📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

སཾཡུཏྟནིཀཱཡེ

ནིདཱནཝགྒཊཱིཀཱ

༡. ནིདཱནསཾཡུཏྟཾ

༡. བུདྡྷཝགྒོ

༡. པཊིཙྩསམུཔྤཱདསུཏྟཝཎྞནཱ

༡. དུཏིཡསུཏྟཱདཱིནིཔི ¶ ¶ པཊིཙྩསམུཔྤཱདཝསེནེཝ དེསིཏཱནཱིཏི ཨཱཧ ‘‘པཋམཾ པཊིཙྩསམུཔྤཱདསུཏྟ’’ནྟི. ཏཏྲཱཏི པདཾ ཡེ དེསཀཱལཱ ཨིདྷ ཝིཧརཎཀིརིཡཱཡ ཝིསེསནབྷཱཝེན ཝུཏྟཱ, ཏེསཾ པརིདཱིཔནནྟི དསྶེནྟོ ‘‘ཡཾ སམཡཾ…པེ… དཱིཔེཏཱི’’ཏི ཨཱཧ. ཏཾ-སདྡོ ཧི ཝུཏྟསྶ ཨཏྠསྶ པཊིནིདྡེསོ, ཏསྨཱ ཨིདྷ དེསསྶ ཀཱལསྶ ཝཱ པཊིནིདྡེསོ བྷཝིཏུཾ ཨརཧཏི, ན ཨཉྙསྶ. ཨཡཾ ཏཱཝ ཏཏྲསདྡསྶ པཊིནིདྡེསབྷཱཝེ ཨཏྠཝིབྷཱཝནཱ. ཡསྨཱ པན ཨཱིདིསེསུ ཋཱནེསུ ཏཏྲསདྡོ དྷམྨདེསནཱཝིསིཊྛཾ དེསཾ ཀཱལཉྩ ཝིབྷཱཝེཏི, ཏསྨཱ ཝུཏྟཾ ‘‘བྷཱསིཏབྦཡུཏྟེ ཝཱ དེསཀཱལེ’’ཏི ¶ . ཏེན ཏཏྲཱཏི ཡཏྠ བྷགཝཱ དྷམྨདེསནཏྠཾ བྷིཀྑཱུ ཨཱལཔི ཨབྷཱསི, ཏཱདིསེ དེསེ, ཀཱལེ ཝཱཏི ཨཏྠོ. ན ཧཱིཏིཨཱདིནཱ ཏམེཝཏྠཾ སམཏྠེཏི.

ནནུ ཙ ཡཏྠ ཋིཏོ བྷགཝཱ ‘‘ཨཀཱལོ ཁོ ཏཱཝཱ’’ཏིཨཱདིནཱ བཱཧིཡསྶ དྷམྨདེསནཾ པཊིཀྑིཔི, ཏཏྠེཝ ཨནྟརཝཱིཐིཡཾ ཋིཏོཝ ཏསྶ དྷམྨཾ ¶ དེསེསཱིཏི? སཙྩམེཏཾ. ཨདེསེཏབྦཀཱལེ ཨདེསནཱཡ ཧི ཨིདཾ ཨུདཱཧརཎཾ. ཏེནཱཧ ‘‘ཨཀཱལོ ཁོ ཏཱཝཱ’’ཏི. ཡཾ པན ཏཏྠ ཝུཏྟཾ ‘‘ཨནྟརགྷརཾ པཝིཊྛམྷཱ’’ཏི, ཏམྤི ཏསྶ ཨཀཱལབྷཱཝསྶེཝ པརིཡཱཡེན དསྶནཏྠཾ ཝུཏྟཾ. ཏསྶ ཧི ཏདཱ ཨདྡྷཱནཔརིསྶམེན རཱུཔཀཱཡེ ཨཀམྨཉྙཏཱ ཨཧོསི, བལཝཔཱིཏིཝེགེན ནཱམཀཱཡེ. ཏདུབྷཡསྶ ཝཱུཔསམཾ ཨཱགམེནྟོ པཔཉྩཔརིཧཱརཏྠཾ བྷགཝཱ ‘‘ཨཀཱལོ ཁོ’’ཏི པརིཡཱཡེན པཊིཀྑིཔི. ཨདེསེཏབྦདེསེ ཨདེསནཱཡ པན ཨུདཱཧརཎཾ ‘‘ཨཐ ཁོ བྷགཝཱ མགྒཱ ཨོཀྐམྨ ཨཉྙཏརསྨིཾ རུཀྑམཱུལེ ནིསཱིདི, ཝིཧཱརཏོ ནིཀྑམིཏྭཱ ཝིཧཱརཔཙྪཱཡཱཡཾ པཉྙཏྟེ ཨཱསནེ ནིསཱིདཱི’’ཏི ཨེཝམཱདིཀཾ ཨིདྷ ཨཱདིསདྡེན སངྒཧིཏཾ. ‘‘ས ཁོ སོ བྷིཀྑཝེ བཱལོ ཨིདྷ པཱཔཱནི ཀམྨཱནི ཀརིཏྭཱ’’ཏི ཨེཝམཱདཱིསུ (མ. ནི. ༣.༢༤༨) པདཔཱུརཎམཏྟེ ཁོ-སདྡོ, ‘‘དུཀྑཾ ཁོ ཨགཱརཝོ ཝིཧརཏི ཨཔྤཏིསྶོ’’ཏིཨཱདཱིསུ (ཨ. ནི. ༤.༢༡) ཨཝདྷཱརཎེ, ‘‘ཀིཏྟཱཝཏཱ ནུ ཁོ, ཨཱཝུསོ, སཏྠུ པཝིཝིཏྟསྶ ཝིཧརཏོ སཱཝཀཱ ཝིཝེཀཾ ནཱནུསིཀྑནྟཱི’’ཏིཨཱདཱིསུ (མ. ནི. ༡.༣༡) ཨཱདིཀཱལཏྠེ, ཝཱཀྱཱརམྦྷེཏི ཨཏྠོ. ཏཏྠ པདཔཱུརཎེན ཝཙནཱལངྐཱརམཏྟཾ ཀཏཾ ཧོཏི, ཨཱདིཀཱལཏྠེན ཝཱཀྱསྶ ཨུཔཉྙཱསམཏྟཾ, ཨཝདྷཱརཎཏྠེན པན ནིཡམདསྶནཾ. ‘‘ཏསྨཱ ཨཱམནྟེསི ཨེཝཱ’’ཏི ཨཱམནྟནེ ནིཡམོ དསྶིཏོ ཧོཏཱིཏི.

‘‘བྷགཝཱཏི ལོཀགརུདཱིཔན’’ནྟི ཀསྨཱ ཝུཏྟཾ, ནནུ པུབྦེ ‘‘བྷགཝཱ’’ཏི པདཾ ཝུཏྟནྟི? ཡདིཔི པུབྦེ ཝུཏྟཾ, ཏཾ པན ཡཐཱཝུཏྟཊྛཱནེ ཝིཧརཎཀིརིཡཱཡ ཀཏྟུཝིསེསདསྶནཔརཾ, ན ཨཱམནྟནཀིརིཡཱཡ, ཨིདྷ པན ཨཱམནྟནཀིརིཡཱཡ, ཏསྨཱ ཏདཏྠཾ པུན བྷགཝཱཏི པཱལི༹ཡཾ ཝུཏྟནྟི. ཏསྶཏྠཾ དསྶེཏུཾ ‘‘བྷགཝཱཏི ལོཀགརུདཱིཔན’’ནྟི ཨཱཧ. ཀཐཱསཝནཡུཏྟཔུགྒལཝཙནནྟི ཝཀྑམཱནཱཡ པཊིཙྩསམུཔྤཱདདེསནཱཡ སཝནཡོགྱཔུགྒལཝཙནཾ. ཙཏཱུསུཔི པརིསཱསུ བྷིཀྑཱུ ཨེཝ ཨེདིསཱནཾ དེསནཱནཾ ཝིསེསེན བྷཱཛནབྷཱུཏཱཏི སཱཏིསཡེན སཱསནསམྤཊིགྒཱཧཀབྷཱཝདསྶནཏྠཾ ཨིདྷ བྷིཀྑུགཧཎནྟི དསྶེཏྭཱ ཨིདཱནི སདྡཏྠཾ དསྶེཏུཾ ‘‘ཨཔིཙཱ’’ཏི ཨཱཧ. ཏཏྠ བྷིཀྑཀོཏི བྷིཀྑཱུཏི བྷིཀྑནསཱིལཏྟཱ བྷིཀྑནདྷམྨཏྟཱ བྷིཀྑཱུཏི ཨཏྠོ. བྷིཀྑཱཙརིཡཾ ཨཛ྄ཛྷུཔགཏོཏི བུདྡྷཱདཱིཧིཔི ཨཛ྄ཛྷུཔགཏཾ བྷིཀྑཱཙརིཡཾ ཨུཉྪཱཙརིཡཾ ཨཛ྄ཛྷུཔགཏཏྟཱ ཨནུཊྛིཏཏྟཱ བྷིཀྑུ. ཡོ ཧི ཀོཙི ཨཔྤཾ ཝཱ མཧནྟཾ ཝཱ བྷོགཀྑནྡྷཾ པཧཱཡ ཨགཱརསྨཱ ཨནགཱརིཡཾ པབྦཛིཏོ, སོ ཀསིགོརཀྑཱདཱིཧི ¶ ¶ ཛཱིཝིཀཀཔྤནཾ ཧིཏྭཱ ལིངྒསམྤཊིཙྪནེནེཝ བྷིཀྑཱཙརིཡཾ ཨཛ྄ཛྷུཔགཏཏྟཱ བྷིཀྑུ. པརཔཊིབདྡྷཛཱིཝིཀཏྟཱ ཝཱ ཝིཧཱརམཛ྄ཛྷེ ཀཱཛབྷཏྟཾ བྷུཉྫམཱནོཔི བྷིཀྑཱཙརིཡཾ ཨཛ྄ཛྷུཔགཏོཏི བྷིཀྑུ པིཎྜིཡཱལོཔབྷོཛནཾ ནིསྶཱཡ པབྦཛྫཱཡ ཨུསྶཱཧཛཱཏཏྟཱ ཝཱ བྷིཀྑཱཙརིཡཾ ཨཛ྄ཛྷུཔགཏོཏི བྷིཀྑཱུཏི ཨེཝམེཏྠ ཨཏྠོ དཊྛབྦོ.

ཨཱདིནཱ ནཡེནཱཏི ‘‘བྷིནྣཔཊདྷརོཏི བྷིཀྑུ, བྷིནྡཏི པཱཔཀེ ཨཀུསལེ དྷམྨེཏི བྷིཀྑུ, བྷིནྣཏྟཱ པཱཔཀཱནཾ ཨཀུསལཱནཾ དྷམྨཱནཾ བྷིཀྑཱུ’’ཏིཨཱདིནཱ ཝིབྷངྒེ (ཝིབྷ. ༥༠༩) ཨཱགཏནཡེན. ཉཱཔནེཏི ཨཝབོདྷནེ, པཊིཝེདནེཏི ཨཏྠོ. བྷིཀྑནསཱིལཏཱ, ན ཀསིཝཱཎིཛྫཱདཱིཧི ཛཱིཝནསཱིལཏཱ. བྷིཀྑནདྷམྨཏཱ ‘‘ཨུདྡིསྶ ཨརིཡཱ ཏིཊྛནྟཱི’’ཏི (ཛཱ. ༡.༧.༥༩) ཨེཝཾ ཝུཏྟབྷིཀྑནསབྷཱཝཏཱ, ན ཡཱཙནཱཀོཧཉྙསབྷཱཝཏཱ. བྷིཀྑནེ སཱདྷུཀཱརིཏཱ ‘‘ཨུཏྟིཊྛེ ནཔྤམཛྫེཡྻཱ’’ཏི (དྷ. པ. ༡༦༨) ཝཙནཾ ཨནུསྶརིཏྭཱ ཏཏྠ ཨཔྤམཛྫཏཱ. ཨཐ ཝཱ སཱིལཾ ནཱམ པཀཏིསབྷཱཝོ. ཨིདྷ པན ཏཐཱདྷིཊྛཱནཾ. དྷམྨོཏི ཝཏཾ. ཨཔརེ པན ‘‘སཱིལཾ ནཱམ ཝཏཝསེན སམཱདཱནཾ. དྷམྨོ ནཱམ པཝེཎི-ཨཱགཏཾ ཙཱརིཏྟཾ. སཱདྷུཀཱརིཏཱ སཀྐཙྩཀཱརིཏཱ ཨཱདརཀིརིཡཱ’’ཏི ཝཎྞེནྟི.

ཧཱིནཱདྷིཀཛནསེཝིཏཝུཏྟིནྟི ཡེ བྷིཀྑུབྷཱཝེ ཋིཏཱཔི ཛཱཏིམདཱདིཝསེན ཨུདྡྷཏཱ ཨུནྣལཱ༹, ཡེ ཙ གིཧིབྷཱཝེ པརེསུ ཨཏྠིཀབྷཱཝམྤི ཨནུཔགཏཏཱཡ བྷིཀྑཱཙརིཡཾ པརམཀཱཔཉྙཾ མཉྙནྟི, ཏེསཾ ཨུབྷཡེསམྤི ཡཐཱཀྐམཾ ‘‘བྷིཀྑཝོ’’ཏི ཝཙནེན ཧཱིནཛནེཧི དལིདྡེཧི པརམཀཱཔཉྙཏཾ པཏྟེཧི པརཀུལེསུ བྷིཀྑཱཙརིཡཱཡ ཛཱིཝིཀཾ ཀཔྤེནྟེཧི སེཝིཏཾ ཝུཏྟིཾ པཀཱསེནྟོ ཨུདྡྷཏབྷཱཝནིགྒཧཾ ཀརོཏི, ཨདྷིཀཛནེཧི ཨུལཱ༹རབྷོགཁཏྟིཡཀུལཱདིཏོ པབྦཛིཏེཧི བུདྡྷཱདཱིཧི ཨཱཛཱིཝསོདྷནཏྠཾ སེཝིཏཾ ཝུཏྟིཾ པཀཱསེནྟོ དཱིནབྷཱཝནིགྒཧཾ ཀརོཏཱིཏི ཡོཛེཏབྦཾ. ཡསྨཱ ‘‘བྷིཀྑཝོ’’ཏི ཝཙནཾ ཨཱམནྟནབྷཱཝཏོ ཨབྷིམུཁཱིཀརཎཾ, པཀརཎཏོ སཱམཏྠིཡཏོ ཙ སུསྶཱུསཱཛནནཾ, སཀྐཙྩསཝནམནསིཀཱརནིཡོཛནཉྩ ཧོཏི, ཏསྨཱ ཏམཏྠཾ དསྶེནྟོ ‘‘བྷིཀྑཝོཏི ཨིམིནཱ’’ཏིཨཱདིམཱཧ.

ཏཏྠ སཱདྷུཀཾ མནསིཀཱརེཔཱིཏི སཱདྷུཀཾ སཝནེ སཱདྷུཀཾ མནསིཀཱརེ ཙ. ཀཐཾ པཝཏྟིཏཱ སཝནཱདཡོ སཱདྷུཀཾ པཝཏྟིཏཱ ཧོནྟཱིཏི? ‘‘ཨདྡྷཱ ཨིམཱཡ ¶ པཊིཔཏྟིཡཱ སཀལསཱསནསམྤཏྟི ཧཏྠགཏཱ བྷཝིསྶཏཱི’’ཏི ཨཱདརགཱརཝཡོགེན ཀཐཱདཱིསུ ཨཔརིབྷཝཱདིནཱ ཙ. ཝུཏྟཉྷི ‘‘པཉྩཧི, བྷིཀྑཝེ, དྷམྨེཧི སམནྣཱགཏོ སུཎནྟོ སདྡྷམྨཾ བྷབྦོ ནིཡཱམཾ ཨོཀྐམིཏུཾ ཀུསལེསུ དྷམྨེསུ སམྨཏྟཾ. ཀཏམེཧི པཉྩཧི? ན ཀཐཾ པརིབྷོཏི, ན ཀཐིཀཾ པརིབྷོཏི, ན ཨཏྟཱནཾ པརིབྷོཏི ¶ , ཨཝིཀྑིཏྟཙིཏྟོ དྷམྨཾ སུཎཱཏི ཨེཀགྒཙིཏྟོ, ཡོནིསོ ཙ མནསི ཀརོཏི. ཨིམེཧི ཁོ, བྷིཀྑཝེ, པཉྩཧི དྷམྨེཧི སམནྣཱགཏོ སུཎནྟོ སདྡྷམྨཾ བྷབྦོ ནིཡཱམཾ ཨོཀྐམིཏུཾ ཀུསལེསུ དྷམྨེསུ སམྨཏྟ’’ནྟི (ཨ. ནི. ༥.༡༥༡). ཏེནཱཧ ‘‘སཱདྷུཀཾ མནསིཀཱརཱཡཏྟཱ ཧི སཱསནསམྤཏྟཱི’’ཏི. སཱསནསམྤཏྟི ནཱམ སཱིལཱདིནིཔྥཏྟི. པཋམཾ ཨུཔྤནྣཏྟཱ ཨདྷིགམཝསེན. སཏྠུཙརིཡཱནུཝིདྷཱཡཀཏྟཱ སཱིལཱདིགུཎཱནུཊྛཱནེན. ཏིཎྞཾ ཡཱནཱནཾ ཝསེན ཨནུདྷམྨཔཊིཔཏྟིསམྦྷཝཏོ སཀལསཱསནཔཊིགྒཱཧཀཏྟཱ.

སནྟིཀཏྟཱཏི སམཱིཔབྷཱཝཏོ. སནྟིཀཱཝཙརཏྟཱཏི སབྦཀཱལཾ སཾཝུཏྟིབྷཱཝཏོ. ཡཐཱནུསིཊྛནྟི ཨནུསཱསནིཡཱནུརཱུཔཾ, ཨནུསཱསནིཾ ཨནཝསེསཏོ པཊིགྒཧེཏྭཱཏི ཨཏྠོ. ཨེཀཙྩེ བྷིཀྑཱུཏི ཡེ པཊིཙྩསམུཔྤཱདདྷམྨེ དེསནཱཔསུཏཱ, ཏེ. པུབྦེ ‘‘སབྦཔརིསསཱདྷཱརཎཱ ཧི བྷགཝཏོ དྷམྨདེསནཱ’’ཏིཨཱདིནཱ བྷིཀྑཱུནཾ ཨེཝ ཨཱམནྟནཀཱརཎཾ དསྶེཏྭཱ ཨིདཱནི བྷིཀྑཱུ ཨཱམནྟེཏྭཱ དྷམྨདེསནཱཡ པཡོཛནཾ དསྶེཏུཾ ཀིམཏྠཾ པན བྷགཝཱཏི ཙོདནཾ སམུཊྛཱཔེཏི. ཏཏྠ ཨཉྙཾ ཙིནྟེནྟཱཏི ཨཉྙཝིཧིཏཱ. ཝིཀྑིཏྟཙིཏྟཱཏི ཨསམཱཧིཏཙིཏྟཱ. དྷམྨཾ པཙྩཝེཀྑནྟཱཏི ཧིཡྻོ ཏཏོ པརདིཝསེསུ ཝཱ སུཏདྷམྨཾ པཏི མནསཱ ཨཝེཀྑནྟཱ. བྷིཀྑཱུ ཨཱམནྟེཏྭཱ དྷམྨེ དེསིཡམཱནེ ཨཱདིཏོ པཊྛཱཡ དེསནཾ སལླཀྑེཏུཾ སཀྐོཏཱིཏི ཨིམམེཝཏྠཾ བྱཏིརེཀམུཁེན དསྶེཏུཾ ‘‘ཏེ ཨནཱམནྟེཏྭཱ’’ཏིཨཱདི ཝུཏྟཾ.

བྷིཀྑཝོཏི ཙ སནྡྷིཝསེན ཨི-ཀཱརལོཔོ དཊྛབྦོ ‘‘བྷིཀྑཝོ ཨིཏཱི’’ཏི, ཨཡཉྷི ཨིཏིསདྡོ ཧེཏུཔརིསམཱཔནཱདིཔདཏྠཝིཔརིཡཱཡཔཀཱརཱཝདྷཱརཎནིདསྶནཱདིཨནེཀཏྠཔབྷེདོ. ཏཐཱ ཧེས ‘‘རུཔྤཏཱིཏི ཁོ, བྷིཀྑཝེ, ཏསྨཱ ‘རཱུཔ’ནྟི ཝུཙྩཏཱི’’ཏིཨཱདཱིསུ (སཾ. ནི. ༣.༧༩) ཧེཏུམྷི དིསྶཏི, ‘‘ཏསྨཱཏིཧ མེ, བྷིཀྑཝེ, དྷམྨདཱཡཱདཱ བྷཝཐ, མཱ ཨཱམིསདཱཡཱདཱ’’ཏིཨཱདཱིསུ (མ. ནི. ༡.༢༩) པརིསམཱཔནེ, ‘‘ཨིཏི ཝཱ ཨེཝརཱུཔཱ ཝིསཱུཀདསྶནཱ པཊིཝིརཏོ’’ཏིཨཱདཱིསུ (དཱི. ནི. ༡.༡༣) ཨཱདིཨཏྠེ ‘‘མཱགཎྜིཡོཏི ཏསྶ བྲཱཧྨཎསྶ སངྑཱ སམཉྙཱ པཉྙཏྟི ¶ ཝོཧཱརོ ནཱམཾ ནཱམཀམྨཾ ནཱམདྷེཡྻཾ ནིརུཏྟི བྱཉྫནཾ ཨབྷིལཱཔོ’’ཏིཨཱདཱིསུ (མཧཱནི. ༧༣, ༧༥) པདཏྠཝིཔརིཡཱཡེ, ‘‘ཨིཏི ཁོ, བྷིཀྑཝེ, སཔྤཊིབྷཡོ བཱལོ, ཨཔྤཊིབྷཡོ པཎྜིཏོ. སཨུཔདྡཝོ བཱལོ, ཨནུཔདྡཝོ པཎྜིཏོ’’ཏིཨཱདཱིསུ (མ. ནི. ༣.༡༢༤) པཀཱརེ, ‘‘ཨཏྠི ཨིདཔྤཙྩཡཱ ཛརཱམརཎནྟི ཨིཏི པུཊྛེན སཏཱ, ཨཱནནྡ, ཨཏྠཱིཏིསྶ ཝཙནཱིཡཾ. ཀིཾ པཙྩཡཱ ཛརཱམརཎནྟི ཨིཏི ཙེ ཝདེཡྻ, ཛཱཏིཔཙྩཡཱ ཛརཱམརཎནྟི ཨིཙྩསྶ ཝཙནཱིཡ’’ནྟིཨཱདཱིསུ (དཱི. ནི. ༢.༩༦) ཨཝདྷཱརཎེ, ‘‘སབྦམཏྠཱིཏི ཁོ, ཀཙྩཱན, ཨཡམེཀོ ཨནྟོ, སབྦཾ ནཏྠཱིཏི ཨཡཾ དུཏིཡོ ཨནྟོ’’ཏིཨཱདཱིསུ (སཾ. ནི. ༢.༡༥; ༣.༩༠) ནིདསྶནེ ¶ . ཨིདྷཱཔི ནིདསྶནེ ཨེཝ དཊྛབྦོ. བྷིཀྑཝོཏི ཨཱམནྟནཱཀཱརོ ཏམེས ཨིཏི-སདྡོ ནིདསྶེཏི ‘‘བྷིཀྑཝོཏི ཨཱམནྟེསཱི’’ཏི. ཨིམིནཱ ནཡེན བྷདྡནྟེཏིཨཱདཱིསུཔི ཡཐཱརཧཾ ཨིཏིསདྡསྶ ཨཏྠོ ཝེདིཏབྦོ.

པུབྦེ ‘‘བྷགཝཱ ཨཱམནྟེསཱི’’ཏི ཝུཏྟཏྟཱ བྷགཝཏོ པཙྩསྶོསུནྟི ཨིདྷ བྷགཝཏོཏི སཱམིཝཙནཾ ཨཱམནྟནམེཝ སམྦནྡྷཱིཨནྟརཾ ཨཔེཀྑཏཱིཏི ཨིམིནཱ ཨདྷིཔྤཱཡེན ‘‘བྷགཝཏོ ཨཱམནྟནཾ པཊིཨསྶོསུ’’ནྟི ཝུཏྟཾ. བྷགཝཏོཏི ཨིདཾ པན པཊིསྶཝསམྦནྡྷེན སམྤདཱནཝཙནཾ. ཨེཏྟཱཝཏཱ ཡཾ ཀཱལདེསདེསཀཔརིསཱཔདེསཔཊིམཎྜིཏཾ ནིདཱནཾ བྷཱསིཏནྟི སམྦནྡྷོ. ཨེཏྠཱཧ – ཀིམཏྠཾ པན དྷམྨཝིནཡསངྒཧེ ཀརིཡམཱནེ ནིདཱནཝཙནཾ, ནནུ བྷགཝཏཱ བྷཱསིཏཝཙནསྶེཝ སངྒཧོ ཀཱཏབྦོཏི? ཝུཙྩཏེ – དེསནཱཡ ཋིཏིཨསམྨོསསདྡྷེཡྻབྷཱཝསམྤཱདནཏྠཾ. ཀཱལདེསདེསཀནིམིཏྟཔརིསཱཔདེསེཧི ཨུཔནིབནྡྷིཏྭཱ ཋཔིཏཱ ཧི དེསནཱ ཙིརཊྛིཏིཀཱ ཧོཏི ཨསམྨོསདྷམྨཱ སདྡྷེཡྻཱ ཙ, དེསཀཱལཀཏྟུསོཏུནིམིཏྟེཧི ཨུཔནིབནྡྷོ ཝིཡ ཝོཧཱརཝིནིཙྪཡོ. ཏེནེཝ ཙཱཡསྨཏཱ མཧཱཀསྶཔེན ‘‘པཊིཙྩསམུཔྤཱདསུཏྟཾ, ཨཱཝུསོ ཨཱནནྡ, ཀཏྠ བྷཱསིཏ’’ནྟིཨཱདིནཱ དེསཱདིཔུཙྪཱསུ ཀཏཱསུ ཏཱསཾ ཝིསྶཛྫནཾ ཀརོནྟེན དྷམྨབྷཎྜཱགཱརིཀེན ‘‘ཨེཝཾ མེ སུཏ’’ནྟི ཨཱཡསྨཏཱ ཨཱནནྡེན ཨིམསྶ སུཏྟསྶ ནིདཱནཾ བྷཱསིཏཾ.

ཨཔིཙ སཏྠུ སམྤཏྟིཔཀཱསནཏྠཾ ནིདཱནཝཙནཾ. ཏཐཱགཏསྶ ཧི བྷགཝཏོ པུབྦརཙནཱནུམཱནཱགམཏཀྐཱབྷཱཝཏོ སམྨཱསམྦུདྡྷབྷཱཝསིདྡྷི. ན ཧི སམྨཱསམྦུདྡྷསྶ ¶ པུབྦརཙནཱདཱིཧི ཨཏྠོ ཨཏྠི, སབྦཏྠ ཨཔྤཊིཧཏཉཱཎཙཱརཏཱཡ ཨེཀཔྤམཱཎཏྟཱ ཙ ཉེཡྻདྷམྨེསུ. ཏཐཱ ཨཱཙརིཡམུཊྛིདྷམྨམཙྪརིཡསཏྠུསཱཝཀཱནུརོདྷཱབྷཱཝཏོ ཁཱིཎཱསཝཏྟསིདྡྷི. ན ཧི སབྦསོ ཁཱིཎཱསཝསྶ ཏེ སམྦྷཝནྟཱིཏི སུཝིསུདྡྷཱ ཙསྶ པརཱནུགྒཧཔྤཝཏྟི, ཨེཝཾ དེསཀསཾཀིལེསབྷཱུཏཱནཾ དིཊྛིསཱིལསམྤདཱདཱུསཀཱནཾ ཨཝིཛྫཱཏཎྷཱནཾ ཨཙྩནྟཱབྷཱཝསཾསཱུཙཀེཧི ཉཱཎསམྤདཱཔཧཱནསམྤདཱབྷིབྱཉྫནཀེཧི ཙ སཾབུདྡྷཝིསུདྡྷབྷཱཝེཧི པུརིམཝེསཱརཛྫདྭཡསིདྡྷི, ཏཏོ ཨེཝ ཙ ཨནྟརཱཡིཀནིཡྻཱནིཀདྷམྨེསུ སམྨོཧཱབྷཱཝསིདྡྷིཏོ པཙྪིམཝེསཱརཛྫདྭཡསིདྡྷཱིཏི བྷགཝཏོ ཙཏུཝེསཱརཛྫསམནྣཱགམོ ཨཏྟཧིཏཔརཧིཏཔཊིཔཏྟི ཙ ནིདཱནཝཙནེན པཀཱསིཏཱ ཧོཏི, ཏཏྠ ཏཏྠ སམྤཏྟཔརིསཱཡ ཨཛ྄ཛྷཱསཡཱནུརཱུཔཾ ཋཱནུཔྤཏྟིཀཔཊིབྷཱནེན དྷམྨདེསནཱདཱིཔནཏོ, ཨིདྷ པན མཱུལདྭཡཝསེན ཨནྟདྭཡརཧིཏསྶ ཏིསནྡྷིཀཱལབནྡྷསྶ ཙཏུབྦིདྷནཡསངྑེཔགམྦྷཱིརབྷཱཝཡུཏྟསྶ པཊིཙྩསམུཔྤཱདསྶ བོདྷིཡཱ ནིདསྶནཏོ ཙཱཏི ཡོཛེཏབྦཾ. ཏེན ཝུཏྟཾ ‘‘སཏྠུ སམྤཏྟིཔཀཱསནཏྠཾ ནིདཱནཝཙན’’ནྟི.

ཏཐཱ ¶ སཱསནསམྤཏྟིཔཀཱསནཏྠཾ ནིདཱནཝཙནཾ. ཉཱཎཀརུཎཱཔརིགྒཧིཏསབྦཀིརིཡསྶ ཧི བྷགཝཏོ ནཏྠི ནིརཏྠིཀཱ པཝཏྟི, ཨཏྟཧིཏཏྠཱ ཝཱ, ཏསྨཱ པརེསཾ ཨེཝ ཨཏྠཱཡ པཝཏྟསབྦཀིརིཡསྶ སམྨཱསམྦུདྡྷསྶ སཀལམྤི ཀཱཡཝཙཱིམནོཀམྨཾ ཡཐཱཔཝཏྟཾ ཝུཙྩམཱནཾ དིཊྛདྷམྨིཀསམྤརཱཡིཀཔརམཏྠེཧི ཡཐཱརཧཾ སཏྟཱནཾ ཨནུསཱསནཊྛེན སཱསནཾ, ན ཀབྦརཙནཱ. ཏཡིདཾ སཏྠུཙརིཏཾ ཀཱལདེསདེསཀཔརིསཱཔདེསེཧི སདྡྷིཾ ཏཏྠ ཏཏྠ ནིདཱནཝཙནེཧི ཡཐཱརཧཾ པཀཱསཱིཡཏི, ཨིདྷ པན དྭཱདསཔདིཀཔཙྩཡཱཀཱརཝིབྷཱཝནེན ཏེན. ཏེན ཝུཏྟཾ ‘‘སཱསནསམྤཏྟིཔཀཱསནཏྠཾ ནིདཱནཝཙན’’ནྟི.

ཨཔིཙ སཏྠུ པམཱཎབྷཱཝཔྤཀཱསནེན སཱསནསྶ པམཱཎབྷཱཝདསྶནཏྠཾ ནིདཱནཝཙནཾ, ཏཉྩསྶ པམཱཎབྷཱཝདསྶནཾ ཧེཊྛཱ ཝུཏྟནཡཱནུསཱརེན ‘‘བྷགཝཱ’’ཏི ཙ ཨིམིནཱ པདེན ཝིབྷཱཝིཏནྟི ཝེདིཏབྦཾ. ‘‘བྷགཝཱ’’ཏི ཙ ཨིམིནཱ ཏཐཱགཏསྶ རཱགདོསམོཧཱདི-སབྦསཾཀིལེསམལདུཙྩརིཏཱདིདོསཔྤཧཱནདཱིཔནེན ཝཙནེན ཨནཉྙསཱདྷཱརཎསུཔརིསུདྡྷཉཱཎཀརུཎཱདིགུཎཝིསེསཡོགཔརིདཱིཔནེན ཏཏོ ཨེཝ སབྦསཏྟུཏྟམབྷཱཝདཱིཔནེན ཨཡམཏྠོ སབྦཐཱ པཀཱསིཏོ ཧོཏཱིཏི. ཨིདམེཏྠ ནིདཱནཝཙནེ པཡོཛནནིདསྶནཾ.

ནིཀྑིཏྟསྶཱཏི ¶ དེསིཏསྶ. དེསནཱཔི ཧི དེསེཏབྦསྶ སཱིལཱདིཨཏྠསྶ ཝིནེཡྻསནྟཱནེསུ ནིཀྑིཔནཏོ ‘‘ནིཀྑེཔོ’’ཏི ཝུཙྩཏཱིཏི ‘‘སུཏྟནིཀྑེཔཾ ཏཱཝ ཝིཙཱརེཏྭཱ ཝུཙྩམཱནཱ པཱཀཊཱ ཧོཏཱི’’ཏི སཱམཉྙཏོ བྷགཝཏོ དེསནཱཡ སམུཊྛཱནསྶ ཝིབྷཱགཾ དསྶེཏྭཱ ‘‘ཨེཏྠཱཡཾ དེསནཱ ཨེཝཾསམུཊྛཱནཱ’’ཏི དེསནཱཡ སམུཊྛཱནེ དསྶིཏེ སུཏྟསྶ སམྨདེཝ ནིདཱནཔརིཛཱནནེན ཝཎྞནཱཡ སུཝིཉྙེཡྻཏྟཱ ཝུཏྟཾ. ཏཏོ ཧེཊྛཱ ‘‘ཀསྨཱ བྷགཝཏཱ པཊིཙྩསམུཔྤཱདཝསེནེཝ དེསནཱ ཨཱརདྡྷཱ’’ཏི ཀེནཙི ཙོདནཱཡ ཀཏཱཡ ‘‘པརཛ྄ཛྷཱསཡོཡཾ སུཏྟནིཀྑེཔོ’’ཏི པརིཧཱརོ སུཀཐིཏོ ཧོཏི. ཏཏྠ ཡཐཱ ཨནེཀསཏཨནེཀསཧསྶབྷེདཱནིཔི སུཏྟནྟཱནི སཾཀིལེསབྷཱགིཡཱདིཔདྷཱནནཡེན སོལ༹སཝིདྷཏཾ ནཱཏིཝཏྟནྟི, ཨེཝཾ ཨཏྟཛ྄ཛྷཱསཡཱདིསུཏྟནིཀྑེཔཝསེན ཙཏུབྦིདྷབྷཱཝནྟི ཨཱཧ ‘‘ཙཏྟཱརོ ཧི སུཏྟནིཀྑེཔཱ’’ཏི. ཨེཏྠ ཙ ཡཐཱ ཨཏྟཛ྄ཛྷཱསཡསྶ ཨཊྛུཔྤཏྟིཡཱ ཙ པརཛ྄ཛྷཱསཡཔུཙྪཱཧི སདྡྷིཾ སཾསགྒབྷེདོ སམྦྷཝཏི ‘‘ཨཏྟཛ྄ཛྷཱསཡོ ཙ པརཛ྄ཛྷཱསཡོ ཙ, ཨཏྟཛ྄ཛྷཱསཡོ ཙ པུཙྪཱཝསིཀོ ཙ, ཨཏྟཛ྄ཛྷཱསཡོ ཙ པརཛ྄ཛྷཱསཡོ ཙ པུཙྪཱཝསིཀོ ཙ, ཨཊྛུཔྤཏྟིཀོ ཙ པརཛ྄ཛྷཱསཡོ ཙ, ཨཊྛུཔྤཏྟིཀོ ཙ པུཙྪཱཝསིཀོ ཙ, ཨཊྛུཔྤཏྟིཀོ ཙ པརཛ྄ཛྷཱསཡོ ཙ པུཙྪཱཝསིཀོ ཙཱ’’ཏི ཨཛ྄ཛྷཱསཡཔུཙྪཱནུསནྡྷིསམྦྷཝཏོ, ཨེཝཾ ཡདིཔི ཨཊྛུཔྤཏྟིཡཱ ཨཛ྄ཛྷཱསཡེནཔི སཾསགྒབྷེདོ སམྦྷཝཏི, ཨཏྟཛ྄ཛྷཱསཡཱདཱིཧི པན པུརཏོ ཋིཏེཧི ཨཊྛུཔྤཏྟིཡཱ སཾསགྒོ ནཏྠཱིཏི. ནཡིདྷ ནིརཝསེསོ ཝིཏྠཱརནཡོ སམྦྷཝཏཱིཏི ‘‘ཙཏྟཱརོ ཧི སུཏྟནིཀྑེཔཱ’’ཏི ¶ ཝུཏྟཾ. ཏདནྟོགདྷཏྟཱ ཝཱ སམྦྷཝནྟཱནཾ སེསནིཀྑེཔཱནཾ མཱུལནིཀྑེཔཝསེན ཙཏྟཱརོཝ དསྶིཏཱ, ཏཐཱདསྶནཉྩེཏྠ ཨཡཾ སཾསགྒབྷེདོ གཧེཏབྦོཏི.

ཏཏྲཱཡཾ ཝཙནཏྠོ – ནིཀྑིཔཱིཡཏཱིཏི ནིཀྑེཔོ, སུཏྟཾ ཨེཝ ནིཀྑེཔོ སུཏྟནིཀྑེཔོ. ཨཐ ཝཱ ནིཀྑིཔནཾ ནིཀྑེཔོ, སུཏྟསྶ ནིཀྑེཔོ སུཏྟནིཀྑེཔོ, སུཏྟདེསནཱཏི ཨཏྠོ. ཨཏྟནོ ཨཛ྄ཛྷཱསཡོ ཨཏྟཛ྄ཛྷཱསཡོ, སོ ཨསྶ ཨཏྠི ཀཱརཎབྷཱུཏོཏི ཨཏྟཛ྄ཛྷཱསཡོ. ཨཏྟནོ ཨཛ྄ཛྷཱསཡོ ཨེཏསྶཱཏི ཝཱ ཨཏྟཛ྄ཛྷཱསཡོ. པརཛ྄ཛྷཱསཡེཔི ཨེསེཝ ནཡོ. པུཙྪཱཡ ཝསེན པཝཏྟདྷམྨོ ཨེཏསྶ ཨཏྠཱིཏི, པུཙྪཱཝསིཀོ. སུཏྟདེསནཱཡ ཝཏྠུབྷཱུཏསྶ ཨཏྠསྶ ཨུཔྤཏྟི ཨཏྠུཔྤཏྟི, ཨཏྠུཔྤཏྟིཡེཝ ཨཊྛུཔྤཏྟི, སཱ ཨེཏསྶ ཨཏྠཱིཏི ཨཊྛུཔྤཏྟིཀོ. ཨཐ ཝཱ ནིཀྑིཔཱིཡཏི ¶ སུཏྟཾ ཨེཏེནཱཏི སུཏྟནིཀྑེཔོ, ཨཏྟཛ྄ཛྷཱསཡཱདི ཨེཝ. ཨེཏསྨིཾ པན ཨཏྠཝིཀཔྤེ ཨཏྟནོ ཨཛ྄ཛྷཱསཡོ ཨཏྟཛ྄ཛྷཱསཡོ. པརེསཾ ཨཛ྄ཛྷཱསཡོ པརཛ྄ཛྷཱསཡོ. པུཙྪཱིཡཏཱིཏི པུཙྪཱ, པུཙྪིཏྭཱ ཉཱཏབྦོ ཨཏྠོ. ཏསྶ པུཙྪཱཝསེན པཝཏྟཾ དྷམྨཔཊིགྒཱཧཀཱནཾ ཝཙནཾ པུཙྪཱཝསིཀཾ, ཏདེཝ ནིཀྑེཔསདྡཱཔེཀྑཱཡ པུལླིངྒཝསེན ‘‘པུཙྪཱཝསིཀོ’’ཏི ཝུཏྟཾ. ཏཐཱ ཨཊྛུཔྤཏྟི ཨེཝ ཨཊྛུཔྤཏྟིཀོཏི ཨེཝམྤེཏྠ ཨཏྠོ ཝེདིཏབྦོ.

ཨཔིཙེཏྠ པརེསཾ ཨིནྡྲིཡཔརིཔཱཀཱདིཀཱརཎནིརཔེཀྑཏྟཱ ཨཏྟཛ྄ཛྷཱསཡསྶ ཝིསུཾ སུཏྟནིཀྑེཔབྷཱཝོ ཡུཏྟོ ཀེཝལཾ ཨཏྟནོ ཨཛ྄ཛྷཱསཡེནེཝ དྷམྨཏནྟིཋཔནཏྠཾ པཝཏྟིཏདེསནཏྟཱ. པརཛ྄ཛྷཱསཡཔུཙྪཱཝསིཀཱནཾ པན པརེསཾ ཨཛ྄ཛྷཱསཡཔུཙྪཱནཾ དེསནཱཔཝཏྟིཧེཏུབྷཱུཏཱནཾ ཨུཔྤཏྟིཡཾ པཝཏྟིཏཱནཾ ཀཐཾ ཨཊྛུཔྤཏྟིཡཾ ཨནཝརོདྷོ, པུཙྪཱཝསིཀཨཊྛུཔྤཏྟིཀཱནཾ ཝཱ པརཛ྄ཛྷཱསཡཱནུརོདྷེན པཝཏྟིཏཱནཾ ཀཐཾ པརཛ྄ཛྷཱསཡེ ཨནཝརོདྷོཏི? ན ཙོདེཏབྦམེཏཾ. པརེསཉྷི ཨབྷིནཱིཧཱརཔརིཔུཙྪཱདིཝིནིམུཏྟསྶེཝ སུཏྟདེསནཱཀཱརཎུཔྤཱདསྶ ཨཊྛུཔྤཏྟིབྷཱཝེན གཧིཏཏྟཱ པརཛ྄ཛྷཱསཡཔུཙྪཱཝསིཀཱནཾ ཝིསུཾ གཧཎཾ. ཏཐཱ ཧི བྲཧྨཛཱལདྷམྨདཱཡཱདསུཏྟཱདཱིནཾ ཝཎྞཱཝཎྞཨཱམིསུཔྤཱདཱདིདེསནཱནིམིཏྟཾ ‘‘ཨཊྛུཔྤཏྟཱི’’ཏི ཝུཙྩཏི. པརེསཾ པུཙྪཾ ཝིནཱ ཨཛ྄ཛྷཱསཡཾ ཨེཝ ནིམིཏྟཾ ཀཏྭཱ དེསིཏོ པརཛ྄ཛྷཱསཡོ, པུཙྪཱཝསེན ཨེཝ དེསིཏོ པུཙྪཱཝསིཀོཏི པཱཀཊོཝཱཡམཏྠོཏི. ཨཏྟནོ ཨཛ྄ཛྷཱསཡེནེཝ ཀཐེཏི དྷམྨཏནྟིཋཔནཏྠནྟི དཊྛབྦཾ. དསབལསུཏྟནྟཧཱརཀོཏི དསབལཝགྒེ ཨནུཔུབྦེན ནིཀྑིཏྟཱནཾ སུཏྟཱནཾ ཨཱཝལི, ཏཐཱ ཙནྡོཔམཧཱརཀཱདཡོ.

ཝིམུཏྟིཔརིཔཱཙནཱིཡཱ དྷམྨཱ སདྡྷིནྡྲིཡཱདཡོ. ཨཛ྄ཛྷཱསཡནྟི ཨདྷིམུཏྟིཾ. ཁནྟིནྟི དིཊྛིནིཛ྄ཛྷཱནཀྑནྟིཾ. མནནྟི ཙིཏྟཾ. ཨབྷིནཱིཧཱརནྟི པཎིདྷཱནཾ. བུཛ྄ཛྷནབྷཱཝནྟི བུཛ྄ཛྷནསབྷཱཝཾ, པཊིཝིཛ྄ཛྷནཱཀཱརཾ ཝཱ.

ཨུགྒྷཊིཏཉྙཱུཏི ¶ ཨུགྒྷཊནཾ ནཱམ ཉཱཎུགྒྷཊནཾ, ཉཱཎེན ཨུགྒྷཊིཏམཏྟེ ཨེཝ དྷམྨཾ ཛཱནཱཏཱིཏི ཨཏྠོ. ཝིཔཉྩིཏཾ ཝིཏྠཱརིཏམེཝ ཨཏྠཾ ཛཱནཱཏཱིཏི ཝིཔཉྩིཏཉྙཱུ. ཨུདྡེསཱདཱིཧི ནེཏབྦོཏི ནེཡྻོ. བྱཉྫནཔདཾ པརམཾ ཨསྶཱཏི པདཔརམོ. སཧ ཨུདཱཧཊཝེལཱཡཱཏི ཨུདཱཧཱརདྷམྨསྶ ཨུདྡེསེ ཨུདཱཧཊམཏྟེ ཨེཝ. དྷམྨཱབྷིསམཡོཏི ཙཏུསཙྩདྷམྨསྶ ཉཱཎེན སདྡྷིཾ ཨབྷིསམཱཡོགོ. ཨཡཾ ཝུཙྩཏཱིཏི ཨཡཾ ‘‘ཙཏྟཱརོ སཏིཔཊྛཱནཱ’’ཏིཨཱདིནཱ ནཡེན སཾཁིཏྟེན མཱཏིཀཱཡ ཋཔིཡམཱནཱཡ དེསནཱནུསཱརེན ཉཱཎཾ ¶ པེསེཏྭཱ ཨརཧཏྟཾ གཎྷིཏུཾ སམཏྠོ པུགྒལོ ‘‘ཨུགྒྷཊིཏཉྙཱུ’’ཏི ཝུཙྩཏི. ཨཡཾ ཝུཙྩཏཱིཏི ཨཡཾ སཾཁིཏྟེན མཱཏིཀཾ ཋཔེཏྭཱ ཝིཏྠཱརེན ཨཏྠེ ཝིབྷཛིཡམཱནེ ཨརཧཏྟཾ པཱཔུཎིཏུཾ སམཏྠོ པུགྒལོ ‘‘ཝིཔཉྩིཏཉྙཱུ’’ཏི ཝུཙྩཏི. ཨུདྡེསཏོཏི ཨུདྡེསཧེཏུ, ཨུདྡིསནྟསྶ ཨུདྡིསཱཔེནྟསྶ ཝཱཏི ཨཏྠོ, ‘‘ཨུདྡིསཏོ’’ཏིཔི པཱཋོ, ཨཡམེཝཏྠོ. པརིཔུཙྪཏོཏི པརིཔུཙྪནྟསྶ. ཨནུཔུབྦེན དྷམྨཱབྷིསམཡོ ཧོཏཱིཏི ཨནུཀྐམེན ཨརཧཏྟཔྤཏྟི ཧོཏི. ན ཏཱཡ ཛཱཏིཡཱ དྷམྨཱབྷིསམཡོ ཧོཏཱིཏི ཏེན ཨཏྟབྷཱཝེན མགྒཾ ཝཱ ཕལཾ ཝཱ ཨནྟམསོ ཛྷཱནཾ ཝཱ ཝིཔསྶནཾ ཝཱ ནིབྦཏྟེཏུཾ ན སཀྐོཏི. ཨཡཾ ཝུཙྩཏཱིཏི ཨཡཾ པུགྒལོ བྱཉྫནཔདམེཝ པརམཾ ཀཏྭཱ ཋིཏཏྟཱ ‘‘པདཔརམོ’’ཏི ཝུཙྩཏི.

ཨེཀཙརཱཏི ཝིཝེཀཱབྷིརཏིཡཱ ཨེཀཝིཧཱརིནོ. དྭིཙརཱཏི དྭེ ཨེཀཛ྄ཛྷཱསཡཱ ཧུཏྭཱ ཉཱཎཙརིཡཱདིཝསེན ཝིཙརནྟཱ. ཨེས ནཡོ སེསེསུ. སཏྟསུཉྙཏཱཔཀཱསནེན སུཉྙཏཾ. ཏཏོ ཨེཝ སཎྷཾ སུཁུམཾ. ‘‘པརེསཾ ཨཛ྄ཛྷཱསཡཝསེན བྷགཝཱ ཨིདཾ སུཏྟཾ ཨཱརབྷཱི’’ཏི ཝཏྭཱ ཏེ པན ‘‘པརེ’’ཏི ཝུཏྟཔུགྒལཱ ཨཔརིཀམྨིཀཱ སུཔརིསོདྷིཏཔུབྦབྷཱགཔཊིཔདཱ ཙཱཏི དུཝིདྷཱ, ཏདུབྷཡེསུ སཏྠུ པཊིཔཏྟིཾ ཨུཔམཱམུཁེན པཀཱསེནྟོ ཡཐཱ ཧཱིཏིཨཱདིམཱཧ. རཱུཔཾ ན སམུཊྛཱཔེཏི ལིཁནཝསེན ན ཨུཔྤཱདེཏི. ཨཀཏཱབྷིནིཝེསནྟི ཝིཔསྶནཱབྷཱཝནཱཡ ཨཀཏཱནུཡོགཾ. སཱིལ…པེ… སམྤདཱཡཱཏི ཨསམཱདིནྣསཱིལཾ སཱིལསམྤདཱཡ, སུཔརིསུདྡྷསཱིལཾ སམཱདྷིསམྤདཱཡ, ཨནུཛུཀཏདིཊྛིཛུཀམྨཾ དིཊྛིསམྤདཱཡ ཡོཛེནྟོཏི ཡོཛནཱ.

ཡནྟི ཡཾ པུབྦབྷཱགཔཊིཔདཾ སནྡྷཱཡ. སཱིལནྟི ཙཏུཔཱརིསུདྡྷིསཱིལཾ. དིཊྛི ཙཱཏི ཀམྨསྶཀཏཱདིཊྛི ཙེཝ ཀམྨཔཐསམྨཱདིཊྛི ཙ. ཏིཝིདྷེནཱཏི ཨཛ྄ཛྷཏྟཾ བཧིདྡྷཱ ཨཛ྄ཛྷཏྟབཧིདྡྷཱཏི ཨེཝཾ ཝིསཡབྷཱཝཏོ ཏིཔྤཀཱརེན. ཡཐཱཝུཏྟདིཊྛིཝིསུདྡྷིཡཱ ཝིསེསཔཙྩཡཾ སཱིལཾཡེཝ བྷཱཝནཱཡ ཨདྷིཊྛཱནནྟི ཝུཏྟཾ ‘‘སཱིལཾ ནིསྶཱཡ སཱིལེ པཏིཊྛཱཡཱ’’ཏི.

སུདྷནྟསུཝཎྞཾ ཨཔགཏསབྦཀཱལ༹ཀཾ. ཙཏུརསྶཱདིདྷོཏོ སུཔརིམཛྫིཏམཎིཀྑནྡྷོ. པཙྩཡདྷམྨཱནཾ ཨཝིཛྫཱདཱིནཾ ཏསྶ ཏསྶ པཙྩཡུཔྤནྣསྶ ཧེཏུཔཙྩཡཱདིབྷཱཝོ པཙྩཡཱཀཱརོ. སོ པན ཨཏྠཏོ ¶ ཨཝིཛྫཱ ཨེཝཱཏི ¶ ཨཱཧ ‘‘པཊིཙྩསམུཔྤཱདནྟི པཙྩཡཱཀཱར’’ནྟི. ཏེནཱཧ ‘‘པཙྩཡཱཀཱརོ ཧཱི’’ཏིཨཱདི.

ཀཱམཾ ཝོ-སདྡོ པདཔརཊྛིཏོ པཊིཡོགཱིཨཏྠཝིསེསཝཱཙཀོ, ནཱམཔརབྷཱུཏོ པན ཏཾ ཏཾ ཀཏྟུཀམྨཀརཎཱདིསཱདྷནཝིསིཊྛམེཝ པབོདྷེཏི, ཧི-ནིཔཱཏཔརབྷཱུཏོ པན ཝཙནཱལངྐཱརམཏྟམེཝཱཏི ཨཱཧ ‘‘ཝོཏི…པེ… དིསྶཏཱི’’ཏི. ཏཾདེསནནྟི ཏསྶ པཊིཙྩསམུཔྤཱདསྶ དེསནཾ. སཱ ཧི ཨིདྷ ཏ-སདྡེན པཙྩཱམསཱིཡཏི. ‘‘སུཎཱཐཱ’’ཏི སོཏཝིཉྙེཡྻཏཱཝཙནཏོ ན ཀེཝལཾ པཊིཙྩསམུཔྤཱདོ.

ཨེཀཏྠམེཏཾ པདཾ ཀ-སདྡེན པདཝཌྜྷནམཏྟསྶ ཀཏཏྟཱ, ཏསྨཱ སཱདྷུསདྡསྶ ཀཏོ ཨཏྠུདྡྷཱརོ སཱདྷུཀསདྡསྶཔི ཀཏོ ཨེཝ ཧོཏཱིཏི ཨདྷིཔྤཱཡོ. སཱདྷུ བྷནྟེཏི ཡཱཙཱམཧཾ བྷནྟེཏི ཨཡམེཏྠ ཨཏྠོཏི ཨཱཧ ‘‘ཨཱཡཱཙནེ’’ཏི. པུན སཱདྷུ བྷནྟེཏི ཨེཝཾ བྷནྟེཏི ཨཡམེཏྠ ཨཏྠོཏི ཨཱཧ ‘‘སམྤཊིཙྪནེ’’ཏི. སཱདྷུ སཱདྷཱུཏི ཨཧོ ཨཧོཏི ཨཡམེཏྠ ཨཏྠོཏི ཝུཏྟཾ ‘‘སམྤཧཾསནེ’’ཏི. སཱདྷུ དྷམྨརུཙཱིཏི པུཉྙཀཱམོ སུནྡརོཏི ཨཏྠོ. པཉྙཱཎཝཱཏི པཉྙཝཱ. ཨདྡུབྦྷོཏི ཨདཱུསཀོ. དལ༹ྷཱིཀམྨེཏི ཐིརཱིཀརཎེ སཀྐཙྩཀིརིཡཱཡཾ. ཨཱཎཏྟིཡནྟི ཨཱཎཱཔནེ. ‘‘སུཎཱཐ སཱདྷུཀཾ མནསི ཀརོཐཱ’’ཏི ཧི ཝུཏྟེ སཱདྷུཀསདྡེན སཝནམནསིཀཱརཱནཾ སཀྐཙྩཀིརིཡཱ ཝིཡ ཏདཱཎཱཔནམྤི ཝུཏྟཾ ཧོཏི. ཨཱཡཱཙནཏྠཏཱ ཝིཡ ཙསྶ ཨཱཎཱཔནཏྠཏཱ ཝེདིཏབྦཱ.

ཨིདཱནེཏྠ ཨེཝཾ ཡོཛནཱ ཝེདིཏབྦཱཏི སམྦནྡྷོ. སོཏིནྡྲིཡཝིཀྑེཔནིཝཱརཎཾ སཝནེ ནིཡོཛནཝསེན ཀིརིཡནྟརཔཊིསེདྷནབྷཱཝཏོ, སོཏཾ ཨོདཧཐཱཏི ཧི ཨཏྠོ. མནིནྡྲིཡཝིཀྑེཔནིཝཱརཎཾ ཨཉྙཙིནྟཱཔཊིསེདྷནཏོ. པུརིམནྟི ‘‘སུཎཱཐཱ’’ཏི པདཾ. ཨེཏྠཱཏི ‘‘སུཎཱཐ, མནསི ཀརོཐཱ’’ཏི པདདྭཡེ, ཨེཏསྨིཾ ཝཱ ཨདྷིཀཱརེ. བྱཉྫནཝིཔལླཱསགྒཱཧནིཝཱརཎཾ སོཏདྭཱརེ ཝིཀྑེཔཔཊིབཱཧཀཏྟཱ. ན ཧི ཡཱཐཱཝཏོ སུཎནྟསྶ སདྡཏོ ཝིཔལླཱསགྒཱཧོ ཧོཏི. ཨཏྠཝིཔལླཱསགྒཱཧནིཝཱརཎཾ མནིནྡྲིཡཝིཀྑེཔཔཊིབཱཧཀཏྟཱ. ན ཧི སཀྐཙྩཾ དྷམྨཾ ཨུཔདྷཱརེནྟསྶ ཨཏྠཝིཔལླཱསགྒཱཧོ ཧོཏི. དྷམྨསྶཝནེ ནིཡོཛེཏི ‘‘སུཎཱཐཱ’’ཏི ཝིདཧནཏོ. དྷཱརཎཱུཔཔརིཀྑཱསཱུཏི ཨེཏྠ ཨུཔཔརིཀྑགྒཧཎེནེཝ ཏུལནཏཱིརཎཱདིཀེ དིཊྛིཡཱ ཙ སུཔྤཊིཝེདྷཾ སངྒཎྷཱཏི. སབྱཉྫནོཏི ཨེཏྠ ཡཐཱདྷིཔྤེཏམཏྠཾ བྱཉྫཡཏཱིཏི བྱཉྫནཾ, སབྷཱཝནིརུཏྟི. སཧ བྱཉྫནེཧཱིཏི ¶ སབྱཉྫནོ, བྱཉྫནསམྤནྣོཏི ཨཏྠོ. ཨརཎཱིཡཏོ ཨུཔགནྟབྦཏོ ཨཏྠོ, ཙཏུཔཱརིསུདྡྷིསཱིལཱདིཀོ. སཧ ཨཏྠེནཱཏི སཱཏྠོ, ཨཏྠསམྤནྣོཏི ཨཏྠོ. དྷམྨགམྦྷཱིརོཏིཨཱདཱིསུ དྷམྨོ ནཱམ ཏནྟི. དེསནཱ ནཱམ ཏསྶཱ མནསཱ ཝཝཏྠཔིཏཱཡ ཏནྟིཡཱ དེསནཱ ཀཐནཾ. ཨཏྠོ ནཱམ ¶ ཏནྟིཡཱ ཨཏྠོ. པཊིཝེདྷོ ནཱམ ཏནྟིཡཱ ཏནྟིཨཏྠསྶ ཙ ཡཐཱབྷཱུཏཱཝབོདྷོ. ཡསྨཱ ཙེཏེ དྷམྨདེསནཱཨཏྠཔཊིཝེདྷཱ སསཱདཱིཧི ཝིཡ མཧཱསམུདྡོ མནྡབུདྡྷཱིཧི དུཀྑོགཱལ༹ྷཱ ཨལབྦྷནེཡྻཔཏིཊྛཱ ཙ, ཏསྨཱ གམྦྷཱིརཱ. ཏེན ཝུཏྟཾ ‘‘ཡསྨཱ ཨཡཾ དྷམྨོ…པེ… སཱདྷུཀཾ མནསི ཀརོཐཱ’’ཏི.

ཨེཏྠ ཙ པཊིཝེདྷསྶ དུཀྐརབྷཱཝཏོ དྷམྨཏྠཱནཾ དེསནཱཉཱཎསྶ དུཀྐརབྷཱཝཏོ དེསནཱཡ དུཀྑོགཱཧཏཱ, པཊིཝེདྷསྶ པན ཨུཔྤཱདེཏུཾ ཨསཀྐུཎེཡྻཏྟཱ ཏབྦིསཡཉཱཎུཔྤཏྟིཡཱ ཙ དུཀྐརབྷཱཝཏོ དུཀྑོགཱཧཏཱ ཝེདིཏབྦཱ. དེསནཾ ནཱམ ཨུདྡིསནཾ སངྑེཔདསྶནསདིསཾ. ཏཐཱ ཧི ཝིབྷངྒསུཏྟེ ‘‘དེསེསྶཱམཱི’’ཏི ཝཏྭཱ པུན ‘‘བྷཱསིསྶཱམཱི’’ཏི ཝུཏྟཾ. ཏསྶ ནིདྡིསནཾ བྷཱསནནྟི ཨིདྷཱདྷིཔྤེཏནྟི ཨཱཧ ‘‘ཝིཏྠཱརཏོཔི ནཾ བྷཱསིསྶཱམཱིཏི ཝུཏྟཾ ཧོཏཱི’’ཏི. པརིབྱཏྟཾ ཀཐནཾ ཝཱ བྷཱསནཾ.

སཱལི༹ཀཱཡིཝ ནིགྒྷོསོཏི སཱལི༹ཀཱཡ ཨཱལཱཔོ ཝིཡ མདྷུརོ ཀཎྞསུཁོ པེམནཱིཡོ. པཊིབྷཱནཾ སདྡོ. ཨུདཱིརཡཱིཏི ཨུཙྩཱརཱིཡཏི, ཝུཙྩཏཱིཏི ཨཏྠོ. ཨེཝཾ ཝུཏྟེ ཨུསྶཱཧཛཱཏཱཏི ཨེཝཾ ‘‘སུཎཱཐ སཱདྷུཀཾ མནསི ཀརོཐ, བྷཱསིསྶཱམཱི’’ཏི ཝུཏྟེ ‘‘ན ཀིར སཏྠཱ སངྑེཔེནེཝ དེསེསྶཏི, ཝིཏྠཱརེནཔི བྷཱསིསྶཏཱི’’ཏི སཉྫཱཏུསྶཱཧཱ ཧཊྛཏུཊྛཱ ཧུཏྭཱ.

ཀཏམོཏི ཏསྶ པདསྶ སཱམཉྙཏོ པུཙྪཱབྷཱཝོ ཉཱཡཏི, ན ཝིསེསཏོཏི ཏསྶ པུཙྪཱཝིསེསབྷཱཝཾ ཀཐེནྟོ ‘‘ཀཐེཏུཀམྱཏཱཔུཙྪཱ’’ཏི ཝཏྭཱ ཏེནེཝ པསངྒེན མཧཱནིདྡེསེ ཨཱགཏཱ སབྦཱཔི པུཙྪཱ ཨཏྠུདྡྷཱརནཡེན དསྶེཏི ‘‘པཉྩཝིདྷཱ ཧི པུཙྪཱ’’ཏིཨཱདིནཱ. ཏཏྠ ཨདིཊྛཾ ཛོཏེཏི ཨེཏཱཡཱཏི ཨདིཊྛཛོཏནཱ. དིཊྛཾ སཾསནྡཱིཡཏི ཨེཏཱཡཱཏི དིཊྛསཾསནྡནཱ. སཾསནྡནཉྩེཏྠ སཱཀཙྪཱཝསེན ཝིནིཙྪཡཀརཎཾ. ཝིམཏིཾ ཚིནྡཏི ཨེཏཱཡཱཏི ཝིམཏིཙྪེདནཱ. ཨནུམཏིཡཱ པུཙྪནཾ ཨནུམཏིཔུཙྪཱ. ‘‘ཏཾ ཀིཾ མཉྙཐ བྷིཀྑཝེ’’ཏིཨཱདིཔུཙྪཱཡ ཧི ‘‘ཀཱ ཏུམྷཱཀཾ ཨནུམཏཱི’’ཏི ཨནུམཏི པུཙྪིཏཱ ཧོཏི. ཀཐེཏུཀམྱཏཱ ཀཐེཏུཀམྱཏཱཡ.

ལཀྑཎནྟི ¶ ཉཱཏུཾ པུཙྪིཏོ ཡོ ཀོཙི སབྷཱཝོ. ཨཉྙཱཏནྟི ཡེན ཀེནཙི ཉཱཎེན ཨཉྙཱཏབྷཱཝམཱཧ. ཨདིཊྛནྟི དསྶནབྷཱུཏེན ཉཱཎེན ཙཀྑུནཱ ཝིཡ ན དིཊྛཏཾ. ཨཏུལིཏནྟི ‘‘ཨེཏྟཀཾ ཨིད’’ནྟི ཏུལནབྷཱུཏེན ཉཱཎེན ན ཏུལིཏཏཾ. ཨཏཱིརིཏནྟི ཏཱིརཎབྷཱུཏེན ཉཱཎེན ཨཀཏཉཱཎཀིརིཡཱསམཱཔནཏཾ. ཨཝིབྷཱུཏནྟི ཉཱཎསྶ ཨཔཱཀཊབྷཱཝཾ. ཨཝིབྷཱཝིཏནྟི ཉཱཎེན ཨཔཱཀཊཱིཀཏབྷཱཝཾ.

པཉྩསུ ¶ པུཙྪཱསུ ཡཱ བུདྡྷཱནཾ སབྦཏོ ན སནྟི, ཏཱ དསྶེཏྭཱ ཨིདྷཱདྷིཔྤེཏཔུཙྪཾ ནིགམེཏུཾ ‘‘ཏཏྠཱ’’ཏིཨཱདི ཝུཏྟཾ. ཏཾ སུཝིཉྙེཡྻམེཝ. ཡདི པཊིཙྩསམུཔྤཱདོ པཙྩཡཱཀཱརོ, ཨཐ ཀསྨཱ བྷགཝཏཱ པཊིཙྩསམུཔྤཱདདེསནཱཡ སངྑཱརཱདཡོ པཙྩཡུཔྤནྣཱ ཀཐིཏཱཏི ཨཱཧ ‘‘ཨེཏྠ ཙཱ’’ཏིཨཱདི. པཙྩཡུཔྤནྣམྤི ཀཐེཏི པཙྩཡུཔྤནྣདསྶནེན པཙྩཡདྷམྨཱནཾ པཙྩཡབྷཱཝསྶ ཀཐིཏབྷཱཝཏོ. ཨཱཧཱརཝགྒསྶཱཏིཨཱདི ‘‘པཙྩཡཱཀཱརོ པཊིཙྩསམུཔྤཱདོ’’ཏི དསྶནཏྠཾ ཝུཏྟཾ. ‘‘སམྦྷཝནྟཱི’’ཏི པཱལི༹ཡཾ པརཏོ ཝུཏྟཾ ཀིརིཡཱཔདཾ ཨཱནེཏྭཱ ཡོཛེཏི, ཨཉྙཐཱ སངྑཱརཱ ཀིཾ ཀཏཱཏི ཝཱ ཀརོནྟཱིཏི ཝཱ ན ཉཱཡེཡྻ. པཝཏྟིཡཱ ཨནུལོམཏོ ‘‘ཨཝིཛྫཱཔཙྩཡཱ’’ཏིཨཱདིཀཱ ཨནུལོམཔཊིཙྩསམུཔྤཱདཀཐཱ.

‘‘ཨཝིཛྫཱཡ ཏྭེཝཱ’’ཏིཨཱདིཀཱ པན ཏསྶ ཝིལོམཏོ པཊིལོམཀཐཱ. ཨཙྩནྟམེཝ སངྑཱརེ ཝིརཛྫཏི ཨེཏེནཱཏི ཝིརཱགོ, མགྒོ. ཨསེསནིརོདྷཱཏི ཨསེསེཏྭཱ ནིརོདྷཱ སམུཙྪིནྡནཱ. ཨེཝཾ ནིརོདྷཱནནྟི ཨེཝཾ ཨནུཔྤཱདནིརོདྷེན ནིརུདྡྷཱནཾ སངྑཱརཱནཾ ནིརོདྷཱ. ཨིཏི ཨཝིཛྫཱདཱིནཾ ནིརོདྷཝཙནེན ཨརཧཏྟཾ ཝདཏི. སཀལསྶཱཏི ཨནཝསེསསྶ. སཏྟཝིརཧིཏསྶཱཏི པརཔརིཀཔྤིཏཛཱིཝརཧིཏསྶ. ཝིནིཝཏྟེཏྭཱཏི ཨནུཔྤཱདནིརོདྷདསྶནཝསེན ཝིཔརིཝཏྟེཏྭཱ.

ཨཏྟམནཱཏི པཱིཏིསོམནསྶེན གཧིཏཙིཏྟཱ. ཏཐཱབྷཱུཏཱ ཙ ཧཊྛཙིཏྟཱ ནཱམ ཧོནྟཱིཏི ཨཱཧ ‘‘ཏུཊྛཙིཏྟཱ’’ཏི. ‘‘ཏསྶ ཝཙནཾ ཨབྷིནནྡིཏབྦ’’ནྟི ཨེཏྠ ཨབྷིནནྡནསདྡོ ཨནུམོདནཏྠོ. ‘‘ཨབྷིནནྡིཏྭཱ’’ཏི ཨེཏྠ སམྤཊིཙྪནཏྠོ. ཨིདྷ པན ཨུབྷཡཏྠོཔི ཝཊྚཏཱིཏི ཨཱཧ ‘‘ཨནུམོདིཾསུ ཙེཝ སམྤཊིཙྪིཾསུ ཙཱ’’ཏི.

པཊིཙྩསམུཔྤཱདསུཏྟཝཎྞནཱ ནིཊྛིཏཱ.

༢. ཝིབྷངྒསུཏྟཝཎྞནཱ

༢. དུཏིཡེཔཱིཏི ¶ དུཏིཡསུཏྟེཔི. པི-སདྡེན ཏདཉྙེསུ སུཏྟེསུཔཱིཏི ཨཏྠོ. ‘‘ཝིསུདྡྷིམགྒེ ཝུཏྟཱ ཨེཝཱ’’ཏི ཝཏྭཱཔི ཏདེཀདེསཾ ཨིདྷ ཝིནིཡོགཀྑམཾ དསྶེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. ཏནྟི མཱུལཾ. ཝིཏྠཱརདེསནནྟི ‘‘ཝིབྷཛིསྶཱམཱི’’ཏི པདསྶ ཨཏྠསྶ དསྶནཝསེན པཝཏྟཾ ཝིབྷངྒདེསནཾ. ཨུདྡེསདེསནཱ པཋམསུཏྟེ ཨནུལོམདེསནཱསདིསཱཝ. པུན ཝཊྚཝིཝཊྚཾ དསྶེནྟོཏི ‘‘ཨིཏི ཁོ, བྷིཀྑཝེ’’ཏིཨཱདིནཱ པཝཏྟིཾ ནིཝཏྟིཉྩ དསྶེནྟོ. པཋམཾ ཨུདྡེསཝསེན ཝིབྷཛནཝསེན ཝིཝཊྚཾ དསྶིཏཾ, ཏཏོ ཨེཝ བྱཏིརེཀནཡེན ཝིཝཊྚམྤི དསྶིཏམེཝ ཧོཏཱིཏི པུནགྒཧཎཾ.

ཏེསཾ ¶ ཏེསཾ སཏྟཱནནྟི ཨིདཾ ཀིཉྩི པཀཱརཏོ ཨནཱམསིཏྭཱ སབྦེཔི སཏྟེ སཱམཉྙཏོ བྱཱཔེཏྭཱ གཧཎནྟི ཨཱཧ ‘‘སངྑེཔཏོ…པེ… ནིདྡེསོ’’ཏི. གཏིཛཱཏིཝསེནཱཏི པཉྩགཏིཝསེན, ཏཏྠཱཔི ཨེཀེཀཱཡ གཏིཡཱ ཁཏྟིཡཱདིབྷུམྨདེཝཱདིཧཏྠིཨཱདིཛཱཏིཝསེན ཙ. ‘‘ཙིཏྟཾ མནོ’’ཏིཨཱདཱིསུ ཝིཡ ཀིཙྩཝིསེསཾ, ‘‘མཱནས’’ནྟིཨཱདཱིསུ ཝིཡ སམཱནེ ཨཏྠེ སདྡཝིསེསཾ, ‘‘པཎྜར’’ནྟིཨཱདཱིསུ ཝིཡ གུཎཝིསེསཾ, ‘‘ཙེཏསིཀཾ ཧདཡ’’ནྟིཨཱདཱིསུ ཝིཡ ནིསྶཡཝིསེསཾ, ‘‘ཙིཏྟསྶ ཋིཏཱི’’ཏིཨཱདཱིསུ ཝིཡ ཨཉྙསྶ ཨཝཏྠཱབྷཱཝཝིསེསཾ, ‘‘ཨལུབྦྷནཱ’’ཏིཨཱདཱིསུ ཝིཡ ཨཉྙསྶ ཀིརིཡཱབྷཱཝཝིསེསཾ, ‘‘ཨལུབྦྷིཏཏྟ’’ནྟིཨཱདཱིསུ ཝིཡ ཨཉྙསྶ ཨབྷཱཝཏཱཝིསེསནྟི ཨེཝམཱདིཀཾ ཨནཔེཀྑིཏྭཱ དྷམྨམཏྟཾ ཝཱ དཱིཔནཱ སབྷཱཝནིདྡེསོ. ཛིཎྞསྶ ཛཱིརཎཝསེན པཝཏྟནཱཀཱརོ ཛཱིརཎཏཱཏི ཨཱཧ ‘‘ཨཱཀཱརནིདྡེསོ’’ཏི.

ཀཱལཱཏིཀྐམེ ཀིཙྩནིདྡེསཱཏི ཀལལཀཱལཏོ པབྷུཏི པུརིམརཱུཔཱནཾ ཛརཱཔཏྟཀྑཎེ ཨུཔྤཛྫམཱནཱནི པཙྪིམརཱུཔཱནི པརིཔཀྐརཱུཔཱནུརཱུཔཱནི པརིཎཏཔརིཎཏཱནི ཨུཔྤཛྫནྟཱིཏི ཨནུཀྐམེན སུཔརིཎཏརཱུཔཱནཾ པརིཔཱཀཀཱལེ ཨུཔྤཛྫམཱནཱནི ཁཎྜིཙྩཱདིསབྷཱཝཱནི ཨུཔྤཛྫནྟཱིཏི ‘‘ཁཎྜིཙྩ’’ནྟིཨཱདཡོ ཀཱལཱཏིཀྐམེ ཛརཱཡ ཀིཙྩནིདྡེསཱ. པཀཏིནིདྡེསཱཏི ཕལཝིཔཙྩནཔཀཏིཡཱ ནིདྡེསཱ, ཛརཱཡ ཝཱ པཱཔུཎིཏབྦཕལམེཝ པཀཏི, ཏསྶཱ ནིདྡེསཱ, ན ཙ ཁཎྜིཙྩཱདཱིནེཝ ཛརཱཏི ཨུདཀཱདིགཏམགྒེསུ ཏིཎརུཀྑསཾབྷགྒཏཱདཡོ ཝིཡ པརིཔཱཀགཏམགྒསངྑཱཏེསུ པརིཔུཎྞརཱུཔེསུ ལབྦྷམཱནཱ ཁཎྜིཙྩཱདཡོ ཛརཱཡ གཏམགྒཱཨིཙྩེཝ ཝེདིཏབྦཱ, ན ཛརཱཏི.

ཡསྨཱ ¶ ཛརཾ པཏྟསྶ ཨཱཡུ ཧཱཡཏི, ཨིནྡྲིཡཱནི ཛཛྫརཱནི ཧོནྟཱིཏི ཨཱཡུཧཱནཱདཡོ པཀཏིནིདྡེསཱ, ཏསྨཱ ཝུཏྟཾ ‘‘པཙྪིམཱ དྭེ པཀཏིནིདྡེསཱ’’ཏི. ཏེནཱཧ ‘‘ཨིམེཧི པནཱ’’ཏིཨཱདི.

ཨཝིཉྙཱཡམཱནནྟརཏྟཱ ཨཝཱིཙིཛརཱ མཎིཨཱདཱིསུ མནྡདསཀཱདཱིསུ ཨེཀེཀདསཀེསུ ཙ ཁཎེ ཁཎེ ཛིཎྞཝིཀཱརཱདཱིནཾ དུཝིཉྙེཡྻཏྟཱ. ཏཏོ ཨཉྙེསཱུཏི མཎིཨཱདིཏོ ཨཉྙེསུ ཨཧིཙྪཏྟཀཱདཱིསུ, པཱཎཱིནཾ ཨེཀབྷཝཔརིཡཱཔནྣེ སཀལཨཱཡུསྨིཾ གཧིཏཏརུཎཡུཝཱཛརཱཀཱལེསུ, ཨེཀདྭིཏྟིདིཝསཱཏིཀྐམེསུ པུཔྥཱདཱིསུ ཝཱཏི ཨཏྠོ. ཏཏྠ ཧི ཛརཱཝིསེསསྶ སུཝིཉྙེཡྻཏྟཱ སཝཱིཙིཛརཱ ནཱམ.

ཙཝནཀཝསེནཱཏི ཙཝནཀཱནཾ ཁནྡྷཱནཾ ཝསེན. ཨེཀཙཏུཔཉྩཀྑནྡྷཱཡ ཙུཏིཡཱ ཙཝནམེཝ ཙཝནཏཱཏི ཨཱཧ ‘‘བྷཱཝཝཙནེན ལཀྑཎནིདསྶན’’ནྟི, པཱལི༹ཡཾ ‘‘ཙུཏཱི’’ཏི ཝུཏྟསྶ མརཎསྶ སབྷཱཝདསྶནནྟི ¶ ཨཏྠོ. བྷངྒུཔྤཏྟི བྷིཛྫམཱནཏཱ. ཏེན ‘‘བྷེདོ’’ཏི ཨིམིནཱ ཁནྡྷཱནཾ བྷིཛྫམཱནཏཱ བྷེདསམངྒིཏཱ ཝུཏྟཱཏི དསྶེཏི. ཋཱནཱབྷཱཝཔརིདཱིཔནནྟི ཀེནཙིཔི ཨཱཀཱརེན ཨཝཊྛཱནཱབྷཱཝདཱིཔནཾ. གྷཊསྶེཝཱཏི ཧི ཝིསདིསཱུདཱཧརཎཾ. ཡཐཱ གྷཊེ བྷིནྣེ ཀཔཱལཱདིཨཝཡཝསེསོ ལབྦྷཏི, ན ཨེཝཾ ཙུཏིཀྑནྡྷེསུ བྷངྒེསུ, ན ཀོཙི ཝིསེསོ ཏིཊྛཏཱིཏི དསྶེཏུཾ ‘‘ཨནྟརདྷཱན’’ནྟི ཝུཏྟཾ. མཙྩུསངྑཱཏཾ མརཎནྟི མཙྩུསཉྙིཏཾ མརཎཾ. ‘‘ཀཱལམརཎ’’ནྟི ཝདནྟི. སནྟཱནསྶ ཨཙྩནྟསམུཙྪེདབྷཱུཏཾ ཁཱིཎཱསཝཱནཾ མརཎཾ སམུཙྪེདམརཎཾ. ཨཱདི-སདྡེན ཁཎིཀམརཎཾ སངྒཎྷཱཏི. ཏསྶ ཀིརིཡཱཏི ཨནྟཀསྶ ཀིརིཡཱ, ཡཱ ལོཀེ ཝུཙྩཏི ‘‘མཙྩཱུ’’ཏི, མརཎནྟི ཨཏྠོ. ཙཝནཀཱལོ ཨེཝ ཝཱ ཨནཏིཀྐམནཱིཡཏྟཱ ཝིསེསེན ཀཱལོཏི ཝུཏྟོཏི ཏསྶ ཀིརིཡཱ ཨཏྠཏོ ཙུཏིཀྑནྡྷཱནཾ བྷེདཔཝཏྟིཡེཝ. ‘‘མཙྩུ མརཎ’’ནྟི ཝཱ ཨེཏྠ སམཱསཾ ཨཀཏྭཱ ཡོ ‘‘མཙྩཱུ’’ཏི ཝུཙྩཏི བྷེདོ, ཏམེཝ མརཎཾ ‘‘པཱཎཙཱགོ’’ཏི ཨེཝམེཏྠ ཨཏྠོ དཊྛབྦོ.

ཙཏུཝོཀཱརཝསེནཱཏི ཙཏུཝོཀཱརབྷཝཝསེན. ཏཏྠ ཧི རཱུཔཀཱཡསཉྙིཏོ ཀལེ༹ཝརོ ནཏྠི, ཡཾ ནིཀྑིཔེཡྻ. ཀིཉྩཱཔི ཨེཀཝོཀཱརབྷཝེཔི ཀལེ༹ཝརནིཀྑེཔོ ནཏྠི, རཱུཔཀཱཡསྶ པན ཏཏྠ ཨཏྠིཏཱམཏྟཾ གཧེཏྭཱ ‘‘ཨེཀཝོཀཱརཝསེན ཀལེ༹ཝརསྶ ནིཀྑེཔོ’’ཏི ཝུཏྟོ. ཙཏུཝོཀཱརཝསེན ཙཱཏི ཙ-སདྡེན ‘‘སེསདྭཡཝསེན ཁནྡྷཱནཾ བྷེདོ’’ཏི ཨིམམཏྠཾ དསྶེཏི སབྦཏྠེཝ ཁནྡྷབྷེདསབྦྷཱཝཏོ. སེསདྭཡཝསེནཱཏི ¶ སེསབྷཝདྭཡཝསེནེཝ ཀལེ༹ཝརསྶ ནིཀྑེཔོ. ཡདིཔི ཨེཀཝོཀཱརབྷཝེ རཱུཔཀཱཡོ ཝིཛྫཏི, ཀལེ༹ཝརནིཀྑེཔོ པན ནཏྠཱིཏི ‘‘ཀལེ༹ཝརསྶ སབྦྷཱཝཏོ’’ཨིཙྩེཝ ཝུཏྟཾ. ཡསྨཱ མནུསྶཱདཱིསུ ཀལེ༹ཝརནིཀྑེཔོ ཨཏྠི, ཏསྨཱ མནུསྶཱདཱིསུ ཀལེ༹ཝརསྶ ནིཀྑེཔོཏི ཡོཛནཱ. ཀལེ༹ཝརཾ ནིཀྑིཔཱིཡཏི ཨེཏེནཱཏི མརཎཾ ཀལེ༹ཝརསྶ ནིཀྑེཔོ. ཨེཀཏོ ཀཏྭཱཏི ཨེཀཛ྄ཛྷཾ ཀཏྭཱ, ཨེཀཛ྄ཛྷཾ གཧཎམཏྟེན.

ཛཱཡནཊྛེནཱཏིཨཱདི ཨཱཡཏནཝསེན ཡོནིཝསེན ཙ དྭཱིཧི པདེཧི སབྦསཏྟེ པརིཡཱདིཡིཏྭཱ པརིཡཱདིཡིཏྭཱ ཛཱཏིཾ དསྶེཏུཾ ཝུཏྟཾ. ཀེཙི པན ‘‘ཀཏྟུབྷཱཝཝསེན པདདྭཡཾ ཝུཏྟ’’ནྟི ཝདནྟི. ‘‘ཏེསཾ ཏེསཾ སཏྟཱནཾ ཛཱཏི སཉྫཱཏཱི’’ཏི པན ཀཏྟརི སཱམིནིདྡེསསྶ ཀཏཏྟཱ ཨུབྷཡཏྠཱཔི བྷཱཝནིདྡེསོ. སམྤུཎྞཱ ཛཱཏི སཉྫཱཏི. པཱཀཊཱ ནིབྦཏྟི ཨབྷིནིབྦཏྟི. ཏེསཾ ཏེསཾ སཏྟཱནཾ…པེ… ཨབྷིནིབྦཏྟཱིཏི སཏྟཝསེན པཝཏྟཏྟཱ ཝོཧཱརདེསནཱ.

ཏཏྲ ཏཏྲཱཏི ཨེཀཙཏུཝོཀཱརབྷཝེསུ དྭིནྣཾ སེསརཱུཔདྷཱཏུཡཾ པཊིསནྡྷིཀྑཎེ ཨུཔྤཛྫམཱནཱནཾ པཉྩནྣཾ, ཀཱམདྷཱཏུཡཾ ཝིཀལཱཝིཀལིནྡྲིཡཱནཾ ཝསེན སཏྟནྣཾ ནཝནྣཾ དསནྣཾ པུན དསནྣཾ ཨེཀཱདསནྣཉྩ ¶ ཨཱཡཏནཱནཾ ཝསེན སངྒཧོ ཝེདིཏབྦོ. སནྟཏིཡནྟི ཡེན ཀམྨུནཱ ཁནྡྷཱནཾ པཱཏུབྷཱཝོ, ཏེན ཨབྷིསངྑཏསནྟཏིཡཾ. ཏཉྩ ཁོ པཊིསནྡྷིཀྑཎཝསེན ཝེདིཏབྦཾ.

ཀམྨཾཡེཝ ཀམྨབྷཝོ ‘‘བྷཝཏི ཨེཏསྨཱ ཨུཔཔཏྟིབྷཝོ’’ཏི ཀཏྭཱ. ཀམྨེན ནིཡྻཱདིཏཨཏྟབྷཱཝུཔཔཏྟིཝསེན བྷཝཏཱིཏི བྷཝོ, ཏཐཱ ཏཐཱ ནིབྦཏྟཝིཔཱཀོ ཀཊཏྟཱརཱུཔཉྩ. ཨཊྛཀཐཱཡཾ པན ‘‘བྷཝཏཱིཏི ཀཏྭཱ བྷཝོ’’ཏི ཨུཔཔཏྟིབྷཝསྶ ཝཀྑམཱནཏྟཱ ‘‘ཀམྨཾ ཕལཝོཧཱརེན བྷཝོཏི ཝུཏྟ’’ནྟི ཀཐིཏཾ.

ཨུཔཱདིཡནྟི སཏྟཱ དལ༹ྷགྒཱཧཾ གཎྷནྟི ཨེཏེན ཀིལེསཀཱམེན. ན ཀེཝལཾ ཨིདྷ ཀརཎསཱདྷནམེཝ, ཨཐ ཁོ ཀཏྟུསཱདྷནམྤི ལབྦྷཏཱིཏི ཝུཏྟཾ ‘‘སཡཾ ཝཱ’’ཏི. ཏནྟི ཝཏྠུཀཱམཾ. ཀཱམོ ཙ སོ ཀཱམནཊྛེན, ཨུཔཱདཱནཉྩ བྷུསམཱདཱནཊྛེནཱཏི ཀཱམུཔཱདཱནཾ. ཨེཏནྟི ཀཱམུཔཱདཱནཔདཾ. པུན ཨེཏནྟི ཀཱམུཔཱདཱནསངྑཱཏཾ.

སསྶཏོ ¶ ཨཏྟཱཏི ཨིདཾ པུརིམདིཊྛིཾ ཨུཔཱདིཡམཱནཾ ཨུཏྟརདིཊྛིཾ དསྶེཏུཾ ཝུཏྟཾ. ཡཐཱ ཨེསཱ དིཊྛི དལ༹ྷཱིཀརཎཝསེན པུརིམཾ ཨུཏྟརཱ ཨུཔཱདིཡཏི, ཨེཝཾ ‘‘ནཏྠི དིནྣ’’ནྟིཨཱདིཀཱཔཱིཏི. ཨཏྟགྒཧཎཾ པན ‘‘ཨཏྟཝཱདུཔཱདཱན’’ནྟི ཨིདཾ ན དིཊྛུཔཱདཱནདསྶནནྟི དཊྛབྦཾ. ལོཀོ ཙཱཏི ཨཏྟགྒཧཎཝིནིམུཏྟགྒཧཎཾ དིཊྛུཔཱདཱནབྷཱུཏཾ ཨིདྷ པུརིམདིཊྛིཨུཏྟརདིཊྛིཝཙནེཧི ཝུཏྟནྟི དཊྛབྦཾ.

ཡེན མིཙྪཱབྷིནིཝེསེན གོསཱིལགོཝཏཱདིཾ སམཱདིཡཏི ཙེཝ ཨནུཏིཊྛཏི ཙ, སོ གོསཱིལགོཝཏཱདཱིནཱིཏི ཨདྷིཔྤེཏཱནི. ཏེནཱཧ ‘‘གོསཱིལ…པེ… སཡམེཝ ཨུཔཱདཱནཱནཱི’’ཏི. ཨབྷིནིཝེསཏོཏི ཨབྷིནིཝེསནཏོ.

ཨཏྟཝཱདུཔཱདཱནནྟི ‘‘ཨཏྟཱ’’ཏི ཝཱདསྶ པཉྙཱཔནསྶ གཧཎསྶ ཀཱརཎབྷཱུཏཱ དིཊྛཱིཏི ཨཏྠོ. ཨཏྟཝཱདམཏྟམེཝཱཏི ཨཏྟསྶ ཨབྷཱཝཱ ‘‘ཨཏྟཱ’’ཏི ཨིདཾ ཝཙནམཏྟམེཝ. ཨུཔཱདིཡནྟི དལ༹ྷཾ གཎྷནྟི.

ཙཀྑུདྭཱརཱདཱིསུ པཝཏྟཱཡཱཏི ཨིདཾ ཏཎྷཱཡ རཱུཔཏཎྷཱདིབྷཱཝསྶ ཀཱརཎཝཙནཾ ཚདྭཱརཱརམྨཎིཀདྷམྨཱནཾ པཊིནིཡཏཱརམྨཎཏྟཱ. ཛཝནཝཱིཐིཡཱ པཝཏྟཱཡཱཏི ཨིདཾ ཏསྶཱ པཝཏྟིཊྛཱནདསྶནཾ. སབྷཱཝེནེཝ ཨུཊྛཱཏུཾ ཨསཀྐོནྟསྶ ཝེལུ༹ ཝིཡ ནིསྶཡོ ཨཧུཏྭཱ ཨོལུམྦྷཀབྷཱཝེན བྷཱཝོ ཨུཔཱདཱནསྶ པཙྩཡབྷཱཝཏོ ཨཱརམྨཎམྤི ཏཾསདིསཾ ཝུཏྟཾ. རཱུཔེཏི ཝིསཡེ ¶ བྷུམྨཾ. སཱ ཏིཝིདྷཱ ཧོཏཱིཏི སམྦནྡྷོ. ཀཱམཏཎྷཱ ཀཱམསྶཱདབྷཱཝེན པཝཏྟིཡཱ. ཨེཝཾ ཨསྶཱདེནྟཱིཏི སསྶཏདིཊྛིཡཱ སཧཛཱཏནིསྶཡསམྤཡུཏྟཨཏྠིཨཝིགཏཱདིཔཙྩཡབྷཱུཏཱཡ སཾསཊྛཏྟཱ ནིཙྩདྷུཝསསྶཏཱབྷིནིཝེསམུཁེན ཨསྶཱདེནྟཱི. བྷཝསཧགཏཱ ཏཎྷཱ བྷཝཏཎྷཱ. བྷཝཏི ཏིཊྛཏི སབྦཀཱལནྟི ཧི བྷཝདིཊྛི བྷཝོ ཨུཏྟརཔདལོཔེན, བྷཝསྶཱདཝསེན པཝཏྟིཡཱ ཙ. ཨིམིནཱ ནཡེན ཝིབྷཝཏཎྷཱཏི ཨེཏྠ ཨཏྠོ ཝེདིཏབྦོ. ཝིབྷཝཏི ཨུཙྪིཛྫཏི ཝིནསྶཏཱིཏི ཨེཝཾ པཝཏྟཱ དིཊྛི ཝིབྷཝོ ཨུཏྟརཔདལོཔེན. ཨེཝཾ ཏཱནི ཨཊྛཱརསཱཏི ཡཱ ཚ ཀཱམཏཎྷཱ, ཚ བྷཝཏཎྷཱ, ཚ ཝིབྷཝཏཎྷཱ ཝུཏྟཱ, ཨེཏཱནི ཨཊྛཱརས ཏཎྷཱཝིཙརིཏཱནི ཏཎྷཱཔཙྩཡོ. ཨཛ྄ཛྷཏྟནྟི སཀསནྟཏིཡཾ. བཧིདྡྷཱཏི ཏཏོ བཧིདྡྷཱ. ཨཏཱིཏཱརམྨཎཱནི ཝཱ ཧོནྟུ ཨིཏརཱརམྨཎཱནི ཝཱ, སཡཾ པན ཨཏཱིཏཱནི ཚཏྟིཾས ཏཎྷཱཝིཙརིཏཱནི. སེསཔདདྭཡེཔི ཨེསེཝ ནཡོ. ‘‘ཨཊྛསཏཾ ཏཎྷཱཝིཙརིཏཱནཱི’’ཏིཨཱདིནཱ ¶ སམྦནྡྷོ. ཨིདཱནི ཨཔརེནཔི པཀཱརེན ཨཊྛསཏཾ ཏཎྷཱཝིཙརིཏཱནི དསྶེཏུཾ ‘‘ཨཛ྄ཛྷཏྟིཀསྶཱ’’ཏིཨཱདིམཱཧ. ཏཏྠ ཨཛ྄ཛྷཏྟིཀསྶཱཏི ཨཛ྄ཛྷཏྟིཀཁནྡྷཔཉྩཀཾ. ཨུཔཡོགཏྠེ ཧི ཨིདཾ སཱམིཝཙནཾ. ཨུཔཱདཱཡཱཏི གཧེཏྭཱ. ཨསྨཱིཏི ཧོཏཱིཏི ཡདེཏཾ ཨཛ྄ཛྷཏྟིཀཾ ཁནྡྷཔཉྩཀཾ ཨུཔཱདཱཡ ཏཎྷཱམཱནདིཊྛིཝསེན སམུདཱཡགྒཱཧཏོ ཨསྨཱིཏི གཱཧོ ཧོཏི, ཏསྨིཾ སཏཱིཏི ཨཏྠོ. ཨིདྷ པན རཱུཔཱདིཨཱརམྨཎཝསེན ཨཏྠོ ཝེདིཏབྦོ. ཨིཏྠམསྨཱིཏི ཧོཏཱིཏི ཁཏྟིཡཱདཱིསུ ‘‘ཨིདཾཔཀཱརོ ཨཧ’’ནྟི ཨེཝཾ ཏཎྷཱམཱནདིཊྛིཝསེན ཧོཏཱིཏི ཨཏྠོ. ཨིདཾ ཏཱཝ ཨནུཔནིདྷཱཡ གཧཎཾ.

ཨེཝམཱདཱིནཱིཏི ཨཱདི-སདྡེན ‘‘ཨེཝམསྨི, ཨཉྙཐཱསྨི, ཨཧཾ བྷཝིསྶཾ, ཨིཏྠཾ བྷཝིསྶཾ, ཨེཝཾ བྷཝིསྶཾ, ཨཉྙཐཱ བྷཝིསྶཾ, ཨསསྨི, སཏསྨི, ཨཧཾ སིཡཾ, ཨིཏྠཾ སིཡཾ, ཨེཝཾ སིཡཾ, ཨཉྙཐཱ སིཡཾ, ཨཔཱཧཾ སིཡཾ, ཨཔཱཧཾ ཨིཏྠཾ སིཡཾ, ཨཔཱཧཾ ཨེཝཾ སིཡཾ, ཨཔཱཧཾ ཨཉྙཐཱ སིཡ’’ནྟི ཨེཏེསཾ སངྒཧོ. ཨུཔནིདྷཱཡ གཧཎམྤི དུཝིདྷཾ སམཏོ ཨསམཏོ ཝཱཏི ཏཾ དསྶེཏུཾ ‘‘ཨེཝམསྨི, ཨཉྙཐཱསྨཱི’’ཏི ཙ ཝུཏྟཾ. ཏཏྠ ཨེཝམསྨཱིཏི ཨིདཾ སམཏོ ཨུཔནིདྷཱཡ གཧཎཾ, ཡཐཱ ཨཡཾ ཁཏྟིཡོ, ཨེཝཾ ཨཧམསྨཱིཏི ཨཏྠོ. ཨཉྙཐཱསྨཱིཏི ཨིདཾ པན ཨསམཏོ གཧཎཾ, ཡཐཱཡཾ ཁཏྟིཡོ ཏཏོ ཨཉྙཐཱ ཨཧཾ ཧཱིནོ ཝཱ ཨདྷིཀོ ཝཱཏི ཨཏྠོ. ཨིམཱནི ཏཱཝ པཙྩུཔྤནྣཝསེན ཙཏྟཱརི ཏཎྷཱཝིཙརིཏཱནི. བྷཝིསྶནྟིཨཱདཱིནི པན ཙཏྟཱརི ཨནཱགཏཝསེན ཝུཏྟཱནི, ཏེསཾ པུརིམཙཏུཀྐེ ཝུཏྟནཡེནེཝ ཨཏྠོ ཝེདིཏབྦོ. ཨསསྨཱིཏི སསྶཏོ ཨསྨི, ནིཙྩསྶེཏཾ ཨདྷིཝཙནཾ. སཏསྨཱིཏི ཨསསྶཏོ ཨསྨི, ཨནིཙྩསྶེཏཾ ཨདྷིཝཙནཾ. ཨིཏི ཨིམཱནི དྭེ སསྶཏུཙྪེདཝསེན ཝུཏྟཱནི. ཨིཏོ པརཱནི སིཡནྟིཨཱདཱིནི ཙཏྟཱརི སཾསཡཔརིཝིཏཀྐཝསེན ཝུཏྟཱནི, ཏཱནི པུརིམཙཏུཀྐེ ཝུཏྟནཡེན ཨཏྠཏོ ཝེདིཏབྦཱནི. ཨཔཱཧཾ སིཡནྟིཨཱདཱིནི པན ཙཏྟཱརི ¶ ‘‘ཨཔི ནཱམཱཧཾ བྷཝེཡྻ’’ནྟི ཨེཝཾ པཏྠནཱཀཔྤནཝསེན ཝུཏྟཱནི, ཏཱནིཔི པུརིམཙཏུཀྐེ ཝུཏྟནཡེནེཝ ཝེདིཏབྦཱནི. ཨེཝམེཏེསུ –

དྭེ དིཊྛིསཱིསཱ ཙཏྟཱརོ, སུདྡྷསཱིསཱ སཱིསམཱུལཀཱ;

ཏཡོ ཏཡོཏི ཨེཏཱནི, ཨཊྛཱརས ཝིབྷཱཝཡེ.

ཨེཏེ ཧི སསྶཏུཙྪེདཝསེན ཝུཏྟཱ དྭེ དིཊྛིསཱིསཱ ནཱམ, ‘‘ཨསྨི, བྷཝིསྶཾ སིཡཾ, ཨཔཱཧཾ སིཡ’’ནྟི ཨེཏེ ཙཏྟཱརོ སུདྡྷསཱིསཱ ནཱམ, ‘‘ཨིཏྠམསྨཱི’’ཏིཨཱདཡོ ¶ ཏཡོ ཏཡོཏི དྭཱདས སཱིསམཱུལཀཱ ནཱམཱཏི ཝེདིཏབྦཾ. ཨིདྷ པཱལི༹ཡཾ རཱུཔཱརམྨཎཱདིཝསེན ཏཎྷཱ ཨཱགཏཱཏི ཨཱཧ ‘‘ཨཛ྄ཛྷཏྟིཀརཱུཔཱདིནིསྶིཏཱནཱི’’ཏི. ཨཊྛཱརས ཏཎྷཱཝིཙརིཏཱནཱིཏི ཨཱནེཏྭཱ སམྦནྡྷོ. ཨིམིནཱ ཨསྨཱིཏི ཨིམིནཱ ཨབྷིསེཀསེནཱཔཙྩཱདིནཱ ‘‘ཁཏྟིཡོ ཨཧ’’ནྟི མཱུལབྷཱཝཏོ ‘‘ཨསྨཱི’’ཏི ཧོཏི. སེསཾ པུབྦེ ཝུཏྟནཡེནེཝ ཝེདིཏབྦཾ. སངྒཧེཏི ཏཎྷཱཡ ཡཐཱཝུཏྟཝིབྷཱགསྶ སཾཁིཔནཝསེན སངྒཎྷནེ ཀརིཡམཱནེ. ‘‘ཚཡིམེ, བྷིཀྑཝེ, ཏཎྷཱཀཱཡཱ’’ཏིཨཱདི ནིདྡེསོ. ‘‘རཱུཔེ ཏཎྷཱ རཱུཔཏཎྷཱ’’ཏིཨཱདི ནིདྡེསཏྠོ. ‘‘ཀཱམརཱགབྷཱཝེནཱ’’ཏིཨཱདིཀོ, ‘‘ཨཛ྄ཛྷཏྟིཀསྶུཔཱདཱཡཱ’’ཏིཨཱདིཀོ ཙ ནིདྡེསཝིཏྠཱརོ. ‘‘རཱུཔཱདཱིསུ ཨཱརམྨཎེསུ ཚལེ༹ཝཱ’’ཏིཨཱདིཀོ སངྒཧོ.

ཡསྨཱ ཙཀྑུདྭཱརཱདཱིསུ ཨེཀེཀསྨིཾ དྭཱརེ ཨུཔྤཛྫནཀཝིཉྙཱཎཱནི ཝིཡ ཨནེཀཱ ཨེཝ ཝེདནཱ, ཏསྨཱ ཏཱ རཱསིཝསེན ཨེཀཛ྄ཛྷཾ གཧེཏྭཱ ‘‘ཚ ཝེདནཱཀཱཡཱ’’ཏི ཝུཏྟནྟི ཨཱཧ ‘‘ཝེདནཱསམཱུཧཱ’’ཏི. ནིསྶཡབྷཱཝེན ཨུཔྤཏྟིདྭཱརབྷཱཝེན ནཱནཱཔཙྩཡཱ ཧོནྟི ཙཀྑུདྷཱཏུཨཱདཡོ, ཏཱ ཀུཙྪིནཱ དྷཱརེནྟིཡོ ཝིཡ པོསེནྟིཡོ ཝིཡ ཙ ཧོནྟཱིཏི ཏཱསཾ མཱཏུསདིསཏཱ ཝུཏྟཱ. ཙཀྑུསམྥསྶཧེཏཱུཏི ནིསྶཡཱདིཙཀྑུསམྥསྶཔཙྩཡཱ. ཨཡནྟི ཨཡཾ ཝེདནཱ ‘‘ཙཀྑུསམྥསྶཛཱ ཝེདནཱ’’ཏིཨཱདིནཱ སཱདྷཱརཎཏོ ཝུཏྟཱ. ཨེཏྠཱཏི ཨེཏསྨིཾ ཝེདནཱཔདེ. སབྦསངྒཱཧིཀཱཏི ཀུསལཱཀུསལཝིཔཱཀཀིརིཡཱནཾ ཝསེན སབྦསངྒཱཧིཀཱ. ཨེཝཾ ཝིབྷངྒེ ཨཱགཏནཡེན སཱདྷཱརཎཏོ ཝཏྭཱཔི ཨིདྷཱདྷིཔྤེཏཝེདནམེཝ དསྶེཏུཾ ‘‘ཝིཔཱཀཝསེན པནཱ’’ཏིཨཱདིམཱཧ. ཙཀྑུམྷི སམྥསྶོཏི ཙཀྑུམྷི ནིསྶཡབྷཱུཏེ ཨུཔྤནྣཕསྶོ. ཨེས ནཡོ སེསེསུ. ཡསྨཱ ཙཀྑཱདཱིནི ཝིསུདྡྷིམགྒེ ཁནྡྷནིདྡེསེ ལཀྑཎཱདིཝིབྷཱགཏོ, ཨཱཡཏནནིདྡེསེ ཝིསེསཏོ, སཱམཉྙཏོ ཙ སདྡཏྠདསྶནཱདིཝསེན ཝིབྷཱཝིཏཱནི, ཏསྨཱ ‘‘ཡཾ ཝཏྟབྦཾ…པེ… ཝུཏྟམེཝཱ’’ཏི ཨཱཧ.

ནམནལཀྑཎནྟི ཨཱརམྨཎཱབྷིམུཁཾ ཧུཏྭཱ ནམནསབྷཱཝཾ ཏེན ཝིནཱ ཨཔྤཝཏྟནཏོ. རུཔྤནལཀྑཎཾ ཧེཊྛཱ ཝུཏྟམེཝ. ཝེདནཱཀྑནྡྷོ པན ཨེཀཱཝ ཝེདནཱ. སབྦདུབྦལཙིཏྟཱནི ནཱམ པཉྩཝིཉྙཱཎཱནི ¶ . ནནུ ཏཏྠ ཛཱིཝིཏཙིཏྟཊྛིཏིཡོ ¶ ཙ སནྟཱིཏི? སཙྩཾ, ཏཱསཾ པན ཀིཙྩཾ ན ཏཐཱ པཱཀཊཾ, ཡཐཱ ཙེཏནཱདཱིནནྟི ཏེ ཨེཝེཏྠ པཱལི༹ཡཾ ཨུདྡྷཊཱ. ཡེན མཧནྟཔཱཏུབྷཱཝཱདིནཱ ཀཱརཎེན. ཨེཏྠཱཏི ཨེཏསྨིཾ མཧཱབྷཱུཏནིདྡེསེ. ཨཉྙོ ཝིནིཙྪཡནཡོཏི ‘‘ཝཙནཏྠཏོ ཀལཱཔཏོ’’ཏིཨཱདིནཱ ལཀྑཎཱདིནིཙྪཡཏོ ཨཉྙོ ཝིནིཙྪཡནཡོ. ནནུ སོ ཙཏུདྷཱཏུཝཝཏྠཱནེ ཝུཏྟོ, ན རཱུཔཀྑནྡྷནིདྡེསེཏི? ཏཏྠ ཝུཏྟེཔི ‘‘ཙཏུདྷཱཏུཝཝཏྠཱནེ ཝུཏྟཱནཱི’’ཏི ཨཏིདེསཝསེན ཝུཏྟཏྟཱ ‘‘རཱུཔཀྑནྡྷནིདྡེསེ ཝུཏྟོ’’ཏི ཝུཏྟཾ. ཨུཔཱདཱཡཱཏི པཊིཙྩ. བྷཱུཏཱནི ཧི པཊིཙྩ ཨུཔྤཛྫམཱནཾ ཨུཔཱདཱརཱུཔཾ ‘‘ཏཱནི གཧེཏྭཱ’’ཏི ཝུཏྟཾ ཨཝིསྶཛྫནཏོ. ནིསྶཱཡཱཏིཔི ཨེཀེ ཏེསཾ ནིསྶཡཔཙྩཡབྷཱཝཏོ. པུབྦཀཱལཀིརིཡཱ ནཱམ ཨེཀཾསཏོ ཨཔརཀཱལཀིརིཡཱཔེཀྑཱཏི པཱཋསེསེན ཨཏྠཾ ཝདཏི. ཝིབྷཏྟིཝིཔལླཱསེན ཝིནཱ ཨེཝ ཨཏྠཾ དསྶེཏུཾ ‘‘སམཱུཧཏྠེ ཝཱ’’ཏིཨཱདི ཝུཏྟཾ. སམཱུཧསམྦནྡྷེ སཱམིནིདྡེསེན སམཱུཧཏྠོ དཱིཔིཏོཏི ཏཾ དསྶེནྟོ ཨཱཧ ‘‘སམཱུཧཾ ཨུཔཱདཱཡཱ’’ཏི. དྷམྨསངྒཎིཡཾ (དྷ. ས. ༥༨༤) ཨཱགཏནཡེན ‘‘ཏེཝཱིསཏིཝིདྷ’’ནྟི ཝུཏྟཾ. ཏཏྠ ཧི ཧདཡཝཏྠུ ན ནིདྡིཊྛཾ, ‘‘ཡཾ རཱུཔཾ ནིསྶཱཡཱ’’ཏི ཝཱ པཊྛཱནེ (པཊྛཱན. ༡.༡.༨) ཨཱགཏཏྟཱ ཧདཡཝཏྠུམྤི གཧེཏྭཱ ཛཱཏིརཱུཔབྷཱཝེན ཨུཔཙཡསནྟཏིཡོ ཨེཀཏོ ཀཏྭཱ ‘‘ཏེཝཱིསཏིཝིདྷ’’ནྟི ཝུཏྟཾ.

ཙཀྑུསྶ ཝིཉྙཱཎནྟི ཝཱ ཙཀྑུཝིཉྙཱཎཾ. ཨསཱདྷཱརཎཀཱརཎེན ཙཱཡཾ ནིདྡེསོ. ‘‘སངྑཱརཔཙྩཡཱ ཝིཉྙཱཎ’’ནྟི ཨེཏྠ སབྦལོཀིཡཝིཔཱཀཝིཉྙཱཎསྶ གཧེཏབྦཏྟཱ ‘‘ཏེབྷཱུམཀཝིཔཱཀཙིཏྟསྶེཏཾ ཨདྷིཝཙན’’ནྟི ཝུཏྟཾ.

ཨབྷིསངྑརཎལཀྑཎོཏི ཨཱཡཱུཧནསབྷཱཝོ. ཙོཔནཝསེནཱཏི ཝིཉྙཏྟིསཾཙོཔནཝསེན, ཀཱཡཝིཉྙཏྟིཡཱ སམུཊྛཱཔནཝསེནཱཏི ཨཏྠོ. ཝཙནབྷེདཝསེནཱཏི ཝཙཱིབྷེདུཔྤཱདཝསེན, ཝཙཱིཝིཉྙཏྟིཡཱ སམུཊྛཱཔནཝསེནཱཏི ཨཏྠོ. ཨེཝཾ ཙོཔནཾ ན བྷཝེཡྻཱཏི དསྶེཏུཾ ‘‘རཧོ ནིསཱིདིཏྭཱ ཙིནྟེནྟསྶཱ’’ཏི ཝུཏྟཾ. ཨེཀཱུནཏིཾསཱཏི ཨེཏྠ ཨབྷིཉྙཱཙེཏནཱཝིནིམུཏྟཱ ཨེཝ ཨེཀཱུནཏིཾས ཙེཏནཱ ཝེདིཏབྦཱ ཏསྶཱ ཝིཔཱཀཝིཉྙཱཎསྶ པཙྩཡཏྟཱབྷཱཝཏོ.

དུཀྑེཏི ཨེཀམྤི ཨིདཾ བྷུམྨཝཙནཾ སཾསིལེསནནིསྶཡཝིསཡབྱཱཔནཝསེན ཨཏྟཱནཾ བྷིནྡིཏྭཱ ཝིནིཡོགཾ གཙྪཏཱིཏི ‘‘ཙཏཱུཧི ཀཱརཎེཧཱི’’ཏིཨཱདི ཝུཏྟཾ. ཨེཀོཔི ¶ ཧི ཝིབྷཏྟིནིདྡེསོ ཨནེཀདྷཱ ཝིནིཡོགཾ གཙྪཏི ཡཐཱ ཏདྡྷིཏཏྠེ ཨུཏྟརཔདསམཱཧཱརེཏི. ཏནྟི ཨཉྙཱཎཾ. དུཀྑསཙྩནྟི ཧདཡཝཏྠུལཀྑཎཾ དུཀྑསཙྩཾ. ཨསྶཱཏི ཨཉྙཱཎསྶ. ནིསྶཡཔཙྩཡབྷཱཝེནཱཏི པུརེཛཱཏནིསྶཡབྷཱཝེན. སཧཛཱཏནིསྶཡཔཙྩཡབྷཱཝེན པན ཏཾསཧཛཱཏཱ ཕསྶཱདཡོ ཝཏྟབྦཱ. ཨཱརམྨཎཔཙྩཡབྷཱཝེན དུཀྑསཙྩཾ ཨསྶ ཨཱརམྨཎནྟི ཡོཛནཱ. དུཀྑསཙྩནྟི ཨུཔཡོགཨེཀཝཙནཾ ¶ . ཨེཏནྟི ཨཉྙཱཎཾ. ཏསྶཱཏི དུཀྑསཙྩསྶ. ‘‘པཊིཙྪཱདེཏཱི’’ཏི ཨེཏྠ ཝུཏྟཾ པཊིཙྪཱདནཱཀཱརཾ དསྶེཏུཾ ‘‘ཡཱཐཱཝཱ’’ཏིཨཱདི ཝུཏྟཾ. ཉཱཎཝིཔྤཡུཏྟཙིཏྟེནཔི ཨེཀདེསེན ཡཱཐཱཝཏོ ལཀྑཎཔཊིཝེདྷོ ཧོཏིཡེཝཱཏི ‘‘ཡཱཐཱཝལཀྑཎཔཊིཝེདྷནིཝཱརཎེནཱ’’ཏི ཝཏྭཱ ‘‘ཉཱཎཔཝཏྟིཡཱ ཙེཏྠ ཨཔྤདཱནེནཱ’’ཏི ཝུཏྟནྟི ཝདནྟི. པུརིམཾ པན པཊིཝེདྷཉཱཎུཔྤཏྟིཡཱ ནིསེདྷཀཐཱདསྶནཾ, པཙྪིམཾ ཨནུབོདྷཉཱཎུཔྤཏྟིཡཱ. ཨེཝམེཏྠ ཨཏྠོ ཝེདིཏབྦོ. ཨེཏྠཱཏི དུཀྑསཙྩེ.

སཧཛཱཏསྶ ཨཉྙཱཎསྶ སམུདཡསཙྩཾ ཝཏྠུ ཧོཏི ནིསྶཡཔཙྩཡབྷཱཝཏོཏི ཝུཏྟཾ ‘‘ཝཏྠུཏོ’’ཏི. ཨཱརམྨཎཏོཏི ཨཱརམྨཎཔཙྩཡབྷཱཝེན. ཡསྨཱ སམུདཡསཙྩཾ ཨཉྙཱཎསྶ ཨཱརམྨཎཾ ཧོཏི, ཏསྨཱ ‘‘དུཀྑསམུདཡེ ཨཉྙཱཎ’’ནྟི ཝུཏྟནྟི ཨཏྠོ. པཊིཙྪཱདནཾ དུཀྑསཙྩེ ཝུཏྟནཡམེཝ ཨེཀེནེཝ ཀཱརཎེན ཨིཏརེསཾ ཏིཎྞཾ ཨསམྦྷཝཏོ, ཀིཾ པན ཨེཏཾ ཨེཀཾ ཀཱརཎནྟི ཨཱཧ ‘‘པཊིཙྪཱདནཏོ’’ཏི. ཨིདཾ ཝིཏྠཱརཏོ ཝིབྷཱཝེཏུཾ ‘‘ནིརོདྷཔཊིཔདཱནཾ ཧཱི’’ཏིཨཱདི ཝུཏྟཾ. ཏདཱརབྦྷཱཏི ཏཾ ཨཱརབྦྷ ཏཾ ཨཱརམྨཎཾ ཀཏྭཱ. པཙྪིམཉྷི སཙྩདྭཡནྟི ནིརོདྷོ མགྒོ. ཏཉྷི ནཡགམྦྷཱིརཏྟཱ. དུདྡསནྟི སཎྷསུཁུམདྷམྨཏྟཱ སབྷཱཝེནེཝ གམྦྷཱིརཏཱཡ དུདྡསཾ དུཝིཉྙེཡྻཾ དུརཝགྒཱཧཾ. ཏཏྠཱཏི པུརིམེ སཙྩདྭཡེ. ཨནྡྷབྷཱུཏནྟི ཨནྡྷཀཱརབྷཱུཏཾ. ན པཝཏྟཏི ཨཱརམྨཎཾ ཀཱཏུཾ ན ཝིསཧཏི. ཝཙནཱིཡཏྟེནཱཏི ཝཱཙཀབྷཱཝེན ཏཐཱ ཨུཔཊྛཱནཏོ. སབྷཱཝལཀྑཎསྶ དུདྡསཏྟཱཏི པཱིལ༹ནཱདིཨཱཡཱུཧནཱདིཝསེན ‘‘ཨིདཾ དུཀྑཾ, ཨཡཾ སམུདཡོ’’ཏི (མ. ནི. ༤༨༤; ༣.༡༠༤) ཡཱཐཱཝཏོ སབྷཱཝལཀྑཎསྶ དུདྡསཏྟཱ དུཝིཉྙེཡྻཏྟཱ པུརིམདྭཡཾ གམྦྷཱིརཾ. ཏཏྠཱཏི པུརིམསྨིཾ སཙྩདྭཡེ. ཝིཔལླཱསགྒཱཧཝསེན པཝཏྟཏཱིཏི སུབྷཱདིཝིཔརཱིཏགྒཱཧཱནཾ པཙྩཡབྷཱཝཝསེན ཨཉྙཱཎཾ པཝཏྟཏི.

ཨིདཱནི ¶ ‘‘དུཀྑེ ཨཉྙཱཎ’’ནྟིཨཱདཱིསུ པཀཱརནྟརེནཔི ཨཏྠཾ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ཏཏྠ དུཀྑེཏི ཨེཏྟཱཝཏཱཏི ‘‘ཨཉྙཱཎནྟི ཝུཙྩམཱནཱཡ ཨཝིཛྫཱཡ དུཀྑེ’’ཏི ཨེཏྟཀེན. སངྒཧཏོཏི སམོདྷཱནཏོ. ཀིཙྩཏོཏི ཨསམྤཊིཝེདྷཀིཙྩཏོ. ཨཉྙཱཎམིཝཱཏི ཝིསཡསབྷཱཝཾ ཡཱཐཱཝཏོ པཊིཝིཛ྄ཛྷིཏུཾ ཨཔྤདཱནཀིཙྩམིཝ. ‘‘དུཀྑེ’’ཏིཨཱདིནཱ ཏཏྠ ཨཝིཛྫཱ པཝཏྟཏི, ཝིསེསཏོ ནིདྡིཊྛཾ ཧོཏཱིཏི ཀཏྭཱ སབྦཏྠེཝ ཏཐཱ ཨཝིསིཊྛསབྷཱཝདསྶནཾ ཨིདནྟི དསྶེཏུཾ ‘‘ཨཝིསེསཏོ པནཱ’’ཏིཨཱདི ཝུཏྟཾ.

ཁཎིཀནིརོདྷསྶ ཨིདྷ ཨནདྷིཔྤེཏཏྟཱ ཨཡུཛྫམཱནཏྟཱ ཝིརཱགགྒཧཎཏོ ཙ ཨཝིཛྫཱདཱིནཾ པཊིཔཀྑཝསེན པཊིབཱཧནཾ ཨིདྷ ‘‘ནིརོདྷོ’’ཏི ཨདྷིཔྤེཏོ, སོ ཙ ནེསཾ སབྦསོ ཨནུཔྤཛྫནམེཝཱཏི ¶ ཨཱཧ ‘‘ནིརོདྷོ ཧོཏཱིཏི ཨནུཔྤཱདོ ཧོཏཱི’’ཏི. ‘‘ཨཝིཛྫཱ ནིརུཛ྄ཛྷཏི ཨེཏྠཱཏི ཨཝིཛྫཱནིརོདྷོ, སངྑཱརཱ ནིརུཛ྄ཛྷནྟི ཨེཏྠཱཏི སངྑཱརནིརོདྷོ’’ཏི ཨེཝཾ སབྦེཧི ཨེཏེཧི ནིརོདྷཔདེཧི ནིབྦཱནསྶ དེསིཏཏྟཱ དཊྛབྦཱ. ཏེནཱཧ ‘‘ནིབྦཱནཾ ཧཱི’’ཏིཨཱདི. ཝཊྚཝིཝཊྚནྟི ཝཊྚཉྩ ཝིཝཊྚཉྩ. ‘‘དྭཱདསཧཱི’’ཏི ཨིདཾ པཙྩེཀཾ ཡོཛེཏབྦཾ ‘‘ཨནུལོམཏོ དྭཱདསཧི པདེཧི ཝཊྚཾ, པཊིལོམཏོ དྭཱདསཧི ཝིཝཊྚཾ ཨིདྷ དསྶིཏ’’ནྟི.

ཝིབྷངྒསུཏྟཝཎྞནཱ ནིཊྛིཏཱ.

༣. པཊིཔདཱསུཏྟཝཎྞནཱ

༣. མིཙྪཱ པཊིཔཛྫཏི ཨེཏཱཡཱཏི མིཙྪཱཔཊིཔདཱ, ཝཊྚགཱམིམགྒོ དུཀྑཱཝཧཏྟཱ. ཏཾ མིཙྪཱཔཊིཔདཾ. ཏེནཱཧ ‘‘ཨནིཡྻཱནིཀཔཊིཔདཱ’’ཏི. སོ པུཉྙཱབྷིསངྑཱརོ ཀཐཾ མིཙྪཱཔཊིཔདཱ ཧོཏཱིཏི? སམྤཏྟིབྷཝེ སུཁཱཝཧོཝ ཧོཏཱིཏི ཨདྷིཔྤཱཡོ. ཝཊྚསཱིསཏྟཱཏི ཝཊྚཔཀྑིཡཱནཾ ཨུཏྟམངྒབྷཱཝཏོ. ཨནྟམསོཏི ཨུཀྐཾསཔརིཡནྟཾ སནྡྷཱཡ ཝདཏི ཨཝཀཾསཔརིཡནྟཏོ. ‘‘ཨིདཾ མེ པུཉྙཾ ནིབྦཱནཱདྷིགམཱཡ པཙྩཡོ ཧོཏཱུ’’ཏི ཨེཝཾ ནིབྦཱནཾ པཏྠེཏྭཱ པཝཏྟིཏཾ. པཎྞམུཊྛིདཱནམཏྟནྟི སཱཀཔཎྞམུཊྛིདཱནམཏྟཾ. ཨཔྤཏྭཱཏི ཨནྟོགདྷཧེཏུ ཨེས ནིདྡེསོ, ཨཔཱཔེཏྭཱཏི ཨཏྠོ. ཡདགྒེན ¶ ཝཱ པཊིཔཛྫནཏོ ཨརཧཏྟཾ པཏྟོཏི ཝུཙྩཏི, ཏདགྒེན ཏདཱཝཧཱ པཊིཔདཱཔི པཏྟཱཏི ཝུཙྩཏཱིཏི ‘‘ཨཔྤཏྭཱ’’ཏི ཝུཏྟཾ. ཨནུལོམཝསེནཱཏི ཨནུལོམཔཊིཙྩསམུཔྤཱདཝསེན. པཊིལོམཝསེནཱཏི ཨེཏྠཱཔི ཨེསེཝ ནཡོ. པཊིཔདཱ པུཙྪིཏཱཏི ཨེཏེན པཊིཔདཱ དེསེཏུཾ ཨཱརདྡྷཱཏི ཨཡམྤི ཨཏྠོ སངྒཧིཏོ ཡཐཱརདྡྷསྶ ཨཏྠསྶ ཀཐེཏུཀམྱཏཱཔུཙྪཱཡ ཨིདྷཱགཏཏྟཱ. ཨནུལོམཔཊིཙྩསམུཔྤཱདདེསནཱཡམྤེཏྠ བྱཏིརེཀམུཁེན ཨཝིཛྫཱདིནིརོདྷཱ པན ཝིཛྫཱཡ སཏི ཧོཏི སངྑཱརཱནཾ ཨསམྦྷཝོཏི ཝུཏྟཾ ‘‘ནིབྦཱནཾ བྷཱཛིཏ’’ནྟི. སརཱུཔེན པན ཏཱཡ ཝཊྚམེཝ པཀཱསིཏཾ. ཝཀྑཏི ཧི པརིཡོསཱནེ ‘‘ཝཊྚཝིཝཊྚམེཝ ཀཐིཏ’’ནྟི. ནིཡྻཱཏནེཏི ནིགམནེ. ཕལེནཱཏི པཏྟབྦཕལེན པཊིཔདཱཡ སམྤཱཔཀཧེཏུནོ དསྶིཏཏྟཱ. ཡཐཱ ཧི ཏིཝིདྷོ ཧེཏུ ཉཱཔཀོ, ནིབྦཏྟཀོ, སམྤཱཔཀོཏི, ཨེཝཾ ཏིཝིདྷཾ ཕལཾ ཉཱཔེཏབྦཾ, ནིབྦཏྟེཏབྦཾ, སམྤཱཔེཏབྦནྟི. ཏསྨཱ པཏྟབྦཕལེན ནིབྦཱནེན ཏཾསམྤཱཔཀཧེཏུབྷཱུཏཱཡ པཊིཔདཱཡ དསྶིཏཏྟཱཏི ཨཏྠོ. ཏེནཱཧ ‘‘ཕལེན ཧེཏྠཱ’’ཏིཨཱདི. ཨཡཾ ཝུཙྩཏཱིཏི ཨེཝཾ ནིབྦཱནཕལཱ ཨཡཾ ‘‘སམྨཱཔཊིཔདཱ’’ཏི ཝུཙྩཏི. ཨསེསཝིརཱགཱ ཨསེསནིརོདྷཱཏི སམུཙྪེདཔྤཧཱནཝསེན ཨཝིཛྫཱཡ ཨསེསཝིརཛྫནཏོ ཨསེསནིརུཛ྄ཛྷནཏོ ཙ. པདདྭཡེནཔི ཨནུཔྤཱདནིརོདྷམེཝ ཝདཏི. ཏཉྷི ནིབྦཱནཾ. དུཏིཡཝིཀཔྤེ ཨཡཾ ཨེཏྠ ཨདྷིཔྤཱཡོ – ཡེན མགྒེན ཀརཎབྷཱུཏེན ཨསེསནིརོདྷོ ཧོཏི, ཨཝིཛྫཱཡ ཨསེསནིརོདྷོ ཡཾ ཨཱགམྨ ཧོཏི, ཏཾ མགྒཾ དསྶེཏུནྟི. ཨེཝཉྷི སཏཱིཏི ཨེཝཾ པདབྷཱཛནསྶ ¶ ནིབྦཱནསྶ པདཏྠེ སཏི. སཱནུབྷཱཝཱ པཊིཔདཱ ཝིབྷཏྟཱ ཧོཏཱིཏི ཨཝིཛྫཱཡ ཨསེསནིརོདྷཧེཏུཔཊིཔདཱ ཏཏྠ སཱཏིསཡསཱམཏྠིཡསམཱཡོགཏོ སཱནུབྷཱཝཱ ཝིབྷཏྟཱ ཧོཏི. མིཙྪཱཔཊིཔདཱགཧཎེནེཏྠ ཝཊྚསྶཔི ཝིབྷཏྟཏྟཱ ཝུཏྟཾ ‘‘ཝཊྚཝིཝཊྚམེཝ ཀཐིཏ’’ནྟི.

པཊིཔདཱསུཏྟཝཎྞནཱ ནིཊྛིཏཱ.

༤. ཝིཔསྶཱིསུཏྟཝཎྞནཱ

༤. ཝིཔྥནྡནྟཱིཏི ནིམིསནཝསེན. ཨནིམིསེཧཱིཏི ཝིགཏནིམིསེཧི ཨུམྨཱིལནྟེཧེཝ. ཏེན ཝུཏྟཾ མཧཱཔདཱནེ. ཨེཏྠཱཏི ཨེཏསྨིཾ ‘‘ཝིཔསྶཱི’’ཏི པདེ, ཨེཏསྨིཾ ཝཱ ‘‘ཨནིམིསེཧཱི’’ཏིཨཱདིཀེ ཡཐཱགཏེ སུཏྟནྟེ.

མཧཱཔུརིསསྶ ¶ ཨནིམིསལོཙནཏོ ‘‘ཝིཔསྶཱི’’ཏི སམཉྙཱཔཊིལཱབྷསྶ ཀཱརཎཾ ཝུཏྟཾ, ཏཾ ཨཀཱརཎཾ ཨཉྙེསམྤི མཧཱསཏྟཱནཾ ཙརིམབྷཝེ ཨནིམིསལོཙནཏྟཱཏི ཙོདནཾ སནྡྷཱཡ ‘‘ཨེཏྠ ཙཱ’’ཏིཨཱདིཾ ཝཏྭཱ ཏཏོ པན ཨཉྙམེཝ ཀཱརཎཾ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. པལཱལ༹ཡམཱནསྶཱཏི ཏོསེནྟསྶ. ཨནཱདརེ ཙེཏཾ སཱམིཝཙནཾ. ཨཊྚསྶཱཏི ཨཏྠསྶ.

པུཉྙུསྶཡསངྑཱཏོ བྷགོ ཨསྶ ཨཏིསཡེན ཨཏྠཱིཏི བྷགཝཱཏི ‘‘བྷཱགྱསམྤནྣསྶཱ’’ཏི ཝུཏྟཾ. སམྨཱཏི སམྨདེཝ ཡཱཐཱཝཏོ, ཉཱཡེན ཀཱརཎེནཱཏི ཝུཏྟཾ ཧོཏཱིཏི ཨཱཧ ‘‘ནཡེན ཧེཏུནཱ’’ཏི. སཾ-སདྡོ ‘‘སཱམ’’ནྟི ཨིམིནཱ སམཱནཏྠོཏི ཨཱཧ ‘‘སཱམཾ པཙྩཏྟཔུརིསཀཱརེནཱ’’ཏི, སཡམྦྷུཉཱཎེནཱཏི ཨཏྠོ. སམྨཱ, སཱམཾ བུཛ྄ཛྷི ཨེཏེནཱཏི སམྦོདྷོ ཝུཙྩཏི མགྒཉཱཎཾ, ‘‘བུཛ྄ཛྷཏི ཨེཏེནཱ’’ཏི ཀཏྭཱ ཨིདྷ སབྦཉྙུཏཉྙཱཎསྶཔི སངྒཧོ. བོདྷིམཱ སཏྟོ བོདྷིསཏྟོ, པུརིམཔདེ ཨུཏྟརཔདལོཔོ ཡཐཱ ‘‘སཱཀཔཏྠཝོ’’ཏི. བུཛ྄ཛྷནཀསཏྟོཏི ཨེཏྠ མཧཱབོདྷིཡཱནཔཊིཔདཱཡ བུཛ྄ཛྷཏཱིཏི བོདྷི ཙ སོ སཏྟཝིསེསཡོགཏོ སཏྟོ ཙཱཏི བོདྷིསཏྟོ. པཏྠཡམཱནོ པཝཏྟཏཱིཏི ‘‘ཀུདཱསྶུ ནཱམ མཧནྟཾ བོདྷིཾ པཱཔུཎིསྶཱམཱི’’ཏི སཉྫཱཏཙྪནྡོ པཊིཔཛྫཏི. དུཀྑནྟི ཛཱཏིཨཱདིམཱུལཀཾ དུཀྑཾ. ཀཱམཾ ཙུཏུཔཔཱཏཱཔི མརཎཛཱཏིཡོ, ‘‘ཛཱཡཏི མཱིཡཏཱི’’ཏི པན ཝཏྭཱ ‘‘ཙཝཏི ཨུཔཔཛྫཏཱི’’ཏི ཝཙནཾ ན ཨེཀབྷཝཔརིཡཱཔནྣཱནཾ ཏེསཾ གཧཎཾ, ཨཐ ཁོ ནཱནཱབྷཝཔརིཡཱཔནྣཱནཾ ཨེཀཛ྄ཛྷཾ གཧཎནྟི དསྶེནྟོ ཨཱཧ ‘‘ཨིདཾ…པེ… ཝུཏྟ’’ནྟི. ཏསྶ ནིསྶརཎནྟི ཏསྶ ཛརཱམརཎསྶ ནིསྶརཎནྟི ཝུཙྩཏི. ཡསྨཱ མཧཱསཏྟོ ཛིཎྞབྱཱདྷིམཏེ དིསྭཱ པབྦཛིཏོ, ཏསྨཱསྶ ཛརཱམརཎམེཝ ཨཱདིཏོ ཨུཔཊྛཱསི.

ཨུཔཱཡམནསིཀཱརེནཱཏི ¶ ཨུཔཱཡེན ཝིདྷིནཱ ཉཱཡེན མནསིཀཱརེན པཐེན མནསིཀཱརསྶ པཝཏྟནཏོ. སམཱཡོགོ ཨཧོསཱིཏི ཡཱཐཱཝཏོ པཊིཝིཛ྄ཛྷནཝསེན སམཱགམོ ཨཧོསི. ཡོནིསོ མནསིཀཱརཱཏི ཧེཏུམྷི ནིསྶཀྐཝཙནནྟི ཏསྶ ‘‘ཡོནིསོ མནསིཀཱརེནཱ’’ཏི ཧེཏུམྷི ཀརཎཝཙནེན ཨཱཧ. ཛཱཏིཡཱ ཁོ སཏི ཛརཱམརཎནྟི ‘‘ཀིམྷི ནུ ཁོ སཏི ཛརཱམརཎཾ ཧོཏི, ཀིཾ པཙྩཡཱ ཛརཱམརཎ’’ནྟི ཛརཱམརཎེ ཀཱརཎཾ པརིགྒཎྷནྟསྶ བོདྷིསཏྟསྶ ‘‘ཡསྨིཾ སཏི ཡཾ ཧོཏི, ཨསཏི ཙ ན ¶ ཧོཏི, ཏཾ ཏསྶ ཀཱརཎ’’ནྟི ཨེཝཾ ཨབྱབྷིཙཱརཛཱཏིཀཱརཎཔརིགྒཎྷནེན ‘‘ཛཱཏིཡཱ ཁོ སཏི ཛརཱམརཎཾ ཧོཏི, ཛཱཏིཔཙྩཡཱ ཛརཱམརཎ’’ནྟི ཡཱ ཛརཱམརཎསྶ ཀཱརཎཔརིགྒཱཧིཀཱ པཉྙཱ ཨུཔྤཛྫི, ཏཱཡ ཨུཔྤཛྫནྟིཡཱ ཙསྶ ཨབྷིསམཡོ པཊིཝེདྷོ ཨཧོསཱིཏི ཨཏྠོ.

ཨིཏཱིཏི ཝུཏྟཔྤཀཱརཔརཱམསནཾ. ཧཱིཏི ནིཔཱཏམཏྟཾ. ཨིདནྟི ཡཐཱཝུཏྟསྶ ཝཊྚསྶ པཙྩཀྑཏོ གཧཎཾ. ཏེནཱཧ ‘‘ཨེཝམིད’’ནྟི. ཨིདྷ ཨཝིཛྫཱཡ སམུདཡསྶ ཨཱགཏཏྟཱ ‘‘ཨེཀཱདསསུ ཋཱནེསཱུ’’ཏི ཝུཏྟཾ. སམུདཡཾ སམྤིཎྜེཏྭཱཏི སངྑཱརཱདཱིནཾ སམུདཡཾ ཨེཀཛ྄ཛྷཾ གཧེཏྭཱ. ཨནེཀཝཱརཉྷི སམུདཡདསྶནཝསེན ཉཱཎསྶ པཝཏྟཏྟཱ ‘‘སམུདཡོ སམུདཡོ’’ཏི ཨཱམེཌིཏཝཙནཾ. ཨཐ ཝཱ ‘‘ཨེཝཾ སམུདཡོ ཧོཏཱི’’ཏི ཨིདཾ ན ཀེཝལཾ ནིབྦཏྟིདསྶནཔརཾ, ཨཐ ཁོ པཊིཙྩསམུཔྤཱདསདྡོ ཝིཡ པཊིཙྩསམུཔྤཱདམུཁེན ཨིདྷ སམུདཡསདྡོ ནིབྦཏྟིམུཁེན པཙྩཡཏྟཾ ཝདཏི. ཝིཉྙཱཎཱདཡོ ཙ ཡཱཝནྟོ ཨིདྷ པཙྩཡདྷམྨཱ ནིདྡིཊྛཱ, ཏེ སཱམཉྙརཱུཔེན བྱཱཔནིཙྪཱཝསེན གཎྷནྟོ ‘‘སམུདཡོ སམུདཡོ’’ཏི ཨཝོཙ. ཏེནཱཧ ‘‘ཨཝིཛྫཱཔཙྩཡཱ སངྑཱརཱནཾ སམུདཡོ ཧོཏཱི’’ཏི. དསྶནཊྛེན ཙཀྑཱུཏི སམུདཡསྶ པཙྩཀྑཏོ དསྶནབྷཱཝོ ཙཀྑུ. ཉཱཏཊྛེནཱཏི ཉཱཏབྷཱཝེན. པཛཱནནཊྛེནཱཏི ‘‘ཨཝིཛྫཱསངྑཱརཱདིཏཾཏཾཔཙྩཡདྷམྨཔཝཏྟིཡཱ ཨེཏསྶ དུཀྑཀྑནྡྷསྶ སམུདཡོ’’ཏི པཀཱརཏོ ཝཱ ཛཱནནཊྛེན. པཊིཝེདྷནཊྛེནཱཏི ‘‘ཨཡཾ ཨཝིཛྫཱདི པཙྩཡདྷམྨོ ཨིམསྶ སངྑཱརཱདིཀསྶ པཙྩཡབྷཱཝཏོ སམུདཡོ’’ཏི པཊིཝིཛ྄ཛྷནཊྛེན. ཨོབྷཱསནཊྛེནཱཏི སམུདཡབྷཱཝཔཊིཙྪཱདཀསྶ མོཧནྡྷཀཱརསྶ ཀིལེསནྡྷཀཱརསྶ ཝིདྷམནཝསེན ཨཝབྷཱསནཝསེན. ཏཾ པནེཏཾ ‘‘ཙཀྑུ’’ནྟིཨཱདིནཱ ཝུཏྟཾ ཉཱཎཾ. ནིརོདྷཝཱརེཏི པཊིལོམཝཱརེ. སོ ཧི ‘‘ཀིསྶ ནིརོདྷཱ ཛརཱམརཎནིརོདྷོ’’ཏི ནིརོདྷཀིཏྟནཝསེན ཨཱགཏོ.

ཝིཔསྶཱིསུཏྟཝཎྞནཱ ནིཊྛིཏཱ.

༥-༡༠. སིཁཱིསུཏྟཱདིཝཎྞནཱ

༥-༡༠. ན ¶ ཨེཝཾ ཡོཛེཏྭཱཏི ‘‘སིཁིསྶཔཱི’’ཏིཨཱདིནཱ སམུཙྩཡཝསེན ཨེཝཾ ན ཡོཛེཏྭཱ. ཀསྨཱཏིཨཱདིནཱ ཏཏྠ ཀཱརཎཾ ཝདཏི. ཨེཀཱསནེ ཨདེསིཏཏྟཱཏི ¶ ཝུཏྟམེཝཏྠཾ པཱཀཊཾ ཀཱཏུཾ ‘‘ནཱནཱཋཱནེསུ ཧཱི’’ཏིཨཱདི ཝུཏྟཾ. ཡདིཔི ཏཱནི ཝིསུཾ ཝིསུཾ ཝུཏྟབྷཱཝེན དེསིཏཱནི, ཨཏྠཝཎྞནཱ པན ཨེཀསདིསཱ ཏདཏྠསྶ ཨབྷིནྣཏྟཱ. ‘‘བུདྡྷཱ ཛཱཏཱ’’ཏི ན ཨཉྙོ ཨཱཙིཀྑཏཱིཏི ཡོཛནཱ. ན ཧི མཧཱབོདྷིསཏྟཱནཾ པཙྪིམབྷཝེ པརོཔདེསེན པཡོཛནཾ ཨཏྠི. གཏམགྒེནེཝཱཏི པཊིཔཏྟིགམནེན གཏམགྒེནེཝ པཙྪིམམཧཱབོདྷིསཏྟཱ གཙྪནྟི, ཨཡམེཏྠ དྷམྨཏཱ. གཙྪནྟཱིཏི ཙཏཱུསུ སཏིཔཊྛཱནེསུ པཏིཊྛིཏཙིཏྟཱ སཏྟ བོཛ྄ཛྷངྒེ ཡཱཐཱཝཏོ བྷཱཝེཏྭཱ སམྨཱསམྦོདྷིཡཱ ཨབྷིསམྦུཛ྄ཛྷནཝསེན པཝཏྟནྟཱིཏི ཨཏྠོ. ཡཐཱ པན ཏེསཾ པཋམཝིཔསྶནཱབྷིནིཝེསོ ཧོཏི, ཏཾ དསྶེཏུཾ ‘‘སབྦབོདྷིསཏྟཱ ཧཱི’’ཏིཨཱདི ཝུཏྟཾ. བུདྡྷབྷཱཝཱནཾ ཝིཔསྶནཱ, བུདྡྷཏྠཱཡ ཝཱ ཝིཔསྶནཱ བུདྡྷཝིཔསྶནཱ.

སིཁཱིསུཏྟཱདིཝཎྞནཱ ནིཊྛིཏཱ.

བུདྡྷཝགྒཝཎྞནཱ ནིཊྛིཏཱ.

༢. ཨཱཧཱརཝགྒོ

༡. ཨཱཧཱརསུཏྟཝཎྞནཱ

༡༡. ཨཱཧརནྟཱིཏི ཨཱནེནྟི ཨུཔྤཱདེནྟི, ཨུཔཏྠམྦྷེནྟཱིཏི ཨཏྠོ. ནིབྦཏྟཱཏི པསུཏཱ. བྷཱུཏཱ ནཱམ ཡསྨཱ ཏཏོ པཊྛཱཡ ལོཀེ ཛཱཏཝོཧཱརོ པཊིསནྡྷིགྒཧཎཏོ པན པཊྛཱཡ ཡཱཝ མཱཏུཀུཙྪིཏོ ནིཀྑནྟོ, ཏཱཝ སམྦྷཝེསིནོ, ཨེས ཏཱཝ གབྦྷསེཡྻཀེསུ བྷཱུཏསམྦྷཝེསིཝིབྷཱགོ, ཨིཏརེསུ པན པཋམཙིཏྟཱདིཝསེན ཝུཏྟོ. སམྦྷཝ-སདྡོ ཙེཏྠ གབྦྷསེཡྻཀཱནཾ ཝསེན པསཱུཏིཔརིཡཱཡོ, ཨིཏརེསཾ ཝསེན ཨུཔྤཏྟིཔརིཡཱཡོ. པཋམཙིཏྟཔཋམཨིརིཡཱཔཐཀྑཎེསུ ཧི ཏེ སམྦྷཝཾ ཨུཔྤཏྟིཾ ཨེསནྟི ཨུཔགཙྪནྟི ནཱམ, ན ཏཱཝ བྷཱུཏཱ ཨུཔཔཏྟིཡཱ ན སུཔྤཏིཊྛིཏཏྟཱ, བྷཱུཏཱ ཨེཝ སབྦསོ བྷཝེསནཱཡ སམུཙྪིནྣཏྟཱ. ན པུན བྷཝིསྶནྟཱིཏི ཨཝདྷཱརཎེན ནིཝཏྟིཏམཏྠཾ དསྶེཏི. ཡོ ཙ ‘‘ཀཱལགྷསོ བྷཱུཏོ’’ཏིཨཱདཱིསུ བྷཱུཏ-སདྡསྶ ཁཱིཎཱསཝཝཱཙིཏཱ དཊྛབྦཱ. ཝཱ-སདྡོ ཙེཏྠ སམྤིཎྜནཏྠོ ‘‘ཨགྒིནཱ ཝཱ ཨུདཀེན ཝཱ’’ཏིཨཱདཱིསུ ཝིཡ.

ཡཐཱསཀཾ ¶ ¶ པཙྩཡབྷཱཝེན ཨཏྟབྷཱཝསྶ པཋཔནམེཝེཏྠ ཨཱཧཱརེཧི ཀཱཏབྦཨནུགྒཧོ ཧོཏཱིཏི ཨདྷིཔྤཱཡེནཱཧ ‘‘ཝཙནབྷེདོ…པེ… ཨེཀོ ཡེཝཱ’’ཏི. སཏྟསྶ ཨུཔྤནྣདྷམྨཱནནྟི སཏྟསྶ སནྟཱནེ ཨུཔྤནྣདྷམྨཱནཾ. ཡཐཱ ‘‘ཝསྶསཏཾ ཏིཊྛཏཱི’’ཏི ཝུཏྟེ ཨནུཔྤབནྡྷཝསེན པཝཏྟཏཱིཏི ཝུཏྟཾ ཧོཏི, ཨེཝཾ ཋིཏིཡཱཏི ཨནུཔྤབནྡྷཝསེན པཝཏྟིཡཱཏི ཨཏྠོ, སཱ པན ཨཝིཙྪེདོཏི ཨཱཧ ‘‘ཨཝིཙྪེདཱཡཱ’’ཏི. ཨནུཔྤབནྡྷདྷམྨུཔྤཏྟིཡཱ སཏྟསནྟཱནོ ཨནུགྒཧིཏོ ནཱམ ཧོཏཱིཏི ཨཱཧ ‘‘ཨནུཔྤནྣཱནཾ ཨུཔྤཱདཱཡཱ’’ཏི. ཨེཏཱནཱིཏི ཋིཏིཨནུགྒཧཔདཱནི. ཨུབྷཡཏྠ དཊྛབྦཱནི ན ཡཐཱསམྦནྡྷཏོ.

ཝཏྠུགཏཱ ཨོཛཱ ཝཏྠུ ཝིཡ ཏེན སདྡྷིཾ ཨཛ྄ཛྷོཧརིཏབྦཏཾ གཙྪཏཱིཏི ཝུཏྟཾ ‘‘ཨཛ྄ཛྷོཧརིཏབྦཀོ ཨཱཧཱརོ’’ཏི, ནིབྦཏྟིཏཨོཛཾ པན སནྡྷཱཡ ‘‘ཀབལཱི༹ཀཱརོ ཨཱཧཱརོ ཨོཛཊྛམཀརཱུཔཱནི ཨཱཧརཏཱི’’ཏི ཝཀྑཏི. ཨོལཱ༹རིཀཏཱ ཨཔྤོཛཏཱཡ ན ཝཏྠུནོ ཐཱུལཏཱཡ ཀཐིནཏཱཡ ཝཱ, ཏསྨཱ ཡསྨིཾ ཝཏྠུསྨིཾ པརིཏྟཱ ཨོཛཱ ཧོཏི, ཏཾ ཨོལཱ༹རིཀཾ. སཔྤཱདཡོ དུཀྑུཔྤཱདཀཏཱཡ ཨོལཱ༹རིཀཱ ཝེདིཏབྦཱ. ཝིསཱཎཱདཱིནཾ ཏིཝསྶཚཌྜིཏཱནཾ པཱུཏིབྷཱུཏཏྟཱ མུདུཀཏཱཏི ཝདནྟི. ཏརཙྪཁེལ༹ཏེམིཏཏཱཡ པན ཏཐཱབྷཱུཏཱནཾ ཏེསཾ མུདུཀཏཱ. དྷམྨསབྷཱཝོ ཧེས. སསཱནཾ ཨཱཧཱརོ སུཁུམོ ཏརུཎཏིཎསསྶཁཱདནཏོ. སཀུཎཱནཾ ཨཱཧཱརོ སུཁུམོ ཏིཎབཱིཛཱདིཁཱདནཏོ. པཙྩནྟཝཱསཱིནཾ ཨཱཧཱརོ སུཁུམོ མཱསམུགྒཀུརཱདིབྷོཛནཏྟཱ. ཏེསནྟི པརནིམྨིཏཝསཝཏྟཱིནཾ. སུཁུམོཏྭེཝཱཏི ན ཀིཉྩི ཨུཔཱདཱཡ, ཨཐ ཁོ སུཁུམོཨིཙྩེཝ ནིཊྛཾ པཏྟོ ཏཏོ པརམསུཁུམསྶ ཨབྷཱཝཏོ.

ཝཏྠུཝསེན པནེཏྠ ཨཱཧཱརསྶ ཨོལཱ༹རིཀསུཁུམཏཱ ཝུཏྟཱ, སཱ ཙསྶ ཨཔྤོཛམཧོཛཏཱཧི ཝེདིཏབྦཱཏི དསྶེཏུཾ ‘‘ཨེཏྠ ཙཱ’’ཏིཨཱདིམཱཧ. པརིསྶཡནྟི ཁུདཱཝསེན ཨུཔྤནྣཾ ཝིཧིཾསཾ སརཱིརདརཐཾ. ཝིནོདེཏཱིཏི ཝཏྠུ ཏསྶ ཝིནོདནམཏྟཾ ཀརོཏི. ན པན སཀྐོཏི པཱལེཏུནྟི སརཱིརཾ ཡཱཔེཏུཾ ནཔྤཧོཏི ནིརོཛཏྟཱ. ན སཀྐོཏི པརིསྶཡཾ ཝིནོདེཏུཾ ཨཱམཱསཡསྶ ཨཔཱུརཎཏོ.

ཚབྦིདྷོཔཱིཏི ཨིམིནཱ ཀསྶཙི ཕསྶསྶ ཨནཝསེསིཏབྦཏམཱཧ. དེསནཀྐམེནེཝེཏྠ ཕསྶཱདཱིནཾ དུཏིཡཱདིཏཱ, ན ཨཉྙེན ཀཱརཎེནཱཏི ཨཱཧ ‘‘དེསནཱནཡོ ཨེཝ ཙེསཱ’’ཏིཨཱདི. མནསོ སཉྩེཏནཱ ན ¶ སཏྟསྶཱཏི དསྶནཏྠཾ མནོགཧཎཾ ཡཐཱ ‘‘ཙིཏྟསྶ ཋིཏི, ཙེཏོཝིམུཏྟི ཙཱ’’ཏི ཨཱཧ ‘‘མནོསཉྩེཏནཱཏི ཙེཏནཱཝཱ’’ཏི. ཙིཏྟནྟི ཡཾ ཀིཉྩི ཙིཏྟམེཝ. ཨེཀརཱསིཾ ཀཏྭཱཏི ཨེཀཛ྄ཛྷཾ གཧེཏྭཱ ཝིབྷཱགཾ ཨཀཏྭཱ, སཱམཉྙེན གཧིཏཱཏི ཨཏྠོ. ཏཏྠ ལབྦྷམཱནཾ ཨུཔཱདིཎྞཀཱདིཝིབྷཱགཾ དསྶེཏུཾ ‘‘ཀབལཱི༹ཀཱརོ ཨཱཧཱརོ’’ཏིཨཱདི ཝུཏྟཾ. ཨཱཧཱརཏྠཾ ན སཱདྷེནྟཱིཏི ཏཱདིསསྶ ¶ ཨཱཧཱརསྶ ཨནཱཧརཎཏོ. ཏདཱཔཱིཏི བྷིཛྫིཏྭཱ ཝིགཏཀཱལེཔི. ཨུཔཱདིཎྞཀཱཧཱརོཏི ཝུཙྩནྟཱིཏི ཀེཙི. ཨིདཾ པན ཨཱཙརིཡཱནཾ ན རུཙྩཏི ཏདཱ ཨུཔཱདིཎྞཀརཱུཔསྶེཝ ཨབྷཱཝཏོ. པཊིསནྡྷིཙིཏྟེནེཝ སཧཛཱཏཱཏི ལཀྑཎཝཙནམེཏཾ, སབྦཱཡཔི ཀམྨཛརཱུཔཔརིཡཱཔནྣཱཡ ཨོཛཱཡ ཨཏྠིབྷཱཝསྶ ཨཝིཙྪེདཔྤཝཏྟིསམྦྷཝདསྶནཏྠོ. སཏྟམཱཏི ཨུཔྤནྣདིཝསཏོ པཊྛཱཡ ཡཱཝ སཏྟམདིཝསཱཔི. རཱུཔསནྟཏིཾ པཱལེཏི པཝེཎིགྷཊནཝསེན. ཨཡམེཝཱཏི ཀམྨཛཨོཛཱ. ཀམྨཛཨོཛཾ པན པཊིཙྩ ཨུཔྤནྣཨོཛཱ ཨཀམྨཛཏྟཱ ཨནུཔཱདིཎྞཨཱཧཱརོཏྭེཝ ཝེདིཏབྦོ. ཨནུཔཱདིཎྞཀཱ ཕསྶཱདཡོ ཝེདིཏབྦཱཏི ཨཱནེཏྭཱ སམྦནྡྷོ. ལོཀུཏྟརཱ ཕསྶཱདཡོ ཀཐནྟི ཨཱཧ ‘‘ལོཀུཏྟརཱ པན རུལ༹ྷཱིཝསེན ཀཐིཏཱ’’ཏི. ཡསྨཱ ཏེསཾ ཀུསལཱནཾ ཨུཔེཏཔརིཡཱཡོ ནཏྠི, ཏསྨཱ ཝིཔཱཀཱནཾ ཨུཔཱདིཎྞཔརིཡཱཡོ ནཏྠེཝཱཏི ཨནུཔཱདིཎྞཔརིཡཱཡོཔི རུལ༹ྷཱིཝསེན ཝུཏྟོཏི ཝེདིཏབྦོ.

པུབྦེ ‘‘ཨཱཧཱརཱཏི པཙྩཡཱ’’ཏི ཝུཏྟཏྟཱ ཡདི པཙྩཡཊྛོ ཨཱཧཱརཊྛོཏིཨཱདིནཱ ཙོདེཏི, ཨཐ ཀསྨཱ ཨིམེ ཨེཝ ཙཏྟཱརོ ཝུཏྟཱཏི ཨཐ ཀསྨཱ ཙཏྟཱརོཝ ཝུཏྟཱ. ཨིམེ ཨེཝ ཙ ཝུཏྟཱཏི ཡོཛནཱ. ཝིསེསཔྤཙྩཡཏྟཱཏི ཨེཏེན ཡཐཱ ཨཉྙེ པཙྩཡདྷམྨཱ ཨཏྟནོ པཙྩཡུཔྤནྣསྶ པཙྩཡཱཝ ཧོནྟི, ཨིམེ པན ཏཐཱ ཙ ཧོཏི ཨཉྙཐཱ ཙཱཏི སམཱནེཔི པཙྩཡཏྟེ ཨཏིརེཀཔཙྩཡཱ ཧོནྟི, ཏསྨཱ ‘‘ཨཱཧཱརཱཏི ཝུཏྟཱ’’ཏི ཨིམམཏྠཾ དསྶེཏི. ཨིདཱནི ཏཾ ཨཏིརེཀཔཙྩཡཏཾ དསྶེཏུཾ ‘‘ཝིསེསཔཙྩཡོ ཧཱི’’ཏིཨཱདི ཝུཏྟཾ. ཝིསེསཔྤཙྩཡོ རཱུཔཀཱཡསྶ ཀབལཱི༹ཀཱརོ ཨཱཧཱརོ ཨུཔཐམྦྷཀབྷཱཝཏོ. ཏེནཱཧ ཨཊྛཀཐཱཡཾ ‘‘རཱུཔཱརཱུཔཱནཾ ཨུཔཐམྦྷཀཏྟེན ཨུཔཀཱརཀཱ ཙཏྟཱརོ ཨཱཧཱརཱ ཨཱཧཱརཔཙྩཡོ’’ཏི (ཝིསུདྡྷི. ༢.༦༠༨; པཊྛཱ. ཨཊྛ. པཙྩཡུདྡེསཝཎྞནཱ). ཨུཔཐམྦྷཀཏྟཉྷི སཏཱིཔི ཛནཀཏྟེ ཨརཱུཔཱིནཾ ཨཱཧཱརཱནཾ ཨཱཧཱརཛརཱུཔསམུཊྛཱནཀརཱུཔཱཧཱརསྶ ¶ ཙ ཧོཏི, ཨསཏི པན ཨུཔཐམྦྷཀཏྟེ ཨཱཧཱརཱནཾ ཛནཀཏྟཾ ནཏྠཱིཏི ཨུཔཐམྦྷཀཏྟཾ པདྷཱནཾ. ཛནཡམཱནོཔི ཧི ཨཱཧཱརོ ཨཝིཙྪེདཝསེན ཨུཔཐམྦྷཡམཱནོ ཨེཝ ཛནེཏཱིཏི ཨུཔཐམྦྷཀབྷཱཝོ ཨེཝ ཨཱཧཱརབྷཱཝོ. ཝེདནཱཡ ཕསྶོ ཝིསེསཔཙྩཡོ. ‘‘ཕསྶཔཙྩཡཱ ཝེདནཱ’’ཏི ཧི ཝུཏྟཾ. ‘‘སངྑཱརཔཙྩཡཱ ཝིཉྙཱཎ’’ནྟི ཝཙནཏོ ཝིཉྙཱཎསྶ མནོསཉྩེཏནཱ. ‘‘ཙེཏནཱ ཏིཝིདྷཾ བྷཝཾ ཛནེཏཱི’’ཏི ཧི ཝུཏྟཾ. ‘‘ཝིཉྙཱཎཔཙྩཡཱ ནཱམརཱུཔ’’ནྟི པན ཝཙནཏོ ནཱམརཱུཔསྶ ཝིཉྙཱཎཾ ཝིསེསཔཙྩཡོ. ན ཧི ཨོཀྐནྟཝིཉྙཱཎཱབྷཱཝེ ནཱམརཱུཔསྶ ཨཏྠི སམྦྷཝོ. ཡཐཱཧ ‘‘ཝིཉྙཱཎཉྩ ཧི, ཨཱནནྡ, མཱཏུཀུཙྪིསྨིཾ ན ཨོཀྐམིསྶཐ, ཨཔི ནུ ཁོ ནཱམརཱུཔཾ མཱཏུཀུཙྪིསྨིཾ སམུཙྩིསྶཐཱ’’ཏིཨཱདི (དཱི. ནི. ༢.༡༡༥). ཝུཏྟམེཝཏྠཾ སུཏྟེན སཱདྷེཏུཾ ‘‘ཡཐཱཧཱ’’ཏིཨཱདི ཝུཏྟཾ.

ཨེཝཾ ཡདིཔི པཙྩཡཏྠོ ཨཱཧཱརཏྠོ, ཝིསེསཔཙྩཡཏྟཱ པན ཨིམེཝ ཨཱཧཱརཱཏི ཝུཏྟཱཏི ཏཾ ནེསཾ ¶ ཝིསེསཔཙྩཡཏཾ ཨཝིབྷཱགཏོ དསྶེཏྭཱ ཨིདཱནི ཝིབྷཱགཏོ དསྶེཏུཾ ‘‘ཀོ པནེཏྠཱ’’ཏིཨཱདི ཨཱརདྡྷཾ. མུཁེ ཋཔིཏམཏྟོ ཨེཝ ཨསངྑཱདིཏོ, ཏཏྟཀེནཱཔི ཨབྦྷནྟརསྶ ཨཱཧཱརསྶ པཙྩཡོ ཧོཏི ཨེཝ. ཏེནཱཧ ‘‘ཨཊྛ རཱུཔཱནི སམུཊྛཱཔེཏཱི’’ཏི. སུཁཝེདནཱཡ ཧིཏོ སུཁཝེདནཱིཡོ. སབྦཐཱཔཱིཏི ཙཀྑུསམྥསྶཱདིཝསེན. ཡཏྟཀཱ ཕསྶསྶ པཀཱརབྷེདཱ, ཏེསཾ ཝསེན སབྦཔྤཀཱརོཔི ཕསྶཱཧཱརོ ཡཐཱརཧཾ ཏིསྶོ ཝེདནཱ ཨཱཧརཏི, ཨནཱཧཱརཀོ ནཏྠི.

སབྦཐཱཔཱིཏི ཨིདྷཱཔི ཕསྶཱཧཱརེ ཝུཏྟནཡཱནུསཱརེན ཨཏྠོ ཝེདིཏབྦོ. ཏིསནྟཏིཝསེནཱཏི ཀཱཡདསཀཾ བྷཱཝདསཀཾ ཝཏྠུདསཀནྟི ཏིཝིདྷསནྟཏིཝསེན. སཧཛཱཏཱདིཔཙྩཡནཡེནཱཏི སཧཛཱཏཱདིཔཙྩཡཝིདྷིནཱ. པཊིསནྡྷིཝིཉྙཱཎཉྷི ཨཏྟནཱ སཧཛཱཏནཱམསྶ སཧཛཱཏཨཉྙམཉྙཝིཔཱཀིནྡྲིཡསམྤཡུཏྟཨཏྠིཨཝིགཏཔཙྩཡེཧི པཙྩཡོ ཧོནྟོཡེཝ ཨཱཧཱརཔཙྩཡཏཱཡ ཏཾ ཨཱཧཱརེཏི ཝུཏྟཾ, སཧཛཱཏརཱུཔེསུ པན ཝཏྠུནོ སམྤཡུཏྟཔཙྩཡཾ ཋཔེཏྭཱ ཝིཔྤཡུཏྟཔཙྩཡེན, སེསརཱུཔཱནཾ ཨཉྙམཉྙཔཙྩཡཉྩ ཋཔེཏྭཱ ཨིཏརེསཾ པཙྩཡཱནཾ ཝསེན ཡོཛནཱ ཀཱཏབྦཱ. ཏཱནཱིཏི ནཔུཾསཀནིདྡེསོ ཨནཔུཾསཀཱནམྤི ནཔུཾསཀེཧི སཧ ཝཙནཏོ. སཱསཝཀུསལཱཀུསལཙེཏནཱཝ ཝུཏྟཱ ཝིསེསཔཙྩཡབྷཱཝདསྶནཾ ཧེཏནྟི, ཏེནཱཧ ‘‘ཨཝིསེསེན པནཱ’’ཏིཨཱདི. པཊིསནྡྷིཝིཉྙཱཎམེཝ ཝུཏྟནྟི ཨེཏྠཱཔི ¶ ཨེསེཝ ནཡོ. ཡཐཱ ཏསྶ ཏསྶ ཕལསྶ ཝིསེསཏོ པཙྩཡཏཱཡ ཨེཏེསཾ ཨཱཧཱརཏྠོ, ཨེཝཾ ཨཝིསེསཏོཔཱིཏི དསྶེཏུཾ ‘‘ཨཝིསེསེནཱ’’ཏིཨཱདི ཝུཏྟཾ. ཏཏྠ ཏཾསམྤཡུཏྟཏཾསམུཊྛཱནདྷམྨཱནནྟི ཏེཧི ཕསྶཱདཱིཧི སམྤཡུཏྟདྷམྨཱནཉྩེཝ ཏཾསམུཊྛཱནརཱུཔདྷམྨཱནཉྩ. ཏཏྠ སམྤཡུཏྟགྒཧཎཾ ཡཐཱརཧཏོ དཊྛབྦཾ, སམུཊྛཱནགྒཧཎཾ པན ཨཝིསེསཏོ.

ཨུཔཏྠམྦྷེནྟོ ཨཱཧཱརཀིཙྩཾ སཱདྷེཏཱིཏི ཨུཔཏྠམྦྷེནྟོ ཨེཝ རཱུཔཾ སམུཊྛཱཔེཏི, ཨོཛཊྛམཀསམུཊྛཱཔནེནེཝ པནསྶ ཨུཔཐམྦྷནཀིཙྩསིདྡྷི. ཕུསནྟོཡེཝཱཏི ཕུསནཀིཙྩཾ ཀརོནྟོ ཨེཝ. ཨཱཡཱུཧམཱནཱཝཱཏི ཙེཏཡམཱནཱ ཨེཝ ཨབྷིསནྡཧནྟཱི ཨེཝ. ཝིཛཱནནྟམེཝཱཏི ཨུཔཔཏྟིཔརིཀཔྤནཝསེན ཝིཛཱནནྟམེཝ ཨཱཧཱརཀིཙྩཾ སཱདྷེཏཱིཏི ཡོཛནཱ. སབྦཏྠ ཨཱཧཱརཀིཙྩསཱདྷནཉྩ ཏེསཾ ཝེདནཱདིཨུཔྤཏྟིཧེཏུཏཱཡ ཨཏྟབྷཱཝསྶ པཝཏྟནམེཝ. ཀཱཡཊྛཔནེནཱཏི ཀསྨཱ ཝུཏྟཾ, ནནུ ཀམྨཛཱདིརཱུཔཾ ཀམྨཱདིནཱཝ པཝཏྟཏཱིཏི ཙོདནཾ སནྡྷཱཡཱཧ ‘‘ཀམྨཛནིཏོཔཱི’’ཏིཨཱདི.

ཨུཔཱདིཎྞརཱུཔསནྟཏིཡཱ ཨུཔཏྠམྦྷནེནེཝ ཨུཏུཙིཏྟཛརཱུཔསནྟཏཱིནམྤི ཨུཔཏྠམྦྷནསིདྡྷི ཧོཏཱིཏི ‘‘དྭིནྣཾ རཱུཔསནྟཏཱིན’’ནྟི ཝུཏྟཾ. ཨུཔཏྠམྦྷནམེཝ སནྡྷཱཡ ‘‘ཨནུཔཱལཀོ ཧུཏྭཱ’’ཏི ཙ ཝུཏྟཾ. རཱུཔཀཱཡསྶ ཋིཏིཧེཏུཏཱ ཧི ཡཱཔནཱ ཨནུཔཱལནཱ. སུཁཱདིཝཏྠུབྷཱུཏནྟི སུཁཱདཱིནཾ པཝཏྟིཊྛཱནབྷཱུཏཾ. ཨཱརམྨཎམྤི ཧི ཝསཏི ཨེཏྠ ཨཱརམྨཎཀརཎཝསེན ཏདཱརམྨཎཱ དྷམྨཱཏི ཝཏྠཱུཏི ¶ ཝུཙྩཏི. ཕུསནྟོཡེཝཱཏི ཨིདཾ ཕསྶསྶ ཕུསནསབྷཱཝཏྟཱ ཝུཏྟཾ. ན ཧི དྷམྨཱནཾ སབྷཱཝེན ཝིནཱ པཝཏྟི ཨཏྠི, ཝེདནཱཔཝཏྟིཡཱ ཝིནཱ སཏྟཱནཾ སནྡྷཱཝནཏཱ ནཏྠཱིཏི ཨཱཧ ‘‘སུཁཱདི…པེ… ཧོཏཱི’’ཏི. ན ཙེཏྠ སཉྙཱིབྷཝཀཐཱཡཾ ཨསཉྙཱིབྷཝོ དསྶེཏབྦོ, ཏསྶཱཔི ཝཱ ཀཱརཎབྷཱུཏཝེདནཱཔཝཏྟིཝསེནེཝ ཋིཏིཡཱ ཧེཏུནོ ཨབྱཱཔིཏཏྟཱ, ཏཐཱ ཧི ‘‘མནོསཉྩེཏནཱ…པེ… བྷཝམཱུལནིཔྥཱདནཏོ སཏྟཱནཾ ཋིཏིཡཱ ཧོཏཱི’’ཏི ཝུཏྟཱ. ཏཏོ ཨེཝ ཝིཉྙཱཎཾ ཝིཛཱནནྟམེཝཱཏི ཨུཔཔཏྟིཔརིཀཔྤནཝསེན ཝིཛཱནནྟམེཝཱཏི ཝུཏྟོཝཱཡམཏྠོ.

ཙཏྟཱརི བྷཡཱནི དཊྛབྦཱནི ཨཱདཱིནཝཝིབྷཱཝནཏོ. ནིཀནྟཱིཏི ནིཀཱམནཱ, རསཏཎྷཾ སནྡྷཱཡ ཝདཏི. སཱ ཧི ཀབལཱི༹ཀཱརེ ཨཱཧཱརེ བལཝཏཱི, ཏེནེཝེཏྠ ཨཝདྷཱརཎཾ ཀཏཾ. བྷཱཡཏི ཨེཏསྨཱཏི བྷཡཾ, ནིཀནྟིཡེཝ ¶ བྷཡཾ མཧཱནཏྠཧེཏུཏོ. ཨུཔགམནཾ ཝིསཡིནྡྲིཡཝིཉྙཱཎེསུ ཝིསཡཝིཉྙཱཎེསུ ཙ སངྒཏིཝསེན པཝཏྟི, ཏཾ ཝེདནཱདིཨུཔྤཏྟིཧེཏུཏཱཡ ‘‘བྷཡ’’ནྟི ཝུཏྟཾ. ཨཝདྷཱརཎེ པཡོཛནཾ ཝུཏྟནཡམེཝ. སེསདྭཡེཔི ཨེསེཝ ནཡོ. ཨཱཡཱུཧནཾ ཨབྷིསནྡཧནཾ, སཾཝིདྷཱནནྟིཔི ཝདནྟི. ཏཾ བྷཝཱུཔཔཏྟིཧེཏུཏཱཡ ‘‘བྷཡ’’ནྟི ཝུཏྟཾ. ཨབྷིནིཔཱཏོ ཏཏྠ ཏཏྠ བྷཝེ པཊིསནྡྷིགྒཧཎཝསེན ཝིཉྙཱཎསྶ ནིབྦཏྟི. སོ བྷཝཱུཔཔཏྟིཧེཏུཀཱནཾ སབྦེསཾ ཨནཏྠཱནཾ མཱུལཀཱརཎཏཱཡ ‘‘བྷཡ’’ནྟི ཝུཏྟཾ. ཨིདཱནི ནིཀནྟིཨཱདཱིནཾ སཔྤཊིབྷཡཏཾ ཝིཏྠཱརཏོ དསྶེཏུཾ ‘‘ཀིཾ ཀཱརཎཱ’’ཏིཨཱདི ཨཱརདྡྷཾ. ཏཏྠ ནིཀནྟིཾ ཀཏྭཱཏི ཨཱལཡཾ ཛནེཏྭཱ, ཏཎྷཾ ཨུཔྤཱདེཏྭཱཏི ཨཏྠོ. སཱིཏཱདཱིནཾ པུརཀྑཏཱཏི སཱིཏཱདཱིནཾ པུརཏོ ཋིཏཱ, སཱིཏཱདཱིཧི བཱདྷིཡམཱནཱཏི ཨཏྠོ.

ཕསྶཾ ཨུཔགཙྪནྟཱཏི ཙཀྑུསམྥསྶཱདིབྷེདཾ ཕསྶཾ པཝཏྟེནྟཱ. ཕསྶསྶཱདིནོཏི ཀཱཡསམྥསྶཝསེན ཕོཊྛབྦསངྑཱཏསྶ ཨསྶཱདནསཱིལཱ. ཀཱཡསམྥསྶཝསེན ཧི སཏྟཱནཾ ཕོཊྛབྦཏཎྷཱ པཝཏྟཏཱིཏི དསྶེཏུཾ ཕསྶཱཧཱརཱདཱིནཝདསྶནེ ཕོཊྛབྦཱརམྨཎཾ ཨུདྡྷཊཾ ‘‘པརེསཾ རཀྑིཏགོཔིཏེསཱུ’’ཏིཨཱདིནཱ. ཕསྶསྶཱདིནོཏི ཝཱ ཕསྶཱཧཱརསྶཱདིནོཏི ཨཏྠོ. སཏི ཧི ཕསྶཱཧཱརེ སཏྟཱནཾ ཕསྶཱརམྨཎེ ཨསྶཱདོ, ནཱསཏི, ཏེནཱཧ ‘‘ཕསྶསྶཱདམཱུལཀ’’ནྟིཨཱདི.

ཛཱཏིནིམིཏྟསྶ བྷཡསྶ ཨབྷིནིཔཱཏསབྷཱཝེན གཧིཏཏྟཱ ‘‘ཏམྨཱུལཀ’’ནྟི ཝུཏྟཾ. ཀམྨཱཡཱུཧནནིམིཏྟནྟི ཨཏྠོ. བྷཡཾ སབྦནྟི པཉྩཝཱིསཏི, ཏིཝིདྷམཧཱབྷཡཾ, ཨཉྙཉྩ སབྦབྷཡཾ ཨཱགཏམེཝ ཧོཏི བྷཡཱདྷིཊྛཱནསྶ ཨཏྟབྷཱཝསྶ ནིཔྥཱདནཏོ.

ཨབྷིནིཔཏཏཱིཏི ཨབྷིནིབྦཏྟཏི. པཋམཱབྷིནིབྦཏྟི ཧི སཏྟཱནཾ ཏཏྠ ཏཏྠ ཨངྒཱརཀཱསུསདིསེ ¶ བྷཝེ ཨབྷིནིཔཱཏསདིསཱི. ཏམྨཱུལཀཏྟཱཏི ནཱམརཱུཔནིབྦཏྟིམཱུལཀཏྟཱ. སབྦབྷཡཱནཾ ཨབྷིནིཔཱཏོཡེཝ བྷཡཾ བྷཱཡཏི ཨེཏསྨཱཏི ཀཏྭཱ.

ཨཔྤེཏི ཝིཡཱཏི ཕལསྶ ཨཏྟལཱབྷཧེཏུབྷཱཝཏོ ཀཱརཎཾ, ཏཾ ནིཡྻཱདེཏི ཝིཡ. ཏནྟི ཕལཾ. ཏཏོཏི ཀཱརཎཏོ. ཨེཏེསནྟི ཨཱཧཱརཱནཾ ¶ . ཡཐཱཝུཏྟེནཱཏི ‘‘ཕལཾ ནིདེཏཱི’’ཏིཨཱདིནཱ ཝུཏྟཔྤཀཱརེན ཨཏྠེན. སབྦཔདེསཱུཏི ‘‘ཝེདནཱནིརོདྷེནཱ’’ཏིཨཱདཱིསུ སབྦེསུ པདེསུ.

པཊིསནྡྷིཾ ཨཱདིཾ ཀཏྭཱཏི པཊིསནྡྷིཀྑཎཾ ཨཱདིཾ ཀཏྭཱ. ཨུཔཱདིཎྞཀཨཱཧཱརེ སནྡྷཱཡ ‘‘ཨཏྟབྷཱཝསངྑཱཏཱནཾ ཨཱཧཱརཱན’’ནྟི ཝུཏྟཾ. ཏེ ཧི ནིཔྤརིཡཱཡཏོ ཏཎྷཱནིདཱནཱ. པརིཔུཎྞཱཡཏནཱནཾ སཏྟཱནཾ སཏྟསནྟཏིཝསེནཱཏི པརིཔུཎྞཱཡཏནཱནཾ སབྷཱཝཀཱནཾ ཙཀྑུ སོཏཾ གྷཱནཾ ཛིཝ྄ཧཱ ཀཱཡོ བྷཱཝོ ཝཏྠཱུཏི ཨིམེསཾ སཏྟནྣཾ སནྟཏཱིནཾ ཝསེན. སེསཱནཾ ཨཔརིཔུཎྞཱཡཏནཱནཾ ཨནྡྷབདྷིརཨབྷཱཝཀཱནཾ. ཨཱུནཨཱུནསནྟཏིཝསེནཱཏི ཙཀྑུནཱ, སོཏེན, ཏདུབྷཡེན, བྷཱཝེན ཙ ཨཱུནཨཱུནསནྟཏིཝསེན. པཊིསནྡྷིཡཾ ཛཱཏཱ པཊིསནྡྷིཀཱ. པཋམབྷཝངྒཙིཏྟཀྑཎཱདཱིཏི ཨཱདི-སདྡེན ཏདཱརམྨཎཙིཏྟསྶ སངྒཧོ དཊྛབྦོ.

ཏཎྷཱཡཔི ནིདཱནཾ ཛཱནཱཏཱིཏི ཡོཛནཱ. ཏཎྷཱནིདཱནནྟིཔི པཱཋོ. ཝཊྚཾ དསྶེཏྭཱཏི སརཱུཔཏོ ནཡཏོ ཙ སཀལམེཝ ཝཊྚཾ དསྶེཏྭཱ. ཨིདཱནི ཏམཏྠཾ ཝིཏྠཱརཏོ ཝིབྷཱཝེཏུཾ ‘‘ཨིམསྨིཉྩ པན ཋཱནེ’’ཏིཨཱདིམཱཧ. ཨཏཱིཏཱབྷིམུཁཾ དེསནཾ ཀཏྭཱཏི པཙྩུཔྤནྣབྷཝཏོ པཊྛཱཡ ཨཏཱིཏདྷམྨཱབྷིམུཁཾ ཏབྦིསཡཾ དེསནཾ ཀཏྭཱ ཏཐཱཀཱརཎེན. ཨཏཱིཏེན ཝཊྚཾ དསྶེཏཱིཏི ཨཏཱིཏབྷཝེན ཀམྨཀིལེསཝིཔཱཀཝཊྚཾ དསྶེཏི. ཨཏྟབྷཱཝོཏི པཙྩུཔྤནྣོ ཨཏྟབྷཱཝོ. ཡདི ཨེཝཾ ཀསྨཱ ‘‘ཨཏཱིཏེན ཝཊྚཾ དསྶེཏཱི’’ཏི ཝུཏྟནྟི? ནཱཡཾ དོསོ ‘‘ཨཏཱིཏེནེཝཱ’’ཏི ཨནཝདྷཱརཎཏོ, ཨེཝཉྩ ཀཏྭཱ ཨཏཱིཏཱབྷིམུཁགྒཧཎཾ ཛནཀཀམྨཾ གཧིཏཾ, ཏཎྷཱསཱིསེན ནཱནནྟརིཡབྷཱཝཏོ. ན ཧི ཀམྨུནཱ ཝིནཱ ཏཎྷཱ བྷཝནེཏྟི ཡུཛྫཏི.

ཏཾ ཀམྨནྟི ཏཎྷཱསཱིསེན ཝུཏྟཀམྨཾ. དསྶེཏུནྟི ཏཾ ཨཏཱིཏཾ ཨཏྟབྷཱཝཾ དསྶེཏུཾ. ཏསྶཏྟབྷཱཝསྶ ཛནཀཾ ཀམྨནྟི ཏསྶ ཡཐཱཝུཏྟསྶ ཨཏྟབྷཱཝསྶ ཛནཀཾ. ཏཏོ པརམྤི ཨཏྟབྷཱཝཾ ཨཱཡཱུཧིཏཾ ཀམྨཾ དསྶེཏུཾ ཝུཏྟཾ. ཨཝིཛྫཱ ཙ ནཱམ ཏཎྷཱ ཝིཡ ཀམྨཏྟཱཏི ཀམྨསྶེཝ གཧཎཾ. དྭཱིསུ ཋཱནེསཱུཏི ཨཱཧཱརགྒཧཎེན ཝེདནཱདིགྒཧཎེནཱཏི དྭཱིསུ ཋཱནེསུ. ཨཏྟབྷཱཝོཏི པཙྩུཔྤནྣཀཱལིཀོ ཨཏཱིཏཀཱལིཀོ ཙ ཨཏྟབྷཱཝོ. པུན དྭཱིསཱུཏི ཏཎྷཱགྒཧཎེ ཨཝིཛྫཱསངྑཱརགྒཧཎེཏི དྭཱིསུ ཋཱནེསུ. ཏསྶ ཛནཀནྟི པཙྩུཔྤནྣསྶ ཙེཝ ཨཏཱིཏསྶ ཙ ཨཏྟབྷཱཝསྶ ¶ ཛནཀཾ ཀམྨཾ ཝུཏྟནྟི ཡོཛནཱ ¶ . ཀམྨགྒཧཎེན ཙེཏྠ ཡཏྠ ཏཾ ཀམྨཾ ཨཱཡཱུཧིཏཾ, སཱ ཨཏཱིཏཱ ཛཱཏི ཨཏྠཏོ དསྶིཏཱ ཧོཏི. ཏེན སཾསཱརཝཊྚསྶ ཨནམཏགྒཏཾ དཱིཔེཏི. སངྑེཔེནཱཏི སངྑེཔེན ཧེཏུཔཉྩཀཕལཔཉྩཀགྒཧཎམྤི ཧི སངྑེཔོ ཨེཝ ཧེཏུཕལབྷཱཝེན སངྒཧེཏབྦདྷམྨཱནཾ ཨནེཀཝིདྷཏྟཱ.

ཡདི ཨཏཱིཏེན ཝཊྚཾ དསྶིཏཾ, ཨེཝཾ སཏི སཔྤདེསཱ པཊིཙྩསམུཔྤཱདདྷམྨདེསནཱ ཧོཏཱིཏི དསྶེནྟོ ‘‘ཏཏྲཱཡ’’ནྟིཨཱདིམཱཧ. ཏེན ཧི ཡདིཔི སརཱུཔཏོ ཨནཱགཏེན ཝཊྚཾ ཨིདྷ ན དསྶིཏཾ, ནཡཏོ པན ཏསྶཔི དསྶིཏཏྟཱ ནིཔྤདེསཱ ཨེཝ པཊིཙྩསམུཔྤཱདདེསནཱཏི དསྶེཏི. ཨིདཱནི ཏམཏྠཾ ཨུཔམཱཡ ཝིབྷཱཝེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. ཨུདཀཔིཊྛེ ནིཔནྣནྟི ཨུདཀཾ པརིཔླཝཝསེན ནིཔནྣཾ. པརབྷཱགནྟི པརཨུཏྟམངྒབྷཱགཾ. ཨོརཏོཏི ཏཏོ ཨཔརབྷཱགཏོ ཨོལོཀེནྟོ. ཨཔརིཔུཎྞོཏི ཝིཀལཱཝཡཝོ. ཨེཝཾསམྤདནྟིཨཱདི ཨུཔམཱཡ སཾསནྡནཾ.

ཡཐཱ ཧི གཱིཝཱ སརཱིརསནྡྷཱརཀཀཎྜརཱནཾ མཱུལཊྛཱནབྷཱུཏཱ, ཨེཝཾ ཨཏྟབྷཱཝསནྡྷཱརཀཱནཾ སངྑཱརཱནཾ མཱུལབྷཱུཏཱ ཏཎྷཱཏི ཝུཏྟཾ ‘‘གཱིཝཱཡ དིཊྛཀཱལོ’’ཏི. ཡཐཱ ཝེདནཱདིཨནེཀཱཝཡཝསམུདཱཡབྷཱུཏོ ཨཏྟབྷཱཝོ, ཨེཝཾ ཕཱསུཀཔིཊྛིཀཎྜཀཱདིཨནེཀཱཝཡཝསམུདཱཡབྷཱུཏཱ པིཊྛཱིཏི ‘‘པིཊྛིཡཱ…པེ… ཏསྶ དིཊྛཀཱལོ’’ཏི ཝུཏྟཾ. ཏཎྷཱསངྑཱཏནྟི ཏཎྷཱཡ ཀཐིཏཾ. ཨིདྷ དེསནཱཡ པཙྩཡཱ ཨཝིཛྫཱསངྑཱརཱ ཝེདིཏབྦཱཏི ‘‘ནངྒུཊྛམཱུལསྶ དིཊྛཀཱལོ ཝིཡཱ’’ཏི ཝུཏྟཾ. ཏཐཱ ཧི པརིཡོསཱནེ ‘‘ནངྒུཊྛམཱུལཾ པསྶེཡྻཱ’’ཏི ཨུཔམཱདསྶནཾ ཀཏཾ. ནཡཏོ པརིཔུཎྞབྷཱཝགྒཧཎཾ ཝེདིཏབྦཾ. པཱལི༹ཡཾ ཨནཱགཏསྶཱཔི པཙྩཡཝཊྚསྶ ཧེཏུཝསེན ཕལཝསེན ཝཱ པརིཔུཎྞབྷཱཝསྶ མུཁམཏྟདསྶནཱིཡཏྟཱ ཨཱདིཏོ ཕལཧེཏུསནྡྷི, མཛ྄ཛྷེ ཧེཏུཕལསནྡྷི, ཨནྟེཔི ཕལཧེཏུསནྡྷཱིཏི ཨེཝཾ ཏིསནྡྷིཀཏྟཱ ཙཏུསངྑེཔམེཝ ཝཊྚཾ དསྶིཏནྟི.

ཨཱཧཱརསུཏྟཝཎྞནཱ ནིཊྛིཏཱ.

༢. མོལི༹ཡཕགྒུནསུཏྟཝཎྞནཱ

༡༢. ཨིམསྨིཾཡེཝ ཋཱནེཏི ‘‘ཙཏྟཱརོམེ བྷིཀྑུ…པེ… ཨཱཧཱརཱ’’ཏི ཨེཝཾ ཙཏྟཱརོ ཨཱཧཱརེ སརཱུཔཏོ དསྶེཏྭཱ ‘‘ཨིམེ ཁོ བྷིཀྑཝེ…པེ… ཨནུགྒཧཱཡཱ’’ཏི ནིགམནཝསེན དསྶིཏེ ཨིམསྨིཾཡེཝ ཋཱནེ. དེསནཾ ནིཊྛཱཔེསི ¶ ཙཏུཨཱཧཱརཝིབྷཱགདཱིཔཀཾ དེསནཾ ཨུདྡེསཝསེནེཝ ནིཊྛཱཔེསི, ཨུཔརི ཨཱཝཛྫེཏྭཱ ཏུཎྷཱི ནིསཱིདི. དིཊྛིགཏིཀོཏི ཨཏྟདིཊྛིཝསེན དིཊྛིགཏིཀོ. ཝརགནྡྷཝཱསིཏནྟི སབྷཱཝསིདྡྷེན ཙནྡནགནྡྷེན ཙེཝ ཏདཉྙནཱནཱགནྡྷེན ཙ པརིབྷཱཝིཏཏྟཱ ཝརགནྡྷཝཱསིཏཾ ¶ . རཏནཙངྐོཊཝརེནཱཏི རཏནམཡེན ཨུཏྟམཙངྐོཊཀེན. དེསནཱནུསནྡྷིཾ གྷཊེནྟོཏི ཡཐཱདེསིཏཱཡ དེསནཱཡ ཨནུསནྡྷིཾ གྷཊེནྟོ, ཡཐཱ ཨུཔརིདེསནཱ ཝདྡྷེཡྻ, ཨེཝཾ ཨུསྶཱཧཾ ཀརོནྟོ. ཝིཉྙཱཎཱཧཱརཾ ཨཱཧཱརེཏཱིཏི ཏསྶ ཨཱཧཱརཎཀིརིཡཱཡ ཝུཏྟཔུཙྪཱཡ ཏཾ དིཊྛིགཏཾ ཨུཔྤཱཊེནྟོ ‘‘ཡོ ཨེཏཾ…པེ… བྷུཉྫཏི ཝཱ’’ཏི ཨཱཧ.

ཝིཉྙཱཎཱཧཱརེ ནཱམ ཨིཙྪིཏེ ཏསྶ ཨུཔབྷུཉྫཀེནཔི བྷཝིཏབྦཾ, སོ ‘‘ཀོ ནུ ཁོ’’ཏི ཨཡཾ པུཙྪཱཡ ཨདྷིཔྤཱཡོ. ཨུཏུསམཡེཏི གབྦྷཝུཊྛཱནསམཡེ. སོ ཧི ཨུཏུསམཡསྶ མཏྟཀསམཡཏྟཱ ཏཐཱ ཝུཏྟོ. ‘‘ཨུདཀེན ཨཎྜཱནི མཱ ནསྶནྟཱུ’’ཏི མཧཱསམུདྡཏོ ནིཀྑམིཏྭཱ. གིཛ྄ཛྷཔོཏཀཱ ཝིཡ ཨཱཧཱརསཉྩེཏནཱཡ ཏཱནི ཀཙྪཔཎྜཱནི མནོསཉྩེཏནཱཧཱརེན ཡཱཔེནྟཱིཏི ཨཡཾ ཏསྶ ཐེརསྶ ལདྡྷི. ཀིཉྩཱཔི ཨཡཾ ལདྡྷཱིཏི ཕསྶམནོསཉྩེཏནཱཧཱརེསུ ཀིཉྩཱཔི ཐེརསྶ ཡུཏྟཱ ཨཡུཏྟཱ ཝཱ ཨཡཾ ལདྡྷི. ཨིམཾ པཉྷནྟི ‘‘ཀོ ནུ ཁོ, བྷནྟེ, ཝིཉྙཱཎཱཧཱརཾ ཨཱཧཱརེཏཱི’’ཏི ཨིམཾ པཉྷཾ ཨེཏཱཡ ཡཐཱཝུཏྟཱཡ ལདྡྷིཡཱ ན པན པུཙྪཏི, ཨཐ ཁོ སཏྟུཔལདྡྷིཡཱ པུཙྪཏཱིཏི ཨདྷིཔྤཱཡོ. སོཏི དིཊྛིགཏིཀོ. ན ནིགྒཧེཏབྦོ ཨུམྨཏྟཀསདིསཏྟཱ ཨདྷིཔྤཱཡཾ ཨཛཱནིཏྭཱ པུཙྪཱཡ ཀཏཏྟཱ. ཏེནཱཧ ‘‘ཨཱཧཱརེཏཱིཏི ནཱཧཾ ཝདཱམཱི’’ཏིཨཱདི.

ཏསྨིཾ མཡཱ ཨེཝཾ ཝུཏྟེཏི ཏསྨིཾ ཝཙནེ མཡཱ ‘‘ཨཱཧཱརེཏཱི’’ཏི ཨེཝཾ ཝུཏྟེ སཏི. ཨཡཾ པཉྷོཏི ‘‘ཀོ ནུ ཁོ, བྷནྟེ, ཝིཉྙཱཎཱཧཱརཾ ཨཱཧཱརེཏཱི’’ཏི ཨཡཾ པཉྷོ ཡུཏྟོ བྷཝེཡྻ. ཨེཝཾ པུཙྪིཏེ པཉྷེཏི སཏྟུཔལདྡྷིཾ ཨནཱདཱཡ ‘‘ཀཏམསྶ དྷམྨསྶ པཙྩཡོ’’ཏི ཨེཝཾ དྷམྨཔཝཏྟཝསེནེཝ པཉྷེ པུཙྪིཏེ. ཏེནེཝ ཝིཉྙཱཎེནཱཏི ཏེནེཝ པཊིསནྡྷིཝིཉྙཱཎེན སཧ ཨུཔྤནྣཾ ནཱམཉྩ རཱུཔཉྩ ཨཏཱིཏབྷཝེ དིཊྛིགཏིཀསྶ ཝསེན ཨཱཡཏིཾ པུནབྦྷཝཱབྷིནིབྦཏྟཱིཏི ཨིདྷཱདྷིཔྤེཏཾ. ནཱམརཱུཔེ ཛཱཏེ སཏཱིཏི ནཱམརཱུཔེ ནིབྦཏྟེ ཏཔྤཙྩཡབྷཱུཏཾ བྷིནྡིཏྭཱ སལཱ༹ཡཏནཾ ཧོཏི.

ཏཏྲཱཡཾ པཙྩཡཝིབྷཱགོ – ནཱམནྟི ཝེདནཱདིཁནྡྷཏྟཡཾ ཨིདྷཱདྷིཔྤེཏཾ, རཱུཔཾ པན སཏྟསནྟཏིཔརིཡཱཔནྣཾ, ནིཡམཏོ ཙཏྟཱརི བྷཱུཏཱནི ཚ ཝཏྠཱུནི ཛཱིཝིཏིནྡྲིཡཾ ¶ ཨཱཧཱརོ ཙ. ཏཏྠ ཝིཔཱཀནཱམཾ པཊིསནྡྷིཀྑཎེ ཧདཡཝཏྠུནོ སཧཱཡོ ཧུཏྭཱ ཚཊྛསྶ མནཱཡཏནསྶ སཧཛཱཏཨཉྙམཉྙནིསྶཡསམྤཡུཏྟཝིཔཱཀཨཏྠིཨཝིགཏཔཙྩཡེཧི སཏྟདྷཱ པཙྩཡོ ཧོཏི. ཀིཉྩི པནེཏྠ ཧེཏུཔཙྩཡེན ཀིཉྩི ཨཱཧཱརཔཙྩཡེནཱཏི ཨེཝཾ ཨུཀྐཾསཱཝཀཾསོ ཝེདིཏབྦོ. ཨིཏརེསཾ པན པཉྩཱཡཏནཱནཾ ཙཏུནྣཾ མཧཱབྷཱུཏཱནཾ སཧཱཡོ ཧུཏྭཱ སཧཛཱཏནིསྶཡཝིཔཱཀཝིཔྤཡུཏྟཨཏྠིཨཝིགཏཝསེན ཚདྷཱ པཙྩཡོ ཧོཏི. ཀིཉྩི པནེཏྠ ཧེཏུཔཙྩཡེན ཀིཉྩི ཨཱཧཱརཔཙྩཡེནཱཏི སབྦཾ པུརིམསདིསཾ. པཝཏྟེ ཝིཔཱཀནཱམཾ ཝིཔཱཀསྶ ཚཊྛཱཡཏནསྶ ཝུཏྟནཡེན སཏྟདྷཱ ¶ པཙྩཡོ ཧོཏི, ཨཝིཔཱཀཾ པན ཨཝིཔཱཀསྶ ཚཊྛསྶ ཏཏོ ཝིཔཱཀཔཙྩཡཾ ཨཔནེཏྭཱ པཙྩཡོ ཧོཏི. ཙཀྑཱཡཏནཱདཱིནཾ པན པཙྩུཔྤནྣཾ ཙཀྑུཔསཱདཱདིཝཏྠུཀམྤི ཨིཏརམྤི ཝིཔཱཀནཱམཾ པཙྪཱཛཱཏཝིཔྤཡུཏྟཨཏྠིཨཝིགཏཔཙྩཡེཧི ཙཏུདྷཱ པཙྩཡོ ཧོཏི, ཏཐཱ ཨཝིཔཱཀམྤི ཝེདིཏབྦཾ. རཱུཔཏོ པན ཝཏྠུརཱུཔཾ པཊིསནྡྷིཡཾ ཚཊྛསྶ སཧཛཱཏཨཉྙམཉྙནིསྶཡཝིཔྤཡུཏྟཨཏྠིཨཝིགཏཔཙྩཡེཧི ཚདྷཱ པཙྩཡོ ཧོཏི. ཙཏྟཱརི པན བྷཱུཏཱནི ཙཀྑཱཡཏནཱདཱིནཾ པཉྩནྣཾ སཧཛཱཏནིསྶཡཨཏྠིཨཝིགཏཔཙྩཡེཧི ཙཏུདྷཱ པཙྩཡོ ཧོཏི. རཱུཔཛཱིཝིཏཾ ཨཏྠིཨཝིགཏིནྡྲིཡཝསེན ཏིདྷཱ པཙྩཡོ ཧོཏཱིཏི ཨཡཉྷེཏྠ སངྑེཔོ, ཝིཏྠཱརོ པན ཝིསུདྡྷིམགྒཏོ (ཝིསུདྡྷི. ༢.༥༩༤) གཧེཏབྦོ.

པཉྷསྶ ཨོཀཱསཾ དེནྟོཏི ‘‘ཀོ ནུ ཁོ, བྷནྟེ, ཕུསཏཱི’’ཏི ཨིམསྶ དིཊྛིགཏིཀཔཉྷསྶ ཨོཀཱསཾ དེནྟོ. ཏཏོ ཝིཝེཙེཏུཀཱམོཏི ཨདྷིཔྤཱཡོ. སབྦཔདེསཱུཏི དིཊྛིགཏིཀེན བྷགཝཏཱ ཙ ཝུཏྟཔདེསུ. སཏྟོཏི ཨཏྟཱ. སོ པན ཨུཙྪེདཝཱདིནོཔི ཡཱཝ ན ཨུཙྪིཛྫཏི, ཏཱཝ ཨཏྠེཝཱཏི ལདྡྷི, པགེཝ སསྶཏཝཱདིནོ. བྷཱུཏོཏི ཝིཛྫམཱནོ. ནིཔྥཏྟོཏི ནིཔྥནྣོ. ན ཏསྶ དཱནི ནིཔྥཱདེཏབྦཾ ཀིཉྩི ཨཏྠཱིཏི ལདྡྷི. ཨིདཔྤཙྩཡཱ ཨིདནྟི ཨིམསྨཱ ཝིཉྙཱཎཱཧཱརཔཙྩཡཱ ཨིདཾ ནཱམརཱུཔཾ. པུན ཨིདཔྤཙྩཡཱ ཨིདནྟི ཨིམསྨཱ ནཱམརཱུཔཔཙྩཡཱ ཨིདཾ སལཱ༹ཡཏནནྟི ཨེཝཾ བཧཱུསུ ཋཱནེསུ བྷགཝཏཱ ཀཐིཏཏྟཱ ཡཐཱ པཙྩཡཏོ ནིབྦཏྟཾ སངྑཱརམཏྟམིདནྟི སཉྙཏྟིཾ ཨུཔགཏོ. ཏེནཱཔཱིཏི སཉྙཏྟུཔགཏེནཱཔི. ཨེཀཱབདྡྷཾ ཀཏྭཱཏི ཡཐཱ པུཙྪཱཡ ཨཝསརོ ན ཧོཏི, ཏཐཱ ཨེཀཱབདྡྷཾ ཀཏྭཱ. དེསནཱརུལ༹ྷནྟི ཡཏོ སལཱ༹ཡཏནཔདཏོ པཊྛཱཡ ‘‘སལཱ༹ཡཏནཔཙྩཡཱ ཕསྶོ’’ཏིཨཱདིནཱ དེསནཱ པཊིཙྩསམུཔྤཱདཝཱིཐིཾ ཨཱརུལ༹ྷམེཝ. ཏམེཝཱཏི སལཱ༹ཡཏནཔདམེཝ ¶ གཧེཏྭཱ. ཝིཝཛྫེནྟོཏི ཝིཝཊྚེནྟོ. ཨེཝམཱཧཱཏི ‘‘ཚནྣཾཏྭེཝཱ’’ཏིཨཱདིཨཱཀཱརེན ཨེཝཾ དེསིཏེ, ‘‘ཝིནེཡྻཛནོ པཊིཝིཛ྄ཛྷཏཱི’’ཏི ཨེཝམཱཧ. ཝིཉྙཱཎཱཧཱརོ ཨཱཡཏིཾ པུནབྦྷཝཱབྷིནིབྦཏྟིཡཱཏི ཨེཝཾ པུརིམབྷཝཏོ ཨཱཡཏིབྷཝསྶ པཙྩཡཝསེན མཱུལཀཱརཎཝསེན ཙ དེསིཏཏྟཱ ‘‘ཝིཉྙཱཎནཱམརཱུཔཱནཾ ཨནྟརེ ཨེཀོ སནྡྷཱི’’ཏི ཝུཏྟཾ. ཏདམིནཱ ཝིཉྙཱཎགྒཧཎེན ཨབྷིསངྑཱརཝིཉྙཱཎསྶཱཔི གཧཎཾ ཀཏནྟི དཊྛབྦཾ.

མོལི༹ཡཕགྒུནསུཏྟཝཎྞནཱ ནིཊྛིཏཱ.

༣. སམཎབྲཱཧྨཎསུཏྟཝཎྞནཱ

༡༣. ཡེ པཙྩཡསམཝཱཡེ ཏེནཏྟབྷཱཝེན སཙྩཱནི པཊིཝིཛ྄ཛྷིཏུཾ སམཏྠཱ, ཏེ བཱཧིརཀལིངྒེ ཋིཏཱཔི ཏེནེཝ ཏཏྠ སམཏྠཏཱཡོགེན བྷཱཝིནཾ སམིཏབཱཧིཏཔཱཔཏཾ ཨཔེཀྑིཏྭཱ སམཎསམྨཏཱཡེཝ བྲཱཧྨཎསམྨཏཱཡེཝཱཏི ¶ ཏེ ནིཝཏྟེཏུཾ ‘‘སཙྩཱནི པཊིཝིཛ྄ཛྷིཏུཾ ཨསམཏྠཱ’’ཏི ཝུཏྟཾ. དུཀྑསཙྩཝསེནཱཏི དུཀྑཨརིཡསཙྩཝསེན. ཨཉྙཐཱ ཀཐཾ བཱཧིརཀཱཔི ཛརཱམརཎཾ དུཀྑནྟི ན ཛཱནནྟི. སཙྩདེསནཱབྷཱཝཏོ ‘‘སཧ ཏཎྷཱཡཱ’’ཏི ཝུཏྟནྟི ཀེཙི. ཏཾ ན སུཊྛུ. ཡསྨཱ ཏཏྠ ཏཏྠ བྷཝེ པཋམཱབྷིནིབྦཏྟི, ཨིདྷ ཛཱཏཱིཏི ཨདྷིཔྤེཏཱ, སཱ ཙ ཏཎྷཱ ཨེཝ སནྟཱནེན, ཏཎྷེཝ སཱ ཛཱཏི. ཛརཱམརཎཉྩེཏྠ པཱཀཊམེཝ ཨདྷིཔྤེཏཾ, ན ཁཎིཀཾ, ཏསྨཱ སཏཎྷཱ ཨེཝ ཛཱཏིཛརཱམརཎསྶ སམུདཡོཏི བྷཱུཏཀཐནམེཏཾ དཊྛབྦཾ. སམུདཡསཙྩཝསེན ན ཛཱནནྟཱིཏི ཡོཛནཱ. ཨེས ནཡོ སེསཔདེསུཔི. སབྦཔདེསཱུཏི ཡཏྠ ཏཎྷཱ ཝིསེསནབྷཱཝེན ཝཏྟབྦཱ, ཏེསུ སབྦཔདེསུ. ཡེན སམནྣཱགཏཏྟཱ པུགྒལོ པརམཏྠཏོ སམཎོ བྲཱཧྨཎོཏི ཝུཙྩཏི, ཏཾ སཱམཉྙཾ བྲཧྨཉྙཉྩཱཏི ཨཱཧ ‘‘ཨརིཡ…པེ… བྲཧྨཉྙཉྩཱ’’ཏི. ཡེན ཧི པཝཏྟིནིམིཏྟེན སམཎ-སདྡོ བྲཱཧྨཎ-སདྡོ ཙ སཀེ ཨཏྠེ ནིརུལ༹ྷོ, ཏསྶ ཝསེན ཨབྷིནྣོཔི ཝེནེཡྻཛ྄ཛྷཱསཡཏོ དྭིདྷཱ ཀཏྭཱ ཝཏྟུཾ ཨརཧཏཱིཏི ཝུཏྟཾ ‘‘ཨུབྷཡཏྠཱཔཱི’’ཏི. ཨེཀཱདསསུ ཋཱནེསུ ཙཏྟཱརི སཙྩཱནི ཀཐེསི ཨཝིཛྫཱསམུདཡསྶ ཨནུདྡྷཊཏྟཱ.

སམཎབྲཱཧྨཎསུཏྟཝཎྞནཱ ནིཊྛིཏཱ.

༤. དུཏིཡསམཎབྲཱཧྨཎསུཏྟཝཎྞནཱ

༡༤. ཨིམེ ¶ དྷམྨེ ཀཏམེ དྷམྨེཏི ཙ ཨེཏྠ ཨིཏི-སདྡོ ཨཱདིཨཏྠོ. ཏེན ‘‘ཨིམེསཾ དྷམྨཱནཾ ཀཏམེསཾ དྷམྨཱན’’ནྟི ཨིམེསཾ པདཱནཾ སངྒཧོ. ཨེཏཱནི ཧི པདཱནི ཛརཱམརཎཱདཱིནཾ སཱདྷཱརཎབྷཱཝེན ཝུཏྟཱནི ཨིམིསྶཱ དེསནཱཡ པཔཉྩབྷཱུཏཱནཱིཏི ཨཱཧ ‘‘ཨེཏྟཀཾ པཔཉྩཾ ཀཏྭཱ ཀཐིཏཾ, དེསནཾ…པེ… ཨཛ྄ཛྷཱསཡེནཱ’’ཏི. ཨིམིནཱ ཏཱནེཝ ཛརཱམརཎཱདཱིནི གཧེཏྭཱ པུགྒལཛ྄ཛྷཱསཡཝསེན ཨཱདིཏོ ‘‘ཨིམེ དྷམྨེ’’ཏིཨཱདིནཱ སབྦཔདསཱདྷཱརཎཏོ དེསནཱ ཨཱརདྡྷཱ. ཡཐཱནུལོམསཱསནཉྷི སུཏྟནྟདེསནཱ, ན ཡཐཱདྷམྨསཱསནནྟི.

དུཏིཡསམཎབྲཱཧྨཎསུཏྟཝཎྞནཱ ནིཊྛིཏཱ.

༥. ཀཙྩཱནགོཏྟསུཏྟཝཎྞནཱ

༡༥. ཡསྨཱ ཨིདྷ ཛཱནནྟཱཔི ‘‘སམྨཱདིཊྛཱི’’ཏི ཝདནྟི ཨཛཱནནྟཱཔི བཱཧིརཀཱཔི སཱསནིཀཱཔི ཨནུསྶཝཱདིཝསེནཔི ཨཏྟཔཙྩཀྑེནཔི, ཏསྨཱ ཏཾ བཧཱུནཾ ཝཙནཾ ཨུཔཱདཱཡ ཨཱམེཌིཏཝསེན ‘‘སམྨཱདིཊྛི སམྨཱདིཊྛཱིཏི, བྷནྟེ, ཝུཙྩཏཱི’’ཏི ཨཱཧ. ཏཐཱནིདྡིཊྛཏཱདསྶནཏྠཾ ཧིསྶ ཨཡཾ ཨཱམེཌིཏཔཡོགོ. ཨཡཉྷེཏྠ ཨདྷིཔྤཱཡོ – ‘‘ཨཔརེཧིཔི སམྨཱདིཊྛཱིཏི ཝུཙྩཏི, སཱ ¶ པནཱཡཾ ཨེཝཾ ཝུཙྩམཱནཱ ཨཏྠཉྩ ལཀྑཎཉྩ ཨུཔཱདཱཡ ཀིཏྟཱཝཏཱ ནུ ཁོ, བྷནྟེ, སམྨཱདིཊྛི ཧོཏཱི’’ཏི. ཨཊྛཀཐཱཡཾ པན ‘‘སམྨཱདིཊྛཱི’’ཏི ཝཙནེ ཡསྨཱ ཝིཉྙཱུ ཨེཝ པམཱཎཾ, ན ཨཝིཉྙཱུ, ཏསྨཱ ‘‘ཡཾ པཎྜིཏཱ’’ཏིཨཱདི ཝུཏྟཾ. དྭེ ཨཝཡཝཱ ཨསྶཱཏི དྭཡཾ, དུཝིདྷཾ དིཊྛིགཱཧཝཏྠུ, དྭཡཾ དིཊྛིགཱཧཝསེན ནིསྶིཏོ ཨཔསྶིཏོཏི དྭཡནིསྶིཏོ. ཏེནཱཧ ‘‘དྭེ ཀོཊྛཱསེ ནིསྶིཏོ’’ཏི. ཡཱཡ དིཊྛིཡཱ ‘‘སབྦོཡཾ ལོཀོ ཨཏྠི ཝིཛྫཏི སབྦཀཱལཾ ཨུཔལབྦྷཏཱི’’ཏི དིཊྛིགཏིཀོ གཎྷཱཏི, སཱ དིཊྛི ཨཏྠིཏཱ, སཱ ཨེཝ སདཱ སབྦཀཱལཾ ལོཀོ ཨཏྠཱིཏི པཝཏྟགཱཧཏཱཡ སསྶཏོ, ཏཾ སསྶཏཾ. ཡཱཡ དིཊྛིཡཱ ‘‘སབྦོཡཾ ལོཀོ ནཏྠི ན ཧོཏི ཨུཙྪིཛྫཏཱི’’ཏི དིཊྛིགཏིཀོ གཎྷཱཏི, སཱ དིཊྛི ནཏྠིཏཱ, སཱ ཨེཝ ཨུཙྪིཛྫཏཱིཏི ཨུཔྤནྣགཱཧཏཱཡ ཨུཙྪེདོ, ཏཾ ཨུཙྪེདཾ. ལོཀོ ¶ ནཱམ སངྑཱརལོཀོ ཏམྷི གཧེཏབྦཏོ. སམྨཔྤཉྙཱཡཱཏི ཨཝིཔརཱིཏཔཉྙཱཡ ཡཐཱབྷཱུཏཔཉྙཱཡ. ཏེནཱཧ ‘‘སཝིཔསྶནཱ མགྒཔཉྙཱ’’ཏི. ནིབྦཏྟེསུ དྷམྨེསཱུཏི ཡཐཱ པཙྩཡུཔྤནྣེསུ རཱུཔཱརཱུཔདྷམྨེསུ. པཉྙཱཡནྟེ སྭེཝཱཏི སནྟཱནནིབནྡྷནཝསེན པཉྙཱཡམཱནེསུ ཨེཝ. ཡཱ ནཏྠཱིཏི ཡཱ ཨུཙྪེདདིཊྛི ཏཏྠ ཏཏྠེཝ སཏྟཱནཾ ཨུཙྪིཛྫནཏོ ཝིནསྶནཏོ ཀོཙི ཋིཏོ ནཱམ སཏྟོ དྷམྨོ ཝཱ ནཏྠཱིཏི སངྑཱརལོཀེ ཨུཔྤཛྫེཡྻ. ‘‘ནཏྠི སཏྟཱ ཨོཔཔཱཏིཀཱ’’ཏི པཝཏྟམཱནཱཔི མིཙྪཱདིཊྛི ཏཐཱཔཝཏྟསངྑཱརཱརམྨཎཱཝ. སཱ ན ཧོཏཱིཏི ཀམྨཱཝིཛྫཱཏཎྷཱདིབྷེདཾ པཙྩཡཾ པཊིཙྩ སངྑཱརལོཀསྶ སམུདཡནིབྦཏྟིཾ སམྨཔྤཉྙཱཡ པསྶཏོ, སཱ ཨུཙྪེདདིཊྛི, ན ཧོཏི, ནཔྤཝཏྟཏི ཨཝིཙྪེདེན སངྑཱརཱནཾ ནིབྦཏྟིདསྶནཏོ. ལོཀནིརོདྷནྟི སངྑཱརལོཀསྶ ཁཎིཀནིརོདྷཾ. ཏེནཱཧ ‘‘སངྑཱརཱནཾ བྷངྒ’’ནྟི. ཡཱ ཨཏྠཱིཏི ཧེཏུཕལསམྦནྡྷེན པཝཏྟམཱནསྶ སནྟཱནཱནུཔཙྪེདསྶ ཨེཀཏྟགྒཧཎེན སངྑཱརལོཀེ ཡཱ སསྶཏདིཊྛི སབྦཀཱལཾ ལོཀོ ཨཏྠཱིཏི ཨུཔྤཛྫེཡྻ. སཱ ན ཧོཏཱིཏི ཨུཔྤནྣུཔྤནྣཱནཾ ནིརོདྷསྶ ནཝནཝཱནཉྩ ཨུཔྤཱདསྶ དསྶནཏོ, སཱ སསྶཏདིཊྛི ན ཧོཏི.

ལོཀོ སམུདེཏི ཨེཏསྨཱཏི ལོཀསམུདཡོཏི ཨཱཧ ‘‘ཨནུལོམཔཙྩཡཱཀཱར’’ནྟི. པཙྩཡདྷམྨཱནཉྷི ཨཏྟནོ ཕལསྶ པཙྩཡབྷཱཝོ ཨནུལོམཔཙྩཡཱཀཱརོ. པཊིལོམཾ པཙྩཡཱཀཱརནྟི ཨཱནེཏྭཱ སམྦནྡྷོ. ཏཾཏཾཧེཏུནིརོདྷཏོ ཏཾཏཾཕལནིརོདྷོ ཧི པཊིལོམཔཙྩཡཱཀཱརོ. ཡོ ཧི ཨཝིཛྫཱདཱིནཾ པཙྩཡདྷམྨཱནཾ ཧེཏུཨཱདིཔཙྩཡབྷཱཝོ, སོ ནིཔྤརིཡཱཡཏོ ལོཀསམུདཡོ. པཙྩཡུཔྤནྣསྶ སངྑཱརཱདིཀསྶ. ཨནུཙྪེདཾ པསྶཏོཏི ཨནུཙྪེདདསྶནསྶ ཧེཏུ. ཨཡམྤཱིཏི ན ཀེཝལཾ ཁཎཏོ ཨུདཡཝཡནཱིཧརཎནཡོ, ཨཐ ཁོ པཙྩཡཏོ ཨུདཡཝཡནཱིཧརཎནཡོཔི.

ཨུཔགམནཊྛེན ཏཎྷཱཝ ཨུཔཡོ. ཏཐཱ དིཊྛུཔཡོ. ཨེསེཝ ནཡོཏི ཨིམིནཱ ཨུཔཡེཧི ཨུཔཱདཱནཱདཱིནཾ ཨནཏྠནྟརཏཾ ཨཏིདིསཏི. ཏཐཱ ཙ པན ཏེསུ དུཝིདྷཏཱ ཨུཔཱདཱིཡཏི. ནནུ ཙ ཙཏྟཱརི ¶ ཨུཔཱདཱནཱནི ཨཉྙཏྠ ཝུཏྟཱནཱིཏི? སཙྩཾ ཝུཏྟཱནི, ཏཱནི ཙ ཁོ ཨཏྠཏོ དྭེ ཨེཝཱཏི ཨིདྷ ཨེཝཾ ཝུཏྟཾ. ཀཱམཾ ‘‘ཨཧཾ མམ’’ནྟི ཨཡཐཱནུཀྐམེན ཝུཏྟཾ, ཡཐཱནུཀྐམཾཡེཝ པན ཨཏྠོ ཝེདིཏབྦོ. ཨཱདི-སདྡེན པརོཔརསྶ སུབྷཾ ཨསུབྷནྟིཨཱདཱིནཉྩ སངྒཧོ ཝེདིཏབྦོ. ཏེ དྷམྨེཏི ཏེབྷཱུམཀདྷམྨེ. ཝིནིཝིསནྟཱིཏི ¶ ཝིརཱུཔཾ ནིཝིསནྟི, ཨབྷིནིཝིསནྟཱིཏི ཨཏྠོ. ཏཱཧཱིཏི ཏཎྷཱདིཊྛཱིཧི. ཝིནིབདྡྷོཏི ཝིརཱུཔཾ ཝིམུཙྩིཏུཾ ཝཱ ཨཔྤདཱནཝསེན ནིཡམེཏྭཱ བདྡྷོ.

‘‘ཨབྷིནིཝེསོ’’ཏི ཨུཔཡུཔཱདཱནཱནཾ པཝཏྟིཨཱཀཱརཝིསེསོ ཝུཏྟོཏི ཨཱཧ ‘‘ཏཉྩཱཡནྟི ཏཉྩ ཨུཔཡུཔཱདཱན’’ནྟི. ཙིཏྟསྶཱཏི ཨཀུསལཙིཏྟསྶ. པཏིཊྛཱནབྷཱུཏནྟི ཨཱདྷཱརབྷཱུཏཾ. དོསམོཧཝསེནཔི ཨཀུསལཙིཏྟཔྤཝཏྟི ཏཎྷཱདིཊྛཱབྷིནིཝེསཱུཔནིསྶཡཱ ཨེཝཱཏི ཏཎྷཱདིཊྛིཡོ ཨཀུསལསྶ ཙིཏྟསྶ ཨདྷིཊྛཱནནྟི ཝུཏྟཱ. ཏསྨིནྟི ཨཀུསལཙིཏྟེ. ཨབྷིནིཝིསནྟཱིཏི ‘‘ཨེཏཾ མམ, ཨེསོ མེ ཨཏྟཱ’’ཏིཨཱདིནཱ ཨབྷིནིཝེསནཾ པཝཏྟེནྟི. ཨནུསེནྟཱིཏི ཐཱམགཏཱ ཧུཏྭཱ ཨཔྤཧཱནབྷཱཝེན ཨནུསེནྟི. ཏདུབྷཡནྟི ཏཎྷཱདིཊྛིདྭཡཾ. ན ཨུཔགཙྪཏཱིཏི ‘‘ཨེཏཾ མམཱ’’ཏིཨཱདིནཱ ཏཎྷཱདིཊྛིགཏིཡཱ ན ཨུཔསངྐམཏི ན ཨལླཱིཡཏི. ན ཨུཔཱདིཡཏཱིཏི ན དལ༹ྷགྒཱཧཾ གཎྷཱཏི. ན ཨདྷིཊྛཱཏཱིཏི ན ཏཎྷཱདིཊྛིགཱཧེན ཨདྷིཊྛཱཡ པཝཏྟཏི. ཨཏྟནིཡགཱཧོ ནཱམ སཏི ཨཏྟགཱཧེ ཧོཏཱིཏི ཝུཏྟཾ ‘‘ཨཏྟཱ མེ’’ཏི. ཨིདཾ དུཀྑགྒཧཎཾ ཨུཔཱདཱནཀྑནྡྷཱཔསྶཡཾ ཏབྦིནིམུཏྟསྶ དུཀྑསྶ ཨབྷཱཝཱཏི ཝུཏྟཾ ‘‘དུཀྑམེཝཱཏི པཉྩུཔཱདཱནཀྑནྡྷམཏྟམེཝཱ’’ཏི. ‘‘སཾཁིཏྟེན པཉྩུཔཱདཱནཀྑནྡྷཱ དུཀྑཱ’’ཏི (དཱི. ནི. ༢.༣༨༧; མ. ནི. ༡.༡༢༠; ༣.༣༧༣; ཝིབྷ. ༡༩༠) ཧི ཝུཏྟཾ. ཀངྑཾ ན ཀརོཏཱིཏི སཾསཡཾ ན ཨུཔྤཱདེཏི སབྦསོ ཝིཙིཀིཙྪཱཡ སམུཙྪིནྡནཏོ.

ན པརཔྤཙྩཡེནཱཏི པརསྶ ཨསདྡཧནེན. མིསྶཀསམྨཱདིཊྛིཾ ཨཱཧཱཏི ནཱམརཱུཔཔརིཙྪེདཏོ པཊྛཱཡ སམྨཱདིཊྛིཡཱ ཝུཏྟཏྟཱ ལོཀིཡལོཀུཏྟརམིསྶཀཾ སམྨཱདིཊྛིཾ ཨཝོཙ. ནིཀཱུཊནྟོཏི ནིཧཱིནནྟོ. ནིཧཱིནཔརིཡཱཡོ ཧི ཨཡཾ ནིཀཱུཊ-སདྡོ. ཏེནཱཧ ‘‘ལཱམཀནྟོ’’ཏི. པཋམཀནྟི ཙ གརཧཱཡཾ ཀ-སདྡོ. སབྦཾ ནཏྠཱིཏི ཡཐཱསངྑཏཾ བྷངྒུཔྤཏྟིཡཱ ནཏྠི ཨེཝ, སབྦཾ ནཏྠི ཨུཙྪིཛྫཏི ཝིནསྶཏཱིཏི ཨདྷིཔྤཱཡོ. སབྦམཏྠཱིཏི ཙ ཡཐཱ ཨསངྑཏཾ ཨཏྠི ཝིཛྫཏི, སབྦཀཱལཾ ཨུཔལབྦྷཏཱིཏི ཨདྷིཔྤཱཡོ. སབྦནྟི ཙེཏྠ སཀྐཱཡསབྦཾ ཝེདིཏབྦཾ ‘‘སབྦདྷམྨམཱུལཔརིཡཱཡ’’ནྟིཨཱདཱིསུ (མ. ནི. ༡.༡) ཝིཡ. ཏཉྷི པརིཉྙཱཉཱཎཱནཾ པཙྩཡབྷཱུཏཾ. ཨིཏི-སདྡོ ནིདསྶནེ. ཀིཾ ནིདསྶེཏི? ཨཏྠི-སདྡེན ཝུཏྟཾ. ‘‘ཨཏྠིཏ’’ནྟི ནིཙྩཏཾ. སསྶཏགྒཱཧོ ཧི ཨིདྷ པཋམོ ཨནྟོཏི ཨདྷིཔྤེཏོ. ཨུཙྪེདགྒཱཧོ དུཏིཡོཏི ཏདུབྷཡཝིནིམུཏྟཱ ཙ ཨིདཔྤཙྩཡཏཱ. ཨེཏྠ ཙ ཨུཔྤནྣནིརོདྷཀཐནཏོ སསྶཏཏཾ, ནིརུཛ྄ཛྷནྟཱནཾ ཨསཏི ¶ ནིབྦཱནཔྤཏྟིཡཾ ཡཐཱཔཙྩཡཾ པུནཱུཔགམནཀཐནཏོ ¶ ཨུཙྪེདཏཉྩ ཨནུཔགམྨ མཛ྄ཛྷིམེན བྷགཝཱ དྷམྨཾ དེསེཏི ཨིདཔྤཙྩཡཏཱནཡེན. ཏེན ཝུཏྟཾ ‘‘ཨེཏེ…པེ… ཨནྟེ’’ཏིཨཱདི.

ཀཙྩཱནགོཏྟསུཏྟཝཎྞནཱ ནིཊྛིཏཱ.

༦. དྷམྨཀཐིཀསུཏྟཝཎྞནཱ

༡༦. ནིབྦིནྡནཏྠཱཡཱཏི ནིབྦིདཱནུཔསྶནཱཔཊིལཱབྷཱཡ. སཱ ཧི ཛརཱམརཎསཱིསེན ཝུཏྟེསུ སངྑཏདྷམྨེསུ ནིབྦིནྡནཱཀཱརེན པཝཏྟཏི. ཝིརཛྫནཏྠཱཡཱཏི ཝིརཱགཱནུཔསྶནཱཔཊིལཱབྷཱཡ. སཱིལཏོ པཊྛཱཡཱཏི ཝིཝཊྚསནྣིསྶིཏསཱིལསམཱདཱནཏོ པཊྛཱཡ. སོཏཱཔཏྟིཡངྒེཧི སམནྣཱགཏོ ཝིཝཊྚསནྣིསྶིཏསཱིལེ པཏིཊྛིཏོ ཨུཔཱསཀོཔི པགེཝ ཙཏུཔཱརིསུདྡྷིསཱིལེ པཏིཊྛིཏོ བྷིཀྑུ སམྨཱཔཊིཔནྣོ ནཱམ. ཏེནཱཧ ‘‘ཡཱཝ ཨརཧཏྟམགྒཱ པཊིཔནྣོཏི ཝེདིཏབྦོ’’ཏི. ནིབྦཱནདྷམྨསྶཱཏི ནིབྦཱནཱཝཧསྶ ཨརིཡསྶ མགྒསྶ. ཨནུརཱུཔསབྷཱཝབྷཱུཏནྟི ནིབྦཱནཱདྷིགམསྶ ཨནུཙྪཝིཀསབྷཱཝབྷཱུཏཾ. ནིབྦིདཱཏི ཨིམིནཱ ཝུཊྛཱནགཱམིནིཔརིཡོསཱནཾ ཝིཔསྶནཾ ཝདཏི. ཝིརཱགཱ ནིརོདྷཱཏི པདདྭཡེན ཨརིཡམགྒཾ, ཨིཏརེན ཕལཾ. ཨེཏྠཱཏི ཨིམསྨིཾ སུཏྟེ. ཨེཀེན ནཡེནཱཏི པཋམེན ནཡེན. ཏཏྠ ཧི བྷགཝཱ ཏེན བྷིཀྑུནཱ དྷམྨཀཐིཀལཀྑཎཾ པུཙྪིཏོ ཏཾ མཏྠཀཾ པཱཔེཏྭཱ ཝིསྶཛྫེསི. ཡོ ཧི ཝིཔསྶནཾ མགྒཾ ཨནུཔཱདཱཝིམུཏྟིཾ པཱཔེཏྭཱ ཀཐེཏུཾ སཀྐོཏི, སོ ཨེཀནྟདྷམྨཀཐིཀོ. ཏེནཱཧ ‘‘དྷམྨཀཐིཀསྶ པུཙྪཱ ཀཐིཏཱ’’ཏི. དྭཱིཧཱིཏི དུཏིཡཏཏིཡནཡེཧི. ཏནྟི པུཙྪཾ. ཝིསེསེཏྭཱཏི ཝིསིཊྛཾ ཀཏྭཱ. ཡཐཱཔུཙྪིཏམཏྟམེཝ ཨཀཐེཏྭཱ ཨཔུཙྪིཏམྤི ཨཏྠཾ དསྶེནྟོ དྷམྨཱནུདྷམྨཔཊིཔཏྟིཾ ཨནུཔཱདཱཡ ཝིམུཏྟིསངྑཱཏཾ ཝིསེསཾ པཱཔེཏྭཱ. བྷགཝཱ ཧི ཨཔྤཾ ཡཱཙིཏོ བཧུཾ དེནྟོ ཨུལཱ༹རཔུརིསོ ཝིཡ དྷམྨཀཐིཀལཀྑཎཾ པུཙྪིཏོ པཊིཙྩསམུཔྤཱདམུཁེན ཏཉྩེཝ ཏཏོ ཙ ཨུཏྟརིཾ དྷམྨཱནུདྷམྨཔཊིཔཏྟིཾ ཨནུཔཱདཱཝིམུཏྟཉྩ ཝིསྶཛྫེསི. ཏཏྠ ‘‘ནིབྦིདཱཡ…པེ… དྷམྨཾ དེསེཏཱི’’ཏི ཨིམིནཱ དྷམྨདེསནཾ ཝཱསནཱབྷཱགིཡཾ ཀཏྭཱ དསྶེསི. ‘‘ནིརོདྷཱཡ པཊིཔནྣོ ཧོཏཱི’’ཏི ཨིམིནཱ ནིབྦེདྷབྷཱགིཡཾ, ‘‘ཨནུཔཱདཱཝིམུཏྟོ ཧོཏཱི’’ཏི ཨིམིནཱ དེསནཾ ཨསེཀྑབྷཱགིཡཾ ཀཏྭཱ དསྶེསི. ཏེནཱཧ ‘‘སེཀྑཱསེཀྑབྷཱུམིཡོ ནིདྡིཊྛཱ’’ཏི.

དྷམྨཀཐིཀསུཏྟཝཎྞནཱ ནིཊྛིཏཱ.

༧. ཨཙེལཀསྶཔསུཏྟཝཎྞནཱ

༡༧. ལིངྒེན ¶ ཨཙེལཀོཏི པབྦཛིཏལིངྒེན ཨཙེལཀོ. ཏེན ཨཙེལཀཙརཎེན ཨཙེལོ, ན ¶ ནིཙྩེལཏཱམཏྟེནཱཏི དསྶེཏི. ནཱམེནཱཏི གོཏྟནཱམེན ཀསྶཔོཏི. དེསེཏི པཝེདེཏི སཾསཡཝིགམནཾ ཨེཏེནཱཏི དེསོ, ནིཙྪཡཧེཏཱུཏི ཨཱཧ ‘‘ཀིཉྩིདེཝ དེས’’ནྟིཨཱདི. སོ ཧི སཾསཡཝིགམནཾ ཀརོཏཱིཏི ཀཱརཎཾ. ཨོཀཱསནྟི ཨཝསཾསནྡནཔདེསཾ. ཏེནཱཧ ‘‘ཁཎཾ ཀཱལ’’ནྟི. ཨནྟརགྷརཾ ཨནྟོནིཝེསནཾ. ཨནྟརེ གྷརཱནི ཨེཏསྶཱཏི ཨནྟརགྷརཾ, ཨནྟོགཱམོ. ཡདཱཀངྑསཱིཏི ཡཾ ཨཱཀངྑསི. ཨིཏི བྷགཝཱ སབྦཉྙུཔཝཱརཎཱཡ པཝཱརེཏི. ཏེནཱཧ ‘‘ཡཾ ཨིཙྪསཱི’’ཏི. ཡདཱཀངྑསཱིཏི ཡཾ ཨཱཀངྑསི, ཀསྶཔ, ཏིཀྑཏྟུཾ པཊིཀྑིཔནྟོཔི པུཙྪསི, ཡཾ ཨཱཀངྑསི, ཏམེཝ པུཙྪཱཏི ཨཏྠོ.

‘‘ཡཱཝཏཏིཡཾ པཊིཀྑིཔཱི’’ཏི ཝུཏྟཏྟཱ ‘‘ཏཏིཡམྤི ཁོ’’ཏིཨཱདིནཱ པཱཋེན བྷཝིཏབྦཾ. སོ པན ནཡཝསེན སཾཁིཏྟོཏི དཊྛབྦོ. ཡེན ཀཱརཎེན བྷགཝཱ ཨཙེལཀསྶ ཏིཀྑཏྟུཾ ཡཱཙཱཔེཏྭཱ ཙསྶ པཉྷཾ ཀཐེསི, ཏཾ དསྶེཏུཾ ‘‘ཀསྨཱ པནཱ’’ཏིཨཱདིམཱཧ. གཱརཝཛནནཏྠཾ ཡཱཝཏཏིཡཾ པཊིཀྑིཔི ཏཉྩ དྷམྨསྶ སུསྶཱུསཱཡ. དྷམྨགརུཀཱ ཧི བུདྡྷཱ བྷགཝནྟོ. སཏྟཱནཾ ཉཱཎཔརིཔཱཀཾ ཨཱགམཡམཱནོ ཡཱཝཏཏིཡཾ ཡཱཙཱཔེཏཱིཏི ཝིབྷཏྟིཝིཔརིཎཱམཝསེན སཱདྷཱརཎཏོ པདཾ ཡོཛེཏྭཱ པུན ‘‘ཨེཏྟཀེན ཀཱལེནཱ’’ཏི ཀསྶཔསྶ ཝསེན ཡོཛེཏབྦཾ.

མཱཏི པཊིསེདྷེ ནིཔཱཏོ. བྷཎཱིཏི པུནཝཙནཝསེན ཀིརིཡཱཔདཾ ཝདཏི. མཱ ཨེཝཾ བྷཎི, ཀཐེསཱིཏི ཨཏྠོ. ‘‘ཨིཏི བྷགཝཱ ཨཝོཙཱ’’ཏི པན སངྒཱིཏིཀཱརཝཙནཾ. སཡཾཀཏཾ དུཀྑནྟི པུརིསསྶ ཨུཔྤཛྫམཱནདུཀྑཾ, ཏེན ཀཏཾ ནཱམ ཏསྶ ཀཱརཎསྶ པུབྦེ ཏེནེཝ ཀམྨསྶ ཨུཔཙིཏཏྟཱཏི ཨཡཾ ནཡོ ཨནཝཛྫོ. དིཊྛིགཏིཀོ པན པཉྩཀྑནྡྷཝིནིམུཏྟཾ ནིཙྩཾ ཀཱརཀཝེདཀལཀྑཎཾ ཨཏྟཱནཾ པརིཀཔྤེཏྭཱ ཏསྶ ཝསེན ‘‘སཡཾཀཏཾ དུཀྑ’’ནྟི པུཙྪཏཱིཏི བྷགཝཱ ‘‘མཱ ཧེཝ’’ནྟི ཨཝོཙ, ཏེནཱཧ ‘‘སཡཾཀཏཾ དུཀྑནྟི ཝཏྟུཾ ན ཝཊྚཏཱི’’ཏིཨཱདི. ཨེཏྠ ཙ ཡདི བཱཧིརཀེཧི པརིཀཔྤིཏོ ཨཏྟཱ ནཱམ ཀོཙི ཨཏྠི, སོ ཙ ནིཙྩོ, ཏསྶ ནིབྦིཀཱརཏཱཡ, པུརིམརཱུཔཱཝིཛཧནཏོ ཀསྶཙི ཝིསེསཱདྷཱནསྶ ཀཱཏུཾ ཨསཀྐུཎེཡྻཏཱཡ ཨཧིཏཏོ ནིཝཏྟནཏྠཾ, ཧིཏེ ཙ ཝཏྟནཏྠཾ ཨུཔདེསོ ཙ ནིཔྤཡོཛནོ སིཡཱ ¶ ཨཏྟཝཱདིནོ. ཀཐཾ ཝཱ སོ ཨུཔདེསོ པཝཏྟཱིཡཏི? ཝིཀཱརཱབྷཱཝཏོ. ཨེཝཉྩ ཨཏྟནོ ཨཛཊཱཀཱསསྶ ཝིཡ དཱནཱདིཀིརིཡཱ ཧིཾསཱདིཀིརིཡཱ ཙ ན སམྦྷཝཏི, ཏཐཱ སུཁསྶ དུཀྑསྶ ཙ ཨནུབྷཝནབནྡྷོ ཨེཝ ཨཏྟཝཱདིནོ ན ཡུཛྫཏི ཀམྨབནྡྷཱབྷཱཝཏོ. ཛཱཏིཨཱདཱིནཉྩ ཨསམྦྷཝཏོ ཀུཏོ ཝིམོཀྑོ. ཨཐ པན ‘‘དྷམྨམཏྟཾ ཏསྶ ཨུཔྤཛྫཏི ཙེཝ ཝིནསྶཏི ཙ. ཡསྶ ཝསེནཱཡཾ ཀིརིཡཱཝོཧཱརོ’’ཏི ཝདེཡྻ, ཨེཝམྤི པུརིམརཱུཔཱཝིཛཧནེན ཨཝཊྛིཏསྶ ཨཏྟནོ དྷམྨམཏྟནྟི ན སཀྐཱ སམྦྷཱཝེཏུཾ. ཏེ ཝཱ པནསྶ དྷམྨཱ ཨཝཏྠཱབྷཱུཏཱ, ཏཏོ ཨཉྙེ ཝཱ སིཡུཾ ཨནཉྙེ ཝཱ. ཡདི ¶ ཨཉྙེ, ན ཏཱཧི ཏསྶ ཨུཔྤནྣཱཧིཔི ཀོཙི ཝིསེསོ ཨཏྠི. ཡོ ཧི ཀརོཏི པཊིསཾཝེདེཏི ཙཝཏི ཨུཔཔཛྫཏི ཙཱཏི ཨིཙྪིཏཾ, ཏསྨཱ ཏདཏྠོ ཨེཝ ཡཐཱཝུཏྟདོསོ. ཀིཉྩ དྷམྨཀཔྤནཱཔི ནིརཏྠིཀཱ སིཡཱ. ཨཐ ཨནཉྙེ, ཨུཔྤཱདཝིནཱསཝནྟཱིཧི ཨཝཏྠཱཧི ཨནཉྙསྶ ཨཏྟནོ ཏཱསཾ ཝིཡ ཨུཔྤཱདཝིནཱསསམྦྷཝཏོ ཀུཏོ ནིཙྩཏཱཝཀཱསོ. ཏཱསམྤི ཝཱ ཨཏྟནོ ཝིཡ ནིཙྩཏཱཔཏྟཱིཏི བནྡྷཝིམོཀྑཱནཾ ཨསམྦྷཝོ ཨེཝཱཏི ན ཡུཛྫཏེཝཱཡཾ ཨཏྟཝཱདོ. ཏེནཱཧ ‘‘ཨཏྟཱ ནཱམ ཀོཙི དུཀྑསྶ ཀཱརཀོ ནཏྠཱིཏི དཱིཔེཏཱི’’ཏི. པརཏོཏི ‘‘པརཾཀཏཾ དུཀྑ’’ནྟིཨཱདིཀེ པརསྨིཾ ཏིཝིདྷེཔི ནཡེ. ཨདྷིཙྩསམུཔྤནྣནྟི ཨདྷིཙྩ ཡདིཙྪཱཡ ཀིཉྩི ཀཱརཎཾ ཀསྶཙི ཝཱ པུབྦཾ ཝིནཱ སམུཔྤནྣཾ. ཏེནཱཧ ‘‘ཨཀཱརཎེན ཡདིཙྪཱཡ ཨུཔྤནྣ’’ནྟི. ཀསྨཱ ཨེཝམཱཧཱཏི ཨེཝཾ ཝཀྑམཱནོཏི ཨདྷིཔྤཱཡོ. ཨསྶཱཏི ཨཙེལསྶ. ཨཡནྟི བྷགཝནྟཾ སནྡྷཱཡ ཝདཏི. སོདྷེནྟོཏི སཡཾ ཝིསུདྡྷཾ ཀཏྭཱ པུཙྪིཏམཏྠཾ ཨེཝ ཨཏྟནོ པུཙྪཱཡ སུདྡྷིཾ དསྶེནྟོ. ལདྡྷིཡཱ ‘‘སཡཾཀཏཾ དུཀྑ’’ནྟི མིཙྪཱགཧཎསྶ པཊིསེདྷནཏྠཱཡ.

སོ ཀརོཏཱིཏི སོ ཀམྨཾ ཀརོཏི. སོ པཊིསཾཝེདཡཏཱིཏི ཀཱརཀཝེདཀཱནཾ ཨནཉྙཏྟདསྶནཔརཾ ཨེཏཾ, ན པན ཀམྨཀིརིཡཱཕལཱནཾ པཊིསཾཝེདནཱནཾ སམཱནཀཱལཏཱདསྶནཔརཾ. ཨིཏཱིཏི ནིདསྶནཏྠེ ནིཔཱཏོ. ཁོཏི ཨཝདྷཱརཎེ. ‘‘སོ ཨེཝཱ’’ཏི དསྶིཏོ. ཨནིཡཏཱདེསཱ ཧི ཨེཏེ ནིཔཱཏཱ. ཨཱདིཏོཏི བྷུམྨཏྠེ ནིསྶཀྐཝཙནནྟི ཨཱཧ ‘‘ཨཱདིམྷིཡེཝཱ’’ཏི. ‘‘སཡཾཀཏཾ དུཀྑ’’ནྟི ལདྡྷིཡཱ པགེཝ ‘‘སོ ཀརོཏི, སོ པཊིསཾཝེདཡཏཱི’’ཏི སཉྙཱཙིཏྟཝིཔལླཱསཱ བྷཝནྟི. སཉྙཱཝིཔལླཱསཏོ ཧི ཙིཏྟཝིཔལླཱསོ, ཙིཏྟཝིཔལླཱསཏོ དིཊྛིཝིཔལླཱསོ, ཏེནཱཧ ‘‘ཨེཝཾ སཏི པཙྪཱ སཡཾཀཏཾ དུཀྑནྟི ཨཡཾ ལདྡྷི ཧོཏཱི’’ཏི. ཨེཝཾ ¶ སཏི སཉྙཱཙིཏྟཝིཔལླཱསཱནཾ བྲཱུཧིཏོ མིཙྪཱབྷིནིཝེསོ, ཡདིདཾ ‘‘སཡཾཀཏཾ དུཀྑ’’ནྟི ལདྡྷི. ཏསྨཱ པཊིནིསྶཛྫེཏུཾ པཱཔཀཾ དིཊྛིགཏནྟི དསྶེཏི. ཏེནཱཧ བྷགཝཱ ‘‘སཡཾཀཏཾ…པེ… ཨེཏཾ པརེཏཱི’’ཏི. ཝཊྚདུཀྑཾ ཨདྷིཔྤེཏཾ ཨཝིསེསཏོ ཨཏྠཱིཏི ཙ ཝུཏྟཏྟཱ. སསྶཏཾ སསྶཏགཱཧཾ དཱིཔེཏི པརེསཾ པཀཱསེཏི, ཏཐཱབྷཱུཏོ ཙ སསྶཏཾ དལ༹ྷགྒཱཧཾ གཎྷཱཏཱིཏི. ཏསྶཱཏི དིཊྛིགཏིཀསྶ. ཏཾ ‘‘སཡཾཀཏཾ དུཀྑ’’ནྟི ཨེཝཾ པཝཏྟཾ ཝིཔརཱིཏདསྶནཾ. ཨེཏཾ སསྶཏགྒཧཎཾ. པརེཏི ཨུཔེཏི. ཏེནཱཧ ‘‘ཀཱརཀཉྩ…པེ… ཨཏྠོ’’ཏི. ཨེཀམེཝ གཎྷནྟནྟི སཏིཔི ཝཏྠུབྷེདེ ཨཡོནིསོ ཨུཔྤཛྫནེན ཨེཀམེཝ ཀཏྭཱ གཎྷནྟཾ.

ཨིདྷ ‘‘ཨཱདིམྷིཡེཝཱ’’ཏི པདེ. ‘‘པརཾཀཏཾ དུཀྑ’’ནྟི ལདྡྷིཡཱ པགེཝཱཏིཨཱདིནཱ ཧེཏྠ ཝུཏྟནཡཱནུསཱརེན ཨཏྠོ ཝེདིཏབྦོ. ཨཡཉྷེཏྠ ཡོཛནཱ – ‘‘པརཾཀཏཾ དུཀྑ’’ནྟི ལདྡྷིཡཱ པགེཝ ཨཉྙོ ཀརོཏི, ཨཉྙོ པཊིསཾཝེདཡཏཱིཏི སཉྙཱཙིཏྟཝིཔལླཱསཱ བྷཝནྟཱིཏི སབྦཾ ཧེཊྛཱ ཝུཏྟནཡེནེཝ ¶ ཡོཛེཏབྦཾ. ཨེཝཾ སཏཱིཏི ཨེཝཾ མུདུཀེ ཨུཙྪེདཝིཔལླཱསེ པཋམུཔྤནྣེ སཏི པཙྪཱ ‘‘པརཾཀཏཾ དུཀྑ’’ནྟི ཨཡཾ ལདྡྷི ཧོཏཱིཏི སམྦནྡྷོ. ཀཱརཀོཏི ཀམྨསྶ ཀཱརཀོ. ཏེན ཀཏནྟི ཀམྨཀཱརཀེན ཀཏཾ. ཀམྨུནཱ ཧི ཕལསྶ ཝོཧཱརོ ཨབྷེདོཔཙཱརཀཏྟཱ. ཨེཝནྟི དིཊྛིསཧགཏཱ ཝེདནཱ སཱཏསབྷཱཝཱ ཀིལེསཔརིལཱ༹ཧཱདིནཱ སཔརིསྶཡཱ སཨུཔཱཡཱསཱ, ཨེཝཾ. ‘‘པགེཝ ཨིཏརེ’’ཏི ཝུཏྟཝེདནཱཡ ཨབྷིཏུནྣསྶ ཝིདྡྷསྶ. ‘‘ཝུཏྟནཡེན ཡོཛེཏབྦ’’ནྟི ཝཏྭཱ ཏཾ ཡོཛནཾ དསྶེནྟོ ‘‘ཏཏྲཱཡ’’ནྟིཨཱདིམཱཧ. ཨུཙྪེདནྟི སཏོ སཏྟསྶ ཨུཙྪེདཾ ཝིནཱསཾ, ཝིབྷཝནྟི ཨཏྠོ. ཨསཏོ ཧི ཝིནཱསཱསམྦྷཝཏོ ཨཏྠིབྷཱཝནིབནྡྷནོ ཨུཙྪེདོ. ཡཐཱ ཧེཏུཕལབྷཱཝེན པཝཏྟམཱནཱནཾ སབྷཱཝདྷམྨཱནཾ སཏིཔི ཨེཀསནྟཱནཔརིཡཱཔནྣཱནཾ བྷིནྣསནྟཏིཔཏིཏེཧི ཝིསེསེ ཧེཏུཕལཱནཾ པརམཏྠཏོ ཨཝིནཱབྷཱཝཏྟཱ བྷིནྣསནྟཱནཔཏིཏཱནཾ ཝིཡ ཨཙྩནྟབྷེདསནྣིཊྛཱནེན ནཱནཏྟནཡསྶ མིཙྪཱགཧཎཾ ཨུཙྪེདཱབྷིནིཝེསསྶ ཀཱརཎཾ. ཨེཝཾ ཧེཏུཕལབྷཱུཏཱནཾ དྷམྨཱནཾ ཝིཛྫམཱནེཔི སབྷཱཝབྷེདེ ཨེཀསནྟཏིཔརིཡཱཔནྣཏཱཡ ཨེཀཏྟནཡེན ཨཙྩནྟཱབྷེདགཧཎམྤི ཀཱརཎམེཝཱཏི དསྶེཏུཾ ‘‘སཏྟསྶཱ’’ཏི ཝུཏྟཾ པཱལི༹ཡཾ. སནྟཱནཝསེན ཧི ཝཏྟམཱནེསུ ཁནྡྷེསུ གྷནཝིནིབྦྷོགཱབྷཱཝེན ཨེཀཏྟགཧཎནིབནྡྷནོ སཏྟགྒཱཧོ, སཏྟསྶ ཙ ཨཏྠིབྷཱཝགྒཱཧནིབནྡྷནོ ཨུཙྪེདགྒཱཧོ, ཡཱཝཱཡཾ ཨཏྟཱ ན ¶ ཨུཙྪིཛྫཏི, ཏཱཝཱཡཾ ཝིཛྫཏིཡེཝཱཏི གཧཎཏོ ནིརུདཡཝིནཱསོ ཨིདྷ ཨུཙྪེདོཏི ཨདྷིཔྤེཏོཏི ‘‘ཨུཙྪེད’’ནྟི ཝུཏྟཾ. ཝིསེསེན ནཱསོ ཝིནཱསོ, ཨབྷཱཝོ. སོ པན མཾསཙཀྑུཔཉྙཱཙཀྑཱུནཾ དསྶནཔཐཱཏིཀྐམོཡེཝ ཧོཏཱིཏི ཝུཏྟཾ ‘‘ཨདསྶན’’ནྟི. ཨདསྶནེ ཧི ནཱསསདྡོ ལོཀེ ནིརུལ༹ྷོཏི. སབྷཱཝཝིགམོ སབྷཱཝཱཔགམོ ཝིབྷཝོ. ཡོ ཧི ནིརུདཡཝིནཱསེན ཨུཙྪིཛྫཏི, ན སོ ཨཏྟནོ སབྷཱཝེན ཏིཊྛཏི.

ཨེཏེ ཏེཏི ཝཱ ཡེ ཨིམེ ཏཡཱ ‘‘སཡཾཀཏཾ དུཀྑ’’ནྟི ཙ པུཊྛེན མཡཱ ‘‘སོ ཀརོཏི, སོ པཊིསཾཝེདཡཏཱི’’ཏིཨཱདིནཱ, ‘‘ཨཉྙོ ཀརོཏི, ཨཉྙོ པཊིསཾཝེདཡཏཱི’’ཏིཨཱདིནཱ ཙ པཊིཀྑིཏྟཱ སསྶཏུཙྪེདསངྑཱཏཱ ཨནྟཱ, ཏེ ཨུབྷོ ཨནྟེཏི ཡོཛནཱ. ཨཐ ཝཱ ཨེཏེ ཏེཏི ཡཏྠ པུཐཱུ ཨཉྙཏིཏྠིཡཱ ཨནུཔཙིཏཉཱཎསམྦྷཱརཏཱཡ པརམགམྦྷཱིརཾ སཎྷཾ སུཁུམཾ སུཉྙཏཾ ཨཔྤཛཱནནྟཱ སསྶཏུཙྪེདེ ནིམུགྒཱ སཱིསཾ ཨུཀྑིཔིཏུཾ ན ཝིསཧནྟི, ཨེཏེ ཏེ ཨུབྷོ ཨནྟེ ཨནུཔགམྨཱཏི ཡོཛནཱ. དེསེཏཱིཏི པཋམཾ ཏཱཝ ཨནཉྙསཱདྷཱརཎེ པཊིཔཏྟིདྷམྨེ ཉཱཎཱནུབྷཱཝེན མཛ྄ཛྷིམཱཡ པཊིཔདཱཡ ཋིཏོ, ཀརུཎཱནུབྷཱཝེན དེསནཱདྷམྨེ མཛ྄ཛྷིམཱཡ པཊིཔདཱཡ ཋིཏོ དྷམྨཾ དེསེཏི. ཨེཏྠ ཧཱིཏི ཧི-སདྡོ ཧེཏུཨཏྠོ. ཡསྨཱ ཀཱརཎཏོ…པེ… ནིདྡིཊྛོ, ཏསྨཱ མཛ྄ཛྷིམཱཡ པཊིཔདཱཡ ཋིཏོ དྷམྨཾ དེསེཏཱིཏི ཡོཛནཱ. ཀཱརཎཏོ ཕལཾ དཱིཔིཏནྟི ཡོཛནཱ, ཨབྷིདྷེཡྻཱནུརཱུཔཉྷི ལིངྒཝཙནཱནི ཧོནྟི. ཨསྶཱཏི ཕལསྶ. ན ཀོཙི ཀཱརཀོ ཝཱ ཝེདཀོ ཝཱ ནིདྡིཊྛོ, ཨཉྙདཏྠུ པཊིཀྑིཏྟོ ཧེཏུཕལམཏྟཏཱདསྶནཏོ ཀེཝལཾ དུཀྑཀྑནྡྷགཧཎཏོཏི. ཨེཏྟཱཝཏཱཏི ‘‘ཨེཏེ ¶ ཏེ, ཀསྶཔ…པེ… དུཀྑཀྑནྡྷསྶ ནིརོདྷོ ཧོཏཱི’’ཏི ཨེཏྟཀེན ཏཱཝ པདེན. སེསཔཉྷཱཏི ‘‘སཡཾཀཏཉྩ པརཾཀཏཉྩ དུཀྑ’’ནྟིཨཱདིཀཱ སེསཱ ཙཏྟཱརོ པཉྷཱ. ཨཊྛཀཐཱཡཾ པན ‘‘ཀིཾ ནུ ཁོ, བྷོ གོཏམ, ནཏྠི དུཀྑ’’ནྟི པཉྷོ པཱལི༹ཡཾ སརཱུཔེནེཝ པཊིཀྑིཏྟོཏི ན ཨུདྡྷཏོ. པཊིསེདྷིཏཱ ཧོནྟཱིཏི ཏཏིཡཔཉྷོ, ཏཱཝ པཋམདུཏིཡཔཉྷཔཊིཀྑེཔེནེཝ པཊིཀྑིཏྟོ, སོ ཧི པཉྷོ ཝིསུཾ ཝིསུཾ པཊིཀྑེཔེན ཨེཀཛ྄ཛྷཾ པཊིཀྑེཔེན ཙ. ཏེནཱཧ ‘‘ཨུབྷོ…པེ… པཊིཀྑིཏྟོ’’ཏི. ཨེཏྠ ཙ ཡསྶ ཨཏྟཱ ཀཱརཀོ ཝེདཀོ ཝཱ ཨིཙྪིཏོ, ཏེན ཝིཔརིཎཱམདྷམྨོ ཨཏྟཱ ཨནུཉྙཱཏོ ཧོཏི. ཏཐཱ ཙ སཏི ཨནུཔུབྦདྷམྨཔྤཝཏྟིཡཱ རཱུཔཱདིདྷམྨཱནཾ ཝིཡ ¶ , སུཁཱདིདྷམྨཱནཾ ཝིཡ ཙསྶ པཙྩཡཱཡཏྟཝུཏྟིཏཱཡ ཨུཔྤཱདཝནྟཏཱ ཨཱཔཛྫཏི. ཨུཔྤཱདེ ཙ སཏི ཨཝསྶཾབྷཱཝཱི ནིརོདྷོཏི ཨནཝཀཱསཱ ནིཙྩཏཱཏི. ཏསྶ ‘‘སཡཾཀཏ’’ནྟི པཋམཔཉྷཔཊིཀྑེཔོ པཙྪཱ ཙེ ཨཏྟནོ ནིརུལ༹ྷསྶ སམུདཡོ ཧོཏཱིཏི པུབྦེ ཝིཡ ཨནེན བྷཝིཏབྦཾ, པུབྦེ ཝིཡ ཝཱ པཙྪཱཔི. སེསཔཉྷཱཏི ཏཏིཡཔཉྷཱདཡོ. ཏཏིཡཔཉྷོ པཊིཀྑིཏྟོཏི ཨེཝཉྩ ཏཏིཡཔཉྷོ པཊིཀྑིཏྟོ ཝེདིཏབྦོ – ‘‘ཨཝིཛྫཱཔཙྩཡཱ སངྑཱརཱ’’ཏིཨཱདིནཱ སཏཏཾ སམིཏཾ པཙྩཡཱཡཏྟསྶ དཱིཔནེན དུཀྑསྶ ཨདྷིཙྩསམུཔྤནྣཏཱ པཊིཀྑིཏྟཱ, ཏཏོ ཨེཝ ཏསྶ ཨཛཱནནཉྩ པཊིཀྑིཏྟཾ. ཏེནཱཧ བྷགཝཱ ‘‘ཨེཝམེཏསྶ ཀེཝལསྶ དུཀྑཀྑནྡྷསྶ སམུདཡོ ཧོཏཱི’’ཏི (མ. ནི. ༣.༡༢༦; སཾ. ནི. ༢.༣༩-༤༠; མཧཱཝ. ༡; ཨུདཱ. ༡).

ཡཾ པརིཝཱསཾ སམཱདིཡིཏྭཱ པརིཝསཏཱིཏི ཡོཛནཱ. ཝཙནསིལིཊྛཏཱཝསེནཱཏི ‘‘བྷགཝཏོ སནྟིཀེ པབྦཛྫཾ ལབྷེཡྻཾ ཨུཔསམྤད’’ནྟི ཡཱཙནྟེན ཏེན ཝུཏྟཝཙནསིལིཊྛཏཱཝསེན. གཱམཔྤཝེསནཱདཱིནཱིཏི ཨཱདི-སདྡེན ནཱཏིདིཝཱཔཊིཀྐམནཾ, ནཝེསིཡཱདིགོཙརཏཱ, སབྲཧྨཙཱརཱིནཾ ཀིཙྩེསུ དཀྑཏཱདི, ཨུདྡེསཱདཱིསུ ཏིབྦཙྪནྡཏཱ, ཏིཏྠིཡཱནཾ ཨཝཎྞབྷཎནེ ཨཏྟམནཏཱ, བུདྡྷཱདཱིནཾ ཨཝཎྞབྷཎནེ ཨནཏྟམནཏཱ, ཏིཏྠིཡཱནཾ ཝཎྞབྷཎནེ ཨནཏྟམནཏཱ, བུདྡྷཱདཱིནཾ ཝཎྞབྷཎནེ ཨཏྟམནཏཱཏི (མཧཱཝ. ༨༧) ཨིམེསཾ སངྒཧོ. ཨཊྛ ཝཏྟཱནཱིཏི ཨིམཱནི ཨཊྛ ཏིཏྠིཡཝཏྟཱནི པཱུརེནྟེན. ཨེཏྠ ཙ ནཱཏིཀཱལེན གཱམཔྤཝེསནཱ ཏཏྠ ཝིསུདྡྷཀཱཡཝཙཱིསམཱཙཱརེན པིཎྜཱཡ ཙརིཏྭཱ ནཱཏིདིཝཱཔཊིཀྐམནནྟི ཨིདམེཀཾ ཝཏྟཾ.

ཨཡམེཏྠ པཱཋོཏི ཨེཏསྨིཾ ཀསྶཔསུཏྟེ ཨཡཾ པཱཋོ. ཨཉྙཏྠཱཏི སཱིཧནཱདསུཏྟཱདཱིསུ (དཱི. ནི. ༡.༤༠༢-༤༠༣). གྷཾསིཏྭཱ ཀོཊྚེཏྭཱཏི ཡཐཱ སུཝཎྞཾ ནིགྷཾསིཏྭཱ ཨདྷིཀརཎིཡཱ ཀོཊྚེཏྭཱ ནིདྡོསམེཝ གཡ྄ཧཏི, ཨེཝཾ པརིཝཱསཝཏྟཙརཎེན གྷཾསིཏྭཱ སུདྡྷབྷཱཝཝཱིམཾསནེན ཀོཊྚེཏྭཱ སུདྡྷོ ཨེཝ ཨཉྙཏིཏྠིཡཔུབྦོ ཨིདྷ གཡ྄ཧཏི. ཏིབྦཙྪནྡཏནྟི སཱསནཾ ཨནུཔཝིསིཏྭཱ བྲཧྨཙརིཡཝཱསེ ཏིབྦཙྪནྡཏཾ དལ༹ྷཏརཱབྷིརུཙིཏཾ. ཨཉྙཏརཾ བྷིཀྑུཾ ཨཱམནྟེསཱིཏི ནཱམགོཏྟེན ཨཔཱཀཊཾ ¶ ཨེཀཾ བྷིཀྑུཾ ཨཱཎཱཔེསི ཨེཧིབྷིཀྑུཨུཔསམྤདཱཡ ཨུཔནིསྶཡཱབྷཱཝཏོ. གཎེ ནིསཱིདིཏྭཱཏི བྷིཀྑཱུ ཨཏྟནོ སནྟིཀེ པཏྟཱསནཝསེན གཎེ ནིསཱིདིཏྭཱ.

ཨཙེལཀསྶཔསུཏྟཝཎྞནཱ ནིཊྛིཏཱ.

༨. ཏིམྦརུཀསུཏྟཝཎྞནཱ

༡༨. ཡསྨཱ ¶ ཏིམྦརུཀོ ‘‘ཝེདནཱ ཨཏྟཱ. ཨཏྟཱཝ ཝེདཡཏཱི’’ཏི ཨེཝཾལདྡྷིཀོ, ཏསྨཱ ཏཱཡ ལདྡྷིཡཱ ‘‘སཡཾཀཏཾ སུཁདུཀྑ’’ནྟི ཝདཏི, ཏཾ པཊིསཾཧརིཏུཾ བྷགཝཱ ‘‘སཱ ཝེདནཱ’’ཏིཨཱདིཾ ཨཝོཙ. ཏེནཱཧ ‘‘སཱ ཝེདནཱཏིཨཱདི སཡཾཀཏཾ སུཁདུཀྑནྟི ལདྡྷིཡཱ ནིསེདྷནཏྠཾ ཝུཏྟ’’ནྟི. ཨེཏྠཱཔཱིཏི ཨིམསྨིམྤི སུཏྟེ. ཏཏྲཱཏི ཡཾ ཝུཏྟཾ ‘‘སཱ ཝེདནཱ…པེ… སུཁདུཀྑ’’ནྟི, ཏསྨིཾ པཱཋེ. ཨཱདིམྷིཡེཝཱཏི ཨེཏྠ བྷུམྨཝཙནེན ‘‘ཨཱདིཏོ’’ཏི ཏོ-སདྡོ ན ནིསྶཀྐཝཙནེ. ཨེཝ-ཀཱརེན ཁོ-སདྡོ ཨཝདྷཱརཎེཏི དསྶེཏི. ཡཾ པནེཏྠ ཝཏྟབྦཾ, ཏཾ ཨནནྟརསུཏྟེ ཝུཏྟམེཝ. ཏཏྠ པན ‘‘ཝེདནཱཏོ ཨཉྙོ ཨཏྟཱ, ཝེདནཱཡ ཀཱརཀོ’’ཏི ལདྡྷིཀསྶ དིཊྛིགཏིཀསྶ ཝཱདོ པཊིཀྑིཏྟོ, ཨིདྷ ‘‘ཝེདནཱ ཨཏྟཱ’’ཏི ཨེཝཾལདྡྷིཀསྶཱཏི ཨཡམེཝ ཝིསེསོ. ཏེནཱཧ ‘‘ཨེཝཉྷི སཏི ཝེདནཱཡ ཨེཝ ཝེདནཱ ཀཏཱ ཧོཏཱི’’ཏིཨཱདི. ཨིམིསྶཱཏི ཡཱཡ ཝེདནཱཡ སུཁདུཀྑཾ ཀཏཾ, ཨིམིསྶཱ. པུབྦེཔཱིཏི སསྶཏཱཀཱརཏོ པུབྦེཔི. པུརིམཉྷི ཨཏྠནྟི ཨནནྟརསུཏྟེ ཝུཏྟཾ ཨཏྠཾ. ཨཊྛཀཐཱཡནྟི པོརཱཎཊྛཀཐཱཡཾ. ཏནྟི པུརིམསུཏྟེ ཝུཏྟམཏྠཾ. ཨསྶཱཏི ཨིམསྶ སུཏྟསྶ. ཡསྨཱ ཏིམྦརུཀོ ‘‘ཝེདནཱཝ ཨཏྟཱ’’ཏི གཎྷཱཏི, ཏསྨཱ ཝུཏྟཾ ‘‘ཨཧཾ སཱ ཝེདནཱ…པེ… ན ཝདཱམཱི’’ཏི.

ཨཉྙཱ ཝེདནཱཏིཨཱདཱིསུཔི ཡཾ ཝཏྟབྦཾ, ཏཾ ཨནནྟརསུཏྟེ ཝུཏྟནཡམེཝ. ཀཱརཀཝེདནཱཏི ཀཏྟུབྷཱུཏཝེདནཱ. ཝེདནཱསུཁདུཀྑནྟི ཝེདནཱབྷཱུཏསུཁདུཀྑཾ ཀཐིཏཾ, ན ཝཊྚསུཁདུཀྑཾ. ‘‘ཝིཔཱཀསུཁདུཀྑམེཝ ཝཊྚཏཱི’’ཏི ཝུཏྟཾ ‘‘སཡཾཀཏཾ སུཁཾ དུཀྑ’’ནྟིཨཱདིཝཙནཏོ.

ཏིམྦརུཀསུཏྟཝཎྞནཱ ནིཊྛིཏཱ.

༩. བཱལཔཎྜིཏསུཏྟཝཎྞནཱ

༡༩. ཨཝིཛྫཱ ནཱིཝརཎཱ བྷཝཱདི-ཨཱདཱིནཝསྶ ནིཝཱརིཏཔཊིཙྪཱདིཀཱ ཨེཏསྶཱཏི ཨཝིཛྫཱནཱིཝརཎོ, ཨཝིཛྫཱཡ ནིཝུཏོཏི ཨཱཧ ‘‘ཨཝིཛྫཱཡ ནིཝཱརིཏསྶཱ’’ཏི. ཨཡཾ ཀཱཡོཏི བཱལསྶ ཨཔྤཧཱིནཀིལེསསྶ པཙྩུཔྤནྣཾ ཨཏྟབྷཱཝཾ རཀྑཾ ཀཏྭཱ ཨཝིཛྫཱཡ པཊིཙྪཱདིཏཱདཱིནཝེ ཨཡཱཐཱཝདསྶནཝསེན ¶ ཏཎྷཱཡ པཊིལདྡྷཙིཏྟསྶ ཏཾཏཾབྷཝཱུཔགཱ སངྑཱརཱ སངྑརཱིཡནྟི. ཏེཧི ¶ ཙ ཨཏྟབྷཱཝསྶ ཨབྷིནིབྦཏྟི, ཏསྨཱ ཨཡཉྩ ཨཝིཛྫཱཡ ཀཱཡོ ནིབྦཏྟོཏི. ཨསྶཱཏི བཱལསྶ. ཨཡཾ ཨཏྠོཏི ‘‘ཨཡཾ ཀཱཡོ ནཱམརཱུཔནྟི ཙ ཝུཏྟོ’’ཏི ཨཏྠོ དཱིཔེཏབྦོ ཨུཔཱདཱནཀྑནྡྷསལཱ༹ཡཏནསངྒཧཏོ ཏེསཾ དྷམྨཱནཾ. ཨེཝམེཏཾ དྭཡནྟི ཨེཝཾ ཨཝིཛྫཱཡ ནིཝཱརིཏཏྟཱ, ཏཎྷཱཡ ཙ སཾཡུཏྟཏྟཱ ཨེཝཾ སཔརསནྟཱནགཏསཝིཉྙཱཎཀཀཱཡསངྑཱཏཾ དྭཡཾ ཧོཏི. ཨཉྙཏྠཱཏི སུཏྟནྟརེསུ. ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎཾ, ཏིཎྞཾ སངྒཏི ཕསྶོ’’ཏིཨཱདིནཱ (མ. ནི. ༡.༢༠༤, ༤༠༠; ༣.༤༢༡, ༤༢༥-༤༢༦; སཾ. ནི. ༢.༤༣-༤༥; ༤.༦༠-༦༡; ཀཐཱ. ༤༦༥, ༤༦༧) ཨཛ྄ཛྷཏྟིཀབཱཧིརཱཡཏནཱནི བྷིནྡིཏྭཱ ཙཀྑུརཱུཔཱདིདྭཡཱནི པཊིཙྩ ཙཀྑུསམྥསྶཱདཡོ ཝུཏྟཱ, ཨིདྷ པན ཨབྷིནྡིཏྭཱ ཚ ཨཛ྄ཛྷཏྟིཀབཱཧིརཱཡཏནཱནི པཊིཙྩ ཙཀྑུསམྥསྶཱདཡོ ཝུཏྟཱ ‘‘དྭཡཾ པཊིཙྩ ཕསྶོ’’ཏི, ཏསྨཱ མཧཱདྭཡཾ ནཱམ ཀིརེཏཾ ཨནཝསེསཏོ ཨཛ྄ཛྷཏྟིཀབཱཧིརཱཡཏནཱནཾ གཧིཏཏྟཱ. ཨཛ྄ཛྷཏྟིཀབཱཧིརཱནི ཨཱཡཏནཱནཱིཏི ཨེཏྠཱཔི ཧི སལཱ༹ཡཏནཱནི སངྒཧིཏཱནེཝ. ཕསྶཀཱརཎཱནཱིཏི ཕསྶཔཝཏྟིཡཱ པཙྩཡཱནི. ཡེཧཱིཏི ཧེཏུདསྶནམཏྟནྟི ཨཱཧ ‘‘ཡེཧི ཀཱརཎབྷཱུཏེཧཱི’’ཏི. ཕསྶོ ཨེཝ ཕུསནཀིཙྩོ, ན ཕསྶཱཡཏནཱནཱིཏི ཝུཏྟཾ ‘‘ཕསྶེན ཕུཊྛོ’’ཏི. པརིཔུཎྞཝསེནཱཏི ཨཝེཀལླཝསེན. ཨཔརིཔུཎྞཱཡཏནཱནཾ ཧཱིནཱནི ཕསྶསྶ ཀཱརཎཱནི ཧོནྟི, ཏེསཾ ཝིཡཱཏི ‘‘ཨེཏེསཾ ཝཱ ཨཉྙཏརེནཱ’’ཏི ཝུཏྟཾ. ཀཱཡནིབྦཏྟནཱདིམྷཱིཏི སཝིཉྙཱཎཀསྶ ཀཱཡསྶ ནིབྦཏྟནཾ ཀཱཡནིབྦཏྟནཾ, ཀཱཡོ ཝཱ ནིབྦཏྟཏི ཨེཏེནཱཏི ཀཱཡནིབྦཏྟནཾ, ཀིལེསཱབྷིསངྑཱརཱ. ཨཱདིསདྡེན ཕསྶསལཱ༹ཡཏནཱདིསངྒཧོ. ཨདྷིཀཾ པཡསཏི པཡུཉྫཏི ཨེཏེནཱཏི ཨདྷིཔྤཡཱསོ, ཝིསེསཀཱརཎནྟི ཨཱཧ ‘‘ཨདྷིཀཔཡོགོ’’ཏི.

བྷགཝཱ ཨམྷཱཀཾ ཨུཔྤཱདཀབྷཱཝེན མཱུལབྷཱཝེན བྷགཝཾམཱུལཀཱ. ཨིམེ དྷམྨཱཏི ཨིམེ ཀཱརཎདྷམྨཱ. ཡེཧི མཡཾ བཱལཔཎྜིཏཱནཾ སམཱནེཔི ཀཱཡནིབྦཏྟནཱདིམྷི ཝིསེསཾ ཛཱནེཡྻཱམ, ཏེནཱཧ ‘‘པུབྦེ ཀསྶཔསམྨཱསམྦུདྡྷེན ཨུཔྤཱདིཏཱ’’ཏིཨཱདི. ཨཱཛཱནཱམཱཏི ཨབྷིམུཁཾ པཙྩཀྑཏོ ཛཱནཱམ. པཊིཝིཛ྄ཛྷཱམཱཏི ཏསྶེཝ ཝེཝཙནཾ, ཨདྷིགཙྪཱམཱཏི ཨཏྠོ. ནེཏཱཏི ཨམྷཱཀཾ སནྟཱནེ པཱཔེཏཱ. ཝིནེཏཱཏི ཡཐཱ ཨལམརིཡཉཱཎདསྶནཝིསེསོ ཧོཏི, ཨེཝཾ ཝིསེསཏོ ནེཏཱ, ཏདངྒཝིནཡཱདིཝསེན ཝཱ ཝིནེཏཱ. ཨནུནེཏཱཏི ཨནུརཱུཔཾ ནེཏཱ. ཨནྟརནྟརཱ ཡཐཱདྷམྨཔཉྙཏྟིཡཱ པཉྙཱཔིཏཱནཾ དྷམྨཱནཾ ཨནུརཱུཔཏོ དསྶནཾ ཧོཏཱིཏི ཨཱཧ ‘‘ཡཐཱསབྷཱཝཏོ ¶ …པེ… དསྶེཏཱ’’ཏི. ཨཱཔཱཐཾ ཨུཔགཙྪནྟཱནཾ བྷགཝཱ པཊིསརཎཾ སམོསརཎཊྛཱནནྟི བྷགཝཾཔཊིསརཎཱ དྷམྨཱ. ཏེནཱཧ ‘‘ཙཏུབྷཱུམཀདྷམྨཱ’’ཏིཨཱདི. པཊིསརཏི པཊིཝིཛ྄ཛྷཏཱིཏི པཊིསརཎཾ, ཏསྨཱ པཊིཝིཛ྄ཛྷནཝསེན བྷགཝཱ པཊིསརཎཾ ཨེཏེསནྟི བྷགཝཾཔཊིསརཎཱ. ཏེནཱཧ ‘‘ཨཔི ཙཱ’’ཏིཨཱདི. ཕསྶོ ཨཱགཙྪཏཱིཏི ¶ པཊིཝིཛ྄ཛྷནཀཝསེན ཕསྶོ ཉཱཎསྶ ཨཱཔཱཐཾ ཨཱགཙྪཏི, ཨཱཔཱཐཾ ཨཱགཙྪནྟོཡེཝ སོ ཨཏྠཏོ ‘‘ཨཧཾ ཀིནྣཱམོ’’ཏི ནཱམཾ པུཙྪནྟོ ཝིཡ, བྷགཝཱ ཙསྶ ནཱམཾ ཀརོནྟོ ཝིཡ ཧོཏཱིཏི ཝུཏྟཾ ‘‘ཨཧཾ བྷགཝཱ’’ཏིཨཱདི. ཨུཔཊྛཱཏཱུཏི ཉཱཎསྶ པཙྩུཔཊྛཱཏུ. བྷགཝནྟཾཡེཝ པཊིབྷཱཏཱུཏི བྷགཝཏོ ཨེཝ བྷཱགོ ཧོཏུ, བྷགཝཱཝ ནཾ ཨཏྟནོ བྷཱགཾ ཀཏྭཱ ཝིསྶཛྫེཏཱུཏི ཨཏྠོ, བྷགཝཏོ བྷཱགོ ཡདིདཾ དྷམྨསྶ ཨཀྑཱནཾ, ཨམྷཱཀཾ པན སཝནཾ བྷཱགོཏི ཨཡམེཏྠ ཨདྷིཔྤཱཡོ. ཨེཝཉྷི སདྡལཀྑཎེན སམེཏི. ཀེཙི པན པཊིབྷཱཏཱུཏི ཨཏྠཾ ཝདནྟི ཉཱཎེན དིསྶཏུ དེསཱིཡཏཱུཏི ཝཱ ཨཏྠོ. ཏེནཱཧ ‘‘ཏུམྷེཡེཝ ནོ ཀཐེཏྭཱ དེཐཱཏི ཨཏྠོ’’ཏི.

བཱལསྶ པཎྜིཏསྶ ཙ ཀཱཡསྶ ནིབྦཏྟིཡཱ པཙྩཡབྷཱུཏཱ ཨཝིཛྫཱ ཙ ཏཎྷཱ ཙ. ཏེནཱཧ ‘‘ཀམྨཾ…པེ… ནིརུདྡྷཱ’’ཏི. ཛཝཱཔེཏྭཱཏི གཧིཏཛཝནཾ ཀཏྭཱ, ཡཐཱ པཊིསནྡྷིཾ ཨཱཀཌྜྷིཏུཾ སམཏྠཾ ཧོཏི, ཨེཝཾ ཀཏྭཱ. ཡདི ནིརུདྡྷཱ, ཀཐཾ ཨཔྤཧཱིནཱཏི ཝུཏྟནྟི ཨཱཧ ‘‘ཡཐཱ པནཱ’’ཏིཨཱདི. བྷཝཏི ཧི ཏཾསདིསེཔི ཏབྦོཧཱརོ ཡཐཱ ‘‘སཱ ཨེཝ ཏིཏྟིརཱི, ཏཱནེཝ ཨོསདྷཱནི, ཏསྶེཝ ཀམྨསྶ ཝིཔཱཀཱཝསེསེནཱ’’ཏི ཙ. དུཀྑཀྑཡཱཡཱཏི ཏདཏྠཝིསེསནཏྠནྟི ཨཱཧ ‘‘ཁཡཏྠཱཡཱ’’ཏི. པཊིསནྡྷིཀཱཡནྟི པཊིསནྡྷིགཧཎཔུབྦཀཾ ཀཱཡཾ. པཱལི༹ཡཾ ‘‘བཱལེནཱ’’ཏི ཀརཎཝཙནཾ ནིསྶཀྐེཏི ཨཱཧ ‘‘བཱལཏོ’’ཏི. བྷཱཝིནཱ སཧ པཊིསནྡྷིནཱ སཔྤཊིསནྡྷིཀོ. ཡོ པན ཨེཀནྟཏོ ཏེནཏྟབྷཱཝེན ཨརཧཏྟཾ པཏྟུཾ བྷབྦོ, སོ བྷཱཝིནཱ པཊིསནྡྷིནཱ ‘‘ཨཔྤཊིསནྡྷིཀོ’’ཏི, ཏཏོ ཝིསེསནཏྠཾ ‘‘སཔྤཊིསནྡྷིཀོ’’ཏི ཝུཏྟཾ. ཀིཉྩཱཔི ཝུཏྟཾ, སོ ཙ ཡཱཝ ཨརིཡབྷཱུམིཾ ན ཨོཀྐམཏི, ཏཱཝ བཱལདྷམྨསམངྒཱི ཨེཝཱཏི ཀཏྭཱ ‘‘སབྦོཔི པུཐུཛྫནོ བཱལོ’’ཏི ཝུཏྟཾ. ཏཐཱ ཧི ‘‘ཨཔྤཊིསནྡྷིཀོ ཁཱིཎཱསཝོ པཎྜིཏོ’’ཏི ཁཱིཎཱསཝ-སདྡེན ཨཔྤཊིསནྡྷིཀོ ཝིསེསིཏོ. ཡདི ཨེཝཾ སེཀྑཱ ཀཐནྟི ཨཱཧ ‘‘སོཏཱཔནྣཱ’’ཏིཨཱདི. ཏེ ཧི སིཁཱཔཏྟཔཎྜིཙྩབྷཱཝལཀྑཎཱབྷཱཝཏོ པཎྜིཏཱཏི ན ཝཏྟབྦཱ ཁཱིཎཱསཝཱ ཝིཡ, བལཝཏརཱནཾ ¶ པན བཱལདྷམྨཱནཾ པཧཱིནཏྟཱ བཱལཱཏིཔི ན ཝཏྟབྦཱ པུཐུཛྫནཱ ཝིཡ. བྷཛིཡམཱནཱ པན ཙཏུསཙྩསམྤཊིཝེདྷཾ ཨུཔཱདཱཡ པཎྜིཏཔཀྑཾ བྷཛནྟི, ན བཱལཔཀྑཾ ཝུཏྟཀཱརཎེནཱཏི.

བཱལཔཎྜིཏསུཏྟཝཎྞནཱ ནིཊྛིཏཱ.

༡༠. པཙྩཡསུཏྟཝཎྞནཱ

༢༠. སབྦམྤི སངྑཏཾ ཨཔྤཊིཙྩ ཨུཔྤནྣཾ ནཱམ ནཏྠཱིཏི པཙྩཡདྷམྨོཔི ཨཏྟནོ པཙྩཡདྷམྨཾ ཨུཔཱདཱཡ པཙྩཡུཔྤནྣོ, ཏཐཱ པཙྩཡུཔྤནྣདྷམྨོཔི ཨཏྟནོ པཙྩཡུཔྤནྣཾ ཨུཔཱདཱཡ པཙྩཡདྷམྨོཏི ཡཐཱརཧཾ དྷམྨཱནཾ པཙྩཡཔཙྩཡུཔྤནྣཏཱ. ཡེསཾ ཝིནེཡྻཱནཾ པཊིཙྩསམུཔྤཱདདེསནཱཡེཝ སུབོདྷཏོ ¶ ཨུཔཊྛཱཏི, ཏེསཾ ཝསེན སུཊྛུ ཝིབྷཱགཾ ཀཏྭཱ པཊིཙྩསམུཔྤཱདོ དེསིཏོ. ཡེསཾ པན ཝིནེཡྻཱནཾ ཏདུབྷཡསྨིཾ ཝིབྷཛྫ སུཏེ ཨེཝ དྷམྨཱབྷིསམཡོ ཧོཏི, ཏེ སནྡྷཱཡ བྷགཝཱ ཏདུབྷཡཾ ཝིབྷཛྫ དསྶེནྟོ ‘‘པཊིཙྩསམུཔྤཱདཉྩ ཝོ, བྷིཀྑཝེ, དེསེསྶཱམི པཊིཙྩསམུཔྤནྣེ ཙ དྷམྨེ’’ཏི ཨིམཾ དེསནཾ ཨཱརབྷཱིཏི ཨིམམཏྠཾ ཝིབྷཱཝེནྟོ ‘‘སཏྠཱ ཨིམསྨིཾ སུཏྟེ’’ཏིཨཱདིམཱཧ. པཙྩཡསྶ བྷཱཝོ པཙྩཡཏྟཾ, པཙྩཡནིབྦཏྟཏཱ. ཨསབྷཱཝདྷམྨེ ན ལབྦྷཏཱིཏི ‘‘སབྷཱཝདྷམྨེ’’ཏི ཝུཏྟཾ. ནནུ ཙ ཛཱཏི ཛརཱ མརཎཉྩ སབྷཱཝདྷམྨོ ན ཧོཏི, ཡེསཾ པན ཁནྡྷཱནཾ ཛཱཏི ཛརཱ མརཎཉྩ, ཏེ ཨེཝ སབྷཱཝདྷམྨཱ, ཨཐ ཀསྨཱ དེསནཱཡ ཏེ གཧིཏཱཏི? ནཱཡཾ དོསོ, ཛཱཏི ཛརཱ མརཎཉྷི པཙྩཡནིབྦཏྟཱནཾ སབྷཱཝདྷམྨཱནཾ ཝིཀཱརམཏྟཾ, ནཉྙེསཾ, ཏསྨཱ ཏེ གཧིཏཱཏི. ཨུཔྤཱདཱ ཝཱ ཏཐཱགཏཱནནྟི ན ཝིནེཡྻཔུགྒལཱནཾ མགྒཕལུཔྤཏྟི ཝིཡ ཛཱཏིཔཙྩཡཱ ཛརཱམརཎུཔྤཏྟི ཏཐཱགཏུཔྤཱདཱཡཏྟཱ, ཨཐ ཁོ སཱ ཏཐཱགཏཱནཾ ཨུཔྤཱདེཔི ཨནུཔྤཱདེཔི ཧོཏིཡེཝ. ཏསྨཱ སཱ ཀཱམཾ ཨསངྑཏཱ ཝིཡ དྷཱཏུ ན ནིཙྩཱ, ཏཐཱཔི ‘‘སབྦཀཱལིཀཱ’’ཏི ཨེཏེན ཛཱཏིཔཙྩཡཏོ ཛརཱམརཎུཔྤཏྟཱིཏི དསྶེཏི. ཏེནཱཧ ‘‘ཛཱཏིཡེཝ ཛརཱམརཎསྶ པཙྩཡོ’’ཏི. ཛཱཏིཔཙྩཡཱཏི ཙ ཛཱཏིསངྑཱཏཔཙྩཡཱ. ཧེཏུམྷི ནིསྶཀྐཝཙནཾ. ཋིཏཱཝ སཱ དྷཱཏུ, ཡཱཡཾ ཨིདཔྤཙྩཡཏཱ ཛཱཏིཡཱ ཛརཱམརཎསྶ པཙྩཡཏཱ ཏསྶ བྱབྷིཙཱརཱབྷཱཝཏོ. ཨིདཱནི ན ཀདཱཙི ཛཱཏི ཛརཱམརཎསྶ པཙྩཡོ ན ཧོཏི ཧོཏིཡེཝཱཏི ཛརཱམརཎསྶ པཙྩཡབྷཱཝེ ནིཡམེཏི. ཨུབྷཡེནཔི ཡཐཱཝུཏྟསྶ པཙྩཡབྷཱཝོ ཡཏྠ ¶ ཧོཏི, ཏཏྠ ཨཝསྶཾབྷཱཝིཏཾ དསྶེཏི. ཏེནཱཧ བྷགཝཱ ‘‘ཋིཏཱཝ སཱ དྷཱཏཱུ’’ཏི. དྭཱིཧི པདེཧི. ཏིཊྛནྟཱིཏི ཡསྶ ཝསེན དྷམྨཱནཾ ཋིཏི, སཱ ཨིདཔྤཙྩཡཏཱ དྷམྨཊྛིཏཏཱ. དྷམྨེཏི པཙྩཡུཔྤནྣེ དྷམྨེ. ནིཡམེཏི ཝིསེསེཏི. ཧེཏུགཏཝིསེསསམཱཡོགོ ཧི ཧེཏུཕལསྶ ཨེཝཾ དྷམྨཏཱནིཡཱམོ ཨེཝཱཏི.

ཨཔརོ ནཡོ – ཋིཏཱཝ སཱ དྷཱཏཱུཏི ཡཱཡཾ ཛརཱམརཎསྶ ཨིདཔྤཙྩཡཏཱ ‘‘ཛཱཏིཔཙྩཡཱ ཛརཱམརཎ’’ནྟི, ཨེསཱ དྷཱཏུ ཨེས སབྷཱཝོ. ཏཐཱགཏཱནཾ ཨུཔྤཱདཏོ པུབྦེ ཨུདྡྷཉྩ ཨཔྤཊིཝིཛ྄ཛྷིཡམཱནོ, མཛ྄ཛྷེ ཙ པཊིཝིཛ྄ཛྷིཡམཱནོ ན ཏཐཱགཏེཧི ཨུཔྤཱདིཏོ, ཨཐ ཁོ སམྦྷཝནྟསྶ ཛརཱམརཎསྶ སབྦཀཱལཾ ཛཱཏིཔཙྩཡཏོ སམྦྷཝོཏི ཋིཏཱཝ སཱ དྷཱཏུ, ཀེཝལཾ པན སཡམྦྷུཉཱཎེན ཨབྷིསམྦུཛ྄ཛྷནཏོ ‘‘ཨཡཾ དྷམྨོ ཏཐཱགཏེན ཨབྷིསམྦུདྡྷོ’’ཏི པཝེདནཏོ ཙ ཏཐཱགཏོ ‘‘དྷམྨསཱམཱི’’ཏི ཝུཙྩཏི, ན ཨཔུབྦསྶ ཨུཔྤཱདནཏོ. ཏེན ཝུཏྟཾ ‘‘ཋིཏཱཝ སཱ དྷཱཏཱུ’’ཏི. སཱ ཨེཝ ‘‘ཛཱཏིཔཙྩཡཱ ཛརཱམརཎ’’ནྟི ཨེཏྠ ཝིཔལླཱསཱབྷཱཝཏོ ཨེཝཾ ཨཝབུཛ྄ཛྷམཱནསྶ ཨེཏསྶ སབྷཱཝསྶ, ཧེཏུནོ ཝཱ ཏཐེཝ བྷཱཝཏོ ཋིཏཏཱཏི དྷམྨཊྛིཏཏཱ, ཛཱཏི ཝཱ ཛརཱམརཎསྶ ཨུཔྤཱདཊྛིཏི པཝཏྟཨཱཡཱུཧན-སཾཡོག-པལིབོདྷ-སམུདཡ-ཧེཏུཔཙྩཡཊྛིཏཱིཏི ཏདུཔྤཱདཱདིབྷཱཝེནསྶཱ ཋིཏཏཱ ‘‘དྷམྨཊྛིཏཏཱ’’ཏི ཕལཾ པཏི སཱམཏྠིཡཏོ ཧེཏུམེཝ ཝདཏི. དྷཱརཱིཡཏི ¶ པཙྩཡེཧཱིཏི ཝཱ དྷམྨོ, ཏིཊྛཏི ཏཏྠ ཏདཱཡཏྟཝུཏྟིཏཱཡ ཕལནྟི ཋིཏི, དྷམྨསྶ ཋིཏི དྷམྨཊྛིཏི. དྷམྨོཏི ཝཱ ཀཱརཎཾ པཙྩཡབྷཱཝེན ཕལསྶ དྷཱརཎཏོ, ཏསྶ ཋིཏི སབྷཱཝོ, དྷམྨཏོ ཙ ཨཉྙོ སབྷཱཝོ ནཏྠཱིཏི དྷམྨཊྛིཏི, པཙྩཡོ. ཏེནཱཧ ‘‘པཙྩཡཔརིགྒཧེ པཉྙཱ དྷམྨཊྛིཏིཉཱཎ’’ནྟི (པཊི. མ. མཱཏིཀཱ ༤). དྷམྨཊྛིཏི ཨེཝ དྷམྨཊྛིཏཏཱ. སཱ ཨེཝ དྷཱཏུ ‘‘ཛཱཏིཔཙྩཡཱ ཛརཱམརཎ’’ནྟི ཨིམསྶ སབྷཱཝསྶ, ཧེཏུནོ ཝཱ ཨཉྙཐཏྟཱབྷཱཝཏོ, ‘‘ན ཛཱཏིཔཙྩཡཱ ཛརཱམརཎ’’ནྟི ཝིཉྙཱཡམཱནསྶ ཙ ཏབྦྷཱཝཱབྷཱཝཏོ ནིཡཱམཏཱ ཝཝཏྠིཏབྷཱཝོཏི དྷམྨནིཡཱམཏཱ. ཕལསྶ ཝཱ ཛརཱམརཎསྶ ཛཱཏིཡཱ སཏི སམྦྷཝོ དྷམྨེ ཧེཏུམྷི ཋིཏཏཱཏི དྷམྨཊྛིཏཏཱ, ཨསཏི ཨསམྦྷཝོ དྷམྨནིཡཱམཏཱཏི ཨེཝཾ ཕལེན ཧེཏུཾ ཝིབྷཱཝེཏི, ཏཾ ‘‘ཋིཏཱཝ སཱ དྷཱཏཱུ’’ཏིཨཱདིནཱ ཝུཏྟཾ. ཨིམེསཾ ཛརཱམརཎཱདཱིནཾ པཙྩཡཏཱསངྑཱཏཾ ཨིདཔྤཙྩཡཏཾ ཨབྷིསམྦུཛ྄ཛྷཏི པཙྩཀྑཀརཎེན ¶ ཨབྷིམུཁཾ བུཛ྄ཛྷཏི ཡཱཐཱཝཏོ པཊིཝིཛ྄ཛྷཏི, ཏཏོ ཨེཝ ཨབྷིསམེཏི ཨབྷིམུཁཾ སམཱགཙྪཏི, ཨཱདིཏོ ཀཐེནྟོ ཨཱཙིཀྑཏི, ཨུདྡིསཏཱིཏི ཨཏྠོ. ཏམེཝ ཨུདྡེསཾ པརིཡོསཱཔེནྟོ དེསེཏི. ཡཐཱཨུདྡིཊྛམཏྟཾ ནིདྡིསནཝསེན པཀཱརེཧི ཉཱཔེནྟོ པཉྙཱཔེཏི. པཀཱརེཧི ཨེཝ པཏིཊྛཔེནྟོ པཊྛཔེཏི. ཡཐཱནིདྡིཊྛཾ པཊིནིདྡེསཝསེན ཝིཝརཏི ཝིབྷཛཏི. ཝིཝཊཉྷི ཝིབྷཏྟཉྩ ཨཏྠཾ ཧེཏཱུདཱཧརཎདསྶནེཧི པཱཀཊཾ ཀརོནྟོ ཨུཏྟཱནཱིཀརོཏི. ཨུཏྟཱནཱིཀརོནྟོ ཏཐཱ པཙྩཀྑབྷཱུཏཾ ཀཏྭཱ ནིགམནཝསེན པསྶཐཱཏི ཙཱཧ.

ཛཱཏིཔཙྩཡཱ ཛརཱམརཎནྟིཨཱདཱིསཱུཏི ཛཱཏིཨཱདཱིནཾ ཛརཱམརཎཔཙྩཡབྷཱཝེསུ. ཏེཧི ཏེཧི པཙྩཡེཧཱིཏི ཡཱཝཏཀེཧི པཙྩཡེཧི ཡཾ ཕལཾ ཨུཔྤཛྫམཱནཱརཧཾ, ཨཝིཀལེཧི ཏེཧེཝ ཏསྶ ཨུཔྤཏྟི, ན ཨཱུནཱདྷིཀེཧཱིཏི. ཏེནཱཧ ‘‘ཨནཱུནཱདྷིཀེཧེཝཱ’’ཏི. ཡཐཱ ཏཾ ཙཀྑུརཱུཔཱལོཀམནསིཀཱརེཧི ཙཀྑུཝིཉྙཱཎསྶ སམྦྷཝོཏི. ཏེན ཏཾཏཾཕལནིཔྥཱདནེ ཏསྶཱ པཙྩཡསཱམགྒིཡཱ ཏཔྤཀཱརཏཱ ཏཐཏཱཏི ཝུཏྟཱཏི དསྶེཏི. སཱམགྒིནྟི སམོདྷཱནཾ, སམཝཱཡནྟི ཨཏྠོ. ཨསམྦྷཝཱབྷཱཝཏོཏི ཨནུཔྤཛྫནསྶ ཨབྷཱཝཏོ. ཏཐཱཝིདྷཔཙྩཡསཱམགྒིཡཉྷི སཏིཔི ཕལསྶ ཨནུཔྤཛྫནེ ཏསྶཱཝིཏཐཏཱ སིཡཱ. ཨཉྙདྷམྨཔཙྩཡེཧཱིཏི ཨཉྙསྶ ཕལདྷམྨསྶ པཙྩཡེཧི. ཨཉྙདྷམྨཱནུཔྤཏྟིཏོཏི ཏཏོ ཨཉྙསྶ ཕལདྷམྨསྶ ཨནུཔྤཛྫནཏོ. ན ཧི ཀདཱཙི ཙཀྑུརཱུཔཱལོཀམནསིཀཱརེཧི སོཏཝིཉྙཱཎསྶ སམྦྷཝོ ཨཏྠི. ཡདི སིཡཱ, ཏསྶཱ སཱམགྒིཡཱ ཨཉྙཐཏཱ ནཱམ སིཡཱ, ན ཙེཏཾ ཨཏྠཱིཏི ‘‘ཨནཉྙཐཏཱ’’ཏི ཝུཏྟཾ. པཙྩཡཏོཏི པཙྩཡབྷཱཝཏོ. པཙྩཡསམཱུཧཏོཏི ཨེཏྠཱཔི ཨེསེཝ ནཡོ. ཨིདཔྤཙྩཡཱ ཨེཝ ཨིདཔྤཙྩཡཏཱཏི ཏཱ-སདྡེན པདཾ ཝཌྜྷིཏཾ ཡཐཱ ‘‘དེཝོཡེཝ དེཝཏཱ’’ཏི, ཨིདཔྤཙྩཡཱནཾ སམཱུཧོ ཨིདཔྤཙྩཡཏཱཏི སམཱུཧཏྠོ ཏཱསདྡོ ཡཐཱ ‘‘ཛནཱནཾ སམཱུཧོ ཛནཏཱ’’ཏི ཨིམམཏྠཾ སནྡྷཱཡཱཧ ‘‘ལཀྑཎཾ པནེཏྠ སདྡསཏྠཏོ ཝེདིཏབྦ’’ནྟི.

ན ¶ ནིཙྩཾ སསྶཏནྟི ཨནིཙྩཾ. ཛརཱམརཎཾ ན ཨནིཙྩཾ སངྑཱརཱནཾ ཝིཀཱརབྷཱཝཏོ ཨནིཔྥནྣཏྟཱ, ཏཐཱཔི ‘‘ཨནིཙྩ’’ནྟི པརིཡཱཡེན ཝུཏྟཾ. ཨེས ནཡོ སངྑཏཱདཱིསུཔི. སམཱགནྟྭཱ ཀཏཾ སཧིཏེཧེཝ པཙྩཡེཧི ནིབྦཏྟེཏབྦཏོ ཡཐཱསབྷཱཝཾ སམེཙྩ སམྦྷུཡྻ པཙྩཡེཧི ཀཏནྟི སངྑཏཾ ¶ . པཙྩཡཱརཧཾ པཙྩཡཾ པཊིཙྩ ན ཝིནཱ ཏེན སཧིཏསམེཏམེཝ ཨུཔྤནྣནྟི པཊིཙྩསམུཔྤནྣཾ. ཏེནཱཧ ‘‘པཙྩཡེ ནིསྶཱཡ ཨུཔྤནྣ’’ནྟི. ཁཡསབྷཱཝནྟི བྷིཛྫནསབྷཱཝཾ. ཝིགཙྪནཀསབྷཱཝནྟི སཀབྷཱཝཏོ ཨཔགཙྪནཀསབྷཱཝཾ. ཝིརཛྫནཀསབྷཱཝནྟི པལུཛྫནཀསབྷཱཝཾ. ནིརུཛ྄ཛྷནཀསབྷཱཝནྟི ཁཎབྷངྒཝསེན པབྷངྒུསབྷཱཝཾ. ཝུཏྟནཡེནཱཏི ཛརཱཡ ཝུཏྟནཡེན. ཛནཀཔྤཙྩཡཱནཾ ཀམྨཱདཱིནཾ. ཀིཙྩཱནུབྷཱཝཀྑཎེཏི ཨེཏྠ ཀིཙྩཱནུབྷཱཝོ ནཱམ ཡཐཱ པཝཏྟམཱནེ པཙྩཡེ ཏསྶ ཕལཾ ཨུཔྤཛྫཏི, ཏཐཱ པཝཏྟི, ཨེཝཾ སནྟསྶ པཝཏྟནཀྑཎེ. ཨིདཾ ཝུཏྟཾ ཧོཏི – ཡསྨིཾ ཁཎེ པཙྩཡོ ཨཏྟནོ ཕལུཔྤཱདནཾ པཏི བྱཱཝཊོ ནཱམ ཧོཏི, ཨིམསྨིཾ ཁཎེ ཡེ དྷམྨཱ རཱུཔཱདཡོ ཨུཔལབྦྷནྟི ཏཏོ པུབྦེ, པཙྪཱ ཙ ཨནུཔལབྦྷམཱནཱ, ཏེསཾ ཏཏོ ཨུཔྤཏྟི ནིདྡྷཱརཱིཡཏི, ཨེཝཾ ཛཱཏིཡཱཔི སཱ ནིདྡྷཱརེཏབྦཱ ཏཾཁཎཱུཔལདྡྷཏོཏི. ཡདི ཨེཝཾ ནིཔྤརིཡཱཡཏོཝ ཛཱཏིཡཱ ཀུཏོཙི ཨུཔྤཏྟི སིདྡྷི, ཨཐ ཀསྨཱ ‘‘ཨེཀེན པརིཡཱཡེནཱ’’ཏི ཝུཏྟནྟི? ཛཱཡམཱནདྷམྨཱནཾ ཝིཀཱརབྷཱཝེན ཨུཔལདྡྷབྦཏྟཱ. ཡདི ནིཔྥནྣདྷམྨཱ ཝིཡ ཛཱཏི ཨུཔལབྦྷེཡྻ, ནིཔྤརིཡཱཡཏོཝ ཏསྶཱ ཀུཏོཙི ཨུཔྤཏྟི སིཡཱ, ན ཙེཝཾ ཨུཔལབྦྷཏི, ཨཐ ཁོ ཨནིཔྥནྣཏྟཱ ཝིཀཱརབྷཱཝེན ཨུཔལབྦྷཏི. ཏསྨཱ ‘‘ཨེཀེན པརིཡཱཡེནེཏྠ ཨནིཙྩཱཏིཨཱདཱིནི ཡུཛྫནྟཱི’’ཏི ཝུཏྟཾ. ན པན ཛརཱམརཎེ, ཛནཀཔྤཙྩཡཱནཾ ཀིཙྩཱནུབྷཱཝཀྑཎེ ཏསྶ ཨལབྦྷནཏོ. ཏེནེཝ ‘‘ཨེཏྠ ཙ ཨནིཙྩནྟི…པེ… ཨནིཙྩཾ ནཱམ ཛཱཏ’’ནྟི ཝུཏྟཾ.

སཝིཔསྶནཱཡཱཏི ཨེཏྠ སཧ-སདྡོ ཨཔྤདྷཱནབྷཱཝདཱིཔནོ ‘‘སམཀྑིཀཾ, སམཀས’’ནྟིཨཱདཱིསུ ཝིཡ. ཨཔྤདྷཱནབྷཱུཏཱ ཧི ཝིཔསྶནཱ, ཡཐཱབྷཱུཏདསྶནམགྒཔཉྙཱ པཛཱནཱཏི. ‘‘པུརིམཾ ཨནྟ’’ནྟི ཝུཙྩམཱནེ པཙྩུཔྤནྣབྷཱཝསྶཔི གཧཎཾ སིཡཱཏི ‘‘པུརིམཾ ཨནྟཾ ཨཏཱིཏ’’ནྟི ཝུཏྟཾ. ཝིཛྫམཱནཏཉྩ ཨཝིཛྫམཱནཏཉྩཱཏི སསྶཏཱསངྐཾ ནིསྶཱཡ ‘‘ཨཧོསིཾ ནུ ཁོ ཨཧམཏཱིཏམདྡྷཱན’’ནྟི ཨཏཱིཏེ ཨཏྟནོ ཝིཛྫམཱནཏཾ, ཨདྷིཙྩསམུཔྤཏྟིཨཱསངྐཾ ནིསྶཱཡ ‘‘ཡཏོ པབྷུཏི ཨཧཾ, ཏཏོ པུབྦེ ན ནུ ཁོ ཨཧོསི’’ནྟི ཨཏཱིཏེ ཨཏྟནོ ཨཝིཛྫམཱནཏཉྩ ཀངྑཏི. ཀསྨཱ? ཝིཙིཀིཙྪཱཡ ཨཱཀཱརདྭཡཱཝལམྦནཏོ. ཏསྶཱ པན ཨཏཱིཏཝཏྠུཏཱཡ གཧིཏཏྟཱ སསྶཏཱདྷིཙྩསམུཔྤཏྟིཨཱཀཱརནིསྶིཏཏཱ དསྶིཏཱ ཨེཝ. ཨཱསཔྤནཔརིསཔྤནཔཝཏྟིཀཾ ཀཏྠཙིཔི ཨཔྤཊིཝཏྟིཧེཏུབྷཱུཏཾ ཝིཙིཀིཙྪཾ ཀསྨཱ ཨུཔྤཱདེཏཱིཏི ན ཝིཙཱརེཏབྦམེཏནྟི དསྶེནྟོ ཨཱཧ ‘‘ཀིཾཀཱརཎནྟི ན ཝཏྟབྦ’’ནྟི ¶ . ཀཱརཎཾ ཝཱ ཝིཙིཀིཙྪཱཡ ཨཡོནིསོམནསིཀཱརོ, ཏསྶ ཨནྡྷབཱལཔུཐུཛྫནབྷཱཝོ, ཨརིཡཱནཾ ཨདསྶཱཝིཏཱ ཙཱཏི དཊྛབྦཾ. ཛཱཏིལིངྒུཔཔཏྟིཡོཏི ཁཏྟིཡབྲཱཧྨཎཱདིཛཱཏིཾ, གཧཊྛཔབྦཛིཏཱདིལིངྒཾ, དེཝམནུསྶཱདིཨུཔཔཏྟིཉྩ. ནིསྶཱཡཱཏི ཨུཔཱདཱཡ. ཏསྨིཾ ¶ ཀཱལེ ཡཾ སནྟཱནཾ མཛ྄ཛྷིམཾ པམཱཎཾ, ཏེན ཡུཏྟོ པམཱཎིཀོ, ཏདབྷཱཝཏོ ཨདྷིཀབྷཱཝཏོ ཝཱ ‘‘ཨཔྤམཱཎིཀོ’’ཏི ཝེདིཏབྦོ. ཀེཙཱིཏི སཱརསམཱསཱཙརིཡཱ. ཏེ ཧི ‘‘ཀཐཾ ནུ ཁོ’’ཏི ཨིསྶརེན ཝཱ བྲཧྨུནཱ ཝཱ པུབྦཀཏེན ཝཱ ཨཧེཏུཏོ ཝཱ ནིབྦཏྟོཏི ཙིནྟེཏཱིཏི ཝདནྟི. ཨཧེཏུཏོ ནིབྦཏྟིཀངྑཱཔི ཧི ཧེཏུཔརཱམསནམེཝཱཏི. པརམྤརནྟི པུབྦཱཔརཔྤཝཏྟིཾ. ཨདྡྷཱནནྟི ཀཱལཱདྷིཝཙནཾ, ཏཉྩ བྷུམྨཏྠེ ཨུཔཡོགཝཙནཾ དཊྛབྦཾ. ཝིཛྫམཱནཏཉྩ ཨཝིཛྫམཱནཏཉྩཱཏི སསྶཏཱསངྐཾ ནིསྶཱཡ ‘‘བྷཝིསྶཱམི ནུ ཁོ ཨཧཾ ཨནཱགཏམདྡྷཱན’’ནྟི ཨནཱགཏེ ཨཏྟནོ ཝིཛྫམཱནཏཾ, ཨུཙྪེདཱསངྐཾ ནིསྶཱཡ ‘‘ཡསྨིཉྩ ཨཏྟབྷཱཝེ ཨུཙྪེདནཀངྑཱ, ཏཏོ པརཾ ནུ ཁོ བྷཝིསྶཱམཱི’’ཏི ཨནཱགཏེ ཨཏྟནོ ཨཝིཛྫམཱནཏཉྩ ཀངྑཏཱིཏི ཧེཊྛཱ ཝུཏྟནཡེན ཡོཛེཏབྦཾ.

པཙྩུཔྤནྣཾ ཨདྡྷཱནནྟི ཨདྡྷཱཔཙྩུཔྤནྣསྶ ཨིདྷཱདྷིཔྤེཏཏྟཱ ‘‘པཊིསནྡྷིམཱདིཾ ཀཏྭཱ’’ཏིཨཱདི ཝུཏྟཾ. ‘‘ཨིདཾ ཀཐཾ, ཨིདཾ ཀཐ’’ནྟི པཝཏྟནཏོ ཀཐཾཀཐཱ, ཝིཙིཀིཙྪཱ, སཱ ཨསྶ ཨཏྠཱིཏི ཀཐཾཀཐཱི. ཏེནཱཧ ‘‘ཝིཙིཀིཙྪཱི’’ཏི. ཀཱ ཨེཏྠ ཙིནྟཱ? ཨུམྨཏྟཀོ ཝིཡ བཱལཔུཐུཛྫནོཏི པཊིཀཙྩེཝ ཝུཏྟནྟི ཨདྷིཔྤཱཡོ. ཏཾ མཧཱམཱཏཱཡ པུཏྟཾ. མུཎྜེསུནྟི མུཎྜེན ཨནིཙྪནྟཾ ཛཱགརཎཀཱལེ ན སཀྐཱཏི སུཏྟཾ མུཎྜེསུཾ ཀུལདྷམྨཝསེན ཡཐཱ ཨེཀཙྩེ ཀུལཏཱཔསཱ. རཱཛབྷཡེནཱཏི ཙ ཝདནྟི. སཱིཏིབྷཱུཏནྟི ཨིདཾ མདྷུརཀབྷཱཝཔྤཏྟིཡཱ ཀཱརཎཝཙནཾ. ‘‘སེཏབྷཱུཏ’’ནྟིཔི པཱཋོ, ཨུདཀེ ཙིརཊྛཱནེན སེཏབྷཱཝཾ པཏྟནྟི ཨཏྠོ.

ཨཏྟནོ ཁཏྟིཡབྷཱཝཾ ཀངྑཏི ཀཎྞོ ཝིཡ སཱུཏཔུཏྟསཉྙཱི, སཱུཏཔུཏྟསཉྙཱིཏི སཱུརིཡདེཝཔུཏྟསྶ པུཏྟསཉྙཱི. ཛཱཏིཡཱ ཝིབྷཱཝིཡམཱནཱཡ ‘‘ཨཧ’’ནྟི ཏསྶ ཨཏྟནོ པརཱམསནཾ སནྡྷཱཡཱཧ ‘‘ཨེཝམྤི སིཡཱ ཀངྑཱ’’ཏི. མནུསྶཱཔི ཙ རཱཛཱནོ ཝིཡཱཏི མནུསྶཱཔི ཙ ཀེཙི ཨེཀཙྩེ རཱཛཱནོ ཝིཡཱཏི ཨདྷིཔྤཱཡོ. ཝུཏྟནཡམེཝ ‘‘སཎྛཱནཱཀཱརཾ ནིསྶཱཡཱ’’ཏིཨཱདིནཱ. ཨེཏྠཱཏི ‘‘ཀཐཾ ནུ ཁོསྨཱི’’ཏི པདེ. ཨབྦྷནྟརེ ཛཱིཝོཏི ¶ པརཔརིཀཔྤིཏཾ ཨནྟརཏྟཱནཾ ཝདཏི. སོལ༹སཾསཱདཱིནནྟི ཨཱདི-སདྡེན སརཱིརཔརིམཱཎཨངྒུཊྛ-ཡཝཔརམཱཎུཔརིམཱཎཏཱདིཀེ སངྒཎྷཱཏི. སཏྟཔཉྙཏྟི ཛཱིཝཝིསཡཱཏི དིཊྛིགཏིཀཱནཾ མཏིམཏྟཾ, པརམཏྠཏོ པན སཱ ཨཏྟབྷཱཝཝིསཡཱཝཱཏི ཨཱཧ ‘‘ཨཏྟབྷཱཝསྶ ཨཱགཏིགཏིཊྛཱན’’ནྟི. ཡཏཱཡཾ ཨཱགཏོ, ཡཏྠ ཙ གམིསྶཏི, ཏཾ ཋཱནནྟི ཨཏྠོ. སོཏཱཔནྣོ ཨདྷིཔྤེཏོ ཝིཙིཀིཙྪཱཔཧཱནསྶ དིཊྛཏྟཱ. ཨིཏརེཔི ཏཡོཏི སཀདཱགཱམཱིཨཱདཡོ ཨཝཱརིཏཱ ཨེཝ. ‘‘ཨཡཉྩ…པེ… སུདིཊྛཱ’’ཏི ནིཔྤདེསཏོ སཙྩསཾཔཊིཝེདྷསྶ ཛོཏིཏཏྟཱ.

པཙྩཡསུཏྟཝཎྞནཱ ནིཊྛིཏཱ.

ཨཱཧཱརཝགྒཝཎྞནཱ ནིཊྛིཏཱ.

༣. དསབལཝགྒོ

༡. དསབལསུཏྟཝཎྞནཱ

༢༡. པཋམཾ ¶ དུཏིཡསྶེཝ སངྑེཔོ པཋམསུཏྟེ སངྑེཔཝུཏྟསྶ ཨཏྠསྶ ཝིཏྠཱརཝསེན དུཏིཡསུཏྟསྶ དེསིཏཏྟཱ, ཏཉྩ པན བྷགཝཱ པཋམསུཏྟཾ སངྑེཔཏོ དེསེསི, དུཏིཡཾ ཏཏོ ཝིཏྠཱརཏོ. པཋམཾ ཝཱ སཾཁིཏྟརུཙཱིནཾ པུགྒལཱནཾ ཨཛ྄ཛྷཱསཡེན སངྑེཔཏོ དེསེསི, དུཏིཡཾ པན ཨཏྟནོ རུཙིཡཱ ཏཏོ ཝིཏྠཱརཏོ. སཱིཧསམཱནཝུཏྟིཀཱ ཧི བུདྡྷཱ བྷགཝནྟོ, ཏེ ཨཏྟནོ རུཙིཡཱ ཀཐེནྟཱ ཨཏྟནོ ཐཱམཾ དསྶེནྟཱཝ ཀཐེནྟི, ཏསྨཱ དུཏིཡསུཏྟཝསེན ཙེཏྠ ཨཏྠཝཎྞནཾ ཀརིསྶཱམ, ཏསྨིཾ སཾཝཎྞིཏེ པཋམཾ སཾཝཎྞིཏམེཝ ཧོཏཱིཏི ཨདྷིཔྤཱཡོ.

དསབལསུཏྟཝཎྞནཱ ནིཊྛིཏཱ.

༢. དུཏིཡདསབལསུཏྟཝཎྞནཱ

༢༢. ཏཏྠཱཏི དུཏིཡསུཏྟེ. དསཧི བལེཧཱིཏི དསཧི ཨནཉྙསཱདྷཱརཎེཧི ཉཱཎབལེཧི, ཏཱནི ཏཐཱགཏསྶེཝ བལཱནཱིཏི ཏཐཱགཏབལཱནཱིཏི ཝུཙྩནྟི. ཀཱམཉྩ ཏཱནི ཨེཀཙྩཱནཾ སཱཝཀཱནམྤི ཨུཔྤཛྫནྟི, ཡཱདིསཱནི ¶ པན བུདྡྷཱནཾ ཋཱནཱཊྛཱནཉཱཎཱདཱིནི ཨུཔྤཛྫནྟི, ན ཏཱདིསཱནི ཏདཉྙེསཾ ཀདཱཙིཔི ཨུཔྤཛྫནྟཱིཏི. ཧཏྠིཀུལཱནུསཱརེནཱཏི ཝཀྑམཱནཧཏྠིཀུལཱནུསཱརེན. ཀཱལཱ༹ཝཀནྟི ཀུལསདྡཱཔེཀྑཱཡ ནཔུཾསཀནིདྡེསོ. ཨེས ནཡོ སེསེསུཔི. པཀཏིཧཏྠིཀུལནྟི གིརིཙརནདིཙརཝནཙརཱདིཔྤབྷེདཱ གོཙརིཡཀཱལཱ༹ཝཀནཱམཱ སབྦཱཔི བལེན པཱཀཏིཀཱ ཧཏྠིཛཱཏི. དསནྣཾ པུརིསཱནནྟི ཐཱམམཛ྄ཛྷིམཱནཾ དསནྣཾ པུརིསཱནཾ. ཨེཀསྶ ཏཐཱགཏསྶ ཀཱཡབལནྟི ཨཱནེཏྭཱ སམྦནྡྷོ. ཨེཀསྶཱཏི ཙ ཏཐཱ ཧེཊྛཱཀཐཱཡཾ ཨཱགཏཏྟཱ དེསནཱསོཏེན ཝུཏྟཾ. ནཱརཱཡནསངྒྷཱཏབལནྟི ཨེཏྠ ནཱརཱ ཝུཙྩནྟི རསྨིཡོ, ཏཱ བཧཱུ ནཱནཱཝིདྷཱ ཨིཏོ ཨུཔྤཛྫནྟཱིཏི ནཱརཱཡནཾ, ཝཛིརཾ, ཏསྨཱ ནཱརཱཡནསངྒྷཱཏབལནྟི ཝཛིརསངྒྷཱཏབལནྟི ཨཏྠོ. ཏཐཱགཏསྶ ཀཱཡབལནྟི ཏཐཱགཏསྶ པཱཀཏིཀཀཱཡབལཾ. སངྒཧཾ ན གཙྪཏི ཨཏྟནོ བལཱབྷཱཝཏོ, ཏཏོ ཨེཝསྶ བཱཧིརཀཏཱ ལཱམཀཏཱ ཙ. ཏདུབྷཡཾ པནསྶ ཀཱརཎེན དསྶེཏུཾ ‘‘ཨེཏཉྷི ནིསྶཱཡཱ’’ཏིཨཱདི ཝུཏྟཾ. ཨཉྙནྟི ཀཱཡབལཏོ ཨཉྙཾ ཏཏོ ཝིསུཾཡེཝ. དསསུ ཋཱནེསུ དསསུ ཉཱཏབྦཊྛཱནེསུ. ཡཱཐཱཝཔཊིཝེདྷཏོ སཡཉྩ ཨཀམྤཡཾ, པུགྒལཉྩ ཏཾསམངྒིཾ ནེཡྻེསུ ཨདྷིབལཾ ཀརོཏཱིཏི ཨཱཧ ‘‘ཨཀམྤནཊྛེན ཨུཔཏྠམྦྷནཊྛེན ཙཱ’’ཏི.

ཋཱནཉྩ ¶ ཋཱནཏོཏི ཀཱརཎཉྩ ཀཱརཎཏོ. ཀཱརཎཉྷི ཡསྨཱ ཕལཾ ཏིཊྛཏི ཏདཱཡཏྟཝུཏྟིཏཱཡ ཨུཔྤཛྫཏི ཙེཝ པཝཏྟཏི ཙ, ཏསྨཱ ‘‘ཋཱན’’ནྟི ཝུཙྩཏི. ཝིཔརིཡཱཡེན ཨཊྛཱནནྟི ཨཀཱརཎཾ ཝེདིཏབྦཾ. ཏདུབྷཡཾ བྷགཝཱ ཡེན ཉཱཎེན ཡེ ཡེ དྷམྨཱ ཡེསཾ ཡེསཾ དྷམྨཱནཾ ཧེཏཱུ པཙྩཡཱ ཨུཔྤཱདཱཡ, ཏཾ ཏཾ ཋཱནཾ, ཡེ ཡེ དྷམྨཱ ཡེསཾ ཡེསཾ དྷམྨཱནཾ ན ཧེཏཱུ ན པཙྩཡཱ ཨུཔྤཱདཱཡ, ཏཾ ཏཾ ཨཊྛཱནནྟི པཛཱནཱཏི. ཏཾ སནྡྷཱཡཱཧ ‘‘ཋཱནཉྩ…པེ… ཛཱནནཾ ཨེཀ’’ནྟི. ཀམྨསམཱདཱནཱནནྟི ཀམྨཾ སམཱདིཡིཏྭཱ ཀཏཱནཾ ཀུསལཱཀུསལཀམྨཱནཾ, ཀམྨཉྙེཝ ཝཱ ཀམྨསམཱདཱནཾ. ཋཱནསོ ཧེཏུསོཏི པཙྩཡཏོ ཙ ཧེཏུཏོ ཙ. ཏཏྠ གཏིཨུཔདྷིཀཱལཔཡོགཱ ཝིཔཱཀསྶ ཋཱནཾ, ཀམྨཾ ཧེཏུ. སབྦཏྠགཱམིནཱིཔཊིཔདཱཛཱནནནྟི སབྦགཏིགཱམིནིཡཱ ཨགཏིགཱམིནིཡཱ ཙ པཊིཔདཱཡ མགྒསྶ ཛཱནནཾ, བཧཱུསུཔི མནུསྶེསུ ཨེཀམེཝ པཱཎཾ ཧནནྟེསུ ‘‘ཨིམསྶ ཙེཏནཱ ནིརཡགཱམིནཱི བྷཝིསྶཏི, ཨིམསྶ ཏིརཙྪཱནཡོནིགཱམིནཱི’’ཏི ཨིམིནཱ ནཡེན ཨེཀཝཏྠུསྨིམྤི ཀུསལཱཀུསལཙེཏནཱསངྑཱཏཱནཾ པཊིཔཏྟཱིནཾ ཨཝིཔརཱིཏཏོ སབྷཱཝཛཱནནཾ ¶ . ཨནེཀདྷཱཏུནཱནཱདྷཱཏུལོཀཛཱནནནྟི ཙཀྑུདྷཱཏུཨཱདཱིཧི ཀཱམདྷཱཏུཨཱདཱིཧི ཝཱ བཧུདྷཱཏུནོ, ཏཱསཾཡེཝ དྷཱཏཱུནཾ ཝིཔརཱིཏཏཱཡ ནཱནཔྤཀཱརདྷཱཏུནོ ཁནྡྷཱཡཏནདྷཱཏུལོཀསྶ ཛཱནནཾ. པརསཏྟཱནནྟི པརེསཾ སཏྟཱནཾ. ནཱནཱདྷིམུཏྟིཀཏཱཛཱནནནྟི ཧཱིནཱདཱིཧི ཨདྷིམུཏྟཱིཧི ནཱནཱདྷིམུཏྟིཀབྷཱཝསྶ ཛཱནནཾ. ཏེསཾཡེཝཱཏི པརསཏྟཱནཾཡེཝ. ཨིནྡྲིཡཔརོཔརིཡཏྟཛཱནནནྟི སདྡྷཱདཱིནཾ ཨིནྡྲིཡཱནཾ པརབྷཱཝསྶ ཨཔརབྷཱཝསྶ ཝུདྡྷིཡཱ ཙེཝ ཧཱནིཡཱ ཙ ཛཱནནཾ. ཛྷཱནཝིམོཀྑསམཱདྷིསམཱཔཏྟཱིནནྟི པཋམཱདཱིནཾ ཙཏུནྣཾ ཛྷཱནཱནཾ, ‘‘རཱུཔཱི རཱུཔཱནི པསྶཏཱི’’ཏིཨཱདཱིནཾ ཨཊྛནྣཾ ཝིམོཀྑཱནཾ, སཝིཏཀྐསཝིཙཱརཱདཱིནཾ ཏིཎྞཾ སམཱདྷཱིནཾ, པཋམཛ྄ཛྷཱནསམཱཔཏྟིཨཱདཱིནཉྩ ནཝནྣཾ ཨནུཔུབྦསམཱཔཏྟཱིནཾ. སཾཀིལེསཝོདཱནཝུཊྛཱནཛཱནནནྟི ཧཱནབྷཱགིཡསྶ, ཝིསེསབྷཱགིཡསྶ ‘‘ཝོདཱནམྤི ཝུཊྛཱནཾ, ཏམྷཱ ཏམྷཱ སམཱདྷིམྷཱ ཝུཊྛཱནམྤི ཝུཊྛཱན’’ནྟི (ཝིབྷ. ༨༢༨) ཨེཝཾ ཝུཏྟཔགུཎཛ྄ཛྷཱནསྶ ཙེཝ བྷཝངྒཕལསམཱཔཏྟཱིནཉྩ ཛཱནནཾ. ཧེཊྛིམཾ ཧེཊྛིམཉྷི པགུཎཛ྄ཛྷཱནཾ ཨུཔརིམསྶ ཨུཔརིམསྶ པདཊྛཱནཾ ཧོཏི, ཏསྨཱ ཝོདཱནམྤི ‘‘ཝུཊྛཱན’’ནྟི ཝུཙྩཏི. བྷཝངྒེན པན སབྦཛྷཱནེཧི ཝུཊྛཱནཾ ཧོཏི. ཕལསམཱཔཏྟིཡཱ ནིརོདྷསམཱཔཏྟིཏོ ཝུཊྛཱནམེཝ སནྡྷཱཡ ‘‘ཏམྷཱ ཏམྷཱ སམཱདྷིམྷཱ ཝུཊྛཱན’’ནྟི ཝུཏྟཾ. པུབྦེནིཝཱསཛཱནནནྟི པུབྦེནིཝཱསཱནུསྶཏིཉཱཎེན ནིཝུཊྛཀྑནྡྷཱནཾ ཛཱནནཾ. ཙུཏཱུཔཔཱཏཛཱནནནྟི སཏྟཱནཾ ཙུཏིཡཱ ཨུཔཔཏྟིཡཱ ཙ ཡཱཐཱཝཏོ ཛཱནནཾ. ཨཡམེཏྠ སངྑེཔོ, ཝིཏྠཱརོ པན ཝིསུདྡྷིམགྒེ ཝུཏྟནཡེནེཝ ཝེདིཏབྦོ. ཨཱསཝཀྑཡཛཱནནཾ ཨཱསཝཀྑཡཉཱཎཾ, མགྒཉཱཎནྟི ཨཏྠོ. ཡཏྠ པནེཏཱནི ཝིཏྠཱརཏོ ཨཱགཏཱནི སཾཝཎྞིཏཱནི, ཏཱནི དསྶེནྟོ ‘‘ཨབྷིདྷམྨེ པནཱ’’ཏིཨཱདིམཱཧ.

བྱཱམོཧབྷཡཝསེན སརཎཔརིཡེསནཾ སཱརཛྫནཾ སཱརདོ, བྱཱམོཧབྷཡཾ. ཝིགཏོ སཱརདོ ཨེཏསྶཱཏི ¶ ཝིསཱརདོ, ཏསྶ བྷཱཝོ ཝེསཱརཛྫཾ. ཏཾ པན ཉཱཎསམྤདཾ པཧཱནསམྤདཾ དེསནཱཝིསེསསམྤདཾ ཁེམཾ ནིསྶཱཡ པཝཏྟཾ ཙཏུབྦིདྷཾ པཙྩཝེཀྑཎཱཉཱཎཾ. ཏེནཱཧ ‘‘ཙཏཱུསུ ཋཱནེསཱུ’’ཏིཨཱདི. ཙཏཱུསཱུཏི པརཔརིཀཔྤིཏེསུ ཝཏྠཱུསུ. པརཔརིཀཔྤིཏེསུ ཝཱ ཝཏྠུམཏྟེསུ ཙོདནཱཀཱརཎེསུ. སམྨཱསམྦུདྡྷསྶ ཏེ པཊིཛཱནཏོཏི ‘‘ཨཧཾ སམྨཱསམྦུདྡྷོ’’ཏི ཨེཝཾ པཊིཛཱནནྟེན ཏཡཱ. ཨིམེ དྷམྨཱཏི ‘‘ཨིདཾ པཉྩམཾ ཨརིཡསཙྩཾ, ཨཡཾ ཚཊྛོ ཨུཔཱདཱནཀྑནྡྷོ, ཨིདཾ ¶ ཏེརསམཾ ཨཱཡཏན’’ནྟི ཝེདིཏབྦཱ ཨིམེ དྷམྨཱ. ཨནབྷིསམྦུདྡྷཱ ཨཔྤཊིཝིདྡྷཏྟཱཏི.

ཏཏྲཱཏི ཏསྨིཾ ཨནབྷིསམྦུདྡྷདྷམྨསངྑཱཏེ ཙོདནཱཝཏྠུསྨིཾ. ཀོཙཱིཏི སམཎཱདཱིཧི ཨཉྙོ ཝཱ ཡོ ཀོཙི. སཧ དྷམྨེནཱཏི སཧ ཧེཏུནཱ. ‘‘དྷམྨཔཊིསམྦྷིདཱ’’ཏིཨཱདཱིསུ ཝིཡ ཧེཏུཔརིཡཱཡོ ཨིདྷ དྷམྨ-སདྡོ. ཧེཏཱུཏི ཙ ཨུཔྤཏྟིསཱདྷནཧེཏུ ཝེདིཏབྦོ, ན ཀཱརཀོ སམྤཱཔཀོ ཝཱ. ནིམིཏྟནྟི ཀཱརཎཾ, ཏཾ པནེཏྠ ཙོདནཱཝཏྠུམེཝ. ན སམནུཔསྶཱམི སམྨཱསམྦུདྡྷབྷཱཝཏོ. ཁེམཔྤཏྟོཏི ཨཁེམཔྤཏྟརཱུཔཱཡ ཙོདནཱཡ ཨནུཔདྡཝཾ པཏྟོ ནིཙྩལབྷཱཝཔྤཏྟོ. ཝེསཱརཛྫཔྤཏྟོཏི ཝིསཱརདབྷཱཝཔྤཏྟོ. སེསེསུཔི ཨེསེཝ ནཡོ. ཨཡཾ པན ཝིསེསོ – ཨིམེ ཨཱསཝཱཏི ཀཱམཱསཝཱདཱིསུ ཨིམེ ནཱམ ཨཱསཝཱ ན པརིཀྑཱིཎཱཏི ཨཱསཝཀྑཡཝཙནེནེཏྠ སབྦཀིལེསཔྤཧཱནཾ ཝུཏྟཾ. ན ཧི སོ ཀིལེསོ ཨཏྠི, ཡོ སབྦསོ ཨཱསཝེསུ ཁཱིཎེསུ ནཔྤཧཱིཡེཡྻ. ཨནྟརཱཡིཀཱཏི ཨནྟརཱཡཀརཱ, སགྒཝིམོཀྑཱདྷིགམསྶ ཨནྟརཱཡཀརཱཏི ཨཏྠོ. དྷམྨོ ཧི ཡོ སཾཀིལེསཏོ ནིཡྻཱཏི, སོ ‘‘ནིཡྻཱནིཀོ’’ཏི ཝུཏྟོ. དྷམྨེ ནིཡྻནྟེ ཏཾསམངྒཱིཔུགྒལོ ནིཡྻཱནིཀོཏི ཝོཧརིཏོ ཧོཏཱིཏི ཏསྶ པཊིཀྑིཔནྟོ ‘‘སོ ན ནིཡྻཱཏཱི’’ཏི ཨཱཧ. ཀཐཾ པན དེསནཱདྷམྨོ ནིཡྻཱཏཱིཏི ཝུཙྩཏི? ནིཡྻཱནཏྠསམཱདྷཱནཏོ, སོ ཨབྷེདོཔཙཱརེན ‘‘ནིཡྻཱཏཱི’’ཏི ཝུཏྟོ. ཨཐ ཝཱ ‘‘དྷམྨོ དེསིཏོ’’ཏི ཨརིཡདྷམྨསྶ ཨདྷིཔྤེཏཏྟཱ ན ཀོཙི ཝིརོདྷོ.

ཨུསབྷསྶ ཨིདནྟི ཨཱསབྷཾ, ཨསནྟསནཊྛེན ཨཱསབྷཾ ཝིཡཱཏི ཨཱསབྷཾ, སེཊྛཊྛཱནཾ སབྦཉྙུཏཾ. ཨཱསབྷཊྛཱནཊྛཱཡིཏཱཡ ཨཱསབྷཱ ནཱམ པུབྦབུདྡྷཱ. སབྦཉྙུཏཔཊིཛཱནནཝསེན ཨབྷིམུཁཾ གཙྪནྟི, ཙཏསྶོ ཝཱ པརིསཱ ཨུཔསངྐམནྟཱིཏི ཨཱསབྷཱ. ཙཏསྶོཔི ཧི པརིསཱ བུདྡྷཱབྷིམུཁཱ ཨེཝཾ ཏིཊྛནྟི, ན ཏིཊྛནྟི པརམྨུཁཱ. ཨིདམྤཱིཏི ‘‘ཨུསབྷོ’’ཏི ཨིདམྤི པདཾ. ཏསྶཱཏི ནིསབྷསྶ. ཡེསཾ བལུཔྤཱདཱཝཊྛཱནཱནཾ ཝསེན ཨུསབྷསྶ ཨཱསབྷཎྛཱནཾ ཨིཙྪིཏཾ, ཏཏོ སཱཏིསཡཱནཾ ཨེཝ ཏེསཾ ཝསེན ཨཱསབྷཎྛཱནཾ ཧོཏཱིཏི དཊྛབྦཾ. ཡཾ ཀིཉྩི ལོཀེ ཨུཔམཾ ནཱམ བུདྡྷགུཎཱནཾ ནིདསྶནབྷཱཝེན ཝུཙྩཏི, སབྦཾ ཏཾ ནིཧཱིནམེཝ. ཏིཊྛམཱནོ ཙཱཏི ཨཏིཊྛནྟོཔི ཏིཊྛམཱནོ ཨེཝ པཊིཛཱནཱཏི ནཱམ. ཨུཔགཙྪཏཱིཏི ཨནུཛཱནཱཏི.

ཨཊྛ ¶ ¶ ཁོ ཨིམཱཏི ཨིདཾ ཝེསཱརཛྫཉཱཎསྶ བལདསྶནཾ. ཡཐཱ ཧི བྱཏྟཾ པརིསཾ ཨཛ྄ཛྷོགཱཧེཏྭཱ ཝིཉྙཱུནཾ ཙིཏྟཾ ཨཱརཱདྷནསམཏྠཱཡ ཀཐཱཡ དྷམྨཀཐིཀསྶ ཚེཀབྷཱཝོ པཉྙཱཡཏི, ཨེཝཾ ཨིམཱ ཨཊྛ པརིསཱ པཏྭཱ སཏྠུ ཝེསཱརཛྫཉཱཎསྶ བལཾ པཱཀཊཾ ཧོཏི. ཏེན ཝུཏྟཾ ‘‘པརིསཱསཱུ’’ཏི. ཁཏྟིཡཔརིསཱཏི ཁཏྟིཡཱནཾ སནྣིཔཏིཏཱནཾ སམཱུཧོ. ཨེས ནཡོ སབྦཏྠ. མཱརཔརིསཱཏི མཱརཀཱཡིཀཱནཾ སནྣིཔཏིཏཱནཾ སམཱུཧོ. མཱརསདིསཱནཾ མཱརཱནཾ པརིསཱཏི མཱརཔརིསཱ. སབྦཱ ཙེཏཱ པརིསཱ ཨུགྒཊྛཱནདསྶནཝསེན གཧིཏཱ. མནུསྶཱ ཧི ‘‘ཨེཏྠ རཱཛཱ ནིསིནྣོ’’ཏི ཝུཏྟེ པཀཏིཝཙནམྤི ཝཏྟུཾ ན སཀྐོནྟི, ཀཙྪེཧི སེདཱ མུཙྩནྟི, ཨེཝཾ ཨུགྒཱ ཁཏྟིཡཔརིསཱ, བྲཱཧྨཎཱ ཏཱིསུ ཝེདེསུ ཀུསལཱ ཧོནྟི, གཧཔཏཡོ ནཱནཱཝོཧཱརེསུ ཙ ཨཀྑརཙིནྟཱཡ ཙ ཀུསལཱ, སམཎཱ སཀཝཱདཔརཝཱདེསུ ཀུསལཱ, ཏེསཾ མཛ྄ཛྷེ དྷམྨཀཐཱཀཐནཾ ནཱམ ཨཏིཝིཡ བྷཱརིཡཾ. དེཝཱནཾ ཨུགྒབྷཱཝེ ཝཏྟབྦམེཝ ནཏྠི. ཨམནུསྶོཏི ཧི ཝུཏྟམཏྟེ མནུསྶཱནཾ སཀལསརཱིརཾ ཀམྤཏི, ཏེསཾ རཱུཔཾ དིསྭཱཔི སདྡཾ སུཏྭཱཔི སཏྟཱ ཝིསཉྙིཏཱཔི ཧོནྟི. ཨེཝཾ ཨམནུསྶཔརིསཱ ཨུགྒཱ. ཨིཏི ཙེཏཱ པརིསཱ ཨུགྒཊྛཱནདསྶནཝསེན ཝུཏྟཱ. ཀསྨཱ པནེཏྠ ཡཱམཱདིཔརིསཱ ན གཧིཏཱཏི? བྷུསཾ ཀཱམཱབྷིགིདྡྷཏཱཡ ཡོནིསོམནསིཀཱརཝིརཧཏོ. ཡཱམཱདཡོ ཧི ཨུལཱ༹རུལཱ༹རེ ཀཱམེ པཊིསེཝནྟཱ ཏཏྠཱབྷིགིདྡྷཏཱཡ དྷམྨསྶཝནཱཡ སབྷཱཝེན ཙིཏྟམྤི ན ཨུཔྤཱདེནྟི, མཧཱབོདྷིསཏྟཱནཾ པན བུདྡྷཱནཉྩ ཨཱནུབྷཱཝེན ཨཱཀཌྜྷིཡམཱནཱ ཀདཱཙི ནེསཾ པཡིརུཔཱསནཱདཱིནི ཀརོནྟི ཏཱདིསེ མཧཱསམཡེ. ཏེནེཝ ཧི ཝིམཱནཝཏྠུདེསནཱཔི ཏཾནིམིཏྟཱ བཧུལཱ ནཱཧོསི. སེཊྛནཱདནྟི ཀེནཙི ཨཔྤཊིཧཏབྷཱཝེན ཨུཏྟམནཱདཾ. ཨབྷཱིཏནཱདནྟི ཝེསཱརཛྫཡོགཏོ ཀུཏོཙི ནིབྦྷཡནཱདཾ. སཱིཧནཱདསུཏྟེནཱཏི ཁནྡྷིཡཝགྒེ ཨཱགཏེན སཱིཧནཱདསུཏྟེན. སཧནཏོཏི ཁམནཏོ. ཧནནཏོཏི ཝིདྷམནཏོ ཝིདྡྷཾསནཏོ. ཡཐཱ ཝཱཏིཨཱདི ‘‘སཱིཧནཱདསདིསཾ ཝཱ ནཱདཾ ནདཏཱི’’ཏི སངྑེཔཏོ ཝུཏྟསྶ ཨཏྠསྶ ཝིཉྙཱཔནཾ.

ཨེཏནྟི ‘‘བྲཧྨཙཀྐ’’ནྟི ཨེཏཾ པདཾ. པཉྙཱཔབྷཱཝིཏནྟི ཙིརཀཱལཔརིབྷཱཝིཏཱཡ པཱརམིཏཱཔཉྙཱཡ ཝིཔསྶནཱཔཉྙཱཡ ཙ ཨུཔྤཱདིཏཾ. ཀརུཎཱཔབྷཱཝིཏནྟི ‘‘ཀིཙྪཾ ཝཏཱཡཾ ལོཀོ ཨཱཔནྣོ’’ཏིཨཱདིནཡཔྤཝཏྟཱཡ མཧཱཀརུཎཱཡ ཨུཔྤཱདིཏཾ. ཡཐཱ ཨབྷིནིཀྑམནཏོ པབྷུཏི མཧཱབོདྷིསཏྟཱནཾ ཨརིཡམགྒཱདྷིགམནཝིརོདྷིནཱི ¶ པཊིཔཏྟི ནཏྠི, ཨེཝཾ ཏུསིཏབྷཝནཏོ ནིཡཏབྷཱཝཱཔཏྟིཏོ ཙ པཊྛཱཡཱཏི དུཏིཡཏཏིཡནཡཱ ཙ གཧིཏཱ. ཕལཀྑཎེཏི ཨགྒཕལཀྑཎེ. པཊིཝེདྷནིཊྛཏྟཱ ཨརཧཏྟམགྒཉཱཎཾ ཝཛིརཱུཔམཏཱཡེཝ སཱཏིསཡོ པཊིཝེདྷོཏི ‘‘ཕལཀྑཎེ ཨུཔྤནྣཾ ནཱམཱ’’ཏི ཝུཏྟཾ. ཏེན པཊིལདྡྷསྶཔི དེསནཱཉཱཎསྶ ཀིཙྩནིཔྥཏྟི པརསྶ བུཛ྄ཛྷནམཏྟེན ཧོཏཱིཏི ‘‘ཨཉྙཱསིཀོཎྜཉྙསྶ སོཏཱཔཏྟི…པེ… ཕལཀྑཎེ པཝཏྟནཾ ནཱམཱ’’ཏི ཝུཏྟཾ. ཏཏོ པརཾ པན ཡཱཝ པརིནིབྦཱནཱ དེསནཱཉཱཎཔྤཝཏྟི, ཏསྶེཝ པཝཏྟིཏསྶ དྷམྨཙཀྐསྶ ཋཱནནྟི ཝེདིཏབྦཾ ¶ པཝཏྟིཏཙཀྐསྶ ཙཀྐཝཏྟིནོ ཙཀྐརཏནསྶ ཋཱནཾ ཝིཡ. ཨུབྷཡམྤཱིཏི པི-སདྡེན ལོཀིཡདེསནཱཉཱཎསྶ ཨིཏརེན ཨནཉྙསཱདྷཱརཎཏཱཝསེན སམཱནཏཾ སམྤིཎྜེཏི. ཨུརསི ཛཱཏཏཱཡ ཨུརསོ སམྦྷཱུཏནྟི ཨོརསཾ ཉཱཎཾ.

ཨིཏི རཱུཔནྟི ཨེཏྠ ཨིཏི-སདྡོ ཨནཝསེསཏོ རཱུཔསྶ སརཱུཔནིདསྶནཏྠོཏི ཏསྶ ‘‘ཨིདཾ རཱུཔ’’ནྟི ཨེཏེན སཱདྷཱརཎཏོ ཙ སརཱུཔནིདསྶནམཱཧ. ཨེཏྟཀཾ རཱུཔནྟི ཨེཏེན ཨནཝསེསཏོ ‘‘ཨིཏོ ཨུདྡྷཾ རཱུཔཾ ནཏྠཱི’’ཏི ནིམིཏྟསྶ ཨཉྙསྶ ཨབྷཱཝཾ. ཨིདཱནི ཏམཏྠཾ ཝིཏྠཱརཏོ དསྶེཏུཾ ‘‘རུཔྤནསབྷཱཝཉྩེཝཱ’’ཏིཨཱདི ཝུཏྟཾ. ཏཏྠ རུཔྤནཾ སཱིཏཱདིཝིརོདྷིཔཙྩཡསམཝཱཡེ ཝིསདིསུཔྤཏྟི. ཨཱདི-སདྡེན ཨཛ྄ཛྷཏྟིཀབཱཧིརཱདིབྷེདཾ སངྒཎྷཱཏི. ལཀྑཎ…པེ… ཝསེནཱཏི ཀཀྑལ༹ཏྟཱདིལཀྑཎཝསེན སནྡྷཱརཎཱདིརསཝསེན སམྤཊིཙྪནཱདིཔཙྩུཔཊྛཱནཝསེན བྷཱུཏཏྟཡཱདིཔདཊྛཱནཝསེན ཙ. ཨེཝཾ པརིགྒཧིཏསྶཱཏི ཨེཝཾ སཱདྷཱརཎཏོ ཙ ལཀྑཎཱདིཏོ ཙ པརིགྒཧིཏསྶ. ཨཝིཛྫཱསམུདཡཱཏི ཨཝིཛྫཱཡ ཨུཔྤཱདཱ, ཨཏྠིབྷཱཝཱཏི ཨཏྠོ. ནིརོདྷཝིརོདྷཱི ཧི ཨཏྠིབྷཱཝོ ཧོཏི, ཏསྨཱ ནིརོདྷེ ཨསཏི ཨཏྠིབྷཱཝོ ཧོཏི, ཏསྨཱ པུརིམབྷཝེ སིདྡྷཱཡ ཨཝིཛྫཱཡ སཏི ཨིམསྨིཾ བྷཝེ རཱུཔསྶ སམུདཡོ རཱུཔསྶ ཨུཔྤཱདོ ཧོཏཱིཏི ཨཏྠོ. ཏཎྷཱསམུདཡཱ ཀམྨསམུདཡཱཏི ཨེཏྠཱཔི ཨེསེཝ ནཡོ. ཨཝིཛྫཱདཱིཧི ཙ ཏཱིཧི ཨཏཱིཏཀཱལིཀཏྟཱ ཏེསཾ སཧཀཱརཱིཀཱརཎབྷཱུཏཾ ཨུཔཱདཱནམྤི གཧིཏམེཝཱཏི ཝེདིཏབྦཾ. པཝཏྟིཔཙྩཡེསུ ཀབལཱི༹ཀཱརཨཱཧཱརསྶ བལཝཏཱཡ, སོ ཨེཝ གཧིཏོ, ‘‘ཨཱཧཱརསམུདཡཱ’’ཏི པན གཧིཏེན པཝཏྟིཔཙྩཡཏཱམཏྟེན ཨུཏུཙིཏྟཱནིཔི གཧིཏཱནེཝ ཧོནྟཱིཏི དྭཱདསསམུཊྛཱནིཀཾ རཱུཔསྶ པཙྩཡཏོ དསྶནམྤི བྷཝིཏབྦམེཝཱཏི དཊྛབྦཾ. ནིབྦཏྟིལཀྑཎནྟིཨཱདིནཱ ཀཱལཝསེན ¶ ཨུདཡདསྶནམཱཧ. ཏཏྠ བྷཱུཏཝསེན མགྒེ ཨུདཡཾ པསྶིཏྭཱ ཋིཏོ ཨིདྷ སནྟཏིཝསེན ཨནུཀྐམེན ཁཎཝསེན པསྶཏི. ཨཝིཛྫཱནིརོདྷཱ རཱུཔནིརོདྷོཏི ཨགྒམགྒཉཱཎེན ཨཝིཛྫཱཡ ཨནུཔྤཱདནིརོདྷཏོ ཨནཱགཏསྶ ཨནུཔྤཱདནིརོདྷོ ཧོཏི པཙྩཡཱབྷཱཝེ ཨབྷཱཝཏོ. པཙྩཡནིརོདྷེནཱཏི ཨཝིཛྫཱསངྑཱཏསྶ པཙྩཡསྶ ནིརོདྷབྷཱཝེན. ཏཎྷཱནིརོདྷཱཏི ཨེཏྠཱཔི ཨེསེཝ ནཡོ. ཨཱཧཱརནིརོདྷཱཏི པཝཏྟིཔཙྩཡསྶ ཀབལཱི༹ཀཱརཱཧཱརསྶ ཨབྷཱཝཱ. རཱུཔནིརོདྷཱཏི ཏཾསམུཊྛཱནརཱུཔསྶ ཨབྷཱཝོ ཧོཏི. སེསཾ ཧེཊྛཱ ཝུཏྟནཡཱནུསཱརེན ཝེདིཏབྦཾ. ཝིཔརིཎཱམལཀྑཎནྟི བྷཝཀཱལཝསེན ཧེཏུདྭཡདསྶནཾ. ཏསྨཱ ཏཾ པདཊྛཱནཝསེན པགེཝ པསྶིཏྭཱ ཋིཏོ ཨིདྷ སནྟཏིཝསེན དིསྭཱ ཨནུཀྐམེན ཁཎཝསེན པསྶཏི.

ཨིཏི ཝེདནཱཏིཨཱདཱིསུཔི ཝུཏྟནཡེན ཨཏྠོ ཝེདིཏབྦོ. སུཁཱདིབྷེདནྟི སུཁདུཀྑཨདུཀྑམསུཁཱདིཝིབྷཱགཾ. རཱུཔསཉྙཱདིབྷེདནྟི རཱུཔསཉྙཱ, སདྡ… གནྡྷ… རས… ཕོཊྛབྦ ¶ … དྷམྨསཉྙཱདིཝིབྷཱགཾ. ཕསྶཱདིབྷེདནྟི ཕསྶཙེཏནཱམནསིཀཱརཱདིཝིབྷཱགཾ. ལཀྑཎ…པེ… ཝསེནཱཏི ཨིཊྛཱནུབྷཝནལཀྑཎཱདིལཀྑཎཝསེན ཨིཊྛཱཀཱརསམྦྷོགརསཱདིརསཝསེན ཀཱཡིཀཨསྶཱདཱདིཔཙྩུཔཊྛཱནཝསེན ཨིཊྛཱརམྨཎཱདིཔདཊྛཱནཝསེན. ‘‘ཕུཊྛོ ཝེདེཏི, ཕུཊྛོ སཉྫཱནཱཏི, ཕུཊྛོ ཙེཏེཏཱི’’ཏི (སཾ. ནི. ༤.༩༣) ཝཙནཏོ ཏཱིསུ ཝེདནཱདཱིསུ ཁནྡྷེསུ ཕསྶསམུདཡཱཏི ཝཏྟབྦཾ. ཝིཉྙཱཎཔྤཙྩཡཱ ནཱམརཱུཔ’’ནྟི ཝཙནཏོ ཝིཉྙཱཎཀྑནྡྷེ ནཱམརཱུཔསམུདཡཱཏི ཝཏྟབྦཾ. ཏེསཾཡེཝ ཝསེནཱཏི ‘‘ཨཝིཛྫཱནིརོདྷོ ཝེདནཱནིརོདྷོ’’ཏིཨཱདིནཱ ཏེསཾཡེཝ ཨཝིཛྫཱདཱིནཾ ཝསེན ཡོཛེཏབྦཾ.

ཨུཔཱདཱནཀྑནྡྷཱནཾ སམུདཡཏྠངྒམཝསེན ཏིཏྠིཡཱནཾ ཨཝིསཡོཔི སཔྤདེསོ སཱིཧནཱདོ དསྶིཏོ. ཨིདཱནི ནིཔྤདེསོ ཨནུལོམཔཊིལོམཝསེན སངྑེཔཏོ ཝིཏྠཱརཏོ པཙྩཡཱཀཱརཝིསཡོ ཨནཉྙསཱདྷཱརཎོ དསྶཱིཡཏཱིཏི ཨཱཧ, ‘‘ཨཡམྤི ཨཔརོ སཱིཧནཱདོ’’ཏི. ཏསྶཱཏི ‘‘ཨིམསྨིཾ སཏཱི’’ཏིཨཱདིནཱ སངྑེཔཏོ ཝུཏྟཔཊིཙྩསམུཔྤཱདཔཱལི༹ཡཱ. ཨེཏྠ ཙ ‘‘ཨིམསྨིཾ སཏི ཨིདཾ ཧོཏི, ཨིམསྶ ནིརོདྷཱ ཨིདཾ ནིརུཛྷྟཱི’’ཏི ཨཝིཛྫཱདཱིནཾ བྷཱཝེ སངྑཱརཱདཱིནཾ བྷཱཝསྶ, ཨཝིཛྫཱདཱིནཾ ནིརོདྷེ སངྑཱརཱདཱིནཾ ནིརོདྷསྶ ཀཐནེན པུརིམསྨིཾ པཙྩཡལཀྑཎེ ནིཡམོ དསྶིཏོ ‘‘ཨིམསྨིཾ ¶ སཏི ཨེཝ, ནཱསཏི, ཨིམསྶ ཨུཔྤཱདཱ ཨེཝ, ནཱནུཔྤཱདཱ, ནིརོདྷཱ ཨེཝ, ནཱནིརོདྷཱ’’ཏི. ཏེནེདཾ ལཀྑཎཾ ཨནྟོགདྷནིཡམཾ ཨིདྷ པཊིཙྩསམུཔྤཱདསྶ ཝུཏྟནྟི དཊྛབྦཾ. ནིརོདྷོཏི ཙ ཨཝིཛྫཱདཱིནཾ ཝིརཱགཱ ཝིགམེན ཨཱཡཏིཾ ཨནུཔྤཱདོ ཨཔྤཝཏྟི. ཏཐཱ ཧི ཝུཏྟཾ ‘‘ཨཝིཛྫཱཡ ཏྭེཝ ཨསེསཝིརཱགནིརོདྷཱ’’ཏིཨཱདི. ནིརོདྷཝིརོདྷཱི ཙ ཨུཔྤཱདོ, ཡེན སོ ཨུཔྤཱདནིརོདྷཝིབྷཱགེན ཝུཏྟོ ‘‘ཨིམསྶ ནིརོདྷཱ ཨིདཾ ནིརུཛ྄ཛྷཏཱི’’ཏི. ཏེནེཏཾ དསྶེཏི ‘‘ཨསཏི ནིརོདྷེ ཨུཔྤཱདོ ནཱམ, སོ ཙེཏྠ ཨཏྠིབྷཱཝོཏི ཝུཙྩཏཱི’’ཏི. ‘‘ཨིམསྨིཾ སཏི ཨིདཾ ཧོཏཱི’’ཏི ཨིདམེཝ ཧི ལཀྑཎཾ. པརིཡཱཡནྟརེན ‘‘ཨིམསྶ ཨུཔྤཱདཱ ཨིདཾ ཨུཔྤཛྫཏཱི’’ཏི ཝདནྟེན པརེན པུརིམཾ ཝིསེསིཏཾ ཧོཏི. ཏསྨཱ ན ཝཏྟམཱནཾཡེཝ སནྡྷཱཡ ‘‘ཨིམསྨིཾ སཏཱི’’ཏི ཝུཏྟཾ, ཨཐ ཁོ མགྒེན ཨནིརུཛ྄ཛྷནསབྷཱཝཉྩཱཏི ཝིཉྙཱཡཏི. ཡསྨཱ ཙ ‘‘ཨིམསྨིཾ ཨསཏི ཨིདཾ ན ཧོཏི, ཨིམསྶ ནིརོདྷཱ ཨིདཾ ནིརུཛ྄ཛྷཏཱི’’ཏི དྭིདྷཱཔི ཨུདྡིཊྛསྶ ལཀྑཎསྶ ནིདྡེསཾ ཝདནྟེན བྷགཝཏཱ ‘‘ཨཝིཛྫཱཡ ཏྭེཝ ཨསེསཝིརཱགནིརོདྷཱ སངྑཱརནིརོདྷོ’’ཏིཨཱདིནཱ ནིརོདྷོཝ ཝུཏྟོ, ཏསྨཱ ནཏྠིབྷཱཝོཔི ནིརོདྷོ ཨེཝཱཏི ནཏྠིབྷཱཝཝིརུདྡྷོ ཨཏྠིབྷཱཝོ ཨནིརོདྷོཏི དསྶིཏཾ ཧོཏི. ཏེན ཨནིརོདྷསངྑཱཏེན ཨཏྠིབྷཱཝེན ཨུཔྤཱདཾ ཝིསེསེཏི. ཏཏོ ཨིདྷ ན ཀེཝལཾ ཨཏྠིབྷཱཝམཏྟཾ ཨུཔྤཱདོཏི ཨཏྠོ ཨདྷིཔྤེཏོ, ཨཐ ཁོ ཨནིརོདྷསངྑཱཏོ ཨཏྠིབྷཱཝོ ཙཱཏི ཨཡམཏྠོ ཝིབྷཱཝིཏོ ཧོཏི. ཨེཝམེཏཾ ལཀྑཎདྭཡཝཙནཾ ཨཉྙམཉྙཾ ཝིསེསནཝིསེསིཏབྦབྷཱཝེན སཱཏྠཀནྟི ཝེདིཏབྦཾ. ཀོ པནཱཡཾ ཨནིརོདྷོ ནཱམ, ཡོ ‘‘ཨཏྠིབྷཱཝོ, ཨུཔྤཱདོ’’ཏི ཙ ཝུཏྟོཏི? ཨཔྤཧཱིནབྷཱཝོ ཙ ཨནིབྦཏྟིཏཕལབྷཱཝེན ¶ ཕལུཔྤཱདནཱརཧཏཱ ཙཱཏི ཨཡམེཏྠ སངྑེཔོ. ཝིཏྠཱརོ པན པརམཏྠདཱིཔནིཡཾ ཨུདཱནཊྛཀཐཱཡཾ (ཨུདཱ. ཨཊྛ. ༡). ཝུཏྟནཡེན ཝེདིཏབྦོ.

པཉྩཀྑནྡྷཝིབྷཛནཱདིཝསེནཱཏི པཉྩནྣཾ ཨུཔཱདཱནཀྑནྡྷཱནཾ དྭཱདསཔདིཀསྶ པཙྩཡཱཀཱརསྶ ཝིབྷཛནཝསེན. ཨིམསྨིཉྷི དསབལསུཏྟེ དྷམྨསྶ དེསིཏཱཀཱརོ པཉྩཀྑནྡྷཔཙྩཡཱཀཱརམཏྟོ. ཏེནཱཧ ‘‘པཉྩཀྑནྡྷཔཙྩཡཱཀཱརདྷམྨོ’’ཏི. ཨཱཙརིཡམུཊྛིཡཱ ཨཀརཎེན ཝིབྷཱུཏོ, སོ པན ཨཏྠཏོ ཙ སདྡཏོ ཙ པིཧིཏོ ཧེཊྛཱམུཁཛཱཏོ ཝཱ ན ཧོཏཱིཏི ཨཱཧ ‘‘ཨནིཀུཛྫིཏོ’’ཏི. ཝིཝཊོཏི ཝིབྷཱཝིཏོ. ཏེནཱཧ ‘‘ཝིཝརིཏྭཱ ཋཔིཏོ’’ཏི ¶ . པཀཱསིཏོཏི ཉཱཎོབྷཱསེན ཨོབྷཱསིཏོ ཨཱདཱིཔིཏོཏི ཨཱཧ ‘‘དཱིཔིཏོ ཛོཏིཏོ’’ཏི. ཏཏྠ ཏཏྠ ཚིནྣབྷིནྣཊྛཱནེ. སིབྦིཏགཎྛིཏནྟི ཝཱཀཾ གཧེཏྭཱ སིབྦིཏཾ, སིབྦིཏུཾ ཨསཀྐུཎེཡྻཊྛཱནེ ཝཱཀེན གཎྛིཏཉྩ. ཚིནྣཔིལོཏིཀཱབྷཱཝེན ཝིགཏཔིལོཏིཀོ དྷམྨོ, ཏསྶ ཚིནྣཔིལོཏིཀསྶ པཊིལོམཏཱ ཚིནྣབྷིནྣཏཱབྷཱཝེནཱཏི དསྶེནྟོ ‘‘ན ཧེཏྠཱ’’ཏིཨཱདིམཱཧ. ནིཝཱསནཔཱརུཔནཾ པརིགྒཧཎཾ. སཡཾ པཊིབྷཱནཾ ཀཔྤེཏྭཱ. ཝཌྜྷེནྟཱ ཨཏྟནོ སམཡཾ. སམཎཀཙཝརནྟི སམཎཝེསདྷཱརཎཝསེན སམཎཔཊིརཱུཔཏཱཡ སམཎཱནཾ ཀཙཝརབྷཱུཏཾ. ཨཏྟནོ རཱུཔཔཝཏྟིཡཱ ཀརཎྜཾ ཀུཙྪིཏཾ དྷུཏྟཾ ཝཱཏི པཝཏྟེཏཱིཏི ཀཱརཎྜཝོ, དུསྶཱིལོ. ཏཾ ཀཱརཎྜཝཾ. ནིདྡྷམཐཱཏི ནཱིཧརཐ. ཀསམྦུནྟི སམཎཀསཊཾ. ཨཔཀསྶཐཱཏི ཨཔཀཌྜྷཐ ནནྟི ཨཏྠོ. པལཱཔེཏི པལཱཔསདིསེ. ཏཐཱ ཧི ཏཎྜུལསཱརརཧིཏོ དྷཉྙཔཊིརཱུཔཀོ ཐུསམཏྟཀོ པལཱཔོཏི ཝུཙྩཏི, ཨེཝཾ སཱིལཱདིསཱརརཧིཏོ སམཎཔཊིརཱུཔཀོ པལཱཔོ ཝིཡཱཏི པལཱཔོ, དུསྶཱིལོ. ཏེ པལཱཔེ. ཝཱཧེཐཱཏི ཨཔནེཐ. པཏིསྶཏཱཏི བཱལ༹ྷསཏིཏཱཡ པཏིསྶཏཱ ཧོཐཱཏི.

སདྡྷཱཡ པབྦཛིཏེནཱཏི རཱཛཱུཔདྡཝཱདཱིཧི ཨནུཔདྡུཏེན ‘‘ཨེཝཉྷི ཏཾ ཨོཏིཎྞཾ ཛཱཏིཨཱདིསཾསཱརབྷཡཾ ཝིཛིནིསྶཱམཱི’’ཏི ཝཊྚནིསྶརཎཏྠཾ ཨཱགཏཱཡ སདྡྷཱཡ ཝསེན པབྦཛིཏེན. ཨཱཙཱརཀུལཔུཏྟོཏི ཨཱཙཱརེན ཨབྷིཛཱཏོ. ཏེནཱཧ ‘‘ཡཏོ ཀུཏོཙཱི’’ཏིཨཱདི. ཛཱཏིཀུལཔུཏྟོཏི ཛཱཏིསམྤཏྟིཡཱ ཨབྷིཛཱཏོ. ཝིཉྙུཔྤསཏྠཱནི ཨངྒཱནི སམྨཱཔདྷཱནིཡངྒབྷཱཝེན, ཀཱཡེ ཙ ཛཱིཝིཏེ ཙ ནིརཔེཀྑབྷཱཝེན ཝཱིརིཡཾ ཨཱརབྷནྟསྶ ཏཐཱཔཝཏྟཝཱིརིཡཝསེན ‘‘ཏཙོ ཨེཀཾ ཨངྒ’’ནྟི ཝུཏྟཾ. ཨེས ནཡོ སེསེསུཔི. ནཝསུ ཋཱནེསུ སམཱདྷཱཏབྦནྟི ‘‘ཀཱལཝསེན པཉྩསུ, ཨིརིཡཱཔཐཝསེན ཙཏཱུསཱུ’’ཏི ཨེཝཾ ནཝསུ ཋཱནེསུ ཝཱིརིཡཾ སམཱདྷཱཏབྦཾ པཝཏྟེཏབྦཾ.

སོ དུཀྑཾ ཝིཧརཏཱིཏི ཀུསཱིཏཔུགྒལོ ནིཡྻཱནིཀསཱསནེ ཝཱིརིཡཱརམྦྷསྶ ཨཀརཎེན སཱམཉྙཏྠསྶ ཨནུཔྤཏྟིཡཱ དུཀྑཾ ཝིཧརཏི. སཀཾ ཝཱ ཨཏྠཾ སདཏྠཾ ཀ-ཀཱརསྶ ད-ཀཱརཾ ཀཏྭཱ ¶ . ཀུསཱིཏསྶ ཨཏྠཔརིཧཱཡནཾ མཱུལཏོ པཊྛཱཡ དསྶེཏུཾ ‘‘ཚ དྭཱརཱནཱི’’ཏིཨཱདི ཝུཏྟཾ. ནིསཛྫཱཝསེན པཱིཋམདྡནཏོ པཱིཋམདྡནོ, ནིརསྶནཝཙནཾ ཏསྶ, ཀསྶཙིཔཏྠསྶ ཨདྷཱརཎཏོ ཀེཝལཾ པཱིཋབྷཱརབྷཱུཏོཏི ཨདྷིཔྤཱཡོ. ཨཉྙཏྠ པན ‘‘མཁམདྡནོ’’ཏི ¶ ཝུཙྩཏི, ཏཏྠ དཱནམིཙྪཱཡ པརེསཾ མཁཾ པསྶནྟོཏི ཨཏྠོ. ལཎྜཔཱུརཀོཏི ཀུཙྪིཔཱུརཾ བྷུཉྫིཏྭཱ ཝཙྩཀུཊིཔཱུརཀོ.

‘‘ཨཱརདྡྷཝཱིརིཡོ’’ཏིཨཱདཱིསུ ‘‘ཀུསཱིཏོ པུགྒལོ’’ཏི ཨེཏྠ ཝུཏྟཝིཔརིཡཱཡེན ཨཏྠོ ཝེདིཏབྦོ, ཨཱསཱིསཱཡ ཝསེན ཐོམིཏོ. ཨཱརདྡྷཝཱིརིཡེཏི པགྒཧིཏཝཱིརིཡེ. པཧིཏཏྟེཏི ནིབྦཱནཾ པཏིཔེསིཏཙིཏྟེ. ཨེཏེན སཱཝཀཱནཾ སམྨཱཔཊིཔཏྟིཾ སཏྠུཝནྡནཱནིསཾསཉྩ དསྶེསི.

ཧཱིནེནཱཏི ཝཊྚནིསྶིཏེན དྷམྨེན. ཏེནཱཧ ‘‘ཧཱིནཱཡ སདྡྷཱཡཱ’’ཏིཨཱདི. ཨགྒེནཱཏི སེཊྛེན ཝིཝཊྚནིསྶིཏེན དྷམྨེན, ཨཱིསཀམྤི ཀཏཀཱལུསིཡཝིགཏཊྛེན མཎྜཊྛེན ཙ པསནྣམྤི སུརཱདི ན པཱཏབྦཾ. སཱསནནྟི པརིཡཏྟིཔཊིཔཏྟིཔཊིཝེདྷལཀྑཎཾ སཱསནཾ. པསནྣཾ ཝིགཏདོསམལཏྟཱ པསཱདནིཡཏྟཱ ཙ. པཱཏབྦཉྩ པཏྟེན ཝིཡ སུཁེན པརིབྷུཉྫིཏབྦཏོ དུཙྩརིཏསབྦཀིལེསཀསཱཝམལཔངྐདོསརཧིཏཏྟཱ ཙ.

མཎྜབྷཱུཏཱ བོདྷིཔཀྑིཡདྷམྨདེསནཱཔི དེསནཱམཎྜོ. ཏསྶ ཨེཀསྶེཝ པན དེསནཱམཎྜསྶ པཊིགྒཱཧཀཱ སུཔྤཊིཔནྣཱ དོསརཧིཏཱ ཙཏསྶོ པརིསཱ པཊིགྒཧམཎྜོ. མགྒབྲཧྨཙརིཡཾ ཏགྒཏིཀཏྟཱ སཀལོཔི བོདྷིཔཀྑིཡདྷམྨརཱསི བྲཧྨཙརིཡམཎྜོ. ཏེནཱཧ ‘‘ཀཏམོ དེསནཱམཎྜོ’’ཏིཨཱདི. ཏཏྠ ཝིཉྙཱཏཱརོཏི སཙྩཱནཾ ཨབྷིསམེཏཱཝིནོ. ཏཐཱ ཧི ཨཱདིཏོ ‘‘ཙཏུནྣཾ ཨརིཡསཙྩཱནཾ ཨཱཙིཀྑཎཱ’’ཏིཨཱདི ཝུཏྟཾ. པུབྦབྷཱགེ ‘‘ཨཏྠི ཨཡཾ ལོཀོ’’ཏིཨཱདིནཱ ཨིདྷལོཀཔརལོཀགཏསམྨོསཝིགམེན པཝཏྟོ ཨདྷིམོཀྑོཝ ཨདྷིམོཀྑམཎྜོ. ཚཌྜེཏྭཱ སམུཙྪེདཝསེན ཝིཛཧིཏྭཱ. ཙཏུབྷཱུམཀསྶ སདྡྷིནྡྲིཡསྶ ཨདྷིམོཀྑམཎྜེན མཎྜབྷཱུཏཾ ཨདྷིམོཀྑཾ. ཨཱདི-སདྡེན ‘‘པགྒཧམཎྜོ ཝཱིརིཡིནྡྲིཡཾ ཀོསཛྫཀསཊ’’ནྟིཨཱདིཾ པཱལི༹སེསཾ སངྒཎྷཱཏི. ཨེཏྠཱཏི ཨེཏསྨིཾ སཱསནེ, ‘‘མཎྜསྨི’’ནྟི ཝཱ ཝཙནེ. ཀཱརཎཝཙནཾ, ཏེན ‘‘སཏྠཱ སམྨུཁཱིབྷཱུཏོ’’ཏི སམྨུཁབྷཱཝནཱཡོགོ ནིརཱསངྐཕལཱཝཧོཏི དསྶེཏི. ཏེནཱཧ ‘‘ཨསམྨུཁཱ’’ཏིཨཱདི. པམཱཎནྟི ཨནུརཱུཔཾ བྷེསཛྫསྶ པམཱཎཾ. ཨུགྒམནནྟི བྷེསཛྫསྶ ཝམནཾ ཝིརེཙནཾ, ཏསྶ ཝཱ ཝསེན དོསདྷཱཏཱུནཾ ཝམནཾ ཝིརེཙནཾ. ཨེཝམེཝཱཏི ཡཐཱ བྷེསཛྫམཎྜཾ ཝེཛྫསམྨུཁཱ ནིརཱསངྐཱ པིཝནྟི, ཨེཝམེཝ ¶ ‘‘སཏྠཱ སམྨུཁཱིབྷཱུཏོ’’ཏི ནིརཱསངྐཱ ཝཱིརིཡཾ ཀཏྭཱ, མཎྜཔེཡྻ སཱསནཾ པིཝཐཱཏི ཡོཛནཱ. ཨབྷིཉྙཱསམཱཔཏྟིཔཊིལཱབྷེན སཱནིསཾསཱ. མགྒཕལཱདྷིགམནེན སཝཌྜྷི ¶ . པརཏྠནྟི ཨཏྟནོ དིཊྛཱནུགཏིཨཱཔཏྟིཡཱ, ཏཐཱ སམྨཱཔཊིཔཛྫནྟཱནཾ པརེསཾ ཨཏྠནྟི ཨེཝམེཏྠ ཨཏྠོ དཊྛབྦོ.

དུཏིཡདསབལསུཏྟཝཎྞནཱ ནིཊྛིཏཱ.

༣. ཨུཔནིསསུཏྟཝཎྞནཱ

༢༣. ཛཱནཏོ པསྶཏོཏི ཨེཏྠ དསྶནཾ པཉྙཱཙཀྑུནཱཝ དསྶནཾ ཨདྷིཔྤེཏཾ, ན མཾསཙཀྑུནཱཏི ཨཱཧ ‘‘དྭེཔི པདཱནི ཨེཀཏྠཱནཱི’’ཏི. ཨེཝཾ སནྟེཔཱིཏི པདདྭཡསྶ ཨེཀཏྠཏྟེཔི ཉཱཎལཀྑཎཉཱཎཔྤབྷཱཝཝིསཡསྶྶ ཏཐཱདསྶནབྷཱཝཱཝིརོདྷནཱཏི ཨཏྠོ. ཏེནཱཧ ‘‘ཛཱནནལཀྑཎཉྷི ཉཱཎ’’ནྟིཨཱདི. ཉཱཎཔྤབྷཱཝནྟི ཉཱཎཱནུབྷཱཝེན ཉཱཎཀིཙྩཝིསཡོབྷཱསནྟི ཨཏྠོ. ཏེནཱཧ ‘‘ཉཱཎེན ཝིཝཊྚེ དྷམྨེ པསྶཏཱི’’ཏི. ཛཱནཏོ པསྶཏོཏི ཙ ཛཱནནདསྶནམུཁེན པུགྒལཱདྷིཊྛཱནཱ དེསནཱ པཝཏྟཱཏི ཨཱཧ – ‘‘ཉཱཎལཀྑཎཾ ཨུཔཱདཱཡཱ’’ཏིཨཱདི. ཛཱནཏོཏི ཝཱ པུབྦབྷཱགཉཱཎེན ཛཱནཏོ, ཨཔརབྷཱགེན ཉཱཎེན པསྶཏོ. ཛཱནཏོཏི ཝཱ ཝཏྭཱ ན ཛཱནནཾ ཨནུསྶཝཱཀཱརཔརིཝིཏཀྐམཏྟཝསེན ཨིདྷཱདྷིཔྤེཏཾ, ཨཐ ཁོ རཱུཔཱནི ཝིཡ ཙཀྑུཝིཉྙཱཎེན རཱུཔཱདཱིནི ཏེསཉྩ སམུདཡཱདིཀེ པཙྩཀྑེ ཀཏྭཱ དསྶནནྟི ཝིབྷཱཝེཏུཾ ‘‘པསྶཏོ’’ཏི ཝུཏྟནྟི ཨེཝཾ ཝཱ ཨེཏྠ ཨཏྠོ.

ཨཱསཝཱནཾ ཁཡནྟི ཨཱསཝཱནཾ ཨཙྩནྟཔྤཧཱནཾ. སོ པན ཏེསཾ ཨནུཔྤཱདནིརོདྷོ སབྦེན སབྦཾ ཨབྷཱཝོ ཨེཝཱཏི ཨཱཧ ‘‘ཨསམུཔྤཱདོ ཁཱིཎཱཀཱརོ ནཏྠིབྷཱཝོ’’ཏི. ཨཱསཝཀྑཡསདྡསྶ ཁཱིཎཱཀཱརཱདཱིསུ ཨཱགཏཊྛཱནཾ དསྶེཏུཾ ‘‘ཨཱསཝཱནཾ ཁཡཱ’’ཏིཨཱདི ཝུཏྟཾ. ཨུཛུམགྒཱནུསཱརིནོཏི ཀིལེསཝངྐཀཱཡཝངྐཱདཱིནཾ པཧཱནེན ཨུཛུབྷཱུཏེ སཝིཔསྶནཱཧེཊྛིམམགྒདྷམྨེ ཨནུསྶརནྟསྶ. ཡདེཝ ཧིསྶ པརིཀྑཱིཎཾ. ཁཡསྨིཾ པཋམཾ ཉཱཎཾ ‘‘ཏཏོ ཨཉྙཱ ཨནནྟརཱ’’ཏི ཁཡསངྑཱཏེ ཨགྒམགྒེ ཏཔྤརིཡཱཔནྣམེཝ ཉཱཎཾ པཋམཾ ཨུཔྤཛྫཏི, ཏདནནྟརཾ པན ཨཉྙཱ ཨརཧཏྟནྟི. ཡདིཔི གཱཐཱཡ ‘‘ཁཡསྨིཾ’’ཨིཙྩེཝ ཝུཏྟཾ, སམུཙྪེདཝསེན པན ‘‘ཨཱསཝེ ¶ ཁཱིཎེ མགྒོ ཁཡོ’’ཏི ཝུཙྩཏཱིཏི ཨཱཧ ‘‘མགྒོ ཨཱསཝཀྑཡོཏི ཝུཏྟོ’’ཏི. སམཎོཏི སམིཏཔཱཔོ ཨདྷིཔྤེཏོ, སོ པན ཁཱིཎཱསཝོ ཧོཏཱིཏི. ‘‘ཨཱསཝཱནཾ ཁཡཱ’’ཏི ཨིདྷ ཕལཾ, པརིཡཱཡེན པན ཨཱསཝཀྑཡོ མགྒོ, ཏེན པཏྟབྦཏོ ཕལཾ. ཨེཏེནེཝ ནིབྦཱནསྶཔི ཨཱསཝཀྑཡབྷཱཝོ ཝུཏྟོཏི ཝེདིཏབྦོ.

ཛཱནཏོ ཨེཝ པསྶཏོ ཨེཝཱཏི ཨེཝམེཏྠ ནིཡམོ ཨིཙྪིཏོ, ན ཨཉྙཐཱ ཝིསེསཱབྷཱཝཏོ ཨནིཊྛཱཔནྣོཝཱཏི ཏསྶ ནིཡམསྶ ཕལཾ དསྶེཏུཾ ‘‘ནོ ཨཛཱནཏོ ནོ ཨཔསྶཏོ’’ཏི ཝུཏྟནྟི ཨཱཧ ¶ ‘‘ཡོ པན ན ཛཱནཱཏི, ན པསྶཏི, ཏསྶ ནོ ཝདཱམཱིཏི ཨཏྠོ’’ཏི. ཨིམིནཱ ཁནྡྷཱནཾ པརིཉྙཱ ཨཱསཝཀྑཡསྶ ཨེཀནྟིཀཀཱརཎནྟི དསྶེཏི. ཨེཏེནཱཏི ‘‘ནོ ཨཛཱནཏོ, ནོ ཨཔསྶཏོ’’ཏི ཨེཏེན ཝཙནེན. ཏེ པཊིཀྑིཏྟཱཏི ཀེ པན ཏེཏི? ‘‘བཱལེ ཙ པཎྜིཏེ ཙ སནྡྷཱཝིཏྭཱ སཾསརིཏྭཱ དུཀྑསྶནྟཾ ཀརིསྶནྟི (དཱི. ནི. ༡.༡༦༨; མ. ནི. ༢.༢༢༨) ཨཧེཏཱུ ཨཔྤཙྩཡཱ སཏྟཱ ཝིསུཛ྄ཛྷནྟཱི’’ཏི (དཱི. ནི. ༡.༡༦༨; མ. ནི. ༢.༡༠༡, ༢༢༧) ཨེཝམཱདིཝཱདཱ. ཏེསུ ཀེཙི ཨབྷིཛཱཏིསངྐནྟིམཏྟེན སཾསཱརསུདྡྷིཾ པཊིཛཱནནྟི, ཨཉྙེ ཨིསྶརཔཛཱཔཏིཀཱརཎཱདིཝསེན. ཏཡིདཾ སབྦཾ སཾསཱརཱདཱིཧཱིཏི ཨེཏྠེཝ སངྒཧིཏནྟི དཊྛབྦཾ. པུརིམེན པདདྭཡེནཱཏི ‘‘ཛཱནཏོ པསྶཏོ’’ཏི ཨིམིནཱ པདདྭཡེན. ཨུཔཱཡོ ཝུཏྟོ ‘‘ཨཱསཝཀྑཡཱ’’ཏི ཨདྷིཀཱརཏོ. ཨིམིནཱཏི ‘‘ནོ ཨཛཱནཏོ, ནོ ཨཔསྶཏོ’’ཏི ཨིམིནཱ པདདྭཡེན. ཨནུཔཱཡོ ཧོཏི ཨེས ཨཱསཝཱནཾ ཁཡསྶ, ཡདིདཾ པཉྩནྣཾ ཁནྡྷཱནཾ ཨཔརིཉྙཱཏི ‘‘ཛཱནཏོ པསྶཏོ’’ཏི ཨིམིནཱཝ ཨནིཡམཝཙནེན ཨནུཔཱཡཔཊིསེདྷོཔི ཨཏྠཏོ བོདྷིཏོ ཧོཏཱིཏི. ཏམེཝ ཧི ཨཏྠཏོ བོདྷིཏབྷཱཝཾ ཝིབྷཱཝེཏུཾ ཨེཝཾ སཾཝཎྞནཱ ཀཏཱཏི དཊྛབྦཾ.

དབྦཛཱཏིཀོཏི དབྦརཱུཔོ. སོ ཧི ‘‘དྲབྱོ’’ཏི ཝུཙྩཏི ‘‘དྲབྱཾ ཝིནསྶཏི ནཱདྲབྱ’’ནྟིཨཱདཱིསུ. དབྦཛཱཏིཀོ ཝཱ སཱརསབྷཱཝོ, སཱརུཔྤསཱིལཱཙཱརོཏི ཨཏྠོ. ཡཐཱཧ ‘‘ན ཁོ དབྦ དབྦཱ ཨེཝཾ ནིབྦེཋེནྟཱི’’ཏི (པཱརཱ. ༣༨༤). ཝཏྟསཱིསེ ཋཏྭཱཏི ཝཏྟཾ ཨུཏྟམཾ དྷུརཾ ཀཏྭཱ. ཡོ ཧི པརིསུདྡྷཱཛཱིཝོ ཀཱཏུཾ ཨཛཱནནྟཱནཾ སབྲཧྨཙཱརཱིནཾ ཨཏྟནོ ཝཱ ཝསྶཝཱཏཱདིཔཊིབཱཧནཏྠཾ ཚཏྟཱདཱིནི ཀརོཏི, སོ ཝཏྟསཱིསེ ཋཏྭཱ ཀརོཏི ནཱམ. པདཊྛཱནཾ ན ཧོཏཱིཏི ན ཝཏྟབྦཾ ནཱཐཀརཎདྷམྨབྷཱཝེན མགྒཕལཱདྷིགམསྶ ཨུཔནིསྶཡབྷཱཝཏོ. ཝུཏྟཉྷི ‘‘ཡཱནི ཏཱནི སབྲཧྨཙཱརཱིནཾ ཨུཙྩཱཝཙཱནི ཀིཙྩཀརཎཱིཡཱནི, ཏཏྠ དཀྑོ ཧོཏཱི’’ཏིཨཱདི ¶ (དཱི. ནི. ༣.༣༤༥). ཨེཝཾ ཛཱནཏོཏི ཨེཝཾ ཝེཛྫཀམྨཱདཱིནཾ ཛཱནནཧེཏུ མིཙྪཱཛཱིཝཔཙྩཡཱ ཀཱམཱསཝཱདཡོ ཨཱསཝཱ ཝཌྜྷནྟིཡེཝ, ན པཧཱིཡནྟི. ‘‘ཨེཝཾ ཁོ…པེ… ཨཱསཝཱནཾ ཁཡོ ཧོཏཱི’’ཏི ཨིམཱཡ པཱལི༹ཡཱ ཨརཧཏྟསྶེཝ གཧཎཾ ཡུཏྟཾ ཕལགྒཧཎེན ཧེཏུནོ ཨཝུཏྟསིདྡྷཏྟཱ. ཏེནཱཧ ‘‘ཨཱསཝཱནཾ ཁཡནྟེ ཛཱཏཏྟཱ’’ཏི.

ཨཱགམནཾ ཨཱགམོ, ཏཾ ཨཱཝཧཏཱིཏི ཨཱགམནཱིཡཱ, པུབྦབྷཱགཔཊིཔདཱ. ཁཡསྨིནྟི བྷཱཝེནབྷཱཝལཀྑཎེ བྷུམྨཾ, ཁཡེཏི པན ཝིསཡེ. ཏེནཱཧ ‘‘ཨཱསཝཀྑཡསངྑཱཏེ’’ཏི. ཨུཔནིསཱིདཏི ཕལཾ ཨེཏྠཱཏི ཀཱརཎཾ ཨུཔནིསཱ. ཨརཧཏྟཕལཝིམུཏྟི ཨུཀྐཊྛནིདྡེསཏོ. སཱཏི ཝིམུཏྟི. ཨསྶཱཏི པཙྩཝེཀྑཎཉཱཎསྶ. མནསྨིཾ ཝིཝཊྚནིསྶིཏེ པན ཨནནྟརཱུཔནིསྶཡཱཔི པཙྩཡཱ སམྦྷཝནྟཱིཏི ‘‘ལབྦྷམཱནཝསེན པཙྩཡབྷཱཝོ ཝེདིཏབྦོ’’ཏི ཝུཏྟཾ.

ཝིརཛྫཏི ¶ ཨསེསསངྑཱརཏོ ཨེཏེནཱཏི ཝིརཱགོ, མགྒོ. ནིབྦིནྡཏི ཨེཏཱཡཱཏི ནིབྦིདཱ, བལཝཝིཔསྶནཱ. ཏེནཱཧ ‘‘ཨེཏེནཱ’’ཏིཨཱདི. པཊིསངྑཱནུཔསྶནཱཔི མུཙྩིཏུཀམྱཏཱཔཀྑིཀཱ ཨེཝཱཏི ཨདྷིཔྤཱཡེན ‘‘ཙཏུནྣཾ ཉཱཎཱནཾ ཨདྷིཝཙན’’ནྟི ཝུཏྟཾ. ‘‘ཡཱཝ མགྒཱམགྒཉཱཎདསྶནཝིསུདྡྷི, ཏཱཝ ཏརུཎཝིཔསྶནཱ’’ཏི ཧི ཝཙནཏོ ཨུཔཀྐིལེསཝིམུཏྟཨུདཡབྦཡཉཱཎཏོ པརཾ བལཝཝིཔསྶནཱ. རཱུཔཱརཱུཔདྷམྨཱནཾ ཝིསེསབྷཱུཏོ སཱམཉྙབྷཱུཏོ ཙ ཡོ ཡོ སབྷཱཝོ ཡཐཱསབྷཱཝོ, ཏསྶ ཛཱནནཾ ཡཐཱསབྷཱཝཛཱནནཾ. ཏདེཝ དསྶནཾ. པཙྩཀྑཀརཎཏྠེན ཉཱཏཔརིཉྙཱ ཏཱིརཎཔརིཉྙཱ ཙ གཧིཏཱ ཧོཏི. ཏེནཱཧ ‘‘ཏརུཎཝིཔསྶན’’ནྟིཨཱདི. སངྑཱརཔརིཙྪེདེཉཱཎནྟི ནཱམརཱུཔཔརིགྒཧཉཱཎཾ ཝདཏི. ཀངྑཱཝིཏརཎཾ པཙྩཡཔརིགྒཧོ དྷམྨཊྛིཏིཉཱཎནྟིཔི ཝུཙྩཏི. ནཡཝིཔསྶནཱདིཀཾ ཨནུཔསྶནཱཉཱཎཾ སམྨསནཾ. མགྒཱམགྒེཉཱཎནྟི མགྒཱམགྒཾ ཝཝཏྠཔེཏྭཱ ཋིཏཾ ཉཱཎཾ. སོ ཧི པཱདཀཛ྄ཛྷཱནསམཱདྷི ཏརུཎཝིཔསྶནཱཡ པཙྩཡོ ཧོཏི. ‘‘སམཱཧིཏོ ཡཐཱབྷཱུཏཾ པཛཱནཱཏི པསྶཏཱི’’ཏི (སཾ. ནི. ༣.༥.; ༤.༩༩; ༥.༡༠༧༡) ཧི ཝུཏྟཾ.

པུབྦབྷཱགསུཁནྟི ཨུཔཙཱརཛ྄ཛྷཱནསཧིཏསུཁཾ. དརཐ པཊིཔྤསྶདྡྷཱིཏི ཀཱམཙྪནྡཱདིཀིལེསདརཐསྶ པཊིཔསྶམྦྷནཾ. ‘‘སུཁཾཔཱཧཾ, བྷིཀྑཝེ, སཨུཔནིསཾ ཝདཱམཱི’’ཏི ཨེཏྠ ཨདྷིཔྤེཏསུཁཾ དསྶེཏུཾ ‘‘ཨཔྤནཱཔུབྦབྷཱགསྶ སུཁསྶཱ’’ཏི ཝུཏྟཾ. ‘‘པསྶདྡྷཀཱཡོ སུཁཾ ཝེདེཏཱི’’ཏི (དཱི. ནི. ༡.༤༦༦;༣.༣༥༩; ཨ.ནི. ༡.༣.༩༦) ཝུཏྟཨཔྤནཱསུཁསྶ པསྶདྡྷིཡཱ པཙྩཡཏྟེ ¶ ཝཏྟབྦམེཝ ནཏྠི. སུཁནྟི ཨེཏྠཱཔི ཨེསེཝ ནཡོ. བལཝཔཱིཏཱིཏི ཕརཎལཀྑཎཔྤཏྟཱ པཱིཏི. ཏཱདིསཱ ཧི ཝིཏཀྐཝིཙཱརསུཁསམཱདྷཱིཧི ལདྡྷཔྤཙྩཡཱ ནཱིཝརཎཾ ཝིཀྑམྦྷནྟཱི ཏཾནིམིཏྟཾ དརཐཾ པརིལཱ༹ཧཾ པཊིཔསྶམྦྷེཏི. ཏེནཱཧ ‘‘སཱ ཧི དརཐཔྤསྶདྡྷིཡཱ པཙྩཡོ ཧོཏཱི’’ཏི. དུབྦལཔཱིཏཱིཏི ཏརུཎཔཱིཏི. ཏེནཱཧ ‘‘སཱ ཧི བལཝཔཱིཏིཡཱ པཙྩཡོ ཧོཏཱི’’ཏི. སདྡྷཱཏི རཏནཏྟཡགུཎཱནཾ ཀམྨཕལསྶ ཙ སདྡཧནཝསེན པཝཏྟོ ཨདྷིམོཀྑོ, སཱ པན ཡསྨཱ ཨཏྟནོ ཝིསཡེ པུནཔྤུནཾ ཨུཔྤཛྫཏི, ན ཨེཀཝཱརམེཝ, ཏསྨཱ ཨཱཧ ‘‘ཨཔརཱཔརཾ ཨུཔྤཛྫནསདྡྷཱ’’ཏི. ཡསྨཱ སདྡཧནྟོ སདྡྷེཡྻཝཏྠུསྨིཾ པམུདིཏོ ཧོཏི, ཏསྨཱ ཨཱཧ ‘‘སཱ ཧི དུབྦལཔཱིཏིཡཱ པཙྩཡོ ཧོཏཱི’’ཏི. དུཀྑདུཀྑཱདིབྷེདསྶ སབྦསྶཔི དུཀྑསྶ ཝཊྚདུཀྑནྟོགདྷཏྟཱ ཏསྶ ཙ ཨིདྷཱདྷིཔྤེཏཏྟཱ ཝུཏྟཾ ‘‘དུཀྑནྟི ཝཊྚདུཀྑ’’ནྟི. ཛརཱམརཎདུཀྑནྟི ཀེཙི, སོཀཱདཡོ ཙཱཏི ཨཔརེ. ཏདུབྷཡསྶཔི སངྒཎྷནཏོ པཋམོ ཨེཝཏྠོ ཡུཏྟོ. ཡསྨཱ དུཀྑཔྤཏྟོ ཀམྨསྶ ཕལཱནི སདྡཧཏི, རཏནཏྟཡེ ཙ པསཱདཾ ཨུཔྤཱདེཏི, ཏསྨཱ ཝུཏྟཾ ‘‘ཏཉྷི ཨཔརཱཔརསདྡྷཱཡ པཙྩཡོ ཧོཏཱི’’ཏི. ཡསྨཱ ‘‘ཨཱཙརིཡཱནཾ སནྟིཀེ དྷམྨཾ སུཏྭཱ པཝཏྟིདུཀྑ’’ནྟི ཙིནྟཡཏོ ‘‘ཨེཀནྟཏོ ཨཡཾ དྷམྨོ ཨིམསྶ དུཀྑསྶ སམཏིཀྐམཱཡ ཧོཏཱི’’ཏི སདྡྷཱ ཨུཔྤཛྫཏི. ཏེནཱཧ ‘‘དྷམྨཾ སུཏྭཱ ཏཐཱགཏེ སདྡྷཾ པཊིལབྷཏཱི’’ཏིཨཱདི (དཱི. ནི. ༡.༡༩༡). སཝིཀཱརཱཏི ཨུཔྤཱདཝིཀཱརེན སཝིཀཱརཱ ཁནྡྷཛཱཏི ¶ ཛཱཡནཊྛེན. ཛཱཏིཡཱ པན ཨསཏི ཏཏྠ ཏཏྠ བྷཝེ ནཏྠི དུཀྑསྶ སམྦྷཝོཏི ཨཱཧ ‘‘སཱ ཧི ཝཊྚདུཀྑསྶ པཙྩཡོ’’ཏི. ཀམྨབྷཝོཏི ཀམྨབྷཝཱདིཀོ ཏིཝིདྷོཔི ཀམྨབྷཝོ. སོ ཧི ཨུཔཔཏྟིབྷཝསྶ པཙྩཡོ. ཨེཝམཱདིཾ སནྡྷཱཡཱཧ ‘‘ཨེཏེནུཔཱཡེནཱ’’ཏི. སེསཔདཱནཱིཏི ཨུཔཱདཱནཱདིཔདཱནི. ཨནུལོམཉཱཎཾ སངྑཱརུཔེཀྑཱཔཀྑིཀཏྟཱ ནིབྦཱནགྒཧཎེན གཧིཏཾ, གོཏྲབྷུཉཱཎཾ པཋམམགྒསྶ ཨཱཝཛྫནཾ. སོ ཧི ཏེན ཝིཔསྶནཱཡ ཀིཉྩི ཀིཉྩི ཝིསེསཊྛཱནཾ ཀཡིརཏཱིཏི ཏཾ ཨནཱམསིཏྭཱ ནིབྦིདཱུཔནིསོ ཝིརཱགོཏི ‘‘ཝིརཱགོ’’ཨིཙྩེཝ ཝུཏྟཾ.

ཀེན ཨུདཀེན ཝིདཱརཡིཏྭཱ གཏཔདེསོཏི ཀཏྭཱ ཀནྡརོ. ནིཏམྦོཏིཔི ཨུདཀསྶ. ཡཐཱ ནིནྣཾ ཨུདཀཾ པཝཏྟཏི, ཏཐཱ ནིཝཏྟནབྷཱཝེན ནདཱིཀུཉྪོཏིཔི ཝུཙྩཏི. ཧེམནྟགིམྷཨུཏུཝསེན ཨཊྛ མཱསེ པཝཏྟོ པཐཝཱིཝིཝརོཏི ཀཏྭཱ པདརོ. ཁུདྡིཀཱ ཨུདཀཝཱཧིནིཡོ སཱཁཱ ཝིཡཱཏི སཱཁཱ ¶ , ཁུདྡཀཱ སོབྦྷཱ ཀུསུབྦྷཱ ཨོ-ཀཱརསྶ ཨུ-ཀཱརཾ ཀཏྭཱ. ཨེཝམེཝ ཁོཏིཨཱདི ‘‘སེཡྻཐཱཔི, བྷིཀྑཝེ’’ཏིཨཱདིནཱ ཨུཔནཱིཏཱཡ ཨུཔམཱཡ ཨུཔམེཡྻེན སཾསནྡནནྟི, ཏཾ ཡོཛེཏྭཱ དསྶེཏུཾ ‘‘ཨཝིཛྫཱ པབྦཏོཏི དཊྛབྦཱ’’ཏིཨཱདི ཝུཏྟཾ. ཏཏྠ ཨཝིཛྫཱ ཙ སནྟཱནཝསེན ཙིརཾཏནཀཱལཔྤཝཏྟནཏོ པཙུརཛནེཧི དུཔྤཛཧནཏོ ‘‘པབྦཏོ’’ཏི ཝུཏྟཱ. ལོཀཏྟཡཱབྷིབྱཱཔནཏོ ཨབྷིསནྡནཏོ ཙ ཨབྷིསངྑཱརཱ མེགྷསདིསཱ. ཨབྷིསངྑཱརཱ མེགྷོཏི དཊྛབྦཱཏི ཨཱནེཏྭཱ སམྦནྡྷོ. ཏཐཱ སེསཔདདྭཡེཔི. ཝིཉྙཱཎཱདིཝཊྚཾ ཨནུཔཝཏྟིཏོ པརམྤརཔཙྩཡཏོ ཙ ཀནྡརཱདིསདིསཱ. ཝིམུཏྟི ཨེཀརསཏྟཱ, ཧཱནིཝུདྡྷིཨབྷཱཝཏོ ཙ སཱགརསདིསཱཏི ཨུཔམཱསཾསནྡནཾ.

ཏཏྠ ཡསྨཱ པུརིམསིདྡྷཱཡ ཨཝིཛྫཱཡ སཏི ཨབྷིསངྑཱརཱ, ནཱསཏི, ཏསྨཱ ཏེ ཨུཔརིཔབྦཏེ པཝཏྟཱ ཝིཡ ཧོནྟཱིཏི ཝུཏྟཾ ‘‘ཨཝིཛྫཱ…པེ… ཝསྶནཾ ཝེདིཏབྦ’’ནྟི. ཨསྶུཏཝཱ ཧཱིཏིཨཱདི ཝུཏྟསྶེཝ ཨཏྠསྶ སམཏྠནཾ. ཏཎྷཱཡ ཨབྷིལཱསཾ ཀཏྭཱཏི ཨེཏེན སབྦསྶཔི ཨབྷིསངྑཱརཝུཊྛིཏེམནཏྠཾ དཱིཔེཏི. ཏཎྷཱ ཧི ‘‘སྣེཧོ’’ཏི ཝུཏྟཱ. ཨནྟིམབྷཝིཀསྶ ཨནྟབྷཝནིབྦཏྟཀོ ཨབྷིསངྑཱརོ ནིབྦཱནཾ ན པཏྟོ, ཏདནྟསྶ བྷཱགསྶ ནིབྦཱནཾ ཨཱཧཙྩ ཋིཏོ ཝིཡ ཧོཏཱིཏི ‘‘མཧཱསམུདྡཾ ཨཱཧཙྩ ཋིཏཀཱལོ ཝིཡཱ’’ཏི ཨུཔམཱནིདསྶནཾ ཀཏཾ. ཝིཉྙཱཎཱདིཝཊྚཾ པཱུརེཏྭཱཔི ཨིམིནཱཔི ཧི ཨནྟིམབྷཝིཀསྶེཝ ཝིཉྙཱཎཔྤཝཏྟི དསྶིཏཱ. སཱ ཧི པཱུརིཏཱཏི ཝཏྟབྦཱ ཏཏོ པརཾ ཝིཉྙཱཎཱདིཝཊྚསྶེཝ ཨབྷཱཝཏོ. ཛཱཏསྶ པུགྒལསྶ ཛཱཏིཔཙྩཡཝཊྚདུཀྑཝེདནཱཡ དྷམྨསྶཝནཾ ཨིཙྪིཏབྦཾ, ཏཾ པན ཡདིཔི ཨིམསྨིཾ སུཏྟེ ན ཨཱགཏཾ, སུཏྟནྟརེསུ པན ཨཱགཏམེཝཱཏི ཏཏོ ཨཱཧརིཏྭཱ ཏཾ ཝཏྟབྦནྟི དསྶེནྟོ ‘‘བུདྡྷཝཙནཾ པནཱ’’ཏིཨཱདིམཱཧ. ཏཡིདཾ སཱཝཀབོདྷིསཏྟཱནཾ ཝསེནཱཡཾ དེསནཱཏི ཀཏྭཱ ཝུཏྟཾ. ཨིཏརེསཾ པན ཝསེན ཝུཙྩམཱནཾ ¶ སུཏྟནྟརགྒཧཎཏྠཾ པཡོཛནཾ ནཏྠཱིཏི ‘‘ཡཱ ཧཱི’’ཏིཨཱདིམཱཧ. པཱལི༹ཡཱ ཝསེན གཧིཏམེཝཱཏི སངྑེཔཏོ ཝུཏྟཨཏྠསྶ ཝིཏྠཱརཏོ དསྶནཾ. ནིབྦཏྟཱིཏི ནིབྦཏྟམཱནཱ ཁནྡྷཱ གཧིཏཱཏི ཨཱཧ ‘‘སཝིཀཱརཱ’’ཏི. ཨནིཙྩཏཱལཀྑཎཱདིདཱིཔནཏོ ལཀྑཎཱཧཊཾ. ཀམྨཱཀམྨནྟི ཝིནིཙྪཡཾ. ནིཛྫཊནྟི ནིགྒུམྦཾ, སུདྡྷནྟི ཨཏྠོ. པཐཝཱིཀསིཎཱདཱིསུ ཀམྨཾ ཨཱརབྷཏཱིཏིཨཱདི པཱལི༹ཡཾ སམཐཔུབྦངྒམཱ ཝིཔསྶནཱ དསྶིཏཱཏི ཀཏྭཱ ཝུཏྟཾ ¶ . ཨེཝཉྷི པཱམོཛྫཱདིདསྶནཾ སམྦྷཝཏཱིཏི. དེཝསྶཱཏི མེགྷསྶ. ཀསྨཱ པནེཏྠ ‘‘ཁཱིཎཱསཝསྶ…པེ… ཋིཏཀཱལོ ཝེདིཏབྦོ’’ཏི ཝུཏྟཾ, ནནུ པུབྦེ དེཝཊྛཱནིཡོ ཨབྷིསངྑཱརོ ཝུཏྟོ, ན ཨབྷིསངྑཱརོ ཁཱིཎཱསཝོཏི? ནཱཡཾ དོསོ, ཀཱརཎཱུཔཙཱརེན ཕལསྶ ཝུཏྟཏྟཱ. ཨབྷིསངྑཱརམཱུལཀོ ཧི ཁནྡྷསནྟཱནོ ཁནྡྷསནྟཱནེ ཙ ཨུཙྪིནྣསཾཡོགེ ཁཱིཎཱསཝསམཉྙཱཏི.

ཨུཔནིསསུཏྟཝཎྞནཱ ནིཊྛིཏཱ.

༤. ཨཉྙཏིཏྠིཡསུཏྟཝཎྞནཱ

༢༤. སོཏི སཱརིཔུཏྟཏྠེརོ. ཡདི ན ཏཱཝ པཝིཊྛོ, ཀསྨཱ ‘‘པཱཝིསཱི’’ཏི ཝུཏྟནྟི ཨཱཧ ‘‘པཝིསིསྶཱམཱི’’ཏིཨཱདི. ཏེན ཨཝསྶམྦྷཱཝིནི བྷཱུཏེ ཝིཡ ཨུཔཙཱརོ ཧོཏཱིཏི དསྶེཏི. ཨིདཱནི ཏམཏྠཾ ཨུཔམཱཡ ཝིབྷཱཝེནྟོ ‘‘ཡཐཱ ཀི’’ནྟིཨཱདིམཱཧ. ཨཏིཔྤགོཡེཝ ནིཀྑནྟདིཝསོཏི པཀཏིཡཱ བྷིཀྑཱཙརཎཝེལཱཡ ཨཏིཝིཡ པཱཏོ ཨེཝ ཝིཧཱརཏོ ནིཀྑནྟདིཝསབྷཱགོ. ཨེཏདཧོསཱིཏི ཨེཏཾ ‘‘ཨཏིཔྤགོ ཁོ’’ཏིཨཱདིཀཾ ཙིནྟནཾ ཨཧོསི. དཀྑིཎདྭཱརསྶཱཏི རཱཛགཧནགརེ དཀྑིཎདྭཱརསྶ ཝེལུ༹ཝནསྶ ཙ ཨནྟརཱ ཨཧོསི, ཏསྨཱ ‘‘ཏེནུཔསངྐམིསྶ’’ནྟི ཙིནྟནཱ ཨཧོསཱིཏི ཨདྷིཔྤཱཡོ. ཀིཾ ཝཱདཱིཏི ཙཏཱུསུ ཝཱདེསུ ཀཏརཾ ཝཱདཾ ཝདསི. ཀིམཀྑཱཡཱིཏི ཏསྶེཝ ཝེཝཙནཾ. ཀིཾ ཝདཏཱིཏི པན ཙཏྟཱརོ ཝཱདེ སཱམཉྙཏོ གཧེཏྭཱ ནཔུཾསཀལིངྒེན ཝདཏི ཡཐཱ ཀིཾ ཏེ ཛཱཏལིངྒཾ. སབྦནཱམཉྷེཏཾ, ཡདིདཾ ནཔུཾསཀལིངྒཾ. ཝདཏི ཨེཏེནཱཏི ཝཱདོ, དསྶནཾ. ཏཾ སནྡྷཱཡཱཧ ‘‘ཀིཾ ཨེཏྠ…པེ… དསྶནནྟི པུཙྪནྟཱི’’ཏི. ‘‘དྷམྨཔཊིསམྦྷིདཱ’’ཏིཨཱདཱིསུ ཝིཡ དྷམྨ-སདྡོ ཧེཏུཨཏྠོཏི ཨཱཧ ‘‘ཡཾ ཝུཏྟཾ ཀཱརཎཾ, ཏསྶ ཨནུཀཱརཎ’’ནྟི. ཝཱདསྶ ཝཙནསྶ ཨནུཔྤཏྟི ཝཱདཔྤཝཏྟི.

ཨིདཾ ཝཙནནྟི ‘‘ཨེཀམིདཱཧ’’ནྟིཨཱདིཝཙནཾ. སཱཏི ‘‘ཨེཀེ སམཎབྲཱཧྨཎཱ ཀམྨཝཱདཱ’’ཏི ཨེཝཾ པཝཏྟཀཐཱ. ཨཙྪརཾ ཨངྒུལིཕོཊནཾ ཨརཧཏཱིཏི ཨཙྪརིཡཾ. ཨབྦྷུཏནྟི ནིརུཏྟིནཡེན པདསིདྡྷི དཊྛབྦཱ. སབྦཝཱདཱནནྟི སབྦེསཾ ཙཏུབྦིདྷཝཱདཱནཾ. པཋམོ ཧེཏྠ སསྶཏཝཱདོ, དུཏིཡོ ཨུཙྪེདཝཱདོ, ཏཏིཡོ ཨེཀཙྩསསྶཏཝཱདོ, ཙཏུཏྠོ ཨདྷིཙྩསམུཔྤནྣཝཱདོ, ཏེསཾ སབྦེསཾ ¶ པཊིཀྑེཔཏོ ¶ པཊིཀྑེཔཀཱརཎཾ ཝུཏྟཾ. པཊིཙྩསམུཔྤཱདཀིཏྟནཾ ཝཱ པཙུརཛནཉཱཎསྶ ཨལབྦྷནེཡྻཔཏིཊྛཏཱཡ གམྦྷཱིརཉྩེཝ, ཏཐཱ ཨཝབྷཱསནཏོ ཙེཏསི ཨུཔཊྛཱནཏོ གམྦྷཱིརཱཝབྷཱསཉྩ ཀརོནྟོ. ཏདེཝ པདནྟི ཕསྶཔདཾཡེཝ ཨཱདིབྷཱུཏཾ གཧེཏྭཱ.

ཨཉྙཏིཏྠིཡསུཏྟཝཎྞནཱ ནིཊྛིཏཱ.

༥. བྷཱུམིཛསུཏྟཝཎྞནཱ

༢༥. པུརིམསུཏྟེཏི ཨནནྟརེ པུརིམེ སུཏྟེ. ཝུཏྟནཡེནེཝ ཝེདིཏབྦནྟི པདཏྠེ ཏཏོ ཝིསིཊྛཾ ཨནིདྡིསིཏྭཱ ཨིཏརཾ ཨཏྠཏོ ཝིབྷཱཝེཏུཾ ‘‘ཨཡཾ པན ཝིསེསོ’’ཏིཨཱདིམཱཧ. ན ཀེཝལཾ ཕསྶཔཙྩཡཱ ཨུཔྤཛྫཏི, ཨཐ ཁོ ཕསྶསྶ སཧཀཱརཱིཀཱརཎབྷཱུཏཨཉྙཔཙྩཡཱ ཙ ཨུཔྤཛྫཏཱིཏི. ཀཱཡེནཱཏི ཙོཔནཀཱཡེན, ཀཱཡཝིཉྙཏྟིཡཱཏི ཨཏྠོ. སཱ ཧི ཀཱམཾ པཊྛཱནེ ཨཱགཏེསུ ཙཏུཝཱིསཏིཡཱ པཙྩཡེསུ ཀེནཙི པཙྩཡེན ཙེཏནཱཡ པཙྩཡོ ན ཧོཏི. ཡསྨཱ པན ཀཱཡེ སཏི ཨེཝ ཀཱཡཀམྨཾ ནཱམ ཧོཏི, ནཱསཏི, ཏསྨཱ སཱ ཏསྶཱ སཱམགྒིཡབྷཱཝེན ཨིཙྪིཏབྦཱཏི ཝུཏྟཾ ‘‘ཀཱཡེནཔི ཀརིཡམཱནཾ ཀརཱིཡཏཱི’’ཏི. ཏེནཱཧ བྷགཝཱ ‘‘ཀཱཡེ ཝཱ, ཧཱནནྡ, སཏི ཀཱཡསཉྩེཏནཱཧེཏུ ཨུཔྤཛྫཏི ཨཛ྄ཛྷཏྟཾ སུཁཾ དུཀྑ’’ནྟི. ཝཱཙཱཡཔཱིཏི ཨེཏྠཱཔི ཨེསེཝ ནཡོ. མནསཱཏི པཱཏུབྷཱུཏེན མནསཱ, ན མནམཏྟེནཱཏི. ཨཏྟནཱ པརེཧི ཨནུསྶཱཧིཏེན. པརེནཱཏི པརེན ཨནུསྶཱཧེན. སམྤཛཱནེནཱཏི ཉཱཎསམྤཡུཏྟཙིཏྟཝསེན པཛཱནནྟེན. ཨསམྤཛཱནེནཱཏི ཏཐཱ ན སམྤཛཱནནྟེན. ཏསྶཱཏི སུཁདུཀྑསྶ. ཀཱཡསཉྩེཏནཱཧེཏཱུཏི ཀཱཡཀམྨནིམིཏྟཾ, ཀཱཡིཀསྶ ཀམྨསྶ ཀཏཏྟཱ ཨུཔཙིཏཏྟཱཏི ཨཏྠོ. ཨེས ནཡོ སེསསཉྩེཏནཱསུཔི. ཨུདྡྷཙྩསཧགཏཙེཏནཱ པཝཏྟིཡཾ ཝིཔཱཀཾ དེཏིཡེཝཱཏི ‘‘ཝཱིསཏི ཙེཏནཱ ལབྦྷནྟཱི’’ཏི ཝུཏྟཾ. ཏཐཱ ཝཙཱིདྭཱརེཏི ཨེཏྠ ‘‘ཀཱམཱཝཙརཀུསལཱཀུསལཝསེན ཝཱིསཏི ཙེཏནཱ ལབྦྷནྟཱི’’ཏི ཨིདཾ ཏཐཱ-སདྡེན ཨུཔསཾཧརཏི. རཱུཔཱརཱུཔཙེཏནཱཧཱིཏི རཱུཔཱཝཙརཱརཱུཔཱཝཙརཀུསལཙེཏནཱཧི. ཏཔྤཙྩཡཾ ཡཐཱརཧནྟི ཨདྷིཔྤཱཡོ. ཏཱཔི ཙེཏནཱཏི ཡཐཱཝུཏྟཱ ཨེཀཱུནཝཱིསཏི ཙེཏནཱ ཨཝིཛྫཱཔཙྩཡཱ ཧོནྟི ཀུསལཱནམྤི པགེཝ ཨིཏརཱདྷིཊྛཧིཏཱཝིཛྫསྶེཝ ཨུཔྤཛྫནཏོ, ཨཉྙཐཱ ཨནུཔྤཛྫནཏོ. ཡཐཱཝུཏྟཙེཏནཱབྷེདནྟི ¶ ཡཐཱཝུཏྟཾ ཀཱཡཙེཏནཱདིཝིབྷཱགཾ. པརེཧི ཨནུསྶཱཧིཏོ སརསེནེཝ པཝཏྟམཱནོ. པརེཧི ཀཱརིཡམཱནོཏི པརེཧི ཨུསྶཱཧིཏོ ཧུཏྭཱ ཀཡིརམཱནོ. ཛཱནནྟོཔཱིཏི ཨནུསྶཝཱདིཝསེན ཛཱནནྟོཔི. ཀམྨམེཝ ཛཱནནྟོཏི ཏདཱ ཨཏྟནཱ ཀརིཡམཱནཀམྨམེཝ ཛཱནནྟོ.

ཙཏཱུསཱུཏི ‘‘སཱམཾ ཝཱ པརེ ཝཱ སམྤཛཱནོ ཝཱ ཨསམྤཛཱནོ ཝཱ’’ཏི ཨེཝཾ ཝུཏྟེསུ ཙཏཱུསུ ཋཱནེསུ. ཡཐཱཝུཏྟེ ཨེཀཱུནཝཱིསཏིཙེཏནཱདྷམྨེ ཨསངྑཱརིཀསསངྑཱརིཀབྷཱཝེན སམྤཛཱནཀཏཱསམྤཛཱནཀཏབྷཱཝེན ¶ ཙཏུགུཎེ ཀཏྭཱ ཝུཏྟཾ ‘‘ཚསཏྟཏི དྭེསཏཱ ཙེཏནཱདྷམྨཱ’’ཏི. ཡེསཾ སཧཛཱཏཀོཊི ལབྦྷཏི, ཏེསམྤི ཨུཔནིསྶཡཀོཊི ལབྦྷཏེཝཱཏི ‘‘ཨུཔནིསྶཡཀོཊིཡཱ ཨནུཔཏིཏཱ’’ཏིཨིཙྩེཝ ཝུཏྟཱ. ཏེཏི ཡཐཱཝུཏྟཱ སབྦེཔི དྷམྨཱ. སོ ཀཱཡོ ན ཧོཏཱིཏི ཨེཏྠ པསཱདཀཱཡོཔི གཧེཏབྦོ. ཏེནཱཧ ‘‘ཡསྨིཾ ཀཱཡེ སཏཱི’’ཏིཨཱདི. སོ ཀཱཡོ ན ཧོཏཱིཏི སོ ཀཱཡོ པཙྩཡནིརོདྷེན ན ཧོཏི. ཝཱཙཱཏི སདྡཝཱཙཱ. མནོཏི ཡཾ ཀིཉྩི ཝིཉྙཱཎཾ. ཨིདཱནི ཀམྨཝསེནེཝ ཡོཛེཏུཾ ‘‘ཨཔིཙཱ’’ཏིཨཱདི ཝུཏྟཾ. ཨེསེཝ ནཡོ ‘‘ཝཱཙཱཔི དྭཱརབྷཱུཏཱ མནོཔི དྭཱརབྷཱུཏོ’’ཏི. ཁཱིཎཱསཝསྶ ཀཐཾ ཀཱཡོ ན ཧོཏི, ན ཏསྶ ཀཱཡཀམྨཱདྷིཊྛཱནནྟི ཨདྷིཔྤཱཡོ. ཨཝིཔཱཀཏྟཱཏི ཨཝིཔཱཀདྷམྨཏྟཱཏི ཨཏྠོ. ཀཱཡོ ན ཧོཏཱིཏི ཝུཏྟཾ ཨཀམྨཀརཎབྷཱཝཏོ.

ཏནྟི ཀམྨཾ. ཁེཏྟཾ ན ཧོཏཱིཏི ཏསྶ དུཀྑསྶ ཨཝིརུཧནཊྛཱནཏྟཱ. ཝིརུཧནཊྛཱནཱདཡོ བྱཏིརེཀཝསེན ཝུཏྟཱ. ཏེནཱཧ ‘‘ན ཧོཏཱི’’ཏི. ཀཱརཎཊྛེནཱཏི ཨཱདྷཱརབྷཱུཏཀཱརཎབྷཱཝེན. སཉྩེཏནཱམཱུལཀནྟི སཉྩེཏནཱནིམིཏྟཾ. ཝིརུཧནཱདཱིནཾ ཨཏྠཱནནྟི ‘‘ཝིརུཧནཊྛེནཱ’’ཏིཨཱདིནཱ ཝུཏྟཱནཾ ཨཏྠཱནཾ. ཨིམིནཱ ཝིརུཧནཱདིབྷཱཝེན ཝེདནཱ ‘‘སུཁདུཀྑཝེདནཱ’’ཏི ཀཐིཏཱ, ནཡིདྷ ཛེཊྛལཀྑཎཾ སུཁདུཀྑཾ ནིཔྤཡོཛཀསྶ སུཁསྶ དུཀྑསྶ ཙ ཨདྷིཔྤེཏཏྟཱ. ཨུཔེཀྑཱཝེདནཱཔེཏྠ སུཁསཎྷསབྷཱཝཝིཔཱཀབྷཱུཏཱ ཝེདནཱཝ.

བྷཱུམིཛསུཏྟཝཎྞནཱ ནིཊྛིཏཱ.

༦. ཨུཔཝཱཎསུཏྟཝཎྞནཱ

༢༦. ཝཊྚདུཀྑམེཝ ¶ ཀཐིཏཾ ཨིཏརདུཀྑསྶཔི ཝིཔཱཀསྶ སངྒཎྷནཏོ.

ཨུཔཝཱཎསུཏྟཝཎྞནཱ ནིཊྛིཏཱ.

༧. པཙྩཡསུཏྟཝཎྞནཱ

༢༧. པཊིཔཱཊིཡཱཏི པཊིཔཱཊིཡཱ ཋཔནེན. ཙཏུསཙྩཡོཛནཾ དསྶེཏུཾ པརིཡོསཱན…པེ… ཨཱདི ཝུཏྟཾ. དུཀྑསཙྩཝསེནཱཏི པརིཉྙེཡྻབྷཱཝཝསེན. ཛརཱམརཎཱཔདེསེན ཧི པཉྩུཔཱདཱནཀྑནྡྷཱ ཝུཏྟཱ, ཏེ ཙསྶ ཨཏྟནོ ཕལསྶ པཙྩཡཱ ན ཧོནྟི. ཏཾ སནྡྷཱཡ ཝུཏྟཾ ‘‘པཙྩཡཾ ཛཱནཱཏཱི’’ཏི. ཝིནེཡྻཛ྄ཛྷཱསཡཝསེན ཧེཏྠ དེསནཱ པཝཏྟཱ. སམྤནྣོཏི སམནྣཱགཏོ. ཨཱགཏོཏི ཨུཔགཏོ, ཨདྷིགཏོཏི ཨཏྠོ. པསྶཏཱིཏི པཙྩཝེཀྑཎཉཱཎེན པཙྩཀྑཏོ པསྶཏི, མགྒཔཉྙཱཡ ཨེཝཾ ཨསམྨོཧཔཊིཝེདྷཝསེན པསྶཏི. མགྒཉཱཎེནེཝ, ན ཕལཉཱཎེན. དྷམྨསོཏཾ སམཱཔནྣོཏི ¶ ཨརིཡདྷམྨསོཏཾ སམྨདེཝ ཨཱཔནྣོ པཏྟོ. ཨནཡེ ནཨིརིཡནཏོ, ཨཡེ ཙ ཨིརིཡནཏོ, སདེཝཀེན ཙ ལོཀེན ‘‘སརཎ’’ནྟི ཨཀརཎཱིཡཏོ ཨརིཡཔཀྑཾ བྷཛནྟོ པུཐུཛྫནབྷཱུམིཾ ཨཏིཀྐནྟོ. ནིབྦེདྷིཀཔཉྙཱཡཱཏི ཙཏུནྣཾ ཨརིཡསཙྩཱནཾ ནིབྦིཛ྄ཛྷནཀཔཉྙཱཡ. ཨཱཧཙྩ ཏིཊྛཏི མགྒཀྑཎེ, ཕལཀྑཎེ པན ཨཱཧཙྩ ཋིཏོ ནཱམ.

པཙྩཡསུཏྟཝཎྞནཱ ནིཊྛིཏཱ.

༨. བྷིཀྑུསུཏྟཝཎྞནཱ

༢༨. ཨུཏྟཱནམེཝ སབྦསོཝ སཏྟམེ ཨཱགཏནཡཏྟཱ, ཝིནེཡྻཛ྄ཛྷཱསཡཝསེན ཧི ཨིདཾ སུཏྟཾ སཏྠཱརཱ ཨཉྙསྨིཾ ཨཱསནེ དེསིཏཾ, པརིསཱཡ ཝིཝཊྚེན སཱཏྠིཀཱཏི སཏྠུ དེསནཱ ཨཱགཏཱཏི ཨཡཾ པཊིགྒཱཧཀཱདྷཱིནཱ ཧོཏཱིཏི དྷམྨགཱརཝེན སངྒཧཾ ཨཱརོཔེནྟིཡེཝ.

བྷིཀྑུསུཏྟཝཎྞནཱ ནིཊྛིཏཱ.

༩. སམཎབྲཱཧྨཎསུཏྟཝཎྞནཱ

༢༩. ཨཀྑརབྷཱཎཀཱནནྟི ¶ ཨཀྑརརུཙཱིནཾ. ཨུཔསགྒེན པདཝཌྜྷནམྤི རུཙྩནྟི. ཏེནཱཧ ‘‘ཏེ ཧཱི’’ཏིཨཱདི.

སམཎབྲཱཧྨཎསུཏྟཝཎྞནཱ ནིཊྛིཏཱ.

༡༠. དུཏིཡསམཎབྲཱཧྨཎསུཏྟཝཎྞནཱ

༣༠. དྭཱིསུ སུཏྟེསཱུཏི ནཝམདསམསུཏྟེསུ.

དུཏིཡསམཎབྲཱཧྨཎསུཏྟཝཎྞནཱ ནིཊྛིཏཱ.

དསབལཝགྒཝཎྞནཱ ནིཊྛིཏཱ.

༤. ཀལཱ༹རཁཏྟིཡཝགྒོ

༡. བྷཱུཏསུཏྟཝཎྞནཱ

༣༡. ཨཛིཏམཱཎཝེནཱཏི ¶ སོལ༹སསུ བཱཝརིཡབྲཱཧྨཎཔརིཙཱརཀེསུ ‘‘ཨཛིཏོ’’ཏི ལདྡྷནཱམེན མཱཎཝེན. སངྑཱ ཝུཙྩཏི པཉྙཱ, སངྑཱཏཱ པརིཉྙཱཏཱ དྷམྨཱ ཡེསཾ ཏེ སངྑཱཏདྷམྨཱ, པཊིཝིདྡྷསཙྩཱ ཁཱིཎཱསཝཱ. སེཀྑཱ པན ཝིཔཱཀསྶ ཨཔརིཉྙཱཏཏྟཱ ‘‘སངྑཱཏདྷམྨཱ’’ཏི ན ཝུཙྩནྟི. སེཀྑདྷམྨསམནྣཱགམེན ཏེ སེཀྑཱ. ཏེ པན ཀཱམཾ པུགྒལཔཊིལཱབྷཝསེན ཨནེཀསཧསྶཱཝ ཧོནྟི, ཙཏུམགྒཧེཊྛིམཕལཏྟཡསྶ པན ཝསེན ཏཾསམངྒིཏཱསཱམཉྙེན ན སཏྟཛནཏོ ཨུདྡྷནྟི ཨཱཧ ‘‘སཏྟ ཛནེ’’ཏི ནིཡམེཏྭཱ ཝིསེསེཏི. སཾཀིལེསཝཛྫཾ, ཏཏོ ཝཱ ཨཏྟཱནཾ ཝིཡ ཝིནེཡྻལོཀཾ ནིཔཱཏི རཀྑཏཱིཏི ནིཔཀོ, ཏསྶ བྷཱཝོ ནེཔཀྐཾ, ཉཱཎནྟི ཨཱཧ ‘‘ནེཔཀྐཾ ཝུཙྩཏི པཉྙཱ, ཏཱཡ སམནྣཱགཏཏྟཱ ནིཔཀོ’’ཏི.

‘‘ཀོ ནུ ཁོ ཨིམསྶ པཉྷསྶ ཨཏྠོ’’ཏི ཙིནྟེནྟོ པཉྷཱཡ ཀངྑཏི ནཱམ. ‘‘ཀཐཾ བྱཱཀརམཱནོ ནུ ཁོ སཏྠུ ཨཛ྄ཛྷཱསཡཾ ན ཝིརོདྷེམཱི’’ཏི ཙིནྟེནྟོ ཨཛ྄ཛྷཱསཡཾ ཀངྑཏི ནཱམ. སུཛཱནནཱིཡཏྠཔརིཙྪེདཾ ཀཏྭཱ ཙིནྟནཱ ཧེཏྠ ¶ ‘‘ཀངྑཱ’’ཏི ཨདྷིཔྤེཏཱ, ན ཝིཙིཀིཙྪཱཏི. པཧཱིནཝིཙིཀིཙྪོ ཧི མཧཱཐེརོ ཨཱཡསྨཏོ ཨསྶཛིམཧཱཐེརསྶ སནྟིཀེཡེཝ, ཝིཙིནནབྷཱུཏཾ ཀུཀྐུཙྩསདིསཾ པནེཏཾ ཝཱིམཾསནམཏྟནྟི དཊྛབྦཾ. པཏྟཾ ཨཱདཱཡ ཙརནྟོཏི པབྦཛིཏབྷཱཝལཀྑཎཾ. དྷམྨསེནཱཔཏིབྷཱཝེན ཝཱ མམ པཏྟདྷམྨདེསནཱཝཱརཾ ཨཱདཱཡ ཙརནྟོཏི ཨེཝཾ ཝཱ ཨེཏྠ ཨཏྠོ དཊྛབྦོ.

ཛཱཏནྟི ཡཐཱརཧཾ པཙྩཡཏོ ཨུཔྤནྣཾ, སངྑཏནྟི ཨཏྠོ. པཉྷབྱཱཀརཎཾ ཨུཔཊྛཱསཱིཏི པཉྷསྶ བྱཱཀརཎཏཱ པཊིབྷཱསི. ‘‘སམྨཔྤཉྙཱཡ པསྶཏཱི’’ཏི པཱཋོ, ཨཊྛཀཐཱཡཾ པན ‘‘སམྨཔྤཉྙཱཡ པསྶཏོ’’ཏི པདཾ ཨུདྡྷརིཏྭཱ ‘‘པསྶནྟསྶཱ’’ཏི ཨཏྠོ ཝུཏྟོ. ཏཾ ‘‘བྷཱུཏནྟི…པེ… པཊིཔནྣོ ཧོཏཱི’’ཏི ཨིམཱཡ པཱལི༹ཡཱ ན སམེཏི, ཏསྨཱ ཡཐཱདསྶིཏཔཱཋོ ཨེཝ ཡུཏྟོ. ཡཱཝ ཨརཧཏྟམགྒཱ ནིབྦིདཱདཱིནཾ ཨཏྠཱཡཱཏི སམིཏཱཔེཀྑདྷམྨཝསཱ པདཾ ཝདནྟི. ཨཱཧཱརསམྦྷཝནྟི པཙྩཡཧེཏུཀཾ. སེཀྑཔཊིཔདཱ ཀཐིཏཱ ‘‘ནིབྦིདཱཡ ཝིརཱགཱཡ ནིརོདྷཱཡ པཊིཔནྣོ ཧོཏཱི’’ཏི ཝཙནཏོ. ཨེས ནཡོ ནིརོདྷཝཱརེཔི. ནིབྦིདཱཏི ཀརཎེ པཙྩཏྟཝཙནཾ, ཝིརཱགཱ ནིརོདྷཱཏི ཀརཎེ ནིསྶཀྐཝཙནནྟི ¶ ཨཱཧ ‘‘སབྦཱནི ཀཱརཎཝཙནཱནཱི’’ཏི. ཨནུཔཱདཱཏི ཨནུཔཱདཱཡ. བྷཱུཏམིདནྟིཨཱདིམཱཧ སབྦསུཏྟཾ ཨཱཧཙྩབྷཱསིཏཾ ཛིནཝཙནམེཝ ཀརོནྟོ.

བྷཱུཏསུཏྟཝཎྞནཱ ནིཊྛིཏཱ.

༢. ཀལཱ༹རསུཏྟཝཎྞནཱ

༣༢. ཏསྶ ཐེརསྶ ནཱམཾ ཛཱཏིསམུདཱགཏཾ. ནིཝཏྟོཏི པུབྦེ ཝཊྚསོཏསྶ པཊིསོཏཾ གནྟུཾ ཨཱརདྡྷོ, ཏཾ ཨཝིསཧནྟོ ཨནུསོཏམེཝ གཙྪནྟོ, ཏཏོ ནིཝཏྟོ པརིཀླེསཝིདྷམེ ཨསཾསཊྛོ ཝིཡུཏྟོ ཧོཏི. ཨེཏྠ ཙེཏནཱཏི ཝཱ ཨསྶཱསོ. ཧཱིནཱཡཱཝཏྟནཾ ནཱམ ཀཱམེསུ སཱཔེཀྑཏཱཡ, ཏཏྠ ཙ ནིརཔེཀྑཏཱ ཏཏིཡམགྒཱདྷིགམེནཱཏི དསྶེནྟོ ‘‘ཏཡོ མགྒེ’’ཏིཨཱདིམཱཧ. སཱཝཀཔཱརམཱིཉཱཎཾ ཐེརསྶ ཨརཧཏྟཱདྷིགམེན ནིཔྥནྣཾ, ཏསྨཱ ཏསྶ ཏཾ ཨུཔརིམཀོཊིཡཱ ཨསྶཱསོ ཝུཏྟོ. ཨུགྒྷཱཊིཏཱཏི ཝིཝཊཱ, ཝཱུཔསམིཏཱཏི ཨཏྠོ. ཏཏྠཱཏི ཨརཧཏྟཔྤཏྟིཡཾ. ཝིཙིཀིཙྪཱབྷཱཝནྟི ནིབྦེམཏིཀཏཾ.

ན ¶ ཨེཝཾ བྱཱཀཏཱཏི ‘‘ཁཱིཎཱ ཛཱཏཱི’’ཏིཨཱདིཀཱ ཨེཝཾ ཨུཏྟཱནཀཾ ན བྱཱཀཏཱ, པརིཡཱཡེན པན བྱཱཀཏཱ. ཀེནཙཱིཏི ཀེནཙིཔི ཀཱརཎེན. ཨེཝཾ ཨུཏྟཱནཀཾ བྱཱཀརིསྶཏི.

ཏསྶ པཙྩཡསྶ ཁཡཱཏི ཏསྶ ཀམྨབྷཝསངྑཱཏསྶ པཙྩཡསྶ ཨཝིཛྫཱཡ སཧཀཱརིཏཱཡཾ སངྒཧིཏསྶ ཁཡཱ ཨནུཔྤཱདཱ ནིརོདྷཱ. ཁཱིཎསྨིནྟི ཁཱིཎེ. ཨནུཔྤཱདནིརོདྷེན ནིརུདྡྷེ ཛཱཏིཡཱ ཡཐཱཝུཏྟེ པཙྩཡེ. ཛཱཏིསངྑཱཏཾ ཕལཾ ཁཱིཎཾ ཨནུཔྤཏྟིདྷམྨཏཾ ཨཱཔཱདིཏནྟི. ཝིདིཏཾ ཉཱཏཾ. ཨཱཛཱནཱཏི ཙཏུསཙྩཾ ཧེཊྛིམམགྒེཧི ཉཱཏཾ ཨནཏིཀྐམིཏྭཱཝ པཊིཝིཛ྄ཛྷཏཱིཏི ཨཉྙཱ ཨགྒམགྒོ. ཏདུཔཙཱརེན ཨགྒཕལཾ ཨིདྷ ‘‘ཨཉྙཱ’’ ནཱམ. པཙྩཡོཏི བྷཝཱུཔཔཏྟིཡཱ པཙྩཡོ པཊིཙྩསམུཔྤཱདོ.

མེཏི མཡཱ. ཨཉྙཱསི ཨཱཀཱརགྒཧཎེན ཙིཏྟཱཙཱརཾ ཛཱནཱཏི. ཏེནཱཏི བྷགཝཏཱ. བྱཱཀརཎཾ ཨནུམོདིཏཾ པཉྷབྱཱཀརཎསྶ ཝིསཡཀཏབྷཱཝཏོ.

ཨཡམསྶ ཝིསཡོཏི ཨཡཾ ཝེདནཱ ཨསྶ སཱརིཔུཏྟཏྠེརསྶ སཝིསཡོ ཏཏྠ ཝིསཡབྷཱཝེན པཝཏྟཏྟཱ. ཀིཉྩཱཔཱིཏི ཀིཉྩཱཔི སུཁཱ ཝེདནཱ ཋིཏིསུཁཱ དུཀྑཱ ཝེདནཱ ཝིཔརིཎཱམསུཁཱ, ཨདུཀྑམསུཁཱ ཝེདནཱ ཉཱཎསུཁཱ. ཝིཔརིཎཱམཀོཊིཡཱཏི ཨནིཙྩབྷཱཝེན སབྦཱཝ ཝེདནཱ དུཀྑཱ ནཱམ ¶ . སུཁཔཊིཀྑེཔཏོཔི ཧི སུཁཔཱིཏིཡཱ ཕརཎཏཱཡ སུཁཱཏི ཏིཀྑམཏྟེན ཝིཔརིཎཱམདུཀྑཱཏི ཝིཔརིཎཱམཏོ ཨབྷཱཝཱདྷིགམེན སུཁནིརོདྷཀྑཎམཏྟེན. ཏཐཱ ཧི ཝུཏྟཾ པཔཉྩསཱུདནིཡཾ ‘‘སུཁཱཡ ཝེདནཱཡ ཨཏྠིབྷཱཝོ སུཁ’’ནྟི. སུཁཀཱམོ དུཀྑཾ ཏིཏིཀྑཏི. ཨཔརིཉྙཱཏཝཏྠུཀཱནཉྷི སུཁཝེདནུཔརམོ དུཀྑཏོ ཨུཔཊྛཱཏི, ཏསྨཱཡམཏྠོ ཝིཡོགེན དཱིཔེཏབྦོ. ‘‘དུཀྑཱ ཝིཔརིཎཱམསུཁཱ’’ཏི ཨེཏྠཱཔི ཨེསེཝ ནཡོ. ཏཐཱཙཱཧ པཔཉྩསཱུདནིཡཾ ‘‘དུཀྑཱཡ ཝེདནཱཡ ནཏྠིབྷཱཝོ སུཁ’’ནྟི. དུཀྑཝེདནུཔརམོ ཧི ཝུཏྟཱནཾ སུཁཏོ ཨུཔཊྛཱཏི ཨེཝཱཏི ཝདནྟི. ཏསྶ ཡོགསྶ ཝཱུཔསམེན ‘‘ཨཧོ སུཁཾ ཛཱཏ’’ནྟི མཛ྄ཛྷཏྟཝེདནཱཡ ཛཱནནབྷཱཝོ ཡཱཐཱཝཏོ ཨཝབུཛ྄ཛྷནཾ སུཁཾ. ཨདུཀྑམསུཁཱཔི ཝེདནཱ ཝིཛཱནནྟསྶ སུཁཾ ཧོཏི ཏསྶ སུཁུམཏཱཡ ཝིཉྙེཡྻབྷཱཝཏོ. ཡཐཱ རཱུཔཱརཱུཔདྷམྨཱནཾ སལཀྑཎཏོ སཱམཉྙལཀྑཎཏོ ཙ སམྨདེཝ ཨཝབོདྷོ པརམཾ སུཁཾ. ཏེནཱཧ –

‘‘ཡཏོ ¶ ཡཏོ སམྨསཏི, ཁནྡྷཱནཾ ཨུདཡབྦཡཾ;

ལབྷཏཱི པཱིཏིཔཱམོཛྫཾ, ཨམཏཾ ཏཾ ཝིཛཱནཏ’’ནྟི. (དྷ. པ. ༣༧༤);

ཨཉྙཱཎདུཀྑཱཏི ཨཛཱནནབྷཱཝོ ཨདུཀྑམསུཁཱཝེདནཱཡ དུཀྑཾ. སམྨཱ ཝིབྷཱགཛཱནནསབྷཱཝོ ཉཱཎསྶ སམྦྷཝོ. ཉཱཎསམྤཡུཏྟཱ ཧི ཉཱཎཱུཔནིསྶཡཱ ཨདུཀྑམསུཁཱ ཝེདནཱ པསཏྠཱཀཱརཱ, ཡཏོ སཱ ཨིཊྛཱ ཙེཝ ཨིཊྛཕལཱ ཙཱཏི. ཨཛཱནནབྷཱཝོཏི ཨེཏྠ ཝུཏྟཝིཔརིཡཱཡེན ཨཏྠོ ཝེདིཏབྦོ. ‘‘དུཀྑནྟི ཝིདིཏོ’’ཏི པཱལི༹, ཨཊྛཀཐཱཡཾ པན ཝིདིཏནྟི པདུདྡྷཱརོ ཀཏོ, ཏཾ ཨཏྠདསྶནམཏྟནྟི དཊྛབྦཾ.

ཝེདནཱཔརིཙྪེདཛཱནནེཏི ‘‘ཏིསྶོ ཨིམཱ ཝེདནཱ’’ཏི ཨེཝཾ པརིཙྪེདཏོ ཛཱནནེ. ཨཉྙཱསཱིཏི ཀདཱ ཨཉྙཱསི? ཨིམསྨིཾ དེསནཱཀཱལེཏི ཝདནྟི, པཊིཝེདྷཀཱལེཏི པན ཡུཏྟཾ. ཡཐཱཔཊིཝིདྡྷཱ ཧི ཝེདནཱ ཨིདྷ ཐེརེན དེསིཏཱཏི. ཨིམིནཱ ཀཱརཎེནཱཏི ‘‘ཡདནིཙྩཾ ཏཾ དུཀྑ’’ནྟི ཝེདནཱནཾ ཨནིཙྩཏཱཡ དུཀྑབྷཱཝཛཱནནསངྑཱཏེན ཀཱརཎེན. ཏཾནིམིཏྟཾ ཧིསྶ ཝེདནཱསུ ཏཎྷཱ ན ཨུཔྤཛྫཏི. ཨཏིཔྤཔཉྩོཏི ཨཏིཝིཏྠཱརོ. དུཀྑསྨིཾ ཨནྟོགདྷཾ དུཀྑཔརིཡཱཔནྣཏྟཱ. དུཀྑནྟི སབྦཾ ཝེདཡིཏཾ དུཀྑཾ སངྑཱརདུཀྑབྷཱཝཏོ. ཉཱཏམཏྟེཏི ཡཱཐཱཝཏོ ཨཝབུཛ྄ཛྷནམཏྟེ. ཏཎྷཱ ན ཏིཊྛཏཱིཏི ན སནྟིཊྛཏི ནཔྤཝཏྟཏི.

ཀཐཾ ཝིམོཀྑཱཏི ཨཛ྄ཛྷཏྟབཧིདྡྷཱབྷེདེསུ ཝིམུཏྟཱ. ཧེཏུམྷི ཙེཏཾ ནིསྶཀྐཝཙནནྟི ཧེཏུཨཏྠེན ཀརཎཝཙནེན ཨཏྠམཱཧ ‘‘ཀཏརེན ཝིམོཀྑེནཱ’’ཏི. ཀརཎཏྠེཔི ཝཱ ཨེཏཾ ནིསྶཀྐཝཙནནྟི ¶ ཏཐཱ ཝུཏྟཾ. ཨབྷིནིཝེསོཏི ཝིཔསྶནཱརམྦྷོ. བཧིདྡྷཱདྷམྨཱཔི དཊྛབྦཱཡེཝ སབྦསྶཔི པརིཉྙེཡྻསྶ པརིཛཱནིཏབྦཏོ. ཉཱཎཾ པཝཏྟེཏྭཱ. ཏེཏི ཨཛ྄ཛྷཏྟསངྑཱརེ. ཝཝཏྠཔེཏྭཱཏི སལཀྑཎཏོ པརིཙྪིནྡིཏྭཱ. བཧིདྡྷཱ ཨོཏཱརེཏཱིཏི བཧིདྡྷཱསངྑཱརེསུ ཉཱཎཾ ཨོཏཱརེཏི. ཨཛ྄ཛྷཏྟཾ ཨོཏཱརེཏཱིཏི ཨཛ྄ཛྷཏྟསངྑཱརེ སམྨསཏི. ཏཏྲ ཏསྨིཾ ཙཏུཀྐེ. ཏེསཾ ཝཝཏྠཱནཀཱལེཏི ཏེསཾ ཨཛ྄ཛྷཏྟསངྑཱརཱནཾ ཝིཔསྶནཱཀཱལེ.

སབྦུཔཱདཱནཀྑཡཱཏི སབྦསོ ཨུཔཱདཱནཱནཾ ཁཡཱ. ཀཱམཾ དིཊྛིསཱིལབྦཏཨཏྟཝཱདུཔཱདཱནཱནི པཋམམགྒེནེཝ ཁཱིཡནྟི, ཀཱམུཔཱདཱནཾ པན ཨགྒམགྒེནཱཏི ཏསྶ ¶ ཝསེན ‘‘སབྦུཔཱདཱནཀྑཡཱ’’ཏི ཝདནྟོ ཐེརོ ཨཏྟནོ ཨརཧཏྟཔཏྟིཾ བྱཱཀརོཏི. ཏེནཱཧ ‘‘ཨཱསཝཱ ནཱནུསྶཝནྟཱི’’ཏི. སཏོཏི ཨིམིནཱ སཏིཝེཔུལླཔྤཏྟིཾ དསྶེཏི. ཙཀྑུཏོ རཱུཔེ སཝནྟཱིཏི ཙཀྑུཝིཉྙཱཎཝཱིཐིཡཾ ཏདནུགཏམནོཝིཉྙཱཎཝཱིཐིཡཉྩ རཱུཔཱརམྨཎཱ ཨཱསཝཱ པཝཏྟནྟཱིཏི. ཀིཉྩཱཔི ཏཏྠ ཀུསལཱདཱིནམྤི པཝཏྟི ཨཏྠི, ཀཱམཱསཝཱདཡོ ཨེཝ ཝཎཏོ ཡཱུསཾ ཝིཡ པགྒྷརཎཀཨསུཙིབྷཱཝེན སནྡནྟི, ཏཐཱ སེསཝཱརེསུ. ཏེནཱཧ ‘‘ཨེཝ’’ནྟིཨཱདི, ཏསྨཱ ཏེ ཨེཝ ‘‘ཨཱསཝཱ’’ཏི ཝུཙྩནྟི. ཏཏྠ ཧི པགྒྷརཎཀཨསུཙིམྷི ནིརུལ༹ྷོ ཨཱསཝསདྡོ. ‘‘ཨཏྟཱནཾ ནཱཝཛཱནཱམཱི’’ཏི ཝུཏྟཏྟཱ ‘‘ཨོམཱནཔཧཱནཾ ཀཐིཏ’’ནྟི ཨཱཧ. ཏེན ཨཱསཝེསུ སམུདཱཡུཔལཀྑཎཾ ཀཐིཏནྟི དཊྛབྦཾ. ན ཧི སེཡྻམཱནཱདིཔྤཧཱནེན ཝིནཱ ཧཱིནམཱནཾཡེཝ པཛཧཏི. པཛཱནནཱཏི ‘‘ནཱཔརཾ ཨིཏྠཏྟཱཡཱ’’ཏི ཝུཏྟཔཛཱནནསམྤནྣོ ཧོཏཱིཏི.

སརཱུཔབྷེདཏོཔཱིཏི ‘‘ཙཏྟཱརོ’’ཏི ཨེཝཾ པརིམཱཎཔརིཙྪེདཏོཔི. ཨིདཾ བྷགཝཱ དསྶེནྟོ ཨཱཧཱཏི སམྦནྡྷོ. ཨིདནྟི ཙ ‘‘ཨཡམྤི ཁོ’’ཏིཨཱདིཝཙནཾ སནྡྷཱཡཱཧ.

ཨསམྦྷིནྣཱཡ ཨེཝཱཏི ཡཐཱནིསིནྣཱཡ ཨེཝ, ཨཝུཊྛིཏཱཡ ཨེཝཱཏི ཨཏྠོ. པུགྒལཐོམནཏྠནྟི དེསནཱཀུསལཱནཾ ཨཱནནྡཏྠེརཱདཱིནཾ པུགྒལཱནཾ པསཾསནཏྠཾ ཨུཀྐཾསནཏྠཾ. དྷམྨཐོམནཏྠནྟི པཊིཔཏྟིདྷམྨསྶ པསཾསནཏྠཾ. ཏེཔཱིཏི ཨཱནནྡཏྠེརཱདཡོ བྷིཀྑཱུཔི. དྷམྨཔཊིགྒཱཧཀཱ བྷིཀྑཱུ. ཨཏྠེཏི སཱིལཱདིཨཏྠེ. དྷམྨེཏི པཱལི༹དྷམྨེ.

ཨསྶཱཏི བྷགཝཏོ. ཨཱནུབྷཱཝཾ ཀརིསྶཏི ‘‘དིཝསཉྩེཔི བྷགཝཱ’’ཏིཨཱདིནཱ. ནནྟི སཱརིཔུཏྟཏྠེརཾ. ཨཧམྤི ཏཐེཝ ཐོམེསྶཱམི ‘‘སཱ ཧི བྷིཀྑཱུ’’ཏིཨཱདིནཱ. ཨེཝཾ ཙིནྟེསཱིཏི ཨེཝཾ ཝཀྑམཱནེན དྷམྨདཱཡཱདདེསནཱཡ ཙིནྟིཏཱཀཱརེན ཙིནྟེསི. ཏེནཱཧ ‘‘ཡཐཱ’’ཏིཨཱདི. ཨེཀཛ྄ཛྷཱསཡཱཡཱཏི ¶ སམཱནཱདྷིཔྤཱཡཱཡ. མཏིཡཱཏི པཉྙཱཡ. ཨཡཾ དེསནཱ ཨགྒཱཏི བྷགཝཱ དྷམྨསེནཱཔཏིཾ གུཎཏོ ཨེཝཾ པགྒཎྷཱཏཱིཏི ཀཏྭཱ ཝུཏྟཾ.

པཀཱསེཏྭཱཏི གུཎཏོ པཱཀཊཾ པཉྙཱཏཾ ཀཏྭཱ སབྦསཱཝཀེཧི སེཊྛབྷཱཝེ ཋཔེཏུཀཱམོ. ཙིཏྟགཏིཡཱ ཙིཏྟཝསེན ཀཱཡསྶ པརིཎཱམནེན ‘‘ཨཡཾ ཀཱཡོ ཨིདཾ ཙིཏྟཾ ཝིཡ ཧོཏཱུ’’ཏི ཀཱཡསམཱནགཏིཀཏྟཱདྷིཊྛཱནེན. ཀཐཾ པན ཀཱཡོ དནྡྷཔྤཝཏྟིཀོ ལཧུཔརིཝཏྟེན ཙིཏྟེན ¶ སམཱནགཏིཀོ ཧོཏཱིཏི? ན སབྦཐཱ སམཱནགཏིཀོ. ཡཐེཝ ཧི ཀཱཡཝསེན ཙིཏྟཝིཔརིཎཱམནེ ཙིཏྟཾ སབྦཐཱ ཀཱཡེན སམཱནགཏིཀཾ ཧོཏི. ན ཧི ཏདཱ ཙིཏྟཾ སབྷཱཝསིདྡྷེན ཨཏྟནོ ཁཎེན ཨཝཏྟིཏྭཱ དནྡྷཝུཏྟིཀསྶ རཱུཔདྷམྨསྶ ཁཎེན ཝཏྟིཏུཾ སཀྐོཏི, ‘‘ཨིདཾ ཙིཏྟཾ ཨཡཾ ཀཱཡོ ཝིཡ ཧོཏཱུ’’ཏི པནཱདྷིཊྛཱནེན དནྡྷགཏིཀསྶ ཀཱཡསྶ ཨནུཝཏྟནཏོ ཡཱཝ ཨིཙྪིཏཊྛཱནཔྤཏྟི ཧོཏི, ཏཱཝ ཀཱཡགཏིཨནུལོམེནེཝ ཧུཏྭཱ སནྟཱནཝསེན པཝཏྟམཱནཾ ཙིཏྟཾ ཀཱཡགཏིཡཱ པརིཎཱམིཏཾ ནཱམ ཧོཏི, ཨེཝཾ ‘‘ཨཡཾ ཀཱཡོ ཨིདཾ ཙིཏྟཾ ཝིཡ ཧོཏཱུ’’ཏི ཨདྷིཊྛཱནེན པགེཝ སུཁལཧུསཉྙཱཡ སམྤཱདིཏཏྟཱ ཨབྷཱཝིཏིདྡྷིཔཱདཱནཾ ཝིཡ དནྡྷཾ ཨཝཏྟིཏྭཱ ཡཐཱ ལཧུཀཏིཔཡཙིཏྟཝཱརེཧེཝ ཨིཙྪིཏཊྛཱནཔྤཏི ཧོཏི, ཨེཝཾ པཝཏྟརཱུཔཏཱ ཝིཉྙཱཡཏཱིཏི.

ཨདྷིཔྤཱཡཱནུརཱུཔམེཝ ཏསྶ བྷགཝཏོ ཐོམནཱཡ ཀཏཏྟཱ. ཨིདཾ ནཱམ ཨཏྠཛཱཏཾ བྷགཝཱ པུཙྪིསྶཏཱིཏི པུབྦེ མཡཱ ཨཝིདིཏཾ ཨཔསྶཾ. ཨཱསཡཛཱནནཏྠནྟི ‘‘ཨེཝཾ བྱཱཀརོནྟེན སཏྠུ ཨཛ྄ཛྷཱསཡོ གཧིཏོ ཧོཏཱི’’ཏི ཨེཝཾ སཏྠུ ཨཛ྄ཛྷཱསཡཛཱནནཏྠཾ. དུཏིཡཾ པཉྷཾ པུཙྪནྟོ བྷགཝཱ པཋམཾ པཉྷཾ ཨནུམོདི དུཏིཡཾ པཉྷཾ པུཙྪནྟེནེཝ པཋམཔཉྷཝིསྶཛྫནསྶ སམྤཊིཙྪིཏབྷཱཝཏོ.

ཨེཏཾ ཨཧོསཱིཏི ཨེཏཾ པརིཝིཏཀྐནཾ ཨཧོསི. ཨསྶཱཏི ཀལཱ༹རཁཏྟིཡསྶ བྷིཀྑུནོ. དྷམྨེ དཧཏཱིཏི དྷམྨདྷཱཏུ, སཱཝཀཔཱརམཱིཉཱཎཾ, སཱཝཀཝིསཡེ དྷམྨེ དཧཏི ཡཱཐཱཝཏོ ཨཛིཏེ ཀཏྭཱ ཋཔེཏཱིཏི ཨཏྠོ. ཏེནཱཧ ‘‘དྷམྨདྷཱཏཱུ’’ཏིཨཱདི. སབྦཉྙུཏཉྙཱཎགཏིཀམེཝ ཝིསཡེ. གོཙརདྷམྨེཏི གོཙརབྷཱུཏེ ཉེཡྻདྷམྨེ.

ཀལཱ༹རསུཏྟཝཎྞནཱ ནིཊྛིཏཱ.

༣. ཉཱཎཝཏྠུསུཏྟཝཎྞནཱ

༣༣. ཉཱཎམེཝ ཉཱཎཝཏྠུ སམྤཏྟཱིནཾ ཀཱརཎབྷཱཝཏོ. ཙཏཱུསཱུཏི ཙཏུསཙྩསྶ བོདྷནཝསེན ཝུཏྟེསུ ཙཏཱུསུ ཉཱཎེསུ. པཋམནྟི ‘‘ཛརཱམརཎེ ཉཱཎ’’ནྟི ཨེཝཾ ཝུཏྟཾ ཉཱཎཾ, ཡེན དྷཱརཎཔརིཙཡམནསིཀཱརཝསེན ¶ པཝཏྟཾ སབྦཾ གཎྷི. སནྣིཙཡཉཱཎམཡཾ སཝནམཡཾ ནཱམཏྭེཝ ཝེདིཏབྦཾ. སབྷཱཝཏོ ¶ པཙྩཡཏོ ཙསྶ པརིགྒཎྷནཉཱཎཾ སམྨསནཉཱཎཾཏྭེཝ ཝེདིཏབྦཾ. ཛརཱམརཎསཱིསེན ཙེཏྠ ཛརཱམརཎཝནྟོཝ དྷམྨཱ གཧིཏཱ. པཊིཝེདྷཉཱཎནྟི ཨསམྨོཧཏོ པཊིཝིཛ྄ཛྷནཉཱཎཾ. ཨིམིནཱ དྷམྨེནཱཏི ཧེཏུམྷི ཀརཎཝཙནཾ. ཨིམསྶ ཧི དྷམྨསྶ ཨདྷིགམཧེཏུ ཨཡཾ ཨརིཡོ ཨཏཱིཏཱནཱགཏེ ནཡེནཔི ཙཏུསཙྩདྷམྨེ ཨབྷིསམྦུཛ྄ཛྷཏི. མགྒཉཱཎམེཝ པན ཨཏཱིཏཱནཱགཏེ ནཡནསདིསཾ ཀཏྭཱ དསྶེཏུཾ ‘‘མགྒཉཱཎདྷམྨེན ཝཱ’’ཏི དུཏིཡཝིཀཔྤོ ཝུཏྟོ. ཨེཝཉྷི ‘‘ཨཀཱལིཀ’’ནྟི སམཏྠིཏཾ ཧོཏི.

ཉཱཎཙཀྑུནཱ དིཊྛེནཱཏི དྷམྨཙཀྑུབྷཱུཏེན ཉཱཎཙཀྑུནཱ ཨསམྨོཧཔཊིཝེདྷཝསེན པཙྩཀྑཏོ དིཊྛེན. པཉྙཱཡ ཝིདིཏེནཱཏི མགྒཔཉྙཱཡ ཏཐེཝ ཝིདིཏེན. ཡསྨཱ ཏཐཱ དིཊྛཾ ཝིདིཏཾ སབྦསོ པཏྟཾ མཧཱཨུཔཱཡོ ཧོཏི, ཏསྨཱ ཝུཏྟཾ ‘‘པརིཡོགཱལ༹ྷེནཱ’’ཏི. དིཊྛེནཱཏི ཝཱ དསྶནེན, དྷམྨཾ པསྶིཏྭཱ ཋིཏེནཱཏི ཨཏྠོ. ཝིདིཏེནཱཏི ཙཏྟཱརི སཙྩཱནི ཝིདིཏྭཱ པཱཀཊཱནི ཀཏྭཱ ཋིཏེན. ཨཀཱལིཀེནཱཏི ན ཀཱལནྟརཝིཔཱཀདཱཡིནཱ. པཏྟེནཱཏི ཙཏྟཱརི སཙྩཱནི པཏྭཱ ཋིཏཏྟཱ དྷམྨཾ པཏྟེན. པརིཡོགཱལ༹ྷེནཱཏི ཙཏུསཙྩདྷམྨེ པརིཡོགཱཧིཏྭཱ ཋིཏེན. ཨཏཱིཏཱནཱགཏེ ནཡཾ ནེཏཱིཏི ཨཏཱིཏེ ཙ ཨནཱགཏེ ཙ ནཡཾ ནེཏི ཧརཏི པེསེཏི. ཨིདཾ པན པཙྩཝེཀྑཎཉཱཎསྶ ཀིཙྩཾ, སཏྠཱརཱ པན མགྒཉཱཎཾ ཨཏཱིཏཱནཱགཏེ ནཡནསདིསཾ ཀཏཾ ཏཾམཱུལཀཏྟཱ. ཨཏཱིཏམགྒསྶ ཧི པཙྩཝེཀྑཎཾ ནཱམ ཧོཏི, ཏསྨཱ མགྒཉཱཎཾ ནཡནསདིསཾ ཀཏཾ ནཱམ ཧོཏི, པཙྩཝེཀྑཎཉཱཎེན པན ནཡཾ ནེཏི. ཏེནཱཧ ‘‘ཨེཏྠ ཙཱ’’ཏིཨཱདི. ཡཐཱ པན ཏེན ནཡཾ ནེཏི. ཏཾ ཨཱཀཱརཾ དསྶེཏུཾ ‘‘ཡེ ཁོ ཀེཙཱི’’ཏིཨཱདི ཝུཏྟཾ. ཨེཏྠ ཙ ནཡནུཔྤཱདནཾ ནཡཉཱཎསྶེཝ པཝཏྟིཝིསེསོ. ཏེན ཝུཏྟཾ ‘‘པཙྩཝེཀྑཎཉཱཎསྶ ཀིཙྩ’’ནྟི. ཀིཉྩཱཔི ‘‘ཨིམིནཱཏི མགྒཉཱཎདྷམྨེན ཝཱ’’ཏི ཝུཏྟཾ, དུཝིདྷཾ པན མགྒཕལཉཱཎཾ སམྨསནཉཱཎཔཙྩཝེཀྑཎཱཡ མཱུལཀཱརཎཾ, ན ནཡནསྶཱཏི དུཝིདྷེན ཉཱཎདྷམྨེནཱཏི ན ན ཡུཛྫཏི. ཏཐཱ ཙཏུསཙྩདྷམྨསྶ ཉཱཏཏྟཱ མགྒཕལསངྑཱཏསྶ ཝཱ དྷམྨསྶ སཙྩཔཊིཝེདྷསམྤཡོགཾ གཏཏྟཱ ‘‘ནཡནཾ ཧོཏཱུ’’ཏི ཏེན ‘‘ཨིམིནཱ དྷམྨེནཱ’’ཏི ཉཱཎསྶ ཝིསཡབྷཱཝེན ཉཱཎསམྤཡོགེན ཏདཉཱཏེནཱཏི ཙ ཨཏྠོ ན ན ཡུཛྫཏི. ཨནུཨཡེཏི དྷམྨཉཱཎསྶ ཨནུརཱུཔཝསེན ཨཡེ བུཛ྄ཛྷནཉཱཎེ དིཊྛཱནཾ ཨདིཊྛཱནཡནཏོ ཨདིཊྛསྶ དིཊྛཏཱཡ ཉཱཔནཏོ ཙ. ཏེནཱཧ ‘‘དྷམྨཉཱཎསྶ ཨནུགམནེ ཉཱཎ’’ནྟི. ཁཱིཎཱསཝསྶ སེཀྑབྷཱུམི ནཱམ ཨགྒམགྒཀྑཎོ ¶ . ཀསྨཱ པནེཏཾ ཨེཝཾ ཝུཏྟནྟི ཙེ? ‘‘ཨེཝཾ ཛརཱམརཎཾ པཛཱནཱཏཱི’’ཏིཨཱདིནཱ ཝཏྟམཱནཝསེན དེསནཱཡ པཝཏྟཏྟཱ.

ཉཱཎཝཏྠུསུཏྟཝཎྞནཱ ནིཊྛིཏཱ.

༤. དུཏིཡཉཱཎཝཏྠུསུཏྟཝཎྞནཱ

༣༤. སཏྟརཱིཏི ¶ ཏ-ཀཱརསྶ ར-ཀཱརཱདེསཾ ཝུཏྟཾ. སཏྟཏིསདྡེན ཝཱ སམཱནཏྠོ སཏྟརིསདྡོ. བྱཉྫནརུཙིཝསེན བྱཉྫནཾ བྷཎནྟཱིཏི བྱཉྫནབྷཱཎཀཱ. ཏེནཱཧ ‘‘བཧུབྱཉྫནཾ ཀཏྭཱ’’ཏིཨཱདི. ཏིཊྛཏི ཏཏྠ ཕལཾ ཏདཱཡཏྟཝུཏྟིཏཱཡཱཏི ཋིཏི, པཙྩུཔྤནྣལཀྑཎསྶ དྷམྨསྶ ཋིཏི དྷམྨཊྛིཏི. ཨཐ ཝཱ དྷམྨོཏི ཀཱརཎཾ, པཙྩཡོཏི ཨཏྠོ. དྷམྨསྶ ཡོ ཋིཏིསབྷཱཝོ, སོཝ དྷམྨཏོ ཨཉྙོ ནཏྠཱིཏི དྷམྨཊྛིཏི, པཙྩཡོ. ཏཏྠ ཉཱཎཾ དྷམྨཊྛིཏིཉཱཎཾ. ཏེནཱཧ ཨཱཡསྨཱ དྷམྨསེནཱཔཏི – ‘‘པཙྩཡཔརིགྒཧེ པཉྙཱ དྷམྨཊྛིཏིཉཱཎ’’ནྟི (པཊི. མ. མཱཏིཀཱ ༤). ཏཐཱ ཙཱཧ ‘‘པཙྩཡཱཀཱརེ ཉཱཎ’’ནྟིཨཱདི. ཏཏྠ དྷམྨཱནནྟི པཙྩཡུཔྤནྣདྷམྨཱནཾ. པཝཏྟིཊྛིཏིཀཱརཎཏྟཱཏི པཝཏྟིསངྑཱཏཱཡ ཋིཏིཡཱ ཀཱརཎཏྟཱ. ‘‘ཛཱཏིཔཙྩཡཱ ཛརཱམརཎ’’ནྟིཨཱདིནཱ ཨདྡྷཏྟཡེ ཨནྭཡབྱཏིརེཀཝསེན པཝཏྟིཡཱ ཚབྦིདྷསྶ ཉཱཎསྶ. ཁཡོ ནཱམ ཝིནཱསོ, སོཝ བྷེདོཏི. ཝིརཛྫནཾ པལུཛྫནཾ. ནིརུཛ྄ཛྷནཾ ཨནྟརདྷཱནཾ. ཨེཀེཀསྨིནྟི ཛརཱམརཎཱདཱིསུ ཨེཀེཀསྨིཾ. པུབྦེ ‘‘ཡཐཱབྷཱུཏཉཱཎ’’ནྟི ཏརུཎཝིཔསྶནཾ ཨཱཧ. ཏསྨཱ ཨིདྷཱཔི དྷམྨཊྛིཏིཉཱཎཾ ཝིཔསྶནཱཏི གཧེཏྭཱ ‘‘ཝིཔསྶནཱཔཊིཝིཔསྶནཱ ཀཐིཏཱ’’ཏི ཝུཏྟཾ.

དུཏིཡཉཱཎཝཏྠུསུཏྟཝཎྞནཱ ནིཊྛིཏཱ.

༥. ཨཝིཛྫཱཔཙྩཡསུཏྟཝཎྞནཱ

༣༥. དེསནཾ ཨོསཱཔེསཱིཏི ཡཐཱརདྡྷཀཐཾ ཋཔེསི. ཏཏྠ ནིསིནྣསྶ དིཊྛིགཏིཀསྶ ལདྡྷིཡཱ བྷིནྡནཝསེན ཨུཔརི ཀཐེཏུཀཱམོ. བུདྡྷཱནཉྷི དེསནཱཝཱརཾ པཙྪིནྡཱཔེཏྭཱ པུཙྪིཏུཾ སམཏྠོ ནཱམ ཀོཙི ནཏྠི. ཏེནཱཧ ‘‘དིཊྛིགཏིཀསྶ ཨོཀཱསདཱནཏྠ’’ནྟི. དུཔྤཉྷོ ཨེསོ སཏྟཱུཔལདྡྷིཡཱ པུཙྪིཏཏྟཱ ¶ . སཏྟཱུཔལདྡྷིཝཱདཔདེནཱཏི ‘‘སཏྟོ ཛཱིཝོ ཨུཔལབྦྷཏཱི’’ཏི ཨེཝཾ པཝཏྟདིཊྛིདཱིཔཀཔདཝསེན. ཝདནྟི ཨེཏེནཱཏི ཝཱདོ. དིཊྛི-སདྡོ པན དྭཡསངྒཧིཏོ, བྲཧྨཙརིཡཝཱསོ པན པརམཏྠཏོ ཨརིཡམགྒབྷཱཝནཱཏི ཨཱཧ ‘‘ཨརིཡམགྒཝཱསོ’’ཏི. ཨཡཾ དིཊྛཱིཏི ཨནཉྙེ སརཱིརཛཱིཝཱཏི དིཊྛི. ‘‘ཛཱིཝོ’’ཏི ཙ ཛཱིཝིཏམེཝ ཝདནྟི. ཝཊྚནྟི དུཝིདྷཾ ཝཊྚཾ. ནིརོདྷེནྟོཏི ཨནུཔྤཏྟིདྷམྨཏཾ ཨཱཔཱདེནྟོ. སམུཙྪིནྡནྟོཏི ཨཔྤཝཏྟིཡཾ པཱཔནེན ཨུཔཙྪིནྡནྟོ. ཏདེཏཾ མགྒེན ནིརོདྷེཏབྦཾ ཝཊྚཾ ནིརུཛ྄ཛྷཏཱིཏི ཡོཛནཱ. ‘‘ཨཡཾ སཏྟོ ཝིནཱསཾ ཨབྷཱཝཾ པཏྭཱ སབྦསོ ཨུཙྪིཛྫཏཱི’’ཏི ཨེཝཾ ཨུཙྪེདདིཊྛིཡཱ གཧིཏཱཀཱརསྶ སམྦྷཝེ སཙྩབྷཱཝེ སཏི. ན ཧོཏཱིཏི སཱཏྠཀོ ན ཧོཏི.

གཙྪཏཱིཏི ¶ སརཱིརཏོ ནིཀྑམིཏྭཱ གཙྪཏི. ཝིཝཊྚེནྟོཏི ཨཔྤཝཏྟིཾ ཀརོནྟོཏི ཨཏྠོ. ཝིཝཊྚེཏུཾ ན སཀྐོཏི ནིཙྩསྶ ཨཔྤཝཏྟིཾ པཱཔེཏུཾ ཨསཀྐུཎེཡྻཏྟཱ. མིཙྪཱདིཊྛི སམྨཱདིཊྛིཾ ཝིཛ྄ཛྷཏི ཨསམཱཧིཏཔུགྒལསེཝནཝསེན ཏཐཱ པཝཏྟིཏུཾ ཨཔྤདཱནཝསེན ཙ པཛཧིཏབྦཱཔཛཧནཝསེན སམྨཱདིཊྛིཾ ཝིཛ྄ཛྷཏི. ཝིསཱུཀམིཝཱཏི ཀཎྜཀོ ཝིཡ. ན ཀེཝལཾ ཨནནུཝཏྟཀོཝ, ཨཐ ཁོ ཝིརོདྷོཔི ‘‘ནིཙྩ’’ནྟིཨཱདིནཱ པཝཏྟནདྷམྨཏཱཡ ཝིཉྙཱཔནཏོ. ཝིརཱུཔཾ བཱིབྷཙྪཾ ཕནྡིཏཾ ཝིཔྥནྡིཏཾ. པཎྞཔུཔྥཕལཔལླཝཱནཾ ཨཝཏྠུབྷཱུཏོ ཏཱལོ ཨེཝ ཏཱལཱཝཏྠུ ‘‘ཨསིཝེ སིཝཱ’’ཏི ཝོཧཱརོ ཝིཡ. ཀེཙི པན ‘‘ཏཱལཝཏྠུཀཏཱནཱི’’ཏི པཋནྟི, ཨཝཏྠུབྷཱུཏཏཱཡ ཏཱལོ ཝིཡ ཀཏཱནཱིཏི ཨཏྠོ. ཏེནཱཧ ‘‘མཏྠཀཙྪིནྣཏཱལོ ཝིཡཱ’’ཏི. ཨནུཨབྷཱཝནྟི ཝིནཱསཾ.

ཨཝིཛྫཱཔཙྩཡསུཏྟཝཎྞནཱ ནིཊྛིཏཱ.

༦. དུཏིཡཨཝིཛྫཱཔཙྩཡསུཏྟཝཎྞནཱ

༣༦. ཨིཏི ཝཱཏི ཨེཝཾ ཝཱ. ཛརཱམརཎསྶ ཙེཝ ཛརཱམརཎསཱམིཀསྶ ཙ ཁཎཝསེན ཡོ ཝདེཡྻ. ཨཝིསཱརདདྷཱཏུཀོ པུཙྪིཏུཾ ཨཙྪེཀཏཱཡ མངྐུབྷཱཝེན ཛཱཏོ. ཏེནཱཧ ‘‘པུཙྪིཏུཾ ན སཀྐོཏཱི’’ཏི.

དུཏིཡཨཝིཛྫཱཔཙྩཡསུཏྟཝཎྞནཱ ནིཊྛིཏཱ.

༧. ནཏུམྷསུཏྟཝཎྞནཱ

༣༧. ན ¶ ཏུམྷཱཀནྟི ཀཱཡསྶ ཨནཏྟནིཡབྷཱཝདསྶནམེཝ པནེཏནྟི ཡཱ ཏསྶ ཨནཏྟནིཡཏཱ, ཏཾ དསྶེཏུཾ ‘‘ཨཏྟནི ཧཱི’’ཏིཨཱདི ཝུཏྟཾ. ཡདི ན ཨཏྟནིཡཾ, པརཀིཡཾ ནཱམ སིཡཱཏི, ཏམྤི ནཏྠཱིཏི དསྶེནྟོ ‘‘ནཱཔི ཨཉྙེས’’ནྟི ཨཱཧ. ནཡིདཾ པུརཱཎཀམྨམེཝཱཏི ‘‘ཨིདཾ ཀཱཡོ’’ཏི ཝུཏྟསརཱིརཾ པུརཱཎཀམྨམེཝ ན ཧོཏི. ན ཧི ཀཱཡོ ཝེདནཱསབྷཱཝོ. པཙྩཡཝོཧཱརེནཱཏི ཀཱརཎོཔཙཱརེན. ཨབྷིསངྑཏནྟིཨཱདི ནཔུཾསཀལིངྒཝཙནཾ. པུརིམལིངྒསབྷཱགཏཱཡཱཏི ‘‘པུརཱཎམིདཾ ཀམྨ’’ནྟི ཨེཝཾ ཝུཏྟཔུརིམནཔུཾསཀལིངྒསབྷཱགཏཱཡ. ཨཉྙམཉྙཱབྷིམུཁེཧི སམེཙྩ པཙྩཡེཧི ཀཏོ ཨབྷིསངྑཏོཏི ཨཱཧ ‘‘པཙྩཡེཧི ཀཏོཏི དཊྛབྦོ’’ཏི. ཨབྷིསཉྩེཏཡིཏནྟི ཏཐཱ ཨབྷིསངྑཏཏྟསངྑཱཏེན ཨབྷིམུཁབྷཱཝེན ཙེཏཡིཏཾ པཀཔྤིཏཾ, པཝཏྟིཏནྟི ཨཏྠོ. ཙེཏནཱཝཏྠུཀོཏི ཙེཏནཱཧེཏུཀོ. ཝེདནིཡནྟི ཝེདནཱཡ ཧིཏཾ ཝཏྠཱརམྨཎབྷཱཝེན ཝེདནཱཡ པཙྩཡབྷཱཝཏོ. ཏེནཱཧ ‘‘ཝེདནིཡཝཏྠཱུ’’ཏི.

ནཏུམྷསུཏྟཝཎྞནཱ ནིཊྛིཏཱ.

༨. ཙེཏནཱསུཏྟཝཎྞནཱ

༣༨. ཡཉྩཱཏི ¶ ཨེཏྠ ཙ-སདྡོ ཨཊྛཱནེ. ཏེན ཙེཏནཱཡ ཝིཡ པཀཔྤཱནཱནུསཡཱནམྤི ཝིཉྙཱཎསྶ ཋིཏིཡཱ ཝཀྑམཱནཾཡེཝ ཨཝིསིཊྛཾ ཨཱརམྨཎབྷཱཝཾ ཛོཏེཏི. ཀཱམཾ ཏཱིསུཔི པདེསུ ‘‘པཝཏྟེཏི’’ཨིཙྩེཝ ཨཏྠོ ཝུཏྟོ, ཝཏྟནཏྠོ པན ཙེཏནཱདཱིནཾ ཡཐཱཀྐམཾ ཙེཏཡནཔཀཔྤནཱནུསཡནརཱུཔོ ཝིསིཊྛཊྛོ དཊྛབྦོ. ཏེབྷཱུམཀཀུསལཱཀུསལཙེཏནཱ གཧིཏཱ ཀམྨཝིཉྙཱཎསྶ པཙྩཡནིདྡྷཱརཎམེཏནྟི. ཏཎྷཱདིཊྛིཀཔྤཱ གཧིཏཱ ཡཐཱརཧནྟི ཨདྷིཔྤཱཡོ. ཨཊྛསུཔི ཧི ལོབྷསཧགཏཙིཏྟེསུ ཏཎྷཱཀཔྤོ, ཏཏྠ ཙཏཱུསྭེཝ དིཊྛིཀཔྤོཏི. ཀཱམཾ ཨནུསཡཱ ལོཀིཡཀུསལཙེཏནཱསུཔི ཨནུསེནྟིཡེཝ, ཨཀུསལེསུ པན པཝཏྟི པཱཀཊཱཏི ‘‘དྭཱདསནྣཾ ཙེཏནཱན’’ནྟི ཝུཏྟཾ. སཧཛཱཏཀོཊིཡཱཏི ཨིདཾ པཙྩུཔྤནྣཱཔི ཀཱམརཱགཱདཡོ ཨནུསཡཱཝ ཝུཙྩནྟི ཏཾསདིསཏཱཡཱཏི ཝུཏྟཾ. ན ཧི ཀཱལབྷེདེན ལཀྑཎཔྤབྷེདོ ཨཏྠཱིཏི. ཨནཱགཏཱ ཨེཝ ཧི ཀཱམརཱགཱདཡོ ནིཔྤརིཡཱཡཏོ ‘‘ཨནུསཡཱ’’ཏི ཝཏྟབྦཏཾ ཨརཧནྟི. པཙྩཡུཔྤནྣོ ¶ ཝཊྚཏཱིཏི ཨཱཧ ‘‘ཨཱརམྨཎཾ པཙྩཡོ’’ཏི. ཀམྨཝིཉྙཱཎསྶ ཋིཏཏྠནྟི ཀམྨཝིཉྙཱཎསྶེཝ པཝཏྟིཡཱ. ཏསྨིཾ པཙྩཡེ སཏཱིཏི ཏསྨིཾ ཙེཏནཱཔཀཔྤནཱནུསཡསཉྙིཏེ པཙྩཡེ སཏི པཏིཊྛཱ ཝིཉྙཱཎསྶ ཧོཏི. སནྟཱནེ ཕལདཱནསམཏྠཏཱཡེཝ ཧོཏཱིཏི ‘‘པཏིཊྛཱ ཧོཏི, ཏསྨིཾ པཏིཊྛིཏེ’’ཏི ཝུཏྟཾ. སནྣིཊྛཱཔཀཙེཏནཱཝསེན ཝིརུལ༹ྷེཏི. པཏིཊྛིཏེཏི ཧི ཨིམིནཱ ཀམྨསྶ ཀཏབྷཱཝོ ཝུཏྟོ, ‘‘ཝིརུལ༹ྷེ’’ཏི ཨིམིནཱ ཨུཔཙིཏབྷཱཝོ. ཏེནཱཧ ‘‘ཀམྨཾ ཛཝཱཔེཏྭཱ’’ཏིཨཱདི. ཏཏྠ པུརེཏརཾ ཨུཔྤནྣཱཧི ཀམྨཙེཏནཱཧི ལདྡྷཔཙྩཡཏྟཱ བལཔྤཏྟཱཡ སནྣིཊྛཱཔཀཙེཏནཱཡ ཀམྨཝིཉྙཱཎཾ ལདྡྷཔཏིཊྛཾ ཝིརུལ༹ྷམཱུལཉྩ ཧོཏཱིཏི ཝུཏྟཾ ‘‘ནིབྦཏྟམཱུལེ ཛཱཏེ’’ཏི. ཏཐཱ ཧི སནྣིཊྛཱཔཀཙེཏནཱ ཝིཔཱཀཾ དེནྟཾ ཨནནྟརེ ཛཱཏིཝསེན དེཏི ཨུཔཔཛྫཝེདནཱིཡཀམྨནྟི.

ཏེབྷཱུམཀཙེཏནཱཡཱཏི ཏེབྷཱུམཀཀུསལཱཀུསལཙེཏནཱཡ. ཨཔྤཝཏྟནཀྑཎོཏི ཨིདྷ པཝཏྟནཀྑཎོ ཛཱཡམཱནཀྑཎོ. ན ཛཱཡམཱནཀྑཎོ ཨཔྤཝཏྟནཀྑཎོ ན ཀེཝལཾ བྷངྒཀྑཎོ ཨཔྤཧཱིནཱནུསཡསྶ ཨདྷིཔྤེཏཏྟཱ. ཨཔྤཧཱིནཀོཊིཡཱཏི ཨསམུཙྪིནྣབྷཱཝེན. ཏདིདཾ ཏེབྷཱུམཀཀུསལཱཀུསལཙེཏནཱསུ ཨཔྤཝཏྟམཱནཱསུ ཨནུསཡཱནཾ སཧཛཱཏཀོཊིཨཱདིནཱ པཝཏྟི ནཱམ ནཏྠི, ཝིཔཱཀཱདཱིསུ ཨཔྤཧཱིནཀོཊིཡཱ པཝཏྟཏི ཀརོནྟསྶ ཨབྷཱཝཏོཏི ཨིམམཏྠཾ སནྡྷཱཡ ཝུཏྟཾ. ཨཝཱརིཏཏྟཱཏི པཊིཔཀྑེཏི ཨཝཱརིཏབྦཏྟཱ. པཙྩཡོཝ ཧོཏི ཝིཉྙཱཎསྶ ཋིཏིཡཱ.

པཋམདུཏིཡཝཱརེཧི ཝཊྚཾ དསྶེཏྭཱ ཏཏིཡཝཱརེ ‘‘ནོ ཙེ’’ཏིཨཱདིནཱ ཝིཝཊྚཾ དསྶིཏནྟི ‘‘པཋམཔདེ ཏེབྷཱུམཀཀུསལཱཀུསལཙེཏནཱ ནིཝཏྟཱ’’ཏིཨཱདི ཝུཏྟཾ. ཏཏྠ ནིཝཏྟཱཏི ཨཀརཎཏོ ཨཔྤཝཏྟིཡཱ ¶ ཨཔགཏཱ. ཏཎྷཱདིཊྛིཡོ ནིཝཏྟཱཏི ཡོཛནཱ. ཝུཏྟཔྤཀཱརེསཱུཏི ‘‘ཏེབྷཱུམཀཝིཔཱཀེསཱུ’’ཏིཨཱདིནཱ ཝུཏྟཔྤཀཱརེསུ.

ཨེཏྠཱཏི ཨིམསྨིཾ སུཏྟེ. ཨེཏྠ ཙེཏནཱཔཀཔྤནཱནཾ པཝཏྟནཝསེན དྷམྨཔརིཙྪེདོ དསྶིཏོཏི ‘‘ཙེཏེཏཱིཏི ཏེབྷཱུམཀཀུསལཱཀུསལཙེཏནཱ གཧིཏཱ’’ཏིཨཱདིནཡོ ཨིདྷེཝ ཧོཏཱིཏི དསྶིཏོ. ཙཏསྶོཏི པཊིགྷདྭཡམོཧམཱུལསམཱགཏཱ ཙཏསྶོ ཨཀུསལཙེཏནཱ. ཙཏཱུསུ ཨཀུསལཙེཏནཱསཱུཏི ཡཐཱཝུཏྟཱསུ ཨེཝ ཙཏཱུསུ ཨཀུསལཙེཏནཱསུ, ཨིཏརཱ པན ‘‘ན པཀཔྤེཏཱི’’ཏི ཨིམིནཱ པཊིཀྑེཔེན ནིཝཏྟཱཏི. སུཏྟེ ཨཱགཏཾ ཝཱརེཏྭཱཏི ‘‘ནོ ཙ པཀཔྤེཏཱི’’ཏི ཨེཝཾ པཊིཀྑེཔཝསེན ¶ སུཏྟེ ཨཱགཏཾ ཝཛྫེཏྭཱ. ‘‘ན པཀཔྤེཏཱི’’ཏི ཧི ཨིམིནཱ ཨཊྛསུ ལོབྷསཧགཏཙིཏྟེསུ སཧཛཱཏཀོཊིཡཱ པཝཏྟཨནུསཡོ ནིཝཏྟིཏོ ཏེསཾ ཙིཏྟཱནཾ ཨཔྤཝཏྟནཏོ, ཏསྨཱ ཏཾ ཋཱནཾ ཋཔེཏྭཱཏི ཨཏྠོ. པུརིམསདིསོཝ པུརིམནཡེསུ ཝུཏྟནཡེན གཧེཏབྦོ དྷམྨཔརིཙྪེདཏྟཱ.

ཏདཔྤཏིཊྛིཏེཏི སམཱསབྷཱཝཏོ ཝིབྷཏྟིལོཔོ, སནྡྷིཝསེན ད-ཀཱརཱགམོ, ཏསྶ ཨཔྤཏིཊྛིཏཾ ཏདཔྤཏིཊྛིཏཾ, ཏསྨིཾ ཏདཔྤཏིཊྛིཏེཏི ཨེཝམེཏྠ སམཱསཔདསིདྡྷི དཊྛབྦཱ. ཨེཏྠཱཏི ཨེཏསྨིཾ ཏཏིཡཝཱརེ ཨརཧཏྟམགྒསྶ ཀིཙྩཾ ཀཐིཏཾ སབྦསོ ཨནུསཡནིབྦཏྟིབྷེདནཏོ. ཁཱིཎཱསཝསྶ ཀིཙྩཀརཎནྟིཔི ཝཏྟུཾ ཝཊྚཏི སབྦསོ ཝེདནཱདཱིནཾ པཊིཀྑེཔབྷཱཝཏོ. ནཝ ལོཀུཏྟརདྷམྨཱཏིཔི ཝཏྟུཾ ཝཊྚཏི མགྒཔཊིཔཱཊིཡཱ ཨནུསཡསམུགྒྷཱཊནཏོ མགྒཱནནྟརཱནི ཕལཱནི, ཏདུབྷཡཱརམྨཎཉྩ ནིབྦཱནནྟི. ཝིཉྙཱཎསྶཱཏི ཀམྨཝིཉྙཱཎསྶ. པུནབྦྷཝསཱིསེན ཨནནྟརབྷཝསངྒཧིཏཾ ནཱམརཱུཔཾ པཊིསནྡྷིཝིཉྙཱཎམེཝ ཝཱ གཧིཏནྟི ཨཱཧ ‘‘པུནབྦྷཝསྶ ཙ ཨནྟརེ ཨེཀོ སནྡྷཱི’’ཏི. བྷཝཛཱཏཱིནནྟི ཨེཏྠ ‘‘དུཏིཡབྷཝསྶ ཏཏིཡབྷཝེ ཛཱཏིཡཱ’’ཏི ཨེཝཾ པརམྤརཝསེན གཧེཏབྦཾ. ཨཱཡཏིཾ པུནབྦྷཝཱབྷིནིབྦཏྟིགཧཎེན པན ནཱནནྟརིཡཏོ ཀམྨབྷཝོ གཧིཏོ, ཛཱཏིཧེཏུཕལསིདྡྷིཔེཏྠ ཝུཏྟཱ ཨེཝཱཏི ཝེདིཏབྦཾ. ཨེཏྠ ཙ ‘‘ནོ ཙེ, བྷིཀྑཝེ, ཙེཏེཏི ནོ ཙ པཀཔྤེཏི, ཨཐ ཁོ ཨནུསེཏཱི’’ཏི ཨེཝཾ བྷགཝཏཱ དུཏིཡནཡེ པུབྦབྷཱགེ བྷཝནིབྦཏྟཀཀུསལཱཀུསལཱཡཱུཧནཾ, པཀཔྤནཉྩ ཝིནཱཔི བྷཝེསུ དིཊྛཱདཱིནཝསྶ ཡོགིནོ ཨནུསཡཔཙྩཡཱ ཝིཔསྶནཱཙེཏནཱཔི པཊིསནྡྷིཛནཀཱ ཧོཏཱིཏི དསྶནཏྠཾ ཀུསལཱཀུསལསྶ ཨཔྤཝཏྟི ཙེཔི, ཏདཱ ཝིཛྫམཱནཏེབྷཱུམཀཝིཔཱཀཱདིདྷམྨེསུ ཨཔྤཧཱིནཀོཊིཡཱ ཨནུསཡིཏཀིལེསཔྤཙྩཡཱ བྷཝཝཛྫསྶ ཀམྨཝིཉྙཱཎསྶ པཏིཊྛིཏཏཱ ཧོཏཱིཏི དསྶནཏྠཉྩ ཝུཏྟོ. ‘‘ན ཙེཏེཏི པཀཔྤེཏི ཨནུསེཏཱི’’ཏི ཨཡཾ ནཡོ ན གཧིཏོ ཙེཏནཾ ཝིནཱ པཀཔྤནསྶ ཨབྷཱཝཏོ.

ཙེཏནཱསུཏྟཝཎྞནཱ ནིཊྛིཏཱ.

༩. དུཏིཡཙེཏནཱསུཏྟཝཎྞནཱ

༣༩. ཝིཉྙཱཎནཱམརཱུཔཱནཾ ¶ ¶ ཨནྟརེ ཨེཀོ སནྡྷཱིཏི ཧེཏུཕལསནྡྷི ཝིཉྙཱཎགྒཧཎེན ཀམྨཝིཉྙཱཎསྶ གཧིཏཏྟཱ. ནཱམརཱུཔཾ པན ཝིཔཱཀནཱམརཱུཔམེཝཱཏི པཱཀཊམེཝ. སེསཾ སུཝིཉྙེཡྻམེཝ.

དུཏིཡཙེཏནཱསུཏྟཝཎྞནཱ ནིཊྛིཏཱ.

༡༠. ཏཏིཡཙེཏནཱསུཏྟཝཎྞནཱ

༤༠. རཱུཔཱདཱིསུ ཚསུ ཨཱརམྨཎེསུ. ཏེན ཙེཏྠ བྷཝཏྟཡཾ སངྒཎྷཱཏི ཚལཱ༹རམྨཎཔརིཡཱཔནྣཏྟཱ. ཏསྶེཝ བྷཝཏྟཡསྶ པཏྠནཱ པཎིདྷཱནཱདིཝསེན ནཏི ནཱམ. ཨཱགཏིམྷི གཏཱིཏི པཙྩུཔཊྛཱནཝསེན ཨབྷིམུཁཾ གཏི པཝཏྟི ཨེཏསྨཱཏི ཨཱགཏི, ཀམྨཱདིནིམིཏྟཾ. ཏསྨིཾ པཊིསནྡྷིཝིཉྙཱཎསྶ གཏི པཝཏྟི ནིབྦཏྟི ཧོཏི. ཏེནཱཧ ‘‘ཨཱགཏེ’’ཏིཨཱདི. ཙུཏཱུཔཔཱཏོཏི ཙཝནཾ ཙུཏི, མརཎཾ. ཨུཔཔཛྫནཾ ནིབྦཏྟི, ཨུཔཔཱཏོ. ཙུཏིཏོ ཨུཔཔཱཏོ པུནརུཔྤཱདོ. ཏེནཱཧ ‘‘ཨེཝཾ ཝིཉྙཱཎསྶཱ’’ཏིཨཱདི. ཨིཏོཏི ནིབྦཏྟབྷཝཏོ. ཏཏྠཱཏི པུནབྦྷཝསངྑཱཏེ ཨཱཡཏིབྷཝེ. ཨེཀོཝ སནྡྷཱིཏི ཨེཀོ ཧེཏུཕལསནྡྷི ཨེཝ ཀཐིཏོ.

ཏཏིཡཙེཏནཱསུཏྟཝཎྞནཱ ནིཊྛིཏཱ.

ཀལཱ༹རཁཏྟིཡཝགྒཝཎྞནཱ ནིཊྛིཏཱ.

༥. གཧཔཏིཝགྒོ

༡. པཉྩཝེརབྷཡསུཏྟཝཎྞནཱ

༤༡. ཡཏོཏི ཡསྨིཾ ཀཱལེ. ཨཡཉྷི ཏོ-སདྡོ དཱ-སདྡོ ཝིཡ ཨིདྷ ཀཱལཝིསཡོ. ཏེནཱཧ ‘‘ཡདཱ’’ཏི. བྷཡཝེརཙེཏནཱཡོཏི བྷཱཡིཏབྦཊྛེན བྷཡཾ, ཝེརཔསཝནཊྛེན ཝེརནྟི ཙ ལདྡྷནཱམཱ ཙེཏནཱཡོ. པཱཎཱཏིཔཱཏཱདཡོ ཧི ཡསྶ པཝཏྟནྟི, ཡཉྩ ཨུདྡིསྶ པཝཏྟིཡནྟི, ཨུབྷཡེ སབྷཡབྷེརཝཱཏི ཏེ ཨེཝ བྷཱཡིཏབྦབྷཡཝེརཛནཀཱཝཱཏི. སོཏསྶ ཨརིཡམགྒསྶ ཨཱདིཏོ པཊྛཱཡ པཊིཔཏྟིཨདྷིགམོ སོཏཱཔཏྟི ¶ , ཏདཏྠཱཡ ཏཏྠ པཏིཊྛིཏསྶ ཙ ཨངྒཱནི སོཏཱཔཏྟིཡངྒཱནི, ཏདུབྷཡཾ ¶ སནྡྷཱཡཱཧ ‘‘དུཝིདྷཾ སོཏཱཔཏྟིཡཱ ཨངྒ’’ནྟི, སོཏཱཔཏྟིཨཏྠཾ ཨངྒནྟི ཨཏྠོ. ཡཾ པུབྦབྷཱགེཏི ཡཾ སཡཾ སོཏཱཔཏྟིམགྒཕལཔཊིལཱབྷཏོ པུབྦབྷཱགེ ཏདཏྠཱཡ སཾཝཏྟཏི. ཀིཾ པན ཏནྟི ཨཱཧ ‘‘སཔྤུརིསསཾསེཝོ’’ཏིཨཱདི. སཔྤུརིསཱནཾ བུདྡྷཱདཱིནཾ ཨརིཡཉཱཎསཉྙཱཎཛཱཏཱ པཡིརུཔཱསནཱ, སདྡྷམྨསྶཝནཾ ཙཏུསཙྩདྷམྨསྶཝནཾ, ཡོནིསོ ཨུཔཱཡེན ཨནིཙྩཱདིཏོ མནསི ཀརཎཾ ཡོནིསོ མནསིཀཱརོ, ཨུསྶུཀྐཱཔེནྟེན དྷམྨསྶ ནིབྦཱནསྶ ཨནུདྷམྨཔཊིཔཛྫནཾ དྷམྨཱནུདྷམྨཔཊིཔཏྟཱིཏི ཨེཏཱནི སོཏཱཔཏྟིཡཱ ཨངྒཱནི. ཨཊྛཀཐཱཡཾ པན སོཏཱཔཏྟིཨངྒནྟི པདཾ ཨཔེཀྑིཏྭཱ ‘‘ཨེཝཾ ཨཱགཏ’’ནྟི ཝུཏྟཾ. ཋིཏསྶ པུགྒལསྶ ཨངྒཾ. སོཏཱཔནྣོ ཨངྒཱིཡཏི ཉཱཡཏི ཨེཏེནཱཏི སོཏཱཔནྣསྶ ཨངྒནྟིཔི ཝུཙྩཏི. ཨིདཾ པཙྪཱ ཝུཏྟཾ ཨངྒཾ. དོསེཧི ཨཱརཀཱཏི ཨརིཡོཏི ཨཱཧ ‘‘ནིདྡོསོ’’ཏི. ཀཐཾ ཨཝིཛྫཱ སངྑཱརཱནཾ པཙྩཡོཏིཨཱདིནཱ ཀེནཙིཔི ཨནུཔཱརམྦྷིཡཏྟཱ ནིརུཔཱརམྦྷོ. ཉཱཎཾ སནྡྷཱཡ ‘‘ནིདྡོསོ’’ཏི ཝུཏྟཾ, པཊིཙྩསམུཔྤཱདཾ སནྡྷཱཡ ‘‘ནིརུཔཱརམྦྷོ’’ཏི ཝདནྟི. ཨུབྷཡམྤི པན སནྡྷཱཡ ཨུབྷཡཾ ཝུཏྟནྟི ཨཔརེ. པཊིཙྩསམུཔྤཱདོ ཨེཏྠ ཨདྷིཔྤེཏོ. ཏཐཱ ཧི ཝུཏྟཾ ‘‘ཨཔརཱཔརཾ ཨུཔྤནྣཱཡ ཝིཔསྶནཱཔཉྙཱཡཱ’’ཏི. ན ཧི མགྒཉཱཎཾ ཝིཔསྶནཱཔཉྙཱཏི. སམྨཱ ཨུཔཱཡཏྟཱ ཏསྶ པཊིཙྩསམུཔྤནྣེ ཡཱཐཱཝཏོ ཉཱཡཏཱིཏི ཉཱཡོ, པཊིཙྩསམུཔྤཱདོ. ཉཱཎཾ པན ཉཱཡཏི སོ ཨེཏེནཱཏི ཉཱཡོ.

ཏཏྠཱཏི ནིརཡེ. མགྒསོཏནྟི མགྒསྶ སོཏཾ. ཨཱཔནྣོཏི ཨདྷིགཏོ. ཨཔཱཡེསུ ཨུཔྤཛྫནསངྑཱཏོ ཝིནིཔཱཏདྷམྨོ ཨེཏསྶཱཏི ཝིནིཔཱཏདྷམྨོ, ན ཝིནིཔཱཏདྷམྨོ ཨཝིནིཔཱཏདྷམྨོ. པརཾ ཨཡནནྟི ཨཏིཝིཡ སཝིསཡེ ཨཡིཏབྦཾ བུཛ྄ཛྷིཏབྦཾ. ཡེསཉྷི དྷཱཏཱུནཾ གཏིཨཏྠོ, བུདྡྷིཔི ཏེསཾ ཨཏྠོ. ཏེནཱཧ ‘‘ཨཝསྶཾ ཨབྷིསམྦུཛ྄ཛྷནཀོ’’ཏི.

པཱཎཱཏིཔཱཏཀམྨཀཱརཎཱཏི པཱཎཱཏིཔཱཏསངྑཱཏསྶ པཱཔཀམྨསྶ ཀརཎཧེཏུ. ཝེརཾ ཝུཙྩཏི ཝིརོདྷོ, ཏདེཝ བྷཱཡིཏབྦཏོ བྷཡནྟི ཨཱཧ ‘‘བྷཡཾ ཝེརནྟི ཨཏྠཏོ ཨེཀ’’ནྟི. ཨིདཾ བཱཧིརཾ ཝེརཾ ནཱམ ཏསྶ ཝེརསྶ མཱུལབྷཱུཏཏོ ཝེརཀཱརཔུགྒལཏོ བཧིབྷཱཝཏྟཱ. ཏེནེཝ ཧི ཏསྶ ཝེརཀཱརཔུགྒལསྶ ཨུཔྤནྣཾ ཝེརཾ སནྡྷཱཡ ‘‘ཨིདཾ ཨཛ྄ཛྷཏྟིཀཝེརཾ ནཱམཱ’’ཏི ཝུཏྟཾ, ཏནྣིསྶིཏསྶ ཝེརསྶ མཱུལབྷཱུཏཱ ཝེརཀཱརཔུགྒལཙེཏནཱ ཨུཔྤཛྫཏི པཧརིཏུཾ ཨསམཏྠསྶཔཱིཏི ཨདྷིཔྤཱཡོ. ན ཧི ནེརཡིཀཱ ནིརཡཔཱལེསུ ¶ པཊིཔཧརིཏུཾ སཀྐོནྟི. ནིརཡཔཱལསྶ ཙེཏནཱ ཨུཔྤཛྫཏཱིཏི ཨེཏེན ‘‘ཨཏྠི ནིརཡེ ནིརཡཔཱལཱ’’ཏི དསྶེཏི. ཡཾ པནེཏཾ བཱཧིརཝེརནྟི ཡམིདཾ དིཊྛདྷམྨིཀཾ སམྤརཱཡིཀཉྩ བཱཧིརཾ ཝེརཾ. པུགྒལཝེརནྟི ཝུཏྟཾ ཨཏྟཀིཙྩཾ སཱདྷེཏུཾ ཨསཀྐོནྟོ ཀེཝལཾ པརཔུགྒལེ ཨུཔྤནྣམཏྟཾ ཝེརནྟི ཀཏྭཱ. ཨཏྠཏོ ཨེཀམེཝ ‘‘ཙེཏསིཀ’’ནྟི ཝིསེསེཏྭཱ ཝུཏྟཏྟཱ. སེསཔདེསཱུཏི ‘‘ཨདིནྣཱདཱནཔཙྩཡཱ’’ཏིཨཱདིནཱ ཨཱགཏེསུ སེསཀོཊྛཱསེསུ. ཨཏྠོ བྷགྒོཏི ཨཏྠོ དྷཾསིཏོ ¶ . ཨདྷིགཏེནཱཏི མགྒེན ཨདྷིགཏེན. ‘‘ཨབྷིགཏེནཱ’’ཏིཔི པཱཋོ, ཨདྷིཝུཏྟེནཱཏི ཨཏྠོ. ཏེནཱཧ ‘‘ཨཙལཔྤསཱདེནཱ’’ཏི.

པཉྩཝེརབྷཡསུཏྟཝཎྞནཱ ནིཊྛིཏཱ.

༢. དུཏིཡཔཉྩཝེརབྷཡསུཏྟཝཎྞནཱ

༤༢. བྷིཀྑཱུནཾ ཀཐིཏབྷཱཝམཏྟམེཝ ཝིསེསོཏི ཨེཏེན ཡཱ སཏྠཱརཱ ཨེཀཙྩཱནཾ དེསིཏདེསནཱ, པུན ཏདཉྙེསཾ ཝེནེཡྻདམཀུསལེན ཀཱལནྟརེ ཏེནེཝ དེསིཏཱ, སཱ དྷམྨསཾགཱཧཀེཧི ‘‘མཱ ནོ སཏྠུདེསནཱ སམྤཊིགྒཧཾ ཝིནཱ ནསྶཏཱུ’’ཏི ཝིསུཾ སངྒཧཾ ཨཱརོཔིཏཱཏི དསྶེཏི.

དུཏིཡཔཉྩཝེརབྷཡསུཏྟཝཎྞནཱ ནིཊྛིཏཱ.

༣. དུཀྑསུཏྟཝཎྞནཱ

༤༣. སམུདཡནཾ སམུདཡོ, སམུདེཏི ཨེཏམྷཱཏི སམུདཡོ, ཨེཝཾ ཨུབྷིནྣཾ སམུདཡཱནམཏྠཏོཔི བྷེདོ ཝེདིཏབྦོ. པཙྩཡཱཝ པཙྩཡསམུདཡོ. ཨཱརདྡྷཝིཔསྶཀོ ‘‘ཨིམཉྩ ཨིམཉྩ པཙྩཡསཱམགྒིཾ པཊིཙྩ ཨིམེ དྷམྨཱ ཁཎེ ཁཎེ ཨུཔྤཛྫནྟཱི’’ཏི པསྶནྟོ ‘‘པཙྩཡསམུདཡཾ པསྶནྟོཔི བྷིཀྑུ ཁཎིཀསམུདཡཾ པསྶཏཱི’’ཏི ཝུཏྟོ པཙྩཡདསྶནམུཁེན ནིབྦཏྟིཀྑཎསྶ དསྶནཏོ. སོ པན ཁཎེ ཁཎེ སངྑཱརཱནཾ ནིབྦཏྟིཾ པསྶིཏུཾ ཨཱརདྡྷོ ‘‘ཨིམེཧི ནཱམ པཙྩཡེཧི ནིབྦཏྟཏཱི’’ཏི པསྶཏི. ‘‘སོ ཁཎིཀསམུདཡཾ པསྶནྟོ པཙྩཡཾ པསྶཏཱི’’ཏི ཝདནྟི. ཡསྨཱ པན པཙྩཡཏོ སངྑཱརཱནཾ ¶ ཨུདཡཾ པསྶནྟོ ཁཎཏོ ཏེསཾ ཨུདཡདསྶནཾ ཧོཏི, ཁཎཏོ ཨེཏེསཾ ཨུདཡཾ པསྶཏོ པགེཝ པཙྩཡཱནཾ སུགྒཧིཏཏྟཱ པཙྩཡཏོ དསྶནཾ སུཁེན ཨིཛ྄ཛྷཏི, ཏསྨཱ ཝུཏྟཾ ‘‘པཙྩཡསམུདཡཾ པསྶནྟོཔཱི’’ཏིཨཱདི. ཨཏྠངྒམདསྶནེཔི ཨེསེཝ ནཡོ. ཨཙྩནྟཏྠངྒམོཏི ཨཔྤཝཏྟི ནིརོདྷོ ནིབྦཱནནྟི. བྷེདཏྠངྒམོཏི ཁཎིཀནིརོདྷོ. ཏདུབྷཡཾ པུབྦབྷཱགེ ཨུགྒཧཔརིཔུཙྪཱདིཝསེན པསྶནྟོ ཨཉྙཏརསྶ དསྶནེ ཨིཏརདསྶནམྤི སིདྡྷམེཝ ཧོཏི, པུབྦབྷཱགེ ཙ ཨཱརམྨཎཝསེན ཁཡཏོ ཝཡསམྨསནཱདིཀཱལེ བྷེདཏྠངྒམཾ པསྶནྟོ ཨཏིརེཀཝསེན ཨནུསྶཝཱདིཏོ ཨཙྩནྟཾ ཨཏྠངྒམཾ པསྶཏི. མགྒཀྑཎེ པནཱརམྨཎཏོ ཨཙྩནྟཨཏྠངྒམཾ པསྶཏི, ཨསམྨོཧཏོ ཨིཏརམྤི པསྶཏི. ཏཾ སནྡྷཱཡཱཧ ‘‘ཨཙྩནྟཏྠངྒམཾ པསྶནྟོཔཱི’’ཏིཨཱདི. སམུདཡཏྠངྒམཾ ནིབྦཏྟིབྷེདནྟི སམུདཡསངྑཱཏཾ ནིབྦཏྟིཾ ཨཏྠངྒམསངྑཱཏཾ བྷེདཉྩ. ནིསྶཡཝསེནཱཏི ཙཀྑུསྶ སནྣིསྶཡཝསེན པཙྩཡཾ ཀཏྭཱ. ཨཱརམྨཎཝསེནཱཏི རཱུཔེ ཨཱརམྨཎཾ ཀཏྭཱ. ཡཾ པནེཏྠ ཝཏྟབྦཾ, ཏཾ མདྷུཔིཎྜིཀསུཏྟཊཱིཀཱཡཾ ཝུཏྟནཡེན ཝེདིཏབྦཾ. ཏིཎྞཾ སངྒཏི ཕསྶོཏི ‘‘ཙཀྑུ རཱུཔཱནི ¶ ཝིཉྙཱཎ’’ནྟི ཨིམེསཾ ཏིཎྞཾ སངྒཏི སམཱགམེ ནིབྦཏྟི ཕསྶོཏི ཝུཏྟོཏི ཨཱཧ ‘‘ཏིཎྞཾ སངྒཏིཡཱ ཕསྶོ’’ཏི. ཏིཎྞནྟི ཙ པཱཀཊཔཙྩཡཝསེན ཝུཏྟཾ, ཏདཉྙེཔི པན མནསིཀཱརཱདཡོ ཕསྶཔཙྩཡཱ ཧོནྟིཡེཝ. ཨེཝནྟི ཏཎྷཱདཱིནཾ ཨསེསཝིརཱགནིརོདྷཀྐམེན. བྷིནྣཾ ཧོཏཱིཏི ཨནུཔྤཱདནིརོདྷེན ནིརུདྡྷཾ ཧོཏི. ཏེནཱཧ ‘‘ཨཔྤཊིསནྡྷིཡ’’ནྟི.

དུཀྑསུཏྟཝཎྞནཱ ནིཊྛིཏཱ.

༤. ལོཀསུཏྟཝཎྞནཱ

༤༤. ཨཡམེཏྠ ཝིསེསོཏི ‘‘ཨཡཾ ལོཀསྶཱ’’ཏི སམུདཡཏྠངྒམཱནཾ ཝིསེསདསྶནཾ. ཨེཏྠ ཙཏུཏྠསུཏྟེ ཏཏིཡསུཏྟཏོ ཝིསེསོ.

ལོཀསུཏྟཝཎྞནཱ ནིཊྛིཏཱ.

༥. ཉཱཏིཀསུཏྟཝཎྞནཱ

༤༥. ཨཉྙམཉྙཾ ¶ དྭིནྣཾ ཉཱཏཱིནཾ གཱམོ ཉཱཏིཀོཏི ཝུཏྟོཏི ཨཱཧ ‘‘དྭིནྣཾ ཉཱཏཀཱནཾ གཱམེ’’ཏི. གིཉྫཀཱ ཝུཙྩནྟི ཨིཊྛཀཱ, གིཉྫཀཱཧི ཨེཝ ཀཏོ ཨཱཝསཐོ གིཉྫཀཱཝསཐོ. སོ ཀིར ཨཱཝཱསོ ཡཐཱ སུདྷཱཔརིཀམྨེན པཡོཛནཾ ནཏྠི, ཨེཝཾ ཨིཊྛཀཱཧི ཨེཝ ཙིནིཏྭཱ ཚཱདེཏྭཱ ཀཏོ. ཏཱདིསཉྷི ཚདནཾ སནྡྷཱཡ བྷགཝཏཱ ཨིཊྛཀཱཚདནཾ ཨནུཉྙཱཏཾ. ཏེན ཝུཏྟཾ ‘‘ཨིཊྛཀཱཧི ཀཏེ མཧཱཔཱསཱདེ’’ཏི. ཏཏྠ དྭཱརབནྡྷཀཝཱཊཕལཀཱདཱིནི པན དཱརུམཡཱནིཡེཝ. པརིཡཱཡཏི ཨཏྟནོ ཕལཾ པརིགྒཧེཏྭཱ ཝཏྟཏཱིཏི པརིཡཱཡོ, ཀཱརཎནྟི ཨཱཧ ‘‘དྷམྨཔརིཡཱཡནྟི དྷམྨཀཱརཎ’’ནྟི, པརིཡཏྟིདྷམྨབྷཱུཏཾ ཝིསེསཱདྷིགམསྶ ཧེཏུནྟི ཨཏྠོ. ཨུཔེཙྩ སུཡྻཏི ཨེཏྠཱཏི ཨུཔསྶུཏཱིཏི ཝུཏྟཾ ‘‘ཨུཔསྶུཏཱིཏི ཨུཔསྶུཏིཊྛཱན’’ནྟི. ཨཏྟནོ ཀམྨནྟི ཡདཏྠཾ ཏཏྠ གཏོ, ཏཾ པརིཝེཎསམཛྫནཀིརིཡཾ. པཧཱཡཱཏི ཨཀཏྭཱ. ཨེཝཾ མཧཏྠཉྷི ཝིམུཏྟཱཡཏནསཱིསེ ཋཏྭཱ སུཎནྟསྶ མཧཏོ ཨཏྠཱཡ སཾཝཏྟཏི. ཨེཀངྒཎཾ ཨཧོསཱིཏི སབྦཾ ཝིཝཊཾ ཨཧོསི. ཏཱིསུ ཧི བྷཝེསུ སངྑཱརགཏཾ པཙྩཡུཔྤནྣཝསེན མནསིཀརོཏོ བྷགཝཏོ ཀིཉྩི ཨསེསེཏྭཱ སབྦམྤི ཏཾ ཉཱཎམུཁེ ཨཱཔཱཐཾ ཨུཔགཙྪི. ཏེན ཝུཏྟཾ ‘‘ཡཱཝབྷཝགྒཱ ཨེཀངྒཎཾ ཨཧོསཱི’’ཏི. ཏནྟིཝསེན ཏམཏྠཾ ཝཱཙཱཡ ནིཙྪཱརེནྟོ ‘‘ཝཙསཱ སཛ྄ཛྷཱཡཾ ཀརོནྟོ’’ཏི ཝུཏྟོ. པཙྩཡཔཙྩཡུཔྤནྣཝསེན ཙ ཨཏྠཾ ཨཱཧརིཏྭཱ ཏེསཾ ནིརོདྷེན ཝིཝཊྚསྶ ཨཱཧཏཏྟཱ ‘‘ཡཐཱནུསནྡྷིནཱ’’ཏི ཝུཏྟཾ. ཨདྡས ཉཱཎཙཀྑུནཱ.

མནསཱ ¶ སཛ྄ཛྷཱཡཾ ཀརོནྟོ ‘‘ཏུཎྷཱིབྷཱུཏོཝ པགུཎཾ ཀརོནྟོ’’ཏི ཝུཏྟོ. པདཱནུཔདནྟི པདཉྩ ཨནུཔདཉྩ. པུརིམཉྷི པདཾ ནཱམ, ཏདནནྟརཾ ཨནུཔདཾ. གྷཊེཏྭཱ སམྦནྡྷཾ ཀཏྭཱ ཨཝིཙྪིནྡིཏྭཱ. པརིཡཱཔུཎཱཏཱིཏི ཨཛ྄ཛྷཡཏི. ཨཱདྷཱརཔྤཏྟནྟི ཨཱདྷཱརཾ ཙིཏྟསནྟཱནཔྤཏྟཾ ཨཔྤམུཊྛཾ གཏཏྟཱ ཨཱདྷཱརཔྤཏྟཾ ནཱམ. ཀཱརཎནིསྶིཏོཏི ལོཀུཏྟརདྷམྨསྶ ཀཱརཎསནྣིསྶིཏོ. ཨཱདིབྲཧྨཙརིཡཀོཏི ཨཱདིབྲཧྨཙརིཡཾ, ཏདེཝ ཨཱདིབྲཧྨཙརིཡཀཾ. དྷམྨཔརིཡཱཡཱཔེཀྑཱཡ པུལླིངྒནིདྡེསོ. ཏཱིསུཔི ཨིམེསཱུཏི ཏཏིཡཙཏུཏྠཔཉྩམེསུ ཏཱིསུ སུཏྟེསུ.

ཉཱཏིཀསུཏྟཝཎྞནཱ ནིཊྛིཏཱ.

༦. ཨཉྙཏརབྲཱཧྨཎསུཏྟཝཎྞནཱ

༤༦. ནཱམཝསེནཱཏི ¶ གོཏྟནཱམཝསེན ཙ ཀིཏྟིཝསེན ཙ ཨཔཱཀཊོ, ཏསྨཱ ‘‘ཛཱཏིཝསེན བྲཱཧྨཎོ’’ཏི ཝུཏྟཾ.

ཨཉྙཏརབྲཱཧྨཎསུཏྟཝཎྞནཱ ནིཊྛིཏཱ.

༧. ཛཱཎུསྶོཎིསུཏྟཝཎྞནཱ

༤༧. ཨེཝཾལདྡྷནཱམོཏི ‘‘ཛཱཎུསྶོཎཱི’’ཏི ཨེཝཾལདྡྷནཱམོ རཉྙོ སནྟིཀཱ ཨདྷིགཏནཱམོ.

ཛཱཎུསྶོཎིསུཏྟཝཎྞནཱ ནིཊྛིཏཱ.

༨. ལོཀཱཡཏིཀསུཏྟཝཎྞནཱ

༤༨. ཨཱཡཏིཾ ཧིཏཾ ཏེན ལོཀོ ན ཡཏཏི ན ཨཱིཧཏཱིཏི ལོཀཱཡཏཾ. ན ཧི ཏཾ ལདྡྷིཾ ནིསྶཱཡ སཏྟཱ པུཉྙཀིརིཡཱཡ ཙིཏྟམྤི ཨུཔྤཱདེནྟི, ཀུཏོ པཡོགོ, ཏཾ ཨེཏསྶ ཨཏྠི, ཏཏྠ ཝཱ ནིཡུཏྟོཏི ལོཀཱཡཏིཀོ. པཋམསདྡོ ཨཱདིཨཏྠཝཱཙཀཏྟཱ ཛེཊྛཝེཝཙནོཏི ཨཱཧ ‘‘པཋམཾ ལོཀཱཡཏ’’ནྟི. སཱདྷཱརཎཝཙནོཔི ལོཀསདྡོ ཝིསིཊྛཝིསཡོ ཨིདྷཱདྷིཔྤེཏོཏི ཨཱཧ ‘‘བཱལཔུཐུཛྫནལོཀསྶཱ’’ཏི. ཨིཏྟརབྷཱཝེན ལཀུཎྜཀབྷཱཝེན ཏསྶ ཝིཔུལཱདིབྷཱཝེན བཱལཱནཾ ཨུཔཊྛཱནམཏྟནྟི དསྶེནྟོ ‘‘ཨཱཡཏཾ མཧནྟ’’ནྟིཨཱདིམཱཧ. པརིཏྟནྟི ཁུདྡཀཾ. ཨེཀསབྷཱཝནྟི ཨེཀཾ སབྷཱཝཾ. ཨཝིཔརིཎཱམདྷམྨཏཱཡཱཏི ཨཱཧ ‘‘ནིཙྩསབྷཱཝམེཝཱཏི པུཙྪཏཱི’’ཏི. པུརིམསབྷཱཝེན ནཱནཱསབྷཱཝནྟི པུརིམསབྷཱཝཏོ བྷིནྣསབྷཱཝཾ. པཙྪཱ ན ཧོཏཱིཏི པཙྪཱ ཀིཉྩི ན ཧོཏི སབྦསོ ¶ སམུཙྪིཛྫནཏོ. ཏེནཱཧ ‘‘ཨུཙྪེདཾ སནྡྷཱཡ པུཙྪཏཱི’’ཏི. ཨེཀཏྟནྟི སབྦཀཱལཾ ཨཏྟསམྦྷཝཾ. ཏཐཱ ཙེཝ གཧཎེན དྭེཔི ཝཱདཱ སསྶཏདིཊྛིཡོ ཧོནྟི. ནཏྠི ན ཧོཏི. པུཐུཏྟཾ ནཱནཱསབྷཱཝཾ, ཨེཀརཱུཔཾ ན ཧོཏཱིཏི ཝཱ གཧཎེན དྭེཔི ཝཱདཱ ཨུཙྪེདདིཊྛིཡོཏི.

ལོཀཱཡཏིཀསུཏྟཝཎྞནཱ ནིཊྛིཏཱ.

༩. ཨརིཡསཱཝཀསུཏྟཝཎྞནཱ

༤༩. སཾསཡུཔྤཏྟི ¶ ཨཱཀཱརདསྶནནྟི ‘‘ཀསྨིཾ སཏི ཀིཾ ཧོཏཱི’’ཏི ཀཱརཎསྶ ཕལསྶ ཙ པཙྩཱམསནེན ཝིནཱ ཀེཝལཾ ཨིདཔྤཙྩཡཏཱཡ སཾསཡསྶ ཨུཔྤཛྫནཱཀཱརདསྶནཾ. སམུདཡཏི སམུདེཏཱིཏི ཨཏྠོཏི ཨཱཧ ‘‘ཨུཔྤཛྫཏཱི’’ཏི.

ཨརིཡསཱཝཀསུཏྟཝཎྞནཱ ནིཊྛིཏཱ.

༡༠. དུཏིཡཨརིཡསཱཝཀསུཏྟཝཎྞནཱ

༥༠. དྭེཔི ནཡཱ ཨེཀཏོ ཝུཏྟཱཏི ཨིདཾ ‘‘ཝིཉྙཱཎེ སཏི ནཱམརཱུཔཾ ཧོཏཱི’’ཏིཨཱདིནཱ ནཝམེ ཝུཏྟསྶ ནཡསྶ ‘‘ཨཝིཛྫཱཡ སཏི སངྑཱརཱ ཧོནྟཱི’’ཏིཨཱདིནཱ དསམེ ཝུཏྟནཡེ ཨནྟོགདྷཏྟཱ. ནཱནཏྟནྟི པུརིམཏོ ནཝམཏོ དསམསྶ ནཱནཏྟཾ.

དུཏིཡཨརིཡསཱཝཀསུཏྟཝཎྞནཱ ནིཊྛིཏཱ.

གཧཔཏིཝགྒཝཎྞནཱ ནིཊྛིཏཱ.

༦. དུཀྑཝགྒོ

༡. པརིཝཱིམཾསནསུཏྟཝཎྞནཱ

༥༡. ཨུཔཔརིཀྑམཱནོཏི པཝཏྟིཔཝཏྟིཧེཏུཾ, ནིཝཏྟིནིཝཏྟིཧེཏུཉྩ པརིཏུལེནྟོ. ཀུཏོ པནེཏནྟི? ‘‘སམྨཱ དུཀྑཀྑཡཱ’’ཏི ཝཙནཏོ. ན ཧི སབྦདུཀྑཔརིཝཱིམཾསཾ ཝིནཱ སམྨཱ དུཀྑཀྑཡོ སམྦྷཝཏི. ཀསྨཱཏིཨཱདིནཱ ཛརཱམརཎསྶེཝ གཧཎེ ཀཱརཎཾ པུཙྪཏི. ཛཱཏིཨཱདཱིནམྤི ¶ པཝཏྟི དུཀྑབྷཱཝིནཱིཏི ཨདྷིཔྤཱཡོ. ཡསྨཱ ཛརཱམརཎེ གཧིཏེ སཏི ཛཱཏིཔི གཧིཏཱ ཧོཏི, ཏསྶཱ ཨབྷཱཝེ ཛརཱམརཎསྶེཝ ཨབྷཱཝཏོ. ཨེས ནཡོ བྷཝཱདཱིསུཔི. ཨེཝཾ ཡཱཝ ཛཱཏིདྷམྨོ ཛརཱམརཎེ གཧིཏེ གཧིཏོཝ ཧོཏི, ཛརཱམརཎཔདེསེན ཏབྦིཀཱརཝནྟོ སབྦེ ཏེབྷཱུམཀཱ སངྑཱརཱ གཧིཏཱཏི ཨེཝམྤི ཛརཱམརཎགྒཧཎེན སབྦམྤི ཝཊྚདུཀྑཾ གཧིཏམེཝ ཧོཏི. ཏེནཱཧ ‘‘ཏསྨིཾ གཧིཏེ སབྦདུཀྑསྶ གཧིཏཏྟཱ’’ཏི. ཨནེཀཝིདྷནྟི བཧུཝིདྷཾ བཧུཀོཊྛཱསཾ. ‘‘ཨནེཀ’’ནྟི ཝཱ པཱཋོ ¶ . ཨནེཀནྟི བཧུལཝཙནཾ. ཝིདྷནྟི ཁཎྜིཙྩཔཱལིཙྩཱདིཝསེན ཝིཔརཱིཏཀོཊྛཱསཾ. ནཱནཔྤཀཱརཀནྟི ཏཏོ ཨེཝ ནཱནཔྤཀཱརཾ. ནྷཏྭཱ ཋིཏཾ པུརིསཾ ཝིཡཱཏི བཱལཱནཾ ཨཏྟབྷཱཝསྶ སུབྷཱཀཱརེན ཨུཔཊྛཱནཾ སནྡྷཱཡཱཧ.

‘‘སཱརུཔྤབྷཱཝེནཱ’’ཏི ཝུཏྟཾ, ཀིཾ སབྦཐཱ སཱརུཔྤབྷཱཝེནཱཏི ཨཱཧ ‘‘ནིཀྐིལེསཏཱཡ པརིསུདྡྷཏཱཡཱ’’ཏི. ན ཧི ཏསྶེསཱ ཨསངྑཏཏཱདིབྷཱཝེན སདིསཱ. པཊིཔནྣོཏི པཊིམུཁོ ཨབྷིསངྑཱརམུཁོ ཧུཏྭཱ པནྣོ ཨདྷིགཏོ. ཨནུགཏནྟི ཨནུཙྪཝིཀབྷཱཝེན གཏཾ, ཡཐཱ ཙ ནིབྦཱནསྶ ཨདྷིགམོ ཧོཏི, ཨེཝཾ ཏདནུརཱུཔབྷཱཝེན གཏཾ. ཨེཏྠ ཙ པཱལི༹ཡཾ ‘‘པཛཱནཱཏཱི’’ཏི པུབྦབྷཱགཝསེན པཛཱནནཱ ཝུཏྟཱ, ‘‘ཏཐཱ པཊིཔནྣོ ཙ ཧོཏཱི’’ཏི ནིཡཏཝསེན. ‘‘ཨཔརབྷཱགཝསེནཱ’’ཏི ཨཔརེ. ཀེཙི པན ‘‘ཡཐཱ པཊིཔནྣསྶ ཛརཱམརཎཾ ནིརུཛ྄ཛྷཏི, ཏཐཱ པཊིཔནྣོ’’ཏི ཝདནྟི. པདཝཱིམཾསནཱ པུབྦབྷཱགཝསེན ཝེདིཏབྦཱ, ན མགྒཀྑཎཝསེན. སངྑཱརནིརོདྷཱཡཱཏི ཨེཏྠ ནཡིདཾ ཨཝིཛྫཱཔཙྩཡསངྑཱརགྒཧཎཾ, ཨཐ ཁོ སངྑཏསངྑཱརགྒཧཎནྟི ཨཱཧ ‘‘སངྑཱརདུཀྑསྶ ནིརོདྷཏྠཱཡཱ’’ཏི. ཏེནཱཧ ‘‘ཨེཏྟཱཝཏཱ ཡཱཝ ཨརཧཏྟཱ དེསནཱ ཀཐིཏཱ’’ཏི.

‘‘པཙྩཏྟཾཡེཝ པརིནིབྦཱཡཏཱི’’ཏིཨཱདིནཱ ཨརཧཏྟཕལཔཙྩཝེཀྑཎཾ, ‘‘སོ སུཁཉྩ ཝེདནཾ ཝེདཡཏཱི’’ཏིཨཱདིནཱ སཏཏཝིཧཱརཉྩ དསྶེཏྭཱ དེསནཱ སབྦཐཱཝ ཝཊྚདེསནཱཏོ ནིཝཏྟེཏབྦཱ སིཡཱ. ཨཝིཛྫཱགཏོཏི ཨེཏྠ ཨིཏི-སདྡོ ཨཱདིཨཏྠོ, ཏེན ཨེཝམཱདིཀཾ ཨིདཾ ཝཊྚཝིཝཊྚཀཐནཾ པུན གཎྷཱཏི. པུགྒལསདྡོ ཨིཏརཱསཾ དྭིནྣཾ པཀཏཱིནཾ ཝཱཙཀོཏི ཏཏོ ཝིསེསེཏྭཱ གཧཎེ པཋམཔཀཏིམེཝ དསྶེནྟོ ‘‘པུརིསཔུགྒལོ’’ཏི ཨཝོཙཱཏི ཨཱཧ ‘‘པུརིསོཡེཝ པུགྒལོ’’ཏི. ཨུབྷཡེནཱཏི པུརིསཔུགྒལགྒཧཎེན. སམྨུཏིཡཱ ཨཝིཛྫམཱནཱཡ ཀཐཱ དེསནཱ སམྨུཏིཀཐཱ. པརམཏྠསྶ ཀཐཱ དེསནཱ པརམཏྠཀཐཱ. ཏཏྠཱཏི སམྨུཏིཔརམཏྠཀཐཱསུ, ན སམྨུཏིཔརམཏྠེསུ. ཏེནཱཧ ‘‘ཨེཝཾ པཝཏྟཱ སམྨུཏིཀཐཱ ནཱམཱ’’ཏིཨཱདི. ཏཏྲིདཾ སམྨུཏིཔརམཏྠཱནཾ ལཀྑཎཾ – ཡསྨིཾ བྷིནྣེ བུདྡྷིཡཱ ཝཱ ཨཝཡཝཝིནིབྦྷོགེ ཀཏེ ན ཏཾསམཉྙཱ, སཱ གྷཊཔཊཱདིཔྤབྷེདཱ སམྨུཏི, ཏབྦིཔརིཡཱཡཏོ པརམཏྠོ. ན ཧི ཀཀྑལ༹ཕུསནཱདིསབྷཱཝེ ཨཡཾ ནཡོ ལབྦྷཏི. ཏཏྠ རཱུཔཱདིདྷམྨཾ ¶ སམཱུཧསནྟཱནཝསེན པཝཏྟམཱནཾ ཨུཔཱདཱཡ ‘‘སཏྟོ’’ཏིཨཱདི ཝོཧཱརོཏི ཨཱཧ ‘‘སཏྟོ ནརོ…པེ… སམྨུཏིཀཐཱ ནཱམཱ’’ཏི ¶ . ཡསྨཱ རཱུཔཱདཡོ པརམཏྠདྷམྨཱ ‘‘ཁནྡྷཱ དྷཱཏུཡོ’’ཏིཨཱདིནཱ ཝུཙྩནྟི, ན ཝོཧཱརམཏྟཾ, ཏསྨཱ ‘‘ཁནྡྷཱ…པེ… པརམཏྠཀཐཱ ནཱམཱ’’ཏི ཝུཏྟཾ. ནནུ ཁནྡྷཀཐཱཔི སམྨུཏིཀཐཱཝ, སམྨུཏི ཧི སངྐེཏོ ཁནྡྷཊྛོ རཱསཊྛོ ཝཱ ཀོཊྛཱསཊྛོ ཝཱཏི? སཙྩམེཏཾ, ཨཡཾ པན ཁནྡྷསམཉྙཱ ཕསྶཱདཱིསུ ཏཛྫཱཔཉྙཏྟི ཝིཡ པརམཏྠསནྣིསྶཡཱ ཏསྶ ཨཱསནྣཏརཱ པུགྒལསམཉྙཱདཡོ ཝིཡ ན དཱུརེཏི པརམཏྠསངྒཧཏཱ ཝུཏྟཱ. ཁནྡྷསཱིསེན ཝཱ ཏདུཔཱདཱནཱ སབྷཱཝདྷམྨཱ ཨེཝ གཧིཏཱ. ནནུ ཙ སབྦེཔི སབྷཱཝདྷམྨཱ སམྨུཏིམུཁེནེཝ དེསནཾ ཨཱརོཧནྟི, ན སམྨུཁེནཱཏི སབྦཱཔི དེསནཱ སམྨུཏིདེསནཱཝ སིཡཱཏི? ནཡིདམེཝཾ དེསེཏབྦདྷམྨཝིབྷཱགེན དེསནཱཝིབྷཱགསྶ ཨདྷིཔྤེཏཏྟཱ, ན ཙ སདྡོ ཀེནཙི པཝཏྟིནིམིཏྟེན ཝིནཱ ཨཏྠཾ པཀཱསེཏཱིཏི. ཏེནཱཧ ‘‘པརམཏྠཾ ཀཐེནྟཱཔི སམྨུཏིཾ ཨམུཉྩིཏྭཱཝ ཀཐེནྟཱི’’ཏི. སཙྩམེཝ ཨཝིཔརཱིཏམེཝ ཀཐེནྟི.

སམྨུཏཱིཏི སམཉྙཱ. པརམོ ཨུཏྟམོ ཨཏྠོཏི པརམཏྠོ, དྷམྨཱནཾ ཡཐཱབྷཱུཏསབྷཱཝོ. ཏཾ པརམཏྠཾ, སམྨུཏི པན ལོཀསྶ སངྐེཏམཏྟསིདྡྷཱ. ཡདི ཨེཝཾ ཀཐཾ སམྨུཏིཀཐཱཡ སཙྩཏཱཏི ཨཱཧ ‘‘ལོཀསམྨུཏིཀཱརཎ’’ནྟི ལོཀསམཉྙཾ ནིསྶཱཡ པཝཏྟནཏོ. ལོཀསམཉྙཱཡ ཧི ཨབྷིནིཝེསནཾ ཝིནཱ པཉྙཱཔནཱ ཨེཀཙྩསྶ སུཏསྶ སཱཝནཱ ཝིཡ, ན མུསཱ ཨནཏིཀྐམིཏབྦཏོ ཏསྶཱ. ཏེནཱཧ བྷགཝཱ ‘‘ཛནཔདནིརུཏྟིཾ ནཱབྷིནིཝེསེཡྻ, སམཉྙཾ ནཱཏིདྷཱཝེཡྻཱ’’ཏི. དྷམྨཱནཾ སབྷཱཝདྷམྨཱནཾ. བྷཱུཏལཀྑཎཾ བྷཱཝསྶ ལཀྑཎཾ དཱིཔེནྟཱིཏི ཀཏྭཱ.

ཏེརསཙེཏནཱབྷེདནྟི ཨཊྛཀཱམཱཝཙརཀུསལཙེཏནཱཔཉྩརཱུཔཱཝཙརཀུསལཙེཏནཱབྷེདཾ. ཨཏྟནོ སནྟཱནསྶ པུནནཏོ པུཛྫབྷཝཕལསྶ ཨབྷིསངྑརཎཏོ པུཉྙཱབྷིསངྑཱརཾ. ཀམྨཔུཉྙེནཱཏི ཀམྨབྷཱུཏེན. ཝིཔཱཀཔུཉྙེནཱཏི ཝིཔཱཀསངྑཱཏེན. པུཉྙཕལམྤི ཧི ཨུཏྟརཔདལོཔེན ‘‘པུཉྙ’’ནྟི ཝུཙྩཏི ‘‘ཨེཝམིདཾ པུཉྙཾ པཝཌྜྷཏཱི’’ཏིཨཱདཱིསུ ཝིཡ. ‘‘ཨཔུཉྙཱུཔགཾ ཧོཏི ཝིཉྙཱཎ’’ནྟི ཨིདཾ ‘‘པུཉྙཱུཔགཾ ཧོཏི ཝིཉྙཱཎ’’ནྟི ཨེཏྠ ཝུཏྟནཡམེཝཱཏི ན ཨུདྡྷཏཾ. ཨཔུཉྙཕལཾ ཨུཏྟརཔདལོཔེན ‘‘ཨཔུཉྙ’’ནྟི ཝུཙྩཏི. སངྑཱརནྟི སངྑཱརསྶ གཧིཏཏྟཱ ‘‘ཨཝིཛྫཱགཏོཡ’’ནྟི ཨིམིནཱ སངྑཱརསྶ པཙྩཡོ གཧིཏོ, ‘‘པུཉྙཱུཔགཾ ཧོཏི ཝིཉྙཱཎ’’ནྟིཨཱདིནཱ པཙྩཡུཔྤནྣཾ ཝིཉྙཱཎཾ. ཏསྨིཉྩ ¶ གཧིཏེ ནཱམརཱུཔཱདི སབྦཾ གཧིཏམེཝ ཧོཏི. ཏེནཱཧ ‘‘དྭཱདསཔདིཀོ པཙྩཡཱཀཱརོ གཧིཏོཝ ཧོཏཱི’’ཏི.

ཝིཛྫཱཏི ཨརཧཏྟམགྒཉཱཎཾ ཨུཀྐཊྛནིདྡེསེན. ཏསྶཱ ཧི ཨུཔྤཱདཱ སབྦསོ ཨཝིཛྫཱ པཧཱིནཱ ¶ ཧོཏི. པཋམམེཝཱཏི ཨིདཾ ཨཝིཛྫཱཔཧཱནཝིཛྫུཔྤཱདཱནཾ སམཱནཀཱལཏཱདསྶནཾ. ཏེནཱཧ ‘‘ཡཐཱ པནཱ’’ཏིཨཱདི. པདཱིཔུཛྫལེནཱཏི པདཱིཔུཛྫལནཧེཏུནཱ སཧེཝ. ཝིཛྫུཔྤཱདཱཏི ཝིཛྫུཔྤཱདཧེཏུ, ཨེཝཾ སཏཱིཔི སམཀཱལཏྟེཏི ཨདྷིཔྤཱཡོ. ན གཎྷཱཏཱིཏི ‘‘ཨེཏཾ མམཱ’’ཏིཨཱདིནཱ ན གཎྷཱཏི. ན ཏཎྷཱཡཏི ན བྷཱཡཏི ཏཎྷཱཝུཏྟིནོ ཨབྷཱཝཱ, ཏཏོ ཨེཝ བྷཡཝཏྠུནོ ཙ ཨབྷཱཝཱ.

གིལིཏྭཱ པརིནིཊྛཱཔེཏྭཱཏི གིལིཏྭཱ ཝིཡ ཨཉྙསྶ ཨཝིསཡཾ ཝིཡ ཀརཎེན པརིནིཊྛཱཔེཏྭཱ. སཱམིསསུཁསྶ ཨནེཀདུཀྑཱནུབནྡྷབྷཱཝཏོ, སུཁཱབྷིནནྡསྶ དུཀྑཧེཏུབྷཱཝཏོ ཙ སུཁཾ ཨབྷིནནྡནྟོཡེཝ དུཀྑཾ ཨབྷིནནྡཏི ནཱམ ཨགྒིསནྟཱཔསུཁཾ ཨིཙྪནྟོ དྷཱུམདུཀྑཱནུཉྙཱཏོ ཝིཡ. དུཀྑཾ པཏྭཱ སུཁཾ པཏྠནཏོཏི ཨེཏྠ དུབྦལགཧཎིཀཱདཡོ ནིདསྶནབྷཱཝེན ཝེདིཏབྦཱ. ཏེ ཧི ཡཱཝ སཱཡནྷསམཡཱཔི ཨབྷུཏྭཱ སཱཡམཱསཱདཱིནི ཀརོནྟོ ཛིགྷཙྪཱདིཾ ཨུཔྤཱདེཏྭཱ བྷུཉྫནཱདཱིནི ཀརོནྟི. སུཁསྶ ཝིཔརིཎཱམདུཀྑཏོ སུཁཾ ཨབྷིནནྡནྟོ དུཀྑཾ ཨབྷིནནྡཏི ནཱམཱཏི ཡོཛནཱ. ཀེཙི པན དུཀྑསྶ ཨབྷཱཝཏོ ཝིཔརིཎཱམསུཁཏོ ཏཾ སུཁཾ ཨབྷིནནྡནྟོ དུཀྑཾ ཨབྷིནནྡཏཱིཏི ཝདནྟི. ཏཾ ན, ན ཧི ཏཱདིསཾ སུཁནིམིཏྟཾ ཀོཙི དུཀྑཾ ཨབྷིནནྡནྟོ དིཊྛོ, དུཀྑཧེཏུཾ པན སཱམིསཾ སུཁཾ ཨབྷིནནྡནྟོ དིཊྛོ. དུཀྑཧེཏུཾ སཱམིསཾ སུཁཾ ཨབྷིནནྡནྟོ ཨཏྠཏོ དུཀྑཾ ཨབྷིནནྡཏི ནཱམཱཏི ཝུཏྟོཝཱཡམཏྠོ. ཀཱཡོཏི པཉྩདྭཱརཀཱཡོ, སོ པརིཡནྟོ ཨཝསཱནཾ ཨེཏསྶཱཏི ཀཱཡཔརིཡནྟིཀཾ. ཏེནཱཧ ‘‘ཡཱཝ པཉྩདྭཱརཀཱཡོ པཝཏྟཏི, ཏཱཝ པཝཏྟ’’ནྟི. ཛཱིཝིཏཔརིཡནྟིཀནྟི ཨེཏྠཱཔི ཨེསེཝ ནཡོ.

པཙྪཱ ཨུཔྤཛྫིཏྭཱ པཋམཾ ནིརུཛ྄ཛྷཏཱིཏི ཨེཀསྨིཾ ཨཏྟབྷཱཝེ མནོདྭཱརིཀཝེདནཱཏོ པཙྪཱ ཨུཔྤཛྫིཏྭཱ ཏཏོ པཋམཾ ནིརུཛ྄ཛྷཏི, ཏཏོ ཨེཝ སིདྡྷམཏྠཾ སརཱུཔེནེཝ དསྶེཏུཾ ‘‘མནོདྭཱརིཀཝེདནཱ པཋམཾ ཨུཔྤཛྫིཏྭཱ པཙྪཱ ནིརུཛ྄ཛྷཏཱི’’ཏི ཝུཏྟཾ. ཨིདཱནི ཏམེཝ སངྑེཔེན ཝུཏྟཾ ཝིཝརིཏུཾ ‘‘སཱ ཧཱི’’ཏིཨཱདིམཱཧ. ཡཱཝ ཏེཏྟིཾསཝསྶཱཔི པཋམཝཡོ. པཎྞཱསཝསྶཀཱལེཏི པཋམཝཡཏོ ཡཱཝ པཉྙཱསཝསྶཀཱལཱ, ཏཱཝ ཋིཏཱ ཧོཏཱིཏི ¶ ཝུཌྜྷིཧཱནིཡོ ཨནུཔགནྟྭཱ སརཱུཔེནེཝ ཋིཏཱ ཧོཏི. མནྡཱཏི མུདུཀཱ ཨཏིཁིཎཱ. ཏདཱཏི ཨསཱིཏིནཝུཏིཝསྶཀཱལེ. ཏཐཱ ཙིརཔརིཝིཏཀྐེཔི. བྷགྒཱ ནིཏྟེཛཱ བྷགྒཝིབྷགྒཱ དུབྦལཱ. ཧདཡཀོཊིཾཡེཝཱཏི ཙཀྑཱདིཝཏྠཱུསུ ཨཝཏྟེཏྭཱ ཏེསཾ ཁཱིཎཏྟཱ ཀོཊིབྷཱུཏཾ ཧདཡཝཏྠུཾཡེཝ. ཡཱཝ ཨེསཱ ཝེདནཱ ཝཏྟཏི.

ཝཱཔིཡཱཏི མཧཱཏལཱ༹ཀེན. པཉྩཨུདཀམགྒསམྤནྣནྟི པཉྩཧི ཨུདཀསྶ པཝིསནནིཀྑམནམགྒེཧི ཡུཏྟཾ. ཏཏོ ཏཏོ ཝིསྶནྡམཱནཾ སབྦསོ པུཎྞཏྟཱ.

པཋམཾ ¶ དེཝེ ཝསྶནྟེཏིཨཱདི ཨུཔམཱསཾསནྡནཾ. ཨིམཾ ཝེདནཾ སནྡྷཱཡཱཏི ཨིམཾ ཡཐཱཝུཏྟཾ པརིཡོསཱནཔྤཏྟཾ མནོདྭཱརིཀཝེདནཾ སནྡྷཱཡ.

ཀཱཡསྶ བྷེདཱཏི ཨཏྟབྷཱཝསྶ ཝིནཱསཏོ. ‘‘ཨུདྡྷཾ ཛཱིཝིཏཔརིཡཱདཱནཱ’’ཏི པཱལི༹, ཨཊྛཀཐཱཡཾ པན ཛཱིཝིཏཔརིཡཱདཱནཱ ཨུདྡྷནྟི པདུདྡྷཱརོ ཀཏོ. པརལོཀཝསེན ཨགནྟྭཱ. ཝེདནཱནཾ སཱིཏིབྷཱཝོ ནཱམ སངྑཱརདརཐཔརིལཱ༹ཧབྷཱཝོ, སོ པནཱཡཾ ཨཔྤཝཏྟིཝསེནཱཏི ཨཱཧ ‘‘པཝཏྟི…པེ… བྷཝིསྶནྟཱི’’ཏི. དྷཱཏུསརཱིརཱནཱིཏི ཨཊྛིཀངྐལསངྑཱཏདྷཱཏུསརཱིརཱནི. སརཱིརེཀདེསེ ཧི སརཱིརསམཉྙཱ.

ཀུམྦྷཀཱརཔཱཀཱཏི ཀུམྦྷཀཱརཔཱཀཏོ. ཨེཏྠ པཙྩཏཱིཏི པཱཀོ, པཙནཊྛཱནཾ. ཏདེཝ པཱཙནཝསེན ཨཱཝསནྟི ཨེཏྠཱཏི ཨཱཝཱསོ, ཏསྨཱ ཀུམྦྷཀཱརཱཝཱསཏོ. ཨཝིགཏཝཱུཔསམཾ སངྑརིཏཾ ཀུམྦྷཾ ཨུདྡྷརིཏྭཱ ཋཔེནྟོ ཚཱརིཀཱཡ སཏི པིདྷཱནཝསེན ཋཔེཏི. ཏཐཱ ཋཔནཾ པན སནྡྷཱཡ ཝུཏྟཾ ‘‘པཊིསིསྶེཡྻཱ’’ཏི. ཀུམྦྷསྶ པདེསབྷཱུཏཏཱཡ ཨཱབདྡྷཱ ཨཝཡཝཱ ‘‘ཀུམྦྷཀཔཱལཱནཱི’’ཏི ཨདྷིཔྤེཏཱནི, ན ཚིནྣབྷིནྣཱནི. ཨཝཡཝམུཁེན ཧི སམུདཱཡོ ཝུཏྟོ. ཏཏྠ ཀཔཱལསམུདཱཡོ ཧི གྷཊོ. ཏེནཱཧ ‘‘མུཁཝཊྚིཡཱ ཨེཀབདྡྷཱནཱི’’ཏི. ཨཝསིསྶེཡྻུནྟི ཝཎྞཝིསེསཨུཎྷབྷཱཝཱཔགཏཱ གྷཊཀཱརཱནེཝ ཏིཊྛེཡྻུནྟི. ཨཱདིཏྟ…པེ… ཏཡོ བྷཝཱ དཊྛབྦཱ ཨེཀཱདསཧི ཨགྒཱིཧི ཨཱདིཏྟབྷཱཝཏོ. ཡཐཱ ཀུམྦྷཀཱརོ ཀུམྦྷཀཱརཱཝཱསཾ ཨཱདིཏྟཾ པཙྩཝེཀྑཏི, ཨེཝཾ ཨཱརདྡྷཝིཔསྶཀོཔེས བྷཝཏྟཡཾ རཱགཱདཱིཧི ཨཱདིཏྟནྟི ཨཱཧ ‘‘ཀུམྦྷཀཱརོ ཝིཡ ཡོགཱཝཙརོ’’ཏི. ནཱིཧརཎདཎྜཀོ ¶ ཝིཡ ཨརཧཏྟམགྒཉཱཎཾ བྷཝཏྟཡཔཱཀཏོ ནཱིཧརཎཏོ. སམོ བྷཱུམིབྷཱགོ ཝིཡ ནིབྦཱནཏལཾ སབྦཝིསམཱ ནིཝཏྟནཏོ.

‘‘ཨཱདཱནནིཀྑེཔནཏོ, ཝཡོཝུདྡྷཏྠངྒམཏོ, ཨཱཧཱརམཡཏོ, ཨུཏུམཡཏོ, ཙིཏྟསམུཊྛཱནཏོ, ཀམྨཛཏོ, དྷམྨཏཱརཱུཔཏོ’’ཏི (ཝིསུདྡྷི. ༢.༧༠༦) ཨིམེཧི སཏྟཧི ཨཱཀཱརེཧི སམྨསནྟོ རཱུཔསཏྟཀཾ ཝིཔསྶཏི ནཱམ. ‘‘ཀལཱཔཏོ, ཡམཀཏོ, ཁཎིཀཏོ, པཊིཔཱཊིཏོ, དིཊྛིཨུགྒྷཱཊནཏོ, མཱནསམུགྒྷཱཊཏོ, ནིཀནྟིཔརིཡཱདཱནཏོ’’ཏི (ཝིསུདྡྷི. ༢.༧༡༧) ཨིམེཧི སཏྟཧི ཨཱཀཱརེཧི སམྨསནྟོ ཨརཱུཔསཏྟཀཾ ཝིཔསྶཏི ནཱམ, ཏསྨཱ ཡཐཱཝུཏྟཾ ཨིམཾ རཱུཔསཏྟཀཾ ཨརཱུཔསཏྟཀཉྩ ནཱིཧརིཏྭཱ ཝིཔསྶནྟསྶ. ཡདིཔི ཨརཧཏོ ཨཏྟབྷཱཝོ སབྦབྷཝེཧིཔི ཨུདྡྷཊོ, ཡཱཝ པན ཨནུཔཱདིསེསཔརིནིབྦཱནཾ ན པཱཔུཎཱཏི, ཏཱཝ ཏསྨིམྤི སུགཏིབྷཝེ ཋིཏོཡེཝཱཏི ཝཏྟབྦཏཾ ལབྦྷཏཱིཏི ‘‘ཙཏཱུཧི ཨཔཱཡེཧི ཨཏྟབྷཱཝཾ ཨུདྡྷརིཏྭཱ’’ཨིཙྩེཝ ཝུཏྟཾ. ཏེནཱཧ ‘‘ཁཱིཎཱསཝོ པནཱ’’ཏིཨཱདི. ཏཐཱ ཙ ཝཀྑཏི ‘‘ཨནུཔཱདིསེསཱཡ ནིབྦཱནདྷཱཏུཡཱ པརིནིབྦུཏསྶ ཝཊྚཝཱུཔསམོ ¶ ཝེདིཏབྦོ’’ཏི. ན པརིནིབྦཱཏི ཨནུཔཱདིསེསཱཡ ནིབྦཱནདྷཱཏུཡཱཏི ཨདྷིཔྤཱཡོ, སཨུཔཱདིསེསཱཡ པན ནིབྦཱནདྷཱཏུཡཱ པརིནིབྦཱནཾ ཨརཧཏྟཔྤཏྟིཡེཝ. ཨབྷིསངྑཱརཧེཏུཏོ ཧེཏྠ པརིལཱ༹ཧཝཱུཔསམསྶ ཨུཔསམབྷཱཝེན ཨདྷིཔྤེཏཏྟཱ ཨུཎྷཀུམྦྷནིབྦཱནནིདསྶནམྤི ན ཝིརུཛ྄ཛྷཏི. ཨནུཔཱདིནྣཀསརཱིརཱནཱིཏི ཨུཏུསམུཊྛཱནིཀརཱུཔཀལཱཔེ ཝདནྟི. བྷིཀྑཝེཏི ཨེཏྠ ཨིཏི-སདྡོ ཨཱདིཨཏྠོ. ཨིདཾ པན ཝཙནཾ. ཨནུཡོགཱརོཔནཏྠནྟི ཀཱཡཔརིཡནྟིཀཾ ཝེདནཾ ཝེདཡམཱནོ ཁཱིཎཱསཝོ ཨཔི ནུ པུཉྙཱབྷིསངྑཱརཱདིཀམྨཾ ཀརེཡྻཱཏི པཉྷཾ ཀཱཏུཾ. ཨཐ ཝཱ ཨནུཡོགཱརོཔནཏྠནྟི ‘‘ཨཔི ནུ ཁོ ཁཱིཎཱསཝོ བྷིཀྑུ པུཉྙཱབྷིསངྑཱརཾ ཝཱ ཨབྷིསངྑརེཡྻཱ’’ཏིཨཱདིནཱ ཨནུཡོགཾ ཨཱརོཔེཏུཾ ཝུཏྟཾ, ན ཏཱཝ ཡཐཱརདྡྷདེསནཾ ནིཊྛཱཔེཏུནྟི ཨཏྠོ.

པཊིསནྡྷིཝིཉྙཱཎེ སིདྡྷེ ཏསྨིཾ བྷཝེ ཨུཔྤཛྫནཱརཧཱནཾ ཝིཉྙཱཎཱནཾ སིཡཱ སམྦྷཝོ, ནཱསཏཱིཏི ཝུཏྟཾ ‘‘ཝིཉྙཱཎཾ པཉྙཱཡེཐཱཏི པཊིསནྡྷིཝིཉྙཱཎཾ པཉྙཱཡེཐཱ’’ཏི. སབྦསོ སངྑཱརེསུ ཨསནྟེསུ པཊིསནྡྷིཝིཉྙཱཎཾ ཨཔི ནུ ཁོ པཉྙཱཡེཡྻ. ཏསྨིཉྷི ཨཔཉྙཱཡམཱནེ སབྦཾ ཝིཉྙཱཎཾ ན པཉྙཱཡེཡྻ. ཐེརཱནནྟི ‘‘བྷིཀྑཝེ’’ཏི ཨཱལཔིཏཏྠེརཱནཾ ¶ . པཉྷབྱཱཀརཎཾ སམྤཧཾསཏི ཏསྶ སབྦཉྙུཏཉྙཱཎེན སཾསནྡནཏོ. ཨཔྤཉྙཱཎནྟི ཨཔྤཉྙཱཡནཾ. ཨཱདི-སདྡེན ཝིཉྙཱཎེ ཨསཏི ནཱམརཱུཔསྶ ཨཔྤཉྙཱཎནྟི ཨེཝམཱདིཾ སངྒཎྷཱཏི. སནྣིཊྛཱནསངྑཱཏནྟི སདྡཧནཱཀཱརེན པཝཏྟསནྣིཊྛཱནསངྑཱཏཾ. ཨདྷིམོཀྑནྟི ནིཙྪཡཱཀཱརཝིམོཀྑཾ སདྡྷཱཝིམོཀྑཉྩ. ཏེནཱཧ པཱལི༹ཡཾ ‘‘སདྡཧཐ མེཏཾ, བྷིཀྑཝེ’’ཏི. སདྡྷཱསཧིཏཉྷི ནིཙྪཡཱཀཱརཝིམོཀྑཾ སནྡྷཱཡཱཧ ‘‘སནྣིཊྛཱནསངྑཱཏཾ ཨདྷིམོཀྑ’’ནྟི. ཨནྟོཏི པརིཡནྟོ. པརིཏོ ཚིཛྫཏི ཨེཏྠཱཏི པརིཙྪེདོ.

པརིཝཱིམཾསནསུཏྟཝཎྞནཱ ནིཊྛིཏཱ.

༢. ཨུཔཱདཱནསུཏྟཝཎྞནཱ

༥༢. ཨཱརམྨཎཱདིབྷཱཝེན སཾཝཏྟནཏོ ཨུཔཱདཱནཱནཾ ཧིཏཱནི ཨུཔཱདཱནིཡཱནི, ཏེསུ ཨུཔཱདཱནིཡེསུ. ཏེནཱཧ ‘‘ཙཏུནྣཾ ཨུཔཱདཱནཱནཾ པཙྩཡེསཱུ’’ཏི. ཨསྶཱདཾ ཨནུཔསྶནྟསྶཱཏི ཨསཱདེཏབྦཾ མིཙྪཱཉཱཎེན ཨནུཔསྶཏོ. ཏདཱཧཱརོཏི སོལ༹ས ཝཱ ཝཱིསཾ ཏིཾསཾ ཙཏྟཱལཱིསཾ པཉྙཱསཾ ཝཱ ཨཱཧཱརོ པཙྩཡོ ཨེཏསྶཱཏི ཏདཱཧཱརོ. ཨགྒིཀྑནྡྷོ ཝིཡ ཏཡོ བྷཝཱ ཨེཀཱདསཧི ཨགྒཱིཧི ཨཱདིཏྟབྷཱཝཏོ ཨེཏདེཝ བྷཝཏྟཡཾ. ཨགྒི…པེ… པུཐུཛྫནོ ཨགྒིཀྑནྡྷསདིསསྶ བྷཝཏྟཡསྶ པརིབནྡྷནཏོ.

ཀམྨཊྛཱནསྶཱཏི ¶ ཝིཔསྶནཱཀམྨཊྛཱནསྶ. ཏེནཱཧ ‘‘ཏེབྷཱུམཀདྷམྨེསཱུ’’ཏི. དྷམྨཔཱསཱདནྟི ལོཀུཏྟརདྷམྨཔཱསཱདཾ. སོ ཧི ཨཙྩུགྒཏཊྛེན ‘‘པཱསཱདོ’’ཏི ཝུཙྩཏི. སཏིཔཊྛཱནམཧཱཝཱིཐིཡཾ ཕལཀྑཎེ པཝཏྟཱཡཱཏི.

ཨུཔཱདཱནསུཏྟཝཎྞནཱ ནིཊྛིཏཱ.

༣-༤. སཾཡོཛནསུཏྟདྭཡཝཎྞནཱ

༥༣-༥༤. མཧནྟཝཊྚཔྤབནྡྷཨོཔམྨབྷཱཝེན ཏེལཔདཱིཔསྶ ཨཱཧཏཏྟཱ ‘‘མཧནྟཉྩ ཝཊྚིཀཔཱལཾ གཧེཏྭཱ’’ཏི ཝུཏྟཾ. པུརིམནཡེནེཝཱཏི པུརིམསྨིཾ ཨུཔཱདཱནིཡསུཏྟེ ¶ ཝུཏྟནཡེནེཝ. ཏཐཱ ཝིནེཏབྦཱནཾ པུགྒལཱནཾ ཨཛ྄ཛྷཱསཡཝསེན ཧི ཨིམེསཾ སུཏྟཱནཾ ཨེཝཾ ཝཙནཾ ཨེཝཾ དེསནཱ. ཨེས ནཡོ ཨིཏོ པརེསུཔི.

སཾཡོཛནསུཏྟདྭཡཝཎྞནཱ ནིཊྛིཏཱ.

༥-༦. མཧཱརུཀྑསུཏྟདྭཡཝཎྞནཱ

༥༥-༥༦. ཨོཛཾ ཨབྷིཧརནྟཱིཏི རསཧརཎིཡོ ཝིཡ པུརིསསྶ སརཱིརེ རུཀྑམཱུལཱནི རུཀྑསྶ པཐཝཱིཨཱཔོརསེ ཨུཔརི ཨཱརོཔེནྟི. ཏེསཾ ཏཐཱ ཨཱརོཔནཾ ‘‘ཨོཛཱཡཱ’’ཏིཨཱདིནཱ ཝིབྷཱཝེཏི. ཧཏྠསཏུབྦེདྷམསྶཱཏི ཧཏྠསཏུབྦེདྷོ, ཧཏྠསཏཾ ཨུབྦིདྡྷསྶཔི. ཨེཏྠཱཏི ཨེཏིསྶཾ ཝཊྚཀཐཱཡཾ. ཀམྨཱརོཧནནྟི ཀམྨཔཙྩཡོ.

པུན ཨེཏྠཱཏི ཨེཏིསྶཾ ཝིཝཊྚཀཐཱཡཾ. ཝཊྚདུཀྑཾ ནཱསེཏུཀཱམསྶ དལ༹ྷཾ ཨུཔྤནྣསཾཝེགཉཱཎཾ སནྡྷཱཡ ‘‘ཀུདྡཱལོ ཝིཡཱ’’ཏི ཨཱཧ. ཏཏོ ནིབྦཏྟིཏཉཱཎཾ སམཱདྷིཔཙྪིཡཱ ཋིཏཾ ནིསྶཱཡ པཝཏྟེཏབྦཝིཔསྶནཱརམྦྷཉཱཎཾ. རུཀྑཙྪེདནཕརསུ ཝིཡཱཏི ཨེཝཾབྷཱུཏསྶ ཝིཔསྶནཱ ཨེཀནྟཏོ ཝཊྚཙྪེདཱཡ ཧོཏིཡེཝཱཏི ཨཱཧ ‘‘རུཀྑསྶ…པེ… མནསིཀརོནྟསྶ པཉྙཱ’’ཏི. ཏཏྠ ཀམྨཊྛཱནནྟི ཝིཔསྶནཱཀམྨཊྛཱནཾ. ཏཾ ཙཏུབྦིདྷཝཝཏྠཱནཝསེན ཝཱིསཏི པཐཝཱིཀོཊྛཱསཱ, དྭཱདས ཨཱཔོཀོཊྛཱསཱ, ཙཏྟཱརོ ཏེཛོཀོཊྛཱསཱ, ཚ ཝཱཡོཀོཊྛཱསཱཏི དྭེཙཏྟཱལཱིསཱཡ ཀོཊྛཱསེསུ. ཝིཉྙཱཎསྶ ཙཱཏི ཨིཏི-སདྡོ ཨཱདིཨཏྠོ པཀཱརཏྠོ ཙ. ཏེན བྷཱུཏརཱུཔཱནི ཝིཉྙཱཎསམྤཡུཏྟདྷམྨེ ཙ སངྒཎྷཱཏི. སཏྟསུ སཔྤཱཡེསུ ཡསྶ ཨལབྷནྟསྶ ཀམྨཊྛཱནཾ ཝིབྷཱུཏཾ ཧུཏྭཱ ན ཨུཔཊྛཱཏི, ཏཾ སནྡྷཱཡཱཧ ‘‘ཨཉྙཏརཾ སཔྤཱཡ’’ནྟི. སེསཾ སུཝིཉྙེཡྻམེཝ.

མཧཱརུཀྑསུཏྟདྭཡཝཎྞནཱ ནིཊྛིཏཱ.

༧. ཏརུཎརུཀྑསུཏྟཝཎྞནཱ

༥༧-༥༩. པལིམཛྫེཡྻཱཏི ¶ ¶ ཨལླཀརཎཝསེན པརིཏོ པཱལི༹ཾ བནྡྷེཡྻ. ཏཐཱ ཀརོནྟོ ཡསྨཱ ཙ ཏཏྠ ཏིཎགཙྪཱདཱིནཾ མཱུལསནྟཱནགྒཧཎེན ཏཾ ཋཱནཾ སོདྷེཏི ནཱམ, ཏསྨཱ ཝུཏྟཾ ‘‘སོདྷེཡྻཱ’’ཏི. པཾསུནྟི ཨསྶ པཝཌྜྷཀཱརཀཾ, ཨཱགནྟུཀཾ པཾསུནྟི ཨཏྠོ. དདེཡྻཱཏི པཀྑིཔེཡྻ. ཏེནཱཧ ‘‘ཐདྡྷ’’ནྟིཨཱདི. ཝུཏྟནཡེནེཝཱཏི ‘‘རུཀྑཾ ནཱསེཏུཀཱམོ པུརིསོ ཝིཡཱ’’ཏིཨཱདིནཱ པཉྩམསུཏྟེ ཝུཏྟནཡེན. ཨཊྛམནཝམཱནི ཨུཏྟཱནཏྠཱནེཝ ཝུཏྟནཡཏྟཱ.

ཏརུཎརུཀྑསུཏྟཝཎྞནཱ ནིཊྛིཏཱ.

༡༠. ནིདཱནསུཏྟཝཎྞནཱ

༦༠. བཧུཝཙནཝསེནཱཏི ཀུརཱུ ནཱམ ཛཱནཔདིནོ རཱཛཀུམཱརཱ, ཏེསཾ ནིཝཱསོ ཨེཀོཔི ཛནཔདོ རུལ༹ྷཱིཝསེན ‘‘ཀུརཱུ’’ཏི ཨེཝཾ བཧུཝཙནཝསེན. ཡཏྠ བྷགཝཏོ ཝསནོཀཱསབྷཱུཏོ ཀོཙི ཝིཧཱརོ ན ཧོཏི, ཏཏྠ ཀེཝལཾ གོཙརགཱམཀིཏྟནཾ ནིདཱནཀཐཱཡ པཀཏི ཡཐཱ ‘‘སཀྐེསུ ཝིཧརཏི དེཝདཧཾ ནཱམ སཀྱཱནཾ ནིགམོ’’ཏི. ‘‘ཨཱཡསྨཱ’’ཏི ཝཱ ‘‘དེཝཱནཾ པིཡོ’’ཏི ཝཱ བྷཝནྟི ཝཱ པིཡསམུདཱཧཱརོ ཨེསོཏི ཨཱཧ ‘‘ཨཱཡསྨཱཏི པིཡཝཙནམེཏ’’ནྟི. ཏཡིདཾ པིཡཝཙནཾ གཱརཝཝསེན ཝུཙྩཏཱིཏི ཨཱཧ ‘‘གརུཝཙནམེཏ’’ནྟི. ཨཏིདཱུརཾ ཨཙྩཱསནྣཾ ཨཏིསམྨུཁཱ ཨཏིཔཙྪཏོ ཨུཔརིཝཱཏོ ཨུནྣཏཔྤདེསོཏི ཨིམེ ཚ ནིསཛྫདོསཱ. ནཱིལཔཱིཏལོཧིཏོདཱཏམཉྫིཊྛཔབྷསྶརཝསེན ཚབྦཎྞཱནཾ.

ཀུལསངྒཧཏྠཱཡཱཏི ཀུལཱནུདྡཡཏཱཝསེན ཀུལཱནུགྒཎྷནཏྠཱཡ. སཧསྶབྷཎྜིཀཾ ནིཀྑིཔནྟོ ཝིཡ བྷིཀྑཱཔཊིགྒཎྷནེན ཏེསཾ ཨབྷིཝཱདནཱདིསམྤཊིཙྪནེན ཙ པུཉྙཱབྷིསནྡསྶ ཛནནེན. པཊིསམྨཛྫིཏྭཱཏི ཨནྟེཝཱསིཀེཧི སམྨཊྛཊྛཱནཾ སཀྐཙྩཀཱརིཏཱཡ པུན སམྨཛྫིཏྭཱ. ཨུབྷཡནྟཏོ པཊྛཱཡ མཛ྄ཛྷནྟི ཨཱདིཏོ པཊྛཱཡ ཝེདནཾ, ཛརཱམརཎཏོ པཊྛཱཡ ཙ ཝེདནཾ པཱཔེཏྭཱ སམྨསནམཱཧ. ཏིཀྑཏྟུནྟི ‘‘ཨཱདིཏོ པཊྛཱཡ ཨནྟ’’ནྟིཨཱདིནཱ ¶ ཝུཏྟཙཏུརཱཀཱརུཔསཾཧིཏེ ཏཡོ ཝཱརེ. ཏེན དྭཱདསཀྑཏྟུཾ སམྨསནམཱཧ. ཨམྷཱཀཾ བྷགཝཏཱ གམྦྷཱིརབྷཱཝེནེཝ ཀཐིཏཏྟཱ སེསབུདྡྷེཧིཔི ཨེཝམེཝ ཀཐིཏོཏི དྷམྨནྭཡེ ཋཏྭཱ ཝུཏྟཾ ‘‘སབྦབུདྡྷེཧི…པེ… ཀཐིཏོ’’ཏི.

པམཱཎཱཏིཀྐམེཏི ཨཔརིམཱཎཏྠེ ‘‘ཡཱཝཉྩིདཾ ཏེན བྷགཝཏཱ’’ཏིཨཱདཱིསུ (དཱི. ནི. ༡.༣) ཝིཡ. ཨཏིརེཀབྷཱཝཛོཏནོ ཧི ཡཾ ཡཱཝ-སདྡོ. ཏེནཱཧ ‘‘ཨཏིགམྦྷཱིརོཏི ཨཏྠོ’’ཏི. ཨཝབྷཱསཏི ¶ ཁཱཡཏི ཨུཔཊྛཱཏི ཉཱཎསྶ. ཏཐཱ ཨུཔཊྛཱནཉྷི སནྡྷཱཡ ‘‘དིསྶཏཱི’’ཏི ཝུཏྟཾ. ནནུ ཨེས པཊིཙྩསམུཔྤཱདོ ཨེཀནྟགམྦྷཱིརོཝ, ཨཐ ཀསྨཱ གམྦྷཱིརཱཝབྷཱསཏཱ ཛོཏིཏཱཏི? སཙྩམེཏཾ, ཨེཀནྟགམྦྷཱིརཏཱདསྶནཏྠམེཝ པནསྶ གམྦྷཱིརཱཝབྷཱསགྒཧཎཾ, ཏསྨཱ ཨཉྙཏྠ ལབྦྷམཱནཾ ཙཱཏུཀོཊིཀཾ བྱཏིརེཀམུཁེན ནིདསྶེཏྭཱ ཏམེཝསྶ ཨེཀནྟགམྦྷཱིརཏཾ ཝིབྷཱཝེཏུཾ ‘‘ཨེཀཾ ཧཱི’’ཏིཨཱདི ཝུཏྟཾ. ཨེཏཾ ནཏྠཱིཏི ཨགམྦྷཱིརོ ཨགམྦྷཱིརཱཝབྷཱསོ ཙཱཏི ཨེཏཾ དྭཡཾ ནཏྠི. ཏེན ཡཐཱདསྶིཏེ ཙཱཏུཀོཊིཀེ པཙྪིམཱ ཨེཀཀོཊི ལབྦྷཏཱིཏི དསྶེཏི. ཏེནཱཧ ‘‘ཨཡཾ ཧཱི’’ཏིཨཱདི.

ཡེཧི གམྦྷཱིརབྷཱཝེཧི པཊིཙྩསམུཔྤཱདོ ‘‘གམྦྷཱིརོ’’ཏི ཝུཙྩཏི, ཏེ ཙཏཱུཧི ཨུཔམཱཧི ཨུལླིངྒེནྟོ ‘‘བྷཝགྒགྒཧཎཱཡཱ’’ཏིཨཱདིམཱཧ. ཡཐཱ བྷཝགྒགྒཧཎཏྠཾ ཧཏྠཾ པསཱརེཏྭཱ གཧེཏུཾ ན སཀྐཱ དཱུརབྷཱཝཏོ, ཨེཝཾ སངྑཱརཱདཱིནཾ ཨཝིཛྫཱདིཔཙྩཡསམྦྷཱུཏསམུདཱགཏཏྠོ པཀཏིཉཱཎེན གཧེཏུཾ ན སཀྐཱ. ཡཐཱ སིནེརུཾ བྷིནྡིཏྭཱ མིཉྫཾ པབྦཏརསཾ པཱཀཏིཀཔུརིསེན ནཱིཧརིཏུཾ ན སཀྐཱ, ཨེཝཾ པཊིཙྩསམུཔྤཱདགཏེ དྷམྨཏྠཱདིཀེ པཀཏིཉཱཎེན བྷིནྡིཏྭཱ ཝིབྷཛྫ པཊིཝིཛ྄ཛྷནཝསེན ཛཱནིཏུཾ ན སཀྐཱ. ཡཐཱ མཧཱསམུདྡཾ པཀཏིཔུརིསསྶ བཱཧུདྭཡཝསེན པཱརཾ ཏརིཏུཾ ན སཀྐཱ. ཨེཝཾ ཝེཔུལླཊྛེན མཧཱསམུདྡསདིསཾ པཊིཙྩསམུཔྤཱདཾ པཀཏིཉཱཎེན དེསནཱཝསེན པརིཧརིཏུཾ ན སཀྐཱ. ཡཐཱ པཐཝིཾ པརིཝཏྟེཏྭཱ པཱཀཏིཀཔུརིསསྶ པཐཝོཛཾ གཧེཏུཾ ན སཀྐཱ, ཨེཝཾ ཨིཏྠཾ ཨཝིཛྫཱདཡོ སངྑཱརཱདཱིནཾ པཙྩཡཱ ཧོནྟཱིཏི ཏེསཾ པཊིཙྩསམུཔྤཱདསབྷཱཝོ པཱཀཏིཀཉཱཎེན ནཱིཧརིཏྭཱ གཧེཏུཾ ན སཀྐོཏི, ཨེཝཾ ཙཏུབྦིདྷགམྦྷཱིརཏཱཝསེན ཙཏསྶོ ཨུཔམཱ ཡོཛེཏབྦཱ. པཱཀཏིཀཉཱཎཝསེན ཙཱཡམཏྠཡོཛནཱ ཀཏཱ དིཊྛསཙྩཱནཾ ཏཏྠ པཊིཝེདྷསབྦྷཱཝཏོ, ཏཐཱཔི ཡསྨཱ སཱཝཀཱནཾ པཙྩེཀབུདྡྷཱནཉྩ ཏཏྠ སཔྤདེསམེཝ ¶ ཉཱཎཾ, བུདྡྷཱནཾཡེཝ ནིཔྤདེསཾ. ཏསྨཱ ཝུཏྟཾ ‘‘བུདྡྷཝིསཡཾ པཉྷ’’ནྟི.

མཱཏི པཊིསེདྷེ ནིཔཱཏོ. སྭཱཡཾ ‘‘ཨུཏྟཱནཀུཏྟཱནཀོ ཝིཡ ཁཱཡཏཱི’’ཏི ཝཙནཾ སནྡྷཱཡ ཝུཏྟོཏི ཨཱཧ ‘‘མཱ བྷཎཱིཏི ཨཏྠོ’’ཏི. ཨུསྶཱདེནྟོཏི པཉྙཱཝསེན ཨུཀྐཾསནྟོཏི ཨཏྠོ. ཨཔསཱདེནྟོཏི ནིབྦྷཙྪནྟོ, ནིགྒཎྷནྟོཏི ཨཏྠོ. ཏེནཱཏི མཧཱཔཉྙབྷཱཝེན.

ཏཏྠཱཏི ཐེརསྶ སཏིཔི ཨུཏྟཱནབྷཱཝེ པཊིཙྩསམུཔྤཱདསྶ ཨཉྙེསཾ གམྦྷཱིརབྷཱཝེ. སུབྷོཛནརསཔུཊྛསྶཱཏི སུནྡརེན བྷོཛནརསེན པོསིཏསྶ. ཀཏཡོགསྶཱཏི ནིབྦུདྡྷཔཡོགེ ཀཏཔརིཙཡསྶ. མལླཔཱསཱཎནྟི མལླེཧི མཧཱབལེཧེཝ ཁིཔིཏབྦཔཱསཱཎཾ. ཀུཧིཾ ཨིམསྶ བྷཱརིཡཊྛཱནནྟི ཀསྨིཾ པསྶེ ཨིམསྶ པཱསཱཎསྶ གརུཏརཔདེསོཏི ཏསྶ སལླཧུཀབྷཱཝཾ དཱིཔེནྟོ ཝདཏི.

ཏིམིརཔིངྒལེནེཝ ¶ དཱིཔེནྟི ཏསྶ མཧཱཝིཔྥཱརབྷཱཝཏོ. ཏེནཱཧ ‘‘ཏསྶ ཀིརཱ’’ཏིཨཱདི. པཀྐུཐཏཱིཏི པཀྐུཐནྟཾ ཝིཡ པརིཝཏྟཏི པརིཏོ ཝཏྟཏི. ལཀྑཎཝཙནཉྷེཏཾ. པིཊྛིཡཾ སཀལིཀཨཊྛིཀཱ པིཊྛིཔཏྟཾ. ཀཱཡཱུཔཔནྣསྶཱཏི མཧཏཱ ཀཱཡེན ཨུཔེཏསྶ, མཧཱཀཱཡསྶཱཏི ཨཏྠོ. པིཉྪ ཝཊྚཱིཏི པིཉྪ ཀལཱཔོ. སུཔཎྞཝཱཏནྟི ནཱགགྒཧཎཱདཱིསུ པཀྑཔཔྥོཊནཝསེན ཨུཔྤཛྫནཀཝཱཏཾ.

‘‘པུབྦཱུཔནིསྶཡསམྤཏྟིཡཱ’’ཏིཨཱདིནཱ ཨུདྡིཊྛཀཱརཎཱནི ཝིཏྠཱརཏོ ཝིཝརིཏུཾ ‘‘ཨིཏོ ཀིརཱ’’ཏིཨཱདི ཝུཏྟཾ. ཏཏྠ ཨིཏོཏི ཨིཏོ བྷདྡཀཔྤཏོ. སཏསཧསྶིམེཏི སཏསཧསྶམེ. ཧཾསཝཏཱི ནཱམ ནགརཾ ཨཧོསི ཛཱཏནགརཾ. དྷུརཔཏྟཱནཱིཏི བཱཧིརཔཏྟཱནི, ཡཱནི དཱིགྷཏམཱནི.

ཀནིཊྛབྷཱཏཱཏི ཝེམཱཏིཀབྷཱཏཱ ཀནིཊྛོ ཡཐཱ ཨམྷཱཀཾ བྷགཝཏོ ནནྡཏྠེརོ. བུདྡྷཱནཉྷི སཧོདརཱ བྷཱཏརོ ནཱམ ན ཧོནྟི. ཏཏྠ ཛེཊྛཱ ཏཱཝ ནུཔྤཛྫནྟི, ཀནིཊྛཱནཾ པན ཨསམྦྷཝོ ཨེཝ. བྷོགནྟི ཝིབྷཝཾ. ཨུཔསནྟོཏི ཙོརཛནིཏསངྑོབྷཝཱུཔསམེན ཨུཔསནྟོ ཛནཔདོ.

དྭེ ¶ སཱཊཀེ ནིཝཱསེཏྭཱཏི སཱཊཀདྭཡམེཝ ཨཏྟནོ ཀཱཡཔརིཧཱརིཡཾ ཀཏྭཱ, ཨིཏརཾ སབྦསམྦྷཱརཾ ཨཏྟནཱ མོཙེཏྭཱ.

པཏྟགྒཧཎཏྠནྟི ཨནྟོཔཀྑིཏྟཨུཎྷབྷོཛནཏྟཱ པཏྟསྶ ཨཔརཱཔརཾ ཧཏྠེ པརིཝཏྟེནྟསྶ སུཁེན པཏྟགྒཧཎཏྠཾ. ཨུཏྟརིསཱཊཀནྟི ཨཏྟནོ ཨུཏྟརིཡཾ སཱཊཀཾ. ཨེཏཱནི པཱཀཊཊྛཱནཱནཱིཏི ཨེཏཱནི ཡཐཱཝུཏྟཱནི བྷགཝཏོ དེསནཱཡ པཱཀཊཱནི བུདྡྷེ བུདྡྷསཱཝཀེ ཙ ཨུདྡིསྶ ཐེརསྶ པུཉྙཀརཎཊྛཱནཱནི, པཙྩེཀབུདྡྷཾ པན བོདྷིསཏྟཉྩ ཨུདྡིསྶ ཐེརསྶ པུཉྙཀརཎཊྛཱནཱནི བཧཱུནིཡེཝ.

པཊིསནྡྷིཾ གཧེཏྭཱཏི ཨམྷཱཀཾ བོདྷིསཏྟསྶ པཊིསནྡྷིགྒཧཎདིཝསེཡེཝ པཊིསནྡྷིཾ གཧེཏྭཱ.

ཨུགྒཧནཾ པཱལི༹ཡཱ ཨུགྒཎྷནཾ, སཝནཾ ཨཏྠསཝནཾ, པརིཔུཙྪནཾ གཎྛིཊྛཱནེསུ ཨཏྠཔརིཔུཙྪནཾ, དྷཱརཎཾ པཱལི༹ཡཱ པཱལི༹ཨཏྠསྶ ཙ ཙིཏྟེ ཋཔནཾ. སབྦཉྩེཏཾ ཨིདྷ པཊིཙྩསམུཔྤཱདཝསེན ཝེདིཏབྦཾ, སབྦསྶཔི བུདྡྷཝཙནསྶ ཝསེནཱཏིཔི ཝཊྚཏི. སོཏཱཔནྣཱནཉྩ…པེ… ཨུཔཊྛཱཏི ཏཏྠ སམྨོཧཝིགམེན ‘‘ཡཾ ཀིཉྩི སམུདཡདྷམྨཾ, སབྦཾ ཏཾ ནིརོདྷདྷམྨ’’ནྟི ཨཏྟཔཙྩཀྑཝསེན ཨུཔཊྛཱནཏོ ¶ . ནཱམརཱུཔཔརིཙྪེདོཏི སཧ པཙྩཡེན ནཱམརཱུཔསྶ པརིཙྪིཛྫ ཨཝབོདྷོ. ཙཏཱུཧཱིཏི དྷམྨགམྦྷཱིརཱདཱིཧི ཙཏཱུཧི གམྦྷཱིརཏཱཧི སབྦཱཔི གམྦྷཱིརཏཱ.

སཱཝཀེཧི དེསིཏཱ དེསནཱཔི པན སཏྠུ ཨེཝ དེསནཱཏི ཨཱཧ ‘‘མཡཱ དིནྣནཡེ ཋཏྭཱ’’ཏི. ‘‘སེཀྑེན ནཱམ ནིབྦཱནཾ སབྦཱཀཱརེན པཊིཝིདྡྷཾ ན ཧོཏཱི’’ཏི ན ཏསྶ གམྦྷཱིརཏཱཏི ཏསྶ གམྦྷཱིརསྶ ཨུཔཱདཱནསྶ གམྦྷཱིརཏཱ ཝིཡ སུཊྛུ དིཊྛཱ ནཱམ ཧོཏི. ཏསྨཱ ཨཱཧ ‘‘ཨིདཾ ནིབྦཱནམེཝ གམྦྷཱིརཾ, པཙྩཡཱཀཱརོ པན ཨུཏྟཱནཀོ ཛཱཏོ’’ཏི. ནིབྦཱནཉྷི སབྦེཔི ཨསེཀྑཱ སབྦསོ པཊིཝིཛ྄ཛྷནྟི ནིཔྤདེསཏྟཱ, པཙྩཡཱཀཱརཾ པན སམྨཱསམྦུདྡྷཱཡེཝ ཨནཝསེསཏོ པཊིཝིཛ྄ཛྷནྟི, ན ཨིཏརེ. ཏསྨཱ པཙྩཡཝསེན ‘‘ཨིདཾ ཨཔརདྡྷ’’ནྟི ཝུཏྟཾ ཐེརཾ ཨཔསཱདེནྟེན. ཏམེཝ ཧིསྶ ཨནཝསེསཏོ པཊིཝེདྷཱབྷཱཝཾ ཝིབྷཱཝེཏུཾ ‘‘ཨཐ ཀསྨཱ’’ཏིཨཱདི ཝུཏྟཾ. ཨསཏིཔི དྷམྨཏོ བྷེདེ སཾཡོཛནཏྠཨནུསཡཏྠཝསེན པན ཏེསཾ ལབྦྷམཱནབྷེདཾ གཧེཏྭཱ ‘‘ཨིམེ ཙཏྟཱརོ ཀིལེསེ’’ཏི ཝུཏྟཾ. ཨཉྙོ ཧི ཏེསཾ བནྡྷནཏྠོ, ཨཉྙོ ཐཱམགམནཊྛོཏི. ཨེས ནཡོ སེསེསུཔི. ཨིཏི ཨིམེསཾ ཀིལེསཱནཾ ཨཔྤཧཱིནཏྟཱ ཏཐཱརཱུཔཾ ཨུཔནིསྶཡསམྤདཾ ¶ ཨབྷཱཝཡཏོཝ ཨནུཏྟཱནམེཝ དྷམྨཾ ཨུཏྟཱནནྟི ན ཝཏྟབྦམེཝཱཏི ཨདྷིཔྤཱཡོ. ཙཏྟཱརི ཨཊྛ སོལ༹ས ཝཱ ཨསངྑྱེཡྻཱནཱིཏི ཨིདཾ མཧཱབོདྷིསཏྟཱནཾ སནྟཱནེ བོདྷིཔརིཔཱཙཀདྷམྨཱནཾ ཏིཀྑམཛ྄ཛྷིམམུདུབྷཱཝསིདྡྷཀཱལཝིསེསདསྶནཾ, ཏཉྩ ཁོ མཧཱབྷིནཱིཧཱརཏོ པཊྛཱཡཱཏི ཝདནྟི. ཨེཏེཧཱིཏི ཡཐཱཝུཏྟབུདྡྷསཱཝཀཨགྒསཱཝཀཔཙྩེཀབུདྡྷསམྨཱསམྦུདྡྷཱནཾ ཝིསེསཱདྷིགམེཧི. པཙྩནཱིཀནྟི པཊིཀྐཱུལཾ ཝིརུདྡྷཾ. སབྦཐཱ པཙྩཡཱཀཱརཔཊིཝེདྷོ ནཱམ སམྨཱསམྦོདྷིཡཱདྷིགམོ ཨེཝཱཏི ཝུཏྟཾ ‘‘པཙྩཡཱཀཱརཾ པཊིཝིཛ྄ཛྷིཏུཾ ཝཱཡམནྟསྶེཝཱ’’ཏི. ནཝཧི ཨཱཀཱརེཧཱིཏི ཨུཔྤཱདཱདཱིཧི ནཝཧི པཙྩཡཱཀཱརེཧི. ཝུཏྟཉྷེཏཾ པཊིསམྦྷིདཱཡཾ (པཊི. མ. ༡.༤༥) –

‘‘ཨཝིཛྫཱསངྑཱརཱནཾ ཨུཔྤཱདཊྛིཏི ཙ པཝཏྟཊྛིཏི ཙ ནིམིཏྟཊྛིཏི ཙ ཨཱཡཱུཧནཊྛིཏི ཙ སཾཡོགཊྛིཏི ཙ པལིབོདྷཊྛིཏི ཙ སམུདཡཊྛིཏི ཙ ཧེཏུཊྛིཏི ཙ པཙྩཡཊྛིཏི ཙ, ཨིམེཧི ནཝཧཱཀཱརེཧི ཨཝིཛྫཱ པཙྩཡོ, སངྑཱརཱ པཙྩཡསམུཔྤནྣཱ’’ཏིཨཱདི.

ཏཏྠ ནཝཧཱཀཱརེཧཱིཏི ནཝཧི པཙྩཡབྷཱཝཱུཔགམནེཧི ཨཱཀཱརེཧི. ཨུཔྤཛྫཏི ཨེཏསྨཱ ཕལནྟི ཨུཔྤཱདོ, ཕལུཔྤཏྟིཡཱ ཀཱརཎབྷཱཝོ. སཏི ཙ ཨཝིཛྫཱཡ སངྑཱརཱ ཨུཔྤཛྫནྟི, ནཱསཏི, ཏསྨཱ ཨཝིཛྫཱ སངྑཱརཱནཾ ཨུཔྤཱདོ ཧོཏི. ཏཐཱ ཨཝིཛྫཱཡ སཏི སངྑཱརཱ པཝཏྟནྟི ཙ ནིམིཡནྟི ཙ. ཡཐཱ ཙ བྷཝཱདཱིསུ ཁིཔནྟི, ཨེཝཾ ཏེསཾ ཨཝིཛྫཱ པཙྩཡོ ཧོཏི, ཏཐཱ ཨཱཡཱུཧནྟི ཕལུཔྤཏྟིཡཱ གྷཊེནྟི སཾཡུཛྫནྟི ཨཏྟནོ ཕལེན. ཡསྨིཾ སནྟཱནེ སཡཾ ཨུཔྤནྣཱ, ཏཾ ¶ པལིབུནྡྷནྟི པཙྩཡནྟརསམཝཱཡེ ཨུདཡནྟི ཨུཔྤཛྫནྟི, ཧིནོཏི ཙ སངྑཱརཱནཾ ཀཱརཎབྷཱཝཾ ཨུཔགཙྪཏི. པཊིཙྩ ཨཝིཛྫཾ སངྑཱརཱ ཨཡནྟི པཝཏྟནྟཱིཏི ཨེཝཾ ཨཝིཛྫཱཡ སངྑཱརཱནཾ ཀཱརཎབྷཱཝཱུཔགམནཝིསེསཱ ཨུཔྤཱདཱདཡོ ཝེདིཏབྦཱཏི. ཨུཔྤཱདཊྛིཏཱིཏི ཙ ཏིཊྛཏི ཨེཏེནཱཏི ཋིཏི, ཀཱརཎཾ. ཨུཔྤཱདོ ཨེཝ ཋིཏི ཨུཔྤཱདཋིཏི. ཨེས ནཡོ སེསེསུཔི. ཨིདཉྩ པཙྩཡཱཀཱརདསྶནཾ ཡཐཱ པུརིམེཧི མཧཱབོདྷིམཱུལེ པཝཏྟིཏཾ, ཏཐཱ ཨམྷཱཀཾ བྷགཝཏཱཔི པཝཏྟིཏནྟི ཨཙྪརིཡཝེགཱབྷིཧཏཱ དསསཧསྶིལོཀདྷཱཏུ སངྐམྤི སམྤཀམྤཱིཏི དསྶེནྟོ ‘‘དིཊྛམཏྟེ’’ཏིཨཱདིམཱཧ.

ཨེཏསྶ དྷམྨསྶཱཏི ཨེཏསྶ པཊིཙྩསམུཔྤཱདསཉྙིཏསྶ དྷམྨསྶ. སོ པན ཡསྨཱ ཨཏྠཏོ ཧེཏུཔྤབྷཝཱནཾ ཧེཏུ. ཏེནཱཧ ‘‘ཨེཏསྶ པཙྩཡདྷམྨསྶཱ’’ཏི ¶ . ཛཱཏིཨཱདཱིནཾ ཛརཱམརཎཔཙྩཡཏཱཡཱཏི ཨཏྠོ. ནཱམརཱུཔཔརིཙྪེདོ ཏསྶ ཙ པཙྩཡཔརིགྒཧོ ན པཋམཱབྷིནིཝེསམཏྟེན ཧོཏི, ཨཐ ཁོ ཏཏྠ ཨཔརཱཔརཾ ཉཱཎུཔྤཏྟིསཉྙིཏེན ཨནུ ཨནུ བུཛ྄ཛྷནེན. ཏདུབྷཡབྷཱཝཾ པན དསྶེནྟོ ‘‘ཉཱཏཔརིཉྙཱཝསེན ཨནནུབུཛ྄ཛྷནཱ’’ཏི ཨཱཧ. ནིཙྩསཉྙཱདཱིནཾ པཛཧནཝསེན པཝཏྟམཱནཱ ཝིཔསྶནཱདྷམྨེ པཊིཝིཛ྄ཛྷཏི ཨེཝ ནཱམ ཧོཏི པཊིཔཀྑཝིཀྑམྦྷནེན ཏིཀྑཝིསདབྷཱཝཱཔཏྟིཏོ, ཏདདྷིཊྛཱནབྷཱུཏཱ ཙ ཏཱིརཎཔརིཉྙཱ ཨརིཡམགྒོ ཙ པརིཉྙཱཔཧཱནཱབྷིསམཡཝསེན པཝཏྟིཡཱ ཏཱིརཎཔྤཧཱནཔརིཉྙཱསངྒཧོ ཙཱཏི ཏདུབྷཡཔཊིཝེདྷཱབྷཱཝཾ དསྶེནྟོ ‘‘ཏཱིརཎཔྤཧཱནཔརིཉྙཱཝསེན ཨཔྤཊིཝིཛ྄ཛྷནཱ’’ཏི ཨཱཧ. ཏནྟཾ ཝུཙྩཏི པཊཝཱིནནཏྠཾ ཏནྟཝཱཡེཏི ཏནྟཾ ཨཱཝཉྪིཏྭཱ པསཱརིཏསུཏྟཝཊྚིཏཾ ནཱིཡཏཱིཏི ཀཏྭཱ, ཏཾ པན ཏནྟཱཀུལཏཱཡ ནིདསྶནབྷཱཝེན ཨཱཀུལམེཝ གཧིཏནྟི ཨཱཧ ‘‘ཏནྟཾ ཝིཡ ཨཱཀུལཛཱཏཱ’’ཏི. སངྑེཔཏོ ཝུཏྟམཏྠཾ ཝིཏྠཱརཏོ དསྶེནྟོ ‘‘ཡཐཱ ནཱམཱ’’ཏིཨཱདི ཝུཏྟཾ. སམཱནེཏུནྟི པུབྦེནཱཔརཾ སམཾ ཀཏྭཱ ཨཱནེཏུཾ, ཨཝིསམཾ ཨུཛུཾ ཀཱཏུནྟི ཨཏྠོ. ཏནྟམེཝ ཝཱ ཨཱཀུལཾ ཏནྟཱཀུལཾ, ཏནྟཱཀུལཾ ཝིཡ ཛཱཏཱ བྷཱུཏཱ ཏནྟཱཀུལཀཛཱཏཱ. མཛ྄ཛྷིམཾ པཊིཔདཾ ཨནུཔགནྟྭཱ ཨནྟདྭཡཔཀྑནྡེན པཙྩཡཱཀཱརེ ཁལིཏྭཱ ཨཱཀུལབྱཱཀུལཱ ཧོནྟི, ཏེནེཝ ཨནྟདྭཡཔཀྑནྡེན ཏཾཏཾདིཊྛིགྒཱཧཝསེན པརིབྦྷམནྟཱ ཨུཛུཀཾ དྷམྨཊྛིཏིཏནྟཾ པཊིཝིཛ྄ཛྷིཏུཾ ན ཛཱནནྟི. ཏེནཱཧ ‘‘ན སཀྐོནྟི པཙྩཡཱཀཱརཾ ཨུཛུཾ ཀཱཏུ’’ནྟི. དྭེ བོདྷིསཏྟེཏི པཙྩེཀབོདྷིསཏྟམཧཱབོདྷིསཏྟེ. ཨཏྟནོ དྷམྨཏཱཡཱཏི ཨཏྟནོ སབྷཱཝེན, པརོཔདེསེན ཝིནཱཏི ཨཏྠོ. ཏཏྠ ཏཏྠ གུལ༹ཀཛཱཏནྟི ཏསྨིཾ ཏསྨིཾ ཋཱནེ ཛཱཏགུལ༹ཀཾ པིཎྜིསུཏྟཾ. ཏཏོ ཨེཝ གཎྛིབདྡྷནྟི ཝུཏྟཾ. པཙྩཡེསུ པཀྑལིཏྭཱཏི ཨནིཙྩདུཀྑཱནཏྟཱདིསབྷཱཝེསུ པཙྩཡདྷམྨེསུ ནིཙྩཱདིབྷཱཝཝསེན པཀྑལིཏྭཱ. པཙྩཡེ ཨུཛུཾ ཀཱཏུཾ ཨསཀྐོནྟོཏི ཏསྶེཝ ནིཙྩཱདིགཱཧསྶ ཨཝིསྶཛྫནཏོ པཙྩཡདྷམྨནིམིཏྟཾ ཨཏྟནོ དསྶནཾ ཨུཛུཾ ཀཱཏུཾ ཨསཀྐོནྟོ ཨིདཾསཙྩཱབྷིནིཝེསཀཱཡགནྠཝསེན ¶ གཎྛིཀཛཱཏཱ ཧོནྟཱིཏི ཨཱཧ ‘‘དྭཱསཊྛི…པེ… གཎྛིབདྡྷཱ’’ཏི.

ཡེ ཧི ཀེཙི སམཎཱ ཝཱ བྲཱཧྨཎཱ ཝཱ སསྶཏདིཊྛིཨཱདི དིཊྛིཡོ ནིསྶིཏཱ ཨལླཱིནཱ, ཝིནནཏོ ཀུལཱཏི ཨིཏྠིལིངྒཝསེན ལདྡྷནཱམསྶ ཏནྟཝཱཡསྶ ¶ གཎྛིཀཾ ནཱམ ཨཱཀུལབྷཱཝེན ཨགྒཏོ ཝཱ མཱུལཏོ ཝཱ དུཝིཉྙེཡྻཱཝཡཝཾ ཁལིཏབནྡྷསུཏྟནྟི ཨཱཧ ‘‘ཀུལཱགཎྛིཀཾ ཝུཙྩཏི པེསཀཱརཀཉྫིཡསུཏྟ’’ནྟི. སཀུཎིཀཱཏི ཝཊྚཙཱཊཀསཀུཎིཀཱ. སཱ ཧི རུཀྑསཱཁཱསུ ཨོལམྦནཀུལཱཝཀཱ ཧོཏི. ཏཉྷི སཱ ཀུལཱཝཀཾ ཏཏོ ཏཏོ ཏིཎཧཱིརཱདིཀེ ཨཱནེཏྭཱ ཏཐཱ ཏཐཱ ཝིནནྡྷཏི, ཡཐཱ ཏེསཾ པེསཀཱརཀཉྫིཡསུཏྟཾ ཝིཡ ཨགྒེན ཝཱ ཨགྒཾ, མཱུལེན ཝཱ མཱུལཾ སམཱནེཏུཾ ཝིཝེཙེཏུཾ ཝཱ ན སཀྐཱ. ཏེནཱཧ ‘‘ཡཐཱ’’ཏིཨཱདི. ཏདུབྷཡམྤཱིཏི ཀུལཱགཎྛིཀནྟི ཝུཏྟཾ ཀཉྫིཡསུཏྟཾ ཀུལཱཝཀཉྩ. པུརིམནཡེནེཝཱཏི ‘‘ཨེཝམེཝ སཏྟཱ’’ཏིཨཱདིནཱ པུབྦེ ཝུཏྟནཡེནེཝ.

ཀཱམཾ མུཉྫཔབྦཛཏིཎཱནི ཡཐཱཛཱཏཱནིཔི དཱིགྷབྷཱཝེན པཏིཏྭཱ ཨརཉྙཊྛཱནེ ཨཉྙམཉྙཾ ཝིནནྡྷིཏྭཱ ཨཱཀུལཱནི ཧུཏྭཱ ཏིཊྛནྟི, ཏཱནི པན ཏཐཱ དུབྦིཝེཙིཡཱནི ཡཐཱ རཛྫུབྷཱུཏཱནཱིཏི དསྶེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. སེསམེཏྠ ཧེཊྛཱ ཝུཏྟནཡམེཝ.

ཨཔཱཡོཏི ཨཡེན སུཁེན, སུཁཧེཏུནཱ ཝཱ ཝིརཧིཏོ. དུཀྑསྶ གཏིབྷཱཝཏོཏི ཨཔཱཡིཀསྶ དུཀྑསྶ པཝཏྟིཊྛཱནབྷཱཝཏོ. སུཁསམུསྶཡཏོཏི ‘‘ཨབྦྷུདཡཏོ ཝིནིཔཏིཏཏྟཱ’’ཏི ཝིརཱུཔཾ ནིཔཏིཏཏྟཱ ཡཐཱ ཏེནཏྟབྷཱཝེན སུཁསམུསྶཡོ ན ཧོཏི, ཨེཝཾ ནིཔཏིཏཏྟཱ. ཨིཏརོཏི སཾསཱརོ ནནུ ‘‘ཨཔཱཡ’’ནྟིཨཱདིནཱ ཝུཏྟོཔི སཾསཱརོ ཨེཝཱཏི? སཙྩམེཏཾ, ནིརཡཱདཱིནཾ པན ཨདྷིམཏྟདུཀྑབྷཱཝདསྶནཏྠཾ ཨཔཱཡཱདིགྒཧཎཾ གོབལིབདྡཉཱཡེན ཨཡམཏྠོ ཝེདིཏབྦོ. ཁནྡྷཱནཉྩ པཊིཔཱཊཱིཏི པཉྩནྣཾ ཁནྡྷཱནཾ ཧེཏུཕལབྷཱཝེན ཨཔརཱཔརུཔྤཏྟི. ཨབྦྷོཙྪིནྣཾ ཝཏྟམཱནཱཏི ཨཝིཙྪེདེན པཝཏྟམཱནཱ.

ཏཾ སབྦམྤཱིཏི ཏཾ ‘‘ཨཔཱཡ’’ནྟིཨཱདིནཱ ཝུཏྟཾ སབྦཾ ཨཔཱཡདུཀྑཉྩེཝ ཝཊྚདུཀྑཉྩ. མཧཱསམུདྡེ ཝཱཏཀྑིཏྟཱ ནཱཝཱ ཝིཡཱཏི ཨིདཾ པརིབྦྷམནཊྛཱནསྶ མཧནྟབྷཱཝདསྶནཏྠཉྩེཝ པརིབྦྷམནསྶ ཨནཝཏྟིཏདསྶནཏྠཉྩ ཝེདིཏབྦཾ. སེསཾ ཝུཏྟནཡམེཝ.

ནིདཱནསུཏྟཝཎྞནཱ ནིཊྛིཏཱ.

དུཀྑཝགྒཝཎྞནཱ ནིཊྛིཏཱ.

༧. མཧཱཝགྒོ

༡. ཨསྶུཏཝཱསུཏྟཝཎྞནཱ

༦༡. ‘‘ཨསྶུཏཝཱ’’ཏི ¶ ¶ སོཏདྭཱརཱནུསཱརེན ཨུཔདྷཱརིཏཾ, ཨུཔདྷཱརཎཾ ཝཱ སུཏཾ ཨསྶ ཨཏྠཱིཏི སུཏཝཱ, ཏཔྤཊིཀྑེཔེན ན སུཏཝཱཏི ཨསྶུཏཝཱ. ཝཱ-སདྡོ ཙཱཡཾ པསཾསཱཡཾ, ཨཏིསཡསྶ ཝཱ བོདྷནཀོ, ཏསྨཱ ཡསྶ པསཾསིཏཾ, ཨཏིསཡེན ཝཱ སུཏཾ ཨཏྠི, སོ ‘‘སུཏཝཱ’’ཏི སཾཀིལེསཝིདྡྷཾསནསམཏྠོ པརིཡཏྟིདྷམྨཔརིཙཡོ ‘‘ཏཾ སུཏྭཱ ཏཐཏྟཱཡ པཊིཔཏྟི ཙ སུཏཝཱ’’ཏི ཨིམིནཱ པདེན པཀཱསིཏོ. ཨཐ ཝཱ སོཏབྦཡུཏྟཾ སུཏྭཱ ཀཏྟབྦནིཔྥཏྟིཾ སུཎཱིཏི སུཏཝཱ. ཏཔྤཊིཀྑེཔེན ན སུཏཝཱཏི ཨསྶུཏཝཱ. ཏེནཱཧུ པོརཱཎཱ ‘‘ཨཱགམཱདྷིགམཱབྷཱཝཱ, ཉེཡྻོ ཨསྶུཏཝཱ ཨིཏཱི’’ཏི. ཏཐཱ ཙཱཧ ‘‘ཁནྡྷདྷཱཏུ…པེ… ཝིནིཙྪཡརཧིཏོ’’ཏི. ཏཏྠ ཝཱཙུགྒཏཀརཎཾ ཨུགྒཧོ, ཏཏྠ པརིཔུཙྪནཾ པརིཔུཙྪཱ, ཀུསལེཧི སཧ ཙོདནཱཔརིཧརཎཝསེན ཝིནིཙྪཡསྶ ཀཱརཎཾ ཝིནིཙྪཡོ. པུཐཱུནནྟི བཧཱུནཾ. ཀིལེསཱདཱིནཾ ཀིལེསཱབྷིསངྑཱརཱནཾ ཝིཏྠཱརེཏབྦཾ པཊིསམྦྷིདཱམགྒནིདྡེསེསུ (མཧཱནི. ༥༡, ༩༤) ཨཱགཏནཡེན. ཨནྡྷཔུཐུཛྫནོ གཧིཏོ ‘‘ནཱལཾ ནིབྦིནྡིཏུ’’ནྟིཨཱདིཝཙནཏོ. ཨཱསནྣཔཙྩཀྑཝཱཙཱི ཨིདཾ-སདྡོཏི ཨཱཧ ‘‘ཨིམསྨིནྟི པཙྩུཔྤནྣཔཙྩཀྑཀཱཡཾ དསྶེཏཱི’’ཏི. ཙཏཱུསུ མཧཱབྷཱུཏེསུ ནིཡུཏྟོཏི ཙཱཏུམཧཱབྷཱུཏིཀོ. ཡཐཱ པན མཧཱམཏྟིཀཱཡ ནིབྦཏྟཾ མཏྟིཀཱམཡཾ, ཨེཝམཡཾ ཙཏཱུཧི མཧཱབྷཱུཏེཧི ནིབྦཏྟོ ‘‘ཙཏུམཧཱབྷཱུཏམཡོ’’ཏི ཝུཏྟཾ. ནིབྦིནྡེཡྻཱཏི ནིབྦིནྡནམྤི ཨཱཔཛྫེཡྻ. ནིབྦིནྡནཱ ནཱམ ཨུཀྐཎྛནཱ ཨནབྷིརཏིབྷཱཝཏོཏི ཝུཏྟཾ ‘‘ཨུཀྐཎྛེཡྻཱ’’ཏི. ཝིརཛྫེཡྻཱཏི ཝཱིཏརཱགོ བྷཝེཡྻ. ཏེནཱཧ ‘‘ན རཛྫེཡྻཱ’’ཏི. ཝིམུཙྩེཡྻཱཏི ཨིདྷ པན ཨཙྩནྟཱཡ ཝིམུཙྩནཾ ཨདྷིཔྤེཏནྟི ཨཱཧ ‘‘མུཙྩིཏུཀཱམོ བྷཝེཡྻཱ’’ཏི. ཙཏཱུཧི ཙ རཱུཔཛནཀཔཙྩཡེཧི ཨཱགཏོ ཙཡོཏི, ཨཱཙཡོ, ཝུདྡྷི. ཙཡཏོ ཨཔཀྐམོཏི ཨཔཙཡོ, པརིཧཱནི. ཨཱདཱནནྟི གཧཎཾ, པཊིསནྡྷིཡཱ ནིབྦཏྟི. བྷེདོཏི ཁནྡྷཱནཾ བྷེདོ. སོ ཧི ཀལེ༹ཝརསྶ ནིཀྑེཔོཏི ཝུཏྟོཏི ཨཱཧ ‘‘ནིཀྑེཔནནྟི བྷེདོ’’ཏི.

པཉྙཱཡནྟཱིཏི པཀཱརཏོ ཉཱཡནྟི. རཱུཔཾ པརིགྒཧེཏུཾ པརིགྒཎྷནཝསེནཔི རཱུཔཾ ཨཱལམྦིཏུཾ. ཨཡུཏྟརཱུཔཾ ཀཏྭཱ ཏཎྷཱདཱིཧི པརིགྒཧེཏུཾ ཨརཱུཔཾ པརིགྒཎྷིཏུཾ ཡུཏྟརཱུཔཾ ¶ ཀརོཏི ཏེསཾ བྷིཀྑཱུནཾ སཔྤཱཡབྷཱཝཏོ. ཏེནཱཧ ‘‘ཀསྨཱ’’ཏིཨཱདི. ནིཀྐཌྜྷནྟོཏི ཏཏོ གཱཧཏོ ནཱིཧརནྟོ.

མནཱཡཏནསྶེཝ ¶ ནཱམཾ, ན སམཱདྷིཔཉྙཏྟཱིནཾ ‘‘ཙིཏྟཾ པཉྙཉྩ བྷཱཝཡཾ (སཾ. ནི. ༡.༢༣, ༡༩༢; པེཊཀོ. ༢༢; མི. པ. ༡.༩.༩), ཙིཏྟོ གཧཔཏཱི’’ཏིཨཱདཱིསུ (དྷ. པ. ཨཊྛ. ༧༤) ཝིཡ. ཙིཏྟཱིཀཱཏབྦབྷཱུཏཾ ཝཏྠུ ཨེཏསྶཱཏི ཙིཏྟཝཏྠུ, ཏསྶ བྷཱཝོ ཙིཏྟཝཏྠུཏཱ, ཏེན ཀཱརཎེན ཙིཏྟབྷཱཝམཱཧ. ཙིཏྟགོཙརཏཱཡཱཏི ཙིཏྟཝིཙིཏྟཝིསཡཏཱཡ. སམྤཡུཏྟདྷམྨཙིཏྟཏཱཡཱཏི རཱགཱདིསདྡྷཱདིསམྤཡུཏྟདྷམྨཝསེན ཙིཏྟསབྷཱཝཏྟཱ. ཏེན ཙིཏྟཏཱཡ ཙིཏྟཏྟམཱཧ. ཝིཛཱནནཊྛེནཱཏི བུཛ྄ཛྷནཊྛེན. ཨཛ྄ཛྷོསིཏནྟི ཨཛ྄ཛྷོསཱབྷཱུཏཱཡ ཏཎྷཱཡ གཧིཏཾ. ཏེནཱཧ ‘‘ཏཎྷཱཡཱ’’ཏིཨཱདི. པརཱམསིཏྭཱཏི དྷམྨསབྷཱཝཾ ཨནིཙྩཏཱདིཾ ཨཏིཀྐམིཏྭཱ པརཏོ ནིཙྩཱདིཏོ ཨཱམསིཏྭཱ. ཨཊྛསཏནྟི ཨཊྛཱདྷིཀཾ སཏཾ. ནཝ མཱནཱཏི སེཡྻསྶ ‘‘སེཡྻོཧམསྨཱི’’ཏིཨཱདིནཱ ཨཱགཏཱ ནཝཝིདྷམཱནཱ. བྲཧྨཛཱལེ ཨཱགཏཱ སསྶཏཝཱདཱདཡོ དྭཱསཊྛིདིཊྛིཡོ. ཨེཝནྟི ཝུཏྟཱཀཱརེན. ཡསྨཱ ཏཎྷཱམཱནདིཊྛིགྒཱཧཝསེན པུཐུཛྫནེན དལ༹ྷགྒཱཧཾ གཧིཏཾ, ཏསྨཱ སོ ཏཏྠ ནིབྦིནྡིཏུཾ ནིབྦིདཱཉཱཎཾ ཨུཔྤཱདེཏུཾ ན སམཏྠོ.

བྷིཀྑཝེཏི ཨེཏྠ ཨིཏི-སདྡོ ཨཱདིཨཏྠོ, ཏེན ‘‘ཝར’’ནྟི ཨེཝམཱདིཀཾ སངྒཎྷཱཏི. ཨིདཾ ཨནུསནྡྷིཝཙནཾ ‘‘ཀསྨཱ ཨཱཧཱ’’ཏི ཀཐེཏུཀཱམཏཱཡ ཀཱརཎཾ པུཙྪཏི. ཏེནཱཧ ‘‘པཋམཾ ཧཱི’’ཏིཨཱདི. ཨསྶུཏཝཏཱ པུཐུཛྫནེན. ཏེནཱཏི བྷགཝཏཱ. ཨཡུཏྟརཱུཔཾ ཀཏཾ ‘‘ནིབྦིནྡེཡྻཱ’’ཏིཨཱདིནཱ ཨཱདཱིནཝསྶ ཝིབྷཱཝིཏཏྟཱ. ཨརཱུཔེ པན ཏཐཱ ཨཱདཱིནཝསྶ ཨཝིབྷཱཝིཏཏྟཱ ཝུཏྟཾ ‘‘ཨརཱུཔཾ པརིགྒཧེཏུཾ ཡུཏྟརཱུཔ’’ནྟི, ཡུཏྟརཱུཔཾ ཝིཡ ཀཏནྟི ཨདྷིཔྤཱཡོ. གཱཧོཏི ཏཎྷཱམཱནདིཊྛིགྒཱཧོ. ‘‘ནིཀྑམིཏྭཱ ཨརཱུཔཾ གཏོ’’ཏི ཨིདཾ བྷགཝཏཱ ཨཱདཱིནཝཾ དསྶེཏྭཱ རཱུཔེ གཱཧོ པཊིཀྑིཏྟོ, ན ཨརཱུཔེ, ཏསྨཱ ‘‘ཀཱཏབྦོ ནུ ཁོ སོ ཏཏྠཱ’’ཏི མིཙྪཱགཎྷནྟཱནཾ སོ ཏཏོ རཱུཔཏོ ནིཀྑམིཏྭཱ ཨརཱུཔཾ གཏོ ཝིཡ ཧོཏཱིཏི ཀཏྭཱ ཝུཏྟཾ. ཏིཊྛམཱནནྟི ཏིཊྛནྟཾ. ‘‘ཨཱཔཛྫིཏྭཱ ཝིཡ ཧོཏཱི’’ཏི སབྷཱཝེན པཝཏྟམཱནཾ ‘‘པཋམཝཡེ’’ཏིཨཱདིནཱ རཱུཔསྶ བྷེདཾ ཝཡཱདཱིཧི ཝིབྷཛིཏྭཱ དསྶེཏི.

པཱདསྶ ཨུདྡྷརཎེཏི ཡཐཱ ཋཔིཏསྶ པཱདསྶ ཨུཀྑིཔནེ. ཨཏིཧརཎནྟི ཡཐཱཨུདྡྷཏཾ ཡཐཱཊྛིཏཊྛཱནཾ ཨཏིཀྐམིཏྭཱ ཧརཎཾ. ཝཱིཏིཧརཎནྟི ཨུདྡྷཏོ ¶ པཱདོ ཡཐཱཊྛིཏཾ པཱདཾ ཡཐཱ ན གྷཊྚེཏི, ཨེཝཾ ཐོཀཾ པསྶཏོ པརིཎཱམེཏྭཱ ཧརཎཾ. ཝོསྶཛྫནནྟི ཏཐཱ པརཔཱདཾ ཝཱིཏིསཱརེཏྭཱ བྷཱུམིཡཾ ནིཀྑིཔནཏྠཾ ཨཝོསྶཛྫནཾ. སནྣིཀྑེཔནནྟི ཝོསྶཛྫེཏྭཱ བྷཱུམིཡཾ སམཾ ནིཀྑིཔནཾ ཋཔནཾ. སནྣིརུཛ྄ཛྷནནྟི ནིཀྑིཏྟསྶ སབྦསོ ནིརུཛ྄ཛྷནཾ ཨུཔྤཱིལ༹ནཾ. ཏཏྠ ཏཏྠེཝཱཏི ཏསྨིཾ ཏསྨིཾ པཋམཝཡཱདིཀེ ཨེཝ. ཨཝདྷཱརཎེན ཏེསཾ ཀོཊྛཱསནྟརསངྐམནཱབྷཱཝམཱཧ. ཨོདྷཱིཏི བྷཱཝོ, པབྦནྟི སནྡྷི. པཋམཝཡཱདཡོ ཨེཝ ཧེཏྠ ཨོདྷི པབྦནྟི ཙ ཨདྷིཔྤེཏཱ. པཊཔཊཱཡནྟཱཏི ‘‘པཊཔཊཱ’’ཨིཏི ¶ ཀརོནྟཱ ཝིཡ, ཏེན ནེསཾ པཝཏྟིཀྑཎསྶ ཨིཏྟརཏཾ དསྶེཏི. ཨེཏནྟི ཨེཏཾ རཱུཔདྷམྨཱནཾ ཡཐཱཝུཏྟཾ ཏཏྠ ཏཏྠེཝ བྷིཛྫནཾ ཨེཝཾ ཝུཏྟཔྤཀཱརམེཝ. ཝཊྚིཔྤདེསནྟི ཝཊྚིཡཱ པུལཀཾ བརཧཾ. ཏཉྷི ཝཊྚིཡཱ པུལཀཾ ཨནཏིཀྐམིཏྭཱཝ སཱ དཱིཔཛཱལཱ བྷིཛྫཏི. པཝེཎིསམྦནྡྷཝསེནཱཏི སནྟཏིཝསེན.

རཏྟིནྟི རཏྟིཡཾ. བྷུམྨཏྠེ ཧེཏཾ ཨུཔཡོགཝཙནཾ. ཨེཝཾ པན ཨཏྠོ ན གཧེཏབྦོ ཨནུཔྤནྣསྶ ནིརོདྷཱབྷཱཝཏོ. པུརིམཔཝེཎིཏོཏི རཱུཔེ ཝུཏྟཔཝེཎིཏོ. ཨནེཀཱནི ཙིཏྟཀོཊིསཏསཧསྶཱནི ཨུཔྤཛྫནྟཱིཏི ཝུཏྟམཏྠཾ ཐེརཝཱདེན དཱིཔེཏུཾ ‘‘ཝུཏྟམྤི ཙེཏ’’ནྟིཨཱདི ཝུཏྟཾ. ཨཌྜྷཙཱུལ༹ནྟི ཐོཀེན ཨཱུནཾ ཨུཔཌྜྷཾ, ཏསྶ པན ཨུཔཌྜྷཾ ཨདྷིཀཱརཏོ ཝཱཧསཏསྶཱཏི ཝིཉྙཱཡཏི. ‘‘ཨཌྜྷཙུདྡས’’ནྟི ཀེཙི, ‘‘ཨཌྜྷཙཏུཏྠ’’ནྟི ཨཔརེ. ‘‘སཱདྷིཀཾ དིཡཌྜྷསཏཾ ཝཱཧཱ’’ཏི དལ༹ྷཾ ཀཏྭཱ ཝདནྟཱིཏི ཝཱིམཾསིཏབྦཾ. ཙཏུནཱལི༹ཀོ ཏུམྦོ. མཧཱརཉྙཏཱཡ པཝདྡྷཾ ཝནཾ པཝནནྟི ཨཱཧ ‘‘པཝནེཏི མཧཱཝནེ’’ཏི. ཏནྟི པཋམཾ གཧིཏསཱཁཾ. ཨཡམཏྠོཏི ཨཡཾ བྷཱུམིཾ ཨནོཏརིཏྭཱ ཋིཏསཱཁཱཡ ཨེཝ གཧཎསངྑཱཏོ ཨཏྠོ. ཨེཏདཏྠམེཝ ཧི བྷགཝཱ ‘‘ཨརཉྙེ’’ཏི ཝཏྭཱཔི ‘‘པཝནེ’’ཏི ཨཱཧ.

ཨརཉྙམཧཱཝནཾ ཝིཡཱཏི ཨརཉྙཊྛཱནེ བྲཧཱརཉྙེ ཝིཡ. ཨཱརམྨཎོལམྦནནྟི ཨཱརམྨཎསྶ ཨཝལམྦནཾ. ན ཝཏྟབྦཾ ཨཱརམྨཎཔཙྩཡེན ཝིནཱ ཨནུཔྤཛྫནཏོ. ཨེཀཛཱཏིཡནྟི རཱུཔཱདིནཱིལཱདིཨེཀསབྷཱཝཾ. ‘‘དིསྶཏི, བྷིཀྑཝེ, ཨིམསྶ ཙཱཏུམཧཱབྷཱུཏིཀསྶ ཀཱཡསྶ ཨཱཙཡོཔི ཨཔཙཡོཔཱི’’ཏི ཝདནྟེན རཱུཔཏོ ནཱིཧརིཏྭཱ ཨརཱུཔེ གཱཧོ པཏིཊྛཱཔིཏོ ནཱམ, ‘‘ཝརཾ, བྷིཀྑཝེ, ཨསྶུཏཝཱ པུཐུཛྫནོ’’ཏིཨཱདིཾ ཝདནྟེན ཨརཱུཔཏོ ནཱིཧརིཏྭཱ རཱུཔེ གཱཧོ པཏིཊྛཱཔིཏོ ནཱམ.

ནནྟི ¶ གཱཧཾ. ཨུབྷཡཏོཏི རཱུཔཏོ ཙ ཨརཱུཔཏོ ཙ. ཧརིསྶཱམཱིཏི ནཱིཧརིསྶཱམི. པརིཝཏྟེཏྭཱཏི མནྟཾ ཛཔྤིཏྭཱ. ཀཎྞེ དྷུམེཏྭཱཏི ཀཎྞེ དྷམེཏྭཱ. ཨསྶཱཏི ཝིསསྶ. ནིམྨཐེཏྭཱཏི ནིམྨདྡིཏྭཱ, ནཱིཧརིཏྭཱཏི ཨདྷིཔྤཱཡོ.

མགྒོཏི ལོཀུཏྟརམགྒོ. ‘‘ནིབྦིནྡ’’ནྟི ཨིམིནཱ བལཝཝིཔསྶནཱ ཀཐིཏཱ.

ཨསྶུཏཝཱསུཏྟཝཎྞནཱ ནིཊྛིཏཱ.

༢. དུཏིཡཨསྶུཏཝཱསུཏྟཝཎྞནཱ

༦༢. པཙྩཡབྷཱཝེན ¶ སུཁཝེདནཱཡ ཧིཏནྟི སུཁཝེདནིཡཾ. ཏེནཱཧ ‘‘སུཁཝེདནཱཡ པཙྩཡ’’ནྟི. པཙྩཡབྷཱཝོ ཙ ཨུཔནིསྶཡཀོཊིཡཱ, ན སཧཛཱཏཀོཊིཡཱ. ཏེནཱཧ ‘‘ནནུ ཙཱ’’ཏིཨཱདི. ཛཝནཝེདནཱཡཱཏི ཛཝནཙིཏྟསཧགཏཱཡ ཝེདནཱཡ. ཏཾ སནྡྷཱཡཱཏི ཏཾ ཨུཔནིསྶཡཔཙྩཡཏཾ སནྡྷཱཡ. ཨེཏནྟི ཨེཏཾ ‘‘སུཁཝེདནཱཡ པཙྩཡ’’ནྟི ཝཙནཾ ཝུཏྟཾ. ཨེསེཝ ནཡོཏི ཨིམིནཱ ‘‘ནནུ ཙ སོཏསམྥསྶོ སུཁཝེདནཱཡ པཙྩཡོ ན ཧོཏཱི’’ཏི ཨེཝམཱདིཾ ཨཏིདིསཏི. སོ སམྥསྶོ ཛཱཏི ཨུཔྤཏྟིཊྛཱནཾ ཨེཏསྶཱཏི ཏཛྫཱཏིཀཾ, ཝེདཡིཏཾ. ཏཾ པན ཡསྨཱ ཏསྶ ཕསྶསྶ ཨནུཙྪཝིཀམེཝ ཧོཏི, ཏསྨཱ ཏསྶཱརུཔྤཾ ཏསྶ ཕསྶསྶ ཨནུརཱུཔནྟི ཙ ཨཏྠོ ཝུཏྟོ. ཝུཏྟནཡེནཱཏི ‘‘སུཁཝེདནཱཡ པཙྩཡོ’’ཏིཨཱདིནཱ ཝུཏྟཝིདྷིཨནུསཱརེན. ཨདྷརཱརཎིཡཾ ཨུཏྟརཱརཎིཡཱ མནྟནཝསེན གྷཊྚནཾ ཨིཝ སངྒྷཊྚནཾ ཕསྶེན ཡུགགྒཱཧོ, ཏསྶ པན གྷཊྚནསྶ ནིརནྟརཔྤཝཏྟིཡཱ པིཎྜིཏབྷཱཝོ ཨིདྷ སམོདྷཱནཾ, ན ཀེསཉྩི དྭིནྣཾ ཏིཎྞཾ ཝཱ སཧཱཝཊྛཱནནྟི ཝུཏྟཾ ‘‘སངྒྷཊྚནསམྤིཎྜནེནཱཏི ཨཏྠོ’’ཏི. ཨགྒིཙུཎྞོཏི ཝིཔྥུལིངྒཾ. ཝཏྠཱུཏི ཙཀྑཱདིཝཏྠུ ཝིསཡསངྒྷཊྚནཏོ. ལབྦྷམཱནོཝ དྷམྨོ སངྒྷཊྚནཾ ཝིཡ གཡ྄ཧཏཱིཏི ཝུཏྟཾ ‘‘སངྒྷཊྚནཾ ཝིཡ ཕསྶོ’’ཏི. ཨུསྨཱདྷཱཏུ ཝིཡ ཝེདནཱ དུཀྑསབྷཱཝཏྟཱ.

དུཏིཡཨསྶུཏཝཱསུཏྟཝཎྞནཱ ནིཊྛིཏཱ.

༣. པུཏྟམཾསཱུཔམསུཏྟཝཎྞནཱ

༦༣. ཝུཏྟནཡམེཝཱཏི ¶ ཧེཊྛཱ ཨཱཧཱརཝགྒསྶ པཋམསུཏྟེ ཝུཏྟནཡམེཝ. ལཱབྷསཀྐཱརེནཱཏི ལཱབྷསཀྐཱརསངྑཱཏཱཡ ཨཊྛུཔྤཏྟིཡཱཏི ཀེཙི. ལཱབྷསཀྐཱརེ ཝཱ ཨཊྛུཔྤཏྟིཡཱཏི ཨཔརེ. ཡོ ཧི ལཱབྷསཀྐཱརནིམིཏྟཾ པཙྩཡེསུ གེདྷེན བྷིཀྑཱུནཾ ཨཔཙྩཝེཀྑིཏཔརིབྷོགོ ཛཱཏོ, ཏཾ ཨཊྛུཔྤཏྟིཾ ཀཏྭཱ བྷགཝཱ ཨིམཾ དེསནཾ ནིཀྑིཔི. ཡམཀམཧཱམེགྷོཏི ཧེཊྛཱ ཨོལམྦནཨུཔརིཨུགྒམནཝསེན སཏཔཊལསཧསྶཔཊལོ ཡུགལ༹མཧཱམེགྷོ.

ཏིཊྛནྟི ཙེཝ བྷགཝཏི ཀཏྠཙི ནིབདྡྷཝཱསཾ ཝསནྟེ, ཙཱརིཀམྤི གཙྪནྟེ ཨནུབནྡྷནྟི ཙ. བྷིཀྑཱུནམྤི ཡེབྷུཡྻེན ཀཔྤསཏསཧསྶཾ ཏཏོ བྷིཡྻོཔི པཱུརིཏདཱནཔཱརམིསཉྩཡཏྟཱ ཏདཱ མཧཱལཱབྷསཀྐཱརོ ཨུཔྤཛྫཏཱིཏི ཝུཏྟཾ ‘‘ཨེཝཾ བྷིཀྑུསངྒྷསྶཔཱི’’ཏི. སཀྐཏོཏི སཀྐཱརཔྤཏྟོ. གརུཀཏོཏི གརུཀཱརཔྤཏྟོ. མཱནིཏོཏི བཧུམཏོ མནསཱ པིཡཱཡིཏོ ཙ. པཱུཛིཏོཏི མཱལཱདིཔཱུཛཱཡ ཙེཝ ཙཏུཔཙྩཡཱབྷིཔཱུཛཱཡ ཙ པཱུཛིཏོ. ཨཔཙིཏོཏི ཨཔཙཱཡནཔྤཏྟོ. ཡསྶ ཧི ཙཏྟཱརོ ¶ པཙྩཡེ སཀྐཏྭཱ སུཨབྷིསངྑཏེ པཎཱིཏཔཎཱིཏེ ཨུཔནེནྟི, སོ སཀྐཏོ. ཡསྨིཾ གརུབྷཱཝཾ པཙྩུཔཊྛཔེཏྭཱ དེནྟི, སོ གརུཀཏོ. ཡཾ མནསཱ པིཡཱཡནྟི བཧུམཉྙནྟི, སོ བཧུམཏོ. ཡསྶ སབྦམེཏཾ པཱུཛཱཝསེན ཀརོནྟི, སོ པཱུཛིཏོ. ཡསྶ ཨབྷིཝཱདནཔཙྩུཊྛཱནཉྫལིཀམྨཱདིཝསེན པརམནིཔཙྩཀཱརཾ ཀརོནྟི, སོ ཨཔཙིཏོ. བྷགཝཏི བྷིཀྑུསངྒྷེ ཙ ལོཀོ ཨེཝཾ པཊིཔནྣོ. ཏེན ཝུཏྟཾ ‘‘ཏེན ཁོ པན སམཡེན…པེ… པརིཀྑཱརཱན’’ནྟི (ཨུདཱ. ༡༤; སཾ. ནི. ༢.༧༠). ལཱབྷགྒཡསགྒཔྤཏྟནྟི ལཱབྷསྶ ཙ ཡསསྶ ཙ ཨགྒཾ ཨུཀྐཾསཾ པཏྟཾ.

པཋམཱཧཱརཝཎྞནཱ

ཨསྶཱཏི བྷགཝཏོ. དྷམྨསབྷཱཝཙིནྟཱཝསེན པཝཏྟཾ སཧོཏྟཔྤཉཱཎཾ དྷམྨསཾཝེགོ. དྷུཝཔཊིསེཝནཊྛཱནཉྷེཏཾ སཏྟཱནཾ, ཡདིདཾ ཨཱཧཱརཔརིབྷོགོ, ཏསྨཱ ན ཏཏྠ ཨཔཙྩཝེཀྑཎམཏྟེན པཱརཱཛིཀཾ པཉྙཔེཏུཾ སཀྐཱཏི ཨདྷིཔྤཱཡོ. ཨཱཧཱརཱཏི ‘‘པཙྩཡཱ’’ཏིཨཱདིནཱ པུབྦེ ཨཱཧཱརེསུ ཝུཏྟཝིདྷིཾ སནྡྷཱཡ ཨཱཧ ‘‘ཨཱཧཱརཱ’’ཏིཨཱདི. ཨིདཱནི ཏཏྠ ཀཏྟབྦཾ ཨཏྠཝཎྞནཾ སནྡྷཱཡ ‘‘ཧེཊྛཱ ཝུཏྟཏྠམེཝཱ’’ཏི ཝུཏྟཾ.

ཨཱདཱིནཝནྟི ¶ དོསཾ. ཛཱཡཱཏི བྷརིཡཱ. པཏཱིཏི བྷཏྟཱ. ཨཔེཀྑཱསདྡཱ ཙེཏེ པིཏཱཔུཏྟསདྡཱ ཝིཡ, པཱལི༹ཡཾ པན ཨཱ-ཀཱརསྶ རསྶཏྟཾ སཱནུནཱསིཀཉྩ ཀཏྭཱ ཝུཏྟཾ ‘‘ཛཱཡམྤཏིཀཱ’’ཏི. སམྨཱ ཕལཾ ཝཧཏཱིཏི སམྦལཾ, སུཁཱཝཧནྟི ཨཏྠོ. ཏཐཱ ཧི ཏཾ ‘‘པཐེ ཧིཏནྟི པཱཐེཡྻ’’ནྟི ཝུཙྩཏི. མགྒསྶ ཀནྟཱརཔརིཡཱཔནྣཏྟཱ ཝུཏྟཾ ‘‘ཀནྟཱརབྷཱུཏཾ མགྒ’’ནྟི. དུལླབྷཏཱཡ ཏཾ ཨུདཀཾ ཏཏྠ ཏཱརེཏཱིཏི ཀནྟཱརཾ, ནིརུདཀཾ མཧཱཝནཾ. རུལ༹ྷཱིཝསེན ཨིཏརམྤི མཧཱཝནཾ ཏཐཱ ཝུཙྩཏཱིཏི ཨཱཧ ‘‘ཙོརཀནྟཱར’’ནྟིཨཱདི. པརརཱཛཱུནཾ ཝེརིཨཱདཱིནཉྩ ཝསེན སཔྤཊིབྷཡམྤི ཨརཉྙཾ ཨེཏྠེཝ སངྒཧཾ གཙྪཏཱིཏི ཝུཏྟཾ ‘‘པཉྩཝིདྷ’’ནྟི.

གྷནགྷནཊྛཱནཏོཏི མཾསསྶ བཧལབཧལཾ ཐཱུལཐཱུལཾ ཧུཏྭཱ ཋིཏཊྛཱནཏོ. ‘‘ཏཱདིསཉྷི མཾསཾ གཧེཏྭཱ སུཀྑཱཔིཏཾ ཝལླཱུརཾ. སཱུལེ ཨཱཝུནིཏྭཱ པཀྐམཾསཾ སཱུལམཾསཾ. ཝིརལ༹ཙྪཱཡཱཡཾ ནིསཱིདིཾསུ གནྟུཾ ཨསམཏྠོ ཧུཏྭཱ. གོཝཏཀུཀྐུརཝཏདེཝཏཱཡཱཙནཱདཱིཧཱིཏི གོཝཏཀུཀྐུརཝཏཱདིཝཏཙརཎེཧི ཙེཝ དེཝཏཱཡཱཙནཱདཱིཧི པཎིདྷིཀམྨེཧི ཙ མཧནྟཾ དུཀྑཾ ཨནུབྷཱུཏཾ.

ཡསྨཱ པན སཱསནེ སམྨཱཔཊིཔཛྫནྟསྶ བྷིཀྑུནོ ཨཱཧཱརཔརིབྷོགསྶ ཨོཔམྨབྷཱཝེན ཏེསཾ ཛཱཡམྤཏིཀཱནཾ པུཏྟམཾསཔརིབྷོགོ ཨིདྷ བྷགཝཏཱ ཨཱནཱིཏོ, ཏསྨཱསྶ ནཱནཱཀཱརེཧི ཨོཔམྨཏྟཾ ¶ ཝིབྷཱཝེཏུཾ ‘‘ཏེསཾ སོ པུཏྟམཾསཱཧཱརོ’’ཏིཨཱདི ཨཱརདྡྷཾ. ཏཏྠ སཛཱཏིམཾསཏཱཡཱཏི སམཱནཛཱཏིཀམཾསབྷཱཝེན, མནུསྶམཾསབྷཱཝེནཱཏི ཨཏྠོ. མསུསྶམཾསཉྷི ཀུལཔྤསུཏམནུསྶཱནཾ ཨམནུཉྙཾ ཧོཏི ཨཔརིཙིཏབྷཱཝཏོ གཱརཡ྄ཧབྷཱཝཏོ ཙ, ཏཏོ ཨེཝ ཉཱཏིཨཱདིམཾསཏཱཡཱཏིཨཱདི ཝུཏྟཾ. ཏརུཎམཾསཏཱཡཱཏིཨཱདི པན སབྷཱཝཏོ ཨནབྷིསངྑཱརཏོ ཙ ཨམནུཉྙཱཏི ཀཏྭཱ ཝུཏྟཾ. ཨདྷཱུཔིཏཏཱཡཱཏི ཨདྷཱུཔིཏབྷཱཝཏོ. མཛ྄ཛྷཏྟབྷཱཝེཡེཝ ཋིཏཱ. ཏཏོ ཨེཝ ནིཙྪནྡརཱགཔརིབྷོགེ ཋིཏཱཏི ཝུཏྟཾ ཀནྟཱརཏོ ནིཏྠརཎཛ྄ཛྷཱསཡཏཱཡ. ཨིདཱནི ཡེ ཙ ཏེ ཨནཔནཱིཏཱཧཱརོ, ན ཡཱཝདཏྠཔརིབྷོགོ ཝིགཏམཙྪེརམལཏཱ སམྨོཧཱབྷཱཝོ ཨཱཡཏིཾ ཏཏྠ པཏྠནཱབྷཱཝོ སནྣིདྷིཀཱརཱབྷཱཝོ ཨཔརིཙྩཛནམདཏྠཱབྷཱཝོ ཨཧཱིལ༹ནཱ ཨཝིཝཱདཔརིབྷོགོ ཙཱཏི ཨུཔམཱཡཾ ལབྦྷམཱནཱ པཀཱརཝིསེསཱ, ཏེ ཏཐཱ ནཱིཧརིཏྭཱ ཨུཔམེཡྻེ ཡོཛེཏྭཱ དསྶེཏུཾ ‘‘ན ¶ ཨཊྛིནྷཱརུཙམྨནིསྶིཏཊྛཱནཱནཱི’’ཏིཨཱདི ཝུཏྟཾ. ཏཾ ཀཱརཎནྟི ཏཾ ཏེསཾ ཛཱཡམྤཏཱིནཾ ཡཱཝདེཝ ཀནྟཱརནིཏྠརཎཏྠཱཡ པུཏྟམཾསཔརིབྷོགསངྑཱཏཾ ཀཱརཎཾ.

ནིསྶནྡཔཱཊིཀུལྱཏཾ པཙྩཝེཀྑནྟོཔི ཀབལཱི༹ཀཱརཱཧཱརཾ པརིཝཱིམཾསཏི. ཡཐཱ ཏེ ཛཱཡམྤཏིཀཱཏིཨཱདིཔི ཨོཔམྨསཾསནྡནཾ. ‘‘པརིབྷུཉྫིཏབྦོ ཨཱཧཱརོ’’ཏི པདཾ ཨཱནེཏྭཱ སམྦནྡྷིཏབྦཾ. ཨེས ནཡོ ཨིཏོ པརེསུཔི. ཨཔཊིཀྑིཔིཏྭཱཏི ཨནཔནེཏྭཱ. ཝཊྚཀེན ཝིཡ ཀུཀྐུཊེན ཝིཡ ཙཱཏི ཝིསདིསཱུདཱཧརཎཾ. ཨོདྷིཾ ཨདསྶེཏྭཱཏི མཧནྟགྒཧཎཝསེན ཨོདྷིཾ ཨཀཏྭཱ. སཱིཧེན ཝིཡཱཏི སདིསཱུདཱཧརཎཾ. སོ ཀིར སཔདཱནམེཝ ཁཱདཏི.

ཨགདྷིཏཨམུཙྪིཏཱདིབྷཱཝེན པརིབྷུཉྫིཏབྦཏོ ‘‘ཨམཙྪརཱཡིཏྭཱ’’ཏིཨཱདི ཝུཏྟཾ. ཨབྦྷནྟརེ ཨཏྟཱ ནཱམ ཨཏྠཱིཏི དིཊྛི ཨཏྟཱུཔལདྡྷི, ཏཾསཧགཏེན སམྨོཧེན ཨཏྟཱ ཨཱཧཱརཾ པརིབྷུཉྫཏཱིཏི. སཏིསམྤཛཉྙཝསེནཔཱིཏི ‘‘ཨསིཏེ པཱིཏེ ཁཱཡིཏེ སཱཡིཏེ སམྤཛཱནཀཱརཱི ཧོཏཱི’’ཏི ཨེཏྠ ཝུཏྟསཏིསམྤཛཉྙཝསེནཔི.

‘‘ཨཧོ ཝཏ མཡཾ…པེ… ལབྷེཡྻ’’ནྟི པཏྠནཾ ཝཱ, ‘‘ཧིཡྻོ ཝིཡ…པེ… ན ལདྡྷ’’ནྟི ཨནུསོཙནཾ ཝཱ ཨཀཏྭཱཏི ཡོཛནཱ.

‘‘སནྣིདྷིཾ ན ཨཀཾསུ, བྷཱུམིཡཾ ཝཱ ནིཁཎིཾསུ, ཨགྒིནཱ ཝཱ ཛྷཱཔཡིཾསཱུ’’ཏི ན-ཀཱརཾ ཨཱནེཏྭཱ ཡོཛནཱ. ཨེཝཾ སབྦཏྠ.

པིཎྜཔཱཏཾ ཝཱ ཨཧཱིལེ༹ནྟེན དཱཡཀཾ ཝཱ ཨཧཱིལེ༹ནྟེན པརིབྷུཉྫིཏབྦོཏི ཡོཛནཱ. ས པཏྟཔཱཎཱིཏི ¶ སོ པཏྟཧཏྠོ. ནཱཝཛཱནིཡཱཏི ན ཨཝཛཱནིཡཱ. ཨཏིམཉྙཏཱིཏི ཨཏིཀྐམིཏྭཱ མཉྙཏི, ཨཝཛཱནཱཏཱིཏི ཨཏྠོ.

‘‘ཏཱིཧི པརིཉྙཱཧི པརིཉྙཱཏེ’’ཏི ཝཏྭཱ ཏཱཧི ཀབལཱི༹ཀཱརཱཧཱརསྶ པརིཛཱནནཝིདྷིཾ དསྶེནྟོ ‘‘ཀཐ’’ནྟིཨཱདིམཱཧ. ཏཏྠ སཝཏྠུཀཝསེནཱཏི སསམྦྷཱརཝསེན, སབྷཱཝཏོ པན རཱུཔཱཧརཎཾ ཨོཛམཏྟཾ ཧོཏི. ཨིདཉྷི ཀབལཱི༹ཀཱརཱཧཱརསྶ ལཀྑཎཾ. ཀཱམཾ རསཱརམྨཎཾ ཛིཝ྄ཧཱཔསཱདེ པཊིཧཉྙཏི, ཏེན པན ཨཝིནཱབྷཱཝཏོ སམྤཏྟཝིསཡགཱཧིཏཱཡ ཙ ཛིཝ྄ཧཱཔསཱདསྶ ‘‘ཨོཛཊྛམཀརཱུཔཾ ཀཏྠ པཊིཧཉྙཏཱི’’ཏི ཝུཏྟཾ. ཏསྶཱཏི ཛིཝ྄ཧཱཔསཱདསྶ ¶ . ཨིམེ དྷམྨཱཏི ཨིམེ ཡཐཱཝུཏྟབྷཱུཏུཔཱདཱཡདྷམྨཱ. ཏནྟི རཱུཔཁནྡྷཾ. པརིགྒཎྷཏོཏི པརིགྒཎྷནྟསྶ. ཨུཔྤནྣཱ ཕསྶཔཉྩམཀཱ དྷམྨཱཏི སབྦེཔི ཡེ ཡཐཱནིདྡྷཱརིཏཱ, ཏེཧི སཧཔྤཝཏྟཱཝ སབྦེཔི ཨིམེ. སརསལཀྑཎཏོཏི ཨཏྟནོ ཀིཙྩཏོ ལཀྑཎཏོ ཙ. ཏེསཾ ནཱམརཱུཔབྷཱཝེན ཝཝཏྠཔིཏཱནཾ པཉྩནྣཾ ཁནྡྷཱནཾ པཙྩཡོ ཝིཉྙཱཎཾ. ‘‘ཏསྶ སངྑཱརཱ ཏེསཾ ཨཝིཛྫཱ’’ཏི ཨེཝཾ ཨུདྡྷཾ ཨཱརོཧནཝསེན པཙྩཡཾ. ཨདྷོཨོརོཧནཝསེན པན སལཱ༹ཡཏནཱདིཀེ པརིཡེསནྟོ ཨནུལོམཔཊིལོམཾ པཊིཙྩསམུཔྤཱདཾ པསྶཏི. སལཱ༹ཡཏནཱདཡོཔི ཧི རཱུཔཱརཱུཔདྷམྨཱནཾ ཡཐཱརཧཾ པཙྩཡབྷཱཝེན ཝཝཏྠཔེཏབྦཱཏི. ཡཱཐཱཝཏོ དིཊྛཏྟཱཏི ‘‘ཨིདཾ རཱུཔཾ, ཨེཏྟཀཾ རཱུཔཾ, ན ཨིཏོ བྷིཡྻོ, ཨིདཾ ནཱམཾ, ཨེཏྟཀཾ ནཱམཾ, ན ཨིཏོ བྷིཡྻོ’’ཏི ཙ ཡཐཱབྷཱུཏཾ དིཊྛཏྟཱ. ཨནིཙྩཱནུཔསྶནཱ, དུཀྑཱནུཔསྶནཱ, ཨནཏྟཱནུཔསྶནཱ, ནིབྦིདཱནུཔསྶནཱ, ཝིརཱགཱནུཔསྶནཱ, ནིརོདྷཱནུཔསྶནཱ, པཊིནིསྶགྒཱནུཔསྶནཱཏི ཨིམཱསཾ སཏྟནྣཾ ཨནུཔསྶནཱནཾ ཝསེན. སོཏི ཀབལཱི༹ཀཱརཱཧཱརོ. ཏིལཀྑཎ…པེ… སངྑཱཏཱཡཱཏི ཨནིཙྩཏཱདཱིནཾ ཏིཎྞཾ ལཀྑཎཱནཾ པཊིཝིཛ྄ཛྷནཝསེན ལཀྑཎཝནྟསམྨསནཝསེན ཙ པཝཏྟཉཱཎསངྑཱཏཱཡ. པརིཉྙཱཏོ ཧོཏི ཨནཝསེསཏོ ནཱམརཱུཔསྶ ཉཱཏཏྟཱ ཏཔྤརིཡཱཔནྣཏྟཱ ཙ ཨཱཧཱརསྶ. ཏེནཱཧ ‘‘ཏསྨིཾ ཡེཝཱ’’ཏིཨཱདི. ཚནྡརཱགཱཝཀཌྜྷནེནཱཏི ཚནྡརཱགསྶ པཛཧནེན.

པཉྩ ཀཱམགུཎཱ ཀཱརཎབྷཱུཏཱ ཨེཏསྶ ཨཏྠཱིཏི པཉྩཀཱམགུཎིཀོ. ཏེནཱཧ ‘‘པཉྩཀཱམགུཎསམྦྷཝོ’’ཏི. ཨེཀིསྶཱ ཏཎྷཱཡ པརིཉྙཱ ཨེཀཔརིཉྙཱ. སབྦསྶ པཉྩཀཱམགུཎིཀསྶ རཱགསྶ པརིཉྙཱ, སབྦཔརིཉྙཱ. ཏདུབྷཡསྶཔི མཱུལབྷཱུཏསྶ ཨཱཧཱརསྶ པརིཉྙཱ མཱུལཔརིཉྙཱ. ཨིདཱནི ཨིམཱ ཏིསྶོཔི པརིཉྙཱཡོ ཝིབྷཱགེན དསྶེཏུཾ ‘‘ཡོ བྷིཀྑཱུ’’ཏིཨཱདི ཨཱརདྡྷཾ. ཛིཝ྄ཧཱདྭཱརེ ཨེཀརསཏཎྷཾ པརིཛཱནཱཏཱིཏི ཛིཝ྄ཧཱཡ རསཾ སཱཡིཏྭཱ ཨིཏི པཊིསཉྩིཀྑཏི ‘‘ཡོ ཡམེཏྠ རསོ, སོ ཝཏྠུཀཱམཝསེན ཨོཛཊྛམཀརཱུཔཾ ཧོཏི ཛིཝ྄ཧཱཡཏནཾ པསཱདོ. སོ ཀིཾ ནིསྶིཏོ? ཙཏུམཧཱབྷཱུཏནིསྶིཏོ. ཏཾསཧཛཱཏོ ཝཎྞོ གནྡྷོ རསོ ཨོཛཱ ཛཱིཝིཏིནྡྲིཡནྟི ཨིམེ དྷམྨཱ རཱུཔཀྑནྡྷོ ནཱམ. ཡོ ཏསྨིཾ རསེ ཨསྶཱདོ, ཨཡཾ རསཏཎྷཱ. ཏཾསཧགཏཱ ¶ ཕསྶཱདཡོ དྷམྨཱ ཙཏྟཱརོ ཨརཱུཔཀྑནྡྷཱ’’ཏིཨཱདིཝསེན. སབྦཾ ཨཊྛཀཐཱཡཾ ཨཱགཏཝསེན ཝེདིཏབྦཾ. ཏེནཱཧ ‘‘ཏེན པཉྩཀཱམགུཎིཀོ རཱགོ པརིཉྙཱཏོཝ ཧོཏཱི’’ཏི. ཏཏྠ ¶ ཏེནཱཏི ཡོ བྷིཀྑུ ཛིཝ྄ཧཱདྭཱརེ རསཏཎྷཾ པརིཛཱནཱཏི, ཏེན. ཀཐཾ པན ཨེཀསྨིཾ དྭཱརེ ཏཎྷཾ པརིཛཱནཏོ པཉྩསུ དྭཱརེསུ རཱགོ པརིཉྙཱཏོ ཧོཏཱིཏི ཨཱཧ ‘‘ཀསྨཱ’’ཏིཨཱདི. ཏསྶཱཡེཝཱཏི ཏཎྷཱཡ ཨེཝ ཏཎྷཱསཱམཉྙཏོ ཨེཀཏྟནཡཝསེན ཝུཏྟཾ. ཏཏྠཱཏི པཉྩསུ དྭཱརེསུ. ཨུཔྤཛྫནཏོཏི རཱུཔརཱགཱདིབྷཱཝེན ཨུཔྤཛྫནཏོ. ལོབྷོ ཨེཝ ཧི ཏཎྷཱཡནཊྛེན ‘‘ཏཎྷཱ’’ཏིཔི, རཛྫནཊྛེན ‘‘རཱགོ’’ཏིཔི ཝུཙྩཏི. ཏེནཱཧ ‘‘སཱཡེཝ ཧཱི’’ཏིཨཱདི. ཨིདཱནི ཝུཏྟམེཝཏྠཾ ‘‘ཡཐཱ’’ཏིཨཱདིནཱ ཨུཔམཱཡ སམྤིཎྜེཏི. པཉྩམགྒེ ཧནཏོཏི པཉྩསུ མགྒེསུ སཉྩརིཏྟཾ ཀརོནྟེན མགྒགཱམིནོ ཧནནྟོ ‘‘མགྒེ ཧནཏོ’’ཏི ཝུཏྟོ.

སབྱཉྫནེ པིཎྜཔཱཏསཉྙིཏེ བྷཏྟསམཱུཧེ མནུཉྙེ རཱུཔེ རཱུཔསདྡཱདཡོ ལབྦྷནྟི, ཏཏྠ པཉྩཀཱམགུཎརཱགསྶ སམྦྷཝཾ དསྶེཏུཾ ‘‘ཀཐ’’ནྟིཨཱདི ཝུཏྟཾ. སཏིསམྤཛཉྙེན པརིགྒཧེཏྭཱཏི སབྦབྷཱགིཡེན ཀམྨཊྛཱནཔརིཔཱལཀེན པརིགྒཧེཏྭཱ. ནིཙྪནྡརཱགཔརིབྷོགེནཱཏི མགྒཱདྷིགམསིདྡྷེན ནིཙྪནྡརཱགཔརིབྷོགེན པརིབྷུཏྟེ. སོཏི ཀཱམགུཎིཀོ རཱགོ.

ཏསྨིཾ སཏཱིཏི ཀབལཱི༹ཀཱརཱཧཱརེ སཏི. ཏསྶཱཏི པཉྩཀཱམགུཎིཀརཱགསྶ. ཨུཔྤཏྟིཏོཏི ཨུཔྤཛྫནཏོ. ན ཧི ཨཱཧཱརཱལཱབྷེན ཛིགྷཙྪཱདུབྦལྱཔརེཏསྶ ཀཱམཔརིབྷོགིཙྪཱ སམྦྷཝཏི. ཨུཔནིཛ྄ཛྷཱནཙིཏྟནྟི རཱགཝསེན ཨཉྙམཉྙཾ ཨོལོཀནཙིཏྟཾ.

ནཏྠི ཏཾ སཾཡོཛནནྟི པཉྩཝིདྷམྤི ཨུདྡྷམྦྷཱགིཡསཾཡོཛནཾ སནྡྷཱཡ ཝུཏྟཾ. ཏེནཱཧ ‘‘ཏེན རཱགེན…པེ… ནཏྠཱི’’ཏི. ཏེནཱཏི ཀཱམརཱགེན. ཨེཏྟཀེནཱཏི ཡཐཱཝུཏྟཱཡ དེསནཱཡ. ཀཐེཏུཾ ཝཊྚཏཱིཏི ཨིམཾ པཋམཱཧཱརཀཐཾ ཀཐེནྟེན དྷམྨཀཐིཀེན.

པཋམཱཧཱརཝཎྞནཱ ནིཊྛིཏཱ.

དུཏིཡཱཧཱརཝཎྞནཱ

དུཏིཡེཏི དུཏིཡེ ཨཱཧཱརེ. ཨུདྡཱལིཏཙམྨཱཏི ཨུཔྤཱཊིཏཙམྨཱ, སབྦསོ ཨཔནཱིཏཙམྨཱཏི ཨཏྠོ. ན སཀྐོཏི དུབྦལབྷཱཝཏོ, ཏཐཱ ཧི ཨིཏྠཱི ‘‘ཨབལཱ’’ཏི ཝུཙྩཏི. སིལཱཀུཊྚཱདཱིནནྟི ཨཱདི-སདྡེན ཨིཊྛཀཀུཊྚམཏྟིཀཱཀུཊྚཱདཱིནཾ སངྒཧོ. ཨུཎྞནཱབྷཱིཏི མཀྐཊཀཾ. སརབཱུཏི གྷརགོལི༹ཀཱ ¶ ¶ . ཨུཙྩཱལིངྒཔཱཎཀཱ ནཱམ ལོམསཱ པཱཎཀཱ. ཨཱཀཱསནིསྶིཏཱཏི ཨཱཀཱསཙཱརིནོ. ལུཉྩིཏྭཱཏི ཨུཔྤཱཊེཏྭཱ.

ཏིསྶོ པརིཉྙཱཏི ཧེཊྛཱ ཝུཏྟཱ ཉཱཏཔརིཉྙཱདཡོ ཏིསྶོ པརིཉྙཱ. ཏམྨཱུལཀཏྟཱཏི ཕསྶམཱུལཀཏྟཱ. དེསནཱ ཡཱཝ ཨརཧཏྟཱ ཀཐིཏཱ སབྦསོ ཝེདནཱསུ པརིཉྙཱཏཱསུ ཀིལེསཱནཾ ལེསསྶཔི ཨབྷཱཝཏོ.

དུཏིཡཱཧཱརཝཎྞནཱ ནིཊྛིཏཱ.

ཏཏིཡཱཧཱརཝཎྞནཱ

ཨངྒཱརཀཱསུནྟི ཨངྒཱརརཱསིཾ. ཕུཎནྟཱིཏི ཨཏྟནོ ཨུཔརི སཡམེཝ ཨཱཀིརནྟཱིཏི ཨཏྠོ. ཏེནཱཧ ‘‘ནརཱ རུདནྟཱ པརིདཌྜྷགཏྟཱ’’ཏི. ནརཱཏི པུརིསཱཏི ཨཏྠོ, ན མནུསྶཱ. བྷཡཉྷི མཾ ཝིནྡཏཱིཏི བྷཡསྶ ཝསེན ཀརོནྟོ བྷཡཾ ལབྷཏི ནཱམ. སནྟརམཱནོཝཱཏི སུཊྛུ ཏརམཱནོ ཨེཝ ཧུཏྭཱ. པོརིསཾ ཝུཙྩཏི པུརིསཔྤམཱཎཾ, ཏསྨཱ ཨཏིརེཀཔོརིསཱ པུརིསཔྤམཱཎཏོ ཨདྷིཀཱ. ཏེནཱཧ ‘‘པཉྩརཏནཔྤམཱཎཱ’’ཏི. ཨསྶཱཏི ཀཱསུཡཱ. ཏདབྷཱཝེཏི ཏེསཾ ཛཱལཱདྷཱུམཱནཾ ཨབྷཱཝེ. ཨཱརཀཱཝསྶཱཏི ཨཱརཀཱ ཨེཝ ཨསྶ.

ཨངྒཱརཀཱསུ ཝིཡ ཏེབྷཱུམཀཝཊྚཾ ཨེཀཱདསནྣཾ ཨགྒཱིནཾ ཝསེན མཧཱཔརིལཱ༹ཧཏོ. ཛིཝི…པེ… པུཐུཛྫནོ ཏེཧི ཨགྒཱིཧི དཧིཏབྦཏོ. དྭེ བལ…པེ… ཀམྨཾ ཨནིཙྪནྟསྶེཝ ཏསྶ ཝཊྚདུཀྑེ པཱཏནཏོ. ཨཱཡཱུཧནཱུཔཀཌྜྷནཱནཾ ཀཱལབྷེདོ ན ཙིནྟེཏབྦོ ཨེཀནྟབྷཱཝིནོ ཕལསྶ ནིཔྥཱདིཏཏྟཱཏི ཨཱཧ ‘‘ཀམྨཾ ཧཱི’’ཏིཨཱདི.

ཕསྶེ ཝུཏྟནཡེནེཝཱཏི ཏཏྠ ‘‘ཕསྶོ སངྑཱརཀྑནྡྷོ’’ཏི ཝུཏྟཾ, ཨིདྷ ‘‘མནོསཉྩེཏནཱ སངྑཱརཀྑནྡྷོ’’ཏི ཝཏྟབྦཾ. སེསཾ ཝུཏྟནཡམེཝཱཏི. ‘‘ཏཎྷཱཔཙྩཡཱ ཨུཔཱདཱནཾ, ཨུཔཱདཱནཔཙྩཡཱ བྷཝོ’’ཏི ཝཙནཏོ མནོསཉྩེཏནཱཡ ཏཎྷཱ མཱུལཀཱརཎནྟི ཨཱཧ ‘‘ཏཎྷཱམཱུལཀཏྟཱ མནོསཉྩེཏནཱཡཱ’’ཏི. ཏེནཱཧ ‘‘ན ཧཱི’’ཏིཨཱདི. ཀེཙི པན ཡསྨཱ མནོསཉྩེཏནཱཡ ཕལབྷཱུཏཾ ཝེདནཾ པཊིཙྩ ཏཎྷཱ ཨུཔྤཛྫཏི, ཏསྨཱ ཨེཝཾ ཝུཏྟནྟི ཝདནྟི.

ཏཏིཡཱཧཱརཝཎྞནཱ ནིཊྛིཏཱ.

ཙཏུཏྠཱཧཱརཝཎྞནཱ

ཨནིཊྛཔཱཔནཝསེན ¶ ¶ ཏཾསམངྒཱིཔུགྒལཾ ཨཱགཙྪཏཱིཏི ཨཱགུ, པཱཔཾ, ཏཾ ཙརཏི སཱིལེནཱཏི ཨཱགུཙཱརཱི. ཏེནཱཧ ‘‘པཱཔཙཱརི’’ནྟི.

རཱཛཱ ཝིཡ ཀམྨཾ པརམིསྶརབྷཱཝཏོ. ཨཱགུཙཱརཱི པུརིསོ ཝིཡ…པེ… པུཐུཛྫནོ དུཀྑཝཏྠུབྷཱཝཏོ. ཨཱདིནྣཔྤཧཱརཝཎཱནི ཏཱིཎི སཏྟིསཏཱནི ཝིཡ པུཐུཛྫནསྶ ཨཱཏུརམཱནམཧཱདུཀྑཔཏིཊྛཾ པཊིསནྡྷིཝིཉྙཱཎཾ. ཏེནཱཧ སཏྟི…པེ… དུཀྑནྟི.

ཏམྨཱུལཀཏྟཱཏི པཊིསནྡྷིཝིཉྙཱཎམཱུལཀཏྟཱ ཨིཏོ པརཾ པཝཏྟནཱམརཱུཔསྶ.

ཙཏུཏྠཱཧཱརཝཎྞནཱ ནིཊྛིཏཱ.

པུཏྟམཾསཱུཔམསུཏྟཝཎྞནཱ ནིཊྛིཏཱ.

༤. ཨཏྠིརཱགསུཏྟཝཎྞནཱ

༦༤. ཙཏུཏྠེ སོཏི ལོབྷོ. རཉྫནཝསེནཱཏི རངྒཛཱཏཾ ཝིཡ ཏསྶ ཙིཏྟསྶ ཨནུརཉྫནཝསེན. ནནྡནཝསེནཱཏི སཔྤཱིཏིཀཏཱཡ ཨཱརམྨཎསྶ ཨབྷིནནྡནཝསེན. ཏཎྷཱཡནཝསེནཱཏི ཝིསཡཀཏྟུཀཱམཏཱཡ ཝསེན. ཨེཀོ ཨེཝ ཧི ལོབྷོ པཝཏྟིཨཱཀཱརཝསེན ཏཐཱ ཝུཏྟོ. པཏིཊྛིཏནྟི ལདྡྷསབྷཱཝཾ. ཏཏྠཱཏི ཝཊྚེ. ཨཱཧཱརེཏི ཀེཙི. ཝིཉྙཱཎནྟི ཨབྷིསངྑཱརཝིཉྙཱཎཾ. ཝིརུལ༹ྷནྟི ཕལནིབྦཏྟིཡཱ ཝིརུལ༹ྷིཔྤཏྟཾ. ཏེནཱཧ ‘‘ཀམྨཾ ཛཝཱཔེཏྭཱ’’ཏིཨཱདི. ཏཏྠ ཛཝཱཔེཏྭཱཏི ཕལཾ གཱཧཱཔེཏྭཱ. ཨབྷིསངྑཱརཝིཉྙཱཎཉྷི ཨཏྟནཱ སཧཛཱཏཱནཾ སཧཛཱཏཱདིཔཙྩཡེཧི ཙེཝ ཨཱཧཱརཔཙྩཡེན ཙ པཙྩཡོ ཧུཏྭཱ ཏསྶ ཨཏྟནོ ཕལུཔྤཱདནེ སཱམཏྠིཡཏྟཱ ཝིརུལ༹ྷིཔྤཏྟཾ. ཏེནཱཧ ‘‘ཀམྨཾ སནྟཱནེ ལདྡྷབྷཱཝཾ ཝིརུལ༹ྷིཔྤཏྟཉྩསྶ ཧོཏཱི’’ཏི. ཝཊྚཀཐཱ ཨེསཱཏི ཀཏྭཱ ‘‘ཡཏྠཱཏི ཏེབྷཱུམཀཝཊྚེ བྷུམྨ’’ནྟི ཝུཏྟཾ. སབྦཏྠཱཏི སབྦེསུ. པུརིམཔདེ ཨེཏཾ བྷུམྨནྟི ‘‘ཡཏྠ ཏཏྠཱ’’ཏི ཨཱགཏཾ ཨེཏཾ བྷུམྨཝཙནཾ པུརིམསྨིཾ པུརིམསྨིཾ པདེ ཝིསཡབྷཱུཏེ. ཏཉྷི ཨཱརབྦྷ ཨེཏཾ ‘‘ཡཏྠ ཏཏྠཱ’’ཏི བྷུམྨཝཙནཾ ཝུཏྟཾ. ཨིམསྨིཾ ཝིཔཱཀཝཊྚེཏི པཙྩུཔྤནྣེ ཝིཔཱཀཝཊྚེ. ཨཱཡཏིཾ ཝཊྚཧེཏུཀེ སངྑཱརེ སནྡྷཱཡ ཝུཏྟཾ ‘‘ཡཏྠ ཨཏྠི ཨཱཡཏིཾ པུནབྦྷཝཱབྷིནིབྦཏྟཱི’’ཏི ཝཙནཏོ ¶ . པུནབྦྷཝཱབྷིནིབྦཏྟཱིཏི ཙ པཊིསནྡྷི ཨདྷིཔྤེཏཱཏི ཝུཏྟཾ ¶ ‘‘ཡཏྠ ཨཏྠི ཨཱཡཏིཾ པུནབྦྷཝཱབྷིནིབྦཏྟི, ཨཏྠི ཏཏྠ ཨཱཡཏིཾ ཛཱཏིཛརཱམརཎ’’ནྟི. ཛཱཏཱིཏི ཙེཏྠ མཱཏུཀུཙྪིཏོ ནིཀྑམནཾ ཨདྷིཔྤེཏཾ. ཡསྨིཾ ཋཱནེཏི ཡསྨིཾ ཀཱརཎེ སཏི.

ཀཱརཎཉྩེཏྠ སངྑཱརཱ ཝེདིཏབྦཱ. ཏེ ཧི ཨཱཡཏིཾ པུནབྦྷཝཱབྷིནིབྦཏྟིཡཱ ཧེཏཱུ, ཏཎྷཱཨཝིཛྫཱཡོ, ཀཱལགཏིཨཱདཡོ ཙ ཀམྨསྶ སམྦྷཱརཱ. ཀེཙི པན ཀིལེསཝཊྚཀམྨགཏིཀཱལཱ ཙཱཏི ཨདྷིཔྤཱཡེན ‘‘ཀཱལགཏིཨཱདཡོ ཙ ཀམྨསྶ སམྦྷཱརཱ’’ཏི ཝདནྟི. ཏཾཏཾབྷཝཔཏྠནཱཡ ཏཐཱ ཏཐཱ གཏོ ཏིཝིདྷོ བྷཝོཝ ཏེབྷཱུམཀཝཊྚཾ. ཏེནཱཧ ‘‘ཡཏྠཱཏི ཏེབྷཱུམཀཝཊྚེ’’ཏི. ཏཐཱ ཙཱཧ ‘‘སསམྦྷཱརཀཀམྨཾ བྷཝེསུ རཱུཔཾ སམུཊྛཱཔེཏཱི’’ཏི. རཱུཔནྟི ཨཏྟབྷཱཝཾ.

སངྑིཔིཏྭཱཏི ཏཱིསུ ཨཀཏྭཱ ཝིཉྙཱཎེན ཨེཀསངྑེཔཾ ཀཏྭཱཏི ཨཏྠོ. ཨེཀོ སནྡྷཱིཏི ཨེཀོ ཧེཏུཕལསནྡྷི. ཝིཔཱཀཝིདྷིནྟི སལཱ༹ཡཏནཱདིཀཾ ཝེདནཱཝསཱནཾ ཝིཔཱཀཝིདྷིཾ. ‘‘ནཱམརཱུཔེན སདྡྷི’’ནྟི པདཾ ཨཱནེཏྭཱ སམྦནྡྷོ. ནཱམརཱུཔེནཱཏི ཝཱ སཧཡོགེ ཀརཎཝཙནཾ. ཨིདྷ ཨེཀོ སནྡྷཱིཏི ཨེཀོ ཧེཏུཕལསནྡྷི. ཨཱཡཏིབྷཝསྶཱཏི ཨཱཡཏིཾ ཨུཔཔཏྟིབྷཝསྶ. ཏེན ཙེཏྠ ཨེཀོ སནྡྷི ཧེཏུཕལསནྡྷི ཝེདིཏབྦོ.

ཁཱིཎཱསཝསྶ ཨགྒམགྒཱདྷིགམནཏོཝ པཝཏྟཀམྨསྶ མགྒེན སཧཱཡཝེཀལླསྶ ཀཏཏྟཱ ཨཝིཛྫམཱནཾ. སཱུརིཡརསྨིསམནྟི ཏཏོ ཨེཝ ཝུཏྟནཡེནེཝ ཨཔྤཏིཊྛིཏསཱུརིཡརསྨིསམཾ. སཱཏི རསྨི. ཀཱཡཱདཡོཏི ཀཱཡདྭཱརཱདཡོ. ཀཏཀམྨནྟི པཙྩཡེཧི ཀཏབྷཱཝཾ ཨུཔཱདཱཡ ཝུཏྟཾ, ན ཀམྨལཀྑཎཔཏྟཏོ. ཏེནཱཧ ‘‘ཀུསལཱཀུསལཾ ནཱམ ན ཧོཏཱི’’ཏི. ཀིརིཡམཏྟེཏི ཨཝིཔཱཀདྷམྨཏྟཱ ཀཱཡིཀཱདིཔཡོགམཏྟེ ཋཏྭཱ. ཨཝིཔཱཀཾ ཧོཏི ཏེསཾ ཨཝིཔཱཀདྷམྨཏྟཱ.

ཨཏྠིརཱགསུཏྟཝཎྞནཱ ནིཊྛིཏཱ.

༥. ནགརསུཏྟཝཎྞནཱ

༦༥. པཉྩམསུཏྟེ ‘‘པུབྦེཝ མེ, བྷིཀྑཝེ, སམྦོདྷཱ’’ཏིཨཱདི ཧེཊྛཱ སཾཝཎྞིཏམེཝཱཏི ཨཝུཏྟམེཝ སཾཝཎྞེཏུཾ ‘‘ནཱམརཱུཔེ ཁོ སཏཱི’’ཏི ཨཱརདྡྷོ ¶ . ཏཏྠ དྭཱདསཔདིཀེ པཊིཙྩསམུཔྤཱདེ ཨིམསྨིཾ སུཏྟེ ཡཱནི དྭེ པདཱནི ཨགྒཧིཏཱནི, ནེསཾ ཨགྒཧཎེ ཀཱརཎཾ པུཙྪིཏྭཱ ཝིསྶཛྫེཏུཀཱམོ ཏེསཾ གཧེཏབྦཀཱརཎཾ ཏཱཝ དསྶེནྟོ ‘‘ཨེཏྠཱ’’ཏིཨཱདིམཱཧ. པཙྩཀྑབྷཱུཏཾ པཙྩུཔྤནྣཾ བྷཝཾ པཋམཾ གཧེཏྭཱ ཏདནནྟརཾ ཨནཱགཏསྶ ‘‘དུཏིཡ’’ནྟི གཧཎེ ཨཏཱིཏོ ཏཏིཡོ ཧོཏཱིཏི ¶ ཨཱཧ ‘‘ཨཝིཛྫཱསངྑཱརཱ ཧི ཏཏིཡོ བྷཝོ’’ཏི. ནནུ ཙེཏྠ ཨནཱགཏསྶ བྷཝསྶ གཧཎཾ ན སམྦྷཝཏི པཙྩུཔྤནྣབྷཝཝསེན ཨབྷིནིཝེསསྶ ཛོཏིཏཏྟཱཏི? སཙྩམེཏཾ, ཀཱརཎེ པན གཧིཏེ ཕལཾ གཧིཏམེཝ ཧོཏཱིཏི ཏཐཱ ཝུཏྟནྟི དཊྛབྦཾ. ཨཔིཙེཏྠ ཨནཱགཏོ ཨདྡྷཱ ཨཏྠཏོ སངྒཧིཏོ ཨེཝ ཡཏོ ‘‘ནཱམརཱུཔཔཙྩཡཱ སལཱ༹ཡཏན’’ནྟིཨཱདིནཱ ཨནཱགཏདྡྷསཾགཱཧིཏཱ དེསནཱ པཝཏྟཱ, ཙཏུཝོཀཱརཝསེན ཝིཉྙཱཎཔཙྩཡཱ ནཱམནྟི ཝིསེསོ ཨཏྠི. ཏསྨཱ ‘‘པཉྩཝོཀཱརཝསེནཱ’’ཏི ཝུཏྟཾ. ཏེཧཱིཏི ཨཝིཛྫཱསངྑཱརེཧི ཨཱརམྨཎབྷཱུཏེཧི. ཨཡཾ ཝིཔསྶནཱཏི ཨདྡྷཱཔཙྩུཔྤནྣཝསེན ཨུདཡབྦཡཾ པསྶནྟསྶ པཝཏྟཝིཔསྶནཱ. ན གྷཊཱིཡཏཱིཏི ན སམིཛ྄ཛྷཏི. མཧཱ…པེ… ཨབྷིནིཝིཊྛོཏི ན གྷཊནེ ཀཱརཎམཱཧ, ཧེཊྛཱ གཧིཏཏྟཱ པཱཊིཡེཀྐཾ སམྨསནཱིཡཾ ན ཧོཏཱིཏི ཨདྷིཔྤཱཡོ.

ཨདིཊྛེསཱུཏི ཨནཝབུདྡྷེསུ. ཙཏུསཙྩསྶ ཨནུབོདྷེན ན བྷཝིཏབྦནྟི ཨཱཧ ‘‘ན སཀྐཱ བུདྡྷེན བྷཝིཏུ’’ནྟི. ཨིམིནཱཏི མཧཱསཏྟེན. ཏེཏི ཨཝིཛྫཱསངྑཱརཱ. བྷཝཨུཔཱདཱནཏཎྷཱཝསེནཱཏི བྷཝཨུཔཱདཱནཏཎྷཱདསྶནཝསེན. དིཊྛཱཝ ‘‘ཏཾསཧགཏཱ’’ཏི སམཱནཡོགཀྑམཏྟཱ. ན པརབྷཱགཾ ཁནེཡྻ ཨཏྟནཱ ཨིཙྪིཏསྶ གཧིཏཏྟཱ པརབྷཱགེ ཨཉྙསྶ ཨབྷཱཝཏོ ཙ. ཏེནཱཧ ‘‘ཀསྶཙི ནཏྠིཏཱཡཱ’’ཏི. པཊིནིཝཏྟེསཱིཏི པཊིསཾཧརི. པཊིནིཝཏྟནེ པན ཀཱརཎཾ དསྶེཏུཾ ‘‘ཏདེཏ’’ནྟིཨཱདི ཝུཏྟཾ. ཨབྷིནྣཊྛཱནནྟི ཨཁཎིཏཊྛཱནཾ.

པཙྩཡཏོཏི ཧེཏུཏོ, སངྑཱརཏོཏི ཨཏྠོ. ‘‘ཀིམྷི ནུ ཁོ སཏི ཛརཱམརཎཾ ཧོཏཱི’’ཏིཨཱདིནཱ ཧེཏུཔརམྤརཝསེན ཕལཔརམྤརཱཡ ཀིཏྟམཱནཱཡ, ཀིམྷི ནུ ཁོ སཏི ཝིཉྙཱཎཾ ཧོཏཱིཏི ཙ ཝིཙཱརཎཱཡ སངྑཱརེ ཁོ སཏི ཝིཉྙཱཎསྶ ཝིསེསཏོ ཀཱརཎབྷཱུཏོ སངྑཱརོ ཨགྒཧིཏོ, ཏཏོ ཝིཉྙཱཎཾ པཊིནིཝཏྟཏི ནཱམ, ན སབྦཔཙྩཡཏོ. ཏེནེཝཱཧ ‘‘ནཱམརཱུཔེ ཁོ སཏི ཝིཉྙཱཎཾ ཧོཏཱི’’ཏི. ཀིཾ ནཱམ ཧེཏྠ ¶ སཧཛཱཏཱདིཝསེནེཝ པཙྩཡབྷཱུཏཾ ཨདྷིཔྤེཏཾ, ན ཀམྨཱུཔནིསྶཡཝསེན པཙྩུཔྤནྣཝསེན ཨབྷིནིཝེསསྶ ཛོཏིཏཏྟཱ. ཨཱརམྨཎཏོཏི ཨཝིཛྫཱསངྑཱརསངྑཱཏཨཱརམྨཎཏོ, ཨཏཱིཏབྷཝསངྑཱཏཨཱརམྨཎཏོ. ཨཏཱིཏདྡྷཔརིཡཱཔནྣཱ ཧི ཨཝིཛྫཱསངྑཱརཱ. ཏཏོ པཊིནིཝཏྟམཱནཾ ཝིཉྙཱཎཾ ཨཏཱིཏབྷཝོཔི པཊིནིཝཏྟཏི ནཱམ. ཨུབྷཡམྤཱིཏི པཊིསནྡྷིཝིཉྙཱཎཾ ཝིཔསྶནཱཝིཉྙཱཎམྤི. ནཱམརཱུཔཾ ན ཨཏིཀྐམཏཱིཏི པཙྩཡབྷཱུཏཾ ཨཱརམྨཎབྷཱུཏཉྩ ནཱམརཱུཔཾ ན ཨཏིཀྐམཏི ཏེན ཝིནཱ ཨཝཏྟནཏོ. ཏེནཱཧ ‘‘ནཱམརཱུཔཏོ པརཾ ན གཙྪཏཱི’’ཏི. ཝིཉྙཱཎེ ནཱམརཱུཔསྶ པཙྩཡེ ཧོནྟེཏི པཊིསནྡྷིཝིཉྙཱཎེ ནཱམརཱུཔསྶ པཙྩཡེ ཧོནྟེ. ནཱམརཱུཔེ ཝིཉྙཱཎསྶ པཙྩཡེ ཧོནྟེཏི ནཱམརཱུཔེ པཊིསནྡྷིཝིཉྙཱཎསྶ པཙྩཡེ ཧོནྟེ. ཙཏུཝོཀཱརཔཉྩཝོཀཱརབྷཝཝསེན ཡཐཱརཧཾ ཡོཛནཱ ཝེདིཏབྦཱ. དྭཱིསུཔི ཨཉྙམཉྙཾ པཙྩཡེསུ ཧོནྟེསཱུཏི ¶ པན པཉྩཝོཀཱརབྷཝཝསེན. ཨེཏྟཀེནཱཏི ཨེཝཾ ཝིཉྙཱཎནཱམརཱུཔཱནཾ ཨཉྙམཉྙཾ ཨུཔཏྠམྦྷཝསེན པཝཏྟིཡཱ. ཛཱཡེཐ ཝཱ ཨུཔཔཛྫེཐ ཝཱཏི ‘‘སཏྟོ ཛཱཡཏི ཨུཔཔཛྫཏཱི’’ཏི སམཉྙཱ ཧོཏི ཝིཉྙཱཎནཱམརཱུཔཝིནིམུཏྟསྶ སཏྟཔཉྙཏྟིཡཱ ཨུཔཱདཱནབྷཱུཏསྶ དྷམྨསྶ ཨབྷཱཝཏོ. ཏེནཱཧ ‘‘ཨིཏོ ཧཱི’’ཏིཨཱདི. ཨེཏདེཝཱཏི ‘‘ཝིཉྙཱཎཾ ནཱམརཱུཔ’’ནྟི ཨེཏཾ དྭཡམེཝ.

ཨཔརཱཔརཙུཏིཔཊིསནྡྷཱིཧཱིཏི ཨཔརཱཔརཙུཏིཔཊིསནྡྷིདཱིཔཀེཧི ‘‘ཙཝཏི, ཨུཔཔཛྫཏཱི’’ཏི དྭཱིཧི པདེཧི. པཉྩ པདཱནཱིཏི ‘‘ཛཱཡེཐ ཝཱ’’ཏིཨཱདཱིནི པཉྩ པདཱནི. ནནུ ཏཏྠ པཋམཏཏིཡེཧི ཙཏུཏྠཔཉྩམཱནི ཨཏྠཏོ ཨབྷིནྣཱནཱིཏི? སཙྩཾ, ཝིཉྙཱཎནཱམརཱུཔཱནཾ ཨཔརཱཔརུཔྤཏྟིདསྶནཏྠཾ ཨེཝཾ ཝུཏྟཾ. ཏེནཱཧ ‘‘ཨཔརཱཔརཙུཏིཔཊིསནྡྷཱིཧཱི’’ཏི. ཨེཏྟཱཝཏཱཏི ཝུཏྟམེཝཏྠནྟི ཡོ ‘‘ཨེཏྟཱཝཏཱ’’ཏི པདེན པུབྦེ ཝུཏྟོ, ཏམེཝ ཡཐཱཝུཏྟམཏྠཾ ‘‘ཡདིད’’ནྟིཨཱདིནཱ ནིཡྻཱཏེནྟོ པུན ཝཏྭཱ. ཨནུལོམཔཙྩཡཱཀཱརཝསེནཱཏི པཙྩཡདྷམྨདསྶནཔུབྦཀཔཙྩཡུཔྤནྣདྷམྨདསྶནཝསེན. པཙྩཡདྷམྨཱནཉྷི ཨཏྟནོ པཙྩཡུཔྤནྣསྶ པཙྩཡབྷཱཝོ ཨིདཔྤཙྩཡཏཱ པཙྩཡཱཀཱརོ, སོ ཙ ‘‘ཨཝིཛྫཱཔཙྩཡཱ སངྑཱརཱ’’ཏིཨཱདིནཱ ཝུཏྟོ སངྑཱརུཔྤཏྟིཡཱ ཨནུལོམནཏོ ཨནུལོམཔཙྩཡཱཀཱརོ, ཏསྶ ཝསེན.

ཨཱཔཏོཏི ¶ པརིཁཱགཏཨུདཀཏོ. དྭཱརསམྤཏྟིཡཱ ཏཏྠ ཝསནྟཱནཾ པཝེསནནིགྒམནཕཱསུཏཱཡ ཨུཔབྷོགཔརིབྷོགཝཏྠུསམྤཏྟིཡཱ སརཱིརཙིཏྟསུཁཏཱཡ ནགརསྶ མནུཉྙཏཱཏི ཝུཏྟཾ ‘‘སམནྟཱ …པེ… རམཎཱིཡ’’ནྟི. པུབྦེ སུཉྙབྷཱཝེན ཨརཉྙསདིསཾ ཧུཏྭཱ ཋིཏཾ ཛནཝཱསཾ ཀརོནྟེ ནགརསྶ ལཀྑཎཔྤཏྟཾ ཧོཏཱིཏི ཝུཏྟཾ ‘‘ཏཾ ཨཔརེན སམཡེན ཨིདྡྷཉྩེཝ ཨསྶ ཕཱིཏཉྩཱ’’ཏི.

‘‘པུབྦེཝ ཁོ པནསྶ ཀཱཡཀམྨཾ ཝཙཱིཀམྨཾ ཨཱཛཱིཝོ ཙ སུཔརིསུདྡྷོ’’ཏི ཝཙནཏོ ཏཱིཧི ཝིརཏཱིཧི སདྡྷིཾ པུབྦབྷཱགམགྒོཔི ཨཊྛངྒིཀཝོཧཱརཾ ལདྡྷུཾ ཨརཧཏཱིཏི ཝུཏྟཾ ‘‘ཨཊྛངྒིཀསྶ ཝིཔསྶནཱམགྒསྶཱ’’ཏི. ཝིཔསྶནཱཡ ཙིཎྞནྟེཏི ཝིཔསྶནཱཡ སཉྩརིཏཏཱཡ ཏཏྠ ཏཏྠ ཏཱཡ ཝིཔསྶནཱཡ ཏཱིརིཏེ པརིཡེསིཏེ. ལོཀུཏྟརམགྒདསྶནནྟི ཨནུམཱནཱདིཝསེན ལོཀུཏྟརམགྒསྶ དསྶནཾ. ཏཐཱ ཧི ནིབྦཱནནགརསྶ དསྶནཾ དཊྛབྦཾ. དིཊྛཀཱལོཏི ཨདྷིགམཝསེན དིཊྛཀཱལོ. མགྒཕལཝསེན ཨུཔྤནྣཱ པརོཔཎྞཱས ཨནཝཛྫདྷམྨཱ, པཙྩཝེཀྑཎཉཱཎཾ པན ཏེསཾ ཝཝཏྠཱཔཀཾ. ཡཱཔེཏྭཱཏི ཙརཱཔེཏྭཱ.

ཨཝཏྟམཱནཀཊྛེནཱཏི བུདྡྷསུཉྙེ ལོཀེ ཀསྶཙི སནྟཱནེ ཨཔྤཝཏྟནཏོཝ ཨུཔྤཱདཱདིཝསེན ཝཏྟམཱནཝསེན. ཏཐཱ ཧི བྷགཝཱ ‘‘ཨནུཔྤནྣསྶ མགྒསྶ ཨུཔྤཱདེཏཱ, ཨསཉྫཱཏསྶ སཉྫནེཏཱ’’ཏིཨཱདིཀེཧི ¶ ཐོམིཏོ. པུབྦཀེཧི མཧེསཱིཧི པཊིཔནྣོ ཧི ཨརིཡམགྒོ ཨིཏརེཧི ཨནྟརཱ ཀེཧིཙི ཨཝལ༹ཉྫིཏོཏི ཝུཏྟཾ ‘‘ཨཝལ༹ཉྫནཊྛེན པུརཱཎམགྒོ’’ཏི. ཛྷཱནསྶཱདེནཱཏི ཛྷཱནསུཁེན ཛྷཱནཔཱིཏིཡཱ. སུབྷིཀྑཾ པཎཱིཏདྷམྨཱམཏཏཱཡ ཏིཏྟིཨཱཝཧཾ. པུཔྥིཏཾ ཨུཔསོབྷིཏཾ. ཡཱཝ དསསཧསྶཙཀྐཝཱལེ༹ཏི ཝུཏྟཾ ‘‘ཨེཀིསྶཱ ལོཀདྷཱཏུཡཱ’’ཏི པརིཙྪིནྣབུདྡྷཁེཏྟཏྟཱ. ཏསྶ ཨཏྠིཏཱཡ ཧི པརིཙྪེདོ ཨཏྠི. ཨེཏསྨིཾ ཨནྟརེཏི ཨེཏསྨིཾ ཨོཀཱསེ.

ནགརསུཏྟཝཎྞནཱ ནིཊྛིཏཱ.

༦. སམྨསསུཏྟཝཎྞནཱ

༦༦. ཚཊྛེ ཨསྶཱཏི བྷགཝཏོ. སཎྷསུཁུམདྷམྨཔརིདཱིཔནཏོ སུཁུམཱ. ཏཱིཧི ལཀྑཎེཧི ཨངྐིཡཏྟཱ ཏིལཀྑཎཱཧཏཱ, ཨནིཙྩཱདིལཀྑཎཔརིདཱིཔིནཱིཏི ཨཏྠོ. ཨརིཡདྷམྨཱདྷིགམསྶ ཨུཔནིསྶཡབྷཱུཏེན ཧེཏུནཱ སཧེཏུཀཱ. ཏིཧེཏུཀཔཊིསནྡྷིཔཉྙཱཡ པཱཊིཧཱརིཡཔཉྙཱཡ ཙ ཨཏྠིཏཱཡ པཉྙཝནྟོ ¶ ན ཀེཝལཾ ཨཛ྄ཛྷཏྟིཀཨངྒསམྤཏྟིཡེཝ, བཱཧིརངྒསམྤཏྟིཔི ནེསམཏྠཱིཏི དསྶེཏུཾ ‘‘སིནིདྡྷཱནཱི’’ཏིཨཱདི ཝུཏྟཾ. ཨབྦྷནྟརནྟི ཨཛ྄ཛྷཏྟཾ. པཙྩཡསམྨསནནྟི པཙྩཡུཔྤནྣཱནཾ པཙྩཡཝཱིམཾསཾ.

ཨཱརམྦྷཱནུརཱུཔཱ ཨནུསནྡྷི ཡཐཱནུསནྡྷི. ན གཏཱཏི ན སམྤཏྟཱ. ཨསམྦྷིནྣཔདནྟི ཨཝོམིསྶཀཔདཾ, ཨཉྙཏྠ ཨེཝཾ ཨནཱགཏཾ ཝཱཀྱནྟི ཨཏྠོ. ཏེནཱཧ ‘‘ཨཉྙཏྠ ཧི ཨེཝཾ ཝུཏྟཾ ནཱམ ནཏྠཱི’’ཏི. ཨེཝནྟི ‘‘ཏེནཧཱནནྡཱ’’ཏི ཨེཀཝཙནཾ, ‘‘སུཎཱཐ མནསི ཀརོཐཱ’’ཏི བཧུཝཙནཾ ཀཏྭཱ ཝུཏྟཾ ནཱམ ནཏྠཱིཏི ཨཏྠོ. ཀེཙི པན ‘‘ཏེནཧཱནནྡཱ’’ཏི ཨིདྷཱཔི བཧུཝཙནམེཝ ཀཏྭཱ པཋནྟི ‘‘སཱདྷུ ཨནུརུདྡྷཱ’’ཏིཨཱདཱིསུ ཝིཡ. ཨུཔདྷཱིཏི ཨདྷིཔྤེཏཾ ཨུཔདྷཱིཡཏི ཨེཏྠ དུཀྑནྟི. ཨུཔྤཛྫཏི ཨུཔྤཱདཀྑཎཾ ཨུདཡཾ པཊིལབྷཏི ‘‘པཱཀཊབྷཱཝོ ཋིཏིཀོ, ཨཏྟལཱབྷོ ཨུདཡོ’’ཏི. ནིཝིསཏི ནིཝེསཾ ཨོཀཱསཾ པཊིལབྷཏི. ཨེཀཝཱརམེཝ ཧི ཨུཔྤནྣམཏྟསྶ དྷམྨསྶ དུབྦལཏྟེན ཨོཀཱསེ ཝིཡ པཏིཊྛཧནཾ ནཏྠི, པུནཔྤུནཾ ཨཱརམྨཎེ པཝཏྟམཱནཾ ནིཝིཊྛཾ པཏིཊྛིཏཾ ནཱམ ཧོཏི. ཏེནཱཧ ‘‘ནིཝིསཏཱིཏི པུནཔྤུནཾ པཝཏྟིཝསེན པཏིཊྛཧཏཱི’’ཏི.

པིཡསབྷཱཝནྟི པིཡཱཡིཏབྦཛཱཏིཀཾ. མདྷུརསབྷཱཝནྟི ཨིཊྛཛཱཏིཀཾ. ཨབྷིནིཝིཊྛཱཏི ཏཎྷཱབྷིནིཝེསེན ཨོཏིཎྞཱ. སམྤཏྟིཡནྟི བྷཝསམྤཏྟིཡཾ. ནིམིཏྟགྒཧཎཱནུསཱརེནཱཏི པཊིབིམྦགྒཧཎཱནུསཱརེན. ཀཎྞསྶ ཚིདྡཔདེསཾ རཛཏནཱལི༹ཀཾ ཝིཡ, ཀཎྞབདྡྷཾ པན པཱམངྒསུཏྟཾ ཝིཡ. ཏུངྒཱ ཨུཙྩཱ དཱིགྷཱ ནཱསིཀཱ ཏུངྒནཱསཱ. ཨེཝཾ ལདྡྷཝོཧཱརཾ ཨཏྟནོ གྷཱནཾ. ‘‘ལདྡྷཝོཧཱརཱ’’ཏི ¶ ཝཱ པཱཋོ. ཏསྨིཾ སཏི ཏུངྒཱ ནཱསཱ ཡེསཾ ཏེ ཏུངྒནཱསཱ. ཨེཝཾ ལདྡྷཝོཧཱརཱ སཏྟཱ ཨཏྟནོ གྷཱནནྟི ཡོཛནཱ ཝཎྞསཎྛཱནཏོ རཏྟཀམྦལཔཊལཾ ཝིཡ. སམྥསྶཏོ མུདུསིནིདྡྷཾ ཀིཙྩཏོ སིནིདྡྷམདྷུརརསདཾ. སཱལལཊྛིནྟི སཱལཀྑནྡྷཾ.

ཨདྡསཾསཱུཏི པསྶིཾསུ. ཨེཝཾ ཝུཏྟནྟི ‘‘ཀཾསེ’’ཏི ཨེཝཾ ཝུཏྟཾ ཨདྷིཊྛཱནཝོཧཱརེན.

སམྤཏྟིནྟི ཝཎྞཱདིགུཎཾ. ཨཱདཱིནཝནྟི མརཎགྒཏཏོ.

སཏྟུཔཱནཱིཡེནཱཏི སཏྟུཾ པཀྑིཔིཏྭཱ ཨཱལོལིཏཔཱནཱིཡེན. ཙཏྟཱརི པཱནཱནི ཝིཡ ཙཏྟཱརོ མགྒཱ ཏཎྷཱཔིཔཱསཱཝཱུཔསམནཏོ.

སམྨསསུཏྟཝཎྞནཱ ནིཊྛིཏཱ.

༧. ནལ༹ཀལཱཔཱིསུཏྟཝཎྞནཱ

༦༧. སཏྟམེ ¶ ཀསྨཱ པུཙྪཏཱིཏི མཧཱཀོཊྛིཀཏྠེརོ སཡཾ ཏཏྠ ནིཀྐངྑོ སམཱནོ ཀསྨཱ པུཙྪཏཱིཏི ཨདྷིཔྤཱཡོ. ཨཛ྄ཛྷཱསཡཛཱནནཏྠནྟི ཨིདམྤི ཏསྶ མཧཱསཱཝཀསྶ པརཙིཏྟཛཱནནེན ཨཔྤཱཊིཧཱིརཾ སིཡཱ, ཏེན ཏཾ ཨཔརིཏུསྶནྟོ ‘‘ཨཔིཙཱ’’ཏིཨཱདིམཱཧ. ཏཏྠ དྭེ ཨགྒསཱཝཀཱཏི སཱིལཱདིགུཎེཧི ཨུཏྟམསཱཝཀཱཏི ཨཏྠོ, ན ཧི མཧཱཀོཊྛིཀཏྠེརོ ཨགྒསཱཝཀལཀྑཎཔྤཏྟོ, ཨཐ ཁོ མཧཱསཱཝཀལཀྑཎཔྤཏྟོ. ཨིདཱནེཝ ཁོ མཡནྟིཨཱདི ཧེཊྛཱ པཙྩཡུཔྤནྣཾ ཨནཱལོལེ༹ནྟེན དསྶེཏྭཱ དེསནཱ ཨཱཧཊཱ, ན ཨཉྙམཉྙཔཙྩཡཏཱཝསེན, ཨིདྷ པན ཡེནཱདྷིཔྤཱཡེན ཏཾ ཨཱལོལེ༹ཏྭཱ ནིཝཏྟེཏྭཱ ཀཐིཏཾ མཧཱཐེརེན, ཏམེཝསྶ ཨདྷིཔྤཱཡཾ ཏེནེཝ པཀཱསེཏུཀཱམོ མཧཱཀོཊྛིཀཏྠེརོ ཨཱཧ ‘‘ཨིདཱནེཝ ཁོ མཡ’’ནྟིཨཱདི. ཏེནཱཧ ‘‘ཨིདཾ ཐེརོ’’ཏིཨཱདི.

ཨེཏྟཀེ ཋཱནེཏི ‘‘ཀིཾ ནུ ཁོ ཨཱཝུསོ’’ཏིཨཱདིནཱ པཋམཱརམྦྷཏོ པཊྛཱཡ ཡཱཝ ‘‘ནིརོདྷོ ཧོཏཱི’’ཏི པདཾ, ཨེཏྟཀེ ཋཱནེ. ཨཝིཛྫཱསངྑཱརེ ཨགྒཧེཏྭཱ ‘‘ནཱམརཱུཔཔཙྩཡཱ ཝིཉྙཱཎ’’ནྟི དེསནཱཡ པཝཏྟཏྟཱ ‘‘པཙྩཡུཔྤནྣཔཉྩཝོཀཱརབྷཝཝསེན དེསནཱ ཀཐིཏཱ’’ཏི ཝུཏྟཾ. ‘‘ཕལེ གཧིཏེ ཀཱརཎཾ གཧིཏམེཝཱ’’ཏི ཝིཉྙཱཎེ གཧིཏེ སངྑཱརཱ, ཏེསཉྩ ཀཱརཎབྷཱུཏཱ ཨཝིཛྫཱ གཧིཏཱ ཨེཝ ཧོཏཱིཏི ཝུཏྟཾ ‘‘ཧེཊྛཱ ཝིསྶཛྫིཏེསུ དྭཱདསསུ པདེསཱུ’’ཏི. ཨེཀེཀསྨིནྟི ཨེཀེཀསྨིཾ པདེ. ཏིཎྞཾ ཏིཎྞཾ ཝསེནཱཏི ‘‘ནིརོདྷཱཡ དྷམྨཾ དེསེསི, ནིརོདྷཱཡ པཊིཔནྣོ ཧོཏི, ནིརོདྷཱ ཨནུཔཱདཱཝིནིམུཏྟོ ཧོཏཱི’’ཏི ཨེཝམཱགཏཱནཾ ཏིཎྞཾ ཏིཎྞཾ ཝཱརཱནཾ ཝསེན. ‘‘ཨཊྛཱརསཧི ཝཏྠཱུཧཱི’’ཏིཨཱདཱིསུ ¶ (མཧཱཝ. ༤༦༨) ཝིཡ ཨིདྷ ཝཏྠུསདྡོ ཀཱརཎཔརིཡཱཡོཏི ཨཱཧ ‘‘ཚཏྟིཾསཱཡ ཀཱརཎེཧཱི’’ཏི. པཋམོ ཨནུམོདནཱཝིདྷི. དྷམྨཀཐིཀགུཎོཏི ཝིཔསྶནཱཝིསཡོ ཨབྷེདོཔཙཱརེན ཝུཏྟོ. སེསདྭཡེསུཔི ཨེསེཝ ནཡོ. དུཏིཡོ ཨནུམོདནཱ, ཏཏིཡཾ ཨནུམོདནནྟི ཨབྷིདྷེཡྻཱནུརཱུཔཾ ཝཏྟབྦཾ. དེསནཱསམྤཏྟི ཀཐིཏཱ ‘‘ནིབྦིདཱཡ…པེ… དྷམྨཾ དེསེཏཱི’’ཏི ཝུཏྟཏྟཱ. སེཀྑབྷཱུམི ཀཐིཏཱ ‘‘ནིབྦིདཱཡ…པེ… པཊིཔནྣོ ཧོཏཱི’’ཏི ཝུཏྟཏྟཱ. ཨསེཀྑབྷཱུམི ཀཐིཏཱ ‘‘ནིབྦིདཱ …པེ… ཨནུཔཱདཱཝིམུཏྟོ ཧོཏཱི’’ཏི ཝུཏྟཏྟཱ.

ནལ༹ཀལཱཔཱིསུཏྟཝཎྞནཱ ནིཊྛིཏཱ.

༨. ཀོསམྦིསུཏྟཝཎྞནཱ

༦༨. ཨཊྛམེ ¶ པརསྶ སདྡཧིཏྭཱཏི པརསྶ ཝཙནཾ སདྡཧིཏྭཱ. ཏེནཱཧ ‘‘ཡཾ ཨེས བྷཎཏི, ཏཾ བྷཱུཏནྟི གཎྷཱཏཱི’’ཏི. པརཔཏྟིཡོ ཧི ཨེསོ པརནེཡྻབུདྡྷིཀོ. ཡཾ ཀཱརཎནྟི ཡཾ ཨཏྟནཱ ཙིནྟིཏཝཏྠུ. རུཙྩཏཱིཏི ‘‘ཨེཝམེཏཾ བྷཝིསྶཏི, ན ཨཉྙཐཱ’’ཏི ཨཏྟནོ མཏིཡཱ ཙིནྟེནྟསྶ རུཙྩཏི. རུཙིཡཱ གཎྷཱཏཱིཏི པརཔཏྟིཡོ ཨཧུཏྭཱ སཡམེཝ ཏཐཱ རོཙེནྟོ གཎྷཱཏི. ཨནུསྶཝོཏི ‘‘ཨནུ ཨནུ སུཏ’’ནྟི ཨེཝཾ ཙིརཀཱལགཏཱཡ ཨནུསྶུཏིཡཱ ལབྦྷམཱནཾ ‘‘ཀཐམིདཾ སིཡཱ, ཀསྨཱ བྷཱུཏམེཏ’’ནྟི ཨནུསྶཝེན གཎྷཱཏི. ཝིཏཀྐཡཏོཏི ‘‘ཨེཝམེཏཾ སིཡཱ’’ཏི པརིཀཔྤེནྟསྶ. ཨེཀཾ ཀཱརཎཾ ཨུཔཊྛཱཏཱིཏི ཡཐཱཔརིཀཔྤིཏཝཏྠུ ཙིཏྟསྶ ཨུཔཊྛཱཏི. ཨཱཀཱརཔརིཝིཏཀྐེནཱཏི ཨཏྟནཱ ཀཔྤིཏཱཀཱརེནཱ ཏཾ གཎྷཱཏི. ཨེཀཱ དིཊྛི ཨུཔྤཛྫཏཱིཏི ‘‘ཡཐཱཔརིཀཔྤིཏཾ ཀིཉྩི ཨཏྠཾ ཨེཝམེཏཾ, ནཱཉྙཐཱ’’ཏི ཨབྷིནིཝིསནྟསྶ ཨེཀོ ཨབྷིནིཝེསོ ཨུཔྤཛྫཏི. ཡཱཡསྶཱཏི ཡཱཡ དིཊྛིཡཱ ཨསྶ པུགྒལསྶ. ནིཛ྄ཛྷཱཡནྟསྶཱཏི པཙྩཀྑཾ ཝིཡ ནིརཱུཔེཏྭཱ ཙིནྟེནྟསྶ. ཁམཏཱིཏི ཏཐཱ གཧཎཀྑམོ ཧོཏི. ཏེནཱཧ ‘‘སོ…པེ… གཎྷཱཏཱི’’ཏི. ཨེཏཱནཱིཏི སདྡྷཱདཱིནི. ཏཱནི ཧི སདྡྷེཡྻཱནཾ ཝཏྠཱུནཾ གཧཎཧེཏུབྷཱཝཏོ ‘‘ཀཱརཎཱནཱི’’ཏི ཝུཏྟཱནི. བྷཝནིརོདྷོ ནིབྦཱནནྟི ནཝཝིདྷོཔི བྷཝོ ནིརུཛ྄ཛྷཏི ཨེཏྠ ཨེཏསྨིཾ ཨདྷིགཏེཏི བྷཝནིརོདྷོ, ནིབྦཱནཾ. སྭཱཡཾ བྷཝོ པཉྩཀྑནྡྷསངྒཧོ ཏབྦིནིམུཏྟོ ནཏྠཱིཏི ཨཱཧ ‘‘པཉྩཀྑནྡྷནིརོདྷོ ནིབྦཱན’’ནྟི. བྷཝནིརོདྷོ ནིབྦཱནཾ ནཱམཱཏི ‘‘ནིབྦཱནཾ ནཱམ བྷཝནིརོདྷོ’’ཏི ཨེས པཉྷོ སེཀྑེཧིཔི ཛཱནིཏབྦོ, ན ཨསེཀྑེཧེཝ. ཨིམཾ ཋཱནནྟི ཨིམཾ ཡཱཐཱཝཀཱརཎཾ.

སུཊྛུ དིཊྛནྟི ‘‘བྷཝནིརོདྷོ ནིབྦཱན’’ནྟི མཡཱ སུཊྛུ ཡཱཐཱཝཏོ དིཊྛཾ, བྷཝསྶ པཱིལ༹ནསངྑཏསནྟཱཔཝིཔརིཎཱམཊྛཱནཾ, བྷཝནིརོདྷསྶ ཙ ནིསྶརཎཝིཝེཀཱསངྑཏཱམཏཊྛཱནཾ ཡཐཱབྷཱུཏཾ སམྨཔྤཉྙཱཡ ¶ དིཊྛཏྟཱ. ཨནཱགཱམིཕལེ ཋིཏོ ཧི ཨནཱགཱམིམགྒེ ཋིཏོ ཨེཝ ནཱམ ཨུཔརིམགྒསྶ ཨནདྷིགཏཏྟཱཏི ཝུཏྟཾ ‘‘ཨནཱགཱམིམགྒེ ཋིཏཏྟཱ’’ཏི. ནིབྦཱནཾ ཨཱརབྦྷ པཝཏྟམྤི ཐེརསྶེཏཾ ཉཱཎཾ ‘‘ནིབྦཱནཾ པཙྩཝེཀྑཏཱི’’ཏི ཝུཏྟཉཱཎཾ ཝིཡ ན ཧོཏཱིཏི ཝུཏྟཾ ‘‘ཨེཀཱུནཝཱིསཏིཡཱ…པེ… པཙྩཝེཀྑཎཉཱཎ’’ནྟི. ཨེཏེན ཨེཏཾ ནིབྦཱནཔཙྩཝེཀྑཎཱ ཝིཡ ན ཧོཏི སཔྤདེསབྷཱཝཏོཏི དསྶེཏི. ཨེཝཉྩ ཀཏྭཱ ཨིདྷ ཨུདཔཱནནིདསྶནམྤི སམཏྠིཏནྟི དཊྛབྦཾ. པཙྩཝེཀྑཎཉཱཎེནཱཏི ཨཝསེསཀིལེསཱནཾ, ནིབྦཱནསྶེཝ ¶ ཝཱ པཙྩཝེཀྑཎཉཱཎེན. ཨུཔརི ཨརཧཏྟཕལསམཡོཏི ཨུཔརི སིཛ྄ཛྷནཏོ ཨརཧཏྟཔཊིལཱབྷོ ཏཐཱ ཨཏྠི. ‘‘ཡེནཱཧཾ ཏཾ པརིཡེསཏོ ནིབྦཱནཾ སཙྪིཀརིསྶཱམཱི’’ཏི ཛཱནཱཏི.

ཀོསམྦིསུཏྟཝཎྞནཱ ནིཊྛིཏཱ.

༩. ཨུཔཡནྟིསུཏྟཝཎྞནཱ

༦༩. ནཝམེ ཨུདཀཝཌྜྷནསམཡེཏི སབྦདིཝསེསུ མཧཱསམུདྡསྶ ཨནྟོ མཧནྟཙནྡཀནྟམཎིཔབྦཏཱནཾ ཛུཎྷསམྥསྶེན པཧཏཏྟཱ ཛལཱབྷིསནྡནཝསེན ཨུདཀསྶ ཝཌྜྷནསམཡེ. ཨུཔརི གཙྪནྟོཏི པཀཏིཡཱ ཨུདཀསྶ ཏིཊྛཊྛཱནསྶ ཏཏོ ཨུཔརི གཙྪནྟོཏི ཨཏྠོ. ཨུཔརི ཡཱཔེཏཱིཏི ཨུདཀཾ ཏཏྠ ཨུཔརཱུཔརི ཝཌྜྷེཏི. ཏཐཱབྷཱུཏོ ཙ ཏཾ བྲཱུཧེནྟོ པཱུརེནྟོཏི ཝུཙྩཏཱིཏི ཨཱཧ ‘‘ཝཌྜྷེཏི པཱུརེཏཱིཏི ཨཏྠོ’’ཏི. ཡསྨཱ པཙྩཡདྷམྨཱ ཨཏྟནོ ཕལསམཝཱཡཔཙྩཡེ ཧོནྟེ ཏསྶ ཨུཔརི ཋིཏོ ཝིཡ ཧོཏི ཏསྶ ཨཏྟནོ ཝསེ ཝཏྟཱཔནཏོ, ཏསྨཱ ཝུཏྟཾ ‘‘ཨཝིཛྫཱ ཨུཔརི གཙྪནྟཱི’’ཏི. པཙྩཡབྷཱཝེན ཧི སཱ ཏཐཱ ཝུཙྩཏི. ཏེནཱཧ ‘‘སངྑཱརཱནཾ པཙྩཡོ བྷཝིཏུཾ སཀྐུཎནྟཱི’’ཏི. ཨཔགཙྪནྟོ ཡཱཡནྟོ. ཏེནཱཧ ‘‘ཨོསརནྟོ’’ཏི, ཨཝཌྜྷནྟོ པརིཧཱིཡམཱནོཏི ཨཏྠོ.

ཨུཔཡནྟིསུཏྟཝཎྞནཱ ནིཊྛིཏཱ.

༡༠. སུསིམསུཏྟཝཎྞནཱ

༧༠. དསམེ གརུཀཏོཏི གརུབྷཱཝཧེཏཱུནཾ ཨུཏྟམགུཎཱནཾ མཏྠཀཔྤཏྟིཡཱ ཨནཉྙསཱདྷཱརཎེན གརུཀཱརེན གརུཀཏོ. མཱནིཏོཏི སམྨཱཔཊིཔཏྟིཡཱ མཱནིཏོ. ཏཱཡ ཧི ཝིཉྙཱུནཾ མནཱཔཏཱཏི ཨཱཧ ‘‘མནེན པིཡཱཡིཏོ’’ཏི. ཙཏུཔཙྩཡཔཱུཛཱཡ ཙ པཱུཛིཏོཏི ཨིདཾ ཨཏྠཝཙནཾ. ཡདཏྠཾ སཾགཱིཏིཀཱརེཧི ‘‘ཏེན ཁོ པན སམཡེན བྷགཝཱ སཀྐཏོ ཧོཏཱི’’ཏིཨཱདིནཱ ཨིམསྶ སུཏྟསྶ ནིདཱནཾ ནིཀྑིཏྟཾ, ཏསྶ ཨཏྠསྶ ཨུལླིངྒཝསེན ཝུཏྟནྟི དཊྛབྦཾ. ཨེས ནཡོ སེསཔདེསུཔི. ཨཾསཀཱུཊཏོཏི ¶ ¶ ཨུཏྟརཱསངྒེན ཨུབྷོ ཨཾསཀཱུཊེ པཊིཙྪཱདེཏྭཱ ཋིཏཱ དཀྑིཎཨཾསཀཱུཊཏོ, ཨུབྷཡཏོ ཝཱ ཨཔནེནྟི. པརིཙིཏགནྠཝསེན པཎྜིཏཔརིབྦཱཛཀོ, ཡཏོ པཙྪཱ ཝིསེསབྷཱགཱི ཛཱཏོ. ཝིཙིཏྟནཡཱཡ དྷམྨཀཐཱཡ ཀཐནཏོ ‘‘ཀཝིསེཊྛོ’’ཏི ཨཱཧཾསུ.

ཏེཛུསྶདོཏི མཧཱཏེཛོ. པུརེབྷཏྟཀིཙྩཱདཱིནཾ ནིཡཏབྷཱཝེན ནིཡམམནུཡུཏྟོ. ཝིཔསྶནཱལཀྑཎམྷཱིཏི ཉཱཎཾ ཏཏྠ ཀཐིཏཾ. དྷམྨནྟི ཏསྶཾ ཏསྶཾ པརིསཱཡཾ ཐེརསྶ ཨསམྨུཁཱ དེསིཏཾ དྷམྨཾ. ཨཱཧརིཏྭཱ ཀཐེཏི ཏཐཱ ཝརསྶ དིནྣཏྟཱ.

ཀིཉྩཱཔི སུསིམོ པཱུརཎཱདཡོ ཝིཡ སཏྠུཔཊིཉྙོ ན ཧོཏི, ཏིཏྠིཡེཧི པན ‘‘ཨཡཾ བྲཱཧྨཎཔབྦཛིཏོ པཉྙཝཱ ཝེདངྒཀུསལོ’’ཏི གཎཱཙརིཡཊྛཱནེ ཋཔིཏོ, ཏཐཱ ཙསྶ སམྦྷཱཝིཏོ. ཏེན ཝུཏྟཾ ‘‘ཨཧཾ སཏྠཱཏི པཊིཛཱནནྟོ’’ཏི, ན སསྶཏདིཊྛིཀཏྟཱ. ཏཐཱ ཧེས བྷགཝཏོ སམྨུཁཱ ཨུཔགནྟུཾ ཨསཀྑི.

ཨཉྙཱཏི ཨརཧཏྟསྶ ནཱམཾ ཨཉྙིནྡྲིཡསྶ ཙིཎྞནྟེ པཝཏྟཏྟཱ. ཏཾ པཝཏྟིནྟི ཡཾ ཨཉྙབྱཱཀརཎཾ ཝུཏྟཾ, ཏཾ སུཏྭཱ. ཨསྶ སུསིམསྶ, པརམཔྤམཱཎནྟི ཨུཏྟམཀོཊི. ཨཱཙརིཡམུཊྛཱིཏི ཨཱཙརིཡསྶ མུཊྛིཀཏདྷམྨོ.

ཨངྒསནྟཏཱཡཱཏི ནཱིཝརཎཱདཱིནཾ པཙྩནཱིཀདྷམྨཱནཾ ཝིདཱུརབྷཱཝེན ཛྷཱནངྒཱནཾ ཝཱུཔསནྟཏཱཡ. ནིབྦུཏསབྦདརཐཔརིལཱ༹ཧཏཱཡ ཧི ཏེསཾ ཛྷཱནཱནཾ པཎཱིཏཏརབྷཱཝོ. ཨཱརམྨཎསནྟཏཱཡཱཏི རཱུཔཔཏིབྷཱགཝིགམེན སཎྷསུཁུམཱདིབྷཱཝཔྤཏྟསྶ ཨཱརམྨཎསྶ སནྟབྷཱཝེན. ཡདགྒེན ཧི ཏེསཾ བྷཱཝནཱཏིསཡསམྦྷཱཝིཏསཎྷསུཁུམཔྤཀཱརཱནི ཨཱརམྨཎཱནི སནྟཱནི, ཏདགྒེན ཛྷཱནངྒཱནཾ སནྟཏཱ ཝེདིཏབྦཱ. ཨཱརམྨཎསནྟཏཱཡ ཝཱ ཏདཱརམྨཎདྷམྨཱནཾ སནྟཏཱ ལོཀུཏྟརདྷམྨཱརམྨཎཱཧི པཙྩཝེཀྑཎཱཧི དཱིཔེཏབྦཱ. ཨཱརུཔྤཝིམོཀྑཱཏི ཨརཱུཔཛ྄ཛྷཱནསཉྙཱཝིམོཀྑཱ. པཉྙཱམཏྟེནེཝ ཝིམུཏྟཱ, ན ཨུབྷཏོབྷཱགཝིམུཏྟཱ. དྷམྨཱནཾ ཋིཏཏཱ ཏཾསབྷཱཝཏཱ དྷམྨཊྛིཏི, ཨནིཙྩདུཀྑཱནཏྟཏཱ, ཏཏྠ ཉཱཎཾ དྷམྨཊྛིཏིཉཱཎནྟི ཨཱཧ ‘‘ཝིཔསྶནཱཉཱཎ’’ནྟི. ཨེཝམཱཧཱཏི ‘‘པུབྦེ ཁོ, སུསིམ, དྷམྨཊྛིཏིཉཱཎཾ, པཙྪཱ ནིབྦཱནེ ཉཱཎ’’ནྟི ཨེཝམཱདི.

ཝིནཱཔི ¶ སམཱདྷིནྟི སམཐལཀྑཎཔྤཏྟཾ པུརིམསིདྡྷཾ ཝིནཱཔི སམཱདྷིནྟི ཝིཔསྶནཱཡཱནིཀཾ སནྡྷཱཡ ཝུཏྟཾ. ཨེཝནྟི ཝུཏྟཱཀཱརེན. ན སམཱདྷིནིསྶནྡོ ཨནུཔུབྦཝིཧཱརཱ ཝིཡ. ན སམཱདྷིཨཱནིསཾསོ ¶ ལོཀིཡཱབྷིཉྙཱ ཝིཡ. ན སམཱདྷིསྶ ནིཔྥཏྟི སབྦབྷཝགྒཾ ཝིཡ. ཝིཔསྶནཱཡ ནིཔྥཏྟི མགྒོ ཝཱ ཕལཾ ཝཱཏི ཡོཛནཱ.

རཱུཔཱདཱིསུ ཙེཏེསུ ཏིཎྞཾ ལཀྑཎཱནཾ པརིཝཏྟནཝསེན དེསནཱ ཏེཔརིཝཊྚདེསནཱ. ཨནུཡོགཾ ཨཱརོཔེནྟོཏི ནནུ ཝུཏྟཾ, སུསིམ, ཨིདཱནི ཨརཧཏྟཱདྷིགམེན སབྦསོ པཙྩཡཱཀཱརཾ པཊིཝིཛ྄ཛྷིཏྭཱ ཏཏྠ ཝིགཏསམྨོཧོཏི ཨནུཡོགཾ ཀརོནྟོ. པཱཀཊཀརཎཏྠནྟི ཡཐཱ ཏྭཾ, སུསིམ, ནིཛ྄ཛྷཱནཀོ སུཀྑཝིཔསྶཀོ ཙ ཧུཏྭཱ ཨཱསཝཱནཾ ཁཡསམྨསནེ སུཔྤཏིཊྛིཏོ, ཨེཝམེཏེཔི བྷིཀྑཱུ, ཏསྨཱ ‘‘ཨཔི པན ཏུམྷེ ཨཱཡསྨནྟོ’’ཏིཨཱདིནཱ ན ཏེ ཏཡཱ ཨནུཡུཉྫིཏབྦཱཏི.

སུསིམསུཏྟཝཎྞནཱ ནིཊྛིཏཱ.

མཧཱཝགྒཝཎྞནཱ ནིཊྛིཏཱ.

༨. སམཎབྲཱཧྨཎཝགྒོ

༡. ཛརཱམརཎསུཏྟཱདིཝཎྞནཱ

༧༡-༧༢. ཨེཀེཀཾ སུཏྟཾ ཀཏྭཱ ཨེཀཱདས སུཏྟཱནི ཝུཏྟཱནི ཨཝིཛྫཱཡ ཝསེན དེསནཱཡ ཨནཱགཏཏྟཱ, ཏཐཱནཱགམནཉྩསྶཱ ཙཏུསཙྩཝསེན ཨེཀེཀསྶ པདསྶ ཨུདྡྷཊཏྟཱ. ཀཱམཉྩ ‘‘ཨཱསཝསམུདཡཱ ཨཝིཛྫཱསམུདཡོ’’ཏི ཨཏྠེཝ ཨཉྙཏྠ སུཏྟཔདཾ, ཨིདྷ པན ཝེནེཡྻཛ྄ཛྷཱསཡཝསེན ཏཐཱ ན ཝུཏྟནྟི དཊྛབྦཾ.

ཛརཱམརཎསུཏྟཱདིཝཎྞནཱ ནིཊྛིཏཱ.

སམཎབྲཱཧྨཎཝགྒཝཎྞནཱ ནིཊྛིཏཱ.

༩. ཨནྟརཔེཡྻཱལཝགྒོ

༡. སཏྠུསུཏྟཱདིཝཎྞནཱ

༧༣. ཨཡཾ ¶ ¶ སཏྠཱ ནཱམཱཏི ཨཡཾ ཨརིཡམགྒསྶ ཨཏྠཱཡ སཱསཏི ཝིམུཏྟིདྷམྨཾ ཨནུསཱསཏཱིཏི སཏྠཱ ནཱམ. ཨདྷིསཱིལཱདིཝསེན ཏིཝིདྷཱཔི སིཀྑཱ. ཡོགོཏི བྷཱཝནཱནུཡོགོ. ཚནྡོཏི ནིཡྻཱནེཏཱ ཀཏྟུཀམྱཏཱཀུསལཙྪནྡོ. སབྦཾ བྷཱཝནཱཡ པརིསྶཡཾ སཧཏི, སབྦཾ ཝཱསྶ ཨུཔཀཱརཱཝཧཾ སཧཏི ཝཱཧེཏཱིཏི སབྦསཧཾ. ཨཔྤཊིཝཱནཱིཏི ན པཊིནིཝཏྟཏཱིཏི ཨཔྤཊིཝཱནཱི. ཨནྟརཱཡ སཧནཾ མོཧནཱསནཝཱིརིཡཾ ཨཱཏཔྤཏི ཀིལེསེཏི ཨཱཏཔྤཾ. ཝིདྷིནཱ ཨཱིརེཏབྦཏྟཱ པཝཏྟེཏབྦཏྟཱ ཝཱིརིཡཾ. སཏཏཾ པཝཏྟིཡམཱནབྷཱཝནཱནུཡོགཀམྨཾ སཱཏཙྩནྟི ཨཱཧ ‘‘སཏཏཀིརིཡ’’ནྟི. ཏཱདིསམེཝཱཏི ཡཱདིསཱི སཏི ཝུཏྟཱ, ཏཱདིསམེཝ ཉཱཎཾ, ཛརཱམརཎཱདིཝསེན ཙཏུསཙྩཔརིགྒཱཧཀཾ ཉཱཎནྟི ཨཏྠོ.

ཨནྟརཔེཡྻཱལཝགྒཝཎྞནཱ ནིཊྛིཏཱ.

སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ

ནིདཱནསཾཡུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༢. ཨབྷིསམཡསཾཡུཏྟཾ

༡. ནཁསིཁཱསུཏྟཝཎྞནཱ

༧༤. སུཁུམཱཏི ¶ ¶ ཏརུཎཱ པརིཏྟཱ ཀེསགྒམཏྟབྷཱཝཏོ. ཡཐཱ ཀེསཱ དཱིགྷསོ དྭངྒུལམཏྟཱཡ སབྦསྨིཾ ཀཱལེ ཨེཏཔྤམཱཎཱཝ, ན ཏཙྪིནྡནཾ, ཨེཝཾ ནཁགྒཱཔི ཀེསགྒམཏྟཱཝ, ན ཏེསཾ ཚིནྡནཾ ཨཝཌྜྷནཏོ. པརཏོཏི ‘‘སཧསྶིམཾ སཏསཧསྶིམ’’ནྟི ཝུཏྟཊྛཱནེ. ཨབྷིསམེཏྭཱཏི པཊིཝིཛ྄ཛྷིཏྭཱ, ཏསྨཱ ཨབྷིསམེཏཱཝིནོ པཊིཝིདྡྷསཙྩསྶཱཏི ཨཏྠོ. ཀཱམཾ པུརིམཔདཾ དུཀྑཀྑནྡྷསྶ ཨཏཱིཏབྷཱཝཾ ཨུཔཱདཱཡཔི ཝཏྟུཾ ཡུཏྟཾ. པུརེཏརཾཡེཝ པན ཝུཏྟབྷཱཝཾ ཨུཔཱདཱཡ ཝུཏྟནྟི དསྶེཏུཾ ‘‘པུརིམཾ དུཀྑཀྑནྡྷ’’ནྟིཨཱདི ཝུཏྟཾ. པུརིམཾ ནཱམ པཙྪིམཾ ཨཔེཀྑིཏྭཱ. པུརིམཔཙྪིམཏཱ ཧི ཏཾ ཏཾ ཨུཔཱདཱཡ ཝུཙྩཏཱིཏི ཨིདྷཱདྷིཔྤེཏཾ པུརིམཾ ནཱིཧརིཏྭཱ དསྶེཏུཾ ‘‘ཀཏམཾ པནཱ’’ཏིཨཱདི ཝུཏྟཾ. ‘‘ཨཏཱིཏམྤི པརིཀྑཱིཎ’’ནྟི ཨིདྷཱདྷིཔྤེཏཾ པརིཀྑཱིཎམེཝ ཝིབྷཱཝེཏུཾ ‘‘ཀཏམཾ པན པརིཀྑཱིཎ’’ནྟིཨཱདི ཝུཏྟཾ. སོཏཱཔནྣསྶ དུཀྑཀྑཡོ ཨིདྷ ཙོདིཏོཏི ཏཾ དསྶེཏུཾ ‘‘པཋམམགྒསྶ ཨབྷཱཝིཏཏྟཱ ཨུཔྤཛྫེཡྻཱ’’ཏི ཝཏྭཱ ཨིདཱནི ཏཾ སརཱུཔཏོ དསྶེཏུཾ པུན ‘‘ཀཏམ’’ནྟིཨཱདི ཝུཏྟཾ. སཏྟསུ ཨཏྟབྷཱཝེསུ ཡཾ ཨཔཱཡེ ཨུཔྤཛྫེཡྻ ཨཊྛམཾ པཊིསནྡྷིཾ ཨཱདིཾ ཀཏྭཱ ཡཏྠ ཀཏྠཙི ཨཔཱཡེསུ ཙཱཏི ཡཾ དུཀྑཾ ཨུཔྤཛྫེཡྻ, ཏཾ སབྦཾ པརིཀྑཱིཎནྟི དཊྛབྦཾ. ཨསྶཱཏི སོཏཱཔནྣསྶ, ཡཾ པརིམཱཎཾ, ཏཏོ ཨུདྡྷཉྩ ཨུཔཔཱཏཾ ཨཏྠཱིཏི ཨདྷིཔྤཱཡོ. མཧཱ ཨཏྠོ གུཎོ མཧཏྠོ, སོ ཨེཏསྶ ཨཏྠཱིཏི མཧཏྠིཡོ ཀ-ཀཱརསྶ ཡ-ཀཱརཾ ཀཏྭཱ. ཏེནཱཧ ‘‘མཧཏོ ཨཏྠསྶ ནིཔྥཱདཀོ’’ཏི.

ནཁསིཁཱསུཏྟཝཎྞནཱ ནིཊྛིཏཱ.

༢. པོཀྑརཎཱིསུཏྟཝཎྞནཱ

༧༥. ཨུབྦེདྷེནཱཏི ཨཝཝེདྷེན ཨདྷོདིསཏཱཡ. ཏེནཱཧ ‘‘གམྦྷཱིརཏཱཡཱ’’ཏི.

པོཀྑརཎཱིསུཏྟཝཎྞནཱ ནིཊྛིཏཱ.

༣. སཾབྷེཛྫཨུདཀསུཏྟཱདིཝཎྞནཱ

༧༦-༧༧. སམྦྷིཛྫཊྛཱནེཏི ¶ ¶ སམྦྷིཛྫསམོདྷཱནགཏཊྛཱནེ. སམེནྟི སམེཏཱ ཧོནྟི. ཏེནཱཧ ‘‘སམཱགཙྪནྟཱི’’ཏི. པཱལི༹ཡཾ ཝིབྷཏྟིལོཔེན ནིདྡེསོཏི ཏམཏྠཾ དསྶེནྟོ ‘‘ཏཱིཎི ཝཱ’’ཏི ཨཱཧ. སམྦྷིཛྫཏི མིསྶཱིབྷཱཝཾ གཙྪཏི ཨེཏྠཱཏི སམྦྷེཛྫཾ, མིསྶིཏཊྛཱནཾ. ཏཏྠ ཨུདཀཾ སམྦྷེཛྫཨུདཀཾ. ཏེནཱཧ ‘‘སམྦྷིནྣཊྛཱནེ ཨུདཀ’’ནྟི.

སཾབྷེཛྫཨུདཀསུཏྟཱདིཝཎྞནཱ ནིཊྛིཏཱ.

༤. པཐཝཱིསུཏྟཱདིཝཎྞནཱ

༧༨-༨༤. ཙཀྐཝཱལ༹བྦྷནྟརཱཡཱཏི ཙཀྐཝཱལ༹པབྦཏསྶ ཨནྟོགདྷཱཡ.

ཚཊྛཱདཱིསུ ཝུཏྟནཡེནེཝཱཏི ཨིདྷ ཚཊྛསུཏྟཱདཱིསུ པཋམསུཏྟཱདཱིསུ ཝུཏྟནཡེནེཝཱཏི ཨཏྠོ ཝེདིཏབྦོ ཝིསེསཱབྷཱཝཏོ.

པརིཡོསཱནེཏི ཨིམསྶ ཨབྷིསམཡསཾཡུཏྟསྶ ཨོསཱནཊྛཱནེ. ཨཉྙཏིཏྠིཡསམཎབྲཱཧྨཎཔརིབྦཱཛཀཱནནྟི ཨཉྙཏིཏྠིཡཱནཾ. གུཎཱདྷིགམོཏི ཛྷཱནཱབྷིཉྙཱསཧིཏོ གུཎཱདྷིགམོ. སཏབྷཱགམྤི…པེ… ན ཨུཔགཙྪཏི སཙྩཔཊིཝེདྷསྶ མཧཱནུབྷཱཝཏྟཱ. ཏེནཱཧ བྷགཝཱ པཙྩཀྑསབྦདྷམྨོ ‘‘ཨེཝཾ མཧཱདྷིགམོ, བྷིཀྑཝེ, དིཊྛིསམྤནྣོ པུགྒལོ ཨེཝཾ མཧཱབྷིཉྙོ’’ཏི.

པཐཝཱིསུཏྟཱདིཝཎྞནཱ ནིཊྛིཏཱ.

སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ

ཨབྷིསམཡསཾཡུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༣. དྷཱཏུསཾཡུཏྟཾ

༡. ནཱནཏྟཝགྒོ

༡. དྷཱཏུནཱནཏྟསུཏྟཝཎྞནཱ

༨༥. པཋམནྟི ¶ ¶ ཨིམསྨིཾ ནིདཱནཝགྒེ སཾཡུཏྟཱནཾ པཋམཾ སཾགཱིཏཏྟཱ. ནིསྶཏྟཊྛསུཉྙཏཊྛསངྑཱཏེནཱཏི དྷམྨམཏྟཏཱཡ ནིསྶཏྟཏཱསངྑཱཏེན ནིཙྩསུབྷསུཁཨཏྟསུཉྙཏཏྠསངྑཱཏེན. སབྷཱཝཊྛེནཱཏི ཡཐཱབྷཱུཏསབྷཱཝཊྛེན. ཏཏོ ཨེཝ སབྷཱཝསྶ དྷཱརཎཊྛེན དྷཱཏཱུཏི ལདྡྷནཱམཱནཾ. ནཱནཱསབྷཱཝོ ཨཉྙམཉྙཝིསདིསཏཱ དྷཱཏུནཱནཏྟཾ. ཙཀྑུསངྑཱཏོ པསཱདོ ཙཀྑུཔསཱདོ. སོ ཨེཝ ཙཀྑནཊྛེན ཙཀྑུ, ནིསྶཏྟསུཉྙཏཊྛེན དྷཱཏུ ཙཱཏི ཙཀྑུདྷཱཏུ. ཙཀྑུཔསཱདཝཏྠུཾ ཨདྷིཊྛཱནཾ ཀཏྭཱ པཝཏྟཾ ཙཀྑུཔསཱདཝཏྠུཀཾ. སེསཔདེསུཔི ཨེསེཝ ནཡོ. དྭེ སམྤཊིཙྪནམནོདྷཱཏུཡོ, ཨེཀཱ ཀིརིཡཱ མནོདྷཱཏཱུཏི ཏིསྶོ མནོདྷཱཏུཡོ མནོདྷཱཏུ ‘‘མནནམཏྟཱ དྷཱཏཱུ’’ཏི ཀཏྭཱ. ཝེདནཱདཡོ…པེ… ནིབྦཱནཉྩ དྷམྨདྷཱཏུ ཝིསེསསཉྙཱཔརིཧཱརེན སཱམཉྙསཉྙཱཡ པཝཏྟནཏོ. ཏཐཱ ཧེཏེ དྷམྨཱ ཨཱཡཏནདེསནཱཡ ‘‘དྷམྨཱཡཏན’’ནྟེཝ དེསིཏཱ. ན ཧི ནེསཾ རཱུཔཱཡཏནཱདཱིནཾ ཝིཡ ཝིཉྙཱཎེཧི ཨཉྙཝིཉྙཱཎེན གཧེཏབྦཏཱཀཱརོ ཨཏྠི. སབྦམྤཱིཏི ཚསཏྟཏིཝིདྷཾ མནོཝིཉྙཱཎཾ. ཀཱམཱཝཙརཱ ཀཱམདྷཱཏུཔརིཡཱཔནྣཏྟཱ. ཨཝསཱནེ དྭེཏི དྷམྨདྷཱཏུམནོཝིཉྙཱཎདྷཱཏུཡོ. ཨཡམེཏྠ སངྑེཔོ, ཝིཏྠཱརོ པན ཝིསུདྡྷིམགྒེ ཏཾསཾཝཎྞནཱསུ དཊྛབྦོ.

དྷཱཏུནཱནཏྟསུཏྟཝཎྞནཱ ནིཊྛིཏཱ.

༢. ཕསྶནཱནཏྟསུཏྟཝཎྞནཱ

༨༦. ཛཱཏིཔསུཏིཨཱརམྨཎཱདིབྷེདེན ནཱནཱབྷཱཝོ ཕསྶོ. ཛཱཏིཔཙྩཡབྷེདེན ཧི པཙྩཡུཔྤནྣསྶ བྷེདོ ཧོཏིཡེཝ. དྷམྨཔརིཙྪེདཝསེན དྷཱཏུདེསནཱཡཾ ཏིསྶོ མནནམཏྟཱ དྷཱཏུཡོཝ མནོདྷཱཏུཡོ. ཀིརིཡཱམཡསྶ ཙིཏྟུཔྤཏྟིཝིབྷཱགེན པཙྩཡུཔྤནྣསྶ ཝསེན དྷཱཏུདེསནཱཡཾ ¶ མནནཊྛེན དྷཱཏུཏཱཡ ¶ སཱམཉྙཏོ མནོདྭཱརཱཝཛྫནཾ ‘‘མནོདྷཱཏཱུ’’ཏི ཨདྷིཔྤེཏནྟི ཝུཏྟཾ ‘‘མནོསམྥསྶོ མནོདྭཱརེ པཋམཛཝནསམྤཡུཏྟོ’’ཏིཨཱདི. ཏསྨཱཏི ཡསྨཱ ཀཱམཾ སམྤཊིཙྪནམནོདྷཱཏུཨནནྟརཾ ཨུཔྤཛྫམཱནོ སནྟཱིརཎཝིཉྙཱཎདྷཱཏུཡཱ སམྤཡུཏྟོ ཕསྶོཔི མནོསམྥསྶོ ཨེཝ ནཱམ, དུབྦལཏྟཱ པན སོ སབྦབྷཝེསུ ཨསམྦྷཝཏོ ཙ གཧིཏོ ཨནཝསེསཏོ གཧཎཾ ན ཧོཏཱིཏི མནོདྭཱརེ ཛཝནསམྥསྶོ ཧོཏི, ཏསྨཱ. ཨཡམེཏྠ ཨཏྠོཏི ཨཡཾ ཨིདྷ ཨདྷིཔྤཱཡཱནུགཏོ ཨཏྠོ.

ཕསྶནཱནཏྟསུཏྟཝཎྞནཱ ནིཊྛིཏཱ.

༣. ནོཕསྶནཱནཏྟསུཏྟཝཎྞནཱ

༨༧. མནོསམྥསྶཾ པཊིཙྩཱཏི མནོདྭཱརེ པཋམཛཝནསམྤཡུཏྟོ ཕསྶོ མནོསམྥསྶོ, ཏཾ མནོསམྥསྶཾ པཊིཙྩ. མནོདྷཱཏཱུཏི ཨཱཝཛྫནཀིརིཡམནོདྷཱཏུ. མནོཝིཉྙཱཎདྷཱཏུ མནོདྷཱཏཱུཏི ཝེནེཡྻཛ྄ཛྷཱསཡཝསེན ཝུཏྟཾ. ཏེནཱཧ ‘‘མནོདྭཱརེ…པེ… ཨེཝམཏྠོ དཊྛབྦོ’’ཏི. ཏཐཱ ཧི ཝཀྑཏི ‘‘སབྦཱནི ཙེཏཱནཱི’’ཏིཨཱདི.

ནོཕསྶནཱནཏྟསུཏྟཝཎྞནཱ ནིཊྛིཏཱ.

༤. ཝེདནཱནཱནཏྟསུཏྟཝཎྞནཱ

༨༨. སབྦཱཔི ཏསྨིཾ དྭཱརེ ཝེདནཱ ཝཏྟེཡྻུཾ ཙཀྑུསམྥསྶཝེདནཱ ཨུཔནིསྶཡཔཙྩཡབྷཱཝིཏཱ. ནིབྦཏྟིཕཱསུཀཏྠནྟི ནིབྦཏྟིཡཱ ཨུཔནིསྶཡབྷཱཝེན པཝཏྟིཡཱ དསྶནསུཁཏྠཾ. སམྤཊིཙྪནཝེདནམེཝ གཧེཏུཾ ཝཊྚཏི, ཏཱཡ གཧིཏཱཡ ཨིཏརཱསཾ གཧཎཾ ཉཱཡཱགཏམེཝཱཏི. ཝུཏྟཾ པོརཱཎཊྛཀཐཱཡཾ. ཨཱཝཛྫནསམྥསྶནྟི ཨཱཝཛྫནམནོསམྥསྶཾ. ཨནནྟརཱུཔནིསྶཡབྷཱུཏཾ པཊིཙྩ པཋམཛཝནཝསེན ཨུཔྤཛྫཏཱིཏི ཡོཛནཱ. ཨཡམདྷིཔྤཱཡོ ཨུཔནིསྶཡསྶ ཨདྷིཔྤེཏཏྟཱ.

ཝེདནཱནཱནཏྟསུཏྟཝཎྞནཱ ནིཊྛིཏཱ.

༥. དུཏིཡཝེདནཱནཱནཏྟསུཏྟཝཎྞནཱ

༨༩. ཏཏིཡཙཏུཏྠེསུ ¶ ཝུཏྟནཡཱཝཱཏི ‘‘ནོ ཙཀྑུསམྥསྶཾ པཊིཙྩ ཨུཔྤཛྫཏི ཙཀྑུདྷཱཏཱུ’’ཏི ཨེཝཾ ཝུཏྟནཡོ, ཙཏུཏྠེ ‘‘ཙཀྑུདྷཱཏུཾ, བྷིཀྑཝེ, པཊིཙྩ ཨུཔྤཛྫཏི ཙཀྑུསམྥསྶོ’’ཏིཨཱདིནཱ ཝུཏྟནཡོ ཙ. ཨེཀཏོ ཀཏྭཱཏི ཨེཀཛ྄ཛྷཾ ཀཏྭཱ དེསིཏཱ. ཀསྨཱ པན ཏེསུ སུཏྟེསུ ཨེཝཾ དེསནཱ པཝཏྟཱཏི ཨཱཧ ‘‘སབྦཱནི ཙེཏཱནཱི’’ཏིཨཱདི. པཊིསེདྷོ པན ཏེསཾ ཝེདནཱནཱནཏྟཱདཱིནཾ ¶ ཕསྶནཱནཏྟཱདིཀསྶ པཙྩཡབྷཱཝཏོ ཏཐཱཨུཔྤཏྟིཡཱ ཨསམྦྷཝཏོ. ཨིཏོ པརེསཱུཏི ‘‘ནོ པརིཡེསནཱནཱནཏྟཾ པཊིཙྩ ཨུཔྤཛྫཏི པརིལཱ༹ཧནཱནཏྟ’’ནྟིཨཱདཱིསུ.

དུཏིཡཝེདནཱནཱནཏྟསུཏྟཝཎྞནཱ ནིཊྛིཏཱ.

༦. བཱཧིརདྷཱཏུནཱནཏྟསུཏྟཝཎྞནཱ

༩༠. པཉྩ དྷཱཏུཡོ ཀཱམཱཝཙརཱ རཱུཔསབྷཱཝཏྟཱ.

བཱཧིརདྷཱཏུནཱནཏྟསུཏྟཝཎྞནཱ ནིཊྛིཏཱ.

༧. སཉྙཱནཱནཏྟསུཏྟཝཎྞནཱ

༩༡. ཨཱཔཱཐེ པཏིཏནྟི ཙཀྑུསྶ ཨཱཔཱཐགཏཾ སཱཊཀཝེཋནཱདིསཉྙིཏཾ བྷཱུཏསངྒྷཱཏཾ སམྨཱ ནིསྶིཏཾ. ཙཀྑུདྭཱརེ སམྤཊིཙྪནཱདིསམྤཡུཏྟསཉྙཱནཾ སངྐཔྤགཏིཀཏྟཱ, ཙཀྑུཝིཉྙཱཎསམྤཡུཏྟསཉྙཱགཧཎེནེཝ ཝཱ གཧེཏབྦཏོ ‘‘རཱུཔསཉྙཱཏི ཙཀྑུཝིཉྙཱཎསམྤཡུཏྟཱ སཉྙཱ’’ཏི ཝུཏྟཾ ཏཏྠ སཉྙཱཡ ཨེཝ ལབྦྷནཏོ. ཨེཏེནེཝ ཧི ཏཾསམྤཡུཏྟོ སངྐཔྤོཏི ཨིདམྤི སཾཝཎྞིཏནྟི དཊྛབྦཾ. ཏེནཱཧ ‘‘སཉྙཱསངྐཔྤཚནྡཱ ཨེཀཛཝནཝཱརེཔི ནཱནཱཛཝནཝཱརེཔི ལབྦྷནྟཱི’’ཏི. ཛཝནསམྤཡུཏྟསྶ ཝིཏཀྐསྶ ཚནྡགཏིཀཏྟཱ ཝུཏྟཾ ‘‘ཏཱིཧི ཙིཏྟེཧི སམྤཡུཏྟོ སངྐཔྤོ’’ཏི. ཚནྡིཀཏཊྛེནཱཏི ཚནྡཀརཎཊྛེན, ཨིཙྪིཏཊྛེནཱཏི ཨཏྠོ. ཨནུཌཧནཊྛེནཱཏི པརིཌཧནཊྛེན. སནྣིསྶཡཌཱཧརསཱ ཧི རཱགགྒིཨཱདཡོ ‘‘རཱུཔེ’’ཏི པན ཏསྶ ཨཱརམྨཎདསྶནམེཏཾ. པརིལཱ༹ཧོཏི པརིལཱ༹ཧསཱིསེན ཨཔེཀྑཾ ཝདཏི. ཏེནཱཧ ‘‘པརིལཱ༹ཧེ ཨུཔྤནྣེ’’ཏིཨཱདི. ‘‘པརིལཱ༹ཧོ’’ཏི དལ༹ྷཛ྄ཛྷོསཱནཱ ¶ བལཝཱཀཱརཔྤཏྟཱ ཝུཏྟཱཏི ཨཱཧ ‘‘པརིལཱ༹ཧཔརིཡེསནཱ པན ནཱནཱཛཝནཝཱརེཡེཝ ལབྦྷནྟཱི’’ཏི. ཏཱསཾ ལདྡྷཱུཔནིསྶཡབྷཱཝཏོཏི དསྶེཏི. ཨིམིནཱ ནཡེནཱཏི ‘‘ཨུཔྤཛྫཏི སཉྙཱནཱནཏྟ’’ནྟི ཨེཏྠ ཝུཏྟནཡེན ཨཏྠོ ཝེདིཏབྦོ. ‘‘རཱུཔསཉྙཱདིནཱནཱསབྷཱཝཾ སཉྙཾ པཊིཙྩ ཀཱམསངྐཔྤཱདིནཱནཱསབྷཱཝོ སངྐཔྤོ ཨུཔྤཛྫཏཱི’’ཏིཨཱདིནཱ ནཡེན ཝེདིཏབྦོ.

སཉྙཱནཱནཏྟསུཏྟཝཎྞནཱ ནིཊྛིཏཱ.

༨. ནོཔརིཡེསནཱནཱནཏྟསུཏྟཝཎྞནཱ

༩༢. པཊིསེདྷམཏྟམེཝ ནཱནཾ, སེསཾ ཧེཊྛཱ ཝུཏྟནཡམེཝཱཏི ཨདྷིཔྤཱཡོ.

ནོཔརིཡེསནཱནཱནཏྟསུཏྟཝཎྞནཱ ནིཊྛིཏཱ.

༩. བཱཧིརཕསྶནཱནཏྟསུཏྟཱདིཝཎྞནཱ

༩༣. ཝུཏྟཔྤཀཱརེ ¶ ཨཱརམྨཎེཏི ‘‘ཨཱཔཱཐེ པཏིཏ’’ནྟིཨཱདིནཱ ཧེཊྛཱ ཝུཏྟཔྤཀཱརེ རཱུཔཱརམྨཎེ. སཉྙཱཏི རཱུཔསཉྙཱཝ. ཨརཱུཔདྷམྨོཔི སམཱནོ ཡསྨིཾ ཨཱརམྨཎེ པཝཏྟཏི, ཏཾ ཕུསནྟོ ཝིཡ ཧོཏཱིཏི ཝུཏྟཾ ‘‘ཨཱརམྨཎཾ ཕུསམཱནོ’’ཏི. ཏཎྷཱཡ ཝཏྠུབྷཱུཏཾཡེཝ རཱུཔཱརམྨཎཾ ལབྦྷཏཱིཏི ཀཏྭཱ ‘‘རཱུཔལཱབྷོ’’ཏི ཨདྷིཔྤེཏནྟི ཨཱཧ ‘‘སཧ ཏཎྷཱཡ ཨཱརམྨཎཾ རཱུཔལཱབྷོ’’ཏི. སབྦསངྒཱཧིཀནཡོཏི ཨེཀསྨིཾཡེཝ ཨཱརམྨཎེ སབྦེསཾ སཉྙཱདཱིནཾ དྷམྨཱནཾ ཨུཔྤཏྟིཡཱ སབྦསངྒཎྷནཝསེན དསྶིཏནཡོ. ཏེནཱཧ ‘‘ཨེཀསྨིཾཡེཝཱ’’ཏིཨཱདི. སབྦསངྒཱཧིཀནཡོཏི ཝཱ དྷུཝཔརིབྷོགཝསེན ནིབདྡྷཱརམྨཎནྟི ཝཱ ཨཱགནྟུཀཱརམྨཎནྟི ཝཱ ཝིབྷཱགཾ ཨཀཏྭཱ སབྦསངྒཱཧིཀནཡོ. ཨཔརོ ནཡོ. མིསྶཀོཏི ཨཱགནྟུཀཱརམྨཎེ ནིབདྡྷཱརམྨཎེ ཙ ཝིསཡཏོ ནིབདྡྷཱརམྨཎེན མིསྶཀོ. ནིབདྡྷཱརམྨཎེ སཏྟཱནཾ ཀིལེསོ མནྡོ ཧོཏི. ཏཐཱ ཧི སཉྙཱསངྐཔྤཕསྶཝེདནཱཝ དསྶིཏཱ. ཡཾ ཀིཉྩི ཝིཡཱཏི ཡཾ ཀིཉྩི ཨཉྙམཉྙཾ ཝིཡ. ཁོབྷེཏྭཱཏི ཀུཏཱུཧལུཔྤཱདནཝསེན ཙིཏྟཾ ཁོབྷེཏྭཱ.

ཨུཔཱསིཀཱཏི ¶ ཏསྶ ཨམཙྩཔུཏྟསྶ བྷརིཡཾ སནྡྷཱཡཱཧ. ཏསྨིནྟི ཨཱགནྟུཀཱརམྨཎེ. ལཱབྷོ ནཱམ ‘‘ལབྦྷཏཱི’’ཏི ཀཏྭཱ.

ཨུརུཝལླིཡཝཱསཱིཏི ཨུརུཝལླིཡལེཎཝཱསཱི, ཨུརུཝལླིཡཝིཧཱརཝཱསཱིཏི ཝདནྟི. པཱལི༹ཡཱཏི ‘‘དྷཱཏུནཱནཏྟཾ, བྷིཀྑཝེ, པཊིཙྩ ཨུཔྤཛྫཏཱི’’ཏིཨཱདིནཡཔཝཏྟཱཡ ཨིམིསྶཱ སུཏྟཔཱལི༹ཡཱ. པརིཝཊྚེཏྭཱཏི མཛ྄ཛྷེ གཧིཏཕསྶཝེདནཱཔརིཡོསཱནེ ཋཔནཝསེན པཱལི༹ཾ པརིཝཊྚེཏྭཱ. ཝུཏྟཔྤཀཱརེཏིཨཱདི པརིཝཏྟེཏབྦཱཀཱརདསྶནཾ. ཏཏྠ ཝུཏྟཔྤཀཱརེཏི ཨཱཔཱཐགཏརཱུཔཱརམྨཎེ. ཨཝིབྷཱུཏཝཱརནྟི ཨཝིབྷཱུཏཱརམྨཎཝཱརཾ. ཨཡམེཝ ཝཱ པཱཋོ. གཎྷནྟི ཀཐེནྟི. ཨེཀཛཝནཝཱརེཔི ལབྦྷནྟི ཙིརཏརནིཝེསཱབྷཱཝཱ. ནཱནཱཛཝནཝཱརེཡེཝ དལ༹ྷཏརནིཝེསཏཱཡ.

༩༤. དསམཾ ཨུཏྟཱནམེཝ ནཝམེ ཝུཏྟནཡཏྟཱ. པཊིསེདྷམཏྟམེཝ ཧེཏྠ ནཱནཏྟནྟི.

བཱཧིརཕསྶནཱནཏྟསུཏྟཱདིཝཎྞནཱ ནིཊྛིཏཱ.

ནཱནཏྟཝགྒཝཎྞནཱ ནིཊྛིཏཱ.

༢. དུཏིཡཝགྒོ

༡. སཏྟདྷཱཏུསུཏྟཝཎྞནཱ

༩༥. ཨཱབྷཱཏཱིཏི ¶ ཨཱབྷཱ, ཨཱལོཀབྷཱཝེན ནིཔྥཛྫཏི, ཨུཔཊྛཱཏཱིཏི ཝཱ ཨཏྠོ. སོ ཨེཝ ནིཛྫཱིཝཊྛེན དྷཱཏཱུཏི ཨཱབྷཱདྷཱཏུ. ཨཱལོཀསྶཱཏི ཨཱལོཀཀསིཎསྶ. སུཊྛུ, སོབྷནཾ ཝཱ བྷཱཏཱིཏི སུབྷཾ. ཀསིཎསཧཙརཎཏོ ཛྷཱནཾ སུབྷཾ. སེསཾ ཝུཏྟནཡམེཝ. སུཔརིསུདྡྷཝཎྞཾ ཀསིཎཾ. ཨཱཀཱསཱནཉྩཱདཡོཔི སུབྷཱརམྨཎཾ ཨེཝཱཏི ཀེཙི. དེསནཾ ནིཊྛཱཔེསཱིཏི དེསནཾ ཨུདྡེསམཏྟེ ཨེཝ ཋཔེསི. པཱལི༹ཡཾ ‘‘ཨནྡྷཀཱརཾ པཊིཙྩ པཉྙཱཡཏཱི’’ཏི ཨེཏྠཱཔི ཨཱརམྨཎམེཝ གཧིཏཾ, ཏཐཱ ‘‘ཨཡཾ དྷཱཏུ ཨསུབྷཾ པཊིཙྩ པཉྙཱཡཏཱི’’ཏི ཨེཏྠཱཔི. ཡཐཱ ཧི ཨིདྷ སུཝཎྞཾ ཀསིཎཾ སུབྷནྟི ཨདྷིཔྤེཏཾ, ཨེཝཾ དུབྦཎྞཾ ཨསུབྷནྟི.

ཨནྡྷཀཱརཾ པཊིཙྩཱཏི ཨནྡྷཀཱརཾ པཊིཙྪཱདཀཔཙྩཡཾ པཊིཙྩ. པཉྙཱཡཏཱིཏི པཱཀཊོ ཧོཏི. ཏེནཱཧ ‘‘ཨནྡྷཀཱརོ ཧཱི’’ཏིཨཱདི. ཨཱལོཀོཔི, ཨནྡྷཀཱརེན ¶ པརིཙྪིནྣོ ཧོཏཱིཏི ཡོཛནཱ. ཨནྡྷཀཱརོ ཏཱཝ ཨཱལོཀེན པརིཙྪིནྣོ ཧོཏུ ‘‘ཡཏྠ ཨཱལོཀོ ནཏྠི, ཏཏྠ ཨནྡྷཀཱརོ’’ཏི ཨཱལོཀོ ཀཐཾ ཨནྡྷཀཱརེན པརིཙྪིནྣོ ཧོཏཱིཏི ཨཱཧ ‘‘ཨནྡྷཀཱརེན ཧི སོ པཱཀཊོ ཧོཏཱི’’ཏི. པརིཙྪེདལེཁཱཡ ཝིཡ ཙིཏྟརཱུཔཾ ཨནྡྷཀཱརེན ཧི པརིཏོ པརིཙྪིནྣོ ཧུཏྭཱ པཉྙཱཡཏི, ཡཐཱ ཏཾ ཚཱཡཱཡ ཨཱཏཔོ. ཨེསེཝ ནཡོཏི ཨསུབྷསུབྷཱནཾ ཨཉྙམཉྙཔརིཙྪིནྣཏཾ ཨཏིདིསིཏྭཱ ཏཏྠ ཨདྷིཔྤེཏམེཝ དསྶེནྟོ ‘‘ཨསུབྷེ སཏི སུབྷཾ པཉྙཱཡཏཱི’’ཏི ཨཱཧ. ཨེཝམཱཧཱཏི ‘‘ཨསུབྷཾ པཊིཙྩ སུབྷཾ པཉྙཱཡཏཱི’’ཏི ཨཝོཙ. ‘‘རཱུཔཱི རཱུཔཱནི པསྶཏཱི’’ཏིཨཱདཱིསུ ཝིཡ ཨུཏྟརཔདལོཔེནཱཡཾ ནིདྡེསོཏི ཨཱཧ ‘‘རཱུཔཾ པཊིཙྩཱཏི རཱུཔཱཝཙརསམཱཔཏྟིཾ པཊིཙྩཱ’’ཏི. ཏཱཡ ཧི སཏི ཨདྷིགཏཱཡ. རཱུཔསམཏིཀྐམཱ ཝཱ ཧོཏཱིཏི སབྷཱཝཱརམྨཎཱནཾ རཱུཔཛ྄ཛྷཱནཱནཾ སམཏིཀྐམཱ ཨཱཀཱསཱནཉྩཱཡཏནསམཱཔཏྟི ནཱམ ཧོཏཱིཏི ཨཏྠོ. ཨེསེཝ ནཡོཏི ཨིམིནཱ ‘‘ཨཱཀཱསཱནཉྩཱཡཏནསམཏིཀྐམཱ ཝིཉྙཱཎཉྩཱཡཏནསམཱཔཏྟི ནཱམ ཧོཏཱི’’ཏིཨཱདིནཱ དྭེཔི པཀཱརེ ཨཏིདིསཏི. པཊིསངྑཱཏི པཊིསངྑཱཉཱཎེན. ཨཔྤཝཏྟིནྟི ཡཐཱཔརིཙྪིནྣཀཱལཾ ཨཔྤཝཏྟནཾ. ཨེཏེན ཁཎནིརོདྷཱདིཾ པཊིཀྑིཔཏི.

ཀཐཾ སམཱཔཏྟི པཏྟབྦཱཏི ཨིམཱསུ སཏྟསུ དྷཱཏཱུསུ ཀཱ པཀཱརཱ སཉྙཱསམཱཔཏྟི ནཱནཱ ཧུཏྭཱ སམཱཔཛྫིཏབྦཱ. ཏེནཱཧ ‘‘ཀཱིདིསཱ སམཱཔཏྟིཡོ’’ཏིཨཱདི. སཉྙཱཡ ཨཏྠིབྷཱཝེནཱཏི པཊུཀིཙྩཱཡ ¶ སཉྙཱཡ ཨཏྠིབྷཱཝེན. སུཁུམསངྑཱརཱནཾ ཏཏྠ སམཱཔཏྟིཡཾ ཨཝསིསྶཏཱཡ. ནིརོདྷོཝཱཏི སངྑཱརཱནཾ ནིརོདྷོ ཨེཝ.

སཏྟདྷཱཏུསུཏྟཝཎྞནཱ ནིཊྛིཏཱ.

༢. སནིདཱནསུཏྟཝཎྞནཱ

༩༦. བྷཱཝནཔུཾསཀམེཏཾ ‘‘ཝིསམཾ ཙནྡིམསཱུརིཡཱ པརིཝཏྟནྟཱི’’ཏིཨཱདཱིསུ (ཨ. ནི. ༤.༧༠) ཝིཡ. སནིདཱནནྟི ཨཏྟནོ ཕལཾ ནིདདཱཏཱིཏི ནིདཱནཾ, ཀཱརཎནྟི ཨཱཧ ‘‘སནིདཱནོ ¶ སཔྤཙྩཡོ’’ཏི. ཀཱམཔཊིསཾཡུཏྟོཏི ཀཱམརཱགསངྑཱཏེན ཀཱམེན པཊིསཾཡུཏྟོ ཝཱ ཀཱམཔཊིབདྡྷོ ཝཱ. ཏཀྐེཏཱིཏི ཏཀྐོ. ཨབྷཱུཏཀཱརཾ སམཱརོཔེཏྭཱ ཀཔྤེཏཱིཏི སངྐཔྤོ. ཨཱརམྨཎེ ཙིཏྟཾ ཨཔྤེཏཱིཏི ཨཔྤནཱ. ཝིསེསེན ཨཔྤེཏཱིཏི བྱཔྤནཱ. ཨཱརམྨཎེ ཙིཏྟཾ ཨབྷིནིརོཔེནྟཾ ཝིཡ པཝཏྟཏཱིཏི ཙེཏསོ ཨབྷིནིརོཔནཱ. མིཙྪཱ ཝིཔརཱིཏོ པཱཔཀོ སངྐཔྤོཏི མིཙྪཱསངྐཔྤོ. ཨཉྙེསུ ཙ ཀཱམཔཊིསཾཡུཏྟེསུ ཝིཛྫམཱནེསུ ཝིཏཀྐོ ཨེཝ ཀཱམདྷཱཏུསདྡེན ནིརུལ༹ྷོ དཊྛབྦོ ཝིཏཀྐསྶ ཀཱམཔསངྒཔྤཏྟིསཱཏིསཡཏྟཱ. ཨེས ནཡོ བྱཱཔཱདདྷཱཏུཨཱདཱིསུཔི. སབྦེཔི ཨཀུསལཱ དྷམྨཱ ཀཱམདྷཱཏུ ཧཱིནཛ྄ཛྷཱསཡེཧི ཀཱམེཏབྦདྷཱཏུབྷཱཝཏོ.

ཀིལེསཀཱམསྶ ཨཱརམྨཎབྷཱཝཏྟཱ སབྦཱཀུསལསཾགཱཧིཀཱཡ ཀཱམདྷཱཏུཡཱ ཨིཏརཱ དྭེ སངྒཧེཏྭཱ ཀཐནཾ སབྦསངྒཱཧིཀཱ. ཏིསྶནྣཾ དྷཱཏཱུནཾ ཨཉྙམཉྙཾ ཨསངྐརཏོ ཀཐཱ ཨསམྦྷིནྣཱ. ཨིམཾ ཀཱམཱཝཙརསཉྙིཏཾ ཀཱམཝིཏཀྐསཉྙིཏཉྩ ཀཱམདྷཱཏུཾ. པཊིཙྩཱཏི པཙྩཡབྷཱུཏཾ ལབྷིཏྭཱ. ཏཱིཧི ཀཱརཎེཧཱིཏི ཏཱིཧི སཱརབྷཱུཏེཧི ཀཱརཎེཧི.

བྱཱཔཱདཝིཏཀྐོ བྱཱཔཱདོ ཨུཏྟརཔདལོཔེན, སོ ཨེཝ ནིཛྫཱིཝཊྛེན སབྷཱཝདྷཱརཎཊྛེན དྷཱཏཱུཏི བྱཱཔཱདདྷཱཏུ. བྱཱཔཛྫཏི ཙིཏྟཾ ཨེཏེནཱཏི བྱཱཔཱདོ, དོསོ. བྱཱཔཱདོཔི དྷཱཏཱུཏི ཡོཛནཱ. སཧཛཱཏཔཙྩཡཱདིཝསེནཱཏི སཧཛཱཏཨཉྙམཉྙནིསྶཡསམྤཡུཏྟཨཏྠིཨཝིགཏཔཙྩཡཝསེན. ཝིསེསེན ཧི པརསྶ ཨཏྟནོ ཙ དུཀྑཱཔནཾ ཝིཧིཾསཱ, སཱ ཨེཝ དྷཱཏུ, ཨཏྠཏོ རོསནཱ པརཱུཔགྷཱཏོ, ཏཐཱ པཝཏྟོ ཝཱ དོསསཧགཏཙིཏྟུཔྤཱདོ.

ཏིཎགཧནེ ཨརཉྙེཏི ཏིཎེཧི གཧནབྷཱུཏེ ཨརཉྙེ. ཨནཡབྱསནནྟི ཨཔཱཡབྱསནཾ, པརིཧརཎཱུཔཱཡརཧིཏཾ ཝིཔཏྟིནྟི ཝཱ ཨཏྠོ. ཨཝཌྜྷིཾ ཝིནཱསནྟི ཨཝཌྜྷིཉྩེཝ ཝིནཱསཉྩཱཏི ཝདནྟི སབྦསོ ཝཌྜྷིརཧིཏཾ. སུཀྑཏིཎདཱཡོ ཝིཡ ཨཱརམྨཎཾ ཀིལེསགྒིསཾཝདྡྷནཊྛེན. ཏིཎུཀྐཱ ཝིཡ ¶ ཨཀུསལསཉྙཱ ཨནུདཧནཊྛེན. ཏིཎཀཊྛ…པེ… སཏྟཱ ཨནཡབྱསནཱཔཏྟིཏོ. ‘‘ཨིམེ སཏྟཱ’’ཏི ཧི ཨཡོནིསོ པཊིཔཛྫམཱནཱ ཨདྷིཔྤེཏཱ. ཏེནཱཧ ‘‘ཡཐཱ སུཀྑཏིཎདཱཡེ’’ཏིཨཱདི.

སམཏཱབྷཱཝཏོ ¶ སམཏཱཝིརོདྷཏོ ཝིསམཏཱཧེཏུཏོ ཙ ཝིསམཱ རཱགཱདཡོཏི ཨཱཧ ‘‘རཱགཝིསམཱདཱིནི ཨནུགཏ’’ནྟི. ཨིཙྪིཏབྦཱ ཨཝསྶཾབྷཱཝིནིབྷཱཝེན.

སཾཀིལེསཏོ ནིཀྑམནཊྛེན ནེཀྑམྨོ, སོ ཨེཝ ནིཛྫཱིཝཊྛེན དྷཱཏཱུཏི ནེཀྑམྨདྷཱཏུ. སྭཱཡཾ ནེཀྑམྨསདྡོ པབྦཛྫཱདཱིསུ ཀུསལཝིཏཀྐེ ཙ ནིརུལ༹ྷོཏི ཨཱཧ ‘‘ནེཀྑམྨཝིཏཀྐོཔི ནེཀྑམྨདྷཱཏཱུ’’ཏི. ཨིཏརཱཔི དྭེ དྷཱཏུཡོཏི ཨབྱཱཔཱདཨཝིཧིཾསཱདྷཱཏུཡོ ཝདཏི. ཝིསུཾ དཱིཔེཏབྦཱ སརཱུཔེན ཨཱགཏཏྟཱ. ཝིཏཀྐཱདཡོཏི ནེཀྑམྨསངྐཔྤཙྪནྡཔརིལཱ༹ཧཔརིཡེསནཱ. ཡཐཱནུརཱུཔཾ ཨཏྟནོ ཨཏྟནོ པཙྩཡཱནུརཱུཔཾ. ཀཐཾ པནེཏྠ ཀུསལདྷམྨེསུ པརིལཱ༹ཧོ ཝུཏྟོཏི? སངྑཱརཔརིལཱ༹ཧམཏྟཾ སནྡྷཱཡེཏཾ ཝུཏྟཾ, སོལ༹སསུ ཨཱཀཱརེསུ དུཀྑསཙྩེ སནྟཱཔཊྛོ ཝིཡ ཝུཏྟོ, ཡསྶ ཝིགམེན ཨརཧཏོ སཱིཏིབྷཱཝཔྤཏྟི ཝུཙྩཏི.

སཡཾ ན བྱཱཔཛྫཏི, ཏེན ཝཱ ཏཾསམངྒཱིཔུགྒལོ ན ཀིཉྩི བྱཱཔཱདེཏཱིཏི ཨབྱཱཔཱདོ, ཝིཧིཾསཱཡ ཝུཏྟཝིཔརིཡཱཡེཧི སཱ ཝེདིཏབྦཱ. ཧིཏེསིབྷཱཝེན མིཛྫཏི སིནིཡ྄ཧཏཱིཏི མིཏྟོ, མིཏྟསྶ ཨེསཱཏི མེཏྟི, ཨབྱཱཔཱདོ. མེཏྟཱཡནཱཏི མེཏྟཱཀཱརཎཾ, མེཏྟཱཡ ཝཱ ཨཡནཱ པཝཏྟནཱ. མེཏྟཱཡིཏཏྟནྟི མེཏྟཱཡིཏསྶ མེཏྟཱཡ པཝཏྟསྶ བྷཱཝོ. མེཏྟཱཙེཏོཝིམུཏྟཱིཏི མེཏྟཱཡནཝསེན པཝཏྟོ ཙིཏྟསམཱདྷི. སེསཾ ཝུཏྟནཡམེཝ.

སནིདཱནསུཏྟཝཎྞནཱ ནིཊྛིཏཱ.

༣. གིཉྫཀཱཝསཐསུཏྟཝཎྞནཱ

༩༧. ཨིཏོ པཊྛཱཡཱཏི ‘‘དྷཱཏུཾ, བྷིཀྑཝེ’’ཏི ཨིམསྨཱ ཏཏིཡསུཏྟཏོ པཊྛཱཡ. ཡཱཝ ཀམྨཝགྒོ, ཏཱཝ ནེཏྭཱ ཨུཔགནྟྭཱ སེཏི ཨེཏྠཱཏི ཨཱསཡོ, ཧཱིནཱདིབྷཱཝེན ཨདྷཱིནོ ཨཱསཡོ ཨཛ྄ཛྷཱསཡོ, ཏཾ ཨཛ྄ཛྷཱསཡཾ, ཨདྷིམུཏྟནྟི ཨཏྠོ. སཉྙཱ ཨུཔྤཛྫཏཱིཏིཨཱདཱིསུ ཧཱིནཱདིབྷེདཾ ཨཛ྄ཛྷཱསཡཾ པཊིཙྩ ཧཱིནཱདིབྷེདཱ སཉྙཱ, ཏནྣིསྶཡདིཊྛིཝིཀཔྤནཱ, ཝིཏཀྐོ ཙ ཨུཔྤཛྫཏི སཧཛཱཏཀོཊིཡཱ ཨུཔནིསྶཡཀོཊིཡཱ ཙ. སཏྠཱརེསཱུཏི ཏེསཾ སཏྠུཔཊིཉྙཏཱཡ ཝུཏྟཾ, ན སཏྠུལཀྑཎསབྦྷཱཝཏོ. ཨསམྨཱསམྦུདྡྷེསཱུཏི ཨཱདྷཱརེ ཝིསཡེ ཙ བྷུམྨཾ ཨེཀཏོ ཀཏྭཱ ¶ ཝུཏྟནྟི པཋམཾ ཏཱཝ དསྶེནྟོ ‘‘མཡཾ སམྨཱསམྦུདྡྷཱ’’ཏིཨཱདིཾ ཝཏྭཱ ཨིཏརཾ དསྶེནྟོ ‘‘ཏེསུ སམྨཱསམྦུདྡྷཱ ¶ ཨེཏེ’’ཏིཨཱདིམཱཧ. ཏེསཾ ‘‘མཡཾ སམྨཱསམྦུདྡྷཱ’’ཏི ཨུཔྤནྣདིཊྛི ཨིདྷ མཱུལབྷཱཝེན པུཙྪིཏཱ, ཨིཏརཱ ཨནུསངྐིཏཱཏི པུཙྪཏིཡེཝཱཏི སཱསངྐཾ ཝདཏི.

‘‘མཧཏཱི’’ཏི ཨེཏྠ མཧཱསདྡོ ‘‘མཧཱཛནོ’’ཏིཨཱདཱིསུ ཝིཡ བཧུཨཏྠཝཱཙཀོཏི དཊྛབྦོ. ཨཝིཛྫཱཔི ཧཱིནཧཱིནཏརཧཱིནཏམཱདིབྷེདེན བཧུཔཀཱརཱ. ཏསྶཱཏི དིཊྛིཡཱ. ཀསྨཱ པནེཏྠ ‘‘ཡདིདཾ ཨཝིཛྫཱ དྷཱཏཱུ’’ཏི ཨཝིཛྫཾ ཨུདྡྷརིཏྭཱ ‘‘ཧཱིནཾ དྷཱཏུཾ པཊིཙྩཱ’’ཏི ཨཛ྄ཛྷཱསཡདྷཱཏུ ནིདྡིཊྛཱཏི? ན ཁོ པནེཏཾ ཨེཝཾ དཊྛབྦཾ, ‘‘ཨཉྙཾ ཨུདྡྷརིཏྭཱ ཨཉྙཾ ནིདྡིཊྛཱ’’ཏི, ཡཏོ ཨཝིཛྫཱསཱིསེན ཨཛ྄ཛྷཱསཡདྷཱཏུ ཨེཝ གཧིཏཱ. ཨཝིཛྫཱགཧིཏོ ཧི པུརིསཔུགྒལོ དིཊྛཛ྄ཛྷཱསཡོ ཧཱིནཱདིབྷེདཾ ཨཝིཛྫཱདྷཱཏུཾ ནིསྶཱཡ ཏཏོ སཉྙཱདིཊྛིཨཱདིཀེ སངྐཔྤེཏི. པཎིདྷི པཏྠནཱ, སཱ པན ཏཐཱ ཏཐཱ ཙིཏྟསྶ ཋཔནཝསེན ཧོཏཱིཏི ཨཱཧ ‘‘ཙིཏྟཊྛཔན’’ནྟི. ཏེནཱཧ ‘‘སཱ པནེསཱ’’ཏིཨཱདི. ཨེཏེཏི ཧཱིནཔཙྩཡཱ སཉྙཱདིཊྛིཝིཏཀྐཙེཏནཱ པཏྠནཱ པཎིདྷིསངྑཱཏཱ ཧཱིནཱ དྷམྨཱ. ཧཱིནོ ནཱམ ཧཱིནདྷམྨསམཱཡོགཏོ. སབྦཔདཱནཱིཏི ‘‘པཉྙཔེཏཱི’’ཏིཨཱདཱིནི པདཱནི ཡོཛེཏབྦཱནི ཧཱིནསདྡེན མཛ྄ཛྷིམུཏྟམཊྛཱནནྟརསྶ ཨསམྦྷཝཏོ. ཨུཔཔཛྫནཾ ‘‘ཨུཔཔཏྟཱི’’ཏི ཨཱཧ ‘‘དྭེ ཨུཔཔཏྟིཡོ པཊིལཱབྷོ ཙ ནིབྦཏྟི ཙཱ’’ཏི. ཏཏྠ ཧཱིནཀུལཱདཱིཏི ཨཱདི-སདྡེན ཧཱིནརཱུཔབྷོགཔརིསཱདཱིནཾ སངྒཧོ. ཧཱིནཏྟིཀཝསེནཱཏི ཧཱིནཏྟིཀེ ཝུཏྟཏྟིཀཔདཝསེནཱཏི ཨདྷིཔྤཱཡོ. ཙིཏྟུཔྤཱདཀྑཎེཏི ཨིདཾ ཧཱིནཏྟིཀཔརིཡཱཔནྣཱནཾ ཙིཏྟུཔྤཱདཱནཾ ཝསེན ཏཏྠ ཏཏྠ ལདྡྷཏྟཱ ཝུཏྟཾ. པཉྩསུ ནཱིཙཀུལེསཱུཏི ཙཎྜཱལཝེནནེསཱདརཐཀཱརཔུཀྐུསཀུལེསུ. དྭཱདསཨཀུསལཙིཏྟུཔྤཱདཱནཾ པན ཡོ ཀོཙི པཊིལཱབྷོ ཧཱིནོཏི ཡོཛནཱ. སེསདྭཡེཔི ཨེསེཝ ནཡོ. ཨིམསྨིཾ ཋཱནེཏི ‘‘ཡཱཡཾ, བྷནྟེ, དིཊྛཱི’’ཏིཨཱདིནཱ ཨཱགཏེ ཨིམསྨིཾ ཋཱནེ. ‘‘དྷཱཏུཾ, བྷིཀྑཝེ, པཊིཙྩ ཨུཔྤཛྫཏཱི’’ཏིཨཱདིནཱ ཨཱགཏཏྟཱ ནིབྦཏྟིཡེཝ ཨདྷིཔྤེཏཱ, ན པཊིལཱབྷོ.

གིཉྫཀཱཝསཐསུཏྟཝཎྞནཱ ནིཊྛིཏཱ.

༤. ཧཱིནཱདྷིམུཏྟིཀསུཏྟཝཎྞནཱ

༩༨. ཨེཀཏོ ¶ ཧོནྟཱིཏི སམཱནཙྪནྡཏཱཡ ཨཛ྄ཛྷཱསཡཏོ ཨེཀཏོ ཧོནྟི. ནིརནྟརཱ ཧོནྟཱིཏི ཏཱཡ ཨེཝ སམཱནཙྪནྡཏཱཡ ཙིཏྟེན ནིབྦིསེསཱ ཧོནྟི. ཨིདྷ ཨདྷིམུཏྟི ནཱམ ཨཛ྄ཛྷཱསཡདྷཱཏཱུཏི ཨཱཧ ‘‘ཧཱིནཱདྷིམུཏྟིཀཱཏི ཧཱིནཛ྄ཛྷཱསཡཱ’’ཏི.

ཧཱིནཱདྷིམུཏྟིཀསུཏྟཝཎྞནཱ ནིཊྛིཏཱ.

༥. ཙངྐམསུཏྟཝཎྞནཱ

༩༩. མཧཱཔཉྙེསཱུཏི ¶ ཝིཔུལཔཉྙེསུ. ནནྟི སཱརིཔུཏྟཏྠེརཾ. ཁནྡྷནྟརནྟི ཁནྡྷཝིབྷཱགཾ, ཁནྡྷཱནཾ ཝཱ ཨནྟརཾ ཝིསེསོ ཨཏྠཱིཏི ཁནྡྷནྟརོ. ཨེས ནཡོ སེསེསུཔི. པརིཀམྨནྟི ཨིདྡྷིཝིདྷཱདྷིགམསྶ པུབྦབྷཱགཔརིཀམྨཉྩེཝ ཨུཏྟརཔརིཀམྨཉྩ. ཨཱནིསཾསནྟི ཨིདྡྷཱནིསཾསཉྩེཝ ཨཱནིསཾསཉྩ. ཨདྷིཊྛཱནཾ ཝིཀུབྦནནྟི ཨདྷིཊྛཱནཝིདྷཱནཉྩེཝ ཝིཀུབྦནཝིདྷཱནཉྩ. ཝུཏྟནཡེནེཝཱཏི ‘‘པཐཝིཾ པཏྠརནྟོ ཝིཡཱ’’ཏིཨཱདིནཱ.

དྷུཏངྒཔརིཧཱརནྟི དྷུཏངྒཱནཾ པརིཧརཎཝིདྷིཾ. པརིཧརཎགྒཧཎེནེཝ སམཱདཱནཾ སིདྡྷཾ ཧོཏཱིཏི ཏཾ ན གཧིཏཾ. ཨཱནིསཾསནྟི ཏཾཏཾདྷུཏངྒཔརིཧརཎེ དཊྛབྦཾ ཨཱནིསཾསམེཝ. སམོདྷཱནནྟི ‘‘ཨེཏྟཀཱ པིཎྜཔཱཏཔཊིསཾཡུཏྟཱ, ཨེཏྟཀཱ སེནཱསནཔཊིསཾཡུཏྟཱ’’ཏི པཙྩཡཝསེན ཨཉྙམཉྙཉྩ ཨནྟོགདྷཏྟཱ. ཨདྷིཊྛཱནནྟི ཨདྷིཊྛཱནཝིདྷིཾ. བྷེདནྟི ཨུཀྐཊྛཱདིབྷེདཉྩེཝ བྷིནྣཱཀཱརཉྩ.

པརིཀམྨནྟི ‘‘དིབྦཙཀྑུ ཨེཝཾ ཨུཔྤཱདེཏབྦཾ, ཨེཝཾ ཝིསོདྷེཏབྦ’’ནྟིཨཱདིནཱ པརིཀམྨཝིདྷཱནཾ. ཨཱནིསཾསནྟི པརེསཾ ཨཛ྄ཛྷཱསཡཱནུརཱུཔཱཡཏནཱདིཨཱནིསཾསཔབྷེདཾ. ཨུཔཀྐིལེསནྟི སཱདྷཱརཎཾ ཨསཱདྷཱརཎཾ དུཝིདྷཾ ཨུཔཀྐིལེསཾ. ཝིཔསྶནཱབྷཱཝནུཔཀྐིལེསཱ ཧི དིབྦཙཀྑུསྶ ཨུཔཀྐིལེསཱཏི ཝེདིཏབྦཱ.

སངྑེཔཝིཏྠཱརགམྦྷཱིརུཏྟཱནཝིཙིཏྲཀཐཱདཱིསཱུཏི སངྑེཔོ ཝིཏྠཱརོ གམྦྷཱིརཏཱ ཨུཏྟཱནཏཱ ཝིཙིཏྲབྷཱཝོ ནེཡྻཏྠཏཱ ནཱིཏཏྠཏཱཏི ཨེཝམཱདཱིསུ དྷམྨསྶ ཀཐེཏབྦཔྤཀཱརེསུ ཏཾ ཏཾ ཀཐེཏབྦཱཀཱརཾ.

ཨིཏི-སདྡོ ¶ ཨཱདིཨཏྠོ, པཀཱརཏྠོ ཝཱ. ཏེན –

‘‘ཨཱདིམྷི སཱིལཾ དེསེཡྻ, (དཱི. ནི. ཨཊྛ. ༡.༡༩༠; མ. ནི. ཨཊྛ. ༡.༢༩༡)

མཛ྄ཛྷེ ཙིཏྟཾ ཝིནིདྡིསེ;

ཨནྟེ པཉྙཱ ཀཐེཏབྦཱ,

ཨེསོ དྷམྨཀཐཱཝིདྷོ’’ཏི. –

ཨེཝཾ ཀཐེཏབྦཱཀཱརཾ སངྒཎྷཱཏི.

‘‘སིཐིལཾ ¶ དྷནིཏཉྩ དཱིགྷརསྶཾ, གརུཀཾ ལཧུཀཉྩ ནིགྒཧཱིཏཾ;

སམྦནྡྷཾ ཝཝཏྠིཏཾ ཝིམུཏྟཾ, དསདྷཱ བྱཉྫནབུདྡྷིཡཱ པབྷེདོ’’ཏི. (དཱི. ནི. ༡.༡༩༠; མ. ནི. ཨཊྛ. ༡.༢༩༡; པརི. ༤༨༥) –

ཨེཝཾ ཝུཏྟཾ དསཝིདྷཾ བྱཉྫནབུདྡྷིཾ. ཨཊྛུཔྤཏྟིནྟི ཏསྶ ཏསྶ སུཏྟསྶ ཛཱཏཀསྶ ཙ ཨཊྛུཔྤཏྟིཾ. ཨནུསནྡྷིནྟི པཙྪཱནུསནྡྷིཨཱདིཨནུསནྡྷིཾ. པུབྦཱཔརནྟི སམྦནྡྷཾ. ཨིདཾ པདཾ ཨེཝཾ ཝཏྟབྦཾ, ཨིདཾ པུབྦཱཔརཾ ཨེཝཾ གཧེཏབྦནྟི.

ཀུལསངྒཎྷནཔརིཧཱརནྟི ལཱབྷུཔྤཱདནཏྠཾ ཀུལཱནཾ སངྒཎྷནཝིདྷིནོ པརིཧརཎཾ ཏནྣིཡམིཏཾ ཨེཀནྟིཀཾ ཀུལསངྒཧཎཝིདྷིཾ.

ཙངྐམསུཏྟཝཎྞནཱ ནིཊྛིཏཱ.

༦. སགཱཐཱསུཏྟཝཎྞནཱ

༡༠༠. ‘‘དྷཱཏུསོ སཾསནྡནྟཱི’’ཏི ཨིདཾ ཨཛ྄ཛྷཱསཡཏོ སརིཀྑཏཱདསྶནཾ, ན ཀཱཡེན མིསྶཱིབྷཱཝདསྶནནྟི ཨཱཧ ‘‘སམུདྡནྟརེ’’ཏིཨཱདི. ནིརནྟརོཏི ནིབྦིསེསོ. སཾསགྒཱཏི པཉྩཝིདྷསཾསགྒཧེཏུ. སཾསགྒགཧཎེན ཙེཏྠ སཾསགྒཝཏྠུཀཱ ཏཎྷཱ གཧིཏཱ. ཏེནཱཧ ‘‘དསྶན…པེ… སྣེཧེནཱ’’ཏི.

ཝནཏི བྷཛཏི སཛྫཏི ཏེནཱཏི ཝནཾ, ཝནཐོཏི ཙ ཀིལེསོ ཝུཙྩཏཱིཏི ཨཱཧ ‘‘ཝནཐོ ཛཱཏོཏི ཀིལེསཝནཾ ཛཱཏ’’ནྟི. ཨིཏརེ སཾསགྒམཱུལཀཱཏི ཏམེཝ པཊིཀྑིཔནྟོ ཨཱཧ ‘‘ཨདསྶནེནཱ’’ཏི. སཱདྷུཛཱིཝཱིཏི སཱདྷུ སུཊྛུ ཛཱིཝཱི, ཏཾཛཱིཝནསཱིལོ. ཏེནཱཧ ‘‘པརིསུདྡྷཛཱིཝིཏཾ ཛཱིཝམཱནོ’’ཏི.

སགཱཐཱསུཏྟཝཎྞནཱ ནིཊྛིཏཱ.

༧. ཨསྶདྡྷསཾསནྡནསུཏྟཝཎྞནཱ

༡༠༡. ནིརོཛཱཏི ¶ སདྡྷཱསྣེཧཱབྷཱཝེན ནིསྣེཧཱ. ཏཏོ ཨེཝ ཨརསབྷཱཝེན ནིརསཱ. ཨེཀསདིསཱཏི སམསམཱ ནིབྦིསེསཱ. ཏེནཱཧ ‘‘ནིརནྟརཱ’’ཏི. ཨལཛྫིཏཱཡ ཨེཀསཱིམཀཏཱ བྷིནྣམརིཡཱདཱ. སདྡྷཱ ཏེསཾ ཨཏྠཱིཏི སདྡྷཱ. ཏནྟིཔཱལཀཱཏི སདྡྷམྨཏནྟིཡཱ པཱལཀཱ. ཝཾསཱནུརཀྑཀཱཏི ¶ ཨརིཡཝཾསསྶ ཨནུརཀྑཀཱ. ཨཱརདྡྷཝཱིརིཡཱཏི པགྒཧིཏཝཱིརིཡཱ. ཡསྨཱ ཏཱདིསཱནཾ ཝཱིརིཡཾ པརིཔུཎྞཾ ནཱམ ཧོཏི ཀིཙྩསིདྡྷིཡཱ, ཏསྨཱ ཝུཏྟཾ ‘‘པརིཔུཎྞཔརཀྐམཱ’’ཏི. སབྦཀིཙྩཔརིགྒཱཧིཀཱཡཱཏི ཙཏུནྣཾ སཏིཔཊྛཱནཱནཾ བྷཱཝནཱཀིཙྩཔརིགྒཱཧིཀཱཡ.

ཨསྶདྡྷསཾསནྡནསུཏྟཝཎྞནཱ ནིཊྛིཏཱ.

༨-༡༢. ཨསྶདྡྷམཱུལཀསུཏྟཱདིཝཎྞནཱ

༡༠༢-༡༠༦. ཨཊྛམཱདཱིནཱིཏི ཨཊྛམཾ ནཝམཾ དསམཾ ཨེཀཱདསམཾ དྭཱདསམནྟི ཨིམཱནི པཉྩ སུཏྟཱནཱིཏི ཨེཀེ. ཨཔརེ པན ནཝ སུཏྟཱནཱིཏི ཨིཙྪནྟི. སྭཱཡམཏྠོ ཨཊྛཀཐཱཡཾ ཝུཏྟོཡེཝ. པཱལི༹ཡཉྩ ཀེསུཙི པོཏྠཀེསུ ལིཁཱིཡཏི.

ཨསྶདྡྷམཱུལཀསུཏྟཱདིཝཎྞནཱ ནིཊྛིཏཱ.

དུཏིཡཝགྒཝཎྞནཱ ནིཊྛིཏཱ.

༣. ཀམྨཔཐཝགྒོ

༡-༢. ཨསམཱཧིཏསུཏྟཱདིཝཎྞནཱ

༡༠༧-༡༠༨. ཨིཏོ པརེསཱུཏི ཨིཏོ དུཏིཡཝགྒཏོ པརེསུ སུཏྟེསུ. པཋམནྟི པཋམཝགྒེ པཋམཾ. ཀསྨཱ པནེཏྠ ཨེཝཾ དེསནཱ པཝཏྟཱཏི ཨཱཧ ‘‘ཨེཝཾ ཝུཙྩམཱནེ’’ཏིཨཱདི.

ཨསམཱཧིཏསུཏྟཱདིཝཎྞནཱ ནིཊྛིཏཱ.

༣-༥. པཉྩསིཀྑཱཔདསུཏྟཱདིཝཎྞནཱ

༡༠༩-༡༡༡. སུརཱམེརཡསངྑཱཏནྟི ¶ པིཊྛསུརཱདིསུརཱསངྑཱཏཾ པུཔྥཱསཝཱདིམེརཡསངྑཱཏཉྩ. མཛྫནཊྛེན མཛྫཾ. སུརཱམེརཡམཛྫཔྤམཱདོཏི ཝུཙྩཏི ‘‘མཛྫཏི ཏེནཱ’’ཏི ཀཏྭཱ. ཏསྨིཾ ཏིཊྛནྟཱིཏི ཏསྨིཾ པམཱདེ པམཛྫནཝསེན ཏིཊྛནྟཱིཏི ཨཏྠོ. སེསཾ ཏཏིཡཙཏུཏྠེསུ སུཝིཉྙེཡྻམེཝཱཏི.

པཉྩམེ ¶ ཏཱནི པདཱནི སཾཝཎྞེཏུཾ ‘‘པཉྩམེ’’ཏིཨཱདི ཨཱརདྡྷཾ. ཏཏྠ པཱཎོ ནཱམ ཝོཧཱརཏོ སཏྟོ, པརམཏྠཏོ ཛཱིཝིཏིནྡྲིཡཾ, ཏཾ པཱཎཾ ཨཏིཔཱཏེནྟི ཨཏིཙྩ ཨནྟརེཡེཝ, ཨཏིཀྐམྨ ཝཱ སཏྠཱདཱིཧི ཨབྷིབྷཝིཏྭཱ པཱཏེནྟི སཎིཀཾ པཏིཏུཾ ཨདཏྭཱ སཱིགྷཾ པཱཏེནྟཱིཏི ཨཏྠོ. ཀཱཡེན ཝཱཙཱཡ ཝཱ ཨདིནྣཾ པརསནྟཀཾ. ཨཱདིཡནྟཱིཏི གཎྷནྟི. མིཙྪཱཏི ན སམྨཱ, གཱརཡ྄ཧཝསེན. མུསཱཏི ཨཏཐཾ ཝཏྠུ. ཝདནྟཱིཏི ཝིསཾཝཱདནཝསེན ཝདནྟི. པིཡསུཉྙཀརཎཏོ པིསུཎཱ, པིསཏི ཝཱ པརེ སཏྟེ, ཧིཾསཏཱིཏི ཨཏྠོ. མམྨཙྪེདིཀཱཏི ཨེཏེན པརསྶ མམྨཙྪེདཝསེན ཨེཀནྟཕརུསསཉྩེཏནཱ ཕརུསཝཱཙཱ ནཱམཱཏི དསྶེཏི. ཨབྷིཛ྄ཛྷཱསདྡོ ལུབྦྷནེ ནིརུལ༹ྷོཏི ཨཱཧ ‘‘པརབྷཎྜེ ལུབྦྷནསཱིལཱཏི ཨཏྠོ’’ཏི. བྱཱཔནྣནྟི དོསཝསེན ཝིཔནྣཾ. པཀཏིཝིཛཧནེན པཱུཏིབྷཱུཏཾ. སཱདྷཱུཧི གརཧིཏབྦཏཾ པཏྟཱ ‘‘ནཏྠི དིནྣ’’ནྟིཨཱདིནཡཔྤཝཏྟཱ ནཏྠིཀཱཧེཏུཀཨཀིརིཡདིཊྛི ཀམྨཔཐཔརིཡཱཔནྣཱ ནཱམ. མིཙྪཏྟཔརིཡཱཔནྣཱ སབྦཱཔི ལོཀུཏྟརམགྒཔཊིཔཀྑཱ ཝིཔརཱིཏདིཊྛི.

ཏེསནྟི ཀམྨཔཐཱནཾ. ཝོཧཱརཏོཏི ཨིནྡྲིཡབདྡྷཾ ཨུཔཱདཱཡ པཉྙཏྟིམཏྟཏོ. ཏིརཙྪཱནགཏཱདཱིསཱུཏི ཨཱདི-སདྡེན པེཏཱནཾ སངྒཧོ. པཡོགཝཏྠུམཧནྟཏཱདཱིཧི མཧཱསཱཝཛྫཏཱ ཏེཧི པཙྩཡེཧི ཨུཔྤཛྫམཱནཱཡ ཙེཏནཱཡ བལཝབྷཱཝཏོ. ཡཐཱཝུཏྟཔཙྩཡཝིཔརིཡཱཡེཔི ཏཾཏཾཔཙྩཡེཧི ཙེཏནཱཡ བལཝབྷཱཝཝསེན ཨཔྤསཱཝཛྫམཧཱསཱཝཛྫཏཱ ཝཱ ཝེདིཏབྦཱ. ཨིདྡྷིམཡོཏི ཀམྨཝིཔཱཀིདྡྷིམཡོ དཱཋཱཀོཊནཱདཱིནཾ ཝིཡ.

མེཐུནསམཱཙཱརེསཱུཏི སདཱརཔརདཱརགམནཝསེན དུཝིདྷེསུ མེཐུནསམཱཙཱརེསུ. ཏེཔི ཧཱིནཱདྷིམུཏྟིཀེཧི ཀཏྟབྦཏོ ཀཱམཱ ནཱམ. མིཙྪཱཙཱརོཏི གཱརཡ྄ཧཱཙཱརོ. གཱརཡ྄ཧཏཱ ཙསྶ ཨེཀནྟནིཧཱིནཏཱཡཱཏི ཨཱཧ ¶ ‘‘ཨེཀནྟནིནྡིཏོ ལཱམཀཱཙཱརོ’’ཏི ཨསདྡྷམྨཱདྷིཔྤཱཡེནཱཏི ཨསདྡྷམྨསེཝནཱདྷིཔྤཱཡེན. གོཏྟརཀྑིཏཱཏི སགོཏྟེཧི རཀྑིཏཱ. དྷམྨརཀྑིཏཱཏི སཧདྷམྨེཧི རཀྑིཏཱ. སསྶཱམིཀཱ ནཱམ སཱརཀྑཱ. ཡསྶཱ གམནེ དཎྜོ ཋཔིཏོ, སཱ སཔརིདཎྜཱ. བྷརིཡབྷཱཝཱཡ དྷནེན ཀཱིཏཱ དྷནཀྐཱིཏཱ. ཚནྡེན ཝསཏཱིཏི ཚནྡཝཱསིནཱི. བྷོགཏྠཾ ཝསཏཱིཏི བྷོགཝཱསིནཱི. པཊཏྠཾ ཝསཏཱིཏི པཊཝཱསིནཱི. ཨུདཀཔཏྟཾ ཨཱམསིཏྭཱ གཧིཏཱ ཨོདཔཏྟཀིནཱི. ཙུམྦཊཾ ཨཔནེཏྭཱ གཧིཏཱ ཨོབྷཊཙུམྦཊཱ. ཀརམརཱནཱིཏཱ དྷཛཱཧཊཱ. ཏངྑཎིཀཾ གཧིཏཱ མུཧུཏྟིཀཱ. ཨབྷིབྷཝིཏྭཱ ཝཱིཏིཀྐམོ མིཙྪཱཙཱརོ མཧཱསཱཝཛྫོ, ན ཏཐཱ དྭིནྣཾ སམཱནཙྪནྡཏཱཡ. ཨབྷིབྷཝིཏྭཱ ཝཱིཏིཀྐམནེ སཏིཔི མགྒེནམགྒཔཊིཔཏྟིཨདྷིཝཱསནེ པུརིམུཔྤནྣསེཝནཱབྷིསནྡྷིཔཡོགཱབྷཱཝཏོ མིཙྪཱཙཱརོ ན ཧོཏི ཨབྷིབྷུཡྻམཱནསྶཱཏི ཝདནྟི. སེཝནཱཙིཏྟེ སཏི པཡོགཱབྷཱཝོ ཨཔྤམཱཎཾ ཡེབྷུཡྻེན ཨིཏྠིཡཱ སེཝནཱཔཡོགསྶ ཨབྷཱཝཏོ. ཏཐཱ སཏི པུརེཏརཾ སེཝནཱཙིཏྟསྶ ཨུཔཊྛཱནེཔི ¶ ཏསྶཱ མིཙྪཱཙཱརོ ན སིཡཱ, ཏཐཱ པུརིསསྶཔི སེཝནཱཔཡོགཱབྷཱཝེ. ཏསྨཱ ཨཏྟནོ རུཙིཡཱ པཝཏྟིཏསྶ ཝསེན ཏཡོ, བལཀྐཱརེན པཝཏྟིཏསྶ ཝསེན ཏཡོཏི སབྦེཔི ཨགྒཧིཏགྒཧཎེན ‘‘ཙཏྟཱརོ སམྦྷཱརཱ’’ཏི ཝུཏྟཾ.

ཨཱསེཝནམནྡཏཱཡཱཏི ཡཱཡ ཨཀུསལཙེཏནཱཡ སམྥཾ པལཔཏི, ཏསྶཱ ཨིཏྟརཀཱལཏཱཡ པཝཏྟིཡཱ ཨནཱསེཝནཱཏི པརིདུབྦལཱ ཧོཏི ཙེཏནཱ.

ཨུཔསགྒཝསེན ཨཏྠཝིསེསཝཱཙིནོ དྷཱཏུསདྡཱཏི ཨབྷིཛ྄ཛྷཱཡཏཱིཏི པདསྶ པརབྷཎྜཱབྷིམུཁཱིཏིཨཱདིཨཏྠོ ཝུཏྟོ. ཏནྣིནྣཏཱཡཱཏི ཏསྨིཾ པརབྷཎྜེ ལུབྦྷནཝསེན ནིནྣཏཱཡ. ཨབྷིཔུབྦོ ཛྷེ-སདྡོ ལུབྦྷནེ ནིརུལ༹ྷོཏི དཊྛབྦོ. ཡསྶ བྷཎྜཾ ཨབྷིཛ྄ཛྷཱཡཏི, ཏསྶ ཨཔྤགུཎཏཱཡ ཨཔྤསཱཝཛྫཱ, མཧཱགུཎཏཱཡ མཧཱསཱཝཛྫཱཏིཨཱདིནཱ ནཡེན ཏཏྠ ཨཔྤསཱཝཛྫམཧཱསཱཝཛྫཝིབྷཱགོ ཝེདིཏབྦོ. ཏེནཱཧ ‘‘ཨདིནྣཱདཱནཾ ཝིཡཱ’’ཏིཨཱདི. ཨཏྟནོ པརིཎཱམནཾ ཙིཏྟེནེཝཱཏི དཊྛབྦཾ.

ཧིཏསུཁཾ བྱཱཔཱདཡཏཱིཏི ཡོ ནཾ ཨུཔྤཱདེཏི, ཡསྶ ཨུཔྤཱདེཏི, ཏསྶ སཏི སམཝཱཡེ ཧིཏསུཁཾ ཝིནཱསེཏི. ཨཧོ ཝཏཱཏི ཨིམིནཱ ཡཐཱ ཨབྷིཛ྄ཛྷཱནེ ཝཏྠུནོ ཨེཀནྟཏོ ཨཏྟནོ པརིཎཱམནཾ དསྶིཏཾ ¶ , ཨེཝམིདྷཱཔི ཝཏྠུནོ ‘‘ཨཧོ ཝཏཱ’’ཏི ཨིམིནཱ པརསྶ ཝིནཱསཙིནྟཱཡ ཨེཀནྟཏོ ནིཡམིཏབྷཱཝཾ དསྶེཏི. ཨེཝཉྷི ནེསཾ དཱརུཎཔྤཝཏྟིཡཱ ཀམྨཔཐཔྤཝཏྟི.

ཡཐཱབྷུཙྩགཧཎཱབྷཱཝེནཱཏི ཡཐཱཏཙྪགཧཎསྶ ཨབྷཱཝེན ཨནིཙྩཱདིསབྷཱཝསྶ ནིཙྩཱདིཏོ གཧཎེན. མིཙྪཱ པསྶཏཱིཏི ཝིཏཐཾ པསྶཏི. སམྥཔྤལཱཔོ ཝིཡཱཏི ཨིམིནཱ ཨཱསེཝནསྶ ཨཔྤམཧནྟཏཱཧི མིཙྪཱདིཊྛིཡཱ ཨཔྤསཱཝཛྫམཧཱསཱཝཛྫཏཱ. ཝཏྠུནོཏི གཧིཏཝཏྠུནོ. གཧིཏཱཀཱརཝིཔརཱིཏཏཱཏི མིཙྪཱདིཊྛིཡཱ གཧིཏཱཀཱརསྶ ཝིཔརཱིཏཏཱ. ཏཐཱབྷཱཝེནཱཏི ཨཏྟནོ གཧིཏཱཀཱརེནེཝ ཏསྶཱ དིཊྛིཡཱ, གཧིཏསྶ ཝཱ ཝཏྠུནོ ཨུཔཊྛཱནཾ ‘‘ཨེཝམེཏཾ, ན ཨིཏོ ཨཉྙཐཱ’’ཏི.

དྷམྨཏོཏི སབྷཱཝཏོ. ཀོཊྛཱསཏོཏི ཙིཏྟངྒཀོཊྛཱསཏོ, ཡཾཀོཊྛཱསཱ ཧོནྟི, ཏཏོཏི ཨཏྠོ. ཙེཏནཱདྷམྨཱཝཱཏི ཙེཏནཱསབྷཱཝཱ ཨེཝ. པཊིཔཱཊིཡཱ སཏྟཱཏི ཨེཏྠ ནནུ ཙེཏནཱ ཨབྷིདྷམྨེ ཀམྨཔཐེསུ ན ཝུཏྟཱཏི པཊིཔཱཊིཡཱ སཏྟནྣཾ ཀམྨཔཐབྷཱཝོ ན ཡུཏྟོཏི? ན, ཨཝཙནསྶ ཨཉྙཧེཏུཀཏྟཱ. ན ཧི ཏཏྠ ཙེཏནཱཡ ཨཀམྨཔཐཏྟཱ ཀམྨཔཐརཱསིམྷི ཨཝཙནཾ, ཀདཱཙི པན ཀམྨཔཐོ ¶ ཧོཏི, ན སབྦདཱཏི ཀམྨཔཐབྷཱཝསྶ ཨནིཡཏཏྟཱ ཨཝཙནཾ. ཡདཱ, པནསྶ ཀམྨཔཐབྷཱཝོ ཧོཏི, ཏདཱ ཀམྨཔཐརཱསིསངྒཧོ ན ནིཝཱརིཏོ. ཨེཏྠཱཧ – ཡདི ཙེཏནཱཡ སབྦདཱ ཀམྨཔཐབྷཱཝཱབྷཱཝཏོ ཨནིཡཏོ ཀམྨཔཐབྷཱཝོཏི ཀམྨཔཐརཱསིམྷི ཨཝཙནཾ, ནནུ ཨབྷིཛ྄ཛྷཱདཱིནམྤི ཀམྨཔཐབྷཱཝཾ ཨཔྤཏྟཱནཾ ཨཏྠིཏཱཡ ཨནིཡཏོ ཀམྨཔཐབྷཱཝོཏི ཏེསམྤི ཀམྨཔཐརཱསིམྷི ཨཝཙནཾ ཨཱཔཛྫཏཱིཏི? ནཱཔཛྫཏི, ཀམྨཔཐཏཱཏཾསབྷཱགཏཱཧི ཏེསཾ ཏཏྠ ཝུཏྟཏྟཱ. ཡདི ཨེཝཾ ཙེཏནཱཔི ཏཏྠ ཝཏྟབྦཱ སིཡཱ? སཙྩམེཏཾ. སཱ པན པཱཎཱཏིཔཱཏཱདིཀཱཏི པཱཀཊོ ཏསྶཱ ཀམྨཔཐབྷཱཝོཏི ན ཝུཏྟཱ སིཡཱ. ཙེཏནཱཡ ཧི ‘‘ཙེཏནཱཧཾ, བྷིཀྑཝེ, ཀམྨཾ ཝདཱམི (ཨ. ནི. ༦.༦༣; ཀཐཱ. ༥༣༩) ཏིཝིདྷཱ, བྷིཀྑཝེ, ཀཱཡསཉྩེཏནཱ ཨཀུསལཾ ཀཱཡཀམྨ’’ནྟིཨཱདིཝཙནཏོ (ཀཐཱ. ༥༣༩) ཀམྨབྷཱཝོ པཱཀཊོ. ཀམྨཾཡེཝ ཙ སུགཏིདུགྒཏཱིནཾ ཏཏྠུཔྤཛྫནཀསུཁདུཀྑཱནཉྩ པཐབྷཱཝེན པཝཏྟཾ ཀམྨཔཐོཏི ཝུཙྩཏཱིཏི པཱཀཊོ, ཏསྶཱ ཀམྨཔཐབྷཱཝོ. ཨབྷིཛ྄ཛྷཱདཱིནཾ པན ཙེཏནཱསམཱིཧནབྷཱཝེན སུཙརིཏདུཙྩརིཏབྷཱཝོ, ཙེཏནཱཛནིཏཔིཊྛིཝཊྚཀབྷཱཝེན སུགཏིདུགྒཏིཏདུཔྤཛྫནཀསུཁདུཀྑཱནཾ ¶ པཐབྷཱཝོ ཙཱཏི, ན ཏཐཱ པཱཀཊོ ཀམྨཔཐབྷཱཝོཏི, ཏེ ཨེཝ ཏེན སབྷཱཝེན དསྶེཏུཾ ཨབྷིདྷམྨེ ཀམྨཔཐརཱསིབྷཱཝེན ཝུཏྟཱ. ཨཏཐཱཛཱཏིཡཀཏྟཱ ཝཱ ཙེཏནཱ ཏེཧི སདྡྷིཾ ན ཝུཏྟཱཏི དཊྛབྦཾ. མཱུལཾ པཏྭཱཏི མཱུལདེསནཾ པཏྭཱ, མཱུལསབྷཱཝེསུ དྷམྨེསུ དེསིཡམཱནེསཱུཏི ཨཏྠོ.

ཨདིནྣཱདཱནཾ སཏྟཱརམྨཎནྟི ཨིདཾ ‘‘པཉྩ སིཀྑཱཔདཱ པརིཏྟཱརམྨཎཱ ཨེཝཱ’’ཏི ཨིམཱཡ པཱལི༹ཡཱ ཝིརུཛ྄ཛྷཏི. ཡཉྷི པཱཎཱཏིཔཱཏཱདིདུསྶཱིལྱསྶ ཨཱརམྨཎཾ, ཏདེཝ ཏཾ ཝེརམཎིཡཱ ཨཱརམྨཎཾ. ཝཱིཏིཀྐམིཏབྦཝཏྠུཏོ ཨེཝ ཧི ཝིརཏཱིཏི. ‘‘སཏྟཱརམྨཎ’’ནྟི ཝཱ སཏྟསངྑཱཏཾ སངྑཱརཱརམྨཎམེཝ ཨུཔཱདཱཡ ཝུཏྟཏྟཱ ན ཀོཙི ཝིརོདྷོ. ཏཐཱ ཧི ཝུཏྟཾ སམྨོཧཝིནོདནིཡཾ (ཝིབྷ. ཨཊྛ. ༧༡༤) ‘‘ཡཱནི སིཀྑཱཔདཱནི ཨེཏྠ ‘སཏྟཱརམྨཎཱནཱི’ཏི ཝུཏྟཱནི, ཏཱནི ཡསྨཱ ‘སཏྟོཏི’ཏི སངྑཾ གཏེ སངྑཱརེཡེཝ ཨཱརམྨཎཾ ཀརོནྟཱི’’ཏི. ཨིཏོ པརེསུཔི ཨེསེཝ ནཡོ. ཝིསབྷཱགཝཏྠུནོ ‘‘ཨིཏྠིཔུརིསཱ’’ཏི གཧེཏབྦཏོ སཏྟཱརམྨཎོཏིཔི ཨེཀེ. ‘‘ཨེཀོ དིཊྛོ, དྭེ སུཏཱ’’ཏིཨཱདིནཱ སམྥཔྤལཔནེ དིཊྛསུཏམུཏཝིཉྙཱཏཝསེན. ཏཐཱ ཨབྷིཛ྄ཛྷཱཏི ཨེཏྠ ཏཐཱ-སདྡོ ‘‘དིཊྛསུཏམུཏཝིཉྙཱཏཝསེནཱ’’ཏི ཨིདམྤི ཨུཔསཾཧརཏི, ན སཏྟསངྑཱརཱརམྨཎཏཾ ཨེཝ དསྶནཱདིཝསེན ཨབྷིཛ྄ཛྷཱཡནཏོ. ‘‘ནཏྠི སཏྟཱ ཨོཔཔཱཏིཀཱ’’ཏི པཝཏྟམཱནཱཔི མིཙྪཱདིཊྛི ཏེབྷཱུམཀདྷམྨཱརམྨཎཱ ཨེཝཱཏི ཨདྷིཔྤཱཡེན ཏསྶཱ སངྑཱརཱརམྨཎཏཱ ཝུཏྟཱ. ཀཐཾ པན མིཙྪཱདིཊྛིཡཱ མཧགྒཏཔྤཏྟཱ དྷམྨཱ ཨཱརམྨཎཾ ཧོནྟཱིཏི? སཱདྷཱརཎཏོ. ནཏྠི སུཀཊདུཀྐཊཱནཾ ཀམྨཱནཾ ཕལཾ ཝིཔཱཀོཏི ཧི པཝཏྟམཱནཱཡ ཨཏྠཏོ རཱུཔཱརཱུཔཱཝཙརདྷམྨཱཔི གཧིཏཱཝ ཧོནྟཱིཏི.

སུཁབཧུལཏཱཡ ¶ རཱཛཱནོ ཧསམཱནཱཔི ‘‘ཙོརཾ གྷཱཏེཐཱ’’ཏི ཝདནྟི, ཧཱསོ པན ཏེསཾ ཨཉྙཝིསཡོཏི ཨཱཧ ‘‘སནྣིཊྛཱཔཀཙེཏནཱ པན ནེསཾ དུཀྑསམྤཡུཏྟཱཝ ཧོཏཱི’’ཏི. མཛ྄ཛྷཏྟཝེདནོ ན ཧོཏི, སུཁཝེདནོཝ. ཏཏྠ ‘‘ཀཱམཱནཾ སམུདཡཱ’’ཏིཨཱདིནཱ ཝེདནཱབྷེདོ ཝེདིཏབྦོ. ལོབྷསམུཊྛཱནོ མུསཱཝཱདོ སུཁཝེདནོ ཝཱ སིཡཱ མཛ྄ཛྷཏྟཝེདནོ ཝཱ, དོསསམུཊྛཱནོ དུཀྑཝེདནོ ཝཱཏི མུསཱཝཱདོ ཏིཝེདནོ སིཡཱ. ཨིམིནཱ ནཡེན སེསེསུཔི ཡཐཱརཧཾ ཝེདནཱནཾ ¶ ‘‘ལོབྷོ ནིདཱནཾ ཀམྨཱནཾ སམུདཡཱཡཱ’’ཏིཨཱདིནཱ བྷེདོ ཝེདིཏབྦོ.

པཱཎཱཏིཔཱཏོ དོསམོཧཝསེན དྭིམཱུལཀོཏི སམྤཡུཏྟམཱུལམེཝ སནྡྷཱཡ ཝུཏྟཾ. ཏསྶ ཧི མཱུལཊྛེན ཨུཔཀཱརབྷཱཝོ དོསཝིསེསོ, ནིདཱནམཱུལེ པན གཡ྄ཧམཱནེ ལོབྷམོཧཝསེནཔི ཝཊྚཏི. སམྨཱུལ༹ྷོ ཨཱམིསཀིཉྫཀྑཀཱམོཔི ཧི པཱཎཾ ཧནཏི. ཏེནེཝཱཧ ‘‘ལོབྷོ ནིདཱནཾ ཀམྨཱནཾ སམུདཡཱཡཱ’’ཏིཨཱདི (ཨ. ནི. ༣.༣༤). སེསེསུཔི ཨེསེཝ ནཡོ.

ཨསམཱདིནྣསཱིལསྶ སམྤཏྟཏོ ཡཐཱཨུཔཊྛིཏཝཱིཏིཀྐམིཏབྦཝཏྠུཏོ ཝིརཏི སམྤཏྟཝིརཏི. སམཱདཱནེན ཨུཔྤནྣཱ ཝིརཏི སམཱདཱནཝིརཏི. ཀིལེསཱནཾ སམུཙྪིནྡནཝསེན པཝཏྟཱ མགྒསམྤཡུཏྟཱ ཝིརཏི སམུཙྪེདཝིརཏི. ཀཱམཉྩེཏྠ པཱལི༹ཡཾ ཝིརཏིཡོཝ ཨཱགཏཱ, སིཀྑཱཔདཝིབྷངྒེ པན ཙེཏནཱཔི ཨཱཧརིཏྭཱ དསྶིཏཱཏི ཏདུབྷཡམྤི གཎྷནྟོ ‘‘ཙེཏནཱཔི ཝཊྚནྟི ཝིརཏིཡོཔཱི’’ཏི ཨཱཧ.

ཨདུསྶཱིལྱཱརམྨཎཱ ཛཱིཝིཏིནྡྲིཡཱདིཨཱརམྨཎཱ ཀཐཾ དུསྶཱིལྱཱནི པཛཧནྟཱིཏི དསྶེཏུཾ ‘‘ཡཐཱ པནཱ’’ཏིཨཱདི ཝུཏྟཾ. པཱཎཱཏིཔཱཏཱདཱིཧི ཝིརམཎཝསེན པཝཏྟནཏོ ཏདཱརམྨཎབྷཱཝེནེཝ ཏཱནི པཛཧནྟི. ན ཧི ཏདེཝ ཨཱརབྦྷ ཏཾ པཛཧིཏུཾ སཀྐཱ ཏཏོ ཨནིསྶཊབྷཱཝཏོ.

ཨནབྷིཛ྄ཛྷཱ…པེ… ཝིརམནྟསྶཱཏི ཨབྷིཛ྄ཛྷཾ པཛཧནྟསྶཱཏི ཨཏྠོ. ན ཧི མནོདུཙྩརིཏཏོ ཝིརཏི ཨཏྠི ཨནབྷིཛ྄ཛྷཱདཱིཧེཝ ཏཔྤཧཱནསིདྡྷིཏོ.

པཉྩསིཀྑཱཔདསུཏྟཱདིཝཎྞནཱ ནིཊྛིཏཱ.

༧. དསངྒསུཏྟཝཎྞནཱ

༡༡༣. མིཙྪཏྟསམྨཏྟཝསེནཱཏི ཨེཏྠ མིཙྪཱབྷཱཝོ མིཙྪཏྟཾ, ཏཐཱ སམྨཱབྷཱཝོ སམྨཏྟཾ. ཏཐཱ ཏཐཱ པཝཏྟཱ ཨཀུསལཀྑནྡྷཱཝ མིཙྪཱསཏི, ཨེཝཾ མིཙྪཱཉཱཎམྤི དཊྛབྦཾ. ན ཧི ཉཱཎསྶ ¶ མིཙྪཱབྷཱཝོ ནཱམ ཨཏྠི. ཏསྨཱ མིཙྪཱཉཱཎིནོཏི མིཙྪཱསཉྙཱཎཱཏི ཨཏྠོ, ཨཡོནིསོ པཝཏྟཙིཏྟུཔྤཱདཱཏི ¶ ཨདྷིཔྤཱཡོ. མིཙྪཱཔཙྩཝེཀྑཎེནཱཏི མིཙྪཱདིཊྛིཨཱདཱིནཾ མིཙྪཱ ཨཡོནིསོ པཙྩཝེཀྑཎེན. ཀུསལཝིམུཏྟཱིཏི པཀཏིཔུརིསསནྟརཛཱནནཾ, གུཎཝིཡུཏྟསྶ ཨཏྟནོ སཀཏྟནི ཨཝཊྛཱནནྟི ཨེཝམཱདིཾ ཨཀུསལཔཝཏྟིཾ ‘‘ཀུསལཝིམུཏྟཱི’’ཏི གཧེཏྭཱ ཋིཏཱ མིཙྪཱཝིམུཏྟིཀཱ. སམྨཱཔཙྩཝེཀྑཎཱཏི ཛྷཱནཝིམོཀྑཱདཱིསུ སམྨཱ ཨཝིཔརཱིཏཾ པཝཏྟཱ པཙྩཝེཀྑཎཱ.

དསངྒསུཏྟཝཎྞནཱ ནིཊྛིཏཱ.

ཏཏིཡཝགྒཝཎྞནཱ ནིཊྛིཏཱ.

༤. ཙཏུཏྠཝགྒོ

༡. ཙཏུདྷཱཏུསུཏྟཝཎྞནཱ

༡༡༤. པཏིཊྛཱདྷཱཏཱུཏི སཧཛཱཏཱནཾ དྷམྨཱནཾ པཏིཊྛཱབྷཱུཏཱ དྷཱཏུ. ཨཱབནྡྷནདྷཱཏཱུཏི ནཧཱནིཡཙུཎྞསྶ ཨུདཀཾ ཝིཡ སཧཛཱཏདྷམྨཱནཾ ཨཱབནྡྷནབྷཱུཏཱ དྷཱཏུ. པརིཔཱཙནདྷཱཏཱུཏི སཱུརིཡོ ཕལཱདཱིནཾ ཝིཡ སཧཛཱཏདྷམྨཱནཾ པརིཔཱཙནབྷཱུཏཱ དྷཱཏུ. ཝིཏྠམྦྷནདྷཱཏཱུཏི དུཏིཡོ ཝིཡ སཧཛཱཏདྷམྨཱནཾ ཝིཏྠམྦྷནབྷཱུཏཱ དྷཱཏུ. ཀེསཱདཡོ ཝཱིསཏི ཀོཊྛཱསཱ. ཨཱདི-སདྡེན པིཏྟཱདཡོ སནྟཔྤནཱདཡོ ཨུདྡྷངྒམཱ ཝཱཏཱདཡོ གཧིཏཱ. ཨེཏཱཏི དྷཱཏུཡོ.

ཙཏུདྷཱཏུསུཏྟཝཎྞནཱ ནིཊྛིཏཱ.

༢. པུབྦེསམྦོདྷསུཏྟཝཎྞནཱ

༡༡༥. ཨཡཾ པཐཝཱིདྷཱཏུཾ ནིསྶཱཡ ཏཾ ཨཱརབྦྷ པཝཏྟོ ཨསྶཱདོ. ཨེཝཾ པཝཏྟཱནནྟི ཨེཝཾ ཀཱཡེ པབྷཱཝསྶ པཝེདནཝསེནེཝ པཝཏྟཱནཾ. ཧུཏྭཱ ཨབྷཱཝཱཀཱརེནཱཏི པུབྦེ ཨཝིཛྫམཱནཱ པཙྩཡསཱམགྒིཡཱ ཧུཏྭཱ ཨུཔྤཛྫིཏྭཱ པུན བྷངྒུཔགམནཏོ ཨུདྡྷཾ ཨབྷཱཝཱཀཱརེན. ན ནིཙྩཱཏི ཨནིཙྩཱ ཨདྡྷུཝཏྟཱ, དྷུཝཾ ནིཙྩཾ. པཊིཔཱིལ༹ནཱཀཱརེནཱཏི ཨུདཡབྦཡཝསེན ཨབྷིཎྷཾ པཱིལ༹ནཱཀཱརེན ¶ དུཀྑཊྛེན. སབྷཱཝཝིགམཱཀཱརེནཱཏི ཨཏྟནོ སབྷཱཝསྶ ཝིགཙྪནཱཀཱརེན. སབྷཱཝདྷམྨཱ ཧི ཨཔྤམཏྟཾ ཁཎཾ པཏྭཱ ནིརུཛ྄ཛྷནྟི. ཏསྨཱ ཏེ ‘‘ཛརཱཡ མརཎེན ཙཱ’’ཏི དྭེདྷཱ ཝིཔརིཎམནྟི. ཏེནཱཧ ¶ ‘‘ཝིཔརིཎཱམདྷམྨཱ’’ཏི. ཨཱདཱིནཾ ཝཱཏི པཝཏྟེཏཱིཏི ཨཱདཱིནཝོ, པརམཀཱཔཉྙཏཱ. ཝིནཱིཡཏཱིཏི ཝཱུཔསམཱིཡཏི. ཨཙྩནྟཔྤཧཱནཝསེན ནིསྶརཏི ཨེཏེནཱཏི ནིསྶརཎཾ.

སཱཡཾ ནིཔནྣཱ སབྦརཏྟིཾ ཁེཔེཏྭཱ པཱཏོ ཨུཊྛཧཱམ, མཱསཔུཎྞགྷཊོ ཝིཡ ནོ སརཱིརཾ ནིསྶནྡཱབྷཱཝཏོ.

ཕུསིཏམཏྟེསུཔཱིཏི ཨུདཀསྶ ཕུསིཏམཏྟེསུཔི.

ཨཏིནཱམེནྟི ཀཱལཾ. ཨེཝཾ ཝུཏྟནཡེན པཝཏྟཱ པུགྒལཱ ཨེཏཱ པཐཝཱིདྷཱཏུཨཱདཡོ ཨསྶཱདེནྟི ནཱམ ཨབྷིརཏིཝསེན ཏཏྠ ཨཱཀངྑུཔྤཱདནཏོ.

ཨབྷིཝིསིཊྛེན ཉཱཎེནཱཏི ཨགྒམགྒཉཱཎེན. རུཀྑོ བོདྷི ‘‘བུཛ྄ཛྷཏི ཨེཏྠཱ’’ཏི ཀཏྭཱ. མགྒོ བོདྷི ‘‘བུཛ྄ཛྷཏི ཨེཏེནཱ’’ཏི ཀཏྭཱ. སབྦཉྙུཏཉྙཱཎཾ བོདྷི སམྨཱ སཱམཉྩ སབྦདྷམྨཱནཾ བུཛ྄ཛྷནཏོ. ནིབྦཱནཾ བོདྷི བུཛ྄ཛྷིཏབྦཏོ. ཏེསནྟི ནིདྡྷཱརཎེ སཱམིཝཙནཾ. སཱཝཀཔཱརམཱིཉཱཎནྟི སཱཝཀཔཱརམཱིཉཱཎཾ ཡཱཐཱཝཏོ དསྶནཝཏྠུ.

ཨཀུཔྤཱཏི པཊིཔཀྑེཧི ཨཀོཔེཏབྦོ. ཀཱརཎཏོཏི ཨརིཡམགྒཏོ. ཏཏོ ཧིསྶ ཨཀུཔྤཏཱ. ཏེནཱཧ ‘‘སཱ ཧཱི’’ཏིཨཱདཱི. ཨཱརམྨཎཏོཏི ནིབྦཱནཱརམྨཎཏོ ནིབྦཱནཱརམྨཎཱནཾ ལོཀིཡསམཱཔཏྟཱིནཾ ཨབྷཱཝཏོ.

ཝིཏྠཱརཝསེནཱཏི ཨེཀེཀདྷཱཏུཝསེནཱཏི ཝདནྟི, ཨེཀེཀིསྶཱ པན དྷཱཏུཡཱ ལཀྑཎཝིབྷཏྟིདསྶནཝསེན. ཡནྟི ཧེཏུཨཏྠེ ནིཔཱཏོ, ཡཾ ནིམིཏྟནྟི ཨཏྠོ. ཨསྶཱདེཏི ཨེཏེནཱཏི ཨསྶཱདོ, ཏཎྷཱ. ཨཡཾ པཐཝཱིདྷཱཏུཡཱ ཨསྶཱདོཏི ཨེཏྠ ཨཡཾ-སདྡོ ‘‘པཧཱནཔཊིཝེདྷོ’’ཏི ཨེཏྠཱཔི ཨཱནེཏྭཱ སམྦནྡྷིཏབྦོ ‘‘ཨཡཾ པཧཱནཔཊིཝེདྷོ པཊིཝིཛ྄ཛྷིཏབྦཊྛེན སམུདཡསཙྩ’’ནྟི. ཨེས ནཡོ སེསསཙྩེསུཔི. ཡཱཏི ཡཐཱཝུཏྟེསུ ཨསྶཱདོ ཨཱདཱིནཝོ ནིསྶརཎནྟི ཨིམེསུ ཏཱིསུ ཋཱནེསུ པཝཏྟཱ ¶ ཡཱ དིཊྛི…པེ… ཡོ སམཱདྷི, ཨཡཾ བྷཱཝནཱཔཊིཝེདྷོ མགྒསཙྩནྟི ཝུཏྟནཡེནེཝ ཡོཛེཏབྦཾ.

པུབྦེསམྦོདྷསུཏྟཝཎྞནཱ ནིཊྛིཏཱ.

༣. ཨཙརིཾསུཏྟཝཎྞནཱ

༡༡༦. ཡཐཱ ¶ ཡཱཝཏཱ ནིསྶརཎཔརིཡེསནཊྛཱནེ ཨཱདཱིནཝཔརིཡེསནཱ, ཨེཝཾ ཡཱཝཏཱ ཨཱདཱིནཝཔརིཡེསནཊྛཱནེ ཨསྶཱདཔརིཡེསནཱ སམྨཱཔཊིཔནྣསྶཱཏི ཝུཏྟཾ ‘‘ཨཙརིནྟི ཉཱཎཙཱརེན ཨཙརིཾ, ཨནུབྷཝནཙཱརེནཱ’’ཏི.

ཨཙརིཾསུཏྟཝཎྞནཱ ནིཊྛིཏཱ.

༤. ནོཙེདཾསུཏྟཝཎྞནཱ

༡༡༧. ནིསྶཊཱཏིཨཱདཱིནི པདཱནི, ཨཱདིཏོ ཝུཏྟཔཊིསེདྷེནཱཏི ‘‘ནེཝཱ’’ཏི ཨེཏྠ ཝུཏྟེན ནཀཱརེན. ཏེནཱཧ ‘‘ན ནིསྶཊཱ’’ཏིཨཱདི. ཝིམརིཡཱདིཀཏེནཱཏིཨཱདི ཙ ཨེཏྠ ཝིཧརཎཔེཀྑཎེ ཀརཎཝཙནཾ. དུཏིཡནཡེཏི ‘‘ཡཏོ ཙ ཁོ, བྷིཀྑཝེ’’ཏིཨཱདིནཱ ཝུཏྟནཡེ. ཀིལེསཝཊྚམརིཡཱདཱཡ སབྦསོ ཨབྷཱཝཏོ ནིམྨརིཡཱདིཀཏེན ཙིཏྟེན. ཏེནཱཧ ‘‘ཏཏྠཱ’’ཏིཨཱདི. ཏཱིསཱུཏི དུཏིཡཱདཱིསུ ཏཱིསུ.

ནོཙེདཾསུཏྟཝཎྞནཱ ནིཊྛིཏཱ.

༥. ཨེཀནྟདུཀྑསུཏྟཝཎྞནཱ

༡༡༨. ཨེཀནྟེནེཝ དུཀྑཱཏི ཨཝཱིཙིམཧཱནིརཡོ ཝིཡ ཨེཀནྟཏོ དུཀྑཱ ཨེཝ སུཁེན ཨཝོམིསྶཱ. དུཀྑེན ཨནུཔཏིཏཱཏི དུཀྑེནེཝ སབྦསོ ཨུཔགཏཱ. དུཀྑེན ཨོཀྐནྟཱཏི བཧིདྡྷཱ ཝིཡ ཨནྟོཔི དུཀྑེན ཨཝཀྐནྟཱ ཨནུཔཝིཊྛཱ. སུཁཝེདནཱཔཙྩཡཏཱཡ ཨིམཱསཾ དྷཱཏཱུནཾ སུཁཏཱ ཝིཡ དུཀྑཝེདནཱཔཙྩཡཏཱཔི ཝེདིཏབྦཱ, སངྑཱརདུཀྑཏཱ པན སབྦཏྠ ཙརིཏཱ ཨེཝ ¶ . སབྦཏྠཱཏི སབྦཱསུ དྷཱཏཱུསུ, སབྦཊྛཱནེསུ ཝཱ. པཋམཾ སུཁཾ དསྶེཏྭཱཔི པཙྪཱ དུཀྑསྶ ཀཐིཏཏྟཱ ‘‘དུཀྑལཀྑཎཾ ཀཐིཏ’’ནྟི ཝུཏྟཾ.

ཨེཀནྟདུཀྑསུཏྟཝཎྞནཱ ནིཊྛིཏཱ.

༦-༡༠. ཨབྷིནནྡསུཏྟཱདིཝཎྞནཱ

༡༡༩-༡༢༣. ཚཊྛསཏྟམེསུ ཝཊྚཝིཝཊྚཾ ཀཐིཏཾ. ཨཊྛཀཐཱཡཾ པན ‘‘ཝིཝཊྚཾ ཀཐིཏ’’ནྟི ཝུཏྟཾ ¶ . ཏཱིསུ སུཏྟེསུ. ཙཏུསཙྩམེཝཱཏི ཙཏྟཱརི སཙྩཱནི སམཱཧཊཱནི ཙཏུསཙྩནྟི ཏེསཾ ཨེཀཛ྄ཛྷཾ གཧཎཾ, ནིཡམོ པན ཏབྦིནིམུཏྟསྶ པརམཏྠསྶ ཨབྷཱཝཏོ.

ཨབྷིནནྡསུཏྟཱདིཝཎྞནཱ ནིཊྛིཏཱ.

ཙཏུཏྠཝགྒཝཎྞནཱ ནིཊྛིཏཱ.

སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ

དྷཱཏུསཾཡུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༤. ཨནམཏགྒསཾཡུཏྟཾ

༡. པཋམཝགྒོ

༡. ཏིཎཀཊྛསུཏྟཝཎྞནཱ

༡༢༤. ཨུཔསགྒོ ¶ ¶ སམཱསཝིསཡེ སསཱདྷནཾ ཀིརིཡཾ དསྶེཏཱིཏི ཝུཏྟཾ ‘‘ཉཱཎེན ཨནུགནྟྭཱཔཱི’’ཏི. ཝསྶསཏཾ ཝསྶསཧསྶནྟི ནིདསྶནམཏྟམེཏཾ, ཏཏོ བྷིཡྻོཔི ཨནུགནྟྭཱ ཨནམཏགྒོ ཨེཝ སཾསཱརོ. ཨགྒ-སདྡོ ཨིདྷ མརིཡཱདཝཙནོ, ཨནུདྡེསིཀཉྩེཏཾ ཝཙནནྟི ཨཱཧ ‘‘ཨཔརིཙྪིནྣཔུབྦཱཔརཀོཊིཀོ’’ཏི. ཨཉྙཐཱ ཨནྟིམབྷཝིཀཔརིཙྪིནྣཀཏཝིམུཏྟིཔརིཔཱཙནཱིཡདྷམྨཱདཱིནཾ ཝསེན ཨཔརིཙྪིནྣཔུབྦཱཔརཀོཊི ན སཀྐཱ ཝཏྟུཾ. སཾསརཎཾ སཾསཱརོ. པཙྪིམཱཔི ན པཉྙཱཡཏི ཨནྡྷབཱལཱནཾ ཝསེནཱཏི ཨདྷིཔྤཱཡོ. ཏེནཱཧ བྷགཝཱ ‘‘དཱིགྷོ བཱལཱན སཾསཱརོ’’ཏི (དྷ. པ. ༦༠). ཝེམཛ྄ཛྷེཡེཝ པན སཏྟཱ སཾསརནྟི པུབྦཱཔརཀོཊཱིནཾ ཨལབྦྷནཱིཡཏྟཱ. ཨཏྠོ པརིཏྟོ ཧོཏི ཡཐཱབྷཱུཏཱཝབོདྷཱབྷཱཝཏོ. བུདྡྷསམཡེཏི སཱསནེཏི ཨཏྠོ. ཨཏྠོ མཧཱ ཡཐཱབྷཱུཏཱཝབོདྷིསམྦྷཝཏོ, ཨཏྠསྶ ཝིཔུལཏཱཡ ཏཾསདིསཱ ཨུཔམཱ ནཏྠཱིཏི པརིཏྟཾཡེཝ ཨུཔམཾ ཨཱཧརནྟཱིཏི ཨདྷིཔྤཱཡོ. ཨིདཱནི ཝུཏྟམེཝཏྠཾ ‘‘པཱལི༹ཡཾ ཧཱི’’ཏིཨཱདིནཱ སམཏྠེཏི. མཱཏུ མཱཏརོཏི མཱཏུ མཱཏཱམཧིཡོ. ཏསྶེཝཱཏི དུཀྑསྶེཝ. ཏིབྦནྟི དུཀྑཔརིཡཱཡོཏི.

ཏིཎཀཊྛསུཏྟཝཎྞནཱ ནིཊྛིཏཱ.

༢. པཐཝཱིསུཏྟཝཎྞནཱ

༡༢༥. མཧཱཔཐཝིནྟི ཨཝིསེསེན ཨནཝསེསཔརིཡཱདཱཡིནཱིཏི ཨཱཧ ‘‘ཙཀྐཝཱལ༹པརིཡནྟ’’ནྟི. པརིཀཔྤཝཙནཉྩེཏཾ.

པཐཝཱིསུཏྟཝཎྞནཱ ནིཊྛིཏཱ.

༣. ཨསྶུསུཏྟཝཎྞནཱ

༡༢༦. ཀནྡནཾ ¶ ¶ སསདྡཾ, རོདནཾ པན ཀེཝལམེཝཱཏི ཨཱཧ ‘‘ཀནྡནྟཱནནྟི སསདྡཾ རུདམཱནཱན’’ནྟི. པཝཏྟནྟི སནྡནཝསེན པཝཏྟཾ. ‘‘སིནེརུརསྨཱིཧི པརིཙྪིནྣེསཱུ’’ཏི སངྑེཔེན ཝུཏྟམཏྠཾ ཝིཝརནྟོ ‘‘སིནེརུསྶཱ’’ཏིཨཱདིམཱཧ. མཎིམཡནྟི ཨིནྡནཱིལམཎིམཡཾ. སིནེརུསྶ པུབྦདཀྑིཎཀོཎསམཔདེསཱ ‘‘པུབྦདཀྑིཎཔསྶཱ’’ཏི ཨདྷིཔྤེཏཱ. ཏེཧི ནིཀྑནྟརཛཏརསྨིཡོ ཨིནྡནཱིལརསྨིཡོ ཙ ཨེཀཏོ ཧུཏྭཱ. ཏཱསཾ རསྨཱིནཾ ཨནྟརེསཱུཏི ཏཱསཾ ཙཏཱུཧི ཀོཎེཧི ནིཀྑནྟརསྨཱིནཾ ཙཏཱུསུ ཨནྟརེསུ. ཙཏྟཱརོཏི དཀྑིཎཱདིབྷེདཱ ཙཏྟཱརོ མཧཱསམུདྡཱ ཧོནྟི. ཝིཨསནནྟི ཝིསེསེན ཁེཔནཾ. ཀིཾ པན ཏནྟི ཨཱཧ ‘‘ཝིནཱསོཏི ཨཏྠོ’’ཏི.

ཨསྶུསུཏྟཝཎྞནཱ ནིཊྛིཏཱ.

༤. ཁཱིརསུཏྟཝཎྞནཱ

༡༢༧. མཱཏུཐཉྙནྟི པཱིཏཾ མཱཏུཡཱ ཐནཏོ ནིབྦཏྟཁཱིརཾ བཧུཏརནྟི ཝེདིཏབྦཾ.

ཁཱིརསུཏྟཝཎྞནཱ ནིཊྛིཏཱ.

༥. པབྦཏསུཏྟཝཎྞནཱ

༡༢༨. ‘‘ཨནམཏགྒསྶ སཾསཱརསྶ དཱིགྷཏམཏྟཱ ན སུཀརཾ ནསུཀར’’ནྟི ཨཊྛཀཐཱཔཱཋོ. ཀཐཾ ནཙྪིནྡཏཱིཏི ཀཐཾ ན པརིཡོསཱཔེཏི, ཀཱཡཙིཔི གཧཎཏཱཡཱཏི ཨདྷིཔྤཱཡོ. ཏཡོ ཀཔྤཱསཾསཱུཏི ཏཡོ ཨེཀཀཔྤཱསཾསཱུ. ཡེཧི ནཾ ཕུཊྛཾ, ཏཏོཔི སུཁུམཏརཾ སཱསཔམཏྟཾ ཁཱིཡེཡྻ པབྦཏཾ སབྦབྷཱགེཧི ཨཏིཙིརཝེལཾ པརིམཛྫནྟེ.

པབྦཏསུཏྟཝཎྞནཱ ནིཊྛིཏཱ.

༦. སཱསཔསུཏྟཝཎྞནཱ

༡༢༩. ནགརནྟི ¶ ནགརསངྑེཔེན པཱཀཱརེན པརིཀྑིཏྟཏཾ སནྡྷཱཡ ཝུཏྟཾ. ཨནྟོ པན སབྦསོ ཝིཙིཏྟསཱསཔེཧི ཨེཝ པུཎྞཾ, ཨེཝཾ ཙུཎྞིཀཱབདྡྷཾ. ཏེནཱཧ ‘‘ན པན…པེ… དཊྛབྦ’’ནྟི.

སཱསཔསུཏྟཝཎྞནཱ ནིཊྛིཏཱ.

༧. སཱཝཀསུཏྟཝཎྞནཱ

༡༣༠. ཏསྶ ¶ ཋིཏཊྛཱནཏོཏི བྷིཀྑུནོ ཨནུསྶརིཏྭཱ ཋིཏཊྛཱནཏོ, ཏེན ཨནུསྶརིཏསྶ སཏསཧསྶཀཔྤསྶ ཨནནྟརཀཔྤཏོ པཊྛཱཡཱཏི ཨཏྠོ. ཨེཝནྟི ཝུཏྟཔྤཀཱརེན. ཙཏྟཱརོཔི བྷིཀྑཱུ ཨབྷིཉྙཱལཱབྷིནོ. ཙཏྟཱརི ཀཔྤསཏསཧསྶཱནི དིཝསེ དིཝསེ ཨནུསྶརེཡྻུནྟི པརིཀཔྤནཝསེན ཝདནྟི.

སཱཝཀསུཏྟཝཎྞནཱ ནིཊྛིཏཱ.

༨. གངྒཱསུཏྟཝཎྞནཱ

༡༣༡. ཨེཏསྨིཾ ཨནྟརེཏི ཨེཏསྨིཾ པབྷཝསམུདྡཔདེསཔརིཙྪིནྣེ ཨཱཡཱམཏོ པཉྩཡོཛནསཏིཀེ ཨཏིརེཀཡོཛནསཏིཀེ ཝཱ ཋཱནེ.

གངྒཱསུཏྟཝཎྞནཱ ནིཊྛིཏཱ.

༩. དཎྜསུཏྟཝཎྞནཱ

༡༣༢. ནཝམེ ཁིཏྟོཏི པུནཔྤུནཾ ཁིཏྟོ. ཨེཀཝཱརཉྷི ཁིཏྟོ མཱུལཱདཱིསུ ཨེཀེནེཝ ནིཔཏེཡྻ. ཏཐཱ སཏི ཨདྷིཔྤེཏོ པཱཏསྶ ཨནིཡམོ ན ནིདསྶིཏོ སིཡཱ. ཏཏྠ ཙ དྷམྨཾ སུཎནྟཱ བྷིཀྑཱུ མནུསྶལོཀེ, ཏེ སནྡྷཱཡ ‘‘ཨསྨཱ ལོཀཱ’’ཏི ཨཱཧ, ཏདཉྙཾ སནྡྷཱཡ ‘‘པརལོཀ’’ནྟི. ཏསྶ ཏསྶ ཝཱ པུགྒལསྶ ཡཐཱདྷིཔྤེཏོ ཨཡཾ ལོཀོ, ཏདཉྙོ པརལོཀོ.

དཎྜསུཏྟཝཎྞནཱ ནིཊྛིཏཱ.

༡༠. པུགྒལསུཏྟཝཎྞནཱ

༡༣༣. སམཊྛིཀཱལོཏི ¶ སམེན ཨཱཀཱརེན ལདྡྷབྦཨཊྛིཀཱལོ. གིརིཔརིཀྑེཔེཏི པཉྩཧི གིརཱིཧི པརིཀྑིཏྟཏྟཱ ‘‘གིརིཔརིཀྑེཔོ’’ཏི ལདྡྷནཱམེ རཱཛགཧེ.

པུགྒལསུཏྟཝཎྞནཱ ནིཊྛིཏཱ.

པཋམཝགྒཝཎྞནཱ ནིཊྛིཏཱ.

༢. དུཏིཡཝགྒོ

༡. དུགྒཏསུཏྟཝཎྞནཱ

༡༣༤. དུགྒཏནྟི ¶ ཀིཙྪཛཱིཝིཀཏྟཱ སབྦཐཱ དུཀྑཾ གཏཾ ཨུཔགཏཾ. ཏཐཱབྷཱུཏོ པན དལིདྡོ ཝརཱཀོ ནཱམ ཧོཏཱིཏི ཝུཏྟཾ ‘‘དལིདྡཾ ཀཔཎ’’ནྟི. ཧཏྠཔཱདེཧཱིཏི ནིདསྶནམཏྟཾ, ཨཉྙེཧིཔི སརཱིརཱཝཡཝེཧི དུསྶཎྛཱནེཧི ཨུཔེཏོ དུརུཔེཏོ ཨེཝཱཏི.

དུགྒཏསུཏྟཝཎྞནཱ ནིཊྛིཏཱ.

༢. སུཁིཏསུཏྟཝཎྞནཱ

༡༣༥. སུཁིཏནྟི སཉྫཱཏསུཁཾ. ཏེནཱཧ ‘‘སུཁསམཔྤིཏ’’ནྟིཨཱདི. སུསཛྫིཏནྟི སུཁུམུཔཀརཎེཧི སབྦཐཱ སཛྫིཏཾ.

སུཁིཏསུཏྟཝཎྞནཱ ནིཊྛིཏཱ.

༣. ཏིཾསམཏྟསུཏྟཝཎྞནཱ

༡༣༦. དྷུཏངྒསམཱདཱནཝསེན, ན ཨརཉྙཝཱསཱདིམཏྟེན. སསཾཡོཛནཱ སབྦསོ སཾཡོཛནཱནཾ ཨཔྤཧཱིནཏྟཱ, ན པུཐུཛྫནབྷཱཝཏོ. ཨེཀེཀཝཎྞཀཱལོཝ གཧེཏབྦོཏི ཨེཏེན མཧིཾསཱདཱིནཾ རསྶདཱིགྷཔིངྒལཱདཱིསུ ཨེཀེཀཱནེཝ གཧེཏྭཱ དསྶེཏི.

ཏིཾསམཏྟསུཏྟཝཎྞནཱ ནིཊྛིཏཱ.

༤-༩. མཱཏུསུཏྟཱདིཝཎྞནཱ

༡༣༧-༡༤༢. ལིངྒནིཡམེན ¶ ཙེཝ ཙཀྐཝཱལ༹ནིཡམེན ཙཱཏི ‘‘པུརིསཱནཉྷི མཱཏུགཱམཀཱལོ, མཱཏུགཱམཱནཉྩ པུརིསཀཱལོ’’ཏི ཡཐཱ སཏྟསནྟཱནེ ལིངྒནིཡམོ ནཏྠི, ཨེཝཾ ཀདཱཙི ཨིམསྨིཾ ཙཀྐཝཱལེ༹ ནིབྦཏྟནྟི, ཀདཱཙི ཨཉྙཏརསྨིནྟི ཙཀྐཝཱལ༹ནིཡམོཔི ནཏྠི. ཨེཝམེཝ ཋིཏེ

ཙཀྐཝཱལེ༹ ¶ མཱཏུགཱམཀཱལེ ནམཱཏཱབྷཱུཏཔུབྦོ ནཏྠཱིཏིཨཱདིནཱ ལིངྒནིཡམེན ཙཀྐཝཱལ༹ནིཡམོ ཙ ཝེདིཏབྦོ. ཏེནཱཧ ‘‘ཏེསཱུ’’ཏིཨཱདི.

མཱཏུསུཏྟཱདིཝཎྞནཱ ནིཊྛིཏཱ.

༡༠. ཝེཔུལླཔབྦཏསུཏྟཝཎྞནཱ

༡༤༣. ཨེཀཾ ཨཔདཱནཾ ཨཱཧརིཏྭཱ དསྶེཏི ‘‘ཨེཝཾ སཾཝེགཾ ཛནེཏྭཱ བྷིཀྑཱུ ཝིསེསཾ པཱཔེསྶཱམཱི’’ཏི. ཙཏཱུཧེན ཨཱརོཧནྟི ཙཏུཡོཛནུབྦེདྷཏྟཱ. དྭིནྣཾ བུདྡྷཱནནྟི ཀཀུསནྡྷསྶ ཀོཎཱགམནསྶ ཙཱཏི ཨིམེསཾ དྭིནྣཾ བུདྡྷཱནཾ. ‘‘ཏིཝརཱ རོཧིཏསྶཱ སུཔྤིཡཱ’’ཏི མནུསྶཱནཾ ཏསྨིཾ ཏསྨིཾ ཀཱལེ སམཉྙཱ ཏཏྠ དེསནཱམཝསེན ཛཱཏཱཏི ཝེདིཏབྦཱ, ཡཐཱ ཨེཏརཧི མཱགདྷཱཏི.

པུན ཝསྶསཏནྟི པཋམཝསྶསཏཏོ ཨུཔརིཝསྶསཏཾ ཛཱིཝནཀོ ནཱམ མནུསྶོ ནཏྠི. པརིཧཱིནསདིསཾ ཀཏཾ དེསནཱཡ. ཝཌྜྷིཏྭཱཏི དསཝསྶཱཡུཀབྷཱཝཏོ པཊྛཱཡ ཡཱཝ ཨསངྑྱེཡྻཱཡུཀབྷཱཝཱ ཝཌྜྷིཏྭཱ. ‘‘པརིཧཱིན’’ནྟི ཝཏྭཱ ཏཾ པརིཧཱིནབྷཱཝཾ དསྶེནྟོ ‘‘ཀཐ’’ནྟིཨཱདིམཱཧ. ཡཾ ཨཱཡུཔྤམཱཎེསཱུཏི ཡཏྟཀཾ ཨཱཡུཔྤམཱཎེསཱུཏི.

ཝེཔུལླཔབྦཏསུཏྟཝཎྞནཱ ནིཊྛིཏཱ.

དུཏིཡཝགྒཝཎྞནཱ ནིཊྛིཏཱ.

སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ

ཨནམཏགྒསཾཡུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༥. ཀསྶཔསཾཡུཏྟཾ

༡. སནྟུཊྛསུཏྟཝཎྞནཱ

༡༤༤. སནྟུཊྛོཏི ¶ ¶ སཀེན ཨུཙྩཱཝཙེན པཙྩཡེན སམམེཝ ཙ ཏུསྶནཀོ. ཏེནཱཧ ‘‘ཨིཏརཱིཏརེནཱ’’ཏིཨཱདི. ཏཏྠ དུཝིདྷཾ ཨིཏརཱིཏརཾ – པཱཀཏིཀཾ, ཉཱཎསཉྫནིཏཉྩཱཏི. ཏཏྠ པཱཀཏིཀཾ པཊིཀྑིཔིཏྭཱ ཉཱཎསཉྫནིཏམེཝ དསྶེནྟོ ‘‘ཐཱུལསུཁུམཱ’’ཏིཨཱདིམཱཧ. ཨིཏརཾ ཝུཙྩཏི ཧཱིནཾ པཎཱིཏཏོ ཨཉྙཏྟཱ. ཏཐཱ པཎཱིཏམྤི ཨིཏརཾ ཧཱིནཏོ ཨཉྙཏྟཱ. ཨཔེཀྑཱསདྡཱ ཧི ཨིཏརཱིཏརཱཏི. ཨིཏི ཡེན ཀེནཙི ཧཱིནེན ཝཱ པཎཱིཏེན ཝཱ ཙཱིཝརཱདིཔཙྩཡེན སནྟུསྶིཏོ ཏཐཱཔཝཏྟོ ཨལོབྷོ ཨིཏརཱིཏརཔཙྩཡསནྟོསོ, ཏཾསམངྒིཏཱཡ སནྟུཊྛོ. ཡཐཱལཱབྷཾ ཨཏྟནོ ལཱབྷཱནུརཱུཔཾ སནྟོསོ ཡཐཱལཱབྷསནྟོསོ. སེསཔདདྭཡེཔི ཨེསེཝ ནཡོ. ལབྦྷཏཱིཏི ཝཱ ལཱབྷོ, ཡོ ཡོ ལཱབྷོ ཡཐཱལཱབྷོ, ཏེན སནྟོསོ ཡཐཱལཱབྷསནྟོསོ. བལནྟི ཀཱཡབལཾ. སཱརུཔྤནྟི བྷིཀྑུནོ ཨནུཙྪཝིཀཏཱ.

ཡཐཱལདྡྷཏོ ཨཉྙསྶ ཨཔཏྠནཱ ནཱམ སིཡཱ ཨཔྤིཙྪཏཱཡ པཝཏྟིཨཱཀཱརོཏི ཏཏོ ཝིནིཝཏྟིཏམེཝ སནྟོསསྶ སརཱུཔཾ དསྶེནྟོ ‘‘ལབྷནྟོཔི ན གཎྷཱཏཱི’’ཏི ཨཱཧ. ཏཾ པརིཝཏྟེཏྭཱཏི པཀཏིདུབྦལཱདཱིནཾ གརུཙཱིཝརཾ ན ཕཱསུབྷཱཝཱཝཧཾ སརཱིརབཱདྷཱཝཧཉྩ ཧོཏཱིཏི པཡོཛནཝསེན, ནཱཏྲིཙྪཏཱདིཝསེན པརིཝཏྟེཏྭཱ. ལཧུཀཙཱིཝརཔརིབྷོགེ སནྟོསཝིརོདྷི ན ཧོཏཱིཏི ཨཱཧ ‘‘ལཧུཀེན ཡཱཔེནྟོཔི སནྟུཊྛོཝ ཧོཏཱི’’ཏི. མཧགྒྷཙཱིཝརཾ བཧཱུནི ཝཱ ཙཱིཝརཱནི ལབྷིཏྭཱ ཏཱནི ཝིསྶཛྫེཏྭཱ ཨཉྙསྶ གཧཎཾ ཡཐཱསཱརུཔྤནཡེ ཋིཏཏྟཱ ན སནྟོསཝིརོདྷཱིཏི ཨཱཧ ‘‘ཏེསཾ…པེ… དྷཱརེནྟོཔི སནྟུཊྛོཝ ཧོཏཱི’’ཏི. ཨེཝཾ སེསཔཙྩཡེསུ ཡཐཱབལཡཐཱསཱརུཔྤནིདྡེསེསུ ཨཔི-སདྡགྒཧཎེ ཨདྷིཔྤཱཡོ ཝེདིཏབྦོ.

པཀཏཱིཏི ཝཱཙཱཔཀཏིཨཱདིཀཱ. ཨཝསེསནིདྡཱཡ ཨབྷིབྷཱུཏཏྟཱ པཊིབུཛ྄ཛྷཏོ སཧསཱ པཱཔཀཱ ཝིཏཀྐཱ པཱཏུབྷཝནྟཱིཏི.

མུཏྟཧརཱིཏཀནྟི ¶ ¶ གོམུཏྟཔརིབྷཱཝིཏཾ, པཱུཏིབྷཱཝེན ཝཱ ཚཌྜིཏཏྟཱ མུཏྟཧརཱིཏཀཾ. བུདྡྷཱདཱིཧི ཝཎྞིཏནྟི ‘‘པཱུཏིམུཏྟབྷེསཛྫཾ ནིསྶཱཡ ཡཱ པབྦཛྫཱ’’ཏིཨཱདིནཱ སམྨཱསམྦུདྡྷཱདཱིཧི པསཏྠཾ.

ཨེཀོ ཨེཀཙྩོ སནྟུཊྛོ ཧོཏི, སནྟོསསྶ ཝཎྞཾ ན ཀཐེཏི སེཡྻཐཱཔི ཨཱཡསྨཱ བཱཀུལཏྠེརོ. ན སནྟུཊྚོ ཧོཏི, སནྟོསསྶ ཝཎྞཾ ཀཐེཏི སེཡྻཐཱཔི ཐེརོ ཨུཔནནྡོ སཀྱཔུཏྟོ. ནེཝ སནྟུཊྛོ ཧོཏི, ན སནྟོསསྶ ཝཎྞཾ ཀཐེཏི སེཡྻཐཱཔི ཐེརོ ལཱལུ༹དཱཡཱི. ཨཡནྟི ཨཱཡསྨཱ མཧཱཀསྶཔོ. ཨནེསནནྟི ཨཡོནིསོ མིཙྪཱཛཱིཝཝསེན པཙྩཡཔརིཡེསནཾ. ཨུཏྟསཏཱིཏི ‘‘ཀཐཾ ནུ ཁོ ལབྷེཡྻ’’ནྟི ཛཱཏུཏྟཱསེན ཨུཏྟསཏི. ཏཐཱ པརིཏསྶཏི. ཨཡནྟི མཧཱཀསྶཔཏྠེརོ. ཨེཝཾ ཡཐཱཝུཏྟཨེཀཙྩབྷིཀྑུ ཝིཡ ན པརིཏསྶཏི, ཨལཱབྷཔརིཏྟཱསེན ཝིགྷཱཏཔྤཏྟིཡཱ ན པརིཏྟཱསཾ ཨཱཔཛྫཏི. ལོབྷོཡེཝ ཨཱརམྨཎེན སདྡྷིཾ གནྠནཊྛེན བཛ྄ཛྷནཊྛེན གེདྷོ ལོབྷགེདྷོ. མུཙྪནྟི གེདྷཾ མོམཱུཧཏྟབྷཱཝཾ. ཨཱདཱིནཝནྟི དོསཾ. ནིསྶརཎམེཝཱཏི ཙཱིཝརེ ཨིདམཏྠིཏཱདསྶནཔུབྦཀཾ ཨལགྒབྷཱཝསངྑཱཏནིཡྻཱནམེཝ པཛཱནནྟོ. ཡཐཱལདྡྷཱདཱིནནྟི ཡཐཱལདྡྷཔིཎྜཔཱཏཱདཱིནཾ. ནིདྡྷཱརཎེ ཙེཏཾ སཱམིཝཙནཾ.

ཡཐཱ མཧཱཀསྶཔཏྠེརོཏི ཨཏྟནཱ ཝཏྟབྦནིཡཱམེན ཝདཏི, བྷགཝཏཱ པན ཝཏྟབྦནིཡཱམེན ‘‘ཡཐཱ ཀསྶཔོ བྷིཀྑཱུ’’ཏི བྷཝིཏབྦཾ. ཀསྶཔེན ནིདསྶནབྷཱུཏེན. ཀཐནཾ ནཱམ བྷཱརོ ‘‘མུཏྟོ མོཙེཡྻ’’ནྟི པཊིཉྙཱནུརཱུཔཏྟཱ. པཊིཔཏྟིཾ པརིཔཱུརཾ ཀཏྭཱ པཱུརཎཾ བྷཱརོ སཏྠུ ཨཱཎཱཡ སིརསཱ སམྤཊིཙྪིཏབྦཏོ.

སནྟུཊྛསུཏྟཝཎྞནཱ ནིཊྛིཏཱ.

༢. ཨནོཏྟཔྤཱིསུཏྟཝཎྞནཱ

༡༤༥. ཏེན རཧིཏོཏི ཏེན སམྨཱཝཱཡཱམེན རཧིཏོ. ནིབྦྷཡོཏི བྷཡརཧིཏོ. ཀུསལཱནུཔྤཱདནམྤི ཧི སཱཝཛྫམེཝ ཨཉྙཱཎཱལསིཡཧེཏུཀཏྟཱ. སམྦུཛ྄ཛྷནཏྠཱཡཱཏི ཨརིཡམགྒེཧི སམྦུཛ྄ཛྷནཱཡ. ཡོགེཧི ཁེམཾ ཏེཧི ཨནུཔདྡུཏཏྟཱ.

མནུཉྙཝཏྠུནྟི ¶ མནོརམཾ ལོབྷུཔྤཏྟིཀཱརཎཾ. ཡཐཱ ཝཱ ཏཐཱ ཝཱཏི སུབྷསུཁཱདིཝསེན. ཏེཏི ལོབྷཱདཡོ. ཨནུཔྤནྣཱཏི ཝེདིཏབྦཱ ཏཐཱརཱུཔེ ཝཏྠཱརམྨཎེ ཏཐཱ ཨནུཔྤནྣཔུབྦཏྟཱ. ཨཉྙཐཱཏི ཝུཏྟནཡེནེཝ ཝཏྠཱརམྨཎེཧི ཨཡོཛེཏྭཱ གཡ྄ཧམཱནེ. ཝཏྠུམྷཱིཏི ཨུཔཊྛཱཀཱདིཙཱིཝརཱདིཝཏྠུམྷི. ཨཱརམྨཎེཏི མནཱཔིཡཱདིབྷེདེ ཨཱརམྨཎེ. ཏཱདིསེན པཙྩཡེནཱཏི ཨཡོནིསོམནསིཀཱརསཏིཝོསྶགྒཱདིཔཙྩཡེན ¶ . ཨིམེཏི ཝུཏྟནཡེན པཙྩཡལཱབྷེན པཙྪཱ ཨུཔྤཛྫམཱནཱ པཱལི༹ཡཾ ཏཐཱ ཝུཏྟཱཏི དཊྛབྦཾ. ཨེཝཾ ཨུཔྤཛྫམཱནཏཱཡ ནཔྤཧཱིཡནྟི ནཱམ. ཨནུཔྤཱདོ ཧི པརམཏྠཏོ པཧཱནཾ ཀཐིཏཾ, ཏསྨཱ ཏཏྠ ཀཐིཏནཡེནེཝ གཧེཏབྦནྟི ཨདྷིཔྤཱཡོ.

ཨཔྤཊིལདྡྷཱཏི ཨནུཔྤཏྟིཡཱ. ཏེཏི ཡཐཱཝུཏྟསཱིལཱདིཨནཝཛྫདྷམྨཱ. པཊིལདྡྷཱཏི ཨདྷིགཏཱ. ‘‘སཱིལཱདིདྷམྨཱ’’ཏི ཨེཏྠ ཡདི མགྒཕལཱནིཔི གཧིཏཱནི, ཨཐ ཀསྨཱ ‘‘པརིཧཱནིཝསེནཱ’’ཏི ཝུཏྟནྟི ཨཱཧ ‘‘ཨེཏྠ ཙཱ’’ཏིཨཱདི. ཨིམསྶ པན སམྨཔྤདྷཱནསྶཱཏི ཙཏུཏྠསྶ སམྨཔྤདྷཱནསྶ ཝསེན. ཨཡཾ དེསནཱཏི ‘‘ཨུཔྤནྣཱ མེ ཀུསལཱ དྷམྨཱ ནིརུཛ྄ཛྷམཱནཱ ཨནཏྠཱཡ སཾཝཏྟེཡྻུ’’ནྟི ཨཡཾ དེསནཱ ཀཏཱ. དུཏིཡམགྒོ ཝཱ…པེ… སཾཝཏྟེཡྻཱཏི ཨིདཾ ཨཱཡཏིཾ སཏྟསུ ཨཏྟབྷཱཝེསུ ཨུཔྤཛྫམཱནདུཀྑསངྑཱཏཨནཏྠུཔྤཏྟིཾ སནྡྷཱཡ ཝུཏྟཾ. ‘‘ཨཱཏཱཔཱི ཨོཏྟཔྤཱི བྷབྦོ སམྦོདྷཱཡཱ’’ཏིཨཱདིཝཙནཏོ ‘‘ཨིམེ ཙཏྟཱརོ སམྨཔྤདྷཱནཱ པུབྦབྷཱགཝིཔསྶནཱཝསེན ཀཐིཏཱ’’ཏི ཝུཏྟཾ.

ཨནོཏྟཔྤཱིསུཏྟཝཎྞནཱ ནིཊྛིཏཱ.

༣. ཙནྡཱུཔམསུཏྟཝཎྞནཱ

༡༤༦. པིཡམནཱཔནིཙྩནཝཀཱདིགུཎེཧི ཙནྡོ ཨུཔམཱ ཨེཏེསནྟི ཙནྡཱུཔམཱ. སནྠཝཱདཱིནི པདཱནི ཨཉྙམཉྙཝེཝཙནཱནི. པརིཡུཊྛཱནཾ པུན ཙིཏྟེ ཀིལེསཱདྷིགམོ. སབྦེཧིཔི པདེཧི ཀཏྠཙི སཏྟེ ཨནུརོདྷརོདྷཱབྷཱཝམཱཧ. ཨཏྟནོ པན སོམྨབྷཱཝེན མཧཱཛནསྶ པིཡོ མནཱཔོ. ཡདཏྠམེཏྠ ཙནྡཱུཔམཱ ཨཱཧཊཱ, ཏཾ དསྶེནྟོ ‘‘ཨེཝ’’ནྟིཨཱདིམཱཧ. ན ཀེཝལཾ ཙནྡཱུཔམཏཱཡ ཨེཏྟཀོ ཨེཝ གུཎོ, ཨཐ ཁོ ཨཉྙེཔི སནྟཱིཏི ཏེ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ཨེཝམཱདཱིཧཱིཏི ཨཱདི-སདྡེན ཡཐཱ. ཙནྡོ ¶ ལོཀཱནུགྒཧེན ཨཛཝཱིཐིཨཱདིཀཱ ནཱནཱཝཱིཐིཡོ པཊིཔཛྫཏི, ཨེཝཾ བྷིཀྑུ ཏཾ ཏཾ དིསཾ ཨུཔགཙྪཏི ཀུལཱནུདྡཡཱཡ. ཡཐཱ ཙནྡོ ཀཎྷཔཀྑཏོ སུཀྐཔཀྑཾ ཨུཔགཙྪནྟོ ཀལཱཧི ཝཌྜྷམཱནོ ཧུཏྭཱ ནིཙྩནཝོ ཧོཏི, ཨེཝཾ བྷིཀྑུ ཀཎྷཔཀྑཾ པཧཱཡ སུཀྐཔཀྑཾ ཨུཔགནྟྭཱ གུཎེཧི ཝཌྜྷམཱནོ ལོཀསྶ ཝཱ པཱམོཛྫཔཱསཾསཏྠོ ནིཙྩནཝཏཱཡ ཙནྡསམཙིཏྟོ ཨདྷུནུཔསམྤནྣོ ཝིཡ ཙ ནིཙྩནཝོ ཧུཏྭཱ ཙརཏི.

ཨཔཀསྶིཏྭཱཏི ཀིལེསཀཱམཝཏྠུཀཱམེཧི ཝིཝེཙེཏྭཱ. ཏཾ ནེཀྑམྨཱབྷིམུཁཾ ཀཱཡཙིཏྟཱནཾ ཨཱཀཌྜྷནཾ ཀཱཡཏོ ཨཔནཡནཉྩ ཧོཏཱིཏི ཨཱཧ ‘‘ཨཱཀཌྜྷིཏྭཱ ཨཔནེཏྭཱཏི ཨཏྠོ’’ཏི. ཙཏུཀྐཉྩེཏྠ སམྦྷཝཏཱིཏི ཏཾ དསྶེཏུཾ ‘‘ཡོ ཧི བྷིཀྑཱུ’’ཏིཨཱདི ཝུཏྟཾ.

ནིཙྩནཝཡཱཏི ¶ ‘‘ནིཙྩནཝཀཱ’’ཨིཙྩེཝ ཝུཏྟཾ ཧོཏི. ཀ-སདྡེན ཧི པདཾ ཝཌྜྷིཏཾ, ཀ-ཀཱརསྶ ཙ ཡ-ཀཱརཱདེསོ. ཨེཝཾ ཝིཙརིཾསཱུཏི ཀིཉྫཀྑཝསེན པརིགྒཧཱབྷཱཝེན ཡཐཱ ཨིམེ, ཨེཝཾ ཝིཙརིཾསུ ཨཉྙེཏི ཨནུཀམྤམཱནཱ.

དྭེབྷཱཏིཀཝཏྠཱུཏི དྭེབྷཱཏིཀཏྠེརཔཊིབདྡྷཾ ཝཏྠུཾ. ཨཔྤཏིརཱུཔཀརཎནྟི བྷིཀྑཱུནཾ ཨསཱརུཔྤཀརཎཾ. ཨཱདྷཱཡིཏྭཱཏི ཨཱརོཔནཾ ཋཔེཏྭཱ. ཏཐཱཏི ཡཐཱ སངྒྷམཛ྄ཛྷེ གཎམཛ྄ཛྷེ ཙ, ཏཐཱ ཝུཌྜྷཏརེ པུགྒལེ ཨཔྤཏིརཱུཔཀརཎཾ. ཨེཝམཱདཱིཏི ཨཱདི-སདྡེན ཨནྟརགྷརཔྤཝེསནེ ཨཉྙཏྠ ཙ ཡཐཱཝུཏྟཏོ ཨཉྙཾ ཨསཱརུཔྤཀིརིཡཾ སངྒཎྷཱཏི. ཏཏྠེཝཱཏི སངྒྷམཛ྄ཛྷེ གཎམཛ྄ཛྷེ པུགྒལསྶ ཙ ཝུཌྜྷསྶ སནྟིཀེ.

ཡཐཱཝུཏྟེསུ ཨཉྙེསུ ཙ ཏེསུ ཋཱནེསུ. པཱཔིཙྪཏཱཔི མནོཔཱགབྦྷིཡནྟི ཨེཏེནེཝ ཀོདྷཱུཔནཱཧཱདཱིནཾ སམུདཱཙཱརོ མནོཔཱགབྦྷིཡནྟི དསྶིཏཾ ཧོཏི.

ཨེཀཏོ བྷཱརིཡནྟི པིཊྛིཔསྶཏོ ཨོནཏཾ. ཝཱཡུཔཏྠམྦྷནྟི ཙིཏྟསམུཊྛཱནཝཱཡུནཱ ཨུཔཏྠམྦྷནཾ. ཨནུབྦེཛེཏྭཱ ཙིཏྟནྟི ཨཱནེཏྭཱ སམྦནྡྷོ. ཙིཏྟསྶ ཧི ཏཏོ ཨནུབྦེཛནཾ ཏདནུནཡནཾ. ཏེནཱཧ ‘‘སམྤིཡཱཡམཱནོ ཨོལོཀེཏཱི’’ཏི. ཝཱཡུཔཏྠམྦྷཀཾ གཱཧཱཔེཏྭཱཏི ཀཱཡཾ ཏཐཱ ཨུཔཏྠམྦྷཀཾ ཀཏྭཱ.

ཨོཔམྨསཾསནྡནཾ ¶ སུཝིཉྙེཡྻམེཝ. ཀཱམགིདྡྷཏཱཡ ཧཱིནཱདྷིམུཏྟིཀོ, ཨཝིསུདྡྷསཱིལཱཙཱརཏཱཡ མིཙྪཱཔཊིཔནྣོ.

ཨངྒུལཱིཧི ནིཀྑནྟཔབྷཱ ཨཱཀཱསསཉྩལནེན དིགུཎཱ ཧུཏྭཱ ཨཱཀཱསེ ཝིཙརིཾསཱུཏི ཨཱཧ ‘‘ཡམཀཝིཛྫུཏཾ ཙཱརཡམཱནོ ཝིཡཱ’’ཏི. ‘‘ཨཱཀཱསེ པཱཎིཾ ཙཱལེསཱི’’ཏི པདསྶ ཨཉྙཏྠ ཨནཱགཏཏྟཱ ‘‘ཨསམྦྷིནྣཔད’’ནྟི ཝུཏྟཾ. ཨཏྟམནོཏི པཱིཏིསོམནསྶེཧི གཧིཏམནོ. ཡཉྷི ཙིཏྟཾ ཨནཝཛྫཾ པཱིཏིསོམནསྶསཧིཏཾ, ཏཾ སསནྟཀཾ ཧིཏསུཁཱཝཧཏྟཱ. ཏེནཱཧ ‘‘སཀམནོ’’ཏིཨཱདི. ན དོམནསྶེན…པེ… གཧིཏམནོ སཀཙིཏྟསྶ ཏབྦིརུདྡྷཏྟཱ. པུརིམནཡེནེཝཱཏི ‘‘ཨིདཱནི ཡོ ཧཱིནཱདྷིམུཏྟིཀོ’’ཏིཨཱདིནཱ པུབྦེ ཝུཏྟནཡེནེཝ.

པསནྣཱཀཱརནྟི པསནྣེཧི ཀཱཏབྦཀིརིཡཾ. ཏཾ སརཱུཔཏོ དསྶེཏི ‘‘ཙཱིཝརཱདཡོ པཙྩཡེ དདེཡྻུ’’ནྟི. ཏཐབྷཱཝཱཡཱཏི ཡདཏྠཾ བྷགཝཏཱ དྷམྨོ དེསིཏོ, ཡདཏྠཉྩ སཱསནེ པབྦཛྫཱ, ཏདཏྠཱཡ ¶ . རཀྑཎབྷཱཝནྟི ཨཔཱཡབྷཡཏོ ཙ རཀྑཎཛ྄ཛྷཱསཡཾ. ཙནྡོཔམཱདིཝསེནཱཏི ཨཱདི-སདྡེན ཨཱཀཱསེ ཙལིཏཔཱཎི ཝིཡ ཀཏྠཙི ཨལགྒཏཱཡ པརིསུདྡྷཛ྄ཛྷཱསཡཏཱ སཏྟེསུ ཀཱརུཉྙནྟི ཨེཝམཱདཱིནཾ སངྒཧོ.

ཙནྡཱུཔམསུཏྟཝཎྞནཱ ནིཊྛིཏཱ.

༤. ཀུལཱུཔཀསུཏྟཝཎྞནཱ

༡༤༧. ཀུལཱནི ཨུཔགཙྪཏཱིཏི ཀུལཱུཔཀོ. སནྡཱིཡཏཱིཏི སབྦསོ དཱིཡཏི, ཨཝཁཎྜཱིཡཏཱིཏི ཨཏྠོ. སཱ པན ཨཝཁཎྜིཡནཱ དུཀྑཱཔནཱ ཨཊྚིཡནཱ ཧོཏཱིཏི ཝུཏྟཾ ‘‘ཨཊྚཱིཡཏཱི’’ཏི. ཏེནཱཧ བྷགཝཱ ‘‘སོ ཏཏོནིདཱནཾ དུཀྑཾ དོམནསྶཾ པཊིསཾཝེདཡཏཱི’’ཏི. ཝུཏྟནཡཱནུསཱརེན ཧེཊྛཱ ཝུཏྟནཡསྶ ཨནུསརཎེན.

ཀུལཱུཔཀསུཏྟཝཎྞནཱ ནིཊྛིཏཱ.

༥. ཛིཎྞསུཏྟཝཎྞནཱ

༡༤༨. ཚིནྣབྷིནྣཊྛཱནེ ¶ ཚིདྡསྶ ཨཔུཐུལཏྟཱ ཨགྒལ༹ཾ ཨདཏྭཱཝ སུཏྟེན སཾསིབྦནམཏྟེན ཨགྒལ༹དཱནེན ཙ ཚིདྡེ པུཐུལེ. ནིབྦསནཱནཱིཏི ཙིརནིསེཝིཏཝསནཀིཙྩཱནི, པརིབྷོགཛིཎྞཱནཱིཏི ཨཏྠོ. ཏེནཱཧ ‘‘པུབྦེ…པེ… ལདྡྷནཱམཱནཱི’’ཏི, སཉྙཱཔུབྦཀོ ཝིདྷི ཨནིཙྩོཏི ‘‘གཧཔཏཱནཱི’’ཏི ཝུཏྟཾ ཡཐཱ ‘‘ཝཱིརིཡ’’ནྟི.

སེནཱཔཏིནྟི སེནཱཔཏིབྷཱཝིནཾ, སེནཱཔཙྩཱརཧནྟི ཨཏྠོ. ཨཏྟནོ ཀམྨེནཱཏི ཨཏྟནཱ ཀཱཏབྦཀམྨེན. སོཏི སཏྠཱ. ཏསྨིནྟི མཧཱཀསྶཔཏྠེརེ ཀརོཏཱིཏི སམྦནྡྷོ. ན ཀརོཏཱིཏི ཝུཏྟམཏྠཾ ཝིཝརནྟོ ‘‘ཀསྨཱ’’ཏིཨཱདིམཱཧ. ཡདི སཏྠཱ དྷུཏངྒཱནི ན ཝིསྶཛྫཱཔེཏུཀཱམོ, ཨཐ ཀསྨཱ ‘‘ཛིཎྞོསི དཱནི ཏྭ’’ནྟིཨཱདིམཝོཙཱཏི ཨཱཧ ‘‘ཡཐཱ པནཱ’’ཏིཨཱདི.

དིཊྛདྷམྨསུཁཝིཧཱརནྟི ཨིམསྨིཾཡེཝ ཨཏྟབྷཱཝེ ཕཱསུཝིཧཱརཾ. ཨམཱནུསིཀཱ སཝནརཏཱིཏི ཨཏིཀྐནྟམཱནུསིཀཱཡ ཨརཉྙསདྡུཔྤཏྟིཡཱ ཨརཉྙེཧཾ ཝསཱམཱིཏི ཝིཝེཀཝཱསཱུཔནིསྶཡཱདྷཱིནསདྡསཝནཔཙྩཡཱ དྷམྨརཏི ཨུཔྤཛྫཏི. ཨཔརོཏི ཨཉྙོ, དུཏིཡོཏི ཨཏྠོ. ཏཏྠེཝཱཏི ཏསྨིཾཡེཝ ཨེཀསྶ ཝིཧརཎཊྛཱནེ ཝིཧརཎསམཡེ ཙ ཕཱསུ བྷཝཏི ཙིཏྟཝིཝེཀསམྦྷཝཏོ. ཏེནཱཧ ‘‘ཨེཀསྶ རམཏོ ཝནེ’’ཏི.

ཏཐཱཏི ¶ ཡཐཱ ཨཱརཉྙིཀསྶ རཏི, ཏཐཱ པིཎྜཔཱཏིཀསྶ ལབྦྷཏི དིཊྛདྷམྨསུཁཝིཧཱརོ. ཨེས ནཡོ སེསེསུ. ཨཔིཎྜཔཱཏིཀཱདྷཱིནོ ཨིཏརསྶ ཝིསེསཛོཏཀོཏི ཏམེཝསྶ ཝིསེསཾ དསྶེཏུཾ ‘‘ཨཀཱལཙཱརཱི’’ཏིཨཱདི ཝུཏྟཾ.

ཨམྷཱཀཾ སལཱཀཾ གཧེཏྭཱ བྷཏྟཏྠཱཡ གེཧཾ ཨནཱགཙྪནྟསྶ སཏྟཱཧཾ ན པཱཏེཏབྦནྟི སཱམིཀེཧི དིནྣཏྟཱ སཏྟཱཧཾ སལཱཀཾ ན ལབྷཏི, ན ཀཏིཀཝསེན. པིཎྜཙཱརིཀཝཏྟེ ཨཝཏྟནཏོ ‘‘ཡསྶ ཙེསཱ’’ཏིཨཱདི ཝུཏྟཾ.

པཋམཏརཾ ཀཱཏབྦཾ ཡཾ, ཏཾ ཝཏྟཾ, ཨིཏརཾ པཊིཝཏྟཾ. མཧནྟཾ ཝཱ ཝཏྟཾ, ཁུདྡཀཾ པཊིཝཏྟཾ. ཀེཙི ‘‘ཝཏྟཔཊིཔཏྟི’’ནྟི པཋནྟི, ཝཏྟསྶ ཀརཎནྟི ཨཏྠོ. ཨུདྡྷརཎ-ཨཏིཧརཎ-ཝཱིཏིཧརཎཝོསྶཛྫན-སནྣིཀྑེཔན-སནྣིརུམྦྷནཱནཾ ¶ ཝསེན ཚ ཀོཊྛཱསེ. གརུབྷཱཝེནཱཏི ཐིརབྷཱཝེན.

‘‘ཨམུཀསྨིཾ སེནཱསནེ ཝསནྟཱ བཧུཾ ཝསྶཝཱསིཀཾ ལབྷནྟཱི’’ཏི ཏཐཱ ན ཝསྶཝཱསིཀཾ པརིཡེསནྟོ ཙརཏི ཝསྶཝཱསིཀསྶེཝ ཨགྒཧཎཏོ. ཏསྨཱ སེནཱསནཕཱསུཀཾཡེཝ ཙིནྟེཏི. ཏེན བཧུཔརིཀྑཱརབྷཱཝེན ཕཱསུཝིཧཱརོ ནཏྠི པརིཀྑཱརཱནཾ རཀྑཎཔཊིཛགྒནཱདིདུཀྑབཧུལཏཱཡ. ཨཔྤིཙྪཱདཱིནནྟི ཨཔྤིཙྪསནྟུཊྛཱདཱིནཾཡེཝ ལབྦྷཏི དིཊྛདྷམྨསུཁཝིཧཱརོ.

ཛིཎྞསུཏྟཝཎྞནཱ ནིཊྛིཏཱ.

༦. ཨོཝཱདསུཏྟཝཎྞནཱ

༡༤༩. ཨཏྟནོ ཋཱནེཏི སབྲཧྨཙཱརཱིནཾ ཨོཝཱདཀཝིཉྙཱཔཀབྷཱཝེན ཨཏྟནོ མཧཱསཱཝཀཊྛཱནེ ཋཔནཏྠཾ. ཨཐ ཝཱ ཡསྨཱ ‘‘ཨཧཾ དཱནི ན ཙིརཾ ཋསྶཱམི, ཏཐཱ སཱརིཔུཏྟམོགྒལླཱནཱ, ཨཡཾ པན ཝཱིསཾཝསྶཏཱཡུཀོ, ཨོཝདནྟོ ཨནུསཱསནྟོ མམཙྩཡེན བྷིཀྑཱུནཾ མཡཱ ཀཱཏབྦཀིཙྩཾ ཀརིསྶཏཱི’’ཏི ཨདྷིཔྤཱཡེན བྷགཝཱ ཨིམཾ དེསནཾ ཨཱརབྷི. ཏསྨཱ ཨཏྟནོ ཋཱནེཏི སཏྠཱརཱ ཀཱཏབྦཨོཝཱདདཱཡཀཊྛཱནེ. ཏེནཱཧ ‘‘ཨེཝཾ པནསྶཱ’’ཏིཨཱདི. ཡཐཱཧ བྷགཝཱ ‘‘ཨོཝད, ཀསྶཔ…པེ… ཏྭཾ ཝཱ’’ཏི. དུཀྑེན ཝཏྟབྦཱ ཨཔྤདཀྑིཎགྒཱཧིབྷཱཝཏོ. དུབྦཙབྷཱཝཀརཎེཧཱིཏི ཀོདྷཱུཔནཱཧཱདཱིཧི. ཨནུསཱསནིཡཱ པདཀྑིཎགྒཧཎཾ ནཱམ ཨནུདྷམྨཙརཎཾ, ཚིནྣཔཊིཔཏྟི ཀཏཱ ཝཱམགྒཱཧོ ནཱམཱཏི ཨཱཧ ‘‘ཨནུསཱསནི’’ནྟིཨཱདི. ཨཏིཀྐམྨ ཝདནྟེཏི ཨཉྙམཉྙཾ ཨཏིཀྐམིཏྭཱ ཨཏིམཉྙིཏྭཱ ཝདནྟེ. བཧུཾ བྷཱསིསྶཏཱིཏི དྷམྨཾ ཀཐེནྟོ ཀོ ཝིཔུལཾ ¶ ཀཏྭཱ ཀཐེསྶཏི. ཨསཧིཏནྟི པུབྦེནཱཔརཾ ནསཧིཏཾ ཧེཏུཔམཱཝིརཧིཏཾ. ཨམདྷུརནྟི ན མདྷུརཾ ན ཀཎྞསུཁཾ ན པེམནཱིཡཾ. ལཧུཉྙེཝ ཨུཊྛཱཏི ཨཔྤཝཏྟནེན ཀཱུལཊྛཱནཾ ཝིཡ ཏསྶ ཀཐནཾ.

ཨོཝཱདསུཏྟཝཎྞནཱ ནིཊྛིཏཱ.

༧. དུཏིཡཨོཝཱདསུཏྟཝཎྞནཱ

༡༥༠. ཨོཀཔྤནསདྡྷཱཏི ¶ སདྡྷེཡྻཝཏྠུཾ ཨོགཱཧིཏྭཱ ‘‘ཨེཝམེཏ’’ནྟི ཀཔྤནསདྡྷཱ. ཀུསལདྷམྨཛཱནནཔཉྙཱཏི ཨནཝཛྫདྷམྨཱནཾ སབྦསོ ཛཱནནཔཉྙཱ. པརིཧཱནནྟི སབྦཱཧི སམྤཏྟཱིཧི པརིཧཱནཾ. ན ཧི ཀལྱཱཎམིཏྟརཧིཏསྶ ཀཱཙི སམྤཏྟི ནཱམ ཨཏྠཱིཏི.

དུཏིཡཨོཝཱདསུཏྟཝཎྞནཱ ནིཊྛིཏཱ.

༨. ཏཏིཡཨོཝཱདསུཏྟཝཎྞནཱ

༡༥༡. པུབྦེཏི པཋམབོདྷིཡཾ. ཨེཏརཧཱིཏི ཏཏོ པཙྪིམེ ཀཱལེ. ཀཱརཎཔཊྛཔནེཏི ཀཱརཎཱརམྦྷེ. ཏེསུ ཝུཏྟགུཎཡུཏྟེསུ ཐེརེསུ. ཏསྨིནྟི ཏསྨིཾ ཡཐཱཝུཏྟགུཎཡུཏྟེ པུགྒལེ. ཨེཝཾ སཀྐཱརེ ཀཡིརམཱནེཏི ‘‘བྷདྡཀོ ཝཏཱཡཾ བྷིཀྑཱུ’’ཏི ཨཱདརཛཱཏེཧི བྷིཀྑཱུཧི སཀྐཱརེ ཀཡིརམཱནེ. ཨིམེ སབྲཧྨཙཱརཱི. ‘‘ཨེཧི བྷིཀྑཱུ’’ཏི ཏཾ བྷིཀྑུཾ ཨཏྟནོ མུཁཱབྷིམུཁཾ ཀརོནྟཱ ཝདནྟི. ཡཉྷི ཏནྟི ཨེཏྠ ཏནྟི ནིཔཱཏམཏྟཾ ཨུཔདྡཝོཏི ཝུཙྩཏི ཨནཏྠཛནནཏོ. པཏྠཡཏི བྷཛཏི བཛ྄ཛྷཏཱིཏི པཏྠནཱ, ཨབྷིསངྒོཏི ཨཱཧ ‘‘ཨབྷིཔཏྠནཱཏི ཨདྷིམཏྟཔཏྠནཱ’’ཏི.

ཏཏིཡཨོཝཱདསུཏྟཝཎྞནཱ ནིཊྛིཏཱ.

༩. ཛྷཱནཱབྷིཉྙསུཏྟཝཎྞནཱ

༡༥༢. ཡཱཝདེཝཱཏི ཨིམིནཱ སམཱནཏྠཾ ‘‘ཡཱཝདེ’’ཏི ཨིདཾ པདནྟི ཨཱཧ ‘‘ཡཱཝདེ ཨཱཀངྑཱམཱིཏི ཡཱཝདེཝ ཨིཙྪཱམཱི’’ཏི. ཡདིཙྪཀཾ ཛྷཱནསམཱཔཏྟཱིསུ ཝསཱིབྷཱཝདསྶནཏྠཾ ཏདེཏཾ ཨཱརདྡྷཾ. ཝིཏྠཱརིཏམེཝ, ཏསྨཱ ཏཏྠ ཝིཏྠཱརིཏམེཝ གཧེཏབྦནྟི ཨདྷིཔྤཱཡོ. ཨཱསཝཱནཾ ཁཡཱཏི ཨཱསཝཱནཾ ཁཡཧེཏུ ཨརིཡམགྒེན སབྦསོ ཨཱསཝཱནཾ ཁེཔིཏཏྟཱ. ཨཔཙྩཡབྷཱུཏནྟི ཨཱརམྨཎཔཙྩཡབྷཱཝེན ཨཔཙྩཡབྷཱུཏཾ.

ཛྷཱནཱབྷིཉྙསུཏྟཝཎྞནཱ ནིཊྛིཏཱ.

༡༠. ཨུཔསྶཡསུཏྟཝཎྞནཱ

༡༥༣. ལཱབྷསཀྐཱརཧེཏུཔི ¶ ¶ ཨེཀཙྩེ བྷིཀྑཱུ བྷིཀྑུནུཔསྶཡཾ གནྟྭཱ བྷིཀྑུནིཡོ ཨོཝདནྟི, ཨེཝམེཝཾ ཨཡཾ པན ཐེརོ ན ལཱབྷསཀྐཱརཧེཏུ བྷིཀྑུནུཔསྶཡགམནཾ ཡཱཙཏི, ཨཐ ཀསྨཱཏི ཨཱཧ ‘‘ཀམྨཊྛཱནཏྠིཀཱ’’ཏིཨཱདི. ཨེསོ ཧི ཨཱནནྡཏྠེརོ ཨུསྶུཀྐཱཔེཏྭཱ པཊིཔཏྟིགུཎཾ དསྶེནྟོ ཡསྨཱ ཏཱ བྷིཀྑུནིཡོ ཙཏུསཙྩཀམྨཊྛཱནིཀཱ, ཏསྨཱ པཉྩནྣཾ ཨུཔཱདཱནཀྑནྡྷཱནཾ ཨུདཡབྦཡཱདིཔཀཱསནིཡཱ དྷམྨཀཐཱཡ ཝིཔསྶནཱཔཊིཔཏྟིསམྤདཾ དསྶེསི. ཨནིཙྩཱདིལཀྑཎཱནི ཙེཝ ཨུདཡབྦཡཱདིཀེ ཙ སམྨཱ དསྶེསི. ཧཏྠེན གཧེཏྭཱ ཝིཡ པཙྩཀྑཏོ དསྶེསི. སམཱདཔེསཱིཏི ཏཏྠ ལཀྑཎཱརམྨཎིཀཝིཔསྶནཾ སམཱདཔེསི. ཡཐཱ ཝཱིཐིཔཊིཔནྣོ ཧུཏྭཱ པཝཏྟཏི, ཨེཝཾ གཎྷཱཔེསི. སམུཏྟེཛེསཱིཏི ཝིཔསྶནཱཡ ཨཱརདྡྷཱཡ སངྑཱརཱནཾ ཨུདཡབྦཡཱདཱིསུ ཨུཔཊྛཧནྟེསུ ཡཐཱཀཱལཾ པགྒཧསམུཔེཀྑཎེཧི བོཛ྄ཛྷངྒཱནཾ ཨནུཔཝཏྟནེན བྷཱཝནཱམཛ྄ཛྷིམཝཱིཐིཾ པཱཔེཏྭཱ ཡཐཱ ཝིཔསྶནཱཉཱཎཾ སུཔྤསནྣཾ ཧུཏྭཱ ཝཧཏི, ཨེཝཾ ཨིནྡྲིཡཱནཾ ཝིསདབྷཱཝཀརཎེན ཝིཔསྶནཱཙིཏྟཾ སམྨཱ ཨུཏྟེཛེསི, ནིབྦཱནཝསེན ཝཱ སམཱདཔེསི. སམྤཧཾསེསཱིཏི ཏཐཱ པཝཏྟིཡམཱནཱཡ ཝིཔསྶནཱཡ སམཔྤཝཏྟབྷཱཝནཱཝསེན ཨུཔརི ལདྡྷབྦབྷཱཝནཱཝསེན ཙིཏྟཾ སམྤཧཾསེསི, ལདྡྷསྶཱདཝསེན སུཊྛུ ཏོསེསི. ཨེཝམེཏྠ ཨཏྠོ ཝེདིཏབྦོ.

མནུཏེ པརིཉྙཱདིཝསེན སཙྩཱནི བུཛ྄ཛྷཏཱིཏི མུནི. ཏེཏི ཏཾ. ཨུཔཡོགཏྠེ ཧི ཨིདཾ སཱམིཝཙནཾ. ཨུཏྟརཱིཏི ཨུཔརི, ཏཝ ཡཐཱབྷཱུཏསབྷཱཝཏོ པརཏོཏི ཨཏྠོ. པཀྑཔཏིཏོ ཨགཏིགམནཾ ཨཏིརེཀཨོཀཱསོ. ཨུཔཔརིཀྑཱིཏི ཨནུཝིཙྩ ནིཝཱརཀོ ན བཧུམཏོ. བུདྡྷཔཊིབྷཱགོ ཐེརོ. ‘‘བཱལཱ བྷིཀྑུནཱི དུབྦྷཱསིཏཾ ཨཱཧཱ’’ཏི ཨཝཏྭཱ ‘‘ཁམཐ, བྷནྟེ’’ཏི ཝདནྟེན པཀྑཔཱཏེན ཝིཡ ཝུཏྟཾ ཧོཏཱིཏི ཨཱཧ ‘‘ཨེཀཱ བྷིཀྑུནཱི ན ཝཱརིཏཱ’’ཏིཨཱདི.

ཙུཏཱ སལིངྒཏོ ནཊྛཱ, དེསནྟརཔཀྐམེན ཨདསྶནཾ ན གཏཱ. ཀཎྚཀསཱཁཱ ཝིཡཱཏི ཀུརཎྚཀཨཔཱམགྒཀཎྚཀལསིཀཱཧི སཱཁཱ ཝིཡ.

ཨུཔསྶཡསུཏྟཝཎྞནཱ ནིཊྛིཏཱ.

༡༡. ཙཱིཝརསུཏྟཝཎྞནཱ

༡༥༤. རཱཛགཧསྶ ¶ དཀྑིཎབྷཱགེ གིརི དཀྑིཎཱགིརི ཎ-ཀཱརེ ཨ-ཀཱརསྶ དཱིགྷཾ ཀཏྭཱ, ཏསྶ དཀྑིཎབྷཱགེ ཛནཔདོཔི ‘‘དཀྑིཎཱགིརཱི’’ཏི ཝུཙྩཏི, ‘‘གིརིཏོ དཀྑིཎབྷཱགོ’’ཏི ¶ ཀཏྭཱ. ཨེཀདིཝསེནཱཏི ཨེཀེན དིཝསེན ཨུཔྤབྦཱཛེསུཾ ཏེསཾ སདྡྷཱཔབྦཛིཏཱབྷཱཝཏོ.

ཡཏྠ ཙཏྟཱརོ ཝཱ ཨུཏྟརི ཝཱ བྷིཀྑཱུ ཨཀཔྤིཡནིམནྟནཾ སཱདིཡིཏྭཱ པཉྩནྣཾ བྷོཛནཱནཾ ཨཉྙཏརཾ བྷོཛནཾ ཨེཀཏོ པཊིགྒཎྷིཏྭཱ བྷུཉྫནྟི, ཨེཏཾ གཎབྷོཛནཾ ནཱམ, ཏཾ ཏིཎྞཾ བྷིཀྑཱུནཾ བྷུཉྫིཏུཾ ཝཊྚཏཱིཏི ‘‘ཏིཀབྷོཛནཾ པཉྙཏྟ’’ནྟི ཝཙནེན གཎབྷོཛནཾ པཊིཀྑིཏྟནྟི ཝུཏྟཾ ཧོཏི. ཏཡོ ཨཏྠཝསེ པཊིཙྩ ཨནུཉྙཱཏཏྟཱཔི ‘‘ཏིཀབྷོཛན’’ནྟི ཝདནྟི.

‘‘དུམྨངྐཱུནཾ ནིགྒཧོ ཨེཝ པེསལཱནཾ ཕཱསུཝིཧཱརོ’’ཏི ཨིདཾ ཨེཀཾ ཨངྒཾ. ཏེནེཝཱཧ ‘‘དུམྨངྐཱུནཾ ནིགྒཧེནེཝཱ’’ཏིཨཱདི. ‘‘ཡཐཱ དེཝདཏྟོ…པེ… སངྒྷཾ བྷིནྡེཡྻུ’’ནྟི ཨིམིནཱ ཀཱརཎེན ཏིཀབྷོཛནཾ པཉྙཏྟཾ.

ཨཐ ཀིཉྩརཧཱིཏི ཨཐ ཀསྨཱ ཏྭཾ ཨསམྤནྣགཎཾ བནྡྷིཏྭཱ ཙརསཱིཏི ཨདྷིཔྤཱཡོ. ཨསམྤནྣཱཡ པརིསཱཡ ཙཱརིཀཱཙརཎཾ ཀུལཱནུདྡཡཱཡ ན ཧོཏི, ཀུལཱནཾ གྷཱཏིཏཏྟཱཏི ཨདྷིཔྤཱཡེན ཐེརོ ‘‘སསྶགྷཱཏཾ མཉྙེ ཙརསཱི’’ཏིཨཱདིམཝོཙ.

སོདྷེནྟོ ཏསྶཱ ཨཏིཝིཡ པརིསུདྡྷབྷཱཝདསྶནེན. ཨུདྡིསིཏུཾ ན ཛཱནཱམི ཏཐཱ ཙིཏྟསྶེཝ ཨནུཔྤནྣཔུབྦཏྟཱ. ཀིཉྩནཾ ཀིལེསཝཏྠུ. སངྒཧེཏབྦཁེཏྟཝཏྠུ པལིབོདྷོ, ཨཱལཡོ ཨཔེཀྑཱ. ཨོཀཱསཱབྷཱཝཏོཏི བཧུཀིཙྩཀརཎཱིཡཏཱཡ ཀུསལཀིརིཡཱཡ ཨོཀཱསཱབྷཱཝཏོ. སནྣིཔཱཏཊྛཱནཏོཏི སངྐེཏཾ ཀཏྭཱ ཝིཡ ཀིལེསརཛཱནཾ ཏཏྠ སནྣིཛ྄ཛྷཔཝཏྟནཏོ.

སིཀྑཏྟཡབྲཧྨཙརིཡནྟི ཨདྷིསཱིལསིཀྑཱདིསིཀྑཏྟཡསངྒཧཾ བྲཧྨཾ སེཊྛཾ ཙརིཡཾ. ཁཎྜཱདིབྷཱཝཱཔཱདནེན ཨཁཎྜཾ ཀཏྭཱ. ལཀྑཎཝཙནཉྷེཏཾ. ཀིཉྩི སིཀྑེཀདེསཾ ཨསེསེཏྭཱ ཨེཀནྟེནེཝ པརིཔཱུརེཏབྦཏཱཡ ཨེཀནྟཔརིཔུཎྞཾ. ཙིཏྟུཔྤཱདམཏྟམྤི སཾཀིལེསམལཾ ཨནུཔྤཱདེཏྭཱ ཨཙྩནྟམེཝ ཝིསུདྡྷཾ ཀཏྭཱ པརིཧརིཏབྦཏཱཡ ཨེཀནྟཔརིསུདྡྷཾ. ཏཏོ ཨེཝ སངྑཾ ཝིཡ ལིཁིཏནྟི སངྑལིཁིཏཾ. ཏེནཱཧ ‘‘ལིཁིཏསངྑསདིས’’ནྟི. དཱཋིཀཱཔི ཏགྒཧཎེནེཝ གཧེཏྭཱ ¶ ‘‘མསྶུ’’ཏྭེཝ ཝུཏྟཾ, ན ཨེཏྠ ཀེཝལཾ མསྶུཡེཝཱཏི ཨཏྠོ. ཀསཱཡེན རཏྟཱནི ཀཱསཱཡཱནི.

ཝངྒསཱཊཀོཏི ཝངྒདེསེ ཨུཔྤནྣསཱཊཀོ. ཨེསཱཏི མཧཱཀསྶཔཏྠེརོ. ཨབྷིནཱིཧཱརཏོ པཊྛཱཡ པཎིདྷཱནཏོ པབྷུཏི, ཨཡཾ ཨིདཱནི ཝུཙྩམཱནཱ. ཨགྒསཱཝཀདྭཡཾ ཨུཔཱདཱཡ ཏཏིཡཏྟཱ ‘‘ཏཏིཡསཱཝཀ’’ནྟི ¶ ཝུཏྟཾ. ཨཊྛསཊྛིབྷིཀྑུསཏསཧསྶནྟི བྷིཀྑཱུནཾ སཏསཧསྶཉྩེཝ སཊྛིསཧསྶཱནི ཙ ཨཊྛ ཙ སཧསྶཱནི.

ཨཡཉྩ ཨཡཉྩ གུཎོཏི སཱིལཏོ པཊྛཱཡ ཡཱཝ ཨགྒཕལཱ གུཎོཏི ཀིཏྟེནྟོ མཧཱསམུདྡཾ པཱུརཡམཱནོ ཝིཡ ཀཐེསི.

ཀོལཱཧལནྟི དེཝཏཱཧི ནིབྦཏྟིཏོ ཀོལཱཧལོ.

ཁུདྡཀཱདིཝསེན པཉྩཝཎྞཱ. ཏརཎཾ ཝཱ ཧོཏུ མརཎཾ ཝཱཏི མཧོགྷཾ ཨོགཱཧནྟོ པུརིསོ ཝིཡ མཙྪེརསམུདྡཾ ཨུཏྟརནྟོ པཙྪཱཔི…པེ… པཱདམཱུལེ ཋཔེསི བྷགཝཏོ དྷམྨདེསནཱཡ མཙྪེརཔཧཱནསྶ ཀཐིཏཏྟཱ.

སཏྠུ གུཎཱ ཀཐིཏཱ ནཱམ ཧོནྟཱིཏི ཝུཏྟཾ ‘‘སཏྠུ གུཎེ ཀཐེནྟསྶཱ’’ཏི. ཏཏོ པཊྛཱཡཱཏི ཏདཱ སཏྠུ སམྨུཁཱ དྷམྨསྶཝནཏོ པཊྛཱཡ.

ཏཐཱགཏམཉྩསྶཱཏི ཏཐཱགཏསྶ པརིབྷོགམཉྩསྶ. དཱནཾ དཏྭཱ བྲཱཧྨཎསྶ པུརོཧིཏཊྛཱནེ ཋཔེསི. ཏཱདིསསྶེཝ སེཊྛིནོ དྷཱིཏཱ ཧུཏྭཱ.

ཨདིནྣཝིཔཱཀསྶཱཏི པུབྦེ ཀཏཱུཔཙིཏསྶ སབྦསོ ན དིནྣཝིཔཱཀསྶ. ཏསྶ ཀམྨསྶཱཏི ཏསྶ པཙྩེཀབུདྡྷསྶ པཏྟེ པིཎྜཔཱཏཾ ཚིནྡིཏྭཱ ཀལལཔཱུརཎཀམྨསྶ. ཏསྨིཾཡེཝ ཨཏྟབྷཱཝེ སཏྟསུ ཋཱནེསུ དུགྒནྡྷསརཱིརཏཱཡ པཊིནིཝཏྟིཏཱ. ཨིཊྛཀཔནྟཱིཏི སུཝཎྞིཊྛཀཔནྟི. གྷཊནིཊྛཀཱཡཱཏི ཏསྶ པནྟིཡཾ པཋམཾ ཋཔིཏཨིཊྛཀཱཡ སདྡྷིཾ གྷཊེཏབྦཨིཊྛཀཱཡ ཨཱུནཱ ཧོཏི. བྷདྡཀེ ཀཱལེཏི ཨཱིདིསིཡཱ ཨིཊྛཀཱཡ ཨིཙྪིཏཀཱལེཡེཝ ཨཱགཏཱསི. ཏེན བནྡྷནེནཱཏི ཏེན སིལེསསམྦནྡྷེན.

ཨོལམྦཀཱཏི ¶ མུཏྟཱམཎིམཡཱ ཨོལམྦཀཱ. པུཉྙནྟི ནཏྠི ནོ པུཉྙཾ ཏཾ, ཡཾ ནིམིཏྟཾ ཡཾ ཀཱརཎཱ ཨིཏོ སུཁུམཏརསྶ པཊིལཱབྷོ སིཡཱཏི ཨཏྠོ. པུཉྙནིཡཱམེནཱཏི པུཉྙཱནུབྷཱཝསིདྡྷེན ནིཡཱམེན. སོ ཙ ཨསྶ བཱརཱཎསིརཛྫཾ དཱཏུཾ ཀཏོཀཱསོ.

ཕུསྶརཐནྟི མངྒལརཐཾ. ཨུཎྷཱིསཾ ཝཱལབཱིཛནཱི ཁགྒོ མཎིཔཱདུཀཱ སེཏཙྪཏྟནྟི པཉྩཝིདྷཾ རཱཛཀཀུདྷབྷཎྜཾ ¶ . སེཏཙྪཏྟཾ ཝིསུཾ གཧིཏཾ. དིབྦཝཏྠཾ སཱདིཡིཏུཾ པུཉྙཱནུབྷཱཝཙོདིཏོ ‘‘ནནུ ཏཱཏཱ ཐཱུལ’’ནྟིཨཱདིམཱཧ.

པཉྩ ཙངྐམནསཏཱནཱིཏི ཨེཏྠ ཨིཏི-སདྡེན ཨཱདིཨཏྠེན ཨགྒིསཱལཱདཱིནི པབྦཛིཏསཱརུཔྤཊྛཱནཱནི སངྒཎྷཱཏི.

སཱདྷུཀཱིལི༹ཏནྟི ཨརིཡཱནཾ པརིནིབྦུཏཊྛཱནེ ཀཱཏབྦསཀྐཱརཾ ཝདཏི.

ནཔྤམཛྫི ནིརོགཱ ཨཡྻཱཏི པུཙྪིཏཱཀཱརདསྶནཾ. པརིནིབྦུཏཱ དེཝཱཏི དེཝཱི པཊིཝཙནཾ ཨདཱསི. པཊིཡཱདེཏྭཱཏི ནིཡྻཱཏེཏྭཱ. སམཎཀཔབྦཛྫནྟི སམིཏཔཱཔེཧི ཨརིཡེཧི ཨནུཊྛཱཏབྦཔབྦཛྫཾ. སོ ཧི རཱཛཱ པཙྩེཀབུདྡྷཱནཾ ཝེསསྶ དིཊྛཏྟཱ ‘‘ཨིདམེཝ བྷདྡཀ’’ནྟི ཏཱདིསཾཡེཝ ལིངྒཾ གཎྷི.

ཏཏྠེཝཱཏི བྲཧྨལོཀེཡེཝ. ཝཱིསཏིམེ ཝསྶེ སམྤཏྟེཏི ཨཱཧརིཏྭཱ སམྦནྡྷོ. བྲཧྨལོཀཏོ ཨཱགནྟྭཱ ནིབྦཏྟཏྟཱ བྲཧྨཙརིཡཱདྷིཀཱརསྶ ཙིརཀཱལཾ སངྒཧིཏཏྟཱ ‘‘ཨེཝརཱུཔཾ ཀཐཾ མཱ ཀཐེཐཱ’’ཏིཨཱདིམཱཧ.

ཝཱིསཏི དྷརཎཱནི ‘‘ནིཀྑ’’ནྟི ཝདནྟི. ཨལབྷནྟོ ན ཝསཱམཱིཏི སཉྙཱཔེསྶཱམཱིཏི སམྦནྡྷོ.

ཨིཏྠཱཀརོཏི ཨིཏྠིརཏནསྶ ཨུཔྤཏྟིཊྛཱནཾ. ཨཡྻདྷཱིཏཱཏི ཨམྷཱཀཾ ཨཡྻསྶ དྷཱིཏཱ, བྷདྡཀཱཔིལཱནཱིཏི ཨཏྠོ. པསཱདརཱུཔེན ནིབྦིསིཊྛཏཱཡ ‘‘མཧཱགཱིཝ’’ནྟི པཊིམཱཡ སདིསབྷཱཝམཱཧ. ཏེནཱཧ ‘‘ཨཡྻདྷཱིཏཱཡཱ’’ཏིཨཱདི.

སམཱནཔཎྞནྟི སདིསཔཎྞཾ, ཀུམཱརསྶ ཀུམཱརིཡཱ ཙ ཝུཏྟནྟཔཎྞཾ. ཨིཏོ ཙ ཨེཏྟོ ཙཱཏི ཏེ པུརིསཱ སམཱགམཊྛཱནཏོ མགདྷརཊྛེ མཧཱཏིཏྠགཱམཾ ¶ མདྡརཊྛེ སཱགལནགརཉྩ ཨུདྡིསྶ པཀྐམནྟཱ ཨཉྙམཉྙཾ ཝིསྶཛྫེནྟཱ ནཱམ ཧོནྟཱིཏི ‘‘ཨིཏོ ཙ ཨེཏྟོ ཙ པེསེསུ’’ནྟི ཝུཏྟཱ.

པུཔྥདཱམནྟི ཧཏྠིཧཏྠཔྤམཱཎཾ པུཔྥདཱམཾ. ཏཱནི པུཔྥདཱམཱནི. ཏེཏི ཨུབྷོ བྷདྡཱ ཙེཝ པིཔྤལིཀུམཱརོ ཙ. ལོཀཱམིསེནཱཏི གེཧསྶིཏཔེམེན, ཀཱམསྶཱདེནཱཏི ཨཏྠོ. ཨསཾསཊྛཱཏི ན སཾསཊྛཱ ¶ . ཝིཙཱརཡིཾསུ གྷཊེ ཛལནྟེན ཝིཡ པདཱིཔེན ཨཛ྄ཛྷཱསཡེན སམུཛྫལནྟེན ཝིམོཀྑབཱིཛེན སམུསྶཱཧིཏཙིཏྟཱ. ཡནྟབདྡྷཱནཱིཏི སསྶསམྤཱདནཏྠཾ ཏཏྠ ཏཏྠ ཨིཊྛཀདྭཱརཀཝཱཊཡོཛནཝསེན ཡནྟབདྡྷཨུདཀནིཀྑམནཏུམྦཱནི. ཀམྨནྟོཏི ཀསིཀམྨཀརཎཊྛཱནཾ. དཱསགཱམཱཏི དཱསཱནཾ ཝསནགཱམཱ.

ཨོསཱཔེཏྭཱཏི པཀྑིཔིཏྭཱ. ཨཱཀཔྤཀུཏྟཝསེནཱཏི ཨཱཀཱརཝསེན ཀིརིཡཱཝསེན ཙ. ཨནནུཙྪཝིཀནྟི པབྦཛིཏཝེསསྶ ཨནནུརཱུཔཾ. ཏསྶ མཏྠཀེཏི དྭེདྷཱཔཐསྶ དྭིདྷཱབྷཱུཏཊྛཱནེ.

ཨེཏེསཾ སངྒཧཾ ཀཱཏུཾ ཝཊྚཏཱིཏི ནིསཱིདཱིཏི སམྦནྡྷོ. སཱ པན སཏྠུ ཏཏྠ ནིསཛྫཱ ཨེདིསཱིཏི དསྶེཏུཾ ‘‘ནིསཱིདནྟོ པནཱ’’ཏིཨཱདི ཝུཏྟཾ. ཏཏྠ ཡཱ བུདྡྷཱནཾ ཨཔརིམིཏཀཱལསངྒཧིཏཱ ཨཙིནྟེཡྻཱཔརིམེཡྻཔུཉྙསམྦྷཱརཱུཔཙཡནིབྦཏྟཱ ནིརཱུཔིཏསབྷཱཝབུདྡྷགུཎཝིཛྫོཏིཏཱ ལཀྑཎཱནུབྱཉྫནསམུཛྫལཱ བྱཱམཔྤབྷཱཀེཏུམཱལཱལངྐཏཱ སབྷཱཝསིདྡྷཏཱཡ ཨཀིཏྟིམཱ རཱུཔཀཱཡསིརཱི, ཏཾཡེཝ མཧཱཀསྶཔསྶ ཨདིཊྛཔུབྦཾ པསཱདསཾཝཌྜྷནཏྠཾ ཨནིགྒཧེཏྭཱ ནིསིནྣོ བྷགཝཱ ‘‘བུདྡྷཝེསཾ གཧེཏྭཱ…པེ… ནིསཱིདཱི’’ཏི ཝུཏྟོ. ཨསཱིཏིཧཏྠཾ པདེསཾ བྱཱཔེཏྭཱ པཝཏྟིཡཱ ‘‘ཨསཱིཏིཧཏྠཱ’’ཏི ཝུཏྟཱ. སཏསཱཁོཏི བཧུསཱཁོ ཨནེཀསཱཁོ. སུཝཎྞཝཎྞོ ཨཧོསི ནིརནྟརཾ བུདྡྷརསྨཱིཧི སམནྟཏོ སམོཀིཎྞཏྟཱ. ཨེཝཾ ཝུཏྟཔྤཀཱརེན ཝེདིཏབྦཱ.

རཱཛགཧཾ ནཱལ༹ནྡནྟི ཙ སཱམིཨཏྠེ ཨུཔཡོགཝཙནཾ ཨནྟརཱསདྡཡོགཏོཏི ཨཱཧ ‘‘རཱཛགཧསྶ ནཱལ༹ནྡཱཡ ཙཱ’’ཏི. ན ཧི མེ ཨིཏོ ཨཉྙེན སཏྠཱརཱ བྷཝིཏུཾ སཀྐཱ དིཊྛདྷམྨིཀསམྤརཱཡིཀཔརམཏྠེཧི སཏྟཱནཾ ཡཐཱརཧཾ ཨནུསཱསནསམཏྠསྶ ཨཉྙསྶ སདེཝཀེ ཨབྷཱཝཏོ. ན ཧི མེ ཨིཏོ ཨཉྙེན སུགཏེན བྷཝིཏུཾ སཀྐཱ སོབྷནགམནགུཎགཎཡུཏྟསྶ ཨཉྙསྶ ཨབྷཱཝཏོ. ན ཧི མེ ཨིཏོ ཨཉྙེན སམྨཱསམྦུདྡྷེན བྷཝིཏུཾ སཀྐཱ སམྨཱ སབྦདྷམྨཱནཾ སཡམྦྷུཉཱཎེན ཨབྷིསམྦུདྡྷསྶ ཨབྷཱཝཏོ. ཨིམིནཱཏི ‘‘སཏྠཱ མེ, བྷནྟེ’’ཏི ཨིམིནཱ ཝཙནེན.

ཨཛཱནམཱནོཝ ¶ སབྦཉྙེཡྻནྟི ཨདྷིཔྤཱཡོ. སབྦཙེཏསཱཏི སབྦཨཛ྄ཛྷཏྟིཀངྒཔརིཔུཎྞཙེཏསཱ. སམནྣཱགཏནྟི སམྤནྣཾ སམྨདེཝ ཨནུ ཨནུ ཨཱགཏཾ ཨུཔགཏཾ. ཕལེཡྻཱཏི ཝིདཱལེཡྻ. ཝིལཡནྟི ཝིནཱསཾ.

ཨེཝཾ སིཀྑིཏབྦནྟི ཨིདཱནི ཝུཙྩམཱནཱཀཱརེན. ཧིརོཏྟཔྤསྶ བཧལཏཱ ནཱམ ཝིཔུལཏཱཏི ཨཱཧ ‘‘མཧནྟ’’ནྟི. པཋམཏརམེཝཱཏི པགེཝ ཨུཔསངྐམནཏོ. ཏཐཱ ཨཏིམཱནཔཧཱིནོ ཨསྶ, ཧིརིཨོཏྟཔྤཾ ¶ ཡཐཱ སཎྛཱཏི. ཀུསལསནྣིསྶིཏནྟི ཨནཝཛྫདྷམྨནིསྶིཏཾ. ཨཊྛིཀནྟི ཏེན དྷམྨེན ཨཊྛིཀཾ. ཨཱདིཏོ པཊྛཱཡ ཡཱཝ པརིཡོསཱནཱ སཝནཙིཏྟཾ ‘‘སབྦཙེཏོ’’ཏི ཨདྷིཔྤེཏནྟི ཨཱཧ ‘‘ཙིཏྟསྶ ཐོཀམྤི བཧི གནྟུཾ ཨདེནྟོ’’ཏི. ཏེན སམོདྷཱནཾ དསྶེཏི. སབྦེན…པེ… སམནྣཱཧརིཏྭཱ ཨཱརམྦྷཏོ པབྷུཏི ཡཱཝ དེསནཱ ནིཔྥནྣཱ, ཏཱཝ ཨནྟརནྟརཱ པཝཏྟེན སབྦེན སམནྣཱཧཱརཙིཏྟེན དྷམྨཾཡེཝ སམནྣཱཧརིཏྭཱ. ཋཔིཏསོཏོཏི དྷམྨེ ནིཧིཏསོཏོ. ཨོདཧིཏྭཱཏི ཨཔིཧིཏཾ ཀཏྭཱ. པཋམཛ྄ཛྷཱནཝསེནཱཏི ཨིདཾ ཨསུབྷེསུ ཏསྶེཝ ཨིཛ྄ཛྷཏོ, ཨིཏརཏྠཉྩ སུཁསམྤཡུཏྟཏཱ ཝུཏྟཱ.

སཾསཱརསཱགརེ པརིབྦྷམནྟསྶ ཨིཎཊྛཱནེ ཏིཊྛནྟི ཀིལེསཱ ཨཱསཝསབྷཱཝཱཔཱདནཏོཏི ཨཱཧ ‘‘སརཎོཏི སཀིལེསོ’’ཏི. ཙཏྟཱརོ ཧི པརིབྷོགཱཏིཨཱདཱིསུ ཡཾ ཝཏྟབྦཾ, ཏཾ ཝིསུདྡྷིམགྒཏྟཾ སཾཝཎྞནཱསུ ཝུཏྟནཡེནེཝ ཝེདིཏབྦཾ. ཨེཏྠ ཙ བྷགཝཱ པཋམཾ ཨོཝཱདཾ ཐེརསྶ བྲཱཧྨཎཛཱཏིཀཏྟཱ ཛཱཏིམཱནཔཧཱནཏྠམབྷཱསི, དུཏིཡཾ བཱཧུསཙྩཾ ནིསྶཱཡ ཨུཔྤཛྫནཀཨཧཾཀཱརཔཧཱནཏྠཾ, ཏཏིཡཾ ཨུཔདྷིསམྤཏྟིཾ ནིསྶཱཡ ཨུཔྤཛྫནཀཨཏྟསིནེཧཔཧཱནཏྠཾ. ཨཊྛམེ དིཝསེཏི བྷགཝཏཱ སམཱགཏདིཝསཏོ ཨཊྛམེ དིཝསེ.

མགྒཏོ ཨོཀྐམནཾ པཋམཏརཾ བྷགཝཏཱ སམཱགཏདིཝསེཡེཝ ཨཧོསི. ཡདི ཨརཧཏྟཱདྷིགམོ པཙྪཱ, ཨཐ ཀསྨཱ པཱལི༹ཡཾ པགེཝ སིདྡྷཾ ཝིཡ ཝུཏྟནྟི ཨཱཧ ‘‘དེསནཱཝཱརསྶཱ’’ཏིཨཱདི. ‘‘སཏྟཱཧམེཝ ཁྭཱཧཾ, ཨཱཝུསོ སརཎོ, རཊྛཔིཎྜཾ བྷུཉྫི’’ནྟི ཝཏྭཱ ཨཝསརཔྤཏྟཾ ཨརཧཏྟཾ པཝེདེནྟོ ‘‘ཨཊྛམིཡཱ ཨཉྙཱ ཨུདཔཱདཱི’’ཏི ཨཱཧ. ཨཡམེཏྠ དེསནཱཝཱརསྶ ཨཱགམོ. ཏཏོ པརཾ བྷགཝཏཱ ཨཏྟནོ ཀཏཾ ཨནུགྒཧཾ ཙཱིཝརཔརིཝཏྟནཾ དསྶེནྟོ ‘‘ཨཐ ཁོ, ཨཱཝུསོ’’ཏིཨཱདིམཱཧ.

ཨནྟནྟེནཱཏི ¶ ཙཏུགྒུཎཾ ཀཏྭཱ པཉྙཏྟཱཡ སངྒྷཱཊིཡཱ ཨནྟནྟེན. ཛཱཏིཔཾསུཀཱུལིཀེན…པེ… བྷཝིཏུཾ ཝཊྚཏཱིཏི ཨེཏེན པུབྦེ ཛཱཏིཨཱརཉྙཀགྒཧཎེན ཙ ཏེརས དྷུཏངྒཱ གཧིཏཱ ཨེཝཱཏི དཊྛབྦཾ. ཨནུཙྪཝིཀཾ ཀཱཏུནྟི ཨནུརཱུཔཾ པཊིཔཏྟིཾ པཊིཔཛྫིཏུཾ. ཐེརོ པཱརུཔཱིཏི སམྦནྡྷོ.

བྷགཝཏོ ཨོཝཱདཾ བྷགཝཏོ ཝཱ དྷམྨཀཱཡཾ ནིསྶཱཡ ཨུརསྶ ཝསེན ཛཱཏོཏི ཨོརསོ. བྷགཝཏོ ཝཱ དྷམྨསརཱིརསྶ མུཁཏོ སཏྟཏིཾསབོདྷིཔཀྑིཡཏོ ཛཱཏོ. ཏེནེཝ དྷམྨཛཱཏདྷམྨནིམྨིཏབྷཱཝོཔི སཾཝཎྞིཏོཏི དཊྛབྦོ. ཨོཝཱདདྷམྨོ ཨེཝ སཏྠཱརཱ དཱཏབྦཏོ ཐེརེན ཨཱདཱཏབྦཏོ ¶ ཨོཝཱདདྷམྨདཱཡཱདོ, ཨོཝཱདདྷམྨདཱཡཛྫོཏི ཨཏྠོ, ཏཾ ཨརཧཏཱིཏི. ཨེས ནཡོ སེསཔདེསུཔི.

‘‘པབྦཛྫཱ ཙ པརིསོདྷིཏཱ’’ཏི ཝཏྭཱ ཏསྶཱ སམྨདེཝ སོདྷིཏབྷཱཝཾ བྱཏིརེཀམུཁེན དསྶེཏུཾ, ‘‘ཨཱཝུསོ, ཡསྶཱ’’ཏིཨཱདི ཝུཏྟཾ. ཏཏྠ ཨེཝནྟི ཡཐཱ ཨཧཾ ལབྷིཾ, ཨེཝཾ སོ སཏྠུ སནྟིཀཱ ལབྷཏཱིཏི ཡོཛནཱ. སཱིཧནཱདཾ ནདིཏུནྟི ཨེཏྠཱཔི སཱིཧནཱདནདནཱ ནཱམ དེསནཱཝ, ཐེརོ སཏྠཱརཱ ཨཏྟནོ ཀཏཱནུགྒཧམེཝ ཨནནྟརསུཏྟེ ཝུཏྟནཡེན ཨུལླིངྒེཏི, ན ཨཉྙཐཱ. ན ཧི མཧཱཐེརོ ཀེཝལཾ ཨཏྟནོ གུཎཱནུབྷཱཝཾ ཝིབྷཱཝེཏི. སེསནྟི ཡཾ ཨིདྷ ཨསཾཝཎྞིཏཾ. པུརིམནཡེནེཝཱཏི ཨནནྟརསུཏྟེ ཝུཏྟནཡེནེཝ.

ཙཱིཝརསུཏྟཝཎྞནཱ ནིཊྛིཏཱ.

༡༢. པརཾམརཎསུཏྟཝཎྞནཱ

༡༥༥. ཡཐཱ ཨཏཱིཏཀཔྤེ ཨཏཱིཏཱསུ ཛཱཏཱིསུ ཀམྨཀིལེསཝསེན ཨཱགཏོ, ཏཐཱ ཨེཏརཧིཔི ཨཱགཏོཏི ཏཐཱགཏོ, ཡཐཱ ཡཐཱ ཝཱ པན ཀམྨཾ ཀཏཱུཔཙིཏཾ, ཏཐཱ ཏཾ ཏཾ ཨཏྟབྷཱཝཾ ཨཱགཏོ ཨུཔགཏོ ཨུཔཔནྣོཏི ཏཐཱགཏོ, སཏྟོཏི ཨཱཧ ‘‘ཏཐཱགཏོཏི སཏྟོ’’ཏི. ཨེཏནྟི ‘‘ཨེཝཾ ཧོཏི བྷཝཏི ཏིཊྛཏི སསྶཏིསམ’’ནྟི ཨེཝཾ པཝཏྟཾ དིཊྛིགཏཾ. ཨཏྠསནྣིསྶིཏཾ ན ཧོཏཱིཏི དིཊྛདྷམྨིཀསམྤརཱཡིཀཔརམཏྠཏོ སུཁནྟི པསཏྠསནྣིསྶིཏཾ ན ཧོཏི. ཨཱདིབྲཧྨཙརིཡཀནྟི ཨེཏྠ མགྒབྲཧྨཙརིཡཾ ཨདྷིཔྤེཏཾ ཏསྶ པདྷཱནབྷཱཝཏོ. ཏསྶ པན ཨེཏཾ དིཊྛིགཏཾ ཨཱདིཔཊིཔདཱམཏྟཾ ¶ ན ཧོཏི ཨནུཔཀཱརཀཏྟཱ ཝིལོམནཏོ ཙ. ཏཏོ ཨེཝ ཨིཏརབྲཧྨཙརིཡསྶཔི ཨནིསྶཡོཝ. སེསཾ ཝུཏྟནཡེན ཝེདིཏབྦཾ.

པརཾམརཎསུཏྟཝཎྞནཱ ནིཊྛིཏཱ.

༡༣. སདྡྷམྨཔྤཏིརཱུཔཀསུཏྟཝཎྞནཱ

༡༥༦. ཨཱཛཱནཱཏི ཧེཊྛིམམགྒེཧི ཉཱཏམརིཡཱདཾ ཨནཏིཀྐམིཏྭཱཝ ཛཱནཱཏི པཊིཝིཛ྄ཛྷཏཱིཏི ཨཉྙཱ, ཨགྒམགྒཔཉྙཱ. ཨཉྙསྶ ཨཡནྟི ཨཉྙཱ, ཨརཧཏྟཕལཾ. ཏེནཱཧ ‘‘ཨརཧཏྟེ’’ཏི.

ཨོབྷཱསེཏི ཨོབྷཱསནིམིཏྟཾ. ‘‘ཙིཏྟཾ ཝིཀམྤཏཱི’’ཏི པདདྭཡཾ ཨཱནེཏྭཱ སམྦནྡྷོ. ཨོབྷཱསེཏི ¶ ཝིསཡབྷཱུཏེ. ཨུཔཀྐིལེསེཧི ཙིཏྟཾ ཝིཀམྤཏཱིཏི ཡོཛནཱ. ཏེནཱཧ ‘‘ཡེཧི ཙིཏྟཾ པཝེདྷཏཱི’’ཏི. སེསེསུཔི ཨེསེཝ ནཡོ.

ཨུཔཊྛཱནེཏི སཏིཡཾ. ཨུཔེཀྑཱཡ ཙཱཏི ཝིཔསྶནུཔེཀྑཱཡ ཙ. ཨེཏྠ ཙ ཝིཔསྶནཱཙིཏྟསམུཊྛཱནསནྟཱནཝིནིམུཏྟཾ པབྷཱསནཾ རཱུཔཱཡཏནཾ ཨོབྷཱསོ. ཉཱཎཱདཡོ ཝིཔསྶནཱཙིཏྟསམྤཡུཏྟཱཝ. སཀསཀཀིཙྩེ སཝིསེསོ ཧུཏྭཱ པཝཏྟོ ཨདྷིམོཀྑོ སདྡྷཱདྷིམོཀྑོ. ཨུཔཊྛཱནཾ སཏི. ཨུཔེཀྑཱཏི ཨཱཝཛྫནུཔེཀྑཱ. སཱ ཧི ཨཱཝཛྫནཙིཏྟསམྤཡུཏྟཱ ཙེཏནཱ. ཨཱཝཛྫནཨཛ྄ཛྷུཔེཀྑནཝསེན པཝཏྟིཡཱ ཨིདྷ ‘‘ཨཱཝཛྫནུཔེཀྑཱ’’ཏི ཝུཙྩཏི. པུན ཨུཔེཀྑཱཡཱཏི ཝིཔསྶནུཔེཀྑཱཝ ཨནེན སམཛ྄ཛྷཏྟཏཱཡ ཨེཝཾ ཝུཏྟཱ. ནིཀནྟི ནཱམ ཝིཔསྶནཱཡ ནིཀཱམནཱ ཨཔེཀྑཱ. སུཁུམཏརཀིལེསོ ཝཱ སིཡཱ དུཝིཉྙེཡྻོ.

ཨིམཱནི དས ཋཱནཱནཱིཏི ཨིམཱནི ཨོབྷཱསཱདཱིནི ཨུཔཀྐིལེསུཔྤཏྟིཡཱ ཋཱནཱནི ཨུཔཀྐིལེསཝཏྠཱུནི. པཉྙཱ ཡསྶ པརིཙིཏཱཏི ཡསྶ པཉྙཱ པརིཙིཏཝཏཱི ཡཱཐཱཝཏོ ཛཱནཱཏི. ‘‘ཨིམཱནི ནིསྶཱཡ ཨདྡྷཱ མགྒཔྤཏྟོ ཕལཔྤཏྟོ ཨཧ’’ནྟི པཝཏྟཨདྷིམཱནོ དྷམྨུདྡྷཙྩཾ དྷམྨཱུཔནིསྶཡོ ཝིཀྑེཔོ. ཏཏྠ ཀུསལོ ཧི ཏཾ ཡཱཐཱཝཏོ ཛཱནནྟོ ན ཙ ཏཏྠ སམྨོཧཾ གཙྪཏི.

ཨདྷིགམསདྡྷམྨཔྤཏིརཱུཔཀཾ ¶ ནཱམ ཨནདྷིགཏེ ཨདྷིགཏམཱནིབྷཱཝཱཝཧཏྟཱ. ཡདགྒེན ཝིཔསྶནཱཉཱཎསྶ ཨུཔཀྐིལེསོ, ཏདགྒེན པཊིཔཏྟིསདྡྷམྨཔྤཏིརཱུཔཀོཏིཔི སཀྐཱ ཝིཉྙཱཏུཾ. དྷཱཏུཀཐཱཏི མཧཱདྷཱཏུཀཐཾ ཝདཏི. ཝེདལླཔིཊཀནྟི ཝེཏུལླཔིཊཀཾ. ཏཾ ནཱགབྷཝནཏོ ཨཱནཱིཏནྟི ཝདནྟི. ཝཱདབྷཱསིཏནྟི ཨཔརེ. ཨབུདྡྷཝཙནཾ བུདྡྷཝཙནེན ཝིརུཛ྄ཛྷནཏོ. ན ཧི སམྦུདྡྷོ པུབྦཱཔརཝིརུདྡྷཾ ཝདཏི. ཏཏྠ སལླཾ ཨུཔཊྛཔེནྟི ཀིལེསཝིནཡཾ ན སནྡིསྶཏི, ཨཉྙདཏྠུ ཀིལེསུཔྤཏྟིཡཱ པཙྩཡོ ཧོཏཱིཏི.

ཨཝིཀྐཡམཱནནྟི ཝིཀྐཡཾ ཨགཙྪནྟཾ. ཏནྟི སུཝཎྞབྷཎྜཾ.

ན སཀྑིཾསུ ཉཱཎསྶ ཨཝིསདབྷཱཝཏོ. ཨེས ནཡོ ཨིཏོ པརེསུཔི.

ཨིདཱནི ‘‘བྷིཀྑཱུ པཊིསམྦྷིདཱཔྤཏྟཱ ཨཧེསུ’’ནྟིཨཱདིནཱ ཝུཏྟམེཝ ཨཏྠཾ ཀཱརཎཏོ ཝིབྷཱཝེཏུཾ པུན ‘‘པཋམབོདྷིཡཾ ཧཱི’’ཏིཨཱདི ཝུཏྟཾ. ཏཏྠ པཊིཔཏྟིཾ པཱུརཡིཾསཱུཏི ཨཏཱིཏེ ཀདཱ ཏེ པཊིསམྦྷིདཱཝཧཾ ¶ པཊིཔཏྟིཾ པཱུརཡིཾསུ? པཋམབོདྷིཀཱལིཀཱ བྷིཀྑཱུ. ན ཧི ཨཏྟསམྨཱཔཎིདྷིཡཱ པུབྦེཀཏཔུཉྙཏཱཡ ཙ ཝིནཱ ཏཱདིསཾ བྷཝཏི. ཨེས ནཡོ ཨིཏོ པརེསུཔི. ཏདཱ པཊིཔཏྟིསདྡྷམྨོ ཨནྟརཧིཏོ ནཱམ བྷཝིསྶཏཱིཏི ཨེཏེན ཨརིཡམགྒེན ཨཱསནྣཱ ཨེཝ པུབྦབྷཱགཔཊིཔདཱ པཊིཔཏྟིསདྡྷམྨོཏི དསྶེཏི.

དྭཱིསཱུཏི སུཏྟཱབྷིདྷམྨཔིཊཀེསུ ཨནྟརཧིཏེསུཔི. ཨནནྟརཧིཏམེཝ ཨདྷིསཱིལསིཀྑཱཡཾ ཋིཏསྶ ཨིཏརསིཀྑཱདྭཡསམུཊྛཱཔིཏཏོ. ཀིཾ ཀཱརཎཱཏི ཀེན ཀཱརཎེན, ཨཉྙསྨིཾ དྷམྨེ ཨནྟརཧིཏེ ཨཉྙཏརསྶ དྷམྨསྶ ཨནནྟརདྷཱནཾ ཝུཙྩཏཱིཏི ཨདྷིཔྤཱཡོ. པཊིཔཏྟིཡཱ པཙྩཡོ ཧོཏི ཨནཝསེསཏོ པཊིཔཏྟིཀྐམསྶ པརིདཱིཔནཏོ. པཊིཔཏྟི ཨདྷིགམསྶ པཙྩཡོ ཝིསེསལཀྑཎཔཊིཝེདྷབྷཱཝཏོ. པརིཡཏྟིཡེཝ པམཱཎཾ སཱསནསྶ ཋིཏིཡཱཏི ཨདྷིཔྤཱཡོ.

ནནུ ཙ སཱསནཾ ཨོསཀྐིཏཾ པརིཡཏྟིཡཱ ཝཏྟམཱནཱཡཱཏི ཨདྷིཔྤཱཡོ. ཨནཱརཱདྷཀབྷིཀྑཱུཏི སཱིལམཏྟསྶཔི ན ཨཱརཱདྷཀོ དུསྶཱིལོ. ཨིམསྨིནྟི ཨིམསྨིཾ པཱཏིམོཀྑེ. ཝཏྟནྟཱཏི ‘‘སཱིལཾ ཨཀོཔེཏྭཱ ཋིཏཱ ཨཏྠཱི’’ཏི པུཙྪི.

ཨེཏེསཱུཏི ¶ ཨེཝཾ མཧནྟེསུ སཀལཾ ལོཀཾ ཨཛ྄ཛྷོཏྠརིཏུཾ སམཏྠེསུ ཙཏཱུསུ མཧཱབྷཱུཏེསུ. ཏསྨཱཏི ཡསྨཱ ཨཉྙེན ཀེནཙི ཨཏིམཧནྟེནཔི སདྡྷམྨོ ན ཨནྟརདྷཱཡཏི, སམཡནྟརེན པན ཝཏྟབྦམེཝ ནཏྠི, ཏསྨཱ. ཨེཝམཱཧཱཏི ཨིདཱནི ཝུཙྩམཱནཱཀཱརཾ ཝདཏི.

ཨཱདཱནཾ ཨཱདི, ཨཱདི ཨེཝ ཨཱདིཀནྟི ཨཱཧ ‘‘ཨཱདིཀེནཱཏི ཨཱདཱནེནཱ’’ཏི. ཧེཊྛཱགམནཱིཡཱཏི ཨདྷོབྷཱགགམནཱིཡཱ, ཨཔཱཡདུཀྑསྶ སཾསཱརདུཀྑསྶ ཙ ནིབྦཏྟཀཱཏི ཨཏྠོ. གཱརཝརཧིཏཱཏི གརུཀཱརརཧིཏཱ. པཏིསྶཡནཾ ནཱིཙབྷཱཝེན པཏིབདྡྷཝུཏྟིཏཱ, པཏིསྶོ པཏིསྶཡོཏི ཨཏྠཏོ ཨེཀཾ, སོ ཨེཏེསཾ ནཏྠཱིཏི ཨཱཧ ‘‘ཨཔྤཏིསྶཱཏི ཨཔྤཏིསྶཡཱ ཨནཱིཙཝུཏྟིཀཱ’’ཏི. སེསཾ སུཝིཉྙེཡྻམེཝ.

སདྡྷམྨཔྤཏིརཱུཔཀསུཏྟཝཎྞནཱ ནིཊྛིཏཱ.

སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ

ཀསྶཔསཾཡུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༦. ལཱབྷསཀྐཱརསཾཡུཏྟཾ

༡. པཋམཝགྒོ

༡. དཱརུཎསུཏྟཝཎྞནཱ

༡༥༧. ཐདྡྷོཏི ¶ ¶ ཀཀྑལོ༹ ཨནིཊྛསྶ པདཱནཏོ. ཙཏུཔཙྩཡལཱབྷོཏི ཙཏུནྣཾ པཙྩཡཱནཾ པཊིལཱབྷོ. སཀྐཱརོཏི ཏེཧིཡེཝ པཙྩཡེཧི སུསངྑཏེཧི པཱུཛནཱ, སོ པན ཨཏྠཏོ སམྤཏྟིཡེཝཱཏི ཨཱཧ ‘‘ཏེསཾཡེཝ…པེ… ལཱབྷོ’’ཏི. ཝཎྞགྷོསོཏི གུཎཀིཏྟནཱ. ཨནྟརཱཡསྶ ཨནཏིཝཏྟནཏོ ཨནྟརཱཡིཀོ ཨནཏྠཱཝཧཏྟཱ.

དཱརུཎསུཏྟཝཎྞནཱ ནིཊྛིཏཱ.

༢. བལི༹སསུཏྟཝཎྞནཱ

༡༥༨. བལི༹སེན ཙརཏི, ཏེན ཝཱ ཛཱིཝཏཱིཏི བཱལི༹སིཀོ. ཏེནཱཧ ‘‘བལི༹སཾ གཧེཏྭཱ ཙརམཱནོ’’ཏི. ཨཱམིསགཏནྟི ཨཱམིསཱུཔགཏཾ ཨཱམིསཔཏིཏཾ. ཏེནཱཧ ‘‘ཨཱམིསམཀྑིཏ’’ནྟི. བྷིནྣཱདྷིཀརཎཱནམྤི བཱཧིརཏྠསམཱསོ ཧོཏེཝཱཏི ཨཱཧ ‘‘ཨཱམིསེ ཙཀྑུདསྶན’’ནྟི. ཨཡོ ཝུཙྩཏི སུཁཾ, ཏབྦིདྷུརཏཱཡ ཨནཡོ, དུཀྑནྟི ཨཱཧ ‘‘དུཀྑཾ པཏྟོ’’ཏི. ཨསྶཱཏི ཨེཏེན. ཀཏྟུཨཏྠེ ཧི ཨེཏཾ སཱམིཝཙནཾ. ཡཐཱ ཀིལེསཱ ཝཏྟནྟི, ཨེཝཾ པཝཏྟམཱནོ པུགྒལོ ཀིལེསཝིཔྤཡོགོ ན ཧོཏཱིཏི ཝུཏྟཾ ‘‘ཡཐཱ ཀིལེསམཱརསྶ ཀཱམོ, ཨེཝཾ ཀཏྟབྦོ’’ཏི.

བལི༹སསུཏྟཝཎྞནཱ ནིཊྛིཏཱ.

༣-༤. ཀུམྨསུཏྟཱདིཝཎྞནཱ

༡༥༩-༡༦༠. ཨཊྛིཀཙྪཔཱ ཝུཙྩནྟི ཡེསཾ ཀཔཱལམཏྠཀེ ཏིཁིཎཱ ཨཊྛིཀོཊི ཧོཏི, ཏེསཾ སམཱུཧོ ཨཊྛིཀཙྪཔཀུལཾ. མཙྪཀཙྪཔཱདཱིནཾ སརཱིརེ ལམྦནྟཱི པཔཏཏཱིཏི པཔཏཱ, ཝུཙྩམཱནཱཀཱརོ ¶ ཨཡཀཎྚཀོ. ཨཡཀོསཀེཏི ¶ ཨཡོམཡཀོསཀེ. ཀཎྞིཀསལླསཎྛཱནོཏི ཨཏྟནིཀཱཔནསལླསཎྛཱནོ. ཨཡཀཎྚཀོཏི ཨཡོམཡཝངྐཀཎྚཀོ. ནིཀྑམཏི ཨེཏྠ ཨཐཱཝརཏོ. པཝེསིཏམཏྟོ ཧི སོ. ཨིདཱནི ཏྭཾ ‘‘ཨམྷཱཀ’’ནྟི ན ཝཏྟབྦོ. ཨིཏོ ཨནནྟརསུཏྟེཏི ཙཏུཏྠསུཏྟམཱཧ.

ཀུམྨསུཏྟཱདིཝཎྞནཱ ནིཊྛིཏཱ.

༥. མཱིལ༹ྷཀསུཏྟཝཎྞནཱ

༡༦༡. མཱིལ༹ྷཀཱཏི ཨེཝཾ ཨིཏྠིལིངྒཝསེན ཝུཙྩམཱནཱ. གཱུཐཔཱཎཀཱཏི གཱུཐབྷཀྑཔཱཎཀཱ. ཨནྟོཏི ཀུཙྪིཡཾ.

མཱིལ༹ྷཀསུཏྟཝཎྞནཱ ནིཊྛིཏཱ.

༦. ཨསནིསུཏྟཝཎྞནཱ

༡༦༢. ‘‘ཨིམེ ལཱབྷསཀྐཱརཾ ཨནཱཧརནྟཱ ཛིགྷཙྪཱདིདུཀྑཾ པཱཔུཎནྟཱུ’’ཏི ཨེཝཾ ན སཏྟཱནཾ དུཀྑཀཱམཏཱཡ ཨེཝམཱཧཱཏི ཨཱནེཏྭཱ སམྦནྡྷོ. ཨནནྟདུཀྑཾ ཨནུབྷོཏི ཨཔརཱཔརཾ ཨུཔྤཛྫནཀཨཀུསལཙིཏྟཱནཾ བཧུབྷཱཝཏོ.

ཨསནིསུཏྟཝཎྞནཱ ནིཊྛིཏཱ.

༧. དིདྡྷསུཏྟཝཎྞནཱ

༡༦༣. ཨཙྪཝིསཡུཏྟཱཏི ཝཱ དིདྡྷེ གཏེན གཏདིདྡྷེན. ཏེནཱཧ ‘‘ཝིསམཀྑིཏེནཱ’’ཏི.

དིདྡྷསུཏྟཝཎྞནཱ ནིཊྛིཏཱ.

༨. སིངྒཱལསུཏྟཝཎྞནཱ

༡༦༤. ཛརསིངྒཱལོཏྭེཝ ¶ ཝུཙྩཏི སརཱིརསོབྷཱཡ ཨབྷཱཝཏོ. སརཱིརསྶ ཨུགྒཏཀཎྚཀཏྟཱ ཨུཀྐཎྚཀེན ནཱམ. ཕུཊཏཱིཏི ཕལཏི བྷིཛྫཏི.

སིངྒཱལསུཏྟཝཎྞནཱ ནིཊྛིཏཱ.

༩. ཝེརམྦྷསུཏྟཝཎྞནཱ

༡༦༥. ཀཱཡཾ ¶ ན རཀྑཏི ནཱམ ཚབྦཱིསཏིཡཱ སཱརུཔྤཱནཾ པརིཙྩཛནཏོ. ཝཱཙཾ ན རཀྑཏི ནཱམ རཱགསཱམནྟཱ ཙ ཀོདྷསཱམནྟཱ ཙ ཡཱཝ ནིཙྪཱརཎཏོ.

ཝེརམྦྷསུཏྟཝཎྞནཱ ནིཊྛིཏཱ.

༡༠. སགཱཐཀསུཏྟཝཎྞནཱ

༡༦༦. ‘‘ཡསྶ སཀྐརིཡམཱནསྶཱ’’ཏི ཨེཏྠ ཨསཀྐཱརེན ཙཱུབྷཡནྟི ཨསཀྐཱརེན ཙ ཨུབྷཡཉྩ, ཀདཱཙི སཀྐཱརེན, ཀདཱཙི ཨསཀྐཱརེན ཀདཱཙི ཨུབྷཡེནཱཏི ཨཏྠོ. ཏེནཱཧ ‘‘ཨསཀྐཱརེནཱ’’ཏིཨཱདི. སཏཏཝིཧཱརཱནཾ སམྤཏྟིཡཱ སཱཏཏིཀོཏི ཨཱཧ ‘‘ཨརཧཏྟ…པེ… སུཁུམདིཊྛཱི’’ཏིཨཱདི. ཏཐཱ ཧི སཱ ‘‘ཝཛིརཱུཔམཉཱཎ’’ནྟི ཝུཙྩཏི. ཨཱགཏཏྟཱཏི ཕལསམཱཔཏྟིཾ སམཱཔཛྫིཏུཾ ཏསྶཱ པུབྦཔརིཀམྨཾ ཨུཔགཏཏྟཱ.

སགཱཐཀསུཏྟཝཎྞནཱ ནིཊྛིཏཱ.

པཋམཝགྒཝཎྞནཱ ནིཊྛིཏཱ.

༢. དུཏིཡཝགྒོ

༡-༢. སུཝཎྞཔཱཏིསུཏྟཱདིཝཎྞནཱ

༡༦༧-༡༦༨. ཙཱལེཏུཾ ན སཀྐོཏི སཱིལཔབྦཏསནྣིསྶིཏཏྟཱ. ཨཉྙཾ ཝཱ ཀིཙྩཾ ཀརོཏི པགེཝ སཱིལསྶ ཚཌྜིཏཏྟཱ. ཏཏིཡཱདཱིསུ ཨཔུབྦཾ ནཏྠི.

སུཝཎྞཔཱཏིསུཏྟཱདིཝཎྞནཱ ནིཊྛིཏཱ.

དུཏིཡཝགྒཝཎྞནཱ ནིཊྛིཏཱ.

༣. ཏཏིཡཝགྒོ

༡. མཱཏུགཱམསུཏྟཝཎྞནཱ

༡༧༠. ཡཾ ¶ ¶ ཝིསབྷཱགཝཏྠུ པུརིསསྶ ཙིཏྟཾ པརིཡཱདཱཡ ཋཱཏུཾ སཀྐོཏཱིཏི ཝུཙྩཏི, ཏཏོ ཝིསེསཏོ ལཱབྷསཀྐཱརོཝ སཏྟཱནཾ ཙིཏྟཾ པརིཡཱདཱཡ ཋཱཏུཾ སཀྐོཏཱིཏི དསྶེནྟོ བྷགཝཱ ‘‘ན ཏསྶ, བྷིཀྑཝེ’’ཏིཨཱདིམཝོཙཱཏི དསྶེནྟོ ‘‘ན ཏསྶཱ’’ཏིཨཱདིམཱཧ.

མཱཏུགཱམསུཏྟཝཎྞནཱ ནིཊྛིཏཱ.

༢. ཀལྱཱཎཱིསུཏྟཝཎྞནཱ

༡༧༡. དུཏིཡཾ ཨུཏྟཱནམེཝ, ཏསྶེཝ ཨཏྠསྶ ཀེཝལཾ ཛནཔདཀལྱཱཎཱིཝསེན ཝུཏྟཾ.

ཀལྱཱཎཱིསུཏྟཝཎྞནཱ ནིཊྛིཏཱ.

༣-༦. ཨེཀཔུཏྟཀསུཏྟཱདིཝཎྞནཱ

༡༧༢-༡༧༥. སདྡྷཱཏི ཨརིཡམགྒེན ཨཱགཏསདྡྷཱ ཨདྷིཔྤེཏཱཏི ཨཱཧ ‘‘སོཏཱཔནྣཱ’’ཏི.

ཨེཀཔུཏྟཀསུཏྟཱདིཝཎྞནཱ ནིཊྛིཏཱ.

༧. ཏཏིཡསམཎབྲཱཧྨཎསུཏྟཝཎྞནཱ

༡༧༦. ཨེཝམཱདཱིཏི ཨཱདི-སདྡེན བཱཧུསཙྩསཾཝརསཱིལཱདཱིནཾ སངྒཧོ དཊྛབྦོ. ལཱབྷསཀྐཱརསྶ སམུདཡཾ ཨུཔྤཏྟིཀཱརཎཾ སམུདཡསཙྩཝསེན དུཀྑསཙྩསྶ ཨུཔྤཏྟིཧེཏུཏཱཝསེན.

ཏཏིཡསམཎབྲཱཧྨཎསུཏྟཝཎྞནཱ ནིཊྛིཏཱ.

༨. ཚཝིསུཏྟཝཎྞནཱ

༡༧༧. ལཱབྷསཀྐཱརསིལོཀོ ¶ ¶ ནརཀཱདཱིསུ ནིབྦཏྟེནྟོཏི ཨིདཾ ཏནྣིསྶཡཾ ཀིལེསགཎཾ སནྡྷཱཡཱཧ. ནིབྦཏྟེནྟོཏི ནིབྦཏྟཱཔེནྟོ. ཨིམཾ མནུསྶཨཏྟབྷཱཝཾ ནཱསེཏི མནུསྶཏྟཾ པུན ནིབྦཏྟིཏུཾ ཨཔྤདཱནཝསེན. ཏསྨཱཏི དུགྒཏིནིབྦཏྟཱཔནཏོ ཨིདྷ མརཎདུཀྑཱཝཧནཏོ ཙ.

ཚཝིསུཏྟཝཎྞནཱ ནིཊྛིཏཱ.

༩. རཛྫུསུཏྟཝཎྞནཱ

༡༧༨. ཁརཱ ཕརུསཱ ཚཝིཨཱདཱིནི ཚིནྡནེ སམཏྠཱ.

རཛྫུསུཏྟཝཎྞནཱ ནིཊྛིཏཱ.

༡༠. བྷིཀྑུསུཏྟཝཎྞནཱ

༡༧༩. ཏཾ སནྡྷཱཡཱཏི དིཊྛདྷམྨསུཁཝིཧཱརསྶ ཨོཀཱསཱབྷཱཝཾ སནྡྷཱཡ.

བྷིཀྑུསུཏྟཝཎྞནཱ ནིཊྛིཏཱ.

ཏཏིཡཝགྒཝཎྞནཱ ནིཊྛིཏཱ.

༤. ཙཏུཏྠཝགྒོ

༡-༤. བྷིནྡིསུཏྟཱདིཝཎྞནཱ

༡༨༠-༡༨༣. དེཝདཏྟོ སགྒེ ཝཱ ནིབྦཏྟེཡྻཱཏིཨཱདི པརིཀཔྤཝཙནཾ. ན ཧི པཙྩེཀབོདྷིཡཾ ནིཡཏགཏིཀོ ཨནྟརཱ མགྒཕལཱནི ཨདྷིགནྟུཾ བྷབྦོཏི. སོཏི ཨནཝཛྫདྷམྨོ. ཨསྶཱཏི དེཝདཏྟསྶ. སམུཙྪེདམགམཱ ཀཏཱུཔཙིཏསྶ མཧཏོ པཱཔདྷམྨསྶ བལེན ཏསྨིཾ ཨཏྟབྷཱཝེ སམུཙྪེདབྷཱཝཏོ, ན ཨཙྩནྟཱཡ. ཨཀུསལཾ ནཱམེཏཾ ཨབལཾ, ཀུསལཾ ཝིཡ ན མཧཱབལཾ, ཏསྨཱ ཏསྨིཾཡེཝ ཨཏྟབྷཱཝེ ཏཱདིསཱནཾ པུགྒལཱནཾ ཨཏེཀིཙྪཏཱ, ཨཉྙཐཱ སམྨཏྟནིཡཱམོ ཝིཡ མིཙྪཏྟནིཡཱམོ ཨཙྩནྟིཀོ ¶ སིཡཱ. ཡདི ཨེཝཾ ཝཊྚཁཱཎུཀཛོཏནཱ ཀཐནྟི? ཨཱསེཝནཱཝསེན, ཏསྨཱ ¶ ཡཐཱ ‘‘སཀིཾ ནིམུགྒོ ནིམུགྒོ ཨེཝ བཱལོ’’ཏི ཝུཏྟཾ, ཨེཝཾ ཝཊྚཁཱཎུཀཛོཏནཱ. ཡཱདིསེ ཧི པཙྩཡེ པཊིཙྩ པུགྒལོ ཏཾ དསྶནཾ གཎྷི, ཏཐཱ ཙ པཊིཔནྣོ, པུན ཨཙིནྟཔྤཏིཝཏྟེ པཙྩཡེ པཏིཏཏོ སཱིསུཀྑིཔནམསྶ ན ཧོཏཱིཏི ན ཝཏྟབྦཾ.

བྷིནྡིསུཏྟཱདིཝཎྞནཱ ནིཊྛིཏཱ.

༥. ཨཙིརཔཀྐནྟསུཏྟཝཎྞནཱ

༡༨༤. ཀཱལེ སམྤཏྟེཏི གབྦྷསྶ པརིཔཱཀགཏཏྟཱ ཝིཛཱཡནཀཱལེ སམྤཏྟེ. པོཏནྟི ཨསྶཏརིཡཱ པུཏྟཾ. ཨེཏནྟི ‘‘གབྦྷོ ཨསྶཏརིཾ ཡཐཱ’’ཏི ཨེཏཾ ཝཙནཾ.

ཨཙིརཔཀྐནྟསུཏྟཝཎྞནཱ ནིཊྛིཏཱ.

༦. པཉྩརཐསཏསུཏྟཝཎྞནཱ

༡༨༥. ཨབྷིཧརཱིཡཏཱིཏི ཨབྷིཧཱརོ, བྷཏྟཾཡེཝ ཨབྷིཧཱརོ བྷཏྟཱབྷིཧཱརོཏི ཨཱཧ ‘‘ཨབྷིཧརིཏབྦཾ བྷཏྟ’’ནྟི. མཙྪཔིཏྟནྟི ཝཱལ༹མཙྪཔིཏྟཾ. པཀྑིཔེཡྻུནྟི ཨུརགཱདིནཱ ཨོསིཉྩེཡྻུཾ.

པཉྩརཐསཏསུཏྟཝཎྞནཱ ནིཊྛིཏཱ.

༧-༡༣. མཱཏུསུཏྟཱདིཝཎྞནཱ

༡༨༦-༡༨༧. མཱཏུཔི ཧེཏཱུཏི ཨཏྟནོ མཱཏུཡཱ ཨུཔྤནྣཨནཏྠཱཝཧསྶ པཧཱནཧེཏུཔི. ཨིཏོ པརེསཱུཏི ‘‘པིཏུཔི ཧེཏཱུ’’ཏི ཨེཝམཱདཱིསུ.

མཱཏུསུཏྟཱདིཝཎྞནཱ ནིཊྛིཏཱ.

སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ

ལཱབྷསཀྐཱརསཾཡུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༧. རཱཧུལསཾཡུཏྟཾ

༡. པཋམཝགྒོ

༡-༨. ཙཀྑུསུཏྟཱདིཝཎྞནཱ

༡༨༨-༡༩༥. ཨེཀཝིཧཱརཱིཏི ¶ ¶ ཙཏཱུསུཔི ཨིརིཡཱཔཐེསུ ཨེཀཱཀཱི ཧུཏྭཱ ཝིཧརནྟོ. ཝིཝེཀཊྛོཏི ཝིཝིཏྟཊྛོ, ཏེནཱཧ ‘‘ནིསྶདྡོ’’ཏི. སཏིཡཱ ཨཝིཔྤཝསནྟོཏི སཏིཡཱ ཨཝིཔྤཝཱསེན ཋིཏོ, སབྦདཱ ཨཝིཛཧནཝསེན པཝཏྟོ. ཨཱཏཱཔཱིཏི ཝཱིརིཡསམྤནྣོཏི སབྦསོ ཀིལེསཱནཾ ཨཱཏཱཔནཔརིཏཱཔནཝསེན པཝཏྟཝཱིརིཡསམངྒཱིབྷཱུཏོ. པཧིཏཏྟོཏི ཏསྨིཾ ཝིསེསཱདྷིགམེ པེསིཏཙིཏྟོ, ཏཏྠ ནིནྣོ ཏཔྤབྦྷཱརོཏི ཨཏྠོ. ཧུཏྭཱ ཨབྷཱཝཱཀཱརེནཱཏི ཨུཔྤཏྟིཏོ པུབྦེ ཨཝིཛྫམཱནོ པཙྩཡསམཝཱཡེན ཧུཏྭཱ ཨུཔྤཛྫིཏྭཱ བྷངྒུཔརམསངྑཱཏེན ཨབྷཱཝཱཀཱརེན. ཨནིཙྩནྟི ནིཙྩདྷུཝཏཱབྷཱཝཏོ. ཨུཔྤཱདཝཡཝནྟཏཱཡཱཏི ཁཎེ ཁཎེ ཨུཔྤཛྫིཏྭཱ ནིརུཛ྄ཛྷནཏོ. ཏཱཝཀཱལིཀཏཱཡཱཏི ཏངྑཎིཀཏཱཡ. ཝིཔརིཎཱམཀོཊིཡཱཏི ཝིཔརིཎཱམཝནྟཏཱཡ. ཙཀྑུཉྷི ཨུཔཱདཱཡ ཝིཀཱརཱཔཛྫནེན ཝིཔརིཎམནྟཾ ཝིནཱསཾ པཊིཔཱིལ༹ཾ པཱཔུཎཱཏི. ནིཙྩཔཊིཀྑེཔཏོཏི ནིཙྩཏཱཡ པཊིཀྑིཔིཏབྦཏོ ལེསམཏྟསྶཔི ཨནུཔལབྦྷནཏོ. དུཀྑམནཊྛེནཱཏི ནིརནྟརདུཀྑཏཱཡ དུཀྑེན ཁམིཏབྦཏོ. དུཀྑཝཏྠུཀཊྛེནཱཏི ནཱནཔྤཀཱརདུཀྑཱདྷིཊྛཱནཏོ. སཏཏསམྤཱིལ༹ནཊྛེནཱཏི ཨབྷིཎྷཏཱཔསབྷཱཝཏོ. སུཁཔཊིཀྑེཔེནཱཏི སུཁབྷཱཝསྶ པཊིཀྑིཔིཏབྦཏོ. ཏཎྷཱགཱཧོ མམཾཀཱརབྷཱཝཏོ. མཱནགཱཧོ ཨཧཾཀཱརབྷཱཝཏོ. དིཊྛིགཱཧོ ‘‘ཨཏྟཱ མེ’’ཏི ཝིཔལླཱསབྷཱཝཏོ. ཝིརཱགཝསེནཱཏི ཝིརཱགགྒཧཎེན. ཏཐཱ ཝིམུཏྟིཝསེནཱཏི ཝིམུཏྟིགྒཧཎེན.

པསཱདཱཝ གཧིཏཱ དྭཱརབྷཱཝཔྤཏྟསྶ ཨདྷིཔྤེཏཏྟཱ. སམྨསནཙཱརཙིཏྟཾ དྭཱརབྷཱུཏམནོཏི ཨདྷིཔྤཱཡོ.

ཚཊྛེ ཨཱརམྨཎེ ཏེབྷཱུམཀདྷམྨཱ སམྨསནཙཱརསྶ ཨདྷིཔྤེཏཏྟཱ. ཡཐཱ པཋམསུཏྟེ པཉྩ པསཱདཱ གཧིཏཱ, ན སསམྦྷཱརཙཀྑུཨཱདཡོ, ཨེཝཾ ¶ ཏཏིཡསུཏྟེ ན པསཱདཝཏྠུཀཙིཏྟམེཝ གཧིཏཾ. ན ¶ ཏཾསམྤཡུཏྟཱ དྷམྨཱ. ཨེཝཉྷི ཨཝདྷཱརཎཾ སཱཏྠཀཾ ཧོཏི ཨཉྙཐཱ ཏེན ཨཔནེཏབྦསྶ ཨབྷཱཝཏོ. སབྦཏྠཱཏི སབྦེསུ ཙཏུཏྠསུཏྟཱདཱིསུ. ཛཝནཔྤཏྟཱཏི ཛཝནཙིཏྟསཾཡུཏྟཱ.

ཙཀྑུསུཏྟཱདིཝཎྞནཱ ནིཊྛིཏཱ.

༩. དྷཱཏུསུཏྟཝཎྞནཱ

༡༩༦. ཨཱཀཱསདྷཱཏུ རཱུཔཔརིཙྪེདཏཱཡ རཱུཔཔརིཡཱཔནྣནྟི ཨདྷིཔྤཱཡེན ‘‘སེསཱཧི རཱུཔ’’ནྟི ཝུཏྟཾ. ནཱམརཱུཔནྟི ཏེབྷཱུམཀཾ ནཱམཾ རཱུཔཉྩ ཀཐིཏཾ.

དྷཱཏུསུཏྟཝཎྞནཱ ནིཊྛིཏཱ.

༡༠. ཁནྡྷསུཏྟཝཎྞནཱ

༡༩༧. སབྦསངྒཱཧིཀཔརིཙྪེདེནཱཏི དྷམྨསངྒཎྷནཔརིཡཱཡེན. ཨིདྷཱཏི ཨིམསྨིཾ སུཏྟེ. ཏེབྷཱུམཀཱཏི གཧེཏབྦཱ སམྨསནཙཱརསྶ ཨདྷིཔྤེཏཏྟཱ.

ཁནྡྷསུཏྟཝཎྞནཱ ནིཊྛིཏཱ.

པཋམཝགྒཝཎྞནཱ ནིཊྛིཏཱ.

༢. དུཏིཡཝགྒོ

༡༡. ཨནུསཡསུཏྟཝཎྞནཱ

༢༠༠. དུཏིཡཝགྒེ ཨཏྟནོཏི ཨཱཡསྨཱ རཱཧུལོ ཨཏྟནོ སཝིཉྙཱཎཀཾ ཀཱཡཾ དསྶེཏི. པརསྶཱཏི པརསྶ ཨཝིཉྙཱཎཀཀཱཡཾ དསྶེཏི. པརསནྟཱནེ ཝཱ ཨརཱུཔེ དྷམྨེ ཨགྒཧེཏྭཱ རཱུཔཀཱཡམེཝ གཎྷནྟོ ཝདཏི. ཨཔརེ ‘‘ཨསཉྙསཏྟཱནཾ ཨཏྟབྷཱཝཾ སནྡྷཱཡ ཏཐཱ ཝུཏྟ’’ནྟི ཝདནྟི. པུརིམེནཱཏི ‘‘ཨིམསྨིཾ སཝིཉྙཱཎཀེ ཀཱཡེ’’ཏི ཨིམིནཱ པདེན. པཙྪིམེནཱཏི ‘‘བཧིདྡྷཱ’’ཏི ཨིམིནཱ པདེན. ཨེཏེ ཀིལེསཱཏི ཨེཏེ ¶ དིཊྛིཏཎྷཱམཱནསཉྙིཏཱ ཀིལེསཱ. ཨེཏེསུ ཝཏྠཱུསཱུཏི ཨཛ྄ཛྷཏྟབཧིདྡྷཱཝཏྠཱུསུ. སམྨ…པེ… པསྶཏཱིཏི པུབྦབྷཱགེ ཝིཔསྶནཱཉཱཎེན སམྨསནཝསེན, མགྒཀྑཎེ ཨབྷིསམཡཝསེན སུཊྛུ ཨཏྟཔཙྩཀྑེན ཉཱཎེན པསྶཏི.

ཨནུསཡསུཏྟཝཎྞནཱ ནིཊྛིཏཱ.

༡༢. ཨཔགཏསུཏྟཝཎྞནཱ

༢༠༡. ‘‘ཨཧམེཏ’’ནྟི ¶ ཨཧཾཀཱརཱདཱིནཾ ཨནཝསེསཔྤཧཱནེན ཨཙྩནྟམེཝ ཨཔགཏཾ.

ཨཔགཏསུཏྟཝཎྞནཱ ནིཊྛིཏཱ.

དུཏིཡཝགྒཝཎྞནཱ ནིཊྛིཏཱ.

དྭཱིསཱུཏི པཋམཝགྒཱདཱིསུ. དེསནཱཡ ཨསེཀྑབྷཱུམིཡཱ དེསིཏཏྟཱ ཨསེཀྑབྷཱུམི ཀཐིཏཱ. པཋམོཏི པཋམཝགྒོ ‘‘སཱདྷུ མེ, བྷནྟེ, བྷགཝཱ’’ཏིཨཱདིནཱ ཨཱཡཱཙནྟསྶ, དུཏིཡོ ཨནཱཡཱཙནྟསྶ ཐེརསྶ ཨཛ྄ཛྷཱསཡཝསེན ཀཐིཏོ. ཝིམུཏྟིཔརིཔཱཙནཱིཡདྷམྨཱ ནཱམ ཝིཝཊྚསནྣིསྶིཏཱ སདྡྷིནྡྲིཡཱདཡོ. ཏེན པན ཝིཔསྶནཱཡ ཀཐིཏཏྟཱ ཀཐིཏཱ ཨེཝཱཏི. ཏཾཏཾདེསནཱནུསཱརེན ཧི ཐེརོ ཏེ དྷམྨེ པརིཔཱཀཾ པཱཔེསི. ཏཐཱ ཧི བྷགཝཱ དུཏིཡཝགྒཾ ཨནཱཡཱཙིཏོཔི དེསེསི.

སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ

རཱཧུལསཾཡུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༨. ལཀྑཎསཾཡུཏྟཾ

༡. པཋམཝགྒོ

༡. ཨཊྛིསུཏྟཝཎྞནཱ

༢༠༢. ཨཱཡསྨཱ ¶ ¶ ཙ ལཀྑཎོཏིཨཱདཱིསུ ‘‘ཀོ ནཱམཱཡསྨཱ ལཀྑཎོ, ཀསྨཱ ཙ ‘ལཀྑཎོ’ཏི ནཱམཾ ཨཧོསི, ཀོ ཙཱཡསྨཱ མོགྒལླཱནོ, ཀསྨཱ ཙ སིཏཾ པཱཏྭཱཀཱསཱི’’ཏི ཏཾ སབྦཾ པཀཱསེཏུཾ ‘‘ཡྭཱཡ’’ནྟིཨཱདི ཨཱརདྡྷཾ. ལཀྑཎསམྤནྣེནཱཏི པུརིསལཀྑཎསམྤནྣེན.

ཨཱིསཾ ཧསིཏཾ ‘‘སིཏ’’ནྟི ཝུཙྩཏཱིཏི ཨཱཧ ‘‘མནྡཧསིཏ’’ནྟི. ཨཊྛིསངྑལིཀནྟི ནཡིདཾ ཨཝིཉྙཱཎཀཾ ཨཊྛིསངྑལིཀམཏྟཾ, ཨཐ ཁོ ཨེཀོ པེཏོཏི ཨཱཧ ‘‘པེཏལོཀེ ནིབྦཏྟ’’ནྟི. ཨེཏེ ཨཏྟབྷཱཝཱཏི པེཏཏྟབྷཱཝཱ. ན ཨཱཔཱཐཾ ཨཱགཙྪནྟཱིཏི དེཝཏྟབྷཱཝཱ ཝིཡ ན ཨཱཔཱཐཾ ཨཱགཙྪནྟི པཀཏིཡཱ. ཏེསཾ པན རུཙིཡཱ ཨཱཔཱཐཾ ཨཱགཙྪེཡྻུཾ མནུསྶཱནཾ. དུཀྑཱབྷིབྷཱུཏཱནཾ ཨནཱཐབྷཱཝདསྶནཔདཊྛཱནཱ ཀརུཎཱཏི ཨཱཧ ‘‘ཀཱརུཉྙེ ཀཏྟབྦེ’’ཏི. ཨཏྟནོ ཙ སམྤཏྟིཾ བུདྡྷཉཱཎསྶ ཙ སམྤཏྟིནྟི པཙྩེཀཾ སམྤཏྟིསདྡོ ཡོཛེཏབྦོ. ཏདུབྷཡཾ ཝིབྷཱཝེཏུཾ ‘‘ཏཾ ཧཱི’’ཏིཨཱདི ཝུཏྟཾ. ཏཏྠ ཨཏྟནོ སམྤཏྟིཾ ཨནུསྶརིཏྭཱ སིཏཾ པཱཏྭཱཀཱསཱིཏི པདཾ ཨཱནེཏྭཱ སམྦནྡྷིཏབྦཾ. དྷམྨདྷཱཏཱུཏི སབྦཉྙུཏཉྙཱཎཾ སནྡྷཱཡ ཝདཏི. དྷམྨདྷཱཏཱུཏི ཝཱ དྷམྨཱནཾ སབྷཱཝོ.

ཨིཏརོཏི ལཀྑཎཏྠེརོ. ཨུཔཔཏྟཱིཏི ཛཱཏི. ཨུཔཔཏྟིསཱིསེན ཧི ཏཐཱརཱུཔཾ ཨཏྟབྷཱཝཾ ཝདཏི. ལོཧཏུཎྜཀེཧཱིཏི ལོཧམཡེཧེཝ ཏུཎྜཀེཧི. ཙརནྟཱིཏི ཨཱཀཱསེན གཙྪནྟི. ཨཙྪརིཡཾ ཝཏཱཏི གརཧཙྪརིཡཾ ནཱམེཏཾ. ཙཀྑུབྷཱུཏཱཏི སམྤཏྟདིབྦཙཀྑུཀཱ, ལོཀསྶ ཙཀྑུབྷཱུཏཱཏི ཨེཝཾ ཝཱ ཨེཏྠ ཨཏྠོ དཊྛབྦོ.

ཡཏྲཱཏི ཧེཏུཨཏྠེ ནིཔཱཏོཏི ཨཱཧ ‘‘ཡཏྲཱཏི ཀཱརཎཝཙན’’ནྟི. ཨཉྙཏྲ ཧི ‘‘ཡཏྲ ཧི ནཱམཱ’’ཏི ཨཏྠོ ཝུཙྩཏི. ཨཔྤམཱཎེ སཏྟནིཀཱཡེ ཏེ ཙ ཁོ ཝིབྷཱགེན ཀཱམབྷཝཱདིབྷེདེ བྷཝེ, ནིརཡཱདིབྷེདཱ ¶ གཏིཡོ, ནཱནཏྟཀཱཡནཱནཏྟསཉྙིཨཱདིཝིཉྙཱཎཊྛིཏིཡོ, ཏཐཱརཱུཔེ སཏྟཱཝཱསེ ཙ སབྦཉྙུཏཉྙཱཎཉྩ མེ ཨུཔནེཏུཾ པཙྩཀྑཾ ཀརོནྟེན.

གོགྷཱཏཀོཏི ¶ གུནྣཾ ཨབྷིཎྷཾ ཧནནཀོ. ཏེནཱཧ ‘‘ཝདྷིཏྭཱ ཝདྷིཏྭཱ’’ཏི. ཏསྶཱཏི གུནྣཾ ཝདྷཀཀམྨསྶ. ཨཔརཱཔརིཡཀམྨསྶཱཏི ཨཔརཱཔརིཡཝེདནཱིཡཀམྨསྶ. བལཝཏཱ གོགྷཱཏཀཀམྨེན ཝིཔཱཀེ དཱིཡམཱནེ ཨལདྡྷོཀཱསཾ ཨཔརཱཔརིཡཝེདནཱིཡཾ ཏསྨིཾ ཝིཔཀྐཝིཔཱཀེ ཨིདཱནི ལདྡྷོཀཱསཾ ‘‘ཨཝསེསཀམྨ’’ནྟི ཝུཏྟཾ. པཊིསནྡྷཱིཏི པཱཔཀམྨཛནིཏཱ པཊིསནྡྷི. ཀམྨསབྷཱགཏཱཡཱཏི ཀམྨསདིསབྷཱཝེན. ཨཱརམྨཎསབྷཱགཏཱཡཱཏི ཨཱརམྨཎསྶ སབྷཱགབྷཱཝེན སདིསབྷཱཝེན. ཡཱདིསེ ཧི ཨཱརམྨཎེ པུབྦེ ཏཾ ཀམྨཾ ཏསྶ ཙ ཝིཔཱཀོ པཝཏྟོ, ཏཱདིསེཡེཝ ཨཱརམྨཎེ ཨིདཾ ཀམྨཾ ཨིམསྶ ཝིཔཱཀོ ཙ པཝཏྟོཏི ཀཏྭཱ ཝུཏྟཾ ‘‘ཏསྶེཝ ཀམྨསྶ ཝིཔཱཀཱཝསེསེནཱ’’ཏི. བྷཝཏི ཧི ཏཾསདིསེཔི ཏབྦོཧཱརོ ཡཐཱ ‘‘སོ ཨེཝ ཏིཏྟིརོ, ཏཱནིཡེཝ ཨོསདྷཱནཱི’’ཏི. ནིམིཏྟཾ ཨཧོསཱིཏི པུབྦེ ཀཏཱུཔཙིཏསྶ པེཏཱུཔཔཏྟིནིབྦཏྟནཝསེན ཀཏོཀཱསསྶ ཏསྶ ཀམྨསྶ ནིམིཏྟབྷཱུཏཾ ཨིདཱནི ཏཐཱ ཨུཔཊྛཧནྟཾ ཏསྶ ཝིཔཱཀསྶ ནིམིཏྟཾ ཨཱརམྨཎཾ ཨཧོསི. སོཏི གོགྷཱཏཀོ. ཨཊྛིསངྑལིཀཔེཏོ ཛཱཏོ ཀམྨསརིཀྑཀཝིཔཱཀཏཱཝསེན.

ཨཊྛིསུཏྟཝཎྞནཱ ནིཊྛིཏཱ.

༢. པེསིསུཏྟཝཎྞནཱ

༢༠༣. གོམཾསཔེསིཡོ ཀཏྭཱཏི གཱཝིཾ ཝདྷིཏྭཱ ཝདྷིཏྭཱ གོམཾསཾ ཕཱལེཏྭཱ པེསིཡོ ཀཏྭཱ. སུཀྑཱཔེཏྭཱཏི ཀཱལནྟརཾ ཋཔནཏྠཾ སུཀྑཱཔེཏྭཱ. སུཀྑཱཔིཡམཱནཱནཾ མཾསཔེསཱིནཉྷི ཝལླཱུརསམཉྙཱ.

པེསིསུཏྟཝཎྞནཱ ནིཊྛིཏཱ.

༣. པིཎྜསུཏྟཝཎྞནཱ

༢༠༤. ནིཔྤཀྑཙམྨེཏི ཝིགཏཔཀྑཙམྨེ.

༤. ནིཙྪཝིསུཏྟཝཎྞནཱ

༢༠༥. ཨུརབྦྷེ ཧནཏཱིཏི ཨོརབྦྷིཀོ. ཨེལ༹ཀེཏི ཨཛེ.

༥. ཨསིལོམསུཏྟཝཎྞནཱ

༢༠༦. ནིཝཱཔཔུཊྛེཏི ¶ ¶ ཨཏྟནཱ དིནྣནིཝཱཔེན པོསིཏེ. ཨསིནཱ ཝདྷིཏྭཱ ཝདྷིཏྭཱ ཝིཀྐིཎནྟོ.

༦. སཏྟིསུཏྟཝཎྞནཱ

༢༠༧. ཨེཀཾ མིགནྟི ཨེཀཾ དཱིཔཀམིགཾ.

༧. ཨུསུལོམསུཏྟཝཎྞནཱ

༢༠༨. ཀཱརཎཱཧཱིཏི ཡཱཏནཱཧི. ཉཏྭཱཏི ཀམྨཊྛཱནཾ ཉཏྭཱ.

༨. སཱུཙིལོམསུཏྟཝཎྞནཱ

༢༠༩. སུཎོཏི པཱུརེཏཱིཏི སཱུཏོ, ཨསྶདམཀཱདིཀོ.

༩. དུཏིཡསཱུཙིལོམསུཏྟཝཎྞནཱ

༢༡༠. པེསུཉྙཱུཔསཾཧཱརཝསེན ཨིཏོ སུཏཾ ཨམུཏྲ, ཨམུཏྲ ཝཱ སུཏཾ ཨིདྷ སཱུཙེཏཱིཏི སཱུཙཀོ. ཨནཡབྱསནཾ པཱཔེསི མནུསྶེཏི སམྦནྡྷོ.

༡༠. ཀུམྦྷཎྜསུཏྟཝཎྞནཱ

༢༡༡. ཝིནིཙྪཡཱམཙྩོཏི རཉྙཱ ཨཌྜཀརཎེ ཋཔིཏོ ཝིནིཙྪཡམཧཱམཏྟོ. སོ ཧི གཱམཛནཀཱཡཾ ཀཱུཊེཏི ཝཉྩེཏཱིཏི གཱམཀཱུཊཀོཏི ཝུཙྩཏི. ཀེཙི ‘‘ཏཱདིསོ ཨེཝ གཱམཛེཊྛཀོ གཱམཀཱུཊཀོ’’ཏི ཝདནྟི. སམེན བྷཝིཏབྦཾ, ‘‘དྷམྨཊྛོ’’ཏི ཝཏྟབྦཏོ. རཧསྶངྒེ ནིསཱིདནཝསེན ཝིསམཱ ནིསཛྫཱཝ ཨཧོསི.

ཀུམྦྷཎྜསུཏྟཝཎྞནཱ ནིཊྛིཏཱ.

པཋམཝགྒཝཎྞནཱ ནིཊྛིཏཱ.

༢. དུཏིཡཝགྒོ

༡. སསཱིསཀསུཏྟཝཎྞནཱ

༢༡༢. ཕུསནྟོཏི ¶ ¶ ཐེཡྻཱཡ ཕུསནྟོ.

༣. ནིཙྪཝིཏྠིསུཏྟཝཎྞནཱ

༢༡༤. མཱཏུགཱམོ སསྶཱམིཀོ ཨཏྟནོ ཕསྶེ ཨནིསྶརོ. ཝཊྚིཏྭཱཏི བྷསྶིཏྭཱ ཨཔརཾ གནྟྭཱ.

༤. མངྒུལིཏྠིསུཏྟཝཎྞནཱ

༢༡༥. མངྒནཝསེན ཨུལཏཱིཏི མངྒུལི, ཝིརཱུཔབཱིབྷཙྪབྷཱཝེན པཝཏྟཏཱིཏི ཨཏྠོ. ཏེནཱཧ ‘‘ཝིརཱུཔཾ དུདྡསིཀཾ བཱིབྷཙྪ’’ནྟི.

༥. ཨོཀིལིནཱིསུཏྟཝཎྞནཱ

༢༡༦. ཨུདྡྷཾ ཨུདྡྷཾ ཨགྒིནཱ པཀྐསརཱིརཏཱཡ ཨུཔྤཀྐཾ. ཧེཊྛཏོ པགྒྷརཎཝསེན ཀིལིནྣསརཱིརཏཱཡ ཨོཀིལིནཱི. ཨིཏོ ཙིཏོ ཙ ཨངྒཱརསམྤརིཀིཎྞཏཱཡ ཨོཀིརིནཱི. ཏེནཱཧ ‘‘སཱ ཀིརཱ’’ཏིཨཱདི. ཨངྒཱརཙིཏཀེཏི ཨངྒཱརསཉྩཡེ. སརཱིརཏོ པགྒྷརནྟི ཨསུཙིདུགྒནྡྷཛེགུཙྪཱནི སེདགཏཱནི. ཏསྶ ཀིར རཉྙོཏི ཏསྶ ཀཱལིངྒསྶ རཉྙོ. ནཱཊཀིནཱིཏི ནཙྩེ ཨདྷིཀཏཱ ཨིཏྠཱི. སེདནྟི སེདནཾ, ཏཱཔནནྟི ཨཏྠོ.

ཨོཀིལིནཱིསུཏྟཝཎྞནཱ ནིཊྛིཏཱ.

༦. ཨསཱིསཀསུཏྟཝཎྞནཱ

༢༡༧. ཨསཱིསཀཾ ཀབནྡྷཾ ཧུཏྭཱ ནིབྦཏྟི ཀམྨཱཡཱུཧནཀཱལེ ཏཐཱ ནིམིཏྟགྒཧཎཔརིཙཡཏོ.

༧-༡༡. པཱཔབྷིཀྑུསུཏྟཱདིཝཎྞནཱ

༢༡༨-༢༢༢. ལཱམཀབྷིཀྑཱུཏི ¶ ¶ ཧཱིནཱཙཱརཏཱཡ ལཱམཀོ, བྷིཀྑུཝེསཏཱཡ, བྷིཀྑཱཧཱརེན ཛཱིཝནཏོ ཙ བྷིཀྑུ. ཙིཏྟཀེལི༹ནྟི ཙིཏྟརུཙིཡཾ ཏཾ ཏཾ ཀཱིལ༹ནྟོ. ཨཡམེཝཱཏི བྷིཀྑུཝཏྠུསྨིཾ ཝུཏྟནཡོ ཨེཝ.

པཱཔབྷིཀྑུསུཏྟཱདིཝཎྞནཱ ནིཊྛིཏཱ.

སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ

ལཀྑཎསཾཡུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༩. ཨོཔམྨསཾཡུཏྟཾ

༡. ཀཱུཊསུཏྟཝཎྞནཱ

༢༢༣. ཀཱུཊཾ ¶ ¶ གཙྪནྟཱིཏི ཀཱུཊཙྪིདྡསྶ ཨནུཔཝིསནཝསེན ཀཱུཊཾ གཙྪནྟི. ཡཱ ཙ གོཔཱནསིཡོ གོཔཱནསནྟརགཏཱ, ཏཱཔི ཀཱུཊཾ ཨཱཧཙྩ ཋཱནེན ཀཱུཊངྒམཱ. དུཝིདྷཱཔི ཀཱུཊེ སམོསརཎཱ. ཀཱུཊསྶ སམུགྒྷཱཏེན ཝིནཱསེན བྷིཛྫནེན. ཨཝིཛྫཱཡ སམུགྒྷཱཏེནཱཏི ཨཝིཛྫཱཡ ཨཙྩནྟམེཝ ཨཔྤཝཏྟིཡཱ. ཏེན ཙ མོཀྑདྷམྨཱདྷིགམེན ཏདནུརཱུཔདྷམྨཱདྷིགམོ དསྶིཏོ. ཨཔྤམཏྟཱཏི པན ཨིམིནཱ ཏསྶ ཨུཔཱཡོ དསྶིཏོ.

ཀཱུཊསུཏྟཝཎྞནཱ ནིཊྛིཏཱ.

༢. ནཁསིཁསུཏྟཝཎྞནཱ

༢༢༤. ཨེཝཾ ཨཔྤཀཱ ཡཐཱ ནཁསིཁཱཡ ཨཱརོཔིཏཔཾསུ, སུགཏིསཾཝཏྟནིཡསྶ ཀམྨསྶ ཨཔྤཀཏྟཱ ཨེཝཾ དེཝེསུཔཱིཏི ཧཱིནཱུདཱཧརཎཝསེན ཝུཏྟཾ. ཨཔྤཏརཱ ཧི སཏྟཱ ཡེ དེཝེསུ ཛཱཡནྟི, ཏཉྩ ཁོ ཀཱམདེཝེསུ. ཨིཏརེསུ པན ཝཏྟབྦམེཝ ནཏྠི.

ནཁསིཁསུཏྟཝཎྞནཱ ནིཊྛིཏཱ.

༣. ཀུལསུཏྟཝཎྞནཱ

༢༢༥. ཝིདྷཾསཡནྟི ཝིཧེཋཡནྟི. ཝཌྜྷིཏཱཏི བྷཱཝནཱཔཱརིཔཱུརིཝསེན པརིབྲཱུཧིཏཱ. པུནཔྤུནཾ ཀཏཱཏི བྷཱཝནཱཡ བཧུལཱིཀརཎེན ཨཔརཱཔརཾ པཝཏྟིཏཱ ཡུཏྟཡཱནཾ ཝིཡ ཀཏཱཏི ཡཐཱ ཡུཏྟཾ ཨཱཛཉྙརཐཾ ཚེཀེན སཱརཐིནཱ ཨདྷིཊྛིཏཾ ཡཐཱརུཙི པཝཏྟཏི, ཨེཝཾ ཡཐཱརུཙི པཝཏྟིཡཱ གམིཏཱ. པཏིཊྛཱནཊྛེནཱཏི ཨདྷིཊྛཱནཊྛེན. ཝཏྠུ ཝིཡ ཀཏཱ སབྦསོ ཨུཔཀྐིལེསཝིསོདྷནེན སུཝིསོདྷིཏམརིཡཱདཾ ཝིཡ ཀཏཱ. ཨདྷིཊྛིཏཱཏི པཊིཔཀྑདཱུརཱིབྷཱཝཏོ སུབྷཱཝིཏབྷཱཝེན ཨཝིཀམྤནེཡྻཏཱཡ ཋཔིཏཱ ¶ . སམནྟཏོ ཙིཏཱཏི སབྦབྷཱགེན བྷཱཝནཱུཔཙཡཾ གམིཏཱ. ཏེནཱཧ ‘‘སུཝཌྜྷིཏཱ’’ཏི ¶ . སུཊྛུ སམཱརདྡྷཱཏི མེཏྟཱབྷཱཝནཱཡ མཏྠཀཔྤཏྟིཡཱ སམྨདེཝ སམྤཱདིཏཱ.

ཀུལསུཏྟཝཎྞནཱ ནིཊྛིཏཱ.

༤. ཨོཀྑཱསུཏྟཝཎྞནཱ

༢༢༦. མཧཱམུཁཨུཀྑལཱིནནྟི མཧཱམུཁཱནཾ མཧནྟཀོལུ༹མྦཱནཾ སཏཾ. པཎཱིཏབྷོཛནབྷརིཏཱནནྟི སཔྤིམདྷུསཀྐརཱདཱིཧི ཨུཔནཱིཏཔཎཱིཏབྷོཛནེཧི པརིཔུཎྞཱནཾ. ཏསྶཱཏི པཱཋསྶ. གོདུཧནམཏྟནྟི གོདོཧནཝེལཱམཏྟཾ. ཏཾ པན ཀིཏྟཀཾ ཨདྷིཔྤེཏནྟི ཨཱཧ ‘‘གཱཝིཡཱ’’ཏིཨཱདི. སབྦསཏྟེསུ ཧིཏཕརཎནྟི ཨནོདྷིསོམེཏྟཱབྷཱཝནམཱཧ – མེཏྟཙིཏྟཾ ཨཔྤནཱཔྤཏྟཾ བྷཱཝེཏུཾ སཀྐོཏཱིཏི ཨདྷིཔྤཱཡོ. ཏམྤི ཏཏོ ཡཐཱཝུཏྟདཱནཏོ མཧཔྥལཏརནྟི.

ཨོཀྑཱསུཏྟཝཎྞནཱ ནིཊྛིཏཱ.

༥. སཏྟིསུཏྟཝཎྞནཱ

༢༢༧. ཨགྒེ པཧརིཏྭཱཏི ཏིཎྷཕལསཏྟིཡཱ ཨགྒེ ཧཏྠེན ཝཱ མུཊྛིནཱ ཝཱ པཧཱརཾ དཏྭཱ. ཀཔྤཱསཝཊྚིཾ ཝིཡཱཏི པཧཏཀཔྤཱསཔིཎྜཾ ཝིཡ. ནིཡྻཱསཝཊྚིཾ ཝིཡཱཏི ཕལསཎྛཱནཾ ནིཡྻཱསཔིཎྜཾ ཝིཡ. ཨེཀཏོ ཀཏྭཱཏི ཀལིཀཱདིབྷཱཝེན ཝཱིསཏིཾསཔིཎྜཱནི ཨེཀཛ྄ཛྷཾ ཀཏྭཱ. ཨལླིཡཱཔེནྟོ པིཎྜཾ ཀརོནྟོ. པཊིལེཎེཏཱིཏི པཊིལཱིནཡཏི ནཱམེཏི. ཨལླིཡཱཔེནྟོ ཏེ དྭེཔི དྷཱརཱ ཨེཀཏོ སམྥུསཱཔེནྟོ. པཊིཀོཊྚེཏཱིཏི པཊིཔཧརཏི. ཏཏྠ ཁཎྜཾ ཝིཡ ནིཡྻཱསོ. ཀཔྤཱསཝཊྚནཀརཎཱིཡནྟི ཝིཧཏསྶ ཀཔྤཱསསྶ པཊིསཾཧརཎཝསེན བནྡྷནདཎྜཾ. པཝཏྟེནྟོཏི ཀཔྤཱསསྶ སཾཝེལླནཝསེན པཝཏྟེནྟོ.

སཏྟིསུཏྟཝཎྞནཱ ནིཊྛིཏཱ.

༦. དྷནུགྒཧསུཏྟཝཎྞནཱ

༢༢༨. དལ༹ྷདྷནུནོཏི ¶ ཐིརཏརདྷནུནོ. ཨིདཱནི ཏསྶ ཐིརཏརབྷཱཝཾ པརིཙྪེདཏོ དསྶེཏུཾ ‘‘དལ༹ྷདྷནཱུ’’ཏིཨཱདི ཝུཏྟཾ. ཏཏྠ དྭིསཧསྶཐཱམནྟི པལཱནཾ དྭིསཧསྶཐཱམཾ. ཝུཏྟམེཝཏྠཾ པཱཀཊཏརཾ ཀཏྭཱ དསྶེཏུཾ ‘‘ཡསྶཱ’’ཏིཨཱདིམཱཧ. ཏཏྠ ཡསྶཱཏི དྷནུནོ. ཨཱརོཔིཏསྶཱཏི ཛིཡཾ ཨཱརོཔིཏསྶ. ཛིཡཱབདྡྷོཏི ཛིཡཱཡ བདྡྷོ. པཐཝིཏོ མུཙྩཏི, ཨེཏཾ ‘‘དྭིསཧསྶཐཱམ’’ནྟི ཝེདིཏབྦཾ ¶ . ལོཧསཱིསཱདཱིནནྟི ཀཱལ༹ལོཧཏམྦལོཧསཱིསཱདཱིནཾ. བྷཱརོཏི པུརིསབྷཱརོ, སོ པན མཛ྄ཛྷིམཔུརིསསྶ ཝསེན ཨེདིསཾ ཏསྶ བལཾ དཊྛབྦཾ. ཨུགྒཧིཏསིཔྤཱ དྷནུཝེདསིཀྑཱཝསེན. ཙིཎྞཝསཱིབྷཱཝཱ ལཀྑེསུ ཨཝིརཛ྄ཛྷནསརཀྑེཔཝསེན. ཀཏཾ རཱཛཀུལཱདཱིསུ ཨུཔགནྟྭཱ ཨསནཾ སརཀྑེཔོ ཨེཏེཧཱིཏི ཀཏཱུཔསནཱཏི ཨཱཧ ‘‘རཱཛཀུལཱདཱིསུ དསྶིཏསིཔྤཱ’’ཏི.

‘‘བོདྷིསཏྟོ ཙཏྟཱརི ཀཎྜཱནི ཨཱཧརཱི’’ཏི ཝཏྭཱ ཏམེཝ ཨཏྠཾ ཝིཏྠཱརཏོ དསྶེནྟོ ‘‘ཏདཱ ཀིརཱ’’ཏིཨཱདིམཱཧ. ཏཏྠ ཛཝིསྶཱམཱཏི དྷཱཝིསྶཱམ. ཨགྒི ཨུཊྛཧཱིཏི སཱིགྷཔཏནསནྟཱཔེན ཙ སཱུརིཡརསྨིསནྟཱཔསྶ ཨཱསནྣབྷཱཝེན ཙ ཨུསུམཱ ཨུཊྛཧི. པཀྑཔཉྫརེནཱཏི པཀྑཛཱལནྟརེན.

ནིཝཏྟིཏྭཱཏི ‘‘ནིཔྤཡོཛནམིདཾ ཛཝན’’ནྟི ནིཝཏྟིཏྭཱ. པཏྟཀཊཱཧེན ཨོཏྠཊཔཏྟོ ཝིཡཱཏི པིཧིཏཔཏྟོ ཝིཡ ཨཧོསི, ཝེགསཱ པཏནེན ནགརསྶ ཨུཔརི ཨཱཀཱསསྶ ནིརིཀྑཎཾ ཨཧོསི. སཉྩཱརིཏཏྟཱ ཨནེཀཧཾསསཧསྶསདིསོ པཉྙཱཡི སེཡྻཐཱཔི བོདྷིསཏྟསྶ དྷནུགྒཧཀཱལེ སརཀཱུཊཱདིདསྶནེ.

དུཀྐརནྟི ཏསྶ ཨདསྶནཾ སནྡྷཱཡཱཧ, ན ཨཏྟནོ པཏནཾ. སཱུརིཡམཎྜལཉྷི ཨཏིསཱིགྷེན ཛཝེན གཙྪནྟམྤི པཉྙཱསཡོཛནཱཡཱམཝིཏྠཏཾ ཨཏྟནོ ཝིཔུལཏཱཡ པབྷསྶརཏཱཡ ཙ སཏྟཱནཾ ཙཀྑུསྶ གོཙརབྷཱཝཾ གཙྪཏི, ཛཝནཧཾསོ པན ཏཱདིསེན སཱུརིཡེན སདྡྷིཾ ཛཝེན གཙྪནྟོ ན པཉྙཱཡེཡྻ. ཏསྨཱ ཝུཏྟཾ ‘‘ན སཀྐཱ ཏཡཱ པསྶིཏུ’’ནྟི. ཙཏྟཱརོ ཨཀྑཎཝེདྷིནོ. གནྟྭཱ གཧིཏེ སོཏུཾ གྷཎྜཾ པིལ༹ནྡྷཱཔེཏྭཱ སཡཾ པུརཏྠཱབྷིམུཁོ ནིསིནྣོ. པུརཏྠིམདིསཱབྷིམུཁཾ གཏཀཎྜཾ སནྡྷཱཡཱཧ ‘‘པཋམཀཎྜེནེཝ སདྡྷིཾ ཨུཔྤཏིཏྭཱ’’ཏི. ཏེ ཙཏྟཱརི ཀཎྜཱནི ཨེཀཀྑཎེཡེཝ ཁིཔིཾསུ.

ཨཱཡུཾ ¶ སངྑརོཏི ཨེཏེནཱཏི ཨཱཡུསངྑཱརོ. ཡཐཱ ཧི ཀམྨཛརཱུཔཱནཾ པཝཏྟི ཛཱིཝིཏིནྡྲིཡཔཊིབདྡྷཱ, ཨེཝཾ ཨཏྟབྷཱཝསྶ པཝཏྟི ཏཔྤཊིབདྡྷཱཏི. བཧུཝཙནནིདྡེསོ པན པཱལི༹ཡཾ ཨེཀསྨིཾ ཁཎེ ཨནེཀསཏསངྑསྶ ཛཱིཝིཏིནྡྲིཡསྶ ཨུཔལབྦྷནཏོ. ཏཾ ཛཱིཝིཏིནྡྲིཡཾ. ཏཏོ ཡཐཱཝུཏྟདེཝཏཱནཾ ཛཝཏོ སཱིགྷཏརཾ ཁཱིཡཏི ཨིཏྟརཁཎཏྟཱ. ཝུཏྟཉྷེཏཾ –

‘‘ཛཱིཝིཏཾ ཨཏྟབྷཱཝོ ཙ, སུཁདུཀྑཱ ཙ ཀེཝལཱ;

ཨེཀཙིཏྟསམཱཡུཏྟཱ, ལཧུསོ ཝཏྟཏེ ཁཎོ’’ཏི. (མཧཱནི. ༡༠);

བྷེདོཏི ¶ བྷངྒོ. ན སཀྐཱ པཉྙཱཔེཏུཾ ཏཏོཔི ཨཏིཝིཡ ཨིཏྟརཁཎཏྟཱ.

དྷནུགྒཧསུཏྟཝཎྞནཱ ནིཊྛིཏཱ.

༧. ཨཱཎིསུཏྟཝཎྞནཱ

༢༢༩. ཨཉྙེ རཱཛཱནོ ཙ བྷཱགཾ གཎྷནྟཱ ཨིམེ ཝིཡ དསབྷཱགཾ གཎྷནྟཱིཏི ཏེསམཡཾ ཨནུགཏི པཉྙཱཡཏི. མཧཱཛནསྶ ཨཱནཡནཏོ ཨཱནཀོཏི ཨཱཧ ‘‘ཨེཝཾལདྡྷནཱམོ’’ཏི. ཨིདཱནི ཏཾ ཨཱདིཏོ པཊྛཱཡ ཨཱགམནཱནུཀྐམཾ དསྶེཏུཾ ‘‘ཧིམཝནྟེ ཀིརཱ’’ཏིཨཱདིམཱཧ. ཀརེཎུནྟི ཀརེཎུཀཾ, ཧཏྠིནིནྟི ཨཏྠོ. སཀྐརིཾསཱུཏི ཨནཏྠཔརིཧརཎཝསེན པསཏྠཱུཔཧཱརཝསེན ཙ པཱུཛེསུཾ. ཨོཏརཱིཏི ཀུལཱི༹རདཧཾ པཱཝིསི. པཊིཀྐམིཏྭཱ ཋཔནཝསེན ཨཔཀྐམིཏྭཱ པཏི.

སུཝཎྞརཛཏཱདིམཡནྟི ཀིསྨིཉྩི ཚིདྡེ སུཝཎྞམཡཾ, ཀིསྨིཉྩི རཛཏམཡཾ, ཀིསྨིཉྩི ཕལིཀམཡཾ ཨཱཎིཾ གྷཊཡིཾསུ བནྡྷིཾསུ. པུབྦེ ཕརིཏྭཱ ཏིཊྛནྟསྶ དྭཱདས ཡོཛནཱནི པམཱཎོ ཨེཏསྶཱཏི དྭཱདསཡོཛནཔྤམཱཎོ, སདྡོ. ཨཐསྶ ཨནེཀསཏཀཱལེ གཙྪནྟེ ཨནྟོསཱལཱཡམྤི དུཀྑེན སུཡྻིཏྠ ཨཱཎིསངྒྷཱཊམཏྟཏྟཱ.

གམྦྷཱིརཱཏི ཨགཱདྷཱ དུཀྑོགཱལ༹ྷཱ. སལླསུཏྟཉྷི ‘‘ཨནིམིཏྟམནཉྙཱཏ’’ནྟིཨཱདིནཱ པཱལི༹ཝསེན གམྦྷཱིརཾ, ན ཨཏྠགམྦྷཱིརཾ. ཏཐཱ ཧི ཏཏྠ ཏཱ ཏཱ གཱཐཱ དུཝིཉྙེཡྻརཱུཔཱ ཏིཊྛནྟི, དུཝིཉྙེཡྻཾ ཉཱཎེན དུཀྑོགཱཧནྟི ཀཏྭཱ ‘‘གམྦྷཱིར’’ནྟི ¶ ཝུཙྩཏི. པུབྦཱཔརམྤེཏྠ ཀཱསཉྩི གཱཐཱནཾ དུཝིཉྙེཡྻཏཱཡ དུཀྑོགཱཧམེཝ, ཏསྨཱ ཏཾ པཱལི༹ཝསེན ‘‘གམྦྷཱིར’’ནྟི ཝུཏྟཾ ‘‘པཱལི༹ཝསེན གམྦྷཱིརཱ སལླསུཏྟསདིསཱ’’ཏི. ཨིམིནཱ ནཡེན ‘‘ཨཏྠཝསེན གམྦྷཱིརཱ’’ཏི ཨེཏྠ ཨཏྠོ ཝེདིཏབྦོ. མཧཱཝེདལླསུཏྟསྶ ཨཏྠཝསེན གམྦྷཱིརཏཱ པཱཀཊཱཡེཝ. ལོཀཾ ཨུཏྟརཏཱིཏི ལོཀུཏྟརོ, ནཝཝིདྷཨཔྤམཱཎདྷམྨོ, སོ ཨཏྠབྷཱུཏོ ཨེཏེསཾ ཨཏྠཱིཏི ལོཀུཏྟརཱ. ཏེནཱཧ ‘‘ལོཀུཏྟརཨཏྠདཱིཔཀཱ’’ཏི. སཏྟསུཉྙཏདྷམྨམཏྟམེཝཱཏི སཏྟེན ཨཏྟནཱ སུཉྙཏཾ ཀེཝལཾ དྷམྨམཏྟམེཝ. ཨུགྒཧེཏབྦཾ པརིཡཱཔུཎིཏབྦནྟི ཙ ལིངྒཝཙནཝིཔལླཱསེན ཝུཏྟནྟི ཨཱཧ ‘‘ཨུགྒཧེཏབྦེ ཙ པརིཡཱཔུཎིཏབྦེ ཙཱ’’ཏི. ཀཝིཏཱཏི ཀཝིནོ ཀམྨཾ ཀཝིཀཏཱ. ཡསྶ པན ཡཾ ཀམྨཾ, ཏཾ ཏེན ཀཏནྟི ཝུཙྩཏཱིཏི ཨཱཧ ‘‘ཀཝིཏཱཏི ཀཝཱིཧི ཀཏཱ’’ཏི. ཨིཏརཾ ‘‘ཀཱཝེཡྻཱ’’ཏི པདཾ, ཀབྦནྟི ཝུཏྟཾ ཧོཏི. ‘‘ཀབྦ’’ནྟི ཙ ཀཝིནཱ ཝུཏྟནྟི ཨཏྠོ. ཏེནཱཧ ‘‘ཏསྶེཝ ཝེཝཙན’’ནྟི. ཙིཏྟཀྑརཱཏི ཝིཙིཏྲཱཀཱརཨཀྑརཱ. སཱསནཏོ བཧིབྷཱུཏཱཏི ན སཱསནཱཝཙརཱ. ཏེསཾ སཱཝཀེཧཱིཏི ‘‘བུདྡྷཱནཾ སཱཝཀཱ’’ཏི ¶ ཨཔཉྙཱཏཱནཾ ཡེསཾ ཀེསཉྩི སཱཝཀེཧི. ཨནུགྒཡ྄ཧམཱནཱཏི ན ཨུགྒཡ྄ཧམཱནཱ སཝནདྷཱརཎཔརིཙཡཨཏྠཱུཔཔརིཀྑཱདིཝསེན ཨནུགྒཡ྄ཧམཱནཱ. ཨནྟརདྷཱཡནྟི ཨདསྶནཾ གཙྪནྟི.

ཨཱཎིསུཏྟཝཎྞནཱ ནིཊྛིཏཱ.

༨. ཀལིངྒརསུཏྟཝཎྞནཱ

༢༣༠. ཀལིངྒརཾ ཝུཙྩཏི ཁུདྡཀདཱརུཁཎྜཾ, ཏཾ ཨུཔདྷཱནཾ ཨེཏེསནྟི ཀལིངྒརཱུཔདྷཱནཱ. ལིཙྪཝཱི པན ཁདིརདཎྜཾ ཨུཔདྷཱནཾ ཀཏྭཱ ཏདཱ ཝིཧརིཾསུ. ཏསྨཱ ཝུཏྟཾ ‘‘ཁདིརགྷཊིཀཱསཱུ’’ཏིཨཱདི. པཀཏིཝིཛྫུསཉྙིཏོ ནཏྠི ཨེཏེསཾ ཁཎོ ཝིཛ྄ཛྷནེཏི ཨཀྑཎཝེདྷིནོ ཏཏོ སཱིགྷཏརཾ ཝིཛ྄ཛྷནཏོ. ‘‘ཨཀྑཎ’’ནྟི ཝིཛྫུ ཝུཙྩཏི ཨིཏྟརཁཎཏྟཱ. ཨཀྑཎོབྷཱསེན ལཀྑཎཝེདྷཀཱ ཨཀྑཎཝེདྷིནོ. ཨནེཀདྷཱ བྷིནྣསྶ ཝཱལསྶ ཝིཛ྄ཛྷནེན ཝཱལཝེདྷིནོ. ཝཱལེཀདེསོ ཧི ཨིདྷ ‘‘ཝཱལོ’’ཏི གཧིཏོ.

བཧུདེཝ དིཝསབྷཱགཾ པདྷཱནཱནུཡོགཏོ ཨུཔྤནྣདརཐཔརིསྶམཝིནོདནཏྠཾ ནྷཱཡིཏྭཱ. ཏེ སནྡྷཱཡཱཏི ཏེ ཏཐཱརཱུཔེ པདྷཱནཀམྨིཀབྷིཀྑཱུ སནྡྷཱཡ. ཨིདཾ ཨིདཱནི ཝུཙྩམཱནཾ ཨཏྠཛཱཏཾ ཝུཏྟཾ པོརཱཎཊྛཀཐཱཡཾ. ཨཡམྤི དཱིཔོཏི ¶ ཏམྦཔཎྞིདཱིཔམཱཧ. པདྷཱནཱནུཡུཉྫནཝེལཱཡ ནིཝེདནཝསེན ཏཏྠ ཏཏྠ ཨེཀཛ྄ཛྷཾ པཧཏགྷཎྜིནིགྒྷོསེནེཝ ཨེཀགྷཎྜིནིགྒྷོསོ, ཏཏྠ ཏཏྠ པཎྞསཱལཱདཱིསུ ཝསནྟཱནཾ བྷིཀྑཱུནཾ ཝསེན ཨེཀཔདྷཱནབྷཱུཏོ. ནཱནཱམུཁོཏི ཨནུརཱདྷཔུརསྶ པཙྪིམདིསཱཡཾ ཨེཀོ ཝིཧཱརོ, པིལིཙྪིཀོལི༹ནགརསྶ པུརཏྠིམདིསཱཡཾ. ཨུབྷཡཏྠ པཝཏྟགྷཎྜིསདྡཱ ཨནྟརཱཔཝཏྟགྷཎྜིསདྡེཧི མིསྶེཏྭཱ ཨོསརནྟི. ཀལྱཱཎིཡཾ པཝཏྟགྷཎྜིསདྡོ ཏཐཱ ནཱགདཱིཔེ.

ཀལིངྒརསུཏྟཝཎྞནཱ ནིཊྛིཏཱ.

༩. ནཱགསུཏྟཝཎྞནཱ

༢༣༡. ཨཏིཀྐནྟཝེལནྟི བྷཏྟཱནུམོདནཨུཔནིསིནྣཀཐཱཝེལཏོ ཨཏིཀྐནྟཝེལཾ. ཨསམྦྷིནྣེནཱཏི སརསམྤཏྟིཏོ ཨསམྦྷིནྣེན, སརསྶ ཨུཙྩཱརཎསམྤཏྟིཾ ཨཔརིཧཱཔེཏྭཱཏི ཨཏྠོ. ཨཔརིསུདྡྷཱསཡཏཱཡ ནེཝ གུཎཝཎྞཱཡ ན ཉཱཎབལཱཡ ཧོཏི. ཏནྟི ཏཾ ཏཐཱ པཙྩཡཱནཾ པརིབྷུཉྫནཾ, ཏཾ ཏཐཱ མིཙྪཱཔཊིཔཛྫནཾ.

ནཱགསུཏྟཝཎྞནཱ ནིཊྛིཏཱ.

༡༠. བིལཱ༹རསུཏྟཝཎྞནཱ

༢༣༢. གྷརཱནཾ ¶ སནྡྷཱིཏི གྷརེན གྷརསྶ སམྦནྡྷཊྛཱནཾ. སཧ མལེན ཝཏྟཏཱིཏི སམལཾ. གེཧཏོ གཱམཏོ ཙ ནིཀྑམནཙནྡནིཀཊྛཱནཾ. སངྐཱརཊྛཱནནྟི སངྐཱརཀཱུཊཾ. ཀེཙི ‘‘སནྡྷིསངྐཱརཀཱུཊཊྛཱན’’ནྟི ཝདནྟི. ཝུཊྛཱནནྟི ཨཱཔནྣཨཱཔཏྟིཏོ, ན ཀིལེསཏོ ཝུཊྛཱནཾ, སུདྡྷནྟེ ཨདྷིཊྛཱནཾ. ཏཾ པན ཡཐཱཨཱཔནྣཱཡ ཨཱཔཏྟིཡཱ ‘‘དེསནཱ’’ཏྭེཝ ཝུཙྩཏཱིཏི ཨཱཧ ‘‘དེསནཱ པཉྙཱཡཏཱི’’ཏི.

བིལཱ༹རསུཏྟཝཎྞནཱ ནིཊྛིཏཱ.

༡༡. སིངྒཱལསུཏྟཝཎྞནཱ

༢༣༣. ཨེཏྟཀམྤཱིཏི ¶ ཨིམིནཱ ཛརསིངྒཱལེན ལདྡྷབྦཾ ཙིཏྟསྶཱདམཏྟམྤི ན ལབྷིསྶཏི སཀལམེཝ ཀཔྤཾ སབྦསོ ཨཝཱིཙིཛཱལཱཧི ནིརནྟརཾ ཛྷཱཡམཱནཏཱཡ ནིཙྩདུཀྑཱཏུརབྷཱཝཏོ.

སིངྒཱལསུཏྟཝཎྞནཱ ནིཊྛིཏཱ.

༡༢. དུཏིཡསིངྒཱལསུཏྟཝཎྞནཱ

༢༣༤. ཀཏཛཱནནནྟི ཀཏཱུཔཀཱརཛཱནནཾ. ཀཏཝེདིཏཱཏི ཏསྶེཝ པརེསཾ པཱཀཊཀརཎཝསེན ཛཱནནམེཝ. ཨཱཙཱརམེཝཱཏི ཀཏཱཔརཱདྷམེཝ.

དུཏིཡསིངྒཱལསུཏྟཝཎྞནཱ ནིཊྛིཏཱ.

སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ

ཨོཔམྨསཾཡུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༡༠. བྷིཀྑུསཾཡུཏྟཾ

༡. ཀོལིཏསུཏྟཝཎྞནཱ

༢༣༥. སཱཝཀཱནཾ ¶ ¶ ཨཱལཱཔོཏི སཱཝཀཱནཾ སབྲཧྨཙཱརིཾ ཨུདྡིསྶ ཨཱལཱཔོ. བུདྡྷེཧི སདིསཱ མཱ ཧོམཱཏི བུདྡྷཱཙིཎྞཾ སམུདཱཙཱརཾ ཨཀཐེནྟེཧི སཱཝཀེཧི, ‘‘ཨཱཝུསོ བྷིཀྑཝེ’’ཏི ཨཱལཔིཏཱ བྷིཀྑཱུ, ‘‘ཨཱཝུསོ’’ཏི པཊིཝཙནཾ དེནྟི, ན, ‘‘བྷནྟེ’’ཏི. དུཏིཡཛ྄ཛྷཱནེ ཝིཏཀྐཝིཙཱརཱ ནིརུཛ྄ཛྷནྟི ཏེསཾ ནིརོདྷེནེཝ ཏསྶ ཛྷཱནསྶ ཨུཔྤཱདེཏབྦཏོ. ཡེསཾ ནིརོདྷཱཏི ཡེསཾ ཝཙཱིསངྒཱརཱནཾ ཝིཏཀྐཝིཙཱརཱནཾ ནིརུཛ྄ཛྷནེན སུཝིཀྑམྦྷིཏབྷཱཝེན སདྡཱཡཏནཾ ཨཔྤཝཏྟིཾ གཙྪཏི ཀཱརཎསྶ དཱུརཏོ པསྶམྦྷིཏཏྟཱ. ཨརིཡོཏི ནིདྡོསོ. པརིསུདྡྷོ ཏུཎྷཱིབྷཱཝོ, ན ཏིཏྠིཡཱནཾ མཱུགབྦཏགྒཧཎཾ ཝིཡ ཨཔརིསུདྡྷོཏི ཨདྷིཔྤཱཡོ. པཋམཛ྄ཛྷཱནཱདཱིནཱིཏི ཨཱདི-སདྡེན ཏཏིཡཛ྄ཛྷཱནཱདཱིནི སངྒཎྷཱཏི.

ཨཱརམྨཎབྷཱུཏེན ཝིཏཀྐེན སཧ གཏཱ པཝཏྟཱཏི ཝིཏཀྐསཧགཏཱཏི ཨཱཧ ‘‘ཝིཏཀྐཱརམྨཎཱ’’ཏི. ཝིཏཀྐཱརམྨཎཏཱ ཙ སཉྙཱམནསིཀཱརཱནཾ སུཁུམཨཱརམྨཎགྒཧཎཝསེན དཊྛབྦཱ. ཏེནཱཧ ‘‘ན སནྟཏོ ཨུཔཊྛཧིཾསཱུ’’ཏི. ན པགུཎཾ སམྨདེཝ ཝསཱིབྷཱཝསྶ ཨནཱཔཱདིཏཏྟཱ. སཉྙཱམནསིཀཱརཱཔཱིཏི ཏཏིཡཛ྄ཛྷཱནཱདྷིགམཱཡ པཝཏྟིཡམཱནཱ སཉྙཱམནསིཀཱརཱཔི ཧཱནབྷཱགིཡཱཝ ཨཧེསུཾ, ན ཝིསེསབྷཱགིཡཱ. སམྨཱ ཋཔེཧཱིཏི བཧིདྡྷཱ ཝིཀྑེཔཾ པཧཱཡ སམྨཱ ཨཛ྄ཛྷཏྟམེཝ ཙིཏྟཾ ཋཔེཧི. ཨེཀགྒཾ ཀརོཧཱིཏི ཏེནེཝ ཝིཀྑེཔཔཊིབཱཧནེན ཨཝིཧཏམཱནསཏཱཡ ཙིཏྟསམཱདྷཱནཝསེན ཨེཀགྒཾ ཀརོཧི. ཨཱརོཔེཧཱིཏི ཨཱིསཀམྤི བཧུམྤི ཨཔཏིཏཾ ཀཏྭཱ ཀམྨཊྛཱནཱརམྨཎེ ཨཱརོཔེཧི. དུཏིཡཨགྒསཱཝཀབྷཱུམིཡཱ པཱརིཔཱུརིཡཱ ཨཱཡསྨཱ མཧཱབྷིཉྙོ, ན ཡཐཱ ཏཐཱཏི ཨཱཧ ‘‘མཧཱབྷིཉྙཏནྟི ཚལ༹བྷིཉྙཏ’’ནྟི. ཨིམིནཱ ཨུཔཱཡེནཱཏི ཨིམིནཱ ‘‘ཨཐ ཁོ མཾ, ཨཱཝུསོ’’ཏིཨཱདིནཱ ཝུཏྟེན ཨུཔཱཡེན. ཝཌྜྷེཏྭཱཏི ཨུཏྟརི ཨུཏྟརི ཝིསེསབྷཱགིཡབྷཱཝཱཔཱདནེན སམཱདྷིཾ པཉྙཉྩ བྲཱུཧེཏྭཱ བྲཱུཧེཏྭཱ.

ཀོལིཏསུཏྟཝཎྞནཱ ནིཊྛིཏཱ.

༢. ཨུཔཏིསྶསུཏྟཝཎྞནཱ

༢༣༦. ཨཏིཨུལཱ༹རམྤི ¶ ¶ སཏྟཾ ཝཱ སངྑཱརཾ ཝཱ སནྡྷཱཡ ཝུཏྟཾ སབྦཏྠམེཝ སབྦསོ ཚནྡརཱགསྶ སུཔྤཧཱིནཏྟཱ. ཛཱནནཏྠཾ པུཙྪཏི སཏྠུགུཎཱནཾ ཨཏིཝིཡ ཨུལཱ༹རཏམབྷཱཝཏོ.

ཨུཔཏིསྶསུཏྟཝཎྞནཱ ནིཊྛིཏཱ.

༣. གྷཊསུཏྟཝཎྞནཱ

༢༣༧. པརིཝེཎགྒེནཱཏི པརིཝེཎབྷཱགེན. ཀེཙི ‘‘ཨེཀཝིཧཱརེཏི ཨེཀཙྪནྣེ ཨེཀསྨིཾ ཨཱཝཱསེ’’ཏི ཝདནྟི. ཏེཏི ཏེ དྭེཔི ཐེརཱ. པཱཊིཡེཀྐེསུ ཋཱནེསཱུཏི ཝིསུཾ ཝིསུཾ ཋཱནེསུ. ནིསཱིདནྟཱིཏི དིཝཱཝིཧཱརཾ ནིསཱིདནྟི. ཨོལཱ༹རིཀོ ནཱམ ཛཱཏོ པརིཏྟདྷམྨཱརམྨཎཏྟཱ ཏསྶ. ཏེཏི ཐེརོ བྷགཝཱ ཙ.

པརིཔུཎྞཝཱིརིཡོཏི ཙཏུཀིཙྩསཱདྷནཝསེན སམྤུཎྞཝཱིརིཡོ. པགྒཧིཏཝཱིརིཡོཏི ཨཱིསཀམྤི སངྐོཙཾ ཨནཱཔཛྫིཏྭཱ པཝཏྟིཏཝཱིརིཡོ. ཨུཔནིཀྑེཔནམཏྟསྶེཝཱཏི སམཱིཔེ ཋཔནམཏྟསྶེཝ.

ཙཏུབྷཱུམཀདྷམྨེསུ ལབྦྷམཱནཏྟཱ པཉྙཱཡ ‘‘ཙཏུབྷཱུམཀདྷམྨེ ཨནུཔཝིསིཏྭཱ ཋིཏཊྛེནཱ’’ཏི ཝུཏྟཾ. ལཀྑིཏབྦཊྛེན སམཱདྷི ཨེཝ སམཱདྷིལཀྑཎཾ. ཨེཝཾ ཝིཔསྶནཱལཀྑཎཾ ཝེདིཏབྦཾ. ཨཉྙམཉྙསྶཱཏི ཨཉྙསྶ ཨཉྙསྶ ནཱནཱལཀྑཎཱཏི ཝེདིཏབྦཾ. ཨཉྙསྶཱཏི ཨིཏརསྶ. དྷུརནྟི ཝཧིཏབྦབྷཱརཾ. དྭཱིསུཔི ཨེཏེསཱུཏི སམཱདྷིལཀྑཎཝིཔསྶནཱལཀྑཎེསུ སམྨཱསམྦུདྡྷོ ནིཔྥཏྟིཾ གཏོ.

གྷཊསུཏྟཝཎྞནཱ ནིཊྛིཏཱ.

༤. ནཝསུཏྟཝཎྞནཱ

༢༣༨. ཨབྷིཙེཏསི ནིསྶིཏཱ ཨཱབྷིཙེཏསིཀཱ. པཊིཔཀྑཝིདྷམནེན ཨབྷིཝིསིཊྛཾ ཙིཏྟཾ ཨབྷིཙིཏྟཾ. ཡསྨཱ ཛྷཱནཱནཾ ཏཾསམྤཡུཏྟཾ ཙིཏྟཾ ནིསྶཱཡ པཙྩཡོ ཧོཏིཡེཝ, ཏསྨཱ ‘‘ནིསྶིཏཱན’’ནྟི ཝུཏྟཾ. ནིཀཱམལཱབྷཱིཏི ཡཐིཙྪིཏལཱབྷཱི ¶ . ཡཐཱཔརིཙྪེདེནཱཏི ཡཐཱཀཏེན ཀཱལཔརིཙྪེདེན. ཝིཔུལལཱབྷཱིཏི ཨཔྤམཱཎལཱབྷཱི. ‘‘ཀསིར’’ནྟི ཧི པརིཏྟཾ ཝུཙྩཏི, ཏཔྤཊིཔཀྑེན ¶ ཨཀསིརཾ ཨཔྤམཱཎཾ. ཏེནཱཧ ‘‘པགུཎཛ྄ཛྷཱནོཏི ཨཏྠོ’’ཏི. སིཐིལམཱརབྦྷཱཏི སིཐིལཾ ཝཱིརིཡཱརམྦྷཾ ཀཏྭཱཏི ཨཏྠོཏི ཨཱཧ ‘‘སིཐིལཾ ཝཱིརིཡཾ པཝཏྟེཏྭཱ’’ཏི.

ནཝསུཏྟཝཎྞནཱ ནིཊྛིཏཱ.

༥. སུཛཱཏསུཏྟཝཎྞནཱ

༢༣༩. ཨཉྙཱནི རཱུཔཱནཱིཏི པརེསཾ རཱུཔཱནི. ཨཏིཀྐནྟརཱུཔོཏི ཨཏྟནོ རཱུཔསམྤཏྟིཡཱ རཱུཔསོབྷཱཡ ཨཏིཀྐམིཏྭཱ ཋིཏརཱུཔོ, སུཙིརམྤི ཝེལཾ ཨོལོཀེནྟསྶ ཏུཊྛིཨཱཝཧོ. དསྶནསྶ ཙཀྑུསྶ ཧིཏོཏི དསྶནཱིཡོ. པསཱདཾ ཨཱཝཧཏཱིཏི པཱསཱདིཀོ. ཚཝིཝཎྞསུནྡརཏཱཡཱཏི ཚཝིཝཎྞསྶ ཙེཝ སརཱིརསཎྛཱནསྶ ཙ སོབྷནབྷཱཝེན.

སུཛཱཏསུཏྟཝཎྞནཱ ནིཊྛིཏཱ.

༦. ལཀུཎྜཀབྷདྡིཡསུཏྟཝཎྞནཱ

༢༤༠. ཝིརཱུཔསརཱིརཝཎྞནྟི ཨསུནྡརཚཝིཝཎྞཉྩེཝ ཨསུནྡརསཎྛཱནཉྩ. པམཱཎཝསེནཱཏི སརཱིརཔྤམཱཎཝསེན. ཨིཙྪིཏིཙྪིཏནྟི ཨཏྟནཱ ཨིཙྪིཏིཙྪིཏཾ. མཧཱསཱརཛྫནྟི མཧནྟོ མངྐུབྷཱཝོ.

གུཎེ ཨཱཝཛྫེཏྭཱཏི ཨཏྟནཱ ཛཱནནཀནིཡཱམེན སཏྠུནོ ཀཱཡགུཎེ ཙ ཙཱརིཏྟགུཎེ ཙ ཨཱཝཛྫེཏྭཱ མནསི ཀཏྭཱ.

ཡོཛནཱཝཊྚནྟི ཡོཛནཔརིཀྑེཔཾ.

‘‘ཀཱཡསྨཱི’’ཏི གཱཐཱསུཁཏྠཾ ནིརནུནཱསིཀཾ ཀཏྭཱ ནིདྡེསོཏི ཝུཏྟཾ ‘‘ཀཱཡསྨི’’ནྟི. ཨཀཱརཎཾ ཀཱཡཔྤམཱཎནྟི སརཱིརཔྤམཱཎཾ ནཱམ ཨཔྤམཱཎཾ, སཱིལཱདིགུཎཱཝ པམཱཎནྟི ཨདྷིཔྤཱཡོ.

ལཀུཎྜཀབྷདྡིཡསུཏྟཝཎྞནཱ ནིཊྛིཏཱ.

༧. ཝིསཱཁསུཏྟཝཎྞནཱ

༢༤༡. པུརསྶ ¶ ཨེསཱཏི པོརཱི, ཙཱཏུརིཡཡུཏྟཏཱ. ཏེནཱཧ ‘‘པུརཝཱསཱིན’’ནྟིཨཱདི. སཱ པན ¶ དུཏཝིལམྦིཏཁལིཏཝསེན ཨཔྤསནྣལཱུཁཏཱདིདོསརཧིཏཱ ཧོཏཱིཏི ཨཱཧ ‘‘པུར…པེ… ཝཱཙཱཡཱ’’ཏི. ཨསནྡིདྡྷཱཡཱཏི མུཏྟཝཱཙཱཡ. ཏེནཱཧ ‘‘ཨཔལིབུདྡྷཱཡཱ’’ཏིཨཱདི. ན ཨེལཾ དོསཾ གལེཏཱིཏི ཨནེལགལཱ, ཨཝིརུཛ྄ཛྷནཝཱཙཱ. ཏེནཱཧ ‘‘ནིདྡོསཱཡཱ’’ཏི. ཙཏུསཙྩསྶ པཀཱསཀཱ, ན ཀདཱཙི སཙྩཝིམུཏྟཱཏི ཨཱཧ ‘‘ཙཏུསཙྩཔརིཡཱཔནྣཱཡཱ’’ཏི. ཏཱ ཧི ཙཏྟཱརི སཙྩཱནི པརིཙྪིཛྫ ཨཱཔཱདེནྟི པཊིཔཱདེནྟི པཝཏྟེནྟི. ཏེནཱཧ ‘‘ཙཏྟཱརི སཙྩཱནི ཨམུཉྩིཏྭཱ པཝཏྟཱཡཱ’’ཏི. དྷཛོ ནཱམ སབྦདྷམྨེཧི སམུསྶིཏཊྛེན.

ཝིསཱཁསུཏྟཝཎྞནཱ ནིཊྛིཏཱ.

༨. ནནྡསུཏྟཝཎྞྞནཱ

༢༤༢. ཨཱརཉྙིཀོཏིཨཱདཱིསུ ཨརཉྙཀཐཱསཱིསེན སེནཱསནཔཊིསཾཡུཏྟཱནཾ དྷུཏངྒཱནཾ, པིཎྜཔཱཏཀཐཱསཱིསེན པིཎྜཔཱཏཔཊིསཾཡུཏྟཱནཾ, པཾསུཀཱུལིཀསཱིསེན ཙཱིཝརཔཊིསཾཡུཏྟཱནཾ, ཏགྒཧཎེནེཝ ཝཱིརིཡནིསྶིཏདྷུཏངྒསྶ ཙ སམཱདཱཡ ཝཏྟནཾ དཱིཔིཏནྟི ཝེདིཏབྦཾ. ཨཱགཏེན བྷགཝཏཱ ཨཔརབྷཱགེ ཀཐིཏཾ.

ནནྡསུཏྟཝཎྞནཱ ནིཊྛིཏཱ.

༩. ཏིསྶསུཏྟཝཎྞནཱ

༢༤༣. བྷཎྜཀནྟི པཏྟཙཱིཝརཾ. ནིསཱིདིཡེཝ ཝཏྟསྶ ཨསིཀྑིཏཏྟཱ. ཏུཛྫནཏྠེན ཝཱཙཱ ཨེཝ སཏྟིཡོཏི ཨཱཧ ‘‘ཝཱཙཱསཏྟཱིཧཱི’’ཏི.

ཝཱཙཱཡ སནྣིཏོདཀེནཱཏི ཝཙནསངྑཱཏེན སམནྟཏོ ནིཙྩཾ ཀཏྭཱ ཨུཔཏུདནཏོ སནྣིཏུདཀེན. ཝིབྷཏྟིཨལོཔེན སོ ནིདྡེསོ. ཏེནཱཧ ‘‘ཝཙནཔཏོདེནཱ’’ཏི.

ཨུཙྩཀུལེ ཛཱཏི ཨེཏསྶཱཏི ཛཱཏིམཱ, བྲཧྨཛཱཏིཀོ ཨིསི. མཱཏངྒོཏི ཙཎྜཱལོ. ཏཏྠཱཏི ཀུམྦྷཀཱརསཱལཱཡཾ. ཨོཀཱསཾ ཡཱཙི ¶ ཀུམྦྷཀཱརཾ. མཧནྟཾ དིསྭཱ ཨཱཧ – ‘‘པཋམཏརཾ པཝིཊྛོ པབྦཛིཏོ’’ཏི. ཏཏྠེཝཱཏི ཏསྶཱཡེཝ སཱལཱཡ དྭཱརཾ ནིསྶཱཡ དྭཱརསམཱིཔེ. མེཏི མཡཱ. ཁམ མཡ྄ཧནྟི མཡ྄ཧཾ ཨཔརཱདྷཾ ཁམསྶུ. ཏེཏི ཏཡཱ. པུན ཏེཏི ཏཝ. གཎྷི ཨུགྒནྟུཾ ཨཔྤདཱནཝསེན. ཏེནཱཧ ‘‘ནཱསྶ ཨུགྒནྟུཾ ཨདཱསཱི’’ཏི. པབུཛ྄ཛྷིཾསཱུཏི ནིདྡཱཡ པབུཛ྄ཛྷིཾསུ པཀཏིཡཱ པབུཛ྄ཛྷནཝེལཱཡ ཨུཔགཏཏྟཱ.

ཚཝོཏི ¶ ནིཧཱིནོ. ཨནནྟམཱཡོཏི ཝིཝིདྷམཱཡོ མཱཡཱཝཱི.

སོཏི མཏྟིཀཱཔིཎྜོ. ‘‘སཏྟདྷཱ བྷིཛྫཱི’’ཏི ཨེཏྠཱཡམདྷིཔྤཱཡོ – ཡཾ ཏེན ཏཱཔསེན པཱརམིཏཱཔརིབྷཱཝནསམིདྡྷཱཧི ནཱནཱཝིཧཱརསམཱཔཏྟིཔརིཔཱུརིཏཱཧི སཱིལདིཊྛིསམྤདཱདཱིཧི སུསངྑཏསནྟཱནེ མཧཱཀརུཎཱདྷིཝཱསེ མཧཱསཏྟེ བོདྷིསཏྟེ ཨརིཡཱུཔཝཱདཀམྨཾ ཨབྷིསཔསངྑཱཏཾ ཕརུསཝཙནཾ པཝཏྟིཏཾ, ཏཾ མཧཱསཏྟསྶ ཁེཏྟཝིསེསབྷཱཝཏོ ཏསྶ ཙ ཨཛ྄ཛྷཱསཡཕརུསཏཱཡ དིཊྛདྷམྨཝེདནཱིཡཾ ཧུཏྭཱ སཙེ སོ མཧཱསཏྟཾ ན ཁམཱཔེཏི, ཏཾ ཀཀྑལ༹ཾ ཧུཏྭཱ ཝིཔཙྩནསབྷཱཝཾ ཛཱཏཾ, ཁམཱཔིཏེ པན མཧཱསཏྟེ པཡོགསམྤཏྟིཔཊིབཱཧིཏཏྟཱ ཨཝིཔཱཀདྷམྨཏཾ ཨཱཔཛྫཏི ཨཧོསིཀམྨབྷཱཝཏོ. ཨཡཉྷི ཨརིཡཱུཔཝཱདཔཱཔསྶ དིཊྛདྷམྨཝེདནཱིཡསྶ ཙ དྷམྨཏཱ. ཡཾ ཏཾ བོདྷིསཏྟེན སཱུརིཡུགྒམནནིཝཱརཎཾ ཀཏཾ, ཨཡཾ བོདྷིསཏྟེན དིཊྛོ ཨུཔཱཡོ. ཏེན ཧི ཨུབྦཱལ༹ྷཱ མནུསྶཱ བོདྷིསཏྟསྶ སནྟིཀེ ཏཱཔསཾ ཨཱནེཏྭཱ ཁམཱཔེསུཾ. སོཔི ཙ མཧཱསཏྟསྶ གུཎེ ཛཱནིཏྭཱ ཏསྨིཾ ཙིཏྟཾ པསཱདེསི. ཡཾ པནསྶ མཏྠཀེ མཏྟིཀཱཔིཎྜསྶ ཋཔནཾ ཏསྶ སཏྟདྷཱ ཕཱལནཾ ཀཏཾ, ཏཾ མནུསྶཱནཾ ཙིཏྟཱནུརཀྑཎཏྠཾ. ཨཉྙཐཱ ཧི ཨིམེ པབྦཛིཏཱ སམཱནཱ ཙིཏྟསྶ ཝསཾ ཝཏྟནྟི, ན པན ཙིཏྟམཏྟནོ ཝསེ ཝཏྟཱཔེནྟཱིཏི མཧཱསཏྟམྤི ཏེན སདིསཾ ཀཏྭཱ གཎྷེཡྻུཾ, ཏདསྶ ནེསཾ དཱིགྷརཏྟཾ ཨཧིཏཱཡ དུཀྑཱཡཱཏི. པཏིརཱུཔནྟི ཡུཏྟཾ.

ཏིསྶསུཏྟཝཎྞནཱ ནིཊྛིཏཱ.

༡༠. ཐེརནཱམཀསུཏྟཝཎྞནཱ

༢༤༤. ཨཏཱིཏེ ཁནྡྷཔཉྩཀེཏི ཨཏཱིཏེ ཨཏྟབྷཱཝེ. ཚནྡརཱགཔྤཧཱནེནཱཏི ཚནྡརཱགསྶ ཨཙྩནྟམེཝ ཛཧནེན. པཧཱིནཾ ནཱམ ཧོཏི ཨནཔེཀྑཔརིཙྩཱགཏོ. པཊིནིསྶཊྛཾ ནཱམ ཧོཏི སབྦསོ ཚཌྜིཏཏྟཱ. ཏཡོ ¶ བྷཝེཏི ཨིམིནཱ ཨུཔཱདིཎྞཀདྷམྨཱནཾཡེཝ གཧཎཾ. སབྦཱ ཁནྡྷཱཡཏནདྷཱཏུཡོ ཙཱཏི ཨིམིནཱ ཨུཔཱདིཎྞཱནམྤི ཨནུཔཱདིཎྞཱནམྤི དྭིདྷཱ པཝཏྟལོཀིཡདྷམྨཱནཾ གཧཎཾ ཨཝིསེསེཏྭཱ ཝུཏྟཏྟཱ. ཝིདིཏཾ པཱཀཊཾ ཀཏྭཱ ཋིཏཾ པརིཉྙཱབྷིསམཡཝསེན. ཏེསྭེཝཱཏི ཏེབྷཱུམཀདྷམྨེསུ ཨེཝ. ཨནུཔལིཏྟཾ ཨམཐིཏཾ ཨསཾཀིལིཊྛཾ ཏཎྷཱདིཊྛིསཾཀིལེསཱབྷཱཝཏོ. ཏདེཝ སབྦནྟི ཧེཊྛཱ ཏཱིསུཔི པདེསུ ཨིདྷ སབྦགྒཧཎེན གཧིཏཾ ཏེབྷཱུམཀཝཊྚཾ. ཛཧིཏྭཱཏི པཧཱནཱབྷིསམཡཝསེན. ཏཎྷཱ ཁཱིཡཏི ཨེཏྠཱཏི ཏཎྷཀྑཡསངྑཱཏེ ནིབྦཱནེ ཝིམུཏྟཾ. ཏམཧནྟི ཏཾ ཨུཏྟམཔུགྒལཾ ཨེཀཝིཧཱརིཾ བྲཱུམི ཏཎྷཱདུཏིཡསྶ ཨབྷཱཝཏོ. ཨེཏྠ ཙ པརིཉྙཱཔཧཱནཱབྷིསམཡཀཐནེན ཨིཏརམྤི ཨབྷིསམཡཾ ཨཏྠཏོ ཀཐིཏམེཝཱཏི དཊྛབྦཾ.

ཐེརནཱམཀསུཏྟཝཎྞནཱ ནིཊྛིཏཱ.

༡༡. མཧཱཀཔྤིནསུཏྟཝཎྞནཱ

༢༤༥. མཧཱཀཔྤིནོཏི ¶ པཱུཛཱཝཙནམེཏཾ ཡཐཱ ‘‘མཧཱམོགྒལླཱནོ’’ཏི. ཏཐཱརཱུཔནྟི ‘‘བུདྡྷོ དྷམྨོ’’ཏིཨཱདིཀཾ གུཎཝིསེསཝནྟཔཊིབདྡྷཾ. སཱསནནྟི དེསནྟརཏོ ཨཱགཏཝཙནཾ. ཛངྒྷཝཱཎིཛཱཏི ཛངྒྷཙཱརིནོ ཝཱཎིཛཱ. ཀིཉྩི སཱསནནྟི ཨཔུབྦཔཝཏྟིདཱིཔཀཾ ཀིཉྩི ཝཙནནྟི པུཙྪི. པཱིཏི ཨུཔྤཛྫི ཡཐཱ ཏཾ སུཙིརཾ ཀཏཱབྷིནཱིཧཱརཏཱཡ པརིཔཀྐཉཱཎསྶ. ཨཔརིམཱཎཾ གུཎསྶ ཨཔརིམཱཎཏོ སབྦཉྙུགུཎཔརིདཱིཔནཏོ, སེསརཏནདྭཡེ ནིཡྻཱནིཀབྷཱཝདཱིཔནཏོ དིཊྛིསཱིལསཱམཉྙེན སཾཧཏབྷཱཝདཱིཔནཏོཏི ཝཏྟབྦཾ. ཡཐཱནུསིཊྛཾ པཊིཔཛྫམཱནེ ཨཔཱཡདུཀྑཏོ སཾསཱརདུཀྑཏོ ཙ ཨཔཏནྟེ དྷཱརེཏཱིཏི དྷམྨོ. སུཔརིསུདྡྷདིཊྛིསཱིལསཱམཉྙེན སཾཧཏོཏི སངྒྷོཏི. རཏནཏྠོ པན ཏིཎྞམྤི སདིསོ ཨེཝཱཏི.

ནཝསཏསཧསྶཱནི ཨདཱསི དེཝཱི. ཏུམྷེཏི རཱཛིནིཾ གཱརཝེན བཧུཝཙནེན ཝདཏི. རཱགོཏི ཨནུགཙྪནྟརཱགོ.

ཛནིཏེཏི ཀམྨཀིལེསེཧི ནིབྦཏྟིཏེ. ཀམྨཀིལེསེཧི པཛཱཏཏྟཱ པཛཱཏི པཛཱསདྡོ ཛནིཏསདྡེན སམཱནཏྠོཏི ཨཱཧ – ‘‘ཛནིཏེ, པཛཱཡཱཏི ཨཏྠོ’’ཏི. ཨཊྛཧི ཝིཛྫཱཧཱིཏི ཨམྦཊྛསུཏྟེ (དཱི. ནི. ༡.༢༧༨) ཨཱགཏནཡེན. ཏཏྠ ཧི ཝིཔསྶནཱཉཱཎམནོམཡིདྡྷཱིཧི སཧ ཚ ཨབྷིཉྙཱ ‘‘ཨཊྛ ཝིཛྫཱ’’ཏི ཨཱགཏཱ ¶ . ཏཔཏི པཊིཔཀྑཝིདྷམནེན ཝིཛྫོཏཏི, ཏཾ སཱུརིཡསྶ ཝིརོཙནནྟི ཨཱཧ – ‘‘ཏཔཏཱིཏི ཝིརོཙཏཱི’’ཏི. ཛྷཱནཾ སམཱཔཛྫིཏྭཱ སམཱཧིཏེན ཙིཏྟེན ཝིཔསྶནཾ ཝཌྜྷེཏྭཱ ཕལསམཱཔཏྟིཾ སམཱཔཛྫིཏྭཱ ནིསིནྣོཏི ཨཱཧ – ‘‘དུཝིདྷེན ཛྷཱནེན ཛྷཱཡམཱནོ’’ཏི. སབྦམངྒལགཱཐཱཏི སབྦམངྒལཱཝིརོདྷཱི གཱཐཱཏི ཝདནྟི. ཏཐཱ ཧི ཝདནྟི –

‘‘མངྒལཾ བྷགཝཱ བུདྡྷོ, དྷམྨོ སངྒྷོ ཙ མངྒལཾ;

སབྦེསམྤི ཙ སཏྟཱནཾ, ས པུཉྙཝིཏམངྒལ’’ནྟི.

པཱུཛཾ ཀཱརེཏྭཱ ཨེཀཾ ཨགཱརིཀདྷམྨཀཐིཀཾ ཨུཔཱསཀཾ ཨཱཧ. ཨེཏྠ ཙ ‘‘ཛྷཱཡཱི ཏཔཏཱི’’ཏི ཨིམིནཱ ཨཱརམྨཎཱུཔནིཛ྄ཛྷཱནཱནཾ གཧིཏཏྟཱ དྷམྨརཏནཾ གཧིཏམེཝ. ‘‘བྲཱཧྨཎོ’’ཏི ཨིམིནཱ སངྒྷརཏནཾ གཧིཏམེཝ. བུདྡྷརཏནཾ པན སརཱུཔེནེཝ གཧིཏནྟི.

མཧཱཀཔྤིནསུཏྟཝཎྞནཱ ནིཊྛིཏཱ.

༡༢. སཧཱཡཀསུཏྟཝཎྞནཱ

༢༤༦. སམྨཱ ¶ སཾསནྡནཝསེན ཨེཏི པཝཏྟཏཱིཏི སམེཏི, སམྨཱདིཊྛིཨཱདི. སམྨཱ ཙིརརཏྟཾ ཙིརཀཱལཾ སམེཏི ཨེཏེསཾ ཨཏྠཱིཏི ཙིརརཏྟཾསམེཏིཀཱ. ཏེནཱཧ ‘‘དཱིགྷརཏྟ’’ནྟིཨཱདི. ཨིདཱནི ཨིམེསནྟི ཨེཏརཧི ཨེཏེསཾ. ཨཡཾ སཱསནདྷམྨོ ཨཛ྄ཛྷཱསཡཏོ པཡོགཏོ ཙ སམྨཱ སཾསནྡཏི སམེཏི, ཏསྨཱ མཛ྄ཛྷེ བྷིནྣཾ ཝིཡ སམམེཝ ན ཝིསདིསཾ. ཀིཉྩ ཏཏོ ཨེཝ བུདྡྷེན བྷགཝཏཱ པཝེདིཏདྷམྨཝིནཡེ ཨེཏེསཾ པཊིཔཏྟིསཱསནདྷམྨོ སོབྷཏི ཝིརོཙཏཱིཏི ཨཏྠོ. ཨརིཡཔྤཝེདིཏེཏི ཨརིཡེན སམྨཱསམྦུདྡྷེན སམྨདེཝ པཀཱསིཏེ ཨརིཡདྷམྨེ. སམྨདེཝ སམུཙྪེདཔཊིཔྤསྶདྡྷིཝིནཡཱནཾ ཝསེན སུཊྛུ ཝིནཱིཏཱ སབྦཀིལེསདརཐཔརིལཱ༹ཧཱནཾ ཝཱུཔསམེན.

སཧཱཡཀསུཏྟཝཎྞནཱ ནིཊྛིཏཱ.

སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ

བྷིཀྑུསཾཡུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

ནིཊྛིཏཱ ཙ སཱརཏྠཔྤཀཱསིནིཡཱ

སཾཡུཏྟནིཀཱཡ-ཨཊྛཀཐཱཡ ནིདཱནཝགྒཝཎྞནཱ.