📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

སཾཡུཏྟནིཀཱཡེ

སལཱ༹ཡཏནཝགྒཊཱིཀཱ

༡. སལཱ༹ཡཏནསཾཡུཏྟཾ

༡. ཨནིཙྩཝགྒོ

༡. ཨཛ྄ཛྷཏྟཱནིཙྩསུཏྟཝཎྞནཱ

༡. ཙཀྑཏཱིཏི ¶ ¶ ཙཀྑུ, ཉཱཎཾ, ཡཐཱསབྷཱཝཏོ ཨཱརམྨཎསྶ ཛཱནནེན སམཝིསམཾ ཨཱཙིཀྑནྟཾ ཝིཡ པཝཏྟཏཱིཏི ཨཏྠོ. ཏཐཱ མཾསཙཀྑུ. ཏམྤི ཧི རཱུཔདསྶནེ ཙཀྑཏཱིཏི ཙཀྑུ. བུདྡྷཱནཾཡེཝ ཙཀྑཱུཏི བུདྡྷཙཀྑུ, ཨསཱདྷཱརཎཏོ ཧི སཏྟསནྟཱནེསུ སསྶཏུཙྪེདདིཊྛི ཨནུལོམིཀཉཱཎཡཐཱབྷཱུཏཉཱཎཱནཉྩེཝ ཀཱམརཱགཱནུསཡཱདཱིནཉྩ ཡཱཐཱཝཏོ ཝིབྷཱཝིཏཉཱཎཾ ཨཱསཡཱནུསཡཉཱཎཾ ཨིནྡྲིཡཔརོཔརིཡཏྟཉཱཎཉྩ. ཧེཊྛིམཱ ཏཡོ མགྒཱ ཙཏུསཙྩདྷམྨེསུ ཝུཏྟཱཀཱརེན པཝཏྟིཡཱ དྷམྨེ ཙཀྑཱུཏི དྷམྨཙཀྑུ, ཏཐཱ ཏེསཾ ཕལཱནི ཏཾཏཾཔཊིཔཀྑེསུ པཊིཔྤསྶདྡྷིཔཧཱནཝསེན ¶ པཝཏྟནཏོ. སམནྟཏོ སབྦདྷམྨེསུ ཙཀྑུཀིཙྩསཱདྷནཏོ སམནྟཙཀྑུ, སབྦཉྙུཏཉྙཱཎཾ. དིབྦཝིཧཱརསནྣིསྶཡེན ལདྡྷབྦཏོ དེཝཱནཾ དིབྦཙཀྑུ ཝིཡཱཏི ཏཾ དིབྦཙཀྑུ, ཨབྷིཉྙཱཝིསེསོ. ཨཱལོཀཾ ཝཌྜྷེཏྭཱ རཱུཔདསྶནཏོ ‘‘ཨཱལོཀཕརཎེནཱ’’ཏི ཝུཏྟཾ. ‘‘ཨིདཾ དུཀྑཾ ཨརིཡསཙྩནྟི མེ, བྷིཀྑཝེ, པུབྦེ ཨནནུསྶུཏེསུ དྷམྨེསུ ཙཀྑུཾ ཨུདཔཱདཱི’’ཏིཨཱདིནཱ (སཾ. ནི. ༥.༡༠༨༡; མཧཱཝ. ༡༥) ནཡེན ¶ ཨཱགཏཏྟཱ ཙཏུསཙྩཔརིཙྪེདཀཉཱཎཾ ‘‘པཉྙཱཙཀྑཱུ’’ཏི ཝུཏྟཾ. ཏདིདཾ ‘‘ཝིཔསྶནཱཉཱཎ’’ནྟི ཝདནྟི, ‘‘ཝིཔསྶནཱམགྒཕལཔཙྩཝེཀྑཎཉཱཎཱནཱི’’ཏི ཨཔརེ.

པཙྩཡབྷཱུཏེཧི ཨེཏེཧི ཨབྷིསམྦྷརཱིཡནྟཱིཏི སམྦྷཱརཱ, ཨུཔཏྠམྦྷབྷཱུཏཱ ཙཏུསམུཊྛཱནིཀརཱུཔཱ. སཧ སམྦྷཱརེཧཱིཏི སསམྦྷཱརཾ. མཧཱབྷཱུཏཱནཾ ཨུཔཱདཱཡ པསཱིདཏཱིཏི པསཱདོ. ཨཀྑིཀཱུཔཀེ ཨཀྑིཔཊལེཧཱིཏི ཨུབྷོཧི ཨཀྑིདལེཧི. སམྦྷཝོཏི ཨཱཔོདྷཱཏུམེཝ སམྦྷཝབྷཱུཏམཱཧ. ཨིདྷ ‘‘ཏེརས སམྦྷཱརཱ’’ཏི ཝུཏྟཾ. ཨཊྛསཱལིནིཡཾ (དྷ. ས. ཨཊྛ. ༥༩༦) པན སཎྛཱནེན སདྡྷིཾ ‘‘ཙུདྡས སམྦྷཱརཱ’’ཏི ཨཱགཏཾ. ཏཏྠ སཎྛཱནནྟི ཝཎྞཱཡཏནམེཝ པརིམཎྜལཱདིསཎྛཱནབྷཱུཏཾ. ཝིསུཾ ཝཙནཾ པན ནེསཾ ཏཐཱབྷཱུཏཱནཾ ཨཏཐཱབྷཱུཏཱནཉྩ ཨཱཔོདྷཱཏུཝཎྞཱཡཏནཱནཾ ཡཐཱཝུཏྟེ མཾསཔིཎྜེ ཝིཛྫམཱནཏྟཱ. སམྦྷཝསྶ ཙཏུདྷཱཏུནིསྶིཏེཧི སཧ ཝུཏྟསྶ དྷཱཏུཏྟཡནིསྶིཏཏཱ ཡོཛེཏབྦཱ. དིཊྛིམཎྜལེཏི ཨབྷིམུཁཾ ཋིཏཱནཾ པཊིབིམྦཔཉྙཱཡནཊྛཱནབྷཱུཏེ ཙཀྑུསཉྙིཏཱཡ དིཊྛིཡཱ པཝཏྟིཊྛཱནབྷཱུཏེ མཎྜལེ. སནྣིཝིཊྛནྟི ཨེཏེན ཙཀྑུཔསཱདསྶ ཨནེཀཀལཱཔགཏབྷཱཝོ དསྶིཏོ. ཏཐཱ ཧི སོ སཏྟ ཨཀྑིཔཊལཱནི ཨབྷིབྱཱཔེཏྭཱ ཝཏྟཏི. ཡསྨཱ སོ སཏྟ ཨཀྑིཔཊལཱནི བྱཱཔེཏྭཱ ཋིཏེཧི ཨཏྟནོ ནིསྶཡབྷཱུཏེཧི ཀཏཱུཔཀཱརཾ ཏཾནིསྶིཏེཧེཝ ཨཱཡུཝཎྞཱདཱིཧི ཨནུཔཱལིཏཔརིཝཱརིཏཾ ཏིསནྟཏིརཱུཔསམུཊྛཱཔཀེཧི ཨུཏུཙིཏྟཱཧཱརེཧི ཨུཔཏྠམྦྷིཡམཱནཾ ཧུཏྭཱ ཏིཊྛཏི. རཱུཔདསྶནསམཏྠནྟི ཨཏྟཱནཾ ནིསྶཱཡ པཝཏྟཝིཉྙཱཎསྶ ཝསེན རཱུཔཱཡཏནདསྶནསམཏྠཾ. ཝིཏྠཱརཀཐཱཏི ཏསྶ ཙཀྑུནོ སོཏཱདཱིནཉྩ ཧེཏུཔཙྩཡཱདིཝསེན ཙེཝ ལཀྑཎཱདིཝསེན ཙ ཝིཏྠཱརཀཐཱ.

སམྨསནཙཱརཙིཏྟནྟི ཝིཔསྶནཱཡ པཝཏྟིཊྛཱནབྷཱུཏཾ ཝིཔསྶིཏབྦཾ ཙིཏྟཾ. ཀེཙི ‘‘ཝིཔསྶནུཔགཏཀིརིཡམཡཙིཏྟ’’ནྟི ཝདནྟི, ཏཾ ཏེསཾ མཏིམཏྟཾ. ཏཱིཎི ལཀྑཎཱནི དསྶེཏྭཱ ཝིཔསྶནཾ ཨུསྶུཀྐཱཔེཏྭཱ ཨརཧཏྟསྶ པཱཔནཝསེན དེསནཱཡ པཝཏྟཏྟཱ.

ཨཛ྄ཛྷཏྟཱནིཙྩསུཏྟཝཎྞནཱ ནིཊྛིཏཱ.

༢-༣. ཨཛ྄ཛྷཏྟདུཀྑསུཏྟཱདིཝཎྞནཱ

༢-༣. དྭེ ¶ ¶ ལཀྑཎཱནཱིཏི དུཀྑཱནཏྟལཀྑཎཱནི. ཨེཀཾ ལཀྑཎནྟི ཨནཏྟལཀྑཎཾ. སེསཱནཱིཏི ཝུཏྟཱཝསེསཱནི ལཀྑཎཱནི. ཏེཧཱིཏི ཡེཧི དུཏིཡཏཏིཡཱནི སུཏྟཱནི དེསིཏཱནི, ཏེཧི. སལླཀྑིཏཱནཱིཏི སམྨདེཝ ཨུཔདྷཱརིཏཱནི. ཨེཏྟཀེནཱཏི དྭིནྣཾ ཨེཀསྶེཝ ཝཱ ལཀྑཎསྶ ཀཐནེན.

ཨཛ྄ཛྷཏྟདུཀྑསུཏྟཱདིཝཎྞནཱ ནིཊྛིཏཱ.

༤-༦. བཱཧིརཱནིཙྩསུཏྟཱདིཝཎྞནཱ

༤-༦. ཝུཏྟསདིསོཝཱཏི ‘‘དྭེ ལཀྑཎཱནཱི’’ཏིཨཱདིནཱ ཝུཏྟསདིསོ ཨེཝ. ནཡོཏི ཨཏིདེསནཡོ.

བཱཧིརཱནིཙྩསུཏྟཱདིཝཎྞནཱ ནིཊྛིཏཱ.

༧-༡༢. ཨཛ྄ཛྷཏྟཱནིཙྩཱཏཱིཏཱནཱགཏསུཏྟཱདིཝཎྞནཱ

༧-༡༢. སལླཀྑེཏྭཱཏི ཨཏཱིཏཱནཱགཏཱནཾ ཨཝིཛྫམཱནཏྟཱ གཱཧསྶ དལ༹ྷཏཱཡ སལླཀྑེཏྭཱ. པཙྩུཔྤནྣེསུ ཝིཛྫམཱནཏྟཱ བལཝཏཱ ཏཎྷཱདིགཱཧེན ཝིཔསྶནཱཝཱིཐིཾ པཊིཔཱདེཏུཾ ཀིལམནྟཱནཾ ཝིནེཡྻཱནཾ ཝསེན.

ཨཛ྄ཛྷཏྟཱནིཙྩཱཏཱིཏཱནཱགཏསུཏྟཱདིཝཎྞནཱ ནིཊྛིཏཱ.

ཨནིཙྩཝགྒཝཎྞནཱ ནིཊྛིཏཱ.

༢. ཡམཀཝགྒོ

༡-༤. པཋམཔུབྦེསམྦོདྷསུཏྟཱདིཝཎྞནཱ

༡༣-༡༦. དྭཱིསུཔི སུཏྟེསུ ཨཱཡཏནཱནཾ ཝསེན དེསནཱ ཨེཀརསཱཝཱཏི ‘‘པཋམདུཏིཡེསཱུ’’ཏི ཨེཀཛ྄ཛྷཾ པདུདྡྷཱརོ ཀཏོ. ཨཱཧིཏོ ཨཧཾམཱནོ ཨེཏྠཱཏི ཨཏྟཱ, ཨཏྟབྷཱཝོ. ཨཏྟཱནམདྷི ཨཛ྄ཛྷཏྟཾ, ཏཔྤརིཡཱཔནྣཏྟཱ ཏཏྠ བྷཝཱནི ཨཛ྄ཛྷཏྟིཀཱནི, ཏེསཾ ཨཛ྄ཛྷཏྟིཀཱནཾ. ཨཛ྄ཛྷཏྟཉྩ ¶ ནཱམ ཨཛ྄ཛྷཏྟཛ྄ཛྷཏྟཾ ¶ , ནིཡཀཛ྄ཛྷཏྟཾ, གོཙརཛ྄ཛྷཏྟཾ, ཝིསཡཛ྄ཛྷཏྟནྟི ཙཏུབྦིདྷཾ. ཏཏྠ ཨཛ྄ཛྷཏྟཛ྄ཛྷཏྟཾ ཨཛ྄ཛྷཏྟེ བྷཝནྟི ཨཛ྄ཛྷཏྟིཀནྟི ཨཱཧ ‘‘ཨཛ྄ཛྷཏྟཛ྄ཛྷཏྟཝསེན ཨཛ྄ཛྷཏྟིཀཱན’’ནྟི. ཏེསཾ ཙཀྑཱདཱིནཾ ཨཛ྄ཛྷཏྟེསུཔི ཨཛ྄ཛྷཏྟིཀབྷཱཝོ ཨདྷིཀསིནེཧཝཏྠུཏཱཡཱཏི ཨཱཧ ‘‘ཚནྡརཱགསྶ ཨདྷིམཏྟབལཝཏཱཡཱ’’ཏི. ཨིདཱནི ཏཏྠ ཏམཏྠཾ པཊིཡོགིནཱ སདྡྷིཾ ཨུདཱཧརཎཝསེན དསྶེནྟོ ‘‘མནུསྶཱནཾ ཧཱི’’ཏིཨཱདིམཱཧ. ཏཾ ཨུཏྟཱནམེཝ. བཱཧིརཱནཱིཏི ཨཛ྄ཛྷཏྟིཀཏོ བཧི བྷཝཱནི.

པཋམཔུབྦེསམྦོདྷསུཏྟཱདིཝཎྞནཱ ནིཊྛིཏཱ.

༥-༦. པཋམནོཙེཨསྶཱདསུཏྟཱདིཝཎྞནཱ

༡༧-༡༨. ནིཀྑནྟཱཏི ལོཀཏོ ནིཀྑནྟཱ. ཝིསཾཡུཏྟཱ སཾཡོགཧེཏཱུནཾ ཀིལེསཱནཾ པཧཱིནཏྟཱ ནོ སཾཡུཏྟཱ. ནོ ཨདྷིམུཏྟཱཏི ན ཨུསྶུཀྐཛཱཏཱ. ཝིམརིཡཱདཱི…པེ… ཙེཏསཱཏི ཝིགཏཀིལེསཝཊྚམརིཡཱདཏཱཡ ནིམྨརིཡཱདཱིཀཏེན ཙིཏྟེན. ཙཏུསཙྩམེཝ ཀཐིཏཾ ཙཀྑཱདཱིནཾ ཨསྶཱདཱདིནོ ཀཐིཏཏྟཱ.

པཋམནོཙེཨསྶཱདསུཏྟཱདིཝཎྞནཱ ནིཊྛིཏཱ.

༧-༡༠. པཋམཱབྷིནནྡསུཏྟཱདིཝཎྞནཱ

༡༩-༢༢. ཝཊྚཝིཝཊྚམེཝ ཀཐིཏཾ ཨབྷིནནྡནཱནཾ ཨུཔྤཱདནིརོདྷཱནཉྩ ཝསེན དེསནཱཡ པཝཏྟཏྟཱ. ཨནུཔུབྦཀཐཱཏི ཨཱདིཏོ པཊྛཱཡ པདཏྠཝཎྞནཱ. ནེསནྟི སུཏྟཱནཾ.

པཋམཱབྷིནནྡསུཏྟཱདིཝཎྞནཱ ནིཊྛིཏཱ.

ཡམཀཝགྒཝཎྞནཱ ནིཊྛིཏཱ.

༣. སབྦཝགྒོ

༡. སབྦསུཏྟཝཎྞནཱ

༢༣. སབྦ-སདྡོ ¶ པཀརཎཝསེན ཀཏྠཙི སཔྤདེསེཔི པཝཏྟཏཱིཏི ཏཏོ ནིཝཏྟནཏྠཾ ཨནཝསེསཝིསཡེན སབྦ-སདྡེན ཝིསེསེཏྭཱ ཝུཏྟཾ ‘‘སབྦསབྦ’’ནྟི, སབྦམེཝ ཧུཏྭཱ སབྦནྟི ཨཏྠོ. ཨཱཡཏནབྷཱཝཾ སབྦཾ ཨཱཡཏནསབྦཾ, སེསདྭཡེཔི ཨེསེཝ ནཡོ.

ཏསྶ ¶ ཨཝིསཡཱབྷཱཝཏོ ན ཨདྡིཊྛམིདྷཏྠི ཀིཉྩཱིཏི. ཨིདྷཱཏི ནིཔཱཏམཏྟཾ, ཨིདྷ ཝཱ སདེཝཀེ ལོཀེ, དསྶནབྷཱུཏེན ཉཱཎེན ཨདིཊྛཾ ནཱམ ཀིཉྩི ནཏྠཱིཏི ཨཏྠོ. ཡདི ཨེཝཾ ཨནུམཱནཝིསཡཾ ནུ ཁོ ཀཐནྟི ཨཱཧ ‘‘ཨཐོ ཨཝིཉྙཱཏ’’ནྟི. ཨཉྙེསཾ ཨཔཙྩཀྑམྤི ཨཝིཉྙཱཏཾ ཏསྶ ཀིཉྩི ནཏྠཱིཏི ཨདིཊྛཾ ཨཝིཉྙཱཏཾ ནཏྠི. པཙྩུཔྤནྣཾ ཨཏཱིཏམེཝ ཉེཡྻཾ གཧིཏཾ, ཨནཱགཏཾ ནུ ཁོ ཀཐནྟི ཨཱཧ – ‘‘ཨཛཱནིཏབྦ’’ནྟི, ཏསྶ ཀིཉྩི ནཏྠཱིཏི ཨཱནེཏྭཱ སམྦནྡྷོ. ཛཱནིཏུཾ ཉཱཏུཾ ཨསཀྐུཎེཡྻཾ ནཱམ ཏསྶ ཀིཉྩི ནཏྠཱིཏི དསྶེནྟོ ཨཱཧ ‘‘སབྦཾ ཨབྷིཉྙཱསཱི’’ཏིཨཱདི.

སཀལསྶ སཀྐཱཡདྷམྨསྶ པརིགྒཧིཏཏྟཱ སཀྐཱཡསབྦཾ. སབྦདྷམྨེསཱུཏི པཉྩནྣཾ དྭཱརཱནཾ ཨཱརམྨཎབྷཱུཏེསུ སབྦེསུ དྷམྨེསུ. ཡསྨཱ ཚསུཔི ཨཱརམྨཎེསུ གཧིཏེསུ པདེསསབྦཾ ནཱམ ན ཧོཏི, ཏསྨཱ ‘‘པཉྩཱརམྨཎམཏྟ’’ནྟི ཝུཏྟཾ. པདེསསབྦཾ སཀྐཱཡསབྦཾ ན པཱཔུཎཱཏི ཏསྶ ཏེབྷཱུམཀདྷམྨེསུ ཨེཀདེསསྶ ཨསངྒཎྷནཏོ. སཀྐཱཡསབྦཾ ཨཱཡཏནསབྦཾ ན པཱཔུཎཱཏི ལོཀུཏྟརདྷམྨཱནཾ ཨསངྒཎྷནཏོ. ཨཱཡཏནསབྦཾ སབྦསབྦཾ ན པཱཔུཎཱཏི. ཡསྨཱ ཨཱཡཏནསབྦེན ཙཏུབྷཱུམཀདྷམྨཱཝ པརིགྒཧིཏཱ, ན ལཀྑཎཔཉྙཏྟིཡོ, ཡསྨཱ སབྦསབྦཾ དསྶེནྟེན བུདྡྷཉཱཎཝིསཡོ དསྶིཏོ, ཏསྨཱ ‘‘སབྦསབྦཾ ན པཱཔུཎཱཏཱི’’ཏི ཨེཏྠཱཔི ‘‘ཀསྨཱ…པེ… ནཏྠིཏཱཡཱ’’ཏི སབྦཾ ཉཱཏཱརམྨཎེནེཝ པུཙྪཱཝིསྶཛྫནཾ ཀཏཾ. ‘‘ཨཱཡཏནསབྦེཔི ཨིདྷ ཝིཔསྶནུཔགདྷམྨཱཝ གཧེཏབྦཱ ཨབྷིཉྙེཡྻནིདྡེསཝསེནཔི སམྨསནཙཱརསྶེཝ ཨིཙྪིཏཏྟཱ’’ཏི ཝདནྟི.

པཊིཀྑིཔིཏྭཱཏི ‘‘ཨིདཾ སབྦཾ ནཱམ ན ཧོཏཱི’’ཏི ཨེཝཾ པཊིཀྑིཔིཏྭཱ. ཏསྶཱཏི ‘‘ཨཉྙཾ སབྦཾ པཉྙཱཔེསྶཱམཱི’’ཏི ཝདནྟསྶ. ཝཱཙཱཡ ཝཏྟབྦཝཏྠུམཏྟཀམེཝཱཏི ཝཉྫྷཱཔུཏྟགགནཀུསུམཱདིཝཱཙཱ ཝིཡ ཨེཏསྶ ཝཱཙཱཡ ཀེཝལཾ ཝཏྟབྦཝཏྠུཀམེཝ བྷཝེཡྻ, ན ཨཏྠོ, ཝཙནམཏྟཀམེཝཱཏི ཨཏྠོ ¶ . ཨཏིཀྐམིཏྭཱཏི ཨནཱམསིཏྭཱ ཨགྒཧེཏྭཱ. ཏཾ ཀིསྶ ཧེཏཱུཏི ཝིགྷཱཏཱཔཛྫནཾ ཀེན ཧེཏུནཱ. ཡཐཱ ཏཾ ཨཝིསཡསྨིནྟི ཡཐཱ ཨཉྙོཔི ཀོཙི ཨཝིསཡེ ཝཱཡམནྟོ, ཨེཝནྟི ཨཏྠོ. ཨཊྛཀཐཱཡཾ པན ཡསྨཱ པཱལི༹ཡཾ ‘‘ཏཾ ཀིསྶ ཧེཏཱུ’’ཏི ཝུཏྟཀཱརཎམེཝ ཨུཔནཡནཝསེན དསྶེཏུཾ ‘‘ཡཐཱ ཏ’’ནྟིཨཱདི ཝུཏྟཾ. ཀཱརཎོཔནཡནཉྩ ཀཱརཎམེཝཱཏི ‘‘ཡཐཱཏི ཀཱརཎཝཙན’’ནྟི ཝུཏྟནྟི དཊྛབྦཾ. ཏེནེཝཱཧ ‘‘ཨེཝཾ ཨིམསྨིམྤི ཨཝིསཡེ’’ཏིཨཱདི.

སབྦསུཏྟཝཎྞནཱ ནིཊྛིཏཱ.

༢. པཧཱནསུཏྟཝཎྞནཱ

༢༤. སབྦསྶཱཏི དྭཱརཱརམྨཎེཧི སདྡྷིཾ དྭཱརཔྤཝཏྟསྶ. པཧཱནཱཡཱཏི ཏཔྤཊིབདྡྷཚནྡརཱགཔཧཱནཝསེན ¶ པཛཧནཱཡ. ཙཀྑུསམྥསྶནྟི ཙཀྑུསནྣིསྶིཏཕསྶཾ. མཱུལཔཙྩཡནྟི མཱུལབྷཱུཏཾ པཙྩཡཾ ཀཏྭཱ, སཧཛཱཏཝེདནཱཡ ཙཀྑུསམྥསྶཔཙྩཡབྷཱཝེ ཝཏྟབྦམེཝ ནཏྠི. ཨེསེཝ ནཡོཏི ཨཔདེསེན ‘‘སོཏསམྥསྶཾ མཱུལཔཙྩཡཾ ཀཏྭཱ’’ཏིཨཱདིནཱ ཝཏྟབྦནྟི དསྶེཏི. མནོཏི བྷཝངྒཙིཏྟཾ མནོདྭཱརསྶ ཨདྷིཔྤེཏཏྟཱ. ཨཱརམྨཎནྟི དྷམྨཱརམྨཎཾ. སཧཱཝཛྫནཀཛཝནནྟི སཧམནོདྭཱརཱཝཛྫནཀཾ ཛཝནཾ. ཏཾཔུབྦཀཏྟཱ མནོཝིཉྙཱཎཕསྶཝེདནཱནཾ མཱུལཔཙྩཡབྷཱུཏཱ སབྦེསྭེཝ ཙཀྑུདྭཱརཱདཱིསུ ཝུཏྟིཏྟཱ ཏདནུརཱུཔཏོ ‘‘བྷཝངྒསཧཛཱཏོ སམྥསྶོ’’ཏི ཝུཏྟཾ. སཧཱཝཛྫནཝེདནཱཡ ཛཝནཝེདནཱ ‘‘ཝེདཡིཏ’’ནྟི ཨདྷིཔྤེཏཱ, བྷཝངྒསམྤཡུཏྟཱཡ པན ཝེདནཱཡ གཧཎེ ཝཏྟབྦམེཝ ནཏྠི. བྷཝངྒཏོ ཨམོཙེཏྭཱ བྷཝངྒཙིཏྟེན སདྡྷིཾཡེཝ ཨཱཝཛྫནཾ གཧེཏྭཱ མནོདྭཱརཱཝཛྫནཾ བྷཝངྒཾ དཊྛབྦཾ. ཡཱ པནེཏྠ དེསནཱཏི ཡཱ ཨེཏྠ ‘‘པཧཱནཱཡཱ’’ཏིཨཱདིནཱ པཝཏྟདེསནཱ སཏྠུ ཨནསིཊྛི ཨཱཎཱ. ཨཡཾ པཎྞཏྟི ནཱམ ཏསྶ ཏསྶ ཨཏྠསྶ པཀཱརཏོ ཉཱཔནཏོ. ཨེཏྠ སབྦགྒཧཎེན སབྦེ སབྷཱཝདྷམྨཱ གཧིཏཱ, པཉྙཏྟི པན ཀཏམཱཏི ཝིཙཱརཎཱཡ ཏཾ དསྶེཏུཾ ‘‘ཡཱ པནེཏྠཱ’’ཏིཨཱདི ཝུཏྟནྟི དཊྛབྦཾ.

པཧཱནསུཏྟཝཎྞནཱ ནིཊྛིཏཱ.

༣. ཨབྷིཉྙཱཔརིཉྙཱཔཧཱནསུཏྟཝཎྞནཱ

༢༥. ཨབྷིཉྙཱཏི ¶ ཨབྷིཉྙཱཡ. ཡ-ཀཱརལོཔཝསེནཱཡཾ ནིདྡེསོ ‘‘སཡཾ ཨབྷིཉྙཱ’’ཏིཨཱདཱིསུ (དཱི. ནི. ༡.༢༨, ༤༠༥; མ. ནི. ༡.༡༥༤) ཝིཡ, ཏཐཱ ‘‘པརིཉྙཱ’’ཏི ཨེཏྠཱཔི. སབྦནྟི ཨཱཡཏནསབྦཾ. ཏཉྷི ཨབྷིཉྙེཡྻཾ. ཨབྷིཛཱནིཏྭཱཏི ཨབྷིཉྙཱཡ ཛཱནིཏྭཱ. པརིཛཱནིཏྭཱཏི ཏཱིརཎཔརིཉྙཱཡ ཨནིཙྩཱདིཏོ པརིཛཱནིཏྭཱ. པཛཧནཏྠཱཡཱཏི པཧཱནཔརིཉྙཱཡ ཨནཝསེསཏོ པཛཧནཱཡ.

ཨབྷིཉྙཱཔརིཉྙཱཔཧཱནསུཏྟཝཎྞནཱ ནིཊྛིཏཱ.

༤. པཋམཨཔརིཛཱནནསུཏྟཝཎྞནཱ

༢༦. ‘‘ཨབྷིཛཱན’’ནྟིཨཱདིནཱ ཨེཏྠ བྷགཝཱ པཋམཾ ཀཎྷཔཀྑཾ དསྶེཏྭཱ སུཀྐཔཀྑཾ དསྶེཏི ཝེནེཡྻཛ྄ཛྷཱསཡཝསེན. ཏེནེཏྠ ཝཊྚཝིཝཊྚཾ ཀཐིཏཾ.

པཋམཨཔརིཛཱནནསུཏྟཝཎྞནཱ ནིཊྛིཏཱ.

༥. དུཏིཡཨཔརིཛཱནནསུཏྟཝཎྞནཱ

༢༧. ཙཀྑུཝིཉྙཱཎཝིཉྙཱཏབྦདྷམྨོ ¶ ནཱམ རཱུཔཱཡཏནམེཝཱཏི ཨཱཧ ‘‘ཧེཊྛཱ གཧིཏརཱུཔམེཝཱ’’ཏི. ཨིདྷ ཨནཱཔཱཐགཏཾ ‘‘ཙཀྑུཝིཉྙཱཎཝིཉྙཱཏབྦཱ དྷམྨཱ’’ཏི ཝུཏྟཏྟཱ. ཧེཊྛཱ ཨཱཔཱཐགཏམྤི ཨནཱཔཱཐགཏམྤི གཧིཏམེཝ ‘‘ཡེ ཙ རཱུཔཱ’’ཏི ཨནཝསེསཏོ ཝུཏྟཏྟཱ. ཏེ ཧི ཝེདནཱསཉྙཱསངྑཱརཀྑནྡྷཱ སཧ ཙཀྑུཝིཉྙཱཎེན ཝིཉྙཱཏབྦཏྟཱ. ཏཐཱ ཧི ཙཀྑུཝིཉྙཱཎཾ ཏེཧི ཨེཀུཔྤཱདཾ ཨེཀཝཏྠུཀཾ ཨེཀནིརོདྷཾ ཨེཀཱརམྨཎམེཝ. སེསཔདེསཱུཏི སེསེསུ ‘‘ཡཉྩ སོཏཾ ཡེ ཙ སདྡཱ’’ཏིཨཱདིནཱ ཨཱགཏེསུ ཀཎྷཔཀྑེ པཉྩསུ, སུཀྐཔཀྑེ ཚསུཔི པདེསུ. ཨེསེཝ ནཡོཏི ཡྭཱཡཾ ‘‘ཧེཊྛཱ གཧིཏརཱུཔམེཝ གཎྷིཏྭཱ’’ཏི ཨཏྠོ ཝུཏྟོ. ཨེསོ ཨེཝ ཏཏྠཔི ཨཏྠཝཎྞནཱནཡོ.

དུཏིཡཨཔརིཛཱནནསུཏྟཝཎྞནཱ ནིཊྛིཏཱ.

༦. ཨཱདིཏྟསུཏྟཝཎྞནཱ

༢༨. གཡཱནཱམིཀཱཡ ¶ ནདིཡཱ ཨཝིདཱུརེ པཝཏྟོ གཱམོ གཡཱ ནཱམ, ཏསྶཾ གཡཱཡཾ ཝིཧརཏཱིཏི སམཱིཔཏྠེ ཙེཏཾ བྷུམྨཝཙནཾ. གཡཱགཱམསྶ ཧི ཨཱསནྣེ གཡཱསཱིསནཱམཀེ པིཊྛིཔཱསཱཎེ བྷགཝཱ ཏདཱ ཝིཧཱསི. ཏེནཱཧ ‘‘བྷགཝཱ ཏཏྠ ཝིཧརཏཱི’’ཏི.

ཏཏྲཱཏི ‘‘བྷིཀྑཱུ ཨཱམནྟེསཱི’’ཏི ཡེ བྷིཀྑཱུ ཨཱམནྟེསི, ཡཐཱ ཙཱཡཾ དེསནཱ ཏེསཾ སཔྤཱཡཱ ཛཱཏཱ, ཏཏྲ ཏསྨིཾ ཨཏྠདྭཡེ ཝིབྷཱཝེཏབྦེ ཨཡཾ ཨནུཔུབྦིཀཐཱ སམུདཱགམཏོ པཊྛཱཡ ཨནུཔཊིཔཱཊིཀཐཱ. ཨིཏོཏི ཨིམསྨཱ ཀཔྤཏོ. ཀིརཱཏི ཨནུསྶཝནཏྠེ ནིཔཱཏོ. པཱརམིཏཱཔརིབྷཱཝནཱཡ པརིཔཱཀགཏེ. ཉཱཎེཏི བོདྷིཉཱཎེ. ཀནིཊྛཔུཏྟོ ཝེམཱཏིཀབྷཱཏཱ བྷགཝཏོ. ཝེལུ༹བྷིཏྟིཀུཊིཀཱཧི པརིཀྑིཔིཏྭཱ བཧིདྡྷཱ, ཨནྟོ པན པཊསཱཎཱིཧི.

སབྦེསཾ སཏྟཱནཾ. པུཉྙཙེཏནཾ ཨནྟོ ཨབྦྷནྟརེ པཝེསེཏི. བྷགཝཱཔི ཏསྶ པུཏྟོཏི ཀཏྭཱ ‘‘ཨཉྙེ ཏཡོ པུཏྟཱ’’ཏི ཝུཏྟཾ. ཨཝིཔྤཀིརིཏྭཱཏི པརཱཛཡེན ཨཝིཔྤཀིརིཡ ཨཔལཱཡིཏྭཱ. པིདཧཱིཏི དཱཏུཾ ན སཀྐོམཱིཏི ཏཐཱ ཨཀཱསི. སཙྩཝཱདིཏཱཡ གཎྷིཾསཱུཏི རཱཛཀུལསྶ སཙྩཝཱདིཏཱཡ ཨཏྟནོ ཝརཾ གཎྷིཾསུ.

ཝིནིཝཏྟིཏུནྟི པཊིཉྙཱཡ ནིཝཏྟིཏུཾ. ཨནྟརཱཏི ཏུམྷེཧི པརིཙྪིནྣཀཱལསྶ ཨནྟརཱ ཨེཝ མཏཱ. ཨཊྛཝཱིསཏིཧཏྠཊྛཱནཾ ཨུསབྷཾ ནཱམ. ཨུསབྷེ ཨཊྛཝཱིསཏིཧཏྠཔྤམཱཎེ ཋཱནེ. དཱནགྒེ བྱཱཝཊོཏི པསུཏོ.

སོཏི ¶ བྷགཝཱ. ཏཐཱརཱུཔཉྷི བུདྡྷཱནཾ དེསནཱཔཱཊིཧཱརིཡཾ, ཡཐཱ དེསནཱཡ གཧིཏོ ཨཏྠོ པཙྩཀྑཏོ ཝིབྷཱུཏོ ཧུཏྭཱ ཨུཔཊྛཱཏི. ཏེནཱཧ ‘‘ཨིམེསཾ…པེ… དེསེསྶཱམཱི’’ཏི. སནྣིཊྛཱནནྟི ཙིརཀཱལཔརིཙིཏཱདིཏྟཨགྒིཀཱནཾ ཨཱདིཏྟཔརིཡཱཡདེསནཱཝ སཔྤཱཡཱཏི ནིཙྪཡམཀཱསི. པདིཏྟནྟི པདཱིཔིཏཾ ཨེཀཱདསཧི ཨགྒཱིཧི ཨེཀཛཱལཱིབྷཱུཏཾ. ཏེནཱཧ ‘‘སམྤཛྫལིཏ’’ནྟི. དུཀྑལཀྑཎཾ ཀཐིཏཾ ཙཀྑཱདཱིནཾ ཨེཀཱདསཧི ཨགྒཱིཧི ཨཱདིཏྟབྷཱཝེན དུཀྑམཏཱཡ དུཀྑསྶ ཀཐིཏཏྟཱ.

ཨཱདིཏྟསུཏྟཝཎྞནཱ ནིཊྛིཏཱ.

༧. ཨདྡྷབྷཱུཏསུཏྟཝཎྞནཱ

༢༩. ཨདྷིསདྡེན ¶ སམཱནཏྠོ ཨདྡྷསདྡོཏི ཨཱཧ ‘‘ཨདྡྷབྷཱུཏནྟི ཨདྷིབྷཱུཏ’’ནྟིཨཱདི. སེསཾ ཝུཏྟནཡམེཝ.

ཨདྡྷབྷཱུཏསུཏྟཝཎྞནཱ ནིཊྛིཏཱ.

༨. སམུགྒྷཱཏསཱརུཔྤསུཏྟཝཎྞནཱ

༣༠. མཉྙིཏཾ ནཱམ ཏཎྷཱམཱནདིཊྛཱིཧི གཧེཏབྦཾ མཉྙིཏཾ. སབྦསྨིཾ མཉྙིཏནྟི སབྦམཉྙིཏཾ, ཏསྶ སམུགྒྷཱཏོ སེཏུགྷཱཏོ, ཏདཱཝཧཾ སབྦམཉྙིཏསམུགྒྷཱཏསཱརུཔྤཾ. ཨཊྛཀཐཱཡཾ པན ‘‘མཉྙིཏཾ ནཱམ ཙཀྑཱདཱིསུ ཨེཝ ཨུཔྤཛྫཏི, ནཱཉྙསྨི’’ནྟི དུཏིཡནཡོ ཝུཏྟོ. ཨནུཙྪཝིཀནྟི ཨནུརཱུཔཾ ཨཝིལོམཾ. ཨིདྷཱཏི ཨིདྷེཝ སཱསནེ ཨཉྙཏྠ ཏདབྷཱཝཏོ. ‘‘ཏཎྷཱ-མཱནདིཊྛིམཉྙིཏཱན’’ནྟི ཝུཏྟཾ མཉྙིཏཏྟཡཾ སཔརསནྟཱནེསུ པཊིཔཀྑཝསེན ཡོཛེཏྭཱ དསྶེཏུཾ ‘‘ཙཀྑུཾ ཨཧནྟི ཝཱ’’ཏིཨཱདི ཝུཏྟཾ. ཏཏྠ ‘‘ཙཀྑུཾ ཨཧ’’ནྟི ཨིམིནཱ ཨཛ྄ཛྷཏྟཝིསཡཾ དིཊྛིམཉྙིཏཉྩ དསྶེཏི ཨཏྟཱབྷིནིཝེསཱཧཾཀཱརདཱིཔནཏོ. ‘‘མམ’’ནྟི ཨིམིནཱ ཏཎྷཱམཉྙིཏཾ མཱནམཉྙིཏམྤི ཝཱ, པརིགྒཧམུཁེནཔི སེཡྻཱདིཏོ མཱནུཔྤཛྫནཏོ. སེསཔདདྭཡེཔི ཨིམིནཱ ནཡེན མཉྙིཏཝིབྷཱགོ ཝེདིཏབྦོ. ཨཧནྟི ཨཏྟཱཝ, སོ ཙ ཙཀྑུསྨིཾ ཏདདྷཱིནཝུཏྟིཏྟཱ ‘‘པརོ’’ཏི ན མཉྙཏི. མམ ཀིཉྩནཔལིབོདྷོ ཙཀྑུསྨིཾ སཏི ལབྦྷནཏོ, ཨསཏི ན མཉྙཏི ཏཐཱམཉྙིཏསྶ པཙྩཡགྷཱཏཏོ. སེསཔདདྭཡེཔི ཨེསེཝ ནཡོ.

ཨཧཾ ཙཀྑུཏོ ནིགྒཏོཏི ‘‘ཨཧ’’ནྟི ཝཏྟབྦོ ཨཡཾ སཏྟོ ཙཀྑུཏོ ནིགྒཏོ ཏཏྠ སུཁུམཱཀཱརེན ཨུཔལབྦྷནཏོ. མམ ཀིཉྩནཔལིབོདྷོ ཙཀྑུཏོ ནིགྒཏོ ཏསྨིཾ སཏི ཨེཝ ཨུཔལབྦྷནཏོ ¶ . སེསདྭཡེཔི ཨེསེཝ ནཡོ. ཏཏྠ པརོཏི པརོ སཏྟོ. མམ ཙཀྑཱུཏི ན མཉྙཏི ཡསྶ ཏཾ ཙཀྑུ, ཏསྶ ‘‘ཨཧ’’ནྟི ཝཏྟབྦསྶེཝ ཨབྷཱཝཏོ. མམཏྟབྷཱུཏནྟི མམ ཀཱརཎཾ. སེསཾ ཨུཏྟཱནམེཝ. ཨེཝམེཏསྨིཾ སུཏྟེ ཙཀྑུརཱུཔ-ཙཀྑུཝིཉྙཱཎ-ཙཀྑུསམྥསྶ-སུཁདུཀྑཱདུཀྑམསུཁཝསེན སཏྟ ཝཱརཱ ཙཀྑུདྭཱརེ, ཏཐཱ སོཏདྭཱརཱདཱིསཱུཏི ཚ སཏྟཀཱ དྭེཙཏྟཱལཱིས. པུན སཀྐཱཡཝསེན ‘‘སབྦཾ ན མཉྙཏཱི’’ཏིཨཱདིནཱ ཝུཏྟཾ, ཏེན ཏེཙཏྟཱལཱིས. པུན ཏེབྷཱུམཀཝཊྚཾ ‘‘ལོཀོ’’ཏི གཧེཏྭཱ ‘‘ན ཀིཉྩི ལོཀེ ཨུཔཱདིཡཏཱི’’ཏི ¶ ཝུཏྟཾ, ཏེན ཙཏུཙཏྟཱལཱིས ཧོནྟི. ཨེཝཾ སབྦཐཱཔི ཙཏུཙཏྟཱལཱིསཱཡ ཋཱནེསུ ཨརཧཏྟཾ པཱཔེཏྭཱ ཝིཔསྶནཱ ཀཐིཏཱཏི ཝེདིཏབྦཱ. ‘‘ཙཏུཙཏྟཱལཱིསཱདྷིཀསཏེསཱུ’’ཏི ཀེསུཙི པོཏྠཀེསུ ལིཁནྟི, སཱ ཙ པམཱདལེཁཱ.

སམུགྒྷཱཏསཱརུཔྤསུཏྟཝཎྞནཱ ནིཊྛིཏཱ.

༩. པཋམསམུགྒྷཱཏསཔྤཱཡསུཏྟཝཎྞནཱ

༣༡. ཨུཔཀཱརབྷཱུཏཱ ཏདཱཝཧཏྟཱ. ཏཏོཏི མཉྙིཏཱཀཱརཏོ. ཏནྟི མཉྙནཱཝཏྠུཾ. ཨཉྙེནཱཀཱརེནཱཏི ཡཐཱ མཉྙཏི ཨནིཙྩཱདིཨཱཀཱརཏོ, ཨཉྙེན ཨནིཙྩཱདིནཱ ཨཱཀཱརེན ཧོཏི. ཨཉྙཐཱབྷཱཝཾ ཝིཔརིཎཱམནྟི ཨུཔྤཱདཝཡཏཱཡ ཨཉྙཐཱབྷཱཝཾ ཛརཱཡ མརཎེན ཙ དྭེདྷཱ ཝིཔརིཎཱམེཏབྦཾ. ཏཾ ཨུཔགམནེན ཨཉྙཐཱབྷཱཝཱི, ཨེཝཾབྷཱུཏོ ཧུཏྭཱཔི ཛཱིརཎབྷིཛྫནསབྷཱཝེསུ. བྷཝེསུ སཏྟོ ལོཀོ ཨུཔརིཔི བྷཝཾཡེཝ ཨབྷིནནྡཏི. ཧེཊྛཱ གཧིཏམེཝ སངྐཌྜྷིཏྭཱཏི ‘‘ཙཀྑུཾ ན མཉྙཏཱི’’ཏིཨཱདིནཱ ཧེཊྛཱ གཧིཏམེཝ ཁནྡྷདྷཱཏུཨཱཡཏནཱཏི ཁནྡྷཱདིཔརིཡཱཡེན ཨེཀཏོ གཧེཏྭཱ པུནཔི མཉྙནཱཝཏྠུཾ དསྶེཏི. ཨཝསཱནེ ‘‘ཏཏོ ཏཾ ཧོཏཱི’’ཏི ཝུཏྟཔདེན སདྡྷིཾ སབྦཝཱརེསུ ཨཊྛ ཨཊྛ ཧོནྟཱིཏི ‘‘ཨཊྛཙཏྟཱལཱིསཱཡ ཋཱནེསཱུ’’ཏི ཝུཏྟཾ.

པཋམསམུགྒྷཱཏསཔྤཱཡསུཏྟཝཎྞནཱ ནིཊྛིཏཱ.

༡༠. དུཏིཡསམུགྒྷཱཏསཔྤཱཡསུཏྟཝཎྞནཱ

༣༢. དསྶེཏྭཱཏི ཨེཏྠ ལཀྑཎེ ཨཡཾ ཏྭཱ-སདྡོ, ཧེཏུམྷི ཝཱ. ཨནཱདིསཏྟསནྟཱནགཏགཱཧཏྟཡལཀྑིཏཱ ཧི སཏྠུ, ཏིཔརིཝཊྚདེསནཱ ཏཾནིམིཏྟཾ ཡཱཝདེཝ ཏཔྤཧཱནཱཡ པཝཏྟིཏབྷཱཝཏོ. ཨརཧཏྟཾ པཱཔེཏྭཱ ཝིཔསྶནཱ ཀཐིཏཱཏི ཨཊྛཀཐཱཡཾ ཝུཏྟཾ ‘‘སཧ ཝིཔསྶནཱཡ ཙཏྟཱརོཔི མགྒཱ ཀཐིཏཱ’’ཏི.

དུཏིཡསམུགྒྷཱཏསཔྤཱཡསུཏྟཝཎྞནཱ ནིཊྛིཏཱ.

སབྦཝགྒཝཎྞནཱ ནིཊྛིཏཱ.

༤. ཛཱཏིདྷམྨཝགྒཝཎྞནཱ

༣༣-༤༢. ནིབྦཏྟནསབྷཱཝནྟི ¶ ¶ ཧེཏུཔཙྩཡེཧི ཨུཔྤཛྫནསབྷཱཝཾ. ཨུཔྤཱདཱནནྟརཾ བུདྡྷིཔྤཏྟིཡཱ ཛཱིརཎསབྷཱཝཾ. ཡཏྠ ཙཀྑཱདཡོ, ཏཏྠེཝ ཝིསབྷཱགསམུཊྛཱནལཀྑཎེན བྱཱདྷིནོ ཨུཔྤཏྟིཔཙྩཡབྷཱཝེན བྱཱདྷིསབྷཱཝཾ. མརཎསབྷཱཝནྟི ཝིནཱསསབྷཱཝཾ. སོཀསབྷཱཝནྟི ཉཱཏིབྱསནཱདིནཱ ཌཡ྄ཧམཱནདུཀྑསབྷཱཝཾ. སཾཀིལེསིཀསབྷཱཝནྟི ཏཎྷཱདིཝསེན སཾཀིལིསྶནསབྷཱཝཾ.

ཛཱཏིདྷམྨཝགྒཝཎྞནཱ ནིཊྛིཏཱ.

༥. སབྦཨནིཙྩཝགྒཝཎྞནཱ

༤༣-༥༢. ཉཱཏཔརིཉྙཱ ཨཱགཏཱ ཝིསཡཝསེན ཏབྦིསཡསྶ དྷམྨསྶ ཛོཏིཏཏྟཱ. ཨིཏརཱ དྭེ ཏཱིརཎཔཧཱནཔརིཉྙཱཔི ཨཱགཏཱ ཨེཝཱཏི ཝེདིཏབྦཱ, ཏཱསཾ ཨབྷིཉྙེཡྻདྷམྨཝིསཡཏྟཱ ཉཱཎསྶ ཙ ཏཱིརཎཔཧཱནཔརིཉྙཱསམྦྷཝཏོ. པརིཉྙེཡྻཔདེ ཏཱིརཎཔརིཉྙཱཝ ཨཱགཏཱ, པཧཱཏབྦཔདེ པཧཱནཔརིཉྙཱཝ ཨཱགཏཱཏི ཡོཛནཱ. ཨིཏརཱཔི དྭེ གཧིཏཱཡེཝ ཏཱཧི ཝིནཱ ཨཏྠསིདྡྷིཡཱ ཨབྷཱཝཏོ. པཙྩཀྑཾ ཀཱཏབྦཾ ཨཱརམྨཎཏོ ཨསམྨོཧཏོ པཊིཝིཛ྄ཛྷནེན. ཨཝུཏྟཱཔི གཧིཏཱཡེཝ པརིཛཱནནསྶ ཡཱཝདེཝ པཧཱནཏྠཏྟཱ. ཨེཀསབྷཱཝེན ཝིནཱབྷཱཝོ ཨནེཀགྒཊྛོ. ཨུཔསཊྛརོགེན ཝིཡ ཨནྟོ ཨེཝ ཨབྷིཧཏསབྦཏཱ ཨུཔཧཏཊྛོ.

སབྦཨནིཙྩཝགྒཝཎྞནཱ ནིཊྛིཏཱ.

པཋམོ པཎྞཱསཀོ.

༦. ཨཝིཛྫཱཝགྒཝཎྞནཱ

༥༣-༦༢. ཙཏཱུསུ སཙྩེསུ ཨཉྙཱཎཾ ཏཔྤཊིཙྪཱདཀསམྨོཧོ. ཨཝིནྡིཡཾ ཝིནྡཏི, ཝིནྡིཡཾ ན ཝིནྡཏཱིཏི ཀཏྭཱ ཝིཛྫཱཡ པཊིཔཀྑོཝ ཨཝིཛྫཱ. ཝིཛྫཱཡ ཨུཔྤནྣཱཡ ཨནཝསེསཏོ ཨཝིཛྫཱ པཧཱིཡཏི, ཏཾ དསྶེནྟོ ‘‘ཝིཛྫཱཏི ཨརཧཏྟམགྒཝིཛྫཱ’’ཏི ¶ ཨཱཧ. ན ཀེཝལཾ ¶ ཨནིཙྩཱནུཔསྶནཱཝསེནེཝ མགྒཝུཊྛཱནཾ, ཨཐ ཁོ ཨིཏརཱནུཔསྶནཱཝསེནཔཱིཏི དསྶེནྟོ ‘‘དུཀྑཱ…པེ… པཧཱིཡཏིཡེཝཱ’’ཏི ཨཱཧ. སབྦཏྠཱཏི ཨུཔརིསུཏྟནྟེ སནྡྷཱཡཱཧ. ཏཏོ ཨཔརེཔི ཏཾཨཏྠལཀྑཎཝསེན ཀཐིཏསུཏྟནྟེཔི. ཏཱནིཔི ཧི ཏཐཱ བུཛ྄ཛྷནཀཔུགྒལཱནམཛ྄ཛྷཱསཡེན ཝུཏྟཱནཱིཏི.

ཨཝིཛྫཱཝགྒཝཎྞནཱ ནིཊྛིཏཱ.

༧. མིགཛཱལཝགྒོ

༡. པཋམམིགཛཱལསུཏྟཝཎྞནཱ

༦༣. ཙཀྑུཝིཉྙཱཎཾ དསྶནཀིཙྩནྟི ཝུཏྟཙཀྑུཝིཉྙཱཎེན པསྶིཏབྦནྟི ཨཱཧ ‘‘ཨིཊྛཱརམྨཎབྷཱུཏཱ’’ཏི. ཀམནཱིཡཱཏི ཀཱམེཏབྦཱ. མནཾ ཨཔྤཱཡནྟཱིཏི མནཱཔཱཏི ཨཱཧ ‘‘མནཝཌྜྷནཀཱ’’ཏི. པིཡཱཡིཏབྦསབྷཱཝཱ པིཡརཱུཔཱ. ཀཱམཱུཔསཾཧིཏཱཏི ཀཱམཔཊིསཾཡུཏྟཱ. ཨཱལམྦིཏབྦཏཱ ཨེཝ ཙེཏྠ ཨུཔསཾཧིཏཏཱཏི ‘‘ཨཱརམྨཎཾ ཀཏྭཱ’’ཏིཨཱདིམཱཧ. ཏཎྷཱསངྑཱཏཱ ནནྡཱི ཏཎྷཱནནྡཱི, ན ཏུཊྛིནནྡཱིཡེཝ ‘‘ནནྡིཾ ཙརཏཱི’’ཏིཨཱདཱིསུ ཝིཡ. གཱམནྟནྟི གཱམསམཱིཔཾ. ‘‘ཨནུཔཙཱརཊྛཱན’’ནྟི ཝཏྭཱ ཏཾ དསྶེཏི ‘‘ཡཏྠཱ’’ཏིཨཱདིནཱ.

ཨེཏྠཱཏི ཡཐཱནཱིཧཏེ པཱཋེ. ‘‘ཨིམཾ ཨེཀཾ པརིཡཱཡཾ ཋཔེཏྭཱ’’ཏི ཝུཏྟཾ ཏསྶ ‘‘པནྟཱནཱི’’ཏིཔདེན སངྒཧིཏཏྟཱ. ཨཔྤསདྡཱནི ཨཔྤནིགྒྷོསཱནཱིཏི ཨེཏྠ ཨཔྤ-སདྡོ ཨབྷཱཝཏྠོ.

པཋམམིགཛཱལསུཏྟཝཎྞནཱ ནིཊྛིཏཱ.

༦. སམིདྡྷིལོཀཔཉྷཱསུཏྟཝཎྞནཱ

༦༨. ཨཱཡཱཙནསུཏྟཏོ པཊྛཱཡཱཏི མིགཛཱལཝགྒེ དུཏིཡསུཏྟཏོ པཊྛཱཡ. པཋམསུཏྟེ པན དུཏིཡཀཝིཧཱརཱདིབྷཱཝོ ཝུཏྟོཏི.

སམིདྡྷིལོཀཔཉྷཱསུཏྟཝཎྞནཱ ནིཊྛིཏཱ.

༧. ཨུཔསེནཨཱསཱིཝིསསུཏྟཝཎྞནཱ

༦༩. གཧེཏྭཱཏི ¶ ¶ པཱརུཔནསྶ སིཐིལཀརཎེན ཝཱིམཾསཏོ མོཙེཏྭཱ. ལེཎཙྪཱཡཱཡཱཏི པུརིམདིསཱཡ ལེཎཙྪཱཡཱཡཾ. པཏིཏྭཱཏི ལེཎཙྪདནཏོ བྷསྶིཏྭཱ. ཕུཊྛཝིསོཏི ཙཏཱུསུ ཨཱསཱིཝིསེསུ སོ ཕུཊྛཝིསོ. ཏེནཱཧ ‘‘ཏསྨཱ’’ཏིཨཱདི. པརིཡཱདིཡམཱནམེཝཱཏི ཁེཔེནྟམེཝ, ཝིནཱསེནྟམེཝཱཏི ཨཏྠོ. ཡཐཱཔརིཙྪེདེནཱཏི ཨཏྟནོ ཝིསཔརིཙྪེདཱནུརཱུཔཾ. ཨཉྙཐཱབྷཱཝནྟི ཝཌྜྷབྷཱཝཱདིཔཀཏིཛཧནཾ. སབྷཱཝཝིགམོཏི ཝིནཱསོ.

ཨུཔསེནཨཱསཱིཝིསསུཏྟཝཎྞནཱ ནིཊྛིཏཱ.

༨. ཨུཔཝཱཎསནྡིཊྛིཀསུཏྟཝཎྞནཱ

༧༠. རཱུཔཾ པཊིསཾཝིདིཏཾ ཀརོཏི ཉཱཏཔརིཉྙཱཝསེན. རཱུཔརཱགནྟི ནཱིལཱདིབྷེདེ རཱུཔདྷམྨེ རཱགཾ. པཊིསཾཝིདིཏཾ ཀརོཏི ‘‘ཨཡཾ མེ རཱགོ ཨཔྤཧཱིནོ’’ཏི. ཨེཏེན སེཀྑཱནཾ པཙྩཝེཀྑཎཱ ཀཐིཏཱ. ཏེན ཝུཏྟཾ ‘‘ཨེཝམྤི ཁོ, ཨུཔཝཱཎ, སནྡིཊྛིཀོ དྷམྨོ ཧོཏཱི’’ཏིཨཱདི. རཱུཔརཱགཾ པཊིསཾཝིདིཏཾ ཀརོཏི ‘‘ནཏྠི མེ ཨཛ྄ཛྷཏྟཾ རཱུཔེསུ རཱགོ’’ཏི པཛཱནཱཏི. ཨསེཀྑཱནཾ ཧཱཡཾ པཙྩཝེཀྑཎཱ.

ཨུཔཝཱཎསནྡིཊྛིཀསུཏྟཝཎྞནཱ ནིཊྛིཏཱ.

༩. པཋམཚཕསྶཱཡཏནསུཏྟཝཎྞནཱ

༧༡. ཕསྶཱཀརཱནནྟི ཚནྣཾ ཕསྶཱནཾ ཨཱཀརཱནཾ ཨུཔྤཏྟིཊྛཱནཱནཾ, ཙཀྑཱདཱིནནྟི ཨཏྠོ. ནཊྛོ ནཱམ ཨཧནྟི ཝདཏི, ཡོ ཚནྣཾ ཕསྶཱཡཏནཱནཾ སམུདཡཱདིཾ ཡཐཱབྷཱུཏཾ པཛཱནཱཏི, སོ ཝུསིཏཝཱ, ཨིཏརོ ཨཝུསིཏཝཱ ཨཧཉྩ ཏཱདིསོཏི. ཨཡམེཝཱཏི ཨཡཾ ཙཀྑུསྨིཾ ‘‘ནེཏཾ མམཱ’’ཏིཨཱདིནཱ ཏིཎྞཾ གཱཧཱནཾ ཨབྷཱཝོ ཨེཝ.

པཋམཚཕསྶཱཡཏནསུཏྟཝཎྞནཱ ནིཊྛིཏཱ.

༡༠. དུཏིཡཚཕསྶཱཡཏནསུཏྟཝཎྞནཱ

༧༢. ཨཔུནབྦྷཝོཏི ¶ པུནབྦྷཝཱབྷཱཝོ.

༡༡. ཏཏིཡཚཕསྶཱཡཏནསུཏྟཝཎྞནཱ

༧༣. པནསྶསནྟི ¶ ཨེཀཾསེན ནཊྛོཏི ཨཡམེཏྠ ཨཏྠོཏི ཨཱཧ ‘‘ཨཏིནཊྛོ’’ཏི, དྷུརཏོ ཨེཝ ནཊྛོཏི ཨཏྠོ.

ཏཏིཡཚཕསྶཱཡཏནསུཏྟཝཎྞནཱ ནིཊྛིཏཱ.

མིགཛཱལཝགྒཝཎྞནཱ ནིཊྛིཏཱ.

༨. གིལཱནཝགྒོ

༡-༥. པཋམགིལཱནསུཏྟཱདིཝཎྞནཱ

༧༤-༧༨. ཨཔྤཉྙཱཏོཏི ནཱམགོཏྟཏོ ཙེཝ སཱིལཱདིགུཎེཧི ཙ ཨཔྤཉྙཱཏོ ཨཝིསྶུཏོ. ཐེརམཛ྄ཛྷིམབྷཱཝཾ ཨཔྤཏྟཏཱཡ ནཝོ.

པཋམགིལཱནསུཏྟཱདིཝཎྞནཱ ནིཊྛིཏཱ.

༧. དུཏིཡཨཝིཛྫཱཔཧཱནསུཏྟཝཎྞནཱ

༨༠. ཨནིཙྩཱདིཝསེན ཨབྷིནིཝིསནཾ ཨབྷིནིཝེསོ, སོ ཨེཝ དྷམྨསབྷཱཝཾ ཨཏིཀྐམིཏྭཱ པརཏོ ཨཱམསནཏོ པརཱམཱསོ, སོ ཨེཝ གཱཧོ. ཏེན ཨབྷིནིཝེསཔརཱམཱསགྒཱཧེན གཎྷིཏུཾ ན ཡུཏྟཱ ཨནིཙྩཱདིསབྷཱཝཏྟཱ. སངྑཱརཱ ཨེཝ པཝཏྟིཡཱ ཀཱརཎབྷཱཝཏོ སངྑཱརནིམིཏྟཱནི. ཡོ སངྑཱརེསུ ཨཔརིཉྙཱཏཱབྷིནིཝེསེན པསྶིཏབྦོ ཨཏྟཱཀཱརོ, སོ ན ཧོཏཱིཏི ཨཉྙོ ཨནཏྟཱཀཱརོ, ཏཏོ ཨཉྙཏོ པསྶཏི. པརིཉྙཱཏཱབྷིནིཝེསོཏི ཏཱིརཎཔརིཉྙཱཡ པརིཙྪིཛྫ ཉཱཏམིཙྪཱབྷིནིཝེསོ. པརིཉྙཱཏཱབྷིནིཝེསོཏི ཝཱ པརིཉྙཱཏཝིཔསྶནཱབྷིནིཝེསོ. ཝིཔསྶནཱཏི ཨརཱུཔསཏྟཀཝསེན ཝིཔསྶནཱཡ པརིཛཱནིཏབྦཱ.

དུཏིཡཨཝིཛྫཱཔཧཱནསུཏྟཝཎྞནཱ ནིཊྛིཏཱ.

༨. སམྦཧུལབྷིཀྑུསུཏྟཝཎྞནཱ

༨༡. ཀེཝལནྟི ¶ ཨིཏརལཀྑཎེཧི ཨཝོམིསྶཾ.

༡༠. ཕགྒུནཔཉྷཱསུཏྟཝཎྞནཱ

༨༣. ཏཎྷཱཡ ¶ པཧཱིནཱཡ དིཊྛིམཱནཱཔི པཧཱིནཱ ཨེཝཱཏི ‘‘ཏཎྷཱཔཔཉྩསྶ ཚིནྣཏྟཱ ཚིནྣཔཔཉྩེ’’ཏི ཝུཏྟཾ. དུཏིཡཔདེཔི ཨེསེཝ ནཡོ. ཨིདྷ སཏྟཝོཧཱརོ ཙཀྑཱདཱིསུ ཝིཛྫམཱནེསུ ཨེཝ ཧོཏི, ཏསྨཱ པརིནིབྦུཏཱནཉྩ ཝོཧཱརོ ཙཀྑཱདཱིསུ སནྣིསྶཡེནེཝ, ནཱཉྙཐཱཏི ཨཏིཀྐནྟབུདྡྷེཧི པརིཧརིཏཱནི ཙཀྑུསོཏཱདཱིནི པུཙྪཱམཱིཏི པུཙྪཏི ‘‘ཨཏྠི ནུ ཁོ བྷནྟེ’’ཏིཨཱདིནཱ. ཙཀྑུསོཏཱདིཝཊྚཾ ཝཊྚེ པཝཏྟེཡྻ.

ཕགྒུནཔཉྷཱསུཏྟཝཎྞནཱ ནིཊྛིཏཱ.

གིལཱནཝགྒཝཎྞནཱ ནིཊྛིཏཱ.

༩. ཚནྣཝགྒོ

༡. པལོཀདྷམྨསུཏྟཝཎྞནཱ

༨༤. ཨནིཙྩལཀྑཎམེཝ ཀཐིཏཾ, ཏཉྩ པརིཡཱཡེན, ཨནིཙྩལཀྑཎེ ཀཐིཏེ ཨིཏརལཀྑཎཱནི ཀཐིཏཱནེཝ ཧོནྟི བྱབྷིཙཱརབྷཱཝཏོ.

༢. སུཉྙཏལོཀསུཏྟཝཎྞནཱ

༨༥. ཨཏྟནོ ཨིདནྟི ཨཏྟནིཡནྟི ཨཱཧ ‘‘ཨཏྟནོ སནྟཀེནཱ’’ཏི.

༣. སཾཁིཏྟདྷམྨསུཏྟཝཎྞནཱ

༨༦. ཝུཏྟནཡེནེཝ ཝེདིཏབྦནྟི ཁནྡྷིཡཝགྒེ ཁནྡྷཝསེན ཨཱགཏཾ, ཨིདྷ ཨཱཡཏནཝསེནཱཏི ཨཡམེཝ ཝིསེསོ.

༤. ཚནྣསུཏྟཝཎྞནཱ

༨༧. སབྦནིམིཏྟེཧི པཊིསལླཱིཡཏི ཨེཏེནཱཏི པཊིསལླཱནཾ, ཕལསམཱཔཏྟི. ཛཱིཝིཏཧཱརཀསཏྠཾ ¶ ཛཱིཝིཏསྶ ཧརཎཏོ, སཏྟཱནཉྩ སསནཏོ ཧིཾསནཏོ ¶ . པརིཙརིཏོཏི པཡིརུཔཱསིཏོ. ཏེན ཡཐཱནུསིཊྛཾ པཊིཔཛྫིནྟི དཱིཔེཏི.

ཨནུཔཝཛྫནྟི པརེཧི ན ཨུཔཝདིཏབྦཾ. ཏཾ པནེཏྠ ཨཱཡཏིཾ ཨཔྤཊིསནྡྷིབྷཱཝཏོ ཧོཏཱིཏི ཨཱཧ ‘‘ཨཔྤཝཏྟིཀ’’ནྟི. ‘‘ནེཏཾ མམཱ’’ཏིཨཱདཱིནི ཝདནྟོ ཨརཧཏྟེ པཀྑིཔིཏྭཱ ཀཐེསི. པུཐུཛྫནབྷཱཝམེཝ དཱིཔེནྟོ ཝདཏི ཨཀཏཀིཙྩབྷཱཝདཱིཔནེན. ཀིཉྩཱཔི ཐེརོ པུཙྪིཏཾ པཉྷཾ ཨརཧཏྟེ པཀྑིཔིཏྭཱ ཀཐེསི, ‘‘ན སམནུཔསྶཱམཱི’’ཏི པན ཝདནྟོ ཀིཉྩི ནིཔྥཏྟིཾ ན ཀཐེསི, ཏསྨཱ ‘‘ཨིདམྤི མནསི ཀཱཏབྦ’’ནྟི ཨིདཾ ཨཱནེཏྭཱ སམྦནྡྷོ.

ཀིལེསཔསྶདྡྷཱིཏི ཀིལེསཔརིལཱ༹ཧཝཱུཔསམོ. བྷཝཏྠཱཡ པུན བྷཝཏྠཱཡ. ཨཱལཡནིཀནྟི པརིཡུཊྛཱནེཏི བྷཝནྟརེ ཨཔེཀྑཱསཉྙིཏེ ཨཱལཡེ ནིཀནྟིཡཱ ཙ པརིཡུཊྛཱནཔྤཏྟིཡཱ. ཨསཏི ཨཝིཛྫམཱནཱཡ. པཊིསནྡྷིཝསེན ཨཉྙབྷཝཏོ ཨིདྷཱགམནཾ ཨཱགཏི ནཱམ. ཙུཏིཝསེན གམནནྟི ཙཝནཝསེན ཨིཏོ གཏི. ཨནུརཱུཔགམནཾ གཏི ནཱམ ཏདུབྷཡཾ ན ཧོཏི. ཙུཏཱུཔཔཱཏོ ཨཔརཱཔརབྷཝནཝསེན ཙུཏི, ཨུཔཔཛྫནཝསེན ཨུཔཔཱཏོ, ཏདུབྷཡམྤི ན ཧོཏི. ཨེཝཾ པན ཙུཏཱུཔཔཱཏེ ཨསཏི ནེཝིདྷ ན ཨིདྷ ལོཀེ. ན ཧུརཾ ན པརལོཀེ ཧོཏི. ཏཏོ ཨེཝ ན ཨུབྷཡཏྠ ཧོཏི. ཨཡམེཝ ཨནྟོ ཨཡཾ ཨིདྷལོཀེ པརལོཀེ ཙ ཨབྷཱཝོཡེཝ དུཀྑསྶ པརིཡོསཱནཾ. ཨཡམེཝཱཏི ཡཐཱཝུཏྟོ ཨེཝ – ཨེཏྠ ཨེཏསྨིཾ པཱཋེ པརམྤརཱགཏོ པམཱཎབྷཱུཏོ ཨཏྠོ.

ཡེ པནཱཏི སམྨཝཱདིནོ སནྡྷཱཡ ཝདཏི. ཨནྟརཱབྷཝཾ ཨིཙྪནྟི ‘‘ཨེཝཾ བྷཝེན བྷཝནྟརསམྦནྡྷོ ཡུཛྫེཡྻཱ’’ཏི. ནིརཏྠཀཾ ཨནྟརཱབྷཝསྶ ནཱམ ཀསྶཙི ཨབྷཱཝཏོ. ཙུཏིཀྑནྡྷཱནནྟརཉྷི པཊིསནྡྷིཀྑནྡྷཱནཾཡེཝ པཱཏུབྷཱཝོ. ཏེནཱཧ ‘‘ཨནྟརཱབྷཝསྶ…པེ… པཊིཀྑིཏྟོཡེཝཱ’’ཏི. ཏཏྠ བྷཱཝོཏི ཨཏྠིཏཱ. ཨབྷིདྷམྨེ ཀཐཱཝཏྠུཔྤཀརཎེ (ཀཐཱ. ༥༠༥-༥༠༧) པཊིཀྑིཏྟོཡེཝ. ཡདི ཨེཝཾ ‘‘ཨནྟརེནཱ’’ཏི ཨིདཾ ཀཐནྟི ཨཱཧ ‘‘ཨནྟརེནཱ’’ཏིཨཱདི. ཝིཀཔྤཏོ ཨཉྙཾ ཝིཀཔྤནྟརཾ, ཏསྶ དཱིཔནཾ ‘‘ཨནྟརེནཱ’’ཏི ཝཙནཾ. ན ཨནྟརཱབྷཝདཱིཔནཾ ཏཱདིསསྶ ཨནུཔལབྦྷནཏོ པཡོཛནཱབྷཱཝཏོ ཙ. ཡཏྠ ཧི ཝིཔཱཀཝིཉྙཱཎསྶ པཙྩཡོ, ཏཏྠསྶ ནིསྶཡབྷཱུཏསྶ ཝཏྠུསྶ སཧབྷཱཝཱིནཉྩ ¶ ཁནྡྷཱནཾ སམྦྷཝོཏི སདྡྷིཾ ཨཏྟནོ ནིསྶཡེན ཝིཉྙཱཎཾ ཨུཔྤཛྫཏེཝཱཏི ནཱསྶ ཨུཔྤཏྟིཡཱ དེསདཱུརཏཱ ཝེདིཏབྦཱ. ‘‘ནེཝ ཨིདྷ ན ཧུར’’ནྟི ཝུཏྟདྭཡཏོ ཨཔརཾ ཝིཀཔྤེན ‘‘ན ཨུབྷཡ’’ནྟི, ཏཏྠཔི ན ཧོཏིཡེཝཱཏི ཨདྷིཔྤཱཡོ. ‘‘ཨནྟརེནཱ’’ཏི ཝཱ ‘‘ཝིནཱ’’ཏི ཨིམིནཱ སམཱནཏྠོ ནིཔཱཏོ, ཏསྨཱ ནེཝིདྷ, ན ཧུརཾ, ཨུབྷཡཾ ཝིནཱཔི ནེཝཱཏི ཨཏྠོ.

ཨཱཧརཱིཏི ¶ ཚིནྣཝསེན གཎྷི. ཏེནཱཧ ‘‘ཀཎྛནཱལ༹ཾ ཚིནྡཱི’’ཏི. པརིགྒཎྷནྟོཏི སམྨསནྟོ. པརིནིབྦུཏོ དཱིགྷརཏྟཾ ཝིཔསྶནཱཡཾ ཡུཏྟཔཡུཏྟབྷཱཝཏོ. ‘‘ཨནུཔཝཛྫཾ ཚནྣེན བྷིཀྑུནཱ སཏྠཾ ཨཱཧརིཏ’’ནྟི, ཀཐེསཱིཏི ཨསེཀྑཀཱལེ བྱཱཀརཎཾ ཝིཡ ཀཏྭཱ ཀཐེསི.

ཨིམིནཱཏི ‘‘ཨུཔཝཛྫཀུལཱནཱི’’ཏི ཨིམིནཱ ཝཙནེན. ཐེརོཏི སཱརིཔུཏྟཏྠེརོ. ཨེཝནྟི ཨེཝཾ པུབྦཀཱལེསུ སཾསཊྛཝིཧཱརཱི ཧུཏྭཱ ཋིཏོ པཙྪཱ ཨརཧཏྟཾ པཱཔུཎིསྶཏཱིཏི ཨཱསངྐནྟོ པུཙྪཏི. སེསཾ ཨུཏྟཱནམེཝ.

ཚནྣསུཏྟཝཎྞནཱ ནིཊྛིཏཱ.

༥-༦. པུཎྞསུཏྟཱདིཝཎྞནཱ

༨༨-༨༩. ཏནྟི ཙཀྑུརཱུཔདྭཡཾ. ཏེནཱཧ ‘‘ཙཀྑུཉྩེཝ རཱུཔཉྩཱ’’ཏི. ནནྡིསམུདཡཱཏི ནནྡིཡཱ སམུདཡཏཎྷཱཡ སེསཀཱརཎེཧི ནནྡིཡཱ སམུདིཏི སམོདྷཱནཾ ནནྡིསམུདཡོ, ཏསྨཱ ནནྡིསམུདཡཱ. ཏེནཱཧ ‘‘ཏཎྷཱཡ སམོདྷཱནེནཱ’’ཏི. པཉྩཀྑནྡྷསངྑཱཏསྶ དུཀྑསྶ སམོདྷཱནེན སམུདིཏི པཝཏྟིཡེཝཱཏི སཧ སམུདཡེན དུཀྑསྶ དསྶིཏཏྟཱ ‘‘ཝཊྚཾ མཏྠཀཾ པཱཔེཏྭཱ’’ཏི ཝུཏྟཾ. ནིརོདྷཱུཔཱཡེན སདྡྷིཾ ནིརོདྷསྶ དསྶིཏཏྟཱ ‘‘ཝིཝཊྚཾ མཏྠཀཾ པཱཔེཏྭཱ’’ཏི. པུཙྪཱནུསནྡྷིཨཱདཱིསུ ཨཉྙཏརོ ན ཧོཏཱིཏི ཨཱཧ – ‘‘པཱཊིཡེཀྐོ ཨནུསནྡྷཱི’’ཏི.

ཙཎྜཱཏི ཀོདྷནཱ. དུཊྛཱཏི དོསཝནྟོཏི ཨཏྠོ. ཀིབྦིསཱཏི པཱཔཱ. ཀཀྑལཱ༹ཏི དཱརུཎཱ. གྷཊིཀམུགྒརེནཱཏི ཨེཀསྨིཾ པཀྑེ གྷཊིཀཾ དསྶེཏྭཱ ཀཏེན རསྶདཎྜེན. སཏྟཱནཾ སསནཏོ སཏྠཾ, ཏཏོ ཨེཝ ཛཱིཝིཏསྶ ཧརཎཏོ ཧཱརཀཉྩཱཏི སཏྠཧཱརཀཾ. ཨིནྡྲིཡསཾཝརོ ‘‘དམོ’’ཏི ཝུཏྟོ མནཙྪཊྛཱནཾ ཨིནྡྲིཡཱནཾ དམནཏོ. པཉྙཱ ‘‘དམོ’’ཏི ཝུཏྟཱ ཀིལེསཝིསེཝིཏཱནཾ དམནཏོ ཝཱུཔསམནཏོ. ཨུཔོསཐཀམྨཾ ‘‘དམོ’’ཏི ¶ ཝུཏྟཾ ཀཱཡདྭཱརཱདཱིཧི ཨུཔྤཛྫནཀཨསམསྶ དམནཏོ. ཁནྟི ‘‘དམོ’’ཏི ཝེདིཏབྦཱ ཨཀྑནྟིཡཱ དམནཏོ ཝཱུཔསམནཏོ. ཏེནཱཧ ‘‘ཨུཔསམོཏི ཏསྶེཝ ཝེཝཙན’’ནྟི.

ཨེཏྠཱཏི སུནཱཔརནྟཛནཔདེ. ཨེཏེ དྭེཏི ཨཡཾ པུཎྞཏྠེརོ ཏསྶ ཀནིཊྛོཏི ཨེཏེ དྭེ བྷཱཏརོ. ཨཱཧཙྩ ཨཊྛཱསི ཨུལཱ༹རཾ བུདྡྷཱརམྨཎཾ པཱིཏིཾ ཨུཔྤཱདེཏྭཱ. སཏྟ སཱིཧནཱདེ ནདིཏྭཱཏི མམྨཙྪེདཀཱནམྤི ཨཀྐོསཔརིབྷཱསཱནཾ ཁམནེ སནྟོསཱབྷཱཝདཱིཔནཾ, པཱཎིཔྤཧཱརསྶ, ལེཌྜུཔྤཧཱརསྶ, དཎྜཔྤཧཱརསྶ, སཏྠཔྤཧཱརསྶ, ཛཱིཝིཏཝོརོཔནསྶ, ཁམནེ སནྟོསཱབྷཱཝདཱིཔནཉྩཱཏི ¶ ཨེཝཾ སཏྟ སཱིཧནཱདེ ནདིཏྭཱ. ཙཏཱུསུ ཋཱནེསུ ཝསིཏཏྟཱ པཱལི༹ཡཾ ཝསནཊྛཱནཾ ཨནུདྡེསིཀཾ ཀཏྭཱ ‘‘སུནཱཔརནྟསྨིཾ ཛནཔདེ ཝིཧརཏི’’ཨིཙྩེཝ ཝུཏྟཾ.

ཙཏཱུསུ ཋཱནེསཱུཏི ཨབྦུཧཏྠཔབྦཏེ, སམུདྡགིརིཝིཧཱརེ, མཱཏུལགིརིམྷི, མཀུལ༹ཀཱརཱམཝིཧཱརེཏི ཨིམེསུ ཙཏཱུསུ ཋཱནེསུ. ཏནྟི ཙངྐམཾ ཨཱརུཡ྄ཧ ཀོཙི བྷིཀྑུ ཙངྐམིཏུཾ སམཏྠོ ནཏྠི མཧཏཱ སམུདྡཔརིསྶཡེན བྷཱཝནཱམནསིཀཱརསྶ ཨནབྷིསམྦྷུཎནཏོ. ཨུཔྤཱཏིཀནྟི ཨུཔྤཱཏཀརཾ མཧཱསངྑོབྷཾ ཨུཊྛཔེཏྭཱ. སམྨུཁེཏི ཨནིལཔདེསེ. པཊིཝེདེསུནྟི པཝེདེསུཾ.

ཨཱརདྡྷཀཱལཏོ པཊྛཱཡཱཏི མཎྜལམཱལ༹སྶ ཀཱཏུཾ པཐཝཱིམིཏཀཱལཏོ པབྷུཏི. སཙྩབནྡྷེན པཉྩསཏཱནི པརིཔཱུརེཏུཾ ‘‘ཨེཀཱུནཔཉྩསཏཱན’’ནྟི ཝུཏྟཾ. གནྡྷཀུཊིནྟི ཛེཏཝནམཧཱཝིཧཱརེ མཧཱགནྡྷཀུཊིཾ.

སཙྩབནྡྷནཱམོཏི སཙྩབནྡྷེ པབྦཏེ ཙིརནིཝཱསིཏཱཡ ‘‘སཙྩབནྡྷོ’’ཏྭེཝ ལདྡྷནཱམོ. ཨརཧཏྟཾ པཱཔུཎཱིཏི པཉྩཱབྷིཉྙཱཔརིཝཱརཾ ཨརཧཏྟཾ ཨདྷིགཙྪི. ཏེནཱཧ ‘‘མགྒེནེཝསྶ ཨབྷིཉྙཱ ཨཱགཏཱ’’ཏི.

ཏསྨིཾ སནྣིཔཏིཏཱ མཧཱཛནཱ ཀེཙི སོཏཱཔནྣཱ, ཀེཙི སཀདཱགཱམིནོ, ཀེཙི ཨནཱགཱམིནོ, ཀེཙི ཨརཧནྟོ ཨཧེསུཾ. ཏཏྠཱཔི ཀེཙི ཏེཝིཛྫཱ, ཀེཙི ཚལ༹བྷིཉྙཱ, ཀེཙི པཊིསམྦྷིདཔྤཏྟཱ ཨཧེསུཾ. ཏཾ སནྡྷཱཡ ཝུཏྟཾ ‘‘མཧཱཛནསྶ བནྡྷནམོཀྑོ ཛཱཏོ’’ཏི. ཡེ པན ཏཏྠ སརཎགམནཔཉྩསཱིལདསསཱིལསམཱདཱནེན ལདྡྷཱནུགྒཧཱ, ཏེསཾ དེཝཏཱནཉྩ ཝསེན ‘‘མཧནྟཾ བུདྡྷཀོལཱཧལཾ ཨཧོསཱི’’ཏི ཝུཏྟཾ.

ཨརུཎཾ ¶ པན མཧཱགནྡྷཀུཊིཡཾཡེཝ ཨུཊྛཔེསི དེཝཏཱནུགྒཧཏྠཉྩེཝ ཀུལཱནུདཡཱཡ ཙ. ཨཔཱཡམགྒེ ཨོཏཱརིཏོ ‘‘ཀོཙི ལོཀསྶ སཛིཏཱ ཨཏྠི, ཏསྶ ཝསེན པཝཏྟིསཾཧཱརཱ ཧོནྟི, ཏེནེཝཱཡཾ པཛཱ སནཱཐཱ ཧོཏི, ཏཾ ཡུཉྫཏི ཙ ཏསྨིཾ ཏསྨིཾ ཀམྨེ’’ཏི མིཙྪཱགཱཧེཧི. པརིཙརིཏབྦཾ ཡཱཙི ‘‘ཨེཏྠ མཡཱ ཙིརཾ ཝསིཏབྦ’’ནྟི.

ཚཊྛནྟི བཱཧིཡསུཏྟཾ. ཏཾ ཨུཏྟཱནམེཝ ཧེཊྛཱ ཝུཏྟནཡཏྟཱ.

པུཎྞསུཏྟཱདིཝཎྞནཱ ནིཊྛིཏཱ.

༧-༨. པཋམཨེཛཱསུཏྟཱདིཝཎྞནཱ

༩༠-༩༡. ཨེཛཏི ¶ ཚལཱ༹རམྨཎནིམིཏྟཾ ཀམྤཏཱིཏི ཨེཛཱ. ཏེནཱཧ ‘‘ཙལནཊྛེནཱ’’ཏི. ཨཱབཱདྷནཊྛེན པཱིལ༹ནཊྛེན. ཨནྟོ དོསནཊྛེནཱཏི ཨནྟོཙིཏྟེ ཨེཝ པདུསྶནཊྛེན. ནིཀནྟནཊྛེནཱཏི ཚིནྡནཊྛེན. ཧེཊྛཱ གཧིཏམེཝཱཏི ཧེཊྛཱ མཉྙིཏསམུགྒྷཱཏསཱརུཔྤསུཏྟེ ཨཱགཏམེཝ. ཝུཏྟནཡམེཝ མཉྙིཏསམུགྒྷཱཏསུཏྟེ.

པཋམཨེཛཱསུཏྟཱདིཝཎྞནཱ ནིཊྛིཏཱ.

༩-༡༠. པཋམདྭཡསུཏྟཱདིཝཎྞནཱ

༩༢-༩༣. དྭཡནྟི དུཀཾ. པཱལི༹ཡཾ ཨཱམེཌིཏལོཔེན ནིདྡེསོཏི ཨཱཧ ‘‘དྭེ དྭེ ཀོཊྛཱསེ’’ཏི. ཨེཝམེཏནྟི ཨེཝཾ ཨནིཙྩཱདིབྷཱཝེན ཨེཏཾ ཙཀྑུརཱུཔཉྩཱཏི དྭཡཾ. ཙལཏཱིཏི ཨནཝཊྛཱནེན པཙལཏི. བྱཐཏཱིཏི ཛརཱཡ མརཎེན ཙ པཝེདྷཏི. ཧེཏུ ཙེཝ ཨུཔྤཏྟིནིམིཏྟཏྟཱ. སཧགཏཱིཏི སཧཔྤཝཏྟི, ཏཱཡ གཧེཏབྦཏྟཱ ‘‘སངྒཏཱི’’ཏི ཕསྶོ ཝུཏྟོ. ཨེས ནཡོ སེསཔདདྭཡེཔི. ཡསྨཱ ཙ སཾགཙྪམཱནདྷམྨཝིམུཏྟཱ སངྒཏི ནཱམ ནཏྠི, ཏཐཱ སནྣིཔཱཏསམཝཱཡཱ, ཏེསཾ ཝསེན ནིབྦཏྟོ ཕསྶོ ཏཐཱ ཝུཙྩཏཱིཏི. ཏེནཱཧ ‘‘ཨིམིནཱ’’ཏིཨཱདི.

ཝཏྠཱུཏི ¶ ཙཀྑུ ནིསྶཡཔཙྩཡཱདིབྷཱཝེན. ཨཱརམྨཎནྟི རཱུཔཾ ཨཱརམྨཎཔཙྩཡཱདིབྷཱཝེན. སཧཛཱཏཱ ཏཡོ ཁནྡྷཱ ཝེདནཱདཡོ, ཏེ སཧཛཱཏཱདིཔཙྩཡབྷཱཝེན. ཨཡཾ ཧེཏཱུཏི ཨཡཾ ཏིཝིདྷོ ཧེཏཱུ. ཕསྶེནཱཏིཨཱདཱིསུ ཨཡཾ སངྑེཔཏྠོ – ཡསྨཱ རཱུཔཱརམྨཎེ ཕསྶེ ཨཏྟནོ ཕུསནཀིཙྩཾ ཀརོནྟེ ཨེཝཾ ཝེདནཱ ཨནུབྷཝནཀིཙྩཾ, སཉྙཱ སཉྫཱནནཀིཙྩཾ ཀརོཏི, ཏསྨཱ ‘‘ཕསྶེན ཕུཊྛམེཝཱ’’ཏིཨཱདིཝུཏྟམེཝ ཨཏྠཾ ཨིདཱནི པུགྒལཱདྷིཊྛཱནེན དསྶེཏུཾ ‘‘ཕུཊྛོ’’ཏིཨཱདི ཝུཏྟཾ. པཉྩེཝ ཁནྡྷཱ བྷགཝཏཱ སམཏིཾསཱཡ ཨཱཀཱརེཧི ཝུཏྟཱ. ཀསྨཱཏི ཨཱཧ ‘‘ཀཐ’’ནྟིཨཱདི. རུཀྑསཱཁཱསུ རུཀྑཝོཧཱརོ ཝིཡ ཨེཀེཀདྷམྨེཔི ཁནྡྷཝོཧཱརོ ཧོཏིཡེཝ. ཏེནཱཧ བྷགཝཱ – ‘‘ཝིཉྙཱཎཾ ཝིཉྙཱཎཀྑནྡྷོ’’ཏི (ཡམ. ཁནྡྷཡམཀ ༢).

པཋམདྭཡསུཏྟཱདིཝཎྞནཱ ནིཊྛིཏཱ.

ཚནྣཝགྒཝཎྞནཱ ནིཊྛིཏཱ.

༡༠. སལ༹ཝགྒོ

༡. ཨདནྟཨགུཏྟསུཏྟཝཎྞནཱ

༩༤. ཨདམིཏཱཏི ¶ དམཾ ནིབྦིསེཝནབྷཱཝཾ ཨནཱིཏཱ. ཨགོཔིཏཱཏི སཏིསངྑཱཏཱཡ ཝཏིཡཱ ན རཀྑིཏཱ. ཨཔིཧིཏཱཏི སཏིཀཝཱཊེན ན པིཧིཏཱ. ཙཏཱུཧིཔི པདེཧི ཨིནྡྲིཡཱནཾ ཨནཱཝརཎམེཝཱཧ. ཨདྷིཀཾ ཝཧནྟཱིཏི ཨདྷིཝཱཧཱ, དུཀྑསྶ ཨདྷིཝཱཧཱ དུཀྑཱདྷིཝཱཧཱ. ནིརཡེསུ ཨུཔྤཛྫནཀཾ ནེརཡིཀཾ. ཨཱདི-སདྡེན སེསཔཱལི༹ཾ སངྒཎྷཱཏི.

སལེ༹ཝཱཏི ཚ-ཀཱརསྶ ས-ཀཱརོ, ལ༹-ཀཱརོ པདསནྡྷིཀརོ. ཡཏྠཱཏི ནིམིཏྟཏྠེ བྷུམྨཾ. ཨནཝསྶུཏཱ ཨཏིནྟཱཏི རཱགེན ཨཏེམིཏཱ.

ཨསྶཱདིཏནྟི ཨསྶཱདཾ ཨིཏཾ ཨུཔགཏཾ. ཏེནཱཧ ‘‘ཨསྶཱདཝནྟ’’ནྟི. སུཁདུཀྑནྟི ཨིཊྛཱནིཊྛཾ. ཨནྭཡཏཱིཏི ཨནྭཡོ, ཧེཏུ. ཕསྶོཏི ཨནྭཡོ ཨེཏསྶཱཏི ཕསྶནྭཡནྟི ཨཱཧ – ‘‘ཕསྶཧེཏུཀ’’ནྟི. ‘‘ཨཝིརུདྡྷ’’ཨིཏི ཝིབྷཏྟིལོཔེན ནིདྡེསོ.

པཔཉྩསཉྙཱཏི ¶ ཏཎྷཱདིསམདྷཱུཔསཾཧཏསཉྙཱ. ཏེནཱཧ ‘‘ཀིལེསསཉྙཱཡ པཔཉྩསཉྙཱ ནཱམ ཧུཏྭཱ’’ཏི. པཔཉྩསཉྙཱ ཨེཏེསཾ ཨཏྠཱིཏི པཔཉྩསཉྙཱ, ཨིཏརཱིཏརཱ ནརཱ. པཔཉྩཡནྟཱཏི སཾསཱརེ པཔཉྩཾ ཙིརཱཡནཾ ཀརོནྟཱ. སཉྙིནོཏི གེཧསྶིཏསཉྙཱཡ སཉྙཱཝནྟོ. མནོམཡཾ ཝིཏཀྐནྟི ཀེཝལཾ མནསཱ སམྦྷཱཝིཏཾ མིཙྪཱཝིཏཀྐཾ. ཨིརཱིཡཏཱིཏི ཨིརིཡཾ པཊིཔཏྟིཾ ཨིརཱིཡཏི པཊིཔཛྫཏི.

སུཊྛུ བྷཱཝིཏོཏི སུཊྛུབྷཱཝཾ སུབྷཱཝནཾ ཨིཏོ བྷཱཝིཏབྷཱཝིཏོ. ཕུཊྛསྶ ཙིཏྟནྟི ཏེན ཡཐཱཝུཏྟཕསྶེན ཕུཊྛཾ ཨསྶ ཙིཏྟཾ. ན ཝིཀམྤཏེ ཀྭཙཱིཏི ཀིསྨིཉྩི ཨིཊྛཱནིཊྛཱརམྨཎེ ན ཀམྤཏི. པཱརགཱཏི པཱརགཱམིནོ བྷཝཐ.

ཨདནྟཨགུཏྟསུཏྟཝཎྞནཱ ནིཊྛིཏཱ.

༢. མཱལུཀྱཔུཏྟསུཏྟཝཎྞནཱ

༩༥. ཨཔསཱདེཏཱིཏི ¶ ཏཛྫེཏི. ཨུསྶཱདེཏཱིཏི ཨུཀྐཾསེཏི. ཨཡཾ ཀིར ཐེརོ མཱལུཀྱཔུཏྟོ. པམཛྫིཏྭཱཏི ཡོནིསོམནསིཀཱརསྶ ཨནནུཡུཛྫནེན པམཛྫིཏྭཱ.

ཡཏྲཱཏི པཙྩཏྟཾ ཝཙནཱལངྐཱརེ. ནཱམཱཏི ཨསམྦྷཱཝནེ ཨཔསཱདནཔཀྑེ, ཨུསྶཱདནཔཀྑེ པན སམྦྷཱཝནེ. ཀིཾ ཛཱཏནྟི ཀིཾ ཏེན མཧལླཀབྷཱཝེན ཛཱཏནྟི མཧལླཀབྷཱཝཾ ཏིཎཱཡཔི ཨམཉྙམཱནོ ཝདཏི. ཏེནཱཧ ‘‘ཡདི…པེ… ཨནུགྒཎྷནྟོ’’ཏི. ཨནུགྒཎྷནྟོཏི ཨཙིནྟེནྟོ. མཱདིསཱནཾ བྷགཝཏོ ཨོཝཱདོ ཨུཔཀཱརཱཝཧོཏི ཨེཏརཧི ཨོཝཱདཉྩ པསཾསནྟོ.

‘‘ཨདིཊྛཱ ཨདིཊྛཔུབྦཱ’’ཏིཨཱདིནཱ པརིཀཔྤཝསེན ཝུཏྟནིདསྶནཾ ‘‘ཡཐཱ ཨེཏེསུ ཚནྡཱདཡོ ན ཧོནྟི, ཨེཝམིཏརེསུཔི པརིཉྙཱཏེསཱུ’’ཏི ནཡཔཊིཔཛྫནཏྠཾ, ཏེསམྤི ཨིམེཧི སམཱནེཏབྦཏྟཱ. ཏེན ཝུཏྟཾ ‘‘སུཔིནཀཱུཔམཱ ཀཱམཱ’’ཏི (མ. ནི. ༡.༢༣༤; ༢.༤༦; པཱཙི. ༤༡༧; ཙཱུལ༹ཝ. ༦༥).

ཙཀྑུཝིཉྙཱཎེན དིཊྛེ དིཊྛམཏྟནྟི ཙཀྑུཝིཉྙཱཎསྶ རཱུཔཱཡཏནཾ ཡཏྟཀོ གཧཎཱཀཱརོ, ཏཏྟཀཾ. ཀིཏྟཀཾ པམཱཎནྟི ཨཏྟསཾཝེདིཡཾ པརསྶ ན ¶ དིསིཏབྦཾ, ཀཔྤནཱམཏྟཾ རཱུཔཾ. ཏེནཱཧ ‘‘ཙཀྑུཝིཉྙཱཎཾ ཧཱི’’ཏིཨཱདི. རཱུཔེཏི རཱུཔཱཡཏནེ. རཱུཔམཏྟམེཝཱཏི ནཱིལཱདིབྷེདཾ རཱུཔཱཡཏནམཏྟཾ, ན ནཱིལཱདི. ཝིསེསནིཝཏྟནཏྠོ ཧི ཨཡཾ མཏྟ-སདྡོ. ཡདི ཨེཝཾ, ཨེཝ-ཀཱརོ ཀིམཏྠིཡོ? ཙཀྑུཝིཉྙཱཎཉྷི རཱུཔཱཡཏནེ ལབྦྷམཱནམྤི ནཱིལཱདིཝིསེསཾ ‘‘ཨིདཾ ནཱིལཾ ནཱམ, ཨིདཾ པཱིཏཾ ནཱམཱ’’ཏི ན གཎྷཱཏི. ཀུཏོ ནིཙྩཱནིཙྩཱདིསབྷཱཝཏྠནྟི སཾཧིཏསྶཔི ནིཝཏྟནཏྠཾ ཨེཝཀཱརགྒཧཎཾ. ཏེནཱཧ ‘‘ན ནིཙྩཱདིསབྷཱཝ’’ནྟི. སེསཝིཉྙཱཎེཧིཔཱིཏི ཛཝནཝིཉྙཱཎེཧིཔི.

དིཊྛཾ ནཱམ ཙཀྑུཝིཉྙཱཎཾ རཱུཔཱཡཏནསྶ དསྶནནྟི ཀཏྭཱ. ཏེནཱཧ ‘‘རཱུཔེ རཱུཔཝིཛཱནན’’ནྟི. ཙཀྑུཝིཉྙཱཎམཏྟམེཝཱཏི ཡཏྟཀཾ ཙཀྑུཝིཉྙཱཎཾ རཱུཔཱཡཏནེ གཧཎམཏྟཾ, ཏཾམཏྟམེཝ མེ སབྦཾ ཙིཏྟཾ བྷཝིསྶཏཱིཏི ཨཏྠོ. ‘‘རཱགཱདིརཧེནཱ’’ཏི ཝཱ པཱཋོ. དིཊྛཾ ནཱམ པདཏྠཏོ ཙཀྑུཝིཉྙཱཎེན དིཊྛཾ རཱུཔཾ. ཏཏྠེཝཱཏི ཙཀྑུཝིཉྙཱཎེན དིཊྛམཏྟེ རཱུཔེ. ཙིཏྟཏྟཡཾ དིཊྛམཏྟཾ ནཱམ ཙཀྑུཝིཉྙཱཎཾ ཝིཡ རཱགཱདིཝིརཧེན པཝཏྟནཏོ. ཏེནཱཧ ‘‘ཡཐཱ ཏ’’ནྟི ཨཱདི.

མནོདྭཱརཱཝཛྫནེན ¶ ཝིཉྙཱཏཱརམྨཎཾ ཝིཉྙཱཏནྟི ཨདྷིཔྤེཏཾ རཱགཱདིཝིརཧེན ཝིཉྙེཡྻཏོ. ཏེནཱཧ ‘‘ཡཐཱ ཨཱཝཛྫནེནཱ’’ཏིཨཱདི.

ཏདཱཏི ཏསྨིཾ ཀཱལེ, ན ཏཏོ པཊྛཱཡཱཏི ཨཡམེཏྠ ཨཏྠོཏི དསྶེཏི. ‘‘དིཊྛམཏྟ’’ནྟིཨཱདིནཱ ཡེསཾ རཱགཱདཱིནཾ ནིཝཏྟནཾ ཨདྷིཔྤེཏཾ, ཏེ ‘‘ཏེནཱ’’ཏི ཨེཏྠ ཏ-སདྡེན པཙྩཱམསཱིཡནྟཱིཏི ‘‘ཏེན རཱགེན ཝཱ རཏྟོ’’ཏིཨཱདི ཝུཏྟཾ. ཏཏྠཱཏི ཝིསཡེ བྷུམྨཾ, ཝིསཡབྷཱཝོ ཙ ཝིསཡིནཱ སམྦནྡྷཝསེན ཨིཙྪིཏབྦོཏི ཝུཏྟཾ ‘‘པཊིབདྡྷོ’’ཏིཨཱདི.

སཏཱིཏི རཱུཔསྶ ཡཐཱསབྷཱཝསལླཀྑཎཱ སཏི མུཊྛཱ པིཡནིམིཏྟམནསིཀཱརེན ཨནུཔྤཛྫནཏོ ན དིསྶཏི ནཔྤཝཏྟཏི. ཨཛ྄ཛྷོསཱཏི ཨཛ྄ཛྷོསཱཡ. གིལིཏྭཱ པརིནིཊྛཔེཏྭཱ ཨཏྟནིཡཀརཎེན.

ཨབྷིཛ྄ཛྷཱ ཙ ཝིཧེསཱ ཙཱཏི ཀརཎཏྠེ པཙྩཏྟཝཙནནྟི ཨཱཧ – ‘‘ཨབྷིཛ྄ཛྷཱཡ ཙ ཝིཧེསཱཡ ཙཱ’’ཏི. ཨཏྠཝསེན ཝིབྷཏྟིཔརིཎཱམོཏི ཨཱཧ – ‘‘ཨབྷིཛ྄ཛྷཱཝིཧེསཱཧཱི’’ཏི. ཨཱཙིནནྟསྶཱཏི ཝཌྜྷེནྟསྶ. པཊིསྶཏོཏི པཏིསྶཏོ སབྦཏྠ སཏིཡཱ ཡུཏྟོ. སེཝཏོ ཙཱཔཱིཏི ཨེཏྠ ཙ-སདྡོ ཨཔི-སདྡོ ཙ ནིཔཱཏམཏྟནྟི ‘‘སེཝནྟསྶ’’ཨིཙྩེཝ ཨཏྠོ ཝུཏྟོ.

མཱལུཀྱཔུཏྟསུཏྟཝཎྞནཱ ནིཊྛིཏཱ.

༣. པརིཧཱནསུཏྟཝཎྞནཱ

༩༦. པརིཧཱནསབྷཱཝནྟི ¶ ཨནཝཛྫདྷམྨེཧི པརིཧཱཡནསབྷཱཝཾ. ཨབྷིབྷཝིཏཱནཱིཏི ཨབྷིབྷཱུཏཱནི ནིབྦིསེཝནབྷཱཝཱཀཱརེན. སརསངྐཔྤཱཏི ཏསྨིཾ ཏསྨིཾ ཝིསཡེ ཨནཝཊྛིཏབྷཱཝེན སངྐཔྤཱ. སཾཡོཛནིཡཱཏི སཾཡོཛེཏབྦཱ. སཾཡོཛནཱནཉྷི པུནཔྤུནཾ ཨུཔྤཏྟིཡཱ ཨོཀཱསཾ དེནྟོ ཀིལེསཛཱཏཾ ཨདྷིཝཱསེཏི ནཱམ. ཀིལེསོ ཨེཝ ཀིལེསཛཱཏཾ. ཨཱརམྨཎཾ པན ཙིཏྟེ ཀརོནྟོ ཨདྷིཝཱསེཏི ནཱམ. ཚནྡརཱགཔྤཧཱནེན ན པཛཧཏི ཨཱརམྨཎཾ, ཀིལེསཾ པན ཨནུཔྤཏྟིདྷམྨཏཱཔཱདནེན ཨེཝ. ཨབྷིབྷཝིཏཾ ཨཱཡཏནནྟི ཀཐིཏཾ ཨདྷིཝཱསནཱདིནཱ. ‘‘ཀཐཉྩ, བྷིཀྑཝེ, པརིཧཱནདྷམྨོ ཧོཏཱི’’ཏི དྷམྨཾ པུཙྪིཏྭཱ ཏཾ ཝིབྷཛནྟེན བྷགཝཏཱ ‘‘ཏཉྩེ བྷིཀྑུ ཨདྷིཝཱསེཏཱི’’ཏིཨཱདིནཱ པུགྒལེན པུགྒལཱདྷིཊྛཱནེན དྷམྨོ དསྶིཏོ.

པརིཧཱནསུཏྟཝཎྞནཱ ནིཊྛིཏཱ.

༤. པམཱདཝིཧཱརཱིསུཏྟཝཎྞནཱ

༩༧. ན ¶ པིདཧིཏྭཱ ཙཀྑུནྡྲིཡཾ ན པིདཧིཏྭཱ སཉྪཱདིཏྭཱ ཋིཏསྶ. བྱཱསིཉྩཏཱིཏི ཀིལེསེཧི ཝིསེསེན ཨཱསིཉྩཏི. ཀིལེསཏིནྟནྟི ཀིལེསེཧི ཨཝསྶུཏཾ. དུབྦལཔཱིཏི ཏརུཎཱ ན བལཔྤཏྟཱ. བལཝཔཱིཏི ཨུབྦེགཱ ཕརཎཔྤཏྟཱ ཙ པཱིཏི. དརཐཔྤསྶདྡྷཱིཏི ཀཱཡཙིཏྟདརཐཝཱུཔསམལཀྑཎཱ པསྶདྡྷི. ན ཨུཔྤཛྫནྟི པཙྩཡཔརམྤརཱཡ ཨསིདྡྷཏྟཱ. ‘‘ཀཐཉྩ, བྷིཀྑཝེ, པམཱདཝིཧཱརཱི ཧོཏཱི’’ཏིཨཱདིནཱ པུགྒལཾ པུཙྪིཏྭཱ ‘‘པཱམོཛྫཾ ན ཧོཏི, པཱམོཛྫཾ ཛཱཡཏཱི’’ཏིཨཱདིནཱ ཙ, དྷམྨེན ‘‘པམཱདཝིཧཱརཱི ཨཔྤམཱདཝིཧཱརཱི’’ཏི ཙ པུགྒལོ དསྶིཏོ.

པམཱདཝིཧཱརཱིསུཏྟཝཎྞནཱ ནིཊྛིཏཱ.

༥. སཾཝརསུཏྟཝཎྞནཱ

༩༨. ཨིདནྟི ‘‘ཀཐཉྩ, བྷིཀྑཝེ, ཨསཾཝརོ’’ཏི? ཨིདཾ ཝཙནཾ. པཧཱཏབྦདྷམྨཀྑཱནཝསེནཱཏི པཧཱཏབྦདྷམྨསྶེཝ ཀཐནཾ ཝུཏྟཾ. ‘‘ཀཐཉྩ, བྷིཀྑཝེ, ཨསཾཝརོ ¶ ཧོཏཱི’’ཏི དྷམྨཾ པུཙྪིཏྭཱ ‘‘སནྟི, བྷིཀྑཝེ, ཙཀྑུཝིཉྙེཡྻཱ རཱུཔཱ’’ཏིཨཱདིནཱ དྷམྨོཝ ཝིབྷཏྟོ.

སཾཝརསུཏྟཝཎྞནཱ ནིཊྛིཏཱ.

༦. སམཱདྷིསུཏྟཝཎྞནཱ

༩༩. ཙིཏྟེཀགྒཏཱཡཱཏི སམཐཝསེན ཙིཏྟེཀགྒཏཱཡ. པརིཧཱཡམཱནེཏི ཏསྶ ཨལཱབྷེན པརིཧཱཡམཱནེ. ཀམྨཊྛཱནནྟི ཝིཔསྶནཱཀམྨཊྛཱནཾ, སམཐམེཝ ཝཱ.

༧. པཊིསལླཱནསུཏྟཝཎྞནཱ

༡༠༠. ཀམྨཊྛཱནནྟི སམཐཝིཔསྶནཱཀམྨཊྛཱནཾ.

༨-༩. པཋམནཏུམྷཱཀཾསུཏྟཱདིཝཎྞནཱ

༡༠༡-༡༠༢. ཨུཔམཾ པརིཝཱརེཏྭཱཏི ཨུཔམཾ པརིཧརིཏྭཱ. སུདྡྷིཀཝསེནཱཏི ཨུཔམཱཡ ཝིནཱ ཀེཝལམེཝ.

༡༠. ཨུདཀསུཏྟཝཎྞནཱ

༡༠༣. ཨུདཀོཏི ¶ ཏསྶ ནཱམཾ. ཝེདཾ ཉཱཎཾ. སབྦཾ ཛིཏཝཱཏི སབྦཛི. ཨཝཁཏནྟི ནིཁཏཾ. ཨུཙྪཱདནདྷམྨོཏི ཨུཙྪཱདེཏབྦསབྷཱཝོ. པརིམདྡནདྷམྨོཏི པརིམདྡིཏབྦསབྷཱཝོ. པརིཧཏོཏི པརིཧརིཏོ. ཨོདནཀུམྨཱསཱུཔཙཡུཙྪཱདནཔརིམདྡནཔདེཧཱིཏི ཝཏྟབྦཾ. ཨུཙྪཱདནཾ ཝཱ པརིམདྡནམཏྟམེཝཱཏི ཀཏྭཱ ན གཧིཏཾ.

ཨུདཀསུཏྟཝཎྞནཱ ནིཊྛིཏཱ.

སལ༹ཝགྒཝཎྞནཱ ནིཊྛིཏཱ.

དུཏིཡོ པཎྞཱསཀོ.

༡༡. ཡོགཀྑེམིཝགྒོ

༡. ཡོགཀྑེམིསུཏྟཝཎྞནཱ

༡༠༤. ཙཏཱུཧི ¶ ཡོགེཧཱིཏི ཀཱམཡོགཱདཱིཧི ཙཏཱུཧི ཡོགེཧི. ཁེམིནོཏི ཁེམཝཏོ ཀུསལིནོ. ཀཱརཎབྷཱུཏནྟི ཀཏྟབྦཨུཔཱཡསྶ ཀཱརཎབྷཱུཏཾ. པརིཡཱཡཏི པཝཏྟིཾ ནིཝཏྟིཉྩ ཉཱཔེཏཱིཏི པརིཡཱཡོ, དྷམྨོ ཙ སོ པརིཡཏྟིདྷམྨཏྟཱ པརིཡཱཡོ ཙཱཏི དྷམྨཔརིཡཱཡོ, ཏཾ དྷམྨཔརིཡཱཡཾ. ཡསྨཱ པན སོ ཏསྶཱདྷིགམསྶ ཀཱརཎཾ ཧོཏི, ཏསྨཱ ཝུཏྟཾ ‘‘དྷམྨཀཱརཎ’’ནྟི. ཡུཏྟིནྟི སམཐཝིཔསྶནཱདྷམྨཱནཱིཏི ཝཱ ཙཏུསཙྩདྷམྨཱནཱིཏི ཝཱ. ‘‘ཏསྨཱ’’ཏི པདཾ ཨུདྡྷརིཏྭཱ – ‘‘ཀསྨཱ’’ཏི ཀཱརཎཾ པུཙྪནྟོ ‘‘ཀིཾ ཨཀྑཱཏཏྟཱ, ཨུདཱཧུ པཧཱིནཏྟཱ’’ཏི ཝིབྷཛིཏྭཱ པུཙྪི. ཡསྨཱ པན ཚནྡརཱགཔྤཧཱནཾ ཡོགཀྑེམིབྷཱཝསྶ ཀཱརཎཾ, ན ཀཐནཾ, ཏསྨཱ ‘‘པཧཱིནཏྟཱ’’ཏིཨཱདི ཝུཏྟཾ.

ཡོགཀྑེམིསུཏྟཝཎྞནཱ ནིཊྛིཏཱ.

༢-༡༠. ཨུཔཱདཱཡསུཏྟཱདིཝཎྞནཱ

༡༠༥-༡༡༣. ཝེདནཱསུཁདུཀྑནྟི ཝེདནཱསངྑཱཏཾ སུཁཉྩ དུཀྑཉྩ ཀཐིཏཾ. ‘‘ཨཛ྄ཛྷཏྟཾ སུཁཾ དུཀྑ’’ནྟི ཝུཏྟཏྟཱ ཝིམུཏྟིསུཁསྶ ཙ སལཱ༹ཡཏནདུཀྑསྶ ཙ ཀཐིཏཏྟཱ ཝིཝཊྚསུཁཾ ཙེཏྠ ཀཐིཏམེཝཱཏི ¶ སཀྐཱ ཝིཉྙཱཏུཾ. ཀཱམཾ ཁནྡྷིཡཝགྒེ ཁནྡྷཝསེན དེསནཱ ཨཱགཏཱ, ན ཨཱཡཏནཝསེན. ཨེཏྠ པན ཝཏྟབྦཾ ཨཏྠཛཱཏཾ ཁནྡྷིཡཝགྒེ ཝུཏྟནཡམེཝཱཏི.

ཨུཔཱདཱཡསུཏྟཱདིཝཎྞནཱ ནིཊྛིཏཱ.

ཡོགཀྑེམིཝགྒཝཎྞནཱ ནིཊྛིཏཱ.

༡༢. ལོཀཀཱམགུཎཝགྒོ

༡-༢. པཋམམཱརཔཱསསུཏྟཱདིཝཎྞནཱ

༡༡༤-༡༡༥. ཨཱཝསཏི ཨེཏྠ ཀིལེསམཱརོཏི ཨཱཝཱསོ. ཀཱམགུཎཨཛ྄ཛྷཏྟིཀབཱཧིརཱནི ཨཱཡཏནཱནི. ཀིལེསམཱརསྶ ཨཱཝཱསཾ གཏོ ¶ ཝསཾ གཏོ. ཏིཝིདྷསྶཱཏི པཔཉྩསཉྙཱསངྑཱཏསྶ ཏིཝིདྷསྶཔི མཱརསྶ. ཏཏོ ཨེཝ དེཝཔུཏྟམཱརསྶཔི ཝསཾ གཏོཏི སཀྐཱ ཝིཉྙཱཏུཾ.

པཋམམཱརཔཱསསུཏྟཱདིཝཎྞནཱ ནིཊྛིཏཱ.

༣. ལོཀནྟགམནསུཏྟཝཎྞནཱ

༡༡༦. ལོཀིཡནྟི ཨེཏྠ སཏྟཀཱཡབྷཱུཏགཱམཱདཱིཏི ལོཀོ, ཙཀྐཝཱལོ༹. སངྑཱརོ པན ལུཛྫནཔལུཛྫནཊྛེན ལོཀོ. ཨནྟནྟི ཨོསཱནཾ. སབྦཉྙུཏཉྙཱཎེན སཾསནྡིཏྭཱཏི སབྦཉྙུཏཉྙཱཎགཏིཡཱ སམཱནེཏྭཱ ཨཝིརོདྷེཏྭཱ. ཐོམེསྶཱམཱིཏི པསཾསིསྶཱམི.

ཨེཝཾསམྤཏྟིཀནྟི ཨེཝཾསམྤཛྫནཀཾ ཨེཝཾཔསྶིཏབྦཾ ཨིདཾ མམ ཨཛ྄ཛྷེསནཾ. ཏེནཱཧ ‘‘ཨཱིདིསནྟི ཨཏྠོ’’ཏི. ཛཱནཾ ཛཱནཱཏཱིཏི སབྦཉྙུཏཉྙཱཎེན ཛཱནིཏབྦཾ ཛཱནཱཏི ཨེཝ. ན ཧི པདེསཉྙཱཎེ ཋིཏོ ཛཱནིཏབྦཾ སབྦཾ ཛཱནཱཏི. ཨུཀྐཊྛནིདྡེསེན ཧི ཨཝིསེསགྒཧཎེན ཙ ‘‘ཛཱན’’ནྟི ཨིམིནཱ ནིརཝསེསཾ ཉེཡྻཛཱཏཾ པརིགྒཡ྄ཧཏཱིཏི ཏབྦིསཡཱཡ ཛཱནནཀིརིཡཱཡ སབྦཉྙུཏཉྙཱཎམེཝ ཀརཎཾ བྷཝིཏུཾ ཡུཏྟཾ. པཀརཎཝསེན ‘‘བྷགཝཱ’’ཏི པདསནྣིདྷཱནེན ཙ ཨཡམཏྠོ ཝིབྷཱཝེཏབྦོ. པསྶིཏབྦམེཝ པསྶཏཱིཏི དིབྦཙཀྑུ-པཉྙཱཙཀྑུ-དྷམྨཙཀྑུ-བུདྡྷཙཀྑུ-སམནྟཙཀྑུ-སངྑཱཏེཧི ཉཱཎཙཀྑཱུཧི པསྶིཏབྦཾ པསྶཏི ཨེཝ. ཨཐ ཝཱ ཛཱནཾ ཛཱནཱཏཱིཏི ཡཐཱ ཨཉྙེ ¶ སཝིཔལླཱསཱ ཀཱམརཱུཔཔརིཉྙཱཝཱདིནོ ཛཱནནྟཱཔི ཝིཔལླཱསཝསེན ཛཱནནྟི, ན ཨེཝཾ བྷགཝཱ. བྷགཝཱ པན པཧཱིནཝིཔལླཱསཏྟཱ ཛཱནནྟོ ཛཱནཱཏི ཨེཝ, དིཊྛིདསྶནསྶ ཨབྷཱཝཱ པསྶནྟོ པསྶཏི ཨེཝཱཏི ཨཏྠོ.

དསྶནཔརིཎཱཡཀཊྛེནཱཏི ཡཐཱ ཙཀྑུ སཏྟཱནཾ དསྶནཏྠཾ པརིཎེཏི སཱདྷེཏི, ཨེཝཾ ལོཀསྶ ཡཱཐཱཝདསྶནསཱདྷནཏོཔི དསྶནཀིཙྩཔརིཎཱཡཀཊྛེན ཙཀྑུབྷཱུཏོ, པཉྙཱཙཀྑུམཡཏྟཱ ཝཱ སཡམྦྷཱུཉཱཎེན པཉྙཱཙཀྑུཾ བྷཱུཏོ པཏྟོཏི ཝཱ ཙཀྑུབྷཱུཏོ. ཉཱཎབྷཱུཏོཏི ཨེཏསྶ ཙ ཨེཝམེཝ ཨཏྠོ དཊྛབྦོ. དྷམྨཱ ཝཱ བོདྷིཔཀྑིཡཱ, ཏེཧི ཨུཔྤནྣཏྟཱ ལོཀསྶ ཙ ཏདུཔྤཱདནཏོ ཨནཉྙསཱདྷཱརཎཾ ཝཱ དྷམྨཾ པཏྟོ ཨདྷིགཏོཏི དྷམྨབྷཱུཏོ. ‘‘བྲཧྨཱ’’ཝུཙྩཏི སེཊྛཊྛེན མགྒཉཱཎཾ, ཏེན ཨུཔྤནྣཏྟཱ ལོཀསྶ ¶ ཙ ཏདུཔྤཱདནཏོ ཏཉྩ སཡམྦྷཱུཉཱཎེན པཏྟོཏི བྲཧྨབྷཱུཏོ. ཙཏུསཙྩདྷམྨཾ ཝདཏཱིཏི ཝཏྟཱ. ཙིརཾ སཙྩཔཊིཝེདྷཾ པཝཏྟེནྟོ ཝདཏཱིཏི པཝཏྟཱ. ཨཏྠཾ ནཱིཧརིཏྭཱཏི དུཀྑཱདིཨཏྠཾ ཨུདྡྷརིཏྭཱ. པརམཏྠཾ ཝཱ ནིབྦཱནཾ པཱཔཡིཏཱ. ཨམཏསཙྪིཀིརིཡཾ སཏྟེསུ ཨུཔྤཱདེནྟོ ཨམཏཾ དདཱཏཱིཏི ཨམཏསྶ དཱཏཱ. བོདྷིཔཀྑིཡདྷམྨཱནཾ ཏདཱཡཏྟབྷཱཝཏོ དྷམྨསྶཱམཱི. པུནཔྤུནཾ ཡཱཙཱཔེནྟོ བྷཱརིཡཾ ཀརོནྟོ གརུཾ ཀརོཏི ནཱམ, ཏཐཱ དུཝིཉྙེཡྻཾ ཀཏྭཱ ཀཐེནྟོཔི.

ཙཀྑུནཱ ཝིཛྫམཱནེན ལོཀསཉྙཱི ཧོཏི, ན ཏསྨིཾ ཨསཏི. ན ཧི ཨཛ྄ཛྷཏྟིཀཱཡཏནཝིརཧེན ལོཀསམཉྙཱ ཨཏྠི. ཏེནཱཧ ‘‘ཙཀྑུཉྷི ལོཀོ’’ཏིཨཱདི. ཨཔྤཧཱིནདིཊྛཱིཏི ཨསམཱུཧཏསཀྐཱཡདིཊྛིཀོ གྷནཝིནིབྦྷོགཾ ཀཱཏུཾ ཨསཀྐོནྟོ སམུདཱཡཾ ཝིཡ ཨཝཡཝཾ ‘‘ལོཀོ’’ཏི སཉྫཱནཱཏི ཙེཝ མཉྙཏི ཙ. ཏཐཱཏི ཨིམིནཱ ‘‘ལོཀོཏི སཉྫཱནཱཏི ཙེཝ མཉྙཏི ཙཱ’’ཏི པདཏྟཡཾ ཨཱཀཌྜྷཏི. ཏསྶཱཏི པུཐུཛྫནསྶ, ཙཀྐཝཱལ༹ལོཀསྶ ཝཱ. ཙཀྑཱདིམེཝ ཧི སཧོཀཱསེན ‘‘ཙཀྐཝཱལོ༹’’ཏི པུཐུཛྫནོ སཉྫཱནཱཏི. གམནེནཱཏི པདསཱ གམནེན. ན སཀྐཱ ཏེསཾ ཨནནྟཏྟཱ. ལུཛྫནཊྛེནཱཏི ཨབྷིསངྑཱརལོཀཝསེན ལོཀསྶ ཨནྟཾ དསྶེཏུཾ ཝུཏྟཾ. ཏསྶ ཨནྟོ ནཱམ ནིབྦཱནཾ. ཏཾ པཏྟུཾ སཀྐཱ སམྨཱཔཊིཔཏྟིཡཱ པཏྟབྦཏྟཱ. ཙཀྐཝཱལ༹ལོཀསྶ པན ཨནྟོ ནཱམ, ནཏྠི ཏསྶ གམནེན ཨཔྤཏྟབྦཏྟཱ.

ཨིམེཧི པདེཧཱིཏི ཨིམེཧི ཝཱཀྱཝིབྷཱགེཧི པདེཧི. ཏཱནི པན ཨཀྑརསམུདཱཡལཀྑཎཱནཱིཏི ཨཱཧ ‘‘ཨཀྑརསམྤིཎྜནེཧཱི’’ཏི. པཱཊིཡེཀྐཨཀྑརེཧཱིཏི ཏསྨིཾ ཏསྨིཾ པདེ པཊིནིཡཏསནྣིཝེསེཧི ཝིསུཾ ཝིསུཾ ཙིཏྟེན གཡ྄ཧམཱནེཧི ཨཀྑརེཧཱིཏི ཨཏྠོ.

གམནཊྛེན ‘‘པཎྜཱ’’ ཝུཙྩཏི པཉྙཱ, ཏཱཡ ཨིཏོ གཏོ པཏྟོཏི པཎྜིཏོ, པཉྙཝཱ. མཧཱཔཉྙཏཱ ¶ ནཱམ པཊིསམྦྷིདཱཝསེན ཝེདིཏབྦཱཏི ཨཱཧ ‘‘མཧནྟེ ཨཏྠེ’’ཏིཨཱདི. ཡཐཱ ཏནྟི ཨེཏྠ ཏནྟི ནིཔཱཏམཏྟཾ པཋམཝིཀཔྤེ, དུཏིཡཝིཀཔྤེ པན པཙྩཱམསནནྟི ཨཱཧ ‘‘ཏཾ བྱཱཀཏ’’ནྟི.

ལོཀནྟགམནསུཏྟཝཎྞནཱ ནིཊྛིཏཱ.

༤. ཀཱམགུཎསུཏྟཝཎྞནཱ

༡༡༧. ཙེཏསོཏི ¶ ཀརཎེ སཱམིཝཙནཾ. ཙིཏྟེན སཾཕུསནཾ ནཱམ ཨནུབྷཝོཏི ཨཱཧ ‘‘ཙིཏྟེན ཨནུབྷཱུཏཔུབྦཱ’’ཏི. ཨུཏུཏྟཡཱནུརཱུཔཏཱཝསེན པཱསཱདཏྟཡཾ, ཏཾ ཝསེན ཏིཝིདྷནཱཊཀབྷེདོ. མནོརམྨཏཱམཏྟེན ཀཱམགུཎཾ ཀཏྭཱ དསྶིཏཾ, ན ཀཱམཝསེན. ན ཧི ཨབྷིནིཀྑམནཏོ ཨུདྡྷཾ བོདྷིསཏྟསྶ ཀཱམཝིཏཀྐཱ བྷཱུཏཔུབྦཱ. ཏེནཱཧ མཱརོ པཱཔིམཱ –

‘‘སཏྟ ཝསྶཱནི བྷགཝནྟཾ, ཨནུབནྡྷིཾ པདཱཔདཾ;

ཨོཏཱརཾ ནཱདྷིགཙྪིསྶཾ, སམྦུདྡྷསྶ སཏཱིམཏོ’’ཏི. (སུ. ནི. ༤༤༨);

མེཏྟེཡྻོ ནཱམཱཏིཨཱདི ཨནཱགཏཱརམྨཎདསྶནམཏྟཾ, ན བོདྷིསཏྟསྶ ཨེཝཾ ཨུཔྤཛྫཏཱིཏི. ཨཏྟཱ པིཡཱཡིཏབྦརཱུཔོ ཨེཏསྶཱཏི ཨཏྟརཱུཔོ, ཨུཏྟརཔདེ པུརིམཔདལོཔེནཱཏི ‘‘ཨཏྟནོ ཧིཏཀཱམཛཱཏིཀེནཱ’’ཏི ཨཏྠོ ཝུཏྟོ. ཨཏྟརཱུཔེནཱཏི ཝཱ པཱིཏིསོམནསྶེཧི གཧིཏསབྷཱཝེན ཏུཊྛཔཧཊྛེན ཨུདགྒུདགྒེན. ཨཔྤམཱདོཏི ཨཔྤམཛྫནཾ ཀུསལདྷམྨེསུ ཨཁཎྜཀཱརིཏཱཏི ཨཱཧ ‘‘སཱཏཙྩཀིརིཡཱ’’ཏི. ཨཝོསྶགྒོཏི ཙིཏྟསྶ ཀཱམགུཎེསུ ཨཝོསྶཛྫནཾ པཀྑནྡིཏུཾ ཨཔྤདཱནཾ. པུརིམོ ཝིཀཔྤོ ཀུསལཱནཾ དྷམྨཱནཾ ཀརཎཝསེན དསྶིཏོ, པཙྪིམོ ཨཀུསལཱནཾ ཨཀརཎཝསེན. དྭེ དྷམྨཱཏི ཨཔྤམཱདོ སཏཱིཏི དྭེ དྷམྨཱ. ཨཔྤམཱདོ སཏི ཙ ཏཐཱ པཝཏྟཱ ཙཏྟཱརོ ཀུསལདྷམྨཀྑནྡྷཱ ཝེདིཏབྦཱ. ཀཏྟབྦཱཏི པཝཏྟེཏབྦཱ.

ཏསྨིཾ ཨཱཡཏནེཏི ཏསྨིཾ ནིབྦཱནསཉྙིཏེ ཀཱརཎེ པཊིཝེདྷེ. ཏཾ ཀཱརཎནྟི ཚནྣཾ ཨཱཡཏནཱནཾ ཀཱརཎཾ. སལཱ༹ཡཏནཾ ནིརུཛ྄ཛྷཏི ཨེཏྠཱཏི སལཱ༹ཡཏནནིརོདྷོ ཝུཙྩཏི ནིབྦཱནཾ. ཏེནཱཧ ‘‘ནིབྦཱནཾ. ཏཾ སནྡྷཱཡཱ’’ཏིཨཱདི. ནིབྦཱནསྨིནྟི ནིབྦཱནམྷི.

ཀཱམགུཎསུཏྟཝཎྞནཱ ནིཊྛིཏཱ.

༥-༦. སཀྐཔཉྷསུཏྟཱདིཝཎྞནཱ

༡༡༨-༡༡༩. དིཊྛེཏི ¶ པཙྩཀྑབྷཱུཏེ. དྷམྨེཏི ཨུཔཱདཱནཀྑནྡྷདྷམྨེ. ཏཏྠ ཧི ཨཏྟཱཏི བྷཝཏི སཉྙཱ དིཊྛི ཙཱཏི ཨཏྟབྷཱཝསཉྙཱ. ཏེནཱཧ – ‘‘དིཊྛེཝ ¶ དྷམྨེཏི ཨིམསྨིཾཡེཝ ཨཏྟབྷཱཝེ’’ཏི. ‘‘ཏནྣིསྶིཏ’’ནྟི ཨེཏྠ ཏཾ-སདྡེན ཧེཊྛཱ ཨབྷིནནྡནཱདིཔརིཡཱཡེན ཝུཏྟཱ ཏཎྷཱ པཙྩཱམཊྛཱཏི ཨཱཧ – ‘‘ཏཎྷཱནིསྶིཏ’’ནྟི. ཏཾ ཨུཔཱདཱནཾ ཨེཏསྶཱཏི ཏདུཔཱདཱནཾ. ཏེནཱཧ – ‘‘ཏཾགཧཎ’’ནྟིཨཱདི. ཏཎྷུཔཱདཱནསངྑཱཏཾ གཧཎཾ ཨེཏསྶཱཏི ཏཾགཧཎཾ. ཚཊྛཾ ཨུཏྟཱནམེཝ པཉྩམེ ཝུཏྟནཡཏྟཱ.

སཀྐཔཉྷསུཏྟཱདིཝཎྞནཱ ནིཊྛིཏཱ.

༧. སཱརིཔུཏྟསདྡྷིཝིཧཱརིཀསུཏྟཝཎྞནཱ

༡༢༠. གྷཊེསྶཏཱིཏི པུབྦེནཱཔརཾ གྷཊིཏཾ སམྦནྡྷཾ ཀརིསྶཏི. ཝིཙྪེདནྟི བྲཧྨཙརིཡསྶ ཝིརོདྷིཔཙྩཡསམུཔྤཏྟིཡཱ ཨུཙྪེདཾ.

༨. རཱཧུལོཝཱདསུཏྟཝཎྞནཱ

༡༢༡. ཡེ དྷམྨཱ སམྨདེཝ བྷཱཝིཏཱ བཧུལཱིཀཏཱ ཝིམུཏྟིཡཱ ཨརཧཏྟསྶ སཙྪིཀིརིཡཱཡ སཾཝཏྟནྟི, ཏེ སདྡྷཱདཡོ སམྦྷཱརཱ ཝིམུཏྟིཔརིཔཱཙནིཡཱཏི ཨདྷིཔྤེཏཱ. པརིཔཱཙེནྟཱིཏི པརིཔཱཀཾ པརིཎཱམཾ གམེནྟི. དྷམྨཱཏི ཀཱརཎབྷཱུཏཱ དྷམྨཱ. ཝིསུདྡྷིཀཱརཎཝསེནཱཏི ཝིསུདྡྷིཀཱརཎཏཱཝསེན, སཱ པན སདྡྷིནྡྲིཡཱདཱིནཾ ཀཱརཎཏོ ཝིསུདྡྷི. ཡཐཱ ནཱམ ཛཱཏིསམྤནྣསྶ ཁཏྟིཡཀུམཱརསྶ ཝིཔཀྑཝིགམེན པཀྑསངྒཧེན པཝཏྟིཊྛཱནསམྤཏྟིཡཱ ཙ པརིསུདྡྷི ཧོཏི, ཨེཝམེཝཾ དཊྛབྦཱཏི དསྶེནྟོ ‘‘ཝུཏྟཾ ཧེཏ’’ནྟིཨཱདིམཱཧ.

ཨསྶདྡྷཱདཡོཔི པུགྒལཱ སདྡྷཱདཱིནཾ ཡཱཝདེཝ པརིཧཱནཱཡ ཧོནྟི, སདྡྷཱདཡོ པཱརིཔཱུརིཡཱཝ, ཏཐཱ པསཱདནིཡསུཏྟནྟཱདིཔཙྩཝེཀྑཎཱ, པསཱདནིཡསུཏྟནྟཱ ནཱམ སམྤསཱདནཱིཡསུཏྟཱདཡོ. སམྨཔྤདྷཱནེཏི སམྨཔྤདྷཱནསུཏྟནྟེ. སཏིཔཊྛཱནེཏི ཙཏྟཱརོ སཏིཔཊྛཱནེ. ཛྷཱནཝིམོཀྑེཏི ཛྷཱནཱནི ཙེཝ ཝིམོཀྑེ ཙ ཨུདྡིསྶ པཝཏྟསུཏྟནྟེ. གམྦྷཱིརཉཱཎཙརིཡེཏི ཁནྡྷཱཡཏནདྷཱཏུཔཊིཙྩསམུཔྤཱདཔཊིསཾཡུཏྟསུཏྟནྟེ.

ཀལྱཱཎམིཏྟཏཱདཡོཏི ཀལྱཱཎམིཏྟཏཱ སཱིལསཾཝརོ ཨབྷིསལླེཁཀཐཱ ཝཱིརིཡཱརམྦྷོ ནིབྦེདྷིཀཔཉྙཱཏི ¶ ཨིམེ ཀལྱཱཎམིཏྟཱདཡོ པཉྩ དྷམྨཱ, ཡེ ‘‘ཨིདྷ, མེགྷིཡ, བྷིཀྑུ ཀལྱཱཎམིཏྟོ ཧོཏཱི’’ཏིཨཱདིནཱ ཨུདཱནེ ¶ (ཨུདཱ. ༣༡) ཀཐིཏཱ. ལོཀཾ ཝོལོཀེནྟསྶཱཏི ཨཱཡསྨཏོ རཱཧུལསྶ ཏཱསཉྩ དེཝཏཱནཾ ཨིནྡྲིཡཔརིཔཱཀཾ པསྶནྟསྶ. ཏཏོ ཡེན ཨནྡྷཝནཾ, ཏཏྠ དིཝཱཝིཧཱརཱཡ མཧཱསམཱགམོ བྷཝིསྶཏཱིཏི. ཏཐཱ ཧི ཝཀྑཏི ‘‘ཨེཏྟཀཱཏི གཎནཱཝསེན པརིཙྪེདོ ནཏྠཱི’’ཏི.

རུཀྑཔབྦཏནིསྶིཏཱ བྷཱུམཊྛཀཱ, ཨཱཀཱསཙཱརིཝིམཱནཝཱསིནོ ཨནྟལིཀྑཊྛཀཱ. དྷམྨཙཀྑུནྟི ཝེདིཏབྦཱནི ཙཏུསཙྩདྷམྨཱནཾ དསྶནཊྛེན.

རཱཧུལོཝཱདསུཏྟཝཎྞནཱ ནིཊྛིཏཱ.

ལོཀཀཱམགུཎཝགྒཝཎྞནཱ ནིཊྛིཏཱ.

༡༣. གཧཔཏིཝགྒོ

༡-༣. ཝེསཱལཱིསུཏྟཱདིཝཎྞནཱ

༡༢༤-༡༢༦. དྭཱིསཱུཏི ཨིམསྨིཾ གཧཔཏིཝགྒེ པཋམདུཏིཡེསུ ཏཏིཡེ ཙ ཝུཏྟཏྠམེཝ པཱཋཛཱཏཾ ཨཔུབྦཾ ནཏྠཱིཏི ཨཏྠོ.

༤-༥. བྷཱརདྭཱཛསུཏྟཱདིཝཎྞནཱ

༡༢༧-༡༢༨. ཀཱམཾ ཨཉྙེཔི པབྦཛིཏཱ ཡུཏྟཀཱལེ པིཎྜཾ ཨུལམཱནཱ ཙརནྟིཡེཝ, ཨཡཾ པན ཨོདརིཏོ, ཏེནེཝ ཀཱརཎེན པབྦཛིཏོཏི དསྶེནྟོ ‘‘པིཎྜཾ ཨུལམཱནོ’’ཏིཨཱདིམཱཧ. གྷཾསནྟོཝཱཏི བྷཱུམིཡཾ གྷཾསནྟོ ཨེཝ པཏྟཾ ཋཔེཏི. པརིཀྑཱིཎནྟི སམནྟཏོ པརིཀྑཱིཎཾ. ནཱལི༹ཀོ …པེ… ཛཱཏཾ, ཨཏིརེཀཔཏྟཊྛཔནསྶ པཊིཀྑིཏྟཏྟཱ ཨཉྙཾ ན གཎྷཱཏི. ‘‘ཨིནྡྲིཡབྷཱཝནནྟི ཙཀྑཱདིཔཉྩིནྡྲིཡབྷཱཝན’’ནྟི ཀེཙི ཝདནྟི, ཏཐཱ ཝིཔསྶནཱབྷིནིཝེསཾ ཀཏྭཱ ཨུཔརིཝིཔསྶནཾ ཝཌྜྷིཏྭཱཏི ཨདྷིཔྤཱཡོ. ཨཔརེ པན ‘‘སདྡྷཱཔཉྩམཱནཾ ཨིནྡྲིཡཱནཾ ཝསེན ཝིཔསྶནཱབྷིནིཝེསཾ ཀཏྭཱ ཏེན སུཁེན ཨབྷིཉྙཱཔཧཱནཱནཾ སམྤཱདནཝསེན ཨིནྡྲིཡཾ བྷཱཝེཏྭཱ’’ཏི ཝདནྟི.

ཨུཔསངྐམཏཱིཏི ¶ ¶ ཨེཏྠ ཡཐཱ སོ རཱཛཱ ཨུཔསངྐམི, ཏཾ ཨཱགམནཏོ པཊྛཱཡ དསྶེཏུཾ ‘‘ཐེརོ ཀིརཱ’’ཏིཨཱདི ཨཱརདྡྷཾ. མཧཱཔཱནཾ ནཱམ ཨཉྙཾ ཀམྨཾ ཨཀཏྭཱ པཱནཔསུཏོ ཧུཏྭཱ སཏྟཱཧཾ ཏདནུརཱུཔཔརིཛནསྶ སུརཱཔིཝནཾ. ཏེནཱཧ ‘‘མཧཱཔཱནཾ ནཱམ པིཝིཏྭཱ’’ཏི. སཱལིཐུསེཧཱིཏི རཏྟསཱལིཐུསེཧི. ཌཡ྄ཧམཱནཾ ཝིཡ ཀིཔིལླིཀདཾསནཛཱཏཱཧི དུཀྑཝེདནཱཧི. མུཁསཏྟཱིཧི ཝིཛ྄ཛྷིཾསུ ཝལླབྷཏཱཡ. ཨིཏྠིལོལོ ཧི སོ རཱཛཱ.

པཝེཎིནྟི ཏེསཾ སམཱདཱནཔཝེཎིཾ བྲཧྨཙརིཡཔབནྡྷཾ. པཊིཔཱདེནྟཱིཏི སམྤཱདེནྟི. གརུཀཱརམྨཎནྟི གརུཀཱཏབྦཨཱརམྨཎཾ, ཨཝཱིཏིཀྐམིཏབྦཱརམྨཎནྟི ཨཏྠོ. ཨསྶཱཏི རཉྙོ. ཙིཏྟཾ ཨནོཏརནྟནྟི པསཱདཝཱིཐིཾ ཨནོཏརནྟཾ ཨནུཔགཙྪནྟཾ. ཝིཧེཋེཏུནྟི ཝིབཱདྷིཏུཾ.

ལོབྷསྶ ཨཔརཱཔརུཔྤཏྟིཡཱ བཧུཝཙནཝསེན ‘‘ལོབྷདྷམྨཱ’’ཏི ཝུཏྟཾ. ཨུཔྤཛྫནྟཱིཏིཔི ཨཏྠོ ཡེཝ, ཡསྨཱ ཨུཔྤཛྫམཱནོ ལོབྷདྷམྨོ ཨཏྟནོ ཧེཏུཔཙྩཡེ པརིགྒཧཱཔེནྟོ ཛཱནཱཔེནྟོ ཝིཡ སཧཏི པཝཏྟཏཱིཏི. ཨིམམེཝ ཀཱཡནྟི ཨེཏྠ སམཱུཧཏྠེ ཨེཝ ཀཱཡ-སདྡོ གབྦྷཱསཡཱདིཊྛཱནེསུ ཨུཔྤཛྫནདྷམྨསམཱུཧཝིསཡཏྟཱ, ཨིཏརེ པན ཀཱཡཱུཔལཀྑིཏཏཱཡ ‘‘ཀཱཡོ’’ཏི ཝེདིཏབྦཱ. ཨུཏྟཱནམེཝ ཧེཊྛཱ ཝུཏྟནཡཏྟཱ.

བྷཱརདྭཱཛསུཏྟཱདིཝཎྞནཱ ནིཊྛིཏཱ.

༦. གྷོསིཏསུཏྟཝཎྞནཱ

༡༢༩. རཱུཔཱ ཙ མནཱཔཱཏི ནཱིལཱདིབྷེདཱ རཱུཔདྷམྨཱ ཙ མནསཱ མནུཉྙཱ པིཡརཱུཔཱ སཾཝིཛྫནྟི, ཨིདཉྩ སུཁཝེདནཱིཡསྶ ཕསྶསྶ སབྷཱཝདསྶནཏྠཾ. ཨེཝཾ ‘‘རཱུཔཱ ཙ མནཱཔཱ ཨུཔེཀྑཱཝེདནིཡཱ’’ཏི ཨེཏྠཱཔི ཡཐཱརཧཾ ཝཏྟབྦཾ. ཙཀྑུཝིཉྙཱཎ…པེ… ཕསྶནྟི ཝུཏྟཾ. ཨུཔནིསྶཡཀོཊིཡཱ ཧི ཙཀྑུཝིཉྙཱཎསམྤཡུཏྟཕསྶོ སུཁཝེདནཱིཡོ, ན སཧཛཱཏཀོཊིཡཱ. ཏེནཱཧ – ‘‘ཨེཀཾ ཕསྶཾ པཊིཙྩ ཛཝནཝསེན སུཁཝེདནཱ ཨུཔྤཛྫཏཱི’’ཏི. སེསཔདེསཱུཏི ‘‘སཾཝིཛྫཏི ཁོ, གཧཔཏི, སོཏདྷཱཏཱུ’’ཏི ཨཱགཏེསུ པཉྩསུ ཀོཊྛཱསེསུ.

ཏེཝཱིསཏི ¶ དྷཱཏུཡོ ཀཐིཏཱ ཚནྣཾ དྭཱརཱནཾ ཝསེན ཝིབྷཛྫགཧཎེན. ཝཏྠུནིསྶིཏནྟི ཧདཡཝཏྠུནིསྶིཏཾ. པཉྩདྭཱརེ ཝཱིསཏི, མནོདྭཱརེ ཏིསྶོ ཨེཝཾ ཏེཝཱིསཏི.

གྷོསིཏསུཏྟཝཎྞནཱ ནིཊྛིཏཱ.

༧-༨. ཧཱལིདྡིཀཱནིསུཏྟཱདིཝཎྞནཱ

༡༣༠-༡༣༡. ཏཾ ¶ ཨིཏྠེཏནྟི ཙཀྑུནཱ ཡཾ རཱུཔཾ དིཊྛཾ, ཏཾ ཨིཏྠནྟི ཨཏྠོ. ཏཾ སུཁཝེདནིཡནྟི ཏཾ སུཁཝེདནཱཡ ཨུཔནིསྶཡཀོཊིཡཱ པཙྩཡབྷཱུཏཾ ཙཀྑུཝིཉྙཱཎཉྩེཝ, ཡོ ཙ ཡཐཱརཧཾ ཨུཔནིསྶཡཀོཊིཡཱ ཝཱ, ཨནནྟརོ ཙེ ཨནནྟརཀོཊིཡཱ ཝཱ, སཧཛཱཏོ ཙེ སམྤཡུཏྟཀོཊིཡཱ ཝཱ, སུཁཝེདནཱཡ པཙྩཡོ ཕསྶོ. ཏཾ སུཁཝེདནིཡཉྩ ཕསྶཾ པཊིཙྩ ཨུཔྤཛྫཏི སུཁཝེདནཱཏི ཡོཛནཱ. ཨེས ནཡོ སབྦཏྠ སབྦེསུ སེསེསུ སཏྟསུ ཝཱརེསུ. མནོདྷཱཏུཡེཝ ཝཱ སམཱནཱཏི ཨབྷིདྷམྨནཡེན. སུཏྟནྟནཡེན པན སུཉྙཏཊྛེན ནིསྶཏྟནིཛྫཱིཝཊྛེན ཙ མནོདྷཱཏུསམཉྙཾ ལབྷཏེཝ. ཨཊྛམཾ ཨུཏྟཱནམེཝ ཧེཊྛཱ ཝུཏྟནཡཏྟཱ.

ཧཱལིདྡིཀཱནིསུཏྟཱདིཝཎྞནཱ ནིཊྛིཏཱ.

༩. ལོཧིཙྩསུཏྟཝཎྞནཱ

༡༣༢. ཏེཔི མཱཎཝཀཱཏྭེཝ ཝུཏྟཱ, ན བྲཱཧྨཎཀུམཱརཱ ཨེཝ. སེལེཡྻཀཱནཱིཏི ཨཉྙམཉྙཾ སིལིསྶནལངྒྷནཀཱིལ༹ནཱནི.

ཨུཔཊྛཱནཝསེན ཨིབྷཾ ཧརནྟཱིཏི ཨིབྦྷཱ, ཧཏྠིགོཔཀཱ. ཏེ པན ནིཧཱིནཀུཊུམྦསྶ བྷོགྒཾ ཨུཔཱདཱཡ གཧཔཏིབྷཱཝཾ ཨུཔཱདཱཡ ‘‘གཧཔཏིཀཱ’’ཏིཔི ཝུཙྩནྟཱིཏི ཨཱཧ ‘‘གཧཔཏིཀཱ’’ཏི. ཀཎྷཱཏི ཀཎྷཱབྷིཛཱཏིཀཱ. རཊྛཾ བྷརནྟཱིཏི ཡསྨིཾ རཊྛེ ཝསནྟི, ཏསྶ རཊྛསྶ བལིཾ བྷརཎེན, ཨཏྟནོ ཝཱ ཀུཊུམྦསྶ བྷརཎེན བྷརཏཱ. པརིཡཱཡནྟཱཏི པརིཏོ སཾཙརནྟཱ ཀཱིལ༹ནྟི.

སཱིལཛེཊྛཀཱཏི སཱིལཔྤདྷཱནཱ. ཡེ པུརཱཎཾ སརནྟི, ཏེ སཱིལུཏྟམཱ ཨཧེསུཾ. དྭཱརཱནི ཙཀྑཱདིདྭཱརཱནི.

ཨཔཀྐམིཏྭཱ ¶ ཨཔེཏཱ ཝིརཧིཏཱ ཧུཏྭཱ. ཝིསམཱནཱིཏི ཝིགཏསམཱནི དུཙྩརིཏསབྷཱཝཱནི. ནཱནཱཝིདྷདཎྜཱ ནཱནཱཝིདྷདཎྜནིཔཱཏཱ.

ཨནཱཧཱརཀཱཏི ཀིཉྩི ཨབྷུཉྫནཀཱ. པངྐོ ཝིཡ པངྐོ, མལཾ. དནྟཔངྐོ པུརིམཔདལོཔེན པངྐོཏི ཝུཏྟོཏི ‘‘པངྐོ ནཱམ དནྟམལ’’ནྟི ཝུཏྟཾ. ཨཛེཧི ཀཱཏབྦཀཱནཾ ཨཀོཔེཏྭཱ ཀརཎཾ སམཱདཱནཝསེན ཝཏཾ. ཨེས ནཡོ སེསེསུཔི. ཀོཧཉྙཾ ནཱམ ཨཏྟནི ཝིཛྫམཱནདོསཾ པཊིཙྪཱདེཏྭཱ ¶ ཨསནྟགུཎཔཀཱསནཱཏི ཨཱཧ – ‘‘པཊིཙྪནྣ…པེ… ཀོཧཉྙཉྩེཝཱ’’ཏི. པརིཀྑཱརབྷཎྜཀཝཎྞཱཏི པརིཀྑཱརབྷཎྜཱ ཀཔྤཀཱཏི. ཏེ ཙ ཁོ ཨཏྟནོ ཛཱིཝིཀཏྠཱཡ ཨཱམིསཀིཉྫཀྑསྶ ཨཏྟནིབནྡྷནཏྠཱཡ ཨམོཙནཏྠཱཡ ཀཏཱ.

ཨཁིལནྟི ཙེཏོཁིལརཧིཏཾ བྲཧྨཝིཧཱརཝསེན. ཏེནཱཧ ‘‘མུདུ ཨཐདྡྷ’’ནྟི.

ཨདྷིམུཏྟོཏི ཨབྷིརཏིཝསེན ཡུཏྟཔཡུཏྟོ. པརིཏྟཙིཏྟོཏི པརིཏོ ཁཎྜིཏཙིཏྟོ. ཨཔྤམཱཎཙིཏྟོཏི ཨེཏྠ ‘‘ཀོ ཨཡ’’ནྟི པཊིཀྑིཏུཾ སཀྐུཎེཡྻཙིཏྟོ.

ལོཧིཙྩསུཏྟཝཎྞནཱ ནིཊྛིཏཱ.

༡༠. ཝེརཧཙྩཱནིསུཏྟཝཎྞནཱ

༡༣༣. བྲཱཧྨཎིཾ དྷམྨསཝནཱཡ ཙོདེནྟོ མཱཎཝཀོ ‘‘ཡགྒྷེ’’ཏི ཨཝོཙ. ཏེནཱཧ ‘‘ཡགྒྷེཏི ཙོདནཏྠེ ནིཔཱཏོ’’ཏི.

ཝེརཧཙྩཱནིསུཏྟཝཎྞནཱ ནིཊྛིཏཱ.

གཧཔཏིཝགྒཝཎྞནཱ ནིཊྛིཏཱ.

༡༤. དེཝདཧཝགྒོ

༡. དེཝདཧསུཏྟཝཎྞནཱ

༡༣༤. མནཾ རམཡནྟཱཏི ཨཱཔཱཐགཏཱ མནསྶ རམཎཝསེན པིཡཱཡིཏབྦཏཱཝསེན པཝཏྟནྟཱ.

༢. ཁཎསུཏྟཝཎྞནཱ

༡༣༥. ཚཕསྶཱཡཏནིཀཱཏི ¶ ཚཧི ཕསྶཱཡཏནེཧི ཨནིཊྛསཾཝེདནིཡཱ. ཚདྭཱརཕསྶཔཊིཝིཉྙཏྟཱིཏི ཚཧིཔི དྭཱརེཧི ཨཱརམྨཎསྶ པཊིསཾཝེདནཱ ཧོཏིཡེཝ སབྦསོ དུཀྑཱནུབྷཝནཏྠཾ. ཏཱཝཏིཾསཔུརནྟི ¶ སུདསྶནམཧཱནགརཾ. ཨབྷཱཝོ ནཱམ ནཏྠི སབྦཐཱ སུཁཱནུབྷཝནཏོ. ནིརཡེཏི ཨིམིནཱ དུགྒཏི བྷཝསཱམཉྙེན ཨིཏརཱཔཱཡཱཔི གཧིཏཱ ཨེཝ. མགྒབྲཧྨཙརིཡཝཱསཾ ཝསིཏུཾ ན སཀྐཱཏི ཨིམིནཱ པན སབྦེསམྤི ཨཙྪིནྡིཀཊྛཱནཱནཾ གཧཎཾ དཊྛབྦཾ. ཨིམེཝཱཏི ཨིམསྨིཾ མནུསྶལོཀེ ཨེཝ. ཨཔཱཡོཔི པཉྙཱཡཏི ཨཔཱཡདུཀྑསདིསསྶ དུཀྑསྶ ཀདཱཙི པཊིསཾཝེདནཏོ. སགྒོཔི པཉྙཱཡཏི དེཝབྷོགསདིསསམྤཏྟིཡཱ ཀདཱཙི པཊིལབྷིཏབྦཏོ.

ཨཡཾ ཀམྨབྷཱུམཱིཏི ཨཡཾ མནུསྶལོཀོ པུརིསཐཱམཀརཎཱཡ ཀམྨབྷཱུམི ནཱམ ཏཱསཾ ཡོགྱཊྛཱནབྷཱཝཏོ. ཏཏྠ པདྷཱནཀམྨཾ དསྶེནྟོ ‘‘ཨིདྷ མགྒབྷཱཝནཱ’’ཏི ཨཱཧ. ཋཱནཱནཱིཏི ཀཱརཎཱནི. སཾཝེཛནིཡཱནཱིཏི སཾཝེགཛནནཱནི བཧཱུནི ཛཱཏིཨཱདཱིནི. ཏཐཱ ཧི ཛཱཏི, ཛརཱ, བྱཱདྷི, མརཎཾ, ཨཔཱཡབྷཝཾ, ཏཏྠཔི ནིརཡཱུཔཔཏྟིཧེཏུཀཾ, ཏིརཙྪཱནུཔཔཏྟིཧེཏུཀཾ, ཨསཱུརཀཱཡཱུཔཔཏྟིཧེཏུཀཾ, ཨཏཱིཏེ ཝཊྚམཱུལཀཾ, ཨནཱགཏེ ཝཊྚམཱུལཀཾ, པཙྩུཔྤནྣེ ཨཱཧཱརཔརིཡེཊྛིམཱུལཀནྟི བཧཱུནི སཾཝེགཝཏྠཱུནི པཙྩཝེཀྑིཏྭཱ སཾཝེགཛཱཏོ སཉྫཱཏསཾཝེགོ ཡོནིསོ པདྷཱནམནུཡུཉྫསྶུ. སཾཝེགཱཏི སཾཝེགམཱཔཛྫསྶུ.

ཁཎསུཏྟཝཎྞནཱ ནིཊྛིཏཱ.

༣. པཋམརཱུཔཱརཱམསུཏྟཝཎྞནཱ

༡༣༦. སམྨུདིཏཱ སམྨོདཔྤཏྟཱ, པམོདིཏཱ སཉྫཱཏཔམོདཱ. དུཀྑཱཏི དུཀྑཝནྟོ སཉྫཱཏདུཀྑཱ. ཏེནཱཧ ‘‘དུཀྑིཏཱ’’ཏི. སུཁཾ ཨེཏསྶ ཨཏྠཱིཏི སུཁོ, སུཁཱི. ཏེནཱཧ ‘‘སུཁིཏོ’’ཏི. ཡཏྟཀཱ རཱུཔཱདཡོ དྷམྨཱ ལོཀེ ཨཏྠཱིཏི ཝུཙྩཏི. པསྶནྟཱནནྟི སཙྩཔཊིཝེདྷེན སམྨདེཝ པསྶནྟཱནཾ. ‘‘པཙྩནཱིཀཾ ཧོཏཱི’’ཏི ཝཏྭཱ ཏཾ པཙྩནཱིཀབྷཱཝཾ དསྶེཏུཾ ‘‘ལོཀོ ཧཱི’’ཏིཨཱདི ¶ ཝུཏྟཾ. ཨསུབྷཱཏི ‘‘ཨཱཧཱུ’’ཏིཔདཾ ཨཱནེཏྭཱ སམྦནྡྷོ. སབྦམེཏནྟི ‘‘སུཁཾ དིཊྛམརིཡེབྷི…པེ… ཏདརིཡཱ སུཁཏོ ཝིདཱུ’’ཏི ཙ ཝུཏྟཾ. སབྦམེཏཾ ནིབྦཱནམེཝ སནྡྷཱཡ ཝུཏྟཾ. ནིབྦཱནམེཝ ཧི ཨེཀནྟཏོ སུཁཾ ནཱམ.

པཉྩནཝུཏིཔཱསཎྜིནོ ཏེསཉྩ པཱསཎྜིབྷཱཝོ པཔཉྩསཱུདནིཊྛཀཐཱཡཾ པཀཱསིཏོ ཨེཝ. ཀིལེསནཱིཝརཎེན ནིཝུཏཱནནྟི ཀིལེསཁནྡྷཱ ཀིལེསནཱིཝརཎཾ, ཏེན ནིཝཱརིཏཱནཾ. ནིབྦཱནདསྶནཾ ནཱམ ཨརིཡམགྒོ, ཏེན ཏསྶ པཊིཝིཛ྄ཛྷནཉྩ ཀཱལ༹མེགྷཨཝཙྪཱདིཏཾ ཝིཡ ཙནྡམཎྜལཾ.

པརིཙྪིནྡིཏྭཱཏི ¶ ཨསུབྷབྷཱཝཔརིཙྪིནྡནེན སམྨཱཝིཉྙཱཎདསྶནེན ཙ པརིཙྪིནྡིཏྭཱ. མགྒདྷམྨསྶཱཏི ཨརིཡམགྒདྷམྨསྶ.

ཨནུཔནྣེཧཱིཏི ཨནུ ཨནུ ཨཝིཧཱཡ པཊིཔནྣེཧི. ཀོ ནུ ཨཉྙོ ཛཱནིཏུཾ ཨརཧཏི, ཨཉྙོ ན ཛཱནཱཏཱིཏི དསྶེཏི.

པཋམརཱུཔཱརཱམསུཏྟཝཎྞནཱ ནིཊྛིཏཱ.

༤-༡༢. དུཏིཡརཱུཔཱརཱམསུཏྟཱདིཝཎྞནཱ

༡༣༧-༡༤༥. སུདྡྷིཀཾ ཀཏྭཱ གཱཐཱབནྡྷནེན ཝིནཱ ཀེཝལཾ ཙུཎྞིཡཔདཝསེནེཝ. ཏཐཱ ཏཐཱཏི ཨཛ྄ཛྷཏྟིཀཱནི བཱཧིརཱནི ཙ ཨཱཡཏནཱནི ཨནིཙྩལཀྑཎེན དུཀྑཱནཏྟལཀྑཎེཧི ཙ ཡོཛེཏྭཱ དསྶནཝསེན.

དུཏིཡརཱུཔཱརཱམསུཏྟཱདིཝཎྞནཱ ནིཊྛིཏཱ.

དེཝདཧཝགྒཝཎྞནཱ ནིཊྛིཏཱ.

༡༥. ནཝཔུརཱཎཝགྒོ

༡. ཀམྨནིརོདྷསུཏྟཝཎྞནཱ

༡༤༦. སམྤཏི ཝིཛྫམཱནསྶ ཙཀྑུསྶ ཏཾནིབྦཏྟསྶ ཀམྨསྶ ཙ ཨདྷིཔྤེཏཏྟཱ ‘‘ན ཙཀྑུ པུརཱཎཾ, ཀམྨམེཝ པུརཱཎ’’ནྟི ཝཏྭཱ ཡཐཱ ཏསྶ ཙཀྑུསྶ པུརཱཎཔརིཡཱཡོ ¶ ཝུཏྟོ, ཏཾ དསྶེནྟོ ཨཱཧ – ‘‘ཀམྨཏོ པནཱ’’ཏིཨཱདི. པཙྩཡནཱམེནཱཏི པུརིམཛཱཏིསཾསིདྡྷཏྟཱ ‘‘པུརཱཎ’’ནྟི ཝཏྟབྦསྶ པཙྩཡབྷཱུཏསྶ ཀམྨསྶ ནཱམེན. ཨེཝཾ ཝུཏྟནྟི ‘‘པུརཱཎཀམྨ’’ནྟི ཨེཝཾ ཝུཏྟཾ. པཙྩཡེཧི ཨབྷིསམཱགནྟྭཱ ཀཏནྟི ཏཎྷཱཝིཛྫཱདིཔཙྩཡེཧི ཨབྷིམུཁབྷཱཝེན སམཱགནྟྭཱ སམེཙྩ ནིབྦཏྟིཏཾ. ཙེཏནཱཡཱཏི ཀམྨཙེཏནཱཡ. པཀཔྤིཏནྟི ཨབྷིསམཱིཧིཏཾ. ཝེདནཱཡཱཏི ཨཏྟཱནཾ ནིསྶཱཡ ཨཱརམྨཎཾ ཀཏྭཱ པཝཏྟཱཡ ཝེདནཱཡ. ཝཏྠཱུཏི ནིབྦཏྟིཀཱརཎཾ པཝཏྟཊྛཱནནྟི ཝིཔསྶནཱཔཉྙཱཡ པསྶིཏབྦཾ. ཀམྨསྶ ནིརོདྷེནཱཏི ཀིལེསཱནཾ ཨནུཔྤཱདནིརོདྷསིདྡྷེན ཀམྨསྶ ནིརོདྷེན. ཝིམུཏྟིཾ ཕུསཏཱིཏི ཨརཧཏྟཕལཝིམུཏྟིཾ པཱཔུཎཱཏི. ཨཱརམྨཎབྷཱུཏོ ནིརོདྷོ ནིབྦཱནཾ ‘‘ཀམྨནིརོདྷོ’’ཏི ¶ ཝུཙྩཏི, ‘‘ཀམྨཾ ནིརུཛ྄ཛྷཏི ཨེཏྠཱ’’ཏི ཀཏྭཱ. ‘‘ཛྷཱཡཐ, བྷིཀྑཝེ, མཱ པམཱདཏྠཱ’’ཏི ཝུཏྟཏྟཱ ‘‘པུབྦབྷཱགཝིཔསྶནཱ ཀཐིཏཱ’’ཏི ཝུཏྟཾ.

ཀམྨནིརོདྷསུཏྟཝཎྞནཱ ནིཊྛིཏཱ.

༢-༥. ཨནིཙྩནིབྦཱནསཔྤཱཡསུཏྟཱདིཝཎྞནཱ

༡༤༧-༡༥༠. ནིབྦཱནསྶཱཏི ནིབྦཱནཱདྷིགམསྶ, ཀིལེསནིབྦཱནསྶེཝ ཝཱ. ཨུཔཀཱརཔཊིཔདནྟི ཨུཔཀཱརཱཝཧཾ པཊིཔདཾ. ཙཏཱུསཱུཏི དུཏིཡཱདཱིསུ ཙཏཱུསུ. ནིབྦཱནསཔྤཱཡཱ པཊིཔདཱ དེསིཏཱཏི ཀཏྭཱ ‘‘སཧ ཝིཔསྶནཱཡ ཙཏྟཱརོ མགྒཱ ཀཐིཏཱ’’ཏི ཝུཏྟཾ.

ཨནིཙྩནིབྦཱནསཔྤཱཡསུཏྟཱདིཝཎྞནཱ ནིཊྛིཏཱ.

༦-༧. ཨནྟེཝཱསིཀསུཏྟཱདིཝཎྞནཱ

༡༥༡-༡༥༢. ཨནྟ-སདྡོ སམཱིཔཏྠེ ཝཏྟཏི ‘‘ཨུདཀནྟཾ ཝནནྟ’’ནྟིཨཱདཱིསུ, ཀིལེསོ པན ཨཏིཨཱསནྣེ ཝསཏི ཨབྦྷནྟརཝུཏྟིཏཱཡཱཏི ‘‘ཨནྟེཝཱསིཀ’’ནྟི ཝུཏྟོ ཝིབྷཏྟིཨལོཔེན ཡཐཱ ‘‘ཝནེཀུསལོ, ཀཱུལེརུཀྑཱ’’ཏི. ཏེནཱཧ – ‘‘ཨནནྟེཝཱསིཀནྟི ཨནྟོཝསནཀིལེསཝིརཧིཏ’’ནྟི. ཨཱཙརཎཀཀིལེསཝིརཧིཏནྟི སམུདཱཙརཎཀིལེསརཧིཏཾ. ཨནྟོ ¶ ཨསྶ ཝསནྟཱིཏི ཨསྶ པུགྒལསྶ ཨནྟོ ཨབྦྷནྟརེ ཙིཏྟེ ཝསནྟི པཝཏྟནྟི. ཏེ ཨེཏཾ ཨདྷིབྷཝནྟཱིཏི ཏེ ཀིལེསཱ ཨེཏཾ པུགྒལཾ ཨབྷིབྷཝིཏྭཱ ཨཏྟནོ ཝསེ ཝཏྟེནྟི. ཏེནཱཧ – ‘‘ཨཛ྄ཛྷོཏྠརནྟི སིཀྑཱཔེནྟི ཝཱ’’ཏི. ཏེཧི ཨཱཙརིཡེཧཱིཏི ཏེཧི ཀིལེསསངྑཱཏེཧི སཏྟེ ཨཏྟནོ གཏིཡཾ ཋཔེནྟེཧི ཨཱཙརིཡེཧི. སཏྟམཾ ཧེཊྛཱ ཀཐིཏནཡམེཝཱཏི ཡསྨཱ ཧེཊྛཱ ཁནྡྷཝསེན དེསནཱ ཨཱགཏཱ, ཨིདྷ ཨཱཡཏནཝསེནཱཏི ཨཡམེཝ ཝིསེསོ.

ཨནྟེཝཱསིཀསུཏྟཱདིཝཎྞནཱ ནིཊྛིཏཱ.

༨. ཨཏྠིནུཁོཔརིཡཱཡསུཏྟཝཎྞནཱ

༡༥༣. པརིཡཱཡཏི པརིགཙྪཏི ཕལཾ ཨེཏསྶཱཏི པརིཡཱཡོ ཧེཏཱུཏི ཨཱཧ – ‘‘ཡཾ པརིཡཱཡནྟི ཡཾ ཀཱརཎ’’ནྟི. པཙྩཀྑདིཊྛེ ཨཝིཔརཱིཏེ ཨཏྠེ པཝཏྟསདྡྷཱ པཙྩཀྑསདྡྷཱ ཡཐཱ ‘‘སམྨཱསམྦུདྡྷོ བྷགཝཱ, སྭཱཁཱཏོ དྷམྨོ’’ཏི (མ. ནི. ༡.༢༨༨) ཙ. ཨེཝཾ ཀིརཱཏི ཨིཏི ཀིརཱཡ ཨུཔྤནྣོ སདྡཧནཱཀཱརོ སདྡྷཱཔཏིརཱུཔཀོ. ཨེཏནྟི ‘‘ཨཉྙཏྲེཝ སདྡྷཱཡཱ’’ཏི ཨེཏཾ ཝཙནཾ ¶ . རུཙཱཔེཏྭཱཏི ཀིཉྩི ཨཏྠཾ ཨཏྟནོ མཏིཡཱ རོཙེཏྭཱ. ཁམཱཔེཏྭཱཏི ཏསྶེཝ ཝེཝཙནཾ, ཙིཏྟཾ ཏཐཱ ཁམཱཔེཏྭཱ. ཏེནཱཧ – ‘‘ཨཏྠེཏནྟི གཧཎཱཀཱརོ’’ཏི. པརམྤརཱགཏསྶ ཨཏྠསྶ ཨེཝཾ ཀིརསྶཱཏི ཨནུསྶཝནཾ. ཀཱརཎཾ ཙིནྟེནྟསྶཱཏི ཡུཏྟིཾ ཙིནྟེནྟསྶ. ཀཱརཎཾ ཨུཔཊྛཱཏཱིཏི ‘‘སཱདྷཱུ’’ཏི ཨཏྟནོ ཙིཏྟསྶ ཨུཔཏིཊྛཏི. ཨཏྠེཏནྟི ‘‘ཨེཏཾ ཀཱརཎཾ ཨེཝམཡམཏྠོ ཡུཛྫཏཱི’’ཏི ཙིཏྟེན གཧཎཾ. ཨཱཀཱརཔརིཝིཏཀྐོཏི ཡུཏྟིཔརིཀཔྤནཱ. ལདྡྷཱིཏི ནིཙྪཡེན གཧཎཾ, སཱ ཙ ཁོ དིཊྛི ཨཡཱཐཱཝགྒཧཎེན ཨཉྙཱཎམེཝཱཏི དཊྛབྦཾ. ཏནྟི ལདྡྷིཾ. ཨཏྠེསཱཏི ཨེསཱ ལདྡྷི མམ ཨུཔྤནྣཱ ཨཏྠི ཡུཏྟརཱུཔཱ ཧུཏྭཱ ཨུཔལབྦྷཏི. ཨེཝཾ གཧཎཱཀཱརོ དིཊྛིནིཛ྄ཛྷཱནཀྑནྟི ནཱམ, པཋམུཔྤནྣལདྡྷིསངྑཱཏཱཡ དིཊྛིཡཱ ནིཛ྄ཛྷཱནཾ ཁམནཱཀཱརོ དིཊྛིནིཛ྄ཛྷཱནཀྑནྟི ནཱམ. པཉྩ ཋཱནཱནཱིཏི ཡཐཱཝུཏྟཱནི སདྡྷཱདཱིནི པཉྩ ཀཱརཎཱནི. མུཉྩིཏྭཱ ཨགྒཧེཏྭཱ. ཧེཊྛིམམགྒཝཛ྄ཛྷཱནཾ རཱགཱདཱིནཾ ཨབྷཱཝཾ སནྡྷཱཡ ‘‘ནཏྠི མེ ཨཛ྄ཛྷཏྟཾ རཱགདོསམོཧོ’’ཏི ཨཡཾ སེཀྑཱནཾ པཙྩཝེཀྑཎཱ, སབྦསོ ཨབྷཱཝཾ སནྡྷཱཡ ཨསེཀྑཱནནྟི ཨཱཧ – ‘‘སེཀྑཱསེཀྑཱནཾ པཙྩཝེཀྑཎཱ ཀཐིཏཱ’’ཏི. ‘‘སནྟཾ ¶ ཝཱ ཨཛ྄ཛྷཏྟ’’ནྟིཨཱདིནཱ སེཀྑཱནཾ, ‘‘ཨསནྟཾ ཝཱ ཨཛ྄ཛྷཏྟ’’ནྟིཨཱདིནཱ ཨསེཀྑཱནཾ པཙྩཝེཀྑཎཱ ཀཐིཏཱཏི དཊྛབྦཾ.

ཨཏྠིནུཁོཔརིཡཱཡསུཏྟཝཎྞནཱ ནིཊྛིཏཱ.

༩-༡༠. ཨིནྡྲིཡསམྤནྣསུཏྟཱདིཝཎྞནཱ

༡༥༤-༡༥༥. ‘‘སམྤནྣསཱིལཱ, བྷིཀྑཝེ, ཝིཧརཐཱ’’ཏིཨཱདཱིསུ (མ. ནི. ༡.༦༤) ཝིཡ པརིཔུཎྞཏྠོ ཨིདྷ སམྤནྣ-སདྡོཏི ཨཱཧ ‘‘པརིཔུཎྞིནྡྲིཡོ’’ཏི. ཨིནྡྲིཡེཧི སམནྣཱགཏཏྟཱ པརིཔུཎྞིནྡྲིཡོ ནཱམ ཧོཏཱིཏི སམྦནྡྷོ. ཨེཝཾ སཏི སམནྣཱགམསམྤཏྟི ཝུཏྟཱ ཧོཏཱིཏི ཨཱསངྐནྟོ ‘‘ཙཀྑཱདཱིནི ཝཱ’’ཏིཨཱདིམཱཧ. ཏཾ སནྡྷཱཡཱཏི དུཏིཡཝིཀཔྤེན ཝུཏྟམཏྠཾ སནྡྷཱཡ. ཧེཊྛཱ ཁནྡྷིཡཝགྒེ ཁནྡྷཝསེན དེསནཱ ཨཱགཏཱ, ཨིདྷ ཨཱཡཏནཝསེནཱཏི ཨཱཧ ‘‘ཝུཏྟནཡམེཝཱ’’ཏི.

ཨིནྡྲིཡསམྤནྣསུཏྟཱདིཝཎྞནཱ ནིཊྛིཏཱ.

ནཝཔུརཱཎཝགྒཝཎྞནཱ ནིཊྛིཏཱ.

ཏཏིཡོ པཎྞཱསཀོ.

༡༦. ནནྡིཀྑཡཝགྒོ

༡-༤. ཨཛ྄ཛྷཏྟནནྡིཀྑཡསུཏྟཱདིཝཎྞནཱ

༡༥༦-༡༥༩. ཨཏྠཏོཏི ¶ སབྷཱཝཏོ. ཉཱཎེན ཨརིཡཏོ ཉཱཏབྦཏོ ཨཏྠོ, སབྷཱཝོཏི. ཨེཝཉྷི ཨབྷིཛྫནསབྷཱཝོ ནནྡནཊྛེན ནནྡཱི, རཉྫནཊྛེན རཱགོ. ཝིམུཏྟིཝསེནཱཏི ཝིམུཏྟིཡཱ ཨདྷིགམཝསེན. ཨེཏྠཱཏི ཨིམསྨིཾ པཋམསུཏྟེ. དུཏིཡཱདཱིསཱུཏི དུཏིཡཏཏིཡཙཏུཏྠེསུ. ཨུཏྟཱནམེཝ ཧེཊྛཱ ཝུཏྟནཡཏྟཱ.

ཨཛ྄ཛྷཏྟནནྡིཀྑཡསུཏྟཱདིཝཎྞནཱ ནིཊྛིཏཱ.

༥-༦. ཛཱིཝཀམྦཝནསམཱདྷིསུཏྟཱདིཝཎྞནཱ

༡༦༠-༡༦༡. སམཱདྷིཝིཀལཱནཾ ¶ ཙིཏྟེཀགྒཏཾ ལབྷནྟཱནཾ, པཊིསལླཱནཝིཀལཱནཾ ཀཱཡཝིཝེཀཉྩ ཙིཏྟེཀགྒཏཉྩ ལབྷནྟཱནནྟི ཡོཛནཱ. པཱཀཊཾ ཧོཏཱིཏི ཝིབྷཱུཏཾ ཧུཏྭཱ ཨུཔཊྛཱཏི. ཨོཀྑཱཡཏི པཙྩཀྑཱཡཏཱིཏི ཙཏུསཙྩདྷམྨཱནཾ ཝིབྷཱུཏབྷཱཝེན ཨུཔཊྛཱནསྶ ཀཐིཏཏྟཱ ཝུཏྟཾ – ‘‘དྭཱིསུཔི…པེ… ཀཐིཏཱ’’ཏི.

ཛཱིཝཀམྦཝནསམཱདྷིསུཏྟཱདིཝཎྞནཱ ནིཊྛིཏཱ.

༧-༩. ཀོཊྛིཀཨནིཙྩསུཏྟཱདིཝཎྞནཱ

༡༦༢-༡༦༤. ཨནིཙྩཱནུཔསྶནཱདཡོ ཨེཝ ཝིམུཏྟིཔརིཔཱཙནིཡཱ དྷམྨཱ ནཱམ. ཐེརསྶ ཏདཱ སདྡྷཱདཱིནི ཨིནྡྲིཡཱནི ན པརིཔཱཀཾ ཨུཔགཏཱནི, ཐེརོ ཨིམཱཧི དེསནཱཧི ཨིནྡྲིཡཔརིཔཱཀམགམཱསི.

ཀོཊྛིཀཨནིཙྩསུཏྟཱདིཝཎྞནཱ ནིཊྛིཏཱ.

༡༠-༡༢. མིཙྪཱདིཊྛིཔཧཱནསུཏྟཱདིཝཎྞནཱ

༡༦༥-༡༦༧. པཱཊིཡེཀྐནྟི ¶ ཝིསུཾ ཝིསུཾ. ཝུཏྟནཡེནེཝཱཏི ཧེཊྛཱ ཝུཏྟནཡེནེཝ ཨཔུབྦསྶ ཝཏྟབྦསྶ ཨབྷཱཝཱ.

མིཙྪཱདིཊྛིཔཧཱནསུཏྟཱདིཝཎྞནཱ ནིཊྛིཏཱ.

ནནྡིཀྑཡཝགྒཝཎྞནཱ ནིཊྛིཏཱ.

༡༧. སཊྛིཔེཡྻཱལཝགྒོ

༡-༦༠. ཨཛ྄ཛྷཏྟཨནིཙྩཚནྡསུཏྟཱདིཝཎྞནཱ

༡༦༨-༢༢༧. ‘‘ཡཾ, བྷིཀྑཝེ, ཨནིཙྩཾ, ཏཏྲ ཝོ ཚནྡོ པཧཱཏབྦོ’’ཏིཨཱདིནཱ ཏེསཾ ཏེསཾ པུགྒལཱནཾ ཨཛ྄ཛྷཱསཡཝསེན སཊྛི སུཏྟཱནི ཀཐིཏཱནི ¶ , ཏཱནི ཙ པེཡྻཱལནཡེན དེསནཾ ཨཱརུལ༹ྷཱནཱིཏི ‘‘སཊྛིཔེཡྻཱལོ ནཱམ ཧོཏཱི’’ཏི ཝུཏྟཾ. ཏེནཱཧ ‘‘ཡཱནི པནེཏྠཱ’’ཏིཨཱདི.

ཨཛ྄ཛྷཏྟཨནིཙྩཚནྡསུཏྟཱདིཝཎྞནཱ ནིཊྛིཏཱ.

སཊྛིཔེཡྻཱལཝགྒཝཎྞནཱ ནིཊྛིཏཱ.

༡༨. སམུདྡཝགྒོ

༡. པཋམསམུདྡསུཏྟཝཎྞནཱ

༢༢༨. ཡདི ‘‘དུཔྤཱུརཎཊྛེན སམུདྡནཊྛེནཱ’’ཏི ཨིམིནཱ ཨཏྠདྭཡེན སཱགརོ ‘‘སམུདྡོ’’ཏི ཝུཙྩཏི, ཙཀྑུསྶེཝེཏཾ ནིཔྤརིཡཱཡཏོ ཡུཛྫཏཱིཏི དསྶེཏུཾ ‘‘ཡདཱི’’ཏིཨཱདི ཝུཏྟཾ. ཏཏྠ དུཔྤཱུརཎཊྛེནཱཏི པཱུརེཏུཾ ཨསཀྐུཎེཡྻབྷཱཝེན. སམུདྡནཊྛེནཱཏི སབྦསོ ཨུཔརཱུཔརིཔཀྑིཏྟགམནེན. མཧཱགངྒཱདིམཧཱནདཱིནཾ མཧཏཱ ཨུདཀོགྷེན ཨནུསཾཝཙྪརཾ ཨནུཔཀྑནྡམཱནོཔི ཧི སམུདྡོ པཱརིཔཱུརིཾ ན གཙྪཏི, ཡཉྩ བྷཱུམིཔདེསཾ ཨོཏྠརཏི, ཏཾ སམུདྡབྷཱཝཾ ནེཏི, ཨབྷཱཝཾ ཝཱ པཱཔུཎཱཏི ཨཔཡཱཏེ སམུདྡོདཀེ, ཏཾ ཝཱ ཨནུདཀབྷཱཝཔཏྟིཡཱ ཨཏཐམེཝ ཧོཏི. ཀཱམཉྩེས དུཔྤཱུརཎཊྛོ སམུདྡནཊྛོ ¶ སཱགརེ ལབྦྷཏི, ཏཐཱཔི ཏཾ དྭཡཾ ཙཀྑུསྨིཾཡེཝ ཝིསེསཏོ ལབྦྷཏཱིཏི དསྶེནྟོ ‘‘ཏསྶ ཧཱི’’ཏིཨཱདིམཱཧ. སམོསརནྟནྟི སབྦསོ ནཱིལཱདིབྷཱགེཧི ཨོསརནྟཾ, ཨཱཔཱཐཾ ཨཱགཙྪནྟནྟི ཨཏྠོ. ཀཱཏུཾ ན སཀྐོཏི དུཔྤཱུརཎཱིཡཏྟཱ. སདོསགམནེན གཙྪཏི སཏྟསནྟཱནསྶ དུསྶནཏོ. དུསྶནཊྛཏཱ ཙསྶ ཙཀྑུདྭཱརིཀཏཎྷཱཝསེན ཝེདིཏབྦཱ. ཡཐཱ སམུདྡེ ཨཔརཱཔརཾ པརིཝཏྟམཱནོ ཨཱུམིཡཱ ཝེགོ སམུདྡསྶཱཏི ཝུཙྩཏི, ཨེཝཾ ཙཀྑུསམུདྡསྶ པུརཏོ ཨཔརཱཔརཾ པརིཝཏྟམཱནཾ ནཱིལཱདིབྷེདཾ རཱུཔཱརམྨཎཾ ཙཀྑུསྶཱཏི ཝཏྟབྦཏཾ ཨརཧཏི ཨནཉྙསཱདྷཱརཎཏྟཱཏི ཝུཏྟཾ ‘‘རཱུཔམཡོ ཝེགོ’’ཏི. ཨསམཔེཀྑིཏེཏི སམྨཱདསྶནེ རཱུཔེ མནཱཔབྷཱཝཾ ཨམནཱཔབྷཱཝཉྩ གཧེཏྭཱ, ‘‘ཨིདཾ ནཱམ མཡཱ དིཊྛ’’ནྟི ཨནུཔདྷཱརེནྟསྶ ཀེཝལཾ སམཱུཧགྷནཝསེན གཎྷནྟསྶ གཧཎཾ ཨསམཔེཀྑནཾ. སཧཏཱིཏི ཨདྷིབྷཝཏི, ཏཾནིམིཏྟཾ ཀཉྩི ཝིཀཱརཾ ནཱཔཛྫཏི.

ཨཱུམཱིཏི ¶ ཝཱིཙིཡོ. ཨཱཝཊྚོ ཨཱཝཊྚནཝསེན པཝཏྟཾ ཨུདཀཾ. གཱཧརཀྑསམཀརཱདཡོ གཱཧརཀྑསོ. ཡཐཱ སམུདྡེ ཨཱུམིཡོ ཨུཔརཱུཔརི ཝཏྟམཱནཱ ཨཏྟནི པཏིཏཔུགྒལཾ ཨཛ྄ཛྷོཏྠརིཏྭཱ ཨནཡབྱསནཾ ཨཱཔཱདེནྟི, ཏཐཱ ཨཱཝཊྚགཱཧརཀྑསཱ. ཨེཝམེཏེ རཱགཱདཡོ ཀིལེསཱ སཡཾ ཨུཔྤནྣཀསཏྟེ ཨཛ྄ཛྷོཏྠརིཏྭཱ ཨནཡབྱསནཾ ཨཱཔཱདེནྟི, ཀིལེསུཔྤཏྟིནིམིཏྟཏཱཡ སཏྟཱནཾ ཨནཡབྱསནཱཔཏྟིཧེཏུབྷཱུཏསྶ ཨཱུམིབྷཡསྶ ཨཱརམྨཎཝསེན ཙཀྑུསམུདྡོ ‘‘སཨཱུམིསཱཝཊྚོ སགཱཧོ སརཀྑསོ’’ཏི ཝུཏྟོ.

ཨཱུམིབྷཡནྟི ཨེཏྠ བྷཱཡཏི ཨེཏསྨཱཏི བྷཡཾ, ཨཱུམཱིཝ བྷཡཾ ཨཱུམིབྷཡཾ. ཀུཛ྄ཛྷནཊྛེན ཀོདྷོ. སྭེཝ ཙིཏྟསྶ ཙ ཨབྷིམདྡནཝསེནུཔྤཱདནཏྠེན དལ༹ྷཾ ཨཱཡཱསནཊྛེན ཨུཔཱཡཱསོ. ཨེཏྠ ཙ ཨནེཀཝཱརཾ པཝཏྟིཏྭཱ སཏྟེ ཨཛ྄ཛྷོཏྠརིཏྭཱ སཱིསཾ ཨུཀྑིཔིཏུཾ ཨདཏྭཱ ཨནཡབྱསནནིཔྥཱདནེན ཀོདྷཱུཔཱཡཱསསྶ ཨཱུམིསདིསཏཱ དཊྛབྦཱ. ཏཐཱ ཀཱམགུཎཱ ཀིལེསཱབྷིབྷཱུཏེ སཏྟེ མཱནེ ཝིཡ རཱུཔཱདིཝིསཡསངྑཱཏེ ཨཏྟནི སཾསཱརེཏྭཱ ཡཐཱ ཏཏོ བཧིབྷཱུཏེ ནེཀྑམྨེ ཙིཏྟམྤི ན ཨུཔྤཛྫཏི, ཨེཝཾ ཨཱཝཊྚེཏྭཱ བྱསནཱཔཱདནེན ཨཱཝཊྚསདིསཏཱ དཊྛབྦཱ. ཡདཱ པན གཱཧརཀྑསོ ཨཱརཀྑརཧིཏཾ ཨཏྟནོ གོཙརབྷཱུམིགཏཾ པུརིསཾ ཨབྷིབྷུཡྻ གཧེཏྭཱ ཨགོཙརེ ཋིཏམྤི གོཙརཾ ནེཏྭཱ བྷེརཝརཱུཔདསྶནཱདིནཱ ཨཏྟནོ ཨུཔཀྐམཾ ཀཱཏུཾ ཨསམཏྠཾ ཀཏྭཱ ཨནྭཱཝིསིཏྭཱ ཝཎྞབལབྷོགཨཱཡུསུཁེཧི ཝིཡོཛེཏྭཱ མཧནྟཾ ཨནཡབྱསནཾ ཨཱཔཱདེཏི, ཨེཝཾ མཱཏུགཱམོཔི ཡོནིསོམནསིཀཱརརཧིཏཾ ཨཝཱིརཔུརིསཾ ཨཏྟནོ རཱུཔཱདཱིཧི པལོབྷནཝསེན ཨབྷིབྷུཡྻ གཧེཏྭཱ ཝཱ ཝཱིརཛཱཏིཡམྤི ཨིཏྠིཀུཏྟབྷཱུཏེཧི ཨཏྟནོ ཧཱཝབྷཱཝཝིལཱསེཧི ཨིཏྠིམཱཡཱཡ ཨནྭཱཝིསིཏྭཱ ཝཱ ཨཝསཾ ཨཏྟནོ ཨུཔཀཱརདྷམྨེ སཱིལཱདཡོ སམྤཱདེཏུཾ ཨསམཏྠཾ ཀརོནྟོ གུཎཝཎྞཱདཱིཧི ཝིཡོཛེཏྭཱ མཧནྟཾ ཨནཡབྱསནཾ ཨཱཔཱདེཏི, ཨེཝཾ མཱཏུགཱམསྶ གཱཧརཀྑསསདིསཏཱ དཊྛབྦཱ. ཨཱུམིབྷཡནྟི ལཀྑཎཝཙནཾ ¶ . ཡཐཱ ཧི ཨཱུམི བྷཱཡིཏབྦཊྛེན བྷཡཾ, ཨེཝཾ ཨཱཝཊྚགཱཧརཀྑསཱཔཱིཏི ཨཱུམིཨཱདིབྷཡེན སབྷཡནྟི ཨཏྠོ ཝེདིཏབྦོ. ཨནྟཾ ཨཝསཱནཾ གཏོ, ཨེཝཾ པཱརཾ ནིབྦཱནཾ གཏོཏི ཝུཙྩཏི.

པཋམསམུདྡསུཏྟཝཎྞནཱ ནིཊྛིཏཱ.

༢-༣. དུཏིཡསམུདྡསུཏྟཱདིཝཎྞནཱ

༢༢༩-༢༣༠. ཀིལེསཱནཾ ¶ ཨལླབྷཱཝཱུཔནཡནནྟི ཨཱཧ ‘‘ཏེམནཊྛེནཱ’’ཏི. ཨརིཡསཱཝཀེཏི ཨནཱགཱམིནོ. ཏེ ཧི ཀཱམབྷཝཝསེན ཨཏིནྟཏཱཡ ན སམུནྣཱ. ཏཡོ མཙྩཱུཏི ཀིལེསཱབྷིསངྑཱརདེཝཔུཏྟམཱརེ. ཏཱིཧི ཨུཔདྷཱིཧཱིཏི ཀིལེསཱབྷིསངྑཱརཀཱམགུཎཱནཾ ཝསེན ཏཱིཧི ཨུཔདྷཱིཧི. ཁནྡྷུཔདྷིནཱ པན སོ ན ནིརཱུཔདྷི སཨུཔཱདིསེསསྶེཝ ནིབྦཱནསྶ ཨདྷིགཏཏྟཱ. གཏོཏི པཊིཔཏྟིགམནེན གཏོ.

དུཏིཡསམུདྡསུཏྟཱདིཝཎྞནཱ ནིཊྛིཏཱ.

༤-༦. ཁཱིརརུཀྑོཔམསུཏྟཱདིཝཎྞནཱ

༢༣༡-༢༣༣. ཨཔྤཧཱིནཊྛེནཱཏི མགྒེན ཨསམུགྒྷཱཊིཏབྷཱཝེན. ཨཏྠཱིཏི ཝིཛྫཏི. སཏི པཙྩཡེ ཝིཛྫམཱནཀིཙྩཀརཎཏོ པརིཡུཊྛཱནཾ ཨཔྤཀཾ མཱུསིཀཱཝིསཾ ཝིཡ པརིཏྟཾ ནཱམ ཧོཏི ཨཔྤཱནུབྷཱཝཏྟཱ. ཨེཝརཱུཔཱཔཱིཏི ཨཔྤཀཱཔི. ཨསྶཱཏི ཨཔྤཧཱིནཀིལེསསྶ. ཨདྷིམཏྟཱནནྟི ཨིཊྛཱནཾ རཛནཱིཡཱནཾ, ཝཏྠུཝསེན པརིཏྟཀམྤི ཨིཊྛཱརམྨཎཾ ཨདྷིམཏྟམེཝ. ཏེནཱཧ ‘‘ནཁཔིཊྛིཔྤམཱཎམྤཱི’’ཏིཨཱདི. དཧརོཏིཨཱདཱིནི ཏཱིཎིཔི པདཱནི. ཨཱབྷིནྡེཡྻཱཏི བྷིནྡེཡྻ. ཏཾ ཨུབྷཡནྟི ཏཾ ཙཀྑུརཱུཔནྟི ཨུབྷཡམྤི ཨཱཡཏནཾ.

ཁཱིརརུཀྑོཔམསུཏྟཱདིཝཎྞནཱ ནིཊྛིཏཱ.

༧. ཨུདཱཡཱིསུཏྟཝཎྞནཱ

༢༣༤. ཨིཏིཔཱིཏི ཨིམིནཱཔི ཀཱརཎེན. ཨནིཙྩེནཱཏི ཨནིཙྩབྷཱཝེན ཨནཏྟལཀྑཎཾ ཀཐིཏཾ. ཡསྨཱ ཧེཏུཔཙྩཡཱ ཝིཉྙཱཎསྶ ཨུཔྤཏྟི སཏི ཙ ཨུཔྤཱདེ ནིརོདྷེན བྷཝིཏབྦཾ, ཨུཔྤཱདཝཡཝནྟཏཱཡ ཨནིཙྩཾ ཝིཉྙཱཎཾ, ཡདི ཙ ཨཏྟཱ སིཡཱ པཙྩཡེཧི ཝིནཱ སིཛ྄ཛྷེཡྻ, ན ཙ ཏཐཱསྶ སིདྡྷི, ཏསྨཱ ‘‘ཝིཉྙཱཎཾ ཨནཏྟཱ’’ཏི ཨནིཙྩཏཱཡ ཨནཏྟཏཱ ཀཐིཏཱ.

ཨུདཱཡཱིསུཏྟཝཎྞནཱ ནིཊྛིཏཱ.

༨. ཨཱདིཏྟཔརིཡཱཡསུཏྟཝཎྞནཱ

༢༣༥. ཀིལེསཱནཾ ¶ ¶ ཨནུ ཨནུ བྱཉྫནཏོ པརིབྱཏྟིཡཱ ཨུཔྤཏྟིཔཙྩཡབྷཱཝཏོ ཨནུབྱཉྫནཾ, ཧཏྠཔཱདཱདིཨཝཡཝཱཏི ཨཱཧ – ‘‘ཧཏྠཱ སོབྷནཱ’’ཏིཨཱདི. ནིམིཏྟགྒཱཧོཏི ཀིལེསུཔྤཏྟིཡཱ ནིམིཏྟབྷཱུཏོ གཱཧོ. སཾསནྡེཏྭཱ གཧཎནྟི ཨཝཡཝེ སམོདྷཱནེཏྭཱ ‘‘ཨིཏྠིཔུརིསོ’’ཏིཨཱདིནཱ ཨེཀཛ྄ཛྷཾ གཧཎཾ. ཝིབྷཏྟིགཧཎནྟི ཝིབྷཱགེན ཨནཝསེསགྒཧཎཾ. ཀུམྦྷཱིལསདིསོཏི ཀུམྦྷཱིལགཱཧསདིསོ. ཏེནཱཧ – ‘‘སབྦམེཝ གཎྷཱཏཱི’’ཏི ཧཏྠཔཱདཱདཱིསུ ཏཾ ཏཾ ཀོཊྛཱསཾ ཝིབྷཛིཏྭཱ གཧཎཾ རཏྟཔཱསདིསོ ཛལཱུཀགཱཧསདིསོ. ཨེཀཛཝནཝཱརེཔི ལབྦྷནྟཱིཏི ཨིདཾ ཙཀྑུདྭཱརཱནུསཱརེན ཨུཔྤནྣམནོདྭཱརིཀཛཝནཾ སནྡྷཱཡ ཝུཏྟཾ.

ནིམིཏྟསྶཱདེན གནྠིཏནྟི ཡཐཱཝུཏྟེ ནིམིཏྟེ ཨསྶཱདགཱཧེན གནྠིཏཾ སམྦདྡྷཾ. བྷཝངྒེནེཝཱཏི མཱུལབྷཝངྒེནེཝ. ཀིལེསབྷཡཾ དསྶེནྟོཏི ཏཐཱ ཀིལེསུཔྤཏྟིཡཱ སཏི ཨཀུསལཙིཏྟེན ཨནྟརིཏཾ ཙེ མརཎཙིཏྟཾ བྷཝེཡྻ, ཨེཀནྟཏོ ནིརཡེ ཝཱ ཏིརཙྪཱནཡོནིཡཱ ཝཱ ཨུཔྤཏྟི སིཡཱཏི ཀིལེསཱནཾ བྷཱཡིཏབྦཾ དསྶེནྟོ. ‘‘སམཡཝསེན ཝཱ ཨེཝཾ ཝུཏྟ’’ནྟི ཝཏྭཱ ཏམཏྠཾ ཝིཝརནྟོ ‘‘ཙཀྑུདྭཱརསྨིཉྷཱི’’ཏིཨཱདིམཱཧ. རཏྟཙིཏྟཾ ཝཱཏི རཱགཝསེན རཏྟཙིཏྟཾ ཝཱ. དུཊྛཙིཏྟེན ཀཐཾ ཨཱརམྨཎརསཱནུབྷཝནནྟི? དོམནསྶཝེདནུཔྤཏྟི ཨེཝ ཏསྶ ཨཱརམྨཎརསཱནུབྷཝནཾ དཊྛབྦཾ. ཨིམསྶ སམཡསྶཱཏི མརཎསམཡསྶ.

ཨུབྷིནྣཾ ནཱསཙྪིདྡཱནཾ མཛ྄ཛྷེ ཋིཏ-ཨཊྛིཏུདནཾ སཧ ཁུརཊྛེན ཚིནྡནཾ. དཎྜཀཝཱསཱིཏི དཱིགྷདཎྜཀཱ མཧཱཝཱསི. ནིཔཛྫིཏྭཱ ནིདྡོཀྐམནནྟི ཨིམིནཱ པཙལཱཡིཀནིདྡཾ པཊིཀྑིཔཏི. ཏཏྠ ཧི ཀདཱཙི ཨནྟརཱ མིཙྪཱཝིཏཀྐཱནཾ སལླཀཱནཾ ཨཝསརོ སིཡཱ, ནཏྠེཝ ནིཔཛྫིཏྭཱ མཧཱནིདྡཾ ཨོཀྐནྟཀཱལེ. ཝིཏཀྐཱནནྟི མིཙྪཱཝིཏཀྐཱནཾ.

ཨཱདིཏྟཔརིཡཱཡསུཏྟཝཎྞནཱ ནིཊྛིཏཱ.

༩-༡༠. པཋམཧཏྠཔཱདོཔམསུཏྟཱདིཝཎྞནཱ

༢༣༦-༢༣༧. ནཝམཾ ¶ ‘‘པཉྙཱཡཏཱི’’ཏི ཝུཙྩམཱནེ བུཛ྄ཛྷནཀཱནཾ ཨཛ྄ཛྷཱསཡཝསེན ཝུཏྟནྟི ཨཱཧ – ‘‘དསམེ ན ཧོཏཱིཏི ཝུཙྩམཱནེ’’ཏིཨཱདི. ཨེཏྟཀམེཝ ཧི དྭིནྣཾ སུཏྟཱནཾ ཝིསེསོཏི.

པཋམཧཏྠཔཱདོཔམསུཏྟཱདིཝཎྞནཱ ནིཊྛིཏཱ.

སམུདྡཝགྒཝཎྞནཱ ནིཊྛིཏཱ.

༡༩. ཨཱསཱིཝིསཝགྒོ

༡. ཨཱསཱིཝིསོཔམསུཏྟཝཎྞནཱ

༢༣༨. ཡེ ¶ བྷིཀྑཱུ ཏདཱ བྷགཝནྟཾ པརིཝཱརེཏྭཱ ནིསིནྣཱ, ཏེསུ ཀེཙི ཨེཀཝིཧཱརིནོ, ཀེཙི ཨཏྟདུཏིཡཱ, ཀེཙི ཨཏྟཏཏིཡཱ, ཀེཙི ཨཏྟཙཏུཏྠཱ, ཀེཙི ཨཏྟཔཉྩམཱ ཧུཏྭཱ ཨརཉྙཱཡཏནེསུ ཝིཧརནྟཱིཏི ཝུཏྟཾ – ‘‘ཨེཀཙཱརིཀ…པེ… པཉྩཙཱརིཀེ’’ཏི. སམཱནཛ྄ཛྷཱསཡཏཱ སབྷཱགཝུཏྟིནོ. ཀམྨཊྛཱནཱནུཡུཉྫནསྶ ཀཱརཀེ. ཏཏོ ཨེཝ ཏཏྠ ཡུཏྟཔཡུཏྟེ. པུགྒལཛ྄ཛྷཱསཡེན ཀཱརཎབྷཱུཏེན. པཙྩཡབྷཱུཏནྟི ཨཔསྶཡབྷཱུཏཾ. ‘‘སེཡྻཐཱཔི, བྷིཀྑཝེ’’ཏི ཨཱརབྷིཏྭཱ ཡཱཝ ‘‘ཏིཎྞོ པཱརངྒཏོ ཐལེ ཏིཊྛཏི བྲཱཧྨཎོ’’ཏི ཨཡཾ མཱཏིཀཱནིཀྑེཔོ. ཏེསཾ མཱཏིཀཱཡ ཝིཏྠཱརབྷཱཛནཾ. ཝཱསནཱ བྷཝིསྶཏཱིཏི ཝཱསནཱཝཧཾ བྷཝིསྶཏི. སིནེརུཾ ཨུཀྑིཔནྟོ ཝིཡཱཏིཨཱདི ཨིམིསྶཱ དེསནཱཡ ཨནཉྙསཱདྷཱརཎཏཱཡ སུདུཀྐརབྷཱཝདསྶནཾ.

མཉྩཊྛེསུ མཉྩསམཉྙཱ ཝིཡ མུཁཊྛཾ ཝིསཾ ‘‘མུཁ’’ནྟི ཨདྷིཔྤེཏཾ. སུཀྑཀཊྛསདིསབྷཱཝཱཔཱདནཏོ ‘‘ཀཊྛ’’ནྟི ཝུཙྩཏཱིཏི ཀཊྛཾ མུཁཾ ཨེཏསྶཱཏི ཀཊྛམུཁོ, དཾསནཱདིནཱ ཀཊྛསདིསབྷཱཝཀརོ སཔྤོ. ཨཐ ཝཱ ཀཊྛསདིསབྷཱཝཱཔཱདནཏོ ཀཊྛཾ ཝིསཾ ཝཱ མུཁེ ཨེཏསྶཱཏི ཀཊྛམུཁོ. ཨིམིནཱ ནཡེན སེསཔདེསུཔི ཨཏྠོ ཝེདིཏབྦོ. ཨིམེ ཙཏྟཱརོཏི ཨིམེ ཝིསཀིཙྩབྷེདེན ཙཏྟཱརོ. ཨིདཱནི ཏཾ ནེསཾ ཝིསཀིཙྩབྷེདཾ དསྶེཏུཾ ‘‘ཏེསཱུ’’ཏིཨཱདི ཝུཏྟཾ. ཨཡསཱུལསམཔྤིཏཾ ཝིཡཱཏི ཨབྦྷནྟརེ ཨཡསཱུལཾ ཨནུཔྤཝེསིཏཾ ཝིཡ. པཀྐཔཱུཏིཔནསཾ ཝིཡཱཏི པཙྩིཏྭཱ ཀཱལཱཏིཀྐམེ ཀུཐིཏཔནསཕལཾ ¶ ཝིཡ. ཙངྒཝཱརེཏི རཛཀཱནཾ ཁཱརཔརིསྶཱཝནེ སུརཱཔརིསྶཱཝནེ ཝཱ. ཨནཝསེསཾ ཚིཛྫནེན ཨསནིཔཱཏཊྛཱནཾ ཝིཡ. མཧཱནིཁཱདནེནཱཏི མཧནྟེན ནིཁཱདནེན.

ཝིསཝེགཝིཀཱརེནཱཏི ཝིསཝེགགཏེན ཝིཀཱརེན. ཝཱཏེནཱཏི ཏསྶ སཔྤསྶ སརཱིརཾ ཕུསིཏྭཱ ཨུགྒཏཝཱཏེན. ནཱསཝཱཏེ པན ཝཏྟབྦམེཝ ནཏྠི. པུགྒལཔཎྞཏྟིཝསེནཱཏི ཏེསཾཡེཝ སོལ༹སནྣཾ སཔྤཱནཾ ཨཱགཏཝིསོཏིཨཱདིཔུགྒལནཱམསྶ ཝསེན ཙཏུསཊྛི ཧོནྟི པཙྩེཀཾ ཙཏུབྦིདྷབྷཱཝཏོ. ཨཱགཏཝིསོཏི ཨཱགཙྪཝིསོ, སཱིགྷཏརཾ ཨབྷིརུཧནཝིསོཏི ཨཏྠོ. གྷོརཝིསོཏི ཀཀྑལ༹ཝིསོ, དུཏྟིཀིཙྪཝིསོ. ཨཡཾ སཱིཏཨུདཀཾ ཝིཡ ཧོཏི གཱལ༹ྷདུབྦིནིམྨོཙཡབྷཱཝེན. ཨུདཀསཔྤོ ཧི གྷོརཝིསོ ཧོཏི ཡེཝཱཏི ཝུཏྟཾ – ‘‘ཨུདཀསཔྤཱདཱིནཾ ཝིསཾ ཝིཡཱ’’ཏི. པཉྙཱཡཏཱིཏི གཎྜཔིལ༹ཀཱདིཝསེན པཉྙཱཡཏི. ཨནེལ༹ཀསཔྤོ ནཱམ མཧཱཨཱསཱིཝིསོ. ནཱིལསཔྤོ ནཱམ སཱཁཝཎྞོ ¶ རུཀྑགྒཱདཱིསུ ཝིཙརཎཀསཔྤོ. ཨིམིནཱ ཨུཔཱཡེནཱཏི ཡོཡཾ ཀཊྛམུཁེསུ དཊྛཝིསཱནཾཡེཝ ‘‘ཨཱགཏཝིསོ ནོ གྷོརཝིསོ’’ཏིཨཱདིནཱ ཙཏུབྦིདྷབྷཱཝོ ཝུཏྟོ, ཨིམིནཱ ཨུཔཱཡེན. ཀཊྛམུཁེ དཊྛཝིསཱདཡོཏི ཀཊྛམུཁེསུ དཊྛཝིསོ, ཕུཊྛཝིསོ, ཝཱཏཝིབྷོཏི ཏཡོ, པཱུཏིམུཁཱདཱིསུ ཙ དཊྛཝིསཱདཡོ ཙཏྟཱརོ ཙཏྟཱརོ ཝེདིཏབྦོ.

ཨེཀེཀནྟི ཙཏུསཊྛིཡོ ཨེཀེཀཾ. ཙཏུདྷཱཏི ཨཎྜཛཱདིཝིབྷཱགེན ཙཏུདྷཱ ཝིབྷཛིཏྭཱ. ཚཔཎྞཱསཱནཱིཏི ཚཔཎྞཱསཱདྷིཀཱནི. གཏམགྒསྶཱཏི ཡཐཱཝུཏྟསངྑྱཱགཏམགྒསྶ པཊིལོམཏོ སཾཁིཔྤམཱནཱ ཨནུཀྐམེན ཙཏྟཱརོཝ ཧོནྟི. ཀུལཝསེནཱཏི ཀཊྛམུཁཱདིཛཱཏིཝསེན.

སཀལཀཱཡེ ཨཱསིཉྩིཏྭཱ ཝིཡ ཋཔིཏཝིསཱཏི ཧི ཏེསཾ ཕུཊྛཝིསཏཱ, ཝཱཏཝིསཏཱ ཝུཙྩཏི. ཨེཝནྟི ‘‘ཨཱསིཏྟཝིསཱ’’ཏིཨཱདིནཱ. ཨེཏྠཱཏི ཨཱསཱིཝིསསདྡེ ཝཙནཏྠོ ནིརུཏྟིནཡེན ཝེདིཏབྦོ. ཨུགྒཏཏེཛཱཏི ཨུདགྒཏེཛཱ, ཨཏྟནོ ཝིསཏེཛེན ནེསཾ ཀུརཱུརདབྦཏཱ ཝཱ. དུནྣིམྨདྡནཝིསཱཏི མནྟཱགདེཧི ཨནིམྨདྡནཱིཡཝིསཱ. ཙཏྟཱརོ ཨཱསཱིཝིསཱཏི ཨེཏྠ ཨིཏི-སདྡོ ཨཱདིཨཏྠོ. ཏེནེཏྠ ཨཝསེསཔཱལི༹ཾ སངྒཎྷཱཏི.

ཨཱསཱིཝིསེསཱུཏི ¶ ཨིམེ ཨཱསཱིཝིསཱ དཊྛཝིསཱ ཨེཝཱཏི ཝེདིཏབྦཱ. སརཱིརཊྛཀེསུཡེཝཱཏི ཏེན པུརིསེན ཏེསཾ ཀསྶཙི ཨནིཊྛསྶ ཨཀཏཏྟཱ ཨཱཡུསེསསྶ ཙ ཝིཛྫམཱནཏྟཱ ནཾ ན དཾསིཾསཱུཏི དཊྛབྦཾ. པུཙྪི ཡཐཱབྷཱུཏཾ པཝེདེཏུཀཱམོ. དུརུཔཊྛཱཧཱཏི དུརུཔཊྛཱནཱ. སོཏྠིམགྒོཏི སོཏྠིབྷཱཝསྶ ཨུཔཱཡོ.

ཨནྟརཙརོཏི ཨནྟརཾ ཙརོ སུཁསཏྟུ ཝིསྶཱསགྷཱཏཱི. ཏེནཱཧ ‘‘ཝདྷཀོ’’ཏི. ཨིདཱནི ཏཱསཾ པེསནེ ཀཱརཎཾ དསྶེཏུཾ ‘‘པཋམ’’ནྟིཨཱདི ཝུཏྟཾ. ཨབྷིམུཁགཏཾ ཝིཡ ཨབྷིམུཁགཏཾ. ཨཱིདིསཱིཔི ཧི ཝཙོཡུཏྟི ལོཀེ ནིརཱུཔཱིཡཏི སནྟིཡཾ པུརིསཾ ཋཔེཏཱིཏི ཝིཡ. ཏསྨཱ ཨབྷིམུཁགཏནྟི ཨབྷིམུཁཾ ཏེན སམྤཏྟནྟི ཨཏྠོ. ཝངྐསཎྛཱནཾ ཕལཀཾ རུཀྑམཱུལེ ཨཱགཏཱགཏཱནཾ ནིསཱིདནཏྠཱཡ ཨཏྠཏཾ.

ཨརིཏྟཧཏྠོ པུརིསོ སནྟཱརེཏི ཨེཏཱཡཱཏི སནྟཱརཎཱི. ཨོརིམཏཱིརཏོ ཨུཏྟརཎཱཡ སེཏུ ཨུཏྟརསེཏུ. ཨེཀེན དྭཱིཧི ཝཱ གནྟབྦོ རུཀྑམཡོ སེཏུ རུཀྑསེཏུ. ཛངྒྷསཏྠེན གམནཡོགྒོ སེཏུ ཛངྒྷསེཏུ. སཀཊེན གནྟུཾ སཀྐུཎེཡྻོ སཀཊསེཏུ. ན ཁོ ཨེས བྲཱཧྨཎོ པརམཏྠཏོ. ཏདཏྠོ པན ཨེཀདེསེན སམྦྷཝཏཱིཏི ཏཐཱ ཝུཏྟནྟི དསྶེནྟོ ‘‘ཨེཏྟཀཱནཾ པཙྩཏྠིཀཱནཾ བཱཧིཏཏྟཱ’’ཏི ཨཱཧ. དེསནནྟི ¶ ཨུདྡེསདེསནཾ. ཝིནིཝཏྟེནྟོཏི པཊིསཾཧརནྟོ. ན ལདྡྷོ ཝཏཱསཱིཏི ན ལདྡྷོ ཝཏ ཨཱསི.

རཱཛཱ ཝིཡ ཀམྨཾ སཏྟེསུ ཨིསྶརིཡསྶ ཝཏྟཱཔནཏོ. རཱཛཱ…པེ… པུཐུཛྫནོ ཝཊྚདུཀྑསངྑཱཏཱཔརཱདྷཏཱཡ. ཉཱཎཔལཱཡནེནཱཏི མཧཱབྷཱུཏེཧི ནིབྦིནྡིཏྭཱ ཝིརཛྫིཏྭཱ ཝིམུཙྩིཏུཀཱམཏཱཝསེན ཨུཔྤནྣཉཱཎཔལཱཡནེ མགྒཱདྷིགམསིདྡྷེནེཝ ཉཱཎཔལཱཡནེན. ཨེཝཉྷེཏྠ ཨུཔམཱསཾསནྡནཾ མཏྠཀཾ པཱཔིཏམེཝ ཧོཏི.

ཡཐེཝ ཧཱིཏིཨཱདིནཱ ཨེཀདེསནཱསམུདཱཡསྶ ནིདསྶནཾ ཨཱརདྡྷཾ. ཡཐཱཝུཏྟཝཙནཾ ཨཊྛཀཐཱཙརིཡཱནཾ ཝཙནེན སམཏྠེཏི ‘‘པཏྠདྡྷོ བྷཝཏཱི’’ཏིཨཱདིནཱ. ཏཏྠ ཀཊྛམུཁེན ཝཱཏི ཝཱ-སདྡོ ཨུཔམཏྠོ. ཡཐཱ ཀཊྛམུཁེན སཔྤེན དཊྛོ པཏྠདྡྷོ ཧོཏི, ཨེཝཾ པཐཝཱིདྷཱཏུཔྤཀོཔེན སོ ¶ ཀཱཡོ ཀཊྛམུཁེཝ ཧོཏི, ཀཊྛམུཁགཏོ ཝིཡ པཏྠདྡྷོ ཧོཏཱིཏི ཨཏྠོ. ཨཐ ཝཱ ཝཱ-སདྡོ ཨཝདྷཱརཎཏྠོ. སོ ‘‘པཐཝཱིདྷཱཏུཔཀོཔེན ཝཱ’’ཏི ཨེཝཾ ཨཱནེཏྭཱ སམྦནྡྷིཏབྦོ. ཨཡཉྷེཏྠ ཨཏྠོ – ཀཊྛམུཁེན དཊྛོཔི ཀཱཡོ པཐཝཱིདྷཱཏུཔྤཀོཔེནེཝ པཏྠདྡྷོ ཧོཏི, ཏསྨཱ པཐཝཱིདྷཱཏུཡཱ ཨཝིཡུཏྟོ སོ ཀཱཡོ སབྦདཱ ཀཊྛམུཁགཏོ ཝིཡ ཧོཏཱིཏི. ཝཱ-སདྡོ ཝཱ ཨནིཡམཏྠོ. ཏཏྲཱཡམཏྠོ – ཀཊྛམུཁེན དཊྛོ ཀཱཡོ པཏྠདྡྷོ ཧོཏི ཝཱ, ན ཝཱ མནྟཱགདཝསེན. པཐཝཱིདྷཱཏུཔྤཀོཔེན པན མནྟཱགདརཧིཏོ སོ ཀཱཡོ ཀཊྛམུཁགཏོ ཝིཡ ཧོཏི ཨེཀནྟཔཏྠདྡྷོཏི. ཏཏྠ ཀཱཡོཏི པཀཏིཀཱཡོ. པཱུཏིཀོཏི ཀུཐིཏོ. སནྟཏྟོཏི སབྦསོ ཏཏྟོ མཧཱདཱཧཔྤཏྟོ. སཉྪིནྣོཏི སབྦསོ ཚིནྣོ ཙུཎྞཝིཙུཎྞབྷཱུཏོ. ཡདཱ ཀཱཡོ པཏྠདྡྷཱདིབྷཱཝཔྤཏྟོ ཧོཏི, ཏདཱ པུརིསོ ཀཊྛམུཁཱདིསཔྤསྶ མུཁེ ཝཏྟམཱནོ ཝིཡ ཧོཏཱིཏི ཨཏྠོ.

ཝིསེསཏོཏི ཀཊྛམུཁཱདིཝིསེསཏོ ཙ པཐཝཱིཨཱདིཝིསེསཏོ ཙ. ཨནཏྠགྒཧཎཏོཏིཨཱདི ཨཙེཏནེསུཔི བྷཱུཏེསུ སཙེཏནེསུ ཝིཡ ཨནཏྠཱདཱིནཾ པཙྩཀྑཏཱཡ ནིབྦེདཛནནཏྠཾ ཨཱརདྡྷཾ. ཏཏྠ ཨཱསཡཏོཏི པཝཏྟིཊྛཱནཏོ. ཨེཏེསནྟི མཧཱབྷཱུཏཱནཾ. སདིསཏཱཏི ཝམྨིཀཱསཡསུསིརགཧནསངྐཱརཊྛཱནཱསཡཏཱཡ ཙ སདིསཏཱ.

པཙྩཏྟལཀྑཎཝསེནཱཏི ཝིསུཾ ཝིསུཾ ལཀྑཎཝསེན. པཐཝཱིཨཱདཱིནཾ ཀཀྑལ༹བྷཱཝཱདི, ཏཾསམངྒིནོ པུགྒལསྶ ཀཀྑལ༹བྷཱཝཱཔཱདནཱདིནཱ ཝིཀཱརུཔྤཱདནཏོ ཝིསཝེགཝིཀཱརཏོ སདིསཏཱ ཝེདིཏབྦཱ.

ཨནཏྠཱཏི ¶ བྱསནཱ. བྱཱདྷིནྟི ཀུཊྛཱདིབྱཱདྷིཾ. བྷཝེ ཛཱཏཱབྷིནནྡིནོཏི བྷཝེསུ ཛཱཏིཡཱ ཨབྷིནནྡནསཱིལཱ. པཉྩཝོཀཱརེ ཧི ཛཱཏིཡཱ ཨབྷིནནྡནཱ ནཱམ མཧཱབྷཱུཏཱབྷིནནྡནཱ ཨེཝ.

དུརུཔཊྛཱནཏརཱནཱིཏི དུཔྤཊིཀཱརཏརཱནི. དུརཱསདཱཏི དུརུཔསངྐམནཱ. ‘‘ཨུཔཊྛཱམཱི’’ཏི ཨུཔསངྐམིཏུཾ ན སཀྐོནྟི. པརིཛཱནཱམ ཀམྨནཱམཱནི, ཨུཔཀཱརཱ ནཱམ ནཏྠི. ཨནནྟདོསཱུཔདྡཝཏོཏི ཨཔརིམཱཎདོསཱུཔདྡཝཧེཏུཏོ. ཨེཀཔཀྑལནྟི ཨེཀདུཀྑཾ.

རཱུཔཀྑནྡྷོ ¶ བྷིཛྫམཱནོ ཙཏྟཱརོ ཨརཱུཔཀྑནྡྷེ གཧེཏྭཱཝ བྷིཛྫཏི ཨརཱུཔཀྑནྡྷཱནཾ ཨེཀནིརོདྷཏྟཱ. ཝཏྠུརཱུཔམྤི གཧེཏྭཱཝ བྷིཛྫནྟི པཉྩཝོཀཱརེ ཨརཱུཔཀྑནྡྷེསུ བྷིནྣེསུ རཱུཔཀྑནྡྷསྶ ཨཝཊྛཱནཱབྷཱཝཏོ. ཨེཏྟཱཝཏཱཏི ལོབྷུཔྤཱདནམཏྟེན. པཉྙཱ ནཱམ ཨཏྟབྷཱཝེ ཨུཏྟམངྒཾ པཉྙུཏྟརཏྟཱ ཀུསལདྷམྨཱནཾ, སཏི ཙ ཀིལེསུཔྤཏྟིཡཾ པཉྙཱཡ ཨནུཔྤཛྫནཏོ ཝུཏྟཾ – ‘‘ཨེཏྟཱཝཏཱ པཉྙཱསཱིསཾ པཏིཏཾ ནཱམ ཧོཏཱི’’ཏི. ཡོནིཡོ ཨུཔནེཏི ཏདུཔགསྶ ཀམྨཔཙྩཡསྶ བྷཱཝེ. ‘‘ཛཱཏིབྷཡཾ, ཛརཱབྷཡཾ, མརཎབྷཡཾ, ཙོརབྷཡ’’ནྟིཨཱདིནཱ ཨཱགཏཱནི པཉྩཝཱིསཏི མཧཱབྷཡཱནི, ‘‘ཧཏྠམྤི ཚིནྡཏཱི’’ཏིཨཱདིནཱ ཨཱགཏཱནི དྭཏྟིཾས ཀམྨཀཱརཎཱནི ཨཱགཏཱནེཝ ཧོནྟི ཀཱརཎསྶ སམཝཊྛིཏཏྟཱ. ནནྡཱིརཱགོ སངྑཱརཀྑནྡྷོཏི སངྑཱརཀྑནྡྷཔརིཡཱཔནྣཏྟཱ ཝུཏྟཾ.

པཱལི༹ཡཾཡེཝ ཨཱགཏཱ ‘‘ཙཀྑུཏོ ཙེཔི ནཾ, བྷིཀྑཝེ’’ཏིཨཱདིནཱ. ཀིཉྩི ཨལབྷིཏྭཱཏི ཏསྨིཾ སུཉྙགཱམེ ཙོརཱནཾ གཡ྄ཧཱུཔགསྶ ཨལཱབྷཝཙནེནེཝ ཏསྶ པུརིསསྶ ཨཏྟནོ པཊིསརཎསྶ ཨལཱབྷོ ཝུཏྟོ ཨེཝ ཧོཏཱིཏི ན ཨུདྡྷཊོ, པུརིསཊྛཱནིཡོ བྷིཀྑུ, ཙོརཱ པན བཱཧིརཱཡཏནཊྛཱནིཡཱ. ཨབྷིནིཝིསིཏྭཱཏི ཝིཔསྶནཱབྷིནིཝེསཾ ཀཏྭཱ. ཨཛ྄ཛྷཏྟིཀཱཡཏནཝསེན དེསནཱཡ ཨཱགཏཏྟཱ ཝུཏྟཾ ‘‘ཨུཔཱདཱརཱུཔཀམྨཊྛཱནཝསེནཱ’’ཏི.

བཱཧིརཱནནྟི བཱཧིརཱཡཏནཱནཾ. པཉྩ ཀིཙྩཱནཱིཏི ཙོརེཧི ཏདཱ ཀཱཏབྦཱནི པཉྩ ཀིཙྩཱནི. ཧཏྠསཱརནྟི ཨཏྟནོ སནྟཀེ ཧཏྠེཧི གཧེཏབྦསཱརབྷཎྜཾ. པཱཏནཱདིཝསེན ཧཏྠཔརཱམཱསཾ ཀརོནྟི. པཧཱརཋཱནེཏི པཧཊཊྛཱནེ. ཋཱནསོ ཏསྨིཾ ཨེཝ ཁཎེཏི ཝདནྟི. ཨཏྟནོ སུཁཱཝཧཾ ཀུསལདྷམྨཾ པཧཱཡ དུཀྑཱཝཧེན ཨཀུསལེན སམངྒིཏཱ སུཁཱཝཧཾ བྷཎྜཾ པཧཱཡ བཧི ནིཀྑམནཾ ཝིཡཱཏི ཝུཏྟཾ སུཁནིསྶཡཏྟཱ ཏསྶ. ཧཏྠཔརཱ…པེ… ཨཱཔཛྫནཀཱལོ གུཎསརཱིརསྶ ཏདཱ པམཱདེན བཱདྷིཏཏྟཱ. པཧཱར…པེ… ཀཱལོ ཏཏོ དལ༹ྷཏརཾ གུཎསརཱིརསྶ བཱདྷིཏཏྟཱ. པཧཱརཾ…པེ… ཨསྶམཎཀཱལོ གུཎསརཱིརསྶ མརཎཔྤཏྟིསདིསཏྟཱ. ཨཝསེསཛནསྶ དཱསཔརིབྷོགེན པརིབྷུཉྫིཏབྦཏཱ ཨཉྙཐཏྟཔྤཏྟིགིཧིབྷཱཝཱཔཏྟིཡཱ ནིདསྶནབྷཱཝེན ཝུཏྟཱ. ཡཾ ‘‘ཚསུ དྭཱརེསུ ཨཱརམྨཎེ ¶ ཨཱཔཱཐགཏེ’’ཏི ཝུཏྟཾ, ཏམེཝ ཨཱརམྨཎཾ ནིསྶཱཡ སམྤརཱཡིཀོ དུཀྑཀྑནྡྷོ ཝེདིཏབྦོཏི ཡོཛནཱ.

རཱུཔཱདཱིནཱིཏི ¶ རཱུཔསདྡགནྡྷརསཱནི. ཏེསནྟི ཡཐཱཝུཏྟབྷཱུཏུཔཱདཱརཱུཔཱནཾ. ལཧུཏཱདིཝསེནཱཏི ཏེསཾ ལཧུཏཱདིཝསེན. དུརུཏྟརཎཊྛོཏི ཨུཏྟརིཏུཾ ཨསཀྐུཎེཡྻབྷཱཝོ ཨོགྷཊྛོ. ཝུཏྟནཡེནཱཏི ‘‘སམྤཡུཏྟཱ ཝེདནཱ ཝེདནཱཀྑནྡྷོ’’ཏིཨཱདིནཱ ཝུཏྟནཡེན. ཙཏུམཧཱབྷཱུཏཱདཱིཧཱིཏི ཨཱདིསདྡེན ཨུཔཱདཱནཀྑནྡྷཱདཱིནཾ གཧཎཾ. ཙིཏྟཀིརིཡདསྶནཏྠནྟི ཙིཏྟཔཡོགདསྶནཏྠཾ. ཝུཏྟཝཱཡཱམམེཝཱཏི ‘‘སམྨཱཝཱཡཱམོ’’ཏི ཡོ ཨརིཡམགྒེ ཝུཏྟོ. བྷདྡེཀརཏྟཱདཱིནཱིཏི ‘‘ཨཛྫེཝ ཀིཙྩཾ ཨཱཏཔྤ’’ནྟིཨཱདིནཱ (མ. ནི. ༣.༢༧༢, ༢༧༥, ༢༧༦) ཝུཏྟཱནི བྷདྡེཀརཏྟསུཏྟཱདཱིནི.

ཀུཎྛཔཱདོཏི ཚིནྣཔཱདོཝ ཧུཏྭཱ གཏིཝིཀལོ. མཱནསཾ བནྡྷཏཱིཏི ཏསྨིཾ ཙིཏྟེ ཀིཙྩཾ ནིབནྡྷཏི. ‘‘ཨཡཾ ཨརིཡམགྒོ མཡ྄ཧཾ ཨོགྷུཏྟརནུཔཱཡོ’’ཏི ཏཏྠ ཙིཏྟསྶ སནྣིཊྛཱནཾ པུན ཏཏྠ པཝཏྟནཾ ཝཱིརིཡཱརམྦྷོ ཙིཏྟབནྡྷནཾ.

ཏསྶ ནཱམརཱུཔསྶ ཨིམེ ནནྡཱིརཱགཱདཡོ ཏཎྷཱཝིཛྫཱདཡོཏི ཀཏྭཱ པཙྩཡོ དྷམྨཱཡཏནེཀདེསོ. ཨརིཡམགྒནིབྦཱནཏཎྷཱཝཛྫོ ཨིདྷ དྷམྨཱཡཏནེཀདེསོཏི ཙ. སོལ༹སཧཱཀཱརེཧཱིཏི པཱིལ༹ནཱདཱིཧི སོལ༹སཧི ཨཱཀཱརེཧི. སཏིཔཊྛཱནཝིབྷངྒེ ཨཱགཏནཡེན སཊྛིནཡསཧསྶེཧི. དེསནཱཔརིཡོསཱནེ…པེ… པཏིཊྛཧིཾསཱུཏི ཝིཔཉྩིཏཉྙཱུ ཨེཝེཏྠ གཧཎཝསེན ཨདྷིགཏཝིསེསཱ པརིཙྪིནྡིཏཱ. ཏེ ཧི ཏདཱ དྷམྨཔཊིགྒཱཧཀབྷཱཝེན སཏྠུ སནྟིཀེ སནྣིསིནྣཱ. ཨུགྒྷཊིཏཉྙཱུནཾ པན ནེཡྻཱནཉྩ ཝིསེསཱདྷིགམོ ཨཊྛཀཐཱཡཾ ན རུལ༹ྷོཏི ཨིདྷ ན གཧིཏོཏི.

ཨཱསཱིཝིསོཔམསུཏྟཝཎྞནཱ ནིཊྛིཏཱ.

༢. རཐོཔམསུཏྟཝཎྞནཱ

༢༣༩. སུསཾཝུཏིནྡྲིཡསྶ བྷོཛནེ མཏྟཉྙུནོ སཏསྶ སམྤཛཱནསྶ ཝིཧརཏོ ཀིལེསནིམིཏྟཾ དུཀྑཾ ཨནཝསརནྟི སུཁསོམནསྶབཧུལཏཱ ཝུཏྟཱ. ཡཝཏི ཏེན ཕལཾ མིསྶིཏཾ ཝིཡ ཧོཏཱིཏི ཡོནི, ཨེཀནྟིཀཾ ཀཱརཎཾ. ཨསྶཱཏི བྷིཀྑུནོ. པརིཔུཎྞནྟི ཨཝིཀལཾ. ཨནཝསེསཾ ཨཱསཝེ ཁེཔེཏཱིཏི ཨཱསཝཀྑཡོ, ཨགྒམགྒོ. ཡཾ ཡནྟི དནྡྷཾ མཛ྄ཛྷཾ ཛཝོཏི ཛཝཱདཱིསུ ཡཾ ཡཾ གམནཾ. རཀྑཎཏྠཱཡཱཏི ཀིལེསཙོརེཧི རཀྑཎཏྠཱཡ ¶ . ཝེགནིགྒཧཎཏྠཱཡཱཏི ཀིལེསཧེཏུཀསྶ ¶ ཨིནྡྲིཡཝེགསྶ ནིགྒཎྷནཏྠཱཡ. ནིབྦིསེཝནཏྠཱཡཱཏི ཝིསེཝནསྶ ཝིཔྥནྡིཏསྶ ནིརོདྷནཱཡ. ཀིལེསཱུཔསམཏྠཱཡཱཏི ཀིལེསཱནཾ ཨུཔརཱུཔརི སམནཏྠཱཡ ཝཱུཔསམནཏྠཱཡ.

སམཎརཏི ནཱམ སམཐཝིཔསྶནཱམགྒཕལསུཁཱནི. དནྟཱནམྤི སིནྡྷཝཱནཾ སཱརཐིནོ པཡོགེན སིཡཱ ཀཱཙི ཝིསེཝནམཏྟཱཏི ཏདབྷཱཝཾ དསྶེནྟོ ‘‘ནིབྦིསེཝནེ ཀཏྭཱ པེསེནྟོ’’ཏི ཝུཏྟཾ. ཉཱཎཾ གཙྪཏཱིཏི ཨསངྒམནཾ པཝཏྟཏི པགེཝ ཨིནྡྲིཡབྷཱཝནཱཡ ཀཏཏྟཱ, ཀིལེསནིགྒཧསྶ སུཁེནེཝ སིདྡྷཏྟཱ. དཱཡཀསྶ ཨཛ྄ཛྷཱསཡོ ཝསོ ཨུལཱ༹རོ ལཱམཀོ. དེཡྻདྷམྨསྶ པམཱཎཾ ཝསོ ཨཔྤཀཾ བཧུཀཉྩ.

མཧཱམཎྜཔཊྛཱནཾ ནཱམ ལོཧཔཱསཱདསྶ པུརཏོ ཨེཝ མཧཱབྷིཀྑུསངྒྷསྶ སནྣིཔཱཏཀཱལེ ཏེསཾ པཧོནཀཝསེན མཧཱམཎྜཔསྶ ཀཏྟབྦཊྛཱནཾ. གཧཎམཱནནྟི པརིཝིསགཧཎབྷཱཛནཾ.

པཀཏིཡཱ བྷཏྟཀཱརཀིཙྩེ ཨདྷིགཏོ ཨུཔཊྛཱཀུཔཱསཀོ. མུདུསམཁརསཉྙིཏེཧི, དཧནཔཙནབྷཛྫནསཉྙིཏེཧི ཝཱ ཏཱིཧི པཱཀེཧི.

པརིསོདྷེཏྭཱཏི རཉྙོ ཨནུཙྪཝིཀབྷཱཝཾ པརིསོདྷེཏྭཱ. བྷཱུམིཡཾ ཚཌྜེསི ‘‘བྷིཀྑཱུནཾ ཨདཏྭཱ མཡཱ མུཁེ པཀྑིཏྟ’’ནྟི. མུཁེན གཎྷི ཏསྶ ནིདྡོསབྷཱཝཾ དསྶེཏུཾ. མཏྟཾ ཛཱནཱཔེཏུཾ པམཛྫི. ‘‘ཏྭཾ ཀུཏོ ཨཱགཏོ’’ཏི པུཙྪནེ པམཱདཾ ཨཱཔཛྫི. ཨནུབྷཱགོཏི ཨཝསིཊྛབྷཱགོ. ཨིདམཏྠིཡནྟི ཨིདཾ པཡོཛནཾ. ཨིཏརནྟི པཱལི༹ཡཾ ཨནཱགཏམྤི ཨཱཧཱརེ པམཱཎཛཱནནཾ.

སཡནཾ སེཡྻཱ, ཀཱམབྷོགཱིནཾ སེཡྻཱ ཀཱམབྷོགིསེཡྻཱ. དཀྑིཎཔསྶེན སཡཱནོ ནཱམ ནཏྠི དཀྑིཎཧཏྠེན ཀཱཏབྦཀིཙྩཀརཎཏོ. ཏེཛུསྶདཏྟཱཏི ཨིདཾ ཨནུཏྲཱསསྶེཝ སཱིཧསྶ སཡནནྟི དསྶེཏུཾ ཝུཏྟཾ. དྭེ པུརིམཔཱདེ ཨེཀསྨིཾ, པཙྪིམཔཱདེ ཨེཀསྨིཾ ཋཱནེ ཋཔེཏྭཱཏི ཧི ཨིདཾ པཱདཱནཾ ཨཝིཀྑིཏྟབྷཱཝཀརཎདསྶནཾ.

ཙཏུཏྠཛ྄ཛྷཱནསེཡྻཱཏི ཙཏུཏྠཛ྄ཛྷཱནིཀཾ ཕལསམཱཔཏྟིཾ ཝདཏི. ཡེབྷུཡྻེན ཧི ཏཐཱགཏཱ ཕལསམཱཔཏྟིཾ སམཱཔཛྫིཏྭཱཝ སཡནྟི. སཱ ཙ ནེསཾ ཙཏུཏྠཛ྄ཛྷཱནཏོ ཝུཊྛཱཡ, ཀིལེསཔརིནིབྦཱནསྶ ཙ ཀཏཏྟཱཏི ཝདནྟི ¶ . ཨིདྷ སཱིཧསེཡྻཱ ཨཱགཏཱ པཱདཾ ཨཙྩཱདྷཱཡ པུབྦེནཱཔརཾ ཨཛཧིཏསཾལཀྑཎཱ སེཡྻཱཏི ཀཏྭཱ. ཏེནཱཧ ‘‘ཨཡཾ ཧཱི’’ཏིཨཱདི. ཨེཝནྟི ‘‘དཀྑིཎེན པསྶེནཱ’’ཏིཨཱདིནཱ ཝུཏྟཱཀཱརེན སེཡྻཾ ཀཔྤེཏི.

ཀཐཾ ¶ ནིདྡཱཡནྟོ སཏོ སམྤཛཱནོ ཧོཏི? བྷཝངྒཙིཏྟེན ཧི ནིདྡཱུཔགམནནྟི ཨདྷིཔྤཱཡོ. ཨཔྤཧཱནེནཱཏི ཏདདྷིམུཏྟཏཱཡ ཏདཔྤཧཱནཾ དཊྛབྦཾ. ཏཐཱ ཏེསུ ནིདྡོཀྐམནསྶ ཨཱདིཔརིཡོསཱནེསུ ཨཛཧིཏསཏིསམྤཛཉྙཾ ཧོཏི. ཏེནཱཧ – ‘‘ནིདྡཾ ཨོཀྐམནྟོཔི སཏོ སམྤཛཱནོ ཧོཏཱི’’ཏི. ཨེཏཾ པནཱཏི ‘‘ནིདྡཾ ཨོཀྐམནྟོཔི སཏོ སམྤཛཱནོ ཧོཏཱི’’ཏི ཝུཏྟནཡཾ ཝདཏི. ཉཱཎདྷཱཏུཀནྟི ན རོཙཡིཾསཱུཏི ནིདྡོཀྐམནེཔི ཛཱགརཎེ པཝཏྟཉཱཎསབྷཱཝམེཝཱཏི ན རོཙཡིཾསུ པོརཱཎཱ. ནིརནྟརཾ བྷཝངྒཙིཏྟེསུ ཝཏྟམཱནེསུ སཏིསམྤཛཉྙཱསམྦྷཝོཏི ཨདྷིཔྤཱཡོ. པུརིམསྨིཉྷི ནཡེ སཏིསམྤཛཉྙསྶ ཨསཾཝརོ, ན བྷཝངྒསྶ. ཨིནྡྲིཡསཾཝརོ, བྷོཛནེ མཏྟཉྙུཏཱ, ཛཱགརིཡཱནུཡོགོཏི ཨིམེཧི ཏིཝངྒིཀཱ, ནིམིཏྟཱནུབྱཉྫནཔརིཝཛྫནཱདི སབྦཾ ཝིཔསྶནཱཔཀྑིཀམེཝཱཏི ཨདྷིཔྤཱཡོ.

ཏཱནེཝཱཏི ཝིཔསྶནཱཀྑཎེ པཝཏྟཱནི ཨིནྡྲིཡཱདཱིནི. ཡཱཝ ཨརཧཏྟཱ དེསནཱ ཝིཏྠཱརཏོ ཀཐེཏབྦཱ. པཱལི༹ཡཾ པན ‘‘ཡོནི ཙསྶ ཨཱརདྡྷཱ ཧོཏི ཨཱསཝཱནཾ ཁཡཱཡཱ’’ཏི སངྑེཔེན ཀཐིཏཱ.

རཐོཔམསུཏྟཝཎྞནཱ ནིཊྛིཏཱ.

༣. ཀུམྨོཔམསུཏྟཝཎྞནཱ

༢༤༠. ཨཊྛིཀུམྨོཏི པིཊྛིཡཾ ཏིཁིཎཊྛིཀོ ཀུམྨོ. ཏནྟིབནྡྷོཏི བྱཱཝཊོ. སམུགྒེ ཝིཡ ཨཏྟནོ ཀཔཱལེ པཀྑིཔིཏྭཱ. སམོདཧནྟོ སམྨཱ ཨོདཧནྟོ ཨཛ྄ཛྷཏྟམེཝ དཧནྟོ. ཨཱརམྨཎཀཔཱལེཏི ཨཱརམྨཎཀཊཱཧེ. སམོདཧནྟོཏི དིཊྛམཏྟསྶེཝ ཙ གཧཎཏོ མནོཝིཏཀྐེ ཏཏྠེཝ སམྨདེཝ ཨོདཧནྟོ. ཏཉྷི ཝིསཡཝསེན པཝཏྟིཏུཾ ཨདེནྟོ. པཉྩ དྷམྨེཏི ‘‘ཀཱལེན ཝཀྑཱམཱི’’ཏིཨཱདིནཱ (པརི. ༣༦༢) ཝུཙྩམཱནེ.

ཀུམྨོཔམསུཏྟཝཎྞནཱ ནིཊྛིཏཱ.

༤. པཋམདཱརུཀྑནྡྷོཔམསུཏྟཝཎྞནཱ

༢༤༡. ཝིལཱསམཱནོ ¶ ཝིཡ སཱགརཾ པཏྭཱ. ཨནྟོསཱཁོཏི གངྒཱཡ ཏཱིརསྶ ཨནྟོ ཨོནཏསཱཁོ. ཏེམེཏཱིཏི ཏིནྟོ ཧོཏི. ཏིརིཡཾ པཏིཏོ དཎྜསེཏུ ཝིཡ ཋིཏཏྟཱ མཧཱཛནསྶ པཙྩཡོ ཛཱཏོ, ཏཐཱ མཧནྟབྷཱཝེན གངྒཱསོཏཾ ཨོཏརཎཱདི ནཏྠི.

ཨཡཾ ¶ ཧཱིཏི ཨནནྟརཾ ཝུཏྟཔུགྒལོ. ཨརིཡམགྒཾ ཨོརུཡ྄ཧཱཏི ཙཏུབྦིདྷཾ ཨརིཡམགྒཝཱིཐིཾ ཨོཏརིཏྭཱ. ‘‘ཙིཏྟཾ ནཱམེཏ’’ནྟིཨཱདིནཱ ཙིནྟེཏྭཱ གིཧིབནྡྷནཾ ན ཝིསྶཛྫེཏཱིཏི སམྦནྡྷོ. ཨཏྟནོ བྷཛམཱནཀེཏི ཨཏྟནོ བྷཛནྟེ. ཛཱིཝིཀཏྠཱཡ པཡུཛྫིཏབྦཏོ པཡོགོ, ཁེཏྟཝཏྠཱདི. ཏཏོ པཡོགཏོ ཨུཊྛིཏཾ ཨཱཡཾ. ཀིཉྩཱཔི བྷིཀྑཱུནཾ ཀཱཡསཱམགྒིཾ དེཏི བྷིཀྑཏྠཱཡ.

མུཎྜགྷཊནྟི བྷིནྣོཊྛཾ གྷཊཾ. ཁནྡྷེཏི ཨཾསེ. སངྒྷབྷོགནྟི སངྒྷསནྟཀཾ བྷོགགཱམཾ གནྟྭཱ. ཨཏྠཏོ ཨེཝཾ ཝདནྟཱིཏི ཏཐཱ ཨཏྠསྶ སམྦྷཝཏོ ཨེཝཾ ཝདནྟཱ ཝིཡ ཧོནྟི. ཡཱགུམཏྟཀེ ཡཱགུནྟི ཡཱགུཾ པིཝིཏྭཱ ཏཱཡ ཨཔརིཔཀྐཱཡ ཨེཝ ཨཉྙཾ ཡཱགུཾ ཨཛ྄ཛྷོཧརིཏྭཱཏི སམྦནྡྷོ.

ཀིལེསཱནུརཉྫིཏོཝཱཏི ཡོནིསོམནསིཀཱརསྶ ཨབྷཱཝེན ཀིལེསཱནུགཏཙིཏྟོ ཨེཝ. ཨཀྑཱིནི ནཱིཧརིཏྭཱཏི ཀོདྷཝསེན ཨཀྑིཀེ ཀརོནྟོ ཨཀྑཱིནི ནཱིཧརིཏྭཱ ཝིཙརིསྶཏི. ཨུདྡྷཏོ ཧོཏི ཨཝཱུཔསནྟོ.

དིཊྛིགཏིཀོཏི སཱསནིཀོ ཨེཝཾ ཨཡོནིསོ ཨུམྨུཛྫིཏྭཱ སཱསནཾ ཨུདྡྷམྨཾ ཨུབྦིནཡཾ ཀཏྭཱ དཱིཔེནྟོ ཨརིཊྛསདིསོ. ཏེནཱཧ ‘‘སོ ཧཱི’’ཏིཨཱདི. ཨརཱུཔབྷཝེ རཱུཔཾ ཨཏྠི, ཨཉྙཐཱ ཏཏོ ཙུཏསྶ ཀུཏོ རཱུཔཀྑནྡྷསྶ སམྦྷཝོ. ཨསཉྙཱིབྷཝེ ཙིཏྟཾ ཨཏྠཱིཏི ཨེཏྠཱཔི ཨེསེཝ ནཡོ. བཧུཙིཏྟཀྑཎིཀོ ལོཀུཏྟརམགྒོ ‘‘ཡོ ཨིམེ ཙཏྟཱརོ སཏིཔཊྛཱནེ བྷཱཝེཡྻ སཏྟཝསྶཱནཱི’’ཏིཨཱདིཝཙནཏོ (དཱི. ནི. ༢.༤༠༤; མ. ནི. ༡.༡༣༧). ཨནུསཡོ ཙིཏྟཝིཔྤཡུཏྟོ, ཨཉྙཐཱ སཱཝཛྫཱནཝཛྫདྷམྨཱནཾ ཨེཀཛ྄ཛྷཾ ཨུཔྤཏྟི སིཡཱ. ཏེ ཙ སཏྟཱ སནྡྷཱཝནྟི སཾསརནྟི, ཨཉྙཐཱ ཀམྨཕལཱནཾ སམྦནྡྷོ ན སིཡཱཏི. ཨིཏི ཝདནྟོ ཨེཝཾ མིཙྪཱཝཱདཾ པགྒཡ྄ཧ ཝདནྟོ.

ཏེམནརུཀྑོ ཝིཡ…པེ… དུལླབྷདྷམྨསྶཝནོ ཙ པུགྒལོ སདྡྷཱསིནེཧེན ཨཏེམནཏོ. ཀཏཝིནཡོ སིཀྑིཏཝིནཡོ ཡཐཱ ‘‘ཀཏཝིཛྫོ’’ཏི. དྷམྨཀཐིཀཱནཾ ¶ ཝིཙཱརེཐཱཏི ཨིདཾ དེཡྻདྷམྨཾ དྷམྨཀཐིཀཱནཾ ཨཡྻཱནཾ ཏསྶ ཏསྶ ཡུཏྟཝསེན ཝིཙཱརེཐཱཏི ནིཡྻཱཏནཝསེན ཝཏྭཱ. དིཝཱཀཐིཀོ སརབྷཱཎཀོ སཱཡནྷེ ཀཐེཏི, པུརིམཡཱམཾ ཀཐེནྟོ རཏྟིཀཐིཀོ བྷཱཎཀཔུགྒལོ.

ནནྡནཝནཱབྷིརཱམེཏི ནནྡནཝནཾ ཝིཡ མནོརམེ. ཨསྶ བྷཱརཧཱརབྷིཀྑཱུཏི ཨསྶ ཀིཙྩཝཱཧཀབྷིཀྑཱུ ཨུཔཛ྄ཛྷཱཡཱདཡོ. སུཁནིསིནྣཀཐནྟི པཊིསནྠཱརཀཐཱཔུབྦཀཾ ཨུཔནིསིནྣཀཐཾ སུཏྭཱ.

ཋིཏསཎྛཱནེནེཝ ¶ ཋིཏཱཀཱརེནེཝ ཋིཏཾ, ནཔྤཡུཏྟནྟི ཨཏྠོ. ཙིཏྟཀམྨམཱུལཱདཱིནི ཋིཏསཎྛཱནེནེཝ ཋིཏཱཏི ཡོཛནཱ. མུདུཏཱཡཱཏི མུདུཧདཡཏཱཡ སཱཔེཀྑཏཱཡ.

པཊིཔདནྟི སམཐཝིཔསྶནཱཔཊིཔཏྟིཾ. དཱིཔེཏྭཱ པཀཱསེཏྭཱ པཱཀཊཾ ཀཏྭཱ. ཏཏྲུཔྤཱདོཏི ཏཏྲ ཨུཔྤཛྫནཀཨཱཡུཔྤཱདོ. ཁེཏྟཾ སནྡྷཱཡ ཝདཏི. ཏེལ…པེ… ཧཏྠཱཏི ཏེལགྷཊ-མདྷུགྷཊཕཱཎིཏགྷཊཱདིཧཏྠཱ. ཨཔཀྐམིཾསུ དུབྦིཙཱརིཏཏྟཱ. པཱུརེསཱིཏི ཧེཊྛཱ ཙ ཏཏྠ ཏཏྠ ཨཏཱིཏཱནི ཀཱལཝཙནཱནི པོརཱཎཊྛཀཐཱཡ ཨཱགཏཏྟཱ ཀིར ཝུཏྟཱནི.

ཨུཔགམནཱནུཔགམནཱདཱིནི ཨོརིམསྶ པཱརིམསྶ ཙ ཨུཔགམནཱནུཔགམནཱནི ཙེཝ མཛ྄ཛྷེ སཾསཱིདནཱནི ཙ. པཊིཝིཛ྄ཛྷིཏུནྟི ཛཱནིཏུཾ. ཨེཏནྟི ཡཐཱཝུཏྟཾ ཙཀྑུསབྷཱཝཾ. དོམནསྶནྟི ཏསྶེཝ མནྡབྷཱཝཔཙྩཡཾ དོམནསྶཾ. ཨཱཔཛྫནྟོཔི ཨུཔགཙྪཏི ནཱམ ཏནྣིམིཏྟསཾཀིལེསསྶ ཨུཔྤཱདིཏཏྟཱ. ཏིཎྞཾ ལཀྑཎཱནནྟི ཧུཏྭཱ ཨབྷཱཝཏོ ཨཱདིཨནྟཝནྟཏོ ཏཱཝཀཱལིཀཏོ ནིཙྩཔཊིཀྑེཔཏོཏིཨཱདཱིནཾ ཏིཎྞཾ ལཀྑཎཱནཾ སལླཀྑཎཝསེན.

ཝཱམཏོཏི མིཙྪཱ. དཀྑིཎཏོཏི སམྨཱ. ཡཐཱ ཏསྶ ཏསྶ སཏྟསྶ ཨོརབྷཱཝཏྟཱ ཨཛ྄ཛྷཏྟིཀཱནི ཨཱཡཏནཱནི ཨོརིམཾ ཏཱིརཾ ཀཏྭཱ ཝུཏྟཱནི, ཨེཝཾ ནེསཾ པརབྷཱཝཏྟཱ བཱཧིརཱནི ཨཱཡཏནཱནི པཱརིམཾ ཝུཏྟཱནི. ཨཔཱཡམཛ྄ཛྷེ སཾསརཎཧེཏུཏཱཡ ནནྡཱིརཱགོཝ ‘‘མཛ྄ཛྷེ སཾསཱདོ’’ཏི ཝུཏྟོ.

ཨུནྣཏོཏི ‘‘སེཡྻོཧམསྨཱི’’ཏིཨཱདིནཱ ཨུནྣཏིཾ ཨུཔགཏོ. ཨཏྟུཀྐཾསནེ པཾསུཀཱུལིཀབྷཱཝེན ཨཏྟཱནཾ དཧནཏོ ཨཉྙཱཀཱརཏཱགཧེཏབྦོ. པཱསཱཎོ ནུ ཁོ ཨེས ཁཱཎུཀོཏི གཧེཏབྦདཱརུཀྑནྡྷསདིསོ ཝུཏྟོ.

ཙུཎྞཝིཙུཎྞཾ ¶ ཧོཏི ཨཱཝཊྚཝེགསྶ བལཝབྷཱཝཏོ. ཙཏཱུསུ ཨཔཱཡེསཱུཏི པཉྩཀཱམགུཎཱཝཊྚེ པཏིཏཔུགྒལོ མནུསྶལོཀེཔི གུཎསརཱིརབྷེདནེན དཱིགྷརཏྟཾ ཙུཎྞཝིཙུཎྞཾ ཨཱཔཛྫཏིཡེཝ, ཏསྶ ཏཐཱ ཨཱཔནྣཏྟཱ. ཨེཝཉྷི སོ ཨཔཱཡེསུ ཏཱདིསེསུ ཛཱཡཏི.

སཱིལསྶ དུཊྛཾ ནཱམ ནཏྠི, ཏསྨཱ ཨབྷཱཝཏྠོ ཨིདྷ དུ-སདྡོཏི ཨཱཧ ‘‘ནིསྶཱིལོ’’ཏི. ‘‘པཱཔཾ པཱཔེན སུཀར’’ནྟིཨཱདཱིསུ (ཨུདཱ. ༤༨) ཝིཡ པཱཔ-སདྡོ ནིཧཱིནཔརིཡཱཡོཏི ཨཱཧ ‘‘ལཱམཀདྷམྨོ’’ཏི. ན སུཙཱིཏི ཀཱཡཝཱཙཱཙིཏྟེཧི ན སུཙི. སངྐཱཡ ཝཱཏི ཨཏྟནོ ཝཱ སངྐཱཡ ¶ པརེསཾ སམཱཙཱརཀིརིཡཾ སརཏི ཨཱསངྐཏི. ཏེནཱཧ ‘‘ཏསྶ ཧཱི’’ཏིཨཱདི. ཏཱནི ཀམྨཱནི པཝིསཏཱིཏི ཏཱནི ཀམྨཱནི ཀརོནྟཱནཾ ཨནྟརེ པཝིསཏི. གུཎཱནཾ པཱུཏིབྷཱཝེནཱཏི གུཎབྷཱཝེན གཧིཏཱནཾ སཱིལདྷམྨཱནཾ སཾཀིལིཊྛབྷཱཝཔྤཏྟིཡཱ. ཀཙཝརཛཱཏོཏི ཨབྦྷནྟརཾ སཉྫཱཏཀཙཝརོ, ཀཙཝརབྷཱུཏོ ཝཱ.

ཨཎཎཱ པབྦཛྫཱཏི ཨཎཎསྶེཝ པབྦཛྫཱ. ཨོརིམཏཱིརཱདཱིནཾ ཨུཔགམནཱནུཔགམནཱདཱིནཾ ཛོཏིཏཏྟཱ ཝཊྚཝིཝཊྚཾ ཀཐིཏཾ.

པཋམདཱརུཀྑནྡྷོཔམསུཏྟཝཎྞནཱ ནིཊྛིཏཱ.

༥. དུཏིཡདཱརུཀྑནྡྷོཔམསུཏྟཝཎྞནཱ

༢༤༢. ཡཱ ཨཱཔཏྟི ཝུཊྛཱནགཱམིནཱི དེསནཱགཱམིནཱི, ཏཾ པཊིཙྪཱདིཏཀཱལཏོ པཊྛཱཡ སཾཀིལིཊྛཱ ནཱམ ཨནྟརཱཡིཀབྷཱཝཏོ. ཨཱཝཱིཀཏཱ པན ཨནཱཔཏྟིཊྛཱནེ ཏིཊྛཏཱིཏི ཨསཾཀིལིཊྛཱ ནཱམ. ཏེནཱཧ – ‘‘ཨཱཝཱིཀཏཱ ཧིསྶ ཕཱསུ ཧོཏཱི’’ཏི. ཨེཝརཱུཔཾ སཾཀིལིཊྛནྟི པཊིཙྪཱདིཏཏཱཡ ཝཱ དུཊྛུལླབྷཱཝེན ཝཱ སཾཀིལིཊྛཾ.

དུཏིཡདཱརུཀྑནྡྷོཔམསུཏྟཝཎྞནཱ ནིཊྛིཏཱ.

༦. ཨཝསྶུཏཔརིཡཱཡསུཏྟཝཎྞནཱ

༢༤༣. སནྠཱགཱརནྟི སཉྙཱཔནཱགཱརཾ. ཏེནཱཧ ‘‘ཨུཡྻོགཀཱལཱདཱིསཱུ’’ཏིཨཱདི. ཨཱདི-སདྡེན མངྒལམཧཱདཱིནཾ སངྒཧོ དཊྛབྦོ. སནྠརནྟཱིཏི ཝིསྶམནྟི ¶ , པརིསྶམཾ ཝིནོདེནྟཱིཏི ཨཏྠོ. སཧཱཏི སནྣིཔཱཏཝསེན ཨེཀཛ྄ཛྷཾ. སཧ ཨཏྠཱནུསཱསནཾ ཨགཱརནྟི ཏསྨིཾ ཨཏྠེ ཏྠ-ཀཱརསྶ ནྠ-ཀཱརཾ ཀཏྭཱ ‘‘སནྠཱགཱར’’ནྟི ཝུཙྩཏཱིཏི དཊྛབྦཾ, པཋམཾ ཏཏྠ སམྨནྟནཝསེན སནྠརནྟི ཝིཙཱརེནྟཱིཏི ཨཏྠོ.

ཏེཔིཊཀཾ བུདྡྷཝཙནཾ ཨཱགཏམེཝ བྷཝིསྶཏཱིཏི བུདྡྷཝཙནསྶ ཨཱགམནསཱིསེན ཨརིཡཕལདྷམྨཱནམྤི ཨཱགམནཾ ཝུཏྟམེཝ. ཏིཡཱམརཏྟིཾ ཏཏྠ ཝསནྟཱནཾ ཕལསམཱཔཏྟིཝལ༹ཉྫནཾ ཧོཏཱིཏི. ཏསྨིཉྩ བྷིཀྑུསངྒྷེ ཀལྱཱཎདྷམྨཱ ཀལྱཱཎཔུཐུཛྫནཱ ཝིཔསྶནཾ ཨུསྶུཀྐཱཔེནྟཱ ཧོནྟཱིཏི ཨརིཡམགྒདྷམྨཱནམྤི ཏཏྠ ཨཱགམནཾ ཧོཏིཡེཝ.

ཨལླགོམཡེནཱཏི ¶ ཨཙྪེན ཨལླགོམཡརསེན. ཨོཔུཉྫཱཔེཏྭཱཏི ཝིལིམྤེཏྭཱ. ཙཏུཛྫཱཏིཡགནྡྷེཧཱིཏི ཀུངྐུམཏུརུཀྑཡཝནཔུཔྥཏམཱལཔཏྟགནྡྷེཧི. ནཱནཱཝཎྞེཏི ནཱིལཱདིཝསེན ནཱནཱཝཎྞེ, བྷིཏྟིཝིསེསཝསེན ནཱནཱསཎྛཱནརཱུཔེ. ‘‘མཧཱཔིཊྛིཀཀོཛཝེཏི ཧཏྠིཔིཊྛིཨཱདཱིསུ ཨཏྠརིཏབྦཏཱཡ ‘མཧཱཔིཊྛིཀཱ’ཏི ལདྡྷསམཉྙེ ཀོཛཝེ’’ཏི ཝདནྟི. ཀུཏྟཀེ པན སནྡྷཱཡེཏཾ ཝུཏྟཾ, ‘‘ཙཏུརངྒུལཱདྷིཀཔུཔྥཱ མཧཱཔིཊྛིཀཀོཛཝཱ’’ཏིཔི ཝདནྟི. ཧཏྠཏྠརཨསྶཏྠརཱ ཧཏྠིཨསྶཔིཊྛཱིསུ ཨཏྠརིཏབྦཱ ཧཏྠིཨསྶརཱུཔཝིཙིཏྟཱ ཙ ཨཏྠརཀཱ. སཱིཧཏྠརཀཱདཡོ པན སཱིཧརཱུཔཱདིཝིཙིཏྟཱ ཨེཝ ཨཏྠརཀཱ. ཙིཏྟཏྠརཀཾ ནཱནཱཝིདྷརཱུཔེཧི ཙེཝ ནཱནཱཝིདྷམཱལཱཀམྨཱདཱིཧི ཙ ཝིཙིཏྟཾ ཨཏྠརཀཾ.

ཨུཔདྷཱནནྟི ཨཔསྶཡནཾ. ཨུཔདཧིཏྭཱཏི ཨཔསྶཡཡོགྒབྷཱཝེན ཋཔེཏྭཱ. གནྡྷེཧི ཀཏམཱལཱ གནྡྷདཱམཾ. ཏམཱལཔཏྟཱདཱིཧི ཀཏམཱལཱ པཏྟདཱམཾ. ཨཱདི-སདྡེན ཧིངྒུལཏཀྐོལཛཱཏིཕལཛཱཏིཔུཔྥཱདཱིཧི ཀཏདཱམཾ སངྒཎྷཱཏི. པལླངྐཱཀཱརེན ཀཏཔཱིཋཾ པལླངྐཔཱིཋཾ. ཏཱིསུ པསྶེསུ ཨེཀཔསྶེ ཨེཝ ཝཱ སཨུཔསྶཡཾ ཨཔསྶཡཔཱིཋཾ. ཨནཔསྶཡཾ མུཎྜཔཱིཋཾ. ཡོཛནཱཝཊྚེཏི ཡོཛནཔརིཀྑེཔོཀཱསེ.

སཾཝིདྷཱཡཱཏི ཨནྟརཝཱསཀསྶ ཀོཎཔདེསཾ ཨིཏརཔདེསཉྩ སམཾ ཀཏྭཱ ཝིདྷཱཡ. ཏེནཱཧ – ‘‘ཀཏྟརིཡཱ པདུམཾ ཀནྟེནྟོ ཝིཡཱ’’ཏི, ‘‘ཏིམཎྜལཾ པཊིཙྪཱདེནྟོ’’ཏི ཙ. ཡསྨཱ བུདྡྷཱནཾ རཱུཔསམྤདཱ ཝིཡ ཨཱཀཔྤསམྤདཱཔི པརམུཀྐཾསཏཾ གཏཱ, ཏསྨཱ ཏདཱ བྷགཝཱ ཨེཝཾ སོབྷེཡྻཱཏི དསྶེནྟོ ‘‘སུཝཎྞཔཱམངྒེནཱ’’ཏིཨཱདིམཱཧ. ཏཏྠ ‘‘ཨསམེན བུདྡྷཝེསེནཱ’’ཏིཨཱདིནཱ ¶ ཏདཱ བྷགཝཱ བུདྡྷཱནུབྷཱཝསྶ ནིགུཧནེ ཀཱརཎཱབྷཱཝཏོ ཏཏྠ སནྣིཔཏིཏདེཝམནུསྶནཱགཡཀྑགནྡྷབྦཱདཱིནཾ པསཱདཛནནཏྠཾ ཨཏྟནོ སབྷཱཝཔཀཏིཡཱཝ ཀཔིལཝཏྠུཾ པཱཝིསཱིཏི དསྶེཏི. བུདྡྷཱནཾ ཀཱཡཔབྷཱ ནཱམ པཀཏིཡཱ ཨསཱིཏིཧཏྠམཏྟཔདེསཾ ཝིསརཏཱིཏི ཨཱཧ ‘‘ཨསཱིཏིཧཏྠཊྛཱནཾ ཨགྒཧེསཱི’’ཏི. ནཱིལཔཱིཏལོཧིཏོདཱཏམཉྫིཊྛཔབྷསྶརཱནཾ ཝསེན ཚབྦཎྞཱ བུདྡྷརསྨིཡོ.

སབྦཔཱལིཕུལློཏི མཱུལཏོ པཊྛཱཡ ཡཱཝ སཱཁགྒཱ སམནྟཏོ ཕུལློ ཝིཀསིཏོ. པཊིཔཱཊིཡཱ ཋཔིཏཱནནྟིཨཱདི པརིཀཔྤཱུཔམཱ, ཡཐཱ ཏཾ…པེ… ཨལངྐཏཾ ཨཉྙཾ ཝིརོཙཏི, ཨེཝཾ ཝིརོཙིཏྠ, སམཏིཾསཱཡ པཱརམིཏཱཧི ཨབྷིསངྑཏཏྟཱ ཨེཝཾ ཝིརོཙིཏྠཱཏི ཝུཏྟཾ ཧོཏི. ‘‘པཉྩཝཱིསཏིཡཱ གངྒཱནནྟི སཏམུཁཱ ཧུཏྭཱ སམུདྡཾ པཝིཊྛཱཡ མཧཱགངྒཱཡ མཧནྟམཧནྟཱནཾ གངྒཱནཾ པཉྩཝཱིསཏཱི’’ཏི ཝདནྟི. པཔཉྩསཱུདནིཡཾ (མ. ནི. ཨཊྛ. ༢.༢༢) ‘‘པཉྩཝཱིསཏིཡཱ ནདཱིན’’ནྟི ཝུཏྟཾ, གངྒཱདཱིནཾ ཙནྡབྷཱགཱཔརིཡོསཱནཱནཾ པཉྩཝཱིསཏིཡཱ མཧཱནདཱིནནྟི ཨཏྠོ. པརིཀཔྤཝཙནཉྷེཏཾ. སམྦྷིཛྫཱཏི སམྦྷེདཾ མིསྶཱིབྷཱཝཾ པཏྭཱ མུཁདྭཱརེཏི སམུདྡཾ པཝིཊྛཊྛཱནེ.

ནཱགསུཔཎྞགནྡྷབྦཡཀྑཱདཱིནནྟིཨཱདི ¶ པརིཀཔྤཝསེན ཝུཏྟཾ. སཧསྶེནཱཏི པདསཧསྶེན, བྷཱཎཝཱརཔྤམཱཎེན གནྠེནཱཏི ཨཏྠོ.

ཀམྤཡནྟོ ཝསུནྡྷརནྟི ཨཏྟནོ གུཎཝིསེསེཧི པཐཝཱིཀམྨཾ ཨུནྣཱདེནྟོ, ཨེཝཾབྷཱུཏོཔི ཨཧེཋཡནྟོ པཱཎཱནི. སབྦཔདཀྑིཎཏྟཱ བུདྡྷཱནཾ དཀྑིཎཾ པཋམཾ པཱདཾ ཨུདྡྷརནྟོ. སམཾ སམྥུསཏེ བྷཱུམིཾ སུཔྤཏིཊྛིཏཔཱདཏཱཡ. ཡདིཔི བྷཱུམིཾ སམཾ ཕུསཏི, རཛསཱ ནུཔལིཔྤཏི སུཁུམཏྟཱ ཚཝིཡཱ. ནིནྣཊྛཱནཾ ཨུནྣམཏཱིཏིཨཱདི བུདྡྷཱནཾ སུཔྤཏིཊྛིཏཔཱདཏཱསངྑཱཏམཧཱཔུརིསལཀྑཎཔཊིལཱབྷསྶ ནིསྶནྡཕལཾ. ནཱཏིདཱུརེ ཨུདྡྷརཏཱིཏི ཨཏིདཱུརེ ཋཔེཏུཾ ན ཨུདྡྷརཏི. ནཙྩཱསནྣེ ཙ ནིཀྑིཔནྟི ཨཙྩཱསནྣེ ཙ ཋཱནེ ཨནིཀྑིཔནྟོ ནིཡྻཱཏི. ཧཱསཡནྟོ སདེཝཀེ ལོཀེ ཏོསེནྟོ. ཙཏཱུཧི པཱདེཧི ཙརཏཱིཏི ཙཏུཙཱརཱི.

བུདྡྷཱནུབྷཱཝསྶ པཀཱསནཝསེན གཏཏྟཱ ཝཎྞཀཱལོ ནཱམ ཨེས. སརཱིརཝཎྞེ ཝཱ གུཎཝཎྞེ ཝཱ ཀཐིཡམཱནེ དུཀྐཐིཏནྟི ན ཝཏྟབྦཾ. ཀསྨཱ? ཨཔྤམཱཎཝཎྞཱ ཧི བུདྡྷཱ བྷགཝནྟོ, བུདྡྷགུཎསཾཝཎྞནཱ ཛཱནནྟསྶ ཡཐཱརདྡྷསཾཝཎྞནཾཡེཝ ¶ ཨནུཔཝིསཏི. དུཀཱུལཙུམྦཊཀེནཱཏི གནྠིཏྭཱ གཧིཏདུཀཱུལཝཏྠེན.

ནཱགཝིཀྐནྟཙཱརཎོཏི ཧཏྠིནཱགསདིསཔདནིཀྑེཔོ. སཏཔུཉྙལཀྑཎོཏི ཨནེཀསཏཔུཉྙཱབྷིནིབྦཏྟམཧཱཔུརིསལཀྑཎོ. མཎིཝེརོཙནོ ཡཐཱཏི ཙཏུརཱསཱིཏིསཧསྶམཎིཔརིཝཱརིཏོ ཨཏིཝིཡ ཝིརོཙམཱནོ ཝིཛྫོཏམཱནོ མཎི ཝིཡ. ‘‘ཝེརོཙནོ ནཱམ ཨེཀོ མཎཱི’’ཏི ཀེཙི. མཧཱསཱལོཝཱཏི མཧནྟོ སཱལརུཀྑོ ཝིཡ, སུདྡྷཊྛིཏོ ཀོཝིལཱ༹རཱདི མཧཱརུཀྑོ ཝིཡ ཝཱ. པདུམོ ཀོཀནདོ ཡཐཱཏི ཀོཀནདསངྑཱཏཾ མཧཱཔདུམཾ ཝིཡ, ཝིཀསམཱནཔདུམཾ ཝིཡ ཝཱ.

ཨཱཀཱསགངྒཾ ཨོཏཱརེནྟོ ཝིཡཱཏིཨཱདི ཏསྶཱ པཀིཎྞཀཀཐཱཡ ཨཉྙེསཾ སུདུཀྐརབྷཱཝདསྶནཉྩེཝ སུཎནྟཱནཾ ཨཙྩནྟསུཁཱཝཧབྷཱཝདསྶནཉྩ. པཐཝོཛཾ ཨཱཀཌྜྷནྟོ ཝིཡཱཏི ནཱལི༹ཡནྟཾ ཡོཛེཏྭཱ མཧཱཔཐཝིཡཱ ཧེཊྛིམཏལེ པཔྤཊཀོཛཾ ཨུདྡྷཾ མུཁཾ ཀཏྭཱ ཨཱཀཌྜྷནྟོ ཝིཡ. ཡོཛནིཀནྟི ཡོཛནཔམཱཎཾ. མདྷུབྷཎྜནྟི མདྷུཔཊལཾ.

མཧནྟནྟི ཝིཔུལཾ ཨུལཱ༹རཔུཉྙཾ. སབྦདཱནཾ དིནྣམེཝ ཧོཏཱིཏི སབྦམེཝ པཙྩཡཛཱཏཾ ཨཱཝཱསདཱཡཀེན དིནྣམེཝ ཧོཏི. ཏཐཱ ཧི དྭེ ཏཡོ གཱམེ པིཎྜཱཡ ཙརིཏྭཱ ཀིཉྩི ཨལདྡྷཱ ཨཱགཏསྶཔི ¶ ཚཱཡཱུདཀསམྤནྣཾ ཨཱརཱམཾ པཝིསིཏྭཱ ནྷཱཡིཏྭཱ པཊིསྶཡེ མུཧུཏྟཾ ནིཔཛྫིཏྭཱ ཨུཊྛཱཡ ནིསིནྣསྶ ཀཱཡེ བལཾ ཨཱཧརིཏྭཱ པཀྑིཏྟཾ ཝིཡ ཧོཏི. བཧི ཝིཙརནྟསྶ ཙ ཀཱཡེ ཝཎྞདྷཱཏུ ཝཱཏཱཏཔེཧི ཀིལམཏི, པཊིསྶཡཾ པཝིསིཏྭཱ དྭཱརཾ པིདྷཱཡ མུཧུཏྟཾ ནིསིནྣསྶ ཝིསབྷཱགསནྟཏི ཝཱུཔསམྨཏི, སབྷཱགསནྟཏི པཏིཊྛཱཏི, ཝཎྞདྷཱཏུ ཨཱཧརིཏྭཱ པཀྑིཏྟཱ ཝིཡ ཧོཏི, བཧི ཝིཙརནྟསྶ ཙ པཱདེ ཀཎྚཀཱ ཝིཛ྄ཛྷནྟི, ཁཱཎུ པཧརཏི, སརཱིསཔཱདིཔརིསྶཡཱ ཙེཝ ཙོརབྷཡཉྩ ཨུཔྤཛྫཏི, པཊིསྶཡཾ པཝིསིཏྭཱ དྭཱརཾ པིདྷཱཡ ནིསིནྣསྶ པན སབྦེཔེཏེ པརིསྶཡཱ ན ཧོནྟི. སཛ྄ཛྷཱཡནྟསྶ དྷམྨཔཱིཏིསུཁཾ, ཀམྨཊྛཱནཾ མནསིཀརོནྟསྶ ཨུཔསམསུཁཾ ཨུཔྤཛྫཏི བཧིདྡྷཱ ཝིཀྑེཔཱབྷཱཝཏོ. བཧི ཝིཙརནྟསྶ ཙ ཀཱཡེ སེདཱ མུཙྩནྟི, ཨཀྑཱིནི ཕནྡནྟི, སེནཱསནཾ པཝིསནཀྑཎེ མཉྩཔཱིཋཱདཱིནི ན པཉྙཱཡནྟི, མུཧུཏྟཾ ནིསིནྣསྶ པན ཨཀྑིཔསཱདོ ཨཱཧརིཏྭཱ པཀྑིཏྟོ ཝིཡ ཧོཏི, དྭཱརཝཱཏཔཱནམཉྩཔཱིཋཱདཱིནི པཉྙཱཡནྟི. ཨེཏསྨིཉྩ ཨཱཝཱསེ ཝསནྟཾ དིསྭཱ མནུསྶཱ ཙཏཱུཧི པཙྩཡེཧི སཀྐཙྩཾ ཨུཔཊྛཧནྟི. ཏེན ཝུཏྟཾ – ‘‘ཨཱཝཱསདཱནསྨིཉྷི དིནྣེ སབྦདཱནཾ དིནྣམེཝ ཧོཏཱི’’ཏི. བྷཱུམཊྛཀ…པེ… ན ¶ སཀྐཱཏི ཨཡམཏྠོ མཧཱསུདསྶནཝཏྠུནཱ (དཱི. ནི. ༢.༢༤༡ ཨཱདཡོ) དཱིཔེཏབྦོ. མཱཏུཀུཙྪི ཨསམྦཱདྷོཝ ཧོཏཱིཏི ཨཡམཏྠོ ཨནྟིམབྷཝིཀཱནཾ མཧཱབོདྷིསཏྟཱནཾ པཊིསནྡྷིཝསེན དཱིཔེཏབྦོ.

སཱིཏནྟི ཨཛ྄ཛྷཏྟཾ དྷཱཏུཀྑོབྷཝསེན ཝཱ བཧིདྡྷཱ ཨུཏུཝིཔརིཎཱམཝསེན ཝཱ ཨུཔྤཛྫནཀསཱིཏཾ. ཨུཎྷནྟི ཨགྒིསནྟཱཔཾ, ཏསྶ ཙ དཝདཱཧཱདཱིསུ སམྦྷཝོ དཊྛབྦོ. པཊིཧནྟཱིཏི པཊིཧནཏི. ཡཐཱ ཏདུབྷཡཝསེན ཀཱཡཙིཏྟཱནཾ ཨཱབཱདྷོ ན ཧནཏི, ཨེཝཾ ཀརོཏི. སཱིཏུཎྷབྦྷཱཧཏེ ཧི སརཱིརེ ཝིཀྑིཏྟཙིཏྟོ བྷིཀྑུ ཡོནིསོ པདཧིཏུཾ ན སཀྐོཏི. ཝཱལ༹མིགཱནཱིཏི སཱིཧབྱགྒྷཱདིཝཱལ༹མིགེ. གུཏྟསེནཱསནཉྷི པཝིསིཏྭཱ དྭཱརཾ པིདྷཱཡ ནིསིནྣསྶ ཏེ པརིསྶཡཱ ན ཧོནྟི. སརཱིསཔེཏི ཡེ ཀེཙི སརནྟཱ གཙྪནྟེ དཱིགྷཛཱཏིཀེ སཔྤཱདིཀེ ཨཉྙེ ཙ ཏཐཱརཱུཔེ. མཀསེཏི ནིདསྶནམཏྟམེཏཾ, ཌཾསཱདཱིནཾ ཨེཏེནེཝ སངྒཧོ དཊྛབྦོ. སིསིརེཏི སཱིཏཀཱལཝསེན སཏྟཱཧཝདྡལིཀཱདིཝསེན ཙ ཨུཔྤནྣེ སིསིརསམྥསྶེ. ཝུཊྛིཡོཏི ཡདཱ ཏདཱ ཨུཔྤནྣཱ ཝསྶཝུཊྛིཡོ པཊིཧནཏཱིཏི ཡོཛནཱ.

ཝཱཏཱཏཔོ གྷོརོཏི རུཀྑགཙྪཱདཱིནཾ ཨུབྦཧནབྷཉྫནཱདིཝསེན པཝཏྟིཡཱ གྷོརོ སརཛཨརཛཱདིབྷེདོ ཝཱཏོ ཙེཝ གིམྷཔརིལཱ༹ཧསམཡེསུ ཨུཔྤཏྟིཡཱ གྷོརོ སཱུརིཡཱཏཔོ ཙ. པཊིཧཉྙཏཱིཏི པཊིབཱཧཱིཡཏི. ལེཎཏྠནྟི ནཱནཱརམྨཎཏོ ཙིཏྟཾ ནིཝཏྟིཏྭཱ པཊིསལླཱཎཱརཱམཏྠཾ. སུཁཏྠནྟི ཝུཏྟཔརིསྶཡཱབྷཱཝེན ཕཱསུཝིཧཱརཏྠཾ. ཛྷཱཡིཏུནྟི ཨཊྛཏིཾསཱཡ ཨཱརམྨཎེསུ ཡཏྠ ཀཏྠཙི ¶ ཙིཏྟཾ ཨུཔནིབནྡྷིཏྭཱ སམཱདཧནཝསེན ཛྷཱཡིཏུཾ. ཝིཔསྶིཏུནྟི ཨནིཙྩཱདིཝསེན སངྑཱརེ སམྨསིཏུཾ.

ཝིཧཱརེཏི པཊིསྶཡེ. ཀཱརཡེཏི ཀཱརཱཔེཡྻ. རམྨེཏི མནོརམེ. ཝཱསཡེཏྠ བཧུསྶུཏེཏི ཀཱརེཏྭཱ པན ཨེཏྠ ཝིཧཱརེསུ བཧུསྶུཏེ སཱིལཝནྟེ ཀལྱཱཎདྷམྨེ ནིཝཱསེཡྻ. ཏེ ནིཝཱསེནྟོ པན ཏེསཾ བཧུསྶུཏཱནཾ ཡཐཱ པཙྩཡེཧི ཀིལམཐོ ན ཧོཏི. ཨེཝཾ ཨནྣཉྩ པཱནཉྩ ཝཏྠསེནཱསནཱནི ཙ དདེཡྻ ཨུཛུབྷཱུཏེསུ ཨཛ྄ཛྷཱསཡསམྤནྣེསུ ཀམྨཕལཱནཾ རཏནཏྟཡགུཎཱནཉྩ སདྡཧནེན ཝིཔྤསནྣེན ཙེཏསཱ. ཨིདཱནི གཧཊྛཔབྦཛིཏཱནཾ ཨཉྙམཉྙཱུཔཀཱརཏཾ དསྶེཏུཾ ‘‘ཏེ ཏསྶཱ’’ཏི གཱཐམཱཧ. ཏཏྠ ཏེཏི བཧུསྶུཏཱ. ཏསྶཱཏི ཨུཔཱསཀསྶ. དྷམྨཾ དེསེནྟཱིཏི སཀལཝཊྚདུཀྑཔནཱུདནཾ ¶ ནིཡྻཱནིཀཾ དྷམྨཾ ཀཐེནྟི. ཡཾ སོ དྷམྨཾ ཨིདྷཉྙཱཡཱཏི སོ པུགྒལོ ཡཾ སདྡྷམྨཾ ཨིམསྨིཾ སཱསནེ སམྨཱཔཊིཔཛྫནེན ཛཱནིཏྭཱ ཨགྒམགྒཱདྷིགམེན ཨནཱསཝོ ཧུཏྭཱ པརིནིབྦཱཡཏི.

ཨཱཝཱསེཏི ཨཱཝཱསདཱནེ. ཨཱནིསཾསོཏི ཨུདྲཡོ. པཱུཛཱསཀྐཱརཝསེན པཋམཡཱམོ ཁེཔིཏོ, སཏྠུ དྷམྨདེསནཱཡ ཨཔྤཱཝསེསོ མཛ྄ཛྷིམཡཱམོ གཏོཏི པཱལི༹ཡཾ ‘‘བཧུདེཝ རཏྟི’’ནྟི ཝུཏྟནྟི ཨཱཧ ‘‘ཨཏིརེཀཏརཾ དིཡཌྜྷཡཱམ’’ནྟི. སངྒཧཾ ནཱརོཧཏི ཝིཔུལཝིཏྠཱརབྷཱཝཏོ. བུདྡྷཱནཉྷི བྷཏྟཱནུམོདནཱཔི ཐོཀཾ ཝཌྜྷེཏྭཱ ཝུཙྩམཱནཱ དཱིགྷམཛ྄ཛྷིམཔམཱཎཱཔི ཧོཏི. ཏཐཱ ཧི སུཕུསིཏཾ དནྟཱཝརཎཾ, ཛིཝ྄ཧཱ ཏནུཀཱ, བྷཝངྒཔརིཝཱསོ པརིཏྟོ, ནཏྠི ཝེགཱཡིཏཾ, ནཏྠི ཝིཏྠཱཡིཏཾ, ནཏྠི ཨབྱཱཝཊམནོ, སབྦཉྙུཏཉྙཱཎཾ སམུཔབྱཱུལ༹ྷཾ, ཨཔརིཀྑཡཱ པཊིསམྦྷིདཱ.

སནྡསྶེཏྭཱཏིཨཱདཱིསུ སནྡསྶེཏྭཱ ཨཱཝཱསདཱནཔཊིསཾཡུཏྟཾ དྷམྨིཾ ཀཐཾ ཀཏྭཱ. ཏཏོ པརཾ, མཧཱརཱཛ, ཨིཏིཔི སཱིལཾ, ཨིཏིཔི སམཱདྷི, ཨིཏིཔི པཉྙཱཏི སཱིལཱདིགུཎེ ཏེསཾ སམྨཱ དསྶེཏྭཱ ཧཏྠེན གཧེཏྭཱ ཝིཡ པཙྩཀྑཏོ པཀཱསེཏྭཱ. སམཱདཔེཏྭཱཏི ཨེཝཾ སཱིལཾ སམཱདཱཏབྦཾ, སཱིལེ པཏིཊྛིཏེན ཨེཝཾ སམཱདྷིཔཉྙཱ བྷཱཝེཏབྦཱཏི ཡཐཱ ཏེ སཱིལཱདིགུཎེ སམྨཱ ཨཱདིཡནྟི, ཏཐཱ གཎྷཱཔེཏྭཱ. སམུཏྟེཛེཏྭཱཏི ཡཐཱསམཱདིནྣཾ སཱིལཾ སུཝིསུདྡྷཾ ཧོཏི, སམཐཝིཔསྶནཱ ཙ བྷཱཝིཡམཱནཱ ཡཐཱ སུཊྛུ ཝིསོདྷིཏཱ ཨུཔརཱུཔརི ཝིསེསཱཝཧཱ ཧོནྟི, ཨེཝཾ སམུཏྟེཛེཏྭཱ ནིསཱམནཝསེན ཝོདཱཔེཏྭཱ. སམྤཧཾསེཏྭཱཏི ཡཐཱནུསིཊྛཾ ཋིཏསཱིལཱདིགུཎེཧི སམྤཏི པཊིལདྡྷགུཎཱནིསཾསེཧི ཙེཝ ཨུཔརིལདྡྷབྦཕལཝིསེསེཧི ཙ ཙིཏྟཾ སམྤཧཾསེཏྭཱ ལདྡྷསྶཱསཝསེན སུཊྛུ ཏོསེཏྭཱ. ཨེཝམེཏེསཾ པདཱནཾ ཨཏྠོ ཝེདིཏབྦོ. སཀྱརཱཛཱནོ ཡེབྷུཡྻེན བྷགཝཏོ དྷམྨདེསནཱཡ སཱསནེ ལདྡྷསྶཱདཱ ལདྡྷཔྤཏིཊྛཱ ཙ.

ཨུཔསགྒསདྡཱནཾ ¶ ཨནེཀཏྠཏྟཱ ཨབྷི-སདྡོ ཨཏི-སདྡེན སམཱནཏྠོཔི ཧོཏཱིཏི ཝུཏྟཾ ‘‘ཨབྷིཀྐནྟཱཏི ཨཏིཀྐནྟཱ’’ཏི.

ཏཏྲ ཀིརཱཏིཨཱདི ཀེཙིཝཱདོཏི བདྡྷོཔི ན ཧོཏི. ཏེནཱཧ ‘‘ཨཀཱརཎམེཏ’’ནྟིཨཱདི. ཀཱཡཙིཏྟལཧུཏཱདཡོ ཨུཔྤཛྫནྟཱིཏི ཨིདཾ ཀཱཡིཀཙེཏསིཀཨཉྙཐཱབྷཱཝསྶ ཀཱརཎཝཙནཾ, ལཧུཏཱདིཨུཔྤནྣེ སཝནཱནུཏྟརིཡཔཊིལཱབྷེན ལདྡྷབྦདྷམྨཏྠཝེདསམདྷིགམཏོ. ཝུཏྟཉྷེཏཾ –

‘‘ཡཐཱ ¶ , ཡཐཱཝུསོ, བྷིཀྑུནོ སཏྠཱ ཝཱ དྷམྨཾ དེསེཏི ཨཉྙཏརོ ཝཱ གརུཊྛཱནིཀོ སབྲཧྨཙཱརཱི, ཏཐཱ ཏཐཱ སོ ཏསྨིཾ དྷམྨེ ལབྷཏི ཨཏྠཝེདཾ, ལབྷཏི དྷམྨཝེདཾ, ལབྷཏི དྷམྨཱུཔསཾཧིཏཾ པཱམོཛྫ’’ནྟིཨཱདི (དཱི. ནི. ༣.༣༢༢, ༣༥༥; ཨ. ནི. ༥.༢༦).

པིཊྛིཝཱཏོ ཨུཔྤཛྫི ཨུཔཱདིནྣསརཱིརསྶ ཏཐཱརཱུཔཏྟཱ སངྑཱརཱནཉྩ ཨནིཙྩཏཱཡ དུཀྑཱནུབནྡྷཏྟཱ. ཨཀཱརཎཾ ཝཱ ཨེཏནྟི ཡེནཱདྷིཔྤཱཡེན ཝུཏྟཾ, ཏམེཝ ཨདྷིཔྤཱཡཾ ཝིཝརིཏུཾ ‘‘པཧོཏཱི’’ཏིཨཱདི ཝུཏྟཾ. ཨེཀཔལླངྐེན ནིསཱིདིཏུཾ པཧོཏི ཡཐཱ ཏཾ ཝེལུཝགཱམཀེ. ཨེཏྟཀེ ཋཱནེཏི ཨེཏྟཀེ ཋཱནེ ཋཱནཾ ནིཔྥནྣནྟི ཡོཛནཱ. ཏཉྩ ཁོཏི ཝུཊྛཱནསཉྙཾ ཙིཏྟེ ཋཔནཾ. དྷམྨཀཐཾ སུཎམཱནོ དྷམྨགཱརཝེན.

ཨཝསྶུཏསྶཱཏི ཨཝསྶུཏབྷཱཝསྶ རཱགཱདིཝསེན. ཨཝསྶུཏསྶ ཀཱརཎནྟི ཏིནྟབྷཱཝཀཱརཎཾ. ཀིལེསཱདྷིམུཙྩནེནཱཏི ཀིལེསཝསེན པརིཔྥནྡིཏཝསེན. ནིབྦཱཔནཾ ཝིཡཱཏི ཝཱུཔསམོ ཝིཡ. ནིབྦིསེཝནཱནནྟི པརིཔྥནྡནརཧིཏཱནཾ.

ཨཝསྶུཏཔརིཡཱཡསུཏྟཝཎྞནཱ ནིཊྛིཏཱ.

༧. དུཀྑདྷམྨསུཏྟཝཎྞནཱ

༢༤༤. དུཀྑདྷམྨཱནནྟི དུཀྑཀཱརཎཱནཾ. ཏེནཱཧ ‘‘དུཀྑསམྦྷཝདྷམྨཱན’’ནྟིཨཱདི. ཏཏྠ ཀིཾ དུཀྑཾ, ཀཱ དུཀྑདྷམྨཱཏི ཏདུབྷཡཾ དསྶེཏུཾ ‘‘པཉྩསུ ཧཱི’’ཏི ཝུཏྟཾ. ཏེཏི པཉྩཀྑནྡྷཱ. དུཀྑསམྦྷཝདྷམྨཏྟཱཏི དུཀྑུཔྤཏྟིཀཱརཎཏྟཱ. ཨསྶཱཏི ཏེན. ཀརཎེ ཧེཏཾ སཱམིཝཙནཾ. ཀཱམེཏི ཝཏྠུཀཱམེ ཀིལེསཀཱམེ ཙ. པུན ཨསྶཱཏི སཱམིཨཏྠེ ཨེཝ སཱམིཝཙནཾ. ཙཱརནྟི ཙིཏྟཱཙཱརཾ. ཝིཧཱརནྟི པཉྩདྭཱརཔྤཝཏྟིཙཱརཝིཧཱརཾ. ‘‘ཨེཀཊྛཱ’’ཏི ཙ ཝདནྟི. ཏེནེཝ ཧི ‘‘ཨནུབནྡྷིཏྭཱ ཙརནྟཾ’’ཨིཙྩེཝ ཝུཏྟཾ. ཨནུབནྡྷིཏྭཱཏི ཙ ཝཱིཐིཙིཏྟཔྤཝཏྟིཏོ པཊྛཱཡ ཡཱཝ ཏཏིཡཛཝནཝཱརཱ ཨནུ ¶ ཨནུ བནྡྷིཏྭཱ. པཀྑནྡནཱདཱིཏི ཨཱདི-སདྡེན ཀསིགོརཀྑཱདིཝསེནཔི ཀཱམཱནཾ པརིཡེསནདུཀྑཾ སངྒཎྷཱཏི.

དཱཡཏཱིཏི ¶ དཱཡོ, ཝནཾ. ཏེནཱཧ ‘‘ཨཊཝི’’ནྟི. ཀཎྚཀགབྦྷནྟི ཨོཝརཀསདིསཾ ཝནཾ. ནཱམཔདཾ ནཱམ ཀིརིཡཱཔདཱཔེཀྑནྟི ‘‘ཝིཛ྄ཛྷཱི’’ཏི ཝཙནསེསེན ཀིརིཡཱཔདཾ གཎྷཱཏི.

དནྡྷཱཡིཏཏྟཾ ཨུཔྤནྣཀིལེསཱནཾ ཨཝཊྛཱནཾ. ཏེནཱཧ ‘‘ཨུཔྤནྣམཏྟཱཡཱ’’ཏིཨཱདི. ཏཱཡཱཏི སཏིཡཱ. ཀཱཙི ཀིལེསཱཏི ཙུདྡསཝིདྷེ ཙིཏྟསྶ ཀིཙྩེ ཛཝནཀིཙྩེ ཨེཝ ཙིཏྟཀིལེསཱནཾ ཨུཔྤཏྟིཾ ཀཏྭཱ ཏཐཱ ཝུཏྟཾ. ནིགྒཧིཏཱཝ ཧོནྟི པཝཏྟིཏུཾ ཨཔྤདཱནཝསེན. ཏེནཱཧ ‘‘ན སཎྛཱཏུཾ སཀྐོནྟཱི’’ཏི. ཙཀྑུདྭཱརསྨིནྟི པཱལི༹ཡཾ ཏསྶ པཋམཾ གཧིཏཏཱཡ ཝུཏྟཾ, ཏེན ནཡེན སེསདྭཱརཱནིཔི གཧིཏཱནེཝ ཧོནྟི. རཱགཱདཱིསུ ཨུཔྤནྣེསུ པཋམཛཝནཝཱརེ. སཏིསམྨོསེན ‘‘ཀིལེསཱ མེ ཨུཔྤནྣཱ’’ཏི ཉཏྭཱ ཏཐཱ པཙྩཱམཱསསཏིཡཱ ལབྦྷནཏོ. ཏེནཱཧ – ‘‘ཨནཙྪརིཡཾ ཙེཏ’’ནྟི. ཨཱཝཊྚེཏྭཱཏི ཨཡོནིསོ ཨཱཝཊྚེཏྭཱ. ཨཱཝཛྫནཱདཱིསཱུཏི ཏཏོ ཨེཝ ཨཡོནིསོ ཨཱཝཛྫནཱདཱིསུ ཨུཔྤནྣེསུ ཨིཊྛཱརམྨཎསྶ ལདྡྷཏྟཱ པཙྩཡསིདྡྷིཡཱ སམྤཏྟཾ པཝཏྟནཱརཧཾ. ནིཝཏྟེཏྭཱཏི དུཏིཡཛཝནཝཱརེཔི ཀིལེསུཔྤཏྟིཾ ནིཝཏྟེཏྭཱ. ཀཐཾ པནསྶ ཨེཝཾ ལདྡྷུཾ སཀྐཱཏི ཨཱཧ ‘‘ཨཱརདྡྷཝིཔསྶཀཱནཾ ཧཱི’’ཏིཨཱདི. བྷཱཝནཱཔཊིསངྑཱནེཏི བྷཱཝནཱཡཾ པཊིསངྑཱནེ ཙ ཡོགིནོ པཏིཊྛིཏབྷཱཝོ. ཏསྶ ཨཡམཱནིསཾསོ – ཡཾ པཙྩཡལཱབྷེན ཨུཔྤཛྫིཏུཾ ལདྡྷོཀཱསཱཔི ཀིལེསཱ པུབྦེ པཝཏྟབྷཱཝནཱནུབྷཱཝེན ཝིཀྑམྦྷིཏཱ ཏཐཱ ཏཐཱ ནིགྒཧིཏཱ ཨེཝ ཧུཏྭཱ ནིཝཏྟནྟི, ཀུསལཱ དྷམྨཱཝ ལདྡྷོཀཱསཱ ཨུཔརཱུཔརི ཝཌྜྷནྟི.

ཨབྷིཧཊྛུནྟི ཨབྷིཧརིཏྭཱ. ཨནུདཧནྟཱིཏི ཨནུདཧནྟཱ ཝིཡ ཧོནྟི. ཨནུསེནྟཱིཏི ཨེཏྠཱཔི ཨེསེཝ ནཡོ. ཨནཱཝཊྚནྟེཏི ཨནིཝཏྟནྟེ སཱམཉྙཏོཏི ཨདྷིཔྤཱཡོ. ཝིཔསྶནཱབལམེཝ དཱིཔིཏཾ མགྒཕལཱདྷིགམསྶ ཨཛོཏིཏཏྟཱ.

དུཀྑདྷམྨསུཏྟཝཎྞནཱ ནིཊྛིཏཱ.

༨. ཀིཾསུཀོཔམསུཏྟཝཎྞནཱ

༢༤༥. ཙཏུནྣཾ ཨརིཡསཙྩཱནཾ པརིཉྙཱབྷིསམཡཱདིཝསེན ཝིཝིདྷདསྶནནྟི ཀིཙྩཝསེན ནཱནཱདསྶནཾ ཧོཏཱིཏི ཝུཏྟཾ, ‘‘དསྶནནྟི པཋམམགྒསྶེཏཾ ཨདྷིཝཙན’’ནྟི ¶ . ཏཡིདཾ ཨུཔརིམགྒེསུ བྷཱཝནཱཔརིཡཱཡསྶ ནིརུལ༹ྷཏྟཱ པཋམམགྒསྶ པཋམཾ ནིབྦཱནདསྶནཏོ. ཏེནཱཧ ‘‘པཋམམགྒོ ཧཱི’’ཏིཨཱདི ¶ . ཀོཙི ཡཐཱཝུཏྟཾ ཨཝིཔརཱིཏཾ ཨཏྠཾ ཨཛཱནནྟོ ཉཱཎདསྶནཾ ནཱམ ཨཱརམྨཎཀརཎསྶ ཝསེན ཨཏིཔྤསངྒཾ ཨཱསངྐེཡྻཱཏི ཏཾ ནིཝཏྟེཏུཾ ‘‘གོཏྲབྷཱུ པནཱ’’ཏིཨཱདི ཝུཏྟཾ. ན དསྶནནྟི ཝུཙྩཏཱིཏི ཨེཏྠ རཱཛདསྶནཾ ཨུདཱཧརནྟི. ཙཏྟཱརོཔི མགྒཱ དསྶནམེཝ ཡཐཱཝུཏྟེནཏྠེན, བྷཱཝནཱཔརིཡཱཡོ པན ཨུཔརི ཏིཎྞཾ མགྒཱནཾ པཋམམགྒཨུཔཱཡསྶ བྷཱཝནཱཀཱརེན པཝཏྟནཏོ. དསྶནཾ ཝིསུདྡྷི ཨེཏྠཱཏི དསྶནཝིསུདྡྷིཀཾ, ནིབྦཱནཾ. ཕསྶཱཡཏནཾ ཀམྨཊྛཱནཾ ཨསྶ ཨཏྠཱིཏི ཕསྶཱཡཏནཀམྨཊྛཱནིཀོ. ཨེས ནཡོ སེསེསུཔི པདེསུ.

པདེསསངྑཱརེསཱུཏི སངྑཱརེཀདེསེསུ. ཧེཊྛིམཔརིཙྪེདེན པཐཝིཨཱདིཀེ དྷམྨམཏྟེ དིཊྛེ རཱུཔཔརིགྒཧོ, ཙཀྑུཝིཉྙཱཎཱདིཀེ ཏཾསཧགཏདྷམྨམཏྟེ དིཊྛེ ཨརཱུཔཔརིགྒཧོ ཙ སིཛ྄ཛྷཏཱིཏི ཝདནྟི.

ཨདྷིགཏམགྒམེཝ ཀཐེསཱིཏི ཡེན མུཁེན ཝིཔསྶནཱབྷིནིཝེསཾ ཨཀཱསི, ཏམེཝསྶ མུཁཾ ཀཐེསི. ཨཡཾ པནཱཏི ཀམྨཊྛཱནཾ པུཙྪནྟོ བྷིཀྑུ. ཨིམེསནྟི ཕསྶཱཡཏནཀམྨཊྛཱནིཀཔཉྩཀྑནྡྷཀམྨཊྛཱནིཀཱནཾ ཝཙནཾ. ‘‘ཨཉྙམཉྙཾ ན སམེཏཱི’’ཏི ཝཏྭཱ ཏམེཝཏྠཾ པཱཀཊཾ ཀརོཏི ‘‘པཋམེནཱ’’ཏིཨཱདིནཱ. པཉྩཀྑནྡྷཝིམུཏྟསྶ སངྑཱརསྶ ཨབྷཱཝཱ ‘‘ནིཔྤདེསེསཱུ’’ཏི ཝུཏྟཾ. ཏཐེཝཱཏི ཡཐེཝ ཕསྶཱཡཏནཀམྨཊྛཱནིཀཾ, ཏཐེཝ ཏཾ པཉྩཀྑནྡྷཀམྨཊྛཱནིཀཾ པུཙྪིཏྭཱ.

སམཔྤཝཏྟཱ དྷཱཏུཡོཏི རསཱདཡོ སརཱིརདྷཱཏུཡོ སམཔྤཝཏྟཱ, ན ཝིསམཱཀཱརསཎྛིཏཱ ཨཧེསུཾ. ཏེནཱཧ ‘‘ཀལླསརཱིརཾ བལཔྤཏྟ’’ནྟི. ‘‘ཨཏཱིཏཱ སངྑཱརཱ’’ཏིཨཱདི ཝིཔསྶནཱབྷིནིཝེསཝསེན ཝུཏྟཾ. སམྨསནཾ སབྦཏྠཀམེཝ ཨིཙྪིཏབྦཾ. ཙཱརིབྷཱུམིནྟི གོཙརཊྛཱནཾ.

ཀཱརཀབྷཱཝནྟི བྷཱཝནཱནུཡུཉྫནབྷཱཝཾ. པཎྜུརོགཔུརིསོཏི པཎྜུརོགཱི པུརིསོ. ཨརིཊྛནྟི སུཏྟཾ. བྷེསཛྫཾ ཀཏྭཱཏི བྷེསཛྫཔཡོགཾ ཀཏྭཱ. ཀརིསྶཱམཱིཏི བྷེསཛྫཾ ཀརིསྶཱམི. ཛྷཱམཐུཎོ ཝིཡཱཏི དཌྜྷཐུཎོ ཝིཡ ཁཱརཀཛཱལནདྡྷཏྟཱ ཏརུཎམཀུལསནྟཱནསཉྪནྣཏྟཱ.

དཀྑིཎདྭཱརགཱམེཏི དཀྑིཎདྭཱརསམཱིཔེ གཱམེ. ལོཧིཏཀོཏི ལོཧིཏཝཎྞོ. ཨོཙིརཀཛཱཏོཏི ཛཱཏཨོལམྦམཱནཙིརཀོ ཝིཡ. ཨཱདིནྣསིཔཱཊིཀོཏི ¶ གཧིཏཕལཔོཏཀོ. སནྡཙྪཱཡོཏི བཧལཙྪཱཡོ. ཡསྨཱ ཏསྶ རུཀྑསྶ སཱཁཱ ཨཝིརལཱ༹ གྷནཔྤཏྟཱ ཨཉྙམཉྙཾ སཾསནྡིཏྭཱ ཋིཏཱ, ཏསྨཱ ཚཱཡཱཔིསྶ ཏཱདིསཱིཏི ཝུཏྟཾ ‘‘སནྡཙྪཱཡོ ནཱམ སཾསནྡིཏྭཱ ཋིཏཙྪཱཡོ’’ཏི, གྷནཙྪཱཡོཏི ཨཏྠོ. ཏཏྠཱཏིཨཱདི ཨུཔམཱསཾསནྡནཾ.

ཡེན ¶ ཡེནཱཀཱརེན ཨདྷིམུཏྟཱནནྟི ཚཕསྶཱཡཏནཱདིམུཁེན ཡེན ཡེན ཝིཔསྶནཱབྷིནིཝེསེན ཝིཔསྶནྟཱནཾ ནིབྦཱནཉྩ ཨདྷིམུཏྟཱནཾ. སུཊྛུ ཝིསུདྡྷཾ པརིཉྙཱཏིསམཡཱདིསིདྡྷིཡཱ. ཏེན ཏེནེཝཱཀཱརེནཱཏི ཨཏྟནཱདྷིམུཏྟཱཀཱརེན. ཨིདཱནི ཏཾ ཏཾ ཨཱཀཱརཾ ཨུཔམཱཡ སདྡྷིཾ ཡོཛེཏྭཱ དསྶེཏུཾ ‘‘ཡཐཱ ཧཱི’’ཏིཨཱདི ཨཱརདྡྷཾ. ཏཾ སུཝིཉྙེཡྻམེཝ.

ཨིདནྟི ནགརོཔམཾ. ཏཾ སལླཀྑིཏནྟི ཀིཾསུཀོཔམདཱིཔིཏཾ ཨཏྠཛཱཏཾ སཙེ སལླཀྑིཏཾ. ཨསྶ བྷིཀྑུནོ. དྷམྨདེསནཏྠནྟི ཡཐཱསལླཀྑིཏསྶ ཨཏྠསྶ ཝསེན ལདྡྷཝིསེསསྶ ཨུཔབྲཱུཧནཱཡ. ཏསྶེཝཏྠསྶཱཏི ཏསྶ དསྶནཝིསུདྡྷིསངྑཱཏསྶ ཨཏྠསྶ. ཙོརཱསངྐཱ ན ཧོནྟི མཛ྄ཛྷིམདེསརཛྫསྶ པསནྣབྷཱཝཏོ. ཏིཔུརིསུབྦེདྷཱནཱིཏི ཨུབྦེདྷེན ཏིཔུརིསཔྤམཱཎཱནི ནཱནཱབྷིཏྟིཝིཙིཏྟཱནི ཐམྦྷཱནཾ ཨུཔརི ཝིཝིདྷམཱལཱཀམྨཱདིཝིཙིཏྟདྷནུརཱཀཱརལཀྑིཏཱནི མནོརམཱནི. ཏེནཱཧ ‘‘ནགརསྶ ཨལངྐཱརཏྠ’’ནྟི. ནགརདྭཱརསྶ ཐིརབྷཱཝཱཔཱདནཝསེན ཋཔེཏབྦཏྟཱ ཝུཏྟཾ ‘‘ཙོརནིཝཱརཎཏྠཱནིཔི ཧོནྟིཡེཝཱ’’ཏི. པིཊྛསངྒྷཱཏསྶཱཏི དྭཱརབཱཧསྶ. ‘‘ཨིམེ ཨཱཝཱསིཀཱ, ཨིམེ ཨཱགནྟུཀཱ, ཏཏྠཱཔི ཙ ཨིམེཧི ནགརསྶ ནགརསཱམིཀསྶ ཙ ཨཏྠོ. ཨིམེསཾ ཝསེན ཨནཏྠོ སིཡཱ’’ཏི ཛཱནནཉཱཎསངྑཱཏེན པཎྜིཙྩེན སམནྣཱགཏོ. ཨཉྙཱཏནིཝཱརཎེ པཊུབྷཱཝསངྑཱཏེན ཝེཡྻཏྟིཡེན སམནྣཱགཏོ. ཋཱནུཔྤཏྟིཀཔཉྙཱསངྑཱཏཱཡཱཏི ཏསྨིཾ ཏསྨིཾ ཨཏྠཀིཙྩེ ཏངྑཎུཔྤཛྫནཀཔཊིབྷཱནསངྑཱཏཱཡ.

རཉྙཱ ཨཱཡུཏྟོ ནིཡོཛིཏོ རཱཛཱཡུཏྟོ, ཏཏྠ ཏཏྠ རཉྙོ ཀཱཏབྦཀིཙྩེ ཋཔིཏཔུརིསོ. ཀཏིཔཱཧེཡེཝཱཏི ཀཏིཔཡདིཝསེཡེཝ ཨཀིཙྩཀརཎེན ཏསྶ ཋཱནཾ ཝིབྦྷམོ ཛཱཏོཏི ཀཏྭཱ ཝུཏྟཾ – ‘‘སབྦཱནི ཝིནིཙྪཡཊྛཱནཱདཱིནི ཧཱརེཏྭཱ’’ཏི.

སཱིསམསྶ ཚིནྡཱཧཱིཏི སཱིསབྷཱུཏཾ ཨུཏྟམངྒཊྛཱནིཡཾ ཏཏྠ ཏསྶ རཱཛཀིཙྩཾ ཚིནྡཱཏི ཨཏྠོ. ཨཉྙཐཱ ཏསྶ པཱཀཏིཀེ ཨཏྠེ གཡ྄ཧམཱནེ པཱཎཱཏིཔཱཏོ ¶ ཨཱཎཏྟོ ནཱམ སིཡཱ. ན ཧི ཙཀྐཝཏྟིརཱཛཱ ཏཱདིསཾ ཨཱཎཱཔེཏི, ཨཉྙེསམྤི ཏཏོ ནིཝཱརཀཏྟཱ. ཨཐ ཝཱ ཚིནྡཱཧཱིཏི མམ ཨཱཎཱཡ ཨསྶ སཱིསཾ ཚིནྡནྟོ ཝིཡ ཨཏྟཱནཾ དསྶེཧི, ཨེཝཾ སོ ཏཏྠོཝཱདཔཊིཀརཏྟཔཏྟོ ཨོདམེཡྻཱཏི, ཏཐཱ ཙེཝ ཨུཔརི པཊིཔཏྟི ཨཱགཏཱ. ཏཏྠཱཏི ཨེཏསྨིཾ པཙྩནྟིམནགརེ.

ཨུཔྤནྣེནཱཏི སམཐཀམྨཊྛཱནེ ཨུཔྤནྣེན.

ཏསྶེཝཱཏི སཀྐཱཡསངྑཱཏསྶ ནགརསྶ ‘‘དྭཱརཱནཱི’’ཏི ཝུཏྟཱནཱིཏི ཨཱནེཏྭཱ སམྦནྡྷོ. ‘‘སཱིགྷཾ ¶ དཱུཏཡུག’’ནྟི ཝུཏྟཱཏི ཡོཛནཱ. ཧདཡཝཏྠུརཱུཔསྶ མཛ྄ཛྷེ སིངྒྷཱཊཀབྷཱཝེན གཧིཏཏྟཱ ‘‘ཧདཡཝཏྠུསྶ ནིསྶཡབྷཱུཏཱནཾ མཧཱབྷཱུཏཱན’’ནྟི ཝུཏྟཾ. ཡདི ཨེཝཾ ཝཏྠུརཱུཔམེཝ གཧེཏབྦཾ, ཏདེཝེཏྠ ཨགྒཧེཏྭཱ ཀསྨཱ མཧཱབྷཱུཏགྒཧཎནྟི ཨཱཧ ‘‘ཝཏྠུརཱུཔསྶ ཧཱི’’ཏིཨཱདི. ཡཱདིསོཏི སམྨཱདིཊྛིཨཱདཱིནཾ ཝསེན ཡཱདིསོ ཨེཝ པུབྦེ ཨཱགཏཝིཔསྶནཱམགྒོ. ‘‘ཨཡམྤི ཨཊྛངྒསམནྣཱགཏཏྟཱ ཏཱདིསོ ཨེཝཱ’’ཏི ཝཏྭཱ ཨརིཡམགྒོ ‘‘ཡཐཱགཏམགྒོ’’ཏི ཝུཏྟོ. ཨིདཾ ཏཱཝེཏྠཱཏི ཨེཏྠ ཨེཏསྨིཾ སུཏྟེ དྷམྨདེསནཏྠཾ ཨཱབྷཏཱཡ ཡཐཱཝུཏྟཨུཔམཱཡ ཨིདཾ སཾསནྡནཾ.

ཨིདཾ སཾསནྡནནྟི ཨིདཱནི ཝཀྑམཱནཾ ཨུཔམཱཡ སཾསནྡནཾ. ནགརསཱམིཨུཔམཱ པཉྩཀྑནྡྷཝསེན དསྶནཝིསུདྡྷིཔཏྟཾ ཁཱིཎཱསཝཾ དསྶེཏུཾ ཨཱབྷཏཱ. སིངྒྷཱཊཀཱུཔམཱ ཙཏུམཧཱབྷཱུཏཝསེན དསྶནཝིསུདྡྷིཔཏྟཾ ཁཱིཎཱསཝཾ དསྶེཏུཾ ཨཱབྷཏཱཏི ཡོཛནཱ. ‘‘ཙཏུསཙྩམེཝ ཀཐིཏ’’ནྟི ཝཏྭཱ ཏཱནི སཙྩཱནི ནིདྡྷཱརེཏྭཱ དསྶེཏུཾ ‘‘སཀལེནཔི ཧཱི’’ཏིཨཱདི ཝུཏྟཾ. ཨིདྷ ནགརསམྦྷཱརོ ཚདྭཱརཱདཡོ. ཏེན ཧི ཚཕསྶཱཡཏནཱདཡོ ཨུཔམིཏཱ. ཏེ པན དུཀྑསཙྩཔརིཡཱཔནྣཱཏི ཝུཏྟཾ ‘‘ནགརསམྦྷཱརེན དུཀྑསཙྩམེཝ ཀཐིཏ’’ནྟི.

ཀིཾསུཀོཔམསུཏྟཝཎྞནཱ ནིཊྛིཏཱ.

༩. ཝཱིཎོཔམསུཏྟཝཎྞནཱ

༢༤༦. བྷིཀྑུསྶ ཝཱ བྷིཀྑུནིཡཱ ཝཱཏི ཀཱམཾ པཱལི༹ཡཾ པརིསཱདྭཡམེཝ གཧིཏཾ, སེསཔརིསཱནཾ པན ཏདཉྙེསམྤི དེཝམནུསྶཱནནྟི སབྦསཱདྷཱརཎོཝཱཡཾ དྷམྨསངྒཧོཏི ཨིམམཏྠཾ ཨུཔམཱཔུབྦཀཾ ཀཏྭཱ དསྶེཏུཾ ‘‘ཡཐཱ ནཱམཱ’’ཏིཨཱདི ¶ ཨཱརདྡྷཾ. ཡཛནྟོཏི དདནྟོ. ཝིནྡིཏབྦོཏི ལདྡྷབྦོ, ཨདྷིགནྟབྦོཏི ཨཏྠོ.

ཚནྡོཏི ཏཎྷཱཚནྡོ. ཏེནཱཧ – ‘‘དུབྦལཏཎྷཱ སོ རཉྫེཏུཾ ན སཀྐོཏཱི’’ཏི. པུབྦུཔྤཏྟིཀཱ ཨེཀསྨིཾ ཨཱརམྨཎེ པཋམཾ ཨུཔྤནྣཱ. སཱ ཧི ཨནཱསེཝནཏྟཱ མནྡཱ. སོཏི ཚནྡོ. རཉྫེཏུཾ ན སཀྐོཏི ལདྡྷཱསེཝནཏྟཱ. དོསོ ནཱམ ཙིཏྟདཱུསནཏྟཱ. ཏཱནཱིཏི དཎྜཱདཱནཱདཱིནི. ཏམྨཱུལཀཱཏི ལོབྷམཱུལཀཱ ཏཱཝ མཱཡཱསཱཋེཡྻམཱནཱཏིམཱནདིཊྛིཙཱཔལཱདཡོ, དོསམཱུལཀཱ ཨུཔནཱཧམཀྑཔལཱསཨིསྶཱམཙྪརིཡཐམྦྷསཱརམྦྷཱདཡོ, མོཧམཱུལཀཱ ཨཧིརིཀ-ཨནོཏྟཔྤ-ཐིནམིདྡྷཝིཙིཀིཙྪུདྡྷཙྩ-ཝིཔརཱིཏམནསིཀཱརཱདཡོ, སཾཀིལེསདྷམྨཱ གཧིཏཱཝ ཧོནྟི ཏཾམཱུལཀཏྟཱ. ཡསྨཱ པན སབྦེཔི སཾཀིལེསདྷམྨཱ དྭཱདསཱཀུསལཙིཏྟུཔྤཱདཔརིཡཱཔནྣཱ ཨེཝ, ཏསྨཱ ཏེསམྤེཏྠ གཧིཏབྷཱཝཾ དསྶེཏུཾ ‘‘ཚནྡོ རཱགོཏི ཝཱ’’ཏི ཝུཏྟཾ.

བྷཱཡིཏབྦཊྛེན ¶ སབྷཡོ. བྷེརཝཊྛེན སཔྤཊིབྷཡོ. ཀུསལཔཀྑསྶ ཝིཀྑམྦྷནཊྛེན སཀཎྚཀོ. ཀུསལཨནཝཛྫདྷམྨེཧི དུརཝགཱཧཊྛེན སགཧནོ. བྷཝསམྤཏྟིབྷཝནིབྦཱནཱནཾ ཨཔྤདཱནབྷཱཝཏོ ཨུམྨགྒོ. དུགྒཏིགཱམིམགྒཏྟཱ ཀུམྨགྒོ. ཨིརིཡནཱཏི ཝཏྟནཱ པཊིཔཛྫནཱ. དུགྒཏིགཱམིཏཱཡ ཀིལེསོ ཨེཝ ཀིལེསམགྒོ. ན སཀྐཱ སམྤཏྟིབྷཝཾ གནྟུཾ ཀུཏོ ནིབྦཱནགམནནྟི ཨདྷིཔྤཱཡོ.

ཨསུབྷཱཝཛྫནཱདཱིཧཱིཏི ཨཱདི-སདྡེན ཨནིཙྩམནསིཀཱརཱདཱིནམྤི སངྒཧོ དཊྛབྦོ. ཙིཏྟཾ ནིཝཏྟཏི སརཱགཙིཏྟཾ ན ཨུཔྤཛྫཏི པཊིཔཀྑམནསིཀཱརེན ཝིནོདིཏཏྟཱ. མཛ྄ཛྷཏྟཱརམྨཎེཏི ཨཉྙཱཎུཔེཀྑཊྛཱནིཡེ ཨཱརམྨཎེ. ཨུདྡེས…པེ… ཨཱཝཛྫནྟསྶཱཏི ཨུདྡིསཱཔནཝསེན ཨུདྡེསཾ, པརིཔུཙྪཱཔནཝསེན པརིཔུཙྪཾ, གརཱུནཾ སནྟིཀེ ཝསནཝསེན གརུཝཱསཾ ཨཱཝཛྫནྟསྶ. ཙིཏྟནྟི གམྦྷཱིརཉཱཎཙརིཡ-པཙྩཝེཀྑཎ-པཉྙཝནྟ-པུགྒལསེཝནཝསེན ཏདདྷིམུཏྟིསིདྡྷིཡཱ ཨཉྙཱཎཙིཏྟཾ ནིཝཏྟཏི.

ཡཐཱ ‘‘པུཛྫབྷཝཕལཾ པུཉྙ’’ནྟི ཝུཏྟཾ ‘‘ཨེཝམིདཾ པུཉྙཾ པཝཌྜྷཏཱི’’ཏི (དཱི. ནི. ༣.༨༠), ཨེཝཾ ཀིཊྛསམྦྷཝཏྟཱ ‘‘ཀིཊྛ’’ནྟི ཝུཏྟནྟི ཨཱཧ ‘‘ཀིཊྛནྟི ཀིཊྛཊྛཱནེ ཨུཔྤནྣསསྶ’’ནྟི.

གྷཊཱཏི ¶ སིངྒཡུགཾ ཨིདྷཱདྷིཔྤེཏནྟི ཨཱཧ ‘‘དྭིནྣཾ སིངྒཱནཾ ཨནྟརེ’’ཏི. གྷཊཱཏི གོཎཱདཱིནཾ སིངྒནྟརཊྛསྶ སམཉྙཱཏི ཝདནྟི. ནཱསཱརཛྫུཀེཏི ནཱསཱརཛྫུཔཱཏཊྛཱནེ.

དམེཏི པུཐུཏྟཱརམྨཎཏོ ནིཝཱརེཏི. ནནྟི ཙིཏྟཾ. ཡཾ སུཏྟཾ སུབྷཱསིཏཾ མཡཱ. ཏདསྶཱཏི ཏདཱ ཨསྶ བྷིཀྑུནོ. ཨཱརམྨཎེཏི ཀམྨཊྛཱནཱརམྨཎེ.

སུདུཛིཏནྟི ནིབྦིསེཝནབྷཱཝཀརཎེན ཛིཏཾ. སུཏཛྫིཏནྟི སུཊྛུ དཱུརཀརཎེན ཛིཏཾ, ཏཐཱབྷཱུཏཉྩ ཏཛྫིཏཾ ནཱམ ཧོཏཱིཏི ཏཐཱ ཝུཏྟཾ. གོཙརཛ྄ཛྷཏྟནྟི ཨཛ྄ཛྷཏྟབྷཱུཏོ གོཙརོ. ཀམྨཊྛཱནཱརམྨཎཉྷི བཧིདྡྷཱརཱུཔཱདིཨཱརམྨཎཝིདྷུརཏཱཡ ཨཛ྄ཛྷཏྟནྟི ཝུཙྩཏི. སམཐོ ཨནུརཀྑཎཾ ཨེཏསྶཱཏི སམཐཱནུརཀྑཎཾ. ཡཐཱ ཨིནྡྲིཡསཾཝརསཱིལཾ སམཐཱནུརཀྑཎཾ ཧོཏི, ཏཐཱ ཀཐིཏནྟི ཨཏྠོ. ཡཐཱ ཧི ཨིནྡྲིཡསཾཝརསཱིལཾ སམཐསྶ པཙྩཡོ, ཨེཝཾ སམཐོཔི ཏསྶ པཙྩཡོཏི.

ཝཱདིཡམཱནཱཡ ཝཱིཎཱཡ. ཙིཏྟཾ རཉྫེཏཱིཏི རཛྫནེན. ཨཝིསྶཛྫནཱིཡཏཱཡ ཙིཏྟཾ བནྡྷཏཱིཏི ¶ བནྡྷནཱིཡོ. ཝེཊྛཀེཏི ཏནྟཱིནཾ ཨཱསཛྫནཝེཊྛཀེ. ཀོཎནྟི ཀཝཎཏོ ཝཱིཎཱཡ སདྡཀརཎཏོ ཀོཎནྟི ལདྡྷནཱམཾ དཱརུདཎྜཾ སིངྒཱདཱིསུ ཡེན ཀེནཙི ཀཏཾ གྷཊིཀཾ. ཏེནཱཧ ‘‘ཙཏུརསྶཾ སཱརདཎྜཀ’’ནྟི.

ཡསྨཱ སོ རཱཛཱ རཱཛམཧཱམཏྟོ ཝཱ སདྡཾ ཡཐཱསབྷཱཝཏོ ན ཨཉྙཱསི, ཏསྨིཾ ཏསྶ ཨཛཱནནཱཀཱརམེཝ དསྶེཏུཾ ‘‘སདྡཾ པསྶིསྶཱམཱི’’ཏིཨཱདི ཝུཏྟཾ.

ཨསཏཱི ཀིརཱཡནྟི པཱལི༹ཡཾ ལིངྒཝིཔལླཱསེན ཝུཏྟནྟི ཡཐཱལིངྒམེཝ ཝདནྟོ ‘‘ཨསཱ’’ཏི ཨཱཧ. ‘‘ཨསཏཱིཏི ལཱམཀཱདྷིཝཙན’’ནྟི ཝཏྭཱ ཏཏྠ པཡོགཾ དསྶེཏུཾ ‘‘ཨསཱ ལོཀིཏྠིཡོ ནཱམཱ’’ཏི ཝུཏྟཾ, ལོཀེ ཨིཏྠིཡོ ནཱམ ཨསཏིཡོཏི ཨཏྠོ, ཏཏྠ ཀཱརཎམཱཧ ‘‘ཝེལཱ ཏཱསཾ ན ཝིཛྫཏཱི’’ཏི. པཀཏིཡཱ ལོཀེ ཛེཊྛབྷཱཏཱ ཀནིཊྛབྷཱཏཱ མཱཏུལོཏིཨཱདིཀཱ ཝེལཱ མརིཡཱདཱ ཏཱསཾ ན ཝིཛྫཏི. ཀསྨཱ? སཱརཏྟཱ ཙ པགབྦཱ ཙ སབྦེསམྤི སམྦྷོགཝསེན ཝིནིཡོགཾ གཙྪནྟི. ཀཐཾ? སིཁཱི སབྦགྷསོ ཡཐཱ. ཏེནེཝཱཧ –

‘‘སབྦཱ ¶ ནདཱི ཝངྐགཏཱི, སབྦེ ཀཊྛམཡཱ ཝནཱ;

སབྦིཏྠིཡོ ཀརེ པཱཔཾ, ལབྷམཱནེ ནིཝཱཏཀེ’’ཏི. (ཛཱ. ༢.༢༡.༣༠༨);

ཨཉྙམྤི ཏནྟིབདྡྷཾ ཙཏུརསྶཨམྦཎཝཱདིཏཱདཱིནི. ཝཱིཎཱ ཝིཡ པཉྩཀྑནྡྷཱ ཨནེཀདྷམྨསམཱུཧབྷཱཝཏོ. རཱཛཱ ཝིཡ ཡོགཱཝཙརོ ཏཔྤཊིབདྡྷདྷམྨགཝེསཀཏྟཱ. ཨསྶཱཏི ཡོགཱཝཙརསྶ.

ནིརཡཱདིཏོ ཨཉྙསྨིམྤི གཏི-སདྡོ ཝཏྟཏི. ཏཏོ ཝིསེསནཏྠཾ ‘‘གཏིགཏཱི’’ཏི ཝུཏྟཾ ‘‘དུཀྑདུཀྑཾ, རཱུཔརཱུཔ’’ནྟི ཙ ཡཐཱ, གཏིསཉྙིཏཾ པཝཏྟིཊྛཱནནྟི ཨཏྠོ. ཏེནཱཧ – ‘‘ཨེཏྠནྟརེ སཾསརཏི ཝཏྟཏཱི’’ཏི. སཉྫཱཡནཔདེསོ ཨེཝ གཏཱིཏི སཉྫཱཏིགཏི.

ཏཾ པན གཏིཾ སཏྟཱནཾ སཾཝེགཝཏྠུབྷཱུཏསྶ པཙྩཀྑསྶ གབྦྷཱསཡསྶ ཝསེན དསྶེཏུཾ ‘‘ཨཡམསྶ ཀཱཡོ’’ཏིཨཱདི ཝུཏྟཾ. རཱུཔདྷམྨསྶ སལཀྑཎཾ གཏི ནིཊྛཱ, ཏཏོ པརཾ ཨཉྙཾ ཀིཉྩི ནཏྠཱིཏི སལཀྑཎགཏི. ཨབྷཱཝོ ཨཙྩནྟཱབྷཱཝོ. སནྟཱནཝིཙྪེདོ ཝིབྷཝགཏི ཏཾནིཊྛཱནབྷཱཝཱ. བྷེདོཏི ཁཎནིརོདྷོ, ཨིདྷཱཔི ཏཾནིཊྛཱནཏཱཡེཝ པརིཡཱཡོ. ཡཱཝ བྷཝགྒཱཏི ཡཱཝ སབྦབྷཝགྒཱ. སལཀྑཎཝིབྷཝགཏིབྷེདགཏིཡོ ‘‘ཨེསེཝ ནཡོ’’ཏི ཨིམིནཱཝ པཀཱསིཏཱཏི ན གཧིཏཱ. ཏསྶ ཁཱིཎཱསཝསྶ ན ཧོཏི ཨགྒམགྒེན སམུཙྪིནྣཏྟཱ.

སཱིལཾ ¶ ཀཐིཏཾ རཱུཔཱདཱིསུ ཚནྡཱདིནིཝཱརཎསྶ ཀཐིཏཏྟཱ. མཛ྄ཛྷེ སམཱདྷིབྷཱཝནཱ ཀཐིཏཱ ‘‘ཨཛ྄ཛྷཏྟམེཝ སནྟིཊྛཏི…པེ… སམཱདྷིཡཏཱི’’ཏི ཛོཏིཏཏྟཱ. པརིཡོསཱནེ ཙ ནིབྦཱནཾ ཀཐིཏཾ ‘‘ཡམྤིསྶ…པེ… ན ཧོཏཱི’’ཏི ཝཙནཏོ.

ཝཱིཎོཔམསུཏྟཝཎྞནཱ ནིཊྛིཏཱ.

༡༠. ཚཔྤཱཎཀོཔམསུཏྟཝཎྞནཱ

༢༤༧. ཝཎསརཱིརོཏི ཝཎིཏསརཱིརོ. པཀྐཏྟཱཏི ཀུཐིཏཏྟཱ. སརདཎྜེསུ སརསམཉྙཱཏི ཀཎྜ-སདྡོ སརཔརིཡཱཡོཏི ཨཱཧ – ‘‘སརཝནནྟི ཀཎྜཝན’’ནྟི. ཨརུགཏྟོ…པེ… ཝེདིཏབྦོ གུཎསརཱིརསྶ ཁཎྜཚིདྡསཱིལཱདཱིཧི ཧེཊྛཱ མཛ྄ཛྷེ ཨུཔརིབྷཱགེ ཙ བྷེདཝིསམཙྪིནྣཝིཀཱརདོསཏྟཱ. ཨེཏྠ ¶ ཀུསཱ ‘‘ཀཎྚཀཱ’’ཏི ཨདྷིཔྤེཏཱ ཀཎྚཀསདིསཏྟཱ, ཀུསཏིཎཱནཾ ཨེཝ ཝཱ ཝུཏྟཱཀཱརཔདེསོ ‘‘ཀུསཀཎྚཀོ’’ཏི ཝུཏྟོ.

གཱམཝཱསཱིནཾ ཝིཛ྄ཛྷནཊྛེནཱཏི ནཱརཧོཝ ཧུཏྭཱ ཏེསཾ ཀཱརཱནཾ པཊིགྒཧཎཝསེན པཱིལ༹ནཊྛེན.

པཀྑིནྟི ཧཏྠིལིངྒསཀུཎཾ. ཏསྶ ཀིར ཧཏྠིསོཎྜསདིསཾ མུཁཾ, ཏསྨཱ ‘‘ཧཏྠིསོཎྜསཀུཎ’’ནྟི ཝུཏྟཾ. ཝིསྶཛྫེཡྻཱཏི རཛྫུཡཱ ཡཐཱབདྡྷཾ ཨེཝ ཝིསྶཛྫེཡྻ.

བྷོགེཧཱིཏི ཨཏྟནོ སརཱིརབྷོགེཧི. མཎྜལཾ བནྡྷིཏྭཱཏི ཡཐཱ སརཱིརཾ མཎྜལཱཀཱརེན ཏིཊྛཏི, ཨེཝཾ ཀཏྭཱ. སུཔིསྶཱམཱིཏི ནིདྡཾ ཨོཀྐམིསྶཱམི. ཌེཏུཀཱམོཏི ཨུཔྤཏིཏུཀཱམོ. དིསཱ དིསནྟི དིསཏོ དིསཾ.

ཚ པཱཎཀཱ ཝིཡ ཚ ཨཱཡཏནཱནི ནཱནཛ྄ཛྷཱསཡཏྟཱ, ནཱནཛ྄ཛྷཱསཡཏཱ ཙ ནེསཾ ནཱནཱཝིསཡནིནྣཏཱཡ དཊྛབྦཱ. དལ༹ྷརཛྫུ ཝིཡ ཏཎྷཱ ཏེསཾ བནྡྷནཏོ. མཛ྄ཛྷེ གཎྛི ཝིཡ ཨཝིཛྫཱ བནྡྷནསྶ དུབྦིནིམྨོཙནཧེཏུཏོ. ཨཱརམྨཎཾ བལཝཾ ཧོཏི མནུཉྙབྷཱཝེན ཙེཝ ཏཏྠ ཏཎྷཱབྷིནིཝེསསྶ དལ༹ྷབྷཱཝེན ཙ.

སརིཀྑཀེན ཝཱ ཨུཔམཱཡ ཨཱཧརཎཔཀྑེ. ཨཔྤནཱཏི སཾསནྡནཱ. པཱལི༹ཡཾཡེཝ ཨཔྤིཏཱ ཨུཔམཱ ‘‘ཨེཝམེཝ ཁོ’’ཏིཨཱདིནཱ. རཱུཔཙིཏྟཱདིཝིསམནིནྣཏྟཱ ཙཀྑུསྶ ཝིསམཛ྄ཛྷཱསཡཏཱ. ཨེས ནཡོ སེསེསུཔི.

ཀཎྞཙྪིདྡཀཱུཔཀེཏི ¶ ཀཎྞཙྪིདྡསཉྙིཏེ ཨཱཝཱཊེ. ཏསྶཱཏི སོཏསྶ. པཙྩཡོ ཧོཏཱིཏི ཨུཔནིསྶཡོ ཧོཏི ཏེན ཝིནཱ སདྡགྒཧཎསྶ ཨབྷཱཝཏོ. ‘‘ཨཛཊཱཀཱསོཔི ཝཊྚཏི ཨེཝཱ’’ཏི ཝཏྭཱ ཏསྶ པཙྩཡབྷཱཝཾ དསྶེཏུཾ ‘‘ཨནྟོལེཎསྨི’’ནྟིཨཱདི ཝུཏྟཾ. དྷཱཏུཔརམྤརཱ གྷཊྚེནྟོཏི བྷཱུཏཔརམྤརཱསངྒྷཊྚེནྟོ.

ཨེཝཾ སནྟེཏི ཨེཝཾ བྷཱུཏཔརམྤརཱཝསེན སདྡེ སོཏཔཐམཱགཙྪནྟེ. སམྤཏྟགོཙརཏཱ ཧོཏི སོཏསྶ. གྷཱནཱདཱིནཾ ཝིཡ ‘‘དཱུརེ སདྡོ’’ཏི ཛཱནནཾ ན སམྦྷཝེཡྻ སམྤཏྟགཱཧིབྷཱཝཏོ. ཏཐཱ ཏཐཱ ཛཱནནཱཀཱརོ ཧོཏི མནོཝིཉྙཱཎསྶ གཧཎཱཀཱརཝིསེསཏོ. སོཏཝིཉྙཱཎཔྤཝཏྟི པན ཨུབྷཡཏྠ སམཱནཱཝ. དཱུརེ ཋིཏོཔི སདྡོ ཏཱདིསེ ཋཱནེ ¶ པཊིགྷོསཱདཱིནཾ པཙྩཡོ ཧོཏི ཨཡོཀནྟོ ཝིཡ ཨཡོཙལནསྶཱཏི དཊྛབྦཾ. དྷམྨཏཱཏི དྷམྨསབྷཱཝོ, སདྡསྶ སོ སབྷཱཝོཏི ཨཏྠོ. ཏཏོ ཏཏོ སཝནཾ ཧོཏི ཨཱཀཱསསཉྙིཏསྶ ཨུཔནིསྶཡསྶ ལབྦྷནཏོ. ཡདི པན སོཏཾ སམྤཏྟགཱཧཱི སིཡཱ, ཙིཏྟསམུཊྛཱནསདྡོ སོཏཝིཉྙཱཎསྶ ཨཱརམྨཎཔཙྩཡོ ན སིཡཱ. པཊྛཱནེ ཙ ཨཝིསེསེན ‘‘སདྡཱཡཏནཾ སོཏཝིཉྙཱཎསྶ ཨཱརམྨཎཔཙྩཡེན པཙྩཡོ’’ཏི ཝུཏྟོ, བཧིདྡྷཱ ཙ ཙིཏྟཛསྶ སདྡསྶ སམྦྷཝོ ནཏྠི. ཨཐ ཝཱ ཙིཏྟཛོ སདྡོ དྷཱཏུཔརམྤརཱཡ སོཏཔསཱདཾ གྷཊྚེཏི, ན སོ ཙིཏྟཛོ སདྡོ, ཡོ པརམྤརཱཡ པཝཏྟོ. ཨུཏུཛོ ཧི སོ, ཏསྨཱ ཡཐུཔྤནྣོ སདྡོ, ཏཏྠ ཋིཏོཝ སོཏཔསཱདསྶ ཨཱཔཱཐཾ ཨཱགཙྪཏཱིཏི ནིཊྛམེཏྠ གནྟབྦཾ. ཏེན ཝུཏྟཾ ‘‘ཨསམྤཏྟགོཙརམེཝེཏ’’ནྟི.

ཏདཱ ཨེཀགྒཙིཏྟཏཾ ཨཱཔཛྫཏི པརིསྶཡཱནཾ ཨབྷཱཝཏོ. ནཱསཙྪིདྡསངྑཱཏཨཱཀཱསསནྣིསྶཡེ ཝཏྟནཏོ གྷཱནཾ ཨཱཀཱསཛ྄ཛྷཱསཡཾ ཝུཏྟཾ. ཝཱཏེན ཝིནཱ གནྡྷགཧཎསྶ ཨསམྦྷཝཏོ ཝཱཏཱུཔནིསྶཡགནྡྷགོཙརཾ. ཏེནཱཧ ‘‘ཏཐཱ ཧཱི’’ཏིཨཱདི.

གཱམཏོ ལདྡྷབྦཾ ཨཱཧཱརཾ གཱམཾ, ཏནྣིནྣཏཱཡ གཱམཛ྄ཛྷཱསཡཏཱ ཝུཏྟཱ. ཏཐཱ ཧི ཛཱིཝིཏནིམིཏྟཾ རསོ ཛཱིཝིཏཾ, ཏསྨིཾ ནིནྣཏཱཡ ཏཾ ཨཝ྄ཧཱཡཏཱིཏི ཛིཝ྄ཧཱ. ན སཀྐཱ ཁེལེ༹ན ཨཏེམིཏསྶ རསཾ ཛཱནིཏུཾ, ཏསྨཱ ཨཱཔོསནྣིསྶིཏརསཱརམྨཎཱ ཛིཝ྄ཧཱཏི.

ཨཱམཀསུསཱནཏོ བཧི. ཨུཔཱདིཎྞཀཛ྄ཛྷཱསཡོཏི ཨུཔཱདིཎྞཀནིནྣོ. ཀཱཡཔསཱདསནྣིསྶཡབྷཱུཏཱཡ པཐཝིཡཱ ཕོཊྛབྦཱརམྨཎེ གྷཊིཏེ ཨེཝ ཏཏྠ ཝིཉྙཱཎུཔྤཏྟི, ན ཨཉྙཐཱཏི ཝུཏྟཾ ‘‘པཐཝཱིསནྣིསྶིཏཕོཊྛབྦཱརམྨཎོ’’ཏི. ཏཐཱ ཧཱིཏིཨཱདི ཀཱཡསྶ ཨུཔཱདིཎྞཀཛ྄ཛྷཱསཡཏཱཡ སཱདྷཀཾ ¶ . ཨཛ྄ཛྷཏྟིཀབཱཧིརཱཏི ཨཛ྄ཛྷཏྟིཀཱ བཱཧིརཱ ཝཱ. ཨསྶཱཏི ཀཱཡསྶ. སུསནྠཏསྶཱཏིཨཱདི ཏསྶ པཐཝིཡཱ པཙྩཡབྷཱཝདསྶནཾ.

ནཱནཛ྄ཛྷཱསཡོཏི ནཱནཱརམྨཎནིནྣོ. ཏེན མནསྶ མཀྐཊསྶ ཝིཡ ཨནཝཊྛིཏཏཾ དསྶེཏི. ཏེནཱཧ ‘‘དིཊྛཔུབྦེཔཱི’’ཏིཨཱདི. མཱུལབྷཝངྒགྒཧཎེན པིཊྛིབྷཝངྒཾ ནིཝཏྟེཏི. ཨསྶཱཏི མནསྶ. ཨེཝཾ ཀིརིཡམཡཾ ཝིཉྙཱཎཾ དཊྛབྦཾ. ནཱནཏྟནྟི བྷེདོ.

ཡཐཱརུཙིཔྤཝཏྟིཡཱ ¶ ནིཝཱརཎཝསེན བདྡྷཱནཾ. ནིབྦིསེཝནབྷཱཝནྟི ལོལཏཱསངྑཱཏཔརིཔྥནྡསྶ ཨབྷཱཝཾ. ནཱཀཌྜྷཏཱིཏི སཝིསཡེ རཱུཔཱརམྨཎེ ཙིཏྟསནྟཱནཾ, ཏཾསམངྒིནཾ ཝཱ པུགྒལཾ ནཱཀཌྜྷཏི. པུབྦབྷཱགཝིཔསྶནཱཝ ཀཐིཏཱ ཨཱཡཏནམུཁེན ‘‘ཨེཝཉྷི ཝོ, བྷིཀྑཝེ, སིཀྑིཏབྦ’’ནྟི ཝུཏྟཏྟཱ.

ཚཔྤཱཎཀོཔམསུཏྟཝཎྞནཱ ནིཊྛིཏཱ.

༡༡. ཡཝཀལཱཔིསུཏྟཝཎྞནཱ

༢༤༨. ཡཝཔུཉྫོ སུཔརིཔཀྐཡཝསམུདཱཡོ. ཀཱཛཧཏྠཱཏི དཎྜཧཏྠཱ. པོཐེཡྻུནྟི ཡཐཱ ཡཝསངྑཱཏཾ དྷཉྙཾ ཝཎྚཏོ མུཙྩཏི, ཨེཝཾ པོཐེཡྻུཾ. ཡཝེ སཱཝེཏྭཱཏི ཡཝསཱིསཏོ ཡཝེ པོཐནེན མོཙེཏྭཱ ཝིཝེཙེཏྭཱ.

ཙཏུམཧཱཔཐོ ཝིཡ ཚ ཨཱཡཏནཱནི ཨཱརམྨཎདཎྜཀེཧི ཧནནཊྛཱནཏྟཱ. ཡཝཀལཱཔཱི ཝིཡ སཏྟོ ཏེཧི ཧཉྙམཱནཏྟཱ. ཚ བྱཱབྷངྒིཡོ ཝིཡ སབྷཱཝཏོ ཚདྷཱཔི པཙྩེཀཾ ཨིཊྛཱནིཊྛམཛ྄ཛྷཏྟཝསེན ཨཊྛཱརས ཨཱརམྨཎཱནི ཡཝཀལཱཔཊྛཱནིཡསྶ སཏྟསྶ ཧནནཏོ. བྷཝཔཏྠནཱཡ ཨཔརཱཔརུཔྤཏྟིཾ སནྡྷཱཡ ‘‘བྷཝཔཏྠནཱ ཀིལེསཱ’’ཏི བཧུཝཙནནིདྡེསོ. བྷཝཔཏྠནཱ ཙ ཏསྶ པཙྩཡབྷཱུཏཱ ཀིལེསཱ ཙཱཏི བྷཝཔཏྠནཱཀིལེསཱཏི ཨེཝཾ ཝཱ ཨེཏྠ ཨཏྠོ དཊྛབྦོ. ཡསྨཱ སཏྟཱནཾ ཝཊྚདུཀྑཾ ནཱམ སབྦམྤི ཏཾ བྷཝཔཏྠནཱམཱུལཀཾ, ཏསྨཱ ཝུཏྟཾ ‘‘ཨེཝཾ སཏྟཱ’’ཏིཨཱདི. བྷཝཔཏྠནཀིལེསཱཏི ཙ བྷཝཔཏྠནཱམཱུལཀཾ ཀིལེསཾ.

བྷུམྨནྟི སམཱིཔཏྠེ བྷུམྨཾ. ཏེནཱཧ ‘‘སུདྷམྨཱཡ དྭཱརེ’’ཏི. ན ཀཏནྟི དུཀྑུཔྤཱདནཾ ན ཀཏཾ. ནཝགཱུཐསཱུཀརཾ ཝིཡཱཏི ནཝགཱུཐབྷཀྑསཱུཀརཾ ཝིཡ. ཙིཏྟེནེཝཱཏི ཡོ བཛ྄ཛྷཏི, ཏསྶ ཙིཏྟེནེཝ ¶ . ཏསྨཱཏི ཡསྨཱ ཝེཔཙིཏྟིབནྡྷནསྶ བནྡྷནམུཙྩནཾ ཝིཡ, ཏསྨཱ ‘‘ཝེཔཙིཏྟིབནྡྷན’’ནྟི ཝུཏྟཾ. ཉཱཎམོཀྑཾ བནྡྷནནྟི ཉཱཎེན མུཙྩནཾ བནྡྷནཾ.

མཉྙམཱནོཏི པརིཀཔྤིཏཏཎྷཱཝསེན ‘‘ཨེཏཾ མམཱ’’ཏི, དིཊྛིཝསེན ‘‘ཨེསོ མེ ཨཏྟཱ’’ཏི, མཱནཝསེན ‘‘ཨེསོཧམསྨཱི’’ཏི མཉྙནྟོ. ཁནྡྷཝིནིམུཏྟསྶ མཉྙམཱནཝཏྠུནོ ཨབྷཱཝཱ ‘‘ཁནྡྷེ མཉྙནྟོ’’ཏི ཝུཏྟཾ. ཨེཏནྟི ‘‘མཱརསྶཱ’’ཏི ¶ ཨེཏཾ སཱམིཝཙནཾ. ཀིལེསམཱརེན བདྡྷོཏི ཀིལེསམཱརེན ཏེནེཝ ཀིལེསབནྡྷནེན བདྡྷོ. མུཏྟོཏི ཨེཏྠཱཔི ཨེསེཝ ནཡོ.

ཏཎྷཱམཉྙནཱཡ སཏི དིཊྛིམཱནམཉྙནཱནཾ པསངྒོ ཨེཝ ནཏྠཱིཏི ཡཐཱ ‘‘ཨསྨཱི’’ཏི པདེན དིཊྛིམཱནམཉྙནཱ ཝུཏྟཱ ཧོནྟི, ཨེཝཾ ཏཎྷཱམཉྙིཏཱཔཱིཏི ཝུཏྟཾ ‘‘ཨསྨཱིཏི པདེན ཏཎྷཱམཉྙིཏཾ ཝུཏྟ’’ནྟི. ཨཡམཧམསྨཱིཏི པདེན དིཊྛིམཉྙིཏནྟི ཨེཏརཧི ལབྦྷམཱནདིཊྛིཝཏྠུཝསེནེཝ. བྷཝིསྶནྟི ཨནཱགཏདིཊྛིཝཏྠུཔརིཀཔྤནཝསེནེཝ དིཊྛིམཉྙིཏཾ. ཡེབྷུཡྻེན ཧི ཨནཱགཏཱལིངྒནཱ སསྶཏདིཊྛི. ཨུཙྪེདཝསེན དིཊྛིམཉྙིཏམེཝཱཏི ཨཱནེཏྭཱ སམྦནྡྷོ. རཱུཔཱིཏིཨཱདཱིནི པདཱནི. སསྶཏསྶེཝཱཏི སསྶཏགཱཧསྶེཝ པབྷེདདཱིཔནཱནི. ཡསྨཱ མཉྙིཏཾ ཨཱབཱདྷཝསེན རོགོ, ཨནྟོདོསཝསེན གཎྜོ, ཨངྒནིཀནྟཝསེན སལླཾ, ཏསྨཱ ཨིམེཧི ཏཎྷཱདཱིཧི ཀིལེསེཧི པཱཀཊཙལནཝསེན ཨིཉྫནྟི ཙེཝ, ཨཔཱཀཊསཉྩལནཝསེན ཕནྡནྟི ཙ. པཔཉྩིཏཾ སཾསཱརེ ཙིརཱཡནཾ དཊྛབྦཾ, ཁནྡྷསནྟཱནསྶ ཝཱ ཝིཏྠཱརཎཾ. པམཏྟཱཀཱརཔྤཏྟཱ མུཙྪནཱཀཱརཔྤཏྟཱ. ཏེསནྟི ཏཎྷཱདིཊྛིཀིལེསཱནཾ. ཨཱཀཱརདསྶནཏྠནྟི པཝཏྟིཨཱཀཱརདསྶནཏྠཾ.

མཱནོ ནཱམ ‘‘སེཡྻོཧམསྨཱི’’ཏིཨཱདིནཱ མཛྫནཱཀཱརཔྤཝཏྟི. ཏཎྷཱཡ སམྤཡུཏྟམཱནཝསེནཱཏི ཀསྨཱ ཝུཏྟཾ? ནནུ སབྦོ མཱནོ ཏཎྷཱསམྤཡུཏྟོ? སཏི ཧི བྱབྷིཙཱརེ ཝིསེསནཾ ཨིཙྪིཏབྦནྟི. སཙྩམེཏཾ, ཏཎྷཱ པན ཨཏྠི མཱནསྶ པཙྩཡབྷཱུཏཱ, ཨཏྠི མཱནསྶ ཨཔྤཙྩཡབྷཱུཏཱ, ཡཏོ མཱནོ ཨནིཡཏོ ཝུཙྩཏི. ཏཐཱ ཧི པཊྛཱནེ ‘‘སཾཡོཛནཾ དྷམྨཾ པཊིཙྩ སཾཡོཛནོ དྷམྨོ ཨུཔྤཛྫཏི ཧེཏུཔཙྩཡཱ’’ཏི ཨེཏྠ སཾཡོཛནཱནི སཾཡོཛནེཧི ཡཐཱལཱབྷཾ ཡོཛེཏྭཱ དསྶིཏཡོཛནཱཡ ‘‘ཀཱམརཱགསཾཡོཛནཾ པཊིཙྩ མཱནསཾཡོཛནཾ ཨཝིཛྫཱསཾཡོཛན’’ནྟི ཝཏྭཱ ‘‘ཀཱམརཱགསཾཡོཛནཾ པཊིཙྩ ཨཝིཛྫཱསཾཡོཛན’’ནྟི, ‘‘མཱནསཾཡོཛནཾ པཊིཙྩ བྷཝརཱགསཾཡོཛནཾ ཨཝིཛྫཱསཾཡོཛན’’ནྟི ཙ ཝཏྭཱ ‘‘བྷཝརཱགསཾཡོཛནཾ པཊིཙྩ ཨཝིཛྫཱསཾཡོཛན’’ནྟི ཝུཏྟཾ. ཨེཏྠ ཙ ཀཱམརཱགབྷཝརཱགསཾཡོཛནེཧི མཱནསྶ ཨནིཡཏབྷཱཝོ པཀཱསིཏོ. ཏཏྠ ཡཱ ཏཎྷཱ བལཝཏཱི, ཏཾ སནྡྷཱཡ ཨིདཾ ཝུཏྟཾ ‘‘ཏཎྷཱཡ སམྤཡུཏྟམཱནཝསེནཱ’’ཏི. བལཝཏཎྷཱསམྤཡུཏྟོ ཧི མཱནོ སཡམྤི བལཝཱ ཧུཏྭཱ ཨསྨཱིཏི སཝིསེསཾ མཛྫནཝསེན པཝཏྟཏཱིཏི.

དིཊྛིཝསེནཱཏི ¶ ¶ མཱནམཱུལཀདིཊྛིཝསེན. ‘‘སེཡྻོཧམསྨཱི’’ཏིཨཱདིནཱ ཧི བཧུལམཱནུཔེཏསྶ པུགྒལསྶ རཱུཔཱདཱིསུ ཨེཀཾ ཨུདྡིསྶ ཨཡམཧམསྨཱིཏི དིཊྛིཡཱ ཨུཔྤནྣཱཡ མཱནསྶ ཨཔྤཧཱིནཏྟཱ མཱནོཔི ཏཏྠ ཏཏྠེཝ ཨུཔྤཛྫཏི. ཨིཏི མཱནམཱུལཀཾ དིཊྛིཾ སནྡྷཱཡཱཧ ‘‘ཨཡམཧམསྨཱིཏི དིཊྛིཝསེན ཝུཏྟ’’ནྟི. ཙོདཀོ པན ཨིམམཏྠཾ ཨཛཱནནྟོ ཨནུཔལབྦྷམཱནམེཝ སམྤཡོགཏྠཾ གཧེཏྭཱ ‘‘ནནུ ཙཱ’’ཏིཨཱདིནཱ ཙོདེཏི. ཨིཏརོ ‘‘ཨཱམ ནཏྠཱི’’ཏི ཏམཏྠཾ སམྤཊིཙྪིཏྭཱ ‘‘མཱནསྶ པནཱ’’ཏིཨཱདིནཱ པརིཧཱརམཱཧ. ཏསྶཏྠོ ཝུཏྟོ ཨེཝ.

ཡཝཀལཱཔིསུཏྟཝཎྞནཱ ནིཊྛིཏཱ.

ཨཱསཱིཝིསཝགྒཝཎྞནཱ ནིཊྛིཏཱ.

ཙཏུཏྠོ པཎྞཱསཀོ.

སལཱ༹ཡཏནསཾཡུཏྟཝཎྞནཱ ནིཊྛིཏཱ.

༢. ཝེདནཱསཾཡུཏྟཾ

༡. སགཱཐཱཝགྒོ

༡. སམཱདྷིསུཏྟཝཎྞནཱ

༢༤༩. ཝེདནཱ ¶ ¶ ཙ པཛཱནཱཏཱིཏི སཙྩཱབྷིསམྦོདྷཝསེན ཝུཙྩམཱནཝེདནཱནཾ པཛཱནནཾ སཱཏིསཡསམཱདྷཱནཔུབྦཀནྟི བྷགཝཏཱ ‘‘སམཱཧིཏོ’’ཏི ཝུཏྟནྟི ཨཱཧ ‘‘ཨུཔཙཱརེན ཝཱ ཨཔྤནཱཡ ཝཱ སམཱཧིཏོ’’ཏི. ཝེདནཱཏི ཏིསྶོཔི ཝེདནཱ. དུཀྑསཙྩཝསེནཱཏི དུཀྑསཙྩབྷཱཝེན, པརིཛཱནནཝསེནཱཏི ཨཏྠོ. སམྦྷཝནྟི སམུདཡཾ ཏཎྷཱཝིཛྫཱཀམྨཕསྶཱདིཔྤབྷེདཾ ཨུཔྤཏྟིཀཱརཎཾ. ཏེནཱཧ ‘‘སམུདཡསཙྩཝསེན པཛཱནཱཏཱི’’ཏི. ཡཏྠཱཏི ཡཾནིམིཏྟཾ, ཡཾ ཨཱགམྨ ཀཱམཏཎྷཱཝིཛྫཱདིནིརོདྷཱ ཝེདནཱནིརོདྷོ, ཏེསཾ ཨཡཾ ནིརོདྷོ. ནིབྦཱནཾ ཨཱརབྦྷ ཨརིཡམགྒཔྤཝཏྟིཡཱ ཧི ནིབྦཱནཾ ཝེདནཱནིརོདྷོཏི ཝུཏྟོ. ཁཡཾ གམེཏཱིཏི ཁཡགཱམཱི, ཏཾ ཁཡགཱམིནཾ. ཚཱཏཾ ཝུཙྩཏི ཏཎྷཱ ཀཱམཱནཾ པཱཏུཀཱམཏཱཝསེན པཝཏྟནཏོ, ཨཙྩནྟམེཝ སམུཙྪིནྣཏྟཱ ནཏྠི ཨེཏསྨིཾ ཚཱཏནྟི ནིཙྪཱཏོ. ཏེནཱཧ ‘‘ནིཏྟཎྷོ’’ཏི. སམྨསནཙཱརཝེདནཱཏི སམྨསནཱུཔཙཱརཝེདནཱ. དྭཱིཧི པདེཧཱིཏི ‘‘སམཱཧིཏོ སམྤཛཱནོ’’ཏི ཨིམེཧི དྭཱིཧི. ‘‘སཏོ’’ཏི པན ཨིདཾ སམྤཛཱནཔདསྶེཝ ཨུཔབྲཱུཧནནྟི ཨདྷིཔྤཱཡོ. སེསེཧི ཙཏཱུཧི ཙཏུསཙྩཾ ཀཐིཏཾ, ཨིཏརེཧི པན དྭཱིཧི ཙཏུསཙྩབུཛ྄ཛྷནམེཝ ཀཐིཏཾ. སབྦསངྒཱཧིཀོཏི སབྦསབྷཱཝདྷམྨཱནཾ སངྒཎྷནཀོ. ཏེནཱཧ ‘‘ཙཏུབྷཱུམཀདྷམྨཔརིཙྪེདོ ཝུཏྟོ’’ཏི.

སམཱདྷིསུཏྟཝཎྞནཱ ནིཊྛིཏཱ.

༢. སུཁསུཏྟཝཎྞནཱ

༢༥༠. དུཀྑཾ ན ཧོཏཱིཏི ཨདུཀྑཾ, སུཁཾ ན ཧོཏཱིཏི ཨསུཁཾ, མ-ཀཱརོ པདསནྡྷིཀརོ. ཨདུཀྑམསུཁནྟི ཝེདཡིཏསདྡཱཔེཀྑཱཡ ནཔུཾསཀནིདྡེསོ. སཔརསནྟཱནགཏེ སནྡྷཱཡ ཨཛ྄ཛྷཏྟབཧིདྡྷཱགཧཎནྟི ཨཱཧ ‘‘ཨཏྟནོ ཙ པརསྶ ཙཱ’’ཏི. ཏེན སབྦམྤི ཝེདཡིཏཾ གཧིཏནྟི དཊྛབྦཾ ¶ . ནསྶནསབྷཱཝནྟི ཨིཏྟརཁཎཏཱཡ ¶ བྷངྒཏོ ཨུདྡྷཾ ཨཔསྶིཏབྦསབྷཱཝཾ. པལོཀོ བྷེདོ ཨེཏསྶ ཨཏྠཱིཏི པལོཀིནཾ. ཏེནཱཧ ‘‘བྷིཛྫནསབྷཱཝ’’ནྟི. ཉཱཎེན ཕུསིཏྭཱ ཕུསིཏྭཱཏི པུབྦབྷཱགེ ཝིཔསྶནཱཉཱཎེན ཨནིཙྩཱ པབྷངྒུནོཏི ཨཱརམྨཎཏོ, ཨུཏྟརཀཱལཾ ཨསམྨོཧཏོ མགྒཔརམྤརཱཡ ཕུསིཏྭཱ ཕུསིཏྭཱ ཝཡཾ པསྶནྟོ. ཝིརཛྫཏཱིཏི མགྒཝིརཱགེན ཝིརཛྫཏི. སམྨསནཙཱརཝེདནཱ ཀཐིཏཱ ཨཱརདྡྷཝིཔསྶཀཱནཾ ཝསེན དེསནཱཏི. ལོཀིཡལོཀུཏྟརེཧི ཉཱཎེཧི ཡཱཐཱཝཏོ པརིཛཱནནཾ པཊིཝིཛ྄ཛྷནཾ ཉཱཎཕུསནཾ.

སུཁསུཏྟཝཎྞནཱ ནིཊྛིཏཱ.

༣. པཧཱནསུཏྟཝཎྞནཱ

༢༥༡. སབྦམྤི ཨཊྛསཏཔབྷེདཾ ཏཎྷཾ ཚིནྡི སམུཙྪེདཔཧཱནཝསེན པཛཧི. ཏེནཱཧ ‘‘སམུཙྪིནྡཱི’’ཏི. ཡདགྒེན ཏཎྷཱ སབྦསོ སམུཙྪིནྣཱ, ཏདགྒེན སབྦཱནིཔི སཉྙོཛནཱནཱིཏི ཨཱཧ ‘‘དསཝིདྷམྤཱི’’ཏིཨཱདི. སམྨཱཏི སུཊྛུ. པཧཱནཉྩ ནཱམ ཨུཔཱཡེན ཉཱཡེན པཧཱནནྟི ཨཱཧ ‘‘ཧེཏུནཱ ཀཱརཎེནཱ’’ཏི. དསྶནཱབྷིསམཡཱཏི ཨསམྨོཧཔཊིཝེདྷཱ. ཨརཧཏྟམགྒོ ཧི ཨུཔྤཛྫམཱནོཝ སབྷཱཝཔཊིཙྪཱདཀཾ མོཧཾ ཝིདྡྷཾསེནྟོ ཨེཝ པཝཏྟཏི, ཏེན མཱནོ ཡཱཐཱཝཏོ དིཊྛོ ནཱམ ཧོཏི, ཨཡམསྶ དསྶནཱབྷིསམཡོ. ཡཐཱ ཧི སཱུརིཡེ ཨུཊྛིཏེ ཨནྡྷཀཱརོ ཝིདྡྷཾསིཡམཱནོ ཝིཧཏོ, ཨེཝཾ ཨརཧཏྟམགྒེ ཨུཔྤཛྫམཱནེ སོ སབྦསོ པཧཱིནོ ཨེཝ ཧོཏི, ན ཏསྨིཾ སནྟཱནེ པཏིཊྛཾ ལབྷཏི, ཨཡམསྶ པཧཱནཱབྷིསམཡོ. ཏེན ཝུཏྟཾ ‘‘ཨརཧཏྟམགྒོ ཧཱི’’ཏིཨཱདི. ཀིཙྩཝསེནཱཏི ཨསམྨོཧཔཊིཝེདྷསངྑཱཏསྶ དསྶནཀིཙྩསྶ ཨནིཔྥཱདནཝསེན.

ཡེ ཨིམེ ཙཏྟཱརོ ཨནྟཱཏི སམྦནྡྷོ. མརིཡཱདནྟོཏི མརིཡཱདསངྑཱཏོ ཨནྟོ. ཨེས ནཡོ སེསཏྟཡེཔི. ཏེསཱུཏི ཙཏཱུསུ ཨནྟེསུ. ཨདུཾ ཙཏུཏྠཀོཊིསངྑཱཏཾ སབྦསྶེཝ ཝཊྚདུཀྑསྶ ཨནྟཾ པརིཙྪེདཾ ཨརཧཏྟམགྒེན མཱནསྶ དིཊྛཏྟཱ པཧཱིནཏྟཱ ཙ ཨཀཱསཱིཏི ཡོཛནཱ. སམུསྶཡོ ཨཏྟབྷཱཝོ.

ན རིཉྩཏཱིཏི ན ཝིཝེཙེཏི ན ཝིསྶཛྫེཏི. ཏེནཱཧ ‘‘སམྤཛཉྙཾ ན ཛཧཏཱི’’ཏི, སམྤཛཉྙཾ ན པརིཙྩཛཏཱིཏི ཨཏྠོ. སངྑྱཾ ནོཔེཏཱིཏི ཨིམསྶ ‘‘དིཊྛདྷམྨེ ཨནཱསཝོ’’ཏི ¶ ཨིམསྶ ཝསེན ཨཏྠཾ ཝདནྟོ ‘‘རཏྟོ དུཊྛོ’’ཏི ཨཝོཙ སཨུཔཱདིསེསནིབྦཱནཝསེན. སངྑྱཾ ནོཔེཏཱིཏི ཝཱ དིཊྛེ-དྷམྨེ ཨནཱསཝོ དྷམྨཊྛོ ཝེདགཱུ ཀཱཡསྶ བྷེདཱ མནུསྶོ དེཝོཏི ཝཱ པཉྙཏྟིཾ ན ཨུཔེཏཱིཏི ཨནུཔཱདིསེསནིབྦཱནཝསེནཔི ཨཏྠོ ཝཏྟབྦོ. ཨེཏྠ ཙ སུཁཱདཱིསུ ཝེདནཱསུ ཡཐཱཀྐམཾ ¶ རཱགཱནུསཡཱདཡོ ཀཐིཏཱཏི ཨཱཧ – ‘‘ཨིམསྨིཾ སུཏྟེ ཨཱརམྨཎཱནུསཡོ ཀཐིཏོ’’ཏི. ཡོ ཧི རཱགཱདི པཙྩཡསམཝཱཡེ ཨཏིཨིཊྛཱདཱིསུ ཨུཔྤཛྫནཱརཧོ མགྒེན ཨཔྤཧཱིནོ, སོ ‘‘རཱགཱནུསཡོ’’ཏིཨཱདིནཱ ཝུཏྟོ, ཨཔྤཧཱིནཏྠོ སོ མགྒེན པཧཱཏབྦོ, ན པརིཡུཊྛཱནཱབྷིབྷཝཏྠོཏི.

པཧཱནསུཏྟཝཎྞནཱ ནིཊྛིཏཱ.

༤. པཱཏཱལསུཏྟཝཎྞནཱ

༢༥༢. ཡཏྠ པཏིཊྛཱ ནཏྠི ཨེཀནྟིཀཱཏི ཨེཀནྟིཀསྶ མཧཏོ པཱཏསྶ ཨལནྟི ཨཡམེཏྠ ཨཏྠོ ཨདྷིཔྤེཏོཏི ཨཱཧ ‘‘ནཏྠི ཨེཏྠ པཏིཊྛཱ’’ཏི. ཨསམྦྷཱུཏཏྠནྟི ན སམྦྷཱུཏཏྠཾ, མུསཱཏི ཨཏྠོ. སོཏི ཨསྶུཏཝཱ པུཐུཛྫནོ. ཡཾ ཏཾ ཨུདཀཾ པཏཏཱིཏི ཡོཛནཱ. ཡསྨཱ སམུདྡཔིཊྛེ ཨནྟརནྟརཱ ཝེརམྦྷཝཱཏསདིསོ མཧཱཝཱཏོ ཨུཊྛཧིཏྭཱ མཧཱསམུདྡེ ཨུདཀཾ ཨུགྒཙྪཱཔེཏི, ཏཾ ཀདཱཙི ཙཀྐཝཱལཱ༹བྷིམུཁཾ, ཀདཱཙི སིནེརུཔཱདཱབྷིམུཁཾ གནྟྭཱ ཏཾ པཏིཧནཏི, ཏསྨཱ ཝུཏྟཾ ‘‘བལཝཱམུཁཾ མཧཱསམུདྡསྶཱ’’ཏིཨཱདི. ཝེགེན པཀྑནྡིཏྭཱཏི མཧཏཱ ཝཱཏཝེགེན སམུདྡྷཏཾ ཏེནེཝ ཝེགེན པཀྑནྡནྟཉྩ ཧུཏྭཱ. མཧཱནརཀཔཔཱཏོ ཝིཡཱཏི ཡོཛནཱཡཱམཝིཏྠཱརགམྦྷཱིརསོབྦྷཔཔཱཏོ ཝིཡ ཧོཏི. ཏཐཱརཱུཔཱནནྟི ཏཏྠ ཝསིཏུཾ སམཏྠཱནཾ. ཨསནྟནྟི ཨབྷཱུཏཾ. ཨཏྠཝསེན ཧི ཝཱཙཱ ཨབྷཱུཏཾ ནཱམ.

ན པཏིཊྛཱསཱིཏི པཏིཊྛཾ ན ལབྷི. ཨནིབདྡྷནྟི ཨནིབནྡྷནཏྠཾ ཡཾཀིཉྩི. དུབྦལཉཱཎོཏི ཉཱཎབལརཧིཏོ. ‘‘ཨསྶུཏཝཱ པུཐུཛྫནོ’’ཏི ཝཏྭཱ ‘‘སུཏཝཱ ཨརིཡསཱཝཀོ’’ཏི ཝུཏྟཏྟཱ ‘‘སོཏཱཔནྣོ དྷུར’’ནྟི ཝུཏྟཾ. ཨིཏརེསུ ཨརིཡསཱཝཀེསུ ཝཏྟབྦམེཝ ནཏྠི. ཏེསཉྷི ཝེདནཱ སུཔརིཉྙཱཏཱ. བལཝཝིཔསྶཀོ…པེ… ཡོགཱཝཙརོཔི ཝཊྚཏི མཏྟསོ ཝེདནཱནཾ པརིཉྙཱཏཏྟཱ.

པཱཏཱལསུཏྟཝཎྞནཱ ནིཊྛིཏཱ.

༥. དཊྛབྦསུཏྟཝཎྞནཱ

༢༥༣. ཝིཔརིཎཱམནཝསེན ¶ དུཀྑཏོ དཊྛབྦཱཏི ཀིཉྩཱཔི སུཁཱ, པརིཎཱམདུཀྑཏཱ པན སུཁཝེདནཱཡ ཨེཀནྟིཀཱཏི. ཝིནིཝིཛ྄ཛྷནཊྛེནཱཏི པཱིལ༹ནཝསེན ཨཏྟབྷཱཝསྶ ཝིཛ྄ཛྷནཊྛེན. ཧུཏྭཱཏི པཙྩཡསམཱགམེན ཨུཔྤཛྫིཏྭཱ. ཏེན པཱཀབྷཱཝཔུབྦཀོ ཨཏྟལཱབྷོ ཝུཏྟོ. ཨབྷཱཝཱཀཱརེནཱཏི བྷངྒུཔགམནཱཀཱརེན. ཏེན ཝིདྡྷཾསབྷཱཝོ ཝུཏྟོ. ཨུབྷཡེན ཨུདཡབྦཡཔརིཙྪིནྣཏཱཡ སིཁཔྤཏྟཾ ཨནིཙྩཏཾ ¶ དསྶེཏི. སྭཱཡཾ ཧུཏྭཱ ཨབྷཱཝཱཀཱརོ ཨིཏརཱསུཔི ཝེདནཱསུ ལབྦྷཏེཝ, ཨདྷིཀོ ཙ པན དྭིནྣཾ དུཀྑསབྷཱཝོ. དུཀྑཏཱཝསེན པུརིམཱནཾ ཝེདནཱནཾ དཊྛབྦཏཱཡ དསྶིཏཏྟཱ པཙྪིམཱཡ ཝེདནཱཡ ཨེཝཾ དཊྛབྦཏཱ དསྶིཏཱ. ཨདྡཱཏི ཉཱཎགཏིཡཱ སཙྪིཀཏྭཱ ཨདཀྑི. ཉཱཎགམནཉྷེཏཾ, ཡདིདཾ དུཀྑཏོ དསྶནཾ. སནྟསབྷཱཝཾ སུཁདུཀྑཏོ ཨུཔསནྟརཱུཔཏྟཱ.

དཊྛབྦསུཏྟཝཎྞནཱ ནིཊྛིཏཱ.

༦. སལླསུཏྟཝཎྞནཱ

༢༥༤. དྭཱིསུ ཛནེསཱུཏི སུཏཝནྟཨསྶུཏཝནྟེསུ དྭཱིསུ ཛནེསུ. ཨནུགཏཝེདྷནྟི པུབྦེ པཝཏྟཝེདྷསྶ ཨནུགཏཝེདྷཾ. བལཝཏརཱ དིགུཎཱ ཝིཡ ཧུཏྭཱ དལ༹ྷཏརཔཝཏྟིཡཱ. ཨེཝམེཝཱཏི ཡཐཱ ཝིདྡྷསྶ པུརིསསྶ ཨནུཝེདྷནཱ བལཝཏརཱ, ཨེཝམེཝ. སམཱདྷིམགྒཕལཱནི ནིསྶརཎཾ ཝིཀྑམྦྷནསམུཙྪེདཔཊིཔྤསྶདྡྷིཝསེན. སམཱདྷིསཱིསེན ཧེཏྠ ཛྷཱནཉྩ གཧིཏཾ. སོ ན ཛཱནཱཏི ཨནདྷིགཏཏྟཱ. ནིསྶརཎནྟི ཛཱནཱཏི ཨནིསྶརཎམེཝ. ཏཱསཾ སམདྷིགཏཱནཾ སུཁདུཀྑཝེདནཱནཾ. ན ཝིཔྤཡུཏྟོ ཨཔྤཧཱིནཀིལེསཏྟཱ. སངྑཱཏདྷམྨསྶཱཏི སངྑཱཡ པཉྙཱཡ པརིཉྙཱཏཙཏུཀྑནྡྷསྶ. ཏེནཱཧ ‘‘ཏུལིཏདྷམྨསྶཱ’’ཏི. ཨིམསྨིམྤི སུཏྟེ པུརིམསུཏྟེ ཝིཡ ཨཱརམྨཎཱནུསཡོཝ ཀཐིཏོ, སོ པན ཏཏྠ ཝུཏྟནཡེནེཝ ཝེདིཏབྦོ. ཨནུརོདྷཝིརོདྷཔཧཱནསྶ ཝུཏྟཏྟཱ ཁཱིཎཱསཝོ དྷུརཾ. ཨནཱགཱམཱིཔི ཝཊྚཏི, ཏསྶ ཝིརོདྷཔྤཧཱནཾ ལབྦྷཏི.

སལླསུཏྟཝཎྞནཱ ནིཊྛིཏཱ.

༧. པཋམགེལཉྙསུཏྟཝཎྞནཱ

༢༥༥. སདྡཧིཏྭཱ ¶ གིལཱནེ ཨུཔཊྛཱཏབྦེ མཉྙིསྶནྟཱིཏི ཡོཛནཱ. ཏཏྠཱཏི ཏསྨིཾ ཋཱནེ. ཀམྨཊྛཱནཱནུཡོགོ སཔྤཱཡོ ཡེསཾ ཏེ ཀམྨཊྛཱནསཔྤཱཡཱ, སཏིཔཊྛཱནརཏཱཏི ཨཏྠོ. ཨནིཙྩཏཾ ཨནུཔསྶནྟོཏི ཀཱཡཾ པཊིཙྩ ཨུཔྤནྣཱཡ ཝེདནཱཡ ཙ ཨནིཙྩཏཾ ཨནུཔསྶནྟོ. ཝཡཾ ཨནུཔསྶནྟོཏིཨཱདཱིསུཔི ཨེསེཝ ནཡོ. ཝཡནྟི པན ཏཱཡ ཨེཝ ཁཡསངྑཱཏཾ. ཝིརཱགནྟི ཝིརཛྫནཾ. པཊིནིསྶགྒནྟི པརིཙྩཱགཔཊིནིསྶགྒཾ, པཀྑནྡནཔཊིནིསྶགྒམྤི ཝཱ.

ཨཱགམནཱིཡཔཊིཔདཱཏི ཨརིཡམགྒསྶ ཨཱགམནཊྛཱནིཡཱ པུབྦབྷཱགཔཊིཔདཱ. པུབྦབྷཱགཱཡེཝ ན ལོཀུཏྟརཱ. སམྤཛཉྙཾ པུབྦབྷཱགིཡམེཝ. ཏིསྶོ ཨནུཔསྶནཱ པུབྦབྷཱགཱཡེཝ ཝིཔསྶནཱཔརིཡཱཔནྣཏྟཱ ¶ . མིསྶཀཱཏི ལོཀིཡལོཀུཏྟརམིསྶཀཱ. བྷཱཝནཱཀཱལོ དསྶིཏོ ‘‘ནིརོདྷཱནུཔསྶིནོ ཝིཧརཏོ, པཊིནིསྶགྒཱནུཔསྶིནོ ཝིཧརཏོ རཱགཱནུསཡོ པཧཱིཡཏཱི’’ཏི ཝུཏྟཏྟཱ.

པཋམགེལཉྙསུཏྟཝཎྞནཱ ནིཊྛིཏཱ.

༨-༩. དུཏིཡགེལཉྙསུཏྟཱདིཝཎྞནཱ

༢༥༦-༢༥༧. ཕསྶཾ པཊིཙྩཱཏི ཨེཏྠ ཕསྶསཱིསེན ཕསྶཱཡཏནཱནཾ གཧཎཾ. ན ཧི ཕསྶཱཡཏནེཧི ཝིནཱ ཕསྶསྶ སམྦྷཝོ. ཏེནཱཧ ‘‘ཀཱཡོཝ ཧི ཨེཏྠ ཕསྶོཏི ཝུཏྟོ’’ཏི, ཕསྶསཱིསེན ཝུཏྟོཏི ཨདྷིཔྤཱཡོ. ནཝམཾ ཨུཏྟཱནམེཝ ཧེཊྛཱ ཝུཏྟནཡཏྟཱ.

དུཏིཡགེལཉྙསུཏྟཱདིཝཎྞནཱ ནིཊྛིཏཱ.

༡༠. ཕསྶམཱུལཀསུཏྟཝཎྞནཱ

༢༥༨. སུཁཝེདནཱཡ ཧིཏཾ སུཁཝེདནིཡཾ. སོ པནེས ཧིཏབྷཱཝོ པཙྩཡབྷཱཝེནཱཏི ཨཱཧ ‘‘སུཁཝེདནཱཡ པཙྩཡབྷཱུཏ’’ནྟི. ཨིམསྨིམྤི སུཏྟདྭཡེཏི ¶ ཨིམསྨིཾ ནཝམེ དསམེ ཙ སུཏྟེཔི. སམྨསནཙཱརཝེདནཱཏི སམྨསནཱིཡཝེདནཱ ཨེཝ ཀཐིཏཱ, ན ལོཀུཏྟརཱཏི ཨདྷིཔྤཱཡོ.

ཕསྶམཱུལཀསུཏྟཝཎྞནཱ ནིཊྛིཏཱ.

སགཱཐཱཝགྒཝཎྞནཱ ནིཊྛིཏཱ.

༢. རཧོགཏཝགྒོ

༡. རཧོགཏསུཏྟཝཎྞནཱ

༢༥༩. ཡཾཀིཉྩི ཝེདཡིཏནྟི ‘‘སུཁཾ དུཀྑཾ ཨདུཀྑམསུཁ’’ནྟི ཝུཏྟཾ ཝེདཡིཏཾ དུཀྑསྨིཾ ཨནྟོགདྷཾ, དུཀྑནྟི ཝཏྟབྦཏཾ ལབྷཏི པརིཡཱཡེནཱཏི ཨཏྠོ. ཏེནཱཧ ‘‘ཏཾ སབྦཾ དུཀྑནྟི ཨཏྠོ’’ཏི. ཡཱ ཨེསཱཏིཨཱདཱིསུ ཡོ སངྑཱརཱནཾ ཨནིཙྩཏཱསངྑཱཏོ ཧུཏྭཱ ཨབྷཱཝཱཀཱརོ, ཡཱ ཁཡསབྷཱཝཏཱ ཝིནསྶནསབྷཱཝཏཱ ཛརཱཡ མརཎེན ཙཱཏི དྭིདྷཱ ཝིཔརིཎཱམནསབྷཱཝཏཱ, ཨེཏཾ སནྡྷཱཡ ཨུདྡིསྶ སབྦཾ ཝེདཡིཏཾ དུཀྑནྟི མཡཱ ཝུཏྟནྟི ཨཡཾ སངྑེཔཏྠོ. སཱཏི སངྑཱརཱནཾ ཨནིཙྩཏཱ ¶ . ཝེདནཱནམྤི ཨནིཙྩཏཱ ཨེཝ སངྑཱརསབྷཱཝཏྟཱ. ཏཱསཾ ཨནིཙྩཏཱ ཙ ནཱམ མརཎཾ བྷངྒོཏི ཀཏྭཱ ཏཏོ ཨུཏྟརི དུཀྑཾ ནཱམ ནཏྠཱིཏི སབྦཱ ཝེདནཱ ‘‘དུཀྑཱ’’ཏི ཝུཏྟཱ, ཡཐཱ ‘‘ཡདནིཙྩཾ ཏཾ དུཀྑ’’ནྟི ཙ, ‘‘པཉྩུཔཱདཱནཀྑནྡྷཱ དུཀྑཱ’’ཏི ཙ ཝུཏྟཾ. ཨིདཾ སུཏྟཔདཾ. ཙཏྟཱརོ ཨཱརུཔྤཱཏི ཙཏསྶོ ཨརཱུཔསམཱཔཏྟིཡོ. ཨེཏྠཱཏི ཙ ཨེཏསྨིཾ པཊིཔྤསྶདྡྷིཝཱརེ.

རཧོགཏསུཏྟཝཎྞནཱ ནིཊྛིཏཱ.

༤. ཨགཱརསུཏྟཝཎྞནཱ

༢༦༢. པུརཏྠིམཱཏི ཝིབྷཏྟིལོཔེན ནིདྡེསོ, ནིསྶཀྐེ ཝཱ ཨེཏཾ པཙྩཏྟཝཙནཾ. པཋམཛ྄ཛྷཱནཱདིཝསེནཱཏི པཋམདུཏིཡཛ྄ཛྷཱནཝསེན. ཨནུསྶཏིཝསེནཱཏི ནིདསྶནམཏྟཾ ཨཉྙསྶཔི ཨུཔཙཱརཛ྄ཛྷཱནགྒཧིཏསྶ སཝིཏཀྐཙཱརསྶ ནིརཱམིསསྶ སུཁསྶ ལབྦྷནཏོ. ཏསྶཔི ཝཱ པཋམཛ྄ཛྷཱནཱདཱིཏི ཨེཏྠ ཨཱདི-སདྡེན སངྒཧོ དཊྛབྦོ. ཀཱམཧེཏུ དུཀྑཔྤཏྟཱནཾ དུཀྑཝེདནཱ ཀཱམཱམིསེན ¶ སཱམིསཱ ཝེདནཱ. ཨནུཏྟརཝིམོཀྑཱ ནཱམ ཨརཧཏྟཕལཾ. ‘‘ཀུདཱསྶུ ནཱམཱཧཾ ཏདཱཡཏནཾ ཨུཔསམྤཛྫ ཝིཧརིསྶཱམཱི’’ཏི ཨེཝཾ པིཧཾ ཨུཔཊྛཱཔཡཏོ ཏསྨིཾ ཨནིཛ྄ཛྷམཱནེ པིཧཔྤཙྩཡཱ ཨུཔྤནྣདོམནསྶཝེདནཱ. ནེཀྑམྨནིསྶིཏཱ ཨུཔེཀྑཱཝེདནཱ ནིརཱམིསཱ ཨདུཀྑམསུཁཱ ནཱམ. སཝིསེསཾ པན དསྶེཏུཾ ‘‘ཙཏུཏྠཛ྄ཛྷཱནཝསེན ཨུཔྤནྣཱ ཨདུཀྑམསུཁཝེདནཱ’’ཏི ཝུཏྟཾ.

ཨགཱརསུཏྟཝཎྞནཱ ནིཊྛིཏཱ.

༥-༨. པཋམཨཱནནྡསུཏྟཱདིཝཎྞནཱ

༢༦༣-༢༦༦. ཧེཊྛཱ ཀཐིཏནཡཱནེཝ, ཝེནེཡྻཛ྄ཛྷཱསཡཏོ པན ཏེསཾ དེསནཱཏི དཊྛབྦཾ. ཨེཏྠཱཏི ཨེཏེསུ ཙཏཱུསུ སུཏྟེསུ. པུརིམཱནི དྭེ ‘‘པཋམཾ ཛྷཱནཾ སམཱཔནྣསྶ ཝཱཙཱ པཊིཔྤསྶདྡྷཱ ཧོཏཱི’’ཏིཨཱདིནཱ ནཡེན ཡཱཝ ཁཱིཎཱསཝསྶ ཀིལེསཔཊིཔྤསྶདྡྷི, ཏཱཝ དེསནཱཡ པཝཏྟཏྟཱ ‘‘པརིཔུཎྞཔསྶདྡྷིཀཱནཱི’’ཏི ཝུཏྟཱནི. ཏཱཝ པརིཔཱུརཾ ཀཏྭཱ ཨདེསིཏཏྟཱ ‘‘པཙྪིམཱནི ཨུཔཌྜྷཔསྶདྡྷིཀཱནི, དེསནཱཡཱ’’ཏིཨཱདི ཝུཏྟཾ.

པཋམཨཱནནྡསུཏྟཱདིཝཎྞནཱ ནིཊྛིཏཱ.

༩-༡༠. པཉྩཀངྒསུཏྟཱདིཝཎྞནཱ

༢༦༧-༢༦༨. དཎྜམུགྒརཾ ཨགྒསོཎྜམུགྒརཾ. ཀཱལ༹སུཏྟཔཀྑིཔནཾ ཀཱལ༹སུཏྟནཱལི༹. ཝཱསིཨཱདཱིནི ¶ པཉྩ ཨངྒཱནི ཨསྶཱཏི པཉྩཀངྒོ. ཝཏྠུཝིཛྫཱཡ ཝུཏྟཝིདྷིནཱ ཀཏྟབྦནིསྶཡཱནི ཋཔེཏཱིཏི ཐཔཏི. པཎྜིཏཨུདཱཡིཏྠེརོ, ན ལཱལུ༹དཱཡིཏྠེརོ. དྭེཔཱནནྡཱཏི ཨཊྛཀཐཱཡ པདུདྡྷཱརོ ཀཏོ – ‘‘དྭེཔི མཡཱ ཨཱནནྡཱ’’ཏི པན པཱལི༹ཡཾ. པསཱདཀཱཡསནྣིསྶིཏཱ ཀཱཡིཀཱ, ཙེཏོསནྣིསྶིཏཱ ཙེཏསིཀཱ. ཨཱདྷིཔཙྩཊྛེན སུཁམེཝ ཨིནྡྲིཡནྟི སུཁིནྡྲིཡཾ. ཨུཔཝིཙཱརཝསེནཱཏི རཱུཔཱདཱིནི ཨུཔེཙྩ ཝིཙརཎཝསེན. ཨཏཱིཏེ ཨཱརམྨཎེ. པཙྩུཔྤནྣེཏི ཨདྡྷཱཔཙྩུཔྤནྣེ. ཨེཝཾ ཨཊྛཱདྷིཀཾ སཏཾ ཨཊྛསཏཾ.

པཱཊིཡེཀྐོ ཨནུསནྡྷཱིཏི པུཙྪཱནུསནྡྷིཨཱདཱིཧི ཝིསུཾ ཏེཧི ཨསམྨིསྶོ ཨེཀོ ཨནུསནྡྷི. ཨེཀཱཔི ཝེདནཱ ཀཐིཏཱ ‘‘ཏཏྲ, བྷིཀྑཝེ, སུཏཝཱ ཨརིཡསཱཝཀོ’’ཏི ཨཱཧརིཏྭཱ ‘‘ཕསྶཔཙྩཡཱ ཝེདནཱ’’ཏི. ཡསྨཱ བྷགཝཱ ¶ ཙཏུཏྠཛ྄ཛྷཱནུཔེཀྑཱཝེདནཾ ཝཏྭཱ – ‘‘ཨཏྠཱནནྡ, ཨེཏསྨཱ སུཁཱ ཨཉྙཾ སུཁ’’ནྟིཨཱདིཾ ཝདནྟོ ཐཔཏིནོ ཝཱདཾ ཨུཔཏྠམྦྷེཏི ནཱམ. ཏེན ཧི ཨུཔེཀྑཱཝེདནཱ ‘‘སུཁ’’ནྟེཝ ཝུཏྟཱ སནྟསབྷཱཝཏྟཱ. ཨབྷིཀྐནྟཏརནྟི ཨཏིཝིཡ ཀནྟཏརཾ མནོརམཏརཾ. ཏེནཱཧ ‘‘སུནྡརཏར’’ནྟི. པཎཱིཏཏརནྟི པདྷཱནབྷཱཝཾ ནཱིཏཏཱཡ ཨུལཱ༹རཏརཾ. ཏེནཱཧ ‘‘ཨཏཔྤཀཏར’’ནྟི. སུཁནྟི ཝུཏྟཱ པཊིཔཀྑསྶ སུཊྛུ ཁཱདནེན, སུཀརཾ ཨོཀཱསདཱནམསྶཱཏི ཝཱ. ནིརོདྷོ སུཁཾ ནཱམ སབྦསོ ཨུདཡབྦཡཱབྷཱཝཏོ. ཏེནཱཧ ‘‘ནིདྡུཀྑབྷཱཝསངྑཱཏེན སུཁཊྛེནཱ’’ཏི.

སུཁསྨིཾཡེཝཱཏི སུཁམིཙྩེཝ པཉྙཔེཏི. ནིརོདྷསམཱཔཏྟིཾ སཱིསཾ ཀཏྭཱཏི ནིརོདྷསམཱཔཏྟིདེསནཱཡ སཱིསཾ ཨུཏྟམཾ ཀཏྭཱ. དེསནཱཡ ཨུདྡེསཱདྷིམུཏྟེ ཨུཊྛཱཔེཏྭཱ ཝིཏྠཱརིཏཏྟཱ ‘‘ནེཡྻཔུགྒལསྶ ཝསེནཱ’’ཏི ཝུཏྟཾ. དསམཾ ཨནནྟརསུཏྟེ ཝུཏྟནཡཏྟཱ ཨུཏྟཱནཏྠམེཝ.

པཉྩཀངྒསུཏྟཱདིཝཎྞནཱ ནིཊྛིཏཱ.

རཧོགཏཝགྒཝཎྞནཱ ནིཊྛིཏཱ.

༣. ཨཊྛསཏཔརིཡཱཡཝགྒོ

༡. སཱིཝཀསུཏྟཝཎྞནཱ

༢༦༩. ཙཱུལཱ༹ པན ཨསྶ མཧཏཱི ཨཏྠི སཝིསེསཱ, ཏསྨཱ ‘‘མོལི༹ཡསཱིཝཀོ’’ཏི ཝུཙྩཏི. ཚནྣཔརིབྦཱཛཀོཏི ཀམྦལཱདིནཱ ཀོཔཱིནཔཊིཙྪཱདཀཔརིབྦཱཛཀོ. པིཏྟཔཙྩཡཱནཱིཏི པིཏྟཧེཏུཀཱནི ¶ . ‘‘ཏིསྶོ ཝེདནཱ’’ཏི ཝཏྭཱ ཏཱསཾ སམྦྷཝཾ དསྶེཏུཾ ‘‘ཀཐ’’ནྟིཨཱདི ཝུཏྟཾ. ཀུསལཝེདནཱ ཨུཔྤཛྫཏི པིཏྟཔཙྩཡཱ. པིཏྟབྷེསཛྫཾ ཀརིསྶཱམཱིཏི བྷེསཛྫསམྦྷརཎཏྠཉྩེཝ ཏདཏྠཾ ཨཱམིསཀིཉྫཀྑསམྦྷརཎཏྠཉྩ པཱཎཾ ཧནཏཱིཏི ཡོཛནཱ. མཛ྄ཛྷཏྟོ བྷེསཛྫཀརཎེ ཨུདཱསཱིནོ.

ཏསྨཱཏི ཡསྨཱ པིཏྟཱདིཔཙྩཡཧེཏུཀནྟི ཨཏྟནོ ཙ ལོཀསྶ ཙ པཙྩཀྑཾ ཨཏིདྷཱཝནྟི ཡེ སམཎཱ ཝཱ བྲཱཧྨཎཱ ཝཱ, ཏསྨཱ ཏེསཾ མིཙྪཱ. པིཏྟཱདཱིནཾ ཏིཎྞམྤི སམོདྷཱནསནྣིཔཱཏེ ཛཱཏཱནི སནྣིཔཱཏིཀཱནི. པུརིམཨུཏུནོ ཝིསདིསོ ཨུཏུཝིཔརིཎཱམོཏི ཨཱཧ ‘‘ཝིསབྷཱགཨུཏུཏོ ཛཱཏཱནཱི’’ཏི ¶ . ཨནུདཀོ ཐདྡྷལཱུཁབྷཱུམིཝིབྷཱགོ ཛངྒལདེསོ, ཝུཏྟཝིཔརིཡཱཡེན ཨནུཔདེསོ ཝེདིཏབྦོ. མལཡཾ ཧིམསཱིཏབཧུལོ, ཨིཏརོ ཨུཎྷབཧུལོ.

ཨཏྟནོ པཀཏིཙརིཡཱནཾ ཝིསམཾ ཀཱཡསྶ པརིཧརཎཝསེན, ཛཱཏཱནི པན ཨསཡ྄ཧསཧནཨདེསཨཀཱལཙརཎཱདིནཱ ཝེདིཏབྦཱནཱིཏི ཨཱཧ ‘‘མཧཱབྷཱརཝཧནཱ’’ཏིཨཱདི. པརསྶ ཨུཔཀྐམཏོ ནིབྦཏྟཱནི ཨོཔཀྐམིཀཱནཱིཏི ཨཱཧ – ‘‘ཨཡཾ ཙོརོ ཝཱ’’ཏིཨཱདི. ཀེཝལནྟི བཱཧིརཔཙྩཡཾ ཨནཔེཀྑིཏྭཱ ཀེཝལཾ ཏེནེཝ. ཏེནཱཧ ‘‘ཀམྨཝིཔཱཀཏོཝ ཛཱཏཱནཱི’’ཏི. སཀྐཱ པཊིབཱཧིཏུཾ པཏཱིཀཱརེན. ལོཀཝོཧཱརོ ནཱམ ཀཐིཏོ པིཏྟསམུཊྛཱནཱདིསམཉྙཱཡ ལོཀསིདྡྷཏྟཱ. ཀཱམཾ སརཱིརསནྣིསྶིཏཱ ཝེདནཱ ཀམྨནིབྦཏྟཱཝ, ཏསྶཱ པན པཙྩུཔྤནྣཔཙྩཡཝསེན ཨེཝམཡཾ ལོཀཝོཧཱརོཏི ཝུཏྟཉྩེཝ གཧེཏྭཱ པརཝཱདཔཊིསེདྷོ ཀཏོཏི དཊྛབྦཾ.

སཱིཝཀསུཏྟཝཎྞནཱ ནིཊྛིཏཱ.

༢-༡༠. ཨཊྛསཏསུཏྟཱདིཝཎྞནཱ

༢༧༠-༢༧༨. ཝེདནཱནཾ ཨཊྛཱདྷིཀཾ སཏཾ, ཏསྶ ཨཊྛསཏསྶ ཏབྦྷཱཝསྶ པརིཡཱཡོ ཀཱརཎཾ ཨེཏྠ ཨཏྠཱིཏི ཨཊྛསཏཔརིཡཱཡོ, སུཏྟཾ. ཏེནཱཧ ‘‘ཨཊྛསཏསྶ ཀཱརཎབྷཱུཏ’’ནྟི. དྷམྨཀཱརཎནྟི པརིཡཏྟིདྷམྨབྷཱུཏཾ ཀཱརཎཾ. ཀཱཡིཀཱཏི པཉྩདྭཱརཀཱཡིཀཱ. ཏེནཱཧ ‘‘ཀཱམཱཝཙརེཡེཝ ལབྦྷནྟཱི’’ཏི, ཀཱམབྷཱུམིཀཱཏི ཨཏྠོ. ཨརཱུཔཱཝཙརེ ནཏྠི, ཏིབྷཱུམིཀཱཏི ཨཏྠོ. ཏེནཱཧ – ‘‘ཨརཱུཔེ ཏིཀཙཏུཀྐཛ྄ཛྷཱནཾ ཨུཔྤཛྫཏི, ཏཉྩ ཁོ ལོཀུཏྟརཾ, ན ལོཀིཡ’’ནྟི. ཨིཏརཱ ཨུཔེཀྑཱཝེདནཱ. ཨུཔཝིཙརནྟི ཨུཔེཙྩ པཛྫནྟཱིཏི ཨཏྠོ. ཏཾསམྤཡུཏྟཱནནྟི ཝིཙཱརསམྤཡུཏྟཱནཾ.

པཊིལཱབྷཏོཏི པཊིལདྡྷབྷཱཝཏོ. སམནུཔསྶཏོཏི པཙྩཝེཀྑཏོ པསྶཏོ. ཨཏཱིཏཾ ཁཎཏྟཡཱཏིཀྐམེན ཨཏིཀྐནྟཾ, ནིརུདྡྷཔྤཏྟིཡཱ ནིརུདྡྷཾ, པཀཏིཝིཛཧནེན ཝིཔརིཎཏཾ. སམནུསྶརཏོཏི ¶ ཙིནྟཡཏོ. གེཧསྶིཏནྟི ཀཱམགུཎནིསྶིཏཾ. ཀཱམགུཎཱ ཧི ཨིདྷ གེཧནིསྶིཏདྷམྨེན གེཧཔརིཡཱཡེན ཝུཏྟཱ.

ཝིཔརིཎཱམཝིརཱགནིརོདྷནྟི ¶ ཝིཔརིཎཱམནཾ ཝིརཛྫནལཀྑཎཾ ནིརུཛ྄ཛྷནཉྩ ཝིདིཏྭཱ. པུབྦེཏི ཨཏཱིཏེ. ཨེཏརཧཱིཏི ཨིདཱནི ཝཏྟམཱནཱ. སམྨཔྤཉྙཱཡ པསྶཏོཏི ཝིཔསྶནཱཔཉྙཱཡ ཙེཝ མགྒཔཉྙཱཡ ཙ ཡཱཐཱཝཏོ པསྶཏོ. ཨུསྶུཀྐཱཔེཏུནྟི ཝིཔསྶནཾ པཊྛཔེཏྭཱ མགྒཔཊིཝེདྷཾ པཱཔེཏུཾ. ནིབྦཱནཾ ཨུདྡིསྶ པཝཏྟིཏཏྟཱ ནེཀྑམྨསྶིཏསོམནསྶཱནི ནཱམ. ལོཀཱམིསཔཊིསཾཡུཏྟཱནནྟི ཀཱམགུཎནིསྶིཏཱནཾ. ཏདཱཡཏནནྟི ཏཾ ཨཱཡཏནཾ ཏཾ ཀཱརཎཾ ཨརཧཏྟཾ. ཨནུཏྟརེསུ ཝིམོཀྑེསཱུཏི ཨརིཡཕལདྷམྨེསུ. པིཧནྟི ཨདྷིགམིཙྪཾ.

ཨུཔེཀྑཱཏི སོམནསྶརཧིཏཨཉྙཱཎུཔེཀྑཱ. བཱལྱཡོགཏོ བཱལསྶ, ཏཏོ ཨེཝ མཱུལ༹ྷསྶ པུཐུཛྫནསྶ. ཀིལེསོདྷཱིནཾ མགྒོདྷཱིཧི ཨཛིཏཏྟཱ ཨནོདྷིཛིནསྶ. སཏྟམབྷཝཱདིཏོ ཨུདྡྷཾ པཝཏྟནཝིཔཱཀསྶ ཨཛིཏཏྟཱ ཨཝིཔཱཀཛིནསྶ. ཨནེཀཱདཱིནཝེ ཝཊྚེ ཨཱདཱིནཝསྶ ཨཛཱནནེན ཨནཱདཱིནཝདསྶཱཝིནོ. པཊིཔཏྟིཔཊིཝེདྷབཱཧུསཙྩཱབྷཱཝེན ཨསྶུཏཝཏོ པུཐུཛྫནསྶ. རཱུཔཾ སཱ ནཱཏིཝཏྟཏི ན ཨཏིཀྐམཏི ཉཱཎསམྤཡུཏྟཱབྷཱཝཏོ. སབྦསངྒཱཧཀོཏི སབྦདྷམྨེ སངྒཎྷནཀོ. ཏཏིཡཱདཱིནི ཡཱཝ དསམཱ ཧེཊྛཱ ཝུཏྟནཡཏྟཱ ཨུཏྟཱནཏྠཱནེཝ.

ཨཊྛསཏསུཏྟཱདིཝཎྞནཱ ནིཊྛིཏཱ.

༡༡. ནིརཱམིསསུཏྟཝཎྞནཱ

༢༧༩. ཨཱརམྨཎཏོ སམྤཡོགཏོ ཙ ཀིལེསཱམིསེན སཱམིསཱ. ནིརཱམིསཱཡཱཏི ནིསྶཀྐཝཙནཾ. ནིརཱམིསཏརཱཝཱཏི ཨེཀཾསཝཙནཾ ཏསྶཱ ཏཐཱ ནིསྶམེཏབྦཏཱཡ. སཱ ཧི པཱིཏི སབྦསོ སནྟཀིལེསཱམིསེ སནྟཱནེ པཝཏྟིཡཱ ཨཙྩནྟསབྷཱཝདྷམྨཱརམྨཎཝིསཡཏཱཡ སཡམྤི སཱཏིསཡཾ སནྟསབྷཱཝཱཀཱརེན པཝཏྟིཡཱ ནིརཱམིསཱཡཔི ནིརཱམིསཏརཱ ཝུཏྟཱ. ཏེནཱཧ ‘‘ནནུ ཙཱ’’ཏིཨཱདི. ཨིདཱནི ཏམཏྠཾ ཨུཔམཱཡ སཱདྷེཏུཾ ‘‘ཡཐཱ ཧཱི’’ཏིཨཱདིམཱཧ. ཨཔྤཊིཧཱརིཀནྟི པཊིཧརཎརཧིཏཾ ཨཔྤཊིཧཱརཾ, ཀེནཙི ཨནཱཝཊནྟི ཨཏྠོ. སེསཝཱརེསཱུཏི སུཁཝཱརཨུཔེཀྑཱཝཱརེསུ.

ཝིམོཀྑཝཱརོ པན ན ཨཏིདིཊྛོ ཨིཏརེཧི ཝིསདིསཏྟཱ. ཏེནཱཧ ‘‘ཝིམོཀྑཝཱརེ པནཱ’’ཏིཨཱདི. རཱུཔཔཊིསཾཡུཏྟོཏི བྷཱཝིཏརཱུཔཔཊིསཾཡུཏྟོ. སཱམིསོ ནཱམ ཡསྨཱ སཱམིསརཱུཔཔཊིབདྡྷཝུཏྟི ¶ ཙེཝ སཱམིསརཱུཔཔཊིབྷཱགཉྩ ¶ , ཏསྨཱ ‘‘རཱུཔཱམིས’’ནྟི ཝུཙྩཏི, ཏེན རཱུཔཱམིསེན སཱམིསོ ནཱམ. ཨརཱུཔཱམིསསྶ ཨབྷཱཝཏོ ཨརཱུཔཔཊིསཾཡུཏྟོ ཝིམོཀྑོ ནིརཱམིསོ ནཱམ.

ནིརཱམིསསུཏྟཝཎྞནཱ ནིཊྛིཏཱ.

ཨཊྛསཏཔརིཡཱཡཝགྒཝཎྞནཱ ནིཊྛིཏཱ.

ཝེདནཱསཾཡུཏྟཝཎྞནཱ ནིཊྛིཏཱ.

༣. མཱཏུགཱམསཾཡུཏྟཾ

༡. པཋམཔེཡྻཱལཝགྒོ

༡-༢. མཱཏུགཱམསུཏྟཱདིཝཎྞནཱ

༢༨༠-༢༨༡. ཨགུཎངྒེཧཱིཏི ¶ ¶ ཨགུཎཀོཊྛཱསེཧི. རཱུཔཡཏཱིཏི རཱུཔཾ, སརཱིརརཱུཔཾ. སརཱིརརཱུཔཾ པཱསཾསཾ ཨེཏསྶ ཨཏྠཱིཏི རཱུཔཝཱ, ཏཔྤཊིཀྑེཔེན ན ཙ རཱུཔཝཱ, སམྤནྣརཱུཔོ ན ཧོཏཱིཏི ཨཏྠོ. ཉཱཏིཀུལཏོ ཨཉྙཏོ ཝཱ ཨཱགཏཱཡ བྷོགསམྤདཱཡ ཨབྷཱཝེན ན བྷོགསམྤནྣོ. དུསྶཱིལོཏི ནིསྶཱིལོ. ནིསྶཱིལཏཱཡ ཨེཝ ཙསྶཱ པུབྦུཊྛཱཡིཏཱདིཨཱཙཱརཱབྷཱཝོ ཝུཏྟོ. ཨཱལསིཡོཏི ཨཱལསིཡཏཱཡ ཡུཏྟོ. པཛཉྩསྶ ན ལབྷཏཱིཏི པཛཱབྷཱཝསཱིསེན ཏསྶཱ པརིཝཱརཧཱནི ཝུཏྟཱ. པརིཝཏྟེཏབྦནྟི པུརིསཝསེན པརིཝཏྟེཏབྦཾ.

མཱཏུགཱམསུཏྟཱདིཝཎྞནཱ ནིཊྛིཏཱ.

༣. ཨཱཝེཎིཀདུཀྑསུཏྟཝཎྞནཱ

༢༨༢. ཨཱཝེཎིཏབྦཏོ མརིཡཱདཱཡ ཝིསུཾ ཨསཱདྷཱརཎཏོ པསྶིཏབྦཏོ ཨཱཝེཎིཀཱནི. པཊིཔཙྩེཀེ པུགྒལེ ནིཡུཏྟཱནཱིཏི པཱཊིཔུགྒལིཀཱནི. པརིཙཱརིཀབྷཱཝནྟི ཨུཔཊྛཱཡིཀབྷཱཝཾ.

ཨཱཝེཎིཀདུཀྑསུཏྟཝཎྞནཱ ནིཊྛིཏཱ.

༤. ཏཱིཧིདྷམྨེཧིསུཏྟཱདིཝཎྞནཱ

༢༨༣-༣༠༣. མཙྪེརམལཔརིཡུཊྛིཏེནཱཏི མཙྪརིཡམལེན ཨབྷིབྷཱུཏེན. ཏེནཱཏི ཀསྶཙི ཀིཉྩི ཨདཱནེན ཙ. ཨེཏཾ ‘‘མཙྪེརམལཔརིཡུཊྛིཏེནཱ’’ཏིཨཱདི ཝུཏྟཾ. ཝིལོཀེནྟོ ཝིཙརཏི ཨིསྶཱཔཀཏཙིཏྟཏཱཡ. པཉྩམཱདཱིནི ཡཱཝ ཨེཀཱདསམཱ ཨུཏྟཱནཏྠཱནེཝ.

ཏཱིཧིདྷམྨེཧིསུཏྟཱདིཝཎྞནཱ ནིཊྛིཏཱ.

༣. བལཝགྒོ

༡. ཝིསཱརདསུཏྟཝཎྞནཱ

༣༠༤. རཱུཔསམྤཏྟི ¶ ¶ རཱུཔབལཾ ཏཾསམངྒིནོ ཨུཔཏྠམྦྷཀབྷཱཝཏོ. ཨེས ནཡོ སེསེསུཔི. བལཱནི ཧི སཏྟཱནཾ ཝུཌྜྷིཡཱ ཨུཔཏྠམྦྷཀཔཙྩཡོ ཧོཏི, ཡཐཱ ཏཾ ཨཱཧཱརོ. ཏེནཱཧ – ‘‘ཨིམཱནཱི’’ཏིཨཱདི.

ཝིསཱརདསུཏྟཝཎྞནཱ ནིཊྛིཏཱ.

༢-༡༠. པསཡ྄ཧསུཏྟཱདིཝཎྞནཱ

༣༠༥-༣༡༣. ཨབྷིབྷཝིཏྭཱ སབྦཾ ཨནྟོཛནཾ སཱམིཀཉྩ. ནཱསེནྟཱིཏི ནཱསནཾ ཨདསྶནཾ ནེནྟི ནཱིཧརནྟཱིཏི ཨཏྠོ.

པསཡ྄ཧསུཏྟཱདིཝཎྞནཱ ནིཊྛིཏཱ.

མཱཏུགཱམསཾཡུཏྟཝཎྞནཱ ནིཊྛིཏཱ.

༤. ཛམྦུཁཱདཀསཾཡུཏྟཾ

༡. ནིབྦཱནཔཉྷསུཏྟཝཎྞནཱ

༣༡༤. ནིབྦཱནཾ ¶ ¶ ཨཱགམྨཱཏི ཨེཏྠ ཨཱགམྨཱཏི སབྦསངྑཱརེཧི ནིབྦིནྣསྶ ཝིསངྑཱརནིནྣསྶ གོཏྲབྷུནཱ ཝིཝཊྚིཏམཱནསསྶ མགྒེན སཙྪིཀརཎེནཱཏི ཨཏྠོ. སཙྪིཀིརིཡམཱནཉྷི ཏཾ ཨདྷིགནྟྭཱ ཨཱརམྨཎཔཙྩཡབྷཱུཏཉྩ པཊིཙྩ ཨདྷིཔཏིཔཙྩཡབྷཱུཏེ ཙ ཏསྨིཾ པརམསྶཱསབྷཱཝེན ཝིམུཏྟསངྑཱརསྶ པརམགཏིབྷཱཝེན ཙ པཏིཊྛཱནབྷཱུཏེ པཏིཊྛཱཡ ཁཡསངྑཱཏོ མགྒོ རཱགཱདིཀེ ཁེཔེཏཱིཏི ཏཾསཙྪིཀརཎཱབྷཱཝེ རཱགཱདཱིནཾ ཨནུཔྤཏྟིནིརོདྷགམནཱབྷཱཝཏོ ‘‘ནིབྦཱནཾ ཨཱགམྨ རཱགོ ཁཱིཡཏཱི’’ཏི ཝུཏྟཾ.

ཨིམིནཱཝ སུཏྟེནཱཏི ཨིམིནཱཝ ཛམྦུཁཱདཀསུཏྟེན. ཀིལེསཀྑཡམཏྟཾ ནིབྦཱནནྟི ཝདེཡྻ ‘‘རཱགཀྑཡོ’’ཏིཨཱདིནཱ སུཏྟེ ཨཱགཏཏྟཱ. ‘‘ཀིལེསཀྑཡམཏྟ’’ནྟི ཨཝིསེསེན ཝུཏྟཏྟཱ ཨཱཧ ‘‘ཀསྶཱ’’ཏིཨཱདི. ཨདྡྷཱ ཨཏྟནོཏི ཝཀྑཏི ‘‘པརསྶ ཀིལེསཀྑཡེན པརསྶ ནིབྦཱནསམྤཏྟི ན ཡུཏྟཱ’’ཏི. ནིབྦཱནཱརམྨཎཀརཎེན གོཏྲབྷུཀྑཎེ ཀིལེསཀྑཡཔྤཏྟིཏཱ ཙ ཨཱཔནྣཱཏི ཨཱཧ – ‘‘ཀིཾ པན ཏེསུ ཨཁཱིཎེསུཡེཝཱ’’ཏིཨཱདི. ནནུ ཨཱརམྨཎཀརཎམཏྟེན ཀིལེསཀྑཡོ ཨནུཔྤཏྟོཏི ན སཀྐཱ ཝཏྟུཾ. ཙིཏྟཉྷི ཨཏཱིཏཱནཱགཏཱདིསབྦཾ ཨཱལམྦནཾ ཀརོཏི, ན ནིཔྥནྣམེཝཱཏི. གོཏྲབྷཱུཔི མགྒེན ཡཱ ཀིལེསཱནཾ ཨནུཔྤཏྟིདྷམྨཏཱ ཀཱཏབྦཱ, ཏཾ ཨཱརབྦྷ པཝཏྟིསྶཏཱིཏི? ན, ཨཔྤཏྟནིབྦཱནསྶ ནིབྦཱནཱརམྨཎཉཱཎཱབྷཱཝཏོ. ན ཧི ཨཉྙེ དྷམྨཱ ཝིཡ ནིབྦཱནཾ, ཏཾ པན ཨཏིགམྦྷཱིརཏྟཱ ཨཔྤཏྟེན ཨཱལམྦིཏུཾ ན སཀྐཱ, ཏསྨཱ ཏེན གོཏྲབྷུནཱ པཏྟབྦེན ཏིཀཱལིཀསབྷཱཝཱཏིཀྐནྟགམྦྷཱིརབྷཱཝེན བྷཝིཏབྦཾ, ཀིལེསཀྑཡམཏྟཏཾ ཝཱ ཨིཙྪཏོ གོཏྲབྷུཏོ པུརེཏརཾ ནིཔྥནྣེན ཀིལེསཀྑཡེན བྷཝིཏབྦཾ. ཨཔྤཏྟཀིལེསཀྑཡཱརམྨཎཀརཎེ ཧི སཏི གོཏྲབྷུཏོ པུརེཏརཙིཏྟཱནིཔི ཨཱལམྦེཡྻུནྟི.

ཏསྨཱཏིཨཱདི ཝུཏྟསྶེཝ ཨཏྠསྶ ནིགམནཾ. ཏཾ པནེཏཾ ནིབྦཱནཾ. རཱུཔིནོ དྷམྨཱ ཨརཱུཔིནོ དྷམྨཱཏིཨཱདཱིསཱུཏི ཨཱདིསདྡེན ལོཀུཏྟརཨནཱསཝཱདཱིནཾ སངྒཧོ དཊྛབྦོ. ཨརཱུཔདྷམྨཱདིབྷཱཝགྒཧཎེན ཙསྶ ¶ པརིནིཔྥནྣཏཱ དཱིཔིཏཱ. ཏེནཱཧ ‘‘ན ཀིལེསཀྑཡམཏྟམེཝཱ’’ཏི. ཀིལེསཀྑཡམཏྟཏཱཡ ¶ ཧི སཏི ནིབྦཱནསྶ བཧུཏཱ ཨཱཔཛྫཏི ‘‘ཡཏྟཀཱ ཀིལེསཱ ཁཱིཡནྟི, ཏཏྟཀཱནི ནིབྦཱནཱནཱི’’ཏི. ཨབྷཱཝསྶབྷཱཝཏོ གམྦྷཱིརཱདིབྷཱཝོ ཨསངྑཏཱདིབྷཱཝོ ཙ ན སིཡཱ, ཝུཏྟོ ཙ སོ ནིབྦཱནསྶ, ཏསྨཱསྶ པཙྩེཏབྦོ པརིནིཔྥནྣབྷཱཝོ. ཡསྨཱ ཙ སམྨུཏིསཙྩཱརམྨཎཾ སངྑཏདྷམྨཱརམྨཎཾ ཝཱ སམུཙྪེདཝསེན ཀིལེསེ པཛཧིཏུཾ ན སཀྐོཏི, ཡཏོ མཧགྒཏཉཱཎཾ ཝིཔསྶནཱཉཱཎཾ ཝཱ ཀིལེསཝིཀྑམྦྷནཝསེན ཏདངྒཝསེན ཝཱ པཛཧཏི, ཏསྨཱ ཨརིཡམགྒཉཱཎསྶ སམྨུཏིསཙྩསངྑཏདྷམྨཱརམྨཎེཧི ཝིཔརཱིཏསབྷཱཝེན ཨཱརམྨཎེན བྷཝིཏབྦཾ. ཏཐཱ ཧི ཏཾ སམུཙྪེདཝསེན ཀིལེསེ པཛཧཱིཏི ཨེཝཾ པརིནིཔྥནྣཱསངྑཏསབྷཱཝཾ ནིབྦཱནནྟི ནིཊྛམེཏྠ གནྟབྦནྟི.

ནིབྦཱནཔཉྷསུཏྟཝཎྞནཱ ནིཊྛིཏཱ.

༣-༡༥. དྷམྨཝཱདཱིཔཉྷསུཏྟཱདིཝཎྞནཱ

༣༡༦-༣༢༨. པཧཱཡ གཏཏྟཱཏི ཨརིཡམགྒེན ཛཧིཏྭཱ ཉཱཎགམནེན གཏཏྟཱ. སུཊྛུ གཏཱཏི སམྨཱ གཏཱ པཊིཔནྣཱཏི སུགཏཱ. པརིཛཱནནཏྠནྟི ཏཱིཧི པརིཉྙཱཧི པརིཛཱནནཏྠཾ. དུཀྑསངྑཱཏོཏི ‘‘དུཀྑ’’ནྟི སངྑཱཏབྦོ ཝིདིཏབྦོ ཙ དུཀྑསབྷཱཝོ དྷམྨོ དུཀྑདུཀྑཏཱ. ཡསྨཱ དུཀྑཝེདནཱཝིནིམུཏྟསངྑཏདྷམྨེ སུཁཝེདནཱཡ ཙ ཡཐཱ ཨིདྷ སངྑཱརདུཀྑཏཱ ཝིཔརིཎཱམདུཀྑཏཱཏི དུཀྑཔརིཡཱཡོ ནིརུཔྤཏེཝ, ཏསྨཱ དུཀྑསབྷཱཝོ དྷམྨོ ཨེཀེན དུཀྑསདྡེན ཝིསེསེཏྭཱ ཝུཏྟོ ‘‘དུཀྑདུཀྑཏཱ’’ཏི. སེསཔདདྭཡེཏི སངྑཱརདུཀྑཏཱ ཝིཔརིཎཱམདུཀྑཏཱཏི ཨེཏསྨིཾ པདདྭཡེ. སངྑཱརབྷཱཝེན དུཀྑསབྷཱཝོ སངྑཱརདུཀྑཏཱ. སུཁསྶ ཝིཔརིཎཱམནེན དུཀྑསབྷཱཝོ ཝིཔརིཎཱམདུཀྑཏཱ.

དྷམྨཝཱདཱིཔཉྷསུཏྟཱདིཝཎྞནཱ ནིཊྛིཏཱ.

༡༦. དུཀྐརཔཉྷསུཏྟཝཎྞནཱ

༣༢༩. པབྦཛྫཱཡཱཏི ¶ པབྦཛིཏཔཊིཔཏྟིཡཾ. དྷམྨཱནུདྷམྨཔྤཊིཔནྣོ བྷིཀྑཱུཏི དྷམྨཱནུདྷམྨཾ པཊིཔཛྫམཱནོ བྷིཀྑུ. པཱཏནྟི པཱཏོ. ནཙིརསྶནྟི ཁིཔྤམེཝ. ཏེནཱཧ ‘‘ལཧུཡེཝཱ’’ཏི.

དུཀྐརཔཉྷསུཏྟཝཎྞནཱ ནིཊྛིཏཱ.

ཛམྦུཁཱདཀསཾཡུཏྟཝཎྞནཱ ནིཊྛིཏཱ.

༥. སཱམཎྜཀསཾཡུཏྟཝཎྞནཱ

༣༣༠-༣༣༡. ཨིམིནཱཝ ¶ ནཡེནཱཏི ཡོ ཛམྦུཁཱདཀསཾཡུཏྟེ ཨཏྠནཡོ, ཨིམིནཱཝ ནཡེན. ཨིམིནཱ ཧི དྭེ སཾཡུཏྟཱནི པཱལི༹ཏོ ཨཏྠཏོ ཙ ཨཉྙམཉྙཾ སདིསཱནེཝཱཏི དསྶེཏི.

སཱམཎྜཀསཾཡུཏྟཝཎྞནཱ ནིཊྛིཏཱ.

༦. མོགྒལླཱནསཾཡུཏྟཾ

༡-༨. པཋམཛ྄ཛྷཱནཔཉྷསུཏྟཱདིཝཎྞནཱ

༣༣༢-༣༣༩. ཀཱམསཧགཏེསུ ¶ ¶ སཉྙཱམནསིཀཱརེསུ ཨུཔཊྛཧནྟེསུ བྱཱཔཱདཱདིསཧགཏཱཔི སཉྙཱམནསིཀཱརཱ ཡཐཱཔཙྩཡཾ ཨུཔཊྛཧནྟིཡེཝཱཏི ཝུཏྟཾ ‘‘ཀཱམསཧགཏཱཏི པཉྩནཱིཝརཎསཧགཏཱ’’ཏི. ནཱིཝརཎཱནཉྷེཏྠ ནིདསྶནམཏྟམེཏཾ, ཡདིདཾ ཀཱམགྒཧཎཾ. པཧཱིནཱཝསེསཱ ཙེཏྠ ནཱིཝརཎཱ ཝེདིཏབྦཱ, ཏསྨཱ པཉྩགྒཧཎཾ ན ཀཏྟབྦཾ. ཏསྶཱཏི མཧཱམོགྒལླཱནཏྠེརསྶ སནྟཏོ ཨུཔཊྛཧིཾསུ ཨཙིཎྞཝསིཏཱཡ. ཏེནཱཧ ‘‘ཧཱནབྷཱགིཡཾ ནཱམ ཨཧོསཱི’’ཏི. ཨཱརམྨཎ…པེ… སཧགཏནྟི ཝུཏྟཾ ཨིཏརེསཾ ཨབྷཱཝཏོ.

པཋམཛ྄ཛྷཱནཔཉྷསུཏྟཱདིཝཎྞནཱ ནིཊྛིཏཱ.

༩. ཨནིམིཏྟཔཉྷསུཏྟཝཎྞནཱ

༣༤༠. ཝིཔསྶནཱསམཱདྷིཾཡེཝ, ན ཕལསམཱདྷིཾ. ཚེཛྫཀིཙྩཾ ན ནིཔྥཛྫཏི ཨཝིཙྪེདཝསེན ཨཔྤཝཏྟནཏོ. ནིཀནྟཱིཏི ཝིཔསྶནཾ ཨསྶཱདེནྟཱི པཝཏྟཏཎྷཱ. སཱདྷེཏུཾ ནཱསཀྑི ཨུཔཀྐིལིཊྛཏྟཱ. ནིམིཏྟཱནུསཱརཱིཏི ནིཙྩསུཁཨཏྟནིམིཏྟཱནཾ ཨཔཱུརཎཏོ རཱགདོསམོཧནིམིཏྟཱནིཔེཏྠ ནིམིཏྟཱནེཝ. ཝུཊྛཱན…པེ… སམཱདྷིནྟི ཨེཏེན ཡཱཝ མགྒོ ནཱདྷིགཏོ, ཏཱཝ ཝུཊྛཱནགཱམིནིཝིཔསྶནམནུཡུཉྫནྟོཔི ཡཐཱརཧཾ ཨནིམིཏྟཾ ཨཔྤཎིཧིཏཾ སུཉྙཏཾ ཙེཏོསམཱདྷིཾ ཨནུཡུཏྟོ ཝིཧརཏཱིཏི ཝཏྟབྦཏཾ ཨརཧཏཱིཏི དསྶེཏི. ཝིཔསྶནཱསམྤཡུཏྟནྟི ཝིཔསྶནཱསངྑཱཏཉཱཎསམྤཡུཏྟཾ. ཙེཏོསམཱདྷིནྟི ཙིཏྟསཱིསེན ཝིཔསྶནཱསམཱདྷིམཱཧ. ཨུཔརིམགྒཕལསམཱདྷིནྟི པཋམམགྒསམཱདྷིསྶ པགེཝ ཨདྷིགཏཏྟཱ.

ཨནིམིཏྟཔཉྷསུཏྟཝཎྞནཱ ནིཊྛིཏཱ.

༡༠-༡༡. སཀྐསུཏྟཱདིཝཎྞནཱ

༣༤༡-༣༤༢. ཨཝེཙྩཔྤསཱདེནཱཏི ¶ ¶ ཝཏྠུཏྟཡཾ ཡཱཐཱཝཏོ ཉཏྭཱ ཨུཔྤནྣཔསཱདེན, མགྒེནཱགཏཔསཱདེནཱཏི ཨཏྠོ. སོ པན ཀེནཙི ཨསཾཧཱརིཡོ ཨསམྤཝེདྷཱིཏི ཨཱཧ ‘‘ཨཙལཔྤསཱདེནཱ’’ཏི. ཨབྷིབྷཝནྟི ཨཏྟནོ པུཉྙཱནུབྷཱཝེན.

སཀྐསུཏྟཱདིཝཎྞནཱ ནིཊྛིཏཱ.

མོགྒལླཱནསཾཡུཏྟཝཎྞནཱ ནིཊྛིཏཱ.

༧. ཙིཏྟསཾཡུཏྟཾ

༡. སཾཡོཛནསུཏྟཝཎྞནཱ

༣༤༣. བྷོགགཱམནྟི ¶ ¶ བྷོགུཔྤཏྟིགཱམཾ. པཝཏྟཏཱིཏི ཨཔྤཊིཧཏཾ ཧུཏྭཱ པཝཏྟཏི པཊིསམྦྷིདཔྤཏྟིཡཱ.

སཾཡོཛནསུཏྟཝཎྞནཱ ནིཊྛིཏཱ.

༢. པཋམཨིསིདཏྟསུཏྟཝཎྞནཱ

༣༤༤. ཨཝིསཱརདཏྟཱཏི པཉྷཾ བྱཱཀཱཏུཾ ཝེཡྻཏྟིཡཱབྷཱཝེན ཨསམཏྠཏྟཱ. ཨུཔཱསཀོ ཐེརེསུ བྱཱཀཱཏུཾ ཨསཀྐོནྟེསུ སཡཾ བྱཱཀཱཏུཀཱམོ པུཙྪཏི, ན ཝིཧེསཱདྷིཔྤཱཡོ. པཋམཝཙནེན ཨབྱཱཀརོནྟེ དིསྭཱཝ པུནཔྤུནཾ པུཙྪིཏཾ ཝིཧེསོ ཝིཡ ཧོཏཱིཏི ཀཏྭཱ ཝུཏྟཾ ‘‘ཝིཧེསེཏཱི’’ཏི.

པཋམཨིསིདཏྟསུཏྟཝཎྞནཱ ནིཊྛིཏཱ.

༣. དུཏིཡཨིསིདཏྟསུཏྟཝཎྞནཱ

༣༤༥. ཨཝནྟིཡཱཏི ཨཝནྟིརཊྛེ, ཏཾ པན མཛ྄ཛྷིམཔདེསཏོ དཀྑིཎདིསཱཡཾ. ཏེནཱཧ ‘‘དཀྑིཎཱཔཐེ’’ཏི. ཨདྷིཔྤཱཡེནཱཏི ཏསྶ ཝཙནསྶ ཨནུམོདནཱདྷིཔྤཱཡེན ཝདཏི, ན པན ཏཏོ ཀིཉྩི གཧེཏུཀཱམཏཱདྷིཔྤཱཡེན.

དུཏིཡཨིསིདཏྟསུཏྟཝཎྞནཱ ནིཊྛིཏཱ.

༤. མཧཀཔཱཊིཧཱརིཡསུཏྟཝཎྞནཱ

༣༤༦. ཏེསཾ ཨནུཛཱནནྟོཏི ཏེསཾ དཱསཀམྨཀརཱནཾ སེསཀེ ཡཐཱརུཙི ཝིཙཱརཎཾ ཨནུཛཱནནྟོ. ཀུདྷིཏནྟི བལཝཏཱ སཱུརིཡསནྟཱཔེན སངྐུཐིཏཾ ¶ . ཏེནཱཧ ‘‘ཧེཊྛཱ’’ཏིཨཱདི. ཨཏིཏིཁིཎནྟི ཨཏིཝིཡ ཏིཀྑདྷཱཏུཀཾ. ཨསམྦྷིནྣཔདནྟི ¶ ཨཉྙཏྠ ཨནཱགཏཏྟཱ ཏིཔིཊཀེ ཨཝོམིསྶཀཔདཾ, ཨིདྷེཝ ཨཱགཏཔདནྟི ཨཏྠོ. པཊིལཱིཡམཱནེནཱཏི པཊིཀཾསེན ཝིསེསནེན ཝིལཱིཡམཱནེན ཀཱཡེན.

ཨེཏྠ ཙཱཏི ཨེཏསྨིཾ ཨདྷིཊྛཱནིདྡྷིཀརཎེ. ཨབྦྷམཎྜཔཾ ཀཏྭཱཏི སམནྟཏོ ཚཱདནཝསེན མཎྜཔཾ ཝིཡ མེགྷཔཊལཾ ཨུཔྤཱདེཏྭཱ. དེཝོཏི མེགྷོ. ཨེཀམེཀཾ ཕུསིཏཀཾ ཕུསཱཡཏུ ཛཱལཝིནདྡྷཾ ཝིཡ ཝསྶཏུ. ཨེཝཾ ཝུཏྟཔྤཀཱརེན ནཱནཱཔརིཀམྨཾ ནཱནཱདྷིཊྛཱནཾ ཨེཀཏོ པརིཀམྨཾ ཨེཀཏོ ཨདྷིཊྛཱནནྟི ཙཏུཀྐམེཏྠ སམྦྷཝཏཱིཏི དསྶེཏི ‘‘ཨེཏྠ ཙཱ’’ཏིཨཱདིནཱ. ཡཐཱ ཏཐཱཏི ཡཐཱཝུཏྟེསུ ཙཏཱུསུ པཀཱརེསུ ཡེན ཝཱ ཏེན ཝཱ པཀཱརེན ཀརོནྟསྶ. ཀཏཔརིཀམྨསྶཱཏི ‘‘ཨེཝཾ ཝཱ ཨེཝཾ ཝཱ ཧོཏཱུ’’ཏི པཝཏྟིཏཔརིཀམྨཙིཏྟསྶ. ‘‘པརིཀམྨཱནནྟརེནཱཏི ཨདྷིཊྛཱནཙིཏྟུཔྤཱདནཏྠཾ སམཱཔནྣཔཱདཀཛ྄ཛྷཱནཏོ ཝུཊྛཱཡ ཨདྷིཊྛཱནཙིཏྟསྶ ཨེཀཱཝཛྫནཝཱིཐིཡཾ པཝཏྟཔརིཀམྨཾ སནྡྷཱཡ ཝུཏྟ’’ནྟི ཝདནྟི.

མཧཀཔཱཊིཧཱརིཡསུཏྟཝཎྞནཱ ནིཊྛིཏཱ.

༥. པཋམཀཱམབྷཱུསུཏྟཝཎྞནཱ

༣༤༧. ཨེལཾ ཝུཙྩཏི དོསོ, ཏཾ ཨེཏསྶ ནཏྠཱིཏི ནེལཾ, ཏཾ ཨངྒཾ ཨེཏསྶཱཏི ནེལངྒོ, སུཝིསུདྡྷསཱིལགུཎོ. ཏེནཱཧ ‘‘ནེལངྒནྟི ཁོ, བྷནྟེ, སཱིལཱནམེཏཾ ཨདྷིཝཙན’’ནྟི. ཨཊྛཀཐཱཡཾ པན དོསཱབྷཱཝམེཝ དསྶེཏུཾ ‘‘ནེལངྒོཏི ནིདྡོསོ’’ཏི ཝུཏྟཾ. ཨེཏཾ བྷིཀྑུཾ ཨཱགཙྪནྟནྟི མཧཱཀཔྤིནཏྠེརཾ སནྡྷཱཡ ཝུཏྟཾ. ཨཏྟནོ དིཊྛེན ཀཐེསཱིཏི ཨཏྟནོ སབྦཉྙུཏཉྙཱཎེན པཙྩཀྑཏོ ཨུཔལཀྑིཏེན ཨཏྠེན ཀཐེསི. ཨཡཾ པན ནཡགྒཱཧེནཱཏི ཨཡཾ པན གཧཔཏི ཨསུཏྭཱ ཀེཝལཾ ནཡགྒཱཧེན ཨཱཧ.

པཋམཀཱམབྷཱུསུཏྟཝཎྞནཱ ནིཊྛིཏཱ.

༦. དུཏིཡཀཱམབྷཱུསུཏྟཝཎྞནཱ

༣༤༨. ནིརོདྷཾ ¶ ཝལཉྫེཏི ཨནཱགཱམིབྷཱཝཏོ. ཨིམེ སངྑཱརཱཏི ཨིམེ ‘‘ཀཱཡསངྑཱརོ, ཝཙཱིསངྑཱརོ, ཙིཏྟསངྑཱརོ’’ཏི ཝུཙྩམཱནཱ ཏཡོ སངྑཱརཱ. སདྡཏོཔི, ཨཏྠཏོཔི ཨཉྙམཉྙཾ མིསྶཱ, ཏཏོ ཨེཝ ཨཱལུལི༹ཏཱ ཨཱཀུལཱ, ཨཝིབྷཱུཏཱ དུབྦིབྷཱཝནཱ, དུདྡཱིཔནཱ ཨསངྐརཏོ དཱིཔེཏུཾ དུཀྐརཱ. ཏཐཱ ཧི ཀུསལཙེཏནཱ ཨེཝ ‘‘ཀཱཡསངྑཱརོ’’ཏིཔི ¶ ཝུཙྩཏི, ‘‘ཝཙཱིསངྑཱརོ’’ཏིཔི, ‘‘ཙིཏྟསངྑཱརོ’’ཏིཔི. ཨསྶཱསཔསྶཱསཱཔི ཀཏྠཙི ‘‘ཀཱཡསངྑཱརོ’’ཏི, ཝིཏཀྐཝིཙཱརཱཔི ‘‘ཝཙཱིསངྑཱརོ’’ཏི ཝུཙྩནྟི, སཉྙཱཝེདནཱཔི ‘‘ཙིཏྟསངྑཱརོ’’ཏི ཝུཙྩནྟི. ཏེན ཝུཏྟཾ ‘‘ཏཐཱ ཧཱི’’ཏིཨཱདི. ཏཏྠ ཨཱཀཌྜྷིཏྭཱ གཧཎཾ ཨཱདཱནཾ, སམྤཏྟསྶ ཧཏྠེ ཀརཎཾ གཧཎཾ, གཧིཏསྶ ཝིསྶཛྫནཾ མུཉྩནཾ, ཕནྡནཾ ཙོཔནཾ པཱཔེཏྭཱ ནིཔྥཱདེཏྭཱ. ཧནུསཉྩོཔནནྟི ཀཱཡཝིཉྙཏྟིཝསེན པུབྦབྷཱགེ ཧནུསཉྩོཔནཾ ཀཏྭཱ. ཨེཝཉྷི ཝཙཱིབྷེདཀརཎཾ. ཨེཝཾ ཨིམེཏིཨཱདི ཡཐཱཝུཏྟསྶ ཨཏྠསྶ ནིགམནཾ.

པདཏྠཾ པུཙྪཏི ཨིཏརསངྑཱརེཧི པདཏྠཏོ ཝིསེསཾ ཀཐཱཔེསྶཱམཱིཏི. ཀཱཡནིསྶིཏཱཏི ཨེཏྠ ཀཱཡནིསྶིཏཏཱ ཙ ནེསཾ ཏབྦྷཱཝབྷཱཝིཏཱཡ ཝེདིཏབྦཱ, ན ཀཱཡསྶ ནིསྶཡཔཙྩཡཏཱཝསེནཱཏི དསྶེནྟོ ‘‘ཀཱཡེ སཏི ཧོནྟི, ཨསཏི ན ཧོནྟཱི’’ཏི ཨཱཧ. ཀཱཡོཏི ཙེཏྠ ཀརཛཀཱཡོ དཊྛབྦོ. ཙིཏྟནིསྶིཏཱཏི ཙིཏྟཾ ནིསྶཱཡ ཏཾ ནིསྶཡཔཙྩཡབྷཱུཏཾ ལབྷིཏྭཱ ཨུཔྤནྣཱ.

‘‘སམཱཔཛྫཱམཱི’’ཏི པདསྶ སམཱིཔེ ཝུཙྩམཱནཾ ‘‘སམཱཔཛྫིསྶ’’ནྟི པདཾ ཨཱསནྣཱནཱགཏཀཱལཝཱཙཱི ཨེཝ བྷཝིཏུཾ ཡུཏྟཾ, ན ཨིཏརནྟི ཨཱཧ – ‘‘པདདྭཡེན ནེཝསཉྙཱནཱསཉྙཱཡཏནསམཱཔཏྟིཀཱལོ ཀཐིཏོ’’ཏི. ཏཡིདཾ ཏསྶ ཏཐཱ ཝཏྟབྦཏཱཡ ཝུཏྟཾ, ན པན ཏསྶ ཏཐཱ ཙིཏྟཔཝཏྟིསམྦྷཝཏོ. སམཱཔནྣེཔི ཨེསེཝ ནཡོ. པུརིམེཧཱིཏི ‘‘སམཱཔཛྫིསྶཾ སམཱཔཛྫཱམཱི’’ཏི དྭཱིཧི པདེཧི. པཙྪིམེནཱཏི ‘‘སམཱཔནྣོ’’ཏི པདེན.

བྷཱཝིཏཾ ཧོཏི ཨུཔྤཱདིཏཾ ཧོཏི ནིརོདྷསམཱཔནྣཏྠཱཡ. ཨནུཔུབྦསམཱཔཏྟིསམཱཔཛྫནསངྑཱཏཱཡ ནིརོདྷབྷཱཝནཱཡ ཏཾ ཙིཏྟཾ བྷཱཝིཏཾ ཧོཏི. ཏེནཱཧ ‘‘ཡཾ ཏ’’ནྟིཨཱདི. དུཏིཡཛ྄ཛྷཱནེཡེཝཱཏི དུཏིཡཛ྄ཛྷཱནཀྑཎེ ནིརུཛ྄ཛྷཏི. ཏཏྠ ཨནུཔྤཛྫནཏོ ཨནུཔྤཱདནཏོ ཧེཊྛཱ ནིརོདྷོཏི ཨདྷིཔྤེཏོ. ཙཏུནྣཾ ཨརཱུཔཀྑནྡྷཱནཾ ཏཛྫཱ པརིཀམྨསིདྡྷཱ ཡཱ ཨཔྤཝཏྟི ¶ , ཏཏྠ ‘‘ནིརོདྷསམཱཔཏྟིསཉྙཱ’’ཏི, ཡཱ ནེསཾ ཏཐཱ ཨཔྤཝཏྟི. སཱ ‘‘ཨནྟོནིརོདྷེ ནིརུཛ྄ཛྷཏཱི’’ཏི ཝུཏྟཱ.

‘‘ཙིཏྟསངྑཱརོ ནིརུདྡྷོ’’ཏི ཝཙནཏོ ཏདཉྙེསཾ ཨནིརོདྷཾ ཨིཙྪནྟཱནཾ ཝཱདཾ དསྶེནྟོ ‘‘ཙིཏྟསངྑཱརོ ནིརུདྡྷོཏི ཝཙནཏོ’’ཏིཨཱདིཾ ཝཏྭཱ ཏཏྠ ཨཏིཔྤསངྒདསྶནམུཁེན ཏཾ ཝཱདཾ ནིསེདྷེཏུཾ ‘‘ཏེ ཝཏྟབྦཱ’’ཏིཨཱདིམཱཧ. ཨབྷིནིཝེསཾ ཨཀཏྭཱཏི ཡཐཱགཏེ བྱཉྫནམཏྟེ ཨབྷིནིཝེསཾ ཨཀཏྭཱ. ཨཱཙརིཡཱནཾ ནཡེཏི ཨཱཙརིཡཱནཾ པརམྤརཱགཏེ དྷམྨནཡེ དྷམྨནེཏྟིཡཾ ཋཏྭཱ.

ཀིརིཡམཡཔཝཏྟསྨིནྟི ¶ པརིཏྟབྷཱུམཀཀུསལཱཀུསལདྷམྨཔབནྡྷེ ཝཏྟམཱནེ. ཏསྨིཉྷི ཝཏྟམཱནེ ཀཱཡིཀ-ཝཱཙསིཀ-ཀིརིཡསམྤཝཏྟི ཧོཏི, དསྶན-སཝནཱདིཝསེན ཨཱརམྨཎགྒཧཎེ པཝཏྟམཱནེཏི ཨཏྠོ. ཏེནཱཧ – ‘‘བཧིདྡྷཱརམྨཎེསུ པསཱདེ གྷཊྚེནྟེསཱུ’’ཏི. མཀྑིཏཱནི ཝིཡཱཏི པུཉྪིཏཱནི ཝིཡ ཧོནྟི གྷཊྚནཱཡ ཝིབཱདྷིཏཏྟཱ. ཨེཏེནཱཡཾ གྷཊྚནཱ པཉྩདྭཱརིཀཝིཉྙཱཎཱནཾ ཝེགསཱ ཨུཔྤཛྫནཱཡ ན ཨཱརམྨཎནྟི དསྶེཏི. ཏེནེཝཱཧ – ‘‘ཨནྟོནིརོདྷེ པཉྩ པསཱདཱ ཨཏིཝིཡ ཝིརོཙནྟཱི’’ཏི.

ཏཏོ པརཾ སཙིཏྟཀོ བྷཝིསྶཱམཱིཏི ཨིདཾ ཨཏྠཏོ ཨཱཔནྣཾ གཧེཏྭཱ ཝུཏྟཾ – ‘‘ཨེཏྟཀཾ ཀཱལཾ ཨཙིཏྟཀོ བྷཝིསྶཱམཱི’’ཏི ཨེཏེནེཝ ཏསྶ ཨཏྠསྶ སིདྡྷཏྟཱ. ཡཾ ཨེཝཾ བྷཱཝིཏནྟི ཨེཏྠ ཝིསུཾ ཙིཏྟསྶ བྷཱཝནཱ ནཱམ ནཏྠི, ཨདྡྷཱནཔརིཙྪེདཾ པན ཀཏྭཱ ནིརོདྷསམཱཔཏྟཏྠཱཡ ཀཱཏབྦཔརིཀམྨབྷཱཝནཱཡ ཨེཝ ཏསྶ སིཛ྄ཛྷནཏོ.

སཱ པནེསཱ ནིརོདྷཀཐཱ. དྭཱིཧི བལེཧཱིཏི སམཐཝིཔསྶནཱབལེཧི. ཏཡོ ཙ སངྑཱརཱནནྟི ཏིཎྞཾ ཀཱཡཝཙཱིཙིཏྟསངྑཱརཱནཾ པཊིཔྤསྶདྡྷིཡཱ. སོལ༹སཧི ཉཱཎཙརིཡཱཧཱིཏི ཨནིཙྩཱནུཔསྶནཱདཱིནཾ ཨཊྛནྣཾ ཨནུཔསྶནཱཉཱཎཱནཾ, ཨཊྛནྣཉྩ མགྒཕལཉཱཎཱནཾ ཝསེན ཨིམཱཧི སོལ༹སཧི ཉཱཎཔྤཝཏྟཱིཧི. ནཝཧི སམཱདྷིཙརིཡཱཧཱིཏི ཨཊྛ སམཱཔཏྟིཡོ ཨཊྛ སམཱདྷིཙརིཡཱ, ཏཱསཾ ཨུཔཙཱརསམཱདྷི སམཱདྷིབྷཱཝསཱམཉྙེན ཨེཀཱ སམཱདྷིཙརིཡཱཏི ཨེཝཾ ནཝཧི སམཱདྷིཙརིཡཱཧི. ཝསཱིབྷཱཝཏཱཔཉྙཱཏི ཝསཱིབྷཱཝཏཱསངྑཱཏཱ པཉྙཱ. སབྦཱཀཱརེན ཝིསུདྡྷིམགྒེ ཀཐིཏཱ, ཏེ ཏཱཝ ཨཱཀཱརཱ ¶ ཏིཊྛནྟུ, སརཱུཔམཏྟསྶ པནསྶ ཝཏྟབྦནྟི ཨཱཧ – ‘‘ཀོ པནཱཡཾ ནིརོདྷོ ནཱམཱ’’ཏི. ཡདི ཁནྡྷཱནཾ ཨཔྤཝཏྟི, ཨཐ ཀིམཏྠམེཏཾ ཛྷཱནསུཁཱདིཾ ཝིཡ སམཱཔཛྫནྟཱིཏི ཨཱཧ ‘‘སངྑཱརཱན’’ནྟིཨཱདི.

ཕལསམཱཔཏྟིཙིཏྟནྟི ཨརཧཏྟཾ ཨནཱགཱམིཕལཙིཏྟཾ. ‘‘ཏཏོ པརཾ བྷཝངྒསམཡེ’’ཏི ཝུཏྟཏྟཱ ཨཱཧ ‘‘ཀིཾ པན…པེ… ན སམུཊྛཱཔེཏཱི’’ཏི. སམུཊྛཱཔེཏི རཱུཔསམུཔྤཱདཀཏྟཱ. ཨིམསྶཱཏི ནིརོདྷཾ སམཱཔནྣབྷིཀྑུནོ. སཱ ན སམུཊྛཱཔེཏཱིཏི སཱ ཙཏུཏྠཛ྄ཛྷཱནིཀཱ ཕལསམཱཔཏྟི ན སམུཊྛཱཔེཏི ཨསྶཱསཔསྶཱསེ. ཕལསམཱཔཏྟིཡཱ ཙཏུཏྠཛ྄ཛྷཱནིཀབྷཱཝོ ཀཐཾ ནིཙྪིཏོཏི ཨཱཧ – ‘‘ཀིཾ ཝཱ ཨེཏེནཱ’’ཏིཨཱདི. ཝཀྑམཱནཱཀཱརེནཔི པརིཧཱརོ ཧོཏཱིཏི. སནྟསམཱཔཏྟིཏོཏི ནིརོདྷསམཱཔཏྟིམེཝ སནྡྷཱཡ ཝདཏི. ཨབྦོཧཱརིཀཱ ཧོནྟི ཨཏིསུཁུམསབྷཱཝཏྟཱ, སཉྫཱིཝཏྠེརསྶ པུབྦེ སམཱཔཏྟིཀྑཎེ ཨསྶཱསཔསྶཱསཱ ཨབྦོཧཱརིཀབྷཱཝཾ གཙྪནྟི. ཏེན ཝུཏྟཾ ‘‘བྷཝངྒསམཡེནེཝེཏཾ ཀཐིཏ’’ནྟི.

ཀིརིཡམཡ ¶ …པེ… ཨུཔྤཛྫཏཱིཏི ཀསྨཱ ཝུཏྟཾ? ནནུ བྷཝངྒུཔྤཏྟིཀཱལམྤི ཝིཏཀྐཝིཙཱརཱ ཨུཔྤཛྫནྟེཝཱཏི? ཀིཉྩཱཔི ཨུཔྤཛྫནྟི, ཝཙཱིསངྑཱརལཀྑཎཔྤཏྟཱ པན ན ཧོནྟཱིཏི ཨིམམཏྠཾ དསྶེཏུཾ ‘‘ཀིཾ བྷཝངྒ’’ནྟིཨཱདི ཝུཏྟཾ.

སུཉྙཏོ ཕསྶོཏིཨཱདཡོ སགུཎེནཔི ཨཱརམྨཎེནཱཏི ཨཱརམྨཎབྷཱུཏམེཏཾ. སུཉྙཏཱ ནཱམ ཕལསམཱཔཏྟི ནིཙྩསུཁཨཏྟསབྷཱཝཏོ སུཉྙཏྟཱ. ‘‘སུཉྙཏོ ཕསྶོ’’ཏི ཝུཏྟཾ ཝུཏྟནཡེན སུཉྙསབྷཱཝཏྟཱ. ཨནིམིཏྟཱ ནཱམ ཕལསམཱཔཏྟི རཱགནིམིཏྟཱདཱིནཾ ཨབྷཱཝཏོ. ཨཔྤཎིཧིཏཱ ནཱམ ཕལསམཱཔཏྟི རཱགཔཎིདྷིཨཱདཱིནམབྷཱཝཏོ. སེསཾ ཝུཏྟནཡམེཝ. ཏེནཱཧ ‘‘ཨནིམིཏྟཔྤཎིཧིཏེསུཔི ཨེསེཝ ནཡོ’’ཏི. རཱགནིམིཏྟཱདཱིནནྟི ཨེཏྠ ཨཱདི-སདྡེན སངྑཱརནིམིཏྟསྶཔི སངྒཧོ དཊྛབྦོ. ཡདགྒེན ཕལསམཱཔཏྟིསམྥསྶོ སུཉྙཏོ ནཱམ, ཏདགྒེན ཕལསམཱཔཏྟིཔི སུཉྙཏཱ ནཱམ, ཕསྶསཱིསེན པན དེསནཱ ཨཱགཏཱཏི ཏཐཱ ཝུཏྟཾ. ཨནིམིཏྟཔྤཎིཧིཏེསུཔི ཨེསེཝ ནཡོ.

ཨཱགམནཾ ཨེཏྠ, ཨེཏཱཡཱཏི ཝཱ ཨཱགམནིཀཱ, སཱ ཨེཝ ཨཱགམནིཡཱ ཀ-ཀཱརསྶ ཡ-ཀཱརཾ ཀཏྭཱ. ཝུཊྛཱཏི ནིམིཏྟཏོ མགྒསྶ ཨུཔྤཱདནེན. ཨནིམིཏྟཱ ནཱམ ནིཙྩནིམིཏྟསྶ ཨུགྒྷཱཊནཏོ. ཨེཏྠ ཙ ཝུཊྛཱནམེཝ པམཱཎཾ, ན ¶ པརིགྒཧདསྶནཱནི. ཨཔྤཎིཧིཏཱ ནཱམ སུཁཔཎིདྷིཡཱ པཊིཔཀྑཏོ. སུཉྙཏཱ ནཱམ ཨཏྟདིཊྛིཡཱ ཨུཛུཔཊིཔཀྑཏྟཱ སཏྟསུཉྙཏཱཡ སུདིཊྛཏྟཱ. མགྒོ ཨནིམིཏྟོ ནཱམ ཝིཔསྶནཱགམནཏོ. ཕལཾ ཨནིམིཏྟཾ ནཱམ མགྒཱགམནཏོ. ཝིཀཔྤོ ཨཱཔཛྫེཡྻ ཨཱགམནསྶ ཝཝཏྠཱནསྶ ཨབྷཱཝེན, ཝིཔསྶནཱཡ ཨནིམིཏྟཱདིནཱམལཱབྷོ ཨཝཝཏྠིཏོཏི ཨདྷིཔྤཱཡོ. ཏེན ཝུཏྟཾ ‘‘ཏསྨཱ’’ཏིཨཱདི. ཡསྨཱ པན སཱ མགྒཝུཊྛཱནཀཱལེ ཨེཝརཱུཔཱཔི ཧོཏཱིཏི ཏསྶ ཝསེན མགྒཕལཱནཾ ཝིཡ ཕསྶསྶཔི པཝཏྟིརཱུཔཏྟཱ ཡཐཱཝུཏྟོ ཝིཀཔྤོ ཨནཝསརོཏི དཊྛབྦཾ. ཏཡོ ཕསྶཱ ཕུསནྟཱིཏི པུགྒལབྷེདཝསེན ཝུཏྟཾ. ན ཧི ཨེཀཾཡེཝ པུགྒལཾ ཨེཏསྨིཾ ཁཎེ ཏཡོ ཕསྶཱ ཕུསནྟི. ‘‘ཏིཝིདྷོ ཕསྶོ ཕུསཏཱི’’ཏི ཝཱ བྷཝིཏབྦཾ. ཡསྨཱ པན ‘‘ནིརོདྷཕལསམཱཔཏྟིཡཱ ཝུཊྛིཏསྶཱ’’ཏིཨཱདི ཡསྶ ཡཐཱཝུཏྟཱ ཏཡོ ཨེཝ ཕསྶཱ སམྦྷཝནྟི, ཏསྶ ཨནཝསེསགྒཧཎཝསེནེཝ ཝུཏྟཾ ‘‘ཏཡོ ཕསྶཱ ཕུསནྟཱི’’ཏི.

ནིབྦཱནཾ ཝིཝེཀོ ནཱམ སབྦསངྑཱརཝིཝིཏྟབྷཱཝཏོ. ཏསྨིཾ ཝིཝེཀེ ཨེཀནྟེནེཝ ནིནྣཔོཎཏྟཱ ཨེཝ ཧི ཏེ པཊིཔྤསྶདྡྷསབྦུསྶུཀྐཱ ཨུཏྟམཔུརིསཱ ཙཏུནྣཾ ཁནྡྷཱནཾ ཨཔྤཝཏྟིཾ ཨནཝསེསགྒཧཎལཀྑཎཾ ནིརོདྷསམཱཔཏྟིཾ སམཱཔཛྫནྟཱིཏི.

དུཏིཡཀཱམབྷཱུསུཏྟཝཎྞནཱ ནིཊྛིཏཱ.

༧. གོདཏྟསུཏྟཝཎྞནཱ

༣༤༩. ནེསནྟི ¶ ཨཔྤམཱཎཙེཏོཝིམུཏྟི-ཨཱཀིཉྩཉྙཙེཏོཝིམུཏྟིསཉྙིཏཱནཾ ཛྷཱནཱནཾ. ཨཏྠོཔི ནཱནཱཏི ཨཱནེཏྭཱ ཡོཛནཱ. ཕརཎཨཔྤམཱཎཏཱཡ ‘‘ཨཔྤམཱཎཱ ཙེཏོཝིམུཏྟཱི’’ཏི ལདྡྷནཱམཾ བྲཧྨཝིཧཱརཛ྄ཛྷཱནནྟི ཨཱཧ ‘‘བྷཱུམནྟརཏོ’’ཏིཨཱདི. ཨཱཀིཉྩཉྙཱ ཙེཏོཝིམུཏྟཱིཏི ཨཱཀིཉྩཉྙཱཡཏནཛ྄ཛྷཱནནྟི ཨཱཧ ‘‘བྷཱུམནྟརཏོ’’ཏིཨཱདི. ཝིཔསྶནཱཏི ཨནིཙྩཱནུཔསྶནཱ, སབྦཱཔི ཝཱ. པམཱཎཀརཎོ ནཱམ ཡསྶ སཡཾ ཨུཔྤཛྫཏི, ཏསྶ གུཎཱབྷཱཝདསྶནཝསེན པམཱཎཀརཎཏོ.

ཕརཎཨཔྤམཱཎཏཱཡཱཏི ¶ ཕརཎཝསེན ཨཔྤམཱཎགོཙརཏཱཡ. ནིབྦཱནམྤི ཨཔྤམཱཎམེཝ པམཱཎགོཙརཱནཾ ཀིལེསཱནཾ ཨཱརམྨཎབྷཱཝསྶཔི ཨནཱགམནཏོ. ཁལནྟི ཁལེ པསཱརིཏསཱལིསཱིསཱདིབྷཎྜཾ. ཀིཉྩེཧཱིཏི མདྡསྶུ. ཏེནཱཧ ‘‘མདྡནཊྛོ’’ཏི. ཨཱརམྨཎབྷཱུཏཾ, པལིབུདྡྷཀཾ ཝཱ ནཏྠི ཨེཏསྶ ཀིཉྩནནྟི ཨཀིཉྩནཾ, ཨཀིཉྩནམེཝ ཨཱཀིཉྩཉྙཾ.

རཱུཔནིམིཏྟསྶཱཏི ཀསིཎརཱུཔནིམིཏྟསྶ. ན གཧིཏཱཏི སརཱུཔཏོ ན གཧིཏཱ, ཨཏྠཏོ པན གཧིཏཱ ཨེཝ. ཏེནཱཧ – ‘‘སཱ སུཉྙཱ རཱགེནཱཏིཨཱདིཝཙནཏོ སབྦཏྠ ཨནུཔཝིཏྠཱཝཱ’’ཏི.

ནཱནཱཏི སདྡཝསེན. ཨེཀཏྠཱཏི ཨཱརམྨཎཝསེན ཨཱརམྨཎབྷཱཝེན ཨེཀསབྷཱཝཱ. ཏེནཱཧ ‘‘ཨཔྤམཱཎཾ…པེ… ཨེཀཏྠཱ’’ཏི. ཨཱརམྨཎཝསེནཱཏི ཨཱརམྨཎསྶ ཝསེན. ཙཏྟཱརོ ཧི མགྒཱ, ཙཏྟཱརི ཕལཱནི ཨཱརམྨཎཝསེན ནིབྦཱནཔཝིཊྛཏཱཡ ཨེཀཏྠཱ ཨེཀཱརམྨཎཱ. ཨཉྙསྨིཾ པན ཋཱནེཏི ཨིདཾ ཝིསུཾ ཝིསུཾ གཧེཏྭཱ ཝུཏྟཾ ཨཔྤམཱཎཱདི པརིཡཱཡཝུཏྟཾ, ནིབྦཱནཾ ཨཱརབྦྷ པཝཏྟནཏོ. ཏསྨཱ ‘‘ཨཉྙསྨི’’ནྟི ཨིདཾ ཏེན ཏེན པརིཡཱཡེན ཏཏྠ ཏཏྠ ཨཱགཏབྷཱཝཾ སནྡྷཱཡ ཝུཏྟཾ.

གོདཏྟསུཏྟཝཎྞནཱ ནིཊྛིཏཱ.

༨. ནིགཎྛནཱཊཔུཏྟསུཏྟཝཎྞནཱ

༣༥༠. ཨཱགཏཱགམོཏི ཝཱཙུགྒཏཔརིཡཏྟིདྷམྨོ. ཝིཉྙཱཏསཱསནོཏི པཊིཝིདྡྷསཏྠུསཱསནོ. ཏེནཱཧ ‘‘ཨནཱགཱམཱི’’ཏིཨཱདི. ནགྒབྷོགྒནྟི ཨཝསནབྷཱཝེན ནགྒཾ, ཀུཊིལཛ྄ཛྷཱསཡཏཱཡ བྷོགྒཾ, ཏཏོ ཨེཝ ནིསྶིརིཀཾ. ནགྒཏཱཡ ཧི སོ རཱུཔེན ནིསྶིརིཀོ, བྷོགྒཏཱཡ ཙིཏྟེན. བྷགཝཏོ སདྡྷཱཡཱཏི བྷགཝཏི སདྡྷཱཡ. ཏསྨིཾ སདྡཧནཱ ཨོཀཔྤནཱ ཏསྶ སདྡྷཱཏིཔི ཝཏྟབྦཏཾ ལབྷཏི. གཙྪཱམཱིཏི ཨཱགཙྪཱམི, བུཛ྄ཛྷཱམཱིཏི ཨཏྠོ. ཨེཏཾ ནིགཎྛེན པུཙྪིཏམཏྠམཱཧ.

ཀཱཡཾ ¶ ཨུནྣཱམེཏྭཱཏི ཀཱཡཾ ཨབྦྷུནྣཱམེཏྭཱ. ཀུཙྪིཾ ནཱིཧརིཏྭཱཏི པིཊྛིཡཱ ནིནྣམནེན ཀུཙྪིཾ པུརཏོ ནཱིཧརིཏྭཱ. གཱིཝཾ པསཱརཎཝསེན པགྒཡ྄ཧ པགྒཧེཏྭཱ ¶ སབྦཾ དིསཾ པེཀྑམཱནོ. སབྦམིདཾ ནིགཎྛསྶ པཧཊྛཱཀཱརདསྶནཏྠཾ ‘‘ཨིདཱནི སམཎསྶ གོཏམསྶ ཨུཔརི ཝཱདཾ ཨཱརོཔེཏུཾ ལབྦྷཏཱི’’ཏི. ཏེནཱཧ ‘‘ཝཱཏཾ ཝཱ སོ’’ཏིཨཱདི. སཀཱརཎཱཏི ཡུཏྟིསཧིཏཱ. པཉྷམགྒོཏི པཉྷསངྑཱཏོ ཝཱིམཾསཱ, ཨེཝཾ བྷཝིཏབྦནྟི ཙིཏྟེནེཝ པརིཝཱིམཾསཱ པཉྷཱ. ཨེཀོ ཨུདྡེསོཏི ཨེཀཾ ཨུདྡིསནཾ ཨཏྠསྶ སཾཁིཏྟཝཙནཾ. ཝེཡྻཱཀརཎནྟི ནིདྡིསནཾ ཨཏྠསྶ ཝིཙཱརེཏྭཱ ཀཐནཾ. ཨེཝནྟི ཨིམིནཱ ནཡེན. སབྦཏྠཱཏི སབྦེསུ པཉྷུདྡེསཝེཡྻཱཀརཎེསུ ཨཏྠོ ཝིཏྠཱརཏོ ཝེདིཏབྦོ.

ནིགཎྛནཱཊཔུཏྟསུཏྟཝཎྞནཱ ནིཊྛིཏཱ.

༩. ཨཙེལཀསྶཔསུཏྟཝཎྞནཱ

༣༥༡. ཨལཾ སམཏྠོ ཨརིཡབྷཱཝཱཡཱཏི ཨལམརིཡོ. ཉེཡྻཛཱནནཊྛེན ཉཱཎམེཝ པཙྩཀྑཏོ དསྶནཊྛེན ཉཱཎདསྶནཾ, སོཡེཝ ཨཏིསཡཊྛེན ཉཱཎདསྶནཝིསེསོ. པཱཝལཱ༹ ཝུཙྩཏི ཨཱནིསདཔདེསོ, ཏཾ པཱཝལ༹ཾ རཛོཧརཎཏྠཾ ནིཔྥོཊཱིཡཏི ཨེཏཱཡཱཏི པཱཝལ༹ནིཔྥོཊནཱ, མོརཔིཉྪཝཏྟི.

ཨཙེལཀསྶཔསུཏྟཝཎྞནཱ ནིཊྛིཏཱ.

༡༠. གིལཱནདསྶནསུཏྟཝཎྞནཱ

༣༥༢. མཏྟརཱཛཱ ནཱམ ཨེཀོ བྷུམྨདེཝོ བྷཱུཏཱདྷིཔཏི སུརཱཔོཏལརུཀྑནིཝཱསཱི. ཏེན ཝུཏྟཾ ‘‘མཏྟརཱཛཀཱལེ’’ཏི. ‘‘ཨོསདྷིཏིཎཝནཔྤཏཱིསཱུ’’ཏི ཝཏྭཱ ཏེ ཡཐཱཀྐམཾ དསྶེནྟོ ‘‘ཧརཱིཏཀཱ…པེ… རུཀྑེསུ ཙཱ’’ཏི ཨཱཧ. པཏྠནཱཝསེན ཙིཏྟཾ ཋཔེཧི. སམིཛ྄ཛྷིསྶཏཱིཏི ཡཐཱདྷིཔྤཱཡཾ སམིཛ྄ཛྷིསྶཏི. ཏེན ཧཱིཏི ཡསྨཱ ཏཾ དེཝཱཔི ཨཱསནྣམརཎཾ མཉྙནྟི, ཏསྨཱ སཱ ཝརམེཝ བྷཝིསྶཏི, ཏཾ ཏུམྷཱཀཾ དཱིགྷརཏྟཾ ཧིཏཱཡ སུཁཱཡ བྷཝིསྶཏཱིཏི ཨདྷིཔྤཱཡོ.

གིལཱནདསྶནསུཏྟཝཎྞནཱ ནིཊྛིཏཱ.

ཙིཏྟསཾཡུཏྟཝཎྞནཱ ནིཊྛིཏཱ.

༨. གཱམཎིསཾཡུཏྟཾ

༡. ཙཎྜསུཏྟཝཎྞནཱ

༣༥༣. ‘‘ཡེན ¶ ¶ མིདྷེཀཙྩོ ཙཎྜོ ཙཎྜོཏྭེཝ སངྑཾ གཙྪཏཱི’’ཏི ཨེཝཾ པཉྷཔུཙྪནེན དྷམྨསངྒཱཧཀཏྠེརེཧི ཙཎྜོཏི གཧིཏནཱམོ. པཱཀཊཾ ཀརོཏཱིཏི དསྶེཏི ཨཏྟནོ ཙཎྜབྷཱཝཾ.

ཙཎྜསུཏྟཝཎྞནཱ ནིཊྛིཏཱ.

༢. ཏཱལཔུཊསུཏྟཝཎྞནཱ

༣༥༤. ཝཱལོཏི ཝུཙྩཏི ཏཱལོ, ཏསྶ ཏཱལཔུཊཾ ནཱམ. ཡཐཱ ཨཱམལཀཱིཕལསམཱནཀཾ, སོ པན ཏཱལསདིསམུཁཝཎྞཏྟཱ ཏཱལཔུཊོཏི ཨེཝཾནཱམཀོ. ཏེནཱཧ ‘‘ཏསྶ ཀིརཱ’’ཏིཨཱདི. ཨབྷིནཱིཧཱརསམྤནྣོ ཨནེཀེསུ ཀཔྤེསུ སམྦྷཏསཱཝཀབོདྷིསམྦྷཱརོ. ཏཐཱ ཧེས ཨསཱིཏིཡཱ མཧཱསཱཝཀེསུ ཨབྦྷནྟརོ ཛཱཏོ. སཧསྶཾ དེནྟི ནཙྩཾ པསྶིཏུཀཱམཱ. སམཛྫཝེསནྟི ནེཔཙྩཝེསཾ. ཀཱིལ༹ཾ ཀཏྭཱཏི ནཙྩཀཱིལི༹ཏཾ ཀཱིལི༹ཏྭཱ, ནཙྩིཏྭཱཏི ཨཏྠོ.

པུབྦེ ཏཐཱཔཝཏྟཝུཏྟནྟདསྶནེ སཙྩེན, ཏབྦིཔརིཡཱཡེ ཨལིཀེན. རཱགཔཙྩཡཱཏི རཱགུཔྤཏྟིཡཱ ཀཱརཎབྷཱུཏཱ. མུཁཏོ…པེ… དསྶནཱདཡོཏི ཨཱདི-སདྡེན མུཁཏོ ཨགྒིཛཱལནིཀྑམདསྶནཱདིཀེ སངྒཎྷཱཏི. ཨཉྙེ ཙ…པེ… ཨབྷིནཡཱཏི ཀཱམསྶཱདསཾཡུཏྟཱནཾ སིངྒཱརཧསྶཨབྦྷུཏརསཱནཉྩེཝ ‘‘ཨཉྙེ ཙཱ’’ཏི ཝུཏྟསནྟབཱིབྷཙྪརསཱནཉྩ དསྶནཀཱ ཨབྷིནཡཱ. དོསཔཙྩཡཱཏི དོསུཔྤཏྟིཡཱ ཀཱརཎབྷཱུཏཱ. ཧཏྠཔཱདཙྪེདཱདཱིཏི ཨཱདི-སདྡེན སངྒཧིཏཱནཾ རུདྡཝཱིརབྷཡཱནཀརསཱནཾ དསྶནཀཱ ཨབྷིནཡཱ. མོཧཔཙྩཡཱཏི མོཧུཔྤཏྟིཡཱ ཀཱརཎབྷཱུཏཱ. ཨེཝམཱདཡོཏི ཨཱདི-སདྡེན སངྒཧིཏཱནཾ ཀརུཎཱསནྟབྷཡཱནཀརསཱནཾ དསྶནཀཱ ཨབྷིནཡཱ. ཏེ ཧི རསེ སནྡྷཱཡ པཱལི༹ཡཾ ‘‘ཡེ དྷམྨཱ རཛནཱིཡཱ, ཡེ དྷམྨཱ དོསནཱིཡཱ, ཡེ དྷམྨཱ མོཧནཱིཡཱ’’ཏི ཙ ཝུཏྟཾ.

ནཊཝེསཾ ¶ གཧེཏྭཱཝ པཙྩནྟི ཀམྨསརིཀྑཝིཔཱཀཝསེན. ཏཾ སནྡྷཱཡཱཏི ཏཾ ཡཐཱཝུཏྟཾ ནིརཡེ པཙྩནཾ སནྡྷཱཡ. ཨེཏཾ ‘‘པཧཱསོ ནཱམ ནིརཡོ, ཏཏྠ ཨུཔཔཛྫཏཱི’’ཏི ཝུཏྟཾ. ཡཐཱ ལོཀེ ཨཏྠཝིསེསཝསེན སཀམྨཀཱནིཔི པདཱནི ཨཀམྨཀཱནི བྷཝནྟི ‘‘ཝིམུཙྩཏི པུརིསོ’’ཏི, ཨེཝཾ ཨིདྷ ཨཏྠཝིསེསཝསེན ཨཀམྨཀཾ སཀམྨཀཾ ཀཏྭཱ ཝུཏྟཾ – ‘‘ནཱཧཾ, བྷནྟེ, ཨེཏཾ རོདཱམཱི’’ཏི. ཀོ ¶ པན སོ ཨཏྠཝིསེསོ? ཨསཧནཾ ཨཀྑམནཾ, ཏསྨཱ ན རོདཱམི ན སཧཱམི, ན ཨཀྑམཱམཱིཏི ཨཏྠོ. རོདནཀཱརཎཉྷི ཨསཧནྟོ ཏེན ཨབྷིབྷཱུཏོ རོདཏི. ཏམེཝསྶ སཀམྨཀབྷཱཝསྶ ཀཱརཎབྷཱུཏཾ ཨཏྠཝིསེསཾ ‘‘ན ཨསྶུཝིམོཙནམཏྟེནཱ’’ཏི ཝུཏྟཾ. མཏཾ ཝཱ, ཨམྨ, རོདནྟཱིཏི ཨེཏྠཱཔི མཏཾ རོདནྟི, ཏསྶ མརཎཾ ན སཧནྟི, ནཀྑམནྟཱིཏི པཱཀཊོཡམཏྠོཏི.

ཏཱལཔུཊསུཏྟཝཎྞནཱ ནིཊྛིཏཱ.

༣-༥. ཡོདྷཱཛཱིཝསུཏྟཱདིཝཎྞནཱ

༣༥༥-༣༥༧. ཡུཛ྄ཛྷནཾ ཡོདྷོ, སོ ཨཱཛཱིཝོ ཨེཏསྶཱཏི ཡོདྷཱཛཱིཝོ. ཏེནཱཧ – ‘‘ཡུདྡྷེན ཛཱིཝིཀཾ ཀཔྤནཀོ’’ཏི, ཨུསྶཱཧཾ ཝཱཡཱམཾ ཀརོཏཱིཏི ཡུཛ྄ཛྷནཝསེན ཨུསྶཱཧཾ ཝཱཡཱམཾ ཀརོཏི. པརིཡཱཔཱདེནྟཱིཏི མརཎཔརིཡནྟིཀཾ ཨཱཔདཾ པཱཔེནྟི. ཏེནཱཧ ‘‘མརཎཾ པཊིཔཛྫཱཔེནྟཱི’’ཏི. དུཊྛུ ཋཔིཏནྟི དུཊྛཱཀཱརེན ཨཏྟནོ པརེསཉྩ ཨཏྠཱཝཧབྷཱཝཾ ན གཏཾ པཊིཔནྣཾ. པརེཧི སངྒཱམེ ཛིཏཱ ཧཏཱ ཨེཏྠ ཛཱཡནྟཱིཏི པརཛིཏོ ནཱམ ནིརཡོ. ཨསིདྷནུགདཱཡསངྐུཙཀྐཱནི པཉྩཱཝུདྷཱནི. ཏཾ སནྡྷཱཡཱཏི ཏཾ ཡོདྷཱཛཱིཝཾ པུགྒལཾ སནྡྷཱཡ. ཨེཏཾ ‘‘ཡོ སོ’’ཏིཨཱདི ཝུཏྟཾ. ཙཏུཏྠཔཉྩམེསཱུཏི ཧཏྠཱརོཧཨསྶཱརོཧསུཏྟེསུ. ཨེསེཝ ནཡོཏི ཨེསོ ཏཏིཡེ ཝུཏྟོ ཨེཝ ཨཏྠཏོ ཝིསེསཱབྷཱཝཏོ.

ཡོདྷཱཛཱིཝསུཏྟཱདིཝཎྞནཱ ནིཊྛིཏཱ.

༦. ཨསིབནྡྷཀཔུཏྟསུཏྟཝཎྞནཱ

༣༥༨. པཙྪཱབྷཱུམིཝཱསིནོཏི ¶ ཨཔརདེསཝཱསིནོ. ཨུདཀསུདྡྷིཀབྷཱཝཛཱནནཏྠཱཡཱཏི ཨཏྟནོ ཨུདཀསུདྡྷིཀབྷཱཝཾ ཛཱནནཏྠཉྩེཝ ལོཀསྶ ཙ ཨུདཀེན སུདྡྷི ཧོཏཱིཏི ཨིམསྶ ཨཏྠསྶ ཛཱནནཏྠཉྩ. ཨུཔརི ཡཱཔེནྟཱིཏི ཨུཔརི བྲཧྨལོཀཾ ཡཱཔེནྟི. སམྨཱ ཉཱཔེནྟཱིཏི སམྨཱ ཨུཛུཀཾཡེཝ སགྒཾ ལོཀཾ གམེནྟི. ཏེནཱཧ – ‘‘སགྒཾ ནཱམ ཨོཀྐཱམེནྟཱི’’ཏི, ཨཝཀྐཱམེནྟི ཨོགཱཧཱཔེནྟཱིཏི ཨཏྠོ. ཨནུཔརིགཙྪེཡྻཱཏི ཨནུཔརིཏོ གཙྪེཡྻ.

ཨསིབནྡྷཀཔུཏྟསུཏྟཝཎྞནཱ ནིཊྛིཏཱ.

༧. ཁེཏྟཱུཔམསུཏྟཝཎྞནཱ

༣༥༩. ཐདྡྷནྟི ཀཐིནཾ ལཱུཁཾ. ཨཱུསརནྟི ཨཱུསཛཱཏཾ. ཙཏཱུཧིཔི ཨོགྷེཧི ཨནབྷིབྷཝནཱིཡཏཱཡ ¶ ཨཧཾ དཱིཔོ. སབྦཔརིསྶཡེཧི ཨནབྷིབྷཝནཱིཡཏཱཡ ཨཧཾ ལེཎོ. སབྦདུཀྑཔརིཏྟཱསནཏོ ཏཱཡནཊྛེན ཨཧཾ ཏཱཎཾ. སབྦབྷཡཧིཾསནཏོ ཨཧཾ སརཎནྟི ཡོཛེཏབྦཾ.

ཨུདཀམཎིཀོཏི མཧནྟཾ ཨུདཀབྷཱཛནཾ. བཧི ཝིསྶནྡནཝསེན ཨུདཀཾ ན ཧརཏཱིཏི ཨཧཱརཱི, པརིཏོ ན པགྒྷརཏཱིཏི ཨཔརིཧཱརཱི. སཀྐཙྩམེཝ དེསེནྟི སདྡྷམྨགཱརཝསྶ སབྦསཏྟེསུ མཧཱཀརུཎཱཡ ཙ བུདྡྷཱནཾ སམཱནརསཏྟཱ. ཙཏསྶོ པན པརིསཱ སཏྠུགཱརཝེན ཨཏྟནོ ཙ སདྡྷཱསམྤནྣཏཱཡ སདྡཧིཏྭཱ ཨོཀཔྤེཏྭཱ སུཎནྟི, ཏསྨཱ ཏཱ དེསནཱཕལེན ཡུཛྫནྟི. ཀིཙྩསིདྡྷིཡཱ སཏྠུ དེསནཱ ཏཏྠ སཀྐཙྩདེསནཱ ནཱམ ཛཱཏཱ.

ཁེཏྟཱུཔམསུཏྟཝཎྞནཱ ནིཊྛིཏཱ.

༨. སངྑདྷམསུཏྟཝཎྞནཱ

༣༦༠. ‘‘ཡོ ཀོཙི པུརིསོ པཱཎཱཏིཔཱཏཱི མུསཱཝཱདཱི, སབྦོ སོ ཨཱཔཱཡིཀོ’’ཏི ཝཏྭཱ པུན ‘‘ཡཾབཧུལཾ ཡཾབཧུལཾ ཀརོཏི, ཏེན ¶ དུགྒཏིཾ གཙྪཏཱི’’ཏི ཝདནྟོ ཨཏྟནཱཝ ཨཏྟནོ ཝཱདཾ བྷིནྡཏི. ཨེཝཾ སནྟེཏི ཡདི བཧུསོ ཀཏེན པཱཔཀམྨེན ཨཱཔཱཡིཀོ, ‘‘ཡོ ཀོཙི པཱཎམཏིཔཱཏེཏཱི’’ཏིཨཱདིཝཙནཾ མིཙྪཱཏི. ཙཏྟཱརི པདཱནཱིཏི ‘‘ཡོ ཀོཙི པཱཎམཏིཔཱཏེཏཱི’’ཏིཨཱདིནཱ ནཡེན ཝུཏྟཱ ཙཏྟཱརོ ཨཏྠཀོཊྛཱསཱ. དིཊྛིཡཱ པཙྩཡཱ ཧོནྟི ‘‘ཨཏྠི ཁོ པན མཡཱ’’ཏིཨཱདིནཱ ཨཡོནིསོ ཨུམྨུཛྫནྟསྶ. བལསམྤནྣོཏི སམཏྠོ. སངྑདྷམཀོཏི སངྑསྶ དྷམནཀིཙྩེ ཚེཀོ. ཨདུཀྑེནཱཏི སུཁེན. ཨུཔཙཱརོཔི ཨཔྤནཱཔི ཝཊྚཏི ཨུབྷིནྣཾ སཱམཉྙཝཙནབྷཱཝཏོ. ཨཔྤམཱཎཀཏབྷཱཝོ ལབྦྷཏེཝ. ཏཐཱ ཧི ཏཾ ཀིལེསཱནཾ ཝིཀྑམྦྷནསམཏྠཏཱཡ དཱིགྷསནྟཱནཏཱཡ ཝིཔུལཕལཏཱཡ ཙ ‘‘མཧགྒཏ’’ནྟི ཝུཙྩཏི.

ན ཨོཧཱིཡཏཱིཏི ཡསྨིཾ སནྟཱནེ ཀཱམཱཝཙརཀམྨཾ, མཧགྒཏཀམྨཉྩ ཀཏཱུཔཙིཏཾ ཝིཔཱཀདཱནེ ལདྡྷཱཝསརཾ ཧུཏྭཱ ཋིཏཾ, ཏེསུ ཀཱམཱཝཙརཀམྨཾ ཨིཏརཾ ནཱིཧརིཏྭཱ སཡཾ ཏཏྠ ཨོཧཱིཡིཏྭཱ ཨཏྟནོ ཝིཔཱཀཾ དཱཏུཾ ན སཀྐོཏི, མཧགྒཏཀམྨམེཝ པན ཨིཏརཾ པཊིབཱཧིཏྭཱ ཨཏྟནོ ཝིཔཱཀཾ དཱཏུཾ སཀྐོཏི གརུབྷཱཝཏོ. ཏེནཱཧ ‘‘ཏཾ ཀཱམཱཝཙརཀམྨ’’ནྟིཨཱདི. ཀིལེསཝསེནཱཏི པཱཔཀམྨསྶ མཱུལབྷཱུཏཀིལེསཝསེན. པཱཎཱཏིཔཱཏཱདཡོ ཧི དོསམོཧལོབྷཱདིམཱུལཀིལེསསམུཊྛཱནཱ. ཀིལེསཝསེནཱཏི ཝཱ ཀམྨཀིལེསཝསེན. ཝུཏྟཉྷེཏཾ – ‘‘པཱཎཱཏིཔཱཏོ ཁོ, གཧཔཏིཔུཏྟ, ཀམྨཀིལེསོ’’ཏིཨཱདི (དཱི. ནི. ༣.༢༤༥). ཡཐཱནུསནྡྷིནཱཝ གཏནྟི ཡཐཱནུསནྡྷིསངྑཱཏཨནུསནྡྷིནཱ ¶ ཨོསཱནཾ གཏཾ སཾཀིལེསསམྨུཁེན ཨུཊྛིཏཱཡ ཝོདཱནདྷམྨཝསེན ནིཊྛཱཔིཏཏྟཱ.

སངྑདྷམསུཏྟཝཎྞནཱ ནིཊྛིཏཱ.

༩. ཀུལསུཏྟཝཎྞནཱ

༣༦༡. ཨེཝཾ པཝཏྟཨཱིཧིཏིཀཱཏི ཨེཝཾ དྭིདྷཱ པཝཏྟཨཱིཧིཏིཀཱ. དྭཱིཧིཏིཀཱ དུཀྐརཛཱིཝིཀཔཡོགཱ. སལཱཀམཏྟཾ ཝུཏྟཾ ཨེཏྠཱཏི སལཱཀཱ ཝུཏྟཱ, པུརིམཔདེ ཨུཏྟརཔདལོཔོ. ཨུབྷཏོཀོཊིཀནྟི ཡདི ‘‘ཀུལཱནུདཡཾ ན ཝཎྞེམཱི’’ཏི ཝདཏི, ‘‘བྷཱུཏཱ ནིཀྐརུཎཱ སམཎ ཏུམྷེ’’ཏི ཝཱདཾ ཨཱརོཔེཧི. ཨཐ ¶ སབྦདཱཔི ‘‘ཀུལཱནུདཡཾ ཝཎྞེམཱི’’ཏི ཝདཏི. ཨེཝཾ སནྟེ ‘‘ཀསྨཱ ཨེཝཾ དུབྦྷིཀྑེ ཀཱལེ མཧཏིཡཱ པརིསཱཡ པརིཝུཏོ ཛནཔདཙཱརིཀཾ ཙརནྟཱ ཀུལཱུཔཙྪེདཱཡ པཊིཔཛྫཐཱ’’ཏི ཨེཝཾ ཨུབྷཏོཀོཊིཀཾ ཝཱདཾ ཨཱརོཔེཧཱིཏི གཱམཎིཾ ཨུཡྻོཛེསི.

དྭེ ཨནྟེཏི ཨུབྷོ ཀོཊིཡོ. བཧི ནཱིཧརིཏུནྟི ན ཝཎྞེམི ཝཎྞེམཱིཏི དྭེ ཨནྟེ མོཙེནྟོ ཏཾ པུཙྪིཏམཏྠཾ བཧི ནཱིཧརཏི ནཱམ. ཏཏྠ དོསཾ དཏྭཱ ཙོདེནྟོ ཏཾ ཨཔུཙྪཾ ཀརོནྟོ གིལིཏྭཱ ཝིཡ ཨནྟོ པཝེསེཏི ནཱམ.

ཨིཏོ སོ གཱམཎཱིཏིཨཱདི ཨཏྟནོ བྷིཀྑཱུནཾ ཨཉྙེསཉྩ ཨཏྠཀཱམཱནཾ བྷིཀྑཔྤདཱནེན ཨནིཊྛཔྤཏྟིཨབྷཱཝདསྶནཏྠཾ ཨཱརདྡྷཾ. དཱནེན སམྦྷཱུཏཱནཱིཏི དཱནམཡེན པུཉྙཀིརིཡཝཏྠུནཱ སམྨདེཝ བྷཱུཏིཾ ཝཌྜྷིཾ པཏྟཱནི. སཙྩེན ཨརིཡཝོཧཱརེན སམྨདེཝ བྷཱུཏཱནི ཨུཔྤནྣཱནི སཙྩསམྦྷཱུཏཱནཱིཏི ཨཱཧ ‘‘སཙྩཾ ནཱམ སཙྩཝཱདིཏཱ’’ཏི. སེསསཱིལནྟི ཨཊྛཝིདྷཨརིཡཝོཧཱརཏོ ཨཉྙསཱིལཾ. ནིཧིཏནྟི ཏསྨིཾ ཀུལེ པུབྦཔུརིསེཧི ནིདྷཱནབྷཱཝེན ནིཧིཏཾ. དུཔྤཡུཏྟཱཏི ཀསིཝཱཎིཛྫཱདིཝསེན དུཊྛུ པཡུཏྟཱ ཀམྨནྟཱ. ཝིཔཛྫནྟཱིཏི ནསྶནྟི. ཀུལངྒཱརོཏི ཀུལསྶ ཨངྒཱརསདིསོ ཝིནཱསཀཔུགྒལོ. ཨནིཙྩཏཱཏི མརཎཾ. ཏསྨིཾ ཀུལེ པདྷཱནཔུརིསཱནཾ བྷོགཱནཾ ཝཱ སབྦསོ ཝིནཱསོ. ཏེནཱཧ ‘‘ཧུཏྭཱ ཨབྷཱཝོ’’ཏིཨཱདི.

ཀུལསུཏྟཝཎྞནཱ ནིཊྛིཏཱ.

༡༠. མཎིཙཱུལ༹ཀསུཏྟཝཎྞནཱ

༣༦༢. ཏཾ ¶ པརིསནྟི ཏཾ རཱཛནྟེཔུརེ ནིསིནྣཾ རཱཛཔརིསཾ. ནཡགྒཱཧེཏི ཀུཏོཙིཔི ཨསུཏྭཱ ཀེཝལཾ ཨཏྟནོ ཨེཝ མཏིཡཱ ནཡགྒཧཎེ ཋཏྭཱ.

ཀཱརེཏུཾ ཝཊྚཏི སཏི སམྦྷཝེ པཊིསངྑཱརསྶ, སེནཱསནཝིནཱསོ ན ཨཛ྄ཛྷུཔེཀྑིཏབྦོཏི ཨདྷིཔྤཱཡོ. ཨཏྟནོ ཨེཏྠ ཀིཙྩཱཝསཱནེ ཡཾ གིཧཱིནཾཡེཝ སནྟཀཾ ཏཱཝཀཱལིཀཾ, ཏཾ གིཧིཝིཀཏནྟི ཨཱཧ ‘‘གིཧིཝིཀཏཾ ཀཏྭཱ’’ཏི. ན ཝདཱམི པབྦཛྫིཏཱསཱརུཔྤཏོ.

མཎིཙཱུལ༹ཀསུཏྟཝཎྞནཱ ནིཊྛིཏཱ.

༡༡. བྷདྲཀསུཏྟཝཎྞནཱ

༣༦༣. ཨེཝཾནཱམཀེཏི ¶ མལླཱ ནཱམ ཛཱནཔདིནོ རཱཛཀུམཱརཱ, ནེསཾ ནིཝཱསཏཱཡ ‘‘མལླཱ’’ཨིཙྩེཝ བཧུཝཙནཝསེན ལདྡྷནཱམཏྟཱ ཨེཝཾནཱམཀེ ཛནཔདེ. ནཏྠི ཨེཏསྶ པཏྟིཡཱ ཀཱལནྟརསཉྙིཏོ ཀཱལོཏི ཨཀཱལོ, སོ ཨེཝ ཨཀཱལིཀོ. ཏེནཱཧ – ‘‘ཀཱལཾ ཨནཏིཀྐམིཏྭཱ པཏྟེནཱ’’ཏི. སོ པན ‘‘ཡཾཀིཉྩི དུཀྑཾ ཨུཔྤཛྫམཱནཾ ཨུཔྤཛྫཏི, སབྦཾ ཏཾ ཚནྡམཱུལཀ’’ནྟི ཨེཝཾ ཝུཏྟོ དུཀྑསྶ ཚནྡམཱུལབྷཱཝོ, ཨེཝཾ ཚནྡམཱུལཀསྶ དུཀྑསྶ ཀཐིཏཏྟཱ ‘‘ཨིམསྨིཾ སུཏྟེ ཝཊྚདུཀྑཾ ཀཐིཏ’’ནྟི ཝུཏྟཾ.

བྷདྲཀསུཏྟཝཎྞནཱ ནིཊྛིཏཱ.

༡༢. རཱསིཡསུཏྟཝཎྞནཱ

༣༦༤. རཱསིཾ ཀཏྭཱ མཱརཔཱསཝསེན, ཏཏྲཱཔི ཨནྟརབྷེདེན ཝིབྷཛིཏྭཱ པུཙྪིཏབྦཔཉྷེ ཨེཀཏོ རཱསིཾ ཀཏྭཱ. ཏཔནཾ ཨཏྟཔརིཏཱཔནཾ ཏཔོ, སོ ཨེཏསྶ ཨཏྠཱིཏི ཏཔསྶཱི, ཏཾ ཏཔསྶིཾ. སོ པན ཏཾ ཏཔཾ ནིསྶཱཡ ཋིཏོ ནཱམ ཧོཏཱིཏི ཝུཏྟཾ ‘‘ཏཔནིསྶིཏཀ’’ནྟི. སོ པན ཨནེཀཱཀཱརབྷེདེན ལཱུཁཾ ཕརུསཾ ཛཱིཝནསཱིལཏྟཱ ལཱུཁཛཱིཝཱི ནཱམ. ཏེནཱཧ ‘‘ལཱུཁཛཱིཝིཀ’’ནྟི. མཛ྄ཛྷིམཱཡ པཊིཔཏྟིཡཱ ཨུཔྤཐབྷཱཝེན ཨཝནིཡཱ གནྡྷབྦཱཏི ཨནྟཱ, ཏཏོ ཨེཝ ལཱམཀཏྟཱ ཨནྟཱ. ལཱམཀམྤི ‘‘ཨནྟོ’’ཏི ཝུཙྩཏི ‘‘ཨནྟམིདཾ, བྷིཀྑཝེ, ཛཱིཝིཀཱནཾ (ཨིཏིཝུ. ༩༡; སཾ. ནི. ༣.༨༠), ཨེཀོ ཨནྟོ’’ཏི ཨེཝམཱདཱིསུ (སཾ. ནི. ༢.༡༥; ༣.༩༠). ཨཊྛཀཐཱཡཾ པན ཨཉྙམཉྙཨཱདྷཱརབྷཱཝཾ ཨུརཱིཀཏྭཱ ‘‘ཀོཊྛཱསཱ’’ཏི ཝུཏྟཾ. ཧཱིནོ གཱམོཏི པཱལི༹. གཱམ-སདྡོ ¶ ཧཱིནཔརིཡཱཡོཏི ཨདྷིཔྤཱཡེནཱཧ ‘‘གཱམྨོ’’ཏི. གཱམེ བྷཝོཏི གཱམྨོ. གཱམ-སདྡོ ཙེཏྠ གཱམཝཱསིཝིསཡོ ‘‘གཱམོ ཨཱགཏོ’’ཏིཨཱདཱིསུ ཝིཡ. ཨཊྛཀཐཱཡཾ པན ‘‘གཱམཝཱསཱིནཾ དྷམྨོ’’ཏི ཝུཏྟཾ, ཏེསཾ ཙཱརིཏྟནྟི ཨཏྠོ. ཨཏྟ-སདྡོ ཨིདྷ སརཱིརཔརིཡཱཡོ ‘‘ཨཏྟནྟཔོ’’ཏིཨཱདཱིསུ ཝིཡཱཏི ཨཱཧ ‘‘སརཱིརདུཀྑཀརཎནྟི ཨཏྠོ’’ཏི.

ཨེཏྠཱཏི ¶ ཨེཏསྨིཾ ཏཔནིསྶིཏགརཧིཏབྦཔདེ ཀསྨཱ ཨནྟདྭཡམཛ྄ཛྷིམཔཊིཔདཱགཧཎཾ? ཨཏྟཀིལམཐཱནུཡོགོ ཏཱཝ གཡ྄ཧཏུ ཨིདམཏྠིཏཱཡཱཏི ཨདྷིཔྤཱཡོ. ཀཱམབྷོགཱིཏཔནིསྶིཏཀནིཛྫརཝཏྠཱུནཾ དསྶནེ ཡཐཱདྷིཔྤེཏསྶ ཨཏྠསྶ ཝིབྷཛིཏྭཱ ཀཐནཾ སམྦྷཝཏཱིཏི ཏེ དསྶེཏྭཱ ཨདྷིཔྤེཏཏྠོ ཀཐིཏོ.

ཏམཏྠནྟི ཡོ ‘‘ཀཱམབྷོགཱིཏཔནིསྶིཏཀེསུ གརཧིཏབྦེཡེཝ གརཧཏི, པསཾསིཏབྦེཡེཝ ཙ པསཾསཏཱི’’ཏི ཝུཏྟོ ཨཏྠོ, ཏམཏྠཾ པཀཱསེནྟོ. སཱཧསིཀཀམྨེནཱཏི ཨཡུཏྟེན ཀམྨེན. དྷམྨེན ཙ ཨདྷམྨེན ཙཱཏི དྷམྨིཀེན ཨདྷམྨིཀེན ཙ. ཨཡོནིསོ པཝཏྟཾ བཱཧིརཀཾ སནྡྷཱཡ ཙོདཀོ ‘‘ཀཐ’’ནྟིཨཱདིམཱཧ. ཨིཏརོ ནཡིདཾ ཏཱདིསཾ ཨཏྟཔརིཏཱཔནཾ ཨདྷིཔྤེཏཾ, ཨཐ ཁོ ཡོནིསོ པཝཏྟཾ སཱསནིཀམེཝཱཏི དསྶེནྟོ ‘‘ཙཏུརངྒཝཱིརིཡཝསེན ཙཱ’’ཏི ཨཱཧ. ཏཏྠ ‘‘ཀཱམཾ ཏཙོ ཙ ནྷཱརུ ཙ ཨཊྛི ཙ ཨཝསིསྶཏཱུ’’ཏིཨཱདིནཱ (མ. ནི. ༢.༡༨༤; སཾ. ནི. ༢.༢༢.༢༣༧; ཨ. ནི. ༢.༥) ནཡེན ཝུཏྟཱ སརཱིརེནིརཔེཀྑཝིཔསྶནཱཡ ཨུསྶུཀྐཱཔནཝསེན པཝཏྟཱ ཝཱིརིཡབྷཱཝནཱ ‘‘ཙཏུརངྒཝཱིརིཡཝསེནཱ’’ཏི ཝུཏྟཱ. ཏཐཱ ཨབྦྷོཀཱསིཀནེསཛྫིཀཏཔཱདིནིསྶིཏཱཝ ཀིལེསནིམྨཐནཡོགྱཱ ཝཱིརིཡབྷཱཝནཱ ‘‘དྷུཏངྒཝསེན ཙཱ’’ཏི ཝུཏྟཱཏི. ཨརིཡམགྒེན ནིསྶེསཀིལེསཱནཾ པཛཧནཱ ནིཛྫརཱ. སཱ ཙ ཨཏྟཔཙྩཀྑཏཱཡ སནྡིཊྛིཀཱ ཏིཎྞཾ མཱུལཀིལེསཱནཾ པཛཧནེན ‘‘ཏིསྶོ’’ཏི ཙ ཝུཏྟཱ. ཏེནཱཧ ‘‘ཨེཀོཔཱི’’ཏིཨཱདི.

རཱསིཡསུཏྟཝཎྞནཱ ནིཊྛིཏཱ.

༡༣. པཱཊལིཡསུཏྟཝཎྞནཱ

༣༦༥. ‘‘མཱཡཉྩཱཧཾ པཛཱནཱམཱི’’ཏི ཝཙནཾ ཀཱམཾ ཏེསཾ མཱཡཱཝཱིབྷཱཝདསྶནཔརཾ, བྷགཝཏོ པན མཱཡཱསཱཋེཡྻཱདིཀསྶ སབྦསྶ པཱཔདྷམྨསྶ བོདྷིམཱུལེ ཨེཝ སེཏུགྷཱཏོ, ཏསྨཱ སབྦསོ པཧཱིནམཱཡོ, སབྦཉྙུཏཱཡ མཱཡཾ ཨཉྙེ ཙ ཉེཡྻེ སབྦསོ ཛཱནཱཏི. ཏེན ཝུཏྟཾ ‘‘མཱཡཉྩཱཧཾ, གཱམཎི, པཛཱནཱམཱི’’ཏིཨཱདི. མཱཡཉྩ པཛཱནཱམཱིཏི ན ཀེཝལམཧཾ མཱཡཾ ཨེཝ ཛཱནཱམི, ཨཐ ཁོ ཨཉྙམྤི ཨིདཉྩིདཉྩ ཛཱནཱམཱིཏི.

ཨིཏྠིཀཱམེཧཱིཏི ¶ ¶ ཨིཏྠཱིཧི ཙེཝ ཏདཉྙཀཱམེཧི ཙ. ཨེཀསྨིཾ ཋཱནེཏི ཨེཀསྨིཾ པདེསེ. ཨེཀེཀསྶེཝ ཨཱགནྟུཀསྶ གཧཊྛསྶ ཝཱ པབྦཛིཏསྶ ཝཱ. སཏྟིཨནུརཱུཔེནཱཏི ཝིབྷཝསཏྟིཨནུརཱུཔེན. བལཱནུརཱུཔེནཱཏི པརིཝཱརབལཱནུརཱུཔེན. སཏྟིཨནུརཱུཔེནཱཏི ཝཱ སདྡྷཱསཏྟིཨནུརཱུཔེན. བལཱནུརཱུཔེནཱཏི ཝིབྷཝབལཱནུརཱུཔེན. དྷམྨེསུ སམཱདྷི དསཀུསལདྷམྨེསུ སམཱདྷཱནཾ. ཨགྒཧིཏཙིཏྟཏཱ པརིཡུཊྛཀཱརིཏཱ. ཏེན ལོཀིཡསཱིལཝིསུདྡྷི དིཊྛིཝིསུདྡྷི ཙ ཝུཏྟཱ. ཏཐཱ ཙཱཧ – ‘‘ཀོ ཙཱདི ཀུསལཱནཾ དྷམྨཱནཾ, སཱིལཉྩ སུཝིསུདྡྷཾ དིཊྛི ཙ ཨུཛུཀཱ’’ཏི (སཾ. ནི. ༥.༣༦༩). ཏཏྠ པཏིཊྛིཏསྶ ཨུཔརི ཀཏྟབྦཾ དསྶེཏུཾ ‘‘དྷམྨསམཱདྷིསྨིཾ ཋིཏོ’’ཏིཨཱདི ཝུཏྟཾ. ཨཡཾ པཊིཔདཱཏི ཏསྶ ཀམྨཕལཝཱདིནོ སཏྠུ ཝཙནཾ སབྦེསཉྩ ཨཡཾ མཡ྄ཧཾ སཱིལསཾཝརབྲཧྨཝིཧཱརབྷཱཝནཱསངྑཱཏཱཔཊིཔདཱ ཨནཔརཱདྷཀཏཱཡ ཨེཝ སཾཝཏྟཏི. ཛཡགྒཱཧོཏི ཨུབྷཡཐཱཔི མཡ྄ཧཾ ཀཱཙི ཛཱནི ནཏྠི.

པཉྩ དྷམྨཱ དྷམྨསམཱདྷི ནཱམ, ཝིཔསྶནཱམགྒཕལདྷམྨམཏྟཾ ཝཱ. ཏཏིཡཝིཀཔྤེ སཱིལཱདིཝིསུདྡྷིཡཱ སདྡྷིཾ བྲཧྨཝིཧཱརཱ ཡཐཱཝུཏྟཏིཝིདྷདྷམྨཱཝཧཏྟཱ ཨེཝ དྷམྨསམཱདྷི ནཱམ. པཱུརེནྟསྶ ཨུཔྤནྣཱ ཙིཏྟེཀགྒཏཱཏི ཝུཏྟཁཎིཀཙིཏྟེཀགྒཏཱ. སཱཔི ཙིཏྟསྶ སམཱདྷཱནཏོ ‘‘ཙིཏྟསམཱདྷཱི’’ཏི ཝུཏྟཱ, ཏསྶ པཊིཔཀྑཾ ཝིཀྑམྦྷནྟཱི སམུཙྪིནྡནྟཱི ཙ ཧུཏྭཱ པཝཏྟཱ ཡཐཱཝུཏྟསམཱདྷི ཨེཝ ཝིསེསེན ཙིཏྟསམཱདྷི ནཱམ.

པཱཊལིཡསུཏྟཝཎྞནཱ ནིཊྛིཏཱ.

གཱམཎིསཾཡུཏྟཝཎྞནཱ ནིཊྛིཏཱ.

༩. ཨསངྑཏསཾཡུཏྟཾ

༡. པཋམཝགྒོ

༡-༡༡. ཀཱཡགཏཱསཏིསུཏྟཱདིཝཎྞནཱ

༣༦༦-༣༧༦. ཨསངྑཏནྟི ¶ ¶ ན སངྑཏཾ ཧེཏུཔཙྩཡེཏི. ཏེནཱཧ ‘‘ཨཀཏ’’ནྟི. ཧིཏཾ ཨེསནྟེནཱཏི མེཏྟཱཡནྟེན. ཨནུཀམྤམཱནེནཱཏི ཀརུཎཱཡནྟེན. ཨུཔཱདཱཡཱཏི ཨཱདིཡིཏྭཱཏི ཨཡམཏྠོཏིཨཱཧ ‘‘ཙིཏྟེན པརིགྒཧེཏྭཱ’’ཏི. ཨཝིཔརཱིཏདྷམྨདེསནཱཏི ཨཝིཔརཱིཏདྷམྨསྶ དེསནཱ, པཊིཔཏྟིམྤི སཱཝཀཱ ཝིཡ གརུཀོ བྷགཝཱ. དཱཡཛྫཾ ཨཏྟནོ ཨདྷིཊྛིཏཾ ནིཡྻཱཏེཏི.

བྷིཀྑཱསམྤཏྟིཀཱལཱདཱིནཾ སཏྟནྣཾ སཔྤཱཡཱནཾ སམྤཏྟིཡཱ ལབྦྷནཀཱལེ. ཝིཔཏྟིཀཱལེ པན ཨེཏྠ ཝུཏྟཝིཔརིཡཱཡེན ཨཏྠོ ཝེདིཏབྦོ. བྷཱརིཡནྟི དུཀྑབཧུལཏཱཡ དཱརུཎཾ. ཨམྷཱཀཾ སནྟིཀཱ ལདྡྷབྦཱ. ཏུམྷཱཀཾ ཨནུསཱསནཱིཏི ཏུམྷཱཀཾ དཱཏབྦཱ ཨནུསཱསནཱི.

ཀཱཡགཏཱསཏིསུཏྟཱདིཝཎྞནཱ ནིཊྛིཏཱ.

༢. དུཏིཡཝགྒོ

༢༣-༣༣. ཨསངྑཏསུཏྟཱདིཝཎྞནཱ

༣༧༧-༤༠༩. ཏཏྠ ཙ ནཏྠི ཨེཏྠ ཏཎྷཱསངྑཱཏཾ ནཏཾ, ནཏྠི ཨེཏསྨིཾ ཝཱ ཨདྷིགཏེ པུགྒལབྷཱཝོཏི ཨནཏཾ. ཨནཱསཝནྟི ཨེཏྠཱཔི ཨེསེཝ ནཡོ. སཙྩདྷམྨཏཱཡ སཙྩཾ. ཝཊྚདུཀྑཏོ པཱརམེཏཱིཏི པཱརཾ. སཎྷཊྛེནཱཏི སུཁུམཊྛེན ནིཔུཎཾ. ཏཏོ ཨེཝ དུདྡསཏཱཡ. ཨཛཛྫརཾ ནིཙྩསབྷཱཝཏྟཱ. ནཏྠི ཨེཏསྶ ནིདསྶནནྟི ཝཱ ཨནིདསྶནཾ. ཨེཏསྨིཾ ཨདྷིགཏེ ནཏྠི སཾསཱརེ. པཔཉྩནྟི ཝཱ ནིཔྤཔཉྩཾ.

ཨེཏསྨིཾ ¶ ¶ ཨདྷིགཏེ པུགྒལསྶ མརཎཾ ནཏྠཱིཏི ཝཱ ཨམཏཾ. ཨཏཔྤཀཊྛེན ཝཱ པཎཱིཏཾ. སུཁཧེཏུཏཱཡ ཝཱ སིཝཾ. ཏཎྷཱ ཁཱིཡནྟི ཨེཏྠཱཏི ཏཎྷཀྑཡཾ.

ཨཉྙསྶ ཏཱདིསསྶ ཨབྷཱཝཏོ ཝིམྷཱཔནཱིཡཏཱཡ ཨབྷཱུཏམེཝཱཏི. ཀུཏོཙི པཙྩཡཏོ ཨནིབྦཏྟམེཝ ཧུཏྭཱ བྷཱུཏཾ ཝིཛྫམཱནཾ. ཏེནཱཧ ‘‘ཨཛཱཏཾ ཧུཏྭཱ ཨཏྠཱི’’ཏི. ནཏྠི ཨེཏྠ དུཀྑནྟི ནིདྡུཀྑཾ, ཏསྶ བྷཱཝོ ནིདྡུཀྑཏྟཾ. ཏསྨཱ ཨནཱིཏིཀཾ ཨཱིཏིརཧིཏཾ. ཝཱནཾ ཝུཙྩཏི ཏཎྷཱ, ཏདབྷཱཝེན ནིབྦཱནཾ. བྱཱབཛ྄ཛྷཾ ཝུཙྩཏི དུཀྑཾ, ཏདབྷཱཝེན ཨབྱཱབཛ྄ཛྷཾ. པརམཏྠཏོ སཙྩཏོ སུདྡྷིབྷཱཝེན. ཀཱམཱ ཨེཝ པུཐུཛྫནེཧི ཨལླཱིཡིཏབྦཏོ ཨཱལཡཱ. ཨེས ནཡོ སེསེསུཔི. པཏིཊྛཊྛེནཱཏི པཏིཊྛཱབྷཱཝེན ཝཊྚདུཀྑཏོ མུཙྩིཏུཀཱམཱནཾ དཱིཔསདིསཾ ཨོགྷེཧི ཨནཛ྄ཛྷོཏྠརཎཱིཡཏྟཱ. ཨལླཱིཡིཏབྦཡུཏྟཊྛེནཱཏི ཨལླཱིཡིཏུཾ ཨརཧབྷཱཝཏོ. ཏཱཡནཊྛེནཱཏི སཔརཏཱཡནཊྛེན. བྷཡསརཎཊྛེནཱཏི བྷཡསྶ ཧིཾསནཊྛེན. སེཊྛཾ ཨུཏྟམཾ. གཏཱིཏི གནྡྷབྦཊྛཱནཾ.

ཨསངྑཏསུཏྟཱདིཝཎྞནཱ ནིཊྛིཏཱ.

ཨསངྑཏསཾཡུཏྟཝཎྞནཱ ནིཊྛིཏཱ.

༡༠. ཨབྱཱཀཏསཾཡུཏྟཾ

༡. ཁེམཱསུཏྟཝཎྞནཱ

༤༡༠. བིམྦིསཱརསྶ ¶ ¶ ཨུཔཱསིཀཱཏི བིམྦིསཱརསྶ ཨོརོདྷབྷཱུཏཱ ཨུཔཱསིཀཱ. པཎྜིཙྩཾ སིཀྑིཏབྷཱཝེན. ཝེཡྻཏྟིཡཾ ཝིསཱརདབྷཱཝེན. ཝིསཱརདཱ ནཱམ ཏིཧེཏུཀཔཊིསནྡྷིསིདྡྷསཱབྷཱཝིཀཔཉྙཱ, ཏཱཡ སམནྣཱགཏཱ.

ཨཙྪིདྡཀགཎནཱཡ ཀུསལོཏི ནཝནྟགཎནཱཡ ཀུསལོ. ཨངྒུལིམུདྡཱཡ གཎནཱཡ ཀུསལོཏི ཨངྒུལིཀཱཡ ཨེཝ གཎནཱཡ ཀུསལོ སེཡྻཐཱཔི པཱདསིཀཱ. པིཎྜགཎནཱཡཱཏི སངྐལནཔཊུཔྤནྣཀཱརིནོ པིཎྜཝསེན གཎནཱ. ཏཐཱགཏོཏི ཁཱིཎཱསཝོ, ཏཐཱགཏཾ སནྡྷཱཡ པུཙྪཏཱིཏི ཁཱིཎཱསཝོཏི ཙསྶ ཨརཧཏྟཕལཝསིབྷཱཝིཏཁནྡྷེ ཨུཔཱདཱཡ ཨཡཾ པཉྙཏྟི ཧོཏི. ཏེསུ ཁནྡྷེསུ སཏི ཁཱིཎཱསཝཱ སཏྟསངྑཱཏཱ ཧོནྟཱིཏི ཝོཧཱརེན པཉྙཔེཏུཾ སཀྐཱ བྷཝེཡྻ, ཨསནྟེསུ ན སཀྐཱ, ཏསྨཱ པརཾ མརཎཱཏི ཝུཏྟཏྟཱ ཏེསཾ ཨབྷཱཝཱ ‘‘ཨབྱཱཀཏམེཏ’’ནྟི ཝུཏྟཾ. ཡདི ཨེཝཾ ཏེསཾ ཨབྷཱཝཏོ ‘‘ན ཧོཏི ཏཐཱགཏོ པརཾ མརཎཱ’’ཏི པུཊྛཱཡ ‘‘ཨཱམཱ’’ཏི པཊིཛཱནིཏབྦཱ སིཡཱ, ཏཾ པན སཏྟསངྑཱཏསྶ པུཙྪིཏཏྟཱ ན པཊིཉྙཱཏནྟི དཊྛབྦཾ. ཡེན རཱུཔེནཱཏི སཏྟཏཐཱགཏེ ཝུཏྟརཱུཔཾ སབྦཉྙུཏཐཱགཏེ པཊིཀྑིཔིཏུཾ ‘‘ཏཾ རཱུཔ’’ནྟིཨཱདི ཝུཏྟཾ. ཡཾ ཨུཔཱདཱཡཱཏི ཡཾ ཁནྡྷཔཉྩཀཾ ཨུཔཱདཱཡ. ཏདབྷཱཝེནཱཏི ཏསྶ ཁནྡྷཔཉྩཀསྶ ཨབྷཱཝེན. ཏསྶཱ པཉྙཏྟིཡཱཏི སཏྟཔཉྙཏྟིཡཱ ཨབྷཱཝཾ. ནིརུདྡྷཾ ན ནིདསྶེཏི.

ཁེམཱཡ ཐེརིཡཱ ཝུཏྟཾ པཋམཾ སུཏྟཾ བྷགཝཏོ སེཊྛཏྠདཱིཔནཏོ ཨགྒཔདཱཝཙརཾཝ ཧོཏཱིཏི ཝུཏྟཾ ‘‘ཨགྒཔདསྨི’’ནྟི.

ཁེམཱསུཏྟཝཎྞནཱ ནིཊྛིཏཱ.

༢. ཨནུརཱདྷསུཏྟཝཎྞནཱ

༤༡༡. ཨིདྷ སལཱ༹ཡཏནཝགྒེ སངྒཱཡནཝསེན སངྒཱིཏིཀཱརེཧི ཝུཏྟཾ.

༣-༨. པཋམསཱརིཔུཏྟཀོཊྛིཀསུཏྟཱདིཝཎྞནཱ

༤༡༢-༤༡༧. རཱུཔམཏྟནྟི ¶ ¶ ཨེཏྠ མཏྟ-སདྡོ ཝིསེསནིཝཏྟིཨཏྠོ. ཀོ པན སོ ཝིསེསོཏི? ཡོ བཱཧིརཔརིཀཔྤིཏོ ཨིདྷ ཏཐཱགཏོཏི ཝུཙྩམཱནོ ཨཏྟཱ. ཨནུཔལབྦྷིཡསབྷཱཝོཏི ཨནུཔལབྦྷིཡཏྟཱ.

པཋམསཱརིཔུཏྟཀོཊྛིཀསུཏྟཱདིཝཎྞནཱ ནིཊྛིཏཱ.

༩. ཀུཏཱུཧལསཱལཱསུཏྟཝཎྞནཱ

༤༡༨. ནཱནཱཝིདྷནྟི ཏཾཏཾདིཊྛིཝཱདཔཊིསཾཡུཏྟཾ ཨཉྙམྤི ཝཱ ནཱནཱཝིདྷཾ ཏིརཙྪཱནཀཐཾ. བཧཱུནཾ ཀུཏཱུཧལུཔྤཏྟིཊྛཱནཏོཏི ཡོཛནཱ. ཡཱཝ ཨཱབྷསྶརབྲཧྨལོཀཱ གཙྪཏཱིཏི ཨགྒིནཱ ཀཔྤཝུཊྛཱནཀཱལེ གཙྪཏི, ཏཾ སནྡྷཱཡ ཝུཏྟཾ. ཨིམཉྩ ཀཱཡནྟི ཨིམཾ རཱུཔཀཱཡཾ. ཙུཏིཙིཏྟེན ནིཀྑིཔཏཱིཏི ཙུཏིཙིཏྟེན བྷིཛྫམཱནེན ནིཀྑིཔཏི. ཙུཏིཙིཏྟསྶ ཧི ཨོརཾ སཏྟརསམསྶ ཙིཏྟསྶ ཨུཔྤཱདཀྑཎེ ཨུཔྤནྣཾ ཀམྨཛརཱུཔཾ ཙུཏིཙིཏྟེན སདྡྷིཾ ནིརུཛ྄ཛྷཏི, ཏཏོ པརཾ ཀམྨཛརཱུཔཾ ན ཨུཔྤཛྫཏི. ཡདི ཨུཔྤཛྫེཡྻ, མརཎཾ ན སིཡཱ, ཙུཏིཙིཏྟཾ རཱུཔཾ ན སམུཊྛཱཔེཏི, ཨཱཧཱརཛསྶ ཙ ཨསམྦྷཝོ ཨེཝ, ཨུཏུཛཾ པན ཝཏྟཏེཝ. ཡསྨཱ པཊིསནྡྷིཀྑཎེ སཏྟོ ཨཉྙཏརཎཱཡ ཨུཔཔཛྫཏི ནཱམ, ཙུཏིཀྑཎེ པཊིསནྡྷིཙིཏྟཾ ཨལདྡྷཾ ཨཉྙཏརཎཱཡ, ཏསྨཱ ཝུཏྟཾ ‘‘ཙུཏིཀྑཎེ…པེ… ཧོཏཱི’’ཏི.

ཀུཏཱུཧལསཱལཱསུཏྟཝཎྞནཱ ནིཊྛིཏཱ.

༡༠. ཨཱནནྡསུཏྟཝཎྞནཱ

༤༡༩. ཏེསཾ ལདྡྷིཡཱཏི ཏེསཾ སསྶཏཝཱདཱནཾ ལདྡྷིཡཱ སདྡྷིཾ ཨེཏཾ ‘‘ཨཏྠཏྟཱ’’ཏི ཝཙནཾ ཨེཀཾ ཨབྷཝིསྶ. ཏཏོ ཨེཝ ཨནུལོམཾ ཏཾ ནཱབྷཝིསྶ ཉཱཎསྶཱཏི ཨསཱརཾ ཨེཏནྟི ཨདྷིཔྤཱཡོ. ཨཔི ནུ མེཏསྶཱཏི མེ ཨེཏསྶ ཨནཏྟཱཏི ཝིཔསྶནཱཉཱཎསྶ ཨནུལོམཾ ཨཔི ནུ ཨབྷཝིསྶ, ཝིལོམཀམེཝ ཏསྶ སིཡཱཏི ཨཏྠོ.

ཨཱནནྡསུཏྟཝཎྞནཱ ནིཊྛིཏཱ.

༡༡. སབྷིཡཀཙྩཱནསུཏྟཝཎྞནཱ

༤༢༠. ཡསྶཔ’སྶཱཏི ¶ ¶ པཱཋསྶ ཨཡཾ པིཎྜཏྠོ ‘‘ཨཱཝུསོ’’ཏིཨཱདི. ཏཏྠཱཡཾ སམྦནྡྷོ – ཨཱཝུསོ, ཡསྶཔི པུགྒལསྶ ཏཱིཎི ཝསྶཱནི ཝུཊྛོ, ཨེཏྟཀེན ཀཱལེན ‘‘ཧེཏུམྷི སཏི རཱུཔཱིཏིཨཱདིཔཉྙཱཔནཱ ཧོཏི, ཨསཏི ན ཧོཏཱི’’ཏི ཨེཏྟཀཾ བྱཱཀརཎཾ བྷཝེཡྻ, ཏསྶ པུགྒལསྶ ཨེཏྟཀམེཝ བཧུ, ཀོ པན ཝཱདོ ཨཏིཀྐནྟེ! ཨིཏོ ཨཏིཀྐནྟེ དྷམྨདེསནཱནཡེ ཝཱདོཡེཝ ཝཏྟབྦམེཝ ནཏྠཱིཏི ཐེརསྶ པཉྷབྱཱཀརཎཾ སུཏྭཱ པརིབྦཱཛཀོ པཱིཏིསོམནསྶཾ པཝེདེསི.

སབྷིཡཀཙྩཱནསུཏྟཝཎྞནཱ ནིཊྛིཏཱ.

ཨབྱཱཀཏསཾཡུཏྟཝཎྞནཱ ནིཊྛིཏཱ.

སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ

སལཱ༹ཡཏནཝགྒཝཎྞནཱཡ ལཱིནཏྠཔྤཀཱསནཱ སམཏྟཱ.