📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

སཾཡུཏྟནིཀཱཡེ

ཁནྡྷཝགྒཊཱིཀཱ

༡. ཁནྡྷསཾཡུཏྟཾ

༡. ནཀུལཔིཏུཝགྒོ

༡. ནཀུལཔིཏུསུཏྟཝཎྞནཱ

༡. བྷགྒཱ ¶ ¶ ནཱམ ཛཱནཔདིནོ རཱཛཀུམཱརཱ. ཏེསཾ ནིཝཱསོ ཨེཀོཔི ཛནཔདོ རུལ༹ྷཱིཝསེན ‘‘བྷགྒཱ’’ཏྭེཝ ཝུཙྩཏཱིཏི ཀཏྭཱ ཝུཏྟཾ ‘‘ཨེཝཾནཱམཀེ ཛནཔདེ’’ཏི, ཨེཝཾ བཧུཝཙནཝསེན ལདྡྷནཱམེ’’ཏི ཨཏྠོ. ཏསྨིཾ ཝནསཎྜེཏི ཡོ པན ཝནསཎྜོ པུབྦེ མིགཱནཾ ཨབྷཡཏྠཱཡ དིནྣོ, ཏསྨིཾ ཝནསཎྜེ. ཡསྨཱ སོ གཧཔཏི ཏསྨིཾ ནགརེ ‘‘ནཀུལཔིཏཱ’’ཏི པུཏྟསྶ ཝསེན པཉྙཱཡིཏྠ, ཏསྨཱ ཝུཏྟཾ ‘‘ནཀུལཔིཏཱ’’ཏི ནཀུལསྶ ནཱམ དཱརཀསྶ པིཏཱཏི ཨཏྠོ. བྷརིཡཱཔིསྶ ‘‘ནཀུལམཱཏཱ’’ཏི པཉྙཱཡིཏྠ.

ཛརཱཛིཎྞོཏི ¶ ཛརཱཝསེན ཛིཎྞོ, ན བྱཱདྷིཨཱདཱིནཾ ཝསེན ཛིཎྞོ. ཝཡོཝུཌྜྷོཏི ཛིཎྞཏྟཱ ཨེཝ ཝཡོཝུཌྜྷིཔྤཏྟིཡཱ ཝུཌྜྷོ, ན སཱིལཱདིཝུཌྜྷིཡཱ. ཛཱཏིཡཱ མཧནྟཏཱཡ ཙིརརཏྟཏཱཡ ཛཱཏིམཧལླཀོ. ཏིཡདྡྷགཏོཏི པཋམོ མཛ྄ཛྷིམོ པཙྪིམོཏི ཏཡོ ཨདྡྷེ གཏོ. ཏཏྠ པཋམཾ དུཏིཡཉྩ ཨཏིཀྐནྟཏྟཱ པཙྪིམཾ ཨུཔགཏཏྟཱ ཝཡོཨནུཔྤཏྟོ. ཨཱཏུརཀཱཡོཏི དུཀྑཝེདནཱཔཝིསཏཱཡ ཨནསྶཱདཀཱཡོ. གེལཉྙཾ པན དུཀྑགཏིཀནྟི ¶ ‘‘གིལཱནཀཱཡོ’’ཏི ཝུཏྟཾ. ཏཐཱ ཧི སཙྩཝིབྷངྒེ (ཝིབྷ. ༡༩༠ ཨཱདཡོ) དུཀྑསཙྩནིདྡེསེ དུཀྑགྒཧཎེནེཝ གཧིཏཏྟཱ བྱཱདྷི ན ནིདྡིཊྛོ. ནིཙྩཔགྒྷརཎཊྛེནཱཏི སབྦདཱ ཨསུཙིཔགྒྷརཎབྷཱཝེན. སོ པནསྶ ཨཱཏུརབྷཱཝེནཱཏི ཨཱཧ – ‘‘ཨཱཏུརཾཡེཝ ནཱམཱ’’ཏི. ཝིསེསེནཱཏི ཨདྷིཀབྷཱཝེན. ཨཱཏུརཏཱིཏི ཨཱཏུརོ. སངྒཱམཔྤཏྟོ སནྟཏྟཀཱཡོ. ཛརཱཡ ཨཱཏུརཏཱ ཛརཱཏུརཏཱ. ཀུསལཔཀྑཝཌྜྷནེན མནོ བྷཱཝེནྟཱིཏི མནོབྷཱཝནཱིཡཱ. མནསཱ ཝཱ བྷཱཝནཱིཡཱ སམྦྷཱཝནཱིཡཱཏི མནོབྷཱཝནཱིཡཱ. ཨནུསཱསཏཱུཏི ཨནུ ཨནུ སཱསཏཱུཏི ཨཡམེཏྠ ཨཏྠོཏི ཨཱཧ – ‘‘པུནཔྤུནཾ སཱསཏཱུ’’ཏི. ཨཔརཱཔརཾ པཝཏྟིཏཾ ཧིཏཝཙནཾ. ཨནོཏིཎྞེ ཝཏྠུསྨིཾ ཡོ ཨེཝཾ ཀརོཏི, ཏསྶ ཨཡཾ གུཎོ དོསོཏི ཝཙནཾ. ཏནྟིཝསེནཱཏི ཏནྟིསནྣིསྶཡེན ཨཡཾ ཨནུསཱསནཱི ནཱམ. པཝེཎཱིཏི ཏནྟིཡཱ ཨེཝ ཝེཝཙནཾ.

ཨཎྜཾ ཝིཡ བྷཱུཏོཏི ཨདྷིཀོཔམཱ ཀཱཡསྶ ཨཎྜཀོསཏོ ཨབལདུབྦལབྷཱཝཏོ. ཏེནཱཧ ‘‘ཨཎྜཾ ཧཱི’’ཏིཨཱདི. བཱལོཡེཝ ཏཱདིསཏྟབྷཱཝསམངྒཱི མུཧུཏྟམྤི ཨཱརོགྱཾ པཊིཛཱནནྟོ.

ཝིཔྤསནྣཱནཱིཏི པཀཏིམཱཀཱརཾ ཨཏིཀྐམིཏྭཱ ཝིསེསེན པསནྣཱནི. ཏེནཱཧ – ‘‘སུཨུ པསནྣཱནཱི’’ཏི. པསནྣཙིཏྟསམུཊྛིཏརཱུཔསམྤདཱཧི ཏཱཧི ཏསྶ མུཁཝཎྞསྶ པཱརིསུདྡྷཱིཏི ཨཱཧ – ‘‘པརིསུདྡྷོཏི ནིདྡོསོ’’ཏི. ཏེནེཝཱཧ ‘‘ནིརུཔཀྐིལེསཏཱཡཱ’’ཏིཨཱདི. ཨེཏེནེཝསྶིནྡྲིཡཝིཔྤསནྣཏཱཀཱརཎམྤི སཾཝཎྞིཏནྟི དཊྛབྦཾ. ཨེས མུཁཝཎྞོ. ནཡགྒཱཧཔཉྙཱ ཀིརེསཱཏི ཨིདཾ ཨནཱཝཛྫནཝསེནེཝ ཝུཏྟབྷཱཝཾ སནྡྷཱཡཱཧ.

ཡཾ ནེཝ པུཏྟསྶཱཏིཨཱདི ‘‘ཨོཝདཏུ ནོ, བྷནྟེ, བྷགཝཱ ཡཐཱ མཡཾ པརལོཀེཔི ཨཉྙམཉྙཾ སམཱགཙྪེཡྻཱམཱ’’ཏི ཝུཏྟཝཙནཾ སནྡྷཱཡ ཝུཏྟམེཝ. མདྷུརདྷམྨདེསནཱཡེཝ སཏྠུ སམྨུཁཱ པཊིལདྡྷཱ, ཏསྶ ཨཏྟནོ པེམགཱརཝགཧིཏཏྟཱ ‘‘ཨམཏཱབྷིསེཀོ’’ཏི ཝེདིཏབྦོ.

ཨིདཾ པདདྭཡཾ. ཨཱརཀཏྟཱ ཀིལེསེཧི མགྒེན སམུཙྪིནྣཏྟཱ. ཨནཡེཏི ཨཝཌྜྷིཡཾ, ཨནཏྠེཏི ཨཏྠོ. ཨནཡེ ཝཱ ཨནུཔཱཡེ. ན ཨིརིཡནཏོ ཨཝཏྟནཏོ. ཨཡེཏི ཝཌྜྷིཡཾ ཨཏྠེ ཨུཔཱཡེ ཙ. ཨརཎཱིཡཏོཏི པཡིརུཔཱསིཏབྦཏོ. ནིརུཏྟིནཡེན པདསིདྡྷི ཝེདིཏབྦཱ པུརིམེསུ ཨཏྠཝིཀཔྤེསུ ¶ , པཙྪིམེ ¶ པན སདྡསཏྠཝསེནཔི. ཡདིཔི ཨརིཡསདྡོ ‘‘ཡེ ཧི ཝོ ཨརིཡཱ པརིསུདྡྷཀཱཡཀམྨནྟཱ’’ཏིཨཱདཱིསུ (མ. ནི. ༡.༣༥) ཝིསུདྡྷཱསཡཔཡོགེསུ པུཐུཛྫནེསུཔི ཝཊྚཏི, ཨིདྷ པན ཨརིཡམགྒཱདྷིགམེན སབྦལོཀུཏྟརབྷཱཝེན ཙ ཨརིཡབྷཱཝོ ཨདྷིཔྤེཏོཏི དསྶེནྟོ ཨཱཧ – ‘‘བུདྡྷཱ ཙཱ’’ཏིཨཱདི. ཏཏྠ པཙྩེཀབུདྡྷཱ ཏཐཱགཏསཱཝཀཱ ཙ སཔྤུརིསཱཏི ཨིདཾ ‘‘ཨརིཡཱ སཔྤུརིསཱ’’ཏི ཨིདྷ ཝུཏྟཔདཱནཾ ཨཏྠཾ ཨསངྐརཏོ དསྶེཏུཾ ཝུཏྟཾ. ཡསྨཱ པན ནིཔྤརིཡཱཡཏོ ཨརིཡསཔྤུརིསབྷཱཝཱ ཨབྷིནྣསབྷཱཝཱ, ཏསྨཱ ‘‘སབྦེཝ ཝཱ’’ཏིཨཱདི ཝུཏྟཾ.

ཨེཏྟཱཝཏཱ ཧི བུདྡྷསཱཝཀོ ཝུཏྟོ, ཏསྶ ཧི ཨེཀནྟེན ཀལྱཱཎམིཏྟོ ཨིཙྪིཏབྦོ པརཏོ གྷོསམནྟརེན པཋམམགྒསྶ ཨནུཔྤཛྫནཏོ. ཝིསེསཏོ ཙསྶ བྷགཝཱཝ ‘‘ཀལྱཱཎམིཏྟོ’’ཏི ཨདྷིཔྤེཏོ. ཝུཏྟཉྷེཏཾ ‘‘མམཉྷི, ཨཱནནྡ, ཀལྱཱཎམིཏྟཾ ཨཱགམྨ ཛཱཏིདྷམྨཱ སཏྟཱ ཛཱཏིཡཱ པརིམུཙྩནྟཱི’’ཏིཨཱདི (སཾ. ནི. ༡.༡༢༩; ༥.༢). སོ ཨེཝ ཙ ཨཝེཙྩཔསཱདཱདྷིགམེན དལ༹ྷབྷཏྟི ནཱམ. ཝུཏྟམྤི ཙེཏཾ ‘‘ཡཾ མཡཱ སཱཝཀཱནཾ སིཀྑཱཔདཾ པཉྙཏྟཾ, ཏཾ མམ སཱཝཀཱ ཛཱིཝིཏཧེཏུཔི ནཱཏིཀྐམནྟཱི’’ཏི (ཨུདཱ. ༤༥; ཙཱུལ༹ཝ. ༣༨༥). ཀཏཉྙུཏཱདཱིཧི པཙྩེཀབུདྡྷབུདྡྷཱཏི ཨེཏྠ ཀཏཾ ཛཱནཱཏཱིཏི ཀཏཉྙཱུ. ཀཏཾ ཝིདིཏཾ པཱཀཊཾ ཀརོཏཱིཏི ཀཏཝེདཱི. པཙྩེཀབུདྡྷཱ ཧི ཨནེཀེསུཔི ཀཔྤསཏསཧསྶེསུ ཀཏཾ ཨུཔཀཱརཾ ཛཱནནྟི, ཀཏཉྩ པཱཀཊཾ ཀརོནྟི སཏིཛནནཨཱམིསཔཊིགྒཧཎཱདིནཱ. ཏཐཱ སཾསཱརདུཀྑདུཀྑིཏསྶ སཀྐཙྩཾ ཀརོནྟི ཀིཙྩཾ, ཡཾ ཨཏྟནཱ ཀཱཏུཾ སཀྐཱ. སམྨཱསམྦུདྡྷོ པན ཀཔྤཱནཾ ཨསངྑྱེཡྻསཧསྶེསུཔི ཀཏཾ ཨུཔཀཱརཾ མགྒཕལཱནཾ ཨུཔནིསྶཡཉྩ ཛཱནནྟི, པཱཀཊཉྩ ཀརོནྟི. སཱིཧོ ཝིཡ ཙ ཨེཝཾ སབྦཏྠ སཀྐཙྩམེཝ དྷམྨདེསནཾ ཀརོནྟེན བུདྡྷཀིཙྩཾ ཀརོནྟི. ཡཱཡ པཊིཔཏྟིཡཱ ཨརིཡཱ དིཊྛཱ ནཱམ ཧོནྟི, ཏསྶཱ ཨཔྤཊིཔཛྫནཾ, ཏཏྠ ཙ ཨཱདརཱབྷཱཝོ ཨརིཡཱནཾ ཨདསྶནསཱིལཏཱ, ན ཙ དསྶནེ སཱདྷུཀཱརིཏཱཏི ཝེདིཏབྦཱ. ཙཀྑུནཱ ཨདསྶཱཝཱིཏི ཨེཏྠ ཙཀྑུ ནཱམ ན མཾསཙཀྑུ ཨེཝ, ཨཐ ཁོ དིབྦཙཀྑུཔཱིཏི ཨཱཧ ‘‘དིབྦཙཀྑུནཱ ཝཱ’’ཏི. ཨརིཡབྷཱཝོཏི ཡེཧི ཡོགཏོ ‘‘ཨརིཡཱ’’ཏི ཝུཙྩནྟི, ཏེ མགྒཕལདྷམྨཱ དཊྛབྦཱ.

ཏཏྲཱཏི ཉཱཎདསྶནསྶེཝ དསྶནབྷཱཝེ. ཝཏྠཱུཏི ཨདྷིཔྤེཏཏྠཉཱཔནཀཱརཎཾ. ཨེཝཾ ཝུཏྟེཔཱིཏི ཨེཝཾ ཨཉྙཱཔདེསེན ཨཏྟུཔནཱཡིཀཾ ཀཏྭཱ ¶ ཝུཏྟེཔི. དྷམྨནྟི ལོཀུཏྟརདྷམྨཾ, ཙཏུསཙྩདྷམྨཾ ཝཱ. ཨརིཡཀརདྷམྨཱ ཨནིཙྩཱནུཔསྶནཱདཡོ, ཝིཔསྶིཡམཱནཱ ཝཱ ཨནིཙྩཱདཡོ, ཙཏྟཱརི ཝཱ ཨརིཡསཙྩཱནི.

ཨཝིནཱིཏོཏི ¶ ན ཝིནཱིཏོ ཨདྷིསཱིལསིཀྑཱདཱིནཾ ཝསེན ན སིཀྑིཏོ. ཡེསཾ སཾཝརཝིནཡཱདཱིནཾ ཨབྷཱཝེན ཨཡཾ ‘‘ཨཝིནཱིཏོ’’ཏི ཝུཙྩཏི, ཏེ ཏཱཝ དསྶེཏུཾ ‘‘དུཝིདྷོ ཝིནཡོ ནཱམཱ’’ཏིཨཱདིམཱཧ. ཏཏྠ སཱིལསཾཝརོཏི པཱཏིམོཀྑསཾཝརོ ཝེདིཏབྦོ, སོ ཙ ཨཏྠཏོ ཀཱཡིཀཝཱཙསིཀོ ཨཝཱིཏིཀྐམོ. སཏིསཾཝརོཏི ཨིནྡྲིཡཱརཀྑཱ, སཱ ཙ ཏཐཱཔཝཏྟཱ སཏིཡེཝ. ཉཱཎསཾཝརོཏི ‘‘སོཏཱནཾ སཾཝརཾ བྲཱུམཱི’’ཏི (སུ. ནི. ༡༠༤༡) ཝཏྭཱ ‘‘པཉྙཱཡེཏེ པིདྷཱིཡརེ’’ཏི (སུ. ནི. ༡༠༤༡) ཝཙནཏོ སོཏསངྑཱཏཱནཾ ཏཎྷཱདིཊྛིདུཙྩརིཏཨཝིཛྫཱཨཝསིཊྛཀིལེསཱནཾ སཾཝརོ པིདཧནཾ སམུཙྪེདཉཱཎནྟི ཝེདིཏབྦཾ. ཁནྟིསཾཝརོཏི ཨདྷིཝཱསནཱ, སཱ ཙ ཏཐཱཔཝཏྟཱ ཁནྡྷཱ, ཨདོསོ ཝཱ, ‘‘པཉྙཱ’’ཏི ཀེཙི ཝདནྟི. ཝཱིརིཡསཾཝརོ ཀཱམཝིཏཀྐཱདཱིནཾ ཝིནོདནཝསེན པཝཏྟཾ ཝཱིརིཡམེཝ. ཏེན ཏེན ཨངྒེན ཏསྶ ཏསྶ ཨངྒསྶ པཧཱནཾ ཏདངྒཔྤཧཱནཾ. ཝིཀྑམྦྷནཝསེན པཧཱནཾ ཝིཀྑམྦྷནཔྤཧཱནཾ. སེསཔདཏྟཡེཔི ཨེསེཝ ནཡོ.

ཨིམིནཱ པཱཏིམོཀྑསཾཝརེནཱཏིཨཱདི སཱིལསཾཝརཱདཱིནཾ ཝིཝརཎཾ. ཏཏྠ སམུཔེཏོཏི ཨིཏི-སདྡོ ཨཱདིཨཏྠོ. ཏེན ‘‘ཨུཔགཏོ’’ཏིཨཱདིནཱ ཝིབྷངྒེ (ཝིབྷ. ༥༡༡) ཨཱགཏཾ སཾཝརཝིབྷངྒཾ དསྶེཏི. ཀཱཡདུཙྩརིཏཱདཱིནནྟི དུསྶཱིལྱསངྑཱཏཱནཾ ཀཱཡཝཙཱིདུཙྩརིཏཱདཱིནཾ མུཊྛསཙྩསངྑཱཏསྶ པམཱདསྶ, ཨབྷིཛ྄ཛྷཱདཱིནཾ ཝཱ ཨཀྑནྟིཨཉྙཱཎཀོསཛྫཱནཉྩ. སཾཝརཎཏོཏི པིདཧནཏོ, ཝིནཡནཏོཏི ཀཱཡཝཱཙཱཙིཏྟཱནཾ ཝིརཱུཔཔཝཏྟིཡཱ ཝིནཡནཏོ, ཀཱཡདུཙྩརིཏཱདཱིནཾ ཝཱ ཨཔནཡནཏོ, ཀཱཡཱདཱིནཾ ཝཱ ཛིམྷཔཝཏྟིཾ ཝིཙྪིནྡིཏྭཱ ཨུཛུཀནཡནཏོཏི ཨཏྠོ. པཙྩཡསམཝཱཡེ ཨུཔྤཛྫནཱརཧཱནཾ ཀཱཡདུཙྩརིཏཱདཱིནཾ ཏཐཱ ཏཐཱ ཨནུཔྤཱདནམེཝ སཾཝརཎཾ ཝིནཡནཉྩ ཝེདིཏབྦཾ.

ཡཾ པཧཱནནྟི སམྦནྡྷོ. ‘‘ནཱམརཱུཔཔརིཙྪེདཱདཱིསུ ཝིཔསྶནཱཉཱཎེསཱུ’’ཏི ཀསྨཱ ཝུཏྟཾ? ནནུ ནཱམརཱུཔཔརིཙྪེདཔཙྩཡཔརིགྒཧཀངྑཱཝིཏརཎཱནི ན ཝིཔསྶནཱཉཱཎཱནི སམྨསནཱཀཱརེན ཨཔྤཝཏྟནཏོ? སཙྩམེཏཾ, ཝིཔསྶནཱཉཱཎསྶ པན ཨདྷིཊྛཱནབྷཱཝཏོ ཨེཝཾ ཝུཏྟཾ. ནཱམརཱུཔམཏྟམིདཾ, ‘‘ནཏྠི ཨེཏྠ ཨཏྟཱ ཝཱ ཨཏྟནིཡཾ ¶ ཝཱ’’ཏི ཨེཝཾ པཝཏྟཉཱཎཾ ནཱམརཱུཔཝཝཏྠཱནཾ. སཏི ཝིཛྫམཱནེ ཁནྡྷཔཉྩཀསངྑཱཏེ ཀཱཡེ, སཡཾ ཝཱ སཏཱི ཏསྨིཾ ཀཱཡེ དིཊྛི སཀྐཱཡདིཊྛི, སཱ ཙ ‘‘རཱུཔཾ ཨཏྟཏོ སམནུཔསྶཏཱི’’ཏི ཨེཝཾ པཝཏྟཱ ཨཏྟདིཊྛི. ཏསྶ ནཱམརཱུཔསྶ ཀམྨཱཝིཛྫཱདིཔཙྩཡཔརིགྒཎྷནཉཱཎཾ པཙྩཡཔརིགྒཧོ. ‘‘ནཏྠི ཧེཏུ, ནཏྠི པཙྩཡོ སཏྟཱནཾ སཾཀིལེསཱཡཱ’’ཏིཨཱདིནཡཔྤཝཏྟཱ ཨཧེཏུདིཊྛི. ‘‘ཨིསྶརཔུརིསཔཛཱཔཏིཔཀཏིཨཎུཀཱལཱདཱིཧི ལོཀོ པཝཏྟཏི ནིཝཏྟཏི ཙཱ’’ཏི ཏཐཱ ཏཐཱ པཝཏྟཱ དིཊྛི ཝིསམཧེཏུདིཊྛི. ཏསྶེཝཱཏི པཙྩཡཔརིགྒཧསྶེཝ. ཀངྑཱཝིཏརཎེནཱཏི ཡཐཱ ཨེཏརཧི ནཱམརཱུཔསྶ ཀམྨཱདིཔཙྩཡཏོ ཨུཔྤཏྟི, ཨེཝཾ ཨཏཱིཏེ ཨནཱགཏེཔཱིཏི ཏཱིསུ ཀཱལེསུ ཝིཙིཀིཙྪཱཔནཡནཉཱཎེན. ཀཐཾཀཐཱིབྷཱཝསྶཱཏི ‘‘ཨཧོསིཾ ནུ ཁོ ཨཧཾ ¶ ཨཏཱིཏམདྡྷཱན’’ནྟིཨཱདིནཡཔཝཏྟཱཡ (མ. ནི. ༡.༡༨; སཾ. ནི. ༢.༢༠) སཾསཡཔྤཝཏྟིཡཱ. ཀལཱཔསམྨསནེནཱཏི ‘‘ཡཾ ཀིཉྩི རཱུཔཾ ཨཏཱིཏཱནཱགཏཔཙྩུཔྤནྣ’’ནྟིཨཱདིནཱ (སཾ. ནི. ༣.༤༨-༤༩) ཁནྡྷཔཉྩཀཾ ཨེཀཱདསསུ ཨོཀཱསེསུ པཀྑིཔིཏྭཱ སམྨསནཝསེན པཝཏྟེན ཝིཔསྶནཱཉཱཎེན. ཨཧཾ མམཱཏི གཱཧསྶཱཏི ‘‘ཨཏྟཱ ཨཏྟནིཡ’’ནྟི གཧཎསྶ. མགྒཱམགྒཝཝཏྠཱནེནཱཏི མགྒཱམགྒཉཱཎཝིསུདྡྷིཡཱ. ཨམགྒེ མགྒསཉྙཱཡཱཏི ཨམགྒེ ཨོབྷཱསཱདིཀེ ‘‘མགྒོ’’ཏི ཨུཔྤནྣསཉྙཱཡ. ཡསྨཱ སམྨདེཝ སངྑཱརཱནཾ ཨུདཡཾ པསྶནྟོ ‘‘ཨེཝམེཏེ སངྑཱརཱ ཨནུརཱུཔཀཱརཎཏོ ཨུཔྤཛྫནྟི, ན པན ཨུཙྪིཛྫནྟཱི’’ཏི གཎྷཱཏི, ཏསྨཱ ཝུཏྟཾ ‘‘ཨུདཡདསྶནེན ཨུཙྪེདདིཊྛིཡཱ’’ཏི. ཡསྨཱ པན སངྑཱརཱནཾ ཝཡཾ ‘‘ཡདིཔིམེ སངྑཱརཱ ཨཝིཙྪིནྣཱ ཝཏྟནྟི, ཨུཔྤནྣུཔྤནྣཱ པན ཨཔྤཊིསནྡྷིཀཱ ནིརུཛ྄ཛྷནྟེཝཱ’’ཏི པསྶཏོ ཀུཏོ སསྶཏགྒཱཧོ. ཏསྨཱ ཝུཏྟཾ ‘‘ཝཡདསྶནེན སསྶཏདིཊྛིཡཱ’’ཏི. བྷཡདསྶནེནཱཏི བྷཡཏཱུཔཊྛཱནཉཱཎེན. སབྷཡེཏི སབྦབྷཡཱནཾ ཨཱཀརབྷཱཝཏོ སཀལདུཀྑཝཱུཔསམསངྑཱཏསྶ པརམསྶཱསསྶ པཊིཔཀྑབྷཱཝཏོ ཙ སབྷཡེ ཁནྡྷཔཉྩཀེ. ཨབྷཡསཉྙཱཡཱཏི ‘‘ཨབྷཡཾ ཁེམ’’ནྟི ཨུཔྤནྣསཉྙཱཡ. ཨསྶཱདསཉྙཱ ནཱམ པཉྩུཔཱདཱནཀྑནྡྷེསུ ཨསྶཱདནཝསེན པཝཏྟསཉྙཱ, ཡོ ‘‘ཨཱལཡཱབྷིནིཝེསོ’’ཏིཔི ཝུཙྩཏི. ཨབྷིརཏིསཉྙཱ ཏཏྠེཝ ཨབྷིརམཎཝསེན པཝཏྟསཉྙཱ, ཡཱ ‘‘ནནྡཱི’’ཏིཔི ཝུཙྩཏི. ཨམུཙྩིཏུཀཱམཏཱ ཨཱདཱནཾ. ཨནུཔེཀྑཱ སངྑཱརེཧི ཨནིབྦིནྡནཾ, སཱལཡཏཱཏི ཨཏྠོ. དྷམྨཊྛིཏིཡཾ པཊིཙྩསམུཔྤཱདེ. པཊིལོམབྷཱཝོ སསྶཏུཙྪེདགྒཱཧོ, པཙྩཡཱཀཱརཔཊིཙྪཱདཀམོཧོ ཝཱ. ནིབྦཱནེ ¶ ཙ པཊིལོམབྷཱཝོ སངྑཱརེསུ ནཏི, ནིབྦཱནཔཊིཙྪཱདཀམོཧོ ཝཱ. སངྑཱརནིམིཏྟགྒཱཧོཏི ཡཱདིསསྶ ཀིལེསསྶ ཨཔྤཧཱིནཏཱ ཝིཔསྶནཱ སངྑཱརནིམིཏྟཾ ན མུཉྩཏི, སོ ཀིལེསོ, ཡོ ‘‘སཾཡོགཱབྷིནིཝེསོ’’ཏིཔི ཝུཙྩཏི, སངྑཱརནིམིཏྟགྒཱཧསྶ, ཨཏིཀྐམནམེཝ ཝཱ པཧཱནཾ.

པཝཏྟི ཨེཝ པཝཏྟིབྷཱཝོ, པརིཡུཊྛཱནནྟི ཨཏྠོ. ནཱིཝརཎཱདིདྷམྨཱནནྟི ཨཱདི-སདྡེན ནཱིཝརཎཔཀྑིཡཱ ཀིལེསཱ ཝིཏཀྐཝིཙཱརཱདཡོ ཙ གཡ྄ཧནྟི. ཙཏུནྣཾ ཨརིཡམགྒཱནཾ བྷཱཝིཏཏྟཱ ཨཙྩནྟཾ ཨཔྤཝཏྟིབྷཱཝེན ཡཾ པཧཱནནྟི སམྦནྡྷོ. ཀེན པན པཧཱནནྟི? ‘‘ཨརིཡམགྒེཧེཝཱ’’ཏི ཝིཉྙཱཡམཱནོཡམཏྠོ ཏེསཾ བྷཱཝིཏཏྟཱ ཨཔྤཝཏྟིཝཙནཏོ. ‘‘སམུདཡཔཀྑིཀསྶཱ’’ཏི ཨེཏྠ ཙཏྟཱརོཔི མགྒཱ ཙཏུསཙྩཱབྷིསམཡཱཏི ཀཏྭཱ ཏེཧི པཧཱཏབྦེན ཏེན ཏེན སམུདཡསངྑཱཏེན ལོབྷེན སཧ པཧཱཏབྦཏྟཱ སམུདཡསབྷཱཝཏྟཱ ཙ. སཙྩཝིབྷངྒེ ཙ སབྦཀིལེསཱནཾ སམུདཡབྷཱཝསྶ ཝུཏྟཏྟཱ ‘‘སམུདཡཔཀྑིཀཱ’’ཏི དིཊྛིཨཱདཡོ ཝུཙྩནྟི. པཊིཔསྶདྡྷཏྟཾ ཝཱུཔསནྟཏཱ.

སངྑཏནིསྶཊཏཱ སངྑཱརསབྷཱཝཱབྷཱཝོ. པཧཱིནསབྦསངྑཏནྟི ཝིརཧིཏསབྦསངྑཏཾ, ཝིསངྑཱརནྟི ཨཏྠོ. པཧཱནཉྩ ཏཾ ཝིནཡོ ཙཱཏི པཧཱནཝིནཡོ པུརིམེན ཨཏྠེན. དུཏིཡེན པན པཧཱིཡཏཱིཏི པཧཱནཾ, ཏསྶ ཝིནཡོཏི ཡོཛེཏབྦོ.

བྷིནྣསཾཝརཏྟཱཏི ¶ ནཊྛསཾཝརཏྟཱ, སཾཝརཱབྷཱཝཏོཏི ཨཏྠོ. ཏེན ཨསམཱདིནྣསཾཝརོཔི སངྒཧིཏོཝ ཧོཏི. སམཱདཱནེན ཧི སམྤཱདེཏབྦོ སཾཝརོ, ཏདབྷཱཝེ ན ཧོཏཱིཏི. ཨརིཡེཏི ཨརིཡོ. པཙྩཏྟཝཙནཉྷེཏཾ. ཨེསེསེཏི ཨེསོ ཨེསོ, ཨཏྠཏོ ཨནཉྙོཏི ཨཏྠོ. ཏཛྫཱཏེཏི ཨཏྠཏོ ཏཾསབྷཱཝོ, སཔྤུརིསོ ཨརིཡསབྷཱཝོ, ཨརིཡོ ཙ སཔྤུརིསབྷཱཝོཏི ཨཏྠོ.

སོ ཨཧནྟི ཨཏྟནཱ པརིཀཔྤིཏཾ ཨཏྟཱནཾ དིཊྛིགཏིཀོ ཝདཏི. ‘‘ཨཧཾབུདྡྷིནིབནྡྷནོ ཨཏྟཱ’’ཏི ཧི ཨཏྟཝཱདིནོ ལདྡྷི. ཨདྭཡནྟི དྭཡཏཱརཧིཏཾ. ཨབྷིནྣཾ ཝཎྞམེཝ ‘‘ཨཙྩཱི’’ཏི གཧེཏྭཱ ‘‘ཨཙྩཱིཏི ཝཎྞོ ཨེཝཱ’’ཏི ཏེསཾ ཨེཀཏྟཾ པསྶནྟོ ཝིཡ ཡཐཱཔརིཀཔྤིཏཾ ཨཏྟཱནཾ ‘‘རཱུཔ’’ནྟི, ཡཐཱདིཊྛཾ ཝཱ རཱུཔཾ, ‘‘ཨཏྟཱ’’ཏི གཧེཏྭཱ ཏེསཾ ཨེཀཏྟཾ པསྶནྟོ དཊྛབྦོ. ཨེཏྠ ཙ ‘‘རཱུཔཾ ཨཏྟཱ’’ཏི ¶ ཨིམིསྶཱ པཝཏྟིཡཱ ཨབྷཱཝེཔི རཱུཔེ ཨཏྟགྒཧཎཾ པཝཏྟམཱནཾ ཨཙྩིཡཾ ཝཎྞགྒཧཎཾ ཝིཡ ‘‘ཨདྭཡདསྶན’’ནྟི ཝུཏྟཾ. ཨུཔམཱཡོ ཙ ཨནཉྙཏྟཱདིགཧཎནིདསྶནཝསེནེཝ ཝུཏྟཱ, ན ཝཎྞཱདཱིནཾ ཝིཡ ཨཏྟནོ ཝིཛྫམཱནདསྶནཏྠཾ. ན ཧི ཨཏྟནི སཱམིབྷཱཝེན རཱུཔཉྩ སཀིཉྩནབྷཱཝེན སམནུཔསྶཏི. ཨཏྟནི ཝཱ རཱུཔནྟི ཨཏྟཱནཾ རཱུཔསྶ སབྷཱཝཏོ ཨཱདྷཱརཎབྷཱཝེན. རཱུཔསྨིཾ ཝཱ ཨཏྟཱནནྟི རཱུཔསྶ ཨཏྟནོ ཨཱདྷཱརཎབྷཱཝེན དིཊྛིཔསྶནཱཡ པསྶཏི. པརིཡུཊྛཊྛཱཡཱིཏི པརིཡུཊྛཱནཔྤཏྟཱཧི དིཊྛིཏཎྷཱཧི ‘‘རཱུཔཾ ཨཏྟཱ, རཱུཔཝཱ ཨཏྟཱ’’ཏིཨཱདིནཱ ཁནྡྷཔཉྩཀཾ མིཙྪཱ གཧེཏྭཱ ཏིཊྛནཏོ. ཏེནཱཧ ‘‘པརིཡུཊྛཱནཱཀཱརེནཱ’’ཏིཨཱདི. ཨེསེཝ ནཡོཏི ཡོ ‘‘ཨིདྷེཀཙྩོ རཱུཔཾ ཨཏྟཏོ སམནུཔསྶཏཱི’’ཏིཨཱདིནཱ རཱུཔཀྑནྡྷེ ཝུཏྟོ སཾཝཎྞནཱནཡོ, ཝེདནཱཀྑནྡྷཱདཱིསུཔི ཨེསོ ཨེཝ ནཡོ ཝེདིཏབྦོ.

སུདྡྷརཱུཔམེཝཱཏི ཨརཱུཔེན ཨམིསྶིཏཾ ཀེཝལཾ རཱུཔམེཝ. ཨརཱུཔནྟི སུདྡྷཨརཱུཔཾ རཱུཔསྶ ཨགྒཧིཏཏྟཱ. ཙཏཱུསུ ཁནྡྷེསུ ཏིཎྞཾ ཏིཎྞཾ ཝསེནཱཏི ཙཏཱུསུ ཁནྡྷེསུ ཏིཎྞཾ ཏིཎྞཾ གཧཎཝསེན རཱུཔཱརཱུཔམིསྶཀོ ཨཏྟཱ ཀཐིཏོ ཏསྨིཾ ཏསྨིཾ གཧཎེ ཝེདནཱདིཝིནིམུཏྟཨརཱུཔདྷམྨེ ཀསིཎརཱུཔེན སདྡྷིཾ སབྦརཱུཔདྷམྨེ ཙ ཨེཀཛ྄ཛྷཾ གཧཎསིདྡྷིཏོ. པཉྩསུ ཋཱནེསུ ཨུཙྪེདདིཊྛི ཀཐིཏཱ, ཏེ ཏེ ཨེཝ དྷམྨེ ‘‘ཨཏྟཱ’’ཏི གཧཎཏོ ཏེསཉྩ ཨུཙྪེདབྷཱཝཏོ. ཨཝསེསེསུ པན པནྣརསསུ ཋཱནེསུ རཱུཔཾ ‘‘ཨཏྟཱ’’ཏི གཧེཏྭཱཔི དིཊྛིགཏིཀོ ཏཏྠ ནིཙྩསཉྙཾ ན ཝིསྶཛྫེཏི ཀསིཎརཱུཔེན ཏཾ མིསྶེཏྭཱ ཏསྶ ཙ ཨུཔྤཱདཱདཱིནཾ ཨདསྶནཏོ, ཏསྨཱསྶ ཏཏྠཔི ཧོཏིཡེཝ སསྶཏདིཊྛི ཨེཀཙྩསསྶཏགཱཧཝསེནཔི. མགྒཱཝརཎཱ ཝིཔརཱིཏདསྶནཏོ. ན སགྒཱཝརཎཱ ཨཀམྨཔཐཔྤཏྟཏཱཡ. ཨཀིརིཡཱཧེཏུཀནཏྠིཀདིཊྛིཡོ ཨེཝ ཧི ཀམྨཔཐདིཊྛིཡོ.

ཀཱཡོཏི རཱུཔཀཱཡོ. སོ ཨཱཏུརོཡེཝ ཨསཝསབྷཱཝཏོ. རཱགདོསམོཧཱནུགཏནྟི ཨཔྤཧཱིནརཱགདོསམོཧསནྟཱནེ ¶ པཝཏྟཾ. ཨིདྷཱཏི ཨིམསྨིཾ སུཏྟེ. དསྶིཏཾ ཨཱཏུརབྷཱཝེན. ནིཀྐིལེསཏཱཡཱཏི སཡཾ པཧཱིནཀིལེསསནྟཱནགཏཏཱཡ. སེཁཱ ནེཝ ཨཱཏུརཙིཏྟཱ པཧཱིནཀིལེསེ ཨུཔཱདཱཡ, ཨཔྤཧཱིནེ པན ཨུཔཱདཱཡ ཨཱཏུརཙིཏྟཱ. ཨནཱཏུརཙིཏྟཏཾཡེཝ བྷཛནྟི ཝཊྚཱནུསཱརིམཧཱཛནསྶ ཝིཡ ཏེསཾ ཙིཏྟསྶ ཀིལེསཝསེན ཨཱཏུརཏྟཱབྷཱཝཏོ.

ནཀུལཔིཏུསུཏྟཝཎྞནཱ ནིཊྛིཏཱ.

༢. དེཝདཧསུཏྟཝཎྞནཱ

༢. དེཝཱ ¶ ཝུཙྩནྟི རཱཛཱནོ ‘‘དིབྦནྟི ཀཱམགུཎེཧི ཀཱིལ༹ནྟི ལལ༹ནྟི, ཨཏྟནོ ཝཱ པུཉྙཱནུབྷཱཝེན ཛོཏནྟཱི’’ཏི ཀཏྭཱ. ཏེསཾ དཧོཏི དེཝདཧོ. སཡཾཛཱཏོ ཝཱ སོ ཧོཏི, ཏསྨཱཔི ‘‘དེཝདཧོ’’ཏི ཝུཏྟོ. ཏསྶ ཨཝིདཱུརེ ནིགམོ ‘‘དེཝདཧ’’ནྟྭེཝ སངྑཾ གཏོ ཡཐཱ ‘‘ཝརཎཱནགརཾ, གོདྷཱགཱམོ’’ཏི. པཙྪཱབྷཱུམིཡཾ ཨཔརདིསཱཡཾ ནིཝིཊྛཛནཔདོ པཙྪཱབྷཱུམཾ, ཏཾ གནྟུཀཱམཱ པཙྪཱབྷཱུམགམིཀཱ. ཏེ སབྷཱརེཏི ཏེ བྷིཀྑཱུ ཐེརསྶ ཝསེན སབྷཱརེ ཀཱཏུཀཱམཏཱཡ. ཡདི ཐེརོ ཏེསཾ བྷཱརོ, ཐེརསྶཔི ཏེ བྷཱརཱ ཨེཝཱཏི ‘‘ཏེ སབྷཱརེ ཀཱཏུཀཱམཏཱཡཱ’’ཏི ཝུཏྟཾ. ཨེཝཉྷི ཐེརོ ཏེ ཨོཝདིཏབྦེ ཨནུསཱསིཏབྦེ མཉྙཏཱིཏི. ཨིདཱནི ཏམཏྠཾ ཝིཝརནྟོ ‘‘ཡོ ཧཱི’’ཏིཨཱདིམཱཧ. ཨཡཾ ནིབྦྷཱརོ ནཱམ ཀཉྩི པུགྒལཾ ཨཏྟནོ བྷཱརཾ ཀཏྭཱ ཨཝཏྟནཏོ.

ཙཏུབྦིདྷེནཱཏི དྷཱཏུཀོསལླཾ ཨཱཡཏནཀོསལླཾ པཊིཙྩསམུཔྤཱདཀོསལླཾ ཋཱནཱཊྛཱནཀོསལླནྟི ཨེཝཾ ཙཏུབྦིདྷེན.

ཏེ མཧལླཀཱབཱདྷིཀཱཏིདཧརཔུགྒལེ གཎྷིཏྭཱཝ གཙྪཏི. ཏེ ཧི དིཝསདྭཡེན ཝཱུཔསནྟཔརིསྶམཱ ཨེཝ. ཧཏྠིཝཱནརཏིཏྟིརཔཊིབདྡྷཾ ཝཏྠུཾ ཀཐེཏྭཱ. ‘‘ཨེལ༹ཀཱལ༹གུམྦེཏི ཀཱལ༹ཏིཎགཙྪམཎྜཔེ’’ཏིཔི ཝདནྟི.

ཝིཝིདྷཾ ནཱནཱབྷཱུཏཾ རཛྫཾ ཝིརཛྫཾ, ཝིརཛྫམེཝ ཝེརཛྫཾ, ཏཏྠ གཏཾ, པརདེསགཏནྟི ཨཏྠོ. ཏེནཱཧ ‘‘ཨེཀསྶཱ’’ཏིཨཱདི. ཙིཏྟསུདཏྟཱདཡོཏི ཙིཏྟགཧཔཏིཨནཱཐཔིཎྜིཀཱདཡོ. ཝཱིམཾསཀཱཏི དྷམྨཝིཙཱརཀཱ. ཀིནྟི ཀཱིདིསཾ. དསྶནནྟི སིདྡྷནྟཾ. ཨཱཙིཀྑཏི ཀཱིདིསནྟི ཨདྷིཔྤཱཡོ. དྷམྨསྶཱཏི བྷགཝཏཱ ཝུཏྟདྷམྨསྶ. ཨནུདྷམྨནྟི ཨནུཀཱུལཾ ཨཝིརུཛ྄ཛྷནདྷམྨཾ. སོ པན ཝེནེཡྻཛ྄ཛྷཱསཡཱནུརཱུཔདེསནཱཝིཏྠཱརོཏི ཨཱཧ – ‘‘ཝུཏྟབྱཱཀརཎསྶ ཨནུབྱཱཀརཎ’’ནྟི. དྷཱརེཏི ཨཏྟནོ ¶ ཕལནྟི དྷམྨོ, ཀཱརཎནྟི ཨཱཧ – ‘‘སཧདྷམྨིཀོཏི སཀཱརཎོ’’ཏི. ཨིམིནཱཔི པཱཋནྟརེན ཝཱདོ ཨེཝ དཱིཔིཏོ, ན ཏེན པཀཱསིཏཱ ཀིརིཡཱ.

ཏཎྷཱཝསེནེཝ ཚནྣམྤི པདཱནཾ ཨཏྠོ ཝེདིཏབྦོ. ཡསྨཱ རཱགཱདཡོ ཏཎྷཱཡ ཨེཝ ཨཝཏྠཱཝིསེསཱཏི. ཏེནཱཧ ‘‘ཏཎྷཱ ཧཱི’’ཏིཨཱདི. ཝིཧནནྟི ཀཱཡཾ ཙིཏྟཉྩཱཏི ཝིགྷཱཏོ, དུཀྑནྟི ཨཱཧ – ‘‘ཨཝིགྷཱཏོཏི ¶ ནིདུཀྑོ’’ཏི. ཨུཔཱཡཱསེཏི ཨུཔཏཱཔེཏཱིཏི ཨུཔཱཡཱསོ, ཨུཔཏཱཔོ. ཏཔྤཊིཔཀྑོ པན ཨནུཔཱཡཱསོ ནིརཱུཔཏཱཔོ དཊྛབྦོ. སབྦཏྠཱཏི སབྦཝཱརེསུ.

དེཝདཧསུཏྟཝཎྞནཱ ནིཊྛིཏཱ.

༣. ཧཱལིདྡིཀཱནིསུཏྟཝཎྞནཱ

༣. ‘‘ཨཝནྟིདཀྑིཎཱཔཐེ’’ཏི ཨཉྙེསུ སུཏྟཔདེསུ ཨཱགཏཏྟཱ ཨཱཧ ‘‘ཨཝནྟིདཀྑིཎཱཔཐསངྑཱཏེ’’ཏི. མཛ྄ཛྷིམདེསཏོ ཧི དཀྑིཎདིསཱཡ ཨཝནྟིརཊྛཾ. པཝཏྟཡིཏྠ ཨེཏྠ ལདྡྷཱིཏི པཝཏྟཾ, པཝཏྟིཏབྦཊྛཱནནྟི ཨཱཧ ‘‘ལདྡྷིཔཝཏྟཊྛཱནེ’’ཏི. རུཔྤནསབྷཱཝོ དྷམྨོཏི ཀཏྭཱ རཱུཔདྷཱཏཱུཏི རཱུཔཀྑནྡྷོ ཝུཏྟོ. རཱུཔདྷཱཏུམྷི ཨཱརམྨཎཔཙྩཡབྷཱུཏེན རཱགེན སཧཛཱཏེནཔི ཨསཧཛཱཏེནཔི ཨུཔནིསྶཡབྷཱུཏེན ཨཔྤཧཱིནབྷཱཝེནེཝ ཝིནིབདྡྷཾ པཊིབདྡྷཾ ཀམྨཝིཉྙཱཎཾ. ཨོཀསཱརཱིཏི ཝུཙྩཏི – ‘‘ཏསྨིཾ རཱུཔདྷཱཏུསཉྙིཏེ ཨོཀེ སརཏི པཝཏྟཏཱི’’ཏི ཀཏྭཱ. ཨཝཏི ཨེཏྠ གཙྪཏི པཝཏྟཏཱིཏི ཨོཀཾ, པཝཏྟིཊྛཱནཾ. ཏེནཱཧ – ‘‘གེཧསཱརཱི ཨཱལཡསཱརཱི’’ཏི.

ཨུགཙྪཏི ཝཱ ཨེཏྠ ཝེདནཱདཱིཧི སདྡྷིཾ སམཝེཏཱིཏི ཨོཀོ, ཙཀྑུརཱུཔཱདི. པཙྩཡོཏི ཨཱརམྨཎཱདིཝསེན པཙྩཡོ. པཙྩཡོ ཧོཏཱིཏི ཨནནྟརསམནནྟརཱདིནཱ ཙེཝ ཀམྨཱུཔནིསྶཡཨཱརམྨཎཱདིནཱ ཙ. ‘‘ཝིཉྙཱཎདྷཱཏུ ཁོ, གཧཔཏཱི’’ཏི ཨེཝཾ ཝུཏྟེ ‘‘ཀམྨཝིཉྙཱཎཝིཔཱཀཝིཉྙཱཎེསུ ཀཏརཾ ནུ ཁོ’’ཏི སམྨོཧོ བྷཝེཡྻ. ཏསྶ སམྨོཧསྶ ཝིགྷཱཏཏྠཾ ཨཔགམནཏྠཾ. ཨསམྦྷིནྣཱཝཱཏི ཨསཾཀིཎྞཱཝ དེསནཱ ཀཏཱ. ཨཱརམྨཎཝསེན ཙཏསྶོ ཨབྷིསངྑཱརཝིཉྙཱཎཊྛིཏིཡོ ཝུཏྟཱ – ‘‘རཱུཔུཔཡཾ ཝཱ, བྷིཀྑཝེ, ཝིཉྙཱཎཾ ཏིཊྛམཱནཾ ཏིཊྛེཡྻ, རཱུཔཱརམྨཎ’’ནྟིཨཱདིནཱ (སཾ. ནི. ༣.༥༣). ཏཱ ཝིཉྙཱཎཊྛིཏིཡོ དསྶེཏུམྤི.

དལ༹ྷཾ ཨབྷིནིཝེསཝསེན ཨཱརམྨཎཾ ཨུཔེནྟཱིཏི ཨུཔཡཱ, ཏཎྷཱདིཊྛིཡོ. ཨདྷིཊྛཱནབྷཱུཏཱཏི པཏིཊྛཱནབྷཱུཏཱ. ཨབྷིནིཝེསབྷཱུཏཱཏི ཏཾ ཏཾ ཨཱརམྨཎཾ ཨབྷིནིཝིསྶ ཨཛ྄ཛྷོསཱཡ པཝཏྟིཡཱ ཀཱརཎབྷཱུཏཱ. ཨནུསཡབྷཱུཏཱཏི རཱགཱནུསཡདིཊྛཱནུསཡབྷཱུཏཱ. ཨུཔརིམཀོཊིཡཱཏི པཧཱནསྶ ཨུཔརིམཀོཊིཡཱ ¶ . བུདྡྷཱནཉྙེཝ ཧི ཏེ སཝཱསནཱ པཧཱིནཱ. པུབྦེ ཨགྒཧིཏཾ ཝིཉྙཱཎཾ ཨགྒཧིཏམེཝཱཏི ཀཏྭཱ ཀསྨཱ ཨིདྷ དེསནཱ ཀཏཱཏི ཙོདེཏི – ‘‘ཨིདྷ ¶ ཝིཉྙཱཎཾ ཀསྨཱ གཧིཏ’’ནྟི. པུབྦེ ‘‘ཝིཉྙཱཎདྷཱཏུརཱགཝིནིབནྡྷཉྩ ཝིཉྙཱཎ’’ནྟི ཝུཙྩམཱནེ ཡཐཱ ཡཐཱ སམྨོཧོ སིཡཱ པཙྩཡཔཙྩཡུཔྤནྣཝིབྷཱགསྶ དུཀྐརཏྟཱ, ཨིདྷ པན སམྨོཧསྶ ཨོཀཱསོཝ ནཏྠི ཨཝིསེསེན པཉྩསུ ཁནྡྷེསུ ཀིལེསཔྤཧཱནཝསེནཱཏི. ཏེནཱཧ ‘‘ཀིལེསཔྤཧཱནདསྶནཏྠ’’ནྟིཨཱདི. ཀམྨཝིཉྙཱཎེན ཨོཀཾ ཨསརནྟེནཱ’’ཏི ཨིཏྠམྦྷཱུཏལཀྑཎེ ཀརཎཝཙནཾ. ཨསརནྟེནཱཏི ཨནུཔགཙྪནྟེན.

པཙྩཡཊྛེནཱཏི ཨཱརམྨཎཱདིཔཙྩཡབྷཱཝེན. ནིམིཏྟཾ ཨུཔྤཏྟིཀཾ. ཨཱརམྨཎ…པེ… ནིཀེཏནྟི ཨཱརམྨཎཀརཎསངྑཱཏེན ནིཝཱསཊྛཱནབྷཱུཏེན རཱུཔམེཝ ནིཀེཏནྟི རཱུཔནིམིཏྟནིཀེཏཾ.

ཚནྡརཱགསྶ བལཝདུབྦལཏཱཡཱཏི ཨཛ྄ཛྷཏྟཁནྡྷཔཉྩཀེ ཚནྡརཱགསྶ བལཝབྷཱཝེན ཏཾ ‘‘ཨོཀོ’’ཏི, བཧིདྡྷཱ ཚསུ ཨཱརམྨཎེསུ ཏསྶ དུབྦལཏཱཡ ཏཱནི ‘‘ནིཀེཏ’’ནྟི ཝུཏྟཱནི. ཨིདཱནི ཡཐཱཝུཏྟམཏྠཾ པཱཀཊཾ ཀཏྭཱ དསྶེཏུཾ ‘‘སམཱནེཔི ཧཱི’’ཏིཨཱདི ཝུཏྟཾ. ཨོཀོཏི ཝུཙྩཏི གེཧམེཝ རཏྟིཊྛཱནབྷཱཝཏོ. ནིཀེཏནྟི ཝུཙྩཏི ཨུཡྻཱནཱདི དིཝཱཊྛཱནབྷཱཝཏོ. ཏཏོ དུབྦལཏརོ ཧོཏི ཚནྡརཱགོ.

གེཧསྶིཏསུཁེནཱཏི གེཧནིསྶིཏེན ཙིཏྟསྶ སུཁེན སུཁིཏོ སུཁཔྤཏྟོ ཧོཏི. ཀིཙྩཀརཎཱིཡེསཱུཏི ཁུདྡཀེསུ ཙེཝ མཧནྟེསུ ཙ ཀཏྟབྦཏྠེསུ. སཡནྟི ཨཏྟནཱ. ཨནྟོཏི ཙིཏྟཛ྄ཛྷཱསཡེ.

ཨེཝཾརཱུཔོཏི ཨཱིདིསརཱུཔོ. ཝཎྞསདྡོ ཝིཡ རཱུཔསདྡོ རཱུཔཱཡཏནསྶ ཝིཡ སཎྛཱནསྶཔི ཝཱཙཀོཏི ཨདྷིཔྤཱཡེན ‘‘དཱིགྷརསྶ ཀཱལོ༹དཱཏཱདཱིསུ རཱུཔེསཱུ’’ཏི ཝུཏྟཾ. སུཁཱདཱིསཱུཏི སོམནསྶཱདཱིསུ. ཏཏྠ ཧི ‘‘ཨབྷིཎྷཾ སོམནསྶིཏོ བྷཝེཡྻ’’ནྟི པཏྠནཱ སིཡཱ. ཨེཝཾསཉྙོ ནཱམཱཏི ཝིསཡཝསེན སཉྙཱཝིསེསཔཏྠནམཱཧ. ཨེཝཾཝིཉྙཱཎོཏི པན ཨིདྷ ཝིསཡམུཁེན ཝིཉྙཱཎཝིསེསཔཏྠནཾ ཝདཏི – ‘‘ཨེཝཾནིཔུཎརཱུཔདསྶནསམཏྠཾ, ཨེཝཾཔཉྩཔསཱདཔཊིམཎྜིཏནིསྶཡཉྩ མེ ཝིཉྙཱཎཾ བྷཝེཡྻཱ’’ཏི.

ཝཊྚཾ པུརཏོ ཨཀུརཱུམཱནོཏི ལོཀེ ཙིཏྟཾ ཨཔཏྠེནྟོ. ཨསིལིཊྛཾ པུབྦེནཱཔརཾ ཨསམྦདྡྷཾ. ཝདནྟི ཨེཏེནཱཏི ཝཱདོ, དོསོཏི ཨཱཧ – ‘‘ཏུཡ྄ཧཾ དོསོ’’ཏིཨཱདི. ཨིདྷེཝ ཨིམསྨིཾཡེཝ སམཱགམེ. ནིབྦེཋེཧི དོསཏོ ཨཏྟཱནཾ མོཙེཧི.

ཧཱལིདྡིཀཱནིསུཏྟཝཎྞནཱ ནིཊྛིཏཱ.

༤. དུཏིཡཧཱལིདྡིཀཱནིསུཏྟཝཎྞནཱ

༤. ཙཱུལ༹ཚཀྐཔཉྷེཏི ¶ ¶ མཱུལཔཎྞཱསེ ཙཱུལ༹ཏཎྷཱསངྑཡསུཏྟེ (མ. ནི. ༡.༣༩༠ ཨཱདཡོ). མཧཱསཀྐཔཉྷེཔཱིཏི མཧཱཏཎྷཱསངྑཡསུཏྟེཔི (མ. ནི. ༡.༣༩༦ ཨཱདཡོ). ཨེཏནྟི ‘‘ཡེ ཏེ སམཎབྲཱཧྨཎཱ’’ཏིཨཱདིསུཏྟཔདཾ. ཏཎྷཱ སམྨདེཝ ཁཱིཡཏི ཨེཏྠཱཏི ཏཎྷཱསངྑཡོ, ཨསངྑཏཱ དྷཱཏཱུཏི ཨཱཧ ‘‘ཏཎྷཱསངྑཡེ ནིབྦཱནེ’’ཏི. ཨནྟཾ ཨཏིཀྐནྟནིཊྛཱཏི ཨནྟརཧིཏནིཊྛཱ. ཏེནཱཧ ‘‘སཏཏནིཊྛཱ’’ཏི. སེསཔདེསཱུཏི ‘‘ཨཙྩནྟཡོགཀྑེམིནོ’’ཏིཨཱདཱིསུ.

དུཏིཡཧཱལིདྡིཀཱནིསུཏྟཝཎྞནཱ ནིཊྛིཏཱ.

༥. སམཱདྷིསུཏྟཝཎྞནཱ

༥. སམཱདྷཱིཏི ཨཔྤནཱསམཱདྷི, ཨུཔཙཱརསམཱདྷི ཝཱ. ཀམྨཊྛཱནནྟི སམཱདྷིཔཱདཀཾ ཝིཔསྶནཱཀམྨཊྛཱནཾ. ‘‘ཕཱཏིཾ གམིསྶཏཱི’’ཏི པཱཋོ. པཏྠེཏཱིཏི ‘‘ཨཧོ ཝཏ མེ ཨཱིདིསཾ རཱུཔཾ བྷཝེཡྻཱ’’ཏི. ཨབྷིཝདཏཱིཏི ཏཎྷཱདིཊྛིཝསེན ཨབྷིནིཝེསཾ ཝདཏི. ཏེནཱཧ ‘‘ཏཱཡ ཨབྷིནནྡནཱཡཱ’’ཏིཨཱདི. ‘‘ཨཧོ པིཡཾ ཨིཊྛ’’ནྟི ཝཙཱིབྷེདེ ཨསཏིཔི ཏཐཱ ལོབྷུཔྤཱདེ སཏི ཨབྷིཝདཏིཡེཝ ནཱམ. ཏེནཱཧ ‘‘ཝཱཙཾ ཨབྷིནྡནྟོ’’ཏི. ‘‘མམ ཨིད’’ནྟི ཨཏྟནོ པརིཎཱམེཏྭཱ ཨནཉྙགོཙརཾ ཝིཡ ཀཏྭཱ གཎྷནྟོ ཨཛ྄ཛྷོསཱཡ ཏིཊྛཏི ནཱམཱཏི དསྶེནྟོ ཨཱཧ ‘‘གིལིཏྭཱཏི པརིནིཊྛཔེཏྭཱ གཎྷཱཏཱི’’ཏི. ‘‘ཨབྷིནནྡཏཱི’’ཏིཨཱདཡོ པུབྦབྷཱགཝསེན ཝུཏྟཱ, ‘‘ཨུཔྤཛྫཏི ནནྡཱི’’ཏི དྭཱརཔྤཏྟཝསེན. པཋམེཧི པདེཧི ཨནུསཡོ, པཙྪིམེན པརིཡུཊྛཱནནྟི ཀེཙི ‘‘གཧཎཊྛེན ཨུཔཱདཱན’’ནྟི ཀཏྭཱ. ནཱབྷིནནྡཏི ནཱབྷིཝདཏཱིཏི ཨེཏྠ ཧེཊྛཱ ཝུཏྟཝིཔརིཡཱཡེན ཨཏྠོ ཝེདིཏབྦོ. ན ‘‘ཨིཊྛཾ ཀནྟ’’ནྟི ཝདཏཱིཏི ‘‘ཨིཊྛ’’ནྟི ན ཝདཏི, ‘‘ཀནྟ’’ནྟི ན ཝདཏི. ནཱབྷིཝདཏིཡེཝ ཏཎྷཱཡ ཨནུཔཱདིཡཏྟཱ.

སམཱདྷིསུཏྟཝཎྞནཱ ནིཊྛིཏཱ.

༦. པཊིསལླཱཎསུཏྟཝཎྞནཱ

༦. ཉཏྭཱ ¶ ཨཱཧཱཏི ‘‘སཏི ཀཱཡཝིཝེཀེ ཙིཏྟཝིཝེཀོ, ཏསྨིཾ སཏི ཨུཔདྷིཝིཝེཀོ ཙ ཨིམེསཾ ལདྡྷུཾ ཝཊྚཏཱི’’ཏི ཉཏྭཱ ཨཱཧ.

པཊིསལླཱཎསུཏྟཝཎྞནཱ ནིཊྛིཏཱ.

༧. ཨུཔཱདཱཔརིཏསྶནཱསུཏྟཝཎྞནཱ

༧. གཧཎེན ¶ ཨུཔྤནྣཾ པརིཏསྶནནྟི ཁནྡྷཔཉྩཀེ ‘‘ཨཧཾ མམཱ’’ཏི གཧཎེན ཨུཔྤནྣཾ ཏཎྷཱཔརིཏསྶནཾ དིཊྛིཔརིཏསྶནཉྩ. ཨཔརིཏསྶནནྟི པརིཏསྶནཱབྷཱཝཾ, པརིཏསྶནཔཊིཔཀྑཾ ཝཱ. ཨཧུ ཝཏ མེཏཾ བལཡོབྦནཱདི. ཀམྨཝིཉྙཱཎནྟི ཝིཔརིཎཱམཱརམྨཎཾ ཏཎྷཱདིཊྛིསཧགཏཾ ཝིཉྙཱཎཾ ཏདནུཝཏྟི ཙ. ཨནུཔརིཝཏྟི ནཱམ ཏཾ ཨཱརམྨཎཾ ཀཏྭཱ པཝཏྟི. ཏེནཱཧ ‘‘ཝིཔརིཎཱམཱརམྨཎཙིཏྟཏོ’’ཏི. ཨཀུསལདྷམྨསམུཔྤཱདཱཏི ཏཎྷཱཡ ཨཉྙཱཀུསལདྷམྨསམུཔྤཱདཱ. པརིཡཱདིཡིཏྭཱཏི ཁེཔེཏྭཱ, ཏསྶ པཝཏྟིཏུཾ ཨོཀཱསཾ ཨདཏྭཱ. སཨུཏྟཱསོཏི ཏཎྷཱདིཊྛིཝསེན སཨུཏྟཱསོ. གཎྷིཏྭཱཏི ཏཎྷཱདིཊྛིགྒཱཧེཧི གཧེཏྭཱ ཏེསཉྩེཝ ཝསེན པརིཏསྶཀོ. རཱུཔབྷེདཱནུཔརིཝཏྟི ཙིཏྟཾ ན ཧོཏི. ཝཊྚཏཱིཏི སབྦཱཀཱརེན ཝཏྟུཾ ཡུཏྟནྟི ཨཏྠོ.

ཨུཔཱདཱཔརིཏསྶནཱསུཏྟཝཎྞནཱ ནིཊྛིཏཱ.

༨. དུཏིཡཨུཔཱདཱཔརིཏསྶནཱསུཏྟཝཎྞནཱ

༨. ཏཎྷཱམཱནདིཊྛིཝསེན དེསནཱ ཀཏཱ ‘‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’’ཏི དེསནཱཡ ཨཱགཏཏྟཱ. ཙཏཱུསུ སུཏྟེསཱུཏི པཉྩམཱདཱིསུ ཙཏཱུསུ སུཏྟེསུ. ཙཏུཏྠེ པན ཝིཝཊྚམེཝ ཀཐིཏཾ.

དུཏིཡཨུཔཱདཱཔརིཏསྶནཱསུཏྟཝཎྞནཱ ནིཊྛིཏཱ.

༩. ཀཱལཏྟཡཨནིཙྩསུཏྟཝཎྞནཱ

༩. ཡདི ¶ ཨཏཱིཏཱནཱགཏཾ ཨེཏརཧི ནཏྠིབྷཱཝཏོ ཨནིཙྩཾ, པཙྩུཔྤནྣམྤི ཏདཱ ནཏྠཱིཏི ཀོ པན ཝཱདོ ཏསྶ ཨནིཙྩཏཱཡ, པཙྩུཔྤནྣམྷི ཀཐཱཝ ཀཱ ཨུདཡབྦཡཔརིཙྪིནྣཏྟཱ ཏསྶ. ཝུཏྟཉྷེཏཾ ‘‘ནིབྦཏྟཱ ཡེ ཙ ཏིཊྛནྟི, ཨཱརགྒེ སཱསཔཱུཔམཱ’’ཏི (མཧཱནི. ༡༠).

ཀཱལཏྟཡཨནིཙྩསུཏྟཝཎྞནཱ ནིཊྛིཏཱ.

༡༠-༡༡. ཀཱལཏྟཡདུཀྑསུཏྟཱདིཝཎྞནཱ

༡༠-༡༡. ཏཐཱརཱུཔེནེཝཱཏི ཡཐཱརཱུཔེནེཝ པུགྒལཛ྄ཛྷཱསཡེན ནཝམཾ སུཏྟཾ ཀཐིཏཾ, ཏཐཱརཱུཔེནེཝཱཏི. ཏེ ཀིར བྷིཀྑཱུ ཨཏཱིཏཱནཱགཏཾ ‘‘དུཀྑ’’ནྟི སལླཀྑེཏྭཱ, ཏཐཱ ‘‘ཨནཏྟཱ’’ཏི ¶ སལླཀྑེཏྭཱ པཙྩུཔྤནྣེ ཀིལམིཾསུ. ‘‘ཨཐ ནེས’’ནྟིཨཱདི སབྦཾ ཧེཊྛཱ ཝུཏྟནཡེན ཝཏྟབྦཾ.

ཀཱལཏྟཡདུཀྑསུཏྟཱདིཝཎྞནཱ ནིཊྛིཏཱ.

ནཀུལཔིཏུཝགྒཝཎྞནཱ ནིཊྛིཏཱ.

༢. ཨནིཙྩཝགྒོ

༡-༡༠. ཨནིཙྩཱདིསུཏྟཝཎྞནཱ

༡༢-༢༡. པུཙྪཱཝསིཀཾ ཨཱནནྡཏྠེརསྶ པུཙྪཱཝསེན དེསིཏཏྟཱ.

ཨནིཙྩཱདིསུཏྟཝཎྞནཱ ནིཊྛིཏཱ.

ཨནིཙྩཝགྒཝཎྞནཱ ནིཊྛིཏཱ.

༣. བྷཱརཝགྒོ

༡. བྷཱརསུཏྟཝཎྞནཱ

༢༢. ཨུཔཱདཱནཱནཾ ཨཱརམྨཎབྷཱུཏཱ ཁནྡྷཱ ཨུཔཱདཱནཀྑནྡྷཱ. པརིཧཱརབྷཱརིཡཊྛེནཱཏི པརིཧཱརསྶ བྷཱརིཡབྷཱཝེན གརུཏརབྷཱཝེན. ཝུཏྟམེཝ ཨཏྠཾ ¶ པཱཀཊཾ ཀཱཏུཾ ‘‘ཨེཏེསཉྷཱི’’ཏིཨཱདིམཱཧ. ཏཏྠ ཡསྨཱ ཨེཏཱནི ཋཱནགམནཱདཱིནི རཱུཔཱརཱུཔདྷམྨཱནཾ པངྒུལཛཙྩནྡྷཱནཾ ཝིཡ ཨཉྙམཉྙཱུཔསྶཡཝསེན ཨིཛ྄ཛྷནྟི, ན པཙྩེཀཾ, ཏསྨཱ ‘‘ཨེཏེས’’ནྟི ཨཝིསེསཝཙནཾ ཀཏཾ. པུགྒལནྟི ཁནྡྷསནྟཱནཾ ཝདཏི. ཁནྡྷསནྟཱནོ ཧི ཨཝིཙྪེདེན པཝཏྟམཱནོ ཡཱཝ པརིནིབྦཱནཱ ཁནྡྷབྷཱརཾ ཝཧནྟོ ཝིཡ ལོཀེ ཁཱཡཏི ཏབྦིནིམུཏྟསྶ སཏྟསྶ ཨབྷཱཝཏོ. ཏེནཱཧ ‘‘པུགྒལོ’’ཏིཨཱདི. བྷཱརཧཱརོཏི ཛཱཏོཏི བྷཱརཧཱརོ ནཱམ ཛཱཏོ.

པུནབྦྷཝཀརཎཾ པུནབྦྷཝོ, ཏཾ ཕལཾ ཨརཧཏི, ཏཏྠ ནིཡུཏྟཱཏི ཝཱ པོནོབྷཝིཀཱ. ཏབྦྷཱཝསཧགཏཾ ¶ ཡཐཱ ‘‘སནིདསྶནཱ དྷམྨཱ’’ཏི, ན སཾསཊྛསཧགཏཾ, ནཱཔི ཨཱརམྨཎསཧགཏཾ. ‘‘ཏཏྲ ཏཏྲཱ’’ཏི ཡཾ ཡཾ ཨུཔྤཏྟིཊྛཱནཾ, རཱུཔཱདིཨཱརམྨཎཾ ཝཱ པཏྭཱ ཏཏྲཏཏྲཱབྷིནནྡིནཱི. ཏེནཱཧ ‘‘ཨུཔཔཏྟིཊྛཱནེ ཝཱ’’ཏིཨཱདི. པཉྩཀཱམགུཎིཀོཏི པཉྩཀཱམགུཎཱརམྨཎོ. རཱུཔཱརཱུཔཱུཔཔཏྟིབྷཝེ རཱགོ རཱུཔཱརཱུཔབྷཝརཱགོ. ཛྷཱནནིཀནྟི ཛྷཱནསངྑཱཏེ ཀམྨབྷཝེ རཱགོ. སསྶཏཱདིཊྛཱིཏི བྷཝདིཊྛི, ཏཾསཧགཏོ རཱགོ. ཨཡནྟི རཱགོ བྷཝཏཎྷཱ ནཱམ. ཨུཙྪེདདིཊྛི ཝིབྷཝདིཊྛི ནཱམ, ཏཾསཧགཏོ ཚནྡརཱགོ ཝིབྷཝཏཎྷཱ ནཱམ. ཨེས པུགྒལོ ཁནྡྷབྷཱརཾ ཨཱདིཡཏི ཏཎྷཱཝསེན པཊིསནྡྷིགྒཧཎཏོ. ‘‘ཨསེསམེཏྠ ཏཎྷཱ ཝིརཛྫཏི པལུཛྫཏི ནིརུཛ྄ཛྷཏི པཧཱིཡཏཱི’’ཏིཨཱདིནཱ སབྦཔདཱནི ནིབྦཱནཝསེནེཝ ཝེདིཏབྦཱནཱིཏི ཨཱཧ ‘‘སབྦཾ ནིབྦཱནསྶེཝ ཝེཝཙན’’ནྟི.

བྷཱརསུཏྟཝཎྞནཱ ནིཊྛིཏཱ.

༢. པརིཉྙསུཏྟཝཎྞནཱ

༢༣. པརིཛཱནིཏབྦེཏི པཧཱནཔརིཉྙཱཡ པརིཛཱནིཏབྦེ. ཏཐཱ པརིཛཱནནཉྩ ཏཏྠ ཚནྡརཱགཔྤཧཱནཾ, ཏེསཾ ཨཏིཀྐམོཏི ཨཱཧ ‘‘སམཏིཀྐམིཏབྦེཏི ཨཏྠོ’’ཏི. ཨཙྩནྟཔརིཉྙནྟི ནིབྦཱནཾ ཝདཏི. ཏེནཱཧ ‘‘སམཏིཀྐམནྟི ཨཏྠོ’’ཏི.

པརིཉྙསུཏྟཝཎྞནཱ ནིཊྛིཏཱ.

༣. ཨབྷིཛཱནསུཏྟཝཎྞནཱ

༢༤. ཉཱཏཔརིཉྙཱ ¶ ཀཐིཏཱ ‘‘ཨབྷིཝིསིཊྛཱཡ པཉྙཱཡ ཛཱནན’’ནྟི ཀཏྭཱ. དུཏིཡཔདེནཱཏི ‘‘པརིཛཱན’’ནྟི པདེན. ཏཏིཡཙཏུཏྠེཧཱིཏི ‘‘ཝིརཱཛཡཾ པཛཧ’’ནྟི པདེཧི.

ཨབྷིཛཱནསུཏྟཝཎྞནཱ ནིཊྛིཏཱ.

༤-༩. ཚནྡརཱགསུཏྟཱདིཝཎྞནཱ

༢༥-༣༠. དྷཱཏུསཾཡུཏྟེ ཝུཏྟནཡེནེཝ ཝེདིཏབྦཱནི, ཀེཝལཉྷི ཨེཏྠ ཁནྡྷཝསེན དེསནཱ ཨཱགཏཱ, ཏཏྠ དྷཱཏུཝསེནཱཏི ཨཡམེཝ ཝིསེསོ. ཙཏྟཱརི སཙྩཱནི ཀཐིཏཱནི ཨསྶཱདཱདཱིནཝནིསྶརཎཝསེན དེསནཱཡ པཝཏྟཏྟཱ.

ཚནྡརཱགསུཏྟཱདིཝཎྞནཱ ནིཊྛིཏཱ.

༡༠. ཨགྷམཱུལསུཏྟཝཎྞནཱ

༣༡. ཨགྷཾ ¶ ཝུཙྩཏི པཱཔཾ, ཨགྷནིམིཏྟཏཱཡ ཨགྷཾ དུཀྑཾ. ཨིདཉྷི དུཀྑཾ ནཱམ ཝིསེསཏོ པཱཔཧེཏུཀཾ ཀམྨཕལསཉྙིཏཾ. ཏཐཱ ཝཊྚདུཀྑཾ ཨཝིཛྫཱཏཎྷཱམཱུལཀཏྟཱ. ཨགྷསྶ ནིམིཏྟཏཱཡ ཨགྷཾ དུཀྑཾ. ཝཊྚཱནུསཱརཱི མཧཱཛནོ ཧི དུཀྑཱབྷིབྷཱུཏོ ཏསྶ པཏིཀཱརཾ མཉྙམཱནོ ཏཾ ཏཾ ཀརོཏཱིཏི.

ཨགྷམཱུལསུཏྟཝཎྞནཱ ནིཊྛིཏཱ.

༡༡. པབྷངྒུསུཏྟཝཎྞནཱ

༣༢. པབྷིཛྫནསབྷཱཝནྟི ཁཎེ ཁཎེ པབྷངྒུསབྷཱཝཾ.

པབྷངྒུསུཏྟཝཎྞནཱ ནིཊྛིཏཱ.

བྷཱརཝགྒཝཎྞནཱ ནིཊྛིཏཱ.

༤. ནཏུམྷཱཀཾཝགྒོ

༡. ནཏུམྷཱཀཾསུཏྟཝཎྞནཱ

༣༣. ཚནྡརཱགཔྤཧཱནེནཱཏི ¶ ཏཔྤཊིབདྡྷསྶ ཚནྡརཱགསྶ པཛཧནེན. དབྦཱདི པཱཀཏིཀཏིཎཾ པཱཀཊམེཝཱཏི ཨཔཱཀཊཾ དསྶེཏུཾ ཏཱལནཱལི༹ཀེརཱདི དསྶིཏཾ, ཏིཎཀཊྛཱནཾ ཝཱ བྷེདདསྶནཏྠཾ. པིཡཱལོ ཕཱརུསཀཾ.

ནཏུམྷཱཀཾསུཏྟཝཎྞནཱ ནིཊྛིཏཱ.

༣. ཨཉྙཏརབྷིཀྑུསུཏྟཝཎྞནཱ

༣༥. ཡདི རཱུཔཾ ཨནུསེཏཱིཏི རཱུཔདྷམྨེ ཨཱརབྦྷ ཡདི རཱགཱདཡོ ཨནུསཡནཝསེན པཝཏྟནྟི. ཏེན སངྑཾ གཙྪཏཱིཏི ཏེན རཱགཱདིནཱ ཏཾསམངྒཱིཔུགྒལོ སངྑཱཏབྦཏཾ ‘‘རཏྟོ དུཊྛོ’’ཏིཨཱདིནཱ ཝོཧརིཏབྦཏཾ ཨུཔགཙྪཏཱིཏི. ཏེནཱཧ ‘‘ཀཱམརཱགཱདཱིསཱུ’’ཏིཨཱདི. ཨབྷཱུཏེནཱཏི ཨཛཱཏེན ¶ ཨནུསཡཝསེན ཨཔྤཝཏྟེན. ཨནུསཡསཱིསེན ཧེཏྠ ཨབྷིབྷཝཾ ཝདཏི. ཡཏོ ‘‘རཏྟོ དུཊྛོ མཱུལ༹ྷོཏི སངྑཾ ན གཙྪཏཱི’’ཏི ཝུཏྟཾ. ནིཔྤརིཡཱཡཏོ ཧི མགྒཝཛ྄ཛྷཀིལེསཱ ཨནུསཡོ.

ཨཉྙཏརབྷིཀྑུསུཏྟཝཎྞནཱ ནིཊྛིཏཱ.

༤. དུཏིཡཨཉྙཏརབྷིཀྑུསུཏྟཝཎྞནཱ

༣༦. ཏཾ ཨནུསཡིཏཾ རཱུཔནྟི ཏཾ རཱགཱདིནཱ ཨནུསཡིཏཾ རཱུཔཾ མརནྟེན ཨནུསཡེན ཨནུམརཏི. ཏེན ཝུཏྟཾ ‘‘ན ཧཱི’’ཏིཨཱདི. ཡེན ཨནུསཡེན མརནྟེན ཏཾ ཨནུམརཏི. ཏེན སངྑཾ གཙྪཏཱིཏི ཏཐཱབྷཱུཏཏོ ཏེན ‘‘རཏྟོ’’ཏིཨཱདིཝོཧཱརཾ ལབྷཏི. ཡེན ཨནུསཡེན ཀཱརཎབྷཱུཏེན ཨནུམཱིཡཏི, ཏེན.

དུཏིཡཨཉྙཏརབྷིཀྑུསུཏྟཝཎྞནཱ ནིཊྛིཏཱ.

༥-༦. ཨཱནནྡསུཏྟཱདིཝཎྞནཱ

༣༧-༣༨. ཋིཏིཡཱ ¶ ཋིཏིཀྑཎེན སཧིཏཾ ཋིཏཾ. ཋིཏསྶ ཨཉྙཐཏྟནྟི ཨུཔྤཱདཀྑཎཏོ ཨཉྙཐཱབྷཱཝོ. པཉྙཱཡཏཱིཏི ཨུཔལབྦྷཏི. པཙྩཡཝསེན དྷརམཱནཏྟཱ ཨེཝ ཛཱིཝམཱནསྶ ཛཱིཝིཏིནྡྲིཡཝསེན ཛརཱ པཉྙཱཡཏི ཨུཔྤཱདཀྑཎཏོ ཨཉྙཐཏྟཔྤཏྟིཡཱ. ཝུཏྟམེཝ ཨཏྠཾ པཱཀཊཏརཾ ཀཱཏུཾ ‘‘ཋིཏཱི’’ཏིཨཱདི ཝུཏྟཾ. ཛཱིཝི…པེ… ནཱམཾ. ཏཐཱ ཧི ཨབྷིདྷམྨེ (དྷ. ས. ༡༩) ‘‘ཨཱཡུ ཋིཏཱི’’ཏི ནིདྡིཊྛཾ. ཨཉྙཐཏྟནྟི ཛརཱཡ ནཱམནྟི སམྦནྡྷོ.

ཏཱིཎི ལཀྑཎཱནི ཧོནྟི སངྑཏསབྷཱཝལཀྑཎཏོ. ཡོ ཀོཙི རཱུཔདྷམྨོ ཝཱ ཨརཱུཔདྷམྨོ ཝཱ ལོཀིཡོ ཝཱ ལོཀུཏྟརོ ཝཱ སངྑཱརོ. སངྑཱརོ, ན ལཀྑཎཾ ཨུཔྤཱདཱདིསབྷཱཝཏྟཱ. ལཀྑཎཾ, ན སངྑཱརོ ཨུཔྤཱདཱདིརཧིཏཏྟཱ. ན ཙ…པེ… སཀྐཱ སངྑཱརདྷམྨཏྟཱ ལཀྑཎསྶ. ནཱཔི ལཀྑཎཾ ཝིནཱ སངྑཱརོ པཉྙཱཔེཏུཾ སཀྐཱ སངྑཱརབྷཱཝེན. ཏེནཱཧ ‘‘ལཀྑཎེནཱ’’ཏིཨཱདི. ཨིདཱནི ཡཐཱཝུཏྟམཏྠཾ ཨུཔམཱཡ ཝིབྷཱཝེཏུཾ ‘‘ཡཐཱ’’ཏིཨཱདིམཱཧ. ཏཏྠ ལཀྑཎནྟི ཀཱལ༹རཏྟསབལཱདིབྷཱཝལཀྑཎཾ པཱཀཊཾ ཧོཏི ‘‘ཨཡཾ ཨསུཀསྶ གཱཝཱི’’ཏི.

ཨེཝཾ སངྑཱརོཔི པཉྙཱཡཏི སབྷཱཝཏོ ཨུཔདྷཱརེནྟསྶ ཨུཔྤཱདལཀྑཎམྤི ཨུཔྤཱདཱཝཏྠཱཏི ཀཏྭཱ. ཀཱལསངྑཱཏོཏི ཨུཔྤཛྫམཱནཀཱལསངྑཱཏོ. ཏསྶ སངྑཱརསྶ. ཁཎོཔཱིཏི ཨུཔྤཱདཀྑཎོཔི པཉྙཱཡཏི. ཨུཔྤཱདོཔཱིཏི ཨུཔྤཱདལཀྑཎོཔི. ཛརཱལཀྑཎནྟི ཨུཔྤནྣཛཱིརཎལཀྑཎཾ, ཏཾ ‘‘ཋིཏསྶ ¶ ཨཉྙཐཏྟ’’ནྟི ཝུཏྟཾ. ‘‘བྷངྒཀྑཎེ སངྑཱརོཔི ཏཾལཀྑཎམྤི ཀཱལསངྑཱཏོ ཏསྶ ཁཎོཔི པཉྙཱཡཏཱི’’ཏི པཱཋོ. ཀེཙི པན ‘‘ཛརཱཔཱི’’ཏི པདམྤེཏྠ པཀྑིཔནྟི. ཨེཝཉྩ ཝདནྟི ‘‘ན ཧི ཏསྨིཾ ཁཎེ ཏརུཎོ ཧུཏྭཱ སངྑཱརོ བྷིཛྫཏི, ཨཐ ཁོ ཛིཡྻམཱནོ མཧལླཀོ ཝིཡ ཛིཎྞོ ཨེཝ ཧུཏྭཱ བྷིཛྫཏཱི’’ཏི, བྷངྒེནེཝ པན ཛརཱ ཨབྷིབྷུཡྻཏི ཁཎསྶ ཨཏིཨིཏྟརབྷཱཝཏོ ན སཀྐཱ པཉྙཱཔེཏུཾ ཋིཏིཡཱཏི ཏེསཾ ཨདྷིཔྤཱཡོ. ཏཱནཱིཏི ཨརཱུཔདྷམྨཱནཾ ཏཱིཎི ལཀྑཎཱནི. ཨཏྠིཀྑཎནྟི ཨརཱུཔདྷམྨཝིཛྫམཱནཀྑཎཾ, ཨུཔྤཱདཀྑཎནྟི ཨདྷིཔྤཱཡོ. སབྦདྷམྨཱནནྟི སབྦེསཾ རཱུཔཱརཱུཔདྷམྨཱནཾ ཋིཏིཡཱ ན བྷཝིཏབྦཾ. ཏསྶེཝཱཏི ཏསྶཱ ཨེཝ ཋིཏིཡཱ. ཏམཏྠནྟི ཛརཱལཀྑཎསྶ པཉྙཱཔེཏུཾ ཨསཀྐུཎེཡྻབྷཱཝཾ. ཨཉྙེ པན ‘‘སནྟཏིཝསེན ཋཱནཾ ཋིཏཱི’’ཏི ཝདནྟི, ཏཡིདཾ ¶ ཨཀཱརཎཾ ཨཊྛཱནཾ. ཡསྨཱ སུཏྟེ ‘‘ཋིཏསྶ ཨཉྙཐཏྟཾ པཉྙཱཡཏཱི’’ཏི ཨུཔྤཱདཝཡེཧི ནིབྦིསེསེན ཋིཏིཡཱ ཛོཏིཏཏྟཱ. ཡཾ པནེཏྠ ཝཏྟབྦཾ, ཏཾ ཧེཊྛཱ ཝུཏྟམེཝ. ཨཔིཙ ཡཐཱ དྷམྨསྶ ཨུཔྤཱདཱཝཏྠཱཡ བྷིནྣཱ བྷངྒཱཝཏྠཱ ཨིཙྪིཏཱ, ཨཉྙཐཱ ཨུཔྤཛྫམཱནམེཝ བྷིཛྫཏཱིཏི ཨཱཔཛྫཏི, ཨེཝཾ བྷངྒཱཝཏྠཱཡཔི བྷིནྣཱ བྷངྒཱབྷིམུཁཱཝཏྠཱ ཨིཙྪིཏབྦཱ. ན ཧི ཨབྷངྒཱབྷིམུཁོ བྷིཛྫཏི. ན ཙེཏྠ སཀྐཱ ཨུཔྤཱདཱབྷིམུཁཱཝཏྠཾ པརིཀཔྤེཏུཾ ཏདཱ ཏསྶ ཨལདྡྷཏྟལཱབྷཏྟཱ. ཨཡཾ ཝིསེསོཏི ཋིཏིཀྑཎོ ནཱམ རཱུཔདྷམྨཱནཾཡེཝ, ན ཨརཱུཔདྷམྨཱནནྟི ཨཡཾ ཨཱིདིསོ ཝིསེསོ. ཨཱཙརིཡམཏི ནཱམ ཏསྶེཝ ཨཱཙརིཡསྶ མཏི, སཱ སབྦདུབྦལཱཏི ཨཱཧ ‘‘ཏསྨཱ’’ཏིཨཱདི.

ཨཱནནྡསུཏྟཱདིཝཎྞནཱ ནིཊྛིཏཱ.

༧-༡༠. ཨནུདྷམྨསུཏྟཱདིཝཎྞནཱ

༣༩-༤༢. ཨཔཱཡདུཀྑེ སཀལསཾསཱརདུཀྑེ ཙ པཏིཏུཾ ཨདཏྭཱ དྷཱརཎཊྛེན དྷམྨོ, མགྒཕལནིབྦཱནཱནི. ཏདནུལོམིཀཱ ཙསྶ པུབྦབྷཱགཔཊིཔདཱཏི ཨཱཧ ‘‘དྷམྨཱནུདྷམྨཔཊིཔནྣསྶཱ’’ཏིཨཱདི. ‘‘ནིབྦིདཱབཧུལོ’’ཏི ཨཊྛཀཐཱཡཾ པདུདྡྷཱརོ ཀཏོ, པཱལི༹ཡཾ པན ‘‘ནིབྦིདཱབཧུལཾ ཝིཧརེཡྻཱ’’ཏི ཨཱགཏཾ. ཨུཀྐཎྛནབཧུལོཏི སབྦབྷཝེསུ ཨུཀྐཎྛནབཧུལོ. ཏཱིཧི པརིཉྙཱཧཱིཏི ཉཱཏཏཱིརཎཔྤཧཱནཔརིཉྙཱཧི. པརིཛཱནཱཏཱིཏི ཏེབྷཱུམཀདྷམྨེ པརིཙྪིཛྫ ཛཱནཱཏི, ཝིཔསྶནཾ ཨུསྶུཀྐཱཔེཏི. པརིམུཙྩཏི སབྦསཾཀིལེསཏོ ‘‘མགྒོ པཝཏྟིཏོ པརིམུཙྩཏཱི’’ཏི ཝུཏྟཏྟཱ. ཏཐཱཏི ཨིམིནཱ ཨིཏོ པརེསུ ཏཱིསུ མགྒོ ཧོཏཱིཏི དསྶེཏི. ཨིདྷཱཏི ཨིམསྨིཾ སུཏྟེ. ཨནིཡམིཏཱཏི ཨགྒཧིཏཱ. ཏེསུ ནིཡམིཏཱ ‘‘ཨནིཙྩཱནུཔསྶཱི’’ཏིཨཱདིཝཙནཏོ. སཱཏི ཨནུཔསྶནཱ. ཏཏྠ ནིཡམིཏཝསེནེཝཱཏི ཨིདཾ ལཀྑཎཝཙནཾ ཡཐཱ ‘‘ཡདི མེ བྱཱདྷཡོ བྷཝེཡྻུཾ ¶ , དཱཏབྦམིདམོསདྷ’’ནྟི. ན ཧི སཀྐཱ ཨེཏིསྶཱ ཨེཝ ཨནུཔསྶནཱཡ ཝསེན སམྨསནཱཙཱརཾ མཏྠཀཾ པཱཔེཏུནྟི.

ཨནུདྷམྨསུཏྟཱདིཝཎྞནཱ ནིཊྛིཏཱ.

ནཏུམྷཱཀཾཝགྒཝཎྞནཱ ནིཊྛིཏཱ.

༥. ཨཏྟདཱིཔཝགྒོ

༡. ཨཏྟདཱིཔསུཏྟཝཎྞནཱ

༤༣. དྭཱིཧི ¶ བྷཱགེཧི ཨཱཔོ ཨེཏྠ གཏཱཏི དཱིཔོ, དཱིཔོ ཝིཡཱཏི དཱིཔོ ཨོགྷེཧི ཨནཛ྄ཛྷོཏྠརནཱིཡཏཱཡ. ཡོ པརོ ན ཧོཏི, སོ ཨཏྟཱ, ཨིདྷ པན དྷམྨོ ཨདྷིཔྤེཏོ. ཨཏྟཱ དཱིཔོ ཨེཏེསནྟི ཨཏྟདཱིཔཱ. པཊིསརཎཏྠོ དཱིཔཊྛོཏི ཨཱཧ – ‘‘ཨཏྟསརཎཱཏི ཨིདཾ ཏསྶེཝ ཝེཝཙན’’ནྟི. ལོཀིཡལོཀུཏྟརོ དྷམྨོ ཨཏྟཱ ནཱམ ཨེཀནྟནཱཐབྷཱཝཏོ. པཋམེན པདེན ཝུཏྟོ ཨེཝ ཨཏྠོ དུཏིཡཔདེན ཝུཙྩཏཱིཏི ཝུཏྟཾ ‘‘ཏེནེཝཱཧཱ’’ཏིཨཱདི. ཡཝཏི ཨེཏསྨཱ ཕལཾ པསཝཏཱིཏི ཡོནི, ཀཱརཎཾ. ཀིཾ པབྷུཏི ཨུཔྤཏྟིཊྛཱནཾ ཨེཏེསནྟི ཀིཾ པབྷུཏིཀཱ. པཧཱནདསྶནཏྠཾ ཨཱརདྡྷཾ. ཏེནེཝཱཧ ‘‘པུབྦེ ཙེཝ…པེ… ཏེ པཧཱིཡནྟཱི’’ཏི. ན པརིཏསྶཏི ཏཎྷཱཔརིཏྟཱསསྶ ཨབྷཱཝཏོ. ཝིཔསྶནངྒེནཱཏི ཝིཔསྶནཱསངྑཱཏེན ཀཱརཎེན.

ཨཏྟདཱིཔསུཏྟཝཎྞནཱ ནིཊྛིཏཱ.

༢. པཊིཔདཱསུཏྟཝཎྞནཱ

༤༤. སབྷཱཝཏོསནྟོ ཝིཛྫམཱནོ ཀཱཡོ རཱུཔཱདིདྷམྨསམཱུཧོཏི སཀྐཱཡོཏི ཨཱཧ – ‘‘སཀྐཱཡོ དུཀྑ’’ནྟི. དིཊྛི ཨེཝ སམནུཔསྶནཱ, དིཊྛིསཧིཏཱ ཝཱ སམནུཔསྶནཱ དིཊྛིསམནུཔསྶནཱ, དིཊྛིམཉྙནཱཡ སདྡྷིཾ ཨིཏརམཉྙནཱ. སཧ ཝིཔསྶནཱཡ ཙཏུམགྒཉཱཎཾ སམནུཔསྶནཱ ‘‘ཙཏུནྣཾ ཨརིཡསཙྩཱནཾ སམྨདེཝ ཨནུརཱུཔཏོ པསྶནཱ’’ཏི ཀཏྭཱ.

པཊིཔདཱསུཏྟཝཎྞནཱ ནིཊྛིཏཱ.

༣. ཨནིཙྩསུཏྟཝཎྞནཱ

༤༥. ཝིརཱགོ ¶ ནཱམ མགྒོ, ཝིམུཏྟིཕལནྟི ཨཱཧ – ‘‘མགྒཀྑཎེ ཝིརཛྫཏི, ཕལཀྑཎེ ཝིམུཙྩཏཱི’’ཏི. ཨགྒཧེཏྭཱཏི ཨེཝཾ ནིརུཛ྄ཛྷམཱནེཧི ཨཱསཝེཧི ‘‘ཨཧཾ མམཱ’’ཏི ཀཉྩི དྷམྨཾ ཨནཱདིཡིཏྭཱ. ‘‘ཙིཏྟཾ ཝིརཏྟཾ, ཝིམུཏྟཾ ཧོཏཱི’’ཏི ཝུཏྟཏྟཱ ¶ ཕལཾ གཡ྄ཧཏི, ‘‘ཁཱིཎཱ ཛཱཏཱི’’ཏིཨཱདིནཱ པཙྩཝེཀྑཎཱཏི ཨཱཧ ‘‘སཧ ཕལེན པཙྩཝེཀྑཎདསྶནཏྠ’’ནྟི. ཨུཔརི ཀཏྟབྦཀིཙྩཱབྷཱཝེན ཋིཏཾ. ཏེནཱཧ ‘‘ཝིམུཏྟཏྟཱ ཋིཏ’’ནྟི. ཡཾ པཏྟབྦཾ, ཏཾ ཨགྒཕལསྶ པཏྟབྷཱཝེན ཨདྷིགཏཏྟཱ སནྟུཊྛཾ པརིཏུཊྛཾ.

ཨནིཙྩསུཏྟཝཎྞནཱ ནིཊྛིཏཱ.

༤. དུཏིཡཨནིཙྩསུཏྟཝཎྞནཱ

༤༦. པུབྦནྟཾ ཨཏཱིཏཁནྡྷཀོཊྛཱསཾ. ཨནུགཏཱཏི སསྶཏཱདཱིནི ཀཔྤེཏྭཱ གཧཎཝསེན ཨནུགཏཱ. ཨཊྛཱརས དིཊྛིཡོཏི ཙཏསྶོ སསྶཏདིཊྛིཡོ, ཙཏསྶོ ཨེཀཙྩསསྶཏདིཊྛིཡོ, ཙཏསྶོ ཨནྟཱནནྟིཀདིཊྛིཡོ, ཙཏསྶོ ཨམརཱཝིཀྑེཔདིཊྛིཡོ, དྭེ ཨདྷིཙྩསམུཔྤནྣདིཊྛིཡོཏི ཨེཝཾ ཨཊྛཱརས དིཊྛིཡོ ན ཧོནྟི པཙྩཡགྷཱཏེན. ཨཔརནྟནྟི ཨནཱགཏཾ ཁནྡྷཀོཊྛཱསཾ སསྶཏཱདིབྷཱཝཾ ཀཔྤེཏྭཱ གཧཎཝསེན ཨནུགཏཱ. སོལ༹ས སཉྙཱིཝཱདཱ, ཨཊྛ ཨསཉྙཱིཝཱདཱ, ཨཊྛ ནེཝསཉྙཱིནཱསཉྙཱིཝཱདཱ, སཏྟ ཨུཙྪེདཝཱདཱ, པཉྩ པརམདིཊྛདྷམྨནིབྦཱནཝཱདཱཏི ཨེཝཾ ཙཏུཙཏྟཱལཱིས དིཊྛིཡོ ན ཧོནྟི པཙྩཡགྷཱཏེན. སསྶཏདིཊྛིཐཱམསོ ཙེཝ སཱིལབྦཏདིཊྛིཔརཱམཱསོ ཙ ན ཧོཏི པཙྩཡགྷཱཏེན. ཏེནཱཧ ‘‘ཨེཏྟཱཝཏཱ པཋམམགྒོ དསྶིཏོ’’ཏི ཨནཝསེསདིཊྛིཔཧཱནཀིཏྟནཏོ. པཧཱིནཱ ཝིཀྑམྦྷིཏཱ. ཨིདཾ པནཱཏི ‘‘རཱུཔསྨི’’ནྟིཨཱདི.

དུཏིཡཨནིཙྩསུཏྟཝཎྞནཱ ནིཊྛིཏཱ.

༥. སམནུཔསྶནཱསུཏྟཝཎྞནཱ

༤༧. པརིཔུཎྞགཱཧཝསེནཱཏི པཉྩཀྑནྡྷེ ཨསེསེཏྭཱ ཨེཀཛ྄ཛྷཾ ‘‘ཨཏྟཱ’’ཏི གཧཎཝསེན. ཨེཏེསཾ པཉྩནྣཾ ཨུཔཱདཱནཀྑནྡྷཱནཾ ཨཉྙཏརཾ ‘‘ཨཏྟཱ’’ཏི སམནུཔསྶནྟི. ཨིཏཱིཏི ཨེཝཾ. ཡསྶ པུགྒལསྶ ཨཡཾ ཨཏྟདིཊྛིསངྑཱཏཱ སམནུཔསྶནཱ ཨཏྠི པཊིཔཀྑེན ཨཝིཧཏཏྟཱ སཾཝིཛྫཏི. པཉྩནྣཾ ཨིནྡྲིཡཱནནྟི ཙཀྑཱདཱིནཾ ཨིནྡྲིཡཱནཾ.

ཨཱརམྨཎནྟི ¶ ཀམྨཝིཉྙཱཎསྶ ཨཱརམྨཎཾ. མཱནཝསེན ཙ དིཊྛིཝསེན ཙ ‘‘ཨསྨཱི’’ཏི གཱཧེ སིཛ྄ཛྷནྟེ ཏཾསཧགཏཱ ཏཎྷཱཔི ཏགྒཧིཏཱཝ ཧོཏཱིཏི ¶ ཝུཏྟཾ ‘‘ཏཎྷཱམཱནདིཊྛིཝསེན ཨསྨཱིཏི ཨེཝམྤིསྶ ཧོཏཱི’’ཏི. གཧེཏྭཱཏི ཨཧཾཀཱརཝཏྠུཝསེན གཧེཏྭཱ. ཨཡཾ ཨཧམསྨཱིཏི ཨཡཾ ཙཀྑཱདིཀོ, སུཁཱདིཀོ ཝཱ ཨཧམསྨི. ‘‘རཱུཔཱི ཨཏྟཱ ཨརོགོ པརཾ མརཎཱ’’ཏི ཨེཝམཱདིགཧཎཝསེན པཝཏྟནཏོ ཝུཏྟཾ ‘‘རཱུཔཱི བྷཝིསྶནྟིཨཱདཱིནི སབྦཱནི སསྶཏམེཝ བྷཛནྟཱི’’ཏི. ཝིཔསྶནཱབྷིནིཝེསཏོ པུབྦེ ཡཐེཝཱཀཱརཱནི པཉྩིནྡྲིཡཱནི, ཨཐ ཝིཔསྶནཱབྷིནིཝེསཏོ པརཾ ཏེནེཝཱཀཱརེན ཋིཏེསུ ཙཀྑཱདཱིསུ ཨིནྡྲིཡེསུ ཨཝིཛྫཱ པཧཱིཡཏི ཝིཔསྶནཾ ཝཌྜྷཨེཏྭཱ མགྒསྶ ཨུཔྤཱདནེན, ཨཐ མགྒཔརམྤརཱཡ ཨརཧཏྟམགྒཝིཛྫཱ ཨུཔྤཛྫཏི. ཏཎྷཱམཱནདིཊྛིཡོ ཀམྨསམྦྷཱརབྷཱཝཏོ. ཀམྨསྶ…པེ… ཨེཀོ སནྡྷཱིཏི ཧེཏུཕལསནྡྷི. པུན ཨེཀོ སནྡྷཱིཏི ཕལཧེཏུསནྡྷིམཱཧ. ཏཡོ པཔཉྩཱ ཨཏཱིཏོ ཨདྡྷཱ ཨཏཱིཏབྷཝཨདྡྷཱནཾ ཏེསཾ ཨདྷིཔྤེཏཏྟཱ. ཨནཱགཏསྶ པཙྩཡོ དསྶིཏོ ཨསྶུཏཝཏོ པུཐུཛྫནསྶ ཝསེན. སུཏཝཏོ པན ཨརིཡསཱཝཀསྶ ཝསེན ཝཊྚསྶ ཝཱུཔསམོ དསྶིཏོཏི.

སམནུཔསྶནཱསུཏྟཝཎྞནཱ ནིཊྛིཏཱ.

༦. ཁནྡྷསུཏྟཝཎྞནཱ

༤༨. ཏཐེཝཱཏི ཨཱརམྨཎབྷཱཝེནེཝ. ཨཱརམྨཎཀརཎཝསེན ཨུཔཱདཱནེཧི ཨུཔཱདཱཏབྦནྟི ཨུཔཱདཱནིཡཾ. ཨིདྷཱཔཱིཏི ཨུཔཱདཱནཀྑནྡྷེསུཔི. ཝིབྷཱགཏྠེ གཡ྄ཧམཱནེ ཨནིཊྛཔྤསངྒོཔི སིཡཱ, ཨབྷིདྷམྨེ ཙ རཱསཊྛོ ཨེཝ ཨཱགཏོ, ‘‘ཏདེཀཛ྄ཛྷཾ ཨབྷིསཾཡུཧིཏྭཱ’’ཏི ཝཙནཏོ ‘‘རཱསཊྛེན’’ཨིཙྩེཝ ཝུཏྟཾ.

ཁནྡྷསུཏྟཝཎྞནཱ ནིཊྛིཏཱ.

༧-༨. སོཎསུཏྟཱདིཝཎྞནཱ

༤༩-༥༠. ཝིསིཊྛོཏི པདྷཱནོ. ཨུཏྟམོཏི ཨུཀྐཊྛོ. ཨཉྙཾ ཀིཾ བྷཝེཡྻཱཏི ཨཉྙཾ ཀིཾ ཀཱརཎཾ བྷཝེཡྻ ཏཐཱ སམནུཔསྶནཱཡ ཨཉྙེསཾ ཨཝིཛྫམཱནཏཱཡ ཝཙནཔརིཊྛིཏིཔབྷིནྣཏོ. ཝཛིརབྷེདདེསནཾ ནཱམ ཨཏྠཏོ ཏེཔརིཝཊྚདེསནཱ.

སོཎསུཏྟཱདིཝཎྞནཱ ནིཊྛིཏཱ.

༩-༡༠. ནནྡིཀྑཡསུཏྟཱདིཝཎྞནཱ

༥༡-༥༢. ནཝམདསམེསཱུཏི ¶ ¶ སུཏྟདྭཡཾ སཧེཝ ཨུདྡྷཊཾ, དྭཱིསུཔི ཨཏྠཝཎྞནཱཡ སརིཀྑབྷཱཝཏོ. ནནྡནཊྛེན ནནྡཱི, རཉྫནཊྛེན རཱགོ. སཏིཔི སདྡཏྠཏོ བྷེདེ ‘‘ཨིམེསཾ ཨཏྠཏོ ནིནྣཱནཱཀརཎཏཱཡཱ’’ཏི ཝཏྭཱཔི པཧཱཡཀདྷམྨབྷེདེན པན ལབྦྷཏེཝ བྷེདམཏྟཱཏི དསྶེཏུཾ ‘‘ནིབྦིདཱནུཔསྶནཱཡ ཝཱ’’ཏིཨཱདི ཝུཏྟཾ. ཝིརཛྫནྟོ རཱགཾ པཛཧཏཱིཏི སམྦནྡྷོ. ཨེཏྟཱཝཏཱཏི ‘‘ནནྡིཀྑཡཱ རཱགཀྑཡོ’’ཏི ཨེཏྟཱཝཏཱ. ཝིཔསྶནཾ ནིཊྛཔེཏྭཱ ཝིཔསྶནཱཀིཙྩསྶ པརིཡོསཱནེན. རཱགཀྑཡཱཏི ཝུཊྛཱནགཱམིནིཔརིཡོསཱནཱཡ ཝིཔསྶནཱཡ རཱགསྶ ཁེཔིཏཏྟཱ. ཨནནྟརཾ ཨུཔྤནྣེན ཨརིཡམགྒེན སམུཙྪེདཝསེན ནནྡིཀྑཡོཏི. ཏེནཱཧ ‘‘ཨིདྷ མགྒཾ དསྶེཏྭཱ’’ཏི. ཨནནྟརཾ པན ཨུཔྤནྣེན ཨརིཡཕལེན པཊིཔསྶདྡྷིཝསེན ནནྡིརཱགཀྑཡཱ སབྦཾ སཾཀིལེསཏོ ཙིཏྟཾ ཝིམུཙྩཏཱིཏི. ཏེནཱཧ ‘‘ཕལཾ དསྶིཏ’’ནྟི.

ནནྡིཀྑཡསུཏྟཱདིཝཎྞནཱ ནིཊྛིཏཱ.

ཨཏྟདཱིཔཝགྒཝཎྞནཱ ནིཊྛིཏཱ.

མཱུལཔཎྞཱསཀོ སམཏྟོ.

༦. ཨུཔཡཝགྒོ

༡. ཨུཔཡསུཏྟཝཎྞནཱ

༥༣. ཨུཔེཏཱིཏི ཨུཔཡོ. ཀཐམུཔེཏི? ཏཎྷཱམཱནཱདིཝསེནཱཏི ཨཱཧ ‘‘ཏཎྷཱམཱནདིཊྛིཝསེནཱ’’ཏི. ཀཐམིདཾ ལབྦྷཏཱིཏི? ‘‘ཨཝིམུཏྟོ’’ཏི ཝཙནཏོ. ཏཎྷཱདིཊྛིཝསེན ཧི བདྡྷོ, ཀིཾ ཨུཔེཏཱིཏི ཨཱཧ ‘‘པཉྩཀྑནྡྷེ’’ཏི ཏབྦིནིམུཏྟསྶ ཏཐཱ ཨུཔེཏསྶ ཨབྷཱཝཏོ. ཀོ པནུཔེཏཱིཏི? ཏཾསམངྒཱིཔུགྒལོ. ཏཎྷཱདིཊྛིཝསེན ཨུཔགམསྶ ཝུཏྟཏྟཱ ཝིཉྙཱཎནྟི ཨཀུསལཀམྨཝིཉྙཱཎམེཝཱཏི ཝདནྟི. ཛཝཱཔེཏྭཱཏི གཧིཏཛཝཾ ཀཏྭཱ. ཡཐཱ པཊིསནྡྷིཾ ཨཱཀཌྜྷིཏུཾ སམཏྠཾ, ཨེཝཾ ཀཏྭཱ. ཏེནཱཧ ‘‘པཊིསནྡྷཱི’’ཏིཨཱདི. ཨགྒཧཎེ ཀཱརཎཾ ཝུཏྟམེཝ ‘‘ཨོཀཾ པཧཱཡ ཨནིཀེཏསཱརཱི’’ཏི གཱཐཱཡ ཝིསྶཛྫནེ. ཀམྨནིམིཏྟཱདིཝསེན པཊིསནྡྷིཡཱ པཙྩཡབྷཱུཏཾ ¶ ཨཱརམྨཎཾ པཊིསནྡྷིཛནཀསྶ ཀམྨསྶ ཝསེན ཝོཙྪིཛྫཏི. པཏིཊྛཱ ན ཧོཏི སརཱགཀཱལེ ཝིཡ ཨནུཔཊྛཱནཏོ ¶ . ཨཔྤཏིཊྛིཏཾ ཝིཉྙཱཎཾ ཝུཏྟཔྤཀཱརེན. ཨནབྷིསངྑརིཏྭཱཏི ཨནུཔྤཱདེཏྭཱ པཙྩཡགྷཱཏེན.

ཨུཔཡསུཏྟཝཎྞནཱ ནིཊྛིཏཱ.

༢. བཱིཛསུཏྟཝཎྞནཱ

༥༤. བཱིཛཛཱཏཱནཱིཏི ཛཱཏ-སདྡོ པདཔཱུརཎམཏྟནྟི ཨཱཧ ‘‘བཱིཛཱནཱི’’ཏི. ཝཙནྟི སེཏཝཙཾ. ཨཛྫུཀནྟི ཏཙྪཀཾ. ཕཎིཛྫཀཾ ཏུལསི. ཨབྷིནྣཱནཱིཏི ཨེཀདེསེནཔི ཨཁཎྜིཏཱནི. བཱིཛཏྠཱཡཱཏི བཱིཛཀིཙྩཱཡ. ན ཨུཔཀཔྤཏཱིཏི པཙྩཡོ ན ཧོཏཱིཏི དསྶེཏི. ན པཱཔིཏཱནཱིཏི པཱུཏིཏཾ ན ཨུཔགཏཱནི. ཏཎྜུལསཱརསྶ ཨཱདཱནཏོ སཱརཱདཱནི. ཨཱརམྨཎགྒཧཎཝསེན ཝིཉྙཱཎཾ ཏིཊྛཏི ཨེཏྠཱཏི ཝིཉྙཱཎཊྛིཏིཡོ. ཨཱརམྨཎཝསེནཱཏི ཨཱརམྨཎབྷཱཝཝསེན. སིནེཧནཊྛེནཱཏི ཏཎྷཱཡནཝསེན སིནིདྡྷཏཱཔཱདནེན, ཡཏོ ‘‘ནནྡཱུཔསེཙན’’ནྟི ཝུཏྟཾ. ཏཐཱ ཧི ཝིརོཔིཏཾ ཏཾ ཀམྨཝིཉྙཱཎཾ པཊིསནྡྷིཨངྐུརུཔྤཱདནསམཏྠཾ ཧོཏི. སཔྤཙྩཡནྟི ཨཝིཛྫཱཨཡོནིསོནམནསིཀཱརཱདིཔཙྩཡེཧི སཔྤཙྩཡཾ. ཝིརུཧཏི ཝིཔཱཀསནྟཱནུཔྤཱདནསམཏྠོ ཧུཏྭཱ.

བཱིཛསུཏྟཝཎྞནཱ ནིཊྛིཏཱ.

༣. ཨུདཱནསུཏྟཝཎྞནཱ

༥༥. ཨུདཱནཾ ཨུདཱཧརཱིཏི ཨཏྟམནཝཱཙཾ ནིཙྪཱརེསི. ཨེས ཝུཏྟཔྤཀཱརོ ཨུདཱཧཱརོ. བྷུསོ ནིསྶཡོ ཨུཔནིསྶཡོ, དཱནམེཝ ཨུཔནིསྶཡོ དཱནཱུཔནིསྶཡོ. ཨེས ནཡོ སེསེསུཔི. ཏཏྠ དཱནཱུཔནིསྶཡོ ཨནྣཱདིཝཏྠཱུསུ བལཝཱཏི བལཝབྷཱཝེན ཧོཏི, ཏསྨཱ ཨུཔནིསྶཡབཧུལོ ཀཱམརཱགཔྤཧཱནེནེཝ ཀཏཔརིཙཡཏྟཱ ཝིཔསྶནམནུཡུཉྫནྟོ ན ཙིརསྶེཝ ཨནཱགཱམིཕལཾ པཱཔུཎཱཏི, ཏཐཱ སུཝིསུདྡྷསཱིལཱུཔནིསྶཡོ ཀཱམདོསཛིགུཙྪནེན. ཡདི ཨེཝཾ ཀསྨཱ ཨིམེ དྭེ ཨུཔནིསྶཡཱ དུབྦལཱཏི ཝུཏྟཱ ¶ ? ཝིཛྫཱུཔམཉྙཱཎསྶེཝ པཙྩཡབྷཱཝཏོ. སོཔི བྷཱཝནཱུཔནིསྶཡསཧཱཡལཱབྷེནེཝ, ན ཀེཝལཾ. བྷཱཝནཱ པན པཊིཝེདྷསྶ ཝིསེསཧེཏུབྷཱཝཏོ བལཝཱ ཨུཔནིསྶཡོ. ཏཐཱ ཧི སཱ ཝཛིརཱུཔམཉཱཎསྶ ཝིསེསཔཙྩཡོ. ཏེནཱཧ ‘‘བྷཱཝནཱུཔནིསྶཡོ ཨརཧཏྟཾ པཱཔེཏཱི’’ཏི.

སོཏི མིལཀཏྠེརོ. ཝིཧཱརནྟི ཝསནཊྛཱནཾ. ཝིཧཱརཔཙྩནྟེ ཧི པཎྞསཱལཱཡ ཐེརོ ཝིཧརཏི. ཨུཔཊྛཱཏི ཨེཀལཀྑཎེན. ཀཱུཊགོཎོ ཝིཡ གམནཝཱིཐིཾ. ཏཏྠཱཏི ཨལླཀཊྛརཱསིམྷི. ཨུདཀམཎིཀཱནནྟི ཨུདཀཐེཝཱནཾ.

ཨཏྟནིཡེཝ ¶ ཨུཔནེསི ཨུདཱནཀཐཱཡ ཝུཏྟདྷམྨཱནཾ པརིཔུཎྞཱནཾ ཨཏྟནི སཾཝིཛྫམཱནཏྟཱ. ཏེནཱཧ ‘‘ཨུཊྛཱནཝཏཱ’’ཏིཨཱདི. ཨཡཉྷི མིལཀཏྠེརོ སིཀྑཱཡ གཱརཝོ སཔྤཏིསྶོ ཝཏྟཔཊིཝཏྟཾ པཱུརེནྟོ ཝིསུདྡྷསཱིལོ ཧུཏྭཱ ཋིཏོ, ཏསྨཱ ‘‘དུབྦལཱུཔནིསྶཡེ’’ཏི ཝུཏྟཾ. ཏེནཱཧ བྷགཝཱ ཨུདཱནེནྟོ ‘‘ནོ ཙསྶཾ…པེ… སཉྙོཛནཱནཱི’’ཏི.

སཙེ ཨཧཾ ན བྷཝེཡྻནྟི ཡདི ཨཧཾ ནཱམ ཀོཙི ན བྷཝེཡྻཾ ཏཱདིསསྶ ཨཧཾསདྡཝཙནཱིཡསྶ ཀསྶཙི ཨཏྠསྶ ཨབྷཱཝཏོ. ཏཏོ ཨེཝ མམ པརིཀྑཱརོཔི ན བྷཝེཡྻཏསྶ ཙ པབྷངྒུབྷཱཝེན ཨནཝཊྛིཏབྷཱཝཏོ. ཨེཝཾ ཨཏྟུདྡེསིཀབྷཱཝེན པདདྭཡསྶ ཨཏྠཾ ཝཏྭཱ ཨིདཱནི ཀམྨཕལཝསེན ཝཏྟུཾ ‘‘སཙེ ཝཱ པནཱ’’ཏིཨཱདི ཝུཏྟཾ. ཨཏཱིཏཔཙྩུཔྤནྣཝསེན སུཉྙཏཾ དསྶེཏྭཱ ཨིདཱནི པཙྩུཔྤནྣཱནཱགཏཝསེན ཏཾ དསྶེནྟོ ‘‘ཨིདཱནི པནཱ’’ཏིཨཱདི ཝུཏྟཾ. ཨེཝཾ ཨདྷིམུཙྩནྟོཏི ཨེདིསཾ ཨདྷིམུཏྟིཾ པཝཏྟེནྟོ. ཝིབྷཝིསྶཏཱིཏི ཝིནསྶིསྶཏི. ཝིབྷཝོ ཧི ཝིནཱསོ. ཏེནཱཧ ‘‘བྷིཛྫིསྶཏཱི’’ཏི. ཝིབྷཝདསྶནཾ ཝིབྷཝོཏི ཨུཏྟརཔདལོཔེན ཝུཏྟནྟི ཨཱཧ ‘‘ཝིབྷཝདསྶནེནཱ’’ཏི. ཝིབྷཝདསྶནཾ ནཱམ ཨཙྩནྟཱཡ ཝིནཱསསྶ དསྶནཾ. ཏནྟི ཨརིཡམགྒཾ. སཱམཉྙཛོཏནཱ ཧེསཱ ཝིསེསནིཊྛཱ ཧོཏཱིཏི ཏཏིཡམགྒཝསེན ཨཏྠོ ཝེདིཏབྦོ.

ཨུཔརི མགྒཕལནྟི ཨགྒམགྒཕལཾ. ནཏྠི ཨེཏིསྶཱ ཛཱཏིཡཱ ཨནྟརནྟི ཨནནྟརཱ, ཨནནྟརཱ ཝིཔསྶནཱ མགྒསྶ. གོཏྲབྷཱུ པན ཨནུལོམཝཱིཐིཔརིཡཱཔནྣཏྟཱ ཝིཔསྶནཱགཏིཀཾ ཝཱ སིཡཱ, ནིབྦཱནཱརམྨཎཏྟཱ མགྒགཏིཀཾ ཝཱཏི ན ཏེན མགྒོ ཨནྟརིཀོ ནཱམ ཧོཏི. ཏེནཱཧ ‘‘ཝིཔསྶནཱ མགྒསྶ ཨཱསནྣཱནནྟརཾ ནཱམཱ’’ཏི ¶ . ཕལཾ པན ནིབྦཱནཱརམྨཎཏྟཱ ཀིལེསཱནཾ པཛཧནཝསེན པཝཏྟནཏོ ལོཀུཏྟརབྷཱཝཏོ ཙ ཀམྨམགྒགཏིཀམེཝ, ཀུསལཝིཔཱཀབྷཱཝེན པན ནེསཾ ཨཏྠོ པབྷེདོཏི ཝིཔསྶནཱཡ ཕལསྶ སིཡཱ ཨནནྟརཏཱཏི ཝུཏྟཾ ‘‘ཕལསྶ དཱུརཱནནྟརཾ ནཱམཱ’’ཏི. ‘‘ཨཱསཝཱནཾ ཁཡོ’’ཏི པན ཨགྒམགྒེ ཝུཙྩམཱནེ ཝིཔསྶནཱནཾ ཨཱསནྣཏཱཡ ཝཏྟབྦམེཝ ནཏྠི. ཨཏསིཏཱཡེཏི ན ཏསིཏབྦེ ཏཱསཾ ཨནཱཔཛྫིཏབྦེ. ཏཱསོཏི ཏཱསཧེཏུ ‘‘ཏསཏི ཨེཏསྨཱ’’ཏི ཀཏྭཱ. སོཏི ཨསྶུཏཝཱ པུཐུཛྫནོ. ཏིལཀྑཎཱཧཏནྟི ཨནིཙྩཏཱདིལཀྑཎཏྟཡལཀྑིཏཾ. མནམྷི ནཊྛོཏི ཨཱིསཀཾ ནཊྛོམྷི, ཏཏོ པརམྤི ཏཏྠེཝ ཋཏྭཱ ཀིཉྩི ཨཔཱུརིཏཏྟཱ ཨེཝ མུཏྟོཏི ཨདྷིཔྤཱཡོ. ‘‘ན ཏཱསོ ནཱམ ཧོཏཱི’’ཏི ཝཏྭཱ ཏསྶ ཨཏཱསབྷཱཝཾ དསྶེཏུཾ ‘‘ན ཧཱི’’ཏིཨཱདི ཝུཏྟཾ. ཀལྱཱཎཔུཐུཛྫནོ ཧི བྷཡཏུཔཊྛཱནཉཱཎེན ‘‘སབྷཡཱ སངྑཱརཱ’’ཏི ཝིཔསྶནྟོ ན ཨུཏྟསཏི.

ཨུདཱནསུཏྟཝཎྞནཱ ནིཊྛིཏཱ.

༤. ཨུཔཱདཱནཔརིཔཝཏྟསུཏྟཝཎྞནཱ

༥༦. ཙཏུནྣཾ ¶ པརིཝཊྚནཝསེནཱཏི པཙྩེཀཀྑནྡྷེསུ ཙཏུནྣཾ ཨརིཡསཙྩཱནཾ པརིཝཊྚནཝསེན. རཱུཔཾ ཨབྦྷཉྙཱསིནྟི སཀལབྷཱུཏུཔཱདཱརཱུཔཾ ཀུཙྪིཏབྷཱཝཏོ ཏཏྠ ཙ ཏུཙྪཝིཔལླཱསཏཱཡ ‘‘དུཀྑསཙྩ’’ནྟི ཨབྷིཝིསིཊྛེན ཉཱཎེན ཨཉྙཱསིཾ པཊིཝིཛ྄ཛྷིཾ. ཨཱཧཱརཝསེན རཱུཔཀཱཡསྶ ཧཱནིཝུདྡྷཱདཱིནཾ པཱཀཊབྷཱཝཏོ ཝིསེསཔཙྩཡཏོ ཙ ཏསྶ ‘‘ཨཱཧཱརསམུདཡཱ’’ཏི ཝུཏྟཾ. དུཀྑསམུདཡཀཐཱ ནཱམ ཝཊྚཀཐཱཏི ‘‘སཙྪནྡརཱགོ’’ཏི ཝིསེསེཏྭཱ ཝུཏྟཾ. ཚནྡརཱགགྒཧཎེན ཙ ཨུཔཱདཱནཀམྨཱཝིཛྫཱཔི གཧིཏཱ ཨེཝ. པཊིཔནྣཱ ཧོནྟཱིཏི ཨཏྠོ. ཝཏྟམཱནཀཱལཔྤཡོགོ ཧེས ཡཐཱ ‘‘ཀུསལཾ ཙིཏྟཾ ཨུཔྤནྣཾ ཧོཏཱི’’ཏི. པཏིཊྛཧནྟཱིཏི པཏིཊྛཾ ལབྷནྟི. ཀེཝལིནོཏི ཨིདྷ ཝིམུཏྟིགུཎེན པཱརིཔཱུརཱིཏི ཨཱཧ ‘‘སཀལིནོ ཀཏསབྦཀིཙྩཱ’’ཏི. ཡེན ཏེཏི ཡེན ཨཝསིཊྛེན ཏེ ཨསེཀྑེ པཉྙཱཔེནྟཱ པཉྙཱཔེཡྻུཾ, ཏཾ ནེསཾ ཝཊྚཾ སེཀྑཱནཾ ཝིཡ ནཏྠི པཉྙཱཔནཱཡ. ཝཊྚནྟི ཀཱརཎཾ ཝཊྚནཊྛེན ཕལསྶ པཝཏྟནཊྛེན. ཨསེཀྑབྷཱུམིཝཱརོཏི ཨསེཀྑབྷཱུམིཔྤཝཏྟི.

ཨུཔཱདཱནཔརིཔཝཏྟསུཏྟཝཎྞནཱ ནིཊྛིཏཱ.

༥. སཏྟཊྛཱནསུཏྟཝཎྞནཱ

༥༧. སཏྟསུ ¶ ཨོཀཱསེསཱུཏི རཱུཔཔཛཱནནཱདཱིསུ སཏྟསུ ཨོཀཱསེསུ. ཝུསིཏཝཱསོཏི ཝུསིཏཨརིཡཝཱསོ. ཨེཏྠཱཏི ཨིམསྨིཾ ཨུདྡེསེ. སེསཾ ནཱམ ཨིདྷ ཝུཏྟཱཝསེསཾ. ཝུཏྟནཡེནཱཏི ཧེཊྛཱ ཝུཏྟནཡེན ཝེདིཏབྦཾ. ཨུསྶདནནྡིཡནྟི ཨུསྶནྣགུཎཝཏོ ཏོསནཾ སམྨོདཱཔནཾ. གུཎཀིཏྟནེན པལོབྷནཱིཡཾ སེཀྑཀལྱཱཎཔུཐུཛྫནཱནཾ པསཱདུཔྤཱདནེན. ཨིདཱནི ཝུཏྟམེཝ ཨཏྠཾ པཱཀཊཾ ཀཱཏུཾ ‘‘ཡཐཱ ཧཱི’’ཏིཨཱདི ཝུཏྟཾ.

ཨེཏྟཱཝཏཱཏི པཉྩནྣཾ ཁནྡྷཱནཾ ཝསེན སཏྟསུ ཋཱནེསུ ཀོསལླདཱིཔནེན ཨེཏྟཀེན དེསནཱཀྐམེན. ཏནྟི ཨཱརམྨཎཾ. དྷཱཏུཨཱདིམཏྟམེཝཱཏི དྷཱཏཱཡཏནཔཊིཙྩསམུཔྤཱདམཏྟམེཝ. ཨིམེསུ དྷམྨེསཱུཏི ཨིམེསུ ཛཱཏཱདཱིསུ. ཀམྨཾ ཀཏྭཱཏི སམྨསནཀམྨཾ ནིཊྛཔེཏྭཱཏི ཨཏྠོ. ཨེཝམེཏྠ པཉྩནྣཾ ཁནྡྷཱནཾ ཝསེན སཏྟཊྛཱནཀོསལླཔཝཏྟིཡཱ པབྷེདེན ཝིབྷཛིཏྭཱ ‘‘ཏིཝིདྷཱུཔཔརིཀྑཱི’’ཏི དསྶེཏི དྷམྨརཱཛཱ.

སཏྟཊྛཱནསུཏྟཝཎྞནཱ ནིཊྛིཏཱ.

༦. སམྨཱསམྦུདྡྷསུཏྟཝཎྞནཱ

༥༨. ཨདྷིཀཾ ¶ སཝིསེསཾ པཡསཏི པཡུཉྫཏི ཨེཏེནཱཏི ཨདྷིཔྤཡཱསོ, ཝིསིཊྛཔཡོགོ. ཏེནཱཧ ‘‘ཨདྷིཀཔཡོགོ’’ཏི. ཨིམཉྷི མགྒནྟི ཨཊྛངྒིཀཾ ཨརིཡམགྒམཱཧ. ཨིདྷཱཏི ཨིམསྨིཾ སུཏྟེ. ཨཝཏྟམཱནཊྛེནཱཏི བུདྡྷུཔྤཱདཏོ པུབྦེ ན ཝཏྟམཱནབྷཱཝེན. མགྒཾ ཛཱནཱཏཱིཏི སམུདཱགམཏོ པཊྛཱཡ སཔུབྦབྷཱགཾ སསམྦྷཱརཝིསཡཾ སཕལཾ སཨུདྲཡཾ ཨརིཡཾ མགྒཾ ཛཱནཱཏི ཨཝབུཛ྄ཛྷཏཱིཏི མགྒཉྙཱུ. ཝིདིཏནྟི ཨཉྙེསམྤི ཉཱཏཾ པཊིལདྡྷཾ ཧཏྠཏལེ ཨཱམལཀཾ ཝིཡ པཱཀཊཾ ཨཀཱསི, ཏཐཱ ཀཏྭཱ དེསེསི. ཨམགྒེ པརིཝཛྫནེན མགྒེ པཊིཔཏྟཱིཏི ཏསྶ མགྒཀུསལཏཱ ཝིཡ ཨམགྒཀུསལཏཱཔི ཨིཙྪིཏབྦཱཏི ཨཱཧ ‘‘མགྒེ ཙ ཨམགྒེ ཙ ཀོཝིདོ’’ཏི. ཨཧཾ པཋམཾ གཏོཏི ཨཧཾ པཋམམགྒེན སམནྣཱགཏོ.

སམྨཱསམྦུདྡྷསུཏྟཝཎྞནཱ ནིཊྛིཏཱ.

༧. ཨནཏྟལཀྑཎསུཏྟཝཎྞནཱ

༥༩. པུརཱཎུཔཊྛཱཀེཏི ¶ པུབྦེ པདྷཱནཔདཧནཀཱལེ ཨུཔཊྛཱཀབྷཱུཏེ. ‘‘ཨཝསཝཏྟནཊྛེན ཨསྶཱམིཀཊྛེན སུཉྙཏཊྛེན ཨཏྟཔཊིཀྑེཔཊྛེནཱ’’ཏི ཨེཝཾ པུབྦེ ཝུཏྟེཧི. ཨེཏྟཀེན ཋཱནེནཱཏི ‘‘རཱུཔཾ, བྷིཀྑཝེ, ཨནཏྟཱ’’ཏི ཨཱརབྷིཏྭཱ ཡཱཝ ‘‘ཨེཝཾ མེ ཝིཉྙཱཎཾ མཱ ཨཧོསཱི’’ཏི ཨེཏྟཀེན སུཏྟཔདེསེན. ཨཀཐིཏསྶེཝ ཀཐནཾ ཨུཏྟརཾ, ན ཀཐིཏསྶཱཏི ཝུཏྟཾ ‘‘ཏཱནི དསྶེཏྭཱ’’ཏི. སམོདྷཱནེཏྭཱཏི སམྤིཎྜིཏྭཱ. ཝིཏྠཱརཀཐཱཏི ཝིཏྠཱརཏོ ཨཊྛཀཐཱ. ཨནཏྟལཀྑཎམེཝཱཏི ཏབྦཧུལཏཱཡ ཏཔྤདྷཱནཏཱཡ ཙ ཝུཏྟཾ. ཨནིཙྩཏཱདཱིནམྤི ཧི ཏཏྠ ཏཾདཱིཔནཏྠམེཝ ཝུཏྟཏྟཱ ཏདེཝ ཛེཊྛཾ པདྷཱནཾ ཏཐཱ ཝེནེཡྻཛ྄ཛྷཱསཡཏོ.

ཨནཏྟལཀྑཎསུཏྟཝཎྞནཱ ནིཊྛིཏཱ.

༨. མཧཱལིསུཏྟཝཎྞནཱ

༦༠. ཨེཀནྟདུཀྑནྟིཨཱདཱིནི པདཱནི ཝུཏྟནཡཱནེཝ, ཏསྨཱ ཏཏྠ ཝུཏྟནཡེནེཝ ཨཏྠོ ཝེདིཏབྦོ. ཨེཏྠ ཙ ཡཐཱ སརཱགོ ཧེཏུ པཙྩཡོ སཾཀིལེསཱཡ, ཨེཝཾ སཝིཔསྶནོ མགྒོ ཧེཏུ པཙྩཡོ ཙ ཝིསུདྡྷིཡཱཏི དཊྛབྦཾ.

མཧཱལིསུཏྟཝཎྞནཱ ནིཊྛིཏཱ.

༩. ཨཱདིཏྟསུཏྟཝཎྞནཱ

༦༡. ཨེཀཱདསཧཱིཏི ¶ རཱགཱདཱིཧི ཨུཔཱཡཱསཔརིཡོསཱནེཧི ཨེཀཱདསཧི སནྟཱཔནཊྛེན ཨགྒཱིཧི. དྭཱིསཱུཏི ཨཊྛམནཝམེསུ. དུཀྑལཀྑཎམེཝཱཏི ཏབྦཧུལཏཱཡ ཏཔྤདྷཱནཏཱཡ ཙ ཝུཏྟཾ.

ཨཱདིཏྟསུཏྟཝཎྞནཱ ནིཊྛིཏཱ.

༡༠. ནིརུཏྟིཔཐསུཏྟཝཎྞནཱ

༦༢. ནིརུཏྟིཡོཝ ནིརུཏྟིཔཐཱཏི པཐ-སདྡེན པདཝཌྜྷནམཱཧ ཡཐཱ ‘‘བཱིཛཱནིཡེཝ བཱིཛཛཱཏཱནཱི’’ཏི. ནིརུཏྟིཝསེནཱཏི ནིབྦཙནཝསེན. པཐཱ ཙ ཨཏྠཱནུརཱུཔབྷཱཝཏོ ¶ . ཏཱིཎིཔཱིཏི ནིརུཏྟིཨདྷིཝཙནཔཉྙཏྟིཔཐཔདཱནི. ཏཐཱ ཧི ‘‘ཕུསཏཱིཏི ཕསྶོ’’ཏིཨཱདིནཱ ནཱིཧརིཏྭཱ ཝཙནཾ ནིརུཏྟི, ‘‘སིརཱིཝཌྜྷཀོ དྷནཝཌྜྷཀོ’’ཏིཨཱདིནཱ ཝཙནམཏྟམེཝ ཨདྷིཀཱརཾ ཀཏྭཱ པཝཏྟཾ ཨདྷིཝཙནཾ, ‘‘ཏཀྐོ ཝིཏཀྐོ’’ཏིཨཱདིནཱ ཏཾཏཾཔཀཱརེན ཉཱཔནཏོ པཉྙཏྟི. ཨཐ ཝཱ ཏཾཏཾཨཏྠཔྤཀཱསནེན ནིཙྪིཏཾ, ནིཡཏཾ ཝཱ ཝཙནཾ ནིརུཏྟི. ཨདྷི-སདྡོ ཨུཔརིབྷཱགེ, ཨུཔརི ཝཙནཾ ཨདྷིཝཙནཾ. ཀསྶ ཨུཔརི? པཀཱསེཏབྦསྶ ཨཏྠསྶཱཏི པཱཀཊོཡམཏྠོ. ཨདྷཱིནཾ ཝཙནཾ ཨདྷིཝཙནཾ. ཀེན ཨདྷཱིནཾ? ཨཏྠེན. ཨཏྠསྶ པཉྙཱཔནཏྠེན པཉྙཏྟཱིཏི ཨེཝཾ ནིརུཏྟིཨཱདིཔདཱནཾ སབྦཝཙནེསུ པཝཏྟི ཝེདིཏབྦཱ. ཨཉྙཐཱ ‘‘ཕུསཏཱིཏི ཕསྶོ’’ཏིཨཱདིཔྤཀཱརེན ནིདྡྷཱརཎཝཙནཱནཾཡེཝ ནིརུཏྟིཏཱ, སིརིཝཌྜྷཀདྷནཝཌྜྷཀཔཀཱརཱནམེཝ ཨབྷིལཱཔནཾ ཨདྷིཝཙནཏཱ. ‘‘ཏཀྐོ ཝིཏཀྐོ’’ཏི ཨེཝཾཔཀཱརཱནམེཝ ཨེཀམེཝ ཨཏྠཾ ཏེན ཏེན པཀཱརེན ཉཱཔེནྟཱནཾ ཝཙནཱནཾ པཉྙཏྟིཏཱ ཙ ཨཱཔཛྫེཡྻ. ཨསཾཀིཎྞཱཏི ན སཾཀིཎྞཱ. ཏེནཱཧ ‘‘ཨཝིཛཧིཏཱ…པེ… ཨཚཌྜིཏཱ’’ཏི. ན སཾཀཱིཡནྟཱིཏི ན སཾཀིརཱིཡནྟི, ན སཾཀཱིཡིསྶནྟི ན སཾཀིརཱིཡིསྶནྟཱིཏི ཨཏྠོ. ཨཔྤཊིཀུཊྛཱཏི ན པཊིཀྑིཏྟཱ. ཡསྨཱ བྷངྒཾ ཨཏིཀྐནྟཾ ཨུཔྤཱདཱདི ཨཏིཀྐནྟམེཝ ཧོཏི, ཏསྨཱ ཝུཏྟཾ ‘‘བྷངྒམེཝཱ’’ཏི. ཡསྨཱ དེསནྟརཾ སངྐནྟོཔི ཨཏིཀྐནྟནྟི ཝུཙྩཏི, ཏསྨཱ ཏདཱབྷཱཝཾ དསྶེཏུཾ ‘‘དེསནྟརཾ ཨསངྐམིཏྭཱ’’ཏི ཝུཏྟཾ. ཡཏྠ ཡཏྠ ཧི སངྑཱརཱ ཨུཔྤཛྫནྟི, ཏཏྠ ཏཏྠེཝ བྷིཛྫནྟི ནིརུཛ྄ཛྷནྟི ཝིཔརིཎམནྟི ཝིནཱསཾ ཨཱཔཛྫནྟི. ཏེནཱཧ ‘‘ཝིཔརིཎཏནྟི…པེ… ནཊྛ’’ནྟི. ཨཔཱཀཊཱིབྷཱུཏཾ ཨཛཱཏཏྟཱ ཨེཝ.

ཝསབྷཎགོཏྟཏཱཡ ཝསྶབྷཉྙཱ. མཱུལདིཊྛིགཏིཀཱཏི མཱུལབྷཱུཏཱ དིཊྛིགཏིཀཱ, ཨིམསྨིཾ ཀཔྤེ སབྦཔཋམཾ ཏཱདིསདིཊྛིསམུཔྤཱདཀཱ. པུནཔྤུནཾ ཨཱཝཛྫེནྟསྶཱཏི ཨཧེཏུཝཱདཔཊིསཾཡུཏྟགནྠཾ ཨུགྒཧེཏྭཱ པརིཡཱཔུཎིཏྭཱ ཏདཏྠཾ ཝཱིམཾསནྟསྶ ‘‘ནཏྠི ཧེཏུ, ནཏྠི པཙྩཡོ སཏྟཱནཾ སཾཀིལེསཱཡཱ’’ཏིཨཱདིནཡཔྤཝཏྟཱཡ ¶ ལདྡྷིཡཱ ཨཱརམྨཎེ མིཙྪཱསཏི སནྟིཊྛཏི, ‘‘ནཏྠི ཧེཏཱུ’’ཏིཨཱདིཝསེན ཨནུསྶཝཱུཔལདྡྷེ ཨཏྠེ ཏདཱཀཱརཔརིཝིཏཀྐནེཧི སཝིགྒཧེ ཝིཡ སརཱུཔཏོ ཙིཏྟསྶ པཙྩུཔཊྛིཏེ ཙིརཀཱལཔརིཙཡེན ‘‘ཨེཝམེཏ’’ནྟི ནིཛ྄ཛྷཱནཀྑམབྷཱཝཱུཔགམནེན ནིཛ྄ཛྷཱནཀྑནྟིཡཱ ཏཐཱགཧིཏེ པུནཔྤུནཾ ཏཐེཝ ཨཱསེཝནྟསྶ བཧུལཱིཀརོནྟསྶ མིཙྪཱཝིཏཀྐེན སམཱདིཡམཱནཱ མིཙྪཱཝཱཡཱམཱུཔཏྠམྦྷིཏཱ ཨཏཾསབྷཱཝཾ ‘‘ཏཾསབྷཱཝ’’ནྟི ¶ གཎྷནྟཱི མིཙྪཱསཏཱིཏི ལདྡྷནཱམཱ ཏཾལདྡྷིསཧགཏཱ ཏཎྷཱ སནྟིཊྛཏི. ཡཐཱསཀཾ ཝིཏཀྐཱདིཔཙྩཡལཱབྷེན ཏསྨིཾ ཨཱརམྨཎེ ཨདྷིཊྛིཏཏཱཡ ཨནེཀགྒཏཾ པཧཱཡ ཙིཏྟཾ ཨེཀགྒཏཾ ཨཔྤིཏཾ ཝིཡ ཧོཏི མིཙྪཱསམཱདྷིནཱ. སོཔི ཧི པཙྩཡཝིསེསེཧི ལདྡྷབྷཱཝནཱབལོ ཨཱིདིསེ ཋཱནེ སམཱདྷཱནཔཏིརཱུཔཀིཙྩཀརོ ཧོཏིཡེཝ ཝཱལཝིཛ྄ཛྷནཱདཱིསུ ཝིཡཱཏི དཊྛབྦཾ. ཏཐཱ ཧི ཨནེཀཀྑཏྟུཾ ཏེནཱཀཱརེན པུབྦབྷཱགིཡེསུ ཛཝནཝཱརེསུ པཝཏྟེསུ སབྦཔཙྪིམེ ཛཝནཝཱརེ སཏྟ ཛཝནཱནི ཛཝནྟི. ཏཏྠ པཋམེ སཏེཀིཙྪོ ཧོཏི, ཏཐཱ དུཏིཡཱདཱིསུ. སཏྟམེ པན ཛཝནེ སམྤཏྟེ ཨཏེཀིཙྪོ ཧོཏི. ཏེནཱཧ ‘‘ཨསྶཱདེནྟསྶཱ’’ཏིཨཱདི. ཨིམེསུཔཱིཏི དྭཱིསུཔི ཋཱནེསུ.

པཙྩུཔྤནྣཾ ཝཱཏི ཨེཏྠ ཨིཏི-སདྡོ ཨཱདིཨཏྠོ. ཏེན ‘‘ཡདེཏཾ ཨནཱགཏཾ ནཱམ, ནཡིདཾ ཨནཱགཏ’’ནྟིཨཱདིཀཾ སངྒཎྷཱཏི. ཏེཔཱིཏི ཏེ ཝསྶབྷཉྙཱཔི ན མཉྙིཾསུ ལོཀསམཉྙཱཡ ཨནཏིཀྐམནཱིཡཏོ. ཏེནཱཧ ‘‘ཨཏཱིཏཾ པནཱ’’ཏིཨཱདི. ཁནྡྷཱནཾ ཨུཔརི ནིརུལ༹ྷཱ པཎྞཏྟི.

ནིརུཏྟིཔཐསུཏྟཝཎྞནཱ ནིཊྛིཏཱ.

ཨུཔཡཝགྒཝཎྞནཱ ནིཊྛིཏཱ.

༧. ཨརཧནྟཝགྒོ

༡. ཨུཔཱདིཡམཱནསུཏྟཝཎྞནཱ

༦༣. གཎྷམཱནོཏི ‘‘ཨེཏཾ མམཱ’’ཏིཨཱདིནཱ གཎྷམཱནོ. པཱསེནཱཏི རཱགཔཱསེན. ཏཉྷི མཱརོ མཱརཔཱསོཏི མཉྙཏི. ཏེནཱཧ ‘‘ཨནྟལིཀྑཙརོ པཱསོ, ཡྭཱཡཾ ཙརཏི མཱནསོ’’ཏི (སཾ. ནི. ༡.༡༥༡; མཧཱཝ. ༣༣). མུཏྟོ ནཱམ ཧོཏི ཨནུཔཱདིཡཏོ སབྦསོ ཁནྡྷསྶ ཨབྷཱཝཏོ.

ཨུཔཱདིཡམཱནསུཏྟཝཎྞནཱ ནིཊྛིཏཱ.

༢-༦. མཉྙམཱནསུཏྟཱདིཝཎྞནཱ

༦༤-༦༨. ‘‘ཨེཏཾ ¶ ¶ མམཱ’’ཏིཨཱདིནཱ. མཉྙནཱ ཨབྷིནནྡནཱ ཙ. ཏཎྷཱཚནྡོཏི ཏཎྷཱ ཨེཝ ཚནྡོ. སཱ ཧི ཏཎྷཱཡནཊྛེན ཏཎྷཱ, ཚནྡིཀཏཊྛེན ཚནྡོ. ཙཏུཏྠཾ ཨནིཙྩལཀྑཎམུཁེན ཝུཏྟཾ, པཉྩམཾ དུཀྑལཀྑཎམུཁེན, ཚཊྛཾ ཨནཏྟལཀྑཎམུཁེན. སེསཾ ཏཱིསུཔི སདིསམེཝཱཏི ཝུཏྟཾ ‘‘ཨེསེཝ ནཡོ’’ཏི.

མཉྙམཱནསུཏྟཱདིཝཎྞནཱ ནིཊྛིཏཱ.

༧. ཨནཏྟནིཡསུཏྟཝཎྞནཱ

༦༩. ཨནཏྟནིཡནྟི ན ཨཏྟནིཡཾ. ཏེནཱཧ ‘‘ན ཨཏྟནོ སནྟཀ’’ནྟི.

ཨནཏྟནིཡསུཏྟཝཎྞནཱ ནིཊྛིཏཱ.

༨-༡༠. རཛནཱིཡསཎྛིཏསུཏྟཱདིཝཎྞནཱ

༧༠-༧༢. རཛནཱིཡེནཱཏི རཛནཱིཡེན རཱགུཔྤཱདཀེན. ཏེནཱཧ ‘‘རཱགསྶ པཙྩཡབྷཱཝེནཱ’’ཏི. རཱཧུལསཾཡུཏྟེ རཱཧུལཏྠེརསྶ པུཙྪཱཝསེན ཨཱགཏཱ. ཨིདྷ རཱདྷཏྠེརསྶ སུརཱདྷཏྠེརསྶ ཙ པུཙྪཱཝསེན, པཱལི༹ པན སབྦཏྠ སདིསཱ. ཏེནཱཧ ‘‘ཝུཏྟནཡེནེཝ ཝེདིཏབྦཱནཱི’’ཏི.

རཛནཱིཡསཎྛིཏསུཏྟཱདིཝཎྞནཱ ནིཊྛིཏཱ.

ཨརཧནྟཝགྒཝཎྞནཱ ནིཊྛིཏཱ.

༨. ཁཛྫནཱིཡཝགྒོ

༡-༣. ཨསྶཱདསུཏྟཱདིཝཎྞནཱ

༧༣-༧༥. ཙཏུསཙྩམེཝ ཀཐིཏཾ ཨསྶཱདཱདཱིནཉྩེཝ སམུདཡཱདཱིནཉྩ ཝསེན དེསནཱཡ པཝཏྟཏྟཱ. ཡསྨཱ ཨསྶཱདོ སམུདཡསཙྩཾ, ཨཱདཱིནཝོ དུཀྑསཙྩཾ, ནིསྶརཎཾ མགྒསཙྩཾ ནིརོདྷསཙྩཉྩཱཏི ཝུཏྟོཝཱཡམཏྠོ; དུཏིཡེ སམུདཡསྶཱདོ ¶ སམུདཡསཙྩཾ, ཨཱདཱིནཝོ དུཀྑསཙྩཾ, ཨཏྠངྒམོ ¶ ནིརོདྷསཙྩཾ, ནིསྶརཎཾ མགྒསཙྩནྟི ཝུཏྟོཝཱཡམཏྠོ; ཏཏིཡཾ ཨརིཡསཱཝཀསྶེཝ ཝསེན ཝུཏྟཾ.

ཨསྶཱདསུཏྟཱདིཝཎྞནཱ ནིཊྛིཏཱ.

༤. ཨརཧནྟསུཏྟཝཎྞནཱ

༧༦. ཡཏྟཀཱ སཏྟཱཝཱསཱཏི ཏསྨིཾ ཏསྨིཾ སཏྟནིཀཱཡེ ཨཱཝསནཊྛེན སཏྟཱ ཨེཝ སཏྟཱཝཱསཱ. ཏེན ཡཏྟཀཱ སཏྟཱཝཱསཱ, ཏེཧི སབྦེཧིཔི ཨེཏེ ཨགྒཱ ཨེཏེ སེཊྛཱ, ཡེ ཨིམེ ཨརཧནྟཱཏི དསྶེཏི. པུརིམནཡེནེཝཱཏི པུརིམསྨིཾ སཏྟཊྛཱནཀོསལླསུཏྟེ ཝུཏྟནཡེན.

ཏདཏྠཔརིདཱིཔནཱཧཱིཏི ‘‘པཉྩཀྑནྡྷེ པརིཉྙཱཡ. ཏཎྷཱ ཏེསཾ ན ཝིཛྫཏི. ཨསྨིམཱནོ སམུཙྪིནྣོ’’ཏིཨཱདིནཱ ཏསྶ ཡཐཱནིདྡིཊྛསྶ སུཏྟསྶ ཨཏྠདཱིཔནཱཧི ཙེཝ ‘‘ཨནེཛཾ ཏེ ཨནུཔྤཏྟཱ, ཙིཏྟཾ ཏེསཾ ཨནཱཝིལ’’ནྟིཨཱདིནཱ ཝིསེསཏྠཔརིདཱིཔནཱཧི ཙ. ཛྷཱནམགྒཕལཔརིཡཱཔནྣཾ ཨཏིསཡིཏསུཁཾ ཨེཏེསམཏྠཱིཏི སུཁིནོཏི ཨཱཧ ‘‘ཛྷཱན…པེ… སུཁིཏཱ’’ཏི. ཏཎྷཱ ཏེསཾ ན ཝིཛྫཏཱིཏི ཨེཏྠ ཏེསཾ ཨཔཱཡདུཀྑཛནིཀཱ ཏཎྷཱ ན ཝིཛྫཏཱིཏི ཝུཏྟཾ. ཝཊྚམཱུལིཀཱཡ ཏཎྷཱཡ ཨབྷཱཝཱ ‘‘ནནྡཱི ཏེསཾ ན ཝིཛྫཏཱི’’ཏི ཨེཏྠ ཝུཙྩཏཱིཏི. ཨིམསྶཔཱིཏི པི-སདྡེན དུཀྑསྶཱབྷཱཝེནཔཱིཏི དུཀྑཱབྷཱཝོ ཝིཡ ཝཊྚམཱུལིཀཏཎྷཱབྷཱཝོ སམྤིཎྜཱིཡཏཱིཏི དཊྛབྦཾ. ཏེན ཧི ཏེ ཨནུཔཱདིསེསནིབྦཱནཔྤཏྟིཡཱ ཨཙྩནྟསུཁིཏཱ ཨེཝཱཏི ཝུཙྩནྟཱིཏི. ‘‘སེཡྻོཧམསྨཱི’’ཏིཨཱདིནཡཔྤཝཏྟིཡཱ ནཝཝིདྷོ. ཉཱཎེནཱཏི ཨགྒམགྒཉྙཱཎེན.

ཨརཧཏྟཾ ཨནུཔྤཏྟཱ. ཨལིཏྟཱཏི ཨམཀྑིཏཱ. བྲཧྨབྷཱུཏཱཏི བྲཧྨབྷཱཝཾ པཏྟཱ, བྲཧྨཏོ ཝཱ ཨརིཡམགྒཉཱཎཏོ བྷཱུཏཱ ཨརིཡཱཡ ཛཱཏིཡཱ ཛཱཏཱ. སཏྟ སདྡྷམྨཱ གོཙརོ པཝཏྟིཊྛཱནཾ ཨེཏེསནྟི སཏྟསདྡྷམྨགོཙརཱ.

ནིརཱསངྐཙཱརོ ནཱམ གཧིཏོ ཀུཏོཙིཔི ཏེསཾ ཨཱསངྐཱཡ ཨབྷཱཝཏོ. སམྨཱདིཊྛིཨཱདཱིཧི དསཧི ཨངྒེཧི སམྨཱཝིམུཏྟི-སམྨཱཉཱཎཔརིཡོསཱནེཧི. ‘‘ཨཱགུཾ ན ཀརོཏཱི’’ཏིཨཱདཱིཧི ཙཏཱུཧི ཀཱརཎེཧི. ཏཎྷཱ ཏེསཾ ན ཝིཛྫཏཱིཏི ཨིདམྤི ཏཎྷཱཔཧཱནསྶ བཧཱུཔཀཱརཏཱདསྶནཾ. ཏེནཱཧ ‘‘དཱསཀཱརིཀཱ ཏཎྷཱཔི ཏེསཾ ནཏྠཱི’’ཏི.

ན ¶ ཝིཀམྤནྟི ‘‘སེཡྻོཧམསྨཱི’’ཏིཨཱདིནཱ.

ཨུདྡྷཾ ¶ ཏིརིཡཾ ཨཔཱཙཱིནནྟི ཨེཏྠ ‘‘ཨུདྡྷཾ ཝུཙྩཏཱི’’ཏིཨཱདིནཱ རཱུཔམུཁེན ཨཏྟབྷཱཝཾ གཧེཏྭཱ པཝཏྟོ པཋམནཡོ. ཀཱལཏྟཡཝསེན དྷམྨཔྤཝཏྟིཾ གཧེཏྭཱ པཝཏྟོ དུཏིཡནཡོ. ཋཱནཝསེན སཀལལོཀདྷཱཏུཾ གཧེཏྭཱ པཝཏྟོ ཏཏིཡནཡོ. བུདྡྷཱཏི ཙཏྟཱརི སཙྩཱནི བུདྡྷཝནྟོ.

སཱིཧནཱདསམོདྷཱནནྟི སཱིཧནཱདཱནཾ སཾཀལནཾ. ལོཀེ ཨཏྟནོ ཨུཏྟརིཏརསྶཱབྷཱཝཱ ཨནུཏྟརཱ. ཨུཏྟརོ ཏཱཝ ཏིཊྛཏུ པུརིསོ, སདིསོཔི ཏཱཝ ནཏྠཱིཏི ཨསདིསཱ. སཀལམྤི བྷཝཾ ཨུཏྟརིཏྭཱ བྷཝཔིཊྛེ ཋཏྭཱ ཝིམུཏྟིསུཁེན སུཁིཏཏྟཱདིཝསེན ཨེཀཝཱིསཏིཡཱཀཱརེཧི སཱིཧནཱདཾ ནདནྟི.

ཨརཧནྟསུཏྟཝཎྞནཱ ནིཊྛིཏཱ.

༥. དུཏིཡཨརཧནྟསུཏྟཝཎྞནཱ

༧༧. སུདྡྷིཀམེཝཱཏི སུདྡྷསཾཁིཏྟབནྡྷམེཝ ཀཏྭཱ.

དུཏིཡཨརཧནྟསུཏྟཝཎྞནཱ ནིཊྛིཏཱ.

༦. སཱིཧསུཏྟཝཎྞནཱ

༧༨. སཱིཧོཏི པརིསྶཡསཧནཏོ པཊིཔཀྑཧནནཏོ ཙ ‘‘སཱིཧོ’ཏི ལདྡྷནཱམོ མིགཱདྷིཔཏི. ཙཏྟཱརོཏི ཙ སམཱནེཔི སཱིཧཛཱཏིཀབྷཱཝེ ཝཎྞཝིསེསཱདིསིདྡྷེན ཝིསེསེན ཙཏྟཱརོ སཱིཧཱ. ཏེ ཨིདཱནི ནཱམཏོ ཝཎྞཏོ ཨཱཧཱརཏོ དསྶེཏྭཱ ཨིདྷཱདྷིཔྤེཏསཱིཧཾ ནཱནཔྤཀཱརཏོ ཝིབྷཱཝེཏུཾ ‘‘ཏིཎསཱིཧོ’’ཏིཨཱདི ཨཱརདྡྷཾ. ཏིཎབྷཀྑོ སཱིཧོ ཏིཎསཱིཧོ པུརིམཔདེ ཨུཏྟརཔདལོཔེན ཡཐཱ ‘‘སཱཀཔཏྠིཝོ’’ཏི. ཀཱལ༹ཝཎྞཏཱཡ ཀཱལ༹སཱིཧོ. ཏཐཱ པཎྜུསཱིཧོ. ཏེནཱཧ ‘‘ཀཱལ༹སཱིཧོ ཀཱལ༹གཱཝིསདིསོ, པཎྜུསཱིཧོ པཎྜུཔལཱསཝཎྞགཱཝིསདིསོ’’ཏི. རཏྟཀམྦལསྶ ཝིཡ ཀེསརོ ཀེསརཀལཱཔོ ཨེཏསྶ ཨཏྠཱིཏི ཀེསརཱི. ལཱཁཱརསཔརིཀམྨཀཏེཧི ཝིཡ པཱདཔརིཡནྟེཧཱིཏི ཡོཛནཱ.

ཀམྨཱནུབྷཱཝསིདྡྷཨཱདྷིཔཙྩམཧེསཀྑཏཱཧི ¶ སབྦམིགགཎསྶ རཱཛཱ སུཝཎྞགུཧཏོ ཝཱཏིཨཱདི ‘‘སཱིཧསྶ ཝིཧཱརོ ཀིརིཡཱ ཨེཝཾ ཧོཏཱི’’ཏི ཀཏྭཱ ཝུཏྟཾ.

སམཾ པཏིཊྛཱཔེཏྭཱཏི སབྦབྷཱགེཧི སམམེཝ བྷཱུམིཡཾ པཏིཊྛཱཔེཏྭཱ. ཨཱཀཌྜྷིཏྭཱཏི པུརཏོ ཨཱཀཌྜྷིཏྭཱ ¶ . ཨབྷིཧརིཏྭཱཏི ཨབྷིམུཁཾ ཧརིཏྭཱ. སངྒྷཱཏནྟི ཝིནཱསཾ. ཝཱིསཏིཡཊྛིཀཾ ཋཱནཾ ཨུསབྷཾ.

སམསཱིཧོཏི སམཛཱཏིཀོ སམབྷཱགོ ཙ སཱིཧོ. སམཱནོསྨཱིཏི དེསནཱམཏྟཾ, སམཔྤབྷཱཝཏཱཡཔི ན བྷཱཡཏི. སཀྐཱཡདིཊྛིབལཝཏཱཡཱཏི ‘‘ཀེ ཨཉྙེ ཨམྷེཧི ཨུཏྟརིཏརཱ, ཨཐ ཁོ མཡམེཝ མཧཱབལཱ’’ཏི ཨེཝཾ བལཱཏིམཱནནིམིཏྟཱཡ ཨཧངྐཱརཧེཏུབྷཱུཏཱཡ སཀྐཱཡདིཊྛིཡཱ བལབྷཱཝེན. སཀྐཱཡདིཊྛིཔཧཱིནཏྟཱཏི སཀྐཱཡདིཊྛིཡཱ པཧཱིནཏྟཱ ནིརཧངྐཱརཏྟཱ ཨཏྟསིནེཧསྶ སུཊྛུ སམུགྒྷཱཊིཏཏྟཱ ན བྷཱཡཏི.

ཏཐཱ ཏཐཱཏི སཱིཧསདིསཏཱདིནཱ ཏེན ཏེན པཀཱརེན ཨཏྟཱནཾ ཀཐེསཱིཏི ཝཏྭཱ ཏམཏྠཾ ཝིཝརིཏྭཱ དསྶེཏུཾ ‘‘སཱིཧོཏི ཁོ’’ཏིཨཱདི ཝུཏྟཾ.

ཀཏཱབྷིནཱིཧཱརསྶ ལོཀནཱཐསྶ བོདྷིཡཱ ནིཡཏབྷཱཝཔྤཏྟིཡཱ ཨེཀནྟབྷཱཝཱིབུདྡྷབྷཱཝོཏི ཀཏྭཱ ‘‘ཏཱིསུ པཱསཱདེསུ ནིཝཱསཀཱལོ, མགདྷརཉྙོ པཊིཉྙཱདཱནཀཱལོ, པཱཡཱསསྶ པརིབྷུཏྟཀཱལོ’’ཏིཨཱདིནཱ ཨབྷིསམྦོདྷིཏོ པུརིམཱཝཏྠཱཔི སཱིཧསདིསཾ ཀཏྭཱ དསྶིཏཱ. བྷཱཝིནི, བྷཱུཏོཔཙཱརོཔི ཧི ལོཀཝོཧཱརོ. ཝིཛྫཱབྷཱཝསཱམཉྙཏོ བྷཱུཏཝིཛྫཱ ཨིཏརཝིཛྫཱཔི ཨེཀཛ྄ཛྷཾ གཧེཏྭཱ པཊིཙྩསམུཔྤཱདསམྨསནཏོ ཏཾ པུརེཏརཾ སིདྡྷཾ ཝིཔཱཀཾ ཝིཡ ཀཏྭཱ ཨཱཧ ‘‘ཏིསྶོ ཝིཛྫཱ ཝིསོདྷེཏྭཱ’’ཏི. ཨནུལོམཔཊིལོམཏོ པཝཏྟཉཱཎཝསེན ‘‘ཡམཀཉཱཎམནྠནེནཱ’’ཏི ཝུཏྟཾ.

ཏཏྠ ཝིཧརནྟསྶཱཏི ཨཛཔཱལནིགྲོདྷམཱུལེ ཝིཧརནྟསྶ. ཨེཀཱདསམེ དིཝསེཏི སཏྟསཏྟཱཧཏོ པརཾ ཨེཀཱདསམེ དིཝསེ. ཨཙལཔལླངྐེཏི ཨིསིཔཏནེ དྷམྨཙཀྐཔཝཏྟནཏྠཾ ནིསིནྣཔལླངྐེ. ཏམྤི ཧི ཀེནཙི ཨཔྤཊིཝཏྟིཡདྷམྨཙཀྐཔཝཏྟནཏྠཾ ¶ ནིསཛྫཱཏི ཀཏྭཱ ཝཛིརཱསནཾ ཝིཡ ཨཙལཔལླངྐཾ ཝུཙྩཏི. ཨིམསྨིཉྩ པན པདེཏི ‘‘དྭེམེ, བྷིཀྑཝེ, ཨནྟཱ’’ཏིཨཱདིནཡཔྤཝཏྟེ ཨིམསྨིཾ སདྡྷམྨཀོཊྛཱསེ. དྷམྨགྷོསོ…པེ… དསསཧསྶིལོཀདྷཱཏུཾ པཊིཙྪཱདེསི ‘‘སབྦཏྠ ཋིཏཱ སུཎནྟཱུ’’ཏི ཨདྷིཊྛཱནེན. སོལ༹སཧཱཀཱརེཧཱིཏི ‘‘དུཀྑཔརིཉྙཱ, སམུདཡཔྤཧཱནཾ, ནིརོདྷསཙྪིཀིརིཡཱ, མགྒབྷཱཝནཱ’’ཏི ཨེཝཾ ཨེཀེཀསྨིཾ མགྒེ ཙཏྟཱརི ཙཏྟཱརི ཀཏྭཱ སོལ༹སཧི ཨཱཀཱརེཧི.

ཝུཏྟོཡེཝ, ན ཨིདྷ ཝཏྟབྦོ, ཏསྨཱ ཏཏྠ ཝུཏྟནཡེནེཝ ཝེདིཏབྦོཏི ཨདྷིཔྤཱཡོ. ཡསྨཱ ཙ ཨཔརེཧིཔི ཨཊྛཧི ཀཱརཎེཧི བྷགཝཱ ཏཐཱགཏོཏི ཨཱརབྷིཏྭཱ ཨུདཱནཊྛཀཐཱདཱིསུཔི (ཨུདཱ. ཨཊྛ. ༡༨; ཨིཏིཝུ. ༣༨) ཏཐཱགཏཔདསྶ ཨཏྠོ ཝུཏྟོ ཨེཝ, ཏསྨཱ ཏཏྠ ཝུཏྟནཡེན ཨཏྠོ ཝེདིཏབྦོ ¶ . ཡདིཔི བྷགཝཱ ན བོདྷིཔལླངྐེ ནིསིནྣམཏྟོཝ ཨབྷིསམྦུདྡྷོ ཛཱཏོ, ཏཐཱཔི ཏཱཡ ནིསཛྫཱཡ ནིསིནྣོཝ པནུཛྫ སབྦཔརིསྶཡཾ ཨབྷིསམྦུདྡྷོ ཛཱཏོ. ཏཐཱ ཧི ཏཾ ‘‘ཨཔརཱཛིཏཔལླངྐ’’ནྟི ཝུཙྩཏི. ཏསྨཱ ‘‘ཡཱཝ བོདྷིཔལླངྐཱ ཝཱ’’ཏི ཝཏྭཱ ཏེན ཨཔརིཏུསྶནྟོ ‘‘ཡཱཝ ཨརཧཏྟམགྒཉཱཎཱ ཝཱ’’ཏི ཨཱཧ.

ཨིཏི རཱུཔནྟི ཨེཏྠ ཨིཏི-སདྡོ ནིདསྶནཏྠོ. ཏེན རཱུཔཾ སརཱུཔཏོ པརིམཱཎཏོ པརིཙྪེདཏོ དསྶིཏནྟི ཨཱཧ ‘‘ཨིདཾ རུཔ’’ནྟིཨཱདི. ‘‘ཨིདཾ རཱུཔ’’ནྟི ཧི ཨིམིནཱ བྷཱུཏུཔཱདཱཡབྷེདརཱུཔཾ སརཱུཔཏོ དསྶིཏཾ. ཨེཏྟཀཾ རཱུཔནྟི ཨིམིནཱ ཏཾ པརིམཱཎཏོ དསྶིཏཾ. ཏསྶ ཙ པརིམཱཎསྶ ཨེཀནྟབྷཱཝདསྶནེན ‘‘ན ཨིཏོ བྷིཡྻོ རཱུཔཾ ཨཏྠཱི’’ཏི ཝུཏྟཾ. སབྷཱཝཏོཏི སལཀྑཎཏོ. སརསཏོཏི སཀིཙྩཏོ. པརིཡནྟཏོཏི པརིམཱཎཔརིཡནྟཏོ. པརིཙྪེདཏོཏི ཡཏྟཀེ ཋཱནེ ཏསྶ པཝཏྟི, ཏསྶ པརིཙྪེདནཏོ. པརིཙྪིནྡནཏོཏི པརིཡོསཱནཔྤཏྟིཏོ. ཏཾ སབྦཾ དསྶིཏཾ ཧོཏི ཡཐཱཝུཏྟེན ཝིབྷཱགེན. ཨཡཾ རཱུཔསྶ སམུདཡོ ནཱམཱཏི ཨཡཾ ཨཱཧཱརཱདི རཱུཔསྶ སམུདཡོ ནཱམ. ཏེནཱཧ ‘‘ཨེཏྟཱཝཏཱ’’ཏིཨཱདི. ཨཏྠངྒམོཏི ནིརོདྷོ. ‘‘ཨཱཧཱརསམུདཡཱ ཨཱཧཱརནིརོདྷཱ’’ཏི ཙ ཨསཱདྷཱརཎམེཝ གཧེཏྭཱ སེསེ ཨཱདི-སདྡེན སངྒཎྷཱཏི.

པཎྞཱསལཀྑཎཔཊིམཎྜིཏནྟི ¶ པཎྞཱསཨུདཡབྦཡལཀྑཎཝིབྷཱུསིཏཾ སམུདཡཏྠངྒམགཧཎཏོ. ཁཱིཎཱསཝཏྟཱཏི ཨནཝསེསཾ སཱཝསེསཉྩ ཨཱསཝཱནཾ པརིཀྑཱིཎཏྟཱ. ཨནཱགཱམཱིནམྤི ཧི བྷཡཾ ཙིཏྟུཏྲཱསོ ཙ ན ཧོཏཱིཏི. ཉཱཎསཾཝེགོ བྷཡཏཱུཔཊྛཱནཉཱཎཾ. ཨིཏརེསཾ པན དེཝཱནནྟི ཨཁཱིཎཱསཝེ དེཝེ སནྡྷཱཡ ཝདཏི. བྷོཏི དྷམྨཱལཔནམཏྟནྟི ཝཱཙསིཀཾ ཏཐཱལཔནམཏྟཾ.

ཙཀྐནྟི སཏྠུ ཨཱཎཱཙཀྐཾ, ཏཾ པན དྷམྨཏོ ཨཱགཏནྟི དྷམྨཙཀྐཾ. ཏཏྠ ཨརིཡསཱཝཀཱནཾ པཊིཝེདྷདྷམྨཏོ ཨཱགཏནྟི དྷམྨཙཀྐཾ. ཨིཏརེསཾ དེསནཱདྷམྨཏོ ཨཱགཏནྟི དྷམྨཙཀྐཾ. དུཝིདྷེཔི ཉཱཎཾ པདྷཱནནྟི ཉཱཎསཱིསེན ཝུཏྟཾ ‘‘པཊིཝེདྷཉཱཎམྤི དེསནཱཉཱཎམྤཱི’’ཏི. ཨིདཱནི ཏཾ ཉཱཎདྭཡཾ སརཱུཔཏོ དསྶེཏུཾ ‘‘པཊིཝེདྷཉཱཎཾ ནཱམཱ’’ཏིཨཱདི ཝུཏྟཾ. ཡསྨཱ ཙསྶ ཉཱཎསྶ སུཔྤཊིཝིདྡྷཏྟཱ བྷགཝཱ ཏཱནི སཊྛི ནཡསཧསྶཱནི ཝེནེཡྻཱནཾ དསྶེཏུཾ སམཏྠོ ཨཧོསི, ཏསྨཱ ཏཱནི སཊྛི ནཡསཧསྶཱནི ཏེན ཉཱཎེན སདྡྷིཾཡེཝ སིདྡྷཱནཱིཏི ཀཏྭཱ དསྶེནྟོ ‘‘སཊྛིཡཱ ཙ ནཡསཧསྶེཧི པཊིཝིཛ྄ཛྷཱི’’ཏི ཨཱཧ. ཏིཔརིཝཊྚནྟི ཨིདཾ དུཀྑནྟི ཙ, པརིཉྙེཡྻནྟི ཙ, པརིཉྙཱཏནྟི ཙ ཨེཝཾ ཏིཔརིཝཊྚཾ, ཏཾཡེཝ དྭཱདསཱཀཱརཾ. ཏནྟི དེསནཱཉཱཎཾ པཝཏྟེཏི ཨེས བྷགཝཱ. ཨཔྤཊིཔུགྒལོཏི པཏིནིདྷིབྷཱུཏཔུགྒལརཧིཏོ. ཨེཀསདིསསྶཱཏི ནིབྦིཀཱརསྶ.

སཱིཧསུཏྟཝཎྞནཱ ནིཊྛིཏཱ.

༧. ཁཛྫནཱིཡསུཏྟཝཎྞནཱ

༧༩. ཝིཔསྶནཱཝསེནཱཏི ¶ ཨེཏརཧི རཱུཔཝེདནཱདཡོ ཨནུསྶརིཏྭཱ ‘‘པུབྦེཔཱཧཾ ཨེཝཾཝེདནོ ཨཧོསི’’ནྟི ཨཏཱིཏཱནཾ རཱུཔཝེདནཱདཱིནཾ པཙྩུཔྤནྣེཧི ཝིསེསཱབྷཱཝདསྶནཱ ཝིཔསྶནཱ, ཏསྶཱ ཝིཔསྶནཱཡ ཝསེན. ཡྭཱཡཾ ‘‘ན ཨིདཾ ཨབྷིཉྙཱཝསེནཱ’’ཏི པཊིཀྑེཔོ ཀཏོ, ཏསྶ ཀཱརཎཾ དསྶེནྟོ ‘‘ཨབྷིཉྙཱཝསེན ཧཱི’’ཏིཨཱདིམཱཧ. ཁནྡྷཔཊིབདྡྷཱ ནཱམ གོཏྟཝཎྞཧཱརཱདཡོ. ཨེཝཾ ཨནུསྶརནྟོཏི ཡཐཱཝུཏྟཝིཔསྶནཱཝསེན ཨནུསྶརནྟོ. སབྷཱཝདྷམྨཱནཾ ཨེཝ ཨནུསྶརཎསྶ ཝུཏྟཏྟཱ ‘‘སུཉྙཏཱཔབྦ’’ནྟི ཝུཏྟཾ.

ཡསྨཱ ¶ ཏེ ཨེཝ རཱུཔཱདཡོ ནེཝ ཨཏྟཱ, ན ཨཏྟནིཡཱ ཨསཱརཱ ཨནིསྶརཱ, ཏསྨཱ ཏཏོ སུཉྙཱ, ཏེསཾ བྷཱཝོ སུཉྙཏཱ, ཏསྶཱ ལཀྑཎཾ རུཔྤནཱདིཀཾ དསྶེཏུཾ.

ཀིཉྩཱཏི ཧེཏུཨཏྠཛོཏཀེ ཀཱརཎེ པཙྩཏྟཝཙནནྟི ཨཱཧ ‘‘ཀིཉྩཱཏི ཀཱརཎཔུཙྪཱ, ཀེན ཀཱརཎེན རཱུཔཾ ཝདེཐཱ’’ཏི. ཨེཏནྟི ཨེཏཾ བྷཱུཏུཔཱདཱཡབྷེདཾ དྷམྨཛཱཏཾ. ཀེན ཀཱརཎེན རཱུཔཾ ནཱམཱཏི ཀིཾ ཀཱརཎཾ ནིསྶཱཡ རཱུཔནྟི ཝུཙྩཏཱིཏི ཨཏྠོ. ཀཱརཎུདྡེསོཏི ཀཱརཎསྶ ཨུདྡིསནཾ. རུཔྤཏཱིཏི ཨེཏྠ རཱུཔཾ ནཱམ སཱིཏཱདིཝིརོདྷིཔཙྩཡསནྣིཔཱཏེན ཝིསདིསུཔྤཏྟི. ཏེནཱཧ ‘‘སཱིཏེནཔཱི’’ཏིཨཱདི. པབྦཏཔཱདེཏི ཙཀྐཝཱལ༹པབྦཏཔཱདེ, སོ པན ཏཏྠ ཨཙྩུགྒཏོ པཱཀཱརོ ཝིཡ ཋིཏོ. ཏཐཱ ཧི ཏཏྠ སཏྟཱ ཨོལམྦནྟཱ ཏིཊྛནྟི. ཧཏྠཔཱསཱགཏཱཏི ཧཏྠཔཱསཾ ཨཱགཏཱ ཨུཔཱགཏཱ. ཏཏྠཱཏི ཏསྨིཾ ཧཏྠཔཱསཱགཏེ སཏྟེ. ཚིཛྫིཏྭཱཏི མུཙྪཱཔཏྟིཡཱ མུཙྩིཏྭཱ, ཨངྒཔཙྩངྒཨུཙྪེདཝསེན ཝཱ པརིཙྪིཛྫིཏྭཱ. ཨཙྩནྟཁཱརེ ཨུདཀེཏི ཨཱཏཔསནྟཱཔཱབྷཱཝེན ཨཏིསཱིཏབྷཱཝམེཝ སནྡྷཱཡ ཨཙྩནྟཁཱརཏཱ ཝུཏྟཱ སིཡཱ. ན ཧི ཏཾ ཀཔྤསཎྛཱནཨུདཀཾ སམྤཏྟིཀརམཧཱམེགྷཝུཊྛཾ པཐཝཱིསནྡྷཱརཀཾ ཀཔྤཝིནཱསཨུདཀཾ ཝིཡ ཁཱརཾ བྷཝིཏུཾ ཨརཧཏི, ཏཐཱ སཏི པཐཝཱིཔི ཝིལཱིཡེཡྻཱཏི. མཧིཾསཀརཊྛཾ ནཱམ ཧིམཝནྟཔདེསེ ཨེཀཾ རཊྛཾ.

ཨཝཱིཙིམཧཱནིརཡེཏི སཨུསྶདཾ ཨཝཱིཙིནིརཡཾ ཝུཏྟཾ. གངྒཱཔིཊྛེཏི གངྒཱཏཱིརེ.

སརནྟཱ གཙྪནྟཱིཏི སརཱིསཔཔདསྶ ཨཏྠཾ ཝདཏི. ཨེཏནྟི རུཔྤནཾ. ཡཐཱ ཀཋིནཏཱ པཐཝིཡཱ པཙྩཏྟལཀྑཎཾ, ཨེཝཾ རུཔྤནཾ རཱུཔཀྑནྡྷསྶ པཙྩཏྟལཀྑཎཾ, སབྷཱཝབྷཱུཏལཀྑཎནྟི ཨཏྠོ.

པུརིམསདིསནྟི ¶ པུརིམེ རཱུཔཀྑནྡྷེ ཝུཏྟེན སདིསཾ. ཏཾ ‘‘ཀིནྟི ཀཱརཎཔུཙྪཱ’’ཏིཨཱདིནཱ ཝུཏྟནཡེནེཝ ཝེདིཏབྦཾ. སུཁཾ ཨིཊྛཱརམྨཎཾ. སུཁཱདཱིནཾ ཝེདནཱནཾ. པཙྩཡཏོཏི ཨཱརམྨཎཔཙྩཡཏོ. ཨཡམཏྠོཏི ‘‘སུཁཱརམྨཎཾ སུཁནྟི ཝུཙྩཏཱི’’ཏི ཨཡམཏྠོ. ཨུཏྟརཔདལོཔེན ཧེས ནིདྡེསོ. ཝེདཡཏཱིཏི ཨནུབྷཝཏི. ཝེདཡིཏལཀྑཎཱཏི ཨནུབྷཝནལཀྑཎཱ.

ནཱིལཔུཔྥེཏི ནཱིལཝཎྞཔུཔྥེ. ཝཏྠེ ཝཱཏི ནཱིལཝཏྠེ. ཝཱ-སདྡེན ཝཎྞདྷཱཏུཨཱདིཾ སངྒཎྷཱཏི. ཨཔྤནཾ ཝཱ ཛྷཱནཾ ཝཱཔེནྟོ. ཨུཔྤཛྫནསཉྙཱཔཱིཏི ཡཾ ¶ ཀིཉྩི ནཱིལཾ རཱུཔཱཡཏནཾ ཨཱརབྦྷ ཨུཔྤཛྫནསཉྙཱཔི, ཡཱ པཀིཎྞཀསཉྙཱཏི ཝུཙྩཏི.

རཱུཔཏྟཱཡཱཏི རཱུཔབྷཱཝཱཡ. ཡཱགུམེཝཱཏི ཡཱགུབྷཱཝིནམེཝ ཝཏྠུཾ. ཡཱགུཏྟཱཡ ཡཱགུབྷཱཝཱཡ. པཙཏི ནཱམ པུགྒལོ. ཨེཝནྟི ཡཐཱ ཡཱགུཨཱདིཝཏྠུཾ པུརིསོ ཡཱགུཨཱདིཨཏྠཱཡ པཙཏི ནིཔྥཱདེཏི, ཨཡཾ ཨེཝཾ རུཔྤནཱདིསབྷཱཝེ དྷམྨསམཱུཧེ ཡཐཱསཀཾ པཙྩཡེཧི ཨབྷིསངྑརིཡམཱནེ ཙེཏནཱཔདྷཱནོ དྷམྨསམཱུཧོ པཝཏྟནཏྠཾ ཝིསེསཔཙྩཡོ ཧུཏྭཱ ཏེ ཨབྷིསངྑརོཏི ནིརོཔེཏི ནིབྦཏྟེཏི. ཏེནཱཧ ‘‘པཙྩཡེཧཱི’’ཏིཨཱདི. རཱུཔམེཝཱཏི རཱུཔསབྷཱཝམེཝ, ན ཨཉྙཾ སབྷཱཝཾ. ཨབྷིསངྑརོཏཱིཏི ཨིཏརེཧི པཙྩཡདྷམྨེཧི ཨདྷིཀཾ སུཊྛུ པཙྩཡཏཾ ཀརོཏི. ‘‘ཨུཔགཙྪཏི ཡཱཔེཏི ཨཱཡཱུཧཏཱི’’ཏི ཏསྶེཝ ཝེཝཙནཱནི. ཨབྷིསངྑརཎམེཝ ཧི ཨཱཡཱུཧནཱདཱིནི. ནིབྦཏྟེཏཱིཏི ཏེསཾ དྷམྨཱནཾ རུཔྤནཱདིབྷཱཝེན ནིབྦཏྟིཡཱ པཙྩཡོ ཧོཏཱིཏི ཨཏྠོ. ཙེཏཡིཏལཀྑཎསྶ སངྑཱརསྶཱཏི ཨིདཾ སངྑཱརཀྑནྡྷདྷམྨཱནཾ ཙེཏནཱཔདྷཱནཏྟཱ ཝུཏྟཾ. ཏཐཱ ཧི བྷགཝཱ སུཏྟནྟབྷཱཛནཱིཡེ སངྑཱརཀྑནྡྷཾ ཝིབྷཛནྟེན ཙེཏནཱཝ ཝིབྷཏྟཱ.

ཝཱཏིངྒཎཾ བྲཧཏིཕལཾ. ཙཏུརསྶཝལླཱིཏི ཏིཝུཏཱལཏཱ. ཨཁཱརིཀནྟི ཁཱརརསརཧིཏཾ, ཏཾ པན པཎྞཕལཱདི. ཡཏྠ ལོཎརསོ ཨདྷིཀོ, ཏཾ ལོཎིཀནྟི ཨཱཧ ‘‘ལོཎཡཱགཱུ’’ཏིཨཱདི. ཨམྦིལཱདིབྷེདཾ རསཾ.

ཨཱཀཱརསཎྛཱནགཧཎཝསེནཱཏི ནཱིལཔཱིཏཱདིཨཱཀཱརགཧཎཝསེན ཙེཝ ཝཊྚཙཏུརསྶཱདིསཎྛཱནགཧཎཝསེན ཙ. ཝིནཱཔི ཨཱཀཱརསཎྛཱནཱཏི ཨཱཀཱརསཎྛཱནེཧི ཝིནཱ, ཏེ ཋཔེཏྭཱཔི. པཙྩཏྟབྷེདགཧཎཝསེནཱཏི ཏསྶ ཏསྶ ཨཱརམྨཎསྶ པབྷེདགཧཎཝསེན. ཨསམྨོཧཏོཏི ཡཱཐཱཝཏོ. ཝིསེསོ ཝིསེསཏྠདཱིཔནཏོ, ཨཝིསེསོ ཨཡཾ དྷམྨོ ཨཝིསེསདཱིཔནཏོ. ཏེནཱཧ ‘‘ཝིསེསོ ཝེདིཏབྦོ’’ཏི. ཛཱནནཉྷི ཨཝིསིཊྛཾ, ཏཾ སམཱསཔདཏོ ཨུཔསགྒཱ ཝིསེསེནྟི. ཏཐཱ ཧི སཉྫཱནནཔདཾ པཙྩབྷིཉྙཱཎནིམིཏྟཾ ཨཱཀཱརགཧཎམཏྟཾ བོདྷེཏི, ཝིཛཱནནཔདཾ ཏཏོ ཝིསིཊྛཝིསཡགཧཎཾ ¶ . པཛཱནནཔདཾ པན ཏཏོཔི ཝིསིཊྛཏརཾ པཀཱརཏོ ཨཝབོདྷཾ བོདྷེཏི. ཏེནཱཧ ‘‘ཏསྶཱཔཱི’’ཏིཨཱདི. ཨཱརམྨཎསཉྫཱནནམཏྟམེཝཱཏི ནཱིལཱདིབྷེདསྶ ཨཱརམྨཎསྶ ¶ སལླཀྑཎམཏྟམེཝ. ཨཝདྷཱརཎེན ལཀྑཎཔཊིཝེདྷཏྟཾ ནིཝཏྟེཏི. ཏེནཱཧ ‘‘ཨནིཙྩ’’ནྟིཨཱདི. ཉཱཎསམྤཡུཏྟཙིཏྟེཧི ཝིཔསྶནྟསྶ ཝིཔསྶནཱཡ པགུཎབྷཱཝེ སཏི ཉཱཎཝིཔྤཡུཏྟེན ཙིཏྟེནཔི ཝིཔསྶནཱ ཧོཏིཡེཝཱཏི ཨཱཧ ‘‘ཨནིཙྩཱདིཝསེན ལཀྑཎཔཊིཝེདྷཉྩ པཱཔེཏཱི’’ཏི. པཊིཝེདྷནྟི ཙ ཨུཔལདྡྷིམེཝ ཝདཏི, ན པཊིཝིཛ྄ཛྷནཾ. ཏེནཱཧ ‘‘ཨུསྶཀྐིཏྭཱ པནཱ’’ཏིཨཱདི. ཨུསྶཀྐིཏྭཱཏི ཨུསྶཀྐཱཔེཏྭཱ མགྒཔཱཏུབྷཱཝམྤི པཱཔེཏི ཨསམྨོཧསབྷཱཝཏྟཱ. ཡཐཱ ལཀྑཎཔཊིཝེདྷཀཱལེ སཉྫཱནནལཀྑཎཝསེན སཉྙཱཎཨནུརཱུཔཝསེནེཝ པཝཏྟཾ, ཨེཝཾ ཝིཉྙཱཎཝིཛཱནནཝསེན ཝཱཡཾ ཨནུརཱུཔཝསེནེཝ པཝཏྟཏཱིཏི དཊྛབྦཾ.

ཨིདཱནི ཏམཏྠཾ ཧེརཉྙིཀཱདིཨུཔམཱཡ ཝིབྷཱཝེཏུཾ ‘‘ཡཐཱ ཧཱི’’ཏིཨཱདིམཱཧ. ཧིརཉྙཾ ཝུཙྩཏི ཀཧཱཔཎཾ, ཧིརཉྙཛཱནནེ ནིཡུཏྟོ ཧེརཉྙིཀོ. ལོཀཝོཧཱརེ ཨཛཱཏཱ ཨསཉྫཱཏཱ བུདྡྷི ཨེཏསྶཱཏི ཨཛཱཏབུདྡྷི, བཱལདཱརཀོ. ཝོཧཱརཀུསལོ གཱམཝཱསཱི པུརིསོ གཱམིཀཔུརིསོ. ཨུཔབྷོགཔརིབྷོགཱརཧཏྟཱ ཨུཔབྷོགཔརིབྷོགཾ. ཏམྦཀཾསམཡཏྟཱ ཀཱུཊོ. མཧཱསཱརཏྟཱ ཚེཀོ. ཨཌྜྷསཱརཏྟཱ ཀརཊོ. ནིཧཱིནསཱརཏྟཱ སཎྷོ. ཨེཏྠ ཙ ཡཐཱ ཧེརཉྙིཀོ ཀཧཱཔཎཾ ཙིཏྟཱདིབྷཱཝཏོ ཨུདྡྷཾ ཀཱུཊཱདིབྷཱཝཾ རཱུཔདསྶནཱདིཝསེན ཨུཔྤཏྟིཊྛཱནཏོཔི ཛཱནནྟོ ཨནེཀཱཀཱརཏོ ཛཱནཱཏི, ཨེཝཾ པཉྙཱ ཨཱརམྨཎཾ ནཱནཔྤཀཱརཏོ ཛཱནཱཏི པཊིཝིཛ྄ཛྷཏི, ཏཱཡ སདྡྷིཾ པཝཏྟམཱནཝིཉྙཱཎམྤི ཡཐཱཝིསཡཾ ཨཱརམྨཎཾ ཛཱནཱཏི.

ཨེཝཾ སྭཱཡཾ ནེསཾ ཛཱནནེ ཝིསེསོ ཨཉྙེསཾ ཨཝིསཡོ, བུདྡྷཱནཾ ཨེཝ ཝིསཡོཏི ཨིདཾ ཝིསེསཾ མིལིནྡཔཉྷེན ཝིབྷཱཝེཏུཾ ‘‘ཏེནཱཧཱ’’ཏིཨཱདིམཱཧ, ཏཾ སུཝིཉྙེཡྻམེཝ.

ཨཏྟསུཉྙཱནཾ སབྷཱཝདྷམྨཱནཾ དྷམྨམཏྟཏཱཡ ཀཐིཏཏྟཱ ‘‘ཨནཏྟལཀྑཎཾ ཀཐེཏྭཱ’’ཏི ཝུཏྟཾ. ཧེཊྛིམམགྒཱ ཙ ཡདི ཨདྷིགཏཱ, ཨརཧཏྟསྶ ཨནདྷིགཏཏྟཱ ‘‘ཨེཀདེསམཏྟེནཱ’’ཏི ཝུཏྟཾ, ཏཾ ཨནིཙྩལཀྑཎཾ དསྶེཏུཾ ཨིདཾ པབྦམཱརདྡྷཾ, ཨིཏརཱནི དྭེ ལཀྑཎཱནི ཏསྶ པརིཧཱརབྷཱཝེནཱཏི ཨདྷིཔྤཱཡོ.

ཡསྨཱ ¶ པནེཏྠ ‘‘ཏཾ ཀིཾ མཉྙཐ, བྷིཀྑཝེ’’ཏིཨཱདིདེསནཱཡ ཏཱིསུ ལཀྑཎེསུ ཨིདམེཝ པདྷཱནབྷཱཝེན དསྶིཏཾ, ཨིདཾ ཨཔྤདྷཱནབྷཱཝེནཱཏི ན སཀྐཱ ཝཏྟུཾ, ཏསྨཱ ‘‘ཏཱིཎི ལཀྑཎཱནི སམོདྷཱནེཏྭཱ དསྶེཏུམྤཱི’’ཏི ཝུཏྟཾ. ཨཔཙིནཱཏཱིཏི ཨཔཙཡགཱམིདྷམྨེ ནིཝཏྟེཏི ཨེཀཾསཏོ ཨཔཙཡགཱམིཔཊིཔདཱཡ ¶ པརིཔཱུརཎཏོ. ཏེནཱཧ ‘‘ནོ ཨཱཙིནཱཏཱི’’ཏིཨཱདི. ཝཊྚཾ ཝིནཱསེཏཱིཏི ཝིདྷམཏི ཨདསྶནཾ གམེཏི. ནེཝ ཙིནཱཏཱིཏི ན ཝཌྜྷེཏི. ཏདེཝཱཏི ཏཾ ཝཊྚཾ ཨེཝ. ཝིསྶཛྫེཏཱིཏི ཚཌྜེཏི. ཝིཀིརཏཱིཏི ཝིདྡྷཾསེཏི. ཝིདྷཱུཔེཏཱིཏི ཝཊྚཏྟཡསངྑཱཏཾ ཨགྒིཀྑནྡྷཾ ཝིགཏདྷཱུམཾ ཝིགཏསནྟཱཔཾ ཀརོཏཱིཏི ཨཏྠོཏི ཨཱཧ ‘‘ནིབྦཱཔེཏཱི’’ཏི.

ཨེཝཾ པསྶནྟིཨཱདི ཨནཱགཱམིཕལེ ཋིཏསྶ ཨརིཡསཱཝཀསྶ ཨགྒམགྒཕལཱདྷིགམཱཡ དེསནཱཏི ཨདྷིཔྤཱཡེནཱཧ ‘‘ཝཊྚཾ ཝིནཱསེཏྭཱ ཋིཏཾ མཧཱཁཱིཎཱསཝཾ དསྶེསྶཱམཱི’’ཏི. ཁཱིཎཱསཝསྶ ཨནཱགཏབྷཱཝདསྶནཾཡེཝ, སབྦཱ ཙཱཡཾ ཧེཊྛིམཱ དེསནཱ སུདྡྷཝིཔསྶནཱཀཐཱ, སཧཔཋམམགྒཱ ཝཱ སཧཝིཛྫཱུཔམདྷམྨཱ ཝཱ ཝིཔསྶནཱཀཐཱཏི དསྶེནྟོ ‘‘ཨེཏྟཀེན ཋཱནེནཱ’’ཏིཨཱདིམཱཧ.

ནམསྶནྟིཡེཝ མཧཏཱ གཱརཝབཧུམཱནེན. ཏེནཱཧ ‘‘ནམོ ཏེ པུརིསཱཛཉྙཱ’’ཏིཨཱདི. ཏཏྠ ནིདསྶནཾ དསྶེནྟོ ‘‘ཨཱཡསྨནྟཾ ནཱིཏཏྠེརཾ ཝིཡཱ’’ཏི ཝཏྭཱ ཏམཏྠཾ ཝིབྷཱཝེཏུཾ ‘‘ཐེརོ’’ཏིཨཱདིམཱཧ. ཏཏྠ ཁུརགྒེཡེཝཱཏི ཀེསོརོཔནཏྠཾ ཁུརདྷཱརཱཡ ཨགྒེ སཱིསེ ཋཔིཏེ ཏཙཔཉྩཀཀམྨཊྛཱནམུཁེན བྷཱཝནཾ ཨནུཡུཉྫནྟོ ཨརཧཏྟཾ པཏྭཱ. བྲཧྨཝིམཱནཱཏི བྲཧྨཱནཾ ནིཝཱསབྷཱུཏཱ ཝིམཱནཱ.

ཁཛྫནཱིཡསུཏྟཝཎྞནཱ ནིཊྛིཏཱ.

༨. པིཎྜོལྱསུཏྟཝཎྞནཱ

༨༠. ཨཔཀརཱིཡཏི ཨེཏེནཱཏི ཨཔཀརཎཾ, པདཾ. ཨཔཀརཎཾ པཀརཎཾ ཀཱརཎནྟི ཨཏྠཏོ ཨེཀཾ. ཏེནཱཧ ‘‘ཀིསྨིཉྩིདེཝ ཀཱརཎེ’’ཏི. ནཱིཧརིཏྭཱཏི ཨཏྟནོ སམཱིཔཙཱརབྷཱཝཏོ ཨཔནེཏྭཱ. ཏཐཱཀརཎཉྩ ཨེཝམེཏེ ¶ ཨེཏྟཀམྤི ཨཔྤཊིརཱུཔཾ ཨཀཏྭཱ ཨཱཡཏིཾ སམྨཱ པཊིཔཛྫིསྶནྟཱིཏི. ལདྡྷབལཱཏི ལདྡྷཉཱཎབལཱ.

ཨེཀདྭཱིཧིཀཱཡཱཏི ཨེཀེཀསྶ ཙེཝ དྭིནྣཾ དྭིནྣཉྩ ཨཱིཧིཀཱ གཏི ཨུཔསངྐམནཱ ཨེཀདྭཱིཧིཀཱ. ཏེནཱཧ ‘‘ཨེཀེཀོ ཙེཝ དྭེ དྭེ ཙ ཧུཏྭཱ’’ཏི. པུཐུཛྫནཱནཾ སམུདིཏཱནཾ ནཱམ ཀིརིཡཱ ཏཱདིསཱིཔི སིཡཱཏི ཝུཏྟཾ ‘‘ཀེལི༹མྤི ཀརེཡྻུ’’ནྟི. པརིཀཔྤནཝསེན སམྨཱསམྦུདྡྷཾ ཨུདྡིསྶ པེསལཱ བྷིཀྑཱུཔི ཨེཝཾ ཀརོནྟཱིཏི.

ཡུགནྡྷརཔབྦཏཱདཱིནཾ ཨནྟརེ སཱིདནྟརཾ སམུདྡཾ ནཱམ. ཏཏྠ ཀིར ཝཱཏོ ན ཝཱཡཏི, པཏིཏཾ ཡཾ ¶ ཀིཉྩིཔི སཱིདནྟརནདིཡཾ ཝིལཱིཡནྟཱ སཱིདནྟེཝ, ཏསྨཱ ཏཾ པརིཝཱརེཏྭཱ ཋིཏཱ ཡུགནྡྷརཱདཡོཔི སཱིདཔབྦཏཱ ནཱམ. ཏཾ སནྡྷཱཡ ཝུཏྟཾ ‘‘སཱིདནྟརེ སནྣིསིནྣཾ མཧཱསམུདྡཾ ཝིཡཱ’’ཏི. ཨཱཧཱརཧེཏཱུཏི ཨཱམིསཧེཏུ སཔྤིཏེལཱདིནིམིཏྟཾ, ཏེསཾ པཎཱམནཱ.

པཙྪིམནྟི ནིཧཱིནཾ. ཏེནཱཧ ‘‘ལཱམཀ’’ནྟི, ལཱམཀནྟོ ཨིདྷཱདྷིཔྤེཏོ –

‘‘མིགཱནཾ ཀོཊྛུཀོ ཨནྟོ, པཀྑཱིནཾ པན ཝཱཡསོ;

ཨེརཎྜོ ཨནྟོ རུཀྑཱནཾ, ཏཡོ ཨནྟཱ སམཱགཏཱ’’ཏི. –

ཨཱདཱིསུ (ཛཱ. ༡.༣.༡༣༥) ཝིཡ. ཨུལཏཱིཏི ཨབྷིཙརཏི. ཨབྷིསཔནྟི ཨེཏེནཱཏི ཨབྷིསཱཔོ. ཨབྷིསཱཔཝཏྠུ པིཎྜོལྱཾ. ཨཏྠོ ཕལཾ ཝསོ ཨེཏསྶཱཏི ཨཏྠཝསཾ, ཀཱརཎཾ, ཏམྤི ཏེསུ ཨཏྠི, ཏཏྠ ནིཡུཏྟཱཏི ཨཏྠཝསིཀཱ.

ཨནྟོ ཧདཡསྶ ཨབྦྷནྟརེ ཨནུཔཝིཊྛཱ སོཀཝཏྠཱུཧི.

ཨབྷིཛ྄ཛྷཱཡིཏཱཏི ཨབྷིཛ྄ཛྷཱཡནསཱིལོ. ཨབྷིཎྷཔྤཝཏྟིཡཱ ཙེཝ བཧུལབྷཱཝེན ཙ བཧུལརཱགོ. པཱུཏིབྷཱཝེནཱཏི ཀུཐིཏབྷཱཝེན. བྱཱཔཱདོ ཧི ཨུཔྤཛྫམཱནོ ཙིཏྟཾ ཨཔགནྡྷཾ ཀརོཏི, ན སུཙིམནུཉྙབྷཱཝཾ. བྷཏྟནིཀྑིཏྟཀཱཀོ ཝིཡཱཏི ཨིདཾ བྷཏྟཊྛཱནསྶ ཨསརཎེན ཀཱཀསྶ ནཊྛསཏིཏཱ པཉྙཱཡཏཱིཏི ཀཏྭཱ ཝུཏྟཾ, ན བྷཏྟནིཀྑིཏྟཏཱཡ. ཨསཎྛིཏོཏི ཨསཎྛིཏཙིཏྟོ. ཀཊྛཏྠནྟི ཀཊྛེན ཀཏྟབྦཀིཙྩཾ.

པཱཔཝིཏཀྐེཧི ཀཏོ, ཏསྨཱ ཏེ ཨནཝསེསཏོ པཧཱཏབྦཱཏི དསྶནཏྠཾ. དྭིནྣཾ ཝུཏྟཏྟཱ ཨེཀོ པུབྦབྷཱགོ, ཨིཏརོ མིསྶཀོཏི ཝཏྟུཾ ཡུཏྟནྟི ¶ ཨདྷིཔྤཱཡེན ‘‘ཨེཏྠ ཙཱ’’ཏིཨཱདི ཝུཏྟཾ. ཨེཝཾ ཏཾ བྷཱཝེནྟསྶ ནིརུཛ྄ཛྷནྟི ཨེཝཱཏི ཨེཀེཀམིསྶཀཏཱཝསེན གཧེཏབྦནྟི པོརཱཎཱ. ཨུཔརི ཏིཔརིཝཊྚདེསནཱཡ ཨནིམིཏྟསམཱདྷིཡེཝ དཱིཔིཏོ. ཏེནཱཧ ‘‘ཡཱཝཉྩིད’’ནྟི. ནིདྡོསོཏི ཝཱིཏརཱགཱདིནཱ ནིདྡོསོ.

པིཎྜོལྱསུཏྟཝཎྞནཱ ནིཊྛིཏཱ.

༩. པཱལིལེཡྻསུཏྟཝཎྞནཱ

༨༡. པརིཡཱདིཎྞརཱུཔཙིཏྟཱཏི ¶ རཱགཱདཱིཧི པརིཡཱདིཡིཏྭཱ ཁེཔེཏྭཱ གཧིཏཙིཏྟཱ.

བྷགཝཏོ ཙཱརོ ཝིདིཏོ པརིཙཡཝསེན. སཏྠཱ པརིབྷོགཾ ཀརོཏི ཨནུགྒཎྷནྟོ ‘‘ཨེཝཾ ཧིསྶ དུགྒཏིམོཀྑོ བྷཝིསྶཏཱི’’ཏི. ཨཉྙཏྲཱཏི ཝིནཱ.

ནཱགེནཱཏི བུདྡྷནཱགེན ཨངྐུསརཧིཏེན. ཏཏོ ཨེཝ ཨུཛུབྷཱུཏེན ཙིཏྟེན. ཨཱིསཱདནྟསྶ ནངྒལསདིསདནྟསྶ ཧཏྠིནོ ཨེཝཾ ཙིཏྟཾ སམེཏི. ཏཏྠ ཀཱརཎམཱཧ ‘‘ཡདེཀོ རམཏཱི ཝནེ’’ཏི. ཨེཏེན ཀཱཡཝིཝེཀེན རཏིསཱམཉྙཾ ཝདཏི.

ཨཏྟནོ དྷམྨཏཱཡཱཏི པཀཏིཡཱ སཡམེཝ.

ཨཱསཝཱནཾ ཁཡོཏི ཨིདྷ ཨརཧཏྟཾ ཨདྷིཔྤེཏཾ, ཏཾ པན ཨགྒམགྒཱནནྟརམེཝཱཏི ཨཱཧ ‘‘མགྒཱནནྟརཾ ཨརཧཏྟཕལ’’ནྟི. ཝིཙཡོ དེསནཱཔཉྙཱ ཨདྷིཔྤེཏཱ, སཱ ཙ ཨནེཀདྷཱ པཝཏྟཱ ཨེཝཱཏི ཝུཏྟཾ ‘‘ཝིཙཡསོ’’ཏི, ཨནེཀཀྑཏྟུཾ པཝཏྟམཱནཱཔི ཝིཙཡོ ཨེཝཱཏི ཀཏྭཱ ‘‘ཝིཙཡེནཱ’’ཏི ཨཏྠོ ཝུཏྟོ. སཱསནདྷམྨོཏི སཱིལཀྑནྡྷཱདིཔརིདཱིཔནོ པརིཡཏྟིདྷམྨོ. པརིཝིཏཀྐོ ཨུདཔཱདི ‘‘ཙཏྟཱརོ སཏིཔཊྛཱནཱ’’ཏིཨཱདིནཱ, ཨེཝཾ ཀོཊྛཱསཏོ པརིཙྪིཛྫ དེསིཏེ མཡཱ དྷམྨེ ཀཏམསྶ ཛཱནནསྶ ཨནྟརཱ ཨཱསཝཱནཾ ཁཡོ ཧོཏཱིཏི ཨེཀཙྩསྶ ཀངྑཱ ཧོཏིཡེཝཱཏི ཨདྷིཔྤཱཡོ. དིཊྛི ཨེཝ སམནུཔསྶནཱ དིཊྛིསམནུཔསྶནཱ. དིཊྛིསངྑཱརོཏི དིཊྛིཔཙྩཡོ སངྑཱརོ. ཏཏོ ཨེཝ ཏཎྷཱཔཙྩཡོ ཧོཏཱིཏི ཝུཏྟཾ ‘‘ཏཏོཛོ སོ སངྑཱརོ’’ཏི. ཏཏོ ཏཎྷཱཏོ སོ སངྑཱརོ ཛཱཏོཏི ཙཏཱུསུ ཨེས དིཊྛིསངྑཱརོ དིཊྛཱུཔནིསྶཡོ སངྑཱརོ ཛཱཡཏི. ཨཝིཛྫཱསམྥསྶོཏི ¶ ཨཝིཛྫཱསམྤཡུཏྟསམྥསྶོ. ཨེཝམེཏྠ བྷགཝཱ སལཱ༹ཡཏནནཱམརཱུཔཝིཉྙཱཎཱནི སངྑཱརཔཀྑིཀཱནེཝ ཀཏྭཱ དསྶེཏི.

ཨེཏྟཀེ ཋཱནེཏི ‘‘ཨིདྷ བྷིཀྑཝེ ཨསྶུཏཝཱ པུཐུཛྫནོ’’ཏིཨཱདིཾ ཀཏྭཱ ཡཱཝ ‘‘ན མེ བྷཝིསྶཏཱི’’ཏི ཨེཏྟཀེ ཋཱནེ. གཧིཏགཧིཏདིཊྛིནྟི སཀྐཱཡདིཊྛིཡཱ ‘‘སོ ཨཏྟཱ, སོ ལོཀོ’’ཏིཨཱདིནཱ པཝཏྟཾ སསྶཏདིཊྛིཾ, ནོ ཙསྶཾ, ནོ ཙ མེ སིཡཱ’’ཏིཨཱདིནཱ པཝཏྟཾ ཨུཙྪེདདིཊྛིནྟི ཏཐཱ ཏཐཱ གཧིཏདིཊྛིཾ. ‘‘ཨིཏི ཁོ, བྷིཀྑཝེ, སོཔི སངྑཱརོ ཨནིཙྩོ’’ཏིཨཱདིདེསནཱཡ ཝིསྶཛྫཱཔེནྟོ ཨཱགཏོ. ཏཏྠ ཏཏྠེཝཱསྶ ཨུཔྤནྣདིཊྛིཝིཝེཙནཏོ ཨིམིསྶཱ དེསནཱཡ པུགྒལཛ྄ཛྷཱསཡེན ¶ པཝཏྟིཏཏཱ ཝེདིཏབྦཱ, ཏེཝཱིསཏིཡཱ ཋཱནེསུ ཨརཧཏྟཔཱཔནེན དེསནཱཝིལཱསོ. ཏཏོཛོ སོ སངྑཱརོཏི ཏཏོ ཝིཙིཀིཙྪཱཡ པཙྩཡབྷཱུཏཏཎྷཱཏོ ཛཱཏོ ཝིཙིཀིཙྪཱཡ སམྤཡུཏྟོ སངྑཱརོ. ཡདི སཧཛཱཏཱདིཔཙྩཡཝསེན ཏཏོ ཏཎྷཱཏོ ཛཱཏོཏི ཏཏོཛོ སངྑཱརོཏི ཝུཙྩེཡྻ, ཨིདམཡུཏྟནྟི དསྶེནྟོ ‘‘ཏཎྷཱསམྤཡུཏྟ…པེ… ཛཱཡཏཱི’’ཏི ཙོདེཏི. ཨིཏརོ ཨུཔནིསྶཡཀོཊི ཨིདྷཱདྷིཔྤེཏཱཏི དསྶེནྟོ ‘‘ཨཔྤཧཱིནཏྟཱ’’ཏི ཝཏྭཱ ‘‘ཡསྶ ཧཱི’’ཏིཨཱདིནཱ ཏམཏྠཾ ཝིཝརཏི. ན ཧི ཏཎྷཱཡ ཝིཙིཀིཙྪཱ སམྦྷཝཏི. ཡདི ཨསཏི སཧཛཱཏཀོཊིཡཱ ཨུཔནིསྶཡཀོཊིཡཱ ཏཎྷཱཔཙྩཡཱ ཝིཙིཀིཙྪཱཡ སམྦྷཝོ ཨེཝ. དིཊྛིཡཱཔཱིཏི དྭཱསཊྛིདིཊྛིཡཱཔི. ཏེནཱཧ ‘‘ཙཏཱུསུ ཧཱི’’ཏིཨཱདི. ཝཱིསཏི སཀྐཱཡདིཊྛིཡོ སསྶཏདིཊྛིཾ ཨུཙྪེདདིཊྛིཾ ཝིཙིཀིཙྪཉྩ པཀྑིཔིཏྭཱ པཙྩེཀཾ ཨནིཙྩཏཱམུཁེན ཝིཔསྶནཾ དསྶེཏྭཱ ཨརཧཏྟཾ པཱཔེཏྭཱ དེསནཱ ནིཊྛཱཔིཏཱཏི ཨཱཧ ‘‘ཏེཝཱིསཏིཡཱ ཋཱནེསཱུ’’ཏིཨཱདི.

པཱལིལེཡྻསུཏྟཝཎྞནཱ ནིཊྛིཏཱ.

༡༠. པུཎྞམསུཏྟཝཎྞནཱ

༨༢. དིསྶཏི ཨཔདིསྶཏཱིཏི དེསོ, ཀཱརཎཾ, ཏཉྩ ཁོ ཉཱཔཀཾ དཊྛབྦཾ. ཡཉྷི སོ ཛཱནིཏུཀཱམོ རུཔྤནཱདིསབྷཱཝཾ, པཋམཾ པན སརཱུཔཾ ¶ པུཙྪིཏྭཱ པུན ཏསྶ ཝིསེསོ པུཙྪིཏབྦོཏི པཋམཾ ‘‘ཨིམེ ནུ ཁོ’’ཏིཨཱདིནཱ པུཙྪཾ ཀརོཏི, ཨིདྷཱཔི ཙ སོ ཝིསེསོ ཨེཝ ཏསྶ བྷིཀྑུནོ ཨནྟནྟི དསྶེཏི. ཨཛཱནནྟོ ཝིཡ པུཙྪཏི ཏེསཾ ཧེཏུནྟི ཨདྷིཔྤཱཡོ.

ཏཎྷཱཚནྡམཱུལཀཱ པབྷཝཏྟཱ. པཉྩུཔཱདཱནཀྑནྡྷཱཏི ཨེཏྠ ཝིསེསཏོ ཏཎྷུཔཱདཱནསྶ གཧཎཾ ཨིཏརསྶ ཏགྒཧཎེནེཝ གཧིཏཾ ཏདཝིནཱབྷཱཝཏོཏི ཚནྡརཱགོ ཨེཝ ཨུདྡྷཊོ. ཨིདནྟི ཏཔྤཉྷཔཊིཀྑིཔནཾ. ཡདིཔི ཁནྡྷཱ ཨུཔཱདཱནེཧི ཨསཧཛཱཏཱཔི ཧོནྟི ཨུཔཱདཱནསྶ ཨནཱརམྨཎབྷཱུཏཱཔི, ཨུཔཱདཱནཾ པན ཏེཧི སཧཛཱཏམེཝ, ཏདཱརམྨཎཉྩ ཧོཏིཡེཝཱཏི དསྶེཏི. ན ཧི ཨསཧཛཱཏཾ ཨནཱརམྨཎཉྩ ཨུཔཱདཱནཾ ཨཏྠཱིཏི. ཨིདཱནི ཏམཏྠཾ ཝིཝརིཏྭཱ དསྶེཏུཾ ‘‘ཏཎྷཱསམྤཡུཏྟསྨི’’ནྟིཨཱདི ཝུཏྟཾ, ཏཾ སུཝིཉྙེཡྻམེཝ. ཨཱརམྨཎཏོཏི ཨཱརམྨཎཀརཎཏོ. ‘‘ཨེཝཾརཱུཔོ སིཡ’’ནྟི ཨེཝཾཔཝཏྟསྶ ཚནྡརཱགསྶ ‘‘ཨེཝཾཝེདནོ སིཡ’’ནྟི ཨེཝཾཔཝཏྟིཡཱ ཨབྷཱཝཏོ ཏཏྠ ཏཏྠེཝ ནཏསངྑཱརཱ བྷིཛྫནྟི, ཏསྨཱ རཱུཔཝེདནཱརམྨཎཱནཾ ཚནྡརཱགཱདཱིནཾ ཨབྷཱཝཏོ ཨཏྠེཝ ཚནྡརཱགཝེམཏྟཏཱ. ཚནྡརཱགསྶ པཧཱནཱདིཝསེན ཚནྡརཱགཔཊིསཾཡུཏྟསྶ ཨཔུཙྪིཏཏྟཱ, ‘‘ཨནུསནྡྷི ན གྷཊིཡཏཱི’’ཏི ཝུཏྟཾ. ཀིཉྩཱཔི ན གྷཊིཡཏཱིཏི ཨཉྙསྶེཝ པུཙྪིཏཏྟཱ, ཏཐཱཔི སཱནུསནྡྷིཀཱཝ པུཙྪཱ ¶ , ཏཏོ ཨེཝ སཱནུསནྡྷིཀཾ ཝིསྶཛྫནཾ. ཏཏྠ ཀཱརཎམཱཧ ‘‘ཏེསཾ ཏེས’’ནྟིཨཱདིནཱ. ཏེན ཨཛ྄ཛྷཱསཡཱནུསནྡྷིཝསེན སཱནུསནྡྷིཀཱནེཝ པུཙྪཱཝིསྶཛྫནཱནཱིཏི དསྶེཏི.

པུཎྞམསུཏྟཝཎྞནཱ ནིཊྛིཏཱ.

ཁཛྫནཱིཡཝགྒཝཎྞནཱ ནིཊྛིཏཱ.

༩. ཐེརཝགྒོ

༡. ཨཱནནྡསུཏྟཝཎྞནཱ

༨༣. པཊིཙྩཱཏི ནིསྶཡཾ ཀཏྭཱ. ‘‘ཨེསོཧམསྨཱི’’ཏི དིཊྛིགྒཱཧོ, ‘‘སེཡྻོཧམསྨཱི’’ཏི མཱནགྒཱཧོ ཙ ཏཎྷཱཝསེནེཝ ཧོནྟཱིཏི ཏཎྷཱཔི ཏཐཱཔཝཏྟིཡཱ པཙྩཡབྷཱུཏཱ ཏཐཱཔཝཏྟི ཨེཝཱཏི ཝུཏྟཾ ‘‘ཨསྨཱིཏི ཨེཝཾ པཝཏྟཾ ¶ ཏཎྷཱམཱནདིཊྛིཔཔཉྩཏྟཡཾ ཧོཏཱི’’ཏི. དཧརསདྡོ བཱལདཱརཀེཔི པཝཏྟཏཱིཏི ཏཏོ ཝིསེསནཏྠཾ ‘‘ཡུཝཱ’’ཏི ཝུཏྟཾ. ཡུཝཱཔི ཨེཀོ ཨམཎྜནསཱིལོཏི ཏཏོ ཝིསེསནཏྠཾ ‘‘མཎྜནཀཛཱཏིཀོ’’ཏི ཝུཏྟཾ. ཏེན མུཁནིམིཏྟཔཙྩཝེཀྑཎསྶ སབྦྷཱཝཾ དསྶེཏི. ཏནྟི ཨཱདཱསམཎྜལཾ ཨོལོཀཡཏོ. པརམྨུཁཾ ཧུཏྭཱ པཉྙཱཡེཡྻཱཏི ཡདི པུརཏྠིམདིསཱབྷིམུཁཾ ཧུཏྭཱ ཋིཏཾ, མུཁནིམིཏྟམྤི པུརཏྠིམདིསཱབྷིམུཁམེཝ ཧུཏྭཱ པཉྙཱཡེཡྻཱཏི ཨཏྠོ. ཡདིཔི པརསྶ སདིསསྶ མུཁཾ བྷཝེཡྻ, ཏཐཱཔི ཀཱཙི ཨསདིསཏཱ བྷཝེཡྻཱཏི ཝུཏྟཾ ‘‘ཝཎྞཱདཱིཧི ཨསདིསཾ ཧུཏྭཱ པཉྙཱཡེཡྻཱ’’ཏི. ནིབྷཱསརཱུཔནྟི པཊིབྷཱསརཱུཔཾ. ནིབྷཱསརཱུཔཾ ཏཱཝ ཀཾསཱདིམཡེ པབྷསྶརེ མཎྜལེ པཉྙཱཡཏུ, ཨུདཀེ པན ཀཐནྟི ‘‘ཀེན ཀཱརཎེནཱ’’ཏི པུཙྪཏི. ཨིཏརོ ‘‘མཧཱབྷཱུཏཱནཾ ཝིསུདྡྷཏཱཡཱ’’ཏི ཝདནྟོ ཏཏྠཱཔི ཡཐཱལདྡྷཔབྷསྶརབྷཱཝེནེཝཱཏི དསྶེཏི. ཨེཏྠ ཙ མཎྜནཛཱཏིཀོ པུརིསོ ཝིཡ པུཐུཛྫནོ, ཨཱདཱསཏལཱདཡོ ཝིཡ པཉྩཀྑནྡྷཱ, མུཁནིམིཏྟཾ ཝིཡ ‘‘ཨསྨཱི’’ཏི གཧཎཾ, མུཁནིམིཏྟཾ ཨུཔཱདཱཡ དིསྶམཱནརཱུཔཱདི ཝིཡ ‘‘ཨསྨཱི’’ཏི སཏི ‘‘ཨཧམསྨཱི’’ཏི ‘‘པརོསྨཱི’’ཏིཨཱདཡོ གཱཧཝིསེསཱ. ཨབྷིསམེཏོཏི ཨབྷིསམིཏོ, ཨཡམེཝ ཝཱ པཱཋོ.

ཨཱནནྡསུཏྟཝཎྞནཱ ནིཊྛིཏཱ.

༢. ཏིསྶསུཏྟཝཎྞནཱ

༨༤. མདྷུརཀཾ ¶ ཝུཙྩཏི ཀཱཡེ ཝིབྷཱརནྟི ཨཱཧ – ‘‘མདྷུརཀཛཱཏོ ཝིཡཱཏི སཉྫཱཏགརུབྷཱཝོ ཝིཡཱ’’ཏི. གརུབྷཱཝེ སཏི ལཧུཏཱ ཨནོཀཱསཱཝ, ཏཐཱ མུདུཏཱ ཀམྨཉྙཏཱ ཙཱཏི ཝུཏྟཾ ‘‘ཨཀམྨཉྙོ’’ཏི. ‘‘ཀཱཡེ’’ཏི ཨཱནེཏྭཱ ཝཏྟབྦཾ. ན པཀྑཱཡནྟཱིཏི པཀཱསཱ ཧུཏྭཱ ན ཁཱཡནྟི. ཏེནཱཧ ‘‘ན པཱཀཊཱ ཧོནྟཱི’’ཏི. ཨུཔཊྛཧནྟཱིཏི ཨུཔཏིཊྛནྟི. ན དིསྶཏཱིཏི གཧཎཾ ན གཙྪཏི. མཧཱཝིཙིཀིཙྪཱཏི ཨཊྛཝཏྠུཀཱ སོལ༹སཝཏྠུཀཱ ཙ ཝིམཏི. ན ཧི ཨུཔྤཛྫཏི པརིཔཀྐཀུསལམཱུལཏྟཱ.

ཀཱམཱནམེཏཾ ཨདྷིཝཙནནྟི པདཾ ཨུདྡྷརིཏྭཱ ཡེན ཨདྷིཔྤཱཡེན བྷགཝཏཱ ནིནྣཾ པལླལཾ ཀཱམཱནཾ ནིདསྶནབྷཱཝེན ཨཱབྷཏཾ, ཏཾ ཨདྷིཔྤཱཡཾ ཝིབྷཱཝེཏུཾ ‘‘ཡཐཱ ཧཱི’’ཏིཨཱདི ཝུཏྟཾ.

ཏིསྶསུཏྟཝཎྞནཱ ནིཊྛིཏཱ.

༣. ཡམཀསུཏྟཝཎྞནཱ

༨༥. དིཊྛི ¶ ཨེཝ དིཊྛིགཏཾ ‘‘གཱུཐགཏཾ མུཏྟགཏ’’ནྟི (མ. ནི. ༢.༡༡༩; ཨ. ནི. ༩.༡༡) ཡཐཱ. དིཊྛིགཏཾ ནཱམ ཛཱཏཾ ཁནྡྷཝིནིམུཏྟསྶ སཏྟསྶ གཧིཏཏྟཱ.

ཀུཔིཏེཏི དིཊྛིསངྑཱཏརོགེན ཀུཔིཏེ. པགྒཡ྄ཧཱཏི ཏེསཾ བྷིཀྑཱུནཾ སནྟིཀེ ཝིཡ ཐེརསྶ སཱརིཔུཏྟསྶ སམྨུཁཱ ཨཏྟནོ ལདྡྷིཾ པགྒཡ྄ཧ ‘‘ཨེཝཾ ཁྭཱཧ’’ནྟི ཨེཝཾ ནིཙྪཡེན ཝཏྟུཾ ཨསཀྐོནྟོ.

ཨནུཡོགཝཏྟཾ ནཱམ ཡེན ཡུཏྟོ, ཏསྶ ཨཏྟནོ གཱཧཾ ནིཛ྄ཛྷཱནཀྑནྟིཡཱཝ ཡཱཐཱཝཏོ པཝེདནཾ. ཐེརསྶ ཨནུཡོགེ བྷུམྨནྟི ‘‘ཏཾ ཀིཾ མཉྙསི, ཨཱཝུསོ ཡམཀཱ’’ཏིཨཱདིནཱ ཐེརེན ཀཐིཏཔུཙྪཱཡ བྷུམྨནིདྡེསོ. སཙེ ཏཾ ཨཱཝུསོཏི ཨིདནྟི ‘‘སཙེ ཏཾ, ཨཱཝུསོ’’ཏི ཨེཝམཱདིཀཾ ཨིདཾ ཝཙནཾ. ཨེཏནྟི ཡམཀཏྠེརཾ. ཨཉྙནྟི ཨརཧཏྟཾ. ཝཏྟབྦཱཀཱརེན ཝདནྟོ ཨཏྠཏོ ཨརཧཏྟཾ བྱཱཀརོནྟོ ནཱམ ཧོཏཱིཏི ཨདྷིཔྤཱཡེན ཝདཏི.

ཨེཏསྶ པཋམམགྒསྶཱཏི ཨེཏསྶ ཨིདཱནིཡེཝ ཏིཔརིཝཊྚདེསནཱཝསཱནེ ཏཡཱ ཨདྷིགཏསྶ པཋམམགྒསྶ ¶ . ཙཏཱུཧི ཡོགེཧཱིཏི ཨཏྟཏོ པིཡཏོ ཨུདཱསིནཏོ ཝེརིཏོཏི ཙཏཱུཧིཔི ཨུཔྤཛྫནཨནཏྠཡོགེཧི.

ཨུཔེཏཱིཏི ཏཎྷུཔཡདིཊྛུཔཡེཧི ཨུཔཱདིཡཏི ཏཎྷཱདིཊྛིཝཏྠུཾ པཔྤོཏི. ཨུཔཱདིཡཏཱིཏི དལ༹ྷགྒཱཧཾ གཎྷཱཏི. ཨདྷིཏིཊྛཏཱིཏི ཨབྷིནིཝིསྶ ཏིཊྛཏི. ཀིནྟི? ‘‘ཨཏྟཱ མེ’’ཏི. པཙྩཏྠིཀཱ མེ ཨེཏེཏི ཨེཏེ རཱུཔཝེདནཱདཡོ པཉྩུཔཱདཱནཀྑནྡྷཱ མཡ྄ཧཾ པཙྩཏྠིཀཱ ཨནཏྠཱཝཧཏྟཱཏི ཝིཔསྶནཱཉཱཎེན ཉཏྭཱ. ཝིཔསྶནཱཡ ཡོཛེཏྭཱཏི ཝིཔསྶནཱཡ ཁནྡྷེ ཡོཛེཏྭཱ.

ཡམཀསུཏྟཝཎྞནཱ ནིཊྛིཏཱ.

༤. ཨནུརཱདྷསུཏྟཝཎྞནཱ

༨༦. ཏསྶེཝ ཝིཧཱརསྶཱཏི མཧཱཝནེ ཡསྨིཾ ཝིཧཱརེ བྷགཝཱ ཝིཧརཏི, ཏསྶེཝ ཝིཧཱརསྶ. ཨིམེཏི ཨཉྙཏིཏྠིཡཱ. ཡསྨཱ ཨཡཾ ཐེརོ ¶ ཋཔནཱིཡཾ པཉྷཾ ཋཔནཱིཡབྷཱཝེན ན ཋཔེསི, ཏསྨཱ. ཨཉྙཏིཏྠིཡཱ…པེ… ཨེཏདཝོཙུཾ. ཏེནཱཧ ‘‘ཨེཀདེསེན སཱསནསམཡཾ ཛཱནནྟཱ’’ཏི.

གཧིཏམེཝ ཧོཏི ཏཏོ པགེཝ སིདྡྷཏྟཱ. ཏེནཱཧ ‘‘ཏསྶ མཱུལཏྟཱ’’ཏི. ཨེཝནྟི ‘‘དུཀྑཉྩེཝ པཉྙཔེམི, དུཀྑསྶ ཙ ནིརོདྷ’’ནྟི ཨེཝཾ. ཝཊྚཝིཝཊྚམེཝཱཏི པཉྩནྣཾ པན ཁནྡྷཱནཾ སམནུཔསྶནཱཡ ཝསེན ཝཊྚཾ, ‘‘ཨེཝཾ པསྶ’’ནྟིཨཱདིནཱ ཝིཝཊྚཾ ཀཐིཏམེཝ.

ཨནུརཱདྷསུཏྟཝཎྞནཱ ནིཊྛིཏཱ.

༥. ཝཀྐལིསུཏྟཝཎྞནཱ

༨༧. ནགརམཛ྄ཛྷེ མཧཱཨཱབཱདྷོ ཨུཔྤཛྫཱིཏི ནགརམཛ྄ཛྷེན ཨཱགཙྪནྟོ ཀམྨསམུཊྛཱནོ མཧནྟོ ཨཱབཱདྷོ ཨུཔྤཛྫཏི. སམནྟཏོ ཨདྷོསཱིཏི སབྦབྷཱགེན པརིཔྥནྡི. ཨིརིཡཱཔཐཾ ཡཱཔེཏུནྟི སཡནནིསཛྫཱདིབྷེདཾ ཨིརིཡཱཔཐཾ པཝཏྟེཏུཾ. ནིཝཏྟནྟཱིཏི ཨོསཀྐནྟི, པརིཧཱཡནྟཱིཏི ཨཏྠོ. ཨདྷིགཙྪནྟཱིཏི ཝཌྜྷནྟི. སཏྠུ གུཎསརཱིརཾ ནཱམ ནཝཝིདྷལོཀུཏྟརདྷམྨཱདྷིགམམཱུལནྟི ཀཏྭཱ ཝུཏྟཾ ‘‘ནཝཝིདྷོ ཧི…པེ… ཀཱཡོ ནཱམཱ’’ཏི, ཡཐཱ སཏྟཱནཾ ཀཱཡོ པཊིསནྡྷིམཱུལཀོ.

ཀཱལ༹སིལཱཡཾ ཀཏཝིཧཱརོ ཀཱལ༹སིལཱཝིཧཱརོ. མགྒཝིམོཀྑཏྠཱཡཱཏི ཨགྒམགྒཝིམོཀྑཱདྷིགམཱཡ. དེཝཏཱཏི སུདྡྷཱཝཱསདེཝཏཱ. ཨལཱམཀཾ ནཱམ པུཐུཛྫནཀཱལཀིརིཡཱཡ ཨབྷཱཝཏོ. ཏེནཱཧ ‘‘ཐེརོ ཀིརཱ’’ཏིཨཱདི ¶ . ཨེཀཾ དྭེ ཉཱཎཱནཱིཏི ཨེཀཾ དྭེ པཙྩཝེཀྑཎཉཱཎཱནི སབྷཱཝཏོ ཨཝསྶཾ ཨུཔྤཛྫནྟི, ཨཡཾ དྷམྨཏཱ. མགྒཕལནིབྦཱནཔཙྩཝེཀྑཎཱནི ཏཾཏཾམགྒཝུཊྛཱནེ ཨུཔྤཛྫནྟི ཨེཝ. ཨེཀཾ དྭེཏི ཝཙནཾ ཨུཔྤནྣབྷཱཝདསྶནཏྠཾ ཝུཏྟཾ.

དྷཱུམཱཡནབྷཱཝོ དྷཱུམཱཀཱརཏཱ, ཏཐཱ ཏིམིརཱཡནབྷཱཝོ.

ཝཀྐལིསུཏྟཝཎྞནཱ ནིཊྛིཏཱ.

༦. ཨསྶཛིསུཏྟཝཎྞནཱ

༨༨. པསྶམྦྷིཏྭཱཏི ¶ ནིརོདྷེཏྭཱ. ནོ ཙ སྭཱཧནྟི ནོ ཙ སུ ཨཧཾ. པརིཧཱཡི ཀུཔྤདྷམྨཏྟཱ. ཨེཏནྟི སམཱདྷིམཏྟསཱརཾ, སཱིལམཏྟེ པན ཝཏྟབྦམེཝ ནཏྠི. ཀཐཾ ཧོཏཱིཏི ཀཐཾ ཨབྷིནནྡནཱ ཧོཏི. དུཀྑཾ པཏྭཱཏི དུཀྑུཔྤཏྟིཧེཏུ སུཁཾ པཏྠེཏི ‘‘ཨེཝཾ མེ དུཀྑཔརིལཱ༹ཧོ ན བྷཝིསྶཏཱི’’ཏི. ཡདགྒེནཱཏི ཡེན བྷཱགེན. ‘‘དུཀྑཾ པཏྠེཏིཡེཝཱ’’ཏི ཝཏྭཱ ཏཏྠ ཀཱརཎམཱཧ ‘‘སུཁཝིཔརིཎཱམེན ཧཱི’’ཏིཨཱདི. སུཁཝིཔརིཝཏྟེ སུཁཝིཔརིཎཱམདུཀྑཾ, ཏསྨཱ སུཁཾ ཨབྷིནནྡནྟོ ཨཏྠཏོ དུཀྑཾ ཨབྷིནནྡཏི ནཱམ.

ཨསྶཛིསུཏྟཝཎྞནཱ ནིཊྛིཏཱ.

༧. ཁེམཀསུཏྟཝཎྞནཱ

༨༩. ཨཏྟནིཡནྟི དིཊྛིགཏིཀཔརིཀཔྤིཏསྶ ཨཏྟནོ སནྟཀཾ. ཏེནཱཧ ‘‘ཨཏྟནོ པརིཀྑཱརཛཱཏ’’ནྟི. ཏཎྷཱམཱནོ ཨདྷིགཏོ ཨརཧཏྟསྶ ཨནདྷིགཏཏྟཱ, ནོ དིཊྛིམཱནོ ཨདྷིགཏོ, ཏཐཱ ཀཱམརཱགབྱཱཔཱདཱཔི. ཨནཱགཱམཱི ཀིར ཁེམཀཏྠེརོ, ‘‘སཀདཱགཱམཱི’’ཏི ཀེཙི ཝདནྟི. སནྡྷཱཝནིཀཱཡཱཏི སཉྩརཎེན. ཏེནཱཧ ‘‘པུནཔྤུནཾ གམནཱགམནེནཱ’’ཏི. ཙཏུཀྑཏྟུཾ གམནཱགམནེནཱཏི ཙཏུཀྑཏྟུཾ གམནེན ཙ ཨཱགམནེན ཙ. ཏེནཱཧ – ‘‘ཏཾ དིཝསཾ དྭིཡོཛནཾ ཨདྡྷཱནཾ ཨཱཧིཎྜཱི’’ཏི. ཉཏྭཱཏི ཨཛ྄ཛྷཱསཡཾ ཉཏྭཱ. ཐེརོཏི ཁེམཀཏྠེརོ.

རཱུཔམེཝ ཨསྨཱིཏི ཝདཏཱིཏི རཱུཔཀྑནྡྷམེཝ ‘‘ཨསྨཱི’’ཏི གཱཧསྶ ཝཏྠུཾ ཀཏྭཱ ཝདཏི. ཨདྷིགཏོ ཏཎྷཱམཱནོ.

ཨཎུསཧགཏོཏི ¶ ཨཎུབྷཱཝཾ གཏོ. ཏེནཱཧ ‘‘སུཁུམོ’’ཏི. ཏཡོ ཁཱརཱ ཝིཡ ཏིསྶོ ཨནུཔསྶནཱ ཙིཏྟསཾཀིལེསསྶ ཝིསོདྷནཏོ. སཱིལགནྡྷཱདཱིཧི གུཎགནྡྷེཧི.

ཀཐེཏུནྟི ཨུདྡེསཝསེན ཀཐེཏུཾ. པཀཱསེཏུནྟི ནིདྡེསཝསེན ཏམཏྠཾ པཀཱསེཏུཾ. ཛཱནཱཔེཏུནྟི ཀཱརཎཝསེན ཛཱནཱཔེཏུཾ. པཏིཊྛཱཔེཏུནྟི ཀཐཱཔེཏུཾ. ཝིཝཊཾ ཀཱཏུནྟི ཨུདཱཧརཎཾ ཝཎྞེཏྭཱ པཱཀཊཾ ཀཱཏུཾ ¶ . སུཝིབྷཏྟཾ ཀཱཏུནྟི ཨནྭཡཏོ བྱཏིརེཀཏོ སུཊྛུ, ཝིབྷཏྟཾ ཀཱཏུཾ. ཨུཏྟཱནཀཾ ཀཱཏུནྟི ཨུཔནཡནིགམེཧི ཏམཏྠཾ ཝིབྷཱུཏཾ ཀཱཏུཾ. ཨཉྙེན ནཱིཧཱརེནཱཏི ཝིཔསྶནཱཝིམུཏྟེན ཙིཏྟཱབྷིནཱིཧཱརེན.

ཁེམཀསུཏྟཝཎྞནཱ ནིཊྛིཏཱ.

༨. ཚནྣསུཏྟཝཎྞནཱ

༩༠. མཀྑཱིཏི གུཎམཀྑནལཀྑཎེན མཀྑེན སམནྣཱགཏོ. པལཱ༹སཱིཏི ཡུགགྒཱཧལཀྑཎེན པལཱ༹སེན སམནྣཱགཏོ. ཨེཏཾ ཨཝོཙཱཏི ‘‘ཨོཝདནྟུ མཾ…པེ… པསྶེཡྻ’’ནྟི ཨེཏཾ ཨཝོཙ.

ཐེརནྟི ཚནྣཏྠེརཾ. ཨཏྟནོ དུགྒཧཎེན ཀཉྩི ཨུཔཱརམྦྷམྤི ཀརེཡྻ. ཏེན ཝུཏྟཾ ‘‘ཨེཝཾ ཀིར ནེསཾ ཨཧོསཱི’’ཏིཨཱདི. ནིདྡོསམེཝསྶ ཀཏྭཱཏི ཨཱདིཏོ ཨནུརཱུཔཏྟམེཝ ཀཏྭཱ སདྡྷམྨཾ ཀཐེསྶཱམཱཏི.

པརིཏསྶནཱ ཨུཔཱདཱནནྟི བྷཡཔརིཏསྶནཱ དིཊྛུཔཱདཱནཾ. ཨནཏྟནི སཏི ཨནཏྟཀཏཱནི ཀམྨཱནི ཀམཏྟཱནཾ ཕུསིསྶནྟཱིཏི བྷཡཔརིཏསྶནཱ ཙེཝ དིཊྛུཔཱདཱནཉྩ ཨུཔྤཛྫཏི. པཊིནིཝཏྟཏཱིཏི ཡཐཱརདྡྷཝིཔསྶནཱཏོ པཊིནིཝཏྟཏི, ནཱསཀྑཱིཏི ཨཏྠོ. ཀསྨཱ པནེཏསྶ ཝིཔསྶནམནུཡུཉྫནྟསྶ ཨེཝཾ ཨཧོསཱིཏི ཏཏྠ ཀཱརཎཾ ཝདཏི ‘‘ཨཡཾ ཀིརཱ’’ཏིཨཱདིནཱ. ཨེཝནྟི ‘‘ཀོ ནུ ཁོ མེ ཨཏྟཱ’’ཏི ཨེཝཾ ན ཧོཏི. ཏཱཝཏིཀཱ ཝིསྶཏྠཱིཏི ‘‘མཡ྄ཧཾ དྷམྨཾ དེསེཏཱུ’’ཏི ཝུཏྟཝིསྶཱསོ ཨཏྠཱིཏི ཨཏྠོ. ཨིདཾ ཀཙྩཱནསཏྠཾ ཨདྡསཱཏི ཡོཛནཱ. ‘‘དྭཡནིསྶིཏོ, ཀཙྩཱན, ལོཀོ’’ཏིཨཱདི དིཊྛིཝིནིཝེཋནཱ. ‘‘ཨེཏེ ཏེ, ཀཙྩཱན, ཨུབྷོ ཨནྟེ ཨནུཔགམྨཱ’’ཏིཨཱདི བུདྡྷབལདཱིཔནཱ.

ཚནྣསུཏྟཝཎྞནཱ ནིཊྛིཏཱ.

༩-༡༠. རཱཧུལསུཏྟཱདིཝཎྞནཱ

༩༡-༩༢. ཨེཏཱནི ¶ སུཏྟཱནི. ཨིདྷཱགཏཱནཱིཏི ཨིམསྨིཾ ཝགྒེ ཨཱནཱིཏཱནི སངྒཱིཏིཀཱརེཧཱིཏི.

རཱཧུལསུཏྟཱདིཝཎྞནཱ ནིཊྛིཏཱ.

ཐེརཝགྒཝཎྞནཱ ནིཊྛིཏཱ.

༡༠. པུཔྥཝགྒོ

༡. ནདཱིསུཏྟཝཎྞནཱ

༩༣. པབྦཏེཡྻཱཏི ¶ པབྦཏཏོ ཨཱགཏཱ. ཏཏོ ཨེཝ ཨོཧཱརིནཱི. ཏེནསྶཱ ཙཎྜསོཏཏཾ དསྶེཏི. དཱུརཾ གཙྪཏཱིཏི དཱུརངྒམཱ. ཏེནསྶཱ མཧོགྷཏཾ དསྶེཏི.

སོཏེཏི ཝཊྚསོཏེ. ཙཏཱུཧི གཱཧེཧཱིཏི ‘‘རཱུཔཾ ཨཏྟཏོ སམནུཔསྶཏཱི’’ཏིཨཱདིནཡཔྤཝཏྟེཧི ཙཏཱུཧི གཱཧེཧི. པལུཛྫནཏྟཱཏི ཚིནྣཏྟཱ. སོཀཱདིབྱསནཔྤཏྟཱིཏི སོཀཱདིཨནཏྠུཔྤཏྟི.

ནདཱིསུཏྟཝཎྞནཱ ནིཊྛིཏཱ.

༢. པུཔྥསུཏྟཝཎྞནཱ

༩༤. ཝིཝདཏཱིཏི ཝིཝཱདཾ ཀརོཏི. ཝདནྟོཏི ཨཡཐཱསབྷཱཝེན ཝདནྟོ. ཝིཝདཏི དྷམྨཏཱཡ ཝིརུདྡྷཾ ཀཏྭཱ ཝདཏི. ལོཀདྷམྨོཏི ལུཛྫནསབྷཱཝདྷམྨོ. ཀོ པན སོཏི ཨཱཧ ‘‘ཁནྡྷཔཉྩཀ’’ནྟི. ཏེནཱཧ ‘‘ཏཾ ཧཱི’’ཏིཨཱདི. ཀཐཾ ཀརོམཱིཏི ཀེན པཀཱརེནཱཧཾ བཱལཾ ཨཛཱནནྟཾ ཀརོམི. ཏེནཱཧ ‘‘མཡ྄ཧཾ ཧཱི’’ཏིཨཱདི. ཏཐཱ ཙཱཧ ‘‘ཨཀྑཱཏོ ཝོ མཡཱ མགྒོ’’ཏིཨཱདི (དྷ. པ. ༢༧༥). ‘‘ཏཡོ ལོཀཱ ཀཐིཏཱ’’ཏི ཝཏྭཱ ཏཾ ཝིཝརིཏུཾ ‘‘ནཱཧཾ, བྷིཀྑཝེ’’ཏིཨཱདིམཱཧ.

པུཔྥསུཏྟཝཎྞནཱ ནིཊྛིཏཱ.

༣. ཕེཎཔིཎྜཱུཔམསུཏྟཝཎྞནཱ

༩༥. ཀེནཙི ¶ ཀཱརཎེན ཡུཛ྄ཛྷིཏྭཱ གཧེཏུཾ ན སཀྐཱཏི ཨཡུཛ྄ཛྷཱ ནཱམ. ནིཝཏྟནཊྛཱནེཏི ཨུདཀཔྤཝཱཧསྶ ནིཝཏྟིཏཊྛཱནེ.

ཨནུསོཏཱགམནེཏི ཨནུསོཏཾ ཨཱགམནཧེཏུ, ‘‘ཨནུསོཏཱགམནེནཱ’’ཏི ཝཱ པཱཋོ. ཨནུཔུབྦེན པཝཌྜྷིཏྭཱཏི ཏཏྠ ཏཏྠ ཨུཊྛིཏཱནཾ ཁུདྡཀམཧནྟཱནཾ ¶ ཕེཎཔིཎྜཱནཾ སཾསགྒེན པཀཱརཏོ ཝུདྡྷིཾ པཏྭཱ. ཨཱཝཧེཡྻཱཏི ཨཱནེཏྭཱ ཝཧེཡྻ. ཀཱརཎེན ཨུཔཔརིཀྑེཡྻཱཏི ཉཱཎེན ཝཱིམཾསེཡྻ. ‘‘སཱརོ ནཱམ ཀིཾ བྷཝེཡྻཱ’’ཏི ཝཏྭཱ སབྦསོ ཏདབྷཱཝཾ དསྶེནྟོ ‘‘ཝིལཱིཡིཏྭཱ ཝིདྡྷཾསེཡྻེཝཱ’’ཏི ཨཱཧ. ཏེན རཱུཔམྤི ནིསྶཱརཏཱཡ བྷིཛྫཏེཝཱཏི དསྶེཏི. ཡཐཱ ཧི ཨནིཙྩཏཱཡ ཨསཱརཏཱསིདྡྷི, ཨེཝཾ ཨསཱརཏཱཡཔི ཨནིཙྩཏཱསིདྡྷཱིཏི ཨནིཙྩཏཱཡ ཨེཝ ནིཙྩསཱརཾ ཐིརབྷཱཝསཱརཾ དྷུཝསཱརཾ སཱམཱིནིཝཱསཱིཀཱརཀབྷཱུཏསྶ ཨཏྟནོ ཝསེ པཝཏྟནམྤེཏྠ ནཏྠཱིཏི ཨཱཧ ‘‘རཱུཔམྤི…པེ… ནིསྶཱརམེཝཱ’’ཏི. སོཏི ཕེཎཔིཎྜོ. གཧིཏོཔི ཨུཔཱཡེན ཏམཏྠཾ ན སཱདྷེཏི ཨནརཧཏྟཱ. ཨནེཀསནྡྷིགྷཊིཏོ ཏཐཱ ཏཐཱ གྷཊིཏོ ཧུཏྭཱ.

བྱཱམམཏྟམྤི ཨེཏརཧི མནུསྶཱནཾ ཝསེན. ཨཝསྶམེཝ བྷིཛྫཏི ཏརངྒབྦྷཱཧཏཾ ཧུཏྭཱ.

ཏསྨིཾ ཏསྨིཾ ཨུདཀབིནྡུམྷི པཏིཏེ. ཨུདཀཏལནྟི ཨུདཀཔིཊྛིཾ. ཨཉྙཏོ པཏནྟཾ ཨུདཀབིནྡུཾ. ཨུདཀཛལླནྟི སནྟཱནཀཾ ཧུཏྭཱ ཋིཏཾ ཨུདཀམལཾ. ཏཉྷི སཾཀཌྜྷིཏྭཱ ཏཏོ ཨུདཀཾ པུཊཾ ཀརོཏི, ཏསྨིཾ པུཊེ པུབྦུལ༹སམཉྙཱ. ཝཏྠུནྟི ཙཀྑཱདིཝཏྠུཾ. ཨཱརམྨཎནྟི རཱུཔཱདིཨཱརམྨཎཾ. ཀིལེསཛལླནྟི པུརིམསིདྡྷཾ, པཊིལབྦྷམཱནཾ ཝཱ ཀིལེསམལཾ. ཕསྶསངྒྷཊྚནནྟི ཕསྶསམོདྷཱནཾ. པུབྦུལ༹སདིསཱ མུཧུཏྟརམཎཱིཡཏཱཡ. ཡསྨཱ གྷམྨཀཱལེ སཱུརིཡཱཏཔསནྟཱཔཱབྷིནིབྦཏྟརསྨིཛཱལནིཔཱཏེ ཏཱདིསེ བྷཱུམིཔདེསེ ཨིཏོ ཙིཏོ སམུགྒཏཝཱཏཝེགསམུདྡྷཊཝིརུལ༹ྷསངྑཱཏེསུ པརིབྦྷམནྟེསུ ཨཎུཔརམཱཎུཏཛྫཱརིཔྤཀཱརེསུ བྷཱུཏསངྒྷཱཏེསུ མརཱིཙིསམཉྙཱ, ཏསྨཱ སབྦསོ སཱརཝིརཧིཏཱཏི ཝུཏྟཾ ‘‘སཉྙཱཔི ཨསཱརཀཊྛེན མརཱིཙིསདིསཱ’’ཏི. ཡསྨཱ ཙ པསྶནྟཱནཾ ཡེབྷུཡྻེན ཨུདཀཱཀཱརེན ཁཱཡཏི, ཏསྨཱ ‘‘གཧེཏྭཱ པིཝིཏུཾ ཝཱ’’ཏིཨཱདི ཝུཏྟཾ. ནཱིལཱདིཨནུབྷཝནཏྠཱཡཱཏི ནཱིལཱདིཨཱརམྨཎསྶ ཨནུབྷཝནཏྠཱཡ. ཕནྡཏཱིཏི ཕནྡནཱཀཱརཔྤཏྟཱ ཝིཡ ཧོཏི ཨཔྤཧཱིནཏཎྷསྶ པུགྒལསྶ. ཝིཔྤལམྦྷེཏི ཨཔྤཧཱིནཝིཔལླཱསཾ པུགྒལཾ. ཏེནཱཧ ‘‘ཨིདཾ ནཱིལཀ’’ནྟིཨཱདི. སཉྙཱཝིཔལླཱསཏོ ཧི ཙིཏྟཝིཔལླཱསོ, ཏཏོ དིཊྛིཝིཔལླཱསོཏི. ཝིཔྤལམྦྷནེནཱཏི ཝིཔྤཀཱརཝསེནེཝ ཨཱརམྨཎསྶ ལམྦྷནེན. ཝིཔྤཀཱརཝསེན ཧི ¶ ཨེཏཾ ལམྦྷནཾ, ཡདིདཾ ཨནུདཀམེཝ ཨུདཀཾ ཀཏྭཱ དསྶནཾ ཨནགརམེཝ ནགརཾ ཀཏྭཱ གནྡྷབྦནཱཊཀཱདིདསྶནཾ.

ཀུཀྐུཀཾ ¶ ཝུཙྩཏི ཀདལིཀྑནྡྷསྶ སབྦཔཏྟཝཊྚཱིནཾ ཨབྦྷནྟརེ དཎྜཀནྟི ཨཱཧ ‘‘ཨཀུཀྐུཀཛཱཏནྟི ཨནྟོ ཨསཉྫཱཏགྷནདཎྜཀ’’ནྟི. ན ཏཐཱ ཧོཏཱིཏི ཡདཏྠཱཡ ཨུཔནཱིཏཾ, ཏདཏྠཱཡ ན ཧོཏི. ནཱནཱལཀྑཎོཏི ནཱནཱསབྷཱཝོ. སངྑཱརཀྑནྡྷོཝཱཏི ཨེཀོ སངྑཱརཀྑནྡྷོཏྭེཝ ཝུཙྩཏི.

ཨསྶཱཏི པུརིསསྶ. ཨཔགཏཔཊལཔིལ༹ཀནྟི ཨཔགཏཔཊལདོསཉྩེཝ ཨཔགཏཔིལ༹ཀདོསཉྩ. ཨསཱརབྷཱཝདསྶནསམཏྠནྟི ཨསཱརསྶ ཨསཱརབྷཱཝདསྶནསམཏྠཾ. ཨིཏྟརཱཏི པརིཏྟཀཱལཱ, ན ཙིརཊྛིཏིཀཱ. ཏེནཱཧ ‘‘ལཧུཔཙྩུཔཊྛཱནཱ’’ཏི. ཨཉྙདེཝ ཙ ཨཱགམནཀཱལེ ཙིཏྟནྟི ཨིདཉྩ ཨོལཱ༹རིཀཝསེནེཝ ཝུཏྟཾ. ཏཐཱ ཧི ཨེཀཙྪརཀྑཎེ ཨནེཀཀོཊིསཏསཧསྶསངྑཱནི ཙིཏྟཱནི ཨུཔྤཛྫིཏྭཱ ནིརུཛ྄ཛྷནྟི. མཱཡཱཡ དསྶིཏཾ རཱུཔཾ མཱཡཱཏི ཝུཏྟཾ. ཡཾཀིཉྩིདེཝ ཀཔཱལིཊྛཀཔཱསཱཎཝཱལིཀཱདིཾ. ཝཉྩེཏཱིཏི ཨསུཝཎྞམེཝ སུཝཎྞནྟི, ཨམུཏྟམེཝ མུཏྟཱཏིཨཱདིནཱ ཝཉྩེཏི. ནནུ ཙ སཉྙཱཔི མརཱིཙི ཝིཡ ཝིཔྤལམྦྷེཏི ཝཉྩེཏི, ཨིདམྤི ཝིཉྙཱཎཾ མཱཡཱ ཝིཡ ཝཉྩེཏཱིཏི ཀོ ཨིམེསཾ ཝིསེསོཏི? ཝཙནཏྠོ ནེསཾ སཱདྷཱརཎོ. ཏཐཱཔི སཉྙཱ ཨནུདཀཾཡེཝ ཨུདཀཾ ཀཏྭཱ གཱཧཱཔེནྟཱི, ཨཔུརིསཉྙེཝ པུརིསཾ ཀཏྭཱ གཱཧཱཔེནྟཱི ཝིཔྤལམྦྷནཝསེན ཨཔྤཝིསཡཱ, ཝིཉྙཱཎཾ པན ཡཾ ཀིཉྩི ཨཏཾསབྷཱཝཾ ཏཾ ཀཏྭཱ དསྶེནྟཱི མཱཡཱ ཝིཡ མཧཱཝིསཡཱ. ཏེནཱཧ ‘‘ཡཾཀིཉྩིདེཝཱ’’ཏིཨཱདི. ཨེཝམྤཱིཏི ཨཏིཝིཡ ལཧུཔརིཝཏྟིབྷཱཝེནཔི མཱཡཱསདིསནྟི.

དེསིཏཱཏི ཨེཝཾ དེསིཏཱ ཕེཎཔིཎྜཱདིཨུཔམཱཧི.

བྷཱུརི ཝུཙྩཏི པཐཝཱི, སཎྷཊྛེན ཝིཔུལཊྛེན ཙ བྷཱུརིསདིསཔཉྙཏཱཡ བྷཱུརིཔཉྙོ. ཏེནཱཧ ‘‘སཎྷཔཉྙེན ཙེཝཱ’’ཏིཨཱདི. ཀིམིགཎཱདཱིནནྟི ཨཱདི-སདྡེན ཨནེཀགིཛ྄ཛྷཱདིཀེ སངྒཎྷཱཏི. པཝེཎཱིཏི དྷམྨཔབནྡྷོ. བཱལལཱཔིནཱི ‘‘ཨཧཾ མམཱ’’ཏིཨཱདིནཱ. སེསདྷཱཏུཡོ གཧེཏྭཱཝ བྷིཛྫཏི ཨེཀུཔྤཱདེཀནིརོདྷཏྟཱ, ཝཏྠུརཱུཔནིསྶཡཔཙྩཡཏྟཱ ‘‘ཨཡ’’ནྟི ན ཝིསུཾ གཧིཏཾ. ཝདྷབྷཱཝཏོཏི ཝདྷསྶ མརཎསྶ ཨཏྠིབྷཱཝཏོ. སརཎནྟི པཊིསརཎཾ.

ཕེཎཔིཎྜཱུཔམསུཏྟཝཎྞནཱ ནིཊྛིཏཱ.

༤-༦. གོམཡཔིཎྜསུཏྟཱདིཝཎྞནཱ

༩༦-༩༨. སསྶཏཾ ¶ ¶ སབྦཀཱལཾ ཡཱཝ ཀཔྤཝུཊྛཱནཱ ཧོནྟཱིཏི སསྶཏིཡོ, སིནེརུཨཱདཡོ. ཏཱཧི སམཾ སམཀཱལཾ. ཨནེནཱཏི བྷགཝཏཱ. ནཡིདནྟི ཨེཏྠ ཡ-ཀཱརོ པདསནྡྷིཀརོ, ཨིདནྟི ནིཔཱཏཔདཾ. ཏཾ པན ཡེན ཡེན སམྦནྡྷཱིཡཏི, ཏཾ ཏིལིངྒོཝ ཧོཏཱིཏི ‘‘ཨཡཾ མགྒབྲཧྨཙརིཡཝཱསོ’’ཏི ཝུཏྟཾ. ‘‘ན པཉྙཱཡེཡྻཱ’’ཏི ཝཏྭཱ ཏམཏྠཾ ཝིཝརིཏུཾ ‘‘མགྒོ ཧཱི’’ཏིཨཱདི ཝུཏྟཾ. ཝིཝཊྚེནྟོཏི ཝིནིཝཊྚེནྟོ ཨཔྤཝཏྟིཾ ཀརོནྟོ.

རཱཛདྷཱནཱིཏི རཉྙོ ནིཝཱསནགརཾ. སུཏྟམཡནྟི ཙིཏྟཝཎྞཝཊྚིཀཱམཡཾ.

གོམཡཔིཎྜསུཏྟཱདིཝཎྞནཱ ནིཊྛིཏཱ.

༧. གདྡུལབདྡྷསུཏྟཝཎྞནཱ

༩༩. ཡཾ མཧཱསམུདྡོཏི ཨེཏྠ ཡནྟི སམཡསྶ པཙྩཱམསནཾ. བྷུམྨཏྠེ ཙེཏཾ པཙྩཏྟཝཙནནྟི ཨཱཧ ‘‘ཡསྨིཾ སམཡེ’’ཏི. སོ ཙ སམཡོ ཨཡནྟི དསྶེནྟོ ‘‘པཉྩམེ སཱུརིཡེ ཨུཊྛིཏེ’’ཏི ཨཱཧ. པརིཙྪེདཾ ན ཝདཱམི པརིཙྪེདཀཱརིཀཱཡ ཨགྒམགྒཝིཛྫཱཡ ཨནདྷིགཏཏྟཱ. སུནཁོ ཝིཡ ཝཊྚནིསྶིཏོ བཱལོ ཨསཝསབྷཱཝཏོ. གདྡུལོ ཝིཡ དིཊྛིབནྡྷོ. སཀྐཱཡོ ཏསྶ ཨསཝསབྷཱཝཏོ. པུཐུཛྫནསྶ སཀྐཱཡཱནུཔརིཝཏྟནནྟི ‘‘སནྟཱནེ སཏྟཝོཧཱརོ’’ཏི ཏཾ ཏཏོ ཨཉྙཾ ཀཏྭཱ བྷེདེན ནིདྡེསོ.

གདྡུལབདྡྷསུཏྟཝཎྞནཱ ནིཊྛིཏཱ.

༨. དུཏིཡགདྡུལབདྡྷསུཏྟཝཎྞནཱ

༡༠༠. དིཊྛིགདྡུལནིསྶིཏཱཡཱཏི སཧཛཱཏཱདིཔཙྩཡཝསེན དིཊྛིགདྡུལནིསྶིཏཱཡ ནིསྶཱཡེཝ པཝཏྟཏི ཏཏོ ཨཏྟཱནཾ ཝིཝེཙེཏུཾ ཨསཀྐུཎེཡྻཏྟཱ. ཙིཏྟསཾཀིལེསེནེཝཱཏི དསཝིདྷཀིལེསཝཏྠུཝསེན ཙིཏྟསྶ སཾཀིལིཊྛབྷཱཝེན. ཨརིཡམགྒཱདྷིགམནེན ཙིཏྟསྶ ཝོདཱནཏྟཱ ཝོདཱཡནྟི ཝིསུཛ྄ཛྷནྟི.

ཝིཙརཎཙིཏྟནྟི ¶ གཧེཏྭཱ ཝིཙརཎཝསེན ཝིཙརཎཙིཏྟཾ. སངྑཱནཱམཱཏི ཨེཝཾནཱམཀཱ. བྲཱཧྨཎཔཱསཎྜིཀཱཏི ཛཱཏིཡཱ བྲཱཧྨཎཱ, ཚནྣཝུཏིཡཱ པཱསཎྜེསུ ཏཾ སངྑཱསཉྙིཏཾ པཱསཎྜཾ པགྒཡ྄ཧ ཝིཙརཎཀཱ. པཊཀོཊྛཀནྟི དུསྶཱཔཎཀཾ. དསྶེནྟཱཏི ཡཐཱགཏིཀམྨཝིཔཱཀཙིཏྟཏཾ དསྶེནྟཱ ¶ . ཏཾ ཙིཏྟནྟི ཏཾ པཊཀོཊྛཀཙིཏྟཾ གཧེཏྭཱ ཝིཙརནྟི. ཙིནྟེཏྭཱ ཀཏཏྟཱཏི ‘‘ཨིམསྶ རཱུཔསྶ ཨེཝཾ ཧཏྠཔཱདཱ, ཨེཝཾ མུཁཾ ལིཁིཏབྦཾ, ཨེཝཾ ཨཱཀཱརཝཏྠགྒཧཎཱནི, ཨེཝཾ ཀིརིཡཱཝིསེསཱ, ཨེཝཾ ཀིརིཡཱཝིབྷཱགཾ, སཏྟཝིསེསཱནཾ ཝིབྷཱགཾ ཀཱཏབྦ’’ནྟི ཏསྶ ཨུབྦཏྟནཁིཔནཔཝཏྟནཱདིཔཡོཛནཉྩཱཏི སབྦམེཏཾ ཏཐཱ ཙིནྟེཏྭཱ ཀཏཏྟཱ ཙིཏྟེན མནསཱ ཙིནྟིཏཾ ནཱམ. ཨུཔཱཡཔརིཡེསནཙིཏྟནྟི ‘‘ཧཏྠཔཱདཱ ཨེཝཾ ལིཁིཏབྦཱ’’ཏིཨཱདིནཱ ཡཐཱཝུཏྟཨུཔཱཡསྶ ཙེཝ པུབྦེ པཝཏྟསྶ བྷཱུམིཔརིཀམྨཝཎྞདྷཱཏུསམྨཱཡོཛནུཔཱཡསྶ ཙ ཝསེན པཝཏྟཾ ཙིཏྟཾ. ཏཏོཔི ཙིཏྟཏརནྟི ཏཏོ ཙིཏྟཀམྨཏོཔི ཙིཏྟཏརཾ ཙིཏྟཀཱརེན ཙིནྟིཏཔྤཀཱརཱནཾ སབྦེསཾཡེཝ ཙིཏྟཀམྨེ ཨནིཔྥཛྫནཏོ. ཀམྨཙིཏྟེནཱཏི ཀམྨཝིཉྙཱཎེན. ཀམྨཙིཏྟེནཱཏི ཝཱ ཀམྨསྶ ཙིཏྟབྷཱཝེན. སོ ཀམྨསྶ ཝིཙིཏྟབྷཱཝོ ཏཎྷཱཝསེན ཛཱཡཏཱིཏི ཝེདིཏབྦོ. སྭཱཡམཏྠོ ཨཊྛསཱལིནཱིཊཱིཀཱཡཾ ཝིབྷཱཝིཏོ. ཨེཝཾ ཙིཏྟཱཏི ཨེཝཾ ཙིཏྟརཱུཔཝིསེསཱ. ཡོནིཾ ཨུཔནེཏཱིཏི ཏཾ ཏཾ ཨཎྜཛཱདིབྷེདཾ ཡོནིཝིསེསཾ པཱཔེཏི ཝཎྞཝིསེསོ ཝིཡ ཕལིཀམཎིཀཾ. ན ཧི ཝིསེསཱ ཧིཏཝིཙིཏྟསཱམཏྠིཡཀམྨཾ ཡོནིཾ ཨུཔནེཏི, ཏསྶ ཏསྶ ཝིཔཱཀུཔྤཏྟིཡཱ པཙྩཡོ ཧོཏི. ཡོནིམཱུལཀོ ཏེསཾ ཙིཏྟབྷཱཝོཏི ཡཾ ཡཾ ཡོནིཾ ཀམྨཾ སཏྟེ ཨུཔནེཏི, ཏཾཏཾཡོནིམཱུལཀོ ཏེསཾ སཏྟཱནཾ ཙིཏྟཝིཙིཏྟབྷཱཝོ. ཏེནཱཧ ‘‘ཡོནིཨུཔགཏཱ’’ཏིཨཱདི. སདིསཙིཏྟཱཝ སདིསཙིཏྟབྷཱཝཱ ཨེཝ. ཨིཏཱིཏིཨཱདི ཝུཏྟསྶེཝ ཨཏྠསྶ ཨུཔྤཊིཔཱཊིཡཱ ནིགམནཾ.

ཏིརཙྪཱནགཏཙིཏྟབྷཱཝཏོ ཙིཏྟསྶེཝ སཝིསེསཾ ཙིཏྟབྷཱཝཀརཎཾ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ཏཏྠ ཙིཏྟཾ ནཱམེཏཾ ཙིཏྟཏརམེཝ ཝེདིཏབྦནྟི སམྦནྡྷོ. སཧཛཱཏདྷམྨཙིཏྟཏཱཡཱཏི རཱགཱདིསདྡྷཱདིདྷམྨཝིཙིཏྟབྷཱཝེན. བྷཱུམིཙིཏྟཏཱཡཱཏི ཨདྷིཊྛཱནཙིཏྟཏཱཡ. ཀམྨནཱནཏྟཾ མཱུལཾ ཀཱརཎཾ ཨེཏེསནྟི ཀམྨནཱནཏྟམཱུལཀཱ, ཏེསཾ. ལིངྒནཱནཏྟཾ ཨིཏྠིལིངྒཱདིནཱནཏྟཝསེན ཙེཝ ཏཾཏཾསཎྛཱནནཱནཏྟཝསེན ཙ ཝེདིཏབྦཾ. སཉྙཱནཱནཏྟཾ ཨིཏྠིཔུརིསདེཝམནུསྶཱདིསཉྙཱནཱནཏྟཝསེན ¶ . ཝོཧཱརནཱནཏྟཾ ཏིསྶོཏིཨཱདིཝོཧཱརནཱནཏྟཝསེན. ཙིཏྟཱནཾ ཝིཙིཏྟཱནཾ. ཏཾཏཾཝོཧཱརནཱནཏྟམྤི ཙིཏྟེནེཝ པཉྙཔཱིཡཏི. རངྒཛཱཏརཱུཔསམུཊྛཱཔནཱདིནཱ ཝཏྠཾ རཉྫཡཏཱིཏི རཛཀོ, ཝཎྞཀཱརོ. པུཐུཛྫནསྶ ཨཏྟབྷཱཝསཉྙིཏརཱུཔསམུཊྛཱཔནཏཱ ནིཡཏཱ ཨེཀནྟིཀཱཏི པུཐུཛྫནགྒཧཎཾ. ‘‘ཨབྷིརཱུཔཾ རཱུཔཾ སམུཊྛཱཔེཏཱི’’ཏི ཨཱནེཏྭཱ སམྦནྡྷོ.

དུཏིཡགདྡུལབདྡྷསུཏྟཝཎྞནཱ ནིཊྛིཏཱ.

༩. ཝཱསིཛཊསུཏྟཝཎྞནཱ

༡༠༡. ཨཏྠསྶཱཏི ཧིཏསྶ. ཨསཱདྷིཀཱ ‘‘བྷཱཝནཱནུཡོགཾ ཨནནུཡུཏྟསྶཱ’’ཏི ཨནནུཡུཏྟསྶ ¶ ཝུཏྟཏྟཱ. ཨིཏརཱཏི སུཀྐཔཀྑཨུཔམཱ. སཱདྷིཀཱ བྷཱཝནཱཡོགསྶ ཨནུཡུཏྟཏྟཱ. ཏཉྷི ཏསྶ སཱདྷིཀཱ ཝེདིཏབྦཱ. སམྦྷཱཝནཏྠེཏི པརམཏྠསམྦྷཱཝནེ. ཨེཝཉྷི ཀཎྷཔཀྑེཔི ཨཔིསདྡགྒཧཎཾ སམཏྠིཏཾ ཧོཏི. སམྦྷཱཝནཏྠེཏི ཝཱ པརིཀཔྤནཏྠེཏི ཨཏྠོ. སངྑཱཏབྦེ ཨཏྠེ ཨནིཡམཏོ ཝུཙྩམཱནེ སངྑཱཏོ ཨནིཡམཏྠོ ཝཱསདྡོ ཝཏྟབྦོཏི ‘‘ཨཊྛ ཝཱ’’ཏིཨཱདི ཝུཏྟཾ. ཨཱུནཱདྷིཀཱནཱིཏི ཨཱུནཱནིཔི ཨདྷིཀཱནིཔི ཀིཉྩཱཔི ཧོནྟི, ཨེཀཾསོ པན གཧེཏབྦོཏི ‘‘ཨཊྛ ཝཱ དས ཝཱ དྭཱདས ཝཱ’’ཏི ཝུཏྟཾ. ཨེཝཾ ཝཙནཾ སནྡྷཱཡ ‘‘ཝཙནསིལིཊྛཏཱཡཱ’’ཏིཨཱདི ཝུཏྟཾ. པཱདནཁསིཁཱཧི ཨཀོཔནཝསེན སམྨཱ ཨདྷིསཡིཏཱནི. ཨུཏུནྟི ཨུཎྷཨུཏུཾ ཀཱཡུསྨཱཝསེན. ཏེནཱཧ ‘‘ཨུསྨཱིཀཏཱནཱི’’ཏི. བྷཱཝིཏཱནཱིཏི ཀུཀྐུཊཝཱསནཱཡ ཝཱསིཏཱནི. སམྨཱཨདྷིསཡནཱདིཏིཝིདྷཀིརིཡཱཀརཎེན ཨིམཾ ཨཔྤམཱདཾ ཀཏྭཱ. སོཏྠིནཱ ཨབྷིནིབྦྷིཛྫིཏུནྟི ཨནནྟརཱཡེན ཏཏོ ནིཀྑམིཏུཾ. ཨིདཱནི ཏམཏྠཾ ཝིཝརནྟོ ‘‘ཏེ ཧཱི’’ཏིཨཱདིམཱཧ. སཡམྤཱིཏི ཨཎྜཱནི. པརིཎཱམནྟི པརིཔཀྐཾ བཧིནིཀྑམནཡོགྒཏཾ.

ཏནྟི ཨོཔམྨསམྤཊིཔཱདནཾ. ཨེཝནྟི ཨིདཱནི ཝུཙྩམཱནཱཀཱརེན. ཨཏྠེནཱཏི ཨུཔམེཡྻཏྠེན. སཾསནྡིཏྭཱ སམྨཱ ཡོཛེཏྭཱ. སམྤཡུཏྟདྷམྨཝསེན ཉཱཎསྶ ཏིཀྑཱདིབྷཱཝོ ཝེདིཏབྦོ. ཉཱཎསྶ ཧི སབྷཱཝཏོ སཏིནེཔཀྐཏོ ཙ ཏིཀྑབྷཱཝོ, སམཱདྷིཝསེན སཱུརབྷཱཝོ, སདྡྷཱཝསེན ཝིཔྤསནྣབྷཱཝོ ¶ , ཝཱིརིཡཝསེན པརིཎཱམབྷཱཝོ. པརིཎཱམཀཱལོཏི བལཝཝིཔསྶནཱཀཱལོ. ཝཌྜྷིཏཀཱལོཏི ཝུཊྛཱནགཱམིནིཝིཔསྶནཱཀཱལོ. ཨནུལོམཊྛཱནསྶ ཧི ཝིཔསྶནཱ གཧིཏགབྦྷཱ ནཱམ ཏདཱ མགྒགབྦྷསྶ གཧིཏཏྟཱ. ཏཛྫཱཏིཀནྟི ཏསྶ ཝིཔསྶནཱནུཡོགསྶ ཨནུརཱུཔཾ. སཏྠཱཔི གཱཐཱཡ ཨཝིཛྫཎྜཀོསཾ པཧརཏི བྷིནྡཱཔེཏི.

ཨོལམྦཀསངྑཱཏནྟི ཨོལམྦཀསུཏྟསངྑཱཏཾ. པལནྟི ཏསྶ སུཏྟསྶ ནཱམཾ. དྷཱརེཏྭཱཏི དཱརཱུནཾ ཧེཡྻཱདིཛཱནནཏྠཾ ཨུཔནེཏྭཱ. དཱརཱུནཾ གཎྜཾ ཧརཏཱིཏི པལགཎྜོཏི ཨེཏེན པལེན གཎྜཧཱརོ ‘‘པལགཎྜོ’’ཏི པཙྪིམཔདེ ཨུཏྟརཔདལོཔེན ནིདྡེསོཏི དསྶེཏི. གཧཎཊྛཱནེཏི ཧཏྠེན གཧེཏབྦཊྛཱནེ. སམྨདེཝ ཁེཔཱིཡནྟི ཨེཏེན ཀཱཡདུཙྩརིཏཱདཱིནཱིཏི སངྑེཔོ, ཏེན. ཝིཔསྶནཾ ཨནུཡུཉྫནྟསྶ པུགྒལསྶེཝ དིཝསེ དིཝསེ ཨཱསཝཱནཾ པརིཀྑཡོ ཨིདྷ ‘‘ཝིཔསྶནཱཡཱནིསཾསོ’’ཏི ཨདྷིཔྤེཏོ. ཧེམནྟིཀེན ཀརཎབྷཱུཏེན. བྷུམྨཏྠེ ཝཱ ཨེཏཾ ཀརཎཝཙནཾ, ཧེམནྟིཀེཏི ཨཏྠོ. པཊིཔྤསྶམྦྷནྟཱིཏི པཊིཔྤསྶདྡྷཕལཱནི ཧོནྟི. ཏེནཱཧ ‘‘པཱུཏིཀཱནི བྷཝནྟཱི’’ཏི.

མཧཱསམུདྡོ ཝིཡ སཱསནཾ སབྷཱཝགམྦྷཱིརབྷཱཝཏོ. ནཱཝཱ ཝིཡ ཡོགཱཝཙརོ མཧོགྷུཏྟརཎཏོ. པརིཡཱདཱནཾ ཝིཡཱཏི པརིཏོ ཨཔརིཔཱུརཎཾ ཝིཡ. ཁཛྫམཱནཱནནྟི སངྑཱདནྟེན ཝིཡ ཨུདཀེན ཁེཔིཡམཱནཱནཾ ¶ བནྡྷནཱནཾ. ཏནུབྷཱཝོཏི པརིཡུཊྛཱནུཔྤཏྟིཡཱ ཨསམཏྠཏཱཡ དུབྦལབྷཱཝོ. ཝིཔསྶནཱཉཱཎཔཱིཏིཔཱམོཛྫེཧཱིཏི ཝིཔསྶནཱཉཱཎསམུཊྛིཏེཧི པཱིཏིཔཱམོཛྫེཧི. ཨོཀྑཱཡམཱནེ པཀྑཱཡམཱནེཏི ཝིཝིདྷཔཊིཔཏྟིཡཱ ཨུཀྑཱཡམཱནེ པཊིསངྑཱནུཔསྶནཱཡ པཀྑཱཡམཱནེ. དུབྦལཏཱ དཱིཔིཏཱ ‘‘ཨཔྤཀསིརེནེཝ སཾཡོཛནཱནི པཊིཔྤསྶམྦྷནྟི, པཱུཏིཀཱནི བྷཝནྟཱི’’ཏི ཝུཏྟཏྟཱ.

ཝཱསིཛཊསུཏྟཝཎྞནཱ ནིཊྛིཏཱ.

༡༠. ཨནིཙྩསཉྙཱསུཏྟཝཎྞནཱ

༡༠༢. བྷཱཝེནྟསྶཱཏི ཝིཔསྶནཱཡ མགྒཾ བྷཱཝེནྟསྶ ཨུཔྤནྣསཉྙཱ. ཏེནཱཧ – ‘‘སབྦཾ ཀཱམརཱགཾ པརིཡཱདིཡཏཱི’’ཏིཨཱདི. སནྟཱནེཏྭཱཏི ཀསནཊྛཱནཾ ¶ སབྦསོ ཝིཏནེཏྭཱ པཏྠརིཏྭཱ. ཀིལེསཱཏི ཨུཔཀྐིལེསཔྤབྷེདཱ ཀིལེསཱ. ཨནིཙྩསཉྙཱཉཱཎེནཱཏི ཨནིཙྩསཉྙཱསཧགཏེན ཉཱཎེན.

ལཱཡནནྟི ལཱཡནཾ ཝིཡ ནཡནཾ ཝིཡ ནིཙྪོཊནཾ ཝིཡ ཙ ཨནིཙྩསཉྙཱཉཱཎཾ. ཨིམིནཱ ཨཏྠེནཱཏི ཨིམིནཱ ཡཐཱཝུཏྟེན པཱལི༹ཡཱ ཨཏྠེན, ཨུཔམཱ སཾསནྡེཏབྦཱཏི ཨེཏྠ པབྦཛལཱཡཀོ ཝིཡ ཡོགཱཝཙརོ. ལཱཡནཱདིནཱ ཏསྶ ཏཏྠ ཀཏཀིཙྩཏཱཡ པརིཏུཊྛི ཝིཡ ཨིམསྶ ཀིལེསེ སབྦསོ ཚིནྡིཏྭཱ ཕལསམཱཔཏྟིསུཁེན ཀཱལསྶ ཝཱིཏིནཱམནཱ.

ཀཱུཊཾ གཙྪནྟཱིཏི པཱརིམནྟེན ཀཱུཊཾ གཙྪནྟི. ཀཱུཊཾ པཝིསནབྷཱཝེནཱཏི ཀཱུཊཙྪིདྡཾ ཨགྒེན པཝིསནཝསེན. སམོསརིཏྭཱཏི ཚིདྡེ ཨནུཔཝིསནཝསེན ཙ ཨཱཧཙྩ ཨཝཊྛཱནེན ཙ སམོསརིཏྭཱ ཋིཏཱ. ཀཱུཊཾ ཝིཡ ཨནིཙྩསཉྙཱ ཨནིཙྩཱནུཔསྶནཱཝསེན ཨཝཊྛཱནསྶ མཱུལབྷཱཝཏོ. གོཔཱནསིཡོ ཝིཡ ཙཏུབྷཱུམཀཀུསལཱ དྷམྨཱ ཨནིཙྩསཉྙཱམཱུལཀཏྟཱ. ཀཱུཊཾ ཨགྒཾ སབྦགོཔཱནསཱིནཾ ཏཐཱཨདྷིཊྛཱནསྶ པདྷཱནཀཱརཎཏྟཱ. ཨནིཙྩསཉྙཱ ཨགྒཱཏི ཨེཏྠཱཔི ཨེསེཝ ནཡོ. ཨནིཙྩསཉྙཱ ལོཀིཡཱཏི ཨིདཾ ཨནིཙྩསཉྙཱནུཔསྶནཾ སནྡྷཱཡ ཝུཏྟཾ. ཨནིཙྩཱནུཔསྶནཱམུཁེན ཨདྷིགཏཨརིཡམགྒེ ཨུཔྤནྣསཉྙཱ ཨནིཙྩསཉྙཱཏི ཝཏྟབྦཏཾ ལབྷཏཱིཏི ‘‘ཨནིཙྩསཉྙཱ, བྷིཀྑཝེ, བྷཱཝིཏཱ བཧུལཱིཀཏཱ སབྦཾ ཀཱམརཱགཾ པརིཡཱདིཡཏཱི’’ཏིཨཱདི ཝུཏྟཾ. ཏཐཱ ཧི དྷམྨསངྒཧེ (དྷ. ས. ༣༥༧, ༣༦༠) ‘‘ཡསྨིཾ སམཡེ ལོཀུཏྟརཾ སཉྙཾ བྷཱཝེཏཱི’’ཏིཨཱདིནཱ སཉྙཱཔི ཨུདྡྷཊཱ. སབྦཱསུ ཨུཔམཱསཱུཏི མཱུལསནྟཱནཨུཔམཱདཱིསུ པཉྩསུ ཨུཔམཱསུ. པུརིམཱཧཱིཏི ཀསྶཀཔབྦཛལཱཡནཨམྦཔིཎྜིཨུཔམཱཧི ཨནིཙྩསཉྙཱཡ ཀིཙྩཾ ཝུཏྟཾ མཱུལསནྟཱནཀཔདཱལནཔབྦཛལཱཡནཝཎྚཙྪེདནཔདེསེན ¶ ཨནིཙྩསཉྙཱཡ པཊིཔཀྑཔཙྪེདནསྶ དསྶིཏཏྟཱ. པཙྪིམཱཧི བལཾ དསྶིཏཾ པཊིཔཀྑཱཏིབྷཱཝསྶ ཛོཏིཏཏྟཱ.

ཨནིཙྩསཉྙཱསུཏྟཝཎྞནཱ ནིཊྛིཏཱ.

པུཔྥཝགྒཝཎྞནཱ ནིཊྛིཏཱ.

མཛ྄ཛྷིམཔཎྞཱསཀོ སམཏྟོ.

༡༡. ཨནྟཝགྒོ

༡. ཨནྟསུཏྟཝཎྞནཱ

༡༠༣. ཨཉྙམཉྙཾ ¶ ཨསཾསཊྛབྷཱཝེན ཨེཏི གཙྪཏཱིཏི ཨནྟོ, བྷཱགོཏི ཨཱཧ ‘‘ཨནྟཱཏི ཀོཊྛཱསཱ’’ཏི. ‘‘སཀྐཱཡནིརོདྷནྟོ’’ཏི ནིརོདྷཔཙྩཡསྶ གཧིཏཏྟཱ ཝུཏྟཾ ‘‘ཙཏུསཙྩཝསེན པཉྩཀྑནྡྷེ ཡོཛེཏྭཱ’’ཏི. ཨནྟོཏི…པེ… ཨཛ྄ཛྷཱསཡཝསེན ཝུཏྟཾ ཡཐཱནུལོམདེསནཏྟཱ སུཏྟནྟདེསནཱཡ.

ཨནྟསུཏྟཝཎྞནཱ ནིཊྛིཏཱ.

༢-༣. དུཀྑསུཏྟཱདིཝཎྞནཱ

༡༠༤-༡༠༥. དུཏིཡམྤཱིཏི ཨཔི-སདྡོ སམྤིཎྜནཏྠོ. ཏེན ན ཀེཝལཾ པཋམསུཏྟམེཝ, ཨཐ ཁོ དུཏིཡམྤཱིཏི.

ཏཏིཡམྤི ཏཐེཝཱཏི ཨིམིནཱ ‘‘པཉྩཀྑནྡྷེ ཙཏུསཙྩཝསེན ཡོཛེཏྭཱ’’ཏི ཨིདཾ ཨུཔསཾཧརཏི.

དུཀྑསུཏྟཱདིཝཎྞནཱ ནིཊྛིཏཱ.

༤. པརིཉྙེཡྻསུཏྟཝཎྞནཱ

༡༠༦. པརིཉྙེཡྻེཏི ཨེཏྠ ཏིསྶོ པརིཉྙཱ ཉཱཏཔརིཉྙཱ, ཏཱིརཎཔརིཉྙཱ, པཧཱནཔརིཉྙཱཏི. ཏཱསུ ཉཱཏཔརིཉྙཱ ཡཱཝདེཝ ཏཱིརཎཔརིཉྙཏྠཱ. ཏཱིརཎཔརིཉྙཱ ཙ ཡཱཝདེཝ པཧཱནཔརིཉྙཏྠཱཏི ¶ . ཏཏྠ ཨུཀྐཊྛཱཡ པརིཉྙཱཡ ཀིཙྩདསྶནཝསེན ཨཏྠཾ དསྶེནྟོ ‘‘པརིཉྙེཡྻེཏི པརིཛཱནིཏབྦེ སམཏིཀྐམིཏབྦེ’’ཏི, པཧཱཏབྦེཏི ཨཏྠོ. ཏེནཱཧ བྷགཝཱ – ‘‘ཀཏམཱ ཙ, བྷིཀྑཝེ, པརིཉྙཱ? རཱགཀྑཡོ, དོསཀྑཡོ, མོཧཀྑཡོ’’ཏི, ཏསྨཱ སམཏིཀྐམནྟི, སམཏིཀྐནྟཾ པཧཱནསྶ ཨུཔཱཡཾ. སམཏིཀྐམིཏྭཱ ཋིཏནྟི པཛཧིཏྭཱ ཋིཏནྟི ཨཡམེཏྠ ཨཏྠོ.

པརིཉྙེཡྻསུཏྟཝཎྞནཱ ནིཊྛིཏཱ.

༥-༡༠. སམཎསུཏྟཱདིཝཎྞནཱ

༡༠༧-༡༡༢. ཙཏྟཱརི ¶ སཙྩཱནི ཀཐིཏཱནི ཨསྶཱདཱདཱིནཾ སམུདཡཱདཱིནཉྩ དེསིཏཏྟཱ.

ཀིལེསཔྤཧཱནཾ ཀཐིཏཾ རཱགཔྤཧཱནསྶ ཛོཏིཏཏྟཱ.

སམཎསུཏྟཱདིཝཎྞནཱ ནིཊྛིཏཱ.

ཨནྟཝགྒཝཎྞནཱ ནིཊྛིཏཱ.

༡༢. དྷམྨཀཐིཀཝགྒོ

༡-༢. ཨཝིཛྫཱསུཏྟཱདིཝཎྞནཱ

༡༡༣-༡༡༤. ཡཱཝཏཱཏི ཡསྨཱ. ཨིམཱཡ…པེ… སམནྣཱགཏོཏི ‘‘ཨིདཾ དུཀྑནྟི ཡཐཱབྷཱུཏཾ ནཔྤཛཱནཱཏཱི’’ཏིཨཱདིནཱ ནཡེན ཝུཏྟཱཡ ཙཏཱུསུ ཨརིཡསཙྩེསུ ཨཉྙཱཎསབྷཱཝཱཡ ཨཝིཛྫཱཡ སམྨོཧེན སམནྣཱགཏོ. ཨེཏྟཱཝཏཱཏི ཨེཏྟཀེན ཀཱརཎེན ཨཝིཛྫཱགཏོ སམངྒཱིབྷཱུཏེན ཨུཔགཏོ, ཨཝིཛྫཱཡ ཝཱ ཨུཔེཏོ ནཱམ ཧོཏི.

དུཏིཡེཔཱིཏི ཝིཛྫཱསུཏྟེ. ‘‘ཝིཛྫཱཝསེན དེསནཱ’’ཏི ཨཡམེཝ ཝིསེསོཏི ཨཱཧ ‘‘ཨེསེཝ ནཡོ’’ཏི.

ཨཝིཛྫཱསུཏྟཱདིཝཎྞནཱ ནིཊྛིཏཱ.

༣. དྷམྨཀཐིཀསུཏྟཝཎྞནཱ

༡༡༥. པཋམེན ¶ དྷམྨཀཐིཀོ ཀཐིཏོ ‘‘དྷམྨཾ དེསེཏཱི’’ཏི ཝུཏྟཏྟཱ. དུཏིཡེན སེཁབྷཱུམི ཀཐིཏཱ ‘‘པཊིཔནྣོ ཧོཏཱི’’ཏི ཝུཏྟཏྟཱ, ཏཏིཡེན ཨསེཁབྷཱུམི ཀཐིཏཱ ‘‘ཨནུཔཱདཱཝིམུཏྟོ ཧོཏཱི’’ཏི ཝུཏྟཏྟཱ. དྷམྨཀཐིཀཾ པུཙྪིཏེན བྷགཝཏཱ. ཝིསེསེཏྭཱཏི དྷམྨཀཐིཀབྷཱཝཏོ ཝིསེསེཏྭཱ ཨུཀྐཾསེཏྭཱ. དྭེ བྷཱུམིཡོཏི སེཀྑཱསེཀྑབྷཱུམིཡོ.

དྷམྨཀཐིཀསུཏྟཝཎྞནཱ ནིཊྛིཏཱ.

༤. དུཏིཡདྷམྨཀཐིཀསུཏྟཝཎྞནཱ

༡༡༦. ཏཱིཎི ¶ ཝིསྶཛྫནཱནཱིཏི ཡཐཱཔུཙྪཾ ཏཱིཎི ཝིསྶཛྫནཱནི.

དུཏིཡདྷམྨཀཐིཀསུཏྟཝཎྞནཱ ནིཊྛིཏཱ.

༥-༩. བནྡྷནསུཏྟཱདིཝཎྞནཱ

༡༡༧-༡༢༡. ཏཱིརཾ ཝུཙྩཏི ཝཊྚཾ ཨོརིམཏཱིརནྟི ཀཏྭཱ. ཏེནཱཧ ‘‘ཨཐཱཡཾ ཨིཏརཱ པཛཱ, ཏཱིརམེཝཱནུདྷཱཝཏཱི’’ཏི (དྷ. པ. ༨༥). པཱརཾ ཝུཙྩཏི ནིབྦཱནཾ སཾསཱརསྶ པཱརིམནྟི ཀཏྭཱ. བདྡྷོཏི ཨནུསཡཔྤཧཱནསྶ ཨཀཏཏྟཱ ཀིལེསབནྡྷནེན བདྡྷོ, སུཀྐཔཀྑེཔི དིཊྛིསམནུཔསྶནཱཡ རཱུཔཱདིབནྡྷནསྶ པཊིཀྑེཔམཏྟམེཝ ཝུཏྟཾ, ན ཝིམོཀྑནྟི ཨདྷིཔྤཱཡོ. ཨིམསྨིཾ སུཏྟེ ཝཊྚདུཀྑཾ ཀཐིཏནྟི ‘‘ཏཱིརདསྶཱི པཱརདསྶཱི, པརིམུཏྟོ སོ དུཀྑསྨཱཏི ཝདཱམཱི’’ཏི ཨཱགཏཏྟཱ ཝཊྚཝིཝཊྚཾ ཀཐིཀནྟི ཝཏྟུཾ སཀྐཱ.

ཚཊྛཱདཱིནི ཨུཏྟཱནཏྠཱནེཝ ཧེཊྛཱ ཝུཏྟནཡཏྟཱ.

བནྡྷནསུཏྟཱདིཝཎྞནཱ ནིཊྛིཏཱ.

༡༠. སཱིལཝནྟསུཏྟཝཎྞནཱ

༡༢༢. ཨཱབཱདྷཊྛེནཱཏི ཨཱདིཏོ ཨུཔྤཏྟིཏོ པཊྛཱཡ བཱདྷནཊྛེན རུཛནཊྛེན. ཨནྟོདོསཊྛེནཱཏི ཨབྦྷནྟརེ ཨེཝ དུསྶནཊྛེན ཀུཔྤནཊྛེན. ཁཎནཊྛེནཱཏི སསནཊྛེན. དུཀྑཊྛེནཱཏི དུཀྑམཏྟཱ ¶ དུཀྑབྷཱཝེན. དུཀྑཉྷི ལོཀེ ‘‘ཨགྷ’’ནྟི ཝུཙྩཏི ཨཏིཝིཡ ཧནནཏོ. ཝིསབྷཱགཾ …པེ… པཙྩཡཊྛེནཱཏི ཡཐཱཔཝཏྟམཱནཱནཾ དྷཱཏཱདཱིནཾ ཝིསབྷཱགབྷཱུཏམཧཱབྷཱུཏསམུཊྛཱནསྶ ཨཱབཱདྷསྶ པཙྩཡབྷཱཝེན. ཨསཀཊྛེནཱཏི ཨནཏྟནིཡཏོ. པལུཛྫནཊྛེནཱཏི པཀཱརཏོ བྷིཛྫནཊྛེན. སཏྟསུཉྙཏཊྛེནཱཏི སཏྟསངྑཱཏཨཏྟསུཉྙཏཊྛེན. ཨཏྟཱབྷཱཝེནཱཏི དིཊྛིགཏིཀཔརིཀཔྤིཏསྶ ཨཏྟནོ ཨབྷཱཝེན. སུཉྙཏོ ཨནཏྟཏོཏི ཨེཏྠ ‘‘པརཏོ’’ཏི པདསྶ སངྒཧོ ཀཱཏབྦོ, ཏསྨཱ ‘‘དྭཱིཧི ཨནཏྟམནསིཀཱརོ’’ཏི ཝཏྟབྦཾ.

སཱིལཝནྟསུཏྟཝཎྞནཱ ནིཊྛིཏཱ.

༡༡. སུཏཝནྟསུཏྟཝཎྞནཱ

༡༢༣. ཏཐཱ ¶ ཨེཀཱདསམེཏི ཨེཏྠ ཏཐཱ-སདྡེན ‘‘ཨུཏྟཱནམེཝཱ’’ཏི ཨིདཾ ཨཱཀཌྜྷཏི. ཨིདྷཱཏི ཨེཀཱདསམེ. ཀམྨཊྛཱནསྶ ཨུགྒཧདྷཱརཎཔརིཙཡམནསིཀཱརཝསེན པཝཏྟཉཱཎཾ ཀམྨཊྛཱནསུཏཝསེན ནིཔྥཛྫནཏོ ‘‘སུཏ’’ནྟི ཝུཏྟཾ.

སུཏཝནྟསུཏྟཝཎྞནཱ ནིཊྛིཏཱ.

༡༢-༡༣. ཀཔྤསུཏྟཱདིཝཎྞནཱ

༡༢༤-༡༢༥. རཱཧུལོཝཱདསདིསཱནཱིཏི རཱཧུལོཝཱདསུཏྟེ (མ. ནི. ༢.༡༡༣ ཨཱདཡོ) ཨཱགཏསུཏྟསདིསཱནི.

ཀཔྤསུཏྟཱདིཝཎྞནཱ ནིཊྛིཏཱ.

དྷམྨཀཐིཀཝགྒཝཎྞནཱ ནིཊྛིཏཱ.

༡༣. ཨཝིཛྫཱཝགྒོ

༡-༡༠. སམུདཡདྷམྨསུཏྟཱདིཝཎྞནཱ

༡༢༦-༡༣༥. ཨིམསྨིནྟི ¶ ཨཝིཛྫཱཝགྒེ. ཙཏུསཙྩམེཝ ཀཐིཏཾ, ཏསྨཱ ཧེཊྛཱ ཝུཏྟནཡཏྟཱ ཨུཏྟཱནམེཝཱཏི ཨདྷིཔྤཱཡོ.

སམུདཡདྷམྨསུཏྟཱདིཝཎྞནཱ ནིཊྛིཏཱ.

ཨཝིཛྫཱཝགྒཝཎྞནཱ ནིཊྛིཏཱ.

༡༤. ཀུཀྐུལ༹ཝགྒོ

༡-༡༤. ཀུཀྐུལ༹སུཏྟཱདིཝཎྞནཱ

༡༣༦-༡༤༩. ཨནྟོ ཨགྒི མཧནྟོ ཚཱརིཀརཱསི, ཏཏྠ ཨུཀྐུལ༹ཝིཀུལཏོ ཨཀྐམནྟཾ ཡཱཝ ཀེསགྒཾ ཨནུདཧཏཱཡ ཀུཙྪིཏཾ ཀུལ༹ནྟི ཀུཀྐུལ༹ཾ ¶ , རཱུཔཝེདནཱདི པན ཏཏོཔི ཀཉྩི ཀཱལཾ ཨནུདཧནཏོ མཧཱཔརིལཱ༹ཧནཊྛེན ཙ ཀུཀྐུལ༹ཾ ཝིཡཱཏི ཀུཀྐུལ༹ཾ. ཨནིཙྩལཀྑཎཱདཱིནཱིཏི ཨནིཙྩདུཀྑཱནཏྟལཀྑཎཱནི.

ཀུཀྐུལ༹སུཏྟཱདིཝཎྞནཱ ནིཊྛིཏཱ.

ཀུཀྐུལ༹ཝགྒཝཎྞནཱ ནིཊྛིཏཱ.

༡༥. དིཊྛིཝགྒོ

༡-༩. ཨཛ྄ཛྷཏྟསུཏྟཱདིཝཎྞནཱ

༡༥༠-༡༥༨. པཙྩཡཾ ཀཏྭཱཏི ཨབྷིནིཝེསཔཙྩཡཾ ཀཏྭཱ. ཨཱདིསདྡེན མིཙྪཱདིཊྛིསཀྐཱཡདིཊྛིཨཏྟཱནུདིཊྛི སཉྙོཛནཱབྷིནིཝེས-ཝིནིབནྡྷཨཛ྄ཛྷོསཱནཱནི སངྒཎྷཱཏི. ཏཏྠ ཨབྷིནིཝེསཱ ཏཎྷཱམཱནདིཊྛིཡོ. ཝིནིབནྡྷཱ ‘‘ཀཱཡེ ཨཝཱིཏརཱགོ ཧོཏཱི’’ཏིཨཱདིནཱ (དཱི. ནི. ༣.༣༢༠; མ. ནི. ༡.༡༨༦) ཨཱགཏཙེཏསོཝིནིབནྡྷཱ ¶ . ཨཛ྄ཛྷོསཱནཱཏི ཏཎྷཱདིཊྛིཛ྄ཛྷོསཱནཱནི. སེསཱནི སུཝིཉྙེཡྻཱནེཝ.

ཨཛ྄ཛྷཏྟསུཏྟཱདིཝཎྞནཱ ནིཊྛིཏཱ.

༡༠.ཨཱནནྡསུཏྟཝཎྞནཱ

༡༥༩. དྷརམཱནཀཱལེཏི ཛཱིཝམཱནཀཱལེ. པཧཱནཾ ཨཔསྶནྟོཏི ཐེརསྶ ཀིར བྷགཝཏི པེམཾ ཨདྷིམཏྟཾ. ཙིཏྟཾ གཎྷིསྶཱམཱིཏི ཙིཏྟཾ ཨཱརཱདྷེསྶཱམི. གནྟབྦཾ ཧོཏི, ཏསྨཱ སཔལིབོདྷོ. ཙིཏྟཾ སམྤཧཾསམཱནོཏི ཙིཏྟསྶ ཝིབོདྷནོ. ཝིམུཏྟི…པེ… ཛཱཏོ ཨཱཡཏིཾ པཊིཝེདྷཔཙྩཡཏྟཱ, ན པན ཏདཱ ཝིསེསཱཝཧབྷཱཝཱ ནིབྦེདྷབྷཱགིཡོ.

ཨཱནནྡསུཏྟཝཎྞནཱ ནིཊྛིཏཱ.

དིཊྛིཝགྒཝཎྞནཱ ནིཊྛིཏཱ.

ཨུཔརིཔཎྞཱསཀོ སམཏྟོ.

སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ

ཁནྡྷསཾཡུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༢. རཱདྷསཾཡུཏྟཾ

༡. པཋམཝགྒོ

༡. མཱརསུཏྟཝཎྞནཱ

༡༦༠. མཱརསདྡོཡཾ ¶ ¶ བྷཱཝསཱདྷནོཏི དསྶེནྟོ ‘‘མཱརོ ཝཱ ཨསྶཱཏི མརཎཾ ཝཱ བྷཝེཡྻཱ’’ཏི ཨཱཧ. མཱརེཏཱཏི མརིཏབྦོ མཱརཾ མརཎཾ ཨེཏབྦོཏི ཨཱཧ ‘‘མཱརེཏབྦོ’’ཏི. ཨནུཔཱདཱནིབྦཱནཏྠཱཏི ཕལཝིམུཏྟིསངྑཱཏཱ ཨརཧཏོ ཨརཧནྟཏཱ ནཱམ ཡཱཝདེཝ ཨནུཔཱདཱནིབྦཱནཏྠཱ. ནིབྦཱནབྦྷནྟརེཏི ཨནུཔཱདཱནིབྦཱནཱདྷིགམསྶ ཨབྦྷནྟརེ ཏཏོ ཨོརམེཝ ཨིདཾ མགྒཾ བྲཧྨཙརིཡཾ ཝུསྶཏི, ན ཏཏོ པརཾ. ཨསྶཱཏི བྲཧྨཙརིཡསྶ.

མཱརསུཏྟཝཎྞནཱ ནིཊྛིཏཱ.

༢-༡༠. སཏྟསུཏྟཱདིཝཎྞནཱ

༡༦༡-༡༦༩. ལགྒཔུཙྪཱཏི ལགྒནསྶ བཛ྄ཛྷནསྶ པུཙྪཱ. ཡདི རཱུཔཱདཱིསུ སཏྟཏྟཱ སཏྟོ, ཁཱིཎཱསཝཱ ཀཐཾ སཏྟཱཏི? སཏྟབྷཱུཏཔུབྦཱཏི ཀཏྭཱ. ཀཱིལཱ༹ཝིགམནྟི ཀཱིལཱ༹ཡ ཨཔནཡནཾ ཨོརམཎཾ. ཡནྟརཛྫུ ཝིཡ བྷཝཔབནྡྷསྶ ནཡནཏོ བྷཝརཛྫཱུཏི ཏཎྷཱ ཝུཏྟཱ.

སཏྟསུཏྟཱདིཝཎྞནཱ ནིཊྛིཏཱ.

པཋམཝགྒཝཎྞནཱ ནིཊྛིཏཱ.

༢. དུཏིཡཝགྒོ

༡-༡༢. མཱརསུཏྟཱདིཝཎྞནཱ

༡༧༠-༡༨༡. རཱུཔཱདིཝིནིམུཏྟཾ ¶ མརཎཾ ནཱམ ནཏྠི རཱུཔཱདཱིནཾཡེཝ ཝིབྷཝེ མརཎསམཉྙཱཏི. མརཎདྷམྨོ ཝིནཱསབྷཱཝོ.

མཱརསུཏྟཱདིཝཎྞནཱ ནིཊྛིཏཱ.

དུཏིཡཝགྒཝཎྞནཱ ནིཊྛིཏཱ.

༣-༤. ཨཱཡཱཙནཝགྒཱདི

༡-༡༡. མཱརཱདིསུཏྟཨེཀཱདསཀཝཎྞནཱ

༡༨༢-༢༠༥. སུཁུམཾ ¶ ཀཱརཎཾ ཨུཔཊྛཱཏི, ཏེནེས ཐེརོ པཊིབྷཱནེཡྻཀཱནཾ ཨེཏདགྒེ ཋཔིཏོ. ཝིམུཏྟིཔརིཔཱཙནཱིཡདྷམྨཝསེནེཝ, ན པཊིཝེདྷཱཝཧབྷཱཝེན.

མཱརཱདིསུཏྟཨེཀཱདསཀཝཎྞནཱ ནིཊྛིཏཱ.

ཨཱཡཱཙནཝགྒཱདིཝཎྞནཱ ནིཊྛིཏཱ.

སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ

རཱདྷསཾཡུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༣. དིཊྛིསཾཡུཏྟཾ

༡. སོཏཱཔཏྟིཝགྒོ

༡. ཝཱཏསུཏྟཝཎྞནཱ

༢༠༦. ན ¶ ¶ ཨེཏེ ཝཱཏཱཏི ཡེ ཨིམེ རུཀྑསཱཁཱདིབྷཉྫནཀརཱ, ཨེཏེ སཏྟཀཱཡཏྟཱ ཝཱཏཱ ནཱམ ན ཧོནྟི. ཏེ ཧི ནིཙྩཱ དྷུཝཱ སསྶཏཱ. ཏེནཱཧ ‘‘ཝཱཏོ པནཱ’’ཏིཨཱདི. ཏེན སཏྟསུ ཀཱཡེསུ ཙཏུཏྠཾ ཀཱཡམཱཧ. རུཀྑསཱཁཱདིབྷཉྫནཀོ ཨེསོ ཝཱཏལེསོ ནཱམ, ཝཱཏསདིསོཏི ཨཏྠོ. ཨེསིཀཏྠམྦྷོ ཝིཡཱཏི ཨིམིནཱ ནིཙྩལབྷཱཝམེཝ དསྶེཏི, པབྦཏཀཱུཊཾ ཝིཡཱཏི ཨིམིནཱ པན སསྶཏིསམཾཝཱཔི. ཨཡཉྷི ཝཱཡུ ཀཱཡསྶ ནིཙྩཏཾ ཨབྷིནིཝིསྶ ཋིཏོ ‘‘མཱ ཙ ཨནིཙྩཏཱ པརོ ཧོཏཱུ’’ཏི ན ཝཱཏཱ ཝཱཡནྟཱིཏི བཱདྷཏི. ཨེས ནཡོ ནདིཡོ སནྡནྟཱིཏིཨཱདཱིསུ. ཨུདཀཾ པནཱཏི དུཏིཡཾ ཀཱཡཾ སནྡྷཱཡཱཧ. གབྦྷོ པན ན ནིཀྑམཏི ཀཱུཊཊྛཱདིབྷཱཝེནེཝ ཏསྶ ལབྦྷནཏོ. ནེཝ ཏེ ཨུདེནྟི ཡཐཱ ཝཱཏཱ, ཨེཝཾ ཏིཊྛནཏོ ལོཀསྶ པན ཏཐཱ མཏིམཏྟནྟི ཨདྷིཔྤཱཡོ.

ཝཱཏསུཏྟཝཎྞནཱ ནིཊྛིཏཱ.

༢-༤. ཨེཏཾམམསུཏྟཱདིཝཎྞནཱ

༢༠༧-༢༠༩. དིཊྛཾ རཱུཔཱཡཏནཾ ཙཀྑུནཱ དཊྛབྦཏོ. སུཏཾ སདྡཱཡཏནཾ སོཏེན སོཏབྦཏོ. མུཏཾ གནྡྷཱཡཏནཱདི ཏིཝིདྷཾ སམྤཏྟགཱཧཱིཧི གྷཱནཱདཱིཧི པཏྭཱ གཧེཏབྦཏོ. ཨཝསེསཱནི ཙཀྑཱདཱིནི སཏྟཱཡཏནཱནི ཝིཉྙཱཏཾ ནཱམ ཀེཝལཾ མནོཝིཉྙཱཎེན ཝིཛཱནིཏབྦཏོ. པཏྟནྟི ཨནུཔྤཏྟཾ, ཡཾ ཀིཉྩི པཱཔུཎིཏབྦཾ པརིཡེསིཏྭཱ གཝེསིཏྭཱ སམྤཏྟནྟི ཨནུཔྤཏྟཾ. པརིཡེསིཏནྟི པརིཡིཊྛཾ. ཙིཏྟེན ཨནུསཉྩརིཏནྟི མནསཱ ཙིནྟིཏཾ. ‘‘པཏྟཾ པརིཡེསིཏ’’ནྟི ཨེཏསྨིཾ པདདྭཡེ ཙཏུཀྐཾ སམྦྷཝཏཱིཏི ཏཾ དསྶེཏྭཱ ཏསྶ ཝསེན པཏྟཔརིཡེསིཏཔདཱནི, ཏཏོ མནསཱ ཨནུཝིཙརིཏཉྩ ནཱིཧརིཏྭཱ དསྶེཏུཾ ¶ ‘‘ལོཀསྨིཾ ཧཱི’’ཏིཨཱདི ཝུཏྟཾ. ཏཏྠ པརིཡེསིཏྭཱ པཏྟཾ ནཱམ པརིཡེསནཱཡ ¶ པརིགྒཱཧབྷཱཝཏོ. པརིཡེསིཏཾ ནཱམ ཀེཝལཾ པརིཡེསིཏམེཝཱཏི ཀཏྭཱ པརིཡེསིཏྭཱ པཏྟསྶ མནུསྶཱནུཝིཙརིཏསྶ ཝུཏྟཏྟཱ. པཋམཝིཀཔྤེ སངྐརོ ཨཏྠཱིཏི ཨསངྐརཏོ ཙ དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ. སབྦནྟི ཝིཉྙཱཏཱདི. ཏཉྷི མནོཝིཉྙཱཎེན གཧིཏཏྟཱ མནསཱ ཨནུཝིཙརིཏཾ ནཱམ ན དིཊྛཾ སུཏཾ མུཏཾ.

ཨེཏཾམམསུཏྟཱདིཝཎྞནཱ ནིཊྛིཏཱ.

༥. ནཏྠིདིནྣསུཏྟཝཎྞནཱ

༢༡༠. དིནྣནྟི དེཡྻདྷམྨསཱིསེན དཱནཾ ཝུཏྟནྟི ཨཱཧ ‘‘དིནྣསྶ ཕལཱབྷཱཝཾ སནྡྷཱཡཱ’’ཏི, དིནྣཾ པན ཨནྣཱདིཝཏྠུཾ ཀཐཾ པཊིཀྑིཔནྟི. ཨེས ནཡོ ‘‘ཡིཊྛཾ ཧུཏ’’ནྟི ཨེཏྠཱཔི. མཧཱཡཱགོཏི སབྦསཱདྷཱརཎཾ མཧཱདཱནཾ. པཧེཎཀསཀྐཱརོཏི པཱཧུནཀཱནཾ ཀཱཏབྦསཀྐཱརོ. ཕལནྟི ཨཱནིསཾསཕལཾ ནིསྶནྡཕལཉྩ. ཝིཔཱཀོཏི སདིསཕལཾ. པརལོཀེ ཋིཏསྶ ཨཡཾ ལོཀོ ནཏྠཱིཏི པརལོཀེ ཋིཏསྶ ཀམྨུནཱ ལདྡྷབྦོ ཨཡཾ ལོཀོ ན ཧོཏི. ཨིདྷལོཀེ ཋིཏསྶཔི པརལོཀོ ནཏྠཱིཏི ཨིདྷལོཀེ ཋིཏསྶ ཀམྨུནཱ ལདྡྷབྦོ པརལོཀོ ན ཧོཏི. ཏཏྠ ཀཱརཎམཱཧ – ‘‘སབྦེ ཏཏྠ ཏཏྠེཝ ཨུཙྪིཛྫནྟཱི’’ཏི. ཨིམེ སཏྟཱ ཡཏྠ ཡཏྠ བྷཝེ ཡོནིཨཱདཱིསུ ཙ ཋིཏཱ, ཏཏྠ ཏཏྠེཝ ཨུཙྪིཛྫནྟི ནིརུདཡཝིནཱསཝསེན ནསྶནྟི. ཕལཱབྷཱཝཝསེནཱཏི མཱཏཱཔིཏཱུསུ སམྨཱཔཊིཔཏྟིམིཙྪཱཔཊིཔཏྟཱིནཾ ཕལསྶ ཨབྷཱཝཝསེན ‘‘ནཏྠི མཱཏཱ, ནཏྠི པིཏཱ’’ཏི ཝདནྟི, ན མཱཏཱཔིཏཱུནཾ, ནཱཔི ཏེསུ ཨིདཱནི ཀརིཡམཱནསཀྐཱརཱསཀྐཱརཱནཾ ཨབྷཱཝཝསེན ཏེསཾ ལོཀཔཙྩཀྑཏྟཱ. པུབྦུལ༹ཀསྶ ཝིཡ ཨིམེསཾ སཏྟཱནཾ ཨུཔྤཱདོ ནཱམ ཀེཝལོ, ན བྷཝཏོ ཙཝིཏྭཱ ཨཱགམནཔུབྦཀོཏི དསྶནཏྠཾ ‘‘ནཏྠི སཏྟཱ ཨོཔཔཱཏིཀཱ’’ཏི ཝུཏྟནྟི ཨཱཧ – ‘‘ཙཝིཏྭཱ ཨུཔྤཛྫནཀསཏྟཱ ནཱམ ནཏྠཱི’’ཏི. སམཎེན ནཱམ ཡཱཐཱཝཏོ ཛཱནནྟེན ཀསྶཙི ཨཀཐེཏྭཱ སཉྙཏེན བྷཝིཏབྦཾ, ཨཉྙཐཱ ཨཱཧོཔུརིསིཀཱ ནཱམ སིཡཱ. ཀིཉྷི པརོ པརསྶ ཀརིསྶཏི, ཏཐཱ ཙ ཨཏྟནོ སམྤཱདནསྶ ཀསྶཙི ཨཝསྶཡོ ཨེཝ ན སིཡཱ ཏཏྠ ཏཏྠེཝ ཨུཙྪིཛྫནཏོཏི ཨཱཧ ‘‘ཡེ ཨིམཉྩ…པེ… པཝེདེནྟཱི’’ཏི.

ཙཏཱུསུ ¶ མཧཱབྷཱུཏེསུ ནིཡུཏྟོཏི ཙཱཏུམཧཱབྷཱུཏིཀོ. ཡཐཱ པན མཏྟིཀཱཡ ནིབྦཏྟཾ བྷཱཛནཾ མཏྟིཀཱམཡཾ, ཨེཝམཡཾ ཙཏཱུཧི མཧཱབྷཱུཏེཧི ནིབྦཏྟོཏི ཨཱཧ ‘‘ཙཏུམཧཱབྷཱུཏམཡོ’’ཏི. ཨཛ྄ཛྷཏྟིཀཱ པཐཝཱིདྷཱཏཱུཏི སཏྟསནྟཱནགཏཱ པཐཝཱིདྷཱཏུ. བཱཧིརཾ པཐཝཱིདྷཱཏུནྟི བཧིདྡྷཱ མཧཱཔཐཝིཾ. ཨནུཡཱཏཱིཏི ཏསྶ ཨནུརཱུཔབྷཱཝེན ཡཱཏི ཨུཔེཏི. ཨུཔགཙྪཏཱིཏི པུབྦེ བཱཧིརཔཐཝཱིཀཱཡཏོ ཏདེཀདེསབྷཱུཏཱ པཐཝཱི ཨཱགནྟྭཱ ཨཛ྄ཛྷཏྟིཀབྷཱཝཔྤཏྟིཡཱ སཏྟབྷཱཝེན སཎྛིཏཱ ཨིདཱནི གྷཊཱདིཔཐཝཱི ¶ ཝིཡ ཏམེཝ བཱཧིརཔཐཝཱིཀཱཡཾ ཨུཔེཏི ཨུཔགཙྪཏི, སབྦསོ ཏེན ནིབྦིསེསཏཾ ཨེཀཱིབྷཱཝམེཝ གཙྪཏཱིཏི ཨཏྠོ. ཨཱཔཱདཱིསུཔི ཨེསེཝ ནཡོཏི ཨེཏྠ པཛྫུནྣེན མཧཱསམུདྡཏོ གཧིཏཨཱཔོ ཝིཡ ཝསྶོདཀབྷཱཝེན པུནཔི མཧཱསམུདྡཾ, སཱུརིཡརཾསིཏོ གཧིཏཨིནྡགྒིསངྑཱཏཏེཛོ ཝིཡ པུནཔི སཱུརིཡརཾསིཾ, མཧཱཝཱཡུཁནྡྷཏོ ནིགྒཏམཧཱཝཱཡོ ཝིཡ ཏམེཝ ཝཱཡུཁནྡྷཾ ཨུཔེཏི ཨུཔགཙྪཏཱིཏི དིཊྛིགཏིཀོ སཡམེཝ ཨཏྟནོ ཝཱདཾ བྷིནྡཏི. ཨུམྨཏྟཀཔཙྪིསདིསཉྷི དིཊྛིགཏིཀདསྶནཾ. མནཙྪཊྛཱནི ཨིནྡྲིཡཱནི ཨཱཀཱསཾ པཀྑནྡནྟི ཏེསཾ ཝིསཡབྷཱཝཱ ཝིསཡཱཔཱིཏི ཝདཏི. ཝིསཡིགྒཧཎེན ཧི ཝིསཡཱ གཧིཏཱ ཨེཝ ཧོནྟཱིཏི. གུཎཱགུཎཔདཱནཱིཏི གུཎདོསཀོཊྛཱསཱ. སརཱིརམེཝ པདཱནཱིཏི ཨདྷིཔྤེཏཾ སརཱིརེན ཏཾཏཾཀིརིཡཱཡ པཛྫིཏབྦཏོ. དབྦནྟི མུཡ྄ཧནྟཱིཏི དཏྟཱུ, མཱུལ༹ྷཔུགྒལཱ. ཏེཧི དཏྟཱུཧི བཱལམནུསྶེཧི པཉྙཏྟཾ.

ནཏྠིདིནྣསུཏྟཝཎྞནཱ ནིཊྛིཏཱ.

༦. ཀརོཏོསུཏྟཝཎྞནཱ

༢༡༡. སཧཏྠཱ ཀརོནྟསྶཱཏི སཧཏྠེན ཀརོནྟསྶ. ནིསྶགྒིཡཐཱཝརཱདཡོཔི ཨིདྷ སཧཏྠཀརཎེནེཝ སངྒཧིཏཱ. ཧཏྠཱདཱིནཱིཏི ཧཏྠཔཱདཀཎྞནཱསཱདཱིནི. པཙནཾ དཧནཾ ཝིབཱདྷནནྟི ཨཱཧ ‘‘དཎྜེན པཱིལེ༹ནྟསྶཱ’’ཏི. པཔཉྩསཱུདནིཡཾ ‘‘ཏཛྫེནྟསྶ ཙཱ’’ཏི ཨཏྠོ ཝུཏྟོ, ཨིདྷ པན སུམངྒལཝིལཱསིནིཡཾ ཝིཡ ཏཛྫནཾ པརིབྷཱསནཾ དཎྜེནེཝ སངྒཧེཏྭཱ ‘‘དཎྜེན པཱིལེ༹ནྟསྶ’’ཨིཙྩེཝ ཝུཏྟཾ. སོཀཾ སཡཾ ཀརོནྟསྶཱཏི པརསྶ སོཀཀཱརཎཾ སཡཾ ཀརོནྟསྶ, སོཀཾ ཝཱ ཨུཔྤཱདེནྟསྶ. པརེཧི ཨཏྟནོ ཝཙནཀརེཧི. སཡམྤི ཕནྡཏོཏི པརསྶ ཝིབཱདྷནཔྤཡོགེན ¶ སཡམྤི ཕནྡཏོ. ཨཏིཔཱཏཡཏོཏི པདཾ སུདྡྷཀཏྟུཨཏྠེ ཧེཏུཀཏྟུཨཏྠེ ཙ ཝཏྟཏཱིཏི ཨཱཧ – ‘‘ཧནནྟསྶཔི ཧནཱཔེནྟསྶཔཱི’’ཏི. ཀཱརཎཝསེནཱཏི ཀཱརཱཔནཝསེན.

གྷརསྶ བྷིཏྟི ཨནྟོ ཙ བཧི ཙ སནྡྷིཏཱ ཧུཏྭཱ ཋིཏཱཝ གྷརསནྡྷི. ཀིཉྩིཔི ཨསེསེཏྭཱ ནིརཝསེསོ ལོཔོ ནིལློཔོ. ཨེཀཱགཱརེ ནིཡུཏྟོ ཝིལོཔོ ཨེཀཱགཱརིཀོ. པརིཏོ སབྦསོ པནྠེ ཧནནཾ པརིཔནྠོ. པཱཔཾ ན ཀརཱིཡཏི པུབྦེ ཨསཏོ ཨུཔྤཱདེཏུཾ ཨསཀྐུཎེཡྻཏྟཱ, ཏསྨཱ ནཏྠི པཱཔཾ. ཡདི ཨེཝཾ ཀཐཾ སཏྟཱ པཱཔེ པཝཏྟནྟཱིཏི ཨཱཧ ‘‘སཏྟཱ པན ཀརོམཱཏི ཨེཝཾསཉྙིནོ ཧོནྟཱི’’ཏི ཨེཝཾ ཀིརསྶ ཧོཏི ཨིམེསཉྷི སཏྟཱནཾ ཧིཾསཱདིཀིརིཡཱ ན ཨཏྟཱནཾ ཕུསཏི ཏསྶ ནིཙྩཏཱཡ ནིབྦིཀཱརཏྟཱ, སརཱིརཾ པན ཨཙེཏནཾ ཀཊྛཀལིངྒརཱུཔམཾ, ཏསྨིཾ ཝིཀོཔིཏེཔི ན ཀིཉྩི པཱཔནྟི. ཁུརནེམིནཱཏི ནིསིཏཁུརམཡནེམིནཱ, ཁུརསདིསནེམིནཱཏི ཨཏྠོ.

གངྒཱཡ ¶ དཀྑིཎཱ དིསཱ ཨཔྤཏིརཱུཔདེསོ, ཨུཏྟརདིསཱ པཏིརཱུཔདེསོཏི ཨདྷིཔྤཱཡེན ‘‘དཀྑིཎཉྩེཔཱི’’ཏིཨཱདི ཝུཏྟནྟི ཨཱཧ ‘‘དཀྑིཎཏཱིརེ མནུསྶཱ ཀཀྑལཱ༹’’ཏིཨཱདི. མཧཱཡཱགནྟི མཧཱཝིཛིཏཡཉྙསདིསཾ མཧཱཡཱགཾ. ཨུཔོསཐཀམྨེནཱཏི ཨུཔོསཐཀམྨེན ཙ. ཙ-སདྡོ ཧེཏྠ ལུཏྟནིདྡིཊྛོ. དམསདྡོ ཧི ཨིནྡྲིཡསཾཝརསྶ ཨུཔོསཐསཱིལསྶ ཙ ཝཱཙཀོ ཨིདྷཱདྷིཔྤེཏོ. ཀེཙི པན ‘‘ཨུཔོསཐཀམྨེནཱ’’ཏི ཨིདཾ ཨིནྡྲིཡདམནསྶ ཝིསེསནཾ, ཏསྨཱ ‘‘ཨུཔོསཐཀམྨབྷཱུཏེན ཨིནྡྲིཡདམེནཱ’’ཏི ཨཏྠཾ ཝདནྟི. སཱིལསཾཡམེནཱཏི སཱིལསཾཝརེན. སཙྩཝཙནེནཱཏི སཙྩཝཱཙཱཡ. ཏསྶཱ ཝིསུཾ ཝཙནཾ ལོཀེ གརུཏརཔུཉྙསམྨཏབྷཱཝཏོ. ཡཐཱ ཧི པཱཔདྷམྨེསུ མུསཱཝཱདོ གརུ, ཨེཝཾ པུཉྙདྷམྨེསུ སཙྩཝཱཙཱ. ཏེནཱཧ བྷགཝཱ – ‘‘ཨེཀཾ དྷམྨཾ ཨཏཱིཏསྶཱ’’ཏིཨཱདི (ཨིཏིཝུ. ༢༥). པཝཏྟཱིཏི ཡོ ཀརོཏཱིཏི ཝུཙྩཏི, ཏསྶ སནྟཱནེ ཕལསྶ ནིབྦཏྟིཡཱ པཙྩཡབྷཱཝེན པཝཏྟི. སབྦཐཱཏི ‘‘ཀརོཏོ’’ཏིཨཱདིནཱ ཝུཏྟེན སབྦཔྤཀཱརེན ཀིརིཡམེཝ པཊིཀྑིཔནྟི.

ཀརོཏོསུཏྟཝཎྞནཱ ནིཊྛིཏཱ.

༧. ཧེཏུསུཏྟཝཎྞནཱ

༢༡༢. ཨུབྷཡེནཱཏི ¶ ཧེཏུཔཙྩཡཔཊིསེདྷཝཙནེན. སཾཀིལེསཔཙྩཡནྟི སཾཀིལིསནསྶ མལཱིནབྷཱཝསྶ ཀཱརཎཾ. ཝིསུདྡྷིཔཙྩཡནྟི སཾཀིལེསཏོ ཝིསུདྡྷིཡཱ ཝོདཱནསྶ ཀཱརཎཾ. ནཏྠི བལནྟི སཏྟཱནཾ དིཊྛདྷམྨིཀསམྤརཱཡིཀནིབྦཱནསམྤཏྟིཨཱཝཧཾ བལཾ ནཱམ ཀིཉྩི ནཏྠི. ཏེནཱཧ ‘‘ཡམྷཱི’’ཏིཨཱདི. ནིདསྶནམཏྟཉྩེཏཾ, སཾཀིལེསིཀམྤི ཙཱཡཾ པཊིཀྑིཔཏེཝ. ཨཉྙམཉྙཝེཝཙནཱནཱིཏི ཏསྶཱ ཏསྶཱ ཀིརིཡཱཡ ཨུསྶནྣཊྛེན བལཾ, སཱུརཝཱིརབྷཱཝཱཝཧཊྛེན ཝཱིརིཡཾ, ཏམེཝ དལ༹ྷགྒཱཧབྷཱཝཏོ པོརིསཾ དྷུརཾ ཝཧནྟེན པཝཏྟེཏབྦཏོ པུརིསཐཱམོ, པརཾ པརཾ ཋཱནཾ ཨཀྐམནཔྤཝཏྟིཡཱ པུརིསཔརཀྐམོཏི ཝུཏྟོཏི ཝེདིཏབྦཾ.

སཏྭཡོགཏོ, རཱུཔཱདཱིསུ ཝཱ སཏྟཏཱཡ སཏྟཱ, པཱཎནཏོ ཨསྶཱསནཔསྶཱསནཝསེན པཝཏྟིཡཱ པཱཎཱ, ཏེ པན སོ ཨེཀིནྡྲིཡཱདིཝསེན ཝིབྷཛིཏྭཱ ཝདཏཱིཏི ཨཱཧ ‘‘ཨེཀིནྡྲིཡོ’’ཏིཨཱདི. ཨཎྜཀོསཱདཱིསུ བྷཝནཏོ བྷཱུཏཱཏི ཝུཙྩནྟཱིཏི ཨཱཧ ‘‘ཨཎྜ…པེ… ཝདནྟཱི’’ཏི. ཛཱིཝནཏོ པཱཎཾ དྷཱརེནྟཱ ཝིཡ ཝཌྜྷནཏོ ཛཱིཝཱཏི སཱལིཡཝཱདིཀེ ཝདནྟི. ནཏྠི ཨེཏེསཾ སཾཀིལེསཝིསུདྡྷཱིསུ ཝསོཏི ཨཝསཱ. ནཏྠི ཏེསཾ བལཾ ཝཱིརིཡནྟི ཨབལཱ ཨཝཱིརིཡཱ. ནིཡཏཏཱཏི ཨཙྪེཛྫསུཏྟཱཝུཏཱབྷེཛྫམཎིནོ ཝིཡ ནིཡཏཔྤཝཏྟིཏཱཡ གཏིཛཱཏིབནྡྷཱཔཝགྒཝསེན ནིཡམོ. ཏཏྠ ཏཏྠ གམནནྟི ཚནྣཾ ཨབྷིཛཱཏཱིནཾ ཝསེན ཏཱསུ ཏཱསུ གཏཱིསུ ཨུཔགམནཾ. སམཝཱཡེན སམཱགམོ སངྒཏི. སབྷཱཝོཡེཝཱཏི ཡཐཱ ཀཎྚཀསྶ ཏིཀྑཏཱ, ཀཔིཏྠཕལཱནཾ པརིམཎྜལཏཱ ¶ , མིགཔཀྑཱིནཾ ཝིཙིཏྟཱཀཱརཏཱ, ཨེཝཾ སབྦསྶཔི ལོཀསྶ ཧེཏུཔཙྩཡེཧི ཝིནཱ ཏཐཱ ཏཐཱ པརིཎཱམོ, ཨཡཾ སབྷཱཝོ ཨེཝ ཨཀིཏྟིམོ ཨེཝ. ཏེནཱཧ ‘‘ཡེན ཧཱི’’ཏིཨཱདི. ཚལ༹བྷིཛཱཏིཡོ པརཏོ ཝིཏྠཱརཱིཡནྟི. སུཁཉྩ དུཀྑཉྩ པཊིསཾཝེདེནྟཱིཏི ཝདནྟཱ ཨདུཀྑམསུཁབྷཱུབྷིཾ སབྦེན སབྦཾ ན ཛཱནནྟཱིཏི ཨུལླིངྒེནྟོ ‘‘ཨཉྙཱ སུཁདུཀྑབྷཱུམི ནཏྠཱིཏི དསྶེནྟཱི’’ཏི ཨཱཧ.

ཧེཏུསུཏྟཝཎྞནཱ ནིཊྛིཏཱ.

༨-༡༠. མཧཱདིཊྛིསུཏྟཱདིཝཎྞནཱ

༢༡༣-༢༡༥. ཨཀཏཱཏི ¶ སམེན ཝཱ ཝིསམེན ཝཱ ཀེནཙི ཧེཏུནཱ ན ཀཏཱ ཨེཝ. ཀེནཙི ཀཏཾ ཀརཎཾ ཝིདྷཱནཾ ནཏྠི ཨེཏེསནྟི ཨཀཏཝིདྷཱནཱ. པདདྭཡེནཔི ལོཀེ ཀེནཙི ཧེཏུཔཙྩཡེན ནེསཾ ཨབྷིནིབྦཏྟིཏཱབྷཱཝཾ དསྶེཏི. ཨིདྡྷིཡཱཔི ན ནིམྨིཏཱཏི ཀསྶཙི ཨིདྡྷིམཏོ དེཝསྶ བྲཧྨུནོ ཝཱ ཨིདྡྷིཡཱཔི ན ནིམྨིཏཱ. ཨནིམྨིཏཱཏི ཝཱ ཀསྶཙི ཨནིམྨཱཔཀཱ. ཨཛནཀཱཏི ཨེཏེན པཐཝཱིཀཱཡཱདཱིནཾ རཱུཔཱདིཛནཀབྷཱཝཾ པཊིཀྑིཔཏི. རཱུཔསདྡཱདཡོ ཧི པཐཝཱིཀཱཡཱདཱིཧི ཨཔྤཊིབདྡྷཝུཏྟིཀཱཏི ཏསྶ ལདྡྷི. ཡཐཱ པབྦཏཀཱུཊཾ ཀེནཙི ཨནིབྦཏྟིཏཾ ཀསྶཙི ཙ ཨནིབྦཏྟཀཾ, ཨེཝམེཏེཔཱིཏི ཨཱཧ ‘‘ཀཱུཊཊྛཱ’’ཏི. ཡམིདཾ ‘‘བཱིཛཱདིཏོ ཨངྐུརཱདི ཛཱཡཏཱི’’ཏི ཝུཙྩཏི, ཏཉྩ ཝིཛྫམཱནམེཝ ཏཏོ ནིཀྑམཏི, ནཱཝིཛྫམཱནཾ, ཨཉྙཐཱ ཡཏོ ཀུཏོཙི ཡསྶ ཀསྶཙི ཨུཔྤཏྟི སིཡཱཏི ཨདྷིཔྤཱཡོ. ཋིཏཱཏི ནིབྦིཀཱརབྷཱཝེན ཋིཏཱ. ན ཙལནྟཱིཏི ན ཝིཀཱརཾ ཨཱཔཛྫནྟི. ཝིཀཱརཱབྷཱཝེན ཧི ཏེསཾ སཏྟནྣཾ ཀཱཡཱནཾ ཨེསིཀཊྛཱཡིཊྛིཏཏཱ. ཨནིཉྫནཉྩ ཨཏྟནོ པཀཏིཡཱ ཨཝཊྛཱནམེཝ. ཏེནཱཧ ‘‘ན ཝིཔརིཎམནྟཱི’’ཏི. ཨཝིཔརིཎཱམདྷམྨཏྟཱ ཨེཝ ཙ ནེ ཨཉྙམཉྙཾ ན བྱཱབཱདྷེནྟི. སཏི ཧི ཝིཀཱརཾ ཨཱཔཱདེཏབྦཏཱཡ བྱཱབཱདྷཀཏཱཔི སིཡཱ, ཏཐཱ ཨནུགྒཧེཏབྦཏཱཡ ཨནུགྒཱཧཀཏཱཏི ཏདབྷཱཝཾ དསྶེཏུཾ པཱལི༹ཡཾ ‘‘ནཱལ’’ནྟིཨཱདི ཝུཏྟཾ. པཐཝཱི ཨེཝ ཀཱཡེཀདེསཏྟཱ པཐཝིཀཱཡོ. ཛཱིཝསཏྟམཱནཾ ཀཱཡཱནཾ ནིཙྩཏཱཡ ནིབྦིཀཱརཱབྷཱཝཏོ ན ཧནྟབྦཏཱ, ན གྷཱཊེཏབྦཏཱ ཙཱཏི ནེཝ ཀོཙི ཧནྟཱ གྷཱཏེཏཱ ཝཱ. ཏེནཱཧ ‘‘སཏྟནྣནྟྭེཝཱ’’ཏིཨཱདི. ཡདི ཀོཙི ཧནྟཱ ནཏྠི, ཀཐཾ སཏྠཔྤཧཱརོཏི ཨཱཧ ‘‘ཡཐཱ མུགྒརཱསིཨཱདཱིསཱུ’’ཏིཨཱདི. ཀེཝལཾ སཉྙཱམཏྟམེཝ ཧོཏི, ན གྷཱཏནཱདི, པརམཏྠཏོ སཏྟནྣནྟྭེཝ ཀཱཡཱནཾ ཨཝིཀོཔནཱིཡབྷཱཝཏོཏི ཨདྷིཔྤཱཡོ.

པམུཁཡོནཱིནནྟི མནུསྶཏིརཙྪཱནཱདཱིསུ ཁཏྟིཡབྲཱཧྨཎཱདིསཱིཧབྱགྒྷཱདིཝསེན པདྷཱནཡོནཱིནཾ. སཊྛིསཏཱནི ཚསཧསྶཱནི. ‘‘པཉྩ ཙ ཀམྨུནོ སཏཱནཱི’’ཏི པདསྶ ཨཏྠདསྶནཾ ‘‘པཉྩ ཀམྨསཏཱནི ཙཱ’’ཏི ¶ . ཨེསེཝ ནཡོཏི ཨིམིནཱ ‘‘ཀེཝལཾ ཏཀྐམཏྟེན ནིརཏྠཀདིཊྛིཾ དཱིཔེཏཱི’’ཏི ཨིམམེཝ ཨཏྠཾ ཨཏིདིསཏི. ཨེཏྠ ཙ ཏཀྐམཏྟཀེནཱཏི ཨིམིནཱ ཡསྨཱ ཏཀྐིཀཱ ནིརངྐུསཏཱཡ པརིཀཔྤནསྶ ཡཾ ཀིཉྩི ཨཏྟནོ པརིཀཔྤིཏཾ སཱརཏོ ¶ མཉྙམཱནཱ ཏཐེཝ ཨབྷིནིཝིསྶ ཏཀྐདིཊྛིགཱཧཾ གཎྷནྟི, ཏསྨཱ ན ཏེསཾ དིཊྛིཝཏྠཱུསུ ཝིཉྙཱུཧི ཝིཙཱརཎཱ ཀཱཏབྦཱཏི དསྶེཏི. ཀེཙཱིཏི ཨུཏྟརཝིཧཱརཝཱསིནོ. ཏེ ཧི ‘‘པཉྩ ཀམྨཱནཱིཏི ཙཀྑུསོཏགྷཱནཛིཝ྄ཧཱཀཱཡཱ, ཨིམཱནི པཉྩིནྡྲིཡཱནི ‘པཉྩ ཀམྨཱནཱིཏི པཉྙཱཔེནྟཱི’’ཏི ཝདནྟི. ཀམྨནྟི ལདྡྷཱིཏི ཨོལཱ༹རིཀབྷཱཝཏོ པརིཔུཎྞཀམྨནྟི ལདྡྷི. མནོཀམྨཾ ཨནོལཱ༹རིཀཏྟཱ ཨུཔཌྜྷཀམྨནྟི ལདྡྷཱིཏི ཡོཛནཱ. ‘‘དྭཱསཊྛིཔཊིཔདཱ’’ཏི ཝཏྟབྦེ སབྷཱཝནིརུཏྟིཾ ཨཛཱནནྟཱ ‘‘དྭཊྛིཔཊིཔདཱ’’ཏི ཝདནྟི. ཨེཀསྨིཾ ཀཔྤེཏི ཨེཀསྨིཾ མཧཱཀཔྤེ. ཏཏྠཱཔི ཙ ཝིཝཊྚཊྛཱཡིསཉྙིཏེ ཨེཀསྨིཾ ཨསངྑྱེཡྻཀཔྤེ.

ཨུརབྦྷེ ཧནནྟཱིཏི ཨོརབྦྷིཀཱ. ཨེཝཾ སཱུཀརིཀཱདཡོ ཝེདིཏབྦཱ. ལུདྡཱཏི ཨཉྙེཔི ཡེ ཀེཙི མཱགཝིཀནེསཱདཱདཡོ, ཏེ པཱཔཀམྨཔསུཏཏཱཡ ཀཎྷཱབྷིཛཱཏཱིཏི ཝདནྟི. བྷིཀྑཱུཏི བུདྡྷསཱསནེ བྷིཀྑཱུ. ཏེ ཀིར ‘‘སཙྪནྡརཱགཱ པརིབྷུཉྫནྟཱི’’ཏི ཨདྷིཔྤཱཡེན ཙཏཱུསུ པཙྩཡེསུ ཀཎྚཀེ པཀྑིཔིཏྭཱ ཁཱདནྟཱིཏི ཝདནྟི. ཀསྨཱཏི ཙེ? ཡསྨཱ ཏེ པཎཱིཏཔཎཱིཏེ པཙྩཡེ པཊིསེཝནྟཱིཏི ཏསྶ མིཙྪཱགཱཧོ. ཉཱཡལདྡྷེཔི པཙྩཡེ པརིབྷུཉྫམཱནཱ ཨཱཛཱིཝཀསམཡསྶ ཝིལོམགཱཧིཏཱཡ པཙྩཡེསུ ཀཎྚཀེ པཀྑིཔིཏྭཱ ཁཱདནྟི ནཱམཱཏི ཝདནྟཱིཏི ཨཔརེ. ཨེཀེ པབྦཛིཏཱ, ཡེ ཝིསེསཏོ ཨཏྟཀིལམཐཱནུཡོགམནུཡུཏྟཱ. ཏཐཱ ཧི ཏེ ཀཎྚཀེ ཝཏྟནྟཱ ཝིཡ ཧོནྟཱིཏི ཀཎྚཀཝུཏྟིཀཱཏི ཝུཏྟཱ. ཋཏྭཱ བྷུཉྫནནཧཱནཔཊིཀྑེཔཱདིཝཏསམཱཡོགེན པཎྜརཏརཱ. ཨཙེལཀསཱཝཀཱཏི ཨཱཛཱིཝཀསཱཝཀེ ཝདཏི. ཏེ ཀིར ཨཱཛཱིཝཀསམཡེ ཨཱཛཱིཝཀལདྡྷིཡཱ དལ༹ྷགཱཧིཏཱཡ ནིགཎྛེཧིཔི པཎྜརཏརཱ. ནནྡཱདཡོ ཀིར ཏཐཱརཱུཔཾ ཨཱཛཱིཝཀཔཊིཔཏྟིཾ ཨུཀྐཾསཾ པཱཔེཏྭཱ ཋིཏཱ, ཏསྨཱ ནིགཎྛེཧི ཨཱཛཱིཝཀསཱཝཀེཧི ཙ པཎྜརཏརཱ ཝུཏྟཱ. པརམསུཀྐཱབྷིཛཱཏཱིཏི ཨཡཾ ཏེསཾ ལདྡྷི.

པུརིསབྷཱུམིཡོཏི པདྷཱནཔུགྒལེན ནིདྡེསོ. ཨིཏྠཱིནམྤེཏཱ བྷཱུམིཡོ ཨིཙྪནྟེཝ. བྷིཀྑུ ཙ པནྣཀོཏིཨཱདི ཏེསཾ པཱལི༹ ཨེཝ. ཏཏྠ པནྣཀོཏི བྷིཀྑཱཡ ཝིཙརཎཀོ, ཏེསཾ ཝཱ པཊིཔཏྟིཡཱ པཊིཔནྣཀོ. ཛིནོཏི ཛིཎྞོ ཛརཱཝསེན ཧཱིནདྷཱཏུཀོ, ཨཏྟནོ ཝཱ པཊིཔཏྟིཡཱ པཊིཔཀྑེ ཛིནིཏྭཱ ཋིཏོ. སོ ཀིར ཏཐཱབྷཱུཏོ དྷམྨམྤི ཀསྶཙི ན ཀཐེཏི. ཏེནཱཧ ‘‘ན ཀིཉྩི ཨཱཧཱ’’ཏི. ནིཊྛུཧནཱདིཝིཔྤཀཱརེ ཀེནཙི ཀཏེཔི ཁམནཝསེན ¶ ན ཀིཉྩི ཝདཏཱིཏི ཝདནྟི. ཨལཱབྷིནྟི ‘‘སོ ན ཀུམྦྷིམུཁཱ པཊིགྒཎྷཱཏཱི’’ཏིཨཱདིནཱ (དཱི. ནི. ༡.༣༩༤) ནཡེན ཝུཏྟཨལཱབྷཧེཏུསམཱཡོགེན ཨལཱབྷིཾ. ཏཏོ ཨེཝ ཛིགྷཙྪཱདུབྦལྱཔརེཏཏཱཡ སཡནཔརཱཡཎཾ སམཎཾ པནྣབྷཱུམཱིཏི ཝདནྟི.

ཨཱཛཱིཝཝུཏྟིསཏཱནཱིཏི ¶ སཏྟཱནཾ ཨཱཛཱིཝབྷཱུཏཱནི ཛཱིཝིཀཱཝུཏྟིསཏཱནི. པསུགྒཧཎེན ཨེལ༹ཀཛཱཏི གཧིཏཱ, མིགགྒཧཎེན རུརུགཝཡཱདིསབྦམིགཛཱཏི. བཧཱུ དེཝཱཏི ཙཱཏུམཧཱརཱཛིཀཱདིབྲཧྨཀཱཡིཀཱདིཝསེན ཏེསཾ ཨནྟརབྷེདཝསེན བཧཱུ དེཝཱ. ཏཏྠ ཙཱཏུམཧཱརཱཛིཀཱནཾ ཨེཀཙྩེ ཨནྟརབྷེདཱ མཧཱསམཡསུཏྟཝསེན (དཱི. ནི. ༢.༣༣༡ ཨཱདཡོ) དཱིཔེཏབྦཱ. མནུསྶཱཔི ཨནནྟཱཏི དཱིཔདེསཀུལཝཾསཱཛཱིཝཱདིཝིབྷཱགེན མནུསྶཱཔི ཨནནྟབྷེདཱ. པིསཱཙཱ ཨེཝ པེསཱཙཱ, ཏེ མཧནྟམཧནྟཱ ཨཛགརཔེཏཱདཡོ. ཚདྡནྟདཧམནྡཱཀིནིཡོ ཀུལཱི༹རམུཙལིནྡནཱམེན ཝདནྟི.

པཝུཊཱཏི སབྦགཎྛིཀཱ. པཎྜིཏོཔི…པེ… ཨུདྡྷཾ ན གཙྪཏི. ཀསྨཱ? སཏྟཱནཾ སཾསརཎཀཱལསྶ ནིཡཏབྷཱཝཏོ.

ཨཔརིཔཀྐཾ སཾསརཎནིམིཏྟཾ སཱིལཱདིནཱ པརིཔཱཙེཏི ནཱམ སཱིགྷཾཡེཝ ཝིསུདྡྷིཔྤཏྟིཡཱ. པརིཔཀྐཾ ཀམྨཾ ཕུསྶ ཕུསྶ པཏྭཱ པཏྭཱ ཀཱལེ པརིཔཀྐབྷཱཝཱཔཱདནེན བྱནྟཱི ཀརོཏི ནཱམ. སུཏྟགུལེ༹ཏི སུཏྟཝཊྚིཡཾ. ནིབྦེཋིཡམཱནམེཝ པལེཏཱིཏི ཨུཔམཱཡ སཏྟཱནཾ སཾསཱརོ ཨནུཀྐམེན ཁཱིཡཏེཝ, ན ཏསྶ ཝཌྜྷཱིཏི དསྶེཏི པརིཙྪིནྣརཱུཔཏྟཱ. ནིབྦེཋིཡམཱནམེཝ སུཏྟགུལ༹ཾ གཙྪཏཱིཏི ཝུཙྩཏི. ཏཉྩ ཁོ སུཏྟཔམཱཎེན, སུཏྟེ པན ཨསཏི ཀུཏོ གཙྪཏི སུཏྟགུལ༹ཾ. ཏེནཱཧ – ‘‘སུཏྟེ ཁཱིཎེ ན གཙྪཏཱི’’ཏི. ཏཏྠེཝ ཏིཊྛཏི སུཏྟཔརིཡནྟནྟི ཨདྷིཔྤཱཡོ. ཀཱལཝསེནཱཏི ཨཏྟནི ཝེཋེཏྭཱ ཋིཏཾ སུཁདུཀྑཾ ཡཐཱཝུཏྟསྶ ཀཱལསྶ ཝསེན ནིབྦེཋིཡམཱནོ བཱལོ ཙ པཎྜིཏོ ཙ པལེཏི གཙྪཏི, ནཱཏིཀྐམཏི སཾསཱརཾ.

མཧཱདིཊྛིསུཏྟཱདིཝཎྞནཱ ནིཊྛིཏཱ.

༡༡-༡༨. ཨནྟཝཱསུཏྟཱདིཝཎྞནཱ

༢༡༦-༢༢༣. ཨེཀཏོ ¶ ཝཌྜྷིཏནིམིཏྟནྟི ཨེཀཔསྶེན ཝཌྜྷིཏཾ ཀསིཎནིམིཏྟཾ. གཱཧེནཱཏི ལཱབྷཱི ཛྷཱནཙཀྑུནཱ པསྶིཏྭཱ གཧཎེན. ཏཀྐེནཱཏི ན ལཱབྷཱི ཏཀྐམཏྟེན. ཨུཔྤནྣདིཊྛཱིཏི ‘‘ལོཀོ’’ཏི ཨུཔྤནྣདིཊྛི. སབྦཏོ ཝཌྜྷིཏནྟི སམནྟཏོ ཨཔྤམཱཎཀསིཎནིམིཏྟཾ. ཨེཀམེཝཱཏི ‘‘ཨེཀམེཝ ཝཏྠཱུ’’ཏི ཨུཔྤནྣདིཊྛི. ཨཊྛཱརས ཝེཡྻཱཀརཎཱནཱིཏི ཝེཡྻཱཀརཎལཀྑཎཔྤཏྟཱནི ཨཊྛཱརས སུཏྟཱནི. ཨེཀཾ གམནནྟི ཨེཀཾ ཝེཡྻཱཀརཎགམནཾ.

ཨནྟཝཱསུཏྟཱདིཝཎྞནཱ ནིཊྛིཏཱ.

༢. དུཏིཡགམནཱདིཝགྒཝཎྞནཱ

༢༢༤-༣༠༡. དུཀྑཝསེན ¶ ཝུཏྟནྟི ‘‘ཨིཏི ཁོ, བྷིཀྑཝེ, དུཀྑེ སཏི དུཀྑཾ ཨུཔཱདཱཡཱ’’ཏིཨཱདིདུཀྑཝསེན ཝུཏྟཾ. ཏཱདིསམེཝ དུཏིཡཾ ཝེཡྻཱཀརཎགམནཾ. ཏེནཱཧ ‘‘ཏཏྲཱཔི ཨཊྛཱརསེཝ ཝེཡྻཱཀརཎཱནཱི’’ཏི. ཏེཧཱིཏི ‘‘རཱུཔཱི ཨཏྟཱ ཧོཏཱི’’ཏིཨཱདིནཡཔཝཏྟེཧི ཝེཡྻཱཀརཎེཧི སདྡྷིཾ. ཏནྟི དུཏིཡཾ གམནཾ.

ཨཱརམྨཎམེཝཱཏི ཀསིཎསངྑཱཏཾ ཨཱརམྨཎམེཝ. ཏཀྐིསདྡེན སུདྡྷཏཀྐིཀཱནཾ གཧཎཾ དཊྛབྦཾ.

ཨནིཙྩདུཀྑཝསེནཱཏི ‘‘ཡདནིཙྩཾ, ཏཾ དུཀྑཾ, ཏསྨིཾ སཏི ཏདུཔཱདཱཡ ཨེཝཾ དིཊྛི ཨུཔྤཛྫཏཱི’’ཏི ཝུཏྟཨནིཙྩདུཀྑཝསེནཱཏི. ཏེཧིཡེཝཱཏི དུཏིཡེ པེཡྻཱལེ ཝུཏྟཔྤཀཱརེཧིཡེཝ. ཏིཔརིཝཊྚཝསེནཱཏི ཏེཧིཡེཝ ཚབྦཱིསཏིཡཱ སུཏྟེཧི ཙཏུཏྠཔེཡྻཱལེ ཏིཔརིཝཊྚཝསེན ཝུཏྟོཏི ཡོཛནཱ.

དུཏིཡགམནཱདིཝགྒཝཎྞནཱ ནིཊྛིཏཱ.

སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ

དིཊྛིསཾཡུཏྟཝཎྞནཱཡ ལཱིནཏྠཔྤཀཱསནཱ སམཏྟཱ.

༤. ཨོཀྐནྟསཾཡུཏྟཾ

༡-༡༠. ཙཀྑུསུཏྟཱདིཝཎྞནཱ

༣༠༢-༣༡༡. སདྡྷཱདྷིམོཀྑནྟི ¶ ¶ སདྡཧནཝསེན པཝཏྟཾ ཨདྷིམོཀྑཾ, ན སནྣིཊྛཱནམཏྟཝསེན པཝཏྟཾ ཨདྷིམོཀྑཾ. དསྶནམྤི སམྨཏྟཾ, ཏཾསིཛ྄ཛྷཱནཝསེན པཝཏྟནིཡཱམོ སམྨཏྟནིཡཱམོ, ཨརིཡམགྒོ. ཨནནྟརཱཡཏཾ དཱིཔེཏི ཀཔྤཝིནཱསཔཊིབྷཱགེན པཝཏྟཏྟཱ. ཏཐཱ ཙཱཧ ‘‘ཏེནེཝཱཧཱ’’ཏིཨཱདི. ཀཔྤསཱིསེན བྷཱཛནལོཀཾ ཝདཏི. སོ ཧི ཨུཌྜཡ྄ཧཏི, ན ཀཔྤོ, ཨུཌྜཡ྄ཧནཝེལཱཏི ཛྷཱཡནཝེལཱ. ཋིཏོ ཀཔྤོ ཋིཏཀཔྤོ, སོ ཨསྶ ཨཏྠཱིཏི ཋིཏཀཔྤཱི, ཀཔྤཾ ཋཔེཏུཾ སམཏྠོཏི ཨཏྠོ. ཨོལོཀནནྟི སཙྩཱབྷིསམཡསངྑཱཏཾ དསྶནཾ. ཁམནྟི སཧནྟི, ཉཱཡནྟཱིཏི ཨཏྠོ.

ཙཀྑུསུཏྟཱདིཝཎྞནཱ ནིཊྛིཏཱ.

ཨོཀྐནྟསཾཡུཏྟཝཎྞནཱ ནིཊྛིཏཱ.

༥. ཨུཔྤཱདསཾཡུཏྟཝཎྞནཱ

༣༡༢-༣༢༡. སབྦཾ ¶ པཱཀཊམེཝ ཨཔུབྦསྶ ཨབྷཱཝཏོ.

ཨུཔྤཱདསཾཡུཏྟཝཎྞནཱ ནིཊྛིཏཱ.

༦. ཀིལེསསཾཡུཏྟཝཎྞནཱ

༣༢༢-༣༣༡. ཨེསོཏི ¶ ཙཀྑུསྨིཾ ཚནྡརཱགོ. ཨུཔེཙྩ ཀིལེསེཏཱིཏི ཨུཔཀྐིལེསོ. ཙིཏྟསྶཱཏི སཱམཉྙཝཙནཾ ཨནིཙྪནྟོ ཙོདཀོ ‘‘ཀཏརཙིཏྟསྶཱ’’ཏི ཨཱཧ. ཨིཏརོ ཀཱམཾ ཨུཔཏཱཔནམལཱིནབྷཱཝཀརཎཝསེན ཨུཔཀྐིལེསོ ལོཀུཏྟརསྶ ནཏྠི, ཝིབཱདྷནཊྛོ པན ཨཏྠེཝ ཨུཔྤཏྟིནིཝཱརཎཏོཏི ཨདྷིཔྤཱཡེནཱཧ ‘‘ཙཏུབྷཱུམཀཙིཏྟསྶཱ’’ཏི. ཙོདཀོ ‘‘ཏེབྷཱུམཀཱ’’ཏིཨཱདིནཱ ཨཏྟནོ ཨདྷིཔྤཱཡཾ ཝིཝརཏི, ཨིཏརོ ‘‘ཨུཔྤཏྟིནིཝཱརཎཏོ’’ཏིཨཱདིནཱ. ཨརིཡཕལཔཊིཔྤསྶདྡྷིཔཧཱནཝསེན པཝཏྟིཡཱ ¶ སབྦསཾཀིལེསཏོ ནིཀྑནྟཏྟཱ ནེཀྑམྨཾ, མགྒནིབྦཱནཱནཾ པན ནེཀྑམྨབྷཱཝོ ཨུཀྐཾསཏོ གཧིཏོ ཨེཝཱཏི ཨཱཧ ‘‘ནེཀྑམྨནིནྣནྟི ནཝལོཀུཏྟརདྷམྨནིནྣ’’ནྟི. ཨབྷིཛཱནིཏྭཱཏི ཨབྷིམུཁབྷཱཝེན ཛཱནིཏྭཱ. སཙྪིཀཱཏབྦེསཱུཏི པཙྩཀྑཀཱཏབྦེསུ. ཚལ༹བྷིཉྙཱདྷམྨེསཱུཏི ཨརིཡམགྒསམྤཡུཏྟདྷམྨེསུ.

ཀིལེསསཾཡུཏྟཝཎྞནཱ ནིཊྛིཏཱ.

༧. སཱརིཔུཏྟསཾཡུཏྟཾ

༡-༩. ཝིཝེཀཛསུཏྟཱདིཝཎྞནཱ

༣༣༢-༣༤༠. ན ¶ ཨེཝཾ ཧོཏཱིཏི ཨེཏྠ ‘‘ཨཧཾ སམཱཔཛྫཱམཱི’’ཏི ཝཱ, ‘‘ཨཧཾ སམཱཔནྣོ’’ཏི ཝཱ མཱ ཧོཏུ ཏདཱ ཏཱདིསཱབྷོགཱབྷཱཝཏོ. ‘‘ཨཧཾ ཝུཊྛིཏོ’’ཏི པན ཀསྨཱ ན ཧོཏཱིཏི? སབྦཐཱཔི ན ཧོཏྭེཝ ཨཧངྐཱརསྶ སབྦསོ པཧཱིནཏྟཱ.

ཝིཝེཀཛསུཏྟཱདིཝཎྞནཱ ནིཊྛིཏཱ.

༡༠. སཱུཙིམུཁཱིསུཏྟཝཎྞནཱ

༣༤༡. ཏསྨིཾ ཝཙནེ པཊིཀྑིཏྟེཏི – ‘‘ཨདྷོམུཁོ བྷུཉྫསཱི’’ཏི པརིབྦཱཛིཀཱཡ ཝུཏྟཝཙནེ – ‘‘ན ཁྭཱཧཾ བྷགིནཱི’’ཏི པཊིཀྑིཏྟེ. ཝཱདནྟི དོསཾ. ཨུབྦྷམུཁོཏི ཨུཔརིམུཁོ. པུརཏྠིམཱདིཀཱ ཙཏསྶོ དིསཱ. དཀྑིཎཔུརཏྠིམཱདིཀཱ ཙཏསྶོ ཝིདིསཱ.

ཨཱརཱམཨཱརཱམཝཏྠུཨཱདཱིསུ བྷཱུམིཔརིཀམྨབཱིཛཱབྷིསངྑརཎཱདིཔཊིསཾཡུཏྟཱ ཝིཛྫཱ ཝཏྠུཝིཛྫཱ, ཏསྶཱ པན མིཙྪཱཛཱིཝབྷཱཝཾ དསྶེཏུཾ ‘‘ཏེས’’ནྟིཨཱདི ཝུཏྟཾ. ཏེསཾ ཏེསཾ ཨཏྟནོ པཙྩཡདཱཡཀཱནཾ. ཏཏྠ ཏཏྠ གམནནྟི ཏེསཾ སཱསནཧརཎཝསེན ཏཾ ཏཾ གཱམནྟརདེསནྟརཾ. ཨེཝམཱརོཙེསཱིཏི ཨཏྟུཀྐཾསནཔརཝམྦྷནརཧིཏཾ ཀཎྞསུཁཾ པེམནཱིཡཾ ཧདཡངྒམཾ ཐེརསྶ དྷམྨཀཐཾ ¶ སུཏྭཱ པསནྣམཱནསཱ ཨེཝཾ ‘‘དྷམྨིཀཾ སམཎཱ སཀྱཔུཏྟིཡཱ’’ཏིཨཱདིནཱ སཱསནསྶ གུཎསཾཀིཏྟནཝཱཙཾ ཀུལཱནཾ ཨཱརོཙེསི.

སཱུཙིམུཁཱིསུཏྟཝཎྞནཱ ནིཊྛིཏཱ.

སཱརིཔུཏྟསཾཡུཏྟཝཎྞནཱ ནིཊྛིཏཱ.

༨. ནཱགསཾཡུཏྟཾ

༡. སུདྡྷིཀསུཏྟཝཎྞནཱ

༣༤༢. ཨཎྜཛཱཏི ¶ ཨཎྜེ ཛཱཏཱ. ཝཏྠིཀོསེཏི ཝཏྠིཀོསསཉྙིཏེ ཛརཱཡུཔུཊེ ཛཱཏཱ. སཾསེདེཏི སཾསིནྣེ ཀིལིནྣཊྛཱནེ ཨུཔྤནྣཱ. ཨུཔཔཏིཏྭཱ ཝིཡཱཏི ཀུཏོཙིཔི ཨཝཔཏིཏྭཱ ཝིཡ ནིབྦཏྟཱ. པུགྒལཱནནྟི ཏཐཱ ཝིནེཏབྦཔུགྒལཱནཾ.

སུདྡྷིཀསུཏྟཝཎྞནཱ ནིཊྛིཏཱ.

༢-༥༠. པཎཱིཏཏརསུཏྟཱདིཝཎྞནཱ

༣༤༣-༣༩༡. ཝིསྶཊྛཀཱཡཱཏི ‘‘ཡེ ཙམྨེན ཝཱ རུདྷིརེན ཝཱ ཨཊྛིནཱ ཝཱ ཨཏྠིཀཱ, ཏེ སབྦཾ གཎྷནྟཱུ’’ཏི ཏཏྠ ནིརཔེཀྑཙིཏྟཏཱཡ ཨདྷིཊྛིཏསཱིལཏཱཡ པརིཙྩཏྟསརཱིརཱ. དུཝིདྷཀཱརིནོཏི ‘‘ཀཱལེན ཀུསལཾ, ཀཱལེན ཨཀུསལ’’ནྟི ཨེཝཾ ཀུསལཱཀུསལཀཱརིནོ. སཧ བྱཡཏི པཝཏྟཏཱིཏི སཧབྱོ, སཧཙཱརོ. ཏསྶ བྷཱཝོ སཧབྱཏཱ, ཏཾ སཧབྱཏཾ. ཨདནཱིཡཏོ ཨནྣཾ. ཁཱདནཱིཡཏོ ཁཛྫཾ. པཱཏབྦཏོ པཱནཾ. ནིཝསནཱིཡཏོ ཝཏྠཾ. ནིཝསིཏབྦཾ ནིཝཱསནཾ. པརིཝརིཏབྦཾ པཱཝུརཎཾ. ཡཱནྟི ཏེནཱཏི ཡཱནཾ, ཨུཔཱཧནཱདིཡཱནཱནི. ཨཱདིསདྡེན ཝཡ྄ཧསིཝིཀཱདཱིནཾ སངྒཧོ. ཚཏྟམྤི པརིསྶཡཱཏཔདུཀྑཔརིརཀྑཎེན མགྒགམནསཱདྷནནྟི ཀཏྭཱ ‘‘ཚཏྟུཔཱཧན’’ནྟིཨཱདི ཝུཏྟཾ. ཏེན ཝུཏྟཾ ‘‘ཡཾ ཀིཉྩི གམནཔཙྩཡ’’ནྟི. པཏྠནཾ ཀཏྭཱ…པེ… ཏཏྠ ནིབྦཏྟནྟི ཙམྤེཡྻནཱགརཱཛཱ ཝིཡཱཏི དཊྛབྦཾ.

པཎཱིཏཏརསུཏྟཱདིཝཎྞནཱ ནིཊྛིཏཱ.

ནཱགསཾཡུཏྟཝཎྞནཱ ནིཊྛིཏཱ.

༩. སུཔཎྞསཾཡུཏྟཝཎྞནཱ

༣༩༢-༤༣༧. པཏྟཱནནྟི ¶ ¶ ཨུབྷོསུ པཀྑེསུ པཏྟཱནཾ. ཝཎྞཝནྟཏཱཡཱཏི ཨཏིསཡེན ཝིཙིཏྟཝཎྞཏཱཡ. ཨཏིསཡཏྠོ ཧི ཨཡཾ ཝནྟ-སདྡོ. པུརིམནཡེནཱཏི ནཱགསཾཡུཏྟེ པཋམསུཏྟེ ཝུཏྟནཡེན. ཨུདྡྷརནྟཱིཏི སམུདྡཏོ ཨུདྡྷརནྟི, པཐཝནྟརཔབྦཏནྟརཏོ པན ཏེསཾ ཨུདྡྷརཎཾ དུཀྐརམེཝ. པཎཱིཏཏརེཏི བལེན པཎཱིཏཏརེ, བལཝནྟེཏི ཨཏྠོ. ཨནུདྡྷརཎཱིཡནཱགཱཏི ཨཱནུབྷཱཝམཧནྟཏཱཡ ཙ ཝསནཊྛཱནཝིདུགྒཏཱཡ ཙ ཨུདྡྷརིཏུཾ ཨསཀྐུཎེཡྻཱ ནཱགཱ. ཏེ ‘‘སཏྟཝིདྷཱ’’ཏི ཝཏྭཱ སརཱུཔཏོ ཝསནཊྛཱནཏོ ཙ དསྶེནྟོ ‘‘ཀམྦལསྶཏརཱ’’ཏིཨཱདིམཱཧ. ཏཏྠ ཀམྦལསྶཏརཱ དྷཏརཊྛཱཏི ཨིམེ ཛཱཏིཝསེན ཝུཏྟཱ. སཏྟསཱིདནྟརཝཱསིནོཏི སཏྟཝིདྷསཱིདསམུདྡཝཱསིནོ. པཐཝིཊྛཀཱཏི པཐཝནྟརཝཱསིནོ, ཏཐཱ པབྦཏཊྛཀཱ. ཏེ ཙ ཝིམཱནཝཱསིནོ. ཏེ ནཱགེ ཀོཙི སུཔཎྞོ ཨུདྡྷརིཏུཾ ན སཀྐོཏཱིཏི སམྦནྡྷོ. སེསནྟི ‘‘ཀཱཡེན དྭཡཀཱརིནོ’’ཏིཨཱདཱིསུ ཡཾ ཝཏྟབྦཾ, ཏཾ སབྦཾ ནཱགསཾཡུཏྟེ ཝུཏྟནཡམེཝ, ཏཏྠ ཙ ཝུཏྟནཡེནེཝ ཨཏྠོ ཝེདིཏབྦོཏི ཨདྷིཔྤཱཡོ.

སུཔཎྞསཾཡུཏྟཝཎྞནཱ ནིཊྛིཏཱ.

༡༠. གནྡྷབྦཀཱཡསཾཡུཏྟཝཎྞནཱ

༤༣༨-༥༤༩. མཱུལགནྡྷཱདིབྷེདཾ ¶ གནྡྷཾ ཨཝནྟི ཨཔཡུཉྫནྟཱིཏི གནྡྷབྦཱ, ཏེསཾ ཀཱཡོ སམཱུཧོ གནྡྷབྦཀཱཡོ, གནྡྷབྦདེཝནིཀཱཡོ. ཙཱཏུམཧཱརཱཛིཀེསུ ཨེཀིཡཱཝ ཏེ དཊྛབྦཱ, ཏཔྤརིཡཱཔནྣཏཱཡ ཏཏྠ ཝཱ ནིཡུཏྟཱཏི གནྡྷབྦཀཱཡིཀཱ. ཏེསཾ ཏེསཾ རུཀྑགཙྪལཏཱནཾ མཱུལཾ པཊིཙྩ པཝཏྟོ གནྡྷོ མཱུལགནྡྷོ, ཏསྨིཾ མཱུལགནྡྷེ. ཨདྷིཝཏྠཱཏི མཱུལགནྡྷཾ ཨདྷིཊྛཱཡ, ཨབྷིབྷུཡྻ ཝཱ ཝསནྟཱ. ཨེས ནཡོ སེསེསུཔི. ཏཾ ནིསྶཱཡཱཏི ཏཾ མཱུལགནྡྷཾ རུཀྑཾ པཙྩཡཾ ཀཏྭཱ ནིབྦཏྟཱ. ན ཀེཝལཾ ཏཏྠ གནྡྷོ ཨེཝ, མཱུལམེཝ ཝཱ ཏེསཾ པཙྩཡོཏི དསྶེནྟོ ‘‘སོ ཧཱི’’ཏིཨཱདིམཱཧ. ཨུཔཀཔྤཏཱིཏི ནིཝཱསཊྛཱནབྷཱཝེན ཝིནིཡུཉྫཏི. གནྡྷགནྡྷེཏི གནྡྷཱནཾ གནྡྷསམུདཱཡེ. མཱུལཱདིགནྡྷཱནཾ གནྡྷེཏི མཱུལཱདིགཏཨཝཡཝགནྡྷཱནཾ གནྡྷེ, ཏིམཱུལཱདིགཏསམུདཱཡབྷཱུཏེཏི ཨཏྠོ. པུབྦེ ཧི ‘‘མཱུལགནྡྷེ’’ཏིཨཱདིནཱ རུཀྑཱནཾ ཨཝཡཝགནྡྷོ ¶ གཧིཏོ, ཨིདྷ པན སབྦསོ གཧིཏཏྟཱ སམུདཱཡགནྡྷོ ཝེདིཏབྦོ. ཏེནཱཧ ‘‘ཡསྶ ཧི རུཀྑསྶཱ’’ཏིཨཱདི. སོཏི སོ སབྦོ མཱུལཱདིགཏོ གནྡྷོ གནྡྷསམུདཱཡོ ཨིདྷ གནྡྷགནྡྷོ ནཱམ. ཏསྶ གནྡྷསྶ གནྡྷེཏི ཏསྶ སམུདཱཡགནྡྷསྶ ཏཐཱབྷཱུཏེ གནྡྷེ. སརིཀྑཾ སདིསཾ པཊིདཱནཾ ཨེཏིསྶཱཏི སརིཀྑདཱནཾ, པཏྠནཱ. ཡཐཱདྷིཔྤེཏཕལཱནི སརིཀྑདཱནཏྟཱཝ ཨདྷིཔྤེཏཕལཾ དེནྟུ, ཨསརིཀྑདཱནཾ ཀཐནྟི? ཏམྤི དེཏིཡེཝ པུཉྙསྶ སབྦཀཱམདདཏྟཱཏི ཨཱཧ ‘‘ཨསརིཀྑདཱནམྤཱི’’ཏིཨཱདི.

གནྡྷབྦཀཱཡསཾཡུཏྟཝཎྞནཱ ནིཊྛིཏཱ.

༡༡. ཝལཱཧཀསཾཡུཏྟཝཎྞནཱ

༥༥༠-༦༠༦. ལོཀཾ ¶ ཝཱལེནྟཱ སཾཝརནྟཱ ཚཱདེནྟཱ ཨཧནྟི པརིཡེསནྟཱིཏི ཝལཱཧཱ, དེཝཔུཏྟཱ. ཏེསཾ སམཱུཧོ ཝལཱཧཀདེཝཀཱཡོཏི ཨཱཧ ‘‘ཝལཱཧཀཀཱཡིཀཱ’’ཏིཨཱདི. སཱིཏཀརཎཝལཱཧཀཱཏི སཱིཏཧརཎཝལཱཧཀཱ. སེསཔདེསཱུཏི ཨུཎྷཝལཱཧཀཱདིཔདེསུ. ཨེསེཝ ནཡོཏི ‘‘ཨུཎྷཀརཎཝལཱཧཀཱ’’ཏིཨཱདིནཱ ཨཏྠོ ཝེདིཏབྦོ. ཙིཏྟཊྛཔནནྟི ‘‘སཱིཏཾ ཧོཏཱུ’’ཏི ཨེཝཾ ཙིཏྟསྶ ཨུཔྤཱདནཾ. ཝསྶཱནེཏི ཝསྶཀཱལེ. ཨུཏུསམུཊྛཱནམེཝཱཏི པཱཀཏིཀསཱིཏམེཝཱཏི ཨཏྠོ. ཨུཎྷེཔཱིཏི ཨུཎྷཀཱལེ. ཨབྦྷམཎྜཔོཏི མཎྜཔསདིསཨབྦྷཔཊལཝིཏཱནམཱཧ. ཨབྦྷཾ ཨུཔྤཛྫཏཱིཏི ཏཧཾ ཏཧཾ པཊལཾ ཨུཊྛཧཏི. ཨབྦྷེཡེཝཱཏི ཨབྦྷཀཱལེ ཨེཝ, ཝསྶཱནེཏི ཨཏྠོ. ཨཏིཨབྦྷནྟི སཏཔཊལསཧསྶཔཊལཾ ཧུཏྭཱ ཨབྦྷུཊྛཱནཾ. ཙིཏྟཝེསཱཁམཱསེསཱུཏི ཝསནྟཀཱལཾ སནྡྷཱཡཱཧ. ཏདཱ ཧི ཝིདྡྷོ ཝིགཏཝལཱཧཀོ དེཝོ བྷཝིཏུཾ ཡུཏྟོ. ཨུཏྟརདཀྑིཎཱདཱིཏི ཨཱདི-སདྡེན པཙྪིམཝཱཏཱདིཾ སངྒཎྷཱཏི. པཀཏིཝཱཏོཏི པཀཏིཡཱ སབྷཱཝེན ཝཱཡནཀཝཱཏོ. ཏཾ ཨུཏུསམུཊྛཱནམེཝཱཏི ཨཱཧཱརཱུཔཛཱིཝཱིནཾ སཏྟཱནཾ སཱདྷཱརཎཀམྨཱུཔནིསྶཡཨུཏུསམུཊྛཱནམེཝ. ཨེས ནཡོ ཨུཏུསམུཊྛཱནསཱིཏུཎྷཝཱཏེསུཔི. ཏམྤི ཧི ཨཱཧཱརཱུཔཛཱིཝཱིནཾ སཏྟཱནཾ སཱདྷཱརཎཀམྨཱུཔནིསྶཡམེཝཱཏི.

གཱིཏནྟི མེགྷགཱིཏཾ. སཙྩཀིརིཡཱཡཱཏི ཏཱདིསཱནཾ པུརིསཝིསེསཱནཾ སཙྩཱདྷིཊྛཱནེན. ཨིདྡྷིབལེནཱཏི ཨིདྡྷིམནྟཱནཾ ཨིདྡྷིཨཱནུབྷཱཝེན. ཝིནཱསམེགྷེནཱཏི ¶ ཀཔྤཝིནཱསཀམེགྷེན. ཨཉྙེནཔི ཀཎྷཔཱཔིཀསཏྟཱནཾ པཱཔཀམྨཔཙྩཡཱ ཨུཔྤནྣཝིནཱསམེགྷེན ཝུཊྛེན སོ སོ དེསོ ཝིནསྶཏེཝ.

ཝལཱཧཀསཾཡུཏྟཝཎྞནཱ ནིཊྛིཏཱ.

༡༢. ཝཙྪགོཏྟསཾཡུཏྟཝཎྞནཱ

༦༠༧-༦༦༡. ཨཉྙཱཎཱཏི ¶ ཨཉྙཱཎཧེཏུ, སཙྩཔཊིཙྪཱདཀསམྨོཧཧེཏཱུཏི ཨཏྠོ. ཨཊྛཀཐཱཡཾ པན ཨིམམེཝ ཨཏྠཾ ཧེཏུཨཏྠེན ཀརཎཝཙནེན དསྶེཏུཾ ‘‘ཨཉྙཱཎེནཱ’’ཏི ཝུཏྟཾ. སབྦཱནཱིཏི ‘‘ཨཉྙཱཎཱ ཨདསྶནཱ ཨནབྷིསམཡཱ’’ཏིཨཱདཱིནི པདཱནི ཨེཀཱདསསུ སུཏྟེསུ ཨཱགཏཱནི, པཉྩཔཉྙཱས ཝེཡྻཱཀརཎཱནི ཝུཏྟཱནི སུཏྟེསུ པཉྩནྣཾ ཁནྡྷཱནཾ ཝསེན ཝེཡྻཱཀརཎསྶ ཨཱགཏཏྟཱ.

ཝཙྪགོཏྟསཾཡུཏྟཝཎྞནཱ ནིཊྛིཏཱ.

༡༣. ཛྷཱནསཾཡུཏྟཾ

༡. སམཱདྷིམཱུལཀསམཱཔཏྟིསུཏྟཝཎྞནཱ

༦༦༢. སམཱདྷིཀུསལོཏི ¶ སམཱདྷིསྨིཾ ཀུསལོ. ཏཡིདཾ སམཱདྷིཀོསལླཏྟཾ སཧ ཛྷཱནངྒཡོགེན ཙཏུབྦིདྷོ ཛྷཱནསམཱདྷི, ཏསྨཱ ཏཾ ཏཾ ཝིབྷཱགཾ ཛཱནནྟསྶ སིདྡྷཾ ཧོཏཱིཏི ཨཱཧ – ‘‘པཋམཾ ཛྷཱན’’ནྟིཨཱདི. ཏཏྠ ཝིཏཀྐཝིཙཱརཔཱིཏིསུཁེཀགྒཏཱཝསེན པཋམཾ པཉྩངྒིཀཾ, པཱིཏིསུཁེཀགྒཏཱཝསེན དུཏིཡཾ ཏིཝངྒིཀཾ, སུཁེཀགྒཏཱཝསེན ཏཏིཡཾ དུཝངྒིཀཾ, ཨུཔེཀྑེཀགྒཏཱཝསེན ཙཏུཏྠཾ དུཝངྒིཀམེཝཱཏི ཨེཝཾ ཏསྨིཾ ཏསྨིཾ ཛྷཱནེ ཏཾཏཾཨངྒཱནཾ ཝཝཏྠཱནེ ཀུསལོ. སམཱཔཏྟིཀུསལོཏི སམཱཔཛྫནེ ཀུསལོ. ཧཱསེཏྭཱཏི ཏོསེཏྭཱ. ཀལླཾ ཀཏྭཱཏི སམཱདྷཱནསྶ པཊིཔཀྑདྷམྨཱནཾ དཱུརཱིཀརཎེན སཧཀཱརཱིཀཱརཎཉྩ སམཱདྷཱནེན སམཱཔཛྫནེ ཙིཏྟཾ སམཏྠཾ ཀཏྭཱ. སེསཔདཱནཱིཏི སེསཱ ཏཡོ ཀོཊྛཱསཱ. ཏཏིཡཱདཱིསུ ནཡེསུ ཨཀུསལོཔི ཛྷཱནཏྠཱཡ པཊིཔནྣཏྟཱ ‘‘ཛྷཱཡཱིཏེཝཱ’’ཏི ཝུཏྟོ.

སམཱདྷིམཱུལཀསམཱཔཏྟིསུཏྟཝཎྞནཱ ནིཊྛིཏཱ.

༢-༥༥. སམཱདྷིམཱུལཀཋིཏིསུཏྟཱདིཝཎྞནཱ

༦༦༣-༧༡༦. དུཏིཡཱདིསུཏྟེསུ ¶ ཋིཏིཀུསལོཏི ཨེཏྠ ཨནྟོགདྷཧེཏུཨཏྠོ ཋིཏི-སདྡོ, ཏསྨིཉྩ པན ཀུསལོཏི ཨཏྠོཏི ཨཱཧ – ‘‘ཛྷཱནཾ ཋཔེཏུཾ ཨཀུསལོ’’ཏི. སཏྟཊྛཨཙྪརཱམཏྟནྟི སཏྟཊྛཨཙྪརཱམཏྟཾ ཁཎཾ ཛྷཱནཾ ཋཔེཏུཾ ན སཀྐོཏི ཨདྷིཊྛཱནཝསཱིབྷཱཝསྶ ཨནིཔྥཱདིཏཏྟཱ. ཡཐཱཔརིཙྪེདེན ཀཱལེན ཝུཊྛཱཏུཾ ན སཀྐོཏི ཝུཊྛཱནཝསཱིབྷཱཝསྶ ཨནིཔྥཱདིཏཏྟཱ. ཀལླཾ ཛཱཏཾ ཨསྶཱཏི ཀལླིཏཾ, ཏསྨིཾ ཀལླིཏེ ཀལླིཏབྷཱཝེན ཀསིཎཱརམྨཎེསུ ‘‘ཨིདཾ ནཱམ ཨསུཀསྶཱ’’ཏི ཝིསཡཝསེན སམཱཔཛྫིཏུཾ ཨསཀྐོནྟོ ན སམཱདྷིསྨིཾ ཨཱརམྨཎཀུསལོ. ན སམཱདྷིསྨིཾ གོཙརཀུསལོཏི སམཱདྷིསྨིཾ ནིཔྥཱདིཏབྦེ ཏསྶ གོཙརེ ཀམྨཊྛཱནསཉྙིཏེ པཝཏྟིཊྛཱནེ བྷིཀྑཱཙཱརགོཙརེ ཙ སཏིསམྤཛཉྙཝིརཧིཏོ ཨཀུསལོ. ཀེཙི པན ‘‘ཀམྨཊྛཱནགོཙརོ པཋམཛ྄ཛྷཱནཱདིཀཾ, ‘ཨེཝཾ སམཱཔཛྫིཏབྦཾ, ཨེཝཾ བཧུལཱིཀཱཏབྦ’ནྟི ཨཛཱནནྟོ ཏཏྠ ཨཀུསལོ ནཱམཱ’’ཏི ཝདནྟི. ཀམྨཊྛཱནཾ ཨབྷིནཱིཧརིཏུནྟི ཀམྨཊྛཱནཾ ཝིསེསབྷཱགིཡཏཱཡ ¶ ཨབྷིནཱིཧརིཏུཾ ཨཀུསལོ. སཀྐཙྩཀཱརཱིཏི ཙིཏྟཱིཀཱརཱི. སཱཏཙྩཀཱརཱིཏི ནིཡཏཀཱརཱི. སམཱདྷིསྶ ཨུཔཀཱརཀདྷམྨཱཏི ཨཔྤནཱཀོསལླཱ. སམཱཔཏྟིཨཱདཱིཧཱིཏི ཨཱདི-སདྡེན སཀྐཙྩཀཱརིཔདཱདཱིནཾཡེཝ སངྒཧོ དཊྛབྦོ ཙཏུཀྐཱནཾ ཝུཏྟཏྟཱ. ཏེནཱཧ ‘‘ཡོཛེཏྭཱ ཙཏུཀྐཱ ཝུཏྟཱ’’ཏི. ལོཀིཡཛ྄ཛྷཱནཝསེནེཝ ཀཐིཏཾ ‘‘སམཱདྷིཀུསལོ’’ཏིཨཱདིནཱ ནཡེན དེསནཱཡ པཝཏྟཏྟཱ. ན ཧི ལོཀུཏྟརདྷམྨེསུ ཨཀོསལླཾ ནཱམ ལབྦྷཏི. ཡདི ཨཀོསལླཾ, ན ཀུསལསདྡེན ཝིསེསིཏབྦཏཱ སིཡཱཏི.

སམཱདྷིམཱུལཀཋིཏིསུཏྟཱདིཝཎྞནཱ ནིཊྛིཏཱ.

ཛྷཱནསཾཡུཏྟཝཎྞནཱ ནིཊྛིཏཱ.

ནིཊྛིཏཱ ཙ སཱརཏྠཔྤཀཱསིནིཡཱ

སཾཡུཏྟནིཀཱཡ-ཨཊྛཀཐཱཡ ཁནྡྷཝགྒཝཎྞནཱ.