📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

སཾཡུཏྟནིཀཱཡེ

མཧཱཝགྒཊཱིཀཱ

༡. མགྒསཾཡུཏྟཾ

༡. ཨཝིཛྫཱཝགྒོ

༡-༢. ཨཝིཛྫཱསུཏྟཱདིཝཎྞནཱ

༡-༢. པུབྦངྒམཱཏི ¶ ¶ པུབྦེཙརཱ. ཨཝིཛྫཱ ཧི ཨཉྙཱཎལཀྑཎཱ སམྨུཡ྄ཧནཱཀཱརེན ཨཱརམྨཎེ པཝཏྟཏཱིཏི སམྤཡུཏྟདྷམྨཱནམྤི ཏདཱཀཱརཱནུཝིདྷཱནཏཱཡ པཙྩཡོ ཧོཏི. ཏཐཱ ཧི ཏེ ཨནིཙྩཱསུབྷདུཀྑཱནཏྟསབྷཱཝེཔི དྷམྨེ ནིཙྩཱདིཏོ གཎྷནྟི, ཨཡམསྶཱ ཏེསཾ སཧཛཱཏཝསེན པུབྦངྒམཏཱ. ཡཾ པན མོཧེན ཨབྷིབྷཱུཏོ པཱཔཀིརིཡཱཡ ཨཱདཱིནཝཾ ཨཔསྶནྟོ པཱཎཾ ཧནཏི, ཨདིནྣཾ ཨཱདིཡཏི, ཀཱམེསུ མིཙྪཱ ཙརཏི, མུསཱ བྷཎཏི, ཨཉྙམྤི ཝིཝིདྷཾ དུསྶཱིལྱཾ ཨཱཙརཏི, ཨཡམསྶ སཧཛཱཏཝསེན ཙ ཨུཔནིསྶཡཝསེན ཙ པུབྦངྒམཏཱ. སམཱཔཛྫནཱཡཱཏི ཏབྦྷཱཝཱཔཛྫནཱཡ ¶ ཨཀུསལཔྤཏྟིཡཱ. སབྷཱཝཔཊིལཱབྷཱཡཱཏི ཨཏྟལཱབྷཱཡ. ཏེནཱཧ ‘‘ཨུཔྤཏྟིཡཱ’’ཏི. སཱ པནེསཱ ཝུཏྟཱཀཱརེན ཨཀུསལཱནཾ པུབྦངྒམབྷཱུཏཱ ཨཝིཛྫཱ ཨུཔྤཛྫཏཱིཏི སམྦནྡྷོ. ཡདེཏནྟི ཡཾ ཨེཏཾ པཱཔཱཛིགུཙྪནཏཱཡ པཱཔཏོ ཨལཛྫནཱཀཱརསཎྛིཏཾ ཨཧིརིཀཾ, པཱཔཱནུཏྲཱསཏཱཡ པཱཔཏོ ཨབྷཱཡནཱཀཱརསཎྛིཏཉྩ ཨནོཏྟཔྤཾ, ཨེཏཾ ¶ དྭཡཾ ཨནུདེཝ ཨནྭཱགཏམེཝ. ཨནུ-སདྡེན ཙེཏྠ ཨེཏནྟི ཨུཔཡོགཝཙནཾ. ཨནུདེཝཱཏི ཨེཏསྶ ཨཏྠོ སཧེཝ ཨེཀཏོཏི. ཨེཏྠ ཨཝིཛྫཱཡ ཝུཏྟནཡཱནུསཱརེན ཏཔྤཊིཔཀྑཏོ ཙ ཨཏྠོ ཝེདིཏབྦོ. ཨཡཾ པན ཝིསེསོ – ཏཏྠ ཡཐཱ ཨཀུསལཀམྨཔཐཝསེན པཝཏྟིཡཾ པུབྦངྒམཏཱ ཨཝིཛྫཱཡ, ཨེཝཾ ཀུསལཀམྨཔཐཝསེན པུཉྙཀིརིཡཝཏྠུཝསེན ཙ པཝཏྟིཡཾ ཝིཛྫཱཡ པུབྦངྒམཏཱ ཝཏྟབྦཱ. ཝཱིམཾསཱདྷིཔཏིཝསེན པཝཏྟིཡཾ ཨཱདྷིཔཙྩཱཀཱརཝསེན ཙ པུབྦངྒམཏཱ ཝེདིཏབྦཱ. དྭཱིཧེཝཱཏི ཙ ཨཝདྷཱརཎཾ ཨཱདྷིཔཙྩཱཀཱརསྶ སཧཛཱཏེནེཝ སངྒཧེཏབྦཏོ.

ལཛྫནཱཀཱརསཎྛིཏཱཏི པཱཔཏོ ཛིགུཙྪནཱཀཱརསཎྛིཏཱ. བྷཱཡནཱཀཱརསཎྛིཏནྟི ཨུཏྟསནཱཀཱརསཎྛིཏཾ. ཨེཏྠཱཏི ཧིརིཨོཏྟཔྤེ. ཝིདཏི, ཝིནྡཏཱིཏི ཝཱ ཝིཛྫཱ. ཝིདྡསཱུཏི ཙ སཔྤཉྙཔརིཡཱཡོཏི ཨཱཧ ‘‘ཝིདྡསུནོཏི ཝིདུནོ’’ཏི. ཡཱཐཱཝདིཊྛཱིཏི ཨཝིཔརཱིཏཱ དིཊྛི, སཾཀིལེསཏོ ནིཡྻཱནིཀདིཊྛི. སམྨཱདིཊྛི པཧོཏཱིཏི ཨེཏྠ སཱ ཝིཛྫཱ སམྨཱདིཊྛི ཝེདིཏབྦཱ. ན ཨེཀཏོ སབྦཱནི ལབྦྷནྟི སམྨཱཝཱཙཱཀམྨནྟཱཛཱིཝཱནཾ པུབྦཱབྷིསངྑཱརསྶ ཨནེཀརཱུཔཏྟཱ. ལོཀུཏྟརམགྒཀྑཎེ ཨེཀཏོ ལབྦྷནྟི ཀིཙྩཏོ བྷིནྣཱནམྤི ཏཱསཾ ཏཏྠ སརཱུཔཏོ ཨབྷིནྣཏྟཱ. ཨེཀཱ ཨེཝ ཧི ཝིརཏི མགྒཀྑཎེ ཏིསྶནྣམྤི ཝིརཏཱིནཾ ཀིཙྩཾ སཱདྷེནྟཱི པཝཏྟཏི, ཡཐཱ ཨེཀཱ ཨེཝ སམྨཱདིཊྛི པརིཛཱནནཱདིཝསེན ཙཏུབྦིདྷཀིཙྩཾ སཱདྷེནྟཱི པཝཏྟཏི. ཏཱནི ཙ ཁོ སབྦཱནི ཨཊྛཔི པཋམཛ྄ཛྷཱནིཀེ མགྒེ ལབྦྷནྟཱིཏི ཡོཛནཱ. པཋམཛ྄ཛྷཱནིཀེཏི པཋམཛྷཱནཝནྟེ.

ཏཐཱབྷཱུཏསྶཱཏི ཨརིཡམགྒསམངྒིནོ. ཡསྨཱ མཧཱསལཱ༹ཡཏནསུཏྟེ ཝུཏྟཾ ‘‘སམྨཱདིཊྛིཨཱདཱིནཾ པཉྩནྣཾ ཨེཝ ཨངྒཱནཾ ཝསེནཱ’’ཏི, ཏསྨཱ པཉྩངྒིཀོ ལོཀུཏྟརམགྒོ ཧོཏི. ‘‘པུབྦེཝ ཁོ པནཱ’’ཏི ཧི ཝཙནཾ ཏདཱ མགྒཀྑཎེ ཝིརཏཱིནཾ ཨབྷཱཝཾ ཉཱཔེཏི, ཏསྨཱ ཀཱམཱཝཙརཙིཏྟེསུ ཝིཡ ལོཀུཏྟརཙིཏྟེསུ ཝིརཏི ཨནིཡཏཱཏི ཨདྷིཔྤཱཡོ. པརིསུདྡྷབྷཱཝདསྶནནྟི པརིསུདྡྷསཱིལབྷཱཝདསྶནཏྠཾ. ཨཡམཏྠོ དཱིཔིཏོ, ན ཨརིཡམགྒེ ཝིརཏཱིནཾ ཨབྷཱཝོ.

ཡདི ཨེཝཾ ཀསྨཱ ཨབྷིདྷམྨེ མགྒཝིབྷངྒེ པཉྩངྒིཀཝཱརོ ཨཱགཏོཏི ཨཱཧ ‘‘ཡམྤི ཨབྷིདྷམྨེ’’ཏིཨཱདི. ཏནྟི ‘‘པཉྩངྒིཀོ མགྒོ ཧོཏཱི’’ཏི ཝཙནཾ. ‘‘ཨེཀཾ ¶ ཀིཙྩནྟརཾ དསྶེཏུཾ ཝུཏྟ’’ནྟི ཝཏྭཱ ཏཾ དསྶེཏུཾ ‘‘ཡསྨིཉྷི ཀཱལེ’’ཏིཨཱདི ཝུཏྟཾ. ཡསྨིཉྷི ཀཱལེཏི ལོཀིཡཀཱལེ ¶ . ཏེན ‘‘ཨེཀཾ ཀིཙྩནྟར’’ནྟི ཝུཏྟཾ ཨཊྛངྒིཀཀིཙྩཾ དསྶེཏི. ཝིརཏིཨུཔྤཱདནེན མིཙྪཱཝཱཙཱདཱིནི པུགྒལེན མགྒསམཡེ པཛཧཱཔེནྟཱིཏི སམྨཱདིཊྛིཨཱདཱིནི ‘‘པཉྩ ཀཱརཀངྒཱནཱི’’ཏི ཝུཏྟཱནི. སམྨཱཝཱཙཱདིཀིརིཡཱ ཧི ཝིརཏི, ཏཉྩ ཨེཏཱནི ཀཱརཱཔེནྟཱིཏི. ཝིརཏིཝསེནཱཏི ཝིརམཎཀིརིཡཱཝསེན ཀཱརཱཔཀབྷཱཝེན, ཀཏྟུབྷཱཝེན ཝཱཏི ཨཏྠོ. ‘‘ཝིརཏིཏྟཡཝསེནཱ’’ཏི ཝཱ པཱཋོ.

སམྨཱཀམྨནྟོ པཱུརཏཱིཏི ཨིམེཧི སམྨཱདིཊྛིཨཱདཱིཧི སམྨཱཀམྨནྟཀིཙྩཾ པཱུརཏི ནཱམ ཏེཧི ཝཱིརིཡཱདིཀེཧི ཏདཏྠསིདྡྷིཏོ. ཏམྤི སནྡྷཱཡ ‘‘ཨེཀཾ ཀིཙྩནྟརཾ དསྶེཏུ’’ནྟི ཝུཏྟཾ. ཨིམཾ ཀིཙྩནྟརཾ དསྶེཏུནྟི ལོཀུཏྟརམགྒཀྑཎེཔི ཨིམཱནེཝ པཉྩ སམྨཱཝཱཙཱདིཝིརཏིཏྟཡསྶ ཨེཀཀྑཎེ ཀཱརཱཔཀངྒཱནཱིཏི དསྶེཏུཾ. ཨེཝཾ ཝུཏྟནྟི ‘‘ཏསྨིཾ སམཡེ པཉྩངྒིཀོ མགྒོ ཧོཏཱི’’ཏི (ཝིབྷ. ༤༩༤) ཨེཝཾ ཝུཏྟཾ. ལོཀིཡམགྒཀྑཎེ པཉྩེཝ ཧོནྟི, ཝིརཏི པན ཨནིཡཏཱ, ཏསྨཱ ‘‘ཚཨངྒིཀོ’’ཏི ཨཝཏྭཱ ‘‘པཉྩངྒིཀོ’’ཨིཙྩེཝ ཝུཏྟཾ. ཏཡིདཾ ཨབྷིདྷམྨེ པཉྩངྒིཀཝཱརདེསནཱཡ ཀཱརཎཀིཏྟནམགྒོ, ཨརིཡམགྒོ པན ཨཊྛངྒིཀོཝཱཏི དསྶེཏུཾ, ‘‘ཡཱ ཙ, བྷིཀྑཝེ’’ཏིཨཱདིམཱཧ, ཏཾ སུཝིཉྙེཡྻམེཝ. མིཙྪཱདིཊྛིཨཱདིཀཱ དས, ཏཔྤཙྩཡཱ ཨཀུསལཱ ཙ དསཱཏི ཝཱིསཏི ཨཀུསལཔཀྑིཡཱ, སམྨཱདིཊྛིཨཱདིཀཱ དས, ཏཔྤཙྩཡཱ ཀུསལཱ ཙ དསཱཏི ཝཱིསཏི ཀུསལཔཀྑིཡཱ མཧཱཙཏྟཱརཱིསཀསུཏྟེ ཝུཏྟཱ. མཧཱཙཏྟཱརཱིསཀནྟི ཏསྶེཏཾ ནཱམཾ. མིསྶཀོཝ ཀཐིཏོ ལོཀུཏྟརསྶཔི ཨིདྷ ལབྦྷམཱནཏྟཱ.

ཡསྨཱ ཀོསལསཾཡུཏྟེཔི ཨིདྷ ཙ ཐེརེན ‘‘ཨུཔཌྜྷམིདཾ, བྷནྟེ, བྲཧྨཙརིཡསྶཱ’’ཏིཨཱདིནཱ ཝུཏྟཾ ‘‘མཱ ཧེཝཾ ཨཱནནྡཱ’’ཏིཨཱདིནཱ པཊིཀྑིཔིཏྭཱ ‘‘སཀལམེཝིདཾ ཨཱནནྡཱ’’ཏིཨཱདིནཱ བྷགཝཏཱ དེསིཏཾ སུཏྟཾ ཨཱགཏཾ. ཏསྶཏྠོ ཀོསལསཾཡུཏྟཝཎྞནཱཡཾ ཝུཏྟོ, ཏསྨཱ ཝུཏྟཾ ‘‘ཀོསལསཾཡུཏྟེ ཝུཏྟཏྠམེཝཱ’’ཏི.

ཨཝིཛྫཱསུཏྟཱདིཝཎྞནཱ ནིཊྛིཏཱ.

༣. སཱརིཔུཏྟསུཏྟཝཎྞནཱ

༣. སཱཝཀབོདྷི ¶ སཱཝཀཔཱརམིཡོ, ཏཔྤརིཡཱཔནྣཾ ཉཱཎཾ སཱཝཀཔཱརམིཉཱཎཾ, ཏཾ པན དྭིནྣཾ ཨགྒསཱཝཀཱནཾ ཏཏྠཔི དྷམྨསེནཱཔཏིནོ ཨེཝ སཝིསེསཾ མཏྠཀཾ པཏྟཾ, ན ཨིཏརེསནྟི ཨཱཧ – ‘‘སཱཝཀ…པེ… ཨཔྤཏྟཏཱཡཱ’’ཏི. ཏསྨཱ ཏསྶ མཏྠཀཔྤཏྟིཡཱ མགྒབྲཧྨཙརིཡེ ཨིཛ྄ཛྷནྟེ ཏསྶ ཨེཀདེསོ ཨིདྷ ཨིཛ྄ཛྷཏི, ན སཀལནྟི. ན ཧི ཨདྡྷབྲཧྨཙརིཡཾ ནཱམ ཨཏྠི, ཏསྨཱ ཝུཏྟཾ, ‘‘སཀལམྤི ¶ …པེ… ལབྦྷཏཱི’’ཏི, ཏཾ པན བྷཎྜཱགཱརིཀོ ནཱཉྙཱསི ཉཱཎསྶ སཱཝཀཝིསཡེཔི སཔྤདེསིཀཏྟཱ, དྷམྨསེནཱཔཏི པན ཉཱཎསྶ ཏཏྠ ནིཔྤདེསིཀཏྟཱ ཨཉྙཱསཱིཏི. ཏེནཱཧ – ‘‘ཨཱནནྡཏྠེརོ…པེ… ཨཉྙཱསཱི’’ཏི. ཨེཝམཱཧཱཏི ‘‘སཀལམིདཾ, བྷནྟེ’’ཏི ཨེཝཾ ཨཝོཙ.

སཱརིཔུཏྟསུཏྟཝཎྞནཱ ནིཊྛིཏཱ.

༤. ཛཱཎུསྶོཎིབྲཱཧྨཎསུཏྟཝཎྞནཱ

༤. ཝལ༹ཝཱབྷི-སདྡོ ཝལ༹ཝཱཔརིཡཱཡོཏི ཨཱཧ ‘‘ཙཏཱུཧི ཝལ༹ཝཱཧི ཡུཏྟརཐེནཱ’’ཏི. ཡོདྷརཐོཏི ཡོདྷེཧི ཡུཛ྄ཛྷནཏྠཾ ཨཱརོཧིཏབྦརཐོ. ཨལངྐཱརརཐོ མངྒལདིཝསེསུ ཨལངྐཏཔཊིཡཏྟེཧི ཨཱརོཧིཏབྦརཐོ. གྷནདུཀུལེན པརིཝཱརིཏོཏི རཛཏཔཊྚཝཎྞེན སེཏདུཀུལེན པཊིཙྪཱདིཏོ. པཊིཙྪཱདནཏྠོ ཧི ཨིདྷ པརིཝཱརསདྡོ. རཛཏཔནཱལི༹སུཔརིཀྑིཏྟཱ སེཏབྷཱཝཀརཎཏྠཾ.

ཚནྣཾ ཚནྣཾ མཱསཱནནྟི ནིདྡྷཱརཎེ སཱམིཝཙནཾ. ཨེཀཝཱརཾ ནགརཾ པདཀྑིཎཾ ཀརོཏཱིཏི ཨིདཾ ཏསྨིཾ ཋཱནནྟརེ ཋིཏེན ཀཱཏབྦཾ ཙཱརིཏྟཾ. ནགརཏོ ན པཀྐནྟཱཏི ནགརཏོ བཧི ན གཏཱ. མངྒལཝཙནེ ནིཡུཏྟཱ མངྒལིཀཱ, སུཝཏྠིཝཙནེ ནིཡུཏྟཱ སོཝཏྠིཀཱ. ཨཱདི-སདྡེན ཐུཏིམཱགདྷཝནྡིཀཱཙརིཡཀེ སངྒཎྷཱཏི. སུཀཔཏྟསདིསཱནི ཝཎྞཏོ.

ཝཎྞགཱིཏནྟི ཐུཏིགཱིཏཾ. བྲཧྨབྷཱུཏཾ སེཊྛབྷཱུཏཾ ཡཱནཾ, བྲཧྨབྷཱུཏཱནཾ སེཊྛབྷཱུཏཱནཾ ཡཱནནྟི ཝཱ བྲཧྨཡཱནཾ. ཝིཛིཏཏྟཱ ཝིསེསེན ཛིནནཏོ. རཱགཾ ཝིནཡམཱནཱ པརིཡོསཱཔེཏཱིཏི སབྦམྤི རཱགཾ སམུཙྪེདཝིནཡཝསེན ཝིནེཏི, ཨཏྟནོ ཀིཙྩཾ པརིཡོསཱཔེཏི. ཀིཙྩཔརིཡོསཱཔནེནེཝ ཧི སཡམྤི ¶ པརིཡོསཱནཾ ནིཔྥཏྟིཾ ཨུཔགཙྪཏི. ཏེནཱཧ ‘‘པརིཡོསཱནཾ གཙྪཏི ནིཔྥཛྫཏཱི’’ཏི.

དྷུརནྟི བྷུམྨཏྠེ ཨུཔཡོགཝཙནནྟི ཨཱཧ ‘‘ཏཏྲམཛ྄ཛྷཏྟཏཱཡུགེ ཡུཏྟཱ’’ཏི. ཨཱིསཱཏི ཡུགསནྡྷཱརིཀཱ དཱརུཡུགལཱ༹. ཡཐཱ ཝཱ བཱཧིརཾ ཡུགཾ དྷཱརེཏི, ཏསྶཱ ཋིཏཱཡ ཨེཝ ཀིཙྩསིདྡྷི, ཨེཝཾ ཀིརིཡཱཝསེན ལདྡྷབལེན ཏཏྲམཛ྄ཛྷཏྟཏཱཡུགེ ཐིརཾ དྷཱརེཏི, ཏེཧེཝ ཨརིཡམགྒརཐསྶ པཝཏྟནཾ. ཧིརིགྒཧཎེན ཙེཏྠ ཏཾསཧཙརཎཏོ ཨོཏྟཔྤམྤི གཧིཏཾཡེཝ ཧོཏི. ཏེནཱཧ ‘‘ཨཏྟནཱ སདྡྷི’’ནྟིཨཱདི. ནཱལི༹ཡཱ མིནམཱནོ པུརིསོ ཝིཡ ཨཱརམྨཎཾ མིནཱཏཱིཏི མནོ. ཀཏརཾ པན ཏཾ མནོ, ཀཐཉྩསྶ ཡོཏྟསདིསཏཱཏི ཨཱཧ ‘‘ཝིཔསྶནཱཙིཏྟ’’ནྟིཨཱདི. ཏེན ཡོཏྟཾ ཝིཡཱཏི ཡོཏྟནྟི དསྶེཏི. ལོཀིཡཝིཔསྶནཱཙིཏྟཾ ཨཏིརེཀཔཉྙཱས ཀུསལདྷམྨེ ཨེཀཱབདྡྷེ ཨེཀསངྒཧིཏེ ཀརོཏཱིཏི སམྦནྡྷོ. ཏེ པན ‘‘ཕསྶོ ཧོཏི…པེ… ཨཝིཀྑེཔོ ཧོཏཱི’’ཏི ཙིཏྟངྒཝསེན དྷམྨསངྒཧེ (དྷ. ས. ༡) ཨཱགཏནཡེནེཝ ¶ ཝེདིཏབྦཱ. ལོཀུཏྟརཝིཔསྶནཱཙིཏྟནྟི མགྒཙིཏྟཾ ཨཱཧ. ཨཏིརེཀསཊྛཱིཏི ཏེ ཨེཝ སམྨཱཀམྨནྟཱཛཱིཝེཧི ཨནཉྙཱཏཉྙསྶཱམཱིཏིནྡྲིཡཱདཱིཧི ཙ སདྡྷིཾ ཨཏིརེཀསཊྛི ཀུསལདྷམྨེ. ཨེཀཱབདྡྷེཏི ཨེཀསྨིཾ ཨེཝ ཨཱརམྨཎེ ཨཱབདྡྷེ. ཨེཀསངྒཧེཏི ཏཐེཝ ཝིཔསྶནཱཀིཙྩཝསེན ཨེཀསངྒཧེ ཀརོཏི. པུབྦངྒམབྷཱཝེན ཨཱརཀྑཾ སཱརེཏཱིཏི ཨཱརཀྑསཱརཐཱི. ‘‘ཡཐཱ ཧི རཐསྶ…པེ… སཱརཐཱི’’ཏི ཝཏྭཱ ཏཾ དསྶེཏུཾ ‘‘ཡོགྒིཡོ’’ཏི ཝུཏྟཾ. དྷུརཾ ཝཱཧེཏི ཡོགྒེ. ཡོཛེཏི ཡོགྒེ སམགཏིཡཉྩ. ཨཀྑཾ ཨབྦྷཉྫཏི སུཁཔྤཝཏྟནཏྠཾ. རཐཾ པེསེཏི ཡོགྒཙོདནེན. ནིབྦིསེཝནེ ཀརོཏི གམནཝཱིཐིཡཾ པཊིཔཱདནེན སནྣིཡོཛེཏི. ཨཱརཀྑཔཙྩུཔཊྛཱནཱཏི ཨཱརཀྑཾ པཙྩུཔཊྛཔེཏི ཨསམྨོསསབྷཱཝཏྟཱ. གཏིཡོཏི པཝཏྟིཡོ, ནིཔྥཏྟིཡོ ཝཱ. སམནྭེསཏཱིཏི གཝེསཏི.

ཨརིཡཔུགྒལསྶ ནིབྦཱནཾ པཊིམུཁཾ སམྤཱཔནེ རཐོ ཝིཡཱཏི རཐོ. པརིཀརོཏི ཝིབྷཱུསཡཏཱིཏི པརིཀྑཱརོ, ཝིབྷཱུསནཾ, སཱིལཉྩ ཨརིཡམགྒསྶ ཝིབྷཱུསནཊྛཱནིཡཾ. ཏེན ཝུཏྟཾ ‘‘ཙཏུཔཱརིསུདྡྷིསཱིལཱལངྐཱརོ’’ཏི, སཱིལབྷཱུསནོཏི ཨཏྠོ. ཝིཔསྶནཱསམྤཡུཏྟཱནནྟི ལོཀིཡཱཡ ལོཀུཏྟརཱཡ ཙ ཝིཔསྶནཱཡ སམྤཡུཏྟཱནཾ. ཝིདྷིནཱ ཨཱིརེཏབྦཏོ པཝཏྟེཏབྦཏོ ཝཱིརིཡཾ, ¶ སམྨཱཝཱཡཱམོ. སམཾ སམྨཱ ཙ དྷིཡཏཱིཏི སམཱདྷི, དྷུརཉྩ ཏཾ སམཱདྷི ཙཱཏི དྷུརསམཱདྷི, ཨུཔེཀྑཱ དྷུརསམཱདྷི ཨེཏསྶཱཏི ཨུཔེཀྑཱདྷུརསམཱདྷི, ཨརིཡམགྒོ ཨུཔེཀྑཱསངྑཱཏདྷུརསམཱདྷཱིཏི ཨཏྠོ. ཨཊྛཀཐཱཡཾ པན བྱཉྫནཾ ཨནཱདིཡིཏྭཱ དྷུརསམཱདྷིསདྡཱནཾ བྷིནྣཱདྷིཀརཎཏཱ ཝུཏྟཱ. པཡོགམཛ྄ཛྷཏྟེཏི ཝཱིརིཡསམཏཱཡ. ཨནིཙྪཱཏི ཨིཙྪཱཔཊིཔཀྑཱ. ཏེནཱཧ ‘‘ཨལོབྷསངྑཱཏཱ’’ཏི. པརིཝཱརཎནྟི པརིཝཱརོ, པརིཙྪདོཏི ཨཏྠོ.

མེཏྟཱཏི མེཏྟཱཙེཏོཝིམུཏྟི. ཏཐཱ ཀརུཎཱ. པུབྦབྷཱགོཏི ཨུབྷིནྣམྤི ཨུཔཙཱརོ. དྭེཔི ཀཱཡཙིཏྟཝིཝེཀཱ ཝིཡ པུབྦབྷཱགདྷམྨཝསེན ཝུཏྟཱ. ཨརིཡམགྒརཐེཏི པརིསུདྡྷམགྒསངྑཱཏེ རཐེ. ཨརིཡམགྒརཐོ ཙ མགྒརཐོ ཙཱཏི ཨརིཡམགྒརཐོ, ཨེཝཾ ཨེཀསེསནཡེན ཝཱ ཨཏྠོ ཝེདིཏབྦོ. ཏེནཱཧ ‘‘ཨིམསྨིཾ ལོཀིཡལོཀུཏྟརམགྒརཐེ ཋིཏོ’’ཏི. སནྣདྡྷཙམྨོཏི ཡོགཱཝཙརསྶ པཊིམུཀྐཙམྨཾ. ན ནཾ ཏེ ཝིཛ྄ཛྷནྟཱིཏི ཝཙནཔཐཱ ན ནཾ ཝིཛ྄ཛྷནྟི. དྷམྨབྷེདནཝསེན ན བྷཉྫཏི, ཏསྶ ཨརིཡམགྒསྶ རཐསྶ སམྨཱ ཡོཛིཏསྶ ཨནྟརཱ བྷངྒོ ནཏྠཱིཏི ཨཏྠོ.

ཨཏྟནོ པུརིསཀཱརཾ ནིསྶཱཡ ལདྡྷཏྟཱ ཨཏྟནོ སནྟཱནེཏི ཨདྷིཔྤཱཡོ. ཨནུཏྟརནྟི ཨུཏྟརརཧིཏཾ. ཏཏོ ཨེཝ སེཊྛཡཱནཾ, ནསྶ ཀེནཙི སདིསནྟི ཨསདིསཾ. དྷིཏིསམྤནྣཏཱཡ དྷཱིརཱ པཎྜིཏཔུརིསཱ ¶ ལོཀམྷཱ ནིཡྻནྟི གཙྪནྟི. ‘‘ཛཡཾ ཛཡ’’ནྟི གཱཐཱཡཾ ཝཙནཝིཔལླཱསེན ཝུཏྟནྟི ཨཱཧ ‘‘ཛིནནྟཱ ཛིནནྟཱ’’ཏི.

ཛཱཎུསྶོཎིབྲཱཧྨཎསུཏྟཝཎྞནཱ ནིཊྛིཏཱ.

༥-༦. ཀིམཏྠིཡསུཏྟཱདིཝཎྞནཱ

༥-༦. ནིཡམཏྠོཏི ཨཝདྷཱརཎཏྠོ. ཏེན ནིཡམེན ཨཝདྷཱརཎེན – ཨཉྙཾ མགྒཾ པཊིཀྑིཔཏི ཨིཏོ ཨཉྙསྶ ནིཡྻཱནིཀམགྒསྶ ཨབྷཱཝཏོ. ‘‘དུཀྑསྶ པརིཉྙཏྠ’’ནྟི ཝུཏྟཏྟཱ ཝཊྚདུཀྑཾ ཀཐིཏཾ. ཨརིཡམགྒེ གཧིཏེ ཏསྶ པུབྦབྷཱགམགྒོ ཝིཔསྶནཱཡ གཧིཏོ ཨེཝཱཏི ‘‘མིསྶཀམགྒོ ཀཐིཏོ’’ཏི ཝུཏྟཾ. ཨུཏྟཱནམེཝ ཨཔུབྦསྶ ཨབྷཱཝཱ. ཨཡཾ པན ཝིསེསོ ‘‘རཱགཀྑཡོ’’ཏིཨཱདཱིཧི ¶ ཡདིཔི ནིབྦཱནཾ ཝུཏྟཾ. ཏཐཱཔི ཨརཧཏྟཾ ཝིཡ བྲཧྨཙརིཡམྤི. ཏེན ནིབྦཱནཾ ཨེཝ ཝུཙྩཏི ‘‘ཨིདཾ བྲཧྨཙརིཡཔརིཡོསཱན’’ནྟི.

ཀིམཏྠིཡསུཏྟཱདིཝཎྞནཱ ནིཊྛིཏཱ.

༧. དུཏིཡཨཉྙཏརབྷིཀྑུསུཏྟཝཎྞནཱ

༧. རཱགཝིནཡཱདིཔདེཧི ནིབྦཱནཾ ཝཱཔི ཝུཙྩེཡྻ ཨརཧཏྟཾ ཝཱཔི. ཡསྨཱ སོ བྷིཀྑུ ཨུབྷཡཏྠཔི ནིཝིཊྛབུདྡྷི, ཏསྨཱ བྷགཝཱ ཏསྶ ཨཛ྄ཛྷཱསཡཝསེན ‘‘ནིབྦཱནདྷཱཏུཡཱ ཁོ ཨེཏ’’ནྟིཨཱདིནཱ ནིབྦཱནདྷཱཏུཾ ཝིསྶཛྫེཏྭཱ པུན ‘‘ཨཱསཝཱནཾ ཁཡོ ཏེན ཝུཙྩཏཱི’’ཏི ཨཱཧ. ཡསྨཱ ཨརིཡམགྒོ རཱགཱདིཀེ སམུཙྪེདཝསེན ཝིནེཏི, ཨཱསཝཉྩ སབྦསོ ཁེཔེཏི, ཏེན ཙ ཝུཏྟཾ ནིབྦཱནཾ ཨརཧཏྟཉྩ, ཏསྨཱ ཏདུབྷཡཾ ‘‘རཱགཝིནཡོཏིཨཱདི ནཱམམེཝཱ’’ཏི ཝུཏྟཾ. ཨནུསནྡྷིཀུསལཏཱཡ པུཙྪནྟོ ཨེཏཾ ཨཝོཙཱཏི ཨིམིནཱ ‘‘པུཙྪཱནུསནྡྷི ཨིདྷ ལབྦྷཏཱི’’ཏི དཱིཔིཏཾ, ཨཛ྄ཛྷཱསཡཱནུསནྡྷིཔི ཨེཏྠ ལབྦྷཏེཝཱཏི དཊྛབྦཾ.

དུཏིཡཨཉྙཏརབྷིཀྑུསུཏྟཝཎྞནཱ ནིཊྛིཏཱ.

༨. ཝིབྷངྒསུཏྟཝཎྞནཱ

༨. ཨེཀེན པརིཡཱཡེན ཨཊྛངྒིཀམགྒཾ ཝིབྷཛིཏྭཱཏི ‘‘སམྨཱདིཊྛཱི’’ཏིཨཱདིནཱ ཨེཀེན པརིཡཱཡེན ཨརིཡཾ ཨཊྛངྒིཀཾ མགྒཾ ཝིབྷཱགེན དསྶེཏྭཱ ‘‘ཀཏམཱ ཙ, བྷིཀྑཝེ, སམྨཱདིཊྛཱི’’ཏིཨཱདིནཱ ¶ པུན ཨཔརེན པརིཡཱཡེན ཝིབྷཛིཏུཀཱམོ. ཨུགྒཧདྷཱརཎཔརིཙཡཉཱཎཱནིཔི སཝནཉཱཎེ ཨེཝ ཨཝརོདྷཾ གཙྪནྟཱིཏི ‘‘སཝནསམྨསནཔཊིཝེདྷཔཙྩཝེཀྑཎཝསེནཱ’’ཏི ཝུཏྟཾ.

ཀམྨཊྛཱནཱབྷིནིཝེསོཏི ཀམྨཊྛཱནཔཊིཔཏྟི. པུརིམཱནི དྭེ སཙྩཱནི ཨུགྒཎྷིཏྭཱཏི སམྦནྡྷོ. ཨིཊྛཾ ཀནྟཾ མནཱཔནྟི ནིརོདྷམགྒེསུ ནིནྣབྷཱཝཾ དསྶེཏི, ན ཨབྷིནནྡནཾ, ཏནྣིནྣབྷཱཝོ ཨེཝ ཙ ཏཏྠ ཀམྨཀརཎཾ དཊྛབྦཾ. ཨེཀེནེཝཱཀཱརེན སཙྩཱནཾ པཊིཝེདྷནིམིཏྟཏཱ, སོ ཨེཝ ཨབྷིམུཁབྷཱཝོ ཏེསཾ སམཱགམོཏི ཨེཀཱབྷིསམཡོ.

ཨསྶཱཏི ¶ ཉཱཎསྶ, ཡོགིནོ ཝཱ. ཨེཏྠ ཙ ཀེཙི ‘‘ལོཀིཡཉཱཎམྤི པཊིཝེདྷོ སབྦསྶ ཡཱཐཱཝབོདྷབྷཱཝཏོ’’ཏི ཝདནྟི. ནནུ ཨུགྒཧཱདིཔཊིཝེདྷོ ཙ པཊིཝེདྷོཝ, ན ཙ སོ ལོཀུཏྟརོཏི? ཏཾ ན, ཀེཝལེན པཊིཝེདྷ-སདྡེན ཨུགྒཧཱདིཔཊིཝེདྷཱནཾ ཨཝཙནཱིཡཏྟཱ, པཊིཝེདྷནིམིཏྟཏྟཱ ཝཱ ཨུགྒཧཱདིཝསེན པཝཏྟཾ དུཀྑཱདཱིསུ པུབྦབྷཱགེ ཉཱཎཾ ‘‘པཊིཝེདྷོ’’ཏི ཝུཙྩཏི, ན པཊིཝེདྷཏྟཱ, པཊིཝེདྷབྷཱུཏམེཝ པན ཉཱཎཾ ཨུཛུཀཾ པཊིཝེདྷོཏི ཝཏྟབྦཏཾ ཨརཧཏི. ཀིཙྩཏོཏི པརིཉྙཱདིཀིཙྩཏོ. ཨཱརམྨཎཔཊིཝེདྷོཏི སཙྪིཀིརིཡཱཔཊིཝེདྷམཱཧ. ཀིཙྩཏོཏི ཨསམྨོཧཔཊིཝེདྷཾ. ཨུགྒཧཱདཱིཧི སཙྩསྶ པརིགྒཎྷནཾ པརིགྒཧོ.

དུདྡསཏྟཱཏི ཨནདྷིགཏཉཱཎེན ཡཱཐཱཝསརསལཀྑཎཏོ དཊྛུཾ ཨསཀྐུཎེཡྻཏྟཱ ཨུཔྤཏྟིཏོ པཱཀཊཱནིཔི. ཏེནཱཧ ‘‘དུཀྑསཙྩཾ ཧཱི’’ཏིཨཱདི. ཨུབྷཡནྟི པུརིམཾ སཙྩདྭཡཾ. པཡོགོཏི ཀིརིཡཱ, ཝཱཡཱམོ ཝཱ. ཏསྶ མཧནྟཏརསྶ ཨིཙྪིཏབྦཏཾ དུཀྐརཏརཏཉྩ ཨུཔམཱཧི དསྶེཏི ‘‘བྷཝགྒགྒཧཎཏྠ’’ནྟིཨཱདིནཱ. ཡཐཱ པུརིམཾ སཙྩདྭཡཾ ཝིཡ ཀེནཙི པརིཡཱཡེན ཨཔཱཀཊཏཱཡ པརམགམྦྷཱིརཏྟཱ ཨུགྒཧཱདིཝསེན པུབྦབྷཱགེ པཝཏྟིབྷེདཾ གཧེཏྭཱ ‘‘དུཀྑེ ཉཱཎ’’ནྟིཨཱདིནཱ ཙཏུབྦིདྷཾ ཀཏྭཱ ཝུཏྟཾ. ཨེཀམེཝ ཏཾ ཉཱཎཾ ཧོཏི ཨེཀཱབྷིསམཡཝསེནེཝ པཝཏྟནཏོ.

ཀཱམཔཙྩནཱིཀཊྛེནཱཏི ཀཱམཱནཾ ཨུཛུཔཙྩནཱིཀབྷཱཝེན. ཀཱམཏོ ནིསྶཊབྷཱཝེནཱཏི ཀཱམེཧི ཝིསཾཡུཏྟབྷཱཝེན. ཀཱམཾ སམྨསནྟསྶཱཏི དུཝིདྷམྤི ཀཱམཾ ཨནིཙྩཱདིཏོ སམྨསནྟསྶ. པཛྫཏི པཝཏྟཏི ཨེཏེནཱཏི པདཾ, ཀཱམསྶ པདནྟི ཀཱམཔདཾ, ཀཱམསྶ ཨུཔྤཏྟིཀཱརཎསྶ གྷཱཏོ སམུགྒྷཱཏོ, ཏཾ ཀཱམཔདགྷཱཏཾ. ཏེནཱཧ ‘‘ཀཱམཝཱུཔསམ’’ནྟི. ཀཱམེཧི ཝིཝིཏྟཾ ཀཱམཝིཝིཏྟཾ. སོ ཨེཝ ཙ ནེསཾ ཨནྟོ སམུཙྪེདཝིཝེཀེཏི ཀཏྭཱ ཏསྨིཾ སཱདྷེཏབྦེ ཨུཔྤནྣོཏི ཝུཏྟཾ ‘‘ཀཱམཝིཝིཏྟནྟེ ཨུཔྤནྣོ’’ཏི. ཀཱམཏོ ནིཀྑམཏཱིཏི ནིཀྑམོ, སོ ཨེཝ ནེཀྑམྨསངྐཔྤོ. ཨིམསྨིཉྩ ¶ ནེཀྑམྨསངྐཔྤསྶ སདྡཏྠཝིབྷཱཝེན ཡཐཱཝུཏྟོ ཀཱམཔཙྩནཱིཀཊྛཱདིཀོ ཨཏྠནིདྡྷཱརཎཝིསེསོ ཨནྟོགདྷོ.

ཨེསེཝ ནཡོཏི ཨིམིནཱ བྱཱཔཱདཔཙྩནཱིཀཊྛེན ཝིཧིཾསཱཡ པཙྩནཱིཀཊྛེནཱཏིཨཱདིཀཾ ཨབྱཱཔཱདཱཝིཧིཾསཱསངྐཔྤཱནཾ ཨཏྠུདྡྷཱརཎཝིདྷིཾ ཨཏིདིསཏི. ནེཀྑམྨསངྐཔྤཱདཡོཏི ཨཱདི-སདྡེན ཨབྱཱཔཱདཨཝིཧིཾསཱསངྐཔྤེ ཨེཝ སངྒཎྷཱཏི. ཀཱམ…པེ… སཉྙཱནནྟི ཀཱམཝིཏཀྐཱདིཝིརཏིསམྤཡུཏྟཱནཾ ནེཀྑམྨཱདིསཉྙཱནཾ. ནཱནཏྟཱཏི ནཱནཱཁཎིཀཏྟཱ. ཏཱིསུ ཋཱནེསཱུཏི ¶ ཏིཔྤཀཱརེསུ ཀཱརཎེསུ. ཨུཔྤནྣསྶཱཏི ཨུཔྤཛྫནཱརཧསྶ. བྷཱུམིལདྡྷཨུཔྤནྣཾ ཨིདྷཱདྷིཔྤེཏཾ. ཨེས ནཡོ ཨིཏོ པརེསུཔི. པདཙྪེདཏོཏི ཀཱརཎུཔཙྪེདཏོ. པདནྟི ཧི ཨུཔྤཏྟིཀཱརཎནྟི ཝུཏྟོཝཱཡམཏྠོ. ཨནུཔྤཏྟིསཱདྷནཝསེནཱཏི ཡཐཱ སངྐཔྤོ ཨཱཡཏིཾ ནུཔྤཛྫཏི, ཨེཝཾ ཨནུཔྤཏྟིསཱདྷནཝསེན. སམྨཱདིཊྛི ཝིཡ ཨེཀོཝ ཀུསལསངྐཔྤོ ཨུཔྤཛྫཏི.

ཙཏཱུསུ ཋཱནེསཱུཏི ཝིསཾཝཱདནཱདཱིསུ ཙཏཱུསུ ཝཱིཏིཀྐམཊྛཱནེསུ. པབྦཛིཏཱནཾ མིཙྪཱཛཱིཝོ ནཱམ ཨཱཧཱརནིམིཏྟཀོཏི ཨཱཧ ‘‘ཁཱདནཱིཡབྷོཛནཱིཡཱདཱིནཾ ཨཏྠཱཡཱ’’ཏི. སབྦསོ ཨནེསནཱཡ པཧཱནཾ སམྨཱཨཱཛཱིཝོཏི ཨཱཧ ‘‘བུདྡྷཔྤསཏྠེན ཨཱཛཱིཝེནཱ’’ཏི. ཀམྨཔཐཔཏྟཱནཾ ཝསེན ‘‘སཏྟསུ ཋཱནེསཱུ’’ཏི ཝུཏྟཾ. ཨཀམྨཔཐཔཏྟཱཡ ཧི ཨནེསནཱཡ སོ པདགྷཱཏཾ ཀརོཏིཡེཝ.

ཏཐཱརཱུཔེ ཝཱ ཨཱརམྨཎེཏི ཡསྨིཾ ཨཱརམྨཎེ ཨིམསྶ པུབྦེ ཀིལེསཱ ན ཨུཔྤནྣཱ, ཏསྨིཾ ཨེཝ. ཨནུཔྤནྣཱནནྟི ཨནུཔྤཱདསྶཔི པཏྠནཱཝསེན ཨནུཔྤནྣཱནཾ. ཝཱིརིཡཙྪནྡནྟི ཝཱིརིཡསྶ ནིབྦཏྟེཏུཀཱམཏཱཚནྡཾ. ‘‘ཚནྡསམྤཡུཏྟཝཱིརིཡཉྩཱ’’ཏི ཝདནྟི. ཝཱིརིཡམེཝ པན ཨནུཔྤནྣཱཀུསལཱནུཔྤཱདནེ ལབྦྷམཱནཚནྡཏཱཡ དྷུརསམྤགྒཧཏཱཡ ཚནྡཔརིཡཱཡེན ཝུཏྟཾ. ཏཐཱ ཧི ཝཱིརིཡཾ – ‘‘ཨནིཀྑིཏྟཚནྡཏཱ ཨནིཀྑིཏྟདྷུརཏཱ’’ཏི (དྷ. ས. ༢༦) ནིདྡིཊྛཾ. ཀོསཛྫཔཀྑེ པཏིཏུཾ ཨདཏྭཱ ཙིཏྟཾ པགྒཧིཏཾ ཀརོཏི. པདྷཱནནྟི པདྷཱནབྷཱུཏཝཱིརིཡཾ.

ཨུཔྤཏྟིཔབནྡྷཝསེནཱཏི ནིརནྟརུཔྤཱདནཝསེན. ཙཏཱུསུ ཋཱནེསུ ཀིཙྩསཱདྷནཝསེནཱཏི ཡཐཱཝུཏྟེསུ ཙཏཱུསུ ཋཱནེསུ པདྷཱནཀིཙྩསྶ ནིཔྥཱདནཝསེན ཨནུཔྤཱདནཱདིཝསེན. ཀིཙྩསཱདྷནཝསེནཱཏི ཀཱཡཝེདནཱཙིཏྟདྷམྨེསུ སུབྷསུཁནིཙྩཨཏྟགཱཧཝིདྷམནཝསེན ཨསུབྷདུཀྑཱནིཙྩཱནཏྟསཱདྷནཝསེན.

ཨཡནྟི ཡཐཱཝུཏྟོ སདིསཱསདིསཏཱཝིསེསོ. ཨསྶཱཏི མགྒསྶ. ཨེཏྠ ཀཐནྟི ཡདི རཱུཔཱཝཙརཙཏུཏྠཛ྄ཛྷཱནཏོ ¶ པཊྛཱཡ ཡཱཝ སབྦབྷཝགྒཱ ཛྷཱནངྒམགྒངྒབོཛ྄ཛྷངྒཱནཾ སདིསཏཱ, ཨེཝཾ སནྟེ ‘‘ཨཱརུཔྤེ ཙཏུཀྐཔཉྩཀཛ྄ཛྷཱནཾ ཨུཔྤཛྫཏི, ཏཉྩ ལོཀུཏྟར’’ནྟི ཨེཏྠ ཀཐཾ ཨཏྠོ གཧེཏབྦོཏི ཨཱཧ ‘‘ཨེཏྠཱཔཱི’’ཏིཨཱདི. ཏཾཛྷཱནིཀཱཝཱཏི པཋམཛ྄ཛྷཱནཱདཱིསུ ཡཾ ཛྷཱནཾ མགྒཔཊིལཱབྷསྶ པཱདཀབྷཱུཏཾ, ཏཾཛྷཱནིཀཱཝ ཨསྶ ཨརིཡསྶ ཨུཔརིཔི ཏཡོ མགྒཱ ¶ . ཨེཝནྟི ཝུཏྟཱཀཱརེན. པཱདཀཛ྄ཛྷཱནམེཝ ནིཡམེཏི ཨཱརུཔྤེ ཙཏུཀྐཔཉྩཀཛ྄ཛྷཱནུཔྤཏྟིཡཾ. ཝིཔསྶནཱཡ ཨཱརམྨཎབྷཱུཏཱ ཁནྡྷཱཏི སམྨསིཏཁནྡྷེ ཝདནྟི. པུགྒལཛ྄ཛྷཱསཡོ ནིཡམེཏི པཱདཀསམྨསིཏཛ྄ཛྷཱནཱནཾ བྷེདེ. ཡསྨཱ སངྑཱརུཔེཀྑཱཉཱཎམེཝ ཨརིཡམགྒསྶ བོཛ྄ཛྷངྒཱདིཝིསེསཾ ནིཡམེཏི, ཏཏོ དུཏིཡཱདིཔཱདཀཛ྄ཛྷཱནཏོ ཨུཔྤནྣསྶ སངྑཱརུཔེཀྑཱཉཱཎསྶ པཱདཀཛ྄ཛྷཱནཱཏིཀྐནྟཱནཾ ཨངྒཱནཾ ཨསམཱཔཛྫིཏུཀཱམཏཱཝིརཱགབྷཱཝཏོ ཨིཏརསྶ ཙ ཨཏབྦྷཱཝཏོ ཏཱིསུཔི ཝཱདེསུ ཝིཔསྶནཱཝ ནིཡམེཏཱིཏི ཝེདིཏབྦོ, ཏསྨཱ ཝིཔསྶནཱནིཡམེནེཝ ཧི པཋམཝཱདེཔི ཨཔཱདཀཛ྄ཛྷཱནཱདིཔཱདཀཱཔི མགྒཱ པཋམཛ྄ཛྷཱནིཀཱ ཧོནྟི. ཨིཏརེཧི ཙ པཱདཀཛ྄ཛྷཱནེཧི ཝིཔསྶནཱནིཡམེཧི ཏཾཏཾཛྷཱནིཀཱཝ. ཨེཝཾ སེསཝཱདེསུ ཝིཔསྶནཱནིཡམོ ཡཐཱསམྦྷཝཾ ཡོཛེཏབྦོ. དུཏིཡཝཱདེ ཏཾཏཾཛྷཱནིཀཏཱ སམྨསིཏསངྑཱརཝིཔསྶནཱནིཡམེཧི ཧོཏི. ཏཏྲ ཧི ཝིཔསྶནཱ ཏཾཏཾཝིརཱགབྷཱཝནཱ བྷཱཝེཏབྦཱ, ན སོམནསྶསཧགཏཱ ཨུཔེཀྑཱསཧགཏཱ ཧུཏྭཱ ཛྷཱནངྒཱདིནིཡམཾ མགྒསྶ ཀརོཏཱིཏི ཨེཝཾ ཝིཔསྶནཱནིཡམོ ཝུཏྟནཡེནེཝ ཝེདིཏབྦོ. ཨིམསྨིཉྩ ཝཱདེ པཱདཀསམྨསིཏཛ྄ཛྷཱནུཔནིསྶཡསབྦྷཱཝེ ཨཛ྄ཛྷཱསཡོ ཨེཀནྟེན ཧོཏཱིཏི ‘‘པུགྒལཛ྄ཛྷཱསཡོ ནིཡམེཏཱིཏི ཝདནྟཱི’’ཏི ཝུཏྟཾ, ཨཊྛཀཐཱཡཾ པན ཝིསུདྡྷིམགྒསྶ ཨེཏིསྶཱ ཨཊྛཀཐཱཡ ཨེཀསངྒཧིཏཏྟཱ ‘‘ཏེསཾ ཝཱདཝིནིཙྪཡོ…པེ… ཝེདིཏབྦོ’’ཏི ཝུཏྟཾ. པུབྦབྷཱགེཏི ཝིཔསྶནཱཀྑཎེ.

ཝིབྷངྒསུཏྟཝཎྞནཱ ནིཊྛིཏཱ.

༩. སཱུཀསུཏྟཝཎྞནཱ

༩. སཱུཀནྟི སཱལིཡཝཱདཱིནཾ ཝཱལམཱཧ. སོ ཧི ནིཀནྟཀསདིསོ པཊིམུཁགཏཾ ཧཏྠཾ ཝཱ པཱདཾ ཝཱ བྷིནྡཏི, ཏསྨཱ བྷེདཾ ཨིཙྪནྟེན ཨུདྡྷགྒཾ ཀཏྭཱ ཋཔིཏཾ སམྨཱཔཎིཧིཏཾ ནཱམ, ཏཐཱ ཨཊྛཔིཏཾ མིཙྪཱཔཎིཧིཏཾ ནཱམཱཏི ཝུཏྟཾ. མིཙྪཱཔཎིཧིཏཱཡཱཏི ཀམྨསྶཀཏཔཉྙཱཡ མིཙྪཱཋཔནཾ ནཱམ – ‘‘ཨིམེ སཏྟཱ ཀམྨཝསེན སུཁདུཀྑཾ པཙྩནུབྷཝནྟི, ཏཾ པན ཀམྨཾ ཨིསྶརསྶ ཨིཙྪཱཝསེན བྲཧྨཱ ནིམྨིནཱཏཱི’’ཏིཨཱདིནཱ མིཙྪཱཔཀཔྤནཾ. ཀེཙི པན ‘‘ནཏྠི དིནྣནྟིཨཱདིནཱ ནཡེན པཝཏྟི, ཏསྶ ཝཱ ཉཱཎསྶ ཨཔྤཝཏྟཱི’’ཏི ཝདནྟི. མགྒབྷཱཝནཱཡཱཏི ¶ ཨེཏྠཱཔི མིཙྪཱམགྒསྶ པཝཏྟནཾ, ཨརིཡམགྒསྶ ཝཱ ཨཔྤཝཏྟནཾ མིཙྪཱཋཔནཾ. ཏེནཱཧ ‘‘ཨཔྤཝཏྟིཏཏྟཱ’’ཏི. ཨཝིཛྫཾ བྷིནྡིསྶཏཱིཏི ཨཝིཛྫཾ སམུཙྪིནྡིསྶཏི. མགྒནིསྶིཏཾ ཀཏྭཱ མགྒེ ¶ ཨེཝ པཀྑིཔིཏྭཱ. ཏཉྷི ཉཱཎཾ མགྒསྶ མཱུལཀཱརཎཾ མགྒེ སིདྡྷེ ཏསྶ ཀིཙྩསྶ མཏྠཀཔྤཏྟིཏོ. ‘‘སམྨཱཔཎིཧིཏཱཡ དིཊྛིཡཱ སམྨཱཔཎིཧིཏཱཡ མགྒབྷཱཝནཱཡཱ’’ཏི ཝུཏྟཏྟཱ མིསྶཀམགྒོ ཀཐིཏོ. ཚཝིབྷེདསདིསོ ཙེཏྠ ཨཝིཛྫཱབྷེདོ, ལོཧིཏུཔྤཱདསདིསོ ལོཀུཏྟརམགྒབྷཱཝོ དཊྛབྦོ.

སཱུཀསུཏྟཝཎྞནཱ ནིཊྛིཏཱ.

༡༠. ནནྡིཡསུཏྟཝཎྞནཱ

༡༠. ཚནྣཔརིབྦཱཛཀོ ཝཏྠཙྪཱདིཡཱ ཚནྣངྒཔརིབྦཱཛཀོ, ན ནགྒཔརིབྦཱཛཀོ.

ཨཝིཛྫཱཝགྒཝཎྞནཱ ནིཊྛིཏཱ.

༢. ཝིཧཱརཝགྒོ

༡. པཋམཝིཧཱརསུཏྟཝཎྞནཱ

༡༡. ཨཌྜྷམཱསནྟི ཨཙྩནྟསཾཡོགེ ཨུཔཡོགཝཙནཾ. པཊིསལླཱིཡིཏུནྟི ཡཐཱཝུཏྟཾ ཀཱལཾ པཊི དིཝསེ དིཝསེ སམཱཔཏྟིཡཾ དྷམྨཙིནྟཱཡཾ ཙིཏྟཾ ནིལཱིཡིཏུཾ. ཝིནེཏབྦོཏི སམུཙྪེདཝིནཡེན ཝིནེཏབྦོ ཨརིཡམགྒཱདྷིགནྟབྦོ. ཏནྟི དིཊྛཱནུགཏིཨཱཔཛྫནཾ. ཨསྶཱཏི ཛནཏཱཡ. ཨཔགཙྪཏཱིཏི སཏྠུ སནྟིཀཏོ ཨཔེཏི. སཱུཏི ནིཔཱཏམཏྟཾ.

པདེསེནཱཏི ཨེཀདེསེན. སཧ པདེསེནཱཏི སཔདེསོ. སྭཱཡཾ སཔདེསོ ཡསྨཱ ཝེདནཱཝསེནེཝ པཱལི༹ཡཾ ཨཱགཏོ, ཏསྨཱ པརམཏྠདྷམྨཀོཊྛཱསེ ཝེདནཱ ཨནཝསེསཏོ ལབྦྷཏི, ཏེ གཎྷནྟོ ‘‘ཁནྡྷཔདེསོ’’ཏིཨཱདིམཱཧ. ཏཾ སབྦནྟི ཁནྡྷཔདེསཱདིཀཾ སབྦམྤི. ‘‘སམྨསནྟོ’’ཏི པདསྶ ཨཏྠདསྶནཝསེན ‘‘པཙྩཝེཀྑནྟོ’’ཏི ཨཱཧ. པཙྩཝེཀྑཎཱ ཨིདྷ སམྨསནཾ ནཱམ, ན ཝིཔསྶནཱ. ཝིཔསྶནཱསམྨསནཾ པན བྷགཝཏོ ¶ ཝིསཱཁཔུཎྞམཱཡཾ ཨེཝ ནིཔྥནྣཾ, ཏསྨཱ བྷགཝཏོ ཨཉྙབྷཱུམིཀཱཔི ཝེདནཱ ཨཉྙབྷཱུམིཀཱནཾ སཏྟཱནཾ ཝིརུདྡྷཱ ཨུཔྤཛྫཏེཝཱཏི ཝུཏྟཾ ‘‘ཡཱཝ བྷཝགྒཱ པཝཏྟཱ སུཁཱ ཝེདནཱ’’ཏི. སབྦཱཀཱརེནཱཏི སརཱུཔཏོ སམུདཡཏོ ཨཏྠངྒམཏོ ཨསྶཱདཱདིཏོཏི སབྦཱཀཱརེན. པརིགྒཎྷནྟོ ཨུཔཔརིཀྑནྟོ.

ནིཔྤདེསཱནེཝ ¶ ཨནཝསེསཱནེཝ. ཨིནྡྲིཡསཏིཔཊྛཱནཔདེསོ སུཝིཉྙེཡྻོཏི ཨནུདྡྷཏོ. ཨསྶཱཏི བྷགཝཏོ. ཋཱནེཏི ཏསྨིཾ ཏསྨིཾ པཙྩཝེཀྑིཏབྦསངྑཱཏེ ཨོཀཱསེ. སཱ སཱ ཙ ཝིཧཱརསམཱཔཏྟཱིཏི ཁནྡྷཝསེན ཨཱཡཏནཱདིཝསེན ཙ པཝཏྟིཏྭཱ ཏེསཾ ཨེཀདེསབྷཱུཏཾ ཝེདནཾཡེཝ པརིགྒཧེཏྭཱ ཏཾ སམྨསིཏྭཱ ཨནུཀྐམེན སམཱཔནྣཱ ཛྷཱནསམཱཔཏྟི ཕལསམཱཔཏྟི ཙ. ཕལསམཱཔཏྟི ཧི ཏཐཱ སམྨསིཏྭཱ པུནཔྤུནཾ སམཱཔཛྫནཝསེན ཨཏྠཏོ ཨབྷིནྣཱཔི ཨདྷིཊྛཱནབྷཱུཏདྷམྨབྷེདེན བྷིནྣཱ ཝིཡ ཝུཙྩཏི, ཡཏོ ཙཏུཝཱིསཏིཀོཊིསཏསཧསྶབྷེདཱ དེཝསིཀཾ ཝལ༹ཉྫནསམཱཔཏྟིཡོ ཨཊྛཀཐཱཡཾ ཝུཏྟཱ. ཀཱམཾ ཨཉྙདྷམྨཝསེནཔི ཛཱཏཱ ཨེཝ, ཝེདནཱཝསེན པནེཏྠ ཨབྷིནིཝེསོ ཀཏོ ཝེདནཱནུབྷཱཝེན ཛཱཏཱ. ཀསྨཱ ཨེཝཾ ཛཱཏཱཏི? བུདྡྷཱནཾ ཉཱཎཔདསྶ ཨནྟརཝིབྷཱགཏྟཱ. ཏཐཱ ཧི བྷགཝཱ སཀལམྤི ཨཌྜྷམཱསཾ ཝེདནཱཝསེནེཝ སམྨསནཾ པཝཏྟེཏི, ཏདནུསཱརེན ཙ ཏཱ ཝིཧཱརསམཱཔཏྟིཡོ སམཱཔཛྫི. ཏཡིདཾ ཨཙྪརིཡཾ ཨནཉྙསཱདྷཱརཎཾ བྷིཀྑཱུ པཝེདེནྟོ སཏྠཱ – ‘‘ཡེན སྭཱཧ’’ནྟིཨཱདིམཝོཙ.

ཨཀུསལཱཝཱཏི པཱཎཱཏིཔཱཏ-ཨདིནྣཱདཱན-ཀཱམེསུམིཙྪཱཙཱར-མུསཱཝཱད-པིསུཎཝཱཙཱསམྥཔྤལཱཔ-ཨབྷིཛ྄ཛྷཱ-བྱཱཔཱདཝསེན ཏཾཏཾམིཙྪཱདསྶནཝསེན ཙ ཨཀུསལཱ ཝེདནཱ ཨེཝ ཧོཏི. བྲཧྨལོཀཱདཱིསུ ཨུཔྤཛྫིཏྭཱ ཏཏྠ ནིཙྩཱ དྷུཝཱ བྷཝིསྶཱམཱཏི ཨེཝཾ དིཊྛིཾ ཨུཔནིསྶཱཡཱཏི ཡོཛེཏབྦཾ. དེཝཀུལཱདཱིསུ དེཝཔཱུཛཏྠཾ, སབྦཛནཔརིབྷོགཏྠཾ ཝཱ མཱལཱཝཙྪཾ རོཔེནྟི. ཝདྷབནྡྷནཱདཱིནཱིཏི ཨཱདི-སདྡེན ཨདིནྣཱདཱན-མིཙྪཱཙཱར-མུསཱཝཱད-པིསུཎཝཱཙཱ-སམྥཔྤལཱཔཱདཱིནཾ སངྒཧོ དཊྛབྦོ. དིཊྛདྷམྨཝིཔཱཀསྶ ཨཔཙུརཏྟཱ ཨཔཱཀཊཏྟཱ ཙ ‘‘བྷཝནྟརགཏཱན’’ནྟི ཝུཏྟཾ.

ཨིཏི ནེསནྟི ཨེཏྠ ཨིཏི-སདྡོ ཨཱདིཨཏྠོ, པཀཱརཏྠོ ཝཱ. ཏེན ཡཐཱ ཕརུསཝཱཙཱཝསེན, ཨེཝཾ ཏདཉྙེསམྤི ཨཀུསལཀམྨཱནཾ ཝསེན སམྨཱདིཊྛིཔཙྩཡཱ ¶ ཨཀུསལཝེདནཱཔྤཝཏྟི ཡཐཱརཧཾ ནཱིཧརིཏྭཱ ཝཏྟབྦཱ. ཨེསེཝ ནཡོཏི ཨིམིནཱ ཡཐཱ མིཙྪཱདིཊྛིཔཙྩཡཱ སམྨཱདིཊྛིཔཙྩཡཱ ཙ ཀུསལཱཀུསལཝིཔཱཀཝེདནཱ སཧཛཱཏཀོཊིཡཱ ཨུཔནིསྶཡཀོཊིཡཱ ཙ ཝསེན ཡཐཱརཧཾ ཡོཛེཏྭཱ དསྶིཏཱ, ཨེཝཾ མིཙྪཱསངྐཔྤཔཙྩཡཱདཱིསུཔི ཡཐཱརཧཾ ཡོཛེཏྭཱ དསྶེཏབྦཱཏི ཨིམམཏྠཾ ཨཏིདིསཏི. ཚནྡཔཙྩཡཱཏི ཨེཏྠ ཏཎྷཱཚནྡསཧིཏོ ཀཏྟུཀཱམཏཱཚནྡོ ཨདྷིཔྤེཏོཏི ཨཱཧ ‘‘ཚནྡཔཙྩཡཱཏིཨཱདཱིསུ པན ཚནྡཔཙྩཡཱ ཨཊྛལོབྷསཧགཏཙིཏྟསམྤཡུཏྟཱ ཝེདནཱ ཝེདིཏབྦཱ’’ཏི. ཝིཏཀྐཔཙྩཡཱཏི ཨེཏྠ ཨཔྤནཱཔྤཏྟོཝ ཝིཏཀྐོ ཨདྷིཔྤེཏོཏི ཝུཏྟཾ ‘‘ཝིཏཀྐཔཙྩཡཱ པཋམཛ྄ཛྷཱནཝེདནཱཝཱ’’ཏི. ཝིཏཀྐཔཙྩཡཱ པཋམཛ྄ཛྷཱནཝེདནཱཡ གཧིཏཏྟཱ ‘‘ཋཔེཏྭཱ པཋམཛ྄ཛྷཱན’’ནྟི. ཨུཔརི ཏིསྶོ རཱུཔཱཝཙརཱ, ཧེཊྛཱ ཏིསྶོ ཨརཱུཔཱཝཙརཱ ཨེཝཾ སེསཱ ཚ སཉྙཱསམཱཔཏྟིཝེདནཱ.

ཏིཎྞནྟི ¶ ཚནྡཝིཏཀྐསཉྙཱནཾ. ཨཝཱུཔསམེཏི པཊིཔཀྑེན ཨཝཱུཔསམིཏེ. ཏིཎྞཉྷི ཏེསཾ སཧབྷཱཝེན པཙྩཡཏཱ ཨཊྛལོབྷསཧགཏཙིཏྟེསུ ཨེཝ. ཏཏྠ ཡཾ ཝཏྟབྦཾ ཏཾ ཝུཏྟམེཝ. ཚནྡམཏྟསྶཱཏི ཏེསུ ཏཱིསུ ཚནྡམཏྟསྶ. ཝཱུཔསམེ པཋམཛ྄ཛྷཱནཝེདནཱཝ ཨཔྤནཱཔྤཏྟསྶ ཨདྷིཔྤེཏཏྟཱ. ཚནྡཝིཏཀྐཱནཾ ཝཱུཔསམེ དུཏིཡཛ྄ཛྷཱནཱདིཝེདནཱ ཨདྷིཔྤེཏཱ སཉྙཱཡ ཨཝཱུཔསནྟཏྟཱ. དུཏིཡཛ྄ཛྷཱནཱདིཝེདནཱགཧཎེན ཧི སབྦཱ སཉྙཱསམཱཔཏྟིཡོ ཙ གཧིཏཱཝ ཧོནྟི. ཏིཎྞམྤི ཝཱུཔསམེཏི ཚནྡཝིཏཀྐསཉྙཱནཾ ཝཱུཔསམེ ནེཝསཉྙཱནཱསཉྙཱཡཏནཝེདནཱ ཨདྷིཔྤེཏཱ. བྷཝགྒཔྤཏྟསཉྙཱ ཧི ཝཱུཔསམནྟི ཚནྡསངྐཔྤཱནཾ ཨཙྩནྟསུཁུམབྷཱཝཔྤཏྟིཡཱ. ཧེཊྛཱ ‘‘སམྨཱདིཊྛིཔཙྩཡཱ’’ཏི ཨེཏྠ སམྨཱདིཊྛིགྒཧཎེན ཧེཊྛིམམགྒསམྨཱདིཊྛིཔི གཧིཏཱཝ ཧོཏཱིཏི ཨཱཧ – ‘‘ཨཔྤཏྟསྶ པཏྟིཡཱཏི ཨརཧཏྟཕལསྶ པཏྟཏྠཱཡཱ’’ཏི. ཨཐ ཝཱ ཧེཊྛིམམགྒཱདྷིགམེན ཝིནཱ ཨགྒམགྒོ ནཏྠཱིཏི ཧེཊྛིམམགྒཱདྷིགམཾ ཨཏྠཱཔནྣཾ ཀཏྭཱ ‘‘ཨརཧཏྟཕལསྶ པཏྟཏྠཱཡཱ’’ཏི ཝུཏྟཾ. ཨཱཡམེཏི ཕལེན མིསྶིཏོ ཧོཏི ཨེཏེནཱཏི ཨཱཡཱམོ, སམྨཱཝཱཡཱམོཏི ཨཱཧ ‘‘ཨཏྠི ཨཱཡཱམནྟི ཨཏྠི ཝཱིརིཡ’’ནྟི. ཏསྶ ཝཱིརིཡཱརམྦྷསྶཱཏི ཨཉྙཱདྷིགམཀཱརཎསྶ སམྨཱཝཱཡཱམསྶ ཝསེན. པཱལི༹ཡཾ ཋཱན-སདྡོ ཀཱརཎཔརིཡཱཡོཏི ཨཱཧ – ‘‘ཨརཧཏྟཕལསྶ ཀཱརཎེ’’ཏི. ཏཔྤཙྩཡཱཏི ཨེཏྠ ཏཾ-སདྡེན ‘‘ཋཱནེ’’ཏི ཝུཏྟཀཱརཎམེཝ པཙྩཱམཊྛནྟི ཨཱཧ – ‘‘ཨརཧཏྟསྶ ཋཱནཔཙྩཡཱ’’ཏི. ཙཏུམགྒསཧཛཱཏཱཏི ཨེཏེན ‘‘ཨརཧཏྟཕལསྶ པཏྟཏྠཱཡཱ’’ཏི ¶ ཨེཏྠ ཧེཊྛིམམགྒཱནཾ ཨཏྠཱཔཏྟིཝསེན གཧིཏབྷཱཝམེཝ ཛོཏེཏི. ཀེཙི པན ‘‘ཙཏུམགྒསཧཛཱཏཱཏི ཝཏྭཱ ནིབྦཏྟིཏལོཀུཏྟརཝེདནཱཏི བྷཱུཏཀཐནཾ ཝིསེསནཾ. ནིབྦཏྟིཏལོཀུཏྟརཝེདནཱཏི པཋམཾ ཨཔེཀྑིཏབྦཾ, པཙྪཱ ཙཏུམགྒསཧཛཱཏཱ’’ཏི ཝདནྟི.

པཋམཝིཧཱརསུཏྟཝཎྞནཱ ནིཊྛིཏཱ.

༢. དུཏིཡཝིཧཱརསུཏྟཝཎྞནཱ

༡༢. མིཙྪཱདིཊྛི ཝཱུཔསམཏི སབྦསོ པཧཱིཡཏི ཨེཏེནཱཏི མིཙྪཱདིཊྛིཝཱུཔསམོ. ‘‘མིཙྪཱདིཊྛིཝཱུཔསམོ ནཱམ སམྨཱདིཊྛི. བྷཝནྟརེ ཨུཔྤཛྫནྟོ ཨཏིདཱུརེཏི མཉྙམཱནོ ཝིཔཱཀཝེདནཾ ན གཎྷཱཏཱི’’ཏི ཨཊྛཀཐཱཡཾ ཝུཏྟཾ. ‘‘ཨིམིནཱ ནཡེནཱ’’ཏི ཨཏིདིསིཏྭཱཔི ཏམཏྠཾ པཱཀཊཏརཾ ཀཱཏུཾ ‘‘ཡསྶ ཡསྶཱ’’ཏིཨཱདིཾ ཝཏྭཱ ཨེཝ སཱམཉྙཝསེན ཝུཏྟམཏྠཾ པཙྪིམེསུ ཏཱིསུ པདེསུ སརཱུཔཏོཝ དསྶེཏུཾ ‘‘ཚནྡཝཱུཔསམཔཙྩཡཱ’’ཏིཨཱདིམཱཧ, ཏཾ སུཝིཉྙེཡྻམེཝ. ཝུཏྟཏྠཱནེཝ ཨནནྟརསུཏྟེ.

དུཏིཡཝིཧཱརསུཏྟཝཎྞནཱ ནིཊྛིཏཱ.

༣-༧. སེཀྑསུཏྟཱདིཝཎྞནཱ

༡༣-༡༧. ཏིསྶནྣམྤི ¶ སིཀྑཱནཾ སིཀྑནཾ སཱིལཾ ཨེཏསྶཱཏི སིཀྑནསཱིལོ. སིཀྑཏཱིཏིཔི ཝཱ སེཀྑོ. ཝུཏྟཉྷེཏཾ ‘‘སིཀྑཏཱིཏི ཁོ, བྷིཀྑཝེ, ཏསྨཱ སེཀྑོཏི ཝུཙྩཏི. ཀིཉྩ སིཀྑཏི? ཨདྷིསཱིལམྤི སིཀྑཏཱི’’ཏིཨཱདི (ཨ. ནི. ༣.༨༦). ཏཱིཧི ཕལེཧི ཧེཊྛཱ. སཱཔི ཙཏུཏྠམགྒེན སདྡྷིཾ ཨུཔྤནྣསིཀྑཱཔི. མགྒཀྑཎེ ཧི སིཀྑཱཀིཙྩཾ ན ནིཊྛིཏཾ ཝིཔྤཀཏབྷཱཝཏོ, ཕལཀྑཎེ པན ནིཊྛིཏཾ ནཱམ. ཨུཏྟཱནཏྠཱནེཝ ཧེཊྛཱ ཝུཏྟནཡཏྟཱ.

སེཀྑསུཏྟཱདིཝཎྞནཱ ནིཊྛིཏཱ.

ཝིཧཱརཝགྒཝཎྞནཱ ནིཊྛིཏཱ.

༣. མིཙྪཏྟཝགྒཝཎྞནཱ

༢༡-༣༠. མིཙྪཱསབྷཱཝནྟི ¶ ཨཡཱཐཱཝསབྷཱཝཾ ཨནིཡྻཱནིཀསབྷཱཝཾ. སམྨཱསབྷཱཝནྟི ཡཱཐཱཝསབྷཱཝཾ ནིཡྻཱནིཀསབྷཱཝཾ. མིཙྪཱཔཊིཔཏྟཱདྷིཀརཎཧེཏཱུཏི ཨེཏྠ ཨདྷི-སདྡོ ཨནཏྠཀོཏི ཨཱཧ – ‘‘མིཙྪཱཔཊིཔཏྟིཀརཎཧེཏཱུ’’ཏི. ཉཱཡཏི པཊིཝིདྡྷཝསེན ནིབྦཱནཾ གཙྪཏཱིཏི ཉཱཡོ. སོ ཨེཝ ཏཾསམངྒཱིནཾ ཝཊྚདུཀྑཔཱཏཏོ དྷཱརཎཊྛེན དྷམྨོཏི ཨཱཧ – ‘‘ཉཱཡཾ དྷམྨནྟི ཨརིཡམགྒདྷམྨ’’ནྟི. ཉཱཎསྶ མིཙྪཱསབྷཱཝོ ནཱམ ནཏྠཱིཏི ཝིཉྙཱཎམེཝེཏྠ པཙྩཝེཀྑཎཝསེན པཝཏྟཾ ཉཱཎ-སདྡེན ཝུཙྩཏཱིཏི ཨཱཧ ‘‘མིཙྪཱཝིཉྙཱཎོ’’ཏི. མིཙྪཱཔཙྩཝེཀྑཎོཏི ཀིཉྩི པཱཔཾ ཀཏྭཱ ‘‘ཨཧོ མཡཱ ཀཏཾ སུཀཏ’’ནྟི ཨེཝཾ པཝཏྟོ མིཙྪཱཔཙྩཝེཀྑཎོ. གོསཱིལགོཝཏཱདིཔཱུརཎཾ མུཏྟཱིཏི ཨེཝཾ གཎྷཏོ མིཙྪཱཝིམུཏྟི ནཱམ. མིཙྪཱཔཊིཔདཱདཱིཧི ཝིཝཊྚནྟི ཨེཝཾ ཝཊྚཝིཝཊྚཾ ཀཐིཏཾ. པུགྒལོ པུཙྪིཏོཏི ནིགམིཏོ ཙ ‘‘ཨཡཾ ཝུཙྩཏི, བྷིཀྑཝེ, ཨསཔྤུརིསོ’’ཏིཨཱདིནཱ. ཀིཉྩཱཔི ‘‘མིཙྪཱདིཊྛིཀོ ཧོཏཱི’’ཏིཨཱདིནཱ པུགྒལོཝ ནིདྡིཊྛོ, ཏཐཱཔི པུགྒལསཱིསེནཱཡཾ དྷམྨདེསནཱཏི ཨཱཧ ‘‘དྷམྨོ ཝིབྷཏྟོ’’ཏི. ཏེནེཝཱཧ ‘‘དྷམྨེན པུགྒལོ དསྶིཏོ’’ཏི. དྷམྨེནཱཏི མིཙྪཱདིཊྛིཨཱདིཀེན དྷམྨེན. ཀལྱཱཎཔུཐུཛྫནཏོ པཊྛཱཡ སབྦསོ སཔྤུརིསཱ ནཱམ, ཁཱིཎཱསཝོ སཔྤུརིསཏརོ. སུཔྤཝཏྟནིཡོཏི སུཁེན པཝཏྟེཏུཾ སཀྐུཎེཡྻོ. དྷཱཝཏཱིཏི གཙྪཏི. པཙྩཡུཔྤནྣེན ཨུཔེཙྩ ནིསྶིཏབྦཏོ ཨུཔནིསཱ, པཙྩཡོ, ཨེཀསྶ ས-ཀཱརསྶ ལོཔཾ ཀཏྭཱ ཝཱཏི ཨཱཧ – ‘‘སཨུཔནིསཾ སཔཙྩཡ’’ནྟི. པརིཀརཎཏོ པརིཀྑཱརོ, པརིཝཱརོཏི ¶ ཨཱཧ – ‘‘སཔརིཀྑཱརཾ སཔརིཝཱར’’ནྟི. སཧཛཱཏཝསེན ཨུཔནིསྶཡཝསེན ཙ སཔཙྩཡཏཱ ཀིཙྩསཱདྷནེ ནིཔྥཱདནེ སཧཱཡབྷཱཝཱུཔགམནེ ཙ སཔརིཝཱརཏཱ དཊྛབྦཱ.

མིཙྪཏྟཝགྒཝཎྞནཱ ནིཊྛིཏཱ.

༤. པཊིཔཏྟིཝགྒཝཎྞནཱ

༣༡-༤༠. ཨཡཱཐཱཝཔཊིཔཏྟི, ན ཡཐཱཔཊིཔཏྟི, ཧེཏུམྷིཔི ཕལེཔི ཨཡཱཐཱཝཝཏྠུསཱདྷནཏོ. ཨེཀཾ སུཏྟཾ དྷམྨཝསེན ཀཐིཏཾ པཊིཔཏྟིཝསེན. ཨེཀཾ སུཏྟཾ པུགྒལཝསེན ཀཐིཏཾ པཊིཔནྣཀཝསེན. སཾསཱརམཧོགྷསྶ པརཏཱིརབྷཱཝཏོ ཡོ ནཾ ཨདྷིགཙྪཏི, ཏཾ པཱརེཏི གམེཏཱིཏི པཱརཾ, ནིབྦཱནཾ, ཏབྦིདྷུརཏཱཡ ¶ ནཏྠི ཨེཏྠ པཱརནྟི ཨཔཱརཾ, སཾསཱརོཏི ཝུཏྟཾ – ‘‘ཨཔཱརཱཔཱརནྟི ཝཊྚཏོ ནིབྦཱན’’ནྟི. པཱརངྒཏཱཏི ཨསེཀྑེ སནྡྷཱཡ. ཡེཔི གཙྪནྟཱིཏི སེཀྑེ. ཡེཔི གམིསྶནྟཱིཏི ཀལྱཱཎཔུཐུཛྫནེ. པཱརགཱམིནོཏི ཨེཏྠ ཀིཏ-སདྡོ ཏིཀཱལཝཱཙཱིཏི ཨེཝཾ ཝུཏྟཾ.

ཏཱིརནྟི ཨོརིམཏཱིརམཱཧ. ཏེན ཝུཏྟཾ ‘‘ཝཊྚམེཝ ཨནུདྷཱཝཏཱི’’ཏི. ཨེཀནྟཀཱལ༹ཀཏྟཱ ཙིཏྟསྶ ཨཔབྷསྶརབྷཱཝཀརཎཏོ ཀཎྷཱབྷིཛཱཏིཧེཏུཏོ ཙ ཝུཏྟཾ ‘‘ཀཎྷནྟི ཨཀུསལདྷམྨ’’ནྟི. ཝོདཱནབྷཱཝཏོ ཙིཏྟསྶ པབྷསྶརབྷཱཝཀརཎཏོ སུཀྐཱབྷིཛཱཏིཧེཏུཏོ ཙ ཝུཏྟཾ – ‘‘སུཀྐནྟི ཀུསལདྷམྨ’’ནྟི. ཀིལེསམཱར-ཨབྷིསངྑཱརམཱར-མཙྩུམཱརཱནཾ པཝཏྟིཊྛཱནཏཱཡ ཨོཀཾ ཝུཙྩཏི ཝཊྚཾ, ཏབྦིདྷུརཏཱཡ ཨནོཀནྟི ནིབྦཱནནྟི ཨཱཧ – ‘‘ཨོཀཱ ཨནོཀནྟི ཝཊྚཏོ ནིབྦཱན’’ནྟི.

པརམཏྠཏོ སམཎཱ ཝུཙྩནྟི ཨརིཡཱ, སམཎཱནཾ བྷཱཝོ སཱམཉྙཾ, ཨརིཡམགྒོ, ཏེན ཨརཎཱིཡཏོ ཨུཔགནྟབྦཏོ སཱམཉྙཏྠོ ནིབྦཱནནྟི ཨཱཧ – ‘‘སཱམཉྙཏྠནྟི ནིབྦཱནཾ, ཏཾ ཧཱི’’ཏིཨཱདི. བྲཧྨཉྙཏྠནྟི ཨེཏྠཱཔི ཨིམིནཱ ནཡེན ཨཏྠོ ཝེདིཏབྦོ. བྲཧྨཉྙེན ཨརིཡམགྒེན. རཱགཀྑཡོཏི ཨེཏྠ ཨིཏི-སདྡོ ཨཱདིསདྡཏྠོ. ཏེན ‘‘དོསཀྑཡོ མོཧཀྑཡོ’’ཏི པདདྭཡཾ སངྒཎྷཱཏི. ཝཊྚཏིཡེཝཱཏི ཝདནྟི ‘‘རཱགཀྑཡོ’’ཏི. པརིཡཱཡེན ཧི ཨརཧཏྟསྶ ཝཏྟབྦཏྟཱཏི.

པཊིཔཏྟིཝགྒཝཎྞནཱ ནིཊྛིཏཱ.

༥. ཨཉྙཏིཏྠིཡཔེཡྻཱལཝགྒཝཎྞནཱ

༤༡-༤༨. ཨཔརཱཔརཾ ¶ པརིཝཏྟམཱནེན ཝཏྟསམྤནྣེན སཾསཱརདྡྷཱནཔརིཉྙཱཝསེནེཝ ནིབྦཱནསྶ པཏྟབྦཏྟཱ ཝུཏྟཾ – ‘‘ནིབྦཱནཾ པཏྭཱ པརིཉྙཱཏཾ ནཱམ ཧོཏཱི’’ཏི. ནིབྦཱནཾ པཏྭཱཏི ནིབྦཱནཔྤཏྟིཧེཏུ. ཧེཏུཨཏྠོ ཧི ཨཡཾ ཏྭཱ-སདྡོ ཡཐཱ – ‘‘གྷཏཾ པིཝིཏྭཱ བལཾ ཧོཏི, སཱིཧཾ དིསྭཱ བྷཡཾ ཧོཏཱི’’ཏི. ཏསྨཱཏི ཡསྨཱ ཨཔརིཉྙེཡྻཔརིཛཱནནཀིཙྩེན ནིབྦཱནསྶ པཏྟིཡཱ ཨདྡྷཱནཔརིཉྙཱསིདྡྷི ཉཱཡཏི, ཏསྨཱ ཨུཔཙཱརཝསེན ནིབྦཱནཾ ‘‘ཨདྡྷཱནཔརིཉྙཱ’’ཏི ཝུཙྩཏི ཡཐཱ ‘‘ཧིམསནྟི སཱུརིཡཾ ཨུགྒམེཏཱི’’ཏི. ཝིཛྫཱཝིམུཏྟིཕལསཙྪིཀིརིཡཏྠནྟི ཨེཏྠ ཝིཛྫཱཏི ཨགྒམགྒཝིཛྫཱ. ཝིམུཏྟཱིཏི ཨགྒམགྒསམཱདྷི ཨདྷིཔྤེཏོ ¶ . ཏེསཾ ཕལཾ ཨཉྙཱཏི ཨཱཧ – ‘‘ཝིཛྫཱཝིམུཏྟིཕལེན ཨརཧཏྟཾ ཀཐིཏ’’ནྟི. ཡཱཐཱཝཏོ ཛཱནནཏོ པཙྩཀྑཏོ དསྶནཏོ ཙ ཉཱཎདསྶནནྟི ཨིདྷ ཕལནིབྦཱནཔཙྩཝེཀྑཎཱ ཨདྷིཔྤེཏཱཏི ཨཱཧ – ‘‘ཉཱཎདསྶནེན པཙྩཝེཀྑཎཱ ཀཐིཏཱ’’ཏི. སེསེཧཱིཏི རཱག-ཝིརཱག-སཾཡོཛནཔྤཧཱན-ཨནུསཡསམུགྒྷཱཏ-ཨདྡྷཱནཔརིཉྙཱ- ཨཱསཝཀྑཡ-ཝིཛྫཱ-ཝིམུཏྟི-ཕལསཙྪིཀིརིཡཱ-ཉཱཎདསྶན-ཨནུཔཱདཱཔརིནིབྦཱནཔདེཧི.

ཨཉྙཏིཏྠིཡཔེཡྻཱལཝགྒཝཎྞནཱ ནིཊྛིཏཱ.

༦. སཱུརིཡཔེཡྻཱལཝགྒཝཎྞནཱ

༤༩-༦༢. ཡཐཱ ཨརུཎུགྒཾ སཱུརིཡུགྒམནསྶ ཨེཀནྟིཀཾ པུབྦནིམིཏྟཾ, ཨེཝཾ ཀལྱཱཎམིཏྟཏཱ ཨརིཡམགྒཔཱཏུབྷཱཝསྶཱཏི སདིསཱུཔམཱ ཨརུཎུགྒཾ ཀལྱཱཎམིཏྟཏཱཡ. ཀལྱཱཎམིཏྟོཏི ཙེཏྠ ཨརིཡོ, ཨརིཡམགྒོ ཝཱ དཊྛབྦོ སཱུརིཡཔཱཏུབྷཱཝོ ཝིཡ ཏེན ཝིདྷཱུཔནཱིཡནྡྷཀཱརཝིདྷམནཏོ. ཀུསལཀཏྟུཀམྱཏཱཚནྡོ ཚནྡསམྤདཱ ཨིཏརཚནྡཏོ སམྤནྣཏྟཱ. ཀཱརཱཔཀཨཔྤམཱདསྶཱཏི སཙྩཔཊིཝེདྷསྶ ཀཱརཱཔཀསྶ. ཨེཝཾ སབྦཏྠེཝ སམྤདཱསདྡཱ ཝིསེསཱདྷིགམཧེཏུཏཱཡ ཝེདིཏབྦཱ. ཨཉྙེནཔི ཨཱཀཱརེནཱཏི ‘‘ཝིཝེཀནིསྶིཏ’’ནྟིཨཱདིཨཱཀཱརཏོ ཨཉྙེན ‘‘རཱགཝིནཡཔརིཡོསཱན’’ནྟིཨཱདིནཱ ཨཱཀཱརེན.

སཱུརིཡཔེཡྻཱལཝགྒཝཎྞནཱ ནིཊྛིཏཱ.

༧. ཨེཀདྷམྨཔེཡྻཱལཝགྒཱདིཝཎྞནཱ

༦༣-༡༣༨. ཏཐཱ ¶ ཏཐཱ ཝུཏྟེ བུཛ྄ཛྷནཀཱནཾ ཨཛ྄ཛྷཱསཡཝསེན ཀཐིཏོ, ཏསྨཱ ‘‘ཝུཏྟོ ཨེཝ ཨཏྠོ, ཀསྨཱ པུན ཝུཏྟོ’’ཏི ན ཙོདེཏབྦཾ.

ཨེཀདྷམྨཔེཡྻཱལཝགྒཱདིཝཎྞནཱ ནིཊྛིཏཱ.

༨. ཨཔྤམཱདཔེཡྻཱལཝགྒོ

༡. ཏཐཱགཏསུཏྟཝཎྞནཱ

༡༣༩. ཀཱརཱཔཀཨཔྤམཱདོ ¶ ནཱམ ‘‘ཨིམེ ཨཀུསལཱ དྷམྨཱ པཧཱཏབྦཱ, ཨིམེ ཀུསལཱ དྷམྨཱ ཨུཔྤཱདེཏབྦཱ’’ཏི ཝུཏྟཝཛྫེཏབྦཝཛྫནསམྤཱདེཏབྦསམྤཱདནཝསེན པཝཏྟོ ཨཔྤམཱདོ. ཨེསཱཏི ཨཔྤམཱདོ. ལོཀིཡོཝ. ན ལོཀུཏྟརོ. ཨཡནྟི ཨེསཱཏི ཙ ཨཔྤམཱདམེཝ ཝདཏི. ཏེསནྟི ཙཏུབྷཱུམཀདྷམྨཱནཾ. པཊིལཱབྷཀཊྛེནཱཏི པཊིལཱབྷཱཔནཊྛེན.

ཏཐཱགཏསུཏྟཝཎྞནཱ ནིཊྛིཏཱ.

༢. པདསུཏྟཝཎྞནཱ

༡༤༠. ཛངྒལཱནནྟི ཛངྒལཝཱསཱིནཾ. ཛངྒལ-སདྡོ ཙེཏྠ ཐདྡྷབྷཱཝསཱམཉྙེན པཐཝཱིཔརིཡཱཡོ, ན ཨནུཔཊྛཱནཝིདཱུརདེསཝཱཙཱི. ཏེནཱཧ – ‘‘པཐཝཱིཏལཝཱསཱིན’’ནྟི. པདཱནཾ ཝུཙྩམཱནཏྟཱ ‘‘སཔཱདཀཔཱཎཱན’’ནྟི ཝིསེསེཏྭཱ ཝུཏྟཾ. སམོདྷཱནནྟི ཨནྟོགདྷབྷཱཝཾ. ཏེནཱཧ – ‘‘ཨོདྷཱནཾ ཨུཔཀྑེཔ’’ནྟི, ཨུཔནེཏྭཱ པཀྑིཔིཏབྦནྟི ཨཏྠོ.

པདསུཏྟཝཎྞནཱ ནིཊྛིཏཱ.

༣-༡༠. ཀཱུཊསུཏྟཱདིཝཎྞནཱ

༡༤༡-༡༤༨. ཝསྶིཀཱཡ པུཔྥཾ ཝསྶིཀཾ ཡཐཱ ‘‘ཨཱམལཀིཡཱ ཕལཾ ཨཱམལཀ’’ནྟི. མཧཱཏལསྨིནྟི ¶ ཨུཔརིཔཱསཱདེ. ‘‘ཡཱནི ཀཱནིཙཱི’’ཏི པདེཧི ཨིཏརཱནི སམཱནཱདྷིཀརཎཱནི བྷཝིཏུཾ ཡུཏྟཱནཱིཏི ‘‘པཙྩཏྟེ སཱམིཝཙན’’ནྟི ཝཏྭཱ ཏཐཱ ཝིབྷཏྟིཝིཔརིཎཱམོ ཀཏོ. ‘‘ཏནྟཱཝུཏཱན’’ནྟི པདཾ ནིདྡྷཱརཎེ སཱམིཝཙནནྟི ཏཏྠ ‘‘ཝཏྠཱནཱི’’ཏི ཝཙནསེསེན ཨཏྠཾ དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ.

ཀཱུཊསུཏྟཱདིཝཎྞནཱ ནིཊྛིཏཱ.

ཨཔྤམཱདཝགྒཝཎྞནཱ ནིཊྛིཏཱ.

༩. བལཀརཎཱིཡཝགྒོ

༡. བལསུཏྟཝཎྞནཱ

༡༤༩. ཀམྨཱནིཡེཝ ¶ ཀམྨནྟཱ ཡཐཱ སུཏྟནྟཱ. ཨརིཡཾ ཨཊྛངྒིཀཾ མགྒནྟི ཨེཏྠ ནཱནནྟརིཡཀཏཱཡ ཝིཔསྶནཱཔི གཧིཏཱ ཨེཝ ཧོཏཱིཏི ཝུཏྟཾ ‘‘སཧཝིཔསྶན’’ནྟི.

༢. བཱིཛསུཏྟཝཎྞནཱ

༡༥༠. པཉྩཝིདྷམྤི སམཱུཧཊྛེན བཱིཛགཱམོ ནཱམ. ཏདེཝཱཏི མཱུལབཱིཛཱདི ཨེཝ. སམྤནྣནྟི སཧཛཱཏམཱུལཝནྟཾ. ནཱིལབྷཱཝཏོ པཊྛཱཡཱཏི ནཱིལབྷཱཝཱཔཏྟིཏོ པཊྛཱཡ.

༣. ནཱགསུཏྟཝཎྞནཱ

༡༥༡. བལཾ གཱཧེནྟཱིཏི ཨཏྟནོ སརཱིརབལཾ གཱཧེནྟི. ཏཾ པན ནཱགཱནཾ བལཔྤཏྟི ཨེཝཱཏི ཨཱཧ – ‘‘བལཾ གཎྷནྟཱི’’ཏི. སམྦྷེཛྫམུཁདྭཱརནྟི མཧཱསམུདྡེན སམྦྷེདགཏམཧཱནདཱིནཾ མུཁདྭཱརཾ. ནཱགཱ ཀཱཡཾ ཝཌྜྷེནྟཱིཏིཨཱདི ཡསྨཱ ཙ བྷགཝཏཱ ཨུཔམཱཝསེན ཨཱབྷཏཾ, ཏསྨཱ ཨེཝམེཝ ཁོཏི ཨེཏྠཱཏིཨཱདིནཱ ཨུཔམཾ སཾསནྡཏི. ཨཱགཏེསཱུཏིཨཱདཱིསུ ཏཱིསུ པདེསུ བྷཱཝེནབྷཱཝལཀྑཎེ.

༥. ཀུམྦྷསུཏྟཝཎྞནཱ

༡༥༣. ན ¶ པཏིཨཱཝམཏཱིཏི ཙ ནིཀུཛྫིཏབྷཱཝེན ཨུདཀཝམནོ གྷཊོ, ན ཏཾ པུན མུཁེན གཎྷཱཏི. ཏེནཱཧ ‘‘ན ཨནྟོ པཝེསེཏཱི’’ཏི.

༧. ཨཱཀཱསསུཏྟཝཎྞནཱ

༡༥༥. ཏེནེཏཾ ཝུཏྟནྟི ཏེན ཨརིཡམགྒསྶ ཨིཛ྄ཛྷནེན ཨེཏེསཾ སབྦེསཾ བོདྷིཔཀྑིཡདྷམྨཱནཾ ཨིཛ྄ཛྷནཾ ཝུཏྟཾ.

༨-༩-༡༠. པཋམམེགྷསུཏྟཱདིཝཎྞནཱ

༡༥༦-༡༥༨. པཾསུརཛོཛལླནྟི བྷཱུམིརེཎུསཧཛཱཏམལཾ. ཝཱཎིཛཀོཔམེཏི ཝཱཎིཛཀོཔམཔཋམསུཏྟེ ཙཱཔི.

༡༡-༡༢. ཨཱགནྟུཀསུཏྟཱདིཝཎྞནཱ

༡༥༩-༡༦༠. སཧཝིཔསྶནསྶ ¶ ཨརིཡམགྒསྶ བྷཱཝནཱཡ ཨིཛ྄ཛྷནེན ཨེཏཾ ཨབྷིཉྙཱཔརིཉྙེཡྻཱདིདྷམྨཱནཾ ཨབྷིཉྙཱཔརིཛཱནནཱདཱིནཾ ཨིཛ྄ཛྷནཾ ཝུཏྟཾ ཁཏྟིཡཱདཱིནཾ ཝིསཡཨཱདིཀཾ ཀརོནྟསྶ ཀཐཱཡ སཛྫིཏཏྟཱ.

བལཀརཎཱིཡཝགྒཝཎྞནཱ ནིཊྛིཏཱ.

༡༠. ཨེསནཱཝགྒོ

༡. ཨེསནཱསུཏྟཝཎྞནཱ

༡༦༡. ཀཱམཱནནྟི ཝཏྠུཀཱམཀིལེསཀཱམཱནཾ. ཀིལེསཀཱམོཔི ཧི ཀཱམིཏནྟི པརིཀཔྤིཏེན ཝིདྷིནཱ ཙ ཨདྷིཀརཱགེཧི ཨེསནཱིཡོ. བྷཝཱནནྟི ཏིཎྞཾ གཏཱིནཾ. དིཊྛིགཏིཀཔརིཀཔྤིཏསྶ ¶ བྲཧྨཙརིཡསྶ ནིམིཏྟབྷཱཝཏོ མིཙྪཱདིཊྛི ‘‘བྲཧྨཙརིཡ’’ནྟི ཨདྷིཔྤེཏཱ.

༢-༡༡. ཝིདྷཱསུཏྟཱདིཝཎྞནཱ

༡༦༢-༡༧༡. སེཡྻོཧམསྨཱིཏིཨཱདིནཱ ཏཾཏཾཝིབྷཱགེན དྷཱིཡནྟི ཝིདྷཱིཡནྟཱིཏི ཝིདྷཱ, མཱནཀོཊྛཱསཱ, མཱནཊྛཔནཱ ཝཱ. ནཱིཧནནྟཱིཏི ཝིབཱདྷེནྟི.

ཨེསནཱཝགྒཝཎྞནཱ ནིཊྛིཏཱ.

༡༡. ཨོགྷཝགྒོ

༡-༢. ཨོགྷསུཏྟཱདིཝཎྞནཱ

༡༧༢-༡༧༣. ཝཊྚེ ཨོཧནནྟི ཨོསཱིདཱཔེནྟཱིཏི ཨོགྷཱ. རཱུཔཱརཱུཔབྷཝེཏི རཱུཔབྷཝེ ཙ ཨརཱུཔབྷཝེ ཙ རཱུཔཱརཱུཔཏཎྷོཔནིསྶཡཱ རཱུཔཱརཱུཔཱཝཙརཀམྨནིབྦཏྟཱ ཁནྡྷཱ. ཡོཛནཊྛེན ཡོགོ.

༣-༤. ཨུཔཱདཱནསུཏྟཱདིཝཎྞནཱ

༡༧༤-༡༧༥. ཀཱམནཝསེན ཨུཔཱདིཡནཏོ ཀཱམུཔཱདཱནཾ. ཏེནཱཧ ‘‘ཀཱམགྒཧཎ’’ནྟི. ནཱམཀཱཡསྶཱཏི ཝེདནཱདཱིནཾ ཙཏུནྣཾ ཨརཱུཔཀྑནྡྷཱནཾ. གྷཊནཔབནྡྷནཀིལེསོཏི ¶ ཧེཏུནཱ ཕལསྶ ཀམྨཝཊྚསྶ ཝིཔཱཀཝཊྚེན དུཀྑཔྤབནྡྷསཉྙིཏསྶ གྷཊནསྶ སམྦཛ྄ཛྷནསྶ ནིབྦཏྟཀཀིལེསོ. ཨནྟགྒཱཧིཀདིཊྛི སསྶཏུཙྪེདགཱཧོ.

ཨུཔཱདཱནསུཏྟཱདིཝཎྞནཱ ནིཊྛིཏཱ.

༥-༡༠. ཨནུསཡསུཏྟཱདིཝཎྞནཱ

༡༧༦-༡༨༡. ཐཱམགཏཊྛེནཱཏི སཏྟསནྟཱནེ ཐིརབྷཱཝཱུཔགམནབྷཱཝེན. ཐཱམགཏནྟི ཙ ཨཉྙེཧི ཨསཱདྷཱརཎོ ཀཱམརཱགཱདཱིནཾཡེཝ ཨཱཝེཎིཀོ སབྷཱཝོ དཊྛབྦོ. ཀཱམརཱགོཝཱཏི ཀཱམརཱགོ ¶ ཨེཝ ཨཔྤཧཱིནོ. སོ སཏི པཙྩཡལཱབྷེ ཨུཔྤཛྫནཱརཧཏཱཡ སནྟཱནེ ཨནུསེཏཱིཏི ཨནུསཡོ. སེསེསུཔཱིཏི པཊིགྷཱནུསཡཱདཱིསུ. ཨོརམྦྷཱགོ ཝུཙྩཏི ཀཱམདྷཱཏུ རཱུཔཱརཱུཔབྷཱཝཏོ ཧེཊྛཱབྷཱུཏཏྟཱ. ཏཏྠ པཝཏྟིཡཱ པཙྩཡབྷཱཝཏོ ཨོརམྦྷཱགིཡཱནི ཡཐཱ ‘‘པཙྪིཡོ གོདུཧཀོ’’ཏི. སཾཡོཛེནྟཱིཏི སཾཡོཛནཱནི, ཧེཊྛཱ ཝིཡ ཨཏྠོ ཝཏྟབྦོ. ཨུདྡྷམྦྷཱགོ མཧགྒཏབྷཱགོ, ཏསྶ ཧིཏཱནཱིཏི སབྦཾ ཧེཊྛཱ ཝུཏྟནཡཏྟཱ ན ཝུཏྟནྟི ཨདྷིཔྤཱཡོ.

ཨནུསཡསུཏྟཱདིཝཎྞནཱ ནིཊྛིཏཱ.

ཨོགྷཝགྒཝཎྞནཱ ནིཊྛིཏཱ.

མགྒསཾཡུཏྟཝཎྞནཱ ནིཊྛིཏཱ.

༢. བོཛ྄ཛྷངྒསཾཡུཏྟཾ

༡. པབྦཏཝགྒོ

༡.ཧིམཝནྟསུཏྟཝཎྞནཱ

༡༨༢. བུཛ྄ཛྷཏི ¶ ¶ ཙཏུསཙྩཾ ཨརིཡསཱཝཀོ ཨེཏཱཡཱཏི བོདྷཾ, དྷམྨསཱམགྒཱི, ཨརིཡསཱཝཀོ པན ཙཏུསཙྩཾ བུཛ྄ཛྷཏཱིཏི བོདྷི. ཨངྒཱཏི ཀཱརཎཱ. ཡཱཡ དྷམྨསཱམགྒིཡཱཏི སམྦནྡྷོ. ཏཎྷཱཝསེན པཏིཊྛཱནཾ, དིཊྛིཝསེན ཨཱཡཱུཧནཱ. སསྶཏདིཊྛིཡཱ པཏིཊྛཱནཾ, ཨུཙྪེདདིཊྛིཡཱ ཨཱཡཱུཧནཱ. ལཱིནཝསེན པཏིཊྛཱནཾ, ཨུདྡྷཙྩཝསེན ཨཱཡཱུཧནཱ. ཀཱམསུཁཱནུཡོགཝསེན པཏིཊྛཱནཾ, ཨཏྟཀིལམཐཱནུཡོགཝསེན ཨཱཡཱུཧནཱ. ཨོགྷཏརཎསུཏྟཝཎྞནཱཡཾ (སཾ. ནི. ༡.༡) –

‘‘ཀིལེསཝསེན པཏིཊྛཱནཾ, ཨབྷིསངྑཱརཝསེན ཨཱཡཱུཧནཱ. ཏཎྷཱདིཊྛཱིཧི པཏིཊྛཱནཾ, ཨཝསེསཀིལེསཱབྷིསངྑཱརེཧི ཨཱཡཱུཧནཱ, སབྦཱཀུསལཱབྷིསངྑཱརཝསེན པཏིཊྛཱནཾ, སབྦལོཀིཡཀུསལཱབྷིསངྑཱརཝསེན ཨཱཡཱུཧནཱ’’ཏི –

ཝུཏྟེསུ པཀཱརེསུ ཨིདྷ ཨཝུཏྟཱནཾ ཝསེན ཝེདིཏབྦོ. ཀིལེསསནྟཱནནིདྡཱཡ ཨུཊྛཧཏཱིཏི ཨེཏེན སིཁཱཔཏྟཝིཔསྶནཱསཧགཏཱནམྤི སཏིཨཱདཱིནཾ བོཛ྄ཛྷངྒབྷཱཝཾ དསྶེཏི. ཙཏྟཱརཱིཏིཨཱདིནཱ མགྒཕལེན སཧགཏཱནཾ. སཏྟཧི བོཛ྄ཛྷངྒེཧི བྷཱཝིཏེཧི སཙྩཔཊིཝེདྷོ ཧོཏཱིཏི ཀཐམིདཾ ཛཱནིཏབྦནྟི ཙོདནཾ སནྡྷཱཡཱཧ ‘‘ཡཐཱཧཱ’’ཏིཨཱདི. ཛྷཱནངྒམགྒངྒཱདཡོ ཝིཡཱཏི ཨེཏེན བོདྷིབོཛ྄ཛྷངྒསདྡཱནཾ སམུདཱཡཱཝཡཝཝིསཡཏཾ དསྶེཏི. སེནངྒརཐངྒཱདཡོ ཝིཡཱཏི ཨེཏེན པུགྒལཔཉྙཏྟིཡཱ ཨཝིཛྫམཱནཔཉྙཏྟིབྷཱཝཾ དསྶེཏི.

བོདྷཱཡ སཾཝཏྟནྟཱིཏི བོཛ྄ཛྷངྒཱཏི ཝུཏྟཾ ‘‘ཀཱརཎཏྠོ ཨངྒསདྡོ’’ཏི. བུཛ྄ཛྷཏཱིཏི བོདྷི, བོདྷིཡཱ ཨེཝ ཨངྒཱཏི བོཛ྄ཛྷངྒཱཏི ཝུཏྟཾ ‘‘བུཛ྄ཛྷནྟཱིཏི བོཛ྄ཛྷངྒཱ’’ཏི. ཝིཔསྶནཱདཱིནཾ ཀཱརཎཱནཾ བུཛ྄ཛྷིཏབྦཱནཾ སཙྩཱནཾ ཨནུརཱུཔཾ པཙྩཀྑབྷཱཝེན པཊིམུཁཾ ཨཝིཔརཱིཏཾ སམྨཱ བུཛ྄ཛྷནྟཱིཏི ཨེཝཾ ཝཏྠུཝིསེསདཱིཔཀེཧི ¶ ཨུཔརིམགྒེཧི ཨནུབུཛ྄ཛྷནྟཱིཏིཨཱདིནཱ ཝུཏྟབོདྷིསདྡེཧི ནིཔྤདེསེན ཝུཏྟཾ ¶ ‘‘བུཛ྄ཛྷནཏཱསཱམཉྙེན སངྒཎྷཱཏཱི’’ཏི. ཨེཏྠ ཙ ལཱིནཔཏིཊྛཱན-ཀཱམསུཁལླིཀཱནུཡོག-ཨུཙྪེདཱབྷིནིཝེསཱནཾ དྷམྨཝིཙཡ-ཝཱིརིཡཔཱིཏིཔདྷཱན-དྷམྨསཱམགྒཱི པཊིཔཀྑོ. ཨུདྡྷཙྩཱཡཱུཧནཨཏྟཀིལམཐཱནུཡོག-སསྶཏཱབྷིནིཝེསཱནཾ པསྶདྡྷིསམཱདྷི-ཨུཔེཀྑཱཔདྷཱན-དྷམྨསཱམགྒཱི པཊིཔཀྑོ. སཏི པན ཨུབྷཡཏྠཱཔི ཨིཙྪིཏབྦཱ. ཏཐཱ ཧི སཱ སབྦཏྠིཀཱ ཝུཏྟཱ.

སཾ-སདྡོ པསཾསཱཡཾ. པུནདེཝ སུནྡརོ ཙ ཨཏྠོཔཱིཏི ཨཱཧ ‘‘པསཏྠོ སུནྡརོ ཙ བོཛ྄ཛྷངྒོ’’ཏི. ཨབྷིནིབྦཏྟེཏཱིཏི ཨབྷིཝིསིཊྛབྷཱཝེན ནིབྦཏྟེཏི སཝིསེསབྷཱཝཾ ཝདཏི. ‘‘ཨེཀེ ཝཎྞཡནྟཱི’’ཏི ཝཏྭཱ ཏཏྠ ཡཐཱཝུཏྟཝིཝེཀཏྟཡཏོ ཨཉྙཾ ཝིཝེཀདྭཡཾ ཨུདྡྷརིཏྭཱ དསྶེཏུཾ ‘‘ཏེ ཧཱི’’ཏིཨཱདི ཝུཏྟཾ. ཏཏྠ ཛྷཱནཀྑཎེ ཏཱཝ ཀིཙྩཏོ ཝིཀྑམྦྷནཝིཝེཀནིསྶིཏཾ, ཝིཔསྶནཱཀྑཎེ ཨཛ྄ཛྷཱསཡཏོ པཊིཔྤསྶདྡྷིཝིཝེཀནིསྶིཏཾ བྷཱཝེཏཱིཏི. ཏེནཱཧ – ‘‘ཨནུཏྟརཾ ཝིམོཀྑཾ ཨུཔསམྤཛྫ ཝིཧརིསྶཱམཱི’’ཏི. ཏཏྠ ཏཏྠ ནིཙྪཡཏཱཡ ཀསིཎཛ྄ཛྷཱནགྒཧཎེན ཨནུཔྤཱདཱནམྤི གཧཎཾ དཊྛབྦཾ.

ཧིམཝནྟསུཏྟཝཎྞནཱ ནིཊྛིཏཱ.

༢. ཀཱཡསུཏྟཝཎྞནཱ

༡༨༣. ཏིཊྛནྟི ཨེཏེནཱཏི ཋིཏི, ཀཱརཎཾ. ཀམྨཨུཏུཙིཏྟཱཧཱརསཉྙིཏོ ཙཏུབྦིདྷོ པཙྩཡོ ཋིཏི ཨེཏསྶཱཏི པཙྩཡཊྛིཏིཀོ. ཨཱཧཱརཔཙྩཡསདྡཱ ཧི ཨེཀཏྠཱ. སུབྷམྤཱིཏི ཀཱམཙྪནྡོ པཙྩཡོ, ཨསུབྷེ སུབྷཱཀཱརེན པཝཏྟནཏོ སུབྷནྟི ཝུཙྩཏི. ཏེན ཀཱརཎེན པཝཏྟནཀསྶ ཨཉྙསྶ ཀཱམཙྪནྡསྶ ནིམིཏྟཏྟཱ སུབྷནིམིཏྟནྟི. སུབྷསྶཱཏི ཡཐཱཝུཏྟསྶ སུབྷསྶ. ཨཱརམྨཎམྤཱིཏི སུབྷཱཀཱརེན, ཨིཊྛཱཀཱརེན ཝཱ གཡ྄ཧམཱནཾ རཱུཔཱདིཨཱརམྨཎམྤི སུབྷནིམིཏྟཾ ཝུཏྟཱཀཱརེན. ཨནུཔཱཡམནསིཀཱརོཏི ཨཱཀངྑིཏསྶ ཧིཏསུཁསྶ ཨནུཔཱཡབྷཱུཏོ མནསིཀཱརོ, ཏཏོ ཨེཝ ཨུཔྤཐམནསིཀཱརོཏི ཨཡོནིསོམནསིཀཱརོ. ཏསྨིནྟི ཡཐཱནིདྡྷཱརིཏེ ཀཱམཙྪནྡབྷཱུཏེ ཏདཱརམྨཎབྷཱུཏེ ཙ དུཝིདྷེཔི སུབྷནིམིཏྟེ. ཨཊྛཀཐཱཡཾ པན ‘‘སུབྷཱརམྨཎེ’’ཨིཙྩེཝ ཝུཏྟཾ. ཨཏྠི, བྷིཀྑཝེ, སུབྷནིམིཏྟནྟིཨཱདཱིཏི ཨཱདི-སདྡེན ཀཱམཙྪནྡནཱིཝརཎསྶ ཨཱཧཱརདསྶནཔཱལི༹ ཨུཏྟཱནཱཏི ཀཏྭཱ ཝུཏྟཾ – ‘‘ཨེཝཾ སབྦནཱིཝརཎེསུ ཡོཛནཱ ཝེདིཏབྦཱ’’ཏི.

པཊིགྷོཔི ¶ པཊིགྷནིམིཏྟཾ པུརིམུཔྤནྣསྶ པཙྪཱ ཨུཔྤཛྫནཀསྶ ནིམིཏྟབྷཱཝཏོ. པཊིགྷཱརམྨཎཾ ནཱམ ཨེཀཱུནཝཱིསཏི ཨཱགྷཱཏཝཏྠུབྷཱུཏཱ སཏྟསངྑཱརཱ. ཨརཏཱིཏི པནྟསེནཱསནཱདཱིསུ ཨརམཎཾ ¶ . ཨུཀྐཎྛིཏཱཏི ཨུཀྐཎྛབྷཱཝོ. པནྟེསཱུཏི དཱུརེསུ, ཝིཝིཏྟེསུ ཝཱ. ཨདྷིཀུསལེསཱུཏི སམཐཝིཔསྶནཱདྷམྨེསུ. ཨརཏི རཏིཔཊིཔཀྑོ. ཨརཏིཏཱཏི ཨརམཎཱཀཱརོ. ཨནབྷིརཏཱིཏི ཨནབྷིརཏབྷཱཝོ. ཨནབྷིརམཎཱཏི ཨནབྷིརམཎཱཀཱརོ. ཨུཀྐཎྛིཏཱཏི ཨུཀྐཎྛནཱཀཱརོ. པརིཏསྶིཏཱཏི ཨུཀྐཎྛནཝསེནེཝ པརིཏསྶནཱ.

ཨཱགནྟུཀཾ, ན སབྷཱཝསིདྡྷཾ. ཀཱཡཱལསིཡནྟི ནཱམཀཱཡེ ཨལསབྷཱཝོ. སམྨོཧཝིནོདནིཡཾ པན ‘‘ཏནྡཱིཏི ཛཱཏིཨཱལསིཡ’’ནྟི ཝུཏྟཾ. ཝདཏཱིཏི ཨེཏེན ཨཏིསཱིཏཱདིཔཙྩཡཱ སངྐོཙཱཔཏྟིཾ དསྶེཏི. ཡཾ སནྡྷཱཡ ཝུཏྟཾ ཀིལེསཝཏྠུཝིབྷངྒེ (ཝིབྷ. ཨཊྛ. ༨༥༧). ཏནྡཱིཏི ཛཱཏིཨཱལསིཡཾ. ཏནྡིཡནཱཏི ཏནྡིཡནཱཀཱརོ. ཏནྡིམནཀཏཱཏི ཏནྡིཡཱ ཨབྷིབྷཱུཏཙིཏྟཏཱ. ཨལསསྶ བྷཱཝོ ཨཱལསྱཾ. ཨཱལསྱཱཡནཱཀཱརོ ཨཱལསྱཱཡནཱ. ཨཱལསྱཱཡིཏསྶ བྷཱཝོ ཨཱལསྱཱཡིཏཏྟཾ. ཨིཏི སབྦེཧིཔི ཨིམེཧི པདེཧི ཀིལེསཝསེན ཀཱཡཱལསིཡཾ ཀཐིཏཾ.

ཀིལེསཝསེནཱཏི སམྨོཧཝསེན. ཀཱཡཝིནམནཱཏི ཀཱཡསྶ ཝིརཱུཔཏོ ནམནཱ. ཛམྦྷནཱཏི ཕནྡནཱ. པུནཔྤུནཾ ཛམྦྷནཱ ཝིཛམྦྷནཱ. ཨཱནམནཱཏི པུརཏོ ནམནཱ. ཝིནམནཱཏི པཙྪཏོ ནམནཱ. སནྣམནཱཏི སམནྟཏོ ནམནཱ. པཎམནཱཏི ཡཐཱ ཧི ཏནྟཏོ ཨུཊྛིཏཔེསཀཱརོ ཀིཉྩིདེཝ ཨུཔརིཊྛིཏཾ གཧེཏྭཱ ཨུཛུཾ ཀཱཡཾ ཨུསྶཱཔེཏི, ཨེཝཾ ཀཱཡསྶ ཨུདྡྷཾ ཋཔནཱ. བྱཱདྷིཡཀནྟི ཨུཔྤནྣབྱཱདྷིཏཱ. ཨིཏི སབྦེཧིཔི ཨིམེཧི པདེཧི ཀིལེསཝསེན ཀཱཡཕནྡནམེཝ ཀཐིཏཾ (ཝིབྷ. ཨཊྛ. ༨༥༨).

བྷཏྟཔརིལཱ༹ཧོཏི བྷཏྟཝསེན པརིལཱ༹ཧུཔྤཏྟི. བྷུཏྟཱཝིསྶཱཏི བྷུཏྟཝཏོ. བྷཏྟམུཙྪཱཏི བྷཏྟགེལཉྙཾ. ཨཏིབྷུཏྟཔཙྩཡཱ ཧི མུཙྪཱཔཏྟོ ཝིཡ ཧོཏི. བྷཏྟཀིལམཐོཏི བྷུཏྟཔཙྩཡཱ ཀིལནྟབྷཱཝོ. བྷཏྟཔརིལཱ༹ཧོཏི བྷཏྟདརཐོ. ཀུཙྪིཔཱུརཾ བྷུཏྟཝཏོ ཧི པརིལཱ༹ཧུཔྤཏྟིཡཱ ཨུཔཧཏིནྡྲིཡོ ཝིཡ ཧོཏི, ཀཱཡོ ཁིཛྫཏི. ཀཱཡདུཊྛུལླནྟི བྷུཏྟབྷཏྟཾ ནིསྶཱཡ ཀཱཡསྶ ཨཀམྨཉྙཏཱ.

ཙིཏྟསྶ ¶ ལཱིཡནཱཀཱརོཏི ཨཱརམྨཎེ ཙིཏྟསྶ སངྐོཙཔྤཏྟི. ཙིཏྟསྶ ཨཀལྱཏཱཏི ཙིཏྟསྶ གིལཱནབྷཱཝོ. གིལཱནོཏི ཨཀལླཀོ ཝུཙྩཏི. ཏཐཱ ཙཱཧ ‘‘ནཱཧཾ, བྷནྟེ, ཨཀལླཀོ’’ཏི. ཨཀམྨཉྙཏཱཏི ཙིཏྟགེལཉྙསངྑཱཏོ ཨཀམྨཉྙནཱཀཱརོ. ཨོལཱིཡནཱཏི ཨོལཱིཡནཱཀཱརོ. ཨིརིཡཱཔཐིཀམྤི ཙིཏྟཾ ཡསྶ ཝསེན ཨིརིཡཱཔཐཾ སནྡྷཱརེཏུཾ ཨསཀྐོནྟོ ཨོལཱིཡཏི, ཏསྶ ཏཾ ཨཱཀཱརཾ སནྡྷཱཡ ཝུཏྟཾ ‘‘ཨོལཱིཡནཱ’’ཏི. དུཏིཡཔདཾ ཨུཔསགྒེན ཝཌྜྷིཏཾ. ལཱིནནྟི ཨཝིཔྥཱརིཀཏཱཡ ¶ སངྐོཙཔྤཏྟཾ. ཨིཏརེ དྭེ ཨཱཀཱརནིདྡེསཱ. ཐིནནྟི ཨཝིཔྥཱརིཀཏཱཡ ཨནུསྶཱཧནཱ ཨསངྒཧནསངྒཧནཾ. ཐིཡནཱཀཱརོ ཐིཡནཱ. ཐིཡིཏཏྟནྟི ཐིཡིཏསྶ ཨཱཀཱརོ, ཨཝིཔྥཱརིཀཏཱཏི ཨཏྠོ.

ཙེཏསོ ཨཝཱུཔསམོཏི ཙིཏྟསྶ ཨཝཱུཔསནྟཏཱ ཨསནྣིསིནྣབྷཱཝོ. ཏེནཱཧ – ‘‘ཨཝཱུཔསནྟཱཀཱརོ’’ཏི. ཨཏྠཏོ པནེཏནྟི སྭཱཡཾ ཨཝཱུཔསནྟཱཀཱརོ ཝིཀྑེཔསབྷཱཝཏྟཱ ཝིཀྑེཔཧེཏུཏཱཡ ཙ ཨཏྠཏོ ཨེཏཾ ཨུདྡྷཙྩཀུཀྐུཙྩམེཝ.

ཝིཙིཀིཙྪཱཡ ཨཱརམྨཎདྷམྨཱ ནཱམ ‘‘བུདྡྷེ ཀངྑཏཱི’’ཏིཨཱདིནཱ ཨཱགཏཨཊྛཀངྑཱཝཏྠུབྷཱུཏཱ དྷམྨཱ. ཡསྨཱ ཝིཙིཀིཙྪཱ བྱཱཔཱདཱདཡོ ཝིཡ ཨནུ ཨནུ ཨུགྒཧཎཔཙྩཡཱ ཨུཔྤཛྫཏི, ཏསྨཱ ཀངྑཱཊྛཱནཱིཡཾ ཨཱརམྨཎམེཝ དསྶིཏཾ ‘‘ཝིཙིཀིཙྪཱཡ ཨཱརམྨཎདྷམྨཱ’’ཏི. ཡསྨཱ པུརིམུཔྤནྣཱ ཝིཙིཀིཙྪཱ པཙྪཱ ཝིཙིཀིཙྪཱཡ པཙྩཡོ ཧོཏི, ཏསྨཱ ཝིཙིཀིཙྪཱཔི ཝིཙིཀིཙྪཱཊྛཱནཱིཡདྷམྨཱ ཝེདིཏབྦཱ. ཏཏྲཱཡཾ ཝཙནཏྠོ – ཏིཊྛནྟི པཝཏྟནྟི ཨེཏྠཱཏི ཋཱནཱིཡཱ, ཝིཙིཀིཙྪཱ ཨེཝ ཋཱནཱིཡཱ ཝིཙིཀིཙྪཱཊྛཱནཱིཡཱ. ཨཊྛཀཐཱཡཾ པན ཨཱརམྨཎསྶཔི ཏཏྠ ཝིསེསཔཙྩཡཏཾ ཨུཔཱདཱཡ ‘‘ཀཱམཙྪནྡོ ཝིཙིཀིཙྪཱཏི ཨིམེ དྭེ དྷམྨཱ ཨཱརམྨཎེན ཀཐིཏཱ’’ཏི ཝུཏྟཾ. སུབྷནིམིཏྟསྶ ཧི པཙྩཡབྷཱཝམཏྟཾ སནྡྷཱཡེཏཾ ཝུཏྟཾ, ཏཐཱཔི ཡཐཱ ‘‘པཊིགྷམྤི པཊིགྷནིམིཏྟ’’ནྟི ཀཏྭཱ ‘‘བྱཱཔཱདོ ཨུཔནིསྶཡེན ཀཐིཏོ’’ཏི ཝུཏྟཾ, ཨེཝཾ སུབྷམྤི སུབྷནིམིཏྟནྟི ཀཏྭཱ ཀཱམཙྪནྡོ ཨུཔནིསྶཡེན ཀཐིཏོཏི སཀྐཱ ཝིཉྙཱཏུཾ. སེསཱ ཐིནམིདྡྷཨུདྡྷཙྩཀུཀྐུཙྩཱནི. ཏཏྠ ཐིནམིདྡྷཾ ཨཉྙམཉྙཾ སཧཛཱཏཱདིཝསེན པཙྩཡོ, ཏཐཱ ཨུདྡྷཙྩཀུཀྐུཙྩནྟི. ཨུབྷཡེསམྤི ཨུཔནིསྶཡཀོཊིཡཱ པཙྩཡབྷཱཝེ ཝཏྟབྦམེཝ ནཏྠཱིཏི ཨཱཧ ‘‘སཧཛཱཏེན ཙ ཨུཔནིསྶཡེན ཙཱ’’ཏི.

ཡསྨཱ ¶ སཏི ནཱམ ‘‘ཙཏྟཱརོ སཏིཔཊྛཱནཱ’’ཏིཨཱདིནཱ ཏེསཾ ཏེསཾ དྷམྨཱནཾ ཨནུསྶརཎཝསེན ཝཏྟཏི, ཏསྨཱ ཏེ དྷམྨཱ སཏིསམྦོཛ྄ཛྷངྒཊྛཱནཱིཡཱ ནཱམ. ལོཀུཏྟརདྷམྨེ ཙ ཨནུསྶཝཱདིཝསེན གཧེཏྭཱ ཏཐཱ པཝཏྟཏེཝ. ཏེན ཝུཏྟཾ ‘‘སཏིཡཱ’’ཏིཨཱདི.

ཀོསལླཾ ཝུཙྩཏི པཉྙཱ, ཏཏོ ཨུཔྤནྣཱ ཀོསལླསམྦྷཱུཏཱ. ཨནཝཛྫསུཁཝིཔཱཀཱཏི ཨནཝཛྫཱ ཧུཏྭཱ སུཁཝིཔཱཀཱ ཝིཔཙྩནཀཱ. པདདྭཡེན པཙྩཡཏོ སབྷཱཝཏོ ཀིཙྩཏོ ཕལཏོ ཀུསལདྷམྨཾ དསྶེཏི. ཨཀུསལནིདྡེསེཔི ཨེསེཝ ནཡོ. སཱཝཛྫཱཏི གཱརཡ྄ཧཱ. ཨནཝཛྫཱཏི ཨགཱརཡ྄ཧཱ. ཧཱིནཱ ལཱམཀཱ. པཎཱིཏཱ སེཊྛཱ. ཀཎྷཱ ཀཱལ༹ཀཱ ཨསུདྡྷཱ. སུཀྐཱ ཨོདཱཏཱ སུདྡྷཱ ¶ . པཊིབྷཱག-སདྡོ པཋམེ ཝིཀཔྤེ སདིསཀོཊྛཱསཏྠོ, དུཏིཡེ པཊིཔཀྑཀོཊྛཱསཏྠོ, ཏཏིཡེ ནིགྒཧེཏབྦཔཊིཔཀྑཀོཊྛཱསཏྠོ དཊྛབྦོ.

ཀུསལཀིརིཡཱཡ ཨཱདིཀམྨབྷཱཝེན པཝཏྟཝཱིརིཡཾ དྷིཏིསབྷཱཝཏཱཡ དྷཱཏཱུཏི ཝུཏྟནྟི ཨཱཧ ‘‘ཨཱརམྦྷདྷཱཏཱུཏི པཋམཱརམྦྷཝཱིརིཡ’’ནྟི. ལདྡྷཱསེཝནཾ ཝཱིརིཡཾ བལཔྤཏྟཾ ཧུཏྭཱ པཊིཔཀྑཾ ཝིདྷམཏཱིཏི ཨཱཧ – ‘‘ནིཀྐམདྷཱཏཱུཏི ཀོསཛྫཏོ ནིཀྑནྟཏྟཱ ཏཏོ བལཝཏར’’ནྟི. ཨདྷིམཏྟཱདྷིམཏྟཏརཱནཾ པཊིཔཀྑདྷམྨཱནཾ ཝིདྷམནསམཏྠཾ པཊུཔཊུཏརཱདིབྷཱཝཔྤཏྟཾ ཧོཏཱིཏི ཨཱཧ – ‘‘པརཀྐམདྷཱཏཱུཏི པརཾ པརཾ ཋཱནཾ ཨཀྐམནཏཱཡ ཏཏོཔི བལཝཏར’’ནྟི.

ཏིཊྛཏི པཝཏྟཏི ཨེཏྠཱཏི ཋཱནཱིཡཱ. ཨཱརམྨཎདྷམྨཱ, པཱིཏིསམྦོཛ྄ཛྷངྒསྶ ཋཱནཱིཡཱཏི པཱིཏིསམྦོཛ྄ཛྷངྒཊྛཱནཱིཡཱཏི ‘‘པཱིཏིཡཱ ཨཱརམྨཎདྷམྨཱ’’ཏི ཝུཏྟཾ. ཡསྨཱ ཨཔརཱཔརུཔྤཏྟིཡཱ པཱིཏིཔི ཏཐཱ ཝཏྟབྦཏཾ ལབྷཏཱིཏི ཝུཏྟཾ ཝིསུདྡྷིམགྒེ ‘‘པཱིཏིཡཱ ཨེཝ ཏཾ ནཱམ’’ནྟི. དརཐཔསྶདྡྷཱིཏི དརཐོ ཀིལེསཔརིལཱ༹ཧོ, སོ པསྶམྦྷཏི ཨེཏཱཡཱཏི དརཐཔསྶདྡྷི, ཀཱཡཔསྶདྡྷིཡཱ ཝེདནཱདིཁནྡྷཏྟཡསྶ ཝིཡ རཱུཔཀཱཡསྶཔི པསྶམྦྷནཾ ཧོཏི, ཙིཏྟཔསྶདྡྷིཡཱ ཙིཏྟསྶེཝ པསྶམྦྷནཾ, ཏཏོ ཨེཝེཏྠ བྷགཝཏཱ ལཧུཏཱདཱིནཾ ཝིཡ དུཝིདྷཏཱ ཝུཏྟཱ. ཏཐཱ སམཱཧིཏཱཀཱརཾ སལླཀྑེཏྭཱ གཡ྄ཧམཱནོ སམཐོཝ སམཐནིམིཏྟཾ, ཏསྶ ཨཱརམྨཎབྷཱུཏཾ པཊིབྷཱགནིམིཏྟམྤི. ཝིཝིདྷཾ ཨགྒཾ ཨེཏསྶཱཏི བྱགྒོ, ཝིཀྑེཔོ. ཏཐཱ ཧི སོ ཨནཝཊྛཱནརསོ བྷནྟཏཱཔཙྩུཔཊྛཱནོ ཝུཏྟོ. ཨེཀགྒབྷཱཝཏོ བྱགྒཔཊིཔཀྑོཏི ཨབྱགྒོ, སམཱདྷི, སོ ཨེཝ ནིམིཏྟནྟི པུབྦེ ཝིཡ ཝཏྟབྦཾ. ཏེནཱཧ ‘‘ཏསྶེཝ ཝེཝཙན’’ནྟི.

ཡོ ¶ ཨཱརམྨཎེ ཨིཊྛཱནིཊྛཱཀཱརཾ ཨནཱདིཡིཏྭཱ གཧེཏབྦོ མཛ྄ཛྷཏྟཱཀཱརོ, ཡོ ཙ པུབྦེ ཨུཔེཀྑཱསམྦོཛ྄ཛྷངྒསྶ བྷཱཝནཱཝསེན ཨུཔྤནྣོ མཛ྄ཛྷཏྟཱཀཱརོ, དུཝིདྷོཔི སོ ཨུཔེཀྑཱཡ ཨཱརམྨཎདྷམྨོཏི ཨདྷིཔྤེཏོཏི ཨཱཧ – ‘‘ཨཏྠཏོ པན མཛ྄ཛྷཏྟཱཀཱརོ ཨུཔེཀྑཱཊྛཱནཱིཡཱ དྷམྨཱཏི ཝེདིཏབྦོ’’ཏི. ཨཱརམྨཎེན ཀཐིཏཱ ཨཱརམྨཎསྶེཝ ཏེསཾ ཝིསེསཔཙྩཡབྷཱཝཏོ. སེསཱཏི ཝཱིརིཡཱདཡོ ཙཏྟཱརོ དྷམྨཱ. ཏེསཉྷི ཨུཔནིསྶཡོཝ སཱཏིསཡོ ཨིཙྪིཏབྦོཏི.

ཀཱཡསུཏྟཝཎྞནཱ ནིཊྛིཏཱ.

༣. སཱིལསུཏྟཝཎྞནཱ

༡༨༤. ཁཱིཎཱསཝསྶ ལོཀུཏྟརཾ སཱིལཾ ནཱམ མགྒཕལཔརིཡཱཔནྣཱ སམྨཱཝཱཙཱཀམྨནྟཱཛཱིཝཱ སཱིལལཀྑཎཔྤཏྟཱ ¶ ཏདཉྙེ ཙེཏནཱདཡོ. ལོཀིཡཾ པན ཀིརིཡཱབྱཱཀཏཙིཏྟཔརིཡཱཔནྣཾ ཙཱརིཏྟསཱིལཾ, ཝཱརིཏྟསཱིལསྶ པན སམྦྷཝོ ཨེཝ ནཏྠི ཝིརམཎཝསེན པཝཏྟིཡཱ ཨབྷཱཝཏོ. ‘‘པུབྦབྷཱགསཱིལཾ ལོཀིཡསཱིལ’’ནྟི ཀེཙི.

ཙཀྑུདསྶནནྟི ཙཀྑཱུཧི དསྶནཾ. ལཀྑཎསྶ དསྶནནྟི སབྷཱཝདྷམྨཱནཾ སངྑཏཱནཾ པཙྩཏྟལཀྑཎསྶ ཉཱཏཔརིཉྙཱཡ, ཨནིཙྩཱདིསཱམཉྙལཀྑཎསྶ ཏཱིརཎཔརིཉྙཱཡ དསྶནཾ. པཛཧནྟོཔི ཧི ཏེ པཧཱཏབྦཱཀཱརཏོ པསྶཏི ནཱམ. ནིབྦཱནསྶ ཏཐལཀྑཎཾ མགྒཕལེཧི དསྶནཾ, ཏཾ པན པཊིཝིཛ྄ཛྷནཾ. ཛྷཱནེན པཐཝཱིཀསིཎཱདཱིནཾ, ཨབྷིཉྙཱཧི རཱུཔཱནཾ དསྶནམྤི ཉཱཎདསྶནམེཝ. ཙཀྑུདསྶནཾ ཨདྷིཔྤེཏཾ སཝནཔཡིརུཔཱསནཱནཾ པརཏོ གཧིཏཏྟཱ. པཉྷཔཡིརུཔཱསནནྟི པཉྷཔུཙྪནཝསེན པཡིརུཔཱསནཾ ཨཉྙཀམྨཏྠཱཡ ཨུཔསངྐམནསྶ ཀེཝལཾ ཨུཔསངྐམནེནེཝ ཛོཏིཏཏྟཱ.

ཨརིཡཱནཾ ཨནུསྶཏི ནཱམ གུཎཝསེན, ཏཏྠཱཔི ལདྡྷཨོཝཱདཱཝཛྫནམུཁེན ཡཐཱབྷཱུཏསཱིལཱདིགུཎཱནུསྶརཎནྟི དསྶེཏུཾ ‘‘ཛྷཱནཝིཔསྶནཱ’’ཏིཨཱདི ཝུཏྟཾ. ཨཉྙེསཾཡེཝ སནྟིཀེཏི ཨརིཡེཧི ཨཉྙེསཾ སཱསནིཀཱནཾཡེཝ སནྟིཀེ. ཏེནཱཧ – ‘‘ཨནུཔབྦཛྫཱ ནཱམཱ’’ཏི. ཨཉྙེསཱུཏི སཱསནིཀེཧི ཨཉྙེསུ ཏཱཔསཔརིབྦཱཛཀཱདཱིསུ. ཏཏྠ ཧི པབྦཛྫཱ ཨརིཡཱནཾ ཨནུཔབྦཛྫཱ ནཱམ ན ཧོཏཱིཏི ཝུཏྟཾ.

སཏསཧསྶམཏྟཱ ¶ ཨཧེསུཾ སམནྟཔཱསཱདིཀཏྟཱ མཧཱཐེརསྶ. ལངྐཱདཱིཔེཏི ནིསྶཡསཱིསེན ནིསྶིཏསལླཀྑཎཾ. ན ཧི པབྦཛྫཱ དཱིཔཔཊིལདྡྷཱ, ཨཐ ཁོ དཱིཔནིཝཱསིཨཱཙརིཡཔཊིལདྡྷཱ. མཧིནྡ…པེ… པབྦཛནྟི ནཱམ ཏསྶ པརིཝཱརཏཱཡ པབྦཛྫཱཡཱཏི.

སརཏཱིཏི ཏཾ ཨོཝཱདཱནུསཱསནིདྷམྨཾ ཙིནྟེཏི ཙིཏྟེ ཀརོཏི. ཝིཏཀྐཱཧཏཾ ཀརོཏཱིཏི པུནཔྤུནཾ པརིཝིཏཀྐནེན ཏདཏྠཾ ཝིཏཀྐནིཔྥཱདིཏཾ ཀརོཏི. ཨཱརདྡྷོ ཧོཏཱིཏི སམྤཱདིཏོ ཧོཏི. ཏཾ པན སམྤཱདནཾ པཱརིཔཱུརི ཨེཝཱཏི ཨཱཧ ‘‘པརིཔུཎྞོ ཧོཏཱི’’ཏི. ཏཏྠཱཏི ཡཐཱཝུཏྟེ དྷམྨེ. ཉཱཎཙཱརཝསེནཱཏི ཉཱཎསྶ པཝཏྟནཝསེན. ཏེསཾ ཏེསཾ དྷམྨཱནནྟི ཏསྨིཾ ཏསྨིཾ ཨོཝཱདདྷམྨེ ཨཱགཏཱནཾ རཱུཔཱརཱུཔདྷམྨཱནཾ. ལཀྑཎནྟི ཝིསེསལཀྑཎཾ སཱམཉྙལཀྑཎཉྩ. པཝིཙིནཏཱིཏི ‘‘ཨིདཾ རཱུཔཾ ཨེཏྟཀཾ རཱུཔ’’ནྟིཨཱདིནཱ ཝིཙཡཾ ཨཱཔཛྫཏི. ཉཱཎཉྩ རོཔེཏཱིཏི ‘‘ཨནིཙྩཾ ཙལཾ པལོཀཾ པབྷངྒཱུ’’ཏིཨཱདིནཱ ཉཱཎཾ པཝཏྟེཏི. ཝཱིམཾསནཾ…པེ… ཨཱཔཛྫཏཱིཏི རཱུཔསཏྟཀཱརཱུཔསཏྟཀཀྐམེན ¶ ཝིཔསྶནཾ པཙྩཀྑཏོ ཝིཡ ཨནིཙྩཏཱདཱིནཾ དསྶནཾ སམྨསནཾ ཨཱཔཛྫཏི.

ཨུབྷཡམྤེཏནྟི ཕལཱནིསཾསཱཏི ཝུཏྟདྭཡཾ. ཨཏྠཏོ ཨེཀཾ པརིཡཱཡསདྡཏྟཱ. པཊིཀཙྩཱཏི པགེཝ. མརཎཀཱལེཏི མརཎཀཱལསམཱིཔེ. སམཱིཔཏྠེ ཧི ཨིདཾ བྷུམྨནྟི ཨཱཧ ‘‘མརཎསྶ ཨཱསནྣཀཱལེ’’ཏི.

སོ ཏིཝིདྷོ ཧོཏི ཉཱཎསྶ ཏིཀྑམཛ྄ཛྷམུདུབྷཱཝེན. ཏེནཱཧ ‘‘ཀཔྤསཧསྶཱཡུཀེསཱུ’’ཏིཨཱདི. ཨུཔཧཙྩཔརིནིབྦཱཡཱི ནཱམ ཨཱཡུཝེམཛ྄ཛྷཾ ཨཏིཀྐམིཏྭཱ པརིནིབྦཱཡནཏོ. ཡཏྠ ཀཏྠཙཱིཏི ཨཝིཧཱདཱིསུ ཡཏྠ ཀཏྠཙི. སཔྤཡོགེནཱཏི ཝིཔསྶནཱཉཱཎསངྑཱརསངྑཱཏེན པཡོགེན, སཧ ཝིཔསྶནཱཔཡོགེནཱཏི ཨཏྠོ. སུདྡྷཱཝཱསབྷཱུམིཡཾ ཨུདྡྷཾཡེཝ མགྒསོཏོ ཨེཏསྶཱཏི ཨུདྡྷཾསོཏོ. པཊིསནྡྷིཝསེན ཨཀནིཊྛབྷཝཾ གཙྪཏཱིཏི ཨཀནིཊྛགཱམཱི.

ཨཝིཧཱདཱིསུ ཝཏྟམཱནོཔི ཨེཀཾསཏོ ཨུདྡྷཾགམནཱརཧོ པུགྒལོ ཨཀནིཊྛགཱམཱི ཨེཝ ནཱམཱཏི ཝུཏྟཾ ‘‘ཨེཀོ ཨུདྡྷཾསོཏོ ཨཀནིཊྛགཱམཱིཏི པཉྩ ཧོནྟཱི’’ཏི. ཏེསནྟི ནིདྡྷཱརཎེ སཱམིཝཙནཾ. ཨུདྡྷཾསོཏབྷཱཝཏོ ཡདིཔི ཧེཊྛིམཱདཱིསུཔི ཨརིཡབྷཱུམི ནིབྦཏྟཏེཝ, ཏཐཱཔི ཏཏྠ བྷཱུམཱིསུ ཨཱཡུཾ ¶ ཨགྒཧེཏྭཱ ཨཀནིཊྛབྷཝེ ཨཱཡུཝསེནེཝ སོལ༹སཀཔྤསཧསྶཱཡུཀཏཱ དཊྛབྦཱ. ‘‘སཏྟ ཕལཱ སཏྟཱནིསཾསཱ པཱཊིཀངྑཱ’’ཏི ཝུཏྟཏྟཱ ‘‘ཨརཧཏྟམགྒསྶ པུབྦབྷཱགཝིཔསྶནཱ བོཛ྄ཛྷངྒཱ ཀཐིཏཱ’’ཏི ཝུཏྟཾ. སཏྟནྣམྤི སཧབྷཱཝོ ལབྦྷཏཱིཏི ‘‘ཨཔུབྦཾ ཨཙརིམཾ ཨེཀཙིཏྟཀྑཎིཀཱ’’ཏི ཝུཏྟཾ. ཏཡིདཾ པཱལི༹ཡཾ ཏཏྠ ཏཏྠ ‘‘ཏསྨིཾ སམཡེ’’ཏི ཨཱགཏཝཙནེན ཝིཉྙཱཡཏི, བོཛ྄ཛྷངྒཱནཾ པན ནཱནཱསབྷཱཝཏྟཱ ‘‘ནཱནཱལཀྑཎཱ’’ཏི ཝུཏྟཾ.

སཱིལསུཏྟཝཎྞནཱ ནིཊྛིཏཱ.

༤. ཝཏྠསུཏྟཝཎྞནཱ

༡༨༥. ‘‘སཏིསམྦོཛ྄ཛྷངྒོ’’ཏི ཨེཝཾ ཙེ མཡ྄ཧཾ ཧོཏཱིཏི སཏིསམྦོཛ྄ཛྷངྒོ ནཱམ སེཊྛོ ཨུཏྟམོ པཝརོ, ཏསྨཱཧཾ སཏིསམྦོཛ྄ཛྷངྒསཱིསེན ཕལསམཱཔཏྟིཾ ཨཔྤེཏྭཱ ཝིཧརིསྶཱམཱིཏི ཨེཝཾ ཙེ མཡ྄ཧཾ པུབྦབྷཱགེ ཧོཏཱིཏི ཨཏྠོ. ‘‘ཨཔྤམཱཎོ’’ཏི ཨེཝཾ མཡ྄ཧཾ ཧོཏཱིཏི སྭཱཡཾ སཏིསམྦོཛ྄ཛྷངྒོ, སབྦསོ པམཱཎཀརཀིལེསཱབྷཱཝཏོ ཨཔྤམཱཎདྷམྨཱརམྨཎཏོ ཙ ཨཔྤམཱཎོཏི ཨེཝཾ མཡ྄ཧཾ ཨནྟོསམཱཔཏྟིཡཾ ཨསམྨོཧཝསེན ཧོཏི. སུཔརིཔུཎྞོཏི བྷཱཝནཱཔཱརིཔཱུརིཡཱ སུཊྛུ པརིཔུཎྞོཏི ཨེཝཾ ¶ མཡ྄ཧཾ ཨནྟོསམཱཔཏྟིཡཾ ཨསམྨོཧཝསེན ཧོཏཱིཏི. ཏིཊྛཏཱིཏི ཡཐཱཀཱལཔརིཙྪེདསམཱཔཏྟིཡཱ ཨཝཊྛཱནེན ཏཔྤརིཡཱཔནྣཏཱཡ སཏིསམྦོཛ྄ཛྷངྒོ ཏིཊྛཏི པཊིབནྡྷཝསེན. ཨུཔྤཱདཾ ཨནཱཝཛྫིཏཏྟཱཏི ཨུཔྤཱདསྶ ཨནཱཝཛྫནེན ཨསམནྣཱཧཱརེན. ཨུཔྤཱདསཱིསེན ཙེཏྠ ཨུཔྤཱདཝནྟོཝ སངྑཱརཱ གཧིཏཱ. ཨནུཔྤཱདནྟི ནིབྦཱནཾ ཨུཔྤཱདཱབྷཱཝཏོ ཨུཔྤཱདཝནྟེཧི ཙ ཝིནིསྶཊཏྟཱ. པཝཏྟནྟི ཝིཔཱཀཔྤཝཏྟཾ. ཨཔྤཝཏྟནྟི ནིབྦཱནཾ ཏཔྤཊིཀྑེཔཏོ. ནིམིཏྟནྟི སབྦསངྑཱརནིམིཏྟཾ. ཨནིམིཏྟནྟི ནིབྦཱནཾ. སངྑཱརེཏི ཨུཔྤཱདཱདིཨནཱམསནེན ཀེཝལམེཝ སངྑཱརགཧཎཾ. ཝིསངྑཱརནྟི ནིབྦཱནཾ. ཨཱཝཛྫིཏཏྟཱ ཨཱཝཛྫིཏཀཱལཏོ པཊྛཱཡ ཨཱརབྦྷ པཝཏྟིཡཱ སཏིསམྦོཛ྄ཛྷངྒོ ཏིཊྛཏི. ཨཊྛཧཱཀཱརེཧཱིཏི ཨཊྛཧི ཀཱརཎེཧི. ཛཱནཱཏཱིཏི སམཱཔཏྟིཏོ ཝུཊྛིཏཀཱལེ པཛཱནཱཏི. ཨཊྛཧཱཀཱརེཧཱིཏི ཨུཔྤཱདཱཝཛྫནཱདཱིཧི ཙེཝ ཨནུཔྤཱདཱཝཛྫནཱདཱིཧི ཙ ཝུཏྟཱཀཱརཝིཔརཱིཏེཧི ཨཊྛཧི ཨཱཀཱརེཧི ཙཝནྟཾ སམཱཔཏྟིཝསེན ཨནཝཊྛཱནཏོཔི གཙྪནྟཾ ཙཝཏཱིཏི ཐེརོ པཛཱནཱཏཱིཏི.

ཕལབོཛ྄ཛྷངྒཱཏི ¶ ཕལསམཱཔཏྟིཔརིཡཱཔནྣཱ བོཛ྄ཛྷངྒཱ. ཀིཾ པན ཏེ ཝིསུཾ ཝིསུཾ པཝཏྟནྟཱིཏི ཨཱཧ ‘‘ཡདཱ ཧཱི’’ཏིཨཱདི. སཱིསཾ ཀཏྭཱཏི པདྷཱནཾ སེཊྛཾ ཀཏྭཱ. ཏདནྭཡཱཏི ཏདནུགཏཱ སཏིསམྦོཛ྄ཛྷངྒཾ ཨནུགཙྪནཀཱ. ཏཉྩ ཁོ ཏཐཱ ཀཏྭཱ དྷམྨཾ པཙྩཝེཀྑཎཝསེན. ཀེཙི པན ‘‘ཏཾ པཙྩཝེཀྑཎཱདིཀཾ ཀཏྭཱ’’ཏི ཝདནྟི.

ཝཏྠསུཏྟཝཎྞནཱ ནིཊྛིཏཱ.

༥. བྷིཀྑུསུཏྟཝཎྞནཱ

༡༨༦. བོདྷཱཡཱཏི ཨེཏྠ བོདྷོ ནཱམ བུཛ྄ཛྷནཾ, ཏཾ པན ཀིསྶ ཀེནཱཏི པུཙྪནྟོ ‘‘ཀིཾ བུཛ྄ཛྷནཏྠཱཡཱ’’ཏི ཝཏྭཱ ཏཾ དསྶེནྟོ ‘‘མགྒེནཱ’’ཏིཨཱདིམཱཧ. མགྒེན ནིབྦཱནཾ བུཛ྄ཛྷནཏྠཱཡ སཾཝཏྟནྟི, པཙྩཝེཀྑཎཱཡ ཀཏཀིཙྩཏཾ བུཛ྄ཛྷནཏྠཱཡ སཾཝཏྟནྟི, པཋམཝིཀཔྤེ སཙྪིཀིརིཡཱབྷིསམཡོ ཨེཝ དསྶིཏོཏི ཏེན ཨཏུཊྛེ ‘‘མགྒེན ཝཱ’’ཏི དུཏིཡཝིཀཔྤམཱཧ. ཝིཝེཀནིསྶིཏཾ ཝིརཱགནིསྶིཏནྟི པདེཧི སབྦཾ མགྒཀིཙྩཾ ཏསྶ ཕལཉྩ དསྶིཏཾ. ནིརོདྷནིསྶིཏནྟི ཨིམིནཱ ནིབྦཱནསཙྪིཀིརིཡཱ. ཀཱམཱསཝཱཔི ཙིཏྟཾ ཝིམུཙྩཏཱིཏིཨཱདིནཱ ཀིལེསཔྤཧཱནཾ. ཝིམུཏྟསྨིཾ ཝིམུཏྟམིཏི ཉཱཎཾ ཧོཏཱིཏིཨཱདིནཱ པཙྩཝེཀྑཎཱ དསྶིཏཱ.

བྷིཀྑུསུཏྟཝཎྞནཱ ནིཊྛིཏཱ.

༦-༧. ཀུཎྜལིཡསུཏྟཱདིཝཎྞནཱ

༡༨༧-༡༨༨. ནིབདྡྷཝཱསཝསེན ¶ ཨཱརཱམེ ནིསཱིདནསཱིལོཏི ཨཱརཱམནིསཱདཱི. པརིསཾ ཨོགཱལ༹ྷོ ཧུཏྭཱ ཙརཏཱིཏི པརིསཱཝཙརོཏི ཨཱཧ – ‘‘ཡོ པནཱ’’ཏིཨཱདི. ཨེཝནྟི ཨིམིནཱཀཱརེན. གཧཎནྟི ནིགྒཧཎཾ. ཏེན པུཙྪཱཔདསྶ ཨཏྠཾ ཝིཝརཏི. ནིབྦེཋནནྟི ནིགྒཧནིབྦེཋནཾ. ཏེན ཝིསྶཛྫནཔདསྶ ཨཏྠཾ ཝིཝརཏི. ཨིམིནཱ ནཡེནཱཏི ཨེཏེན ‘‘ཨིཏིཝཱདོ’’ཏི ཨེཏྠ ཨིཏི-སདྡསྶ ཨཏྠཾ དསྶེཏི. ཨུཔཱརམྦྷཱདྷིཔྤཱཡོ ཝདཏི ཨེཏེནཱཏི ཝཱདོ, དོསོ. ཨིཏིཝཱདོ ཧོཏཱིཏི ཨེཝཾ ཨིམསྶ ཨུཔརི ཝཱདཱརོཔནཾ ཧོཏི. ཨིཏིཝཱདཔྤམོཀྑོཏི ཨེཝཾ ཏཏོ པམོཀྑོ ཧོཏི ¶ . ཨེཝཾ ཝཱདཔྤམོཀྑཱནིསཾསཾ པརེཧི ཨཱརོཔིཏདོསསྶ ནིབྦེཋནཝསེན དསྶེཏྭཱ ཨིདཱནི དོསཔཝེདནཝསེན དསྶེཏུཾ ‘‘ཨཡཾ པུཙྪཱཡ དོསོ’’ཏིཨཱདི ཝུཏྟཾ.

ཨེཏྟཀཾ ཋཱནནྟིཨཱདིཏོ པཊྛཱཡ ཡཱཝ ‘‘ཏཱིཎི སུཙརིཏཱནཱི’’ཏི ཨེཏྟཀཾ ཋཱནཾ. ཨིམཾ དེསནནྟི ‘‘ཨིནྡྲིཡསཾཝརོ ཁོ’’ཏིཨཱདིནཡཔྤཝཏྟཾ ཨིམཾ དེསནཾ. ནཱབྷིཛ྄ཛྷཱཡཏཱིཏི ན ཨབྷིཛ྄ཛྷཱཡཏི. ནཱབྷིཧཾསཏཱིཏི ན ཨབྷིཏུསྶཏི. གོཙརཛ྄ཛྷཏྟེ ཋིཏཾ ཧོཏཱིཏི ཀམྨཊྛཱནཱརམྨཎེ སམཱདྷཱནཝསེན ཋིཏཾ ཧོཏི ཨཝཊྛིཏཾ. ཏེནཱཧ ‘‘སུསཎྛིཏ’’ནྟི. སུསཎྛིཏནྟི སམྨཱ ཨཝིཀྑེཔཝསེན ཋིཏཾ. ཀམྨཊྛཱནཝིམུཏྟིཡཱཏི ཀམྨཊྛཱནཱནུཡུཉྫནཝསེན པཊིཔཀྑཏོ ནཱིཝརཎཏོ ཝིམུཏྟིཡཱ. སུཊྛུ ཝིམུཏྟནྟི སུཝིམུཏྟཾ. ཏསྨིཾ ཨམནཱཔརཱུཔདསྶནེ ན མངྐུ ཝིལཀྑོ ན ཧོཏི. ཀིལེསཝསེན དོསཝསེན. ཨཊྛིཏཙིཏྟོ ཨཐདྡྷཙིཏྟོ. ཀོཝེསེན ཧི ཙིཏྟཾ ཐདྡྷཾ ཧོཏི, ན མུདུཀཾ. ཨདཱིནམཱནསོཏི དོམནསྶཝསེན ཡོ དཱིནབྷཱཝོ, ཏདབྷཱཝེན ནིདྡོསམཱནསོ. ཨཔཱུཏིཙིཏྟོཏི བྱཱཔཛྫཱབྷཱཝེན སཱིཏིབྷཱུཏཙིཏྟོ.

ཨིམེསུ ཚསུ དྭཱརེསུ ཨཊྛཱརས དུཙྩརིཏཱནི ཧོནྟི པཙྩེཀཾ ཀཱཡཝཙཱིམནོདུཙྩརིཏབྷེདེན. ཏཱནི ཝིབྷཱགེན དསྶེཏུཾ ‘‘ཀཐ’’ནྟིཨཱདི ཝུཏྟཾ. ཏཏྠ ཨིཊྛཱརམྨཎེ ཨཱཔཱཐགཏེཏི ནཡདཱནམཏྟམེཏཾ. ཏེན ‘‘ཨནིཊྛཱརམྨཎེ ཨཱཔཱཐགཏེ དོསཾ ཨུཔྤཱདེནྟསྶཱ’’ཏིཨཱདིནཱ ཏིཝིདྷདུཙྩརིཏཾ ནཱིཧརིཏྭཱ ཝཏྟབྦཾ, ཏཐཱ ‘‘མཛ྄ཛྷཏྟཱརམྨཎེ མོཧཾ ཨུཔྤཱདེནྟསྶཱ’’ཏིཨཱདིནཱ ཙ. མནོདུཙྩརིཏཱདིསཱམཉྙེན པན ཏཱིཎིཡེཝ དུཙྩརིཏཱནི ཧོནྟཱིཏི ཝེདིཏབྦཾ.

པཉྙཏྟིཝསེནཱཏི ཝཏྠུཾ ཨནཱམསིཏྭཱ པིཎྜགཧཎམུཁེན ཀེཝལཾ པཉྙཏྟིཝསེནེཝ. བྷཱཝནཱཔཊིསངྑཱནེཏི བྷཱཝནཱསིདྡྷེ པཊིསངྑཱནེ, བྷཱཝནཱཡ པཊིསངྑཱནེ ཝཱཏི ཨཏྠོ. ཨིམཱནཱིཏི ཡཐཱཝུཏྟཱནི ཚདྭཱརཱརམྨཎཱནི. དུཙྩརིཏཱནཱིཏི དུཙྩརིཏཀཱརཎཱནི. ཨཔྤཊིསངྑཱནེ ཋིཏསྶ དུཙྩརིཏཱནི ¶ སུཙརིཏཱནི ཀཏྭཱ. པརིཎཱམེཏཱིཏི པརིཝཏྟེཏི དུཙྩརིཏཱནི ཏཏྠ ཨནུཔྤཱདེཏྭཱ སུཙརིཏཱནི ¶ ཨུཔྤཱདེནྟོ. ཨེཝནྟི ཝུཏྟཔྤཀཱརེན. ཨིནྡྲིཡསཾཝརོ…པེ… ཝེདིཏབྦོ ཨིནྡྲིཡསཾཝརསམྤཱདནཝསེན ཏིཎྞཾ སུཙརིཏཱནཾ སིཛ྄ཛྷནཏོ. ཏེནཱཧ ‘‘ཨེཏྟཱཝཏཱ’’ཏིཨཱདི. ཨེཏྟཱཝཏཱཏི ཨཱདིཏོ པཊྛཱཡ ཡཱཝ ‘‘ཏཱིཎི སུཙརིཏཱནི པརིཔཱུརེནྟཱི’’ཏི པདཾ, ཨེཏྟཱཝཏཱ. སཱིལཱནུརཀྑཀཾ ཨིནྡྲིཡསཾཝརསཱིལནྟི ཙཏུཔཱརིསུདྡྷིསཱིལསྶ ཨནུརཀྑཀཾ ཨིནྡྲིཡསཾཝརསཱིལཾ ཀཐིཀཾ. ཀཐཾ པན ཏདེཝ ཏསྶ ཨནུརཀྑཀཾ ཧོཏཱིཏི? ཨཔརཱཔརུཔྤཏྟིཡཱ ཨུཔནིསྶཡབྷཱཝཏོ.

ཏཱིཎི སཱིལཱནཱིཏི ཨིནྡྲིཡསཾཝར-ཨཱཛཱིཝཔཱརིསུདྡྷི-པཙྩཡསནྣིསྶིཏ-སཱིལཱནི. ལོཀུཏྟརམིསྶཀཱཏི ལོཀིཡཱཔི ལོཀུཏྟརཱཔི ཧོནྟཱིཏི ཨཏྠོ. སཏྟནྣཾ བོཛ྄ཛྷངྒཱནནྟི ལོཀུཏྟརཱནཾ སཏྟནྣཾ བོཛ྄ཛྷངྒཱནཾ. མཱུལབྷཱུཏཱ སཏིཔཊྛཱནཱ པུབྦབྷཱགཱ, ཏེ སནྡྷཱཡ ཝུཏྟཾ ‘‘ཙཏྟཱརོ ཁོ, ཀུཎྜལིཡ, སཏིཔཊྛཱནཱ བྷཱཝིཏཱ བཧུལཱིཀཏཱ སཏྟ བོཛ྄ཛྷངྒེ པརིཔཱུརེནྟཱི’’ཏི. ཏེཔཱིཏི ཡཐཱཝུཏྟསཏིཔཊྛཱནཱ. སཏིཔཊྛཱནམཱུལཀཱ བོཛ྄ཛྷངྒཱཏི ལོཀིཡསཏིཔཊྛཱནམཱུལཀཱ བོཛ྄ཛྷངྒཱཝ. པུབྦབྷཱགཱཝཱཏི ཨེཏྠ ཀེཙི ‘‘པུབྦབྷཱགཱ ཙཱ’’ཏི པཱཋཾ ཀཏྭཱ ‘‘པུབྦེཝ ལོཀུཏྟརཱ པུབྦབྷཱགཱ ཙཱ’’ཏི ཨཏྠཾ ཝདནྟི. ཝིཛྫཱཝིམུཏྟིམཱུལཀཱཏི ‘‘སཏྟ ཁོ, ཀུཎྜལིཡ, བོཛ྄ཛྷངྒཱ བྷཱཝིཏཱ བཧུལཱིཀཏཱ ཝིཛྫཱཝིམུཏྟིཾ པརིཔཱུརེནྟཱི’’ཏི ཨེཝཾ ཝུཏྟཱ བོཛ྄ཛྷངྒཱ ལོཀུཏྟརཱཝ ཝིཛྫཱཝིམུཏྟིསཧགཏབྷཱཝཏོ.

ཀུཎྜལིཡསུཏྟཱདིཝཎྞནཱ ནིཊྛིཏཱ.

༨. ཨུཔཝཱནསུཏྟཝཎྞནཱ

༡༨༩. པཙྩཏྟནྟི ཀརཎནིདྡེསོ ཨཡནྟི ཨཱཧ – ‘‘ཨཏྟནཱཝཱ’’ཏི. ཀུརུམཱནོཡེཝཱཏི ཨུཔྤཱདེནྟོ ཨེཝ. ཀམྨཊྛཱནཝིམུཏྟིཡཱ སུཊྛུ ཝིམུཏྟནྟི ཀམྨཊྛཱནམནསིཀཱརེན ནཱིཝརཎཱནཾ དཱུརཱིབྷཱཝཏོ ཏེཧི སུཊྛུ ཝིམུཏྟཾ. ཨཏྠཾ ཀརིཏྭཱཏི བྷཱཝནཱམནསིཀཱརཾ ཨུཏྟམཾ ཀཏྭཱ. ‘‘མཧཱ ཝཏ མེ ཨཡཾ ཨཏྠོ ཨུཔྤནྣོ’’ཏི ཨཏྠིཀོ ཧུཏྭཱ.

༩. པཋམཨུཔྤནྣསུཏྟཝཎྞནཱ

༡༩༠. ཏཐཱགཏསྶ པཱཏུབྷཱཝཱཏིཨཱདིནཱ བུདྡྷུཔྤཱདཀཱལེ ཨེཝ བོཛ྄ཛྷངྒརཏནཔཊིལཱབྷོཏི དསྶེཏི.

པབྦཏཝགྒཝཎྞནཱ ནིཊྛིཏཱ.

༢. གིལཱནཝགྒོ

༡-༣. པཱཎསུཏྟཱདིཝཎྞནཱ

༡༩༢-༡༩༤. ཡེསནྟི ¶ ¶ ཡེསཾ སཏྟཱནཾ. ཙཏྟཱརོ ཨིརིཡཱཔཐཱ ཨཏྠི ལབྦྷནྟི ཏདུཔགསརཱིརཱཝཡཝལཱབྷེན. ཨེཏནྟི ‘‘ཙཏྟཱརོ ཨིརིཡཱཔཐེ ཀཔྤེནྟཱི’’ཏི ཨེཏཾ ཝཙནཾ. ‘‘ཝིཝེཀནིསྶིཏ’’ནྟིཨཱདིཝཙནཏོ ‘‘སཧཝིཔསྶནཀེ མགྒབོཛ྄ཛྷངྒེ’’ཨིཙྩེཝ ཝུཏྟཾ. དུཏིཡཏཏིཡཱནི ཨུཏྟཱནཏྠཱནེཝ ཧེཊྛཱ ཝུཏྟནཡཏྟཱ.

༤-༡༠. པཋམགིལཱནསུཏྟཱདིཝཎྞནཱ

༡༩༥-༢༠༡. ཝིསུདྡྷཾ ཨཧོསི ཝིསབྷཱགདྷཱཏུཀྑོབྷཾ ཝཱུཔསམེནྟཾ. ཏེནཱཧ – ‘‘པོཀྑརཔཏྟེ …པེ… ཝིནིཝཏྟིཏྭཱ གཏོ’’ཏི. ཨེསེཝ ནཡོ པཱལི༹ཏོ ཨཏྠཏོ ཙ ཙཏུཏྠེན པཉྩམཚཊྛཱནཾ སམཱནཏྟཱ. ཝིསརུཀྑཝཱཏསམྥསྶེནཱཏི ཝིསརུཀྑསནྣིསྶིཏཝཱཏསམྥསྶེན. མནྡསཱིཏཛརོཏི མུདུཀོ སཱིཏཛརོ. སེསནྟི ཝུཏྟཱཝསེསཾ. སབྦཏྠཱཏི སཏྟམཱདཱིསུ ཙཏཱུསུ.

གིལཱནཝགྒཝཎྞནཱ ནིཊྛིཏཱ.

༣. ཨུདཱཡིཝགྒོ

༡-༢. བོདྷཱཡསུཏྟཱདིཝཎྞནཱ

༢༠༢-༢༠༣. ཀིཏྟཀེན ནུ ཁོ ཀཱརཎེན བུཛ྄ཛྷནཀཨངྒཱ ནཱམ ཝུཙྩནྟི བུཛ྄ཛྷནཀསྶ པུགྒལསྶ ཨངྒཱཏི ཝཏྟབྦཏཾ ལབྷནྟི. མིསྶཀབོཛ྄ཛྷངྒཱ ཀཐིཏཱ སཧཝིཔསྶནཱ མགྒབོཛ྄ཛྷངྒཱ ཀཐིཏཱཏི ཀཏྭཱ. དྷམྨཔརིཙྪེདོ ཀཐིཏོ གཎནཱམཏྟེན པརིཙྪིནྡིཏྭཱ ཝུཏྟཏྟཱ ན བྷཱུམནྟརཔརིཙྪེདོ, ཝིཔསྶནཱདིཔརིཙྪེདོ ཝཱ.

༣-༥. ཋཱནིཡསུཏྟཱདིཝཎྞནཱ

༢༠༤-༢༠༦. ཀཱམརཱགེན ¶ གདྷིཏབྦཊྛཱནབྷཱུཏཱ ཀཱམརཱགཊྛཱནིཡཱཏི ཨཱཧ ‘‘ཨཱརམྨཎདྷམྨཱན’’ནྟི. ‘‘མནསིཀཱརབཧུལཱིཀཱརཱ’’ཏི ཝུཏྟཏྟཱ ‘‘ཨཱརམྨཎེནེཝ ཀཐིཏ’’ནྟི ¶ ཝུཏྟཾ. ཝུཏྟཔརིཙྪེདོཏི ཨེཏེན ན ཀེཝལཾ ཨཱརམྨཎཝསེནེཝ, ཨཐ ཁོ ཨུཔནིསྶཡཝསེནཔེཏྠ ཨཏྠོ ལབྦྷཏཱིཏི དསྶེཏི. པཋམཝགྒསྶ ཧི དུཏིཡེ སུཏྟེ ཨུཔནིསྶཡཝསེནེཝ ཨཏྠོ དསྶིཏོ. མིསྶཀབོཛ྄ཛྷངྒཱ ཀཐིཏཱ ཨཝིབྷཱགེནེཝ ཀཐིཏཏྟཱ. ཨཔརིཧཱནིཡེཏི ཏཱིཧི སིཀྑཱཧི ཨཔརིཧཱནཱཝཧེ.

༦-༧. ཏཎྷཀྑཡསུཏྟཱདིཝཎྞནཱ

༢༠༧-༢༠༨. ‘‘སོ མཾ པུཙྪིསྶཏཱི’’ཏི ཨདྷིཔྤཱཡེན བྷགཝཏཱ ཨོསཱཔིཏདེསནཾ. པཏྠཊཏྟཱ བྷཱཝནཱཔཱརིཔཱུརིཡཱ ཝིཏྠཱརིཏཾ གཏཏྟཱ. མཧནྟབྷཱཝནྟི བྷཱཝནཱཝསེནེཝ མཧཏྟཾ གཏཏྟཱ. ཏཏོ ཨེཝ ཝཌྜྷིཔྤམཱཎཱ. ནཱིཝརཎཝིགམེ སམྦྷཝཏོ པཙྩཡཏོ བྱཱཔཱདོ ཝིགཏོ ཧོཏཱིཏི ཨཱཧ – ‘‘ནཱིཝརཎཱནཾ དཱུརཱིབྷཱཝེན བྱཱཔཱདཝིརཧིཏཏྟཱ’’ཏི. ཏཎྷཱམཱུལཀནྟི ཏཎྷཱཔཙྩཡཾ. ཡཉྷི ཏཎྷཱསཧགཏཾ ཨསཧགཏམྤི ཏཎྷཾ ཨུཔནིསྶཱཡ ནིཔྥནྣཾ, སབྦཾ ཏཾ ཏཎྷཱམཱུལཀཾ. པཧཱིཡཏི ཨནུཔྤཱདཔྤཧཱནེན. ཏཎྷཱདཱིནཾཡེཝ ཁཡཱ, ན ཏེསཾ སངྑཱརཱནཾ ཁཡཱ. ཨེཏེཧི ཏཎྷཀྑཡཱདིཔདེཧི.

༨. ནིབྦེདྷབྷཱགིཡསུཏྟཝཎྞནཱ

༢༠༩. ནིབྦིཛ྄ཛྷནྟཱིཏི ནིབྦེདྷཱ, ནིབྦིཛ྄ཛྷནདྷམྨཱ དྷམྨཝིནཡཱདཡོ, ཏཔྤརིཡཱཔནྣཏཱཡ ནིབྦེདྷབྷཱགེ གཏོ ནིབྦེདྷབྷཱགིཡོ, ཏཾ ནིབྦེདྷབྷཱགིཡཾ. ཏེནཱཧ ‘‘ནིབྦིཛ྄ཛྷནཀོཊྛཱསིཡ’’ནྟི. བྷཱཝེཏྭཱ ཋིཏེན ཙིཏྟེན. ཝིཔསྶནཱམགྒམྤི གཧེཏྭཱ ‘‘མགྒབོཛ྄ཛྷངྒཱ མིསྶཀཱ’’ཏི ཝུཏྟཱ. ཏེཧཱིཏི བོཛ྄ཛྷངྒེཧི བྷཱཝིཏཾ ཙིཏྟཾ. ཏེ ཝཱ བོཛ྄ཛྷངྒེ བྷཱཝེཏྭཱ ཋིཏཾ ཙིཏྟཾ ནཱམ ཕལཙིཏྟཾ, ཏསྨཱ ནིབྦཏྟིཏལོཀུཏྟརམེཝ. ཏམྤཱིཏི ཕལཙིཏྟམྤི མགྒཱནནྟརཏཱཡ མགྒནིསྶིཏཾ ཀཏྭཱ མིསྶཀམེཝ ཀཐེཏུཾ ཝཊྚཏི ‘‘བོདྷཱཡ སཾཝཏྟནྟཱི’’ཏི ཝུཏྟཏྟཱ.

༩. ཨེཀདྷམྨསུཏྟཝཎྞནཱ

༢༡༠. སཾཡོཛནསངྑཱཏཱ ཝིནིབནྡྷཱཏི ཀཱམརཱགཱདིསཾཡོཛནསཉྙིཏཱ བནྡྷནཱ. པརིནིཊྛཔེཏྭཱ གཧཎཱཏི གིལིཏྭཱ ཝིཡ པརིནིཊྛཔེཏྭཱ གཧཎཱཀཱརཱ.

༡༠. ཨུདཱཡིསུཏྟཝཎྞནཱ

༢༡༡. བཧུཀཏཾ ¶ ¶ ཝུཙྩཏི བཧུཀཱརོ བཧུམཱནོ, ནཏྠི ཨེཏསྶ བཧུཀཏནྟི ཨབཧུཀཏོ, ཨཀཏབཧུམཱནོ. དྷམྨོ ཨུཔྤཛྫམཱནོ ཨུཀྐུཛྫནྟོ ཝིཡ ནིརུཛ྄ཛྷམཱནོ ཨཝཀུཛྫནྟོ ཝིཡ ཧོཏཱིཏི ཝུཏྟཾ ‘‘ཨུཀྐུཛྫཾ ཝུཙྩཏི ཨུདཡོ, ཨཝཀུཛྫཾ ཝཡོ’’ཏི. པརིཝཏྟེནྟོཏི ཨནིཙྩཱཏིཔི དུཀྑཱཏིཔི ཨནཏྟཱཏིཔི. ‘‘ཨེསོ ཧི ཏེ ཨུདཱཡི མགྒོ པཊིལདྡྷོ, ཡོ ཏེ…པེ… ཏཐཏྟཱཡ ཨུཔནེསྶཏཱི’’ཏི པརིཡོསཱནེ བྷགཝཏོ ཝཙནཉྩེཏྠ སཱདྷཀཾ དཊྛབྦཾ. ཏེན ཏེནཱཀཱརེན ཝིཧརནྟནྟི ཡེན སམྨསནཱཀཱརེན ཝིཔསྶནཱཝིཧཱརེན ཝིཧརནྟཾ. ཏཐཱབྷཱཝཱཡཱཏི ཁཱིཎཱསཝབྷཱཝཔཙྩཝེཀྑཎཱཡ. ཏེནཱཧ – ‘‘ཁཱིཎཱ ཛཱཏཱིཏི…པེ… ཏཾ དསྶེནྟོ ཨེཝམཱཧཱ’’ཏི.

ཨུདཱཡིཝགྒཝཎྞནཱ ནིཊྛིཏཱ.

༤. ནཱིཝརཎཝགྒོ

༣-༤. ཨུཔཀྐིལེསསུཏྟཱདིཝཎྞནཱ

༢༡༤-༢༡༥. ན ཙ པབྷཱཝནྟནྟི ན ཙ པབྷཱསམྤནྣཾ. པབྷིཛྫནསབྷཱཝནྟི ཏཱཔེཏྭཱ ཏཱལནེ པབྷངྒུཏཾ. ཨཝསེསཾ ལོཧནྟི ཝུཏྟཱཝསེསཾ ཛཱཏིལོཧཾ, ཝིཛཱཏིལོཧཾ, ཀིཏྟིམལོཧནྟི པབྷེདཾ སབྦམྤི ལོཧཾ. ཨུཔྤཛྫིཏུཾ ཨཔྤདཱནེནཱཏི ཨེཏྠ ནནུ ལོཀིཡཀུསལཙིཏྟསྶཔི སུཝིསུདྡྷསྶ ཨུཔྤཛྫིཏུཾ ཨཔྤདཱནེན ཨུཔཀྐིལེསཏཱཏི? སཙྩམེཏཾ, ཡསྨིཾ པན སནྟཱནེ ནཱིཝརཎཱནི ལདྡྷཔཏིཊྛཱནི, ཏཏྠ མཧགྒཏཀུསལསྶཔི ཨསམྦྷཝོ, པགེཝ ལོཀུཏྟརཀུསལསྶ, པརིཏྟཀུསལཾ པན ཡཐཱཔཙྩཡཾ ཨུཔྤཛྫཏི. ནཱིཝརཎེ ཧི ཝཱུཔསནྟེ སནྟཱནེ ཨུཔྤཏྟིཡཱ ཨཔརིསུདྡྷཾ ཧོཏི, ཨུཔཀྐིལིཊྛཾ ནཱམ ཧོཏི, ཨཔརིསུདྡྷདཱིཔཀཔལླིཀཝཊྛིཏེལཱདིསནྣིསྶཡོ དཱིཔོ ཝིཡ, ཨཔིཙ ནིཔྤརིཡཱཡཏོ ཨུཔྤཛྫིཏུཾ ཨཔྤདཱནེནེཝ ཏེསཾ ཨུཔཀྐིལེསཏཱཏི དསྶེནྟོ ‘‘ཡདགྒེན ཧཱི’’ཏིཨཱདིམཱཧ. ཨཱརམྨཎེ ཝིཀྑིཏྟཔྤཏྟིཝསེན ཙུཎྞཝིཙུཎྞཏཱ ཝེདིཏབྦཱ. ན ཨཱཝརནྟཱིཏི ཀུསལདྷམྨེ ཨུཔྤཛྫིཏུཾ ཨཔྤདཱནཝསེན ན ཨཱཝརནྟི, ཨཐ ཁོ ཏེསཾ ཨུཔྤཏྟིཡཱ ཧོནྟི. ན པཊིཙྪཱདེནྟཱིཏི ན ¶ ཝིནནྡྷནྟི. ཙཏུབྷཱུམཀཙིཏྟསྶཱཏི ཙཏུཏྠབྷཱུམཀཀུསལཙིཏྟསྶ ཨནུཔཀྐིལེསཱ, ཏེཧི ཨཀིལིསྶནཏོ.

༨. ཨཱཝརཎནཱིཝརཎསུཏྟཝཎྞནཱ

༢༡༩. པཉྙཱ ¶ དུབྦལཱ ཧོཏི, ན བལཝཏཱི པཊིཔཀྑེན ཨུཔཀྐིལིཊྛབྷཱཝཏོ. ཏེནཱཧ ‘‘མནྡཱ ཨཝིསདཱ’’ཏི.

པཉྩ ནཱིཝརཎཱ དཱུརེ ཧོནྟི ཨཱཝརཎཱབྷཱཝཏོ. ཏམེཝ པཱིཏིནྟི སཔྤཱཡདྷམྨསཝནེ ཨུཔྤནྣཾ པཱིཏིཾ. ཏསྶཱ ཏདཱ ཨུཔྤནྣཱཀཱརསལླཀྑཎེན ཨཝིཛཧནྟོ པུནཔྤུནཾ ཏསྶཱ ནིབྦཏྟནེན. ཏེནཱཧ ‘‘པཉྩ ནཱིཝརཎེ ཝིཀྑམྦྷེཏྭཱ’’ཏི. ཨིདཾ སནྡྷཱཡཱཏི ཨེཏྟཀེ དིཝསེཔི ན ཝིནསྶནྟི, སཱ དྷམྨཔཱིཏི ལདྡྷཔཙྩཡཱ ཧུཏྭཱ ཝིསེསཱཝཧཱཏི ཨིམམཏྠཾ སནྡྷཱཡ ཨེཏཾ ‘‘ཨིམསྶ པཉྩ ནཱིཝརཎཱ ཏསྨིཾ སམཡེ ན ཧོནྟཱི’’ཏིཨཱདི ཝུཏྟཾ. པཱིཏིཔཱམོཛྫཔཀྑིཡཱཏི པཱིཏིཔཱམོཛྫཔཙྩཡཱ. ནསྶནྟཱིཏི ནིརོདྷཔཙྩཡཝསེན པཝཏྟནཏོ ནསྶནྟི. སབྷཱགཔཙྩཡཝསེན པུན ཨུཔྤཛྫནྟཱཔི…པེ… ཝུཙྩཏི ཀིཙྩསཱདྷནཝསེན པཝཏྟནཏོ.

༩. རུཀྑསུཏྟཝཎྞནཱ

༢༢༠. ཨབྷིརུཧནཀཱཏི སམཱིཔརུཀྑེ ཨབྷིབྷཝིཏྭཱ རུཧནཀཱ. ཨཊྛིཀཙྪཀོཏི ཨཊྛིབཧུལཀཙྪཀོ. ཀཔིཐནསདིསཕལཏྟཱ ཀཔིཏྠནོཏི ལདྡྷནཱམོ.

༡༠. ནཱིཝརཎསུཏྟཝཎྞནཱ

༢༢༡. ཨནྡྷབྷཱཝཀརཎཱ པཉྙཱཙཀྑུསྶ ཝིབནྡྷནཏོ. ཏཐཱ ཧི ཏེ ‘‘ཨཙཀྑུཀརཎཱ པཉྙཱནིརོདྷིཀཱ’’ཏི ཝུཏྟཱ. ཝིཧནཏི ཝིབཱདྷཏཱིཏི ཝིགྷཱཏོ, དུཀྑནྟི ཨཱཧ ‘‘ཝིགྷཱཏཔཀྑིཡཱཏི དུཀྑཔཀྑིཀཱ’’ཏི. ནིབྦཱནཏྠཱཡ ན སཾཝཏྟནྟཱིཏི ཨནིབྦཱནསཾཝཏྟནིཀཱ. མིསྶཀབོཛ྄ཛྷངྒཱཝ ཀཐིཏཱ པུབྦབྷཱགིཀཱནཾ ཀཐིཏཏྟཱ.

ནཱིཝརཎཝགྒཝཎྞནཱ ནིཊྛིཏཱ.

༥. ཙཀྐཝཏྟིཝགྒོ

༡. ཝིདྷཱསུཏྟཝཎྞནཱ

༢༢༢. ཝིདྷཱིཡནྟཱིཏི ¶ ¶ ཝིདྷཱ, མཱནཱདིབྷཱགཱ ཀོཊྛཱསཱཏི ཨཱཧ ‘‘ཏཡོ མཱནཀོཊྛཱསཱ’’ཏི. ཏཐཱ ཏཐཱ ཝིདཧནཏོཏི ‘‘སེཡྻོཧམསྨཱི’’ཏིཨཱདིནཱ ཏེན ཏེནཱཀཱརེན ཝིདཧནཏོ ཋཔནཏོ, ཋཔེཏབྦཏོ ཝཱ.

༢. ཙཀྐཝཏྟིསུཏྟཝཎྞནཱ

༢༢༣. སིརིསམྤཏྟིཡཱ རཱཛཏི དིཔྤཏི སོབྷཏཱིཏི རཱཛཱ, དཱནཔིཡཝཙནཨཏྠཙརིཡཱསམཱནཏྟཏཱསངྑཱཏེཧི ཙཏཱུཧི སངྒཧཝཏྠཱུཧི. རཉྫེཏཱིཏི རམེཏི. ཨབྦྷུགྒཏཱཡཱཏི ཨུདཱིརིཏཱ ནིབྦཏྟིཏོ ཏཏྠ ཏཏྠ གཙྪནཏོ. ཙཀྐཾ ཝཏྟེཏཱིཏི ཙཀྐརཏནཾ པཝཏྟེཏི. དེཝཊྛཱནནྟི པཱུཛནཱིཡདེཝཊྛཱནཾ. ཙིཏྟཱིཀཏཊྛེནཱཏི པཱུཛནཱིཡབྷཱཝེན. ཨགྒྷོ ནཏྠི ཙིརཀཱལསམྦྷཝཔུཉྙཱནུབྷཱཝསིདྡྷརཏནསབྦྷཱཝཏོ. ཨཉྙེཧི ཙཀྐཝཏྟིནོ པརིགྒཧབྷཱུཏརཏནེཧི. ལོཀེཏི མནུསྶལོཀེ. ཏེན ཏདཉྙལོཀཾ ནིཝཏྟེཏི. ཝིཛྫམཱནགྒཧཎེན ཨཏཱིཏཱནཱགཏཾ ནིཝཏྟེཏི. བུདྡྷཱ ཙ ཀདཱཙི ཀརཧཙི ཨུཔྤཛྫནྟི ཙཀྐཝཏྟིནོཔི ཡེབྷུཡྻེན ཏསྨིཾཡེཝ ཨུཔྤཛྫནཏོཏི ཨདྷིཔྤཱཡོ. ཨནོམསྶཱཏི ཨལཱམཀསྶ ཨུཀྐཊྛསྶ. སེསཱནི རཏནཱནི.

ཏཏྲཱཏི ཝཱཀྱོཔཉྙཱསནེ ནིཔཱཏོ, ཏསྨིཾ པཱཏུབྷཱཝཝཙནེ. ‘‘ཨཡུཏྟ’’ནྟི ཝཏྭཱ ཏཏྠ ཨདྷིཔྤཱཡཾ ཝིཝརནྟོ ‘‘ཨུཔྤནྣཾ ཧཱི’’ཏིཨཱདིམཱཧ. ཏེཧི རཏནེཧི ཙཀྐཝཏྟནནིཡམཱཔེཀྑཏཱཡ ཙཀྐཝཏྟིཝཙནསྶ. ནིཡམེནཱཏི ཨེཀནྟེན. ཝཏྟབྦཏཾ ཨཱཔཛྫཏི བྷཱཝིནི བྷཱུཏེ ཝིཡ ཨུཔཙཱརོཏི ཡཐཱ – ‘‘ཨགམཱ རཱཛགཧཾ བུདྡྷོ’’ཏི (སུ. ནི. ༤༡༠). ལདྡྷནཱམསྶཱཏི ཙཀྐཝཏྟཱིཏི ལོཀེ ལདྡྷསམཉྙསྶ པཏྠནཱིཡསྶ པུརིསཝིསེསསྶ. མཱུལུཔྤཏྟིཝཙནཏོཔཱིཏི ‘‘ཙཀྐཝཏྟིསྶ པཱཏུབྷཱཝཱ’’ཏི ཨེཏསྶ པཋམུཔྤཏྟིཡཱ ཝཙནཏོཔི. ཨིདཱནི ཏམཏྠཾ ཝིཝརནྟོ ‘‘ཡོ ཧཱི’’ཏིཨཱདིམཱཧ. ཡོ ཧི ཙཀྐཝཏྟིརཱཛཱ, ཏསྶ ཨུཔྤཏྟིཡཱ ཙཀྐརཏནསྶ ཨུཔྤཛྫནཏོ ཙཀྐཝཏྟཱིཏི ཨེཝཾ ནཱམཾ ཨུཔྤཛྫཏི. ‘‘ཙཀྐཾ ཝཏྟེསྶཏཱི’’ཏི ཨིདཾ པན ནིཡཱམཾ ཨནཔེཀྑིཏྭཱ ཏསྶ ཨུཔྤཛྫཏཱིཏི རཏནཱནུཔྤཏྟིཾ ¶ གཧེཏྭཱ ཝུཏྟནཡཏོ སཉྙཱ ཨུཔྤཛྫཏི ‘‘ཙཀྐཝཏྟཱི’’ཏི. ཨེཀམེཝཱཏི ཙཀྐརཏནམེཝ པཋམཾ པཱཏུབྷཝཏི. ཡསྨིཾ བྷཱུཏེ རཉྙོ ཙཀྐཝཏྟིསམཉྙཱ, ཨཐ པཙྪཱ ¶ རཏནཱནི པཱཏུབྷཝནྟཱིཏི བཧཱུནཾ པཱཏུབྷཱཝཾ ཨུཔཱདཱཡ བཧུལཝཙནཏོཔི ཨེཏཾ ‘‘ཙཀྐཝཏྟིསྶ པཱཏུབྷཱཝཱ རཏནཱནཾ པཱཏུབྷཱཝོ’’ཏི ཝུཏྟཾ. ཨཡཾ ཧེཏུཀཏྟུསཉྙིཏོ ཨཏྠབྷེདོ. པཱཏུབྷཱཝཱཏི པཱཏུབྷཱཝཏོ. པུཉྙསམྦྷཱརོ བྷིནྣསནྟཱནཏཱཡ རཏནཱནམྤི པརིཡཱཡེན ཨུཔནིསྶཡཧེཏཱུཏི ཝུཏྟཾ. ཡུཏྟམེཝེཏཾ ཡཐཱཝུཏྟཡུཏྟིཡུཏྟཏྟཱ.

ཝཏྟབྦབྷཱུཏོ ཨདྷིཔྤཱཡོ ཨེཏསྶ ཨཏྠཱིཏི ཨདྷིཔྤཱཡོ, ཨཏྠནིདྡེསོ, སངྑེཔཏོ ཨདྷིཔྤཱཡོ སངྑེཔཱདྷིཔྤཱཡོ. ཙཀྐརཏནཱནུབྷཱཝེན ཙཀྐཝཏྟིསྶརིཡསྶ སིཛ྄ཛྷནཏོ ‘‘དཱཏུཾ སམཏྠསྶཱ’’ཏི ཝུཏྟཾ. ཡོཛནཔྤམཱཎེ པདེསེ པཝཏྟཏྟཱ ཡོཛནཔྤམཱཎཾ ཨནྡྷཀཱརཾ. ཨཏིདཱིགྷཱཏིརསྶཏཱདིཾ ཚབྦིདྷཾ དོསཾ ཝིཝཛྫེཏྭཱ ཋིཏསྶཱཏི ཝཙནསེསོ.

སབྦེསཾ ཙཏུབྷཱུམཀདྷམྨཱནཾ པུརེཙརཾ ཀུསལཱནཾ དྷམྨཱནཾ གཏིཡོ སམནྭེསནཝསེན པཝཏྟནཏོ. བུདྡྷཱདཱིཧིཔི ཨཔྤཧཱནཱིཡཏཱཡ མཧནྟདྷམྨསབྷཱཝཏྟཱ དྷམྨཀཱཡེ ཙ ཛེཊྛཀཊྛེན དྷམྨཀཱཡཱུཔཔནྣཾ. པཉྙཱཔཱསཱདཏཱཡ ཙསྶ ཨུཔརིགཏཊྛེན ཨཙྩུགྒཏཾ. ཝིཏྠཏཊྛེན ཝིཔུལཾ. མཧནྟཏཱཡ མཧནྟཾ. ཨནཱདིཀཱལབྷཱཝིཏསྶ ཀིལེསསནྟཱནསྶ ཁཎེནེཝ ཝིདྡྷཾསནཏོ སཱིགྷཾ ལཧུ ཛཝནྟི པརིཡཱཡཱ. བོཛ྄ཛྷངྒདྷམྨཔརིཡཱཔནྣཏྟཱ ཧི ཝུཏྟཾ ‘‘ཨེཀནྟ-ཀུསལཏྟཱ’’ཏི. སམྤཡུཏྟཝསེན པཱིཏིཡཱ ཨཱལོཀཝིདྡྷཾསནབྷཱཝཝསེནཱཏི ཝུཏྟཾ ‘‘སཧཛཱཏཔཙྩཡཱདཱི’’ཏིཨཱདི. སབྦསངྒཱཧིཀདྷམྨཔརིཙྪེདོཏི ཙཏུབྷཱུམཀཏྟཱ སབྦསངྒཱཧཀོ བོཛ྄ཛྷངྒདྷམྨཔརིཙྪེདོ ཀཐིཏོ.

༤-༡༠. དུཔྤཉྙསུཏྟཱདིཝཎྞནཱ

༢༢༥-༢༣༡. ཨེལ༹ཾ ཝུཙྩཏི དོསོ, ཨེལེ༹ན མཱུགོ ཝིཡཱཏི ཨེལ༹མཱུགོཏི ཨིམམཏྠཾ དསྶེནྟོ ‘‘མུཁེན ཝཱཙ’’ནྟིཨཱདིམཱཧ.

ཙཀྐཝཏྟིཝགྒཝཎྞནཱ ནིཊྛིཏཱ.

༦. སཱཀཙྪཝགྒོ

༡. ཨཱཧཱརསུཏྟཝཎྞནཱ

༢༣༢. པུརིམནཡཏོཏི ¶ ¶ ‘‘སཏིསམྦོཛ྄ཛྷངྒཊྛཱནཱིཡཱནཾ དྷམྨཱན’’ནྟིཨཱདིནཱ ཨཱགཏནཡཏོ. ཨེཝནྟི ཨིདཱནི ཝུཙྩམཱནཱཀཱརེན. སཏི ཙ སམྤཛཉྙཉྩ སཏིསམྤཛཉྙཾ. སཏིཔདྷཱནཾ ཝཱ ཨབྷིཀྐནྟཱདཱིསུ སཏྠཀབྷཱཝཔརིགྒཎྷཀཉཱཎཾ སཏིསམྤཛཉྙཾ. ཏཾ སབྦཏྠ སཏོཀཱརཱིབྷཱཝཱཝཧཏྟཱ སཏིསམྦོཛ྄ཛྷངྒསྶ ཨུཔྤཱདཱཡ སཾཝཏྟཏི. ཡཐཱ ཙ པཙྩནཱིཀདྷམྨཔྤཧཱནཾ ཨནུརཱུཔདྷམྨདེསནཱ ཙ ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ ཧོཏི, ཨེཝཾ སཏིརཧིཏཔུགྒལཝཛྫནཱ སཏོཀཱརཱིཔུགྒལསེཝནཱ ཙ ཏཏྠ ཙ ཡུཏྟཔཡུཏྟཏཱ སཏིསམྦོཛ྄ཛྷངྒསྶ ཨུཔྤཱདཱཡ ཧོཏཱིཏི ཨིམམཏྠཾ དསྶེཏི ‘‘སཏིསམྤཛཉྙ’’ནྟིཨཱདིནཱ. ཨརཧཏྟམགྒེན བྷཱཝནཱཔཱརིཔཱུརཱི ཧོཏི. ཏཐཱ ཧི ཨརཧཱཝ ‘‘སཏིཝེཔུལླཔྤཏྟོ’’ཏི ཝུཙྩཏི.

དྷམྨཱནཾ, དྷམྨེསུ ཝཱ ཝིཙཡོ, སོ ཨེཝ ཧེཊྛཱ ཝུཏྟནཡེན སམྦོཛ྄ཛྷངྒོ, ཏསྶ དྷམྨཝིཙཡསམྦོཛ྄ཛྷངྒསྶ. པརིཔུཙྪཀཏཱཏི ཨཱཙརིཡཾ པཡིརུཔཱསིཏྭཱ པཉྩཔི ནིཀཱཡེ སཧཊྛཀཐཱཡ པརིཡོགཱཧེཏྭཱ ཡཾ ཡཾ ཏཏྠ གཎྛིཊྛཱནཾ, ཏསྶ ཏསྶ ‘‘ཨིདཾ, བྷནྟེ, ཀཐཾ ཨིམསྶ ཀོ ཨཏྠོ’’ཏི ཨེཝཾ ཁནྡྷཱདཱིསུ ཨཏྠཔུཙྪཀབྷཱཝོ. ཏེནཱཧ ‘‘ཁནྡྷ…པེ… བཧུལཏཱ’’ཏི.

ཝཏྠུཝིསདཀིརིཡཱཏི ཙིཏྟཙེཏསིཀཱནཾ པཝཏྟིཊྛཱནབྷཱཝཏོ སརཱིརཾ ཏཔྤཊིབདྡྷཱནི ཙ ཙཱིཝརཱདཱིནི ཨིདྷ ‘‘ཝཏྠཱུནཱི’’ཏི ཨདྷིཔྤེཏཱནི, ཏཱནི ཡཐཱ ཙིཏྟསྶ སུཁཱཝཧཱནི ཧོནྟི, ཏཐཱ ཀརཎཾ ཏེསཾ ཝིསདབྷཱཝཀརཎཾ. ཏེན ཝུཏྟཾ ‘‘ཨཛ྄ཛྷཏྟིཀབཱཧིརཱན’’ནྟིཨཱདི. ཨུསྶནྣདོསནྟི ཝཱཏཱདིཨུསྶནྣདོསཾ. སེདམལམཀྑིཏནྟི སེདེན ཙེཝ ཛལླིཀཱསངྑཱཏེན སརཱིརམལེན ཙ མཀྑིཏཾ. ཙ-སདྡེན ཨཉྙམྤི སརཱིརསྶ ཙ ཙིཏྟསྶ ཙ པཱིལཱ༹ཝཧཾ སངྒཎྷཱཏི. སེནཱསནཾ ཝཱཏི ཝཱ-སདྡེན པཏྟཱདཱིནཾ སངྒཧོ དཊྛབྦོ. ཨཝིསདེ སཏི, ཝིསཡབྷཱུཏེ ཝཱ. ཀཐཾ བྷཱཝནམནུཡུཏྟསྶ ཏཱནི ཝིསཡོཏི? ཨནྟརནྟརཱ པཝཏྟནཀཙིཏྟུཔྤཱདཝསེན ཨེཝཾ ཝུཏྟཾ. ཏེ ཧི ཙིཏྟུཔྤཱདཱ ཙིཏྟེཀགྒཏཱཡ ཨིཛ྄ཛྷནྟིཡཱཔི ཨཔརིསུདྡྷབྷཱཝཱཡ སཾཝཏྟནྟི. ཙིཏྟཙེཏསིཀེསུ ནིསྶཡཱདིཔཙྩཡབྷཱུཏེསུ. ཉཱཎམྤཱིཏི པི-སདྡོ སམྤིཎྜནེ. ཏེན ན ཀེཝལཾ ཏཾ ཝཏྠུཡེཝ ¶ , ཨཐ ཁོ ཏསྨིཾ ཨཔརིསུདྡྷེ ཉཱཎམྤི ཨཔརིསུདྡྷཾ ཧོཏཱིཏི ནིསྶཡཱཔརིསུདྡྷིཡཱ ནིསྶིཏཱཔརིསུདྡྷི ཝིཡ ཝིསཡསྶ ཨཔརིསུདྡྷཏཱཡ ཝིསཡཱིནཾ ཨཔརིསུདྡྷིཾ དསྶེཏི ཨནྭཡཏོ བྱཏིརེཀཏོ ཙ.

སམབྷཱཝཀརཎཾ ¶ ཀིཙྩཏོ ཨནཱུནཱདྷིཀབྷཱཝཀརཎཾ. ཡཐཱཔཙྩཡཾ སདྡྷེཡྻཝཏྠུསྨིཾ ཨདྷིམོཀྑཀིཙྩསྶ པཊུཏརབྷཱཝེན པཉྙཱཡ ཨཝིསདཏཱཡ ཝཱིརིཡཱདཱིནཉྩ ཨནུབལཔྤདཱནསིཐིལཏཱདིནཱ སདྡྷིནྡྲིཡཾ བལཝཾ ཧོཏི. ཏེནཱཧ ‘‘ཨིཏརཱནི མནྡཱནཱི’’ཏི. ཏཏོཏི ཏསྨཱ སདྡྷིནྡྲིཡསྶ བལཝབྷཱཝཏོ ཨིཏརེསཉྩ མནྡཏྟཱ. ཀོསཛྫཔཀྑེ པཏིཏུཾ ཨདཏྭཱ སམྤཡུཏྟདྷམྨཱནཾ པགྒཎྷནཾ ཨནུབལཔྤདཱནཾ པགྒཧོ, པགྒཧཀིཙྩཾ ཀཱཏུཾ ན སཀྐོཏཱིཏི སམྦནྡྷིཏབྦཾ. ཨཱརམྨཎཾ ཨུཔགནྟྭཱ ཋཱནཾ, ཨནིསྶཛྫནཾ ཝཱ ཨུཔཊྛཱནཾ, ཝིཀྑེཔཔཊིཔཀྑོ. ཡེན ཝཱ སམྤཡུཏྟཱ ཨཝིཀྑིཏྟཱ ཧོནྟི, སོ ཨཝིཀྑེཔོ. རཱུཔགཏཾ ཝིཡ ཙཀྑུནཱ ཡེན ཡཱཐཱཝཏོ ཝིསཡསབྷཱཝཾ པསྶཏི, ཏཾ དསྶནཀིཙྩཾ ཀཱཏུཾ ན སཀྐོཏི བལཝཏཱ སདྡྷིནྡྲིཡེན ཨབྷིབྷཱུཏཏྟཱ. སཧཛཱཏདྷམྨེསུ ཧི ཨིནྡཊྛཾ ཀརོནྟཱནཾ སཧ པཝཏྟམཱནཱནཾ དྷམྨཱནཾ ཨེཀརསཏཱཝསེནེཝ ཨཏྠསིདྡྷི, ན ཨཉྙཐཱ. ཏསྨཱཏི ཝུཏྟམེཝཏྠཾ ཀཱརཎབྷཱཝེན པཙྩཱམསཏི. ཏནྟི སདྡྷིནྡྲིཡཾ.

དྷམྨསབྷཱཝཔཙྩཝེཀྑཎེནཱཏི ཡསྶ སདྡྷེཡྻཝཏྠུནོ ཨུལཱ༹རཏཱདིགུཎེ ཨདྷིམུཙྩནསྶ སཱཏིསཡཔྤཝཏྟིཡཱ སདྡྷིནྡྲིཡཾ བལཝཾ ཛཱཏཾ, ཏསྶ པཙྩཡཔཙྩཡུཔྤནྣཏཱདིཝིབྷཱགཏོ ཡཱཐཱཝཏོ ཝཱིམཾསནེན. ཨེཝཉྷི ཨེཝཾདྷམྨཏཱནཡེན སབྷཱཝསརསཏོ པརིགྒཡ྄ཧམཱནེ སཝིཔྥཱརོ ཨདྷིམོཀྑོ ན ཧོཏི – ‘‘ཨཡཾ ཨིམེསཾ དྷམྨཱནཾ སབྷཱཝོ’’ཏི པཉྙཱབྱཱཔཱརསྶ སཱཏིསཡཏྟཱ. དྷུརིཡདྷམྨེསུ ཧི ཡཐཱ སདྡྷཱཡ བལཝབྷཱཝེ པཉྙཱཡ མནྡབྷཱཝོ ཧོཏི, ཨེཝཾ པཉྙཱཡ བལཝབྷཱཝེ སདྡྷཱཡ མནྡབྷཱཝོ ཧོཏི. ཏེན ཝུཏྟཾ – ‘‘ཏཾ དྷམྨསབྷཱཝཔཙྩཝེཀྑཎེན…པེ… ཧཱཔེཏབྦ’’ནྟི. ཏཐཱ ཨམནསིཀརཎེནཱཏི ཡེནཱཀཱརེན བྷཱཝནམནུཡུཉྫནྟསྶ སདྡྷིནྡྲིཡཾ བལཝཾ ཛཱཏཾ, ཏེནཱཀཱརེན བྷཱཝནཾ ནཱནུཡུཉྫནེནཱཏི ཝུཏྟཾ ཧོཏི. ཨིདྷ དུཝིདྷེན སདྡྷིནྡྲིཡསྶ བལཝབྷཱཝོ ཨཏྟནོ ཝཱ པཙྩཡཝིསེསེན ཀིཙྩུཏྟརིཡཏོ ཝཱིརིཡཱདཱིནཾ ཝཱ མནྡཀིཙྩཏཱཡ. ཏཏྠ པཋམཝིཀཔྤེ ཧཱཔནཝིདྷི དསྶིཏོ, དུཏིཡཝིཀཔྤེ པན ཡཐཱ མནསིཀརོཏོ ཝཱིརིཡཱདཱིནཾ མནྡཀིཙྩཏཱཡ སདྡྷིནྡྲིཡཾ བལཝཾ ཛཱཏཾ, ཏཐཱ ཨམནསིཀཱརེན ཝཱིརིཡཱདཱིནཾ པཊུཏརབྷཱཝཱཝཧེན མནསིཀཱརེན སདྡྷིནྡྲིཡཾ ཏེཧི ¶ སམཏཾ ཀརོནྟེན ཧཱཔེཏབྦཾ. ཨིམིནཱ ནཡེན སེསིནྡྲིཡེསུཔི ཧཱཔནཝིདྷི ཝེདིཏབྦོ.

ཝཀྐལིཏྠེརཝཏྠཱུཏི སོ ཧི ཨཱཡསྨཱ སདྡྷཱདྷིམུཏྟོ ཏཏྠ ཙ ཀཏཱདྷིཀཱརོ སཏྠུ རཱུཔཀཱཡདསྶནེ པསུཏོ ཨེཝ ཧུཏྭཱ ཝིཧརནྟོ སཏྠཱརཱ – ‘‘ཀིཾ ཏེ, ཝཀྐལི, ཨིམིནཱ པཱུཏིཀཱཡེན དིཊྛེན, ཡོ ཁོ, ཝཀྐལི, དྷམྨཾ པསྶཏི, སོ མཾ པསྶཏཱི’’ཏིཨཱདིནཱ (སཾ. ནི. ༣.༨༧) ཨོཝདིཡམཱནོ ཀམྨཊྛཱནེ ནིཡོཛིཏོཔི ཏཾ ཨནནུཡུཉྫནྟོ པཎཱམིཏོ ཨཏྟཱནཾ ¶ ཝིནིཔཱཏེཏུཾ པཔཱཏཊྛཱནཾ ཨབྷིརུཧི. ཨཐ ནཾ སཏྠཱ ཡཐཱནིསིནྣོཝ ཨོབྷཱསཝིསྶཛྫནེན ཨཏྟཱནཾ དསྶེཏྭཱ –

‘‘པཱམོཛྫབཧུལོ བྷིཀྑུ, པསནྣོ བུདྡྷསཱསནེ;

ཨདྷིགཙྪེ པདཾ སནྟཾ, སངྑཱརཱུཔསམཾ སུཁ’’ནྟི. (དྷ. པ. ༣༨༡) –

གཱཐཾ ཝཏྭཱ ‘‘ཨེཧི, ཝཀྐལཱི’’ཏི ཨཱཧ. སོ ཏེན ཝཙནེན ཨམཏེནེཝ ཨབྷིསིཏྟོ ཧཊྛཏུཊྛོ ཧུཏྭཱ ཝིཔསྶནཾ པཊྛཔེསི, སདྡྷཱཡ བཧུལབྷཱཝཏོ ཝིཔསྶནཱཝཱིཐིཾ ནཱརོཧཏི. ཏཾ ཉཏྭཱ བྷགཝཱ ཨིནྡྲིཡསམཏྟཔཊིཔཱདནཱཡ ཀམྨཊྛཱནཾ སོདྷེཏྭཱ ཨདཱསི. སོ སཏྠཱརཱ དིནྣནཡེན ཝིཔསྶནཾ ཨུསྶུཀྐཱཔེཏྭཱ མགྒཔཊིཔཱཊིཡཱ ཨརཧཏྟཾ པཱཔུཎི. ཏེན ཝུཏྟཾ – ‘‘ཝཀྐལིཏྠེརཝཏྠུ ཙེཏྠ ནིདསྶན’’ནྟི. ཨེཏྠཱཏི སདྡྷིནྡྲིཡསྶ ཨདྷིམཏྟབྷཱཝེ སེསིནྡྲིཡཱནཾ སཀིཙྩཱཀརཎེ.

ཨིཏརཀིཙྩབྷེདནྟི ཨུཔཊྛཱནཱདིཀིཙྩཝིསེསཾ. པསྶདྡྷཱདཱིཏི ཨཱདི-སདྡེན སམཱདྷིཨུཔེཀྑཱསམྦོཛ྄ཛྷངྒཱནཾ སངྒཧོ དཊྛབྦོ. ཧཱཔེཏབྦནྟི ཡཐཱ སདྡྷིནྡྲིཡསྶ བལཝབྷཱཝོ དྷམྨསབྷཱཝཔཙྩཝེཀྑཎེན ཧཱཡཏི, ཨེཝཾ ཝཱིརིཡིནྡྲིཡསྶ ཨདྷིམཏྟཏཱ པསྶདྡྷིཡཱདིབྷཱཝནཱཡ ཧཱཡཏི སམཱདྷིཔཀྑིཀཏྟཱ ཏསྶཱ. ཏཐཱ ཧི སམཱདྷིནྡྲིཡསྶ ཨདྷིམཏྟཏཾ ཀོསཛྫཔཱཏཏོ རཀྑནྟཱི ཝཱིརིཡཱདིབྷཱཝནཱ ཝིཡ ཝཱིརིཡིནྡྲིཡསྶ ཨདྷིམཏྟཏཾ ཨུདྡྷཙྩཔཱཏཏོ རཀྑནྟཱི ཨེཀཾསཏོ ཧཱཔེཏི. ཏེན ཝུཏྟཾ ‘‘པསྶདྡྷཱདིབྷཱཝནཱཡ ཧཱཔེཏབྦ’’ནྟི. སོཎཏྠེརསྶ ཝཏྠཱུཏི སུཀུམཱརསོཎཏྠེརསྶ ཝཏྠུ. སོ ཧི ཨཱཡསྨཱཔི སཏྠུ སནྟིཀཱ ཀམྨཊྛཱནཾ གཧེཏྭཱ སཱིཏཝནེ ཝིཧརནྟོ – ‘‘མམ སརཱིརཾ སུཁུམཱལཾ, ན ཙ སཀྐཱ སུཁེནེཝ སུཁཾ ཨདྷིགནྟུཾ, ཀཱཡཾ ཀིལམེཏྭཱཔི སམཎདྷམྨོ ཀཱཏབྦོ’’ཏི ཋཱནཙངྐམནམེཝ ཨདྷིཊྛཱཡ ¶ པདྷཱནམནུཡུཉྫནྟོ པཱདཏལེསུ ཕོཊེསུ ཨུཊྛིཏེསུཔི ཝེདནཾ ཨཛ྄ཛྷུཔེཀྑིཏྭཱ དལ༹ྷཝཱིརིཡཾ ཀརོནྟོ ཨཙྩཱརདྡྷཝཱིརིཡཏཱཡ ཝིསེསཾ པཝཏྟེཏུཾ ནཱསཀྑི. སཏྠཱ ཏཏྠ གནྟྭཱ ཝཱིཎོཔམོཝཱདེན ཨོཝདིཏྭཱ ཝཱིརིཡསམཏཱཡོཛནཝིདྷིཾ དསྶེནྟོ ཀམྨཊྛཱནཾ སོདྷེཏྭཱ གིཛ྄ཛྷཀཱུཊཾ གཏོ. ཐེརོཔི སཏྠཱརཱ དིནྣནཡེན ཝཱིརིཡསམཏཾ ཡཱཛེཏྭཱ བྷཱཝེནྟོ ཝིཔསྶནཾ ཨུསྶུཀྐཱཔེཏྭཱ ཨརཧཏྟེཝ པཏིཊྛཱསི. ཏེན ཝུཏྟཾ ‘‘སོཎཏྠེརསྶ ཝཏྠུ དསྶེཏབྦ’’ནྟི. སེསེསུཔཱིཏི སཏིསམཱདྷིཔཉྙིནྡྲིཡེསུཔི.

སམཏནྟི སདྡྷཱཔཉྙཱནཾ ཨཉྙམཉྙཾ ཨནཱུནཱདྷིཀབྷཱཝཾ, ཏཐཱ སམཱདྷིཝཱིརིཡཱནཉྩ. ཡཐཱ ཧི སདྡྷཱཔཉྙཱནཾ ཝིསུཾ ཝིསུཾ དྷུརིཡདྷམྨབྷཱུཏཱནཾ ཀིཙྩཏོ ཨཉྙམཉྙནཱཏིཝཏྟནཾ ཝིསེསཏོ ཨིཙྪིཏབྦཾ. ཡཏོ ཏེསཾ སམདྷུརཏཱཡ ཨཔྤནཱ སམྤཛྫཏི, ཨེཝཾ སམཱདྷིཝཱིརིཡཱནཾ ཀོསཛྫུདྡྷཙྩཔཀྑིཀཱནཾ ¶ སམཏཱཡ སཏི ཨཉྙམཉྙུཔཏྠམྦྷནཏོ སམྤཡུཏྟདྷམྨཱནཾ ཨནྟདྭཡཔཱཏཱབྷཱཝེན སམྨདེཝ ཨཔྤནཱ ཨིཛ྄ཛྷཏཱིཏི. བལཝསདྡྷོཏིཨཱདི ཝུཏྟསྶེཝ ཨཏྠསྶ བྱཏིརེཀམུཁེན སམཏྠནཾ. ཏསྶཏྠོ – ཡོ བལཝཏིཡཱ སདྡྷཱཡ སམནྣཱགཏོ ཨཝིསདཉཱཎོ, སོ མུདྷཔྤསནྣོ ཧོཏི, ན ཨཝེཙྩཔྤསནྣོ. ཏཐཱ ཧི སོ ཨཝཏྠུསྨིཾ པསཱིདཏི, སེཡྻཐཱཔི ཏིཏྠིཡསཱཝཀཱ. ཀེརཱཊིཀཔཀྑནྟི སཱཋེཡྻཔཀྑཾ བྷཛཏི. སདྡྷཱཧཱིནཱཡ པཉྙཱཡ ཨཏིདྷཱཝནྟོ ‘‘དེཡྻཝཏྠུཔརིཙྩཱགེན ཝིནཱ ཙིཏྟུཔྤཱདམཏྟེནཔི དཱནམཡཾ པུཉྙཾ ཧོཏཱི’’ཏིཨཱདཱིནི པརིཀཔྤེཏི ཧེཏུཔཏིརཱུཔཀེཧི ཝཉྩིཏོ, ཨེཝཾབྷཱུཏོ ཙ ལཱུཁཏཀྐཝིལུཏྟཙིཏྟོ པཎྜིཏཱནཾ ཝཙནཾ ནཱདིཡཏི, སཉྙཏྟིཾ ན གཙྪཏི. ཏེནཱཧ ‘‘བྷེསཛྫསམུཊྛིཏོ ཝིཡ རོགོ ཨཏེཀིཙྪོ ཧོཏཱི’’ཏི. ཡཐཱ ཙེཏྠ སདྡྷཱཔཉྙཱནཾ ཨཉྙམཉྙཾ སམབྷཱཝོ ཨཏྠཱཝཧོ, ཝིསམབྷཱཝོ ཨནཏྠཱཝཧོ, ཨེཝཾ སམཱདྷིཝཱིརིཡཱནཾ ཨཉྙམཉྙཾ སམབྷཱཝོ ཨཏྠཱཝཧོ, ཨིཏརོ ཨནཏྠཱཝཧོ, ཏཐཱ སམབྷཱཝོ ཨཝིཀྑེཔཱཝཧོ, ཨིཏརོ ཝིཀྑེཔཱཝཧོ. ཀོསཛྫཾ ཨབྷིབྷཝཏི, ཏེན ཨཔྤནཾ ན པཱཔུཎཱཏཱིཏི ཨདྷིཔྤཱཡོ. ཨེས ནཡོ ཨུདྡྷཙྩཾ ཨབྷིབྷཝཏཱིཏི ཨེཏྠཱཔི. ཏདུབྷཡནྟི སདྡྷཱཔཉྙཱདྭཡཾ སམཱདྷིཝཱིརིཡདྭཡཉྩ. སམཾ ཀཱཏབྦནྟི སམཏཾ ཀཱཏབྦཾ.

སམཱདྷིཀམྨིཀསྶཱཏི སམཐཀམྨཊྛཱནིཀསྶ. ཨེཝནྟི ཨེཝཾ སནྟེ, སདྡྷཱཡ ཐོཀཾ བལཝབྷཱཝེ སཏཱིཏི ཨཏྠོ. སདྡཧནྟོཏི ‘‘པཐཝཱི པཐཝཱིཏི མནསིཀཱརམཏྟེན ¶ ཀཐཾ ཛྷཱནུཔྤཏྟཱི’’ཏི ཨཙིནྟེཏྭཱ ‘‘ཨདྡྷཱ སམྦུདྡྷེན ཝུཏྟཝིདྷི ཨིཛ྄ཛྷཏཱི’’ཏི སདྡཧནྟོ སདྡྷཾ ཛནེནྟོ. ཨོཀཔྤེནྟོཏི ཨཱརམྨཎཾ ཨནུཔཝིསིཏྭཱ ཝིཡ ཨདྷིམུཙྩནཝསེན ཨཝཀཔྤེནྟོ པཀྑནྡནྟོ. ཨེཀགྒཏཱ བལཝཏཱི ཝཊྚཏི སམཱདྷིཔདྷཱནཏྟཱ ཛྷཱནསྶ. ཨུབྷིནྣནྟི སམཱདྷིཔཉྙཱནཾ. སམཱདྷིཀམྨིཀསྶ སམཱདྷིནོ ཨདྷིམཏྟཏཱཡ པཉྙཱཡ ཨདྷིམཏྟཏཱཔི ཨིཙྪིཏབྦཱཏི ཨཱཧ ‘‘སམཏཱཡཔཱི’’ཏི, སམབྷཱཝེནཱཔཱིཏི ཨཏྠོ. ཨཔྤནཱཏི ལོཀིཡཨཔྤནཱ. ཏཐཱ ཧི ‘‘ཧོཏིཡེཝཱ’’ཏི སཱསངྐཾ ཝདཏི, ལོཀུཏྟརཔྤནཱ པན ཏེསཾ སམབྷཱཝེནེཝ ཨིཙྪིཏཱ. ཡཐཱཧ ‘‘སམཐཝིཔསྶནཾ ཡུགནདྡྷཾ བྷཱཝེཏཱི’’ཏི (ཨ. ནི. ༤.༡༧༠). ཡདི ཝིསེསཏོ སདྡྷཱཔཉྙཱནཾ སམཱདྷིཝཱིརིཡཱནཉྩ སམཱནཏཾ ཨིཙྪཏི, ཀཐཾ སཏཱིཏི ཨཱཧ – ‘‘སཏི པན སབྦཏྠ བལཝཏཱི ཝཊྚཏཱི’’ཏི. སབྦཏྠཱཏི ལཱིནུདྡྷཙྩཔཀྑིཀེསུ པཉྩིནྡྲིཡེསུ. ཨུདྡྷཙྩཔཀྑིཀེཀདེསེ གཎྷནྟོ ‘‘སདྡྷཱཝཱིརིཡཔཉྙཱན’’ནྟི ཨཱཧ. ཨཉྙཐཱ པཱིཏི ཙ གཧེཏབྦཱ སིཡཱ. ཏཐཱ ཧི ‘‘ཀོསཛྫཔཀྑིཀེན སམཱདྷིནཱ’’ཨིཙྩེཝ ཝུཏྟཾ, ན ཙ ‘‘པསྶདྡྷིསམཱདྷིཨུཔེཀྑཱཧཱི’’ཏི. སཱཏི སཏི. སབྦེསུ རཱཛཀམྨེསུ ནིཡུཏྟོཏི སབྦཀམྨིཀོ. ཏེནཱཏི ཡེན ཀཱརཎེན སབྦཏྠ ཨིཙྪིཏབྦཱ, ཏེན ཨཱཧ ཨཊྛཀཐཱཡཾ. སབྦཏྠ ནིཡུཏྟཱ སབྦཏྠིཀཱ ¶ , སབྦེན ཝཱ ལཱིནུདྡྷཙྩཔཀྑིཀེན བོཛ྄ཛྷངྒེན ཨཏྠེཏབྦཱ སབྦཏྠིཡཱ, སབྦཏྠིཡཱཝ སབྦཏྠིཀཱ. ཙིཏྟནྟི ཀུསལཙིཏྟཾ. ཏསྶ ཧི སཏིཔཊིསརཎཾ པརཱཡཎཾ ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ. ཏེནཱཧ – ‘‘ཨཱརཀྑཔཙྩུཔཊྛཱནཱ’’ཏིཨཱདི.

ཁནྡྷཱདིབྷེདེ ཨནོགཱལ༹ྷཔཉྙཱནནྟི པརིཡཏྟིབཱཧུསཙྩཝསེནཔི ཁནྡྷཱཡཏནཱདཱིསུ ཨཔྤཏིཊྛིཏབུདྡྷཱིནཾ. བཧུསྶུཏསེཝནཱ ཧི སུཏམཡཉཱཎཱཝཧཱ. ཏརུཎཝིཔསྶནཱསམངྒཱིཔི བྷཱཝནཱམཡཉཱཎེ ཋིཏཏྟཱ ཨེཀཾསཏོ པཉྙཝཱ ཨེཝ ནཱམ ཧོཏཱིཏི ཨཱཧ – ‘‘སམཔཉྙཱས…པེ… པུགྒལསེཝནཱ’’ཏི. ཉེཡྻདྷམྨསྶ གམྦྷཱིརབྷཱཝཝསེན ཏཔྤརིཙྪེདཀཉཱཎསྶ གམྦྷཱིརབྷཱཝགཧཎནྟི ཨཱཧ – ‘‘གམྦྷཱིརེསུ ཁནྡྷཱདཱིསུ པཝཏྟཱཡ གམྦྷཱིརཔཉྙཱཡཱ’’ཏི. ཏཉྷི ཉེཡྻཾ ཏཱདིསཱཡ པཉྙཱཡ ཙརིཏབྦཏོ གམྦྷཱིརཉཱཎཙརིཡཾ, ཏསྶཱ ཝཱ པཉྙཱཡ ཏཏྠ པབྷེདཏོ པཝཏྟི གམྦྷཱིརཉཱཎཙརིཡཱ, ཏསྶཱ པཙྩཝེཀྑཎཱཏི ཨཱཧ ‘‘གམྦྷཱིརཔཉྙཱཡ པབྷེདཔཙྩཝེཀྑཎཱ’’ཏི. ཡཐཱ སཏིཝེཔུལླཔྤཏྟོ ནཱམ ཨརཧཱ ཨེཝ, ཨེཝཾ སོ ཨེཝ པཉྙཱཝེཔུལླཔྤཏྟོཔཱིཏི ཨཱཧ ¶ ‘‘ཨརཧཏྟམགྒེན བྷཱཝནཱཔཱརིཔཱུརཱི ཧོཏཱི’’ཏི. ཝཱིརིཡཱདཱིསུཔི ཨེསེཝ ནཡོཏི.

‘‘ཏཏྟཾ ཨཡོཁིལཾ ཧཏྠེ གམེནྟཱི’’ཏིཨཱདིནཱ ཝུཏྟཔཉྩཝིདྷབནྡྷནཀམྨཀཱརཎཱ ནིརཡེ ནིབྦཏྟསཏྟསྶ སབྦཔཋམཾ ཀརོནྟཱིཏི དེཝདཱུཏསུཏྟཱདཱིསུ (མ. ནི. ༣.༢༥༠), ཏསྶཱ ཨཱདིཏོ ཝུཏྟཏྟཱ ཙ ཨཱཧ – ‘‘པཉྩཝིདྷབནྡྷནཀམྨཀཱརཎཏོ པཊྛཱཡཱ’’ཏི. སཀཊཝཧནཱདིཀཱལེཏི ཨཱདི-སདྡེན ཏདཉྙམནུསྶེཧི ཏིརཙྪཱནེཧི ཙ ཝིབཱདྷནཱིཡཀཱལཾ སངྒཎྷཱཏི. ཨེཀཾ བུདྡྷནྟརནྟི ཨིདཾ ཨཔརཱཔརཾ པེཏེསུ ཨེཝ ཨུཔྤཛྫནཀསཏྟཝསེན ཝུཏྟཾ, ཨེཀཙྩཱནཾ ཝཱ པེཏཱནཾ, ཨེཀཙྩཏིརཙྪཱནཱནཾ ཝིཡ ཏཐཱ དཱིགྷཱཡུཀཏཱཔི སིཡཱཏི ཏཐཱ ཝུཏྟཾ. ཏཐཱ ཧི ཀཱལོ ནཱགརཱཛཱ ཙཏུནྣཾ བུདྡྷཱནཾ རཱུཔདསྶཱཝཱི.

ཨེཝཾ ཨཱནིསཾསདསྶཱཝིནོཏི ‘‘ཝཱིརིཡཱཡཏྟོ ཨེཝ སཀལལོཀིཡལོཀུཏྟརཝིསེསཱདྷིགམོ’’ཏི ཨེཝཾ ཨཱནིསཾསདསྶནསཱིལསྶ. གམནཝཱིཐིནྟི སཔུབྦབྷཱགཾ ནིབྦཱནགཱམིནིཾ པཊིཔདཾ. སཧ ཝིཔསྶནཱཡ ཨརིཡམགྒཔཊིཔཱཊི, སཏྟཝིསུདྡྷིཔརམྤརཱ ཝཱ. སཱ ཧི ཝཊྚཏོ ནིཡྻཱནཱཡ གནྟབྦཱ པཊིཔདཱཏི ཀཏྭཱ གམནཝཱིཐི ནཱམ.

ཀཱཡདལ༹ྷཱིབཧུལོཏི ཀཱཡསྶ པོསནཔསུཏོ. པིཎྜནྟི རཊྛཔིཎྜཾ. པཙྩཡདཱཡཀཱནཾ ཨཏྟནི ཀཱརསྶ ཨཏྟནོ སམྨཱཔཊིཔཏྟིཡཱ མཧཔྥལབྷཱཝསྶ ཀརཎེན པིཎྜཱཡ བྷིཀྑཱཡ པཊིཔཱུཛནཱ པིཎྜཱཔཙཱཡནཱ. ནཱིཧརནྟོཏི པཏྟཏྠཝིཀཏོ ནཱིཧརནྟོ. ཏཾ སདྡཾ སུཏྭཱཏི ཏཾ ཨུཔཱསིཀཱཡ ཝཙནཾ པཎྞསཱལདྭཱརེ ཋིཏོཝ པཉྩཱབྷིཉྙཏཱཡ དིབྦསོཏེན སུཏྭཱཏི ཝདནྟི. མནུསྶསམྤཏྟི, དིབྦསམྤཏྟི ¶ , ཨནྟེ ནིབྦཱནསམྤཏྟཱིཏི ཏིསྶོ སམྤཏྟིཡོ. སིཏཾ ཀརོནྟོཝཱཏི ‘‘ཨཀིཙྪེནེཝ མཡཱ ཝཊྚདུཀྑཾ སམཏིཀྐནྟ’’ནྟི པཙྩཝེཀྑཎཱཝསཱནེ སཉྫཱཏཔཱམོཛྫཝསེན སིཏཾ ཀརོནྟོ ཨེཝ.

ཨལསཱནཾ བྷཱཝནཱཡ ནཱམམཏྟམྤི ཨཛཱནནྟཱནཾ ཀཱཡསྶ པོསནབཧུལཱནཾ ཡཱཝདཏྠཾ པརིབྷུཉྫིཏྭཱ སེཡྻསུཁཱདིཾ ཨནུཡུཉྫནྟཱནཾ ཏིརཙྪཱནཀཐིཀཱནཾ དཱུརཏོཝ ཝཛྫནཾ ཀུསཱིཏཔུགྒལཔརིཝཛྫནཱ. ‘‘དིཝསཾ ཙངྐམེན ནིསཛྫཱཡཱ’’ཏིཨཱདིནཱ བྷཱཝནཱརམྦྷཝསེན ཨཱརདྡྷཝཱིརིཡཱནཾ དལ༹ྷཔརཀྐམཱནཾ ཀཱལེནཀཱལཾ ¶ ཨུཔསངྐམནཱ ཨཱརདྡྷཝཱིརིཡཔུགྒལསེཝནཱ. ཏེནཱཧ ‘‘ཀུཙྪིཾ པཱུརེཏྭཱ’’ཏིཨཱདི.

ཝིསུདྡྷིམགྒེ པན ‘‘ཛཱཏིམཧཏྟཔཙྩཝེཀྑཎཱ, སབྲཧྨཙཱརིམཧཏྟཔཙྩཝེཀྑཎཱ’’ཏི ཨིདཾ དྭཡཾ ན གཧིཏཾ, ‘‘ཐིནམིདྡྷཝིནོདནཏཱ, སམྨཔྤདྷཱནཔཙྩཝེཀྑཎཱ’’ཏི ཨིདཾ དྭཡཾ གཧིཏཾ. ཏཏྠ ཨཱནིསཾསདསྶཱཝིཏཱཡ ཨེཝ སམྨཔྤདྷཱནཔཙྩཝེཀྑཎཱ གཧིཏཱ ལོཀིཡལོཀུཏྟརཝིསེསཱདྷིགམསྶ ཝཱིརིཡཱཡཏྟཏཱདསྶནབྷཱཝཏོ. ཐིནམིདྡྷཝིནོདནཾ ཏདདྷིམུཏྟཏཱཡ གཧིཏཾ, ཝཱིརིཡུཔྤཱདནེ ཡུཏྟཔཡུཏྟསྶ ཐིནམིདྡྷཝིནོདནཾ ཨཏྠཏོ སིདྡྷམེཝ. ཏཏྠ ཐིནམིདྡྷཝིནོདནཾ ཀུསཱིཏཔུགྒལཔརིཝཛྫན-ཨཱརདྡྷཝཱིརིཡཔུགྒལ-སེཝན- ཏདདྷིམུཏྟཏཱཔཊིཔཀྑཝིདྷམན-པཙྩཡཱུཔསཾཧཱརཝསེན, ཨཔཱཡབྷཡཔཙྩཝེཀྑཎཱདཡོ སམུཏྟེཛནཝསེན ཝཱིརིཡསམྦོཛ྄ཛྷངྒསྶ ཨུཔྤཱདཀཱཏི དཊྛབྦཱ.

བུདྡྷཱནུསྶཏིཡཱ ཨུཔཙཱརསམཱདྷིནིཊྛཏྟཱ ཝུཏྟཾ ‘‘ཡཱཝ ཨུཔཙཱརཱ’’ཏི. སཀལསརཱིརཾ ཕརམཱནོཏི པཱིཏིསམུཊྛཱནེཧི པཎཱིཏརཱུཔེཧི སཀལསརཱིརཾ ཕརམཱནོ. དྷམྨསངྒྷགུཎེ ཨནུསྶརནྟསྶཔི ཡཱཝ ཨུཔཙཱརཱ སཀལསརཱིརཾ ཕརམཱནོ པཱིཏིསམྦོཛ྄ཛྷངྒོ ཨུཔྤཛྫཏཱིཏི ཡོཛནཱ. ཨེཝཾ སེསཨནུསྶཏཱིསུ པསཱདནཱིཡསུཏྟནྟཔཙྩཝེཀྑཎཱཡ ཙ ཡོཛེཏབྦཾ ཏསྶཱཔི ཝིམུཏྟཱཡཏནབྷཱཝེན ཏགྒཏིཀཏྟཱ. ཨེཝརཱུཔེ ཀཱལེཏི དུབྦྷིཀྑབྷཡཱདཱིསཱུཏི ཝུཏྟཀཱལེ. སམཱཔཏྟིཡཱ…པེ… ན སམུདཱཙརནྟཱིཏི ཨིདཾ ཨུཔསམཱནུསྶཏིཡཱ ཝསེན ཝུཏྟཾ. སངྑཱརཱནཉྷི སཔྤདེསཝཱུཔསམེཔི ནིཔྤདེསཝཱུཔསམེ ཝིཡ ཏཏྠ སཔཉྙཱཡ པཝཏྟནཏོ བྷཱཝནཱམནསིཀཱརོ ཀིལེསཝིཀྑམྦྷནསམཏྠོ ཧུཏྭཱ ཨུཔཙཱརསམཱདྷིཾ ཨཱཝཧནྟོ ཏཐཱརཱུཔཔཱིཏིསོམནསྶསམནྣཱགཏོ པཱིཏིསམྦོཛ྄ཛྷངྒསྶ ཨུཔྤཱདཱཡ ཧོཏཱིཏི. པསཱདནཱིཡེསུ ཋཱནེསུ པསཱདསིནེཧཱབྷཱཝེན སཾསཱུཙིཏཧདཡཏཱ ལཱུཁཏཱ. སཱ ཙ ཏཏྠ ཨཱདརགཱརཝཱཀརཎེན ཝིཉྙཱཡཏཱིཏི ཨཱཧ ‘‘ཨསཀྐཙྩཀིརིཡཱཡ སཾསཱུཙིཏལཱུཁབྷཱཝེ’’ཏི.

ཀཱཡཙིཏྟདརཐཝཱུཔསམལཀྑཎཱ པསྶདྡྷི ཨེཝ ཡཐཱཝུཏྟབོདྷིཨངྒབྷཱུཏོ པསྶདྡྷིསམྦོཛ྄ཛྷངྒོ, ཏསྶ ¶ པསྶདྡྷིསམྦོཛ྄ཛྷངྒསྶ. པཎཱིཏབྷོཛནསེཝནཏཱཏི པཎཱིཏསཔྤཱཡབྷོཛནསེཝནཏཱ. ཨུཏུཨིརིཡཱཔཐསུཁགྒཧཎེཧི སཔྤཱཡཨུཏུཨིརིཡཱཔཐཾ གཧིཏནྟི དཊྛབྦཾ. ཏཉྷི ཏིཝིདྷམྤི སཔྤཱཡཾ སེཝིཡམཱནཾ ཀཱཡསྶ ཀལླཏཱཔཱདནཝསེན ཙིཏྟསྶ ཀལླཏཾ ¶ ཨཱཝཧནྟཾ དུཝིདྷཱཡཔི པསྶདྡྷིཡཱ ཀཱརཎཾ ཧོཏི. སཏྟེསུ ལབྦྷམཱནཾ སུཁདུཀྑཾ ཨཧེཏུཀནྟི ཨཡམེཀོ ཨནྟོ, ཨིསྶརཱདིཝིསམཧེཏུཀནྟི ཨཡཾ དུཏིཡོ, ཨེཏེ ཨུབྷོ ཨནྟེ ཨནུཔགམྨ ཡཐཱསཀཾ ཀམྨུནཱ ཧོཏཱིཏི ཨཡཾ མཛ྄ཛྷིམཱ པཊིཔཏྟི. མཛ྄ཛྷཏྟོ པཡོགོ ཡསྶ སོ མཛ྄ཛྷཏྟཔཡོགོ, ཏསྶ བྷཱཝོ མཛ྄ཛྷཏྟཔཡོགཏཱ. ཨཡཉྷི པཧཱནསཱརདྡྷཀཱཡཏཱ-སངྑཱཏཔསྶདྡྷཀཱཡཏཱཡ ཀཱརཎཾ ཧོནྟཱི པསྶདྡྷིདྭཡཾ ཨཱཝཧཏི. ཨེཏེནེཝ སཱརདྡྷཀཱཡཔུགྒལཔརིཝཛྫན-པསྶདྡྷཀཱཡཔུགྒལསེཝནཱནཾ ཏདཱཝཧནཏཱ སཾཝཎྞིཏཱཏི དཊྛབྦཾ.

ཝཏྠུཝིསདཀིརིཡཱ ཨིནྡྲིཡསམཏྟཔཊིཔཱདནཱ ཙ ‘‘པཉྙཱཝཧཱ’’ཏི ཝུཏྟཱ. སམཐཱཝཧཱཔི ཏཱ ཧོནྟི སམཐཱཝཧབྷཱཝེནེཝ པཉྙཱཝཧཏྟཱཏི ཝུཏྟཾ ‘‘ཝཏྠུཝིསད…པེ… ཝེདིཏབྦཱ’’ཏི.

ཀརཎཀོསལླབྷཱཝནཱཀོསལླཱནཾ ནཱནནྟརིཡབྷཱཝཏོ རཀྑཎཀོསལླསྶ ཙ ཏཾམཱུལཀཏྟཱ ‘‘ནིམིཏྟཀུསལཏཱ ནཱམ ཀསིཎནིམིཏྟསྶ ཨུགྒཧཎཀུསལཏཱ’’ཨིཙྩེཝ ཝུཏྟཾ. ཨཏིསིཐིལཝཱིརིཡཏཱདཱིཧཱིཏི ཨཱདི-སདྡེན པཉྙཱཔཡོགམནྡཏཾ ཨཔྤམཱདཝེཀལླཉྩ སངྒཎྷཱཏི. ཏསྶ པགྒཎྷནནྟི ཏསྶ ལཱིནསྶ ཙིཏྟསྶ དྷམྨཝིཙཡསམྦོཛ྄ཛྷངྒཱདིསམུཊྛཱཔནེན ལཡཱཔཏྟིཏོ སམུཊྛཱཔནཾ. ཝུཏྟཉྷེཏཾ བྷགཝཏཱ –

‘‘ཡསྨིཉྩ ཁོ, བྷིཀྑཝེ, སམཡེ ལཱིནཾ ཙིཏྟཾ ཧོཏི, ཀཱལོ ཏསྨིཾ སམཡེ དྷམྨཝིཙཡསམྦོཛ྄ཛྷངྒསྶ བྷཱཝནཱཡ, ཀཱལོ ཝཱིརིཡསམྦོཛ྄ཛྷངྒསྶ བྷཱཝནཱཡ, ཀཱལོ པཱིཏིསམྦོཛ྄ཛྷངྒསྶ བྷཱཝནཱཡ. ཏཾ ཀིསྶ ཧེཏུ? ལཱིནཾ, བྷིཀྑཝེ, ཙིཏྟཾ, ཏཾ ཨེཏེཧི དྷམྨེཧི སུསམུཊྛཱཔཡཾ ཧོཏི. སེཡྻཐཱཔི, བྷིཀྑཝེ, པུརིསོ པརིཏྟཾ ཨགྒིཾ ཨུཛྫཱལེཏུཀཱམོ ཨསྶ, སོ ཏཏྠ སུཀྑཱནི ཙེཝ ཏིཎཱནི པཀྑིཔེཡྻ, སུཀྑཱནི གོམཡཱནི པཀྑིཔེཡྻ, སུཀྑཱནི ཀཊྛཱནི པཀྑིཔེཡྻ, མུཁཝཱཏཉྩ དདེཡྻ, ན ཙ པཾསུཀེན ཨོཀིརེཡྻ, བྷབྦོ ནུ ཁོ སོ པུརིསོ པརིཏྟཾ ཨགྒིཾ ཨུཛྫཱལེཏུནྟི. ཨེཝཾ, བྷནྟེ’’ཏི (སཾ. ནི. ༥.༢༣༤).

ཨེཏྠ ཙ ཡཐཱསཀཾ ཨཱཧཱརཝསེན དྷམྨཝིཙཡསམྦོཛ྄ཛྷངྒཱདཱིནཾ བྷཱཝནཱ སམུཊྛཱཔནཱཏི ཝེདིཏབྦཱ, སཱ ཨནནྟརཾ ཝིབྷཱཝིཏཱ ཨེཝ.

ཨཙྩཱརདྡྷཝཱིརིཡཏཱདཱིཧཱིཏི ¶ ¶ ཨཱདི-སདྡེན པཉྙཱཔཡོགབལཝཏཾ པམོདུཔྤིལཱཝནཉྩ སངྒཎྷཱཏི. ཏསྶ ནིགྒཎྷནནྟི ཏསྶ ཨུདྡྷཏསྶ ཙིཏྟསྶ སམཱདྷིསམྦོཛ྄ཛྷངྒཱདིསམུཊྛཱཔནེན ཨུདྡྷཏཱཔཏྟིཏོ ནིསེདྷནཾ. ཝུཏྟམྤི ཙེཏཾ བྷགཝཏཱ –

‘‘ཡསྨིཉྩ ཁོ, བྷིཀྑཝེ, སམཡེ ཨུདྡྷཏཾ ཙིཏྟཾ ཧོཏི, ཀཱལོ ཏསྨིཾ སམཡེ པསྶདྡྷིསམྦོཛ྄ཛྷངྒསྶ བྷཱཝནཱཡ, ཀཱལོ སམཱདྷིསམྦོཛ྄ཛྷངྒསྶ བྷཱཝནཱཡ, ཀཱལོ ཨུཔེཀྑཱསམྦོཛ྄ཛྷངྒསྶ བྷཱཝནཱཡ. ཏཾ ཀིསྶ ཧེཏུ? ཨུདྡྷཏཾ, བྷིཀྑཝེ, ཙིཏྟཾ, ཏཾ ཨེཏེཧི དྷམྨེཧི སུཝཱུཔསམཡཾ ཧོཏི. སེཡྻཐཱཔི, བྷིཀྑཝེ, པུརིསོ མཧནྟཾ ཨགྒིཀྑནྡྷཾ ནིབྦཱཔེཏུཀཱམོ ཨསྶ, སོ ཏཏྠ ཨལླཱནི ཙེཝ ཏིཎཱནི….པེ… པཾསུཀེན ཙ ཨོཀིརེཡྻ, བྷབྦོ ནུ ཁོ སོ པུརིསོ མཧནྟཾ ཨགྒིཀྑནྡྷཾ ནིབྦཱཔེཏུནྟི. ཨེཝཾ, བྷནྟེ’’ཏི (སཾ. ནི. ༥.༢༣༤).

ཨེཏྠཱཔི ཡཐཱསཀཾ ཨཱཧཱརཝསེན པསྶདྡྷིསམྦོཛ྄ཛྷངྒཱདཱིནཾ བྷཱཝནཱ སམུཊྛཱཔནཱཏི ཝེདིཏབྦཱ. ཏཏྠ པསྶདྡྷིསམྦོཛ྄ཛྷངྒསྶ བྷཱཝནཱ ཝུཏྟཱ ཨེཝ, སམཱདྷིསམྦོཛ྄ཛྷངྒསྶ ཝུཙྩམཱནཱ, ཨིཏརསྶ ཨནནྟརཾ ཝཀྑཏི. པཉྙཱཔཡོགམནྡཏཱཡཱཏི པཉྙཱབྱཱཔཱརསྶ ཨཔྤབྷཱཝེན. ཡཐཱ ཧི དཱནཾ ཨལོབྷཔྤདྷཱནཾ, སཱིལཾ ཨདོསཔྤདྷཱནཾ, ཨེཝཾ བྷཱཝནཱ ཨམོཧཔྤདྷཱནཱ. ཏཏྠ ཡདཱ པཉྙཱ ན བལཝཏཱི ཧོཏི, ཏདཱ བྷཱཝནཱ པུབྦེནཱཔརཾ ཝིསེསཱཝཧཱ ན ཧོཏི, ཨནབྷིསངྑཏོ ཝིཡ ཨཱཧཱརོ པུརིསསྶ ཡོགིནོ ཙིཏྟསྶ ཨབྷིརུཙིཾ ན ཨུཔྤཱདེཏི, ཏེན ཏཾ ནིརསྶཱདཾ ཧོཏི. ཏཐཱ བྷཱཝནཱཡ སམྨདེཝ ཝཱིཐིཔཊིཔཏྟིཡཱ ཨབྷཱཝེན ཨུཔསམསུཁཾ ན ཝིནྡཏི, ཏེནཔི ཙིཏྟཾ ནིརསྶཱདཾ ཧོཏི. ཏེན ཝུཏྟཾ ‘‘པཉྙཱཔཡོག…པེ… ནིརསྶཱདཾ ཧོཏཱི’’ཏི.

ཏསྶ སཾཝེགུཔྤཱདནཉྩ པསཱདུཔྤཱདནཉྩ ཏིཀིཙྪནནྟི ཏཾ དསྶེནྟོ ‘‘ཨཊྛ སཾཝེགཝཏྠཱུནཱི’’ཏིཨཱདིམཱཧ. ཏཏྠ ཛཱཏིཛརཱབྱཱདྷིམརཎཱནི ཡཐཱརཧཾ སུགཏིཡཾ དུགྒཏིཡཉྩ ཧོནྟཱིཏི ཏདཉྙམེཝ པཉྩཝིདྷབནྡྷནཱདིཁུཔྤིཔཱསཱདིཨཉྙམཉྙཝིབཱདྷནཱདིཧེཏུཀཾ ཨཔཱཡདུཀྑཾ དཊྛབྦཾ. ཏཡིདཾ སབྦཾ ཏེསཾ ཏེསཾ སཏྟཱནཾ པཙྩུཔྤནྣབྷཝནིསྶིཏཾ གཧིཏནྟི ཨཏཱིཏེ ཨནཱགཏེ ཙ ཀཱལེ ¶ ཝཊྚམཱུལཀདུཀྑཱནི ཝིསུཾ གཧིཏཱནིཡེཝ. ཡེ པན སཏྟཱ ཨཱཧཱརཱུཔཛཱིཝིནོ ཏཏྠ ཙ ཨུཊྛཱནཕལཱུཔཛཱིཝིནོ, ཏེསཾ ཨཉྙེཧི ཨསཱདྷཱརཎཾ ཛཱིཝིཀདུཀྑཾ ཨཊྛམཾ སཾཝེགཝཏྠུ གཧིཏནྟི དཊྛབྦཾ. ཨཡཾ ཝུཙྩཏི སམཡེ སམྤཧཾསནཱཏི ཨཡཾ སམྤཧཾསིཏབྦསམཡེ ཝུཏྟནཡེན སཾཝེགཛནནཝསེན ཙེཝ པསཱདུཔྤཱདནཝསེན ཙ སམྨདེཝ པཧཾསནཱ, སཾཝེགཛནནཔུབྦཀཔསཱདུཔྤཱདནེན བྷཱཝནཱཙིཏྟསྶ ཏོསནཱཏིཨཏྠོ.

སམྨཱཔཊིཔཏྟིཾ ¶ ཨཱགམྨཱཏི ལཱིནུདྡྷཙྩཝིརཧེན སམཐཝཱིཐིཔཊིཔཏྟིཡཱ ཙ སམྨདེཝ བྷཱཝནཱཔཊིཔཏྟིཾ ཨཱགམྨ.

ཨལཱིནནྟིཨཱདཱིསུ ཀོསཛྫཔཀྑིཀཱནཾ དྷམྨཱནཾ ཨནདྷིམཏྟཏཱཡ ཨལཱིནཾ, ཨུདྡྷཙྩཔཀྑིཀཱནཾ ཨནདྷིམཏྟཏཱཡ ཨནུདྡྷཏཾ, པཉྙཱཔཡོགསམྤཏྟིཡཱ ཨུཔསམསུཁཱདྷིགམེན ཙ ཨནིརསྶཱདཾ, ཏཏོ ཨེཝ ཨཱརམྨཎེ སམཔྤཝཏྟཾ སམཐཝཱིཐིཔཊིཔནྣཉྩ. ཏཏྠ ཨལཱིནཏཱཡ པགྒཧེ, ཨནུདྡྷཏཱཡ ཙ ནིགྒཧེ, ཨནིརསྶཱདཏཱཡ སམྤཧཾསནེ ན བྱཱཔཱརཾ ཨཱཔཛྫཏི. ཨལཱིནཱནུདྡྷཙྩཏཱཧི ཨཱརམྨཎེ སམཔྤཝཏྟཾ, ཨནིརསྶཱདཏཱཡ སམཐཝཱིཐིཔཊིཔནྣཾ, སམཔྤཝཏྟིཡཱ ཝཱ ཨལཱིནཾ ཨནུདྡྷཏཾ, སམཐཝཱིཐིཔཊིཔཏྟིཡཱ ཨནིརསྶཱདནྟི དཊྛབྦཾ. ཨཡཾ ཝུཙྩཏི སམཡེ ཨཛ྄ཛྷུཔེཀྑནཏཱཏི ཨཡཾ ཨཛ྄ཛྷུཔེཀྑིཏབྦསམཡེ ཙིཏྟསྶ པགྒཧནིགྒཧསམྤཧཾསནེསུ བྱཱཝཊཏཱསངྑཱཏཾ པཊིཔཀྑཾ ཨབྷིབྷུཡྻ ཨུཔེཀྑནཱ ཝུཙྩཏི. ཨེསཱཏི སམཱདྷིབོཛ྄ཛྷངྒོ ཨནུཔྤནྣོ ཨུཔྤཛྫཏི. ཨརཧཏྟམགྒེན བྷཱཝནཱཔཱརིཔཱུརཱི ཧོཏཱིཏི ཨེཏེན ནིཔྤརིཡཱཡཏོ སམཱདྷིཝེཔུལླཔྤཏྟོཔི ཨརཧཱ ཨེཝཱཏི དསྶེཏི.

ཨནུརོདྷཝིརོདྷཔཧཱནཝསེན མཛ྄ཛྷཏྟབྷཱཝོ ཨུཔེཀྑཱསམྦོཛ྄ཛྷངྒསྶ ཀཱརཎཾ ཏསྨིཾ སཏི སིཛ྄ཛྷནཏོ, ཨསཏི ཙ ཨསིཛ྄ཛྷནཏོ, སོ ཙ མཛ྄ཛྷཏྟབྷཱཝོ ཝིསཡཝསེན དུཝིདྷོཏི ཨཱཧ ‘‘སཏྟམཛ྄ཛྷཏྟཏཱ སངྑཱརམཛ྄ཛྷཏྟཏཱ’’ཏི. ཏདུབྷཡཝསེན ཙསྶ ཝིརུཛ྄ཛྷནཾ པསྶདྡྷིསམྦོཛ྄ཛྷངྒསྶ བྷཱཝནཱཡ ཨེཝ དཱུརཱིཀཏནྟི ཨནུརུཛ྄ཛྷནསྶེཝ པཧཱནཝིདྷིཾ དསྶེནྟོ ‘‘སཏྟམཛ྄ཛྷཏྟཏཱ’’ཏིཨཱདིམཱཧ. ཏཐཱ ཧིསྶ སཏྟསངྑཱརཀེལཱཡནཔུགྒལཔརིཝཛྫནཾ ‘‘ཨུཔྤཏྟིཡཱ ཀཱརཎ’’ནྟི ཝུཙྩཏི. ཨུཔེཀྑཱཡ ཧི ཝིསེསཏོ རཱགོ པཊིཔཀྑོ, ཏཏོ རཱགབཧུལསྶ པུགྒལསྶ ཨུཔེཀྑཱ ‘‘ཝིསུདྡྷིམགྒོ’’ཏི ཝུཙྩཏི. དྭཱིཧཱཀཱརེཧཱིཏི ཀམྨསྶཀཏཱཔཙྩཝེཀྑཎཾ ཨཏྟསུཉྙཏཱཔཙྩཝེཀྑཎནྟི ཨིམེཧི དྭཱིཧི ཀཱརཎེཧི. དྭཱིཧེཝཱཏི ཨཝདྷཱརཎཾ སངྑཱརསཧིཏཱཡ སངྑྱཱསམཱནཏཱཡ དསྶནཏྠཾ. སངྑྱཱ ཨེཝ ཧེཏྠ སམཱནཾ, ན ¶ སངྑྱེཡྻཾ སབྦཐཱ སམཱནནྟི. ཨསྶཱམིཀབྷཱཝོ ཨནཏྟནིཡཏཱ. སཏི ཧི ཨཏྟནི ཏསྶ ཀིཉྩནབྷཱཝེན ཙཱིཝརཾ ཨཉྙཾ ཝཱ ཀིཉྩི ཨཏྟནིཡཾ ནཱམ སིཡཱ, སོ པན ཀོཙི ནཏྠེཝཱཏི ཨདྷིཔྤཱཡོ. ཨནདྡྷནིཡནྟི, ན ཨདྡྷཱནཀྑམཾ, ན ཙིརཊྛཱཡི ཨིཏྟརཾ ཨནིཙྩནྟི ཨཏྠོ. ཏཱཝཀཱལིཀནྟི ཏསྶེཝ ཝེཝཙནཾ.

མམཱཡཏཱིཏི མམཏྟཾ ཀརོཏི. མམཱཏི ཏཎྷཱཡ པརིགྒཡ྄ཧ ཏིཊྛཏི. དྷནཱཡནྟཱཏི དྷནཾ དབྦཾ ཀརོནྟཱ. ཨསྶཱཏི ཨུཔེཀྑཱསམྦོཛ྄ཛྷངྒསྶ ཨརཧཏྟམགྒེན བྷཱཝནཱཔཱརིཔཱུརཱི ཧོཏི. ཏཐཱ ཧི ཨརཧཏོ ཨེཝ ཚལ༹ངྒུཔེཀྑཱནིཔྥཏྟི.

ཨསུབྷཱརམྨཎཱ ¶ དྷམྨཱཏི ཨསུབྷཔྤཀཱརཱ ཨསུབྷཛྷཱནསྶ ཨཱརམྨཎབྷཱུཏཱ དྷམྨཱ. ཀཱམཾ ཨིནྡྲིཡབདྡྷཱཔི ཀེསཱདཡོ ཨསུབྷཔྤཀཱརཱ ཨེཝ, ཝིསེསཏོ པན ཛིགུཙྪིཏབྦེ ཛིགུཙྪཱཝཧེ གཎྷནྟོ ‘‘དསཱ’’ཏི ཨཱཧ. ཡཐཱ མནསིཀརོཏོ སབྷཱཝསརསཏོ ཏཏྠ ཨསུབྷསཉྙཱ སནྟིཊྛཏི, ཏཐཱ པཝཏྟོ མནསིཀཱརོ ཨུཔཱཡམནསིཀཱརོ. ཨསུབྷེ ཨསུབྷཔཊིཀྐཱུལཱཀཱརསྶ ཨུགྒཎྷནཾ, ཡཐཱ ཝཱ ཏཏྠ ཨུགྒཧནིམིཏྟཾ ཨུཔྤཛྫཏི, ཏཐཱ མནསིཀཱརོ ཨསུབྷནིམིཏྟསྶ ཨུགྒཧོ. ཨུཔཙཱརཔྤནཱཝཧཱཡ ཨསུབྷབྷཱཝནཱཡ ཨནུཡུཉྫནཱ ཨསུབྷབྷཱཝནཱནུཡོགོ.

མནཙྪཊྛཱནཾ ཨིནྡྲིཡཱནཾ སུཊྛུ སུསཾཝརཎེ སཏི ཨཝསརཾ ཨལབྷནྟོ ཀཱམཙྪནྡོ པཧཱིཡཏེཝ, ཏཐཱ བྷོཛནེ མཏྟཉྙུནོ མིཏཱཧཱརསྶ ཐིནམིདྡྷཱབྷིབྷཝཱབྷཱཝཱ ཨོཏཱརཾ ཨལབྷམཱནོ ཀཱམཙྪནྡོ པཧཱིཡཏི. ཡོ པན ཨཱཧཱརེ པཊིཀྐཱུལསཉྙཾ ཏབྦིཔརིཎཱམསྶ ཏདཱདྷཱརསྶ ཏསྶ ཙ ཨུདརིཡབྷཱུཏསྶ ཨཏིཝིཡ ཛེགུཙྪཏཾ, ཀཱཡསྶ ཙ ཨཱཧཱརཏིཊྛཀཏཾ སམྨདེཝ ཛཱནཱཏི, སོ སབྦསོ བྷོཛནེ པམཱཎསྶ ཛཱནནེན ཝིསེསཏོ བྷོཛནེ མཏྟཉྙཱུ ནཱམ. ཏསྶ ཀཱམཙྪནྡོ པཧཱིཡཏེཝ, ཨཊྛཀཐཱཡཾ པན ཨཔྤཱཧཱརཏཾཡེཝ དསྶེཏུཾ ‘‘ཙཏུནྣ’’ནྟིཨཱདི ཝུཏྟཾ. ཨསུབྷཀམྨིཀཏིསྶཏྠེརོ དནྟཊྛིདསྶཱཝཱི. པཧཱིནསྶཱཏི ཝིཀྑམྦྷནཝསེན པཧཱིནསྶ. ཨབྷིདྷམྨཔརིཡཱཡེན སབྦོཔི ལོབྷོ ཀཱམཙྪནྡནཱིཝརཎནྟི ‘‘ཨརཧཏྟམགྒེན ཨཱཡཏིཾ ཨནུཔྤཱདོ’’ཏི ཝུཏྟཾ.

མེཛྫཏི ཧིཏཕརཎཝསེན སིནིཡ྄ཧཏཱིཏི མིཏྟོ, ཧིཏེསཱི པུགྒལོ, ཏསྨིཾ མིཏྟེ བྷཝཱ, མིཏྟསྶ ཝཱ ཨེསཱཏི མེཏྟཱ, ཧིཏེསིཏཱ. སཱ ཨེཝ པཊིཔཀྑཏོ ¶ ཙེཏསོ ཝིམུཏྟཱིཏི མེཏྟཱཙེཏོཝིམུཏྟི. ཏཏྠ མེཏྟཱཡནསྶ སཏྟེསུ ཧིཏཕརཎསྶ ཨུཔྤཱདནཾ པཝཏྟནཾ མེཏྟཱནིམིཏྟསྶ ཨུགྒཧོ. ཏེནཱཧ ‘‘ཨོདིསྶཀཱ’’ཏིཨཱདི.

ཏཏྠ ཨཏྟཔིཡསཧཱཡམཛ྄ཛྷཏྟཝེརིཝསེན ཨོདིསྶཀཏཱ. སཱིམཱསམྦྷེདེ ཀཏེ ཨནོདིསྶཀཏཱ. ཨེཀཱདིདིསཱཕརཎཝསེན དིསཱཕརཎཏཱ མེཏྟཱཡ ཨུགྒཎྷནེ ཝེདིཏབྦཱ. ཨུགྒཧོ ཡཱཝ ཨུཔཙཱརཱ དཊྛབྦོ. ཨུགྒཧིཏཱཡ ཨཱསེཝནཱ བྷཱཝནཱ, སབྦཱ ཨིཏྠིཡོ པུརིསཱ ཨརིཡཱ ཨནརིཡཱ དེཝཱ མནུསྶཱ ཝིནིཔཱཏིཀཱཏི སཏྟོདྷིཀརཎཝསེན པཝཏྟཱ སཏྟཝིདྷཱ, ཨཊྛཝཱིསཏིཝིདྷཱ ཝཱ, དསཧི དིསཱཧི དིསོདྷིཀརཎཝསེན པཝཏྟཱ དསཝིདྷཱ, ཨེཀེཀཱཡ དིསཱཡ སཏྟཱདིཨིཏྠཱདིཨཝེརཱདིབྷེདེན ཨསཱིཏཱདྷིཀཙཏུསཏཔྤབྷེདཱ ཙ ཨོདྷིསོཕརཎམེཏྟཱ. སབྦེ སཏྟཱ, པཱཎཱ, བྷཱུཏཱ, པུགྒལཱ, ཨཏྟབྷཱཝཔརིཡཱཔནྣཱཏི ཨེཏེསཾ ཝསེན པཉྩཝིདྷཱ. ཨེཀེཀསྨིཾ ཨཝེརཱ ཧོནྟུ, ཨབྱཱཔཛྫཱ, ཨནཱིགྷཱ, སུཁཱི ཨཏྟཱནཾ པརིཧརནྟཱུཏི ཙཏུདྷཱ པཝཏྟིཡཱ ཝཱིསཏིཝིདྷཱ ཨནོདྷིསོཕརཎམེཏྟཱ, ཏཾ སནྡྷཱཡཱཧ – ‘‘ཨོདྷིསོ…པེ… བྷཱཝེནྟསྶཔཱི’’ཏི. ཏྭཾ ཨེཏསྶཱཏིཨཱདིནཱ ཀམྨསྶཀཏཱཔཙྩཝེཀྑཎཾ དསྶེཏི ¶ . པཊིསངྑཱནེ ཋིཏསྶཱཏི ཀོདྷེ ཡཐཱཝུཏྟསྶ ཨཱདཱིནཝསྶ ཏཔྤཊིཔཀྑཏོ ཨཀོདྷེ མེཏྟཱཡ ཨཱནིསཾསསྶ ཙ པཊིསངྑཱནེ སམྨདེཝ ཛཱནནེ. སེཝནྟསྶཱཏི བྷཛནྟསྶ བྱཱཔཱདོ པཧཱིཡཏི.

ཨཏིབྷོཛནེ ནིམིཏྟགྒཱཧོཏི ཨཱཧཱརསྶ ཨདྷིཀབྷོཛནེ ཐིནམིདྡྷསྶ ནིམིཏྟགྒཱཧོ, ‘‘ཨེཏྟཀེ བྷུཏྟེ ཐིནམིདྡྷཾ ཨུཔྤཛྫཏི, ཨེཏྟཀེ ནོ’’ཏི ཐིནམིདྡྷསྶ ཀཱརཎཱཀཱརཎགྒཱཧོཏི ཨཏྠོ. དིཝཱ སཱུརིཡཱལོཀནྟི དིཝཱ གཧིཏནིམིཏྟཾ སཱུརིཡཱལོཀཾ, རཏྟིཡཾ མནསིཀརོནྟསྶཔཱིཏི ཨེཝམེཏྠ ཨཏྠོ ཝེདིཏབྦོ. དྷུཏངྒཱནཾ ཝཱིརིཡནིསྶིཏཏྟཱ ཝུཏྟཾ ‘‘དྷུཏངྒནིསྶིཏསཔྤཱཡཀཐཱཡཔཱི’’ཏི.

ཀུཀྐུཙྩམྤི ཀཏཱཀཏཱནུསོཙནཝསེན པཝཏྟམཱནཾ ཙེཏསོ ཨཝཱུཔསམཱཝཧཏཱཡ ཨུདྡྷཙྩེན སམཱནལཀྑཎམེཝཱཏི ཏདུབྷཡསྶ པཧཱནཀཱརཎཾ དསྶེནྟོ བྷགཝཱ – ‘‘ཨཏྠི, བྷིཀྑཝེ, ཙེཏསོ ཝཱུཔསམོ’’ཏིཨཱདིམཱཧ. ཏསྨཱ བཱཧུསཙྩཱདི ཏསྶ པཧཱནཀཱརཎནྟི དསྶེཏུཾ ‘‘ཨཔིཙ ཚ དྷམྨཱ’’ཏིཨཱདིམཱཧ. ཏཏྠ བཧུསྶུཏསྶ གནྠཏོ, ཨཏྠཏོ དྷམྨཾ ཝིཙཱརེནྟསྶ ཨཏྟཝེདཱདིཔཊིལཱབྷསམྦྷཝཏོ ཝིཀྑེཔོ ན ཧོཏི. ཡཐཱཝིཧིཏཔཊིཔཏྟིཡཱ ¶ ཡཐཱདྷམྨཔཊིཀཱརཔྤཏྟིཡཱ ཙ ཝིཔྤཊིསཱརོ ཨནཝསརོཝཱཏི ‘‘བཱཧུསཙྩེནཔི…པེ… ཨུདྡྷཙྩཀུཀྐུཙྩཾ པཧཱིཡཏཱི’’ཏི ཝུཏྟཾ. ཡདགྒེན བཧུསྶུཏསྶ པཊིསངྑཱནཝཏོ ཨུདྡྷཙྩཀུཀྐུཙྩཾ པཧཱིཡཏི, ཏདགྒེན པརིཔུཙྪཀཏཱཝིནཡཔཀཏཉྙུཏཱཧིཔི ཏཾ པཧཱིཡཏཱིཏི དཊྛབྦཾ. ཝུདྡྷསེཝིཏཱ ཙ ཝུདྡྷསཱིལིཏཾ ཨཱཝཧཏཱིཏི ཙེཏསོ ཝཱུཔསམཀརཏྟཱ ཨུདྡྷཙྩཀུཀྐུཙྩསྶ པཧཱནཀཱརཱི ཝུཏྟཱ, ཝུདྡྷབྷཱཝཾ པན ཨནཔེཀྑིཏྭཱ ཝིནཡདྷརཱ ཀུཀྐུཙྩཝིནོདཀཱ ཀལྱཱཎམིཏྟཱཏི དཊྛབྦཱ. ཝིཀྑེཔོ ཙ བྷིཀྑཱུནཾ ཡེབྷུཡྻེན ཀུཀྐུཙྩཧེཏུཀོ ཧོཏཱིཏི ‘‘ཀཔྤིཡཱཀཔྤིཡཔརིཔུཙྪཱབཧུལསྶཱ’’ཏིཨཱདིནཱ ཝིནཡནཡེནེཝ པརིཔུཙྪཀཏཱདཡོ ནིདྡིཊྛཱ. པཧཱིནེ ཨུདྡྷཙྩཀུཀྐུཙྩེཏི ནིདྡྷཱརཎེ བྷུམྨཾ. ཀུཀྐུཙྩསྶ དོམནསྶསཧགཏཏྟཱ ཨནཱགཱམིམགྒེན ཨཱཡཏིཾ ཨནུཔྤཱདོ ཝུཏྟོ.

ཀུསལཱཀུསལཱ དྷམྨཱཏིཨཱདཱིསུ ཡཾ ཝཏྟབྦཾ, ཏཾ ཧེཊྛཱ ཝུཏྟམེཝ. ཀཱམཾ བཱཧུསཙྩཔརིཔུཙྪཀཏཱཧི ཨཊྛཝཏྠུཀཱཔི ཝིཙིཀིཙྪཱ པཧཱིཡཏི, ཏཐཱཔི རཏནཏྟཡཝིཙིཀིཙྪཱམཱུལིཀཱ སེསཝིཙིཀིཙྪཱཏི ཀཏྭཱ ཝུཏྟཾ ‘‘ཏཱིཎི རཏནཱནི ཨཱརབྦྷཱ’’ཏིཨཱདི. ཝིནཡེ པཀཏཉྙུཏཱཡ ཙ སཏི སིཀྑཱཡ ཀངྑཱཡ ཨསམྦྷཝོ ཨེཝ, ཏཐཱ རཏནཏྟཡགུཎཱཝབོདྷེ སཏི པུབྦནྟཱདཱིསུ སཾསཡསྶཱཏི ཨཱཧ – ‘‘ཝིནཡེ’’ཏིཨཱདི. ཨོཀཔྤནཱིཡསདྡྷཱ སདྡྷེཡྻཝཏྠུཾ ཨནུཔཝིསིཏྭཱ ཝིཡ ཨདྷིམུཙྩནཾ, ཏཉྩ ཏཐཱ ཨདྷིམོཀྑུཔྤཱདནམེཝ. སདྡྷཱཡ ནིནྣཔོཎཔབྦྷཱརཏཱ ཨདྷིམུཏྟི. ཨརཧཏྟེན ཀཱུཊཾ གཎྷི སཏྟཔི བོཛ྄ཛྷངྒེ ཝིཏྠཱརེཏྭཱ དེསནཱཡ ཨོསཱཔིཏཏྟཱ.

ཨཱཧཱརསུཏྟཝཎྞནཱ ནིཊྛིཏཱ.

༢. པརིཡཱཡསུཏྟཝཎྞནཱ

༢༣༣. སམྦཧུལཱཏི ¶ ཝུཙྩནྟི སངྒྷསམཉྙཱཡ ཨབྷཱཝཏོ. ཏཏོ པརནྟི ཏིཎྞཾ ཛནཱནཾ ཨུཔརི སངྒྷོ ཙཏུཝགྒཀརཎཱིཡཱདིསངྒྷཀམྨཝསེན ཀམྨཔྤཏྟཏྟཱ. པཝིསིཾསཱུཏི བྷཱཝིནི པཝིསནེ བྷཱུཏེ ཝིཡ ཀཏྭཱ ཨུཔཙཱརེན ཝུཏྟནྟི ཨཱཧ – ‘‘པཝིཊྛཱ’’ཏི. བྷཱཝིནི ཧི བྷཱུཏེ ཝིཡ ཨུཔཙཱརོ. ཏེནཱཧ – ‘‘ཏེ པནཱ’’ཏིཨཱདི, ཏེ པན བྷིཀྑཱུཏི ཨཏྠོ. པུན ཏེ པནཱཏི ཏིཏྠིཡཱ ཏིཏྠིཡསཱཝཀཱ ཙ.

ཨིམསྨིཾ ¶ པཉྙཱཔནེཏི ‘‘པཉྩ ནཱིཝརཎེ པཧཱཡཱ’’ཏིཨཱདིནཡཔྤཝཏྟེ ཨིམསྨིཾ པཀཱརེ ཨཏྠཔཉྙཱཔནེ. ཝིསིསྶཏི ཨཉྙམཉྙཏོ པབྷིཛྫཏཱིཏི ཝིསེསོ, བྷེདོ. སྭཱཡཾ ཨིདྷ ཨནྟོགདྷཱདྷིཀབྷཱཝོ ཨདྷིཔྤེཏོཏི ཨཱཧ – ‘‘ཀོ ཝིསེསོཏི ཀིཾ ཨདྷིཀ’’ནྟི. ཨདྷིཀཾ པཡསནཾ པཡུཉྫནནྟི ཨདྷིཔྤཡཱསོ, ཨདྷིཀཔྤཡོགོ. ནཱནཱ ཀརཱིཡཏི ཨེཏེནཱཏི ནཱནཱཀརཎཾ, བྷེདོཏི ཨཱཧ – ‘‘ཀིཾ ནཱནཏྟ’’ནྟི. དུཏིཡཔདེཏི ‘‘ཨནུསཱསནིཡཱ ཝཱ ཨནུསཱསནི’’ནྟི ཨེཏསྨིཾ པདེ. ཨེསེཝ ནཡོཏི ཡཐཱ པཋམསྨིཾ པདེ ཨཏྠཡོཛནཱ, ཨེཝཾ དུཏིཡཔདེཔི ཡོཛེཏབྦཱ.

ཏཱིཎི ཋཱནཱནཱིཏི དེཝམཱརབྲཧྨཊྛཱནཱནི ཏཱིཎི ‘‘སདེཝཀེ ལོཀེ’’ཏིཨཱདིནཱ ལོཀེ པཀྑིཔིཏྭཱ. ‘‘སསྶམཎབྲཱཧྨཎིཡཱ པཛཱཡ སདེཝམནུསྶཱཡཱ’’ཏི དྭེ ཋཱནཱནི. ‘‘པཛཱཡཱ’’ཏི ཨེཏྠ པཀྑིཔིཏྭཱ ཨིཏི པཉྩཧི པདེཧི. ཨུདྡེསནྟི ཨུདྡིསིཏབྦཏཾ. གཎནནྟི ཨེཀོ ཀཱམཙྪནྡོཏི གཧེཏབྦཏཾ གཙྪཏི. ཨཏྟནོ ཧཏྠཔཱདཱདཱིསཱུཏི ནིདསྶནམཏྟཾ དཊྛབྦཾ སམུདཱཡཾ ཨཱརབྦྷ པཊིགྷསྶ ཨུཔྤཛྫནཏོ. ཨཏྟནོ ཁནྡྷེསུ ཝིམཏི ‘‘ཨཧཾ ནུ ཁོསྨཱི’’ཏིཨཱདིནཱ.

ཀིཉྩཱཔི སབྦཾ ཝཱིརིཡཾ ཙེཏསིཀམེཝ, ཡཾ པན ཀཱཡཀམྨཱདྷིཊྛཱནཱདིཝསེན མནསི ཀཱཡིཀཔཡོགསམུཊྛཱཔནཾ ཝཱིརིཡཾ ཀཱཡིཀནྟི ལདྡྷཔརིཡཱཡནྟི ཏཏོ ཝིསེསེཏྭཱ ཙེཏསིཀནྟི ཡཐཱདྷིཔྤེཏདུཏིཡཏཱདསྶནཏྠཾ. ཡདིཔི ཡཐཱཀཔྤིཏཨིརིཡཱཔཐསནྡྷཱརཎཝསེན པཝཏྟམཱནཾ ཝཱིརིཡཾ ཀཱཡསྶ ཏཐཱཔཝཏྟསྶ པཙྩཡབྷཱུཏནྟི ན སཀྐཱ ཝཏྟུཾ, ཏཐཱཔི ན ཏཱདིསོ ཀཱཡཔཡོགོ, ཏདཱ པཝཏྟོ ནཏྠཱིཏི ཝུཏྟཾ ‘‘ཀཱཡཔཡོགཾ ཝིནཱ ཨུཔྤནྣཝཱིརིཡ’’ནྟི. སཏིསམྦོཛ྄ཛྷངྒསདིསོ ཝཱཏི ཨིམིནཱ ཨཛ྄ཛྷཏྟིཀེ སངྑཱརེ ཨཛ྄ཛྷུཔེཀྑནཝསེན པཝཏྟཱ ཨཛ྄ཛྷཏྟདྷམྨེསུ ཨུཔེཀྑཱཏིཨཱདིནཡཾ ཨཏིདིསཏི.

‘‘མིསྶཀབོཛ྄ཛྷངྒཱ ཀཐིཏཱ’’ཏི ཝཏྭཱ ཏམཏྠཾ ཝིབྷཱཝེཏུཾ ‘‘ཨེཏེསཱུ’’ཏིཨཱདི ཝུཏྟཾ. ཙངྐམནྟེནཔི ¶ ཨརིཡམགྒཾ ཨདྷིགནྟུཾ སཀྐཱཏི ཀཏྭཱ ཝུཏྟཾ ‘‘མགྒཾ ཨཔཏྟཾ ཀཱཡིཀཝཱིརིཡ’’ནྟི. བོཛ྄ཛྷངྒཱ ན ལབྦྷནྟཱིཏི ནིཔྤརིཡཱཡབོཛ྄ཛྷངྒཱ ན ལབྦྷནྟཱི. བོཛ྄ཛྷངྒེ ཨུདྡྷརནྟི པརིཡཱཡཏོཏི ཨདྷིཔྤཱཡོ. སེསཱཏི བཧིདྡྷཱདྷམྨེསུ སཏི-དྷམྨཝིཙཡ-ཨུཔེཀྑཱ-ཙེཏསིཀ-ཝཱིརིཡ-སཝིཏཀྐ-སཝིཙཱར-པཱིཏི-སམཱདྷཱི དྭེ པསྶདྡྷིཡོ ཙ. ཨཡཾ པན ནཡོ པཙུརཔྤཝཏྟིཝསེན ཨཊྛཀཐཱནཡེནེཝ ¶ ཝུཏྟོ. ཐེརཝཱདཝསེན པན ཨཝིཏཀྐཨཝིཙཱརམཏྟཱ པཱིཏིསམཱདྷིསམྦོཛ྄ཛྷངྒཱ རཱུཔཱཝཙརཱཔི ཨཏྠཱིཏི ཏེཔི གཧེཏྭཱ དས མིསྶཀཱཝ ཧོནྟཱིཏི ཝཏྟབྦཾ སིཡཱཏི.

པརིཡཱཡསུཏྟཝཎྞནཱ ནིཊྛིཏཱ.

༣. ཨགྒིསུཏྟཝཎྞནཱ

༢༣༤. ལོཎདྷཱུཔནནྟི ལོཎཉྩ དྷཱུཔནཉྩ ལོཎདྷཱུཔནཾ. ཡོདྷཀམྨནྟི ཡོདྷཔུགྒལེན ཀཏྟབྦཾ ཀམྨཾ. མནྟཀམྨནྟི རཱཛཀིཙྩམནྟནཾ. པཊིཧཱརཀམྨནྟི རཉྙོ སནྟིཀཾ ཨཱགཏཱནཾ ཝཙནཾ རཉྙོ ནིཝེདེཏྭཱ ཏཏོ ནེསཾ པཊིཧརཎཀམྨཾ. ཏསྨཱཏི སབྦཏྠིཀཏྟཱ སཏིཡཱ. ཨེཝཾ ‘‘སཏིཉྩ ཁྭཱཧ’’ནྟིཨཱདིཀཾ ཨཝོཙ. པུབྦབྷཱགཝིཔསྶནཱ བོཛ྄ཛྷངྒཱཝ ཀཐིཏཱ པགྒཧནིགྒཧཝིནོདིཏཏྟཱ.

ཨགྒིསུཏྟཝཎྞནཱ ནིཊྛིཏཱ.

༤. མེཏྟཱསཧགཏསུཏྟཝཎྞནཱ

༢༣༥. ཀཱིདིསཱ གཏི ནིབྦཏྟི ཨེཏིསྶཱཏི ཀིཾགཏིཀཱ, ཀིཾནིཊྛཱཏི ཝུཏྟཾ ཧོཏི. ཀཱིདིསཱི པརམཱ ཨུཏྟམཱ ཀོཊི ཨེཏིསྶཱཏི ཀིཾཔརམཱ. ཀཱིདིསཾ ཕལཾ ཨཱནིསཾསཾ ཨུདཡོ ཨེཏིསྶཱཏི ཀིཾཕལཱ. སཾསཊྛཾ སམྤཡུཏྟནྟི ཨིདཾ སཧགཏ-སདྡསྶ ཨཏྠདསྶནམཏྟཾ, ཨིདྷ པན མེཏྟཱཛྷཱནཾ པཱདཀཾ ཀཏྭཱ ཝིཔསྶནཱཔུབྦབྷཱགབོཛ྄ཛྷངྒཱ ཙ ‘‘མེཏྟཱསཧགཏཾ སཏིསམྦོཛ྄ཛྷངྒ’’ནྟིཨཱདིནཱ ཝུཏྟཱཏི ཝེདིཏབྦཾ. སབྦཏྠཱཏི སབྦེསུ བོཛ྄ཛྷངྒེསུ སབྦེསུ ཙ བྲཧྨཝིཧཱརེསུ.

པཊིཀཱུལེཏི ཝིརཛྫཏཱིཏི པཊིཀཱུལཾ, ཨནིཊྛཾ. ན པཊིཀཱུལཾ ཨཔྤཊིཀཱུལཾ, ཨིཊྛཾ. ཏེནཱཧ ‘‘ཨིཊྛེ ཝཏྠུསྨི’’ནྟི. ཨེཏྠཱཏི ཨཔྤཊིཀཱུལཝཏྠུསྨིཾ. ཨེཝནྟི པཊིཀཱུལསཉྙཱི. སཏྟེ ཨཔྤཊིཀཱུལེ ཨསུབྷཕརཎཾ, སངྑཱརེ ཨཔྤཊིཀཱུལེ ཨནིཙྩནྟི མནསིཀཱརཾ ཀརོནྟོ. ཨསུབྷཱཡཱཏི ཨསུབྷསཉྙཱཡ. ཨནིཙྩཏོ ཝཱ ཨུཔསཾཧརཏཱིཏི ཨནིཙྩནྟི མནསིཀཱརཾ པཝཏྟེཏི. ‘‘ཨེསེཝ ནཡོ’’ཏི སངྑེཔཏོ ཝུཏྟམཏྠཾ ཝིཝརིཏུཾ ‘‘ཨཔྤཊིཀཱུལཔཊིཀཱུལེསཱུ’’ཏིཨཱདི ཝུཏྟཾ. ཚལ༹ངྒུཔེཀྑནྟི ཚསུ ཨཱརམྨཎེསུ པཧཱིནཱནུརོདྷསྶ ཨུཔྤཏྟིཡཱ ཚལ༹ངྒཝནྟཾ ཨུཔེཀྑཾ.

མེཏྟཱཡཱཏི ¶ ¶ མེཏྟཱབྷཱཝནཱཡ. པཊིཀཱུལཱདཱིསུ ཝཏྠཱུསུ ཨིཙྪིཏཝིཧཱརེན ཝིཧརིཏུཾ སམཏྠཏཱ ཨརིཡཱནཾ ཨེཝ, ཏཏྠ ཙ ཨརཧཏོ ཨེཝ ཨིཛ྄ཛྷནཏོ ཨརིཡིདྡྷི ནཱམ. ཏསྶཱ ཨརིཡིདྡྷིཡཱ ཙ དསྶིཏཏྟཱ དེསནཱ ཝིནིཝཊྚེཏབྦཱ པརིཡོསཱནེཏབྦཱ སིཡཱ. ཨརཧཏྟཾ པཱཔུཎིཏུཾ ན སཀྐོཏི ཨིནྡྲིཡཱནཾ ཨཔརིཔཀྐཏྟཱ ནིཀནྟིཡཱ ཙ དུཔྤརིཡཱདཱནཏོ. ཨཡཾ དེསནཱཏི ‘‘མེཏྟཱསཧགཏཾ བོཛ྄ཛྷངྒཾ བྷཱཝེཏཱི’’ཏིཨཱདིནཱ ཨཡཾ དེསནཱ ཨཱརདྡྷཱ. ཡོ ཧི མེཏྟཱཛྷཱནཾ པཱདཀཾ ཀཏྭཱ སམྨསནཾ ཨཱརབྷིཏྭཱ ཨརཧཏྟཾ པཱཔུཎིཏུཾ ཨསཀྐོནྟོ པརིསུདྡྷེསུ ཝཎྞཀསིཎེསུ ཝིམོཀྑསངྑཱཏཾ རཱུཔཱཝཙརཛ྄ཛྷཱནཾ ནིབྦཏྟེཏི, ཏཾ སནྡྷཱཡཱཧ བྷགཝཱ – ‘‘སུབྷཾ ཁོ པན ཝིམོཀྑཾ ཨུཔསམྤཛྫ ཝིཧརཏཱི’’ཏི.

སུབྷཔརམནྟི སུབྷཝིམོཀྑཔརམཾ. ཨིདྷ ལོཀེ ཨེཝ པཉྙཱ ཨསྶ. ཏེནཱཧ ‘‘ལོཀིཡཔཉྙསྶཱཏི ཨཏྠོ’’ཏི. ཨརཧཏྟཔརམཱཝ མེཏྟཱ ཨརཧཏྟམགྒསྶ པཱདཀཏྟཱ. ཀརུཎཱདཱིསུཔི ཨེསེཝ ནཡོཏི ཀརུཎཱདིཛྷཱནཾ པཱདཀཾ ཀཏྭཱ སངྑཱརེ སམྨསནྟོ ཨརཧཏྟཾ པཏྟུཾ སཀྐོཏི, ཏསྶ ཨརཧཏྠཔརམཱ ཀརུཎཱ ཧོཏི, ཨེཝཾ མུདིཏཱཨུཔེཀྑཱསུཔི ཝཏྟབྦནྟི ཨིམམཏྠཾ ཨཏིདིསཏི. པུན དེསནཱརམྦྷཔཡོཛནཾ པན ‘‘ཨིམིནཱ ནཡེནཱ’’ཏི ཧེཊྛཱ ཨཏིདིཊྛམེཝ.

སུབྷཔརམཱདིཏཱཏི མེཏྟཱཀརུཎཱམུདིཏཱཨུཔེཀྑཱནཾ སུབྷཔརམཏཱ ཨཱཀཱསཱནཉྩཱཡཏནཔརམཏཱ, ཝིཉྙཱཎཉྩཱཡཏནཔརམཏཱ, ཨཱཀིཉྩཉྙཱཡཏནཔརམཏཱ. ཏསྶ ཏསྶཱཏི སུབྷཝིམོཀྑསྶ ཧེཊྛཱ ཏིཎྞཾ ཨརཱུཔཛ྄ཛྷཱནཱནཉྩ ཡཐཱཀྐམཾ ཨུཔནིསྶཡཏྟཱ. ཨཔྤཊིཀཱུལཔརིཙཡཱཏི ཨིཊྛཱརམྨཎེ མནསིཀཱརབཧུལཱིཀཱརཱ. ཨཔྤཀསིརེནེཝཱཏི སུཁེནེཝ. ཏཏྠཱཏི ཝིསུདྡྷཏཱཡ ཨིཊྛེསུ ཝཎྞཀསིཎེསུ. ཙིཏྟནྟི བྷཱཝནཱམཡཙིཏྟཾ པཀྑནྡཏི ཨཔྤནཱཝསེན. ཏཏོ པརནྟི ཏཏོ སུབྷཝིམོཀྑཏོ པརཾ ཝིམོཀྑཱནཾ ཨུཔནིསྶཡོ ནཱམ ན ཧོཏི, མེཏྟཱསཧགཏབྷཱཝོ དཊྛབྦོ.

སཏྟདུཀྑཾ སམནུཔསྶནྟསྶཱཏི དཎྜེན ཨབྷིཧཊཔྤཏྟརཱུཔཧེཏུཾ སཏྟེསུ ཨུཔྤཛྫནཀདུཀྑཾ ཉཱཎེན ཝཱིམཾསནྟསྶ. ཏཡིདཾ རཱུཔནིམིཏྟཀཾ སཏྟེསུ ཨུཔྤཛྫནཀཾ དུཀྑཾ ཉཱཎེན ཀརུཎཱཝིཧཱརིསྶ ཝིསེསཏོ པཀྑནྡཏཱིཏི ཀཏྭཱ ཝུཏྟཾ ‘‘ཨཔྤཀསིརེནེཝ ཏཏྠ ཙིཏྟཾ པཀྑནྡཏཱི’’ཏི, ན པན སབྦསོ ཨརཱུཔེ ཨཱནིསཾསདསྶནཏོ.

ཝིཉྙཱཎཾ ¶ སམནུཔསྶནྟསྶཱཏི ཨིདཾ པཱམོཛྫགཧཎམུཁེན ཏནྣིསྶཡཝིཉྙཱཎསྶ གཧཎཾ སམྦྷཝཏཱིཏི ཀཏྭཱ ཝུཏྟཾ. ཝིཉྙཱཎགྒཧཎཔརིཙིཏནྟི ཝུཏྟནཡེན ཝིཉྙཱཎགྒཧཎེ པརིཙིཏཾ.

ཨུཔེཀྑཱཝིཧཱརིསྶཱཏི ¶ ཨུཔེཀྑཱབྲཧྨཝིཧཱརཾ ཝིཧརཏོ. ཨཱབྷོགཱབྷཱཝཏོཏི སུཁཱདིཝསེན ཨཱབྷུཛནཱབྷཱཝཏོ. སུཁ…པེ… སམྦྷཝཏོཏི སུཁདུཀྑཱཏི པརམཏྠཀམྨགྒཧཎེ ཝིམུཁཏཱསམྦྷཝཏོ. ཨཝིཛྫམཱནགྒཧཎདུཀྑནྟི པརམཏྠཏོ ཨཝིཛྫམཱནསཏྟཔཉྙཏྟིགཧཎཔརིཙིཏཾ ཏསྶ ཏསྶ ཨབྷཱཝམཏྟཀསྶ གཧཎམྤི དུཀྑཾ ཀུསལམྤི ཧོཏི. སེསཾ སུཝིཉྙེཡྻམེཝ.

མེཏྟཱསཧགཏསུཏྟཝཎྞནཱ ནིཊྛིཏཱ.

༥. སངྒཱརཝསུཏྟཝཎྞནཱ

༢༣༦. པཋམཉྙེཝཱཏི པུརེཏརཾཡེཝ. ཨསཛ྄ཛྷཱཡཀཏཱནཾ མནྟཱནཾ ཨཔྤཊིབྷཱནཾ པགེཝ པཋམཾཡེཝ སིདྡྷཾ, ཏཏྠ ཝཏྟབྦམེཝ ནཏྠཱིཏི ཨདྷིཔྤཱཡོ. པརིཡུཊྛཱནཾ ནཱམ ཨབྷིབྷཝོ གཧཎནྟི ཨཱཧ – ‘‘ཀཱམརཱགཔརིཡུཊྛིཏེནཱཏི ཀཱམརཱགགཧིཏེནཱ’’ཏི. ཝིཀྑམྦྷེཏི ཨཔནེཏཱིཏི ཝིཀྑམྦྷནཾ, པཊིཔཀྑཏོ ནིསྶརཏི ཨེཏེནཱཏི ནིསྶརཎཾ, ཝིཀྑམྦྷནཉྩ ཏཾ ནིསྶརཎཉྩཱཏི ཝིཀྑམྦྷནནིསྶརཎཾ. ཏེནཱཧ – ‘‘ཏཏྠཱ’’ཏིཨཱདི. སེསཔདདྭཡེཔི ཨེསེཝ ནཡོ. ཨཏྟནཱ ཨརཎིཡོ པཏྟབྦོ ཨཏྟཏྠོ, ཏཐཱ པརཏྠོ ཝེདིཏབྦོ.

‘‘ཨནིཙྩཏོ ཨནུཔསྶནྟོ ནིཙྩསཉྙཾ པཛཧཏཱི’’ཏིཨཱདཱིསུ བྱཱཔཱདཱདཱིནཾ ཨནཱགཏཏྟཱ ཨབྱཱཔཱདཝཱརེ ཏདངྒནིསྶརཎཾ ན གཧིཏཾ. ཀིཉྩཱཔི ན གཧིཏཾ, པཊིསངྑཱནཝསེན པན ཏསྶ ཝིནོདེཏབྦཏཱཡ ཏདངྒནིསྶརཎམྤི ལབྦྷཏེཝཱཏི སཀྐཱ ཝིཉྙཱཏུཾ. ཨཱལོཀསཉྙཱ ཨུཔཙཱརཔྤཏྟཱ, ཨཔྤནཱཔྤཏྟཱ ཝཱ, ཡོ ཀོཙི ཀསིཎཛ྄ཛྷཱནཱདིབྷེདོ སམཐོ. དྷམྨཝཝཏྠཱནཾ ཨུཔཙཱརཔྤནཱཔྤཏྟཝསེན གཧེཏབྦཾ.

ཀུཐིཏོཏི ཏཏྟོ. ཨུསྨུདཀཛཱཏོཏི ཏསྶེཝ ཀུཐིཏབྷཱཝསྶ ཨུསྨུདཀཏཾ ཨཙྩུཎྷཏཾ པཏྟོ. ཏེནཱཧ ‘‘ཨུསུམཛཱཏོ’’ཏི. ཏིལབཱིཛཀཱདིབྷེདེནཱཏི ཏིལབཱིཛཀཀཎྞིཀཀེསརཱདིབྷེདེན. སེཝཱལེན…པེ… པཎཀེནཱཏི ཨུདཀཔིཙྪིལེན. ཨཔྤསནྣོ ཨཱཀུལཏཱཡ. ཨསནྣིསིནྣོ ¶ ཀལལུཔྤཏྟིཡཱ. ཨནཱལོཀཊྛཱནེཏི ཨཱལོཀརཧིཏེ ཋཱནེ.

སངྒཱརཝསུཏྟཝཎྞནཱ ནིཊྛིཏཱ.

༦. ཨབྷཡསུཏྟཝཎྞནཱ

༢༣༧. ཨེཀཾསེན བྷགཝཱ ནཱིཝརཎཱཏི ཨེཀཾསཏོ ཨེཝ བྷགཝཱ ཨེཏེ དྷམྨཱ ནཱིཝརཎཱ ཙིཏྟེ ཀུསལཔྤཝཏྟིཡཱ ¶ ནཱིཝརཎཏོ. ཀཱཡཀིལམཐོཏི ཀཱཡཔརིསྶམོ, སོ པན ཨཊྛུཔྤཏྟིཡཱ པཙྩཡཏྟཱ ‘‘དརཐོ’’ཏི ཝུཏྟོ. ཙིཏྟཀིལམཐོ ཏཔྤཙྩཡཛཱཏོ དཊྛབྦོ. ཏེནཱཧ – ‘‘ཏསྶ ཀིརཱ’’ཏིཨཱདི. ཙིཏྟདརཐོཔི པཊིཔྤསྶམྦྷཱིཏི ཨཱནེཏྭཱ སམྦནྡྷོ. མགྒེནེཝཱཏི ཡཐཱདྷིགཏེན ཨརིཡམགྒེནེཝ. ཨསྶཱཏི ཨབྷཡསྶ རཱཛཀུམཱརསྶ. ཨེཏཾ ཀཱཡཙིཏྟདརཐདྭཡཾ.

ཨབྷཡསུཏྟཝཎྞནཱ ནིཊྛིཏཱ.

སཱཀཙྪཝགྒཝཎྞནཱ ནིཊྛིཏཱ.

༧. ཨཱནཱཔཱནཝགྒོ

༡. ཨཊྛིཀམཧཔྥལསུཏྟཱདིཝཎྞནཱ

༢༣༨. ཨུཔྤནྣསཉྙཱཏི སཉྙཱསཱིསེན ཨུཔཙཱརཛ྄ཛྷཱནཾ ཝདཏི. ཏེནཱཧ ‘‘ཏཾ པནེཏ’’ནྟིཨཱདི. ཚཝིཙམྨམྤི ཨུཔཊྛཱཏཱིཏི ཨིདཾ སཝིཉྙཱཎཀཾ ཨཝིཉྙཱཎཀམྤི ཀཱཡསཱམཉྙཏོ གཧེཏྭཱ ཝུཏྟཾ. སཏི ཝཱ ཨུཔཱདིསེསེཏི ཨེཏྠ ཨུཔཱདིཡཏི ཨཏྟནོ ཨཱརམྨཎཾ གཎྷཱཏཱིཏི ཨུཔཱདི, ཨུཔཱདཱནཾ, ཨེཏསྶ ཨེཀདེསེ ཨཔྤཧཱིནེ སཏཱིཏི ཨཏྠོ.

ཨཱནཱཔཱནཝགྒཝཎྞནཱ ནིཊྛིཏཱ.

༨. ནིརོདྷཝགྒོ

༡-༡༠. ཨསུབྷསུཏྟཱདིཝཎྞནཱ

༢༤༨-༢༥༧. ཨནབྷིརཏིནྟི ཨནབྷིརམཎཾ ཨནཔེཀྑིཏཾ. ཨཙྩནྟནིརོདྷབྷཱུཏེ ནིབྦཱནེ པཝཏྟསཉྙཱ ནིརོདྷསཉྙཱ. ཏཏྠ སཱ མགྒསཧགཏཱ ལོཀུཏྟརཱ ¶ , ཡཱ པན ནིབྦཱནེ ནིནྣབྷཱཝེན པཝཏྟཱ, ཨུཔསམཱནུསྶཏིསཧགཏཱ ཙ, སཱ ལོཀིཡཱཏི ཨཱཧ – ‘‘ནིརོདྷསཉྙཱ མིསྶཀཱ’’ཏི. ‘‘ཏེསཾ ནཝསཱུ’’ཏིཨཱདི པམཱདཔཱཋོ. ‘‘ཨེཀཱདསསུ ཨཔྤནཱ ཧོཏི, ནཝ ཨུཔཙཱརཛ྄ཛྷཱནིཀཱ’’ཏི པཱཋོ གཧེཏབྦོ. ཝཱིསཏི ཀམྨཊྛཱནཱནཱིཏི ཨིདམྤི ཨིདྷཱགཏནཡོ, ན ཝིསུདྡྷིམགྒཱདཱིསུ ཨཱགཏནཡོ ¶ . ཨེཏྠ ཙ ཨཱརམྨཎཱདཱིསུ ཡཐཱཡོགཾ ཨཔྤནཾ ཨུཔཙཱརཾ ཝཱ པཱཔུཎིཏྭཱ ཨརཧཏྟཔྤཏྟསྶ པུབྦབྷཱགབྷཱུཏཱ ཝིཔསྶནཱམགྒབོཛ྄ཛྷངྒཱ ཀཐིཏཱ.

ནིརོདྷཝགྒཝཎྞནཱ ནིཊྛིཏཱ.

བོཛ྄ཛྷངྒསཾཡུཏྟཝཎྞནཱ ནིཊྛིཏཱ.

༣. སཏིཔཊྛཱནསཾཡུཏྟཾ

༡. ཨམྦཔཱལིཝགྒོ

༡. ཨམྦཔཱལིསུཏྟཝཎྞནཱ

༣༦༧. ཨེཀཱཡནྭཱཡནྟི ¶ ¶ སནྡྷིཝསེན ཝུཏྟཾ ཨོ-ཀཱརསྶ ཝ-ཀཱརཾ ཨ-ཀཱརསྶ དཱིགྷཾ ཀཏྭཱ. ཨཡཾ ཀིར སཾཡུཏྟཱབྷིལཱཔོ, ཏཏྠ ཨཡན-སདྡོ མགྒཔརིཡཱཡོ. ན ཀེཝལཾ ཨཡམེཝ, ཨཐ ཁོ ཨཉྙེཔི མགྒཔརིཡཱཡཱཏི པདུདྡྷཱརཾ ཀརོནྟོ ‘‘མགྒསྶ ཧཱི’’ཏིཨཱདིཾ ཝཏྭཱ ཡདི མགྒཔརིཡཱཡོ ཨཱཡན-སདྡོ, ཀསྨཱ པུན མགྒོཏི ཝུཏྟནྟི ཙོདནཾ སནྡྷཱཡཱཧ ‘‘ཏསྨཱ’’ཏིཨཱདི. ཏཏྠ ཨེཀམགྒོཏི ཨེཀོཝ མགྒོ. ན ཧི ནིབྦཱནགཱམིམགྒོ ཨཉྙོ ཨཏྠཱིཏི. ནནུ སཏིཔཊྛཱནཾ ཨིདྷ མགྒོཏི ཨདྷིཔྤེཏཾ, ཏདཉྙེཔི བཧཱུ མགྒདྷམྨཱ ཨཏྠཱིཏི? སཙྩཾ ཨཏྠི, ཏེ པན སཏིཔཊྛཱནགྒཧཎེནེཝ གཧིཏཱ ཏདཝིནཱབྷཱཝཏོ. ཏཐཱ ཧི ཉཱཎཝཱིརིཡཱདཡོ ནིདྡེསེ གཧིཏཱ, ཨུདྡེསེ སཏིཡཱ ཨེཝ གཧཎཾ ཝེནེཡྻཛ྄ཛྷཱསཡཝསེནཱཏི དཊྛབྦཾ, སཏིཡཱ མགྒབྷཱཝདསྶནཏྠཉྩ. ན དྭེདྷཱཔཐབྷཱུཏོཏི ཨིམིནཱ ཨིམསྶ དྭཡབྷཱཝཱབྷཱཝཾ ཝིཡ ཨནིབྦཱནགཱམིབྷཱཝཱབྷཱཝཉྩ དསྶེཏི. ནིབྦཱནགམནཊྛེནཱཏི ནིབྦཱནཾ གཙྪཏི ཨེཏེནཱཏི ནིབྦཱནགམནཾ, སོ ཨེཝ ཨཝིཔརཱིཏབྷཱཝནཱཡ ཨཏྠོ, ཏེན ནིབྦཱནགམནཊྛེན, ནིབྦཱནཱདྷིགམཱུཔཱཡཏཱཡཱཏི ཨཏྠོ. མགྒནཱིཡཊྛེནཱཏི གཝེསིཏབྦཏཱཡ.

རཱགཱདཱིཧཱིཏི ‘‘རཱགོ མལཾ, དོསོ མལཾ, མོཧོ མལ’’ནྟི (ཝིབྷ. ༩༢༤) ཨེཝཾ ཝུཏྟེཧི རཱགཱདཱིཧི མལེཧི. སཱ པནཱཡཾ སཾཀིལིཊྛཙིཏྟཱནཾ ཝིསུདྡྷི སིཛ྄ཛྷམཱནཱ ཡསྨཱ སོཀཱདཱིནཾ ཨནུཔྤཱདཱཡ སཾཝཏྟཏི, ཏསྨཱ ཝུཏྟཾ ‘‘སོཀཔརིདེཝཱནཾ སམཏིཀྐམཱཡཱ’’ཏིཨཱདི. ཏཏྠ སོཙནཾ ཉཱཏིབྱསནཱདིནིམིཏྟཾ ཙེཏསོ སནྟཱཔོ ཨནྟོནིཛ྄ཛྷཱནཾ སོཀོ. ཉཱཏིབྱསནཱདིནིམིཏྟམེཝ སོཀཱདྷིཀཏཱཛནིཏོ ‘‘ཀཧཾ ཨེཀཔུཏྟཀཱ’’ཏིཨཱདིནཱ པརིདེཝནཝསེན ཝཱཙཱཝིཔྤལཱཔོ པརིདེཝནཾ པརིདེཝོ. ཏསྶ ཨཱཡཏིཾ ཨནུཔྤཛྫནཾ ཨིདྷ སམཏིཀྐམོཏི ཨཱཧ ‘‘པཧཱནཱཡཱ’’ཏི. དུཀྑདོམནསྶཱནནྟི ཨེཏྠ ཙེཏསིཀདུཀྑཏཱཡ དོམནསྶསྶཔི དུཀྑསདྡེནེཝ གཧཎེ ¶ སིདྡྷེ སདྡེན ཨནིཝཏྟནཏོ ¶ སཱམཉྙཛོཏནཱཡ ཝིསེསཝཙནཾ སེཊྛནྟི ‘‘དོམནསྶཱན’’ནྟེཝ ཝུཏྟཾ. ཙེཏསིཀདོམནསྶསྶཱཏི བྷཱུཏཀཐནཾ དཊྛབྦཾ. ཉཱཡཏི ཨེཏེན ཡཱཐཱཝཏོ པཊིཝིཛ྄ཛྷཱིཡཏི ཙཏུསཙྩནྟི ཉཱཡོ ཝུཙྩཏི ཨརིཡམགྒོ. ནནུ ཨཡམྤི མགྒོ, ཀིཾ མགྒོ ཨེཝ མགྒསྶ ཨདྷིགམཱཡ ཧོཏཱིཏི ཙོདནཾ སནྡྷཱཡཱཧ – ‘‘ཨཡཾ ཧཱི’’ཏིཨཱདི. ཏཎྷཱཝ ཀམྨཀིལེསཝིཔཱཀཱནཾ ཝིནནཊྛེན སཾསིབྦནཊྛེན ཝཱནཾ. ཏེན ཏཎྷཱཝཱནེན ཝིརཧིཏཏྟཱ ཏསྶ ཨབྷཱཝཱཏི ཨཏྠོ. ཨཏྟཔཙྩཀྑཱཡཱཏི ཨཏྟཔཙྩཀྑཏྠཱཡ.

ཝཎྞབྷཱསནནྟི པསཾསཱཝཙནཾ. ཝིསུདྡྷིནྟི ཝིསུཛ྄ཛྷནཾ ཀིལེསཔྤཧཱནཾ. ཨུགྒཧེཏབྦནྟི ཨེཏྠ ཝཱཙུགྒཏཀརཎཾ ཨུགྒཧོ. པརིཙཡཀརཎཾ པརིཔུཙྪཱམཱུལཀཏྟཱ ཏགྒཧཎེནེཝ གཧིཏནྟི དཊྛབྦཾ.

ན ཏཏོ ཧེཊྛཱཏི ཨིདྷ ཨདྷིཔྤེཏཀཱཡཱདཱིནཾ ཝེདནཱདིསབྷཱཝཏྟཱབྷཱཝཱ ཀཱཡཝེདནཱཙིཏྟཝིམུཏྟསྶ ཏེབྷཱུམཀདྷམྨསྶ ཝིསུཾ ཝིཔལླཱསཝཏྠནྟརབྷཱཝེན གཧིཏཏྟཱ ཙ ཧེཊྛཱ གཧཎེསུ ཝིཔལླཱསཝཏྠཱུནཾ ཨནིཊྛཱནཾ སནྡྷཱཡ ཝུཏྟཾ. པཉྩམསྶ པན ཝིཔལླཱསཝཏྠུནོ ཨབྷཱཝེན ‘‘ན ཨུདྡྷ’’ནྟི ཨཱཧ. ཨཱརམྨཎཝིབྷཱགེན ཧེཏྠ སཏིཔཊྛཱནཝིབྷཱགོཏི. ཏཡོ སཏིཔཊྛཱནཱཏི སཏིཔཊྛཱནསདྡསྶ ཨཏྠུདྡྷཱརདསྶནཾ, ན ཨིདྷ པཱལི༹ཡཾ ཝུཏྟསྶ སཏིཔཊྛཱནསདྡསྶ ཨཏྠདསྶནཾ. ཨཱདཱིསུ ཧཱིཏི ཨེཏྠ ཨཱདི-སདྡེན ‘‘ཕསྶསམུདཡཱ ཝེདནཱནཾ སམུདཡོ, ནཱམརཱུཔསམུདཡཱ ཙིཏྟསྶ སམུདཡོ, མནསིཀཱརསམུདཡཱ དྷམྨཱནཾ སམུདཡོ’’ཏི (སཾ. ནི. ༥.༤༠༨) སཏིཔཊྛཱནཱཏི ཝུཏྟཱནཾ སཏིགོཙརཱནཾ པཀཱསཀེ སུཏྟཔདེསེ སངྒཎྷཱཏི. ཨེཝཾ པཊིསམྦྷིདཱམགྒཔཱལི༹ཡམྤི ཨཝསེསཔཱལི༹པདེསདསྶནཏྠོ ཨཱདི-སདྡོ དཊྛབྦོ. སཏིཡཱ པཊྛཱནནྟི སཏིཡཱ པཏིཊྛཱཏབྦཊྛཱནཾ.

ཨརིཡོཏི ཨཱརཀཏྟཱདིནཱ ཨརིཡཾ སམྨཱསམྦུདྡྷམཱཧ. ཨེཏྠཱཏི ཨེཏསྨིཾ སལཱ༹ཡཏནཝིབྷངྒསུཏྟེ (མ. ནི. ༣.༣༡༡). ཏཏྠ ཧི –

‘‘ཏཡོ སཏིཔཊྛཱནཱ ཡདརིཡོ…པེ… མརཧཏཱིཏི ཨིཏི ཁོ པནེཏཾ ཝུཏྟཾ, ཀིཉྩེཏཾ པཊིཙྩ ཝུཏྟཾ. ཨིདྷ, བྷིཀྑཝེ, སཏྠཱ སཱཝཀཱནཾ དྷམྨཾ དེསེཏི ཨནུཀམྤཀོ ཧིཏེསཱི ཨནུཀམྤཾ ཨུཔཱདཱཡ – ‘ཨིདཾ ཝོ ¶ ཧིཏཱཡ ཨིདཾ ཝོ སུཁཱཡཱ’ཏི. ཏསྶ སཱཝཀཱ ན སུསྶཱུསནྟི, ན སོཏཾ ཨོདཧནྟི, ན ཨཉྙཱ ཙིཏྟཾ ཨུཔཊྛཔེནྟི, ཝོཀྐམྨ ཙ སཏྠུསཱསནཱ ཝཏྟནྟི. ཏཏྲ, བྷིཀྑཝེ, ཏཐཱགཏོ ན ཙེཝ ཨནཏྟམནོ ཧོཏི, ན ཙ ཨནཏྟམནཏཾ པཊིསཾཝེདེཏི, ཨནཝསྶུཏོ ཙ ཝིཧརཏི སཏོ སམྤཛཱནོ. ཨིདཾ, བྷིཀྑཝེ, པཋམཾ སཏིཔཊྛཱནཾ. ཡདརིཡོ སེཝཏི…པེ... མརཧཏི. པུན ཙཔརཾ, བྷིཀྑཝེ, སཏྠཱ ¶ …པེ… ཨིདཾ ཝོ སུཁཱཡཱཏི. ཏསྶ ཨེཀཙྩེ སཱཝཀཱ ན སུསྶཱུསནྟི…པེ… ཨེཀཙྩེ སཱཝཀཱ སུསྶཱུསནྟི…པེ… ན ཙ ཝོཀྐམྨ སཏྠུསཱསནཱ ཝཏྟནྟི. ཏཏྲ, བྷིཀྑཝེ, ཏཐཱགཏོ ན ཙེཝ ཨནཏྟམནོ ཧོཏི, ན ཙ ཨནཏྟམནཏཾ པཊིསཾཝེདེཏི, ན ཙེཝ ཨཏྟམནོ ཧོཏི, ན ཙ ཨཏྟམནཏཾ པཊིསཾཝེདེཏི. ཨནཏྟམནཏཉྩ ཨཏྟམནཏཉྩ ཏདུབྷཡཾ ཨབྷིནིཝཛྫེཏྭཱ ཨུཔེཀྑཀོ ཝིཧརཏི སཏོ སམྤཛཱནོ. ཨིདཾ, བྷིཀྑཝེ, དུཏིཡཾ སཏིཔཊྛཱནཾ…པེ… མརཧཏི. པུན ཙཔརཾ, བྷིཀྑཝེ,…པེ… སུཁཱཡཱཏི, ཏསྶ སཱཝཀཱ སུསྶཱུསནྟི…པེ… ཝཏྟནྟི. ཏཏྲ, བྷིཀྑཝེ, ཏཐཱགཏོ ཨཏྟམནོ ཙེཝ ཧོཏི, ཨཏྟམནཏཉྩ པཊིསཾཝེདེཏི, ཨནཝསྶུཏོ ཙ ཝིཧརཏི སཏོ སམྤཛཱནོ. ཨིདཾ, བྷིཀྑཝེ, ཏཏིཡཾ སཏིཔཊྛཱན’’ནྟི –

ཨེཝཾ པཊིགྷཱནུནཡེཧི ཨནཝསྶུཏཏཱ ནིཙྩཾ ཨུཔཊྛིཏསྶཏིཏཱཡ ཏདུབྷཡཝཱིཏིཝཏྟཏཱ ‘‘སཏིཔཊྛཱན’’ནྟི ཝུཏྟཱ. བུདྡྷཱནཾཡེཝ ཧི ནིཙྩཾ ཨུཔཊྛིཏསྶཏིཏཱ ཧོཏི ཨཱཝེཎིཀདྷམྨབྷཱཝཏོ, ན པཙྩེཀབུདྡྷཱདཱིནཾ. པ-སདྡོ ཨཱརམྦྷཾ ཛོཏེཏི, ཨཱརམྦྷོ ཙ པཝཏྟཱིཏི ཀཏྭཱ ཨཱཧ ‘‘པཝཏྟཡིཏབྦཏོཏི ཨཏྠོ’’ཏི. སཏིཡཱ ཀརཎབྷཱུཏཱཡ པཊྛཱནཾ པཊྛཔེཏབྦཾ སཏིཔཊྛཱནཾ. ཨན-སདྡོ ཧི བཧུལཝཙནེན ཀམྨཏྠོཔི ཧོཏཱིཏི.

ཏཐཱསྶ ཀཏྟུཨཏྠོཔི ལབྦྷཏཱིཏི ‘‘པཏིཊྛཱཏཱིཏི པཊྛཱན’’ནྟི ཝུཏྟཾ. ཨུཔཊྛཱཏཱིཏི ཨེཏྠ ཨུཔ-སདྡོ བྷུསཏྠཝིསིཊྛཾ པཀྑནྡནཾ དཱིཔེཏཱིཏི ‘‘ཨོཀྐནྡིཏྭཱ པཀྑནྡིཏྭཱ པཝཏྟཏཱིཏི ཨཏྠོ’’ཏི ཝུཏྟཾ. པུན བྷཱཝཏྠཾ སཏིསདྡཾ པཊྛཱནསདྡཉྩ ཝཎྞེནྟོ ‘‘ཨཐ ཝཱ’’ཏིཨཱདིམཱཧ. ཏེན པུརིམཝིཀཔྤེ སཏི-སདྡོ པཊྛཱན-སདྡོ ཙ ཀཏྟུཨཏྠོཏི ཝིཉྙཱཡཏི. སརཎཊྛེནཱཏི ཙིརཀཏསྶ ཙིརབྷཱསིཏསྶ ཙ ཨནུསྶརཎཊྛེན. ཨིདནྟི ཡཾ ‘‘སཏིཡེཝ སཏིཔཊྛཱན’’ནྟི ཝུཏྟཾ, ཨིདཾ ཨིདྷ ཨིམསྨིཾ སུཏྟཔདེསེ ཨདྷིཔྤེཏཾ.

ཡདི ¶ ཨེཝནྟི ཡདི སཏི ཨེཝ སཏིཔཊྛཱནཾ, སཏི ནཱམ ཨེཀོ དྷམྨོ, ཨེཝཾ སནྟེ ཀསྨཱ སཏིཔཊྛཱནཱཏི བཧུཝཙནནྟི ཨཱཧ ‘‘སཏཱིནཾ བཧུཏྟཱ’’ཏིཨཱདི. ཡདི བཧུཀཱ ཏཱ སཏིཡོ, ཨཐ ཀསྨཱ མགྒོཏི ཨེཀཝཙནནྟི ཡོཛནཱ. མགྒནཊྛེནཱཏི ནིཡྻཱནཊྛེན. ནིཡྻཱནིཀོ ཧི མགྒདྷམྨོ, ཏེནེཝ ནིཡྻཱནིཀབྷཱཝེན ཨེཀཏྟུཔགཏོ ཨེཀནྟཏོ ནིབྦཱནཾ གཙྪཏི, ཨཏྠིཀེཧི ཙ ཏདཏྠཾ མགྒཱིཡཏཱིཏི ཨཱཧ ‘‘ཝུཏྟཉྷེཏ’’ནྟིཨཱདི. ཏཏྠ ཙཏསྶོཔི ཙེཏཱཏི ཀཱཡཱནུཔསྶནཱདིཝསེན ཙཏུབྦིདྷཱཔི ཙ ཨེཏཱ སཏིཡོ. ཨཔརབྷཱགེཏི ཨརིཡམགྒཀྑཎེ. ཀིཙྩཾ སཱདྷཡམཱནཱཏི པུབྦབྷཱགེ ཀཱཡཱདཱིསུ ཨཱརམྨཎེསུ སུབྷསཉྙཱདིཝིདྷམནཝསེན ཝིསུཾ ཝིསུཾ པཝཏྟིཏྭཱ མགྒཀྑཎེ སཀིཾཡེཝ ¶ ཏཏྠ ཙཏུབྦིདྷསྶཔི ཝིཔལླཱསསྶ སམུཙྪེདཝསེན པཧཱནཀིཙྩཾ སཱདྷཡམཱནཱ ཨཱརམྨཎཀརཎཝསེན ནིབྦཱནཾ གཙྪནྟི, ཏམེཝསྶ ཙཏུཀིཙྩསཱདྷནཏཾ ཨུཔཱདཱཡ བཧུཝཙནནིདྡེསོ, ཏཐཱཔི ཨཏྠཏོ བྷེདཱབྷཱཝཏོ མགྒོཏི ཨེཀཝཙནེན ཝུཙྩཏི. ཏེནཱཧ – ‘‘ཏསྨཱ ཙཏསྶོཔི ཨེཀོ མགྒོཏི ཝུཏྟཱ’’ཏི.

ཀཐེཏུཀམྱཏཱཔུཙྪཱ ཨིཏརཱསཾ པུཙྪཱནཾ ཨིདྷ ཨསམྦྷཝཏོ ནིདྡེསཱདིཝསེན དེསེཏུཀཱམཏཱཡ ཙ ཏཐཱ ཝུཏྟཏྟཱ. ‘‘ཨཡཉྩེཝ ཀཱཡོ བཧིདྡྷཱ ཙ ནཱམརཱུཔ’’ནྟིཨཱདཱིསུ (མ. ནི. ༡.༢༧༡, ༢༨༧, ༢༩༧; པཱརཱ. ༡༡) ཁནྡྷཔཉྩཀཾ, ‘‘སུཁཉྩ ཀཱཡེན པཊིསཾཝེདེཏཱི’’ཏིཨཱདཱིསུ ཝེདནཱདཡོ ཏཡོ ཨརཱུཔཀྑནྡྷཱ, ‘‘ཡཱ ཏསྨིཾ སམཡེ ཀཱཡསྶ པསྶདྡྷི པཊིཔྤསྶདྡྷཱི’’ཏིཨཱདཱིསུ (དྷ. ས. ༤༠) ཝེདནཱདཡོ ཏཡོ ཙེཏསིཀཱ ཁནྡྷཱ ‘‘ཀཱཡོ’’ཏི ཝུཙྩནྟི, ཏཏོ ཝིསེསནཏྠཾ ‘‘ཀཱཡེཏི རཱུཔཀཱཡེ’’ཏི ཨཱཧ. ཀཱཡཱནུཔསྶཱིཏི ཨེཏྠ ཏསྶཱིལཏྠཾ དསྶེནྟོ ‘‘ཀཱཡཾ ཨནུཔསྶནསཱིལོ’’ཏི ཨཱཧ. ཨནིཙྩཏོ ཨནུཔསྶཏཱིཏི ཙཏུསམུཊྛཱནིཀཀཱཡཾ ‘‘ཨནིཙྩ’’ནྟི ཨནུཔསྶཏི, ཨེཝཾ པསྶནྟོ ཨེཝ ཙསྶ ཨནིཙྩཱཀཱརམྤི ཨནུཔསྶཏཱིཏི ཝུཙྩཏི, ཏཐཱབྷཱུཏསྶ ཙསྶ ནིཙྩགཱཧསྶ ཝིསེསོཔི ན ཧོཏཱིཏི ཝུཏྟཾ ‘‘ནོ ནིཙྩཏོ’’ཏི. ཏཐཱ ཧེས ‘‘ནིཙྩསཉྙཾ པཛཧཏཱི’’ཏི (པཊི. མ. ༡.༢༨) ཝུཏྟོ. ཨེཏྠ ཙ ཨནིཙྩཏོ ཨེཝ ཨནུཔསྶཏཱིཏི ཨེཝཀཱརོ ལུཏྟནིདྡིཊྛོཏི ཏེན ནིཝཏྟིཏམཏྠཾ དསྶེཏུཾ ‘‘ནོ ནིཙྩཏོ’’ཏི ཝུཏྟཾ. ན ཙེཏྠ དུཀྑཱནུཔསྶནཱདིནིཝཏྟནམཱསངྐིཏབྦཾ པཊིཡོགིནིཝཏྟནཔརཏྟཱ ཨེཝ-ཀཱརསྶ, ཨུཔརི དེསནཱཨཱརུལ༹ྷཏྟཱ ཙ ཏཱསཾ. དུཀྑཏོ ཨནུཔསྶཏཱིཏིཨཱདཱིསུཔི ཨེསེཝ ནཡོ. ཨཡཾ པན ཝིསེསོ – ཨནིཙྩསྶ དུཀྑཏྟཱ ¶ ཏམེཝ ཀཱཡཾ དུཀྑཏོ ཨནུཔསྶཏི, དུཀྑསྶ ཨནཏྟཏྟཱ ཨནཏྟཏོ ཨནུཔསྶཏཱིཏི.

ཡསྨཱ པན ཡཾ ཨནིཙྩཾ དུཀྑཾ ཨནཏྟཱ, ན ཏཾ ཨབྷིནནྡིཏབྦཾ, ཡཉྩ ན ཨབྷིནནྡིཏབྦཾ, ན ཏཏྠ རཛྫིཏབྦཾ, ཏསྨཱ ཝུཏྟཾ ‘‘ཨནིཙྩཏོ ཨནུཔསྶཏི, ནོ ནིཙྩཏོ, དུཀྑཏོ ཨནུཔསྶཏི, ནོ སུཁཏོ, ཨནཏྟཏོ ཨནུཔསྶཏི, ནོ ཨཏྟཏོ, ནིབྦིནྡཏི, ནོ ནནྡཏི, ཝིརཛྫཏི, ནོ རཛྫཏཱི’’ཏི. སོ ཨེཝཾ ཨརཛྫནྟོ རཱགཾ ནིརོདྷེཏི, ནོ སམུདེཏི, སམུདཡཾ ན ཀརོཏཱིཏི ཨཏྠོ. ཨེཝཾ པཊིཔནྣོ ཙ པཊིནིསྶཛྫཏི, ནོ ཨཱདིཡཏི. ཨཡཉྷི ཨནིཙྩཱདིཨནུཔསྶནཱ ཏདངྒཝསེན སདྡྷིཾ ཀཱཡཏནྣིསྶཡཁནྡྷཱབྷིསངྑཱརེཧི ཀིལེསཱནཾ པརིཙྩཛནཏོ སངྑཏདོསདསྶནེན ཏབྦིཔརཱིཏེ ནིབྦཱནེ ཏནྣིནྣཏཱཡ པཀྑནྡནཏོ ‘‘པརིཙྩཱགཔཊིནིསྶགྒོ ཙེཝ པཀྑནྡནཔཊིནིསྶགྒོ ཙཱ’’ཏི ཝུཙྩཏི. ཏསྨཱ ཏཱཡ སམནྣཱགཏོ བྷིཀྑུ ཝུཏྟནཡེན ཀིལེསེ ཙ པརིཙྩཛཏི, ནིབྦཱནེ ཙ པཀྑནྡཏི, ཏཐཱབྷཱུཏོ ཙ པརིཙྩཛནཝསེན ཀིལེསེ ¶ ན ཨཱདིཡཏི, ནཱཔི ཨདོསདསྶིཏཱཝསེན སངྑཏཱརམྨཎཾ. ཏེན ཝུཏྟཾ ‘‘པཊིནིསྶཛྫཏི, ནོ ཨཱདིཡཏཱི’’ཏི. ཨིདཱནི ནིསྶིཏཱཧི ཨནུཔསྶནཱཧི ཡེསཾ དྷམྨཱནཾ པཧཱནཾ ཧོཏི, ཏཾ དསྶེཏུཾ ‘‘ཨནིཙྩཏོ ཨནུཔསྶནྟོ ནིཙྩསཉྙཾ པཛཧཏཱི’’ཏིཨཱདི ཝུཏྟཾ. ཏཏྠ ནིཙྩསཉྙནྟི སངྑཱརཱ ནིཙྩཱཏི ཨེཝཾ པཝཏྟཾ ཝིཔརཱིཏསཉྙཾ. དིཊྛིཙིཏྟཝིཔལླཱསཔཧཱནམུཁེནེཝ སཉྙཱཝིཔལླཱསཔྤཧཱནནྟི སཉྙཱགཧཎཾ, སཉྙཱསཱིསེན ཝཱ ཏེསམྤི གཧཎཾ དཊྛབྦཾ. ནནྡིནྟི སཔྤཱིཏིཀཏཎྷཾ. སེསཾ ཝུཏྟནཡམེཝ.

ཝིཧརཏཱིཏི ཨིམིནཱ ཀཱཡཱནུཔསྶནཱསམངྒིནོ ཨིརིཡཱཔཐཝིཧཱརོ ཝུཏྟོཏི ཨཱཧ – ‘‘ཨིརིཡཏཱི’’ཏི, ཨིརིཡཱཔཐཾ པཝཏྟེཏཱིཏི ཨཏྠོ. ཨཱརམྨཎཀརཎཝསེན ཨབྷིབྱཱཔནཏོ ‘‘ཏཱིསུ བྷཝེསཱུ’’ཏི ཝུཏྟཾ, ཨུཔྤཛྫནཝསེན པན ཀིལེསཱ པརིཏྟབྷཱུམཀཱ ཨེཝཱཏི. ཡདིཔི ཀིལེསཱནཾ པཧཱནཾ ཨཱཏཱཔནནྟི ཏཾ སམྨཱདིཊྛིཨཱདཱིནམྤི ཨཏྠེཝ, ཨཱཏཔྤ-སདྡོཝིཡ པན ཨཱཏཱཔ-སདྡོཔི ཝཱིརིཡེ ཨེཝ ནིརུལ༹ྷོཏི ཝུཏྟཾ ‘‘ཝཱིརིཡསྶེཏཾ ནཱམ’’ནྟི. ཨཐ ཝཱ པཊིཔཀྑཔྤཧཱནེ སམྤཡུཏྟདྷམྨཱནཾ ཨབྦྷུསྶཧནཝསེན པཝཏྟམཱནསྶ ཝཱིརིཡསྶ སཱཏིསཡཾ ཏདཱཏཱཔནནྟི ཝཱིརིཡམེཝ ཏཐཱ ཝུཙྩཏི, ན ཨཉྙེ དྷམྨཱ.

ཨཱཏཱཔཱིཏི ཙཱཡམཱིཀཱརོ པསཾསཱཡ, ཨཏིསཡསྶ ཝཱ དཱིཔཀོཏི ཨཱཏཱཔཱིགཧཎེན སམྨཔྤདྷཱནསམངྒིཏཾ དསྶེཏི. སམྨཱ སམནྟཏོ སཱམཉྩ པཛཱནནྟོ སམྤཛཱནོ, ཨསམྨིསྶཏོ ཝཝཏྠཱནེ ཨཉྙདྷམྨཱནུཔསྶིཏཱབྷཱཝེན ¶ སམྨཱ ཨཝིཔརཱིཏཾ, སབྦཱཀཱརཔཛཱནནེན སམནྟཏོ, ཨུཔརཱུཔརི ཝིསེསཱཝཧབྷཱཝེན པཝཏྟིཡཱ སཱམཾ པཛཱནནྟོཏི ཨཏྠོ. ཡདི པཉྙཱཡ ཨནུཔསྶཏི, ཀཐཾ སཏིཔཊྛཱནཏཱཏི ཨཱཧ ‘‘ན ཧཱི’’ཏིཨཱདི. ཏསྨཱ སཏིཡཱ ལདྡྷུཔཀཱརཱཡ ཨེཝ པཉྙཱཡ ཨེཏྠ ཡཐཱཝུཏྟེ ཀཱཡེ ཀམྨཊྛཱནིཀོ བྷིཀྑུ ཨནུཔསྶཀོ, ཏསྨཱ ‘‘ཀཱཡཱནུཔསྶཱི’’ཏི ཝུཙྩཏི. ཨནྟོསངྑེཔོ ཨནྟོལཱིནཏཱ, ཀོསཛྫནྟི ཨཏྠོ. ཨུཔཱཡཔརིགྒཧོཏི ཨེཏྠ སཱིལཝིསོདྷནཱདི གཎནཱདི ཨུགྒཧཀོསལླཱདི ཙ ཨུཔཱཡོ, ཏབྦིཔརིཡཱཡཏོ ཨནུཔཱཡོ ཝེདིཏབྦོ. ཡསྨཱ ཙ ཨུཔཊྛིཏསྶཏཱི ཡཐཱཝུཏྟཾ ཨུཔཱཡཾ ན པརིཙྩཛཏི, ཨནུཔཱཡཉྩ ན ཨུཔཱདིཡཏི, ཏསྨཱ ཝུཏྟཾ ‘‘མུཊྛསྶཏི…པེ… ཨསམཏྠོ ཧོཏཱི’’ཏི. ཏེནཱཏི ཨུཔཱཡཱནུཔཱཡཱནཾ པརིགྒཧཔརིཝཛྫནེསུ ཨཔརིཙྩཱགཱཔརིགྒཧེསུ ཙ ཨསམཏྠབྷཱཝེན. ཨསྶ ཡོགིནོ.

ཡསྨཱ སཏིཡེཝེཏྠ སཏིཔཊྛཱནཾ ཝུཏྟཱ, ཏསྨཱསྶ སམྤཡུཏྟདྷམྨཱ ཝཱིརིཡཱདཡོ ཨངྒནྟི ཨཱཧ – ‘‘སམྤཡོགངྒཉྩསྶ དསྶེཏྭཱ’’ཏི. ཨངྒ-སདྡོ ཙེཏྠ ཀཱརཎཔརིཡཱཡོ དཊྛབྦོ. སཏིགྒཧཎེནེཝེཏྠ སམྨཱསམཱདྷིསྶཔི གཧཎཾ དཊྛབྦཾ ཏསྶཱ སམཱདྷིཀྑནྡྷེ སངྒཧིཏཏྟཱ. ཡསྨཱ ཝཱ སཏིསཱིསེནཱཡཾ ¶ དེསནཱ. ན ཧི ཀེཝལཱཡ སཏིཡཱ ཀིལེསཔྤཧཱནཾ སམྦྷཝཏི, ནིབྦཱནཱདྷིགམོ ཝཱ, ནཱཔི ཀེཝལཱ སཏི པཝཏྟཏི, ཏསྨཱསྶ ཛྷཱནདེསནཱཡཾ སཝིཏཀྐཱདིཝཙནསྶ ཝིཡ སམྤཡོགངྒདསྶནཏཱཏི ཨངྒ-སདྡསྶ ཨཝཡཝཔརིཡཱཡཏཱ དཊྛབྦཱ. པཧཱནངྒནྟི ‘‘ཝིཝིཙྩེཝ ཀཱམེཧཱི’’ཏིཨཱདཱིསུ ཝིཡ པཧཱཏབྦངྒཾ དསྶེཏུཾ. ཡསྨཱ ཨེཏྠ པུབྦབྷཱགམགྒོ ཨདྷིཔྤེཏོ, ན ལོཀུཏྟརམགྒོ, ཏསྨཱ པུབྦབྷཱགིཡམེཝ ཝིནཡཾ དསྶེནྟོ ‘‘ཏདངྒཝིནཡེན ཝཱ ཝིཀྑམྦྷནཝིནཡེན ཝཱ’’ཏི ཨཱཧ. ཨསྶཱཏི ཡོགིནོ. ཏེསཾ དྷམྨཱནནྟི ཝེདནཱདིདྷམྨཱནཾ. ཏེསཉྷི ཏཏྠ ཨནདྷིཔྤེཏཏྟཱ ‘‘ཨཏྠུདྡྷཱརནཡེནེཏཾ ཝུཏྟ’’ནྟི ཨཱཧ. ཡཾ པནཱཏི ཝིབྷངྒེ, ཝིབྷངྒཔཀརཎེཏི ཨདྷིཔྤཱཡོ. ཨེཏྠཱཏི ‘‘ལོཀེ’’ཏི ཨེཏསྨིཾ པདེ, ཏཱ ཙ ལོཀིཡཱ ཨེཝ ཨནུཔསྶནཱ ནཱམ སམྨསནནྟི ཀཏྭཱ.

དུཀྑཏོཏི ཝིཔརིཎཱམསངྑཱརདུཀྑཏཱཧི དུཀྑསབྷཱཝཏོ, དུཀྑཱཏི ཨནུཔསྶིཏབྦཱཏི ཨཏྠོ. སེསཔདདྭཡེཔི ཨེསེཝ ནཡོ. ཡོ སུཁཾ ¶ དུཀྑཏོ ཨདྡཱཏི ཡོ བྷིཀྑུ སུཁཾ ཝེདནཾ ཝིཔརིཎཱམདུཀྑཏཱཡ དུཀྑནྟི པཉྙཱཙཀྑུནཱ ཨདྡཀྑི. དུཀྑམདྡཀྑི སལླཏོཏི དུཀྑཝེདནཾ པཱིལཱ༹ཛནནཏོ ཨནྟོཏུདནཏོ དུནྣཱིཧརཎཏོ ཙ སལླནྟི ཨདྡཀྑི པསྶི. ཨདུཀྑམསུཁནྟི ཨུཔེཀྑཱཝེདནཾ. སནྟནྟི སུཁདུཀྑཱནཾ ཝིཡ ཨནོལཱ༹རིཀཏཱཡ པཙྩཡཝསེན ཝཱུཔསནྟསབྷཱཝཏྟཱ ཙ སནྟཾ. ཨནིཙྩཏོཏི ཧུཏྭཱ ཨབྷཱཝཏོ ཨུདཡབྦཡཝནྟཏོ ཏཱཝཀཱལིཀཏོ ནིཙྩཔཊིཀྑེཔཏོ ཙ ཨནིཙྩནྟི ཡོ ཨདྡཀྑི. ས ཝེ སམྨདྡསོ བྷིཀྑཱུཏི སོ བྷིཀྑུ ཨེཀཾསེན, པརིབྱཏྟཾ ཝཱ ཝེདནཱཡ སམྨཱ པསྶནཀོཏི ཨཏྠོ.

དུཀྑཱཏིཔཱིཏི སངྑཱརདུཀྑཏཱཡ དུཀྑཱ ཨིཏིཔི. སབྦཾ ཏཾ ཝེདཡིཏཾ དུཀྑསྨིཾ ཨནྟོགདྷཾ པརིཡཱཔནྣནྟི ཝདཱམི སངྑཱརདུཀྑནྟི ཝཏྟབྦཏོ. སུཁདུཀྑཏོཔི ཙཱཏི སུཁཱདཱིནཾ ཋིཏིཝིཔརིཎཱམཉཱཎསུཁཏཱཡ ཙ ཝིཔརིཎཱམཊྛིཏིཨཉྙཱཎདུཀྑཏཱཡ ཙ ཝུཏྟཏྟཱ ཏིསྶོཔི སུཁཏོ ཏིསྶོཔི ཙ དུཀྑཏོ ཨནུཔསྶིཏབྦཱཏི ཨཏྠོ. སཏྟ ཨནུཔསྶནཱ ཧེཊྛཱ པཀཱསིཏཱ ཨེཝ.

ཨཱརམྨཎཱ…པེ… བྷེདཱནནྟི རཱུཔཱདིཨཱརམྨཎནཱནཏྟསྶ ནཱིལཱདིཏབྦྷེདསྶ, ཚནྡཱདིཨདྷིཔཏིནཱནཏྟསྶ ཧཱིནཱདིཏབྦྷེདསྶ, ཉཱཎཛྷཱནཱདིསཧཛཱཏནཱནཏྟསྶ སསངྑཱརིཀཱསངྑཱརིཀ-སཝིཏཀྐ-སཝིཙཱརཱདིཏབྦྷེདསྶ, ཀཱམཱཝཙརཱདིབྷཱུམིནཱནཏྟསྶ, ཨུཀྐཊྛམཛ྄ཛྷིམཱདིཏབྦྷེདསྶ, ཀུསལཱདིཀམྨནཱནཏྟསྶ, དེཝགཏིསཾཝཏྟནིཡཏཱདིཏབྦྷེདསྶ, ཀཎྷསུཀྐཝིཔཱཀནཱནཏྟསྶ, དིཊྛདྷམྨཝེདནཱིཡཏཱདིཏབྦྷེདསྶ, པརིཏྟབྷཱུམཀཱདིཀིརིཡཱནཱནཏྟསྶ, ཏིཧེཏུཀཱདིཏབྦྷེདསྶ ཝསེན ཨནུཔསྶིཏབྦནྟི ཡོཛནཱ. ཨཱདི-སདྡེན སཝཏྠུཀཱཝཏྠུཀཱདིནཱནཏྟསྶ པུགྒལཏྟཡསཱདྷཱརཎཱདིཏབྦྷེདསྶ ¶ ཙ སངྒཧོ དཊྛབྦོ. སརཱགཱདཱིནནྟི མཧཱསཏིཔཊྛཱནསུཏྟེ (དཱི. ནི. ༢.༣༨༡; མ. ནི. ༡.༡༡༤) ཨཱགཏཱནཾ སརཱགཝཱིཏརཱགཱདིབྷེདཱནཾ. སལཀྑཎ-སཱམཉྙལཀྑཎཱནནྟི ཕུསནཱདིཏཾཏཾསལཀྑཎཱནཉྩེཝ ཨནིཙྩཏཱདིསཱམཉྙལཀྑཎཱནཉྩ ཝསེནཱཏི ཡོཛནཱ.

སུཉྙཏདྷམྨསྶཱཏི ཨནཏྟཏཱསངྑཱཏསུཉྙཏསབྷཱཝསྶ. ‘‘སལཀྑཎ-སཱམཉྙལཀྑཎཱན’’ནྟི ཧི ཨིམིནཱ ཡོ ཨིཏོ བཱཧིརཀེཧི སཱམིནིཝཱསཱིཀཱརཀཝེདཀཨདྷིཊྛཱཡཀབྷཱཝེན པརིཀཔྤིཏོ ཨཏྟཱ, ཏསྶ སངྑཱརེསུ ནིཙྩཏཱ སུཁཏཱ ཝིཡ ཀཏྠཙིཔི ཨབྷཱཝོ ཝིབྷཱཝིཏོ. ནཏྠི ཨེཏེསཾ ཨཏྟཱཏི ཨནཏྟཱ, ཡསྨཱ པན སངྑཱརེསུ ཨེཀདྷམྨོཔི ཨཏྟཱ ¶ ན ཧོཏི, ཏསྨཱ ཏེ ན ཨཏྟཱཏིཔི ཨནཏྟཱཏི ཨཡཾ ཏེསཾ སུཉྙཏདྷམྨོ. ཏསྶ སུཉྙཏདྷམྨསྶ, ཡཾ ཝིབྷཱཝེཏུཾ ཨབྷིདྷམྨེ (དྷ. ས. ༡༢༡) ‘‘ཏསྨིཾ ཁོ པན སམཡེ དྷམྨཱ ཧོནྟཱི’’ཏིཨཱདིནཱ སུཉྙཏཝཱརདེསནཱ ཝུཏྟཱ. སེསཾ སུཝིཉྙེཡྻམེཝ.

ཨམྦཔཱལིསུཏྟཝཎྞནཱ ནིཊྛིཏཱ.

༢. སཏིསུཏྟཝཎྞནཱ

༣༦༨. སརཏཱིཏི སཏོ. ཨཡཾ པན ན ཡཱཡ ཀཱཡཙི སཏིཡཱ སཏོ, ཨཐ ཁོ ཨེདིསཱཡཱཏི དསྶེནྟོ ‘‘ཀཱཡཱདིཨནུཔསྶནཱསཏིཡཱ’’ཏི ཨཱཧ. ཙཏུསམྤཛཉྙཔཉྙཱཡཱཏི ཙཏུབྦིདྷསམྤཛཉྙཔཉྙཱཡ, ཨབྷིཀྐམནཾ ཨབྷིཀྐནྟནྟི ཨཱཧ – ‘‘ཨབྷིཀྐནྟཾ ཝུཙྩཏི གམན’’ནྟི. ཏཐཱ པཊིཀྐམནཾ པཊིཀྐནྟནྟི ཝུཏྟཾ – ‘‘པཊིཀྐནྟཾ ནིཝཏྟན’’ནྟི. ནིཝཏྟནཉྩ ནིཝཏྟིམཏྟཾ, ནིཝཏྟིཏྭཱ པན གམནཾ གམནམེཝ. ཀཱཡཾ ཨབྷིཧརནྟོ ཨབྷིགམནཝསེན ཀཱཡཾ ནཱམེནྟོ. ཋཱནནིསཛྫཱསཡནེསུ ཡོ གམནཱདིཝིདྷིནཱ ཀཱཡསྶ པུརཏོ ཨབྷིཧཱརོ, སོ ཨབྷིཀྐམོ, པཙྪཏོ ཨཔཧརཎཾ པཊིཀྐམོཏི དསྶེནྟོ ‘‘ཋཱནེཔཱི’’ཏིཨཱདིམཱཧ. ཨཱསནསྶཱཏི པཱིཋཀཱདིཨཱསནསྶ. པུརིམཨངྒཱབྷིམུཁོཏི ཨཊནིཀཱདིཔུརིམཱཝཡཝཱབྷིམུཁོ. སཾསརནྟོཏི སཾསཔྤནྟོ. པཙྩཱསཾསརནྟོཏི པཊིཨཱསཔྤནྟོ. ཨེསེཝ ནཡོཏི ཨིམིནཱ སརཱིརསྶེཝ ཨབྷིམུཁསཾསཔྤནཔཊིཨཱསཔྤནཱནི ནིདསྶེཏི.

སམྨཱ པཛཱནནཾ སམྤཛཱནཾ. ཏེན ཨཏྟནཱ ཀཱཏབྦཀིཙྩསྶ ཀརཎསཱིལོ སམྤཛཱནཀཱརཱིཏི ཨཱཧ – ‘‘སམྤཛཉྙེན སབྦཀིཙྩཀཱརཱི’’ཏི. སམྤཛཱནམེཝ ཧི སམྤཛཉྙཾ. སམྤཛཉྙསྶེཝ ཝཱ ཀཱརཱིཏི ¶ སམྤཛཉྙསྶེཝ ཀརཎསཱིལོ. སམྤཛཉྙཾ ཀརོཏེཝཱཏི ཨབྷིཀྐནྟཱདཱིསུ ཨསམྨོཧཾ ཨུཔྤཱདེཏི ཨེཝ, སམྤཛཱནསྶེཝ ཝཱ ཀཱརོ ཨེཏསྶ ཨཏྠཱིཏི སམྤཛཱནཀཱརཱི.

དྷམྨཏོ ཝཌྜྷིཏསངྑཱཏེན སཧ ཨཏྠེན ཝཏྟཏཱིཏི སཱཏྠཀཾ, ཨབྷིཀྐནྟཱདི, སཱཏྠཀསྶ སམྤཛཱནནཾ སཱཏྠཀསམྤཛཉྙཾ. སཔྤཱཡསྶ ཨཏྟནོ ¶ ཨུཔཀཱརཱཝཧསྶ ཧིཏསྶ སམྤཛཱནནཾ སཔྤཱཡསམྤཛཉྙཾ. ཨབྷིཀྐམཱདཱིསུ བྷིཀྑཱཙཱརགོཙརེ, ཨཉྙཏྠཱཔི ཙ པཝཏྟེསུ ཨཝིཛཧིཏེ ཀམྨཊྛཱནསངྑཱཏེ གོཙརེ སམྤཛཉྙཾ གོཙརསམྤཛཉྙཾ. ཨབྷིཀྐམཱདཱིསུ ཨསམྨུཡ྄ཧནམེཝ སམྤཛཉྙཾ ཨསམྨོཧསམྤཛཉྙཾ. པརིགྒཎྷིཏྭཱཏི ཏུལཡིཏྭཱ ཏཱིརེཏྭཱ, པཊིསངྑཱཡཱཏི ཨཏྠོ. སངྒྷདསྶནེནེཝ ཨུཔོསཐཔཝཱརཎཱདིཨཏྠཾ གམནཾ སངྒཧིཏཾ. ཨསུབྷདསྶནཱདཱིཏི ཨཱདི-སདྡེན ཀསིཎཔརིཀམྨཱདཱིནཾ སངྒཧོ དཊྛབྦོ. སངྑེཔཏོ ཝུཏྟམཏྠཾ ཝིཝརིཏུཾ ‘‘ཙེཏིཡཾ དིསྭཱཔི ཧཱི’’ཏིཨཱདི ཝུཏྟཾ. ཨརཧཏྟཾ པཱཔུཎཱཏཱིཏི ཨུཀྐཊྛནིདྡེསོ ཨེསོ. སམཐཝིཔསྶནུཔྤཱདནམྤི ཧི བྷིཀྑུནོ ཝུདྡྷི ཨེཝ. དཀྑིཎདྭཱརེཏི ཙེཏིཡངྒཎསྶ དཀྑིཎདྭཱརེ, ཏཐཱ པཙྪིམདྭཱརེཏིཨཱདཱིསུ. ཨབྷཡཝཱཔི པཱལི༹ཡནྟི ཨབྷཡཝཱཔིཡཱ པུརཏྠིམཏཱིརེ.

བུདྡྷཝཾས-ཨརིཡཝཾས-ཙེཏིཡཝཾས-དཱིཔཝཾསཱདིཝཾསཀཐནཏོ མཧཱཨརིཡཝཾསབྷཱཎཀོ ཐེརོ. པཉྙཱཡནཊྛཱནེཏི ཙེཏིཡསྶ པཉྙཱཡནཊྛཱནེ. ཨེཀཔདུདྡྷཱརེཏི པདུདྡྷཱརཔཏིཊྛཱནཔརིཝཏྟནཾ ཨཀཏྭཱ ཨེཀསྨིཾཡེཝ ཨཝཊྛཱནེ. ཀེཙཱིཏི ཨབྷཡགིརིཝཱསིནོ.

ཏསྨིཾ པནཱཏི སཱཏྠཀསམྤཛཉྙཝསེན པརིགྒཧིཏཨཏྠེཔི གམནེ. ཨཏྠོ ནཱམ དྷམྨཏོ ཝཌྜྷཱིཏི ཡཾ སཱཏྠཀནྟི ཨདྷིཔྤེཏཾ གམནཾ, ཏཾ སཔྤཱཡམེཝཱཏི སིཡཱ ཀསྶཙི ཨཱསངྐཱཏི ཏནྣིཝཏྟནཏྠཾ ‘‘ཙེཏིཡདསྶནཾ ཏཱཝཱ’’ཏིཨཱདི ཨཱརདྡྷཾ. ཙིཏྟཀམྨརཱུཔཀཱནི ཝིཡཱཏི ཙིཏྟཀམྨཀཏཱ པཊིམཱཡོ ཝིཡ, ཡནྟཔཡོགེན ཝཱ ཝིཙིཏྟཀམྨཱ པཊིམཱཡ སདིསཱ ཡནྟརཱུཔཀཱ ཝིཡ. ཨསམཔེཀྑནཾ གེཧསྶིཏཨཉྙཱཎུཔེཀྑཱཝསེན ཨཱརམྨཎེ ཨཡོནིསོ ཨོལོཀནཱདི. ཡཾ སནྡྷཱཡ ཝུཏྟཾ ‘‘ཙཀྑུནཱ རཱུཔཾ དིསྭཱ ཨུཔྤཛྫཏི ཨུཔེཀྑཱ བཱལསྶ མཱུལ༹ྷསྶ པུཐུཛྫནསྶཱ’’ཏིཨཱདི (མ. ནི. ༣.༣༠༨). ཧཏྠིཨཱདིསམྨདྡེན ཛཱིཝིཏནྟརཱཡོ. ཝིསབྷཱགརཱུཔདསྶནཱདིནཱ བྲཧྨཙརིཡནྟརཱཡོ.

པབྦཛིཏདིཝསཏོ པཊྛཱཡ བྷིཀྑཱུནཾ ཨནུཝཏྟནཀཐཱ ཨཱཙིཎྞཱ, ཨནནུཝཏྟནཀཐཱ པན ཏསྶཱ ཨཔརཱ དུཏིཡཱ ནཱམ ཧོཏཱིཏི ཨཱཧ – ‘‘དྭེ ཀཐཱ ནཱམ ན ཀཐིཏཔུབྦཱ’’ཏི. ཨེཝནྟི ཨིམིནཱ ¶ ‘‘སཙེ པནཱ’’ཏིཨཱདིཀཾ སབྦམྤི ཝུཏྟཱཀཱརཾ པཙྩཱམསཏི, ན ‘‘པུརིསསྶ མཱཏུགཱམཱསུབྷ’’ནྟིཨཱདིཀཾ ཝུཙྩམཱནཾ.

ཡོགཀམྨསྶ ¶ པཝཏྟིཊྛཱནཏཱཡ བྷཱཝནཱཡ ཨཱརམྨཎཾ ཀམྨཊྛཱནཾ ཝུཙྩཏཱིཏི ཨཱཧ ‘‘ཀམྨཊྛཱནསངྑཱཏཾ གོཙར’’ནྟི. ཨུགྒཧེཏྭཱཏི ཡཐཱ ཨུགྒཧནིམིཏྟཾ ཨུཔྤཛྫཏི, ཨེཝཾ ཨུགྒཧཀོསལླསྶ སམྤཱདནཝསེན ཨུགྒཧེཏྭཱ.

ཧརཏཱིཏི ཀམྨཊྛཱནཾ པཝཏྟེཏི, ཡཱཝ པིཎྜཔཱཏཔཊིཀྐམཱ ཨནུཡུཉྫཏཱིཏི ཨཏྠོ. ན པཙྩཱཧརཏཱིཏི ཨཱཧཱརཱུཔབྷོགཏོ ཡཱཝ དིཝཱཊྛཱནུཔསངྐམནཱ ཀམྨཊྛཱནཾ ན པཊིནེཏི. སམཱདཱཡ ཝཏྟཏི སམྨཱ ཨཱདིཡིཏྭཱ ཏེསཾ ཝཏྟཱནཾ པརིཔཱུརཎཝསེན ཝཏྟཏི. སརཱིརཔརིཀམྨནྟི མུཁདྷོཝནཱདིསརཱིརཔཊིཛགྒནཾ. དྭེ ཏཡོ པལླངྐེཏི དྭེ ཏཡོ ནིསཛྫཱཝཱརེ དྭེ ཏཱིཎི ཨུཎྷཱསནཱནི. ཏེནཱཧ – ‘‘ཨུསུམཾ གཱཧཱཔེནྟོ’’ཏི. ཀམྨཊྛཱནསཱིསེནེཝཱཏི ཀམྨཊྛཱནམུཁེནེཝ ཀམྨཊྛཱནཾ ཨཝིཛཧནྟོ ཨེཝ. ཏེན ‘‘པཏྟོཔི ཨཙེཏནོ’’ཏིཨཱདིནཱ པཝཏྟེཏབྦཀམྨཊྛཱནཾ, ཡཐཱཔརིཧརིཡམཱནཾ ཝཱ ཀམྨཊྛཱནཾ ཨཝིཛཧིཏྭཱཏི དསྶེཏི. ཏཐེཝཱཏི ཏིཀྑཏྟུམེཝ. པརིབྷོགཙེཏིཡཏོ སརཱིརཙེཏིཡཾ གརུཏརནྟི ཀཏྭཱ ‘‘ཙེཏིཡཾ ཝནྡིཏྭཱ’’ཏི ཙེཏིཡཝནྡནཱཡ པཋམཾ ཀརཎཱིཡཏཱ ཝུཏྟཱ. ཏཐཱ ཧི ཨཊྛཀཐཱཡཾ – ‘‘ཙེཏིཡཾ བཱདྷཡམཱནཱ བོདྷིསཱཁཱ ཧརིཏབྦཱ’’ཏི ཝུཏྟཱ. བུདྡྷགུཎཱནུསྶརཎཝསེནེཝ བོདྷིཉྩ པཎིཔཱཏཀརཎནྟི ཨཱཧ – ‘‘བུདྡྷསྶ བྷགཝཏོ སམྨུཁཱ ཝིཡ ནིཔཙྩཀཱརཾ དསྶེཏྭཱ’’ཏི. གཱམསམཱིཔེཏི གཱམསྶ ཨུཔཙཱརཊྛཱནེ.

ཛནསངྒཧཎཏྠནྟི ‘‘མཡི ཨཀཐེནྟེ ཨེཏེསཾ ཀོ ཀཐེསྶཏཱི’’ཏི དྷམྨཱནུགྒཧེན ཛནསངྒཧཎཏྠཾ. ཏསྨཱཏི ཡསྨཱ ‘‘དྷམྨཀཐཱ ནཱམ ཀཐེཏབྦཱ ཨེཝཱ’’ཏི ཨཊྛཀཐཱཙརིཡཱ ཝདནྟི, ཡསྨཱ ཙ དྷམྨཀཐཱ ཀམྨཊྛཱནཝིནིམུཏྟཱ ནཱམ ནཏྠི, ཏསྨཱ. ཀམྨཊྛཱནསཱིསེནེཝཱཏི ཨཏྟནཱ པརིཧརིཡམཱནཾ ཀམྨཊྛཱནཾ ཨཝིཛཧནྟོ ཏདནུགུཎཾཡེཝ དྷམྨཀཐཾ ཀཐེཏྭཱ. ཨནུམོདནཾ ཀཏྭཱཏི ཨེཏྠཱཔི ‘‘ཀམྨཊྛཱནསཱིསེནེཝཱ’’ཏི ཨཱནེཏྭཱ སམྦནྡྷིཏབྦཾ. སམྤཏྟཔརིཙྪེདེནེཝཱཏི པརིཙིཏོ ཨཔརིཙིཏོཏིཨཱདིཝིབྷཱགཾ ཨཀཏྭཱ སམྤཏྟཀོཊིཡཱ ཨེཝ, སམཱགམམཏྟེནེཝཱཏི ཨཏྠོ. བྷཡེཏི པརཙཀྐཱདིབྷཡེ.

ཀམྨཛཏེཛོཏི གཧཎིཾ སནྡྷཱཡཱཧ. ཀམྨཊྛཱནཝཱིཐིཾ ནཱརོཧཏི ཁུདཱཔརིསྶམེན ཀིལནྟཀཱཡཏྟཱ སམཱདྷཱནཱབྷཱཝཏོ. ཨཝསེསཊྛཱནེཏི ཡཱགུཡཱ ¶ ཨགྒཧིཏཊྛཱནེ. པོངྑཱནུཔོངྑནྟི ཀམྨཊྛཱནུཔཊྛཱནསྶ ¶ ཨཝིཙྪེད-དསྶནམེཏཾ, ཡཐཱ པོངྑཱནུཔོངྑཾ པཝཏྟཱཡ སརཔཊིཔཱཊིཡཱ ཨནཝིཙྪེདོ, ཨེཝམེཏསྶཔི ཀམྨཊྛཱནུཔཊྛཱནསྶཱཏི ཝུཏྟཾ ཧོཏི.

ནིཀྑིཏྟདྷུརོ བྷཱཝནཱནུཡོགེ. ཝཏྟཔཊིཔཏྟིཡཱ ཨཔཱུརཎེན སབྦཝཏྟཱནི བྷིནྡིཏྭཱ. ཀཱམེ ཨཝཱིཏརཱགོ ཧོཏི. ཀཱཡེ ཨཝཱིཏརཱགོ. རཱུཔེ ཨཝཱིཏརཱགོ. ཡཱཝདཏྠཾ ཨུདརཱཝདེཧཾ བྷུཉྫིཏྭཱ སེཡྻསུཁཾ པསྶསུཁཾ མིདྡྷསུཁཾ ཨནུཡུཏྟོ ཝིཧརཏི. ཨཉྙཏརཾ དེཝནིཀཱཡཾ པཎིདྷཱཡ བྲཧྨཙརིཡཾ ཙརཏཱི’’ཏི (དཱི. ནི. ༣.༣༢༠; མ. ནི. ༡.༡༨༦) ཨེཝཾ ཝུཏྟཾ པཉྩཝིདྷཙེཏོཝིནིབནྡྷཙིཏྟོ. ཙརིཏྭཱཏི པཝཏྟིཏྭཱ.

གཏཔཙྩཱགཏིཀཝཏྟཝསེནཱཏི བྷཱཝནཱསཧིཏཾཡེཝ བྷིཀྑཱཡ གཏཔཙྩཱགཏཾ གམནཔཙྩཱགམནཾ ཨེཏསྶ ཨཏྠཱིཏི གཏཔཙྩཱགཏིཀཾ, ཏདེཝ ཝཏྟཾ, ཏསྶ ཝསེན. ཨཏྟནོ ཧིཏསུཁཾ ཀཱམེནྟི ཨིཙྪནྟཱིཏི ཨཏྟཀཱམཱ, དྷམྨཙྪནྡཝནྟོ. ‘‘དྷམྨོ’’ཏི ཧི ཧིཏཾ ཏཾནིམིཏྟཀཉྩ སུཁནྟི. ཨཐ ཝཱ ཝིཉྙཱུནཾ དྷམྨཱནཾ ཨཏྟནིཡཏྟཱ ཨཏྟབྷཱཝཔརིཙྪནྣཏྟཱ ཙ ཨཏྟཱ ནཱམ དྷམྨོ. ཏེནཱཧ བྷགཝཱ – ‘‘ཨཏྟདཱིཔཱ, བྷིཀྑཝེ, ཝིཧརཐ ཨཏྟསརཎཱ’’ཏིཨཱདི (སཾ. ནི. ༣.༤༣). ཏཾ ཀཱམེནྟི ཨིཙྪནྟཱིཏི ཨཏྟཀཱམཱ. ཨུསབྷཾ ནཱམ ཝཱིསཏི ཡཊྛིཡོ. ཏཱཡ སཉྙཱཡཱཏི ཏཱཡ པཱསཱཎསཉྙཱཡ, ‘‘ཨེཏྟཀཾ ཋཱནམཱགཏཱ’’ཏི ཛཱནནྟཱཏི ཨདྷིཔྤཱཡོ. སོ ཨེཝ ནཡོ ཨཡཾ བྷིཀྑཱུཏིཨཱདིཀོ ཡོ ཋཱནེ ཝུཏྟོ, སོ ཨེཝ ནིསཛྫཱཡཔི ནཡོ. པཙྪཏོ ཨཱགཙྪནྟཱནཾ ཚིནྣབྷཏྟབྷཱཝབྷཡེནཔི ཡོནིསོམནསིཀཱརཾ པརིབྲཱུཧེཏི.

མདྡནྟཱཏི དྷཉྙཀརཎཊྛཱནེ སཱལིསཱིསཱནི མདྡནྟཱ. མཧཱཔདྷཱནཾ པཱུཛེསྶཱམཱིཏི ཨམྷཱཀཾ ཨཏྠཱཡ ལོཀནཱཐེན ཚ ཝསྶཱནི ཀཏཾ དུཀྐརཙརིཡཾ ཨེཝཱཧཾ ཡཐཱསཏྟི པཱུཛེསྶཱམཱིཏི. པཊིཔཏྟིཔཱུཛཱ ཧི སཏྠུཔཱུཛཱ, ན ཨཱམིསཔཱུཛཱཏི. ཋཱནཙངྐམམེཝཱཏི ཨདྷིཊྛཱཏབྦཨིརིཡཱཔཐཀཱལཝསེན ཝུཏྟཾ, ན བྷོཛནཱདིཀཱལེསུ ཨཝསྶཾ ཀཱཏབྦནིསཛྫཱཡ པཊིཀྑེཔཝསེན.

ཝཱིཐིཾ ཨོཏརིཏྭཱ ཨིཏོ ཙིཏོ ཨནོལོཀེཏྭཱ པཋམམེཝ ཝཱིཐིཡོ སལླཀྑེཏབྦཱཏི ཨཱཧ ‘‘ཝཱིཐིཡོ སལླཀྑེཏྭཱ’’ཏི. ཡཾ སནྡྷཱཡ ¶ ཝུཙྩཏི – ‘‘པཱསཱདིཀེན ཨབྷིཀྐནྟེནཱ’’ཏིཨཱདི. ཏཾ དསྶེཏུཾ ‘‘ཏཏྠ ཙཱ’’ཏིཨཱདི ཝུཏྟཾ. ཨཱཧཱརེ པཊིཀཱུལསཉྙཾ ཨུཔཊྛཔེཏྭཱཏིཨཱདཱིསུ ཡཾ ཝཏྟབྦཾ, ཏཾ ཧེཊྛཱ ཝུཏྟམེཝ. ཨཊྛངྒསམནྣཱགཏནྟི ‘‘ཡཱཝདེཝ ཨིམསྶ ཀཱཡསྶ ཋིཏིཡཱ’’ཏིཨཱདིནཱ (མ. ནི. ༡.༢༣; ༢.༢༤; ༣.༧༥; སཾ. ནི. ༤.༡༢༠; ཨ. ནི. ༦.༥༨; ༨.༩) ཝུཏྟེཧི ཨཊྛཧི ཨངྒེཧི སམནྣཱགཏཾ ཀཏྭཱ. ནེཝ དཝཱཡཱཏིཨཱདི པན པཊིཀྑེཔདསྶནཾ.

པཙྩེཀབོདྷིཾ ¶ སཙྪིཀརོཏི, ཡདི ཨུཔནིསྶཡསམྤནྣོ ཧོཏཱིཏི སམྦནྡྷོ. ཨིདཉྩ ཡཐཱ ཧེཊྛཱ ཏཱིསུ ཋཱནེསུ, ཨེཝཾ ཨིཏོ པརེསུ ཋཱནེསུ ཨུཔནེཏྭཱ སམྦནྡྷིཏབྦཾ. ཏཏྠ པཙྩེཀབོདྷིཡཱ ཨུཔནིསྶཡསམྤདཱ ཀཔྤཱནཾ དྭེ ཨསངྑྱེཡྻཱནི སཏསཧསྶཉྩ ཏཛྫཾ པུཉྙཉཱཎསམྦྷཱརསམྦྷརཎཾ, སཱཝཀབོདྷིཡཾ ཨགྒསཱཝཀཱནཾ ཨེཀཾ ཨསངྑྱེཡྻཾ ཀཔྤསཏསཧསྶཉྩ, མཧཱསཱཝཀཱནཾ ཀཔྤསཏསཧསྶམེཝ ཏཛྫཾ སམྦྷཱརསམྦྷརཎཾ, ཨིཏརེསཾ ཨཏཱིཏཱསུ ཛཱཏཱིསུ ཝིཝཊྚསནྣིསྶཡཝསེན ནིབྦཏྟིཏཾ ནིབྦེདྷབྷཱགིཡཾ ཀུསལཾ. བཱཧིཡོ དཱརུཙཱིརིཡོཏི བཱཧིཡཝིསཡེ ཛཱཏསཾཝདྡྷཏཱཡ བཱཧིཡོ, དཱརུཙཱིརཔརིཧརཎེན དཱརུཙཱིརིཡོཏི ལདྡྷསམཉྙོ. སོ ཧི ཨཱཡསྨཱ ‘‘ཏསྨཱཏིཧ ཏེ, བཱཧིཡ, ཨེཝཾ སིཀྑིཏབྦཾ – དིཊྛེ དིཊྛམཏྟཾ བྷཝིསྶཏཱི’’ཏིཨཱདིཝསཔྤཝཏྟེན (ཨུདཱ. ༡༠) སཾཁིཏྟེནེཝ ཨོཝཱདེན ཁིཔྤཏརཾ ཝིསེསཾ ཨདྷིགཙྪི. ཏེན ཝུཏྟཾ ‘‘ཁིཔྤཱབྷིཉྙོ ཝཱ ཧོཏི སེཡྻཐཱཔི ཐེརོ བཱཧིཡོ དཱརུཙཱིརིཡོ’’ཏི. ཨེཝཾ མཧཱཔཉྙོ ཝཱཏིཨཱདཱིསུ ཡཐཱརཧཾ ཝཏྟབྦནྟི.

ཏནྟི ཨསམྨུཡ྄ཧནཾ. ཨེཝནྟི ཨིདཱནི ཝུཙྩམཱནཱཀཱརདསྶནཾ. ཨཏྟཱ ཨབྷིཀྐམཏཱིཏི ཨིམིནཱ ཨནྡྷཔུཐུཛྫནསྶ དིཊྛིགྒཱཧཝསེན ཨབྷིཀྐམེ སམྨུཡ྄ཧནཾ དསྶེཏི, ཨཧཾ ཨབྷིཀྐམཱམཱིཏི པན ཨིམིནཱ མཱནགྒཱཧཝསེན, ཏདུབྷཡཾ པན ཏཎྷཱཡ ཝིནཱ ན ཧོཏཱིཏི ཏཎྷཱགྒཱཧཝསེནཔི སམྨུཡ྄ཧནཾ དསྶིཏམེཝ ཧོཏི, ‘‘ཏཐཱ ཨསམྨུཡ྄ཧནྟོ’’ཏི ཝཏྭཱ ཏཾ ཨསམྨུཡ྄ཧནཾ ཡེན གྷནཝིནིབྦྷོགེན ཧོཏི, ཏཾ དསྶེནྟོ ‘‘ཨབྷིཀྐམཱམཱིཏི ཙིཏྟེ ཨུཔྤཛྫམཱནེ’’ཏིཨཱདིམཱཧ. ཏཏྠ ཡསྨཱ ཝཱཡོདྷཱཏུཡཱ ཨནུགཏཱ ཏེཛོདྷཱཏུ ཨུདྡྷརཎསྶ པཙྩཡོ. ཨུདྡྷརཎགཏིཀཱ ཧི ཏེཛོདྷཱཏཱུཏི ཨུདྡྷརཎེ ཝཱཡོདྷཱཏུཡཱ ཏསྶཱ ཨནུགཏབྷཱཝོ, ཏསྨཱ ཨིམཱསཾ དྭིནྣམེཏྠ དྷཱཏཱུནཾ སཱམཏྠིཡཏོ ཨདྷིམཏྟཏཱ, ཨིཏརཱསཉྩ ཨོམཏྟཏཱཏི དསྶེནྟོ ‘‘ཨེཀེཀཔཱདུདྡྷརཎེ…པེ… བལཝཏིཡོ’’ཏི ཨཱཧ. ཡསྨཱ པན ཏེཛོདྷཱཏུཡཱ ཨནུགཏཱ ¶ ཝཱཡོདྷཱཏུ ཨཏིཧརཎཝཱིཏིཧརཎཱནཾ པཙྩཡོ. ཏིརིཡགཏིཀཱཡ ཧི ཝཱཡོདྷཱཏུཡཱ ཨཏིཧརཎཝཱིཏིཧརཎེསུ སཱཏིསཡོ བྱཱཔཱརོཏི ཏེཛོདྷཱཏུཡཱ ཏསྶཱནུགཏབྷཱཝོ, ཏསྨཱ ཨིམཱསཾ དྭིནྣམེཏྠ སཱམཏྠིཡཏོ ཨདྷིམཏྟཏཱ, ཨིཏརཱསཉྩ ཨོམཏྟཏཱཏི དསྶེནྟོ ‘‘ཏཐཱ ཨཏིཧརཎཝཱིཏིཧརཎེསཱུ’’ཏི ཨཱཧ. སཏིཔི ཨནུགམནཱནུགནྟབྦཏཱཝིསེསེ ཏེཛོདྷཱཏུཝཱཡོདྷཱཏུབྷཱཝམཏྟཾ སནྡྷཱཡ ཏཐཱ-སདྡགྒཧཎཾ.

ཏཏྠ ཨཀྐནྟཊྛཱནཏོ པཱདསྶ ཨུཀྑིཔནཾ ཨུདྡྷརཎཾ, ཋིཏཊྛཱནཾ ཨཏིཀྐམིཏྭཱ པུརཏོ ཧརཎཾ ཨཏིཧརཎཾ. རུཀྑཁཱཎུཨཱདིཔརིཧརཎཏྠཾ, པཏིཊྛིཏཔཱདགྷཊྚནཔརིཧརཎཏྠཾ ཝཱ པསྶེན ཧརཎཾ ཝཱིཏིཧརཎཾ. ཡཱཝ པཏིཊྛིཏཔཱདོ, ཏཱཝ ཨཱཧརཎཾ ཨཏིཧརཎཾ, ཏཏོ པརཾ ཧརཎཾ ཝཱིཏིཧརཎནྟི ཨཡཾ ཝཱ ཨེཏེསཾ ཝིསེསོ. ཡསྨཱ པཐཝཱིདྷཱཏུཡཱ ཨནུགཏཱ ཨཱཔོདྷཱཏུ ཝོསྶཛྫནསྶ པཙྩཡོ. གརུཏརསབྷཱཝཱ ཧི ཨཱཔོདྷཱཏཱུཏི ཝོསྶཛྫནེ པཐཝཱིདྷཱཏུཡཱ ཏསྶཱནུགཏབྷཱཝོ, ཏསྨཱ ཏཱསཾ དྭིནྣམེཏྠ ¶ སཱམཏྠིཡཏོ ཨདྷིམཏྟཏཱ, ཨིཏརཱསཉྩ ཨོམཏྟཏཱཏི དསྶེནྟོ ཨཱཧ ‘‘ཝོསྶཛྫནེ…པེ… བལཝཏིཡོ’’ཏི. ཡསྨཱ པན ཨཱཔོདྷཱཏུཡཱ ཨནུགཏཱ པཐཝཱིདྷཱཏུ སནྣིཀྑེཔནསྶ པཙྩཡོ. པཏིཊྛཱབྷཱཝེ ཝིཡ པཏིཊྛཱཔནེཔི ཏསྶཱ སཱཏིསཡཀིཙྩཏྟཱ ཨཱཔོདྷཱཏུཡཱ ཏསྶཱ ཨནུགཏབྷཱཝོ, ཏཐཱ གྷཊྚནཀིརིཡཱཡ པཐཝཱིདྷཱཏུཡཱ ཝསེན སནྣིརུམྦྷནསྶ སིཛ྄ཛྷནཏོ ཏཏྠཱཔི པཐཝཱིདྷཱཏུཡཱ ཨཱཔོདྷཱཏུཨནུགཏབྷཱཝོ, ཏསྨཱ ཝུཏྟཾ – ‘‘ཏཐཱ སནྣིཀྑེཔནསནྣིརུམྦྷནེསཱུ’’ཏི.

ཏཏྠཱཏི ཏསྨིཾ ཨབྷིཀྐམནེ, ཏེསུ ཝཱ ཝུཏྟེསུ ཨུདྡྷརཎཱདཱིསུ ཚསུ ཀོཊྛཱསེསུ. ཨུདྡྷརཎེཏི ཨུདྡྷརཎཀྑཎེ. རཱུཔཱརཱུཔདྷམྨཱཏི ཨུདྡྷརཎཱཀཱརེན པཝཏྟཱ རཱུཔདྷམྨཱ ཏཾསམུཊྛཱཔཀཱ ཨརཱུཔདྷམྨཱ ཙ. ཨཏིཧརཎཾ ན པཱཔུཎནྟི ཁཎམཏྟཱཝཊྛཱནཏོ. ཏཏྠ ཏཏྠེཝཱཏི ཡཏྠ ཡཏྠ ཨུཔྤནྣཱ, ཏཏྠ ཏཏྠེཝ. ན ཧི དྷམྨཱནཾ དེསནྟརསངྐམནཾ ཨཏྠི. པབྦཾ པབྦནྟིཨཱདི ཨུདྡྷརཎཱདིཀོཊྛཱསེ སནྡྷཱཡ སབྷཱགསནྟཏིཝསེན ཝུཏྟནྟི ཝེདིཏབྦཾ. ཨཏིཨིཏྟརོ ཧི རཱུཔདྷམྨཱནམྤི པཝཏྟིཀྑཎོ, གམནསྶཱདཱནཾ དེཝཔུཏྟཱནཾ ཧེཊྛུཔརིཡཱཡེན ¶ པཊིམུཁཾ དྷཱཝནྟཱནཾ སིརསི པཱདེ ཙ བདྡྷཁུརདྷཱརཱསམཱགམཏོཔི སཱིགྷཏརོ. ཡཐཱ ཏིལཱནཾ བྷཛྫིཡམཱནཱནཾ ཏཊཏཊཱཡནེན བྷེདོ ལཀྑཱིཡཏི, ཨེཝཾ སངྑཏདྷམྨཱནཾ ཨུཔྤཱདེནཱཏི དསྶནཏྠཾ ‘‘ཏཊཏཊཱཡནྟཱ’’ཏི ཝུཏྟཾ. ཨུཔྤནྣཱ ཧི ཨེཀནྟཏོ བྷིཛྫནྟཱིཏི.

སདྡྷིཾ རཱུཔེནཱཏི ཨིདཾ ཏསྶ ཏསྶ ཙིཏྟསྶ ནིརོདྷེན སདྡྷིཾ ནིརུཛ྄ཛྷནཀརཱུཔདྷམྨཝསེན ཝུཏྟཾ, ཡཾ ཏཏོ སཏྟརསམཙིཏྟསྶ ཨུཔྤཱདཀྑཎེ ཨུཔྤནྣཾ. ཨཉྙཐཱ ཡདི རཱུཔཱརཱུཔདྷམྨཱ སམཱནཀྑཎཱ སིཡུཾ, ‘‘རཱུཔཾ གརུཔརིཎཱམཾ དནྡྷནིརོདྷ’’ནྟིཨཱདིཝཙནེཧི ཝིརོདྷོ སིཡཱ. ཏཐཱ – ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི, ཡཾ ཨེཝཾ ལཧུཔརིཝཏྟཾ, ཡཐཡིདཾ ཙིཏྟ’’ནྟི (ཨ. ནི. ༡.༤༨) ཨེཝམཱདིཔཱལི༹ཡཱ ཙ. ཙིཏྟཙེཏསིཀཱ ཧི སཱརམྨཎསབྷཱཝཱ ཡཐཱབལཾ ཨཏྟནོ ཨཱརམྨཎཔཙྩཡབྷཱུཏམཏྠཾ ཝིབྷཱཝེནྟཱཡེཝ ཨུཔྤཛྫནྟཱིཏི ཏེསཾ ཏཾསབྷཱཝནིཔྥཏྟིཨནནྟརཾ ནིརོདྷོ, རཱུཔདྷམྨཱ པན ཨནཱརམྨཎཱ པཀཱསེཏབྦཱ. ཨེཝཾ ཏེསཾ པཀཱསེཏབྦབྷཱཝནིཔྥཏྟི སོལ༹སཧི ཙིཏྟེཧི ཧོཏཱིཏི ཏངྑཎཱཡུཀཏཱ ཏེསཾ ཨིཙྪིཏཱ, ལཧུཀཝིཉྙཱཎསྶ ཝིསཡསངྒཏིམཏྟཔཙྩཡཏཱཡ ཏིཎྞཾ ཁནྡྷཱནཾ, ཝིསཡསངྒཏིམཏྟཏཱཡ ཙ ཝིཉྙཱཎསྶ ལཧུཔརིཝཏྟིཏཱ, དནྡྷམཧཱབྷཱུཏཔཙྩཡཏཱཡ རཱུཔདྷམྨཱནཾ དནྡྷཔརིཝཏྟིཏཱ. ནཱནཱདྷཱཏུཡཱ ཡཐཱབྷཱུཏཉཱཎཾ ཁོ པན ཏཐཱགཏསྶེཝ, ཏེན ཙ པུརེཛཱཏཔཙྩཡོ རཱུཔདྷམྨོཝ ཝུཏྟོ, པཙྪཱཛཱཏཔཙྩཡོ ཙ ཏསྶེཝཱཏི རཱུཔཱརཱུཔདྷམྨཱནཾ སམཱནཀྑཎཏཱ ན ཡུཛྫཏེཝ, ཏསྨཱ ཝུཏྟནཡེནེཝེཏྠ ཨཏྠོ ཝེདིཏབྦོ.

ཨཉྙཾ ¶ ཨུཔྤཛྫཏེ ཙིཏྟཾ, ཨཉྙཾ ཙིཏྟཾ ནིརུཛ྄ཛྷཏཱིཏི ཡཾ པུརིམུཔྤནྣཾ ཙིཏྟཾ, ཏཾ ཨཉྙཾ, ཏཾ པན ནིརུཛ྄ཛྷནྟཾ ཨཔརསྶ ཨནནྟརཱདིཔཙྩཡོ ཧུཏྭཱ ཨེཝ ནིརུཛ྄ཛྷཏཱིཏི ཏཐཱལདྡྷཔཙྩཡཾ ཨཉྙཾ ཨུཔྤཛྫཏེ ཙིཏྟཾ. ཡདི ཨེཝཾ ཏེསཾ ཨནྟརོ ལབྦྷེཡྻཱཏི, ནོཏི ཨཱཧ ‘‘ཨཝཱིཙིམནུཔབནྡྷོ’’ཏི. ཡཐཱ ཝཱིཙི ཨནྟརོ ན ལབྦྷཏི, ‘‘ཏདེཝེཏ’’ནྟི ཨཝིསེསཝིདཱུ མཉྙནྟི, ཨེཝཾ ཨནུ ཨནུ པབནྡྷོ ཙིཏྟསནྟཱནོ རཱུཔསནྟཱནོ ཙ ནདཱིསོཏོཝ ནདིཡཾ ཨུདཀཔྤཝཱཧོ ཝིཡ ཝཏྟཏི.

ཨབྷིམུཁཾ ལོཀིཏཾ ཨཱལོཀིཏནྟི ཨཱཧ ‘‘པུརཏོཔེཀྑན’’ནྟི. ཡསྨཱ ཡཾདིསཱབྷིམུཁོ གཙྪཏི ཏིཊྛཏི ནིསཱིདཏི ཝཱ, ཏདབྷིམུཁཾ པེཀྑནཾ ཨཱལོཀིཏཾ ¶ , ཏསྨཱ ཏདནུགཏཾ ཝིདིསཱལོཀནཾ ཝིལོཀིཏནྟི ཨཱཧ ‘‘ཝིལོཀིཏཾ ནཱམ ཨནུདིསཱཔེཀྑན’’ནྟི. སམྨཛྫནཔརིབྷཎྜཱདིཀརཎེ ཨོལོཀིཏསྶ, ཨུལློཀཱཧརཎཱདཱིསུ ཨུལློཀིཏསྶ, པཙྪཏོ ཨཱགཙྪནྟསྶ པརིསྶཡསྶ པརིཝཛྫནཱདིཝསེན ཨཔལོཀིཏསྶ ཙ སིཡཱ སམྦྷཝོཏི ཨཱཧ – ‘‘ཨིམིནཱ ཝཱ མུཁེན སབྦཱནིཔི ཏཱནི གཧིཏཱནེཝཱ’’ཏི.

ཀཱཡསཀྑིནྟི ཀཱཡེན སཙྪིཀཏཝནྟཾ, པཙྩཀྑཀཱརིནནྟི ཨཏྠོ. སོཧཱཡསྨཱ ཝིཔསྶནཱཀཱལེ ཨེཝ ‘‘ཡམེཝཱཧཾ ཨིནྡྲིཡེསུ ཨགུཏྟདྭཱརཏཾ ནིསྶཱཡ སཱསནེ ཨནབྷིརཏིཨཱདིཝིཔྤཀཱརཾ པཏྟོ, ཏམེཝ སུཊྛུ ནིགྒཧེསྶཱམཱི’’ཏི ཨུསྶཱཧཛཱཏོ བལཝཧིརོཏྟཔྤོ, ཏཏྠ ཙ ཀཏཱདྷིཀཱརཏྟཱ ཨིནྡྲིཡསཾཝརེ ཨུཀྐཾསཔཱརམིཔྤཏྟོ, ཏེནེཝ ནཾ སཏྠཱ – ‘‘ཨེཏདགྒཾ, བྷིཀྑཝེ, མམ སཱཝཀཱནཾ བྷིཀྑཱུནཾ ཨིནྡྲིཡེསུ གུཏྟདྭཱརཱནཾ ཡདིདཾ ནནྡོ’’ཏི (ཨ. ནི. ༡.༢༣༠) ཨེཏདགྒེ ཋཔེསི.

སཱཏྠཀཏཱ ཙ སཔྤཱཡཏཱ ཙ ཝེདིཏབྦཱ ཨཱལོཀིཏཝིལོཀིཏསྶཱཏི ཨཱནེཏྭཱ སམྦནྡྷོ. ཏསྨཱཏི ཀམྨཊྛཱནཱཝིཛཧནསྶེཝ གོཙརསམྤཛཉྙབྷཱཝཏོཏི ཝུཏྟམེཝཏྠཾ ཧེཏུབྷཱཝེན པཙྩཱམསཏི. ཨཏྟནོ ཀམྨཊྛཱནཝསེནེཝ ཨཱལོཀནཝིལོཀནཾ ཀཱཏབྦཾ, ཁནྡྷཱདིཀམྨཊྛཱནིཀེཧི ཨཉྙོ ཨུཔཱཡོ ན གཝེསིཏབྦོཏི ཨདྷིཔྤཱཡོ. ཡསྨཱ ཨཱལོཀིཏཱདིསམཉྙཱཔི དྷམྨམཏྟསྶེཝ པཝཏྟིཝིསེསོ, ཏསྨཱ ཏསྶ ཡཱཐཱཝཏོ པཛཱནནཾ ཨསམྨོཧསམྤཛཉྙནྟི དསྶེཏུཾ ‘‘ཨབྦྷནྟརེ’’ཏིཨཱདི ཝུཏྟཾ. ཙིཏྟཀིརིཡཝཱཡོདྷཱཏུཝིཔྥཱརཝསེནཱཏི ཀིརིཡམཡཙིཏྟསམུཊྛཱནཝཱཡོདྷཱཏུཡཱ ཙལནཱཀཱརཔཝཏྟིཝསེན. ཨདྷོ སཱིདཏཱིཏི ཐོཀཾ ཨོཏརཏི. ཨུདྡྷཾ ལངྒྷེཏཱིཏི ལངྒྷནྟཾ ཝིཡ ཨུཔརི གཙྪཏི.

ཨངྒཀིཙྩཾ སཱདྷཡམཱནནྟི པདྷཱནབྷཱུཏཾ ཨངྒཀིཙྩཾ ནིཔྥཱདེནྟཾ, ཨུཔཔཏྟིབྷཝསྶ སརཱིརཾ ཧུཏྭཱཏི ཨཏྠོ. པཋམཛཝནེཔི…པེ… སཏྟམཛཝནེཔི ན ཧོཏཱིཏི ཨིདཾ པཉྩདྭཱརཝིཉྙཱཎཝཱིཐིཡཾ ‘‘ཨིཏྠཱི པུརིསོ’’ཏི ¶ རཛྫནཱདཱིནཾ ཨབྷཱཝཾ སནྡྷཱཡ ཝུཏྟཾ. ཏཏྠ ཧི ཨཱཝཛྫནཝོཊྛབྦནཱནཾ ཨཡོནིསོ ཨཱཝཛྫནཝོཊྛབྦནཝསེན ཨིཊྛེ ཨིཏྠིརཱུཔཱདིམྷི ལོབྷམཏྟཾ, ཨནིཊྛེ པཊིགྷམཏྟཾ ཨུཔྤཛྫཏི. མནོདྭཱརེ པན ‘‘ཨིཏྠཱི པུརིསོ’’ཏི རཛྫནཱདི ཧོཏི, ཏསྶ པཉྩདྭཱརཛཝནཾ མཱུལཾ, ཡཐཱཝུཏྟཾ ¶ ཝཱ སབྦཾ བྷཝངྒཱདི. ཨེཝཾ མནོདྭཱརཛཝནསྶ མཱུལབྷཱུཏདྷམྨཔརིཛཱནནཝསེནེཝ མཱུལཔརིཉྙཱ ཝུཏྟཱ, ཨཱགནྟུཀཏཱཝཀཱལིཀཏཱ པན པཉྩདྭཱརཛཝནསྶེཝ ཨཔུབྦབྷཱཝཝསེན ཙེཝ ཨིཏྟརབྷཱཝཝསེན ཙ ཝུཏྟཱ. ཧེཊྛུཔརིཡཝསེན བྷིཛྫིཏྭཱ པཏིཏེསཱུཏི ཧེཊྛིམསྶ ཨུཔརིམསྶ ཙ ཨཔརཱཔརཾ བྷངྒཔྤཏྟིམཱཧ.

ཏནྟི ཛཝནཾ. ཏསྶ ཛཝནསྶ ན ཡུཏྟནྟི སམྦནྡྷོ. ཨཱགནྟུཀོ ཨབྦྷཱགཏོ. ཨུདཡབྦཡཔརིཙྪིནྣོ ཏཱཝཏཀོ ཀཱལོ ཨེཏེསནྟི ཏཱཝཀཱལིཀཱནི.

ཨེཏཾ ཨསམྨོཧསམྤཛཉྙཾ. སམཝཱཡེཏི སཱམགྒིཡཾ. ཏཏྠཱཏི པཉྩཀྑནྡྷཝསེན ཨཱལོཀནཝིལོཀནེ པཉྙཱཡམཱནེ ཏབྦིནིམུཏྟོ – ཀོ ཨེཀོ ཨཱལོཀེཏི, ཀོ ཝིལོཀེཏི. ཨུཔནིསྶཡཔཙྩཡོཏི ཨིདཾ སུཏྟནྟནཡེན པརིཡཱཡཏོ ཝུཏྟཾ. སཧཛཱཏཔཙྩཡོཏི ནིདསྶནམཏྟམེཏཾ ཨཉྙམཉྙསམྤཡུཏྟཨཏྠིཨཝིགཏཱདིཔཙྩཡཱནམྤི ལབྦྷནཏོ.

ཀཱལེཏི སམིཉྫིཏུཾ ཡུཏྟཀཱལེ སམིཉྫནྟསྶ, ཏཐཱ པསཱརེཏུཾ ཡུཏྟཀཱལེ པསཱརེནྟསྶ. ‘‘མཎིསཔྤོ ནཱམ ཨེཀཱ སཔྤཛཱཏཱི’’ཏི ཝདནྟི. ལལ༹ནནྟི ཀམྤནཾ, ལཱིལཱ༹ཀརཎཾ ཝཱ.

ཨུཎྷཔཀཏིཀོ པརིལཱ༹ཧབཧུལཀཱཡོ. སཱིལསྶ ཝིདཱུསནེན ཨཧིཏཱཝཧཏྟཱ མིཙྪཱཛཱིཝཝསེན ཨུཔྤནྣཾ ཨསཔྤཱཡཾ. ‘‘ཙཱིཝརམྤི ཨཙེཏན’’ནྟིཨཱདིནཱ ཙཱིཝརསྶ ཝིཡ ཀཱཡོཔི ཨཙེཏནོཏི ཀཱཡསྶ ཨཏྟསུཉྙཏཱཝིབྷཱཝནེན ‘‘ཨབྦྷནྟརེ’’ཏིཨཱདིནཱ ཝུཏྟམེཝཏྠཾ པརིདཱིཔེནྟོ ཨིཏརཱིཏརསནྟོསསྶ ཀཱརཎཾ དསྶེཏི. ཏེནཱཧ ‘‘ཏསྨཱ’’ཏིཨཱདི.

ཙཏུཔཉྩགཎྛིཀཱཧཏོཏི ཨཱཧཏཙཏུཔཉྩགཎྛིཀོ, ཙཏུཔཉྩགཎྛིཀཱཧི ཝཱ ཧཏསོབྷོ.

ཨཊྛཝིདྷོཔི ཨཏྠོཏི ཨཊྛཝིདྷོཔི པཡོཛནཝིསེསོ. མཧཱསིཝཏྠེརཝཱདཝསེན ‘‘ཨིམསྶ ཀཱཡསྶ ཋིཏིཡཱ’’ཏིཨཱདིནཱ ནཡེན ཝུཏྟོ དཊྛབྦོ. ཨིམསྨིཾ པཀྑེ ‘‘ནེཝ དཝཱཡཱཏིཨཱདིནཱ ནཡེནཱ’’ཏི པན ཨིདཾ པཊིཀྑེཔངྒདསྶནམུཁེན པཱལི༹ ཨཱགཏཱཏི ཀཏྭཱ ཝུཏྟནྟི དཊྛབྦཾ.

པཐཝཱིསནྡྷཱརཀཛལསྶ ¶ ¶ ཏཾསནྡྷཱརཀཝཱཡུནཱ ཝིཡ པརིབྷུཏྟསྶ ཨཱཧཱརསྶ ཝཱཡོདྷཱཏུཡཱཝ ཨཱསཡེ ཨཝཊྛཱནནྟི ཨཱཧ – ‘‘ཝཱཡོདྷཱཏུཝསེནེཝ ཏིཊྛཏཱི’’ཏི. ཨཏིཧརཏཱིཏི ཡཱཝ མུཁཱ ཨབྷིཧརཏི. ཝཱིཏིཧརཏཱིཏི ཏཏོ ཀུཙྪིཡཾ ཝིམིསྶཾ ཀརོནྟོ ཧརཏི. ཨཏིཧརཏཱིཏི ཝཱ མུཁདྭཱརཾ ཨཏིཀྐཱམེནྟོ ཧརཏི. ཝཱིཏིཧརཏཱིཏི ཀུཙྪིགཏཾ པསྶཏོ ཧརཏི. པརིཝཏྟེཏཱིཏི ཨཔརཱཔརཾ ཙཱརེཏི. ཨེཏྠ ཙ ཨཱཧཱརསྶ དྷཱརཎཔརིཝཏྟནསཉྩུཎྞནཝིསོསནཱནི པཐཝཱིདྷཱཏུསཧིཏཱ ཨེཝ ཝཱཡོདྷཱཏུ ཀརོཏི, ན ཀེཝལཱཏི ཏཱནི པཐཝཱིདྷཱཏུཡཱ ཀིཙྩབྷཱཝེན ཝུཏྟཱནི, སཱ ཨེཝ དྷཱརཎཱདཱིནི ཀིཙྩཱནི ཀརོནྟསྶ སཱདྷཱརཎཱཏི ཝུཏྟཱནི. ཨལླཏྟཉྩ ཨནུཔཱལེཏཱིཏི ཡཐཱ ཝཱཡོདྷཱཏུཨཱདཱིཧི ཨཉྙེཧི ཝིསོསནཾ ན ཧོཏི, ཏཐཱ ཨནུཔཱལེཏི ཨལླབྷཱཝཾ. ཏེཛོདྷཱཏཱུཏི གཧཎཱིསངྑཱཏཱ ཏེཛོདྷཱཏུ. སཱ ཧི ཨནྟོཔཝིཊྛཾ ཨཱཧཱརཾ པརིཔཱཙེཏི. ཨཉྫསོ ཧོཏཱིཏི ཨཱཧཱརསྶ པཝིསནཱདཱིནཾ མགྒོ ཧོཏི. ཨཱབྷུཛཏཱིཏི པརིཡེསནཝསེན, ཨཛ྄ཛྷོཧརཎཛིཎྞཱཛིཎྞཏཱདིཔཊིསཾཝེདནཝསེན ཙ ཨཱཝཛྫེཏི, ཝིཛཱནཱཏཱིཏི ཨཏྠོ. ཏཾཏཾཝིཛཱནནསྶ པཙྩཡབྷཱུཏོཡེཝ ཧི པཡོགོ ‘‘སམྨཱཔཡོགོ’’ཏི ཝུཏྟོ. ཡེན ཧི པཡོགེན པརིཡེསནཱདི ནིཔྥཛྫཏི, སོ ཏབྦིསཡཝིཛཱནནམྤི ནིཔྥཱདེཏི ནཱམ ཏདཝིནཱབྷཱཝཏོ. ཨཐ ཝཱ སམྨཱཔཡོགཾ སམྨཱཔཊིཔཏྟིཾ ཨནྭཱཡ ཨཱགམྨ ཨཱབྷུཛཏི སམནྣཱཧརཏི. ཨཱབྷོགཔུབྦཀོ ཧི སབྦོཔི ཝིཉྙཱཎབྱཱཔཱརོཏི ཏཐཱ ཝུཏྟཾ.

གམནཏོཏི བྷིཀྑཱཙཱརཝསེན གོཙརགཱམཾ ཨུདྡིསྶ གམནཏོ. པརིཡེསནཏོཏི གོཙརགཱམེ བྷིཀྑཏྠཾ ཨཱཧིཎྜནཏོ. པརིབྷོགཏོཏི ཨཱཧཱརསྶ པརིབྷུཉྫནཏོ. ཨཱསཡཏོཏི པིཏྟཱདིཨཱསཡཏོ. ཨཱསཡཏི ཨེཏྠ ཨེཀཛ྄ཛྷཾ པཝཏྟམཱནོཔི ཀམྨབལཝཝཏྠིཏོ ཧུཏྭཱ མརིཡཱདཝསེན ཨཉྙམཉྙཾ ཨསངྐརཏོ སཡཏི ཏིཊྛཏི པཝཏྟཏཱིཏི ཨཱསཡོ, ཨཱམཱསཡསྶ ཨུཔརི ཏིཊྛནཀོ པིཏྟཱདིཀོ. མརིཡཱདཏྠོ ཧི ཨཡམཱཀཱརོ. ནིདྷེཏི ཡཐཱབྷུཏྟོ ཨཱཧཱརོ ནིཙིཏོ ཧུཏྭཱ ཏིཊྛཏི ཨེཏྠཱཏི ནིདྷཱནཾ, ཨཱམཱསཡོ, ཏཏོ ནིདྷཱནཏོ. ཨཔརིཔཀྐཏོཏི གཧཎཱིསངྑཱཏེན ཀམྨཛཏེཛེན ཨཝིཔཀྐཏོ. པརིཔཀྐཏོཏི ཡཐཱབྷུཏྟསྶ ཨཱཧཱརསྶ ཝིཔཀྐབྷཱཝཏོ. ཕལཏོཏི ནིཔྥཏྟིཏོ. ནིསྶནྡཏོཏི ཨིཏོ ཙིཏོ ཙ ཝིསྶནྡནཏོ ¶ . སམྨཀྑནཏོཏི སབྦསོ མཀྑནཏོ. ཨཡམེཏྠ སངྑེཔོ, ཝིཏྠཱརོ པན ཝིསུདྡྷིམགྒསཾཝཎྞནཱཡ (ཝིསུདྡྷི. མཧཱཊཱི. ༡.༢༩༤) གཧེཏབྦོ.

སརཱིརཏོ སེདཱ མུཙྩནྟཱིཏི ཝེགསནྡྷཱརཎེན ཨུཔྤནྣཔརིལཱ༹ཧཏོ སརཱིརཏོ སེདཱ མུཙྩནྟི. ཨཉྙེ ཙ རོགཱ ཀཎྞསཱུལབྷགནྡརཱདཡོ. ཨཊྛཱནེཏི མནུསྶཱམནུསྶཔརིགྒཧེ ཨཡུཏྟཊྛཱནེ ཁེཏྟདེཝཱཡཏནཱདིཀེ. ཀུདྡྷཱ ཧི མནུསྶཱ ཨམནུསྶཱཔི ཝཱ ཛཱིཝིཏཀྑཡཾ པཱཔེནྟི. ཝིསྶཊྛཏྟཱ ནེཝ ཏསྶ ¶ བྷིཀྑུནོ ཨཏྟནོ, ཀསྶཙི ཨནིསྶཛྫིཏཏྟཱ ཛིགུཙྪནཱིཡཏྟཱ ཙ ན པརསྶ, ཨུདཀཏུམྦཏོཏི ཝེལུ༹ནཱལི༹ཨཱདིཨུདཀབྷཱཛནཏོ. ཏནྟི ཚཌྜིཏཨུདཀཾ.

ཨེཏྠ ཙ ཨེཀོ ཨིརིཡཱཔཐོ དྭཱིསུ ཋཱནེསུ ཨཱགཏོ, སོ པུབྦེ ཨབྷིཀྐམཔཊིཀྐམགཧཎེན. ‘‘གམནེཔི པུརཏོ པཙྪཏོ ཙ ཀཱཡསྶ ཨབྷིཧརཎཾ ཝུཏྟནྟི ཨིདྷ གམནམེཝ གཧིཏ’’ནྟི ཨཔརེ. ཡསྨཱ ཨིདྷ སམྤཛཉྙཀཐཱཡཾ ཨསམྨོཧསམྤཛཉྙམེཝ དྷུརཾ, ཏསྨཱ ཨནྟརནྟརེ ཨིརིཡཱཔཐེ པཝཏྟཱནཾ རཱུཔཱརཱུཔདྷམྨཱནཾ ཏཏྠ ཏཏྠེཝ ནིརོདྷདསྶནཝསེན སམྤཛཱནཀཱརིཏཱ གཧིཏཱཏི. མཛ྄ཛྷིམབྷཱཎཀཱ པན ཨེཝཾ ཝདནྟི – ཨེཀོ ཧི བྷིཀྑུ གཙྪནྟོ ཨཉྙཾ ཙིནྟེནྟོ, ཨཉྙཾ ཝིཏཀྐེནྟོ གཙྪཏི, ཨེཀོ ཀམྨཊྛཱནཾ ཨཝིསྶཛྫེཏྭཱཝ གཙྪཏི, ཏཐཱ ཨེཀོ ཏིཊྛནྟོ, ནིསཱིདནྟོ, སཡནྟོ ཨཉྙཾ ཙིནྟེནྟོ, ཨཉྙཾ ཝིཏཀྐེནྟོ སཡཏི, ཨེཀོ ཀམྨཊྛཱནཾ ཨཝིསྶཛྫེཏྭཱཝ སཡཏི. ཨེཏྟཀེན པན ན པཱཀཊཾ ཧོཏཱིཏི ཙངྐམནེན དཱིཔེནྟི. ཡོ བྷིཀྑུ ཙངྐམནཾ ཨོཏརིཏྭཱ ཙངྐམནཀོཊིཡཾ ཋིཏོ པརིགྒཎྷཱཏི – ‘‘པཱཙཱིནཙངྐམནཀོཊིཡཾ པཝཏྟཱ རཱུཔཱརཱུཔདྷམྨཱ པཙྪིམཙངྐམནཀོཊིཾ ཨཔྤཏྭཱ ཨེཏྠེཝ ནིརུདྡྷཱ, པཙྪིམཙངྐམནཀོཊིཡཾ པཝཏྟཱཔི པཱཙཱིནཙངྐམནཀོཊིཾ ཨཔྤཏྭཱ ཨེཏྠེཝ ནིརུདྡྷཱ, ཙངྐམནམཛ྄ཛྷེ པཝཏྟཱ ཨུབྷོ ཀོཊིཡོ ཨཔྤཏྭཱ ཨེཏྠེཝ ནིརུདྡྷཱ, ཙངྐམནེ པཝཏྟཱ རཱུཔཱརཱུཔདྷམྨཱ ཋཱནཾ ཨཔྤཏྭཱ ཨེཏྠེཝ ནིརུདྡྷཱ, ཋཱནེ པཝཏྟཱ ནིསཛྫཾ ཨཔྤཏྭཱ ཨེཏྠེཝ ནིརུདྡྷཱ, ནིསཛྫཱཡ པཝཏྟཱ སཡནཾ ཨཔྤཏྭཱ ཨེཏྠེཝ ནིརུདྡྷཱ’’ཏི, ཨེཝཾ པརིགྒཎྷནྟོ པརིགྒཎྷནྟོ ཨེཝ ཙིཏྟཾ བྷཝངྒཾ ཨོཏཱརེཏི, ཨུཊྛཧནྟོ པན ཀམྨཊྛཱནཾ གཧེཏྭཱཝ ཨུཊྛཧཏི. ཨཡཾ བྷིཀྑུ གཏཱདཱིསུ སམྤཛཱནཀཱརཱི ནཱམ ཧོཏཱིཏི.

ཨེཝམྤི ¶ སུཏྟེ ཀམྨཊྛཱནཾ ཨཝིབྷཱུཏཾ ཧོཏི, ཀམྨཊྛཱནཾ ཨཝིབྷཱུཏཾ ན ཀཱཏབྦཾ, ཏསྨཱ སོ བྷིཀྑུ ཡཱཝ སཀྐོཏི, ཏཱཝ ཙངྐམིཏྭཱ ཋཏྭཱ ནིསཱིདིཏྭཱ སཡམཱནོ ཨེཝཾ པརིགྒཧེཏྭཱ སཡཏི – ‘‘ཀཱཡོ ཨཙེཏནོ མཉྩོ ཨཙེཏནོ, ཀཱཡོ ན ཛཱནཱཏི ‘ཨཧཾ མཉྩེ སཡིཏོ’ཏི, མཉྩོཔི ན ཛཱནཱཏི ‘མཡི ཀཱཡོ སཡིཏོ’ཏི, ཨཙེཏནོ ཀཱཡོ ཨཙེཏནེ མཉྩེ སཡིཏོ’’ཏི, ཨེཝཾ པརིགྒཎྷནྟོ ཨེཝ ཙིཏྟཾ བྷཝངྒཾ ཨོཏཱརེཏི, པབུཛ྄ཛྷནྟོ ཀམྨཊྛཱནཾ གཧེཏྭཱཝ པབུཛ྄ཛྷཏཱིཏི ཨཡཾ སུཏྟེ སམྤཛཱནཀཱརཱི ནཱམ ཧོཏི. ཀཱཡིཀཱདིཀིརིཡཱནིབྦཏྟནེན ཏམྨཡཏྟཱ ཨཱཝཛྫནཀིརིཡཱནིབྦཏྟཀཏྟཱ ཨཱཝཛྫནཀིརིཡཱསམུཊྛིཏཏྟཱ ཙ ཛཝནཾ, སབྦམྤི ཝཱ ཚདྭཱརཔྤཝཏྟཾ ཀིརིཡཱམཡཔཝཏྟཾ ནཱམ, ཏསྨིཾ སཏི ཛཱགརིཏཾ ནཱམ ཧོཏཱིཏི པརིགྒཎྷནྟོ ཛཱགརིཏེ སམྤཛཱནཀཱརཱི ནཱམ. ཨཔིཙ རཏྟིནྡིཝཾ ཚ ཀོཊྛཱསེ ཀཏྭཱ པཉྩ ཀོཊྛཱསེ ཛགྒནྟོཔི ཛཱགརིཏེ སམྤཛཱནཀཱརཱི ནཱམ ཧོཏཱིཏི.

ཝིམུཏྟཱཡཏནསཱིསེ ¶ ཋཏྭཱ དྷམྨཾ དེསེནྟོཔི བཱཏྟིཾསཏིརཙྪཱནཀཐཾ པཧཱཡ དསཀཐཱཝཏྠུནིསྶིཏསཔྤཱཡཀཐཾ ཀཐེནྟོཔི བྷཱསིཏེ སམྤཛཱནཀཱརཱི ནཱམ ཧོཏི. ཨཊྛཏིཾསཱཡ ཨཱརམྨཎེསུ ཙིཏྟརུཙིཡཾ ཨཱརམྨཎཾ མནསིཀཱརཾ པཝཏྟེནྟོཔི དུཏིཡཛ྄ཛྷཱནཾ སམཱཔནྣོཔི ཏུཎྷཱིབྷཱཝེ སམྤཛཱནཀཱརཱི ནཱམ. དུཏིཡཉྷི ཛྷཱནཾ ཝཙཱིསངྑཱརཔྤཧཱནཏོ ཝིསེསཏོ ཏུཎྷཱིབྷཱཝོ ནཱམཱཏི. ཨོཊྛེ ཙཱཏིཨཱདཱིསུ ཙ-སདྡེན ཀཎྛསཱིསནཱབྷིཨཱདཱིནཾ སངྒཧོ དཊྛབྦོ. ཏདནུརཱུཔཾ པཡོགནྟི ཏསྶ ཨུཔྤཏྟིཡཱ ཨནུཙྪཝིཀཾ ཙིཏྟསྶ པཝཏྟིཨཱཀཱརསཉྙིཏཾ པཡོགཾ, ཡཏོ སབྦེ ཝིཙཱརཱདཡོ ནིཔྥཛྫནྟི. ཨུཔཱདཱརཱུཔཔཝཏྟིཡཱཏི ཝིཉྙཏྟིཝིཀཱརསཧིཏསདྡཱཡཏནུཔྤཏྟིཡཱ. ཨེཝནྟི ཝུཏྟཔྤཀཱརེན. སཏྟསུཔི ཋཱནེསུ ཨསམྨུཡ྄ཧནཝསེན ‘‘མིསྶཀ’’ནྟི ཝུཏྟཾ. མགྒསམྨཱསཏིཡཱཔི ཀཱཡཱནུཔསྶནཱདིཨནུརཱུཔཏྟཱ སམྤཛཉྙཱནུརཱུཔཔུབྦབྷཱགཾ སཏྟཊྛཱནིཡསྶ ཨེཀནྟལོཀིཡཏྟཱ.

སཏིསུཏྟཝཎྞནཱ ནིཊྛིཏཱ.

༣. བྷིཀྑུསུཏྟཝཎྞནཱ

༣༦༩. ཡསྨཱ སོ བྷིཀྑུ ‘‘དེསེཏུ མེ, བྷནྟེ, བྷགཝཱ སཾཁིཏྟེན དྷམྨ’’ནྟི སཾཁིཏྟེན དྷམྨདེསནཾ ཡཱཙི, ཏསྶ སཾཁིཏྟརུཙིབྷཱཝཏོ, ཏསྨཱ སཾཁིཏྟེནེཝ ¶ དྷམྨཾ དེསེཏུཀཱམོ བྷགཝཱ ‘‘ཏསྨཱཏིཧཱ’’ཏིཨཱདིམཱཧཱཏི ཝུཏྟཾ – ‘‘ཡསྨཱ སཾཁིཏྟེན དེསནཾ ཡཱཙསི, ཏསྨཱ’’ཏི. ཀམྨསྶཀཏཱདིཊྛིཀསྶེཝ ལོཀིཡལོཀུཏྟརགུཎཝིསེསཱ ཨིཛ྄ཛྷནྟི, ན དིཊྛིཝིཔནྣསྶ, ཏསྨཱ ཝུཏྟཾ ‘‘དིཊྛཱིཏི ཀམྨསྶཀཏཱདིཊྛཱི’’ཏི.

༤. སཱལསུཏྟཝཎྞནཱ

༣༧༠. ཡཐཱནུསིཊྛཾ པཊིཔཛྫམཱནེ ཨཔཱཡདུཀྑེ ཨཔཱཏནཝསེན དྷཱརཎཊྛེན དྷམྨོ, སཱསནབྲཧྨཙརིཡཾ, ཏདེཝ ཏདངྒཱདིཝསེན ཀིལེསཱནཾ ཝིནཡནཊྛེན ཝིནཡོཏི ཨཱཧ – ‘‘དྷམྨོཏི ཝཱ…པེ… ནཱམ’’ནྟི. པཊིཔཀྑདྷམྨེཧི ཨནབྷིབྷཱུཏཏཱཡ ཨེཀོ ཨུདེཏཱིཏི ཨེཀོདཱིཏི ལདྡྷནཱམོ སམཱདྷི བྷཱུཏོ ཛཱཏོ ཨེཏེསནྟི ཨེཀོདིབྷཱུཏཱ. ཨེཏྠ ཙ ཨེཀོདིབྷཱུཏཱཏི ཨེཏེན ཨུཔཙཱརཛ྄ཛྷཱནཱཝཧོ པུབྦབྷཱགིཀོ སམཱདྷི ཝུཏྟོ. སམཱཧིཏཱཏི ཨེཏེན ཨུཔཙཱརཔྤནཱསམཱདྷི. ཨེཀགྒཙིཏྟཱཏི ཨེཏེན སུབྷཱཝིཏོ ཝསིཔྤཏྟོ ཨཔྤནཱསམཱདྷི ཝུཏྟོཏི ཝེདིཏབྦོ. ནཝཀབྷིཀྑཱུཧི བྷཱཝིཏསཏིཔཊྛཱནཱ པུབྦབྷཱགཱ. ཏེ ཧི ཡཐཱབྷཱུཏཉཱཎཱཡ བྷཱཝིཏཱ. ཡཐཱབྷཱུཏཉཱཎནྟི ཧི སོཏཱཔཏྟིམགྒཉཱཎཾ ཨིདྷཱདྷིཔྤེཏཾ. ཁཱིཎཱསཝེཧི བྷཱཝིཏསཏིཔཊྛཱནཱཔི པུབྦབྷཱགཱ. ཏེསཉྷི ཀཏཀརཎཱིཡཱནཾ ¶ དིཊྛདྷམྨསུཁཝིཧཱརཱཡ སཏིཔཊྛཱནབྷཱཝནཱ, སེཀྑཱནཾ པན སཏིཔཊྛཱནབྷཱཝནཱ པརིཉྙཏྠཱཡ པཝཏྟཱ ལོཀིཡཱ, པརིཛཱནནཝསེན པཝཏྟཱ ལོཀུཏྟརཱཏི ‘‘མིསྶཀཱ’’ཏི ཝུཏྟཾ.

༥. ཨཀུསལརཱསིསུཏྟཝཎྞནཱ

༣༧༡. པཉྩམེ ཀེཝལོཏི ཀུསལདྷམྨེཧི ཨསམྨིསྶོ, ཏཏོ ཨེཝ སཀལོ སུཀྐཔཀྑོ ཨནཝཛྫཊྛོ. སེསཾ ཝུཏྟནཡམེཝ.

༦. སཀུཎགྒྷིསུཏྟཝཎྞནཱ

༣༧༢. པཱཀཏིཀསཀུཎཀུལེསུ བལཝབྷཱཝཏོ ཏེསཾ ཧནནཏོ སཀུཎགྒྷི. སེནོཏི ཝུཏྟཾ ‘‘སེནསྶེཏཾ ཨདྷིཝཙན’’ནྟི, སེནཝིསེསོ པན སོ ཝེདིཏབྦོ. ཨཱམིསཏྠཱཡ པཏྟཏྟཱ ‘‘ལོབྷསཱཧསེན པཏྟཱ’’ཏི ཝུཏྟཾ, ལོབྷནིམིཏྟེན སཱཧསཱཀཱརེན པཏྟཱཏི ཨཏྠོ. ནངྒལེན ཀཊྛཾ ཀསིཏཾ ནངྒལཀཊྛཾ, ཏཾ ཀརཱིཡཏི ཨེཏྠཱཏི ནངྒལཀཊྛཀརཎནྟི ¶ ཨཱཧ – ‘‘ཨདྷུནཱ ཀཊྛཾ ཁེཏྟཊྛཱན’’ནྟི. ལེཌྜུཡོ ཏིཊྛནྟི ཨེཏྠཱཏི ལེཌྜུཊྛཱནཾ, ལེཌྜུནིམིཏྟཾ ཀསིཏཊྛཱནཾ. ཝཛྫཏཱིཏི ཝདཾ, ཝཙནཾ. ཀུཙྪིཏཾ ཝདཾ ཨཝདཾ. གརཧནེ ཧི ཨཡཾ ཨ-ཀཱརོ ཡཐཱ – ‘‘ཨཔུཏྟོ ཨབྷརིཡཱ’’ཏི. ཨཝདཾ མཱནེཏཱིཏི ཨཝདམཱནཱ, ཨཏྟནོ བལམདེན ལཱཔཾ ཨཏིམཉྙིཏྭཱ ཝདནྟཱིཏི ཨཏྠོ. ཏེནེཝཱཧ ‘‘གཙྪ ཁོ, ཏྭཾ ལཱཔ, ཏཏྲཔི མེ གནྟྭཱ ན མོཀྑསཱི’’ཏི. ཡཾ པན ཨཊྛཀཐཱཡཾ ཝུཏྟཾ ‘‘ཨཏྟནོ བལསྶ སུཊྛུ ཝཎྞཾ ཝདམཱནཱ’’ཏི, ཏཏྠ ཨཏྟཏོ ཨཱཔནྣཾ གཧེཏྭཱ ཝུཏྟཾ. ‘‘ཝདམཱནོ’’ཏི ཝཱ པཱཋོ, སཱརམྦྷཝསེན ཨཝ྄ཧཱཡནྟོཏི ཨཏྠོ. ཏེནཱཧ ‘‘ཨེཧི ཁོ དཱནི སཀུཎགྒྷཱི’’ཏི. སུཊྛུ ཋཔེཏྭཱཏི ཛིཡཱམུཏྟསརསྶ ཝིཡ སཱིགྷཔཱཏཡོགྱཏཱཀརཎེན ཨུབྷོ པཀྑེ སམྨཱ ཋཔེཏྭཱ. ཨཡནྟི སཀུཎགྒྷི. ཉཏྭཱཏི ཡཐཱབྷཱུཏདསྶནེན ཨཏྟནོ ཉཱཎེན ཛཱནིཏྭཱ. ཕཱལཱིཡིཏྠཱཏི ཕཱལཙྪེདཏིཁིཎསིཁརེ སུཀྑལེཌྜུསྨིཾ བྷིཛྫིཏྠ.

༧. མཀྐཊསུཏྟཝཎྞནཱ

༣༧༣. སཉྩཱརོཏི སཉྩརཎཾ. ལེཔནྟི སིལེསསདིསཾ ཨཱལེཔནཾ. ཀཱཛསིཀྐཱ ཝིཡཱཏི ཀཱཛདཎྜཀེ ཨོལགྒེཏབྦཱ སིཀྐཱ ཝིཡ. ཨཔིཙ ཙཏསྶོ རཛྫུཡོ ཨུཔརི བནྡྷནཊྛཱནཉྩཱཏི པཉྩཊྛཱནཾ. ཨོཌྜིཏོཏི ཨོལམྦིཏོ. ཐུནནྟོཏི ནིཏྠུནནྟོ.

༨. སཱུདསུཏྟཝཎྞནཱ

༣༧༤. ཨཱཧཱརསམྤཱདནེན ¶ ཏཾཏཾཨཱཧཱརཝཏྠུགཏེ སཱུདེཏི པགྒྷརེཏཱིཏི སཱུདོ, བྷཏྟཀཱརཀོ. དཧརེཧི མནཱཔཏརཾ ཨཙྩེཏབྦཏོ ཨཏིཀྐམིཏབྦཏོ ཨཙྩཡཱ, བྷོཛནེ རསཝིསེསཱ, ཏསྨཱ ནཱནཙྩཡེཧཱིཏི ནཱནཔྤཀཱརརསཝིསེསེཧཱིཏི ཨཏྠོ. ཏེན ཝུཏྟཾ ‘‘ནཱནཙྩཡེཧཱི’’ཏིཨཱདི. ཨགྒཱིཡཏི ཨསངྐརཏོ ཝིབྷཛཱིཡཏཱིཏི ཨགྒོ, ཨམྦིལམེཝ ཨགྒོ ཨམྦིལགྒོཏི ཨཱཧ – ‘‘ཨམྦིལགྒེཧཱིཏི ཨམྦིལཀོཊྛཱསེཧཱི’’ཏི. དཱཏུཾ ཨབྷིཧརིཏབྦཏཱཡ ཨབྷིཧཱརཱ, དེཡྻདྷམྨཱ. ཏེནཱཧ – ‘‘ཨབྷིཧཊཱནཾ དཱཡཱན’’ནྟི. ཨིདཾ མེ ཀམྨཊྛཱནཾ ཨནུལོམཾཝཱཏི ཨིདཾ མམ ཀམྨཊྛཱནཾ ཨེཝཾ པཝཏྟམཱནཾ ཨནུལོམཱཝསཱནམེཝ ཧུཏྭཱ ཏིཊྛཏི. ཨེཝཾ པུན པཝཏྟམཱནཾ ¶ ཨུསྶཀྐིཏྭཱ ཝིསེསནིབྦཏྟནཏྠམེཝ ཧོཏཱིཏི ཨེཝཾ ནིམིཏྟཾ གཧེཏུཾ ན སཀྐོཏི བཱལོ ཨབྱཏྟོ, པཎྜིཏོ པན སཀྐོཏི. ཨཏྟནོ ཙིཏྟསྶཱཏི ཨཏྟནོ བྷཱཝནཱཙིཏྟསྶ. པུབྦབྷཱགཝིཔསྶནཱ སཏིཔཊྛཱནཱཝ ཀཐིཏཱ ‘‘སཀསྶ ཙིཏྟསྶ ནིམིཏྟཾ ཨུགྒཎྷཱཏཱི’’ཏི ཝུཏྟཏྟཱ.

༩. གིལཱནསུཏྟཝཎྞནཱ

༣༧༥. པཱདགཱམོཏི ནགརསྶ པདསདིསོ མཧནྟགཱམོ. ཏེནེཝཱཧ ‘‘ཝེསཱལིཡཾ ཝིཧརཏི ཝེལུ༹ཝགཱམཀེ’’ཏི. ཨཧིཏནིསེདྷན-ཧིཏནིཡོཛན-བྱསནཔརིཙྩཛན-ལཀྑཎོ མིཏྟབྷཱཝོ ཡེསུ ཨཏྠི, ཏེ མིཏྟཱ. ཡེ པན དིཊྛམཏྟསཧཱཡཱ, ཏེ སནྡིཊྛཱ. ཡེ སཝིསེསཾ བྷཏྟིམནྟོ, ཏེ སམྦྷཏྟཱཏི དསྶེནྟོ ‘‘མིཏྟཱཏི མིཏྟཱཝཱ’’ཏིཨཱདིམཱཧ. ཨསྶཱཏི བྷགཝཏོ. པཉྩམིཡཾ ཨཊྛམིཡཾ ཙཱཏུདྡསིཡཾ པཉྩདསིཡནྟི ཨེཀེཀསྨིཾ པཀྑེ ཙཏྟཱརོ ཝཱརེ ཀཏྭཱ མཱསསྶ ཨཊྛཝཱརེ.

ཝེདནཱནཾ བལཝབྷཱཝེན ཁརོ ཕརུསོ ཀཀྑལོ༹. ཨཱབཱདྷོཏི པུབྦཀམྨཧེཏུཏཱཡ ཀམྨསམུཊྛཱནོ ཨཱབཱདྷོ སངྑཱརདུཀྑཏཱསངྑཱཏོ སབྦཀཱལིཀཏྟཱ སརཱིརསྶ སབྷཱགརོགོ ནཱམ. ནཱཡམཱིདིསོ ཨཱབཱདྷོ, ཨཡཾ པན བཧལཏརབྱཱདྷིཏཱཡ ‘‘ཝིསབྷཱགརོགོ’’ཏི ཝུཏྟོ. ཨནྟ-སདྡོ སམཱིཔཔཝཏྟོཏི ཨཱཧ – ‘‘མརཎནྟཾ མརཎསནྟིཀ’’ནྟི. ཝེདནཱ…པེ… ཨཀརོནྟོ ཨུཀྐཾསགཏབྷཱཝིཏཀཱཡཱདིཏཱཡ. ཨཔཱིལི༹ཡམཱནོཏི ཨཔཱིལི༹ཡམཱནོ ཝིཡ. ཨོཝཱདམེཝ བྷིཀྑུསངྒྷསྶ ཨཔལོཀནནྟི ཨཱཧ – ‘‘ཨོཝཱདཱནུསཱསནིཾ ཨདཏྭཱཏི ཝུཏྟཾ ཧོཏཱི’’ཏི. པུབྦབྷཱགཝཱིརིཡཾ ནཱམ ཕལསམཱཔཏྟིཡཱ པརིཀམྨབྷཱུཏཝིཔསྶནཱཝཱིརིཡཾ. ཛཱིཝིཏམྤི ཛཱིཝིཏསངྑཱརོ པཏིཏུཾ ཨདཏྭཱ ཨཏྟབྷཱཝསྶ ཨབྷིསངྑརཎཏོ.

‘‘ཨེཏྟཀཾ ¶ ཀཱལཾ ཨཏིཀྐམིཏྭཱ ཝུཊྛཧིསྶཱམཱི’’ཏི ཁཎཔརིཙྪེདཝཏཱི སམཱཔཏྟི ཁཎིཀསམཱཔཏྟི. ནིགྒུམྦཾ ནིཛྫཊཾ ཀཏྭཱཏི རཱུཔསཏྟཀཱརཱུཔསཏྟཀཝསེན པཝཏྟིཡམཱནཾ ཝིཔསྶནཱབྷཱཝནཾ སབྦསོ ཁིལཝིརཧེན ནིགྒུམྦཾ, ཨབྱཱཀུལཏཱཡ ནིཛྫཊཾ ཀཏྭཱ. མཧཱཝིཔསྶནཱཝསེནཱཏི པཙྩེཀཾ སཝིསེསཾ ཝིཏྠཱརིཏཱནཾ ཨཊྛཱརསཱདཱིནཾ མཧཱཝིཔསྶནཱནཾ ཝསེན ཝིཔསྶིཏྭཱ སམཱཔནྣཱ ཡཱ སམཱཔཏྟི, སཱ སུཊྛུ ཝིཀྑམྦྷེཏི ཝེདནཾ མཧཱབལཝཏཱཡ པུབྦཱརམྨཎསྶ, མཧཱནུབྷཱཝཏཱཡ ཏཐཱཔཝཏྟིཏཝིཔསྶནཱཝཱིརིཡསྶ. ཡཐཱ ¶ ནཱམཱཏིཨཱདིནཱ ཏསྶ ནིདསྶནཾ དསྶེཏི. ཝེདནཱཏི དུཀྑཝེདནཱ. ཙུདྡསཧཱཀཱརེཧཱིཏི ཏསྶེཝ སཏྟཀདྭཡསྶ ཝསེན ཝདཏི. སནྣེཏྭཱཏི ཨནྟརནྟརཱ སམཱཔནྣཛ྄ཛྷཱནསམཱཔཏྟིསམྦྷཱུཏེན ཝིཔསྶནཱཔཱིཏིསིནེཧེན ཏེམེཏྭཱ. སམཱཔཏྟཱིཏི ཕལསམཱཔཏྟི.

གིལཱནཱ ཝུཊྛིཏོཏི གིལཱནབྷཱཝཏོ ཝུཊྛིཏོ. སརཱིརསྶ གརུཐདྡྷབྷཱཝཔྤཏྟི མདྷུརཀཏཱཏི ཨཱཧ – ‘‘སཉྫཱཏགརུབྷཱཝོ སཉྫཱཏཐདྡྷབྷཱཝོ’’ཏི. ནཱནཱཀཱརཏོཏི པུརཏྠིམཱདིབྷེདཏོ. སཏིཔཊྛཱནདྷམྨཱཏི པུབྦེ ཨཏྟནཱ བྷཱཝིཡམཱནཱ སཏིཔཊྛཱནདྷམྨཱ. པཱཀཊཱ ན ཧོནྟི ཀཱཡཙིཏྟཱནཾ ཨཀམྨཉྙཏཱཡ. ཏནྟི དྷམྨཱཏི པརིཡཏྟིདྷམྨཱ ན ཉཱཡནྟི.

ཨནནྟརཾ ཨབཱཧིརནྟི དྷམྨཝསེན པུགྒལཝསེན ཙ ཨནྟརབཱཧིརཾ ཨཀཏྭཱ. ཨེཏྟཀནྟིཨཱདིནཱ ཝུཏྟམེཝཏྠཾ ཝིཝརཏི. དཧརཀཱལེཏི ཨཏྟནོ དཧརཀཱལེ. ན ཨེཝཾ ཧོཏཱིཏི ‘‘ཨཧཾ བྷིཀྑུསངྒྷཾ པརིཧརིསྶཱམཱི’’ཏིཨཱདིཀོ མཱནཏཎྷཱམཱུལཀོ ཨིསྶཱམཙྪརིཡཱནཾ པཝཏྟིཨཱཀཱརོ ཏཐཱགཏསྶ ན ཧོཏི, ནཏྠེཝ པགེཝ ཏེསཾ སམུཙྪིནྣཏྟཱཏི ཨཱཧ – ‘‘བོདྷིཔལླངྐེཡེཝཱ’’ཏིཨཱདི. པཊིསངྑརཎེན ཝེཋེན མིསྶཀེན. མཉྙེཏི ཡཐཱཝུཏྟཾ པཊིསངྑརཎསཉྙིཏེན ཝེཋམིསྶཀེན ཝིཡ ཛརསཀཊཾ. ཨརཧཏྟཕལཝེཋེནཱཏི ཨརཧཏྟཕལསམཱཔཏྟིསཉྙིཏེན ཨཏྠབྷཱཝཝེཋེན.

ཕལསམཱཔཏྟིཡཱ ཨདྷིཔྤེཏཏྟཱ ‘‘ཨེཀཙྩཱནཾ ཝེདནཱནནྟི ལོཀིཡཱནཾ ཝེདནཱན’’ནྟི ཝུཏྟཾ. ཨཏྟདཱིཔཱཏི ཨེཏྠ ཨཏྟ-སདྡེན དྷམྨོ ཨེཝ ཝུཏྟོ, སྭཱཡམཏྠོ ཧེཊྛཱ ཝིབྷཱཝིཏོ ཨེཝ. ནཝཝིདྷོ ལོཀུཏྟརདྷམྨོ ཝེདིཏབྦོ. སོ ཧི ཙཏཱུཧི ཨོགྷེཧི ཨནཛ྄ཛྷོཏྠརཎཱིཡཏོ ‘‘དཱིཔོ’’ཏི ཝུཏྟོ. ཏམཨགྒེཏི ཏམཡོགཱབྷཱཝེན སདེཝཀསྶ ལོཀསྶ ཨགྒེ. སབྦེསནྟི སབྦེསཾ སིཀྑཱཀཱམཱནཾ. ཏེ ‘‘དྷམྨདཱིཔཱ ཝིཧརཐཱ’’ཏི ཝུཏྟཱ ཙཏུསཏིཔཊྛཱནགོཙརཱཝ བྷིཀྑཱུ ཨགྒེ བྷཝིསྶནྟི.

༡༠. བྷིཀྑུནུཔསྶཡསུཏྟཝཎྞནཱ

༣༧༦. ཀམྨཊྛཱནཀམྨིཀཱཏི ¶ ཀམྨཊྛཱནམནུཡུཏྟཱ. ཝིསེསེཏཱིཏི ཝིསེསོ, ཨཏིསཡོ, སྭཱཡཾ པུབྦཱཔརཝིསེསོ ཨུཔཱདཱཡུཔཱདཱཡ གཧེཏབྦོཏི ཏཾ དསྶེཏུཾ ‘‘ཏཏྠཱ’’ཏིཨཱདིམཱཧ.

ཨུཔྤཛྫཏི ¶ ཀིལེསཔརིལཱ༹ཧོཏི ཀཱཡེ ཨསུབྷཱདིཝསེན མནསིཀཱརཾ ཨདཧནྟསྶ མནསིཀཱརསྶ ཝཱིཐིཡཾ ཨཔཊིཔནྣཏཱ སུབྷཱདིཝསེན ཀཱཡཱརམྨཎོ ཀིལེསཔརིལཱ༹ཧོ ཙ ཨུཔྤཛྫཏི. ཝཱིརིཡཱརམྦྷསྶ ཨབྷཱཝེན ཏསྨིཾ ཨཱརམྨཎེ ཙེཏསོ ཝཱ ལཱིནཏྟཾ ཧོཏི, གོཙརཛ྄ཛྷཏྟཏོ བཧིདྡྷཱ པུཐུཏྟཱརམྨཎེ ཙིཏྟཾ ཝིཀྑིཔཏི. ཨེཝཾ ཀིལེསཔརིལཱ༹ཧེ ཙཱཏིཨཱདིནཱ ཏིཝིདྷམྤི བྷཱཝནཱནུཡོགསྶ ཀིལེསཝཏྠུབྷཱཝཾ ཨུཔཱདཱཡ སམུཙྩཡཝསེན ཨཊྛཀཐཱཡཾ ཝུཏྟཾ. ཡསྨཱ པན ཏེ པརིལཱ༹ཧལཱིནཏྟཝིཀྑེཔཱ ཨེཀཛ྄ཛྷཾ ན པཝཏྟནྟི, ཏསྨཱ པཱལི༹ཡཾ ‘‘ཀཱཡཱརམྨཎོ ཝཱ’’ཏིཨཱདིནཱ ཨནིཡམཏྠོ ཝཱ-སདྡོ གཧིཏོ. ཀིལེསཱནུརཉྫིཏེནཱཏི ཀིལེསཝིཝཎྞིཏཙིཏྟེན ཧུཏྭཱ ན ཝཏྟིཏབྦཾ. ཀཐཾ པན ཝཏྟིཏབྦནྟི ཨཱཧ ‘‘ཀིསྨིཉྩིདེཝཱ’’ཏི. ན ཙ ཝིཏཀྐེཏི ན ཙ ཝིཙཱརེཏཱིཏི ཀིལེསསཧགཏེ ཝིཏཀྐཝིཙཱརེ ན པཝཏྟེཏི. སུཁིཏོཏི ཛྷཱནསུཁེན སུཁིཏོ.

ཨིམསྶ བྷིཀྑུནོ བྷཱཝནཱ པཝཏྟཱཏི སམྦནྡྷོ. ཡསྨཱ ཧི ཨིམསྶ བྷིཀྑུནོ ཏཾ མཱུལཀམྨཊྛཱནཾ པརིཔནྠེ སཏི ཋཔེཏྭཱ བུདྡྷགུཎཱདིཨནུསྶརཎེན ཙིཏྟཾ པསཱདེཏྭཱ མཱུལཀམྨཊྛཱནབྷཱཝནཱ པཝཏྟཱ, ཏསྨཱ པཎིདྷཱཡ བྷཱཝནཱཏི ཝུཏྟནྟི སམྦནྡྷོ. ཨཊྛཔེཏྭཱཏི ཙིཏྟཾ ཨཔྤཝཏྟེཏྭཱཏི ཨཏྠོ ཝེདིཏབྦོ. ཀམྨཊྛཱནཱདཱིནཾ ཏིཎྞམྤི ཝསེན ཨཏྠཡོཛནཱ སམྦྷཝཏི. ཏེནཱཧ ‘‘ཏཏྠཱ’’ཏིཨཱདི. སཱརེནྟོ ཝིཡཱཏི རཐཾ ཝཱཧཡནྟོ ཝིཡ. སམཔྤམཱཎཏོ ཨཊྛཀཱདིཝསེན སུཏཙྪིཏཾ པཀྑིཔནྟོ ཝིཡ. སུཁེནེཝ ཀིལེསཱནཾ ཨོཀཱསཾ ཨདེནྟོ ཨནྟརཱ ཨསཛྫནྟོ ཨལགྒནྟོ. ཝིཔསྶནཱཙཱརསྶ ཨཱརདྡྷཝུཏྟིཏཾ ཨཔརིཔནྠཏཉྩ དསྶེནྟོ ཨོཔམྨདྭཡམཱཧ. བྱཱབྷངྒིཡཱཏི ཀཱཛདཎྜེན. ཀིལེསཔརིལཱ༹ཧཱདཱིནནྟི ཀིལེསཔརིལཱ༹ཧལཱིནཏྟཝིཀྑེཔཱནཾ.

གུལ༹ཁཎྜཱདཱིནཱིཏི གུལ༹ཁཎྜསཀྑརཁཎྜཱདཱིནི ཨུཙྪུཝིཀཱརབྷཱུཏཱནི. ‘‘ཀཱཡེ ཀཱཡཱནུཔསྶཱི ཝིཧརཱམཱི’’ཏིཨཱདིཝཙནཏོ ‘‘པུབྦབྷཱགཝིཔསྶནཱ ཀཐིཏཱ’’ཏི ཝུཏྟཾ.

ཨམྦཔཱལིཝགྒཝཎྞནཱ ནིཊྛིཏཱ.

༢. ནཱལནྡཝགྒོ

༢. ནཱལནྡསུཏྟཝཎྞནཱ

༣༧༨. དུཏིཡཝགྒེ ¶ ¶ པཋམསུཏྟཾ ཧེཊྛཱ ཝུཏྟནཡཏྟཱ སུཝིཉྙེཡྻནྟི ཏཾ ལངྒྷིཏྭཱ ‘‘དུཏིཡེ’’ཏི ཝུཏྟཾ.

བྷིཡྻཏརོ ཨབྷིཉྙཱཏོཏི སམྦོདྷིཡཱ སེཊྛཏརོཏི ཨབྷིལཀྑིཏོ. བྷིཡྻཏརཱབྷིཉྙོཏི སབྦསཏྟེསུ ཨདྷིཀཏརཔཉྙོ. ཏེནཱཧ ‘‘ཨུཏྟརིཏརཉཱཎོ’’ཏི. སམྨཱ ཨནཝསེསཏོ བུཛ྄ཛྷཏི ཨེཏེནཱཏི སམྦོདྷཱིཏི ཨཱཧ – ‘‘སམྦོདྷིཡནྟི སབྦཉྙུཏཉྙཱཎེ’’ཏི. ནིཔྤདེསཱ གཧིཏཱཏི ཨནཝསེསཱ བུདྡྷགུཎཱ གཧིཏཱ ཨགྒམགྒསིདྡྷིཡཱཝ བྷགཝཏོ སབྦགུཎཱནཾ སིདྡྷཏྟཱ. ན ཀེཝལཉྩ བུདྡྷཱནཾ, ཨཐ ཁོ ཨགྒསཱཝཀཔཙྩེཀབུདྡྷཱནམྤི ཏཾཏཾགུཎསམིཛ྄ཛྷནཾ ཨགྒམགྒཱདྷིགམེནེཝཱཏི དསྶེནྟོ ‘‘དྭེཔི ཨགྒསཱཝཀཱ’’ཏིཨཱདིམཱཧ.

ཨཔརོ ནཡོ – པསནྣོཏི ཨིམིནཱ པསཱདསྶ ཝཏྟམཱནཏཱ དཱིཔིཏཱཏི ཨུཔྤནྣསདྡྷོཏི ཨིམིནཱཔི སདྡྷཱཡ པཙྩུཔྤནྣཏཱ པཀཱསིཏཱཏི ཨཱཧ – ‘‘ཨེཝཾ སདྡཧཱམཱིཏི ཨཏྠོ’’ཏི. ཨབྷིཛཱནཱཏི ཨབྷིམུཁབྷཱཝེན སབྦཉྙེཡྻཾ ཛཱནཱཏཱིཏི ཨབྷིཉྙོ, བྷིཡྻོ ཨདྷིཀོ ཨབྷིཉྙོཏི བྷིཡྻོབྷིཉྙོ. སོ ཨེཝ ཨཏིསཡཝཙནིཙྪཱཝསེན བྷིཡྻོབྷིཉྙཏརོཏི ཝུཏྟོཏི ཨཱཧ – ‘‘བྷིཡྻཏརོ ཨབྷིཉྙཱཏོ’’ཏི. དུཏིཡཝིཀཔྤེ པན ཨབྷིཛཱནཱཏཱིཏི ཨབྷིཉྙཱ, ཨབྷིཝིསིཊྛཱ པཉྙཱ. བྷིཡྻོ ཨབྷིཉྙཱ ཨེཏསྶཱཏི བྷིཡྻོབྷིཉྙོ, སོ ཨེཝ ཨཏིསཡཝཙནིཙྪཱཝསེན བྷིཡྻོབྷིཉྙཏརོ. སྭཱཡཾ ཨསྶ ཨཏིསཡོ ཨབྷིཉྙཱཡ བྷིཡྻོབྷཱཝཀཏོཏི ཨཱཧ – ‘‘བྷིཡྻཏརཱབྷིཉྙོ ཝཱ’’ཏི. སམྦུཛ྄ཛྷཏི ཨེཏཱཡཱཏི སམྦོདྷི, སབྦཉྙུཏཉྙཱཎཾ ཨགྒམགྒཉཱཎཉྩ. སབྦཉྙུཏཉྙཱཎཔདཊྛཱནཉྷི ཨགྒམགྒཉཱཎཾ, ཨགྒམགྒཉཱཎཔདཊྛཱནཉྩ སབྦཉྙུཏཉྙཱཎཾ སམྦོདྷི ནཱམ. ཏཏྠ པདྷཱནཝསེན ཏདཏྠདསྶནེ པཋམཝིཀཔྤོ, པདཊྛཱནཝསེན དུཏིཡཝིཀཔྤོ. ཀསྨཱ པནེཏྠ ཨརཧཏྟམགྒཉཱཎསྶེཝ གཧཎཾ, ནནུ ཧེཊྛིམཱནིཔི བྷགཝཏོ མགྒཉཱཎཱནི སཝཱསནམེཝ ཡཐཱསཀཾ པཊིཔཀྑཝིདྷམནཝསེན པཝཏྟཱནི. སཝཱསནཔྤཧཱནཉྷི ཉེཡྻཱཝརཎཔྤཧཱནནྟི? སཙྩམེཏཾ, ཏཾ པན ཨཔརིཔུཎྞཾ པཊིཔཀྑཝིདྷམནསྶ ཝིཔྤཀཏབྷཱཝཏོཏི ཨཱཧ ‘‘ཨརཧཏྟམགྒཉཱཎེ ཝཱ’’ཏི. སབྦནྟི སམྨཱསམྦུདྡྷེན ཨདྷིགནྟབྦཾ སབྦཾ.

ཁཱདནཱིཡཱནཾ ¶ ¶ ཨུལཱ༹རཏཱ སཱཏརསཱནུབྷཱཝེནཱཏི ཨཱཧ ‘‘མདྷུརེ ཨཱགཙྪཏཱི’’ཏི. པསཾསཱཡ ཨུལཱ༹རཏཱ ཝིསིཊྛབྷཱཝེནཱཏི ཨཱཧ – ‘‘སེཊྛེ’’ཏི. ཨོབྷཱསསྶ ཨུལཱ༹རཏཱ མཧནྟབྷཱཝེནཱཏི ཝུཏྟཾ – ‘‘ཝིཔུལེ’’ཏི. ཨུསབྷསྶ ཨཡནྟི ཨཱསབྷཱི, ཨིདྷ པན ཨཱསབྷཱི ཝིཡཱཏི ཨཱསབྷཱི. ཏེནཱཧ – ‘‘ཨུསབྷསྶ ཝཱཙཱསདིསཱི’’ཏི. ཡེན གུཎེན སཱ ཏཾསདིསཱ, ཏཾ དསྶེཏུཾ ‘‘ཨཙལཱ ཨསམྤཝེདྷཱི’’ཏི ཝུཏྟཾ. ཡཏོ ཀུཏོཙི ཨནུསྶཝནཾ ཨནུསྶཝོ. ཝིཛྫཱཊྛཱནཱདཱིསུ ཀཏཔརིཙཡཱནཾ ཨཱཙརིཡཱནཾ ཏཾ ཏཾ ཨཏྠཾ ཉཱཔེནྟཱི པཝེཎཱི ཨཱཙརིཡཔརམྤརཱ. ཀེཝལཾ ཨཏྟནོ མཏིཡཱ ‘‘ཨིཏི ཀིར ཨེཝཾ ཀིརཱ’’ཏི པརིཀཔྤནཱ ཨིཏིཀིརཱ. པིཊཀསྶ གནྠསྶ སམྤདཱནཏོ བྷཱུཏཏོ ཏསྶ གཧཎཾ པིཊཀསམྤདཱནཾ. ཡཐཱསུཏཱནཾ ཨཏྟཱནཾ ཨཱཀཱརསྶ པརིཝིཏཀྐནཾ ཨཱཀཱརཔརིཝིཏཀྐོ. ཏཐེཝསྶ ‘‘ཨེཝམེཏ’’ནྟི དིཊྛིཡཱ ནིཛ྄ཛྷཱནཀྑམནཾ དིཊྛིནིཛ྄ཛྷཱནཀྑནྟི. ཨཱགམཱདྷིགམེཧི ཝིནཱ ཀེཝལཾ ཨནུསྶུཏཏོ ཏཀྐམགྒཾ ནིསྶཱཡ ཏཀྐནཾ ཏཀྐོ. ཨནུམཱནཝིདྷིཾ ནིསྶཱཡ གཧཎཾ ནཡགྒཱཧོ. ཡསྨཱ བུདྡྷཝིསཡེ ཋཏྭཱ བྷགཝཏོ ཨཡཾ ཐེརསྶ ཙོདནཱ ཐེརསྶ ཙ སོ ཨཝིསཡོ, ཏསྨཱ ‘‘པཙྩཀྑཏོ ཉཱཎེན པཊིཝིཛ྄ཛྷིཏྭཱ ཝིཡཱ’’ཏི ཝུཏྟཾ. སཱིཧནཱདོ ཝིཡཱཏི སཱིཧནཱདོ. ཏཾསདིསཏཱ ཙསྶ སེཊྛབྷཱཝེན, སོ ཙེཏྠ ཨེཝཾ ཝེདིཏབྦོཏི དསྶེནྟོ ‘‘སཱིཧནཱདོ’’ཏིཨཱདིམཱཧ. ཨུནྣཱདཡནྟེནཱཏི ཨསནིསདིསཾ ཀརོནྟེན.

ཨནུཡོགདཱཔནཏྠནྟི ཨནུཡོགཾ སོདྷཱཔེཏུཾ. ཝིམདྡཀྑམཉྷི སཱིཧནཱདཾ ནདནྟོ ཨཏྠཏོ ཨནུཡོགཾ སོདྷེཏི ནཱམ, ཨནུཡུཛ྄ཛྷནྟོ ཙ ནཾ སོདྷཱཔེཏི ནཱམ. དཱཏུནྟི སོདྷེཏུཾ. ཀེཙི ‘‘དཱནཏྠ’’ནྟི ཨཏྠཾ ཝདནྟི, ཏཾ ན ཡུཏྟཾ. ན ཧི ཡོ སཱིཧདཱནཾ ནདཏི, སོ ཨེཝ ཏཏྠ ཨནུཡོགཾ དེཏཱིཏི ཡུཛྫཏི. ནིགྷཾསནནྟི ཝིམདྡནཾ. དྷམམཱནནྟི ཏཱཔཡམཱནཾ. ཏཱཔནཉྩེཏྠ གགྒརིཡཱ དྷམྨཱཔནསཱིསེན ཝདཏི.

སབྦེ ཏེཏི སབྦེ ཏེ ཨཏཱིཏེ ནིརུདྡྷེ སམྨཱསམྦུདྡྷེ. ཏེནེཏཾ དསྶེཏི – ཡེ ཏེ ཨཧེསུཾ ཨཏཱིཏམདྡྷཱནཾ ཏཝ ཨབྷིནཱིཧཱརཏོ ཨོརཾ སམྨཱསམྦུདྡྷཱ, ཏེསཾ ཏཱཝ སཱཝཀཉཱཎགོཙརེ དྷམྨེ པརིཙྪིནྡནྟོ མཱརཱདཡོ ཝིཡ ཙ བུདྡྷཱནཾ ལོཀིཡཙིཏྟཱཙཱརཾ ཏྭཾ ཛཱནེཡྻཱསི. ཡེ པན ཏེ ཨབྦྷཏཱིཏཱ, ཏཏོ པརཏོ ཚིནྣཝཊུམཱ ཚིནྣཔཔཉྩཱ པརིཡཱདིནྣཝཊྚཱ སབྦདུཀྑཝཱིཏིཝཏྟཱ སམྨཱསམྦུདྡྷཱ, ཏེསཾ སབྦེསམྤི ཏཝ སཱཝཀཉཱཎསྶ ¶ ཨཝིསཡབྷཱུཏེ དྷམྨེ ཀཐཾ ཛཱནིསྶསཱིཏི. ཏེནཱཏི སམྦོདྷིསངྑཱཏེན སབྦཉྙུཏཉྙཱཎཔདཊྛཱནེན ཨརཧཏྟམགྒཉཱཎེན. ཨེཝཾསཱིལཱཏི ཏཱདིསསཱིལཱ. སམཱདྷིཔཀྑཱཏི སམཱདྷི ཙ སམཱདྷིཔཀྑཱ ཙ སམཱདྷིཔཀྑཱ ཨེཀདེསསརཱུཔེཀསེསནཡེན. ཏཏྠ སམཱདྷིཔཀྑཱཏི ཝཱིརིཡསཏིཡོ ཏདནུགུཎཱ ཙ དྷམྨཱ ཝེདིཏབྦཱ ¶ . ཛྷཱནསམཱཔཏྟཱིསུ ཡེབྷུཡྻེན ཝིཧཱརཝོཧཱརོ, ཛྷཱནསམཱཔཏྟིཡོ སམཱདྷིཔྤདྷཱནཱཏི ཝུཏྟཾ ‘‘སམཱདྷིཔཀྑཱནཾ དྷམྨཱནཾ གཧིཏཏྟཱ ཝིཧཱརོ གཧིཏོ’’ཏི.

ཡཐཱ པན ཧེཊྛཱ གཧིཏཱཔི སམཱདྷིཔཉྙཱ པཊིཔཀྑཏོ ཝིམུཏྟཏྟཱ ཝིམུཙྩན-སངྑཱཏ-ཀིཙྩཝིསེས-དསྶནཝསེན ཝིམུཏྟིཔརིཡཱཡེན པུན གཧིཏཱ ‘‘ཨེཝཾཝིམུཏྟཱ’’ཏི, ཨེཝཾ དིབྦཝིཧཱརོ དིབྦཝིཧཱརཝིསེསདསྶནཝསེན པུན གཧིཏོ ‘‘ཨེཝཾཝིཧཱརཱི’’ཏི, ཏསྨཱ སབྦེསཾ སམཱཔཏྟིཝིཧཱརཱནཾ ཝསེནེཏྠ ཨཏྠོ ཡུཛྫཏཱིཏི དཊྛབྦཾ. ཝིམུཏྟཱིཏི སངྑཾ གཙྪནྟི ཝིམུཙྩིཏྠཱཏི ཀཏྭཱ. ཨེས ནཡོ སེསེསུཔི. པཊིཔྤསྶདྡྷནྟེཏི པཊིཔྤསྶམྦྷནོསཱཔནེན. སབྦཀིལེསེཧི ནིསྶཊཏྟཱ ཨསཾསཊྛཏྟཱ ཝིམུཏྟཏྟཱ ཙ ནིསྶརཎཝིམུཏྟི ནིབྦཱནཾ.

ཨནཱགཏབུདྡྷཱནཾ པནཱཏི པན-སདྡོ ཝིསེསཏྠཛོཏནོ. ཏེན ཨཏཱིཏེསུ ཏཱཝ ཁནྡྷཱནཾ བྷཱུཏཔུབྦཏྟཱ ཏཏྠ སིཡཱ ཉཱཎསྶ སཝིསཡེ གཏི, ཨནཱགཏེསུ པན སབྦསོ ཨསཉྫཱཏེསུ ཀཐནྟི ཨིམམཏྠཾ ཛོཏེཏི. ཏེནཱཧ ‘‘ཨནཱགཏཱཔཱི’’ཏིཨཱདི. ‘‘ཨཏྟནོ ཙེཏསཱ པརིཙྪིནྡིཏྭཱ ཝིདིཏཱ’’ཏི ཀསྨཱ ཝུཏྟཾ? ནནུ ཨཏཱིཏཱནཱགཏེ སཏྟཱཧེ ཨེཝ པཝཏྟཾ ཙིཏྟཾ ཙེཏོཔརིཡཉཱཎསྶ ཝིསཡོ, ན ཏཏོ པརནྟི? ནཡིདཾ ཙེཏོཔརིཡཉཱཎཀིཙྩཝསེན ཝུཏྟཾ, ཨཐ ཁོ པུབྦེནིཝཱསཨནཱགཏཾསཉཱཎཱནཾ ཝསེན ཝུཏྟཾ, ཏསྨཱ ནཱཡཾ དོསོ. ཝིདིཏཊྛཱནེ ན ཀརོཏི སིཀྑཱཔདེནེཝ ཏཱདིསསྶ པཊིཀྑེཔསྶ པཊིཀྑིཏྟཏྟཱ སེཏུགྷཱཏཏོ ཙ. ཀཐཾ པན ཐེརོ དྭཡསམྦྷཝེ པཊིཀྑེཔམེཝ ཨཀཱསི, ན ཝིབྷཛྫ བྱཱཀཱསཱིཏི ཨཱཧ ‘‘ཐེརོ ཀིརཱ’’ཏིཨཱདི. པཱརཾ པརིཡནྟཾ མིནོཏཱིཏི པཱརམཱི, སཱ ཨེཝ ཉཱཎནྟི པཱརམིཉཱཎཾ, སཱཝཀཱནཾ པཱརམིཉཱཎཾ སཱཝཀཔཱརམིཉཱཎཾ. ཏསྨིཾ སཱཝཀཱནཾ ཨུཀྐཾསཔརིཡནྟགཏེ ཛཱནནེ ནཱཡམནུཡོགོ, ཨཐ ཁོ སབྦཉྙུཏཉྙཱཎེ སབྦཉྙུཏཱཡ ཛཱནནེ. ཀེཙི པན ‘‘སཱཝཀཔཱརམིཉཱཎེཏི སཱཝཀཔཱརམིཉཱཎཝིསཡེ’’ཏི ཨཏྠཾ ཝདནྟི, ཏཐཱ སེསཔདེསུཔི. སཱིལ…པེ… སམཏྠནྟི སཱིལསམཱདྷིཔཉྙཱཝིམུཏྟིཉཱཎསངྑཱཏཱནཾ ཀཱརཎཱནཾ ¶ ཛཱནནསམཏྠཾ. བུདྡྷསཱིལཱདཡོ ཧི བུདྡྷཱནཾ བུདྡྷཀིཙྩསྶ པརེཧི ཨེཏེ བུདྡྷཱཏི ཛཱནནསྶ ཙ ཀཱརཎཾ.

ཨནུམཱནཉཱཎཾ ཝིཡ སཾསཡཊྛིཏཾ ཨཧུཏྭཱ ཨིདམིདནྟི ཡཐཱསབྷཱཝཏོ ཉེཡྻཾ དྷཱརེཏི ནིཙྪིནོཏཱིཏི དྷམྨོ, པཙྩཀྑཉཱཎནྟི ཨཱཧ ‘‘དྷམྨསྶ པཙྩཀྑཏོ ཉཱཎསྶཱ’’ཏི. ཨནུཨེཏཱིཏི ཨནྭཡོཏི ཨཱཧ ‘‘ཨནུཡོགཾ ཨནུགནྟྭཱ’’ཏི. པཙྩཀྑསིདྡྷཉྷི ཨཏྠཾ ཨནུགནྟྭཱ ཨནུམཱནཉཱཎསྶ པཝཏྟི ‘‘དིཊྛེན ཨདིཊྛསྶ ཨནུམཱན’’ནྟི ཝེདིཏབྦཱ. ཝིདིཏེ ཝེདཀམྤི ཉཱཎཾ ཨཏྠཏོ ཝིདིཏམེཝ ཧོཏཱིཏི ‘‘ཨནུམཱནཉཱཎཾ ནཡགྒཱཧོ ཝིདིཏོ’’ཏི ཝུཏྟཾ. ཝིདིཏོཏི ཝིདྡྷོ ¶ པཊིལདྡྷོ, ཨདྷིགཏོཏི ཨཏྠོ. ཨཔྤམཱཎོཏི ཨཔརིམཱཎོ མཧཱཝིསཡཏྟཱ. ཏེནཱཧ ‘‘ཨཔརིཡནྟོ’’ཏི. ཏེནཱཏི ཨཔརིཡནྟཏྟཱ. ཏེན ཝཱ ཨཔརིཡནྟེན ཉཱཎེན. ཨེཏེན ཐེརོ ཡཾ ཡཾ ཨནུམེཡྻམཏྠཾ ཉཱཏུཀཱམོ ཧོཏི, ཏཏྠ ཏཏྠ ཏསྶ ཨསངྒམཔྤཊིཧཏཾ ཨནུམཱནཉཱཎཾ པཝཏྟེཏཱིཏི དསྶེཏི. ཏེནཱཧ ‘‘སོ ཨིམིནཱ’’ཏིཨཱདི. ཏཏྠ ཨིམིནཱཏི ཨིམིནཱ ཀཱརཎེན.

པཱཀཱརསྶ ཐིརབྷཱཝཾ ཨུདྡྷམུདྡྷཾ ཨཱཔེཏཱིཏི ཨུདྡྷཱཔཾ, པཱཀཱརམཱུལཾ. ཨཱདི-སདྡེན པཱཀཱརདྭཱརབནྡྷཔརིཁཱདཱིནཾ སངྒཧོ ཝེདིཏབྦོ. པཙྩནྟེ བྷཝཾ པཙྩནྟིམཾ. པཎྜིཏདོཝཱརིཀཊྛཱནིཡཾ ཀཏྭཱ ཐེརོ ཨཏྟཱནཾ དསྶེཏཱིཏི དསྶེནྟོ ‘‘ཨེཀདྭཱརནྟི ཀསྨཱ ཨཱཧཱ’’ཏི ཙོདནཾ སམུཊྛཱཔེསི.

ཡསྶཱ པཉྙཱཡ ཝསེན པུརིསོ པཎྜིཏོཏི ཝུཙྩཏི, ཏཾ པཎྜིཙྩནྟི ཨཱཧ – ‘‘པཎྜིཙྩེན སམནྣཱགཏོ’’ཏི. ཏཾཏཾཨིཏིཀཏྟབྦཏཱསུ ཚེཀབྷཱཝོ བྱཏྟབྷཱཝོ ཝེཡྻཏྟིཡཾ. མེདྷཏི ཨཉྙཱཎཾ ཧིཾསཏི ཝིདྷམཏཱིཏི མེདྷཱ, སཱ ཨེཏསྶ ཨཏྠཱིཏི མེདྷཱཝཱི. ཋཱནེ ཋཱནེ ཨུཔྤཏྟི ཨེཏིསྶཱ ཨཏྠཱིཏི ཋཱནུཔྤཏྟིཀཱ, ཋཱནསོ ཨུཔྤཛྫནཔཉྙཱ. ཨནུཔརིཡཱཡནྟི ཨེཏེནཱཏི ཨནུཔརིཡཱཡོ, སོ ཨེཝ པཐོཏི ཨནུཔརིཡཱཡཔཐོ, པརིཏོ པཱཀཱརསྶ ཨནུཡཱཡནམགྒོ. པཱཀཱརབྷཱགཱ སམྦནྡྷིཏབྦཱ ཨེཏྠཱཏི པཱཀཱརསནྡྷི, པཱཀཱརསྶ ཕུལླིཏཔདེསོ. སོ པན ཧེཊྛིམནྟེན དྭིནྣམྤི ཨིཊྛཀཱནཾ ཝིགམེན ཨེཝཾ ཝུཙྩཏཱིཏི ཨཱཧ – ‘‘དྭིནྣཾ ཨིཊྛཀཱནཾ ཨཔགཏཊྛཱན’’ནྟི. ཚིནྣཊྛཱནནྟི ཚིནྣབྷིནྣཔདེསཾ, ཚིནྣཊྛཱནཾ ཝཱ. ཏཉྷི ‘‘ཝིཝར’’ནྟི ཝུཙྩཏི. ཀཱིལིཊྛནྟི མལཱིནཾ. ཨུཔཏཱཔེནྟཱིཏི ཀིལེསཔརིལཱ༹ཧེན སནྟཱཔེནྟི. ཝིབཱདྷེནྟཱིཏི པཱིལེ༹ནྟི. ཨུཔྤནྣཱཡ པཉྙཱཡ ནཱིཝརཎེཧི ན ཀིཉྩི ཀཱཏུཾ སཀྐཱཏི ཨཱཧ ‘‘ཨནུཔྤནྣཱཡ པཉྙཱཡ ཨུཔྤཛྫིཏུཾ ན དེནྟཱི’’ཏི. ཏསྨཱཏི པཙྩཡཱུཔགྷཱཏེན ¶ ཨུཔྤཛྫིཏུཾ ཨཔྤདཱནཏོ. ཙཏཱུསུ སཏིཔཊྛཱནེསུ སུཊྛུ ཋཔིཏཙིཏྟཱཏི ཙཏུབྦིདྷཱཡཔི སཏིཔཊྛཱནབྷཱཝནཱཡ སམྨདེཝ ཋཔིཏཙིཏྟཱ ཨཔྤིཏཙིཏྟཱ. ཡཐཱསབྷཱཝེན བྷཱཝེཏྭཱཏི ཡཱཐཱཝཏོ སམྨདེཝ ཡཐཱ པཊིཔཀྑཱ སམུཙྪིཛྫནྟི, ཨེཝཾ བྷཱཝེཏྭཱ.

པུརིམནཡེ སཏིཔཊྛཱནཱནི བོཛ྄ཛྷངྒཱ ཙ མིསྶཀཱ ཨདྷིཔྤེཏཱཏི ཏཏོ ཨཉྙཐཱ ཝཏྟུཾ ‘‘ཨཔིཙེཏྠཱ’’ཏིཨཱདི ཝུཏྟཾ. མིསྶཀཱཏི སམཐཝིཔསྶནཱམགྒཝསེན མིསྶཀཱ. ‘‘ཙཏཱུསུ སཏིཔཊྛཱནེསུ སུཔྤཏིཊྛིཏཙིཏྟཱཏི པཋམཾ ཝུཏྟཏྟཱ སཏིཔཊྛཱནེསུ ཝིཔསྶནཾ གཧེཏྭཱ སཏྟ བོཛ྄ཛྷངྒེ ཡཐཱབྷཱུཏཾ བྷཱཝེཏྭཱཏི ཝུཏྟཏྟཱ མགྒཔརིཡཱཔནྣཱནཾཡེཝ ཙ ནེསཾ ནིཔྤརིཡཱཡབོཛ྄ཛྷངྒབྷཱཝཏོ ཏེསུ ཙ ཨདྷིགཏམེཝ ཧོཏཱིཏི བོཛ྄ཛྷངྒེ མགྒོ ཙ སབྦཉྙུཏཉྙཱཎཉྩཱཏི གཧིཏེ སུནྡརོ པཉྷོ བྷཝེཡྻཱ’’ཏི མཧཱསིཝཏྠེརོ ཨཱཧ. ན པནེཝཾ གཧིཏཾ པོརཱཎེཧཱིཏི ཨདྷིཔྤཱཡོ. ཨིཏཱིཏི ཝུཏྟཔྤཀཱརཔརཱམསནཾ. ཐེརོཏི སཱརིཔུཏྟཏྠེརོ.

ཏཏྠཱཏི ¶ ཏེསུ པཙྩནྟནགརཱདཱིསུ. ནགརཾ ཝིཡ ནིབྦཱནཾ ཏདཏྠིཀེཧི ཨུཔགནྟབྦཏོ ཨུཔགཏཱནཉྩ པརིསྶཡརཧིཏསུཁཱདྷིགམཊྛཱནཏོ. པཱཀཱརོ ཝིཡ སཱིལཾ ཏདུཔགཏཱནཾ པརིཏོ ཨཱརཀྑབྷཱཝཏོ. ཨནུཔརིཡཱཡཔཐོ ཝིཡ ཧིརཱི སཱིལཔཱཀཱརསྶ ཨདྷིཊྛཱནབྷཱཝཏོ. ཝུཏྟཉྷེཏཾ – ‘‘པརིཡཱཡཔཐོཏི ཁོ བྷིཀྑུ ཧིརིཡཱ ཨེཏཾ ཨདྷིཝཙན’’ནྟི. དྭཱརཾ ཝིཡ ཨརིཡམགྒོ ནིབྦཱནནགརཔྤཝེསནེ ཨཉྫསབྷཱཝཏོ. པཎྜིཏདོཝཱརིཀོ ཝིཡ དྷམྨསེནཱཔཏི ནིབྦཱནནགརཾ པཝིཊྛཔཝིསནཀཱནཾ སཏྟཱནཾ སལླཀྑཎཏོ. དིནྣོཏི དཱཔིཏོ, སོདྷིཏོཏི ཨཏྠོ. སེསཾ སུཝིཉྙེཡྻམེཝ.

༣. ཙུནྡསུཏྟཝཎྞནཱ

༣༧༩. པུབྦེ སཱཝཏྠིཏོ ཝེལུ༹ཝགཱམསྶ གཏཏྟཱ ཝུཏྟཾ ‘‘ཨཱགཏམགྒེནེཝ པཊིནིཝཏྟནྟོ’’ཏི. སཏྟནྣནྟི ཨུཔསེནོ, རེཝཏོ, ཁདིརཝནིཡོ, ཙུནྡོ, སམཎུདྡེསོ ཨཧནྟི ཙཏུནྣཾ, ཙཱལཱ, ཨུཔཙཱལཱ, སཱིསཱུཔཙཱལཱཏི, ཏིསྶནྣནྟི ཨིམེསཾ སཏྟནྣཾ ཨརཧནྟཱནཾ. ནཏྠི ནུ ཁོཏི ཨེཏྠཱཔི ‘‘ཨོལོཀེནྟོ’’ཏི ཨཱནེཏྭཱ སམྦནྡྷོ སཱིཧཱཝལོཀནཉཱཡེན. བྷཝིསྶནྟི མེ ཝཏྟཱརོ ཧརིཏུཾ ནཱསཀྑཱིཏི སམྦནྡྷོ. ཨིདཾ དཱནི པཙྪིམདསྶནནྟི བྷཱུཏཀཐནམཏྟཾ, ན ཏཏྠ སཱལཡཏཱདསྶནཾ ཡཐཱ ཏཐཱགཏསྶ ཝེསཱལིཡཱ ནིཀྑམིཏྭཱ ནཱགཱཔལོཀིཏཾ.

ཏསྶ ¶ ཏསྶ ཝིསེསསྶ ཨདྷིཊྛཱནཝསེནེཝ ཨིདྡྷིབྷེདདསྶནཾ ཨིདྡྷིཝིཀུབྦནཾ. སཱིཧསྶ ཝིཛམྦྷནཱདིཝསེན ཀཱིལི༹ཏྭཱ ནཱདསདིསཱི ཨཡཾ དྷམྨཀཐཱཏི ཝུཏྟཾ ‘‘སཱིཧཝིཀཱིལི༹ཏོ དྷམྨཔརིཡཱཡོ’’ཏི. གམནཀཱལོ མཡ྄ཧནྟཱིཏི ཨེཏྠ ཨིཏི-སདྡོ པརིསམཱཔནེ. ཏེན ཐེརེན ཡཐཱརམྦྷསྶ ཝཙནཔབནྡྷསྶ སམཱཔིཏབྷཱཝཾ ཛོཏེཏི. ཨེས ནཡོ སེསེསུཔི ཨེདིསེསུ སབྦཊྛཱནེསུ. ཡུགནྡྷརཱདཡོ པརིབྷཎྜཔབྦཏཱཏི ཝེདིཏབྦཱ. ཨེཀཔྤཧཱརེནེཝཱཏི ཨེཀཔྤཧཱརེན ཨིཝ. སྭཱཡཾ ཨིཝ-སདྡོ ན སཀྐོམཱིཏི ཨེཏྠ ཨཱནེཏྭཱ སམྦནྡྷིཏབྦོ.

པཊིཔཱདེསྶཱམཱིཏི ཋིཏཀཱཡཾ པཊིཔཱདེསྶཱམི. པཏྠནཱཀཱལེ ཨནོམདསྶིསྶ བྷགཝཏོ ཝཙནསུཏཱནུསཱརེན ཉཱཎེན དིཊྛམཏྟཏཾ སནྡྷཱཡ ‘‘ཏཾ པཋམདསྶན’’ནྟི ཝུཏྟཾ. དྷཱརེཏུཾ ཨསཀྐོནྟཱི གུཎསཱརཾ. ཨེས མགྒོཏི ཨེསོ ཛཱཏཱནཾ སཏྟཱནཾ མརཎནིཊྛིཏོ པནྠོ. པུནཔི ཨེཝཾབྷཱཝིནོ ནཱམ སངྑཱརཱཏི སངྑཱརཱ ནཱམ ཨེཝཾབྷཱཝིནོ, མརཎཔརིཡོསཱནཱཏི ཨཏྠོ. ཨེཏྟཀནྟི ཨེཏྟཀཾ ཀཱལཾ. སངྐཌྜྷིཏྭཱ སཾཧརིཏྭཱ. མུཁཾ པིདྷཱཡཱཏི མུཁཾ ཚཱདེཏྭཱ. ཨགྒྷིཀསཏཱནཱིཏི མཀུལ༹ངྐུརཙེཏིཡསཏཱནི.

པུརིམདིཝསེཏི ¶ ཨཏཱིཏདིཝསེ. ཡསྨཱ དྷམྨསེནཱཔཏིནོ ཨརཧཏྟཔྤཏྟདིཝསེཡེཝ སཏྠུ སཱཝཀསནྣིཔཱཏོ ཨཧོསི, ཏསྨཱ ‘‘པཱུརིཏསཱཝཀསནྣིཔཱཏོ ཨེས བྷིཀྑཱུ’’ཏི ཝུཏྟཾ. པཉྩ ཛཱཏིསཏཱནཱིཏི བྷུམྨཏྠེ, ཨཙྩནྟསཾཡོགེ ཝཱ ཨུཔཡོགཝཙནཾ.

ཀལོ༹པིཧཏྠོཏི ཝིལཱིཝམཡབྷཱཛནཧཏྠོ. ‘‘ཙམྨམཡབྷཱཛནཧཏྠོ’’ཏི ཙ ཝདནྟི. པུརནྟརེཏི ནགརམཛ྄ཛྷེ. ཝནེཏི ཨརཉྙེ.

ཨོསཀྐནཱཀཱརཝིརཧིཏོཏི དྷམྨདེསནཱཡ སངྐོཙཧེཏུཝིརཧིཏོ. ཝིསཱརདོཏི སཱརདཝིརཧིཏོ. དྷམྨོཛནྟི དྷམྨརསཾ, ཨོཛཝནྟཾ དེསནཱདྷམྨནྟི ཨཏྠོ. དྷམྨབྷོགནྟི དྷམྨཔརིབྷོགཾ, པརེཧི སདྡྷིཾ སཾཝིབྷཛནཝསེན པཝཏྟཾ དྷམྨསམྦྷོགནྟི དེསནཱདྷམྨམེཝ ཝདཏི. ཏེན ཝུཏྟཾ ‘‘ཨུབྷཡེནཔི དྷམྨཔརིབྷོགོཝ ཀཐིཏོ’’ཏི.

པིཡཱཡིཏབྦཏོ པིཡེཧི. མནསྶ ཝཌྜྷནཏོ མནཱཔེཧི. ཛཱཏིཡཱཏི ཁཏྟིཡཱདིཛཱཏིཡཱ. ནཱནཱབྷཱཝོ ཨསཧབྷཱཝོ ཝིསུཾབྷཱཝོ. ཨཉྙཐཱབྷཱཝོ ཨཉྙཐཏྟཾ. སརཱིརནྟི རཱུཔདྷམྨཀཱཡསངྑཱཏཾ སརཱིརཾ. རཱུཔཀཱཡེ ¶ ཧི བྷིཛྫནྟེ བྷིཛྫནྟེཝ. སོ བྷིཛྫེཡྻཱཏི སོ མཧནྟཏརོ ཁནྡྷོ བྷིཛྫེཡྻ.

དཀྑིཎདིསཾ གཏོཏི དཀྑིཎདིསཱམུཁེ པཝཏྟོ. མཧཱཁནྡྷོ ཝིཡཱཏི མཧནྟོ སཱརཝནྟོ སཱཁཱཁནྡྷོ ཝིཡ. སཱཁཁནྡྷཱ ཧི དིསཱབྷིམུཁཔཝཏྟཱཀཱརཱ, མཱུལཁནྡྷོ པན ཨུདྡྷམུགྒཏོ. སོལ༹སནྣཾ པཉྷཱནནྟི སོལ༹སནྣཾ ཨཔརཱཔརིཡཔཝཏྟནིཡཱནཾ ཨཏྠཱནཾ. ཉཱཏུཾ ཨིཙྪིཏོ ཧི ཨཏྠོ པཉྷོ.

༤-༥. ཨུཀྐཙེལསུཏྟཱདིཝཎྞནཱ

༣༨༠-༣༨༡. ཨམཱཝསུཔོསཐེཏི ཨམཱཝསིཨུཔོསཐེ, ཀཱལཔཀྑཨུཔོསཐེཏི ཨཏྠོ. པུརིམནཡེནེཝཱཏི ཨནནྟརསུཏྟེ ཝུཏྟནཡེནེཝ.

༦. ཨུཏྟིཡསུཏྟཝཎྞནཱ

༣༨༢. མཙྩུདྷེཡྻསྶཱཏི མཙྩུནོ པཝཏྟིཊྛཱནསྶ.

༨. བྲཧྨསུཏྟཝཎྞནཱ

༣༨༤. ཏསྨིཾ ¶ ཀཱལེཏི པཋམཱབྷིསམྦོདྷིཡཾ. བྷིཀྑུཡེཝ ནཏྠི དྷམྨཙཀྐསྶ ཨཔྤཝཏྟིཏཏྟཱ, བྷིཀྑུཡེཝ བྷིཀྑུལཀྑཎཡོགཏོ. ཨེཀཀོ མགྒོ, ན དྭེདྷཱཔཐབྷཱུཏོཏི ཨེཀམགྒོ, ཏཾ ཨེཀམགྒཾ. ཛཱཏིཡཱ ཁཡོ ཝཊྚདུཀྑསྶ ཨནྟབྷཱུཏོཏི ཛཱཏིཀྑཡནྟོ, ནིབྦཱནཾ, ཏཾ དིཊྛཏྟཱ ཛཱཏིཀྑཡནྟདསྶཱིཏི ཨེཝམེཏྠ ཨཏྠོ དཊྛབྦོ.

༩. སེདཀསུཏྟཝཎྞནཱ

༣༨༥. ཨཡཾ ཏསྶ ལདྡྷཱིཏི ཨཡཾ ཨིདཱནི ཝུཙྩམཱནཱ ཏསྶ ཨཱཙརིཡསྶ ལདྡྷི. ཏཏོ ཨནཱམེནྟོཏི ཡེན ཝཾསོ ནམཏི, ཏེན ཀཱཡཾ ཨནཱམེནྟོ. ཏཐཱ ནམནྟོ ཧི པཏིཏྭཱ ཙུཎྞཝིཙུཎྞཾ ཧོཏི. ཏནྟི ཀཱཡཾ, ཏཾ ཝཾསཾ ཝཱ. ཨཱཀཌྜྷེནྟོ ཝིཡཱཏི ནམིཏཊྛཱནཏོ པརབྷཱགེན ཨཱཀཌྜྷེནྟོ ཝིཡ. ཨེཀཏོབྷཱགིཡཾ ཀཏྭཱཏི ཡཐཱཝུཏྟཾ སཏིཾ སཱུཔཊྛིཏཾ ¶ ཀཏྭཱ ཨོནཏཾ ཝིཡ ཀཏྭཱ. ཏཐཱ ཀརཎཾ པན ཏཐཱ ཝཱཏཱུཔཏྠམྦྷགཱཧཱཔནེནཱཏི ཨཱཧ – ‘‘ཝཱཏཱུཔཏྠམྦྷཾ གཱཧཱཔེཏྭཱ’’ཏི. ཏཉྩ སཏིཡཱ ཏདཏྠཾ ཨུཔཊྛཱནེནཱཏི ཝུཏྟཾ ‘‘སཏིཾ སཱུཔཊྛིཏཾ ཀཏྭཱ’’ཏི. ནིཙྩལོཝ ནིསཱིདནྟོ ཨནྟེཝཱསཱི ཨཱཙརིཡཾ རཀྑཏི, ཨེཏྟཀཾ ཨཱཙརིཡསྶ ལདྡྷིཝསེན ཝུཏྟཾ. ‘‘ཨཱཙརིཡོ ཝཾསཾ སུགྒཧིཏཾ གཎྷནྟོ’’ཏིཨཱདི སབྦཾ ཧེཊྛཱ ཝུཏྟནཡམེཝ.

‘‘ཨཏྟཱནམེཝ རཀྑཏཱི’’ཏི ཨིདཾ ཨཏྟནོ རཀྑཎཾ པདྷཱནཾ ཀཏྭཱ ཝུཏྟཾ, ན ཨནྟེཝཱསིཀནྟི ཨཝདྷཱརཎཕལཾ. ཨཏྟརཀྑཱཡ པནེཏྠ སིཛ྄ཛྷམཱནཱཡ ཨནྟེཝཱསིཀརཀྑཱཔི སིདྡྷཱ ཨེཝ ཧོཏཱིཏི. དུཏིཡཔཀྑེཔི ཨེསེཝ ནཡོ. སོ ཏཏྠ ཉཱཡོཏི ཡཱ ཨཏྟནོ ཨེཝ རཀྑཱ, སཱ ཨཏྠཏོ པརརཀྑཱཔི ཧོཏཱིཏི ཨཡམེཏྠ ཉཱཡོ ཡུཏྟཔྤཡོགོ. ཨནུཝཌྜྷིཡཱཏི ཡཐཱཝཌྜྷིཏསྶ ཨནུཨནུཝཌྜྷིཡཱ. ཨེཏེན པཊིལདྡྷསམྤཡུཏྟཔམོདནཱཀཱརོ དསྶིཏོཏི ཨཱཧ – ‘‘སཔུབྦབྷཱགཱཡ མུདིཏཱཡཱཏི ཨཏྠོ’’ཏི. ཨཱསེཝནཱཡཱཏིཨཱདཱིནི པདཱནི ཨནུདཡཏཱཔརིཡོསཱནཱནི (ཡསྨཱ སཏིཔཊྛཱནཾ སེཝནྟསྶ སིདྡྷཾ ཨཏྟནོ ཙ པརསྶ ཙ རཀྑཎཾ པཀཱསེནྟི, ཏསྨཱ) – ‘‘ཨཏྟཱནཾ, བྷིཀྑཝེ, རཀྑིསྶཱམཱིཏི སཏིཔཊྛཱནཾ སེཝིཏབྦ’’ནྟིཨཱདི ཝུཏྟཾ.

༡༠. ཛནཔདཀལྱཱཎཱིསུཏྟཝཎྞནཱ

༣༨༦. ཛནཔདསྨིཾ ཀལྱཱཎཱིཏི སཀལཛནཔདེ བྷདྡཱ རཱུཔསམྤཏྟིཡཱ སིཀྑཱསམྤཏྟིཡཱ ཙ སུནྡརཱ ¶ སེཊྛཱ. རཱུཔསམྤཏྟི ཙ ནཱམ སབྦསོ རཱུཔདོསཱབྷཱཝེན རཱུཔགུཎཔཱརིཔཱུརིཡཱ ཧོཏཱིཏི ཏདུབྷཡཾ དསྶེཏུཾ ‘‘ཚསརཱིརདོསརཧིཏཱ པཉྩཀལྱཱཎསམནྣཱགཏཱ’’ཏི ཝུཏྟཾ. ཏཾ དུཝིདྷམྤི ཝིཝརནྟོ ‘‘སཱ ཧཱི’’ཏིཨཱདིམཱཧ. པཉྩཀལྱཱཎསམནྣཱགཏཱཏི པཉྩཝིདྷསརཱིརགུཎསམྤདཱཧི སམནྣཱགཏཱ. ནཱཏིདཱིགྷཱ ནཱཏིརསྶཱཏི པམཱཎམཛ྄ཛྷིམཱ དཱིགྷཏརཔྤམཱཎཱ ན ཧོཏི, ན ཨཏིརསྶཱ, ལཀུཎྜཀརཱུཔཱ ན ཧོཏི. ནཱཏིཀིསཱཏི ཨཏིཝིཡ ཀིསཐདྡྷམཾསལོཧིཏཱ དིསྶམཱནཱ ཨཊྛིསརཱིརཱ ཛཱལསརཱིརཱ ན ཧོཏི. ནཱཏིཐཱུལཱཏི བྷཱརིཡམཾསཱ མཧོདརཱ ན ཧོཏི. ནཱཏིཀཱལཱ༹ ནཱཙྩོདཱཏཱཏི ཨཏིཝིཡ ཀཱལ༹ཝཎྞཱ ཛྷཱམངྒཱརོ ཝིཡ ¶ , དདྷིཏཀྐཱདཱིཧི པམཛྫིཏམཏྟཀཾསལོཧཝཎྞཱ ན ཧོཏི. མནུསྶལོཀེ ཏཱདིསིཡཱ རཱུཔསམྤཏྟིཡཱ ཨབྷཱཝཏོ ཨཏིཀྐནྟཱ མནུསྶཝཎྞཾ. ཡཐཱ པམཱཎཡུཏྟཱ, ཨེཝཾ ཨཱརོཧཔརིཎཱཧཡོགཏོ ཙ པརེསཾ པསཱདཱཝཧཱ ནཱཏིདཱིགྷཏཱདཡོ. ཨེཝཾ མནུསྶཱནཾ དིབྦརཱུཔཏཱསམྤཏྟཱིཔཱིཏི ཝུཏྟཾ ‘‘ཨཔྤཏྟཱ དིབྦཝཎྞ’’ནྟི. ཨེཏྠ ཙ ནཱཏིདཱིགྷནཱཏིརསྶཏཱཝཙནེན ཨཱརོཧསམྤཏྟི ཝུཏྟཱ ཨུབྦེདྷེན པཱསཱདིཀབྷཱཝཏོ. ཀིསཐཱུལདོསཱབྷཱཝཝཙནེན པརིཎཱཧསམྤཏྟི ཝུཏྟཱ. ཨུབྷཡེནཔི སཎྛཱནསམྤདཱ ཝིབྷཱཝིཏཱ, ནཱཏིཀཱལ༹ཏཱཝཙནེན ཝཎྞསམྤཏྟི ཝུཏྟཱ ཝིཝཎྞཏཱབྷཱཝཏོ. པིཡངྒུསཱམཱཏི པརིཎཏཔིཡངྒུཔུཔྥསདིསསརཱིརནིབྷཱསཱ. མུཁཔརིཡོསཱནནྟི ཨདྷརོཊྛམཱཧ. ཨཡཾ ཡཐཱཝུཏྟཱ སརཱིརཝཎྞསམྤཏྟི. ཨསྶཱཏི ཛནཔདཀལྱཱཎིཡཱ. ཚཝིཀལྱཱཎཏཱ ཚཝིསམྤཏྟིཧེཏུཀཏྟཱ ཏསྶཱ. ཨེས ནཡོ སེསེསུཔི. ནཁཱ ཨེཝ པཏྟསདིསཏཱཡ ནཁཔཏྟཱནི.

(པསཱཝོ སརཱིརཱཝཡཝེན ཨིརིཡནནྟི ཨཱཧ – ‘‘པཝཏྟཱིཏི ཨཏྠོ’’ཏི, པསཱཝོ ཡཐཱཔརིཏམེཝ ཀནཏནྟི, ན སབྷཱཝསནྡྷཱནཾ. ཡཐཱཝིབྷཱཝསེན ཨུཏྟམམེཝ ནཙྩཾ ནཙྩཏི. ཏེ ཝཱ ཝཱིསཏིཡཱསཱུཏིརཾ དྷཱནཔྤཏྟིཡཱ པཝཏྟིཡཱ པཝཏྟིམཀཏམནྡཏཱ ཝིབྷཱཝསུཊཏསྶ ཨུཏྟམམེཝ གཱིཏཉྩ གཱཡཏཱིཏི ཨཏྠོ.) [ཨེཏྠནྟརེ པཱཋོ ཨསུདྡྷོ དུསྶོདྷནཱིཡོ ཙ. སུདྡྷཔཱཋོ གཝེསིཏབྦོ.] སམཏིཏྟིཀོ ཏེལཔཏྟོཏི མུཁཝཏྟིསམཾ ཏེལཱནཾ པཱུརིཏཏྟཱ སམཏིཏྟིཀམུཁཾ ཏེལབྷཱཛནཾ. ཨནྟརེན ཙ མཧཱསམཛྫཾ ཨནྟརེན ཙ ཛནཔདཀལྱཱཎིནྟི ཛནཔདཀལྱཱཎིཡཱ, ཏསྶཱ ཙ ནཙྩགཱིཏཾ པེཀྑིཏུཾ སནྣིཔཏིཏམཧཱཛནསམཱུཧསྶ མཛ྄ཛྷཏོ པརིཧརིཏབྦོ ནེཏབྦོ. ནནྟི ཏེལཾ. ཨཱཧརེཡྻཱཏི ཨཱཔཛྫེཡྻ. ཏཏྲིདཾ ཨོཔམྨསཾསནྡནཾ – ཏེལཔཏྟཾ ཝིཡ ཀཱཡགཏཱསཏི, ཏསྶ པརིཧརཎཔུགྒལོ ཝིཡ ཝིཔསྶཀོ, ཛནཀཱཡཱ ཝིཡ པུཐུཏྟཱརམྨཎཱནི, ཨསིཔུརིསོ ཝིཡ མནོ, ཏེལསྶ ཙཛནཾ ཝིཡ ཀིལེསུཔྤཱདནཾ, སཱིསཔཱཏནཾ ཝིཡ ཨརིཡམགྒཉཱཎསཱིསཱནུཔྤཏྟི. ‘‘ཀཱཡགཏཱ སཏི ནོ བྷཱཝིཏཱ…པེ… སིཀྑིཏབྦ’’ནྟི ཝུཏྟཏྟཱ ‘‘པུབྦབྷཱགཝིཔསྶནཱཝ ཀཐིཏཱ’’ཏི ཝུཏྟཾ.

ནཱལནྡཝགྒཝཎྞནཱ ནིཊྛིཏཱ.

༣. སཱིལཊྛིཏིཝགྒོ

༡-༢. སཱིལསུཏྟཱདིཝཎྞནཱ

༣༨༧-༣༨༨. སཱིལཱནཱིཏི ¶ ¶ བཧུཝཙནཾ ཨནེཀཝིདྷཏྟཱ སཱིལསྶ. ཏཉྷི སཱིལནཊྛེན ཨེཀཝིདྷམྤི ཙཱརིཏྟཱདིཝསེན ཨནེཀཝིདྷཾ. ཏེནཱཧ – ‘‘ཙཏུཔཱརིསུདྡྷིསཱིལཱནཱི’’ཏི. པཉྷམགྒོཏི ཉཱཏུཾ ཨིཙྪིཏསྶ ཨཏྠསྶ ཝཱིམཾསནཾ. ཏེནཱཧ – ‘‘པཉྷགཝེསན’’ནྟི.

༣-༥. པརིཧཱནསུཏྟཱདིཝཎྞནཱ

༣༨༩-༣༩༡. པུགྒལཝསེན པརིཧཱནཾ ཧོཏི ན དྷམྨཝསེན. ཡོ ན བྷཱཝེཏི, ཏསྶེཝ པརིཧཱཡཏི. ཏེནཱཧ ‘‘ཡོ ཧཱི’’ཏིཨཱདི.

༦. པདེསསུཏྟཝཎྞནཱ

༣༩༢. པདེསཏོ བྷཱཝིཏཏྟཱཏི ཨེཀདེསཏོ བྷཱཝིཏཏྟཱ བྷཱཝནཱཔཱརིཔཱུརིཡཱ ཨནནུཔྤཏྟཏྟཱ. ཏེནཱཧ – ‘‘ཙཏྟཱརོ ཧི མགྒེ’’ཏིཨཱདི.

༧. སམཏྟསུཏྟཝཎྞནཱ

༣༩༣. སམཏྟཱ བྷཱཝིཏཏྟཱཏི པརིཡཏྟཱ བྷཱཝིཏཏྟཱ.

༨-༡༠. ལོཀསུཏྟཱདིཝཎྞནཱ

༣༩༤-༣༩༦. མཧཱཝིསཡཏྟཱ མཧཏིཡོ ཨབྷིཉྙཱ ཨེཏསྶཱཏི མཧཱབྷིཉྙོ, ཏསྶ བྷཱཝོཏི སབྦཾ ཝཏྟབྦཾ. ‘‘སཏཏཝིཧཱརཝསེན ཝུཏྟ’’ནྟི ཝཏྭཱ ཏམཏྠཾ པཱཀཊཾ ཀཱཏུཾ ‘‘ཐེརོ ཀིརཱ’’ཏིཨཱདི ཝུཏྟཾ. ཏསྶཱཏི ཐེརསྶ. ཨཱཝཛྫནསྶ གཏིནྟི ཨེཀཱཝཛྫནསྶེཝ གམནཝཱིཐིཾ. ཨནུབནྡྷཏི ཙཀྐཝཱལཱ༹ནཾ སཧསྶཾ ཨེཀཱཝཛྫནེནེཝ སཧསྶལོཀདྷཱཏུཡཱ ཨིཙྪིཏམཏྠཾ ཛཱནིཏུཾ སམཏྠོཏི དསྶེཏི.

སཱིལཊྛིཏིཝགྒཝཎྞནཱ ནིཊྛིཏཱ.

༤. ཨནནུསྶུཏཝགྒཝཎྞནཱ

༣༩༧-༤༠༧. ཡཱ ¶ ¶ ཝེདནཱ སམྨསིཏྭཱཏི ཡཱ ཏེབྷཱུམཀཝེདནཱ སམྨསིཏྭཱ. ཏཱཝསྶཱཏི ཏཱ ཏེབྷཱུམཀཝེདནཱ ཨེཝ ཨསྶ བྷིཀྑུནོ. སདིསཝསེན ཙེཏཾ ཝུཏྟཾ, ཨནིཙྩཱདིསམྨསནཝསེན ཝིདིཏཱ པུབྦབྷཱགེ སམྨསནཀཱལེ ཨུཔཊྛཧནྟི. པརིགྒཧིཏེསཱུཏི པརིཛཱནནཝསེན པརིཙྪིཛྫ གཧིཏེསུ. ‘‘ཝེདནཱ ཏཎྷཱཔཔཉྩསྶ, ཝིཏཀྐོ མཱནཔཔཉྩསྶ, སཉྙཱ དིཊྛིཔཔཉྩསྶ མཱུལཝསེན སམྨསནཾ ཝུཏྟཱ’’ཏི ཝདནྟི. ‘‘ཝེདནཱཝིཏཀྐསཉྙཱ ཏཎྷཱམཱནདིཊྛིཔཔཉྩཱནཾ མཱུལདསྶནཝསེནཱ’’ཏི ཨཔརེ.

ཨནནུསྶུཏཝགྒཝཎྞནཱ ནིཊྛིཏཱ.

༥. ཨམཏཝགྒོ

༢. སམུདཡསུཏྟཝཎྞནཱ

༤༠༨. སཱརམྨཎསཏིཔཊྛཱནཱཏི ཨཱརམྨཎལཀྑིཏཱ སཏིཔཊྛཱནཱ ཀཐིཏཱ, ན སཏིལཀྑཎཱ.

༤. སཏིསུཏྟཝཎྞནཱ

༤༡༠. སུདྡྷིཀཾ ཀཏྭཱ ཝིསུཾ ཝིསུཾ ཀཏྭཱ. ཏཐཱ ཙ ཝུཏྟཾ པཱལི༹ཡཾ ‘‘ཀཱཡེ ཝཱ བྷིཀྑཱུ’’ཏི.

༦. པཱཏིམོཀྑསཾཝརསུཏྟཝཎྞནཱ

༤༡༢. ཛེཊྛཀསཱིལནྟི པདྷཱནཀསཱིལཾ. སཱིལགྒཧཎཉྷི པཱལི༹ཡཾ པཱཏིམོཀྑསཾཝརཝསེནེཝ ཨཱགཏཾ. ཏེནཱཧ ‘‘ཏིཔིཊཀཙཱུལ༹ནཱགཏྠེརོ པནཱ’’ཏིཨཱདི. ཏཏྠ པཱཏིམོཀྑསཾཝརོཝ སཱིལནྟི ཨཝདྷཱརཎཾ ཨིཏརེསཾ ཏིཎྞཾ ཨེཀདེསེན པཱཏིམོཀྑནྟོགདྷབྷཱཝཾ དཱིཔེཏི. ཏཐཱ ཧི ཨནོལོཀིཡོལོཀནེ ཨཱཛཱིཝཧེཏུ ཙ ཚསིཀྑཱཔདཝཱིཏིཀྐམནེ གིལཱནཔཙྩཡསྶ ཨཔྤཙྩཝེཀྑིཏཔརིབྷོགེ ¶ ཙ ཨཱཔཏྟི ཝིཧིཏཱཏི. ཏཱིཎཱིཏི ཨིནྡྲིཡསཾཝརཱདཱིནི. སཱིལནྟི ཝུཏྟཊྛཱནཾ ནཱམ ནཏྠཱིཏི སཱིལཔརིཡཱཡེན ཏེསཾ ཀཏྠཙི སུཏྟེ གཧིཏཊྛཱནཾ ནཱམ ནཏྠཱིཏི ནིཔྤརིཡཱཡསཱིལཏཾ ཏེསཾ ¶ པཊིཀྑིཔཏི. ཚདྭཱརརཀྑཎམཏྟམེཝཱཏི ཏསྶ སལླཧུཀཏམཱཧ ཙིཏྟཱདྷིཊྛཱནམཏྟེན པཊིཔཱཀཏིཀབྷཱཝཔྤཏྟིཏོ. ཨིཏརདྭཡེཔི ཨེསེཝ ནཡོ. པཙྩཡུཔྤཏྟིམཏྟཀནྟི ཕལེན ཧེཏུཾ དསྶེཏི. ཨུཔྤཱདནཧེཏུཀཱ ཧི པཙྩཡཱནཾ ཨུཔྤཏྟི. ཨིདམཏྠནྟི ཨིདཾ པཡོཛནཾ ཨིམསྶ པཙྩཡསྶ པརིབྷུཉྫནེཏི ཨདྷིཔྤཱཡོ. ནིཔྤརིཡཱཡེནཱཏི ཨིམིནཱ ཨིནྡྲིཡསཾཝརཱདཱིནི ཏཱིཎི པདྷཱནསཱིལསྶ པརིཔཱལནཔརིསོདྷནཝསེན པཝཏྟིཡཱ པརིཡཱཡསཱིལཱནི ནཱམཱཏི དསྶེཏི. ཨིདཱནི པཱཏིམོཀྑསཱིལསྶེཝ པདྷཱནབྷཱཝཾ བྱཏིརེཀཏོ ཨནྭཡཏོ ཙ ཨུཔམཱཡ ཝིབྷཱཝེཏུཾ ‘‘ཡསྶཱ’’ཏིཨཱདིམཱཧ. ཏཏྠ སོཏི པཱཏིམོཀྑསཾཝརོ. སེསཱནི ཨིནྡྲིཡསཾཝརཱདཱིནི. པཱཏིམོཀྑསདྡསྶ ཨཏྠོ པན ཝིསུདྡྷིམགྒསཾཝཎྞནཱདཱིསུ ཝིཏྠཱརིཏོ, ཏསྨཱ ཏཏྠ ཝུཏྟནཡེནེཝ ཝེདིཏབྦོ.

ཨཱཙཱརེན ཙ གོཙརེན ཙ སམྤནྣོཏི ཀཱཡིཀཙེཏསིཀཨཝཱིཏིཀྐམསངྑཱཏེན ཨཱཙཱརེན ཙ ནཝེསིཡཱདིགོཙརཏཱདིསངྑཱཏེན གོཙརེན ཙ སམྤནྣོ, སམྤནྣཨཱཙཱརགོཙརོཏི ཨཏྠོ. ཨཔྤམཏྟཀེསཱུཏི ཨཏིཔརིཏྟཀེསུ ཨནཱཔཏྟིགམནཱིཡེསུ. ‘‘དུཀྐཊདུབྦྷཱསིཏམཏྟེསཱུ’’ཏི ཨཔརེ. ཝཛྫེསཱུཏི ཨཀརཎཱིཡེསུ གཱརཡ྄ཧེསུ. ཏེ པན ཨེཀནྟཏོ ཨཀུསལཱ ཧོནྟཱིཏི ཨཱཧ – ‘‘ཨཀུསལདྷམྨེསཱུ’’ཏི. བྷཡདསྶཱཝཱིཏི བྷཡཏོ དསྶནསཱིལོ, པརམཱཎུམཏྟམྤི ཝཛྫཾ སིནེརུཔྤམཱཎཾ ཝིཡ ཀཏྭཱ དསྶནསཱིལོ. སམྨཱ ཨཱདིཡིཏྭཱཏི སམྨདེཝ སཀྐཙྩཾ སབྦསོ ཙ ཨཱདིཡིཏྭཱ. སིཀྑཱཔདེསཱུཏི ནིདྡྷཱརཎེ བྷུམྨནྟི སམུདཱཡཏོ ཨཝཡཝནིདྡྷཱརཎཾ དསྶེནྟོ ‘‘སིཀྑཱཔདེསུ ཏཾ ཏཾ སིཀྑཱཔད’’ནྟིཨཱདིམཱཧ. སིཀྑཱཔདཾ སམཱདཱཏབྦཾ སིཀྑིཏབྦཉྩཱཏི ཨདྷིཔྤཱཡོ. སིཀྑཱཏི ཨདྷིསཱིལསིཀྑཱ. པུབྦེ པད-སདྡོ ཨདྷིཊྛཱནཊྛོ, ཨིདྷ བྷཱགཏྠོཏི དཊྛབྦནྟི ཨཱཧ – ‘‘སིཀྑཱཀོཊྛཱསེསཱུ’’ཏི. མཱུལཔཉྙཏྟིཨནུཔཉྙཏྟིཨཱདིབྷེདཾ ཡཾཀིཉྩི སིཀྑིཏབྦཾ པཱུརེཏབྦཾ སཱིལཾ, ཏཾ པན དྭཱརཝསེན དུཝིདྷམེཝཱཏི ཨཱཧ – ‘‘ཀཱཡིཀཾ ཝཱ ཝཱཙསིཀཾ ཝཱ’’ཏི. ཨིམསྨིཾ ཨཏྠཝིཀཔྤེ སིཀྑཱཔདེསཱུཏི ཨཱདྷཱརེ བྷུམྨཾ སིཀྑཱབྷཱགེསུ ཀསྶཙི ཝིསུཾ ཨགྒཧཎཏོ. ཏེནཱཧ – ‘‘ཏཾ ཏཾ སབྦ’’ནྟི. ‘‘ཏཏོ ཏྭཾ བྷིཀྑུ སཱིལཾ ནིསྶཱཡཱ’’ཏི ཝཙནཏོ ཨནབྷིཛ྄ཛྷཱ ཨབྱཱཔཱདསམྨཱདིཊྛིཡོཔི སཱིལནྟི ཝུཏྟཱ, ཏསྨཱ ཨིམསྨིཾ སུཏྟེ ‘‘པཱཏིམོཀྑསཾཝརསཱིལམེཝ ཀཐིཏ’’ནྟི ཝུཏྟཾ.

༧. དུཙྩརིཏསུཏྟཝཎྞནཱ

༤༡༣. ཨེཏྠཱཔི ¶ མནོསུཙརིཏཾ སཱིལཾ ནཱམཱཏི དསྶེཏཱིཏི ཀཏྭཱ ཝུཏྟཾ ‘‘པཙྪིམཱཔི ཏཡོ’’ཏི. ཨནབྷིཛ྄ཛྷཱཨབྱཱཔཱདསམྨཱདིཊྛིདྷམྨཱ སཱིལཾ ཧོཏཱིཏི ཝེདིཏབྦཱ ཀཱཡཝཙཱིསུཙརིཏེཧི སདྡྷིཾ ¶ མནོསུཙརིཏམྤི ཝཏྭཱ ‘‘ཏཏོ ཏྭཾ བྷིཀྑུ སཱིལཾ ནིསྶཱཡ སཱིལེ པཏིཊྛཱཡཱ’’ཏི ཝུཏྟཏྟཱ. སེསཾ ཝུཏྟནཡམེཝ. ཚཊྛསཏྟམེསཱུཏི ཚཊྛསཏྟམཝགྒེསུ ཨཔུབྦཾ ནཏྠི. ཏེན ཝུཏྟཾ ‘‘ཧེཊྛཱ ཝུཏྟནཡེནེཝ ཨཏྠོ ཝེདིཏབྦོ’’ཏི. ཝགྒཔེཡྻཱལཏོ པན ཨིམསྨིཾ སཏིཔཊྛཱནསཾཡུཏྟེ ཀཏིཔཡཝགྒཱ སངྒཧཾ ཨཱརཱུལ༹ྷཱ, ཏཐཱཔི ཏེསཾ ཨཏྠཝིསེསཱབྷཱཝཏོ ཨེཀཙྩེསུ པོཏྠཀེསུ མུཁམཏྟཾ དསྶེཏྭཱ སཾཁིཏྟཱ, ཨེཀཙྩེསུ ཨཏིསཾཁིཏྟཱཝ, ཏེ སངྑེཔཝསེན དྭེ ཀཏྭཱ ‘‘ཚཊྛསཏྟམེསཱུ’’ཏི ཝུཏྟཾ.

ཨམཏཝགྒཝཎྞནཱ ནིཊྛིཏཱ.

སཏིཔཊྛཱནསཾཡུཏྟཝཎྞནཱ ནིཊྛིཏཱ.

༤. ཨིནྡྲིཡསཾཡུཏྟཾ

༡. སུདྡྷིཀཝགྒོ

༡. སུདྡྷིཀསུཏྟཝཎྞནཱ

༤༧༡. ཙཏུབྷཱུམཀ ¶ ¶ …པེ… ལབྦྷནྟི ཀུསལཱབྱཱཀཏབྷཱཝཏོ ཏེསཾ ཏིཎྞཾ ཨིནྡྲིཡཱནཾ. ཝཱིརིཡིནྡྲིཡསམཱདྷིནྡྲིཡཱནི…པེ… སབྦཏྠ ལབྦྷནྟི ཀུསལཏྟིཀསཱདྷཱརཎཏྟཱ. ཙཏུབྷཱུམཀ …པེ… ཝསེནཱཏི ཙཏུབྷཱུམཀདྷམྨཔརིཙྪེདཝསེན ཙེཝ ཀུསལཱདཱིཧི སབྦསངྒཱཧཀདྷམྨཔརིཙྪེདཝསེན ཙ ཝུཏྟནྟི ཨཏྠོ.

དུཏིཡསམཎབྲཱཧྨཎསུཏྟཝཎྞནཱ

༤༧༧. དུཀྑསཙྩཝསེནཱཏི དུཀྑསཙྩབྷཱཝེན ན པཛཱནནྟི. ཏཉྷི པརིཉྙེཡྻཏཱཡ དུཀྑསཙྩསངྒཧཾ. སམུདཡསཙྩཝསེནཱཏི ཏཎྷཱཝིཛྫཱདིཾ སདྡྷིནྡྲིཡསྶ སམུདཡསཙྩབྷཱཝེན ན པཛཱནནྟི. ནིརོདྷནྟི སདྡྷིནྡྲིཡསྶ ཨནུཔཱདཱཡ ནིརོདྷནིམིཏྟཾ ནིབྦཱནཾ. པཊིཔདནྟི སདྡྷིནྡྲིཡནིརོདྷགཱམིནིཾ པཊིཔདཾ ཨརིཡམགྒཾ. སེསེསཱུཏི ཝཱིརིཡིནྡྲིཡཱདཱིསུ.

སུཀྐཔཀྑེཏི ‘‘སདྡྷིནྡྲིཡཾ པཛཱནནྟཱི’’ཏིཨཱདིནཡཔྤཝཏྟེ ཨནཝཛྫཔཀྑེ. ཨདྷིམོཀྑཝསེན ཨཱཝཛྫནསམུདཡཱཏི ‘‘ཨཏྠི དིནྣ’’ནྟིཨཱདིནཡཔྤཝཏྟཔུབྦབྷཱགབྷཱུཏསདྡྷཱདྷིམོཀྑཝསེན ཨཱཝཛྫནུཔྤཏྟིཡཱ. ཏསྨཱ པཋམུཔྤནྣཱ སདྡྷཱ ཨེཝ ཧེཏྠ ‘‘ཨཱཝཛྫན’’ནྟི ཝུཏྟཱ, ན མནོདྭཱརཱཝཛྫནཾ. ཨེས ནཡོ སེསེསུཔི. ཏསྨཱ པཋམུཔྤནྣཱ ཨཱཝཛྫནཱ པགྒཧུཔྤཏྟིཊྛཱནཱནཾ ཏིཀྑཱནཾ ཝཱིརིཡིནྡྲིཡཱདཱིནཾ པཋམུཔྤཏྟིཡཱ ཨཱཝཛྫནཔརིཡཱཡེན ཝུཏྟཱཏི དཊྛབྦཾ. དུབྦལཱ ཧི པཋམུཔྤནྣཱ པགྒཧཱབྷཱཝཏོ ཝཱིརིཡིནྡྲིཡཱདཱིནཾ སམུདཡོཏི བལཝབྷཱཝཔྤཏྟཝཱིརིཡིནྡྲིཡཱདིཀསྶ ཨཱཝཛྫནཊྛཱནིཡཱནི ཧོནྟཱིཏི ཏེསཾ སམུདཡོཏི ཝུཏྟཱ, པུབྦེ ཨདྷིམུཙྩནཱདིཝསེན པཝཏྟསྶ ཨཱཝཛྫནསྶ སམུདཡཱཏི ཨཏྠོ. པུན ཚནྡཝསེནཱཏི ཀཏྟུཀཱམཏཱཀུསལཙྪནྡཝསེན སདྡྷཱདཱིནཾ ཨུཔྤཱདེཏུཀཱམཏཱཀཱརཔྤཝཏྟསྶ ¶ ཚནྡསྶ ཝསེན. མནསིཀཱརཝསེན ཨཱཝཛྫནསམུདཡཱཏི སདྡྷིནྡྲིཡཱདིཝསེན པཝཏྟསྶ དུབྦལསྶ ཏསྶ ནིབྦཏྟཀཡོནིསོམནསིཀཱརཝསེན ཨཱཝཛྫནསྶ ཨུཔྤཏྟིཡཱ. ཨེཝམྤཱིཏི ‘‘ཨདྷིམོཀྑཝསེནཱ’’ཏིཨཱདིནཱ ཝུཏྟཱཀཱརེནཔི. ཚསུ སུཏྟེསཱུཏི ¶ དུཏིཡཏོ པཊྛཱཡ ཚསུ སུཏྟེསུ. ཙཏུསཙྩམེཝ ཀཐིཏཾ. ཨསྶཱདགྒཧཎེན ཧི སམུདཡསཙྩཾ, ཨཱདཱིནཝགྒཧཎེན དུཀྑསཙྩཾ, ནིསྶརཎགྒཧཎེན ནིརོདྷམགྒསཙྩཱནི གཧིཏཱནཱིཏི. པཋམསུཏྟེ པན ཨིནྡྲིཡཱནཾ སརཱུཔདསྶནམེཝཱཏི.

༨. དབྦསུཏྟཝཎྞནཱ

༤༧༨. སོཏོ ཨཱཔཛྫཱིཡཏི ཨེཏེནཱཏི སོཏཱཔཏྟི, ཨནཱགཏཾ པཏི པཋམམགྒོ. སོཏོཏི ཨརིཡམགྒསོཏོ དཊྛབྦོ. ཨཱཔཛྫཱིཡཏཱིཏིཨཱདིཏོ པཊིཔཛྫཱིཡཏི. པཋམམགྒཔཊིལཱབྷནིམིཏྟཱནི སོཏཱཔནྣསྶ ཨངྒཱནི ཨིདྷ ‘‘སོཏཱཔཏྟིཡངྒཱནཱི’’ཏི ཝུཏྟཱནི. ཏཱནི པན ཏཱིསུ ཋཱནེསུ སདྡྷཱ ཨརིཡཀནྟསཱིལཉྩཱཏི ཝེདིཏབྦཱནི. སཝིསཡེཏི སཀཝིསཡེ. ཛེཊྛཀབྷཱཝདསྶནཏྠནྟི པདྷཱནབྷཱཝདསྶནཏྠཾ. ཡཏྠ སདྡྷཱདིཨིནྡྲིཡཱནཾ སཱཏིསཡཀིཙྩཾ, ཏེསཾ ཀིཙྩཱཏིརེཀཏཾ དསྶེཏུནྟི ཨཏྠོ. ཨིདཱནི ཏམཏྠཾ ཨུཔམཱཧི ཝིབྷཱཝེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. པཏྭཱཏི ཨཏྟནོ ཀིཙྩཱཏིརེཀཊྛཱནཾ པཊིལབྷིཏྭཱ. པུབྦངྒམནྟི སདྡཧནཀིཙྩེསུ པུརེཙཱརཾ དྷོརཡ྄ཧཾ. སེསཱནི ཝཱིརིཡིནྡྲིཡཱདཱིནི. ཏདནྭཡཱནཱིཏི ཏདནུགཏཱནི ཏསྶ སདྡྷིནྡྲིཡཱདིཀསྶ པཀྑིཀཱནི. ཨེས ནཡོ སེསེསུཔི. ཛྷཱནཝིམོཀྑེཏི ཛྷཱནསངྑཱཏེ ཝིམོཀྑེ སམཱདྷིཔདྷཱནཏཱཡ ཛྷཱནཱནཾ. ཨེཝཉྩ ཀཏྭཱ ‘‘སོཏཱཔཏྟིཡངྒཱནི པཏྭཱ’’ཏི ཨིདཉྩ ཝཙནཾ སམཏྠིཏཾ ཧོཏི. སདྡྷཱུཔནིསཉྷི སཱིལནྟི. ཨརིཡསཙྩཱནི པཏྭཱཏི ཙཏྟཱརི སཙྩཱནི ཨབྷིསམེཏབྦཱནི པཱཔུཎིཏྭཱ.

༩-༡༠. པཋམཝིབྷངྒསུཏྟཱདིཝཎྞནཱ

༤༧༩-༤༨༠. ནེཔཀྐཾ ཝུཙྩཏི པཉྙཱཏི ཨཱཧ – ‘‘པཉྙཱཡེཏཾ ནཱམ’’ནྟི. ནིཔཱཡཏི སཾཀིལེསདྷམྨེ ཝིསོསེཏི ནིཀྑཱམེཏཱིཏི ནིཔཀོ, ཐིརཏིཀྑསཏིཔུགྒལོ, ཏསྶ བྷཱཝོ ནེཔཀྐནྟི སཏིཡཱཔི ནེཔཀྐབྷཱཝོ ཡུཛྫཏེཝ. ཨེཝཉྷི ‘‘སཏིནེཔཀྐེནཱ’’ཏི ཨིདཾ ཝཙནཾ སམཏྠིཏཾ ཧོཏི, སཏིཡཱ ཙ ནེཔཀྐེནཱཏི ཨེཝཾ ཝུཙྩམཱནེན སཏིནིདྡེསོ ནཱམ ཀཏོ ཧོཏིཡེཝ. ཨསུཀཾ ནཱམ སུཏྟཾ ཝཱ ཀམྨཊྛཱནཾ ཝཱ མེ བྷཱསིཏནྟི. ཝོསྶཛྫཱིཡཏི སངྑཱརགཏཾ ཨེཏསྨིཾ ཨདྷིགཏེཏི ཝོསྶགྒོ, ནིབྦཱནཾ. ཏཾ ཨཱརམྨཎཾ ¶ ཀརིཏྭཱཏི ཨཱཧ – ‘‘ནིབྦཱནཱརམྨཎཾ ཀཏྭཱ’’ཏི. གཙྪནྟིཡཱཏི སངྑཱརཱནཾ ཨུདཡཉྩ ཝཡཉྩ ཨུདཡབྦཡཾ གཙྪནྟིཡཱ བུཛ྄ཛྷནྟིཡཱ. ཏེནཱཧ ¶ ‘‘ཨུདཡབྦཡཔརིགྒཱཧིཀཱཡཱ’’ཏི. སདྡྷཱསཏིཔཉྙིནྡྲིཡཱནི པུབྦབྷཱགཱནི ‘‘ཨིཏིཔི སོ བྷགཝཱ ཨརཧཾ, ཙིརཀཏམྤི ཙིརབྷཱསིཏམྤི སརིཏཱ ཨནུསྶརིཏཱ, ཨུདཡཏྠགཱམིནིཡཱ པཉྙཱཡཱ’’ཏི ཙ ཝུཏྟཏྟཱ. ‘‘ཨཱརདྡྷཝཱིརིཡོ ཝིཧརཏི, སོ ཨནུཔྤནྣཱན’’ནྟིཨཱདིནཱ ཙ ཝུཏྟཏྟཱ ཝཱིརིཡིནྡྲིཡཾ མིསྶཀཾ. ‘‘ཝོསྶགྒཱརམྨཎཾ ཀརིཏྭཱ’’ཏི ཝུཏྟཏྟཱ སམཱདྷིནྡྲིཡཾ ནིབྦཏྟིཏལོཀུཏྟརམེཝ. ཨཡམེཝཱཏི ཡྭཱཡཾ ནཝམེ ཝུཏྟོ. ཨཡམེཝ པུབྦབྷཱགམིསྶཀལོཀུཏྟརཏྟདྷམྨཔརིཙྪེདོ.

སུདྡྷིཀཝགྒཝཎྞནཱ ནིཊྛིཏཱ.

༢. མུདུཏརཝགྒོ

༡. པཊིལཱབྷསུཏྟཝཎྞནཱ

༤༨༡. སམྨཔྤདྷཱནེ ཨཱརབྦྷཱཏི སམྨཔྤདྷཱནེ བྷཱཝནཱཝསེན ཨཱརབྦྷ. ཏེནཱཧ ‘‘བྷཱཝེནྟོ’’ཏི. ཡཐཱ ཝཱིརིཡིནྡྲིཡནིདྡེསེ ‘‘ཙཏྟཱརོ སམྨཔྤདྷཱནེ ཨཱརབྦྷ ཝཱིརིཡཾ པཊིལབྷཏཱི’’ཏི དེསནཱ ཨཱགཏཱ, ཨེཝཾ སཏིནྡྲིཡནིདྡེསེ ‘‘ཙཏྟཱརོ སཏིཔཊྛཱནེ ཨཱརབྦྷ སཏིཾ པཊིལབྷཏཱི’’ཏི, ཏསྨཱ ‘‘སཏིནྡྲིཡེཔི ཨེསེཝ ནཡོ’’ཏི ཝུཏྟཾ. སདྡྷིནྡྲིཡཱདིནིདྡེསེསུ པན ན ཏཐཱ དེསེཏི.

༢. པཋམསཾཁིཏྟསུཏྟཝཎྞནཱ

༤༨༢. ཨིནྡྲིཡཱནཾ ཏིཀྑཱདིབྷཱཝོ ཝིཔསྶནཱཝསེན ཝཱ མགྒཝསེན ཝཱ ཕལཝསེན ཝཱ གཧེཏབྦོཏི ཝུཏྟཾ ‘‘ཏཏོཏི…པེ… ཝེདིཏབྦ’’ནྟི. ནནུ ཙེཏྠ མུདུབྷཱཝོ ཨེཝ པཱལི༹ཡཾ གཧིཏོཏི? སཙྩམེཏཾ, ཏཾ པན ཏིཀྑབྷཱཝེ ཨསཏི ན ཧོཏི ཏིཀྑཱདིབྷཱཝོཏི ཝུཏྟཾ. ཡཏོ ཧི ཨཡཾ མུདུ, ཨིཏོ ཏཾ ཏིཀྑནྟི ཝཏྟབྦཏཾ ལབྷཏི ཨཔེཀྑཱསིདྡྷཏྟཱ ཏིཀྑམུདུབྷཱཝཱནཾ པཱརཱཔཱརཾ ཝིཡ. ཨིདཱནི ‘‘ཏཏོ’’ཏིཨཱདིནཱ སངྑེཔཏོ ཝུཏྟམཏྠཾ ཝིཏྠཱརཏོ དསྶེཏུཾ ‘‘སམཏྟཱནཱི’’ཏིཨཱདི ཝུཏྟཾ. ཏཏྠ སམཏྟཱནཱིཏི སམྤནྣཱནི. ཨིཏརཾ ¶ ཏསྶེཝ ཝེཝཙནཾ. སམཏྟཱནཱིཏི ཝཱ པརིཡཏྟཱནི, སམཏྟཱནཱིཏི ཨཏྠོ. ‘‘ཏཏོ མུདུཏརཱནི དྷམྨཱནུསཱརཱིམགྒསྶཱ’’ཏི ཀསྨཱ ཝུཏྟཾ? ཏཏོཏི ཧི སོཏཱཔཏྟིམགྒཝིཔསྶནིནྡྲིཡཱནི ཨདྷིཔྤེཏཱནིཡེཝ, ‘‘ཏཏོ མུདུཏརཱནཱི’’ཏི ཝུཏྟཔཋམམགྒོ དྷམྨཱནུསཱརཱི ཝཱ སིཡཱ སདྡྷཱནུསཱརཱི ཝཱཏི བྱབྷིཙརཏི? ནཱཡཾ དོསོ, སོཏཱཔཏྟིམགྒེཀདེསཝསེནེཝ ¶ ལདྡྷབྦཔཋམམགྒཱཔེཀྑཱཡ ཝིཔསྶནཱཡ ཝིབྷཱགསྶ ཨདྷིཔྤེཏཏྟཱ. ཡོ ཧི སོཏཱཔནྣོ ཧུཏྭཱ ཨིརིཡཱཔཐཾ ཨཀོཔེཏྭཱ ཡཐཱནིསིནྣོཝ སཀདཱགཱམིམགྒཾ པཱཔུཎཱཏི, ཏསྶ ཝིཔསྶནིནྡྲིཡཱནི སནྡྷཱཡ ཨཝིབྷཱགེན ཝུཏྟཾ – ‘‘ཏཏོ མུདུཏརཱནི སོཏཱཔཏྟིམགྒསྶ ཝིཔསྶནིནྡྲིཡཱནི ནཱམཱ’’ཏི. ཡོ པན སོཏཱཔནྣོ ཧུཏྭཱ ཀཱལནྟརེན སཀདཱགཱམཱི ཧོཏི, ཏསྶ སོཏཱཔཏྟིམགྒཏྠཱཡ པཝཏྟཱནི ཝིཔསྶནིནྡྲིཡཱནི ནཱམ ཧོནྟི. སོ ཙེ དྷམྨཱནུསཱརཱིགོཏྟོ, ཏསྶ ཡཐཱཝུཏྟཝིཔསྶནིནྡྲིཡཏོ མུདུཏརཱནཱིཏི ‘‘ཏཏོ མུདུཏརཱནི དྷམྨཱནུསཱརཱིམགྒསྶཱ’’ཏི ཝུཏྟཾ. ཝིཔསྶནིནྡྲིཡཱནི ནཱམཱཏི ཨཱནེཏྭཱ སམྦནྡྷོ. དྷམྨཱནུསཱརཱིཝིཔསྶནིནྡྲིཡཏོ སདྡྷཱནུསཱརཱིཝིཔསྶནིནྡྲིཡཱནཾ མུདུབྷཱཝསྶ ཀཱརཎཾ སཡམེཝ ཝཀྑཏི. དྷམྨེན པཉྙཱཡ མགྒསོཏཾ ཨནུསྶརཏཱིཏི དྷམྨཱནུསཱརཱི, པཉྙུཏྟརོ ཨརིཡོ. སདྡྷཱཡ མགྒསོཏཾ ཨནུསྶརཏཱིཏི སདྡྷཱནུསཱརཱི, སདྡྷུཏྟརོ ཨརིཡོ.

ཨེཝཾ ཝིཔསྶནཱཝསེན དསྶེཏྭཱ མགྒཝསེན དསྶེཏུཾ ‘‘ཏཐཱ’’ཏིཨཱདི ཨཱརདྡྷཾ. སམྤཡོགཏོ སབྷཱཝཏོ ཙ ཨརཧཏྟམགྒཔརིཡཱཔནྣཱནི ཨརཧཏྟམགྒིནྡྲིཡཱནི. ཨརཧཏྟཕལིནྡྲིཡཱནཱིཏི ཨེཏྠཱཔི ཨེསེཝ ནཡོ.

ཨིདཱནི ཕལཝསེན དསྶེཏུཾ ‘‘སམཏྟཱནི པརིཔུཎྞཱནཱི’’ཏིཨཱདི ཝུཏྟཾ. སོཏཱཔཏྟིམགྒཊྛཔུགྒལཝསེན ནཱནཏྟཾ ཛཱཏཾ, ཏསྨཱ ཏེ དྭེཔི ཨིདྷ ཏཏིཡཝཱརེ ན ལབྦྷནྟཱིཏི ཨདྷིཔྤཱཡོ. དྷམྨཱནུསཱརཱིསདྡྷཱནུསཱརཱིནཾ ནཱནཏྟཾ ཀཐཾ ཛཱཏནྟི ཨཱཧ ‘‘ཨཱགམནེནཔི མགྒེནཔཱི’’ཏི. ཏདུབྷཡཾ དསྶེནྟོ ‘‘སདྡྷཱནུསཱརཱིཔུགྒལོ’’ཏིཨཱདིམཱཧ. ཨུདྡིསཱཔེནྟོཏི ཨུདྡེསཾ གཎྷནྟོ.

མགྒོ ཏིཀྑོ ཧོཏི ཨུཔནིསྶཡིནྡྲིཡཱནཾ ཏིཀྑཝིསདབྷཱཝཏོ. ཏེནཱཧ ‘‘སཱུརཾ ཉཱཎཾ ཝཧཏཱི’’ཏི. ཨསངྑཱརེནཱཏི སརསེནེཝ. ཨཔྤཡོགེནཱཏི ཏསྶེཝ ཝེཝཙནཾ. དྷམྨཱནུསཱརཱིཔུགྒལོ ཧི ཨཱགམནམྷི ཀིལེསེ ཝིཀྑམྦྷེནྟོ ཨཔྤདུཀྑེན ཨཔྤཀསིརེན ཨཀིལམནྟོཝ ཝིཀྑམྦྷེཏུཾ སཀྐོཏི. སདྡྷཱནུསཱརཱིཔུགྒལོ པན དུཀྑེན ཀསིརེན ཀིལམནྟོ ཧུཏྭཱ ཝིཀྑམྦྷེཏུཾ སཀྐོཏི, ཏསྨཱ དྷམྨཱནུསཱརིསྶ པུབྦབྷཱགམགྒཀྑཎེ ¶ ཀིལེསཙྪེདཀཉཱཎཾ ཨདནྡྷཾ ཏིཁིཎཾ ཧུཏྭཱ ཝཧཏི, ཡཐཱ ནཱམ ཏིཁིཎེན ཨསིནཱ ཀདལིཾ ཚིནྡནྟསྶ ཚིནྣཊྛཱནཾ མཊྛཾ ཧོཏི, ཨསི ཁིཔྤཾ ཝཧཏི, སདྡོ ན སུཡྻཏི, བལཝཝཱཡཱམཀིཙྩཾ ན ཧོཏི, ཨེཝརཱུཔཱ དྷམྨཱནུསཱརིནོ པུབྦབྷཱགབྷཱཝནཱ ཧོཏི, སདྡྷཱནུསཱརིནོ པན པུབྦབྷཱགཀྑཎེ ཀིལེསཙྪེདཀཉཱཎཾ དནྡྷཾ ན ཏིཁིཎཾ ཨསཱུརཾ ཧུཏྭཱ ཝཧཏི, ཡཐཱ ནཱམ ནཱཏིཏིཁིཎེན ཨསིནཱ ཀདལིཾ ཚིནྡནྟསྶ ཚིནྣཊྛཱནཾ ན མཊྛཾ ཧོཏི, ཨསི སཱིགྷཾ ན ཝཧཏི, སདྡོ སུཡྻཏི, བལཝཝཱཡཱམཀིཙྩཾ ཨིཙྪིཏབྦཾ ¶ ཧོཏི, ཨེཝརཱུཔཱ སདྡྷཱནུསཱརིནོ པུབྦབྷཱགབྷཱཝནཱ ཧོཏི. ཨེཝཾ སནྟེཔི ཀིལེསཀྑཡེ ནཱནཏྟཾ ནཏྠི. ཏེནཱཧ ‘‘ཀིལེསཀྑཡེ པནཱ’’ཏིཨཱདི. ཨཝསེསཱ ཙ ཀིལེསཱ ཁཱིཡནྟི སཾཡོཛནཀྑཡཱཡ ཡོགཏྟཱ.

༣. དུཏིཡསཾཁིཏྟསུཏྟཝཎྞནཱ

༤༨༣. ཏཏོཏི ཕལཏོ ཕལཝེམཏྟཏཱཡ ཙརིཡམཱནཏྟཱ. ཨིནྡྲིཡཝེམཏྟཏཱ སདྡྷཱདཱིནཾ ཨིནྡྲིཡཱནཾ ནཱནཏྟེན. ཕལནཱནཏྟནྟི ཨརཧཏྟཕལཱདིནཱནཏྟཾ. པུགྒལནཱནཏྟནྟི ཨནཱགཱམིཨཱདིཔུགྒལནཱནཏྟཾ.

༤. ཏཏིཡསཾཁིཏྟསུཏྟཝཎྞནཱ

༤༨༤. སཱིལཀྑནྡྷཱདཱིཧི སདྡྷིནྡྲིཡཱདཱིཧི ཙ པརིཏོ པཱུརཎེན པརིཔཱུརཾ ཨརཧཏྟམགྒཾ ཀརོནྟོ ནིཔྥཏྟིཏོ ཨརཧཏྟཕལཾ ཨཱརཱདྷེཏི ནིཔྥཱདེཏི. ཏཡོ པདེསམགྒེཏི སཱིལཀྑནྡྷཱདཱིནཾ ཨཔཱརིཔཱུརིཡཱ ཨེཀདེསབྷཱུཏེ ཏཡོ ཧེཊྛིམམགྒེ. པདེསཾ ཧེཊྛིམཕལཏྟཡཾ. ཙཏཱུསཱུཏི ཨིམསྨིཾ ཝགྒེ པཋམཱདཱིསུ ཙཏཱུསུ སུཏྟེསུ. ཀཱམཉྩེཏྠ ཏཏིཡེ ‘‘ཏཏོཏི ཕལཝསེན ནིསྶཀྐ’’ནྟི ཝུཏྟཾ, ཙཏུཏྠེ ‘‘པརིཔཱུརཾ པརིཔཱུརཀཱརཱི ཨཱརཱདྷེཏི, པདེསཾ པདེསཀཱརཱི’’ཏི, ‘‘ཙཏཱུསུཔི སུཏྟེསུ མིསྶཀཱནེཝ ཨིནྡྲིཡཱནི ཀཐིཏཱནཱི’’ཏི པན ཝཙནཏོ ཝིཔསྶནཱཝསེནཔི ཡོཛནཱ ལབྦྷཏེཝཱཏི དཊྛབྦཾ.

༥-༧. པཋམཝིཏྠཱརསུཏྟཱདིཝཎྞནཱ

༤༨༥-༤༨༧. ཝིཔསྶནཱཝསེན ནིསྶཀྐཾ ཝེདིཏབྦཾ, ན མགྒཕལཝསེན, ཨིམསྨིཾ སུཏྟེ སབྦསོཝ ཝིཔསྶནིནྡྲིཡཱནཾ ཨེཝ ཨདྷིཔྤེཏཏྟཱ. ཨིདཱནི ཏམཏྠཾ ¶ པཱཀཊཾ ཀཱཏུཾ ‘‘པརིཔུཎྞཱནི ཧཱི’’ཏིཨཱདི ཝུཏྟཾ. ཨཝིཧཱདཱིསུ པཉྩསུ སུདྡྷཱཝཱསེསུ ཏཏྠ ཏཏྠ ཨཱཡུཝེམཛ྄ཛྷཾ ཨནཏིཀྐམིཏྭཱ ཨནྟརཱ ཀིལེསཔརིནིབྦཱནེན པརིནིབྦཱཡནཏོ ཨནྟརཱཔརིནིབྦཱཡཱི, ཨསངྑཱརེན ཨཔྤཡོགེན སརསཏོཝ པརིནིབྦཱཡནཏོ ཨསངྑཱརཔརིནིབྦཱཡཱི, ཏབྦིཔརིཡཱཡཏོ སསངྑཱརཔརིནིབྦཱཡཱི, ཨུདྡྷཾ ཝཱཧིབྷཱཝེན ཨུདྡྷམསྶ ཏཎྷཱསོཏཾ ཝཊྚསོཏཾ ཝཱཏི ཨུདྡྷཾསོཏོ, ཨུདྡྷཾ ཝཱ གནྟྭཱ པཊིལབྷིཏབྦཏོ ཨུདྡྷམསྶ མགྒསོཏནྟི ཨུདྡྷཾསོཏོ, ཨཀནིཊྛབྷཝཾ གཙྪཏཱིཏི ཨཀནིཊྛགཱམཱིཏི ཨེཝམེཏྠ སདྡཏྠོ དཊྛབྦོ.

ཨིམསྨིཾ པན ཋཱནེཏི ‘‘ཝིཔསྶནཱཝསེན ནིསྶཀྐ’’ནྟི ཝུཏྟཊྛཱནེ. ཨརཧཏྟམགྒེཡེཝ ཋཏྭཱཏི ཨིམསྨིཾཡེཝ ¶ བྷཝེ ཨརཧཏྟམགྒེཡེཝ, ན ཝིཔསྶནཱཡ ཙ ཋཏྭཱ. པཉྩ ནིསྶཀྐཱནི ནཱིཧརིཏབྦཱནཱིཏི ‘‘ཏཏོ མུདུཏརེཧི ཨནྟརཱཔརིནིབྦཱཡཱི ཧོཏཱི’’ཏིཨཱདཱིནི པཉྩ ནིསྶཀྐཱནི ནིདྡྷཱརེཏྭཱ ཀཐེཏབྦཱནི. ཨིདཱནི ཏམཏྠཾ ཝིཝརནྟོ ‘‘ཨརཧཏྟམགྒསྶ ཧཱི’’ཏིཨཱདིམཱཧ. ཏཏྠ ཨཝིཧཱདཱིསུ ཨུཔྤཛྫིཏྭཱ ཨུཔྤནྣསམནནྟརཱཡ པརིནིབྦཱཡནཏོ པཋམཨནྟརཱཔརིནིབྦཱཡཱི. ཏཏྠ ཨཱཡུཔྤམཱཎཝེམཛ྄ཛྷཾ ཨཔྤཏྭཱཝ པརིནིབྦཱཡནཏོ དུཏིཡཨནྟརཱཔརིནིབྦཱཡཱི, ཨཱཡུཝེམཛ྄ཛྷཾ པཏྭཱ པརིནིབྦཱཡནཏོ ཏཏོ པརཾ ཏཏིཡཨནྟརཱཔརིནིབྦཱཡཱི ཝེདིཏབྦོ. ‘‘པཉྩ ནིསྶཀྐཱནཱི’’ཏི ཀསྨཱ ཝུཏྟཾ? ནནུ ཨསངྑཱརསསངྑཱརཔརིནིབྦཱཡཱིཏི ཝཏྟབྦནྟི? ན ཝཏྟབྦནྟི དསྶེནྟོ ཨཱཧ ‘‘ཨསངྑཱརཔརིནིབྦཱཡིསྶ སསངྑཱརཔརིནིབྦཱཡིནོཔི ཨེཏེཝ པཉྩ ཛནཱ’’ཏི.

ཏཱིཎི ནིསྶཀྐཱནཱིཏི ‘‘ཏཏོ མུདུཏརེཧི སོཏཱཔནྣོ ཧོཏཱི’’ཏིཨཱདཱིནི ཏཱིཎི ནིསྶཀྐཔདཱནི. ཨིདྷ སཀདཱགཱམཱི ན གཧིཏོ, སོ ཨནཱགཱམིམགྒེ ཋཏྭཱ ནཱིཧརིཏབྦོ, ཨནཱགཱམིམགྒསྶ ཝིཔསྶནིནྡྲིཡེཧི མུདུཏརེཧི སཀདཱགཱམཱི ཧོཏི. སཀདཱ…པེ… མུདུཏརཱནཱིཏི ཨིདཾ སཀདཱགཱམིམགྒསྶ ཝིཔསྶནིནྡྲིཡེཧི ཨེཀབཱིཛིསངྑཱཏསོཏཱཔནྣཝིཔསྶནིནྡྲིཡཱནི མུདུཏརཱནི ཧོནྟཱིཏི ཏཱིཎི ཀཏྭཱ ཝུཏྟཾ. དྷམྨཱནུསཱརཱིཏིཨཱདིདྭཡཾ ཀོལཾཀོལཱདིདྭཡེན གཧིཏཾ ཧོཏཱིཏི. སཀདཱགཱམིམགྒསྶ ཧཱིཏིཨཱདི ཝུཏྟསྶེཝ ཨཏྠསྶ ཝིཝརཎཾ. སེསཾ ཧེཊྛཱ ཝུཏྟནཡམེཝ. ཚཊྛསཏྟམཱནི ཝུཏྟནཡཱནེཝཱཏི ཚཊྛསཏྟམཱནི སུཏྟཱནི དུཏིཡཏཏིཡེསུ ཝུཏྟནཡཱནེཝ. ཏཏྠ པན མིསྶཀཱནི ཨིནྡྲིཡཱནི ཀཐིཏཱནི, ཨིདྷ པུབྦབྷཱགཝིཔསྶནིནྡྲིཡཱནི ཀཐིཏཱནཱིཏི ཨཡམེཝ ཝིསེསོ.

༨. པཊིཔནྣསུཏྟཝཎྞནཱ

༤༨༨. ཏནྟི ¶ མགྒཕལཝསེན ནིསྶཀྐཾ. པཱལི༹ཡཾ ཝུཏྟམེཝ ‘‘ཨརཧཏྟཕལསཙྪིཀིརིཡཱཡ པཊིཔནྣོ ཧོཏཱི’’ཏིཨཱདིནཱ. ཨཊྛཧཱིཏི ཙཏཱུཧི ཕལེཧི ཙཏཱུཧི ཙ མགྒེཧཱིཏི ཨཊྛཧི. བཧིབྷཱུཏོ ན ཨནྟོབྷཱཝོ. ལོཀུཏྟརཱནེཝ ཨིནྡྲིཡཱནི ཀཐིཏཱནི མགྒཕལཙིཏྟུཔྤཱདཔརིཡཱཔནྣཏྟཱ.

༩-༡༠. སམྤནྣསུཏྟཱདིཝཎྞནཱ

༤༨༩-༤༩༠. ཨིནྡྲིཡསམྤནྣོཏི ཨེཏྠ སམྤནྣསདྡོ པརིཔཱུརིཨཏྠོཏི ཨཱཧ ‘‘པརིཔུཎྞིནྡྲིཡོ’’ཏི. མིསྶཀཱནི ཨིནྡྲིཡཱནི ཀཐིཏཱནི སཱམཉྙཏོཝ དེསིཏཏྟཱ.

མུདུཏརཝགྒཝཎྞནཱ ནིཊྛིཏཱ.

༣. ཚལི༹ནྡྲིཡཝགྒོ

༢. ཛཱིཝིཏིནྡྲིཡསུཏྟཝཎྞནཱ

༤༩༢. ཨིཏྠིབྷཱཝེཏི ¶ ཨིཏྠིཏཱཡ. ཨིནྡཊྛཾ ཀརོཏི ཏཐཱསཏྟཛནསཱམཉྙཀཱརཎབྷཱཝཏོ. ཨིཏྠིཡཱ ཨེཝ ཨིནྡྲིཡཾ ཨིཏྠིནྡྲིཡཾ. ཨེས ནཡོ པུརིསིནྡྲིཡེ. ཛཱིཝིཏེཏི སཧཛཱཏདྷམྨཱནཾ ཛཱིཝནེ པཱལནེ པཝཏྟནེ. ཝཊྚིནྡྲིཡཱནཱིཏི ཝཊྚཧེཏུབྷཱུཏཱནི ཨིནྡྲིཡཱནི. ཨིམེསུ ཧི ཨུཔཱདིནྣཨིནྡྲིཡེསུ སཏི ཝཊྚཾ ཝཏྟཏི པཉྙཱཡཏི.

༣. ཨཉྙིནྡྲིཡསུཏྟཝཎྞནཱ

༤༩༣. ཨཛཱནིཏཔུབྦཾ དྷམྨནྟི ཙཏུསཙྩདྷམྨམཱཧ, ཏཐཱ ཏེསཾཡེཝ ཉཱཏདྷམྨཱནནྟི. ཨཡཾ པནེཏྠ ཨཏྠོ – ཨཱཛཱནཱཏཱིཏི ཨཉྙཱ, པཋམམགྒེན ཉཱཏམནཏིཀྐམིཏྭཱ ཛཱནཱཏཱིཏི ཨཏྠོ. སོཏཱཔནྣཱདཱིནཾ ཚཨརིཡཱནཾ ཨེཏཾ ནཱམཾ. ཨཉྙསྶ ཨིནྡྲིཡཱནི ཨཉྙིནྡྲིཡཱནི. ཨཉྙཱཏཱཝཱིསཱུཏི ཨཱཛཱནིཏཝནྟེསུ. ཡསྨཱ ཨགྒཕལདྷམྨེསུ ཉཱཎཀིཙྩཾ སཱཏིསཡཾ, ཏསྨཱ ཏཾ ཀིཙྩཾ སེསདྷམྨེསུཔི སམཱརོཔེཏྭཱ ཝུཏྟཾ ‘‘ཨཉྙཱཏཱཝཱིསུ ཨརཧཏྟཕལདྷམྨེསཱུ’’ཏི. ཏཏྠ ཏཏྠ ཏེསུ ཏེསུ མགྒཕལེསུ. ཏེན ཏེནཱཀཱརེནཱཏི ཨནཉྙཱཏཛཱནནཱདིཨཱཀཱརེན.

༤. ཨེཀབཱིཛིསུཏྟཝཎྞནཱ

༤༩༤. ཝིཔསྶནཏོ ¶ ནིསྶཀྐནྟི ཝིཔསྶནིནྡྲིཡེཧི ནིསྶཀྐཾ. ཨིདཱནི ཏམེཝ སངྑེཔཏོ ཝུཏྟམཏྠཾ ཝིཝརནྟོ ‘‘སམཏྟཱནཱི’’ཏིཨཱདིམཱཧ. ཏཱིཎི ནིསྶཀྐཱནི ཨེཝམིདྷ པཉྩ ནིསྶཀྐཱནི ནཱིཧརིཏབྦཱནི ཨེཀབཱིཛིཨཱདིཝིབྷཱཝནཏོ. ཏེནཱཧ ‘‘སཀདཱགཱམིམགྒསྶ ཧཱི’’ཏིཨཱདི. སོཏཱཔཏྟིམགྒསྶ ཝིཔསྶནིནྡྲིཡཱནི ནཱམ ཏེནཏྟབྷཱཝེན སཀདཱགཱམིམགྒཾ པཏྟུཾ གཙྪནྟསྶ སོཏཱཔནྣསྶ ཝིཔསྶནིནྡྲིཡཱནི. པཉྩཔི ཏེ སོཏཱཔཏྟིམགྒསྶ བྷེདཱཡེཝཱཏི ‘‘སཀདཱགཱམིམགྒེ ཋཏྭཱ ནཱིཧརིཏབྦཱནཱི’’ཏི ཝུཏྟཾ.

ཨེཀབཱིཛཱིཏི ཨེཏྠ ཁནྡྷབཱིཛཾ ནཱམ ཀཐིཏཾ. ཡསྶ ཧི སོཏཱཔནྣསྶ ཨེཀཾ ཁནྡྷབཱིཛཾ ཨཏྠི, ཨེཀཾ ཨཏྟབྷཱཝགྒཧཎཾ, སོ ཨེཀབཱིཛི ནཱམ. ཏེནཱཧ – ‘‘སོཏཱཔནྣོ ཧུཏྭཱ’’ཏིཨཱདི. མཱནུསཀཾ ¶ བྷཝནྟི ཨིདཾ པནེཏྠ དེསནཱམཏྟཾ, དེཝབྷཝཾ ནིབྦཏྟེཏཱིཏིཔི ཝཏྟུཾ ཝཊྚཏིཡེཝ. བྷགཝཏཱ གཧིཏནཱམཱནེཏཱནི. ཨེཏྟཀཉྷི པམཱཎཾ གཏོ སཏྟཀྑཏྟུཔརམོ ནཱམ ཧོཏི, ཨེཏྟཀཾ ཀོལཾཀོལོ, ཨེཏྟཀཾ ཨེཀབཱིཛཱིཏི བྷགཝཏཱ ཨེཏེསཾ ནཱམཾ གཧིཏཾ.

དྭེ ཏཡོ བྷཝེཏི དེཝམནུསྶེསུ ཨེཝ དྭེ ཏཡོ བྷཝེ. སམྦོདྷིཙཏུསཙྩདྷམྨོ པརཾ ཨཡནཾ ནིསྶཡོ གཏི ཨེཏསྶཱཏི སམྦོདྷིཔརཱཡཎོ. ཀུལཏོ ཀུལཾ གཙྪཏཱིཏི ཀོལཾཀོལོ. སོཏཱཔཏྟིཕལསཙྪིཀིརིཡཏོ པཊྛཱཡ ཧི ནཱིཙཀུལེ ཨུཔྤཏྟི ནཱམ ནཏྠི, མཧཱབྷོགེསུ ཀུལེསུ ཨེཝ ནིབྦཏྟཏཱིཏི ཨཏྠོ. ཀེཝལོཔི ཧི ཀུལ-སདྡོ མཧཱབྷོགཀུལམེཝ ཝདཏི. དྭེ ཝཱ ཏཱིཎི ཝཱ ཀུལཱནཱིཏི དེཝམནུསྶཝསེན དྭེ ཝཱ ཏཡོ ཝཱ བྷཝེཏི ཨཡམྤི མིསྶཀབྷཝེན ཀཐིཏོ. ཛཱཏསྶ ཀུམཱརསྶ ཝིཡ ཨརིཡཱཡ ཛཱཏིཡཱ ཛཱཏསྶ ནཱམམེཏཾ, ཡདིདཾ ནིཡཏོཏི སཏྟཀྑཏྟུཔརམཱདིཀོཏི ཙ སམཉྙཱཏི དསྶེནྟོ ཨཱཧ ‘‘བྷགཝཏཱ གཧིཏནཱམཝསེནེཝཱ’’ཏིཨཱདི.

ཡདི པུབྦཧེཏུནིཡམཏོ སོཏཱཔནྣོ ཙ ནིཡཏོཏི སོཏཱཔཏྟིམགྒཏོ ཨུདྡྷཾ ཏིཎྞཾ མགྒཱནཾ ཨུཔནིསྶཡཱབྷཱཝཏོ པུབྦཧེཏུཀིཙྩཾ ནཏྠཱིཏི སོཏཱཔཏྟིམགྒསྶ ཨུཔནིསྶཡབྷཱཝོ ཨཱཔཛྫཏི. ཡདི ཏསྶཔི པུབྦཧེཏུཨུཔནིསྶཡོ སིཡཱ, ཏཱཝ ནིཡམཏོ སོཏཱཔཏྟིམགྒུཔྤཏྟིཏོ པུབྦེ ཨེཝ ནིཡམིཏོ, ཡཱཝཉྩ ཨཀནིཊྛཾ ཏསྶ པུབྦཧེཏུ ནཱམ ¶ , ཨཧེཏུཀཏཱ ཨཱཔནྣཱ, ཨིཙྩསྶ ཨཧེཏུ ཨཔྤཙྩཡཱ ནིཔྥཏྟི པཱཔུཎཱཏི. ཀིཉྩ ཧེཏུ ཙེ? ནིཡམཏོ སོཏཱཔནྣོ ཙ ནིཡཏོཏི པཋམམགྒཱདྷིགམེནེཝ ཨནུཀྐམེན ཨུཔརི ཏིཎྞཾ མགྒཱནཾ ཀིཙྩཱནི ནིཔྥཛྫནྟི, ཨེཝཾ སཏྟཀྑཏྟུཔརམཏཱདིནིཡམེ སཏི སཏྟམབྷཝཱདིཏོ ཨུདྡྷཾ པཝཏྟཏཱཡ དུཀྑསྶ མཱུལབྷཱུཏཱ ཀིལེསཱ པཋམམགྒེནེཝ ཁཱིཎཱཏི ཨུཔརི ཏཡོ མགྒཱ ཨཀིཙྩཱ སིཡུཾ. ཏེནཱཧ ‘‘པཋམམགྒསྶ ཨུཔནིསྶཡོ ཀཏོ ནཱམཱ’’ཏིཨཱདི.

ཡདི ཨུཔརི ཏཡོ མགྒཱ སཏྟཀྑཏྟུཔརམཱདིཏཾ ནིཡམེནྟི, ཏཏོ ཙ ཨཉྙོ སོཏཱཔནྣོ ནཏྠཱིཏི སོཏཱཔཏྟིམགྒསྶ ཨཀིཙྩཀཏཱ ནིཔྤཡོཛནཏཱ ཨཱཔཛྫེཡྻ. ཨཐ སཀྐཱཡདིཊྛིཨཱདིཔྤཧཱནཾ ཏསྶ ཀིཙྩཾ, ཏེསཾ ཏེསཾ པཧཱནེན སཏྟཀྑཏྟུཔརམཱདིནིཡམཏཱཡ. བྷཝིཏབྦཾ, ཡཱཝ ཨུཔརིམགྒཱ ཨེཝ ཧོནྟཱིཏི སཏྟབྷཝཱདིཏོ ཨུདྡྷམཔཝཏྟནཏོ ཏེན ཝིནཱནེན སཀྐཱཡདིཊྛིཨཱདིཔྤཧཱནེན ཙ ཏེན ཝིནཱ བྷཝིཏབྦནྟི ཨཱཧ – ‘‘པཋམམགྒེ ཨནུཔྤནྣེཝ ཨུཔརི ཏཡོ མགྒཱ ཨུཔྤནྣཱཏི ཨཱཔཛྫཏཱི’’ཏི. ཏིཎྞཾ མགྒཱནནྟི ཨུཔརི ཏིཎྞཾ མགྒཱནཾ. ཝིཔསྶནཱ ནིཡམེཏཱིཏི ཡུཛྫཏཱིཏི ཝུཏྟམཏྠཾ ཝིཝརནྟོ ‘‘སཙེ ཧཱི’’ཏིཨཱདིམཱཧ.

སོཏཱཔནྣོ ¶ ཝཊྚཛ྄ཛྷཱསཡོ. ཏཏྲེཀཙྩེ པཱཀཊེ པཉྙཱཏེ དསྶེནྟོ ‘‘ཨནཱཐཔིཎྜིཀོ’’ཏིཨཱདིམཱཧ. ཨིདྷཊྛཀཝོཀིཎྞསུཀྑཝིཔསྶཀསྶཱཏི ཡོ ཨིམསྨིཾ ཀཱམབྷཝེ ཋིཏོ མནུསྶདེཝཝསེན ཝོཀིཎྞབྷཝཱུཔཔཏྟིཀོ སུཀྑཝིཔསྶཀོ ཙ, ཏསྶ ཝསེན. ནཱམཾ ཀཐིཏནྟི སཏྟཀྑཏྟུཔརམོཏི ནཱམཾ ཀཐིཏཾ. ཀེཙི པན ‘‘ཀཱམབྷཝེ སཏྟཀྑཏྟུཾཡེཝ ཨུཔྤཛྫཏི, ན ཏཏོ’’ཏི ཝདནྟི, ཏཾ ཝཱིམཾསིཏབྦཾ.

སོདྷེསྶཱམཱིཏི ཛམྦུདཱིཔེ ཀེནཙི ཏེཔིཊཀེན བྷིཀྑུནཱ སདྡྷིཾ པིཊཀཏྟཡམེཝ མཡ྄ཧཾ ཨུགྒཧཔརིཔུཙྪཱཝསེན སོདྷེཡྻཱམཱིཏི པརཏཱིརཾ ཛམྦུདཱིཔཾ གཏོ. ཡོ བྷིཀྑུ སཀྐོཏཱིཏི ཡོཛནཱ. ཨནིཙྩཱནུཔསྶནཱདཱིསུ ཨེཀམུཁེན ཨབྷིནིཝིཊྛེནཔི ཨབྷིདྷམྨཔརིཡཱཡེན ཏཱིཧི ཨེཝ ཝིམོཀྑེཧི མགྒཾ ལབྷཏཱིཏི ཨབྷིནིཝེསབྷེདེན ཏཡོ པུགྒལཱ སུཉྙཏཏོ ཝུཊྛིཏཱ, ཏཐཱ ཏཡོ ཨཔྤཎིཧིཏཏོ ཝུཊྛིཏཱཏི ཚ ཧོནྟི, ཏེཝ སདྡྷཱདྷུརཔཉྙཱདྷུརཝསེན དྭཱདས སཀདཱགཱམིནོ. ཏཐཱ ཨརཧནྟོ, ཏཡོ ཨནྟརཱཔརིནིབྦཱཡིནོ ¶ ཨེཀོ ཨུཔཧཙྩཔརིནིབྦཱཡཱི ཨེཀོ ཨུདྡྷཾསོཏོ ཨཀནིཊྛགཱམཱིཏི པཉྩ, ཏེ ཨསངྑཱརསསངྑཱརཔརིནིབྦཱཡིབྷེདེན དསཱཏི ཨཝིཧཱདཱིསུ ཙཏཱུསུཔི ཙཏྟཱལཱིས, ཨཀནིཊྛེ པན ཨུདྡྷཾསོཏོ ནཏྠཱིཏི ཨཊྛཙཏྟཱལཱིས ཨནཱགཱམིནོ. ཝིཔསྶནཱ ཀཐིཏཱ སམྨསནཙཱརསྶ ཀཐིཏཏྟཱ.

༥-༡༠. སུདྡྷཀསུཏྟཱདིཝཎྞནཱ

༤༩༥-༥༠༠. ཡཐཱ ཙཀྑུསྶ སཧཛཱཏཏདིནྡྲིཡནིསྶིཏདྷམྨེསུ ཨདྷིཔཏེཡྻཾ ཨནུཝཏྟནཱིཡཏྟཱ, ཨེཝཾ ཏཾདྭཱརིཀདྷམྨེསུཔི ཨདྷིཔཏེཡྻཾ ཏེཧི ཨནུཝཏྟནཱིཡཏྟཱཏི ཝུཏྟཾ – ‘‘ཨདྷིཔཏེཡྻསངྑཱཏེན ཨིནྡཊྛེནཱ’’ཏི. ཨེས ནཡོ སེསིནྡྲིཡཱདཱིསུཔི. ཙཏུསཙྩཝསེན ཀཐིཏཱནི སབྷཱཝཱདིཝིབྷཱཝནསྶ ཀཐིཏཏྟཱ.

ཚལི༹ནྡྲིཡཝགྒཝཎྞནཱ ནིཊྛིཏཱ.

༤. སུཁིནྡྲིཡཝགྒོ

༡-༥. སུདྡྷིཀསུཏྟཱདིཝཎྞནཱ

༥༠༡-༥༠༥. ཡཐཱ ཙཀྑུ དསྶནེ ཨདྷིཔཏེཡྻཊྛེན ཙཀྑུནྡྲིཡཾ, ཨེཝཾ སུཁཝེདནཱ སུཁནེ ཨདྷིཔཏེཡྻཊྛེན ¶ སུཁིནྡྲིཡཾ. ཨེས ནཡོ སེསེསུཔི. སེསཾ ཏེབྷཱུམཀནྟི སེསཾ བྷཱུམིཏྟཡཝསེན ཏེབྷཱུམཀཾ.

༦. པཋམཝིབྷངྒསུཏྟཝཎྞནཱ

༥༠༦. ཀཱཡིཀནྟི ཨཡམསྶ ནིསྶཡཝསེན ནིདྡེསོཏི ཨཱཧ – ‘‘ཀཱཡཔསཱདཝཏྠུཀ’’ནྟི. སརཱུཔནིདྡེསོ སུཁཾ སུཁིནྡྲིཡསྶ སརཱུཔནྟི. སཱདནཱིཡཊྛེན དྷམྨཔདཱནི ཨཏྟནི ཨསྶཱདཡཏཱིཏི སཱཏཾ, མདྷུརཾ. ཝེདཡིཏནྟི ཝེདིཡནཾ, ཨནུབྷཝནནྟི ཨཏྠོ. ཨཉྙདྷམྨཝིསིཊྛོཏི ཕསྶཱདཱིཧི ཨཉྙེཧི དྷམྨེཧི ཝིསདིསོ. ཀཱཡིཀནྟི པསཱདཀཱཡསནྣིསྶིཏཾ. ཙེཏསིཀནྟི ཙེཏོསནྣིསྶིཏཾ, ཏེན ཝུཏྟཾ ‘‘ཨེཏྠ པནཱ’’ཏིཨཱདི. ཀཱཡཔསཱད…པེ… ནཏྠི, ཏསྨཱ ‘‘ཙཏྟཱརོ པསཱདཀཱཡེ ཝཏྠུཾ ཀཏྭཱ’’ཏི ཝུཏྟཾ.

༩. ཀཊྛོཔམསུཏྟཝཎྞནཱ

༥༠༩. དྭིནྣཾ ¶ ཨརཎཱིནནྟི ཨདྷརུཏྟརཱརཎཱིནཾ. ཀིཉྩི དྭཡཾ སངྒྷཊྚིཏམཏྟཾ ཧུཏྭཱ ན སམོདྷཱནགཏཾ ཧོཏཱིཏི ཏཾནིཝཏྟནཏྠཾ ‘‘སངྒྷཊྚནསམོདྷཱནཱ’’ཏི ཝུཏྟཾ. པུནཔྤུནཾ སངྒྷཊྚནེན ཧི ཏེཛོཔཱཏུབྷཱཝོ. ཨདྷརཱརཎཱི ཝིཡ ཝཏྠཱརམྨཎཾ ཨསཏིཔི ཝཱཡཱམེ ཏཛྫསམྥསྶཔཙྩཡཏོ. ཨུཏྟརཱརཎཱི ཝིཡ ཕསྶོ ཝཏྠཱརམྨཎཱདིཕསྶེན པཝཏྟནཏོ. སངྒྷཊྚོ ཝིཡ ཕསྶསངྒྷཊྚནཾ ཨརཎིདྭཡསངྒྷཊྚནཱ ཝིཡ ཕསྶསྶེཝ ཝཏྠཱརམྨཎེསུ སངྒྷཊྚནཱཀཱརེན པཝཏྟིཏོ. ཨགྒི ཝིཡ ཝེདནཱ ཨནུདཧནཊྛེན ཁཎིཀཱཝཱཡཉྩ. ཝཏྠཱརམྨཎཾ ཝཱ ཨུཏྟརཱརཎཱི ཝིཡ ཨིནྡྷནཱཔཱཏགཧཎཱདཱིསུ ཨུསྶཱཧསྶ ཝིཡ པཝཏྟིསམྦྷཝཏོ. ཕསྶོ ཨདྷརཱརཎཱི ཝིཡ ནིརུསྶཱཧནིརཱིཧཏཱཝསེན ཨཏྟསཱདྷནཏོ.

༡༠. ཨུཔྤཊིཔཱཊིཀསུཏྟཝཎྞནཱ

༥༡༠. རསནཾ བྷཉྫནཾ ནིརུཛ྄ཛྷནཾ རསོ. ཡོ ཡོ དྷམྨཱནཾ རསོ ཡཐཱདྷམྨརསོ, ཏེན ཡཐཱདྷམྨརསེན. པཊིཔཱཊིཡཱཏི ཀམེན, ཨུབྷཡེནཔི དྷམྨཱནཾ པཧཱནཀྐམེནཱཏི ཝུཏྟཾ ཧོཏི. ཨིམསྨིཾ ཨིནྡྲིཡཝིབྷངྒེཏི ཨིམསྨིཾ ཨིནྡྲིཡསཾཡུཏྟསཉྙིཏེ ཨིནྡྲིཡཝིབྷངྒེ. ཨདེསིཏཏྟཱཏི སེསསུཏྟཱནི ཝིཡ ‘‘སུཁིནྡྲིཡ’’ནྟིཨཱདིནཱ ཨདེསིཏཏྟཱ ཨིདཾ ཨུཔྤཊིཔཱཊིཀསུཏྟཾ ནཱམ. ཝལིཡཱ ཁརསམྥསྶཱཡ ཕུཊྛསྶ. ཏནྟི ཀཎྚཀཝེདནཱདིཾ. ཨེཏསྶ དུཀྑིནྡྲིཡསྶ.

ཏེསཾ ¶ ཏེསནྟི དོམནསྶིནྡྲིཡཱདཱིནཾ. ཀཱརཎཝསེནེཝཱཏི ཏཾཏཾཨསཱདྷཱརཎཀཱརཎཝསེན. ཏེསཉྷི ཝིསེསཀཱརཎཾ དསྶེནྟོ ‘‘པཏྟཙཱིཝརཱདཱིནཾ ཝཱ’’ཏི ཨཱཧ.

ཨེཀཏོཝཱཏི པུནཔྤུནཾ པདུདྡྷཱརཎཾ ཨཀཏྭཱ ཨེཀཛ྄ཛྷམེཝ. དུཏིཡཛ྄ཛྷཱནཱདཱིནཾ ཨུཔཙཱརཀྑཎེ ཨེཝ ནིརུཛ྄ཛྷནྟཱིཏི ཨཱནེཏྭཱ སམྦནྡྷོ. ཏེསཾ དུཀྑིནྡྲིཡདོམནསྶཱདཱིནཾ. ཨཏིསཡནིརོདྷོཏི སུཊྛུ པཧཱནཾ ཨུཛུཔྤཊིཔཀྑེན ཝཱུཔསམོ. ནིརོདྷོཡེཝཱཏི ནིརོདྷམཏྟམེཝ. ནཱནཱཝཛྫནེཏི ཡེན ཨཱཝཛྫནེན ཨཔྤནཱཝཱིཐི ཧོཏི, ཏཏོ བྷིཛྫཱཝཛྫནེ, ཨནེཀཱཝཛྫནེ ཝཱ. ཨཔྤནཱཝཱིཐིཡཉྷི ཨུཔཙཱརོ ཨེཀཱཝཛྫནོ, ཨིཏརོ ཨནེཀཱཝཛྫནོ ཨནེཀཀྑཏྟུཾ པཝཏྟནཏོ. ཝིསམནིསཛྫཱཡ ཨུཔྤནྣཀིལམཐོ ཝིསམཱསནུཔཏཱཔོ ¶ . པཱིཏིཕརཎེནཱཏི པཱིཏིཡཱ ཕརཎརསཏྟཱ. པཱིཏིསམུཊྛཱནཱནཾ ཝཱ པཎཱིཏརཱུཔཱནཾ ཀཱཡསྶ བྱཱཔནཏོ ཝུཏྟཾ. ཏེནཱཧ ‘‘སབྦོ ཀཱཡོ སུཁོཀྐནྟོ ཧོཏཱི’’ཏི. ཝིཏཀྐཝིཙཱརཔཙྩཡེཔཱིཏི པི-སདྡོ ཨཊྛཱནཔཡུཏྟོ, སོ ‘‘པཧཱིནསྶཱ’’ཏི ཨེཏྠ ཨཱནེཏྭཱ སམྦནྡྷིཏབྦོ ‘‘པཧཱིནསྶཔི དོམནསྶིནྡྲིཡསྶཱ’’ཏི. ཨེཏཾ དོམནསྶིནྡྲིཡཾ ཨུཔྤཛྫཏཱིཏི སམྦནྡྷོ. ‘‘ཏསྶ མཡ྄ཧཾ ཨཏིཙིརཾ ཝིཏཀྐཡཏོ ཝིཙཱརཡཏོ ཀཱཡོཔི ཀིལམི, ཙིཏྟམྤི ཝིཧཉྙཱི’’ཏི ཙ ཝཙནཏོ ཀཱཡཙིཏྟཁེདཱནཾ ཝིཏཀྐཝིཙཱརཔཙྩཡཏཱ ཝེདིཏབྦཱ. ཝིཏཀྐཝིཙཱརབྷཱཝེ ཨུཔྤཛྫཏི དོམནསྶིནྡྲིཡནྟི ཨཱནེཏྭཱ སམྦནྡྷིཏབྦཾ. ཏཏྠསྶ སིཡཱ ཨུཔྤཏྟཱིཏི ཏཏྠ དུཏིཡཛ྄ཛྷཱནུཔཙཱརེ ཨསྶ དོམནསྶསྶ ཨུཔྤཏྟི བྷཝེཡྻ. ‘‘ཏཏྠསྶ སིཡཱ ཨུཔྤཏྟཱི’’ཏི ཨིདཾ པརིཀཔྤཝཙནཾ ཨུཔཙཱརཀྑཎེ དོམནསྶསྶ སུཔྤཧཱིནབྷཱཝདསྶནཏྠཾ. ཏཐཱ ཧི ཝུཏྟཾ ‘‘ན ཏྭེཝ དུཏིཡཛ྄ཛྷཱནེ པཧཱིནཔཙྩཡཏྟཱ’’ཏི. པཧཱིནམྤི སོམནསྶིནྡྲིཡཾ པཱིཏི ཝིཡ ན དཱུརེཏི ཀཏྭཱ ‘‘ཨཱསནྣཏྟཱ’’ཏི ཝུཏྟཾ. ནཱནཱཝཛྫནུཔཙཱརེ པཧཱིནམྤི པཧཱནངྒཾ པཊིཔཀྑེན ཨཝིཧཏཏྟཱ ཨནྟརནྟརཱ ཨུཔྤཛྫེཡྻཱཏི ཨིམམཏྠཾ དསྶེནྟོ ‘‘ཨཔྤནཱཔྤཏྟཱཡཱ’’ཏིཨཱདིམཱཧ. ‘‘ཏཱདིསཱཡ ཨཱསེཝནཱཡ ཨིཙྪིཏབྦཏྟཱ ཡཐཱ མགྒཝཱིཐིཏོ པུབྦེ དྭེ ཏཡོ ཛཝནཝཱརཱ སདིསཱནུཔསྶནཱཝ པཝཏྟནྟི, ཨེཝམིདྷཱཔི ཨཔྤནཱཝཱརཏོ པུབྦེ དྭེ ཏཡོ ཛཝནཝཱརཱ ཨུཔེཀྑཱསཧགཏཱཝ པཝཏྟནྟཱི’’ཏི ཝདནྟི. ཨཔརིསེསནྟི སུཝིཀྑམྦྷིཏནྟི ཀཏྭཱ ཝིཀྑམྦྷནེན ཨནཝསེསཾ.

ཏཐཏྟཱཡཱཏི ཏཐབྷཱཝཱཡ པཋམཛ྄ཛྷཱནསམངྒིཏཱཡ. སཱ པནསྶ ཨུཔྤཱདནེན ཝཱ ཨུཔྤནྣསྶ སམཱཔཛྫནེན ཝཱ ཧོཏཱིཏི ཝུཏྟཾ ‘‘ཨུཔྤཱདནཏྠཱཡ སམཱཔཛྫནཏྠཱཡཱ’’ཏི. དྭཱིསཱུཏི ནཝམདསམེསུ སུཏྟནྟེསུ.

སུཁིནྡྲིཡཝགྒཝཎྞནཱ ནིཊྛིཏཱ.

༥. ཛརཱཝགྒོ

༡. ཛརཱདྷམྨསུཏྟཝཎྞནཱ

༥༡༡. པམུཁེ ¶ , པཱསཱདསྶ ཙ པཙྪིམབྷཱགེ ཨཱཏཔོ པཙྪཱཏཔོ, ཏསྨིཾ པཙྪཱཏཔེ. སོ ཧི པཱསཱདསྶ པམུཁབྷཱཝེན ཀཏོ. ཀིཾ པན བྷགཝཏོ ཝཛིརསཱརཾ སརཱིརཾ ཨོཏཱཔེཏབྦཾ ཧོཏཱིཏི ཨཱཧ – ‘‘སམྨཱསམྦུདྡྷསྶཱ’’ཏིཨཱདི ¶ . ཨཡཉྩ ཨིམཾ སུཏྟཾ དེསིཏསམཡེ. ན སཀྐོཏི བྱཱམཔྤབྷཱཡ ཀཱཡཙི པབྷཱཡ ཨནབྷིབྷཝནཱིཡཏྟཱ. ཀིཉྩཱཔི བུདྡྷཱབྷཱ སཱུརིཡཱབྷཱཡ ཨནབྷིབྷཝནཱིཡཱ, གྷམྨསབྷཱཝཏཱཡ པན རསྨཱིནཾ པརིཏོ ཕརནྟཱི སཱུརིཡཱབྷཱ ཏིཁིཎཱ ཨུཎྷཱཏི ཨཱཧ ‘‘རསྨིཏེཛ’’ནྟི. ཨིདཱནི ཏམཏྠཾ ཨུཔམཱཡ ཝིབྷཱཝེཏུཾ ‘‘ཡཐེཝ ཧཱི’’ཏིཨཱདི ཝུཏྟཾ.

སུཝཎྞཱཝཊྚཾ ཝིཡཱཏི ཨཙྪེ སུཝཎྞཔཏྟེ ཝིནིཝཏྟཨཱཝཊྚཾ ཝིཡ. གརཧཎཙྪརིཡཾ ནཱམ ཀིརེཏཾ ‘‘ཨཙྪརིཡམེཏཾ ཨཝིསིཙྪེཕལཝད’’ནྟིཨཱདཱིསུ ཝིཡ. ན ཨེཝམེཏརཧཱིཏི ཨཏྟནོ པཱཀཊཝསེན ཝདཏི, ན ཨིཏརེསམྤཱིཏི. སིརཱཛཱལཱཏི སིརཱསནྟཱནཱ. ཨེཝརཱུཔཾ ན ཧོཏཱིཏི ཨཉྙེསཾ པཱཀཏིཀསཏྟཱནཾ ཝུཏྟཱཀཱརཾ ཝིཡ ན ཧོཏི པུཉྙསམྦྷཱརསྶ ཨུལཱ༹རཏམཏྟཱ ཝིཔཙྩནསྶ པརིཡནྟགཏཏྟཱ. ཏེནཱཧ ‘‘ཨཉྙེསཾ ཨཔཱཀཊ’’ནྟི. ཝལིཡཱཝཊྚཀནྟི ཨཔྤཀཾ ཝལིཡཱཝཊྚཾ. ཏེནཱཧ ‘‘ཀེསགྒཔྤམཱཎ’’ནྟི. སབྦཱནཱིཏི སིརཱཛཱལཱནི. པུརཏོ ཝངྐོཏི ཐོཀཾ པུརཏོ ནཏམཏྟཾ སནྡྷཱཡཱཧ. ཏེན ཝུཏྟཾ ‘‘སྭཱཡཾ ཨཉྙེསཾ ཨཔཱཀཊོ’’ཏི. ནཡགྒཱཧཏོཏི ཨནུམཱནཏོ. དྷཱི ཏནྟི དྷཱི-སདྡཡོགེ ཨུཔཡོགཝཙནཾ. དྷཱིཏི ཛིགུཙྪནཏྠེ ནིཔཱཏོ. དྷིཀྐཱརོཏི ཛིགུཙྪཱཔཡོགོ. ཏཾ ཕུསཏཱུཏི ཏུཡ྄ཧཾ པཱཔུཎཱཏུ.

༢. ཨུཎྞཱབྷབྲཱཧྨཎསུཏྟཝཎྞནཱ

༥༡༢. ཨཉྙམཉྙསྶཱཏི ཨཉྙོ ཨཉྙསྶ. ན པཙྩནུབྷོཏི ཨཏྟནོ ཨཝིསཡབྷཱཝཏོ. ཨིདཱནི ཏཾ ཨཉྙཝིསཡཏཾ ཨནྭཡཏོ བྱཏིརེཀཏོ ཝིབྷཱཝེཏུཾ ‘‘སཙེ ཧཱི’’ཏིཨཱདི ཝུཏྟཾ.

ཝིསཡཱནི པཊིསརནྟི ཨེཏྠཱཏི པཊིསརཎཾ. ཨིནྡྲིཡཝིཉྙཱཎཱནི ཧི ཨསཏིཔི ཏཱདིསེ ཨདྷིཔྤཱཡེ ཨཏྟནོ ཨཱརམྨཎསྶ ཡཱཐཱཝཏོ སམྤཛཱནནཏོ པཝེདནཝིཛཱནནཱནི ཀརོནྟཱནི ཝིཡ པཝཏྟནྟི, ཏཐཱ ལོཀསྶ ཨཉྙཏྠ སིདྡྷིཏོ. ཏེནཱཧ བྷགཝཱ – ‘‘མནོ པཊིསརཎཾ, མནོཝ ནེསཾ ¶ གོཙརཝིསཡཾ པཙྩནུབྷོཏཱི’’ཏི མནོདྭཱརིཀཛཝནམནོ ཧི སཝིསེསཾ མནོཝིསཡཾ པཙྩནུབྷོཏི, པཉྩདྭཱརིཀཛཝནམནོ མནནམཏྟམེཝ པཙྩནུབྷཝཏི. རཛྫནཱདིགྒཧཎཉྩེཏྠ ནིདསྶནམཏྟཾ, ཏསྨཱ སདྡཧནཱདིཔི གཧིཏམེཝཱཏི དཊྛབྦཾ, པཉྩདྭཱརཔྤཝཏྟིཝསེན ཏཐཱ ཝུཏྟཾ. ཨེཀསྨིཾ པན དྭཱརེཏི ཙཀྑུདྭཱརེ.

དུབྦལབྷོཛཀཱཏི ¶ ཨཔྤཱནུབྷཱཝཱ རཱཛབྷོགྒཱ. ཨཱཡནྟི བྷོགུཔྤཏྟིཊྛཱནཾ. ཡོཏྟབནྡྷཱདིནིམིཏྟཾ ལདྡྷབྦཀཧཱཔཎོ ཡོཏྟཀཧཱཔཎོ. ཨདྡུབནྡྷཱདིནིམིཏྟཾ གཧེཏབྦཀཧཱཔཎོ ཨདྡུཀཧཱཔཎོ. མཱགྷཱཏགྷོསནཱཡ ཀཏཱཡ ཧིཾསཱནིམིཏྟཾ གཧེཏབྦཀཧཱཔཎོ མཱཔཧཱརཀཧཱཔཎོ. ཏསྶ པརིམཱཎཾ དསྶེཏུཾ ‘‘ཨཊྛཀཧཱཔཎོ’’ཏིཨཱདི ཝུཏྟཾ. སཏཝཏྠུཀནྟི སཏཀརཱིསཝཏྠུཀཾ.

མགྒསཏཱིཏི ཨརིཡམགྒསཏི. བྷཱཝནམནུཡུཉྫནྟསྶ ཧི ཛཝནམནོ ཨུསྶཀྐིཏྭཱཝ མགྒསཏིཾ པཊིསརཏི ཏཔྤརིཡོསཱནཏྟཱ. ཏནྟི ནིབྦཱནཾ. སཱཏི ཕལཝིམུཏྟི. པཊིསརཏི ཨགྒམགྒསཏིཡཱ. ཕལཝིམུཏྟི ནིབྦཱནནྟི ཨུབྷཡཾ མགྒསྶ སིདྡྷཱཡེཝཱཏི. ཨཱརམྨཎཝསེན ནཏྠི ཨེཏསྶ པཊིསརཎནྟི ཨཔྤཊིསརཎཾ ཨསངྑཏཱམཏསྶ སནྟིནིཙྩསབྷཱཝཏྟཱ. སཡཾ པན སབྦེསཾཡེཝ ཨརིཡཱནཾ པཊིསརཎཾ. ཏེནཱཧ ‘‘ནིབྦཱནཾ ཨརཧཏོ གཏཱི’’ཏི (པརི. ༣༣༩). ནིབྦཱནཾ ཨནུཔཝིཊྛཾ ནིབྦཱནནིསྶཡཏྟཱ. ན ཏཏོ པརཾ གཙྪཏི གཏསྶ ཨཉྙསྶ ཏཱདིསསྶ ཨབྷཱཝཱ. ནིབྦཱནཾ པརི སབྦསོ ཨོསཱནནྟི ནིབྦཱནཔརིཡོསཱནཾ.

མཱུལཛཱཏཱ ཛཱཏམཱུལཱ. ཏཏོ ཨེཝ པཏིཊྛིཏཱ. ཀཱ པནསྶཱཏི ཨཱཧ ‘‘མགྒེན ཨཱགཏསདྡྷཱ’’ཏི. མགྒོ དལ༹ྷཱཡ ཨསཾཧཱརིཡསདྡྷཱཡ མཱུལཾ དིཊྛིསམྤཡུཏྟཱནི ཙེཝ ཝིཙིཀིཙྪཱཙིཏྟཉྩཱཏི པཉྩ ཨཀུསལཙིཏྟཱནི སམུཙྪེདཝསེན པཧཱིནཱནི. པཉྩ ནཱིཝརཎཱནཱིཏི ཨེཏྠ ཨཔཱཡགམནཱིཡཱནི པཋམམགྒེནེཝ པཧཱིནཱནི, ཨིཏརཱནི ཝིཀྑམྦྷནཝསེན ཛྷཱནེན པཧཱིནཱནཱིཏི པཉྩསུ ཨོརམྦྷཱགིཡཀིལེསསཾཡོཛནེསུ ཨེཀདེསཝིགམེནེཝ བཧིདྡྷཱསཾཡོཛནོ ཝིཡ ཛཱཏོཏི ཝུཏྟཾ ‘‘ཛྷཱནཨནཱགཱམིཊྛཱནེ ཋིཏོ’’ཏི. ཏེནཱཧ ‘‘སོ ཨཔརིཧཱིན…པེ… ནིབྦཱཡེཡྻཱ’’ཏི.

༥. པཋམཔུབྦཱརཱམསུཏྟཝཎྞནཱ

༥༡༥. པུབྦཀོཊྛཀེ ཨེཝཾ ཨཱགཏསུཏྟཾ ཨཱདིཾ ཀཏྭཱ ཕལིནྡྲིཡཱནེཝ ཀཐིཏཱནི ཨགྒཕལཝསེན དེསནཱཡ ཨཱགཏཏྟཱ.

༡༠. ཨཱཔཎསུཏྟཝཎྞནཱ

༥༢༠. ཨུཔརི ¶ སཧ ཝིཔསྶནཱཡ ཏཡོ མགྒཱཏི ཝིཔསྶནཱཡ སཧ སོཏཱཔཏྟིཕལཏོ ཨུཔརི ཏཡོ མགྒཱ. མགྒཱདྷིགམེན ཨིདཱནི པཙྩཀྑབྷཱུཏཏྟཱ ¶ ‘‘ཨིམེ ཁོ ཏེ དྷམྨཱ’’ཏི ཝུཏྟཱ. ཏཏྠ ཡཾ ཨགྒབྷཱུཏཾ, ཏསྶ ཝསེན དསྶེཏུཾ ‘‘ཨརཧཏྟཕལིནྡྲིཡཾ ནཱམཱ’’ཏི ཝུཏྟཾ ཨིནྡྲིཡབྷཱཝསཱམཉྙེན ཨེཀཛ྄ཛྷཾ ཀཏྭཱ. ཨཏིཝིཛ྄ཛྷིཏྭཱ པསྶཱམཱིཏི སཙྪིཀཏྭཱ ཡཱཐཱཝཏོ པསྶཱམི. ཙཏཱུཧི ཨིནྡྲིཡེཧཱིཏི ཝཱིརིཡིནྡྲིཡཱདཱིཧི ཙཏཱུཧི ཨིནྡྲིཡེཧི. སཱ ཝིཔསྶནཱམགྒཕལསཧགཏཱ སིཡཱཏི མིསྶཀཱ ཝུཏྟཱ.

ཛརཱཝགྒཝཎྞནཱ ནིཊྛིཏཱ.

༦. སཱུཀརཁཏཝགྒོ

༡. སཱལསུཏྟཝཎྞནཱ

༥༢༡. སཱུརབྷཱཝེནཱཏི ཨཏིསཱུརབྷཱཝེན. བུཛ྄ཛྷནཏྠཱཡཱཏི སཙྩཔཊིཝེདྷཱཡ.

༢. མལླིཀསུཏྟཝཎྞནཱ

༥༢༢. ཙཏྟཱརི ཨིནྡྲིཡཱནཱིཏི པཉྙིནྡྲིཡཾ ཋཔེཏྭཱ སེསཱནི ཙཏྟཱརི. ‘‘ཨརིཡཉཱཎཾ ལོཀུཏྟར’’ནྟི ཝུཏྟཾ མགྒཉཱཎཾ ཀཏྭཱ. ཨརིཡ-སདྡོ པན ཡཐཱ ཏཐཱ ཝིསུདྡྷེཔི ཧོཏཱིཏི ཏཱདིསཾ སནྡྷཱཡ ཝུཏྟཾ ‘‘ཏམྤི པནཱ’’ཏིཨཱདི. ཡཐཱ ཧི ཙཏྟཱརིནྡྲིཡཱནི མིསྶཀཱནི, ཨེཝཾ པཉྙིནྡྲིཡམྤི མིསྶཀནྟི ཝུཙྩམཱནེ ན ཀོཙི ཝིརོདྷོཏི ཨདྷིཔྤཱཡེནཱཧ ‘‘ཏམྤི པན…པེ… ཝཊྚཏཱི’’ཏི.

༣. སེཁསུཏྟཝཎྞནཱ

༥༢༣. ན སཀྐོཏི ཨིནྡྲིཡཱནཾ ཨཔརིཔཀྐཏྟཱ. ཨཏྠཱིཏི པཛཱནཱཏི ནཡགྒཱཧེན, ན པཙྩཀྑཏོ. ན ཧི ཨརིཡཱཔི ཨནདྷིགཏཾ མགྒཕལཾ པཙྩཝེཀྑིཏུཾ སཀྐོནྟི.

༦. པཏིཊྛིཏསུཏྟཝཎྞནཱ

༥༢༦. སཱསཝེསཱུཏི ¶ ཙཏུརཱསཝཝིནིམུཏྟེསུ སེསདྷམྨེསུ ཨཱརམྨཎེསུ. ཏེསུཔི ཨུཔྤཛྫནཀཨནཏྠཏོ ཙིཏྟཾ རཀྑཏི ནཱམ.

༨. སཱུཀརཁཏསུཏྟཝཎྞནཱ

༥༢༨. ཏཾ ¶ སནྡྷཱཡཱཏི ཏཾ སཱུཀརཁཏལེཎཾ སནྡྷཱཡ. ཨེཏཾ ‘‘སཱུཀརཁཏཱཡ’’ནྟི ཝཙནཾ ཝུཏྟཾ. བྷཱཝནཔུཾསཀནྟི བྷཱཝཛོཏཀཾ ནཔུཾསཀཝཙནཾ ཡཐཱ ‘‘ཝིསམཾ ཝཱཏཱ ཝཱཡནྟི, ཨེཀམནྟཾ ནིསཱིདཱི’’ཏི. ཀིཙྩཔཊིཔཏྟི ཏེསཾ སཾཀཱསནཊྛེན སཔཏིསོ, སཔཏིསོ ཨེཝ སཔྤཏིསྶོ, སཛེཊྛཀོཏི ཨཱཧ ‘‘སཔྤཏིསྶོཏི སཛེཊྛཀོ’’ཏི.

སཱུཀརཁཏཝགྒཝཎྞནཱ ནིཊྛིཏཱ.

༧. བོདྷིཔཀྑིཡཝགྒཝཎྞནཱ

༥༣༡-༦༥༠. སཏྟཱནཾ ཕལཱནཾ ཧེཏུབྷཱུཏཱནི ‘‘ཨིམེསཾ ཁོ, བྷིཀྑཝེ, པཉྩནྣཾ ཨིནྡྲིཡཱནཾ བྷཱཝིཏཏྟཱ’’ཏིཨཱདིནཱ ཝུཏྟཱནི, པཉྩིནྡྲིཡཱནིཡེཝ ཕལཱུཔཙཱརེན ‘‘སཏྟ ཕལཱནཱི’’ཏི ཝུཏྟཱནི. ཏཱནི ཙ པུབྦབྷཱགཱནི ‘‘ཨིམེསཾ, བྷིཀྑཝེ, པཉྩནྣཾ ཨིནྡྲིཡཱནཾ བྷཱཝིཏཏྟཱ…པེ… སཏྟཱནིསཾསཱ པཱཊིཀངྑཱ’’ཏི ཝཙནཏོ. ཏེསནྟི སཏྟཱནཾ ཕལཱནཾ. ‘‘དྭིནྣཾ ཕལཱནཾ ཨཉྙཏརཾ ཕལ’’ནྟི ཨེཝཾ ཨཏཱིཏསུཏྟེ ཝུཏྟཱནི ཧེཊྛཱ དྭེ ཕལཱནི ནཱམཱཏི ཝདནྟི. ཡེཧི པན ཨིནྡྲིཡེཧི ཨཉྙཏྲ པན ཨནྟརཱཔརིནིབྦཱཡིཾ སེསཱནི ཕལཱནི ཧོནྟི, ཏཱནི ཙཏྟཱརི སཔུབྦབྷཱགཱནི ལོཀུཏྟརཱནཱིཏི ཝུཏྟཾ སིཡཱ.

ཨིནྡྲིཡསཾཡུཏྟཝཎྞནཱ ནིཊྛིཏཱ.

༥. སམྨཔྤདྷཱནསཾཡུཏྟཝཎྞནཱ

༦༥༡-༧༠༤. སམྨཔྤདྷཱནསཾཡུཏྟེ ¶ པུབྦབྷཱགཝིཔསྶནཱཝ ཀཐིཏཱ ‘‘ཨཀུསལཱནཾ དྷམྨཱནཾ པཧཱནཱཡཱ’’ཏིཨཱདིཝཙནཏོ.

སམྨཔྤདྷཱནསཾཡུཏྟཝཎྞནཱ ནིཊྛིཏཱ.

༦. བལསཾཡུཏྟཝཎྞནཱ

༧༠༥-༨༡༢. བལསཾཡུཏྟེ བལཱནི མིསྶཀཱནེཝ ཀཐིཏཱནི ‘‘ཝིཝེཀནིསྶིཏ’’ནྟི ཝཙནཏོ.

བལསཾཡུཏྟཝཎྞནཱ ནིཊྛིཏཱ.

༧. ཨིདྡྷིཔཱདསཾཡུཏྟཾ

༡. ཙཱཔཱལཝགྒོ

༡. ཨཔཱརསུཏྟཝཎྞནཱ

༨༡༣. ཚནྡཾ ¶ ¶ ནིསྶཱཡ པཝཏྟོ སམཱདྷཱིཏི ཀཏྟུཀམྱཏཱཚནྡཾ ཨདྷིཔཏིཾ ཀཏྭཱ པཊིལདྡྷསམཱདྷི ཚནྡྷསམཱདྷི. པདྷཱནསངྑཱརཱཏི ཙཏུཀིཙྩསཱདྷཀསྶ སམྨཔྤདྷཱནཝཱིརིཡསྶེཏཾ ཨདྷིཝཙནཾ. ཏེཧཱིཏི ཚནྡསམཱདྷིཔདྷཱནསངྑཱརེཧི. ཨིདྡྷིཡཱ པཱདནྟི ནིཔྥཏྟིཔརིཡཱཡེན ཨིཛ྄ཛྷནཊྛེན, ཨིཛ྄ཛྷནྟི ཨེཏཱཡ སདྡྷཱ ཨིདྡྷཱ ཝུདྡྷཱ ཨུཀྐཾསགཏཱ ཧོནྟཱིཏི ཨིམིནཱ ཝཱ པརིཡཱཡེན ‘‘ཨིདྡྷཱི’’ཏི སངྑཱཏཱནཾ ཨུཔཙཱརཛ྄ཛྷཱནཱདིཀུསལཙིཏྟསམྤཡུཏྟཱནཾ ཚནྡསམཱདྷིཔདྷཱནསངྑཱརཱནཾ ཨདྷིཊྛཱནཊྛེན པཱདབྷཱུཏཾ, སེསཙིཏྟཙེཏསིཀརཱསིནྟི ཨཏྠོ. སཱ ཨེཝ ཙ ཡཐཱཝུཏྟཨིདྡྷི ཡསྨཱ ཧེཊྛིམཱ ཧེཊྛིམཱ ཨུཔརིམཱཡ ཨུཔརིམཱཡ པཱདབྷཱུཏཱ, ཏསྨཱ ཝུཏྟཾ ‘‘ཨིདྡྷིབྷཱུཏཾ ཝཱ པཱདནྟི ཨིདྡྷིཔཱད’’ནྟི. སེསེསཱུཏི ཝཱིརིཡསམཱདྷིཨཱདཱིསུ. ཏཏྠ ཧི ཝཱིརིཡཾ ཙིཏྟཾ ཝཱིམཾསཾ ཨདྷིཔཏིཾ ཀཏྭཱ པཊིལདྡྷསམཱདྷི ཝཱིམཾསཱསམཱདྷཱིཏི ཨཏྠོ ཝེདིཏབྦོ. ཨིདྷཱཏི ཨིམསྨིཾ ཨིདྡྷིཔཱདསཾཡུཏྟེ. ཨེཀཔརིཙྪེདོཝ ཨཏྠནིདྡེསོ.

༥. ཨིདྡྷིཔདེསསུཏྟཝཎྞནཱ

༨༡༧. ཨིདྡྷིཔདེསནྟི ཨིདྡྷིཡཱ ཨེཀདེསཾ. ཀོ པན སོཏི ཨཱཧ – ‘‘ཏཡོ ཙ མགྒེ ཏཱིཎི ཙ ཕལཱནཱི’’ཏི.

༦. སམཏྟསུཏྟཝཎྞནཱ

༨༡༨. སམཏྟནྟི སཱམཉྙསྶ སམཾ ཨཏྟནཾ ཨིཛ྄ཛྷནཾ སམཏྟཾ པརིཔུཎྞཾ. ཝིཝཊྚཔཱདཀཱ ཨེཝ ཨིདྡྷིཔཱདཱ ཀཐིཏཱ ‘‘ཨཔཱརཱ པཱརཾ གམནཱཡ སཾཝཏྟནྟཱི’’ཏིཨཱདིཝཙནཏོ.

༡༠. ཙེཏིཡསུཏྟཝཎྞནཱ

༨༢༢. ཨུདེནཡཀྑསྶ ¶ ཙེཏིཡཊྛཱནེཏི ཨུདེནསྶ ནཱམ ཡཀྑསྶ དེཝཱཡཏནསངྑེཔེན ཨིཊྛཀཱཧི ཀཏེ མཧཱཛནསྶ ཙིཏྟཱིཀཏཊྛཱནེ. ཀཏཝིཧཱརོཏི བྷགཝནྟཾ ཨུདྡིསྶ ཏཏྠ ཀཏཝིཧཱརོ. ཝུཙྩཏཱིཏི པུརིམཝོཧཱརེན ¶ ‘‘ཨུདེནཙེཏིཡ’’ནྟི ཝུཙྩཏི. གོཏམཀཱདཱིསུཔཱིཏི གོཏམཀཙེཏིཡནྟི ཨེཝམཱདཱིསུཔི. ཨེསེཝ ནཡོཏི ཙེཏིཡཊྛཱནེ ཀཏཝིཧཱརབྷཱཝཾ ཨཏིདིསཏི. ཝཌྜྷིཏཱཏི བྷཱཝནཱཔཱརིཔཱུརིཝསེན པརིབྲཱུཧིཏཱ. པུནཔྤུནཾ ཀཏཱཏི བྷཱཝནཱཡ བཧུལཱིཀརཎཝསེན ཨཔརཱཔརཾ པཝཏྟིཏཱ ཨཱནཱིཏཱ. ཡུཏྟཡཱནཾ ཝིཡ ཀཏཱཏི ཡཐཱ ཡུཏྟམཱཛཉྙཡཱནཾ ཚེཀེན སཱརཐིནཱ ཨདྷིཊྛིཏཾ ཡཐཱརུཙི པཝཏྟིམརཧཏི, ཨེཝཾ ཡཐཱརུཙི པཝཏྟནཱརཧཏཾ གམིཏཱ. པཏིཊྛཱནཊྛེནཱཏི ཨདྷིཊྛཱནཊྛེན. ཝཏྠུ ཝིཡ ཀཏཱཏི སབྦསོ ཨུཔཀྐིལེསཝིསོདྷནེན ཨིདྡྷིཝིསེསཱནཾ པཝཏྟིཊྛཱནབྷཱཝཏོ སུཝིསོདྷིཏཔརིསྶཡཝཏྠུ ཝིཡ ཀཏཱ. ཨདྷིཊྛིཏཱཏི པཊིཔཀྑདཱུརཱིབྷཱཝཏོ སུབྷཱཝིཏབྷཱཝེན ཏཾཏཾཨདྷིཊྛཱནཡོགྱཏཱཡ ཋཔིཏཱ. སམནྟཏོ ཙིཏཱཏི སབྦབྷཱགེན བྷཱཝནུཔཙཡཾ གམིཏཱ. ཏེནཱཧ ‘‘སུཝཌྜྷིཏཱ’’ཏི. སུཊྛུ སམཱརདྡྷཱཏི ཨིདྡྷིབྷཱཝནཱཡ སིཁཔྤཏྟིཡཱ སམྨདེཝ སཾསེཝིཏཱ.

ཨནིཡམེནཱཏི ‘‘ཡསྶ ཀསྶཙཱི’’ཏི ཨནིཡཏཝཙནེན. ནིཡམེཏྭཱཏི ‘‘ཏཐཱགཏསྶཱ’’ཏི སརཱུཔགྒཧཎེན ནིཡམེཏྭཱ. ཨཱཡུཔྤམཱཎནྟི པརམཱཡུཔྤམཱཎཾ ཝདཏི. ཏསྶེཝ གཧཎེ ཀཱརཎཾ བྲཧྨཛཱལཝཎྞནཱཡཾ ཝུཏྟནཡེནེཝ ཝེདིཏབྦཾ. མཧཱསཱིཝཏྠེརོ པན མཧཱབོདྷིསཏྟཱནཾ ཙརིམབྷཝེ པཊིསནྡྷིདཱཡིནོ ཀམྨསྶ ཨསངྑེཡྻཱཡུཀཏཱསཾཝཏྟནསམཏྠཏཾ ཧདཡེ ཋཔེཏྭཱ བུདྡྷཱནཾ ཨཱཡུསངྑཱརསྶ པརིསྶཡཝིཀྑམྦྷནསམཏྠཏཱ པཱལི༹ཡཾ ཨཱགཏཱ ཨེཝཱཏི ཨིམཾ བྷདྡཀཔྤམེཝ ཏིཊྛེཡྻཱཏི ཨཝོཙ.

ཁཎྜིཙྩཱདཱིཧི ཨབྷིསུཡྻཏཱིཏི ཨེཏེན ཡཐཱ ཨིདྡྷིབལེན ཛརཱཡ ན པཊིགྷཱཏོ, ཨེཝཾ ཏེན མརཎསྶཔི ན པཊིགྷཱཏོཏི ཨཏྠཏོ ཨཱཔནྣམེཝཱཏི. ‘‘ཀྭ སརོ ཁིཏྟོ, ཀྭཙནི པཏིཏོ’’ཏི ཨཉྙཐཱ ཝུཊྛིཏེནཔི ཐེརཝཱདེན ཨཊྛཀཐཱཝཙནམེཝ སམཏྠིཏནྟི དཊྛབྦཾ. ཏེནཱཧ ‘‘སོ པན ན རུཙྩཏི…པེ… ནིཡམིཏ’’ནྟི.

པརིཡུཊྛིཏཙིཏྟོཏི ཡཐཱ ཀིཉྩི ཨཏྠཱནཏྠཾ སལླཀྑེཏུཾ ན སཀྐཱ, ཨེཝཾ ཨབྷིབྷཱུཏཙིཏྟོ. སོ པན ཨབྷིབྷཝོ མཧཏཱ ཨུདཀོགྷེན ཨཔྤཀསྶ ཨུདཀསྶ ཨཛ྄ཛྷོཏྠརཎཾ ཝིཡ ཨཧོསཱིཏི ཝུཏྟཾ ‘‘ཨཛ྄ཛྷོཏྠཊཙིཏྟོ’’ཏི. ཨཉྙོཏི ཐེརཏོ, ཨརིཡེཧི ཝཱ ཨཉྙོ ཡོ ཀོཙི པརོ ¶ པུཐུཛྫནོ. པུཐུཛྫནགྒཧཎཉྩེཏྠ ཡཐཱ སབྦེན སབྦཾ ཨཔྤཧཱིནཝིཔལླཱསོ མཱརེན པརིཡུཊྛིཏཙིཏྟོ ཀིཉྩི ཨཏྠཱནཏྠཾ སལླཀྑེཏུཾ ན སཀྐོཏི, ཨེཝཾ ཐེརོ བྷགཝཏཱ ཀཏཾ ནིམིཏྟོབྷཱསཾ སབྦསོ ན ¶ སལླཀྑེསཱིཏི དསྶནཏྠཾ. ཏེནཱཧ ‘‘མཱརོ ཧཱི’’ཏིཨཱདི. ཙཏྟཱརོ ཝིཔལླཱསཱཏི ཨསུབྷེ ‘‘སུབྷ’’ནྟི སཉྙཱཝིཔལླཱསོ, ཙིཏྟཝིཔལླཱསོ, དུཀྑེ ‘‘སུཁ’’ནྟི སཉྙཱཝིཔལླཱསོ, ཙིཏྟཝིཔལླཱསོཏི ཨིམེ ཙཏྟཱརོ ཝིཔལླཱསཱ. ཏེནཱཏི ཡདིཔི ཨིཏརེ ཨཊྛ ཝིཔལླཱསཱ པཧཱིནཱ, ཡཐཱཝུཏྟཱནཾ ཙཏུནྣཾ ཝིཔལླཱསཱནཾ ཨཔྤཧཱིནབྷཱཝེན. ཨསྶཱཏི ཐེརསྶ.

མདྡཏཱིཏི ཕུསནམཏྟེན མདྡནྟོ ཝིཡ ཧོཏི, ཨཉྙཐཱ ཏེན མདྡིཏེ སཏྟཱནཾ མརཎམེཝ སིཡཱ, ཀིཾ སཀྑིསྶཏི ན སཀྑིསྶཏཱིཏི ཨདྷིཔྤཱཡོ. ཀསྨཱ ན སཀྑིསྶཏི? ནནུ ཨེས ཨགྒསཱཝཀསྶ མཧིདྡྷིཀསྶ མཧཱནུབྷཱཝསྶ ཀུཙྪིཾ པཝིཊྛོཏི? སཙྩཾ པཝིཊྛོ, ཏཉྩ ཁོ ཨཏྟནོ མཧཱནུབྷཱཝསྶ དསྶནཏྠཾ, ན ཝིབཱདྷནཱདྷིཔྤཱཡེན. ཝིབཱདྷནཱདྷིཔྤཱཡེན པན ཨིདྷ ‘‘ཀིཾ སཀྑིསྶཏཱི’’ཏི ཝུཏྟཾ ཧདཡམདྡནསྶ ཨདྷིཀཏཏྟཱ. ནིམིཏྟོབྷཱསནྟི ཨེཏྠ ‘‘ཏིཊྛཏུ བྷགཝཱ ཀཔྤ’’ནྟི སཀལཀཔྤཾ ཨཝཊྛཱནཡཱཙནཱཡ ‘‘ཡསྶ ཀསྶཙི, ཨཱནནྡ, ཙཏྟཱརོ ཨིདྡྷིཔཱདཱ བྷཱཝིཏཱ’’ཏིཨཱདིནཱ ཨཉྙཱཔདེསེན ཨཏྟནོ ཙཏུརིདྡྷིཔཱདབྷཱཝནཱནུབྷཱཝེན ཀཔྤཾ ཨཝཊྛཱནསམཏྠཏཱཝསེན སཉྙུཔྤཱདནཾ ནིམིཏྟཾ. ཏཐཱ པན པརིཡཱཡགྒཧཎཾ མུཉྩིཏྭཱ ཨུཛུཀཾཡེཝ ཨཏྟནོ ཨདྷིཔྤཱཡཝིབྷཱཝནཾ ཨོབྷཱསོ. ཛཱནནྟོཡེཝཱཏི མཱརེན པརིཡུཊྛིཏབྷཱཝཾ ཛཱནནྟོ ཨེཝ. ཨཏྟནོ ཨཔརཱདྷཧེཏུཀོ སཏྟཱནཾ སོཀོ ཏནུཀོ ཧོཏི, ན བལཝཱཏི ཨཱཧ – ‘‘དོསཱརོཔནེན སོཀཏནུཀརཎཏྠ’’ནྟི. ཀིཾ པན ཐེརོ མཱརེན པརིཡུཊྛིཏཙིཏྟཀཱལེ པཝཏྟིཾ པཙྪཱ ཛཱནཱཏཱིཏི? ན ཛཱནཱཏི སབྷཱཝེན, བུདྡྷཱནུབྷཱཝེན པན ཛཱནཱཏི.

ཨནཏྠེ ནིཡོཛེནྟོ གུཎམཱརཎེན མཱརེཏི, ཝིརཱགཝིབནྡྷནེན ཝཱ ཛཱཏིནིམིཏྟཏཱཡ ཏཏྠ ཏཏྠ ཛཱཏཾ མཱརེནྟོ ཝིཡ ཧོཏཱིཏི ‘‘མཱརེཏཱིཏི མཱརོ’’ཏི ཝུཏྟཾ. ཨཏིཔཱཔཏྟཱ པཱཔིམཱ. ཀཎྷདྷམྨསམནྣཱགཏོ ཀཎྷོ. ཝིརཱགཱདིགུཎཱནཾ ཨནྟཀརཎཏོ ཨནྟཀོ. སཏྟཱནཾ ཨནཏྠཱཝཧཾ པཊིཔཏྟིཾ ན མུཉྩཏཱིཏི ནམུཙི. ཨཏྟནོ མཱརཔཱསེན པམཏྟེ བནྡྷཏི, པམཏྟཱ ཝཱ བནྡྷཱུ ཨེཏསྶཱཏི པམཏྟབནྡྷུ. སཏྟམསཏྟཱཧཏོ པརཾ སཏྟ ¶ ཨཧཱནི སནྡྷཱཡཱཧ ‘‘ཨཊྛམེ སཏྟཱཧེ’’ཏི, ན པན པལླངྐསཏྟཱཧཱདི ཝིཡ ནིཡཏཀིཙྩསྶ ཨཊྛམསཏྟཱཧསྶ ནཱམ ལབྦྷནཏོ. སཏྟམསཏྟཱཧསྶ ཧི པརཏོ ཨཛཔཱལནིགྲོདྷམཱུལེ བྲཧྨུནོ སཀྐསྶ ཙ པཊིཉྙཱཏདྷམྨདེསནཾ བྷགཝནྟཾ ཉཏྭཱ ‘‘ཨིདཱནི སཏྟེ དྷམྨདེསནཱཡ མམ ཝིསཡཾ ཨཏིཀྐཱམེསྶཏཱི’’ཏི སཉྫཱཏདོམནསྶོ ཧུཏྭཱ ཋིཏོ ཙིནྟེསི, ‘‘ཧནྡཱཧཾ དཱནི ནཾ ཨུཔཱཡེན པརིནིབྦཱཔེསྶཱམི, ཨེཝམསྶ མནོརཐོ ཨཉྙཐཏྟཾ གམིསྶཏི, མམ མནོརཐོ ཨིཛ྄ཛྷིསྶཏཱི’’ཏི ཙིནྟེཏྭཱ བྷགཝནྟཾ ཨུཔསངྐམིཏྭཱ ཨེཀམནྟཾ ཋིཏོ – ‘‘པརིནིབྦཱཏུ དཱནི, བྷནྟེ, བྷགཝཱ’’ཏིཨཱདིནཱ པརིནིབྦཱནཾ ཡཱཙི. ཏཾ སནྡྷཱཡ ཝུཏྟཾ ‘‘ཨཊྛམེ སཏྟཱཧེ’’ཏིཨཱདི. ཏཏྠ ཨཛྫཱཏི ཨཱཡུསངྑཱརཝོསྶཛྫནདིཝསཾ སནྡྷཱཡཱཧ. བྷགཝཱ ཙསྶ ཨཏིབནྡྷནཱདྷིཔྤཱཡཾ ¶ ཛཱནནྟོཔི ཏཾ ཨནཱཝིཀཏྭཱ པརིནིབྦཱནསྶ ཨཀཱལབྷཱཝམེཝ པཀཱསེནྟོ ཡཱཙནཾ པཊིཀྑིཔི. ཏེནཱཧ ‘‘ན ཏཱཝཱཧ’’ནྟིཨཱདི.

མགྒཝསེན བྱཏྟཱཏི སཙྩཔཊིཝེདྷཝེཡྻཏྟིཡེན བྱཏྟཱ. ཏཐེཝ ཝིནཱིཏཱཏི མགྒཝསེན ཀིལེསཱནཾ སམུཙྪེདཝིནཡེན ཝིནཱིཏཱ. ཏཐཱ ཝིསཱརདཱཏི ཨརིཡམགྒཱདྷིགམེནེཝ སཏྠུསཱསནེ ཝེསཱརཛྫཔྤཏྟིཡཱ ཝིསཱརདཱ, སཱརཛྫཀརཱནཾ དིཊྛིཝིཙིཀིཙྪཱདིཔཱཔདྷམྨཱནཾ ཝིགམེན ཝིསཱརདབྷཱཝཾ པཏྟཱཏི ཨཏྠོ. ཡསྶ སུཏསྶ ཝསེན ཝཊྚདུཀྑཏོ ནིསྶརཎཾ སམྦྷཝཏི, ཏཾ ཨིདྷ ཨུཀྐཊྛནིདྡེསེན ‘‘སུཏ’’ནྟི ཨདྷིཔྤེཏནྟི ཨཱཧ ‘‘ཏེཔིཊཀཝསེནཱ’’ཏི. ཏིཎྞཾ པིཊཀཱནཾ སམཱུཧོ ཏེཔིཊཀཾ, ཏཱིཎི ཝཱ པིཊཀཱནི ཏིཔིཊཀཾ, ཏིཔིཊཀམེཝ ཏེཔིཊཀཾ, ཏསྶ ཝསེན. ཏདེཝཱཏི ཡཾ ཏཾ ཏེཔིཊཀཾ སོཏབྦབྷཱཝེན སུཏནྟི ཝུཏྟཾ, ཏམེཝ. དྷམྨནྟི པརིཡཏྟིདྷམྨཾ. དྷཱརེནྟཱིཏི སུཝཎྞབྷཱཛནེ པཀྑིཏྟསཱིཧཝསཾ ཝིཡ ཨཝིནསྶནྟཾ ཀཏྭཱ སུཔྤགུཎསུཔྤཝཏྟིབྷཱཝེན དྷཱརེནྟི ཧདཡེ ཋཔེནྟི. ཨིཏི པརིཡཏྟིདྷམྨཝསེན བཧུསྶུཏདྷམྨདྷརབྷཱཝཾ དསྶེཏྭཱ ཨིདཱནི པཊིཝེདྷཝསེནཔི ཏཾ དསྶེནྟོ ‘‘ཨཐ ཝཱ’’ཏིཨཱདི ཝུཏྟཾ. ཨརིཡདྷམྨསྶཱཏི མགྒཕལདྷམྨསྶ, ནཝཝིདྷསྶ ཝཱ ལོཀུཏྟརདྷམྨསྶ. ཨནུདྷམྨབྷཱུཏནྟི ཨདྷིགམཱཡཱནུརཱུཔཾ དྷམྨབྷཱུཏཾ. ཨནུཙྪཝིཀཔཊིཔདནྟི ཏམེཝ ཝིཔསྶནཱདྷམྨམཱཧ, ཚབྦིདྷཱ ཝིསུདྡྷིཡོ ཝཱ. ཨནུདྷམྨནྟི ནིབྦཱནདྷམྨསྶ ཨནུདྷམྨོ, ཡཐཱཝུཏྟཔཊིཔདཱ, ཏསྶཱནུརཱུཔཾ ཨབྷིསལླེཁིཏཾ ཨཔྤིཙྪཏཱདིདྷམྨཾ. ཙརཎསཱིལཱཏི སམཱདཱཡ ཝཏྟནསཱིལཱ. ཨནུམགྒཕལདྷམྨོ ཨེཏིསྶཱཏི ཝཱ ཨནུདྷམྨཱ, ཝུཊྛཱནགཱམིནིཝིཔསྶནཱ, ཏསྶ ཙརཎསཱིལཱ. ཨཏྟནོ ཨཱཙརིཡཝཱདནྟི ཨཏྟནོ ཨཱཙརིཡསྶ ¶ སམྨཱསམྦུདྡྷསྶ ཝཱདཾ. སདེཝཀསྶ ལོཀསྶ ཨཱཙཱརསིཀྑཱཔནེན ཨཱཙརིཡོ, བྷགཝཱ, ཏསྶ ཝཱདོ, ཙཏུསཙྩདེསནཱ.

ཨཱཙིཀྑིསྶནྟཱིཏི ཨཱདིཏོ ཀཐེསྶནྟི, ཨཏྟནཱ ཨུགྒཧིཏནིཡཱམེན པརེ ཨུགྒཎྷཱཔེསྶནྟཱིཏི ཨཏྠོ. དེསེསྶནྟཱིཏི ཝཱཙེསྶནྟི, པཱལི༹ཾ སམྨཱ པབོདྷེསྶནྟཱིཏི ཨཏྠོ. པཉྙཔེསྶནྟཱིཏི པཛཱནཱཔེསྶནྟི, སངྐཱསེསྶནྟཱིཏི ཨཏྠོ. པཊྛཔེསྶནྟཱིཏི པཀཱརེཧི ཋཔེསྶནྟི, པཀཱསེསྶནྟཱིཏི ཨཏྠོ. ཝིཝརིསྶནྟཱིཏི ཝིཝཊཾ ཀརིསྶནྟི. ཝིབྷཛིསྶནྟཱིཏི ཝིབྷཏྟཾ ཀརིསྶནྟི. ཨུཏྟཱནཱིཀརིསྶནྟཱིཏི ཨནུཏྟཱནཾ གམྦྷཱིརཾ ཨུཏྟཱནཾ པཱཀཊཾ ཀརིསྶནྟི. སཧདྷམྨེནཱཏི ཨེཏྠ དྷམྨ-སདྡོ ཀཱརཎཔརིཡཱཡོ ‘‘ཧེཏུམྷི ཉཱཎཾ དྷམྨཔཊིསམྦྷིདཱ’’ཏིཨཱདཱིསུ (ཝིབྷ. ༧༢༠) ཝིཡཱཏི ཨཱཧ ‘‘སཧེཏུཀེན སཀཱརཎེན ཝཙནེནཱ’’ཏི.

སཔྤཱཊིཧཱརིཡནྟི སནིསྶརཎཾ. ཡཐཱ པརཝཱདཾ བྷཉྫིཏྭཱ སཀཝཱདོ པཏིཊྛཧཏི, ཨེཝཾ ཧེཏུདཱཧརཎེཧི ཡཐཱདྷིགཏམཏྠཾ སམྤཱདེཏྭཱ དྷམྨཾ ཀཐེསྶནྟི. ཏེནཱཧ ‘‘ནིཡྻཱནིཀཾ ཀཏྭཱ དྷམྨཾ དེསེསྶནྟཱི’’ཏི ¶ , ནཝཝིདྷཾ ལོཀུཏྟརཾ དྷམྨཾ པབོདྷེསྶནྟཱིཏི ཨཏྠོ. ཨེཏྠ ཙ ‘‘པཉྙཔེསྶནྟཱི’’ཏིཨཱདཱིཧི ཚཧི པདེཧི ཚ ཨཏྠཔདཱནི དསྶིཏཱནི, ཨཱདིཏོ པན དྭཱིཧི པདེཧི ཚ བྱཉྫནཔདཱནི. ཨེཏྟཱཝཏཱ ཏེཔིཊཀཾ བུདྡྷཝཙནཾ སཾཝཎྞནཱནཡེན སངྒཧེཏྭཱ དསྶིཏཾ ཧོཏི. ཝུཏྟཉྷེཏཾ ནེཏྟིཡཾ (ནེཏྟི. སངྒཧཝཱར) ‘‘དྭཱདས པདཱནི སུཏྟཾ, ཏཾ སབྦཾ བྱཉྫནཉྩ ཨཏྠོ ཙཱ’’ཏི.

སིཀྑཏྟཡསངྒཧིཏནྟི ཨདྷིསཱིལསིཀྑཱདིསིཀྑཏྟཡསངྒཧཾ. སཀལཾ སཱསནབྲཧྨཙརིཡནྟི ཨནཝསེསཾ སཏྠུསཱསནབྷཱུཏཾ སེཊྛཙརིཡཾ. སམིདྡྷནྟི སམྨདེཝ ཝཌྜྷིཏཾ. ཛྷཱནསྶཱདཝསེནཱཏི ཏེཧི ཏེཧི བྷིཀྑཱུཧི སམདྷིགཏཛྷཱནསུཁཝསེན. ཝུཌྜྷིཔྤཏྟནྟི ཨུལཱ༹རཔཎཱིཏབྷཱཝཱུཔགམནེན སབྦསོ པརིཝུཌྜྷིམུཔགཏཾ. སབྦཔཱལིཕུལླཾ ཝིཡ ཨབྷིཉྙཱསམྤདཱཧི སཱསནཱབྷིཝུཌྜྷིཡཱ མཏྠཀཔྤཏྟིཏོ. པཏིཊྛིཏཝསེནཱཏི པཏིཊྛཱནཝསེན, པཏིཊྛཔྤཏྟིཡཱཏི ཨཏྠོ. པཊིཝེདྷཝསེན བཧུནོ ཛནསྶ ཧིཏཾ བཱཧུཛཉྙཾ. ཏེནཱཧ ‘‘མཧཱཛནཱབྷིསམཡཝསེནཱ’’ཏི. པུཐུ པུཐུལཾ བྷཱུཏཾ ཛཱཏཾ, པུཐུཏྟཾ བྷཱུཏཾ པཏྟནྟི ཝཱ པུཐུབྷཱུཏཾ. ཏེནཱཧ ‘‘སབྦཱཀཱརེན པུཐུལབྷཱཝཔྤཏྟ’’ནྟི. སུཊྛུ པཀཱསིཏནྟི སམྨདེཝ ཨཱདིཀལྱཱཎཱདིབྷཱཝེན པཝེདིཏཾ.

སཏིཾ ¶ སཱུཔཊྛིཏཾ ཀཏྭཱཏི ཨཡཾ ཀཱཡཱདིཝིབྷཱགོ ཨཏྟབྷཱཝསཉྙིཏོ དུཀྑབྷཱརོ མཡཱ ཨེཏྟཀཾ ཀཱལཾ ཝཧིཏོ, ཨིདཱནི པན ན ཝཧིཏབྦོ, ཨེཏསྶ ཨཝཧནཏྠཾ ཙིརཏརཾ ཀཱལཾ ཨརིཡམགྒསམྦྷཱརོ སམྦྷཏོ, སྭཱཡཾ ཨརིཡམགྒོ པཊིཝིདྡྷོ, ཡཏོ ཨིམེ ཀཱཡཱདཡོ ཨསུབྷཱདིཏོ སབྷཱཝཱདིཏོ སམྨདེཝ པརིཉྙཱཏཱཏི ཙཏུབྦིདྷམྤི སཏིཾ ཡཐཱཏཐཾ ཝིསཡེ སུཊྛུ ཨུཔཊྛིཏཾ ཀཏྭཱ. ཉཱཎེན པརིཙྪིནྡིཏྭཱཏི ཡསྨཱ ཨིམསྶ ཨཏྟབྷཱཝསཉྙིཏསྶ དུཀྑབྷཱརསྶ ཝཧནེ པཡོཛནབྷཱུཏཾ ཨཏྟཧིཏཾ བོདྷིམཱུལེ ཨེཝ པརིསམཱཔིཏཾ, པརཧིཏཾ པན བུདྡྷཝེནེཡྻཝིནཡནཾ པརིསམཱཔིཏཾ མཏྠཀཔྤཏྟཾ, ཏཾ དཱནི མཱསཏྟཡེནེཝ པརིསམཱཔནཾ པཱཔུཎིསྶཏི, ཏསྨཱ ཨཱཧ ‘‘ཝིསཱཁཔུཎྞམཱཡཾ པརིནིབྦཱཡིསྶཱམཱི’’ཏི, ཨེཝཾ བུདྡྷཉཱཎེན པརིཙྪིནྡིཏྭཱ སཙྩབྷཱགེན ཝིནིཙྪཡཾ ཀཏྭཱ. ཨཱཡུསངྑཱརཾ ཝིསྶཛཱིཏི ཨཱཡུནོ ཛཱིཝིཏསྶ ཨབྷིསངྑརཎཾ ཕལསམཱཔཏྟིདྷམྨཾ ན སམཱཔཛྫིསྶཱམཱིཏི ཝིསྶཛི, ཏཾ ཝིསྶཛྫནེནེཝ ཏེན ཨབྷིསངྑརཱིཡམཱནཾ ཛཱིཝིཏསངྑཱརཾ ན པཝཏྟཡིསྶཱམཱིཏི ཝིསྶཛི. ཏེནཱཧ ‘‘ཏཏྠཱ’’ཏིཨཱདི.

ཋཱནམཧནྟཏཱཡཔི པཝཏྟིཨཱཀཱརམཧནྟཏཱཡཔི མཧནྟོ པཐཝཱིཀམྤོ. ཏཏྠ ཋཱནམཧནྟཏཱཡ བྷཱུམིཙཱལསྶ མཧནྟཏཾ དསྶེཏུཾ ‘‘ཏདཱ…པེ… ཨཀམྤིཏྠཱ’’ཏི ཝུཏྟཾ, སཱ པན ཛཱཏིཁེཏྟབྷཱུཏཱ དསསཧསྶཱི ལོཀདྷཱཏུ ཨེཝ, ན ཡཱ ཀཱཙི. ཡཱ མཧཱབྷིནཱིཧཱརམཧཱཛཱཏིཨཱདཱིསུཔི ཨཀམྤིཏྠ, ཏདཱཔི ¶ ཏཏྟཀཱཡ ཨེཝ ཀམྤནེ ཀིཾ ཀཱརཎཾ? ཛཱཏིཁེཏྟབྷཱཝེན ཏསྶེཝ ཨཱདིཏོ པརིགྒཧསྶ ཀཏཏྟཱ, པརིགྒཧཎཉྩསྶ དྷམྨཏཱཝསེན ཝེདིཏབྦཾ. ཏཐཱ ཧི པུརིམབུདྡྷཱནམྤི ཏཏྟཀམེཝ ཛཱཏིཁེཏྟཾ ཨཧོསི. ཏཐཱ ཧི ཝུཏྟཾ ‘‘དསསཧསྶཱི ལོཀདྷཱཏུ ནིསྶདྡཱ ཧོཏི ནིརཱཀུལཱ…པེ… མཧཱསམུདྡོ ཨཱབྷུཛཏི, དསསཧསྶཱི པཀམྤཏཱི’’ཏི ཙ ཨཱདི. ཨུདཀཔརིཡནྟཾ ཀཏྭཱ ཚཔྤཀཱརཔྤཝེདྷནེན. ཨཝཱིཏརཱགེ བྷིཾསེཏཱིཏི བྷིཾསནོ, སོ ཨེཝ བྷིཾསནཀོཏི ཨཱཧ ‘‘བྷཡཛནཀོ’’ཏི. དེཝབྷེརིཡོཏི དེཝདུནྡུབྷིསདྡསྶ པརིཡཱཡཝཙནམཏྟཾ, ན ཙེཏྠ ཀཱཙི བྷེརཱི དེཝདུནྡུབྷཱིཏི ཨདྷིཔྤེཏཱ, ཨཐ ཁོ ཨུཔྤཱཏབྷཱཝེན ལབྦྷམཱནོ ཨཱཀཱསཏོ ནིགྒྷོསསདྡོ. ཏེནཱཧ ‘‘དེཝོ’’ཏིཨཱདི. དེཝོཏི མེགྷོ. ཏསྶ ཧི ཏདཱ ཨཙྪབྷཱཝེན ཨཱཀཱསསྶ ཝསྶཱབྷཱཝེན སུཀྑགཛྫིཏསཉྙིཏེ ¶ སདྡེ ནིཙྪརནྟེ དེཝདུནྡུབྷིསམཉྙཱ. ཏེནཱཧ ‘‘དེཝོ སུཀྑགཛྫིཏཾ གཛྫཱི’’ཏི.

པཱིཏིཝེགཝིསྶཊྛནྟི ‘‘ཨེཝཾ ཙིརཏརཀཱལཾ ཝཧིཏོ ཨཡཾ ཨཏྟབྷཱཝསཉྙིཏོ དུཀྑབྷཱརོ, དཱནི ན ཙིརསྶེཝ ནིཀྑིཔིསྶཱམཱི’’ཏི སཉྫཱཏསོམནསྶོ བྷགཝཱ སབྷཱཝེནེཝ པཱིཏིཝེགཝིསྶཊྛཾ ཨུདཱནཾ ཨུདཱནེཏི, ཨེཝཾ ཨུདཱནེནྟེན ཨཡམྤི ཨཏྠོ སཱདྷིཏོ ཧོཏཱིཏི དསྶནཏྠཾ ཨཊྛཀཐཱཡཾ ‘‘ཀསྨཱ’’ཏིཨཱདི ཝུཏྟཾ.

ཏུལཱིཡཏཱིཏི ཏུལནྟི ཏུལ-སདྡོ ཀམྨསཱདྷནོཏི དསྶེཏུཾ ‘‘ཏུལིཏ’’ནྟི ཝུཏྟཾ. ཨཔྤཱནུབྷཱཝཏཱཡ པརིཙྪིནྣཾ. ཏཐཱ ཧི ཏཾ པཊིཔཀྑེན པརིཏོ ཁཎྜིཏབྷཱཝེན པརིཏྟནྟི ཝུཙྩཏི. པཊིཔཀྑཝིཀྑམྦྷནཏོ དཱིགྷསནྟཱནཏཱཡ ཝིཔུལཕལཏཱཡ ཙ ན ཏུལཾ ན པརིཙྪིནྣཾ. ཡེཧི ཀཱརཎེཧི པུབྦེ ཨཝིསེསཏོ ‘‘མཧགྒཏཾ ཨཏུལ’’ནྟི ཝུཏྟཾ, ཏཱནི ཀཱརཎཱནི རཱུཔཱཝཙརཏོ ཨཱརུཔྤསྶ སཱཏིསཡཾ ཝིཛྫནྟཱིཏི ཨརཱུཔཱཝཙརཾ ཨཏུལནྟི ཝུཏྟཾ, ཨིཏརཉྩ ཏུལནྟི. ཨཔྤཝིཔཱཀནྟི ཏཱིསུཔི ཀམྨེསུ ཡཾ ཨཔྤཝིཔཱཀཾ ཧཱིནཾ, ཏཾ ཏུལཾ. བཧུཝིཔཱཀནྟི ཡཾ མཧཱཝིཔཱཀཾ པཎཱིཏཾ, ཏཾ ཨཏུལཾ. ཡཾ པནེཏྠ མཛ྄ཛྷིམཾ, ཏཾ ཧཱིནཾ ཨུཀྐཊྛནྟི དྭིདྷཱ བྷིནྡིཏྭཱ དྭཱིསུ བྷཱགེསུ པཀྑིཔིཏབྦཾ. ཧཱིནཏྟིཀཝཎྞནཱཡཾ ཝུཏྟནཡེནེཝ ཨཔྤབཧུཝིཔཱཀཏཾ ནིདྡྷཱརེཏྭཱ ཏསྶ ཝསེན ཏུལཱཏུལབྷཱཝོ ཝེདིཏབྦོ. སམྦྷཝཏི ཨེཏསྨཱཏི སམྦྷཝོཏི ཨཱཧ ‘‘སམྦྷཝ^ ཧེཏུབྷཱུཏ’’ནྟི. ནིཡཀཛ྄ཛྷཏྟརཏོཏི སསནྟཱནདྷམྨེསུ ཝིཔསྶནཱཝསེན གོཙརཱསེཝནཱཡ ཙ རཏོ. སཝིཔཱཀཾ སམཱནཾ པཝཏྟིཝིཔཱཀམཏྟདཱཡིཀམྨཾ སཝིཔཱཀཊྛེན སམྦྷཝཾ, ན ཙ ཏཾ ཀཱམཱདི^ བྷཝཱབྷིསངྑཱརཀནྟི ཏཏོ ཝིསེསནཏྠཾ སམྦྷཝནྟི ཝཏྭཱ ‘‘བྷཝསངྑཱར’’ནྟི ཝུཏྟཾ. ཨོསྶཛཱིཏི ཨརིཡམགྒེན ཨཝསྶཛི. ཀཝཙཾ ཝིཡ ཨཏྟབྷཱཝཾ པརིཡོནནྡྷིཏྭཱ ཋིཏཾ ཨཏྟནི སམྦྷཱུཏཏྟཱ ཨཏྟསམྦྷཝཾ ¶ ཀིལེསཉྩ ཨབྷིནྡཱིཏི ཀིལེསབྷེདསཧབྷཱཝིཀམྨོསྶཛྫནཾ དསྶེནྟོ ཏདུབྷཡསྶ ཀཱརཎམཱཧ ‘‘ཨཛ྄ཛྷཏྟརཏོ སམཱཧིཏོ’’ཏི.

པཋམཝིཀཔྤེ ཨཝསཛྫནམེཝ ཝུཏྟཾ. ཨེཏྠ ཨཝསཛྫནཱཀཱརོཏི ཏཾ དསྶེནྟོ ‘‘ཨཐ ཝཱ’’ཏིཨཱདིམཱཧ. ཏཏྠ ཏཱིརེནྟོཏི ‘‘ཨུཔྤཱདོ བྷཡཾ, ཨནུཔྤཱདོ ཁེམ’’ནྟིཨཱདིནཱ ཝཱིམཾསནྟོ. ཏུལེནྟོ ཏཱིརེནྟོཏིཨཱདིནཱ སངྑེཔཏོ ཝུཏྟམཏྠཾ ཝིཏྠཱརཏོ དསྶེཏུཾ ‘‘པཉྩཀྑནྡྷཱ’’ཏིཨཱདིཾ ཝཏྭཱ བྷཝསངྑཱརསྶ ཨཝསཛྫནཱཀཱརཾ སརཱུཔཏོ དསྶེཏི. ཨེཝནྟིཨཱདིནཱ ¶ པན ཨུདཱནགཱཐཱཝཎྞནཱཡཾ ཨཱདིཏོ ཝུཏྟམཏྠཾ ནིགམནཝསེན དསྶེཏི. ཨབྷཱིཏབྷཱཝཉཱཔནཏྠཉྩཱཏི ཨཡམྤི ཨཏྠོ སངྒཧིཏོཏི དཊྛབྦཾ.

ཙཱཔཱལཝགྒཝཎྞནཱ ནིཊྛིཏཱ.

༢. པཱསཱདཀམྤནཝགྒོ

༡-༢. པུབྦསུཏྟཱདིཝཎྞནཱ

༨༢༣-༨༢༤. པརཏོ ཨིམསྨིཾ པཱསཱདཀམྤནཝགྒེ དསམསུཏྟེ ཨཱཝི བྷཝིསྶནྟི. ཚཨབྷིཉྙཱཔཱདཀཱཏི ཚནྣཾ ཨབྷིཉྙཱནཾ པཱདཀབྷཱུཏཱ པདྷཱནབྷཱུཏཱ. ཡཐཱ པཋམསུཏྟེ, ཏཐཱ དུཏིཡཏཏིཡསུཏྟེསུཔི ཙ ཚཨབྷིཉྙཱཔཱདཀཱ ཨིདྡྷིཔཱདཱ ཀཐིཏཱཏི ཨཏྠོ.

༣. ཚནྡསམཱདྷིསུཏྟཝཎྞནཱ

༨༢༥. ཡོ སམཱདྷིསྶ ནིསྶཡབྷཱུཏོ ཚནྡོ, སོ ཨིདྷཱདྷིཔྤེཏོཏི ཨཱཧ ‘‘ཚནྡནྟི ཀཏྟུཀམྱཏཱཚནྡ’’ནྟི. ཏསྶ ཙ ཨདྷིཔཏེཡྻཊྛོ ནིསྶཡཊྛོ, ན ཝིནཱ ཏཾ ཚནྡཾ ནིསྶཱཡཱཏི ཨཱཧ – ‘‘ནིསྶཱཡཱཏི ནིསྶཡཾ ཀཏྭཱ, ཨདྷིཔཏིཾ ཀཏྭཱཏི ཨཏྠོ’’ཏི. པདྷཱནབྷཱུཏཱཏི སེཊྛབྷཱུཏཱ, སེཊྛབྷཱཝོ ཙ ཨེཀསྶཔི ཙཏུཀིཙྩསཱདྷནཝསེན པཝཏྟིཡཱ, ཏཏོ ཨེཝ བཧུཝཙནནིདྡེསོ, པདྷཱནསངྑཱརཊྛེན པདྷཱནསངྑརཎཏོ. ‘‘ཚནྡཾ ཙེ ནིསྶཱཡ…པེ… ཨཡཾ ཝུཙྩཏི ཚནྡསམཱདྷཱི’’ཏི ཨིམཱཡ པཱལི༹ཡཱ ཚནྡཱདྷིཔཏི སམཱདྷི ཚནྡསམཱདྷཱིཏི ཨདྷིཔཏིསདྡལོཔཾ ཀཏྭཱ སམཱསོ ཝུཏྟོཏི ཝིཉྙཱཡཏི, ཨདྷིཔཏིསདྡཏྠདསྶནཝསེན ཝཱ ཚནྡཧེཏུཀོ, ཚནྡཱདྷིཀོ ཝཱ སམཱདྷི ཚནྡསམཱདྷི. ཏེན ‘‘ཚནྡསམཱདྷིནཱ ཙེཝ པདྷཱནསངྑཱརེཧི པདྷཱནབྷཱུཏསངྑཱརེཧི ཙ སམནྣཱགཏཱ’’ཏི ཝཀྑཏི, ཏཾ ཨཱནེཏྭཱ ¶ སམྦནྡྷོ. པདྷཱནབྷཱུཏཱཏི ཝཱིརིཡབྷཱུཏཱ. ཀེཙི ཝདནྟི – ‘‘སངྑཏསངྑཱརཱདིནིཝཏྟནཏྠཾ པདྷཱནགྒཧཎ’’ནྟི. ཨཐ ཝཱ ཏཾ ཏཾ ཝིསེསཾ སངྑརོཏཱིཏི སངྑཱརོ, སབྦམྤི ཝཱིརིཡཾ. ཏཏྠ ཙཏུཀིཙྩསཱདྷཀཏོ ཏདཉྙསྶ ནིཝཏྟནཏྠཾ པདྷཱནགྒཧཎནྟི. ཡཐཱ ཚནྡོ ཚནྡསམཱདྷིནཱ ཙེཝ པདྷཱནསངྑཱརེཧི ཙ སམནྣཱགཏོ, ཨེཝཾ ཚནྡསམཱདྷི ཚནྡེན ཙེཝ པདྷཱནསངྑཱརེཧི ཙ སམནྣཱགཏོ. པདྷཱནསངྑཱརཱཔི ཚནྡེན ¶ ཙེཝ ཚནྡསམཱདྷིནཱ ཙ སམནྣཱགཏཱཏི ཏཱིསུཔི པདེསུ སམནྣཱགཏསདྡོ ཡོཛེཏབྦོ. ཏསྨཱཏི ཡསྨཱ ཏཡོཔི ཚནྡཱདཡོ ཨེཀཙིཏྟུཔྤཱདཔརིཡཱཔནྣཱ, ཏསྨཱ སབྦེ ཏེ དྷམྨཱ ཨེཀཏོ ཀཏྭཱ ‘‘ཨཡཾ ཝུཙྩཏི…པེ… ཨིདྡྷིཔཱདོ’’ཏི ཝུཏྟནྟི. ཨེཝཾ ཚནྡཱདཱིནཾཡེཝ ཙེཏྠ ཨིདྡྷིཔཱདབྷཱཝོ ཝུཏྟོ, ཝིབྷངྒེ པན ཏེསཾ ཨིདྡྷིབྷཱཝོ སམྤཡུཏྟཱནཾ ཨིདྡྷིཔཱདབྷཱཝོ ཝུཏྟོཏི དསྶེནྟོ ‘‘ཨིདྡྷིཔཱདཝིབྷངྒེ པནཱ’’ཏིཨཱདིམཱཧ.

ཨིདཱནི ནེསཾ ཨིདྡྷིཔཱདཏཱཔི སམྦྷཝཏཱིཏི དསྶེནྟོ ‘‘ཨཔིཙཱ’’ཏིཨཱདིམཱཧ. ཏཏྠ ཚནྡཉྷི བྷཱཝཡཏོ པདྷཱནཾ ཀཏྭཱ བྷཱཝེནྟསྶ ཏཐཱ པཝཏྟཔུབྦཱབྷིསངྑཱརཝསེན ཨིཛ྄ཛྷམཱནོ ཚནྡོ ཨིདྡྷི ནཱམ, ཏསྶ ནིསྶཡབྷཱུཏཱ པདྷཱནསངྑཱརཱ ཨིདྡྷིཔཱདོ ནཱམ. སེསདྭཡེཔི ཨེསེཝ ནཡོ. ཏཐཱ བྷཱཝཡནྟསྶ མུཁྱཏཱམཏྟཾ སནྡྷཱཡ ཝུཏྟཾ, ཨིཛ྄ཛྷནཏྠོ པན སབྦེསཾ སམཱནནྟི དསྶེནྟོ ‘‘སམྤཡུཏྟ…པེ… ཨིཛ྄ཛྷནྟིཡེཝཱ’’ཏི ཨཱཧ.

ཨིདྡྷིཔཱདེ ཨསངྐརཏོ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ཏཏྠ ཚནྡཱདཡོཏི ཚནྡསམཱདྷིཔདྷཱནསངྑཱརཱ. སེསིདྡྷིཔཱདེསཱུཏི ཝཱིརིཡིདྡྷིཔཱདཱདཱིསུ. ཏཏྠ ཝཱིརིཡསམཱདྷིཔདྷཱནསངྑཱརསམནྣཱགཏོཏི དྭིཀྑཏྟུཾ ཝཱིརིཡཾ ཨཱགཏཾ, ཏཏྠ པུརིམཾ སམཱདྷིཝིསེསཾ, ཝཱིརིཡཱདྷིཔཏིསམཱདྷི ཨེཝ ཝཱིརིཡསམཱདྷཱིཏི དུཏིཡཾ སམནྣཱགམངྒདསྶནཾ. དྭེཡེཝ ཧི སབྦཏྠ སམནྣཱགམངྒཱནི སམཱདྷི པདྷཱནསངྑཱརོ ཙ, ཚནྡཱདཡོ སམཱདྷིཝིསེསནཱནི, པདྷཱནསངྑཱརོ པན པདྷཱནཝཙནེནེཝ ཝིསེསིཏོ, ན ཚནྡཱདཱིཧཱིཏི ན ཨིདྷ ཝཱིརིཡཱདྷིཔཏིཏཱ པདྷཱནསངྑཱརསྶ ཝུཏྟཱ ཧོཏི. ཝཱིརིཡཉྩ སམཱདྷིཾ ཝིསེསེཏྭཱ ཋིཏམེཝ སམནྣཱགམངྒཝསེན པདྷཱནསངྑཱརཝཙནེན ཝུཏྟནྟི ནཱཔི དྭཱིཧི ཝཱིརིཡེཧི སམནྣཱགམོ ཝུཏྟོ ཧོཏི. ཡསྨཱ པན ཚནྡཱདཱིཧི ཝིསིཊྛོ སམཱདྷི, ཏཐཱཔི ཝིསིཊྛེནེཝ ཙ ཏེན སམྤཡུཏྟོ པདྷཱནསངྑཱརོ སེསདྷམྨཱ ཙ, ཏསྨཱ སམཱདྷིཝིསེསནཱནཾ ཝསེན ཙཏྟཱརོ ཨིདྡྷིཔཱདཱ ཝུཏྟཱ, ཝིསེསནབྷཱཝོ ཙ ཚནྡཱདཱིནཾ ཏཾཏཾཨཝསྶཡདསྶནཝསེན ཧོཏཱིཏི ‘‘ཚནྡསམཱདྷི…པེ… ཨིདྡྷིཔཱདོ’’ཏི ཨེཏྠ ནིསྶཡཏྠེཔི པཱད-སདྡེ ཨུཔཱདཱཡཊྛེན ཚནྡཱདཱིནཾ ཨིདྡྷིཔཱདཏཱ ཝུཏྟཱ ཧོཏི, ཏེནེཝ ཨབྷིདྷམྨེ ཨུཏྟརཙཱུལ༹བྷཱཛནིཡེ ‘‘ཙཏྟཱརོ ཨིདྡྷིཔཱདཱ ཚནྡིདྡྷིཔཱདོ’’ཏིཨཱདིནཱ (ཝིབྷ. ༤༥༧) ཚནྡཱདཱིནཾཡེཝ ཨིདྡྷིཔཱདཏཱ ཝུཏྟཱ, པཉྷཔུཙྪཀེ ཙ – ‘‘ཙཏྟཱརོ ཨིདྡྷིཔཱདཱ ཨིདྷ བྷིཀྑུ ཚནྡསམཱདྷཱི’’ཏིཨཱདིནཱཝ (ཝིབྷ. ༤༣༡) ཨུདྡེསཾ ཀཏྭཱཔི པུན ¶ ཚནྡཱདཱིནཾཡེཝ ཀུསལཱདིབྷཱཝོ ¶ ཝིབྷཏྟོ. ཨུཔཱཡིདྡྷིཔཱདདསྶནཏྠམེཝ ཧི ནིསྶཡིདྡྷིཔཱདདསྶནཾ ཀཏཾ, ཨཉྙཐཱ ཙཏུབྦིདྷཏཱ ན ཧོཏཱིཏི ཨཡམེཏྠ པཱལི༹ཝསེན ཨཏྠཝིནིཙྪཡོ. ཏཏྠ ཨུཔཱཡིདྡྷིཔཱདདསྶནཏྠམེཝཱཏི ཚནྡཱདིཀེ དྷུརེ ཛེཊྛཀེ པུབྦངྒམེ ཀཏྭཱ ནིབྦཏྟིཏསམཱདྷི ཚནྡཱདྷིཔཏིསམཱདྷཱིཏི ཚནྡཱདཱིནཾ ཨིདྡྷིཡཱ ཨདྷིགམཱུཔཱཡདསྶནཾ ཨུཔཱཡིདྡྷིཔཱདདསྶནཾ, ཏདཏྠམེཝ ‘‘ཏཐཱབྷཱུཏསྶ ཝེདནཱཀྑནྡྷོ…པེ… ཝིཉྙཱཎཀྑནྡྷོ’’ཏི ཏཏྠ ཏཏྠ པཱལི༹ཡཾ ནིསྶཡིདྡྷིཔཱདདསྶནཾ ཀཏཾ ཚནྡཱདིཝིསིཊྛཱནཾཡེཝ ཝེདནཱཀྑནྡྷཱདཱིནཾ ཨདྷིཔྤེཏཏྟཱ. ཨེཝཉྩེཏཾ སམྤཊིཙྪིཏབྦཾ, ཨཉྙཐཱ ཀེཝལཾ ཨིདྡྷིསམྤཡུཏྟཱནཾཡེཝ ཁནྡྷཱནཾ ཝསེན ཨིདྡྷིཔཱདབྷཱཝེ གཡ྄ཧམཱནེ ཏེསཾ ཙཏུབྦིདྷཏཱ ན ཧོཏི ཝིསེསཀཱརཎབྷཱཝཏོཏི ཨདྷིཔྤཱཡོ.

ཀེཙཱིཏི ཨུཏྟརཝིཧཱརཝཱསིནོ. ཨནིབྦཏྟོཏི ཧེཏུཔཙྩཡེཧི ན ནིབྦཏྟོ, ན སབྷཱཝདྷམྨོ, པཉྙཏྟིམཏྟནྟི ཨདྷིཔྤཱཡོ. ཝཱདམདྡནཏྠཱཡ ཧོཏི, ཨབྷིདྷམྨེ ཙ ཨཱགཏོ ཨུཏྟརཙཱུལ༹ཝཱརོཏི ཡོཛནཱ. ཙཏྟཱརོ ཨིདྡྷིཔཱདཱཏིཨཱདི ཨུཏྟརཙཱུལ༹ཝཱརདསྶནཾ. ཨིམེ པན ཨུཏྟརཙཱུལ༹ཝཱརེ ཨཱགཏཱ ཨིདྡྷིཔཱདཱ.

རཊྛཔཱལཏྠེརོ ཚནྡེ སཏི ཀཐཾ ནཱནུཛཱནིསྶནྟཱིཏི སཏྟཱཧཱནི བྷཏྟཱནི ཨབྷུཉྫིཏྭཱ མཱཏཱཔིཏརོ ཨནུཛཱནཱཔེཏྭཱ པབྦཛིཏྭཱ ཚནྡམེཝ ནིསྶཱཡ ཨརཧཏྟཾ པཱཔུཎཱིཏི ཨཱཧ – ‘‘རཊྛཔཱལཏྠེརོ ཚནྡཾ དྷུརཾ ཀཏྭཱ ལོཀུཏྟརདྷམྨཾ ནིབྦཏྟེསཱི’’ཏི. སོཎཏྠེརོཏི སུཁུམཱལསོཎཏྠེརོ. སོ ཧི ཨཱཡསྨཱ ཨཏྟནོ སུཁུམཱལབྷཱཝཾ ཨཙིནྟེཏྭཱ ཨཏིཝེལཾ ཙངྐམནེན པཱདེསུ ཨུཊྛིཏེསུཔི ཨུསྶཱཧཾ ཨཝིསྶཛྫེནྟོ ཝཱིརིཡཾ དྷུརཾ ཀཏྭཱ ལོཀུཏྟརདྷམྨཾ ནིབྦཏྟེསི. སམྦྷུཏཏྠེརོ ‘‘ཙིཏྟཝཏོ ཙེ ཨལམརིཡཉཱཎདསྶནཝིསེསོ ཨིཛ྄ཛྷེཡྻ, མཡ྄ཧཾ ཨིཛ྄ཛྷེཡྻཱཏི ཙིཏྟཾ དྷུརཾ ཀཏྭཱ ལོཀུཏྟརདྷམྨཾ ནིབྦཏྟེསི. མོགྷརཱཛཱ ‘‘པཉྙཝཏོ ཙེ མགྒབྷཱཝནཱ ཨིཛ྄ཛྷེཡྻ, མཡ྄ཧཾ ཨིཛ྄ཛྷེཡྻཱ’’ཏི པཉྙཱཔུབྦངྒམཾ པཉྙཱདྷུརཾ པཉྙཱཛེཊྛཀཾ ཀཏྭཱ ཨརཧཏྟཾ པཱཔུཎཱིཏི ཨཱཧ ‘‘མོགྷརཱཛཱ ཝཱིམཾསཾ དྷུརཾ ཀཏྭཱ ལོཀུཏྟརདྷམྨཾ ནིབྦཏྟེསཱི’’ཏི. ཨིདཱནི ནེསཾ ཨརིཡཱནཾ ཨུཔཊྛཱནུསྶཱཧམནྟཛཱཏིསམྤདཾ ནིསྶཱཡ རཉྙོ སནྟིཀེ ལདྡྷཝིསེསེ ཨམཙྩཔུཏྟེ ནིདསྶནབྷཱཝེན དསྶེཏུཾ ‘‘ཏཏྠ ཡཐཱ’’ཏིཨཱདིམཱཧ. ཨེཏྠ ¶ ཙ པུནཔྤུནཾ ཚནྡུཔྤཱདནཾ ཏོསནཾ ཝིཡ ཧོཏཱིཏི ཚནྡསྶ ཨུཔཊྛཱནསདིསཏཱ ཝུཏྟཱ, ཐཱམབྷཱཝཏོ ཙ ཝཱིརིཡསྶ སཱུརཏྟསདིསཏཱ, ཙིནྟནཔྤདྷཱནཏྟཱ ཙིཏྟསྶ མནྟསཾཝིདྷཱནསདིསཏཱ, ཡོནིསོམནསིཀཱར-སམྦྷཱུཏེསུ ཀུསལདྷམྨེསུ པཉྙཱ སེཊྛཱཏི ཝཱིམཾསཱཡ ཛཱཏིསམྤཏྟིསདིསཏཱ ཝུཏྟཱ.

༤. མོགྒལླཱནསུཏྟཝཎྞནཱ

༨༢༦. ཨུདྡྷཙྩཔཀཏིཀཱཏི ¶ ཝིཀྑིཏྟསབྷཱཝཱ, ཝིབྦྷནྟཙིཏྟཱཏི ཨཏྠོ. ཨནཝཊྛིཏཏཱཡ ཝིཔྥནྡིཏཙིཏྟཏཱཡ ཝིཔྥནྡམཱནཙིཏྟཱ. ཏུཙྪཏཱཡ ནལོ༹ ཝིཡཱཏི ནལོ༹, མཱནོ, ཨུགྒཏོ ནལོ༹ ཨེཏེསནྟི ཨུནྣལཱ༹ཏི ཨཱཧ – ‘‘ཨུནྣལཱ༹ཏི…པེ… ཝུཏྟཾ ཧོཏཱི’’ཏི. ཙཔལཱཏི ཙཱཔལྱཏཱ ནཱམ ལོལབྷཱཝོ. མུརཱཏི ཁརཝཙནཱ, ཕརུསཝཙནཱཏི ཨཏྠོ. ཝིཀིཎྞཝཱཙཱ ནཱམ སམྥཔྤལཱཔིནོཏི ཝུཏྟཾ ‘‘ཨསཾཡཏཝཙནཱ’’ཏིཨཱདི. པཊིཔཏྟིདྷམྨེ པམུཊྛཱ ཝིནཊྛཱ པཊིཝིནཊྛཱ སཏི ཨེཏེསནྟི མུཊྛསཏཱིཏི ཨཱཧ – ‘‘ནཊྛསྶཏིནོ’’ཏི. ཨུབྦྷནྟཙིཏྟཱཏི སམཱདྷིནོ ཨབྷཱཝེན ཨུདྡྷཙྩེནེཝ ཨུཔརཱུཔརི བྷནྟཙིཏྟཱ. པཱཀཏིནྡྲིཡཱ ཨབྷཱཝིཏཀཱཡཏཱཡ གཱམདཱརཀཱ ཝིཡ པཀཏིབྷཱུཏཨིནྡྲིཡཱ. ནེམོ ཝུཙྩཏི བྷཱུམིཡཱ བདྡྷབྷཱཝནིམིཏྟཔདེསོ, གམྦྷཱིརོ ནེམོ ཨེཏསྶཱཏི གམྦྷཱིརནེམོ. སུཊྛུ ནིཁཱཏོཏིཨཱདི ཏསྶ པཱདསྶ སུཔྤཏིཊྛིཏབྷཱཝདསྶནཾ.

༥. ཨུཎྞཱབྷབྲཱཧྨཎསུཏྟཝཎྞནཱ

༨༢༧. པཧཱནཏྠནྟི ཨནུཔྤཱདཔཧཱནཏྠཾ.

༩. ཨིདྡྷཱདིདེསནཱསུཏྟཝཎྞནཱ

༨༣༡. ཨབྷིཉྙཱཔཱདཀཾ ཙཏུཏྠཛ྄ཛྷཱནཾ ཨདྷིཔྤེཏཾ ‘‘ཨིདྡྷིལཱབྷཱཡ པཝཏྟཏཱི’’ཏི ཝཙནཏོ.

༡༠. ཝིབྷངྒསུཏྟཝཎྞནཱ

༨༣༢. ཚནྡཾ ཨུཔྤཱདེཏྭཱཏི བྷཱཝནཱཚནྡཾ ཨུཔྤཱདེཏྭཱ. ལཱིནཱཀཱརོཏི བྷཱཝནཱཙིཏྟསྶ ལཡཱཔཏྟི. ཀོསཛྫེན ཝོཀིཎྞཱཔཛྫནཾ ཝུཏྟཾ.

ཨེཝཾ ¶ པསཱདཱབྷཱཝེན ཙིཏྟསྶ ཝིཀྑེཔཱཔཏྟི, ཏཏྠ པསཱདུཔྤཱདནེན ཡཾ སམྤཧཾསནཾ ཨིཙྪིཏབྦཾ, ཏསྶ ཨུཔྤཱདནཱཀཱརཾ དསྶེཏུཾ ཝུཏྟཾ ‘‘སོ བུདྡྷདྷམྨསངྒྷགུཎེ ཨཱཝཛྫེཏྭཱ’’ཏིཨཱདི. ཝཏྠུཀཱམེ ཨཱརབྦྷ ཝིཀྑིཏྟོ པུནཔྤུནཾ ཝིཀྑིཏྟོ ཧོཏིཡེཝཱཏི ཝུཏྟཾ ‘‘ཨནུཝིཀྑིཏྟོ’’ཏི. ཨུཔྤཐཾ པཊིཔནྣསྶ ཙིཏྟསྶ དཎྜནཊྛེན ནིགྒཎྷནཊྛེན སུཏྟཱནི ཨེཝ དཎྜོཏི སུཏྟདཎྜོ, ཏེན སུཏྟདཎྜེན ¶ ཙིཏྟཾ ཏཛྫེཏྭཱ. པཉྩཀཱམགུཎེ ཨཱརབྦྷ པཝཏྟོ ཙིཏྟཝིཀྑེཔོ པུནཔྤུནཾ ཨུཔྤཛྫཏེཝཱཏི ཝུཏྟཾ ‘‘ཨནུཝིཀྑིཏྟོ ཨནུཝིསཊོ’’ཏི.

པུརེཔཙྪཱབྷཱཝོ ཀམྨཊྛཱནསྶ མནསིཀཱརཝསེན ཨུགྒཧཝསེན ཝཱཏི ཏདུབྷཡཾ དསྶེཏུཾ ‘‘ཀཐ’’ནྟིཨཱདི ཝུཏྟཾ. ཨཏིལཱིནཱདཱིསུ ཙཏཱུསུ ཋཱནེསཱུཏི ཨཏིལཱིནཱཏིཔགྒཧིཏསཾཁིཏྟཨནུཝིཀྑིཏྟསཉྙིཏེསུ ཙཏཱུསུ ཋཱནེསུ. ཏཏྠ བྷཱཝནཾ ཨནཛ྄ཛྷོགཱཧེཏྭཱཝ སངྐོཙོ ཨཏིལཱིནཏཱ, ཨཛ྄ཛྷོགཱཧེཏྭཱ ཨནྟོ སངྐོཙོ སཾཁིཏྟཏཱ, ཨནྟོསངྑེཔོ ཨཏིཔགྒཧིཏཏཱ, ཨཙྩཱརདྡྷཝཱིརིཡཏཱ ཨནུཝིཀྑིཏྟཏཱ. བཧིདྡྷཱ ཝིསམཝིཏཀྐཱནུབྷཱཝནཾ ཨཱཔཛྫནྟོ དྭཏྟིཾསཱཀཱརཝསེན ཨཊྛིཀསཉྙཱཝསེན ཝཱ གཧེཏབྦནྟི ཨཱཧ – ‘‘སརཱིརཝསེན ཝེདིཏབྦ’’ནྟི. ཏེནཱཧ ‘‘ཨུདྡྷཾ པཱདཏལཱ’’ཏིཨཱདི (དཱི. ནི. ༢.༣༧༧; མ. ནི. ༡.༡༡༠).

ཨཉྙམཉྙཾ ཨསངྐརཏོ ཨཱཀིརཱིཡནྟི པཀཱརཏོ ཋཔཱིཡནྟཱིཏི ཨཱཀཱརཱ, བྷཱགཱཏི ཨཱཧ – ‘‘ཡེཧི ཨཱཀཱརེཧཱིཏི ཡེཧི ཀོཊྛཱསེཧཱི’’ཏི. ལིངྒཱིཡཏི སལླཀྑཱིཡཏཱིཏི ལིངྒཾ, སཎྛཱནཾ. ནིམཱིཡཏི ནིདྡྷཱརེཏྭཱ པརིཙྪིནྡཱིཡཏཱིཏི ནིམིཏྟཾ, ཨུཔཊྛཱནཾ. ཡོ བྷིཀྑཱུཏིཨཱདི ཨཱལོཀསཉྙཾ ཡོ ཨུགྒཎྷཱཏི, ཏཾ དསྶནཾ. ཨངྒཎེཏི ཝིཝཊངྒཎེ. ཨཱལོཀསཉྙཾ མནསིཀརོཏི རཏྟིཡཾ. ཝཱིརིཡཱདཱིསུཔཱིཏི ཡཐཱ ‘‘ཨིདྷ བྷིཀྑུ ཚནྡཾ ཨུཔྤཱདེཏྭཱ’’ཏི ཚནྡེ ཝིཏྠཱརནཡོ ཝུཏྟོ, ཝཱིརིཡཱདཱིསུཔི ཨེསོ ཨེཝ ཝིཏྠཱརནཡོ ཡོཛེཏབྦོ.

པཱསཱདཀམྤནཝགྒཝཎྞནཱ ནིཊྛིཏཱ.

༣. ཨཡོགུལ༹ཝགྒོ

༢. ཨཡོགུལ༹སུཏྟཝཎྞནཱ

༨༣༤. ཨིམིནཱ ཙཏུམཧཱབྷཱུཏམཡེནཱཏི ཨིམིནཱ སབྦལོཀཔཙྩཀྑེན ཙཏཱུཧི མཧཱབྷཱུཏེཧི ནིབྦཏྟེན ཙཏུམཧཱབྷཱུཏམཡེན. མནོམཡོ པན ནིམྨིཏཀཱཡོ ¶ བྷགཝཏོ རུཙིཝསེན པརེསཾ པཙྩཀྑོ ཧོཏི. ཨོམཱཏཱིཏི ཨཝམཱཏི. ཨཝ-པུབྦོ ཧི མཱ-སདྡོ སཏྟིཨཏྠོཔི ཧོཏཱིཏི ‘‘པཧོཏི སཀྐོཏཱི’’ཏི ཨཏྠོ ཝུཏྟོ. ཨསམྦྷིནྣཔདནྟི ཨསཱདྷཱརཎཔདཾ ཨཉྙཏྠ ཨནཱགཏཏྟཱ. ཀཱཡསྶ ¶ ཙིཏྟེ སམོདཧནཾ ཨཱརོཔནཾ ཏནྣིསྶིཏཏཱཀརཎཉྩ ཨཏྠཏོ ཙིཏྟགཏིཡཱ པཝཏྟནམེཝཱཏི ཨཱཧ ‘‘ཙིཏྟགཏིཡཱ པེསེཏཱི’’ཏི.

ཏཏྠ ཙིཏྟགཏིགམནཾ ནཱམ ཙིཏྟཝསེན ཀཱཡསྶ པརིཎཱམནེན ‘‘ཨཡཾ ཀཱཡོ ཨིམཾ ཙིཏྟཾ ཝིཡ ཧོཏཱུ’’ཏི ཀཱཡསྶ ཙིཏྟེན སམཱནགཏིཀཏཱཋཔནཾ. ཀཐཾ པན ཀཱཡོ དནྡྷཔཝཏྟིཀོ ལཧུཔཝཏྟིནཱ ཙིཏྟེན སམཱནགཏིཀོ ཧོཏཱིཏི? ན སབྦཐཱ སམཱནགཏིཀོ. ཡཐེཝ ཧི ཀཱཡཝསེན ཙིཏྟཔརིཎཱམནེ ཙིཏྟཾ སབྦཐཱ ཀཱཡེན སམཱནགཏིཀཾ ན ཧོཏི. ན ཧི ཀདཱཙི ཏཾ སབྷཱཝསིདྡྷེན ཨཏྟནོ ཁཎེན ཨཝཏྟིཏྭཱ དནྡྷཝུཏྟིཀསྶ རཱུཔདྷམྨསྶ ཝསེན པཝཏྟིཏུཾ སཀྐོཏི, ‘‘ཨིདཾ ཙིཏྟཾ ཨཡཾ ཀཱཡོ ཝིཡ ཧོཏཱུ’’ཏི པན ཨདྷིཊྛཱནེན དནྡྷགཏིཀསྶ ཀཱཡསྶ ཨནུཝཏྟནཏོ ཡཱཝ ཨིཙྪིཏཊྛཱནཔྤཏྟི, ཏཱཝ ཀཱཡགཏིཨནུལོམེནེཝ ཧུཏྭཱ སནྟཱནཝསེན པཝཏྟམཱནཾ ཙིཏྟཾ ཀཱཡགཏིཡཱ པརིཎཱམིཏཾ ནཱམ ཧོཏི. ཨེཝཾ ‘‘ཨཡཾ ཀཱཡོ ཨིདཾ ཙིཏྟཾ ཝིཡ ཧོཏཱུ’’ཏི ཨདྷིཊྛཱནེན པགེཝ སུཁལཧུསཉྙཱཡ སམྤཱདིཏཏྟཱ ཨབྷཱཝིཏིདྡྷིཔཱདཱནཾ ཝིཡ དནྡྷཾ ཨཝཏྟིཏྭཱ ཡཐཱ ལཧུཀཾ ཀཏིཔཡཙིཏྟཝཱརེནེཝ ཨིཙྪིཏཊྛཱནཔྤཏྟི ཧོཏི, ཨེཝཾ པཝཏྟམཱནོ ཀཱཡོ ཙིཏྟགཏིཡཱ པརིཎཱམིཏོ ནཱམ ཧོཏི, ན ཨེཀཙིཏྟཀྑཎེནེཝ ཨིཙྪིཏཊྛཱནཔྤཏྟིཡཱ, ཨེཝཉྩ ཀཏྭཱ བཱཧཱསམིཉྫནཔསཱརཎཱུཔམཱཔི ཨུཔཙཱརེན ཝིནཱ སུཊྛུཏརཾ ཡུཏྟཱ ཧོཏཱིཏི. ཨཉྙཐཱ དྷམྨཏཱཝིལོམཏཱ སིཡཱ, ནཱཔི དྷམྨཱནཾ ལཀྑཎཉྙཐཏྟཾ ཨིདྡྷིབལེན ཀཱཏུཾ སཀྐཱ, བྷཱཝཉྙཐཏྟམེཝ པན ཀཱཏུཾ སཀྐཱཏི.

༣-༡༠. བྷིཀྑུསུཏྟཱདིཝཎྞནཱ

༨༣༥-༨༤༢. ‘‘དྭིནྣཾ ཕལཱན’’ནྟི ཨཱགཏསུཏྟཾ སནྡྷཱཡ ‘‘དྭེ ཕལཱནི ཨཱདིཾ ཀཏྭཱ’’ཏི ཝུཏྟཾ. སེསཾ སུཝིཉྙེཡྻམེཝ.

ཨཡོགུལ༹ཝགྒཝཎྞནཱ ནིཊྛིཏཱ.

ཨིདྡྷིཔཱདསཾཡུཏྟཝཎྞནཱ ནིཊྛིཏཱ.

༨. ཨནུརུདྡྷསཾཡུཏྟཾ

༡. རཧོགཏཝགྒོ

༡-༢. པཋམརཧོགཏསུཏྟཱདིཝཎྞནཱ

༨༩༩-༩༠༠. ཚཏྟིཾསཱཡ ¶ ¶ ཋཱནེསཱུཏི ཨཛ྄ཛྷཏྟཾ ཀཱཡེ སམུདཡདྷམྨཱནུཔསྶཱི, ཝཡོ, སམུདཡཝཡོ, བཧིདྡྷཱ སམུདཡོ, ཝཡོ, སམུདཡཝཡོ, ཨཛ྄ཛྷཏྟབཧིདྡྷཱ སམུདཡོ, ཝཡོ, སམུདཡཝཡདྷམྨཱནུཔསྶཱིཏི ནཝ ཨནུཔསྶནཱ, ཏཐཱ ཝེདནཱཡ ཙིཏྟེ དྷམྨེསཱུཏི ཨེཝཾ ཚཏྟིཾསཱཡ ཋཱནེསུ. དུཏིཡེ དྭཱདསསུ ཋཱནེསཱུཏི ཀཱཡེ ཨཛ྄ཛྷཏྟཾ བཧིདྡྷཱ ཨཛ྄ཛྷཏྟབཧིདྡྷཱ, ཝེདནཱཡ ཙིཏྟེ དྷམྨེསཱུཏི ཨེཝཾ དྭཱདསསུ ཋཱནེསུ.

༣. སུཏནུསུཏྟཝཎྞནཱ

༩༠༡. ཨིམཱཡ པཱལི༹ཡཱཏི ཨིམཱཡ ཧཱིནཏྟིཀཔཱལི༹ཡཱ. ཨིམེ དྷམྨཱ ཧཱིནཱ ལཱམཀཊྛེན. ཨིམེ དྷམྨཱ མཛ྄ཛྷིམཱ ཧཱིནཔཎཱིཏཱནཾ མཛ྄ཛྷེ བྷཝཱཏི. ཨུཏྟམཊྛེན ཨཏྟཔྤཀཊྛེན པདྷཱནབྷཱཝཾ ནཱིཏཱཏི པཎཱིཏཱ.

༤-༧. པཋམཀཎྜཀཱིསུཏྟཱདིཝཎྞནཱ

༩༠༢-༩༠༥. ཀཎྜཀཱ ཨེཏིསྶཱ ཨཏྠཱིཏི ཀཎྜཀཱི, ཀརམནྡགཙྪོ. ཨོསདྷིབྷཱཝཱཔེཀྑཱཡ ཨིཏྠིལིངྒནིདྡེསོ, ཏབྦཧུལཏཱཡ ཏཾ ཝནཾ ‘‘ཀཎྜཀཱིཝན’’ནྟེཝ པཉྙཱཡིཏྠ. སཧསྶལོཀནྟི སཧསྶཙཀྐཝཱལ༹ལོཀཾ. དསཙཀྐཝཱལ༹སཧསྶཾ ཨེཀཱཝཛྫནསྶ ཨཱཔཱཐཾ ཨཱགཙྪཏི ཏཐཱ ཨཱལོཀཝཌྜྷནསྶ ཀཏཏྟཱ.

༩. ཨམྦཔཱལིཝནསུཏྟཝཎྞནཱ

༩༠༧. ཨརཧཏྟབྷཱཝདཱིཔཀནྟི ¶ ཨརཧཏྟསྶ ཨཏྠིབྷཱཝདཱིཔཀཾ. ‘‘ཨརཧཏྟབྷཱཝདཱིཔིཀ’’ནྟི ཝཱ པཱཋོ.

རཧོགཏཝགྒཝཎྞནཱ ནིཊྛིཏཱ.

༢. དུཏིཡཝགྒཝཎྞནཱ

༩༠༩-༩༢༢. དསབལཉཱཎནྟི ¶ དསཝིདྷབལཉཱཎཾ. ཨེཀདེསེནཱཏི པདེསཝསེན. སཱཝཀཱནམྤི ཨཏྟནོ ཨབྷིནཱིཧཱརཱནུརཱུཔཾ ཉཱཎཾ པཝཏྟཏཱིཏི ཏེ ཀཱལཔདེསཝསེན ཙེཝ ཡཐཱཔརིཙཡསཏྟཔདེསཝསེན ཙ ཋཱནཱནཱིཏི ཛཱནནྟི, སམྨཱསམྦུདྡྷཱནཾ པན ཨནནྟཉཱཎཏཱཡ སབྦཏྠེཝ ཨཔྤཊིཧཏམེཝ ཉཱཎནྟི ཨཱཧ – ‘‘སབྦཉྙུབུདྡྷཱནཾ པནཱ’’ཏིཨཱདི. ཨེཏཾ དསབལཉཱཎཾ ཨནནྟཝིསཡཏྟཱ ནིཔྤདེསཾ ཨནཱུནཏཱཡ སབྦཱཀཱརཔརིཔཱུརཾ.

དུཏིཡཝགྒཝཎྞནཱ ནིཊྛིཏཱ.

ཨནུརུདྡྷསཾཡུཏྟཝཎྞནཱ ནིཊྛིཏཱ.

༩. ཛྷཱནསཾཡུཏྟཝཎྞནཱ

༩༢༣. ཛྷཱནསཾཡུཏྟཾ ¶ སུཝིཉྙེཡྻམེཝ, མིསྶཀནྟི ཝདནྟི.

ཛྷཱནསཾཡུཏྟཝཎྞནཱ ནིཊྛིཏཱ.

༡༠. ཨཱནཱཔཱནསཾཡུཏྟཾ

༡. ཨེཀདྷམྨཝགྒོ

༡. ཨེཀདྷམྨསུཏྟཝཎྞནཱ

༩༧༧. ཨེཏྠཱཏི ¶ ¶ ཨེཏསྨིཾ པཋམསུཏྟེ. ཝུཏྟམེཝ, ཏསྨཱ ཏཏྠ ཝུཏྟནཡེནེཝ ཝེདིཏབྦནྟི ཨདྷིཔྤཱཡོ.

༦. ཨརིཊྛསུཏྟཝཎྞནཱ

༩༨༢. ནོ-སདྡོ པུཙྪཱཡཾ, ཏསྨཱ ནཱུཏི ཨིམིནཱ སམཱནཏྠོཏི ཨཱཧ ‘‘བྷཱཝེཐ ནཱུ’’ཏི. ཀཱམཙྪནྡོཏི ཝཏྠུཀཱམེསུ ཨིཙྪཱཏི ཨཱཧ ‘‘པཉྩཀཱམགུཎིཀརཱགོ’’ཏི. དྭཱདསསུ ཨཱཡཏནདྷམྨེསུ སཔརསནྟཏིཔརིཡཱཔནྣེསུ. ཨིམིནཱ ཀཱམཙྪནྡཔྤཧཱནཀིཏྟནེན པཊིགྷསཉྙཱཔཊིཝིནཡཀིཏྟནེན ཙ ཨནཱགཱམིམགྒཾ ཀཐེཏི པཉྩོརམྦྷཱགིཡསཉྙོཛནསམུཙྪེདསྶ བྱཱཀཏཏྟཱ. ཝིཔསྶནཾ དསྶེནྟོཏི ‘‘ཝིཔསྶནཾ ཨནུཡུཉྫཐཱ’’ཏི དསྶེནྟོ.

༨. པདཱིཔོཔམསུཏྟཝཎྞནཱ

༩༨༤. ‘‘ནེཝ ཀཱཡོཔི ཀིལམཏི ན ཙཀྑཱུནཱི’’ཏི ཨཊྛཀཐཱཡཾ པདུདྡྷཱརོ ཀཏོ. ‘‘ཀཱཡོཔི ཀིལམཏི, ཙཀྑཱུནིཔི ཝིཧཉྙནྟཱི’’ཏི ཝཏྭཱ ཡཏྠ ཡཐཱ ཧོཏི, ཏཱནི དསྶེཏུཾ ‘‘དྷཱཏུཀམྨཊྛཱནསྨིཾ ཧཱི’’ཏིཨཱདི ཝུཏྟཾ. ཙཀྑཱུནི ཕནྡནྟི ཀིལམནྟཱིཏིཨཱདི ཨཏིཝེལཾ ཨུཔནིཛ྄ཛྷཱཡནེ ཧོཏཱིཏི ཀཏྭཱ ཝུཏྟཾ. ཨིམསྨིཾ པན ཀམྨཊྛཱནེཏི ཨཱནཱཔཱནཀམྨཊྛཱནེ. ཨེཝམཱཧཱཏི ‘‘བྷིཀྑུ ཙེཔི ཨཱཀངྑེཡྻ, ནེཝ ཀཱཡོ ཀིལམེཡྻཱ’’ཏི ཨེཝམཱཧ.

ལབྦྷཏཱིཏི ཨཊྛཀཐཱདྷིཔྤཱཡེ ཋཏྭཱ ཝུཏྟཾ, པརཏོ ཨཱགཏེན ཐེརཝཱདེན སོ ཨནིཙྪིཏོ. ན ¶ ཧི ཏཱརཀརཱུཔམུཏྟཱཝལི༹ཀཱདིསདིསཾ ནིམིཏྟཱུཔཊྛཱནཱཀཱརམཏྟཾ ཁཎམཏྟཊྛཱཡིནཾ ཀསིཎནིམིཏྟེསུ ཝིཡ ཨུགྒྷཱཊནཾ ཀཱཏུཾ སཀྐོཏི. ཏེནཱཧ ‘‘ན ལབྦྷཏེཝཱ’’ཏི. ཨཱནིསཾསདསྶནཏྠཾ གཧིཏོ, ཨཱནཱཔཱནསྶཏིསམཱདྷིསྨིཾ སིདྡྷེ ཨཡཾ གུཎོ སུཁེནེཝ ཨིཛ྄ཛྷཏཱིཏི. ཡསྨཱ བྷིཀྑཱུཏི ཨིམསྨིཾ ཝཱརེ ནཱགཏནྟི ཡཐཱ པུརིམཝཱརེ ‘‘བྷིཀྑུ ཙེཔི ཨཱཀངྑེཡྻཱ’’ཏི ¶ ཨཱགཏཾ, ཨེཝཾ ཨིདྷ ‘‘བྷཱཝིཏེ ཁོ, བྷིཀྑཝེ, ཨཱནཱཔཱནསྶཏིསམཱདྷིམྷཱི’’ཏི ཨཱགཏཝཱརེ བྷིཀྑུགྒཧཎམཀཏཾ, ཏསྨཱ ‘‘སོ’’ཏི ན ཝུཏྟཾ.

༩. ཝེསཱལཱིསུཏྟཝཎྞནཱ

༩༨༥. པཱཀཱརཔརིཀྑེཔཝཌྜྷནེནཱཏི པཱཀཱརཔརིཀྑེཔེན བྷཱུམིཡཱ ཝཌྜྷནེན. རཱཛགཧསཱཝཏྠིཡོ ཝིཡ ཨིདམྤི ཙ ནགརཾ…པེ… སབྦཱཀཱརཝེཔུལླཏཾ པཏྟཾ. ཨནེཀཔརིཡཱཡེནཱཏི ཨེཏྠ པརིཡཱཡསདྡོ ཀཱརཎཝཙནོཏི ཨཱཧ ‘‘ཨནེཀེཧི ཀཱརཎེཧཱི’’ཏི, ཨཡཾ ཀཱཡོ ཨཝིཉྙཱཎཀོཔི སཝིཉྙཱཎཀོཔི ཨེཝམྤི ཨསུབྷོ ཨེཝམྤི ཨསུབྷོཏི ནཱནཱཝིདྷེཧི ཀཱརཎེཧཱིཏི ཨཏྠོ. ཨསུབྷཱཀཱརསནྡསྶནཔྤཝཏྟནྟི ཀེསཱདིཝསེན ཏཏྠཱཔི ཝཎྞཱདིཏོ ཨསུབྷཱཀཱརསྶ སབྦསོ དསྶནཝསེན པཝཏྟཾ. ཀཱཡཝིཙྪནྡནཱིཡཀཐནྟི ཨཏྟནོ པརསྶ ཙ ཀརཛཀཱཡེ ཝིཙྪནྡནུཔྤཱདནཀཐཾ. མུཏྟཾ ཝཱཏིཨཱདིནཱ བྱཏིརེཀམུཁེན ཀཱཡསྶ ཨམནུཉྙཏཾ དསྶེཏི. ཏཏྠ ཨཱདིཏོ ཏཱིཧི པདེཧི ཨདསྶནཱིཡཏཱཡ ཨསཱརཀཏཱཡ ཙ, མཛ྄ཛྷེ ཙཏཱུཧི དུགྒནྡྷཏཱཡ, ཨནྟེ ཨེཀེན ལེསམཏྟེནཔི མནུཉྙཏཱབྷཱཝམསྶ དསྶེཏི. ཨཐ ཁོཏིཨཱདིནཱ ཨནྭཡཏོ སརཱུཔེནེཝ ཨམནུཉྙཏཱཡ དསྶནཾ. ‘‘ཀེསལོམཱདཱི’’ཏི སངྑེཔཏོ ཝུཏྟམཏྠཾ ཝིབྷཱགེན དསྶེཏུཾ ‘‘ཡེཔཱི’’ཏིཨཱདི ཝུཏྟཾ.

ཝཎྞེནྟོཏི ཝིཏྠཱརེནྟོ. ཨསུབྷཱཡཱཏི ཨསུབྷམཱཏིཀཱཡ. ཕཱཏིཀམྨནྟི བཧུལཱིཀཱརོ. ཀིལེསཙོརེཧི ཨནབྷིབྷཝནཱིཡཏྟཱ ཛྷཱནཾ ‘‘ཙིཏྟམཉྫཱུས’’ནྟི ཝུཏྟཾ. ནིསྶཱཡཱཏི པཱདཀཾ ཀཏྭཱ.

ཨཔརེ པན ‘‘ཏསྨིཾ ཀིར ཨདྡྷམཱསེ ན ཀོཙི བུདྡྷཝེནེཡྻོ ཨཧོསི, ཏསྨཱ བྷགཝཱ ཨེཝམཱཧ – ‘ཨིཙྪཱམཧཾ, བྷིཀྑཝེ’ཏིཨཱདཱི’’ཏི ཝདནྟི. པརེ ཀིརཱཏི ཀིར-སདྡོ ཨརུཙིསཾསཱུཙནཏྠོ. ཏེནཱཧ ‘‘ཨིདཾ པན ཨིཙྪཱམཏྟ’’ནྟི.

ཨནེཀཀཱརཎསམྨིསྶོཏི ཨེཏྠ ཀཱརཎཾ ནཱམ ཀཱཡསྶ ཨསུཙིདུགྒནྡྷཛེགུཙྪཔཊིཀཱུལཏཱཝ. སབྦམཀཾསཱུཏི པུཐུཛྫནཱ ནཱམ སཱཝཛྫེཔི ཏཏྠ ཨནཝཛྫསཉྙིནོ ཧུཏྭཱ ཀརཎཀཱརཱཔནསམནུཉྙཏཱབྷེདཾ ¶ སབྦཾ པཱཔཾ ཨཀཾསུ ¶ . ཀཱམཾ དསཱནུསྶཏིགྒཧཎེནེཝ ཨཱནཱཔཱནསྶཏི གཧིཏཱ, སཱ པན ཏཏྠ སནྣིཔཏིཏབྷིཀྑཱུསུ བཧཱུནཾ སཔྤཱཡཱ སཱཏྠིཀཱ ཙ, ཏསྨཱ པུན གཧིཏཱ. ཏཐཱ ཧི བྷགཝཱ ཏམེཝ ཀམྨཊྛཱནཾ ཨིམསྨིཾ སུཏྟེ ཀཐེསི. ཨཱཧཱརེ པཊིཀཱུལསཉྙཱ ཨསུབྷཀམྨཊྛཱནསདིསཱ, ཙཏྟཱརོ པན ཨཱརུཔྤཱ ཨཱདིཀམྨིཀཱནཾ ཨཡོགྱཱཏི ཏེསཾ ཨིདྷ ཨགྒཧཎཾ དཊྛབྦཾ.

ཝེསཱལིཾ ཨུཔནིསྶཱཡཱཏི ཝེསཱལཱིནགརཾ གོཙརགཱམཾ ཀཏྭཱ. མུཧུཏྟེནེཝཱཏི སཏྠརི སདྡྷམྨེ ཙ གཱརཝེན ཨུཔགཏབྷིཀྑཱུནཾ ཝཙནསམནནྟརམེཝ ཨུཊྛཧིཾསཱུཏི ཀཏྭཱ ཝུཏྟཾ. བུདྡྷཀཱལེ ཀིར བྷིཀྑཱུ བྷགཝཏོ སནྡེསཾ སིརསཱ སམྤཊིཙྪིཏུཾ ཨོཧིཏསོཏཱ ཝིཧརནྟི.

ཨཱནཱཔཱནཔརིགྒཱཧིཀཱཡཱཏི ཨསྶཱསཔསྶཱསེ པརིགྒཎྷནཝསེན པཝཏྟཱཡ སཏིཡཱ. སམྤཡུཏྟོ སམཱདྷཱིཏི ཏཱཡ སམྤཡུཏྟཨཉྙམཉྙཔཙྩཡབྷཱུཏཱཡ ཨུཔྤནྣོ སམཱདྷི. ཨཱནཱཔཱནསྶཏིཡཾ ཝཱ སམཱདྷཱིཏི ཨིམིནཱ ཨུཔནིསྶཡཔཙྩཡསབྷཱཝམྤི དསྶེཏི, ཨུབྷཡཏྠཱཔི སཧཛཱཏཱདཱིནཾ སཏྟནྣམྤི པཙྩཡཱནཾ ཝསེན པཙྩཡབྷཱཝཾ དསྶེཏི. ‘‘ཡཐཱཔཊིཔནྣཱ མེ སཱཝཀཱ ཙཏྟཱརོ སཏིཔཊྛཱནེ བྷཱཝེནྟཱི’’ཏིཨཱདཱིསུ ཨུཔྤཱདནཝཌྜྷནཊྛེན བྷཱཝནཱཏི ཝུཙྩཏཱིཏི ཏདུབྷཡཝསེན ཨཏྠཾ དསྶེནྟོ ‘‘བྷཱཝིཏོཏི ཨུཔྤཱདིཏོ ཝཌྜྷིཏོ ཝཱ’’ཏི ཨཱཧ. ཏཏྠ བྷཱཝཾ ཝིཛྫམཱནཏཾ ཨིཏོ གཏོཏི བྷཱཝིཏོ, ཨུཔྤཱདིཏོ པཊིལདྡྷམཏྟོཏི ཨཏྠོ. ཨུཔྤནྣོ པན ལདྡྷཱསེཝནོ བྷཱཝིཏོ, པགུཎབྷཱཝཾ ཨཱཔཱདིཏོ ཝཌྜྷིཏོཏི ཨཏྠོ. བཧུལཱིཀཏོཏི བཧུལཾ པཝཏྟིཏོ. ཏེན ཨཱཝཛྫནཱདིཝསཱིབྷཱཝཔྤཏྟིམཱཧ. ཡོ ཧི ཝསཱིབྷཱཝམཱཔཱདིཏོ, སོ ཨིཙྪིཏིཙྪིཏཀྑཎེ སམཱཔཛྫིཏབྦཏོ པུནཔྤུནཾ པཝཏྟིསྶཏི. ཏེན ཝུཏྟཾ ‘‘པུནཔྤུནཾ ཀཏོ’’ཏི. ཡཐཱ ‘‘ཨིདྷེཝ, བྷིཀྑཝེ, སམཎོ (མ. ནི. ༡.༡༣༩; ཨ. ནི. ༤.༢༤༡), ཝིཝིཙྩེཝ ཀཱམེཧཱི’’ཏི (དཱི. ནི. ༡.༢༢༦; མ. ནི. ༡.༢༧༡; སཾ. ནི. ༢.༡༥༢; ཨ. ནི. ༤.༡༢༣) ཙ ཨེཝམཱདཱིསུ པཋམཔདེ ཝུཏྟོ ཨེཝ-སདྡོ དུཏིཡཱདཱིསུཔི ཝུཏྟོཡེཝ ཧོཏི, ཨེཝམིདྷཱཔཱིཏི ཨཱཧ ‘‘ཨུབྷཡཏྠ ཨེཝསདྡེན ནིཡམོ ཝེདིཏབྦོ’’ཏི. ཨུབྷཡཏྠ ནིཡམེན ལདྡྷགུཎཾ དསྶེཏུཾ ‘‘ཨཡཾ ཧཱི’’ཏིཨཱདི ཝུཏྟཾ.

ཨསུབྷཀམྨཊྛཱནནྟི ཨསུབྷཱརམྨཎཾ ཛྷཱནམཱཧ. ཏཉྷི ཨསུབྷེསུ ཡོགཀམྨབྷཱཝཏོ ཡོགིནོ སུཁཝིསེསཱནཾ ཀཱརཎབྷཱཝཏོ ཙ ‘‘ཨསུབྷཀམྨཊྛཱན’’ནྟི ཝུཙྩཏི. ཀེཝལནྟི ཨིམིནཱ ཨཱརམྨཎཾ ནིཝཏྟེཏི. པཊིཝེདྷཝསེནཱཏི ¶ ཛྷཱནཔཊིཝེདྷཝསེན. ཛྷཱནཉྷི བྷཱཝནཱཝིསེསེན ཨིཛ྄ཛྷནྟཾ ཨཏྟནོ ཝིསཡཾ པཊིཝིཛ྄ཛྷནྟམེཝ པཝཏྟཏི ཡཐཱསབྷཱཝཏོ པཊིཝིཛ྄ཛྷིཡཏི ཙཱཏི པཊིཝེདྷོཏི ཝུཙྩཏི. ཨོལཱ༹རིཀཱརམྨཎཏྟཱཏི ¶ བཱིབྷཙྪཱརམྨཎཏྟཱ. པཊིཀཱུལཱརམྨཎཏྟཱཏི ཛིགུཙྪིཏབྦཱརམྨཎཏྟཱ. པརིཡཱཡེནཱཏི ཀཱརཎེན, ལེསནྟརེན ཝཱ. ཨཱརམྨཎསནྟཏཱཡཱཏི ཨནུཀྐམེན ཝིཙིཏབྦཏཾ པཏྟཱརམྨཎསྶ པརམསུཁུམཏཾ སནྡྷཱཡཱཧ. སནྟེཧི སནྣིསིནྣེ ཨཱརམྨཎེ པཝཏྟམཱནོ དྷམྨོ སཡམྤི སནྣིསིནྣོཝ ཧོཏི. ཏེནཱཧ ‘‘སནྟོ ཝཱུཔསནྟོ ནིབྦུཏོ’’ཏི, ནིབྦུཏསབྦཔརིལཱ༹ཧོཏི ཨཏྠོ. ཨཱརམྨཎསནྟཏཱཡ ཏདཱརམྨཎཱནཾ དྷམྨཱནཾ སནྟཏཱ ལོཀུཏྟརདྷམྨཱརམྨཎཱཧི པཙྩཝེཀྑཎཱཧི ཝེདིཏབྦཱ.

ནཱསྶ སནྟཔཎཱིཏབྷཱཝཱཝཧཾ ཀིཉྩི སེཙནནྟི ཨསེཙནཀོ. ཨསེཙནཀཏྟཱ ཨནཱསིཏྟཀོ, ཨནཱསིཏྟཀཏྟཱ ཨེཝ ཨབྦོཀིཎྞོ, ཨསམྨིསྶོ པརིཀམྨཱདིནཱ. ཏཏོ ཨེཝ པཱཊིཡེཀྐོ ཝིསུཾཡེཝེཀོ. ཨཱཝེཎིཀོ ཨསཱདྷཱརཎོ. སབྦམེཏཾ སརསཏོ ཨེཝ སནྟབྷཱཝཾ དསྶེཏུཾ ཝུཏྟཾ, པརིཀམྨཾ ཝཱ སནྟབྷཱཝནིམིཏྟཾ. པརིཀམྨནྟི ཙ ཀསིཎཀརཎཱདིནིམིཏྟུཔྤཱདཔརིཡོསཱནཾ, ཏཱདིསཾ ཨེཏྠ ནཏྠཱིཏི ཨདྷིཔྤཱཡོ. ཏདཱ ཧི ཀམྨཊྛཱནཾ ནིརསྶཱདཏྟཱ ཨསནྟཾ ཨཔྤཎཱིཏཾ སིཡཱ. ཨུཔཙཱརེ ཝཱ ནཏྠི ཨེཏྠ སནྟཏཱཏི ཡོཛནཱ. ཡཐཱ ཨུཔཙཱརཀྑཎེ ནཱིཝརཎཱདིཝིགམེན ཨངྒཔཱཏུབྷཱཝེན ཙ པརེསཾ སནྟཏཱ ཧོཏི, ན ཨེཝམིམསྶ. ཨཡཾ པན ཨཱདིསམནྣཱ…པེ… པཎཱིཏོ ཙཱཏི ཡོཛནཱ. ཀེཙཱིཏི ཨུཏྟརཝིཧཱརཝཱསིནོ. ཨནཱསིཏྟཀོཏི ཨུཔསེཙནེན ཨནཱསིཏྟཀོ. ཏེནཱཧ – ‘‘ཨོཛཝནྟོ’’ཏི ཨོཛཝནྟསདིསོཏི ཨཏྠོ. མདྷུརོཏི ཨིཊྛོ. ཙེཏསིཀསུཁཔཊིལཱབྷསཾཝཏྟནཾ ཏིཀཙཏུཀྐཛ྄ཛྷཱནཝསེན, ཨུཔེཀྑཱཡ ཝཱ སནྟབྷཱཝེན སུཁགཏིཀཏྟཱ སབྦེསམྤི ཛྷཱནཱནཾ ཝསེན ཝེདིཏབྦཾ. ཛྷཱནསམུཊྛཱནཔཎཱིཏརཱུཔཕུཊྛསརཱིརཏཱཝསེན པན ཀཱཡིཀསུཁཔཊིལཱབྷསཾཝཏྟནཾ དཊྛབྦཾ, ཏཉྩ ཁོ ཛྷཱནཏོ ཝུཊྛིཏཀཱལེ. ཨིམསྨིཾ པཀྑེ ‘‘ཨཔྤིཏཔྤིཏཀྑཎེ’’ཏི ཨིདཾ ཧེཏུམྷི བྷུམྨཝཙནཾ དཊྛབྦཾ.

ཨཝིཀྑམྦྷིཏེཏི ཛྷཱནེན སཀསནྟཱནཏོ ཨནཱིཧཏེ ཨཔྤཧཱིནེ. ཨཀོསལླསམྦྷཱུཏེཏི ཨཀོསལླཾ ཝུཙྩཏི ཨཝིཛྫཱ, ཏཏོ སམྦྷཱུཏེ. ཨཝིཛྫཱཔུབྦངྒམཱ ཧི སབྦེ པཱཔདྷམྨཱ. ཁཎེནེཝཱཏི ཨཏྟནོ པཝཏྟིཀྑཎེནེཝ. ཨནྟརདྷཱཔེཏཱིཏི ཨེཏྠ ཨནྟརདྷཱཔནཾ ཝིནཱསནཾ, ཏཾ པན ཛྷཱནཀཏྟུཀཾ ¶ ཨིདྷཱདྷིཔྤེཏནྟི པརིཡུཊྛཱནཔྤཧཱནཾ ཧོཏཱིཏི ཨཱཧ – ‘‘ཝིཀྑམྦྷེཏཱི’’ཏི. ཝཱུཔསམེཏཱིཏི ཝིསེསེན ཨུཔསམེཏི. ཝིསེསེན ཨུཔསམནཾ པན སམྨདེཝ ཨུཔསམནཾ ཧོཏཱིཏི ཨཱཧ ‘‘སུཊྛུ ཨུཔསམེཏཱི’’ཏི. སཱསནིཀསྶ ཛྷཱནབྷཱཝནཱ ཡེབྷུཡྻེན ནིབྦེདྷབྷཱགིཡཱ ཧོཏཱིཏི ཨཱཧ ‘‘ནིབྦེདྷབྷཱགིཡཏྟཱ’’ཏི. ཨརིཡམགྒསྶ པཱདཀབྷཱུཏོ ཨཡཾ སམཱདྷི ཨནུཀྐམེན ཝཌྜྷིཏྭཱ ཨརིཡམགྒབྷཱཝཾ ཨུཔགཏོ ཝིཡ ཧོཏཱིཏི ཨཱཧ ‘‘ཨནུཔུབྦེན ཨརིཡམགྒཝུཌྜྷིཔྤཏྟོ’’ཏི. ཨཡཾ པནཏྠོ ཝིརཱགནིརོདྷཔཊིནིསྶགྒཱནུཔསྶནཱནཾ ཝསེན སམྨདེཝ ཡུཛྫཏི. སེསཾ སུཝིཉྙེཡྻམེཝ.

༡༠. ཀིམིལསུཏྟཝཎྞནཱ

༩༨༦. ཐེརོཏི ¶ ཨཱནནྡཏྠེརོ. ཨཡཾ དེསནཱཏི ‘‘ཀཐཾ ཝིབྷཱཝིཏོ ནུ ཁོ ཀིམིལཱ’’ཏིཨཱདིནཱ པཝཏྟཱ དེསནཱ. ཀཱཡཉྙཏརནྟི རཱུཔཀཱཡེ ཨཉྙཏརཀོཊྛཱསེ. ཨེཝནྟི ཡཐཱ ཨཱནཱཔཱནཾ ཨནུསྶརནྟོ བྷིཀྑུ ཀཱཡེ ཀཱཡཱནུཔསྶཱི ཛཱཏོ, ཨེཝཾ སབྦཏྠ ཝཱརེསུ ཝེདནཱནུཔསྶཱིཏིཨཱདི ཨཏྠོ ཝེདིཏབྦོ.

དེསནཱསཱིསནྟི དེསནཱཔདེསཾ. མནསིཀཱརཔདེསེན ཝེདནཱ ཝུཏྟཱཏི ཏཾ སབྦཾ སརཱུཔཏོ ཨཉྙཱཔདེསཏོ ཨཔདིསཏི. ཡཐེཝ ཧཱིཏིཨཱདིནཱ ཏཏྠ ནིདསྶནཾ དསྶེཏི. ཙིཏྟསངྑཱརཔདདྭཡེཏི ‘‘ཙིཏྟསངྑཱརཔཊིསཾཝེདཱི པསྶམྦྷཡཾ ཙིཏྟསངྑཱར’’ནྟི ཨེཏསྨིཾ པདདྭཡེ.

ཨེཝཾ སནྟེཔཱིཏི པཱིཏིམནསིཀཱརཙིཏྟསངྑཱརཔདེསེན ཡདི ཝེདནཱ ཝུཏྟཱ, ཨེཝཾ སནྟེཔི. ཨེསཱ ཡཐཱཝུཏྟཱ ཝེདནཱ ཨཱརམྨཎཾ ན ཧོཏི. ཝེདནཱརམྨཎཱ ཙ ཨནུཔསྶནཱ, ཏསྨཱ ཝེདནཱནུཔསྶནཱ ན ཡུཛྫཏི. ཡདི ཨེཝཾ མཧཱསཏིཔཊྛཱནཱདཱིསུ ‘‘ཝེདནཱ ཝེདིཡཏཱི’’ཏི ཝུཏྟཾ, ཏཾ ཀཐནྟི ཨཱཧ – ‘‘མཧཱསཏིཔཊྛཱནཱདཱིསུཔཱི’’ཏིཨཱདི. ཏཏྠ སུཁཱདཱིནཾ ཝཏྠུནྟི སུཁཱདཱིནཾ ཨུཔྤཏྟིཡཱ ཝཏྠུབྷཱུཏཾ རཱུཔསདྡཱདིཾ ཨཱརམྨཎཾ ཀཏྭཱ ཝེདནཱ ཝེདིཡཏི, ན པུགྒལོ པུགྒལསྶེཝ ཨབྷཱཝཏོ. ཝེདནཱཔྤཝཏྟིཾ ཨུཔཱདཱཡ ནིསྶཱཡ ཡཐཱ ‘‘པུགྒལོ ཝེདནཾ ཝེདིཡཏཱི’’ཏི ཝོཧཱརམཏྟཾ ཧོཏི. ཨེཝཾ ཨིདྷཱཔི ཝེདནཱཡ ཨསྶཱསཔསྶཱསེ ཨཱརབྦྷ པཝཏྟི, ཏཐཱ པཝཏྟམནསིཀཱརསཱིསེན ‘‘ཝེདནཱསུ ཝེདནཱནུཔསྶཱི བྷིཀྑུ ཏསྨིཾ སམཡེ ཝིཧརཏཱི’’ཏི ཝུཏྟོ. ཏཾ སནྡྷཱཡཱཏི ཏཾ ཝེདནཱཡ ཨཱརམྨཎབྷཱཝཾ སནྡྷཱཡ ¶ . ཨཱདཱིནཾ པདཱནཾ. ཨེཏསྶ ‘‘ཝེདནཱནུཔསྶནཱ ན ཡུཛྫཏཱི’’ཏི ཝུཏྟཨནུཡོགསྶ.

སཔྤཱིཏིཀེ དྭེ ཛྷཱནེ སམཱཔཛྫཏཱིཏི པཱིཏིསཧགཏཱནི པཋམདུཏིཡཛ྄ཛྷཱནཱནི པཊིཔཱཊིཡཱ སམཱཔཛྫཏི. ཏསྶཱཏི ཏེན. པཊིསཾཝིདིཏསདྡཱཔེཀྑཱཡ ཧི ཀཏྟུཨཏྠེ ཨེཏཾ སཱམིཝཙནཾ. སམཱཔཏྟིཀྑཎེཏི སམཱཔཛྫནཀྑཎེ. ཛྷཱནཔཊིལཱབྷེནཱཏི ཛྷཱནེན སམངྒཱིབྷཱཝེན. ཨཱརམྨཎཏོཏི ཨཱརམྨཎམུཁེན ཏདཱརམྨཎཛྷཱནཔརིཡཱཔནྣཱ པཱིཏི པཊིསཾཝིདིཏཱ ཧོཏི, ཨཱརམྨཎསྶ པཊིསཾཝིདིཏཏྟཱཏི ཝུཏྟཾ ཧོཏི. ཡཐཱ ནཱམ སཔྤཔརིཡེསནཾ ཙརནྟེན ཏསྶ ཨཱསཡེ པཊིསཾཝིདིཏེ སོཔི པཊིསཾཝིདིཏོ ཧོཏི མནྟཱགདབལེན ཏསྶ གཧཎསྶ སུཀརཏྟཱ, ཨེཝཾ པཱིཏིཡཱ ཨཱསཡབྷཱུཏེ ཨཱརམྨཎེ པཊིསཾཝིདིཏེ སཱ པཱིཏི པཊིསཾཝིདིཏཱཝ ཧོཏི སལཀྑཎཏོ སཱམཉྙལཀྑཎཏོ ཙ ཏསྶཱ གཧཎསྶ སུཀརཏྟཱ. ཝིཔསྶནཀྑཎེཏི ཝིཔསྶནཱཔཉྙཱཡ ཏིཀྑཝིསདབྷཱཝཔྤཏྟཱཡ ¶ ཝིསཡཏོ དསྶནཀྑཎེ. ལཀྑཎཔྤཊིཝེདྷེནཱཏི པཱིཏིཡཱ སལཀྑཎསྶ སཱམཉྙལཀྑཎསྶ ཙ པཊིཝིཛ྄ཛྷནེན. ཡཉྷི པཱིཏིཡཱ ཝིསེསཏོ སཱམཉྙཏོ ཙ ལཀྑཎཾ, ཏསྨིཾ ཝིདིཏེ སཱ ཡཱཐཱཝཏོ ཝིདིཏཱ ཨེཝ ཧོཏི. ཏེནཱཧ ‘‘ཨསམྨོཧཏོ པཱིཏི པཊིསཾཝིདིཏཱ ཧོཏཱི’’ཏི.

ཨིདཱནི ཏམཏྠཾ པཱལི༹ཡཱ ཨེཝ ཝིབྷཱཝེཏུཾ ‘‘ཝུཏྟཉྷེཏ’’ནྟིཨཱདིམཱཧ. ཏཏྠ དཱིགྷཾ ཨསྶཱསཝསེནཱཏི དཱིགྷསྶ ཨསྶཱསསྶ ཨཱརམྨཎབྷཱུཏསྶ ཝསེན. པཛཱནཏོ སཱ པཱིཏི པཊིསཾཝིདིཏཱ ཧོཏཱིཏི སམྦནྡྷོ. ཙིཏྟསྶ ཨེཀགྒཏཾ ཨཝིཀྑེཔཾ པཛཱནཏོཏི ཛྷཱནཔརིཡཱཔནྣཾ ‘‘ཨཝིཀྑེཔོ’’ཏི ལདྡྷནཱམཾ ཙིཏྟསྶེཀགྒཏཾ ཏཾསམྤཡུཏྟཱཡ པཉྙཱཡ པཛཱནཏོ. ཡཐཱ ཧི ཨཱརམྨཎམུཁེན པཱིཏི པཊིསཾཝིདིཏཱ ཧོཏི, ཨེཝཾ ཏཾསམྤཡུཏྟདྷམྨཱཔི ཨཱརམྨཎམུཁེན པཊིསཾཝིདིཏཱ ཨེཝ ཧོནྟཱིཏི. སཏི ཨུཔཊྛིཏཱ ཧོཏཱིཏི དཱིགྷཾ ཨསྶཱསཝསེན ཛྷཱནསམྤཡུཏྟཱ སཏི ཏསྨིཾ ཨཱརམྨཎེ ཨུཔཊྛིཏཱ ཨཱརམྨཎམུཁེན ཛྷཱནེཔི ཨུཔཊྛིཏཱ ནཱམ ཧོཏི. ཏཱཡ སཏིཡཱཏི ཨེཝཾ ཨུཔཊྛིཏཱཡ ཏཱཡ སཏིཡཱ ཡཐཱཝུཏྟེན ཏེན ཉཱཎེན སུཔྤཊིཝིདིཏཏྟཱ ཨཱརམྨཎསྶ ཏསྶ ཝསེན ཏདཱརམྨཎཱ སཱ པཱིཏི པཊིསཾཝིདིཏཱ ཧོཏི. དཱིགྷཾ པསྶཱསཝསེནཱཏིཨཱདཱིསུཔི ཨིམིནཱཝ ནཡེན ཨཏྠོ ཝེདིཏབྦོ. ཏེན ཝུཏྟཾ ‘‘ཨེཏེནེཝ ནཡེན ཨཝསེསཔདཱནིཔི ཨཏྠཏོ ཝེདིཏབྦཱནཱི’’ཏི.

ཡཐེཝཱཏིཨཱདཱིསུ ¶ ཨཡཾ སངྑེཔཏྠོ – ཛྷཱནཔཊིལཱབྷེན ཡཐཱ ཨཱརམྨཎཏོ པཱིཏིཨཱདཡོ པཊིསཾཝིདིཏཱ ཧོནྟི ཏེན ཝིནཱ ཏེསཾ ཨཔྤཝཏྟནཏོ. ཨེཝཾ ཛྷཱནསམྤཡུཏྟེན ཏཾཔརིཡཱཔནྣེན ཝེདནཱསངྑཱཏམནསིཀཱརཔཊིལཱབྷེན ཨཱརམྨཎཏོ ཝེདནཱ པཊིསཾཝིདིཏཱ ཧོཏི ཨརུཎུགྒམེན ཝིཡ སཱུརིཡསྶ ཏེན ཝིནཱ ཝེདནཱཡ ཨཔྤཝཏྟནཏོ. ཏསྨཱ ཝུཏྟནཡེན ཨཏིསཡཔྤཝཏྟི ཝེདནཱ སུཔྤཊིཝིདིཏཱ, ཏསྨཱ སུཝུཏྟམེཏནྟི པུབྦེ ཝུཏྟཙོདནཾ ནིརཱཀརོཏི.

ཨཱརམྨཎེཏི ཨསྶཱསཔསྶཱསནིམིཏྟཾ ཝདཏི. ཙིཏྟཱནུཔསྶཱིཡེཝ ནཱམེས ཧོཏི ཨསམྨོཧཏོ ཙིཏྟསྶ པཊིསཾཝིདིཏཏྟཱ. ཏེནཱཧ ‘‘ཏསྨཱ’’ཏིཨཱདི. ཙིཏྟཔཊིསཾཝིདིཏཝསེནཱཏི ཨཱདི-སདྡེན ཨིཏརཱ ཏིསྶོཔི ཙིཏྟཱནུཔསྶནཱ སངྒཎྷཱཏི.

སོཏི དྷམྨཱནུཔསྶནཾ ཨནུཡུཏྟོ བྷིཀྑུ. ཡཾ ཏཾ པཧཱནཾ པཧཱཡཀཉཱཎཾ. པཉྙཱཡཱཏི ཨཔརཱཡ ཝིཔསྶནཱཔཉྙཱཡ ཨནིཙྩཝིརཱགཱདིཏོ དིསྭཱ དུཝིདྷཱཡཔི ཨཛ྄ཛྷུཔེཀྑིཏཱ ཧོཏི. ཨིདཉྷི ཙཏུཀྐནྟི ཨནིཙྩཱནུཔསྶནཱདིཝསེན ཝུཏྟཾ ཙཏུཀྐཾ. ཏསྶཱཔི དྷམྨཱནུཔསྶནཱཡ. པཛཧཏཱིཏི ¶ པཧཱནནྟི ཨཱཧ ‘‘ནིཙྩསཉྙཾ…པེ… པཧཱནཀརཉཱཎཾ ཨདྷིཔྤེཏ’’ནྟི. ཝིཔསྶནཱཔརམྤརནྟི པཊིཔཱཊིཡཱ ཝིཔསྶནམཱཧ. པཐཔཊིཔནྣཾ ཨཛ྄ཛྷུཔེཀྑཏཱིཏི མཛ྄ཛྷིམཱཡ པཊིཔཏྟིཡཱ སམྨདེཝ ཝཱིཐིཔཊིཔནྣཾ བྷཱཝནཱཙིཏྟཾ པགྒཧནིགྒཧཱནཾ ཨཀརཎེན ཨཛ྄ཛྷུཔེཀྑཏི. ཨེཀཏོ ཨུཔཊྛཱནནྟི ཡསྨཱ མཛ྄ཛྷིམསམཐཝཱིཐིནཱཏིཝཏྟིཡཱ ཏཏྠ ཙ པཀྑནྡནེན ཨིནྡྲིཡཱནཾ ཨེཀརསབྷཱཝེན, ཏཏྲམཛ྄ཛྷཏྟཏཱཡ བྷཱཝཏོ ཨཝིསེསཾ ཨེཀགྒབྷཱཝཱུཔགམནེན ཨེཀནྟཏོ ཨུཔཊྛཱཏི, ཏསྨཱ ན ཏཏྠ ཀིཉྩི ཀཱཏབྦནྟི ཨཛ྄ཛྷུཔེཀྑཏི. ཏཏྠཱཏི ཨེཝཾ ཨཛ྄ཛྷུཔེཀྑནེ. སཧཛཱཏཱནམྤི ཨཛ྄ཛྷུཔེཀྑནཱ ཧོཏི ཏེསཾ པཝཏྟནཱཀཱརསྶ ཨཛ྄ཛྷུཔེཀྑནཏོ. ‘‘པཉྙཱཡ དིསྭཱ’’ཏི ཝུཏྟཏྟཱ ཨཱརམྨཎཨཛ྄ཛྷུཔེཀྑནཱ ཨདྷིཔྤེཏཱ. ན ཀེཝལཾ ནཱིཝརཎཱདིདྷམྨེ ཨཛ྄ཛྷུཔེཀྑིཏཱ, ཨཐ ཁོ ཨབྷིཛ྄ཛྷཱ …པེ… པཉྙཱཡ དིསྭཱ ཨཛ྄ཛྷུཔེཀྑིཏཱ ཧོཏཱིཏི ཡོཛནཱ.

པཾསུཔུཉྫཊྛཱནིཡསྶ ཀིལེསསྶ ཨུཔྤཏྟིཊྛཱནདསྶནཏྠཾ ‘‘ཙཏུམཧཱཔཐོ ཝིཡ ཚ ཨཱཡཏནཱནི’’ཨིཙྩེཝ ཝུཏྟཾ. ཀཱཡཱདཡོ ཙཏྟཱརོ ཨཱརམྨཎསཏིཔཊྛཱནཱ. ཙཏཱུསུ ཨཱརམྨཎེསཱུཏི ཀཱཡཱདཱིསུ ཙཏཱུསུ ཨཱརམྨཎེསུ པཝཏྟཱ ¶ ཙཏྟཱརོ སཏིཔཊྛཱནཱ པཾསུཔུཉྫཊྛཱནིཡསྶ ཀིལེསསྶ ཨུཔཧནནཏོ.

ཨེཀདྷམྨཝགྒཝཎྞནཱ ནིཊྛིཏཱ.

༢. དུཏིཡཝགྒོ

༡-༢. ཨིཙྪཱནངྒལསུཏྟཱདིཝཎྞནཱ

༩༨༧-༩༨༨. ཀསྨཱཏིཨཱདི ཝིཧཱརསམཱཔཏྟིཨཱཙིཀྑཎེ ཀཱརཎཾ ཝིབྷཱཝེཏུཾ ཨཱརདྡྷཾ.

ཨེཝ-ཝཱཀཱརོཏི ཨེཝ-ཀཱརོ ཝཱ-ཀཱརོ ཙ. ཨེཀནྟསནྟཏྟཱ ཨེཀནྟེན སནྟམནསིཀཱརབྷཱཝཏོ. སེཀྑཝཙནེནེཝ ཏེསཾ སིཀྑིཏབྦསྶ ཨཏྠིབྷཱཝེ སིདྡྷེཔི སིཀྑིཏབྦརཧིཏེསུ ཏེསུཔི སེཀྑཔརིཡཱཡསྶ ཝུཙྩམཱནཏྟཱ སིཀྑིཏབྦསདྡེན སེཀྑེ ཝིསེསེཏྭཱ ཝུཏྟཱ. ཨཱསཝཀྑཡཏྠཾ སིཀྑིཏབྦསྶ ཨབྷཱཝེཔི དིཊྛདྷམྨསུཁཝིཧཱརཏྠཾ ཛྷཱནཱདིསིཀྑནེན ཝིནཱ སིཀྑིཏབྦཱབྷཱཝཱ ‘‘ཨསེཀྑཱ ནཱམཱ’’ཏི ཝུཏྟཱ. བུདྡྷཱནཾ པན སབྦསོ སམྨདེཝ པརིནིཊྛིཏསིཀྑཏྟཱ ‘‘སིཀྑཱམཱི’’ཏི ན ཝུཏྟཾ. ཨཱནཱཔཱནཛ྄ཛྷཱནཕལསམཱཔཏྟི ཏཐཱགཏཝིཧཱརོ.

༣-༡༠. པཋམཨཱནནྡསུཏྟཱདིཝཎྞནཱ

༩༨༩-༩༩༦. ཨནིཙྩཱདིཝསེནཱཏི ¶ ཨནིཙྩདུཀྑཱནཏྟཝསེན. པཝིཙིནཏི པཀཱརེཧི ཝིཙིནཏི. ནིཀྐིལེསཱཏི ཨཔགཏཀིལེསཱ ཝིཀྑམྦྷིཏཀིལེསཱ. པཱིཏིསམྦོཛ྄ཛྷངྒོ, པསྶདྡྷིསམྦོཛ྄ཛྷངྒོཏི པཱཋོ.

ཡཱཡ ཨནོསཀྐནཾ ཨནཏིཝཏྟནཉྩ ཧོཏི, ཨཡཾ ཏཏྲམཛ྄ཛྷཏྟུཔེཀྑཱ མཛ྄ཛྷཏྟཱཀཱརོཏི ཝུཏྟཱ. ཨེཀཙིཏྟཀྑཎིཀཱཏི ཨེཀཙིཏྟུཔྤཱདཔརིཡཱཔནྣཏྟཱ.

ཙཏྟུནྣཾ ཙཏུཀྐཱནཾ ཝསེན སོལ༹སཀྑཏྟུཀཱ. ཨཱནཱཔཱནསནྣིསྶཡེན པཝཏྟཏྟཱ ཨཱརམྨཎཝསེན པཝཏྟཱ ཨཱནཱཔཱནཱརམྨཎཱཔི ཨཔརབྷཱགེ སཏི ཨཱནཱཔཱནསྶཏཱིཏི པརིཡཱཡེན ཝཏྟབྦཏཾ ཨརཧཏཱིཏི ‘‘ཨཱནཱཔཱནསྶཏི མིསྶཀཱ ཀཐིཏཱ’’ཏི ཝུཏྟཾ. ཨཱནཱཔཱནམཱུལཀཱཏི ཨཱནཱཔཱནསནྣིསྶཡེན ¶ པཝཏྟཱ སཏིཔཊྛཱནཱ. ཏེསཾ མཱུལབྷཱུཏཱཏི ཏེསཾ སཏིཔཊྛཱནཱནཾ མཱུལཀཱརཎབྷཱུཏཱ. བོཛ྄ཛྷངྒམཱུལཀཱཏི བོཛ྄ཛྷངྒཔཙྩཡབྷཱུཏཱ. ཏེཔི བོཛ྄ཛྷངྒཱཏི ཨེཏེ ཝཱིསཏི སཏིཔཊྛཱནཧེཏུཀཱ བོཛ྄ཛྷངྒཱ. ཝིཛྫཱཝིམུཏྟིཔཱུརཀཱཏི ཏཏིཡཝིཛྫཱཡ ཏསྶ ཕལསྶ ཙ པརིཔཱུརཎཝསེན པཝཏྟཱ བོཛ྄ཛྷངྒཱ. ཕལསམྤཡུཏྟཱཏི ཙཏུཏྠཕལསམྤཡུཏྟཱ, ཙཏུབྦིདྷཕལསམྤཡུཏྟཱ ཝཱ.

དུཏིཡཝགྒཝཎྞནཱ ནིཊྛིཏཱ.

ཨཱནཱཔཱནསཾཡུཏྟཝཎྞནཱ ནིཊྛིཏཱ.

༡༡. སོཏཱཔཏྟིསཾཡུཏྟཾ

༡. ཝེལུ༹དྭཱརཝགྒོ

༡. ཙཀྐཝཏྟིརཱཛསུཏྟཝཎྞནཱ

༩༩༧. ཨནུགྒཧགརཧཎེསུ ¶ ¶ ནིཔཱཏོཏི ཨནུགྒཎྷནགརཧཏྠཛོཏཀོ ནིཔཱཏོ. ཀིམེཏྠ ཨནུགྒཎྷཱཏི, ཀིཾ ཝཱ གརཧཏཱིཏི ཨཱཧ ‘‘ཙཏུནྣ’’ནྟིཨཱདི. ཏཏྠ ཨནུགྒཎྷནྟོ ཨནུཙྪཝིཀཾ ཀཏྭཱ གཎྷནྟོ. གརཧནྟོ ནིནྡནྟོ. ཨིསྶརསཱིལོ ཨིསྶརོ, ཏསྶ བྷཱཝོ ཨིསྶརིཡཾ, པབྷུཏཱ. ཨདྷཱིནཾ པཏི ཨདྷིཔཏི, ཏསྶ བྷཱཝོ ཨཱདྷིཔཙྩཾ, སཱམིབྷཱཝོཏི ཨཱཧ – ‘‘ཨིསྶརིཡཱདྷིཔཙྩ’’ནྟིཨཱདི. ཨནནྟཀཱནཱིཏི ཨནྟརཧིཏཱནི.

ཨཝེཙྩཔྤསཱདེནཱཏི ཝཏྠུཏྟཡསྶ གུཎེ ཡཱཐཱཝཏོ ཨཝེཙྩ པཝིསིཏྭཱ པསཱདོ. སོ པན ཀེནཙི ཙལནརཧིཏོཏི ཨཱཧ ‘‘ཨཙལཔྤསཱདེནཱ’’ཏི. མགྒེནཱཏི ཨརིཡམགྒེན. ཨཱགཏཔྤསཱདོ ཏསྶ ཨདྷིགམེན ལདྡྷཔྤསཱདོ. ཨཔུབྦཾ ཨཙརིམནྟི ཨེཀཛ྄ཛྷཾ. ཨརིཡསཱཝཀཱནཉྷི ཨརིཡམགྒོ ཨུཔྤཛྫནྟོཝ ཏཱིསུ ཝཏྠཱུསུ ཨཝེཙྩཔྤསཱདཾ ཨཱཝཧནྟོ ཨེཝ ཨུཔྤཛྫཏི. ཏེསནྟི ཝིསཡབྷཱུཏཱནཾ ཏིཎྞཾ ཝཏྠཱུནཾ ཝསེན ཏིདྷཱ ཝུཏྟོ. ཡསྨཱ ཙ ཨཏྠཏོ ཨེཀོ, ཏསྨཱཝ ནིནྣཱནཱཀརཎོ ཧོཏི པཝཏྟཊྛཱནབྷེདེ སཏིཔི. ཨརིཡསཱཝཀསྶ ཧཱིཏིཨཱདིནཱ ནཡེན ཏམཏྠཾ ཝིཝརཏི. པསཱདོ ཨོཀཔྤནཱ. པེམཾ བྷཏྟི. གཱརཝཾ གརུཀརཎཾ. མཧནྟཾ ཨུལཱ༹རཾ. ཨེཏཾ ཝིབྷཱགེན ནཏྠི སབྦཏྠ སམཱནཏྟཱ.

ཨེཝནྟི བྷཝནྟརེཔི ཨཀོཔནཱིཡཏཱཡ. སདིསཝསེནཱཏི ཨཉྙེཧི ཨཁཎྜཱདཱིཧི སདིསཝསེན. ཏེནཱཧ ‘‘མུཁཝཊྚི ཡཉྷི ཚིནྣེ’’ཏིཨཱདི. ཁཎྜཱ ཨེཏིསྶཱ ཨཏྠཱིཏི ཁཎྜཱ. ཨེས ནཡོ སེསེསུཔི. པཱཏིམོཀྑེ ཨཱགཏཱནུཀྐམེན སཱིལསྶ ཨཱདིམཛ྄ཛྷཝིབྷཱགོ ཝེདིཏབྦོ. དྭིནྣཾ ཝཱ ཏིཎྞཾ ཝཱཏི སཱིལཀོཊྛཱསཱནཾ. ཨེཀནྟརཾ བྷིནྣནྟི ཨབྷིནྣེན ཨེཀནྟརཾ ཧུཏྭཱ བྷིནྣཾ. ཏེསཾ ཁཎྜཱདཱིནཾ. ‘‘བྷུཛིསྶེཧཱི’’ཏི ཨུཏྟརཔདལོཔེན ནིདྡེསོཏི ཨཱཧ ‘‘བྷུཛིསྶབྷཱཝཀརེཧཱི’’ཏི. ཨིདཾ ¶ ཝཱིཏིཀྐནྟནྟི ཨིདམྤི སཱིལཾ ཝཱིཏིཀྐནྟཾ. ‘‘ཨཡཾ སཱིལསྶ ཝཱིཏིཀྐམོ’’ཏི ཨེཝཾ པརཱམསིཏུཾ ཨསཀྐུཎེཡྻེཧི.

༢. བྲཧྨཙརིཡོགདྷསུཏྟཝཎྞནཱ

༩༩༨. ཡེསནྟི ¶ ཨནིཡམཏོ སདྡྷཱདཱིནམཱདྷཱརབྷཱུཏཔུགྒལདསྶནཾ. བུདྡྷེ པསཱདོ གཧིཏོ. སོ ཧི ཨིཏརེཧི པཋམཾ གཧེཏབྦོཏི. ཨརིཡཀནྟཱནི སཱིལཱནི གཧིཏཱནི སོཏཱཔནྣསྶ སཱིལཱནཾ ཨདྷིཔྤེཏཏྟཱ. སངྒྷེ པསཱདོ གཧིཏོ དྷམྨཔྤསཱདསྶ ཨནནྟརཾ ཝུཙྩམཱནཏྟཱ. དྷམྨེ པསཱདོ གཧིཏོ ཨཝེཙྩཔྤསཱདབྷཱཝཏོ. སོཏཾ ཨརིཡམགྒཾ ཨཱདིཏོ པཏྟི སོཏཱཔཏྟི, ཏསྶཱ ཨངྒཱནི སོཏཱཔཏྟིཡངྒཱནི. པཙྩེནྟཱིཏི པཛཱཡནྟི ཨདྷིགཙྪནྟི. ཏེནཱཧ ‘‘པཱཔུཎནྟཱི’’ཏི. བྲཧྨཙརིཡནྟི མགྒབྲཧྨཙརིཡཾ. ཀཏརཔསཱདོ ཝཏྟམཱནོཏི ཨདྷིཔྤཱཡོ. མགྒཔྤསཱདོཏི མགྒསམྤཡུཏྟོ པསཱདོ. ཨཱགཏམགྒསྶཱཏི ཨདྷིགཏམགྒསྶ. མིསྶཀཔྤསཱདོ ཨེསོཏི ཏསྨཱ ཨུབྷོཔི ཐེརཱ པཎྜིཏཱ བཧུསྶུཏཱ.

༣. དཱིགྷཱཝུཨུཔཱསཀསུཏྟཝཎྞནཱ

༩༩༩. ཡདགྒེན ཏསྨིཾ ཨུཔཱསཀེ ཡཐཱཝུཏྟཱནི སོཏཱཔཏྟིཡངྒཱནི སཾཝིཛྫནྟི, ཏདགྒེན སོ ཏེསུ ཝཏྟིསྶཏཱིཏི ཨཱཧ ‘‘ཙཏཱུསུ སོཏཱཔཏྟིཡངྒེསུ སནྡིསྶསཱི’’ཏི. ཝིཛྫཾ བྷཛནྟཱིཏི ཝིཛྫཱབྷཱགིཡཱ, ཏེསུ ཀོཊྛཱསེསུ པརིཡཱཔནྣཱཏི ཝུཏྟཾ ‘‘ཝིཛྫཱབྷཱགིཡེཏི ཝིཛྫཱཀོཊྛཱསིཀེ’’ཏི.

༤-༥. པཋམསཱརིཔུཏྟསུཏྟཱདིཝཎྞནཱ

༡༠༠༠-༡༠༠༡. ‘‘སོཏཱཔཏྟཱི’’ཏི པཋམམགྒོ ཨདྷིཔྤེཏོ, ཏསྶ ཨདྷིགམཱུཔཱཡོ སོཏཱཔཏྟིཡངྒཾ. ཏེནཱཧ ‘‘སོཏཱཔཏྟིཡཱ པུབྦབྷཱགཔཊིལཱབྷངྒ’’ནྟི. སོཏཱཔཏྟིཨཏྠཱཡཱཏི སོཏཱཔཏྟིམགྒཏྠཱཡ. ཨངྒནྟི ཀཱརཎཾ. ཨིཏརེ རཏནཏྟཡཔྤསཱདཱདཡོ. པུབྦབྷཱགིཡཱཡ སོཏཱཔཏྟིཡཱ ཨངྒཾ ཀཱརཎནྟི.

༦. ཐཔཏིསུཏྟཝཎྞནཱ

༡༠༠༢. (ཝིཏཱནཾ ཀཱཡཱནཾ ཀཱལནཀཱཡ, ཀཱརཎསྶ ཨུཔགཏཱནཾ སཱཏཔརིཡཱ སིཛ྄ཛྷཏི. ཏཏྠ ¶ ཀཱཡཔརིཔཛ྄ཛྷཱཡམུཁེན ཏནྟིཾ ཋཔེསི བྷགཝཱ. ན ཧི པསྶཐ ནམཏྠེཧི ཀརཎེ ནིརཏྠཀོ པིཏི ཝཏྟཏི. ‘‘ནིཡཏཏྟཱ’’ཏི ཝུཏྟཾ. ཏམེཝ ནིཡམཾ ‘‘མཛ྄ཛྷིམཔདེསེཡེཝཱ’’ཏི ཨཝདྷཱརཎེན ཝིབྷཱཝེཏི ¶ . མཧཱམཎྜལཙཱརིཀཾ ཙརནྟོཔི མཛ྄ཛྷིམཔདེསསྶ ཨནྟནྟེནེཝ ཙརཏི. ཏཏྠ ཙ ཝིནེཡྻཛནསྶ སམོསརཎཏཱ མཏྟཔནཝཱཙམཧཏྠསུཔནནྟི.) [ཨེཏྠནྟརེ པཱཋོ ཨསུདྡྷོ དུསྶོདྷནཱིཡོ ཙ, སུདྡྷཔཱཋོ གཝེསིཏབྦོ.] ཨརུཎུཊྛཱཔནམྤི ཏཏྠེཝ ཧོཏི. པཙྩནྟཔདེསེ པན དཱུརེ ཝིནེཡྻཛནཱ ཧོནྟི, ཏཏྠ གནྟྭཱ མགྒཕལེསུ པཏིཊྛཱཔེཏྭཱ ཏཏོ པཙྩཱགནྟྭཱ མཛ྄ཛྷིམཔདེསེ ཨེཝ ཝཱསཾ ཨུཔགཙྪཏི, ཏཏྠ མནུསྶེཧི ཀཏཱནཾ ཀཱརཱནཾ མཧཔྥལབྷཱཝནིཡམནཏྠནྟི དཊྛབྦཾ. ‘‘ཨཱསནྣེ ནོ བྷགཝཱ’’ཏི ཨིདཾ ནིདསྶནམཏྟནྟི དསྶེནྟོ ‘‘ན ཀེཝལ’’ནྟི ཨཱདིམཱཧ.

སཀིཉྩནསཔལིབོདྷནཊྛེནཱཏི ཨེཏྠ ཀིཉྩནཾ པལིབོདྷོ ཨསམཱཔིཏཀིཙྩཏཱ, ཏདུབྷཡསྶ ཨཏྠིབྷཱཝེནཱཏི ཨཏྠོ. མཧཱཝཱསེཏི མཧཱགེཧེ.

དྭེཔི ཛནཱཏི ཨིསིདཏྟཔུརཱཎཱ. སིཏཾ ནཱམ མནྡཧསིཏཾ. ཧསིཏཾ ནཱམ ཝིསྶཊྛཧསིཏཾ. མུཏྟཙཱགོཏིཨཱདཱིསུ ཡཾ ཝཏྟབྦཾ, ཏཾ ཝིསུདྡྷིམགྒཊཱིཀཱཡཾ (ཝིསུདྡྷི. མཧཱཊཱི. ༡.༡༦༠) ཝུཏྟནཡེན ཝེདིཏབྦཾ. སཾཝིབྷཱགེཏི པརསྶ དཱནཝསེན སཾཝིབྷཛནེ. ཨཀཏཝིབྷཱགནྟི དེཡྻདྷམྨཝསེན ན ཀཏཝིབྷཱགཾ. པུགྒལཝསེན པན ‘‘སཱིལཝནྟེཧཱི’’ཏི ཝུཏྟཏྟཱ ཀཏཝིབྷཱགམེཝ མཧཔྥལཏཱཀརཎེན. ཏེནཱཧ ‘‘སབྦཾ དཱཏབྦམེཝ ཧུཏྭཱ ཋིཏ’’ནྟི.

(ཨེཏྠནྟརེ པཱཋོ ཨསུདྡྷོ དུསྶོདྷནཱིཡོ ཙ, སུདྡྷཔཱཋོ གཝེསིཏབྦོ.)

༧. ཝེལུ༹དྭཱརེཡྻསུཏྟཝཎྞནཱ

༡༠༠༣. པཝེཎིཨཱགཏསྶཱཏི ཨནེཀཔུརིསཡུགཝསེན པརམྤརཱགཏསྶ. ཨཏྟནི ཨུཔནེཏབྦནྟི ཨཏྟནི ནེཏྭཱ པརསྨིཾ ཨུཔནེཏབྦཾ. ཏེནཱཧ ‘‘ཡོ ཁོ མྱཱཡཾ དྷམྨོ ཨཔྤིཡོ ཨམནཱཔོ, པརསྶཔེསོ དྷམྨོ ཨཔྤིཡོ ཨམནཱཔོ’’ཏིཨཱདི. ཨམནྟབྷཱསེནཱཏི སམྥསྶ སམྥཔྤལཱཔསྶ ཨམནྟཱཡ མནྟཱརཧིཏབྷཱསནེན.

༨-༩. པཋམགིཉྫཀཱཝསཐསུཏྟཱདིཝཎྞནཱ

༡༠༠༤-༥. དྭེ གཱམཱ དྭིནྣཾ ཉཱཏཱིནཾ གཱམཱཏི ཀཏྭཱ. ཉཱཏིཀེཏི ཨེཝཾལདྡྷནཱམེ ཨེཀསྨིཾ ¶ གཱམཀེ. གིཉྫཀཱཝསཐེཏི གིཉྫཀཱ ཝུཙྩནྟི ཨིཊྛཀཱ, གིཉྫཀཱཧི ཨེཝ ཀཏོ ཨཱཝསཐོ, ཏསྨིཾ. སོ ཀིར ཨཱཝཱསོ ཡཐཱ ¶ སུདྷཱཧི པརིཀམྨེན པཡོཛནཾ ནཏྠི, ཨེཝཾ ཨིཊྛཀཱཧི ཨེཝ ཙིནིཏྭཱ ཀཏོ. ཏེན ཝུཏྟཾ ‘‘ཨིཊྛཀཱམཡེ ཨཱཝསཐེ’’ཏི. ཏུལཱཐམྦྷདྭཱརབནྡྷཀཝཱཊཕལཀཱནི པན དཱརུམཡཱ ཨེཝ. ཨོརཾ ཝུཙྩཏི ཀཱམདྷཱཏུ, པཙྩཡབྷཱཝེན ཏཾ ཨོརཾ བྷཛནྟཱིཏི ཨོརམྦྷཱགིཡཱནི, ཨོརམྦྷཱགསྶ ཝཱ ཧིཏཱནི ཨོརམྦྷཱགིཡཱནི. ཏེནཱཧ ‘‘ཧེཊྛཱབྷཱགིཡཱན’’ནྟིཨཱདི. ཏཱིཧི མགྒེཧཱིཏི ཧེཊྛིམེཧི ཏཱིཧི མགྒེཧི. ཏེཧི པཧཱཏབྦཏཱཡ ཧི ཏེསཾ སཉྙོཛནཱནཾ ཨོརམྦྷཱགིཡཏཱ, ཨོརཾ བྷཉྫིཡཱནི ཝཱ ཨོརམྦྷཱགིཡཱནི ཝུཏྟཱནི ནིརུཏྟིནཡེན. ཨིདཱནི བྱཏིརེཀམུཁེན ནེསཾ ཨོརམྦྷཱགིཡབྷཱཝཾ ཝིབྷཱཝེཏུཾ ‘‘ཏཏྠཱ’’ཏིཨཱདི ཝུཏྟཾ. ཝིཀྑམྦྷིཏཱནི སམཏྠཏཱཝིགྷཱཏེན པུཐུཛྫནཱནཾ, སམུཙྪིནྣཱནི སབྦསོ ཨབྷཱཝེན ཨརིཡཱནཾ རཱུཔཱརཱུཔབྷཝཱུཔཔཏྟིཡཱ ཝིབནྡྷནཱཡ ན ཧོནྟཱིཏི ཝུཏྟཾ ‘‘ཨཝིཀྑམྦྷིཏཱནི མགྒེན ཝཱ ཨསམུཙྪིནྣཱནཱི’’ཏི. ནིབྦཏྟིཝསེནཱཏི པཊིསནྡྷིགྒཧཎཝསེན གནྟུཾ ན དེནྟི. མཧགྒཏབྷཝགཱམིཀམྨཱཡཱུཧནསྶ ཝིབནྡྷནཏོ སཀྐཱཡདིཊྛིཨཱདཱིནི ཏཱིཎི སཉྙོཛནཱནི ཀཱམཙྪནྡབྱཱཔཱདཱ ཝིཡ མཧགྒཏབྷཝཱུཔཔཏྟིཡཱ ཝིསེསཔཙྩཡཏྟཱ ཏཏྠ མཧགྒཏབྷཝེ ནིབྦཏྟམྤི ཏནྣིབྦཏྟིཧེཏུཀམྨཔརིཀྑཡེ ཀཱམབྷཝཱུཔཔཏྟིཔཙྩཡཏཱཡ མཧགྒཏབྷཝཏོ ཨཱནེཏྭཱ ཨིདྷེཝ ཀཱམབྷཝེ ཨེཝ ནིབྦཏྟཱཔེནྟི. ཏསྨཱ སབྦཱནིཔི པཉྩཔི སཾཡོཛནཱནི ཨོརམྦྷཱགིཡཱནེཝ. པཊིསནྡྷིཝསེན ཨནཱགམནསབྷཱཝོཏི པཊིསནྡྷིགྒཧཎཝསེན ཏསྨཱ ལོཀཱ ཨིདྷ ན ཨཱགམནསབྷཱཝོ. བུདྡྷདསྶན-ཐེརདསྶན-དྷམྨསྶཝནཱནཾ པན ཨཏྠཱཡ ཨསྶ ཨཱགམནཾ ཨནིཝཱརིཏཾ.

ཀདཱཙི ཨུཔྤཏྟིཡཱ ཝིརལཱ༹ཀཱརཏཱ, པརིཡུཊྛཱནམནྡཏཱཡ ཨབཧལཏཱཏི དྭེདྷཱཔི ཏནུབྷཱཝོ. ཨབྷིཎྷནྟི བཧུསོ. བཧལབཧལཱཏི ཏིབྦཏིབྦཱ. ཡཏྠ ཨུཔྤཛྫནྟི, ཏཾ སནྟཱནཾ མདྡནྟཱ ཕརནྟཱ སཱདྷེནྟཱ ཨནྡྷཀཱརཾ ཀརོནྟཱ ཨུཔྤཛྫནྟི, དྭཱིཧི པན མགྒེཧི པཧཱིནཏྟཱ ཏནུཀཏནུཀཱ མནྡམནྡཱ ཨུཔྤཛྫནྟི. པུཏྟདྷཱིཏརོ ཧོནྟཱིཏི ཨིདཾ ཨཀཱརཎཾ. ཏཐཱ ཧི ཨངྒཔཙྩངྒཔརཱམསནམཏྟེནཔི ཏེ ཧོནྟི. ཨིདནྟི ‘‘རཱགདོསམོཧཱནཾ ཏནུཏྟཱ’’ཏི ཨིདཾ ཝཙནཾ. བྷཝཏནུཀཝསེནཱཏི ཨཔྤཀབྷཝཝསེན. ཏནྟི མཧཱསཱིཝཏྠེརསྶ ཝཙནཾ པཊིཀྑིཏྟནྟི སམྦནྡྷོ. ཡེ བྷཝཱ ཨརིཡཱནཾ ལབྦྷནྟི, ཏེ པརིཔུཎྞལཀྑཎབྷཝཱ ཨེཝ. ཡེ ན ལབྦྷནྟི, ཏཏྠ ཀཱིདིསཾ ཏཾ བྷཝཏནུཀཾ. ཏསྨཱ ཨུབྷཡཐཱཔི བྷཝཏནུཀསྶ ཨསམྦྷཝོ ཨེཝཱཏི དསྶེཏུཾ ‘‘སོཏཱཔནྣསྶཱ’’ཏིཨཱདི ཝུཏྟཾ. ཨཊྛམེ བྷཝེ བྷཝཏནུཀཾ ནཏྠི ཨཊྛམསྶེཝ བྷཝསྶ སབྦསྶེཝ ཨབྷཱཝཏོ. སེསེསུཔི ཨེསེཝ ནཡོ.

ཀཱམཱཝཙརལོཀཾ ¶ སནྡྷཱཡ ཝུཏྟཾ ཨིཏརསྶ ལོཀསྶ ཝསེན ཏཐཱ ཝཏྟུཾ ཨསཀྐུཎེཡྻཏྟཱ. ཡོ ཧི ¶ སཀདཱགཱམཱི དེཝམནུསྶལོཀེསུ ཝོམིསྶཀཝསེན ནིབྦཏྟཏི, སོཔི ཀཱམབྷཝཝསེནེཝ པརིཙྪིནྡིཏབྦོ. བྷགཝཏཱ ཙ ཀཱམལོཀེ ཋཏྭཱ – ‘‘སཀིདེཝ ཨིམཾ ལོཀཾ ཨཱགནྟྭཱ’’ཏི ཝུཏྟཾ. ཨིམཾ ལོཀཾ ཨཱགནྟྭཱཏི ཙ ཨིམིནཱ པཉྩསུ སཀདཱགཱམཱིསུ ཙཏྟཱརོ ཝཛྫེཏྭཱ ཨེཀོཝ གཧིཏོ. ཨེཀཙྩོ ཧི ཨིདྷ སཀདཱགཱམིཕལཾ པཏྭཱ ཨིདྷེཝ པརིནིབྦཱཡཏི, ཨེཀཙྩོ ཨིདྷ པཏྭཱ དེཝལོཀེ པརིནིབྦཱཡཏི, ཨེཀཙྩོ དེཝལོཀེ པཏྭཱ ཏཏྠེཝ པརིནིབྦཱཡཏི, ཨེཀཙྩོ དེཝལོཀེ པཏྭཱ ཨིདྷཱུཔཔཛྫིཏྭཱ པརིནིབྦཱཡཏི, ཨིམེ ཙཏྟཱརོ ཨིདྷ ན ལབྦྷནྟི. ཡོ པན ཨིདྷ པཏྭཱ དེཝལོཀེ ཡཱཝཏཱཡུཀཾ ཝསིཏྭཱ པུན ཨིདྷཱུཔཔཛྫིཏྭཱ པརིནིབྦཱཡཏི, ཨཡམིདྷ ཨདྷིཔྤེཏོ. ཨཊྛཀཐཱཡཾ པན ‘‘ཨིམཾ ལོཀནྟི ཀཱམབྷཝོ ཨདྷིཔྤེཏོ’’ཏི ཨིམམཏྠཾ ཝིབྷཱཝེཏུཾ ‘‘སཙེ ཧཱི’’ཏིཨཱདིནཱ ཨཉྙཾཡེཝ ཙཏུཀྐཾ དསྶིཏཾ.

ཙཏཱུསུ…པེ… སབྷཱཝོཏི ཨཏྠོ ཨཔཱཡགམནཱིཡཱནཾ པཱཔདྷམྨཱནཾ སབྦསོ པཧཱིནཏྟཱ. དྷམྨནིཡཱམེནཱཏི མགྒདྷམྨནིཡཱམེན ནིཡཏོ ཨུཔརིམགྒཱདྷིགམསྶ ཨཝསྶཾབྷཱཝིབྷཱཝཏོ. ཏེནཱཧ ‘‘སམྦོདྷིཔརཱཡཎོ’’ཏི. ཏེསཾ ཏེསཾ ཉཱཎགཏིནྟི ཏེསཾ ཏེསཾ སཏྟཱནཾ ‘‘ཨསུཀོ སོཏཱཔནྣོ, ཨསུཀོ སཀདཱགཱམཱི’’ཏིཨཱདིནཱ ཏཾཏཾཉཱཎཱདྷིགམནཾ ཉཱཎཱུཔཔཏྟིཾ. ཉཱཎཱབྷིསམྤརཱཡནྟི ཏཏོ པརམྤི – ‘‘ནིཡཏོ སམྦོདྷིཔརཱཡཎོ སཀིདེཝ ཨིམཾ ལོཀཾ ཨཱགནྟྭཱ དུཀྑསྶནྟཾ ཀརིསྶཏཱི’’ཏིཨཱདིནཱ ཉཱཎསཧིཏཾ ཨུཔཔཏྟིཔཙྩཡབྷཝཾ. ཨོལོཀེནྟསྶ ཉཱཎཙཀྑུནཱ ཨཔེཀྑནྟསྶ. ཀེཝལཾ ཀཱཡཀིལམཐོཝ, ན ཏེན ཀཱཙི པརེསཾ ཨཏྠསིདྡྷཱིཏི ཨདྷིཔྤཱཡོ. ཙིཏྟཝིཧེསཱ ཙིཏྟཁེདོ, སཱ ཀིལེསཱུཔསཾཧིཏཏྟཱ བུདྡྷཱནཾ ནཏྠི.

ཨཱདིསྶཏི ཨཱལོཀཱིཡཏི ཨཏྟཱ ཨེཏེནཱཏི ཨཱདཱསཾ, དྷམྨབྷཱུཏཾ ཨཱདཱསཾ དྷམྨཱདཱསཾ, ཨརིཡམགྒཉཱཎསྶེཏཾ ཨདྷིཝཙནཾ. ཏེན ཧི ཨརིཡསཱཝཀོ ཙཏཱུསུ ཨརིཡསཙྩེསུ ཝིདྡྷསྟསམྨོཧཏྟཱ ཨཏྟཱནཾ ཡཱཐཱཝཏོ ཉཏྭཱ ཡཱཐཱཝཏོ བྱཱཀརེཡྻ, ཏཔྤཀཱསནཏོ པན དྷམྨཔརིཡཱཡསྶ སུཏྟསྶ དྷམྨཱདཱསཏཱ ཝེདིཏབྦཱཏི. ཡེན དྷམྨཱདཱསེནཱཏི ཨིདྷ པན མགྒདྷམྨམེཝ ཝདཏི. སེསཾ ཨུཏྟཱནཏྠཏྟཱ སུཝིཉྙེཡྻམེཝཱཏི.

ཝེལུ༹དྭཱརཝགྒཝཎྞནཱ ནིཊྛིཏཱ.

༢. རཱཛཀཱརཱམཝགྒོ

༡. སཧསྶབྷིཀྑུནིསངྒྷསུཏྟཝཎྞནཱ

༡༠༠༧. དྷམྨིཀཏྟཱ ¶ ¶ དེསཝཱསཱིཧི ཨནུཀམྤིཏོ རཱཛཱཏི རཱཛཀོ, ཏསྶ ཨཱརཱམོ རཱཛཀཱརཱམོ, ཏསྨིཾ. བྷཱུམིསཱིསཾ སེཊྛཔྤདེསོ, ཡཏྠ ཝསནྟོ ལཱབྷགྒཡསགྒཔྤཏྟོ ཧོཏཱིཏི ཏེསཾ ཨདྷིཔྤཱཡོ.

ཝཱརཱཔེཧཱིཏི པཊིསེདྷེཧི. ཡུཛ྄ཛྷཱཔེཏུནྟི ཀལཧཾ ཀཱརཱཔེཏུཾ. པུན ཨཱགཙྪནྟཱཏི ཨཔརསྨིཾ སཾཝཙྪརེ ཨཱགཙྪནྟཱ. ཨུབྦཊྚེཏྭཱཏི མཧཏཱི ཝཱིཙིཡོ ཨུབྦཊྚེཏྭཱ. ཡཐཱ ཏསྶ སཀལམེཝ རཊྛཾ ཨེཀོདཀཱིབྷཱུཏཾ ཧོཏི, ཨེཝཾ ཀཏྭཱ སམུདྡམེཝ ཛཱཏཾ. ཏེན ཝུཏྟཾ ‘‘སམུདྡམེཝ ཨཀཾསཱུ’’ཏི.

ཨིསཱིནམནྟརཾ ཀཏྭཱཏི ཨིསཱིནཾ ཀཱརཎཾ ཀཏྭཱ, ཨིསཱིནཾ ཧེཏཱུཏི ཨཏྠོ, ཨིསཱིནཾ ཝཱ ཨནྟརབྷེདཾ ཀཏྭཱ. ཏཐཱ ལོཀེ ཀོལཱཧལསྶ པཏྠཊཏཾ ཝིབྷཱཝེནྟོ བྷགཝཱ ‘‘མེ སུཏ’’ནྟི ཨཱཧ པཙྩཀྑཏོ ཛཱནམྤི. ཨུཙྪིནྣོཏི ཀུལཙྪེདེན ཨུཙྪིནྣོ. ན ཀེཝལཾ སཡམེཝ, ཨཐ ཁོ སཧ རཊྛེཧི. ཝིབྷཝནྟི ཝིནཱསཾ ཨུཔགཏོ.

ཏཾ སནྡྷཱཡེཏཾ ཝུཏྟནྟི ཏཾ ཡཐཱཝུཏྟཾ པསེནདིནཱ ཀོསལརཱཛེན ཀཱརིཏཾ ཝིཧཱརཾ སནྡྷཱཡ ཨེཏཾ ‘‘རཱཛཀཱརཱམེ’’ཏི ཝུཏྟཾ.

༢-༣. བྲཱཧྨཎསུཏྟཱདིཝཎྞནཱ

༡༠༠༨-༩. ཨུདཡགཱམིནིནྟི ཨཱརམྦྷཏོ པཊྛཱཡ སམྤཏྟིཨཱཝཧཾ.

༤. དུགྒཏིབྷཡསུཏྟཝཎྞནཱ

༡༠༡༠. དུཊྛཱ གཏི ནིཔྥཏྟི དུགྒཏི, དུགྒཏབྷཱཝོ དཱལིདྡིཡཾ, ཏདེཝ བྷཡཾ, ཏཾ སབྦཾ ཨནཝསེསཾ ཝཱ དུགྒཏིབྷཡཾ དལིདྡབྷཡཾ. སམྨདེཝ ཨཏིཀྐནྟོཏི སམཏིཀྐནྟོ.

༦. པཋམམིཏྟཱམཙྩསུཏྟཝཎྞནཱ

༡༠༡༢. ཝོཧཱརམིཏྟཱཏི ¶ ཏཾཏཾདཱནགྒཧཎཝསེན ཝོཧཱརཀཱ མིཏྟཱ. ཨཱམནྟནཔཊིམནྟནཨིརིཡཱཔཐཱདཱིསུཔཱིཏི ཨཱལཱཔསལླཱཔགམནནིསཛྫཱདིཨཏྠསཾཝིདྷཱནཱདཱིསུ ¶ . ཨེཀཏོ པཝཏྟཀིཙྩཱཏི སཧ པཝཏྟཀཏྟབྦཱ. ཨམཱ སཧ བྷཝནྟཱིཏི ཨམཙྩཱ. ‘‘ཨམྷཱཀཾ ཨིམེ’’ཏི ཉཱཡནྟཱིཏི ཉཱཏཱི, ཨཱཝཱཧཝིཝཱཧསམྦདྡྷཱ. ཏེནཱཧ ‘‘སསྶུསསུརཔཀྑིཀཱ’’ཏི. ཡོནིསམྦནྡྷཱ ཝཱ སཱལོཧིཏཱ. ཏེནཱཧ ‘‘བྷཱཏིབྷགིནིམཱཏུལཱདཡོ’’ཏི.

༧. དུཏིཡམིཏྟཱམཙྩསུཏྟཝཎྞནཱ

༡༠༡༣. ཀིསྨིཉྩི ཀསྶཙི ཙ ཏཐཱ ཏཐཱ ཨུཔྤནྣསྶ པསཱདསྶ ཨཉྙཐཱབྷཱཝོ པསཱདཉྙཐཏྟཾ. བྷཱུཏསངྒྷཱཏསྶ གྷནཨཱདིཀསྶ ཨཉྙཐཱབྷཱཝོ བྷཱཝཉྙཐཏྟཾ. ནིརཡཱདིགཏིཨནྟརཨུཔཔཏྟི གཏིཨཉྙཐཏྟཾ. སབྷཱཝདྷམྨཱནཾ ཀཀྑལ༹ཕུསནཱདིལཀྑཎསྶ ཨཉྙཐཱབྷཱཝོ ལཀྑཎཉྙཐཏྟཾ. ‘‘ཋིཏསྶ ཨཉྙཐཏྟཾ པཉྙཱཡཏཱི’’ཏི ཨེཝཾ ཝུཏྟཾ ཨཉྙཐཏྟཾ ཝིཔརིཎཱམཉྙཐཏྟཾ. ལཀྑཎཉྙཐཏྟཾ ན ལབྦྷཏི. ཏེནཱཧ ‘‘ལཀྑཎཾ པན ན ཝིགཙྪཏཱི’’ཏི, སེསཾ ལབྦྷཏཱིཏི. པཐཝཱིདྷཱཏུཡཱཏི སསམྦྷཱརཔཐཝཱིདྷཱཏུཡཱ. ཨཱཔོདྷཱཏུཡཱཏི ཨེཏྠཱཔི ཨེསེཝ ནཡོ. པུརིམབྷཱཝོཏི གྷནཀཋིནབྷཱཝོ. བྷཱཝཉྙཐཏྟཾ རསཉྙཐཏྟསབྷཱཝོ. གཏིཨཉྙཐཏྟཾ ཨུགྒཏཱུཔཔཏྟི. ཏེནཱཧ ‘‘ཏཉྷི ཨརིཡསཱཝཀསྶ ནཏྠཱི’’ཏི. པསཱདཉྙཐཏྟམྤི ནཏྠིཡེཝ ཨརིཡསཱཝཀསྶ.

རཱཛཀཱརཱམཝགྒཝཎྞནཱ ནིཊྛིཏཱ.

༣. སརཎཱནིཝགྒོ

༡-༢. པཋམམཧཱནཱམསུཏྟཱདིཝཎྞནཱ

༡༠༡༧-༡༨. སམིདྡྷནྟི སམྤུཎྞཾ. སུཔུཔྥིཏནྟི ཨུཔསོབྷིཏཏཱཡ སུཔུཔྥིཏསདིསཏྟཱ. བྱཱུཧཱ ནཱམ ཡེཧི ཨེཝ པཝིསནྟི, ཏེཧི ཨེཝ ནིཀྑམནྟི. ཏེནཱཧ ‘‘བྱཱུཧཱ ཝུཙྩནྟི ཨཝིནིབྦིདྡྷརཙྪཱཡོ’’ཏི. ཨུདྡྷཏཙཱརིནཱཏི ཡཊྛནྟརཱ.

༣. གོདྷསཀྐསུཏྟཝཎྞནཱ

༡༠༡༩. ཏཱིཧཱིཏི ¶ རཏནཏྟཡེ ཨུཔྤནྣེཧི ཏཱིཧི པསཱདདྷམྨེཧི. ཙཏཱུཧཱིཏི ཏེཧི ཨེཝ སདྡྷིཾ སཱིལེན. ཀོཙིདེཝཱཏིཨཱདི པརིཀཔྤཝསེན ཝུཏྟཾ བྷགཝཏི ¶ ཨཏྟནོ སདྡྷཱཡ ཨུལཱ༹རཏམབྷཱཝདསྶནཏྠཾ. ཏེནཱཧ ‘‘བྷགཝཏོ སབྦཉྙུཏཱཡཱ’’ཏིཨཱདི. དྷམྨོ སམུཔྤཱདོཏི ཝིཝཱདདྷམྨཨུཔྤཏྟིཧེཏུ. ཏདེཝ ཧི སནྡྷཱཡཱཧ ‘‘ཀིཉྩིདེཝ ཀཱརཎ’’ནྟི. ཀཱརཎནྟི ནཱནཱཀཱརཎཾ. ཀལྱཱཎཀུསལཝིམུཏྟནྟི ཨཀལྱཱཎཾ ཨཀུསལཾ, ཏདིདཾ ཡཐཱཝུཏྟཨཔྤསཱདནེན ཨཔནཱིཏཨཏྠདསྶནཏྠཾ. ཨསྶཱཏི མཧཱནཱམསཀྐསྶ. ཨནཝཛྫནདོསོ ཨེསོཏི ཙཏཱུསུ དྷམྨེསུ ཨེཀེནཔི སམནྣཱགཏོ སོཏཱཔནྣོ ཧོཏཱིཏི ཨནུཛཱནིཏྭཱ ཙཏཱུཧིཔི སམནྣཱགཏེན ཨཱཙིཀྑིཏབྦནྟི ཡཱཐཱཝཏོ ཨནཝཛྫནདོསོཏི ཨཏྠོ.

༤. པཋམསརཎཱནིསཀྐསུཏྟཝཎྞནཱ

༡༠༢༠. པམཱཎེནཱཏི ཨེཀེན པམཱཎེན, ན སབྦསོ. ཨོལོཀནཾ ཁམནྟཱིཏི དསྶནམགྒེན ཙཏུསཙྩདྷམྨཱ པཙྩཏྟཾ པསྶིཏབྦཱ པཊིཝིཛ྄ཛྷིཏབྦཱ. པཋམམགྒཀྑཎེ ཧི ཙཏུསཙྩདྷམྨཱ ཨེཀདེསཏོཝ དིཊྛཱ ནཱམ ཧོནྟི. ‘‘པརིམུཙྩཏཱི’’ཏི པན ཝཏྟུཾ ཝཊྚཏི པཊིཝིཛ྄ཛྷནཀིརིཡཱཡ ཝཏྟམཱནཏྟཱ. ཨགནྟྭཱ ཨཔཱཡེསུ ཨནུཔྤཏྟིརཧཏྟཱ. ཏེནཱཧ ‘‘ན གཙྪཏཱི’’ཏི, ན ཨུཔྤཛྫཏཱིཏི ཨཏྠོ. མཧཱསཱརརུཀྑེ དསྶེནྟོ ཨཱཧ – ‘‘ཡོ ཀོཙི ཝིཉྙུཛཱཏིཀོ མམ ཙེ གོཙརཾ གཙྪཏི, ཨེཀསྶ ཨཱགམནཾ ཨཝཉྫྷཾ ཨམོགྷ’’ནྟི དསྶེཏུཾ.

༥. དུཏིཡསརཎཱནིསཀྐསུཏྟཝཎྞནཱ

༡༠༢༡. དུཀྑེཏྟཾ ནིརོཛཀཾ, ཏཱཡ ཨེཝ དུཀྑེཏྟཏཱཡ ཝིསམཾ ཧོཏཱིཏི ཨཱཧ ‘‘ཝིསམཁེཏྟ’’ནྟི. ལོཎཱུཔཧཏནྟི ཛཱཏསབྷཱཝེན ལོཎེན ཨཱུསརེན ཨུཔཧཏཾ. ཁཎྜཱནཱིཏི ཁཎྜིཏཱནི. ཏེམེཏྭཱཏི ཏེམིཏཏྟཱ. ཝཱཏཱཏཔཧཏཱནཱིཏི ཙིརཀཱལཾ ཝཱཏེན ཙེཝ ཨཱཏཔེན ཙ ཨུཔཧཏཱནི ཨཱབཱདྷིཏཱནི.

༦. པཋམཨནཱཐཔིཎྜིཀསུཏྟཝཎྞནཱ

༡༠༢༢. ཋཱནནྟི ཋཱནསོ. ཏེནཱཧ ‘‘ཁཎེནཱ’’ཏི. ནིཡྻཱནིཀནྟི པཝཏྟཾ ཉཱཎཔཊིརཱུཔཀཾ ¶ པཀཏིཔུརིསནྟརཛཱནནཱདིམིཙྪཱཉཱཎཾ. ཏཾ པན ཨནིཡྻཱནིཀཾ ‘‘ནིཡྻཱནིཀ’’ནྟི པཙྩཝེཀྑཎཝསེན པཝཏྟེཡྻཱཏི ཨཱཧ ‘‘མིཙྪཱཔཙྩཝེཀྑཎེནཱ’’ཏི. གུཎཝིཡུཏྟསྶ ཨཏྟནོ སཀཏྟནི ཨཝཊྛཱནསངྑཱཏཱ ཝིམུཏྟི མིཙྪཱཝིམུཏྟི.

༧. དུཏིཡཨནཱཐཔིཎྜིཀསུཏྟཝཎྞནཱ

༡༠༢༣. ཡཐཱཀམྨཾ ¶ སམྤརེཏབྦཏོ སམྤརཱཡོ, པེཙྩབྷཝོ, སམྤརཱཡཧེཏུཀཾ སམྤརཱཡིཀཾ, མརཎབྷཡཾ.

སརཎཱནིཝགྒཝཎྞནཱ ནིཊྛིཏཱ.

༤. པུཉྙཱབྷིསནྡཝགྒོ

༡. པཋམཔུཉྙཱབྷིསནྡསུཏྟཝཎྞནཱ

༡༠༢༧. ཨཝིཙྪེདེན ནིཙྩཔྤཝཏྟིཡམཱནཱནི པུཉྙཱནི ཨབྷིསནྡནཊྛེན ‘‘པུཉྙཱབྷིསནྡཱ’’ཏི ཝུཏྟཱ, ཏེན པུཉྙནདིཡོཏི ཨཏྠོ ཝུཏྟོ. སུཁསྶ ཨཱཧརཎཏོ ཨཱནཡནཏོ སུཁསྶཱཧཱརོ.

༤. པཋམདེཝཔདསུཏྟཝཎྞནཱ

༡༠༣༠. དེཝཱནནྟི ཝིསུདྡྷིདེཝཱནཾ. དེཝཔདཱནཱིཏི ཏེསཾ པདཱནི དེཝཔདཱནི, དེཝོཏི ཝཱ སམྨཱསམྦུདྡྷོ. དེཝསྶ ཉཱཎེན ཨཀྐནྟཔདཱནཱིཏི པཊིཝེདྷཉཱཎེན ཙེཝ དེསནཱཉཱཎེན ཙ ཨཀྐནྟཔདཱནི. དེཝཱ ནཱམ ཛཱཏིདེཝཱ. ཏེསམྤི དེཝཊྛེན དེཝོཏི དེཝདེཝོ, སམྦུདྡྷོ.

༨. ཝསྶསུཏྟཝཎྞནཱ

༡༠༣༤. པཱརཾ ཝུཙྩཏི ནིབྦཱནཾ སཾསཱརམཧོགྷསྶ པརཏཱིརབྷཱཝཏོ. ཏེནཱཧ – ‘‘ཏིཎྞོ པཱརངྒཏོ, ཐལེ ཏིཊྛཏི བྲཱཧྨཎོ (སཾ. ནི. ༤.༢༣༨; ཨིཏིཝུ. ༦༩; པུ. པ. ༡༨༨), ཡེ ¶ ཛནཱ པཱརགཱམིནོ’’ཏི (དྷ. པ. ༨༥) ཙ. ཨཐ ཝཱ པཱཏི རཀྑཏཱིཏི པཱརཾ, ནིབྦཱནཾ. ཡོ པཊིཝིཛ྄ཛྷཏི, ཏཾ ཝཊྚདུཀྑཏོ པཱཏི རཀྑཏི, ཨཙྩནྟཧིཏེན ཙ ཝིམུཏྟིསུཁེན ཙ རམེཏི, ཏསྨཱ པཱརནྟི ཝུཙྩཏི. གཙྪམཱནཱ ཨེཝཱཏི པཱརཾ ནིབྦཱནཾ གཙྪམཱནཱ ཨེཝ. ཏེ དྷམྨཱ ཨཱསཝཱནཾ ཁཡཱཡ སཾཝཏྟནྟི སཙྪིཀིརིཡཱཔཧཱནཔཊིཝེདྷཱནཾ སམཀཱལཏྟཱ.

༡༠. ནནྡིཡསཀྐསུཏྟཝཎྞནཱ

༡༠༣༦. པཝིཝེཀཏྠཱཡཱཏི ¶ པཝིཝེཀསུཁཏྠཱཡ. པཊིསལླཱནཏྠཱཡཱཏི བཧིདྡྷཱ ནཱནཱརམྨཎཏོ ཙིཏྟཾ པཊིནིཝཏྟེཏྭཱ ཀམྨཊྛཱནེ སམྨདེཝ ལཱིནཏྠཱཡ.

པུཉྙཱབྷིསནྡཝགྒཝཎྞནཱ ནིཊྛིཏཱ.

༥. སགཱཐཀཔུཉྙཱབྷིསནྡཝགྒོ

༡. པཋམཨབྷིསནྡསུཏྟཝཎྞནཱ

༡༠༣༧. སངྑྱཱ ཨཏྠི ཧེཊྛཱ མཧཱཔཐཝིཡཱ, ཨུཔརི ཨཱཀཱསེན, པརིཏོ ཙཀྐཝཱལ༹པབྦཏེན, མཛ྄ཛྷེ ཏཏྠ ཏཏྠ ཋིཏེཧི དཱིཔཔབྦཏཔརིཡནྟེཧི པརིཙྪིནྣཏྟཱ. ཛཱནནྟེན ཡོཛནཏོ སངྑཱཏུཾ སཀྐཱཏི ཨདྷིཔྤཱཡོ. མཧཱསརཱིརམཙྪ-ཀུམྦྷཱིལ-ཡཀྑ-རཀྑས-མཧཱནཱགདཱནཝཱདཱིནཾ སཝིཉྙཱཎཀཱནཾ, བལ༹ཝཱམུཁཔཱཏཱལཱདཱིནཾ ཨཝིཉྙཱཎཀཱནཾ བྷེརཝཱརམྨཎཱནཾ ཝསེན བཧུབྷེརཝཾ.

༢. དུཏིཡཨབྷིསནྡསུཏྟཝཎྞནཱ

༡༠༣༨. སམྦྷེདེཏི སམྦྷེདཾ སམོདྷཱནཾ གཏཊྛཱནེ. ཡཏྠིམཱ མཧཱནདིཡོ སཾསནྡནྟི སམེནྟཱིཏི པརིཀཔྤཝཙནམེཏཾ. ཏཱདིསཱསུ ཧི མཧཱནདཱིསུ ཀཱཙི པུརཏྠིམསམུདྡཾ པཝིཊྛཱ, ཀཱཙི པཙྪིམཾ.

༣. ཏཏིཡཨབྷིསནྡསུཏྟཝཎྞནཱ

༡༠༣༩. ‘‘ཀུསལེ ¶ པཏིཊྛིཏོ’’ཏི ཨེཏྠ ཡཾ ཨཙྩནྟིཀཾ ཀུསལེ པཏིཊྛཱནཾ. ཏཾ དསྶེནྟོ ‘‘མགྒཀུསལེ པཏིཊྛིཏོ’’ཏི ཨཱཧ, ཧེཊྛིམམགྒཀུསལེཏི ཨདྷིཔྤཱཡོ. ཏེནཱཧ ‘‘བྷཱཝེཏི མགྒ’’ནྟི. ཨརིཡཕལཾཡེཝ དྷམྨསཱརོ. ཀིལེསཱ ཁཱིཡནྟི ཨེཏྠཱཏི ཀིལེསཀྑཡོ, ནིབྦཱནཾ, ཏསྨིཾ ཀིལེསཀྑཡེ རཏོ.

༤. པཋམམཧདྡྷནསུཏྟཝཎྞནཱ

༡༠༤༠. ཨརིཡཱནཾ ¶ བུདྡྷཱནཾ དྷནནྟིཔི ཨརིཡདྷནཾ, ནིབྦཱནནྟི ཀེཙི. ཨནཡཏོཔི ཝིསུདྡྷཊྛེན ཨརིཡཉྩ ཏཾ དྷནཉྩ དྷནཱཡིཏཊྛེནཱཏི ཨརིཡདྷནཾ, ཏེན ཨརིཡདྷནེན. ཏེནེཝ བྷོགེནཱཏི ཨརིཡདྷནབྷོགེན.

སགཱཐཀཔུཉྙཱབྷིསནྡཝགྒཝཎྞནཱ ནིཊྛིཏཱ.

༦. སཔྤཉྙཝགྒོ

༢. ཝསྶཾཝུཏྠསུཏྟཝཎྞནཱ

༡༠༤༨. སམོདྷཱནེཏྭཱཏི ཡེཧི ཨིནྡྲིཡཱདཱིཧི བྷཱཝིཡམཱནེཧི སོཏཱཔཏྟིམགྒོ ཨནུཔྤཏྟོ, ཏཱནེཝ. དྷམྨསམཱནཏཱཡ ཙེཏཾ ཝུཏྟཾ. ཨཉྙཱནེཝ ཧི ཨཏྠཏོ ཏཾ ཏཾ མགྒཾ སཱདྷཀཱནི ཨིནྡྲིཡཱདཱིནི. ཏནྟི པཝེཎཱི ཀཐིཏཱཏི ཡཾ ཀཉྩི ཝིནེཡྻཔུགྒལཾ ཨནཔེཀྑིཏྭཱ ཀེཝལཾ ཏནྟིཝསེན ཋིཏི ཀཐིཏཱ.

༣. དྷམྨདིནྣསུཏྟཝཎྞནཱ

༡༠༤༩. སཏྟསུ ཛནེསཱུཏི སཏྟསུ ཀིཏྟིཡམཱནེསུ ཨུཔཱསཀཛནེསུ. གམྦྷཱིརཱཏིཨཱདཱིསུ དྷམྨགམྦྷཱིརཱཏི པཱལི༹གཏིཡཱ གམྦྷཱིརཱ, ཏཐཱ ཙ སལླསུཏྟཾ ཧེཊྛཱ པཀཱསིཏམེཝ. ‘‘ཙེཏནཱཧཾ, བྷིཀྑཝེ, ཀམྨཾ ཝདཱམཱི’’ཏིཨཱདིནཱ (ཨ. ནི. ༦.༦༣; ཀཐཱ. ༥༣༩) ཨཱགཏཾ ཙེཏནཱསུཏྟཾ ¶ . ཏཏྠ ‘‘ཙེཏནཱསཧཛཱཏཾ ནཱནཱཀྑཎིཀ’’ནྟིཨཱདིནཱ པཊྛཱནེ ཨཱགཏནཡེན, སུཏྟེསུ (ཨ. ནི. ༣.༡༠༡) ཙ ‘‘དིཊྛདྷམྨཝེདནཱིཡ’’ནྟིཨཱདིནཱ ཨཱགཏནཡེན གམྦྷཱིརབྷཱཝོ ཝེདིཏབྦོ, ནིབྦཱནསྶ ཙེཝ ཨརིཡམགྒསྶ ཙ པཀཱསནཏོ ཨསངྑཏསཾཡུཏྟསྶ ལོཀུཏྟརཏྠདཱིཔཀཏཱ. ‘‘ཨཏཱིཏཾཔཱཧཾ རཱུཔེན ཁཛྫིཾ, ཨེཏརཧི ཁཛྫཱམཱི’’ཏིཨཱདིནཱ པཉྩནྣཾ ཁནྡྷཱནཾ ཁཱདཀབྷཱཝསྶ, པུགྒལསྶ ཁཱདིཏབྦཏཱཡ ཝིབྷཱཝནེན ཁཛྫནཱིཡཔརིཡཱཡེ (སཾ. ནི. ༣.༧༩) ཝིསེསཏོ ནིསྶཏྟནིཛྫཱིཝཏཱ དཱིཔིཏཱཏི ཝུཏྟཾ ‘‘སཏྟསུཉྙཏཱདཱིཔཀཱ ཁཛྫནིཀསུཏྟནྟཱདཡོ’’ཏི. ཨུཔསམྤཛྫ ཝིཧརིསྶཱམཱཏི ཡེ ཏེསུ སུཏྟེསུ ཝུཏྟཔཊིཔདཾ སམྨདེཝ པརིཔཱུརེནྟི, ཏེ ཏེསུ ཨུཔསམྤཛྫ ཝིཧརནྟི ནཱམ ¶ . ཨེཏྠཱཏི ‘‘ན ཁོ ནེཏ’’ནྟི ཨེཏྠ ན-ཀཱརོ ‘‘ཨཉྙམཉྙ’’ནྟི ཨེཏྠ མ-ཀཱརོ ཝིཡ བྱཉྫནསནྡྷིམཏྟམེཝ, ནཱསྶ ཀོཙི ཨཏྠོ.

༤. གིལཱནསུཏྟཝཎྞནཱ

༡༠༥༠. ན ཁོ པནེཏནྟི ན ཁོ ཨེཏཾ, ནོཏི ཙ ཨམྷེཧཱིཏི ཨཏྠོཏི ཨཱཧ ‘‘ན ཁོ ཨམྷེཧཱི’’ཏིཨཱདི. ཨསྶསནྟཱིཏི ཨསྶཱསནཱིཡཱཏི ཨཱཧ ‘‘ཨསྶཱསཀརེཧཱི’’ཏི. མརིསྶཏཱིཏི མཱརིསོ, ཨེཀནྟབྷཱཝིམརཎོ, སོ པན མརཎཱདྷཱིནཝུཏྟིཀོཏི ཝུཏྟཾ ‘‘མརཎཔཊིབདྡྷོ’’ཏི. ཨདྷིམུཙྩེཧཱིཏི ཨདྷིམུཏྟིཾ ཨུཔྤཱདེཧི. ཏཾ པན ཏཐཱ ཙིཏྟསྶ པཎིདྷཱནཾ ཋཔནནྟི ཨཱཧ ‘‘ཋཔེཧཱི’’ཏི. ཨཱགམནཱིཡགུཎེསཱུཏི པུབྦབྷཱགགུཎེསུ. པམཱཎཾ ནཱམ ནཏྠི ཨནནྟཱཔརིམཱཎཏྟཱ. ནཱནཱཀརཎཾ ནཏྠི ཝིམུཏྟིཡཱ ནིནྣཱནཏྟཱ.

༩. པཉྙཱཔཊིལཱབྷསུཏྟཝཎྞནཱ

༡༠༥༥. པཉྙཱཔཊིལཱབྷཱཡཱཏི མགྒཕལཔཉྙཱཡ པཊིལཱབྷཏྠཾ. ཏེནཱཧ ‘‘སཏྟ སེཀྑཱ’’ཏིཨཱདི.

སཔྤཉྙཝགྒཝཎྞནཱ ནིཊྛིཏཱ.

༧. མཧཱཔཉྙཝགྒོ

༡. མཧཱཔཉྙསུཏྟཝཎྞནཱ

༡༠༥༨. མཧནྟེ ¶ ཨཏྠེ པརིགྒཎྷཱཏཱིཏི སཙྩཔཊིཙྩསམུཔྤཱདཱདིཀེ མཧཱཝིཏྠཱརེ ཨཏྠེ པརིཙྪིཛྫ ཨསེསེཏྭཱ མུཊྛིགཏེ ཝིཡ ཀཏྭཱ གཎྷཱཏི. སེསཾ ཧེཊྛཱ ཝུཏྟནཡམེཝ.

མཧཱཔཉྙཝགྒཝཎྞནཱ ནིཊྛིཏཱ.

སོཏཱཔཏྟིསཾཡུཏྟཝཎྞནཱ ནིཊྛིཏཱ.

༡༢. སཙྩསཾཡུཏྟཾ

༡. སམཱདྷིཝགྒོ

༡. སམཱདྷིསུཏྟཝཎྞནཱ

༡༠༧༡. ཙིཏྟེཀགྒཏཱཡཱཏི ¶ ¶ ནིསྶཀྐཝཙནཾ ‘‘པརིཧཱཡནྟཱི’’ཏི པདཾ ཨཔེཀྑིཏྭཱ. ཡཐཱབྷཱུཏཱདིཝསེནཱཏི ཡཐཱགཏཱདིཝསེན. ཡཐཱབྷཱུཏཾ ནཱམ ཨིམསྨིཾ སུཏྟེ ‘‘སམཱཧིཏོ, བྷིཀྑཝེ, བྷིཀྑུ ཡཐཱབྷཱུཏཾ པཛཱནཱཏཱི’’ཏིཨཱདི. ཨཱདི-སདྡེན ‘‘ཏཐཱ ཡསྨཱ’’ཏིཨཱདིསངྒཧོ དཊྛབྦོ. ཏཐཱ ཧི ཡཐཱབྷཱུཏཝསེན ཀཱརཎཙྪེདོ ཀཏོ ‘‘ཏཐཱ ཡསྨཱ’’ཏིཨཱདིཝཙནེཧི. ཝཎྞཱཏི ཨཀྑརཱ, ‘‘གུཎཱ’’ཏི ཀེཙི. པདབྱཉྫནཱནཱིཏི ནཱམཱདིཔདཱནི ཙེཝ ཏཾསམུདཱཡབྷཱུཏབྱཉྫནཱནི ཙ.

༣. པཋམཀུལཔུཏྟསུཏྟཱདིཝཎྞནཱ

༡༠༧༣-༧༥. སཱསནཱཝཙརཱ ཨདྷིཔྤེཏཱ བཱཧིརཀཱནཾ སཙྩཱབྷིསམཡསྶ ཨབྷཱཝཏོ. ཏཐཱཏི ཨིམིནཱ ཙཏུཏྠཔཉྩམེསུ ཨཏྠཝིསེསཱབྷཱཝཾ དསྶེཏི. ཡདི ཨེཝཾ ཀསྨཱ ཝིསུཾ ཝིསུཾ དེསནཱཏི ཨཱཧ ‘‘ཏེན ཏེན ཨབྷིལཱཔེནཱ’’ཏིཨཱདི.

༡༠. ཏིརཙྪཱནཀཐཱསུཏྟཝཎྞནཱ

༡༠༨༠. དུགྒཏིཏོ སཾསཱརཏོ ཙ ནིཡྻཱཏི ཨེཏེནཱཏི ནིཡྻཱནཾ, སགྒམགྒོ མོཀྑམགྒོ ཙ. ཏསྨིཾ ནིཡྻཱནེ ནིཡུཏྟཱ, ཏཾ ཨེཏྠ ཨཏྠཱིཏི ནིཡྻཱནིཀཱ. ཝཙཱིདུཙྩརིཏསཾཀིལེསཏོ ཝཱ ནིཡྻཱཏཱིཏི ཨཱི-ཀཱརསྶ རསྶཏྟཾ ཡ-ཀཱརསྶ ཀ-ཀཱརཾ ཀཏྭཱ ནིཡྻཱནིཀཱ. ཙེཏནཱཡ སདྡྷིཾ སམྥཔྤལཱཔཱ ཝེརམཎི. ཏཔྤཊིཔཀྑཏོ ཨནིཡྻཱནིཀཱ, ཏསྶ བྷཱཝོ ཨནིཡྻཱནིཀཏྟཾ. ཏིརཙྪཱནབྷཱུཏནྟི ཏིརོཀརཎབྷཱུཏཾ. ཀམྨཊྛཱནབྷཱཝེཏི ཨནིཙྩཏཱཔཊིསཾཡུཏྟཙཏུསཙྩཀམྨཊྛཱནབྷཱཝེ. སཱཏྠཀནྟི དཱནསཱིལཱདིནིསྶིཏཏྟཱ ཧིཏཔཊིསཾཡུཏྟཾ.

ཝིསིཁཱཏི ¶ གྷརསནྣིཝེསོ. ཝིསིཁཱགཧཎེན ཙ གཱམཱདིགཧཎེ ཝིཡ ཏནྣིཝཱསིནོ ཝིསེསཏོ གཧིཏཱ ‘‘ཨཱགཏོ གཱམོ’’ཏིཨཱདཱིསུ ཝིཡ ¶ . ཏེནཱཧ ‘‘སཱུརཱ སམཏྠཱ’’ཏི. ཀུམྦྷཊྛཱནཱཔདེསེན ཀུམྦྷདཱསིཡོ ཝུཏྟཱཏི ཨཱཧ – ‘‘ཀུམྦྷདཱསིཀཐཱ’’ཏི. ཨཡཱཐཱཝཏོ ཨུཔྤཏྟིཊྛིཏིསཾཧཱརཱདིཝསེན ལོཀོ ཨཀྑཱཡཏི ཨེཏེནཱཏི ལོཀཀྑཱཡིཀཱ. ཨིཏི ཨིམིནཱ པཀཱརེན བྷཝོ, ཨིམིནཱ ཨབྷཝོཏི ཨེཝཾ པཝཏྟཱཡ ཨིཏིབྷཝཱབྷཝཀཐཱཡ སདྡྷིཾ.

སམཱདྷིཝགྒཝཎྞནཱ ནིཊྛིཏཱ.

༢. དྷམྨཙཀྐཔྤཝཏྟནཝགྒོ

༡. དྷམྨཙཀྐཔྤཝཏྟནསུཏྟཝཎྞནཱ

༡༠༨༡. ‘‘ཨིསཱིནཾ པཏནུཔྤཏནཝསེན ཨོསཱིདནཨུཔྤཏནཊྛཱནཝསེན ཨེཝཾ ‘ཨིསིཔཏན’ནྟི ‘ལདྡྷནཱམེ’ཏི སངྑེཔཏོ ཝུཏྟམཏྠཾ ཝིཝརིཏུཾ ‘ཨེཏྠ ཧཱི’’’ཏིཨཱདི ཝུཏྟཾ.

ཨཱམནྟེསཱིཏི ཨེཏྠ ཡསྨཱ དྷམྨཙཀྐཔྤཝཏྟནཏྠཾ ཨཡཾ ཨཱམནྟནཱ, ཏསྨཱ སམུདཱགམཏོ པཊྛཱཡ སཏྠུ པུབྦཙརིཏཾ སངྑེཔེནེཝ པཀཱསེཏུཾ ཝཊྚཏཱིཏི ‘‘དཱིཔངྐརཔཱདམཱུལེ ཀཏཱབྷིནཱིཧཱརཏོ པཊྛཱཡཱ’’ཏིཨཱདི ཨཱརདྡྷཾ. ཏཏྠ མཱརབལཾ བྷིནྡིཏྭཱཏི མཱརཉྩ མཱརབལཉྩ བྷཉྫིཏྭཱ. ཨཐ ཝཱ མཱརསྶ ཨབྦྷནྟརཾ བཱཧིརཉྩཱཏི དུཝིདྷཾ བལཾ བྷཉྫིཏྭཱ. ‘‘དྭེམེ, བྷིཀྑཝེ, ཨནྟཱ’’ཏི ཨེཏྠ ཨནྟ-སདྡོ ‘‘པུབྦནྟེ ཉཱཎཾ ཨཔརནྟེ ཉཱཎ’’ནྟིཨཱདཱིསུ (དྷ. ས. ༡༠༦༣) ཝིཡ བྷཱགཔརིཡཱཡོཏི ཨཱཧ ‘‘དྭེ ཨིམེ, བྷིཀྑཝེ, ཀོཊྛཱསཱ’’ཏི. སཧ སམུདཱཧཱརེནཱཏི ཨུཙྩཱརཎསམཀཱལཾ. པཏྠརིཏྭཱ ཨཊྛཱསི བུདྡྷཱནུབྷཱཝེན. བྲཧྨཱནོ སམཱགཙྪིཾསུ པརིཔཀྐཀུསལམཱུལཱ སཙྩཱབྷིསམྦོདྷཱཡ ཀཏཱདྷིཀཱརཱ.

གིཧིསཉྙོཛནནྟི གིཧིབནྡྷནཾ. ཚིནྡིཏྭཱཏི ཧརིཏྭཱ. ན ཝལ༹ཉྫེཏབྦཱཏི ནཱནུཡུཉྫེཏབྦཱ. ཀིལེསཀཱམསུཁསྶཱཏི ཀིལེསཀཱམཡུཏྟསྶ སུཁསྶ. ཨནུཡོགོཏི ཨནུབྷཝོ. གཱམཝཱསཱིཧི སེཝིཏབྦཏྟཱ གཱམཝཱསཱིནཾ སནྟཀོ. ཨཏྟནོཏི ཨཏྟབྷཱཝསྶ. ཨཱཧིཏོ ཨཧཾམཱནོ ཨེཏྠཱཏི ཨཏྟཱ, ཨཏྟབྷཱཝོ. དུཀྑཀརཎནྟི དུཀྑུཔྤཱདནཾ. ཨཏྟམཱརཎེཧཱིཏི ¶ ཨཏྟབཱདྷནེཧི. ཨུཔསམཱཡཱཏི ¶ ཀིལེསཝཱུཔསམོ ཨདྷིཔྤེཏོ, ཏདཏྠསམྤདཱནཝཙནནྟི ཨཱཧ ‘‘ཀིལེསཱུཔསམཏྠཱཡཱ’’ཏི. ཨེས ནཡོ སེསེསུཔི.

སཙྩཉཱཎཱདིཝསེན ཏཡོ པརིཝཊྚཱ ཨེཏསྶཱཏི ཏིཔརིཝཊྚཾ, ཉཱཎདསྶནཾ. ཏེནཱཧ ‘‘སཙྩཉཱཎཱ’’ཏིཨཱདི. ཡཐཱབྷཱུཏཾ ཉཱཎནྟི པཊིཝེདྷཉཱཎཾ ཨཱཧ. ཏེསུཡེཝ སཙྩེསུ. ཉཱཎེན ཀཏྟབྦསྶ ཙ པརིཉྙཱཔཊིཝེདྷཱདིཀིཙྩསྶ ཙ ཛཱནནཉཱཎཾ, ‘‘ཏཉྩ ཁོ པཊིཝེདྷཏོ པགེཝཱ’’ཏི ཀེཙི. པཙྪཱཏི ཨཔརེ. ཏཐཱ ཀཏཉཱཎཾ. དྭཱདསཱཀཱརནྟི དྭཱདསཝིདྷཨཱཀཱརབྷེདཾ. ཨཉྙཏྠཱཏི ཨཉྙེསུ སུཏྟེསུ.

པཊིཝེདྷཉཱཎམྤི དེསནཱཉཱཎམྤི དྷམྨཙཀྐནྟི ཨིདཾ ཏཏྠ ཉཱཎཀིཙྩཾ པདྷཱནནྟི ཀཏྭཱ ཝུཏྟཾ. སདྡྷིནྡྲིཡཱདིདྷམྨསམུདཱཡོ པན པཝཏྟནཊྛེན ཙཀྐནྟི དྷམྨཙཀྐཾ. ཨཐ ཝཱ ཙཀྐནྟི ཨཱཎཱ, དྷམྨཏོ ཨནཔེཏཏྟཱ དྷམྨཉྩ ཏཾ ཙཀྐཉྩ, དྷམྨེན ཉཱཡེན ཙཀྐནྟིཔི དྷམྨཙཀྐཾ. ཡཐཱཧ ‘‘དྷམྨཉྩ པཝཏྟེཏི ཙཀྐཉྩཱཏི དྷམྨཙཀྐཾ, ཙཀྐཉྩ པཝཏྟེཏི དྷམྨཉྩཱཏི དྷམྨཙཀྐཾ, དྷམྨེན པཝཏྟཏཱིཏི དྷམྨཙཀྐཾ, དྷམྨཙརིཡཱཡ པཝཏྟཏཱིཏི དྷམྨཙཀྐ’’ནྟིཨཱདི (པཊི. མ. ༢.༤༠-༤༡). ཨུབྷཡམྤཱིཏི པཊིཝེདྷཉཱཎཾ དེསནཱཉཱཎནྟི ཨུབྷཡམྤི. ཨེཏནྟི ཏདུབྷཡཾ. ཨིམཱཡ དེསནཱཡཱཏི ཨིམིནཱ སུཏྟེན པཀཱསེནྟེན བྷགཝཏཱ ཡཐཱཝུཏྟཉཱཎདྭཡསངྑཱཏཾ དྷམྨཙཀྐཾ པཝཏྟིཏཾ ནཱམ པཝཏྟནཀིཙྩསྶ ཨནིཊྛིཏཏྟཱ. པཏིཊྛིཏེཏི ཨཉྙཱསི ཀོཎྜཉྙཏྠེརེན སོཏཱཔཏྟིཕལེ པཏིཊྛིཏེ. པཝཏྟིཏཾ ནཱམ ཀསྶཔསམྨཱསམྦུདྡྷསྶ སཱསནནྟརདྷཱནཏོ པཊྛཱཡ ཡཱཝ བུདྡྷུཔྤཱདོ, ཨེཏྟཀཾ ཀཱལཾ ཨཔྤཝཏྟཔུབྦསྶ པཝཏྟིཏཏྟཱ, ཨུཔརིམགྒཱདྷིགམོ པནསྶ ཨཏྠངྒཏོ ཨེཝཱཏི.

ཨེཀཔྤཧཱརེནཱཏི ཨེཀེནེཝ པཧཱརསཉྙིཏེན ཀཱལེན. དིཝསསྶ ཧི ཏཏིཡོ བྷཱགོ པཧཱརོ ནཱམ. པཱལི༹ཡཾ པན ‘‘ཏེན ཁཎེན ཏེན ལཡེན ཏེན མུཧུཏྟེནཱ’’ཏི ཝུཏྟཾ. ཏཾ པཧཱརཀྑཎསལླཀྑཎམེཝ. སབྦཉྙུཏཉྙཱཎོབྷཱསོཏི སབྦཉྙུཏཉྙཱཎཱནུབྷཱཝེན པཝཏྟོ ཨོབྷཱསོ ཙིཏྟཾ པཊིཙྩ ཨུཏུསམུཊྛཱནོ ཝེདིཏབྦོ. ཡསྨཱ བྷགཝཏོ དྷམྨཙཀྐཔྤཝཏྟནསྶ ཨཱརམྦྷེ ཝིཡ པརིསམཱཔནེ ཨཏིཝིཡ ཨུལཱ༹རཏམཾ པཱིཏིསོམནསྶཾ ཨུདཔཱདི, ཏསྨཱ ‘‘ཨིམསྶཔི ཨུདཱནསྶཱ’’ཏིཨཱདི ཝུཏྟཾ.

༩. སངྐཱསནསུཏྟཝཎྞནཱ

༡༠༨༩. ཨཏྠསཾཝཎྞནེ ¶ ཝཎྞཱིཡནྟེཏི ཝཎྞཱ. ཏེཡེཝ པརིཡཱཡེན ཨཀྑརཎཏོ ཨཀྑརཱནི ¶ . ཨཏྠཾ བྱཉྫེནྟཱིཏི བྱཉྫནཱནི. ཡསྨཱ པན ཨཀཱརཱདིཀེ སརསམཉྙཱ, ཀཀཱརཱདིཀེ བྱཉྫནསམཉྙཱ, ཨུབྷཡཏྠ ཝཎྞསམཉྙཱ, ཏསྨཱ ཝུཏྟཾ ‘‘ཝཎྞཱནཾ ཝཱ ཨེཀདེསཱ ཡདིདཾ བྱཉྫནཱ ནཱམཱ’’ཏི. ནེཏྟིཡཾ པན ཝཱཀྱེ བྱཉྫནསམཉྙཱ. བྱཉྫནགྒཧཎེནེཝ ཙེཏྠ ཨཱཀཱརནིརུཏྟིནིདྡེསཱ གཧིཏཱ ཨེཝཱཏི དཊྛབྦཾ. སངྐཱསནཱཏི ཨཏྠསྶ ཉཱཔནཱ བྷཱགསོ. ཏེནཱཧ ‘‘ཝིབྷཏྟིཡོ’’ཏི. སངྐཱསནགྒཧཎེནེཝ ཙེཏྠ པཀཱསནཱ ཝུཏྟཱ ཧོཏི. ཝིབྷཏྟིཡོ ཧི ཨཏྠཝཙནེནེཝ ཝིཝརནྟི, ཏཱཧི ཀཱརཎཔཉྙཏྟིཡོ ཝུཏྟཱཡེཝཱཏི, ཏཱཧིཔི ཨཏྠཔདཱནི གཧིཏཱནེཝ ཧོནྟི. ཨཡམེཏྠ སངྑེཔོ, ཝིཏྠཱརོ པན ཝིསུདྡྷིམགྒཝཎྞནཱཡཾ ནེཏྟིཨཊྛཀཐཱཡཉྩ ཝུཏྟནཡེན ཝེདིཏབྦོ. སབྦཱཀཱརེནཱཏི སབྷཱགཱདིཝིབྷཱཝནཱཀཱརེན. ཝཎྞཱདཱིནནྟི ཏསྨིཾ པན ཝིཏྠཱརེ པཝཏྟཝཎྞཱདཱིནཾ. ཏསྨཱཏི ཝཎྞཱདཱིནཾ ཨནྟཨབྷཱཝཏོ. ཨེཝམཱཧཱཏི ‘‘ཨཔརིམཱཎཱ ཝཎྞཱ བྱཉྫནཱ སངྐཱསནཱ’’ཏི ཨེཝམཱཧ.

༡༠. ཏཐསུཏྟཝཎྞནཱ

༡༠༩༠. སབྷཱཝཱཝིཛཧནཊྛེནཱཏི ཨཏྟནོ དུཀྑསབྷཱཝསྶ ཀདཱཙིཔི ཨཔརིཙྩཛནེན ཏཐསབྷཱཝཾ. ཏེནཱཧ ‘‘དུཀྑཉྷི དུཀྑམེཝ ཝུཏྟ’’ནྟི. སབྷཱཝསྶཱཏི དུཀྑསབྷཱཝསྶ. ཨམོགྷཏཱཡཱཏི ཨཝཉྫྷཏཱཡ. ཨཝིཏཐནྟི ན ཝིཏཐཾ. ཏེནཱཧ ‘‘ན ཧི དུཀྑཾ ཨདུཀྑཾ ནཱམ ཧོཏཱི’’ཏི. ཨཉྙབྷཱཝཱནུཔགམེནཱཏི སམུདཡཱདིསབྷཱཝཱནུཔགམནེན མུསཱ ན ཧོཏཱིཏི ཨཉྙོ ཨཉྙཐཱ ན ཧོཏཱིཏི ཨནཉྙཐཾ. ཏེནཱཧ ‘‘ན ཧཱི’’ཏིཨཱདི.

དྷམྨཙཀྐཔྤཝཏྟནཝགྒཝཎྞནཱ ནིཊྛིཏཱ.

༣. ཀོཊིགཱམཝགྒོ

༡. ཀོཊིགཱམསུཏྟཝཎྞནཱ

༡༠༩༡. ཨནནུབོདྷཱཏི ¶ པཊིཝེདྷསྶ ཨནུརཱུཔབོདྷཱབྷཱཝེན. ཨཔྤཊིཝེདྷཱཏི སཙྩཱནཾ པཊིམུཁཾ ཝེདྷཱབྷཱཝེན.

༢. དུཏིཡཀོཊིགཱམསུཏྟཝཎྞནཱ

༡༠༩༢. ཕལསམཱདྷིཕལཔཉྙཱནནྟི ¶ ཨགྒཕལསམཱདྷིཨགྒཕལཔཉྙཱནཾ.

༧. ཏཐསུཏྟཝཎྞནཱ

༡༠༩༧. ཨརིཡཱནནྟི བུདྡྷཱནཾ ཨརིཡཱནཾ. ཏེནཱཧ ‘‘ན ཧཱི’’ཏིཨཱདི.

༨. ལོཀསུཏྟཝཎྞནཱ

༡༠༩༨. པཊིཝིདྡྷཏྟཱ དེསིཏཏྟཱ ཙཱཏི ཨིམིནཱ པཊིཝེདྷཉཱཎེན དེསནཱཉཱཎེན ཙ པརིགྒཧིཏཏྟཱ ཨརིཡསནྟཀཱནི ཧོནྟི ཨརིཡསྶ བྷགཝཏོ སནྟཀབྷཱཝཏོ.

༡༠. གཝམྤཏིསུཏྟཝཎྞནཱ

༡༡༠༠. ཨེཀཔྤཊིཝེདྷོཏི ཨེཀེནེཝ ཉཱཎེན ཙཏུནྣཾ ཨརིཡསཙྩཱནཾ ཨེཀཛ྄ཛྷཾ པཊིཝེདྷོ.

ཀོཊིགཱམཝགྒཝཎྞནཱ ནིཊྛིཏཱ.

༤. སཱིསཔཱཝནཝགྒོ

༣. དཎྜསུཏྟཝཎྞནཱ

༡༡༠༡. པུནཔྤུནཾ ཝཊྚསྨིཾཡེཝ ནིབྦཏྟནྟི ཨདིཊྛཏྟཱ ཙཏུནྣཾ ཨརིཡསཙྩཱནཾ.

༥. སཏྟིསཏསུཏྟཝཎྞནཱ

༡༡༠༥. བྷཝེཡྻ ¶ ཙེཏི དུཀྑདོམནསྶཱནི ཨཛ྄ཛྷུཔེཀྑིཏྭཱ སཧིཏེཧི ཏེཧི སཙྩཱབྷིསམཡོ བྷཝེཡྻཱཏི ཨེཝཾ པརིཀཔྤནཱ ན ཀཱཏབྦཱཏི.

༩. ཨིནྡཁཱིལསུཏྟཝཎྞནཱ

༡༡༠༩. ཨཛ྄ཛྷཱསཡནྟི ¶ སསྶཏཱདིབྷེདཾ ཨཛ྄ཛྷཱསཡཾ. སོ ཧི ‘‘ཨིདམེཝ སཙྩཾ མོགྷམཉྙ’’ནྟི གཱཧསྶ མུཁབྷཱུཏཏྟཱ མུཁནྟི ཨདྷིཔྤེཏོ. ཏཉྩ ཨཔརེ ཨདིཊྛསཙྩཱ ཨོལོཀེནྟི, དིཊྛསཙྩཱ པན ནེཝ ཨོལོཀེནྟི.

༡༠. ཝཱདཏྠིཀསུཏྟཝཎྞནཱ

༡༡༡༠. ཀུཀྐུཀོ པམཱཎམཛ྄ཛྷིམསྶ པུརིསསྶ ཧཏྠོཏི ཨཏྠོ. ཀུཀྐཱུཏི ཏསྶེཝ ནཱམཾ.

སཱིསཔཱཝནཝགྒཝཎྞནཱ ནིཊྛིཏཱ.

༥. པཔཱཏཝགྒོ

༡. ལོཀཙིནྟཱསུཏྟཝཎྞནཱ

༡༡༡༡. ལོཀཙིནྟནྟི ལོཀསནྣིཝེསཔཊིསཾཡུཏྟཝཱིམཾསཱཝ. ‘‘ལོཀཙིཏྟ’’ནྟིཔི པཱཋོ, ཏཾཏཾལོཀཔརིཡཱཔནྣཾ ཙིཏྟནྟི ཨཏྠོ. ནཱལི༹ཀེརཱདཡོཏི ཨཱདི-སདྡེན ཨཝུཏྟཱནཾ ཨོསདྷིཏིཎཝནཔྤཏིཨཱདཱིནཾ སངྒཧོ. ཨེཝརཱུཔནྟི ཨེདིསཾ ཨཉྙམྤི ཏཾཏཾལོཀཙིཏྟཾ.

ཝིགཏཙིཏྟོཏི ཨཏྟཏྠཔརཏྠཏོ ཨཔགཏཝིཏཀྐོ ཨདྡས ཨེཝཾ ཨདྷིཊྛཧིཾསཱུཏི སམྦནྡྷོ. སམྦརིམཱཡནྟི སམྦརེན ཨསུརིནྡེན ཨུཔྤཱདིཏཾ ཨསུརམཱཡཾ, ཡཾ ‘‘ཨིནྡཛཱལ’’ནྟིཔི ཝུཙྩཏི ཨིནྡསྶ མོཧནཏྠཾ ཨུཔྤཱདིཏཏྟཱ. སམྤརིཝཏྟེཏྭཱཏི པརིདྷཱཝེཏྭཱ. ཡཐཱ ནེཏི ནེ ཨསུརེ ཡཐཱ སོ པུརིསོ པསྶཏི, ཨེཝཾ ཨདྷིཊྛཧིཾསུ. ཀསྨཱ པནེཏེ ཨེཝཾ ཨདྷིཊྛཧིཾསཱུཏི? ཏཾ པུརིསཾ ཏཏྠ ཏཐཱནིསིནྣཾ དིསྭཱ ‘‘ཨཡཉྩ དེཝོ’’ཏི ཨཱསངྐནྟཱ ཏཐཱ ཨདྷིཊྛཧིཏྭཱ བྷིསམུལཱ༹ལཚིདྡེཧི པཝིསིཏྭཱ ཨཏྟནོ ཨསུརབྷཝནཾ གཏཱ. ཏེནཱཧ བྷགཝཱ – ‘‘དེཝཱནཾཡེཝ མོཧཡམཱནཱ’’ཏི.

༢-༣. པཔཱཏསུཏྟཱདིཝཎྞནཱ

༡༡༡༢-༣. མརིཡཱདཔཱསཱཎོཏི ¶ ¶ གིཛ྄ཛྷཀཱུཊཔབྦཏསྶ མརིཡཱདཔཱཀཱརསདིསོ མཧནྟོ པཱསཱཎོ. ཨནིཊྛརཱུཔནྟི ཨེཏྠ རཱུཔ-སདྡོ སབྷཱཝཏྠོ ‘‘པིཡརཱུཔེ སཱཏརཱུཔེ’’ཏིཨཱདཱིསུ (མ. ནི. ༡.༤༠༨-༤༠༩) ཝིཡཱཏི ཨཱཧ – ‘‘ཨནིཊྛསབྷཱཝ’’ནྟི.

༥. ཝཱལསུཏྟཝཎྞནཱ

༡༡༡༥. ཨུཔཱསནནྟི ཨཱཙརིཡཨུཔཱསནཾ, ཨཱཙརིཡཾ ཨནྟེཝཱསིནཱ ཝཱ དིཝསེ དིཝསེ སིཀྑནཝསེན ཨུཔཱསིཏབྦཏོ ཨུཔཱསནནྟི ལདྡྷནཱམཾ ཀཎྜཁིཔནསིཔྤཾ. ཀཎྜཾ ཨཏིཀྐམནྟེཏི སརཾ ཁིཔནྟེ. པོངྑཱནུཔོངྑནྟི པོངྑསདྡཏྠཾ པཱཀཊཾ ཀཏྭཱ དསྶེཏུཾ ‘‘ཨེཀཾ ཀཎྜཾ ཁིཔིཏྭཱ’’ཏིཨཱདི ཝུཏྟཾ. ཨཔརཾ ཨནུཔོངྑནྟི ཨེཏྠ ཨཔརནྟི ཏཏིཡཀཎྜཾ. ཨནུཔོངྑཾ ནཱམ ཨིདནྟི དསྶེཏུཾ ‘‘ཨནུཔོངྑཾ ནཱམ དུཏིཡསྶ པོངྑ’’ནྟི ཝུཏྟཾ. ཏཉྷི ཏཏིཡེན སརེན ཝིཛ྄ཛྷཱིཡཏི. པུན ཨཔརཾ ཏསྶ པོངྑནྟི ཨིདཾ པན ཨཔརཱཔརཾ ཨཝིརཛ྄ཛྷནཾ དསྶེཏུཾ ཝུཏྟཾ. དུརབྷིསམྦྷཝཏརནྟི ཨབྷིབྷཝིཏུཾ ཨསཀྐུཎེཡྻཏརཾ. ཝཱལནྟི ཀེསཾ. སཏྟདྷཱ བྷིནྡིཏྭཱཏི སཏྟཀྑཏྟུཾ ཝིཕཱལེཏྭཱ. ཏསྶ ཨེཀཾ བྷེདནྟི ཏསྶ ཀེསསྶ ཨེཀཾ ཨཾསུསངྑཱཏཾ བྷེདཾ གཧེཏྭཱ. ཝཱཏིངྒཎམཛ྄ཛྷེ བནྡྷིཏྭཱཏི ཝཱཏིངྒཎཕལསྶ མཛ྄ཛྷཊྛཱནེ བནྡྷིཏྭཱ. ཨཔརཾ བྷེདནྟི ཨཔརཾ ཀེསསྶ ཨཾསུསངྑཱཏཾ བྷེདཾ. ཨགྒཀོཊིཡཾ བནྡྷིཏྭཱཏི ཡཐཱ ཏསྶ ཝཱལབྷེདསྶ ཨཱུཀཱམཏྟཾ ལིཁཱམཏྟཾ ཝཱ ཀཎྜསྶ ཨགྒཀོཊིཾ ཨདྷིཀཾ ཧུཏྭཱ ཏིཊྛཏི, ཨེཝཾ བནྡྷིཏྭཱ. ཨུསབྷམཏྟེཏི ཝཱིསཏིཡཊྛིམཏྟེ ཋཱནེ ཋིཏོ. ཀཎྜབདྡྷཱཡ ཀོཊིཡཱཏི ཀཎྜབདྡྷཱཡ ཝཱལསྶ ཀོཊིཡཱ ཝཱཏིངྒཎབནྡྷནཝཱལསྶ ཀོཊིཾ པཊིཝིཛ྄ཛྷེཡྻ.

༨. དུཏིཡཚིགྒལ༹ཡུགསུཏྟཝཎྞནཱ

༡༡༡༨. ཨདྷིཙྩུཔྤཏྟིཀནྟི ཡདིཙྪཱཝསེན ཨུཔྤཛྫནཀཾ. ཚིགྒལེ༹ནཱཏི ཚིགྒལ༹པདེསེན. ཚིགྒལུ༹པརཱིཏི ཧེཊྛིམཡུགསྶ ཚིགྒལ༹པདེསསྶ ཨུཔརི. ཨཱརུལ༹ྷསྶ ཚིགྒལེ༹ནཱཏི ཨུབྷིནྣམྤི ཚིདྡེན. གཱིཝཔྤཝེསནཾ ཝིཡཱཏི ཙཏུནྣཾ ཡུགཱནཾ ཚིདྡཔདེསེནེཝ ཨུཔརཱུཔརི ཋིཏཱནཾ ཚིདྡནྟརེན ཀཱཎཀཙྪཔསྶ གཱིཝཔྤཝེསནཾ ¶ ཨདྷིཙྩཏརསམྦྷཝཾ. ཏཏོཔི ཨདྷིཙྩཏརསམྦྷཝོ མནུསྶཏྟལཱབྷོ, ཏཏོ ཨདྷིཙྩཏམསམྦྷཝོ ཨརིཡམགྒཔཊིལཱབྷོཏི དསྶེནྟོ ཨཱཧ ‘‘ཙཏུསཙྩཔཊིཝེདྷོ ཨཏིཝིཡ ཨདྷིཙྩཏརསམྦྷཝོ’’ཏི.

པཔཱཏཝགྒཝཎྞནཱ ནིཊྛིཏཱ.

༦. ཨབྷིསམཡཝགྒཝཎྞནཱ

༡༡༢༡. ཨབྷིསམཡསཾཡུཏྟེ ¶ ཝིཏྠཱརིཏོཝ, ཏསྨཱ ཏཏྠ ཝུཏྟནཡེནེཝ ཏསྶ ཨཏྠོ ཝེདིཏབྦོ.

༧. པཋམཨཱམཀདྷཉྙཔེཡྻཱལཝགྒོ

༣. པཉྙཱསུཏྟཝཎྞནཱ

༡༡༣༣. ལོཀིཡམྤི ཝིསུདྡྷཏྠེན ‘‘ཨརིཡ’’ནྟི ཝཏྟབྦཏཾ ལབྷཏཱིཏི ‘‘ལོཀིཡལོཀུཏྟརེནཱ’’ཏི ཝུཏྟཾ.

༤. སུརཱམེརཡསུཏྟཝཎྞནཱ

༡༡༣༤. པིཊྛསུརཱཏི པིཊྛེན ཀཱཏབྦསུརཱ, ཏཐཱ ཨོདནསུརཱ པཱུཝསུརཱ, མཛྫརསཱདིབྷཱུཏེ ཀིཎྞེ པཀྑིཔིཏྭཱ ཀཏྟབྦཱ སུརཱ ཀིཎྞཔཀྑིཏྟསུརཱ. སམྦྷཱརསཾཡུཏྟཱཏི མཱུལབྷེསཛྫསམྦྷཱརེཧི སཾཡུཏྟཱ. པུཔྥཱསཝོཏི ནཱལི༹ཀེརཔུཔྥཱདིཏོ ཨསྶཝནཀཨཱསཝོ. མུདྡིཀཕལཱདིཏོ ཨསྶཝནཀཨཱསཝོ ཕལཱསཝོ. ཨིཏཱིཏིཨཱདིཨཏྠོ. ཏེན མདྷྭཱསཝགུལཱ༹སཝསམྦྷཱརསཾཡུཏྟེ སངྒཎྷཱཏི. སུརཱསཝཝིནིམུཏྟནྟི ཡཐཱཝུཏྟསུརཱསཝཝིནིམུཏྟཾ.

༡༠. པཙཱཡིཀསུཏྟཝཎྞནཱ

༡༡༤༠. ནཱིཙཝུཏྟིནོཏི ཀུལེ ཛེཊྛཱནཾ མཧཱཔིཏུཙཱུལ༹པིཏུཛེཊྛབྷཱཏིཀཱདཱིནཾ ཨབྷིཝཱདནཔཙྩུཊྛཱནཨཉྫལིཀམྨསཱམཱིཙིཀམྨཱདིཝསེན ནཱིཙཝུཏྟིནོ.

༨. དུཏིཡཨཱམཀདྷཉྙཔེཡྻཱལཝགྒོ

༨. བཱིཛགཱམསུཏྟཝཎྞནཱ

༡༡༤༨. ‘‘མཱུལབཱིཛ’’ནྟིཨཱདཱིསུ ¶ ¶ མཱུལམེཝ བཱིཛནྟི མཱུལབཱིཛཾ, མཱུལབཱིཛཾ ཨེཏསྶཱཏིཔི མཱུལབཱིཛཾ. ཏཏྠ པུརིམེན བཱིཛགཱམོ ཝུཏྟོ ‘‘བཱིཛཱནཾ སམཱུཧོ’’ཏི ཀཏྭཱ, དུཏིཡེན བྷཱུཏགཱམོ. དུཝིདྷོཔེསོ སཱམཉྙནིདྡེསེན, ‘‘མཱུལབཱིཛཉྩ མཱུལབཱིཛཉྩ མཱུལབཱིཛ’’ནྟི ཨེཀསེསནཡེན ཝཱ བཱིཛཏྠོ ཝེདིཏབྦོ. ཨེས ནཡོ སེསེསུཔི. ཕལུ༹བཱིཛནྟི པབྦབཱིཛཾ. བཱཧིརཔཙྩཡནྟརསམཝཱཡེ སདིསཕལུཔྤཏྟིཡཱ ཝིསེསཀཱརཎབྷཱཝཏོ ཝིརུཧནསམཏྠེ སཱརཕལེ ནིརུལ༹ྷོ བཱིཛ-སདྡོ. ཏདཏྠསིདྡྷིཡཱ མཱུལཱདཱིསུཔི ཀེསུཙི པཝཏྟཏཱིཏི ཏཏོ ནིཝཏྟནཏྠཾ ཨེཀེན བཱིཛ-སདྡེན ཝིསེསེཏྭཱ ཝུཏྟཾ ‘‘བཱིཛབཱིཛ’’ནྟི ‘‘རཱུཔརཱུཔཾ, དུཀྑདུཀྑ’’ནྟི (སཾ. ནི. ༤.༣༢༧) ཙ ཡཐཱ. ནཱིལཏིཎརུཀྑཱདིཀསྶཱཏི ཨལླཏིཎསྶ ཙེཝ ཨལླརུཀྑཱདིཀསྶ ཙ. ཨཱདི-སདྡེན ཨོསདྷིགཙྪལཏཱདཱིནཾ གཧཎཾ.

༩. ཝིཀཱལབྷོཛནསུཏྟཝཎྞནཱ

༡༡༤༩. ཨརུཎུགྒམནཏོ པཊྛཱཡ ཡཱཝ མཛ྄ཛྷནྷིཀོ, ཨཡཾ བུདྡྷཱདིཨརིཡཱནཾ ཨཱཙིཎྞསམཱཙིཎྞོ བྷོཛནསྶ ཀཱལོ, ཏདཉྙོ ཝིཀཱལོཏི ཨཱཧ – ‘‘ཝིཀཱལབྷོཛནཱཏི ཀཱལཱཏིཀྐནྟབྷོཛནཱ’’ཏི.

༡༠. གནྡྷཝིལེཔནསུཏྟཝཎྞནཱ

༡༡༥༠. ཡཾ ཀིཉྩི པུཔྥནྟི གནྠིམཾ ཨགནྠིམཾ ཝཱ ཡཾ ཀིཉྩི པུཔྥཛཱཏཾ, ཏཐཱ པིསིཏཱདིབྷེདཾ ཡཾ ཀིཉྩི གནྡྷཛཱཏཾ.

༩. ཏཏིཡཨཱམཀདྷཉྙཔེཡྻཱལཝགྒོ

༡. ནཙྩགཱིཏསུཏྟཝཎྞནཱ

༡༡༥༡. སངྑེཔཏོ ¶ ‘‘སབྦཔཱཔསྶ ཨཀརཎ’’ནྟིཨཱདིནཡཔྤཝཏྟཾ (དཱི.ནི. ༢.༩༠; དྷ.པ. ༡༨༣) བྷགཝཏོ སཱསནཾ ཨཙྩནྟཚནྡརཱགཔཝཏྟིཏོ ནཙྩཱདཱིནཾ དསྶནཾ ན ཨནུལོམེཏཱིཏི ཨཱཧ ‘‘སཱསནསྶ ཨནནུལོམཏྟཱ’’ཏི. ཨཏྟནཱ པརེཧི ཙ པཡོཛིཡམཱནཾ ¶ པཡོཛཱཔིཡམཱནཉྩ ཨེཏེནེཝ ནཙྩ-སདྡེན གཧིཏཾ, ཏཐཱ གཱིཏཝཱདིཏསདྡེཧི ཙཱཏི ཨཱཧ – ‘‘ནཙྩནནཙྩཱཔནཱདིཝསེནཱ’’ཏི. ཨཱདི-སདྡེན གཱཡན-གཱཡཱཔན-ཝཱདན-ཝཱདཱཔནཱདཱིནི སངྒཎྷཱཏི. དསྶནེན ཙེཏྠ སཝནམྤི སངྒཧིཏཾ ཝིརཱུཔེཀསེསནཡེན. ཡཐཱསཀཾ ཝིསཡསྶ ཨཱལོཙནསབྷཱཝཏཱཡ ཝཱ པཉྩནྣཾ ཝིཉྙཱཎཱནཾ སཝནཀིརིཡཱཡཔི དསྶནསངྑེཔསབྦྷཱཝཏོ ‘‘དསྶནཱ’’ཨིཙྩེཝ ཝུཏྟཾ. ཨཝིསཱུཀབྷཱུཏསྶ གཱིཏསྶ སཝནཾ ཀདཱཙི ཝཊྚཏཱིཏི ཨཱཧ – ‘‘ཝིསཱུཀབྷཱུཏཱ དསྶནཱ ཙཱ’’ཏི. ཏཐཱ ཧི ཝུཏྟཾ པརམཏྠཛོཏིཀཱཡ ཁུདྡཀཨཊྛཀཐཱཡ (ཁུ. པཱ. ཨཊྛ. ༢.པཙྪིམཔཉྩསིཀྑཱཔདཝཎྞནཱ) – ‘‘དྷམྨཱུཔསཾཧིཏཾ གཱིཏཾ ཝཊྚཏི, གཱིཏཱུཔསཾཧིཏོ དྷམྨོ ན ཝཊྚཏཱི’’ཏི.

༢. ཨུཙྩཱསཡནསུཏྟཝཎྞནཱ

༡༡༥༢. ཨུཙྩཱཏི ཨུཙྩ-སདྡེན སམཱནཏྠཾ ཨེཀཾ སདྡནྟརཾ. སེཏི ཨེཏྠཱཏི སཡནཾ, ཨུཙྩཱསཡནཾ མཧཱསཡནཉྩ སམཎསཱརུཔྤརཧིཏཾ པཊིཀྑིཏྟནྟི ཨཱཧ – ‘‘པམཱཎཱཏིཀྐནྟཾ ཨཀཔྤིཡཏྠརཎ’’ནྟི. ཨཱསནྡཱདིཨཱསནཉྩེཏྠ སཡནེནེཝ སངྒཧིཏཾ. ཡསྨཱ པན ཨཱདྷཱརེ པཊིཀྑིཏྟེ ཏདཱདྷཱརཀིརིཡཱ པཊིཀྑིཏྟཱཝ ཧོཏི, ཏསྨཱ ‘‘ཨུཙྩཱསཡནམཧཱསཡནཱ’’ཨིཙྩེཝ ཝུཏྟཾ. ཨཏྠཏོ པན ཏདུཔབྷོགབྷཱུཏནིསཛྫཱནིཔཛྫནེཧི ཝིརཏི དསྶིཏཱཏི དཊྛབྦཾ. ཨཐ ཝཱ ཨུཙྩཱསཡནམཧཱསཡནཉྩ ཨུཙྩཱསཡནམཧཱསཡནཉྩཱཏི ཨུཙྩཱསཡནམཧཱསཡནནྟི ཨེཏསྨིཾ ཨཏྠེ ཨེཀསེསནཡེན ཨཡཾ ནིདྡེསོ ཀཏོ ཡཐཱ – ‘‘ནཱམརཱུཔཔཙྩཡཱ སལཱ༹ཡཏན’’ནྟི (ཨུདཱ. ༡). ཨཱསནཀིརིཡཱཔུབྦཀཏྟཱ ཝཱ སཡནཀིརིཡཱཡ སཡནགྒཧཎེནེཝ ཨཱསནམྤི གཧིཏནྟི དཊྛབྦཾ.

༣. ཛཱཏརཱུཔསུཏྟཝཎྞནཱ

༡༡༥༣. ཨཉྙེཔི ཨུགྒཧཱཔནེ ཨུཔནིཀྑིཏྟསཱདིཡནེ ཙ པཊིགྒཧཎཏྠོ ལབྦྷཏཱིཏི ཨཱཧ ¶ – ‘‘ན ཨུགྒཎྷཱཔེནྟི, ན ཨུཔནིཀྑིཏྟཾ སཱདིཡནྟཱི’’ཏི. ཨཐ ཝཱ ཏིཝིདྷཾ པཊིགྒཧཎཾ ཀཱཡེན ཝཱཙཱཡ མནསཱཏི. ཏཏྠ ཀཱཡེན པཊིགྒཧཎཾ ཨུགྒཧཎཾ, ཝཱཙཱཡ པཊིགྒཧཎཾ ཨུགྒཧཱཔཎཾ, མནསཱ པཊིགྒཧཎཾ སཱདིཡནཾ. ཏིཝིདྷམྤི པཊིགྒཧཎཾ སཱམཉྙནིདྡེསེན, ཨེཀསེསནཡེན ཝཱ གཧེཏྭཱ ‘‘པཊིགྒཧཎཱ’’ཏི ཝུཏྟནྟི ཨཱཧ – ‘‘ནེཝ ནཾ ཨུགྒཎྷནྟཱི’’ཏིཨཱདི. ཨེས ནཡོ ‘‘ཨཱམཀདྷཉྙཔཊིགྒཧཎཱ’’ཏིཨཱདཱིསུཔི.

༤. ཨཱམཀདྷཉྙསུཏྟཝཎྞནཱ

༡༡༥༤. ནཱིཝཱརཱདིཨུཔདྷཉྙསྶ ¶ སཱལིཨཱདིམཱུལདྷཉྙནྟོགདྷཏྟཱ ཝུཏྟཾ ‘‘སཏྟཝིདྷསྶཱ’’ཏི.

༥. ཨཱམཀམཾསསུཏྟཝཎྞནཱ

༡༡༥༥. ‘‘ཨནུཛཱནཱམི, བྷིཀྑཝེ, པཉྩ ཝསཱནི བྷེསཛྫཱནི – ཨཙྪཝསཾ, མཙྪཝསཾ, སུསུཀཱཝསཾ, སཱུཀརཝསཾ, གདྲབྷཝས’’ནྟི (མཧཱཝ. ༢༦༢; པཱརཱ. ཨཊྛ. ༦༢༣) ཝུཏྟཏྟཱ ཨིདཾ ཨུདྡིསྶ ཨནུཉྙཱཏཾ ནཱམ. ཏསྶ པན ‘‘ཀཱལེ པཊིགྒཧིཏ’’ནྟི (མཧཱཝ. ༢༦༢) ཝུཏྟཏྟཱ པཊིགྒཧཎཾ ཝཊྚཏཱིཏི ཨཱཧ – ‘‘ཨཉྙཏྲ ཨུདྡིསྶ ཨནུཉྙཱཏཱ’’ཏི. ཝིནཡཝསེན ཨུཔཔརིཀྑིཏབྦོ, ཏསྨཱ སམནྟཔཱསཱདིཀཱཡ ཝིནཡཊྛཀཐཱཡ ཝུཏྟནཡེནེཏྠ ཝིནིཙྪཡོ ཝེདིཏབྦོ.

༡༠. ཙཏུཏྠཨཱམཀདྷཉྙཔེཡྻཱལཝགྒོ

༢-༣. ཀཡཝིཀྐཡསུཏྟཱདིཝཎྞནཱ

༡༡༦༢-༦༣. ཀསྶཙི བྷཎྜསྶ གཧཎཾ ཀཡོ, དཱནཾ ཝིཀྐཡོ. ཏཏྠ ཏཏྠཱཏི གཱམནྟརེ སནྟིཀེ ཙ གམནཾ དཱུཏཀམྨནྟི ཝུཙྩཏཱིཏི ཡོཛནཱ. པཧིཎགམནཾ ཁུདྡཀགམནཾ.

༤. ཏུལཱཀཱུཊསུཏྟཝཎྞནཱ

༡༡༦༤. རཱུཔཀཱུཊཾ སརཱུཔེན སདིསེན ཚལཝོཧཱརོ. ཨངྒཀཱུཊཾ ཨཏྟནོ ཧཏྠཱདིནཱ ཨངྒཱནཾ ཚལཀརཎཾ ¶ . གཧཎཀཱུཊཾ མཱནེསུ གཧཎཝསེན. པཊིཙྪནྣཀཱུཊཾ ཨཡཙུཎྞཱདིནཱ པཊིཙྪནྣེན ཚལཀརཎཾ. མཧཏིཡཱ ཏུལཱཡ. པཙྪཱབྷཱགེཏི ཏུལཱཡ པཙྪིམབྷཱགེ. ཧཏྠེནཱཏི ཧཏྠཔདེསེན. ཨཀྐམཏཱིཏི ཨུཊྛཱཏུཾ ཨདེནྟོ གཎྷཱཏི. དདནྟོ པུབྦབྷཱགེཏི པརེསཾ དདནྟོ པུབྦབྷཱགེ ཧཏྠེན ཏུལཾ ཨཀྐམཏི. ཏནྟི ཨཡཙུཎྞཾ.

ལོཧཔཱཏིཡོཏི ཏམྦལོཧཔཱཏིཡོ. སུཝཎྞཝཎྞཱ ཀརོནྟཱིཏི ཨསནིཁཱདསུཝཎྞཀནཀལིམྤིཏཱ སུཝཎྞཝཎྞཱ ཀརོནྟི. མཱནབྷཱཛནསྶ ¶ ཧདཡབྷཱུཏསྶ ཨབྦྷནྟརསྶ བྷིནྣཾ ཧདཡབྷེདོ. ནིམིཡམཱནསྶ ཏིལཏཎྜུལཱདིཀསྶ སིཁཱཡ ཨགྒཀོཊིཡཱ བྷིནྣཾ སིཁཱབྷེདོ. ཁེཏྟཱདཱིནཾ མིནནརཛྫུཡཱ ཨཉྙཐཱཀརཎཾ རཛྫུབྷེདོ. རཛྫུགཧཎེནེཝ ཙེཏྠ དཎྜཀསྶ གཧཎཾ ཀཏམེཝཱཏི དཊྛབྦཾ.

༦-༡༡. ཚེདནསུཏྟཱདིཝཎྞནཱ

༡༡༦༦-༧༡. ཝདྷོཏི མུཊྛིཔྤཧཱརཀསཱཏཱལ༹ནཱདཱིཧི ཧིཾསནཾ, ཝིཧེཋནནྟི ཨཏྠོ. ཝིཧེཋནཏྠོཔི ཧི ཝདྷ-སདྡོ དིསྶཏི ‘‘ཨཏྠཱནཾ ཝདྷིཏྭཱ ཝདྷིཏྭཱ རོདེཡྻཱ’’ཏིཨཱདཱིསུ. ཨཊྛཀཐཱཡཾ པན ‘‘མཱརཎ’’ནྟི ཝུཏྟཾ, ཏཾ པན པོཐནཾ སནྡྷཱཡཱཏི སཀྐཱ ཝིཉྙཱཏུཾ མཱརཎསདྡསྶ ཝིཧིཾསནེཔི དིསྶནཏོ. སེསཾ སུཝིཉྙེཡྻམེཝ.

ཨཱམཀདྷཉྙཔེཡྻཱལཝགྒཝཎྞནཱ ནིཊྛིཏཱ.

སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ

མཧཱཝགྒཝཎྞནཱཡ ལཱིནཏྠཔྤཀཱསནཱ ནིཊྛིཏཱ.

ནིགམནཀཐཱཝཎྞནཱ

སཀལརཱུཔཱརཱུཔསམྨསནེ ¶ སཎྷསུཁུམཝིསཡཉཱཎཏཱཡ ཝིཔསྶནཱཙཱརནིཔུཎབུདྡྷཱིནཾ སུསཾཡཏཀཱཡཝཙཱིསམཱཙཱརཏཱཡ སམཐཝིཔསྶནཱསུ སམྨདེཝ ཡཏནཏོ ཙ ཡཏཱིནཾ བྷིཀྑཱུནཾ ཁནྡྷཱཡཏནདྷཱཏུསཙྩིནྡྲིཡཔཊིཙྩསམུཔྤཱདབྷེདེ པརམཏྠདྷམྨེ ནཱནཱནཡེཧི ཉཱཎཝིབྷཱགསྶ སནྣིསྶཡེན བཧུཀཱརསྶ སཾཡུཏྟཱགམཝརསྶ ཨཏྠསཾཝཎྞནཾ ཀཱཏུཾ སཱརཏྠཔྤཀཱསནཏོ ཨེཝ ནིཔུཎཱ ཡཱ མཡཱ ཨཊྛཀཐཱ ཨཱརདྡྷཱཏི སམྦནྡྷོ. སཝིསེསཾ པཉྙཱཝཧགུཎཏྟཱ ཨེཝ ཧིསྶ གནྠཱརམྦྷེ ཨཱདིཏོཔི ‘‘པཉྙཱཔབྷེདཛནནསྶཱ’’ཏི ¶ ཝུཏྟཾ. མཧཱཨཊྛཀཐཱཡ སཱརནྟི སཾཡུཏྟམཧཱཨཊྛཀཐཱཡ སཱརཾ. ཨེཀཱུནསཊྛིམཏྟོཏི ཐོཀཾ ཨཱུནབྷཱཝཏོ མཏྟ-སདྡགྒཧཎཾ.

མཱུལཊྛཀཐཱཡ སཱརནྟི པུབྦེ ཝུཏྟསཾཡུཏྟམཧཱཨཊྛཀཐཱཡ སཱརམེཝ པུན ནིགམནཝསེན ཝུཏྟནྟི. ཨཐ ཝཱ མཱུལཊྛཀཐཱཡ སཱརནྟི པོརཱཎཊྛཀཐཱསུ ཨཏྠསཱརཾ. ཏེན ཨེཏཾ དསྶེཏི ‘‘སཾཡུཏྟམཧཱཨཊྛཀཐཱཡ ཨཏྠསཱརཾ ཨཱདཱཡ ཨིམཾ སཱརཏྠཔྤཀཱསིནིཾ ཀརོནྟེན སེསམཧཱནིཀཱཡཱནམྤི མཱུལཊྛཀཐཱསུ ཨིདྷ ཝིཡོགཀྑམཾ ཨཏྠསཱརཾ ཨཱདཱཡ ཨཀཱསི’’ནྟི. ‘‘མཧཱཝིཧཱརཱདྷིཝཱསཱིན’’ནྟི ཙ ཨིདཾ པུརིམཔཙྪིམཔདེཧི སདྡྷིཾ སམྦནྡྷིཏབྦཾ ‘‘མཧཱཝིཧཱརཱདྷིཝཱསཱིནཾ སམཡཾ པཀཱསཡནྟིཾ མཧཱཝིཧཱརཱདྷིཝཱསཱིནཾ མཱུལཊྛཀཐཱཡ སཱརཾ ཨཱདཱཡཱ’’ཏི ཙ. ཏེན པུཉྙེན. ཧོཏུ སབྦོ སུཁཱི ལོཀོཏི ཀཱམཱཝཙརཱདིཝིབྷཱགོ སབྦོ སཏྟལོཀོ ཡཐཱརཧཾ བོདྷིཏྟཡཱདྷིགམཝསེན སམྤཡུཏྟེན ནིབྦཱནསུཁེན སུཁིཏོ ཧོཏཱུཏི སདེཝཀསྶ ལོཀསྶ ཨཙྩནྟཾ སུཁཱདྷིགམཱཡ ཨཏྟནོ པུཉྙཾ པརིཎཱམེཏི.

ཨེཏྟཱཝཏཱ སཱརཏྠཔྤཀཱསིནིཡཱ

སཾཡུཏྟནིཀཱཡ-ཨཊྛཀཐཱཡ ལཱིནཏྠཔྤཀཱསནཱ ནིཊྛིཏཱ.

སཾཡུཏྟཊཱིཀཱ སམཏྟཱ.