཙྩཱདིཏོ སབྦསངྑཱརེ སམྨསིཏུཾ.

ཝིཧཱརེཏི པཊིསྶཡེ. ཀཱརཡེཏི ཀཱརཱཔེཡྻ. རམྨེཏི མནོརམེ ནིཝཱསསུཁེ. ཝཱསཡེཏྠ བཧུསྶུཏེཏི ཀཱརེཏྭཱ པན ཨེཏྠ ཝིཧཱརེསུ བཧུསྶུཏེ སཱིལཝནྟེ ཀལྱཱཎདྷམྨེ ནིཝཱསེཡྻ. ཏེ ནིཝཱསེནྟོ པན ཏེསཾ བཧུསྶུཏཱནཾ ཡཐཱ པཙྩཡེཧི ཀིལམཐོ ན ཧོཏི, ཨེཝཾ ཨནྣཉྩ པཱནཉྩ ཝཏྠསེནཱསནཱནི ཙ དདེཡྻ ཨུཛུབྷཱུཏེསུ ཨཛ྄ཛྷཱསཡསམྤནྣེསུ ཀམྨཕལཱནཾ རཏནཏྟཡགུཎཱནཉྩ སདྡཧནེན ཝིཔྤསནྣེན ཙེཏསཱ.

ཨིདཱནི གཧཊྛཔབྦཛིཏཱནཾ ཨཉྙམཉྙཱུཔཀཱརཏཾ དསྶེཏུཾ ‘‘ཏེ ཏསྶཱ’’ཏི གཱཐམཱཧ. ཏཏྠ ཏེཏི བཧུསྶུཏཱ ཏསྶཱཏི ཨུཔཱསཀསྶ. དྷམྨཾ དེསེནྟཱིཏི སཀལཝཊྚདུཀྑཔནུདནཾ དྷམྨཾ དེསེནྟི. ཡཾ སོ དྷམྨཾ ཨིདྷཉྙཱཡཱཏི སོ པུགྒལོ ཡཾ སདྡྷམྨཾ ཨིམསྨིཾ སཱསནེ སམྨཱཔཊིཔཛྫནེན ཛཱནིཏྭཱ ཨགྒམགྒཱདྷིགམེན ཨནཱསཝོ ཧུཏྭཱ པརིནིབྦཱཡཏི.

པཱུཛཱསཀྐཱརཝསེནེཝ ¶ པཋམཡཱམོ ཁེཔིཏོ, བྷགཝཏོ དེསནཱཡ ཨཔྤཱཝསེསོ མཛ྄ཛྷིམཡཱམོ གཏོཏི པཱལི༹ཡཾ ‘‘བཧུདེཝ རཏྟི’’ནྟི ཝུཏྟནྟི ཨཱཧ ‘‘ཨཏིརེཀཏརཾ དིཡཌྜྷཡཱམ’’ནྟི. སནྡསྶེསཱིཏི ཨཱནིསཾསཾ དསྶེསི, ཨཱཝཱསདཱནཔཊིསཾཡུཏྟཾ དྷམྨིཾ ཀཐཾ སུཏྭཱ ཏཏོ པརཾ, ‘‘མཧཱརཱཛ, ཨིཏིཔི སཱིལཾ, ཨིཏིཔི སམཱདྷི, ཨིཏིཔི པཉྙཱ’’ཏི སཱིལཱདིགུཎེ ཏེསཾ སམྨཱ དསྶེསི, ཧཏྠེན གཧེཏྭཱ ཝིཡ པཙྩཀྑཏོ པཀཱསེསི. སམཱདཔེསཱིཏི ‘‘ཨེཝཾ སཱིལཾ སམཱདཱཏབྦཾ, སཱིལེ པཏིཊྛིཏེན ཨེཝཾ སམཱདྷི, ཨེཝཾ པཉྙཱ བྷཱཝེཏབྦཱ’’ཏི ཡཐཱ ཏེ སཱིལཱདིགུཎེ ཨཱདིཡནྟི, ཏཐཱ གཎྷཱཔེསི. སམུཏྟེཛེསཱིཏི ཡཐཱ སམཱདིནྣཾ སཱིལཾ སུཝིསུདྡྷཾ ཧོཏི, སམཐཝིཔསྶནཱ ཙ བྷཱཝིཡམཱནཱ ཡཐཱ སུཊྛུ ཝིསོདྷིཏཱ ཨུཔརིཝིསེསཱཝཧཱ ཧོནྟི, ཨེཝཾ ཙིཏྟཾ སམུཏྟེཛེསི ནིསཱམནཝསེན ཝོདཱཔེསི. སམྤཧཾསེསཱིཏི ཡཐཱནུསིཊྛཾ ཋིཏསཱིལཱདིགུཎེཧི སམྤཏི ལདྡྷགུཎཱནིསཾསེཧི ¶ ཙེཝ ཨུཔརི ལདྡྷབྦཕལཝིསེསེཧི ཙ ཨུཔརིཙིཏྟཾ སམྨཱ པཧཾསེསི, ལདྡྷསྶཱསཝསེན སུཊྛུ ཏོསེསི. ཨེཝམེཏེསཾ པདཱནཾ ཨཏྠོ ཝེདིཏབྦོ.

སམུདཱཡཝཙནོཔི ཨསཱིཏིམཧཱཐེར-སདྡོ ཏདེཀདེསེཔི ནིརུལ༹ྷོཏི ཨཱཧ ‘‘ཨསཱིཏིམཧཱཐེརེསུ ཝིཛྫམཱནེསཱུ’’ཏི. ཨཱནནྡཏྠེརོཔི ཧི ཨནྟོགདྷོ ཨེཝཱཏི. སཱཀིཡམཎྜལེཏི སཱཀིཡརཱཛསམཱུཧེ.

པཊིཔདཱཡ ནིཡུཏྟཏྟཱ པཱཊིཔདོ. ཏེནཱཧ – ‘‘པཊིཔནྣཀོ’’ཏི. སིཀྑནསཱིལཏཱདིནཱ སེཁོ, ཨོདྷིསོ སམིཏཔཱཔཏཱཡ སམཎོ. སེཁོ པཱཊིཔདོ པཊིཔཛྫནཔུགྒལཱདྷིཊྛཱནེན པཊིཔདཱདེསནཾ ནིཡམེནྟོ པཊིཔདཱཡ པུགྒལཾ ནིཡམེཏི ནཱམཱཏི ‘‘པཊིཔདཱཡ པུགྒལཾ ནིཡམེཏྭཱ དསྶེཏཱི’’ཏི. སེཁཔྤཊིཔདཱ སཱསནེ མངྒལཔཊིཔདཱ སམྨདེཝ ཨསེཝིཏབྦཔརིཝཛྫནེན སེཝིཏབྦསམཱདཱནེན ཨུཀྐཾསཝཏྠཱུསུ ཙ བྷཱཝཏོ ཨསེཁདྷམྨཔཱརིཔཱུརིཡཱ ཨཱཝཧཏྟཱ ཙ ཝཌྜྷམཱནཀཔཊིཔདཱ. ཨཀིལམནྟཱཝ སལླཀྑེསྶནྟཱིཏི ཨིདཾ ཏདཱ ཏེསཾ ཨསེཁབྷཱུམིཨདྷིགམཱཡ ཨཡོགྱཏཱཡ ཝུཏྟཾ. ཨཀིལམནྟཱཝཱཏི ཨིམིནཱ པཊིསམྦྷིདཱཔྤཏྟསྶཔི ཨནདྷིགཏམགྒསཉྙཱཔནཱ བྷཱརིཡཱཏི དསྶེཏི. ཨོསཊཱཏི ཨནུཔྤཝིཊྛཱ. སཀལཾ ཝིནཡཔིཊཀཾ ཀཐིཏམེཝ ཧོཏི ཏསྶ སཱིལཀཐཱབཱཧུལླཏོ སེསདྭཡེཔི ཨེསེཝ ནཡོ. ཏཱིཧི པིཊཀེཧཱིཏི ཀརཎཏྠེ ཀརཎཝཙནཾ. ཏེན ཏཾཏཾཔིཊཀཱནཾ ཏསྶཱ ཏསྶཱ སིཀྑཱཡ སཱདྷཀཏམབྷཱཝཾ དསྶེཏི.

པིཊྛིཝཱཏོ ¶ ཨུཔྤཛྫཏི ཨུཔཱདིནྣཀསརཱིརསྶ ཏཐཱརཱུཔཏྟཱ སངྑཱརཱནཉྩ ཨནིཙྩཏཱཡ དུཀྑཱནུབནྡྷཏྟཱ. ཨཀཱརཎཾ ཝཱ ཨེཏནྟི ཡེནཱདྷིཔྤཱཡེན ཝུཏྟཾ, ཏམེཝ ཨདྷིཔྤཱཡཾ ཝིཝརིཏུཾ ‘‘པཧོཏཱི’’ཏིཨཱདི ཝུཏྟཾ. ཙཏཱུཧི ཨིརིཡཱཔཐེཧི པརིབྷུཉྫིཏུཀཱམོ ཨཧོསི སཀྱརཱཛཱུནཾ ཨཛ྄ཛྷཱསཡཝསེན. ཏཐཱ ཧི ཝཀྑཏི ‘‘སཏྠཱཔི ཏདེཝ སནྡྷཱཡ ཏཏྠ སངྒྷཱཊིཾ པཉྙཔེཏྭཱ ནིཔཛྫཱིཏཱི’’ཏི. ཡདི ཨེཝཾ ‘‘པིཊྛི མེ ཨཱགིལཱཡཏཱི’’ཏི ཨིདཾ ཀཐནྟི ཨཱཧ ‘‘ཨུཔཱདིནྣཀསརཱིརཉྩ ནཱམཱ’’ཏིཨཱདི.

༢༣. ‘‘ཨིམིནཱ པཱཏིམོཀྑསཾཝརེན…པེ… སམྤནྣོ’’ཏིཨཱདཱིསུ (ཝིབྷ. ༥༡༡) སམནྣཱགཏཏྠོ སམྤནྣ-སདྡོ, ཨིདྷ པན པཱརིཔཱུརིཨཏྠོཏི དསྶེཏུཾ ‘‘པརིཔུཎྞསཱིལོཏི ཨཏྠོ’’ཏི ཝུཏྟཾ. ཡོ པན སམྤནྣསཱིལོཡེཝ, སོ པརིཔུཎྞསཱིལོ. པརིསུདྡྷཉྷི སཱིལཾ ‘‘པརིཔུཎྞ’’ནྟི ཝུཙྩཏི, ན སབལཾ ཀམྨཱསཾ ཝཱ. སུནྡརདྷམྨེཧཱིཏི སོབྷནདྷམྨེཧི. ཡསྨིཾ སནྟཱནེ ཨུཔྤནྣཱ ཏསྶ སོབྷནབྷཱཝཏོ. ཏེཧི སཔྤུརིསབྷཱཝསཱདྷནཏོ སཔྤུརིསཱནཾ དྷམྨེཧི.

༢༤. ཨིམིནཱ ¶ ཨེཏྟཀེན ཋཱནེནཱཏི ‘‘ཨིདྷ, མཧཱནཱམ, ཨརིཡསཱཝཀོ’’ཏི ཨཱརབྷིཏྭཱ ཡཱཝ ‘‘ཨཀསིརལཱབྷཱི’’ཏི པདཾ ཨིམིནཱ ཨེཏྟཀེན ཨུདྡེསཔདེན མཱཏིཀཾ ཋཔེཏྭཱ. པཊིཔཱཊིཡཱཏི ཨུདྡེསཔཊིཔཱཊིཡཱ. ཨེཝམཱཧཱཏི ‘‘ཨེཝཾ ཀཐཉྩ, མཧཱནཱམཱ’’ཏིཨཱདིནཱ ཨིདཱནི ཝུཙྩམཱནེན དསྶིཏཱཀཱརེན ཨཱཧ.

༢༥. ཧིརཱིཡཏཱིཏི ལཛྫཱིཡཏི པཱིལཱི༹ཡཏི. ཡསྨཱ ཧིརཱི པཱཔཛིགུཙྪནལཀྑཎཱ, ཏསྨཱ ‘‘ཛིགུཙྪཏཱིཏི ཨཏྠོ’’ཏི ཝུཏྟཾ. ཨོཏྟཔྤཏཱིཏི ཨུཏྟཔྤཏི. པཱཔུཏྲཱསལཀྑཎཉྷི ཨོཏྟཔྤཾ. པགྒཧིཏཝཱིརིཡོཏི སངྐོཙཾ ཨནཱཔནྣཝཱིརིཡོ. ཏེནཱཧ ‘‘ཨནོསཀྐིཏམཱནསོ’’ཏི. པཧཱནཏྠཱཡཱཏི སམུཙྪིནྡནཏྠཱཡ. ཀུསལཱནཾ དྷམྨཱནཾ ཨུཔསམྤདཱ ནཱམ ཨདྷིགམོ ཨེཝཱཏི ཨཱཧ ‘‘པཊིལཱབྷཏྠཱཡཱ’’ཏི. སཏིནེཔཀྐེནཱཏི སཏིཡཱ ནེཔཀྐེན ཏིཀྑཝིསདསཱུརབྷཱཝེན. ཨཊྛཀཐཱཡཾ པན ནེཔཀྐཾ ནཱམ པཉྙཱཏི ཨདྷིཔྤཱཡེན ‘‘སཏིཡཱ ཙ ནིཔཀབྷཱཝེན ཙཱ’’ཏི ཨཏྠོ ཝུཏྟོ, ཨེཝཾ སཏི ཨཉྙོ ནིདྡིཊྛོ ནཱམ ཧོཏི. སཏིམཱཏི ཙ ཨིམིནཱཝ ཝིསེསཱ སཏི གཧིཏཱ, པརཏོ ‘‘ཙིརཀཏམྤི ¶ ཙིརབྷཱསིཏམྤི སརིཏཱ ཨནུསྶརིཏཱ’’ཏི སཏིཀིཙྩམེཝ ནིདྡིཊྛཾ, ན པཉྙཱཀིཙྩཾ, ཏསྨཱ སཏིནེཔཀྐེནཱཏི སཏིཡཱ ནེཔཀྐབྷཱཝེནཱཏི སཀྐཱ ཝིཉྙཱཏུཾ. ཏེནེཝ ཧི པཙྩཡཝིསེསཝསེན ཨཉྙདྷམྨནིརཔེཀྑོ སཏིཡཱ བལཝབྷཱཝོ. ཏཐཱ ཧི ཉཱཎཝིཔྤཡུཏྟཙིཏྟེནཔི ཨཛ྄ཛྷཡནསམྨསནཱནི སམྦྷཝནྟི.

ཙེཏིཡངྒཎཝཏྟཱདཱིཏི ཨཱདི-སདྡེན བོདྷིཡངྒཎཝཏྟཱདཱིནི སངྒཎྷཱཏི. ཨསཱིཏིམཧཱཝཏྟཔཊིཔཏྟིཔཱུརཎནྟི ཨེཏྠ ཨསཱིཏིཝཏྟཔཊིཔཏྟིཔཱུརཎཾ མཧཱཝཏྟཔཊིཔཏྟིཔཱུརཎནྟི ཝཏྟཔཊིཔཏྟིཔཱུརཎ-སདྡོ པཙྩེཀཾ ཡོཛེཏབྦོ. ཏཏྠ མཧཱཝཏྟཱནི (ཝིབྷ. མཱུལཊཱི. ༤༠༦) ནཱམ ཝཏྟཁནྡྷཀེ (ཙཱུལ༹ཝ. ༣༥༦ ཨཱདཡོ) ཝུཏྟཱནི ཨཱགནྟུཀཝཏྟཾ ཨཱཝཱསིཀཾ གམིཀཾ ཨནུམོདནཾ བྷཏྟགྒཾ པིཎྜཙཱརིཀཾ ཨཱརཉྙིཀཾ སེནཱསནཾ ཛནྟཱགྷརཾ ཝཙྩཀུཊི ཨུཔཛ྄ཛྷཱཡཾ སདྡྷིཝིཧཱརིཀཾ ཨཱཙརིཡཾ ཨནྟེཝཱསིཀཝཏྟནྟི ཙུདྡས. ཏཏོ ཨཉྙཱནི པན ཀདཱཙི ཏཛྫནཱིཡཀམྨཀཏཱདིཀཱལེ པཱརིཝཱསིཀཱདིཀཱལེ ཙ ཙརིཏབྦཱནི ཨསཱིཏི ཁུདྡཀཝཏྟཱནི སབྦཱསུ ཨཝཏྠཱསུ ན ཙརིཏབྦཱནི, ཏསྨཱ མཧཱཝཏྟེསུ, ཨགྒཧིཏཱནི. ཏཏྠ ‘‘པཱརིཝཱསིཀཱནཾ བྷིཀྑཱུནཾ ཝཏྟཾ པཉྙཔེསྶཱམཱི’’ཏི ཨཱརབྷིཏྭཱ ‘‘ན ཨུཔསམྤཱདེཏབྦཾ…པེ… ན ཚམཱཡཾ ཙངྐམནྟེ ཙངྐམེ ཙངྐམིཏབྦ’’ནྟི (ཙཱུལ༹ཝ. ༨༡) ཝུཏྟཱནི པཀབྷཏྟེ ཙརིཏབྦཝཏྟཱཝསཱནཱནི ཚསཊྛི, ཏཏོ པརཾ ‘‘ན, བྷིཀྑཝེ, པཱརིཝཱསིཀེན བྷིཀྑུནཱ པཱརིཝཱསིཀཝུཌྜྷཏརེན བྷིཀྑུནཱ སདྡྷིཾ མཱུལཱཡཔཊིཀསྶནཱརཧེན མཱནཏྟཱརཧེན མཱནཏྟཙཱརིཀེན ཨབྦྷཱནཱརཧེན བྷིཀྑུནཱ སདྡྷིཾ ཨེཀཙྪནྣེ ཨཱཝཱསེ ཝཏྟབྦ’’ནྟིཨཱདཱིནི (ཙཱུལ༹ཝ. ༨༢) པཀཏཏྟེ ཙརིཏབྦེཧི ཨནཉྙཏྟཱ ཝིསུཾ ཝིསུཾ ཨགཎེཏྭཱ པཱརིཝཱསིཀཝུཌྜྷཏརཱདཱིསུ པུགྒལནྟརེསུ ¶ ཙརིཏབྦཏྟཱ ཏེསཾ ཝསེན སམྤིཎྜེཏྭཱ ཨེཀེཀཾ ཀཏྭཱ གཎིཏབྦཱནི པཉྩཱཏི ཨེཀསཏྟཏིཝཏྟཱནི, ཨུཀྑེཔནིཡཀམྨཀཏཝཏྟེསུ ཝཏྟཔཉྙཱཔནཝསེན ཝུཏྟཾ – ‘‘ན པཀཏཏྟསྶ བྷིཀྑུནོ ཨབྷིཝཱདནཾ པཙྩུཊྛཱནཾ…པེ… ནྷཱནེ པིཊྛིཔརིཀམྨཾ སཱདིཏབྦ’’ནྟི (ཙཱུལ༹ཝ. ༥༡) ཨིདཾ ཨབྷིཝཱདནཱདཱིནཾ ཨསཱདིཡནཾ ཨེཀཾ, ‘‘ན པཀཏཏྟོ བྷིཀྑུ སཱིལཝིཔཏྟིཡཱ ཨནུདྡྷཾསིཏབྦོ’’ཏིཨཱདཱིནི ཙ དསཱཏི ཨེཝམེཏཱནི དྭཱསཱིཏི. ཨེཏེསྭེཝ པན ཀཱནིཙི ཏཛྫནཱིཡཀམྨཱདིཝཏྟཱནི ཀཱནིཙི པཱརིཝཱསིཀཱདིཝཏྟཱནཱིཏི ཨགྒཧིཏགྒཧཎེན དྭཱསཱིཏི, ཨེཝཾ ཨཔྤཀཾ པན ཨཱུནམདྷིཀཾ ཝཱ གཎནུཔགཾ ན ཧོཏཱིཏི ཨིདྷ ‘‘ཨསཱིཏི’’ཙྩེཝ ཝུཏྟཾ. ཨཉྙཏྠ པན ཨཊྛཀཐཱཔདེསེ ‘‘དྭཱསཱིཏི ཁནྡྷཀཝཏྟཱནཱི’’ཏི ཝུཙྩཏི.

སཀྐཙྩཾ ¶ ཨུདྡིསནཾ སཀྐཙྩཾ ཨུདྡིསཱཔནནྟི པཙྩེཀཾ སཀྐཙྩཾ-སདྡོ ཡོཛེཏབྦོ. ཨུདྡིསནཾ ཨུདྡེསགྒཧཎཾ. དྷམྨོསཱརཎཾ དྷམྨསྶ ཨུཙྩཱརཎཾ. དྷམྨདེསནཱ –

‘‘ཨཱདིམྷི སཱིལཾ དེསེཡྻ, མཛ྄ཛྷེ ཛྷཱནཾ ཝིཔསྶནཾ;

པརིཡོསཱནེ ཙ ནིབྦཱནཾ, ཨེསཱ ཀཐིཀསཎྛིཏཱི’’ཏི. (དཱི. ནི. ཨཊྛ. ༡.༡༩༠; སཾ. ནི. ཨཊྛ. ༣.༤.༢༤༦) –

ཨེཝཾ ཀཐིཏལཀྑཎཱ དྷམྨཀཐཱ. ཨུཔགནྟྭཱ ནིསིནྣསྶ ཡསྶ ཀསྶཙི གཧཊྛསྶ པབྦཛིཏསྶ ཝཱ ཏངྑཎཱནུརཱུཔཱ དྷམྨཱི ཀཐཱ ཨུཔནིསིནྣཀཐཱ. བྷཏྟཱནུམོདནཀཐཱ ཨནུམོདནིཡཱ. སརིཏཱཏི ཨེཏྠ ན ཀེཝལཾ ཙིརཀཏཙིརབྷཱསིཏཱནཾ སརཎམནུསྶརཎམཏྟཾ ཨདྷིཔྤེཏཾ, ཨཐ ཁོ ཏཐཱཔཝཏྟརཱུཔཱརཱུཔདྷམྨཱནཾ པརིགྒཧམུཁེན པཝཏྟཝིཔསྶནཱཙཱརེ སཏིསམྦོཛ྄ཛྷངྒསམུཊྛཱཔནནྟི དསྶེཏུཾ ‘‘ཏསྨིཾ ཀཱཡེན ཙིརཀཏེ’’ཏིཨཱདི ཝུཏྟཾ. སཀིམྤི སརཎེནཱཏི ཨེཀཝཱརཾ སརཎེན. པུནཔྤུནཾ སརཎེནཱཏི ཨནུ ཨནུ སརཎེན. སཏིསམྦོཛ྄ཛྷངྒམྤི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསགྒཔརིཎཱམིཉྩ ཀཏྭཱ སརནྟོ ཏཏྠ ཏཏྠ ཛཝནཝཱརེ སརཎཛཝནཝཱརེ པརིཏྟཛཝནཝསེན ཨནུསྶརིཏཱཏི ཝེདིཏབྦཱ.

གཏིཨཏྠཱ དྷཱཏུསདྡཱ བུདྡྷིཨཏྠཱ ཧོནྟཱིཏི ཨཱཧ – ‘‘ཨུདཡཉྩ ཝཡཉྩ པཊིཝིཛ྄ཛྷིཏུཾ སམཏྠཱཡཱ’’ཏི. མིསྶཀནཡེནཱཡཾ དེསནཱ ཨཱགཏཱཏི ཨཱཧ – ‘‘ཝིཀྑམྦྷནཝསེན ཙ སམུཙྪེདཝསེན ཙཱ’’ཏི. ཏེནཱཧ ‘‘ཝིཔསྶནཱཔཉྙཱཡ ཙེཝཱ’’ཏིཨཱདི. ཝིཔསྶནཱཔཉྙཱཡ ནིབྦེདྷིཀཔརིཡཱཡཏོ. སཱ ཙ ཁོ པདེསིཀཱཏི ནིཔྤདེསིཀཾ ཀཏྭཱ དསྶེཏུཾ ‘‘མགྒཔཉྙཱཡ པཊིལཱབྷསཾཝཏྟནཏོ ཙཱ’’ཏི ཝུཏྟཾ. དུཀྑཀྑཡགཱམིནིབྷཱཝེཔི ཨེསེཝ ནཡོ. སམྨཱཏི ཡཱཐཱཝཏོ. ཨཀུཔྤདྷམྨཏཱཡ ¶ ཧི མགྒཔཉྙཱ ཁེཔིཏཁེཔནཱཡ ན པུན ཀིཙྩཾ ཨཏྠཱིཏི ཨུཔཱཡེན ཉཱཡེན ཡཱ པཝཏྟི སཱ ཨེཝཱཏི ཨཱཧ – ‘‘ཧེཏུནཱ ནཡེནཱ’’ཏི.

༢༦. ཨདྷིཀཾ ཙེཏོ ཨབྷིཙེཏོ, མཧགྒཏཙིཏྟཾ, ཏསྶ པན ཨདྷིཀཏཱ ཀཱམཙྪནྡཱདིཔཊིཔཀྑཝིགམེན ཝིསིཊྛབྷཱཝཔྤཏྟི, ཏནྣིསྶིཏཱནི ཨཱབྷིཙེཏསིཀཱནི. ཏེནཱཧ ‘‘ཨབྷིཙིཏྟཾ སེཊྛཙིཏྟཾ སིཏཱན’’ནྟི. དིཊྛདྷམྨསུཁཝིཧཱརཱནནྟི ཨིམསྨིཾཡེཝ ཨཏྟབྷཱཝེ ཕཱསུཝིཧཱརབྷཱུཏཱནཾ. ཏེཧི ¶ པན སམངྒིཏཀྑཎེ ཡསྨཱ ཝིཝེཀཛཾ པཱིཏིསུཁཾ སམཱདྷིཛཾ པཱིཏིསུཁཾ ཨཔཱིཏིཛཾ སཏིཔཱརིསུདྡྷིཉཱཎསུཁཉྩ པཊིལབྷཏི ཝིནྡཏི, ཏསྨཱ ཨཱཧ – ‘‘ཨཔྤིཏཔྤིཏཀྑཎེ སུཁཔཊིལཱབྷཧེཏཱུན’’ནྟི. ཨིཙྪིཏིཙྪིཏཀྑཎེ སམཱཔཛྫིཏཱཏི ཨིམིནཱ ཏེསུ ཛྷཱནེསུ སམཱཔཛྫནཝསཱིབྷཱཝམཱཧ, ‘‘ནིཀཱམལཱབྷཱི’’ཏི པན ཝཙནཏོ ཨཱཝཛྫནཱདྷིཊྛཱནཱ པཙྩཝེཀྑཎཝསིཡོ ཙ ཝུཏྟཱ ཨེཝཱཏི ཝེདིཏབྦཱ. ནིདུཀྑལཱབྷཱིཏི ཨིམིནཱ ཏེསཾ ཛྷཱནཱནཾ སུཁཔཊིཔདཱཁིཔྤཱབྷིཉྙཏཾ དསྶེཏི, ཝིཔུལལཱབྷཱིཏི ཨིམིནཱ པགུཎཏཾ ཏཔྤམཱཎདསྶིཏབྷཱཝདཱིཔནཏོ. ཏེནཱཧ ‘‘པགུཎབྷཱཝེནཱ’’ཏིཨཱདི. སམཱཔཛྫིཏུཾ སཀྐོཏི སམཱཔཛྫནཝསཱིབྷཱཝཏཱཡ སཱདྷིཏཏྟཱ. སམཱདྷིཔཱརིཔནྠིཀདྷམྨེཏི ཝསཱིབྷཱཝསྶ པཙྩནཱིཀདྷམྨེ. ཛྷཱནཱདྷིགམསྶ པན པཙྩནཱིཀདྷམྨཱ པགེཝ ཝིཀྑམྦྷིཏཱ, ཨཉྙཐཱ ཛྷཱནཱདྷིགམོ ཨེཝ ན སིཡཱ. ཨཀིལམནྟོ ཝིཀྑམྦྷེཏུཾ ན སཀྐོཏཱིཏི ཀིཙྪེན ཝིཀྑམྦྷེཏི ཝིསོདྷེཏི, ཀཱམཱདཱིནཝཔཙྩཝེཀྑཎཱདཱིཧི ཀཱམཙྪནྡཱདཱིནཾ ཨཉྙེསཾ སམཱདྷིཔཱརིཔནྠིཀཱནཾ དཱུརསམུསྶཱརཎཾ ཨིདྷ ཝིཀྑམྦྷནཾ ཝིསོདྷནནྟི ཝེདིཏབྦཾ.

༢༧. ཝིཔསྶནཱཧིཏཱཡ ཨུཔརཱུཔརིཝིསེསཱཝཧཏྟཱ ཝཌྜྷམཱནཱཡ པུབྦབྷཱགསཱིལཱདིཔཊིཔདཱཡ. སཱ ཨེཝ པུབྦབྷཱགཔཊིཔདཱ ཡཐཱབྷཱཝིཏཏཱཡ ཨཝསྶཾ བྷཱཝིནཾ ཝིསེསཾ པརིགྒཧིཏཏྟཱ ཨཎྜཾ ཝིཡཱཏི ཨཎྜཾ, ཀིལེསེཧི ཨདཱུསིཏཏཱཡ ཨཔཱུཏི ཨཎྜཾ ཨེཏསྶཱཏི ཨཔུཙྩཎྜོ, ཝིཔསྶནཾ ཨུསྶུཀྐཱཔེཏྭཱ ཋིཏཔུགྒལོ, ཏསྶ བྷཱཝོ ཨཔུཙྩཎྜཏཱ. ཝིཔསྶནཱདིཉཱཎཔྤབྷེདཱཡཱཏི པུབྦེནིཝཱསཉཱཎཱདིཉཱཎཔབྷེདཱཡ. ཏཏྠཱཏི ཙེཏོཁིལསུཏྟེ (མ. ནི. ༡.༡༨༥) ‘‘ས ཁོ སོ, བྷིཀྑཝེ, ཨེཝཾ ཨུསྶོལ༹ྷིཔནྣརསངྒསམནྣཱགཏོ བྷིཀྑུ བྷབྦོ ཨབྷིནིབྦིདཱཡཱ’’ཏི ཨཱགཏཏྟཱ ཨུསྶོལ༹ྷིཔནྣརསེཧི ཨངྒེཧི སམནྣཱགཏབྷཱཝོཏི ཨེཝཾ ཡཾ ཨོཔམྨསཾསནྡནཾ ཨཱགཏཾ, ཏཾ ཨོཔམྨསཾསནྡནཾ ཨིདྷ ཨིམསྨིཾ སེཁསུཏྟེ ཡོཛེཏྭཱ ཝེདིཏབྦནྟི སམྦནྡྷོ.

༢༨. མཧགྒཏཱདིབྷཱཝེན ཧེཊྛིམཱནཾ ཛྷཱནཱནཾ ཨནུརཱུཔམྤི ཨཏྟནོ ཝིསེསེན ཏེ ཨུཏྟརིཏྭཱ ཨཏིཀྐམིཏྭཱན ཋིཏནྟི ཨནུཏྟརཾ, ཏེནཱཧ – ‘‘པཋམཱདིཛ྄ཛྷཱནེཧི ཨསདིསཾ ཨུཏྟམ’’ནྟི. དུཏིཡཱདཱིསུཔི ¶ ཨབྷིནིབྦྷིདཱསུ. པུབྦེནིཝཱསཉཱཎཾ ཨུཔྤཛྫམཱནཾ ཡཐཱ ཨཏྟནོ ཝིསཡཔཊིཙྪཱདཀཾ ཀིལེསནྡྷཀཱརཾ ཝིདྷམནྟམེཝ ¶ ཨུཔྤཛྫཏི, ཨེཝཾ ཨཏྟནོ ཝིསཡེ ཀཉྩི ཝིསེསཾ ཀརོནྟམེཝ ཨུཔྤཛྫཏཱིཏི ཨཱཧ – ‘‘པུབྦེནིཝཱསཉཱཎེན པཋམཾ ཛཱཡཏཱི’’ཏི, སེསཉཱཎདྭཡེཔི ཨེསེཝ ནཡོ.

༢༩. ཙརཎསྨིནྟི པཙྩཏྟེ བྷུམྨཝཙནནྟི ཨཱཧ ‘‘ཙརཎཾ ནཱམ ཧོཏཱིཏི ཨཏྠོ’’ཏི. ཏེནཱཏི ཀརཎཏྠེ ཀརཎཝཙནཾ ཨགཏཔུབྦདིསཱགམནེ ཏེསཾ སཱདྷཀཏམབྷཱཝཏོ.

ཨཊྛ ཉཱཎཱནཱིཏི ཨིདྷ ཨཱགཏཱནི ཙ ཨནཱགཏཱནི ཙ ཨམྦཊྛསུཏྟཱདཱིསུ (དཱི. ནི. ༡.༢༥༤ ཨཱདཡོ) ཨཱགཏཱནི གཧེཏྭཱ ཝདཏི. ཝིནིཝིཛ྄ཛྷིཏྭཱཏི པུབྦེནིཝཱསཔཊིཙྪཱདཀཱདིཀིལེསཏམཾ བྷིནྡིཏྭཱ པདཱལེཏྭཱ.

༣༠. སནངྐུམཱརེནཱཏི སནནྟནཀུམཱརེན. ཏདེཝ ཧི ཏསྶ སནནྟནཀུམཱརཏཾ དསྶེཏུཾ ‘‘ཙིརཀཱལཏོ པཊྛཱཡཱ’’ཏི ཝུཏྟཾ. སོ ཨཏྟབྷཱཝོཏི ཡེན ཨཏྟབྷཱཝེན མནུསྶཔཐེ ཛྷཱནཾ ནིབྦཏྟེསི, སོ ཀུམཱརཏྟབྷཱཝོ, ཏསྨཱ བྲཧྨབྷཱུཏོཔི ཏཱདིསེན ཀུམཱརཏྟབྷཱཝེན ཙརཏི.

ཛནིཏསྨིཾ-སདྡོ ཨེཝ ཨི-ཀཱརསྶ ཨེ-ཀཱརཾ ཀཏྭཱ ‘‘ཛནེཏསྨི’’ནྟི ཝུཏྟོ, ཛནིཏསྨིནྟི ཙ ཛནསྨིནྟི ཨཏྠོ ཝེདིཏབྦོ. ཛནིཏསྨིནྟི སཱམཉྙགྒཧཎེཔི ཡཏྠ ཙཏུཝཎྞསམཉྙཱ, ཏཏྠེཝ མནུསྶལོཀེ. ཁཏྟིཡོ སེཊྛོཏི ལོཀསམཉྙཱཔི མནུསྶལོཀེཡེཝ, ན དེཝཀཱཡེ བྲཧྨཀཱཡེ ཝཱཏི དསྶེཏུཾ ‘‘ཡེ གོཏྟཔཊིསཱརིནོ’’ཏི ཝུཏྟཾ. པཊིསརནྟཱིཏི ‘‘ཨཧཾ གོཏམོ, ཨཧཾ ཀསྶཔོ’’ཏི པཏི པཏི ཨཏྟནོ གོཏྟཾ ཨནུསརནྟི པཊིཛཱནནྟི ཝཱཏི ཨཏྠོ.

ཨེཏྟཱཝཏཱཏི ‘‘སཱདྷུ སཱདྷུ ཨཱནནྡཱ’’ཏི ཨེཏྟཀེན སཱདྷུཀཱརདཱནེན. ཛིནབྷཱསིཏཾ ནཱམ ཛཱཏནྟིཨཱདིཏོ པཊྛཱཡ ཡཱཝ པརིཡོསཱནཱ ཐེརབྷཱསིཏཾ བུདྡྷབྷཱསིཏམེཝ ནཱམ ཛཱཏཾ. ‘‘ཀིམྤནིདཾ སུཏྟཾ སཏྠུདེསནཱནུཝིདྷཱནཏོ ཛིནབྷཱསིཏཾ, ཨུདཱཧུ སཱདྷུཀཱརདཱནམཏྟེནཱ’’ཏི ཨེཝརཱུཔཱ ཙོདནཱ ཨིདྷ ཨནོཀཱསཱ ཐེརསྶ དེསནཱཡ བྷགཝཏོ དེསནཱནུཝིདྷཱནཧེཏུཀཏྟཱ སཱདྷུཀཱརདཱནསྶཱཏི. ཡཾ པནེཏྠ ཨཏྠཏོ ཨཝིབྷཏྟཾ, ཏཾ སུཝིཉྙེཡྻམེཝ.

སེཁསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༤. པོཏལིཡསུཏྟཝཎྞནཱ

༣༡. ཨངྒཱ ¶ ནཱམ ¶ ཛནཔདིནོ རཱཛཀུམཱརཱ, ཏེསཾ ནིཝཱསོ ཨེཀོཔི ཛནཔདོ རུལ༹ྷིཝསེན ཨངྒཱཏྭེཝ ཝུཙྩཏཱིཏི ཨཱཧ ‘‘ཨངྒཱཡེཝ སོ ཛནཔདོ’’ཏི. མཧིཡཱ པནསྶ ཨུཏྟརེན ཡཱ ཨཱཔོཏི མཧིཡཱ ནདིཡཱ ཡཱ ཨཱཔོ ཏསྶ ཛནཔདསྶ ཨུཏྟརེན ཧོནྟི. ཏཱསཾ ཨཝིདཱུརཏྟཱ སོ ཛནཔདོ ཨུཏྟརཱཔོཏི ཝུཙྩཏི. སཱ པན མཧཱི ཀཏྠཙི ཀཏྠཙི བྷིཛྫིཏྭཱ གཏཱཏི ཨཱཧ ‘‘ཀཏརམཧིཡཱ ཨུཏྟརེན ཡཱ ཨཱཔོ’’ཏི. ཏཏྠཱཏི ཏསྶཱ མཧིཡཱ ཨཱགམནཏོ པཊྛཱཡ ཨཡཾ ཨཱཝིབྷཱཝཀཐཱ. ཡསྨཱ (ཨ. ནི. ཊཱི. ༣.༨.༡༩) ལོཀིཡཱ ཛམྦུདཱིཔོ ཧིམཝཱ ཏཏྠ པཏིཊྛིཏསམུདྡདཧཔབྦཏནདིཡོཏི ཨེཏེསུ ཡཾ ཡཾ ན མནུསྶགོཙརཾ, ཏཏྠ སཡཾ སམྨཱུལ༹ྷཱ ཨཉྙེཔི སམྨོཧཡནྟི, ཏཏྠ ཏཏྠ སམྨོཧཝིདྷམནཏྠཾ ‘‘ཨཡཾ ཀིར ཛམྦུདཱིཔོ’’ཏིཨཱདིམཱརདྡྷཾ. དསསཧསྶཡོཛནཔརིམཱཎོ ཨཱཡཱམཏོ ཙ ཝིཏྠཱརཏོ ཙཱཏི ཨདྷིཔྤཱཡོ. ཏེནཱཧ ‘‘ཏཏྠཱ’’ཏིཨཱདི. ཨུདཀེན ཨཛ྄ཛྷོཏྠཊོ ཏདུཔབྷོགིསཏྟཱནཾ པུཉྙཀྑཡེན.

སུནྡརདསྶནཾ ཀཱུཊནྟི སུདསྶནཀཱུཊཾ, ཡཾ ལོཀེ ‘‘ཧེམཀཱུཊ’’ནྟི ཝུཙྩཏི. མཱུལགནྡྷོ ཀཱལཱ༹ནུསཱརིཡཱདི. སཱརགནྡྷོ ཙནྡནཱདི. ཕེགྒུགནྡྷོ སལལཱདི. ཏཙགནྡྷོ ལཝངྒཱདི. པཔཊིཀགནྡྷོ ཀབིཏྠཱདི. རསགནྡྷོ སཛྫཱདི, པཏྟགནྡྷོ ཏམཱལཧིརིཝེརཱདི. པུཔྥགནྡྷོ ནཱགཀུངྐུམཱདི. ཕལགནྡྷོ ཛཱཏིཕལཱདི. གནྡྷགནྡྷོ སབྦེསཾ གནྡྷཱནཾ གནྡྷོ. ཡསྶ ཧི རུཀྑསྶ སབྦེསམྤི མཱུལཱདཱིནཾ གནྡྷོ ཨཏྠི, སོ ཨིདྷ གནྡྷོ ནཱམ. ཏསྶ གནྡྷསྶ གནྡྷོ གནྡྷགནྡྷོ. སབྦཱནི པུཐུལཏོ པཉྙཱསཡོཛནཱནི, ཨཱཡཱམཏོ པན ཨུབྦེདྷཏོ ཝིཡ དྭིཡོཛནསཏཱནེཝཱཏི ཝདནྟི.

མནོཧརསིལཱཏལཱནཱིཏི ཨོཏརཎཏྠཱཡ མནུཉྙསོཔཱནསིལཱཏལཱནི. སུཔཊིཡཏྟཱནཱིཏི ཏདུཔབྷོགིསཏྟཱནཾ སཱདྷཱརཎཀམྨཱནུབྷཱཝེན སུཊྛུ པཊིཡཏྟཱནི སུཔྤཝཏྟིཏཱནི ཧོནྟི. མཙྪཀཙྪཔཱདཡོ ཨུདཀཾ མལིནཾ ཀརོནྟི, ཏདབྷཱཝཏོ ཕལིཀསདིསནིམྨལུདཀཱནི. ཏིརིཡཏོ དཱིགྷཾ ཨུགྒཏཀཱུཊནྟི ‘‘ཏིརཙྪཱནཔབྦཏ’’ནྟི ཨཱཧ.

ཨཱཔཎཱནི ¶ ཨེཝ ཝོཧཱརསྶ མུཁབྷཱུཏཱནཱིཏི ཨཱཧ ‘‘ཨཱཔཎམུཁསཧསྶཱནཱི’’ཏི. ཝིབྷཏྟཱནཱིཏི ¶ ཝཝཏྠིཏཱནི ཨཉྙམཉྙཱསམྦྷིནྣཱནི. ཝསནཊྛཱནནྟི ཨཏྟནོ ཡཐཱཕཱསུཀཾ ཝསིཏབྦཊྛཱནཾ. ཨཱསཏི ཨེཏྠཱཏི ཨཱསནཾ, ནིསཱིདིཏབྦཊྛཱནཱནི.

ཨསཱརུཔྤཾ པཊིཙྩ ཨུཔྤཛྫནཀསྶ ཚཱདནཏོ ཚནྣཾ ཨནུཙྪཝིཀཾ, ཏདེཝ ཨཛ྄ཛྷཱསཡསམྤཏྟིཾ པཏིརཱུཔེཏི པཀཱསེཏཱིཏི པཏིརཱུཔཾ. ཏེནཱཧ ‘‘ནཔྤཏིརཱུཔ’’ནྟི. ཀཱརཎཝེཝཙནཱནཱིཏི ཉཱཔཀཀཱརཎཝེཝཙནཱནི. ཉཱཔཀཉྷི ཀཱརཎཾ ཨདྷིཔྤེཏཾ. ཨཏྠཾ ཨཱཀརོཏི པཀཱསེཏཱིཏི ཨཱཀཱརོ, ཏམེཝ ལཱིནཾ གུལ༹ྷཾ ཨཏྠཾ གམེཏཱིཏི ལིངྒཾ, སོ ཏེན ནིམཱིཡཏཱིཏི ནིམིཏྟནྟི ཝུཙྩཏི. ཨིདཱནི ཏམེཝཏྠཾ ཝིཝརིཏུཾ ‘‘དཱིགྷདསཝཏྠ…པེ… ནིམིཏྟཱཏི ཝུཏྟཱ’’ཏི ཨཱཧ. ཏེཏི ཨཱཀཱརཱདཡོ. ཏཐཱ ཧི པན མེཏིཨཱདིནཱ པོཏལིཡོ གཧཔཏི ‘‘པརིབྦཱཛཀནིཡཱམེན ཨཧཾ ཛཱིཝཱམི, ཏསྨཱ གཧཔཏི ན ཧོམཱིཏི ཝདཏི. ཨོཝདནྟོཏི ཨནུསཱསནྟོ. ཨུཔཝདནྟོཏི པརིབྷཱསནྟོ.

༣༢. གེདྷབྷཱུཏོ ལོབྷོཏི གིཛ྄ཛྷནསབྷཱཝོ ལོབྷོ. ཨགིཛ྄ཛྷནལཀྑཎོ ན ལོབྷོ, ཨནིནྡཱབྷཱུཏཾ ཨགྷཊྚནནྟི ནིནྡཱཡ པཊིཔཀྑབྷཱུཏཾ པརེསཾ ཨགྷཊྚནཾ. ནིནྡཱགྷཊྚནཱཏི ནིནྡཱཝསེན པརེསཾ གྷཊྚནཱ ཨཀྐོསནཱ. བྱཝཧཱརཝོཧཱརོཔཱིཏི ཀཡཝིཀྐཡལཀྑཎོ སབྱོཧཱརོཔི དཱནགྒཧཎཾ ཝོཧཱརོ. ‘‘དཏྟོ ཏིསྶོ’’ ཏིཨཱདིནཱ ཝོཧརཎཾ པཉྙཱཔནནྟི པཉྙཏྟི ཝོཧཱརོ. ཡཐཱདྷིཔྤེཏསྶ ཨཏྠསྶ ཝོཧརཎཾ ཀཐནཾ བོདྷནནྟི ཝཙནཾ ཝོཧཱརོ. ཡཱཐཱཝཏོ ཨཡཱཐཱཝཏོ ཙ ཝོཧརཏི ཨེཏེནཱཏི ཝོཧཱརོ, ཙེཏནཱ. ཨཡམིདྷཱདྷིཔྤེཏོཏི ཨཡཾ ཙེཏནཱལཀྑཎོ ཝོཧཱརོ ཨིདྷ ཨིམསྨིཾ ཨཏྠེ ཨདྷིཔྤེཏོ, སོ ཙ ཁོ སཱཝཛྫོཝ སམུཙྪེདསྶ ཨིཙྪིཏཏྟཱ. ཨིདཱནི ཙཏུབྦིདྷསྶཔི ཝོཧཱརསྶ ཨིདྷ སམྦྷཝཾ དསྶེཏུཾ ‘‘ཡསྨཱ ཝཱ’’ཏིཨཱདི ཝུཏྟཾ. གིཧཱིཏི ཙེཏནཱ ནཏྠཱིཏི ཨཧཾ གིཧཱིཏི ཙེཏནཱཔཝཏྟི ནཏྠི. གིཧཱིཏི ཝཙནཾ ནཏྠཱིཏི གིཧཱིཏི ཨཏྟནོ པརེསཉྩ ཝཙནཔྤཝཏྟི ནཏྠི. གིཧཱིཏི པཎྞཏྟི ནཏྠཱིཏི གིཧཱིཏི སམཉྙཱ ནཏྠི. གིཧཱིཏི བྱཝཧཱརོ ནཏྠཱིཏི སམུདཱཙཱརོ ནཏྠི.

༣༣. པཱཎཱཏིཔཱཏོཝ སཾཡོཛནཾ. ཀསྨཱ? བནྡྷནབྷཱཝེན པཝཏྟནཏོ ནིསྶརིཏུཾ ཨཔྤདཱནཏོ. པཱཎཱཏིཔཱཏསྶ ཨཏྠིཏཱཡ སོ པུགྒལོ ¶ ‘‘པཱཎཱཏིཔཱཏཱི’’ཏི ཝུཙྩཏཱིཏི ཨཱཧ – ‘‘པཱཎཱཏིཔཱཏསྶ…པེ… ཧོཏཱི’’ཏི. ཡཉྷི ཡསྶ ཨཏྠི, ཏེན སོ ཨཔདིསྶཏཱིཏི. བཧུཏཱཡཱཏི ཨཙཀྑུཀཱདིབྷེདེན བཧུབྷཱཝཏོ. པཱཎཱཏིཔཱཏསྶ པཊིཔཀྑོ ཨཔཱཎཱཏིཔཱཏོ. སོ པན ཨཏྠཏོ ཀཱཡདྭཱརིཀོ སཱིལསཾཝརོཏི ཨཱཧ ‘‘ཀཱཡིཀསཱིལསཾཝརེནཱ’’ཏི. ཨཏྟཱཔི མཾ ཨུཔཝདེཡྻཱཏིཨཱདི པཱཎཱཏིཔཱཏེ ཨཱདཱིནཝདསྶནཾ. ཨཱདཱིནཝདསྶིནོ ཧི ཏཏོ ཨོརམཎཾ. དེསནཱཝསེནཱཏི ¶ ཨཉྙཏྠ སུཏྟེ ཨབྷིདྷམྨེ ཙ དསསུ སཾཡོཛནེསུ པཉྩསུ ནཱིཝརཎེསུ དེསནཱཝསེན ཨཔརིཡཱཔནྣམྤི སཾཡོཛནནྟིཔི ནཱིཝརཎནྟིཔི ཨིདྷ ཝུཏྟཾ. ཀསྨཱ? ཏདཏྠསམྦྷཝཏོ. ཏེནཱཧ – ‘‘ཝཊྚབནྡྷནཊྛེན ཧིཏཔྤཊིཙྪཱདནཊྛེན ཙཱ’’ཏི, པཱཎཱཏིཔཱཏོ ཧི ཨཔཱཎཱཏིཔཱཏཔཙྩཡཾ ཧིཏཾ པཊིཙྪཱདེནྟོཝ ཨུཔྤཛྫཏཱིཏི. ཨེཀོ ཨཝིཛྫཱསཝོཏི ཨིདཾ སཧཛཱཏཝསེན ཝུཏྟཾ, ཨུཔནིསྶཡཝསེན པན ཨིཏརེསམྤི ཨཱསཝཱནཾ ཡཐཱརཧཾ སམྦྷཝོ ཝེདིཏབྦོ. པཱཎཱཏིཔཱཏཱི ཧི པུགྒལོ ‘‘ཏཔྤཙྩཡཾ ཨཏྠཾ ཀརིསྶཱམཱི’’ཏི ཀཱམེ པཏྠེཏི. དིཊྛིཾ གཎྷཱཏི, བྷཝཝིསེསཾ པཙྩཱསཱིསཏི. ཏཏྠ ཨུཔྤནྣཾ ཝིཧནཏི བཱདྷཏཱིཏི ཝིགྷཱཏོ, དུཀྑཾ, པརིལཱ༹ཧནཾ ཨནཏྠུཔྤཱདཝསེན ཨུཔཏཱཔནཾ པརིལཱ༹ཧོ, ཨཡམེཏེསཾ ཝིསེསོ. སབྦཏྠཱཏི སབྦེསུ ཝཱརེསུ. ཨིམིནཱ ཨུཔཱཡེནཱཏི ཨཏིདེསེན པན པརིགྒཧིཏོ ཨཏྠོ པརཏོ ཨཱགམིསྶཏཱིཏི.

༣༤-༤༠. ཨིམསྨིཾ པདེཏི ཨེཏེན སཏྟསུཔི ཝཱརེསུ ཏཐཱ ཨཱགཏཾ པདཾ སཱམཉྙཏོ གཧིཏཾ. ཏེནཱཧ ‘‘ཨིམིནཱ’’ཏིཨཱདི. རོསནཾ ཀཱཡིཀཾ ཝཱཙསིཀཉྩཱཏི ཏཔྤཊིཔཀྑོ ཨརོསོཔི ཏཐཱ དུཝིདྷོཏི ཨཱཧ ‘‘ཀཱཡིཀཝཱཙསིཀསཾཝརེནཱ’’ཏི. ཡཐཱ ཨབྷིཛ྄ཛྷཱ ལོབྷོ, ཨནབྷིཛ྄ཛྷཱ ཨལོབྷོ, ཨེཝཾ ཨཀོདྷཱུཔཱཡཱསོ ཨབྱཱཔཱདོ, སཾཝརེ སུཁནྟི སཾཝརོཏི དཊྛབྦོ, ཨནཏིལོབྷོ པན སཏིསཾཝརེ, ཨནཏིམཱནོ ཉཱཎསཾཝརེ སངྒཧཾ གཙྪཏཱིཏི དཊྛབྦཾ. ཨིམེསུ པན པདེསུ ཨེཝཾ སབྦཝཱརེསུ ཡོཛནཱ ཀཱཏབྦཱཏི སམྦནྡྷོ.

ཨེཝཾ ཨཱསཝུཔྤཏྟི ཝེདིཏབྦཱཏི ཨེཏྠ ཝུཏྟསྶཔི ཨེཀཛ྄ཛྷཾ ཝུཙྩམཱནཏྟཱ ‘‘པུན ཨཡཾ སངྑེཔཝིནིཙྪཡོ’’ཏི ཝུཏྟཾ. ཨསམྨོཧཏྠཾ ཨཱརམྨཎསྶ. པུརིམེསུ ཏཱཝ ཙཏཱུསུ ཝཱརེསུ ཝིརམིཏུཾ ན སཀྐོམཱིཏི ཝཏྟབྦཾ. ‘‘ཨཏྟཱཔི མཾ ཨུཔཝདེཡྻཱ’’ཏི ཨེཏསྶ པདསྶ ཨཏྠཝཎྞནཱཡཾ ‘‘ན སཀྐོམཱི’’ཏི, ‘‘ཨནུཝིཛྫཱཔི མཾ ཝིཉྙཱུ གརཧེཡྻུ’’ནྟི ཨེཏསྶ པདསྶ ཨཏྠཝཎྞནཱཡཾ ‘‘ན སཀྐོཏཱི’’ཏི ¶ ཝཏྟབྦཾ, ཨིམིནཱ ནཡེན པཙྪིམེསུཔི ཙཏཱུསུ ཡཐཱརཧཾ ཡོཛནཱ ཝེདིཏབྦཱ. ཨཏིམཱནེ བྷཝཱསཝཨཝིཛྫཱསཝཱཏི ཝུཏྟཾ མཱནེན སཧ དིཊྛིཡཱ ཨནུཔྤཛྫནཏོ, ཨཏིམཱནོ པན ཀཱམརཱགེནཔི ཨུཔྤཛྫཏེཝཱཏི ‘‘ཨཏིམཱནེ ཀཱམཱསཝཨཝིཛྫཱསཝཱ’’ཏི ཝཏྟབྦཾ སིཡཱ, སྭཱཡཾ ནཡོ ཝུཏྟནཡཏྟཱ སུཝིཉྙེཡྻོཏི ན དསྶིཏོ. པཱཏིམོཀྑསཾཝརསཱིལཾ ཀཐིཏཾ ཨཱདིཏོ ཙཏཱུཧི ཚཊྛེན ཝཱཏི པཉྩཧི ཝཱརེཧི, སེསེཧི ཏཱིཧི པཱཏིམོཀྑསཾཝརསཱིལེ ཋིཏསྶ བྷིཀྑུནོ པཊིསངྑཱཔཧཱནཾ, སབྦེཧིཔི པན བྷིཀྑུབྷཱཝེ ཋིཏསྶ གིཧིཝོཧཱརསམུཙྪེདོ ཀཐིཏོ. ཏཏྠ སབྦཏྠ ཝཏྟཾ ‘‘ཨིདཉྩིདཉྩ མཡ྄ཧཾ ཀཱཏུཾ ནཔྤཏིརཱུཔ’’ནྟི པཊིསངྑཱནཝསེན ཨཀརཎཾ པཛཧནཉྩ པཊིསངྑཱཔཧཱནཾ.

ཀཱམཱདཱིནཝཀཐཱཝཎྞནཱ

༤༢. ཨུཔསུམྦྷེཡྻཱཏི ¶ ཨེཏྠ ཨུཔ-སདྡོ སམཱིཔཏྠོ, སུམྦྷནཾ ཝིཀྑེཔནཾ. ཏེནེཝ ཏམེནནྟི བྷུམྨཏྠེ ཨུཔཡོགཝཙནནྟི ཨཱཧ – ‘‘ཏསྶ སམཱིཔེ ཁིཔེཡྻཱ’’ཏི, ཏསྶ ཀུཀྐུརསྶ སམཱིཔེ ཨཊྛིཀངྐལཾ ཁིཔེཡྻཱཏི ཨཏྠོ. ནིམྨཾསཏྟཱ ཀངྐལནྟི ཝུཙྩཏཱིཏི ཨིམིནཱ ཝིགཏམཾསཱཡ ཨཊྛིཀངྐལིཀཱཡ ཨུརཊྛིམྷི ཝཱ པིཊྛིཀཎྚཀེ ཝཱ སཱིསཊྛིམྷི ཝཱ ཀངྐལ-སདྡོ ནིརུལ༹ྷོཏི དསྶེཏི. སུནིཀྐནྟནྟི ནིལླིཁིཏཾ ཀཏྭཱཝ ནིབྦིསེསཾ ལིཁིཏཾ.

ཨེཀཏྟུཔཊྛཱནསྶ ཨཛ྄ཛྷུཔེཀྑནཝསེན པཝཏྟིཡཱ ཨེཀཏྟཱ. ཏེནཱཧ ‘‘ཙཏུཏྠཛྷཱནུཔེཀྑཱ’’ཏི. ཡསྨཱ པནསྶ ཨཱརམྨཎམྤི ཨེཀསབྷཱཝམེཝ, ཏསྨཱ ཨཱཧ ‘‘སཱ ཧཱི’’ཏིཨཱདི. ལོཀཱམིསསངྑཱཏཱཏི ཨཔརིཉྙཱཏཝཏྠུནཱ ལོཀེན ཨཱམསིཏབྦཏོ, ལོཀེ ཝཱ ཨཱམིསོཏི སངྑཾ གཏཱཡ ཝསེན ཀཱམགུཎཱནཾ ཀཱམབྷཱཝོ ཙ ཨཱམིསབྷཱཝོ ཙ, སོ ཨེཝ ནིཔྤརིཡཱཡཏོ ཨཱམིསནྟི ཝཏྟབྦཏཾ ཨརཧཏི. ཀཱམགུཎཱམིསཱཏི ཀཱམགུཎེ ཚནྡརཱགཱ. གཧཎཊྛེན བྷུསཾ ཨཱདཱནཊྛེན.

༤༣. ཌཡནཾ ཨཱཀཱསེན གམནནྟི ཨཱཧ ‘‘ཨུཔྤཏིཏྭཱ གཙྪེཡྻཱ’’ཏི. གིཛ྄ཛྷཱདཱིནཾ ཝཱསིཕརསུ ན ཧོཏཱིཏི ཨཱཧ – ‘‘མུཁཏུཎྜཀེན ཌསནྟཱ ཏཙྪེཡྻུ’’ནྟི. ཝིསྶཛྫེཡྻུནྟི ཨེཏྠ ‘‘ཝིསྶཛྫན’’ནྟི ཨཱཀཌྜྷནཾ ཨདྷིཔྤེཏཾ ཨནེཀཏྠཏྟཱ དྷཱཏཱུནཾ, ཨཱཀཌྜྷནཉྩ ཨནུབནྡྷིཏྭཱ པཱཏནནྟི ཨཱཧ ‘‘མཾསཔེསིཾ ནཁེཧི ཀཌྜྷིཏྭཱ པཱཏེཡྻུ’’ནྟི.

༤༧. པུརིསསྶ ¶ ཨཱརོཧནཡོགྱཾ པོརིསེཡྻཾ.

༤༨. སམྤནྣཾ སུནྡརཾ ཕལམསྶཱཏི སམྤནྣཕལཾ. ཕལཱུཔཔནྣནྟི ཕལེཧི ཨུཔེཏནྟི ཨཱཧ ‘‘བཧུཕལ’’ནྟི.

༥༠. སུཝིདཱུརཝིདཱུརེཏི ཨརིཡསྶ ཝིནཡེ ཝོཧཱརསམུཙྪེདཏོ སུཊྛུ ཝིདཱུརབྷཱུཏེ ཨེཝ ཝིདཱུརེ ཨཧཾ ཋིཏོ. ཀསྶཙི ནཱམ ཨཏྠསྶཔི ཨཛཱནནཏོ ན ཨཱཛཱནནྟཱིཏི ཨནཱཛཱནཱིཡཱཏི ཀཏྟུསཱདྷནམསྶ དསྶེནྟོ ཨཛཱནནཀེཏི ཨཛཱནནྟབྷོཛནསཱིསེན ཏེསཾ དཱཏབྦཔཙྩཡེ ཝདཏི. སེསཾ སུཝིཉྙེཡྻམེཝ.

པོཏལིཡསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༥. ཛཱིཝཀསུཏྟཝཎྞནཱ

༥༡. ཀུམཱརེན ¶ བྷཏོ པོསཱཔིཏོཏི ཀུམཱརབྷཏོ, ཀུམཱརབྷཏོ ཨེཝ ཀོམཱརབྷཙྩོ ཡཐཱ ‘‘བྷིསཀྐམེཝ བྷེསཛྫ’’ནྟི.

ཨཱརབྷནྟཱིཏི ཨེཏྠ ཨཱརབྷ-སདྡོ ཀཱམཾ ཀཱམཱཡཱུཧནཡཉྙུཊྛཱཔནཨཱཔཏྟིཨཱཔཛྫནཝིཉྙཱཔནཱདཱིསུཔི ཨཱགཏོ, ཨིདྷ པན ཧིཾསནེ ཨིཙྪིཏབྦོཏི ཨཱཧ – ‘‘ཨཱརབྷནྟཱིཏི གྷཱཏེནྟཱི’’ཏི. ཨུདྡིསིཏྭཱ ཀཏནྟི (ཨ. ནི. ཊཱི. ༣.༨.༡༢; སཱརཏྠ. ཊཱི. མཧཱཝགྒ ༣.༢༩༤) ཨཏྟཱནཾ ཨུདྡིསིཏྭཱ མཱརཎཝསེན ཀཏཾ ནིབྦཏྟིཏཾ. པཊིཙྩཀམྨནྟི ཨེཏྠ ཀམྨ-སདྡོ ཀམྨསཱདྷནོ ཨཏཱིཏཀཱལིཀོཏི ཨཱཧ – ‘‘ཨཏྟཱནཾ པཊིཙྩ ཀཏ’’ནྟི. ནིམིཏྟཀམྨསྶེཏཾ ཨདྷིཝཙནཾ ‘‘པཊིཙྩ ཀམྨཾ ཕུསཏཱི’’ཏིཨཱདཱིསུ (ཛཱ. ༡.༤.༧༥) ཝིཡ. ནིམིཏྟཀམྨསྶཱཏི ནིམིཏྟབྷཱཝེན ལདྡྷབྦཀམྨསྶ, ན ཀརཎཀཱརཱཔནཝསེན. པཊིཙྩཀམྨཾ ཨེཏྠ ཨཏྠཱིཏི མཾསཾ པཊིཙྩཀམྨཾ ཡཐཱ ‘‘བུདྡྷཾ ཨེཏསྶ ཨཏྠཱིཏི བུདྡྷོ’’ཏི. ཏེསནྟི ནིགཎྛཱནཾ. ཨཉྙེཔི བྲཱཧྨཎཱདཡོ ཏཾལདྡྷིཀཱ ཨཏྠེཝ.

ཀཱརཎནྟི ཨེཏྠ ཡུཏྟི ཨདྷིཔྤེཏཱ, སཱ ཨེཝ ཙ དྷམྨཏོ ཨནཔེཏཏྟཱ ‘‘དྷམྨོ’’ཏི ཝུཏྟཱཏི ཨཱཧ – ‘‘ཀཱརཎཾ ནཱམ ཏིཀོཊིཔརིསུདྡྷམཙྪམཾསཔརིབྷོགོ’’ཏི. ཨནུཀཱརཎཾ ནཱམ མཧཱཛནསྶ ཏཐཱ བྱཱཀརཎཾ ཡུཏྟིཡཱ དྷམྨསྶ ཨནུརཱུཔབྷཱཝཏོ མཾསཾ པརིབྷུཉྫིཏབྦནྟི ཨནུཉྙཱཏཾ ཏཐེཝ ཀཐནནྟི ཀཏྭཱ. ཏནྟི ‘‘ཛཱནཾ ཨུདྡིསྶཀཏཾ མཾསཾ པརིབྷུཉྫཏཱི’’ཏི ཨེཝཾ ཝུཏྟཾ པརིབྷུཉྫནཾ ནེཝ ཀཱརཎཾ ཧོཏི ¶ སབྦེན སབྦཾ ཨབྷཱཝཏོ སཏི ཙ ཨཡུཏྟིཡཾ ཨདྷམྨོཏི ཀཏྭཱ. ཏཐཱ བྱཱཀརཎནྟི ‘‘ཛཱནཾ ཨུདྡིསྶཀཏཾ མཾསཾ པརིབྷུཉྫཏཱི’’ཏི ཀཐནཾ ཡུཏྟིཡཱ དྷམྨསྶ ཨནནུརཱུཔབྷཱཝཏོ ན ཨནུཀཱརཎཾ ཧོཏི. པརེཧི ཝུཏྟཀཱརཎེན སཀཱརཎོ ཧུཏྭཱཏི པརེ ཏིཏྠིཡཱ ‘ཛཱན’ནྟིཨཱདིནཱ དྷམྨཾ ཀཐེནྟི ཝདནྟི, ཏེན ཀཱརཎབྷཱུཏེན སཀཱརཎོ ཧུཏྭཱ. ཏེཧི ཏཐཱ ཝཏྟབྦོ ཨེཝ ཧུཏྭཱ ཏུམྷཱཀཾ ཝཱདོ ཝཱ ཨནུཝཱདོ ཝཱ ‘‘མཾསཾ པརིབྷུཉྫིཏབྦ’’ནྟི པཝཏྟཱ ཏུམྷཱཀཾ ཀཐཱ ཝཱ པརཏོ པརེཧི ཏཐཱ པཝཏྟིཏཱ ཏསྶཱ ཨནུཀཐཱ ཝཱ. ཝིཉྙཱུཧི གརཧིཏབྦཀཱརཎནྟི ཏིཏྠིཡཱ ཏཱཝ ཏིཊྛནྟུ, ཏཏོ ཨཉྙེཧི པཎྜིཏེཧི གརཧིཏབྦཀཱརཎཾ. ཀོཙི ན ཨཱགཙྪཏཱིཏི གརཧིཏབྦཏཾ ན ཨཱཔཛྫཏཱིཏི ཨཏྠོ. ཨབྷིབྷཝིཏྭཱ ཨཱཙིཀྑནྟཱིཏི ཨབྷིབྷུཡྻ མདྡིཏྭཱ ཀཐེནྟི, ཨབྷིབྷཱུཏེན ཨཀྐོསནྟཱིཏི ཨཏྠོ.

༥༢. ཀཱརཎེཧཱིཏི ¶ པརིབྷོགཙིཏྟསྶ ཨཝིསུདྡྷཏཱཧེཏཱུཧི. བྷིཀྑཱུ ཨུདྡིསྶཀཏཾ དིཊྛཾ. ཏཱདིསམཾསཉྷི པརིབྷོགཱནཱརཧཏྟཱ ཙིཏྟཨཝིསུདྡྷིཡཱ ཀཱརཎཾ ཙིཏྟསཾཀིལེསཱཝཧཏོ. ཨིདཱནི དིཊྛསུཏཔརིསངྐིཏཱནི སརཱུཔཏོ དསྶེཏུཾ ‘‘དིཊྛཱདཱིསཱུ’’ཏིཨཱདི ཝུཏྟཾ. ཏཏྠ ཏདུབྷཡཝིམུཏྟཔརིསངྐིཏནྟི ‘‘དིཊྛཾ སུཏ’’ནྟི ཨིམཾ ཨུབྷཡཾ ཨནིསྶཱཡ – ‘‘ཀིཾ ནུ ཁོ ཨིམཾ བྷིཀྑུཾ ཨུདྡིསྶ ཝདྷིཏྭཱ སམྤཱདིཏ’’ནྟི ཀེཝལམེཝ པརིསངྐིཏཾ. སབྦསངྒཱཧཀོཏི སབྦེསཾ ཏིཎྞཾ པརིསངྐིཏཱནཾ སངྒཎྷནཀོ.

མངྒལཱདཱིནནྟི ཨཱདི-སདྡེན ཨཱཧུནཔཱཧུནཱདིཀཾ སངྒཎྷཱཏི. ནིབྦེམཏིཀཱ ཧོནྟཱིཏི སབྦེན སབྦཾ པརིསངྐིཏཱབྷཱཝམཱཧ. ཨིཏརེསནྟི ཨཛཱནནྟཱནཾ ཝཊྚཏི, ཛཱནཏོ ཨེཝེཏྠ ཨཱཔཏྟི ཧོཏི. ཏེཡེཝཱཏི ཡེ ཨུདྡིསྶ ཀཏཾ, ཏེཡེཝ.

ཨུདྡིསྶཀཏམཾསཔརིབྷོགཏོ ཨཀཔྤིཡམཾསཔརིབྷོགསྶ ཝིསེསཾ དསྶེཏུཾ ‘‘ཨཀཔྤིཡམཾསཾ པནཱ’’ཏིཨཱདི ཝུཏྟཾ. པུརིམསྨིཾ སཙིཏྟཀཱ ཨཱཔཏྟི, ཨིཏརསྨིཾ ཨཙིཏྟཀཱ. ཏེནཱཧ – ‘‘ཨཀཔྤིཡམཾསཾ ཨཛཱནིཏྭཱ བྷུཏྟསྶཔི ཨཱཔཏྟིཡེཝཱ’’ཏི. པརིབྷོགནྟི པརིབྷུཉྫིཏབྦནྟི ཝདཱམཱིཏི ཨཏྠོ.

༥༣. ཏཱདིསསྶཱཏི ཏིཀོཊིཔརིསུདྡྷསྶ མཙྪམཾསསྶ པརིབྷོགེ. མེཏྟཱཝིཧཱརིནོཔཱིཏི ཨཔི-སདྡེན ཨམེཏྟཱཝིཧཱརིནོཔི. མེཏྟཱཝིཧཱརིནོ པརིབྷོགེ སིཁཱཔྤཏྟཱ ཨནཝཛྫཏཱཏི དསྶེཏུཾ ‘‘ཨིདྷ, ཛཱིཝཀ, བྷིཀྑཱུ’’ཏིཨཱདི ¶ ཝུཏྟཾ. ཨནིཡམེཏྭཱཏི ཨཝིསེསེཏྭཱ སཱམཉྙཏོ. ཡསྨཱ བྷགཝཏཱ – ‘‘ཡཏོ ཁོ, ཝཙྪ, བྷིཀྑུནོ ཏཎྷཱ པཧཱིནཱ ཧོཏཱི’’ཏིཨཱདིནཱ མཧཱཝཙྪགོཏྟསུཏྟེ (མ. ནི. ༢.༡༩༤) ཨཏྟཱ ཨནིཡམེཏྭཱ ཝུཏྟོ. ཏཐཱ ཧི ཝཙྪགོཏྟོ – ‘‘ཏིཊྛཏུ བྷཝཾ གོཏམོ, ཨཏྠི པན བྷོཏོ གོཏམསྶ ཨེཀབྷིཀྑུཔི སཱཝཀོ ཨཱསཝཱནཾ ཁཡཱ…པེ… ཨུཔསམྤཛྫ ཝིཧརཏཱི’’ཏི ཨཱཧ, ‘‘ཨིདྷ, བྷཱརདྭཱཛ, བྷིཀྑུ ཨཉྙཏརཾ གཱམཾ ཝཱ ནིགམཾ ཝཱ ཨུཔནིསྶཱཡ ཝིཧརཏཱི’’ཏིཨཱདིནཱ ཙངྐཱིསུཏྟེ (མ. ནི. ༢.༤༣༠) ཨཏྟཱ ཨནིཡམེཏྭཱ ཝུཏྟོ. ཏཐཱ ཧི ཏཏྠ པརཏོ – ‘‘ཡཾ ཁོ པན ཨཡམཱཡསྨཱ དྷམྨཾ དེསེཏི, གམྦྷཱིརོ སོ དྷམྨོ དུདྡསོ དུརནུབོདྷོ སནྟོ པཎཱིཏོ ཨཏཀྐཱཝཙརོ ནིཔུཎོ པཎྜིཏཝེདནཱིཡོ, ན སོ དྷམྨོ སུདེསནཱིཡོ ལུདྡེནཱ’’ཏིཨཱདིནཱ དེསནཱ ཨཱགཏཱ, ཏསྨཱ ཝུཏྟཾ ‘‘བྷགཝཏཱ ཧི མཧཱཝཙྪགོཏྟསུཏྟེ, ཙངྐཱིསུཏྟེ ཨིམསྨིཾ སུཏྟེཏི ཏཱིསུ ཋཱནེསུ ཨཏྟཱནཾཡེཝ སནྡྷཱཡ དེསནཱ ཀཏཱ’’ཏི. མཾསཱུཔསེཙནོཝ ཨདྷིཔྤེཏོ མཙྪམཾསསཧིཏསྶ ཨཱཧཱརསྶ པརིབྷོགབྷཱཝཏོ མཙྪམཾསསྶ ཙ ཨིདྷ ཨདྷིཔྤེཏཏྟཱ.

ཨགཐིཏོ ¶ ཨཔྤཊིབདྡྷོ. ཏཎྷཱམུཙྪནཱཡཱཏི ཏཎྷཱཡནཝསེན མུཙྪཱཔཏྟིཡཱ. ཨནཛ྄ཛྷོཔནྣོ ཏཎྷཱཡ ཨབྷིབྷཝིཏྭཱ ན ཨཛ྄ཛྷོཏྠཊོ, གིལིཏྭཱ པརིནིཊྛཔེཏྭཱ ན སཎྛིཏོཏི ཨཏྠོ. ཏེནཱཧ – ‘‘སབྦཾ ཨཱལུམྤིཏྭཱ’’ཏིཨཱདི. ཨིདྷ ཨཱདཱིནཝོ ཨཱཧཱརསྶ པཊིཀཱུལབྷཱཝོཏི ཨཱཧ ‘‘ཨེཀརཏྟིཝཱསེནཱ’’ཏིཨཱདི. ཨཡམཏྠོ ཨཱཧཱརཔརིབྷོགོཏི ཨཏྠསཾཡོཛནཔརིཙྪེདིཀཱ ‘‘ཡཱཝདེཝ ཨིམསྶ ཀཱཡསྶ ཋིཏིཡཱ’’ཏིཨཱདིནཱ (དཱི. ནི. ༣.༡༨༢; མ. ནི. ༡.༢༣; ༢.༢༤; ༣.༧༥; སཾ. ནི. ༤.༡༢༠) པཝཏྟཱ ཨཱཧཱརཔཊིབདྡྷཚནྡརཱགནིསྶརཎབྷཱུཏཱ པཉྙཱ ཨསྶ ཨཏྠཱིཏི ནིསྶརཎཔཉྙོ. ཨིདམཏྠནྟི ཨེཏམཏྠཱཡ. ཨེཝཾ སནྟེཏི ‘‘བྲཧྨཱཏི ཙ མེཏྟཱཝིཧཱརིནོ སམཉྙཱ’’ཏི ཨཝཏྭཱ ཡེ དྷམྨཱ མེཏྟཱཝིཧཱརསྶ པཊིཔཀྑབྷཱུཏཱ, ཏཏྠ སཱཝསེསཾ པཧཱསི བྲཧྨཱ, ཨནཝསེསཾ པཧཱསི བྷགཝཱཏི སཙེ ཏེ ཨིདཾ སནྡྷཱཡ བྷཱསིཏཾ, ཨེཝཾ སནྟེ ཏཝ ཨིདཾ ཡཐཱཝུཏྟཝཙནཾ ཨནུཛཱནཱམི, ན མེཏྟཱཝིཧཱརིཏཱསཱམཉྙམཏྟཏོཏི ཨཏྠོ.

༥༥. ‘‘པཱཊིཡེཀྐོ ¶ ཨནུསནྡྷཱི’’ཏི ཝཏྭཱ ཝིསུཾ ཨནུསནྡྷིབྷཱཝཾ དསྶེཏུཾ ‘‘ཨིམསྨིཾ ཧཱི’’ཏིཨཱདི ཝུཏྟཾ. དྭཱརཾ ཐཀེཏཱིཏི མཙྪམཾསཔརིབྷོགཱནུཉྙཱཡ ཨཉྙེསཾ ཝཙནདྭཱརཾ པིདཧཏི, ཙོདནཱཔཐཾ ནིརུནྡྷཏི. ཀཐཾ སཏྟཱནུདྡཡཾ དསྶེཏི? སཏྟཱནུདྡཡམུཁེན བཱཧིརཀཱནཾ མཙྪམཾསཔརིབྷོགཔཊིཀྑེཔོ ཏཡིདཾ མིཙྪཱ, ཏིཀོཊིཔརིསུདྡྷསྶེཝ མཙྪམཾསསྶ པརིབྷོགོ བྷགཝཏཱ ཨནུཉྙཱཏོ. ཏཐཱ ཧི ཝུཏྟཾ – ‘ཏཱིཧི ཁོ ཨཧཾ, ཛཱིཝཀ, ཋཱནེཧི མཾསཾ པརིབྷོགནྟི ཝདཱམཱི’ཏིཨཱདི (མ. ནི. ༢.༥༢). ཝིནཡེཔི (པཱརཱ. ༤༠༩; ཙཱུལ༹ཝ. ༣༤༣) ཝུཏྟཾ – ‘‘ཏིཀོཊིཔརིསུདྡྷཾ, དེཝདཏྟ, མཙྪམཾསཾ མཡཱ ཨནུཉྙཱཏ’’ནྟི. ཏིཀོཊིཔརིསུདྡྷཉྩ བྷུཉྫནྟཱནཾ སཏྟེསུ ཨནུདྡཡཱ ནིཙྩལཱ. ‘‘སཏྟཱནུདྡཡཾ དསྶེཏཱི’’ཏི སངྑེཔཏོ ཝུཏྟམཏྠཾ ཝིཝརནྟོ ‘‘སཙེ ཧཱི’’ཏིཨཱདིམཱཧ.

པཋམེན ཀཱརཎེནཱཏི དེསནཱཝསེནཔི པཡོགཝསེནཔི པཋམེན པརཱུཔགྷཱཏཧེཏུནཱ. ཀཌྜྷིཏོ སོ པཱཎོ. གལེན པཝེདྷེནྟེནཱཏི ཡོཏྟགལེན ཀརཎེན ཨསཡ྄ཧམཱནེན. བཧུཔུཉྙམེཝ ཧོཏི ཨཱསཱདནཱཔེཀྑཱཡ ཨབྷཱཝཏོ, ཧིཏཛ྄ཛྷཱསཡཏྟཱ ཝཱཏི ཨདྷིཔྤཱཡོ. ཨེསཱཧཾ, བྷནྟེཏིཨཱདི ཀསྨཱ ཝུཏྟཾ, སརཎགམནཝསེནེཝ གཧིཏསརཎོཏི ཙོདནཾ སནྡྷཱཡཱཧ ‘‘ཨཡ’’ནྟིཨཱདི. ཨོགཱཧནྟོཏིཨཱདིཏོ པཊྛཱཡ ཡཱཝ པརིཡོསཱནཱ སུཏྟཾ ཨནུསྶརནྟོ ཨཏྠཾ ཨུཔདྷཱརེནྟོ. སེསཾ སུཝིཉྙེཡྻམེཝ.

ཛཱིཝཀསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༦. ཨུཔཱལིསུཏྟཝཎྞནཱ

༥༦. པཱཝཱརཾ ¶ པཱརུཔཏཱིཏི པཱཝཱརིཀོ, ཨིདཾ ཏསྶ ཀུལསམུདཱགཏཾ ནཱམཾ, སོ པན མཧདྡྷནོ མཧཱབྷོགོ ནགརེ སེཊྛིཊྛཱནེ ཋིཏོ. ཏེནཱཧ ‘‘དུསྶཔཱཝཱརིཀསེཊྛིནོ’’ཏི. དཱིགྷཏྟཱ དཱིགྷཏམཏྟཱ. སོ ཀིར པམཱཎཏོ ཨུཔཝཙྪཡཏོ དིཡཌྜྷརཏནཾ ཨཏིཀྐམྨ ཋིཏོ. ཨེཝཾལདྡྷནཱམོཏི ‘‘དཱིགྷཏཔསྶཱི’’ཏི ལདྡྷསམཉྙོ. བཱཧིརཱཡཏནེཏི ཏིཏྠིཡསམཡེ པིཎྜཔཱཏོཏི ཝོཧཱརོ ནཏྠི, ཏསྨཱ སཱསནཝོཧཱརེན ‘‘པིཎྜཔཱཏཔྤཊིཀྐནྟོ’’ཏི ཝུཏྟནྟི ཨདྷིཔྤཱཡོ.

དསྶེཏཱིཏི ¶ དེསེཏི. ཋཔེཏཱིཏི ཨཉྙམཉྙསངྐརཏོ ཝཝཏྠཔེཏི. ཀིརིཡཱཡཱཏི ཀརཎེན. པཝཏྟིཡཱཏི པཝཏྟནེན. དཎྜཱནི པཉྙཔེཏཱིཏི ཨེཏྠ ཀསྨཱ བྷགཝཏཱ ཨཱདིཏོཝ ཏཐཱ ན པུཙྪིཏནྟི? ཡསྨཱ སཱ ཏསྨིཾ ཨཏྠེ སབྷཱཝནིརུཏྟི ན ཧོཏི, སཱསནེ ལོཀེ སམཡནྟརེསུ ཙ ཏཱདིསོ སམུདཱཙཱརོ ནཏྠི, ཀེཝལཾ པན ཏསྶེཝ ནིགཎྛསྶཱཡཾ ཀོཊྛཱལཀསདིསོ སམུདཱཙཱརོཏི ཨིམམཏྠཾ དསྶེཏུཾ ‘‘ཀམྨཱནི པཉྙཔེཏི’’ ཨིཙྩེཝཱཧ. ཨཙིཏྟཀནྟི ཙིཏྟརཧིཏཾ, ཙིཏྟེན ཨསམུཊྛཱཔིཏནྟི ཨཏྠོ. ཀཐཾ པན ཏདུབྷཡསྶ ཙིཏྟེན ཝིནཱ སམྦྷཝོཏི ཙོདནཾ སནྡྷཱཡ ཏཏྠ ནིདསྶནམཱཧ ‘‘ཡཐཱ ཀིརཱ’’ཏིཨཱདི. པཊིཝིབྷཏྟཱནནྟི ཨཏྠཏོ བྷིནྣཱནཾ. པཊིཝིསིཊྛཱནནྟི ཝིསེསནཔདཝསེན སདྡཏོཔི བྷིནྣཱནཾ. ཝཙནཾ པཏིཊྛཔེཏུཀཱམོཏི དཱིགྷཏཔསྶིནོ ཡཐཱཝུཏྟཝཙནཾ པཏིཊྛཔེཏུཀཱམོ. ཏསྨིཉྷི པཏིཊྛཱཔིཏེ ཏེནཔྤསངྒེན ཨཱགཏོ, ཨུཔཱལི གཧཔཏི ཏསྨིཾ པདེསེ དྷམྨཾ དིསྭཱ སཱསནེ ཨབྷིཔྤསཱིདིསྶཏི.

ཀཐཱ ཨེཝ ཨུཔརི ཝཱདཱརོཔནསྶ ཝཏྠུབྷཱཝཏོ ཀཐཱཝཏྠུ. ཀཐཱཡཾ པཏིཊྛཔེསཱིཏི ཀཐཱཝཏྠུསྨིཾ, ཏདཏྠེ ཝཱ པཏིཊྛཔེསི. ཡཐཱ ཏཾ ཝཱདཱརོཔནབྷཡེན ན ཨཝཛཱནཱཏི, ཨེཝཾ ཏསྶཾ ཀཐཱཡཾ, ཏསྨིཾ ཝཱ ཨཏྠེ དཱིགྷཏཔསྶིཾ ཡཱཝཏཏིཡཾ ཝཱདེ པཏིཊྛཔེསི. ཝཱདནྟི དོསཾ.

༥༧. ཨིདཱནི ཙེཏནཱསམྤཡུཏྟདྷམྨམྤི གཧེཏྭཱ ཀཱཡཀམྨཱདིཝསེན སངྒཧེཏྭཱ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ཏཏྠ ཏིཝིདྷཾ ཀཱཡདུཙྩརིཏཾ ཀཱཡཀམྨཾ ནཱམཱཏིཨཱདི ‘‘ཀམྨསྶ ཀིརིཡཱཡཱ’’ཏི པཱལི༹ཡཾ ཨཀུསལཀམྨསྶ ཨདྷིགཏཏྟཱ ཝུཏྟཾ, པུབྦེ པན ཨཊྛཀཱམཱཝཙརཀུསལཙེཏནཱཏིཨཱདི སཱཝཛྫཾ ཨནཝཛྫཉྩ སཱམཉྙཏོ ཨེཀཛ྄ཛྷཾ ཀཏྭཱ དསྶིཏཾ. ཀསྨཱ པནེཏྠ ཙེཏནཱ ན གཧིཏཱཏི ཨཱཧ ‘‘ཨིམསྨིཾ སུཏྟེ ཀམྨཾ དྷུར’’ནྟི. ཀཱཡཀམྨཱདིབྷེདཾ ཀམྨམེཝ ¶ དྷུརཾ ཛེཊྛཀཾ པུབྦངྒམཾ, ན ཙེཏནཱམཏྟམེཝ. ཨེཝམཱགཏེཔཱིཏི ཀམྨཱནཱིཏི ཨེཝཾ ནཱམེན ཨཱགཏེཔི ཙེཏནཱ དྷུརཾ, ཏཏྠ ཙེཏནཾ ཛེཊྛཀཾ པུབྦངྒམཾ ཀཏྭཱ ཝུཏྟནྟི ཨདྷིཔྤཱཡོ. ཀཐཾ པན ཏཏྠ ཀམྨནྟི ཝཱ ཀམྨཱནཱིཏི ཝཱ ཨཱགཏེ ཏེསཾ ཙེཏནཱཡ དྷུརབྷཱཝོཏི ཨཱཧ ‘‘ཡཏྠ ཀཏྠཙི…པེ… ལབྷཏཱི’’ཏི. ཏཏྠ ཡཏྠ ཀཏྠཙཱིཏི ཡསྨིཾ ཀིསྨིཉྩི དྭཱརེ. སཱ ཝུཏྟཱཝཱཏི སཱ ཙེཏནཱ ཝུཏྟཱཝ, ཡཱ ཀཱཡསངྑཱརཱདིཔརིཡཱཡེན (ཡསྶ ཀསྶཙི ཀམྨསྶ ཀཱཡདྭཱརཱདཱིསུ པཝཏྟཱཔནཙེཏནཱ) སམྤཡུཏྟདྷམྨཱཔི ¶ ཏདགྒེན ལོཀིཡཱཔི ལོཀུཏྟརཱཔི ཀམྨམེཝ, ཨབྷིཛ྄ཛྷཱདཡོ པན ཙེཏནཱཔཀྑིཀཱཏི དཊྛབྦཾ.

མཧནྟནྟི ཀཊུཀཕལཾ. ན ཀིལམཏི སཔྤཱཊིཧཱརིཡཏྟཱ པཊིཉྙཱཡ. ཨིདཱནི ཏེསཾ སཔྤཱཊིཧཱརིཡཏཾ དསྶེཏུཾ ‘‘ཏཐཱ ཧཱི’’ཏིཨཱདི ཝུཏྟཾ. ཡདི ཨཀུསལཾ པཏྭཱ ཀཱཡཀམྨཾ ཝཙཱིཀམྨཾ མཧནྟནྟི ཝདནྟོ ན ཀིལམཏི, ཨཐ ཀསྨཱ བྷགཝཱ ཨིདྷ ཨཀུསལཾ མནོཀམྨཾ མཧཱསཱཝཛྫཾ ཀཐེསཱིཏི ཨཱཧ ‘‘ཨིམསྨིཾ པན ཋཱནེ’’ཏིཨཱདི. ཡཱཝཏཏིཡཾ པཏིཊྛཱཔནམཏྟེན གཏམགྒཾ པཊིཔཛྫནྟོ. ཏེནཱཧ ‘‘ཀིཉྩི ཨཏྠནིཔྥཏྟིཾ ཨཔསྶནྟོཔཱི’’ཏི.

༥༨. ནིཝཱསཊྛཱནབྷཱུཏོ བཱལཀོ ཨེཏིསྶཱ ཨཏྠཱིཏི བཱལཀིནཱི. སཏྠུཔཊིཉྙཱཏཏཱཡ ནིགཎྛཱནཾ མཧཱཏི སམྦྷཱཝིཏཏྟཱ མཧཱནིགཎྛོ.

༦༠. ཨཱཝཊྚེཏི པུརིམཱཀཱརཏོ ནིཝཏྟེཏི ཨཏྟནོ ཝསེ ཝཏྟེཏི ཨེཏཱཡཱཏི ཨཱཝཊྚནཱི, མཱཡཱ. ཏེནཱཧ ‘‘ཨཱཝཊྚེཏྭཱ གཧཎམཱཡ’’ནྟི. སཏྠུཔཊིཉྙཱནཾ བུདྡྷདསྶནེ ཙིཏྟམེཝ ན ཨུཔྤཛྫཏི, ཨཡམེཏྠ དྷམྨཏཱ. སཙེ པན སོ ཏཾ པཊིཉྙཾ ཨཔྤཧཱཡ བུདྡྷཱནཾ སམྨུཁཱིབྷཱཝཾ ཨུཔགཙྪེཡྻ, སཏྟདྷཱ མུདྡྷཱ ཕལེཡྻ, ཏསྨཱ བྷགཝཱ ‘‘མཱ ཨཡཾ བཱལོ ཝིནསྶཱི’’ཏིཨཱདིཏོཝ ཡཐཱ སམྨུཁཱིབྷཱཝཾ ན ལབྷཏི, ཏཐཱ ཀརོཏི. སྭཱཡམཏྠོ པཱཐིཀཔུཏྟསམཱགམེན དཱིཔེཏབྦོ. དསྶནསམྤཏྟིནིཡཱམམཱཧ ‘‘ཏཐཱགཏཾ ཧཱི’’ཏིཨཱདི. ཨཱགམཱ ནུ ཁོ ཨིདྷ ཏུམྷཱཀཾ སནྟིཀཾ.

༦༡. ཝཙཱིསཙྩེ པཏིཊྛཧིཏྭཱཏི ཡཐཱཔཊིཉྙཱཏཱཡ པཊིཉྙཱཡ ཋཏྭཱ.

༦༢. སཱིཏོདཀེ ཨམཏཱ པཱཎཱ པཱནཀཱལེ པན མརནྟི, ཏེཔི ཏེན སཱིཏོདཀཔརིབྷོགེན མཱརིཏཱ ཧོནྟི, ཏསྨཱ ཏཔསྶིནཱ ནཱམ སབྦེན སབྦཾ སཱིཏོདཀཾ ན པརིབྷུཉྫིཏབྦནྟི ཏེསཾ ལདྡྷི. པཱཀཏིཀཾ ཝཱ ཨུདཀཾ སཏྟོཏི པུརཱཏནཱནཾ ནིགཎྛཱནཾ ལདྡྷི. ཏེནཱཧ ‘‘སཏྟསཉྙཱཡ སཱིཏོདཀཾ པཊིཀྑིཔནྟཱི’’ཏི. ཏེསཾ ཏཾ ཨདྷུནཱཏནནིགཎྛཱནཾ ཝཱདེན ཝིརུཛ྄ཛྷཏི. ཏེ ཧི པཐཝཱིཨཱདིནཝཔདཏྠཏོ ¶ ཨཉྙམེཝ ཛཱིཝིཏཾ པཊིཛཱནནྟི. ཙིཏྟེན སཱིཏོདཀཾ པཱཏུཀཱམོ པརིབྷུཉྫིཏུཀཱམོ ཧོཏི རོགེ ཋཏྭཱཔི སཏྟཱནཾ ཙིཏྟསྶ ཏཐཱ ན ཝིཏཏཏཱ. ཏེནཱཧ – ‘‘ཏེནསྶ མནོདཎྜོ ཏཏྠེཝ བྷིཛྫཏཱི’’ཏི. ཏེནཱཏི སཱིཏོདཀཾ པཱཏུཾ པརིབྷུཉྫིཏུཉྩ ཨིཙྪནེན. ཨསྶཱཏི ཡཐཱཝུཏྟསྶ ནིགཎྛསྶ. ཏཏྠེཝཱཏི ཏཐཱཙིཏྟུཔྤཱདནེ ཨེཝ. བྷིཛྫཏི སཾཝརསྶ ཝིཀོཔིཏཏྟཱ. ཏཐཱབྷཱུཏོ སོ ནིགཎྛོ སཱིཏོདཀཾ ¶ ཙེ ལབྷེཡྻ, ཀཏིཔཡཾ ཀཱལཾ ཛཱིཝེཡྻ, ཨལཱབྷེན པན པརིསུསྶམཱནཀཎྛོཊྛཏཱལུཛིཝ྄ཧཱཨཱདིཀོ སབྦསོ པརིདཱཧཱབྷིབྷཱུཏོ མརེཡྻ. ཏེནཱཧ – ‘‘སཱིཏོདཀཾ ཨལབྷམཱནོ ཀཱལཾ ཀརེཡྻཱ’’ཏི. ཀསྨཱ? ཡསྨཱ སཱིཏོདཀཾ པིཝཱཡ སནྣིསྶིཏཙིཏྟསྶ མརཎཾ ཧོཏི, ཏསྨཱ ཝུཏྟཾ ‘‘མནོདཎྜོ པན བྷིནྣོཔི ཙུཏིམྤི ཨཱཀཌྜྷཏཱི’’ཏི. ཡསྨཱ པན ཏཐཱབྷཱུཏཙིཏྟསྶ ནིགཎྛསྶ མནོསཏྟེསུ ནཱམ དེཝེསུ ཨུཔཔཏྟི ཧོཏཱིཏི ཏིཏྠིཡཱནཾ ལདྡྷི, ཏསྨཱ ཝུཏྟཾ ‘‘མནོདཎྜོ པན བྷིནྣོཔི པཊིསནྡྷིམྤི ཨཱཀཌྜྷཏཱི’’ཏི. ཨིཏཱིཏི ཨེཝཾ ‘‘ཨིདྷཱསྶ ནིགཎྛོ’’ཏིཨཱདིཨཱཀཱརེན. ནནྟི ཨུཔཱལིཾ གཧཔཏིཾ. མཧནྟོཏི ཝདཱཔེསི ‘‘མནོཔཊིབདྡྷོ ཀཱལངྐརོཏཱི’’ཏི ཝདནྟོཏི ཨདྷིཔྤཱཡོ.

ཨུཔཱསཀསྶཱཏི ཨུཔཱལིསྶ གཧཔཏིསྶ. མུཙྪཱཝསེནཱཏིཨཱདིནཱ ཨནྭཡཏོ བྱཏིརེཀཏོ ཙ མནོདཎྜསྶ མཧནྟཏཾ ཝིབྷཱཝེཏི. ཙིཏྟསནྟཏིཔྤཝཏྟིམཏྟེནེཝཱཏི ཝིནཱ ཀཱཡདཎྜེན ཝཙཱིདཎྜེན ཙ ཀེཝལཾ ཙིཏྟསནྟཏིཔྤཝཏྟིམཏྟེན. བྷིཛྫིཏྭཱཔཱིཏི ཨེཏྠ པི-སདྡེན ཨབྷིཛྫིཏྭཱཔི. ཨནིཡྻཱནིཀཱཏི ཨཔྤཱཊིཧཱིརཱ, ཨཡུཏྟཱཏི ཨཏྠོ. སལླཀྑེསི ཨུཔཱསཀོཏི ཝིབྷཏྟིཾ ཝིཔརིཎཱམེཏྭཱ ཡོཛནཱ. པཉྷཔཊིབྷཱནཱནཱིཏི ཉཱཏུཾ ཨིཙྪིཏེ ཨཏྠེ ཨུཔྤཛྫནཀཔཊིབྷཱནཱནི.

‘‘མནོཔཊིབདྡྷོ ཀཱལཾ ཀརོཏཱི’’ཏི ཝདནྟེན ཨཏྠཏོ མནོདཎྜསྶ ཏདུཏྟརབྷཱཝོ པཊིཉྙཱཏོ ཧོཏཱིཏི ཨཱཧ ‘‘ཨིདཱནི མནོདཎྜོ མཧནྟོཏི ཨིདཾ ཝཙན’’ནྟི. ཏཐཱ ཙེཝ ཝུཏྟཾ – ‘‘མནོདཎྜོཝ བལཝཱ མཧནྟོཏི ཝདཱཔེསཱི’’ཏི.

༦༣. པཱཎཱཏིཔཱཏཱདིཏོ ཡམནཾ ཡཱམོ, ཙཏུབྦིདྷོ ཡཱམོ ཙཏུཡཱམོ, ཙཏུཡཱམསངྑཱཏེན སཾཝརེན སཾཝུཏོ ཙཱཏུཡཱམསཾཝརསཾཝུཏོ. ཨཊྛཀཐཱཡཾ པན ཡཱམ-སདྡོ ཀོཊྛཱསཔརིཡཱཡོཏི ‘‘ཨིམིནཱ ཙཏུཀོཊྛཱསེནཱ’’ཏི ཝུཏྟཾ. པིཡཛཱཏིཀཾ རཱུཔཱདིཨཱརམྨཎཾ རཱགཝསེན བཱལེཧི བྷཱཝནཱིཡཏྟཱ ‘‘བྷཱཝིཏ’’ནྟི ཝུཙྩཏཱིཏི ཨཱཧ ‘‘བྷཱཝིཏནྟི པཉྩ ཀཱམགུཎཱ’’ཏི.

ཡོ སབྦཾ པཱཔཾ ཨཱསཝཉྩ ཝཱརེཏཱིཏི སབྦཝཱརཱི, ཏསྶ ནཝསུ པདཏྠེསུ སཏྟམོ པདཏྠོ, ཏེན སབྦཝཱརིནཱ པཱཔཾ ཝཱརིཏྭཱ ཋིཏོཏི སབྦཝཱརིཝཱརིཏོ ¶ . ཏེནཱཧ ‘‘སབྦེན པཱཔཝཱརཎེན ཝཱརིཏཔཱཔོ’’ཏི. ¶ ཏཏོ ཨེཝ སབྦསྶ ཝཱརིཏབྦསྶ ཨཱསཝསྶ དྷུནནཏོ སབྦཝཱརིདྷུཏོ. ཝཱརིཏབྦསྶ ནིཝཱརཎཝསེན སབྦཝཱརིནོ ཕུཊོ ཕུསིཏོཏི སབྦཝཱརིཕུཊོ. སངྒྷཱཏནྟི སཧསཱ ཧནནཾ, ཨསཉྩེཏནིཀཝདྷནྟི ཨཏྠོ. ཀཏརསྨིཾ ཀོཊྛཱསེཏི ཏཱིསུ དཎྜཀོཊྛཱསེསུ ཀཏརཀོཊྛཱསེ.

༦༤. ཁལིཡཏི སམཱདིཡཏཱིཏི ཁལཾ, རཱསཱིཏི ཨཱཧ – ‘‘ཨེཀཾ མཾསཁལནྟི ཨེཀཾ མཾསརཱསི’’ནྟི. ཝིཛྫཱདྷརཨིདྡྷིཡཱ ཨིདྡྷིམཱ. སཱ པན ཨིདྡྷི ཡསྨཱ ཨཱནུབྷཱཝསམྤནྣསྶེཝ ཨིཛ྄ཛྷཏི, ན ཡསྶ ཀསྶཙི. ཏསྨཱ ཨཱཧ ‘‘ཨཱནུབྷཱཝསམྤནྣོ’’ཏི. ཝིཛྫཱནུབྷཱཝཝསེནེཝ ཨཱནུབྷཱཝསམྤནྣོ. ཙིཏྟེ ཝསཱིབྷཱཝཔྤཏྟོ ཨཱནུབྷཱཝཱཡ ཨེཝ ཝིཛྫཱཡ པགུཎབྷཱཝཱཔཱདནེན. ཨེཏེན ཝསཱིབྷཱཝཾ ལོཀིཡསམཉྙཱཝསེན བྷགཝཱ ཨུཔཱལིཾ གཧཔཏིཾ པཉྙཔེཏུཀཱམོ ཨེཝམཱཧ. ལོཀིཀཱ ཧི ‘‘བྷཱཝནཱམཡཨིདྡྷིཡཱ ཨིདྡྷིམཱ ཙེཏོཝསཱིབྷཱཝཔྤཏྟོ པརཱུཔགྷཱཏཾ ཀརོཏཱི’’ཏི མཉྙནྟི. ཏཐཱ ཧི ཏེ ཨིསཡོ པརེསཾ སཾཝཎྞེནྟི, ཨིསཱིནཾ ཨཱནུབྷཱཝཾ ཀིཏྟེནྟི. ཡཾ པནེཏྠ ཝཏྟབྦཾ, ཏཾ པརཏོ ཨཱགམིསྶཏཱིཏི.

༦༥. ཨརཉྙམེཝ ཧུཏྭཱཏི སབྦསོ ཨརཉྙམེཝ ཧུཏྭཱ. ཨརཉྙབྷཱཝེན ཨརཉྙཾ ཛཱཏཾ, ན ནཱམམཏྟེན. ཨིསཱིནཾ ཨཏྠཱཡཱཏི ཨིསཱིནཾ ཨཱསཱདནཏྠཱཡ.

གོདྷཱཝརཱིཏཱིརཏོ ནཱཏིདཱུརེ. ཨུསཱུཡམཱནོཏི ‘‘ན མཾ ཨེས ཛནོ པརིཝཱརེཏཱི’’ཏི ཨུསཱུཡཾ ཀརོནྟོ. ཀིལིཊྛོ ཝཏཱཏི པངྐདནྟརཛསིརཏཱདཱིཧི ཀིལིཊྛསརཱིརོ. ཨནཉྫིཏམཎྜིཏོཏི ཨནཉྫིཏཀྑིཀོ སབྦེན, སབྦཾ ཨམཎྜིཏོ ཙ. ཏསྨིཾ ཀཱལེ ‘‘ཀཱལསྶེཝ ཨཀྑཱིནཾ ཨཉྫནཾ མངྒལ’’ནྟི མནུསྶཱནཾ ལདྡྷི, ཏསྨཱ ཨནཉྫནཾ ཝིསུཾ གཧིཏཾ.

རཱཛཱ ཏསྶ ཝཙནཾ གཧེཏྭཱཏི ‘‘ཝེདེསུ ཨཱིདིསཾ ཨཱགཏཾ བྷཝིསྶཏཱིཏི ཨེཝཾ, བྷནྟེ’’ཏི རཱཛཱ ཏསྶ པུརོཧིཏསྶ ཝཙནཾ གཧེཏྭཱ. ཨུསུམཛཱཏཧདཡོཏི ཨུཏྟཏྟཧདཡོ. ནཱསིཀཱནཾ ཨཔྤཧོནྟེ མུཁེན ཨསྶསནྟོ.

ཝིཛིཏཛཡེཧི ཨཱགནྟྭཱ ནཀྑཏྟཡུཏྟཾ ཨཱགམེནྟེཧི ནིསཱིདིཏབྦཊྛཱནཾ ཛཡཁནྡྷཱཝཱརཊྛཱནཾ. ཨུདཀཝུཊྛིཔཱཏནཱདི ཏསྨིཾ པཱཔཀམྨེ ཨསམངྒིབྷཱུཏཱནམྤི སམནུཉྙཏཱཡ ¶ ཨནྟོཀརཎཏྠཾ ཀཏཾ. ཀཏབྷཎྜཝུཊྛཱིཏི ཨཱབྷརཎཝསྶཾ. མཧཱཛནོ སམནུཉྙོ ཛཱཏོཏི ཡོཛནཱ. མཱཏུཔོསཀརཱམོཏི མཱཏརི སམྨཱཔཊིཔནྣོ རཱམོ ནཱམ ཨེཀོ པུརིསོ. ཨསམངྒིབྷཱུཏཱནནྟི ཨསམནུཉྙཱནཾ.

ཨཝཀིརིཡཱཏི ¶ ཨསུསྶཱུསཏཾ པཊིཙྩ. ཕུལིངྒཱནཱིཏི ཨགྒིཀཎཱནི. པཏནྟི ཀཱཡེཏི ཀཱཡེ ཨིཏོ ཙིཏོ ནིཔཏནྟི. ཨེཏེ ཀིར ནིརཡཾ ཝིཝརིཏྭཱ མཧཱཛནསྶ དསྶེནྟི.

ཡཐཱཕཱསུཀཊྛཱནནྟི མཡཾ ཀཉྩིཔི དེསཾ ཨུདྡིསྶ ན གཙྪཱམ, ཡཏྠ པན ཝསནྟསྶ པབྦཛིཏསྶ ཕཱསུ ཧོཏི, ཏཾ ཡཐཱཕཱསུཀཊྛཱནཾ གཙྪཱམཱཏི ཨདྷིཔྤཱཡོ. སངྒྷཱཏི སཾཧཏཱ. གཎཱཏི ཏཾཏཾསེཎིབྷཱཝེན གཎིཏབྦཏཱཡ གཎཱ. གཎཱིབྷཱུཏཱཏི ཨེཀཛ྄ཛྷཱསཡཱ ཧུཏྭཱ རཱསིབྷཱུཏཱ. ཨདིནྣཱདཱནནྟིཨཱདཱིསུཔི ནིརཡེ པཙྩིཏྭཱ མནུསྶལོཀཾ ཨཱགཏསྶ ཝིཔཱཀཱཝསེསེནཱཏི ཨཱནེཏྭཱ ཡོཛེཏབྦཾ.

པགྒཎྷིསྶཱམཱིཏི སམྦྷཱཝནཾ ཨུཔྤཱདེསྶཱམི. ནེསཾ ཀཏྟབྦནྟི ཙིནྟེསཱིཏི ཡོཛནཱ. ཀིཾ ཙིནྟེསི? ཨཱགྷཱཏཾ ཨུཔྤཱདེཏྭཱ ཨནཏྠཀརཎཱུཔཱཡཾ. ཏེནཱཧ ‘‘སོ དྷམྨཀཐཱཔརིཡོསཱནེ’’ཏིཨཱདི. ནཱགབལཔིཙྪིལླཱདཱིནནྟི ནཱགབལསཱསཔཨངྐོལཏེལཀཎིཀཱརནིཡྻཱསཱདཱིནཾ ཙིཀྑལླཱནཾ. ཝིཧེཋཡིཾསུ ནིརཡཱདིཀཐཱཧི གྷཊྚེནྟཱ. ཚདྭཱརཱརམྨཎེཏི ཙཀྑཱདཱིནཾ ཚནྣཾ དྭཱརཱནཾ ཨཱརམྨཎབྷཱུཏེ རཱུཔཱདིཝིསཡེ.

ནཝ ཝུཊྛིཡོཏི ཨུདཀཝུཊྛི སུམནཔུཔྥཝུཊྛི མཱསཀཝུཊྛི ཀཧཱཔཎཝུཊྛི ཨཱབྷརཎཝུཊྛི ཨཱཝུདྷཝུཊྛི ཨངྒཱརཝུཊྛི པཱསཱཎཝུཊྛི ཝཱལིཀཱཝུཊྛཱིཏི ཨིམཱ ནཝ ཝུཊྛིཡོ. ཨཝཉྩཡཱིཏི སཀྐཱརཾ ཀརོནྟོ ཝིཡ ཧུཏྭཱ ཨསཀྐཱརཾ ཀརོནྟོ ཨནཏྠཙརཎེན ཝཉྩཡི. ཨདཱུསཀེཏི ཨནཔརཱདྷེ.

‘‘དིཊྛམངྒལིཀཱ བྲཱཧྨཎཀཉྙཱ’’ཏི ཛཱཏཀཊྛཀཐཱདཱིསུ (ཛཱ. ཨཊྛ. ༤.༡༥.མཱཏངྒཛཱཏཀཝཎྞནཱ) ཨཱགཏཾ, ཨིདྷ པན ‘‘སེཊྛིདྷཱིཏཱ’’ཏི. ཝཱརེཡྻཏྠཱཡཱཏི ཨཱཝཱཧཏྠཱཡ, ཨསྶཱཏི པེསིཏཔུགྒལསྶ. ཏཱདིསེན ནཱིཙཀུལསཾཝཏྟནིཡེན ཀམྨུནཱ ལདྡྷོཀཱསེན ཙཎྜཱལཡོནིཡཾ ནིབྦཏྟོ.

ཙམྨགེཧེཏི ¶ ཙམྨེན ཚཱདིཏེ གེཧེ. མཱཏངྒོཏྭེཝསྶ ནཱམཾ ཨཧོསི ཛཱཏིསམུདཱགཏཾ. ཏནྟི གྷཎྚཾ. ཝཱདེནྟོ ཏཱལནེན སདྡཾ ཀརོནྟོ. མཧཱཔཐཾ པཊིཔཛྫི དིཊྛམངྒལིཀཱཡ གེཧདྭཱརསམཱིཔེན.

ཏསྶཱ ཝེཡྻཱཝཙྩཀརཱ ཙེཝ ཨུཔཊྛཱཀམནུསྶཱ པཊིབདྡྷཱ ཙ སུརཱསོཎྜཱདཡོ ཛཱཎུཀཔྤརཱདཱིཧི སུཀོཊྚིཏཾ ཀོཊྚིཏབྷཱཝེན མུཙྪཾ ཨཱཔནྣཏྟཱ མཏོཏི སཉྙཱཡ ཚཌྜེསུཾ.

ཨཐ བོདྷིསཏྟོ ¶ ཨཱཡུཨཝསེསསྶ ཨཏྠིཏཱཡ མནྡམནྡེ ཝཱཏེ ཝཱཡནྟེ ཙིརེན སཉྙཾ པཊིལབྷཏི. ཏེནཱཧ ‘‘མཧཱཔུརིསོ’’ཏིཨཱདི. གེཧངྒཎེཏི གེཧསྶ མཧཱདྭཱརཏོ བཧི ཝིཝཊངྒཎེ. པཏིཏོཏི པཱཏཾ ཀཏྭཱ ཨིཙྪིཏཏྠནིཔྥཏྟིཾ ཨནྟརཾ ཀཏྭཱ ཨནུཔྤཝེསེན ནིཔནྣོ. དིཊྛམངྒལིཀཱཡཱཏི དིཊྛམངྒལིཀཱཀཱརཎེན.

ཡསནྟི ཝིབྷཝཾ ཀིཏྟིསདྡཉྩ. ཙནྡནྟི ཙནྡམཎྜལཾ, ཙནྡཝིམཱནནྟི ཨཏྠོ. ཨུཙྪིཊྛགེཧེཏི པརེཧི པརིབྷུཏྟགེཧེ. མཎྜཔེཏི ནགརམཛ྄ཛྷེ མཧཱམཎྜཔེ.

ཁཱིརམཎིམཱུལནྟི ཁཱིརམཱུལཾ, པཱདེསུ བདྡྷམཎིམཱུལཉྩ. ཡཱཝཏཱ ཝཱཙུགྒཏཱ པརིཡཏྟཱིཏི ཡཏྟཀོ མནུསྶཝཙཱིདྭཱརཏོ ཨུགྒཏོ ནིཀྑནྟོ པཝཏྟོ, ཡཾཀིཉྩི ཝཙཱིམཡནྟི ཨཏྠོ. ཨཱཀཱསངྒཎེཏི ཝིཝཊངྒཎེ.

དུམྨཝཱསཱིཏི དྷཱུམོ དྷཱུསརོ, ཨནཉྫིཏཱམཎྜིཏོཏི ཨདྷིཔྤཱཡོ. ཨོཏལླཀོཏི ནིཧཱིནཛ྄ཛྷཱསཡོ, ཨཔྤཱནུབྷཱཝོཏི ཨཏྠོ. པཊིམུཉྩ ཀཎྛེཏི ཡཱཝ གལཝཱཊཀཱ པཱརུཔིཏྭཱ. ཀོ རེ ཏུཝནྟི ཨརེ ཀོ ནཱམ ཏྭཾ.

པཀཏནྟི པཊིཡཏྟཾ ནཱནཔྤཀཱརཏོ ཨབྷིསངྑཏཾ. ཨུཏྟིཊྛཔིཎྜནྟི ཨནྟརགྷརཾ ཨུཔགམྨ ཋཏྭཱ ལདྡྷབྦཔིཎྜཾ, བྷིཀྑཱཧཱརནྟི ཨཏྠོ. ལབྷཏནྟི ལཙྪཏུ. སཔཱཀོཏི མཧཱསཏྟོ ཛཱཏིཝསེན ཡཐཱབྷཱུཏཾ ཨཏྟཱནཾ ཨཱཝིཀརོཏི.

ཨཏྠཏྠིཏཾ སདྡཧཏོཏི སམྤརཱཡིཀསྶ ཨཏྠསྶ ཨཏྠིབྷཱཝཾ སདྡཧནྟསྶ. ཨཔེཧཱིཏི ཨཔགཙྪ. ཨེཏྟོཏི ཨིམསྨཱ ཋཱནཱ. ཛམྨཱཏི ལཱམཀ.

ཨནཱུཔཁེཏྟེཏི ¶ ཨཛངྒལེ ཨུདཀསམྤནྣེ ཁེཏྟེ ཕལཝིསེསཾ པཙྩཱསཱིསནྟཱ. ཨེཏཱཡ སདྡྷཱཡ དདཱཧི དཱནནྟི ནིནྣཾ ཐལཉྩ པཱུརེནྟོ མེགྷོ ཝིཡ གུཎཝནྟེ ནིགྒུཎེ ཙ དཱནཾ དེཧི, ཨེཝཾ དེནྟོ ཙ ཨཔྤེཝ ཨཱརཱདྷཡེ དཀྑིཎེཡྻེཏི. དཀྑིཎེཡྻེཏི སཱིལཱདིགུཎསམནྣཱགཏེ.

ཏཱནཱིཏི ཏེ བྲཱཧྨཎཱ. ཝེཎུཔདརེནཱཏི ཝེལུ༹ཝིལཱིཝེན.

གིརིཾ ནཁེན ¶ ཁཎསཱིཏི པབྦཏཾ ཨཏྟནོ ནཁེན ཁཎནྟོ ཝིཡ ཨཧོསི. ཨཡོཏི ཀཱལལོཧཾ. པདཧསཱིཏི ཨབྷིབྷཝསི, ཨཏྟནོ སརཱིརེན ཨབྷིབྷཝནྟོ ཝིཡ ཨཧོསི.

ཨཱཝེདྷིཏནྟི ཙལིཏཾ ཝིཔརིཝཏྟེཏྭཱ ཋིཏཾ. པིཊྛིཏོཏི པིཊྛིཔསྶེན. བཱཧུཾ པསཱརེཏི ཨཀམྨནེཡྻནྟི ཨཀམྨཀྑམཾ བཱཧུདྭཡཾ ཐདྡྷཾ སུཀྑདཎྜཀཾ ཝིཡ ཀེཝལཾ པསཱརེཏི, ན སམིཉྫེཏི, སེཏཱནི ཨཀྑཱིནི པརིཝཏྟནེན ཀཎྷམཎྜལསྶ ཨདིསྶནཏོ.

ཛཱིཝིཏནྟི ཛཱིཝནཾ.

ཝེཧཱཡསནྟི ཨཱཀཱསེ. པཐདྡྷུནོཏི པཐབྷཱུཏདྡྷུནོ ཝིཡ.

སཉྙམྤི ན ཀརོཏཱིཏི ‘‘ཨིམེ ཀུལཔྤསུཏཱ’’ཏི སཉྙཱམཏྟམྤི ན ཀརོཏི. དནྟཀཊྛཀུཙྪིཊྛཀནྟི ཁཱདིཏདནྟཀཊྛཏྟཱ ཝུཏྟཾ. ཨེཏསྶེཝ ཨུཔརི པཏིསྶཏི ཨཔྤདུཊྛཔདོསབྷཱཝཏོ, མཧཱསཏྟསྶ ཏདཱ ཨུཀྐཾསགཏཁེཏྟབྷཱཝཏོ. ཨིདྡྷིཝིསཡོ ནཱམ ཨཙིནྟེཡྻོ, ཏསྨཱ ཀཐཾ སཱུརིཡསྶ ཨུགྒནྟུཾ ནཱདཱསཱིཏི ན ཙིནྟེཏབྦཾ. ཨརུཎུགྒཾ ན པཉྙཱཡཏཱིཏི ཏསྨིཾ པདེསེ ཨརུཎཔབྷཱ ན པཉྙཱཡཏི, ཨནྡྷཀཱརོ ཨེཝ ཧོཏི.

ཡཀྑཱཝཊྚོ ནུ ཁོ ཨཡཾ ཀཱལཝིཔརིཡཱཡོ. མཧཱཔཉྙནྟི མཧནྟཱནཾ པཉྙཱནཾ ཨདྷིཊྛཱནབྷཱུཏཾ. ཛནཔདསྶ མུཁཾ པསྶཐཱཏི ཨིམསྶ ཛནཔདཝཱསིནོ ཛནསྶ ཨུཔདྡཝེན མངྐུབྷཱུཏཾ མུཁཾ པསྶཐ.

ཨེཏསྶ ཀཐཱ ཨེཏསྶེཝ ཨུཔརི པཏིསྶཏཱིཏི ཡཱཧི ཏེན པཱརམིཏཱཔརིབྷཱཝནསམིདྡྷཱཧི ནཱནཱསམཱཔཏྟིཝིཧཱརཔརིཔཱུརིཏཱཧི སཱིལདིཊྛིསམྤདཱཧི སུསངྑཏསནྟཱནེ མཧཱཀརུཎཱདྷིཝཱསེ མཧཱསཏྟེ ཨརིཡཱུཔཝཱདཀམྨཨབྷིསཔསངྑཱཏཱ ཕརུསཝཱཙཱ པཝཏྟིཏཱ, སཱ ཨབྷིསཔི ཏསྶ ཁེཏྟཝིསེསབྷཱཝཏོ ཏསྶ ཙ ཨཛ྄ཛྷཱསཡཕརུསཏཱཡ དིཊྛདྷམྨཝེདནིཡཀམྨཾ ཧུཏྭཱ ¶ སཙེ སོ མཧཱསཏྟཾ ན ཁམཱཔེཏི, སཏྟམེ དིཝསེ ཝིཔཙྩནསབྷཱཝཾ ཛཱཏཾ, ཁམཱཔིཏེ པན མཧཱསཏྟེ པཡོགསམྤཏྟི པཊིབཱཧིཏཏྟཱ ཨཝིཔཱཀདྷམྨཏཾ ཨཱཔཛྫཏི ཨཧོསིཀམྨབྷཱཝཏོ. ཨཡཉྷི ཨརིཡཱུཔཝཱདཔཱཔསྶ དིཊྛདྷམྨཝེདནིཡསྶ དྷམྨཏཱ, ཏེན ཝུཏྟཾ ‘ཨེཏསྶ ཀཐཱ ཨེཏསྶེཝ ཨུཔརི པཏིསྶཏཱི’ཏིཨཱདི. མཧཱསཏྟོ པན ཏཾ ཏསྶ ཨུཔརི པཏིཏུཾ ན ཨདཱསི, ཨུཔཱཡེན མོཙེསི. ཏེན ཝུཏྟཾ ཙརིཡཱཔིཊཀེ (ཙརིཡཱ. ༢.༦༤) –

‘‘ཡཾ སོ ¶ ཏདཱ མཾ ཨབྷིསཔི, ཀུཔིཏོ དུཊྛམཱནསོ;

ཏསྶེཝ མཏྠཀེ ནིཔཏི, ཡོགེན ཏཾ པམོཙཡི’’ནྟི.

ཡཉྷི ཏཏྠ སཏྟམེ དིཝསེ བོདྷིསཏྟེན སཱུརིཡུགྒམནནིཝཱརཎཾ ཀཏཾ, ཨཡམེཏྠ ཡོགོཏི ཨདྷིཔྤེཏོ. ཡོགེན ཧི ཨུབྦལ༹ྷཱ སརཱཛིཀཱ པརིསཱ ནགརཝཱསིནོ ནེགམཱ ཙེཝ ཛཱནཔདཱ ཙ བོདྷིསཏྟསྶ སནྟིཀཾ ཏཱཔསཾ ཨཱནེཏྭཱ ཁམཱཔེསུཾ. སོ ཙ བོདྷིསཏྟསྶ གུཎེ ཛཱནིཏྭཱ ཏསྨིཾ ཙིཏྟཾ པསཱདེསི. ཡཾ པནསྶ མཏྠཀེ མཏྟིཀཱཔིཎྜསྶ ཋཔནཾ, ཏསྶ ཙ སཏྟདྷཱ ཕཱལནཾ ཀཏཾ, ཏཾ མནུསྶཱནཾ ཙིཏྟཱནུརཀྑཎཏྠཾ. ཨཉྙཐཱ ཧི – ‘‘ཨིམེ པབྦཛིཏཱ སམཱནཱ ཙིཏྟསྶ ཝསེ ཝཏྟནྟི, ན པན ཙིཏྟཾ ཨཏྟནོ ཝསེ ཝཏྟཱཔེནྟཱི’’ཏི མཧཱསཏྟམྤི ཏེན སདིསཾ ཀཏྭཱ གཎྷེཡྻུཾ, ཏདསྶ ཏེསཾ དཱིགྷརཏྟཾ ཨཧིཏཱཡ དུཀྑཱཡཱཏི. ཏེནཱཧ ‘‘ཨཐསྶཱ’’ཏིཨཱདི.

ལོཧཀཱུཊཝསྶནྟི ཨཡགུལ༹ཝསྶཾ. ཏདཱ ཧི རཏནམཏྟཱནི དིཡཌྜྷརཏནམཏྟཱནིཔི ཏིཁིཎཾསཱནི ཨཡགུལ༹མཎྜལཱནི ཨིཏོ ཙིཏོ ཙ ནིཔཏནྟཱ མནུསྶཱནཾ སརཱིརཱནི ཁཎྜཁཎྜཀཱནི ཨཀཾསུ. ཀལལཝསྶནྟི ཏནུཀཀདྡམཔཊལཀདྡམཾ. ཨུཔཧཙྩཱཏི ཨཱགྷཱཊེཏྭཱ. ཏདེཝ མཛ྄ཛྷཱརཉྙཾ.

༦༧. ཨནུཝིཙྩཀཱརནྟི ཨནུཝིཙྩཀརཎཾ. ཀཱརཎེཧི དྭཱིཧི ཨནིཡྻཱནིཀསཱསནེ ཋིཏཱནཾ ཨཏྟནོ སཱཝཀཏྟཾ ཨུཔགཏེ པགྒཧནིགྒཧཱནི དསྶེཏུཾ ‘‘ཀསྨཱ’’ཏིཨཱདི ཝུཏྟཾ.

༦༩. ཨནུཔུབྦིཾ ཀཐནྟི (དཱི. ནི. ཊཱི. ༢.༧༥-༧༦; ཨ. ནི. ཊཱི. ༣.༨.༡༢) ཨནུཔུབྦིཡཱ ཨནུཔུབྦཾ ཀཐེཏབྦཀཐཾ, ཀཱ པན སཱ? དཱནཱདིཀཐཱ. དཱནཀཐཱ ཏཱཝ པཙུརཛནེསུཔི པཝཏྟིཡཱ སབྦསཱདྷཱརཎཏྟཱ སུཀརཏྟཱ སཱིལེ པཏིཊྛཱནསྶ ཨུཔཱཡབྷཱཝཏོ ཙ ཨཱདིཏོཝ ཀཐིཏཱ ¶ . པརིཙྩཱགསཱིལོ ཧི པུགྒལོ པརིགྒཧཝཏྠཱུསུ ནིསྶངྒབྷཱཝཏོ སུཁེནེཝ སཱིལཱནི སམཱདིཡཏི, ཏཏྠ ཙ སུཔྤཏིཊྛིཏོ ཧོཏི. སཱིལེན དཱཡཀཔཊིགྒཧཎཝིསུདྡྷིཏོ པརཱནུགྒཧཾ ཝཏྭཱ པརཔཱིལཱ༹ནིཝཏྟིཝཙནཏོ, ཀིརིཡདྷམྨཾ ཝཏྭཱ ཨཀིརིཡདྷམྨཝཙནཏོ, བྷོགཡསསམྤཏྟིཧེཏུཾ ཝཏྭཱ བྷཝསམྤཏྟིཧེཏུཝཙནཏོ ཙ དཱནཀཐཱནནྟརཾ སཱིལཀཐཱ ཀཐིཏཱ. ཏཉྩ སཱིལཾ ཝཊྚནིསྶིཏཾ, ཨཡཾ བྷཝསམྤཏྟི ཏསྶ ཕལནྟི དསྶནཏྠཾ, ཨིམེཧི ཙ དཱནསཱིལམཡེཧི པཎཱིཏཙརིཡབྷེདབྷིནྣེཧི པུཉྙཀིརིཡཝཏྠཱུཧི ཨེཏཱ ཙཱཏུམཧཱརཱཛིཀཱདཱིསུ པཎཱིཏཏརཱདིབྷེདབྷིནྣཱ ཨཔརིམེཡྻཱ བྷོགབྷཝསམྤཏྟིཡོཏི དསྶནཏྠཾ ཏདནནྟརཾ སགྒཀཐཱ. སྭཱཡཾ སགྒོ རཱགཱདཱིཧི ཨུཔཀྐིལིཊྛོ སབྦདཱ ཨནུཔཀྐིལིཊྛོ ཨརིཡམགྒོཏི དསྶནཏྠཾ སགྒཱནནྟརཾ མགྒོ, མགྒཉྩ ཀཐེནྟེན ¶ ཏདདྷིགམཱུཔཱཡསནྡསྶནཏྠཾ སགྒཔརིཡཱཔནྣཱཔི པགེཝ ཨིཏརེ སབྦེཔི ཀཱམཱ ནཱམ བཧྭཱདཱིནཝཱ ཨནིཙྩཱ ཨདྡྷུཝཱ ཝིཔརིཎཱམདྷམྨཱཏི ཀཱམཱནཾ ཨཱདཱིནཝོ. ཧཱིནཱ གམྨཱ པོཐུཛྫནིཀཱ ཨནརིཡཱ ཨནཏྠསཉྷིཏཱཏི ཏེསཾ ཨོཀཱརོ ལཱམཀབྷཱཝོ, སབྦེཔི བྷཝཱ ཀིལེསཱནཾ ཝཏྠུབྷཱུཏཱཏི ཏཏྠ སཾཀིལེསོ. སབྦསོ ཀིལེསཝིཔྤམུཏྟཾ ནིབྦཱནནྟི ནེཀྑམྨེ ཨཱནིསཾསོ ཙ ཀཐེཏབྦོཏི ཨཡམཏྠོ མགྒནྟཱིཏི ཨེཏྠ ཨིཏི-སདྡེན དསྶིཏོཏི ཝེདིཏབྦཾ.

སུཁཱནཾ ནིདཱནནྟི དིཊྛདྷམྨིཀཱནཾ སམྤརཱཡིཀཱནཾ ནིབྦཱནསཉྷིཏཱནཉྩཱཏི སབྦེསམྤི སུཁཱནཾ ཀཱརཎཾ. ཡཉྷི ཀིཉྩི ལོཀེ བྷོགསུཁཾ ནཱམ, ཏཾ སབྦཾ དཱནནིདཱནནྟི པཱཀཊོ ཨཡམཏྠོ. ཡཾ པན ཛྷཱནཝིཔསྶནཱམགྒཕལནིབྦཱནཔཊིསཾཡུཏྟཾ སུཁཾ, ཏསྶཔི དཱནཾ ཨུཔནིསྶཡཔཙྩཡོ ཧོཏིཡེཝ. སམྤཏྟཱིནཾ མཱུལནྟི ཡཱ ཨིམཱ ལོཀེ པདེསརཛྫསིརིསྶརིཡསཏྟརཏནསམུཛྫལཙཀྐཝཏྟིསམྤདཱཏི ཨེཝཾཔབྷེདཱ མཱནུསིཀཱ སམྤཏྟིཡོ, ཡཱ ཙ ཙཱཏུམཧཱརཱཛཱདིགཏཱ དིབྦཱ སམྤཏྟིཡོ, ཡཱ ཝཱ པནཉྙཱཔི སམྤཏྟིཡོ, ཏཱསཾ སབྦཱསཾ ཨིདཾ མཱུལཀཱརཎཾ. བྷོགཱནནྟི བྷུཉྫིཏབྦཊྛེན ‘‘བྷོགོ’’ནྟི ལདྡྷནཱམཱནཾ མནཱཔིཡརཱུཔཱདཱིནཾ, ཏནྣིསྶཡཱནཾ ཝཱ ཨུཔབྷོགསུཁཱནཾ, པཏིཊྛཱ ནིཙྩལཱདྷིཊྛཱནཏཱཡ. ཝིསམགཏསྶཱཏི བྱསནཔྤཏྟསྶ. ཏཱཎནྟི རཀྑཱ ཏཏོ པརིཔཱལནཏོ. ལེཎནྟི བྱསནེཧི པརིཔཱཏིཡམཱནསྶ ཨོལཱིཡནཔདེསོ. གཏཱིཏི གནྟབྦཊྛཱནཾ. པརཱཡཎནྟི པཊིསརཎཾ. ཨཝསྶཡོཏི ཝིནིཔཏིཏུཾ ཨདེནྟོ ནིསྶཡོ. ཨཱརམྨཎནྟི ཨོལུབྦྷཱརམྨཎཾ.

རཏནམཡསཱིཧཱསནསདིསནྟི ¶ སབྦརཏནམཡསཏྟངྒམཧཱསཱིཧཱསནསདིསཾ, མཧགྒྷཾ ཧུཏྭཱ སབྦསོ ཝིནིཔཏིཏུཾ ཨཔྤདཱནཏོ. མཧཱཔཐཝིསདིསཾ གཏགཏཊྛཱནེ པཏིཊྛཱསམྦྷཝཏོ. ཡཐཱ དུབྦལསྶ པུརིསསྶ ཨཱལམྦནརཛྫུ ཨུཏྟིཊྛཏོ ཏིཊྛཏོ ཙ ཨུཔཏྠམྦྷོ, ཨེཝཾ དཱནཾ སཏྟཱནཾ སམྤཏྟིབྷཝེ ཨུཔཔཏྟིཡཱ ཋིཏིཡཱ ཙ པཙྩཡོ ཧོཏཱིཏི ཨཱཧ ‘‘ཨཱལམྦནཊྛེན ཨཱལམྦནརཛྫུསདིས’’ནྟི. དུཀྑནིཏྠརཎཊྛེནཱཏི དུགྒཏིདུཀྑནིཏྠརཎཊྛེན. སམསྶཱསནཊྛེནཱཏི ལོབྷམཙྪརིཡཱདིཔཊིསཏྟུཔདྡཝཏོ སམྨདེཝ ཨསྶཱསནཊྛེན. བྷཡཔརིཏྟཱཎཊྛེནཱཏི དཱལིདྡིཡབྷཡཏོ པརིཔཱལནཊྛེན. མཙྪེརམལཱདཱིཧཱིཏི མཙྪེརལོབྷདོསཨིསྶཱམིཙྪཱདིཊྛིཝིཙིཀིཙྪཱདི ཙིཏྟམལེཧི. ཨནུཔལིཏྟཊྛེནཱཏི ཨནུཔཀྐིལིཊྛཏཱཡ. ཏེསནྟི མཙྪེརམལཱདཱིནཾ. ཨེཏེསཾ ཨེཝ དུརཱསདཊྛེན. ཨསནྟཱསནཊྛེནཱཏི ཨསནྟཱསཧེཏུབྷཱཝེན. ཡོ ཧི དཱཡཀོ དཱནཔཏི, སོ སམྤཏིཔི ན ཀུཏོཙི སནྟསཏི, པགེཝ ཨཱཡཏིཾ. བལཝནྟཊྛེནཱཏི མཧཱབལཝཏཱཡ. དཱཡཀོ ཧི དཱནཔཏི སམྤཏི པཀྑབལེན བལཝཱ ཧོཏི, ཨཱཡཏིཾ པན ཀཱཡབལཱདཱིཧི. ཨབྷིམངྒལསམྨཏཊྛེནཱཏི ‘‘ཝུཌྜྷིཀཱརཎ’’ནྟི ཨབྷིསམྨཏབྷཱཝེན. ཝིཔཏྟིཏོ སམྤཏྟིཡཱ ནཡནཾ ཁེམནྟབྷཱུམིསམྤཱཔནཾ.

ཨིདཱནི ¶ མཧཱབོདྷིཙརིཡབྷཱཝེནཔི དཱནགུཎཾ དསྶེཏུཾ དཱནཾ ནཱམེཏནྟིཨཱདི ཝུཏྟཾ. ཏཏྠ ཨཏྟཱནཾ ནིཡྻཱདེནྟེནཱཏི ཨེཏེན དཱནཕལཾ སམྨདེཝ པསྶནྟཱ མཧཱཔུརིསཱ ཨཏྟནོ ཛཱིཝིཏམྤི པརིཙྩཛནྟི, ཏསྨཱ ཀོ ནཱམ ཝིཉྙུཛཱཏིཀོ བཱཧིརེ ཝཏྠུམྷི སངྒཾ ཀརེཡྻཱཏི ཨོཝཱདཾ དེཏི. ཨིདཱནི ཡཱ ལོཀིཡཱ ལོཀུཏྟརཱ ཙ ཨུཀྐཾསགཏཱ སམྤཏྟིཡོ, ཏཱ སབྦཱ དཱནཏོཡེཝ པཝཏྟནྟཱིཏི དསྶེནྟོ ‘‘དཱནཉྷཱི’’ཏིཨཱདིམཱཧ. ཏཏྠ སཀྐམཱརབྲཧྨསམྤཏྟིཡོ ཨཏྟཧིཏཱཡ ཨེཝ, ཙཀྐཝཏྟིསམྤཏྟི པན ཨཏྟཧིཏཱཡ ཙ པརཧིཏཱཡ ཙཱཏི དསྶེཏུཾ སཱ ཏཱསཾ པརཏོ ཝུཏྟཱ. ཨེཏཱ ལོཀིཡཱ, ཨིམཱ པན ལོཀུཏྟརཱཏི དསྶེཏུཾ ‘‘སཱཝཀཔཱརམཱིཉཱཎ’’ནྟིཨཱདི ཝུཏྟཾ. ཏཱསུཔི ཨུཀྐཊྛུཀྐཊྛཏརུཀྐཊྛཏམམེཝ དསྶེཏུཾ ཀམེན ཉཱཎཏྟཡཾ ཝུཏྟཾ. ཏེསཾ པན དཱནསྶ པཙྩཡབྷཱཝོ ཧེཊྛཱ ཝུཏྟོཡེཝ. ཨེཏེནེཝ ཏསྶ བྲཧྨསམྤཏྟིཡཱཔི པཙྩཡབྷཱཝོ དཱིཔིཏོཏི ཝེདིཏབྦོ.

དཱནཉྩ ནཱམ ཧིཏཛ྄ཛྷཱསཡེན, པཱུཛཱཝསེན ཝཱ ཨཏྟནོ སནྟཀསྶ པརེསཾ པརིཙྩཛནཾ, ཏསྨཱ དཱཡཀོ པུརིསཔུགྒལོ པརེསཾ སནྟཀཾ ཧརིསྶཏཱིཏི ¶ ཨཊྛཱནམེཏནྟི ཨཱཧ – ‘‘དཱནཾ དདནྟོ སཱིལཾ སམཱདཱཏུཾ སཀྐོཏཱི’’ཏི. སཱིལཱལངྐཱརསདིསོ ཨལངྐཱརོ ནཏྠི སོབྷཱཝིསེསཱཝཧཏྟཱ སཱིལསྶ. སཱིལཔུཔྥསདིསཾ པུཔྥཾ ནཏྠཱིཏི ཨེཏྠཱཔི ཨེསེཝ ནཡོ. སཱིལགནྡྷསདིསོ གནྡྷོ ནཏྠཱིཏི ཨེཏྠ ‘‘ཙནྡནཾ ཏགརཾ ཝཱཔཱི’’ཏིཨཱདིཀཱ (དྷ. པ. ༥༥; མི. པ. ༤.༡.༡) གཱཐཱ – ‘‘གནྡྷོ ཨིསཱིནཾ ཙིརདིཀྑིཏཱནཾ, ཀཱཡཱ ཙུཏོ གཙྪཏི མཱལུཏེནཱ’’ཏིཨཱདིཀཱ (ཛཱ. ༢.༡༧.༥༥) ཛཱཏཀགཱཐཱཡོ ཙ ཨཱཧརིཏྭཱ ཝཏྟབྦཱ, སཱིལཉྷི སཏྟཱནཾ ཨཱབྷརཎཉྩེཝ ཨལངྐཱརོ ཙ གནྡྷཝིལེཔནཉྩ དསྶནཱིཡབྷཱཝཱཝཧཉྩ. ཏེནཱཧ ‘‘སཱིལཱལངྐཱརེན ཧཱི’’ཏིཨཱདི.

ཨཡཾ སགྒོ ལབྦྷཏཱིཏི ཨིདཾ མཛ྄ཛྷིམེཧི ཚནྡཱདཱིཧི སམཱདཱནསཱིལཾ སནྡྷཱཡཱཧ. ཏེནཱཧ སཀྐོ དེཝརཱཛཱ –

‘‘ཧཱིནེན བྲཧྨཙརིཡེན, ཁཏྟིཡེ ཨུཔཔཛྫཏི;

མཛ྄ཛྷིམེན ཙ དེཝཏྟཾ, ཨུཏྟམེན ཝིསུཛ྄ཛྷཏཱི’’ཏི. (ཛཱ. ༡.༨.༧༥; ༢.༢༢.༤༢༩; དཱི. ནི. ཊཱི. ༢.༧༥-༧༦);

ཨིཊྛོཏི སུཁོ. ཀནྟོཏི ཀམནཱིཡོ. མནཱཔོཏི མནཝཌྜྷནཀོ. ཏཾ པན ཏསྶ ཨིཊྛཱདིབྷཱཝཾ དསྶེཏུཾ ‘‘ནིཙྩམེཏྠ ཀཱིལཱ༹’’ཏིཨཱདི ཝུཏྟཾ.

དོསོཏི ཨནིཙྩཏཱདིནཱ ཨཔྤསྶཱདཱདིནཱ ཙ དཱུསིཏབྷཱཝོ, ཡཏོ ཏེ ཝིཉྙཱུནཾ ཙིཏྟཾ ནཱརཱདྷེནྟི ¶ . ཨཐ ཝཱ ཨཱདཱིནཾ ཝཱཏི པཝཏྟེཏཱིཏི ཨཱདཱིནཝོ, པརམཀཔཎཏཱ. ཏཐཱ ཙ ཀཱམཱ ཡཐཱབྷཱུཏཾ པཙྩཝེཀྑནྟཱནཾ པཙྩུཔཏིཊྛནྟི. ལཱམཀབྷཱཝོཏི ཨསེཊྛེཧི སེཝིཏབྦོ, སེཊྛེཧི ན སེཝིཏབྦོ ནིཧཱིནབྷཱཝོ. སཾཀིལིསྶནནྟི ཝིབཱདྷཀཏཱ ཨུཔཏཱཔཏཱ ཙ.

ནེཀྑམྨེ ཨཱནིསཾསནྟི ཨེཏྠ ཡཏྟཀཱ ཀཱམེསུ ཨཱདཱིནཝཱ, ཏཔྤཊིཔཀྑཏོ ཏཏྟཀཱ ནེཀྑམྨེ ཨཱནིསཾསཱ. ཨཔིཙ – ‘‘ནེཀྑམྨཾ ནཱམེཏཾ ཨསམྦཱདྷཾ ཨསཾཀིལིཊྛཾ ནིཀྑནྟཾ ཀཱམེཧི, ནིཀྑནྟཾ ཀཱམསཉྙཱཡ, ནིཀྑནྟཾ ཀཱམཝིཏཀྐེཧི, ནིཀྑནྟཾ ཀཱམཔརིལཱ༹ཧེཧི, ནིཀྑནྟཾ བྱཱཔཱདསཉྙཱཡཱ’’ཏིཨཱདིནཱ (སཱརཏྠ. ཊཱི. མཧཱཝགྒ ༣.༢༦; དཱི. ནི. ཊཱི. ༢.༧༥-༧༦) ནཡེན ནེཀྑམྨེ ཨཱནིསཾསེ པཀཱསེསི, པབྦཛྫཱཡ ཛྷཱནཱདཱིསུ ཙ གུཎེ ཝིབྷཱཝེསི ཝཎྞེསི. ཀལླཙིཏྟནྟི ཧེཊྛཱ པཝཏྟིཏདེསནཱཡ ཨསྶདྡྷིཡཱདཱིནཾ ཙིཏྟདོསཱནཾ ཝིགཏཏྟཱ ཨུཔརིདེསནཱཡ བྷཱཛནབྷཱཝཱུཔགམནེན ཀམྨཀྑམཙིཏྟཾ. ཨཊྛཀཐཱཡཾ པན ཡསྨཱ ཨསྶདྡྷིཡཱདཡོ ཙིཏྟསྶ རོགབྷཱུཏཱ ¶ , ཏདཱ ཏེ ཝིགཏཱ, ཏསྨཱ ཨཱཧ ‘‘ཨརོགཙིཏྟ’’ནྟི. དིཊྛིམཱནཱདིཀིལེསཝིགམེན མུདུཙིཏྟཾ. ཀཱམཙྪནྡཱདིཝིགམེན ཝིནཱིཝརཎཙིཏྟཾ. སམྨཱཔཊིཔཏྟིཡཾ ཨུལཱ༹རཔཱིཏིཔཱམོཛྫཡོགེན ཨུདགྒཙིཏྟཾ. ཏཏྠ སདྡྷཱསམྤཏྟིཡཱ པསནྣཙིཏྟཾ. ཡདཱ བྷགཝཱ ཨཉྙཱསཱིཏི སམྦནྡྷོ. ཨཐ ཝཱ ཀལླཙིཏྟནྟི ཀཱམཙྪནྡཝིགམེན ཨརོགཙིཏྟཾ. མུདུཙིཏྟནྟི བྱཱཔཱདཝིགམེན མེཏྟཱཝསེན ཨཀཐིནཙིཏྟཾ. ཝིནཱིཝརཎཙིཏྟནྟི ཨུདྡྷཙྩཀུཀྐུཙྩཝིགམེན ཝིཀྑེཔསྶ ཝིགཏཏྟཱ ཏེན ཨཔིཧིཏཙིཏྟཾ. ཨུདགྒཙིཏྟནྟི ཐིནམིདྡྷཝིགམེན སམྤགྒཧིཏཝསེན ཨལཱིནཙིཏྟཾ. པསནྣཙིཏྟནྟི ཝིཙིཀིཙྪཱཝིགམེན སམྨཱཔཊིཔཏྟིཡཾ ཨདྷིམུཏྟཙིཏྟནྟི ཨེཝམེཏྠ སེསཔདཱནཾ ཨཏྠོ ཝེདིཏབྦོ.

སེཡྻཐཱཔཱིཏིཨཱདིནཱ ཨུཔམཱཝསེན ཨུཔཱལིསྶ སཾཀིལེསཔྤཧཱནཾ ཨརིཡམགྒནིཔྥཱདནཉྩ དསྶེཏི. ཨཔགཏཀཱལ༹ཀནྟི ཝིགཏཀཱལ༹ཀཾ. སམྨདེཝཱཏི སུཊྛུ ཨེཝ. རཛནནྟི ནཱིལཔཱིཏཱདིརངྒཛཱཏཾ. པཊིགྒཎྷེཡྻཱཏི གཎྷེཡྻ པབྷསྶརཾ བྷཝེཡྻ. ཏསྨིཾཡེཝ ཨཱསནེཏི ཏིསྶཾ ཨེཝ ནིསཛྫཱཡཾ. ཨེཏེནསྶ ལཧུཝིཔསྶཀཏཱ ཏིཀྑཔཉྙཏཱ སུཁཔཊིཔདཱཁིཔྤཱབྷིཉྙཏཱ ཙ དསྶིཏཱ ཧོཏི. ཝིརཛནྟི ཨཔཱཡགམནཱིཡརཱགརཛཱདཱིནཾ ཝིགམེན ཝིརཛཾ. ཨནཝསེསདིཊྛིཝིཙིཀིཙྪཱམལཱཔགམེན ཝཱིཏམལཾ. ཏིཎྞཾ མགྒཱནནྟི ཧེཊྛིམཱནཾ ཏིཎྞཾ མགྒཱནཾ. ཏསྶ ཨུཔྤཏྟིཨཱཀཱརདསྶནནྟི ཀསྨཱ ཝུཏྟཾ? ནནུ མགྒཉཱཎཾ ཨསངྑཏདྷམྨཱརམྨཎནྟི ཙོདནཾ སནྡྷཱཡཱཧ ‘‘ཏཾ ཧཱི’’ཏིཨཱདི. ཏཏྠ པཊིཝིཛ྄ཛྷནྟནྟི ཨསམྨོཧཔཊིཝེདྷཝསེན པཊིཝིཛ྄ཛྷནྟཾ. ཏེནཱཧ ‘‘ཀིཙྩཝསེནཱ’’ཏི.

ཏཏྲིདཾ ¶ ཨུཔམཱསཾསནྡནཾ – ཝཏྠཾ ཝིཡ ཙིཏྟཾ, ཝཏྠསྶ ཨཱགནྟུཀམལེཧི ཀིལིཊྛབྷཱཝོ ཝིཡ ཙིཏྟསྶ རཱགཱདིམལེཧི སཾཀིལིཊྛབྷཱཝོ, དྷོཝནསིལཱ ཝིཡ ཨནུཔུབྦཱིཀཐཱ, ཨུདཀཾ ཝིཡ སདྡྷཱ, ཨུདཀེ ཏེམེཏྭཱ ཨཱུསགོམཡཚཱརིཀཱབྷརེཧི ཀཱལ༹ཀཔདེསེ སམྨདྡིཏྭཱ ཝཏྠསྶ དྷོཝནཔཡོགོ ཝིཡ སདྡྷཱསིནེཧེན ཏེམེཏྭཱ སཏིསམཱདྷིཔཉྙཱཧི དོསེ སིཐིལེ ཀཏྭཱ སུཏཱདིཝིདྷིནཱ ཙིཏྟསྶ སོདྷནེ ཝཱིརིཡཱརམྦྷོ. ཏེན པཡོགེན ཝཏྠེ ཀཱལ༹ཀཱཔགམོ ཝིཡ ཝཱིརིཡཱརམྦྷེན ཀིལེསཝིཀྑམྦྷནཾ, རངྒཛཱཏཾ ཝིཡ ཨརིཡམགྒོ, ཏེན སུདྡྷསྶ ཝཏྠསྶ པབྷསྶརབྷཱཝོ ཝིཡ ཝིཀྑམྦྷིཏཀིལེསསྶ ཙིཏྟསྶ མགྒེན པརིཡོདཔནནྟི.

དིཊྛདྷམྨོཏི ཝཏྭཱ དསྶནཾ ནཱམ ཉཱཎདསྶནཏོ ཨཉྙམྤི ཨཏྠཱིཏི ཏནྣིཝཏྟནཏྠཾ ‘‘པཏྟདྷམྨོ’’ཏི ཝུཏྟཾ. པཏྟི ཙ ཉཱཎསམྤཏྟིཏོ ཨཉྙཱཔི ཝིཛྫཏཱིཏི ¶ ཏཏོ ཝིསེསནཏྠཾ ‘‘ཝིདིཏདྷམྨོ’’ཏི ཝུཏྟཾ. སཱ པནེསཱ ཝིདིཏདྷམྨཏཱ དྷམྨེསུ ཨེཀདེསནཱཔི ཧོཏཱིཏི ནིཔྤདེསཏོ ཝིདིཏབྷཱཝཾ དསྶེཏུཾ ‘‘པརིཡོགཱལ༹ྷདྷམྨོ’’ཏི ཝུཏྟཾ. ཏེནསྶ སཙྩཱབྷིསམྦོདྷཾཡེཝ དཱིཔེཏི. མགྒཉཱཎཉྷི ཨེཀཱབྷིསམཡཝསེན པརིཉྙཱདིཀིཙྩཾ སཱདྷེནྟཾ ནིཔྤདེསེན ཙཏུསཙྩདྷམྨཾ སམནྟཏོ ཨོགཱཧནྟཾ ནཱམ ཧོཏི. ཏེནཱཧ – ‘‘དིཊྛོ ཨརིཡསཙྩདྷམྨོ ཨེཏེནཱཏི དིཊྛདྷམྨོ’’ཏི. ཏིཎྞཱ ཝིཙིཀིཙྪཱཏི སཔྤཊིབྷཡཀནྟཱརསདིསཱ སོལ༹སཝཏྠུཀཱ ཨཊྛཝཏྠུཀཱ ཙ ཏིཎྞཱ ཝིཙིཀིཙྪཱ ཏིཎྞཝིཙིཀིཙྪཱ. ཝིགཏཀཐཾཀཐོཏི པཝཏྟིཨཱདཱིསུ ‘‘ཨེཝཾ ནུ ཁོ, ཀིཾ ནུ ཁོ’’ཏི ཨེཝཾ པཝཏྟིཀཱ ཝིགཏཱ སམུཙྪིནྣཱ ཀཐཾཀཐཱ. སཱརཛྫཀརཱནཾ པཱཔདྷམྨཱནཾ པཧཱིནཏྟཱ ཏཔྤཊིཔཀྑེསུ སཱིལཱདིགུཎེསུ སུཔྤཏིཊྛིཏཏྟཱ ཝེསཱརཛྫཾ ཝིསཱརདབྷཱཝཾ ཝེཡྻཏྟིཡཾ པཏྟོ. ཨཏྟནཱ ཨེཝ པཙྩཀྑཏོ དིཊྛཏྟཱ ན ཏསྶ པརོ པཙྩེཏབྦོ ཨཏྠཱིཏི ཨཔརཔྤཙྩཡོ.

༧༡. པཎྜིཏོཏི པཉྙཝཱ.

༧༢. ཏེན ཧི སམྨཱཏི དོཝཱརིཀེན སདྡྷིཾ སལླཔཏིཡེཝ, ‘‘ཨེཏྠེཝཱ’’ཏི ཏེན ཝུཏྟཝཙནཾ སུཏྭཱཔི ཏསྶ ཨཏྠཾ ཨསལླཀྑེནྟོ. ཀསྨཱ? པརིདེཝཏཱཡ. ཏེནཱཧ ‘‘བལཝསོཀེན ཨབྷིབྷཱུཏོ’’ཏི.

༧༣. ཏེནེཝཱཏི ཡེན ཨུཏྟརཱསངྒེན ཨཱསནཾ སམྨཛྫཏི, ཏེནེཝ ཨུདརེ པརིཀྑིཔནྟོ ‘‘མཱཧཾ སཏྠཱརཾ མམ སརཱིརེན ཕུསི’’ནྟི ཨནྟརཾ ཀརོནྟོ ཨུཏྟརཱསངྒེན ཏཾ ཨུདརེ པརིཀྑིཔནྟོ པརིགྒཧེཏྭཱ. ‘‘དཏྟཔཉྙཏྟ’’ནྟིཨཱདཱིསུ (དཱི. ནི. ༡.༡༧༡) ཝིཡ དཏྟ-སདྡོ ཨེཏྠ བཱལཔརིཡཱཡོཏི ¶ ཨཱཧ ‘‘ཛལོ༹སི ཛཱཏོ’’ཏི. ཨུཔཊྛཱཀསྶ ཨཉྙཐཱབྷཱཝེནཱཏི པུབྦེ ཨཏྟནོ ཨུཔཊྛཱཀསྶ ཨིདཱནི ཨནུཔཊྛཱཀབྷཱཝེན.

༧༥. ཨཝིཉྙཱཎཀཾ དཱརུསཱཁཱདིམཡཾ. བཧལབཧལཾ པཱིཏཱཝལེཔནཾ རངྒཛཱཏནྟི ཨཏིཝིཡ བཧལཾ པཱིཏཝཎྞམཉྫིཊྛཨཱདིཨཝལེཔནརཛནཾ. གྷཊྚེཏྭཱ ཨུཔྤཱདིཏཙྪཝིཾ, ཡཱ རངྒཾ པིཝཏི. ནིལློམཏནྟི པུནཔྤུནཾ ཨནུལིམྤནེན. ཁཎྜཁཎྜིཏནྟི ཁཎྜཁཎྜིཏབྷཱཝཾ. རངྒཀྑམོ རཛནིཡོ. ཏེནཱཧ ‘‘རཱགམཏྟཾ ཛནེཏཱི’’ཏི. ཨནུཡོགནྟི ཙོདནཾ. ཝཱིམཾསནྟི ཝིཙཱརཎཾ. ཐུསེ ཀོཊྚེཏྭཱ ཏཎྜུལཔརིཡེསནཾ ¶ ཝིཡ ཀདལིཡཾ སཱརཔརིཡེསནཾ ཝིཡ ཙ ནིགཎྛཝཱདེ སཱརཝཱིམཾསནཾ. ཏཏོ ཨེཝ ཙ ཏཾ ཝཱིམཾསནྟོ རིཏྟཀོ ཏུཙྪཀོཝ ཧོཏཱིཏི. སབྦམྤི བུདྡྷཝཙནཾ ཙཏུསཙྩཝིནིམུཏྟཾ ནཏྠི, ཏཉྩ ཝཱིམཾསིཡམཱནཾ ཝིཉྙཱུནཾ པཱིཏིསོམནསྶམེཝ ཛནེཏི, ཨཏཔྤཀཉྩ ཨསེཙནཱབྷཱཝེནཱཏི ཨཱཧ ‘‘ཙཏུསཙྩཀཐཱ ཧཱི’’ཏིཨཱདི. ཡཐཱ ཡཐཱཏི ཡདི ཁནྡྷམུཁེན ཡདི དྷཱཏཱཡཏནཱདཱིསུ ཨཉྙཏརམུཁེན བུདྡྷཝཙནཾ ཨོགཱཧིསྶཏི, ཏཐཱ ཏཐཱ གམྦྷཱིརཉཱཎཱནཾཡེཝ གོཙརབྷཱཝཏོ གམྦྷཱིརམེཝ ཧོཏི. ཡོ ཙེཏྠ པཎྜིཏོ ནིཔུཎོ ཀཏཔརཔྤཝཱདོ པཎིདྷཱཡ སབྦཐཱམེན ཙོདནཾ ཨཱརམྦྷཏི ཏསྶ ཙོདནཱ ཀེསགྒམཏྟམྤི ཙཱལེཏུཾ ན སཀྐོཏི. པུན སུཙིརམྤི ཀཱལཾ ཝིཙཱརེནྟེསུཔི ཝིམདྡཀྑམཏོ, ཨེཝཾ ཏཐཱགཏཝཱདོ སྭཱཁྱཱཏབྷཱཝཏོཏི ཨཱཧ ‘‘ཨནུཡོགཀྑམོ ཝིམཛྫནཀྑམོ ཙཱ’’ཏི.

༧༦. ཝིསཡཔརིཉྙཱཎེན དཧཏི པཊིཔཀྑེ སོདྷེཏཱིཏི དྷཱིརོ, སྭཱཡམསྶ དྷཱིརབྷཱཝོ སབྦསོ སམྨོཧཝིདྡྷཾསནཏཱཡཱཏི ཨཱཧ – ‘‘ཡཱ པཉྙཱ…པེ… ཏེན སམནྣཱགཏསྶཱ’’ཏི. པབྷིནྣཁཱིལསྶཱཏི སམུཙྪིནྣསབྦཙེཏོཁཱིལསྶ, ཀིལེསམཙྩུམཱརཝིཛཡེནེཝ ཨབྷིསངྑཱརཁནྡྷམཱརཱ ཛིཏཱཝ ཧོནྟཱིཏི ཏེསཾ དྭིནྣཾ ཨིདྷ ཨགྒཧཎཾ. ཨཱིགྷ-སདྡོ དུཀྑཔརིཡཱཡོཏི ཨཱཧ ‘‘ནིདྡུཀྑསྶཱ’’ཏི. ཏཏྠ སཨུཔཱདིསེསནིབྦཱནཔྤཏྟིཡཱ ཀིལེསེན ནིདྡུཀྑཏཱ, ཨནུཔཱདིསེསནིབྦཱནཔྤཏྟིཡཱ ཝིཔཱཀདུཀྑེན ནིདྡུཀྑཏཱ. རཛྫནདུསྶནམུཡ྄ཧནཱདིཝསེན ཝིཝིདྷཾ ཨཱིསནཏོ ཝཱིསཾ, ཝཱིསམེཝ ཝེསཾ, རཱགཱདཱིཏི ཨཱཧ – ‘‘ཝེསནྟརསྶཱཏི རཱགཱདིཝཱིསཾ ཏརིཏྭཱ ཝིཏརིཏྭཱ ཋིཏསྶཱ’’ཏི.

ཏུསིཏསྶཱཏི ཀརུཎཱཡནཝསེན ཏུསིཡཱ ཨིཏསྶ སཾཝཏྟསྶ. ཨེཝཾ སཏི ‘‘མུདིཏསྶཱ’’ཏི ཨིདཾ པུནརུཏྟམེཝ ཧོཏི. མནུཛསྶཱཏི པཋམཱཡ ཛཱཏིཡཱ བྷགཝཱ མནུསྶཛཱཏིཡོ ཧུཏྭཱ ཝུཏྟཱནཾ ཝཀྑམཱནཱནཉྩ ཝསེན སདེཝཀཾ ཨབྷིབྷཝིཏྭཱ ཋིཏོ ཨཙྪརིཡོ བྷགཝཱཏི དསྶེཏི. སདེཝཀཾ ལོཀཾ སཾསཱརཏོ ནིབྦཱནསུཁཾ ནརཏི ནེཏི པཱཔེཏཱིཏི ནརོ, ནཱཡཀོཏི ཨཏྠོ, ཏསྶ ནརསྶ, ཏེནཱཧ ¶ ‘‘པུནརུཏྟ’’ནྟི. ‘‘མནུཛསྶཱ’’ཏི ཝཏྭཱ ‘‘ནརསྶཱ’’ཏི པུནརུཏྟཾ པདཾ. ཨཏྠཝསེན ཨཉྙཐཱ ཝུཙྩམཱནེ ཨེཀེཀགཱཐཱཡ དསགུཎཱ ནཔྤཧོནྟི, ན པཱུརེནྟཱིཏི ཨཏྠོ.

ཝིནེཏཱིཏི ཝིནཡོ, ཝིནཡོ ཨེཝ ཝེནེཡིཀོཏི ཨཱཧ ‘‘སཏྟཱནཾ ཝིནཱཡཀསྶཱ’’ཏི. ཝིཉྙཱུནཾ རུཙིཾ རཱཏི, ཨཱིརེཏཱིཏི ཝཱ རུཙིརོ, སྭཱཡམསྶ རུཙིརབྷཱཝོ ¶ ཀུསལཏཱཡཱཏི ཨཱཧ ‘‘སུཙིདྷམྨསྶཱ’’ཏི. པབྷཱསཀསྶཱཏི ཉཱཎཱལོཀེན པབྷསྶརབྷཱཝཀརསྶ. ནིསྶངྒསྶཱཏི ཨཊྛསུཔི པརིསཱསུ, སདེཝེ ཝཱ སབྦསྨིཾ ལོཀེ ཨགྒཎྷཱཔནཔརིཙྩཱགེན ནིསྶཊསྶ. གམྦྷཱིརགུཎསྶཱཏི པརེསཾ ཉཱཎེན ཨཔྤཏིཊྛབྷཱཝཱ གམྦྷཱིརགུཎསྶ. ཏེནཱཧ བྷགཝཱ – ‘‘ཨཏྠི, བྷིཀྑཝེ, ཨཉྙེཝ དྷམྨཱ གམྦྷཱིརཱ’’ཏིཨཱདི (དཱི. ནི. ༡.༢༨). ཨརིཡཱཡ ཝཱ ཏུཎྷཱིབྷཱཝེན མོནཔྤཏྟསྶ. དྷམྨེ ཋིཏསྶཱཏི དྷམྨཀཱཡེ སུཔྤཏིཊྛིཏསྶ. སཾཝུཏཏྟསྶཱཏི ཨརཀྑིཡཀཱཡསམཱཙཱརཱདིཏཱཡ སཾཝུཏསབྷཱཝསྶ.

ཨཱགུཾ ན ཀརོཏཱིཏིཨཱདཱིཧི ཙཏཱུཧི ཀཱརཎེཧི, པནྟསེནཱསནསྶཱཏི ཝིཝིཏྟསེནཱསནསྶ. པཊིམནྟནཔཉྙཱཡཱཏི སབྦཔརཔྤཝཱདཱནཾ ཝིཔརཱཝཏྟམནྟནཔཉྙཱཡ. མོནཾ ཝུཙྩཏི ཉཱཎཾ སབྦཏོ ཀིལེསཱནཾ ནིདྷུནནཏོ.

ཨིསིསཏྟམསྶཱཏི སབྦཨིསཱིསུ ཛེཊྛསྶ སཱདྷུཏམསྶ. སེཊྛཔྤཏྟསྶཱཏི སེཊྛཾ ཨུཏྟམཾ སམྨཱསམྦོདྷིཾ པཏྟསྶ. ཨཀྑརཱདཱིནཱིཏི ཨཀྑརཔདབྱཉྫནཱཀཱར-ནིརུཏྟིནིདྡེས-སཾཀཱསནཔཀཱསན-ཝིཝརཎ-ཝིབྷཛནུཏྟཱནཱིཀརཎཱནཱིཏི བྱཉྫནཏྠཔདཱནི. སམོདྷཱནེཏྭཱ ཝིནེཡྻཛ྄ཛྷཱསཡཱནུརཱུཔཾ པཀཱསནཏོ ཀཐནཏོ པདཀསྶ. པུརི-སདྡོ ‘‘པུབྦེ’’ཏི ཨིམིནཱ སམཱནཏྠོཏི ཨཱཧ – ‘‘པུརིནྡདསྶཱཏི སབྦཔཋམཾ དྷམྨདཱནདཱཡཀསྶཱ’’ཏི. བྷགཝཱ ཨསཡ྄ཧཾ སཧིཏུཾ སམཏྠོཏི ཨཱཧ ‘‘སམཏྠསྶཱ’’ཏི. ཏེནཱཧ – ‘‘ཏཐཱགཏཾ བུདྡྷམསཡ྄ཧསཱཧིན’’ནྟི (ཨིཏིཝུ. ༣༨). ཏེ པཏྟསྶཱཏི ཏེ གུཎེ ཨནཝསེསཏོ པཏྟསྶ. ཝིཏྠཱརེཏྭཱ སཾཀིལེསཝོདཱནདྷམྨཾ བྱཱཀརོཏཱིཏི བྱཱཀརཎོ, བྱཱཀརཎོ ཨེཝ ཝེཡྻཱཀརཎོ. ཏནྟིཔདནྟི ཏནྟིཾ ཨཱརོཔེཏྭཱ ཋཔིཏཾ པདཾ.

ཏཎྷཱབནྡྷནེན སབྦེན ཝཱ ཀིལེསབནྡྷནེན ཨབདྡྷསྶ. མཧཱཔཉྙཱཡཱཏི མཧཱནུབྷཱཝཱཡ པཉྙཱཡ, མཧཱཝིསཡཱཡ ཝཱ པཉྙཱཡ. སབྦཱ ཧི བྷགཝཏོ པཉྙཱ མཧཱནུབྷཱཝཱ, ཡཐཱསཀཾ ཝིསཡེ མཧཱཝིསཡཱ ཙ ཨེཀཱདིཝསེན ཨནཝསེསཏོ མཧཱཝིསཡཱ ནཱམ སབྦཉྙུཏཱཝ. ཨཱནུབྷཱཝདསྶནཊྛེནཱཏི ཨཙྪརིཡཱཙིནྟེཡྻཱཔརིམེཡྻསྶ ཨཏྟནོ ཨཱནུབྷཱཝསྶ ལོཀསྶ དསྶནཊྛེན ¶ . ཡཀྑསྶཱཏི ཝཱ ལོཀེན པཱུཛནཱིཡསྶ ¶ . ཨཡཾ ཨུཔཱསཀོ ཁུཛྫུཏྟརཱ ཝིཡ ཨུཔཱསིཀཱ སེཁཔཊིསམྦྷིདཱཔྤཏྟོཏི ཨཱཧ ‘‘སོཏཱཔཏྟིམགྒེནེཝ པཊིསམྦྷིདཱ ཨཱགཏཱ’’ཏི. ཀིལེསཔྤཧཱནཝཎྞཾ ཀཐེནྟོཏི ཀིལེསཔྤཧཱནཾ ཝིསཡཾ ནིམིཏྟཾ ཀཏྭཱ ཝཎྞཾ ཀཐེནྟོ.

༧༧. སམྤིཎྜིཏཱཏི སནྣིཙིཏཱ, གནྠིཏཱཏི ཨཏྠོ. ཨིམེ སཏྟཱཏི ཡཾ ཡདེཝ པརིབྦྷམནྟཱ སཏྟཱ. ཨཏྟནོཝ ཙིནྟཡནྟཱིཏི ཨཝཱིཏཏཎྷཏཱཡ སཀཾཡེཝ པཡོཛནཾ ཙིནྟེནྟི. ཏཐཱ ཧི མཏེ ཉཱཏཀེ ཨནུསོཙནྟཱཔི ཏེཧི སཱདྷེཏབྦསྶ ཨཏྟནོ པཡོཛནསྶེཝ ཝསེན ཨནུསོཙནྟི. ཨུཎྷཾ ཨཧོསཱིཏི བལཝཏཱ ཙིཏྟསྶ སནྟཱཔེན སནྟཏྟཾ ཨབྦྷནྟརཾ ཧདཡཊྛཱནཾ ཁདིརངྒཱརསནྟཱཔིཏཾ ཝིཡ ཨུཎྷཾ ཨཧོསི. ཏེནཱཧ ‘‘ལོཧིཏཾ ཝིལཱིཡིཏྠཱ’’ཏི. པཏྟམཏྟནྟི ཨེཀཔཏྟཔཱུརམཏྟཾ. ཨབྷིསམཡསཱདྷིཀཱཡ ཙཏུསཙྩདེསནཱཡ སངྑེཔེནེཝ དེསིཏཏྟཱ ཨཱཧ – ‘ཨུགྒྷཊིཏཉྙུཔུགྒལསྶ ཝསེན དྷམྨདེསནཱ པརིནིཊྛིཏཱ’’ཏི.

ཨུཔཱལིསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༧. ཀུཀྐུརཝཏིཀསུཏྟཝཎྞནཱ

༧༨. ཀོལིཡེསཱུཏི ¶ བཧུཝཙནཝསེནཱཡཾ པཱལི༹ ཨཱགཏཱ. ཨེཝཾནཱམཀེ ཛནཔདེཏི ཨཏྠཝཙནཾ ཀསྨཱ ཝུཏྟནྟི ཨཱཧ ‘‘སོ ཧཱི’’ཏིཨཱདི. ན ནིཡམིཏོཏི ‘‘ཨསུཀམྷི ནཱམ ཝིཧཱརེ’’ཏི ན ནིཡམེཏྭཱ ཝུཏྟོ. སེནཱསནེཡེཝཱཏི ཨཱཝཱསེཡེཝ, ན རུཀྑམཱུལཱདིཀེ. ཝེསཀིརིཡཱ གྷཱསགྒཧཎཱདིནཱ སམཱདཱཏབྦཊྛེན གོཝཏཾ, ཏསྨིཾ ནིཡུཏྟོ གོཝཏིཀོ. ཏེནཱཧ ‘‘སམཱདིནྣགོཝཏོ’’ཏི. ཡཾ སནྡྷཱཡཱཧུ ཝེདཝེདིནོ – ‘‘གཙྪཾ བྷཀྑེཏི, ཏིཊྛཾ མུཏྟེཏི, ཨུཔཱཧཱ ཨུདཀཾ དྷཱུཔེཏི, ཏིཎཱནི ཚིནྡཏཱི’’ཏིཨཱདི. ཨཡཾ ཨཙེལོཏི ཨཙེལཀཔབྦཛྫཱཝསེན ཨཙེལོ, པུརིམོ པན གོཝཏིཀོ ཀུཀྐུརཝཏིཀོཏི ཨེཏྠ ཝུཏྟནཡཱནུསཱརེན ཨཏྠོ ཝཏྟབྦོ. པལིཀུཎྛིཏྭཱཏི ཨུབྷོ ཧཏྠེ ཨུབྷོ པཱདེ ཙ སམིཉྫིཏྭཱ. ‘‘ཨུཀྐུཊིཀོ ཧུཏྭཱ’’ཏིཔི ཝདནྟི. གམནཾ ནིཔྥཛྫནཾ གཏཱིཏི ཨཱཧ – ‘‘ཀཱ ¶ གཏཱིཏི ཀཱ ནིཔྥཏྟཱི’’ཏི. ནིཔྥཏྟིཔརིཡོསཱནཱ ཧི ཝིཔཱཀདྷམྨཔྤཝཏྟི. ཀཏཱུཔཙིཏཀམྨཝསེན ཨབྷིསམྤརེཏི ཨེཏྠཱཏི ཨབྷིསམྤརཱཡོ, པརལོཀོ. ཏཏྠསྶ ཙ ནིཔྥཏྟིཾ པུཙྪཏཱིཏི ཨཱཧ – ‘‘ཨབྷིསམྤརཱཡམྷི ཀཏྠ ནིབྦཏྟཱི’’ཏི. ཀུཀྐུརཝཏསམཱདཱནནྟི ཀུཀྐུརབྷཱཝསམཱདཱནཾ, ‘‘ཨཛྫ པཊྛཱཡ ཨཧཾ ཀུཀྐུརོ’’ཏི ཀུཀྐུརབྷཱཝཱདྷིཊྛཱནཾ.

༧༩. པརིཔུཎྞནྟི ཡཏྟཀཱ ཀུཀྐུརཝིཀཱརཱ, ཏེཧི པརིཔུཎྞཾ. ཏེནཱཧ ‘‘ཨནཱུན’’ནྟི. ཨབྦོཀིཎྞནྟི ཏེཧི ཨཝོམིསྶཾ. ཀུཀྐུརཱཙཱརནྟི ཀུཀྐུརཱནཾ གམནཱཀཱརོཏིཨཱདིཨཱཙཱརེན ཀུཀྐུརབྷཱཝཱདྷིཊྛཱནཙིཏྟམཱཧ. ཏཐཱ ཏཐཱ ཨཱཀཔྤེཏབྦཏོ ཨཱཀཔྤོ, པཝཏྟིཨཱཀཱརོ. སོ པནེཏྠ གམནཱདིཀོཏི ཨཱཧ ‘‘ཀུཀྐུརཱནཾ གམནཱཀཱརོ’’ཏིཨཱདི. ཨཱཙཱརེནཱཏི ཀུཀྐུརསཱིལཱཙཱརེན. ཝཏསམཱདཱནེནཱཏི ཀུཀྐུརཝཏཱདྷིཊྛཱནེན. ཀུཀྐུརཙརིཡཱདིཡེཝ དུཀྐརཏཔཙརཎཾ. ཏེན གཏིཝིཔརིཡེསཱཀཱརེན པཝཏྟཱ ལདྡྷི. ཨསྶ ཀུཀྐུརཝཏིཀསྶ ཨཉྙཱ གཏི ནཏྠཱིཏི ཨིཏརགཏིཾ པཊིཀྑིཔཏི, ཨིཏརཱསཾ པན སམྦྷཝོ ཨེཝ ནཏྠཱིཏི. ནིཔཛྫམཱནནྟི ཝཏསཱིལཱདཱིནཾ སཾགོཔནཝསེན སིཛ྄ཛྷམཱནཾ. ཡཐཱ སཀམྨཀདྷཱཏུསདྡཱ ཨཏྠཝིསེསཝསེན ཨཀམྨཀཱ ཧོནྟི ‘‘ཝིབུདྡྷོ པུརིསོ ཝིབུདྡྷོ ཀམལསཎྜོ’’ཏི, ཨེཝཾ ཨཏྠཝིསེསཝསེན ཨཀམྨཀཱཔི སཀམྨཀཱ ཧོནྟཱིཏི དསྶེནྟོ ‘‘ན པརིདེཝཱམི ན ཨནུཏྠུནཱམཱི’’ཏིཨཱདིམཱཧ. ཨནུཏྠུནསདྡོ ཙ སཀམྨཀཝསེན པཡུཛྫཏི ‘‘པུརཱཎཱནི ཨནུཏྠུན’’ནྟིཨཱདཱིསུ. ཨཡཉྩེཏྠ པཡོགོཏི ཨིམིནཱ གཱཐཱཡཉྩ ཨནུཏྠུནནརོདནཾ ཨདྷིཔྤེཏནྟི དསྶེཏི.

༨༠. ཝུཏྟནཡེནེཝཱཏི ¶ ཨིམིནཱ གོཝཏནྟི གོཝཏསམཱདཱནཾ. གོསཱིལནྟི གཝཱཙཱརཾ. གོཙིཏྟནྟི ‘‘ཨཛྫ པཊྛཱཡ གོཧི ཀཱཏབྦཾ ཀརིསྶཱམཱི’’ཏི ཨུཔྤནྣཙིཏྟནྟི ཨིམམཏྠཾ ཨཏིདིསཏི. གྭཱཀཔྤེ པན ཝཏྟབྦཾ ཨཝསིཊྛཾ ‘‘ཀུཀྐུརཱཀཔྤེ ཝུཏྟསདིསམེཝཱ’’ཏི ཨིམིནཱཝ ཨཏིདིཊྛཾ, ཝིསིཊྛཉྩ ཡཐཱ པན ཏཏྠཱཏིཨཱདིནཱ ཝུཏྟམེཝ. ཡཾ པནེཏྠ ཝཏྟབྦཾ, ཏཾ ཀུཀྐུརཝཏཱདཱིསུ ཝུཏྟནཡམེཝ.

༨༡. ཨེཀཙྩཀམྨཀིརིཡཱཝསེནཱཏི ཨེཀཙྩསྶ ཨཀུསལཀམྨསྶ ཀུསལཀམྨསྶ ཀརཎཔྤསངྒེན. ཨིམེསནྟི གོཝཏིཀཀུཀྐུརཝཏིཀཱནཾ. ཀིརིཡཱཏི གོཝཏབྷཱཝནཱདིཝསེན པཝཏྟཱ ཀིརིཡཱ. པཱཀཊཱ བྷཝིསྶཏཱིཏི ‘‘ཨིམསྨིཾ ཀམྨཙཏུཀྐེ ཨིདཾ ནཱམ ཀམྨཾ བྷཛཏཱི’’ཏི པཱཀཊཱ བྷཝིསྶཏི.

ཀཱལ༹ཀནྟི ¶ (ཨ. ནི. ཊཱི. ༢.༤.༢༣༢) མལཱིནཾ, ཙིཏྟསྶ ཨཔབྷསྶརབྷཱཝཀརཎནྟི ཨཏྠོ. ཏཾ པནེཏྠ ཀམྨཔཐསམྤཏྟམེཝ ཨདྷིཔྤེཏནྟི ཨཱཧ ‘‘དསཨཀུསལཀམྨཔཐ’’ནྟི. ཀཎྷནྟི ཀཎྷཱབྷིཛཱཏིཧེཏུཏོ ཝཱ ཀཎྷཾ. ཏེནཱཧ ‘‘ཀཎྷཝིཔཱཀ’’ནྟི. ཨཔཱཡཱུཔཔཏྟི མནུསྶེསུ ཙ དོབྷགྒིཡཾ ཀཎྷཝིཔཱཀོ, ཡཐཱ ཏམབྷཱཝོ ཝུཏྟོ, ཨེཀཏྟནིདྡེསེན པན ‘‘ཨཔཱཡེ ནིབྦཏྟནཏོ’’ཏི ཝུཏྟཾ, ནིབྦཏྟཱཔནཏོཏི ཨཏྠོ. སུཀྐནྟི ཨོདཱཏཾ, ཙིཏྟསྶ པབྷསྶརབྷཱཝཀརཎནྟི ཨཏྠོ, སུཀྐཱབྷིཛཱཏིཧེཏུཏོ ཝཱ སུཀྐཾ. ཏེནཱཧ ‘‘སུཀྐཝིཔཱཀ’’ནྟི. སགྒཱུཔཔཏྟི མནུསྶལོཀེ སོབྷགྒིཡཉྩ སུཀྐཝིཔཱཀོ, ཡཐཱ ཙ ཛོཏིབྷཱཝོ ཝུཏྟོ, ཨེཀཏྟནིདྡེསེན པན ‘‘སགྒེ ནིབྦཏྟནཏོ’’ཏི ཝུཏྟཾ, ནིབྦཏྟཱཔནཏོཏི ཨཏྠོ, ཝོམིསྶཀཀམྨནྟི ཀཱལེན ཀཎྷཾ, ཀཱལེན སུཀྐནྟི ཨེཝཾ མིསྶཀཝསེན ཀཏཀམྨཾ. ‘‘སུཁདུཀྑཝིཔཱཀ’’ནྟི ཝཏྭཱ སུཁདུཀྑཱནཾ པཝཏྟིཨཱཀཱརཾ དསྶེཏུཾ ‘‘མིསྶཀཀམྨཉྷཱི’’ཏིཨཱདི ཝུཏྟཾ. ཀམྨསྶ ཀཎྷསུཀྐསམཉྙཱ ཀཎྷསུཀྐཱབྷིཛཱཏིཧེཏུཏཱཡཱཏི, ཨཔཙྩཡགཱམིཏཱཡ ཏདུབྷཡཝིནིམུཏྟསྶ ཀམྨཀྑཡཀརཀམྨསྶ ཨིདྷ སུཀྐཔརིཡཱཡོཔི ན ཨིཙྪིཏོཏི ཨཱཧ – ‘‘ཨུབྷཡ…པེ… ཨསུཀྐནྟི ཝུཏྟ’’ནྟི. ཏཏྠ ཨུབྷཡཝིཔཱཀསྶཱཏི ཡཐཱདྷིགཏསྶ ཝིཔཱཀསྶ. སམྤཏྟིབྷཝཔརིཡཱཔནྣོ ཧི ཝིཔཱཀོ ཨིདྷ ‘‘སུཀྐཝིཔཱཀོ’’ཏི ཨདྷིཔྤེཏོ, ན ཨཙྩནྟཔརིསུདྡྷོ.

སདུཀྑནྟི ཨཏྟནཱ ཨུཔྤཱདེཏབྦེན དུཀྑེན སདུཀྑཾ, དུཀྑསཾཝཏྟནིཀནྟི ཨཏྠོ. ‘‘ཨིམསྨིཾ སུཏྟེ ཙེཏནཱ དྷུརཾ, ཨུཔཱལིསུཏྟེ (མ. ནི. ༢.༥༦) ཀམྨ’’ནྟི ཧེཊྛཱ ཝུཏྟམྤི ཨཏྠཾ ཨིདྷ སཱདྷཡཏི ཝིཛཱནནཏྠཾ. ཨབྷིསངྑརིཏྭཱཏི ཨཱཡཱུཧིཏྭཱ. ཏཾ པན པཙྩཡསམཝཱཡསིདྡྷིཏོ སཾཀཌྜྷནཾ པིཎྜནཾ ཝིཡ ཧོཏཱིཏི ཨཱཧ – ‘‘སངྐཌྜྷིཏྭཱ, པིཎྜཾ ཀཏྭཱཏི ཨཏྠོ’’ཏི, སདུཀྑཾ ལོཀནྟི ¶ ཨཔཱཡལོཀམཱཧ. ཝིཔཱཀཕསྶཱཏི ཕསྶསཱིསེན ཏཏྠ ཝིཔཱཀཔཝཏྟམཱཧ. བྷཱུཏཀམྨཏོཏི ནིབྦཏྟཀམྨཏོ ཨཏྟནཱ ཀཏཱུཔཙིཏཀམྨཏོ. ཡཐཱབྷཱུཏནྟི ཡཱདིསཾ. ཀམྨསབྷཱགཝསེནཱཏི ཀམྨསརིཀྑཀཝསེན. ཨུཔཔཏྟི ཧོཏཱིཏི ཨཔདཱདིབྷེདཱ ཨུཔཔཏྟི. ཀམྨེན ཝིཡ ཝུཏྟཱཏི ཡཾ ཀརོཏི, ཏེན ཨུཔཔཛྫཏཱིཏི ཨེཀཀམྨེནེཝ ཛཱཡམཱནཱ ཝིཡ ཝུཏྟཱ ཨཔདཱདིབྷེདཱ. ཨུཔཔཏྟི ཙ ནཱམ ཝིཔཱཀེན ཧོཏི ཝིཔཱཀེ སམྦྷཝནྟེ ཨེཀཾསེན ཏེ ཨུཔཔཏྟིཝིསེསཱ སམྦྷཝནྟི. ཡདི ཨེཝཾ ཀསྨཱ ‘‘ཏེན ཨུཔཔཛྫཏཱི’’ཏི ཨུཔཔཏྟིཀམྨཧེཏུཀཱ ཝུཏྟཱཏི ཨཱཧ ‘‘ཡསྨཱ པནཱ’’ཏིཨཱདི. ཡེན ཀམྨཝིཔཱཀེན ནིབྦཏྟོཏི ¶ ཡེན ཀམྨཝིཔཱཀེན ཝིཔཙྩམཱནེན ཨཡཾ སཏྟོ ནིབྦཏྟོཏི ཝུཙྩཏི. ཏཾཀམྨཝིཔཱཀཕསྶཱཏི ཏསྶ ཏསྶ ཀམྨསྶ ཝིཔཱཀབྷཱུཏཱ ཕསྶཱ. ཀམྨེན དཱཏབྦཾ དཱཡཾ ཏབྦིཔཱཀཾ ཨཱདིཡནྟཱིཏི ཀམྨདཱཡཱདཱ, ཕསྶཱ. ཀམྨསྶ དཱཡཛྫཏཱ ཀམྨཕལསྶ དཱཡཛྫཾ, ཏསྨཱ ཝུཏྟཾ ‘‘ཀམྨདཱཡཛྫཱ’’ཏི. ཏེནཱཧ ‘‘ཀམྨམེཝ ནེསཾ དཱཡཛྫཾ སནྟཀ’’ནྟི.

ཏིསྶོ ཙ ཧེཊྛིམཛ྄ཛྷཱནཙེཏནཱཏི ཨིདཾ ཨབྱཱབཛ྄ཛྷཝེདནཾ ཝེདིཡནཨེཀནྟསུཁུཔྤཏྟིཡཱ ཧེཏུབྷཱཝསཱདྷནཾ. ཡདི ཨེཝཾ ཡཐཱཝུཏྟཱ ཛྷཱནཙེཏནཱ ཏཱཝ ཧོཏུ ཨེཀནྟསུཁུཔྤཏྟིཧེཏུབྷཱཝཏོ. ཀཱམཱཝཙརཱ ཀིནྟཱིཏི ཀཱམཱཝཙརཱ པན ཀུསལཙེཏནཱ ཏཾསབྷཱཝཱབྷཱཝཏོ ཀིནྟི ཀེན པཀཱརེན ཨབྱཱབཛ྄ཛྷམནོསངྑཱརོ ནཱམ ཛཱཏོཏི ཙོདེཏི, ཨིཏརོ པན ན སབྦཱ ཀཱམཱཝཙརཀུསལཙེཏནཱ ཏཐཱ གཧིཏཱ, ཨཐ ཁོ ཨེཀཙྩཱ ཛྷཱནཙེཏནཱནུཀཱུལཱཏི དསྶེནྟོ ‘‘ཀསིཎསཛྫནཀཱལེ ཀསིཎཱསེཝནཀཱལེ ལབྦྷནྟཱི’’ཏི ཨཱཧ. ཏཏྠ ཀསིཎཱསེཝནཙེཏནཱ གཧེཏབྦཱ, སཱ ཨུཔཙཱརཛ྄ཛྷཱནསྶ སཱདྷིཀཱ. ཏེན ཀཱམཱཝཙརཙེཏནཱ པཋམཛ྄ཛྷཱནཙེཏནཱཡ གྷཊིཏཱཏི ཀསིཎསཛྫནཙེཏནཱཔི ཀདཱཙི ཏཱདིསཱ ཧོཏཱིཏི གཧིཏཱ. པརིཀམྨཱདིཝསེན ཧི པཝཏྟཱ བྷཱཝནཱམཡཱ ཀཱམཱཝཙརཀུསལཙེཏནཱ པཋམཛ྄ཛྷཱནསྶ ཨཱསནྣཏཱཡ ཝུཏྟཱ. ཙཏུཏྠཛ྄ཛྷཱནཙེཏནཱ ཏཏིཡཛ྄ཛྷཱནཙེཏནཱཡ གྷཊིཏཱཏི ཨིདཾ ཨེཀཏྟཀཱཡཨེཀཏྟསཉྙཱིསཏྟཱཝཱསཝཏཱཡ ཏཾསརིཀྑཀཱ ཨུཔེཀྑཱཔི ཨཱིདིསེསུ ཋཱནེསུ སུཁསརིཀྑཏཱ, ཨེཝཾ སནྟསབྷཱཝཏཱ ཉཱཎསཧིཏཏཱ ཙ. ཀེཙི པན ཙཏུཏྠཛ྄ཛྷཱནཙེཏནཱནུགུཎཱཏི ནིདསྶེནྟཱ ཀསིཎསཛྫནཀཱལེ ཀསིཎཛ྄ཛྷཱནཀཱལེ ཀསིཎཱསེཝནཀཱལེ ལབྦྷཏཱིཏི ཏཏིཡཛ྄ཛྷཱནཙེཏནཱཡ ཨཱསནྣགྷཊིཏཏཱ ཝུཏྟཱཏི ཝདནྟི, ཏཾ ཏེསཾ མཏིམཏྟཾ, ཝུཏྟནཡེནེཝ ཏཱསཾ གྷཊིཏཏཱ ཝེདིཏབྦཱ. ཨུབྷཡམིསྶཀཝསེནཱཏི ཨུབྷཡེསཾ ཀུསལཱཀུསལསངྑཱརཱནཾ སུཁདུཀྑཱནཉྩ མིསྶཀབྷཱཝཝསེན. ཝེམཱནིཀཔེཏཱནནྟི ཨིདཾ བཱཧུལླཏོ ཝུཏྟཾ, ཨིཏརེསམྤི ཝིནིཔཱཏིཀཱནཾ ཀཱལེན དུཀྑཾ ཧོཏིཡེཝ.

ཏསྶ ¶ པཧཱནཱཡཱཏི ཏསྶ ཡཐཱཝུཏྟསྶ ཀམྨསྶ ཨནུཔྤཏྟིདྷམྨཏཱཔཱདནཱཡ. ཡཱ ཙེཏནཱཏི ཡཱ ཨཔཙཡགཱམིནིཙེཏནཱ. ཀམྨཾ པཏྭཱཏི སུཁཀམྨནྟི ཝུཙྩམཱནེ མགྒཙེཏནཱཡ ཨཉྙོ པཎྜརཏརོ དྷམྨོ ནཱམ ནཏྠི ¶ ཨཙྩནྟཔཱརིསུདྡྷིབྷཱཝཏོ. ཨཀཎྷཱ ཨསུཀྐཱཏི ཨཱགཏཱཏི ཨེཏྠ སུཀྐབྷཱཝཔཊིཀྑེཔཀཱརཎཾ ཧེཊྛཱ ཝུཏྟནཡམེཝ. ཏེནཱཧ ‘‘ཨིདཾ པན ཀམྨཙཏུཀྐཾ པཏྭཱ’’ཏིཨཱདི.

༨༢. ཨནིཡྻཱནིཀཔཀྑེཏི ཨཙེལ༹ཀཔབྦཛྫཱཡ ཀུཀྐུརཝཏེ ཙ. ཡོགེཏི ཉཱཡདྷམྨཔཊིཔཏྟིཡནྟི ཨཏྠོ. ཡོནེནཱཏི ཡོ ཏིཏྠིཡཔརིཝཱསོ ཏེན བྷགཝཏཱ པཉྙཏྟོ. ཡཾ ཏིཏྠིཡཔརིཝཱསཾ སམཱདིཡིཏྭཱཏི ཨཡམེཏྠ ཡོཛནཱ. གྷཾསིཏྭཱ སུཝཎྞཾ ཝིཡ ནིགྷཾསོཔྤལེ. ཀོཊྚེཏྭཱ ཧཏྠེན ཝིཡ ཀུལཱལབྷཱཛནཾ.

ཝཱུཔཀཊྛོཏི ཝིཝིཏྟོ ཨེཀཱིབྷཱུཏོ. པེསིཏཏྟོཏི ནིབྦཱནཾ པཏི པེསིཏཏྟོ. ཀཱམཾ ཏདནུཏྟརཾ བྲཧྨཙརིཡཔརིཡོསཱནཾ…པེ… ཝིཧཱསཱིཏི ཨིམིནཱཝ ཨརཧཏྟནིཀཱུཊེན དེསནཱ ནིཊྛཱཔིཏཱ ཧོཏི, ཨཱཡསྨཏོ པན སེནིཡསྶ པཊིཔཏྟིཀིཏྟནཔརམེཏཾ ཨུཛུཀཾ ཨཱཔནྣཨརཧཏྟབྷཱཝདཱིཔནཾ, ཡདིདཾ ‘‘ཨཉྙཏརོ ཁོ པནཱ’’ཏིཨཱདིཝཙནནྟི ཨཱཧ ‘‘ཨརཧཏྟནིཀཱུཊེནེཝཱ’’ཏི. ཨརཧཏྟཱདྷིགམོཡེཝ ཏསྶ ཏེསཾ ཨབྦྷནྟརཏཱ. སེསཾ སབྦཾ སུཝིཉྙེཡྻམེཝ.

ཀུཀྐུརཝཏིཀསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༨. ཨབྷཡརཱཛཀུམཱརསུཏྟཝཎྞནཱ

༨༣. ཛཱཏིཡཱ ¶ ཨསམཱནོ ནིཧཱིནཱཙརིཡོ པརདཏྟཱུཔཛཱིཝིཀཱཡ མཱཏུཡཱ ཀུཙྪིཡཾ ཛཱཏོ པཱདསིཀཔུཏྟོ. ནིནྡཱཝསེན ཝདཏི ཨེཏེནཱཏི ཝཱདོ ཨགུཎོཏི ཨཱཧ – ‘‘ཝཱདཾ ཨཱརོཔེཧཱིཏི དོསཾ ཨཱརོཔེཧཱི’’ཏི. ནིབྦཏྟཝསེན ནིརཡཾ ཨརཧཏི, ནིརཡསཾཝཏྟནིཡེན ཝཱ ཀམྨེན ནིརཡེ ནིཡུཏྟོ ནེརཡིཀོ. ཨཱཔཱཡིཀོཏི ཨེཏྠཱཔི ཨེསེཝ ནཡོ. ཨཝཱིཙིམྷི ཨུཔྤཛྫིཏྭཱ ཏཏྠ ཨཱཡུཀཔྤསཉྙིཏཾ ཨནྟརཀཔྤཾ ཏིཊྛཏཱིཏི ཀཔྤཊྛོ. ནིརཡཱུཔཔཏྟིཔརིཧརཎཝསེན ཏིཀིཙྪིཏུཾ སཀྐུཎེཡྻོཏི ཏེཀིཙྪོ, ན ཏེཀིཙྪོ ཨཏེཀིཙྪོ. དྭེ ཨནྟེ མོཙེཏྭཱཏི ཕརུསཾ ཝཱ ཨཔྤིཡཾ ཝཱ ཀཔྤེཡྻཱཏི དྭེ ཀོཊྛཱསེ མུཉྩིཏྭཱ ¶ ཏེ ཨནཱམསིཏྭཱ པུཙྪིཏཾ ཨཏྠཾ ཏཏོ བཧི ཀརོནྟོ ཨུགྒིལཏི ནཱམ. ཏཾ པན ཨེཝཾ ཀཱཏུཾ ན སཀྐོཏཱིཏི ཨཱཧ – ‘‘ཨུགྒིལིཏུཾ བཧི ནཱིཧརིཏུཾ ན སཀྑིཏཱི’’ཏི. ཨེཝམེཝཱཡཾ པུཙྪཱ ན གཧེཏབྦཱ, ཨཡམེཏྠ དོསོཏི ཏཾ ཨཔུཙྪཾ ཀརོནྟོ ཨཔནཡནྟོ ཨོགིལཏི ནཱམ, ཏཐཱ པན ཨསཀྐོནྟོ པཏིཊྛཱཔེནྟོ ན ཨོགིལཏི ནཱམ, བྷགཝཱ པན ཏམཏྠཾ ཨོཀཱསམྤི ཨཀརོནྟོ ཨུབྷཡཐཱཔི ཨསཀྑཱིཏི ཝེདིཏབྦོ. ཀཐཾ? བྷགཝཱ ཧི ‘‘ན ཁྭེཏྠ རཱཛཀུམཱར ཨེཀཾསེནཱ’’ཏི ཝདནྟོ ནིགཎྛསྶ ཨདྷིཔྤཱཡཾ ཝིཔརིཝཏྟེཏི, ཨུབྷོ ཨནྟེ མོཙེཏྭཱ པཉྷཾ ཝིསྶཛྫེསི, ཨེཝཾ ཏཱཝ ཨུགྒིལིཏུཾ ཨསཀྑི. ‘‘ན ཏཏྲ རཱཛཀུམཱར ཨེཀཾསེནཱ’’ཏི ཝདནྟོ ཨེཝ ཙ ‘‘ནཱཡཾ པུཙྪཱ ཨེཝཾ ཨཝིབྷཱགེན པུཙྪིཏབྦཱ, ཝིབྷཛིཏྭཱ པན པུཙྪིཏབྦཱ’’ཏི པུཙྪཱཡ དོསཾ དཱིཔེནྟོ ཏཾ ཧཱརེནྟོ ཨོགིལིཏུམྤི སཀྑཏཱིཏི.

ཨུཊྛཱཏུཾ ན སཀྑིསྶཏི ཙིཏྟསྶ ཨཉྙཐཱ པཝཏྟིཡཱ. ཨབྷཡོ དྭེ མགྒེ ཀཏཔརིཙཡོ ཚེཀོ ནིཔུཎོ ཝཱདསཱིལོ ཙ ཧུཏྭཱ ཝིཙརཏི. ཏེནཱཧ – ‘‘སོ ཝཱདཛ྄ཛྷཱསཡཏཱཡ ཏསྶ ཝཙནཾ སམྤཊིཙྪནྟོ ‘ཨེཝཾ, བྷནྟེ’ཏི ཨཱཧཱ’’ཏི.

༨༥. ཨེཝརཱུཔནྟི ཡཱ པརེསཾ ཨཔྤིཡཱ ཨམནཱཔཱ དུརུཏྟཝཱཙཱ, ཨེཝརཱུཔཱ ཝཱཙཱ, ན པན ཕརུསཝཱཙཱ. ཕརུསཝཱཙཱཡ ཧི སེཏུགྷཱཏོ ཏཐཱགཏཱནཾ. ཙེཏནཱཕརུསཏཱཡ ཧི ཕརུསཝཱཙཱ ཨིཙྪིཏཱ, ན པརེསཾ ཨཔྤིཡཏཱམཏྟེན. ནཊྛཱ ནིགཎྛཱ ཨོགིལིཀཱདིསམྨཏསྶ པཉྷསྶ ཨེཀཝཙནེན ཝིདྡྷཾསིཏཏྟཱ.

༨༦. དཱརཀསྶ ཨངྐེ ནིསཱིདནསྶ ཀཱརཎཾ དསྶེཏུཾ ‘‘ལེསཝཱདིནོ’’ཏིཨཱདི ཝུཏྟཾ. ཏཏྠ ལེསཝཱདིནོཏི ¶ ཚལཝཱདིནོ, ཝཱདམགྒེ ཝཱ ཨཔརིཔུཎྞཏཱཡ ལེསམཏྟེནེཝ ཝཱདསཱིལཱ. ཨོསཊསངྒཱམོཏི ཨནེཀཝཱརཾ པརཝཱདམདྡནཝསེན ཨོཏིཎྞཝཱདསངྒཱམོ. ཝིཛ྄ཛྷིཏྭཱཏི ནཁེན ཝིཛ྄ཛྷིཏྭཱ. ཨིམམེཝཱཏི ཡྭཱཡཾ དཱརཀོ ཨཏྟནོ ཝཱདབྷངྒཔརིཧརཎཏྠཾ ཨིམིནཱ ཨངྐེ ནིསཱིདཱཔིཏོ, ཨིམམེཝ ཨསྶ དཱརཀཾ ཨུཔམཾ ནིསྶཡཾ ཀཏྭཱ ཝཱདཾ བྷིནྡིསྶཱམི. ‘‘ཨསྶ ཝཱདཾ ཨཔྤཊིཏཏཱཡ ཨུཔམཱཡ བྷཉྫིསྶཱམཱི’’ཏི ཙིནྟེཏྭཱ.

ཨཔནེཡྻཾ ¶ ཨསྶ ཨཧནྟི ཨསྶ དཱརཀསྶ མུཁཏོ ཨཧཾ ཏཾ ཨཔནེཡྻཾ. ཨབྷཱུཏཏྠོཝ ཨབྷཱུཏཾ ཨུཏྟརཔདལོཔེནཱཏི ཨཱཧ ‘‘ཨབྷཱུཏནྟི ཨབྷཱུཏཏྠ’’ནྟི. ཨཏཙྪནྟི ཏསྶེཝ ཝེཝཙནནྟི ཨཱཧ ‘‘ཨཏཙྪནྟི ན ཏཙྪ’’ནྟི. ཨབྷཱུཏནྟི ཝཱ ཨསནྟཾ ཨཝིཛྫམཱནཾ. ཨཏཙྪནྟི ཨཏཐཱཀཱརཾ. ཨནཏྠསཾཧིཏནྟི དིཊྛདྷམྨིཀེན, སམྤརཱཡིཀེན ཝཱ ཨནཏྠེན སཾཧིཏཾ, ཨནཏྠེ ཝཱ སཾཧིཏཾ, ན ཨཏྠོཏི ཝཱ ཨནཏྠོ, ཨཏྠསྶ པཊིཔཀྑོ སབྷཱཝོ, ཏེན སཾཧིཏནྟི ཨནཏྠསཾཧིཏཾ, པིསུཎཝཱཙཾ སམྥཔྤལཱཔཉྩཱཏི ཨཏྠོ. ཨེཝམེཏྠ ཙཏུབྦིདྷསྶཔི ཝཙཱིདུཙྩརིཏསྶ གཧིཏཏཱ དཊྛབྦཱ.

དུཔྤཡུཏྟོཏི དུཔྤཊིཔནྣོ. ན ཏཾ ཏཐཱགཏོ བྷཱསཏི ཨབྷཱུཏཏཱདིདོསདུཊྛཏྟཱ. ཏམྤི ཏཐཱགཏོ ན བྷཱསཏི བྷཱུཏཏྠེཔི ཨནཏྠསཾཧིཏཏཱདིདོསདུཊྛཏྟཱ.

ཋཱནཾ ཀཱརཎཾ ཨེཏིསྶཱ ཨཏྠཱིཏི ཋཱནིཡཱ ཀ-ཀཱརསྶ ཡ-ཀཱརཾ ཀཏྭཱ, ན ཋཱནིཡཱཏི ཨཊྛཱནིཡཱ, ནིཀྐཱརཎཱ ཨཡུཏྟིཡུཏྟཱ, སཱ ཨེཝ ཀཐཱཏི ཨཊྛཱནིཡཀཐཱ. ཨཏྟཔཙྩཀྑཀཐཾ ཀཐེམཱཏི ཨཏྟནཱ ཨེཝ པཙྩཀྑཾ ཀཏྭཱ པཝཏྟིཡམཱནཾ ཚལཀཐཾ ཀཐེམ.

གཱམིཀམཧལླཀོ ‘‘ཨིམེ མཾ ཝཉྩེཏུཀཱམཱ, ཨཧམེཝ དཱནི ཨིམེ ཝཉྩེསྶཱམཱི’’ཏི ཙིནྟེཏྭཱ ‘‘ཨེཝཾ བྷཝིསྶཏཱི’’ཏིཨཱདིམཱཧ. ‘‘ན མཡཾ དཱསཱ’’ཏིཔི ཝཏྟུཾ ནཱསཀྑིཾསུ པུབྦེ ཏཐཱཀཏིཀཱཡ ཀཏཏྟཱ.

ཏཏིཡཾ ཏཏིཡམེཝཱཏི དྭཱིསུཔི པཀྑེསུ ཏཏིཡཾ ཏཏིཡམེཝ ཝཱཙཾ. བྷཱསིཏབྦཀཱལཾ ཨནཏིཀྐམིཏྭཱཏི ཡསྶ ཡདཱ ཡཐཱ བྷཱསིཏབྦཾ, ཏསྶ ཏདཱ ཏཐེཝ ཙ བྷཱསནཏོ བྷཱསིཏབྦཾ ཀཱརཎཾ བྷཱསིཏབྦཀཱལཉྩ ཨནཏིཀྐམིཏྭཱཝ བྷཱསཏི.

༨༧. ཋཱནུཔྤཏྟིཀཉཱཎེནཱཏི ¶ ཋཱནེ ཨེཝ ཨུཔྤཛྫནཀཉཱཎེན. ཏསྨིཾ ཏསྨིཾ ཀཱརཎེ ཏསྶ ཏཾ ཏཾ ཨཝཏྠཱཡ ཨུཔྤཛྫནཀཉཱཎེན, དྷམྨཱནཾ ཡཐཱསབྷཱཝཏོ ཨཝབུཛ྄ཛྷནསབྷཱཝོཏི དྷམྨསབྷཱཝོ. དྷམྨེ སབྷཱཝདྷམྨེ ཨནཝསེསེ ཝཱ ཡཱཐཱཝཏོ ཨུཔདྷཱརེཏཱིཏི དྷམྨདྷཱཏུ, སབྦཉྙུཏཱ. ཏེནཱཧ ‘‘སབྦཉྙུཏཉྙཱཎསྶེཏཾ ཨདྷིཝཙན’’ནྟི. སུཔྤཊིཝིདྡྷནྟི སབྦཾ ཉེཡྻདྷམྨཾ སུཊྛུ པཊིཝིཛ྄ཛྷནཝསེན, སུཊྛུ པཊིཝིདྡྷནྟི ཨཏྠོ. ཏེནཱཧ ‘‘ཧཏྠགཏཾ བྷགཝཏོ’’ཏི. ནེཡྻཔུགྒལཝསེན པརིནིཊྛིཏཱཏི ཀཐཱཔརིཝིབྷཱགེན ཨཡམེཝ ¶ དེསནཱ ཙཏྟཱརི ཨརིཡསཙྩཱནི དསྶེནྟོ ཨརཧཏྟཾ པཙྩཀྑཱསཱིཏི.

ཨབྷཡརཱཛཀུམཱརསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༩. བཧུཝེདནིཡསུཏྟཝཎྞནཱ

༨༨. པཉྩཀངྒོཏི ¶ ཝཌྜྷཀཱིཀིཙྩསཱདྷནེ ཝཱསིཨཱདིཔཉྩཀཾ ཨངྒཾ སཾདྷནཾ ཨེཏསྨིནྟི པཉྩཀངྒོ. ཐམྦྷཱདིཝཏྠཱུནཾ ཐཔནཊྛེན ཐཔཏི. པཎྜིཏཨུདཱཡིཏྠེརོ, ན ཀཱལུ༹དཱཡཱི ཐེརོ.

༨༩. པརིཡཱཡཏི ཨཏྟནོ ཕལཾ ཝཏྟེཏཱིཏི པརིཡཱཡོ, ཀཱརཎཾ. ཝེདནཱསནྣིསྶིཏོ ཙ ཀཱཡིཀཙེཏསིཀབྷཱཝོ ཀཱརཎཾ. ཏེནཱཧ – ‘‘ཀཱཡིཀཙེཏསིཀཝསེན དྭེ ཝེདིཏབྦཱ’’ཏི. ཏཏྠ པསཱདཀཱཡསནྣིསྶིཏཱ ཀཱཡིཀཱ, ཙེཏོསནྣིསྶིཏཱ ཙེཏསིཀཱ. སུཁཱདིཝསེན ཏིསྶོཏི ཨེཏྠ སུཁནདུཀྑནུཔེཀྑནཱནི སུཁཱདིཝེདནཱཡ ཀཱརཎཾ. ཏཱནི ཧི པཝཏྟིནིམིཏྟཱནི ཀཏྭཱ ཏཏྠ སུཁཱདིསདྡཔྤཝཏྟི, ཨིམིནཱ ནཡེན སེསེསུཔི ཡཐཱརཧཾ ཀཱརཎཾ ནིདྡྷཱརེཏྭཱ ཝཏྟབྦཾ. ཨུཔཝིཙཱརཝསེནཱཏི ཨཱརམྨཎཾ ཨུཔེཙྩ སཝིསེསཔཝཏྟིཝསེན. ཡསྨིཉྷི ཨཱརམྨཎེ སོམནསྶཝེདནཱ པཝཏྟཏི, ཨཱརམྨཎཏཱཡ ཏཾ ཨུཔགནྟྭཱ ཨིཏརཝེདནཱཧི ཝིསིཊྛཏཱཡ སཝིསེསཾ ཏཏྠ པཝཏྟི. ཏེནཱཧ ‘‘སོམནསྶཊྛཱནིཡཾ རཱུཔཾ ཨུཔཝིཙརཏཱི’’ཏི. ཨེས ནཡོ སེསཝེདནཱསུ གེཧསྶིཏཱནཱིཏི གེཧནིསྶིཏཱནི.

༩༠. པརིཡཱཡེནཱཏི ‘‘ཨིདམེཏྠ དུཀྑསྨིནྟི ཝདཱམཱི’’ཏི ཝུཏྟཊྛཱནཾ སནྡྷཱཡ ཝདཏི. ཏཾ དསྶེནྟོཏི ཀཱམཉྩེཏྠ སུཏྟེ – ‘‘དྭེཔཱནནྡ, ཝེདནཱ ཝུཏྟཱ’’ཏི དྭེ ཨཱདིཾ ཀཏྭཱ ཝེདནཱ དསྶིཏཱ, ཨེཀཱཔི པན དསྶིཏཱ ཨེཝཱཏི དསྶེནྟོ. ཨུཔཏྠམྦྷེཏུནྟི ཨེཀཱཔི ཝེདནཱ ཝུཏྟཱ མཡཱ པརིཡཱཡེན, ཨེཝཾ སཏི དྭེཔི ཝཏྟབྦཱཏི ཨེཝཾ ཏསྶ ཝཱདཾ ཨུཔཏྠམྦྷེཏུཾ. ཀཐཾ པན ཨེཀཱ ཝེདནཱ ཝུཏྟཱཏི? ཡཾ ཀིཉྩི ཝེདཡིཏཾ སུཁཾ ཝཱ དུཀྑཾ ཝཱ ཨདུཀྑམསུཁཾ ཝཱ, ཨིདམེཏྠ དུཀྑསྨིནྟི ཝདཱམཱིཏི. ཡཾ པནེཏྠ ཝཏྟབྦཾ, ཏཾ ཨིཏིཝུཏྟཀཝཎྞནཱཡཾ (ཨིཏིཝུ. ཨཊྛ. ༥༢ ཨཱདཡོ) པརམཏྠདཱིཔནིཡཾ ཝུཏྟནཡེན ཝེདིཏབྦཾ.

ཀཐཾ ¶ པནེཏྠ རཱུཔཱཝཙརཙཏུཏྠེ ཨརཱུཔེསུ སཉྙཱཝེདཡིཏནིརོདྷེ སུཁཾ ཨུདྡྷཏནྟི ཨཱཧ ‘‘ཨེཏྠ ཙཱ’’ཏིཨཱདི. སནྟཊྛེནཱཏི པཊིཔཀྑདྷམྨཱནཾ ཝཱུཔསནྟབྷཱཝེན. པཎཱིཏཊྛེནཱཏི བྷཱཝནཱཝིསེསཝིསིཊྛེན ཨཏཔྤཀབྷཱཝེནེཝ སེཊྛབྷཱཝེན ཙ, པཙྩཡཝིསེསེན པདྷཱནབྷཱཝཾ ནཱིཏནྟིཔི པཎཱིཏཾ. ཝེདཡིཏསུཁཾ ནཱམ ཝེདནཱབྷཱུཏཾ སུཁནྟི ཀཏྭཱ. ཨཝེདཡིཏསུཁཾ ནཱམ ཡཱཝཏཱ ནིདྡུཀྑཏཱ, ཏཱཝཏཱ སུཁནྟི ཝུཙྩཏཱིཏི.ཨཐ ཝཱ ནིརོདྷོ སུཊྛུ ཁཱདཏི ཁནཏི ཀཱཡིཀཙེཏསིཀཱབཱདྷནྟི ¶ ཝཏྟབྦཏཾ ཨརཧཏི སཏྟཱཧམྤི ཏཏྠ དུཀྑསྶ ནིརུཛ྄ཛྷནཏོ. ཏེནཱཧ ‘‘ནིདྡུཀྑབྷཱཝསངྑཱཏེན སུཁཊྛེནཱ’’ཏི.

༩༡. ཡསྨིཾ ཡསྨིཾ བྷཝེ, ཙིཏྟུཔྤཱདེ, ཨཝཏྠཱཡ ཝཱ ནིདྡུཀྑབྷཱཝོ, དུཀྑསྶ པཊིཔཀྑཏཱ ཨནུཔལབྦྷནེན དུཀྑཝིཝིཏྟཾ, ཏཾ སུཁསྨིཾཡེཝ པཉྙཔེཏི. སེསཾ སུཝིཉྙེཡྻམེཝ.

བཧུཝེདནཱིཡསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༡༠. ཨཔཎྞཀསུཏྟཝཎྞནཱ

༩༣. ནཱནཱཝིདྷཱཏི ¶ ནཱནཱཝིདྷདིཊྛིཀཱ སམཎབྲཱཧྨཎཱཏི པབྦཛྫཱམཏྟེན སམཎཱ, ཛཱཏིམཏྟེན བྲཱཧྨཎཱ ཙ. དསྶནནྟི དིཊྛི. གཧིཏནྟི ཨབྷིནིཝིསྶ གཧིཏཾ. ཨིཏི ཏེ ཨཏྟནོ དསྶནཾ གཧེཏུཀཱམཱ པུཙྪནྟི. ཝིནཱ དསྶནེན ལོཀོ ན ནིཡྻཱཏཱིཏི ཝིམོཀྑབྷཱཝནཱཡ ཨེཀེན དསྶནེན ཝིནཱ ལོཀོ སཾསཱརདུཀྑཏོ ན ནིགཙྪཏི. ཨེཀདིཊྛིཡམྤི པཏིཊྛཱཏུཾ ནཱསཀྑིཾསུ སདྡྷཱཀཱརཱབྷཱཝཏོ. ཏཐཱ ཧི ཏེ ཨིམཱཡ དེསནཱཡ སརཎེསུ པཏིཊྛཧིཾསུ. ཡསྨཱ ཨཝིཔརཱིཏེ སདྡྷེཡྻཝཏྠུསྨིཾ ཨུཔྤནྣསདྡྷཱ ‘‘ཨཱཀཱརཝཏཱི’’ཏི ཨདྷིཔྤེཏཱ, ཏསྨཱ ཡོ ལོཀེ ཨཝིཔརཱིཏདྷམྨདེསནཱ, ཨཡམེཝེསཱཏི པཝཏྟཱ མགྒསཱདྷནགཏཱཡ སདྡྷཱཡ ཀཱརཎབྷཱཝཏོ ཏནྣིསྶཡཱ སདྡྷཱ, སཱ ཨཱཀཱརཝཏཱིཏི ཝུཏྟཱ. ཨཝཏྠུསྨིཉྷི སདྡྷཱ ཨཡུཏྟཀཱརཎཏཱཡ ན ཨཱཀཱརཝཏཱི. ཨཱཀཱརཝཏཱིཏི ཨེཏྠ ཝཏཱི-སདྡོ ན ཀེཝལཾ ཨཏྠིཏཱམཏྟདཱིཔཀོ, ཨཐ ཁོ ཨཏིསཡཏྠདཱིཔཀོ པཱསཾསཏྠདཱིཔཀོ ཝཱ དཊྛབྦོ. ཏེན ཨཱཀཱརཝཏཱིཏི སདྡྷེཡྻཝཏྠུཝསེན ཨཏིསཡཀཱརཎཝཏཱིཏི ཝཱ པཱསཾསཀཱརཎཝཏཱིཏི ཝཱ ¶ ཨཡམེཏྠ ཨཏྠོ. ཨཔཎྞཀོཏི ཨེཏྠ ཡཐཱ ཀཉྩི ཨཏྠཾ སཱདྷེཏུཾ ཨཱརདྡྷསྶ པཡོགོ ཝིརདྡྷོ, ཏཏྠ ཨཀཱརཀོ ཝིཡ ཧོཏི པུནཔི ཨཱརབྷིཏབྦཏཱཡ. ཨཝིརདྡྷོ པན ཨཏྠསྶ སཱདྷནཏོ ཨཔཎྞཀོ, ཨེཝཾ ཨཡམྤི དྷམྨོ ཨབྷིབྷཝིཏྭཱ པཝཏྟནཏོ ཨེཀཾསཏོ ‘‘ཨཔཎྞཀོ’’ཏི ཝུཏྟོ. ཏེནཱཧ ‘‘ཨཝིརདྡྷོ ཨདྭེཛ྄ཛྷགཱམཱི ཨེཀཾསགཱཧིཀོ’’ཏི.

༩༤. ཏབྦིཔཙྩནཱིཀབྷཱུཏཱཏི ཏསྶཱ མིཙྪཱདིཊྛིཡཱ པཙྩནཱིཀབྷཱུཏཱ.

༩༥. ནེསནྟི ཀུསལཱནཾ དྷམྨཱནཾ. ཨཀུསལཏོ ནིཀྑནྟབྷཱཝེཏི ཨསཾཀིལིཊྛབྷཱཝེ. ཨཱནིསཾསོཏི སུདྡྷཝིཔཱཀཏཱ. ཝིསུདྡྷིཔཀྑོཏི ཝིསུདྡྷིབྷཱཝོ པརིཡོདཱཏཏཱ. ཨབྷཱུཏདྷམྨསྶ དིཊྛིབྷཱཝསྶ སཉྙཱཔནཱ ཨཱཙིཀྑནཱ ཨབྷཱུཏདྷམྨསཉྙཱཔནཱ. སཱཝཛྫེསུ པརམཝཛྫེ མིཙྪཱདསྶནེ པགྒཧཎནྟི ཀུཏོ སུསཱིལྱསྶ པགྒཧོཏི ཨཱཧ – ‘‘མིཙྪཱདསྶནཾ གཎྷནྟསྶེཝ སུསཱིལྱཾ པཧཱིནཾ ཧོཏཱི’’ཏི. མིཙྪཱདིཊྛིཨཱདཡོཏི ཨེཏྠ མིཙྪཱསངྐཔྤོ པརལོཀཱབྷཱཝཙིནྟཱ, མིཙྪཱཝཱཙཱ པརལོཀཱབྷཱཝཝཱདབྷཱུཏོ མུསཱཝཱདོ, ཨརིཡཱནཾ པཙྩནཱིཀཏཱདཡོ. ཨཔརཱཔརཾ ཨུཔྤཛྫནཝསེནཱཏི པུནཔྤུནཾ ཙིཏྟེ ཨུཔྤཛྫནཝསེན. པཱཔཀཱ ཨཀུསལཱ དྷམྨཱཏི པཙྩཝེཀྑཎསཉྙཱཔནཱདིཀཱལེ ཨུཔྤཛྫནཀཱ ཏཐཱཔཝཏྟཱ ཨཀུསལཁནྡྷཱ.

ཀལིགྒཧོཏི ¶ ཨནཏྠཔརིགྒཧོ. སོ པན ཡསྨཱ དིཊྛེཝ དྷམྨེ ཨབྷིསམྤརཱཡཉྩ པརཱཛཡོ ཧོཏཱིཏི ཨཱཧ ‘‘པརཱཛཡགྒཱཧོ’’ཏི. དུསྶམཏྟོཏི ཨེཏྠ དུ-སདྡོ ‘‘སམཱདིནྣོ’’ཏི ཨེཏྠཱཔི ཨཱནེཏྭཱ ཡོཛེཏབྦོཏི ཨཱཧ ‘‘དུཔྤརཱམཊྛོ’’ཏི. ཡཐཱ དུཔྤརཱམཊྛོ ཧོཏི, ཨེཝཾ སམཱདིནྣོ དུསྶམཏྟོ དུསམཱདིནྣོ ཝུཏྟོ. སཀཝཱདམེཝ ཕརིཏྭཱཏི ཨཏྟནོ ནཏྠིཀཝཱདམེཝ ‘‘ཨིདམེཝ སཙྩཾ མོགྷམཉྙ’’ནྟི (མ. ནི. ༢.༡༨༧; ༣.༢༧-༢༨) ཨཝདྷཱརེནྟོ ཨཉྙསྶ ཨོཀཱསཨདཱནཝསེན ཕརིཏྭཱ. ཏེནཱཧ ‘‘ཨདྷིམུཙྩིཏྭཱ’’ཏི. ‘‘སམྦུདྡྷོ’’ཏིཨཱདི ཨདྷིམུཙྩནཱཀཱརདསྶནཾ. རིཉྩཏཱིཏི ཝིཝེཙེཏི ཨཔནེཏི. ཏེནཱཧ ‘‘ཝཛྫེཏཱི’’ཏི.

༩༦. ཀཊགྒཧོཏི ཀཏཾ སབྦསོ སིདྡྷིམེཝ ཀཏྭཱ གཧཎཾ. སོ པན ཛཡལཱབྷོ ཧོཏཱིཏི ཝུཏྟཾ ‘‘ཛཡགྒཱཧོ’’ཏི. སུགྒཧིཏོཏི སུཊྛུཀརཎཝསེན གཧིཏོ. སུཔརཱམཊྛོཏི སུཊྛུ པརཱཔརཾ ཨཱསེཝནཝསེན ཨཱམཊྛོ ¶ . ཨུབྷཡེནཔི ཏསྶ ཀམྨསྶ ཀཏཱུཔཙིཏབྷཱཝཾ དསྶེཏི, སོཏྠིབྷཱཝཱཝཧཏྟཉྩ སགྒུཔཔཏྟིསཾཝཏྟནཏོ པཱཔསབྷཱཝཔཧཱནཏོ ཙ.

༩༧. སཧཏྠཱ ཀརོནྟསྶཱཏི (དཱི. ནི. ཊཱི. ༡.༡༦༦; སཾ. ནི. ཊཱི. ༢.༣.༢༡༡) སཧཏྠེནེཝ ཀརོནྟསྶ. ནིསྶགྒིཡཐཱཝརཱདཡོཔི ཨིདྷ སཧཏྠཀརཎེནེཝ སངྒཧིཏཱ. པཙནཾ དཧནཾ ཝིབཱདྷནནྟི ཨཱཧ ‘‘དཎྜེན པཱིལེ༹ནྟསྶཱ’’ཏི. སོཀཾ སཡཾ ཀརོནྟསྶཱཏི པརསྶ སོཀཀཱརཎཾ སཡཾ ཀརོནྟསྶ, སོཀཾ ཝཱ ཨུཔྤཱདེནྟསྶ. པརེཧི ཨཏྟནོ ཝཙནཀརེཧི. སཡམྤི ཕནྡཏོཏི པརསྶ ཝིབཱདྷནཔཡོགེན སཡམྤི ཕནྡཏོ. ཨཏིཔཱཏཡཏོཏི པདཾ སུདྡྷཀཏྟུཨཏྠེ ཧེཏུཀཏྟུཨཏྠེ ཙ ཝཏྟཏཱིཏི ཨཱཧ ‘‘ཧནནྟསྶཔི ཧནཱཔེནྟསྶཱཔཱི’’ཏི.

གྷརསྶ བྷིཏྟི ཨནྟོ བཧི ཙ སནྡྷིཏཱ ཧུཏྭཱ ཋིཏཱ གྷརསནྡྷི. ཀིཉྩིཔི ཨསེསེཏྭཱ ནིརཝསེསམེཝ ལོཔོཏི ནིལློཔོ. ཨེཀཱགཱརེ ནིཡུཏྟོ ཝིལོཔོ ཨེཀཱགཱརིཀོ. པརིཏོ སབྦསོ པནྠེ ཧནནཾ པརིཔནྠོ. པཱཔཾ ན ཀརཱིཡཏི པུབྦེ ཨསཏོ ཨུཔྤཱདེཏུཾ ཨསཀྐུཎེཡྻཏྟཱ, ཏསྨཱ ནཏྠི པཱཔཾ. ཡདི ཨེཝཾ ཀཐཾ སཏྟཱ པཱཔཾ པཊིཔཛྫནྟཱིཏི ཨཱཧ – ‘‘སཏྟཱ པན ཀརོམཱཏི ཨེཝཾསཉྙིནོ ཧོནྟཱི’’ཏི. ཨེཝཾ ཀིརསྶ ཧོཏི ‘‘ཨིམེསཉྷི སཏྟཱནཾ ཧིཾསཱདིཀིརིཡཱ ན ཨཏྟཱནཾ ཕུསཏི ཏསྶ ནིཙྩཏཱཡ ནིབྦིཀཱརཏྟཱ, སརཱིརཾ པན ཨཙེཏནཾ ཀཊྛཀལིངྒརཱུཔམཾ, ཏསྨིཾ ཝིཀོཔིཏེཔི ན ཀིཉྩི པཱཔ’’ནྟི. ཁུརནེམིནཱཏི ནིསིཏཁུརམཡནེམིནཱ. གངྒཱཡ དཀྑིཎདིསཱ ཨཔྤཏིརཱུཔདེསོ, ཨུཏྟརདིསཱ པཏིརཱུཔདེསོཏི ཨདྷིཔྤཱཡེན ‘‘དཀྑིཎཉྩེ’’ཏིཨཱདི ཝུཏྟནྟི ‘‘དཀྑིཎཏཱིརེ མནུསྶཱ ཀཀྑལཱ༹’’ཏིཨཱདིམཱཧ.

མཧཱཡཱགནྟི ¶ མཧཱཝིཛིཏཡཉྙསདིསཾ མཧཱཡཱགཾ. སཱིལསཾཡམེནཱཏི ཀཱཡིཀཝཱཙསིཀསཾཝརེན. སཙྩཝཙནེནཱཏི སཙྩཝཱཙཱཡ. ཏསྶ ཝིསུཾ ཝཙནཾ ལོཀེ གརུཏརཔུཉྙསམྨཏབྷཱཝཏོ. ཡཐཱ ཧི པཱཔདྷམྨེསུ མུསཱཝཱདོ གརུ, ཨེཝཾ པུཉྙདྷམྨེསུ སཙྩཝཱཙཱ. ཏེནཱཧ བྷགཝཱ – ‘‘ཨེཀཾ དྷམྨམཏཱིཏསྶཱ’’ཏིཨཱདི (དྷ. པ. ༡༧༦). ཝུཏྟནཡེནེཝཱཏི ཀཎྷཔཀྑེ ཝུཏྟནཡེན. ཏཏྠ ཧི – ‘‘ནཏྠི པཱཔཾ, ནཏྠི པཱཔསྶ ཨཱགམོ’’ཏི ཨཱགཏཾ, ཨིདྷ ‘‘ཨཏྠི པུཉྙཾ, ཨཏྠི པུཉྙསྶ ཨཱགམོ’’ཏི ཨཱགཏཾ, ཨཡམེཝ ཝིསེསོ. སེསཾ ཝུཏྟསདིསམེཝཱཏི ¶ ‘‘ཏེསམེཏཾ པཱཊིཀངྑ’’ནྟི ཨེཝམཱདིཾ སནྡྷཱཡ ཝདཏི, ཏཾ ཧེཊྛཱ པུརིམཝཱརསདིསཾ.

༡༠༠. ཨུབྷཡེནཱཏི ཧེཏུཔཙྩཡཔཊིསེདྷཝཙནེན. སཾཀིལེསཔཙྩཡནྟི སཾསཱརེ པརིབྦྷམནེན ཀིལིནྣསྶ མལིནབྷཱཝསྶ ཀཱརཎཾ. ཝུཏྟཝིཔརིཡཱཡེན ཝིསུདྡྷིཔཙྩཡནྟི སདྡཏྠོ ཝེདིཏབྦོ. བལནྟིཨཱདཱིསུ སཏྟཱནཾ སཾཀིལེསཱཝཧཾ ཝོདཱནཱཝཧཉྩ ཨུསྶཱཧསངྑཱཏཾ བལཾ ཝཱ, སཱུརཝཱིརབྷཱཝསངྑཱཏཾ ཝཱིརིཡཾ ཝཱ, པུརིསེན ཀཏྟབྦོ པུརིསཐཱམོ ཝཱ, སོ ཨེཝ པརཾ པརཾ ཋཱནཾ ཨཀྐམནཔྤཏྟིཡཱ པུརིསཔརཀྐམོ ཝཱ ནཏྠི ན ཨུཔལབྦྷཏི.

སཏྭཡོགཏོ, རཱུཔཱདཱིསུ སཏྟཝིསཏྟཏཱཡ ཙ སཏྟཱ. པཱཎནཏོ ཨསྶཱསཔསྶཱསཝསེན པཝཏྟིཡཱ པཱཎཱ. ཏེ པན སོ ཨེཀིནྡྲིཡཱདིཝསེན ཝིབྷཛིཏྭཱ ཝདཏཱིཏི ཨཱཧ ‘‘ཨེཀིནྡྲིཡོ’’ཏིཨཱདི. ཨཎྜཀོསཱདཱིསུ བྷཝནཏོ བྷཱུཏཱཏི ཝུཙྩནྟཱིཏི ཨཱཧ ‘‘ཨཎྜཀོས…པེ… ཝདནྟཱི’’ཏི. ཛཱིཝནཏོ པཱཎཾ དྷཱརེནྟོ ཝིཡ ཝཌྜྷནཏོ ཛཱིཝཱཏི ཨེཝཾ སཏྟཔཱཎབྷཱུཏཛཱིཝེསུ སདྡཏྠོ ཝེདིཏབྦོ. ནཏྠི ཨེཏེསཾ སཾཀིལེསཝིསུདྡྷཱིསུ ཝསོཏི ཨཝསཱ. ནཏྠི ནེསཾ བལཾ ཝཱིརིཡཉྩཱཏི ཨབལཱ ཨཝཱིརིཡཱ. ནིཡཏཏཱཏི ཨཙྪེཛྫསུཏྟཱཝུཏཱབྷེཛྫམཎི ཝིཡ ནིཡཏཔཝཏྟནཏཱཡ གཏིཛཱཏིབནྡྷཔཛཧཝསེན ནིཡཱམོ. ཏཏྠ ཏཏྠ གམནནྟི ཚནྣཾ ཨབྷིཛཱཏཱིནཾ ཏཱསུ ཏཱསུ གཏཱིསུ ཨུཔགམནཾ སམཝཱཡེན སམཱགམོ. སབྷཱཝོཡེཝཱཏི ཡཐཱ ཀཎྚཀསྶ ཏིཀྑཏཱ, ཀབིཊྛཕལཱནཾ པརིམཎྜལཏཱ, མིགཔཀྑཱིནཾ ཝིཙིཏྟཱཀཱརཏཱ, ཨེཝཾ སབྦསྶཔི ལོཀསྶ ཧེཏུཔཙྩཡེན ཝིནཱ ཏཐཱ ཏཐཱ པརིཎཱམོ, ཨཡཾ སབྷཱཝོཡེཝ ཨཀིཏྟིམོཡེཝ. ཏེནཱཧ ‘‘ཡེན ཧཱི’’ཏིཨཱདི.

སཀུཎེ ཧནཏཱིཏི སཱཀུཎིཀོ, ཏཐཱ སཱུཀརིཀོ. ལུདྡོཏི ཨཉྙོཔི ཡོ ཀོཙི མཱགཝིཀོ ནེསཱདོ. པཱཔཀམྨཔསུཏཏཱཡ ཀཎྷཱབྷིཛཱཏི ནཱམ. བྷིཀྑཱུཏི སཱཀིཡཱ བྷིཀྑཱུ, མཙྪམཾསཁཱདནཏོ ནཱིལཱབྷིཛཱཏཱིཏི ཝདནྟི. ཉཱཡལདྡྷེཔི པཙྩཡེ བྷུཉྫམཱནཱ ཨཱཛཱིཝཀསམཡསྶ ཝིལོམགཱཧིཏཱཡ ‘‘པཙྩཡེསུ ཀཎྚཀེ པཀྑིཔིཏྭཱ ཁཱདནྟཱི’’ཏི ཝདནྟི. ཨེཀེ པབྦཛིཏཱ ¶ , ཡེ སཝིསེསཾ ཨཏྟཀིལམཐཱནུཡོགམནུཡུཏྟཱ. ཏཐཱ ¶ ཧི ཏེ ཀཎྚཀེ ཝཏྟེནྟཱ ཝིཡ ཧོནྟཱིཏི ཀཎྚཀཝུཏྟིཀཱཏི ཝུཏྟཱ. ཋཏྭཱ བྷུཉྫནདཱནཔཊིཀྑེཔཱདིཝཏསམཱཡོགེན པཎྜརཏརཱ. ཨཙེལཀསཱཝཀཱཏི ཨཱཛཱིཝཀསཱཝཀེ ཝདཏི. ཏེ ཀིར ཨཱཛཱིཝཀལདྡྷིཡཱ ཝིསུདྡྷཙིཏྟཏཱཡ ནིགཎྛེཧིཔི པཎྜརཏརཱ. ནནྡཱདཡོ ཧི ཏཐཱརཱུཔཱཡ པཊིཔཏྟིཡཱ པཏྟབྦཱ, ཏསྨཱ ནནྡཱདཡོ ནིགཎྛེཧི ཨཱཛཱིཝཀསཱཝཀེཧི ཙ པཎྜརཏརཱཏི ཝུཏྟཱ ‘‘སུཀྐཱབྷིཛཱཏཱི’’ཏི.

ཨཡམེཏེསཾ ལདྡྷཱིཏི སཱཀུཎིཀཱདིབྷཱཝཱུཔགམནེན ཀཎྷཱབྷིཛཱཏིཨཱདཱིསུ དུཀྑཾ སུཁཉྩ པཊིསཾཝེདེནྟཱ ཨནུཀྐམེན མཧཱཀཔྤཱནཾ ཙུལླཱསཱིཏིསཧསྶཱནི ཁེཔེཏྭཱ ཨཱཛཱིཝཀབྷཱཝཱུཔགམནེན པརམསུཀྐཱབྷིཛཱཏིཡཾ ཋཏྭཱ སཾསཱརཏོ སུཛ྄ཛྷནྟཱིཏི ཨཡཾ ཏེསཾ ནིཡཏི ཨཱཛཱིཝཀཱནཾ ལདྡྷི.

‘‘ནཏྠི དིནྣ’’ནྟི ཝདནྟོ ནཏྠིཀོ དཱནསྶ ཕལཾ པཊིཀྑིཔཏཱིཏི ཨཱཧ – ‘‘ནཏྠིཀདིཊྛི ཝིཔཱཀཾ པཊིབཱཧཏཱི’’ཏི. ཏཐཱ ཙེཝ ཧེཊྛཱ སཾཝཎྞིཏཾ ‘‘ནཏྠིཀདིཊྛི ཧི ནཏྠིཏམཱཧཱ’’ཏི. ཨཧེཏུཀདིཊྛི ཨུབྷཡནྟི ཀམྨཾ ཝིཔཱཀཉྩ ཨུབྷཡཾ. སོ ཧི ‘‘ཨཧེཏཱུ ཨཔཙྩཡཱ སཏྟཱ སཾཀིལིསྶནྟི ཝིསུཛ྄ཛྷནྟཱི’’ཏི ཝདནྟོ ཀམྨསྶ ཝིཡ ཝིཔཱཀསྶཔི སཾཀིལེསཝིསུདྡྷཱིནཾ པཙྩཡཏྟཱབྷཱཝཝཙནཏོ ཏདུབྷཡཾ པཊིབཱཧཏི ནཱམ. ཝིཔཱཀོ པཊིབཱཧིཏོ ཧོཏི ཨསཏི ཀམྨེ ཝིཔཱཀཱབྷཱཝཏོ. ཀམྨཾ པཊིབཱཧིཏཾ ཧོཏི ཨསཏི ཝིཔཱཀེ ཀམྨསྶ ནིརཏྠཀབྷཱཝཱཔཏྟིཏོ. ཨཏྠཏོཏི སརཱུཔེན. ཨུབྷཡཔཊིབཱཧཀཱཏི ཝིསུཾ ཝིསུཾ ཏཾཏཾདིཊྛིཏཱ ཝུཏྟཱཔི སབྦེ ཏེ ནཏྠིཀཱདཡོ ནཏྠིཀདིཊྛིཨཱདིཝསེན པཙྩེཀཾ ཏིཝིདྷདིཊྛིཀཱ ཨེཝ ཨུབྷཡཔཊིབཱཧཀཏྟཱ. ‘‘ཨུབྷཡཔཊིབཱཧཀཱ’’ཏི ཧི ཧེཏུཝཙནཾ. ཨཧེཏུཀཝཱདཱ ཙཱཏིཨཱདི པཊིཉྙཱཝཙནཾ. ཡོ ཧི ཝིཔཱཀཔཊིབཱཧནེན ནཏྠིཀདིཊྛིཀོ, སོ ཨཏྠཏོ ཀམྨཔཊིབཱཧནེན ཨཀིརིཡདིཊྛིཀོ, ཨུབྷཡཔཊིབཱཧནེན ཨཧེཏུཀདིཊྛིཀོ ཙ ཧོཏི. སེསདྭཡེཔི ཨེསེཝ ནཡོ.

སཛ྄ཛྷཱཡནྟཱིཏི ཏཾ དིཊྛིདཱིཔཀཾ གནྠཾ ཨུགྒཧེཏྭཱ པཋནྟི. ཝཱིམཾསནྟཱིཏི ཏསྶ ཨཏྠཾ ཝིཙཱརེནྟི. ཏེསནྟིཨཱདི ཝཱིམཾསནཱཀཱརདསྶནཾ. ཏསྨིཾ ཨཱརམྨཎེཏི ཡཐཱཔརིཀཔྤིཏཀམྨཕལཱབྷཱཝདཱིཔཀེ ‘‘ནཏྠི དིནྣ’’ནྟིཨཱདིནཡཔྤཝཏྟཱཡ ལདྡྷིཡཱ ཨཱརམྨཎེ. མིཙྪཱསཏི སནྟིཊྛཏཱིཏི ‘‘ནཏྠི དིནྣ’’ནྟིཨཱདིཝསེན ¶ ཨནུསྶཝཱུཔལདྡྷེ ཨཏྠེ ཏདཱཀཱརཔརིཝིཏཀྐནེཧི སཝིགྒཧེ ཝིཡ སརཱུཔཏོ ཙིཏྟསྶ པཙྩུཔཊྛིཏེ ཙིརཀཱལཔརིཙཡེན ‘‘ཨེཝམེཏ’’ནྟི ནིཛ྄ཛྷཱནཀྑམབྷཱཝཱུཔགམནེན ནིཛ྄ཛྷཱནཀྑནྟིཡཱ ཏཐཱ གཧིཏེ པུནཔྤུནཾ ཏཐེཝ ཨཱསེཝནྟསྶ བཧུལཱིཀརོནྟསྶ མིཙྪཱཝིཏཀྐེན སམཱདིཡམཱནཱ མིཙྪཱཝཱཡཱམུཔཏྠམྦྷིཏཱ ཨཏཾསབྷཱཝཾ ‘‘ཏཾསབྷཱཝ’’ནྟི གཎྷནྟཱི མིཙྪཱསཏཱིཏི ལདྡྷནཱམཱ ཏཾལདྡྷིསཧགཏཱ ཏཎྷཱ སནྟིཊྛཏི ¶ . ཙིཏྟཾ ཨེཀགྒཾ ཧོཏཱིཏི ཡཐཱཝུཏྟཝིཏཀྐཱདིཔཙྩཡལཱབྷེན ཏསྨིཾ ཨཱརམྨཎེ ཨཝཊྛིཏཏཱཡ ཨནེཀགྒཾ པཧཱཡ ཨེཀགྒཾ ཨཔྤིཏཾ ཝིཡ ཧོཏི. མིཙྪཱསམཱདྷིཔི ཧི པཙྩཡཝིསེསེཧི ལདྡྷབྷཱཝནཱབལེཧི ཀདཱཙི སམཱདྷཱནཔཏིརཱུཔཀིཙྩཀརོ ཧོཏིཡེཝ ཝཱལཝིཛ྄ཛྷནཱདཱིསུ ཝིཡཱཏི དཊྛབྦཾ. ཛཝནཱནི ཛཝནྟཱིཏི ཨནེཀཀྑཏྟུཾ ཏེནཱཀཱརེན པུབྦབྷཱགིཡེསུ ཛཝནཝཱརེསུ པཝཏྟེསུ སབྦཔཙྪིམེ ཛཝནཝཱརེ སཏྟ ཛཝནཱནི ཛཝནྟི. པཋམཛཝནེ པན སཏེཀིཙྪཱ ཧོནྟི, ཏཐཱ དུཏིཡཱདཱིསཱུཏི དྷམྨསབྷཱཝདསྶནམེཏཾ, ན པན ཏསྨིཾ ཁཎེ ཏེསཾ སཏེཀིཙྪབྷཱཝཱཔཱདནཾ ཀེནཙི སཀྐཱ ཀཱཏུཾ.

ཏཏྠཱཏི ཏེསུ ཏཱིསུ མིཙྪཱདསྶནེསུ. ཀོཙི ཨེཀཾ དསྶནཾ ཨོཀྐམཏཱིཏི ཡསྶ ཨེཀསྨིཾཡེཝ ཨབྷིནིཝེསོ ཨཱསེཝནཱ ཙ པཝཏྟཱ, སོ ཨེཀཾཡེཝ དསྶནཾ ཨོཀྐམཏི. ཡསྶ པན དྭཱིསུ, ཏཱིསུཔི ཝཱ ཨབྷིནིཝེསནཱ པཝཏྟཱ, སོ དྭེ ཏཱིཎི ཨོཀྐམཏི. ཨེཏེན ཡཱ པུབྦེ ཨུབྷཡཔཊིབཱཧནཏཱམུཁེན ཝུཏྟཱ ཨཏྠསིདྡྷཱ སབྦདིཊྛིཀཏཱ, སཱ པུབྦབྷཱགིཡཱ. ཡཱ པན མིཙྪཏྟནིཡཱམོཀྐནྟི བྷཱུཏཱ, སཱ ཡཐཱསཀཾ པཙྩཡསམུདཱགམསིདྡྷིཏོ བྷིནྣཱརམྨཎཱནཾ ཝིཡ ཝིསེསཱདྷིགམཱནཾ ཨཉྙམཉྙཾ ཨེཀཛ྄ཛྷཾ ཨནུཔྤཏྟིཡཱ ཨསཾཀིཎྞཱ ཨེཝཱཏི དསྶེཏི. ཨེཀསྨིཾ ཨོཀྐནྟེཔཱིཏིཨཱདིནཱ ཏིསྶནྣམྤི དིཊྛཱིནཾ སམཱནབལཏཾ སམཱནཕལཏཉྩ དསྶེཏི, ཏསྨཱ ཏིསྶོཔི ཙེཏཱ ཨེཀསྶ ཨུཔྤནྣཱ ཨཉྙམཉྙཾ ཨབྦོཀིཎྞཱ ཨེཝ, ཨེཀཱཡ ཝིཔཱཀེ དིནྣེ ཨིཏརཱ ཨནུབལཔྤདཱཡིཀཱ ཧོནྟི. ཝཊྚཁཱཎུ ནཱམཱཏི ཨིདཾ ཝཙནཾ ནེཡྻཏྠཾ, ན ནཱིཏཏྠནྟི ཏཾ ཝིཝརིཏྭཱ དསྶེཏུཾ ཀིཾ པནེསཱཏིཨཱདི ཝུཏྟཾ, ཨཀུསལཾ ནཱམེཏཾ ཨབལཾ དུབྦལཾ, ན ཀུསལཾ ཝིཡ མཧཱབལནྟི ཨཱཧ – ‘‘ཨེཀསྨིཾཡེཝ ཨཏྟབྷཱཝེ ནིཡཏོ’’ཏི. ཨཉྙཐཱ སམྨཏྟནིཡཱམོ ཝིཡ མིཙྪཏྟནིཡཱམོཔི ཨཙྩནྟིཀོ སིཡཱ. ཡདི ཨེཝཾ ཝཊྚཁཱཎུཀཛོཏནཱ ཀཐནྟི ཨཱཧ ‘‘ཨཱསེཝནཝསེན པནཱ’’ཏིཨཱདི, ཏསྨཱ ཡཐཱ ‘‘སཀིཾ ནིམུགྒོ ¶ ནིམུགྒོཝ ཧོཏཱི’’ཏི (ཨ. ནི. ༧.༡༥) ཝུཏྟཾ, ཨེཝཾ ཝཊྚཁཱཎུཀཛོཏནཱ. ཡཱདིསེ ཧི པཙྩཡེ པཊིཙྩ ཨཡཾ ཏཾཏཾདསྶནཾ ཨོཀྐནྟོ པུན ཀདཱཙི ཏཔྤཊིཔཀྑེ པཙྩཡེ པཊིཙྩ ཏཏོ སཱིསུཀྑིཔནམསྶ ན ཧོཏཱིཏི ན ཝཏྟབྦཾ. ཏེན ཝུཏྟཾ ‘‘ཡེབྷུཡྻེནཱ’’ཏི.

ཏསྨཱཏི ཡསྨཱ ཨེཝཾ སཾསཱརཁཱཎུབྷཱཝསྶཔི པཙྩཡོ ཨཀལྱཱཎཛནོ, ཏསྨཱ. བྷཱུཏིཀཱམོཏི དིཊྛདྷམྨིཀསམྤརཱཡིཀཔརམཏྠཱནཾ ཝསེན ཨཏྟནོ གུཎེཧི ཝཌྜྷིཀཱམོ. ཡཾ པནེཏྠ ཀེཙི ཝདནྟི ‘‘ཡཐཱ ཙིརཀཱལབྷཱཝནཱཡ པརིཔཱཀཱུཔགམལདྡྷབལཏྟཱ ཨུཔནིསྶཡཀུསལཱ ཨཀུསལེ སབྦསོ སམུཙྪིནྡནྟི, ཨེཝཾ ཨཀུསལདྷམྨཱ ཏཏོཔི ཙིརཀཱལབྷཱཝནཱསམྦྷཝཏོ ལདྡྷབལཱ ཧུཏྭཱ ཀདཱཙི ཀུསལདྷམྨེཔི སམུཙྪིནྡནྟི. ཨེཝཉྩ ཀཏྭཱ དལ༹ྷམིཙྪཱབྷིནིཝེསསྶ མིཙྪཱདིཊྛིཀསྶ ཝཊྚཁཱཎུཀབྷཱཝཛོཏནཱཔི ¶ སམཏྠིཏཱ ཧོཏཱི’’ཏི ཡཐཱ ཏཾ ‘‘ཝསྶབྷཉྙཱནཾ དིཊྛཱི’’ཏི, ཏཾ ན, མིཙྪཏྟནིཡཏདྷམྨཱནཾ ཙིརཀཱལབྷཱཝནཱམཏྟེན ན པཊིཔཀྑསྶ པཛཧནསམཏྠཏཱ, ཨཐ ཁོ དྷམྨཏཱསིདྡྷེན པཙྩཡཝིསེསཱཧིཏསཱམཏྠིཡེན ཨཏྟནོ པཧཱཡཀསབྷཱཝེན པཧཱཡཀབྷཱཝོ བྷཱཝནཱཀུསལཱནཾཡེཝ ཝུཏྟོ, ཨཀུསལཱནཾཡེཝ ཙ པཧཱཏབྦབྷཱཝོ ‘‘དསྶནེན པཧཱཏབྦཱ’’ཏིཨཱདིནཱ ནཡེན, ཨཀུསལཱནཾཡེཝ དུབྦལབྷཱཝོ ‘‘ཨབལཱནཾ བལཱིཡནྟཱི’’ཏིཨཱདིནཱ (སུ. ནི. ༧༧༦; མཧཱནི. ༥) (ཡུཏྟིནཱཔི ནཱམཏོ ཝཱ ཨདྷིགམནིཡོ ཨཱལོཀོ ཨཱལོཀབྷཱཝཏོ བཱཧིརཱརཎེཀཱ ཝིཡ ན ཙེཏྠ པཊིཉྙཏྟེ བྷཱཝེསཏཱ སོཏུནོ ཨཱསཾཀིཏབྦཱ ཝིསེསཝསྶ སཱདྷེཏབྦཏོ སཱམཉྙསྶ ཙ སོཏུབྷཱཝེན ཨདྷིཔྤེཏཏྟཱ ཝེད-སདྡསྶ ལོཔོ དཱིཔེ སབྷཱཝེ སཱདྷནེ ཡཐཱ ཏཾ སདྡཡབྷཱཝསྶ ནཱཔི ཝིསུདྡྷཀཨནུམཱནཱདིཝིརོདྷསམྦྷཱཝཏོ. ན ཧི སཀྐཱ ཨནྟརཱལོཀསྶ བཱཧིརཱལོཀསྶ ཝིཡ རཱུཔཀཱཡཾ ཨུཔཱདཱཡ རཱུཔཏཱ ཙཀྑུཝིཉྙེཡྻཏྟཱདིཀེ པཏིཊྛཱཔེཏུཾ སཀྐཱཏི ཝུཏྟཾ, ནནུཔི ཨནྟརཱལོཀོ ཨཝིགྒཧཏྟཱ ཝེདནཱ ཝིཡཱཏི སདྡྷེཝ ཉཱཎཱལོཀསྶ ཨཝིཛྫནྡྷཀཱརཱ ཝིཡ ཝིདྷམནིཡབྷཱཝེ སབྦེསམྤི ཀུསལདྷམྨཱནཾ ཀེནཙིཔི ཨཀུསལདྷམྨེན སམུཙྪིནྡནིཡཏཱ སིདྡྷཱཝ ཧོཏི). ཝཊྚཁཱཎུཀཙོདནཱཡ ཡཾ ཝཏྟབྦཾ, ཏཾ ཧེཊྛཱ ཝུཏྟམེཝཱཏི ཏིཊྛཏེསཱ བཱལཛནཝིཀཏྠནཱ.

༡༠༣. ཛྷཱནཙིཏྟམཡཱཏི ¶ རཱུཔཱཝཙརཛ྄ཛྷཱནཙིཏྟེན ནིབྦཏྟཱ. ཏཐཱ ཧི ཏེསཾ ཝིསེསེན ཛྷཱནམནསཱ ནིབྦཏྟཏྟཱ ‘‘མནོམཡཱ’’ཏི ཝུཏྟཱ, ཨཝིསེསེན པན ཨབྷིསངྑཱརམནསཱ སབྦེཔི སཏྟཱ མནོམཡཱ ཨེཝ. སཉྙཱམཡཱཏི ཨེཏྠཱཔི ཨེསེཝ ནཡོ. ཏེནཱཧ ‘‘ཨརཱུཔཛ྄ཛྷཱནསཉྙཱཡཱ’’ཏི. ཨཡནྟི རཱུཔིཏཱབྷཱཝཔཊིཔཛྫནཀཔུགྒལོ. ཨཔྤཊིལདྡྷཛ྄ཛྷཱནོཏི ཨནདྷིགཏརཱུཔཛ྄ཛྷཱནོ. ཏསྶཔཱིཏི ཏཀྐིནོཔི. རཱུཔཛ྄ཛྷཱནེ ཀངྑཱ ནཏྠི ཨནུསྶཝཝསེན ལདྡྷཝིནིཙྪཡཏྟཱ.

༡༠༤. སཱརཱགཱཡཱཏི སརཱགབྷཱཝཱཡ. སནྟིཀེཏི སམཱིཔེ, ན ཐཱམགཏཱ དིཊྛིནཱཏིདཱུརཏྟཱ སརཱགཱ, ན སམྤཡུཏྟཏྟཱ. སཱ ཧི ན ཐཱམགཏཱ ཝཊྚཔརིཡཱཔནྣེསུ དྷམྨེསུ རཛྫཏཱིཏི ཝིཉྙཱཡཏཱིཏི ཨཱཧ – ‘‘རཱགཝསེན ཝཊྚེ རཛྫནསྶཱ’’ཏི. སབྦེཔི སཾཡོཛནཱ ཏཎྷཱཝསེནེཝ སམྦྷཝནྟཱིཏི ཨཱཧ – ‘‘ཏཎྷཱཝསེན སཾཡོཛནཏྠཱཡཱ’’ཏི. ཨཱརུཔྤེ པནསྶ ཀངྑཱ ནཏྠཱིཏི ཨནུསྶཝཝསེན ལདྡྷནིཙྪཡཾ སནྡྷཱཡ ཝུཏྟཾ. ཀཱམཾ དུགྒཏིདུཀྑཱནཾ ཨེཀནྟསཾཝཏྟནེན ནཏྠིཀདིཊྛིཨཱདཱིནཾ ཨཔཎྞཀཏཱ པཱཀཊཱ ཨེཝ, ནིཔྤརིཡཱཡེན པན ཨནཝཛྫསྶ ཨཏྠསྶ ཨེཀནྟསཱདྷཀཾ ཨཔཎྞཀནྟི ཀཏྭཱ ཙོདནཱ, སཱཝཛྫསྶཔི ཨཏྠསྶ སཱདྷནེ ཨེཀཾསིཀབྷཱཝཾ གཧེཏྭཱ པརིཧཱརོ. ཏེནཱཧ ‘‘གཧཎཝསེནཱ’’ཏིཨཱདི. ཏེན རུལ༹ྷཱིཝསེན ‘‘ནཏྠི དིནྣ’’ནྟིཨཱདཱིནི ཨཔཎྞཀངྒཱནི ཛཱཏཱནཱིཏི དསྶེཏི.

༡༠༥. ཧེཊྛཱ ¶ ཏཡོ པུགྒལཱཝ ཧོནྟཱིཏི ཨཏྟནྟཔོ པརནྟཔོཏི ཨིམསྨིཾ ཙཏུཀྐེ ཧེཊྛཱ ཏཡོ པུགྒལཱ ཧོནྟི. ཡཐཱཝུཏྟཱ པཉྩཔི པུགྒལཱ དུཔྤཊིཔནྣཱཝ, ཏཏོ ཨཏྠིཀཝཱདཱདཡོ པཉྩཔུགྒལཱ སམྨཱཔཊིཔནྣཏཱཡ ཨིམསྨིཾ ཙཏུཀྐེ ཨེཀོ ཙཏུཏྠཔུགྒལོཝ ཧོཏི. ཨེཏམཏྠཾ དསྶེཏུནྟི ཨིདྷ ཧེཊྛཱ ཝུཏྟཔུགྒལཔཉྩཀདྭཡཾ ཨིམསྨིཾ ཙཏུཀྐེ ཨེཝ སངྒཧཾ གཙྪཏཱིཏི ཝིབྷཱགེན དུཔྤཊིཔཏྟིསུཔྤཊིཔཏྟིཡོ དསྶེཏུཾ བྷགཝཱ ཨིམཾ དེསནཾ ཨཱརབྷཱིཏི. ཡཾ པནེཏྠ ཨཏྠཏོ ཨཝིབྷཏྟཾ, ཏཾ སུཝིཉྙེཡྻམེཝ.

ཨཔཎྞཀསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

ནིཊྛིཏཱ ཙ གཧཔཏིཝགྒཝཎྞནཱ.

༢. བྷིཀྑུཝགྒོ

༡. ཨམྦལཊྛིཀརཱཧུལོཝཱདསུཏྟཝཎྞནཱ

༡༠༧. ཨམྦལཊྛིཀཱཡནྟི ¶ ¶ ཨེཏྠ ཨམྦལཊྛིཀཱ ཝུཙྩཏི སུཛཱཏོ ཏརུཎམྦརུཀྑོ, ཏསྶ པན ཨཝིདཱུརེ ཀཏོ པཱསཱདོ ཨིདྷ ‘‘ཨམྦལཊྛིཀཱ’’ཏི ཨདྷིཔྤེཏོ. ཏེནཱཧ ‘‘ཝེལུ༹ཝནཝིཧཱརསྶཱ’’ཏིཨཱདི. པདྷཱནགྷརསངྑེཔེཏི བྷཱཝནཱགེཧཔྤཀཱརེ ཡོགཱིནཾ གེཧེཏི ཨཏྠོ. ཏིཁིཎོཝ ཧོཏི, ན ཏསྶ ཏིཁིཎབྷཱཝོ ཀེནཙི ཀཱཏབྦོ སབྷཱཝསིདྡྷཏྟཱ. ཨེཝམེཝ ཨཏྟནོ ཝིམུཏྟིཔརིཔཱཙནཀམྨུནཱ ཏིཀྑཝིསདབྷཱཝཔྤཏྟིཡཱ ཨཡམྤི ཨཱཡསྨཱ…པེ… ཏཏྠ ཝིཧཱསི. པཀཏིཔཉྙཏྟམེཝཱཏི པཀཏིཡཱ པཉྙཏྟཾ བུདྡྷཱནཾ ཨུཔགམནཏོ པུརེཏརམེཝ ཙཱརིཏྟཝསེན པཉྙཏྟཾ.

༡༠༨. ཨུདཀཾ ཨནེན དྷཱིཡཏི, ཋཔཱིཡཏི ཝཱ ཨེཏྠཱཏི ཨུདཀཱདྷཱནཾ. ཨུདཀཊྛཱནནྟི ཙ ཁུདྡཀབྷཱཛནཾ. ‘‘ཨོཝཱདདཱནཏྠཾ ཨཱམནྟེསཱི’’ཏི ཝཏྭཱ ཏཾ པནསྶ ཨོཝཱདདཱནཾ ན ཨིདྷེཝ, ཨཐ ཁོ བཧཱུསུ ཋཱནེསུ བཧུཀྑཏྟུཾ པཝཏྟིཏནྟི ཏཱནི ཏཱནི སངྑེཔཏོ དསྶེཏྭཱ ཨིདྷ སཾཝཎྞནཏྠཾ ‘‘བྷགཝཏཱ ཧཱི’’ཏིཨཱདི ཝུཏྟཾ.

ཏཏྠ སབྦབུདྡྷེཧི ཨཝིཛཧིཏནྟི ཨིམིནཱ སབྦེསཾ བུདྡྷཱནཾ སཱསནེ ཀུམཱརཔཉྷཱ ནཱམ ཧོཏཱིཏི དསྶེཏི. ཨེཀེཀཏོ པཊྛཱཡ ཡཱཝ དསཀཱ པཝཏྟཱ དས པུཙྪཱ ཨེཏསྶཱཏི དསཔུཙྪཾ, ཨེཀེཀཏོ པཊྛཱཡ ཡཱཝ དསཀཱ ཨེཀུཏྟརཝསེན པཝཏྟཾ ཝིསྶཛྫནཏྠཱཡ པཉྩཔཎྞསཝིསྶཛྫནཾ སཱམཎེརཔཉྷནྟི སམྦནྡྷོ. ཡཾ པནེཏྠ ཝཏྟབྦཾ, ཏཾ པརམཏྠཛོཏིཀཱཡཾ ཁུདྡཀཊྛཀཐཱཡཾ (ཁུ. པཱ. ཨཊྛ. ༤.ཀུམཱརཔཉྷཝཎྞནཱ) ཝུཏྟནཡེནེཝ ཝེདིཏབྦཾ. ཨནཱདཱིནཝདསྶིཏཱཡ ཨབྷིཎྷཾ མུསཱ སམུདཱཙརཎཏོ ‘‘པིཡམུསཱཝཱདཱ’’ཏི ཝུཏྟཾ, ཨུདཀཱཝསེསཚཌྜནཨུདཀཱདྷཱནནིཀུཛྫནཨུཀྐུཛྫནདསྶནསཉྙིཏཱ ཙཏསྶོ ཨུདཀཱདྷཱནཱུཔམཱཡོ སབྦསྶ ཡུདྡྷཀམྨསྶ ཨཀརཎཀརཎཝསེན དསྶིཏཱ དྭེ ཧཏྠིཨུཔམཱཡོ.

ཏཏྠ ¶ རཱཧུལསུཏྟནྟི སུཏྟནིཔཱཏེ ཨཱགཏཾ རཱཧུལསུཏྟཾ (སུ. ནི. ༣༣༧ ཨཱདཡོ). ཨབྷིཎྷོཝཱདཝསེན ཝུཏྟནྟི ཨིམིནཱ ཨནྟརནྟརཱ ཏཾ སུཏྟཾ ཀཐེཏྭཱ བྷགཝཱ ཐེརཾ ཨོཝདཏཱིཏི དསྶེཏི. ཨིདཉྩ པནཱཏི ཨིདཾ ཡཐཱཝུཏྟཾ བྷགཝཏོ ཏཾཏཾཀཱལཱནུརཱུཔཾ ཨཏྟནོ ཨོཝཱདདཱནཾ སནྡྷཱཡ. བཱིཛནྟི ཨཎྜཾ. པསྶསི ནཱུཏི ¶ ནུ-སདྡོ ཨནུཛཱནནེ, ནནུ པསྶསཱིཏི ཨཏྠོ. སཙྩདྷམྨཾ ལངྒྷིཏྭཱ ཋིཏསྶ ཀིཉྩིཔི ཨཀཏྟབྦཾ ནཱམ པཱཔཾ ནཏྠཱིཏི ཨཱཧ – ‘‘སམྤཛཱནམུསཱཝཱདེ སཾཝརརཧིཏསྶ ཨོཔམྨདསྶནཏྠཾ ཝུཏྟཱ’’ཏི. ཏཐཱ ཧི –

‘‘ཨེཀཾ དྷམྨམཏཱིཏསྶ, མུསཱཝཱདིསྶ ཛནྟུནོ;

ཝིཏིཎྞཔརལོཀསྶ, ནཏྠི པཱཔམཀཱརིཡ’’ནྟི. (དྷ. པ. ༡༧༦);

ཨུརུལ༹ྷཝཱཏི ཨུརུལ༹ྷོ ཧུཏྭཱ ཨུསྶིཏོ. སོ པན དམཝསེན ཨབྷིརུཡ྄ཧ ཝཌྜྷིཏོ ཨཱརོཧནཡོགྱོ ཙ ཧོཏཱིཏི ཨཱཧ ‘‘ཨབྷིཝཌྜྷིཏོ ཨཱརོཧསམྤནྣོ’’ཏི. ཨཱགཏཱགཏེཏི ཨཏྟནོ ཡོགྱཔདེསཾ ཨཱགཏཱགཏེ. པཊིསེནཱཡ ཕལཀཀོཊྛཀམུཎྜཔཱཀཱརཱདཡོཏི པཊིསེནཱཡ ཨཏྟནོ ཨཱརཀྑཏྠཱཡ ཋཔིཏེ ཕལཀཀོཊྛཀེ ཙེཝ ཨུདྡྷཙྪདཔཱཀཱརཱདིཀེ ཙ. ཨེཏཾ པདེསནྟི ཨེཏཾ པརསེནཱཔདེསཾ. ཨེཏྟཀེནཱཏི ཨོལོཀནམཏྟེན. ཏསྶ ཨོལོཀནཱཀཱརདསྶནེནེཝ. སཏམྤི སཧསྶམྤི སེནཱནཱིཀཾ དྭེདྷཱ བྷིཛྫཏི, ཏཱིརཔཱཏིཀཾ མདྡིཏཾ ཧུཏྭཱ པདཱཏཱ ཧུཏྭཱ དྭེདྷཱ ཧུཏྭཱ པལཱཡནྟི. ཀཎྞེཧི པཧརིཏྭཱཏི པགེཝ སརཱནཾ ཨཱགམནསདྡཾ ཨུཔདྷཱརེཏྭཱ ཡཐཱ ཝེགོ ན ཧོཏི, ཨེཝཾ སམུཊྛཱཔེཏྭཱ ཏེཧི པཧརིཏྭཱ པཱཏནཾ. པཊིཧཏྠིཔཊིཨསྶཱཏིཨཱདིནཱ པཙྩེཀཾ པཏི-སདྡོ ཡོཛེཏབྦོཏི. དཱིགྷཱསིལཊྛིཡཱཏི དཱིགྷལཏཱཡ ཨསིལཊྛིཡཱ.

ཀརཎེཏི ཀམྨཀརཎེ. མཉྙཏི ཧཏྠཱརོཧོ. ཨཡམུགྒརནྟི ཏཱདིསེ ཀཱལེ གཧིཏམུགྒརཾ. ཨོལོཀེཏྭཱཏི ཉཱཎཙཀྑུནཱ དིསྭཱ, ཨབྷིཎྷཾ སམྤཛཉྙཾ ཨུཔཊྛཔེཏྭཱཏི ཨཏྠོ.

༡༠༩. སསཀྐནྟི པསྶིཏུཾ ཡུཏྟཾ ཀཏྭཱ ཨུསྶཱཧཾ ཛནེཏྭཱ ན ཀརཎཱིཡཾ, ཏཱདིསཾ ནིཡམཏོ ཨཀཏྟབྦཾ ཧོཏཱིཏི ཨཱཧ ‘‘ཨེཀཾསེནེཝ ན ཀཱཏབྦ’’ནྟི. པཊིསཾཧརེཡྻཱསཱིཏི ཀརཎཏོ སངྐོཙཾ ཨཱཔཛྫེཡྻཱསི. ཡཐཱབྷཱུཏོ ཨསནྟོ ནིཝཏྟོ ཨཀརོནྟོ ནཱམ ཧོཏཱིཏི ཨཱཧ ‘‘ནིཝཏྟེཡྻཱསི མཱ ཀརེཡྻཱསཱི’’ཏི. ཨནུཔདེཡྻཱསཱིཏི ཨནུབལཔྤདཱཡཱི བྷཝེཡྻཱསི. ཏེནཱཧ ‘‘ཨུཔཏྠམྦྷེཡྻཱསཱི’’ཏི. ཏཾ པན ཨནུབལཔྤདཱནཾ ཨུཔཏྠམྦྷནཾ པུནཔྤུནཾ ཀརཎམེཝཱཏི ཨཱཧ ‘‘པུནཔྤུནཾ ཀརེཡྻཱསཱི’’ཏི ¶ . སིཀྑམཱནོཏི ཏཾཡེཝ ཨདྷིསཱིལསིཀྑཾ ཏནྣིསྶཡཉྩ སིཀྑཱདྭཡཾ སིཀྑནྟོ སམྤཱདེནྟོ.

༡༡༡. ཀིཏྟཀེ ¶ པན ཋཱནེཏི ཀིཏྟཀེ ཋཱནེ པཝཏྟཱནི. ཨཝིདཱུརེ ཨེཝ པཝཏྟཱནཱིཏི དསྶེནྟོ ‘‘ཨེཀསྨིཾ པུརེབྷཏྟེཡེཝ སོདྷེཏབྦཱནཱི’’ཏི ཨཱཧ. ཨེཝཉྷི ཏཱནི སུསོདྷིཏཱནི ཧོནྟི སུཔརིསུདྡྷཱནི. པརེསཾ ཨཔྤིཡཾ གརུཾ གཱརཡ྄ཧཾ, ཡཐཱཝུཏྟཊྛཱནཏོ པན ཨཉྙཾ ཝཱ ཀམྨཊྛཱནམནསིཀཱརེནེཝ ཀཱཡཀམྨཱདཱིནི པརིསོདྷིཏཱནི ཧོནྟཱིཏི ན གཧིཏཾ. པཊིགྷཾ ཝཱཏི ཨེཏྠ ཝཱ-སདྡེན ཨསམཔེཀྑཎེ མོཧསྶ སངྒཧོ དཊྛབྦོ.

༡༡༢. ཝུཏྟནཡེན ཀཱཡཀམྨཱདིཔརིསོདྷནཾ ནཱམ ཨིདྷེཝ, ན ཨིཏོ བཧིདྡྷཱཏི ཨཱཧ ‘‘བུདྡྷཱ…པེ… སཱཝཀཱ ཝཱ’’ཏི. ཏེ ཧི ཨཏྠཏོ སམཎབྲཱཧྨཎཱ ཝཱཏི. ཏསྨཱཏི ཡསྨཱ སབྦབུདྡྷཔཙྩེཀབུདྡྷསཱཝཀེཧི ཨཱརུལ༹ྷམགྒོ, རཱཧུལ, མཡཱ ཏུཡ྄ཧཾ ཨཱཙིཀྑིཏོ, ཏསྨཱ. ཏེན ཨནུསིཀྑནྟེན ཏཡཱ ཨེཝཾ སིཀྑིཏབྦནྟི ཨོཝཱདཾ ཨདཱསི. སེསཾ ཝུཏྟནཡཏྟཱ སུཝིཉྙེཡྻམེཝ.

ཨམྦལཊྛིཀརཱཧུལོཝཱདསུཏྟཝཎྞནཱཡ ལཱིནཏྠཔྤཀཱསནཱ

སམཏྟཱ.

༢. མཧཱརཱཧུལོཝཱདསུཏྟཝཎྞནཱ

༡༡༣. ཨིརིཡཱཔཐཱནུབནྡྷནེནཱཏི ¶ ཨིརིཡཱཔཐགམནཱནུབནྡྷནེན, ན པཊིཔཏྟིགམནཱནུབནྡྷནེན. ཨཉྙམེཝ ཧི བུདྡྷཱནཾ པཊིཔཏྟིགམནཾ ཨཉྙཾ སཱཝཀཱནཾ. ཝིལཱསིཏགམནེནཱཏི – ‘‘དཱུརེ པཱདཾ ན ཨུདྡྷརཏི, ན ཨཙྩཱསནྣེ པཱདཾ ནིཀྑིཔཏི, ནཱཏིསཱིགྷཾ གཙྪཏི ནཱཏིསཎིཀ’’ནྟིཨཱདིནཱ (སཾ. ནི. ཨཊྛ. ༣.༤.༢༤༣; ཨུདཱ. ཨཊྛ. ༧༦; སཱརཏྠ. ཊཱི. མཧཱཝགྒ ༣.༢༨༥) ཝུཏྟེན སབྷཱཝསཱིལེན བུདྡྷཱནཾ ཙཱཏུརིཡགམནེན. ཏདེཝ ཧི སནྡྷཱཡ ‘‘པདེ པདཾ ནིཀྑིཔནྟོ’’ཏི ཝུཏྟཾ. པདཱནུཔདིཀོཏི རཱཧུལཏྠེརསྶཔི ལཀྑཎཔཱརིཔཱུརིཡཱ ཏཱདིསམེཝ གམནནྟི ཡཏྟཀཾ པདེསཾ ཨནྟརཾ ཨདཏྭཱ བྷགཝཏོ པིཊྛིཏོ གནྟུཾ ཨཱརདྡྷོ, སབྦཏྠ ཏམེཝ གམནཔདཱནུཔདཾ གཙྪཏཱིཏི པདཱནུཔདིཀོ.

ཝཎྞནཱབྷཱུམི ¶ ཙཱཡཾ ཏཏྠ བྷགཝནྟཾ ཐེརཉྩ ཨནེཀརཱུཔཱཧི ཨུཔམཱཧི ཝཎྞེནྟོ ‘‘ཏཏྠ བྷགཝཱ’’ཏིཨཱདིམཱཧ. ནིཀྑནྟགཛཔོཏཀོ ཝིཡ ཝིརོཙིཏྠཱཏི པདཾ ཨཱནེཏྭཱ ཡོཛནཱ. ཨེཝཾ ཏཾ ཀེསརསཱིཧོ ཝིཡཱཏིཨཱདཱིསུཔི ཨཱནེཏྭཱ ཡོཛེཏབྦཾ. ཏཱརཀརཱཛཱ ནཱམ ཙནྡོ. དྭིནྣཾ ཙནྡམཎྜལཱནནྟིཨཱདི པརིཀཔྤཝཙནཾ, བུདྡྷཱཝེཎིཀསནྟཀཾ ཝིཡ བུདྡྷཱནཾ ཨཱཀཔྤསོབྷཱ ཨཧོསི, ཨཧོ སིརཱིསམྤཏྟཱིཏི ཡོཛནཱ.

ཨཱདིཡམཱནཱཏི གཎྷནྟི. ‘‘པཙྪཱ ཛཱནིསྶཱམཱ’’ཏི ན ཨཛྫུཔེཀྑིཏབྦོ. ཨིདཾ ན ཀཏྟབྦནྟི ཝུཏྟེཏི ཨིདཾ པཱཎཨཏིཔཱཏནཾ ན ཀཏྟབྦནྟི ཝུཏྟེ ཨིདཾ དཎྜེན ཝཱ ལེཌྜུནཱ ཝཱ ཝིཧེཋནཾ ན ཀཏྟབྦཾ, ཨིདཾ པཱཎིནཱ དཎྜཀདཱནཉྩ ཨནྟམསོ ཀུཛ྄ཛྷིཏྭཱ ཨོལོཀནམཏྟམྤི ན ཀཏྟབྦམེཝཱཏི ནཡསཏེནཔི ནཡསཧསྶེནཔི པཊིཝིཛ྄ཛྷཏི, ཏཐཱ ཨིདྷ ཏཱཝ སམྨཛྫནཾ ཀཏྟབྦནྟི ཝུཏྟེཔི ཏཏྠ པརིབྷཎྜཀརཎཾ ཝིཧཱརངྒཎསམྨཛྫནཾ ཀཙཝརཚཌྜནཾ ཝཱལིཀཱསམཀིརཎནྟི ཨེཝམཱདིནཱ ནཡསཏེན ནཡསཧསྶེན པཊིཝིཛ྄ཛྷཏི. ཏེནཱཧ – ‘‘ཨིདཾ ཀཏྟབྦནྟི ཝུཏྟེཔི ཨེསེཝ ནཡོ’’ཏི. པརིབྷཱསནྟི ཏཛྫནཾ. ལབྷཱམཱིཏི པཙྩཱསཱིསཏི.

སབྦམེཏནྟི སབྦཾ ཨེཏཾ མཡི ལབྦྷམཱནཾ སིཀྑཱཀཱམཏཾ. ཨབྷིཉྙཱཡཱཏི ཛཱནིཏྭཱ. སཧཱཡོཏི རཊྛཔཱལཏྠེརཾ སནྡྷཱཡཱཧ. སོ ཧི བྷགཝཏཱ སདྡྷཱཔབྦཛིཏབྷཱཝེ ཨེཏདགྒེ ཋཔིཏོ. དྷམྨཱརཀྑོཏི ¶ སཏྠུ སདྡྷམྨརཏནཱནུཔཱལཀོ དྷམྨབྷཎྜཱགཱརིཀོ. པེཏྟིཡོཏི ཙཱུལ༹པིཏཱ. སབྦཾ མེ ཛིནསཱསནནྟི སབྦམྤི བུདྡྷསཱསནཾ མཡ྄ཧམེཝ.

ཚནྡརཱགཾ ཉཏྭཱཏི ཚནྡརཱགཾ མམ ཙིཏྟེ ཨུཔྤནྣཾ ཉཏྭཱ. ཨཉྙཏརསྨིཾ རུཀྑམཱུལེཏི ཝིཧཱརཔརིཡནྟེ ཨཉྙཏརསྨིཾ རུཀྑམཱུལཊྛཱནེ ཨནུཙྪཝིཀེ.

ཏདཱཏི ཨགྒསཱཝཀེཧི པསཱདཱཔནཀཱལེ. ཨཉྙཀམྨཊྛཱནཱནི ཙངྐམནཨིརིཡཱཔཐེཔི པིཊྛིཔསཱརཎཀཱལེཔི སམིཛ྄ཛྷནྟི, ན ཨེཝམིདནྟི ཨཱཧ – ‘‘ཨིདམསྶ ཨེཏིསྶཱ ནིསཛྫཱཡ ཀམྨཊྛཱནཾ ཨནུཙྪཝིཀ’’ནྟི. ཨཱནཱཔཱནསྶཏིནྟི ཨཱནཱཔཱནསྶཏིཀམྨཊྛཱནཾ.

སམསཱིསཱི ཧོཏཱིཏི སཙེ སམསཱིསཱི ཧུཏྭཱ ན པརིནིབྦཱཡཏི. པཙྩེཀབོདྷིཾ སཙྪིཀརོཏི ནོ ཙེ པཙྩེཀབོདྷིཾ སཙྪིཀརོཏི. ཁིཔྤཱབྷིཉྙོཏི ཁིཔྤཾ ལཧུཾཡེཝ པཏྟབྦཚལ༹བྷིཉྙོ.

པརིཔུཎྞཱཏི ¶ སོལ༹སསུ ཨཱཀཱརེསུ ཀསྶཙིཔི ཨཏཱཔནེན སབྦསོ པུཎྞཱ. སུབྷཱཝིཏཱཏི སམཐབྷཱཝནཱཡ ཝིཔསྶནཱབྷཱཝནཱཡ ཙ ཨནུཔུབྦསམྤཱདནེན སུབྷཱཝིཏཱ. གཎནཱཝིདྷཱནཱནུཔུབྦིཡཱ ཨཱསེཝིཏཏྟཱ ཨནུཔུབྦཾ པརིཙིཏཱ.

ཨོམཱནཾ ཝཱཏི ཨཝཛཱནནཾ ཨུཉྙཱཏནྟི ཨེཝཾཝིདྷཾ མཱནཾ ཝཱ. ཨཏིམཱནཾ ཝཱཏི ‘‘ཀིཾ ཨིམེཧི, མམེཝ ཨཱནུབྷཱཝེན ཛཱིཝིསྶཱམཱི’’ཏི ཨེཝཾ ཨཏིམཱནཾ ཝཱ ཀུཏོ ཛནེསྶཏཱིཏི.

༡༡༤. ཝིསངྑརིཏྭཱཏི ཝིསཾཡུཏྟེ ཀཏྭཱ, ཡཐཱ སངྒཱཀཱརེན གཧཎཾ ན གཙྪཏི, ཨེཝཾ ཝིནིབྷུཉྫིཏྭཱཏི ཨཏྠོ. མཧཱབྷཱུཏཱནི ཏཱཝ ཝིཏྠཱརེཏུ, སམྨསནཱུཔགཏྟཱ, ཨསམྨསནཱུཔགཾ ཨཱཀཱསདྷཱཏུཾ ཨཐ ཀསྨཱ ཝིཏྠཱརེསཱིཏི ཨཱཧ ‘‘ཨུཔཱདཱརཱུཔདསྶནཏྠ’’ནྟི. ཨཱཔོདྷཱཏུ སུཁུམརཱུཔཾ. ཨིཏརཱསུ ཨོལཱ༹རིཀསུཁུམཏཱཔི ལབྦྷཏཱིཏི ཨཱཧ ‘‘ཨུཔཱདཱརཱུཔདསྶནཏྠ’’ནྟི. ཧེཊྛཱ ཙཏྟཱརི མཧཱབྷཱུཏཱནེཝ ཀཐིཏཱནི, ན ཨུཔཱདཱརཱུཔནྟི ཏསྶ པནེཏྠ ལཀྑཎཧཱརནཡེན ཨཱཀཱསདསྶནེན དསྶིཏཏཱ ཝེདིཏབྦཱ. ཏེནཱཧ ‘‘ཨིམིནཱ མུཁེན ཏཾ དསྶེཏུ’’ནྟི. ན ཀེཝལཾ ཨུཔཱདཱརཱུཔགྒཧཎདསྶནཏྠམེཝ ཨཱཀཱསདྷཱཏུ ཝིཏྠཱརིཏཱ, ཨཐ ཁོ པརིགྒཧསུཁཏཱཡཔཱིཏི དསྶེནྟོ ‘‘ཨཔིཙཱ’’ཏིཨཱདིམཱཧ. ཏཏྠ པརིཙྪིནྡིཏབྦསྶ རཱུཔསྶ ནིརཝསེསཔརིཡཱདཱནཏྠཾ ‘‘ཨཛ྄ཛྷཏྟིཀེནཱ’’ཏི ཝིསེསནམཱཧ. ཨཱཀཱསེནཱཏི ཨཱཀཱསདྷཱཏུཡཱ གཧིཏཱཡ. པརིཙྪིནྣརཱུཔནྟི ཏཱཡ པརིཙྪིནྡིཏཀལཱཔགཏམྤི པཱཀཊཾ ཧོཏི ཝིབྷཱུཏཾ ཧུཏྭཱ ཨུཔཊྛཱཏི.

ཨིདཱནི ¶ ཝུཏྟམེཝཏྠཾ སུཁགྒཧཎཏྠཾ གཱཐཱཡ དསྶེཏི. ཏསྶཱཏི ཨུཔཱདཱཡརཱུཔསྶ. ཨེཝཾ ཨཱཝིབྷཱཝཏྠནྟི ཨེཝཾ པརིཙྪིནྣཏཱཡ ཨཱཀཱསསྶ ཝསེན ཝིབྷཱུཏབྷཱཝཏྠཾ. ཏནྟི ཨཱཀཱསདྷཱཏུཾ.

༡༡༨. ཨཱཀཱསབྷཱཝཾ གཏནྟི ཙཏཱུཧི མཧཱབྷཱུཏེཧི ཨསམྥུཊྛཱནཾ ཏེསཾ པརིཙྪེདཀབྷཱཝེན ཨཱཀཱསནྟི གཧེཏབྦཏཾ གཏཾ, ཨཱཀཱསམེཝ ཝཱ ཨཱཀཱསགཏཾ ཡཐཱ ‘‘དིཊྛིགཏཾ (དྷ. ས. ༣༨༡; མཧཱནི. ༡༢), ཨཏྠངྒཏ’’ནྟི (ཨ. ནི. ཨཊྛ. ༡.༡.༡༣༠) ཙ. ཨཱདིནྣནྟི ཨིམནྟི ཏཎྷཱདིཊྛཱིཧི ཨཱདིནྣཾ. ཏེནཱཧ ‘‘གཧིཏཾ པརཱམཊྛ’’ནྟི. ཨཉྙཏྠ ཀམྨཛཾ ‘‘ཨུཔཱདིནྣ’’ནྟི ཝུཙྩཏི, ན ཏཐཱ ཨིདྷཱཏི ཨཱཧ ‘‘སརཱིརཊྛཀནྟི ཨཏྠོ’’ཏི. པཐཝཱིདྷཱཏུཨཱདཱིསུ ¶ ཝུཏྟནཡེནེཝཱཏི མཧཱཧཏྠིཔདོཔམེ (མ. ནི. ༡.༣༠༠ ཨཱདཡོ) ཝུཏྟནཡདསྶནཾ སནྡྷཱཡ ཝདཏི.

༡༡༩. ཏཱདིབྷཱཝོ ནཱམ ནིཊྛིཏཀིཙྩསྶ ཧོཏི, ཨཡཉྩ ཝིཔསྶནཾ ཨནུཡུཉྫཏི, ཨཐ ཀིམཏྠཾ ཏཱདིབྷཱཝཏཱ ཝུཏྟཱཏི? པཐཝཱིསམཏཱདིལཀྑཎཱཙིཀྑཎཱཧི ཝིཔསྶནཱཡ སུཁཔྤཝཏྟིཨཏྠཾ. ཏེནཱཧ ‘‘ཨིཊྛཱནིཊྛེསཱུ’’ཏིཨཱདི. གཧེཏྭཱཏི ཀུསལཔྤཝཏྟིཡཱ ཨོཀཱསདཱནཝསེན པརིགྒཧེཏྭཱ. ན པཏིཊྛིཏོཏི ན ནིསྶིཏོ ན ལགྒོ.

༡༢༠. བྲཧྨཝིཧཱརབྷཱཝནཱ ཨསུབྷབྷཱཝནཱ ཨཱནཱཔཱནསྶཏིབྷཱཝནཱ ཙ ཨུཔཙཱརཾ ཝཱ ཨཔྤནཾ ཝཱ པཱཔེནྟོ ཝིཔསྶནཱཡ པཱདཀབྷཱཝཱཡ ཨནིཙྩཱདིསཉྙཱཡ ཝིཔསྶནཱབྷཱཝེན ཨུསྶཀྐིཏྭཱ མགྒཔཊིཔཱཊིཡཱ ཨརཧཏྟཱདྷིགམཱཡ ཧོཏཱིཏི ‘‘མེཏྟཱདིབྷཱཝནཱཡ པན ཧོཏཱི’’ཏི ཝུཏྟཾ. ཡཏྠ ཀཏྠཙི སཏྟེསུ སངྑཱརེསུ ཙ པཊིཧཉྙནཀིལེསོཏི ཨཱགྷཱཏབྷཱཝམེཝ ཝདཏི ཉཱཡབྷཱཝཏོ ཨཉྙེསམྤི. ཨསྨིམཱནོཏི རཱུཔཱདིཀེ པཙྩེཀཾ ཨེཀཛ྄ཛྷཾ གཧེཏྭཱ ‘‘ཨཡམཧམསྨཱི’’ཏི ཨེཝཾ པཝཏྟམཱནོ.

༡༢༡. ཨིདཾ ཀམྨཊྛཱནནྟི ཨེཏྠ གཎནཱདིཝསེན ཨཱསེཝིཡམཱནཱ ཨསྶཱསཔསྶཱསཱ ཡོགཀམྨསྶ པཏིཊྛཱནཏཱཡ ཀམྨཊྛཱནཾ. ཏཏྠ པན ཏཐཱཔཝཏྟོ མནསིཀཱརོ བྷཱཝནཱ. ཨེཏྠ ཙ ཏསྶེཝ ཐེརསྶ བྷགཝཏཱ བཧཱུནཾ ཀམྨཊྛཱནཱནཾ དེསིཏཏྟཱ ཙརིཏཾ ཨནཱདིཡིཏྭཱ ཀམྨཊྛཱནཱནི སབྦེསཾ པུགྒལཱནཾ སཔྤཱཡཱནཱིཏི ཨཡམཏྠོ སིདྡྷོ, ཨཏིསཔྤཱཡཝསེན པན ཀམྨཊྛཱནེསུ ཝིབྷཱགཀཐཱ ཀཐིཏཱཏི ཝེདིཏབྦཱ.

མཧཱརཱཧུལོཝཱདསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༣. ཙཱུལ༹མཱལུཀྱསུཏྟཝཎྞནཱ

༡༢༢. ཨེཝཾ ¶ ཋཔིཏཱནཱིཏི ‘‘སསྶཏོ ལོཀོ’’ཏིཨཱདིནཡཔྤཝཏྟཱནི དིཊྛིགཏཱནི ཨནིཡྻཱནིཀཏཱཡ ན བྱཱཀཱཏབྦཱནི ན ཀཐེཏབྦཱནི, ཨེཝཾ ཋཔནཱིཡཔཀྑེ ཋཔིཏཱནི ཙེཝ ནིཡྻཱནིཀསཱསནེ ཚཌྜནཱིཡཏཱཡ པཊིཀྑིཏྟཱནི ཙ, ཨཔིཙེཏྠ ཨཏྠཏོ པཊིཀྑེཔོ ཨེཝ བྱཱཀཱཏབྦཏོ. ཡཐཱ ཨེཀོ ¶ ཀམྨཀིལེསཝསེན ཨིཏྠཏྟཾ ཨཱགཏོ, ཏཐཱ ཨཔརོཔི ཨཔརོཔཱིཏི སཏྟོ ཏཐཱགཏོ ཝུཙྩཏཱིཏི ཨཱཧ – ‘‘ཏཐཱགཏོཏི སཏྟོ’’ཏི. ཏཾ ཨབྱཱཀརཎཾ མཡ྄ཧཾ ན རུཙྩཏཱིཏི ཡདི སསྶཏོ ལོཀོ, སསྶཏོ ལོཀོཏི, ཨསསྶཏོ ལོཀོ, ཨསསྶཏོ ལོཀོཏི ཛཱནཱམཱཏི བྱཱཀཱཏབྦམེཝ, ཡཾ པན ཨུབྷཡཐཱ ཨབྱཱཀརཎཾ, ཏཾ མེ ཙིཏྟཾ ན ཨཱརཱདྷེཏི ཨཛཱནནཧེཏུཀཏྟཱ ཨབྱཱཀརཎསྶ. ཏེནཱཧ – ‘‘ཨཛཱནཏོ ཁོ པན ཨཔསྶཏོ ཨེཏདེཝ ཨུཛུཀཾ, ཡདིདཾ ན ཛཱནཱམི ན པསྶཱམཱི’’ཏི. སསྶཏོཏིཨཱདཱིསུ སསྶཏོཏི སབྦཀཱལིཀོ, ནིཙྩོ དྷུཝོ ཨཝིཔརིཎཱམདྷམྨོཏི ཨཏྠོ. སོ ཧི དིཊྛིགཏིཀེཧི ལོཀཱིཡནྟི ཨེཏྠ པུཉྙཔཱཔཏབྦིཔཱཀཱ, སཡཾ ཝཱ ཏབྦིཔཱཀཱཀརཱདིབྷཱཝེན ཨཝིཡུཏྟེཧི ལོཀཱིཡཏཱིཏི ལོཀོཏི ཨདྷིཔྤེཏོ. ཨེཏེན ཙཏྟཱརོཔི སསྶཏཝཱདཱ དསྶིཏཱ ཧོནྟི. ཨསསྶཏོཏི ན སསྶཏོ, ཨནིཙྩོ ཨདྡྷུཝོ བྷེདནདྷམྨོཏི ཨཏྠོ, ཨསསྶཏོཏི ཙ སསྶཏབྷཱཝཔཊིཀྑེཔེན ཨུཙྪེདོ དཱིཔིཏོཏི སཏྟཔི ཨུཙྪེདཝཱདཱ དསྶིཏཱ ཧོནྟི. ཨནྟཝཱཏི པརིཝཊུམོ པརིཙྪིནྣཔརིམཱཎོ, ཨསབྦགཏོཏི ཨཏྠོ. ཏེན ‘‘སརཱིརཔརིམཱཎོ, ཨངྒུཊྛཔརིམཱཎོ, ཡཝཔརིམཱཎོ པརམཱཎུཔརིམཱཎོ ཨཏྟཱ’’ཏི (ཨུདཱ. ཨཊྛ. ༥༤; དཱི. ནི. ཊཱི. ༡.༧༦-༧༧) ཨེཝམཱདིཝཱདཱ དསྶིཏཱ ཧོནྟི.

ཏཐཱགཏོ པརཾ མརཎཱཏི ཏཐཱགཏོ ཛཱིཝོ ཨཏྟཱ མརཎཏོ ཨིམསྶ ཀཱཡསྶ བྷེདཏོ པརཾ ཨུདྡྷཾ ཧོཏི ཨཏྠི སཾཝིཛྫཏཱིཏི ཨཏྠོ. ཨེཏེན སསྶཏབྷཱཝམུཁེན སོལ༹ས སཉྙཱིཝཱདཱ, ཨཊྛ ཨསཉྙཱིཝཱདཱ, ཨཊྛ ཙ ནེཝསཉྙཱིནཱསཉྙཱིཝཱདཱ དསྶིཏཱ ཧོནྟི. ན ཧོཏཱིཏི ནཏྠི ན ཨུཔལབྦྷཏི. ཨེཏེན ཨུཙྪེདཝཱདོ དསྶིཏོ ཧོཏི. ཨཔིཙ ཧོཏི ཙ ན ཙ ཧོཏཱིཏི ཨཏྠི ནཏྠི ཙཱཏི. ཨེཏེན ཨེཀཙྩསསྶཏཝཱདོ དསྶིཏོ. ནེཝ ཧོཏི ན ན ཧོཏཱིཏི པན ཨིམིནཱ ཨམརཱཝིཀྑེཔཝཱདོ དསྶིཏོཏི ཝེདིཏབྦཾ. བྷགཝཏཱ པན ཨནིཡྻཱནིཀཏྟཱ ཨནཏྠསཾཧིཏཱནི ཨིམཱནི དསྶནཱནཱིཏི ཏཱནི ན བྱཱཀཏཱནི, ཏཾ ཨབྱཱཀརཎཾ སནྡྷཱཡཱཧ ཨཡཾ ཐེརོ ‘‘ཏཾ མེ ན རུཙྩཏཱི’’ཏི. སིཀྑཾ པཊིཀྑིཔིཏྭཱ ཡཐཱསམཱདིནྣསིཀྑཾ པཧཱཡ.

༡༢༥. ཏྭཾ ¶ ནེཝ ¶ ཡཱཙཀོཏི ཨཧཾ བྷནྟེ བྷགཝཏི བྲཧྨཙརིཡཾ ཙརིསྶཱམཱིཏིཨཱདིནཱ. ན ཡཱཙིཏཀོཏི ཏྭཾ མཱལུཀྱཔུཏྟ མཡི བྲཧྨཙརིཡཾ ཙརཱཏིཨཱདིནཱ.

༡༢༦. པརསེནཱཡ ཋིཏེན པུརིསེན. བཧལལེཔནེནཱཏི བཧལཝིལེཔནེན. མཧཱསུཔིཡཱདི སབྦོ མུདུཧིདཀོ ཝེཎུཝིསེསོ སཎྷོ. མརུཝཱཏི མཀཙི. ཁཱིརཔཎྞིནོཏི ཁཱིརཔཎྞིཡཱ, ཡསྶཱ ཚིནྡནམཏྟེ པཎྞེ ཁཱིརཾ པགྒྷརཏི. གཙྪནྟི གཙྪཏོ ཛཱཏཾ སཡཾཛཱཏགུམྦཏོ གཧིཏནྟི ཨདྷིཔྤཱཡོ. སིཐིལཧནུ ནཱམ དཏྟཱ ཀཎྞོ པཏངྒོ. ཨེཏཱཡ དིཊྛིཡཱ སཏི ན ཧོཏཱིཏི ‘‘སསྶཏོ ལོཀོ’’ཏི ཨེཏཱཡ དིཊྛིཡཱ སཏི མགྒབྲཧྨཙརིཡཝཱསོ ན ཧོཏི, ཏཾ པཧཱཡ ཨེཝ པཏྟབྦཏོ.

༡༢༧. ཨཏྠེཝ ཛཱཏཱིཏིཨཱདིནཱ ཨེཏཱ དིཊྛིཡོ པཙྩེཀམྤི སཾསཱརཔརིབྲཱུཧནཱ ཀཊསིཝཌྜྷནཱ ནིབྦཱནཝིབནྡྷནཱཏི དསྶེཏི.

༡༢༨. ཏསྨཱཏིཧཱཏི ཨིདཾ ཨཊྛཱནེ ཨུདྡྷཊཾ, ཋཱནེཡེཝ པན ‘‘ཝུཏྟཔཊིཔཀྑནཡེན ཝེདིཏབྦ’’ནྟི ཨིམསྶ པརཏོ ཀཏྭཱ སཾཝཎྞེཏབྦཾ. ཨཏྟནོ ཕལེན ཨརཎཱིཡཏོ ཨནུགནྟབྦཏོ ཀཱརཎམྤི ‘‘ཨཏྠོ’’ཏི ཝུཙྩཏཱིཏི ཨཱཧ ‘‘ཀཱརཎནིསྶིཏ’’ནྟི. ཏེནཱཧ ‘‘བྲཧྨཙརིཡསྶ ཨཱདིམཏྟམྤཱི’’ཏི. པུབྦཔདཊྛཱནནྟི པཋམཱརམྦྷོ. སེསཾ སུཝིཉྙེཡྻམེཝ.

ཙཱུལ༹མཱལུཀྱསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༤. མཧཱམཱལུཀྱསུཏྟཝཎྞནཱ

༡༢༩. ཨོརཾ ¶ ཝུཙྩཏི ཀཱམདྷཱཏུ, ཏཏྠ པཝཏྟིཡཱ སཾཝཏྟནཏོ ཨོརཾ བྷཛནྟཱིཏི ཨོརམྦྷཱགིཡཱནི, ཧེཊྛིམམགྒཝཛ྄ཛྷཏཱཡ ཨོརམྦྷཱགེ ཧེཊྛཱཀོཊྛཱསེ བྷཛནྟཱིཏི ཨོརམྦྷཱགིཡཱནི ཀ-ཀཱརསྶ ཡ-ཀཱརཾ ཀཏྭཱ. ཏེནཱཧ ‘‘ཧེཊྛཱཀོཊྛཱསིཀཱནཱི’’ཏིཨཱདི. ཀམྨུནཱ ཧི ཝཊྚེན ཙ དུཀྑཾ སཾཡོཛེནྟཱིཏི སཾཡོཛནཱནི, ཨོརམྦྷཱགིཡསཉྙིཏཱནི སཾཡོཛནཱནི ཡསྶ ཨཔྤཧཱིནཱནི, ཏསྶེཝ ཝཊྚདུཀྑཾ. ཡསྶ པན ཏཱནི པཧཱིནཱནི, ཏསྶ ཏཾ ནཏྠཱིཏི. ཨཔྤཧཱིནཏཱཡ ཨནུསེཏཱིཏི ཨརིཡམགྒེན ཨསམུཙྪིནྣཏཱཡ ཀཱརཎལཱབྷེ ¶ སཏི ཨུཔྤཛྫཏི, ཨཔྤཧཱིནབྷཱཝེན ཨནུསེཏི. ཨནུསཡམཱནོ སཾཡོཛནཾ ནཱམ ཧོཏཱིཏི ཨནུསཡཏྟཾ ཕརིཏྭཱ པཝཏྟམཱནོ པཱཔདྷམྨོ ཡཐཱཝུཏྟེནཏྠེན སཾཡོཛནཾ ནཱམ ཧོཏི. ཨེཏེན ཡདི པན ཨནུསཡཏོ སཾཡོཛནཾ པཝཏྟཾ, ཏཐཱཔི ཡེ ཏེ ཀཱམརཱགཱདཡོ ‘‘ཨནུསཡཱ’’ཏི ཝུཙྩནྟི, ཏེཡེཝ བནྡྷནཊྛེན སཾཡོཛནཱནཱིཏི དསྶེཏི.

ཨེཝཾ སནྟེཔཱིཏི ཡདེཝ ཨོརམྦྷཱགིཡསཾཡོཛནཾ བྷགཝཏཱ པུཙྪིཏཾ, ཏདེཝ ཐེརེནཔི ཝིསྶཛྫིཏཾ, ཏཐཱཔི ཨཡཾ ལདྡྷི སནྣིསྶཡཱ. ཏཏྠ དོསཱརོཔནཱཏི དསྶེཏུཾ ‘‘ཏསྶ ཝཱདེ’’ཏིཨཱདི ཝུཏྟཾ. སམུདཱཙཱརཀྑཎེཡེཝཱཏི པཝཏྟིཀྑཎེ ཨེཝ. ན ཧི སབྦེ ཝཏྟམཱནཱ ཀིལེསཱ སཾཡོཛནཏྠཾ ཕརནྟཱིཏི ཨདྷིཔྤཱཡོ. ཏེནཱཏི ཏེན ཀཱརཎེན, ཏཐཱལདྡྷིཀཏྟཱཏི ཨཏྠོ. ཙིནྟེསི ‘‘དྷམྨཾ དེསེསྶཱམཱི’’ཏི ཡོཛནཱ. ཨཏྟནོ དྷམྨཏཱཡེཝཱཏི ཨཛ྄ཛྷཏྟཱསཡེནེཝ. ཝིསཾཝཱདིཏཱཏི སཏྠུ ཙིཏྟསྶ ཨནཱརཱདྷནེན ཝིཝེཙིཏཱ. ཨེཝམཀཱསི ཨེཝཾ དྷམྨཾ དེསཱཔེསི.

༡༣༠. སཀྐཱཡདིཊྛིཔརིཡུཊྛིཏེནཱཏི པརིཡུཊྛཱནསམཏྠསཀྐཱཡདིཊྛིཀེན. ཏཐཱབྷཱུཏཉྩ ཙིཏྟཾ ཏཱཡ དིཊྛིཡཱ ཝིགཡ྄ཧིཏཾ ཨཛ྄ཛྷོཏྠཊཉྩ ནཱམ ཧོཏཱིཏི ཨཱཧ ‘‘གཧིཏེན ཨབྷིབྷཱུཏེནཱ’’ཏི. དིཊྛིནིསྶརཎཾ ནཱམ དསྶནམགྒོ ཏེན སམུཙྪིནྡིཏབྦཏོ, སོ པན ནིབྦཱནཾ ཨཱགམྨ ཏཾ སམུཙྪིནྡཏི, ཏསྨཱ ཝུཏྟཾ ‘‘དིཊྛིནིསྶརཎཾ ནིབྦཱན’’ནྟི. ཨཝིནོདིཏཱ ཨནཱིཧཊཱཏི པདདྭཡེནཔི སམུཙྪེདཝསེན ཨཔྤཧཱིནཏྟཾཡེཝ ཝདཏི. ཨཉྙཾ སཾཡོཛནཾ ཨཉྙོ ཨནུསཡོཏི ཝདནྟི, སཧབྷཱཝོ ནཱམ ཨཉྙེན ཧོཏི. ན ཧི ཏདེཝ ཏེན སཧཱཏི ཝུཙྩཏཱིཏི ཏེསཾ ཨདྷིཔྤཱཡོ. ཨཉྙེནཱཏི ཨཏྠཏོ ཨཉྙེན. ཨཝཏྠཱམཏྟཏོ ཡདིཔི ཨཝཡཝཝིནིམུཏྟོ སམུདཱཡོ ནཏྠི, ཨཝཡཝོ པན སམུདཱཡོ ན ཧོཏཱིཏི སོ སམུདཱཡཏོ ཨཉྙོ ཨེཝཱཏི སཀྐཱ ཝཏྟུནྟི ཡཐཱཝུཏྟསྶ པརིཧཱརསྶ ཨཔྤཱཊིཧཱིརཀཏཾ ཨཱསངྐིཏྭཱ པཀྑནྟརཾ ཨཱསལླིཏཾ ‘‘ཨཐཱཔི སིཡཱ’’ཏིཨཱདིནཱ. པཀྑནྟརེཧི པརིཧཱརཱ ¶ ཧོནྟཱིཏི ཡཐཱཝུཏྟཉཱཡེནཔི ཨཉྙོ པུརིསོ ཨཐཱཔི སིཡཱ, ཨཡཾ པནེཏྠ ཨཉྙོ དོསོཏི ཨཱཧ ‘‘ཡདི ཏདེཝཱ’’ཏིཨཱདི. ཨཐཱཔི སིཡཱ ཏུཡ྄ཧཾ ཡདི པརིཝིཏཀྐོ ཨཱིདིསོ ཡདི ཏདེཝ སཾཡོཛནནྟིཨཱདི. ཨིམམཏྠཾ སནྡྷཱཡཱཏི པརམཏྠཏོ སོ ཨེཝ ¶ ཀིལེསོ སཾཡོཛནམནུསཡོ ཙ, བནྡྷནཏྠཨཔྤཧཱིནཏྠཱནཾ པན ཨཏྠེཝ བྷེདོཏི ཨིམམཏྠཾ སནྡྷཱཡ.

༡༣༢. ཏཙཙྪེདོ ཝིཡ སམཱཔཏྟི ཀིལེསཱནཾ སམཱཔཏྟིཝིཀྑམྦྷནསྶ སཱརཙྪེདསྶ ཨནུསཡསྶ དཱུརབྷཱཝཏོ. ཕེགྒུཙྪེདོ ཝིཡ ཝིཔསྶནཱ ཏསྶ ཨཱསནྣབྷཱཝཏོ. ཨེཝརཱུཔཱ པུགྒལཱཏི ཨབྷཱཝིཏསདྡྷཱདིབལཏཱཡ དུབྦལནཱམཀཱཡཱ པུགྒལཱ, ཡེསཾ སཀྐཱཡནིརོདྷཱཡ…པེ… ནཱདྷིམུཙྩཏི. ཨེཝཾ དཊྛབྦཱཏི ཡཐཱ སོ དུབྦལཀོ པུརིསོ, ཨེཝཾ དཊྛབྦོ སོ པུརིསོ གངྒཱཔཱརཾ ཝིཡ སཀྐཱཡཔཱརཾ གནྟུཾ ཨསམཏྠཏྟཱ. ཝུཏྟཝིཔརིཡཱཡེན སུཀྐཔཀྑསྶ ཨཏྠོ ཝེདིཏབྦོ.

༡༣༣. ཨུཔདྷིཝིཝེཀེནཱཏི ཨིམིནཱ ཨུཔདྷིཝིཝེཀཱཏི ཀརཎེ ནིསྶཀྐནནྟི དསྶེཏི, ཨུཔདྷིཝིཝེཀཱཏི ཝཱ ཧེཏུམྷི ནིསྶཀྐཝཙནསྶ ཨུཔདྷིཝིཝེཀེནཱཏི ཧེཏུམྷི ཀརཎཝཙནེན པཉྩཀཱམགུཎཝིཝེཀོ ཀཐིཏོ. ཀཱམགུཎཱཔི ཧི ཨུཔདྷཱིཡཏི ཨེཏྠ དུཀྑནྟི ཨུཔདྷཱིཏི ཝུཙྩནྟཱིཏི. ཐིནམིདྡྷཔཙྩཡཱ ཀཱཡཝིཛམྦྷིཏཱདིབྷེདཾ ཀཱཡཱལསིཡཾ. ཏཏྠཱཏི ཨནྟོསམཱཔཏྟིཡཾ སམཱཔཏྟིཨབྦྷནྟརེ ཛཱཏཾ. ཏཾ པན སམཱཔཏྟིཔརིཡཱཔནྣམྤི ཨཔརིཡཱཔནྣམྤཱིཏི ཏདུབྷཡཾ དསྶེཏུཾ ‘‘ཨནྟོསམཱཔཏྟིཀྑཎེཡེཝཱ’’ཏིཨཱདི ཝུཏྟཾ. རཱུཔཱདཡོ དྷམྨེཏི རཱུཔཝེདནཱདིཀེ པཉྩཀྑནྡྷདྷམྨེ. ན ནིཙྩཏོཏི ཨིམིནཱ ནིཙྩཔཊིཀྑེཔཏོ ཏེསཾ ཨནིཙྩཏམཱཧ. ཏཏོ ཨེཝ ཨུདཡཝཡནྟཏོ ཝིཔརིཎཱམཏོ ཏཱཝཀཱལིཀཏོ ཙ ཏེ ཨནིཙྩཱཏི ཛོཏིཏཾ ཧོཏི. ཡཉྷི ནིཙྩཾ ན ཧོཏི, ཏཾ ཨུདཡབྦཡཔརིཙྪིནྣཾ ཛརཱཡ མརཎེན ཙཱཏི དྭེདྷཱ ཝིཔརིཎཏཾ ཨིཏྟརཁཎམེཝ ཙ ཧོཏི. ན སུཁཏོཏི ཨིམིནཱ སུཁཔཊིཀྑེཔཏོ ཏེསཾ དུཀྑཏམཱཧ, ཨཏོ ཨེཝ ཨབྷིཎྷཾ པཊིཔཱིལ༹ནཏོ དུཀྑཝཏྠུཏོ ཙ ཏེ དུཀྑཱཏི ཛོཏིཏཾ ཧོཏི. ཨུདཡབྦཡཝནྟཏཱཡ ཧི ཏེ ཨབྷིཎྷཾ པཊིཔཱིལ༹ནཏོ ནིརནྟརདུཀྑཏཱཡ དུཀྑསྶེཝ ཙ ཨདྷིཊྛཱནབྷཱུཏཱཏི. པཙྩཡཡཱཔནཱིཡཏཱཡ རོགམཱུལཏཱཡ ཙ རོགཏོ. དུཀྑཏཱསཱུལཡོགིཏཱཡ ཀིལེསཱསུཙིཔགྒྷརཎཏོ ཨུཔྤཱདཛརཱབྷངྒེཧི ཨུདྡྷུམཱཏཔཀྐབྷིཛྫནཏོ ཙ གཎྜཏོ. པཱིལཱ༹ཛནནཏོ ཨནྟོཏུདནཏོ དུནྣཱིཧརཎཏོ ཙ ཨཝདྡྷིཨཱཝཧཏོ ཨགྷཝཏྠུཏོ ཙ ཨསེརཱིབྷཱཝཏོ ཨཱབཱདྷཔདཊྛཱནཏཱཡ ཙ ཨཱབཱདྷཏོ. ཨཝསཝཏྟནཏོ ཨཝིདྷེཡྻཏཱཡ པརཏོ ¶ . བྱཱདྷིཛརཱམརཎེཧི པལུཛྫནཱིཡཏཱཡ པལོཀཏོ. སཱམཱིནིཝཱསཱིཀཱརཀཝེདཀཨདྷིཊྛཱཡཀཝིརཧཏོ སུཉྙཏོ. ཨཏྟཔཊིཀྑེཔཊྛེན ཨནཏྟཏོ, རཱུཔཱདིདྷམྨཱཔི ན ཨེཏྠ ཨཏྟཱ ཧོནྟཱིཏི ཨནཏྟཱ, ཨེཝཾ ཨཡམྤི ན ཨཏྟཱ ཧོཏཱིཏི ཨནཏྟཱ. ཏེན ¶ ཨབྱཱཔཱརཏོ ནིརཱིཧཏོ ཏུཙྪཏོ ཨནཏྟཱཏི དཱིཔིཏཾ ཧོཏི. ལཀྑཎཏྟཡམེཝ ཨཝབོདྷཏྠཾ ཨེཀཱདསཧི པདེཧི ཝིབྷཛིཏྭཱ གཧིཏནྟི དསྶེཏུཾ ‘‘ཏཏྠཱ’’ཏིཨཱདི ཝུཏྟཾ.

ཨནྟོསམཱཔཏྟིཡནྟི སམཱཔཏྟཱིནཾ སཧཛཱཏཏཱཡ སམཱཔཏྟཱིནཾ ཨབྦྷནྟརེ. ཙིཏྟཾ པཊིསཾཧརཏཱིཏི ཏཔྤཊིབདྡྷཚནྡརཱགཱདིཨུཔཀྐིལེསཝིཀྑམྦྷནེན ཝིཔསྶནཱཙིཏྟཾ པཊིསཾཧརཏི. ཏེནཱཧ ‘‘མོཙེཏཱི’’ཏི. སཝནཝསེནཱཏི ‘‘སབྦསངྑཱརསམཐོ’’ཏིཨཱདིནཱ སཝནཝསེན. ཐུཏིཝསེནཱཏི ཏཐེཝ ཐོམནཱཝསེན གུཎཏོ སཾཀིཏྟནཝསེན. པརིཡཏྟིཝསེནཱཏི ཏསྶ དྷམྨསྶ པརིཡཱཔུཎནཝསེན. པཉྙཏྟིཝསེནཱཏི ཏདཏྠསྶ པཉྙཱཔནཝསེན. ཨཱརམྨཎཀརཎཝསེནེཝ ཨུཔསཾཧརཏི མགྒཙིཏྟཾ. ཨེཏཾ སནྟནྟིཨཱདི པན ཨཝདྷཱརཎནིཝཏྟིཏཏྠདསྶནཾ. ཡཐཱ ཝིཔསྶནཱ ‘‘ཨེཏཾ སནྟཾ ཨེཏཾ པཎཱིཏ’’ནྟིཨཱདིནཱ ཨསངྑཏཱཡ དྷཱཏུཡཱ ཙིཏྟཾ ཨུཔསཾཧརཏི, ཨེཝཾ མགྒོ ནིབྦཱནཾ སཙྪིཀིརིཡཱབྷིསམཡཝསེན ཨབྷིསམེནྟོ ཏཏྠ ལབྦྷམཱནེ སབྦེ ཝིསེསེ ཨསམྨོཧཏོ པཊིཝིཛཱནནྟོ ཏཏྠ ཙིཏྟཾ ཨུཔསཾཧརཏི. ཏེནཱཧ ‘‘ཨིམིནཱ པན ཨཱཀཱརེནཱ’’ཏིཨཱདི. སོ ཏཏྠ ཋིཏོཏི སོ ཨདནྡྷཝིཔསྶནོ ཡོགཱི ཏཏྠ ཏཱཡ ཨནིཙྩཱདིལཀྑཎཏྟཡཱརམྨཎཱཡ ཝིཔསྶནཱཡ ཋིཏོ. སབྦསོཏི ཏསྶ མགྒསྶ ཨདྷིགམཱཡ ནིབྦཏྟིཏསམཐཝིཔསྶནཱསུ. ཨསཀྐོནྟོ ཨནཱགཱམཱི ཧོཏཱིཏི ཧེཊྛིམམགྒཝཧཱསུ ཨེཝ སམཐཝིཔསྶནཱསུ ཚནྡརཱགཾ པཧཱཡ ཨགྒམགྒཝཧཱསུ ཏཱསུ ནིཀནྟིཾ པརིཡཱདཱཏུཾ ཨསཀྐོནྟོ ཨནཱགཱམིཏཱཡམེཝ སཎྛཱཏི.

སམཏིཀྐནྟཏྟཱཏི སམཐཝསེན ཝིཔསྶནཱཝསེན ཙཱཏི སབྦཐཱཔི རཱུཔསྶ ཨཏིཀྐནྟཏྟཱ. ཏེནཱཧ ‘‘ཨཡཉྷཱི’’ཏིཨཱདི. ཨནེནཱཏི ཡོགིནཱ. ཏཾ ཨཏིཀྐམྨཱཏི ཨིདཾ ཡོ ཝཱ པཋམཾ པཉྩཝོཀཱརབྷཝཔརིཡཱཔནྣེ དྷམྨེ སམྨདེཝ སམྨསིཏྭཱ ཏེ ཝིཝཛྫེཏྭཱ ཏཏོ ཨརཱུཔསམཱཔཏྟིཾ སམཱཔཛྫིཏྭཱ ཨརཱུཔདྷམྨེ སམྨསཏི, ཏཾ སནྡྷཱཡ ཝུཏྟཾ. ཏེནཱཧ ‘‘ཨིདཱནི ཨརཱུཔཾ སམྨསཏཱི’’ཏི.

སམཐཝསེན ¶ གཙྪཏོཏི སམཐཔྤདྷཱནཾ པུབྦབྷཱགཔཊིཔདཾ ཨནུཡུཉྫནྟསྶ. ཙིཏྟེཀགྒཏཱ དྷུརཾ ཧོཏཱིཏི ཏསྶ ཝིཔསྶནཱབྷཱཝནཱཡ ཏཐཱ པུབྦེ པཝཏྟཏྟཱ ཝུཊྛཱནགཱམིནིཝིཔསྶནཱ སམཱདྷིཔྤདྷཱནཱ ཧོཏི, མགྒེཔི ཙིཏྟེཀགྒཏཱ དྷུརཾ ཧོཏི, སམཱདྷིནྡྲིཡཾ པུབྦངྒམཾ བལཝཾ ཧོཏི. སོ ཙེཏོཝིམུཏྟོ ནཱམཱཏི སོ ཨརིཡོ ཙེཏོཝིམུཏྟོ ནཱམ ཧོཏི. ཝིཔསྶནཱཝསེན གཙྪཏོཏི ‘‘སམཐཝསེན གཙྪཏོ’’ཏི ཨེཏྠ ཝུཏྟནཡཱནུསཱརེན ཨཏྠོ ཝེདིཏབྦོ. ཨཡཉྩ པུགྒལཝིབྷཱགོ སུཏྟནྟནཡེན ཨིདྷཱབྷིཧིཏོ པརིཡཱཡོ ནཱམ, ཨབྷིདྷམྨནཡེན པརཏོ ཀཱིཊཱགིརིསུཏྟཝཎྞནཱཡཾ དསྶཡིསྶཱམ. ཨཡཾ སབྷཱཝདྷམྨོཡེཝཱཏི པུབྦབྷཱགཔཊིཔདཱ སམཐཔྤདྷཱནཱ ཙེ སམཱདྷི དྷུརཾ, ཝིཔསྶནཱཔདྷཱནཱ ཙེ པཉྙཱ དྷུརནྟི ཨཡཾ དྷམྨསབྷཱཝོཡེཝ, ཨེཏྠ ཀིཉྩི ན ཨཱསངྐིཏབྦཾ.

ཨིནྡྲིཡཔརོཔརིཡཏྟཾ ¶ ཨིནྡྲིཡཝེམཏྟཏཱ. ཏེནཱཧ ‘‘ཨིནྡྲིཡནཱནཏྟཾ ཝདཱམཱི’’ཏི. ཨིནྡྲིཡནཱནཏྟཏཱ ཀཱརཎནྟི ཨིདཾ དསྶེཏི – ཨནིཙྩཱདིཝསེན ཝིཔསྶནཱབྷིནིཝེསོ ཝིཡ སམཐཝསེན ཝིཔསྶནཱཝསེན ཙ ཡཾ པུབྦབྷཱགགམནཾ, ཏཾ ཨཔྤམཱཎཾ ཏཾ ཝུཊྛཱནགཱམིནིཝིཔསྶནཾ, ཡསྶ སམཱདྷི དྷུརཾ པུབྦངྒམཾ བལཝཾ ཧོཏི, སོ ཨརིཡོ ཙེཏོཝིམུཏྟི ནཱམ ཧོཏི. ཡསྶ པཉྙཱ དྷུརཾ པུབྦངྒམཾ བལཝཾ ཧོཏི སོ ཨརིཡོ པཉྙཱཝིམུཏྟོ ནཱམ ཧོཏི. ཨིདཱནི ཏམཏྠཾ བུདྡྷིཝིསིཊྛེན ནིདསྶནེན དསྶེནྟོ ‘‘དྭེ ཨགྒསཱཝཀཱ’’ཏིཨཱདིམཱཧ, ཏཾ སུཝིཉྙེཡྻམེཝ.

མཧཱམཱལུཀྱསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༥. བྷདྡཱལིསུཏྟཝཎྞནཱ

༡༣༤. ཨསིཡཏཱིཏི ¶ ཨསནཾ, བྷུཉྫནཾ བྷོཛནཾ, ཨསནསྶ བྷོཛནཾ ཨསནབྷོཛནཾ, ཨཱཧཱརཔརིབྷོགོ, ཨེཀསྨིཾ ཀཱལེ ཨསནབྷོཛནཾ ཨེཀཱསནབྷོཛནཾ. སོ པན ཀཱལོ སབྦབུདྡྷཱནཾ སབྦཔཙྩེཀབུདྡྷཱནཾ ཨཱཙིཎྞསམཱཙིཎྞཝསེན པུབྦཎྷོ ཨེཝ ཨིདྷཱདྷིཔྤེཏོཏི ཨཱཧ ‘‘ཨེཀསྨིཾ པུརེབྷཏྟེ ཨསནབྷོཛན’’ནྟི. ཝིཔྤཊིསཱརཀུཀྐུཙྩནྟི ‘‘ཨཡུཏྟཾ ཝཏ མཡཱ ཀཏཾ, ཡོ ཨཏྟནོ སརཱིརཔཀཏིཾ ཨཛཱནནྟོ ཨེཀཱསནབྷོཛནཾ བྷུཉྫི, ཡེན མེ ཨིདཾ སརཱིརཾ ཀིསཾ ཛཱཏཾ བྲཧྨཙརིཡཱནུགྒཧོ ནཱཧོསཱི’’ཏི ཨེཝཾ ¶ ཝིཔྤཊིསཱརཀུཀྐུཙྩཾ བྷཝེཡྻ. ཨེཏཾ སནྡྷཱཡ སཏྠཱ ཨཱཧ, ན བྷདྡཱལིམེཝ ཏཱདིསཾ ཀིརིཡཾ ཨནུཛཱནནྟོ. ཨིཏརཐཱཏི ཡདི ཨེཀཾཡེཝ བྷཏྟཾ དྭིདྷཱ ཀཏྭཱ ཏཏོ ཨེཀསྶ བྷཱགསྶ བྷུཉྫནཾ ཨེཀདེསབྷུཉྫནཾ ཨདྷིཔྤེཏཾ. ཀོ སཀྐོཏཱིཏི ཀོ ཨེཝཾ ཡཱཔེཏུཾ སཀྐོཏི. ཨཏཱིཏཛཱཏིཔརིཙཡོཔི ནཱམ ཨིམེསཾ སཏྟཱནཾཡེཝ ཨནུབནྡྷཏཱིཏི ཨཱཧ ‘‘ཨཏཱིཏེ’’ཏིཨཱདི. ཝིརཝནྟསྶེཝཱཏི ཨནཱདརེ སཱམིཝཙནཾ. ཏཾ མདྡིཏྭཱཏི ‘‘ཨཡཾ སིཀྑཱ སབྦེསམྤི བུདྡྷཱནཾ སཱསནེ ཨཱཙིཎྞཾ, ཨཡཉྩ བྷིཀྑུ ཨིམཾ སིཀྑཏེཝཱ’’ཏི ཝཏྭཱ ཏཾ བྷདྡཱལིཾ ཏསྶ ཝཱ ཨནུསྶཱཧཔཝེདནཾ ཨབྷིབྷཝིཏྭཱ. བྷིཀྑཱཙཱརགམནཏྠཾ ན ཝིཏཀྐམཱལ༹ཀཾ ཨགམཱསི, ཝིཧཱརཙཱརིཀཾ ཙརནྟོ ཏསྶ ཝསནཊྛཱནཾ བྷགཝཱ གཙྪཏི.

༡༣༥. དཱུསཡནྟི གརཧནྟི ཨེཏེནཱཏི དོསོ, ཨཔརཱདྷོ, སོ ཨེཝ ཀུཙྪིཏབྷཱཝེན དོསཀོ. གརཧཱཡ པཝཏྟིཊྛཱནཏོ ཨོཀཱསོ. ཏེནཱཧ – ‘‘ཨེཏཾ ཨོཀཱསཾ ཨེཏཾ ཨཔརཱདྷ’’ནྟི. དུཀྐརཏརནྟི པཏིཀཱརཝསེན ཨཏིསཡེན དུཀྐརཾ. ཨཔརཱདྷོ ཧི ན ཁམཱཔེནྟཾ ཡཐཱཔཙྩཡཾ ཝིཏྠཱརིཏོ ཧུཏྭཱ དུཔྤཏིཀཱརོ ཧོཏི. ཏེནཱཧ ‘‘ཝསྶཉྷཱི’’ཏིཨཱདི.

ཨལགྒིཏྭཱཏི ཨིམམྤི ནཱམ ཨཔནཱིཏཾ ཨཀཱསཱིཏི ཨེཝཾ ཨཝིནེཏྭཱ, ཏཾ ཏཾ ཏསྶ ཧིཏཔཊིཔཏྟིཾ ནིཝཱརཎཾ ཀཏྭཱཏི ཨཏྠོ. ཉཱཡཔཊིཔཏྟིཾ ཨཏིཙྩ ཨེཏི པཝཏྟཏཱིཏི ཨཙྩཡོ, ཨཔརཱདྷོ, པུརིསེན མདྡིཏྭཱ པཝཏྟིཏོ ཨཔརཱདྷོ ཨཏྠཏོ པུརིསཾ ཨཏིཙྩ ཨབྷིབྷཝིཏྭཱ པཝཏྟོ ནཱམ ཧོཏི. ཏེནཱཧ ‘‘ཨཙྩཡོ མཾ, བྷནྟེ, ཨཙྩགམཱ’’ཏི. ཨཝསེསཔཙྩཡཱནཾ སམཱགམེ ཨེཏི ཕལཾ ཨེཏསྨཱ ཨུཔྤཛྫཏི པཝཏྟཏི ཙཱཏི སམཡོ, ཧེཏུ ཡཐཱ ‘‘སམུདཱཡོ’’ཏི ཨཱཧ ‘‘ཨེཀཾ ཀཱརཎ’’ནྟི. ཡཾ པནེཏྠ བྷདྡཱལིཏྠེརསྶ ཨཔརིཔཱུརཀཱརིཏཱཡ བྷིཀྑུཨཱདཱིནཾ ཛཱནནཾ, ཏམྤི ཀཱརཎཾ ཀཏྭཱ ‘‘ཨཧཾ ཁོ, བྷནྟེ, ན ཨུསྶཧཱམཱི’’ཏིཨཱདིནཱ ཝཏྟབྦནྟི དསྶེཏི.

༡༣༦. ཨེཀཙིཏྟཀྑཎིཀཱཏི ¶ པཋམམགྒཙིཏྟཀྑཎེན ཨེཀཙིཏྟཀྑཎིཀཱ. ཨེཝཾ ཨཱཎཱཔེཏུཾ ན ཡུཏྟནྟི སངྐམཏྠཱཡ ཨཱཎཱཔེཏུཾ ན ཡུཏྟཾ པཡོཛནཱབྷཱཝཏོ. ཨནཱཙིཎྞཉྩེཏཾ བུདྡྷཱནཾ, ཡདིདཾ པདསཱ ཨཀྐམནཾ. ཏཐཱ ཧི –

‘‘ཨཀྐམིཏྭཱན མཾ བུདྡྷོ, སཧ སིསྶེཧི གཙྪཏུ;

མཱ ནཾ ཀལལཾ ཨཀྐམིཏྠ, ཧིཏཱཡ མེ བྷཝིསྶཏཱི’’ཏི. (བུ. ཝཾ. ༢.༥༣);

སུམེདྷཔཎྜིཏེན ¶ པཙྩཱསཱིསིཏཾ ན ཀཏཾ. ཡཐཱཧ –

‘‘དཱིཔངྐརོ ལོཀཝིདཱུ, ཨཱཧུཏཱིནཾ པཊིགྒཧོ;

ཨུསྶཱིསཀེ མཾ ཋཏྭཱན, ཨིདཾ ཝཙནམབྲཝཱི’’ཏི. (བུ. ཝཾ. ༢.༦༠);

བྷགཝཏཱ ཨཱཎཏྟེ སཏི ཏེསམྤི ཨེཝཾ ཀཱཏུཾ ན ཡུཏྟནྟི ཨེཏྠཱཔི ཨེསེཝ ནཡོ. ཨེཏེསཾ པཊིབཱཧིཏུཾ ཡུཏྟནྟི ཨིདཾ ཨཊྛཱནཔརིཀཔྤནཝསེནེཝ ཝུཏྟཾ. ན ཧི བུདྡྷཱནཾ ཀཱཏུཾ ཨཱརདྡྷཾ ནཱམ ཀིཙྩཾ ཀེཧིཙི པཊིབཱཧིཏུཾ ཡུཏྟཾ ནཱམ ཨཏྠི པཊིབཱཧིཏུཾཡེཝ ཨཀརཎཏོ. སམྨཏྟནིཡཱམསྶ ཨནོཀྐནྟཏྟཱ ཝུཏྟཾ ‘‘བཱཧིརཀོ’’ཏི.

༡༣༧. ན ཀམྨཊྛཱནཾ ཨལླཱིཡཏཱིཏི ཙིཏྟཾ ཀམྨཊྛཱནཾ ན ཨོཏརཏི.

༡༤༠. པུནཔྤུནཾ ཀཱརེནྟཱིཏི དཎྜཀམྨཔཎཱམནཱདིཀཱརཎཾ པུནཔྤུནཾ ཀཱརེནྟི. སམྨཱཝཏྟམྷི ན ཝཏྟཏཱིཏི ཏསྶཱ ཏསྶཱ ཨཱཔཏྟིཡཱ ཝུཊྛཱནཏྠཾ བྷགཝཏཱ པཉྙཏྟསམྨཱཝཏྟམྷི ན ཝཏྟཏི. ཨནུལོམཝཏྟེ ན ཝཏྟཏཱིཏི ཡེན ཡེན ཝཏྟེན སངྒྷོ ཨནུལོམིཀོ ཧོཏི, ཏསྨིཾ ཏསྨིཾ ཨནུལོམཝཏྟེ ན ཝཏྟཏི ཝིལོམམེཝ གཎྷཱཏི, པཊིལོམེན ཧོཏི. ནིཏྠཱརཎཀཝཏྟམྷཱིཏི ཡེན ཝཏྟེན སངྒྷོ ཨནུལོམིཀོ ཧོཏི, སཱཔཏྟིཀབྷཱཝཏོ ནིཏྠིཎྞོ ཧོཏི, ཏམྷི ནིཏྠཱརཎཝཏྟསྨིཾ ན ཝཏྟཏི. ཏེནཱཧ ‘‘ཨཱཔཏྟཱི’’ཏིཨཱདི. དུབྦཙཀརཎེཏི དུབྦཙསྶ བྷིཀྑུནོ ཀརཎེ.

༡༤༤. ཡཱཔེཏཱིཏི ཝཏྟཏི, སཱསནེ ཏིཊྛཏཱིཏི ཨཏྠོ. ཨབྷིཉྙཱཔཏྟཱཏི ‘‘ཨསུཀོ ཨསུཀོ ཙ ཐེརོ སཱིལཝཱ ཀལྱཱཎདྷམྨོ བཧུསྶུཏོ’’ཏིཨཱདིནཱ ཨབྷིཉྙཱཏབྷཱཝཾ པཏྟཱ ཨདྷིགཏཨབྷིཉྙཱཏཱ.

༡༤༥. སཏྟེསུ ཧཱཡམཱནེསཱུཏི ཀིལེསབཧུལཏཱཡ པཊིཔཛྫནཀསཏྟེསུ པརིཧཱཡནྟེསུ པཊིཔཐེསུ ¶ ཛཱཡམཱནེསུ. ཨནྟརདྷཱཡཏི ནཱམ ཏདཱདྷཱརཏཱཡ. དིཊྛདྷམྨིཀཱ པརཱུཔཝཱདཱདཡོ. སམྤརཱཡིཀཱ ཨཔཱཡདུཀྑཝིསེསཱ. ཨཱསཝནྟི ཏེན ཏེན པཙྩཡེན པཝཏྟནྟཱིཏི ཨཱསཝཱ. ནེསནྟི པརཱུཔཝཱདཱདིཨཱསཝཱནཾ. ཏེཏི ཝཱིཏིཀྐམདྷམྨཱ.

ཨཀཱལཾ དསྶེཏྭཱཏི སིཀྑཱཔདཔཉྙཏྟིཡཱ ཨཀཱལཾ དསྶེཏྭཱ. ཨུཔྤཏྟིནྟི ཨཱསཝཊྛཱནིཡཱནཾ དྷམྨཱནམུཔྤཏྟིཾ. སིཀྑཱཔདཔཉྙཏྟིཡཱ ཀཱལཾ, ཏཱཝ ¶ སེནཱསནཱནི པཧོནྟི, ཏེན ཨཱཝཱསམཙྪརིཡཱདིཧེཏུནཱ སཱསནེ ཨེཀཙྩེ ཨཱསཝཊྛཱནིཡཱ དྷམྨཱ ན ཨུཔྤཛྫནྟི. ཨིམིནཱ ནཡེནཱཏི ཨིམིནཱ པན ཧེཏུནཱ པདསོདྷམྨསིཀྑཱཔདཱནཾ སངྒཧོ དཊྛབྦོ.

ཡསནྟི ཀིཏྟིསདྡཾ པརིཝཱརཉྩ. སཱགཏཏྠེརསྶ ནཱགདམནཀིཏྟིཡསཱདིཝསེན སུརཱཔཱནསངྑཱཏོ ཨཱསཝཊྛཱནིཡོ དྷམྨོ ཨུཔྤཛྫི.

རསེན རསཾ སཾསནྡེཏྭཱཏི ཨུཔཱདིནྣཀཕསྶརསེན ཨནུཔཱདིནྣཀཕསྶརསཾ སཾསནྡེཏྭཱ.

༡༤༦. ན ཁོ, བྷདྡཱལི, ཨེསེཝ ཧེཏུ, ཨཐ ཁོ ཨཉྙམྤི ཨཏྠཱིཏི དསྶེནྟོ བྷགཝཱ ‘‘ཨཔིཙཱ’’ཏིཨཱདིམཱཧ. ཏེན དྷམྨསྶ སཀྐཙྩསཝནེ ཐེརཾ ནིཡོཛེཏི.

༡༤༧. ཝིསེཝནཱཙཱརནྟི ཨདནྟཀིརིཡཾ. པརིནིབྦཱཡཏཱིཏི ཝཱུཔསམྨཏི. ཏཏྠ ཨདནྟཀིརིཡཾ པཧཱཡ དནྟོ ཧོཏི. ཡུགསྶཱཏི རཐདྷུརསྶ.

ཨནུཀྐམེཏི ཨནུརཱུཔཔརིགམེ. ཏདཝཏྠཱནུརཱུཔཾ པཱདཱནཾ ཨུཀྑིཔནེ ནིཀྑིཔནེ ཙ. ཏེནཱཧ ‘‘ཙཏྟཱརོ པཱདེ’’ཏིཨཱདི. རཛྫུབནྡྷནཝིདྷཱནེནཱཏི པཱདཏོ བྷཱུམིཡཱ མོཙནཝིདྷཱནེན. ཨེཝཾ ཀརཎཏྠནྟི ཡཐཱ ཨསྶེ ནིསིནྣསྶེཝ བྷཱུམིཾ གཧེཏུཾ སཀྐཱ, ཨེཝཾ ཙཏྟཱརོ པཱདེ ཏཐཱ ཀཏྭཱ ཨཏྟནོ ནིཙྩལབྷཱཝཀརཎཏྠཾ. མཎྜལེཏི མཎྜལདྷཱཝིཀཱཡཾ. པཐཝཱིཀམནེཏི པཐཝིཾ ཕུཊྛམཏྟེན གམནེ. ཏེནཱཧ ‘‘ཨགྒགྒཁུརེཧཱི’’ཏི. ཨོཀྐནྟཀརཎསྨིནྟི ཨོཀྐནྟེཏྭཱ པརསེནཱསམྨདྡན ཨོཀྐནྟཀརཎེ. ཨེཀསྨིཾ ཋཱནེཏི ཙཏཱུསུ པཱདེསུ ཡཏྠ ཀཏྠཙི ཨེཀསྨིཾ ཋཱནེ གམནཾ ཙོདེནྟཱིཏི ཨཏྠོ, སོ པནེཏྠ སཱིགྷཏརོ ཨདྷིཔྤེཏོ. དཝཏྟེཏི མརིཡཱདཱཀོཔནེཧི ནཱནཔྤཡོཛནེ, པརསེནཱཡ པཝཏྟམཧཱནཱདཔཧརཎེཧི ཨཏྠོ. ཏེནཱཧ ‘‘ཡུདྡྷཀཱལསྨི’’ནྟིཨཱདི.

རཉྙཱ ཛཱནིཏབྦགུཎེཏི ཡཐཱ རཱཛཱ ཨསྶསྶ གུཎེ ཛཱནཱཏི, ཨེཝཾ ཏེན ཛཱནིཏབྦགུཎཀཱརཎཾ ¶ ཀཱརེཏི. ཨསྶརཱཛཝཾསེཏི དུསྶཧཾ དུཀྑཾ པཏྭཱཔི ཡཐཱ ཨཡཾ རཱཛཝཾསཱནུརཱུཔཀིརིཡཾ ན ཛཧིསྶཏི, ཨེཝཾ སིཀྑཱཔནེ. སིཀྑཱཔནམེཝ ཧི སནྡྷཱཡ སབྦཏྠ ‘‘ཀཱརཎཾ ཀཱརེཏཱི’’ཏི ཝུཏྟཾ ཏསྶ ཀརཎཀཱརཱཔནཔརིཡཱཡཏྟཱ.

ཡཐཱ ¶ ཨུཏྟམཛཝོ ཧོཏཱིཏི ཛཝདསྶནཊྛཱནེ ཡཐཱ ཧཡོ ཨུཏྟམཛཝཾ ན ཧཱཔེསི, ཨེཝཾ སིཀྑཱཔེཏི. ཨུཏྟམཧཡབྷཱཝེ, ཡཐཱ ཨུཏྟམཧཡོ ཧོཏཱིཏི ཀམྨཀརཎཀཱལེ ཨཏྟནོ ཨུཏྟམསབྷཱཝཾ ཨནིགུཧིཏྭཱ ཨཝཛྫེཏྭཱ ཡཐཱ ཨཏྠསིདྡྷི ཧོཏི, ཨེཝཾ པརམཛཝེན སིཀྑཱཔེཏི. ཡཐཱ ཀིརིཡཱ ཝིནཱ དབྦམྤི ཝིནཱ ཀིརིཡཾ ན བྷཝཏི, ཨེཝཾ དཊྛབྦནྟི དསྶེཏུཾ ‘‘ཏཏྠ པཀཏིཡཱ’’ཏིཨཱདི ཝུཏྟཾ.

ཏཏྲཱཏི ཏསྨིཾ པཀཏིཡཱ ཨུཏྟམཧཡསྶེཝ ཨུཏྟམཧཡཀཱརཎཱརཧཏྟཱ ཨུཏྟམཛཝཔཊིཔཛྫནེ. མཱསཁཱདཀགྷོཊཀཱནནྟི མཱསཾ ཁཱདིཏྭཱ ཡཐཱ ཏཐཱ ཝིགུཎཁལུངྒཀཱནཾ. ཝལཉྫཀདཎྜནྟི རཉྙཱ གཧེཏབྦསུཝཎྞདཎྜཾ. དྷཱཏུཔཏྠདྡྷོཏི ཨཏྟནཱཝ སམུཔྤཱདིཏདྷཱཏུཡཱ ཨུཔཏྠམྦྷིཏོ ཧུཏྭཱ.

ཨུཏྟམེ སཱཁལྱེཏི པརམསཁིལབྷཱཝེ སཁིལཝཱཙཱཡ ཨེཝ དམེཏབྦཏཱཡ. ཏེནཱཧ ‘‘མུདུཝཱཙཱཡ ཧཱི’’ཏིཨཱདི.

ཨརཧཏྟཕལསམྨཱདིཊྛིཡཱཏི ཕལསམཱཔཏྟིཀཱལེ པཝཏྟསམྨཱཉཱཎཾ. སམྨཱཉཱཎཾ པུབྦེ ཝུཏྟསམྨཱདིཊྛིཡེཝཱཏི པན ཨིདཾ ཕལསམྨཱདིཊྛིབྷཱཝསཱམཉྙེན ཝུཏྟཾ. ཀེཙི པན ‘‘པཙྩཝེཀྑཎཉཱཎ’’ནྟི ཝདནྟི, ཏཾ ན ཡུཛྫཏི ‘‘ཨསེཀྑེནཱ’’ཏི ཝིསེསིཏཏྟཱ. ཏམྤི ཨསེཀྑཉཱཎནྟི ཙེ? ཨེཝམྤི ནིཔྤརིཡཱཡ སེཀྑགྒཧཎེ པརིཡཱཡསེཀྑགྒཧཎཾ ན ཡུཏྟམེཝ, ཀིཙྩབྷེདེན ཝཱ ཝུཏྟནྟི དཊྛབྦཾ. ཨེཀཱ ཨེཝ ཧི སཱ པཉྙཱ ནིབྦཱནསྶ པཙྩཀྑཀིརིཡཱཡ སམྨཱདསྶནཀིཙྩཾ ཨུཔཱདཱཡ ‘‘སམྨཱདིཊྛཱི’’ཏི ཝུཏྟཱ, སམྨཱཛཱནནཀིཙྩཾ ཨུཔཱདཱཡ ‘‘སམྨཱཉཱཎ’’ནྟི. ཨཉྙཱཏཱཝིནྡྲིཡཝསེན ཝཱ སམྨཱདིཊྛི, པཉྙིནྡྲིཡཝསེན སམྨཱཉཱཎནྟི ཨེཝམེཏྠ ཨཏྠོ དཊྛབྦོ. མགྒཕལཱཝཧཱཡ དེསནཱཡ སངྑེཔཏོཝ ཨཱགཏཏྟཱ ཝུཏྟཾ ‘‘ཨུགྒྷཊིཏཉྙུཔུགྒལསྶ ཝསེནཱ’’ཏི.

བྷདྡཱལིསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༦. ལཊུཀིཀོཔམསུཏྟཝཎྞནཱ

༡༤༨. མཧཱཨུདཱཡིཏྠེརོཏི ¶ ཀཱལུ༹དཱཡིལཱལུ༹དཱཡིཏྠེརེཧི ཨཉྙོ མཧཱདེཧཏཱཡ མཧཱཨུདཱཡཱིཏི སཱསནེ པཉྙཱཏོ ཐེརོ. ཨཔཧརི ཨཔཧརཏི ཨཔཧརིསྶཏཱིཏི ཨཔཧཏྟཱ. ཏེཀཱལིཀོ ཧི ཨཡཾ ¶ སདྡོ. ཨུཔཧཏྟཱཏི ཨེཏྠཱཔི ཨེསེཝ ནཡོ. ཨཔཧཱརཀོཏི ཨཔནེཏཱ. ཨུཔཧཱརཀོཏི ཨུཔནེཏཱ.

༡༤༩. ཡནྟི བྷུམྨཏྠེ པཙྩཏྟཝཙནཾ, ཏེན ཙ ཨནནྟརནིདྡིཊྛསམཡོ པཙྩཱམཊྛོཏི ཨཱཧ ‘‘ཡསྨིཾ སམཡེ’’ཏི. ན བྷགཝནྟཾ པཊིཙྩཱཏི ན བྷགཝནྟཾ ཨཱརམྨཎཾ ཀཏྭཱ.

ཀམྨནིཔྥནྣཏྠནྟི ཨཏྟནཱ ཨཱཡཱཙིཡམཱནཀམྨསིདྡྷིཨཏྠཾ. བྷཝཏཱིཏི བྷཱུ, ན བྷཱུཏི ཨབྷཱུ, བྷཡཝསེན པན སཱ ཨིཏྠཱི ‘‘ཨབྷུ’’ནྟི ཨཱཧ. ཨཱཏུ མཱཏཱུཏི ཨེཏྠ ཡཐཱ –

‘‘ཨངྒཱ ཨངྒཱ སམྦྷཝསི, ཧདཡཱ ཨདྷིཛཱཡསེ;

ཨཏྟཱ ཨེཝ པུཏྟ ནཱམཱསི, ས ཛཱིཝ སརདོསཏ’’ནྟི. –

ཨཱདཱིསུ པུཏྟོ ‘‘ཨཏྟཱ’’ཏི ཝུཙྩཏི ཀུལཝསེན སནྟཱནེ པཝཏྟནཏོ. ཨེཝཾ པིཏཱཔི ‘‘པུཏྟསྶ ཨཏྟཱ’’ཏི ཝུཙྩཏི. ཡསྨཱ ‘‘བྷིཀྑུསྶ ཨཏྟཱ མཱཏཱ’’ཏི ཝཏྠུཀཱམཱ བྷཡཝསེན ‘‘ཨཱཏུ མཱཏཱུ’’ཏི ཨཱཧ. ཏེནཱཧ ‘‘ཨཱཏཱུཏི པིཏཱ’’ཏིཨཱདི.

༡༥༠. ཨེཝམེཝནྟི ཨིདཾ གརཧཏྠཛོཏནནིཔཱཏཔདནྟི ཝུཏྟཾ ‘‘གརཧནྟོ ཨཱཧཱ’’ཏི. ཏཐཱ ཧི ནཾ ཝཱཙཀསདྡེནེཝ དསྶེནྟོ ‘‘ཨིདྷེཀཙྩེ མོགྷཔུརིསཱ’’ཏི ཨཱཧ. ཨཱཧཾསཱུཏི ཏེསཾ ཏཐཱ ཝཙནསྶ ཨཝིཙྪེདེན པཝཏྟིདཱིཔནནྟི ཨཱཧ ‘‘ཝདནྟཱི’’ཏི. ཀིཾ པནིམསྶ ཨཔྤམཏྟཀསྶཱཏི པཧཱཏབྦཝཏྠུཾ ཨཝམཉྙམཱནེཧི ཝུཏྟཾ. ཏེནཱཧ ‘‘ཀིཾ པནཱ’’ཏི. ཧེཏུམྷི ཛོཏེཏབྦེ ཙེཏཾ སཱམིཝཙནཾ ཡཐཱ ‘‘ཨནུསྶཝསྶ ཧེཏུ, ཨཛ྄ཛྷེནསྶ ཧེཏཱུ’’ཏི. ཏེནཱཧ ‘‘ཨཔྤམཏྟཀསྶ ཧེཏཱུ’’ཏི. ནནུ ཨཔསྶནྟེན ཝིཡ ཨསུཎནྟེན ཝིཡ བྷཝིཏབྦནྟི? སཏྠཱརཱ ནཱམ ཨཔྤམཏྟཀེསུ དོསེསུ ཨཔསྶནྟེན ཝིཡ ཙ ཨསུཎནྟེན ཝིཡ ཙ བྷཝིཏབྦནྟི ཏེསཾ ཨདྷིཔྤཱཡེན ཝིཝརཎཾ. ཏེསུ ཙཱཏི སིཀྑཱཀཱམེསུ ཙ. ཨཔྤཙྩཡཾ ཨུཔཊྛཱཔེནྟཱིཏི ཨཱནེཏྭཱ སམྦནྡྷིཏབྦནྟི དསྶེཏི. ཏེསནྟི ཡེ ‘‘མོགྷཔུརིསཱ’’ཏི ཝུཏྟཱ པུགྒལཱ, ཏེསཾ. གལེ བདྡྷཾ མཧཱཀཊྛནྟི གལེ ཨོལམྦེཏྭཱ བདྡྷཾ རུཀྑདཎྜམཱཧ. ¶ པཱུཏིལཏཱཡཱཏི གལོཙིཡཱ. པཱརཱཛིཀཝཏྠུ ཝིཡ དུཔྤཛཧཾ ཧོཏཱིཏི ཚནྡཀཔྤཧཱནཝསེན ཏཾ པཛཧིཏུཾ ན སཀྐོཏི.

༡༥༡. ཨནུསྶུཀྐཱཏི ¶ ཏསྶ པཧཱཏབྦསྶ པཧཱནེ ཨུསྶུཀྐརཧིཏཱ. ཨཔཙྩཱསཱིསནཔཀྑེཏི ཏཱཡ པརདཏྟཝུཏྟིཏཱཡ ཀསྶཙི པཙྩཡསྶ ཀུཏོཙི ཨཔཙྩཱསཱིསཀཔཀྑེ ཋིཏཱ ཧུཏྭཱ སུཔྤཛཧཾ ཧོཏི, ན ཏསྶ པཧཱནེ བྷཱརིཡཾ ཨཏྠི.

༡༥༢. དལིདྡོ དུགྒཏོ. ཨསྶཀོཏི ཨསཱཔཏེཡྻོ. གེཧཡཊྛིཡོཏི གེཧཚདནསྶ ཨཱདྷཱརཱ, ཏཱ ཨུཛུཀཾ ཏིརིཡཾ ཋཔེཏབྦདཎྜཱ. སམནྟཏོ བྷིཏྟིཔཱདེསུ ཋཔེཏབྦདཎྜཱ མཎྜལཱ. ཀཱཀཱཏིདཱཡིནྟི ཨིཏོ ཙིཏོ ཀཱཀེཧི ཨཏིཔཱཏཝསེན ཨུཌྜེཏབྦཾ. ཏེནཱཧ ‘‘ཡཏྠ ཀིཉྩིདེཝཱ’’ཏིཨཱདི. སཱུརཀཱཀཱཏི ཀཱཀཱནཾ ཨུཌྜེཔནཱཀཱརམཱཧ. ནཔརམརཱུཔནྟི ཧཱིནརཱུཔཾ. ཝིལཱིཝམཉྩཀོཏི ཏཱལཝེཏྟཀཱདཱིཧི ཝཱིཏམཉྩཀོ. སཱ པནསྶ སནྟཱནཱནཾ ཚིནྣབྷིནྣཏཱཡ ཨོལུགྒཝིལུགྒཏཱ, ཏཐཱ སཏི སཱ ཝིསམརཱུཔཱ ཧོཏཱིཏི ཨཱཧ ‘‘ཨོཎཏཱ’’ཏིཨཱདི. སོ པུགྒལོ ལཱུཁབྷོཛཱི ཧོཏཱིཏི ཨཱཧ ‘‘དྷཉྙཾ ནཱམ ཀུདྲཱུསཀོ’’ཏི. སམཀཱལཾ ཝཔིཏབྦཏཱཡ སམཝཱཔཀཾ, ཡཐཱཨུཏུ ཝཔིཏབྦབཱིཛཾ. ཛཱཡིཀཱཏི ཀུཙྪིཏཱ བྷརིཡཱ, སབྦཏྠ གརཧཱཡཾ ཀ-སདྡོ. སོ ཝཏཱཧཾ པབྦཛེཡྻནྟི སོཧཾ ཀེསམསྶུཾ ཨོཧཱརེཏྭཱ པབྦཛེཡྻཾ, ཡོཧཾ པུརིསོ ནཱམ ཨསྶཾ ཝཏཱཏི པབྦཛྫཱཝསེན ཨཏྟནོ པུརིསཾ བོདྷེཡྻ. ཏཾསབྷཱཝེ ཋིཏསྶ བོདྷཱ ན ཏུ དུཀྐརཱ, སཱ ཁཊོཔིཀཱ. སཱ ཀུམྦྷཱི. མེཎྜཀསེཊྛིནོ ཨཌྜྷཏེལ༹སཱནི ཀོཊྛཱགཱརསཏཱནི ཝིཡ.

༡༥༣. སུཝཎྞནིཀྑསཏཱནནྟི ཨནེཀེསཾ སུཝཎྞནིཀྑསཏཱནཾ. ཙཡོཏི སནྟཱནེཧི ནིཙཡོ ཨཝཱིཙི ནིཙྩཔྤབནྡྷནིཙཡོ. ཏེནཱཧ ‘‘སནྟཱནཏོ ཀཏསནྣིཙཡོ’’ཏི.

༡༥༤. ཧེཊྛཱ ཀིཉྩཱཔི ཨཔྤཛཧནཀཱ པཋམཾ དསྶིཏཱ, པཛཧནཀཱ པདྷཱནཱ, ཏེསཉྩ ཝསེནེཏྠ པུགྒལཙཏུཀྐཾ དསྶིཏཾ. ཏེ ཏཉྩེཝ པཛཧནྟཱིཏི པཛཧནཀཱ པཋམཾ གཧིཏཱ. རཱསིཝསེནཱཏི ‘‘ཨིདྷུདཱཡི ཨེཀཙྩོ པུགྒལོ’’ཏིཨཱདིནཱ ཙཏུཀྐེ ཨཱགཏཝིབྷཱགཾ ཨནཱམསིཏྭཱ ‘‘ཏེ ཏེ’’ཏི པཙུརཝསེན ཝུཏྟཾ. ཏེནཱཧ ‘‘ན པཱཊིཡེཀྐཾ ཝིབྷཏྟཱ’’ཏི. ཨཝིབྷཱགེན གཧིཏཝཏྠཱུསུ ཝིབྷཱགཏོ གཧཎཾ ལོཀསིདྡྷམེཏནྟི དསྶེཏུཾ ‘‘ཡཐཱ ནཱམཱ’’ཏིཨཱདི ¶ ཝུཏྟཾ. པཛཧནཀཔུགྒལཱཏི ‘‘ཏེ ཏཉྩེཝ པཛཧནྟཱི’’ཏི ཨེཝཾ པཛཧནཀཔུགྒལཱ ཨེཝ.

ཨུཔདྷིཨནུདྷཱཝནཀཱཏི ཨུཔདྷཱིསུ ཨནུཨནུདྷཱཝནཀཱ ཨུཔདྷིཡོ ཨཱརབྦྷ པཝཏྟནཀཱ. ཝིཏཀྐཱཡེཝཱཏི ¶ ཀཱམསངྐཔྤཱདིཝིཏཀྐཱཡེཝ. ཨིནྡྲིཡནཱནཏྟཏཱཏི ཝིམུཏྟིཔརིཔཱཙཀཱནཾ ཨིནྡྲིཡཱནཾ པརོཔརིཡཏྟཾ. ཏསྶ ཧི ཝསེནེཝ ཏེ ཙཏྟཱརོ པུགྒལཱ ཛཱཏཱ. ཨགྒམགྒཏྠཱཡ ཝིཔསྶནཾ ཨུསྶུཀྐཱཔེཏྭཱ ཡཱཝ ན ཏཾ མགྒེན སམུགྒྷཱཏེནྟི, ཏཱཝ ནཔྤཛཧནྟི ནཱམ. ཨིཏི ཧེཊྛིམཱ ཏཡོཔི ཨརིཡཱ ཨཔྤཧཱིནསྶ ཀིལེསསྶ ཝསེན ‘‘ནཔྤཛཧནྟཱི’’ཏི ཝུཏྟཱ, པགེཝ པུཐུཛྫནཱ. ཝུཏྟནཡེན པན ཝིཔསྶནཾ མགྒེན གྷཊེནྟཱ ཏེ ཙཏྟཱརོ ཛནཱ ཨགྒམགྒཀྑཎེ པཛཧནྟི ནཱམ. ཏེ ཨེཝ ཏཏྠ སཱིགྷཀཱརིནོ ཁིཔྤཾ པཛཧནྟི ནཱམ, ཏེནཱཧ ‘‘ཏཏྠཱ’’ཏིཨཱདི.

སཾཝེགཾ ཀཏྭཱ ཨགྒིཾ ཨཀྐནྟཔུརིསོ ཝིཡ. མགྒེནཱཏི ཨནུཀྐམཱགཏེན ཨགྒམགྒེན. མཧཱཧཏྠིཔདོཔམེཏི མཧཱཧཏྠིཔདོཔམསུཏྟེ (མ. ནི. ༡.༣༠༠ ཨཱདཡོ). ཏཏྠ ཧི ‘‘ཏསྶ དྷཱཏཱརམྨཎམེཝ ཙིཏྟཾ པཀྑནྡཏི པསཱིདཏི སནྟིཊྛཏི ཨདྷིམུཙྩཏཱི’’ཏི (མ. ནི. ༡.༣༠༢) ཨེཏྠ ཨཏིཏིཀྑནཱཏིཏིཀྑ-ནཱཏིམནྡཨཏིམནྡ-པུགྒལཝསེན ཨཊྛཀཐཱཡཾ (མ. ནི. ཨཊྛ. ༢.༣༠༢) ཏཡོ ཝཱརཱ ཨུདྡྷཊཱ, ཏཏྠ མཛ྄ཛྷིམཝསེནེཝ པཉྷོ ཀཐིཏོ. ཨིནྡྲིཡབྷཱཝནེཏི ཨིནྡྲིཡབྷཱཝནཱསུཏྟེ, ཏཏྠཱཔི མཛ྄ཛྷིམནཡེནེཝ པཉྷོ ཀཐིཏོ. ཏེནཱཧ ‘‘ཨིམེསཱུ’’ཏིཨཱདི.

ཏནྟི ‘‘ཨུཔདྷཱི’’ཏི ཝུཏྟཾ ཁནྡྷཔཉྩཀཾ. དུཀྑསྶ མཱུལནྟི སབྦསྶཔི ཝཊྚདུཀྑསྶ ཀཱརཎཾ. ནིགྒཧཎོཏི ནིརུཔཱདཱནོ. ཏེནཱཧ ‘‘ནིཏྟཎྷོ’’ཏི.

༡༥༥. ཡེ པཛཧནྟཱིཏི ‘‘ཏེ ཏཉྩེཝ པཛཧནྟཱི’’ཏི ཨེཝཾ ཝུཏྟཔུགྒལཱ. ཏེ ཨིམེ ནཱམ ཨེཏྟཀེ ཀིལེསེ པཛཧནྟཱིཏི ཡེ ཏེ པུཐུཛྫནཱ ལཱབྷིནོ ཙ པཉྩ ཀཱམགུཎེ ཨེཏྟཀེ ཏཾཏཾཛྷཱནཱདིཝཏྠུཀེ ཙ ཏཾཏཾམགྒཝཛ྄ཛྷཏཱཡ པརིཙྪིནྣཏྟཱ ཨེཏྟཀེ ཀིལེསེ པཛཧནྟི. ཡེ ནཔྤཛཧནྟཱིཏི ཨེཏྠ ཝུཏྟནཡཱནུསཱརེན ཨཏྠོ ཝེདིཏབྦོ. ཨསུཙིསུཁཾ ཀཱཡཱསུཙིསནྣིསྶིཏཏྟཱ. ཨནརིཡེཧཱིཏི ཨཔརིསུདྡྷེཧི. པཊིལཱབྷཏོ བྷཱཡིཏབྦཾ ཀིལེསདུཀྑགཏིཀཏྟཱ. ཝིཔཱཀཏོ བྷཱཡིཏབྦཾ ཨཔཱཡདུཀྑགཏིཀཏྟཱ. གཎཏོཔི ཀིལེསཏོཔི ཝིཝིཏྟསུཁནྟི གཎསངྒཎིཀཏོ ཙ ཀིལེསསངྒཎིཀཏོ ¶ ཙ ཝིཝིཏྟསུཁཾ. རཱགཱདིཝཱུཔསམཏྠཱཡཱཏི རཱགཱདིཝཱུཔསམཱཝཧཾ སུཁཾ. ན བྷཱཡིཏབྦཾ སམྤཏི ཨཱཡཏིཉྩ ཨེཀནྟཧིཏབྷཱཝཏོ.

༡༥༦. ཨིཉྫིཏསྨིནྟི པཙྩཏྟེ བྷུམྨཝཙནནྟི ཨཱཧ ‘‘ཨིཉྫན’’ནྟིཨཱདི. ཨིཉྫཏི ཏེནཱཏི ཨིཉྫིཏཾ, ཏསྶ ཏསྶ ཛྷཱནསྶ ཁོབྷཀརཾ ཨོལཱ༹རིཀཾ ཛྷཱནངྒཾ. ཙཏུཏྠཛ྄ཛྷཱནཾ ཨནིཉྫནཾ སནྣིསིནྣཱབྷཱཝཏོ. ཏཐཱ ཧི ཝུཏྟཾ ‘‘ཋིཏེ ཨཱནེཉྫཔྤཏྟེ’’ཏི (དཱི. ནི. ༡.༢༤༤-༢༤༥; མ. ནི. ༡.༣༨༤-༣༨༦; པཱརཱ. ༡༢-༡༣).

ཨལཾ-སདྡོ ¶ ཡུཏྟཏྠོཔི ཧོཏི – ‘‘ཨལམེཝ ནིབྦིནྡིཏུཾ, ཨལཾ ཝིམུཙྩིཏུ’’ནྟིཨཱདཱིསུ (དཱི. ནི. ༢.༢༧༢; སཾ. ནི. ༢.༡༢༤, ༡༢༨, ༡༣༤, ༡༤༣), ཏསྨཱ ཨནལཾ ཨནུསངྒཾ ཀཱཏུཾ ཨཡུཏྟནྟི ཨཏྠོ. ཏེནཱཧ ‘‘ཨཀཏྟབྦཨཱལཡནྟི ཝདཱམཱི’’ཏི. སནྣིཊྛཱནནྟི སམྨཱཔཊིཔཏྟིཡཾ ཨལཾ ཨེཏྟཱཝཏཱཏི ཨུསྶཱཧཔཊིཔྤསྶམྦྷནཝསེན སནྣིཊྛཱནཾ ན ཀཱཏབྦནྟི ཡོཛནཱ. ཨུདྡྷམྦྷཱགིཡསཉྙིཏཾ ཨཎུཾ ཝཱ ཨོརམྦྷཱགིཡསཉྙིཏཾ ཐཱུལཾ ཝཱ, རཱུཔརཱགོཏི ཨེཝརཱུཔཾ ཨཎུཾ ཝཱ ཀཱམཱསཝོ པཊིགྷནྟི ཨེཝརཱུཔཾ ཐཱུལཾ ཝཱ, མུདུནཱ པཝཏྟིཨཱཀཱརཝིསེསེན ཨཔྤསཱཝཛྫཾ, ཀམྨབནྡྷནཊྛེན ཝཱ ཨཔྤསཱཝཛྫཾ, ཏབྦིཔརིཡཱཡཏོ མཧཱསཱཝཛྫཾ ཝེདིཏབྦཾ. ནཱཏིཏིཀྑཔཉྙསྶ ཝསེན དེསནཱཡ པཝཏྟཏྟཱ ‘‘ནེཡྻཔུགྒལསྶ ཝསེནཱ’’ཏི ཝུཏྟཾ. སབྦསོ ཧི པརིཡཱདིནྣནིཀནྟིཀསྶ ཨརིཡཔུགྒལསྶ ཝསེན སཉྙཱཝེདཡིཏནིརོདྷསྶ ཨཱགཏཏྟཱ ‘‘ཨརཧཏྟནིཀཱུཊེནེཝ ནིཊྛཱཔིཏཱ’’ཏི ཝུཏྟཾ. ཡཾ པནེཏྠ ཨཏྠཏོ ན ཝིབྷཏྟཾ, ཏཾ སུཝིཉྙེཡྻམེཝ.

ལཊུཀིཀོཔམསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༧. ཙཱཏུམསུཏྟཝཎྞནཱ

༡༥༧. ཡཐཱཨུཔནིསྶཡེནཱཏི ¶ ཡོ ཡོ ཨུཔནིསྶཡོ ཡཐཱཨུཔནིསྶཡོ, ཏེན ཡཐཱཨུཔནིསྶཡེན སམྨཱཔཡོགེན. པཏིཊྛཧིསྶནྟི སཱསནེ པཏིཊྛཾ པཊིལབྷིསྶནྟི. ཝསནཊྛཱནཱནཱིཏི ཝསྶགྒཱདིཝསེན ཝསནཊྛཱནཱནི. སཎྛཱཔཡམཱནཱཏི སུཝིབྷཏྟབྷཱཝེན ཋཔེནྟཱ.

ཨཝིནིབྦྷོགསདྡནྟི ཝིནིབྷུཉྫིཏྭཱ གཧེཏུཾ ཨསཀྐུཎེཡྻསདྡཾ. ཝཙཱིགྷོསོཔི ཧི བཧཱུཧི ཨེཀཙྩཾ པཝཏྟིཏོ ཋཱནཏོ ཙ དཱུརཏརོ ཀེཝལཾ མཧཱནིགྒྷོསོ ¶ ཨེཝ ཧུཏྭཱ སོཏཔཐམཱགཙྪཏི. མཙྪཝིལོཔེཏི མཙྪེ ཝིལུམྤིཏྭཱ ཝིཡ གཧཎེ, མཙྪཱནཾ ཝཱ ནཡནེ.

༡༥༨. ཝཝསྶགྒཏྠེཏི ནིཙྪཡཏྠེ, ཨིདཾ ཏཱཝ ཨམྷེཧི ཝུཙྩམཱནཝཙནཾ ཨེཀནྟསོཏབྦཾ, པཙྪཱ ཏུམྷེཧི ཀཱཏབྦཾ ཀརོཐཱཏི ཨདྷིཔྤཱཡོ. ཝཙནཔརིཧཱརོཏི ཏེཧི སཀྱརཱཛཱུཧི ཝུཏྟཝཙནསྶ པརིཧཱརོ. ལེསཀཔྤནྟི ཀཔྤིཡལེསཾ. དྷུརཝཧཱཏི དྷུརཝཱཧིནོ, དྷོརཡ྄ཧཱཏི ཨཏྠོ. པཱདམཱུལནྟི ཨུཔཙཱརཾ ཝདཏི. ཝིགཙྪིསྶཏཱིཏི ཧཱཡིསྶཏི. པཊིཔྥརིཏོཏི ན བྷགཝཏོ སམྨུཁཱཝ, སཀྱརཱཛཱུནཾ པུརཏོཔི ཝིཔྥརིཏོཝ ཧོཏི.

༡༥༩. ཨབྷིནནྡཏཱུཏི ཨབྷིམུཁོ ཧུཏྭཱ པམོདཏུ. ཨབྷིཝདཏཱུཏི ཨབྷིརཱུཔཝསེན ཝདཏུ. པསཱདཉྙཐཏྟནྟི ཨཔྤསཱདསྶ ཝིཔརིཎཱམོ ཧཱིནཱཡཱཝཏྟནསངྑཱཏཾ པརིཝཏྟནཾ, ཏེནཱཧ ‘‘ཝིབྦྷམནྟཱནཾ. ཝིཔརིཎཱམཉྙཐཏྟ’’ནྟི. ཀཱརཎཱུཔཙཱརེན སསྶེསུ བཱིཛཔརིཡཱཡོཏི ཨཱཧ ‘‘བཱིཛཱནཾ ཏརུཎཱནནྟི ཏརུཎསསྶཱན’’ནྟི. ཏརུཎབྷཱཝེནེཝ ཏསྶ བྷཱཝིནོ ཕལསྶ ཨབྷཱཝེན ཝིཔརིཎཱམོ.

༡༦༠. ཀཏྟབྦསྶ སརསེནེཝ ཀརཎཾ ཙིཏྟརུཙིཡཾ, ན ཏཐཱ པརསྶ ཨུསྶཱདནེནཱཏི ཨཱཧ – ‘‘པཀྐོསིཡམཱནཱནཾ གམནཾ ནཱམ ན ཕཱསུཀ’’ནྟི. མཡམྤི བྷགཝཱ ཝིཡ དིཊྛདྷམྨསུཁཝིཧཱརེནེཝ ཝིཧརིསྶཱམཱཏི དཱིཔེཏི པཀཏིཡཱ ཝིཝེཀཛ྄ཛྷཱསཡབྷཱཝཏོ ཝིརདྡྷོ ཨཱགཏསྶ བྷཱརསྶ ཨཝཧནཏོཡེཝ. ཏེནཱཧ ‘‘ཨཏྟནོ བྷཱརབྷཱཝཾ ན ཨཉྙཱསཱི’’ཏི.

༡༦༡. ཀསྨཱ ¶ ཨཱརབྷཱིཏི? སཔྤཱཡཏོ. པཉྩསཏཱ ཧི བྷིཀྑཱུ ཨབྷིནཝཱ, ཏསྨཱ ཏེསཾ ཨོཝཱདདཱནཏྠཾ བྷགཝཱ ཨིམཾ དེསནཾ ཨཱརབྷཱིཏི.

༡༦༢. ཀོདྷུཔཱཡཱསསྶཱཏི ཨེཏྠ ཀུཛ྄ཛྷནཊྛེན ཀོདྷོ, སྭེཝ ཙིཏྟསྶ ཀཱཡསྶ ཙ ཨཏིཔྤམདྡནམཐནུཔྤཱདནེཧི དལ༹ྷཾ ཨཱཡཱསཊྛེན ཨུཔཱཡཱསོ. ཨནེཀཝཱརཾ པཝཏྟིཏྭཱ ཨཏྟནཱ སམཝེཏཾ སཏྟཾ ཨཛ྄ཛྷོཏྠརིཏྭཱ སཱིསཾ ཨུཀྑིཔིཏུཾ ཨདཏྭཱ ཨནཡབྱསནཔཱཔནེན ཀོདྷུཔཱཡཱསསྶ ཨཱུམིསདིསཏཱ དཊྛབྦཱ. ཏེནཱཧ ‘‘ཀོདྷུཔཱཡཱསེ’’ཏིཨཱདི.

༡༦༣. ཨོདརིཀཏྟེན ཁཱདིཏོཏི ཨོདརིཀབྷཱཝེན ཨཱམིསགེདྷེན མིཙྪཱཛཱིཝེན ཛཱིཝིཀཱཀཔྤནེན ནཱསིཏསཱིལཱདིགུཎཏཱཡ ཁཱདིཏདྷམྨསརཱིརོ.

༡༦༤. པཉྩཀཱམགུཎཱཝཊྚེ ¶ ནིམུཛྫིཏྭཱཏི ཨེཏྠ ཀཱམརཱགཱབྷིབྷཱུཏེ སཏྟེ ཨིཏོ ཙ ཨེཏྟོ, ཨེཏྟོ ཙ ཨིཏོཏི ཨེཝཾ མནཱཔིཡརཱུཔཱདིཝིསཡསངྑཱཏེ ཨཱཝཊྚེ ཨཏྟཱནཾ སཾསཱརེཏྭཱ ཡཐཱ ཏཏོ བཧིབྷཱུཏེ ནེཀྑམྨེ ཙིཏྟམྤི ན ཨུཔྤཱདེཏི, ཨེཝཾ ཨཱཝཊྚེཏྭཱ བྱསནཱཔཱདནེན ཀཱམགུཎཱནཾ ཨཱཝཊྚསདིསཏཱ དཊྛབྦཱ. ཏེནཱཧ ‘‘ཡཐཱ ཧཱི’’ཏིཨཱདི.

༡༦༥. རཱགཱནུདྡྷཾསིཏེནཱཏི རཱགེན ཨནུདྡྷཾསིཏེན. ཙཎྜམཙྪཾ ཨཱགམྨཱཏི སུསུཀཱདིཙཎྜམཙྪཾ ཨཱགམྨ. མཱཏུགཱམཾ ཨཱགམྨཱཏི མཱཏུགཱམོ ཧི ཡོནིསོམནསིཀཱརརཧིཏཾ ཨདྷཱིརཔུརིསཾ ཨིཏྠིཀུཏྟབྷཱུཏེཧི ཨཏྟནོ ཧཱཝབྷཱཝཝིལཱསེཧི ཨབྷིབྷུཡྻ གཧེཏྭཱ དྷཱིརཛཱཏིཡམྤི ཨཏྟནོ རཱུཔཱདཱིཧི པལོབྷནཝསེན ཨནཝསེསཾ ཨཏྟནོ ཨུཔཀཱརདྷམྨེ སཱིལཱདིཀེ སམྤཱདེཏུཾ ཨསམཏྠཾ ཀརོནྟོ ཨནཡབྱསནཾ པཱཔེཏི. ཏེནཱཧ – ‘‘མཱཏུགཱམཾ ཨཱགམྨ ཨུཔྤནྣཀཱམརཱགོ ཝིབྦྷམཏཱི’’ཏི.

བྷཡཾ ནཱམ ཡཏྠ བྷཱཡིཏབྦཝཏྠུ, ཏཏྠ ཨོཏརནྟསྶེཝ ཧོཏི, ན ཨནོཏརནྟསྶ, ཏཾ ཨོཏརིཏྭཱ བྷཡཾ ཝིནོདེཏྭཱ ཏཏྠ ཀིཙྩཾ སཱདྷེཏབྦཾ, ཨིཏརཐཱ ཙཏྠསིདྡྷི ན ཧོཏཱིཏི ཨིམམཏྠཾ ཨུཔམོཔམིཏབྦསརཱུཔཝསེན དསྶེཏུཾ ‘‘ཡཐཱ’’ཏིཨཱདི ཝུཏྟཾ. ཏཏྠ ཨུདཀཾ ནིསྶཱཡ ཨཱནིསཾསོ པིཔཱསཝིནཡནཾ སརཱིརསུདྡྷི པརིལཱ༹ཧཱུཔསམོ ཀཱཡཨུཏུགྒཱཧཱཔནནྟི ཨེཝམཱདི. སཱསནཾ ནིསྶཱཡ ཨཱནིསཾསོ པན སངྑེཔཏོ ཝཊྚདུཀྑཱུཔསམོ, ཝིཏྠཱརཏོ པན སཱིལཱནིསཾསཱདིཝསེན ཨནེཀཝིདྷོ, སོ ཝིསུདྡྷིམགྒེ (ཝིསུདྡྷི. ༡.༩) ཝུཏྟནཡེན ཝེདིཏབྦོ. ཝུཏྟཔྤཀཱརོ ཨཱནིསཾསོ ཧོཏི ཏཱནི བྷཡཱནི ཨབྷིབྷུཡྻ པཝཏྟསྶཱཏི ཨདྷིཔྤཱཡོ. ཨིམཱནི ཨབྷཱཡིཏྭཱཏི ཨིམཱནི ཀོདྷཱུཔཱཡཱསཱདིབྷཡཱནི ¶ ཨབྷིབྷུཡྻ པཝཏྟིཏྭཱ ཨབྷཱཡིཏྭཱ. ཀོདྷཱུཔཱཡཱསཱདཡོ ཧི བྷཱཡཏི ཨེཏསྨཱཏི བྷཡནྟི ཝུཏྟཱ. ཐེརོཏི མཧཱདྷམྨརཀྑིཏཏྠེརོ. ཀཱམཾ པཧཱནཱབྷིསམཡཀཱལོ ཨེཝ སཙྪིཀིརིཡཱབྷིསམཡོ, སམྨཱདིཊྛིཡཱ པན སཾཀིལེསཝོདཱནདྷམྨེསུ ཀིཙྩཾ ཨསཾཀིཎྞཾ ཀཏྭཱ དསྶེཏུཾ སམཱནཀཱལིཀམྤི ཨསམཱནཀཱལིཀཾ ཝིཡ ཝུཏྟཾ ‘‘ཏཎྷཱསོཏཾ ཚིནྡིཏྭཱ ནིབྦཱནཔཱརཾ དཊྛུཾ ན སཀྐོཏཱི’’ཏི. སེསཾ སུཝིཉྙེཡྻམེཝ.

ཙཱཏུམསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༨. ནལ༹ཀཔཱནསུཏྟཝཎྞནཱ

༡༦༦. ཡཏྠ ¶ ¶ བོདྷིསཏྟཔམུཁོ ཝཱནརོ ནལ༹ཀེན པཱནཱིཡཾ པིཝི, སཱ པོཀྑརཎཱི, ཏསྶཱམནྟོ བྷཱུམིཔྤདེསོ, ཏཏྠ ནིཝིཊྛགཱམོ ཙ ‘‘ནལ༹ཀཔཱན’’ནྟེཝ པཉྙཱཡིཏྠ, ཨིདྷ པན གཱམོ ཨདྷིཔྤེཏོཏི ཨཱཧ ‘‘ནལ༹ཀཔཱནེཏི ཨེཝཾནཱམཀེ གཱམེ’’ཏི. ཨིདཱནི ཏམཏྠཾ ཨཱགམནཏོ པཊྛཱཡ དསྶེཏུཾ ‘‘པུབྦེ ཀིརཱ’’ཏི ཨཱརདྡྷཾ. པཉྙཝཱཏི ཨིཏིཀཏྟབྦཏཱཡ པཉྙཱཡ པཉྙཝཱ.

ཐཱུལདཱིགྷབཧུལབྷཱཝེན མཧཏཱིཧི དཱཋིཀཱཧི སམནྣཱགཏཏྟཱ མཧཱདཱཋིཀོ. ‘‘ཨུདཀརཀྑསོ ཨཧ’’ནྟི ཝཏྭཱ ཝཱནརཱནཾ ཀཉྩི ཨམུཉྩིཏྭཱ ‘‘སབྦེ ཏུམྷེ མམ ཧཏྠགཏཱ’’ཏི དསྶེནྟོ ‘‘ཏུམྷེ པན སབྦེ ཁཱདིསྶཱམཱི’’ཏི ཨཱཧ. དྷམི…པེ… པིཝིཾསཱུཏི བོདྷིསཏྟེན གཧིཏནལོ༹ ཨནཝསེསོ ཨབྦྷནྟརེ སབྦསནྡྷཱིནཾ ནིབྦཱདྷེན ཨེཀཙྪིདྡོ ཨཧོསི. ནེཝ མཾ ཏྭཾ ཝདྷིསྶསཱིཏི ཨུདཀརཀྑས ཏྭཾ ཝདྷིཏུཀཱམོཔི མམ པུརིསཐཱམེན ན ཝདྷིསྶསི.

ཨེཝཾ པན ཝཏྭཱ མཧཱསཏྟོ ‘‘ཨཡཾ པཱཔོ ཨེཏྠ པཱནཱིཡཾ པིཝནྟེ ཨཉྙེཔི སཏྟེ མཱ བཱདྷཡིཏྠཱ’’ཏི ཀརུཎཱཡམཱནོ ‘‘ཨེཏྠ ཛཱཡནྟཱ ནལཱ༹ སབྦེ ཨཔབྦབནྡྷཱ ཨེཀཙྪིདྡཱཝ ཧོནྟཱུ’’ཏི ཨདྷིཊྛཱཡ གཏོ. ཏེནཱཧ ‘‘ཏཏོ པཊྛཱཡཱ’’ཏིཨཱདི.

༡༦༧. ཨནུརུདྡྷཔྤམུཁཱ བྷིཀྑཱུ བྷགཝཏཱ ‘‘ཀཙྩི ཏུམྷེ ཨནུརུདྡྷཱ’’ཏི པུཙྪིཏཱཏི ཐེརོ ‘‘ཏགྒྷ མཡཾ, བྷནྟེ’’ཏི ཨཱཧ.

སཙེ པབྦཛཏི, ཛཱིཝིཏཾ ལབྷིསྶཏི, ནོ ཨཉྙཐཱཏི རཉྙཱ པབྦཛྫཱཡ ཨབྷིནཱིཏཱཏི རཱཛཱབྷིནཱིཏཱ. ཙོརཱབྷིནཱིཏཱཏི ཨེཏྠཱཔི ཨེསེཝ ནཡོ. ཙོརཱནཾ མཱུལཾ ཚིནྡནྟོ ‘‘ཀཎྚཀསོདྷནཾ ཀརིསྶཱམཱི’’ཏི. ཨཱཛཱིཝིཀཱཡཱཏི ཨཱཛཱིཝེན ཛཱིཝིཏཝུཏྟིཡཱ. ཨིམེསུ པན ཨནུརུདྡྷཏྠེརཱདཱིསུ.

ཝིཝེཀནྟི པུབྦཀཱལིཀཀིརིཡཔྤདྷཱནཾ ‘‘ཨབྱཱཔཛྫཾ ཨུཔེཏ’’ནྟིཨཱདཱིསུ ཝིཡཱཏི ཨཱཧ – ‘‘ཝིཝིཙྩཱ’’ཏི, ཝིཝིཙྩིཏྭཱ ཝིཝིཏྟོ ཧུཏྭཱ ཝིནཱ ཧུཏྭཱཏི ཨཏྠོ. པབྦཛིཏཀིཙྩནྟི པབྦཛིཏསྶ སཱརུཔྤཀིཙྩཾ. སམཎཀིཙྩནྟི སམཎབྷཱཝཀརཎཀིཙྩཾ. ཡདགྒེན ཧི པབྦཛིཏཀིཙྩཾ ¶ ཀཱཏུཾ ན སཀྐོཏི ཏདགྒེན སམཎབྷཱཝཀརམྤི ཀིཙྩཾ ཀཱཏུཾ ན སཀྐོཏི. ཏེནཱཧ ‘‘སོ ཡེཝཱ’’ཏིཨཱདི.

༡༦༨. ཨཔྤཊིསནྡྷིཀེ ¶ ཏཱཝ བྱཱཀརོནྟོ པཝཏྟཱིསུ ཋཱནཾ ཨཏཱིཏོཏི ཀཏྭཱ ཨུཔཔཏྟཱིསུ བྱཱཀརོཏི ནཱམ ཏཏྠ པཊིསནྡྷིཡཱ ཨབྷཱཝཀིཏྟནཏོ. མཧནྟཏུཊྛིནོཏི ཝིཔུལཔམོདཱ.

༡༦༩. ཨིམསྶཱཏི ‘‘ཨསྶཱ’’ཏི པདསྶ ཨཏྠཝཙནཾ. ཨིམསྶ ཋིཏསྶ ཨཱཡསྨཏོ སཱམཾ དིཊྛོ ཝཱ ཧོཏི ཨནུསྶཝསུཏོ ཝཱཏི ཡོཛནཱ. སམཱདྷིཔཀྑིཀཱ དྷམྨཱ དྷམྨཱཏི ཨདྷིཔྤེཏཱ, སམཱདྷི པན ཨེཝཾཝིཧཱརཱིཏི ཨེཏྠ ཝིཧཱརསདྡེན གཧིཏོ. ཨེཝཾཝིམུཏྟཱཏི ཨེཏྠ པན ཝིམུཏྟིསདྡེན ཕལཝིམུཏྟི གཧིཏཱ. ཙརཏོཔཱིཏི སམཐཝིཔསྶནཱཙཱརེན ཙརཏོཔི ཝིཧརནྟསྶཔི. ཨུཔཱསཀཨུཔཱསིཀཱཋཱནེསུ ལབྦྷམཱནམྤི ཨརཧཏྟཾ ཨཔྤཀབྷཱཝཏོ པཱལི༹ཡཾ ཨནུདྡྷཊནྟི དཊྛབྦཾ. སེསཾ སུཝིཉྙེཡྻམེཝ.

ནལ༹ཀཔཱནསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༩. གོལིཡཱནིསུཏྟཝཎྞནཱ

༡༧༣. པདསམཱཙཱརོཏི ¶ ཏཾཏཾཔཙྩཡབྷེདདསྶནཱཡ ཝིགཏཏྟཱ པཀཱརེཧི དལིདྡསམཱཙཱརོ སིཐིལསམཱཙཱརོཏི ཨཏྠོ. ཡསྨཱ པན ཏཱདིསོ སམཱཙཱརོ ཐིརོ དལ༹ྷོ ནཱམ ན ཧོཏི, ཏསྨཱ ཝུཏྟཾ ‘‘དུབྦལསམཱཙཱརོ’’ཏི. ‘‘སཱཁསམཱཙཱརོ’’ཏི ཝཱ པཱཋོ, ཏཏྠ ཏཏྠ ལགྒནཊྛེན སཱཁཱསདིསསཱིལོཏི ཨཏྠོ. ཏེནཱཧ ‘‘ཨོལཱ༹རིཀཱཙཱརོ’’ཏི. པཙྩཡེསུ སཱཔེཀྑོཏི པཙྩཡེསུ སཱཔེཀྑཏཱཡ ཨེཝ ཧིསྶ ཨོལཱ༹རིཀཱཙཱརཏཱ ཝེདིཏབྦཱ. གརུནཱ ཀིསྨིཉྩི ཝུཏྟེ གཱརཝཝསེན པཏིསྶཝནཾ པཏིསྶོ, པཏིསྶཝཙནབྷཱུཏཾ ཏཾསབྷཱགཉྩ ཡཾ ཀིཉྩི གཱརཝནྟི ཨཏྠོ. སཧ པཏིསྶེནཱཏི སཔྤཏིསྶེན, སཔྤཏིསྶཝེན ཨོཝཱདསམྤཊིཙྪནེན. པཏིསྶཱིཡཏཱིཏི ཝཱ པཏིསྶོ, གརུཀཱཏབྦོ, ཏེན སཧ པཏིསྶེནཱཏི སབྦཾ པུབྦེ ཝིཡ. ཏེནཱཧ ‘‘སཛེཊྛཀེནཱ’’ཏི. སེརིཝིཧཱརོ ནཱམ ཨཏྟཔྤདྷཱནཝཱསོ. ཏེནཱཧ ‘‘ནིརངྐུསཝིཧཱརེནཱ’’ཏི.

ཨནུཔཁཛྫཱཏི ཨནུཔཀཌྜྷིཏྭཱ. གརུཊྛཱནིཡཱནཾ ཨནྟརཾ ཨནཱཔུཙྪཱ ཨནུཔཝིསིཏྭཱཏི ཨིམམཏྠཾ དསྶེཏུཾ ‘‘ཏཏྠ ཡོ’’ཏིཨཱདི ཝུཏྟཾ.

ཨཱབྷིསམཱཙཱརིཀནྟི ¶ ཨབྷིསམཱཙཱརེ བྷཝཾ. ཀིཾ པན ཏནྟི ཨཱཧ ‘‘ཝཏྟཔཊིཔཏྟིམཏྟམྤཱི’’ཏི. ནཱཏིཀཱལསྶེཝ སངྒྷསྶ པུརཏོ པཝིསིཏབྦཾ, ན པཙྪཱ པཊིཀྐམིཏབྦནྟི ཨདྷིཔྤཱཡེན ཨཏིཀཱལེ ཙ གཱམཔྤཝེསོ ཨཏིདིཝཱ པཊིཀྐམནཉྩ ནིཝཱརིཏཾ, ཏཾ དསྶེཏུཾ ‘‘ན ཨཏིཔཱཏོ’’ཏིཨཱདི ཝུཏྟཾ. ཨུདྡྷཙྩཔཀཏིཀོཏི ཝིབྦྷནྟཙིཏྟོ. ཨཝཙཱཔལྱེནཱཏི དལ༹ྷཝཱཏཱཔཧཏཔལླཝསདིསེན ལོལབྷཱཝེན.

པཉྙཝཏཱཏི ཨིམིནཱ བྷིཀྑུསཱརུཔྤེསུ ཨིཏིཀཏྟབྦེསུ ཨུཔཱཡཔཉྙཱ ཨདྷིཔྤེཏཱ, ན སུཏམཡཔཉྙཱ. ཨབྷིདྷམྨེ ཨབྷིཝིནཡེ ཡོགོཏི ཨིམིནཱ བྷཱཝནཱཔཉྙཱཨུཏྟརིམནུསྶདྷམྨེ ཡོགོ པཀཱསིཏོ. ཡོགོཏི ཙ པརིཙཡོ ཨུགྒཎྷཝསེན.

ཨཱརུཔྤཱཏི ཨིམིནཱ ཙཏསྶོཔི ཨརཱུཔསམཱཔཏྟིཡོ གཧིཏཱ, ཏཱ པན ཙཏཱུཧི རཱུཔསམཱཔཏྟཱིཧི ཝིནཱ ན སམྤཛྫནྟཱིཏི ཨཱཧ – ‘‘ཨཱརུཔྤཱཏི ཨེཏྟཱཝཏཱ ཨཊྛཔི སམཱཔཏྟིཡོ ཝུཏྟཱ ཧོནྟཱི’’ཏི. ཀསིཎེཏི དསཝིདྷེ ཀསིཎེ. ཨེཀཾ པརིཀམྨཀམྨཊྛཱནནྟི ཡཾ ཀིཉྩི ཨེཀབྷཱཝནཱ ¶ པརིཀམྨདཱིཔནཾ ཁནྡྷཀམྨཊྛཱནཾ. ཏེནཱཧ ‘‘པགུཎཾ ཀཏྭཱ’’ཏི. ཀསིཎཔརིཀམྨཾ པན ཏགྒཧཎེནེཝ གཧིཏཾ ཧོཏི, ལོཀིཡཱ ཨུཏྟརིམནུསྶདྷམྨཱ ཧེཊྛཱ གཧིཏཱཏི ཨཱཧ ‘‘ཨུཏྟརིམནུསྶདྷམྨེཏི ཨིམིནཱ སབྦེཔི ལོཀུཏྟརདྷམྨེ དསྶེཏཱི’’ཏི. ནེཡྻཔུགྒལསྶ ཝསེནཱཏི ཛཱནིཏྭཱ ཝིཏྠཱརེཏྭཱ ཉཱཏབྦཔུགྒལསྶ ཝསེནཱཏི.

གོལིཡཱནིསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༡༠. ཀཱིཊཱགིརིསུཏྟཝཎྞནཱ

༡༧༤. པཉྩ ¶ ཨཱནིསཾསེཏི ཨཔྤཱབཱདྷཏཱདིཀེ པཉྩ གུཎེ. ཏཏྠ ཨཀྑིརོགཀུཙྪིརོགཱདཱིནཾ ཨབྷཱཝོ ཨཔྤཱབཱདྷཏཱ. སརཱིརེ ཏེསཾ ཀུཔྤནདུཀྑསྶ ཨབྷཱཝོ ཨཔྤཱཏངྐཾ. སརཱིརསྶ ཨུཊྛཱནསུཁཏཱ ལཧུཊྛཱནཾ. བལཾ ནཱམ ཀཱཡབལཾ. ཕཱསུཝིཧཱརོ ཨིརིཡཱཔཐསུཁཏཱ. ཨནུཔཀྑནྡཱནཱིཏི དུཙྩཛནཝསེན སཏྟཱནཾ ཨནུཔཝིཊྛཱནི. སཉྫཱནིསྶཐཱཏི ཨེཏྠ ཨིཏི-སདྡོ ཨཱདིཨཏྠོ, ཏསྨཱ ཨིཏི ཨེཝཾ ཨཱནིསཾསནྟི ཨཏྠོ.

༡༧༥. ཨཱཝཱསེ ནིཡུཏྟཱཏི ཨཱཝཱསིཀཱ ཏསྶ ཨནཏིཝཏྟནཏོ. ཏེནཱཧ ‘‘ནིབདྡྷཝཱསིནོ’’ཏི, ནིཡཏཝཱསིནོཏི ཨཏྠོ. ཏནྣིབནྡྷཱཏི ¶ ནིབནྡྷཾ ཝུཙྩཏི བྱཱཔཱརོ, ཏཏྠ བནྡྷཱ པསུཏཱ ཨུསྶུཀཱཏི ཏནྣིབནྡྷཱ. ཀཐཾ ཏེ ཏཏྠ ནིབནྡྷཱཏི ཨཱཧ ‘‘ཨཀཏཾ སེནཱསན’’ནྟིཨཱདི. ཨུཔྤཛྫནཀེན ཀཱལེན པཏྟབྦཾ ཀཱལིཀཾ སོ པན ཀཱལོ ཨནཱགཏོ ཨེཝ ཧོཏཱིཏི ཨཱཧ ‘‘ཨནཱགཏེ ཀཱལེ པཏྟབྦ’’ནྟི.

༡༧༨. ཨེཏྟཀཱ ཝེདནཱ སེཝིཏབྦཱཏི ཨཊྛཱརསཔི ནེཀྑམྨནིསྶིཏཱ ཝེདནཱ སེཝིཏབྦཱ, གེཧསྶིཏཱ ན སེཝིཏྦྦཱ.

༡༨༡. ཏཾ ཀཏཾ སོལ༹སཝིདྷསྶཔི ཀིཙྩསྶ ནིཊྛིཏཏྟཱ. ཨནུལོམིཀཱནཱིཏི ཨུཏུསུཁབྷཱཝེན ཨནུརཱུཔཱནི. ཏེནཱཧ ‘‘ཀམྨཊྛཱནསཔྤཱཡཱནཱི’’ཏི. སམཱནཾ ཀུརུམཱནཱཏི ཨོམཏྟཏཾ ཨདྷིམཏྟཏཉྩ པཧཱཡ སམཀིཙྩཏཾ སམྤཱདེནྟཱ.

༡༨༢. ཏེ དྭེ ཧོནྟཱིཏི ཏེ ཨཱདིཏོ ཝུཏྟཱ དྭེ.

ཨུབྷཏོ (ཨ. ནི. ཊཱི. ༣.༧.༡༤) ཨུབྷཡཐཱ ཨུབྷོཧི བྷཱགེཧི ཝིམུཏྟོཏི ཨུབྷཏོབྷཱགཝིམུཏྟོ ཨེཀདེསསརཱུཔེཀསེསནཡེན. ཏཐཱ ཧི ཝུཏྟཾ ཨབྷིདྷམྨཊྛཀཐཱཡཾ (པུ. པ. ཨཊྛ. ༢༤) ‘‘དྭཱིཧི བྷཱགེཧི དྭེ ཝཱརེ ཝིམུཏྟོཏི ཨུབྷཏོབྷཱགཝིམུཏྟོ’’ཏི. ཏཏྠ ཀེཙི ཏཱཝ ཐེརཱ – ‘‘སམཱཔཏྟིཡཱ ཝིཀྑམྦྷནཝིམོཀྑེན, མགྒེན སམུཙྪེདཝིམོཀྑེན ཝིམུཏྟོཏི ཨུབྷཏོབྷཱགཝིམུཏྟོ’’ཏི ¶ ཝདནྟི. ཨཉྙེ ཐེརཱ – ‘‘ཨཡཾ ཨུབྷཏོབྷཱགཝིམུཏྟོ རཱུཔཏོ མུཙྩིཏྭཱ ནཱམཾ ནིསྶཱཡ ཋིཏོ པུན ཏཏོ མུཙྩནཏོ ནཱམནིསྶིཏཀོ’’ཏི ཝཏྭཱ ཏསྶ ཙ སཱདྷཀཾ –

‘‘ཨཙྩི ཡཐཱ ཝཱཏཝེགེན ཁིཏྟཱ, (ཨུཔསིཝཱཏི བྷགཝཱ,)

ཨཏྠཾ པལེཏི ན ཨུཔེཏི སངྑཾ;

ཨེཝཾ མུནི ནཱམཀཱཡཱ ཝིམུཏྟོ,

ཨཏྠཾ པལེཏི ན ཨུཔེཏི སངྑ’’ནྟི. (སུ. ནི. ༡༠༨༠; ཙཱུལ༹ནི. ཨུཔསཱིཝམཱཎཝཔུཙྪཱ ༡༡; ཨུཔསཱིཝམཱཎཝཔུཙྪཱནིདྡེས ༤༣) –

ཨིམཾ སུཏྟཔདཾ ཝཏྭཱ ‘‘ནཱམཀཱཡཏོ ཙ རཱུཔཀཱཡཏོ ཙ སུཝིམུཏྟཏྟཱ ཨུབྷཏོབྷཱགཝིམུཏྟོ’’ཏི ཝདནྟི. སུཏྟེ ཧི ཨཱཀིཉྩཉྙཱཡཏནལཱབྷིནོ ཨུཔསིཝབྲཱཧྨཎསྶ བྷགཝཏཱ ནཱམཀཱཡཱ ཝིམུཏྟོཏི ཨུབྷཏོབྷཱགཝིམུཏྟོཏི ཨཀྑཱཏོཏི. ཨཔརེ པན ‘‘སམཱཔཏྟིཡཱ ཝིཀྑམྦྷནཝིམོཀྑེན ¶ ཨེཀཝཱརཾ ཝིམུཏྟོ, མགྒེན སམུཙྪེདཝིམོཀྑེན ཨེཀཝཱརཾ ཝིམུཏྟོཏི ཨེཝཾ ཨུབྷཏོབྷཱགཝིམུཏྟོ’’ཏི ཝདནྟི. ཨེཏྠ པཋམཝཱདེ དྭཱིཧི བྷཱགེཧི ཝིམུཏྟོཏི ཨུབྷཏོབྷཱགཝིམུཏྟོ. དུཏིཡཝཱདེ ཨུབྷཏོབྷཱགཏོ ཝིམུཏྟོཏི ཨུབྷཏོབྷཱགཝིམུཏྟོ. ཏཏིཡཝཱདེ པན དྭཱིཧི བྷཱགེཧི དྭེ ཝཱརེ ཝིམུཏྟོཏི ཨཡམེཏེསཾ ཝིསེསོ. ཀིལེསེཧི ཝིམུཏྟོ ཀིལེསཱ ཝཱ ཝིཀྑམྦྷནསམུཙྪེདེཧི ཀཱཡདྭཡཏོ ཝིམུཏྟཱ ཨསྶཱཏི ཨཡམཏྠོ དཊྛབྦོ. ཏེནཱཧ ‘‘དྭཱིཧི བྷཱགེཧཱི’’ཏིཨཱདི.

སོཏི ཨུབྷཏོབྷཱགཝིམུཏྟོ. ཀཱམཉྩེཏྠ རཱུཔཱཝཙརཙཏུཏྠཛ྄ཛྷཱནམྤི ཨརཱུཔཱཝཙརཛ྄ཛྷཱནཾ ཝིཡ དུཝངྒིཀཾ ཨཱནེཉྫཔྤཏྟནྟི ཝུཙྩཏི. ཏཾ པན པདཊྛཱནཾ ཀཏྭཱ ཨརཧཏྟཾ པཏྟོ ཨུབྷཏོབྷཱགཝིམུཏྟོ ནཱམ ན ཧོཏི རཱུཔཀཱཡཏོ ཨཝིམུཏྟཏྟཱ. ཏཉྷི ཀིལེསཀཱཡཏོཝ ཝིམུཏྟཾ, ན རཱུཔཀཱཡཏོ, ཏསྨཱ ཏཏོ ཝུཊྛཱཡ ཨརཧཏྟཾ པཏྟོ ཨུབྷཏོབྷཱགཝིམུཏྟོ ན ཧོཏཱིཏི ཨཱཧ – ‘‘ཙཏུནྣཾ ཨརཱུཔ…པེ… པཉྩཝིདྷོ ཧོཏཱི’’ཏི. ‘‘རཱུཔཱི རཱུཔཱནི པསྶཏཱི’’ཏིཨཱདིཀེ ནིརོདྷསམཱཔཏྟིཨནྟེ ཨཊྛ ཝིམོཀྑེ ཝཏྭཱ – ‘‘ཡཏོ ཙ ཁོ, ཨཱནནྡ, བྷིཀྑུ ཨིམེ ཨཊྛ ཝིམོཀྑེ ཀཱཡེན ཕུསིཏྭཱ ཝིཧརཏི, པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟི, ཨཡཾ ཝུཙྩཏི, ཨཱནནྡ, བྷིཀྑུ ཨུབྷཏོབྷཱགཝིམུཏྟོ’’ཏི ཡདིཔི མཧཱནིདཱནེ (དཱི. ནི. ༢.༡༢༩-༡༣༠) ཝུཏྟཾ, ཏཾ པན ཨུབྷཏོབྷཱགཝིམུཏྟསེཊྛཝསེན ཝུཏྟནྟི ཨིདྷ སབྦཨུབྷཏོབྷཱགཝིམུཏྟསངྒཧཎཏྠཾ ‘‘པཉྩཝིདྷོ ཧོཏཱི’’ཏི ཝཏྭཱ ‘‘པཱལི༹ པནེཏྠ…པེ… ཨབྷིདྷམྨེ ཨཊྛཝིམོཀྑལཱབྷིནོ ཝསེན ཨཱགཏཱ’’ཏི ཨཱཧ. ཨིདྷཱཔི ཧི ཀཱིཊཱགིརིསུཏྟེ ‘‘ཨིདྷ, བྷིཀྑཝེ, ཨེཀཙྩོ པུགྒལོ…པེ… ཨུབྷཏོབྷཱགཝིམུཏྟོ’’ཏི ¶ ཨརཱུཔསམཱཔཏྟིཝསེན ཙཏྟཱརོ ཨུབྷཏོབྷཱགཝིམུཏྟཱ, སེཊྛོ ཙ ཝུཏྟོ ཝུཏྟལཀྑཎཱུཔཔཏྟིཏོ. ཡཐཱཝུཏྟེསུ ཧི པཉྩསུ པུརིམཱ ཙཏྟཱརོ ནིརོདྷཾ ན སམཱཔཛྫནྟཱིཏི པརིཡཱཡེན ཨུབྷཏོབྷཱགཝིམུཏྟཱ ནཱམ. ཨཊྛསམཱཔཏྟིལཱབྷཱི ཨནཱགཱམཱི ཏཾ སམཱཔཛྫིཏྭཱ ཏཏོ ཝུཊྛཱཡ ཝིཔསྶནཾ ཝཌྜྷེཏྭཱ ཨརཧཏྟཾ པཏྟོཏི ནིཔྤརིཡཱཡེན ཨུབྷཏོབྷཱགཝིམུཏྟསེཊྛོ ནཱམ.

ཀཏམོ ཙ པུགྒལོཏིཨཱདཱིསུ ཀཏམོཏི པུཙྪཱཝཙནཾ, པུགྒལོཏི ཨསཱདྷཱརཎཏོ པུཙྪིཏབྦཝཙནཾ. ཨིདྷཱཏི ཨིམསྨིཾ སཱསནེ. ཨེཀཙྩོཏི ཨེཀོ ¶ . ཨཊྛ ཝིམོཀྑེ ཀཱཡེན ཕུསིཏྭཱ ཝིཧརཏཱིཏི ཨཊྛ སམཱཔཏྟིཡོ སཧཛཱཏནཱམཀཱཡེན པཊིལབྷིཏྭཱ ཝིཧརཏི. པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟཱིཏི ཝིཔསྶནཱཔཉྙཱཡ སངྑཱརགཏཾ, མགྒཔཉྙཱཡ ཙཏྟཱརི སཙྩཱནི པསྶིཏྭཱ ཙཏྟཱརོཔི ཨཱསཝཱ པརིཀྑཱིཎཱ ཧོནྟཱིཏི ཨེཝམཏྠོ དཊྛབྦོ.

པཉྙཱཝིམུཏྟོཏི ཝིསེསཏོ པཉྙཱཡ ཨེཝ ཝིམུཏྟོ, ན ཏསྶཱ པཏིཊྛཱནབྷཱུཏེན ཨཊྛཝིམོཀྑསངྑཱཏེན སཱཏིསཡེན སམཱདྷིནཱཏི པཉྙཱཝིམུཏྟོ. ཡོ ཨརིཡོ ཨནདྷིགཏཨཊྛཝིམོཀྑེན སབྦསོ ཨཱསཝེཧི ཝིམུཏྟོ, ཏསྶེཏཾ ཨདྷིཝཙནཾ. ཨདྷིགཏེཔི ཧི རཱུཔཛ྄ཛྷཱནཝིམོཀྑེ ན སོ སཱཏིསཡསམཱདྷིནིསྶིཏོཏི ན ཏསྶ ཝསེན ཨུབྷཏོབྷཱགཝིམུཏྟོ ཧོཏཱིཏི ཝུཏྟོཝཱཡམཏྠོ. ཨརཱུཔཛ྄ཛྷཱནེསུ པན ཨེཀསྨིམྤི སཏི ཨུབྷཏོབྷཱགཝིམུཏྟོཡེཝ ནཱམ ཧོཏི. ཏེན ཧི ཨཊྛཝིམོཀྑེཀདེསེན ཏཾནཱམདཱནསམཏྠེན ཨཊྛཝིམོཀྑལཱབྷཱིཏྭེཝ ཝུཙྩཏི. སམུདཱཡེ ཧི པཝཏྟོ ཝོཧཱརོ ཨཝཡཝེཔི དིསྶཏི ཡཐཱ ‘‘སཏྟིསཡོ’’ཏི. པཱལཱི༹ཏི ཨབྷིདྷམྨཔཱལི༹. ཨེཏྠཱཏི ཨེཏིསྶཾ པཉྙཱཝིམུཏྟིཀཐཱཡཾ. ཨཊྛཝིམོཀྑཔཊིཀྑེཔཝསེནེཝཱཏི ཨཝདྷཱརཎེན ཨིདྷཱཔི པཊིཀྑེཔཝསེནེཝ ཨཱགཏབྷཱཝཾ དསྶེཏི. ཏེནཱཧ ‘‘ཀཱཡེན ཕུསིཏྭཱ ཝིཧརཏཱི’’ཏི.

ཕུཊྛནྟཾ སཙྪིཀརོཏཱིཏི ཕུཊྛཱནཾ ཨནྟོ ཕུཊྛནྟོ, ཕུཊྛཱནཾ ཨརཱུཔཛ྄ཛྷཱནཱནཾ ཨནནྟརོ ཀཱལོཏི ཨདྷིཔྤཱཡོ. ཨཙྩནྟསཾཡོགེ ཙེཏཾ ཨུཔཡོགཝཙནཾ, ཕུཊྛཱནནྟརཀཱལམེཝ སཙྪིཀརོཏི སཙྪིཀཱཏབྦོཔཱཡེནཱཏི ཝུཏྟཾ ཧོཏི. བྷཱཝནཔུཾསཀཾ ཝཱ ཨེཏཾ ‘‘ཨེཀམནྟཾ ནིསཱིདཱི’’ཏིཨཱདཱིསུ (པཱརཱ. ༢) ཝིཡ. ཡོ ཧི ཨརཱུཔཛ྄ཛྷཱནེན རཱུཔཀཱཡཏོ ནཱམཀཱཡེཀདེསཏོ ཙ ཝིཀྑམྦྷནཝིམོཀྑེན ཝིམུཏྟོ, ཏེན ནིརོདྷསངྑཱཏོ ཝིམོཀྑོ ཨཱལོཙིཏོ པཀཱསིཏོ ཝིཡ ཧོཏི, ན པན ཀཱཡེན སཙྪིཀཏོ, ནིརོདྷཾ པན ཨཱརམྨཎཾ ཀཏྭཱ ཨེཀཙྩེསུ ཨཱསཝེསུ ཁེཔིཏེསུ ཏེན སོ སཙྪིཀཏོ ཧོཏི, ཏསྨཱ སོ སཙྪིཀཱཏབྦཾ ནིརོདྷཾ ཡཐཱཨཱལོཙིཏཾ ནཱམཀཱཡེན སཙྪིཀརོཏཱིཏི ‘‘ཀཱཡསཀྑཱི’’ཏི ཝུཙྩཏི, ན ཏུ ‘‘ཝིམུཏྟོ’’ཏི ཨེཀཙྩཱནཾ ཨཱསཝཱནཾ ¶ ཨཔརིཀྑཱིཎཏྟཱ. ཏེནཱཧ ¶ – ‘‘ཛྷཱནཕསྶཾ པཋམཾ ཕུསཏི, པཙྪཱ ནིརོདྷཾ ནིབྦཱནཾ སཙྪིཀརོཏཱི’’ཏི. ཨཡཾ ཙཏུནྣཾ ཨརཱུཔསམཱཔཏྟཱིནཾ ཨེཀེཀཏོ ཝུཊྛཱཡ སངྑཱརེ སམྨསིཏྭཱ ཀཱཡསཀྑིབྷཱཝཾ པཏྟཱནཾ ཙཏུནྣཾ, ནིརོདྷཱ ཝུཊྛཱཡ ཨགྒམགྒཔྤཏྟཨནཱགཱམིནོ ཙ ཝསེན ཨུབྷཏོབྷཱགཝིམུཏྟོ ཝིཡ པཉྩཝིདྷོ ནཱམ ཧོཏི. ཏེན ཝུཏྟཾ ཨབྷིདྷམྨཊཱིཀཱཡཾ ‘‘ཀཱཡསཀྑིམྷིཔི ཨེསེཝ ནཡོ’’ཏི.

དིཊྛནྟཾ པཏྟོཏི དསྶནསངྑཱཏསྶ སོཏཱཔཏྟིམགྒཉཱཎསྶ ཨནནྟརཾ པཏྟོཏི ཝུཏྟཾ ཧོཏི. ‘‘དིཊྛཏྟཱ པཏྟོ’’ཏིཔི པཱཋོ. ཨེཏེན ཙཏུསཙྩདསྶནསངྑཱཏཱཡ དིཊྛིཡཱ ནིརོདྷསྶ པཏྟཏཾ དཱིཔེཏི. ཏེནཱཧ ‘‘དུཀྑཱ སངྑཱརཱ, སུཁོ ནིརོདྷོཏི ཉཱཏཾ ཧོཏཱི’’ཏི. ཏཏྠ པཉྙཱཡཱཏི མགྒཔཉྙཱཡ. པཋམཕལཊྛཏོ ཡཱཝ ཨགྒམགྒཊྛཱ, ཏཱཝ དིཊྛིཔྤཏྟོ. ཏེནཱཧ ‘‘སོཔི ཀཱཡསཀྑི ཝིཡ ཚབྦིདྷོ ཧོཏཱི’’ཏི. ཡཐཱ པན པཉྙཱཝིམུཏྟོ པཉྩཝིདྷོ ཝུཏྟོ, ཨེཝཾ ཨཡམྤི སུཀྑཝིཔསྶཀོ, ཙཏཱུཧི རཱུཔཛ྄ཛྷཱནེཧི ཝུཊྛཱཡ དིཊྛིཔྤཏྟབྷཱཝཔྤཏྟཱ ཙཏྟཱརོ ཙཱཏི པཉྩཝིདྷོ ཧོཏཱིཏི ཝེདིཏབྦོ. སདྡྷཱཝིམུཏྟེཔི ཨེསེཝ ནཡོ. ཨིདཾ དུཀྑནྟི ཨེཏྟཀཾ དུཀྑཾ, ན ཨིཏོ ཨུདྡྷཾ དུཀྑནྟི. ཡཐཱབྷཱུཏཾ པཛཱནཱཏཱིཏི ཋཔེཏྭཱ ཏཎྷཾ ཨུཔཱདཱནཀྑནྡྷཔཉྩཀཾ དུཀྑསཙྩནྟི ཡཱཐཱཝཏོ པཛཱནཱཏི. ཡསྨཱ པན ཏཎྷཱ དུཀྑཾ ཛནེཏི ནིབྦཏྟེཏི, ཏཏོ ཏཾ དུཀྑཾ སམུདེཏི, ཏསྨཱ ནཾ ‘‘ཨཡཾ དུཀྑསམུདཡོ’’ཏི ཡཐཱབྷཱུཏཾ པཛཱནཱཏི ཡསྨཱ པན ཨིདཾ དུཀྑཾ སམུདཡོ ཙ ནིབྦཱནཾ པཏྭཱ ནིརུཛ྄ཛྷཏི ཨཔྤཝཏྟིཾ གཙྪཏི, ཏསྨཱ ‘‘ཨཡཾ དུཀྑནིརོདྷོ’’ཏི ཡཐཱབྷཱུཏཾ པཛཱནཱཏི. ཨརིཡོ པན ཨཊྛངྒིཀོ མགྒོ ཏཾ དུཀྑནིརོདྷཾ གཙྪཏི, ཏེན ‘‘ཨཡཾ དུཀྑནིརོདྷགཱམིནིཔཊིཔདཱ’’ཏི ཡཐཱབྷཱུཏཾ པཛཱནཱཏི. ཨེཏྟཱཝཏཱ ནཱནཀྑཎེ སཙྩཝཝཏྠཱནཾ དསྶིཏཾ. ཨིདཱནི ཏཾ ཨེཀཀྑཎེ དསྶེཏུཾ ‘‘ཏཐཱགཏཔྤཝེདིཏཱ’’ཏིཨཱདི ཝུཏྟཾ, ཏསྶཏྠོ ཨཱགམིསྶཏི.

སདྡྷཱཡ ཝིམུཏྟོཏི ཨེཏེན སབྦཐཱ ཨཝིམུཏྟསྶཔི སདྡྷཱམཏྟེན ཝིམུཏྟབྷཱཝོ དཱིཔིཏོ ཧོཏི. སདྡྷཱཝིམུཏྟོཏི ཝཱ སདྡྷཱཡ ཨདྷིམུཏྟོཏི ཨཏྠོ. ཝུཏྟནཡེནེཝཱཏི ‘‘སོཏཱཔཏྟིཕལ’’ནྟིཨཱདིནཱ ཝུཏྟནཡེན. སདྡཧནྟསྶཱཏི ‘‘ཨེཀཾསཏོ ཨཡཾ པཊིཔདཱ ཀིལེསཀྑཡཾ ཨཱཝཧཏི སམྨཱསམྦུདྡྷེན བྷཱསིཏཏྟཱ’’ཏི ཨེཝཾ སདྡཧནྟསྶ. ཡསྨཱ པནསྶ ཨནིཙྩཱནུཔསྶནཱདཱིཧི ¶ ནིཙྩསཉྙཱཔཧཱནཝསེན བྷཱཝནཱཡ པུབྦེནཱཔརཾ ཝིསེསཾ པསྶཏོ ཏཏྠ ཏཏྠ པཙྩཀྑཏཱཔི ཨཏྠི, ཏསྨཱ ཝུཏྟཾ ‘‘སདྡཧནྟསྶ ཝིཡཱ’’ཏི. སེསཔདདྭཡཾ ཏསྶེཝ ཝེཝཙནཾ. ཨེཏྠ ཙ པུབྦབྷཱགམགྒབྷཱཝནཱཏི ཝཙནེན ཨཱགམནཱིཡཔཊིཔདཱནཱནཏྟེན སདྡྷཱཝིམུཏྟདིཊྛིཔྤཏྟཱནཾ པཉྙཱནཱནཏྟཾ ཧོཏཱིཏི དསྶིཏཾ. ཨབྷིདྷམྨཊྛཀཐཱཡམྤི (པུ. པ. ཨཊྛ. ༢༨) ‘‘ནེསཾ ཀིལེསཔྤཧཱནེ ¶ ནཱནཏྟཾ ནཏྠི, པཉྙཱཡ ནཱནཏྟཾ ཨཏྠིཡེཝཱ’’ཏི ཝཏྭཱ – ‘‘ཨཱགམནཱིཡནཱནཏྟེནེཝ སདྡྷཱཝིམུཏྟོ དིཊྛིཔྤཏྟཾ ན པཱཔུཎཱཏཱིཏི སནྣིཊྛཱནཾ ཀཏ’’ནྟི ཝུཏྟཾ.

པཉྙཱསངྑཱཏཾ དྷམྨཾ ཨདྷིམཏྟཏཱཡ པུབྦངྒམཾ ཧུཏྭཱ པཝཏྟཾ ཨནུསྶརཏཱིཏི དྷམྨཱནུསཱརཱི. ཏེནཱཧ ‘‘དྷམྨོ’’ཏིཨཱདི. སདྡྷཾ ཨནུསྶརཏི སདྡྷཱཔུབྦངྒམཾ མགྒཾ བྷཱཝེཏཱིཏི ཨིམམཏྠཾ ‘‘ཨེསེཝ ནཡོ’’ཏི ཨཏིདིསཏི. པཉྙཾ ཝཱཧེཏཱིཏི པཉྙཱཝཱཧཱི, པཉྙཾ སཱཏིསཡཾ པཝཏྟེཏཱིཏི ཨཏྠོ. ཏེནཱཧ ‘‘པཉྙཱཔུབྦངྒམཾ ཨརིཡམགྒཾ བྷཱཝེཏཱི’’ཏི. སདྡྷཱཝཱཧིནྟི ཨེཏྠ ཝུཏྟནཡེན ཨཏྠོ ཝེདིཏབྦོ. ཨུབྷཏོབྷཱགཝིམུཏྟཱདིཀཐཱཏི ཨུབྷཏོབྷཱགཝིམུཏྟཱདཱིསུ ཨཱགམནཏོ པཊྛཱཡ ཝཏྟབྦཀཐཱ. ཨེཏེསནྟི ཡཐཱཝུཏྟཱནཾ ཨུབྷཏོབྷཱགཝིམུཏྟཱདཱིནཾ. ཨིདྷཱཏི ཨིམསྨིཾ ཀཱིཊཱགིརིསུཏྟེ. ནནུ ཙ ཨཊྛསམཱཔཏྟིལཱབྷིཝསེན ཨུབྷཏོབྷཱགཝིམུཏྟོ ཀཱཡསཀྑཱིཨཱདཡོ ཙ ཨབྷིདྷམྨེ ཨཱགཏཱ, ཀཐམིདྷ ཨརཱུཔཛ྄ཛྷཱནལཱབྷཱིཝསེནེཝ ཨུདྡྷཊཱཏི ཙོདནཾ སནྡྷཱཡཱཧ ‘‘ཡསྨཱ’’ཏིཨཱདི.

ཕུསིཏྭཱ པཏྭཱ. པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟཱིཏི ན ཨཱསཝཱ པཉྙཱཡ པསྶཱིཡནྟི, དསྶནཀཱརཎཱ པཉྙཱཡ པརིཀྑཱིཎཱ ‘‘དིསྭཱ པཉྙཱཡ པརིཀྑཱིཎཱ’’ཏི ཝུཏྟཱ. དསྶནཱཡཏྟཔརིཀྑཡཏྟཱ ཨེཝ ཧི དསྶནཾ ཨཱསཝཱནཾ ཁཡསྶ པུརིམཀིརིཡཱ ཧོཏཱིཏི. ཏཐཱགཏེན པཝེདིཏཱཏི བོདྷིམཎྜེ ནིསཱིདིཏྭཱ ཏཐཱགཏེན པཊིཝིདྡྷཱ ཝིདིཏཱ པཙྪཱ པརེསཾ པཱཀཊཱིཀཏཱ. ‘‘ཙཏུསཙྩདྷམྨཱ’’ཏི ཝཏྭཱ ཏདནྟོགདྷཏྟཱ སཱིལཱདཱིནཾ ‘‘ཨིམསྨིཾ ཋཱནེ སཱིལཾ ཀཐིཏ’’ནྟིཨཱདི ཝུཏྟཾ. ཨཏྠེནཱཏི ཨཝིཔྤཊིསཱརཱདིཔཡོཛནེན ཏསྨིཾ ཏསྨིཾ པཱིཏིཨཱདིཀེན ཨཏྠེན. ཀཱརཎེནཱཏི སཔྤུརིསཱུཔནིསྶཡཱདིནཱ ཀཱརཎེན ཏསྨིཾ ཏསྨིཾ སམཱདྷིཨཱདིཔདཊྛཱནཏཱཡ སཱིལཱདི ¶ ཀཱརཎེ. ཙིཎྞཙརིཏཏྟཱཏི སདྡྷཱཙིཎྞབྷཱཝེན སམྦོདྷཱཝཧབྷཱཝེ. ཏཏྠ ཏཏྠ ཝིཙརིཏཱ ཝིསེསེན ཙརིཏཱ, ཏེསུ ཏེན པཉྙཱ སུཊྛུ ཙརཱཔིཏཱཏི ཨཏྠོ. པཏིཊྛིཏཱ ཧོཏི མགྒེན ཨཱགཏཏྟཱ. མཏྟཱཡ པརིཏྟཔྤམཱཎེན. ཨོལོཀནཾ ཁམནྟི, པཉྙཱཡ གཧེཏབྦཏཾ ཨུཔེནྟི.

ཏཡོཏི ཀཱཡསཀྑིདིཊྛིཔྤཏྟསདྡྷཱཝིམུཏྟཱ. ཡཐཱཋིཏོཝ པཱལི༹ཨཏྠོ, ན ཏཏྠ ཀིཉྩི ནིདྡྷཱརེཏྭཱ ཝཏྟབྦཾ ཨཏྠཱིཏི སུཏྟནྟཔརིཡཱཡེན ཨཝུཏྟཾ ཝདཏི. ཏསྶ མགྒསྶཱཏི སོཏཱཔཏྟིམགྒསྶ ཡཾ ཀཱཏབྦཾ, ཏསྶ ཨདྷིགཏཏྟཱ. ཨུཔརི པན ཏིཎྞཾ མགྒཱནཾ ཨཏྠཱཡ སེཝམཱནཱ ཨནུལོམསེནཱསནཾ, བྷཛམཱནཱ ཀལྱཱཎམིཏྟེ, སམནྣཱནཡམཱནཱ ཨིནྡྲིཡཱནི ཨནུཔུབྦེན བྷཱཝནཱམགྒཔྤཊིཔཱཊིཡཱ ཨརཧཏྟཾ པཱཔུཎིསྶནྟི མགྒསྶ ཨནེཀཙིཏྟཀྑཎིཀཏཱཡཱཏི ཨཡམེཏྠ སུཏྟཔདེསེ པཱལི༹ཡཱ ཨཏྠོ.

ཨིམམེཝ ¶ པཱལི༹ཾ གཧེཏྭཱཏི ‘‘ཀཏམོ ཙ པུགྒལོ སདྡྷཱནུསཱརཱི’’ཏི མགྒཊྛེ པུགྒལེ ཝཏྭཱ ‘‘ཨིམསྶ ཁོ ཨཧཾ, བྷིཀྑཝེ’’ཏིཨཱདིནཱ ཏེསཾ ཝསེན ཨནུལོམསེནཱསནསེཝནཱདཱིནཾ ཝུཏྟཏྟཱ ཨིམམེཝ ཡཐཱཝུཏྟཾ པཱལི༹པདེསཾ གཧེཏྭཱ ‘‘ལོཀུཏྟརདྷམྨོ བཧུཙིཏྟཀྑཎིཀོ’’ཏི ཝདཏི. སོ ཝཏྟབྦོཏི སོ ཝིཏཎྜཝཱདཱི ཨེཝཾ ཝཏྟབྦོ. ཡདི མགྒཊྛཔུགྒལེ ཝཏྭཱ ཨནུལོམིཀསེནཱསནསེཝནཱདི པཱལི༹ཡཾ ཝུཏྟནྟི མགྒསམངྒིནོ ཨེཝ ཧུཏྭཱ ཏེ ཏཐཱ པཊིཔཛྫནྟི, ཨེཝཾ སནྟེ སེནཱསནཔཊིསཾཡུཏྟརཱུཔཱདིཝིཔསྶནགྒཧཎསྨིཾ ཏཝ མཏེན མགྒསམངྒིནོ ཨེཝ ཨཱཔཛྫེཡྻུཾ, ན ཙེཏཾ ཨེཝཾ ཧོཏི, ཏསྨཱ སུཏྟཾ མེ ལདྡྷནྟི ཡཾ ཀིཉྩི མཱ ཀཐེཧཱིཏི ཝཱརེཏབྦོ. ཏེནཱཧ ‘‘ཡདི ཨཉྙེན ཙིཏྟེནཱ’’ཏིཨཱདི. ཏཏྠ ཨེཝཾ སནྟེཏི ནཱནཱཙིཏྟེནེཝ སེནཱསནཔཊིསེཝནཱདིཀེ སཏི. ཏཏྠ པཱལི༹ཡཾ ཡདི ལོཀུཏྟརདྷམྨསམངྒིནོ ཨེཝ པཉྩཝིཉྙཱཎསམངྒིཀཱལེཔི ལོཀུཏྟརསམངྒིཏཾ སཙེ སམྤཊིཙྪསི, སཏྠཱརཱ སདྡྷིཾ པཊིཝིརུཛ྄ཛྷསི སུཏྟཝིརོདྷདཱིཔནཏོ. ཏེནཱཧ ‘‘སཏྠཱརཱ ཧཱི’’ཏིཨཱདི. དྷམྨཝིཙཱརཎཱ ནཱམ ཏུཡ྄ཧཾ ཨཝིསཡོ, ཏསྨཱ ཡཱགུཾ པིཝཱཧཱིཏི ཨུཡྻོཛེཏབྦོ.

༡༨༣. ཨཱདིཀེནེཝཱཏི པཋམེནེཝ. ཨནུཔུབྦསིཀྑཱཏི ཨནུཔུབྦེནེཝ པཝཏྟསིཀྑཱཡ. ཏེནཱཧ ‘‘ཀརཎཏྠེ པཙྩཏྟཝཙན’’ནྟི. སདྡྷཱ ཛཱཏཱ ཨེཏསྶཱཏི སདྡྷཱཛཱཏོ, ཨགྱཱཧིཏཱཏིཔཀྑེཔེན ཛཱཏ-སདྡསྶ པཙྪཱཝཙནཾ ¶ . ཨེཝམེཏནྟི ཨདྷིམུཙྩནཾ ཨོཀཔྤནིཡསདྡྷཱ. སནྟིཀེ ནིསཱིདཏི ཨུཔཊྛཱནཝསེན. སཱདྷུཀཾ ཀཏྭཱ དྷཱརེཏཱིཏི ཡཐཱསུཏཾ དྷམྨཾ ཝཱཙུགྒཏཀརཎཝསེན ཏཾ པགུཎཾ ཀཏྭཱ སཱརཝསེན དྷཱརེཏི. ཚནྡོ ཛཱཡཏཱིཏི དྷམྨེསུ ནིཛ྄ཛྷཱནཀྑམེསུ ཨིམེ དྷམྨེ བྷཱཝནཱཔཉྙཱཡ པཙྩཀྑཏོ ཨུསྶཱམཱིཏི ཀཏྟུཀམྱཏཱཀུསལཙྪནྡོ ཛཱཡཏི. ཨུསྶཧཏཱིཏི ཚནྡོ ཨུཔྤཱདམཏྟེ ཨཊྛཏྭཱ ཏཏོ བྷཱཝནཱརམྦྷཝསེན ཨུསྶཧཏི. ཏུལཡཏིཏི སམྨསནཝསེན སངྑཱརེ. ཏཱིརཎཝིཔསྶནཱཡ ཏུལཡནྟོཏི ཏཱིརཎཔརིཉྙཱཡ ཛཱནིཏྭཱ ཨུཔརི པཧཱནཔརིཉྙཱཡ ཝསེན པརིཏུལཡནྟོ པཊིཛཱནནྟོ. མགྒཔདྷཱནཾ པདཧཏཱིཏི མགྒལཀྑཎཾ པདྷཱནིཀཾ མགྒཾ པདཧཏི. པེསིཏཙིཏྟོཏི ནིབྦཱནཾ པཏི པེསིཏཙིཏྟོ. ནཱམཀཱཡེནཱཏི མགྒཔྤཊིཔཱཊིཡཱ ཏཾཏཾམགྒསམྤཡུཏྟནཱམཀཱཡེན. ན པན ཀིཉྩི ཨཱཧཱཏི དཱུརཏཱཡ སམཱནཾ ན ཀིཉྩི ཝཙནཾ བྷགཝཱ ཨཱཧ ཏེ དལ༹ྷཏརཾ ནིགྒཎྷིཏུཾ.

༡༨༤. པཎེན ཝོཧཱརེན བྱཱཀརཎཾ པཎཝིཡཱ, པཎཝིཡཱ ཨབྷཱཝེན ཨོཔཎཝིཡཱ, ན ཨུཔེཏཱིཏི ན ཡུཛྫཏི. ཏནྟི ཨིདཾ ཨིདྷ ཨདྷིཔྤེཏཾ པཎོ པཎཝིཡཾ དསྶེཏུཾ. ཏཡིདཾ སབྦཾ བྷགཝཱ ‘‘མཡཾ ཁོ, ཨཱཝུསོ, སཱཡཉྩེཝ བྷུཉྫཱམཱ’’ཏི ཨསྶཛིཔུནབྦསུཀེཧི ཝུཏྟཾ སིཀྑཱཡ ཨཝཏྟནབྷཱཝདཱིཔནཝཙནཾ སནྡྷཱཡ ཝདཏི.

ཨུཀྑིཔིཏྭཱཏི ¶ སཱིསེན གཧེཏྭཱ ཝིཡ སམཱདཱཡ. ཨནུདྷམྨོཏི ཨནུརཱུཔོ སབྷཱཝོ, སཱཝཀབྷཱཝསྶ ཨནུཙྪཝིཀཱ པཊིཔཏྟི. རོཧནཱིཡནྟི ཝིརུལ༹ྷིབྷཱཝཾ. སིནིཡ྄ཧཏི ཨེཏྠ, ཨེཏེན ཝཱཏི སིནེཧོ, ཀཱརཎཾ. ཏཾ ཨེཏྠ ཨཏྠཱིཏི སིནེཧཝནྟཾ, པཱདཀནྟི ཨཏྠོ. ཏཙོ ཨེཀཾ ཨངྒནྟི ཏཙོ ཝཱིརཔཀྑབྷཱཝེ ཨེཀམངྒཾ. པདྷཱནཾ ཨནུཡུཉྫནྟསྶ ཧི ཏཙེ པལུཛྫམཱནེཔི ཏཾནིམིཏྟཾ ཨཝོསཱནཾ ཨནཱཔཛྫནཀསྶེཝ ཝཱིརིཡསྶ ཨེཀཾ ཨངྒཾ ཨེཀཾ ཀཱརཎཾ. ཨེཝཾ སེསེསུ ཝཏྟབྦཾ. ཏེནཱཧ – ‘‘ཨརཧཏྟཾ ཨཔྤཏྭཱ ན ཝུཊྛཧིསྶཱམཱིཏི ཨེཝཾ པཊིཔཛྫཏཱི’’ཏི. སེསཾ སུཝིཉྙེཡྻམེཝ.

ཀཱིཊཱགིརིསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

ནིཊྛིཏཱ ཙ བྷིཀྑུཝགྒཝཎྞནཱ.

༣. པརིབྦཱཛཀཝགྒོ

༡. ཏེཝིཛྫཝཙྪསུཏྟཝཎྞནཱ

༡༨༥. ཏཏྠཱཏི ¶ ¶ ཨེཀཔུཎྜརཱིཀསཉྙིཏེ པརིབྦཱཛཀཱརཱམེ. ཨནཱགཏཔུབྦོ ལོཀིཡསམུདཱཧཱརཝསེན ‘‘ཙིརསྶཾ ཁོ, བྷནྟེ’’ཏིཨཱདིནཱ ཝུཙྩཏི, ཨཡཾ པནེཏྠ ཨཱགཏཔུབྦཏཾ ཨུཔཱདཱཡ ཏཐཱ ཝུཏྟོ. བྷགཝཱ ཧི ཀེསཉྩི ཝིམུཏྟིཛནནཏྠཾ, ཀེསཉྩི ཨིནྡྲིཡཔརིཔཱཀཏྠཾ, ཀེསཉྩི ཝིསེསཱདྷིགམཏྠཾ ཀདཱཙི ཏིཏྠིཡཱརཱམཾ ཨུཔགཙྪཏི. ཨནནུཉྙཱཡ ཋཏྭཱཏི ཨནནུཛཱནིཏབྦེ ཋཏྭཱ. ཨནུཛཱནིཏབྦཾ སིཡཱ ཨནཉྙཱཏསྶ ཉེཡྻསྶ ཨབྷཱཝཏོ. ཡཱཝཏཀཉྷི ཉེཡྻཾ, ཏཱཝཏཀཾ བྷགཝཏོ ཉཱཎཾ, ཡཱཝཏཀཉྩ བྷགཝཏོ ཉཱཎཾ ཏཱཝཏཀཾ ཉེཡྻཾ. ཏེནེཝཱཧ – ‘‘ན ཏསྶ ཨདིཊྛམིདྷཏྠི ཀིཉྩི, ཨཐོ ཨཝིཉྙཱཏམཛཱནིཏབྦ’’ནྟིཨཱདི (མཧཱནི. ༡༥༦; ཙཱུལ༹ནི. དྷོཏཀམཱཎཝཔུཙྪཱནིདྡེས ༣༢; པཊི. མ. ༡.༡༢༡). སབྦཉྙུཏཉྙཱཎེན ཧི བྷགཝཱ ཨཱཝཛྫེཏྭཱ པཛཱནཱཏི. ཝུཏྟཉྷེཏཾ ‘‘ཨཱཝཛྫནཔཊིབདྡྷཾ བུདྡྷསྶ བྷགཝཏོ ཉཱཎ’’ནྟི (མི. པ. ༤.༡.༢). ཡདི ཨེཝཾ ‘‘ཙརཾ སམཱཧིཏོ ནཱགོ, ཏིཊྛཾ ནཱགོ སམཱཧིཏོ’’ཏི (ཨ. ནི. ༦.༤༣) ཨིདཾ སུཏྟཔདཾ ཀཐནྟི? ཝིཀྑེཔཱབྷཱཝདཱིཔནཔདམེཏཾ, ན ཨནཱཝཛྫནེནཔི ཉཱཎཱནཾ པཝཏྟིཔརིདཱིཔནཾ. ཡཾ པནེཏྠ ཝཏྟབྦཾ, ཏཾ ཧེཊྛཱ ཝིཏྠཱརཏོ ཝུཏྟམེཝ.

༡༨༦. ཡཱཝདེཝཱཏི ཨིདཾ ཡཐཱརུཙི པཝཏྟི ཝིཡ ཨཔརཱཔརུཔྤཏྟིཔི ཨིཙྪིཏབྦཱཏི ཏདབྷཱཝཾ དསྶེནྟོ ཨཱཧ – ‘‘སཀིཾ ཁཱིཎཱནཾ ཨཱསཝཱནཾ པུན ཁེཔེཏབྦཱབྷཱཝཱ’’ཏི. པཙྩུཔྤནྣཛཱནནགུཎནྟི ཨིདཾ དིབྦཙཀྑུཉཱཎསྶ པརིབྷཎྜཉཱཎཾ ཨནཱགཏཾསཉཱཎཾ ཨནཱདིཡིཏྭཱ ཝུཏྟཾ, ཏསྶ པན ཝསེན ཨནཱགཏཾསཉཱཎགུཎཾ དསྶེཏཱིཏི ཝཏྟབྦཾ སིཡཱ.

གིཧིཔརིཀྑཱརེསཱུཏི ཝཏྠཱབྷརཎཱདིདྷནདྷཉྙཱདིགིཧིཔརིཀྑཱརེསུ. གིཧིལིངྒཾ པན ཨཔྤམཱཎཾ, ཏསྨཱ གིཧིབནྡྷནཾ ཚིནྡིཏྭཱ དུཀྑསྶནྟཀརཱ ཧོནྟིཡེཝ. སཏི པན དུཀྑསྶནྟཀིརིཡཱཡ གིཧིལིངྒེ ཏེ ན ཏིཊྛནྟིཡེཝཱཏི དསྶེནྟོ ‘‘ཡེཔཱི’’ཏིཨཱདིམཱཧ. སུཀྑཱཔེཏྭཱ སམུཙྪིནྡིཏྭཱ. ཨརཧཏྟཾ ¶ པཏྟདིཝསེཡེཝ པབྦཛནཾ ཝཱ པརིནིབྦཱནཾ ཝཱཏི ཨཡཾ ནཡོ ན སབྦསཱདྷཱརཎོཏི ཨཱཧ ‘‘བྷཱུམདེཝཏཱ པན ཏིཊྛནྟཱི’’ཏི. ཏཏྠ ཀཱརཎཝཙནཾ ¶ ‘‘ནིལཱིཡནོཀཱསསྶ ཨཏྠིཏཱཡཱ’’ཏི. ཨརཉྙཔབྦཏཱདིཔཝིཝེཀཊྛཱནཾ ནིལཱིཡནོཀཱསོ. སེསཀཱམབྷཝེཏི ཀཱམལོཀེ. ལལི༹ཏཛནསྶཱཏི ཨཱབྷརཎཱལངྐཱརནཙྩགཱིཏཱདིཝསེན ཝིལཱསཡུཏྟཛནསྶ.

སོཔཱིཏི ‘‘སོ ཨཉྙཏྲ ཨེཀེནཱ’’ཏི ཝུཏྟོ སོཔི. ཀརཏོ ན ཀརཱིཡཏི པཱཔནྟི ཨེཝཾ ན ཀིརིཡཾ པཊིབཱཧཏི. ཡདི ཨཏྟཱནཾཡེཝ གཧེཏྭཱ ཀཐེཏི, ཨཐ ཀསྨཱ མཧཱསཏྟོ ཏདཱ ཨཱཛཱིཝཀཔབྦཛྫཾ ཨུཔགཙྪཱིཏི ཨཱཧ ‘‘ཏདཱ ཀིརཱ’’ཏིཨཱདི. ཏསྶཔཱིཏི ན ཀེཝལཾ ཨཉྙེསཾ ཨེཝ པཱསཎྜཱནཾ, ཏསྶཔི. ཝཱིརིཡཾ ན ཧཱཔེསཱིཏི ཏཔོཛིགུཙྪཝཱདཾ སམཱདིཡིཏྭཱ ཋིཏོ ཝིརཱགཏྠཱཡ ཏཾ སམཱདིཎྞཝཏྟཾ ན པརིཙྩཛི, སཏྠུསཱསནཾ ན ཚཌྜེསི. ཏེནཱཧ – ‘‘ཀིརིཡཝཱདཱི ཧུཏྭཱ སགྒེ ནིབྦཏྟཏཱི’’ཏི.

ཏེཝིཛྫཝཙྪསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༢. ཨགྒིཝཙྪསུཏྟཝཎྞནཱ

༡༨༧. ལོཀསྶ ¶ སསྶཏཏཱཔཝཏྟིཔཊིཀྑེཔཝསེན པཝཏྟོ ཝཱདོ ཨུཙྪེདཝཱདོ ཨེཝ ཧོཏཱིཏི སསྶཏགྒཱཧཱབྷཱཝེ ཨུཙྪེདགྒཱཧབྷཱཝཏོ པུན པརིབྦཱཛཀེན ‘‘ཨསསྶཏོ ལོཀོ’’ཏི ཝདནྟེན ཨུཙྪེདགྒཱཧོ པུཙྪིཏོ, བྷགཝཏཱཔི སོ ཨེཝ པཊིཀྑིཏྟོཏི ཨཱཧ ‘‘དུཏིཡེ ནཱཧཾ ཨུཙྪེདདིཊྛིཀོ’’ཏི. ཨནྟཱནནྟིཀཱདིཝསེནཱཏི ཨེཏྠ ཨནྟཱནནྟིཀགྒཧཎེན ཨནྟཝཱ ལོཀོ ཨནནྟཝཱ ལོཀོཏི ཨིམཾ ཝཱདདྭཡམཱཧ. ཨཱདི-སདྡེན ‘‘ཏཾ ཛཱིཝཾ ཏཾ སརཱིར’’ནྟིཨཱདིཝཱདཙཏུཀྐཾ སངྒཎྷཱཏི, ཨིཏརཾ པན དྭཡཾ སརཱུཔེནེཝ གཧིཏནྟི. པཊིཀྑེཔོ ཝེདིཏབྦོཏི ‘‘ཏཏིཡེ ནཱཧཾ ཨནྟཝཱདིཊྛིཀོ, ཙཏུཏྠེ ནཱཧཾ ཨནནྟཝཱདིཊྛིཀོ’’ཏི ཨེཝམཱདིནཱ པཊིཀྑེཔོ ཝེདིཏབྦོ. ‘‘ཧོཏི ཏཐཱགཏོ པརཾ མརཎཱ’’ཏི ཨཡམྤི སསྶཏཝཱདོ, སོ ཙ ཁོ ཨཔརནྟཀཔྤིཀཝསེན, ‘‘སསྶཏོ ལོཀོ’’ཏི པན པུབྦནྟཀཔྤིཀཝསེནཱཏི ཨཡམེཏེསཾ ཝིསེསོ. ‘‘ན ཧོཏི ཏཐཱགཏོ པརཾ མརཎཱ’’ཏི ཨཡམྤི ཨུཙྪེདཝཱདོ, སོ ཙ ཁོ སཏྟཝསེན, ‘‘ཨསསྶཏོ ལོཀོ’’ཏི པན སཏྟསངྑཱརཝསེནཱཏི ཝདནྟི.

༡༨༩. སཔྤཏིབྷཡཾ ¶ ཨུཔྤཛྫནཏོ སཧ དུཀྑེནཱཏི སདུཀྑཾ. ཏེནཱཧ ‘‘ཀིལེསདུཀྑེནཱ’’ཏིཨཱདི. ཏེསཾཡེཝཱཏི ཀིལེསདུཀྑཝིཔཱཀདུཀྑཱནཾཡེཝ. སཨུཔགྷཱཏཀནྟི སབཱདྷཾ. སཨུཔཱཡཱསནྟི སཔརིསྶམཾ སཨུཔཏཱཔཾ སཔཱིལ༹ཾ. སཔརིལཱ༹ཧནྟི སདརཐཾ.

ཀིཉྩི དིཊྛིགཏནྟི ཨིམཱ ཏཱཝ ཨཊྛ དིཊྛིཡོ མཱ ཧོནྟུ, ཨཏྠི པན, བྷོ གོཏམ, ཡཾ ཀིཉྩི དིཊྛིགཏཾ གཧིཏཾ. ན ཧི ཏཱཡ དིཊྛིཡཱ ཝིནཱ ཀཉྩི སམཡཾ པཝཏྟེཏུཾ ཡུཛྫཏཱིཏི ཨདྷིཔྤཱཡེན པུཙྪཏི. ཨཔཝིདྡྷནྟི སམུཙྪེདཔྤཧཱནཝསེན ཚཌྜིཏཾ. པཉྙཱཡ དིཊྛནྟི ཝིཔསྶནཱཔཉྙཱསཧིཏཱཡ མགྒཔཉྙཱཡ བྷགཝཏཱ པཊིཝིདྡྷཾ. ཡཏྠ ཨུཔྤཛྫནྟི, ཏཾ སཏྟཾ མཐེནྟི སམྨདྡནྟཱིཏི མཐིཏཱཏི ཨཱཧ ‘‘མཐིཏཱནནྟི ཏེསཾཡེཝ ཝེཝཙན’’ནྟི. ཀཉྩི དྷམྨནྟི རཱུཔདྷམྨཾ ཨརཱུཔདྷམྨཾ ཝཱ. ཨནུཔཱདིཡིཏྭཱཏི ཨགྒཧེཏྭཱ.

༡༩༠. ན ཨུཔེཏཱིཏི སངྑཾ ན གཙྪཏཱིཏི ཨཏྠོཏི ཨཱཧ ‘‘ན ཡུཛྫཏཱི’’ཏི. ཨནུཛཱནིཏབྦཾ སིཡཱ ཨནུཔཱདཱཝིམུཏྟསྶ ཀཉྩིཔི ཨུཔྤཏྟིཡཱ ཨབྷཱཝཏོ. ‘‘ཨེཝཾ ཝིམུཏྟཙིཏྟོ ན ཨུཔཔཛྫཏཱི’’ཏི ཀཱམཉྩེཏཾ སབྷཱཝཔཝེདནཾ པརིནིབྦཱནཾ, ཨེཀེ པན ཨུཙྪེདཝཱདིནོ ‘‘མཡམྤི ‘སཏྟོ ཨཱཡཏིཾ ན ཨུཔཔཛྫཏཱི’ཏི ཝདཱམ, སམཎོ གོཏམོཔི ཏཐཱ ཝདཏཱི’’ཏི ཨུཙྪེདབྷཱཝེཡེཝ པཏིཊྛཧིསྶནྟི, ཏསྨཱ བྷགཝཱ ¶ ‘‘ན ཨུཔཔཛྫཏཱིཏི ཁོ ཝཙྪ ན ཨུཔེཏཱི’’ཏི ཨཱཧ. ‘‘ཨུཔཔཛྫཏཱི’’ཏི པན ཝུཏྟེ སསྶཏམེཝ གཎྷེཡྻཱཏི ཡོཛནཱ. སེསདྭཡེཔི ཨེསེཝ ནཡོ. ཨཔྤཏིཊྛོཏི ཨུཙྪེདཝཱདཱདིཝསེན པཏིཊྛཱརཧིཏོ. ཨནཱལམྦོཏི ཏེསཾཡེཝ ཝཱདཱནཾ ཨོལམྦཱརམྨཎསྶ ཨབྷཱཝེན ཨནཱལམྦོ. སུཁཔཝེསནཊྛཱནནྟི ཏེསཉྙེཝ ཝཱདཱནཾ སུཁཔཝེསནོཀཱསཾ མཱ ལབྷཏཱུཏི. ཨནནུཉྙཱཡ ཋཏྭཱཏི ‘‘ན ཨུཔཔཛྫཏཱི’’ཏིཨཱདིནཱ ཨནུཛཱནིཏབྦཱཡ པཊིཉྙཱཡ ཋཱནཧེཏུ. ཨནུཉྙམྤཱིཏི ཨནུཛཱནིཏབྦམྤི དུཏིཡཔཉྷཾ པཊིཀྑིཔི. པརིཡཏྟོ པན དྷམྨོ ཨཏྠཏོ པཙྩཡཱཀཱརོ ཨེཝཱཏི ཨཱཧ ‘‘དྷམྨོཏི པཙྩཡཱཀཱརདྷམྨོ’’ཏི. ཨཉྙཏྠ པཡོགེནཱཏི ཨིམམྷཱ ནིཡྻཱནིཀསཱསནཱ ཨཉྙསྨིཾ མིཙྪཱསམཡེ པཝཏྟཔྤཡོགེན, ཨནིཡྻཱནིཀཾ ཝིཝིདྷཾ མིཙྪཱཔཊིཔཏྟིཾ པཊིཔཛྫནྟེནཱཏི ཨཏྠོ. ‘‘ཨཉྙཝཱདིཡཀེནཱ’’ཏིཔི པཱཋོ, པཙྩཡཱཀཱརཏོ ཨཉྙཱཀཱརདཱིཔཀཨཱཙརིཡཝཱདཾ པགྒཡ྄ཧ ཏིཊྛནྟེནཱཏི ཨཏྠོ.

༡༩༡. ཨཔྤཙྩཡོཏི ¶ ཨནུཔཱདཱནོ, ནིརིནྡྷནོཏི ཨཏྠོ.

༡༩༢. ཡེན རཱུཔེནཱཏི ཡེན བྷཱུཏུཔཱདཱདིབྷེདེན རཱུཔདྷམྨེན. ཏཾ རཱུཔཾ ཏཔྤཊིབདྡྷསཾཡོཛནཔྤཧཱནེན ཁཱིཎཱསཝ-ཏཐཱགཏསྶ པཧཱིནཾ ཨནུཔྤཏྟིདྷམྨཏཾ ཨཱཔནྣཾ. ཏེན ཝུཏྟཾ པཱལི༹ཡཾ ‘‘ཨནུཔྤཱདདྷམྨ’’ནྟིཨཱདི. ཨཉྙེསཾ ཛཱནནཱཡ ཨབྷཱཝགུཎཏཱཡ གུཎགམྦྷཱིརོ. ‘‘ཨེཏྟཀཱ གུཎཱ’’ཏི པམཱཎཾ གཎྷིཏུཾ ན སཀྐུཎེཡྻོ. ‘‘ཨཱིདིསཱ ཨེཏསྶ གུཎཱ’’ཏི པརིཡོགཱཧིཏུཾ ཨསཀྐུཎེཡྻཏཱཡ དུཔྤརིཡོགཱལ༹ྷོཏི. དུཛྫཱནོཏི ཨགཱདྷཏཱཡ གམྦྷཱིརོ ‘‘ཨེཏྟཀཱནི ཨུདཀལ༹ྷཀསཏཱནཱི’’ཏིཨཱདིནཱ པམེཏུཾ ན སཀྐཱཏི ཨཔྤམེཡྻོ, ཏཏོ ཨེཝ དུཛྫཱནོ. ཨེཝམེཝཱནྟི ཡཐཱ མཧཱསམུདྡོ གམྦྷཱིརོ ཨཔྤམེཡྻོ དུཛྫཱནོ, ཨེཝམེཝ ཁཱིཎཱསཝོཔི གུཎཝསེན, ཏསྨཱ ཨཡཾ རཱུཔཱདིཾ གཧེཏྭཱ རཱུཔཱིཏིཨཱདིཝོཧཱརོ བྷཝེཡྻ, པརིནིབྦུཏསྶ པན ཏདབྷཱཝཱ ཏཐཱ པཉྙཱཔེཏུཾ ན སཀྐཱ, ཏཏོ ཏཾ ཨཱརབྦྷ ཨུཔཔཛྫཏཱིཏིཨཱདི ན ཡུཛྫེཡྻ. ཡཐཱ པན ཝིཛྫམཱནོ ཨེཝ ཛཱཏཝེདོ བྱཏྟེན པུརིསེན ནཱིཡམཱནོ པུརཏྠིམཱདིདིསཾ གཏོཏི ཝུཙྩེཡྻ, ན ནིབྦུཏོ, ཨེཝཾ ཁཱིཎཱསཝོཔཱིཏི དསྶེནྟོ ‘‘ཨེཝམེཝཱ’’ཏིཨཱདིམཱཧ.

ཨནིཙྩཏཱཏི ཨེཏྠ ཨནིཙྩཏཱགཧཎཾ ཨསཱརནིདསྶནཾ. ཏེན ཡཐཱ སོ སཱལརུཀྑོ སཱཁཱཔལཱསཱདིཨསཱརཱཔགམེན སུདྡྷོ སཱརེ པཏིཊྛིཏོ, ཨེཝམཡཾ དྷམྨཝིནཡོ སཱསཝསངྑཱཏཨསཱརཝིགམེན ལོཀུཏྟརདྷམྨསཱརེ པཏིཊྛིཏོཏི དསྶེཏི. སེསཾ སུཝིཉྙེཡྻམེཝ.

ཨགྒིཝཙྪསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༣. མཧཱཝཙྪསུཏྟཝཎྞནཱ

༡༩༣. སཧ ¶ ཀཐཱ ཨེཏསྶ ཨཏྠཱིཏི སཧཀཐཱི, ‘‘མཡཾ པུཙྪཱཝསེན ཏུམྷེ ཝིསྶཛྫནཝསེནཱ’’ཏི ཨེཝཾ སཧཔཝཏྟཀཐོཏི ཨཏྠོ. ཨེཏསྶེཝ ཀཐིཏཱནི, ཏཏྠ པཋམེ ཝིཛྫཱཏྟཡཾ དེསིཏཾ, དུཏིཡེ ཨགྒིནཱ དསྶིཏནྟི ཏེཝིཛྫཝཙྪསུཏྟཾ ཨགྒིཝཙྪསུཏྟནྟི ནཱམཾ ཝིསེསེཏྭཱ ཝུཏྟཾ. སཱིགྷཾ ལདྡྷིཾ ན ཝིསྶཛྫེནྟི, ཡསྨཱ སངྑཱརཱནཾ ནིཡཏོཡཾ ཝིནཱསོ ཨནཉྙསམུཔྤཱདོ, ཧེཏུསམུཔྤནྣཱཔི ན ཙིརེན ནིཛ྄ཛྷཱནཾ ཁམནྟི, ན ལཧུཾ. ཏེནཱཧ ‘‘ཝསཱཏེལ ¶ …པེ… སུཛ྄ཛྷནྟཱི’’ཏི. པཙྪིམགམནཾ ཉཱཎསྶ པརིཔཱཀཾ གཏཏྟཱ. ཡཊྛིཾ ཨཱལམྦིཏྭཱ ཨུདཀཾ ཏརིཏུཾ ཨོཏརནྟོ པུརིསོ ‘‘ཡཊྛིཾ ཨོཏརིཏྭཱ ཨུདཀེ པཏམཱནོ’’ཏི ཝུཏྟོ. ཀམྨཔཐཝསེན ཝིཏྠཱརདེསནནྟི སཾཁིཏྟདེསནཾ ཨུཔཱདཱཡ ཝུཏྟཾ. ཏེནཱཧ ‘‘མཱུལཝསེན ཙེཏྠཱ’’ཏིཨཱདི. ཝིཏྠཱརསདིསཱཏི ཀམྨཔཐཝསེན ཨིདྷ དེསིཏདེསནཱཝ མཱུལཝསེན དེསིཏདེསནཾ ཨུཔཱདཱཡ ཝིཏྠཱརསདིསཱ. ཝིཏྠཱརདེསནཱ ནཱམ ནཏྠཱིཏི ན ཀེཝལཾ ཨཡམེཝ, ཨཐ ཁོ སབྦཱཔི བུདྡྷཱནཾ ནིཔྤརིཡཱཡེན ཨུཛུཀེན ནིརཝསེསཏོ ཝིཏྠཱརདེསནཱ ནཱམ ནཏྠི དེསནཱཉཱཎསྶ མཧཱཝིསཡཏཱཡ ཀརཎསམྤཏྟིཡཱ ཙ ཏཛྫཱཡ མཧཱནུབྷཱཝཏྟཱ སབྦཉྙུཏཉྙཱཎསྶ. སབྦཉྙུཏཉྙཱཎསམངྒིཏཱཡ ཧི ཨཝསེསཔཊིསམྦྷིདཱནུབྷཱཝིཏཱཡ ཨཔརིམིཏཀཱལསམྦྷཏཉཱཎསམྦྷཱརསམུདཱགཏཱཡ ཀདཱཙིཔི པརིཀྑཡཱནརཧཱཡ ཨནཉྙསཱདྷཱརཎཱཡ པཊིབྷཱནཔཊིསམྦྷིདཱཡ པཧཱུཏཛིཝ྄ཧཱདིཏདནུརཱུཔརཱུཔཀཱཡསམྤཏྟིསམྤདཱཡ ཝིཏྠཱརིཡམཱནཱ བྷགཝཏོ དེསནཱ ཀཐཾ པརིམིཏཱ པརིཙྪིནྣཱ བྷཝེཡྻ, མཧཱཀཱརུཎིཀཏཱཡ པན བྷགཝཱ ཝེནེཡྻཛ྄ཛྷཱསཡཱནུརཱུཔཾ ཏཏྠ ཏཏྠ པརིམིཏཾ པརིཙྪིནྣཾ ཀཏྭཱ ནིཊྛཔེཏི. ཨཡཉྩ ཨཏྠོ མཧཱསཱིཧནཱདསུཏྟེན (མ. ནི. ༡.༡༤༦ ཨཱདཡོ) དཱིཔེཏབྦོ. སབྦཾ སཾཁིཏྟམེཝ ཨཏྟཛ྄ཛྷཱསཡཝསེན ཨཀཐེཏྭཱ བོདྷནེཡྻཔུགྒལཛ྄ཛྷཱསཡཝསེན དེསནཱཡ ནིཊྛཱཔིཏཏྟཱ. ན ཙེཏྠ དྷམྨསཱསནཝིརོདྷོ པརིཡཱཡཾ ཨནིསྶཱཡ ཡཐཱདྷམྨཾ དྷམྨཱནཾ བོདྷིཏཏྟཱ སབྦལཧུཏྟཱ ཙཱཏི.

༡༩༤. སཏྟ དྷམྨཱ ཀཱམཱཝཙརཱ སམྤཏྟསམཱདཱནཝིརཏཱིནཾ ཨིདྷཱདྷིཔྤེཏཏྟཱ.

ཨནིཡམེཏྭཱཏི ‘‘སམྨཱསམྦུདྡྷོ, སཱཝཀོ’’ཏི ཝཱ ནིཡམཾ ཝིསེསེན ཨཀཏྭཱ. ཨཏྟཱནམེཝ…པེ… ཝེདིཏབྦཾ, ཏཐཱ ཧི པརིབྦཱཛཀོ ‘‘ཏིཊྛཏུ བྷཝཾ གོཏམོ’’ཏི ཨཱཧ.

༡༩༥. སཏྠཱཝ ¶ ཨརཧཱ ཧོཏི པཊིཔཏྟིཡཱ པཱརིཔཱུརིབྷཱཝཏོ. ཏསྨིཾ བྱཱཀཏེཏི ཏསྨིཾ ‘‘ཨེཀབྷིཀྑུཔི སཱཝཀོ’’ཏིཨཱདིནཱ སུཊྛུ པཉྷེ ཀཐིཏེ.

༡༩༦. སམྤཱདཀོཏི པཊིཔཏྟིསམྤཱདཀོ.

༡༩༧. སེཁཱཡ ¶ ཝིཛྫཱཡཱཏི སེཁལཀྑཎཔྤཏྟཱཡ མགྒཔཉྙཱཡ སཱཏིསཡཾ ཀཏྭཱ ཀརཎཝསེན ཝུཏྟཱ, ཕལཔཉྙཱ པན ཏཱཡ པཏྟབྦཏྟཱ ཀམྨབྷཱཝེན ཝུཏྟཱ. ཏེནཱཧ ‘‘ཧེཊྛིམཕལཏྟཡཾ པཏྟབྦ’’ནྟི. ཨིམཾ པནེཏྠ ཨཝིཔརཱིཏམཏྠཾ པཱལི༹ཏོ ཨེཝ ཝིཉྙཱཡམཱནཾ ཨཔྤཊིཝིཛ྄ཛྷནཏོ ཝིཏཎྜཝཱདཱི ‘‘ཡཱཝཏཀཾ སེཁེན པཏྟབྦཾ, ཨནུཔྤཏྟཾ ཏཾ མཡཱ’’ཏི ཝཙནལེསཾ གཧེཏྭཱ ‘‘ཨརཧཏྟམགྒོཔི ཨནེན པཏྟོཡེཝཱ’’ཏི ཝདཏི. ཨེཝནྟི ཨིདཱནི ཝུཙྩམཱནཱཡ གཱཐཱཡ.

ཀིལེསཱནི པཧཱཡ པཉྩཱཏི པཉྩོརམྦྷཱགིཡསཾཡོཛནསངྑཱཏེ སཾཀིལེསེ པཧཱཡ པཛཧིཏྭཱ, པཧཱནཧེཏུ ཝཱ. པརིཔུཎྞསེཁོཏི སབྦསོ ཝཌྜྷིཏསེཁདྷམྨོ. ཨཔརིཧཱནདྷམྨོཏི ཨཔརིཧཱནསབྷཱཝོ. ན ཧི ཡསྶ ཕཱཏིགཏེཧི སཱིལཱདིདྷམྨེཧི པརིཧཱནི ཨཏྠི, སམཱདྷིམྷི པརིཔཱུརཀཱརིཏཱཡ ཙེཏོཝསིཔྤཏྟོ. ཏེནཱཧ ‘‘སམཱཧིཏིནྡྲིཡོ’’ཏི. ཨཔརིཧཱནདྷམྨཏྟཱཝ ཋིཏཏྟོ.

ཨནཱགཱམིནཱ ཧི ཨསེཁབྷཱཝཱཝཧཱ དྷམྨཱ པརིཔཱུརེཏབྦཱ, ན སེཁབྷཱཝཱཝཧཱཏི སོ ཨེཀནྟཔརིཔུཎྞེ སེཁོ ཝུཏྟོ. ཨེཏཾ ན བུདྡྷཝཙནནྟི ‘‘མགྒོ བཧུཙིཏྟཀྑཎིཀོ’’ཏི ཨེཏཾ ཝཙནཾ ན བུདྡྷཝཙནཾ ཨནནྟརེཀནྟཝིཔཱཀདཱནཏོ, བཧུཀྑཏྟུཾ པཝཏྟནེ པཡོཛནཱབྷཱཝཏོ ཙ ལོཀུཏྟརཀུསལསྶ, ‘‘སམཱདྷིམཱནནྟརིཀཉྙམཱཧུ (ཁུ. པཱ. ༦.༥; སུ. ནི. ༢༢༨), ན པཱརཾ དིགུཎཾ ཡནྟཱི’’ཏི (སུ. ནི. ༧༡༩) ཨེཝམཱདཱིནི སུཏྟཔདཱནི ཨེཏསྶཏྠསཱདྷཀཱནི. ཨོརམྦྷཱགིཡསཾཡོཛནཔྤཧཱནེན སེཀྑདྷམྨཔརིཔཱུརིབྷཱཝསྶ ཝུཏྟཏཱཡ ཨཏྠོ ཏཝ ཝཙནེན ཝིརུཛ྄ཛྷཏཱིཏི. ཨསྶ ཨཱཡསྨཏོ ཝཙྪསྶ.

༡༩༨. ཨབྷིཉྙཱ ཝཱ ཀཱརཎནྟི ཡཉྷི ཏཾ ཏཏྲ ཏཏྲ སཀྑིབྷབྦཏཱསངྑཱཏཾ ཨིདྡྷིཝིདྷཔཙྩནུབྷཝནཱདི, ཏསྶ ཨབྷིཉྙཱ ཀཱརཎཾ. ཨཐ ཨིདྡྷིཝིདྷཔཙྩནུབྷཝནཱདི ཨབྷིཉྙཱ, ཨེཝཾ སཏི ཨབྷིཉྙཱཔཱདཀཛ྄ཛྷཱནཾ ཀཱརཎཾ. ཨཝསཱནེ ཚཊྛཱབྷིཉྙཱཡ པན ཨརཧཏྟཾ. ཨེཏྠ ཙ ཡསྨཱ པཋམསུཏྟེ ཨཱསཝཀྑཡོ ཨདྷིཔྤེཏོ, ཨཱསཝཱ ཁཱིཎཱ ཨེཝ, ན པུན ཁེཔེཏབྦཱ, ཏསྨཱ ཏཏྠ ‘‘ཡཱཝདེཝཱ’’ཏི ན ཝུཏྟཾ. ཨིདྷ ཕལསམཱཔཏྟི ཨདྷིཔྤེཏཱ, སཱ ཙ པུནཔྤུནཾ སམཱཔཛྫཱིཡཏི, ཏསྨཱ ‘‘ཡཱཝདེཝཱ’’ཏི ཝུཏྟཾ. ཏཏོ ཨེཝ ཧི ‘‘ཨརཧཏྟཾ ཝཱ ཀཱརཎ’’ནྟི ཝུཏྟཾ. ཏཉྷི ‘‘ཀུདཱསྶུ ¶ ནཱམཱཧཾ ཏདཱཡཏནཾ ཨུཔསམྤཛྫ ཝིཧརིསྶཱམི, ¶ ཡདརིཡཱ ཨེཏརཧི ཨུཔསམྤཛྫ ཝིཧརནྟཱི’’ཏི (མ. ནི. ༡.༤༦༥; ༣.༣༠༧) ཨནུཏྟརེསུ ཝིམོཀྑེསུ པིཧཾ ཨུཔཊྛཔེཏྭཱ ཨབྷིཉྙཱ ནིབྦཏྟེནྟསྶ ཀཱརཎཾ, ཏཡིདཾ སབྦསཱདྷཱརཎཾ ན ཧོཏཱིཏི སཱདྷཱརཎཝསེན ནཾ དསྶེནྟོ ‘‘ཨརཧཏྟསྶ ཝིཔསྶནཱ ཝཱ’’ཏི ཨཱཧ.

༢༠༠. པརིཙརནྟི ནཱམ ཝིཔྤཀཏབྲཧྨཙརིཡཝཱསཏྟཱ. པརིཙིཎྞོ ཧོཏི སཱཝཀེན ནཱམ སཏྠུ དྷམྨེ ཀཏྟབྦཱ པརིཙརིཡཱ སམྨདེཝ ནིཊྛཱཔིཏཏྟཱ. ཏེནཱཧ ‘‘ཨིཏི…པེ… ཐེརོ ཨེཝམཱཧཱ’’ཏི. ཏེསཾ གུཎཱནནྟི ཏེསཾ ཨསེཀྑགུཎཱནཾ. སེསཾ སུཝིཉྙེཡྻམེཝ.

མཧཱཝཙྪསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༤. དཱིགྷནཁསུཏྟཝཎྞནཱ

༢༠༡. ཁནནཾ ¶ ཁཏཾ, སཱུཀརསྶ ཁཏཾ ཨེཏྠ ཨཏྠཱིཏི སཱུཀརཁཏཱ, སཱུཀརསྶ ཝཱ ཨིམསྨིཾ བུདྡྷུཔྤཱདེ པཋམཾ ཁཏཾ ཨུཔཱདཱཡ སཱུཀརཁཏཱ, ཏཱཡ. ཨེཝཾནཱམཀེཏི ཨེཝཾ ཨིཏྠིལིངྒཝསེན ལདྡྷནཱམཀེ. པཾསུདྷོཏེཏི དྷོཏཔཾསུཀེ. ཨོཏརིཏྭཱ ཨབྷིརུཧིཏབྦནྟི པཀཏིབྷཱུམིཏོ ཨནེཀེཧི སོཔཱནཕལཀེཧི ཨོཏརིཏྭཱ པུན ལེཎདྭཱརཾ ཀཏིཔཡེཧི ཨབྷིརུཧིཏབྦཾ.

ཋིཏཀོཝཱཏི མཱཏུལསྶ ཋིཏཏྟཱ ཏཏྠ སགཱརཝསཔཏིསྶཝསེན ཋིཏཀོཝ. ཀིཉྩཱཔི སབྦ-སདྡོ ཨཝིསེསཏོ ཨནཝསེསཔརིཡཱདཱཡཀོ, ཝཏྠུཨདྷིཔྤཱཡཱནུརོདྷཱི པན སདྡཔྤཡོགོཏི ཏམཏྠཾ སནྡྷཱཡ པརིབྦཱཛཀོ ‘‘སབྦཾ མེ ནཀྑམཏཱི’’ཏི ཨཱཧ. ཡཱ ལོཀེ མནུསྶཨུཔཔཏྟིཡོཏིཨཱདིཀཱ ཨུཔཔཏྟིཡོ, ཏཱ ཨནཏྠསམུདཱགཏཱ ཏཏྠ ཏཏྠེཝ སཏྟཱནཾ ཨུཙྪིཛྫནཏོ, ཏསྨཱ སམཡཝཱདཱིཧི ཝུཙྩམཱནཱ སབྦཱ ཨཱཡཏིཾ ཨུཔྤཛྫནཨུཔཔཏྟི ན ཧོཏི. ཛལབུབྦུལ༹ཀཱ ཝིཡ ཧི ཨིམེ སཏྟཱ ཏཏྠ ཏཏྠ སམཡེ ཨུཔྤཛྫིཏྭཱ བྷིཛྫནྟི, ཏེསཾ ཏཏྠ པཊིསནྡྷི ནཏྠཱིཏི ཨསྶ ཨདྷིཔྤཱཡོ. ཏེནཱཧ ‘‘པཊིསནྡྷིཡོ’’ཏིཨཱདི. ཨསྶ ཨདྷིཔྤཱཡཾ མུཉྩིཏྭཱཏི ཡེནཱདྷིཔྤཱཡེན པརིབྦཱཛཀོ ‘‘སབྦཾ མེ ནཀྑམཏཱི’’ཏི ཨཱཧ, ཏཾ ཏསྶ ཨདྷིཔྤཱཡཾ ཛཱནནྟོཔི ཨཛཱནནྟོ ཝིཡ ཧུཏྭཱ ཏསྶ ཨཀྑརེ ཏཱཝ དོསཾ དསྶེནྟོཏི ¶ པདེསསབྦཾ སནྡྷཱཡ ཏེན ཝུཏྟཾ, སབྦསབྦཝིསཡཾ ཀཏྭཱ ཏཏྠ དོསཾ གཎྷནྟོ. ཡཐཱ ལོཀེ ཀེནཙི ‘‘སབྦཾ ཝུཏྟཾ, ཏཾ མུསཱ’’ཏི ཝུཏྟེ ཏསྶ ཝཙནསྶ སབྦནྟོགདྷཏྟཱ མུསཱབྷཱཝོ ཨཱཔཛྫེཡྻ, ཨེཝཾ ཨིམསྶཔི ‘‘སབྦཾ མེ ནཀྑམཏཱི’’ཏི ཝདཏོ ཏཐཱ པཝཏྟཱ དིཊྛིཔི ནཀྑམཏཱིཏི ཨཏྠཏོ ཨཱཔནྣམེཝ ཧོཏི. ཏེནཱཧ བྷགཝཱ – ‘‘ཨེསཱཔི ཏེ དིཊྛི ནཀྑམཏཱི’’ཏི. ཡཐཱ པན ཀེནཙི ‘‘སབྦཾ ཝུཏྟཾ མུསཱ’’ཏི ཝུཏྟེ ཨདྷིཔྤཱཡཱནུརོདྷིནཱི སདྡཔྤཝཏྟི, ཏསྶ ཝཙནཾ མུཉྩིཏྭཱ ཏདཉྙེསམེཝ མུསཱབྷཱཝོ ཉཱཡཱགཏོ, ཨེཝམིདྷཱཔི ‘‘སབྦཾ མེ ནཀྑམཏཱི’’ཏི ཝཙནཏོ ཡསྶཱ དིཊྛིཡཱ ཝསེན ‘‘སབྦཾ མེ ནཀྑམཏཱི’’ཏི ཏེན ཝུཏྟཾ, ཏཾ དིཊྛིཾ མུཉྩིཏྭཱ ཏདཉྙམེཝ ཡཐཱདྷིཔྤེཏཾ སབྦཾ ནཀྑམཏཱིཏི ཨཡམཏྠོ ཉཱཡཱགཏོ, བྷགཝཱ པན ཝཱདཱིཝརོ སུཁུམཱཡ ཨཱཎིཡཱ ཐཱུལཾ ཨཱཎིཾ ནཱིཧརནྟོ ཝིཡ ཨུཔཱཡེན ཏསྶ དིཊྛིགཏཾ ནཱིཧརིཏུཾ ཏསྶ ཨདྷིཔྤཱཡེན ཨཝཏྭཱ སདྡཝསེན ཏཱཝ ལབྦྷམཱནཾ དོསཾ དསྶེནྟོ ‘‘ཡཱཔི ཁོ ཏེ’’ཏིཨཱདིམཱཧ. ཏེན ཝུཏྟཾ – ‘‘ཨསྶ ཨདྷིཔྤཱཡཾ མུཉྩིཏྭཱ ཨཀྑརེ ཏཱཝ དོསཾ དསྶེནྟོ’’ཏི.

པརིབྦཱཛཀོ ¶ པན ཡཾ སནྡྷཱཡ ‘‘སབྦཾ མེ ནཀྑམཏཱི’’ཏི མཡཱ ཝུཏྟཾ, ‘‘ཨཡཾ སོ’’ཏི ཡཐཱཝུཏྟདོསཔརིཧརཎཏྠཾ ཏསྨིཾ ཨཏྠེ ཝུཙྩམཱནེ ཨེས དོསོ སབྦོ ན ཧོཏི, ཨེཝམྤི སམཎོ གོཏམོ མམ ཝཱདེ དོསམེཝ ཨཱརོཔེཡྻཱཏི ཨཏྟནོ ཨཛ྄ཛྷཱསཡཾ ནིགུཧིཏྭཱ ཡཐཱཝུཏྟདོསཾ པརིཧརིཏུཀཱམོ ‘‘ཨེསཱ མེ’’ཏིཨཱདིམཱཧ. ཏཏྠ ཏམྤསྶ ཏཱདིསམེཝཱཏི ཡཾ ‘‘སབྦཾ མེ ནཀྑམཏཱི’’ཏི གཧིཏཾ ཝཏྠུ, ཏམྤི ཏཱདིསམེཝ བྷཝེཡྻཱཏི. ཨཡཉྩ སབྦནྟོགདྷདིཊྛི མཡ྄ཧམྤི དིཊྛིཝཏྠུ, ཏཾ མེ ཁམེཡྻཝཱཏི. ཡསྨཱ པན ‘‘ཨེསཱཔི དིཊྛི ཏུཡ྄ཧཾ ནཀྑམཏཱི’’ཏི ཡཱཔི དིཊྛི ཝུཏྟཱ བྷཝཏཱ གོཏམེན, སཱཔི མཡ྄ཧཾ ནཀྑམཏི, ཏསྨཱ སབྦཾ མེ ནཀྑམཏེཝཱཏི པརིབྦཱཛཀསྶ ཨདྷིཔྤཱཡོ. ཏེནཱཧ – ‘‘ཏཾ པརིཧརཱམཱིཏི སཉྙཱཡ ཝདཏཱི’’ཏི. ཏཐཱ ཙ ཝཀྑཏི ‘‘ཏསྨཱཔི ཨུཙྪེདདིཊྛི མཡ྄ཧཾ ནཀྑམཏཱི’’ཏི. ‘‘ཨེསཱ མེ དིཊྛཱི’’ཏི ཡཱ ཋིཏིབྷཱུཏཱ དིཊྛི, ཏཱཡ ‘‘སབྦཾ མེ ནཀྑམཏཱི’’ཏི པནེཏྠ སབྦགྒཧཎེན གཧིཏཏྟཱ ཨཱཧ – ‘‘ཨཏྠཏོ པནསྶ ཨེསཱ དིཊྛི ན མེ ཁམཏཱིཏི ཨཱཔཛྫཏཱི’’ཏི. ཨཡཾ དོསོཏི དསྶེནྟོ ཨཱཧ ‘‘ཡསྶ པནཱ’’ཏིཨཱདི. ཨེསཱཏི དིཊྛི. རུཙིཏནྟི དིཊྛིདསྶནེན ཨབྷིནིཝིསིཏྭཱ རོཙེཏྭཱ གཧིཏཾ. ཏེན ཧི དིཊྛིཨཀྑམེན ཨརུཙིཏེན བྷཝིཏབྦནྟི སཏི དིཊྛིཡཱ ཨཀྑམབྷཱཝེ ཏཏོ ཏཱཡ གཧིཏཱཡ ཁམེཡྻ རུཙྩེཡྻ ཡཐཱ, ཨེཝཾ སབྦསྶ ཨཀྑམབྷཱཝེཏི ¶ ཨཔརབྷཱགེ སབྦཾ ཁམཏི རུཙྩཏཱིཏི ཨཱཔཛྫཏི. ན པནེས ཏཾ སམྤཊིཙྪཏཱིཏི ཨེས ‘‘སབྦཾ མེ ནཀྑམཏཱི’’ཏི ཨེཝཾ ཝདནྟོ ཨུཙྪེདཝཱདཱི ཏཾ ཝུཏྟནཡེན སབྦསྶ ཁམནཾ རུཙྩནཾ ན སམྤཊིཙྪཏི. ཉཱཡེན ཝུཏྟམཏྠཾ ཀཐཾ ན སམྤཊིཙྪཏཱིཏི ཨཱཧ ‘‘ཀེཝལཾ ཏསྶཱཔི ཨུཙྪེདདིཊྛིཡཱ ཨུཙྪེདམེཝ གཎྷཱཏཱི’’ཏི. སབྦེསཉྷི དྷམྨཱནཾ ཨཱཡཏིཾ ཨུཔྤཱདཾ ཨརུཙྩིཏྭཱ ཏཾ སནྡྷཱཡ ཨཡཾ ‘‘སབྦཾ མེ ནཀྑམཏཱི’’ཏི ཝདཏི, ཨུཙྪེདདིཊྛིཀེསུ ཙ ཨུཙྪིནྣེསུ ཀུཏོ ཨུཙྪེདདིཊྛིསབྷཱཝོཏི.

ཏེནཱཏི ཏེན ཀཱརཎེན, ཡསྨཱ ཨིདྷེཀཙྩེ སཏྟཱ ཨཱིདིསཾ དིཊྛིཾ པགྒཡ྄ཧ ཏིཊྛནྟི, ཏསྨཱཏི ཝུཏྟཾ ཧོཏི. པཛཧནཀེན ཝཱ ཙིཏྟེན ཨེཀཛ྄ཛྷཾ གཧེཏྭཱ པཛཧནཀེཧི ཨཔྤཛཧནཀེ ནིདྡྷཱརེཏུཾ བྷགཝཱ ‘‘ཨཏོ…པེ… བཧུཏརཱ’’ཏི ཨཝོཙཱཏི ཨཱཧ – ‘‘པཛཧནཀེསུ ནིསྶཀྐ’’ནྟི ཡཐཱ ‘‘པཉྩསཱིལེཧི པབྷཱཝནཱ པཉྙཝནྟཏརཱ’’ཏི. ‘‘བཧཱུ’’ཏི ཝཏྭཱ ན ཀེཝལཾ བཧཱུ, ཨཐ ཁོ ཨཏིཝིཡ བཧཱུཏི དསྶེནྟོ ‘‘བཧུཏརཱ’’ཏི ཨཱཧ. ‘‘བཧཱུ ཧཱི’’ཏི ནཡིདཾ ནིསྶཀྐཝཙནཾ, ཨཐ ཁོ པཙྩཏྟཝཙནཾ. ཀཐཾ ཧི-སདྡོཏི ཨཱཧ ‘‘ཧི-ཀཱརོ ནིཔཱཏམཏྟ’’ནྟི. ཨནིསྶཀྐཝཙནཾ ཏཱཝ ཏསྶ པཛཧནཀཱནཾ བཧུབྷཱཝཏོ ཏེཔི པརཏོ ‘‘བཧུཏརཱ’’ཏི ཝུཙྩཱིཡནྟི. མཱུལདསྶནནྟི ཡེ ཏཱདིསཾ དསྶནཾ པཋམཾ ཨུཔཱདིཡནྟི, ཏཛྫཱཏིཀམེཝ པཙྪཱ གཧིཏདསྶནཾ. ཝིཛཱཏིཡཉྷི པཋམཾ གཧིཏདསྶནཾ ཨཔྤཧཱཡ ཝིཛཱཏིཡསྶ གཧཎཾ ན སམྦྷཝཏི ཝིརུདྡྷསྶ ཨབྷིནིཝེསསྶ སཧ ཨནཝཊྛཱནཏོ ¶ . ཨཝིརུདྡྷཾ པན མཱུལདསྶནཾ ཨཝིསྶཛྫིཏྭཱ ཝིསཡཱདིབྷེདབྷིནྣཾ ཨཔརདསྶནཾ གཧེཏུཾ ལབྦྷཏི. ཏེནཱཧ ‘‘ཨེཏྠ ཙཱ’’ཏིཨཱདི.

ཏཏྠ ཀིཉྩཱཔི ཨེཀཙྩསསྶཏཝཱདོ སསྶཏུཙྪེདཱབྷིནིཝེསཱནཾ ཝསེན ཡཐཱཀྐམཾ སསྶཏུཙྪེདགྒཱཧནཛཱཏིཀོ, ཨུཙྪེདགྒཱཧེན པན སསྶཏཱབྷིནིཝེསསྶ ཏཾགཱཧེན ཙ ཨསསྶཏཱབྷིནིཝེསསྶ ཝིརུཛ྄ཛྷནཏོ ཨུབྷཡཏྠཔི ‘‘ཨེཀཙྩསསྶཏཾ ཝཱ གཧེཏུཾ ན སཀྐཱ’’ཏི ཝུཏྟཾ, ཏཐཱ ‘‘སསྶཏཾ ཝཱ ཨུཙྪེདཾ ཝཱ ན སཀྐཱ གཧེཏུ’’ནྟི ཙ. མཱུལསསྶཏཉྷི པཋམཾ གཧིཏཾ. ཨཱཡཏནེསུཔི ཡོཛེཏབྦནྟི པཋམཾ ཙཀྑཱཡཏནཾ སསྶཏནྟི གཧེཏྭཱ ཨཔརབྷཱགེ ན ཀེཝལཾ ཙཀྑཱཡཏནམེཝ སསྶཏཾ, སོཏཱཡཏནམྤི སསྶཏཾ, གྷཱནཱཡཏནཱདིཔི སསྶཏནྟི གཎྷཱཏཱིཏིཨཱདིནཱ ཡོཛེཏབྦཾ. ཨཱཡཏནེསུཔཱིཏི པི-སདྡེན དྷཱཏཱུནཾ ཨིནྡྲིཡཱནམྤི གཱཧོ དཊྛབྦོ. ཨིདཾ སནྡྷཱཡཱཏི ¶ ‘‘མཱུལེ སསྶཏ’’ནྟིཨཱདིནཱ ཝུཏྟཔཋམགྒཱཧསྶ སམཱནཛཱཏིཡཾ ཨཔརགྒཱཧཾ སནྡྷཱཡ.

དུཏིཡཝཱརེ པཋམཝཱརེ ཝུཏྟསདིསཾ ཝུཏྟནཡེནེཝ ཝེདིཏབྦཾ. ཏཏྠ ཨཱདཱིནཝཾ དིསྭཱཏི ‘‘ཡདི རཱུཔཾ སསྶཏཾ སིཡཱ, ནཡིདཾ ཨཱབཱདྷཱཡ སཾཝཏྟེཡྻ. ཡསྨཱ ཙ ཁོ ཨིདཾ རཱུཔཾ ཨསསྶཏཾ, ཏསྨཱ ཨབྷིཎྷཔཊིཔཱིལ༹ནཊྛེན ཨུདཡཝཡཝནྟཏཱཡ རཱུཔཾ ཨནིཙྩཾ སངྑཏཾ པཊིཙྩསམུཔྤནྣཾ, སསྶཏཱབྷིནིཝེསོ མིཙྪཱ’’ཏིཨཱདིནཱ ཏཏྠ སསྶཏཝཱདེ ཨཱདཱིནཝཾ དོསཾ དིསྭཱ. ཨོལཱ༹རིཀནྟི ཏསྨཱ པཊིཔཱིལ༹ནཊྛེན ཨཡཱཐཱཝགྒཱཧཏཱཡ རཱུཔཾ ན སཎྷཾ ཨོལཱ༹རིཀམེཝ. ཝེདནཱདཱིནམྤི ཨནིཙྩཱདིབྷཱཝདསྶནཾ རཱུཔཝེདནཱཨཱདཱིནཾ སམཱནཡོགཀྑམཏྟཱ. ཝིསྶཛྫེཏཱིཏི པཛཧཏི.

ཏིསྶོ ལདྡྷིཡོཏི སསྶཏུཙྪེདཨེཀཙྩསསྶཏདིཊྛིཡོ. ཡསྨཱ སསྶཏདིཊྛིཀཱ ཝཊྚེ རཛྫནསྶ ཨཱསནྣཱ. ཏཐཱ ཧི ཏེ ཨོལཱིཡནྟཱིཏི ཝུཙྩནྟི, བྷཝཱབྷཝདིཊྛཱིནཾ ཝསེན ཨིམེསཾ སཏྟཱནཾ སཾསཱརཏོ སཱིསུཀྑིཔནཾ ནཏྠཱིཏི ཨེཏཱཝ ཏིསྶོ ཝིསེསཏོ གཧེཏབྦཱ.

ཨིདྷལོཀཾ པརལོཀཉྩ ཨཏྠཱིཏི ཛཱནཱཏཱིཏི ཨེཏྟཱཝཏཱ སསྶཏདསྶནསྶ ཨཔྤསཱཝཛྫཏཱཀཱརཎམཱཧ, ཝཊྚཾ ཨསྶཱདེཏི, ཨབྷིནནྡཏཱིཏི ཨིམིནཱ དནྡྷཝིརཱགཏཱཡ. ཏེནཱཧ ‘‘ཏསྨཱ’’ཏིཨཱདི. ཨིདྷལོཀཾ པརལོཀཉྩ ཨཏྠཱིཏི ཛཱནཱཏཱིཏི ཨིམིནཱ ཏཱསུ ཏཱསུ གཏཱིསུ སཏྟཱནཾ སཾསརཎཾ པཊིཀྑིཔཏཱིཏི དསྶེཏི, སུཀཏདུཀྐཊཱནཾ ཀམྨཱནཾ ཕལཾ ཨཏྠཱིཏི ཛཱནཱཏཱིཏི ཨིམིནཱ ཀམྨཕལཾ. ཀུསལཾ ན ཀརོཏཱིཏི ཨིམིནཱ ཀམྨཾ, ཨཀུསལཾ ཀརོནྟོ ན བྷཱཡཏཱིཏི ཨིམིནཱ པུཉྙཱཔུཉྙཱནི སབྷཱཝཏོ ཛཱཡནྟཱིཏི དསྶེཏི. ཝཊྚཾ ཨསྶཱདེཏི ཨབྷིནནྡཏི ཏནྣིནྣབྷཱཝཏོ ¶ . སཱིགྷཾ ལདྡྷིཾ ཛཧིཏུཾ ན སཀྐོཏི ཝཊྚུཔཙྪེདསྶ ཨརུཙྩནཏོ. ཨུཙྪེདཝཱདཱི ཧི ཏསྨིཾ བྷཝེ ཨུཙྪེདཾ མཉྙཏི. ཏཏོ པརཾ ཨིདྷལོཀཾ པརལོཀཉྩ ཨཏྠཱིཏི ཛཱནཱཏི སུཀཏདུཀྐཊཱནཾ ཕལཾ ཨཏྠཱིཏི ཛཱནཱཏི ཀམྨཕལཝཱདཱིབྷཱཝཏོ. ཡེབྷུཡྻེན ཧི ཨུཙྪེདཝཱདཱི སབྷཱཝནིཡཏིཡདིཙྪཱབྷིནིཝེསེསུ ཨཉྙཏྲཱབྷིནིཝེསོ ཧོཏི. སཱིགྷཾ དསྶནཾ པཛཧཏི ཝཊྚཱབྷིརཏིཡཱ ཨབྷཱཝཏོ. པཱརམིཡོ པཱུརེཏུཾ སཀྐོནྟོ པཙྩེཀབུདྡྷོ ཧུཏྭཱ, ལོཀཝོཧཱརམཏྟེནེཝ སོ སམྨཱསམྦུདྡྷོ ཧུཏྭཱ པརིནིབྦཱཡཏཱིཏི ཡོཛནཱ. ཨསཀྐོནྟོཏི བུདྡྷོ ཧོཏུཾ ཨསཀྐོནྟོ. ཨབྷིནཱིཧཱརཾ ¶ ཀཏྭཱ ཨགྒསཱཝཀཱདིབྷཱཝསྶ ཨབྷིནཱིཧཱརཾ སམྤཱདེཏྭཱ. སཱཝཀོ ཧུཏྭཱཏི ཨགྒསཱཝཀོ མཧཱསཱཝཀོ ཧུཏྭཱ, ཏཏྠཱཔི ཏེཝིཛྫོ ཚལ༹བྷིཉྙོ པཊིསམྦྷིདཱཔྤཏྟོ ཝཱ སུཀྑཝིཔསྶཀོ ཨེཝ ཝཱ བུདྡྷསཱཝཀོ ཧུཏྭཱ པརིནིབྦཱཡཏི. སབྦམིདཾ ཨུཙྪེདཝཱདིནོ ཀལྱཱཎམིཏྟནིསྶཡེན སམྨཏྟནིཡཱམོཀྐམནེ ཁིཔྤཝིརཱགཏཱདསྶནཏྠཾ ཨཱགཏཾ. ཏེནཱཧ ‘‘ཏསྨཱ’’ཏིཨཱདི.

༢༠༢. ཀཉྫིཡེནེཝཱཏི ཨཱརནཱལེ༹ན. ཀཉྫིཡསདིསེན ཨུཙྪེདདསྶནེན. པཱུརིཏོཏི པརིཔུཎྞཛ྄ཛྷཱསཡོ. སོཏི པརིབྦཱཛཀོ. ཨཔྤཧཱཡཱཏི ཨབྷིནྡིཏྭཱ. ཝིགྒཧོཏི ཀལཧོ ཨིདམེཝ སཙྩཾ, མོགྷམཉྙནྟི ཨཉྙམཉྙཾ ཝིརུདྡྷགྒཱཧོཏི ཀཏྭཱ. ཝིཝཱདནྟི ཝིརུདྡྷཝཱདཾ. ཝིགྷཱཏནྟི ཝིརོདྷཧེཏུཀཾ ཙིཏྟཝིགྷཱཏཾ. ཝིཧེསནྟི ཝིགྒཧཝིཝཱདནིམིཏྟཾ ཀཱཡིཀཾ ཙེཏསིཀཉྩ ཀིལམཐཾ. ཨཱདཱིནཝཾ དིསྭཱཏི ཨེཏཱསཾ དིཊྛཱིནཾ ཨེཝརཱུཔོ ཨཱདཱིནཝོ, ཨནིཡྻཱནིཀབྷཱཝཏཱཡ པན སམྤཏི ཨཱཡཏིཉྩ མཧཱདཱིནཝོཏི ཨེཝཾ ཨཱདཱིནཝཾ དིསྭཱ.

༢༠༥. ‘‘ཨེསོཧམསྨི, ཨེསོ མེ ཨཏྟཱ’’ཏིཨཱདིནཱ (མ. ནི. ༡.༢༤༡; སཾ. ནི. ༣.༨) ཀཱཡཾ ཨནྭེཏཱིཏི ཀཱཡནྭཡོ, སོཡེཝ, ཏསྶ ཝཱ སམཱུཧོ ཀཱཡནྭཡཏཱ, ཀཱཡཔཊིབདྡྷོ ཀིལེསོ. ཏེནཱཧ ‘‘ཀཱཡཾ…པེ… ཨཏྠོ’’ཏི.

ཨསམྨིསྶབྷཱཝནྟི ཨསངྐརཏོ ཝཝཏྠིཏབྷཱཝཾ. ཏེན ཏཱསཾ ཡཐཱསཀཾ པཙྩཡཱནཾ ཨུཔྤཛྫིཏྭཱ ཝིགམཾ དསྶེཏི. ཨེཝཉྷི ཏཱསཾ ཀདཱཙིཔི སངྐརོ ནཏྠི. ཏེནཱཧ ‘‘ཏཏྲཱཡཾ སངྑེཔཏྠོ’’ཏིཨཱདི. སརཱུཔཾ ཨགྒཧེཏྭཱ ‘‘ཨཉྙཱ ཝེདནཱ’’ཏི ཨནིཡམེན ཝུཏྟཏྟཱ ཏམེཝ ཝིགམཾ དསྶེནྟོ ‘‘ཨནུཔྤནྣཱཝ ཧོནྟི ཨནྟརཧིཏཱ ཝཱ’’ཏི ཨཱཧ. སརཱུཔཏོ ནིཡམེཏྭཱ ཝུཙྩམཱནེ ཀཱཙི ཨནུཔྤནྣཱ ཝཱ ཧོཏི, ཀཱཙི ཨནྟརཧིཏཱ ཝཱཏི. ཙུཎྞཝིཙུཎྞབྷཱཝདསྶནཏྠནྟི ཁཎེ ཁཎེ བྷིཛྫམཱནབྷཱཝདསྶནཏྠཾ.

ན ཀེནཙི ¶ སཾཝདཏཱིཏི ཀེནཙི པུགྒལེན སདྡྷིཾ དིཊྛིརཱགཝསེན སཾཀིལིཊྛཙིཏྟོ ན ཝདཏི. ཏེནཱཧ ‘‘སསྶཏཾ གཧེཏྭཱ’’ཏིཨཱདི. ན ཝིཝདཏཱིཏི ཝིརུདྡྷབྷཱཝོ ཧུཏྭཱ ན ཝིཝདཏི. པརིཝཏྟེཏྭཱཏི ཨུཙྪེདཾ གཧེཏྭཱ ཨེཀཙྩསསྶཏཾ གཧེཏྭཱ ཨེཝཾ ཝུཏྟནཡེན ཏཡོཔི ཝཱདཱ པརིཝཏྟེཏྭཱ ཡོཛེཏབྦཱ ¶ . ཏེན ཝོཧརཏཱིཏི ཏེན ལོཀཝོཧཱརེན ལོཀསམཉྙཾ ཨནཏིདྷཱཝནྟོ སཏྟོ པུརིསོ པུགྒལོཏིཨཱདིནཱ ཝོཧརཏི, ན པན ཨིཏོ བཱཧིརཀཱ ཝིཡ ཨབྷིནིཝིསཏི. ཏེནཱཧ ‘‘ཨཔརཱམསནྟོ’’ཏི. ཀཉྩི དྷམྨནྟི རཱུཔཱདཱིསུ ཨེཀཾ དྷམྨམྤི. པརཱམཱསགྒཱཧེན ཨགྒཎྷནྟོཏི ‘‘ནིཙྩ’’ནྟིཨཱདིནཱ, ‘‘ཨེཏཾ མམཱ’’ཏིཨཱདིནཱ ཙ དྷམྨསབྷཱཝཾ ཨཏིཀྐམིཏྭཱ པརཏོ ཨཱམསིཏྭཱ གཧཎེན ཨགྒཎྷནྟོ.

ཀཏཱཝཱིཏི ཀཏཀིཙྩོ. སོ ཝདེཡྻཱཏི ཁཱིཎཱསཝོ བྷིཀྑུ ཨཧངྐཱརམམངྐཱརེསུ སབྦསོ སམུཙྪིནྣེསུཔི ཨཧཾ ཝདཱམཱིཏི ཝདེཡྻ. ཏཏྠ ཨཧནྟི ནིཡཀཛ྄ཛྷཏྟསནྟཱནེ. མམནྟི ཏསྶ སནྟཀབྷཱུཏེ ཝཏྠུསྨིཾ ལོཀནིརུལ༹ྷེ. སམཉྙནྟི ཏཏྠ སུཀུསལཏཱཡ ལོཀེ སམཉྙཱ ཀུསལོ ཝིདིཏྭཱ. ཝོཧཱརམཏྟེནཱཏི ཀེཝལཾ པཙྩེཀབུདྡྷོ ཧུཏྭཱ མཧཱབོདྷིཔཱརམིཡོ པཱུརེཏུཾ ཨསཀྐོནྟོ སཱཝཀོ ཧུཏྭཱ དེསཝོཧཱརམཏྟེན ན ཨཔྤཧཱིནཏཎྷོ ཝིཡ ཨནྡྷཔུཐུཛྫནོ ཨབྷིནིཝེསནཝསེན.

༢༠༦. སསྶཏཱདཱིསཱུཏི སསྶཏཱབྷིནིཝེསཱདཱིསུ. ཏེསཾ ཏེསཾ དྷམྨཱནནྟི ནིདྡྷཱརཎེ སཱམིཝཙནཾ. སསྶཏཾ ཨབྷིཉྙཱཡཱཏི སསྶཏདིཊྛིཾ སམུདཡཏོ ཨཏྠངྒམཏོ ཨསྶཱདཏོ ནིསྶརཎཏོ ཨབྷིཝིསིཊྛཱཡ པཉྙཱཡ པཊིཝིཛ྄ཛྷིཏྭཱ. པཧཱནནྟི ཨཙྩནྟཔྤཧཱནཾ སམུཙྪེདཾ. རཱུཔསྶ པཧཱནནྟི རཱུཔསྶ ཏཔྤཊིབདྡྷསཉྙོཛནཔྤཧཱནེན པཧཱནཾ. ཨནུཔྤཱདནིརོདྷེན ནིརུདྡྷེཧི ཨཱསཝེཧི ཨགྒཧེཏྭཱཝ ཙིཏྟཾ ཝིམུཙྩི. ‘‘ཨཱསཝེཧི ཙིཏྟཾ ཝིམུཙྩཱི’’ཏི ཨེཏྠ ཀིཉྩིཔི ཨགྒཧེཏྭཱ ཨསེསེཏྭཱ. སོལ༹ས པཉྙཱཏི མཧཱཔཉྙཱདིཀཱ སོལ༹ས པཉྙཱ. ཙཏུརངྒསམནྣཱགཏོཏི པུཎྞཨུཔོསཐདིཝསཏཱ, ཀེནཙི ཨནཱམནྟིཏམེཝ ཨནེཀསཏཱནཾཡེཝ ཨནེཀསཧསྶཱནཾ ཝཱ བྷིཀྑཱུནཾ སནྣིཔཏིཏཏཱ, སབྦེསཾ ཨེཧིབྷིཀྑུབྷཱཝེན ཨུཔསམྤནྣཏཱ, ཚལ༹བྷིཉྙཏཱ ཙཱཏི. ཏེནཱཧ ‘‘ཏཏྲིམཱནི ཨངྒཱནཱི’’ཏིཨཱདི. ཡཾ པནེཏྠ ཨཏྠཏོ ཨཝིབྷཏྟཾ, ཏཾ སུཝིཉྙེཡྻམེཝ.

དཱིགྷནཁསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༥. མཱགཎྜིཡསུཏྟཝཎྞནཱ

༢༠༧. དྭེ ¶ མཱགཎྜིཡཱཏི དྭེ ¶ མཱགཎྜིཡནཱམཀཱ. དེཝགབྦྷསདིསནྟི དེཝཱནཾ ཝསནཨོཝརཀསདིསཾ. ཨེཏཾ ཝུཏྟནྟི ‘‘བྷཱརདྭཱཛགོཏྟསྶ བྲཱཧྨཎསྶ ཨགྱཱགཱརེ ཏིཎསནྠཱརཀེ’’ཏི ཨེཏཾ ཝུཏྟཾ. ན ཀེཝལཾ ཏཾ དིཝསམེཝཱཏི ཡཾ དིཝསཾ མཱགཎྜིཡོ པརིབྦཱཛཀོ ཏིཎསནྠཱརཀཾ པཉྙཏྟཾ, ན ཀེཝལཾ ཏཾ དིཝསམེཝ བྷགཝཱ ཡེནཉྙཏརོ ཝནསཎྜོ, ཏེནུཔསངྐམཱིཏི ཡོཛནཱ. གཱམཱུཔཙཱརེཏི གཱམསམཱིཔེ. སཉྙཱཎཾ ཀཏྭཱཏི སཉྙཱཎཾ ཀཏྭཱ ཝིཡ. ན ཧི བྷགཝཏོ ཏསྶ སཉྙཱཎཀརཎེ པཡོཛནཾ ཨཏྠི.

སམཎསེཡྻཱནུརཱུཔནྟི སམཎསྶ ཨནུཙྪཝིཀཱ སེཡྻཱ. པཱསཾསཏྠོ ཧི ཨཡཾ རཱུཔ-སདྡོ. ཏེནཱཧ ‘‘ཨིམཾ ཏིཎསནྠཱརཀ’’ནྟིཨཱདི. ཨནཱཀིཎྞོཏི ཝིལུལི༹ཏོ ཨགྷཊྚིཏོ. ཧཏྠཔཱདསཱིསེཧི ཏཏྠ ཏཏྠ པཧཊེན ན ཙལིཏོ ཨབྷིནྣོ, ཨཙལིཏཏྟཱ ཨེཝ ཨབྷིནྣཾ ཨཏྠརཎཾ. པརིཙྪིནྡིཏྭཱ པཉྙཏྟོ ཝིཡཱཏི ཨཡཾ ཚེཀེན ཙིཏྟཀཱརེན ཙིནྟེཏྭཱ ཏུལིཀཱཡ པརིཙྪིནྣལེཁཱཡ པརིཙྪིནྡིཏྭཱ ལིཁིཏཱ ཙིཏྟཀཏསེཡྻཱ ཝིཡ. བྷཱུནཾ ཝུཙྩཏི ཝཌྜྷིཏཾ, ཏཾ ཧནྟཱིཏི བྷཱུནཧུནོ. ཏེནཱཧ ‘‘ཧཏཝཌྜྷིནོ’’ཏི. ཏཾ པནཱཡཾ ཙཀྑཱདཱིསུ སཾཝརཝིདྷཱནཾ ཝཌྜྷིཧནནཾ མཉྙཏི. ཏེནཱཧ ‘‘མརིཡཱདཀཱརཀསྶཱ’’ཏི. བྲཱུཧེཏབྦནྟི ཨུལཱ༹རཝིསཡཱུཔཧཱརེན ཝཌྜྷེཏབྦཾ པཱིཎེཏབྦཾ. ཏཾ པན ཨནནུབྷཱུཏཱནུབྷཝནེན ཧོཏཱིཏི ཨཱཧ ‘‘ཨདིཊྛཾ དཀྑིཏབྦ’’ནྟི. ཨནུབྷཱུཏཾ པན ཨཔཎཱིཏཾ ཧོཏཱིཏི ཝུཏྟཾ ‘‘དིཊྛཾ སམཏིཀྐམིཏབྦ’’ནྟི. སེསཝཱརེསུཔི ཨེསེཝ ནཡོ. པརམདིཊྛདྷམྨནིབྦཱནཝཱདཱི ཀིརེས པརིབྦཱཛཀོ, ཏསྨཱ ཨེཝཾ ཚསུ དྭཱརེསུ ཝཌྜྷིཾ པཉྙཔེཏི. ཡསྨཱ ཡཾ ཚནྣམྤི ཙཀྑཱདཱིནཾ ཡཐཱསཀཾ ཝིསཡགྒཧཎཾ པཊིཀྑིཔནྟོ ལོཀསྶ ཨཝཌྜྷིཏཾ ཝིནཱསམེཝ པཉྙཔེཏི, ཏསྨཱ སོ སཡམྤི ཝཌྜྷིཧཏོ ཧཏཝཌྜྷིཏོ.

སཾཀིལེསཏོ ཨཱརཀཏྟཱ ཨརིཡོ ནིཡྻཱནིཀདྷམྨབྷཱཝཏོ ཉཱཡོ དྷམྨོ. ཝཛྫལེསསྶཔི ཨབྷཱཝཏོ ཀུསལོ. ཏེནཱཧ ‘‘པརིསུདྡྷེ ཀཱརཎདྷམྨེ ཨནཝཛྫེ’’ཏི. ཨུགྒཏསྶཱཏི ཨུཙྩཀུལཱིནཏཱདིནཱ ཨུལཱ༹རསྶ. མུཁེ ཨཱརཀྑཾ ཋཔེཏྭཱཏི མུཁེན སཾཡཏོ ཧུཏྭཱ. ཨམྦཛམྦཱུཨཱདཱིནི གཧེཏྭཱ ཝིཡ ཨཔཱུརཡམཱནོཏི ཨམྦཛམྦཱུཨཱདཱིནི ཨཉྙམཉྙཝིསདིསཱནི ཝིཡ པཱུརཎཀཐཱནཡེན ཡཾ ཀིཉྩི ཨཀཐེཏྭཱ. ཏེནཱཧ ‘‘མཡཱ ཀཐིཏནིཡཱམེནཱ’’ཏི.

༢༠༨. ཕལསམཱཔཏྟིཡཱ ¶ ¶ ཝུཊྛིཏོཏི དིཝཱཝིཧཱརཏོ ཝུཊྛིཏོཏི ཨཏྠོ. དིཝཱཝིཧཱརོཔི ཧི ‘‘པཊིསལླཱན’’ནྟི ཝུཙྩཏི ‘‘རཧོགཏསྶ པཊིསལླཱིནསྶ ཨེཝཾ ཙེཏསོ པརིཝིཏཀྐོ ཨུདཔཱདཱི’’ཏིཨཱདཱིསུ (པཱརཱ. ༡༨). བྷགཝཱ ཧི ཕལསམཱཔཏྟིཏོ ཝུཊྛཱནུཏྟརཀཱལཾ ཏེསཾ ཀཐཱསལླཱཔཾ སུཏྭཱ དིཝཱཝིཧཱརཏོ ཝུཊྛཱཡ ཏཏྠ གཏོ. སཾཝེགོ ནཱམ སཧོཏྟཔྤཉཱཎཾ, ཏཾ ནིབྦིནྡནཝསེནཔི ཧོཏི, སཾཝེགནིསྶིཏཾ སནྡྷཱཡཱཧ ‘‘པཱིཏིསཾཝེགེན སཾཝིགྒོ’’ཏི. སོ པན ཡསྨཱ པུརིམཱཝཏྠཱཡ ཙལནཾ ཧོཏི ཙིཏྟསྶ, ཏསྨཱ ཨཱཧ ‘‘ཙལིཏོ ཀམྤིཏོ’’ཏི. ཏིཁིཎསོཏེན པུརིསེནཱཏི བྷགཝནྟཾ སནྡྷཱཡཱཧ.

༢༠༩. དྷམྨདེསནཾ ཨཱརབྷི ཡཐཱ ཝིནེཡྻདམནཀུསལོ ཝསནཊྛཱནཊྛེནཱཏི ཨིདཾ ཨཱརམིཏབྦབྷཱཝསྶ བྷཱཝལཀྑཎཝཙནཾ. ཨཱརམཏི ཨེཏྠཱཏི ཨཱརཱམོ, རཱུཔཾ ཨཱརཱམོ ཨེཏསྶཱཏི རཱུཔཱརཱམཾ, ཏཏོ ཨེཝ ཏནྣིནྣབྷཱཝེན རཱུཔེ རཏནྟི རཱུཔརཏཾ, ཏེན སམྨོ དུཔྤཏྟིཡཱ རཱུཔེན སམྨུདིཏནྟི རཱུཔསམྨུདིཏཾ, ཏདེཏཾ ཏདབྷིཧཏཛཝནཀིཙྩཾ ཏཏྠ ཨཱརོཔེཏྭཱ ཝུཏྟཾ. དནྟནྟིཨཱདཱིསུཔི ཨེསེཝ ནཡོ. དནྟཾ དམིཏཾ. ནིབྦིསེཝནནྟི ཝིགཏཝིསུཀཱཡིཀཾ. གུཏྟནྟི སཏིཡཱ གུཏྟཾ. རཀྑིཏནྟི ཏསྶེཝ ཝེཝཙནཾ. སཾཝུཏནྟི ཨཔནཱིཏཾ པཝེསནིཝཱརཎེན. ཏེནཱཧ ‘‘པིཧིཏ’’ནྟི.

༢༡༠. ཨུཔྤཛྫནཔརིལཱ༹ཧནྟི ཨུཔྤཛྫནཀིལེསཔརིལཱ༹ཧཾ. ཀིཾ ཝཙནཾ ཝཏྟབྦཾ ཨསྶཱཏི རཱུཔཱརམྨཎཾ ཨནུབྷཝིཏྭཱ སམུདཡཱདིཔཧཱནཾ པརིགྒཎྷིཏྭཱ པརིནིབྦིནྡིཏྭཱ ཝིརཛྫིཏྭཱ ཡོ ཝིམུཏྟོ, ཏཏྠ ཀིཾ ཝུདྡྷིཧཏཔརིཡཱཡོ ཨཝསྶཾ ལབྷཏི ན ལབྷཏཱིཏི པུཙྪཏི. པརིབྦཱཛཀོ ཏཱདིསེ སཱརབདྡྷཝིམུཏྟིཀེ ཝུདྡྷིཧཏོཏི ན ཝདེཡྻཱཏི ཨཱཧ ‘‘ན ཀིཉྩི, བྷོ, གོཏམཱ’’ཏི.

༢༡༡. ཏེཏི ཏཡཱ, ཨཡམེཝ ཝཱ པཱཋོ. ཝསྶཾ ཝཱསོ ཝསྶཾ ཨུཏྟརཔདལོཔེན, ཝསྶིཏུཾ ཨརཧཏཱིཏི ཝསྶིཀོ, ཝསྶཀཱལེ ནིཝཱསཱནུཙྪཝིཀོཏི ཨཏྠོ.

ནཱཏིཨུཙྩོ ཧོཏི ནཱཏིནཱིཙོཏི གིམྷིཀོ ཝིཡ ཨུཙྩོ, ཧེམནྟིཀོ ཝིཡ ནཱིཙོ ན ཧོཏི, ཨཐ ཁོ ཏདུབྷཡཝེམཛ྄ཛྷལཀྑཎཏཱཡ ནཱཏིཨུཙྩོ ཧོཏི ནཱཏིནཱིཙོ. ནཱཏིཏནཱུནཱིཏི ¶ ཧེམནྟིཀསྶ ཝིཡ ན ཁུདྡཀཱནི. ནཱཏིབཧཱུནཱིཏི གིམྷིཀསྶ ཝིཡ ན ཨཏིབཧཱུནི. མིསྶཀཱནེཝཱཏི ཧེམནྟིཀགིམྷིཀེསུ ཝུཏྟལཀྑཎཝོམིསྶཀཱནི. ཨུཎྷཔཝེསནཏྠཱཡཱཏི ནིཡཱུཧེསུ པུརེབྷཏྟཾ པཙྪཱབྷཏྟཉྩ པཏིཏསཱུརིཡོབྷཱསཝསེན ཨུཎྷསྶ ཨབྦྷནྟརཔཝེསནཏྠཱཡ. བྷིཏྟིནིཡཱུཧཱནི ནཱིཧརཱིཡནྟཱིཏི ¶ དཀྑིཎཔསྶེ བྷིཏྟཱིསུ ནིཡཱུཧཱནི ནཱིཧརིཏྭཱ ཀརཱིཡནྟི. ཝིཔུལཛཱལཱནཱིཏི པུཐུལཚིདྡཱནི. ཨུདཀཡནྟཱནཱིཏི ཨུདཀཝཱཧཀཡནྟཱནི.

ནཱིལུཔྤལགཙྪཀེ ཀཏྭཱཏི ཝིཀསིཏེཧི ནཱིལུཔྤལེཧི གཙྪཀེ ནལི༹ནིཀེ ཀཏྭཱ. གནྡྷཀལལནྟི གནྡྷམིསྶཀཀདྡམཾ. ཡམཀབྷིཏྟཱིཏི ཡུགལ༹བྷིཏྟི, ཏསྶཱ ཨནྟརེ ནཱལི༹, ཡཏོ ཨུདཀཾ ཨབྷིརུཧཏི. ལོཧནཱལི༹ནྟི ལོཧམཡཡནྟནཱལི༹ཾ. ཛཱལནྟི ཏམྦལོཧམཡཾ ཛཱལཾ. ཧེཊྛཱ ཡནྟཾ པརིཝཏྟེནྟཱིཏི ཧེཊྛཱབྷཱགེ ཨུདཀཡནྟཾ གམེནྟི. ཨུདཀཕུསིཏེ ཏེམེནྟེ ཝིཝཎྞཏཱ མཱཧོསཱིཏི ནཱིལཔཊཾ ནིཝཱསེཏི. དིཝཱཀཱལེཏི དིཝསཝེལཱཡ. ཨཛ྄ཛྷཏྟཾ ཝཱུཔསནྟཙིཏྟོ ཝིཧརཱམཱིཏི ཨེཏེན ཨཏྟནོ ཕལསམཱཔཏྟིཝིཧཱརོ བྷགཝཏཱ དསྶིཏོཏི ཨཱཧ – ‘‘ཏཱཡ རཏིཡཱ རམམཱནོཏི ཨིདཾ ཙཏུཏྠཛ྄ཛྷཱནིཀཕལསམཱཔཏྟིརཏིཾ སནྡྷཱཡ ཝུཏྟ’’ནྟི.

༢༡༢. མཧཱ ཙ ནེསཾ པཔཉྩོཏི ནེསཾ རཱཛཱུནཾ མཧཱཔཔཉྩོ རཱཛིདྡྷིཝསེན སབྦདཱ སམྤཏྟིཝིསཡོ ཙ, ཨནུབྷཝིཏུཾ ན ལབྷནྟཱིཏི ཨདྷིཔྤཱཡོ. མནྟེ གཝེསནྟཱ ཝིཙརནྟི, ན བྷོགསུཁཾ. གཎནཱ ནཱམ ཨཙྪིནྣགཎནཱ, ན ཝིགཎགཎནཱ ན པཎགཎནཱ. ཨཱཝཊྚོཏི ཡཐཱདྷིགཏེ དིབྦེ ཀཱམེ པཧཱཡ ཀཱམཧེཏུ ཨཱཝཊྚོ ནིཝཏྟོ པརིཝཏྟིཏོ བྷཝེཡྻ. ཨེཝཾ མཱནུསཀཱ ཀཱམཱཏི ཡཐཱ ཀོཙི ཀུསགྒེན ཨུདཀཾ གཧེཏྭཱ མཧཱསམུདྡེ ཨུདཀཾ མིནེཡྻ. ཏཏྠ མཧཱསམུདྡེ ཨུདཀམེཝ མཧནྟཾ ཝིཔུལཾ པཎཱིཏཉྩ, ཨེཝཾ དིབྦཱནཾ ཀཱམཱནཾ སམཱིཔེ ཨུཔནིདྷཱཡ མཱནུསཀཱ ཀཱམཱ ཨཔྤམཏྟཀཱ ཨོརམཏྟཀཱ ནིཧཱིནཱ, དིབྦཱཝ ཀཱམཱ མཧནྟཱ ཝིཔུལཱ ཨུལཱ༹རཱ པཎཱིཏཱ. སམདྷིགཡ྄ཧཱཏི སམྨཱ ཨདྷིགམནཝསེན ནིགྒཡ྄ཧ དིབྦམྤི སུཁཾ ཧཱིནཾ ཀཏྭཱ ཏིཊྛཏི.

༢༡༣. ཨཱརོགྱཧེཏུཀཾ སུཁཾ ཨསྶ ཨཏྠཱིཏི སུཁཱི, ཏཾ པནསྶ རོགཝིགམཏོཝཱཏི ཨཱཧ ‘‘པཋམཾ དུཀྑིཏོ པཙྪཱ སུཁིཏོ’’ཏི. སེརཱི ནཱམ ཨཏྟཱདྷཱིནཝུཏྟཱིཏི ཨཱཧ ‘‘སེརཱི ཨེཀཀོ བྷཝེཡྻཱ’’ཏི. ཨཏྟནོ ཝསོ ¶ སཡཾཝསོ, སོ ཨེཏསྶ ཨཏྠཱིཏི སཡཾཝསཱི. ཨངྒཱརཀཔལླཾ ཝིཡ ཀཱམཝཏྠུཔརིལཱ༹ཧཧེཏུཏོ. ཏཙྪེཏྭཱཏི གྷཊྚེཏྭཱ, ཀཎྜཱུཡིཏྭཱཏི ཨཏྠོ.

༢༡༤. ཡེན ཀཱཡོ མདྷུརཀཛཱཏོ ཧོཏི, ཏཾ ཀིར ཀུཊྛཾ ཚཝིཾ ཝིནཱསེཏི, ཙམྨཾ ཚིདྡཛཱཏཾ ཝིཡ ཧོཏི. ཏེནེཝཱཧ ‘‘ཨུཔཧཏཀཱཡཔྤསཱདོ’’ཏི. པཙྩལཏྠཱཏི པཊིལབྷི. ཨཝིཛྫཱབྷིབྷཱུཏཏཱཡ ཝིརོདྷིཔཙྩཡསམཱཡོགེན པཉྙིནྡྲིཡསྶ ཨུཔཧཏཏྟཱ. ཨཱཡཏིཾ དུཀྑཕལཏཱཡ ཨེཏརཧི ཙ ཀིལེསདུཀྑབཧུལཏཱཡ ཀཱམཱནཾ དུཀྑསམྥསྶཏཱ, ཏདུབྷཡསཾཡུཏྟེསུ ཏེསུ ཙ ཏཾ ཨསལླཀྑིཏྭཱ ¶ ཨེཀནྟསུཁཱབྷིནིཝེསོ ཝིཔརཱིཏསཉྙཱཡ, ན ཀེཝལཱཡ སུཁཝེདནཱཡ སུཁཱཏི པཝཏྟསཉྙཱི.

༢༡༥. ཏཱནཱིཏི ཀུཊྛསརཱིརེ ཝཎམུཁཱནི. ཨསུཙཱིནཱིཏི ཨསུབྷཱནི. དུགྒནྡྷཱནཱིཏི ཝིསྶགནྡྷཱནི. པཱུཏཱིནཱིཏི ཀུཎཔབྷཱུཏཱནི. ཨིདཱནཱིཏི ཨེཏརཧི. ནཁེཧི ཝིཔྤཏཙྪནཨགྒིཔརིཏཱཔནེཧི ཨཏིནིཔྤཱིལ༹ནཀཱལེ པཱཎཀཱ…པེ… པགྒྷརནྟི, ཏེན ཝེདནཱ ཏནུཀཱ ཧོཏི. ཨེཝནྟི ཝུཏྟནཡེན ཝེདནཱཡ ཏནུཀབྷཱཝཏོ.

ཨཱརོགྱབྷཱཝེ དྷནལཱབྷཱདིལཱབྷུཔྤཏྟིཏོ, ཨསཏི ཙ ཨཱརོགྱེ ལཱབྷསྶ ནིརཏྠཀབྷཱཝཏོ, དིཊྛདྷམྨིཀཱདིསབྦསམྤཏྟཱིནཾ ལཱབྷསྶ ནིམིཏྟབྷཱཝཏོ ཙ ཨཱརོགྱཔརམཱ ལཱབྷཱ. ནིབྦཱནེ སུཁུཔྤཏྟིཏོ, ཨསཏི ཙ ནིབྦཱནཱདྷིགམེ ཏཱདིསསྶ སུཁསྶ ཨནུཔལབྦྷནཏོ, སབྦསངྑཏཝིཝིཏྟཏྟཱ ཙ སབྦསོ ཙ སཾསཱརདུཀྑཱབྷཱཝཏོ, ཨདྷིགཏེ ཙ ཏསྨིཾ སཀལཝཊྚདུཀྑཱབྷཱཝཏོ ཙ ནིབྦཱནཾ པརམཾ སུཁཾ. པུབྦབྷཱགམགྒཱནནྟི ཀཱཡཱནུཔསྶནཱདིབྷེདབྷིནྣཱནཾ ཨརིཡམགྒསྶ པུབྦབྷཱགིཡཱནཾ མགྒཱནཾ. ཏེསཉྩ ཨམཏགཱམིཏཱ ནཱམ ཏནྣིནྣཏཱཝསེནེཝ སཙྪིཀིརིཡཱཝསེནཱཏི ཨཱཧ ‘‘པུབྦབྷཱགགམནེནེཝ ཨམཏགཱམིན’’ནྟི. ཨཊྛངྒིཀོ ཨརིཡམགྒོ ཁེམོ སབྦཔརིསྶཡསམུགྒྷཱཏནེན ཨནུཔདྡུཏཏྟཱ, ཏཾསམངྒཱིནཾ སབྦསོ ཨནུཔདྡུཏཏྟཱ ཏཾསམངྒཱིནཾ སབྦསོ ཨནུཔདྡཝཧེཏུཏོ ཙ. ལདྡྷིཝསེན གཧིཏཱཏི སསྶཏཝཱདཱདཱིཧི ཀེཝལཾ ཏེསཾ ལདྡྷིཝསེན ཏཐཱ གཧིཏཱ. ཁེམཨམཏགཱམིནནྟི ཨིམིནཱ ཧི ‘‘ཁེམཾཨམཏགཱམིན’’ནྟི ཝིབྷཏྟིཨལོཔེན ནིདྡེསོ, ཨཏྠོ པན ཝིབྷཏྟིལོཔེན དཊྛབྦོཏི དསྶེཏི.

༢༡༦. ཨནོམཛྫཏཱིཏི ¶ ཨནུ ཨནུ ཨོམཛྫཏི. ཨཔརཱཔརཾ ཧཏྠཾ ཧེཊྛཱ ཨོཏཱརེནྟོ མཛྫཏི.

༢༡༧. ཚེཀནྟི གྷནབྷཱཝེན ཝཱིཏཾ. གྷནམཊྛབྷཱཝེན སུནྡརཾ ཧོཏཱིཏི ཨཱཧ ‘‘སམྤནྣ’’ནྟི. སཱདྷཱུཧི པརམཔྤིཙྪསནྟུཊྛེཧི ལཱཏོ གཧིཏོཏི སཱཧུལི༹. སངྐཱརཙོལ༹ཀཾ ནིཙྩཀཱལ༹ཀཾ.

༢༡༨. ཏཏྠ ཏཏྠ རུཛནཊྛེན ཝིབཱདྷནཊྛེན རོགོཝ བྷཱུཏོ. ཝིཔསྶནཱཉཱཎེནཔི སིཁཱཔྤཏྟེན ཨཱརོགྱཾ ཨེཀདེསེན པསྶཏི, ནིབྦཱནཉྩ ཝཊྚཔཊིཔཀྑཏོཏི ཨཱཧ ‘‘ཝིཔསྶནཱཉཱཎཉྩེཝཱ’’ཏི.

༢༡༩. ཨནྟརཱཏི ¶ པཋམུཔྤཏྟི ཛརཱམརཎཱནཾ ཝེམཛ྄ཛྷེ. ཨུཔཧཏོཏི པིཏྟསེམྷཱདིདོསེཧི དཱུསིཏབྷཱཝེན ཀཐིཏོ. པིཏྟཱདིདོསེ པན བྷེསཛྫསེཝནཱཡ ནིཝཏྟེནྟོ ཨུཔཧཏཾ པཊིཔཱཀཏིཀཾ ཀརོནྟོ ཙཀྑཱུནི ཨུཔྤཱདེཏི ནཱམ. ཝིནཊྛཱནཱིཏི ཨནུཔྤཏྟིདྷམྨཏཾ ཨཱཔནྣཱནི.

༢༢༠. པུབྦེ ཝུཏྟེ སཱཧུལི༹ཡཙཱིརེ. ཝཊྚེ ཨནུགཏཙིཏྟེནཱཏི ཨནམཏགྒེ སཾསཱརཝཊྚེ ཨནཱདཱིནཝདསྶིཏཱཡ ཨནུགཱམིཙིཏྟེན.

༢༢༡. དྷམྨསྶཱཏི ནིབྦཱནསྶ. ཨནུདྷམྨནྟི ཨནུརཱུཔཾ ནིཡྻཱནདྷམྨཾ. ཏེནཱཧ ‘‘ཨནུཙྪཝིཀཾ པཊིཔད’’ནྟི. པཉྩཀྑནྡྷེཏི པཉྩུཔཱདཱནཀྑནྡྷེ དསྶེཏི. ‘‘དཱིགྷརཏྟཾ ཝཏ, བྷོ’’ཏིཨཱདིནཱ པཱལི༹ཡཾ ཝིཝཊྚཾ དསྶིཏཾ. ཏེནཱཧ ‘‘ཨུཔཱདཱནནིརོདྷཱཏི ཝིཝཊྚཾ དསྶེནྟོ’’ཏི. སེསཾ སུཝིཉྙེཡྻམེཝ.

མཱགཎྜིཡསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༦. སནྡཀསུཏྟཝཎྞནཱ

༢༢༣. དེཝེན ¶ ཝསྶེན ཀཏོ སོབྦྷོ དེཝཀཏསོབྦྷོ. ཏེནཱཧ ‘‘ཝསྶོ…པེ… རཧདོ’’ཏི. གུཧཱཏི པཾསུགུཧཱ པཱསཱཎགུཧཱ མིསྶཀགུཧཱཏི ཏིསྶོ གུཧཱ. ཏཏྠ པཾསུགུཧཱ ཨུདཀམུཏྟཊྛཱནེ ཨཧོསི ནིནྣཊྛཱནཾ པན ཨུདཀེན ཨཛ྄ཛྷོཏྠཏཾ. ཨུམངྒཾ ཀཏྭཱཏི ཧེཊྛཱ སུདུགྒཾ ཀཏྭཱ. ཨནམཏགྒིཡཾ ¶ པཙྩཝེཀྑིཏྭཱཏི ‘‘ན ཁོ སོ སཏྟཱཝཱསོ སུལབྷརཱུཔོ, ཡོ ཨིམིནཱ དཱིགྷེན ཨདྡྷུནཱ ཨནཱཝུཊྛཔུབྦོ’’ཏིཨཱདིནཱ (མ. ནི. ༡.༡༦༠) ཨིདཉྩ ཏལཱ༹ཀཾ མཡཱ ཝུཏྠཔུབྦཾ བྷཝིསྶཏི, ཏམྤི ཋཱནཾ སོ ཙ ཨཏྟབྷཱཝོ ཨཔཉྙཏྟིཀབྷཱཝཾ གཏོཏི ཨེཝཾ ཨནམཏགྒིཡཾ པཙྩཝེཀྑིཏྭཱ ཏཱདིསཾ ཋཱནཾ གནྟུཾ ཝཊྚཏི. ཨིམིནཱ ནཡེན སམུདྡཔབྦཏདསྶནཱདཱིསུཔི པཙྩཝེཀྑཎཱཝིདྷི ཝེདིཏབྦོ.

ཨུཙྩཾ ནདམཱནཱཡཱཏི ཨུཙྩཾ ཀཏྭཱ སདྡཾ ཀརོནྟིཡཱ ཀཱམསྶཱདབྷཝསྶཱདཱདིཝཏྠུནྟི ‘‘ཨཡཉྩ ཨཡཉྩ ཀཱམོ ཨིཊྛོ ཀནྟོ མནཱཔོ, ཨསུཀོ བྷཝོ ཨིཊྛོ ཀནྟོ མནཱཔོ, ཨེཝམཡཾ ལོཀོ པིཡེཧི པིཡཏརོ’’ཏི ཨེཝཾ ཀཱམསྶཱདབྷཝསྶཱདལོཀསྶཱདཱདིསངྑཱཏཾ ཝཏྠུཾ. དུགྒཏིཏོ སཾསཱརཏོ ཙ ནིཡྻཱཏི ཨེཏེནཱཏི ནིཡྻཱནཾ, སགྒམགྒོ མོཀྑམགྒོ ཙ, ཏཾ ནིཡྻཱནཾ ཨརཧཏི, ནིཡྻཱནེ ཝཱ ནིཡུཏྟཱཏི ནིཡྻཱནིཀཱ, ནིཡྻཱནཾ ཝཱ ཕལཾ ཨེཏིསྶཱ ཨཏྠཱིཏི ནིཡྻཱནིཀཱ, ཝཙཱིདུཙྩརིཏཱདིསཾཀིལེསཏོ ནིཡྻཱཏཱིཏི ཝཱ ནིཡྻཱནཱིཡཱ, ཨཱི-ཀཱརསྶ རསྶཏྟཾ ཡ-ཀཱརསྶ ཙ ཀ-ཀཱརཾ ཀཏྭཱ ནིཡྻཱནིཀཱ, ཙེཏནཱཡ སདྡྷིཾ སམྥཔྤལཱཔཱ ཝེརམཎི. ཏཔྤཊིཔཀྑཏོ ཨནིཡྻཱནིཀཱ, ཏསྶཱ བྷཱཝོ ཨནིཡྻཱནིཀཏྟཾ, ཏསྨཱ ཨནིཡྻཱནིཀཏྟཱ. ཏིརཙྪཱནབྷཱུཏཱཏི ཏིརོཀརཎབྷཱུཏཱ. གེཧསྶིཏཀཐཱཏི ཀཱམཔཊིསཾཡུཏྟཀཐཱ. ཀམྨཊྛཱནབྷཱཝེཏི ཨནིཙྩཏཱཔཊིསཾཡུཏྟཙཏུསཙྩཀམྨཊྛཱནབྷཱཝེ. སཧ ཨཏྠེནཱཏི སཱཏྠཀཾ, ཧིཏཔཊིསཾཡུཏྟནྟི ཨཏྠོ. ཝིསིཁཱཏི གྷརསནྣིཝེསོ, ཝིསིཁཱགཧཎེན ཙ ཏནྣིཝཱསིནོ གཧིཏཱ ‘‘གཱམོ ཨཱགཏོ’’ཏིཨཱདཱིསུ (སཱརཏྠ. ཊཱི. ༡.ཨཱཙརིཡཔརམྤརཀཐཱཝཎྞནཱ) ཝིཡ. ཏེནེཝཱཧ ‘‘སཱུརཱ སམཏྠཱ’’ཏི ‘‘སདྡྷཱ པསནྣཱ’’ཏི ཙ. ཀུམྦྷཊྛཱནཔྤདེསེན ཀུམྦྷདཱསིཡོ ཝུཏྟཱཏི ཨཱཧ ‘‘ཀུམྦྷདཱསིཀཐཱ ཝཱ’’ཏི.

༢༢༨. ཝོཧཱརོ ཝིཡ ཏེསཾ ཏཐཱ ཝོཧཱརམཏྟཾ གཧེཏྭཱ ཝུཏྟཾ ‘‘བྲཧྨཙརིཡཝཱསེ’’ཏི. ཨཀཏཱཏི སམེན, ཝིསམེན ཝཱ ཀེནཙི ཧེཏུནཱ ན ཀཏཱ ན ཝིཧིཏཱ. ཀཏཝིདྷོ ཀརཎཝིདྷི ནཏྠི ¶ ཨེཏེསནྟི ཨཀཊཝིདྷཱ. པདདྭཡེནཔི ལོཀེ ཀེནཙི ཧེཏུཔཙྩཡེན ནེསཾ ཨནིབྦཏྟཏཾ དསྶེཏི. ཨིདྡྷིཡཱཔི ན ནིམྨིཏཱཏི ཀསྶཙི ཨིདྡྷིམཏོ ཙེཏོཝསིཔྤཏྟསྶ དེཝསྶ, ཨིསྶརཱདིནོ ཝཱ ཨིདྡྷིཡཱཔི ན ནིམྨིཏཱ. ཨནིམྨཱཏཱཏི ཀསྶཙི ཨནིམྨཱཔིཏཱ. རཱུཔཱདིཛནཀབྷཱཝནྟི རཱུཔསདྡཱདཱིནཾ པཙྩཡབྷཱཝཾ, རཱུཔཱདཡོཔི པཐཝིཡཱདཱིཧི ¶ ཨཔྤཊིབདྡྷཝུཏྟིཀཱཏི ཏསྶ ཨདྷིཔྤཱཡོ. ཡཐཱ པབྦཏཀཱུཊཾ ཀེནཙི ཨནིབྦཏྟིཏཾ ཀསྶཙི ཙ ཨནིབྦཏྟནཀཾ, ཨེཝམེཏེཔཱིཏི ཨཱཧ ‘‘པབྦཏཀཱུཊཱ ཝིཡ ཋིཏཱཏི ཀཱུཊཊྛཱ’’ཏི. ཡམིདཾ བཱིཛཏོ ཨངྐུརཱདི ཛཱཡཏཱིཏི ཝུཙྩཏི, ཏཾ ཝིཛྫམཱནམེཝ ཏཏོ ནིཀྑམཏི ནཱཝིཛྫམཱནཾ, ཨཉྙཐཱ ཨཉྙཏོཔི ཨཉྙསྶ ཨུཔལདྡྷི སིཡཱཏི ཨདྷིཔྤཱཡོ. ཨེཝཾ ཋིཏཱཏི ཨེཝཾ ནིབྦིཀཱརཱ ཋིཏཱ. ཨུབྷཡེནཔཱིཏི ཨཏྠདྭཡེནཔཱིཏི ཝདནྟི. ‘‘ཀཱུཊཊྛཱ ཨེསིཀཊྛཱཡིཊྛིཏཱ’’ཏི པདདྭཡེནཔི. ཏེསཾ སཏྟནྣཾ ཀཱཡཱནཾ. ཋིཏཏྟཱཏི ནིབྦིཀཱརཱབྷཱཝེན ཋིཏཏྟཱ. ན ཙལནྟཱིཏི ཝིཀཱརཾ ནཱཔཛྫནྟི. ཝིཀཱརཱབྷཱཝཏོ ཧི ཏེསཾ སཏྟནྣཾ ཀཱཡཱནཾ ཨེསིཀཊྛཱཡིཊྛིཏཏཱ. ཨནིཉྫནཉྩ ཨཏྠཏོ པཀཏིཡཱ ཨཝཊྛཱནམེཝཱཏི དསྶེཏུཾ ‘‘ན ཝིཔརིཎཱམེནྟཱི’’ཏི ཝུཏྟཾ. ཏཐཱ ཨཝིཔརིཎཱམདྷམྨཏྟཱ ཨེཝ ཏེ ཨཉྙམཉྙཾ ན བྱཱབཱདྷེནྟི. སཏི ཧི ཝིཀཱརཾ ཨཱཔཱདེཏབྦཏཱཡ བྱཱབཱདྷཀཏཱཔི སིཡཱ, ཏཐཱ ཨནུགྒཧེཏབྦཏཱཡ ཨནུགྒཱཧཀཏཱཏི ཏདབྷཱཝཾ དསྶེཏུཾ པཱལི༹ཡཾ ‘‘ནཱལ’’ནྟིཨཱདི ཝུཏྟཾ.

པཐཝཱི ཨེཝ ཀཱཡེཀདེསཏྟཱ པཐཝཱིཀཱཡོ. ཧནྟུཾ ཝཱ གྷཱཏེཏུཾ ཝཱ སམཏྠོ ནཱམ ནཏྠི ཛཱིཝསཏྟམཱནཾ ཀཱཡཱནཾ ནིཙྩཏཱཡ ནིབྦིཀཱརབྷཱཝཏོ, ཨེཏེནེཝ ནེསམཧནྟབྦཏཱ ཨགྷཱཏེཏབྦཏཱ ཨཏྠཏོ ཝུཏྟཱཡེཝཱཏི དཊྛབྦཱ. ཏཐཱ ཧི ཝུཏྟཾ ‘‘སཏྟནྣཾཏྭེཝ ཀཱཡཱན’’ནྟིཨཱདི. སོཏུཾ ཝཱ སཱཝེཏུཾ ཝཱ སམཏྠོ ནཱམ ནཏྠཱིཏི པཙྩེཀཾ ནེསཾ སཝནེསུ ཨསམཏྠཏྟཱ ཏདེཀདེསཱདཱིསུཔི ཨསམཏྠཏཾ དཱིཔེཏི. ཡདི ཀོཙི ཧནྟཱ ནཏྠི, ཀཐཾ སཏྠཔྤཧཱརོཏི ཨཱཧ ‘‘ཡཐཱ མུགྒརཱསིཨཱདཱིསཱུ’’ཏིཨཱདི. ཀེཝལཾ སཉྙཱམཏྟམེཝ ཧོཏི, ཧནནགྷཱཏནཱདི པན པརམཏྠཏོ ནཏྠེཝ ཀཱཡཱནཾ ཨཝིཀོཔནཱིཡབྷཱཝཏོཏི ཨདྷིཔྤཱཡོ. ཀེཝལཾ ཏཀྐམཏྟེན ནིརཏྠཀཾ དིཊྛིཾ དཱིཔེཏཱིཏི ཨེཏེན ཡསྨཱ ཏཀྐིཀཱ ནིརངྐུསཏཱཡ པརིཀཔྤནསྶ ཡཾ ཀིཉྩི ཨཏྟནཱ པརིཀཔྤིཏཾ སཱརཏོ མཉྙམཱནཱ ཏཐེཝ ཨབྷིནིཝིསྶ ཏཀྐདིཊྛིགྒཱཧཾ གཎྷནྟི, ཏསྨཱ ན ཏེསཾ དིཊྛིཝཏྠུསྨིཾ ཝིཉྙཱུཧི ཝིཙཱརཎཱ ཀཏྟབྦཱཏི དསྶེཏི. ཀེཙཱིཏི སཱརསམཱསཱཙརིཡཱ. པཉྩིནྡྲིཡཝསེནཱཏི པཉྩརཱུཔིནྡྲིཡཝསེན. ཀམྨནྟི ལདྡྷི ཀམྨབྷཱཝེན སུཔཱཀཊཏྟཱ. ཨཝངྐཀཐཱཏཱརཎཱདིཀཱ དྭཱསཊྛི པཊིཔདཱ. ཨེཀསྨིཾ ཀཔྤེཏི ཨེཀསྨིཾ མཧཱཀཔྤེ.

པུརིསབྷཱུམིཡོཏི ¶ པདྷཱནཔུགྒལེན ནིདྡེསོ, ཨིཏྠཱིནམྤེཏཱ བྷཱུམིཡོ ཨིཙྪནྟེཝ. བྷིཀྑུ ཙ པནྣཀོཏིཨཱདི ཏེསཾ པཱལི༹ཡེཝ. ཏཏྠ པནྣཀོཏི བྷིཀྑཱཡ ཝིཙརཎཀོཏི ཝདནྟི, ཏེསཾ ཝཱ པཊིཔཏྟིཾ ¶ པཊིཔནྣཀོ. ཛིནོཏི ཛིཎྞོ, ཛརཱཝསེན ནིཧཱིནདྷཱཏུཀོཏི ཝདནྟི, ཨཏྟནོ ཝཱ པཊིཔཏྟིཡཱ པཊིཔཀྑཾ ཛིནིཏྭཱ ཋིཏོ. སོ ཀིར ཏཐཱབྷཱུཏོ ཀསྶཙིཔི དྷམྨཾ ན ཀཐེཏི, ཏེནཱཧ ‘‘ན ཀིཉྩི ཨཱཧཱ’’ཏི. ཨལཱབྷིནྟི ‘‘སོ ན ཀུམྦྷིམུཁཱ པཊིགྒཎྷཏཱི’’ཏིཨཱདིནཱ (དཱི. ནི. ༡.༣༩༤) ནཡེན ཝུཏྟཨལཱབྷཧེཏུསམཱཡོགེན ཨལཱབྷིཾ. ཏཏོ ཨེཝ ཛིགྷཙྪཱདུབྦལཔརེཏཏཱཡ སཡནཔརཱཡཎཾ སམཎཾ པནྣབྷཱུམཱིཏི ཝདཏི.

ཨཱཛཱིཝཝུཏྟིསཏཱནཱིཏི སཏྟཱནཾ ཨཱཛཱིཝབྷཱུཏཱནི ཛཱིཝིཀཱཝུཏྟིསཏཱནི. པསུགྒཧཎེན ཨེལ༹ཀཛཱཏི གཧིཏཱ, མིགགྒཧཎེན རུརུགཝཡཱདིསབྦམིགཛཱཏི. བཧཱུ དེཝཱཏི ཙཱཏུམཧཱརཱཛིཀཱདིབྲཧྨཀཱཡིཀཱདིཝསེན ནེསཾ ཨནྟརབྷེདཝསེན བཧཱུ དེཝཱ. ཏཏྠ ཙཱཏུམཧཱརཱཛིཀཱནཾ ཨེཀཙྩོ ཨནྟརབྷེདོ ‘‘མཧཱསམཡསུཏྟེན’’ (དཱི. ནི. ༢.༣༣༡ ཨཱདཡོ) དཱིཔེཏབྦོ. མཱནུསཱཔི ཨནནྟཱཏི དཱིཔདེསཀུལཝཾསཱཛཱིཝཱདིཝིབྷཱགཝསེན མཱནུསཱཔི ཨནནྟབྷེདཱ. པིསཱཙཱ ཨེཝ པེསཱཙཱ, ཏེ ཨཔརཔེཏཱདཡོ མཧནྟཱ ཝེདིཏབྦཱ.

ཚདྡནྟདཧམནྡཱཀིནིཡོ ཀུལཱི༹རམུཙལིནྡནཱམེན ཝདཏི. གཎྛིཀཱཏི པབྦགཎྛིཀཱ. པཎྜིཏོཔི…པེ… ཨུདྡྷཾ ན གཙྪཏི, ཀསྨཱ? སཏྟཱནཾ སཾསརཎཀཱལསྶ ནིཡཏབྷཱཝཏོ.

ཨཔརིཔཀྐཾ སཾསརཎནིམིཏྟཾ སཱིལཱདིནཱ པརིཔཱཙེཏི ནཱམ སཱིགྷཾཡེཝ ཝིསུདྡྷིཔྤཏྟིཡཱ. པརིཔཀྐཾ ཕུསྶ ཕུསྶ པཏྭཱ པཏྭཱ པརིཔཀྐབྷཱཝཱཔཱདནེན བྱནྟིཾ ཀརོཏི ནཱམ. སུཏྟགུལེ༹ཏི སུཏྟཝཊྚིཡཾ. ནིབྦེཋིཡམཱནམེཝ པལེཏཱིཏི ཨུཔམཱཡ སཏྟཱནཾ སཾསཱརོ ཨནུཀྐམེན ཁཱིཡཏེཝ, ན ཏསྶ ཝདྡྷཱིཏི དསྶེཏི པརིཙྪིནྣརཱུཔཏྟཱ.

༢༢༩. ནིཡཏིཝཱདེ པཀྑིཔནྟོཏི སབྦཉྙུཏཾ པཊིཛཱནིཏྭཱཔི པདེསཉྙུཏཱཡ ཨསམྤཱཡམཱནོ ཏཏྠ ཨཏྟནོ ཨཉྙཱཎཀིརིཡཾ པརིཧརིཏུཾ ཨསཀྐོནྟོ ཙ ‘‘ཨེཝམེསཱ ནིཡཏཱི’’ཏི ནིཡཏིཝཱདེ པཀྑིཔནྟོ.

༢༣༠. དྷམྨཀཐཱཡ ¶ ཨཔསྶཡབྷཱུཏོ ཨནུསྶཝོ ཨེཏསྶ ཨཏྠཱིཏི ཨནུསྶཝཱི, ཏེནེཝསྶ ཨཔསྶཡཝཱདཾ དསྶེཏུཾ ‘‘ཨནུསྶཝནིསྶིཏོ’’ཏི ཨཱཧ. སཝནཾ སཙྩཏོཏི ཡཾ ཀིཉྩི ཨནུསྶཝཾ, ཏཾ སཝནཾ སཙྩནྟི གཧེཏྭཱ ཋིཏོ. པིཊཀསམྤདཱཡཱཏི གནྠསམྤཱདནེན, ཏཱདིསཾ གནྠཾ པགུཎཾ ཝཱཙུགྒཏཾ ཀཏྭཱ ཏཾ ནིསྶཱཡ དྷམྨཾ ཀཐེཏི. ཏེནཱཧ ‘‘ཝགྒཔཎྞཱསཀཱཡཱ’’ཏིཨཱདི.

༢༣༢. མནྡཔཉྙོཏི ¶ པརིཏྟཔཉྙོ. མོམཱུཧོཏི སམྨུཡ྄ཧཀོ. ‘‘ཨེཝནྟིཔི མེ ནོ’’ཏིཨཱདིནཱ ཝིཝིདྷོ ནཱནཔྤཀཱརོ ཁེཔོ ཝཱཙཱཡ པརཝཱདཱནཾ ཁཱིཔནཾ ཝཱཙཱཝིཀྑེཔོ, ཏཾ ཝཱཙཱཝིཀྑེཔཾ, ན མརཏི ན པཙྪིཛྫཏི ཡཐཱཝུཏྟོ ཝཱདཝིཀྑེཔོ ཨེཏཱཡཱཏི ཨམརཱ, ཏཏྠ པཝཏྟཱ དིཊྛི ཨམརཱཝིཀྑེཔོ, ཏཾ ཨམརཱཝིཀྑེཔཾ. ཨཔརིཡནྟཝིཀྑེཔནྟི ‘‘ཨེཝམྤི མེ ནོ’’ཏིཨཱདིནཱ པུཙྪིཏསྶ ཨཔརིཡོསཱཔནཝསེན ཝིཀྑེཔཾ. ཨིཏོ ཙིཏོ ཙ སནྡྷཱཝཏི ཨེཀསྨིཾ སབྷཱཝེ ཨནཝཊྛཱནཏོ. གཱཧཾ ན ཨུཔགཙྪཏཱིཏི མིཙྪཱགཱཧཏཱཡ ཨུཏྟརཝིདྷཱནཱཡ པུརིམཔཀྑཾ ཋཔེཏྭཱ གཱཧཾ ན ཨུཔགཙྪཏི. ཨམརཱསདིསཱཡ ཨམརཱཡ ཝིཀྑེཔོཏི ཨམརཱཝིཀྑེཔོ.

ཨིདཾ ཀུསལནྟི ཨེཏྠ ཨིཏི-སདྡོ པཀཱརཏྠོ, ཨིམིནཱ པཀཱརེནཱཏི ཨཏྠོ. ཨམརཱཝིཀྑེཔིཀོ ཡཐཱ ཀུསལེ, ཨེཝཾ ཨཉྙསྨིཾ ཡཾ ཀིཉྩི ཀེནཙི པུཙྪིཏཾ ཨཏྠཾ ཨཏྟནོ ཨརུཙྩནཏཱཡ ‘‘ཨེཝནྟིཔི མེ ནོ’’ཏིཨཱདིནཱ ཏཏྠ ཏཏྠ ཝིཀྑེཔཉྙེཝ ཨཱཔཛྫཏི, ཏསྨཱ ‘‘ཨེཝནྟིཔི མེ ནོ’’ཏིཨཱདི ཏཏྠ ཏཏྠ པུཙྪིཏཱཀཱརཔཊིསེདྷནཝསེན ཝིཀྑིཔནཱཀཱརདསྶནཾ. ནནུ ཙེཏྠ ཝིཀྑེཔཝཱདིནོ ཝིཀྑེཔཔཀྑསྶ ཨནནུཛཱནནཾ ཝིཀྑེཔཔཀྑེ ཨཝཊྛཱནཾ ཡུཏྟནྟི? ན, ཏཏྠཱཔི ཏསྶ སམྨཱུལ༹ྷསྶ པཊིཀྑེཔཝསེནེཝ ཝིཀྑེཔཝཱདསྶ པཝཏྟནཏོ. ཏེན ཝུཏྟཾ ‘‘ནོ’’ཏི. ཏཐཱ ཧི སཉྩཡོ བེལཊྛཔུཏྟོ རཉྙཱ ཨཛཱཏསཏྟུནཱ སནྡིཊྛིཀཾ སཱམཉྙཕལཾ པུཊྛོ པརལོཀཏྟིཀཱདཱིནཾ པཊིསེདྷནམུཁེན ཝིཀྑེཔཾ བྱཱཀཱསི.

ཨེཏྠཱཧ – ‘‘ནནུ ཙཱཡཾ སབྦོཔི ཨམརཱཝིཀྑེཔིཀོ ཀུསལཱདཡོ དྷམྨེ པརལོཀཏྟིཀཱདཱིནི ཙ ཡཐཱབྷཱུཏཾ ཨནཝབུཛ྄ཛྷམཱནོ ཏཏྠ ཏཏྠ པཉྷཾ པུཊྛོ སམཱནོ པུཙྪཱཡ ཝིཀྑེཔམཏྟཾ ཨཱཔཛྫཏི, ཏསྶ ཀཐཾ དིཊྛིགཏབྷཱཝོ. ན ཧི ཨཝཏྟུཀཱམསྶ ཝིཡ པུཙྪིཏམཏྠཾ ཨཛཱནནྟསྶ ཝིཀྑེཔཀརཎམཏྟེན ¶ ཏསྶ དིཊྛིགཏིཀཏཱ ཡུཏྟཱ’’ཏི? ཝུཙྩཏེ – ན ཧེཝ ཁོ པུཙྪཱཡ ཝིཀྑེཔཀརཎམཏྟེན ཏསྶ དིཊྛིགཏིཀཏཱ, ཨཐ ཁོ མིཙྪཱབྷིནིཝེསཝསེན. སསྶཏཱབྷིནིཝེསེན མིཙྪཱབྷིནིཝིཊྛོཡེཝ ཧི པུགྒལོ མནྡབུདྡྷིཏཱཡ ཀུསལཱདིདྷམྨེ པརལོཀཏྟིཀཱདཱིནི ཙ ཡཱཐཱཝཏོ ཨཔྤཊིཔཛྫམཱནོ ཨཏྟནཱ ཨཝིཉྙཱཏསྶ ཨཏྠསྶ པརཾ ཝིཉྙཱཔེཏུཾ ཨསཀྐུཎེཡྻཏཱཡ མུསཱཝཱདབྷཡེན ཙ ཝིཀྑེཔཾ ཨཱཔཛྫཏཱིཏི. ཨཐ ཝཱ པུཉྙཔཱཔཱནཾ ཏབྦིཔཱཀཱནཉྩ ཨནཝབོདྷེན ཨསདྡཧནེན ཙ ཏབྦིསཡཱཡ པུཙྪཱཡ ཝིཀྑེཔཀརཎཾཡེཝ སུནྡརནྟི ཁནྟིཾ རུཙིཾ ཨུཔྤཱདེཏྭཱ ཨབྷིནིཝིསནྟསྶ ཨུཔྤནྣཱ ཝིསུཾཡེཝ སཱ ཨེཀཱ དིཊྛི སཏྟབྷངྒདིཊྛི ཝིཡཱཏི དཊྛབྦཱ, ཨིནྡྲིཡབདྡྷཏོ ཙ ཏཏིཡཊྛཱནབྷཱཝེ དསྶིཏོ.

༢༣༤. སནྣིདྷིཀཱརཀཾ ¶ ཀཱམེཏི ཨེཏྠ ཨནིནྡྲིཡབདྡྷཱནི ཨདྷིཔྤེཏཱནཱིཏི ཏིལཏཎྜུལཱདིགྒཧཎཾ, ཏསྶ ལོཀསྶ ཨཔྤསཱདཔརིཧཱརཏྠཾ ཀདཱཙི ཏཎྜུལནཱལི༹ཨཱདིསངྒཧཎཀརཎཾ སནྡྷཱཡ ཝུཏྟཾ ‘‘ཏིལཏཎྜུལཱདཡོ པཉྙཱཡནྟཱི’’ཏི.

༢༣༦. ཨཱཛཱིཝཀཱ མཏཱ ནཱམཱཏི ཨིམེ ཨཱཛཱིཝཀཱ སབྦསོ སམྨཱཔཊིཔཏྟིརཧིཏཱ མིཙྪཱ ཨེཝ ཙ པཊིཔཛྫམཱནཱ ཨདྷིསཱིལསངྑཱཏསྶ སཱིལཛཱིཝིཏསྶ ཨབྷཱཝེན མཏཱ ནཱམ. པུཏྟམཏཱཏི མཏཔུཏྟཱ. སམཎེ གོཏམེ བྲཧྨཙརིཡཝཱསོ ཨཏྠཱིཏི སམཎཾ ཨེཝ གོཏམཾ པརིསུདྡྷོ སུཔརིཔུཎྞོ ཏཀྐརསྶ སམྨཱ དུཀྑཀྑཡཱཝཧོ བྲཧྨཙརིཡཝཱསོ ཨཏྠི. ཨེཏེནེཏྠ དྷམྨསུདྷམྨཏཱདིདཱིཔནེན བུདྡྷསུབུདྡྷཏཉྩ དཱིཔེཏི, ཨཉྙཏྠ ནཏྠཱིཏི ཨིམིནཱ བཱཧིརཀེསུ ཏསྶ ཨབྷཱཝཾ. སེསཾ སུཝིཉྙེཡྻམེཝ.

སནྡཀསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༧. མཧཱསཀུལུདཱཡིསུཏྟཝཎྞནཱ

༢༣༧. ཨབྷིཉྙཱཏཱཏི ¶ ཨེདིསོ ཨེདིསོ ཙཱཏི ཨབྷིལཀྑཎཝསེན ཉཱཏཱ. ཨཔྤསདྡསྶ ཝིནཱིཏོ, ཨཔྤསདྡཏཱཡ མནྡབྷཱཎིཏཱཡ ཝིནཱིཏོཏི ཙ ཨཔྤསདྡཝིནཱིཏོཏི ཝུཙྩམཱནེ ཨཉྙེན ཝིནཱིཏབྷཱཝོ དཱིཔིཏོ ཧོཏི, བྷགཝཱ པན སཡམྦྷུཉཱཎེན སཡམེཝ ཝིནཱིཏོ. ཏསྨཱ པཱལི༹ཡཾ ‘‘ཨཔྤསདྡཝིནཱིཏོ’’ཏི ན ཝུཏྟཾ. ཏེནཱཧ ‘‘ན ཧི བྷགཝཱ ཨཉྙེན ཝིནཱིཏོ’’ཏི.

༢༣༨. ཧིཡྻོདིཝསཾ ¶ ཨུཔཱདཱཡ ཏཏོ ཨཱསནྣཱནི ཀཏིཔཡཱནི དིཝསཱནི པུརིམཱནི ནཱམ ཧོནྟི, པུརིམཱནཱིཏི ཙ པུབྦཀཱནི, ཨཏཱིཏཱནཱིཏི ཨཏྠོ. ཏཏོ པརནྟི ཡཐཱ ཝུཏྟཨཏཱིཏདིཝསཏོ ཨནནྟརཾ པརཾ པུརིམཏརཾ ཨཏིསཡེན པུརིམཏྟཱ. ཨིཏི ཨིམེསུ དྭཱིསུ པཝཏྟིཏོ ཡཐཱཀྐམཾ པུརིམཔུརིམཏརབྷཱཝོ, ཨེཝཾ སནྟེཔི ཡདེཏྠ ‘‘པུརིམཏར’’ནྟི ཝུཏྟཾ, ཏཏོ པབྷུཏི ཡཾ ཡཾ ཨོརཾ, ཏཾ ཏཾ པརཾ, ཡཾ ཡཾ པརཾ, ཏཾ ཏཾ ‘‘པུརིམཏར’’ནྟི ཝུཏྟཾ ཧོཏི. ཀུཏཱུཧལཡུཏྟཱ སཱལཱ ཀུཏཱུཧལསཱལཱ ཡཐཱ ‘‘ཨཱཛཉྙརཐོ’’ཏི. ཨིམེ དསྶནཱདཡོ.

ཨཡཐཱབྷཱུཏགུཎེཧཱིཏི ཨཡཐཱབྷཱུཏཾ མིཙྪཱདཱིཔིཏཨཏྠམཏྟེནེཝ ཨུགྒྷོསིཏགུཎེཧི སམུགྒཏོ གྷོསིཏོ. ཏརནྟི ཨཏིཀྐམནྟི ཨེཏེནཱཏི ཏིཏྠཾ, ཨགྒམགྒོ. དིཊྛིགཏིཀམགྒོ པན ཨཡཐཱབྷཱུཏོཔི ཏེསཾ ཏཐཱ ཝིཏརཎཾ ཨུཔཱདཱཡ ཏིཏྠནྟི ཝོཧརཱིཡཏཱིཏི ཏཾ ཀརོནྟཱ ཏིཏྠཀརཱ. ཨོསརཏཱིཏི པཝིསཏི.

༢༣༩. སཧིཏནྟི པུབྦཱཔརཱཝིརུདྡྷཾ. ན ཀིཉྩི ཛཱཏནྟི པཊིཉྙཱདོསཧེཏུདོསཨུདཱཧརཎདོསདུཊྛདོསཏཱཡ ན ཀིཉྩི ཛཱཏཾ. ཏེནཱཧ ‘‘ཨཱརོཔིཏོ ཏེ ཝཱདོ’’ཏི. ཝདནྟི ཏེན པརིབྷཱསནྟཱིཏི ཝཱདོ དོསོ. སབྷཱཝཀྐོསེནཱཏི སབྷཱཝཏོ པཝཏྟཀོཊྛཱསེན.

༢༤༠. པཱིལེ༹ཡྻཱཏི མདྷུབྷཎྜེན སཧ བྷཱཛནེ པཱིལེ༹ཏྭཱ དདེཡྻ. སབྲཧྨཙཱརཱིཧི སམྤཡོཛེཏྭཱཏི སཧདྷམྨིཀེཧི ཝིཧེཋནཔཡོགཾ ཀཏྭཱ, ཏེནཱཧ ‘‘ཝིཝཱདཾ ཀཏྭཱ’’ཏི.

༢༤༡. ཨིཏརཱིཏརེནཱཏི པཎཱིཏཏོ ཨིཏརེན. ཏེནཱཧ ‘‘ལཱམཀལཱམཀེནཱ’’ཏི.

༢༤༢. བྷཏྟཀོསཀེནཱཏི ¶ ཀོསཀབྷཏྟེན, ཁུདྡཀསརཱཝབྷཏྟཀེནཱཏི ཨཏྠོ. བེལུཝམཏྟབྷཏྟཱཧཱརཱཏི བིལླཔམཱཎབྷཏྟབྷོཛནཱ. ཨོཊྛཝཊྚིཡཱཏི མུཁཝཊྚིཡཱ. སབྦཱཀཱརེནེཝཱཏི སབྦཔྤཀཱརེནེཝ. ཨནཔྤཱཧཱརོཏི ན ཝཏྟབྦོ ཀདཱཙི ཨཔྤཱཧཱརོཏི ཀཏྭཱ. ཏཏྠ ཨཏིཝིཡ ཨཉྙེཧི ཨཝིསཡ྄ཧཾ ཨཔྤཱཧཱརཏཾ བྷགཝཏོ དསྶེཏུཾ ‘‘པདྷཱནབྷཱུམིཡ’’ནྟིཨཱདི ཝུཏྟཾ. མཡཱཏི ནིསྶཀྐཝཙནཾ. ཝིསེསཏརཱཏི ཏེན དྷམྨེན ཝིསེསཝནྟཏརཱ.

ཝཏསམཱདཱནཝསེནེཝ ¶ པཾསུཀཱུལཾ དྷཱརེནྟཱིཏི པཾསུཀཱུལིཀཱཏི ཨཱཧ – ‘‘སམཱདིནྣཔཾསུཀཱུལིཀངྒཱ’’ཏི, སདྡཏྠོ པན ‘‘ཝིསུདྡྷིམགྒེ’’ (ཝིསུདྡྷི. ༡.༢༤) ཝུཏྟནཡེན ཝེདིཏབྦོ. པིཎྜཔཱཏིཀཱ སཔདཱནཙཱརིནོཏིཨཱདཱིསུཔི ཨེསེཝ ནཡོ. ཏཏྠ ཏཏྠ སཏྠེན ཚིནྡིཏཏྟཱ སཏྠལཱུཁཱནི. ཡཾ ཡཾ སཔྤཱཡཾ, ཏསྶེཝ གཧཎཾ ཨུཙྩིནནྟི ཨཱཧ ‘‘ཨུཙྩིནིཏྭཱ…པེ… ཐིརཊྛཱནམེཝ གཧེཏྭཱ’’ཏི. ཨལཱབུལོམསཱནཱིཏི ཨལཱབུལོམཱནི ཝིཡ སུཁུམཏརཱནི ཙཱིཝརསུཏྟཾསཱུནི ཨེཏེསཾ སནྟཱིཏི ཨལཱབུལོམསཱནི. པཱཏིཏསཱཎཔཾསུཀཱུལནྟི ཀལེ༹ཝརེན སདྡྷིཾ ཚཌྜིཏསཱཎམཡཾ པཾསུཀཱུལཾ, ཡཾ ཏུམྦམཏྟེ པུལ༹ཝེ ཨོདྷུནིཏྭཱ སཏྠཱ གཎྷི.

‘‘ཡཐཱཔི བྷམརོ པུཔྥ’’ནྟིཨཱདིནཱ (དྷ. པ. ༤༩) ཝུཏྟཾ མདྷུཀརབྷིཀྑཱཙཱརཝཏཾ ‘‘པིཎྜིཡཱལོཔབྷོཛནཾ ནིསྶཱཡ པབྦཛྫཱ’’ཏི (མཧཱཝ. ༧༣, ༡༢༨) ཝཙནཏོ བྷིཀྑཱུནཾ པཀཏིབྷཱུཏཾ ཝཏནྟི ཝུཏྟཾ ‘‘ཨུཉྪཱསཀེ ཝཏེ རཏཱ’’ཏི. ཝཏ-སདྡོ ཙེཏྠ པཀཏིཝཏསངྑཱཏཾ སཀཝཏཾ ཝདཏི. ཏེནཱཧ ‘‘ཨུཉྪཱཙརིཡསངྑཱཏེ བྷིཀྑཱུནཾ པཀཏིཝཏེ’’ཏི. ཨུཙྩནཱིཙགྷརདྭཱརཊྛཱཡིནོཏི མཧནྟཁུདྡཀགེཧཱནཾ བཧིདྭཱརཀོཊྛཀཊྛཱཡིནོ. ཀབརམིསྶཀཾ བྷཏྟཾ སཾཧརིཏྭཱཏི ཀཎཱཛཀམིསྶཀཾ བྷཏྟཾ སམྤིཎྜིཏྭཱ. ཨུམྨཱརཏོ པཊྛཱཡཱཏི གྷརུམྨཱརཏོ པཊྛཱཡ.

ཙཱིཝརཱནུགྒཧཏྠནྟི ཙཱིཝརཱནུརཀྑཎཏྠཾ. ཨེཏྠ ཙ ཡསྨཱ བུདྡྷཱ ནཱམ སདེཝཀེ ལོཀེ ཨནུཏྟརཾ པུཉྙཀྑེཏྟཾ, སཱ ཙསྶ པུཉྙཀྑེཏྟཏཱ པརམུཀྐཾསགཏཱ, ཏསྨཱ སཏྟཱནཾ ཏཱདིསཾ ཨུཔཀཱརཾ ཨཱཙིཀྑིཏྭཱ ཏེ ཙ ཨནུགྒཎྷནྟཱ གཧཔཏིཙཱིཝརཾ སཱདིཡནྟི, ཙཏུཔཙྩཡསནྟོསེ པན ནེ པརམུཀྐཾསགཏཱ ཨེཝཱཏི དཊྛབྦཾ.

༢༤༤. སཔྤཙྩཡནྟི སཧེཏུཀཾ སཀཱརཎཾ ཧུཏྭཱ དྷམྨཾ དེསེཏཱིཏི ཨཡམེཏྠ ཨཏྠོ. ཙོདཀོ པན ཨདྷིཔྤཱཡཾ ཨཛཱནནྟོ ‘‘ཀིཾ པནཱ’’ཏིཨཱདིམཱཧ. ཨིཏརོ ‘‘ནོ ན དེསེཏཱི’’ཏིཨཱདིནཱ ཨདྷིཔྤཱཡཾ ཝིཝརཏི. ནིདཱནནྟི ཙེཏྠ ཉཱཔཀཾ ཨུཔྤཏྟིཀཱརཎཾ ཨདྷིཔྤེཏཾ, ཏཉྩ ཏསྶ ཏསྶ ཨནུཔྤཏྟིཡུཏྟསྶ ཨཏྠསྶ པཊིཔཀྑཧརཎཏོ ‘‘སཔྤཱཊིཧཱརིཡ’’ནྟི ཝུཙྩཏཱིཏི ཨཱཧ ‘‘པུརིམསྶེཝེཏཾ ¶ ཝེཝཙན’’ནྟི. རཱགཱདཱིནཾ ཝཱ པཊིཧརཎཾ པཊིཧཱརིཡཾ, ཏདེཝ པཱཊིཧཱརིཡཾ, སཧ པཱཊིཧཱརིཡེནཱཏི སཔྤཱཊིཧཱརིཡཾ. རཱགཱདིཔཊིསེདྷཝསེནེཝ ཧི སཏྠཱ དྷམྨཾ དེསེཏི.

༢༤༥. ཏསྶ ¶ ཏསྶ པཉྷསྶཱཏི ཡཾ ཡཾ པཉྷཾ པརོ ཨབྷིསངྑརིཏྭཱ བྷགཝནྟཾ ཨུཔསངྐམིཏྭཱ པུཙྪཏི, ཏསྶ ཏསྶ པཉྷསྶ. ཨུཔརི ཨཱགམནཝཱདཔཐནྟི ཝིསྶཛྫནེ ཀཏེ ཏཏོ ཨུཔརི ཨཱགཙྪནཀཾ ཝཱདམགྒཾ. ཝིསེསེཏྭཱ ཝདནྟོཏི ཝཏྟཏི, ‘‘བྷོ གོཏམ, ཝཏྟུམརཧཏཱི’’ཏི ཨཏྟནོ ཝཱདབྷེདནཏྠཾ ཨཱཧཏཾ ཀཱརཎཾ ཨཏྟནོ མཱརཎཏྠཾ ཨཱཝུདྷཾ ནིདསྶེནྟོ ཝིཡ ཝིསེསེཏྭཱ ཝདནྟོ པཧཱརཀེན ཝཙནེན. ཨནྟརནྟརེཏི མཡཱ ཝུཙྩམཱནཀཐཱཔབནྡྷསྶ ཨནྟརནྟརེ. དདེཡྻ ཝདེཡྻ. ཨེཝརཱུཔེསུ ཋཱནེསཱུཏི པརཝཱདཱིཧི སདྡྷིཾ ཝཱདཔཊིཝཱདཊྛཱནེསུ. ཏེ ནིགྒཧེཏུཾ མཡཱ དེསིཏཾ སུཏྟཔདཾ ཨཱནེཏྭཱ མམཡེཝ ཨནུསཱསནིཾ ཨོཝཱདཾ པཙྩཱསཱིསནྟི.

༢༤༦. སམྤཱདེམཱིཏི མནོརཐཾ སམྤཱདེམི. པརིཔཱུརེམཱིཏི ཨཛ྄ཛྷཱསཡཾ པརིཔཱུརེམི. ཨདྷིསཱིལེཏི ཨདྷིཀེ ཨུཏྟམསཱིལེ. སཱཝཀསཱིལཏོ ཙ པཙྩེཀབུདྡྷསཱིལཏོ ཙ བུདྡྷཱནཾ སཱིལཾ ཨདྷིཀཾ ཨུཀྐཊྛཾ པརམུཀྐཾསཏོ ཨནཉྙསཱདྷཱརཎབྷཱཝཏོ. ཏེནཱཧ ‘‘བུདྡྷསཱིལཾ ནཱམ ཀཐིཏ’’ནྟི. ཋཱནུཔྤཏྟིཀཔཉྙཱཏི ཏཏྠ ཏཏྠ ཋཱནསོ ཨུཔྤནྣཔཉྙཱ. ཏེནཱཧ ‘‘ཏཏྠཱ’’ཏིཨཱདི. ཨཝསེསཱ པཉྙཱཏི ཨིདྷ པཱལི༹ཡཾ ཨཱགཏཱ ཨནཱགཏཱ ཙ ཡཐཱཝུཏྟཉཱཎདྭཡཝིནིམུཏྟཱ པཉྙཱ.

༢༤༧. ཝིསེསཱདྷིགམཱནནྟི སཏིཔཊྛཱནཱདཱིནཾ ཨདྷིགནྡྷབྦཝིསེསཱནཾ. ཨབྷིཉྙཱ ནཱམ ཚ ཨབྷིཉྙཱ, ཏཱསུ ཨུཀྐཊྛནིདྡེསེན ཚལ༹བྷིཉྙཱརཧཏོཝ ཨགྒམགྒཔཉྙཱ ཨིདྷ ཨབྷིཉྙཱཏི ཨདྷིཔྤེཏཱ, ཏསྶ ཝོསཱནཾ པརིཡོསཱནཾ པཱརམཱི པརམུཀྐཾསཱཏི ཨཝཀཾསཱཏི ཙ ཨགྒཕལཾ ཝུཙྩཏཱིཏི ཨཱཧ ‘‘ཨབྷིཉྙཱ…པེ… ཨརཧཏྟཾ པཏྟཱ’’ཏི.

ཨུཔཱཡཔདྷཱནེཏི ཨརིཡཕལཱདྷིགམནསྶ ཨུཔཱཡབྷཱུཏེ པདྷཱནེ. ‘‘ཨནུཔྤནྣཔཱཔཀཱནུཔྤཱདཱདིཨཏྠཱ’’ཏི གཧིཏཱ ཏཐེཝ ཧོནྟི, ཏཾ ཨཏྠཾ སཱདྷེནྟིཡེཝཱཏི ཨེཏསྶ ཨཏྠསྶ དཱིཔཀོ སམྨཱ-སདྡོཏི ཡཐཱཨདྷིཔྤེཏཏྠསྶ ཨནུཔྤནྣཔཱཔཀཱནུཔྤཱདཱདིནོ ཨུཔཱཡབྷཱུཏེ, པདྷཱནཨུཔཱཡབྷཱུཏེཏི ཨཏྠོ. སམྨཱ-སདྡསྶ ཝཱ ཡོནིསོ ཨཏྠདཱིཔཀཏཾ སནྡྷཱཡ ‘‘ཡོནིསོ པདྷཱནེ’’ཏི ཝུཏྟཾ. ཚནྡཾ ཛནེཏཱིཏི ཀཏྟུཀམྱཏཱཀུསལཙྪནྡཾ ཨུཔྤཱདེཏི པཝཏྟེཏི ཝཱ. ཝཱཡམཏཱིཏི པཡོགཔརཀྐམཾ ཀརོཏི. ཝཱིརིཡཾ ཨཱརབྷཏཱིཏི ཀཱཡིཀཙེཏསིཀཝཱིརིཡཾ ཀརོཏི. ཙིཏྟཾ ཨུཀྑིཔཏཱིཏི ¶ ཏེནེཝ སཧཛཱཏཝཱིརིཡེན ཀོསཛྫཔཀྑཏོ ཙིཏྟཾ ཨུཀྑིཔཏི. པདཧཏཱིཏི སམྨཔྤདྷཱནབྷཱུཏཾ ཝཱིརིཡཾ པཝཏྟེཏི. པཊིཔཱཊིཡཱ པནེཏཱནི ཙཏྟཱརི པདཱནི ཨཱསེཝནཱབྷཱཝནཱབཧུལཱིཀམྨསཱཏཙྩཀིརིཡཱཧི ¶ ཡོཛེཏབྦཱནི. ‘‘པདཧཏཱི’’ཏི ཝཱ ཨིམིནཱ ཨཱསེཝནཱདཱིཧི སདྡྷིཾ སིཁཱཔཏྟཾ ཨུསྶོལ༹ྷིཝཱིརིཡཾ ཡོཛེཏབྦཾ. ཝཌྜྷིཡཱ པརིཔཱུརཎཏྠནྟི ཡཱཝཏཱ བྷཱཝནཱཔཱརིཔཱུརིཡཱ པརིཔཱུརཎཏྠཾ. ཡཱ ཋིཏཱིཏི ཡཱ ཀུསལཱནཾ དྷམྨཱནཾ པཊིཔཀྑཝིགམེན ཨཝཊྛིཏི. སོ ཨསམྨོསོཏི སོ ཨཝིནཱསོ. ཡཾ ཝེཔུལླནྟི ཡོ སབྦསོ ཝིཔུལབྷཱཝོ མཧནྟཏཱ. བྷཱཝནཱཔཱརིཔཱུརཱིཏི བྷཱཝནཱཡ པརིཔཱུརིཏཱ. ཨཏྠོཏིཔི ཝེདིཏབྦཾ པུརིམཔཙྪིམཔདཱནཾ སམཱནཏྠབྷཱཝཏོ.

པུབྦབྷཱགཔཊིཔདཱ ཀཐིཏཱཏཾཏཾཝིསེསཱདྷིགམསྶ པཊིཔདཱཝིབྷཱཝནཱཡ ཨཱརདྡྷཏྟཱ. ཨཀུསལཱནཾ དྷམྨཱནཾ ཨནུཔྤཛྫནེན ཨནཏྠཱཝཧཏཱ ནཱམ ནཏྠཱིཏི ཝུཏྟཾ – ‘‘ཨུཔྤཛྫམཱནཱ’’ཏི ཝཙནཾ ཨུཔྤནྣཱནཾ རཱསནྟརབྷཱཝེན གཧིཏཏྟཱ. ཏཐཱ ཀུསལཱནཾ དྷམྨཱནཾ ཨུཔྤཛྫནེནཱཏི ཝུཏྟཾ – ཨནུཔྤཛྫམཱནཱཏི ཝཙནཾ ཨུཔྤནྣཱནཾ རཱསནྟརབྷཱཝེན གཧིཏཏྟཱ. ནིརུཛ྄ཛྷམཱནཱཏི པཊིཔཀྑསམཱཡོགེན ཝིནསྶམཱནཱ, ན ཁཎནིརོདྷཝསེན ནིརུཛ྄ཛྷམཱནཱ.

ལོབྷཱདཡོ ཝེདིཏབྦཱ, ཡེ ཨཱརདྡྷཝིཔསྶཀཱནཾ ཨུཔྤཛྫནཱརཧཱ. སཀིཾ ཨུཔྤཛྫིཏྭཱཏི སབྷཱཝཀཐནམཏྟམེཏཾ. ཨེཀཝཱརམེཝ ཧི མགྒོ ཨུཔྤཛྫཏི. ནིརུཛ྄ཛྷམཱནོཏི སརསེནེཝ ནིརུཛ྄ཛྷམཱནོ. ན ཧི ཏསྶ པཊིཔཀྑསམཱཡོགོ ནཱམ ཨཏྠི. ཕལསྶཱཏི ཨནནྟརཀཱལེཝ ཨུཔྤཛྫནཀཕལསྶ. པཙྩཡཾ དཏྭཱཝ ནིརུཛ྄ཛྷཏཱིཏི ཨིམིནཱ མགྒོ སམྤཏི ཨཱཡཏིཉྩ ཨེཀནྟེནེཝ ཨཏྠཱཝཧོཏི དསྶེཏི. པུརིམསྨིམྤཱིཏི ‘‘ཨནུཔྤནྣཱ མེ ཀུསལཱ དྷམྨཱ ཨནུཔྤཛྫམཱནཱ ཨནཏྠཱཡ སཾཝཏྟེཡྻུ’’ནྟི ཨེཏསྨིཾ ཏཏིཡཝཱརེཔི. ‘‘སམཐཝིཔསྶནཱ གཧེཏབྦཱ’’ཏི ཝུཏྟཾ ཨཊྛཀཐཱཡཾ, ཏཾ པན མགྒསྶ ཨནུཔྤནྣཏཱཡ སབྦྷཱཝཏོ, ཨནུཔྤཛྫམཱནེ ཙ ཏསྨིཾ ཝཊྚཱནཏྠསབྦྷཱཝཏོཏི མགྒསྶཔི སཱདྷཱརཎབྷཱཝཏོ ན ཡུཏྟནྟི པཊིཀྑིཔཏི. ཡདི སམཐཝིཔསྶནཱནམྤི ཨནུཔྤཏྟི ཨནཏྠཱཝཧཱ, མགྒསྶ ཨནུཔྤཏྟིཡཱ ཝཏྟབྦཾ ནཏྠཱིཏི.

མཧནྟཾ ¶ , གཱརཝཾ ཧོཏི, ཏསྨཱ ‘‘སངྒྷགཱརཝེན ཡཐཱརུཙི ཝནྡིཏུཾ ན ལབྷཱམཱི’’ཏི སངྒྷེན སཧ ན ནིཀྑམི. ཨེཏྟཀཾ དྷཱཏཱུནཾ ནིདྷཱནཾ ནཱམ ཨཉྙཏྲ ནཏྠི, མཧཱདྷཱཏུནིདྷཱནཏོ ཧི ནཱིཧརིཏྭཱ ཀཏིཔཡཱ དྷཱཏུཡོ ཏཏྠ ཏཏྠ ཙེཏིཡེ ཨུཔནཱིཏཱ, ཨིདྷ པན རཱམགཱམཐཱུཔེ ཝིནཊྛེ ནཱགབྷཝནཾ པཝིཊྛཱ དོཎམཏྟཱ དྷཱཏུཡོ ཨུཔནཱིཏཱ. ཨཏིམནྡཱནི ནོཏི ནནུ ཨཏིཝིཡ མནྡཱནི.

སཾཝིཛྫིཏྭཱཏི ‘‘ཀཐཉྷི ནཱམ མཱདིསོ ཨཱིདིསཾ ཨནཏྠཾ པཱཔུཎིསྶཏཱི’’ཏི སཾཝེགཾ ཛནེཏྭཱ. ཨཱིདིསཾ ནཱམ མཱདིསཾ ཨཱརབྦྷ ཝཏྟབྦནྟི ཀིཾ ཝདཏཱིཏི ཏཾ ཝཙནཾ ཨནཱདིཡནྟོ.

སནྟསམཱཔཏྟིཏོ ¶ ཨཉྙཾ སནྠམྦྷནཀཱརཎཾ བལཝཾ ནཏྠཱིཏི ཏཏོ པརིཧཱིནོ སམྨཱཔཊིཔཏྟིཡཾ པཏིཊྛཱ ཀཐཾ བྷཝིསྶཏཱིཏི ཨཱཧ ‘‘སནྟཱཡ…པེ… ན སཀྐོཏཱི’’ཏི. ན ཧི མཧཱརཛྫུཡཱ ཚིནྣཱཡ སུཏྟཏནྟཱུ སནྠམྦྷེཏུཾ སཀྐོནྟཱིཏི. སམཐེ དསྶེཏྭཱ ཏེན སམཱནགཏིཀཱ ཨིམསྨིཾ ཝིསཡེ ཝིཔསྶནཱཔཱིཏི ཨིམིནཱ ཨདྷིཔྤཱཡེནཱཧ ‘‘ཨེཝཾ ཨུཔྤནྣཱ སམཐཝིཔསྶནཱ…པེ… སཾཝཏྟནྟཱི’’ཏི.

ཀཱསཱཝནྟི ཀཱསཱཝཝཏྠཾ. ཀཙྪཾ པཱིལེ༹ཏྭཱ ནིཝཏྠནྟི པཙྪིམཾ ཨོཝཊྚིཀཾ པཱིལེ༹ནྟོ ཝིཡ དལ༹ྷཾ ཀཏྭཱ ནིཝཏྠཾ ཨདྡསཾསཱུཏི ཡོཛནཱ.

ཝུཏྟནཡེནཱཏི (ཨ. ནི. ཊཱི. ༡.༡.༣༩༤) ‘‘ཀཱམཱ ནཱམེཏེ ཨནིཙྩཱ དུཀྑཱ ཝིཔརིཎཱམདྷམྨཱ’’ཏིཨཱདིནཱ ཝཏྠུཀཱམཀིལེསཀཱམེསུ ཨཱདཱིནཝདསྶནཔུབྦཀནེཀྑམྨཔཊིཔཏྟིཡཱ ཚནྡརཱགཾ ཝིཀྑམྦྷཡཏོ སམུཙྪིནྡནྟསྶ ཙ ‘‘ཨནུཔྤནྣོ ཙ ཀཱམཱསཝོ ན ཨུཔྤཛྫཏཱི’’ཏིཨཱདིནཱ ཧེཊྛཱ སབྦཱསཝསུཏྟཝཎྞནཱདཱིསུ (མ. ནི. ༡.༡༥ ཨཱདཡོ; མ. ནི. ཨཊྛ. ༡.༡༥ ཨཱདཡོ) ཝུཏྟནཡེན. ཨཱརམྨཎརསཾ ཨནུབྷཝིཏྭཱ ནིརུདྡྷཝིཔཱཀོཏི ཏདཱརམྨཎམཱཧ. ཨནུབྷཝིཏྭཱ བྷཝིཏྭཱ ཙ ཝིགཏཾ བྷཱུཏཝིགཏཾ. ཨནུབྷཱུཏབྷཱུཏཱ ཧི བྷཱུཏཏཱསཱམཉྙེན བྷཱུཏ-སདྡེན ཝུཏྟཱ. སཱམཉྙམེཝ ཧི ཨུཔསགྒེན ཝིསེསཱིཡཏཱིཏི. ཨནུབྷཱུཏསདྡོ ཙ ཀམྨཝཙནིཙྪཱཡ ཨབྷཱཝཏོ ཨནུབྷཝཀཝཱཙཀོ དཊྛབྦོ. ཝིཔཱཀོ ཨཱརམྨཎེ ཨུཔྤཛྫིཏྭཱ ནིརུདྡྷོ བྷུཏྭཱཝིགཏོཏི ཝཏྟབྦཏཾ ཨརཧཏི, ¶ ཝིཀཔྤགཱཧཝསེན རཱགཱདཱིཧི ཏབྦིཔཀྑེཧི ཙ ཨཀུསལཾ ཀུསལཉྩ ཀམྨཾ ཨཱརམྨཎརསཾ ཨནུབྷཝིཏྭཱ ཝིགཏནྟི ཝཏྟབྦཏཾ ཨརཧཏི. ཡཐཱཝུཏྟོ པན ཝིཔཱཀོ ཀེཝལཾ ཨཱརམྨཎརསཱནུབྷཝནཝསེནེཝ པཝཏྟཏཱིཏི ཨནུབྷཝིཏྭཱ ཝིགཏཏྟཱ ནིཔྤརིཡཱཡེནེཝ ཝུཏྟོ, ཏསྶ ཙ ཏཐཱ ཝུཏྟཏྟཱ ཀམྨཾ བྷཝིཏྭཱ ཝིགཏཔརིཡཱཡེན, ཡཾ ‘‘ཨུཔྤནྣཱནཾ ཨཀུསལཱནཾ དྷམྨཱནཾ པཧཱནཱཡ, ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ’’ཏི ཨེཏྠ ‘‘ཨུཔྤནྣ’’ནྟི གཧེཏྭཱ ཏཾསདིསཱནཾ པཧཱནཾ, ཝུདྡྷི ཙ ཝུཏྟཱ. ཝིཔཙྩིཏུཾ ཨོཀཱསཀརཎཝསེན ཨུཔྤཏིཏཾ ཨཏཱིཏཀམྨཉྩ ཏཏོ ཨུཔྤཛྫིཏུཾ ཨཱརདྡྷོ ཨནཱགཏོ ཝིཔཱཀོ ཙ ‘‘ཨོཀཱསཀཏུཔྤནྣོ’’ཏི ཝུཏྟོ. ཡཾ ཨུཔྤནྣསདྡེན ཝིནཱཔི ཝིཉྙཱཡམཱནཾ ཨུཔྤནྣཾ སནྡྷཱཡ ‘‘ནཱཧཾ, བྷིཀྑཝེ, སཉྩེཏནིཀཱན’’ནྟིཨཱདི (ཨ. ནི. ༡༠.༢༡༧, ༢༡༩) ཝུཏྟཾ.

ཏེསཱུཏི ཝིཔསྶནཱཡ བྷཱུམིབྷཱུཏེསུ ཁནྡྷེསུ. ཨནུསཡིཏཀིལེསཱཏི ཨནུསཡཝསེན པཝཏྟཱ ཨཔྤཧཱིནཱ མགྒེན པཧཱཏབྦཱ ཀིལེསཱ ཨདྷིཔྤེཏཱ. ཏེནཱཧ ‘‘ཨཏཱིཏཱ…པེ… ན ཝཏྟབྦཱ’’ཏི. ཏེསཉྷི ཨམྦརུཀྑོཔམཱཡ ཝཏྟམཱནཱདིཏཱ ན ཝཏྟབྦཱ མགྒེན པཧཱཏབྦཱནཾ ཏཱདིསསྶ ཝིབྷཱགསྶ ཨནུཔྤཛྫནཏོ. ཨཔྤཧཱིནཱཝ ཧོནྟཱིཏི ཨིམིནཱ ཨཔྤཧཱིནཊྛེན ཨནུསཡཊྛོཏི དསྶེཏི. ཨིདཾ ¶ བྷཱུམིལདྡྷུཔྤནྣཾ ནཱམཱཏི ཨིདཾ ཏེསུ ཁནྡྷེསུ ཨུཔྤཏྟིརཧཀིལེསཛཱཏཾ ཏཱཡ ཨེཝ ཨུཔྤཏྟིརཧཏཱཡ བྷཱུམིལདྡྷུཔྤནྣཾ ནཱམ, ཏེབྷཱུམཀབྷཱུམིལདྡྷཱ ནཱམ ཧོཏཱིཏི ཨཏྠོ. ཏཱསུ ཏཱསུ བྷཱུམཱིསཱུཏི མནུསྶདེཝཱདིཨཏྟབྷཱཝསངྑཱཏེསུ ཨུཔཱདཱནཀྑནྡྷེསུ. ཏསྨིཾ ཏསྨིཾ སནྟཱནེ ཨནུཔྤཏྟིཨནཱཔཱདིཏཏཱཡ ཨསམུགྒྷཱཏིཏཱ. ཨེཏྠ ཙ ལདྡྷབྷཱུམིཀཾ བྷཱུམིལདྡྷནྟི ཝུཏྟཾ ཨགྒིཨཱཧིཏོ ཝིཡ.

ཨོཀཱསཀཏུཔྤནྣ-སདྡེཔི ཙ ཨོཀཱསོ ཀཏོ ཨེཏེནཱཏི ཨོཀཱསོ ཀཏོ ཨེཏསྶཱཏི ཙ ཨཏྠདྭཡེཔི ཀཏ-སདྡསྶ པརནིཔཱཏོ དཊྛབྦོ. ཨཱཧཏཁཱིརརུཀྑོ ཝིཡ ནིམིཏྟགྒཱཧཝསེན ཨདྷིགྒཧིཏཾ ཨཱརམྨཎཾ, ཨནཱཧཏཁཱིརརུཀྑོ ཝིཡ ཨཝིཀྑམྦྷིཏཏཱཡ ཨནྟོགདྷཀིལེསཾ ཨཱརམྨཎཾ. ནིམིཏྟགྒཱཧཀཱཝིཀྑམྦྷིཏཀིལེསཱ ཝཱ པུགྒལཱ ཨཱཧཏཱནཱཧཏཁཱིརརུཀྑསདིསཱ. པུརིམནཡེནེཝཱཏི ཨཝིཀྑམྦྷིཏུཔྤནྣེ ཝིཡ ‘‘ཨིམསྨིཾ ནཱམ ཋཱནེ ནུཔྤཛྫིསྶནྟཱིཏི ན ཝཏྟབྦཱ. ཀསྨཱ? ཨསམུགྒྷཱཏིཏཏྟཱ’’ཏི ཡོཛེཏྭཱ ཝིཏྠཱརེཏབྦཾ.

ཝུཏྟཾ པཊིསམྦྷིདཱམགྒེ. ཏཏྠ ཙ མགྒེན པཧཱིནཀིལེསཱནམེཝ ཏིདྷཱ ནཝཏྟབྦཏཾ ཨཔཱཀཊཾ སུཔཱཀཊཾ ཀཱཏུཾ ཨཛཱཏཕལརུཀྑོ ཨུཔམཱབྷཱཝེན ཨཱགཏོ ¶ . ཨཏཱིཏཱདཱིནཾ ཨཔྤཧཱིནཏཱ དསྶནཏྠམྤི ‘‘ཛཱཏཕལརུཀྑེན དཱིཔེཏབྦ’’ནྟི ཝུཏྟཾ. ཏཏྠ ཡཐཱ ཨཙྪིནྣེ རུཀྑེ ནིབྦཏྟཱརཧཱནི ཕལཱནི ཚིནྣེ ཨནུཔྤཛྫམཱནཱནི ན ཀདཱཙི སསབྷཱཝཱནི ཨཧེསུཾ ཧོནྟི བྷཝིསྶནྟི ཙཱཏི ཏཱནི ཨཏཱིཏཱདིབྷཱཝེན ན ཝཏྟབྦཱནི, ཨེཝཾ མགྒེན པཧཱིནཀིལེསཱ ཙ དཊྛབྦཱ. ཡཐཱ ཚེདེ ཨསཏི ཕལཱནི ཨུཔྤཛྫིསྶནྟི, སཏི ཙ ནུཔྤཛྫིསྶནྟཱིཏི ཚེདསྶ སཱཏྠཀཏཱ, ཨེཝཾ མགྒབྷཱཝནཱཡ ཙ སཱཏྠཀཏཱ ཡོཛེཏབྦཱ.

ཏེཔི པཛཧཏིཡེཝ ཀིལེསཔྤཧཱནེནེཝ ཏེསམྤི ཨནུཔྤཏྟིདྷམྨཏཱཔཱདནཏོ. ཨབྷིསངྑཱརཝིཉྙཱཎསྶཱཏི པཊིསནྡྷིཝིཉྙཱཎསྶ. ཨུཔཱདིནྣཨནུཔཱདིནྣཏོཏི ཨུཔཱདིནྣཁནྡྷཏོ ཙེཝ ཀིལེསཏོ ཙ. ཨུཔཔཏྟིཝསེན ཝུཊྛཱནཾ དསྶེཏུམཱཧ – ‘‘བྷཝཝསེན པནཱ’’ཏིཨཱདི. ཡེ སོཏཱཔནྣསྶ སཏྟ བྷཝཱ ཨཔྤཧཱིནཱ, ཏཏོ པཉྩ ཋཔེཏྭཱ ཨིཏརེ དྭེ ‘‘སུགཏིབྷཝེཀདེསཱ’’ཏི ཨདྷིཔྤེཏཱ. སུགཏིཀཱམབྷཝཏོཏི སུགཏིབྷཝེཀདེསབྷཱུཏཀཱམབྷཝཏོ. ཨརཧཏྟམགྒོ རཱུཔཱརཱུཔབྷཝཏོ ཝུཊྛཱཏི ཨུདྡྷམྦྷཱགིཡསཾཡོཛནསམུགྒྷཱཏབྷཱཝཏོ. ཡདི ཨརཧཏྟམགྒོ ཨེཝ ཨརིཡམགྒོ སིཡཱ, སོ ཨེཝ སབྦཀིལེསེ པཛཧེཡྻ, སབྦབྷཝེཧིཔི ཝུཊྛཧེཡྻ. ཡསྨཱ པན ཨོདྷིསོཝ ཀིལེསཱ པཧཱིཡནྟི, ཏསྨཱ ཧེཊྛིམཧེཊྛིམམགྒེཧི པཧཱིནཱཝསེསེ ཀིལེསེ སོ པཛཧཏི, ཨིཏི ཨིམཾ སཱམཏྠིཡཾ སནྡྷཱཡ ¶ ‘‘སབྦབྷཝེཧི ཝུཊྛཱཏིཡེཝཱཏིཔི ཝདནྟཱི’’ཏི ཝུཏྟཾ. ཏཐཱ ཧི སོ ཨེཝ ‘‘ཝཛིརཱུཔམོ’’ཏི ཝུཏྟོ.

ཧོཏུ ཏཱཝ ཝུཏྟནཡེན ཨནུཔྤནྣཱནཾ ཨཀུསལཱནཾ ཨནུཔྤཱདཱཡ, ཨུཔྤནྣཱནཾ ཨུཔྤནྣསདིསཱནཾ པཧཱནཱཡ ཨནུཔྤཏྟིདྷམྨཏཱཔཱདནཱཡ མགྒབྷཱཝནཱ, ཨཐ མགྒཀྑཎེ ཀཐཾ ཨནུཔྤནྣཱནཾ ཀུསལཱནཾ ཨུཔྤཱདཱཡ ཨུཔྤནྣཱནཉྩ ཋིཏིཡཱ བྷཱཝནཱ ཧོཏི ཨེཀཙིཏྟཀྑཎིཀཏྟཱ ཏསྶཱཏི ཙོདེཏི, ཨིཏརོ ‘‘མགྒཔྤཝཏྟིཡཱཡེཝཱ’’ཏི པརིཧཱརམཱཧ. མགྒོ ཧི ཀཱམཉྩེཀཙིཏྟཀྑཎིཀོ, ཏཐཱརཱུཔོ པནསྶ པཝཏྟིཝིསེསོ, ཡཾ ཨནུཔྤནྣཱ ཀུསལཱ དྷམྨཱ སཱཏིསཡཾ ཨུཔྤཛྫནྟི, ཨུཔྤནྣཱ ཙ སཝིསེསཾ པཱརིཔཱུརིཾ པཱཔུཎནྟི. ཏེནཱཧ ‘‘མགྒོ ཧཱི’’ཏིཨཱདི. ཀིཉྩཱཔི ཨརིཡམགྒོ ཝཏྟམཱནཀྑཎེ ཨནུཔྤནྣོ ནཱམ ན ཧོཏི, ཨནུཔྤནྣཔུབྦཏཾ ཨུཔཱདཱཡ ཨུཔཙཱརཝསེན ཏཐཱ ཝུཙྩཏཱིཏི དསྶེཏུཾ ‘‘ཨནཱགཏཔུབྦཾ ཧཱི’’ཏིཨཱདི ཝུཏྟཾ. ཨཡམེཝཱཏི ཨཡཾ མགྒསྶ ཡཐཱཔཙྩཡཔཝཏྟི ¶ ཨེཝ ཋིཏི ནཱམཱཏི, མགྒསམངྒཱི པུགྒལོ མགྒམྤི བྷཱཝེནྟོ ཨེཝ ཏསྶ ཋིཏིཡཱ བྷཱཝེཏཱིཏི ཝཏྟུཾ ཝཊྚཏི.

ཨུཔསམམཱནཾ གཙྪཏཱིཏི ཝིཀྑམྦྷནཝསེན སམུཙྪེདཝསེན ཀིལེསེ ཨུཔསམེནྟཾ ཝཏྟཏི. པུབྦབྷཱགིནྡྲིཡཱནི ཨེཝ ཝཱ ཨདྷིཔྤེཏཱནི. ཏེནེཝཱཧ ‘‘ཀིལེསཱུཔསམཏྠཾ ཝཱ གཙྪཏཱི’’ཏི.

༢༤༨. ཨདྷིམུཙྩནཊྛེནཱཏི (དཱི. ནི. ཊཱི. ༢.༡༢༩; ཨ. ནི. ཊཱི. ༣.༨.༦༦) ཨདྷིཀཾ སཝིསེསཾ མུཙྩནཊྛེན, ཏེནཱཧ ‘‘སུཊྛུ མུཙྩནཊྛོ’’ཏི. ཨེཏེན སཏིཔི སབྦསྶཔི རཱུཔཱཝཙརཛ྄ཛྷཱནསྶ ཝིཀྑམྦྷནཝསེན པཊིཔཀྑཏོ ཝིམུཏྟབྷཱཝེ ཡེན བྷཱཝནཱཝིསེསེན ཏཾ ཛྷཱནཾ སཱཏིསཡཾ པཊིཔཀྑཏོ ཝིམུཙྩིཏྭཱ པཝཏྟཏི, སོ བྷཱཝནཱཝིསེསོ དཱིཔིཏོ. བྷཝཏི ཧི སམཱནཛཱཏིཡུཏྟོཔི བྷཱཝནཱཝིསེསེན པཝཏྟིཨཱཀཱརཝིསེསོ. ཡཐཱ ཏཾ སདྡྷཱཝིམུཏྟཏོ དིཊྛིཔྤཏྟསྶ, ཏཐཱ པཙྩནཱིཀདྷམྨེཧི སུཊྛུ ཝིམུཏྟཏཱཡ ཨེཝ ཨནིགྒཧིཏབྷཱཝེན ནིརཱསངྐཏཱཡ ཨབྷིརཏིཝསེན སུཊྛུ ཨདྷིམུཙྩནཊྛེནཔི ཝིམོཀྑོ. ཏེནཱཧ ‘‘ཨཱརམྨཎེ ཙཱ’’ཏིཨཱདི. ཨཡཾ པནཏྠོཏི ཨཡཾ ཨདྷིམུཙྩནཏྠོ པཙྪིམཝིམོཀྑེ ནིརོདྷེ ནཏྠི. ཀེཝལོ ཝིམུཏྟཏྠོ ཨེཝ ཏཏྠ ལབྦྷཏི, ཏཾ སཡམེཝ པརཏོ ཝཀྑཏི.

རཱུཔཱིཏི ཡེནཱཡཾ སསནྟཏིཔརིཡཱཔནྣེན རཱུཔེན སམནྣཱགཏོ, ཏཾ ཡསྶ ཛྷཱནསྶ ཧེཏུབྷཱཝེན ཝིསིཊྛཾ རཱུཔཾ ཧོཏི. ཡེན ཝིསིཊྛེན རཱུཔེན ‘‘རཱུཔཱི’’ཏི ཝུཙྩེཡྻ རཱུཔཱི-སདྡསྶ ཨཏིསཡཏྠདཱིཔནཏོ, ཏདེཝ སསནྟཏིཔརིཡཱཔནྣརཱུཔནིམིཏྟཾ ཛྷཱནམིཝ པརམཏྠཏོ རཱུཔཱིབྷཱཝསཱདྷཀནྟི ¶ དཊྛབྦཾ. ཏེནཱཧ ‘‘ཨཛ྄ཛྷཏྟ’’ནྟིཨཱདི. རཱུཔཛ྄ཛྷཱནཾ རཱུཔཾ ཨུཏྟརཔདལོཔེན. རཱུཔཱནཱིཏི པནེཏྠ པུརིམཔདལོཔོ དཊྛབྦོ. ཏེན ཝུཏྟཾ ‘‘ནཱིལཀསིཎཱདཱིནི རཱུཔཱནཱི’’ཏི.

ཨནྟོཨཔྤནཱཡཾ སུབྷནྟི ཨཱབྷོགོ ནཏྠཱིཏི ཨིམིནཱ པུབྦཱབྷོགཝསེན ཨདྷིམུཏྟི སིཡཱཏི དསྶེཏི. ཨེཝཉྷེཏྠ ཏཐཱཝཏྟབྦཏཱཔཏྟིཙོདནཱ ཨནཝཀཱསཱ ཧོཏི. ཡསྨཱ སུཝིསུདྡྷེསུ ནཱིལཱདཱིསུ ཝཎྞཀསིཎེསུ ཏཏྠ ཀཏཱདྷིཀཱརཱནཾ ཨབྷིརཏིཝསེན སུཊྛུ ཨདྷིམུཏྟི སིཡཱ, ཏསྨཱ ཨཊྛཀཐཱཡཾ ཏཐཱ ཏཏིཡོ ཝིམོཀྑོ སཾཝཎྞིཏོ. ཡསྨཱ པན མེཏྟཱདིཝསེན པཝཏྟམཱནཱ བྷཱཝནཱ སཏྟེ ཨཔྤཊིཀཱུལཏོ དཧཏི, ¶ ཏེ སུབྷཏོ ཨདྷིམུཙྩིཏྭཱཝ པཝཏྟཏི, ཏསྨཱ པཊིསམྦྷིདཱམགྒེ (པཊི. མ. ༡.༢༡༢) བྲཧྨཝིཧཱརབྷཱཝནཱ ‘‘སུབྷཝིམོཀྑོ’’ཏི ཝུཏྟཱ, ཏཡིདཾ ཨུབྷཡམྤི ཏེན ཏེན པརིཡཱཡེན ཝུཏྟཏྟཱ ན ཝིརུཛ྄ཛྷཏཱིཏི དཊྛབྦཾ.

སབྦསོཏི ཨནཝསེསཏོ. ན ཧི ཙཏུནྣཾ ཨརཱུཔཀྑནྡྷཱནཾ ཨེཀདེསོཔི ཏཏྠ ཨཝསིཊྛོཏི. ཝིསྶཊྛཏྟཱཏི ཡཐཱཔརིཙྪིནྣེ ཀཱལེ ནིརོདྷིཏཏྟཱ. ཨུཏྟམོ ཝིམོཀྑོ ནཱམ ཨརིཡེཧེཝ སམཱཔཛྫིཏབྦཏོ, ཨརིཡཕལཔརིཡོསཱནཏྟཱ དིཊྛེཝ དྷམྨེ ནིབྦཱནཔྤཏྟིབྷཱཝཏོ ཙ.

༢༤༩. ཨབྷིབྷཝཏཱིཏི ཨབྷིབྷུ (དཱི. ནི. ཊཱི. ༢.༡༧༣; ཨ. ནི. ཊཱི. ༣.༦.༦༡-༦༥) པརིཀམྨཾ, ཉཱཎཾ ཝཱ. ཨབྷིབྷུ ཨཱཡཏནཾ ཨེཏསྶཱཏི ཨབྷིབྷཱཡཏནཾ, ཛྷཱནཾ. ཨབྷིབྷཝིཏབྦཾ ཝཱ ཨཱརམྨཎསངྑཱཏཾ ཨཱཡཏནཾ ཨེཏསྶཱཏི ཨབྷིབྷཱཡཏནཾ, ཛྷཱནཾ. ཨཱརམྨཎཱབྷིབྷཝནཏོ ཨབྷིབྷུ ཙ ཏཾ ཨཱཡཏནཉྩ ཡོགིནོ སུཁཝིསེསཱནཾ ཨདྷིཊྛཱནབྷཱཝཏོ མནཱཡཏནདྷམྨཱཡཏནབྷཱཝཏོ ཙཱཏིཔི སསམྤཡུཏྟཾ ཛྷཱནཾ ཨབྷིབྷཱཡཏནཾ. ཏེནཱཧ ‘‘ཨབྷིབྷཝནཀཱརཎཱནཱི’’ཏིཨཱདི. ཏཱནཱིཏི ཨབྷིབྷཱཡཏནསཉྙིཏཱནི ཛྷཱནཱནི. སམཱཔཏྟིཏོ ཝུཊྛིཏསྶ ཨཱབྷོགོ པུབྦབྷཱགབྷཱཝནཱཝསེན ཛྷཱནཀྑཎེ པཝཏྟཾ ཨབྷིབྷཝནཱཀཱརཾ གཧེཏྭཱ པཝཏྟོཏི དཊྛབྦོ. པརིཀམྨཝསེན ཨཛ྄ཛྷཏྟཾ རཱུཔསཉྙཱི, ན ཨཔྤནཱཝསེན. ན ཧི པཊིབྷཱགནིམིཏྟཱརམྨཎཱ ཨཔྤནཱ ཨཛ྄ཛྷཏྟཝིསཡཱ སམྦྷཝཏི. ཏཾ པན ཨཛ྄ཛྷཏྟ པརིཀམྨཝསེན ལདྡྷཾ ཀསིཎནིམིཏྟཾ ཨསུཝིསུདྡྷམེཝ ཧོཏི, ན བཧིདྡྷཱ པརིཀམྨཝསེན ལདྡྷཾ ཝིཡ ཝིསུདྡྷཾ.

པརིཏྟཱནཱིཏི ཡཐཱལདྡྷཱནི སུཔྤསརཱཝམཏྟཱནི. ཏེནཱཧ ‘‘ཨཝཌྜྷིཏཱནཱི’’ཏི. པརིཏྟཝསེནེཝཱཏི ཝཎྞཝསེན ཨཱབྷོགེ ཝིཛྫམཱནེཔི པརིཏྟཝསེནེཝ ཨིདམབྷིབྷཱཡཏནཾ ཝུཏྟཾ. པརིཏྟཏཱ ཧེཏྠ ཨབྷིབྷཝནསྶ ཀཱརཎཾ. ཝཎྞཱབྷོགེ སཏིཔི ཨསཏིཔི ཨབྷིབྷཱཡཏནབྷཱཝནཱ ནཱམ ཏིཀྑཔཉྙསྶེཝ སམྦྷཝཏི, ན ཨིཏརསྶཱཏི ‘‘ཉཱཎུཏྟརིཀོ པུགྒལོ’’ཏི. ཨབྷིབྷཝིཏྭཱ སམཱཔཛྫཏཱིཏི ¶ ཨེཏྠ ཨབྷིབྷཝནཾ སམཱཔཛྫནཉྩ ཨུཔཙཱརཛ྄ཛྷཱནཱདྷིགམསམནནྟརམེཝ ཨཔྤནཱཛྷཱནུཔྤཱདནནྟི ཨཱཧ ‘‘སཧ ནིམིཏྟུཔྤཱདེནེཝེཏྠ ཨཔྤནཾ པཱཔེཏཱི’’ཏི. སཧ ནིམིཏྟུཔྤཱདེནཱཏི ཙ ཨཔྤནཱཔརིཝཱསཱབྷཱཝསྶ ལཀྑཎཝཙནམེཏཾ. ཡོ ‘‘ཁིཔྤཱབྷིཉྙོ’’ཏི ཝུཙྩཏི ¶ , ཏཏོཔི ཉཱཎུཏྟརསྶེཝ ཨབྷིབྷཱཡཏནབྷཱཝནཱ. ཨེཏྠཱཏི ཨེཏསྨིཾ ནིམིཏྟེ. ཨཔྤནཾ པཱཔེཏཱིཏི བྷཱཝནཱ ཨཔྤནཾ ནེཏི.

ཨེཏྠ ཙ ཀེཙི ‘‘ཨུཔྤནྣེ ཨུཔཙཱརཛ྄ཛྷཱནེ ཏཾ ཨཱརབྦྷ ཡེ ཧེཊྛིམནྟེན དྭེ ཏཡོ ཛཝནཝཱརཱ པཝཏྟནྟི, ཏེ ཨུཔཙཱརཛ྄ཛྷཱན པཀྑིཀཱ ཨེཝ, ཏདནནྟརཉྩ བྷཝངྒཔརིཝཱསེན ཨུཔཙཱརཱསེཝནཱཡ ཙ ཝིནཱ ཨཔྤནཱ ཧོཏི, སཧ ནིམིཏྟུཔྤཱདེནེཝ ཨཔྤནཾ པཱཔེཏཱི’’ཏི ཝདནྟི, ཏཾ ཏེསཾ མཏིམཏྟཾ. ན ཧི པཱརིཝཱསིཀཔརིཀམྨེན ཨཔྤནཱཝཱརོ ཨིཙྪིཏོ, ནཱཔི མཧགྒཏཔྤམཱཎཛ྄ཛྷཱནེསུ ཝིཡ ཨུཔཙཱརཛ྄ཛྷཱནེ ཨེཀནྟཏོ པཙྩཝེཀྑཎཱ ཨིཙྪིཏབྦཱ, ཏསྨཱ ཨུཔཙཱརཛ྄ཛྷཱནཱདྷིགམཏོ པརཾ ཀཏིཔཡབྷཝངྒཙིཏྟཱཝསཱནེ ཨཔྤནཾ པཱཔུཎནྟོ ‘‘སཧ ནིམིཏྟུཔྤཱདེནེཝེཏྠ ཨཔྤནཾ པཱཔེཏཱི’’ཏི ཝུཏྟོ. ‘‘སཧ ནིམིཏྟུཔྤཱདེནཱ’’ཏི ཙ ཨདྷིཔྤཱཡིཀམིདཾ ཝཙནཾ, ན ནཱིཏཏྠཾ, ཨདྷིཔྤཱཡོ ཝུཏྟནཡེནེཝ ཝེདིཏབྦོ.

ན ཨནྟོསམཱཔཏྟིཡཾ ཏདཱ ཏཐཱརཱུཔསྶ ཨཱབྷོགསྶ ཨསམྦྷཝཏོ, སམཱཔཏྟིཏོ ཝུཊྛིཏསྶ ཨཱབྷོགོ པུབྦབྷཱགབྷཱཝནཱཝསེན ཛྷཱནཀྑཎེ པཝཏྟཾ ཨབྷིབྷཝནཱཀཱརཾ གཧེཏྭཱ པཝཏྟོཏི དཊྛབྦཾ. ཨབྷིདྷམྨཊྛཀཐཱཡཾ (དྷ. ས. ཨཊྛ. ༢༠༤) པན ‘‘ཨིམིནཱ པནསྶ པུབྦབྷཱགོ ཀཐིཏོ’’ཏི ཝུཏྟཾ. ཨནྟོསམཱཔཏྟིཡཾ ཏཐཱ ཨཱབྷོགཱབྷཱཝེ ཀསྨཱ ‘‘ཛྷཱནསཉྙཱཡཔཱི’’ཏི ཝུཏྟནྟི ཨཱཧ ‘‘ཨབྷིབྷཝ…པེ… ཨཏྠཱི’’ཏི.

ཝཌྜྷིཏཔྤམཱཎཱནཱིཏི ཝིཔུལཔྤམཱཎཱནཱིཏི ཨཏྠོ, ན ཨེཀངྒུལདྭངྒུལཱདིཝསེན ཝཌྜྷིཏཔྤམཱཎཱནཱིཏི ཏཐཱ ཝཌྜྷནསྶེཝེཏྠ ཨསམྦྷཝཏོ. ཏེནཱཧ ‘‘མཧནྟཱནཱི’’ཏི.

རཱུཔེ སཉྙཱ རཱུཔསཉྙཱ, སཱ ཨསྶ ཨཏྠཱིཏི རཱུཔསཉྙཱི, ན རཱུཔསཉྙཱི ཨརཱུཔསཉྙཱི. སཉྙཱསཱིསེན ཛྷཱནཾ ཝདཏི. རཱུཔསཉྙཱཡ ཨནུཔྤཱདནམེཝེཏྠ ཨལཱབྷིཏཱ. བཧིདྡྷཱཝ ཨུཔྤནྣནྟི བཧིདྡྷཱཝཏྠུསྨིཾཡེཝ ཨུཔྤནྣཾ. ཨབྷིདྷམྨེ པན ‘‘ཨཛ྄ཛྷཏྟཾ ཨརཱུཔསཉྙཱི བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི, ཨཔྤམཱཎཱནི སུཝཎྞདུབྦཎྞཱནཱི’’ཏི ཨེཝཾ ཙཏུནྣཾ ཨབྷིབྷཱཡཏནཱནཾ ཨཱགཏཏྟཱ ཨབྷིདྷམྨཊྛཀཐཱཡཾ (དྷ. ས. ཨཊྛ. ༢༠༤) ‘‘ཀསྨཱ པན ཡཐཱ སུཏྟནྟེ – ‘ཨཛ྄ཛྷཏྟཾ རཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པརིཏྟཱནཱི’ཏིཨཱདི ཝུཏྟཾ, ཨེཝཾ ཨཝཏྭཱ ¶ ཨིདྷ ཙཏཱུསུཔི ཨབྷིབྷཱཡཏནེསུ ཨཛ྄ཛྷཏྟཾ ¶ ཨརཱུཔསཉྙིཏཱཝ ཝུཏྟཱ’’ཏི ཙོདནཾ ཀཏྭཱ ‘‘ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏོ’’ཏི ཀཱརཎཾ ཝཏྭཱ ‘‘ཏཏྠ ཝཱ ཧི ཨིདྷ ཝཱ བཧིདྡྷཱརཱུཔཱནེཝ ཨབྷིབྷཝིཏབྦཱནི, ཏསྨཱ ཏཱནི ནིཡམཏོ ཝཏྟབྦཱནཱིཏི ཏཏྲཱཔི ཨིདྷཱཔི ཝུཏྟཱནི. ‘ཨཛ྄ཛྷཏྟཾ ཨརཱུཔསཉྙཱི’ཏི ཨིདཾ པན སཏྠུ དེསནཱཝིལཱསམཏྟམེཝཱ’’ཏི ཝུཏྟཾ.

ཨེཏྠ ཙ ཝཎྞཱབྷོགརཧིཏཱནི སཧིཏཱནི ཙ སབྦཱནི ‘‘པརིཏྟཱནི སུཝཎྞདུབྦཎྞཱནཱི’’ཏི ཝུཏྟཱནི, ཏཐཱ ‘‘ཨཔྤམཱཎཱནཱི’’ཏི དཊྛབྦཱནི. ཨཏྠི ཧི ཨེསོ པརིཡཱཡོ ‘‘པརིཏྟཱནི ཨབྷིབྷུཡྻ ཏཱནི ཙེ ཀདཱཙི ཝཎྞཝསེན ཨཱབྷུཛིཏཱནི ཧོནྟི སུཝཎྞདུབྦཎྞཱནི ཨབྷིབྷུཡྻཱ’’ཏི. པརིཡཱཡཀཐཱ ཧི སུཏྟནྟདེསནཱཏི. ཨབྷིདྷམྨེ པན ནིཔྤརིཡཱཡདེསནཏྟཱ ཝཎྞཱབྷོགརཧིཏཱནི ཝིསུཾ ཝུཏྟཱནི, ཏཐཱ སཧིཏཱནི. ཨཏྠི ཧི ཨུབྷཡཏྠ ཨབྷིབྷཝནཔརིཡཱཡོཏི ‘‘ཨཛ྄ཛྷཏྟཾ རཱུཔསཉྙཱི’’ཏིཨཱདིནཱ པཋམདུཏིཡཨབྷིབྷཱཡཏནེསུ པཋམཝིམོཀྑོ, ཏཏིཡཙཏུཏྠཱབྷིབྷཱཡཏནེསུ དུཏིཡཝིམོཀྑོ, ཝཎྞཱབྷིབྷཱཡཏནེསུ ཏཏིཡཝིམོཀྑོ ཙ ཨབྷིབྷཝནཔྤཝཏྟིཏོ སངྒཧིཏོ, ཨབྷིདྷམྨེ པན ནིཔྤརིཡཱཡདེསནཏྟཱ ཝིམོཀྑཱབྷིབྷཱཡཏནཱནི ཨསངྐརཏོ དསྶེཏུཾ ཝིམོཀྑེ ཝཛྫེཏྭཱ ཨབྷིབྷཱཡཏནཱནི ཀཐིཏཱནི, སབྦཱནི ཙ ཝིམོཀྑཀིཙྩཱནི ཛྷཱནཱནི ཝིམོཀྑདེསནཱཡཾ ཝུཏྟཱནི. ཏདེཏཾ ‘‘ཨཛ྄ཛྷཏྟཾ རཱུཔསཉྙཱི’’ཏི ཨཱགཏསྶ ཨབྷིབྷཱཡཏནདྭཡསྶ ཨབྷིདྷམྨེ ཨབྷིབྷཱཡཏནེསུ ཨཝཙནཏོ ‘‘རཱུཔཱི རཱུཔཱནི པསྶཏཱི’’ཏིཨཱདཱིནཉྩ སབྦཝིམོཀྑཀིཙྩསཱདྷཱརཎཝཙནབྷཱཝཏོ ཝཝཏྠཱནཾ ཀཏནྟི ཝིཉྙཱཡཏི.

‘‘ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏོ’’ཏི ཨིདཾ ཨབྷིདྷམྨེ ཀཏྠཙིཔི ‘‘ཨཛ྄ཛྷཏྟཾ རཱུཔཱནི པསྶཏཱི’’ཏི ཨཝཏྭཱ སབྦཏྠ ཡཾ ཝུཏྟཾ ‘‘བཧིདྡྷཱརཱུཔཱནི པསྶཏཱི’’ཏི, ཏསྶ ཀཱརཎཝཙནཾ. ཏེན ཡཾ ཨཉྙཧེཏུཀཾ, ཏཾ ཏེན ཧེཏུནཱ ཝུཏྟཾ, ཡཾ པན དེསནཱཝིལཱསཧེཏུཀཾ ཨཛ྄ཛྷཏྟཾ ཨརཱུཔསཉྙིཏཱཡ ཨེཝ ཨབྷིདྷམྨེ ཝཙནཾ, ན ཏསྶ ཨཉྙཾ ཀཱརཎཾ མགྒིཏབྦནྟི དསྶེཏི. ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏཱ ཙ ཏེསཾ བཧིདྡྷཱརཱུཔཱནཾ ཝིཡ ཨཝིབྷཱུཏཏྟཱ, དེསནཱཝིལཱསོ ཙ ཡཐཱཝུཏྟཝཝཏྠཱནཝསེན ཝེདིཏབྦོ, ཝེནེཡྻཛ྄ཛྷཱསཡཝསེན ཝིཛྫམཱནཔརིཡཱཡཀཐནབྷཱཝཏོ. ‘‘སུཝཎྞདུབྦཎྞཱནཱི’’ཏི ཨེཏེནེཝ སིདྡྷཏྟཱ ནཱིལཱདིཨབྷིབྷཱཡཏནཱནི ན ཝཏྟབྦཱནཱིཏི ཙེ? ན, ནཱིལཱདཱིསུ ¶ ཀཏཱདྷིཀཱརཱནཾ ནཱིལཱདིབྷཱཝསྶེཝ ཨབྷིབྷཝནཀཱརཎཏྟཱ. ན ཧི ཏེསཾ པརིསུདྡྷཱཔརིསུདྡྷཝཎྞཱནཾ པརིཏྟཏཱ ཏདཔྤམཱཎཏཱ ཝཱ ཨབྷིབྷཝནཀཱརཎཾ, ཨཐ ཁོ ནཱིལཱདིབྷཱཝོ ཨེཝཱཏི. ཨེཏེསུ ཙ པརིཏྟཱདིཀསིཎརཱུཔེསུ ཡཾ ཙརིཏསྶ ཨིམཱནི ཨབྷིབྷཱཡཏནཱནི ཨིཛ྄ཛྷནྟི, ཏཾ དསྶེཏུཾ ‘‘ཨིམེསུ པནཱ’’ཏིཨཱདི ཝུཏྟཾ.

སབྦསངྒཱཧིཀཝསེནཱཏི ¶ སཀལནཱིལཝཎྞནཱིལནིདསྶནནཱིལནིབྷཱསཱནཾ སཱདྷཱརཎཝསེན. ཝཎྞཝསེནཱཏི སབྷཱཝཝཎྞཝསེན. ནིདསྶནཝསེནཱཏི པསྶིཏབྦཏཱཝསེན. ཨོབྷཱསཝསེནཱཏི སཔྤབྷཱསཏཱཡ ཨཝབྷཱསནཝསེན. ཨུམཱཔུཔྥནྟི ཨཏསིཔུཔྥཾ. ནཱིལམེཝ ཧོཏི ཝཎྞསངྐརཱབྷཱཝཏོ. བཱརཱཎསིཡཾ བྷཝནྟི བཱརཱཎསིཡཾ སམུཊྛིཏཾ.

ཏེ དྷམྨེཏི ཏེ སཏིཔཊྛཱནཱདིདྷམྨེ ཙེཝ ཨཊྛཝིམོཀྑདྷམྨེ ཙ. ཙིཎྞཝསཱིབྷཱཝཱཡེཝ ཏཏྠ ཨབྷིཝིསིཊྛཱཡ པཉྙཱཡ པརིཡོསཱནུཏྟརཾ སཏཾ གཏཱ ཨབྷིཉྙཱཝོསཱནཔཱརམིཔྤཏྟཱ.

༢༥༠. སཀལཊྛེནཱཏི (དཱི. ནི. ཊཱི. ༣.༣༤༦; ཨ. ནི. ཊཱི. ༣.༡༠.༢༥) སཀལབྷཱཝེན, ཨསུབྷནིམིཏྟཱདཱིསུ ཝིཡ ཨེཀདེསེ ཨཊྛཏྭཱ ཨནཝསེསཏོ གཧེཏབྦཊྛེནཱཏི ཨཏྠོ. ཡཐཱ ཁེཏྟཾ སསྶཱནཾ ཨུཔྤཏྟིཊྛཱནཾ ཝཌྜྷིཊྛཱནཉྩ, ཨེཝམེཝ ཏཾཏཾསམྤཡུཏྟདྷམྨཱནནྟི ཨཱཧ ‘‘ཁེཏྟཊྛེནཱ’’ཏི. པརིཙྪིནྡིཏྭཱཏི ཨིདཾ ཨུདྡྷཾ ཨདྷོ ཏིརིཡནྟི ཡོཛེཏབྦཾ. པརིཙྪིནྡིཏྭཱ ཨེཝ ཧི སབྦཏྠ ཀསིཎཾ ཝཌྜྷེཏབྦཾ. ཏེན ཏེན ཀཱརཎེནཱཏི ཨུཔརིཨཱདཱིསུ ཏེན ཏེན ཀསིཎེན. ཡཐཱ ཀིནྟི ཨཱཧ – ‘‘ཨཱལོཀམིཝ རཱུཔདསྶནཀཱམོ’’ཏི, ཡཐཱ དིབྦཙཀྑུནཱ ཨུདྡྷཾ ཙེ རཱུཔཾ དཊྛུཀཱམོ, ཨུདྡྷཾ ཨཱལོཀཾ པསཱརེཏི, ཨདྷོ ཙེ, ཨདྷོ, སམནྟཏོ ཙེ རཱུཔཾ དཊྛུཀཱམོ, སམནྟཏོ ཨཱལོཀཾ པསཱརེཏི, ཨེཝཾ སབྦཀསིཎནྟི ཨཏྠོ. ཨེཀསྶཱཏི པཐཝཱིཀསིཎཱདཱིསུ ཨེཀེཀསྶ. ཨཉྙབྷཱཝཱནུཔགམནཏྠནྟི ཨཉྙཀསིཎབྷཱཝཱནུཔགམནདཱིཔནཏྠཾ, ཨཉྙསྶ ཝཱ ཀསིཎབྷཱཝཱནུཔགམནདཱིཔནཏྠཾ. ན ཧི ཨཉྙེན པསཱརིཏཀསིཎཾ ཏཏོ ཨཉྙེན པསཱརིཏཀསིཎབྷཱཝཾ ཨུཔགཙྪཏི, ཨེཝམྤི ནེསཾ ཨཉྙཀསིཎསམྦྷེདཱབྷཱཝོ ཝེདིཏབྦོ. ན ཨཉྙཾ པཐཝཱིཨཱདི. ན ཧི ཨུདཀེན ཋིཏཊྛཱནེ སསམྦྷཱརཔཐཝཱི ཨཏྠི. ཨཉྙཀསིཎསམྦྷེདོཏི ཨཱཔོཀསིཎཱདིནཱ སངྐརོ ¶ . སབྦཏྠཱཏི སབྦེསུ སེསཀསིཎེསུ. ཨེཀདེསེ ཨཊྛཏྭཱ ཨནཝསེསཕརཎཾ པམཱཎསྶ ཨགྒཧཎཏོ ཨཔྤམཱཎཾ. ཏེནེཝ ཧི ནེསཾ ཀསིཎསམཉྙཱ. ཏཐཱ ཧི ‘‘ཏཉྷཱི’’ཏིཨཱདིམཱཧ. ཏཏྠ ཙེཏསཱ ཕརནྟོཏི བྷཱཝནཱཙིཏྟེན ཨཱརམྨཎཾ ཀརོནྟོ. བྷཱཝནཱཙིཏྟཉྷི ཀསིཎཾ པརིཏྟཾ ཝཱ ཝིཔུལཾ ཝཱ སཀལམེཝ མནསི ཀརོཏི.

ཀསིཎུགྒྷཱཊིམཱཀཱསེ པཝཏྟཾ ཝིཉྙཱཎཾ ཕརཎཨཔྤམཱཎཝསེན ‘‘ཝིཉྙཱཎཀསིཎ’’ནྟི ཝུཏྟཾ. ཏཐཱ ཧི ཏཾ ‘‘ཝིཉྙཱཎ’’ནྟི ཝུཙྩཏི. ཀསིཎཝསེནཱཏི ཨུགྒྷཱཊིཏཀསིཎཝསེན ཀསིཎུགྒྷཱཊིམཱཀཱསེ ཨུདྡྷཾཨདྷོཏིརིཡཏཱ ཝེདིཏབྦཱ. ཡཏྟཀཉྷི ཋཱནཾ ཀསིཎཾ པསཱརིཏཾ, ཏཏྟཀཾ ཨཱཀཱསབྷཱཝནཱཝསེན ཨཱཀཱསཾ ཧོཏཱིཏི. ཨེཝཾ ཡཏྟཀཾ ཋཱནཾ ཨཱཀཱསཾ ཧུཏྭཱ ཨུཔཊྛིཏཾ, ཏཏྟཀཾ ཨཱཀཱསམེཝ ཧུཏྭཱ ཝིཉྙཱཎསྶ པཝཏྟནཏོ ཨཱགམནཝསེན ཝིཉྙཱཎཀསིཎེཔི ཨུདྡྷཾཨདྷོཏིརིཡཏཱ ¶ ཝུཏྟཱཏི ‘‘ཀསིཎུགྒྷཱཊིམཱཀཱསཝསེན ཏཏྠ པཝཏྟཝིཉྙཱཎེ ཨུདྡྷཾཨདྷོཏིརིཡཏཱ ཝེདིཏབྦཱ’’ཏི ཨཱཧ.

༢༥༢. ཝུཏྟོཡེཝ ཝམྨིཀསུཏྟེ. ནིསྶིཏཉྩ ཚཝཏྠུནིསྶིཏཏྟཱ ཝིཔསྶནཱཉཱཎསྶ. པཊིབདྡྷཉྩ ཏེན ཝིནཱ ཨཔྤཝཏྟནཏོ ཀཱཡསཉྙིཏཱནཾ རཱུཔདྷམྨཱནཾ ཨཱརམྨཎཀརཎཏོ ཙ. སུཊྛུ བྷཱཏི ཨོབྷཱསཏཱིཏི ཝཱ སུབྷོ. ཀུརུཝིནྡཛཱཏིཨཱདིཛཱཏིཝིསེསོཔི མཎི ཨཱཀརཔཱརིསུདྡྷིམཱུལཀོ ཨེཝཱཏི ཨཱཧ ‘‘སུཔརིསུདྡྷཨཱཀརསམུཊྛིཏོ’’ཏི. དོསནཱིཧརཎཝསེན པརིཀམྨནིཔྥཏྟཱིཏི ཨཱཧ ‘‘སུཊྛུ ཀཏཔརིཀམྨོ ཨཔནཱིཏཔཱསཱཎསཀྑརོ’’ཏི. དྷོཝནཝེདྷནཱདཱིཧཱིཏི ཙཏཱུསུ པཱསཱཎེསུ དྷོཝནེན ཙེཝ ཀཱལ༹ཀཱདིཨཔཧརཎཏྠཱཡ སུཏྟེན ཨཱཝུནནཏྠཱཡ ཙ ཝིཛ྄ཛྷནེན. ཏཱཔསཎྷཀརཎཱདཱིནཾ སངྒཧོ ཨཱདི-སདྡེན. ཝཎྞསམྤཏྟིནྟི སུཏྟསྶ ཝཎྞསམྤཏྟིཾ.

མཎི ཝིཡ ཀརཛཀཱཡོ པཙྩཝེཀྑིཏབྦཏོ. ཨཱཝུཏསུཏྟཾ ཝིཡ ཝིཔསྶནཱཉཱཎཾ ཨནུཔཝིསིཏྭཱ ཋིཏཏྟཱ. ཙཀྑུམཱ པུརིསོ ཝིཡ ཝིཔསྶནཱལཱབྷཱི བྷིཀྑུ སམྨདེཝ ཏསྶ དསྶནཏོ. ཏདཱརམྨཎཱནནྟི རཱུཔདྷམྨཱརམྨཎཱནཾ. ཕསྶཔཉྩམཀཙིཏྟཙེཏསིཀགྒཧཎེན གཧིཏདྷམྨཱཔི ཝིཔསྶནཱཙིཏྟུཔྤཱདཔརིཡཱཔནྣཱ ཨེཝཱཏི ཝེདིཏབྦཾ. ཨེཝཉྷི ཏེསཾ ཝིཔསྶནཱཉཱཎགཏིཀཏྟཱ ‘‘ཨཱཝུཏསུཏྟཾ ཝིཡ ཝིཔསྶནཱཉཱཎ’’ནྟི ཝཙནཾ ཨཝིརོདྷིཏཾ ཧོཏི.

ཉཱཎསྶཱཏི ¶ པཙྩཝེཀྑཎཉཱཎསྶ. ཡདི ཨེཝཾ ཉཱཎསྶ ཝསེན ཝཏྟབྦཾ, ན པུགྒལསྶཱཏི ཨཱཧ ‘‘ཏསྶ པནཱ’’ཏིཨཱདི. མགྒསྶ ཨནནྟརཾ, ཏསྨཱ ལོཀིཡཱབྷིཉྙཱནཾ པརཏོ ཚཊྛཱབྷིཉྙཱཡ པུརཏོ ཝཏྟབྦཾ ཝིཔསྶནཱཉཱཎཾ. ཨེཝཾ སནྟེཔཱིཏི ཡདིཔཱཡཾ ཉཱཎཱནུཔུབྦཊྛིཏི, ཨེཝཾ སནྟེཔི ཨེཏསྶ ཨནྟརཱ ཝཱརོ ནཏྠཱིཏི པཉྩསུ ལོཀིཡཱབྷིཉྙཱསུ ཀཐིཏཱསུ ཨཱཀངྑེཡྻསུཏྟཱདཱིསུ (མ. ནི. ༡.༦༤ ཨཱདཡོ) ཝིཡ ཚཊྛཱབྷིཉྙཱ ཀཐེཏབྦཱཏི ཨེཏསྶ ཨནབྷིཉྙཱལཀྑཎསྶ ཝིཔསྶནཱཉཱཎསྶ ཏཱསཾ ཨནྟརཱ ཝཱརོ ན ཧོཏི, ཏསྨཱ ཏཏྠ ཨཝསརཱབྷཱཝཏོ ཨིདྷེཝ རཱུཔཱཝཙརཙཏུཏྠཛ྄ཛྷཱནཱནནྟརམེཝ དསྶིཏཾ ཝིཔསྶནཱཉཱཎཾ. ཡསྨཱ ཙཱཏི ཙ-སདྡོ སམུཙྩཡཏྠོ. ཏེན ན ཀེཝལཾ ཏདེཝ, ཨཐ ཁོ ཨིདམྤི ཀཱརཎཾ ཝིཔསྶནཱཉཱཎསྶ ཨིདྷེཝ དསྶནེཏི ཨིམམཏྠཾ དཱིཔེཏི. དིབྦེན ཙཀྑུནཱ བྷེརཝརཱུཔཾ པསྶཏོཏི ཨེཏྠ ཨིདྡྷིཝིདྷཉཱཎེན བྷེརཝཾ རཱུཔཾ ནིམྨིནིཏྭཱ ཙཀྑུནཱ པསྶཏོཏི ཝཏྟབྦཾ, ཨེཝམྤི ཨབྷིཉྙཱལཱབྷིནོ ཨཔརིཉྙཱཎཝཏྠུཀསྶ བྷཡསནྟཱསོ ཨུཔྤཛྫཏི ཨུཙྩཝཱལིཀཝཱསཱིམཧཱནཱགཏྠེརསྶ ཝིཡ. ཨིདྷཱཔཱིཏི ཨིམསྨིཾ ཝིཔསྶནཱཉཱཎེཔི, ན སཏིཔཊྛཱནཱདཱིསུ ཨེཝཱཏི ཨདྷིཔྤཱཡོ.

༢༥༣. མནོམཡིདྡྷིཡཾ ¶ ཙིཎྞཝསིཏཱཡ ཨབྷིཉྙཱ ཝོསཱནཔཱརམིཔྤཏྟཏཱ ཝེདིཏབྦཱཏི ཡོཛནཱ. མནེན ནིབྦཏྟནྟི ཨབྷིཉྙཱམནེན ནིབྦཏྟིཏཾ. ཏཾ སདིསབྷཱཝདསྶནཏྠམེཝཱཏི སཎྛཱནཏོཔི ཝཎྞཏོཔི ཨཝཡཝཝིསེསཏོཔི སདིསབྷཱཝདསྶནཏྠམེཝ. སཛཱཏིཡཾ ཋིཏོ, ན ནཱགིདྡྷིཡཱ ཨཉྙཛཱཏིརཱུཔོ. སུཔརིཀམྨཀཏམཏྟིཀཱདཡོ ཝིཡ ཨིདྡྷིཝིདྷཉཱཎཾ ཝིཀུབྦནཀིརིཡཱཡ ནིསྶཡབྷཱཝཏོ.

༢༥༥. ཨཔྤཀསིརེནེཝཱཏི ཨཀིཙྪེནེཝ.

༢༥༦. མནྡོ ཨུཏྟཱནསེཡྻཀདཱརཀོཔི ‘‘དཧརོ’’ཏི ཝུཙྩཏཱིཏི ཏཏོ ཝིསེསནཏྠཾ ‘‘ཡུཝཱ’’ཏི ཝུཏྟཾ. ཡུཝཱཔི ཀོཙི ཨནིཙྪནཏོ ཨམཎྜནསཱིལོ ཧོཏཱིཏི ཏཏོ ཝིསེསནཏྠཾ ‘‘མཎྜནཀཛཱཏིཀོ’’ཏི ཝུཏྟཾ. ཏེན ཝུཏྟཾ ‘‘ཡུཝཱཔཱི’’ཏིཨཱདི. ཀཱལ༹ཏིལཔྤམཱཎཱ བིནྡཝོ ཀཱལ༹ཏིལཀཱནི. ནཱཏིཀམྨཱསཏིལཔྤམཱཎཱ བིནྡཝོ ཏིལཀཱནི. ཝངྐཾ ནཱམ པིཡངྒཾ. ཡོབྦནཔཱིལ༹ཀཱདཡོ མུཁདཱུསིཔཱིལ༹ཀཱ. མུཁགཏོ དོསོ མུཁདོསོ, ལཀྑཎཝཙནཉྩེཏཾ མུཁེ ཨདོསསྶཔི པཱཀཊབྷཱཝསྶ ཨདྷིཔྤེཏཏྟཱ ¶ . ཡཐཱ ཝཱ མུཁེ དོསོ, ཨེཝཾ མུཁེ ཨདོསོཔི མུཁདོསོ སརལོཔེན, མུཁདོསོ ཙ མུཁདོསོ ཙ མུཁདོསོཏི ཨེཀསེསནཡེནཔེཏྠ ཨཏྠོ དཊྛབྦོ. ཨེཝཉྷི པརེསཾ སོལ༹སཝིདྷཾ ཙིཏྟཾ པཱཀཊཾ ཧོཏཱིཏི ཝཙནཾ སམཏྠིཏཾ ཧོཏི.

༢༥༩. པཊིཔདཱཝསེནཱཏི ཡཐཱརཧཾ སམཐཝིཔསྶནཱམགྒཔཊིཔདཱཝསེན. ཨཊྛསུ ཀོཊྛཱསེསཱུཏི སཏིཔཊྛཱནཱདཱིསུ བོདྷིཔཀྑིཡདྷམྨཀོཊྛཱསེསུ, ཝིམོཀྑཀོཊྛཱསེསུ ཝཱཏི ཨིམེསུ ཨཊྛསུ ཀོཊྛཱསེསུ. སེསེསཱུཏི ཝུཏྟཱཝསེསེསུ ཨབྷིབྷཱཡཏནཀོཊྛཱསཱདཱིསུ. སེསཾ སུཝིཉྙེཡྻམེཝ.

མཧཱསཀུལུདཱཡིསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༨. སམཎམུཎྜིཀཱཔུཏྟསུཏྟཝཎྞནཱ

༢༦༠. ཨུགྒཧིཏུནྟི ¶ སིཀྑིཏུཾ. ཨུགྒཱཧེཏུནྟི སིཀྑཱཔེཏུཾ, པཱཋཏོ ཨཏྟནཱ ཡཐཱཨུགྒཧིཏམཏྠཾ ཏབྦིབྷཱཝནཏྠཱཡ ཨུཙྩཱརཎཝསེན པརེསཾ གཱཧེཏུནྟི ཨཏྠོ. སམཡནྟི དིཊྛིཾ. སཱ ཧི སཾཡོཛནབྷཱཝཏོ སམེཏི སམྦནྡྷཱ ཨེཏི པཝཏྟཏི, དལ༹ྷགྒཧཎབྷཱཝཏོ ཝཱ སཾཡུཏྟཱ ཨཡནྟི པཝཏྟནྟི སཏྟཱ ཡཐཱབྷིནིཝེསཾ ཨེཏེནཱཏི སམཡོཏི ཝུཙྩཏི. དིཊྛིསཾཡོཛནེན ཧི སཏྟཱ ཨཏིཝིཡ བཛ྄ཛྷནྟཱིཏི. སཱུརིཡསྶ ཨུགྒམནཏོ ཨཏྠངྒམཱ ཨཡཾ ཨེཏྟཀོ ཀཱལོ རཏྟནྡྷཀཱརཝིདྷམནཏོ དིཝཱ ནཱམ, ཏསྶ པན མཛ྄ཛྷིམཔཧཱརསཉྙིཏོ ཀཱལོ སམུཛྫལིཏཔབྷཱཏེཛདཧནབྷཱཝེན དིཝཱ ནཱམ. ཏེནཱཧ ‘‘དིཝསསྶཔི དིཝཱབྷཱུཏེ’’ཏི. པཊིསཾཧརིཏྭཱཏི ནིཝཏྟེཏྭཱ. ཨེཝཾ ཙིཏྟསྶ པཊིསཾཧརཎཾ ནཱམ གོཙརཀྑེཏྟེ ཋཔནནྟི ཨཱཧ ‘‘ཛྷཱནརཏིསེཝནཝསེན ཨེཀཱིབྷཱཝཾ གཏོ’’ཏི. ཨེཏེན ཀཱཡཝིཝེཀཔུབྦཀཾ ཙིཏྟཝིཝེཀམཱཧ. སཱིལཱདིགུཎཝིསེསཡོགཏོ མནསཱ སམྦྷཱཝནཱིཡཱ, ཏེ པན ཡསྨཱ ཨཏྟནོ སཱིལཱདིགུཎེཧི ཝིཉྙཱུནཾ མནཱཔཱ ཧོནྟི (ཀིལེསཨནིགྒཧསྶ པཉྩཔསཱདཱཡཏྟཏྟཱ,) ཏསྨཱ ཨཱཧ ‘‘མནཝཌྜྷནཀཱན’’ནྟིཨཱདི. ཏཏྠ ཨུནྣམཏཱིཏི ཨུདགྒཾ ཧོཏི. ཝཌྜྷཏཱིཏི སདྡྷཱཝསེན ཝཌྜྷཏི. ཏེནཱཧ བྷགཝཱ – ‘‘ཨནུསྶརཎམྤཧཾ, བྷིཀྑཝེ, ཏེསཾ བྷིཀྑཱུནཾ བཧཱུཔཀཱརཾ ཝདཱམཱི’’ཏི (ཨིཏིཝུ. ༡༠༤; སཾ. ནི. ༥.༡༨༤).

༢༦༡. པཉྙཔེམཱིཏི ¶ པཛཱནནབྷཱཝེན ཉཱཔེམི ཏཐཱ ཝཝཏྠཔེམི. ཏེནཱཧ ‘‘དསྶེམི ཋཔེམཱི’’ཏི. པརིཔུཎྞཀུསལནྟི སབྦསོ པུཎྞཀུསལདྷམྨཾ, ཨུཏྟམཀུསལནྟི ཨུཏྟམབྷཱཝཾ སེཊྛབྷཱཝཾ པཏྟཀུསལདྷམྨཾ. ཨཡོཛ྄ཛྷནྟི ཝཱདཡུདྡྷེན ཨཡོདྷནཱིཡཾ, ཝཱདཡུདྡྷཾ ཧོཏུ, ཏེན པརཱཛཡོ ན ཧོཏཱིཏི དསྶེཏི, ཏེནཱཧ ‘‘ཝཱདཡུདྡྷེནཱ’’ཏིཨཱདི. སཾཝརཔྤཧཱནནྟི པཉྩསུ སཾཝརེསུ ཡེན ཀེནཙི སཾཝརེན སཾཝརལཀྑཎཾ པཧཱནཾ. པཊིསེཝནཔྤཧཱནཾ ཝཱཏི ཝཱ-སདྡེན པརིཝཛྫནཔྤཧཱནཱདིཾ སངྒཎྷཱཏི. སེསཔདེསཱུཏི ‘‘ན བྷཱསཏཱི’’ཏིཨཱདཱིསུ པདེསུ. ཨེསེཝ ནཡོཏི ཨིམིནཱ ‘‘ཨབྷཱསནམཏྟམེཝ ཝདཏཱི’’ཏི ཨེཝམཱདིཾ ཨཏིདིསཏི.

ནཱབྷིནནྡཱིཏི ན སམྤཊིཙྪི. སཱསནེ ཏིཎྞཾ དུཙྩརིཏཱནཾ མིཙྪཱཛཱིཝསྶ ཝིཝཛྫནཾ ཝཎྞཱིཡཏི, ཨཡཉྩ ཨེཝཾ ཀཐེཏི, ཏསྨཱ སཱསནསྶ ཨནུལོམཾ ཝིཡ ཝདཏི, ཝདནྟོ ཙ སམྨཱསམྦུདྡྷེ དྷམྨེ ཙསྶ ཨཔྤསཱདཾ ན དསྶེཏི, ཏསྨཱ པསནྣཀཱརམྤི ཝདཏཱིཏི མཉྙམཱནོ ཏསྶ ཝཱདཾ ན པཊིསེདྷེཏི.

༢༦༢. ཡཐཱ ¶ ཏསྶ ཝཙནཾ, ཨེཝཾ སནྟེཏི ཡཐཱ ཏསྶ པརིབྦཱཛཀསྶ ཝཙནཾ, ཨེཝཾ སམཎབྷཱཝེ སནྟེ ལབྦྷམཱནེ. མཡཾ པན ཨེཝཾ ན ཝདཱམཱཏི ཨེཏེན སམཎབྷཱཝོ ནཱམ ཨེཝཾ ན ཧོཏཱིཏི དསྶེཏི. ཡོ ཧི དྷམྨོ ཡཱདིསོ, ཏཐེཝ ཏཾ བུདྡྷཱ དཱིཔེནྟི. ཝིསེསཉཱཎཾ ན ཧོཏཱིཏི ཀཱཡཝིསེསཝིསཡཉཱཎཾ ཏསྶ ཏདཱ ནཏྠི, ཡཏོ པརཀཱཡེ ཨུཔཀྐམཾ ཀརེཡྻཱཏི དསྶེཏི, ཏསྶ པན ཏཏྠ ཝིསེསཉཱཎམྤི ནཏྠེཝཱཏི. ཡསྨཱ ཀཱཡཔཊིབདྡྷཾ ཀཱཡཀམྨཾ, ཏསྨཱ ཏཾ ནིཝཏྟེནྟོ ཨཱཧ ‘‘ཨཉྙཏྲ ཕནྡིཏམཏྟཱ’’ཏི. ཀིལེསསཧགཏཙིཏྟེནེཝཱཏི དུཀྑསམྥསྶསྶ ཨསཧནནིམིཏྟེན དོམནསྶསཧགཏཙིཏྟེནེཝ. དུཏིཡཝཱརེཔི ཨེསེཝ ནཡོ. ཛིགྷཙྪཱཔིཔཱསདུཀྑསྶ ཨསཧནནིམིཏྟེན དོམནསྶེནེཝ. ཝིཀཱུཛིཏམཏྟཱཏི ཨེཏྠ ཝིརཱུཔཾ ཀཱུཛིཏཾ ཝིཀཱུཛིཏཾ པུབྦེནིཝཱསསནྣིསྶཡཾ ཨུཔཡཾ, ཏཾ པནེཏྠ རོདནཧསནསམུཊྛཱཔཀཙིཏྟསཧགཏནྟི དོསསཧགཏཾ ལོབྷསཧགཏཉྩཱཏི དཊྛབྦཾ. ཙིཏྟནྟི ཀུསལཙིཏྟཾ. ཨཀུསལཙིཏྟཾ པན ཨཏཱིཏཱརམྨཎཾ པཝཏྟཏཱིཏི ཝཏྟབྦམེཝ ནཏྠི. སརིཏྭཱཏི ཡཱཝ ན སཏིསཎྛཱཔནཱ དྷམྨཱ ཨུཔྤཛྫནྟི, ཏཱཝ སུཔིནནྟེ ཨནུབྷཱུཏཾ ཝིཡ དུཀྑཾ སརིཏྭཱ རོདནྟི. ཧསནྟཱིཏི ཨེཏྠཱཔི ཨེསེཝ ནཡོ. ཨཡཉྩ ནཡོ ཡེ ལདྡྷསུཁཱརམྨཎཱ ཧུཏྭཱ གཧིཏཔཊིསནྡྷིཀཱ མཱཏུཀུཙྪིཏོཔི སུཁེནེཝ ནིཀྑམནྟི, ཏེསཾ ཝསེན ཝུཏྟོཏི དཊྛབྦོ. པཱཡནྟིཡཱཏི ཨཏྟནོ ཛནཔདདེསརཱུཔེན ¶ པཱཡནྟིཡཱ. ཨཡམྤཱིཏི ཨཱཛཱིཝོཔི མཱཏུ ཨཉྙཝིཧིཏཀཱལེ ཙ ལོཀསྶཱདཝསེན ཀིལེསསཧགཏཙིཏྟེནེཝ ཧོཏི.

༢༦༣. སམདྷིགཡ྄ཧཱཏི སམྨཱ ཨདྷིགཏབྷཱཝེན གཧེཏྭཱ ཨབྷིབྷཝིཏྭཱ ཝིསེསེཏྭཱ ཝིསིཊྛོ ཧུཏྭཱ. ཁཱིཎཱསཝཾ སནྡྷཱཡཱཏི བྱཏིརེཀཝསེན ཁཱིཎཱསཝཾ སནྡྷཱཡ. ཨཡཉྷེཏྠ ཨཏྠོ – ཁཱིཎཱསཝམྤི སོཏཱཔནྣཀུསལཾ པཉྙཔེཏི སེཀྑབྷཱུམིཡཾ ཋིཏཏྟཱ. སེསཔདེསུཔི ཨེསེཝ ནཡོ.

ཏཱིཎི པདཱནི ནིསྶཱཡཱཏི ན ཀཱཡེན པཱཔཀཾ ཀམྨཾ ཀརོཏི, ན པཱཔཀཾ ཝཱཙཾ བྷཱསཏི, ན པཱཔཀཾ ཨཱཛཱིཝཾ ཨཱཛཱིཝཏཱིཏི ཨིམཱནི ཏཱིཎི པདཱནི ནིསྶཱཡ ཀུསལསཱིལམཱུལཀཱ ཙ ཨཀུསལསཱིལམཱུལཀཱ ཙཱཏི དྭེ པཋམཙཏུཀྐཱ ཋཔིཏཱ. ཨེཀཾ པདཾ ནིསྶཱཡཱཏི ན པཱཔཀཾ སངྐཔྤཾ སངྐཔྤེཏཱིཏི ཨིམཾ ཨེཀཔདཾ ནིསྶཱཡ ཀུསལསངྐཔྤམཱུལཀཱ ཨཀུསལསངྐཔྤམཱུལཀཱ ཙཱཏི ཨིམེ དྭེ པཙྪིམཙཏུཀྐཱ ཋཔིཏཱ.

༢༦༤. ཝིཙིཀིཙྪུདྡྷཙྩསཧགཏཙིཏྟདྭཡམྤི ཝཊྚཏི བལཝཏཱ མོཧེན སམནྣཱགཏཏྟཱ. ཏཐཱ ཧི ཏཱནི ‘‘མོམཱུཧཙིཏྟཱནཱི’’ཏི ཝུཙྩནྟི.

ཀུཧིནྟི ཀིཾནིམིཏྟཾ. ཀཏརཾཋཱནཾ པཱཔུཎིཏྭཱཏི ཀིཾ ཀཱརཎཾ ཨཱགམྨ. ཨེཏྠེཏེཏི ཨེཏྠཱཏི ཀཱཡཝཙཱིམནོསུཙརིཏབྷཱཝནཱསཱཛཱིཝནིཔྥཏྟིཡཾ ¶ . སཱ པན ཧེཊྛིམཀོཊིཡཱ སོཏཱཔཏྟིཕལེན དཱིཔེཏབྦཱཏི ཨཱཧ ‘‘སོཏཱཔཏྟིཕལེ བྷུམྨ’’ནྟི. ཡསྨཱ ཨཱཛཱིཝཊྛམཀཾ ཨཝསིཊྛཉྩ སཱིལཾ པཱཏིམོཀྑསཾཝརསཱིལསྶ ཙ པཱརིསུདྡྷིཔཱཏིམོཀྑཱདྷིགམེན སོཏཱཔཏྟིཕལཔྤཏྟིཡཱ སིདྡྷོ ཧོཏཱིཏི ཨཱཧ – ‘‘པཱཏིམོཀྑ…པེ… ནིརུཛ྄ཛྷཏཱི’’ཏི. ‘‘སུཁསཱིལོ དུཀྑསཱིལོ’’ཏིཨཱདཱིསུ ཝིཡ པཀཏིཨཏྠསཱིལསདྡཾ གཧེཏྭཱ ཝུཏྟཾ ‘‘ཨཀུསལསཱིལ’’ནྟིཨཱདི.

༢༦༥. ཀཱམཱཝཙརཀུསལཙིཏྟམེཝ ཝུཏྟཾ སམྤཏྟསམཱདཱནཝིརཏིཔུབྦཀསྶ སཱིལསྶ ཨདྷིཔྤེཏཏྟཱ. ཏེནཱཧ – ‘‘ཨེཏེན ཧི ཀུསལསཱིལཾ སམུཊྛཱཏཱི’’ཏི.

སཱིལཝཱཏི ཨེཏྠ ཝཱ-སདྡོ པཱསཾསཏྠོཝ ཝེདིཏབྦོཏི ཨཱཧ ‘‘སཱིལསམྤནྣོ ཧོཏཱི’’ཏི. ཡོ སཱིལམཏྟེ པཏིཊྛིཏོ, ན སམཱདྷིཔཉྙཱསུ, སོ ¶ སཱིལམཡདྷམྨཔཱུརིཏཏཱཡ སཱིལམཡོ. ཏེནཱཧ ‘‘ཨལམེཏྟཱཝཏཱ’’ཏིཨཱདི. ཡཏྠཱཏི ཡསྶཾ ཙེཏོཝིམུཏྟིཡཾ པཉྙཱཝིམུཏྟིཡཉྩ. ཏདུབྷཡཉྩ ཡསྨཱ ཨརཧཏྟཕལེ སངྒཧིཏཾ, ཏསྨཱ ཝུཏྟཾ ‘‘ཨརཧཏྟཕལེ བྷུམྨ’’ནྟི. ཨསེསཾ ནིརུཛ྄ཛྷཏི སུཁཝིཔཱཀབྷཱཝསྶ སབྦསོ པཊིཔྤསྶམྦྷནཏོ.

༢༦༦. ཀཱམཔཊིསཾཡུཏྟཱ སཉྙཱ ཀཱམསཉྙཱ. སེསེསུཔི ཨེསེཝ ནཡོ. ཨིཏརཱ དྭེཏི བྱཱཔཱདཝིཧིཾསཱསཉྙཱ.

ཨནཱགཱམིཕལཔཋམཛ྄ཛྷཱནནྟི ཨནཱགཱམིཕལསཧགཏཾ པཋམཛ྄ཛྷཱནཾ. ཨེཏྠཱཏི ཡཐཱཝུཏྟེ པཋམཛ྄ཛྷཱནེ. ཨེཏྠ ཙ ཨུཛུཝིཔཙྩནཱིཀེན པཊིཔཀྑཔྤཧཱནཾ སཱཏིསཡནྟི པཋམཛ྄ཛྷཱནགྒཧཎཾ. ཏེནཱཧ ‘‘ཨཔརིསེསཱ ནིརུཛ྄ཛྷནྟཱི’’ཏི. ནེཀྑམྨསཉྙཱནཾ ཀཱམཱཝཙརཙིཏྟསཧགཏཏཱ ཏསྶ སཱིལསྶ སམུཊྛཱནཏཱ ཙ སམྤཡུཏྟནཡེན ཝེདིཏབྦཱ.

༢༦༧. ཀུསལསངྐཔྤནིརོདྷདུཏིཡཛ྄ཛྷཱནིཀཨརཧཏྟཕལཨཀུསལསངྐཔྤནིརོདྷ- པཋམཛ྄ཛྷཱནིཀཨནཱགཱམིཕལགྒཧཎེན སམཎོ དསྶིཏོ. སེསཾ སུཝིཉྙེཡྻམེཝ.

སམཎམུཎྜིཀཱཔུཏྟསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༩. ཙཱུལ༹སཀུལུདཱཡིསུཏྟཝཎྞནཱ

༢༧༡. པཉྷོཏི ¶ ཉཱཏུཾ ཨིཙྪིཏོ ཨཏྠོ, ཏདེཝ དྷམྨདེསནཱཡ ནིམིཏྟབྷཱཝཏོ ཀཱརཎཾ. ཨུཔཊྛཱཏཱུཏི ཉཱཎསྶ གོཙརབྷཱཝཾ ཨུཔགཙྪཏུ. ཡེན ཀཱརཎེནཱཏི ཡེན ཏུཡ྄ཧཾ ཨུཔཊྛིཏེན ཀཱརཎེན དྷམྨདེསནཱ ཨུཔཊྛཧེཡྻ, ཏཾ པན པརིབྦཱཛཀསྶ ཨཛ྄ཛྷཱསཡཝསེན ཏཐཱ ཝུཏྟཾ. ཏེནཱཧ ‘‘ཨེཏེན ཧི…པེ… དཱིཔེཏཱི’’ཏི. ཨེཀངྒཎཱནཱིཏི པིདྷཱནཱབྷཱཝེན ཨེཀངྒཎསདིསཱནི. ཏེནཱཧ ‘‘པཱཀཊཱནཱི’’ཏི.

ཛཱནནྟོཏི ཨཏྟནོ ཏཐཱབྷཱཝཾ སཡཾ ཛཱནནྟོ. སཀྐཙྩཾ སུསྶཱུསཏཱིཏི ‘‘ཏཐཱབྷཱུཏཾཡེཝ མཾ ཏཐཱ ཨཝོཙཱ’’ཏི སཱདརཾ སུསྶཱུསཏི. ཏསྨཱཏི དིབྦཙཀྑུལཱབྷིནོ ཨནཱགཏཾསཉཱཎལཱབྷཏོ. ཨེཝམཱཧཱཏི ‘‘ཡོ ¶ ཁོ, ཨུདཱཡི, དིབྦེན ཙཀྑུནཱ’’ཏི ཨཱརབྷིཏྭཱ ‘‘སོ ཝཱ མཾ ཨཔརནྟཾ ཨཱརབྦྷ པཉྷཾ པུཙྪེཡྻཱ’’ཏི ཨེཝཾ ཨཝོཙ.

ཨིཏརནྟི ཨཝསིཊྛཾ ཨིམསྨིཾ ཋཱནེ ཝཏྟབྦཾ. ཝུཏྟནཡམེཝཱཏི ‘‘ཡོ ཧི ལཱབྷཱི’’ཏིཨཱདིནཱ ཝུཏྟནཡམེཝ. ཨཏཱིཏེཏི པུབྦེནིཝཱསཱནུསྶཏིཉཱཎསྶ ཝིསཡབྷཱུཏེ ཨཏྠེ. ཨནཱགཏེཏི ཨནཱགཏཾསཉཱཎསྶ ཝིསཡབྷཱུཏེ ཨནཱགཏེ ཨཏྠེ.

པཾསུཔདེསེ ནིབྦཏྟནཏོ པཾསུསམོཀིཎྞསརཱིརཏཱཡ པཾསུཔིསཱཙཀཾ. ཨེཀཾ མཱུལཾ གཧེཏྭཱཏི དཱིགྷསོ ཧེཊྛིམནྟེན ཙཏུརངྒུལཾ, ཨུཔརིམནྟེན ཝིདཏྠིཀཾ རུཀྑགཙྪལཏཱདཱིསུ ཡསྶ ཀསྶཙི ཨེཀཾ མཱུལཾ གཧེཏྭཱ ཨཉྙཛཱཏིཀཱནཾ ཨདིསྶམཱནཀཱཡོ ཧོཏི. ཨཡཾ ཀིར ནེསཾ ཛཱཏིསིདྡྷཱ དྷམྨཏཱ. ཏཏྲཱཏི ཏསྶ མཱུལཝསེན ཨདིསྶམཱནཀཏཱཡ. ན དིསྶཏི ཉཱཎེན ན པསྶཏི.

༢༧༢. ན ཙ ཨཏྠཾ དཱིཔེཡྻཱཏི ཨདྷིཔྤེཏམཏྠཾ སཱ ཝཱཙཱ སརཱུཔཏོ ན ཙ དཱིཔེཡྻ, ཀེཝལཾ ཝཱཙཱམཏྟམེཝཱཏི ཨདྷིཔྤཱཡོ. པཊིཧརིཏབྦཊྛེན པརསནྟཱནེ ནེཏབྦཊྛེན པཊིཧཱརིཡ-སདྡདྭཱརེན ཝིཉྙཱཏབྦོ བྷཱཝཏྠོ, སོཝ པཱཊིཧཱིརཀོ ནིརུཏྟིནཡེན, ནཏྠི ཨེཏསྶ པཱཊིཧཱིརཀནྟི ཨཔྤཱཊིཧཱིརཀཏཾ, ཏ-སདྡེན པདཾ ཝཌྜྷེཏྭཱ ཏཐཱ ཝུཏྟཾ, ཨནིཡྻཱནཾ. ཏེནཱཧ ‘‘ནིརཏྠཀཾ སམྤཛྫཏཱི’’ཏི. སུབྷཀིཎྷདེཝལོཀེ ཁནྡྷཱ ཝིཡ ཛོཏེཏཱིཏི ཨིམིནཱ – ‘‘དིབྦོ རཱུཔཱི མནོམཡོ སབྦངྒཔཙྩངྒཱི ཨཧཱིནིནྡྲིཡོ ཨཏྟཱ’’ཏི ཨིམམཏྠཾ དསྶེཏི.

༢༧༣. སཨུཔསགྒཔདསྶ ¶ ཨཏྠོ ཨུཔསགྒེན ཝིནཱཔི ཝིཉྙཱཡཏཱིཏི ཨཱཧ ‘‘ཝིདྡྷེཏི ཨུབྦིདྡྷེ’’ཏི. སཱ ཙསྶ ཨུབྦིདྡྷཏཱ ཨུཔཀྐིལེསཝིགམེན སུཙིབྷཱཝེན ཨུཔཊྛཱནནྟི ཨཱཧ ‘‘མེགྷཝིགམེན དཱུརཱིབྷཱུཏེ’’ཏི. ཨིནྡནཱིལམཎི ཝིཡ དིབྦཏི ཛོཏེཏཱིཏི དེཝོ, ཨཱཀཱསོ. ‘‘ཨཌྜྷརཏྟསམཡེ’’ཏི ཝཏྟབྦེ བྷུམྨཏྠེ ཝིཧིཏཝཙནཱནཾ ཨཙྩནྟསཾཡོགཱབྷཱཝཱ ཨུཔཡོགཝཙནཾ ཝེདིཏབྦཾ. པུཎྞམཱསིཡཉྷི གགནམཛ྄ཛྷསྶ པུརཏོ ཝཱ པཙྪཏོ ཝཱ ཨནྟེ ཋིཏེ ཨཌྜྷརཏྟེ སམཡོ བྷིནྣོ ནཱམ ཧོཏི, མཛ྄ཛྷེ ཨེཝ པན ཋིཏོ ཨབྷིནྣོ ནཱམ. ཏེནཱཧ ‘‘ཨབྷིནྣེ ཨཌྜྷརཏྟསམཡེ’’ཏི.

ཡེ ཨནུབྷོནྟཱིཏི ཡེ དེཝཱ ཙནྡིམསཱུརིཡཱནཾ ཨཱབྷཱ ཨནུབྷོནྟི ཝིནིབྷུཉྫནྟི ཝལ༹ཉྫནྟི ཙ ཏེཧི དེཝེཧི བཧཱུ ཙེཝ བཧུཏརཱ ཙ ཙནྡིམསཱུརིཡཱནཾ ཨཱབྷཱ ¶ ཨནནུབྷོནྟོ. ཏེནཱཧ – ‘‘ཨཏྟནོ སརཱིརོབྷཱསེནེཝ ཨཱལོཀཾ ཕརིཏྭཱ ཝིཧརནྟཱི’’ཏི.

༢༧༤. པུཙྪཱམཱུལ༹ྷོ པན ཛཱཏོ ‘‘ཨཡཾ པརམོ ཝཎྞོ’’ཏི གཧིཏཔདསྶ ཝིདྷམནེན. ཨཙེལཀཔཱལི༹ནྟི ‘‘ཨཙེལཀོ ཧོཏི མུཏྟཱཙཱརོ’’ཏིཨཱདིནཡཔྤཝཏྟཾ (དཱི. ནི. ༡.༣༩༤) ཨཙེལཀཔཊིཔཏྟིདཱིཔཀགནྠཾ, གནྠསཱིསེནེཝ ཏེན པཀཱསིཏཝཱདཱནི ཝདཏི. སུརཱམེརཡཔཱནམནུཡུཏྟཔུགྒལསྶ སུརཱཔཱནཏོ ཝིརཏི ཏསྶ ཀཱཡཾ ཙིཏྟཉྩ ཏཱཔེནྟཱི སཾཝཏྟཏཱིཏི སུརཱཔཱནཝིརཏི (ཏཔོ, སོཡེཝ གུཎོ. ཏེནཱཧ ‘‘སུརཱཔཱནཝིརཏཱིཏི ཨཏྠོ’’ཏི).

༢༧༥. ཨེཀནྟཾ ཨཙྩནྟམེཝ སུཁཾ ཨསྶཱཏི ཨེཀནྟསུཁཾ. པཉྩསུ དྷམྨེསཱུཏི ‘‘པཱཎཱཏིཔཱཏཱ པཊིཝིརཏཱི’’ཏིཨཱདཱིསུ པཉྩསུ སཱིལཱཙཱརདྷམྨེསུ. ན ཛཱནིཾསཱུཏི སམྨོསེན ཨནུཔཊྛཧནྟི ཏདཏྠཾ ན བུཛ྄ཛྷནྟི. བུདྡྷུཔྤཱདེན ཀིར ཝིཧཏཏེཛཱནི མཧཱནུབྷཱཝཱནི མནྟཔདཱནི ཝིཡ བཱཧིརཀཱནཾ ཡོགཱཝཙརགནྠེན སདྡྷིཾ ཡོགཱཝཙརཔཊིཔདཱ ནསྶཏི. ཨུགྒཎྷིཾསཱུཏི ‘‘པཉྩ པུབྦབྷཱགདྷམྨེ’’ཏིཨཱདིཝཙནམཏྟཾ ཨུགྒཎྷིཾསུ. ཏཏིཡཛ྄ཛྷཱནཏོཏི ཀཱརཎོཔཙཱརེན ཕལཾ ཝདཏི, ཕལབྷཱུཏཏོ ཏཏིཡཛ྄ཛྷཱནཏོ.

༢༧༦. ཨེཀནྟསུཁསྶ ལོཀསྶ པཊིལཱབྷེན པཏྟིཡཱ ཏཏྠ ནིབྦཏྟི པཊིལཱབྷསཙྪིཀིརིཡཱ. ཨེཀནྟསུཁེ ལོཀེ ཨནབྷིནིབྦཏྟིཏྭཱ ཨེཝ ཨིདྡྷིཡཱ ཏཏྠ གནྟྭཱ ཏསྶ སཏྟལོཀསྶ བྷཱཛནལོཀསྶ ཙ པཙྩཀྑཏོ དསྶནཾ པཙྩཀྑསཙྪིཀིརིཡཱ. ཏེནཱཧ ‘‘ཏཏྠཱ’’ཏིཨཱདི.

༢༧༧. ཨུདཉྩནིཀོཏི ¶ ཨུདཉྩནོ. ཝིཉྫྷུཔབྦཏཔསྶེ གཱམཱནཾ ཨནིཝིཊྛཏྟཱ ཏིཾསཡོཛནམཏྟཾ ཋཱནཾ ཨཊཝཱི ནཱམ, ཏཏྠ སེནཱསནཾ, ཏསྨིཾ ཨཊཝིསེནཱསནེ པདྷཱནཀམྨིཀཱནཾ བྷིཀྑཱུནཾ བཧཱུནཾ ཏཏྠ ནིཝཱསེན ཨེཀཾ པདྷཱནགྷརཾ ཨཧོསི.

ཙཱུལ༹སཀུལུདཱཡིསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༡༠. ཝེཁནསསུཏྟཝཎྞནཱ

༢༨༠. སཧ ¶ ¶ ཝཏྠུཀཱམེན ཀིལེསཀཱམོ གརུ གརུཀཱཏབྦོ ཨེཏསྶཱཏི ཀཱམགརུ. ཏེསྭེཝ ཀཱམེསུ ནིནྣཔོཎཔབྦྷཱརཛ྄ཛྷཱསཡོཏི ཀཱམཱདྷིམུཏྟོ. པབྦཛྫཱཔཋམཛ྄ཛྷཱནཱདིཀཾ ནེཀྑམྨཾ གརུ གརུཀཱཏབྦཾ ཨེཏསྶཱཏི ནེཀྑམྨགརུ. ཏཏྠ ནིནྣཔོཎཔབྦྷཱརཛ྄ཛྷཱསཡོ ནེཀྑམྨཱདྷིམུཏྟོ སྭཱཡམཏྠོ ཡཐཱ ཨེཀཙྩེ གཧཊྛེ ལབྦྷཏི, ཨེཝཾ ཨེཀཙྩེ ཨནགཱརེཔཱིཏི ཨཱཧ ‘‘པབྦཛིཏོཔཱི’’ཏིཨཱདི. ཨཡཾ པན ཝེཁནསོ པརིབྦཱཛཀོ. སོ ཧི ཝེཁནསཏཱཔསཔབྦཛྫཾ ཨུཔགནྟྭཱ ཝེཁནསེན ཨིམིནཱ དིཊྛིམཱདཱཡ སམཱདིཡིཏྭཱ ཋིཏཏྟཱ ‘‘ཝེཁནསོ’’ཏི ཝུཙྩཏི. ཡཐཱ ལོཀོ སཡཾ ཨེཀཱདསཧི ཨགྒཱིཧི ཨཱདིཏྟོཔི སམཱནོ པཙྩཀྑཏོ ཨནུབྷཝིཡམཱནཾ སཱལཱཀིཀཾ ཨགྒིསནྟཱཔཾ ཝིཡ ཨནཱདིཀཱལཱནུགཏསམྨཱཀཝཙརསནྟཱཔཾ ཨཱདིཏྟཏཱཡ ན སལླཀྑེཏི, སམྨཱསམྦུདྡྷེན པན མཧཱཀརུཎཱསམུསྶཱཧིཏམཱནསེན ‘‘སབྦཾ, བྷིཀྑཝེ, ཨཱདིཏྟ’’ནྟི ཨཱདིཏྟཔརིཡཱཡེ (སཾ. ནི. ༤.༢༨; མཧཱཝ. ༥༤) དེསིཡམཱནེ སལླཀྑེཏི, ཨེཝཾ ཨཡམྤི ཨནཱདིཀཱལཔརིབྷཱཝིཏཾ ཨཏྟཨཛ྄ཛྷཱསཡེ ཨཝཊྛིཏཾ ཀཱམཱདྷིམུཏྟཾ སརསེན ཨནུཔདྷཱརེནྟོ སཏྠཱརཱ – ‘‘པཉྩ ཁོ ཨིམེ, ཀཙྩཱན, ཀཱམགུཎཱ’’ཏིཨཱདིནཱ ཀཱམགུཎེསུ ཀཱམསུཁེ བྷཱསིཡམཱནེ ‘‘ཀཱམཱདྷིམུཏྟཾ ཝཏ པབྦཛིཏསྶ ཙིཏྟ’’ནྟི ཨུཔདྷཱརེསྶཏཱིཏི ཨཱཧ – ‘‘ཨིམཱཡ ཀཐཱཡ ཀཐིཡམཱནཱཡ ཨཏྟནོ ཀཱམཱདྷིམུཏྟཏཾ སལླཀྑེསྶཏཱི’’ཏི. ཀཱམགྒསུཁནྟི ཀཱམེཏབྦཝཏྠཱུཧི ཨགྒབྷཱུཏཾ སུཁཾ. སབྦེ ཧི ཏེབྷཱུམཀདྷམྨཱ ཀཱམནཱིཡཊྛེན ཀཱམཱ, ཏེ པཊིཙྩ ཨུཔྤཛྫནསུཁཏོ ནིབྦཱནསུཁམེཝ ཨགྒབྷཱུཏཾ སུཁཾ. ཡཐཱཧ – ‘‘ཡཱཝཏཱ, བྷིཀྑཝེ, དྷམྨཱ སངྑཏཱ ཝཱ ཨསངྑཏཱ ཝཱ, ཝིརཱགོ ཏེསཾ ཨགྒམཀྑཱཡཏཱི’’ཏི (ཨིཏིཝུ. ༩༠; ཨ. ནི. ༤.༣༤) – ‘‘ནིབྦཱནཾ པརམཾ སུཁ’’ནྟི (མ. ནི. ༢.༢༡༥, ༢༡༧; དྷ. པ. ༢༠༣) ཙ. ཏེན ཝུཏྟཾ ‘‘ནིབྦཱནཾ ཨདྷིཔྤེཏ’’ནྟི.

༢༨༡. པུབྦེནིཝཱསཉཱཎལཱབྷིནོ པུབྦནྟཾ ཨཱརབྦྷ ཝུཙྩམཱནཀཐཱ ཨནུཙྪཝིཀཱ ཏདཏྠསྶ པཙྩཀྑབྷཱཝཏོ, ཏདབྷཱཝཏོ ཝེཁནསསྶ ཨནནུཙྪཝིཀཱཏི ཨཱཧ ‘‘ཡསྨཱ…པེ… ནཏྠཱི’’ཏི. ཨནཱགཏཀཐཱཡ…པེ… ནཏྠཱིཏི ཨེཏྠཱཔི ཨེསེཝ ནཡོ. ཨཱརཀྑཏྠཱཡཱཏི དེཝཏཱཧི མནྟཔདེཧི སཧ ཋིཏཱ ¶ ཏཏྠ ཨཱརཀྑཏྠཱཡ. ཨཝིཛྫཱཡཱཏི ཨིདཾ ལཀྑཎཝཙནཾ, ཏཾམཱུལཀཏྟཱ ཝཱ སབྦཀིལེསདྷམྨཱནཾ ཨཝིཛྫཱཝ གཧིཏཱ. ཛཱནནཾ པཧཱིནཀིལེསཔཙྩཝེཀྑཎཉཱཎེན. སེསཾ སུཝིཉྙེཡྻམེཝ.

ཝེཁནསསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

ནིཊྛིཏཱ ཙ པརིབྦཱཛཀཝགྒཝཎྞནཱ.

༤. རཱཛཝགྒོ

༡. གྷཊིཀཱརསུཏྟཝཎྞནཱ

༢༨༢. ཙརིཡནྟི ¶ ¶ བོདྷིཙརིཡཾ, བོདྷིསམྦྷཱརསམྦྷརཎཝསེན པཝཏྟིཏཾ བོདྷིསཏྟཔཊིཔཏྟིནྟི ཨཏྠོ. སུཀཱརཎནྟི བོདྷིཔརིཔཱཙནསྶ ཨེཀནྟིཀཾ སུནྡརཾ ཀཱརཎཾ, ཀསྶཔསྶ བྷགཝཏོ པཡིརུཔཱསནཱདིཾ སནྡྷཱཡ ཝདཏི. ཏཉྷི ཏེན སདྡྷིཾ མཡཱ ཨིདྷ ཀཏནྟི ཝཏྟབྦཏཾ ལབྷཏི. མནྡཧསིཏནྟི ཨཱིསཀཾ ཧསིཏཾ. ཀུཧཾ ཀུཧནྟི ཧཱས-སདྡསྶ ཨནུཀརཎམེཏཾ. ཧཊྛཔཧཊྛཱཀཱརམཏྟནྟི ཧཊྛཔཧཊྛམཏྟཾ. ཡཐཱ གཧིཏསངྐེཏཱ ‘‘པཧཊྛོ བྷགཝཱ’’ཏི སཉྫཱནནྟི, ཨེཝཾ ཨཱཀཱརདསྶནམཏྟཾ.

ཨིདཱནི ཨིམིནཱ པསངྒེན ཏཱསཾ སམུཊྛཱནཾ ཝིབྷཱགཏོ དསྶེཏུཾ ‘‘ཧསིཏཉྩ ནཱམེཏ’’ནྟིཨཱདི ཨཱརདྡྷཾ. ཏཏྠ ཨཛ྄ཛྷུཔེཀྑནཝསེནཔི ཧཱསོ ན སམྦྷཝཏི, པགེཝ དོམནསྶཝསེནཱཏི ཨཱཧ ‘‘ཏེརསཧི སོམནསྶསཧགཏཙིཏྟེཧཱི’’ཏི. ནནུ ཙ ཀེཙི ཀོདྷཝསེནཔི ཧསནྟཱིཏི? ན, ཏེསམྤི ཡཾ ཏཾ ཀོདྷཝཏྠུ, ཏསྶ མཡཾ དཱནི ཡཐཱཀཱམཀཱརིཏཾ ཨཱཔཛྫིསྶཱམཱཏི དུཝིཉྙེཡྻནྟརེན སོམནསྶཙིཏྟེནེཝ ཧཱསསྶ ཨུཔྤཛྫནཏོ. ཏེསཱུཏི པཉྩསུ སོམནསྶསཧགཏཙིཏྟེསུ. བལཝཱརམྨཎེཏི ཨུལཱ༹རཨཱརམྨཎེ ཡམཀམཧཱཔཱཊིཧཱརིཡསདིསེ. དུབྦལཱརམྨཎེཏི ཨནུལཱ༹རེ ཨཱརམྨཎེ. ཨིམསྨིཾ པན ཋཱནེ…པེ… ཨུཔྤཱདེསཱིཏི ཨིདཾ པོརཱཎཊྛཀཐཱཡཾ ཏཐཱ ཨཱགཏཏྟཱ ཝུཏྟཾ. ན ཨཧེཏུཀསོམནསྶསཧགཏཙིཏྟེན བྷགཝཏོ སིཏཾ ཧོཏཱིཏི དསྶནཏྠཾ.

ཨབྷིདྷམྨཊཱིཀཱཡཾ (དྷ. ས. མཱུལཊཱི. ༥༦༨) པན ‘‘ཨཏཱིཏཾསཱདཱིསུ ཨཔྤཊིཧཏཾ ཉཱཎཾ ཝཏྭཱ ‘ཨིམེཧི ཏཱིཧི དྷམྨེཧི སམནྣཱགཏསྶ བུདྡྷསྶ བྷགཝཏོ སབྦཾ ཀཱཡཀམྨཾ ཉཱཎཔུབྦངྒམཾ ཉཱཎཱནུཔརིཝཏྟ’ནྟིཨཱདིཝཙནཏོ (མཧཱནི. ༦༩, ༡༥༦; ཙཱུལ༹ནི. མཱགྷརཱཛམཱཎཝཔུཙྪཱནིདྡེས ༨༥; པཊི. མ. ༣.༥; ནེཏྟི. ༡༥; དཱི. ནི. ཨཊྛ. ༣.༣༠༥; ཝིབྷ. མཱུལཊཱི. སུཏྟནྟབྷཱཛནཱིཡཝཎྞནཱ; དཱི. ནི. ཊཱི. ༣.༡༤༡, ༣༠༥) ‘བྷགཝཏོ ¶ ཨིདཾ ཙིཏྟཾ ཨུཔྤཛྫཏཱི’ཏི ཝུཏྟཝཙནཾ ཝིཙཱརེཏབྦ’’ནྟི ཝུཏྟཾ. ཏཏྠ ཨིམིནཱ ཧསིཏུཔྤཱདཙིཏྟེན པཝཏྟིཡམཱནམྤི བྷགཝཏོ སིཏཀརཎཾ པུབྦེནིཝཱས-ཨནཱགཏཾས-སབྦཉྙུཏཉྙཱཎཱནཾ ཨནུཝཏྟཀཏྟཱ ཉཱཎཱནུཔརིཝཏྟིཡེཝཱཏི, ཨེཝཾ པན ཉཱཎཱནུཔརིཝཏྟིབྷཱཝེ སཏི ན ཀོཙི པཱལི༹ཨཊྛཀཐཱནཾ ཝིརོདྷོ. ཏཐཱ ཧི ཨབྷིདྷམྨཊྛཀཐཱཡཾ (དྷ. ས. ཨཊྛ. ༥༦༨) ‘‘ཏེསཾ ¶ ཉཱཎཱནཾ ཙིཎྞཔརིཡནྟེ ཨིདཾ ཙིཏྟཾ ཨུཔྤཛྫཏཱི’’ཏི ཝུཏྟཾ. ཨཝསྶཉྩ ཨེཏཾ ཨེཝཾ ཨིཙྪིཏབྦཾ, ཨཉྙཐཱ ཨཱཝཛྫནསྶཔི བྷགཝཏོ པཝཏྟི ཏཐཱརཱུཔེ ཀཱལེ ན སཾཡུཛྫེཡྻ, ཏསྶཔི ཧི ཝིཉྙཏྟིསམུཊྛཱཔཀབྷཱཝསྶ ཨིཙྪིཏཏྟཱ, ཏཐཱ ཧི ཝུཏྟཾ – ‘‘ཨེཝཉྩ ཀཏྭཱ མནོདྭཱརཱཝཛྫནསྶཔི ཝིཉྙཏྟིསམུཊྛཱཔཀཏྟཾ ཨུཔཔནྣཾ ཧོཏཱི’’ཏི, ན ཙ ཝིཉྙཏྟིསམུཊྛཱཔཀཏྟེ ཏཾསམུཊྛིཏཱཡ ཝིཉྙཏྟིཡཱ ཀཱཡཀམྨཱདིབྷཱཝཾ ཨཱཔཛྫནབྷཱཝོ ཝིབནྡྷཏཱིཏི ཏམེཝ སནྡྷཱཡ ཝདཏི. ཏེནཱཧ ‘‘ཨེཝཾ ཨཔྤམཏྟཀམྤཱི’’ཏི. སཏེརིཏཱ ཝིཛྫུལཏཱ ནཱམ སཏེརཏཱཝིཛྫུལཏཱ. སཱ ཧི ཨིཏརཝིཛྫུལཏཱ ཝིཡ ཁཎཊྛིཏིཀཱ སཱིགྷནིརོདྷཱ ཙ ན ཧོཏི, ཨཔིཙ ཁོ དནྡྷནིརོདྷཱ, ཏཉྩ སབྦཀཱལཾ ཙཏུདཱིཔིཀམཧཱམེགྷཏོཝ ནིཙྪརཏི ཏེནཱཧ ‘‘ཙཱཏུདྡཱིཔིཀམཧཱམེགྷམུཁཏོ’’ཏི. ཨཡཾ ཀིར ཏཱསཾ རསྨིཝཊྚཱིནཾ དྷམྨཏཱ, ཡདིདཾ ཏིཀྑཏྟུཾ སིརཝརཾ པདཀྑིཎཾ ཀཏྭཱ དཱཋགྒེསུཡེཝ ཨནྟརདྷཱནཾ.

༢༨༣. ཡདིཔི ཙཏྟཱརི ཨསངྑྱེཡྻཱནི ཀཔྤཱནཾ སཏསཧསྶཉྩ པཉྙཱཔཱརམིཏཱ པརིབྷཱཝིཏཱ, ཏཐཱཔི ཨིདཱནི ཏཾ བུདྡྷནྟརཾ ཏསྶཱ པཊིཔཱདེཏབྦཏྟཱ ཝུཏྟཾ ‘‘ཨཔརིཔཀྐཉཱཎཏྟཱ’’ཏི. ཀཱམཉྩསྶ ཉཱཎཱཡ ཨིདཱནིཔི པཊིཔཱདེཏབྦཏཱ ཨཏྠི, ཨེཝཾ སནྟེཔི ནནུ སམྨཱསམྦུདྡྷེསུ པསཱདེན སམྦྷཱཝནཱཡ བྷཝིཏབྦཾ ཏཐཱ ཙིརཀཱལཾ པརིབྷཱཝིཏཏྟཱ, ཀཐཾ ཏཏྠ ཧཱིལ༹ནཱཏི ཨཱཧ ‘‘བྲཱཧྨཎཀུལེ’’ཏིཨཱདི. ཙིརཀཱལཔརིཙིཏཱཔི ཧི གུཎབྷཱཝནཱ ཨཔྤཀེནཔི ཨཀལྱཱཎམིཏྟསཾསགྒེན ཝིཔརིཝཏྟཏི ཨཉྙཐཏྟཾ གཙྪཏི. ཏེན མཧཱསཏྟོཔི ཛཱཏིསིདྡྷཱཡཾ ལདྡྷིཡཾ ཋཏྭཱ ཛཱཏིསིདྡྷེན མཱནེན ཨེཝམཱཧ – ‘‘ཀིཾ པན ཏེན མུཎྜཀེན སམཎཀེན དིཊྛེནཱ’’ཏི. ཏཐཱ ཧི ཝུཏྟཾ ཨཊྛཀཐཱཡཾ –

‘‘ཏསྨཱ ཨཀལྱཱཎཛནཾ, ཨཱསཱིཝིསམིཝོརགཾ,

ཨཱརཀཱ པརིཝཛྫེཡྻ, བྷཱུཏིཀཱམོ ཝིཙཀྑཎོ’’ཏི. (དཱི. ནི. ཨཊྛ. ༡.༡༧༠-༡༧༢);

ནྷཱནཙུཎྞེན སུཏྟེན ཀཏཱ སོཏྟི, ཀུརུཝིནྡགུལི༹ཀཱ, སཱ ཨེཝ སིནཱཡནྟི ཀཱཡཾ ཝིསོདྷེནྟི ཨེཏཱཡཱཏི སིནཱནཾ. ཏེནཱཧ – ‘‘སོཏྟི སིནཱནནྟི སིནཱནཏྠཱཡ ཀཏསོཏྟི’’ནྟི.

༢༨༤. ཨརིཡཔརིཧཱརེནཱཏི ¶ ཨརིཡཱནཾ པརིཧཱརེན, ཨནཱགཱམཱིནཾ ནྷཱནཀཱལེ ཨཏྟནོ ཀཱཡསྶ པརིཧཱརནིཡཱམེནཱཏི ཨཏྠོ. ཨཏྟནོ ¶ ཉཱཎསམྤཏྟིཡཱ ཝིབྷཝསམྤཏྟིཡཱ པསནྣཀཱརཾ ཀཱཏུཾ སཀྑིསྶཏི. ཨེཏདཏྠནྟི ‘‘ཨཧིཏནིཝཱརཎཾ, ཧིཏེ ནིཡོཛནཾ བྱསནེ པརིཝཛྫན’’ནྟི ཡདིདཾ, ཨེཏདཏྠཾ མིཏྟཱ ནཱམ ཧོནྟི. ཀེཙི ‘‘ཡཱཝེཏྠ ཨཧུཔཱི’’ཏི པཋནྟི, ཏེསཾ ཡཱཝ ཨེཏྠ ཀེསགྒགཧཎཾ ཏཱཝ ཨཡཾ ནིབནྡྷོ ཨཧུཔཱིཏི ཨཏྠོ.

༢༨༥. སཏིཔཊིལཱབྷཏྠཱཡཱཏི བོདྷིཡཱ མཧཱབྷིནཱིཧཱརཾ ཀཏྭཱ བོདྷིསམྦྷཱརཔཊིཔདཱཡ པཱུརཎབྷཱཝེ སཏིཡཱ པཊིལཱབྷཏྠཱཡ. ཨིདཱནི ཏསྶ སཏུཔྤཱདནཱིཡཀཐཱཡ པཝཏྟིཏཱཀཱརཾ སངྑེཔེནེཝ དསྶེཏུཾ ‘‘ཏསྶ ཧཱི’’ཏིཨཱདི ཝུཏྟཾ. ཏཏྠ ན ལཱམཀཊྛཱནཾ ཨོཏིཎྞསཏྟོཏི ཨིམིནཱ མཧཱསཏྟསྶ པཎཱིཏཱདྷིམུཏྟཏཾ དསྶེཏྭཱ ཨེཝཾ པཎཱིཏཱདྷིམུཏྟིཀསྶ པམཱདཀིརིཡཱ ན ཡུཏྟཱཏི དསྶེནྟོ ‘‘ཏཱདིསསྶ ནཱམ པམཱདཝིཧཱརོ ན ཡུཏྟོ’’ཏི ཨཱཧ. ཏདཱ བོདྷིསཏྟསྶ ནེཀྑམྨཛ྄ཛྷཱསཡོ ཏེལཔྤདཱིཔོ ཝིཡ ཝིསེསཏོ ནིབྦཏྟི, ཏཾ དིསྭཱ བྷགཝཱ ཏདནུརཱུཔཾ དྷམྨཀཐཾ ཀརོནྟོ ‘‘ཏཱདིསསྶ…པེ… ཀཐེསཱི’’ཏི. པརསམུདྡཝཱསཱི ཐེརཱ ཨཉྙཐཱ ཝདནྟི. ཨཊྛཀཐཱཡཾ པན ནཱཡཾ བུདྡྷཱནཾ བྷཱརོ, ཡདིདཾ པཱུརིཏཔཱརམཱིནཾ བོདྷིསཏྟཱནཾ ཏཐཱ དྷམྨདེསནཱ ཏེསཾ མཧཱབྷིནཱིཧཱརསམནནྟརམྤི བོདྷིསམྦྷཱརསྶ སཡམྦྷུཉཱཎེནེཝ པཊིཝིདིཏཏྟཱ. ཏསྨཱ བོདྷིསཏྟབྷཱཝཔཝེདནམེཝ ཏསྶ བྷགཝཱ ཨཀཱསཱིཏི དསྶེཏུཾ ‘‘སཏིཔཊིལཱབྷཏྠཱཡཱ’’ཏིཨཱདི ཝུཏྟཾ. སཏིཔཊིལཱབྷཏྠཱཡཱཏི སམྨཱཔཊིཔཏྟིཡཱ ཨུཛྫལནེ པཱཀཊཀརསཏིཔཊིལཱབྷཱཡ.

༢༨༦. ཉཱཎཉྷི ཀིལེསདྷམྨཝིདཱལནཔདཱལནེཧི སིངྒཾ ཝིཡཱཏི སིངྒཾ. ཏཉྷི པཊིཔཏྟིཡཱ ཨུཔཏྠམྦྷིཏཾ ཨུསྶིཏཾ ནཱམ ཧོཏི, ཏདབྷཱཝེ པཏིཏཾ ནཱམ. ཀེཙི པན ཝཱིརིཡཾ སིངྒནྟི ཝདནྟི. ཏསྨིཾ སམྨཔྤདྷཱནཝསེན པཝཏྟེ བཱཧིརཔབྦཛྫཾ ཨུཔགཏཱཔི མཧཱསཏྟཱ ཝིསུདྡྷཱསཡཱ ཨཔྤིཙྪཏཱདིགུཎསམངྒིནོ ཡཐཱརཧཾ གནྠདྷུརཾ ཝཱསདྷུརཉྩ པརིབྲཱུཧཡནྟཱ ཝིཧརནྟི, པགེཝ བུདྡྷསཱསནེ ཨཔྤིཙྪཏཱདཱིཧཱིཏི ཨཱཧ ‘‘ཙཏུཔཱརིསུདྡྷིསཱིལེ པནཱ’’ཏིཨཱདི. ཝིཔསྶནཾ བྲཱུཧེནྟཱ སིཁཱཔྤཏྟཝིཔསྶནཱ ཧོནྟཱིཏི ཝུཏྟཾ – ‘‘ཡཱཝ ཨནུལོམཉཱཎཾ ཨཱཧཙྩ ཏིཊྛནྟཱི’’ཏི, ཨནུལོམཉཱཎཏོ ཨོརམེཝ ཝིཔསྶནཾ ཋཔེནྟཱིཏི ཨཏྠོ. མགྒཕལཏྠཾ ཝཱཡཱམཾ ན ཀརོནྟི པཉྙཱཔཱརམིཏཱཡ སབྦཉྙུཏཉྙཱཎགབྦྷསྶ ཨཔརིཔུཎྞཏྟཱ ཨཔརིཔཀྐཏྟཱ ཙ.

༢༨༧. ཐེརེཧཱིཏི ¶ ཝུདྡྷཏརེཧི. ནིཝཱསེ སཏཱིཏི ཡསྨིཾ ཋཱནེ པབྦཛིཏོ, ཏཏྠེཝ ནིཝཱསེ. ཝཔྤཀཱལཏོཏི སསྶཱནཾ ཝཔྤཀཱལཏོ. པུབྦེ ཝིཡ ཏཏོ པརཾ ཏིཁིཎེན སཱུརིཡསནྟཱཔེན པཡོཛནཾ ནཏྠཱིཏི ཝུཏྟཾ – ‘‘ཝཔྤཀཱལེ ཝིཏཱནཾ ཝིཡ ཨུཔརི ཝཏྠཀིལཉྫཾ བནྡྷིཏྭཱ’’ཏི. པུཊཀེཏི ཀལཱཔེ.

༢༨༨. པཙྩཡསཱམགྒིཧེཏུཀཏྟཱ ¶ དྷམྨཔྤཏྟིཡཱ པདེསཏོ པརིཉྙཱཝཏྠུཀཱཔི ཨརིཡཱ ཨུཔཊྛིཏེ ཙིཏྟཝིགྷཱཏཔཙྩཡེ ཡདེཏཾ ནཱཏིསཱཝཛྫཾ, ཏདེཝཾ གཎྷནྟཱིཏི ཨཡམེཏྠ དྷམྨཏཱཏི ཨཱཧ – ‘‘ཨལཱབྷཾ ཨཱརབྦྷ ཙིཏྟཉྙཐཏྟ’’ནྟིཨཱདི. སོཏི ཀིཀཱི ཀཱསིརཱཛཱ. བྲཱཧྨཎབྷཏྟོཏི བྲཱཧྨཎེསུ བྷཏྟོ. དེཝེཏི བྲཱཧྨཎེ སནྡྷཱཡཱཧ. བྷཱུམིདེཝཱཏི ཏེསཾ སམཉྙཱ, ཏདཱ བྲཱཧྨཎགརུཀོ ལོཀོ. ཏདཱ ཧི ཀསྶཔོཔི བྷགཝཱ བྲཱཧྨཎཀུལེ ནིབྦཏྟི. དྷཱིཏུ ཨཝཎྞཾ ཝཏྭཱཏི, ‘‘མཧཱརཱཛ, ཏཝ དྷཱིཏཱ བྲཱཧྨཎསམཡཾ པཧཱཡ མུཎྜཔཱསཎྜིཀསམཡཾ གཎྷཱི’’ཏིཨཱདིནཱ རཱཛཔུཏྟིཡཱ ཨགུཎཾ ཝཏྭཱ. ཝརཾ གཎྷིཾསུ ཉཱཏཀཱ. རཛྫཾ ནིཡྻཱཏེསི ‘‘མཱ མེ ཝཙནཾ མུསཱ ཨཧོསི, ཨཊྛམེ དིཝསེ ནིགྒཎྷིསྶཱམཱི’’ཏི.

པཱཝནཨསྨནཡནཝསེན སམྨཱ པཱཝཱིཀཏཏྟཱ པརིསུདྡྷཏཎྜུལཱནི. པཱལི༹ཡཾ ཏཎྜུལཔཊིབྷསྟཱནཱིཏི ཏཎྜུལཁཎྜཱནི. མུགྒཔཊིབྷསྟཀལཱ༹ཡཔཊིབྷསྟེསུཔི ཨེསེཝ ནཡོ.

༢༨༩. ཀོ ནུ ཁོཏི བྷུམྨཏྠེ པཙྩཏྟཝཙནནྟི ཨཱཧ – ‘‘ཀུཧིཾ ནུ ཁོ’’ཏི པཱརིཔཱུརིཾ ཡོཛཱིཡནྟི བྱཉྫནབྷོཛནཱནི ཨེཏྠཱཏི པརིཡོགོ, ཏཏོ པརིཡོགཱ. ཏེནཱཧ ‘‘སཱུཔབྷཱཛནཏོ’’ཏི. སཉྙཾ དཏྭཱཏི ཝུཏྟཾ སབྦཾ ཨཱཙིཀྑིཏྭཱ ཏུམྷཱཀཾ ཨཏྠཱཡ སམྤཱདེཏྭཱ ནིཀྑིཏྟོ ཨུཔཊྛཱཀོཏི བྷགཝཏོ ཨཱརོཙེཐཱཏི སཉྙཾ དཏྭཱ. ཨཏིཝིསྶཏྠོཏི ཨཏིཝིཡ ཝིསྶཏྠོ. པཉྩཝཎྞཱཏི ཁུདྡིཀཱདིཝསེན པཉྩཔྤཀཱརཱ.

༢༩༠. ཀིནྟི ནིསྶཀྐེ པཙྩཏྟཝཙནཾ, ཀསྨཱཏི ཨཏྠོ? དྷམྨིཀོཏི ཨིམིནཱ ཨཱགམནསུདྡྷིཾ དསྶེཏི ¶ . བྷིཀྑཱུནཾ པཏྟེ བྷཏྟསདིསོཏི ཨིམིནཱ ཨུཔཱསཀེན སཏྠུ པརིཙྩཏྟབྷཱཝཾ ཏཏྠ སཏྠུནོ ཙ ཨཔརིསངྐཏཾ དསྶེཏི. སིཀྑཱཔདཝེལཱ ནཱམ ནཏྠཱིཏི དྷམྨསྶཱམིབྷཱཝཏོ སིཀྑཱཔདམརིཡཱདཱ ནཱམ ནཏྠི པཎྞཏྟིཝཛྫེ, པཀཏིཝཛྫེ པན སེཏུགྷཱཏོ ཨེཝ.

༢༩༡. ཚདནཊྛཱནེ ཡདཱཀཱསཾ, ཏདེཝ ཏསྶ གེཧསྶ ཚདནནྟི ཨཱཀཱསཙྪདནཾ. པཀཏིཡཱ ཨུཏུཕརཎམེཝཱཏི ཚཱདིཏེ ཡཱདིསཾ ཨུཏུ, ཚདནེ ཨུཏྟིཎབྷཱཝེཔི ཏམྷི གེཧེ ཏཱདིསམེཝ ཨུཏུཕརཎཾ ཨཧོསི. ཏེསཾཡེཝཱཏི ཏེསཾ གྷཊིཀཱརསྶ མཱཏཱཔིཏཱུནཾ ཨེཝ.

༢༩༢. ‘‘ཙཏསྶོ ¶ མུཊྛིཡོ ཨེཀོ ཀུཌུཝོ, ཙཏྟཱརོ ཀུཌུཝཱ ཨེཀོ པཏྠོ, ཙཏྟཱརོ པཏྠཱ ཨེཀོ ཨཱལ༹ྷཀོ, ཙཏྟཱརོ ཨཱལ༹ྷཀཱ ཨེཀཾ དོཎཾ, ཙཏྟཱརི དོཎཱནི ཨེཀཱ མཱནིཀཱ, ཙཏསྶོ མཱནིཀཱ ཨེཀཱ ཁཱརཱི, ཝཱིསཏི ཁཱརིཀཱ ཨེཀོ ཝཱཧོཏི ཏདེཝ ཨེཀསཀཊ’’ནྟི སུཏྟནིཔཱཏཊྛཀཐཱདཱིསུ (སུ. ནི. ཨཊྛ. ༢.༦༦༢) ཝུཏྟཾ, ཨིདྷ པན ‘‘དྭེ སཀཊཱནི ཨེཀོ ཝཱཧོ’’ཏི ཝུཏྟཾ. ཏེལཕཱཎིཏཱདིནྟི ཨཱདི-སདྡེན སཔྤིཨཱདིཾ མརིཙཱདིཀཊུཀབྷཎྜཉྩ སངྒཎྷཱཏི. ནཱཧཾ རཉྙཱ དིཊྛཔུབྦོ, ཀུཏོ པརིཔྥསྶོཏི ཨདྷིཔྤཱཡོ. ནཙྩིཏྭཱཏི ནཙྩཾ དཏྭཱ.

གྷཊིཀཱརསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༢. རཊྛཔཱལསུཏྟཝཎྞནཱ

༢༩༣. ཐཱུལམེཝ ¶ ཐུལླཾ, ཐུལླཱ ཝིཔུལཱ མཧནྟཱ ཀོཊྛཱ ཛཱཏཱ ཨིམསྶཱཏི ཐུལླཀོཊྛིཀནྟི ཨོདནཔཱུཔཔཧཱུཏཝསེན ལདྡྷནཱམོ ནིགམོ. ཨཊྛཀཐཱཡཾ པན ཐུལླཀོཊྛནྟི ཨཏྠོ ཝུཏྟོ. ཏེན པཱལི༹ཡཾ ཨིཀ-སདྡེན པདཝཌྜྷནཾ ཀཏནྟི དསྶེཏི.

༢༩༤. རཊྛཔཱལོཏི ཨིདཾ ཏསྶ ཀུལཔུཏྟསྶ ནཱམཾ. པཝེཎིཝསེན ཨཱགཏཀུལཝཾསཱནུགཏནྟི སམུདཱགམཏོ པཊྛཱཡ དསྶེཏུཾ ‘‘ཀསྨཱ རཊྛཔཱལོ’’ཏིཨཱདི ཝུཏྟཾ. སནྡྷཱརེཏུནྟི ཝིནཱསནཏོ པུབྦེ ཡཱདིསཾ, ཏཐེཝ སམྨདེཝ དྷཱརེཏུཾ སམཏྠོ. སདྡྷཱཏི ཀམྨཕལསདྡྷཱཡ སམྤནྣཱ. སཱམཎེརཾ དིསྭཱཏི སིཀྑཱཀཱམཏཱཡ ཨེཏདགྒེ ཋཔིཡམཱནཾ དིསྭཱ.

སཧ ¶ རཉྙཱཏི སརཱཛིཀཾ, རཉྙཱ སདྡྷིཾ རཱཛཔརིསཾ. ཙཱཏུཝཎྞནྟི བྲཱཧྨཎཱདིཙཏུཝཎྞསམུདཱཡཾ. པོསེཏུནྟི ཝདྡྷེཏུཾ དཱནཱདཱིཧི སངྒཧཝཏྠཱུཧི སངྒཎྷིཏུཾ. ཡཾ ཀུལཾ. པཧོསྶཏཱིཏི སཀྑིསྶཏི.

ཏེན ཏེན མེ ཨུཔཔརིཀྑཏོཏི ‘‘ཀཱམཱ ནཱམེཏེ ཨནིཙྩཱ དུཀྑཱ ཝིཔརིཎཱམདྷམྨཱ, ཨཊྛིཀངྐལཱུཔམཱ’’ཏི (མ. ནི. ༡.༢༣༤; པཱཙི. ༤༡༧; མཧཱནི. ༣, ༦) ཙ ཨཱདིནཱ ཡེན ཡེན ཨཱཀཱརེན ཀཱམེསུ ཨཱདཱིནཝཾ ཨོཀཱརཾ སཾཀིལེསཾ, ཏབྦིཔརིཡཱཡཏོ ནེཀྑམྨེ ཨཱནིསཾསཾ གུཎཾ པཀཱསེནྟཾ བྷགཝཏཱ དྷམྨཾ དེསིཏཾ ཨཱཛཱནཱམི, ཏེན ཏེན པཀཱརེན ཨུཔཔརིཀྑཏོ ཝཱིམཾསནྟསྶ མཡ྄ཧཾ ཨེཝཾ ཧོཏི ཨེཝཾ ཨུཔཊྛཱཏི. སིཀྑཏྟཡབྲཧྨཙརིཡནྟི ཨདྷིསཱིལཱདིསིཀྑཏྟཡསངྒཧཾ སེཊྛཙརིཡཾ. ཨཁཎྜཱདིབྷཱཝཱཔཱདནེན ཨཁཎྜཾ ལཀྑཎཝཙནཉྷེཏཾ. ཀཉྩིཔི སིཀྑེཀདེསཾ ཨསེསེཏྭཱ ཨེཀནྟེནེཝ པརིཔཱུརེཏབྦཏཱཡ ཨེཀནྟཔརིཔུཎྞཾ. ཙིཏྟུཔྤཱདམཏྟམྤི སཾཀིལེསམལཾ ཨནུཔྤཱདེཏྭཱ ཨཙྩནྟམེཝ ཝིསུདྡྷཾ ཀཏྭཱ པརིཧརིཏབྦཏཱཡ ཨེཀནྟཔརིསུདྡྷཾ. ཏཏོ ཨེཝ སངྑཾ ཝིཡ ལིཁིཏནྟི སངྑལིཁིཏཾ. ཏེནཱཧ ‘‘ལིཁིཏསངྑསདིས’’ནྟི. དཱཋིཀཱཔི མསྶུགྒཧཎེནེཝ གཧེཏྭཱ ‘‘མསྶུ’’ཏྭེཝ ཝུཏྟཾ, ཨུཏྟརཱདྷརམསྶུནྟི ཨཏྠོ. ཀསཱཡེན རཏྟཱནི ཀཱསཱཡཱནི. ཨནནུཉྙཱཏཾ པུཏྟཾ ན པབྦཱཛེཏི ‘‘མཱཏཱཔིཏཱུནཾ ལོཀིཡམཧཱཛནསྶ ཙིཏྟཉྙཐཏྟཾ མཱ ཧོཏཱུ’’ཏི. ཏཐཱ ཧི སུདྡྷོདནམཧཱརཱཛསྶ ཏཐཱ ཝརོ དིནྣོ.

༢༩༥. པིཡཱཡིཏབྦཏོ ¶ པིཡོཏི ཨཱཧ ‘‘པཱིཏིཛནཀོ’’ཏི. མནསྶ ཨཔྤཱཡནཏོ མནཱཔོཏི ཨཱཧ ‘‘མནཝཌྜྷནཀོ’’ཏི. སུཁེདྷིཏོ ཏརུཎདཱརཀཀཱལེ. ཏཏོ པརཉྩ སཔྤིཁཱིརཱདིསཱདུརསམནུཉྙབྷོཛནཱདིཨཱཧཱརསམྤཏྟིཡཱ སུཁཔརིབྷཏོ. ཨཐ ཝཱ དལ༹ྷབྷཏྟིཀདྷཱཏིཛནཱདིཔརིཛནསམྤཏྟིཡཱ ཙེཝ པརིཙྪདསམྤཏྟིཡཱ ཙ ཨུལཱ༹རཔཎཱིཏསུཁཔཙྩཡཱུཔཧཱརེཧི ཙ སུཁེདྷིཏོ, ཨཀིཙྪེནེཝ དུཀྑཔྤཙྩཡཝིནོདནེན སུཁཔརིབྷཏོ. ཨཛ྄ཛྷཏྟིཀངྒསམྤཏྟིཡཱ ཝཱ སུཁེདྷིཏོ, བཱཧིརངྒསམྤཏྟིཡཱ སུཁཔརིབྷཏོ. ཀསྶཙཱིཏི ཨུཔཡོགཏྠེ སཱམིཝཙནཾ, ཀིཉྩཱིཏི ཝུཏྟཾ ཧོཏི, ཨཡམེཝ ཝཱ པཱཋོ. ཏཐཱ ཧི ‘‘ཨཔྤམཏྟཀམྤི ཀལབྷཱགཾ དུཀྑསྶ ན ཛཱནཱསཱི’’ཏི ཨཏྠོ ཝུཏྟོ. ཨེཝཾ སནྟེཏི ནནུ མཡཾ རཊྛཔཱལ མརཎཱདཱིསུ ཀེནཙི ཨུཔཱཡེན ཨཔྤཏཱིཀཱརེན མརཎེནཔི ཏཡཱ ཨཀཱམཀཱཔི ¶ ཝིནཱ བྷཝིསྶཱམ, ཨེཝཾ སཏི. ཡེནཱཏི ཡེན ཀཱརཎེན. ཀིཾ པནཱཏི ཨེཏྠ ཀིནྟི ཀཱརཎཏྠེ པཙྩཏྟཝཙནནྟི དསྶེནྟོ ཨཱཧ ‘‘ཀེན པན ཀཱརཎེནཱ’’ཏི.

༢༩༦. པརིཙཱརེཧཱིཏི པརིཏོ ཏཏྠ ཏཏྠ ཡཐཱསཀཾ ཝིསཡེསུ ཙཱརེཧི. ཏེནཱཧ ‘‘ཨིཏོ ཙིཏོ ཙ ཨུཔནེཧཱི’’ཏི. པརིཙཱརེཧཱིཏི ཝཱ སུཁཱུཔཀརཎེཧི ཨཏྟཱནཾ པརིཙཱརེཧི, ཨཏྟནོ པརིཙརཎཾ ཀཱརེཧི. ཏཐཱབྷཱུཏོ ཙ ཡསྨཱ ལལ༹ནྟོ ཀཱིལ༹ནྟོ ནཱམ ཧོཏི, ཏསྨཱ ‘‘ལལཱ༹’’ཏིཨཱདི ཝུཏྟཾ. ནིཙྩདཱནཾ དཱནཾ ནཱམ, ཨུཔོསཐདིཝསཱདཱིསུ དཱཏབྦཾ ཨཏིརེཀདཱནཾ པདཱནཾ ནཱམ. པཝེཎཱིརཀྑཎཝསེན ཝཱ དཱིཡམཱནཾ དཱནཾ ནཱམ, ཨཏྟནཱཝ པཊྛཔེཏྭཱ དཱིཡམཱནཾ པདཱནཾ ནཱམ. པཙུརཛནསཱདྷཱརཎཾ ཝཱ ནཱཏིཨུལཱ༹རཾ དཱནཾ ནཱམ, ཨནཉྙསཱདྷཱརཎཾ ཨཏིཨུལཱ༹རཾ པདཱནཾ ནཱམ. ཨུདྡསྶེཏབྦཱཏི ཨུདྡྷཾ དསྶེཏབྦཱ. ཀུཏོ ཨུདྡྷཾ ཏེ དསྶེཏབྦཱ? པབྦཛིཏཏོ ཨུདྡྷཾ ཨཏྟཱནཾ མཱཏཱཔིཏརོ དསྶེཏབྦཱ, ཏེནཱཧ ‘‘ཡཐཱ’’ཏིཨཱདི.

༢༩༩. བལཾ གཧེཏྭཱཏི ཨེཏྠ བལགྒཧཎཾ ནཱམ ཀཱཡབལསྶ ཨུཔྤཱདནམེཝཱཏི ཨཱཧ ‘‘ཀཱཡབལཾ ཛནེཏྭཱ’’ཏི. ཨེཝཾ ཝིཧརནྟོཏི ཡཐཱ པཱལི༹ཡཾ ཝུཏྟཾ ཨེཝཾ ཨེཀོ ཝཱུཔཀཊྛོ ཨཔྤམཏྟོ ཝིཧརནྟོ. ཏསྨཱཏི ཡསྨཱ ནེཡྻོ, ན ཨུགྒྷཊིཏཉྙཱུ, ན ཙ ཝིཔཉྩིཏཉྙཱུ, ཏསྨཱ. ཙིརེན པབྦཛིཏོ དྭཱདསམེ ཝསྶེ ཨརཧཏྟཾ པཱཔུཎི. ཡཾ པན ཝུཏྟཾ པཱལི༹ཡཾ ‘‘ན ཙིརསྶེཝཱ’’ཏི, ཏཾ སཊྛི ཝསྶཱནི ཏཏོ ཨདྷིཀམྤི ཝིཔསྶནཱཔརིཝཱསཾ ཝསནྟེ ཨུཔཱདཱཡ ཝུཏྟཾ.

སཏྟདྭཱརཀོཊྛཀསྶཱཏི སཏྟགབྦྷནྟརདྭཱརཀོཊྛཀསཱིསེན གབྦྷནྟརཱནི ཝདཏི. པཧརཱཔེཏཱིཏི ཝཡོཝུཌྜྷཱནུརཱུཔཾ ཀཔྤཱཔནཱདིནཱ ཨལངྐཱརཱཔེཏི. ཨནྟོཛཱཏཏཱཡ ཉཱཏིསདིསཱི དཱསཱི ཉཱཏིདཱསཱི. པཱུཏིབྷཱཝེནེཝ ལཀྑིཏབྦོ དོསོ ཝཱ ཨབྷིདོསོ, སོཝ ཨཱབྷིདོསིཀོ, ཨབྷིདོསཾ ཝཱ པཙྩཱུསཀཱལཾ གཏོ པཏྟོ ཨཏིཀྐནྟོཏི ཨཱབྷིདོསིཀོ. ཏེནཱཧ ‘‘ཨེཀརཏྟཱཏིཀྐནྟསྶཱ’’ཏིཨཱདི ¶ . ཨཔརིབྷོགཱརཧོ པཱུཏིབྷཱུཏབྷཱཝེན. ཨརིཡཝོཧཱརེནཱཏི ཨརིཡསམུདཱཙཱརེན. ཨརིཡཱ ཧི མཱཏུགཱམཾ བྷགིནིཝཱདེན སམུདཱཙརནྟི. ནིསྶཊྛཔརིགྒཧནྟི པརིཙྩཏྟཱལཡཾ. ཝཏྟུཾ ཝཊྚཏཱིཏི ནིརཔེཀྑབྷཱཝཏོ ཝུཏྟཾ, ཨིདྷ པན ཝིསེསཏོ ཨཔརིབྷོགཱརཧཏྟཱཝ ཝཏྠུནོ. ནིམཱིཡཏི སཉྙཱཡཏཱིཏི ནིམིཏྟཾ, ཏཐཱསལླཀྑིཏོ ཨཱཀཱརོཏི ཨཱཧ ‘‘ཨཱཀཱརཾ ཨགྒཧེསཱི’’ཏི.

༣༠༠. གྷརཾ ¶ པཝིསིཏྭཱཏི གེཧསཱམིནིཡཱ ནིསཱིདིཏབྦཊྛཱནབྷཱུཏཾ ཨནྟོགེཧཾ པཝིསིཏྭཱ. ཨཱལཔནེཏི དཱསིཛནསྶ ཨཱལཔནེ. བཧི ནིཀྑམནྟཱཏི ཡཐཱཝུཏྟཨནྟོགེཧཏོ བཧི ནིཀྑམནྟིཡོ. གྷརེསུ སཱལཱ ཧོནྟཱིཏི གྷརེསུ ཨེཀམནྟེ བྷོཛནསཱལཱ ཧོནྟི པཱཀཱརཔརིཀྑིཏྟཱ སུསཾཝིཧིཏདྭཱརབནྡྷཱ སུསམྨཊྛཝཱལིཀངྒཎཱ.

ཨནོཀཔྤནཾ ཨསདྡཧནཾ. ཨམརིསནཾ ཨསཧནཾ. ཨནཱགཏཝཙནཾ ཨནཱགཏསདྡཔྤཡོགོ, ཨཏྠོ པན ཝཏྟམཱནཀཱལིཀོཝ. ཏེནཱཧ ‘‘པཙྩཀྑམྤཱི’’ཏི. ཨརིཡིདྡྷིཡནྟི ‘‘པཊིཀཱུལེ ཨཔཊིཀཱུལསཉྙཱི ཝིཧརཏཱི’’ཏི (ཨ. ནི. ༥.༡༤༤) ཨེཝཾ ཝུཏྟཨརིཡིདྡྷིཡཾ.

པཱུཏིཀུམྨཱསོ ཚཌྜནཱིཡདྷམྨོ ཏསྶ གེཧཏོ ལདྡྷོཔི ན དཱཏབྦཡུཏྟཀོ དཱསིཛནེན དིནྣོཏི ཨཱཧ ‘‘དེཡྻདྷམྨཝསེན ནེཝ དཱནཾ ཨལཏྠམྷཱ’’ཏི. ‘‘ཨིམེཧི མུཎྜཀེཧཱི’’ཏིཨཱདིནཱ ནིཏྠུནནཝཙནེན པཙྩཀྑཱནཾ ཨཏྠཏོ ལདྡྷམེཝ, ཏསྶ པན ཨུཛུཀཕཱསུསམཱཙཱརཝསེན ཨལདྡྷཏྟཱ ཝུཏྟཾ ‘‘ན པཙྩཀྑཱན’’ནྟི. ཏེནཱཧ – ‘‘པཊིསནྠཱརཝསེན པཙྩཀྑཱནམྤི ན ཨལཏྠམྷཱ’’ཏི. ‘‘ནེཝ དཱན’’ནྟིཨཱདི པཙྩཱསཱིསཱཡ ཨཀྑནྟིཡཱ ཙ ཝུཏྟཾ ཝིཡ པཙུརཛནོ མཉྙེཡྻཱཏི ཏནྣིཝཏྟནཏྠཾ ཨདྷིཔྤཱཡམསྶ ཝིཝརིཏུཾ ‘‘ཀསྨཱ པནཱ’’ཏིཨཱདི ཝུཏྟཾ. སུཏྟིཀཱཔཊིཙྪནྣནྟི སིཔྤིཀཱཚདཱཧི ཚནྣཾ.

ཨུཀྐཊྛཨེཀཱསནིཀཏཱཡཱཏི ཨིདཾ བྷཱུཏཀཐནམཏྟཾ ཐེརསྶ ཏཐཱབྷཱཝདཱིཔནཏོ. མུདུཀསྶཔི ཧི ཨེཀཱསནིཀསྶ ཡཱཡ ནིསཛྫཱཡ ཀིཉྩིམཏྟཾ བྷོཛནཾ བྷུཏྟཾ, ཝཏྟསཱིསེནཔི ཏཏོ ཝུཊྛིཏསྶ པུན བྷུཉྫིཏུཾ ན ཝཊྚཏི. ཏེནཱཧ ཏིཔིཊཀཙཱུལཱ༹བྷཡཏྠེརོ ‘‘ཨཱསནཾ ཝཱ རཀྑེཡྻ བྷོཛནཾ ཝཱ’’ཏི. ཨུཀྐཊྛསཔདཱནཙཱརིཀོཏི པུརཏོ པཙྪཏོ ཙ ཨཱཧཊབྷིཀྑམྤི ཨགྒཧེཏྭཱ བཧིདྭཱརེ ཋཏྭཱ པཏྟཝིསྶཛྫནམེཝ ཀརོཏི. ཨེཏེནེཝ ཐེརསྶ ཨུཀྐཊྛཔིཎྜཔཱཏིཀབྷཱཝོ དཱིཔིཏོ. ཏེནཱཧ – ‘‘སྭཱཏནཱཡ བྷིཀྑཾ ནཱམ ནཱདྷིཝཱསེཏཱི’’ཏི. ཨཐ ཀསྨཱ ཨདྷིཝཱསེསཱིཏི ཨཱཧ ‘‘མཱཏུ ཨནུགྒཧེནཱ’’ཏིཨཱདི ¶ . པཎྜིཏཱ ཧི མཱཏཱཔིཏཱུནཾ ཨཱཙརིཡུཔཛ྄ཛྷཱཡཱནཾ ཝཱ ཀཱཏབྦཾ ཨནུགྒཧཾ ཨཛ྄ཛྷུཔེཀྑིཏྭཱ དྷུཏངྒསུདྡྷིཀཱ ན བྷཝནྟི.

༣༠༡. པཡུཏྟནྟི ཝདྡྷིཝསེན པཡོཛིཏཾ, ཏདྡྷིཏལོཔཾ ཀཏྭཱ ཝུཏྟནྟི ཝེདིཏབྦཾ ཡཐཱ ཨཉྙཏྠཱཔི ‘‘པིཏཱམཧཾ དྷནཾ ལདྡྷཱ, སུཁཾ ཛཱིཝཏི སཉྩཡོ’’ཏི ¶ . ཛེཊྛཀིཏྠིཡོཏི པདྷཱནིཏྠིཡོ. ཨིཏོཏི ཨིམསྨིཾ ཀུལེ ཨནུབྷཝིཏབྦཝིབྷཝསམྤཏྟིཏོ. ཨཉྙཏོཏི ཨིམསྶ དིནྣཏྟཱ ཨཉྙསྨིཾ ཀུལེ ཨནུབྷཝིཏབྦསམྤཏྟིཏོ.

༣༠༢. ཙིཏྟཝིཙིཏྟནྟི ཀཔྤནཱཡ ཙེཝ ཨརཧརཱུཔེན ཨལངྐཱརཱདིནཱ ཙ ཙིཏྟིཏཉྩེཝ ཝིཙིཏྟིཏཉྩ. ཝཎཀཱཡནྟི ཝཎབྷཱུཏཾ ཀཱཡཾ. སམནྟཏོ ཨུསྶིཏནྟི ཧེཊྛིམཀཱཡཝསེན ཧེཊྛཱ ཨུཔརི ཙ སནྣིསྶིཏཾ. ནིཙྩཱཏུརནྟི ཨབྷིཎྷཔྤཊིཔཱིལི༹ཏཾ, སདཱ དུཀྑིཏཾ ཝཱ. བཧུསངྐཔྤནྟི རཱགཝཏྠུབྷཱཝེན ཨབྷིཛནེཧི ཧཱཝབྷཱཝཝིལཱསཝསེན, ཨཱམིསཝསེན ཙ སོཎསིངྒཱལཱདཱིཧི བཧཱུཧི སངྐཔྤེཏབྦཾ. ཋིཏཱིཏི ཨཝཊྛཱནཾ ཨཝིཔརིཎཱམོ ནཏྠི. ཏེནཱཧ – ‘‘བྷིཛྫནདྷམྨཏཱཝ ནིཡཏཱ’’ཏི, པརིསྶཝབྷཱཝཱཔཏྟི ཙེཝ ཝིནཱསཔཏྟི ཙ ཨེཀནྟིཀཱཏི ཨཏྠོ.

ཙིཏྟཀཏམྤཱིཏི གནྡྷཱདཱིཧི ཙིཏྟཀཏམྤི. རཱུཔནྟི སརཱིརཾ.

ཨལཏྟཀཀཏཱཏི པིཎྜིཨལཏྟཀེན སུཝཎྞཀཏཱ. ཏེནཱཧ ‘‘ཨལཏྟཀེན རཉྫིཏཱ’’ཏི. ཙུཎྞཀམཀྑིཏནྟི དོསནཱིཧརཎེཧི ཏཱཔདཧནཱདཱིཧི ཀཏཱབྷིསངྑཱརམུཁཾ གོརོཙནཱདཱིཧི ཨོབྷཱསནཀཙུཎྞེཧི མཀྑིཏཾ, ཏེནཱཧ ‘‘སཱསཔཀཀྐེནཱ’’ཏིཨཱདི.

རསོདཀེནཱཏི སརལནིཡྻཱསརསམིསྶེན ཨུདཀེན. ཨཱཝཏྟནཔརིཝཏྟེ ཀཏྭཱཏི ཨཱཝཏྟནཔརིཝཏྟནཝསེན ནཏེ ཀཏྭཱ. ཨཊྛཔདཀརཙནཱཡཱཏི བྷིཏྟིཀཱུཊདྡྷཙནྡཱདིཝིབྷཱགཱཡ ཨཊྛཔདཀརཙནཱཡ.

ཝིརཝམཱནེཏི ‘‘ཨཡཾ པལཱཡཏི, གཎྷ གཎྷཱ’’ཏི ཝིརཝམཱནེ. ཧིརཉྙསུཝཎྞཨོརོདྷེཏི ཝཏྟབྦཾ.

༣༠༣. ཨུསྶིཏཱཡ ཨུསྶིཏཱཡཱཏི ཀུལཝིབྷཝབཱཧུསཙྩཔཉྙཱསམྤཏྟིཡཱ ཨུགྒཏཱཡ ཨུགྒཏཱཡ. ཨབྷིལཀྑིཏོ ཨུལཱ༹རབྷཱཝེན.

༣༠༤. པརིཛུཉྙཱནཱིཏི ¶ པརིཧཱནཱནི. ཡེ བྱཱདྷིནཱ ཨབྷིབྷཱུཏཱ སཏྟཱ ཛིཎྞཀཔྤཱ ཝཡོཧཱནིསཏྟཱ ཝིཡ ཧོནྟི, ཏཏོ ནིཝཏྟེནྟོ ‘‘ཛརཱཛིཎྞོ’’ཏི ཨཱཧ. ཝཡོཝུཌྜྷོ, ན སཱིལཱདིཝུཌྜྷོ. མཧཏྟཾ ལཱཏི གཎྷཱཏཱིཏི མཧལླཀོ, ཛཱཏིཡཱ མཧལླཀོ, ན ཝིབྷཝཱདིནཱཏི ཛཱཏིམཧལླཀོ ¶ . དྭཏྟིརཱཛཔརིཝཏྟསངྑཱཏཾ ཨདྡྷཱནཾ ཀཱལཾ གཏོ ཝཱིཏིཝཏྟོཏི ཨདྡྷགཏོ. ཏཐཱ ཙ པཋམཝཡཾ མཛ྄ཛྷིམཝཡཉྩ ཨཏཱིཏོ ཧོཏཱིཏི ཨཱཧ ‘‘ཨདྡྷཱནཾ ཨཏིཀྐནྟོ’’ཏི. ཛིཎྞཱདིཔདེཧི པཋམཝཡམཛ྄ཛྷིམཝཡསྶ བོདྷིཏཏྟཱ ཨནུཔྤཏྟཏཱཝིསིཊྛོ ཝཡ-སདྡོ ཨོསཱནཝཡཝིསཡོཏི ཨཱཧ ‘‘པཙྪིམཝཡཾ ཨནུཔྤཏྟོ’’ཏི.

‘‘ཨཔྤིཙྪོ, ཨཔྤཌཾསམཀསཝཱཏཱཏཔསརཱིསཔསམྥསྶོ’’ཏི (ཨ. ནི. ༡༠.༡༡) ཨེཝམཱདཱིསུ ཝིཡ ཨཔྤ-སདྡོ ཨབྷཱཝཏྠོཏི ཨདྷིཔྤཱཡེནཱཧ ‘‘ཨཔྤཱབཱདྷོཏི ཨརོགོ, ཨཔྤཱཏངྐོཏི ནིདྡུཀྑོ’’ཏི. ཨཔྤཏྠོ ཝཱ ཨིདྷ, ཏཏྠཱཔི ཨཔྤ-སདྡོ དཊྛབྦོ. ཨེཝཉྷི ‘‘ཡོ ཧི, གཧཔཏི, ཨིམཾ པཱུཏིཀཱཡཾ པརིཧརནྟོ མུཧུཏྟམྤི ཨཱརོགྱཾ པཊིཛཱནེཡྻ ཀིམཉྙཏྲ བཱལྱཱ’’ཏི (སཾ. ནི. ༣.༡) སུཏྟཔདཾ སམཏྠིཏཾ ཧོཏི. ཝིཔཙྩནཾ ཝིཔཱཀོ, སོ ཨེཝ ཝེཔཱཀོ. སམོ ཝེཔཱཀོ ཨེཏིསྶཱ ཨཏྠཱིཏི སམཝེཔཱཀིནཱི, ཏཱཡ. ཏེནེཝ སམཝེཔཱཀིནིབྷཱཝེན སབྦམྤི སམྨདེཝ གཎྷཱཏི དྷཱརེཏཱིཏི གཧཎཱི. གཧཎིསམྤཏྟིཡཱ ཧི ཡཐཱབྷུཏྟཨཱཧཱརོ སམྨདེཝ ཛཱིརནྟོ སརཱིརེ ཏིཊྛཏི, ནོ ཨཉྙཐཱ བྷུཏྟབྷུཏྟོ ཨཱཧཱརོ ཛཱིརཏི གཧཎིཡཱ ཏིཀྑབྷཱཝེན. ཏཐེཝ ཏིཊྛཏཱིཏི བྷུཏྟཱཀཱརེནེཝ ཏིཊྛཏི གཧཎིཡཱ མནྡབྷཱཝཏོ. བྷཏྟཙྪནྡོ ཨུཔྤཛྫཏེཝ བྷུཏྟཨཱཧཱརསྶ སམྨཱ པརིཎཱམཾ གཏཏྟཱ. ཏེནེཝཱཏི སམཝེཔཱཀིནིབྷཱཝེནེཝ. པཏྟཱནཾ བྷོགཱནཾ པརིཀྑིཡམཱནཾ ན སཧསཱ ཨེཀཛ྄ཛྷཾཡེཝ པརིཀྑཡཾ གཙྪནྟི, ཨཐ ཁོ ཨནུཀྐམེན, ཏཐཱ ཉཱཏཡོཔཱིཏི ཨཱཧ ‘‘ཨནུཔུབྦེནཱ’’ཏི. ཚཱཏཀབྷཡཱདིནཱཏི ཨཱདི-སདྡེན བྱཱདྷིབྷཡཱདིཾ སངྒཎྷཱཏི.

༣༠༥. ཨུདྡེསསཱིསེན ནིདྡེསོ གཧིཏོཏི ཨཱཧ ‘‘དྷམྨནིདྡེསཱ ཨུདྡིཊྛཱ’’ཏི. ཡསྨཱ ཝཱ ཡེ དྷམྨཱ ཨུདྡིསིཏབྦཊྛེན ‘‘ཨུདྡེསཱ’’ཏི ཝུཙྩནྟི. ཏེཝ དྷམྨཱ ནིདྡིསིཏབྦཊྛེན ནིདྡེསཱཏི ‘‘དྷམྨནིདྡེསཱ ཨུདྡིཊྛཱ’’ཏི ཨཏྠོ ཝུཏྟོ. ཨཐ ཝཱ ཡེ དྷམྨཱ ཨནིཙྩཏཱདིཝིབྷཱཝནཝསེན ཨུདྡྷཾ ཨུདྡྷཾ དེསེསྶནྟི, ཏེ དྷམྨཱ ཏཐེཝ ནིསྶེསཏོ དེསེསྶནྟཱིཏི ཨེཝཾ ཨུདྡེསནིདྡེསཔདཱནཾ ཨནཏྠནྟརཏཱ ཝེདིཏབྦཱ. ཏཏྠཱཏི ཛརཱམརཎསནྟིཀེ. ཨདྡྷུཝོཏི ནིདྡྷུཝོ ན ཐིརོ, ཨནིཙྩོཏི ཨཏྠོ. ཏེནཱཧ ‘‘དྷུཝཊྛཱནཝིརཧིཏོ’’ཏི, ཨཛཱཏཱབྷཱུཏཱསངྑཏདྷུཝབྷཱཝཀཱརཎཝིཝིཏྟོཏི ཨཏྠོ. ཨུཔནཱིཡྻཏཱིཏི ཝཱ ¶ ཛརཱམརཎེན ལོཀོ སམྨཱ ནཱིཡཏི, ཏསྨཱ ཨདྡྷུཝོཏི ཨེཝམེཏྠ ཨཏྠོ དཊྛབྦོ. ཏཱཡིཏུནྟི ཛཱཏིཨཱདིབྱསནཏོ རཀྑིཏུཾ སམཏྠེན ཨིསྶརེན ཨཏྟནཱ ཝིརཧིཏོཏི. ‘‘ཨིམཾ ལོཀཾ ཨིཏོ ཝཊྚདུཀྑཏོ མོཙེསྶཱམི, ཛརཱབྱཱདྷིམརཎཱནཾ ཏཾ ཨདྷིབྷཝིཏུཾ ན དསྶཱམཱི’’ཏི ཨེཝཾ ཨབྷིསརཏཱིཏི ¶ ཨབྷིསྶརཎཾ, ལོཀསྶ སུཁསྶ དཱཏཱ ཧིཏསྶ ཝིདྷཱཏཱ ཀོཙི ཨིསྶརོ, ཏདབྷཱཝཏོ ཨཱཧ ‘‘ཨནབྷིསྶརོཏི ཨསརཎོ’’ཏི. ནིསྶཀོ མམཱཡིཏབྦཝཏྠུཨབྷཱཝཏོ, ཏེནཱཧ ‘‘སཀབྷཎྜཝིརཧིཏོ’’ཏིཨཱདི. ཏཎྷཱཡ ཝསེ ཛཱཏོ ཏཎྷཱཡ ཝིཛིཏོཏི ཀཏྭཱ ‘‘ཏཎྷཱཡ དཱསོ’’ཏི ཝུཏྟཾ.

༣༠༦. ཧཏྠིཝིསཡཏྟཱ ཧཏྠིསནྣིསྶིཏཏྟཱ ཝཱ ཧཏྠིསིཔྤཾ ‘‘ཧཏྠཱི’’ཏི གཧིཏནྟི ཨཱཧ – ‘‘ཧཏྠིསྨིནྟི ཧཏྠིསིཔྤེ’’ཏི, སེསཔདེསུཔི ཨེསེཝ ནཡོ. སཱཏིསཡཾ ཨཱུརུབལཾ ཨེཏསྶ ཨཏྠཱིཏི ཨཱུརུབལཱིཏི ཨཱཧ – ‘‘ཨཱུརུབལསམྤནྣོ’’ཏི, ཏམེཝཏྠཾ པཱཀཊཾ ཀཏྭཱ དསྶེཏུཾ ‘‘ཡསྶ ཧཱི’’ཏིཨཱདི ཝུཏྟཾ. ཨབྷིནྣཾ པརསེནཾ བྷིནྡཏོ བྷིནྣཾ སཀསེནཾ སནྡྷཱརཡཏོ ཨུཔཏྠམྦྷཡཏོ. བཱཧུབལཱིཏི ཨེཏྠཱཔི ‘‘ཡསྶ ཧི ཕལཀཉྩ ཨཱཝུདྷཉྩ གཧེཏྭཱ’’ཏིཨཱདིནཱ ཨཏྠོ ཝཏྟབྦོ, ཨིདྷ པན པརཧཏྠགཏཾ རཛྫཾ ཨཱཧརིཏུཾ བཱཧུབལནྟི ཡོཛནཱ. ཡཐཱ ཧི ‘‘ཨཱུརུབལཱི’’ཏི ཨེཏྠཱཔི བཱཧུབལཾ ཨནཱམསིཏྭཱ ཨཏྠོ, ཨེཝཾ ‘‘བཱཧུབལཱི’’ཏི ཨེཏྠ ཨཱུརུབལཾ ཨནཱམསིཏྭཱ ཨཏྠོ ཝེདིཏབྦོ, ཨཱཧིཏོ ཨཧཾམཱནོ ཨེཏྠཱཏི ཨཏྟཱ, ཨཏྟབྷཱཝོ. ཨལཾ སམཏྠོ ཨཏྟཱ ཨེཏསྶཱཏི ཨལམཏྠོཏི ཨཱཧ ‘‘སམཏྠཨཏྟབྷཱཝོ’’ཏི.

པརིཡོདྷཱཡཱཏི ཝཱ པརིཏོ ཨཱརཀྑཾ ཨོདཧིཏྭཱ. ‘‘སཾཝིཛྫནྟེ ཁོ, བྷོ རཊྛཔཱལ, ཨིམསྨིཾ རཱཛཀུལེ ཧཏྠིཀཱཡཱཔི…པེ… ཝཏྟིསྶནྟཱི’’ཏི ཨིདམྤི སོ རཱཛཱ ཨུཔརི དྷམྨུདྡེསསྶ ཀཱརཎཾ ཨཱཧརནྟོ ཨཱཧ.

ཝུཏྟསྶེཝ ཨནུ པཙྪཱ གཱཡནཝསེན ཀཐནཾ ཨནུགཱིཏི. ཏཱ པན གཱཐཱ དྷམྨུདྡེསཱནཾ དེསནཱནུཔུབྦིཾ ཨནཱདིཡིཏྭཱཔི ཡཐཱརཧཾ སངྒཎྷནཝསེན ཨནུགཱིཏཱཏི ཨཱཧ ‘‘ཙཏུནྣཾ དྷམྨུདྡེསཱནཾ ཨནུགཱིཏི’’ནྟི.

༣༠༧. ཨེཀནྟི ཨེཀཛཱཏིཡཾ. ཝཏྠུཀཱམཀིལེསཀཱམཱ ཝིསཡབྷེདེན བྷིནྡིཏྭཱ ཏཐཱ ཝུཏྟཱཏི དཊྛབྦོ.

སཱགརནྟེནཱཏི ¶ སཱགརཔརིཡནྟེན.

ཨཧོ ཝཏཱཏི སོཙནེ ནིཔཱཏོ, ‘‘ཨཧོ ཝཏ པཱཔཾ ཀཏཾ མཡཱ’’ཏིཨཱདཱིསུ ཝིཡ. ཨམརཱཏིཨཱདཱིསུ ¶ ཨཱཧཱུཏི ཀཐེནྟི. མཏཾ ཨུདྡིསྶ ‘‘ཨམྷ’’ནྟི ཝཏྟབྦེ སོཀཝསེན ‘‘ཨམར’’ནྟི ཝུཙྩཏི.

ཝོསཱནནྟི ནིཊྛཾ, པརིཡོསཱནནྟི ཨཏྠོ. སཱཝཱཏི པཉྙཱ ཨེཝ. དྷནཏོཏི སབྦདྷནཏོ. ཨུཏྟམཏརཱ སེཊྛཱ, ཏེནེཝཱཧ ‘‘པཉྙཱཛཱིཝིཾ ཛཱིཝིཏམཱཧུ སེཊྛ’’ནྟི (སཾ. ནི. ༡.༢༤༦; སུ. ནི. ༡༨༤).

ཏེསུ པཱཔཾ ཀརོནྟེསུ སཏྟེསུ, ནིདྡྷཱརཎེ ཙེཏཾ བྷུམྨཝཙནཾ. པརམྤརཱཡཱཏི ཨཏྟབྷཱཝཔརམྤརཱཡ. སཾསཱརཾ ཨཱཔཛྫིཏྭཱཏི བྷཝཱདཱིསུ སཾསཱརསྶ ཨཱཔཛྫནཧེཏུཾ ཨཱཔཛྫནྟོ པརལོཀཾ ཨུཔེཏི, པརལོཀཾ ཨུཔེནྟོཝ བཧུཝིདྷདུཀྑསངྑཱཏཾ གབྦྷཉྩ ཨུཔེཏི. ཏཱདིསསྶཱཏི ཏཐཱརཱུཔསྶ གབྦྷཝཱསདུཀྑཱདཱིནཾ ཨདྷིཊྛཱནབྷཱུཏསྶ ཨཔྤཔཉྙསྶ ཨཉྙོ ཨཔྤཔཉྙོ ཙ ཨབྷིསདྡཧནྟོ ཧིཏསུཁཱཝཧནྟི པཏྟིཡཱཡནྟོ.

‘‘པཱཔདྷམྨོ’’ཏི ཝུཏྟཏྟཱ ཏཱདིསསྶ པརལོཀོ ནཱམ དུགྒཏི ཨེཝཱཏི ཨཱཧ ‘‘པརམྷི ཨཔཱཡལོཀེ’’ཏི.

ཝིཝིདྷརཱུཔེནཱཏི རཱུཔསདྡཱདིཝསེན ཏཏྠཔི པཎཱིཏཏརཱདིཝསེན བཧུཝིདྷརཱུཔེན.

སཱམཉྙམེཝཱཏི སམཎབྷཱཝོ ཨེཝ སེཡྻོ. ཨེཏྠ ཙ ཨཱདིཏོ དྭཱིཧི གཱཐཱཧི ཙཏུཏྠོ དྷམྨུདྡེསོ ཨནུགཱིཏོ. ཙཏུཏྠགཱཐཱཡ ཏཏིཡོ. པཉྩམགཱཐཱཡ དུཏིཡོ. ཚཊྛགཱཐཱཡ དུཏིཡཏཏིཡཱ. སཏྟམགཱཐཱཡ པཋམོ དྷམྨུདྡེསོ ཨནུགཱིཏོ, ཨཊྛམཱདཱིཧི པཝཏྟིནིཝཏྟཱིསུ ཀཱམེསུ ནེཀྑམྨེ ཙ ཡཐཱརཧཾ ཨཱདཱིནཝཱནིསཾསཾ ཝིབྷཱཝེཏྭཱ ཨཏྟནོ པབྦཛྫཀཱརཎཾ པརམཏོ དསྶེནྟོ ཡཐཱཝུཏྟདྷམྨུདྡེསཾ ནིགམེཏི, ཏེན ཝུཏྟཾ ‘‘ཏཱ པན གཱཐཱ དྷམྨུདྡེསཱནཾ དེསནཱནུཔུབྦིཾ ཨནཱདིཡིཏྭཱཔི ཡཐཱརཧཾ སངྒཎྷནཝསེན ཨནུགཱིཏཱ’’ཏི. སེསཾ སུཝིཉྙེཡྻམེཝ.

རཊྛཔཱལསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༣. མགྷདེཝསུཏྟཝཎྞནཱ

༣༠༨. པུབྦེ ¶ ¶ མགྷདེཝོ ནཱམ རཱཛཱཏི ཨཏཱིཏཀཱལེ ཨིམསྨིཾཡེཝ ཀཔྤེ ཨནེཀཝསྶསཧསྶཱཡུཀེསུ མནུསྶེསུ པཊིཔཱཊིཡཱ ཨུཔྤནྣཱནཾ ཙཏུརཱསཱིཏིསཧསྶཱནཾ ཙཀྐཝཏྟིརཱཛཱུནཾ ཨཱདིཔུརིསོ མགྷདེཝོཏི ཨེཝཾནཱམོ རཱཛཱ.

དྷམྨོཏི རཱཛདྷམྨོཏི ལོཀིཀཱ ཝདནྟི. མཧཱབོདྷིནིདྷཱནཔཱརམིཏཱསངྑཱཏོ པན དྷམྨོ ཨཏྠཱིཏི དྷམྨིཀོ. དྷམྨེནཱཏི ཉཱཡེན. ཏདཱ བྲཧྨཝིཧཱརཱདིབྷཱཝནཱདྷམྨསྶ རཉྙོ ཨནདྷིགཏཏྟཱ ཏསྶཔི ཝཱ ཨནབྷིཛ྄ཛྷཱདཱིཧི སམཱནཡོགཀྑམཏྟཱ ཝུཏྟཾ ‘‘དསཀུསལཀམྨཔཐེ ཋིཏོ’’ཏི. དྷམྨནྟི དྷམྨཏོ ཨནཔེཏཾ. ཏཐཱ ཧི ཙ སོ པཀྑཔཱཏཱབྷཱཝཏོ ‘‘སམོ’’ཏི ཝུཙྩཏཱིཏི ཨཱཧ ‘‘སམཾ ཙརཏཱི’’ཏི. པཀཏིནིཡཱམེནེཝཱཏི པཝེཎིཡཱ ཨཱགཏནིཡཱམེནེཝ. ཡསྨཱ ནིགམཛནཔདེསུ ཡེབྷུཡྻེན གཧཔཏཱིནཾ སངྒཧོ, ཏསྨཱ ཨཊྛཀཐཱཡཾ ‘‘གཧཔཏིཀཱན’’ནྟྭེཝ ཝུཏྟཾ. པཱལི༹ཡཾ པན ཨཉྙམེཝ ནཱགརཙཱརིཏྟཾ, ཨཉྙཾ ནེགམཛནཔདཙཱརིཏྟནྟི ཏེ ཝིསུཾ གཧིཏཱ ‘‘ནེགམེསུ ཙེཝ ཛནཔདེསུ ཙཱ’’ཏི. པཙྩུགྒམནནིགྒམནཝསེན ཨུཔོསཐསྶ པཊིཧརཎཾ པཱཊིཧཱརིཡོ, སོ ཨེཝ པཱཊིཧཱརིཀོ, པཀྑོ. ཨིམེ དིཝསཱཏི ཨིམེ ཙཏྟཱརོ དིཝསཱ.

༣༠༩. དེཝོཏི མཙྩུ ཨབྷིབྷཝནཊྛེན. ཡཐཱ ཧི དེཝོ པཀཏིསཏྟེ ཨབྷིབྷཝཏི, ཨེཝཾ མཙྩུ སཏྟེ ཨབྷིབྷཝཏི. ‘‘ཨཧཾ ཨསུཀཾ མདྡིཏུཾ ཨཱགམིསྶཱམི, ཏྭཾ ཏསྶ ཀེསེ གཧེཏྭཱ མཱ ཝིསྶཛྫེཧཱི’’ཏི མཙྩུདེཝསྶ ཨཱཎཱཀརཱ དཱུཏཱ ཝིཡཱཏི དཱུཏཱཏི ཝུཙྩནྟི. ཨལངྐཏཔཊིཡཏྟཱཡཱཏི ཨིདཾ ཨཏྟནོ དིབྦཱནུབྷཱཝཾ ཨཱཝིཀཏྭཱ ཋིཏཱཡཱཏི དསྶེཏུཾ ཝུཏྟཾ. དེཝཏཱབྱཱཀརཎསདིསམེཝ ཧོཏི ན ཙིརེནེཝ མརཎསམྦྷཝཏོ. ཝིསུདྡྷིདེཝཱནནྟི ཁཱིཎཱསཝབྲཧྨཱནཾ. ཏེ ཧི ཙརིམབྷཝེ བོདྷིསཏྟཱནཾ ཛིཎྞཱདིཀེ དསྶེནྟི.

དུཁིཏཉྩ བྱཱདྷིཏནྟི བྱཱདྷིབྷཱཝེན སཉྫཱཏདུཀྑནྟི ཨཏྠོ. ཨནྟིམབྷཝིཀབོདྷིསཏྟཱནཾ ཝིསུདྡྷིདེཝེཧི ཨུཔཊྛཱཔིཏབྷཱཝཾ ཨུཔཱདཱཡ ཏདཉྙེསཾ ཏེཧི ཨནུཔཊྛཱཔིཏཱནམྤི པཎྜིཏཱནཾ ཏཐཱ ཝོཧརིཏབྦཏཱ པརིཡཱཡསིདྡྷཱཏི ཨཱཧ ‘‘ཨིམིནཱ པརིཡཱཡེནཱ’’ཏི.

དིསམྤཏཱིཏི ¶ ཝིབྷཏྟིཨལོཔེན ནིདྡེསོ, དིསཱསཱིསེན དེསཱ ཝུཏྟཱཏི དེསཱནཾ ཨདྷིཔཏིརཱཛཱཏི ¶ ཨཏྠོ. ཨུཏྟམངྒེ སིརསི རུཧནྟཱིཏི ཨུཏྟམངྒརུཧཱ, ཀེསཱ. ཏེ པནེཏྠ ཡསྨཱ པལིཏཏྟཱ ཨཝིསེསཏོ སབྦཔཙྪིམཝཡསནྡསྶཀཱ ཧོནྟི, ཏསྨཱ ‘‘ཝཡོཧརཱ’’ཏི ཝུཏྟཱ.

པུརིསཡུགོ ཡསྨཱ ཏསྨིཾ ཝཾསེ སཉྫཱཏཔུརིསཊྛིཏིཡཱ པརིཙྪིནྣོ, ཏསྨཱ ཨཱཧ ‘‘ཝཾསསམྦྷཝེ པུརིསེ’’ཏི. རཱཛགེཧཏོ ཨཱཧཊབྷིཀྑཱཡ ཡཱཔེནྟོཏི ཨིམིནཱ ཀུམཱརཀཔབྦཛྫཱཡ ཨུཔགཏབྷཱཝཾ དསྶེཏི.

པརིཧརིཡམཱནོཝཱཏི ཨཉྙེན ཨཉྙེན པརིཧརིཡམཱནོ ཝིཡ ཝེལཱཡ ཝེལཱཡ ཏེན མཧཏཱ པརིཛནེན ཨུཔཊྛིཡམཱནོ ཀུམཱརཀཱིལ༹ཾ ཀཱིལཱི༹ཏི ཨཏྠོ. ཀེཙི པན ‘‘པརིཧརིཡམཱནོ ཨེཝཱ’’ཏི ཨཝདྷཱརཎཝསེན ཨཏྠཾ ཝདནྟི, ཏཐཱ སཏི ཙཏུརཱསཱིཏིཝསྶསཧསྶཱནི ཐཉྙཔཱཡཱི ཏརུཎདཱརཀོ ཨཧོསཱིཏི ཨཱཔཛྫཏཱིཏི ཏདཡུཏྟཾ. ཀུམཱརཀཱལཾ ཝཏྭཱ ཏདནནྟརཾ ཨོཔརཛྫཝཙནཏོ ཝིརུདྡྷཉྩེཏཾ. (པཉྩམངྒལཝཙནེན ཨུནྣངྒལམངྒལཨུཀྐནྟནམངྒལཀམྨཧཱཡམངྒལདུསྶམངྒལཱནི སམུཔགཏཱནི ཨེཝ ཨཧེསུནྟི དཊྛབྦཾ).

༣༡༡. སཝཾསཝསེན ཨཱགཏཱ པུཏྟནཏྟུཨཱདཡོ པུཏྟཱ ཙ པཔུཏྟཱ ཙ ཨེཏིསྶཱཏི པུཏྟཔཔུཏྟཀཱ པརམྤརཱ. ནིཧཏནྟི ནིཧིཏཾ ཋཔིཏཾ, པཝཏྟིཏནྟི ཨཏྠོ. ནིཧཏནྟི ཝཱ སཏཏཾ པཏིཊྛིཏབྷཱཝེན ཝལ༹ཉྫིཏནྟི ཨཏྠོ. ཏེནཱཧ ‘‘ཀལྱཱཎཝཏྟ’’ནྟི. ཨཏིརེཀཏརཱ དྭེ གུཎཱཏི མཧཱསཏྟསྶ མགྷདེཝཀཱལཏོ ཨཏིརེཀཏརཱ དྭེ གུཎཱ ཨིཏརརཱཛཱུཧི པན ཨཏིརེཀཏརཱ ཨནེཀསཏསཧསྶཔྤབྷེདཱ ཨེཝ གུཎཱ ཨཧེསུནྟི.

༣༡༢. ཏེཏྟིཾས སཧཔུཉྙཀཱརིནོ ཨེཏྠ ནིབྦཏྟཱཏི ཏཾསཧཙརིཏཊྛཱནཾ ཏེཏྟིཾསཾ, ཏདེཝ ཏཱཝཏིཾསཾ, ཏཾནིཝཱསོ ཨེཏེསནྟི ཏཱཝཏིཾསཱ. ནིཝཱསབྷཱཝོ ཙ ཏེསཾ ཏཏྠ ནིབྦཏྟནཔུབྦཀོཏི ཨཱཧ – ‘‘དེཝཱནཾ ཏཱཝཏིཾསཱནནྟི ཏཱཝཏིཾསབྷཝནེ ནིབྦཏྟདེཝཱན’’ནྟི. རཉྙོཏི ནིམིམཧཱརཱཛསྶ. ཨོཝཱདེ ཋཏྭཱཏི ‘‘སཱིལཾ ཨརཀྑནྟོ མམ སནྟིཀཾ མཱ ཨཱགཙྪཏཱུ’’ཏི ནིགྒཎྷནཝསེནཔི, ‘‘ཨེཀནྟཏོ མམ ཝིཛིཏེ ཝསནྟེན སཱིལཾ རཀྑིཏབྦ’’ནྟི ཨེཝཾ པཝཏྟིཏཨོཝཱདཝསེནཔི ཨོཝཱདེ ཋཏྭཱ.

ཨཐ ¶ ནནྟི མཧཱཛུཏིཀཾ མཧཱཝིཔྥཱརཾ མཧཱནུབྷཱཝཾ ནིམིརཱཛཱནཾ. ‘‘སཀྐོཧམསྨི དེཝིནྡོ, ཏཝ སནྟིཀམཱགཏོ’’ཏི ཨཏྟནོ སཀྐབྷཱཝཾ པཝེདེཏྭཱ ‘‘ཀངྑཾ ཏེ པཊིཝིནོདེསྶཱམཱི’’ཏི ཨཱཧ. ཏེནཱཧ ‘‘སབྦབྷཱུཏཱནམིསྶརཱ’’ཏིཨཱདི.

སཱིལཾ ¶ ཨུཔཱདཱཡ ཨོམཀཏཱཡ ‘‘ཀི’’ནྟི ཧཱིལེ༹ནྟོ ཝདཏི. གུཎཝིསིཊྛཏཱཡཱཏི ལཱབྷཡསཱདཱིནཉྩེཝ པིཡམནཱཔཏཱདཱིནཉྩ ཨཱསཝཀྑཡཔརིཡོསཱནཱནཾ ནིམིཏྟབྷཱཝེན ཨུཏྟམགུཎཏཱཡ. ཏདཱ སཀྐོ ཨནུརུདྡྷཏྠེརོ, སོ ཨཏྟནོ པུརིམཛཱཏིཡཾ པཙྩཀྑསིདྡྷཾཝ དཱནཏོ སཱིལཾ མཧནྟཾ ཝིབྷཱཝེནྟོ ‘‘ཨཧཉྷཱི’’ཏིཨཱདིམཱཧ. ཏཏྠ ཨཏྟནཱ ཝསིཡམཱནཾ ཀཱམཱཝཙརདེཝལོཀཾ སནྡྷཱཡ ‘‘པེཏྟིཝིསཡཏོ’’ཏི ཝུཏྟཾ. ཏསྶ ཧི ཀཔྤསཏསཧསྶཾ ཝིཝཊྚཛ྄ཛྷཱསཡསྶ པཱུརིཏཔཱརམིསྶ དེཝལོཀོ པེཏལོཀོ ཝིཡ ཨུཔཊྛཱསི. ཏེནེཝཱཧ ‘‘ཨཙྪརཱགཎསངྒྷུཊྛཾ, པིསཱཙགཎསེཝིཏ’’ནྟི (སཾ. ནི. ༡.༤༦).

ཁཏྟིཡེཏི ཁཏྟིཡཛཱཏིཡཾ. ཝིསུཛ྄ཛྷཏཱིཏི བྲཧྨལོཀཱུཔཔཏྟིཾ སནྡྷཱཡ ཝདཏི ཀཱམསཾཀིལེསཝིསུཛ྄ཛྷནཏོ. ཀཱཡཱཏི ཙ བྲཧྨཀཱཡམཱཧ.

ཨིམསྶ མམ ཨདིཊྛཔུབྦརཱུཔཾ དིསྭཱ ‘‘ཨཧུདེཝ བྷཡ’’ནྟི ཙིནྟེཏྭཱ ཨཱཧ ‘‘ཨཝིཀམྤམཱནོ’’ཏི. བྷཱཡནྟོ ཧི ཙིཏྟསྶ ཨཉྙཐཏྟེན ཀཱཡསྶ ཙ ཚམྦྷིཏཏྟེན ཝིཀམྤཏི ནཱམ. ཏེནཱཧ ‘‘ཨབྷཱཡམཱནོ’’ཏི. སུཁཾ ཀཐེཏུཾ ཧོཏཱིཏི པུཉྙཕལཾ ཀཐེཏུཾ སུཁཾ ཧོཏི.

༣༡༣. མནཾ ཨཱགམྨ ཡུཏྟཱཡེཝ ཧོནྟཱིཏི མཱཏལིསྶ སཀྐསྶེཝ ཙིཏྟཾ ཛཱནིཏྭཱ ཡུཏྟཱ ཝིཡ ཧོནྟི, རཐེ ཡུཏྟཨཱཛཱནཱིཡཀིཙྩཾ ཀརོནྟི དེཝཔུཏྟཱ. ཨེཝཾ ཏཱདིསེ ཀཱལེ ཏཐཱ པཊིཔཛྫནྟི, ཡཐཱ ཨེརཱཝཎོ དེཝཔུཏྟོ ཧཏྠིཀིཙྩཾ. ནདྡྷིཏོ པཊྛཱཡཱཏི རཐཔཉྫརཔརིཡནྟེན ཨཀྑསྶ སམྦནྡྷཊྛཱནཾ ནདྡྷཱི, ཏཏོ པཊྛཱཡ. ཨཀྑོ བཛ྄ཛྷཏི ཨེཏྠཱཏི ཨཀྑབདྡྷོ, ཨཀྑེན རཐསྶ བདྡྷཊྛཱནཾ. ཡཐཱ དེཝལོཀཏོ ཡཱཝ ཙནྡམཎྜལསྶ གམནཝཱིཐི, ཏཱཝ ཨཏྟནོ ཨཱནུབྷཱཝེན ཧེཊྛཱམུཁམེཝ རཐཾ པེསེསི, ཨེཝཾ ཙནྡམཎྜལསྶ གམནཝཱིཐིཏོ ཡཱཝ རཉྙོ པཱསཱདོ, ཏཱཝ ཏཐེཝ པེསེསི. དྭེ མགྒེ དསྶེཏྭཱཏི པཏོདལཊྛིཡཱ ཨཱཀཱསཾ ཝིལིཁནྟོ ཝིཡ ཨཏྟནོ ཨཱནུབྷཱཝེན ནིརཡགཱམཱི དེཝལོཀགཱམཱི ཙཱཏི དྭེ མགྒེ ¶ དསྶེཏྭཱ. ཀཏམེནཱཏིཨཱདི དེསནཱམཏྟཾ, ཡཐཱ ཏེན རཐེན གཙྪནྟསྶ ནིརཡོ དེཝལོཀོ ཙ པཱཀཊཱ ཧོནྟི, ཏཐཱ ཀརཎཾ ཨདྷིཔྤེཏཾ.

ཝུཏྟཀཱརཎམེཝ སནྡྷཱཡཱཧ མཧཱསཏྟོ ‘‘ཨུབྷཡེནེཝ མཾ མཱཏལི ནེཧཱི’’ཏི. དུགྒནྟི དུགྒམཾ. ཝེཏྟརཎིནྟི ཨེཝཾནཱམཀཾ ནིརཡཾ. ཀུཐིཏནྟི པཀྐུཐིཏཾ ནིཔཀྐཏེལསདིསཛཱལཾ. ཁཱརསཾཡུཏྟནྟི ཁཱརོདཀསདིསཾ.

རཐཾ ནིཝཏྟེཏྭཱཏི ནིརཡཱབྷིམུཁཏོ ནིཝཏྟེཏྭཱ. བཱིརཎཱིདེཝདྷཱིཏཱཡཱཏི ‘‘བཱིརཎཱི’’ཏི ཨེཝཾནཱམིཀཱཡ ¶ ཨཙྪརཱཡ. སོཎདིནྣདེཝཔུཏྟསྶཱཏི ‘‘སོཎདིནྣོ’’ཏི ཨེཝཾནཱམཀསྶ དེཝཔུཏྟསྶ. གཎདེཝཔུཏྟཱནནྟི གཎཝསེན པུཉྙཾ ཀཏྭཱ གཎཝསེནེཝ ནིབྦཏྟདེཝཔུཏྟཱནཾ.

པཏྟཀཱལེཏི ཨུཔཀཊྛཱཡ ཝེལཱཡ. ཨཏིཐིནྟི པཙྩེཀསམྦུདྡྷཾ. ཀསྶཔསྶ བྷགཝཏོ སཱསནེ ཨེཀཾ ཁཱིཎཱསཝཏྠེརནྟིཔི ཝདནྟི. མཱཏཱཝ པུཏྟཾ སཀིམཱབྷིནནྡཱིཏི ཡཐཱ པཝཱསཏོ ཨཱགཏཾ པུཏྟཾ མཱཏཱ སཀིཾ ཨེཀཝཱརཾ ཨཱགཏཀཱལེ ཨབྷིནནྡཏི, ཏཐཱ ནིཙྩཀཱལེ ཨབྷིནནྡི སཀྐཙྩཾ པརིཝིསི. སཾཡམཱ སཾཝིབྷཱགཱཏི སཱིལསཾཡམཱ སཾཝིབྷཱགསཱིལཱ. ཛཱཏཀེཏི ནིམིཛཱཏཀེ.

ཙིཏྟཀཱུཊནྟི དེཝནགརསྶ དཀྑིཎདིསཱཡ དྭཱརཀོཊྛཀཾ. སཀྐོ ཙིཏྟཾ སནྡྷཱརེཏུཾ ཨསཀྐོནྟོཏི མཧཱསཏྟེ པཝཏྟཾ དེཝཏཱནཾ སཀྐཱརསམྨཱནཾ པཊིཙྩ ཨུཔྤནྣཾ ཨཏྟནོ ཨུསཱུཡཙིཏྟཾ བཧི ཨནཱཝིཀཏྭཱ ཨབྦྷནྟརེཡེཝ ཙ ནཾ ཋཔེཏུཾ ཨསཀྐོནྟོ. ཨཉྙེསཾ པུཉྙེན ཝསཱཧཱིཏི སཀྐསྶ མཧཱསཏྟཾ རོསེཏུཀཱམཏཱཡ ཨཱརཱདྷནཾ ནིདསྶེཏི. པུརཱཎསཀྐོ དཱིགྷཱཡུཀོ, ཏཾ ཨུཔཱདཱཡ ཛརཱཛིཎྞཾ ཝིཡ ཀཏྭཱ ‘‘ཛརསཀྐོ’’ཏི ཝུཏྟཾ.

༣༡༥. སེསཾ སབྦནྟི པབྦཛྫུཔགམནཱ སེསཾ ཨཏྟནོ ཝཾསེ པོརཱཎརཱཛཱུནཾ རཱཛཙཱརིཏྟཾ. པཱཀཏིཀནྟི པུན སབྷཱཝཏྟམེཝ གཏོ ཨཧོསི, ཨཔབྦཛིཏབྷཱཝཝཙནེནེཝསྶ བྲཧྨཝིཧཱརབྷཱཝནཱདཱིནཾ པབྦཛྫཱགུཎཱནཾ ཨབྷཱཝོ དཱིཔིཏོ ཧོཏི.

༣༡༦. ཝཱིརིཡཾ ཨཀརོནྟོ སམུཙྪིནྡཏི, ན ཏཱཝ སམུཙྪིནྣཾ, ཀལྱཱཎམིཏྟསཾསགྒཱདིཔཙྩཡསམཝཱཡེ སཏི སཱིལཝཏཾ ཀལྱཱཎཝཏྟཾ པཝཏྟེཏུཾ སཀྐོཏི ¶ . དུསྶཱིལེན སམུཙྪིནྣཾ ནཱམ ཧོཏི ཏསྶ ཏཏྠ ནིརཱསབྷཱཝེན པཊིཔཏྟིཡཱ ཨེཝ ཨསམྦྷཝཏོ. སཏྟ སེཁཱ པཝཏྟེནྟི ཀལྱཱཎཝཏྟསྶ ཨཔརིནིཊྛིཏཀིཙྩཏྟཱ. ཁཱིཎཱསཝེན པཝཏྟིཏཾ ནཱམ པརིནིཊྛིཏཀིཙྩཏྟཱ. སེསཾ སུཝིཉྙེཡྻམེཝ.

མགྷདེཝསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༤. མདྷུརསུཏྟཝཎྞནཱ

༣༡༧. མདྷུརཱཡནྟི ¶ ཨུཏྟརམདྷུརཱཡཾ. གུནྡཱཝནེཏི ཀཱལ༹སིཔྤལིཝནེ. ཨཏིམུཏྟཀཝནེཏི ཙ ཝདནྟི. ཙཏཱུསུ ཝཎྞེསུ བྲཱཧྨཎོཝ སེཊྛོ ཝཎྞོ. པཎྜརོཏི པརིསུདྡྷོ. ཀཱལ༹ཀོཏི ཨཔརིསུདྡྷོ. ཛཱཏིགོཏྟཱདིཔཉྙཱཔནཊྛཱནེསཱུཏི ཛཱཏིགོཏྟཱདིཝསེན སུདྡྷཙིནྟཱཡཾ བྲཱཧྨཎཱ ཨེཝ སུདྡྷཛཱཏིཀཱ, ན ཨིཏརེཏི ཨདྷིཔྤཱཡོ. སཾསཱརཏོ ཝཱ སུདྡྷཙིནྟཱཡཾ བྲཱཧྨཎཱཝ སུཛ྄ཛྷནྟི ཝེདཝིཧིཏསྶ སུདྡྷཝིདྷིནོ ཨཉྙེསཾ ཨཝིསཡཏྟཱཏི ཨདྷིཔྤཱཡོ. ཏཾ པནེཏཾ ཏེསཾ ཝིརུཛ྄ཛྷཏི ཁཏྟིཡཝེསྶཱནམྤི མནྟཛ྄ཛྷེནསྶ ཨནུཉྙཱཏཏྟཱ, མནྟཛ྄ཛྷེནཝིདྷིནཱ ཙ སཾསཱརསུདྡྷིཡཱབྷཱཝཏོ. པུཏྟཱ ནཱམ ཨནོརསཱཔི ཧོནྟི, ན ཏཐཱ ཨིམེཏི ཨཱཧ ‘‘ཨོརསཱ’’ཏི. ཨུརེ སཾཝཌྜྷིཏཔུཏྟོཔི ‘‘ཨོརས’’ནྟི ཝུཙྩཏི. ཨིམེ པན མུཁཏོ ནིགྒཏོ ཧུཏྭཱ ཨུརེ སཾཝཌྜྷཱཏི དསྶེཏུཾ ‘‘ཨོརསཱ མུཁཏོ ཛཱཏཱ’’ཏི ཝུཏྟཾ. ཏཏོ ཨེཝ བྲཧྨཏོ ཛཱཏཱཏི བྲཧྨཛཱ, བྲཧྨསམྦྷཱུཏཱཔི ‘‘བྲཧྨཛཱ’’ཏི ཝུཙྩནྟི, ན ཏཐཱ ཨིམེ. ཨིམེ པན པཙྩཀྑཏོ བྲཧྨུནཱ ནིམྨིཏཱཏི བྲཧྨནིམྨིཏཱ, ཏཏོ ཨེཝ བྲཧྨཏོ ལདྡྷབྦཝིཛྫཱདིདཱཡཛྫདཱཡཱདཱཏི བྲཧྨདཱཡཱདཱཏི སབྦམེཏཾ བྲཱཧྨཎཱནཾ ཀཏྠནཱཔལཱཔསདིསཾ ཝིཉྙཱུནཾ ཨཔྤམཱཎཾ ཨཝིམདྡཀྑམཾ ཝཱཙཱཝཏྠུམཏྟཾ བྲཧྨཀུཏྟསྶེཝ ཨབྷཱཝཏོ. ཡཾ པནེཏྠ ཝཏྟབྦཾ, ཏཾ ཝིསུདྡྷིམགྒཝཎྞནཱཡཾ ཝུཏྟམེཝ. ཏེནཱཧ ‘‘གྷོསོཡེཝཱ’’ཏིཨཱདི. ཝོཧཱརམཏྟམེཝེཏནྟི ཨེཏཾ ‘‘བྲཱཧྨཎོཝ སེཊྛོ ཝཎྞོ’’ཏིཨཱདི ཝཙནམཏྟམེཝ, ན ཏསྶ ཨཏྠོ ཏེཧི ཨདྷིཔྤེཏཔྤཀཱརོ ཨཏྠི.

༣༡༨. སམིཛ྄ཛྷེཡྻཱཏི དིཊྛིདཱིཔནཝསེན ཨཏྟནོ ཨཛ྄ཛྷཱསཡོ ནིཔྥཛྫེཡྻ. ཏེནཱཧ ‘‘མནོརཐོ པཱུརེཡྻཱ’’ཏི. ཁཏྟིཡོཔཱིཏི པརཁཏྟིཡོཔི ¶ . ཨསྶཱཏི སམིདྡྷདྷནཱདིཾ པཏྟསྶ. ཏེནཱཧ – ‘‘ཨིསྶརིཡསམྤཏྟསྶཱ’’ཏི ནེསནྟི ཨེཏེསཾ ཙཏུནྣཾ ཝཎྞཱནཾ ཨེཏྠ པུབྦུཊྛཱཡིབྷཱཝཱདིནཱ ཨིཏརེཧི ཨུཔཙརིཏབྦཏཱཡ ན ཀིཉྩི ནཱནཱཀརཎནྟི ཡོཛནཱ.

༣༢༢. ཨཧཾ ¶ ཙཱིཝརཱདཱིཧི ཨུཔཊྛཱཀོ, ཏུམྷཱཀཾ ཨིཙྪིཏཙྪིཏཀྑཎེ ཝདེཡྻཱཐ ཡེནཏྠོཏི ཡོཛནཱ. ཙོརཱདིཨུཔདྡཝནིསེདྷནེན རཀྑཱགུཏྟི, དཱནཱདིནིམིཏྟཨུཔདྡཝནིསེདྷནེན ཨཱཝརཎགུཏྟི. པཙྩུཔྤནྣཱནཏྠནིསེདྷནེན ཝཱ རཀྑཱགུཏྟི, ཨཱགཱམིཨནཏྠནིསེདྷནེན ཨཱཝརཎགུཏྟི. ཨེཏྠ ཙ ཁཏྟིཡཱདཱིསུ ཡོ ཡོ ཨིསྶརོ, ཏསྶ ཨིཏརེན ཨནུཝཏྟེཏབྦབྷཱཝེ, ཀུསལཱཀུསལཀརཎེན ནེསཾ ཝསེན ལདྡྷབྦཨབྷིསམྤརཱཡེ, པབྦཛིཏེཧི ལདྡྷབྦསཱམཱིཙིཀིརིཡཱཡ ཙ ཨཎུམཏྟོཔི ཝིསེསོ ནཏྠི, ཏསྨཱ སོ ཝིསེསཱབྷཱཝོ པཱལི༹ཡཾ ཏཏྠ ཏཏྠ ཝཱརེ ‘‘ཨེཝཾ སནྟེ’’ཏིཨཱདིནཱ ཝིབྷཱཝིཏོ. སེསཾ སུཝིཉྙེཡྻམེཝ.

མདྷུརསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༥. བོདྷིརཱཛཀུམཱརསུཏྟཝཎྞནཱ

༣༢༤. ཨོལོཀནཀཔདུམནྟི ¶ ལཱིལཱཨརཝིནྡཾ. ཏསྨཱཏི ཀོཀནདསཎྛཱནཏྟཱ ཀོཀནདོཏི སངྑཾ ལབྷི.

༣༢༥. ཡཱཝ པཙྪིམ…པེ… ཕལཀཾ ཝུཏྟཾ ཏསྶ སབྦཔཙྪཱ སནྠཏཏྟཱ. ཨུཔརིམཕལགཏཉྷི སོཔཱནམཏྠཀཾ. ཨོལོཀནཏྠཾཡེཝཱཏི ན ཀེཝལཾ བྷགཝཏོ ཨཱགམནཉྙེཝ ཨོལོཀནཏྠཾ, ཨཐ ཁོ ཨཏྟནོ པཏྠནཱཡ སནྠརཱཔིཏཱཡ ཙེལཔཊིཀཱཡ ཨཀྐམནསྶཔི.

སཀུཎཔོཏཀེཏི ཀཱདམྦཊིཊྚིབྷཔུཏྟཀེ. ཨཉྙོཝ བྷཝེཡྻཱཏི ཏསྨིཾ ཨཏྟབྷཱཝེ མཱཏུགཱམཏོ ཨཉྙོ ཨིདཱནི བྷརིཡཱབྷཱུཏོ མཱཏུགཱམོ བྷཝེཡྻ. པུཏྟཾ ལབྷེཡྻཱཏི ཨཏྟནོ ཀམྨཝསེན པུཏྟཾ, ནོ ཏསྶ. ཨུབྷོཧཱིཏི ཨིམེཧི ཨེཝ ཨུབྷོཧི. ཨིམེཧི ཀཱརཎེཧཱིཏི ཏསྶ རཱཛཀུམཱརསྶ བུདྡྷཾ པཊིཙྩ མིཙྪཱགཧཎཾ, ཏིཏྠིཡཱནཾ ཨུཛ྄ཛྷཱཡནཾ, ཨནཱགཏེ མནུསྶཱནཾ བྷིཀྑཱུནཾ ཨུདྡིསྶ ཝིཔྤཊིསཱརོཏི ཨིམེཧི ཏཱིཧི ཀཱརཎེཧི. པཉྙཏྟནྟི སནྠཏཾ ཙེལཔཊིཀཾ. མངྒལཾ ཨིཙྪནྟཱིཏི མངྒལིཀཱ.

༣༢༦. ཏཏིཡཾ ¶ ཀཱརཎནྟི ཨིམིནཱ བྷིཀྑཱུསུ ཝིཔྤཊིསཱརཱནུཔྤཱདནམཱཧ. ཡཾ ཀིཉྩི པརིབྷུཉྫན-སུཁཾ ཀཱམསུཁལླིཀཱནུཡོགོཏི ཨདྷིཔྤཱཡེན ཀཱམསུཁལླིཀཱནུཡོགསཉྙཱི ཧུཏྭཱ…པེ… མཉྙམཱནོ ཨེཝམཱཧ.

༣༢༧. ཨཐ ནཾ བྷགཝཱ ཏཏོ མིཙྪཱབྷིནིཝེསཏོ ཝིཝེཙེཏུཀཱམོ ‘‘སོ ཁོ ཨཧ’’ནྟིཨཱདིནཱ ཨཏྟནོ དུཀྐརཙརིཡཾ དསྶེཏུཾ ཨཱརབྷི. མཧཱསཙྩཀེ(མ. ནི. ༡.༣༦༤ ཨཱདཡོ) ཝུཏྟནཡེནེཝ ཝེདིཏབྦཾ ‘‘སོ ཁོ ཨཧ’’ནྟིཨཱདིཔཱཋསྶ ཏཏྠ ཨཱགཏནིཡཱམེནེཝ ཨཱགཏཏྟཱ. པཱསརཱསིསུཏྟེ (མ. ནི. ༡.༢༧༢ ཨཱདཡོ) ཝུཏྟནཡེནཱཏི ཨེཏྠཱཔི ཨེསེཝ ནཡོ.

༣༤༣. ཨངྐུསཾ གཎྷནྟི ཨེཏེན ཏསྶ གཧཎེ ཚེཀོ ཧོཏཱིཏི ཨངྐུསགཧཎསིཔྤཾ. མེགྷཨུཏུནྟི མེགྷཾ པཊིཙྩ ཨུཔྤནྣསཱིཏཨུཏུཾ. པབྦཏཨུཏུནྟི པབྦཏཾ པཊིཙྩ ཨུཎྷཨུཏུཾ. ཨུབྷཡཝསེན ཙ ཏསྶ ¶ ཏཐཱ སཱིཏུཎྷཨུཏུཏོ ཨེནོ ཨཱགཏོཏི ཏ-ཀཱརསྶ ད-ཀཱརཾ ཀཏྭཱ ཨུདེནོཏི ནཱམཾ ཨཀཱསི.

ཏཱཔསོ ཨོགཱལ༹ྷཉཱཎཝསེན རཉྙོ མཏབྷཱཝཾ ཉཏྭཱ. ཨཱདིཏོ པཊྛཱཡཱཏི ཀོསམྦིནགརེ པརནྟཔརཉྙོ ཨགྒམཧེསིབྷཱཝཏོ པཊྛཱཡ. པུབྦེཏི སཱིལཝནྟཀཱལེ. ཧཏྠིགནྠནྟི ཧཏྠཱིནཾ ཨཏྟནོ ཝསེ ཝཏྟཱཔནསཏྠཾ. ཏེནེཝསྶ ཏཾ སིཀྑཱཔེཏི, ཀིཙྩཉྩ ཨིཛ྄ཛྷཏི.

༣༤༤. པདཧནབྷཱཝོཏི བྷཱཝནཱནུཡོགོ. པདྷཱནེ ཝཱ ནིཡུཏྟོ པདྷཱནིཡོ, པདྷཱནིཡསྶ བྷིཀྑུནོ, ཏསྶེཝ པདྷཱནིཡབྷཱཝསྶ ཨངྒཱནི ཀཱརཎཱནི པདྷཱནིཡངྒཱནི. སདྡྷཱ ཨེཏསྶ ཨཏྠཱིཏི སདྡྷོ. ཀིཉྩཱཔི པཙྩེཀབོདྷིསཏྟཱནམྤི ཨབྷིནཱིཧཱརཏོ པཊྛཱཡ ཨཱགཏཱ ཨཱགམནསདྡྷཱ ཨེཝ, མཧཱབོདྷིསཏྟཱནཾ པན སདྡྷཱ གརུཏརཱཏི སཱ ཨེཝ གཧིཏཱ. ཨཙལབྷཱཝེན ཨོཀཔྤནཾ ‘‘སམྨཱསམྦུདྡྷོ བྷགཝཱ, སྭཱཁྱཱཏོ དྷམྨོ, སུཔྤཊིཔནྣོ སངྒྷོ’’ཏི ཀེནཙི ཨཀམྤིཡབྷཱཝེན རཏནཏྟཡགུཎེ ཨོགཱཧིཏྭཱ ཀཔྤནཾ. པསཱདུཔྤཏྟི རཏནཏྟཡེ པསཱིདནམེཝ. བོདྷིནྟི ཙཏུམགྒཉཱཎནྟི ཝུཏྟཾ ཏཾནིམིཏྟཏྟཱ སབྦཉྙུཏཉྙཱཎསྶ, བོདྷཱིཏི ཝཱ སམྨཱསམྦོདྷི. སབྦཉྙུཏཉྙཱཎཔདཊྛཱནཉྷི མགྒཉཱཎཾ, མགྒཉཱཎཔདཊྛཱནཉྩ སབྦཉྙུཏཉྙཱཎཾ ‘‘སམྨཱསམྦོདྷཱི’’ཏི ཝུཙྩཏི. ནིཙྪིཏསུབུདྡྷཏཱཡ དྷམྨསྶ སུདྷམྨཏཱ སངྒྷསྶ སུཔྤཊིཔཏྟི ཝིནིཙྪིཏཱ ཨེཝ ¶ ཧོཏཱིཏི ཨཱཧ ‘‘དེསནཱསཱིསམེཝ ཙེཏ’’ནྟིཨཱདི. ཏསྶ པདྷཱནཾ ཝཱིརིཡཾ ཨིཛ྄ཛྷཏི རཏནཏྟཡསདྡྷཱཡ ‘‘ཨིམཱཡ པཊིཔདཱཡ ཛརཱམརཎཏོ མུཙྩིསྶཱམཱི’’ཏི པདྷཱནཱནུཡོགེ ཨཝཾམུཁསམྦྷཝཏོ.

ཨཔྤཱབཱདྷོཏིཨཱདི ཧེཊྛཱ ཝུཏྟམེཝ. ཨགུཎཾ པཀཱསེཏཱ ཨཱཡཏིཾ སཾཝརཾ ཨཱཔཛྫིཏཱ སམྨཱཔཊིཔཏྟིཡཱ ཝིསོདྷནཏྠཾ. ཨུདཡཉྩ ཨཏྠཉྩ གནྟུནྟི ‘‘ཨཝིཛྫཱསམུདཡཱ’’ཏིཨཱདིནཱ པཉྩནྣཾ ཨུཔཱདཱནཀྑནྡྷཱནཾ ཨུདཡཉྩ ཝཡཉྩ ཛཱནིཏུཾ. ཏེནཱཧ ‘‘ཨེཏེནཱ’’ཏིཨཱདི. པརིསུདྡྷཱཡ ཨུཔཀྐིལེསཝིནིམུཏྟཱཡ. ནིབྦིཛ྄ཛྷིཏུནྟི ཏདངྒཝསེན པཛཧིཏུཾ སམུཙྪེདཔྤཧཱནསྶ པཙྩཡོ བྷཝིཏུཾ. ཡཾ དུཀྑཾ ཁཱིཡཏཱིཏི ཀིལེསེསུ ཨཔྤཧཱིནེསུ ཏེན ཏདུཔནིསྶཡཀམྨཾ པཊིཙྩ ཡཾ དུཀྑཾ ཨུཔྤཛྫེཡྻ, ཏཾ སནྡྷཱཡ ཝུཏྟཾ.

༣༤༥. སེསདིཝསེཏི སཏྟདིཝསཏོ པཊྛཱཡ ཡཱཝ དྭེ རཏྟིནྡིཝཱ.

༣༤༦. ཀུཙྪིསནྣིསྶིཏོ ¶ གབྦྷོ ནིསྶཡཝོཧཱརེན ‘‘ཀུཙྪཱི’’ཏི ཝུཙྩཏི, སོ ཨེཏིསྶཱ ཨཏྠཱིཏི ཀུཙྪིམཏཱི. ཏེནཱཧ ‘‘ཨཱཔནྣསཏྟཱ’’ཏི. ཨཱརཀྑོ པནསྶ པཙྩུཔཊྛིཏོ ཧོཏཱིཏི མཱཏརཱ གཧིཏསརཎཾ གབྦྷཝུཊྛིཏསྶ ཏསྶ སརཎགམནཾ པཝེདཡིཏསྶ ཀུསལཾ སརཎཾ ནཱམ, མཱཏུ ཀཏརཀྑོ པུཏྟསྶཔི པཙྩུཔཊྛིཏོཏི. མཧལླཀཀཱལེཏི ཝཙནཏྠཾ ཛཱནནཀཱལེ. སཱརེནྟཱིཏི ཡཐཱདིཊྛཾ ཡཐཱབལཾ རཏནཏྟཡགུཎཔཏིཊྛཱཔནཝསེན ཨསྶ སཱརེནྟི. སལླཀྑེཏྭཱཏི ཝུཏྟམཏྠཾ ཨུཔདྷཱརེཏྭཱ. སརཎཾ གཧིཏཾ ནཱམ ཧོཏི རཏནཏྟཡསྶ སརཎབྷཱཝསལླཀྑཎཔུབྦཀཏནྣིནྣཙིཏྟབྷཱཝཏོཝ. སེསཾ སུཝིཉྙེཡྻམེཝ.

བོདྷིརཱཛཀུམཱརསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༦. ཨངྒུལིམཱལསུཏྟཝཎྞནཱ

༣༤༧. ཨངྒུལཱིནཾ ¶ མཱལཾ དྷཱརེཏཱིཏི ཨིམིནཱ ཨནྭཏྠཱ ཏསྶ སམཉྙཱཏི དསྶེཏི. ཏཏྲཱཏི ཏསྨིཾ ཨཱཙརིཡཝཙནེན ཨངྒུལིམཱལསྶ དྷཱརཎེ. ཀརཱིསསཧསྶཁེཏྟེ ཨེཀསཱལིསཱིསཾ ཝིཡ ཨཔཉྙཱཡམཱནསཀཀིཙྩོ ཧོཏཱིཏི ཨདྷིཔྤཱཡོ. ཏཀྐསཱིལཾ པེསཡིཾསུ ‘‘ཏཱདིསསྶ ཨཱཙརིཡསྶ སནྟིཀེ ¶ སིཔྤུགྒཧསམྨཱཔཡོགེན དིཊྛདྷམྨིཀེ སམྤརཱཡིཀེ ཙ ཨཏྠེ ཛཱནནྟོ བྷཱརིཡཾ ན ཀརེཡྻཱ’’ཏི. བཱཧིརཀཱ ཨཧེསུཾ ཨཧིཾསཀསྶ ཝཏྟསམྤཏྟིཡཱ ཨཱཙརིཡསྶ ཙིཏྟསབྷཱཝཏོ ནིབྦཏྟནཏིབྷཱཝེན. སིནེཧེནེཝ ཝདནྟེཏི སིནེཧེན ཝིཡ ཝདནྟེ.

གཎནམྤི ན ཨུགྒཎྷཱཏཱིཏི གཎནཝིདྷིམྤི ན སལླཀྑེཏི. ཏཏྠ ཀཱརཎམཱཧ ‘‘པཀཏིཡཱ’’ཏིཨཱདིནཱ. ཋཔིཏཊྛཱནེཏི རུཀྑགཙྪནྟརཱདིཀེ ཋཔིཏཊྛཱནེ སཀུནྟསིངྒཱལཱནཾ ཝསེན ཨངྒུལིཡོ ཝིནསྶནྟི. བྷགྒཝོཏི ཀོསལརཉྙོ པུརོཧིཏཾ གོཏྟེན ཝདཏི. ཙོརོ ཨཝིསྶཱསནཱིཡོ སཱཧསིཀབྷཱཝཏོ. པུརཱཎསནྠཏཱ སཱཁཱ ཨཝིསྶཱསནཱིཡཱ ཝིཙྪིཀཱདཱིནཾ པཝེསནཡོགྱཏྟཱ. རཱཛཱ ཨཝིསྶཱསནཱིཡོ ཨིསྶརིཡམདེན དྷནལོབྷེན ཙ ཀདཱཙི ཛཱིཝིཏེ སངྐཱབྷཱཝཏོ. ཨིཏྠཱི ཨཝིསྶཱསནཱིཡཱ ལོལསཱིལཙིཏྟབྷཱཝཏོ. ཨནུདྡྷརཎཱིཡོ བྷཝིསྶཏི སཾསཱརཔངྐཏོ.

༣༤༨. སངྐརིཏྭཱཏི ‘‘མཡཾ ཨེཀཛ྄ཛྷཾ སནྣིཔཏིཏྭཱ ཙོརཾ མཱརེཏྭཱ ཝཱ པལཱཔེཏྭཱ གམིསྶཱམཱ’’ཏི སངྐརཾ ཀཏྭཱ. ཨིདྡྷཱབྷིསངྑཱརནྟི ཨབྷིསངྑརཎཾ ཨདྷིཊྛཱནཾ. ཨབྷིསངྑཱསཱིཏི ཨདྷིཊྛཧི. སཾཧརིཏྭཱཏི སཾཁིཔིཏྭཱ. ཨོརབྷཱགེཏི ཙོརསྶ ཨོརབྷཱགེ.

༣༤༩. དཎྜོཏི པཧརཎཧཏྠཙྪེདནཱདིཀོ དཎྜནསངྑཱཏོ དཎྜོ. པཝཏྟཡིཏབྦོཏི ཨཱནེཏབྦོ. ཨཔནེཏྭཱཏི ཨཏྟནོ སནྟཱནཏོ སམུཙྪེདཝསེན པཧཱཡ. པཊིསངྑཱཡཱཏི པཊིསངྑཱནེན. ཨཝིཧིཾསཱཡཱཏི ཀརུཎཱཡ. སཱརཎཱིཡདྷམྨེསཱུཏི ཚསུཔི སཱརཎཱིཡདྷམྨེསུ, ཋིཏོ ཨཊྛིཏཱནཾ པཱཔདྷམྨཱནཾ བོདྷིམཱུལེ ཨེཝ སམུཙྪིནྣཏྟཱ. ཡཐཱ ཨཏཱིཏེ ཨཔརིམིཏཾ ཀཱལཾ སནྡྷཱཝིཏཾ, ཨེཝཾ ཨིམཱཡ པཊིཔཏྟིཡཱ ཨནཱགཏེཔི སནྡྷཱཝིསྶཏཱིཏི དསྶེནྟོ ‘‘ཨིདཱནཱི’’ཏིཨཱདིམཱཧ.

ཨིཏྭེཝཱཏི ཨིཏི ཨེཝ, ཨིཏི-སདྡོ ནིདསྶནཏྠོ. ཏེནཱཧ ‘‘ཨེཝཾ ཝཏྭཱ ཡེཝཱ’’ཏི. ཨཀིརཱིཏི ཨཱཀིརི, པཉྩཔི ཨཱཝུདྷཱནི ཝིཀིརི. ཏེན ཝུཏྟཾ ‘‘ཁིཔི ཚཌྜེསཱི’’ཏི.

༣༥༠. ཨེཏྟོཝཱཏི ¶ ཨཏོ ཨེཝ ཨཱགཏམགྒེནེཝ སཱཝཏྠིཾ གཏཱ. ཨདྷིཝཱསེསྶཏཱིཏི ‘‘ཙོརཾ པཊིསེདྷེཏུཾ གམིསྶཱམཱི’’ཏི ཝུཏྟེ ཏུཎྷཱི བྷཝིསྶཏི ¶ . དཱརུཎཀམྨེན ཨུཔྤནྣནཱམནྟི ‘‘ཨངྒུལིམཱལོ’’ཏི ཨིམཾ ནཱམཾ སནྡྷཱཡ ཝདཏི.

༣༥༡. ཧཏྠཱི ཨརཉྙཧཏྠཱི ཧོནྟི མནུསྶཱནཾ ཏཏྠ གནྟུཾ ཨསཀྐུཎེཡྻཏྟཱ, ཨེཝཾ ཨསྶཱཔི. ཀཱུཊསཧསྶཱནཾ བྷིཛྫནཀཱརཎཾ ཧོཏི ཐེརསྶ ཨཱགམནབྷཡེན གྷཊེ ཚཌྜེཏྭཱ པལཱཡནེན. གབྦྷམཱུལ༹ྷཱཡཱཏི བྱཱཀུལགབྦྷཱཡ. པབྦཛྫཱབལེནཱཏི ཝུཏྟཾ, སཏྠུ དེསནཱནུབྷཱཝེནཱཏི པན ཝཏྟབྦཾ. སོ ཧི ཏསྶཱཔི ཀཱརཎནྟི. ཨརིཡཱ ནཱམ ཛཱཏི པབྦཛྫཱ ཨརིཡབྷཱཝཏྠཱཡ ཛཱཏཱིཏི ཀཏྭཱ.

མཧཱཔརིཏྟཾ ནཱམེཏནྟི མཧཱནུབྷཱཝཾ པརིཏྟཾ ནཱམེཏཾ. ཏཐཱ ཧི ནཾ ཐེརོ སབྦབྷཱཝེན ཨརིཡཱཡ ཛཱཏོ སཙྩཱདྷིཊྛཱནེན ཨཀཱསི. ཏེནཱཧ ‘‘སཙྩཀིརིཡཀཏཊྛཱནེ’’ཏི. གབྦྷམཱུལ༹ྷནྟི མཱུལ༹ྷགབྦྷཾ. གབྦྷོ ཧི པརིཔཀྐོ སམྤཛྫམཱནོ ཝིཛཱཡནཀཱལེ ཀམྨཛཝཱཏེཧི སཉྩཱལེཏྭཱ པརིཝཏྟིཏོ ཨུདྡྷཾཔཱདོ ཨདྷོསཱིསོ ཧུཏྭཱ ཡོནིམུཁཱབྷིམུཁོ ཧོཏི, ཨེཝཾ སོ ཀསྶཙི ཨལགྒོ སོཏྠིནཱ བཧི ནིཀྑམཏི, ཝིཔཛྫམཱནོ པན ཝིཔརིཝཏྟནཝསེན ཡོནིམགྒཾ པིདཧིཏྭཱ ཏིརིཡཾ ནིཔཛྫཏི, ཏཐཱ ཡསྶཱ ཡོནིམགྒོ པིདཧཏི, སཱ ཏཏྠ ཀམྨཛཝཱཏེཧི ཨཔརཱཔརཾ པརིཝཏྟམཱནཱ བྱཱཀུལཱ མཱུལ༹ྷགབྦྷཱཏི ཝུཙྩཏི, ཏཾ སནྡྷཱཡ ཝུཏྟཾ ‘‘གབྦྷམཱུལ༹ྷ’’ནྟི.

སཙྩཀིརིཡཱ ནཱམ བུདྡྷཱསཡཾ ཨཏྟནོ སཱིལཾ པཙྩཝེཀྑིཏྭཱ ཀཏཱ, ཏསྨཱ སཙྩཀིརིཡཱ ཝེཛྫཀམྨཾ ན ཧོཏཱིཏི དཊྛབྦཾ. ཐེརསྶཔི ཙཱཏིཨཱདིནཱ ཨུཔསངྐམིཏབྦཀཱརཎཾ ཝདཏི. ཨིམེ དྭེ ཧེཏཱུ པཊིཙྩ བྷགཝཱ ཐེརཾ སཙྩཀིརིཡཾ ཀཱརེསི. ཛཱཏིནྟི མཱུལཛཱཏིཾ.

༣༥༢. པརིཡཱདཱཡ ཨཱཧཙྩ བྷིནྣེན སཱིསེན. སབྷཱགདིཊྛདྷམྨཝེདནཱིཡཀམྨནྟི ནིརཡེ ནིབྦཏྟནསཀཀམྨསབྷཱགབྷཱུཏཾ དིཊྛདྷམྨཝེདནཱིཡཀམྨཾ. སབྷཱགཏཱ ཙ སམཱནཝཏྠུཀཏཱ སམཱནཱརམྨཎཏཱཨེཀཝཱིཐིཔརིཡཱཔནྣཏཱདིཝསེན སབྦཐཱ སརིཀྑཏཱ, སདིསམྤི ཙ ནཱམ ཏདེཝཱཧརཱིཡཏི ཡཐཱ ‘‘ཏསྶེཝ ཀམྨསྶ ཝིཔཱཀོ’’ཏི ཙ ‘‘སཱ ཨེཝ ཏིཏྟིརཱི ཏཱནེཝ ཨོསདྷཱནཱི’’ཏི ཙ. ཨིདཱནི ཏམེཝ སབྷཱགཏཾ དསྶེཏུཾ ‘‘ཀམྨཾ ཧཱི’’ཏིཨཱདི ཨཱརདྡྷཾ. ཀརིཡམཱནམེཝཱཏི པཙྩཡསམཝཱཡེན པཊིཔཱཊིཡཱ ནིབྦཏྟིཡམཱནམེཝ. ཏཡོ ཀོཊྛཱསེ པཱུརེཏི, དིཊྛདྷམྨཝེདནཱིཡཨཔརཱཔརིཡཱཡཝེདནཱིཡཨུཔཔཛྫཝེདནཱིཡསངྑཱཏེ ཏཡོ བྷཱགེ པཱུརེཏི, ཏེསཾ ཏིཎྞཾ བྷཱགཱནཾ ཝསེན པཝཏྟཏི.

དིཊྛདྷམྨོ ¶ ¶ ཝུཙྩཏི པཙྩཀྑབྷཱུཏོ པཙྩུཔྤནྣོ ཨཏྟབྷཱཝོ, ཏཏྠ ཝེདིཏབྦཕལཾ ཀམྨཾ དིཊྛདྷམྨཝེདནཱིཡཾ. པཙྩུཔྤནྣབྷཝཏོ ཨནནྟརཾ ཝེདིཏབྦཕལཾ ཀམྨཾ ཨུཔཔཛྫཝེདནཱིཡཾ. དིཊྛདྷམྨཱནནྟརབྷཝཏོ ཨཉྙསྨིཾ ཨཏྟབྷཱཝཔརིཡཱཡེ ཨཏྟབྷཱཝཔརིཝཏྟེ ཝེདིཏབྦཕལཾ ཀམྨཾ ཨཔརཱཔརིཡཱཡཝེདནཱིཡཾ. པཊིཔཀྑེཧི ཨནབྷིབྷཱུཏཏཱཡ, པཙྩཡཝིསེསེན པཊིལདྡྷཝིསེསཏཱཡ ཙ བལཝབྷཱཝཔྤཏྟཱ ཏཱདིསསྶ པུབྦཱབྷིསངྑཱརསྶ ཝསེན སཱཏིསཡཱ ཧུཏྭཱ པཝཏྟཱ པཋམཛཝནཙེཏནཱ ཏསྨིཾཡེཝ ཨཏྟབྷཱཝེ ཕལདཱཡིནཱི དིཊྛདྷམྨཝེདནཱིཡཱ ནཱམ. སཱ ཧི ཝུཏྟཱཀཱརེན བལཝཏི ཛཝནསནྟཱནེ གུཎཝིསེསཡུཏྟེསུ ཨུཔཀཱརཱནུཔཀཱརཝསཔྤཝཏྟིཡཱ ཨཱསེཝནཱལཱབྷེན ཨཔྤཝིཔཱཀཏཱཡ ཙ ཨིཏརདྭཡཾ ཝིཡ པཝཏྟསནྟཱནུཔརམཱཔེཀྑཾ ཨོཀཱསལཱབྷཱཔེཀྑཉྩ ཀམྨཾ ན ཧོཏཱིཏི ཨིདྷེཝ པུཔྥམཏྟཾ ཝིཡ པཝཏྟིཝིཔཱཀམཏྟཾ ཕལཾ དེཏི.

ཏཐཱ ཨསཀྐོནྟནྟི ཀམྨསྶ ཕལདཱནཾ ནཱམ ཨུཔདྷིཔཡོགཱདིཔཙྩཡནྟརསམཝཱཡེནེཝ ཧོཏཱིཏི ཏདབྷཱཝཏོ ཏསྨིཾཡེཝ ཨཏྟབྷཱཝེ ཝིཔཱཀཾ དཱཏུཾ ཨསཀྐོནྟཾ. ཨཧོསིཀམྨནྟི ཀམྨཾཡེཝ ཨཧོསི, ན ཏསྶ ཝིཔཱཀོ ཨཧོསི, ཨཏྠི བྷཝིསྶཏི ཝཱཏི ཨེཝཾ ཝཏྟབྦཾ ཀམྨཾ. ཨཏྠསཱདྷིཀཱཏི དཱནཱདིཔཱཎཱཏིཔཱཏཱདིཨཏྠསྶ ནིཔྥཱདིཀཱ. ཀཱ པན སཱཏི ཨཱཧ ‘‘སཏྟམཛཝནཙེཏནཱ’’ཏི. སཱ ཧི སནྣིཊྛཱཔཀཙེཏནཱ ཝུཏྟནཡེན པཊིལདྡྷཝིསེསཱ པུརིམཛཝནཙེཏནཱཧི ལདྡྷཱསེཝནཱ ཙ སམཱནཱ ཨནནྟརེ ཨཏྟབྷཱཝེ ཝིཔཱཀདཱཡིནཱི ཨུཔཔཛྫཝེདནཱིཡཀམྨཾ ནཱམ. ཏེནཱཧ ‘‘ཨནནྟརེ ཨཏྟབྷཱཝེ ཝིཔཱཀཾ དེཏཱི’’ཏི. སཏི སཾསཱརཔྤཝཏྟིཡཱཏི ཨིམིནཱ ཨསཏི སཾསཱརཔྤཝཏྟིཡཱ ཨཧོསིཀམྨཔཀྑེ ཏིཊྛཏི ཝིཔཙྩནོཀཱསསྶ ཨབྷཱཝཏོཏི.

སམུགྒྷཱཊིཏཱནི ཝིཔཙྩནོཀཱསསྶ ཨནུཔྤཏྟིདྷམྨཏཱཔཱདནེན. དིཊྛདྷམྨཝེདནཱིཡཾ ཨཏྠི ཝིཔཱཀཱརཧཱབྷཱཝསྶ ཨནིབྦཏྟིཏཏྟཱ ཝིཔཙྩནོཀཱསསྶ ཨནུཔཙྪིནྣཏྟཱ. ཀཏཱུཔཙིཏཉྷི ཀམྨཾ སཏི ཝིཔཙྩནོཀཱསེ ཡཱཝ ན ཕལཾ དེཏི, ཏཱཝ ཨཏྠེཝ ནཱམ ཝིཔཱཀཱརཧབྷཱཝཏོ. ‘‘ཡསྶ ཁོ’’ཏི ཨིདཾ ཨནིཡམཱཀཱརཝཙནཾ བྷགཝཏཱ ཀམྨསརིཀྑཏཱཝསེན སཱདྷཱརཎཏོ ཝུཏྟནྟི ཨཱཧ ‘‘ཡཱདིསསྶ ཁོ’’ཏི.

པམཱདཀིལེསཝིམུཏྟོཏི པམཱདཧེཏུཀེཧི སབྦེཧི ཀིལེསེཧི ཝིམུཏྟོ.

པཱཔསྶ ¶ པིདྷཱནཾ ནཱམ ཨཝིཔཱཀདྷམྨཏཱཔཱདནནྟི ཨཱཧ ‘‘ཨཔྤཊིསནྡྷིཀཾ ཀརཱིཡཏཱི’’ཏི. བུདྡྷསཱསནེཏི ¶ སིཀྑཱཏྟཡསངྒཧེ བུདྡྷསྶ བྷགཝཏོ སཱསནེ. ཡུཏྟཔྤཡུཏྟོ ཝིཧརཏཱིཏི ཨཀཏྟབྦསྶ ཨཀརཎཝསེན, ཀཏྟབྦསྶ ཙ པརིཔཱུརཎཝསེན པཝཏྟཏི.

དིསྶནྟི ཀུཛ྄ཛྷནྟཱིཏི དིསཱ, པཊིཔཀྑཱཏི ཨཱཧ ‘‘སཔཏྟཱ’’ཏི. ཏཔྤསཾསཔཀཱརནྟི མེཏྟཱནིསཾསཀིཏྟནཱཀཱརཾ. ཀཱལེནཱཏི ཨཱམེཌིཏལོཔེན ནིདྡེསོཏི ཨཱཧ ‘‘ཁཎེ ཁཎེ’’ཏི. ཨནུཀརོནྟཱུཏི ཡེསཾ ཀལྱཱཎམིཏྟཱནཾ སནྟིཀེ སུཎནྟི, ཡཐཱསུཏཾ དྷམྨཾ ཏེསཾ ཨནུཀརོནྟུ དིཊྛཱནུགཏིཀརཎཾ ཨཱཔཛྫནྟུ, ཨཏྟནོ ཝེརིཔུགྒལཱནམྤི བྷགཝཏོ སནྟིཀེ དྷམྨསྶཝནཾ སམྨཱཔཊིཔཏྟིཉྩ པཙྩཱསཱིསཏི.

ཏསནྟི གཏིཾ པཏྠཡནྟཱིཏི ཏསཱ བྷཝནྟརཱདཱིསུ སཾསརཎབྷཱཝཏོ. ཏེནཱཧ ‘‘ཏསཱ ཝུཙྩནྟི སཏཎྷཱ’’ཏི.

ནེཏབྦཊྛཱནཾ ཨུདཀཾ ནཡནྟཱིཏི ནེཏྟིཀཱ. བནྡྷིཏྭཱཏི དལ༹ྷཾ བནྡྷིཏྭཱ. ཏེལཀཉྫིཀེནཱཏི ཏེལམིསྶིཏེན ཀཉྫིཀེན.

ཡཱདིསོཝ ཨནིཊྛེ, ཏཱདིསོཝ ཨིཊྛེཏི ཨིཊྛཱནིཊྛེ ནིབྦིཀཱརེན ཏཱདཱི. ཡེསཾ པན ཀཱམཱམིསཱདཱིནཾ ཝནྟཏྟཱ རཱགཱདཱིནཾ ཙཏྟཏྟཱ ཀཱམོགྷཱདཱིནཾ ཏིཎྞཏྟཱ ཏཱདིབྷཱཝོ བྷཝེཡྻ, ཏེསཾ བྷགཝཏཱ སབྦསོ ཝནྟཱ ཙཏྟཱ ཏིཎྞཱ, ཏསྨཱ བྷགཝཱ ཝནྟཱཝཱིཏི ཏཱདཱི, ཙཏྟཱཝཱིཏི ཏཱདཱི, ཏིཎྞཱཝཱིཏི ཏཱདཱི, ཡེཧི ཨནཉྙསཱདྷཱརཎེཧི སཱིལཱདིགུཎེཧི སམནྣཱགཏཏྟཱ བྷགཝཱ ཏཱདིབྷཱཝེན ཨུཀྐཾསཔཱརམིཔྤཏྟོ ཏཾནིདྡེསོ, ཏེཧི གུཎེཧི ཡཱཐཱཝཏོ ནིདྡིསིཏབྦཏོཔི ཏཱདཱི. ཡཐཱ ཡནྟརཛྫུཡཱ ཡནྟཾ ནཱིཡཏི, ཨེཝཾ ཡཱཡ ཏཎྷཱཡ བྷཝོ ནཱིཡཏི, སཱ ‘‘བྷཝནེཏྟི བྷཝརཛྫཱུ’’ཏི ཝུཏྟཱ. ཏེནཱཧ ‘‘ཏཱཡ ཧཱི’’ཏིཨཱདི, ཀམྨཱནི ཀུསལཱདཱིནི ཝིཔཙྩཡནྟི ཨཔཙྩཡནྟི ཨེཏཱཡཱཏི ཀམྨཝིཔཱཀོ. ཨཔཙྩཡབྷཱཝོ ནཱམ ཨརིཡམགྒཙེཏནཱཡཱཏི ཨཱཧ ‘‘མགྒཙེཏནཱཡཱ’’ཏི. ཡཱཝ ན ཀིལེསཱ པཧཱིཡནྟི, ཏཱཝ ཨིམེ སཏྟཱ སཨིཎཱ ཨེཝ ཨསེརིཝིཧཱརབྷཱཝཏོཏི ཨཱཧ ‘‘ཨཎཎོ ནིཀྐིལེསོ ཛཱཏོ’’ཏི.

ཐེཡྻཔརིབྷོགོ (ཝིསུདྡྷི. ཊཱི. ༡.༩༡) ནཱམ སཱམིཔརིབྷོགཱབྷཱཝཏོ. བྷགཝཏཱཔི ཧི ཨཏྟནོ སཱསནེ སཱིལཝཏོ པཙྩཡཱ ཨནུཉྙཱཏཱ, ན དུསྶཱིལསྶ, དཱཡཀཱནཾ ¶ སཱིལཝཏོཡེཝ པརིཙྩཱགོ, ན དུསྶཱིལསྶ ཨཏྟནོ ཀཱརཱནཾ མཧཔྥལབྷཱཝསྶ པཙྩཱསཱིསནཏོ. ཨིཏི སཏྠཱརཱ ཨནནུཉྙཱཏཏྟཱ དཱཡཀེཧི ཙ ཨཔརིཙྩཏྟཏྟཱ ‘‘དུསྶཱིལསྶ པརིབྷོགོ ཐེཡྻཔརིབྷོགོ ནཱམཱ’’ཏི ཝུཏྟཾ ¶ . ཨིཎཝསེན པརིབྷོགོ ཨིཎཔརིབྷོགོ. པཊིགྒཱཧཀཏོ དཀྑིཎཱཝིསུདྡྷིཡཱ ཨབྷཱཝཏོ ཨིཎཾ གཧེཏྭཱ པརིབྷོགོ ཝིཡཱཏི ཨཏྠོ. ཡསྨཱ སེཀྑཱ བྷགཝཏོ ཨོརསཔུཏྟཱ, ཏསྨཱ ཏེ པིཏུསནྟཀཱནཾ པཙྩཡཱནཾ དཱཡཱདཱ ཧུཏྭཱ ཏེ པཙྩཡེ པརིབྷུཉྫནྟཱིཏི ཏེསཾ པརིབྷོགོ དཱཡཛྫཔརིབྷོགོ ནཱམ. ཀིཾ པན ཏེ བྷགཝཏོ པཙྩཡེ པརིབྷུཉྫནྟི, ཨུདཱཧུ གིཧཱིཧི དིནྣནྟི? གིཧཱིཧི དིནྣཱཔི ཏེ བྷགཝཏཱ ཨནུཉྙཱཏཏྟཱ བྷགཝཏོ སནྟཀཱ ཧོནྟི ཨནནུཉྙཱཏེསུ སབྦེན སབྦཾ པརིབྷོགཱབྷཱཝཏོ ཨནུཉྙཱཏེསུཡེཝ པརིབྷོགསམྦྷཝཏོ. དྷམྨདཱཡཱདསུཏྟཉྩེཏྠ (མ. ནི. ༡.༢༩ ཨཱདཡོ) སཱདྷཀཾ.

ཨཝཱིཏརཱགཱནཾ ཏཎྷཱཔརཝསཏཱཡ པཙྩཡཔརིབྷོགེ སཱམིབྷཱཝོ ནཏྠི, ཏདབྷཱཝེན ཝཱིཏརཱགཱནཾ ཏཏྠ སཱམིབྷཱཝོ ཡཐཱརུཙི པརིབྷོགསམྦྷཝཏོ. ཏཐཱ ཧི ཏེ པཊིཀཱུལམྤི ཨཔྤཊིཀཱུལཱཀཱརེན, ཨཔྤཊིཀཱུལམྤི པཊིཀཱུལཱཀཱརེན ཏདུབྷཡཾ ཝིཝཛྫེཏྭཱ ཨུཔེཀྑཱཀཱརེན ཙ པཙྩཡེ པརིབྷུཉྫནྟི, དཱཡཀཱནཉྩ མནོརཐཾ པརིཔཱུརེནྟི. སེསམེཏྠ ཡཾ ཝཏྟབྦཾ, ཏཾ ཝིསུདྡྷིམགྒེ, ཏཾསཾཝཎྞནཱསུ ཙ ཝུཏྟནཡེནེཝ ཝེདིཏབྦཾ. ཀིལེསཨིཎཱནཾ ཨབྷཱཝཾ སནྡྷཱཡ ‘‘ཨཎཎོ’’ཏི ཝུཏྟཾ, ན པཙྩཝེཀྑིཏཔརིབྷོགམཏྟཾ. ཏེནཱཧ ཨཱཡསྨཱ ཙ བཱཀུལོ – ‘‘སཏྟཱཧམེཝ ཁོ ཨཧཾ, ཨཱཝུསོ, སརཎོ རཊྛཔིཎྜཾ བྷུཉྫི’’ནྟི (མ. ནི. ༣.༢༡༡).

ཝཏྠུཀཱམཀིལེསཀཱམེཧི ཏཎྷཱཡ པཝཏྟིཨཱཀཱརཾ པཊིཙྩ ཨཏྠི རམཎཝོཧཱརོཏི ཨཱཧ – ‘‘དུཝིདྷེསུཔི ཀཱམེསུ ཏཎྷཱརཏིསནྠཝ’’ནྟི. མནྟིཏནྟི ཀཐིཏཾ. ཨུཔྤནྣེཧི སཏྠུཔཊིཉྙེཧི. སཾཝིབྷཏྟཱཏི ཀུསལཱདིཝསེན ཁནྡྷཱདཱིཧི ཨཱཀཱརེཧི ཝིབྷཏྟཱ. སུནྡརཾ ཨཱགམནནྟི སྭཱགཏཾ. ཏཏོ ཨེཝ ན ཀུཙྪིཏཾ ཨཱགཏཾ. སོལ༹སཝིདྷཀིཙྩསྶ པརིཡོསིཏཏྟཱ ཨཱཧ ‘‘ཏཾ སབྦཾ མཡཱ ཀཏ’’ནྟི. མགྒཔཉྙཱཡམེཝ ཏཏིཡཝིཛྫཱསམཉྙཱཏི ཨཱཧ – ‘‘ཏཱིཧི ཝིཛྫཱཧི ནཝཧི ཙ ལོཀུཏྟརདྷམྨེཧཱི’’ཏི.

ཨངྒུལིམཱལསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༧. པིཡཛཱཏིཀསུཏྟཝཎྞནཱ

༣༥༣. པཀཏིནིཡཱམེནཱཏི ¶ ¶ ཡཐཱ སོཀུཔྤཏྟིཏོ པུབྦེ ཨིཏི ཀཏྟབྦེསུ ཨསམྨོཧཝསེན ཙིཏྟཾ པཀྑནྡཏི, ཏཱནི ཙསྶ ཨུཔཊྛཧནྟི, ན ཨེཝཾ སོཀསྶ ཙིཏྟསངྐོཙསབྷཱཝཏོ. ཏེན ཝུཏྟཾ ‘‘པཀཏིནིཡཱམེན པན ན པཊིབྷནྟཱི’’ཏི. ཀེཙི པན ‘‘སཱམནྟཱ ཀཏིཔཡེ ན ཀུཊུམྦཾ སནྡྷཱརེཏི. ཏེནཱཧ ‘ན སབྦེན སབྦཾ པཊིབྷནྟཱི’ཏི’’ ཝདནྟི. ཨེཏྠཱཏི དུཏིཡཔདེ. ཨནེཀཏྠཏྟཱ དྷཱཏཱུནཾ ‘‘ན པཊིབྷཱཏཱི’’ཏི པདསྶ ‘‘ན རུཙྩཏཱི’’ཏི ཨཏྠམཱཧ. ན པཊིབྷཱཏཱིཏི ཝཱ བྷུཉྫིཏུཀཱམཏཱཙིཏྟཾ ན ཨུཔཊྛིཏནྟི ཨཏྠོ. པཏིཊྛིཏོཀཱསནྟི ཨིནྡྲིཡཱཝིཊྛཊྛཱནཾ ཝདཏི. པིཡཱཡིཏབྦཏོ པིཡོ ཛཱཏི ཨུཔྤཏྟིཊྛཱནཾ ཨེཏེསནྟི པིཡཛཱཏིཀཱ. པིཡོ པབྷུཏི ཨེཏེསནྟི པིཡཔྤབྷུཏིཀཱཏི ཝཏྟབྦེ, ཨུ-ཀཱརསྶ ཝ-ཀཱརཾ, ཏ-ཀཱརསྶ ཙ ལོཔཾ ཀཏྭཱ ‘‘པིཡཔྤབྷཱཝིཀཱ’’ཏི ཝུཏྟཾ. ཏེནཱཧ ‘‘པིཡཏོ པབྷཝནྟཱི’’ཏི.

༣༥༥. པར-སདྡེན སམཱནཏྠཾ ཨཛ྄ཛྷཏྟིཀབྷཱཝནིསེདྷནཏྠཾ ‘‘པིརེ’’ཏི པདནྟི ཨཱཧ ‘‘ཨམྷཱཀཾ པརེ’’ཏི. པིརེཏི ཝཱ ‘‘པརཏོ’’ཏི ཨིམིནཱ སམཱནཏྠཾ ནིཔཱཏཔདནྟི ཨཱཧ ‘‘ཙར པིརེཏི པརཏོ གཙྪཱ’’ཏི.

༣༥༦. དྭིདྷཱ ཚེཏྭཱཏི ཨེཏྠ ཡདི ཨིཏྠཱི ཏསྶ པུརིསསྶ པིཡཱ, ཀཐཾ དྭིདྷཱ ཚིནྡཏཱིཏི ཨཱཧ ‘‘ཡདི ཧཱི’’ཏིཨཱདི.

༣༥༧. ཀཐཾ ཀཐེཡྻནྟི ཡཐཱ བྷགཝཱ ཨེཏསྶ བྲཱཧྨཎསྶ ཀཐེསི, སོ ཙ མེ ཀཐེསི, ཏཐཱ ཙཱཧཾ ཀཐེཡྻཾ. མརཎཝསེན ཝིཔརིཎཱམོ ཨཏྟབྷཱཝསྶ པརིཝཏྟཏྟཱ. པལཱཡིཏྭཱ གམནཝསེན ཨཉྙཐཱབྷཱཝོ མིཏྟསནྠཝསྶ སམཱགམསྶ ཙ ཨཉྙཐཱབྷཱུཏཏྟཱ.

ཚཌྜིཏབྷཱཝེནཱཏི པརིཝཏྟིཏབྷཱཝེན. ཧཏྠགམནཝསེན ཨཉྙཐཱབྷཱཝོ པུབྦེ སཝསེ ཝཏྟིཏཱནཾ ཨིདཱནི ཝསེ ཨཝཏྟནབྷཱཝེན.

ཨཱཙམེཧཱིཏི ¶ ཨཱཙམནཾ མུཁཝིཀྑཱལནཾ ཀཱརེཧི. ཡསྨཱ མུཁཾ ཝིཀྑཱལེནྟཱ ཧི ཧཏྠཔཱདེ དྷོཝིཏྭཱ ཝིཀྑཱལེནྟི, ཏསྨཱ ‘‘ཨཱཙམིཏྭཱ’’ཏི ཝཏྭཱ པཙྪཱཔི ཏསྶ ཨཏྠཾ དསྶེནྟོ ‘‘མུཁཾ ཝིཀྑཱལེཏྭཱ’’ཏི ཨཱཧ. སེསཾ སུཝིཉྙེཡྻམེཝ.

པིཡཛཱཏིཀསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༨. བཱཧིཏིཀསུཏྟཝཎྞནཱ

༣༥༩. སཱཝཛྫཏཱཡ ¶ ¶ ཨུཔཱརམྦྷཾ ཨརཧཏཱིཏི ཨོཔཱརམྦྷོ. ཏེནཱཧ ‘‘དོསཾ ཨཱརོཔནཱརཧོ’’ཏི. བཱལཱ ཨུཔཱརམྦྷཝཏྠུམཉྙཾ ཨམཱུལཀམྤི ནཾ ཨཱརོཔེནྟཱ ཨུགྒྷོསེནྟི, ཏསྨཱ ཏེ ཨནཱམསིཏྭཱ ‘‘ཝིཉྙཱུཧཱི’’ཏི ཨིདཾ པདཾ གཧེཏྭཱ པཉྷེན ཉཱཏུཾ ཨིཙྪིཏེན ཨཏྠེན ཨུཔཱརམྦྷཱདཱིནཾ ཨུཔརི ཨུཏྟརཾ པརིཔཱུརེཏུཾ ནཱསཀྑིམྷཱ. ཏཾ ཀཱརཎནྟི ཏཾ ཨུཔྤཏྟིཀཱརཎཾ. ཡདི ཧི མཡཱ ‘‘ཝིཉྙཱུཧཱི’’ཏི པདཾ པཀྑིཔིཏྭཱ ཝུཏྟཾ བྷཝེཡྻ, པཉྷཱ མེ པརིཔུཎྞཱ བྷཝེཡྻ, ན པན ཝུཏྟཱ. ཨིདཱནི པན ཏཾ ཀཱརཎཾ ཨུཏྟརཾ ཨཱཡསྨཏཱ ཨཱནནྡེན ‘‘ཝིཉྙཱུཧཱི’’ཏི ཨེཝཾ ཝདནྟེན པརིཔཱུརིཏཾ.

༣༦༠. ཀོསལླཔཊིཔཀྑཏོ ཨཀོསལླཾ ཝུཙྩཏི ཨཝིཛྫཱ, ཏཾསམུཊྛཱནཏོ ཨཀོསལླསམྦྷཱུཏོ. ཨཝཛྫཾ ཝུཙྩཏི གརཧིཏབྦཾ, སཧ ཨཝཛྫེཧཱིཏི སཱཝཛྫོ, གཱརཡ྄ཧོ. རཱགཱདིདོསེཧི སདོསོ. ཏེཧི ཨེཝ སབྱཱབཛ྄ཛྷོ, ཏཏོ ཨེཝ སམྤཏི ཨཱཡཏིཉྩ སདུཀྑོ. སབྱཱབཛ྄ཛྷཱདིཀོ ནིསྶནྡཝིཔཱཀོ.

ཏཐཱ ཨཏྠོ ཝུཏྟོ བྷཝེཡྻཱཏི པུཙྪཱསབྷཱགེནཔི ཨཏྠོ ཝུཏྟོ བྷཝེཡྻ, པུཙྪནྟསྶ པན ན ཏཱཝ ཙིཏྟཱརཱདྷནཾ. ཏེནཱཧ – ‘‘ཨེཝཾ བྱཱཀརཎཾ པན ན བྷཱརིཡ’’ནྟི, གརུཀརཎཾ ན ཧོཏི ཝིསཱརཛྫཾ ན སིཡཱཏི ཨདྷིཔྤཱཡོ. ཏེནཱཧ – ‘‘ཨཔྤཧཱིནཨཀུསལོཔི ཧི པཧཱནཾ ཝཎྞེཡྻཱ’’ཏི. ཨེཝརཱུཔོ པན ཡཐཱཀཱརཱི ཏཐཱཝཱདཱི ན ཧོཏི, ན ཨེཝཾ བྷགཝཱཏི ཨཱཧ ‘‘བྷགཝཱ’’ཏིཨཱདི. ཨེཝཾ བྱཱཀཱསཱིཏི ‘‘སབྦཱཀུསལདྷམྨཔཧཱིནོ ཁོ, མཧཱརཱཛ, ཏཐཱགཏོ’’ཏི ཨེཝཾ བྱཱཀཱསི. སུཀྐཔཀྑེཔི ཨེསེཝ ནཡོཏི ཨིམིནཱ ‘‘སབྦེསཾཡེཝ ཀུསལཱནཾ དྷམྨཱནཾ ཨུཔསམྤདཾ ཝཎྞེཏཱི’’ཏི ཝུཏྟེ ཡཐཱ པུཙྪཱ, ཏཐཱ ཨཏྠོ ཝུཏྟོ བྷཝེཡྻ, ཨེཝཾ བྱཱཀརཎཾ པན ན བྷཱརིཡཾ, ཨསམྤཱདིཏཀུསལདྷམྨོཔི ཨུཔསམྤདཾ ཝཎྞེཡྻ. བྷགཝཱ པན སམྨདེཝ སམྤཱདིཏཀུསལཏྟཱ ཡཐཱཀཱརཱི ཏཐཱཝཱདཱིཏི དསྶེཏུཾ ‘‘ཨེཝཾ བྱཱཀཱསཱི’’ཏི ཨིམམཏྠཾ དསྶེཏི. སེསཾ སུཝིཉྙེཡྻམེཝ.

བཱཧིཏིཀསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༩. དྷམྨཙེཏིཡསུཏྟཝཎྞནཱ

༣༦༤. མེདཝཎྞཱ ¶ ¶ ཨུལུ༹པཝཎྞཱ ཙ ཏཏྠ ཏཏྠ པཱསཱཎཱ ཨུསྶནྣཱ ཨཧེསུནྟི མེདཱལུ༹པནྟི གཱམསྶ སམཉྙཱ ཛཱཏཱ. ཨུལུ༹པཝཎྞཱཏི ཙནྡསམཱནཝཎྞཏཱཡ མེདཔཱསཱཎཱ ཝུཏྟཱཏི ཀེཙི. ཨཊྛཀཐཱཡཾ པན ‘‘མེདཝཎྞཱ པཱསཱཎཱ ཀིརེཏྠ ཨུསྶནྣཱ ཨཧེསུ’’ནྟི ཨིདཾ ཝུཏྟཾ. ཨསྶཱཏི སེནཱཔཏིསྶ. ཀཐཱསམུཊྛཱཔནཏྠནྟི མལླིཀཱཡ སོཀཝིནོདནདྷམྨཀཐཱསམུཊྛཱཔནཏྠཾ.

རཉྙཱཏི པསེནདཱིཀོསལརཉྙཱ. མཧཙྩཱཏི མཧཏིཡཱ. པདཝིཔལླཱསེན ཙེཏཾ ཝུཏྟཾ. པསཱདམརཧནྟཱིཏི པཱསཱདིཀཱནི. ཏེནཱཧ ‘‘སཧ རཉྫནཀཱནཱི’’ཏི. ཡཱནི པན པཱསཱདིཀཱནི, ཏཱནི པསྶིཏུཾ ཡུཏྟཱནི. པཱསཱདིཀཱནཱིཏི ཝཱ སདྡཧནསཧིཏཱནི. ཏེནཱཧ ‘‘པསཱདཛནཀཱནཱི’’ཏི. ‘‘ཨཔྤཱབཱདྷ’’ནྟི ཨཱདཱིསུ ཝིཡ ཨཔྤསདྡོ ཨབྷཱཝཏྠོཏི ཨཱཧ ‘‘ནིསྶདྡཱནཱི’’ཏི. ཨནིཡམཏྠཝཱཙཱི ཡ-སདྡོ ཨནིཡམཱཀཱརཝཱཙཀོཔི ཧོཏཱིཏི ‘‘ཡཏྠཱ’’ཏི པདསྶ ‘‘ཡཱདིསེསཱུ’’ཏིཨཱདིམཱཧ. ཏཐཱ ཧི ཨངྒུལིམཱལསུཏྟེ (མ. ནི. ཨཊྛ. ༢.༣༤༧ ཨཱདཡོ) ‘‘ཡསྶ ཁོ’’ཏི པདསྶ ‘‘ཡཱདིསསྶ ཁོ’’ཏི ཨཏྠོ ཝུཏྟོ.

༣༦༦. པཊིཙྪདནྟི པཊིཙྪཱདཀཾ. རཱཛཀཀུདྷབྷཎྜཱནཱིཏི རཱཛབྷཎྜབྷཱུཏཱནི. རཧཱཡཏཱིཏི རཧོ ཀརོཏི, མཾ ཨཛ྄ཛྷེསཏཱིཏི ཨཏྠོ.

༣༦༧. ཡཐཱསབྷཱཝཏོ ཉེཡྻཾ དྷཱརེཏི ཨཝདྷཱརེཏཱིཏི དྷམྨོ, ཉཱཎནྟི ཨཱཧ ‘‘པཙྩཀྑཉཱཎསངྑཱཏསྶ དྷམྨསྶཱ’’ཏི. ཨནུནཡོཏི ཨནུགཙྪནཀོ. དིཊྛེན ཧི ཨདིཊྛསྶ ཨནུམཱནཾ. ཏེནཱཧ ‘‘ཨནུམཱནཾ ཨནུབུདྡྷཱི’’ཏི. ཨཱཔཱཎཀོཊིཀནྟི ཡཱཝ པཱཎཀོཊི, ཏཱཝ ཛཱིཝིཏཔརིཡོསཱནཾ. ཨེཏནྟི དྷམྨནྭཡསངྑཱཏཾ ཨནུམཱནཾ. ཨེཝནྟི ‘‘ཨིདྷ པནཱཧ’’ནྟི ཝུཏྟཔྤཀཱརེན.

༣༦༩. ཙཀྑུཾ ཨབནྡྷནྟེ ཝིཡཱཏི ཨཔཱསཱདིཀཏཱཡ པསྶནྟཱནཾ ཙཀྑུཾ ཨཏྟནི ཨབནྡྷནྟེ ཝིཡ. ཀུལསནྟཱནཱནུབནྡྷོ རོགོ ཀུལརོགོ. ཨུལཱ༹རནྟི སཱནུབྷཱཝཾ. ཡོ ཧི ཨཱནུབྷཱཝསམྤནྣོ, ཏཾ ‘‘མཧེསཀྑ’’ནྟི ཝདནྟི. ཨརཧཏྟཾ གཎྷནྟོཏི ཨུཀྐཊྛནིདྡེསོཡཾ, ཧེཊྛིམཕལཱནི གཎྷནྟོཔི.

༣༧༣. ཛཱིཝིཀཱ ¶ ¶ ཛཱིཝིཏཝུཏྟི.

༣༧༤. དྷམྨཾ ཙེཏེཏི སཾཝེདེཏི ཨེཏེཧཱིཏི དྷམྨཙེཏིཡཱནི, དྷམྨསྶ པཱུཛཱཝཙནཱནི. ནནུ ཙེཏཱནི བུདྡྷསངྒྷགུཎདཱིཔནཱནིཔི སནྟི? ཀཐཾ ‘‘དྷམྨཙེཏིཡཱནཱིཏི དྷམྨསྶ ཙིཏྟཱིཀཱརཝཙནཱནཱི’’ཏི ཝུཏྟནྟི ཨཱཧ ‘‘ཏཱིསུ ཧཱི’’ཏིཨཱདི. ཏཏྠ ཡསྨཱ བུདྡྷརཏནམཱུལཀཱནི སེསརཏནཱནི ཏསྶ ཝསེན ལདྡྷབྦཏོ. ཀོསལརཉྙཱ ཙེཏྠ བུདྡྷགཱརཝེན དྷམྨསངྒྷགཱརཝཾ པཝེདིཏཾ, ཏསྨཱ ‘‘བྷགཝཏི ཙིཏྟཱིཀཱརེ ཀཏེ དྷམྨོཔི ཀཏོཝ ཧོཏཱི’’ཏི ཝུཏྟཾ. ཡསྨཱ ཙ རཏནཏྟཡཔསཱདཔུབྦིཀཱ སཱསནེ སམྨཱཔཊིཔཏྟི, ཏསྨཱ ཝུཏྟཾ – ‘‘ཨཱདིབྲཧྨཙརིཡཀཱནཱིཏི མགྒབྲཧྨཙརིཡསྶ ཨཱདིབྷཱུཏཱནཱི’’ཏི. སེསཾ སུཝིཉྙེཡྻམེཝ.

དྷམྨཙེཏིཡསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༡༠. ཀཎྞཀཏྠལསུཏྟཝཎྞནཱ

༣༧༥. ཨནནྟརསུཏྟེ ¶ ཝུཏྟཀརཎཱིཡེནེཝཱཏི ‘‘པཱསཱདེ ཝཱ ནཱཊཀེསུ ཝཱ ཙིཏྟསྶཱདཾ ཨལབྷམཱནོ ཏཏྠ ཏཏྠ ཝིཙརིཏུཾ ཨཱརདྡྷོ’’ཏི ཝུཏྟཀརཎཱིཡེན. ཨཔྤདུཊྛཔདོསཱིནཉྷི ཨེཝཾ ཧོཏཱིཏི.

༣༧༦. པུཙྪིཏོཏི ‘‘ཨཉྙཾ དཱུཏཾ ནཱལཏྠུ’’ནྟི པུཙྪིཏོ. སོཏི རཱཛཱ. ཏཱསཾ ཝནྡནཱ སཙེ ཨུཏྟརཀཱལཾ, ཨཏྟནོ ཨཱགམནཀཱརཎཾ ཀཐེསྶཏི.

༣༧༨. ཨེཀཱཝཛྫནེནཱཏི ཨེཀཝཱིཐིཛཝནེན. ཏེན ཨེཀཙིཏྟཾ ཏཱཝ ཏིཊྛཏུ, ཨེཀཙིཏྟཝཱིཐིཡཱཔི སབྦཾ ཛཱནིཏུཾ ན སཀྐཱཏི དསྶེཏི. ‘‘ཨིདཾ ནཱམ ཨཏཱིཏཾ ཛཱནིསྶཱམཱི’’ཏི ཨནིཡམེཏྭཱ ཨཱཝཛྫཏོ ཡཾ ཀིཉྩི ཨཏཱིཏཾ ཛཱནཱཏི, ནིཡམིཏེ པན ནིཡམིཏམེཝཱཏི ཨཱཧ – ‘‘ཨེཀེན ཧི…པེ… ཨེཀདེསམེཝ ཛཱནཱཏཱི’’ཏི. ཏེན ཙིཏྟེནཱཏི ‘‘ཨཏཱིཏཾ སབྦཾ ཛཱནིསྶཱམཱི’’ཏི ཨེཝཾ པཝཏྟཙིཏྟེན. ཨིཏརེསཱུཏི ཨནཱགཏཔཙྩུཔྤནྣེསུ. ཀཱརཎཛཱཏིཀནྟི ཡུཏྟིསབྷཱཝཾ, ཡུཏྟིཡཱ ཡུཏྟནྟི ཨཏྠོ. སམྤརཱཡགུཎནྟི སམྤརཱཡེ ཀཏཀམྨསྶ ཝིསེསཾ.

༣༧༩. ལོཀུཏྟརམིསྶཀཱནི ཀཐིཏཱནི བོདྷིརཱཛཀུམཱརསུཏྟེ ཝིཡ ལོཀིཡཱ ཙེཝ ལོཀུཏྟརཱ ཙ. ཡཐཱལཱབྷཝསེན ཙེཏྠ པདྷཱནིཡངྒཱནཾ ¶ ལོཀུཏྟརགྒཧཎཾ ཝེདིཏབྦཾ. པཙྩེཀཾ ཨེཝ ནེསཉྩ པདྷཱནིཡངྒཏཱ དཊྛབྦཱ ཡཐཱ ‘‘ཨཊྛཝིམོཀྑཱ སནྡིསྶནྟི ལོཀུཏྟརམིསྶཀཱ’’ཏི. ལོཀུཏྟརཱནེཝཱཏི ཙེཏྠ ཡཾ ཝཏྟབྦཾ, ཏཾ པརཏོ ཨཱཝི བྷཝིསྶཏི. པདྷཱནནཱནཏྟནྟི པདཧནནཱནཏྟཾ, བྷཱཝནཱནུཡོགཝིསེསནྟི ཨཏྠོ. སངྑཱརེ པརིམདྡིཏྭཱ པཊིཔཀྑདྷམྨེ ཨེཀདེསཏོ པཛཧིཏྭཱ ཋིཏསྶ བྷཱཝནཱནུཡོགོ སབྦེན སབྦཾ ཨཔརིམདྡིཏསངྑཱརསྶ ཨཔྤཧཱིནཔཊིཔཀྑསྶ བྷཱཝནཱནུཡོགཏོ སུཁུམོ ཝིསདོཝ ཧོཏི, སཙྩཱབྷིསམཡེན སནྟཱནསྶ ཨཱཧིཏཝིསེསཏྟཱཏི ཨཱཧ – ‘‘ཨཉྙཱདིསམེཝ ཧི པུཐུཛྫནསྶ པདྷཱནཾ, ཨཉྙཱདིསཾ སོཏཱཔནྣསྶཱ’’ཏིཨཱདི. ཨཡཉྩ ཝིསེསོ ན ཀེཝལཾ ཨནརིཡཨརིཡཔུགྒལཏོ ཨེཝ, ཨཐ ཁོ ཨརིཡེསུཔི སེཀྑཱདིཝིསེསཏོཔི ལབྦྷཏི ཨབྷིསངྑཱརཝིསེསཏོ ཨབྷིནཱིཧཱརཏོ ཙ ཨིཛ྄ཛྷནཏོཏི དསྶེནྟོ ‘‘ཨཉྙཱདིསཾ སཀདཱགཱམིནོ’’ཏིཨཱདིམཱཧ. ན པཱཔུཎཱཏཱིཏི ཡསྨཱ པུཐུཛྫནོ སབྦཐཱཝ པདྷཱནཾ པདཧནྟོ སོཏཱཔཏྟིམགྒཾ ¶ ཨདྷིགཙྪཏི, སོཏཱཔནྣོ ཙ སཀདཱགཱམིམགྒནྟི ཧེཊྛིམཾ ཨུཔརིམཏོ ཨོལཱ༹རིཀཾ, ཨུཔརིམཉྩ ཨིཏརཏོ སུཁུམཾ ཏེན པཧཱཏུཾ ཨསཀྐུཎེཡྻསྶ པཛཧནཏོ, ཨིཏི ཨདྷིགནྟབྦཝིསེསེན ཙ ཨདྷིགམཔཊིཔདཱཡ སཎྷསུཁུམཏཱ ཏིཀྑཝིསདཏཱ ཙ ཝིཉྙཱཡཏཱིཏི ཨཱཧ – ‘‘པུཐུཛྫནསྶ པདྷཱནཾ སོཏཱཔནྣསྶ པདྷཱནཾ ན པཱཔུཎཱཏཱི’’ཏིཨཱདི.

ཨཀཱུཊཀརཎནྟི ཨཝཉྩནཀིརིཡཾ. ཨནཝཙྪིནྡནནྟི ཨཏིཡཱནཾ. ཨཝིཉྪནཾ ན ཨཱཀཌྜྷནཾ, ནིཡུཏྟཏཾ ཝིནིཝེཋེཏྭཱ སམནྟཱ ཝིཔརིཝཏྟིཏྭཱ སམདྷཱརཱཡ ཚཌྜནཾ ཝཱ. ཏསྶ ཀཱརཎཾ ཏཾཀཱརཎཾ, ཏཾ ཀཱརཎནྟི ཝཱ ཏཾ ཀིརིཡཾ ཏཾ ཨདྷིཀཱརཾ. དནྟེཧི གནྟབྦབྷཱུམིནྟི དནྟེཧི པཏྟབྦཊྛཱནཾ, པཏྟབྦཝཏྠུཾ ཝཱ. ཙཏྟཱརོཔི ཨསྶདྡྷཱ ནཱམ ཨུཔརིམཨུཔརིམསདྡྷཱཡ ཨབྷཱཝཏོ. ཡེན ཧི ཡཾ ཨཔྤཏྟཾ, ཏསྶ ཏཾ ནཏྠི. ཨརིཡསཱཝཀསྶ…པེ… ནཏྠི པཋམམགྒེནེཝ མཱཡཱསཱཋེཡྻཱནཾ པཧཱཏབྦཏྟཱ. ཏེནེཝཱཏི སམྨདེཝ ཝིརུདྡྷཔཀྑཱནཾ སདྡྷཱདཱིནཾ ཨིདྷཱདྷིཔྤེཏཏྟཱ. ཡདི ཨེཝཾ ཀཐཾ མིསྶཀཀཐཱཏི ཨཱཧ ‘‘ཨསྶཁལུ༹ངྐསུཏྟནྟེ པནཱ’’ཏིཨཱདི. ཙཏྟཱརོཝ ཧོནྟི པུཐུཛྫནཱདིཝསེན.

ཨོཔམྨསཾསནྡནེ ཨདནྟཧཏྠིཨཱདཡོ ཝིཡཱཏིཨཱདིནཱ ཀཎྷཔཀྑེ, ཡཐཱ པན དནྟཧཏྠིཨཱདཡོཏིཨཱདིནཱ སུཀྐཔཀྑེ ཙ སཱདྷཱརཎཏོ ཨེཀཛ྄ཛྷཾ ¶ ཀཏྭཱ ཝུཏྟཾ, ཨསཱདྷཱརཎཏོ བྷིནྡིཏྭཱ དསྶེཏུཾ ‘‘ཨིདཾ ཝུཏྟཾ ཧོཏཱི’’ཏིཨཱདི ཝུཏྟཾ.

༣༨༠. སམྨཔྤདྷཱནཱ ནིབྦིསིཊྛཝཱིརིཡཱ. ཏེནཱཧ – ‘‘ན ཀིཉྩི ནཱནཱཀརཎཾ ཝདཱམི, ཡདིདཾ ཝིམུཏྟིཡཱ ཝིམུཏྟི’’ནྟི. ན ཧི སུཀྑཝིཔསྶཀཏེཝིཛྫཚལ༹བྷིཉྙཱནཾ ཝིམུཏྟིཡཱ ནཱནཱཀརཎཾ ཨཏྠི. ཏེན ཝུཏྟཾ ‘‘ཡཾ ཨེཀསྶཱ’’ཏིཨཱདི. ཀིཾ ཏྭཾ ན ཛཱནཱསཱིཏི སམྦནྡྷོ. ཨཱགཙྪནྟཱིཏི ཨུཔྤཛྫནཝསེན ཨཱགཙྪནྟི. ནཱགཙྪནྟཱིཏི ཨེཏྠཱཔི ཨེསེཝ ནཡོ. ཨིདཾ པུཙྪནྟོཏི ཨིདཾ པུཙྪཱམཱིཏི དསྶེནྟོ. ཨཔྤཧཱིནཙེཏསིཀདུཀྑཱ ཨནདྷིགཏཨནཱགཱམིཏཱ. ཏེནཱཧ ‘‘ཨུཔཔཏྟིཝསེན ཨཱགནྟཱརོ’’ཏི. སམུཙྪིནྣདུཀྑཱཏི སམུགྒྷཱཊིཏཙེཏསིཀདུཀྑཱ.

༣༨༡. ཏམྷཱ ཋཱནཱཏི ཏཏོ ཡཐཱདྷིགཏཨིསྶརིཡཊྛཱནཏོ. པུན ཏམྷཱ ཋཱནཱཏི ཏཏོ དུགྒཏཱ. སམྤནྣཀཱམགུཎནྟི ཨུལཱ༹རཀཱམགུཎསམནྣཱགཏཾ.

ཏཏྠཱཏི ཀཱམདེཝལོཀེ. ཋཱནབྷཱཝཏོཏི ཨརཧཏྟཉྩེ ཨདྷིགཏཾ, ཏཱཝདེཝ པརིནིབྦཱནཏོ. ཨུཔརིདེཝེ ¶ ཙཱཏི ཨུཔརཱུཔརི བྷཱུམིཝཱསེ དེཝེ ཙ, ཙཀྑུཝིཉྙཱཎདསྶནེནཔི དསྶནཱཡ ནཔྤཧོནྟཱིཏི ཡོཛནཱ.

༣༨༢. ཝུཏྟནཡེནེཝཱཏི དེཝཔུཙྪཱཡ ཝུཏྟེནེཝ ནཡེན. སཱ ཀིར ཀཐཱཏི ‘‘ནཏྠི སོ སམཎོ ཝཱ བྲཱཧྨཎོ ཝཱ, ཡོ སཀིདེཝ སབྦཾ ནེཡྻ’’ནྟི ཀཐཱ. ཏེཏི ཝིཊཊཱུབྷསཉྫཡཱ. ཨིམསྨིཾཡེཝ ཋཱནེཏི ཨིམསྨིཾ མིགདཱཡེཡེཝ. སེསཾ སུཝིཉྙེཡྻམེཝ.

ཀཎྞཀཏྠལསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

ནིཊྛིཏཱ ཙ རཱཛཝགྒཝཎྞནཱ.

༥. བྲཱཧྨཎཝགྒོ

༡. བྲཧྨཱཡུསུཏྟཝཎྞནཱ

༣༨༣. ‘‘མཧཱསཏྟོ ¶ ¶ མཧིདྡྷིཀོ མཧཱནུབྷཱཝོ’’ཏིཨཱདཱིསུ (མཧཱཝ. ༣༨) ཨུལཱ༹རཏཱ ཝིསཡོ, ‘‘མཧཱཛནཀཱཡོ སནྣིཔཏཱི’’ཏིཨཱདཱིསུ སམྦཧུལབྷཱཝཝིསཡོ, ཨིདྷ པན ཏདུབྷཡམྤིསྶ ཨཏྠོཏི ‘‘མཧཏཱཏི གུཎམཧཏྟེནཔི མཧཏཱ’’ཏིཨཱདི ཝུཏྟཾ. ཨཔྤིཙྪཏཱདཱིཏི ཨཱདི-སདྡེན སནྟུཊྛིསལླེཁཔཝིཝེཀཨསཾསགྒཝཱིརིཡཱརམྦྷཱདཱིནཾ སངྒཧོ. དིཊྛིསཱིལསཱམཉྙསངྒྷཱཏསངྑཱཏེནཱཏི ཨེཏྠ ‘‘ནིཡཏོ སམྦོདྷིཔརཱཡཎོ’’ (སཾ. ནི. ༢.༤༡; ༣.༩༩༨, ༡༠༠༤) – ‘‘ཨཊྛཱནམེཏཾ, བྷིཀྑཝེ, ཨནཝཀཱསོ, ཡཾ དིཊྛིསམྤནྣོ པུགྒལོ སཉྩིཙྩ པཱཎཾ ཛཱིཝིཏཱ ཝོརོཔེཡྻཱཏི ནེཏཾ ཋཱནཾ ཝིཛྫཏཱི’’ཏིཨཱདིཝཙནཏོ དིཊྛིསཱིལཱནཾ ནིཡཏསབྷཱཝཏྟཱ སོཏཱཔནྣཱཔི ཨཉྙམཉྙཾ དིཊྛིསཱིལསཱམཉྙེན སཾཧཏཱ, པགེཝ སཀདཱགཱམིཨཱདཡོ. ‘‘ཏཐཱརཱུཔཱཡ དིཊྛིཡཱ དིཊྛིསཱམཉྙགཏོ ཝིཧརཏི (དཱི. ནི. ༣.༣༢༤, ༣༥༦; མ. ནི. ༡.༤༩༢; ༣.༥༤; ཨ. ནི. ༦.༡༡; པརི. ༢༧༤) ཏཐཱརཱུཔེཧི སཱིལེཧི སཱིལསཱམཉྙགཏོ ཝིཧརཏཱི’’ཏི (དཱི. ནི. ༣.༣༢༤; མ. ནི. ༡.༤༩༢; ༣.༥༤; ཨ. ནི. ༦.༡༢; པརི. ༢༧༤) ཝཙནཏོ པུཐུཛྫནཱནམྤི དིཊྛིསཱིལསཱམཉྙེན སཾཧཏབྷཱཝོ ལབྦྷཏིཡེཝ.

ཨོཊྛཔཧཏཀརཎཝསེན ཨཏྠཝིབྷཱགཝསེན. སནིགྷཎྜུཀེཊུབྷཱནནྟི ཨེཏྠ ནིགྷཎྜཱུཏི ཝཙནཱིཡཝཱཙཀབྷཱཝེན ཨཏྠཾ སདྡཉྩ ཁཎྜཏི ཝིབྷཛྫ དསྶེཏཱིཏི ནིཁཎྜུ. སོ ཨེཝ ཨིདྷ ཁ-ཀཱརསྶ གྷ-ཀཱརཾ ཀཏྭཱ ‘‘ནིགྷཎྜཱུ’’ཏི ཝུཏྟོ. ཀིཊཏི གམེཏི ཀིརིཡཱདིཝིབྷཱགཾ, ཏཾ ཝཱ ཨནཝསེསཔརིཡཱདཱནཏོ གམེནྟོ པཱུརེཏཱིཏི ཀེཊུབྷཾ. ཝེཝཙནཔྤཀཱསཀནྟི པརིཡཱཡསདྡདཱིཔཀཾ, ཨེཀེཀསྶ ཨཏྠསྶ ཨནེཀཔརིཡཱཡཝཙནཝིབྷཱཝཀནྟི ཨཏྠོ. ནིདསྶནམཏྟཉྩེཏཾ ཨནེཀེསམྤི ཨཏྠཱནཾ ཨེཀསདྡཝཙནཱིཡཏཱཝིབྷཱཝནཝསེནཔི ཏསྶ གནྠསྶ པཝཏྟཏྟཱ. ཝཙཱིབྷེདཱདིལཀྑཎཱ ཀིརིཡཱ ཀཔྤཱིཡཏི ཨེཏེནཱཏི ཀིརིཡཱཀཔྤོ, སོ པན ཝཎྞཔདསམྦནྡྷཔདཏྠཝིབྷཱགཏོ བཧུཝིཀཔྤོཏི ཨཱཧ ‘‘ཀིརིཡཱཀཔྤཝིཀཔྤོ’’ཏི. ཨིདཉྩ མཱུལཀིརིཡཱཀཔྤགནྠཾ སནྡྷཱཡ ཝུཏྟཾ. སོ ཧི ¶ སཏསཧསྶཔརིམཱཎོ ནལཙརིཡཱདིཔཀརཎཾ. ཋཱནཀརཎཱདིཝིབྷཱགཏོ ¶ ནིབྦཙནཝིབྷཱགཏོ ཙ ཨཀྑརཱ པབྷེདཱིཡནྟི ཨེཏེཧཱིཏི ཨཀྑརཔྤབྷེདཱ, སིཀྑཱནིརུཏྟིཡོ. ཨེཏེསནྟི ཝེདཱནཾ. ཏེ ཨེཝ ཝེདེ པདསོ ཀཱཡཏཱིཏི པདཀོ. ཏཾ ཏཾ སདྡཾ ཏདཏྠཉྩ བྱཱཀརོཏི བྱཱཙིཀྑཏི ཨེཏེནཱཏི བྱཱཀརཎཾ, སདྡསཏྠཾ. ཨཱཡཏིཾ ཧིཏཾ ཏེན ལོཀོ ན ཡཏཏི ན ཨཱིཧཏཱིཏི ལོཀཱཡཏཾ. ཏཉྷི གནྠཾ ནིསྶཱཡ སཏྟཱ པུཉྙཀིརིཡཱཡ ཙིཏྟམྤི ན ཨུཔྤཱདེནྟི. ཝཡཏཱིཏི ཝཡོ, ན ཝཡོ ཨཝཡོ, ན ཨཝཡོ ཨནཝཡོ, ཨཱདིམཛ྄ཛྷཔརིཡོསཱནེསུ ཀཏྠཙི ཨཔརིཀིལནྟོ ཨཝིཏྠཱཡནྟོ ཏེ གནྠེ སནྡྷཱརེཏི པཱུརེཏཱིཏི ཨཏྠོ. དྭེ པཊིསེདྷཱ པཀཏིཾ གམེནྟཱིཏི དསྶེནྟོ ‘‘ཨཝཡོ ན ཧོཏཱི’’ཏི ཝཏྭཱ ཏཏྠ ཨཝཡཾ དསྶེཏུཾ ‘‘ཨཝཡོ…པེ… ན སཀྐོཏཱི’’ཏི ཝུཏྟཾ.

༣༨༤. གརཱུཏི བྷཱརིཡཾ ཨཏྟཱནཾ ཏཏོ མོཙེཏྭཱ གམནཾ དུཀྐརཾ ཧོཏི. ཨནཏྠོཔི ཨུཔྤཛྫཏི ནིནྡཱབྱཱརོསཨུཔཱརམྦྷཱདི. ཨབྦྷུགྒཏོཏི ཨེཏྠ ཨབྷིསདྡཡོགེན ཨིཏྠམྦྷཱུཏཱཁྱཱནཏྠེ ཨུཔཡོགཝཙནཾ.

ལཀྑཎཱནཱིཏི ལཀྑཎདཱིཔནཱནི མནྟཔདཱནི. ཨནྟརདྷཱཡནྟཱིཏི ན ཀེཝལཾ ལཀྑཎམནྟཱནིཡེཝ, ཨཉྙཱནིཔི བྲཱཧྨཎཱནཾ ཉཱཎབལཱབྷཱཝེན ཨནུཀྐམེན ཨནྟརདྷཱཡནྟི. ཏཐཱ ཧི ཝདནྟི ‘‘ཨེཀསཏཾ ཨདྡྷརིཡཾ དིཔཉྙཱསམཏྟཏོ སཱམཱ’’ཏིཨཱདི. པཎིདྷིམཧཏོ སམཱདཱནམཧཏོཏིཨཱདིནཱ པཙྩེཀཾ མཧ-སདྡོ ཡོཛེཏབྦོ. པཎིདྷིམཧནྟཏཱདི ཙསྶ བུདྡྷཝཾསཙརིཡཱཔིཊཀཝཎྞནཱདིཝསེནེཝ ཝེདིཏབྦོ. ནིཊྛཱཏི ནིཔྥཏྟིཡོ. ཛཱཏིསཱམཉྙཏོཏི ལཀྑཎཛཱཏིཡཱ ལཀྑཎབྷཱཝེན སམཱནབྷཱཝཏོ. ཡཐཱ ཧི བུདྡྷཱནཾ ལཀྑཎཱནི སུཝིསུདྡྷཱནི སུཔརིབྱཏྟཱནི པརིཔུཎྞཱནི ཙ ཧོནྟི, ན ཨེཝཾ ཙཀྐཝཏྟཱིནཾ. ཏེནཱཧ ‘‘ན ཏེཧེཝ བུདྡྷོ ཧོཏཱི’’ཏི.

ཨབྷིརཱུཔཏཱ དཱིགྷཱཡུཀཏཱ, ཨཔྤཱཏངྐཏཱ བྲཱཧྨཎཱདཱིནཾ པིཡམནཱཔཏཱཏི ཙཏཱུཧི ཨཙྪརིཡདྷམྨེཧི. དཱནཾ པིཡཝཙནཾ ཨཏྠཙརིཡཱ སམཱནཏྟཏཱཏི ཨིམེཧི ཙཏཱུཧི སངྒཧཝཏྠཱུཧི. རཉྫནཏོཏི པཱིཏིཛནནཏོ. ཙཀྐཾ ཙཀྐརཏནཾ ཝཏྟེཏི པཝཏྟེཏཱིཏི ཙཀྐཝཏྟཱི, སམྤཏྟིཙཀྐེཧི སཡཾ ཝཏྟེཏི, ཏེཧི ཙ པརཾ སཏྟནིཀཱཡཾ ཝཏྟེཏི པཝཏྟེཏཱིཏི ཙཀྐཝཏྟཱི, པརཧིཏཱཝཧོ ཨིརིཡཱཔཐཙཀྐཱནཾ ཝཏྟོ ཝཏྟནཾ ཨེཏསྶ ཨཏྠཱིཏི ཙཀྐཝཏྟཱི, ཨཔྤཊིཧཏཾ ཝཱ ¶ ཨཱཎཱསངྑཱཏཾ ཙཀྐཾ ཝཏྟེཏཱིཏི ཙཀྐཝཏཱི, ཨཔྤཊིཧཏཾ ཝཱ ཨཱཎཱསངྑཱཏཾ ཙཀྐཾ ཝཏྟེཏཱིཏི ཙཀྐཝཏྟཱི, ཁཏྟིཡམཎྜལཱདིསཉྙིཏཾ ཙཀྐཾ སམཱུཧཾ ཨཏྟནོ ཝསེ ཝཏྟེཏཱིཏི ཙཀྐཝཏྟཱི. དྷམྨཾ ཙརཏཱིཏི དྷམྨིཀོ. དྷམྨཏོ ཨནཔེཏཏྟཱ དྷམྨོ རཉྫནཏྠེན རཱཛཱཏི དྷམྨརཱཛཱ. ཀོཔཱདཱིཏི ཨཱདི-སདྡེན ཀཱམལོབྷམཱནམདཱདིཀེ ¶ སངྒཎྷཱཏི. ཝིཛིཏཱཝཱིཏི ཝིཛིཏཝཱ. ཀེནཙི ཨཀམྤིཡཊྛེན ཛནཔདཏྠཱཝརིཡཔྤཏྟོ. དལ༹ྷབྷཏྟིབྷཱཝཏོ ཝཱ ཛནཔདོ ཐཱཝརིཡཾ པཏྟོ ཨེཏྠཱཏི ཛནཔདཏྠཱཝརིཡཔྤཏྟོ. ཙིཏྟཱིཀཏབྷཱཝཱདིནཱཔི (ཁུ. པཱ. ཨཊྛ. ༦.༣; དཱི. ནི. ཨཊྛ. ༢.༣༣; སཾ. ནི. ཨཊྛ. ༣.༥.༢༢༣; སུ. ནི. ཨཊྛ. ༡.༢༢༦; མཧཱནི. ཨཊྛ. ༥༠) ཙཀྐསྶ རཏནཊྛོ ཝེདིཏབྦོ. ཨེས ནཡོ སེསེསུཔི. རཏིནིམིཏྟཏཱཡ ཝཱ ཙིཏྟཱིཀཏཱདིབྷཱཝསྶ རཏིཛནནཊྛེན ཨེཀསངྒཧཏཱཡ ཝིསུཾ ཨགྒཧཎཾ.

ཨིམེཧི པན རཏནེཧི རཱཛཱ ཙཀྐཝཏྟཱི ཡཾ ཡམཏྠཾ པཙྩནུབྷོཏི, ཏཾ ཏཾ དསྶེཏུཾ ‘‘ཨིམེསུ པནཱ’’ཏིཨཱདི ཝུཏྟཾ. ཨཛིཏཾ ཛིནཱཏི མཧེསཀྑཏཱསཾཝཏྟནིཡཀམྨནིསྶནྡབྷཱཝཏོ. ཝིཛིཏེ ཡཐཱསུཁཾ ཨནུཝིཙརཏི ཧཏྠིརཏནཾ ཨསྶརཏནཉྩ ཨབྷིརུཧིཏྭཱ ཏེསཾ ཨཱནུབྷཱཝེན ཨནྟོཔཱཏརཱསེཡེཝ སཀལཾ པཐཝིཾ ཨནུསཾཡཱཡིཏྭཱ རཱཛདྷཱནིཡཾ པཙྩཱགམནཏོ. པརིཎཱཡཀརཏནེན ཝིཛིཏམནུརཀྑཏི ཏེན ཏཏྠ ཏཏྠ ཀཏྟབྦཀིཙྩསྶ སཾཝིདྷཱནཏོ. སེསེཧཱིཏི མཎིརཏནཨིཏྠིརཏནགཧཔཏིརཏནེཧི. ཏཏྠ མཎིརཏནེན ཡོཛནཔྤམཱཎེ དེསེ ཨནྡྷཀཱརཾ ཝིདྷམིཏྭཱ ཨཱལོཀདསྶནཱདིནཱ སུཁམནུབྷཝཏི, ཨིཏྠིརཏནེན ཨཏིཀྐནྟམཱནུསརཱུཔསམྤཏྟིདསྶནཱདིཝསེན, གཧཔཏིརཏནེན ཨིཙྪིཏིཙྪིཏམཎིཀནཀརཛཏཱདིདྷནཔྤཊིལཱབྷཝསེན. ཨུསྶཱཧསཏྟིཡོགོ ཡེན ཀེནཙི ཨཔྤཊིཧཏཱཎཱཙཀྐབྷཱཝསིདྡྷིཏོ. ཧཏྠིཨསྶརཏནཱདཱིནཾ མཧཱནུབྷཱཝཏྟཱ ཀོསསམྤཏྟིཡཱཔི པབྷཱཝསམྤཏྟིསིདྡྷིཏོ ‘‘ཧཏྠི…པེ… ཡོགོ’’ཏི ཝུཏྟཾ. ཀོསོ ཧི ནཱམ སཏི ཨུསྶཱཧསམྤཏྟིཡཾ (ཨུགྒཏེཛསྶ སུཀུམཱརཔརཀྐམསྶ པསནྣམུཁསྶ སམྨུཁེ པཱཔུཎཱཏི). པཙྪིམེནཱཏི པརིཎཱཡཀརཏནེན. ཏཉྷི སབྦརཱཛཀིཙྩེསུ ཀུསལཾ ཨཝིརཛ྄ཛྷནཔཡོགཾ. ཏེནཱཧ ‘‘མནྟསཏྟིཡོགོ’’ཏི. ཏིཝིདྷསཏྟིཡོགཕལཾ པརིཔུཎྞཾ ཧོཏཱིཏི སམྦནྡྷོ. སེསེཧཱིཏི སེསེཧི པཉྩཧི རཏནེཧི. ཨདོསཀུསལམཱུལཛནིཏཀམྨཱནུབྷཱཝེནཱཏི ཨདོསསངྑཱཏེན ཀུསལམཱུལེན སཧཛཱཏཱདིཔཙྩཡཝསེན ཨུཔྤཱདིཏཀམྨསྶ ¶ ཨཱནུབྷཱཝེན སམྤཛྫནྟི སོམྨཏརརཏནཛཱཏིཀཏྟཱ. མཛ྄ཛྷིམཱནི མཎིཨིཏྠིགཧཔཏིརཏནཱནི. ཨལོབྷ…པེ… ཀམྨཱནུབྷཱཝེན སམྤཛྫནྟི ཨུལཱ༹རདྷནསྶ ཨུལཱ༹རདྷནཔཊིལཱབྷཀཱརཎསྶ ཙ པརིཙྩཱགསམྤདཱཧེཏུཀཏྟཱ. པཙྪིམནྟི པརིཎཱཡཀརཏནཾ. ཏཉྷི ཨམོཧ…པེ… ཀམྨཱནུབྷཱཝེན སམྤཛྫཏི མཧཱཔཉྙེནེཝ ཙཀྐཝཏྟིརཱཛཀིཙྩསྶ པརིཎེཏབྦཏྟཱ.

སརཎཏོ པཊིཔཀྑཝིདྷམནཏོ སཱུརཱ. ཏེནཱཧ ‘‘ཨབྷཱིརུཀཛཱཏིཀཱ’’ཏི. ཨསུརེ ཝིཛིནིཏྭཱ ཋིཏཏྟཱ ཝཱིརོ, སཀྐོ དེཝཱནམིནྡོ, ཏསྶ ཨངྒཾ དེཝཔུཏྟོ སེནངྒབྷཱཝཏོཏི ཝུཏྟཾ ‘‘ཝཱིརངྒརཱུཔཱཏི དེཝཔུཏྟསདིསཀཱཡཱ’’ཏི. སབྷཱཝོཏི སབྷཱཝབྷཱུཏོ ཨཏྠོ. ཝཱིརཀཱརཎནྟི ཝཱིརབྷཱཝཀཱརཎཾ. ཝཱིརིཡམཡསརཱིརཱ ཝིཡཱཏི སཝིགྒཧཝཱིརིཡསདིསཱ སཝིགྒཧཉྩེ ཝཱིརིཡཾ སིཡཱ, ཏཾསདིསཱཏི ཨཏྠོ. ¶ ནནུ རཉྙོ ཙཀྐཝཏྟིསྶ པཊིསེནཱ ནཱམ ནཏྠི, ཡམསྶ པུཏྟཱ པམདྡེཡྻུཾ, ཨཐ ཀསྨཱ ‘‘པརསེནཔམདྡནཱ’’ཏི ཝུཏྟནྟི ཙོདནཾ སནྡྷཱཡཱཧ ‘‘སཙེ’’ཏིཨཱདི. ཏེན པརསེནཱ ཧོཏུ ཝཱ མཱ ཝཱ, ཏེ པན ཨེཝཾ མཧཱནུབྷཱཝཱཏི དསྶེཏི. དྷམྨེནཱཏི ཀཏཱུཔཙིཏེན ཨཏྟནོ པུཉྙདྷམྨེན. ཏེན ཧི སཉྩོདིཏཱ པཐཝིཡཾ སབྦརཱཛཱནོ པཙྩུགྒནྟྭཱ ‘‘སྭཱགཏཾ ཏེ མཧཱརཱཛཱ’’ཏིཨཱདིཾ ཝཏྭཱ ཨཏྟནོ རཛྫཾ རཉྙོ ཙཀྐཝཏྟིསྶ ནིཡྻཱདེནྟི. ཏེན ཝུཏྟཾ ‘‘སོ ཨིམཾ…པེ… ཨཛ྄ཛྷཱཝསཏཱི’’ཏི. ཨཊྛཀཐཱཡཾ པན ཏསྶ ཡཐཱཝུཏྟདྷམྨསྶ ཙིརཏརཾ ཝིཔཙྩིཏུཾ པཙྩཡབྷཱུཏཾ ཙཀྐཝཏྟིཝཏྟསམུདཱགཏཾ པཡོགསམྤཏྟིསངྑཱཏཾ དྷམྨཾ དསྶེཏུཾ ‘‘པཱཎོ ན ཧནྟབྦོཏིཨཱདིནཱ པཉྩསཱིལདྷམྨེནཱ’’ཏི ཝུཏྟཾ. ཨེཝཉྷི ‘‘ཨདཎྜེན ཨསཏྠེནཱ’’ཏི ཨིདཾ ཝཙནཾ སུཊྛུཏརཾ སམཏྠིཏཾ ཧོཏི, ཡསྨཱ རཱགཱདཡོ པཱཔདྷམྨཱ ཨུཔྤཛྫམཱནཱ སཏྟསནྟཱནཾ ཚཱདེཏྭཱ པརིཡོནནྡྷིཏྭཱ ཏིཊྛནྟི, ཀུསལཔཝཏྟིཾ ནིཝཱརེནྟི, ཏསྨཱ ཏེ ‘‘ཚདནཱ, ཚདཱ’’ཏི ཙ ཝུཏྟཱ.

ཝིཝཊྚེཏྭཱ པརིཝཏྟེཏྭཱ. པཱུཛཱརཧཏཱ ཝུཏྟཱ ‘‘ཨརཧཏཱིཏི ཨརཧ’’ནྟི. ཏསྶཱཏི པཱུཛཱརཧཏཱཡ. ཡསྨཱ སམྨཱསམྦུདྡྷོ, ཏསྨཱ ཨརཧནྟི. བུདྡྷཏྟཧེཏུབྷཱུཏཱ ཝིཝཊྚཙྪདཏཱ ཝུཏྟཱ སཝཱསནསབྦཀིལེསཔྤཧཱནཔུབྦཀཏྟཱ བུདྡྷབྷཱཝསིདྡྷིཡཱ. ཨརཧཾ ཝཊྚཱབྷཱཝེནཱཏི ཕལེན ཧེཏུཨནུམཱནདསྶནཾ. སམྨཱསམྦུདྡྷོ ཚདནཱབྷཱཝེནཱཏི ཧེཏུནཱ ཕལཱནུམཱནདསྶནཾ. ཧེཏུདྭཡཾ ཝུཏྟཾ ‘‘ཝིཝཊྚོ ཝིཙྪདོ ཙཱ’’ཏི. དུཏིཡཝེསཱརཛྫེནཱཏི ‘‘ཁཱིཎཱསཝསྶ ཏེ པཊིཛཱནཏོ’’ཏིཨཱདིནཱ (མ. ནི. ༡.༡༥༠) ཨཱགཏེན ཝེསཱརཛྫེན. པུརིམསིདྡྷཱིཏི ¶ པུརིམསྶ པདསྶ ཨཏྠསིདྡྷི. པཋམེནཱཏི ‘‘སམྨཱསམྦུདྡྷསྶ ཏེ པཊིཛཱནཏོ’’ཏིཨཱདིནཱ (མ. ནི. ༡.༡༥༠) ཨཱགཏེན ཝེསཱརཛྫེན. དུཏིཡསིདྡྷཱིཏི བུདྡྷཏྟསིདྡྷི. ཏཏིཡཙཏུཏྠེཧཱིཏི ‘‘ཡེ ཁོ པན ཏེ ཨནྟརཱཡིཀཱ དྷམྨཱ’’ཏིཨཱདིནཱ (མ. ནི. ༡.༡༥༠), ‘‘ཡསྶ ཁོ པན ཏེ ཨཏྠཱཡཱ’’ཏིཨཱདིནཱ (མ. ནི. ༡.༡༥༠) ཙ ཨཱགཏེཧི ཏཏིཡཙཏུཏྠེཧི ཝེསཱརཛྫེཧི. ཏཏིཡསིདྡྷཱིཏི ཝིཝཊྚཙྪདནཏཱ སིདྡྷི. ཡཱཐཱཝཏོ ཨནྟརཱཡིཀནིཡྻཱནིཀདྷམྨཱཔདེསེན ཧི སཏྠུ ཝིཝཊྚཙྪདབྷཱཝོ ལོཀེ པཱཀཊོ ཨཧོསི. པུརིམཾ དྷམྨཙཀྑུནྟི པུརིམཔདཾ བྷགཝཏོ དྷམྨཙཀྑུཾ སཱདྷེཏི ཀིལེསཱརཱིནཾ སཾསཱརཙཀྐསྶ ཙ ཨརཱནཾ ཧཏབྷཱཝདཱིཔནཏོ. དུཏིཡཾ པདཾ བུདྡྷཙཀྑུཾ སཱདྷེཏི སམྨཱསམྦུདྡྷསྶེཝ ཏཾ སམྦྷཝཏོ. ཏཏིཡཾ པདཾ སམནྟཙཀྑུཾ སཱདྷེཏི སཝཱསནསབྦཀིལེསཔྤཧཱནདཱིཔནཏོ. ‘‘སམྨཱསམྦུདྡྷོ’’ཏི ཧི ཝཏྭཱ ‘‘ཝིཝཊྚཙྪདོ’’ཏི ཝཙནཾ བུདྡྷབྷཱཝཱཝཧམེཝ སབྦཀིལེསཔྤཧཱནཾ ཝིབྷཱཝེཏཱིཏི. སཱུརབྷཱཝནྟི ལཀྑཎཝིབྷཱཝནེན ཝིསདཉཱཎཏཾ.

༣༨༥. གཝེསཱིཏི (དཱི. ནི. ཊཱི. ༡.༢༨༧) ཉཱཎེན པརིཡེསནཾ ཨཀཱསི. སམཱནཡཱིཏི ཉཱཎེན སངྐལེནྟོ སམཱནཾ ཨཱནཡི སམཱཧརི. ན སཀྐོཏི སཾཀུཙིཏེ ཨིརིཡཱཔཐེ ཡེབྷུཡྻེན ¶ ཏེསཾ དུབྦིབྷཱཝནཏོ. ཀངྑཏཱིཏི པདསྶ ཨཱཀངྑཏཱིཏི ཨཡམཏྠོཏི ཨཱཧ – ‘‘ཨཧོ ཝཏ པསྶེཡྻནྟི པཏྠནཾ ཨུཔྤཱདེཏཱི’’ཏི. ཀིཙྪཏཱིཏི ཀིལམཏི. ‘‘ཀངྑཏཱི’’ཏི པདསྶ པུབྦེ ཨཱསཱིསནཏྠཏཾ ཝཏྭཱ ཨིདཱནི ཏསྶ སཾསཡཏྠཏྟམེཝ ཝིཀཔྤནྟརཝསེན དསྶེནྟོ ‘‘ཀངྑཱཡ ཝཱ དུབྦལཱ ཝིམཏི ཝུཏྟཱ’’ཏིཨཱདི ཝུཏྟཾ. ཏཱིཧི དྷམྨེཧི ཏིཔྤཀཱརེཧི སཾསཡདྷམྨེཧི. ཀཱལུསྶིཡབྷཱཝོཏི ཨཔྤསནྣཏཱཡ ཧེཏུབྷཱུཏོ ཨཱཝིལབྷཱཝོ. ཡསྨཱ བྷགཝཏོ ཀོསོཧིཏཾ སབྦབུདྡྷཱཝེཎིཀཾ ཝཏྠགུཡ྄ཧཾ སུཝིསུདྡྷཀཉྩནམཎྜལསནྣིཀཱསཾ ཨཏྟནོ སཎྛཱནསནྣིཝེསསུནྡརཏཱཡ ཨཱཛཱནེཡྻགནྡྷཧཏྠིནོ ཝརངྒཙཱརུབྷཱཝཾ ཝིཀསམཱནཏཔནིཡཱརཝིནྡསམུཛྫལཀེསརཱཝཏྟཝིལཱསཾ སཉྫྷཱཔབྷཱནུརཉྫིཏཛལཝནནྟརཱབྷིལཀྑིཏ-སམྤུཎྞཙནྡམཎྜལསོབྷཉྩ ཨཏྟནོ སིརིཡཱ ཨབྷིབྷུཡྻ ཝིརཱཛཏི, ཡཾ བཱཧིརབྦྷནྟརམལེཧི ཨནུཔཀྐིལིཊྛཏཱཡ ཙིརཀཱལཾ སུཔརིཙིཏབྲཧྨཙརིཡཱདྷིཀཱརཏཱཡ སུསཎྛིཏསཎྛཱནསམྤཏྟིཡཱ ཙ ཀོཔཱིནམྤི སནྟཾ ཨཀོཔཱིནམེཝ, ཏསྨཱ ཝུཏྟཾ ‘‘བྷགཝཏོ ཧཱི’’ཏིཨཱདི. པཧཱུཏབྷཱཝནྟི ¶ པུཐུལབྷཱཝཾ. ཨེཏྠེཝ ཧི ཏསྶ སཾསཡོ, ཏནུམུདུསུཀུམཱརཏཱདཱིསུ པནསྶ གུཎེསུ ཏསྶ ཝིཙཱརཎཱ ཨེཝ ནཱཧོསི.

ཧིརིཀརཎོཀཱསནྟི ཧིརིཡིཏབྦཊྛཱནཾ. ཚཱཡནྟི པཊིབིམྦཾ. ཀཱིདིསནྟི ཨཱཧ ‘‘ཨིདྡྷིཡཱ’’ཏིཨཱདི. ཚཱཡཱརཱུཔནྟི བྷགཝཏོ པཊིབིམྦརཱུཔཾ. ཏཉྩ ཁོ བུདྡྷསནྟཱནཏོ ཝིནིམུཏྟཾ རཱུཔཀམཏྟཾ བྷགཝཏོ སརཱིརཝཎྞསཎྛཱནཱཝཡཝཾ ཨིདྡྷིམཡཾ བིམྦཀམཏྟཾ, ཏཾ པན དསྶེནྟོ བྷགཝཱ ཡཐཱ ཨཏྟནོ བུདྡྷརཱུཔཾ ན དིསྶཏི, ཏཐཱ ཀཏྭཱ དསྶེཏི. ནཱིཧརིཏྭཱཏི ཕརིཏྭཱ.

ཀཎྞསོཏཱནཾ ཨུཔཙིཏཏནུཏམྦལོམཏཱཡ དྷོཏརཛཏཔནཱལི༹ཀཱསདིསཏཱ ཝུཏྟཱ. མུཁཔརིཡནྟེཏི ཀེསནྟེ.

ཀིརིཡཱཀརཎནྟི ཀིརིཡཱཡ ཀཱཡིཀསྶ ཝཱཙསིཀསྶ པཊིཔཏྟི. ཏཏྠཱཏི ཏེསུ ཀིཙྩེསུ. དྷམྨཀཐིཀཱནཾ ཝཏྟཾ དསྶེཏུཾ བཱིཛནིགྒཧཎཾ ཀཏཾ. ན ཧི ཨཉྙཐཱ སབྦསྶཔི ལོཀསྶ ཨལངྐཱརབྷཱུཏཾ པརམུཀྐཾསགཏཾ སིཀྑཱསཾཡམཱནཾ བུདྡྷཱནཾ མུཁཙནྡམཎྜལཾ པཊིཙྪཱདེཏབྦཾ ཧོཏི.

པཏྠརིཏཝིཏཱནཨོལམྦིཏགནྡྷདཱམཀུསུམདཱམཀེ གནྡྷམཎྜལམཱལེ༹. པུབྦབྷཱགེན པརིཙྪིནྡིཏྭཱཏི ‘‘ཨེཏྟཀཾ ཝེལཾ སམཱཔཏྟིཡཱ ཝཱིཏིནཱམེསྶཱམཱི’’ཏི ཨེཝཾ པཝཏྟེན པུབྦབྷཱགེན ཀཱལཾ པརིཙྪིནྡིཏྭཱ. པཙྩཡདཱཡཀེསུ ཨནུརོདྷཝསེན པརིསཾ ཨུསྶཱདེནྟོ ཝཱ པགྒཎྷནྟོ, ཨདཱཡཀེསུ ཝིརོདྷཝསེན པརིསཾ ཨཔསཱདེནྟོ ཝཱ.

ཡོགཀྑེམཾ ¶ ཨནྟརཱཡཱབྷཱཝཾ. སབྷཱཝགུཎེནེཝཱཏི ཡཐཱཝུཏྟགུཎེནེཝ. བྷོཏོ གོཏམསྶ གུཎཾ སཝིགྒཧཾ ཙཀྐཝཱལ༹ཾ ཨཏིསམྦཱདྷཾ ཝིཏྠཱརེན སནྡྷཱརེཏུཾ ཨཔྤཧོནྟཏོ. བྷཝགྒཾ ཨཏིནཱིཙཾ ཨུཔརཱུཔརི སནྡྷཱརེཏུཾ ཨཔྤཧོནྟཏོ.

༣༨༦. ཋཱནགམནཱདཱིསུ (དཱི. ནི. ཊཱི. ༢.༣༥) བྷཱུམིཡཾ སུཊྛུ སམཾཔཏིཊྛིཏཱ པཱདཱ ཨེཏསྶཱཏི སུཔྤཏིཊྛིཏཔཱདོ. ཏཾ པན བྷགཝཏོ སུཔྤཏིཊྛིཏཔཱདཏཾ བྱཏིརེཀམུཁེན ཝིབྷཱཝེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. ཏཏྠ ཨགྒཏལནྟི ཨགྒཔཱདཏལཾ. པཎྷཱིཏི པཎྷིཏལཾ. པསྶནྟི པཱདཏལསྶ དྭཱིསུ པསྶེསུ ཨེཀེཀཾ, ཨུབྷཡམེཝ ཝཱ པརིཡནྟཾ པསྶཾ. སུཝཎྞཔཱདུཀཏལཾ ཝིཡ ཨུཛུཀཾ ནིཀྑིཔིཡམཱནཾ. ཨེཀཔྤཧཱརེནེཝཱཏི ཨེཀཀྑཎེཡེཝ. སཀལཾ པཱདཏལཾ བྷཱུམིཾ ཕུསཏི ནིཀྑིཔནེ. ཨེཀཔྤཧཱརེནེཝ སཀལཾ པཱདཏལཾ བྷཱུམིཏོ ཨུཊྛཧཏཱིཏི ཡོཛནཱ.

ཏཏྲཱཏི ¶ ཏཱཡ སུཔྤཏིཊྛིཏཔཱདཏཱཡ ཨནུཔུབྦནིནྣཱཝ ཨཙྪརིཡབྦྷུཏཾ ཨིདཾ ཝུཙྩམཱནཾ ནིསྶནྡཕལཾ. ཝུཏྟམེཝཏྠཾ སཏྠུ ཏིདིཝགམནེན སུཔཱཀཊཾ ཀཱཏུཾ ‘‘ཏཐཱ ཧཱི’’ཏིཨཱདིཾ ཝཏྭཱ ‘‘ན ཧཱི’’ཏིཨཱདིནཱ ཏཾ སམཏྠེཏི. ཏེན པཋམལཀྑཎཏོཔི དུཏིཡལཀྑཎཾ མཧཱནུབྷཱཝནྟི དསྶེཏི. ཏཐཱ ཧི ཝཀྑཏི ‘‘ཨནྟམསོ ཙཀྐཝཏྟིརཉྙོ པརིསཾ ཨུཔཱདཱཡ སབྦོཔི ཙཀྐལཀྑཎསྶེཝ པརིཝཱརོ’’ཏི. ཡུགནྡྷརཔབྦཏསྶ ཏཱཝཏིཾསབྷཝནསྶ ཙ པཀཏིཔདནིཀྑེཔཊྛཱནུཔསངྐམནེ ནེཝ བུདྡྷཱནཾ, ན དེཝཏཱནཾ ཨཱནུབྷཱཝོ, ཨཐ ཁོ བུདྡྷཱནཾ ལཀྑཎཱནུབྷཱཝོཏི ཨིམམཏྠཾ ནིདསྶིཏཾ. སཱིལཏེཛེན…པེ… དསནྣཾ པཱརམཱིནཾ ཨཱནུབྷཱཝེནཱཏི ཨིདམྤི ལཀྑཎནིབྦཏྟཀམྨཝིསེསཀིཏྟནམེཝཱཏི དཊྛབྦཾ. སབྦཱཝནྟེཧཱིཏི སབྦཔདེསཝནྟེཧི.

ནཱབྷིཔརིཙྪིནྣཱཏི ནཱབྷིཡཾ པརིཙྪིནྣཱ པརིཙྪེདཝསེན ཋིཏཱ. ནཱབྷིམུཁཔརིཀྑེཔཔཊྚོཏི པཀཏིཙཀྐསྶ ཨཀྑབྦྷཱཧཏཔརིཧརཎཏྠཾ ནཱབྷིམུཁེ ཋཔེཏབྦཔརིཀྑེཔཔཊྚོ. ནེམིམཎིཀཱཏི ནེམིཡཾ ཨཱཝལི༹བྷཱཝེན ཋིཏམཎིཀཱལེཁཱ.

སམྦཧུལཝཱརོཏི བཧུཝིདྷལེཁངྒཝིབྷཱཝནཝཱརོ. སཏྟཱིཏི ཨཱཝུདྷསཏྟི. སིརིཝཙྪོཏི སིརིམུཁཾ. ནནྡཱིཏི དཀྑིཎཱཝཊྚཾ. སོཝཏྟིཀོཏི སོཝཏྟིཨངྐོ. ཝཊཾསཀོཏི ཨཱཝེལ༹ཾ. ཝཌྜྷམཱནཀནྟི པུརིསཧཱརི པུརིསངྒཾ. མོརཧཏྠཀོཏི མོརཔིཉྪཀལཱཔོ, མོརཔིཉྪ པརིསིབྦིཏོ ཝཱ བཱིཛནིཝིསེསོ. ཝཱལབཱིཛནཱིཏི ཙཱམརིཝཱལཾ. སིདྡྷཏྠཱདི པུཎྞགྷཊཔུཎྞཔཱཏིཡོ. ‘‘ཙཀྐཝཱལོ༹’’ཏི ཝཏྭཱ ཏསྶ པདྷཱནཱཝཡཝེ དསྶེཏུཾ ‘‘ཧིམཝཱ སིནེརུ…པེ… སཧསྶཱནཱི’’ཏི ཝུཏྟཾ.

ཨཱཡཏཔཎྷཱིཏི ¶ ཨིདཾ ཨཉྙེསཾ པཎྷིཏོ དཱིགྷཏཾ སནྡྷཱཡ ཝུཏྟཾ, ན པན ཨཏིདཱིགྷཏནྟི ཨཱཧ ‘‘པརིཔུཎྞཔཎྷཱི’’ཏི. ཡཐཱ པན པཎྷིལཀྑཎཾ པརིཔུཎྞཾ ནཱམ ཧོཏི, ཏཾ བྱཏིརེཀམུཁེན དསྶེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. ཨཱརགྒེནཱཏི མཎྜལཱཡ སིཁཱཡ. ཝཊྚེཏྭཱཏི ཡཐཱ སུཝཊྚཾ ཧོཏི, ཨེཝཾ ཝཊྚེཏྭཱ. རཏྟཀམྦལགེཎྜུཀསདིསཱཏི རཏྟཀམྦལམཡགེཎྜུཀསདིསཱ.

མཀྐཊསྶེཝཱཏི ཝཱནརསྶ ཝིཡ. དཱིགྷབྷཱཝེན སམཏཾ སནྡྷཱཡེཏཾ ཝུཏྟཾ. ནིཡྻཱསཏེལེནཱཏི ཚདིཀནིཡྻཱསཱདིནིཡྻཱསསམྨིསྶེན ཏེལེན.

ཏལུནཱཏི ¶ སུཀུམཱརཱ.

ཙམྨེནཱཏི ཨངྒུལནྟརཝེཋིཏཙམྨེན. པཊིབདྡྷཨངྒུལནྟརོཏི ཨེཀཏོ སམྦདྡྷཨངྒུལནྟརོ. ཨེཀཔྤམཱཎཱཏི དཱིགྷཏོ སམཱནཔྤམཱཎཱ. ཡཝལཀྑཎནྟི ཨབྦྷནྟརཏོ ཨངྒུལིཔབྦེཋིཏཾ ཡཝལཀྑཎཾ. པཊིཝིཛ྄ཛྷིཏྭཱཏི ཏཾཏཾཔབྦཱནཾ སམཱནདེསཏཱཡ ཨངྒུལཱིནཾ པསཱརིཏཀཱལེ ཨཉྙམཉྙཾ ཝིཛ྄ཛྷིཏཱནི ཝིཡ ཕུསིཏྭཱ ཏིཊྛནྟི.

སངྑཱ ཝུཙྩནྟི གོཔྥཀཱ, ཨུདྡྷཾ སངྑཱ ཨེཏེསནྟི ཨུསྶངྑཱ, པཱདཱ. པིཊྛིཔཱདེཏི པིཊྛིཔཱདསམཱིཔེ. སུཁེན པཱདཱ པརིཝཏྟནྟི པཱདནཱམནཱདཱིསུ, ཏེནེཝ གཙྪནྟཱནཾ ཏེསཾ ཧེཊྛཱ པཱདཏལཱནི དིསྶནྟི. ཏེནཱཏི གོཔྥཀཱནཾ པིཊྛིཔཱདཏོ ཨུདྡྷཾ པཏིཊྛིཏཏྟཱ. ཙཏུརངྒུལམཏྟཉྷི ཏཱནི ཨུདྡྷཾ ཨཱརོཧིཏྭཱ པཏིཊྛཧནྟི, ནིགུལ༹ྷཱནི ཙ ཧོནྟི, ན ཨཉྙེསཾ ཝིཡ པཉྙཱཡམཱནཱནི. སཏིཔི དེསནྟརཔྤཝཏྟིཡཾ ནིཙྩལོཏི དསྶནཏྠཾ ནཱབྷིགྒཧཎཾ.

ཡསྨཱ ཨེཎཱིམིགསྶ སམནྟཏོ ཨེཀསདིསམཾསཱ ཨནུཀྐམེན ཨུདྡྷཾ ཐཱུལཱ ཛངྒྷཱ ཧོནྟི, ཏསྨཱ ཝུཏྟཾ ‘‘ཨེཎཱིམིགསདིསཛངྒྷཱ’’ཏི. པརིཔུཎྞཛངྒྷོཏི སམནྟཏོ མཾསཱུཔཙཡེན པརིཔུཎྞཛངྒྷོ. ཏེནཱཧ ‘‘ན ཨེཀཏོ’’ཏིཨཱདི.

ཨེཏེནཱཏི ‘‘ཨནོནམནྟོ’’ཏིཨཱདིཝཙནེན, ཛཱཎུཕཱསུབྷཱཝདཱིཔནེནཱཏི ཨཏྠོ. ཨཝསེསཛནཱཏི ཨིམིནཱ ལཀྑཎེན རཧིཏཱ ཛནཱ. ཁུཛྫཱ ཝཱ ཧོནྟི ཧེཊྛིམཀཱཡཏོ ཨུཔརིམཀཱཡསྶ རསྶཏཱཡ. ཝཱམནཱ ཝཱ ཨུཔརིམཀཱཡཏོ ཧེཊྛིམཀཱཡསྶ རསྶཏཱཡ. ཨེཏེན ཋཔེཏྭཱ སམྨཱསམྦུདྡྷཾ ཙཀྐཝཏྟིནཉྩ ཨིཏརེ སཏྟཱ ཁུཛྫཱ ཝཱམནཱ ཙཱཏི དསྶེཏི.

ཨོཧིཏནྟི ¶ སམོཧིཏཾ ཨནྟོགདྷཾ. ཏཐཱབྷཱུཏཾ པན ཏཾ ཏེན ཚནྣཾ ཧོཏཱིཏི ཨཱཧ ‘‘པཊིཙྪནྣ’’ནྟི.

སུཝཎྞཝཎྞོཏི སུཝཎྞཝཎྞཝཎྞོཏི ཨཡམེཏྠ ཨཏྠོཏི ཨཱཧ ‘‘ཛཱཏིཧིངྒུལཀེནཱ’’ཏིཨཱདི. སྭཱཡམཏྠོ ཨཱཝུཏྟིཉཱཡེན ཙ ཝེདིཏབྦོ. སརཱིརཔརིཡཱཡོ ཨིདྷ ཝཎྞསདྡོཏི ཨདྷིཔྤཱཡེན པཋམཝིཀཔྤཾ ཝཏྭཱ ཏཐཱརཱུཔཱཡ པན རུལ༹ྷིཡཱ ཨབྷཱཝཾ མནསི ཀཏྭཱ ཝཎྞདྷཱཏུཔརིཡཱཡམེཝ ཝཎྞསདྡཾ གཧེཏྭཱ དུཏིཡཝིཀཔྤོ ཝུཏྟོ.

རཛོཏི ¶ སུཁུམརཛོ. ཛལླནྟི མལཱིནབྷཱཝཱཝཧོ རེཎུསཉྩཡོ. ཏེནཱཧ ‘‘མལཾ ཝཱ’’ཏི. ཡདི ཝིཝཊྚཏི, ཀཐཾ ནྷཱནཱདཱིཏི ཨཱཧ ‘‘ཧཏྠདྷོཝནཱ’’ཏིཨཱདི.

ཨཱཝཊྚཔརིཡོསཱནེཏི པདཀྑིཎཱཝཊྚཱཡ ཨནྟེ.

བྲཧྨུནོ སརཱིརཾ པུརཏོ ཝཱ པཙྪཏོ ཝཱ ཨནོནམིཏྭཱ ཨུཛུཀམེཝ ཨུགྒཏནྟི ཨཱཧ ‘‘བྲཧྨཱ ཝིཡ ཨུཛུགཏྟོ’’ཏི. པསྶཝངྐཱཏི དཀྑིཎཔསྶེན ཝཱ ཝཱམཔསྶེན ཝཱ ཝངྐཱ.

ཧཏྠཔིཊྛིཨཱདིཝསེན སཏྟ ཨུསྶདཱ ཨེཏསྶཱཏི སཏྟུསྶདོ.

སཱིཧསྶ པུབྦདྡྷཾ སཱིཧཔུབྦདྡྷཾ, པརིཔུཎྞཱཝཡཝཏཱཡ སཱིཧཔུབྦདྡྷཾ ཝིཡ སཀལོ ཀཱཡོ ཨསྶཱཏི སཱིཧཔུབྦདྡྷཀཱཡོ. སཱིཧསྶེཝཱཏི སཱིཧསྶ ཝིཡ. སཎྛནྟཱིཏི སཎྛཧནྟི. ནཱནཱཙིཏྟེནཱཏི ཝིཝིདྷཙིཏྟེན. པུཉྙཙིཏྟེནཱཏི པཱརམིཏཱཔུཉྙཙིཏྟརཱུཔེན. ཙིཏྟིཏོཏི སཉྫཱཏཙིཏྟབྷཱཝོ.

དྭིནྣཾ ཀོཊྚཱནམནྟརནྟི དྭིནྣཾ པིཊྛིབཱཧཱནཾ ཝེམཛ྄ཛྷཾ, པིཊྛིམཛ྄ཛྷསྶ ཨུཔརིབྷཱགོ. ཙིཏཾ པརིཔུཎྞནྟི ཨནིནྣབྷཱཝེན ཙིཏཾ, དྭཱིཧི ཀོཊྚེཧི སམཏལཏཱཡ པརིཔུཎྞཾ. ཨུགྒམྨཱཏི ཨུགྒནྟྭཱ.

ནིགྲོདྷཔརིམཎྜལོ ཝིཡ པརིམཎྜལོ ནིགྲོདྷཔརིམཎྜལོ ཨེཀསྶ པརིམཎྜལསདྡསྶ ལོཔཾ ཀཏྭཱ. ན ཧི སབྦོ ནིགྲོདྷོ མཎྜལོ. ཏེནཱཧ ‘‘སམཀྑནྡྷསཱཁོ ནིགྲོདྷོ’’ཏི. པརིམཎྜལསདྡསནྣིདྷཱནེན ཝཱ པརིམཎྜལོཝ ནིགྲོདྷོ གཡ྄ཧཏཱིཏི པརིམཎྜལསདྡསྶ ལོཔེན ཝིནཱཔི ¶ ཨཡམཏྠོ ལབྦྷཏཱིཏི ཨཱཧ ‘‘ནིགྲོདྷོ ཝིཡ པརིམཎྜལོ’’ཏི. ཡཱཝཏཀྭསྶཱཏི ཨོ-ཀཱརསྶ ཝ-ཀཱརཱདེསཾ ཀཏྭཱ ཝུཏྟཾ.

སམཝཊྚིཏཀྑནྡྷོཏི སམཾ སུཝཊྚིཏཀྑནྡྷོ. ཀོཉྩཱ ཝིཡ དཱིགྷགལཱ, བཀཱ ཝིཡ ཝངྐགལཱ, ཝརཱཧཱ ཝིཡ པུཐུལགལཱཏི ཡོཛནཱ. སུཝཎྞཱལིངྒསདིསོཏི སུཝཎྞམཡཁུདྡཀམུདིངྒསདིསོ.

རསགྒསགྒཱིཏི མདྷུརཱདིབྷེདཾ རསཾ གསནྟི ཨནྟོ པཝེསནྟཱིཏི རསགྒསཱ, རསགྒསཱནཾ ཨགྒཱ རསགྒསགྒཱ, ཏཱ ཨེཏསྶ སནྟཱིཏི རསགྒསགྒཱི. ཏེནཱཏི ཨོཛཱཡ ཨཕརཎེན, ཧཱིནདྷཱཏུཀཏྟཱ ཏེ བཧྭཱབཱདྷཱ ཧོནྟི.

‘‘ཧནཱུ’’ཏི ¶ སནྣིསྶཡདནྟཱདྷཱརསྶ སམཉྙཱ, ཏཾ བྷགཝཏོ སཱིཧཧནུསདིསཾ, ཏསྨཱ བྷགཝཱ སཱིཧཧནུ. ཏཏྠ ཡསྨཱ བུདྡྷཱནཾ རཱུཔཀཱཡསྶ དྷམྨཀཱཡསྶ ཙ ཨུཔམཱ ནཱམ ནིཧཱིནུཔམཱཝ, ནཏྠི སམཱནུཔམཱ, ཀུཏོ ཨདྷིཀཱུཔམཱ, ཏསྨཱ ཨཡམྤི ནིཧཱིནུཔམཱཏི དསྶེཏུཾ ‘‘ཏཏྠཱ’’ཏིཨཱདི ཝུཏྟཾ. ཏིབྷཱགཝསེན མཎྜལཏཱཡ དྭཱདསིཡཾ པཀྑསྶ ཙནྡསདིསཱནི.

དནྟཱནཾ ཨུཙྩནཱིཙཏཱ ཨབྦྷནྟརབཱཧིརཔསྶཝསེནཔི ཝེདིཏབྦཱ, ན ཨགྒཝསེནེཝ. ཏེནཱཧ ‘‘ཨཡཔཊྚཚིནྣསངྑཔཊལཾ ཝིཡཱ’’ཏི. ཨཡཔཊྚནྟི ཙ ཀཀཙཾ ཨདྷིཔྤེཏཾ. ཝིསམཱཏི ཝིསམསཎྛཱནཱ.

ཝིཙྪིནྡིཏྭཱ ཝིཙྪིནྡིཏྭཱ པཝཏྟསརཏཱཡ ཚིནྣསྶརཱཔི. ཨནེཀཱཀཱརཏཱཡ བྷིནྣསྶརཱཔི. ཀཱཀསྶ ཝིཡ ཨམནུཉྙསརཏཱཡ ཀཱཀསྶརཱཔི. ཨཔལིབུདྡྷཏྟཱཏི ཨནུཔདྡུཏཝཏྠུཀཏྟཱ. ཝཏྠུནྟི ཙ ཨཀྑརུཔྤཏྟིཊྛཱནམཱཧ. ཨཊྛངྒསམནྣཱགཏོཏི ཨེཏྠ ཨཊྛངྒཱནི པརཏོ ཨཱགམིསྶནྟི. མཉྫུགྷོསོཏི མདྷུརསྶརོ.

ཀརཝཱིཀསདྡོ ཡེསཾ སཏྟཱནཾ སོཏཔཐཾ ཨུཔགཙྪཏི, ཏེ ཨཏྟནོ སརསམྤཏྟིཡཱ པཀཏིཾ ཛཧཱཔེཏྭཱ ཨཝསེ ཀརོནྟོ ཨཏྟནོ ཝསེ ཝཏྟེཏི, ཨེཝཾ མདྷུརོཏི དསྶེནྟོ ‘‘ཏཏྲིད’’ནྟིཨཱདིམཱཧ. ཏཾ པཱིཏིནྟི ཏཾ བུདྡྷགཏཾ པཱིཏིཾ. ཏེནེཝ ནཱིཧཱརེན པུནཔྤུནཾ པཝཏྟནྟཾ ཨཝིཛཧིཏྭཱ ཝིཀྑམྦྷིཏཀིལེསཱ ཐེརཱནཾ སནྟིཀེ ལདྡྷདྷམྨསྶཝནསཔྤཱཡཱ ཨུཔནིསྶཡསམྤཏྟིཡཱ པརིཔཀྐཉཱཎཏཱཡ ¶ ‘‘སཏྟཧི…པེ… པཏིཊྛཱསཱི’’ཏི. སཏྟསཏམཏྟེན ཨོརོདྷཛནེན སདྡྷིཾ པདསཱཝ ཐེརཱནཾ སནྟིཀཾ ཨུཔགཏཏྟཱ ‘‘སཏྟཧི ཛངྒྷཱསཏེཧི སདྡྷི’’ནྟི ཝུཏྟཾ.

ཨབྷིནཱིལནེཏྟོཏི ཨདྷིཀནཱིལནེཏྟོ. ཨདྷིཀནཱིལཏཱ ཙ སཱཏིསཡཾ ནཱིལབྷཱཝེན ཝེདིཏབྦཱ, ན ནེཏྟེ ནཱིལཝཎྞསྶེཝ ཨདྷིཀབྷཱཝཏོཏི ཨཱཧ ‘‘ན སཀལནཱིལནེཏྟོཝཱ’’ཏིཨཱདི. པཱིཏལོཧིཏཝཎྞཱ སེཏམཎྜལགཏརཱཛིཝསེན, ནཱིལསེཏཀཱལ༹ཝཎྞཱ པན ཏཾཏཾམཎྜལཝསེནེཝ ཝེདིཏབྦཱ.

ཙཀྑུབྷཎྜནྟི ཨཀྑིདལནྟི ཀེཙི, ཨཀྑིདལཔཏྟནྟི ཨཉྙེ. ཨཀྑིདལེཧི པན སདྡྷིཾ ཨཀྑིབིམྦནྟི ཝེདིཏབྦཾ. ཨེཝཉྷི ཝིནིགྒཏགམྦྷཱིརཛོཏནཱཔི ཡུཏྟཱ ཧོཏི.

ཨུཎྞཱསདྡོ ¶ ལོཀེ ཨཝིསེསཏོ ལོམཔརིཡཱཡོ, ཨིདྷ པན ལོམཝིསེསཝཱཙཀོཏི ཨཱཧ ‘‘ཨུཎྞལོམ’’ནྟི. ནལཱཊམཛ྄ཛྷཛཱཏཱཏི ནལཱཊམཛ྄ཛྷགཏཱ. ཨོདཱཏཏཱཡ ཨུཔམཱ, ན མུདུཏཱཡ. རཛཏཔུབྦུལ༹ཀཱཏི རཛཏམཡཏཱརཀཱ.

དྭེ ཨཏྠཝསེ པཊིཙྩ ཝུཏྟནྟི ཡསྨཱ བུདྡྷཱ ཙཀྐཝཏྟིནོ ཙ པརིཔུཎྞནལཱཊཏཱཡ པརིཔུཎྞསཱིསབིམྦཏཱཡ ཙ ‘‘ཨུཎྷཱིསསཱིསཱ’’ཏི ཝུཙྩནྟི, ཏསྨཱ ཏེ དྭེ ཨཏྠཝསེ པཊིཙྩ ‘‘ཨུཎྷཱིསསཱིསོ’’ཏི ཨིདཾ ཝུཏྟཾ. ཨིདཱནི ཏཾ ཨཏྠདྭཡཾ བྷགཝཏི སུཔྤཏིཊྛིཏནྟི དསྶེཏུཾ ‘‘ཏཐཱགཏསྶཧཱི’’ཏིཨཱདི ཝུཏྟཾ. སཎྷཏམཏཱཡ སུཝཎྞཝཎྞཏཱཡ ཙ རཉྙོ བདྡྷཨུཎྷཱིསཔཊྚོ ཝིཡ ཝིརོཙཏི. ཀཔྤསཱིསཱཏི དྭིདྷཱབྷཱུཏསཱིསཱ. ཕལསཱིསཱཏི ཕལསདིསསཱིསཱ. ཨཊྛིསཱིསཱཏི མཾསསྶ ཨབྷཱཝཏོ ཏཙོཔརིཡོནདྡྷཨཊྛིམཏྟསཱིསཱ. ཏུམྦསཱིསཱཏི ལཱབུསདིསསཱིསཱ. པབྦྷཱརསཱིསཱཏི པིཊྛིབྷཱགེན ཨོལམྦམཱནསཱིསཱ. པུརིམནཡེནཱཏི པརིཔུཎྞནལཱཊཏཱཔཀྑེན. ཨུཎྷཱིསཝེཋིཏསཱིསོ ཝིཡཱཏི ཨུཎྷཱིསཔཊྚེན ཝེཋིཏསཱིསཔདེསོ ཝིཡ. ཨུཎྷཱིསཾ ཝིཡཱཏི ཚེཀེན སིཔྤིནཱ ཝིརཙིཏཨུཎྷཱིསམཎྜལཾ ཝིཡ.

ཀམྨནྟི ཡེན ཡེན ཀམྨེན ཡཾ ཡཾ ལཀྑཎཾ ནིབྦཏྟཾ, ཏཾ ཏཾ ཀམྨཾ. ཀམྨསརིཀྑཀནྟི ཏསྶ ཏསྶ ལཀྑཎསྶ ཏཾཀམྨཱནུརཱུཔཏཱ. ལཀྑཎནྟི ཏསྶ མཧཱཔུརིསལཀྑཎསྶ ཨཝིཔརཱིཏསབྷཱཝོ. ལཀྑཎཱནིསཾསནྟི ཏཾ ལཀྑཎཔཊིལཱབྷེན ལདྡྷབྦགུཎོ. ཨིམཱནི ཀམྨཱདཱིནཱིཏི ཨིམཱནི ཨནནྟརཾ ཝུཏྟཱནི ཀམྨཀམྨསརིཀྑཀཱདཱིནི དསྶེཏྭཱ ཏཾ སརཱུཔཏོ ཝིབྷཱཝེཏྭཱ ཀཐེཏབྦཱནི སཾཝཎྞཀེན.

རཏནཝིཙིཏྟསུཝཎྞཏོརཎཾ ¶ ཏསྨིཾ ཀཱལེ མནུསྶལོཀེ ནཏྠཱིཏི ཝུཏྟཾ ‘‘དེཝནགརེ’’ཏི. སབྦསོ སུཔུཔྥིཏསཱལརུཀྑོ ཨསཱདྷཱརཎསོབྷོ མནུསྶཱུཔཙཱརེ ན ལབྦྷཏཱིཏི ཨཱཧ ‘‘སེལནྟརམྷཱི’’ཏི. ཀིརིཡཱཙཱརནྟི ཀཱཡིཀཝཱཙསིཀཀིརིཡཱཔཝཏྟིཾ.

༣༨༧. སཏཏཔཱཊིཧཱརིཡནྟི སཏཏཾ ཙརིམབྷཝེ སབྦཀཱལཾ ལཀྑཎནིབྦཏྟཀཀམྨཱནུབྷཱཝཧེཏུཀཾ བུདྡྷཱཝེཎིཀཾ པཱཊིཧཱརིཡཾ. བུདྡྷཱནཾ ཨཏིདཱུརེ པཱདཾ ནིཀྑིཔིཏུཀཱམཱནམྤི ནཱཏིདཱུརེ ཨེཝ ནིཀྑིཔནཾ ཧོཏཱིཏི ‘‘ན ཨཏིདཱུརེ ཋཔེསྶཱམཱིཏི ¶ ཨུདྡྷརཏཱི’’ཏི ཝུཏྟཾ. པཀཏིསཉྩརཎཝསེནེཏཾ ཝུཏྟཾ, ཏཱདིསེན པཱདེན ཨནེཀཡོཛནེ ཋཔེསྶཱམཱིཏི ཨུདྡྷརཎམྤི ཧོཏིཡེཝ. ཨཏིདཱུརཾ ཧཱིཏིཨཱདི པམཱཎཱཏིཀྐམེ དོསདསྶནཾ. ཨེཝཾ སཏཱིཏི ཨེཝཾ དཀྑིཎཔཱདཝཱམཔཱདཱནཾ ཡཐཱདྷིཔྤེཏཔཏིཊྛིཏཊྛཱནེ སཏི. པདཝིཙྪེདོཏི པདཝཱརཝིཙྪེདོ. ཡཱདིསཾ པསཱརེནྟོ ཝཱམཔཱདསྶ ཨུདྡྷརཎཾ པཏིཊྛཱནཉྩ, དཀྑིཎཔཱདསྶ ཏཱདིསམེཝ, ཨིཏི ནེསཾ ཨུདྡྷརཎཔཏིཊྛཱནཱནཾ སམཱནཏོ ཨཉྙམཉྙབྷཱཝེན ཨནཱུནཱནདྷིཀཏཱཡ ཝུཏྟཾ ‘‘དཀྑིཎཔཱདཀིཙྩཾ ཝཱམཔཱདེན ནིཡམིཏཾ, ཝཱམཔཱདཀིཙྩཾ དཀྑིཎཔཱདེན ནིཡམིཏ’’ནྟི.

དིཝཱཏི ཨུཔཀཊྛཱཡ ཝེལཱཡ. ཝིཧཱརབྷཏྟཏྠཱཡཱཏི ཝིཧཱརེ ཡཐཱཝུདྡྷཾ གཧེཏབྦབྷཏྟཏྠཱཡ. པཙྪཏོ ཨཱགཙྪནྟོཏི པཀཏིགམནེན པཙྪཏོ ཨཱགཙྪནྟོ. ཨོཀཱསཾ ན ལབྷཏཱིཏི པདནིཀྑེཔཊྛཱནཾ ན ལབྷཏི. ཨཱུརུཔརིཡཱཡོ ཨིདྷ སཏྠི-སདྡོཏི ཨཱཧ ‘‘ན ཨཱུརུཾ ཨུནྣཱམེཏཱི’’ཏི. དཎྜངྐུསཾ ཝུཙྩཏི དཱིགྷདཎྜོ ཨངྐུསོ, ཏེན རུཀྑསཱཁཾ ཚིནྡཏོ པུརིསསྶ ཡཐཱ པཙྪཱབྷཱགེན པཱདཱནཾ ཨོསཀྐནཾ ཧོཏི, ཨེཝཾ བྷགཝཏོ པཱདཱ ན ཨོསཀྐནྟཱིཏི ཨཱཧ ‘‘རུཀྑསཱཁཱཚེདན…པེ… ཨོསཀྐཱཔེཏཱི’’ཏི. ཨོབདྡྷཱནཱབདྡྷཊྛཱནེཧི པཱདཾ ཀོཊྚེནྟོ ཝིཡཱཏི ཨཱབདྡྷཊྛཱནེན ཨནཱབདྡྷཊྛཱནེན ཙ པཱདཁཎྜཾ ཀོཊྚེཏྭཱ ཐདྡྷཾ ཀརོནྟོ ཝིཡ. ན ཨིཏོ ཙིཏོ ཙ ཙཱལེཏཱིཏི ཨཔརཱཔརཾ ན ཙཱལེཏི. ཨུསྶངྑཔཱདཏཱཡ སུཁེནེཝ པཱདཱནཾ པརིཝཏྟནཏོ ནཱབྷིཏོ པཊྛཱཡ ཨུཔརིམཀཱཡོ ན ཨིཉྫཏཱིཏི ཧེཊྛིམཀཱཡོཝ ཨིཉྫཏི. ཏེནཱཧ ‘‘ཨུཔརིམ…པེ… ནིཙྩལོ ཧོཏཱི’’ཏི. ན ཛཱནཱཏི ཨནིཉྫནཏོ. ཀཱཡབལེནཱཏི གམནཔཡོགསངྑཱཏེན ཀཱཡགཏེན ཝིསེསབལེན. ཛཝགམནཧེཏུབྷཱུཏེན ཝཱ ཀཱཡབལེན. ཏེནཱཧ ‘‘བཱཧཱ ཁིཔནྟོ’’ཏིཨཱདི. ཛཝེན གཙྪནྟོ ཧི བཱཧཱ ཁིཔཏི, སརཱིརཏོ སེདཱ མུཙྩནྟི. ནཱགཱཔལོཀིཏཝསེནཱཏི ནཱགསྶ ཨཔལོཀནམིཝ སཀལཀཱཡེནེཝ པརིཝཏྟེཏྭཱ ཨཔལོཀནཝསེན.

ཨནཱཝརཎཉཱཎསྶཱཏི ཨནཱཝརཎཉཱཎབལེན དསྶནསྶ. ཨནཱཝརཎཝཱརོ པན ཀཱཡེ པཏིཊྛིཏརཱུཔདསྶནམྤི ཨནཱཝརཎམེཝཱཏི དསྶནཏྠཾ ཝུཏྟོ. ཨིནྡཁཱིལཏོ པཊྛཱཡཱཏི ནགརདྭཱརེ ཨིནྡཁཱིལཏོ ¶ པཊྛཱཡ. པཀཏིཨིརིཡཱཔཐེནེཝཱཏི ¶ ཨོནམནཱདིཾ ཨཀཏྭཱ ཨུཛུཀགམནཱདིནཱ ཨེཝ. ཡདི ཨེཝཾ ཀོཊྛཀདྭཱརགེཧཔྤཝེསེ ཀཐནྟི ཨཱཧ ‘‘དལིདྡམནུསྶཱན’’ནྟིཨཱདི. པརིཝཏྟེནྟེནཱཏི ནིཔཛྫནཏྠཾ ཀཱཡཾ པརིཝཏྟེནྟེན.

ཧཏྠེཧི གཧེཏྭཱཏི ཨུབྷོཧི ཧཏྠེཧི ཨུབྷོསུ ཀཊིཔྤདེསེསུ པརིགྒཧེཏྭཱ. པཏཏི ནིསཱིདནཊྛཱནེ ནིཔཛྫནཝསེན པཏཏི. ཨོརིམཾ ཨངྒཾ ནིསྶཱཡ ནིསིནྣོཏི པལླངྐམཱབྷུཛིཏྭཱ ཨུཀྐུཊིཀནིསཛྫཱཡ ཨུཔརིམཀཱཡཾ ཧེཊྛིམཀཱཡེ པཏིཊྛཔེནྟོཡེཝ བྷཱརཱིཀརཎཝསེན ཨོརིམངྒཾ ནིསྶཱཡ ནིསིནྣོ. གྷཾསནྟོཏི ཨཱནིསདདེསེན ཨཱསནཊྛཱནཾ གྷཾསནྟོ. པཱརིམངྒནྟི སཏྠིབྷཱགསམྨདྡཾ ཨཱནིསདཔདེསཾ. ཏཐེཝཱཏི གྷཾསནྟོ ཨེཝ. ཨོལམྦཀཾ དྷཱརེནྟོ ཝིཡཱཏི ཨོལམྦཀསུཏྟཾ ཨོཏཱརེནྟོ ཝིཡ. ཏེན ཨུཛུཀམེཝ ནིསཱིདནམཱཧ. སརཱིརསྶ གརུཀབྷཱཝཧེཏཱུནཾ དཱུརཏོ སམུཔཱཡིཏབྷཱཝེན སལླཧུཀབྷཱཝཏོ ཏཱུལཔིཙུཾ ཋཔེནྟོ ཝིཡ.

ཨཔྤེསཀྑཱནཾ མཧཱནུབྷཱཝགེཧཔྤཝེསེ སིཡཱ ཚམྦྷིཏཏྟཾ, ཙིཏྟཀྑོབྷོ, དརཐཝསེན ནཱནཔྤཀཱརཀཔྤནཾ, བྷཡཝསེན ཏཎྷཱཝསེན པརིཏསྶནཾ, ཏཾ སབྦཾ བྷགཝཏོ ནཏྠཱིཏི དསྶེཏུཾ པཱལི༹ཡཾ ‘‘ན ཚམྦྷཏཱི’’ཏིཨཱདི (མ. ནི. ༢.༣༨༧) ཝུཏྟནྟི ཨཱཧ ‘‘ན ཚམྦྷཏཱི’’ཏིཨཱདི.

ཨུདཀཾ དཱིཡཏི ཨེཏེནཱཏི ཨུདཀདཱནཾ, བྷིངྐཱརཱདི ཨུདཀབྷཱཛནཾ. བདྡྷཾ ཀཏྭཱཏི ཧཏྠགཏམཏྟིཀཾ ཝིཡ ཨཏྟནོ ཝསེ ཨཝཏྟནྟཾ ཀཏྭཱ. པརིཝཏྟེཏྭཱཏི ཀུཛྫིཏྭཱ. ཝིཚཌྜཡམཱནོ ཨུདཀསྶ ཝིཀྑིཔནཝསེན ཚཌྜཡམཱནོ.

ཏཐཱ ན གཎྷཱཏི, བྱཉྫནམཏྟཱཡ ཨེཝ གཎྷནྟོ. བྷཏྟཾ ཝཱ ཨམནཱཔནྟི ཨཱནེཏྭཱ ཡོཛནཱ. བྱཉྫནེན ཨཱལོཔཨཏིནཱམནཾ, ཨཱལོཔེན བྱཉྫནཨཏིནཱམནནྟི ཨིམེསུ པན དྭཱིསུ པཋམམེཝ ཨསཱརུཔྤཏཱཡ ཨནིཊྛཾ ཝཛྫེཏབྦནྟི པཱལི༹ཡཾ པཊིཀྑིཏྟནྟི དཊྛབྦཾ. སབྦཏྠེཝཱཏི སབྦསྨིཾ ཨཱཧརིཏབྦཝཏྠུསྨིཾ སུཔཎཱིཏབྷཱཝེན རསོ པཱཀཊོ ཧོཏི ཉཱཎེན པརིཉྙཱཏཏྟཱ. རསགེདྷོ པན ནཏྠི སེཏུགྷཱཏཏྟཱ.

ཨསྶཱཏི ‘‘ནེཝ དཝཱཡཱ’’ཏིཨཱདིཔདསྶ. ཝུཏྟམེཏནྟི ‘‘ཝིསུདྡྷིམགྒེ ཝིནིཙྪཡོ ཨཱགཏོ’’ཏི སབྦཱསཝསུཏྟེ (མ. ནི. ༡.༢༣) སཾཝཎྞཡནྟེན ཝུཏྟམེཏཾ, ཏསྨཱ ¶ ན ཨེཏྠ ཏཾ ཝཏྟབྦནྟི ཨདྷིཔྤཱཡོ, ཏསྨཱ ཡོ ཏསྨིཾ ཏསྨིཾ ཝིནིཙྪཡེ ཝིསེསཝཱདོ ཨིཙྪིཏབྦོ. སོ པརམཏྠམཉྫཱུསཱཡ ཝིསུདྡྷིམགྒཝཎྞནཱཡ ཝུཏྟནཡེནེཝ ཝེདིཏབྦོ. པཏྟསྶ གཧཎཊྛཱནནྟི ཧཏྠེན པཏྟསྶ ¶ གཧཎཔདེསཾ. ཝིནིཝཏྟིཏྭཱཏི པཏྟེ སབྦཾ ཨཱམིསགཏཾ སདྡྷིཾ བྷཏྟེན ཝིནིཝཏྟིཏྭཱ གཙྪཏི. པམཱཎཱཏིཀྐནྟནྟི ཀེལཱཡནཝསེན ཨཏིཀྐནྟཔམཱཎཾ ཨཱརཀྑཾ ཋཔེཏི. ཙཱིཝརབྷོགནྟརནྟི ཙཱིཝརཔཊལནྟརཾ. ཨུདརེན ཨཀྐམིཏྭཱཏི ཨུདརེནེཝ སནྣིརུམྦྷིཏྭཱ.

ཨཔྤཏྟཀཱལཾ ཨབྷིམུཁཾ ནཱམེཏི ཨུཔནཱམེཏཱིཏི ཨཏིནཱམེཏི, པཏྟཀཱལཾ ཨཏིཀྐཱམེནྟོ ནཱམེཏི ཨཔནེཏཱིཏི ཨཏིནཱམེཏི. ཨུབྷཡམྤི ཨེཀཛ྄ཛྷཾ གཧེཏྭཱ པཱལི༹ཡཾ ‘‘ན ཙ ཨནུམོདནསྶ ཀཱལམཏིནཱམེཏཱི’’ཏི ཝུཏྟནྟི དསྶེནྟོ ‘‘ཡོ ཧཱི’’ཏིཨཱདིམཱཧ.

ཝེགགམནེན པཊིསཾམུཉྩིཏྭཱ དྷཱཝིཏྭཱ གཙྪཏི. ཨཙྩུཀྐཊྛནྟི ཨཏིཝིཡ ཨུདྡྷཾ ཀཏྭཱ ཀཌྜྷིཏཔཱརུཏཾ. ཏེནཱཧ ‘‘ཡོ ཧི ཡཱཝ ཧནུཀཊྛིཏོ…པེ… ཧོཏཱི’’ཏི. ཨཙྩོཀྐཊྛནྟི ཨཏིཝིཡ ཧེཊྛཱ ཀཏྭཱ ཀཌྜྷིཏཔཱརུཏཾ. ཏེནཱཧ ‘‘ཡཱཝ གོཔྥཀཱ ཨོཏཱརེཏྭཱ’’ཏི. ཨུབྷཏོ ཨུཀྑིཔིཏྭཱཏི དཀྑིཎཏོ ཝཱམཏོཏི ཨུབྷོསུ པསྶེསུ ཨུཏྟརཱསངྒཾ ཨུཀྑིཔིཏྭཱ. ཐནནྟི དཀྑིཎཐནཾ.

ཝིསྶཊྛོཏི ཝིམུཏྟོ. ཏེནཱཧ ‘‘ཝིསྶཊྛཏྟཱཡེཝ ཙེས ཝིཉྙེཡྻོ’’ཏི. ཡསྨཱ ཨམུཏྟཝཱདིནོ ཝཙནཾ ཨཝིསྶཊྛཏཱཡ ན སིནིཡ྄ཧཏི, ན ཨེཝཾ མུཏྟཝཱདིནོཏི ཨཱཧ ‘‘སིནིདྡྷོ’’ཏི. ཝིཉྙེཡྻོཏི སུཔརིབྱཏྟཏཱཡ ཨཀྑརཏོ ཙ བྱཉྫནཏོ ཙ ཝིཉྙཱཏུཾ སཀྐུཎེཡྻོ. ཏེནཱཧ ‘‘པཱཀཊོ’’ཏི. ཝིཉྙཱཔནིཡོཏི ཝིཛཱནིཏབྦོ. བྱཉྫནཝསེནེཝ ཙེཏྠ ཝིཉྙེཡྻཏཱ ཝེདིཏབྦཱ གྷོསསྶ ཨདྷིཔྤེཏཏྟཱ. མདྷུརོཏི པིཡོ པེམནཱིཡོ ཨཔལིབུདྡྷོ. སཝནམརཧཏི, སཝནསྶ སོཏསྶ ཧིཏོཏི ཝཱ སཝནཱིཡོ. སམྤིཎྜིཏོཏི སཧིཏོ. བྷགཝཏོ ཧི སདྡོ ཨུཔྤཏྟིཊྛཱནཀཏཱསཉྩིཏཏྟཱ སཧིཏཱཀཱརེནེཝ ཨཱཔཱཐམཱགཙྪཏི, ན ཨཡོསལཱཀཱཡ པཧཊཀཾསཐཱལཾ ཝིཡ ཝིཔྤཀིཎྞོ. ཏེནཱཧ ‘‘ཨཝིསཱརཱི’’ཏི. གམྦྷཱིརོཏི ཡཐཱ གམྦྷཱིརཝཏྠུཔརིཙྪིནྡནེན ཉཱཎསྶ གམྦྷཱིརསམཉྙཱ, ཨེཝཾ གམྦྷཱིརཊྛཱནསམྦྷཝཏོ སདྡསྶ གམྦྷཱིརསམཉྙཱཏི ཨཱཧ ‘‘གམྦྷཱིརོཏི གམྦྷཱིརསམུཊྛིཏོ’’ཏི ¶ . ནིནྣཱདཝཱཏི སཝིསེསཾ ནིནྣཱདཝཱ. སྭཱཡཾ ཝིསེསོ གམྦྷཱིརབྷཱཝསིདྡྷོཏི ཨཱཧ ‘‘གམྦྷཱིརཏྟཱཡེཝ ཙེས ནིནྣཱདཱི’’ཏི. ཨེཝམེཏྠ ཙཏྟཱརི ཨངྒཱནི ཙཏུརངྒནིཔྥཱདཱིནི ཝེདིཏབྦཱནི. ཨཀཱརཎཱ མཱ ནསྶཱིཏི བུདྡྷཱནུབྷཱཝེན ཝིཡ སརསྶ པརིསཔརིཡནྟཏཱ ཝུཏྟཱ, དྷམྨཏཱཝསེནེཝ པན སཱ ཝེདིཏབྦཱ ཏསྶ མཱུལཀཱརཎསྶ ཏཐཱ ཨཝཊྛིཏཏྟཱ.

པཙྩོསཀྐིཏྭཱཏི པཊིནིཝཏྟིཏྭཱ. སམུསྶིཏཀཉྩནཔབྦཏཾ ཝིཡ ཨུཔརི ཨིནྡནཱིལརཏནཝིཏཏསིཁཾ ¶ ཝིཛྫུལླཏཱབྷཱུསིཏཾ. མཧཱཔཐཝཱིཨཱདཡོ སཏྠུགུཎཔཊིབྷཱགཏཱཡ ནིདསྶནཾ, ཀེཝལཾ མཧནྟཏཱམཏྟཾ ཨུཔཱདཱཡ ནིདསྶིཏཱ.

༣༩༠. ཨཔྤཊིསཾཝིདིཏོཏི ཨནཱརོཙིཏོ. ཨཱགམནཝསེན ཙེཏྠ པཊིསཾཝེདིཏནྟི ཨཱཧ ‘‘ཨཝིཉྙཱཏཨཱགམནོ’’ཏི. ཨུགྒཏབྷཱཝནྟི ཀུལབྷོགཝིཛྫཱདཱིཧི ཨུལཱ༹རབྷཱཝཾ. ཨནུདྡཡསམྤནྣཱཏི ཀཱརུཎིཀཱ.

༣༩༡. སཧསཱཝ ཨོཀཱསཀརཎེན ཨུཙྩཀུལཱིནཏཱ དཱིཔིཏཱ ཧོཏཱིཏི ཨཱཧ ‘‘ཝེགེན ཨུཊྛཱཡ དྭིདྷཱ བྷིཛྫིཏྭཱ’’ཏིཨཱདི.

ནཱརིསམཱནནཱམནྟི ཨིཏྠིཨཏྠཛོཏཀནཱམཾ. ཏེནཱཧ ‘‘ཨིཏྠིལིངྒ’’ནྟི. ཨཝ྄ཧཱཏབྦཱཏི ཀཐེཏབྦཱ.

༣༩༤. ཨེཀནཱིཧཱརེནེཝ ཨཊྛ པཉྷེ བྱཱཀརོནྟོ. ‘‘པུབྦེནིཝཱསཾ…པེ… པཝུཙྩཏཱི’’ཏི ཨིམིནཱ པུབྦེནིཝཱསསྶ ཝིདིཏཀཱརཎཾ ཝུཏྟནྟི ཨཱཧ ‘‘ཏསྶ པུབྦེནིཝཱསོ པཱཀཊོ’’ཏི. དིབྦཙཀྑུཉཱཎཾ ཀཐིཏཾ ཏསྶ པརིབྷཎྜཉཱཎབྷཱཝཏོ ཡཐཱཀམྨཱུཔགཉཱཎསྶ. ‘‘ཛཱཏིཀྑཡཾ པཏྟོ, ཨབྷིཉྙཱ ཝོསིཏོ’’ཏི ཙ ཝུཏྟཏྟཱ མུནཱིཏི ཨསེཀྑམུནི ཨིདྷཱདྷིཔྤེཏོཏི ཨཱཧ ‘‘ཨརཧཏྟཉཱཎམོནེཡྻེན སམནྣཱགཏོ’’ཏི.

ཀིལེསརཱགེཧི ཀིལེསཝིཝཎྞཏཱཧི. ཛཱཏིཀྑཡཔྤཏྟཏྟཱ ‘‘ཨཐོ ཛཱཏིཀྑཡཾ པཏྟོ’’ཏི ཝུཏྟཏྟཱ. ཨབྷིཛཱནིཏྭཱཏི ཨབྷིཝིསིཊྛཏཱཡ ཨགྒམགྒཔཉྙཱཡ ཉཏྭཱ. ཨིདཱནི པཊིསམྦྷིདཱཡཾ ཨཱགཏནཡེན པརིཉྙཱཔཧཱནབྷཱཝནཱསཙྪིཀིརིཡཱསམཱཔཏྟཱིནཾ པཱརགམནེན པཱརགཱུཏི ཨཡམེཏྠ ཨཏྠོཏི དསྶེཏུཾ ‘‘པཱརགཱུཏི ཝཱ’’ཏིཨཱདི ཝུཏྟཾ. ཨབྷིཉྙེཡྻདྷམྨཱནཾ ཛཱནནཝསེན ཨབྷིཉྙཱཔཱརགཱུ. ཏཱདིསོཏི ཡཱདིསོ ‘‘པཱརགཱུ སབྦདྷམྨཱན’’ནྟི པདདྭཡེན ¶ ཝུཏྟོ, ཏཱདིསོ. ཚཧི ཨཱཀཱརེཧཱིཏི པཛཱནནཱདཱིཧི ཡཐཱཝུཏྟེཧི ཚཧི ཨཱཀཱརེཧི.

ཀཱམཉྩེཏྠ དྭེ ཨེཝ པུཙྪཱགཱཐཱ དྭེ ཙ ཝིསྶཛྫནཱགཱཐཱ, པུཙྪཱཔཊིཔཱཊིཡཱ པན ཨསངྐརཏོ ཙ ཝིསྶཛྫནཾ པཝཏྟཏི, ཏཾ ནིདྡྷཱརེཏུཾ ཀིཾ པནཱཏིཨཱདི ཝུཏྟཾ. ཝེདེཧི གཏཏྟཱཏི ཝེདེཧི མགྒཉཱཎེཧི པཱརངྒཏཏྟཱ. པུབྦེནིཝཱསནྟིཨཱདཱིཧི ཝིཛྫཱནཾ ཨཏྠིཏཱཡ བོདྷིཏཏྟཱ. པཱཔདྷམྨཱནནྟི ཚཏྟིཾསཔཱཔདྷམྨཱནཾ སོཏྠཱནཾ མགྒཾ པཱཔནེན ནིསྶེསཏོ སོདྷིཏཏྟཱ.

༣༩༥. དྷམྨོ ¶ ནཱམ ཨརཧཏྟམགྒོ ཀུསལདྷམྨེསུ ཨུཀྐཾསཔཱརམིཔྤཏྟིཡཱ ཨུཀྐཊྛནིདྡེསེན. ཏསྶ ཨནུརཱུཔདྷམྨབྷཱཝཏོ ཨནུདྷམྨོ ནཱམ ཧེཊྛིམམགྒཕལདྷམྨཱ. ཡོ སཏྠུ སནྟིཀེ དྷམྨཾ སུཏྭཱ ཡཐཱནུསིཊྛཾ ན པཊིཔཛྫཏི, སོ ཏཐཱགཏཾ དྷམྨཱདྷིཀརཎཾ ཝིཧེཋེཏི ནཱམ. ཡོ པན པཊིཔཛྫནྟོ ཙ དནྡྷཱབྷིཉྙཏཱཡ ཀམྨཊྛཱནསོདྷནཏྠཾ ཨནྟརནྟརཱ བྷགཝནྟཾ ཨུཔསངྐམིཏྭཱ ཨནེཀཝཱརཾ ཀཐཱཔེཏི, སོ ཨེཏྟཱཝཏཱ དྷམྨཱདྷིཀརཎཾ ཏཐཱགཏཾ ཝིཧེཋེཏཱིཏི ན ཝཏྟབྦོ. ན ཧི བྷགཝཏོ དྷམྨདེསནཱཡ པརིསྶམོ ཨཏྠི, ཨཡཉྩ ཨཏྠོ མཧཱསུདསྶནསུཏྟཱདཱིཧི (དཱི. ནི. ༢.༢༤༡ ཨཱདཡོ) དཱིཔེཏབྦོ, ཏསྨཱ – ‘‘སཙྩདྷམྨསྶ ཨནུདྷམྨ’’ནྟི ཝཏྟབྦེ ཝུཏྟམེཝ བྱཏིརེཀམུཁེན ཝིབྷཱཝེཏུཾ ‘‘ན ཙ མཾ དྷམྨཱདྷིཀརཎཾ ཝིཧེསེསཱི’’ཏི ཝུཏྟནྟི དཊྛབྦཾ. ཏཏྠ པརིནིབྦཱཡཱིཏི པརཀཱལེ ཙེཏྠ པརིནིབྦཱནམྤི སངྒཡ྄ཧཏི, ཏཾ པན ཨིམསྨིཾ གཧིཏམེཝ ཧོཏཱིཏི ཨཱཧ ‘‘དེསནཱཡ ཨརཧཏྟེནེཝ ཀཱུཊཾ གཧིཏ’’ནྟི.

བྲཧྨཱཡུསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༢. སེལསུཏྟཝཎྞནཱ

༣༩༦. ཀེཎིཡོཏི ¶ ཏསྶ ནཱམཾ, པུབྦེ ཀེཎིཡཱ ཛཱིཝིཀཱཀཔྤནཏོཏི ཝདནྟི. ཛཊིལོཏི ཛཊཱདྷརོ. བྲཱཧྨཎཛཱཏིཀཏྟཱ ཀོཊིསཱརཏཱཡ ཙ བྲཱཧྨཎམཧཱསཱལོ. པཡོཛེཏྭཱ ནིསྶཡོ ཧུཏྭཱ ཝསཏི, རཏྟིཾ ཀཱམསམྤཏྟིཾ ཨནུབྷཝཏཱིཏི ཝཱ ཡོཛནཱ. སུསངྑཏནྟི སཔྤིམདྷུསཀྐརཱདཱིཧི ཙེཝ མརིཙསིངྒཱིཝེརཱདཱིཧི ཙ སུཊྛུ ཨབྷིསངྑཏཾ.

པཊིཀྑེཔཔསནྣཏཱཡཱཏི ¶ ཨཧོཝཏཱཡཾ ཨཔྤིཙྪོ, ཡོ ནིམནྟིཡམཱནོཔི ན སཱདིཡཏཱིཏི ཨུཔནིམནྟིཡམཱནསྶ པཊིཀྑེཔེ ཏིཏྠིཡཱནཾ པསནྣབྷཱཝཏོཏི. ཏཾ ཀཐཾ? ཝིརུདྡྷམེཏནྟི ‘‘ཨཀཱརཎམེཏ’’ནྟི པཊིཀྑིཔཏི.

༣༩༨. ཀཔྤསཧསྶེཧིཔི…པེ… ཨཧོསཱིཏི ཨིདཾ ནཱནུསྶཝསིདྡྷཾ ཨནུམཱནགྒཧཎཾ སནྡྷཱཡཱཧ. པདེཏི ཨུཏྟརཔདལོཔེན ནིདྡེསོཏི ཨཱཧ ‘‘པདཔྤམཱཎེ’’ཏི. པཛྫཏི ནིཀྑིཔཏི ཨེཏྠཱཏི ཝཱ པདཾ པཀཏིཡཱ པཱདནིཀྑིཔཊྛཱནཾ, ཏསྨིཾ པདེ. ཀཱིལཱ༹པསུཏཏཱདིནཱ པམཱདཾ ཨཱཔཛྫཏི. བོདྷིསཏྟཙཱརིཀནྟི དུཀྐརཙརིཡཾ སནྡྷཱཡ ཝདཏི.

༣༩༩. པརིཔུཎྞཏཱཡཱཏི ཨནཱུནཏཱཡ. ཨཧཱིནངྒཏཱཡཱཏི ཨཝེཀལླབྷཱཝཏོ. རོཙཏཱིཏི རུཙི, དེཧཔྤབྷཱ, སོབྷཎཱ རུཙི ཨེཏསྶཱཏི སུརུཙི. ཨཱརོཧསམྤཏྟི ཀཱཡསྶ པམཱཎཡུཏྟཨུཙྩཏཱ. པརིཎཱཧསམྤཏྟི ཀིསཐཱུལབྷཱཝཝཛྫིཏཔརིཎཱཧཏཱ. སཎྛཱནསམྤཏྟི ཨཝཡཝཱནཾ སུསཎྛིཏཏཱ. ཙཱརུདསྶནོཏི པིཡདསྶནོ ཏེནཱཧ ‘‘སུཙིརམྤཱི’’ཏིཨཱདི. སུཝཎྞསདིསཝཎྞོཏི ཛཱཏིཧིངྒུལཀེན མདྡིཏྭཱ སིལཱནིགྷཾསེནེཝ པརིཀམྨཾ ཀཏྭཱ ཋཔིཏགྷནསུཝཎྞརཱུཔཝཎྞོ. མཧཱཔུརིསབྷཱཝཾ བྱཉྫེནྟི པཀཱསེནྟཱིཏི བྱཉྫནཱནི, མཧཱཔུརིསལཀྑཎཱནཱིཏི ཨཱཧ ‘‘པཋམཾ ཝུཏྟབྱཉྫནཱནེཝཱ’’ཏི.

པུབྦེ ཝུཏྟནྟི ‘‘སུརུཙཱི’’ཏི པུབྦེ ཝུཏྟཾ, ‘‘ཨཱདིཙྩོཝ ཝིརོཙསཱི’’ཏི པུན ཝུཏྟཾ. ‘‘ཙཱརུདསྶནོ སུཝཎྞཝཎྞོསཱི’’ཏི པུབྦེ ཝུཏྟཾ, ‘‘ཀལྱཱཎདསྶནོ བྷིཀྑུ ཀཉྩནཱབྷཏྟཙོ’’ཏི པུན ཝུཏྟནྟི ཨིམམཏྠཾ སནྡྷཱཡཱཧ ‘‘ཨུཏྟརགཱཐཱཡཔི ཨེསེཝ ནཡོ’’ཏི. སཱཏིསཡཾ ཨུཏྟམཝཎྞེ ཝཎྞེཏྭཱ ཨུཏྟམཝཎྞིནོཏི པདེན སནྟཾ པཀཱསེཏཱིཏི ཨཱཧ ‘‘ཨུཏྟམཝཎྞསམྤནྣསྶཱ’’ཏི. ཨུཏྟམསཱརཐཱིཏི ¶ སེཊྛཔུརིསསཱརཐི. ཏཏྠ ཏཏྠ ཛམྦུཝནསཎྜམཎྜིཏཏཱཡ ཛམྦུདཱིཔོ ‘‘ཛམྦུསཎྜོ’’ཏི ཝུཙྩཏི. ཨིསྶརིཡནྟི ཙཀྐཝཏྟིསྶརིཡཾ.

ཛཱཏིཁཏྟིཡཱཏི ཛཱཏིམནྟོ ཁཏྟིཡཱ. རཱཛཱབྷིརཱཛཱཏི ཨེཏྠ ཨབྷི-སདྡོ པཱུཛཏྠོཏི ཨཱཧ ‘‘རཱཛཱུནཾ པཱུཛནཱིཡོ’’ཏི.

ཨཔྤམཱཎཱཏི ཨཔརིམཱཎཱ ལོཀདྷཱཏུཡོ. ‘‘ཡཱཝཏཱ པན ཨཱཀངྑེཡྻཱ’’ཏི (ཨ. ནི. ༣.༨༡) ཧི ཝུཏྟཾ. དྷམྨརཱཛཱ ཨནུཏྟརོཏི ཨེཏྠ ཝུཏྟཨནུཏྟརབྷཱཝཾ ‘‘ཡཱཝཏཱ ¶ ཧཱི’’ཏིཨཱདིནཱ པཱཀཊཏརཾ ཀཏྭཱ དྷམྨརཱཛབྷཱཝཾ ཝིབྷཱཝེཏུཾ ‘‘སྭཱཧ’’ནྟིཨཱདི ཝུཏྟཾ. དྷམྨེནཱཏི པཊིཝེདྷདྷམྨེན. ཏེནཱཧ ‘‘ཨནུཏྟརེནེཝཱ’’ཏི. ཨནུཏྟརེནཱཏི ཝིསིཊྛེན ཨུཏྟམེན. ཨིམསྨིཾ པཀྑེ དྷམྨེནཱཏི པཊིཔཏྟིདྷམྨེནཱཏིཔི སངྒཡ྄ཧཏི. པརིཡཏྟིདྷམྨེནཱཏི དེསནཱདྷམྨེན ཨཱཎཱཙཀྐཾ པཝཏྟེམཱིཏི ཡོཛནཱ. དེསནཱཉཱཎཔཊིཝེདྷཉཱཎཝིབྷཱགཾ དྷམྨཙཀྐམེཝ ཝཱ. ཨཔྤཊིཝཏྟིཡནྟི པཊིཝཏྟིཏུཾ ཨསཀྐུཎེཡྻཾ.

ཏཐཱགཏེན ཛཱཏོཏི ཏཐཱགཏེན ཧེཏུནཱ ཨརིཡཱཡ ཛཱཏིཡཱ ཛཱཏོ. ཧེཏུཨཏྠེ ཀརཎཝཙནཾ. ཨནུཛཱཏོཏི ཙ ཝུཏྟེ ཨནུ-སདྡསྶ ཝསེན ཏཐཱགཏནྟི ཙ ཨུཔཡོགཝཙནམེཝ ཧོཏི, སོ ཙ ཨནུ-སདྡོ ཧེཏུཨཏྠཛོཏཀོཏི ཨཱཧ ‘‘ཏཐཱགཏཾ ཧེཏུཾ ཨནུཛཱཏོ’’ཏི. ཨཝཉྙཱཏབྦབྷཱཝེན ཛཱཏོཏི ཨཝཛཱཏོ དུཔྤཊིཔནྣཏྟཱ. ཏེནཱཧ ‘‘དུསྶཱིལོ’’ཏི. ཏཐཱ ཧི ཝུཏྟཾ ཀོཀཱལིཀཾ ཨཱརབྦྷ ‘‘པུརིསནྟཀལི ཨཝཛཱཏོ’’ཏི. པུཏྟོ ནཱམ ན ཧོཏི ཏསྶ ཨོཝཱདཱནུསཱསནིཡཾ ཨཊྛིཏཏྟཱ. ཨེཝམཱཧཱཏི ‘‘ཨནུཛཱཏོ ཏཐཱགཏ’’ནྟི ཨེཝམཱཧ.

ཝིཛྫཱཏི མགྒཝིཛྫཱ. ཨུཀྐཊྛནིདྡེསེན ཝིམུཏྟཱིཏི ཕལཝིམུཏྟི. ནནུ ཙ མགྒོ བྷཱཝེཏབྦེན གཧིཏོཏི? སཙྩཾ གཧིཏོ, སབྦེ ཙ པན སཏྟ དྷམྨཱ ཨབྷིཉྙེཡྻཱཏི ཝིཛྫཱཡ ཨབྷིཉྙེཡྻབྷཱཝོ ཝུཏྟོ. ཨིམིནཱ ཝཱ ནཡེན སབྦེསམྤི ཨབྷིཉྙེཡྻབྷཱཝོ ཝུཏྟོ ཨེཝཱཏི ཝེདིཏབྦོ. ཕལེན ཝིནཱ ཧེཏུབྷཱཝསྶེཝ ཨབྷཱཝཏོ ཧེཏུཝཙནེན ཕལསིདྡྷི, ནིརོདྷསྶ ཙ སམྤཱཔནེན མགྒསྶ ཧེཏུབྷཱཝོ. དུཀྑསྶ ནིབྦཏྟནེན ཏཎྷཱཡ སམུདཡབྷཱཝོཏི ཨིམམཏྠཾ སངྒཧིཏམེཝ ཨཏྠཏོ ཨཱཔནྣཏྟཱ. ཡུཏྟཧེཏུནཱཏི ཡུཏྟིཡུཏྟེན ཧེཏུནཱ བུདྡྷབྷཱཝཾ སཱདྷེཏི སཙྩཝིནིམུཏྟསྶ བུཛ྄ཛྷིཏབྦསྶ ཨབྷཱཝཏོ སཙྩསམྦོདྷནེནེཝ ཙ ཏསྶ ཨནཝསེསཏོ བུདྡྷཏྟཱ. ཨཏྠཝཙནཉྩེཏཾ, པཡོགཝཙནཱནི པན – བྲཱཧྨཎ, ཨཧཾ སམྨཱསམྦུདྡྷོ སབྦཐཱ ཨཝིཔརཱིཏདྷམྨདེསནོ, སམྨཱསམྦུདྡྷཏྟཱ སབྦཏྠ ཨཝིཔརཱིཏམཱཙིཀྑཏི ཡཐཱཧཾ སབྦམགྒདེསཀོཏི ¶ . ཀིཾ པན བྷགཝཱ སཡམེཝ ཨཏྟནོ སམྨཱསམྦུདྡྷབྷཱཝཾ ཨཱརོཙེཏཱིཏི? མཧཱཀརུཎཱཡ ཨཉྙེསཾ མཧཱཝིསཡཏོ. ཏཏྠ ‘‘ཨེཀོམྷི སམྨཱསམྦུདྡྷོ, སབྦཱབྷིབྷཱུ སབྦཝིདཱུཧམསྨཱི’’ཏིཨཱདཱིནི (མཧཱཝ. ༡༡; མ. ནི. ༡.༢༨༥; ༢.༣༤༡; ཀཐཱ. ༤༠༥) སུཏྟཔདཱནི ཨིདམེཝ ཙ སུཏྟཔདཾ ཨེཏསྶ ཨཏྠསྶ སཱདྷཀཾ.

སལླཀནྟནོཏི ¶ སལླཱནཾ སམུཙྪིནྣཏྟཱ. རོགསྶཱཏི ཀིལེསརོགསྶ. ཏསྨཱཏི ཨཔུནཔཝཏྟིཔཱདནེན ཏིཀིཙྪནཏོ. བྲཧྨཾ ཝཱ སེཊྛཾ སམྨཱསམྦོདྷིཾ པཏྟོཏི བྲཧྨབྷཱུཏོ. ཨེཝཾ ཨཱགཏཱཡཱཏི ཨིམིནཱ –

‘‘ཀཱམཱ ཏེ པཋམཱ སེནཱ, དུཏིཡཱ ཨརཏི ཝུཙྩཏི;

ཏཏིཡཱ ཁུཔྤིཔཱསཱ ཏེ, ཙཏུཏྠཱི ཏཎྷཱ པཝུཙྩཏི.

ཐིནམིདྡྷཾ ཏེཔཉྩམཾ ཐིནམིདྡྷཾ ཏེ, ཚཊྛཱ བྷཱིརཱུ པཝུཙྩཏི;

སཏྟམཱི ཝིཙིཀིཙྪཱ ཏེ, མཀྑོ ཐམྦྷོ ཏེ ཨཊྛམོ.

ལཱབྷོ སིལོཀོ སཀྐཱརོ, མིཙྪཱལདྡྷོ ཙ ཡོ ཡསོ;

ཡོ ཙཏྟཱནཾ སམུཀྐཾསེ, པརེ ཙ ཨཝཛཱནཏི;

ཨེསཱ ནམུཙི ཏེ སེནཱ, ཀཎྷསྶཱབྷིཔྤཧཱརིནཱི’’ཏི. (སུ. ནི. ༤༣༨-༤༤༡);

ཨེཝཾ ཝུཏྟཾ ནཝཝིདྷཾ སེནཾ སངྒཡ྄ཧཏི. ཝསེ ཝཏྟེཏྭཱཏི སམུཙྪིནྡནེན ཨནུཔྤཱདཏཱཔཱདནེན ཝསེ ཝཏྟེཏྭཱ. ཀུཏོཙི ཨབྷཡོ ནིབྦྷཡོ.

སཡམེཝ དཊྛབྦནྟི ཡེན ཡེན ཨདྷིགཏོ, ཏེན ཏེན པརསདྡྷཱཡ གནྟབྦཾ ཧིཏྭཱ ཨསམྨོཧཏོ པཙྩཝེཀྑཎཱཉཱཎེནེཝ སཱམཾ དཊྛབྦཾ. ཏེནཱཧ ‘‘པཙྩཀྑ’’ནྟི. པསཊྛཱ དིཊྛི སནྡིཊྛི. ཡཐཱ རཐེན ཛཡཏཱིཏི རཐིཀོ, ཨེཝཾ ཨིདཾ མགྒབྲཧྨཙརིཡཾ སནྡིཊྛིཡཱ ཛཡཏཱིཏི སནྡིཊྛིཀཾ. ཨཐ ཝཱ དིཊྛནྟི དསྶནཾ ཝུཙྩཏི, དིཊྛམེཝ སནྡིཊྛཾ, སནྡསྶནནྟི ཨཏྠོ. སནྡིཊྛཾ ཨརཧཏཱིཏི སནྡིཊྛིཀོ ཡཐཱ ཝཏྠཡུགཾ ཨརཧཏཱིཏི ཝཏྠཡུགིཀོ. སནྡིཊྛིཀཾ ཕལདཱནཾ སནྡྷཱཡ ནཱསྶ ཀཱལོཏི ཨཀཱལཾ, ཨཀཱལམེཝ ཨཀཱལིཀཾ, ན ཀཱལནྟརཾ ཁེཔེཏྭཱ ཕལཾ དེཏི, ཨཏྟནོ པན པཝཏྟིསམནནྟརམེཝ ཕལཾ དེཏཱིཏི ཨཏྠོ. ཨཐ ཝཱ ཨཏྟནོ ཕལཔྤདཱནེ པཀཊྛོ ཀཱལོ པཏྟོ ཨསྶཱཏི ཀཱལིཀོ, ལོཀིཡོ ཀུསལདྷམྨོ, ཨིདཾ པན སམནནྟརཕལཏྟཱ ན ཀཱལིཀཾ.

༤༠༠. ‘‘མཧཱཡཉྙཾ ¶ པཝཏྟཡཱི’’ཏིཨཱདཱིསུ ཀེཝལཾ དཱནདྷམྨཱདཱིསུ ཡཉྙཔརིཡཱཡསམྦྷཝཏོ ‘‘བྲཱཧྨཎཱནཾ ཡཉྙཱབྷཱཝཏོ’’ཏི ཝུཏྟཾ. བྲཱཧྨཎཱ ཧི ‘‘ཨགྒིམུཁཱ དེཝཱ’’ཏི ཨགྒིཛུཧནཔུབྦཀཾ ཡཉྙཾ ཝིདཧནྟི. ཏེནཱཧ ‘‘ཨགྒིཛུཧནཔྤདྷཱནཱཏི ཨཏྠོ’’ཏི ‘‘བྷཱུརྦྷུཝ? སྭ?’’ ཨིཏི སཱཝིཏྟཱི པུབྦཀཏྟཱ མུཁཾ པུབྦངྒམཾ ¶ . ‘‘མུཁམིཝ མུཁ’’ནྟིཨཱདཱིསུ ཝིཡ ཨིདྷཱཔི པདྷཱནཔརིཡཱཡོ མུཁསདྡོཏི དསྶེནྟོ ‘‘མནུསྶཱནཾ སེཊྛཏོ རཱཛཱ ‘མུཁ’ནྟི ཝུཏྟོ’’ཏི ཨཱཧ. ཨཱདྷཱརཏོཏི ཨོགཱཧནྟཱིནཾ ནདཱིནཾ ཨཱདྷཱརབྷཱཝཏོ པཊིསརཎཏོ གནྟབྦཊྛཱནབྷཱཝཏོ. སཉྙཱཎཏོཏི ཙནྡཡོགཝསེན ཨཛྫ ཨསུཀནཀྑཏྟནྟི པཉྙཱཡནཏོ. ཨཱལོཀཀརཎཏོཏི ནཀྑཏྟཱནི ཨབྷིབྷཝིཏྭཱ ཨཱལོཀཀརཎཏོ. སོམྨབྷཱཝཏོཏི སཱིཏཧིམཝཱསཱིཏཝཱཏཱུཔཀྑརབྷཱཝཏོ. ཏཔནྟཱནནྟི དཱིཔསིཁཱ ཨགྒིཛཱལཱ ཨསནིཝིཙཀྐནྟི ཨེཝམཱདཱིནཾ ཝིཛྫལནྟཱནཾ. ཨཱཡམུཁཾ ཨགྒདཀྑིཎེཡྻབྷཱཝེན.

དིབྦཙཀྑུ དྷམྨཙཀྑུ པཉྙཱཙཀྑུ བུདྡྷཙཀྑུ སམནྟཙཀྑཱུཏི ཨིམེཧི པཉྩཧི ཙཀྑཱུཧི. ཏེ སརཎསྶཱཏི ཏེ སརཎསྶ ཙ, ཏེ སརཎབྷཱཝམཱུལཀཏྟཱ ཨིཏརདྭཡསྶ ཙ, ཡཐཱཝུཏྟ ཏེ-པདེན ཝུཏྟཏྠཏོ པརསྶ ཙཱཏི ཨཏྠོ. ཨིདཾ ཝུཏྟཾ ཧོཏི – ‘‘ཏེ ཏུཡ྄ཧཾ, ཨིཏརསྶ ཙ སརཎསྶ ཨཧོ ཨཱནུབྷཱཝོ’’ཏི. ཨཱཝུཏྟིཝསེན ཝཱ ཏེ སརཎསྶཱཏི ཨེཏྠ ཨཏྠོ ཝིབྷཱཝེཏབྦོ – ཏུཡ྄ཧཾ སརཎབྷཱུཏསྶ ཙ ཨིཏརསརཎསྶ ཙ ཨཱནུབྷཱཝོཏི. སེསཾ སུཝིཉྙེཡྻམེཝ.

སེལསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༣. ཨསྶལཱཡནསུཏྟཝཎྞནཱ

༤༠༡. ཨཉྙམཉྙཝིསིཊྛཏྟཱ ¶ ཝིསདིསཾ རཛྫཾ ཝིརཛྫཾ, ཝིརཛྫཏོ ཨཱགཏཱ, ཏཏྠ ཛཱཏཱཏི ཝཱ ཝེརཛྫཀཱ, ཨེཝཾ ཛཱཏཱ ཁོ པན ཏེ, ཡསྨཱ ཝཏྠཱབྷརཎཱདིཝིབྷཱགེན ནཱནཔྤཀཱརཱ ཧོནྟི, ཏསྨཱ ཝུཏྟཾ ‘‘ནཱནཱཝེརཛྫཀཱན’’ནྟི. ཨཊྛཀཐཱཡཾ པན ཝེརཛྫསྶེཝ ཝསེན ནཱནཔྤཀཱརཏཱ ཝུཏྟཱ. ཡཉྙུཔཱསནཱདིནཱཏི ཡཉྙཱནུབྷཝནམནྟཛ྄ཛྷེནདཀྑིཎཔརིཡེསནཱདིནཱ. ཙཏུཝཎྞསཱདྷཱརཎནྟི ཁཏྟིཡཱདཱིནཾ ཙཏུནྣཾ ཝཎྞཱནཾ སཱདྷཱརཎཾ སཾསཱརསུདྡྷིཔཱཔཏསྶནཾ. ནྷཱནསུདྡྷིཡཱཏི ཏིཏྠསམུདྡཁཱཏེསུ མནྟཛཔྤནཔུབྦཀཾ སཱཡཾཏཏིཡཨུདཀོརོཧནཱདིནྷཱནསུདྡྷིཡཱ. བྷཱཝནཱསུདྡྷིཡཱཏི པརམཛོཏིབྷཱུཏཱཡ པུརིསབྷཱཝནཱསངྑཱཏཱཡ སུདྡྷིཡཱ. ཝཱཔིཏསིརོཏི ཨོརོཔིཏཀེསོ. ཏམེཝ ཧི སིརོ ཝཱཔིཏནྟི ཝུཙྩཏི.

སབྷཱཝཝཱདཱིཏི ¶ ཡཐཱབྷཱུཏཝཱདཱི. པབྦཛནྟཱཏི བྲཱཧྨཎཔབྦཛྫཾ ཨུཔགཙྪནྟཱ, ཏསྨཱ བྲཱཧྨཎཱནཾ པབྦཛྫཱཝིདྷཱནཾ སིཀྑནྟེན བྷོཏཱ ‘‘བྲཱཧྨཎཱཝ སུཛ྄ཛྷནྟི, ནོ ཨབྲཱཧྨཎཱ’’ཏི ཨཡཾ ཝིདྷི སཧེཏུཀོ སཨུཔཱདཱནོ སཀྐཙྩཾ ཨུགྒཧིཏོ, ཏསྨཱ ཏུཡ྄ཧཾ པརཱཛཡོ ནཏྠི…པེ… ཨེཝམཱཧཾསུ.

༤༠༢. ལདྡྷིབྷིནྡནཏྠནྟི ‘‘བྲཱཧྨཎཱཝ བྲཧྨུནོ པུཏྟཱ ཨོརསཱ མུཁཏོ ཛཱཏཱ བྲཧྨཛཱ’’ཏི ཨེཝཾ པཝཏྟལདྡྷིཡཱ ཝིནིཝེཋནཏྠཾ. པུཏྟཔཊིལཱབྷཏྠཱཡཱཏི ‘‘ཨེཝཾ མཡཾ པེཏྟིཀཾ ཨིཎདྷཱརཾ སོདྷེཡྻཱམཱ’’ཏི ལདྡྷིཡཾ ཋཏྭཱ པུཏྟཔཊིལཱབྷཏྠཱཡ. ཨཡཉྷེཏྠ ཨདྷམྨིཀཱནཾ བྲཱཧྨཎཱནཾ ཨཛ྄ཛྷཱསཡོ. ནེསནྟི བྲཱཧྨཎཱནཾ. སཙྩཝཙནཾ སིཡཱཏི ‘‘བྲཧྨུནོ པུཏྟཱ’’ཏིཨཱདིཝཙནཾ སཙྩཾ ཡདི སིཡཱ བྲཱཧྨཎཱིནཾ…པེ… བྷཝེཡྻ, ན ཙེཏཾ ཨཏྠི. མཧཱབྲཧྨུནོ མུཁཏོ ཛཱཏོཏི ཝཱདཙྪེདཀཝཱདོ མུཁཏོཛཱཏཙྪེཀཝཱདོ. ཨསྶལཱཡནོཝིཉྙཱུ ཛཱཏིཀོ ‘‘ནིརཀྑེཔཾ སམཎེན གོཏམེན ཝུཏྟ’’ནྟི ཛཱནནྟོཔི སཧགཏཱནཾ བྲཱཧྨཎཱནཾ ཙིཏྟཱནུརཀྑཎཏྠཾ ‘‘ཀིཉྩཱཔི བྷཝཾ གོཏམོ’’ཏིཨཱདིམཱཧ.

༤༠༣. ཨིདཱནི བྲཱཧྨཎོཝ སེཊྛོ ཝཎྞོཏི ཝཱདཾ བྷིནྡིཏུཾ ‘‘སུཏཾ ཏེ ཡོནཀཀམྦོཛེསཱུ’’ཏིཨཱདི ཨཱརདྡྷཾ. ཡདི བྲཱཧྨཎོཝ སེཊྛོ ཝཎྞོ, སབྦཏྠ བྲཱཧྨཎོཝ སེཊྛོ བྷཝེཡྻ, ཨཐ ཀསྨཱ ཡོནཀཀམྦོཛཱདིཛནཔདེསུ བྲཱཧྨཎཱནཾ སེཊྛབྷཱཝོ ནཏྠི? ཨེཝཉྷི ཏཏྠ ཝཎྞཱ ¶ , ཏསྨཱ ‘‘བྲཱཧྨཎོཝ སེཊྛོ’’ཏི ལདྡྷིམཏྟམེཏཾ. ཏེསུ ཧི ཛནཔདེསུ ཛནཱ ཨེཀཛ྄ཛྷཾ སནྣིཔཏིཏྭཱ སམྨནྟཡིཏྭཱ ཀཏིཀཾ ཨཀཾསུ, དཱསཾ སཱམིཀཾ ཀཏྭཱ ཨིཏརེ སབྦེ ཏཾ པཱུཛེཏྭཱ ཏསྶ ཝསེ ཝཏྟནྟི, ཡོ ཏེསཾ ཨཡྻོ ཧོཏི ཨིཏརེ སབྦེ ཏསྶ དཱསཱ ཧོནྟི, ཏེ ཀཏིཔཡསཾཝཙྪརཱཏིཀྐམེན ཏསྶ ཀིཉྩི དོསཾ དིསྭཱ ཏཾ ཏཏོ ཋཱནཏོ ཨཔནེཏྭཱ ཨཉྙཾ ཋཔེནྟི, ཨིཏི སོ ཨཡྻོ ཧུཏྭཱ དཱསོ ཧོཏི, ཨིཏརོ དཱསོ ཧུཏྭཱ ཨཡྻོ ཧོཏི, ཨེཝཾ ཏཱཝ ཀེཙི ‘‘ཨཡྻོ ཧུཏྭཱ དཱསོ ཧོཏི, དཱསོ ཧུཏྭཱ ཨཡྻོ ཧོཏཱི’’ཏི ཨེཏྠ ཨཏྠཾ ཝདནྟི. ཨཊྛཀཐཱཡཾ པན པུརིམཝསེནེཝ ཏམཏྠཾ དསྶེཏུཾ ‘‘བྲཱཧྨཎོ སབྷརིཡོ’’ཏིཨཱདི ཝུཏྟཾ. ཝཡཔྤཏྟེ པུཏྟེ ཨསཏཱིཏི ཨིདཾ ཝཀྑམཱནསྶ དཱརཀསྶ དཱཡཛྫསཱམིཀབྷཱཝསྶ ཏཱཝ དསྶནཾ. མཱཏིཏོ སུདྡྷོཏི ཨེཏྠ ¶ ཡོ མཱཏིཏོ སུདྡྷཏྟཱ ཨཡྻོ, པིཏིཏོ ཨསུདྡྷཏྟཱ དཱསོ ཧོཏི, སོ ཨེཝ པིཏིཏོ ཨསུདྡྷཏྟཱ དཱསོ ཧུཏྭཱ མཱཏིཏོ ཨཡྻོ ཧོཏཱིཏི ཛཱཏིཾ སམྦྷེདེཏི. སོཝ སབྦེན སབྦཾ ཧོཏཱིཏི ན སཀྐཱ ཝཏྟུནྟི ཨཔརེ. ཀོ ཐཱམོཏི མཧནྟེ ལོཀསནྣིཝཱསེ ཨནམཏགྒེ ཨཏཱིཏེ ཀཱལེ ཨིཏྠཱིནཾ ཝཱ ཙིཏྟེ ཨནཝཊྛིཏེ དཱསཱ དཱསཱ ཨེཝ ཧོནྟི, ཨཡྻཱ ཨཡྻཱ ཨེཝ ཧོནྟཱིཏི ཨེཏྠ ཀོ ཨེཀནྟིཀོ སཧེཏུཀོ ཨཝསྶཡོ, ཏསྶ སཱདྷཀོ སིདྡྷནྟོ, ཀིཾ ནིདསྶནནྟི ཨཏྠོ.

༤༠༤. སུཀྐཙྪེདཀཝཱདོ ནཱམཱཏི ‘‘བྲཱཧྨཎོཝ སུཀྐོ ཝཎྞོ’’ཏི ཨེཝཾ ཝུཏྟོ སུཀྐཙྪེདཀཝཱརོ ནཱམ.

༤༠༨. སབྦསྨིཾ ཨགྒིཀིཙྩཾ ཀརོནྟེཏི ཨེཏེན ཡཐཱ ཡཏོ ཀུཏོཙི ནིསྶཡཏོ ཨུཔྤནྣོ ཨགྒིཨུཔཱདཱནསམྤནྣོ ཨགྒིཀིཙྩཾ ཀརོཏི, ཨེཝཾ ཡསྨིཾ ཀསྨིཉྩི དཱསཀུལེ ཛཱཏོ ཨུཔནིསྶཡསམྤནྣོ སམྨཱཔཊིཔཛྫམཱནོ སཾསཱརཏོ སུཛ྄ཛྷཏི ཨེཝཱཏི དསྶེཏི.

༤༠༩. པཱདསིཀཝཎྞོཏི ཨནྟརཱལ༹ཝཎྞོ. ཨེཏེསནྟི ཁཏྟིཡཀུམཱརེན བྲཱཧྨཎཀཉྙཱཡ ཨུཔྤནྣཔུཏྟོ, བྲཱཧྨཎཀུམཱརེན ཁཏྟིཡཀཉྙཱཡ ཨུཔྤནྣཔུཏྟོཏི ཨེཏེསཾ དྭིནྣཾ མཱཎཝཀཱནཾ. མཏཀབྷཏྟེཏི མཏེ ཨུདྡིསྶ ཀཏབྷཏྟེ. ཐཱལིཔཱཀེཏི ཀཏམངྒལབྷཏྟེ.

༤༡༠. ཏུམྷེཏི ཛཱཏིསཱམཉྙཏོ མཱཎཝཾ བྲཱཧྨཎེཧི སདྡྷིཾ ཨེཀཛ྄ཛྷཾ སངྒཎྷནྟོ ཨཱཧ. ཀོ ནུ ཁོཏི ཨཝཾསིརོ ཨིསིཝཱདོ, ཏེསཾ བྲཱཧྨཎཱིསཱིནཾ ཨསཱམཏྠིཡདསྶནེན ཛཱཏིཡཱ ཨཔྤམཱཎཏཾ ཝིབྷཱཝེཏུཾ གཱམདཱརཀཝེསེན ཨུཔགཙྪི. ཏེན ཝུཏྟཾ ‘‘གཱམཎྜལརཱུཔོ ཝིཡཱ’’ཏི. ཀོཎྜདམཀོཏི ཨདནྟདམཀོ.

༤༡༡. ཛནེཏཱིཏི ¶ ཛནིཀཱ ཛནེཏྟི. ཛནཀོ པིཏཱཏི ཨེཏྠཱཔི ཨེསེཝ ནཡོ. གནྡྷབྦཔཉྷནྟི གནྡྷབྦསྶ མཱཏུཀུཙྪིཡཾ ཨུཔྤཛྫནཀསཏྟསྶ ཁཏྟིཡབྷཱཝཱདིཔུཙྪཾ. དབྦིགཧཎསིཔྤམྤི ཨེཀཱ ཝིཛྫཱ ཝེདིཏབྦཱ. ཏཏྠ ཀིར ཀུསལོ ཡཾ ཀིཉྩི ཨཱཧཱརཱུཔགཔཎྞཔུཔྥཕལབཱིཛཾ ཨནྟམསོ ཨེལཱལུཀམྤི གཧེཏྭཱ བྷེསཛྫེཧི ཡོཛེཏྭཱ པཙནྟོ སཔྤིམདྷུཕཱཎིཏེཧི སམཱནརསཾ ཀཏྭཱ སམྤཱདེཏུཾ ¶ སཀྐོཏི, པུཎྞོཔི ཏཱདིསོ, ཏེན ཉཱཏཾ ཏྭཾ དབྦིགཧཎསིཔྤམཏྟམྤི ན ཛཱནཱསཱིཏི སམྦནྡྷོ. སདྡྷོཏི ཀམྨཕལསདྡྷཱཡ སདྡྷོ, པོཐུཛྫནིཀེནེཝ རཏནཏྟཡཔསཱདེན པསནྣོ. ཏེནེཝཱཧ – ‘‘ཨུཔཱསཀཾ མཾ བྷཝཾ…པེ… སརཎཾ གཏ’’ནྟི.

ཨསྶལཱཡནསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༤. གྷོཊམུཁསུཏྟཝཎྞནཱ

༤༡༢. ཁེམིཡཱ ¶ ནཱམ རཉྙོ དེཝིཡཱ རོཔིཏཏྟཱ ཏཾ ཨམྦཝནཾ ཁེམིཡམྦཝནནྟི ཝུཙྩཏཱིཏི ཝདནྟི. དྷམྨིཀོཏི དྷམྨཡུཏྟོ སབྦསོཝ ཨདྷམྨཾ པཧཱཡ དྷམྨེ ཋིཏོ. པརིབྦཛཏི པབྦཛཏི ཨེཏེནཱཏི པརིབྦཛོ, གྷརཱཝཱསཏོ ནིཀྑམནཔུབྦཀཾ ལིངྒགྒཧཎཝསེན སཱིལསམཱདཱནཾ. ཨེཏྠཱཏི ཨེཏསྨིཾ པརིབྦཛེ. སབྷཱཝོཏི ཏཾ པརིབྦཱཛནིཡཾ, ཏེཧི ཏེཧི པརིབྦཱཛཀེཧི ཨནུཊྛཱཏབྦོ པཊིཔཏྟིདྷམྨསངྑཱཏོ སབྷཱཝོ. དྷམྨོཝ པམཱཎནྟི ཨེཏེན མཡཾ ཨཧིརིམནཱ ཙིཏྟསྶ ཡཐཱཨུཔཊྛིཏཾ ཀཐེམ, ཏསྨཱ ཏཾ ཨཔྤམཱཎཾ, ཡོ པནེཏྠ ཨཝིཏཐོ དྷམྨོ, ཏདེཝ པམཱཎཾ. ཨདྷིགཏཔཊིཔཏྟིསངྑཱཏོ སབྷཱཝོ ཨཏྠི, ཏསྶ ཏུམྷེཧི ཏུམྷེཧི བཧུནཱ ནཱནཱསནྡསྶནཱདི ཀམྨེན ཨིདྷ བྷཝིཏབྦཾ, བཧུདེཝེཏྠ ཝཏྟབྦནྟི ཨདྷིཔྤཱཡོ.

༤༡༤. སཱརཏྟརཏྟཱཏི སཱརཛྫནཝསེན རཏྟཱ, བཧུལརཱགཝསེན ཨབྷིརཏྟཱཏི ཨཏྠོ. ཨཏྟནཱ ཉཱཔེཏབྦམཏྠཾ ཨནུགྒཧཱཔེཏི བོདྷེཏཱིཏི ཨནུགྒཧོ, ཉཱཔིཏཀཱརཎཾ, སཧ ཨནུགྒཧེནཱཏི སཱནུགྒཧཱ. ཏེནཱཧ ‘‘སཀཱརཎཱ’’ཏི. ཀིཾ པན ཏཾ ཀཱརཎཾ? ཨིམསྶཱདྷིཔྤཱཡོ ‘‘ནཏྠི དྷམྨིཀོ པརིབྦཛོ’’ཏི མཡཱ ཝུཏྟོ, ཨདྡྷཱ པནཱཡསྨཱ ཨུདེནོ ཡཱཐཱཝཏོ དྷམྨིཀཾ པརིབྦཛཾ མེ ཨཱཙིཀྑཏཱིཏི. ཏེནཱཧ ‘‘ཝུཏྟཉྷེཏ’’ནྟིཨཱདི.

༤༢༡. སབྦམིདཾ ཐཱཝརཛངྒམཾ པུརིསཀཏཾ, ཏསྨཱ ཡཾ ཀིཉྩི ཀཏྭཱ ཨཏྟཱ པོསེཏབྦོ རཀྑིཏབྦོཏི ལོཀཱཡཏནིསྶིཏོ ནཱིཏིམགྒོ གྷོཊམུཁཀནྟོ, ཏསྨཱ ཨཱཧ ‘‘ཨེཏསྶ ཀིར ཛཱནནསིཔྤེ’’ཏིཨཱདི. སགྒེ ¶ ནིབྦཏྟོ ནཱམ ནཏྠི ཨཀཏྟབྦམེཝ ཀརཎཏོ. དེཝལོཀཔརིཡཱཔནྣདྷནཾ མནུསྶཱནཾ ཨུཔཀཔྤཔུཉྙཱབྷཱཝཏོ པུབྦེ ཨཏྟནཱ ནིཧིཏདྷནཾ ‘‘ཨསུཀེ ཙཱ’’ཏི ཨཱཙིཀྑིཏྭཱ གཏོ. སེསཾ སུཝིཉྙེཡྻམེཝ.

གྷོཊམུཁསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༥. ཙངྐཱིསུཏྟཝཎྞནཱ

༤༢༢. ཏསྨིནྟི ¶ སཱལཝནེ. ཨུཏྟརེན ཨོཔཱསཱདནྟི ཨོཔཱསཱདགཱམསྶ ཨུཏྟརདིསཱཡཾ. ཨུཏྟརེནཱཏི ཨེན-སདྡཡོགེན ཧི ཨོཔཱསཱདནྟི ཨུཔཡོགཝཙནཾ. ཨཛ྄ཛྷཱཝསཏཱིཏི ཨེཏྠ ཨདྷི-ཨཱ-སདྡཱནཾ ཨནཏྠནྟརཏཾ ཧདཡེ ཀཏྭཱ ཨཱཧ ‘‘ཝསཏཱི’’ཏི. ཨིདཱནི ཏེསཾ ཨཏྠཝིསེསབྷཱཝིཏཾ དསྶེནྟོ ‘‘ཨབྷིབྷཝིཏྭཱ ཝཱ ཨཱཝསཏཱི’’ཏིཨཱདིམཱཧ. ཨེཏྠཱཏི ཨོཔཱསཱདཔདེ. སཏྟུསྶདནྟིཨཱདཱིསུ པན ཀཐནྟི ཨཱཧ – ‘‘ཏསྶ ཨནུཔྤཡོགཏྟཱཝ སེསཔདེསཱུ’’ཏི. ཨུཔ-ཨནུ-ཨདྷི-ཨིཏི-ཨེཝཾ-པུབྦཀེ ཝསནཀིརིཡཡཱཊྛཱནེ ཨུཔཡོགཝཙནམེཝ པཱཔུཎཱཏཱིཏི སདྡཝིདཱུ ཨིཙྪནྟཱིཏི ཨཱཧ ‘‘ལཀྑཎཾ སདྡསཏྠཏོ པརིཡེསིཏབྦ’’ནྟི. ཏཐཱ ཧི ཝུཏྟཾ ‘‘ཨུཔསགྒཝསེན པནེཏྠ བྷུམྨཏྠེ ཨུཔཡོགཝཙནཾ ཝེདིཏབྦ’’ནྟི. ཨུསྶདཏཱ ནཱམེཏྠ བཧུལཏཱཏི ཏཾ བཧུལཏཾ དསྶེཏུཾ ‘‘བཧུཛན’’ནྟིཨཱདི ཝུཏྟཾ. ཨཱཝཛྫིཏྭཱཏི པརིཀྑིཔིཏྭཱ.

རཉྙཱ ཝིཡ བྷུཉྫིཏབྦནྟི ཝཱ རཱཛབྷོགྒཾ. རཉྙོ དཱཡབྷཱུཏནྟི ཀུལཔརམྤརཱཡ བྷོགྒབྷཱཝེན རཉྙཱ ལདྡྷདཱཡབྷཱུཏཾ. ཏེནཱཧ ‘‘དཱཡཛྫནྟི ཨཏྠོ’’ཏི. རཱཛནཱིཧཱརེན པརིབྷུཉྫིཏབྦཏོ ཨུདྡྷཾ པརིབྷོགལཱབྷསྶ སེཊྛདེཡྻཏཱ ནཱམ ནཏྠཱིཏི ཨཱཧ – ‘‘ཚཏྟཾ ཨུསྶཱཔེཏྭཱ རཱཛསངྑེཔེན པརིབྷུཉྫིཏབྦ’’ནྟི. ཏིཏྠཔབྦཏཱདཱིསཱུཏི ནདཱིཏིཏྠཔབྦཏཔཱདགཱམདྭཱརཨཊཝཱིམུཁཱདཱིསུ. ནིསྶཊྛཔརིཙྩཏྟནྟི མུཏྟཙཱགཝསེན པརིཙྩཏྟཾ ཀཏྭཱ. ཨེཏེསཾ བྲཱཧྨཎགཧཔཏིཀཱནཾ.

༤༢༣. ཏི སནྣིཔཏིཏཱ. ཡོ ཀོཙི ཝིཉྙཱུནཾ ཨིཙྪིཏོ པཉྷོ, ཏསྶ པུཙྪིཏསྶ ཡཱཐཱཝཏོ ཀཐནསམཏྠོ པུཙྪིཏཔཉྷབྱཱཀརཎསམཏྠོ.ཀུལཱཔདེསཱདིནཱ མཧཏཱི མཏྟཱ ཨེཏསྶཱཏི མཧཱམཏྟོ.

༤༢༤. ཏེཏི ¶ ‘‘ནཱནཱཝེརཛྫཀཱ’’ཏི ཝུཏྟབྲཱཧྨཎཱ. ‘‘ཨུབྷཏོ སུཛཱཏོ’’ཏི (དཱི. ནི. ཊཱི. ༡.༣༠༣; ཨ. ནི. ཊཱི. ༣.༥.༡༣༤) ཨེཏྟཀེ ཝུཏྟེ ཡེཧི ཀེཧིཙི དྭཱིཧི བྷཱགེཧི སུཛཱཏཏཱ ཝིཉྙཱཡེཡྻ, སུཛཱཏསདྡོ ཙ ‘‘སུཛཱཏོ ཙཱརུདསྶནོ’’ཏིཨཱདཱིསུ (མ. ནི. ༢.༣༩༩; སུ. ནི. ༥༥༣; ཐེརགཱ. ༨༡༨) ཨཱརོཧཔརིཎཱཧསམྤཏྟིཔརིཡཱཡོཏི ཛཱཏིཝསེནེཝ སུཛཱཏཏཾ ཝིབྷཱཝེཏུཾ ‘‘མཱཏིཏོ ཙ པིཏིཏོ ཙཱ’’ཏི ཝུཏྟཾ. ཨནོརསཔུཏྟཝསེནཔི ལོཀེ མཱཏུཔིཏུསམཉྙཱ དིསྶཏི, ཨིདྷ པནསྶ ཨོརསཔུཏྟཝསེནེཝ ཨིཙྪཱིཡཏཱིཏི དསྶེཏུཾ ‘‘སཾསུདྡྷགཧཎཱིཀོ’’ཏི ¶ ཝུཏྟཾ. པིཏཱ ཙ མཱཏཱ ཙ པིཏརོ, པིཏཱུནཾ པིཏརོ པིཏཱམཧཱ, ཏེསཾ ཡུགོ པིཏཱམཧཡུགོ, ཏསྨཱ ཡཱཝ སཏྟམཱ པིཏཱམཧཡུགཱཏི ཨེཝམེཏྠ ཨཏྠོ དཊྛབྦོ. ཡུགསདྡོ ཙེཏྠ ཨེཀསེསནཡེན དཊྛབྦོ ‘‘ཡུགོ ཙ ཡུགོ ཙ ཡུགཱ’’ཏི. ཨེཝཉྷི ཏཏྠ ཏཏྠ དྭིནྣཾ གཧིཏམེཝ ཧོཏི. ཏེནཱཧ – ‘‘ཏཏོ ཨུདྡྷཾ སབྦེཔི པུབྦཔུརིསཱ པིཏཱམཧགྒཧཎེནེཝ གཧིཏཱ’’ཏི. པུརིསགྒཧཎཉྩེཏྠ ཨུཀྐཊྛནིདྡེསཝསེན ཀཏནྟི དཊྛབྦཾ. ཨེཝཉྷི ‘‘མཱཏིཏོ’’ཏི པཱལི༹ཝཙནཾ སམཏྠིཏཾ ཧོཏི. ཨཀྑིཏྟོཏི ཨཔྤཏྟཁེཔོ. ཨནཝཀྑིཏྟོཏི སདྡྷཐཱལིཔཱཀཱདཱིསུ ན ཨཝཀྑིཏྟོ. ཛཱཏིཝཱདེནཱཏི ཧེཏུམྷི ཀརཎཝཙནནྟི དསྶེཏུཾ ‘‘ཀེན ཀཱརཎེནཱ’’ཏིཨཱདི ཝུཏྟཾ. ཨེཏྠ ཙ ཨུབྷཏོ…པེ… པིཏཱམཧཡུགཱཏི ཨེཏེན བྲཱཧྨཎསྶ ཡོནིདོསཱབྷཱཝོ དསྶིཏོ སཾསུདྡྷགཧཎིཀབྷཱཝཀིཏྟནཏོ. ཨཀྑིཏྟོཏི ཨིམིནཱ ཀིརིཡཱཔརཱདྷཱབྷཱཝོ. ཀིརིཡཱཔརཱདྷེན ཧི སཏྟཱ ཁེཔཾ པཱཔུཎནྟི. ཨནུཔཀུཊྛོཏི ཨིམིནཱ ཨཡུཏྟསཾསགྒཱབྷཱཝོ. ཨཡུཏྟསཾསགྒམྤི ཧི པཊིཙྩ སཏྟཱ ཨཀྐོསཾ ལབྷནྟི.

ཨིསྶརོཏི ཨདྷིཔཏེཡྻསཾཝཏྟནིཡཀམྨཕལེན ཨཱིསནསཱིལོ. སཱ པནསྶ ཨིསྶརཏཱ ཝིབྷཝསམྤཏྟིཔཙྩཡཱ པཱཀཊཱ ཛཱཏཱཏི ཨཌྜྷཏཱཔརིཡཱཡབྷཱཝེན ཝདནྟོ ‘‘ཨཌྜྷོཏི ཨིསྶརོ’’ཏི ཨཱཧ. མཧནྟཾ དྷནམསྶ བྷཱུམིགཏཉྩེཝ ཝེཧཱསཊྛཉྩཱཏི མཧདྡྷནོ. ཏསྶཱཏི ཏསྶ ཏསྶ. ཝདནྟི ‘‘ཨནྭཡཏོ བྱཏིརེཀཏོ ཙ ཨནུཔསངྐམནཀཱརཎཾ ཀིཏྟེམཱ’’ཏི.

ཨདྷིཀརཱུཔོཏི ཝིསིཊྛརཱུཔོ ཨུཏྟམསརཱིརོ. དསྶནཾ ཨརཧཏཱིཏི དསྶནཱིཡོ. ཏེནཱཧ ‘‘དསྶནཡོགྒོ’’ཏི. པསཱདཾ ཨཱཝཧཏཱིཏི པཱསཱདིཀོ. ཏེནཱཧ ‘‘ཙིཏྟཔསཱདཛནནཏོ’’ཏི. ཝཎྞསྶཱཏི ཝཎྞདྷཱཏུཡཱ ¶ . སརཱིརནྟི སནྣིཝེསཝིསིཊྛོ ཀརཙརཎགཱིཝཱསཱིསཱདི ཨཝཡཝསམུདཱཡོ, སོ ཙ སཎྛཱནམུཁེན གཡ྄ཧཏཱིཏི ‘‘པརམཱཡ ཝཎྞཔོཀྑརཏཱཡཱཏི པརམཱཡ…པེ… སམྤཏྟིཡཱ ཙཱ’’ཏི ཝུཏྟཾ. སབྦཝཎྞེསུ སུཝཎྞཝཎྞོཝ ཨུཏྟམོཏི ཝུཏྟཾ ‘‘སེཊྛེན སུཝཎྞཝཎྞེན སམནྣཱགཏོ’’ཏི. ཏཐཱ ཧི བུདྡྷཱ ཙཀྐཝཏྟིནོ ཙ སུཝཎྞཝཎྞཱཝ ཧོནྟི. བྲཧྨཝཙྪསཱིཏི ཨུཏྟམསརཱིརཱབྷོ སུཝཎྞཱབྷོཏི ཨཏྠོ. ཨིམམེཝ ཧི ཨཏྠཾ སནྡྷཱཡཱཧ ‘‘མཧཱབྲཧྨུནོ སརཱིརསདིསེན སརཱིརེན སམནྣཱགཏོ’’ཏི. ན བྲཧྨུཛུགཏྟཏཾ. ཨཁུདྡཱཝཀཱསོ དསྶནཱཡཱཏི ཨཱརོཧཔརིཎཱཧསམྤཏྟིཡཱ ཨཝཡཝཔཱརིཔཱུརིཡཱ ཙ དསྶནཱཡ ཨོཀཱསོ ན ཁུདྡཀོ. ཏེནཱཧ ‘‘སབྦཱནེཝཱ’’ཏིཨཱདི.

ཡམནིཡམལཀྑཎཾ སཱིལམསྶ ཨཏྠཱིཏི སཱིལཝཱ, ཏཾ པནསྶ རཏྟཉྙུཏཱཡ ཝུདྡྷཾ ཝཌྜྷིཏཾ སཱིལཾ ཨསྶ ཨཏྠཱིཏི ཝུདྡྷསཱིལཱི, ཏེན ཙ སབྦདཱ སམཱཡོགཏོ ཝུཌྜྷསཱིལེན སམནྣཱགཏོ. པཉྩསཱིལམཏྟམེཝ སནྡྷཱཡ ཝདནྟི ཏཏོ པརཾ སཱིལསྶ ཏཏྠ ཨབྷཱཝཏོ ཏེསཉྩ ཨཛཱནནཏོ.

ཋཱནཀརཎསམྤཏྟིཡཱ ¶ སིཀྑཱསམྤཏྟིཡཱ ཙ ཀཏྠཙིཔི ཨནཱུནཏཱཡ པརིམཎྜལཔདཱནི བྱཉྫནཱནི ཨཀྑརཱནི ཨེཏིསྶཱཏི པརིམཎྜལཔདབྱཉྫནཱ. ཨཐ ཝཱ པཛྫཏི ཨཏྠོ ཨེཏེནཱཏི པདཾ, ནཱམཱདི, ཡཐཱདྷིཔྤེཏམཏྠཾ བྱཉྫེཏཱིཏི བྱཉྫནཾ ཝཱཀྱཾ, ཏེསཾ པརིཔུཎྞཏཱཡ པརིམཎྜལཔདབྱཉྫནཱ. ཨཏྠཉཱཔནསཱདྷནཏཱཡ ཝཱཙཱཝ ཀརཎནྟི ཝཱཀྐརཎཾ, ཨུདཱཧརཎགྷོསོ. གུཎཔརིཔུཎྞབྷཱཝེན ཏསྶ བྲཱཧྨཎསྶ, ཏེན ཝཱ བྷཱསིཏབྦཨཏྠསྶ. པཱུརེ པུཎྞབྷཱཝེ. པཱུརེཏི ཙ པུརིམསྨིཾ ཨཏྠེ ཨཱདྷཱརེ བྷུམྨཾ, དུཏིཡསྨིཾ ཝིསཡེ. སུཁུམཱལཏྟནེནཱཏི ཨིམིནཱ ཏསྶཱ ཝཱཙཱཡ མུདུསཎྷབྷཱཝམཱཧ. ཨཔལིབུདྡྷཱཡ པིཏྟསེམྷཱདཱིཧི. སནྡིཊྛཾ སབྦཾ དསྶེཏྭཱ ཝིཡ ཨེཀདེསཀཐནཾ. ཝིལམྦིཏཾ སཎིཀཾ ཙིརཱཡིཏྭཱ ཀཐནཾ. ‘‘སནྡིདྡྷཝིལམྦིཏཱདཱི’’ཏི ཝཱ པཱཋོ. ཏཏྠ སནྡིདྡྷཾ སནྡེཧཛནཀཾ. ཨཱདི-སདྡེན ཁལིཏཱནུཀཌྜྷིཏཱདིཾ སངྒཎྷཱཏི. ཨཱདིམཛ྄ཛྷཔརིཡོསཱནཾ པཱཀཊཾ ཀཏྭཱཏི ཨིམིནཱ ཙསྶ ཝཱཙཱཡ ཨཏྠཔཱརིཔཱུརིཾ ཝདནྟི.

༤༢༥. སདིསཱཏི ཨེཀདེསེན སདིསཱ. ན ཧི བུདྡྷཱནཾ གུཎེཧི སབྦཐཱ སདིསཱ ཀེཙིཔི གུཎཱ ཨཉྙེསུ ལབྦྷནྟི. ཨིཏརེཏི ཨཏྟནོ གུཎེཧི ཨསདིསགུཎེ. ཨིདནྟི ཨིདཾ ཨཏྠཛཱཏཾ. གོཔདཀནྟི གཱཝིཡཱ པདེ ཋིཏཨུདཀཾ. ཀུལཔརིཡཱཡེནཱཏི ཀུལཱནུཀྐམེན.

ཏཏྠཱཏི ¶ མཉྩཀེ. སཱིཧསེཡྻཾ ཀཔྤེསཱིཏི ཡཐཱ རཱཧུ ཨསུརིནྡོ ཨཱཡཱམཏོ ཝིཏྠཱརཏོ ཨུབྦེདྷཏོ ཙ བྷགཝཏོ རཱུཔཀཱཡསྶ པརིཙྪེདཾ གཧེཏུཾ ན སཀྐོཏི, ཏཐཱརཱུཔཾ ཨིདྡྷཱབྷིསངྑཱརཾ ཨབྷིསངྑརོནྟོ སཱིཧསེཡྻཾ ཀཔྤེསི.

པརིསུདྡྷཊྛེན ཨརིཡནྟི ཨཱཧ ‘‘ཨརིཡཾ ཨུཏྟམཾ པརིསུདྡྷ’’ནྟི. ཨནཝཛྫཊྛེན ཀུསལཾ, ན སུཁཝིཔཱཀཊྛེན. ཀཏྠཙི ཙཏུརཱསཱིཏི པཱཎསཧསྶཱནི ཀཏྠཙི ཨཔརིམཱཎཱཔི དེཝམནུསྶཱ ཡསྨཱ ཙཏུཝཱིསཏིཡཱ ཋཱནེསུ ཨསངྑྱེཡྻཱ ཨཔརིམེཡྻཱ མགྒཕལཱམཏཾ པིཝནྟི. ཀོཊིསཏསཧསྶཱདིཔརིམཱཎེནཔི བཧཱུ ཨེཝ. ཏསྨཱ ཨནུཏྟརཱཙཱརསིཀྑཱཔནཝསེནེཝ བྷགཝཱ བཧཱུནཾ ཨཱཙརིཡོ. ཏེཏི ཀཱམརཱགཏོ ཨཉྙེ བྷགཝཏཱ པཧཱིནཀིལེསེ.

ཨཔཱཔཔུརེཀྑཱརོཏི ཨཔཱཔེཧི པུརཀྑརཱིཡཏི, ན ཝཱ པཱཔཾ པུརཏོ ཀརོཏཱིཏིཔི ཨཔཱཔཔུརེཀྑཱརོཏི ཨིམམཏྠཾ དསྶེཏུཾ ‘‘ཨཔཱཔེ ནཝ ལོཀུཏྟརདྷམྨེ’’ཏིཨཱདི ཝུཏྟཾ. ཏཏྠ ཨཔཱཔེཏི པཱཔཔཔཊིཔཀྑེ པཱཔརཧིཏེ ཙ. བྲཧྨནི བྷཝཱ, བྲཧྨུནོ ཝཱ ཧིཏཱ གརུཀརཎཱདིནཱ, བྲཧྨཱནཾ ཝཱ མགྒཾ ཛཱནཱཏཱིཏི བྲཧྨཉྙཱ, ཏསྶཱ བྲཧྨཉྙཱཡ པཛཱཡ.

ཏིརོརཊྛཱ ¶ ཏིརོཛནཔདཱཏི ཨེཏྠ རཛྫཾ རཊྛཾ རཱཛནྟི རཱཛཱནོ ཨེཏེནཱཏི ཀཏྭཱ. ཏདེཀདེསབྷཱུཏཱ པདེསཱ པན ཛནཔདོ ཛནཱ པཛྫནྟི ཨེཏྠ སུཁཛཱིཝིཀཾ པཱཔུཎནྟཱིཏི ཀཏྭཱ. པུཙྪཱཡ དོསཾ སལླཀྑེཏྭཱཏི སམྦནྡྷོ. བྷགཝཱ ཝིསྶཛྫེཏི ཏེསཾ ཨུཔནིསྶཡསམྤཏྟིཾ ཙིནྟེཏྭཱཏི ཨདྷིཔྤཱཡོ. ནཝཀཱཏི ཨཱགནྟུཀབྷཱཝེན ཨམྷཱཀཾ ཨབྷིནཝཱ.

༤༢༦. ཨོཔཱཏེཏི ནིཔྤཱཏེཏཱིཏི ཨཏྠོ. ཏཐཱབྷཱུཏོ ཙ ཏཏྠ པེསིཏཱ ཧོཏཱིཏི ཝུཏྟཾ ‘‘པཝེསེཏཱི’’ཏི. སཾཔུརཀྑརོནྟཱིཏི སཀྐཙྩཾ པུབྦངྒམཾ ཀརོནྟི. ཏེནཱཧ ‘‘པུརཏོ ཀཏྭཱ ཝིཙརནྟཱི’’ཏི.

༤༢༧. སུདྡེ བཧི ཀཏྭཱ རཧོ སཱསིཏབྦཊྛེན མནྟཱ ཨེཝ ཏཾཏཾཨཏྠཔཊིཔཏྟིཧེཏུཏཱཡ པདནྟི མནྟཔདཾ ཝེདཾ. ཏེནཱཧ ‘‘ཝེདོ’’ཏི. ཨེཝཾ ཀིརཱཏི པརམྤརབྷཱཝེན ཨཱབྷཏནྟི ཨཱཙརིཡཔརམྤརཱཡ ཨཱབྷཏཾ. པཱཝཙནསངྑཱཏསམྤཏྟིཡཱཏི ¶ པམུཁཝཙནམྷི ཨུདཏྟཱདིསམྤཏྟིཡཱ. སཱཝིཏྟིཨཱདཱིཧི ཚནྡབནྡྷེཧི ཝགྒབནྡྷེཧི ཙཱཏི གཱཡཏྟཱིཨཱདཱིཧི ཨཛ྄ཛྷཱཡཱནུཝཱཀཱདཱིཧི ཚནྡབནྡྷེཧི ཙ ཝགྒབནྡྷེཧི ཙ. སམྤཱདེཏྭཱཏི པདསམྤཏྟིཾ ཨཧཱཔེཏྭཱ. པཝཏྟཱརོཏི ཝཱ པཱཝཙནཝསེན ཝཏྟཱརོ. སཛ྄ཛྷཱཡིཏནྟི གཱཡནཝསེན སཛ྄ཛྷཱཡིཏཾ, ཏཾ པན པདེནེཝ ཨིཙྪིཏནྟི ཨཱཧ ‘‘པདསམྤཏྟིཝསེནཱ’’ཏི. ཨཉྙེསཾ ཝུཏྟནྟི པཱཝཙནཝསེན ཨཉྙེསཾ ཝུཏྟཾ. རཱསིཀཏནྟི ཨིརུཝེདཡཛུཝེདསཱམཝེདཱདིཝསེན, ཏཏྠཱཔི པཙྩེཀཾ མནྟབྲཧྨཱདིཝསེན ཨཛ྄ཛྷཱཡཱནུཝཱཀཱདིཝསེན རཱསིཀཏཾ. དིབྦེན ཙཀྑུནཱ ཨོལོཀེཏྭཱཏི དིབྦཙཀྑུཔརིབྷཎྜེན ཡཐཱཀམྨཱུཔགཉཱཎེན སཏྟཱནཾ ཀམྨསྶཀཏཾ, པཙྩཀྑཏོ དསྶནཊྛེན དིབྦཙཀྑུསདིསེན པུབྦེནིཝཱསཉཱཎེན ཨཏཱིཏཀཔྤེ བྲཱཧྨཎཱནཾ མནྟཛ྄ཛྷེནཝིདྷིཉྩ ཨོལོཀེཏྭཱ. པཱཝཙནེན སཧ སཾསནྡེཏྭཱཏི ཀསྶཔསམྨཱསམྦུདྡྷསྶ ཡཾ ཝཙནཾ ཝཊྚསནྣིསྶིཏཾ, ཏེན སཧ ཨཝིརུདྡྷཾ ཀཏྭཱ. ན ཧི ཏེསཾ ཝིཝཊྚསནྣིསྶིཏོ ཨཏྠོ པཙྩཀྑོ ཧོཏི. ཨཔརཱཔརེཏི ཨཊྛཀཱདཱིཧི ཨཔརཱཔརེ, པཙྪིམཱ ཨོཀྐཱཀརཱཛཀཱལཱདཱིསུ ཨུཔྤནྣཱ. པཀྑིཔིཏྭཱཏི ཨཊྛཀཱདཱིཧི གནྠིཏམནྟཔདེསུ ཀིལེསསནྣིསྶིཏཔདཱནཾ ཏཏྠ ཏཏྠ པདེ པཀྑིཔནཾ ཀཏྭཱ. ཝིརུདྡྷེ ཨཀཾསཱུཏི བྲཱཧྨཎདྷམྨིཀསུཏྟཱདཱིསུ (ཁུ. ནི. བྲཱཧྨཎདྷམྨིཀསུཏྟཾ) ཨཱགཏནཡེནེཝ སཾཀིལེསིཀཏྠདཱིཔནཏོ པཙྩནཱིཀབྷཱུཏེ ཨཀཾསུ.

༤༢༨. པཊིཔཱཊིཡཱ གྷཊིཏཱཏི པཊིཔཱཊིཡཱ སམྦདྡྷཱ. པརམྤརསཾསཏྟཱཏི ཨཱདཱནིཡཱཡ ཡཊྛིཡཱ སཾསཏྟཱ. ཏེནཱཧ ‘‘ཡཊྛིགྒཱཧཀེན ཙཀྑུམཏཱ’’ཏི. པུརིམསྶཱཏི མཎྜལཱཀཱརེན ཋིཏཱཡ ཨནྡྷཝེཎིཡཱ སབྦཔུརིམསྶ ཧཏྠེན སབྦཔཙྪིམསྶ ཀཙྪཾ གཎྷཱཔེཏྭཱ. དིཝསམྤཱིཏི ཨནེཀདིཝསམྤི ¶ . ཙཀྑུསྶ ཨནཱགཏབྷཝཾ ཉཏྭཱ ཡཐཱཨཀྐནྟཊྛཱནེཡེཝ ཨནུཔཏིཏྭཱ ཨཀྐམནཾཝ སལླཀྑེཏྭཱ ‘‘ཀཧཾ ཙཀྑུམཱ ཀཧཾ མགྒོ’’ཏི པརིཝེདིཏྭཱ.

པཱལི༹ཨཱགཏེསུ དྭཱིསཱུཏི སདྡྷཱ ཨནུསྶཝོཏི ཨིམེསུ དྭཱིསུ. ཨེཝརཱུཔེཏི ཡཐཱ སདྡྷཱནུསྶཝཱ, ཨེཝརཱུཔེ ཨེཝ པཙྩཀྑགཱཧིནོཏི ཨཏྠོ. ཏཡོཏི རུཙིཨཱཀཱརཔརིཝིཏཀྐདིཊྛིནིཛ྄ཛྷཱནཀྑནྟིཡོ. བྷཱུཏཝིཔཱཀཱཏི བྷཱུཏཏྠནིཊྛཱཡཀཱ ཨདྷིཔྤེཏཏྠསཱདྷཀཱ, ཝུཏྟཝིཔརིཡཱཡེན ཨབྷཱུཏཏྠཝིཔཱཀཱ ཝེདིཏབྦཱ ¶ . ཨེཏྠཱཏི ཨེཏེསུ སདྡྷཱཡིཏཱདིཝཏྠཱུསུ. ཨེཀཾསེནེཝ ནིཊྛཾ གནྟུཾ ནཱལཾ ཨནེཀནྟིཀཏྟཱ སདྡྷཱདིགྒཱཧསྶ. ཨུཔརི པུཙྪཱཡ མགྒཾ ཝིཝརིཏྭཱ ཋཔེསི སཙྩཱནུརཀྑཱཡ ཉཱཏུཀཱམཏཱཡ ཨུཔྤཱདིཏཏྟཱ. པསྶཏི ཧི བྷགཝཱ – མཡཱ ‘‘སཙྩམནུརཀྑཏཱ…པེ… ནིཊྛཾ གནྟུ’’ནྟི ཝུཏྟེ སཙྩཱནུརཀྑཎཾ ཉཱཏུཀཱམོ མཱཎཝོ ‘‘ཀིཏྟཱཝཏཱ’’ཏིཨཱདིནཱ པུཙྪིསྶཏི, ཏསྶ ཏཾ ཝིསྶཛྫེཏྭཱ སཙྩཱནུབོདྷེ པུཙྪཱཡ ཨཝསརཾ དཏྭཱ ཏསྶ ཨུཔནིསྶཡེ ཨུཔཀཱརདྷམྨེ ཀཐེསྶཱམཱིཏི. ཏེན ཝུཏྟཾ – ‘‘ཨུཔརི པུཙྪཱཡ མགྒཾ ཝིཝརིཏྭཱ ཋཔེསཱི’’ཏི.

༤༣༠. ཨཏྟཱནཉྙེཝ སནྡྷཱཡ ཝདཏི, ཡཏོ ཝུཏྟཾ པཱལི༹ཡཾ – ‘‘ཡཾ ཁོ པནཱཡམཱཡསྨཱ དྷམྨཾ དེསེཏི, གམྦྷཱིརོ སོ དྷམྨོ དུདྡསོ དུརནུབོདྷོ’’ཏིཨཱདི. ལུབྦྷནྟཱིཏི ལོབྷནཱིཡཱ ཡཐཱ ‘‘ཨཔཱཡགམནཱིཡཱ’’ཏི ཨཱཧ ‘‘ལོབྷནཱིཡེསུ དྷམྨེསཱུཏི ལོབྷདྷམྨེསཱུ’’ཏི. ཡཐཱ ཝཱ རཱུཔཱདིདྷམྨཱ ལོབྷནཱིཡཱ, ཨེཝཾ ལོབྷོཏི ཨཱཧ ‘‘ལོབྷནཱིཡེསུ དྷམྨེསཱུཏི ལོབྷདྷམྨེསཱུ’’ཏི. ཏེནེཝཱཧ – ‘‘ཡཾ ལོཀེ པིཡརཱུཔཾ སཱཏརཱུཔཾ, ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏི, ཨེཏྠ ནིཝིསམཱནཱ ནིཝིསཏཱི’’ཏི (དཱི. ནི. ༢.༤༠༠; མ. ནི. ༡.༡༣༣; ཝིབྷ. ༢༠༣). ཨེསེ ནཡོ སེསཔདདྭཡེཔི.

༤༣༢. ནིཝེསེཏཱིཏི ཋཔེཏི པཊྛཔེཏི. པཡིརུཔཱསཏཱིཏི ཨུཔཊྛཱནཝསེན ཨུཔགནྟྭཱ ནིསཱིདཏི. སུཡྻཏི ཨེཏེནཱཏི སོཏནྟི ཨཱཧ ‘‘པསཱདསོཏ’’ནྟི. ཏཉྷི སཝནཱཡ ཨོདཧིཏབྦནྟི. དྷཱརེཏི སནྡྷཱརེཏི ཏཏྠེཝ མནཾ ཋཔེཏི. ཨཏྠཏོཏི ཡཐཱཝུཏྟསྶ དྷམྨསྶ ཨཏྠཏོ. ཀཱརཎཏོཏི ཡུཏྟིཏོ ཧེཏུདཱཧརཎེཧི ཨུཔཔཏྟིཏོ. ཨོལོཀནནྟི ཨེཝམེཏནྟི ཡཐཱསབྷཱཝཏོ པཉྙཱཙཀྑུནཱ དཊྛབྦཏཾ ཁམནྟི, ཏཉྩ མཧནྟསྶ མཎིནོ པཛྫལནྟསྶ ཝིཡ ཨཱཝིཀཏྭཱ ཨཏྠསྶ ཙིཏྟེ ཨུཔཊྛཱནནྟི ཨཱཧ ‘‘ཨིདྷཱ’’ཏིཨཱདི. ཀཏྟུཀམྱཏཱཚནྡོཏི ཀཏྟུཀཱམཏཱསངྑཱཏོ ཀུསལཙྪནྡོ. ཝཱཡམཏཱིཏིཨཱདིཏོ ཙཏུནྣམྤི ཝཱིརིཡཱནཾ ཝསེན ཝཱཡཱམཾ པརཀྐམཾ ཀརོཏི. མགྒཔདྷཱནཾ པདཧཏཱིཏི མགྒཱཝཧཾ མགྒཔརིཡཱཔནྣཉྩ སམྨཔྤདྷཱནཾ པདཧཏི, པདཧནཝསེན ཏཾ པརིཔཱུརེཏི. པརམསཙྩནྟི ཨམོགྷདྷམྨཏྟཱ པརམཏྠསཙྩཾ. སཧཛཱཏནཱམཀཱཡེནཱཏི མགྒཔཉྙཱསཧཛཱཏནཱམཀཱཡེན ¶ . ཏདེཝཱཏི ཏདེཝ པརམསཙྩཾ ནིབྦཱནཾ. ཏེནེཝཱཧ – ‘‘སཙྪིཀིརིཡཱབྷིསམཡེན ཝིབྷཱུཏཾ པཱཀཊཾ ཀརོནྟོ པསྶཏཱི’’ཏི.

༤༣༣-༤. མགྒཱནུབོདྷོཏི ¶ མགྒཔཊིཔཱཊིཡཱ བོདྷོ བུཛ྄ཛྷནཾ, ཡེསཾ ཀིལེསཱནཾ སམུཙྪིནྡནཝསེན མགྒཔྤཊིཝེདྷོ, ཏེསཾ པཊིཔསྶམྦྷནཝསེན པཝཏྟམཱནཾ སཱམཉྙཕལཾ, མགྒེན པཊིཝིདྡྷཱནི སཙྩཱནི, པརམཏྠསཙྩམེཝ ཝཱ ཨནུརཱུཔབུཛ྄ཛྷནནྟི ཨདྷིཔྤཱཡོ. ‘‘སཙྩཱནུཔྤཏྟཱིཏི ཕལསཙྪིཀིརིཡཱ’’ཏི ཝུཏྟཾ. ཨེཝཉྷི སཏི ཧེཊྛཱ ཝུཏྟཱ སདྡྷཱཔཊིལཱབྷཱདཡོ དྭཱདས དྷམྨཱ སཙྩཱནུཔྤཏྟིཡཱ ཨུཔཀཱརཱ ཧོནྟི, ཏསྨཱ ཝུཏྟཾ ‘‘ཏེསཾཡེཝཱཏི ཧེཊྛཱ ཝུཏྟཱནཾ དྭཱདསནྣ’’ནྟི. ནཱཡཾ ‘‘ཏེསཾཡེཝཱ’’ཏི པདསྶ ཨཏྠོ. སཏིཔི ཀུསལཝིཔཱཀཱདིབྷཱཝེན ནཱནཏྟེ ཝཏྠཱརམྨཎབྷཱུམིཀིཙྩཱདིཝསེན པན སདིསཱཏི ཨུཔཱཡཏོཝ མགྒདྷམྨཱ ཨཱསེཝིཏཱ བཧུལཱིཀཏཱ ཕལབྷཱུཏཱཏི ཝཏྟབྦཏཾ ཨརཧཏཱིཏི ཏཾསདིསེ ཏབྦོཧཱརཾ ཀཏྭཱ ‘‘ཏེསཾ མགྒསམྤཡུཏྟདྷམྨཱན’’ནྟི ཝུཏྟཾ. ཨེཝཉྷི ཨཱསེཝནཱགཧཎཾ སམཏྠིཏཾ, ན ཨཉྙཐཱ. ན ཧི ཨེཀཙིཏྟཀྑཎིཀཱནཾ མགྒདྷམྨཱནཾ ཨཱསེཝནཱ, བཧུལཱིཀམྨཾ ཝཱ ཨཏྠཱིཏི. ཏུལནཱཏི ཝིཔསྶནཱ. སཱ ཧི ཝུཊྛཱནགཱམིནིབྷཱུཏཱ མགྒཔྤདྷཱནསྶ བཧུཀཱརཱ ཏསྶ ཨབྷཱཝེ མགྒཔྤདྷཱནསྶེཝ ཨབྷཱཝཏོ, ཨེཝཾ ཨུསྶཱཧོ ཏུལནཱཡ ཚནྡོ ཨུསྶཱཧསྶ བཧུཀཱརོཏིཨཱདིནཱ ཧེཊྛིམསྶ ཨུཔརིམཱུཔཀཱརཏཾ སུཝིཉྙེཡྻམེཝཱཏི ཨཱཧ – ‘‘ཨིམིནཱ ནཡེན སབྦཔདེསུ ཨཏྠོ ཝེདིཏབྦོ’’ཏི. སེསཾ སུཝིཉྙེཡྻམེཝ.

ཙངྐཱིསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༦. ཨེསུཀཱརཱིསུཏྟཝཎྞནཱ

༤༣༧. ཀོཊྛཱསནྟི ¶ མཾསབྷཱགཾ. ལགྒཱཔེཡྻུནྟི ནྷཱརུནཱ ཝཱ ཝཱཀེན ཝཱ བནྡྷིཏྭཱ པུརིསསྶ ཧཏྠེ ཝཱ ཝསནགེཧེ ཝཱ ཨོལམྦནཝསེན བནྡྷེཡྻུཾ. སཏྠདྷམྨནྟི སཏྠིཀེསུ སཏྠཝཱཧེན པཎེཏབྦཾ ཨཱཎཱདྷམྨཾ. ཏསྶ ནིཀྑམནཏྠནྟི ཏཾ མཱུལཾ སཏྠིཀེཧི ནིཏྠརཎཏྠཾ. པཱཔཾ ཨསྶཱཏི པརིཙརནྟསྶ པཱརིཙརིཡཱཡ ཨཧིཏཾཝ ཨསྶ. ཏེནཱཧ ‘‘ན སེཡྻོ’’ཏི. ཨུཙྩཀུལཱིནཱདཡོ དུཏིཡཝཱརཱདཱིཧི ཝུཙྩནྟི, ཨིདྷ ཨུཔདྷིཝིཔཏྟིསམྤཏྟིཡོ པཱཔིཡཱདིཔདེཧི ཝུཏྟཱཏི ཨདྷིཔྤཱཡོ. ཏེནཱཧ – ‘‘པཱཔིཡོཏི པཱཔཀོ ལཱམཀོ ཨཏྟབྷཱཝོ ཨསྶཱ’’ཏི. སེཡྻཾསོཏི ཧིཏཀོཊྛཱསོ, ཧིཏསབྷཱཝོཏི ཨཏྠོ. ཨུཙྩཀུལཱིནཏཱཏི ཀརཎཏྠེ པཙྩཏྟཝཙནནྟི ཨཱཧ ‘‘ཨུཙྩཱཀུལཱིནཏྟེནཱ’’ཏི. ‘‘ཝཎྞོ ན ཁཱིཡེཐ ཏཐཱགཏསྶཱ’’ཏིཨཱདཱིསུ ¶ (དཱི. ནི. ཨཊྛ. ༡.༣༠༥; ༣.༡༤༡; མ. ནི. ཨཊྛ. ༢.༤༢༥; ཨུདཱ. ༥༣; ཨཔ. ཨཊྛ. ༢.༧.༢༠; བུ. ཝཾ. ཨཊྛ. ༤.༤; ཙརིཡཱ. ཨཊྛ. ༡.ནིདཱནཀཐཱ; ༢.པཀིཎྞཀཀཐཱ; དཱི. ནི. ཊཱི. ༡.གནྠཱརམྦྷཀཐཱཝཎྞནཱ; སཾ. ནི. ཊཱི. ༡.༢.༡; ཨ. ནི. ཊཱི. ༡.༡.༡; ཝཛིར. ཊཱི. གནྠཱརམྦྷཀཐཱཝཎྞནཱ; སཱརཏྠ. ཊཱི. ༡.གནྠཱརམྦྷཀཐཱཝཎྞནཱ; ནེཏྟི. ཊཱི. གནྠཱརམྦྷཀཐཱཝཎྞནཱ; མ. ནི. ཊཱི. ༡.༡) ཝིཡ ཝཎྞསདྡོ ཨིདྷ པསཾསཱཔརིཡཱཡོཏི ཨཱཧ ‘‘ཝེསྶོཔི ཧི ཨུལཱ༹རཝཎྞོ ཧོཏཱི’’ཏི.

༤༤༠. ‘‘ནིརཝོ པདསདྡོ སོལཱ༹རགོཏྟསྶ ཨཀིཎྞམཏྟིཀཱཔཏྟོ ཏིཊྛེཡྻ ཨསངྒཙཱརཱི’’ཏི ཝུཏྟཏྟཱ བྷིཀྑཱ ཙརིཏབྦཱཝ, ཨཡཾ ཏེསཾ ཀུལདྷམྨོཏི ཨདྷིཔྤཱཡོ. ཧརིཏྭཱཏི ཨཔནེཏྭཱ. སཏྟཛཱིཝོ སཏྟཝཱཎིཛཀོ. གོཔེཏི རཀྑཏཱིཏི གོཔོ, ཨཱརཀྑཱདྷིཀཱརེ ནིཡུཏྟོ. ཨསནྟི ལཱུནནྟི ཏེནཱཏི ཨསིཏཾ, ལཝིཏྟཾ. ཝིཝིདྷཾ བྷཱརཾ ཨཱབྷཉྫནྟི ཨོལམྦནྟི ཨེཏྠཱཏི བྱཱབྷངྒཱི, ཀཱཛཾ.

༤༤༡. ཨནུསྶརཏོཏི ཨནུསྶརཎཧེཏུ ཀུལཝཾསཱནུསྶརཎཀྑཎེ ཁཏྟིཡོཏིཨཱདིནཱ སངྑྱཾ གཙྪཏི. ཏེནཱཧ ‘‘པོརཱཎེ…པེ… ཨནུསྶརིཡམཱནེ’’ཏི. ཨུཙྩནཱིཙཏྟཛཱནནཏྠཉྩ ཀུལཝཝཏྠཱནཾ ཀཏཾ ཧོཏཱིཏི ཁཏྟིཡཱདིཀུལཀམྨུནཱ ཏེསཾ ཙཏུནྣཾ ཝཎྞཱནཾ སནྡྷནཾ ཛཱིཝིཀཾ པཉྙཔེནྟི བྲཱཧྨཎཱ, ཏཐཱགཏོ པན ལོཀུཏྟརདྷམྨམེཝ པུརིསསྶ སནྡྷནཾ པཉྙཔེཏི ཏེན སཏྟསྶ ལོཀགྒབྷཱཝསིདྡྷིཏོ. སེསཾ སུཝིཉྙེཡྻམེཝ.

ཨེསུཀཱརཱིསུཏྟཝཎྞནཱ ལཱིནཏྠཔྤཀཱསནཱ སམཏྟཱ.

༧. དྷནཉྫཱནིསུཏྟཝཎྞནཱ

༤༤༥. རཱཛགཧཾ ¶ པརིཀྑིཔིཏྭཱ ཋིཏཔབྦཏསྶཱཏི པཎྜཝཔབྦཏཾ སནྡྷཱཡཱཧ. རཱཛགཧནགརསྶ དཀྑིཎདིསཱབྷཱགེ པབྦཏསྶ སམཱིཔེ ཋིཏོ ཛནཔདོ དཀྑིཎཱགིརི. ཏཎྜུལཔུཊཀཱནཾ པཱལི ཨེཏྠཱཏི ཏཎྜུལཔཱལི. ཏསྶ ¶ ཀིར དྭཱརསམཱིཔེ ཏཎྜུལཝཱཎིཛཱ ཏཎྜུལཔསིབྦཀེ ཝིཝརིཏྭཱ པཊིཔཱཊིཡཱ ཋཔེཏྭཱ ནིསཱིདནྟི, ཏེནསྶ ‘‘ཏཎྜུལཔཱལིདྭཱར’’ནྟི སམཉྙཱ ཨཧོསི. སབྦམེཝ སསྶཾ གཎྷཱཏཱིཏི དལིདྡཀསྶཀཱནཾ དིཝསཔརིབྦཡམཏྟམེཝ ཝིསྶཛྫེཏྭཱ སབྦམེཝ ཨཱཡཏོ ནིཔྥནྣཾ དྷཉྙཾ གཎྷཱཏི. མནྡསསྶཱནཱིཏི མནྡནིཔྥཏྟིཀཱནི སསྶཱནི.

༤༤༦. ཨིམིནཱ ནཡེནཱཏི དཱསཀམྨཀརསྶ ནིཝཱསནབྷཏྟཝེཏྟནཱནུཔྤདཱནེན མངྒལདིཝསེསུ དྷནཝཏྠཱལངྐཱརཱནུཔྤདཱནཱདིནཱ ཙ པོསེཏབྦོ. མིཏྟཱམཙྩཱནཾ པིཡཝཙནཨཏྠཙརིཡཱསམཱནཏྟཏཱདི མིཏྟཱམཙྩཀརཎཱིཡཾ ཀཏྟབྦཾ, ཏཐཱ ཉཱཏིསཱལོཧིཏཱནཾ. ཏཏྠ ཨཱཝཱཧཝིཝཱཧསམྦདྡྷེན ‘‘ཨམྷཱཀཾ ཨིམེ’’ཏི ཉཱཡནྟཱིཏི ཉཱཏཱི, མཱཏཱཔིཏཱདིསམྦདྡྷཏཱཡ སམཱནལོཧིཏཱཏི སཱལོཧིཏཱ. སམྨཱ དདནྟེསུཔི ཨསཛྫནཏོ ནཏྠི ཨེཏེསཾ ཏིཐཱིཏི ཨཏིཐི, ཏེསཾ ཨཏྟནཱ སམཱནཔརིབྷོགཝསེན ཨཏིཐིཀརཎཱིཡཾ ཀཱཏབྦཾ, ཨཏིཐིབལཱིཏི ཨཏྠོ. ཉཱཏཀབྷཱུཏཔུབྦཱ པེཏྟིཝིསཡཾ ཨུཔགཏཱ པུབྦཔེཏཱ, དཀྑིཎེཡྻེསུ ཀཱལེན ཀཱལཾ དཱནཾ དཏྭཱ ཏེསཾ ཨུདྡིསནཾ པུབྦཔེཏཀརཎཱིཡཾ, པེཏབལཱིཏི ཨཏྠོ. གནྡྷཔུཔྥཝིལེཔནཛཱལཱབྷཏྟེཧི ཀཱལེན ཀཱལཾ དེཝཏཱནཾ པཱུཛཱ དེཝཏཱཀརཎཱིཡཾ, དེཝཏཱབལཱིཏི ཨཏྠོ, རཱཛཀིཙྩཀརཎཾ ཨུཔཊྛཱནཾ རཱཛཀརཎཱིཡཾ. ཨཡམྤི ཀཱཡོཏི ཨཏྟནོ ཀཱཡཾ སནྡྷཱཡ ཝདཏི. ཨིམམཏྠཾ སནྡྷཱཡཱཧ ‘‘ཨིམིནཱ ནཡེན ཨཏྠོ ཝེདིཏབྦོ’’ཏི.

༤༤༧. པཉྩ དུསྶཱིལྱཀམྨཱནཱིཏི ནིཙྩསཱིལཔཊིཔཀྑདྷམྨཱ. དས ཨཀུསལཀམྨཔཐདྷམྨཱ དས དུསྶཱིལྱཀམྨཱནི. ཨདྷམྨཙཱརཱི ཨེཝ ཝིསམཙཱརཱི ཀཱཡཝིསམཱདིཙརཎཏོཏི ཝིསམཙཱརཱིཔདསྶ ཨཏྠོ ཝིསུཾ ན ཝུཏྟོ.

༤༤༨-༤༥༣. ཨོསརནྟི ¶ ཨཔསཀྐནྟི, ཁཱིཡནྟཱིཏི ཨཏྠོ. ཏེནཱཧ ‘‘པརིཧཱཡནྟཱི’’ཏི. ཨབྷིསརནྟཱིཏི ཨབྷིཝཌྜྷནཝསེན པཝཏྟནྟི. ཏེནཱཧ ‘‘ཝཌྜྷནྟཱི’’ཏི. ཏཏྲཱཏི བྲཧྨལོཀེ. ཨསྶཱཏི བྲཧྨལོཀེ ཨུཔྤནྣསྶ དྷནཉྫཱནིསྶ. ཏཏོ པཊྛཱཡཱཏི ཡདཱ བྷགཝཏཱ ‘‘ཨེསོ, བྷིཀྑཝེ, སཱརིཔུཏྟོ’’ཏིཨཱདི ཝུཏྟཾ, ཏཏོ པཊྛཱཡ. ཙཏུསཙྩཝིནིམུཏྟནྟི ནིདྡྷཱརེཏྭཱ ཝིབྷཛིཏྭཱ ཝུཙྩམཱནེཧི སཙྩེཧི ཝིམུཏྟཾ. ཨཏྠཏོ པན ཏཏོ པུབྦེཔི སཙྩཝིམུཏྟཾ ཀཐཾ ན ཀཐེསིཡེཝ སཙྩཝིམུཏྟསྶ ནིཡྻཱནསྶ ཨབྷཱཝཏོ.

དྷནཉྫཱནིསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༨. ཝཱསེཊྛསུཏྟཝཎྞནཱ

༤༥༤. ཛཱཏིཾ ¶ ¶ སོདྷེཏུཀཱམཱ ཧོནྟཱིཏི སཧཝཱསཱིནཾ བྲཱཧྨཎཱནཾ ཀིརིཡཱ པརཱདྷེན ཝཱ ཨསཱརུཔྤཏྟེན ཝཱ ཛཱཏིཡཱ ཨུཔཀྐིལེསཾ ཨཱསངྐཱཡ ཏཾ སོདྷེཏུཀཱམཱ ཧོནྟི. མནྟེ སོདྷེཏུཀཱམཱ ཧོནྟཱིཏི མནྟཝཙནེ ཨཱཙརིཡམཏིཙོདནཱཡ ཨཉྙེན ཝཱཀྱེན ཀེནཙི ཀཱརཎེན སཾསཡེ ཨུཔྤནྣེ ཏཾ སོདྷེཏུཀཱམཱ ཧོནྟི. ཨནྟརཱཏི ཝེམཛ྄ཛྷེ, ཨཉྙཏྠེཝཱ ཨནྟརཱསདྡོཏི ཏསྶ ཨཉྙཱ ཀཐཱཏི ཝཙནཾ ཨཝགནྟབྦཾ. ཁནྟཱིམེཏྟཱནུདྡཡཱདིགུཎསམྤནྣོ ཨེཝ ‘‘སཱིལཝཱཏི གུཎཝཱ’’ཏིཨཱཧ. ཏེཧི སཱིལསྶ ཝིསྶཛྫནཀཱལེཔི ‘‘སཱིལཝཱ’’ཏི ཝུཙྩཏི. སམྤནྣསཱིལཏྟཱ ཝཱ ཏེཧི སམནྣཱགཏོ ཨེཝ ཧོཏཱིཏི ཨཱཧ ‘‘སཱིལཝཱཏི གུཎཝཱ’’ཏི. ཨཱཙཱརསམྤནྣོཏི སཱདྷུ ཨཱཙཱརཝཏྟོ.

༤༥༥. སིཀྑིཏཱཏི ཏེཝིཛྫཱནཾ སིཀྑིཏཱ ཏུམྷེ, ན དཱནི ཏུམྷེཧི ཀིཉྩི ཀཏྟབྦཾ ཨཏྠཱིཏི ཨཏྠོ. པཊིཉྙཱཏཱཏི པཊིཛཱནིཏྭཱ ཋིཏཱ.

ཝེདཏྟཡསངྑཱཏཱ ཏིསྶོ ཝིཛྫཱ ཨཛ྄ཛྷཡནྟཱིཏི ཏེཝིཛྫཱ. ཏེནཱཧ ‘‘ཏིཝེདཱན’’ནྟི. ཏཡོ ཝེདེ ཨཎནྟི ཨཛ྄ཛྷཡནྟཱིཏི བྲཱཧྨཎཱ, ཏེསཾ. ཡཾ ཨེཀཾ པདམྤི ཨཀྑཱཏཾ, ཏཾ ཨཏྠཏོ བྱཉྫནཏོ ཙ ཀེཝལིནོ ཨདྷིཡིནོ ཨཔྤཔཡོགེན. ནིཊྛཱགཏམྷཱཏི ནིཔྥཏྟིཾ གཏཱ ཨམྷཱ ཏེཝིཛྫཱཡ སཀསམཡསྶ ཀཐནེ.

མནོཀམྨཏོ ཧི ཝཏྟསམྤདཱཏིཀཱརཎཱུཔཙཱརེནཱཡམཏྠོ ཝུཏྟོཏི ཨཱཧ – ‘‘ཏེན སམནྣཱགཏོ ཧི ཨཱཙཱརསམྤནྣོ ཧོཏཱི’’ཏི.

ཁཡཱཏཱིཏནྟི ཝཌྜྷིཔཀྑེ ཋིཏནྟི ཨཏྠོ. སུཀྐཔཀྑཔཱཊིཔདཏོ པཊྛཱཡ ཧི ཙནྡོ ཝཌྜྷཏཱིཏི ཝུཙྩཏི, ན ཁཱིཡཏཱིཏི. ཝནྡམཱནཱ ཛནཱ ནམཀྐཱརཾ ཀརོནྟི.

ཨཏྠདསྶནེནཱཏི ཝིཝརཎེན དསྶནཔརིཎཱཡཀཊྛེན ལོཀསྶ ཙཀྑུ ཧུཏྭཱ སམུཔྤནྣཾ.

༤༥༦. ཏིཊྛཏུ ཏཱཝ བྲཱཧྨཎཙིནྟཱཏི – ‘‘ཀིཾ ཛཱཏིཡཱ བྲཱཧྨཎོ ཧོཏི ཨུདཱཧུ བྷཝཏི ཀམྨུནཱ’’ཏི ཨཡཾ བྲཱཧྨཎཝིཙཱརོ ཏཱཝ ཏིཊྛཏུ ¶ . ཛཱཏིདསྶནཏྠཾ ཏིཎརུཀྑཀཱིཊཔཊངྒཏོ པཊྛཱཡ ལོཀེ ¶ ཛཱཏིཝིབྷངྒཾ ཝིཏྠཱརཏོ ཀཐེསྶཱམཱིཏི ཏེསཾ ཙིཏྟསམྤཧཾསནཏྠཾ དེསེཏབྦམཏྠཾ པཊིཛཱནཱཏི. ཏཏྠ ཨཉྙམཉྙཱ ཧི ཛཱཏིཡོཏི ཨིདཾ ཀཱརཎཝཙནཾ, ཡསྨཱ ཨིམཱ ཛཱཏིཡོ ནཱམ ཨཉྙམཉྙཾ ཝིསིཊྛཱ, ཏསྨཱ ཛཱཏིཝིབྷངྒཾ བྱཱཀརིསྶཱམཱིཏི.

ཡསྨཱ ཨིདྷ ཨུཔཱདིནྣཀཛཱཏི བྱཱཀཱཏབྦབྷཱཝེན ཨཱགཏཱ, ཏསྶཱ པན ནིདསྶནབྷཱཝེན ཨིཏརཱ, ཏསྨཱ ‘‘ཛཱཏིཝིབྷངྒཾ པཱཎཱན’’ནྟི པཱལི༹ཡཾ ཝུཏྟཾ. ཏེསཾ ཏེསཾ པཱཎཱནཾ ཛཱཏིཡོཏི ཨཏྠོ. ཨེཝནྟི ནིདསྶནཾ ཀཐེཏྭཱ ནིདསྶིཏབྦེ ཀཐིཡམཱནེ. ཏསྶཱཏི ཝཱསེཊྛསྶ. ཀཱམཾ ‘‘ཏེསཾ ཝོཧཾ བྱཀྑིསྶ’’ནྟི ཨུབྷོཔི མཱཎཝེ ནིསྶཱཡ དེསནཱ ཨཱགཏཱ, ཏཐཱཔི ཏཏྠ ཏཏྠ ‘‘ཨེཝཾ, ཝཱསེཊྛ, ཛཱནཱཧཱི’’ཏིཨཱདིནཱ ཝཱསེཊྛམེཝ ཨཱལཔནྟོ བྷགཝཱ ཏམེཝ ཨིམིནཱ ནིཡཱམེན པམུཁཾ ཨཀཱསི. ཏེན ཝུཏྟཾ ‘‘ཏསྶཱཏི ཝཱསེཊྛསྶཱ’’ཏི. ཛཱཏིབྷེདོ ཛཱཏིཝིསེསོ, ཛཱཏིཡཱ བྷེདོ པཱཀཊོ བྷཝིསྶཏི ནིདསྶནེན ཝིབྷཱུཏབྷཱཝཾ ཨཱཔཱདིཏེན པཊིཉྙཱཏསྶ ཨཏྠསྶ ཝིབྷཱུཏབྷཱཝཱཔཏྟིཏོ. ཨཱམ ན ཝཊྚཏཱིཏི ཀམྨནཱནཏཱཡ ཨེཝ ཨུཔཱདིནྣནཱནཏཱཡ པཊིཀྑེཔཔདམེཏཾ, ན བཱིཛནཱནཏཱཡ ཨནུཔཱདིནྣནཱནཏཱཡ པཊིཀྑེཔཔདནྟི དསྶེཏུཾ ‘‘ཀམྨཾ ཧཱི’’ཏིཨཱདི ཝུཏྟཾ. ཏསྶཏྠོ – ཏཾཏཾཡོནིཁིཔནམཏྟཾ ཀམྨསྶ སཱམཏྠིཡཾ, ཏཾཏཾཡོནིནིཡཏཱ པན ཡེ ཝཎྞཝིསེསཱ, ཏེ ཏཾཏཾཡོནིསིདྡྷིཡཱཝ སིདྡྷཱ ཧོནྟཱིཏི ཏཾ པན ཡོནིཁིཔནཀམྨཾ ཏཾཏཾཡོནིཝིསིཊྛ-ཝིསེསཱབྷིབྷཱུཏཱཡ པཡོགནིཔྥཏྟིཡཱ, ཨསཾམུཙྪིཏཱཡ ཨེཝ ཝཱ པཙྩཡབྷཱུཏཱཡ བྷཝཔཏྠནཱཡ ཨབྷིསངྑཏམེཝཱཏི ཝིཉྙཱཏབྦཔཙྩཡཝིསེསེན ཝིནཱ ཕལཝིསེསཱབྷཱཝཏོ ཨེཏཾ སམཱིཧིཏཀམྨཾ པཏྠནཱདཱིཧི ཙ བྷིནྣསཏྟིཏཾ ཝིསིཊྛསཱམཏྠིཡཾ ཝཱ ཨཱཔཛྫིཏྭཱ ཙཀྑུནྡྲིཡཱདིཝིསིཊྛཕལནིབྦཏྟཀཾ ཛཱཡཏི, ཨེཝཾ ཡོནིཁིཔནཏཾཡོནིནིཡཏཝིསེསཱཝཧཏཱ ཧོཏཱིཏི. ཐེརེན ཧི བཱིཛནཱནཏཱ ཝིཡ ཀམྨནཱནཏཱཔི ཨུཔཱདིནྣཀནཱནཏཱཡ སིཡཱ ནུ ཁོ པཙྩཡོཏི ཙོདནཾ པཊིཀྑིཔིཏྭཱ པཙྩཡཝིསེསཝིསིཊྛཱ ཀམྨནཱནཏཱ པན པཙྩཡོཏི ནིཙྪིཏནྟི དཊྛབྦཾ.

ནཱནཱཝཎྞཱཏི ནཱནཔྤཀཱརཝཎྞཱ. ཏཱལནཱལི༹ཀེརཱདཱིནཾ ལོཀེ ཨབྷིཉྙཱཏཏིཎཛཱཏིབྷཱཝཏོ ཝིསེསེན གཡ྄ཧཏི ཨབྷིཉྙཱཏསོཏནཡེན. ཛཱཏིཡཱ བྲཱཧྨཎོཝཱཏི ཨཊྛཱནཔཡུཏྟོ ཨེཝ-སདྡོ, ཛཱཏིཡཱཝ ¶ བྲཱཧྨཎོ བྷཝེཡྻཱཏི ཡོཛནཱ. ན ཙ གཡ྄ཧཏཱིཏི ཏིཎརུཀྑཱདཱིསུ ཝིཡ བྲཱཧྨཎེསུ ཛཱཏིནིཡཏསྶ ལིངྒསྶ ཨནུཔལབྦྷནཏོ, པིཝནབྷུཉྫནཀཐནཧསནཱདིཀིརིཡཱཡ བྲཱཧྨཎབྷཱཝེན ཨེཀནྟིཀལིངྒནིཡཏཱཡ མནྟཛ྄ཛྷེནཱདིཾ ཝིནཱ ཨནུཔལབྦྷནཏོ ཙ. ཝཙཱིབྷེདེནེཝཱཏི ཨཱཧཙྩཝཙནེནེཝ.

ཀཱིཊེ པཊངྒེཏིཨཱདཱིསུ ཛཱཏིནཱནཏཱ ལབྦྷཏི ཨཉྙམཉྙལིངྒཝིསིཊྛཏཱདསྶནཱ. ཀུནྠཱ ཀཱིཊཀཱ ¶ , ཁཛྫཁཱདཀཱ ཀིཔིལླིཀཱ. ཨུཔྤཏིཏྭཱཏི ཨུཌྜེཏྭཱ ཨུཌྜེཏྭཱ. པཊབྷཱཝཾ གཙྪནྟཱིཏི ཝཱ པཊངྒཱ, ན ཁུདྡཀཔཱཎཀཱ ཀཱིཊཱ ནཱམ. ཏེསམྤི ཀཱིཊཀཱནཾ.

ཀཱལ༹ཀཱདཡོཏི ཀལནྡཀཱདཡོ.

ཨུདརཾཡེཝ ནེསཾ པཱདཱ ཨུདརེནེཝ སམྤཛྫནཏོ.

སཉྙཱཔུབྦཀོ ཝིདྷི ཨནིཙྩོཏི དསྶེནྟོ ‘‘ཨུདཀེ’’ཏི ཨཱཧ ཡཐཱ ‘‘ཝཱིརསྶ བྷཱཝོ ཝཱིརིཡ’’ནྟི.

པཏྟསམུདཱཡེ པཀྑསདྡོཏི ‘‘པཏྟེཧི ཡནྟཱི’’ཏི ཝུཏྟཾ. ན ཧི ཨཝཡཝབྱཏིརེཀེན སམུདཱཡོ ཨཏྠི.

སངྑེཔེན ཝུཏྟོ ‘‘ཛཱཏིཝསེན ནཱནཱ’’ཏིཨཱདིནཱ. ཨེཏྠ པདཏྠེ དུབྦིཉྙེཡྻཾ ནཏྠཱིཏི སམྦནྡྷམཏྟཾ དསྶེཏུཾ ‘‘ཏཏྲཱཡཾ ཡོཛནཱ’’ཏིཨཱདི ཝུཏྟཾ. ‘‘ན ཧི བྲཱཧྨཎཱནཾ ཨེདིསཾ སཱིསཾ ཧོཏི, ཁཏྟིཡཱནཾ ཨེདིསནྟི ནིཡམོ ཨཏྠི ཡཐཱ ཧཏྠིཨསྶམིགཱདཱིན’’ནྟི ཨིདམེཝ ཝཱཀྱཾ སབྦཏྠ ནེཏབྦཾ. ཏཾ སཾངྑིཔིཏྭཱ དསྶེནྟོ ‘‘ཨིམིནཱ ནཡེན སབྦཾ ཡོཛེཏབྦ’’ནྟི ཨཱཧ.

ཏསྶཱཏི ཡཐཱཝུཏྟནིགམནཝཙནསྶ ཨཡཾ ཡོཛནཱ ཨིདཱནི ཝུཙྩམཱནཱ ཡོཛནཱ ཝེདིཏབྦཱ.

༤༥༧. ཝོཀཱརནྟི ཝོཀརཎཾ, ཡེན ཝིསིཊྛཏཱཡ ན ཝོཀརཱིཡཏི ཛཱཏིབྷེདོཏི ཨཏྠོ. ཏེནཱཧ ‘‘ནཱནཏྟ’’ནྟི.

གོརཀྑཱདིཨུཔཛཱིཝནེན ཨཱཛཱིཝཝིཔནྣོ, ཧིཾསཱདིནཱ སཱིལཝིཔནྣོ, ནིཀྑིཏྟཝཏྟཏཱདིནཱ ཨཱཙཱརཝིཔནྣོཏི. སཱམཉྙཛོཏནཱ ཝིསེསེ ནིཝིཊྛཱ ཧོཏཱིཏི ཨཱཧ ‘‘གོརཀྑནྟི ཁེཏྟརཀྑ’’ནྟི. ‘‘གོཏི ཧི པཐཝིཡཱ ནཱམ’’ནྟི. ཏེཧི ཏེཧི ཨུཔཱཡེཧི སིཀྑིཏབྦཊྛེན སིཔྤཾ, ཏཏྠ ཀོསལླཾ. པརེསཾ ¶ ཨཱིསནཊྛེན ཧིཾསནཊྛེན ཨིསྶོ, སོ ཨསྶ ཨཏྠཱིཏི ཨིསྶོ ཡོདྷཱཛཱིཝིཀོ, ཨིསྶསྶ ཀམྨཾ པཧརཎཾ, ཨུསུཾ སཏྟིཉྩ ནིསྶཱཡ པཝཏྟཱ ཛཱིཝིཀཱ ཨིསྶཏྟཾ. ཏེནཱཧ ‘‘ཨཱཝུདྷཛཱིཝིཀ’’ནྟི. ཡཾ ནིསྶཱཡ ཨསྶ ཛཱིཝིཀཱ, ཏདེཝ དསྶེཏུཾ ‘‘ཨུསུཉྩ སཏྟིཉྩཱ’’ཏི ཝུཏྟཾ.

བྲཧྨཾ ¶ ཝུཙྩཏི ཝེདོ, ཏཾ ཨཎཏི ཛཱནཱཏཱིཏི བྲཱཧྨཎོ, ཛཱནནཉྩ པོརཱཎེཧི བྲཱཧྨཎེཧི ཝིཧིཏནིཡཱམེན བྲཱཧྨཎེཧི ཀཏོཔསམེན ཨནུཊྛཱནཏཔེན ཡཐཱ ‘‘ཨཱཛཱིཝསཱིལཱཙཱརཝིཔནྣོ ནཏྠཱི’’ཏི བྲཱཧྨཎདྷམྨིཀེཧི ལོཀིཡཔཎྜིཏེཧི ཙ སམྤཊིཙྪིཏོ, ཏཐཱ པཊིཔཛྫནམེཝཱཏི ཨཱཧ ‘‘ཨེཝཾ བྲཱཧྨཎསམཡེན…པེ… སཱདྷེཏྭཱ’’ཏི. ཨེཝཾ སནྟེཏི ཨེཝཾ ཨཱཛཱིཝསཱིལཱཙཱརཝིཔནྣསྶ ཨབྲཱཧྨཎབྷཱཝེ སཏི ན ཛཱཏིཡཱ བྲཱཧྨཎོ ཧོཏི, གུཎེཧི པན ཨཱཛཱིཝསཱིལཱཙཱརསམྤཏྟིསངྑཱཏེཧི བྲཱཧྨཎོ ཧོཏི, ཏསྨཱ གུཎཱནཾཡེཝ བྲཱཧྨཎབྷཱཝཀརཎཏོ ཙཏུཝཎྞཝིབྷཱགེ ཡཏྠ ཀཏྠཙི ཀུལེ ཛཱཏོ ཡོ སཱིལཱདིགུཎསམྤནྣཏཱཡ གུཎཝཱ, སོ ཝུཏྟལཀྑཎེན ནིཔྤརིཡཱཡཏོ བཱཧིཏཔཱཔཏཱཡ བྲཱཧྨཎོཏི ཨཡམེཏྠ བྲཱཧྨཎབྷཱཝེ ཉཱཡོཏི, ཨེཝཾ ཉཱཡཾ ཨཏྠཏོ ཨཱཔནྣཾ ཀཏྭཱ. ནནྟི ཏམེཝ ཡཐཱཝུཏྟཾ ཉཱཡཾ. ཡོ བྲཱཧྨཎསྶ སཾཝཎྞིཏཱཡཱཏི མཱཏུཡཱ ཨུབྷཏོསུཛཱཏཏཱདིཀུལཝཎྞེན སཾཝཎྞིཏཱཡ པསཏྠཱཡ ཡཐཱརཱུཔཱཡ བྲཱཧྨཎསྶ མཱཏཱ བྷཝིཏུཾ ཡུཏྟཱ, ཏཐཱརཱུཔཱཡ མཱཏརིསམྦྷཱུཏོ. ཨེཏེན ཙཏུནྣཾ ཡོནཱིནཾ ཡཏྠ ཀཏྠཙི ཝིསེསནིཊྛཱ ཀཏཱ. ཏེནཱཧ ‘‘ཏཏྲཱཔི ཝིསེསེནཱ’’ཏི. ཨེཝཾ སཱམཉྙཏོ ཝིསེསནིཊྛཱཝསེན ‘‘ཡོནིཛཾ མཏྟིསམྦྷཝ’’ནྟི པདསྶ ཨཏྠཾ ཝཏྭཱ ཨིདཱནི སཱམཉྙཛོཏནཾ ཨནཱདིཡིཏྭཱ ཝིསེསཛོཏནཱཝསེནེཝ ཨཏྠཾ ཝཏྟུཾ ‘‘ཡཱཙཱཡ’’ནྟིཨཱདི ཝུཏྟཾ. པརིསུདྡྷཨུཔྤཏྟིམགྒསངྑཱཏཱ ཡོནི ཝུཏྟཱཏི ཨནུཔཀྐུཊྛབྷཱཝེན པརིསུདྡྷཨུཔྤཏྟིམགྒསངྑཱཏཱ ཡཱ ཙཱཡཾ ཡོནི ཝུཏྟཱཏི སམྦནྡྷོ. ཏཏོཔི ཛཱཏསམྦྷཱུཏཏྟཱཏི ཏཏོ ཡོནིཏོ ཛཱཏཏྟཱ མཱཏཱཔེཏྟིསམྤཏྟིཏོ སམྦྷཱུཏཏྟཱ.

ཝིསིཊྛཏྟཱཏི སམུདཱཡབྷཱུཏཱ མནུསྶཱ རཱགཱདིནཱ ཝིསིཊྛཏྟཱ. རཱགཱདིནཱ སཧ ཀིཉྩནེནཱཏི སཀིཉྩནོ. ཏཐེཝ རཱགཱདིསངྑཱཏེན པལིབོདྷནཊྛེན སཧ པལིབོདྷེནཱཏི སཔལིབོདྷོ. སབྦགཧཎཔཊིནིསྶགྒེནཱཏི ཨུཔཱདཱནསངྑཱཏསྶ སབྦསྶ གཧཎསྶ པཊིནིསྶཛྫནེན. ཡསྨཱ བཱཧིཏཔཱཔོ ཨཏྟནོ སནྟཱནཏོ བཧིཀཏཔཱཔོ, ཏསྨཱ ཏམཧཾ བྲཱུམི བྲཱཧྨཎནྟི ¶ ཨཏྠོ ཝཏྟབྦོ. ཨེཝརཱུཔོ ཨེཏིསྶཱ ཀཐཱཡ ཨུཔདེསོ ནཱནཔྤཀཱརཏོ ཝིབྷཏྟོ, ཏསྨཱ ཏཏྠ ཏཏྠ ཝུཏྟནཡེནེཝ ཝེདིཏབྦོ.

༤༥༨. གཧིཏདཎྜེསཱུཏི པརེསཾ དཎྜེན ཝིཧེཋནཾ ཨནིདྷཱཡ ཨཱདིནྣདཎྜེསུ.

༤༥༩. ཀིཉྩི གཧཎནྟི ཏཎྷཱགཱཧཱདཱིསུ ཀིཉྩི གཱཧཾ.

ཡེན ཀཱམབྷཝེན མཱནུསཀེཧི པཉྩཧི ཀཱམགུཎེཧི ཡུཉྫཏི, ཏཾ མཱནུསཀཾ ཡོགཾ. ‘‘མཱནུསཀཾ ¶ ཡོག’’ནྟི ཨེཏྠ ཙ ཨེཀདེསཾ གཧེཏྭཱ ཝུཏྟཾ, ཨེས ནཡོ ‘‘དིབྦཡོག’’ནྟི ཨེཏྠཱཔི. སབྦཡོགཝིསཾཡུཏྟནྟི པདདྭཡེན ཝུཏྟེཧི སབྦཀིལེསཡོགེཧི ཝིཔྤཡུཏྟཾ.

རཏིནྟི ཨབྷིརཏིཾ ཨཱསཏྟིཾ. ཀུསལབྷཱཝནཱཡཱཏི ཀཱཡབྷཱཝནཱདི ཀུསལདྷམྨབྷཱཝནཱཡ ཨུཀྐཎྛིཏཾ. ཝཱིརིཡཝནྟནྟི ཝཱིརིཡསབྦྷཱཝེན ཝཱིརཾ ནིདྡིསཏི, ཝཱིརབྷཱཝོ ཧི ཝཱིརིཡནྟི.

སུནྡརཾ ཋཱནནྟི ནིབྦཱནཾ. སུནྡརཱཡ པཊིཔཏྟིཡཱ ཨརིཡཔཊིཔཏྟིཡཱ.

ནིབྦཏྟིནྟི པརིཡོསཱནཾ. ཨཏཱིཏེཏི ཨཏཱིཏཀོཊྛཱསེ. ཀིཉྩནཀཱརཀོཏི པལིབོདྷཧེཏུབྷཱུཏོ.

ཨསེཀྑེ སཱིལཀྑནྡྷཱདིཀེ མཧནྟེ གུཎེ. པཉྩནྣཾ མཱརཱནཾ ཝིཛིཏཏྟཱ ཝིཛིཏཝིཛཡཾ.

༤༦༠. ཨིདཾ ཨཛཱནནྟཱཏི ‘‘ཛཱཏིཡཱ བྲཱཧྨཎོ’’ཏི ཨིདཾ ལོཀསམཉྙཱམཏྟནྟི ཨཛཱནནྟཱ. ཡེ བྲཱཧྨཎེསུ ནཱམགོཏྟཾ ནཱམ ཏཏིཡཾ དིཊྛཱབྷིནིཝེསཾ ཛནེནྟི, སཱཝ ནེསཾ དིཊྛི. ཀཏཾ ཨབྷིསངྑཏནྟི པརིཀཔྤནཝསེནེཝ ཀཏཾ ཋཔིཏཾ ཏདུཔཙིཏཾ, ན ཧེཏུཔཙྩཡསམཱཡོགེན. སམུཙྩཱཏི སམྨུཏིཡཱ. ཀཱ པན སཱ སམྨུཏཱིཏི ཨཱཧ ‘‘སམཉྙཱཡཱ’’ཏི, ལོཀསམཉྙཱཏེནཱཏི ཨཏྠོ. སམྨཱ པན པརམཏྠཏོ ཨཛཱནནྟཱནཾ ནཱམགོཏྟཾ ཨེཝཾ ཀཔྤེཏཱིཏི ཨཱཧ ‘‘ནོ ཙེ’’ཏིཨཱདི. ཏཾ པན ཨསནྟམྤི པརམཏྠཏོ སནྟཏཱཡེཝ ཨབྷིནིཝིསནྟི, ཏེསམཡཾ དོསོཏི དསྶེཏུཾ ‘‘ཨེཝཾ པཀཔྤིཏ’’ནྟིཨཱདི ཝུཏྟཾ. ཏེནཱཧ བྷགཝཱ – ‘‘ཛནཔདནིརུཏྟིཾ ནཱབྷིནིཝེསེཡྻཱ’’ཏི ¶ (མ. ནི. ༣.༣༣༡). ཨཛཱནནྟཱ ནོཏི ཨེཏྠ ནོ-སདྡོ ཨཝདྷཱརཎཏྠོ – ‘‘ན ནོ སམཾ ཨཏྠི ཏཐཱགཏེནཱ’’ཏིཨཱདཱིསུ (ཁུ. པཱ. ༦.༣) ཝིཡཱཏི ཨཱཧ ‘‘ཨཛཱནནྟཱཝ ཨེཝཾ ཝདནྟཱི’’ཏི.

ནིཔྤརིཡཱཡནྟི བྷཱཝནཔུཾསཀནིདྡེསོ, ནིཔྤརིཡཱཡེན ཨུཛུཀམེཝཱཏི ཨཏྠོ, ན པུབྦེ ཝིཡ ‘‘ཡོ ཧི ཀོཙཱི’’ཏི པརིཡཱཡཝསེན. ‘‘ན ཛཙྩཱ’’ཏི གཱཐཱཡ པུབྦདྡྷེན ཛཱཏིཝཱདཾ པཊིཀྑིཔནྟོ པཙྪིམདྡྷེན ཀམྨཝཱདཾ པཏིཊྛཔེནྟོ. ཏཏྠཱཏི ཏིསྶཾ གཱཐཱཡཾ. ཨུཔཌྜྷགཱཐཱཡ ཝིཏྠཱརཎཏྠནྟི ཨུཔཌྜྷགཱཐཱཡ ཨཏྠཾ ཝིཏྠཱརེཏུཾ ‘‘ཀསྶཀོ ཀམྨུནཱ’’ཏི ཝུཏྟཾ. ཏཏྠ པུརིམཱཡ ཙཏཱུཧི པཱདེཧི, པཙྪིམེ དྭཱིཧི དྭིནྣམྤི སཱདྷཱརཎཏོ ཨཏྠོ ཝིཏྠཱརིཏོ. ཏཏྠ ཀསིཀམྨཱདཱིཏི ཨཱདི-སདྡེན སིཔྤཀམྨཝཱཎིཛཱདི སངྒཧོ.

པཊིཙྩསམུཔྤཱདཔདྷཱནཝཙནཝིཉྙེཡྻོ ¶ པཙྩཡོ པཊིཙྩསམུཔྤཱདསདྡསྶ ཨཏྠོ པཙྩཡུཔྤནྣཱཔེཀྑཱཡ ཧོཏཱིཏི ཨཱཧ – ‘‘ཨིམིནཱ པཙྩཡེན ཨེཏཾ ཧོཏཱི’’ཏི. ཡཾ པནེཏྠ ཝཏྟབྦཾ, ཏཾ ཝིསུདྡྷིམགྒེ (ཝིསུདྡྷི. ༢.༥༧༠) ཏཾསཾཝཎྞནཱཡཉྩ (ཝིསུདྡྷི. མཧཱཊཱི. ༢.༥༧༠) ཝུཏྟནཡེན ཝེདིཏབྦཾ. སམྨཱནཱཝམཱནཱརཧཀུལེཏི སམྨཱནཱརཧེ ཁཏྟིཡཱདིཀུལེ, ཨཝམཱནཱརཧེ ཙཎྜཱལཱདིཀུལེ ཀམྨཝསེན ཨུཔཔཏྟི ཧོཏི ཀམྨསྶ ཝིཔཙྩམཱནོཀཱསཀརཏཱཡ ཝིནཱ ཏཱདིསཱཡ ཨུཙྩནཱིཙཀུལནིབྦཏྟིཡཱ ཨབྷཱཝཏོ. ཨཌྜྷདལིདྡཏཱདི ཨཉྙཱཔི ཧཱིནཔཎཱིཏཏཱ.

ཀམྨུནཱཏི ཙེཏྠ ཡཐཱ ལོཀཔཛཱསཏྟསདྡེཧི ཨེཀོ ཨེཝཏྠོ ཝུཏྟོ, ཨེཝཾ སེསསདྡེཧིཔི, ཨདྷིཔྤཱཡཝིསེསོ པན ཏཏྠ ཨཏྠཱིཏི དསྶེཏུཾ ‘‘པུརིམཔདེན ཙེཏྠཱ’’ཏིཨཱདི ཝུཏྟཾ. ནཱཡཾ ལོཀོ བྲཧྨནིམྨིཏོ ཀམྨེན ཨུཔྤཛྫནཏོ. ན ཧི སནྣིཧིཏཀཱརཎཱནཾ ཕལཱནཾ ཨཉྙེན ཨུཔྤཏྟིདིཊྛི ཡུཛྫཏི. ཏེནཱཧ ‘‘དིཊྛིཡཱ པཊིསེདྷོ ཝེདིཏབྦོ’’ཏི. ཡཾ པནེཏྠ ཝཏྟབྦཾ ཏཾ ཝིསུདྡྷིམགྒསཾཝཎྞནཱདཱིསུཝུཏྟནཡེན ཝེདིཏབྦཾ. ཏཐཱ ལོཀསྶ པཋམུཔྤཏྟི ན བྲཧྨུནཱཏི ‘‘ཀམྨུནཱ ཧི ཏཱསུ ཏཱསཱུ’’ཏིཨཱདི ཝུཏྟཾ. ཏཏིཡེན ‘‘ཨཡཾ ལོཀོ ཨཱདིཏོ པབྷུཏི པབྷཝཀམྨུནཱ ཝཏྟཏཱི’’ཏི ཝུཏྟམཏྠཾ ནིགམེཏི.ཝུཏྟསྶེཝཏྠསྶ སཱུཙནཉྷི ནིགམནཾ. ཏཾ པན ནིཡམཏྠཾ ཧོཏཱིཏི ཨཱཧ ‘‘ཀམྨེནེཝ བདྡྷཱ ཧུཏྭཱ པཝཏྟནྟི, ན ཨཉྙཐཱ’’ཏི ¶ . ཙཏུཏྠེན པདེན. ཡཱཡཏོཏི གཙྪཏོ. ནིབྦཏྟཏོཏི ནིབྦཏྟནྟསྶ. པཝཏྟཏོཏི པཝཏྟནྟསྶ.

དྷུཏདྷམྨཱ ཝིསེསཏོ ཏཎྷཱཡ སནྟཏྟཝསེན ཝཏྟནྟཱིཏི ཨཱཧ ‘‘ཏཔེནཱཏི དྷུཏངྒཏཔེནཱ’’ཏི. མེཐུནཝིརཏི ཝིསེསཏོ བྲཱཧྨཎཱནཾ བྲཧྨཙརིཡནྟི སཱ ཨིདྷ བྲཧྨཙརིཡེནཱཏི ཨདྷིཔྤེཏཱཏི ཨཱཧ ‘‘བྲཧྨཙརིཡེནཱཏི མེཐུནཝིརཏིཡཱ’’ཏི. ཨེཏེནཱཏི ཨིམིནཱ ‘‘ཏཔེནཱ’’ཏིཨཱདཱིཧི ཙཏཱུཧི པདེཧི ཝུཏྟེན. སེཊྛེནཱཏི ཨུཏྟམེན. སཾཀིལེསཝིསུདྡྷིཡཱ པརིསུདྡྷེན. བྲཧྨནྟི བྲཧྨབྷཱཝཾ སེཊྛབྷཱཝཾ. སོ པནེཏྠ ཨཏྠཏོ བྲཱཧྨཎབྷཱཝོཏི ཨཱཧ ‘‘བྲཱཧྨཎབྷཱཝཾ ཨཱཝཧཏཱི’’ཏི.

བྲཧྨཱ ཙ སཀྐོ ཙཱཏི སཀྐགརུཀཱནཾ སཀྐོ སཀྐེནཔི གརུཀཱཏབྦཏོ, བྲཧྨགརུཀཱནཾ བྲཧྨཱ བྲཧྨུནཱཔི གརུཀཱཏབྦཏོ. ཝིཛཱནཏནྟི པརམཏྠབྲཱཧྨཎསྶ ཝིསེསཾ ཛཱནནྟཱནཾ ཝིཉྙཱུནཾ. ཨཝིཉྙུནོ ཧི ཨཔྤམཱཎཾ. ཏེནཱཧ – ‘‘པཎྜིཏཱན’’ནྟི. སེསཾ སུཝིཉྙེཡྻམེཝ.

ཝཱསེཊྛསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༩. སུབྷསུཏྟཝཎྞནཱ

༤༦༢. ཏུདིསཉྙཱཏོ ¶ གཱམོ ནིགམོ ཨེཏསྶཱཏི ཏོདེཡྻོ, ཏསྶ ཨཏྟཛོ ཏོདེཡྻཔུཏྟོཏི ཨཱཧ ‘‘ཏུདིགཱམཱ’’ཏིཨཱདི. ཨཱརཱདྷཀོཏི སཾརཱདྷཀོ. དྷམྨནིསནྟི ཡསྨཱ སམྤཱདནེན པརིཔཱུརཎེན ཨིཙྪིཏཱ, ཏསྨཱ ཝུཏྟཾ ‘‘སམྤཱདཀོ པརིཔཱུརཀོ’’ཏི. ཉཱཡཏི ནིཙྪཡེན གམེཏི ནིབྦཱནཾ, ཏཾ ཝཱ ཉཱཡཏི པཊིཝིཛ྄ཛྷཱིཡཏི ཨེཏེནཱཏི ཉཱཡོ, ཏཏོ ཨེཏསྶ སམྤཱདཀཧེཏུབྷཱཝཏོ ཉཱཡོ དྷམྨོ ཨརིཡམགྒོ ཏཾ ཉཱཡཾ དྷམྨཾ. ཏེནཱཧ ‘‘ཀཱརཎདྷམྨ’’ནྟི. ཨནཝཛྫནྟི ཨཝཛྫཔཊིཔཀྑཾ.

༤༦༣. ཝཊྚཙཱརཀཏོ ནིཡྻཱཏཱིཏི ནིཡྻཱནིཀཾ ཨཱིཀཱརསྶ རསྶཏྟཾ ཡ-ཀཱརསྶ ཙ ཀ-ཀཱརཾ ཀཏྭཱ. ནིཡྻཱནེ ཝཱ ནིཡུཏྟཾ, ནིཡྻཱནཾ སཱིལནྟི ཝཱ ནིཡྻཱནིཀཾ, ཏཔྤཊིཔཀྑཏོ ཨནིཡྻཱནིཀཾ. སཱ པན ཨཏྠཏོ ཨཀུསལཀིརིཡཱཏི ཨཱཧ ‘‘ཨཀུསལཔཊིཔད’’ནྟི.

བཧུབྷཱཝཝཱཙཀོ ¶ ཨིདྷ མཧཱསདྡོ ‘‘མཧཱཛནོ’’ཏིཨཱདཱིསུཝིཡཱཏི ཨཱཧ ‘‘མཧནྟེཧི བཧཱུཧཱི’’ཏི. ཨཏྠོཏི པཡོཛནཾ. མཧནྟཱནཱིཏི བཧུལཱནི. ཀིཙྩཱནཱིཏི ཀཱཏབྦཱནི. ཨདྷིཀརཎཱནཱིཏི ཨདྷིཀཱརཛཱིཝིཀཱརཱུཔཱནི. གྷརཱཝཱསཀམྨམེཝ པཉྩབལིཀརཎདསཨཏྠཊྛཱནབྷཱཝཏོ ལོཀཡཱཏྲཱཡ ཙ སམྤཝཏྟིཊྛཱནབྷཱཝཏོ ཛཱིཝིཏཝུཏྟིཡཱ ཝཱ ཧེཏུབྷཱཝཏོ གྷརཱཝཱསཀམྨཊྛཱནཾ.

‘‘ཨཔྤཀེནཔི མེདྷཱཝཱི, པཱབྷཏེན ཝིཙཀྑཎོ;

སམུཊྛཱཔེཏི ཨཏྟཱནཾ, ཨཎུཾ ཨགྒིཾཝ སནྡྷམ’’ནྟི. (ཛཱ. ༡.༡.༤);

གཱཐཱཡ ཝུཏྟནཡེན ཙཱུལ༹ནྟེཝཱསིཀསྶ ཝིཡ.

༤༦༤. ཨཡོནིསོ པཝཏྟིཏཾ ཝཱཎིཛྫཀམྨཾ ཝིཡ ཨཔཱཡབྷཱུཏཾ ཀསིཀམྨཾ ནིདསྶནབྷཱཝེ ཋཔེཏྭཱ ཨཡོནིསོམནསིཀརཎཝསེན པཝཏྟཾ གྷརཱཝཱསཀིཙྩཾ སནྡྷཱཡཱཧ – ‘‘ཡཐཱ ཀསི…པེ… ཨེཝཾ གྷརཱཝཱསཀམྨཊྛཱནམྤཱི’’ཏི. བྲཱཧྨཎབྷཏྟོ ཨཧོསཱིཏི སོ ཀིར བཧཱུ བྲཱཧྨཎེ དྷནཾ དཏྭཱ ཡཉྙཾ ཀཱརེསི. ཨུཔརཱིཏི ‘‘ཨུཔརི ཨུཔཊྛཱཏཱིཏི ཝདེཧཱི’’ཏི བྲཱཧྨཎེཧི ཨཏྟནོ སམཡེན ཨཱཙིཀྑཱཔིཏོཔི ཡཐཱ ཨུཔཊྛིཏམེཝ ཀཐེཏྭཱ ཀཱལཾ ཀཏྭཱ ནིརཡེ ནིབྦཏྟོ, ཨཐ བྲཱཧྨཎཱ – ‘‘ཨིམིནཱ ¶ ཨམྷཱཀཾ ཡཉྙེ དོསོ དིནྣོ’’ཏི ཀུཛ྄ཛྷིཏྭཱ ཏསྶ ཀལེ༹ཝརཾ སུསཱནཾ ནེཏུཾ ནཱདཾསུ. ཨཐསྶ ཉཱཏཀེཧི སཧསྶེ དིནྣེ ཏཾ སཧསྶཾ གཧེཏྭཱ གེཧཏོ ནཱིཧརིཏུཾ ཨདཾསུ. ཀསྶཔསམྨཱསམྦུདྡྷཀཱལེ ཚཏྟིཾས ཨིཏྠིཡོ ‘‘ཨེཀཱ ཝཏྠཾ ཨདཱསི, ཨེཀཱ གནྡྷཾ, ཨེཀཱ སུམནམཱལ’’ནྟིཨཱདིནཱ ཏཾ ཏཾ དཱནམཡཾ པུཉྙཾ ཀཏྭཱ ཨཱཡུཔརིཡོསཱནེ ཏཱཝཏིཾསབྷཝནེ སཀྐསྶ དེཝརཉྙོ པརིཙཱརིཀཱ ཧུཏྭཱ ནིབྦཏྟིཾསུ སཧསྶཨཙྪརཱཔརིཝཱརིཀཱ, སཀྐསྶ དེཝརཉྙོ ཝེཛཡནྟརཐཾ པེསེཏྭཱ པཀྐོསཱཔིཏེན གུཏྟིལཱཙརིཡབྷཱུཏེན མཧཱབོདྷིསཏྟེན པུཙྪིཏཱ ཏཾ ཏཾ ཨཏྟནཱ ཀཏཾ པུཉྙཾ བྱཱཀརིཾསུ. ཏཾ སནྡྷཱཡ ཝུཏྟཾ ‘‘སཀལཱཡ གུཏྟིལཝིམཱནཀཐཱཡ དཱིཔེཏབྦ’’ནྟི. ཝཎིཛྫཀམྨཊྛཱནཾ ཝིཔཛྫམཱནནྟི ཨེཏྠ ཏསྶ ཝིཔཛྫམཱནཱཀཱརོ ཧེཊྛཱ ཝུཏྟོ. ཨེཝཾ པབྦཛྫཀམྨཊྛཱནམྤི ཝིཔཛྫམཱནཾ ཨཔྤཕལཾ ཧོཏཱིཏི ཨཱནེཏྭཱ སམྦནྡྷོ. སཱིལེསུ ཨཔརིཔཱུརཀཱརིནོཏིཨཱདི ཏསྶ ཝིཔཛྫནཱཀཱརདསྶནཾ. ཛྷཱནཱདིསུཁནྟི ཨེཏྠ ཨཱདི-སདྡེན ཨབྷིཉྙཱཝིཔསྶནཱདིསུཁསྶ ཝིཡ སབྲཧྨཙཱརཱིཧི སདྡྷིཾ སཱིལསམྤདཱདིསུཁསྶ ¶ སངྒཧོ དཊྛབྦོ. ཨརཧཏྟམྤི པཱཔུཎཱཏི པགེཝ སེཀྑཔུཐུཛྫནསམྤཏྟིཡོཏི ཨདྷིཔྤཱཡོ.

ཙཱགསཱིསེནཱཏི པདྷཱནབྷཱུཏེན ཙཱགེན དཱནེན ཏཾ ཨཝསྶཡཾ ཀཏྭཱ. ཨེཏྠ ཏེ ན ཀོཙི ཨཕཱསུཀབྷཱཝོཏི. ཨུཛུཀཾ ཀཏྭཱ ཨཝིརུདྡྷཾ ཀཏྭཱ, སམྤཡོཛེཏྭཱཏི ཨཏྠོ. ཏཔཙརིཡནྟི ཨགྒིཔརིཙརཎཾ, ཏཔཙརིཡཉྩ བྲཧྨཙརིཡགྒཧཎཱ དུཊྛུལླབྷཱཝཏོ.

༤༦༦. ཨཛཱནནབྷཱཝནྟི ཨསབྦཉྙུབྷཱཝཾ. བྷགཝཏོ པན སབྦཉྙུབྷཱཝོ སདེཝཀེ ལོཀེ ཛལཏལེ པཀྑིཏྟཏེལཾ ཝིཡ པཏྠརིཏྭཱ ཋིཏོ, ན མེ ཨིདཾ པཏིརཱུཔཾ, ཏཏོ པརིཝཏྟིསྶཱམཱིཏི ‘‘བྲཱཧྨཎོ, བྷོ, གོཏམཱ’’ཏིཨཱདིམཱཧ. པཙྩཱཧརིཏུཾ པཊིཔཀྑེན ཨཔཧརིཏུཾ. སེཏཔོཀྑརསདིསོཏི པུཎྜརཱིཀཔཏྟསདིསཝཎྞོ. སུཝཊྚིཏཱཏི ཝཊྚབྷཱཝཡུཏྟཊྛཱནེ སུཝཊྚཱ. ནཱམཀཾཡེཝཱཏི ནཱམམཏྟམེཝ ཝཙནམཏྟམེཝ. ཏཐཱབྷཱུཏཱནཾ བྷཱཝསྶཔི ཨབྷཱཝེན ནིཧཱིནཾ ནཱམ ཧོཏི, ནཱམ-སདྡོ ནིཧཱིནཔརིཡཱཡོ. ཏེནཱཧ – ‘‘ལཱམཀཾཡེཝཱ’’ཏི.

༤༦༧. ཀཏམཱ ཝཱཙཱ ཏེསཾ སེཡྻོཏི ཏེསཾ ཙངྐིཡཱདཱིནཾ བྲཱཧྨཎམཧཱསཱལཱནཾ ཝུཙྩམཱནཝིབྷཱགཱསུ ཝཱཙཱསུ ཀཏམཱ ཝཱཙཱ སེཡྻོཏི. ‘‘སེཡྻཱ’’ཏི ལིངྒཝིཔལླཱསེན ཝུཏྟཾ. སམྨུཏིཡཱཏི ཨཝིལངྒྷིཏསཱདྷུམརིཡཱདཱཡ ལོཀསམྨུཏིཡཱ. ཏེནཱཧ ‘‘ལོཀཝོཧཱརེནཱ’’ཏི. མནྟཱཏི མནྟཱསངྑཱཏཱཡ པཉྙཱཡ མནྟེཏྭཱ ཛཱནིཏྭཱ. ཏེནཱཧ ‘‘ཏུལཡིཏྭཱ’’ཏི. ཨཏྠསཾཧིཏནྟི ཧེཏུསཉྷིཏཾ. ཏཾ པན ཨེཀཾསཏོ ཡུཏྟིཡུཏྟཾ ཧོཏཱིཏི ཨཱཧ – ‘‘ཀཱརཎནིསྶིཏ’’ནྟི. ཨཱཝུཏོཏིཨཱདཱིསུ ཨཱདིཏོ ཨབྷིམུཁཾ ཉཱཎགཏིཡཱ ཝིབནྡྷནེན ཨཱཝུཏོ, ཨཱཝརིཡེན ཝིསེསཏོ ཉཱཎགཏིཡཱ ¶ ནིབནྡྷནེན ནིཝུཏོ, ཨེཝཾ ཨོཕུཊོ པལིགུཎྛིཏོ. པརིཡོནདྡྷོཏི སམནྟཏོ ཨོནདྡྷོ ཚཱདིཏོ. ཏེནཱཧ ‘‘པལིཝེཋིཏོ’’ཏི.

༤༦༨. སཙེ ཨེཏཾ ཀཱརཎམཏྠཱིཏི ‘‘ནིསྶཊྛཏིཎཀཊྛུཔཱདཱནོ ཨགྒི ཛལཏཱི’’ཏི ཨེཏཾ ཀཱརཎཾ སཙེ ཨཏྠི ཡདི སིཡཱ, སོ ཨཔརོ ཏིཎཀཊྛུཔཱདཱནོ ཨགྒི ཡདི བྷཝེཡྻ. སདོསོ སཱདཱིནཝོ སཔརིཀྐིལེསོ. པརིསུདྡྷོཏི ཨུཔཀྐིལེསཱབྷཱཝེན སབྦསོ སུདྡྷོ. ཛཱཏི ཨཱདཱིནཾ ཨབྷཱཝེནཱཏི ཛཱཏིཔཙྩཡཱནཾ ཀམྨཀིལེསཱནཾ ནིགྒམེན.

༤༦༩. ན ¶ ནིཙྩལཱ ཏིཊྛནྟཱིཏི ཏཏྠ པཀྑིཔིཏབྦསྶ ལབྦྷམཱནཏྟཱ ཡཐཱཔཉྙཏྟཾ ཧུཏྭཱ ནིཙྩལཱ ཨཀམྤིཡཱ ན ཏིཊྛནྟི. ཏཾ དོསཾ ཏཾ ཨཱུནཏཱདོསཾ.

ཨཉྙསྨིཾ ཨསཏཱིཏི ཨཏྠབྷཉྫཀམུསཱཝཱདེ ཨསཏི. སོ ཧི ཨཏྟནོ སནྟཀསྶ ཨདཱཏུཀཱམཏཱདིཝསེན པཝཏྟསྶ ཨཀམྨཔཐཔྤཏྟསྶ མུསཱཝཱདབྷཱཝསྶ ཝིཔརཱིཏོ ཨཉྙོ ཨིདྷ ཨདྷིཔྤེཏོ. ཏཐཱ ཧི ཨིཏརོ ཡེབྷུཡྻེན ཝལ༹ཉྫིཏབྦཏོ ཝོཧརིཏབྦཏོ ཝལ༹ཉྫཀམུསཱཝཱདོཏི ཨཱཧ. ན ཀདཱཙི མུསཱཝཱདཱིཏི དྭེ ཀཐཱ ན ཀཐེནྟི. བཱཧིརཀཱནཾ ཨནཝཛྫཏཔསམྨཏཱཡཔི ནིསྶིཏོཏི ཝཏྟུཾ ཨཱཧ ‘‘སཱིལཝཱ ཏཔནིསྶིཏཀོ ཧོཏི’’ཏི. ཝིཝཊམུཁཱ མནྟཛ྄ཛྷེནམཎྜིཏཱ སབྦསོ སཛ྄ཛྷཱཡཱ ཧོནྟི, ན ཨིཏརེཏི ཨཱཧ ‘‘པབྦཛིཏཱ ནིཙྩཾ སཛ྄ཛྷཱཡནྟཱི’’ཏི.

༤༧༠. ཙིརཾ ནིཀྑནྟོཏི ནིགྒཏོ ཧུཏྭཱ ཙིརཀཱལེ. ན སབྦསོ པཙྩཀྑཱ ཧོནྟི སཏིསམྨོཧཏོ མགྒཱནཉྩ ཨཉྙཐཱ ཀརཎཏོ. ཙིརཱཡིཏཏྟནྟི ‘‘ཨཡཾ མགྒོ’’ཏི ཀཐནསྶ ཙིརཱཡནཾ. ཝིཏྠཱཡིཏཏྟནྟི ཨསཔྤཊིབྷཱནཾ. ཏཾ པན སཨུཔམཱཧ དསྶེཏུཾ ‘‘ཡཐཱ’’ཏིཨཱདི ཝུཏྟཾ.

བལསམྤནྣོཏི ཀཱཡབལེན སམནྣཱགཏོ. པམཱཎཀཏཾ ཀམྨཾ ནཱམ པམཱཎཀརཱནཾ རཱགཱདིཀིལེསཱནཾ ཨཝིཀྑམྦྷིཏཏྟཱ ‘‘པམཱཎཀཏཾ ཀམྨཾ ནཱམ ཀཱམཱཝཙར’’ནྟི ཨཱཧ, ཏེསཾ པན ཝིཀྑམྦྷིཏཏྟཱ ཝུཏྟཾ ‘‘ཨཔྤམཱཎཀཏཾ ཀམྨཾ ནཱམ རཱུཔཱརཱུཔཱཝཙར’’ནྟི. ཏཏྠཱཔི ཝིསེསཏོ ཨཔྤམཉྙཱབྷཱཝནཱ སམྦྷཝཏཱིཏི ཨཱཧ ‘‘ཏེསུཔཱི’’ཏིཨཱདི. ནིརཱིཧཀཏྟཱ ཡཐཱ ཨཔྤམཱཎསམཉྙཱ ལབྦྷཏི, ཏཾ དསྶེཏུཾ ‘‘པམཱཎཾ…པེ… ཝུཙྩཏཱི’’ཏི ཨཱཧ. ན ཨོཧཱིཡཏི ན ཏིཊྛཏཱིཏི ཀཏཱུཔཙིཏམྤི ཀཱམཱཝཙརཀམྨཾ ཡཐཱདྷིགཏེ མཧགྒཏཛ྄ཛྷཱནེ ཨཔརིཧཱིནེ ཏཾ ཨབྷིབྷཝིཏྭཱ ཨཱསཱིདེཏྭཱ པསྶེ ཨོཧཱིཡཀཾ ཀཏྭཱ པཊིསནྡྷིཾ དཱཏུཾ སམཏྠབྷཱཝེན ན ཏིཊྛཏི. ལགྒིཏུནྟི ཨཱཝརིཏུཾ ¶ . ཋཱཏུནྟི པཏིཊྛཱཏུཾ. ཕརིཏྭཱཏི པཊིཔྥརིཏྭཱ. པརིཡཱདིཡིཏྭཱཏི ཏསྶ སཱམཏྠིཡཾ ཁེཔེཏྭཱ. ཀམྨསྶ པརིཡཱདིཡནཾ ནཱམ ཝིཔཱཀུཔྤཱདབནྡྷནམེཝཱཏི ཨཱཧ – ‘‘ཏསྶ ཝིཔཱཀཾ པཊིབཱཧིཏྭཱ’’ཏི. སེསཾ སུཝིཉྙེཡྻམེཝ.

སུབྷསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༡༠. སངྒཱརཝསུཏྟཝཎྞནཱ

༤༧༣. ཨབྷིཔྤསནྣཱཏི ¶ ¶ ཨབྷིསམེཙྩ པསནྣཱ. ཏེནཱཧ – ‘‘ཨཝེཙྩཔྤསཱདཝསེན པསནྣཱ’’ཏི. བྲཱཧྨཎཱི ཝིགཏམལམཙྪེརཏཱཡ ‘‘ཏུཡ྄ཧཾ དེཡྻདྷམྨཾ རུཙྩནཀཊྛཱནེ དེཧཱི’’ཏི ཨཱཧ. མགྒེནེཝ ཧིསྶཱ མཙྪརིཡསྶ པཧཱིནཏྟཱ བུདྡྷཔཀྑབྲཱཧྨཎཔཀྑཝསེན ཨུབྷཏོཔཀྑིཀཱ.

ཀིཾསཱུཏི ཀིནྟི པུཙྪཱཝཙནཾ. ཚེཏྭཱ ཨནཱདིཡིཏྭཱ ཝིནཱསེཏྭཱ. སུཁཾ སེཏཱིཏི ཙིཏྟསནྟཱཔཱབྷཱཝེན སུཁེན སུཔཏི. ན སོཙཏཱིཏི ཏཏོ ཨེཝ སོཀཾ ནཱམ ཝིནཱསེཏི. ཀོདྷནྟི ཀུཛ྄ཛྷནལཀྑཎཾ ཀོདྷཾ. ཚེཏྭཱ སམུཙྪིནྡིཏྭཱ. སུཁཾ སེཏཱིཏི ཀོདྷཔརིལཱ༹ཧེན ཨཔརིཌཡ྄ཧམཱནཏྟཱ སུཁཾ སུཔཏི. ཀོདྷཝིནཱསེན ཝིནཊྛདོམནསྶཏྟཱ ན སོཙཏི. ཝིསམཱུལསྶཱཏི དུཀྑཝིཔཱཀསྶ. མདྷུརགྒསྶཱཏི ཨཀྐོསཀསྶ པཙྩཀྐོསནེན, པཧཱརཀསྶ པཊིཔྤཧརཎེན ཡཾ སུཁཾ ཨུཔྤཛྫཏི, ཏཾ སནྡྷཱཡེཝ ‘‘མདྷུརགྒོ’’ཏི ཝུཏྟོ. ཨིམསྨིཉྷི ཋཱནེ པརིཡོསཱནཾ ‘‘ཨགྒ’’ནྟི ཝུཏྟཾ. ཨརིཡཱཏི བུདྡྷཱདཡོ ཨརིཡཱ.

པཉྷཾ ཀཐེསཱིཏི བྲཱཧྨཎོ ཀིར ཙིནྟེསི – ‘‘སམཎོ གོཏམོ ལོཀཔཱུཛིཏོ, ན སཀྐཱ ཡཾ ཝཱ ཏཾ ཝཱ ཝཏྭཱ སནྟཛྫེཏུཾ, ཨེཀཾ སཎྷཔཉྷཾ པུཙྪིསྶཱམཱི’’ཏི. སོ ཨེཀཾ པུཙྪཱགཱཐཾ ཨབྷིསངྑརིཏྭཱ ‘‘སཙེ ཨསུཀསྶ ནཱམ ཝདྷཾ རོཙེམཱིཏི ཝཀྑཏི, ཡེ ཏུཡ྄ཧཾ ན རུཙྩནྟི, ཏེ མཱརེཏུཀཱམོསི, ལོཀཝདྷཱཡ ཨུཔྤནྣོ ཀིཾ ཏུཡ྄ཧཾ སམཎབྷཱཝེནཱཏི ནིགྒཧེསྶཱམི. སཙེ ན ཀསྶཙི ཝདྷཾ རོཙེམཱིཏི ཝཀྑཏི, ཨཐ ནཾ ཏྭཾ རཱགཱདཱིནམྤི ཝདྷཾ ན ཨིཙྪསི, ཏསྨཱ སམཎོ ཧུཏྭཱ ཨཱཧིཎྜསཱིཏི ནིགྒཎྷིསྶཱམཱིཏི ཨིམཾ ཨུབྷཏོཀོཊིཀཾ པཉྷཾ པུཊྛོ སམཎོ གོཏམོ ནེཝ གིལིཏུཾ ན ཨུགྒིལིཏུཾ སཀྑིསྶཏཱི’’ཏི ཨེཝཾ ཙིནྟེཏྭཱ ཨིམཾ པཡ྄ཧཾ པུཙྪི. ཏསྶ བྷགཝཱ ཨཛ྄ཛྷཱསཡཱནུརཱུཔཾ ཀཐེསི. སོ པཉྷབྱཱཀརཎེན ཨཱརཱདྷིཏཙིཏྟོ པབྦཛྫཾ ཡཱཙི. སཏྠཱ ཏཾ པབྦཱཛེསི, སོ པབྦཛྫཱཀིཙྩཾ མཏྠཀཾ པཱཔེསི. ཏེན ཝུཏྟཾ ‘‘པབྦཛིཏྭཱ ཨརཧཏྟཾ པཏྟོ’’ཏི.

ཨཝབྷཱུཏཱཏི ཨདྷོབྷཱུཏཱ. ཨདྷོབྷཱཝོ སཏྟཱནཾ ཨཝཌྜྷི ཨཝམངྒལནྟི ཨཱཧ – ‘‘ཨཝཌྜྷིབྷཱུཏཱ ཨཝམངྒལབྷཱུཏཱཡེཝཱ’’ཏི. པརིབྷཱུཏཱཏི པརིབྷཝཔྤཏྟཱ. ཝིཛྫམཱནཱནནྟི པཱལི༹ཡཾ ཨནཱདརེ སཱམིཝཙནནྟི ཏདཏྠཾ དསྶེནྟོ ‘‘ཝིཛྫམཱནེསཱུ’’ཏིཨཱཧ. པཀཊྛཾ, པཝཌྜྷཾ ཝཱ ཉཱཎནྟི པཉྙཱཎནྟི བྷགཝཏོ ཉཱཎཾ ཝིསེསེཏྭཱ ཝུཏྟཾ.

༤༧༤. ཨབྷིཛཱནིཏྭཱཏི ¶ ¶ ཨབྷིཝིསིཊྛེན ཉཱཎེན ཛཱནིཏྭཱ. ཝོསིཏཝོསཱནཱཏི ཀཏཀརཎཱིཡཏཱཡ སབྦསོ པརིསོསིཏནིཊྛཱ. པཱརམིསངྑཱཏནྟི པརམུཀྐཾསབྷཱཝཏོ པཱརམཱིཏི སངྑཱཏཾ. ཏེནཱཧ ‘‘སབྦདྷམྨཱནཾ པཱརབྷཱུཏ’’ནྟི. བྲཧྨཙརིཡསྶཱཏི སཱསནབྲཧྨཙརིཡསྶ ཨཱདིབྷཱུཏཾ. ཏེནཱཧ ‘‘ཨུཔྤཱདཀཱ ཛནཀཱ’’ཏི. ‘‘ཨིདམེཝཾ བྷཝིསྶཏི ཨིདམེཝ’’ནྟི ཏཀྐནཾ ཏཀྐོ, སོ ཨེཏསྶ ཨཏྠཱིཏི ཏཀྐཱི. ཡསྨཱ སོ ཏཾ ཏཾ ཝཏྠུཾ ཏཐཱ ཏཐཱ ཏཀྐིཏྭཱ གཎྷཏི, ཏསྨཱ ཝུཏྟཾ ‘‘ཏཀྐགཱཧཱི’’ཏི. ཝཱིམཾསནསཱིལོ ཝཱིམཾསཱི པཙྩཀྑབྷཱུཏམཏྠཾ ཝཱིམཾསནབྷཱུཏཱཡ པཉྙཱཡ ཀེཝལཾ ཝཱིམཾསནཏོ. ཏེནཱཧ ‘‘པཉྙཱཙཱརཾ ཙརཱཔེཏྭཱ ཨེཝཾཝཱདཱི’’ཏི. ཡཐཱཝུཏྟཏཀྐཱིཝཱིམཾསཱིབྷཱཝེན ཏཀྐཔརིཡཱཧཏཾ ཝཱིམཾསཱནུཙརིཏཾ སཡཾཔཊིབྷཱནཾ ཨེཝམེཏནྟི ཝཏྭཱ.

༤༨༥. ཨཊྛིཏཔདྷཱནཝཏནྟི ཨཉྙཏྠ ཀིསྨིཉྩི པུགྒལེ ཨཊྛིཏཔདྷཱནཝཏཾ ཨནཉྙསཱདྷཱརཎཾ བྷོཏོ གོཏམསྶ པདྷཱནཾ ཨཧོསི. སཔྤུརིསཔདྷཱནཝཏཾ ཨཧོསི སཔྤུརིསཔདྷཱནཝཏཱདྷིགཏཱནཾ ཨེཏཱདིསཱནཾ ཨརཧཏཾ ཨཙྪརིཡཔུགྒལཱནཾཡེཝ ཨཱཝེཎིཀཔདྷཱནཝཏཾ ཨཧོསི. ཨཛཱནནྟོཝ པཀཱསེཏཱིཏི ཨཡཾ པུཙྪིཏམཏྠཾ སཡཾ པཙྩཀྑཏོ ཨཛཱནནྟོ ཨེཝ ཀེཝལཾ སདྡཾ ཨུཔྤཱདེཏྭཱཝ པཀཱསེསཱིཏི སཉྙཱཡ ཨཱཧ. ཨཛཱནནབྷཱཝེ སནྟེཏི ཨིམེ ཨདྷིདེཝཱཏི པཙྩཀྑཏོ ཛཱནནེ ཨསཏི. པཎྜིཏེན མནུསྶེནཱཏི ལོཀཝོཧཱརཀུསལེན མནུསྶེན, ཏྭཾ པན ལོཀཝོཧཱརེཔི ཨཀུསལོ. ཝཙནཏྠཉྷི ཨཛཱནནྟོ ཡཾ ཀིཉྩི ཝདཏི. ཨུཙྩེན སམྨཏནྟི ཨུཙྩཾ སུཔཱཀཊཾ སབྦསོ ཏརུཎདཱརཀེཧིཔི སམྨཏཾ. ཉཱཏམེཏཾ ཡདིདཾ ཨཏྠི དེཝཱཏི. ཏེནཱཧ ‘‘སུསུདཱརཀཱཔཱི’’ཏིཨཱདི. དེཝཱཏི ཨུཔཔཏྟིདེཝཱ. ཨདྷིདེཝཱ ནཱམ སམྨུཏིདེཝེཧི ཨདྷིཀདེཝཱཏི ཀཏྭཱ, ཏདཉྙེ ཙ མནུསྶེ ཨདྷིཀབྷཱཝེ ཀིམེཝ ཝཏྟབྦཾ. སེསཾ སུཝིཉྙེཡྻམེཝ.

པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ

སངྒཱརཝསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

ནིཊྛིཏཱ ཙ བྲཱཧྨཎཝགྒཝཎྞནཱ.

མཛ྄ཛྷིམཔཎྞཱསཊཱིཀཱ སམཏྟཱ.