📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཨངྒུཏྟརནིཀཱཡེ

ཨེཀཀནིཔཱཏ-ཊཱིཀཱ

གནྠཱརམྦྷཀཐཱ

ཨནནྟཉཱཎཾ ¶ ¶ ཀརུཎཱནིཀེཏཾ,

ནམཱམི ནཱཐཾ ཛིཏཔཉྩམཱརཾ;

དྷམྨཾ ཝིསུདྡྷཾ བྷཝནཱསཧེཏུཾ,

སངྒྷཉྩ སེཊྛཾ ཧཏསབྦཔཱཔཾ.

ཀསྶཔཾ ཏཾ མཧཱཐེརཾ, སངྒྷསྶ པརིཎཱཡཀཾ;

དཱིཔསྨིཾ ཏམྦཔཎྞིམྷི, སཱསནོདཡཀཱརཀཾ.

པཊིཔཏྟིཔརཱདྷཱིནཾ, སདཱརཉྙནིཝཱསིནཾ;

པཱཀཊཾ གགནེ ཙནྡ-མཎྜལཾ ཝིཡ སཱསནེ.

སངྒྷསྶ ¶ པིཏརཾ ཝནྡེ, ཝིནཡེ སུཝིསཱརདཾ;

ཡཾ ནིསྶཱཡ ཝསནྟོཧཾ, ཝུཌྜྷིཔྤཏྟོསྨི སཱསནེ.

ཨནུཐེརཾ མཧཱཔཉྙཾ, སུམེདྷཾ སུཏིཝིསྶུཏཾ;

ཨཝིཁཎྜིཏསཱིལཱདི-པརིསུདྡྷགུཎོདཡཾ.

བཧུསྶུཏཾ སཏིམནྟཾ, དནྟཾ སནྟཾ སམཱཧིཏཾ;

ནམཱམི སིརསཱ དྷཱིརཾ, གརུཾ མེ གཎཝཱཙཀཾ.

ཨཱགཏཱགམཏཀྐེསུ ¶ , སདྡསཏྠནཡཉྙུསུ;

ཡསྶནྟེཝཱསིབྷིཀྑཱུསུ, སཱསནཾ སུཔྤཏིཊྛིཏཾ.

ཡོ སཱིཧལི༹ནྡོ དྷིཏིམཱ ཡསསྶཱི,

ཨུལཱ༹རཔཉྙོ ནིཔུཎོ ཀལཱསུ;

ཛཱཏོ ཝིསུདྡྷེ རཝིསོམཝཾསེ,

མཧབྦལོ ཨབྦྷུཏཝུཏྟིཏེཛོ.

ཛིཏྭཱརིཝགྒཾ ཨཏིདུཔྤསཡ྄ཧཾ,

ཨནཉྙསཱདྷཱརཎཝིཀྐམེན;

པཏྟཱབྷིསེཀོ ཛིནདྷམྨསེཝཱི,

ཨབྷིཔྤསནྣོ རཏནཏྟཡམྷི.

ཙིརཾ ཝིབྷིནྣེ ཛིནསཱསནསྨིཾ,

པཙྩཏྠིཀེ སུཊྛུ ཝིནིགྒཧེཏྭཱ;

སུདྷཾཝ སཱམགྒིརསཾ པསཏྠཾ,

པཱཡེསི བྷིཀྑཱུ པརིསུདྡྷསཱིལེ.

ཀཏྭཱ ཝིཧཱརེ ཝིཔུལེ ཙ རམྨེ,

ཏཏྲཔྤིཏེནེཀསཧསྶསངྑེ;

བྷིཀྑཱུ ¶ ཨསེསེ ཙཏུཔཙྩཡེཧི,

སནྟཔྤཡནྟོ སུཙིརཾ ཨཁཎྜཾ.

སདྡྷམྨཝུདྡྷིཾ ཨབྷིཀངྑམཱནོ,

སཡམྤི བྷིཀྑཱུ ཨནུསཱསཡིཏྭཱ;

ནིཡོཛཡཾ གནྠཝིཔསྶནཱསུ,

ཨཀཱསི ཝུདྡྷིཾ ཛིནསཱསནསྶ.

ཏེནཱཧམཙྩནྟམནུགྒཧཱིཏོ,

ཨནཉྙསཱདྷཱརཎསངྒཧེན;

ཡསྨཱ པརཀྐནྟབྷུཛཝ྄ཧཡེན,

ཨཛ྄ཛྷེསིཏོ བྷིཀྑུགཎསྶ མཛ྄ཛྷེ.

ཏསྨཱ ¶ ཨནུཏྟཱནཔདཱནམཏྠཾ,

སེཊྛཱཡ ཨངྒུཏྟརཝཎྞནཱཡ;

སནྡསྶཡིསྶཾ སཀལཾ སུབོདྡྷུཾ,

ནིསྶཱཡ པུབྦཱཙརིཡཔྤབྷཱཝཾ.

གནྠཱརམྦྷཀཐཱཝཎྞནཱ

༡. སཾཝཎྞནཱརམྦྷེ རཏནཏྟཡཾ ནམསྶིཏུཀཱམོ ཏསྶ ཝིསིཊྛགུཎཡོགསནྡསྶནཏྠཾ ‘‘ཀརུཎཱསཱིཏལཧདཡ’’ནྟིཨཱདིམཱཧ. ཝིསིཊྛགུཎཡོགེན ཧི ཝནྡནཱརཧབྷཱཝོ, ཝནྡནཱརཧེ ཙ ཀཏཱ ཝནྡནཱ ཡཐཱདྷིཔྤེཏམཏྠཾ སཱདྷེཏི. ཨེཏྠ ཙ སཾཝཎྞནཱརམྦྷེ རཏནཏྟཡཔྤཎཱམཀརཎཔྤཡོཛནཾ ཏཏྠ ཏཏྠ བཧུདྷཱ པཔཉྩེནྟི ཨཱཙརིཡཱ, མཡཾ པན ཨིདྷཱདྷིཔྤེཏམེཝ པཡོཛནཾ དསྶཡིསྶཱམ, ཏསྨཱ སཾཝཎྞནཱརམྦྷེ རཏནཏྟཡཔྤཎཱམཀརཎཾ ཡཐཱཔཊིཉྙཱཏསཾཝཎྞནཱཡ ཨནནྟརཱཡེན པརིསམཱཔནཏྠནྟི ཝེདིཏབྦཾ. ཨིདམེཝ ཧི པཡོཛནཾ ཨཱཙརིཡེན ཨིདྷཱདྷིཔྤེཏཾ. ཏཐཱ ཧི ཝཀྑཏི –

‘‘ཨིཏི མེ པསནྣམཏིནོ, རཏནཏྟཡཝནྡནཱམཡཾ པུཉྙཾ;

ཡཾ སུཝིཧཏནྟརཱཡོ, ཧུཏྭཱ ཏསྶཱནུབྷཱཝེནཱ’’ཏི.

རཏནཏྟཡཔྤཎཱམཀརཎེན ¶ ཙེཏྠ ཡཐཱཔཊིཉྙཱཏསཾཝཎྞནཱཡ ཨནནྟརཱཡེན པརིསམཱཔནཾ རཏནཏྟཡཔཱུཛཱཡ པཉྙཱཔཱཊཝཏོ, ཏཱཡ པཉྙཱཔཱཊཝཉྩ རཱགཱདིམལཝིདྷམནཏོ. ཝུཏྟཉྷེཏཾ –

‘‘ཡསྨིཾ, མཧཱནཱམ, སམཡེ ཨརིཡསཱཝཀོ ཏཐཱགཏཾ ཨནུསྶརཏི, ནེཝསྶ ཏསྨིཾ སམཡེ རཱགཔརིཡུཊྛིཏཾ ཙིཏྟཾ ཧོཏི, ན དོསཔརིཡུཊྛིཏཾ ཙིཏྟཾ ཧོཏི, ན མོཧཔརིཡུཊྛིཏཾ ཙིཏྟཾ ཧོཏི, ཨུཛུགཏམེཝསྶ ཏསྨིཾ སམཡེ ཙིཏྟཾ ཧོཏཱི’’ཏིཨཱདི (ཨ. ནི. ༦.༡༠; ༡༡.༡༡).

ཏསྨཱ རཏནཏྟཡཔཱུཛནེན ཝིཀྑཱལིཏམལཱཡ པཉྙཱཡ པཱཊཝསིདྡྷི.

ཨཐ ཝཱ རཏནཏྟཡཔཱུཛནསྶ པཉྙཱཔདཊྛཱནསམཱདྷིཧེཏུཏྟཱ པཉྙཱཔཱཊཝཾ. ཝུཏྟཉྷི ཏསྶ སམཱདྷིཧེཏུཏྟཾ –

‘‘ཨུཛུགཏཙིཏྟོ ¶ ཁོ པན, མཧཱནཱམ, ཨརིཡསཱཝཀོ ལབྷཏི ཨཏྠཝེདཾ, ལབྷཏི དྷམྨཝེདཾ, ལབྷཏི དྷམྨཱུཔསཾཧིཏཾ པཱམོཛྫཾ, པམུདིཏསྶ པཱིཏི ཛཱཡཏི, པཱིཏིམནསྶ ཀཱཡོ པསྶམྦྷཏི, པསྶདྡྷཀཱཡོ སུཁཾ ཝེདིཡཏི, སུཁིནོ ཙིཏྟཾ སམཱདྷིཡཏཱི’’ཏི (ཨ. ནི. ༦.༡༠; ༡༡.༡༡).

སམཱདྷིསྶ ཙ པཉྙཱཡ པདཊྛཱནབྷཱཝོ ཝུཏྟོཡེཝ – ‘‘སམཱཧིཏོ ཡཐཱབྷཱུཏཾ པཛཱནཱཏཱི’’ཏི (སཾ. ནི. ༣.༥; ༤.༩༩; ༥.༡༠༧༡). ཏཏོ ཨེཝཾ པཊུབྷཱུཏཱཡ པཉྙཱཡ པཊིཉྙཱམཧཏྟཀཏཾ ཁེདམབྷིབྷུཡྻ ཨནནྟརཱཡེན སཾཝཎྞནཾ སམཱཔཡིསྶཏི.

ཨཐ ཝཱ རཏནཏྟཡཔཱུཛཱཡ ཨཱཡུཝཎྞསུཁབལཝཌྜྷནཏོ ཨནནྟརཱཡེན པརིསམཱཔནཾ ཝེདིཏབྦཾ. རཏནཏྟཡཔྤཎཱམེན ཧི ཨཱཡུཝཎྞསུཁབལཱནི ཝཌྜྷནྟི. ཝུཏྟཉྷེཏཾ –

‘‘ཨབྷིཝཱདནསཱིལིསྶ, ནིཙྩཾ ཝུཌྜྷཱཔཙཱཡིནོ;

ཙཏྟཱརོ དྷམྨཱ ཝཌྜྷནྟི, ཨཱཡུ ཝཎྞོ སུཁཾ བལ’’ནྟི. (དྷ. པ. ༡༠༩) –

ཏཏོ ཨཱཡུཝཎྞསུཁབལཝུདྡྷིཡཱ ཧོཏེཝ ཀཱརིཡནིཊྛཱནཾ.

ཨཐ ¶ ཝཱ རཏནཏྟཡགཱརཝསྶ པཊིབྷཱནཱཔརིཧཱནཱཝཧཏྟཱ. ཨཔརིཧཱནཱཝཧཉྷི ཏཱིསུཔི རཏནེསུ གཱརཝཾ. ཝུཏྟཉྷེཏཾ –

‘‘སཏྟིམེ, བྷིཀྑཝེ, ཨཔརིཧཱནཱིཡཱ དྷམྨཱ. ཀཏམེ སཏྟ? སཏྠུགཱརཝཏཱ, དྷམྨགཱརཝཏཱ, སངྒྷགཱརཝཏཱ, སིཀྑཱགཱརཝཏཱ, སམཱདྷིགཱརཝཏཱ, སོཝཙསྶཏཱ, ཀལྱཱཎམིཏྟཏཱ’’ཏི (ཨ. ནི. ༧.༣༤).

ཧོཏེཝ ཙ ཏཏོ པཊིབྷཱནཱཔརིཧཱནེན ཡཐཱཔཊིཉྙཱཏཔརིསམཱཔནཾ.

ཨཐ ཝཱ པསཱདཝཏྠཱུསུ པཱུཛཱཡ པུཉྙཱཏིསཡབྷཱཝཏོ. ཝུཏྟཉྷི ཏསྶཱ པུཉྙཱཏིསཡཏྟཾ –

‘‘པཱུཛཱརཧེ པཱུཛཡཏོ, བུདྡྷེ ཡདི ཝ སཱཝཀེ;

པཔཉྩསམཏིཀྐནྟེ, ཏིཎྞསོཀཔརིདྡཝེ.

ཏེ ¶ ཏཱདིསེ པཱུཛཡཏོ, ནིབྦུཏེ ཨཀུཏོབྷཡེ;

ན སཀྐཱ པུཉྙཾ སངྑཱཏུཾ, ཨིམེཏྟམཔི ཀེནཙཱི’’ཏི. (དྷ. པ. ༡༩༥-༡༩༦; ཨཔ. ཐེར ༡.༡༠.༡-༢);

པུཉྙཱཏིསཡོ ཙ ཡཐཱདྷིཔྤེཏཔརིསམཱཔནཱུཔཱཡོ. ཡཐཱཧ –

‘‘ཨེས དེཝམནུསྶཱནཾ, སབྦཀཱམདདོ ནིདྷི;

ཡཾ ཡདེཝཱབྷིཔཏྠེནྟི, སབྦམེཏེན ལབྦྷཏཱི’’ཏི. (ཁུ. པཱ. ༨.༡༠);

ཨུཔཱཡེསུ ཙ པཊིཔནྣསྶ ཧོཏེཝ ཀཱརིཡནིཊྛཱནཾ. རཏནཏྟཡཔཱུཛཱ ཧི ནིརཏིསཡཔུཉྙཀྑེཏྟསམྦུདྡྷིཡཱ ཨཔརིམེཡྻཔྤབྷཱཝོ པུཉྙཱཏིསཡོཏི བཧུཝིདྷནྟརཱཡེཔི ལོཀསནྣིཝཱསེ ཨནྟརཱཡནིབནྡྷནསཀལསཾཀིལེསཝིདྡྷཾསནཱཡ པཧོཏི, བྷཡཱདིཨུཔདྡཝཉྩ ནིཝཱརེཏི. ཏསྨཱ ཝུཏྟཾ – ‘‘སཾཝཎྞནཱརམྦྷེ རཏནཏྟཡཔྤཎཱམཀརཎཾ ཡཐཱཔཊིཉྙཱཏསཾཝཎྞནཱཡ ཨནནྟརཱཡེན པརིསམཱཔནཏྠ’’ནྟི.

ཨེཝཉྩ སཔྤཡོཛནཾ རཏནཏྟཡཝནྡནཾ ཀཏྟུཀཱམོ པཋམཾ ཏཱཝ བྷགཝཏོ ཝནྡནཾ ཀཱཏུཾ ཏམྨཱུལཀཏྟཱ ¶ སེསརཏནཱནཾ ‘‘ཀརུཎཱསཱིཏལཧདཡཾ…པེ… གཏིཝིམུཏྟ’’ནྟི ཨཱཧ. ཏཏྠ ཡསྶཱ དེསནཱཡ སཾཝཎྞནཾ ཀཏྟུཀཱམོ, སཱ ན ཝིནཡདེསནཱ ཝིཡ ཀརུཎཱཔདྷཱནཱ, ནཱཔི ཨབྷིདྷམྨདེསནཱ ཝིཡ པཉྙཱཔདྷཱནཱ, ཨཐ ཁོ ཀརུཎཱཔཉྙཱཔདྷཱནཱཏི ཏདུབྷཡཔྤདྷཱནམེཝ ཏཱཝ སམྨཱསམྦུདྡྷསྶ ཐོམནཾ ཀཱཏུཾ ‘‘ཀརུཎཱསཱིཏལཧདཡཾ, པཉྙཱཔཛྫོཏཝིཧཏམོཧཏམ’’ནྟི ཝུཏྟཾ. ཏཏྠ ཀིརཏཱིཏི ཀརུཎཱ, པརདུཀྑཾ ཝིཀྑིཔཏི ཨཔནེཏཱིཏི ཨཏྠོ. ཨཐ ཝཱ ཀིཎཱཏཱིཏི ཀརུཎཱ, པརདུཀྑེ སཏི ཀཱརུཎིཀཾ ཧིཾསཏི ཝིབཱདྷཏཱིཏི ཨཏྠོ. པརདུཀྑེ སཏི སཱདྷཱུནཾ ཀམྤནཾ ཧདཡཁེདཾ ཀརོཏཱིཏི ཝཱ ཀརུཎཱ. ཨཐ ཝཱ ཀམིཏི སུཁཾ, ཏཾ རུནྡྷཏཱིཏི ཀརུཎཱ. ཨེསཱ ཧི པརདུཀྑཱཔནཡནཀཱམཏཱལཀྑཎཱ ཨཏྟསུཁནིརཔེཀྑཏཱཡ ཀཱརུཎིཀཱནཾ སུཁཾ རུནྡྷཏི ཝིབནྡྷཏཱིཏི ཨཏྠོ. ཀརུཎཱཡ སཱིཏལཾ ཀརུཎཱསཱིཏལཾ, ཀརུཎཱསཱིཏལཾ ཧདཡཾ ཨསྶཱཏི ཀརུཎཱསཱིཏལཧདཡོ, ཏཾ ཀརུཎཱསཱིཏལཧདཡཾ.

ཏཏྠ ཀིཉྩཱཔི པརེསཾ ཧིཏོཔསཾཧཱརསུཁཱདིཨཔརིཧཱནིཙྪནསབྷཱཝཏཱཡ, བྱཱཔཱདཱརཏཱིནཾ ཨུཛུཝིཔཙྩནཱིཀཏཱཡ ཙ སཏྟསནྟཱནགཏསནྟཱཔཝིཙྪེདནཱཀཱརཔྤཝཏྟིཡཱ མེཏྟཱམུདིཏཱནམྤི ཙིཏྟསཱིཏལབྷཱཝཀཱརཎཏཱ ཨུཔལབྦྷཏི, ཏཐཱཔི དུཀྑཱཔནཡནཱཀཱརཔྤཝཏྟིཡཱ པརཱུཔཏཱཔཱསཧནརསཱ ཨཝིཧིཾསབྷཱུཏཱ ¶ ཀརུཎཱ ཝིསེསེན བྷགཝཏོ ཙིཏྟསྶ ཙིཏྟཔྤསྶདྡྷི ཝིཡ སཱིཏིབྷཱཝནིམིཏྟནྟི ཝུཏྟཾ – ‘‘ཀརུཎཱསཱིཏལཧདཡ’’ནྟི. ཀརུཎཱམུཁེན ཝཱ མེཏྟཱམུདིཏཱནམྤི ཧདཡསཱིཏལབྷཱཝཀཱརཎཏཱ ཝུཏྟཱཏི དཊྛབྦཾ. ཨཐ ཝཱ ཨསཱདྷཱརཎཉཱཎཝིསེསནིབནྡྷནབྷཱུཏཱ སཱཏིསཡཾ ནིརཝསེསཉྩ སབྦཉྙུཏཉྙཱཎཾ ཝིཡ སཝིསཡབྱཱཔིཏཱཡ མཧཱཀརུཎཱབྷཱཝཾ ཨུཔགཏཱ ཀརུཎཱཝ བྷགཝཏོ ཨཏིསཡེན ཧདཡསཱིཏལབྷཱཝཧེཏཱུཏི ཨཱཧ – ‘‘ཀརུཎཱསཱིཏལཧདཡ’’ནྟི. ཨཐ ཝཱ སཏིཔི མེཏྟཱམུདིཏཱནཾ སཱཏིསཡེ ཧདཡསཱིཏིབྷཱཝནིབནྡྷནཏྟེ སཀལབུདྡྷགུཎཝིསེསཀཱརཎཏཱཡ ཏཱསམྤི ཀཱརཎནྟི ཀརུཎཱཝ བྷགཝཏོ ‘‘ཧདཡསཱིཏལབྷཱཝཀཱརཎ’’ནྟི ཝུཏྟཱ. ཀརུཎཱནིདཱནཱ ཧི སབྦེཔི བུདྡྷགུཎཱ. ཀརུཎཱནུབྷཱཝནིབྦཱཔིཡམཱནསཾསཱརདུཀྑསནྟཱཔསྶ ཧི བྷགཝཏོ པརདུཀྑཱཔནཡནཀཱམཏཱཡ ཨནེཀཱནིཔི ཨསངྑྱེཡྻཱནི ཀཔྤཱནཾ ཨཀིལནྟརཱུཔསྶེཝ ནིརཝསེསབུདྡྷཀརདྷམྨསམྦྷརཎནིརཏསྶ སམདྷིགཏདྷམྨཱདྷིཔཏེཡྻསྶ ཙ སནྣིཧིཏེསུཔི སཏྟསངྑཱརསམུཔནཱིཏཧདཡཱུཔཏཱཔནིམིཏྟེསུ ན ཨཱིསཀམྤི ཙིཏྟསཱིཏིབྷཱཝསྶ ཨཉྙཐཏྟམཧོསཱིཏི. ཨེཏསྨིཉྩ ཨཏྠཝིཀཔྤེ ཏཱིསུཔི ཨཝཏྠཱསུ བྷགཝཏོ ཀརུཎཱ སངྒཧིཏཱཏི དཊྛབྦཾ.

པཛཱནཱཏཱིཏི པཉྙཱ, ཡཐཱསབྷཱཝཾ པཀཱརེཧི པཊིཝིཛ྄ཛྷཏཱིཏི ཨཏྠོ. པཉྙཱཝ ཉེཡྻཱཝརཎཔྤཧཱནཏོ པཀཱརེཧི དྷམྨསབྷཱཝཱཝཛོཏནཊྛེན པཛྫོཏོཏི པཉྙཱཔཛྫོཏོ. སཝཱསནཔྤཧཱནཏོ ཝིསེསེན ཧཏཾ སམུགྒྷཱཏིཏཾ ཝིཧཏཾ. པཉྙཱཔཛྫོཏེན ཝིཧཏཾ པཉྙཱཔཛྫོཏཝིཧཏཾ ¶ , མུཡ྄ཧནྟི ཏེན, སཡཾ ཝཱ མུཡ྄ཧཏི, མོཧནམཏྟམེཝ ཝཱ ཏནྟི མོཧོ, ཨཝིཛྫཱ. སྭེཝ ཝིསཡསབྷཱཝཔྤཊིཙྪཱདནཏོ ཨནྡྷཀཱརསརིཀྑཏཱཡ ཏམོ ཝིཡཱཏི མོཧཏམོ, པཉྙཱཔཛྫོཏཝིཧཏོ མོཧཏམོ ཨེཏསྶཱཏི པཉྙཱཔཛྫོཏཝིཧཏམོཧཏམོ, ཏཾ པཉྙཱཔཛྫོཏཝིཧཏམོཧཏམཾ. སབྦེསམྤི ཧི ཁཱིཎཱསཝཱནཾ སཏིཔི པཉྙཱཔཛྫོཏེན ཨཝིཛྫནྡྷཀཱརསྶ ཝིཧཏབྷཱཝེ སདྡྷཱདྷིམུཏྟེཧི ཝིཡ དིཊྛིཔྤཏྟཱནཾ སཱཝཀེཧི པཙྩེཀསམྦུདྡྷེཧི ཙ སཝཱསནཔྤཧཱནེན སམྨཱསམྦུདྡྷཱནཾ ཀིལེསཔྤཧཱནསྶ ཝིསེསོ ཝིཛྫཏཱིཏི སཱཏིསཡེན ཨཝིཛྫཱཔཧཱནེན བྷགཝནྟཾ ཐོམེནྟོ ཨཱཧ – ‘‘པཉྙཱཔཛྫོཏཝིཧཏམོཧཏམ’’ནྟི.

ཨཐ ¶ ཝཱ ཨནྟརེན པརོཔདེསཾ ཨཏྟནོ སནྟཱནེ ཨཙྩནྟཾ ཨཝིཛྫནྡྷཀཱརཝིགམསྶ ནིབྦཏྟིཏཏྟཱ, ཏཏྠ ཙ སབྦཉྙུཏཱཡ བལེསུ ཙ ཝསཱིབྷཱཝསྶ སམདྷིགཏཏྟཱ, པརསནྟཏིཡཉྩ དྷམྨདེསནཱཏིསཡཱནུབྷཱཝེན སམྨདེཝ ཏསྶ པཝཏྟིཏཏྟཱ བྷགཝཱཝ ཝིསེསཏོ མོཧཏམཝིགམེན ཐོམེཏབྦོཏི ཨཱཧ – ‘‘པཉྙཱཔཛྫོཏཝིཧཏམོཧཏམ’’ནྟི. ཨིམསྨིཉྩ ཨཏྠཝིཀཔྤེ ‘‘པཉྙཱཔཛྫོཏོ’’ཏི པདེན བྷགཝཏོ པཊིཝེདྷཔཉྙཱ ཝིཡ དེསནཱཔཉྙཱཔི སཱམཉྙནིདྡེསེན, ཨེཀསེསནཡེན ཝཱ སངྒཧིཏཱཏི དཊྛབྦཾ.

ཨཐ ཝཱ བྷགཝཏོ ཉཱཎསྶ ཉེཡྻཔརིཡནྟིཀཏྟཱ སཀལཉེཡྻདྷམྨསབྷཱཝཱཝབོདྷནསམཏྠེན ཨནཱཝརཎཉཱཎསངྑཱཏེན པཉྙཱཔཛྫོཏེན སབྦཉེཡྻདྷམྨསབྷཱཝཙྪཱདཀསྶ མོཧནྡྷཀཱརསྶ ཝིདྷམིཏཏྟཱ ཨནཉྙསཱདྷཱརཎོ བྷགཝཏོ མོཧཏམཝིནཱསོཏི ཀཏྭཱ ཝུཏྟཾ – ‘‘པཉྙཱཔཛྫོཏཝིཧཏམོཧཏམ’’ནྟི. ཨེཏྠ ཙ མོཧཏམཝིདྷམནནྟེ ཨདྷིགཏཏྟཱ ཨནཱཝརཎཉཱཎཾ ཀཱརཎོཔཙཱརེན སསནྟཱནམོཧཏམཝིདྷམནཾ དཊྛབྦཾ. ཨབྷིནཱིཧཱརསམྤཏྟིཡཱ སཝཱསནཔྤཧཱནམེཝ ཧི ཀིལེསཱནཾ ཉེཡྻཱཝརཎཔྤཧཱནནྟི, པརསནྟཱནེ པན མོཧཏམཝིདྷམནསྶ ཀཱརཎབྷཱཝཏོ ཨནཱཝརཎཉཱཎཾ ‘‘མོཧཏམཝིདྷམན’’ནྟི ཝུཙྩཏཱིཏི.

ཀིཾ པན ཀཱརཎཾ ཨཝིཛྫཱསམུགྒྷཱཏོཡེཝེཀོ པཧཱནསམྤཏྟིཝསེན བྷགཝཏོ ཐོམནཱནིམིཏྟཾ གཡ྄ཧཏི, ན པན སཱཏིསཡནིརཝསེསཀིལེསཔྤཧཱནནྟི? ཏཔྤཧཱནཝཙནེནེཝ ཏདེཀཊྛཏཱཡ སཀལསཾཀིལེསགཎསམུགྒྷཱཏསྶ ཝུཏྟཏྟཱ. ན ཧི སོ ཏཱདིསོ ཀིལེསོ ཨཏྠི, ཡོ ནིརཝསེསཨཝིཛྫཱཔཧཱནེན ན པཧཱིཡཏཱིཏི.

ཨཐ ཝཱ ཝིཛྫཱ ཝིཡ སཀལཀུསལདྷམྨསམུཔྤཏྟིཡཱ, ནིརཝསེསཱཀུསལདྷམྨནིབྦཏྟིཡཱ སཾསཱརཔྤཝཏྟིཡཱ ¶ ཙ ཨཝིཛྫཱ པདྷཱནཀཱརཎནྟི ཏབྦིགྷཱཏཝཙནེན སཀལསཾཀིལེསགཎསམུགྒྷཱཏོ ཝུཏྟོ ཨེཝ ཧོཏཱིཏི ཝུཏྟཾ – ‘‘པཉྙཱཔཛྫོཏཝིཧཏམོཧཏམ’’ནྟི.

ནརཱ ཙ ཨམརཱ ཙ ནརཱམརཱ, སཧ ནརཱམརེཧཱིཏི སནརཱམརོ, སནརཱམརོ ཙ སོ ལོཀོ ཙཱཏི སནརཱམརལོཀོ, ཏསྶ གརཱུཏི སནརཱམརལོཀགརུ, ཏཾ སནརཱམརལོཀགརུཾ. ཨེཏེན དེཝམནུསྶཱནཾ ཝིཡ ཏདཝསིཊྛསཏྟཱནམྤི ཡཐཱརཧཾ གུཎཝིསེསཱཝཧཏཱཡ བྷགཝཏོ ཨུཔཀཱརཏཾ ¶ དསྶེཏི. ན ཙེཏྠ པདྷཱནཔྤདྷཱནབྷཱཝོ ཙོདེཏབྦོ. ཨཉྙོ ཧི སདྡཀྐམོ, ཨཉྙོ ཨཏྠཀྐམོ. ཨཱིདིསེསུ ཧི སམཱསཔདེསུ པདྷཱནམྤི ཨཔྤདྷཱནཾ ཝིཡ ནིདྡིསཱིཡཏི ཡཐཱ ‘‘སརཱཛིཀཱཡ པརིསཱཡཱ’’ཏི (ཙཱུལ༹ཝ. ༣༣༦). ཀཱམཉྩེཏྠ སཏྟསངྑཱརབྷཱཛནཝསེན ཏིཝིདྷོ ལོཀོ, གརུབྷཱཝསྶ པན ཨདྷིཔྤེཏཏྟཱ གརུཀརཎསམཏྠསྶེཝ ཡུཛྫནཏོ སཏྟལོཀསྶ ཝསེན ཨཏྠོ གཧེཏབྦོ. སོ ཧི ལོཀཱིཡནྟི ཨེཏྠ པུཉྙཔཱཔཱནི ཏབྦིཔཱཀོ ཙཱཏི ‘‘ལོཀོ’’ཏི ཝུཙྩཏི. ཨམརགྒཧཎེན ཙེཏྠ ཨུཔཔཏྟིདེཝཱ ཨདྷིཔྤེཏཱ.

ཨཐ ཝཱ སམཱུཧཏྠོ ལོཀསདྡོ སམུདཱཡཝསེན ལོཀཱིཡཏི པཉྙཱཔཱིཡཏཱིཏི. སཧ ནརེཧཱིཏི སནརཱ, སནརཱ ཙ ཏེ ཨམརཱ ཙཱཏི སནརཱམརཱ, ཏེསཾ ལོཀོཏི སནརཱམརལོཀོཏི པུརིམནཡེནེཝ ཡོཛེཏབྦཾ. ཨམརསདྡེན ཙེཏྠ ཝིསུདྡྷིདེཝཱཔི སངྒཡ྄ཧནྟི. ཏེཔི ཧི མརཎཱབྷཱཝཏོ པརམཏྠཏོ ཨམརཱ. ནརཱམརཱནཾཡེཝ ཙ གཧཎཾ ཨུཀྐཊྛནིདྡེསཝསེན ཡཐཱ ‘‘སཏྠཱ དེཝམནུསྶཱན’’ནྟི (དཱི. ནི. ༡.༡༥༧). ཏཐཱ ཧི སབྦཱནཏྠཔརིཧརཎཔུབྦངྒམཱཡ ནིརཝསེསཧིཏསུཁཝིདྷཱནཏཔྤརཱཡ ནིརཏིསཡཱཡ པཡོགསམྤཏྟིཡཱ སདེཝམནུསྶཱཡ པཛཱཡ ཨཙྩནྟཱུཔཀཱརིཏཱཡ ཨཔརིམིཏནིརུཔམཔྤབྷཱཝགུཎཝིསེསསམངྒིཏཱཡ ཙ སབྦསཏྟུཏྟམོ བྷགཝཱ ཨཔརིམཱཎཱསུ ལོཀདྷཱཏཱུསུ ཨཔརིམཱཎཱནཾ སཏྟཱནཾ ཨུཏྟམགཱརཝཊྛཱནཾ. ཏེན ཝུཏྟཾ – ‘‘སནརཱམརལོཀགརུ’’ནྟི.

སོབྷནཾ གཏཾ གམནཾ ཨེཏསྶཱཏི སུགཏོ. བྷགཝཏོ ཧི ཝེནེཡྻཛནཱུཔསངྐམནཾ ཨེཀནྟེན ཏེསཾ ཧིཏསུཁནིཔྥཱདནཏོ སོབྷནཾ, ཏཐཱ ལཀྑཎཱནུབྱཉྫནཔྤཊིམཎྜིཏརཱུཔཀཱཡཏཱཡ དུཏཝིལམྦིཏཁལིཏཱནུཀཌྜྷནནིཔྤཱིལ༹ནུཀྐུཊིཀཀུཊིལཱཀུཊིལཏཱདི- དོསརཧིཏམཝཧསིཏརཱཛཧཾསཝསབྷཝཱརཎམིགརཱཛགམནཾ ཀཱཡགམནཾ ཉཱཎགམནཉྩ ཝིཔུལནིམྨལཀརུཎཱསཏིཝཱིརིཡཱདིགུཎཝིསེསསཧིཏམབྷིནཱིཧཱརཏོ ཡཱཝ མཧཱབོདྷི ཨནཝཛྫཏཱཡ སོབྷནམེཝཱཏི. ཨཐ ཝཱ སཡམྦྷུཉཱཎེན སཀལམྤི ལོཀཾ པརིཉྙཱབྷིསམཡཝསེན པརིཛཱནནྟོ ཉཱཎེན སམྨཱ གཏོ ཨཝགཏོཏི སུགཏོ, ཏཐཱ ལོཀསམུདཡཾ པཧཱནཱབྷིསམཡཝསེན པཛཧནྟོ ཨནུཔྤཏྟིདྷམྨཏཾ ཨཱཔཱདེནྟོ སམྨཱ གཏོ ཨཏཱིཏོཏི སུགཏོ, ལོཀནིརོདྷཾ ནིབྦཱནཾ སཙྪིཀིརིཡཱབྷིསམཡཝསེན སམྨཱ ¶ གཏོ ཨདྷིགཏོཏི ¶ སུགཏོ, ལོཀནིརོདྷགཱམིནིཔཊིཔདཾ བྷཱཝནཱབྷིསམཡཝསེན སམྨཱ གཏོ པཊིཔནྣོཏི སུགཏོ. ‘‘སོཏཱཔཏྟིམགྒེན ཡེ ཀིལེསཱ པཧཱིནཱ, ཏེ ཀིལེསེ ན པུནེཏི ན པཙྩེཏི ན པཙྩཱགཙྪཏཱིཏི སུགཏོ’’ཏིཨཱདིནཱ (ཙཱུལ༹ནི. མེཏྟགཱུམཱཎཝཔུཙྪཱནིདྡེསོ ༢༧) ནཡེན ཨཡམཏྠོ ཝིབྷཱཝེཏབྦོ. ཨཐ ཝཱ སུནྡརཾ ཋཱནཾ སམྨཱསམྦོདྷིཾ, ནིབྦཱནམེཝ ཝཱ གཏོ ཨདྷིགཏོཏི སུགཏོ, ཡསྨཱ ཝཱ བྷཱུཏཾ ཏཙྪཾ ཨཏྠསཾཧིཏཾ ཝེནེཡྻཱནཾ ཡཐཱརཧཾ ཀཱལཡུཏྟམེཝ ཙ དྷམྨཾ བྷཱསཏི, ཏསྨཱ སམྨཱ གདཏཱིཏི སུགཏོ, ད-ཀཱརསྶ ཏ-ཀཱརཾ ཀཏྭཱ. ཨིཏི སོབྷནགམནཏཱདཱིཧི སུགཏོ, ཏཾ སུགཏཾ.

པུཉྙཔཱཔཀམྨེཧི ཨུཔཔཛྫནཝསེན གནྟབྦཏོ གཏིཡོ, ཨུཔཔཏྟིབྷཝཝིསེསཱ. ཏཱ པན ནིརཡཱདིཝསེན པཉྩཝིདྷཱ. ཏཱཧི སཀལསྶཔི བྷཝགཱམིཀམྨསྶ ཨརིཡམགྒཱདྷིགམེན ཨཝིཔཱཀཱརཧབྷཱཝཀརཎེན ནིཝཏྟིཏཏྟཱ བྷགཝཱ པཉྩཧིཔི གཏཱིཧི སུཊྛུ མུཏྟོ ཝིསཾཡུཏྟོཏི ཨཱཧ – ‘‘གཏིཝིམུཏྟ’’ནྟི. ཨེཏེན བྷགཝཏོ ཀཏྠཙིཔི གཏིཡཱ ཨཔརིཡཱཔནྣཏཾ དསྶེཏི, ཡཏོ བྷགཝཱ ‘‘དེཝཱཏིདེཝོ’’ཏི ཝུཙྩཏི. ཏེནེཝཱཧ –

‘‘ཡེན དེཝཱུཔཔཏྱསྶ, གནྡྷབྦོ ཝཱ ཝིཧངྒམོ;

ཡཀྑཏྟཾ ཡེན གཙྪེཡྻཾ, མནུསྶཏྟཉྩ ཨབྦཛེ;

ཏེ མཡ྄ཧཾ ཨཱསཝཱ ཁཱིཎཱ, ཝིདྡྷསྟཱ ཝིནལཱི༹ཀཏཱ’’ཏི. (ཨ. ནི. ༤.༣༦);

ཏཾཏཾགཏིསཾཝཏྟནིཀཱནཉྷི ཀམྨཀིལེསཱནཾ ཨགྒམགྒེན བོདྷིམཱུལེཡེཝ སུཔྤཧཱིནཏྟཱ ནཏྠི བྷགཝཏོ གཏིཔརིཡཱཔནྣཏཱཏི ཨཙྩནྟམེཝ བྷགཝཱ སབྦབྷཝཡོནིགཏིཝིཉྙཱཎཊྛིཏིསཏྟཱཝཱསསཏྟནིཀཱཡེཧི སུཔརིམུཏྟོ, ཏཾ གཏིཝིམུཏྟཾ. ཝནྡེཏི ནམཱམི, ཐོམེམཱིཏི ཝཱ ཨཏྠོ.

ཨཐ ཝཱ གཏིཝིམུཏྟནྟི ཨནུཔཱདིསེསནིབྦཱནདྷཱཏུཔྤཏྟིཡཱ བྷགཝནྟཾ ཐོམེཏི. ཨེཏྠ ཧི དྭཱིཧི ཨཱཀཱརེཧི བྷགཝཏོ ཐོམནཱ ཝེདིཏབྦཱ ཨཏྟཧིཏསམྤཏྟིཏོ པརཧིཏཔྤཊིཔཏྟིཏོ ཙ. ཏེསུ ཨཏྟཧིཏསམྤཏྟི ཨནཱཝརཎཉཱཎཱདྷིགམཏོ སཝཱསནཱནཾ སབྦེསཾ ཀིལེསཱནཾ ཨཙྩནྟཔྤཧཱནཏོ ཨནུཔཱདིསེསནིབྦཱནཔྤཏྟིཏོ ཙ ཝེདིཏབྦཱ, པརཧིཏཔྤཊིཔཏྟི ལཱབྷསཀྐཱརཱདིནིརཔེཀྑཙིཏྟསྶ སབྦདུཀྑནིཡྻཱནིཀདྷམྨདེསནཏོ ཝིརུདྡྷེསུཔི ནིཙྩཾ ཧིཏཛ྄ཛྷཱསཡཏོ ཉཱཎཔརིཔཱཀཀཱལཱགམནཏོ ཙ. སཱ པནེཏྠ ཨཱསཡཏོ པཡོགཏོ ཙ དུཝིདྷཱ, པརཧིཏཔྤཊིཔཏྟི ཏིཝིདྷཱ ཙ, ཨཏྟཧིཏསམྤཏྟི ¶ པཀཱསིཏཱ ཧོཏི. ཀཐཾ? ‘‘ཀརུཎཱསཱིཏལཧདཡ’’ནྟི ཨེཏེན ཨཱསཡཏོ པརཧིཏཔྤཊིཔཏྟི ¶ , སམྨཱགདནཏྠེན སུགཏསདྡེན པཡོགཏོ པརཧིཏཔྤཊིཔཏྟི, ‘‘པཉྙཱཔཛྫོཏཝིཧཏམོཧཏམཾ གཏིཝིམུཏྟ’’ནྟི ཨེཏེཧི ཙཏུསཙྩསམྤཊིཝེདྷནཏྠེན ཙ སུགཏསདྡེན ཏིཝིདྷཱཔི ཨཏྟཧིཏསམྤཏྟི, ཨཝསིཊྛེན ‘‘པཉྙཱཔཛྫོཏཝིཧཏམོཧཏམ’’ནྟི ཨེཏེན ཙཱཔི ཨཏྟཧིཏསམྤཏྟི པརཧིཏཔྤཊིཔཏྟི པཀཱསིཏཱ ཧོཏཱིཏི.

ཨཐ ཝཱ ཏཱིཧི ཨཱཀཱརེཧི བྷགཝཏོ ཐོམནཱ ཝེདིཏབྦཱ ཧེཏུཏོ, ཕལཏོ, ཨུཔཀཱརཏོ ཙ. ཏཏྠ ཧེཏུ མཧཱཀརུཎཱ, སཱ པཋམཔདེན དསྶིཏཱ. ཕལཾ ཙཏུབྦིདྷཾ ཉཱཎསམྤདཱ, པཧཱནསམྤདཱ, ཨཱནུབྷཱཝསམྤདཱ, རཱུཔཀཱཡསམྤདཱ ཙཱཏི. ཏཱསུ ཉཱཎཔྤཧཱནསམྤདཱ དུཏིཡཔདེན སཙྩཔྤཊིཝེདྷནཏྠེན ཙ སུགཏསདྡེན པཀཱསིཏཱ ཧོནྟི, ཨཱནུབྷཱཝསམྤདཱ ཏཏིཡཔདེན, རཱུཔཀཱཡསམྤདཱ ཡཐཱཝུཏྟཀཱཡགམནསོབྷནཏྠེན སུགཏསདྡེན ལཀྑཎཱནུབྱཉྫནཔཱརིཔཱུརིཡཱ ཝིནཱ ཏདབྷཱཝཏོ. ཨུཔཀཱརོ ཨནནྟརཾ ཨབཱཧིརཾ ཀརིཏྭཱ ཏིཝིདྷཡཱནམུཁེན ཝིམུཏྟིདྷམྨདེསནཱ. སོ སམྨཱགདནཏྠེན སུགཏསདྡེན པཀཱསིཏོ ཧོཏཱིཏི ཝེདིཏབྦཾ.

ཏཏྠ ‘‘ཀརུཎཱསཱིཏལཧདཡ’’ནྟི ཨེཏེན སམྨཱསམྦོདྷིཡཱ མཱུལཾ དསྶེཏི. མཧཱཀརུཎཱསཉྩོདིཏམཱནསོ ཧི བྷགཝཱ སཾསཱརཔངྐཏོ སཏྟཱནཾ སམུདྡྷརཎཏྠཾ ཀཏཱབྷིནཱིཧཱརོ ཨནུཔུབྦེན པཱརམིཡོ པཱུརེཏྭཱ ཨནུཏྟརཾ སམྨཱསམྦོདྷིཾ ཨདྷིགཏོཏི ཀརུཎཱ སམྨཱསམྦོདྷིཡཱ མཱུལཾ. ‘‘པཉྙཱཔཛྫོཏཝིཧཏམོཧཏམ’’ནྟི ཨེཏེན སམྨཱསམྦོདྷིཾ དསྶེཏི. ཨནཱཝརཎཉཱཎཔདཊྛཱནཉྷི མགྒཉཱཎཾ, མགྒཉཱཎཔདཊྛཱནཉྩ ཨནཱཝརཎཉཱཎཾ ‘‘སམྨཱསམྦོདྷཱི’’ཏི ཝུཙྩཏཱིཏི. སམྨཱགམནཏྠེན སུགཏསདྡེན སམྨཱསམྦོདྷིཡཱ པཊིཔཏྟིཾ དསྶེཏི ལཱིནུདྡྷཙྩཔཏིཊྛཱནཱཡཱུཧནཀཱམསུཁལླིཀཏྟཀིལམཐཱནུཡོགསསྶཏུཙྪེདཱབྷིནིཝེསཱདིཨནྟདྭཡརཧིཏཱཡ ཀརུཎཱཔཉྙཱཔརིགྒཧིཏཱཡ མཛ྄ཛྷིམཱཡ པཊིཔཏྟིཡཱ པཀཱསནཏོ སུགཏསདྡསྶ. ཨིཏརེཧི སམྨཱསམྦོདྷིཡཱ པདྷཱནཔྤདྷཱནབྷེདཾ པཡོཛནཾ དསྶེཏི. སཾསཱརམཧོགྷཏོ སཏྟསནྟཱརཎཉྷེཏྠ པདྷཱནཾ པཡོཛནཾ, ཏདཉྙམཔྤདྷཱནཾ. ཏེསུ པདྷཱནེན པརཧིཏཔྤཊིཔཏྟིཾ དསྶེཏི, ཨིཏརེན ཨཏྟཧིཏསམྤཏྟིཾ. ཏདུབྷཡེན ཨཏྟཧིཏཱཡ ¶ པཊིཔནྣཱདཱིསུ ཙཏཱུསུ པུགྒལེསུ བྷགཝཏོ ཙཏུཏྠཔུགྒལབྷཱཝཾ དསྶེཏི. ཏེན ཙ ཨནུཏྟརདཀྑིཎེཡྻབྷཱཝཾ ཨུཏྟམཝནྡནེཡྻབྷཱཝཾ ཨཏྟནོ ཙ ཝནྡནཀིརིཡཱཡ ཁེཏྟངྒཏབྷཱཝཾ དསྶེཏི.

ཨེཏྠ ཙ ཀརུཎཱགཧཎེན ལོཀིཡེསུ མཧགྒཏབྷཱཝཔྤཏྟཱསཱདྷཱརཎགུཎདཱིཔནཏོ བྷགཝཏོ སབྦལོཀིཡགུཎསམྤཏྟི དསྶིཏཱ ཧོཏི, པཉྙཱགཧཎེན སབྦཉྙུཏཉྙཱཎཔདཊྛཱནམགྒཉཱཎདཱིཔནཏོ སབྦལོཀུཏྟརགུཎསམྤཏྟི. ཏདུབྷཡགྒཧཎསིདྡྷོ ཧི ཨཏྠོ ‘‘སནརཱམརལོཀགརུ’’ནྟིཨཱདིནཱ པཔཉྩཱིཡཏཱིཏི ¶ . ཀརུཎཱགཧཎེན ཙ ཨུཔགམནཾ ནིརུཔཀྐིལེསཾ དསྶེཏི, པཉྙཱགཧཎེན ཨཔགམནཾ. ཏཐཱ ཀརུཎཱགཧཎེན ལོཀསམཉྙཱནུརཱུཔཾ བྷགཝཏོ པཝཏྟིཾ དསྶེཏི ལོཀཝོཧཱརཝིསཡཏྟཱ ཀརུཎཱཡ, པཉྙཱགཧཎེན སམཉྙཱཡ ཨནཏིདྷཱཝནཾ. སབྷཱཝཱནཝབོདྷེན ཧི དྷམྨཱནཾ སམཉྙཾ ཨཏིདྷཱཝིཏྭཱ སཏྟཱདིཔརཱམསནཾ ཧོཏཱིཏི. ཏཐཱ ཀརུཎཱགཧཎེན མཧཱཀརུཎཱསམཱཔཏྟིཝིཧཱརཾ དསྶེཏི, པཉྙཱགཧཎེན ཏཱིསུ ཀཱལེསུ ཨཔྤཊིཧཏཉཱཎཾ ཙཏུསཙྩཉཱཎཾ, ཙཏུཔཊིསམྦྷིདཱཉཱཎཾ, ཙཏུཝེསཱརཛྫཉཱཎཾ. ཀརུཎཱགཧཎེན མཧཱཀརུཎཱསམཱཔཏྟིཉཱཎསྶ གཧིཏཏྟཱ སེསཱསཱདྷཱརཎཉཱཎཱནི, ཚ ཨབྷིཉྙཱ, ཨཊྛསུ པརིསཱསུ ཨཀམྤནཉཱཎཱནི, དས བལཱནི, ཙུདྡས བུདྡྷཉཱཎཱནི, སོལ༹ས ཉཱཎཙརིཡཱ, ཨཊྛཱརས བུདྡྷདྷམྨཱ, ཙཏུཙཏྟཱལཱིས ཉཱཎཝཏྠཱུནི, སཏྟསཏྟཏི ཉཱཎཝཏྠཱུནཱིཏི ཨེཝམཱདཱིནཾ ཨནེཀེསཾ པཉྙཱཔབྷེདཱནཾ ཝསེན ཉཱཎཙཱརཾ དསྶེཏི. ཏཐཱ ཀརུཎཱགཧཎེན ཙརཎསམྤཏྟིཾ, པཉྙཱགཧཎེན ཝིཛྫཱསམྤཏྟིཾ. ཀརུཎཱགཧཎེན ཨཏྟཱདྷིཔཏིཏཱ, པཉྙཱགཧཎེན དྷམྨཱདྷིཔཏིཏཱ. ཀརུཎཱགཧཎེན ལོཀནཱཐབྷཱཝོ, པཉྙཱགཧཎེན ཨཏྟནཱཐབྷཱཝོ. ཏཐཱ ཀརུཎཱགཧཎེན པུབྦཀཱརིབྷཱཝོ, པཉྙཱགཧཎེན ཀཏཉྙུཏཱ. ཏཐཱ ཀརུཎཱགཧཎེན ཨཔརནྟཔཏཱ, པཉྙཱགཧཎེན ཨནཏྟནྟཔཏཱ. ཀརུཎཱགཧཎེན ཝཱ བུདྡྷཀརདྷམྨསིདྡྷི, པཉྙཱགཧཎེན བུདྡྷབྷཱཝསིདྡྷི. ཏཐཱ ཀརུཎཱགཧཎེན པརེསཾ ཏཱརཎཾ, པཉྙཱགཧཎེན སཡཾཏརཎཾ. ཏཐཱ ཀརུཎཱགཧཎེན སབྦསཏྟེསུ ཨནུགྒཧཙིཏྟཏཱ, པཉྙཱགཧཎེན སབྦདྷམྨེསུ ཝིརཏྟཙིཏྟཏཱ དསྶིཏཱ ཧོཏི.

སབྦེསཉྩ བུདྡྷགུཎཱནཾ ཀརུཎཱ ཨཱདི ཏནྣིདཱནབྷཱཝཏོ, པཉྙཱ པརིཡོསཱནཾ ཏཏོ ཨུཏྟརིཀརཎཱིཡཱབྷཱཝཏོ. ཨིཏི ཨཱདིཔརིཡོསཱནདསྶནེན ¶ སབྦེ བུདྡྷགུཎཱ དསྶིཏཱ ཧོནྟི. ཏཐཱ ཀརུཎཱགཧཎེན སཱིལཀྑནྡྷཔུབྦངྒམོ སམཱདྷིཀྑནྡྷོ དསྶིཏོ ཧོཏི. ཀརུཎཱནིདཱནཉྷི སཱིལཾ ཏཏོ པཱཎཱཏིཔཱཏཱདིཝིརཏིཔྤཝཏྟིཏོ, སཱ ཙ ཛྷཱནཏྟཡསམྤཡོགིནཱིཏི. པཉྙཱཝཙནེན པཉྙཱཀྑནྡྷོ. སཱིལཉྩ སབྦེསཾ བུདྡྷགུཎཱནཾ ཨཱདི, སམཱདྷི མཛ྄ཛྷེ, པཉྙཱ པརིཡོསཱནནྟི ཨེཝམྤི ཨཱདིམཛ྄ཛྷཔརིཡོསཱནཀལྱཱཎཱ སབྦེ བུདྡྷགུཎཱ དསྶིཏཱ ཧོནྟི ནཡཏོ དསྶིཏཏྟཱ. ཨེསོ ཨེཝ ཧི ནིརཝསེསཏོ བུདྡྷགུཎཱནཾ དསྶནུཔཱཡོ, ཡདིདཾ ནཡགྒཧཎཾ, ཨཉྙཐཱ ཀོ ནཱམ སམཏྠོ བྷགཝཏོ གུཎེ ཨནུཔདཾ ནིརཝསེསཏོ དསྶེཏུཾ? ཏེནེཝཱཧ –

‘‘བུདྡྷོཔི བུདྡྷསྶ བྷཎེཡྻ ཝཎྞཾ,

ཀཔྤམྤི ཙེ ཨཉྙམབྷཱསམཱནོ;

ཁཱིཡེཐ ¶ ཀཔྤོ ཙིརདཱིགྷམནྟརེ,

ཝཎྞོ ན ཁཱིཡེཐ ཏཐཱགཏསྶཱ’’ཏི. (དཱི. ནི. ཨཊྛ. ༡.༣༠༤; ༣.༡༤༡; མ. ནི. ཨཊྛ. ༢.༤༢༥; ཨུདཱ. ཨཊྛ. ༥༣; བུ. ཝཾ. ཨཊྛ. ༤.༤; ཨཔ. ཨཊྛ. ༢.༧.པརཔྤསཱདཀཏྠེརཨཔདཱནཝཎྞནཱ);

ཏེནེཝ ཙ ཨཱཡསྨཏཱ སཱརིཔུཏྟཏྠེརེནཔི བུདྡྷགུཎཔརིཙྪེདནཾ པཏི ཨནུཡུཏྟེན ‘‘ནོ ཧེཏཾ, བྷནྟེ’’ཏི པཊིཀྑིཔིཏྭཱ ‘‘ཨཔིཙ མེ, བྷནྟེ, དྷམྨནྭཡོ ཝིདིཏོ’’ཏི ཝུཏྟཾ.

༢. ཨེཝཾ སངྑེཔེན སཀལསབྦཉྙུགུཎེཧི བྷགཝནྟཾ ཨབྷིཏྠཝིཏྭཱ ཨིདཱནི སདྡྷམྨཾ ཐོམེཏུཾ ‘‘བུདྡྷོཔཱི’’ཏིཨཱདིམཱཧ. ཏཏྠ བུདྡྷོཏི ཀཏྟུནིདྡེསོ. བུདྡྷབྷཱཝནྟི ཀམྨནིདྡེསོ. བྷཱཝེཏྭཱ སཙྪིཀཏྭཱཏི ཙ པུབྦཀཱལཀིརིཡཱནིདྡེསོ. ཡནྟི ཨནིཡམཏོ ཀམྨནིདྡེསོ. ཨུཔགཏོཏི ཨཔརཀཱལཀིརིཡཱནིདྡེསོ. ཝནྡེཏི ཀིརིཡཱནིདྡེསོ. ཏནྟི ནིཡམནཾ. དྷམྨནྟི ཝནྡནཀིརིཡཱཡ ཀམྨནིདྡེསོ. གཏམལཾ ཨནུཏྟརནྟི ཙ ཏབྦིསེསནཾ.

ཏཏྠ བུདྡྷསདྡསྶ ཏཱཝ ‘‘བུཛ྄ཛྷིཏཱ སཙྩཱནཱིཏི བུདྡྷོ, བོདྷེཏཱ པཛཱཡཱཏི བུདྡྷོ’’ཏིཨཱདིནཱ (མཧཱནི. ༡༩༢; ཙཱུལ༹ནི. པཱརཱཡནཏྠུཏིགཱཐཱནིདྡེསོ ༩༧; པཊི. མ. ༡.༡༦༢) ནིདྡེསནཡེན ཨཏྠོ ཝེདིཏབྦོ. ཨཐ ཝཱ སཝཱསནཱཡ ཨཉྙཱཎནིདྡཱཡ ཨཙྩནྟཝིགམཏོ, བུདྡྷིཡཱ ཝཱ ཝིཀསིཏབྷཱཝཏོ བུདྡྷཝཱཏི བུདྡྷོ ཛཱགརཎཝིཀསནཏྠཝསེན. ཨཐ ཝཱ ཀསྶཙིཔི ཉེཡྻདྷམྨསྶ ཨནཝབུདྡྷསྶ ཨབྷཱཝེན ཉེཡྻཝིསེསསྶ ཀམྨབྷཱཝེན ཨགྒཧཎཏོ ཀམྨཝཙནིཙྪཱཡ ཨབྷཱཝེན ཨཝགམནཏྠཝསེནེཝ ¶ ཀཏྟུནིདྡེསོ ལབྦྷཏཱིཏི བུདྡྷཝཱཏི བུདྡྷོ ཡཐཱ ‘‘དིཀྑིཏོ ན དདཱཏཱི’’ཏི. ཨཏྠཏོ པན པཱརམིཏཱཔརིབྷཱཝིཏོ སཡམྦྷུཉཱཎེན སཧ ཝཱསནཱཡ ཝིཧཏཝིདྡྷཾསིཏནིརཝསེསཀིལེསོ མཧཱཀརུཎཱསབྦཉྙུཏཉྙཱཎཱདིཨཔརིམེཡྻགུཎགཎཱདྷཱརོ ཁནྡྷསནྟཱནོ བུདྡྷོ. ཡཐཱཧ –

‘‘བུདྡྷོཏི ཡོ སོ བྷགཝཱ སཡམྦྷཱུ ཨནཱཙརིཡཀོ པུབྦེ ཨནནུསྶུཏེསུ དྷམྨེསུ སཱམཾ སཙྩཱནི ཨབྷིསམྦུཛ྄ཛྷི, ཏཏྠ ཙ སབྦཉྙུཏཾ པཏྟོ བལེསུ ཙ ཝསཱིབྷཱཝ’’ནྟི (མཧཱནི. ༡༩༢; ཙཱུལ༹ནི. པཱརཱཡནཏྠུཏིགཱཐཱནིདྡེསོ ༩༧; པཊི. མ. ༡.༡༦༡).

ཨཔི-སདྡོ སམྦྷཱཝནེ. ཏེན ‘‘ཨེཝཾ གུཎཝིསེསཡུཏྟོ སོཔི ནཱམ བྷགཝཱ’’ཏི ཝཀྑམཱནགུཎདྷམྨེ ¶ སམྦྷཱཝནཾ དཱིཔེཏི. བུདྡྷབྷཱཝནྟི སམྨཱསམྦོདྷིཾ. བྷཱཝེཏྭཱཏི ཨུཔྤཱདེཏྭཱ ཝཌྜྷེཏྭཱ ཙ. སཙྪིཀཏྭཱཏི པཙྩཀྑཾ ཀཏྭཱ. ཨུཔགཏོཏི པཏྟོ, ཨདྷིགཏོཏི ཨཏྠོ. ཨེཏསྶ བུདྡྷབྷཱཝནྟི ཨེཏེན སམྦནྡྷོ. གཏམལནྟི ཝིགཏམལཾ, ནིདྡོསནྟི ཨཏྠོ. ཝནྡེཏི པཎམཱམི, ཐོམེམི ཝཱ. ཨནུཏྟརནྟི ཨུཏྟརརཧིཏཾ, ལོཀུཏྟརནྟི ཨཏྠོ. དྷམྨནྟི ཡཐཱནུསིཊྛཾ པཊིཔཛྫམཱནེ ཨཔཱཡཏོ ཙ སཾསཱརཏོ ཙ ཨཔཏམཱནེ ཀཏྭཱ དྷཱརེཏཱིཏི དྷམྨོ. ཨཡཉྷེཏྠ སངྑེཔཏྠོ – ཨེཝཾ ཝིཝིདྷགུཎགཎསམནྣཱགཏོ བུདྡྷོཔི བྷགཝཱ ཡཾ ཨརིཡམགྒསངྑཱཏཾ དྷམྨཾ བྷཱཝེཏྭཱ, ཕལནིབྦཱནཾ པན སཙྪིཀཏྭཱ ཨནུཏྟརཾ སམྨཱསམྦོདྷིཾ ཨདྷིགཏོ, ཏམེཝཾ བུདྡྷཱནམྤི བུདྡྷབྷཱཝཧེཏུབྷཱུཏཾ སབྦདོསམལརཧིཏཾ ཨཏྟནོ ཨུཏྟརིཏརཱབྷཱཝེན ཨནུཏྟརཾ པཊིཝེདྷསདྡྷམྨཾ ནམཱམཱིཏི. པརིཡཏྟིསདྡྷམྨསྶཔི ཏཔྤཀཱསནཏྟཱ ཨིདྷ སངྒཧོ དཊྛབྦོ.

ཨཐ ཝཱ ‘‘ཨབྷིདྷམྨནཡསམུདྡཾ ཨདྷིགཉྪི, ཏཱིཎི པིཊཀཱནི སམྨསཱི’’ཏི ཙ ཨཊྛཀཐཱཡཾ ཝུཏྟཏྟཱ པརིཡཏྟིདྷམྨསྶཔི སཙྪིཀིརིཡཱསམྨསནཔརིཡཱཡོ ལབྦྷཏཱིཏི སོཔི ཨིདྷ ཝུཏྟོ ཨེཝཱཏི དཊྛབྦཾ. ཏཐཱ ‘‘ཡཾ དྷམྨཾ བྷཱཝེཏྭཱ སཙྪིཀཏྭཱ’’ཏི ཙ ཝུཏྟཏྟཱ བུདྡྷཀརདྷམྨབྷཱུཏཱཧི པཱརམིཏཱཧི སཧ པུབྦབྷཱགེ ཨདྷིསཱིལསིཀྑཱདཡོཔི ཨིདྷ དྷམྨསདྡེན སངྒཧིཏཱཏི ཝེདིཏབྦཱ. ཏཱཔི ཧི ཝིགཏཔྤཊིཔཀྑཏཱཡ གཏམལཱ, ཨནཉྙསཱདྷཱརཎཏཱཡ ཨནུཏྟརཱ ཙཱཏི. ཏཐཱ ཧི སཏྟཱནཾ སཀལཝཊྚདུཀྑནིསྶརཎཱཡ ཀཏམཧཱབྷིནཱིཧཱརོ མཧཱཀརུཎཱདྷིཝཱསནཔེསལཛ྄ཛྷཱསཡོ ¶ པཉྙཱཝིསེསཔརིཡོདཱཏནིམྨལཱནཾ དཱནདམསཉྙམཱདཱིནཾ ཨུཏྟམདྷམྨཱནཾ སཏསཧསྶཱདྷིཀཱནི ཀཔྤཱནཾ ཙཏྟཱརི ཨསངྑྱེཡྻཱནི སཀྐཙྩཾ ནིརནྟརཾ ནིརཝསེསཱནཾ བྷཱཝནཱཔཙྩཀྑཀརཎེཧི ཀམྨཱདཱིསུ ཨདྷིགཏཝསཱིབྷཱཝོ ཨཙྪརིཡཱཙིནྟེཡྻམཧཱནུབྷཱཝོ ཨདྷིསཱིལཨདྷིཙིཏྟཱནཾ པརམུཀྐཾསཔཱརམིཔྤཏྟོ བྷགཝཱ པཙྩཡཱཀཱརེ ཙཏུཝཱིསཏིཀོཊིསཏསཧསྶམུཁེན མཧཱཝཛིརཉཱཎཾ པེསེཏྭཱ ཨནུཏྟརཾ སམྨཱསམྦོདྷིཾ ཨབྷིསམྦུདྡྷོཏི.

ཨེཏྠ ཙ ‘‘བྷཱཝེཏྭཱ’’ཏི ཨེཏེན ཝིཛྫཱསམྤདཱཡ དྷམྨཾ ཐོམེཏི, ‘‘སཙྪིཀཏྭཱ’’ཏི ཨེཏེན ཝིམུཏྟིསམྤདཱཡ. ཏཐཱ པཋམེན ཛྷཱནསམྤདཱཡ, དུཏིཡེན ཝིམོཀྑསམྤདཱཡ. པཋམེན ཝཱ སམཱདྷིསམྤདཱཡ, དུཏིཡེན སམཱཔཏྟིསམྤདཱཡ. ཨཐ ཝཱ པཋམེན ཁཡཉཱཎབྷཱཝེན, དུཏིཡེན ཨནུཔྤཱདཉཱཎབྷཱཝེན. པཋམེན ཝཱ ཝིཛྫཱུཔམཏཱཡ, དུཏིཡེན ཝཛིརཱུཔམཏཱཡ. པུརིམེན ཝཱ ཝིརཱགསམྤཏྟིཡཱ, དུཏིཡེན ནིརོདྷསམྤཏྟིཡཱ. ཏཐཱ པཋམེན ནིཡྻཱནབྷཱཝེན, དུཏིཡེན ནིསྶརཎབྷཱཝེན. པཋམེན ཝཱ ཧེཏུབྷཱཝེན, དུཏིཡེན ཨསངྑཏབྷཱཝེན. པཋམེན ཝཱ དསྶནབྷཱཝེན, དུཏིཡེན ཝིཝེཀབྷཱཝེན. པཋམེན ཝཱ ཨདྷིཔཏིབྷཱཝེན, དུཏིཡེན ཨམཏབྷཱཝེན དྷམྨཾ ཐོམེཏི. ཨཐ ཝཱ ‘‘ཡཾ དྷམྨཾ བྷཱཝེཏྭཱ བུདྡྷབྷཱཝཾ ཨུཔགཏོ’’ཏི ཨེཏེན སྭཱཀྑཱཏཏཱཡ དྷམྨཾ ཐོམེཏི, ‘‘སཙྪིཀཏྭཱ’’ཏི ¶ ཨེཏེན སནྡིཊྛིཀཏཱཡ. ཏཐཱ པུརིམེན ཨཀཱལིཀཏཱཡ, པཙྪིམེན ཨེཧིཔསྶིཀཏཱཡ. པུརིམེན ཝཱ ཨོཔནེཡྻིཀཏཱཡ, པཙྪིམེན པཙྩཏྟཾ ཝེདིཏབྦཏཱཡ དྷམྨཾ ཐོམེཏི. ‘‘གཏམལ’’ནྟི ཨིམིནཱ སཾཀིལེསཱབྷཱཝདཱིཔནེན དྷམྨསྶ པརིསུདྡྷཏཾ དསྶེཏི, ‘‘ཨནུཏྟར’’ནྟི ཨེཏེན ཨཉྙསྶ ཝིསིཊྛསྶ ཨབྷཱཝདཱིཔནེན ཝིཔུལཔརིཔུཎྞཏཾ. པཋམེན ཝཱ པཧཱནསམྤདཾ དྷམྨསྶ དསྶེཏི, དུཏིཡེན པབྷཝསམྤདཾ. བྷཱཝེཏབྦཏཱཡ ཝཱ དྷམྨསྶ གཏམལབྷཱཝོ ཡོཛེཏབྦོ. བྷཱཝནཱགུཎེན ཧི སོ དོསཱནཾ སམུགྒྷཱཏཀོ ཧོཏཱིཏི. སཙྪིཀཱཏབྦབྷཱཝེན ཨནུཏྟརབྷཱཝོ ཡོཛེཏབྦོ. སཙྪིཀིརིཡཱནིབྦཏྟིཏོ ཧི ཏདུཏྟརིཀརཎཱིཡཱབྷཱཝཏོ ཨནཉྙསཱདྷཱརཎཏཱཡ ཨནུཏྟརོཏི. ཏཐཱ ‘‘བྷཱཝེཏྭཱ’’ཏི ཨེཏེན སཧ པུབྦབྷཱགསཱིལཱདཱིཧི སེཀྑཱ སཱིལསམཱདྷིཔཉྙཱཀྑནྡྷཱ དསྶིཏཱ ཧོནྟི. ‘‘སཙྪིཀཏྭཱ’’ཏི ཨེཏེན སཧ ཨསངྑཏཱཡ དྷཱཏུཡཱ ཨསེཀྑཱ སཱིལསམཱདྷིཔཉྙཱཀྑནྡྷཱ དསྶིཏཱ ཧོནྟཱིཏི.

༣. ཨེཝཾ ¶ སངྑེཔེནེཝ སབྦདྷམྨགུཎེཧི སདྡྷམྨཾ ཨབྷིཏྠཝིཏྭཱ ཨིདཱནི ཨརིཡསངྒྷཾ ཐོམེཏུཾ ‘‘སུགཏསྶཱ’’ཏིཨཱདིམཱཧ. ཏཏྠ སུགཏསྶཱཏི སམྦནྡྷནིདྡེསོ. ‘‘ཏསྶ པུཏྟཱན’’ནྟི ཨེཏེན སམྦནྡྷོ. ཨོརསཱནནྟི པུཏྟཝིསེསནཾ. མཱརསེནམཐནཱནནྟི ཨོརསཔུཏྟབྷཱཝེ ཀཱརཎནིདྡེསོ ཏེན ཀིལེསཔྤཧཱནམེཝ བྷགཝཏོ ཨོརསཔུཏྟབྷཱཝེ ཀཱརཎཾ ཨནུཛཱནཱཏཱིཏི དསྶེཏི. ཨཊྛནྣནྟི གཎནཔརིཙྪེདནིདྡེསོ. ཏེན ཙ སཏིཔི ཏེསཾ སཏྟཝིསེསབྷཱཝེན ཨནེཀསཏསཧསྶབྷཱཝེ ཨིམཾ གཎནཔརིཙྪེདཾ ནཱཏིཝཏྟནྟཱིཏི དསྶེཏི མགྒཊྛཕལཊྛབྷཱཝཱནཏིཝཏྟནཏོ. སམཱུཧནྟི སམུདཱཡནིདྡེསོ. ཨརིཡསངྒྷནྟི གུཎཝིསིཊྛསཾཧཏབྷཱཝནིདྡེསོ. ཏེན ཨསཏིཔི ཨརིཡཔུགྒལཱནཾ ཀཱཡསཱམགྒིཡཾ ཨརིཡསངྒྷབྷཱཝཾ དསྶེཏི དིཊྛིསཱིལསཱམཉྙེན སཾཧཏབྷཱཝཏོ.

ཏཏྠ ཨུརསི བྷཝཱ ཛཱཏཱ སཾབདྡྷཱ ཙ ཨོརསཱ. ཡཐཱ ཧི སཏྟཱནཾ ཨོརསཔུཏྟཱ ཨཏྟཛཏཱཡ པིཏུ སནྟཀསྶ དཱཡཛྫསྶ ཝིསེསེན བྷཱགིནོ ཧོནྟི, ཨེཝམེཏེཔི ཨརིཡཔུགྒལཱ སམྨཱསམྦུདྡྷསྶ སཝནནྟེ ཨརིཡཱཡ ཛཱཏིཡཱ ཛཱཏཏཱཡ བྷགཝཏོ སནྟཀསྶ ཝིམུཏྟིསུཁསྶ ཨརིཡདྷམྨརཏནསྶ ཨེཀནྟེན བྷཱགིནོཏི ཨོརསཱ ཝིཡ ཨོརསཱ. ཨཐ ཝཱ བྷགཝཏོ དྷམྨདེསནཱནུབྷཱཝེན ཨརིཡབྷཱུམིཾ ཨོཀྐམམཱནཱ ཨོཀྐནྟཱ ཙ ཨརིཡསཱཝཀཱ བྷགཝཏོ ཨུརེ ཝཱཡཱམཛནིཏཱབྷིཛཱཏིཏཱཡ ནིཔྤརིཡཱཡེན ཨོརསཔུཏྟཱཏི ཝཏྟབྦཏཾ ཨརཧནྟི. སཱཝཀེཧི པཝཏྟིཡམཱནཱཔི ཧི དྷམྨདེསནཱ ‘‘བྷགཝཏོ དྷམྨདེསནཱ’’ཨིཙྩེཝ ཝུཙྩཏི ཏཾམཱུལཀཏྟཱ ལཀྑཎཱདིཝིསེསཱབྷཱཝཏོ ཙ.

ཡདིཔི ཨརིཡསཱཝཀཱནཾ ཨརིཡམགྒཱདྷིགམསམཡེ བྷགཝཏོ ཝིཡ ཏདནྟརཱཡཀརཎཏྠཾ དེཝཔུཏྟམཱརོ ¶ , མཱརཝཱཧིནཱི ཝཱ ན ཨེཀནྟེན ཨཔསཱདེཏི, ཏེཧི པན ཨཔསཱདེཏབྦཏཱཡ ཀཱརཎེ ཝིམཐིཏེ ཏེཔི ཝིམཐིཏཱ ཨེཝ ནཱམ ཧོནྟཱིཏི ཨཱཧ – ‘‘མཱརསེནམཐནཱན’’ནྟི. ཨིམསྨིཾ པནཏྠེ ‘‘མཱརམཱརསེནམཐནཱན’’ནྟི ཝཏྟབྦེ ‘‘མཱརསེནམཐནཱན’’ནྟི ཨེཀདེསསརཱུཔེཀསེསོ ཀཏོཏི དཊྛབྦཾ. ཨཐ ཝཱ ཁནྡྷཱབྷིསངྑཱརམཱརཱནཾ ཝིཡ དེཝཔུཏྟམཱརསྶཔི གུཎམཱརཎེ སཧཱཡབྷཱཝཱུཔགམནཏོ ཀིལེསབལཀཱཡོ ‘‘སེནཱ’’ཏི ཝུཙྩཏི. ཡཐཱཧ – ‘‘ཀཱམཱ ཏེ པཋམཱ སེནཱ’’ཏིཨཱདི ¶ (སུ. ནི. ༤༣༨; མཧཱནི. ༢༨, ༦༨, ༡༤༩). སཱ ཙ ཏེཧི དིཡཌྜྷསཧསྶབྷེདཱ, ཨནནྟབྷེདཱ ཝཱ ཀིལེསཝཱཧིནཱི སཏིདྷམྨཝིཙཡཝཱིརིཡསམཐཱདིགུཎཔྤཧརཎེཧི ཨོདྷིསོ ཝིམཐིཏཱ ཝིཧཏཱ ཝིདྡྷསྟཱ ཙཱཏི མཱརསེནམཐནཱ, ཨརིཡསཱཝཀཱ. ཨེཏེན ཏེསཾ བྷགཝཏོ ཨནུཛཱཏཔུཏྟཏཾ དསྶེཏི.

ཨཱརཀཏྟཱ ཀིལེསེཧི, ཨནཡེ ན ཨིརིཡནཏོ, ཨཡེ ཙ ཨིརིཡནཏོ ཨརིཡཱ ནིརུཏྟིནཡེན. ཨཐ ཝཱ སདེཝཀེན ལོཀེན སརཎནྟི ཨརཎཱིཡཏོ ཨུཔགནྟབྦཏོ, ཨུཔགཏཱནཉྩ ཏདཏྠསིདྡྷིཏོ ཨརིཡཱ, ཨརིཡཱནཾ སངྒྷོཏི ཨརིཡསངྒྷོ, ཨརིཡོ ཙ སོ སངྒྷོ ཙཱཏི ཝཱ ཨརིཡསངྒྷོ, ཏཾ ཨརིཡསངྒྷཾ. བྷགཝཏོ ཨཔརབྷཱགེ བུདྡྷདྷམྨརཏནཱནམྤི སམདྷིགམོ སངྒྷརཏནཱདྷཱིནོཏི ཨསྶ ཨརིཡསངྒྷསྶ བཧཱུཔཀཱརཏཾ དསྶེཏུཾ ཨིདྷེཝ ‘‘སིརསཱ ཝནྡེ’’ཏི ཝུཏྟནྟི དཊྛབྦཾ.

ཨེཏྠ ཙ ‘‘སུགཏསྶ ཨོརསཱནཾ པུཏྟཱན’’ནྟི ཨེཏེན ཨརིཡསངྒྷསྶ པབྷཝསམྤདཾ དསྶེཏི, ‘‘མཱརསེནམཐནཱན’’ནྟི ཨེཏེན པཧཱནསམྤདཾ སཀལསཾཀིལེསཔྤཧཱནདཱིཔནཏོ. ‘‘ཨཊྛནྣམྤི སམཱུཧ’’ནྟི ཨེཏེན ཉཱཎསམྤདཾ མགྒཊྛཕལཊྛབྷཱཝདཱིཔནཏོ. ‘‘ཨརིཡསངྒྷ’’ནྟི ཨེཏེན པབྷཝསམྤདཾ དསྶེཏི སབྦསངྒྷཱནཾ ཨགྒབྷཱཝདཱིཔནཏོ. ཨཐ ཝཱ ‘‘སུགཏསྶ ཨོརསཱནཾ པུཏྟཱན’’ནྟི ཨརིཡསངྒྷསྶ ཝིསུདྡྷནིསྶཡབྷཱཝདཱིཔནཾ, ‘‘མཱརསེནམཐནཱན’’ནྟི སམྨཱཨུཛུཉཱཡསཱམཱིཙིཔྤཊིཔནྣབྷཱཝདཱིཔནཾ, ‘‘ཨཊྛནྣམྤི སམཱུཧ’’ནྟི ཨཱཧུནེཡྻཱདིབྷཱཝདཱིཔནཾ, ‘‘ཨརིཡསངྒྷ’’ནྟི ཨནུཏྟརཔུཉྙཀྑེཏྟབྷཱཝདཱིཔནཾ. ཏཐཱ ‘‘སུགཏསྶ ཨོརསཱནཾ པུཏྟཱན’’ནྟི ཨེཏེན ཨརིཡསངྒྷསྶ ལོཀུཏྟརསརཎགམནསབྦྷཱཝཾ དཱིཔེཏི. ལོཀུཏྟརསརཎགམནེན ཧི ཏེ བྷགཝཏོ ཨོརསཔུཏྟཱ ཛཱཏཱ. ‘‘མཱརསེནམཐནཱན’’ནྟི ཨེཏེན ཨབྷིནཱིཧཱརསམྤདཱསིདྡྷཾ པུབྦབྷཱགེ སམྨཱཔཊིཔཏྟིཾ དསྶེཏི. ཀཏཱབྷིནཱིཧཱརཱ ཧི སམྨཱཔཊིཔནྣཱ མཱརཾ མཱརཔརིསཾ ཝཱ ཨབྷིཝིཛིནནྟི. ‘‘ཨཊྛནྣམྤི སམཱུཧ’’ནྟི ཨེཏེན ཝིདྡྷསྟཝིཔཀྑེ སེཀྑཱསེཀྑདྷམྨེ དསྶེཏི པུགྒལཱདྷིཊྛཱནེན མགྒཕལདྷམྨཱནཾ པཀཱསིཏཏྟཱ. ‘‘ཨརིཡསངྒྷ’’ནྟི ཨགྒདཀྑིཎེཡྻབྷཱཝཾ དསྶེཏི. སརཎགམནཉྩ སཱཝཀཱནཾ སབྦགུཎཱནཾ ཨཱདི, སཔུབྦབྷཱགཔྤཊིཔདཱ སེཀྑཱ སཱིལཀྑནྡྷཱདཡོ མཛ྄ཛྷེ, ཨསེཀྑཱ སཱིལཀྑནྡྷཱདཡོ ¶ པརིཡོསཱནནྟི ཨཱདིམཛ྄ཛྷཔརིཡོསཱནཀལྱཱཎཱ སངྑེཔཏོ སབྦེ ཨརིཡསངྒྷགུཎཱ པཀཱསིཏཱ ཧོནྟི.

༤. ཨེཝཾ ¶ གཱཐཱཏྟཡེན སངྑེཔཏོ སཀལགུཎསཾཀིཏྟནམུཁེན རཏནཏྟཡསྶ པཎཱམཾ ཀཏྭཱ ཨིདཱནི ཏཾནིཔཙྩཀཱརཾ ཡཐཱདྷིཔྤེཏེ པཡོཛནེ པརིཎཱམེནྟོ ‘‘ཨིཏི མེ’’ཏིཨཱདིམཱཧ. ཏཏྠ རཏིཛནནཊྛེན རཏནཾ, བུདྡྷདྷམྨསངྒྷཱ. ཏེསཉྷི ‘‘ཨིཏིཔི སོ བྷགཝཱ’’ཏིཨཱདིནཱ ཡཐཱབྷཱུཏགུཎེ ཨཱཝཛྫེནྟསྶ ཨམཏཱདྷིགམཧེཏུབྷཱུཏཾ ཨནཔྤཀཾ པཱིཏིཔཱམོཛྫཾ ཨུཔྤཛྫཏི. ཡཐཱཧ –

‘‘ཡསྨིཾ, མཧཱནཱམ, སམཡེ ཨརིཡསཱཝཀོ ཏཐཱགཏཾ ཨནུསྶརཏི, ནེཝསྶ ཏསྨིཾ སམཡེ རཱགཔརིཡུཊྛིཏཾ ཙིཏྟཾ ཧོཏི, ན དོས…པེ… ན མོཧཔརིཡུཊྛིཏཾ ཙིཏྟཾ ཧོཏི, ཨུཛུགཏམེཝསྶ ཏསྨིཾ སམཡེ ཙིཏྟཾ ཧོཏི ཏཐཱགཏཾ ཨཱརབྦྷ. ཨུཛུགཏཙིཏྟོ ཁོ པན, མཧཱནཱམ, ཨརིཡསཱཝཀོ ལབྷཏི ཨཏྠཝེདཾ, ལབྷཏི དྷམྨཝེདཾ, ལབྷཏི དྷམྨཱུཔསཾཧིཏཾ པཱམོཛྫཾ, པམུདིཏསྶ པཱིཏི ཛཱཡཏཱི’’ཏིཨཱདི (ཨ. ནི. ༦.༡༠; ༡༡.༡༡).

ཙིཏྟཱིཀཏཱདིབྷཱཝོ ཝཱ རཏནཊྛོ. ཝུཏྟཉྷེཏཾ –

‘‘ཙིཏྟཱིཀཏཾ མཧགྒྷཉྩ, ཨཏུལཾ དུལླབྷདསྶནཾ;

ཨནོམསཏྟཔརིབྷོགཾ, རཏནཾ ཏེན ཝུཙྩཏཱི’’ཏི. (དཱི. ནི. ཨཊྛ. ༢.༣༣; སཾ. ནི. ཨཊྛ. ༣.༥.༢༢༣; ཁུ. པཱ. ཨཊྛ. ༦.༣; སུ. ནི. ཨཊྛ. ༡.༢༢༦);

ཙིཏྟཱིཀཏབྷཱཝཱདཡོ ཙ ཨནཉྙསཱདྷཱརཎཱ བུདྡྷཱདཱིསུ ཨེཝ ལབྦྷནྟཱིཏི.

ཝནྡནཱཝ ཝནྡནཱམཡཾ ཡཐཱ ‘‘དཱནམཡཾ, སཱིལམཡ’’ནྟི (དཱི. ནི. ༣.༣༠༥; ཨིཏིཝུ. ༦༠). ཝནྡནཱ ཙེཏྠ ཀཱཡཝཱཙཱཙིཏྟེཧི ཏིཎྞཾ རཏནཱནཾ གུཎནིནྣཏཱ, ཐོམནཱ ཝཱ. པུཛྫབྷཱཝཕལནིབྦཏྟནཏོ པུཉྙཾ, ཨཏྟནོ སནྟཱནཾ པུནཱཏཱིཏི ཝཱ. སུཝིཧཏནྟརཱཡོཏི སུཊྛུ ཝིཧཏནྟརཱཡོ. ཨེཏེན ཨཏྟནོ པསཱདསམྤཏྟིཡཱ, རཏནཏྟཡསྶ ཙ ཁེཏྟབྷཱཝསམྤཏྟིཡཱ ཏཾ པུཉྙཾ ཨཏྠཔྤཀཱསནསྶ ཨུཔགྷཱཏཀཨུཔདྡཝཱནཾ ཝིཧནནེ སམཏྠནྟི དསྶེཏི. ཧུཏྭཱཏི པུབྦཀཱལཀིརིཡཱ. ཏསྶ ‘‘ཨཏྠཾ པཀཱསཡིསྶཱམཱི’’ཏི ཨེཏེན སམྦནྡྷོ. ཏསྶཱཏི ཡཾ རཏནཏྟཡཝནྡནཱམཡཾ པུཉྙཾ, ཏསྶ. ཨཱནུབྷཱཝེནཱཏི བལེན.

༥. ཨེཝཾ ¶ ¶ རཏནཏྟཡསྶ ནིཔཙྩཀཱརཀརཎེ པཡོཛནཾ དསྶེཏྭཱ ཨིདཱནི ཡསྶཱ དྷམྨདེསནཱཡ ཨཏྠཾ སཾཝཎྞེཏུཀཱམོ, ཏསྶཱ ཏཱཝ གུཎཱབྷིཏྠཝནཝསེན ཨུཔཉྙཱཔནཏྠཾ ‘‘ཨེཀཀདུཀཱདིཔཊིམཎྜིཏསྶཱ’’ཏིཨཱདིམཱཧ, ཨེཀཀཱདཱིནི ཨངྒཱནི ཨུཔརཱུཔརི ཝཌྜྷེཏྭཱ དེསིཏེཧི སུཏྟནྟེཧི པཊིམཎྜིཏསྶ ཝིསིཊྛསྶཱཏི ཨཏྠོ. ཨེཏེན ‘‘ཨངྒུཏྟརོ’’ཏི ཨཡཾ ཨིམསྶ ཨཱགམསྶ ཨཏྠཱནུགཏཱ སམཉྙཱཏི དསྶེཏི. ནནུ ཙ ཨེཀཀཱདིཝསེན དེསིཏཱནི སུཏྟཱནིཡེཝ ཨཱགམོ. ཀསྶ པན ཨེཀཀདུཀཱདཱིཧི པཊིམཎྜིཏབྷཱཝོཏི? སཙྩམེཏཾ པརམཏྠཏོ, སུཏྟཱནི པན ཨུཔཱདཱཡ པཉྙཏྟོ ཨཱགམོ. ཡཐེཝ ཧི ཨཏྠབྱཉྫནསམུདཱཡེ སུཏྟནྟི ཝོཧཱརོ, ཨེཝཾ སུཏྟསམུདཱཡེ ཨཱགམོཏི ཝོཧཱརོ. ཨེཀཀཱདཱིཧི ཨངྒེཧི ཨུཔརཱུཔརི ཨུཏྟརོ ཨདྷིཀོཏི ཨངྒུཏྟརོ, ཨཱགམིསྶནྟི ཨེཏྠ, ཨེཏེན, ཨེཏསྨཱ ཝཱ ཨཏྟཏྠཔརཏྠཱདཡོཏི ཨཱགམོ, ཨཱདིཀལྱཱཎཱདིགུཎསམྤཏྟིཡཱ ཨུཏྟམཊྛེན ཏཾཏཾཨབྷིཔཏྠིཏསམིདྡྷིཧེཏུཏཱཡ པཎྜིཏེཧི ཝརིཏབྦཏོ ཝརོ, ཨཱགམོ ཙ སོ ཝརོ ཙ སེཊྛཊྛེནཱཏི ཨཱགམཝརོ, ཨཱགམསམྨཏེཧི ཝཱ ཝརོཏི ཨཱགམཝརོ. ཨངྒུཏྟརོ ཙ སོ ཨཱགམཝརོ ཙཱཏི ཨངྒུཏྟརཱགམཝརོ, ཏསྶ.

པུངྒཝཱ ཝུཙྩནྟི ཨུསབྷཱ, ཨསནྟསནཔརིསྶཡསཧནསྶ པརིཔཱལནཱདིགུཎེཧི ཏཾསདིསཏཱཡ དྷམྨཀཐིཀཱ ཨེཝ པུངྒཝཱཏི དྷམྨཀཐིཀཔུངྒཝཱ, ཏེསཾ. ཧེཏཱུཔམཱདིཔྤཊིམཎྜིཏནཱནཱཝིདྷདེསནཱནཡཝིཙིཏྟཏཱཡ ཝིཙིཏྟཔཊིབྷཱནཛནནསྶ. སུམངྒལཝིལཱསིནཱིཨཱདཱིསུ (དཱི. ནི. ཨཊྛ. ༡.གནྠཱརམྦྷཀཐཱ; མ. ནི. ཨཊྛ. ༡.གནྠཱརམྦྷཀཐཱ; སཾ. ནི. ཨཊྛ. ༡.༡.གནྠཱརམྦྷཀཐཱ) པན ‘‘བུདྡྷཱནུབུདྡྷསཾཝཎྞིཏསྶཱ’’ཏི ཝུཏྟཾ. བུདྡྷཱནཉྷི སཙྩཔྤཊིཝེདྷཾ ཨནུགམྨ པཊིཝིདྡྷསཙྩཱ ཨགྒསཱཝཀཱདཡོ ཨརིཡཱ བུདྡྷཱནུབུདྡྷཱ. ཨཡམྤི ཨཱགམོ ཏེཧི ཨཏྠསཾཝཎྞནཱཝསེན གུཎསཾཝཎྞནཱཝསེན ཙ སཾཝཎྞིཏོ ཨེཝ. ཨཐ ཝཱ བུདྡྷཱ ཙ ཨནུབུདྡྷཱ ཙ བུདྡྷཱནུབུདྡྷཱཏི ཡོཛེཏབྦཾ. སམྨཱསམྦུདྡྷེནེཝ ཧི ཏིཎྞཾ པིཊཀཱནཾ ཨཏྠཝཎྞནཱཀྐམོ བྷཱསིཏོ, ཡཱ ‘‘པཀིཎྞཀདེསནཱ’’ཏི ཝུཙྩཏི. ཏཏོ སངྒཱཡནཱདིཝསེནེཝ སཱཝཀེཧཱིཏི ཨཱཙརིཡཱ ཝདནྟི. ཨིདྷ པན ‘‘དྷམྨཀཐིཀཔུངྒཝཱནཾ ཝིཙིཏྟཔཊིབྷཱནཛནནསྶ’’ཨིཙྩེཝ ཐོམནཱ ཀཏཱ. སཾཝཎྞནཱསུ ཙཱཡཾ ཨཱཙརིཡསྶ པཀཏི, ཡཱ ཏཾཏཾསཾཝཎྞནཱསུ ཨཱདིཏོ ཏསྶ ཏསྶ སཾཝཎྞེཏབྦསྶ དྷམྨསྶ ཝིསེསགུཎཀིཏྟནེན ཐོམནཱ. ཏཐཱ ཧི སུམངྒལཝིལཱསིནཱིཔཔཉྩསཱུདནཱིསཱརཏྠཔྤཀཱསནཱིསུ ཨཊྛསཱལིནཱིཨཱདཱིསུ ¶ ཙ ཡཐཱཀྐམཾ ‘‘སདྡྷཱཝཧགུཎསྶ, པརཝཱདམཐནསྶ, ཉཱཎཔྤབྷེདཛནནསྶ, ཏསྶ གམྦྷཱིརཉཱཎེཧི ཨོགཱལ༹ྷསྶ ཨབྷིཎྷསོ ནཱནཱནཡཝིཙིཏྟསྶཱ’’ཏིཨཱདིནཱ ཐོམནཱ ཀཏཱ.

༦. ཨཏྠོ ཀཐཱིཡཏི ཨེཏཱཡཱཏི ཨཏྠཀཐཱ, སཱ ཨེཝ ཨཊྛཀཐཱ, ཏྠ-ཀཱརསྶ ཊྛ-ཀཱརཾ ཀཏྭཱ ཡཐཱ ‘‘དུཀྑསྶ པཱིལ༹ནཊྛོ’’ཏི (པཊི. མ. ༡.༡༧; ༢.༨). ཨཱདིཏོཏིཨཱདིམྷི པཋམསངྒཱིཏིཡཾ ¶ . ཚལ༹བྷིཉྙཏཱཡ པརམེན ཙིཏྟཝསཱིབྷཱཝེན སམནྣཱགཏཏྟཱ ཛྷཱནཱདཱིསུ པཉྩཝིདྷཝསིཏཱསབྦྷཱཝཏོ ཙ ཝསིནོ, ཐེརཱ མཧཱཀསྶཔཱདཡོ, ཏེསཾ སཏེཧི པཉྩཧི. ཡཱཏི ཡཱ ཨཊྛཀཐཱ. སངྒཱིཏཱཏི ཨཏྠཾ པཀཱསེཏུཾ ཡུཏྟཊྛཱནེ ‘‘ཨཡཾ ཨེཏསྶ ཨཏྠོ, ཨཡཾ ཨེཏསྶ ཨཏྠོ’’ཏི སངྒཧེཏྭཱ ཝུཏྟཱ. ཨནུསངྒཱིཏཱ ཙ ཡསཏྠེརཱདཱིཧི པཙྪཱཔི དུཏིཡཏཏིཡསངྒཱིཏཱིསུ. ཨིམིནཱ ཨཏྟནོ སཾཝཎྞནཱཡ ཨཱགམནཝིསུདྡྷིཾ དསྶེཏི.

༧. སཱིཧསྶ ལཱནཏོ གཧཎཏོ སཱིཧལོ༹, སཱིཧཀུམཱརོ. ཏཾཝཾསཛཱཏཏཱཡ ཏམྦཔཎྞིདཱིཔེ ཁཏྟིཡཱནཾ, ཏེསཾ ནིཝཱསཏཱཡ ཏམྦཔཎྞིདཱིཔསྶ ཙ སཱིཧལ༹བྷཱཝོ ཝེདིཏབྦོ. ཨཱབྷཏཱཏི ཛམྦུདཱིཔཏོ ཨཱནཱིཏཱ. ཨཐཱཏི པཙྪཱ. ཨཔརབྷཱགེ ཧི ཨསངྐརཏྠཾ སཱིཧལ༹བྷཱསཱཡ ཨཊྛཀཐཱ ཋཔིཏཱཏི. ཏེན སཱ མཱུལཊྛཀཐཱ སབྦསཱདྷཱརཎཱ ན ཧོཏཱིཏི ཨིདཾ ཨཏྠཔྤཀཱསནཾ ཨེཀནྟེན ཀརཎཱིཡནྟི དསྶེཏི. ཏེནེཝཱཧ – ‘‘དཱིཔཝཱསཱིནམཏྠཱཡཱ’’ཏི. ཏཏྠ དཱིཔཝཱསཱིནནྟི ཛམྦུདཱིཔཝཱསཱིནཾ, དཱིཔཝཱསཱིནནྟི ཝཱ སཱིཧལ༹དཱིཔཝཱསཱིནཾ ཨཏྠཱཡ སཱིཧལ༹བྷཱསཱཡ ཋཔིཏཱཏི ཡོཛནཱ.

༨. ཨཔནེཏྭཱནཱཏི ཀཉྩུཀསདིསཾ སཱིཧལ༹བྷཱསཾཨཔནེཏྭཱན. ཏཏོཏི ཨཊྛཀཐཱཏོ. ཨཧནྟི ཨཏྟཱནཾ ནིདྡིསཏི. མནོརམཾ བྷཱསནྟི མཱགདྷབྷཱསཾ. སཱ ཧི སབྷཱཝནིརུཏྟིབྷཱུཏཱ པཎྜིཏཱནཾ མནཾ རམཡཏཱིཏི. ཏེནེཝཱཧ – ‘‘ཏནྟིནཡཱནུཙྪཝིཀ’’ནྟི, པཱལི༹གཏིཡཱ ཨནུལོམིཀཾ པཱལི༹ཙྪཱཡཱནུཝིདྷཱཡིནིནྟི ཨཏྠོ. ཝིགཏདོསནྟི ཨསབྷཱཝནིརུཏྟིབྷཱསནྟརརཧིཏཾ.

༩. སམཡཾ ཨཝིལོམེནྟོཏི སིདྡྷནྟཾ ཨཝིརོདྷེནྟོ. ཨེཏེན ཨཏྠདོསཱབྷཱཝམཱཧ. ཨཝིརུདྡྷཏྟཱ ཨེཝ ཧི ཐེརཝཱདཱཔི ཨིདྷ པཀཱསཱིཡིསྶནྟི. ཐེརཝཾསདཱིཔཱནནྟི ཐིརེཧི སཱིལཀྑནྡྷཱདཱིཧི སམནྣཱགཏཏྟཱ ཐེརཱ ¶ , མཧཱཀསྶཔཱདཡོ, ཏེཧི ཨཱགཏཱ ཨཱཙརིཡཔརམྤརཱ ཐེརཝཾསོ. ཏཔྤརིཡཱཔནྣཱ ཧུཏྭཱ ཨཱགམཱདྷིགམསམྤནྣཏྟཱ པཉྙཱཔཛྫོཏེན ཏསྶ སམུཛྫལནཏོ ཐེརཝཾསདཱིཔཱ, མཧཱཝིཧཱརཝཱསིནོ ཐེརཱ, ཏེསཾ. ཝིཝིདྷེཧི ཨཱཀཱརེཧི ནིཙྪཱིཡཏཱིཏི ཝིནིཙྪཡོ, གཎྛིཊྛཱནེསུ ཁཱིལམདྡནཱཀཱརེན པཝཏྟཱ ཝིམཏིཙྪེདཀཐཱ. སུཊྛུ ནིཔུཎོ སཎྷོ ཝིནིཙྪཡོ ཨེཏེསནྟི སུནིཔུཎཝིནིཙྪཡཱ. ཨཐ ཝཱ ཝིནིཙྪིནོཏཱིཏི ཝིནིཙྪཡོ, ཡཐཱཝུཏྟཏྠཝིསཡཾ ཉཱཎཾ. སུཊྛུ ནིཔུཎོ ཚེཀོ ཝིནིཙྪཡོ ཨེཏེསནྟི སུནིཔུཎཝིནིཙྪཡཱ. ཨེཏེན མཧཱཀསྶཔཱདིཏྠེརཔརམྤརཱབྷཏོ, ཏཏོཡེཝ ཙ ཨཝིཔརཱིཏོ སཎྷསུཁུམོ མཧཱཝིཧཱརཝཱསཱིནཾ ཝིནིཙྪཡོཏི ཏསྶ པམཱཎབྷཱུཏཏཾ དསྶེཏི.

༡༠. སུཛནསྶ ¶ ཙཱཏི ཙ-སདྡོ སམྤིཎྜནཏྠོ. ཏེན ‘‘ན ཀེཝལཾ ཛམྦུདཱིཔཝཱསཱིནཾཡེཝ ཨཏྠཱཡ, ཨཐ ཁོ སཱདྷུཛནཱནཾ ཏོསནཏྠཉྩཱ’’ཏི དསྶེཏི. ཏེན ཙ ‘‘ཏམྦཔཎྞིདཱིཔཝཱསཱིནམྤི ཨཏྠཱཡཱ’’ཏི ཨཡམཏྠོ སིདྡྷོ ཧོཏི ཨུགྒཧཎཱདིསུཀརཏཱཡ ཏེསམྤི བཧཱུཔཀཱརཏྟཱ. ཙིརཊྛིཏཏྠནྟི ཙིརཊྛིཏིཨཏྠཾ, ཙིརཀཱལཱཝཊྛཱནཱཡཱཏི ཨཏྠོ. ཨིདཉྷི ཨཏྠཔྤཀཱསནཾ ཨཝིཔརཱིཏབྱཉྫནསུནིཀྑེཔསྶ ཨཏྠསུནཱིཏསྶ ཙ ཨུཔཱཡབྷཱཝཏོ སདྡྷམྨསྶ ཙིརཊྛིཏིཡཱ སཾཝཏྟཏི. ཝུཏྟཉྷེཏཾ བྷགཝཏཱ –

‘‘དྭེམེ, བྷིཀྑཝེ, དྷམྨཱ སདྡྷམྨསྶ ཋིཏིཡཱ ཨསམྨོསཱཡ ཨནནྟརདྷཱནཱཡ སཾཝཏྟནྟི. ཀཏམེ དྭེ? སུནིཀྑིཏྟཉྩ པདབྱཉྫནཾ, ཨཏྠོ ཙ སུནཱིཏོ’’ཏི (ཨ. ནི. ༢.༢༡).

༡༡-༡༢. ཡཾ ཨཏྠཝཎྞནཾ ཀཏྠུཀཱམོ, ཏསྶཱ མཧནྟཏྟཾ པརིཧརིཏུཾ ‘‘སཱཝཏྠིཔབྷཱུཏཱིན’’ནྟིཨཱདིམཱཧ. ཏེནཱཧ – ‘‘ན ཨིདྷ ཝིཏྠཱརཀཐཾ ཀརིསྶཱམི, ན ཏཾ ཨིདྷ ཝིཙཱརཡིསྶཱམཱི’’ཏི ཙ. ཏཏྠ དཱིགྷསྶཱཏི དཱིགྷནིཀཱཡསྶ. མཛ྄ཛྷིམསྶཱཏི མཛ྄ཛྷིམནིཀཱཡསྶ. ‘‘སངྒཱིཏཱིནཾ དྭིནྣཾ ཡཱ མེ ཨཏྠཾ ཝདནྟེནཱ’’ཏིཔི པཱཋོ. ཏཏྠཔི སངྒཱིཏཱིནཾ དྭིནྣནྟི དཱིགྷམཛ྄ཛྷིམནིཀཱཡཱནནྟི ཨཏྠོ གཧེཏབྦོ. མེཏི ཀརཎཏྠེ སཱམིཝཙནཾ, མཡཱཏི ཨཏྠོ. སུདནྟི ནིཔཱཏམཏྟཾ. ཧེཊྛཱ དཱིགྷསྶ མཛ྄ཛྷིམསྶ ཙ ཨཏྠཾ ཝདནྟེན སཱཝཏྠིཔབྷུཏཱིནཾ ནགརཱནཾ ཡཱ ཝཎྞནཱ ཀཏཱ, ཏསྶཱ ཝིཏྠཱརཀཐཾ ན ཨིདྷ བྷིཡྻོ ཀརིསྶཱམཱིཏི ¶ ཡོཛེཏབྦཾ. ཡཱནི ཙ ཏཏྠ ཝཏྠཱུནི ཝིཏྠཱརཝསེན ཝུཏྟཱནི, ཏེསམྤི ཝིཏྠཱརཀཐཾ ན ཨིདྷ བྷིཡྻོ ཀརིསྶཱམཱིཏི སམྦནྡྷོ.

༡༣. ཨིདཱནི ‘‘ན ཨིདྷ ཝིཏྠཱརཀཐཾ ཀརིསྶཱམཱི’’ཏི སཱམཉྙཏོ ཝུཏྟསྶ ཨཏྠསྶ པཝརཾ དསྶེཏུཾ – ‘‘སུཏྟཱནཾ པནཱ’’ཏིཨཱདི ཝུཏྟཾ. སུཏྟཱནཾ ཡེ ཨཏྠཱ ཝཏྠཱུཧི ཝིནཱ ན པཀཱསནྟཱིཏི ཡོཛེཏབྦཾ.

༡༤. ཡཾ ཨཊྛཀཐཾ ཀཏྟུཀཱམོ, ཏདེཀདེསབྷཱཝེན ཝིསུདྡྷིམགྒོ ཙ གཧེཏབྦོཏི ཀཐིཀཱནཾ ཨུཔདེསཾ ཀརོནྟོ ཏཏྠ ཝིཙཱརིཏདྷམྨེ ཨུདྡེསཝསེན དསྶེཏི – ‘‘སཱིལཀཐཱ’’ཏིཨཱདིནཱ. ཏཏྠ སཱིལཀཐཱཏི ཙཱརིཏྟཝཱརིཏྟཱདིཝསེན སཱིལསྶ ཝིཏྠཱརཀཐཱ. དྷུཏདྷམྨཱཏི པིཎྜཔཱཏིཀངྒཱདཡོ ཏེརས ཀིལེསདྷུནནཀདྷམྨཱ. ཀམྨཊྛཱནཱནི སབྦཱནཱིཏི པཱལི༹ཡཾ ཨཱགཏཱནི ཨཊྛཏིཾས, ཨཊྛཀཐཱཡཾ དྭེཏི ནིརཝསེསཱནི ཡོགཀམྨསྶ བྷཱཝནཱཡ པཝཏྟིཊྛཱནཱནི. ཙརིཡཱཝིདྷཱནསཧིཏོཏི རཱགཙརིཏཱདཱིནཾ སབྷཱཝཱདིཝིདྷཱནེན སཧིཏོ. ཛྷཱནཱནི ཙཏྟཱརི རཱུཔཱཝཙརཛ྄ཛྷཱནཱནི, སམཱཔཏྟིཡོ ཙཏསྶོ ཨཱརུཔྤསམཱཔཏྟིཡོ ¶ . ཨཊྛཔི ཝཱ པཊིལདྡྷམཏྟཱནི ཛྷཱནཱནི སམཱཔཛྫནཝསཱིབྷཱཝཔྤཏྟིཡཱ སམཱཔཏྟིཡོ. ཛྷཱནཱནི ཝཱ རཱུཔཱརཱུཔཱཝཙརཛ྄ཛྷཱནཱནི, སམཱཔཏྟིཡོ ཕལསམཱཔཏྟིནིརོདྷསམཱཔཏྟིཡོ.

༡༥. ལོཀིཡལོཀུཏྟརབྷེདཱ ཚ ཨབྷིཉྙཱཡོ སབྦཱ ཨབྷིཉྙཱཡོ. ཉཱཎཝིབྷངྒཱདཱིསུ ཨཱགཏནཡེན ཨེཀཝིདྷཱདིནཱ པཉྙཱཡ སཾཀལེཏྭཱ སམྤིཎྜེཏྭཱ ནིཙྪཡོ པཉྙཱསངྐལནནིཙྪཡོ.

༡༦. པཙྩཡདྷམྨཱནཾ ཧེཏུཨཱདཱིནཾ པཙྩཡུཔྤནྣདྷམྨཱནཾ ཧེཏུཔཙྩཡཱདིབྷཱཝོ པཙྩཡཱཀཱརོ, ཏསྶ དེསནཱ པཙྩཡཱཀཱརདེསནཱ, པཊིཙྩསམུཔྤཱདཀཐཱཏི ཨཏྠོ. སཱ པན གྷནཝིནིབྦྷོགསྶ སུདུཀྐརཏཱཡ སཎྷསུཁུམཱ, ནིཀཱཡནྟརལདྡྷིསངྐརརཧིཏཱ, ཨེཀཏྟནཡཱདིསཧིཏཱ ཙ ཏཏྠ ཝིཙཱརིཏཱཏི ཨཱཧ – ‘‘སུཔརིསུདྡྷནིཔུཎནཡཱ’’ཏི. པཊིསམྦྷིདཱདཱིསུ ཨཱགཏནཡཾ ཨཝིསྶཛྫེཏྭཱཝ ཝིཙཱརིཏཏྟཱ ཨཝིམུཏྟཏནྟིམགྒཱ.

༡༧. ཨིཏི པན སབྦནྟི ཨིཏི-སདྡོ པརིསམཱཔནེ, པན-སདྡོ ཝཙནཱལངྐཱརེ, ཨེཏཾ སབྦནྟི ཨཏྠོ. ཨིདྷཱཏི ཨིམིསྶཱ ཨཊྛཀཐཱཡ ན ཝིཙཱརཡིསྶཱམི པུནརུཏྟིབྷཱཝཏོཏི ཨདྷིཔྤཱཡོ.

༡༨. ཨིདཱནི ¶ ཏསྶེཝ ཨཝིཙཱརཎསྶ ཨེཀནྟཀཱརཎཾ ནིདྡྷཱརེནྟོ ‘‘མཛ྄ཛྷེ ཝིསུདྡྷིམགྒོ’’ཏིཨཱདིམཱཧ. ཏཏྠ ‘‘མཛ྄ཛྷེ ཋཏྭཱ’’ཏི ཨེཏེན མཛ྄ཛྷབྷཱཝདཱིཔནེན ཝིསེསཏོ ཙཏུནྣཾ ཨཱགམཱནཾ སཱདྷཱརཎཊྛཀཐཱ ཝིསུདྡྷིམགྒོ, ན སུམངྒལཝིལཱསིནཱིཨཱདཡོ ཝིཡ ཨསཱདྷཱརཎཊྛཀཐཱཏི དསྶེཏི. ‘‘ཝིསེསཏོ’’ཏི ཙ ཨིདཾ ཝིནཡཱབྷིདྷམྨཱནམྤི ཝིསུདྡྷིམགྒོ ཡཐཱརཧཾ ཨཏྠཝཎྞནཱ ཧོཏི ཨེཝཱཏི ཀཏྭཱ ཝུཏྟཾ.

༡༩. ཨིཙྩེཝཱཏི ཨིཏི ཨེཝ. ཏམྤཱིཏི ཝིསུདྡྷིམགྒམྤི. ཨེཏཱཡཱཏི མནོརཐཔཱུརཎིཡཱ. ཨེཏྠ ཙ ‘‘སཱིཧལ༹དཱིཔཾ ཨཱབྷཏཱ’’ཏིཨཱདིནཱ ཨཏྠཔྤཀཱསནསྶ ནིམིཏྟཾ དསྶེཏི, ‘‘དཱིཔཝཱསཱིནམཏྠཱཡ སུཛནསྶ ཙ ཏུཊྛཏྠཾ ཙིརཊྛིཏཏྠཉྩ དྷམྨསྶཱ’’ཏི ཨེཏེན པཡོཛནཾ, ཨཔནེཏྭཱན ཏཏོཧཾ, སཱིཧལ༹བྷཱས’’ནྟིཨཱདིནཱ. ‘‘སཱཝཏྠིཔབྷུཏཱིན’’ནྟིཨཱདིནཱ ཙ ཀརཎཔྤཀཱརཾ. ཧེཊྛིམནིཀཱཡེསུ ཝིསུདྡྷིམགྒེ ཙ ཝིཙཱརིཏཱནཾ ཨཏྠཱནཾ ཨཝིཙཱརཎམྤི ཧི ཨིདྷ ཀརཎཔྤཀཱརོ ཨེཝཱཏི.

གནྠཱརམྦྷཀཐཱཝཎྞནཱ ནིཊྛིཏཱ.

༡. རཱུཔཱདིཝགྒཝཎྞནཱ

ནིདཱནཝཎྞནཱ

ཝིབྷཱགཝནྟཱནཾ ¶ སབྷཱཝཝིབྷཱཝནཾ ཝིབྷཱགདསྶནཝསེནེཝ ཧོཏཱིཏི པཋམཾ ཏཱཝ ནིཔཱཏསུཏྟཝསེན ཝིབྷཱགཾ དསྶེཏུཾ ‘‘ཏཏྠ ཨངྒུཏྟརཱགམོ ནཱམཱ’’ཏིཨཱདིམཱཧ. ཏཏྠ ཏཏྠཱཏི ‘‘ཨངྒུཏྟརཱགམསྶ ཨཏྠཾ པཀཱསཡིསྶཱམཱི’’ཏི ཡདིདཾ ཝུཏྟཾ, ཏསྨིཾ ཝཙནེ, ‘‘ཡསྶ ཨཏྠཾ པཀཱསཡིསྶཱམཱི’’ཏི པཊིཉྙཱཏཾ, སོ ཨངྒུཏྟརཱགམོ ནཱམ ནིཔཱཏསུཏྟཝསེན ཨེཝཾ ཝིབྷཱགོཏི ཨཏྠོ. ཨཐ ཝཱ ཏཏྠཱཏི ‘‘ཨངྒུཏྟརནིསྶིཏཾ ཨཏྠ’’ནྟི ཨེཏསྨིཾ ཝཙནེ ཡོ ཨངྒུཏྟརཱགམོ ཝུཏྟོ, སོ ནིཔཱཏསུཏྟཱདིཝསེན ཨེདིསོཏི ཨཏྠོ.

ཨིདཱནི ཏཾ ཨཱདིཏོ པཊྛཱཡ སཾཝཎྞིཏུཀཱམོ ཨཏྟནོ སཾཝཎྞནཱཡ པཋམམཧཱསངྒཱིཏིཡཾ ནིཀྑིཏྟཱནུཀྐམེན པཝཏྟབྷཱཝདསྶནཏྠཾ ‘‘ཏསྶ ནིཔཱཏེསུ…པེ… ཝུཏྟཾ ནིདཱནམཱདཱི’’ཏིཨཱདིམཱཧ. ཏཏྠ ཡཐཱཔཙྩཡཾ ཏཏྠ ཏཏྠ དེསིཏཏྟཱ པཉྙཏྟཏྟཱ ཙ ཝིཔྤཀིཎྞཱནཾ དྷམྨཝིནཡཱནཾ སངྒཧེཏྭཱ གཱཡནཾ ཀཐནཾ སངྒཱིཏི. ཨེཏེན ཏཾཏཾསིཀྑཱཔདཱནཾ སུཏྟཱནཉྩ ཨཱདིཔརིཡོསཱནེསུ ¶ ཨནྟརནྟརཱ ཙ སམྦནྡྷཝསེན ཋཔིཏཾ སངྒཱིཏིཀཱརཝཙནཾ སངྒཧིཏཾ ཧོཏི. སངྒཱིཡམཱནསྶ ཨཏྠསྶ མཧནྟཏཱཡ པཱུཛནཱིཡཏཱཡ ཙ མཧཏཱི སངྒཱིཏི མཧཱསངྒཱིཏི, པཋམཱ མཧཱསངྒཱིཏི པཋམམཧཱསངྒཱིཏི, ཏསྶཱ པཝཏྟིཀཱལོ པཋམམཧཱསངྒཱིཏིཀཱལོ, ཏསྨིཾ པཋམམཧཱསངྒཱིཏིཀཱལེ. ནིདདཱཏི དེསནཾ དེསཀཱལཱདིཝསེན ཨཝིདིཏཾ ཝིདིཏཾ ཀཏྭཱ ནིདསྶེཏཱིཏི ནིདཱནཾ. ཡོ ལོཀིཡེཧི ཨུཔོགྒྷཱཏོཏི ཝུཙྩཏི, སྭཱཡམེཏྠ ‘‘ཨེཝཾ མེ སུཏ’’ནྟིཨཱདིཀོ གནྠོ ཝེདིཏབྦོ. ན ‘‘སནིདཱནཱཧཾ, བྷིཀྑཝེ, དྷམྨཾ དེསེམཱི’’ཏིཨཱདཱིསུ (ཨ. ནི. ༣.༡༢༦) ཝིཡ ཨཛ྄ཛྷཱསཡཱདིདེསནུཔྤཏྟིཧེཏུ. ཏེནེཝཱཧ – ‘‘ཨེཝཾ མེ སུཏནྟིཨཱདིཀཾ ཨཱཡསྨཏཱ ཨཱནནྡེན པཋམམཧཱསངྒཱིཏིཀཱལེ ཝུཏྟཾ ནིདཱནམཱདཱི’’ཏི.

༡. ‘‘སཱ པནེསཱ’’ཏིཨཱདིནཱ བཱཧིརནིདཱནེ ཝཏྟབྦཾ ཨཏིདིསིཏྭཱ ཨིདཱནི ཨབྦྷནྟརནིདཱནཾ ཨཱདིཏོ པཊྛཱཡ སཾཝཎྞིཏུཾ ‘‘ཡཾ པནེཏ’’ནྟི ཝུཏྟཾ. ཏཏྠ ཡསྨཱ སཾཝཎྞནཾ ཀརོནྟེན སཾཝཎྞེཏབྦེ དྷམྨེ པདཱནི པདཝིབྷཱགཾ ཏདཏྠཉྩ དསྶེཏྭཱ ཏཏོ པརཾ པིཎྜཏྠཱདིནིདསྶནཝསེན ཙ སཾཝཎྞནཱ ཀཱཏབྦཱ, ཏསྨཱ པདཱནི ཏཱཝ དསྶེནྟོ ‘‘ཨེཝནྟི ནིཔཱཏཔད’’ནྟིཨཱདིམཱཧ ¶ . ཏཏྠ པདཝིབྷཱགོཏི པདཱནཾ ཝིསེསོ, ན པདཝིགྒཧོ. ཨཐ ཝཱ པདཱནི ཙ པདཝིབྷཱགོ ཙ པདཝིབྷཱགོ, པདཝིགྒཧོ ཙ པདཝིབྷཱགོ ཙ པདཝིབྷཱགོཏི ཝཱ ཨེཀསེསཝསེན པདཔདཝིགྒཧཱ པདཝིབྷཱགསདྡེན ཝུཏྟཱཏི ཝེདིཏབྦཾ. ཏཏྠ པདཝིགྒཧོ ‘‘ཛེཏསྶ ཝནཾ ཛེཏཝན’’ནྟིཨཱདིནཱ སམཱསཔདེསུ དཊྛབྦོ.

ཨཏྠཏོཏི པདཏྠཏོ. ཏཾ པན པདཏྠཾ ཨཏྠུདྡྷཱརཀྐམེན པཋམཾ ཨེཝཾ-སདྡསྶ དསྶེནྟོ ‘‘ཨེཝཾ-སདྡོ ཏཱཝཱ’’ཏིཨཱདིམཱཧ. ཨཝདྷཱརཎཱདཱིཏི ཨེཏྠ ཨཱདི-སདྡེན ཨིདམཏྠཔུཙྪཱཔརིམཱཎཱདིཨཏྠཱནཾ སངྒཧོ དཊྛབྦོ. ཏཐཱ ཧི ‘‘ཨེཝཾགཏཱནི པུཐུསིཔྤཱཡཏནཱནི, ཨེཝམཱདཱིནཱི’’ཏིཨཱདཱིསུ ཨིདཾ-སདྡསྶ ཨཏྠེ ཨེཝཾ-སདྡོ. གཏ-སདྡོ ཧི པཀཱརཔརིཡཱཡོ, ཏཐཱ ཝིདྷཱཀཱར-སདྡཱ ཙ. ཏཐཱ ཧི ཝིདྷཡུཏྟགཏསདྡེ ལོཀིཡཱ པཀཱརཏྠེ ཝདནྟི. ‘‘ཨེཝཾ སུ ཏེ སུནྷཱཏཱ སུཝིལིཏྟཱ ཀཔྤིཏཀེསམསྶཱུ ཨཱམུཀྐམཎིཀུཎྜལཱབྷརཎཱ ཨོདཱཏཝཏྠཝསནཱ པཉྩཧི ཀཱམགུཎེཧི སམཔྤིཏཱ སམངྒཱིབྷཱུཏཱ པརིཙཱརེནྟི སེཡྻཐཱཔི ཏྭཾ ཨེཏརཧི ¶ སཱཙརིཡཀོཏི. ནོ ཧིདཾ, བྷོ གོཏམཱ’’ཏིཨཱདཱིསུ (དཱི. ནི. ༡.༢༨༦) པུཙྪཱཡཾ. ‘‘ཨེཝཾ ལཧུཔརིཝཏྟཾ (ཨ. ནི. ༡.༤༨), ཨེཝམཱཡུཔརིཡནྟོ’’ཏི (དཱི. ནི. ༡.༢༤༤; པཱརཱ. ༡༢) ཙ ཨཱདཱིསུ པརིམཱཎེ.

ནནུ ཙ ‘‘ཨེཝཾ སུ ཏེ སུནྷཱཏཱ སུཝིལིཏྟཱ ཨེཝམཱཡུཔརིཡནྟོ’’ཏི ཨེཏྠ ཨེཝཾ-སདྡེན པུཙྪནཱཀཱརཔརིམཱཎཱཀཱརཱནཾ ཝུཏྟཏྟཱ ཨཱཀཱརཏྠོ ཨེཝ ཨེཝཾ-སདྡོཏི? ན, ཝིསེསསབྦྷཱཝཏོ. ཨཱཀཱརམཏྟཝཱཙཀོ ཧི ཨེཝཾ-སདྡོ ཨཱཀཱརཏྠོཏི ཨདྷིཔྤེཏོ ཡཐཱ ‘‘ཨེཝཾ བྱཱཁོ’’ཏིཨཱདཱིསུ (མ. ནི. ༡.༢༣༤; པཱཙི. ༤༡༧; ཙཱུལ༹ཝ. ༦༥), ན པན ཨཱཀཱརཝིསེསཝཱཙཀོ. ཨེཝཉྩ ཀཏྭཱ ‘‘ཨེཝཾ ཛཱཏེན མཙྩེནཱ’’ཏིཨཱདཱིནི (དྷ. པ. ༥༣) ཨུཔམཱདིཨུདཱཧརཎཱནི ཨུཔཔནྣཱནི ཧོནྟི. ཏཐཱ ཧི ‘‘ཡཐཱ ཧི…པེ… བཧུ’’ནྟི (དྷ. པ. ༥༣) ཨེཏྠ པུཔྥརཱསིཊྛཱནིཡཏོ མནུསྶཱུཔཔཏྟིསཔྤུརིསཱུཔནིསྶཡསདྡྷམྨསྶཝནཡོནིསོམནསིཀཱརབྷོགསམྤཏྟི- ཨཱདིདཱནཱདིཔུཉྙཀིརིཡཱཧེཏུསམུདཱཡཏོ སོབྷཱསུགནྡྷཏཱདིགུཎཡོགཏོ མཱལཱགུཎསདིསིཡོ པཧཱུཏཱ པུཉྙཀིརིཡཱ མརིཏབྦསབྷཱཝཏཱཡ མཙྩེན སཏྟེན ཀཏྟབྦཱཏི ཛོཏིཏཏྟཱ པུཔྥརཱསིམཱལཱགུཎཱཝ ཨུཔམཱ. ཏེསཾ ཨུཔམཱཀཱརོ ཡཐཱ-སདྡེན ཨནིཡམཏོ ཝུཏྟོཏི ‘‘ཨེཝཾ-སདྡོ ཨུཔམཱཀཱརནིགམནཏྠོ’’ཏི ཝཏྟུཾ ཡུཏྟཾ, སོ པན ཨུཔམཱཀཱརོ ནིཡམིཡམཱནོ ཨཏྠཏོ ཨུཔམཱཝ ཧོཏཱིཏི ཨཱཧ – ‘‘ཨུཔམཱཡཾ ཨཱགཏོ’’ཏི. ཏཐཱ ‘‘ཨེཝཾ ཨིམིནཱ ཨཱཀཱརེན ཨབྷིཀྐམིཏབྦ’’ནྟིཨཱདིནཱ ཨུཔདིསིཡམཱནཱཡ སམཎསཱརུཔྤཱཡ ཨཱཀཔྤསམྤཏྟིཡཱ ཡོ ཏཏྠ ཨུཔདིསནཱཀཱརོ, སོ ཨཏྠཏོ ཨུཔདེསོ ཨེཝཱཏི ཝུཏྟཾ – ‘‘ཨེཝཾ ཏེ…པེ… ཨུཔདེསེ’’ཏི. ཏཐཱ ཨེཝམེཏཾ ¶ བྷགཝཱ, ཨེཝམེཏཾ སུགཏཱཏི ཨེཏྠ བྷགཝཏཱ ཡཐཱཝུཏྟམཏྠཾ ཨཝིཔརཱིཏཏོ ཛཱནནྟེཧི ཀཏཾ ཏཏྠ སཾཝིཛྫམཱནགུཎཱནཾ པཀཱརེཧི ཧཾསནཾ ཨུདགྒཏཱཀརཎཾ སམྤཧཾསནཾ, ཡོ ཏཏྠ སམྤཧཾསནཱཀཱརོཏི ཡོཛེཏབྦཾ.

ཨེཝམེཝཾ པནཱཡནྟི ཨེཏྠ གརཧཎཱཀཱརོཏི ཡོཛེཏབྦཾ, སོ ཙ གརཧཎཱཀཱརོ ‘‘ཝསལཱི’’ཏིཨཱདིཁུཾསནསདྡསནྣིདྷཱནཏོ ཨིདྷ ཨེཝཾ-སདྡེན པཀཱསིཏོཏི ཝིཉྙཱཡཏི. ཡཐཱ ཙེཏྠ, ཨེཝཾ ཨུཔམཱཀཱརཱདཡོཔི ཨུཔམཱདིཝསེན ཝུཏྟཱནཾ པུཔྥརཱསིཨཱདིསདྡཱནཾ སནྣིདྷཱནཏོཏི དཊྛབྦཾ. ཨེཝཾ, བྷནྟེཏི ཁོཏིཨཱདཱིསུ པན དྷམྨསྶ སཱདྷུཀཾ སཝནམནསིཀཱརེན ནིཡོཛིཏེཧི བྷིཀྑཱུཧི ཨཏྟནོ ཏཏྠ ཋིཏབྷཱཝསྶ པཊིཛཱནནཝསེན ཝུཏྟཏྟཱ ¶ ཨེཏྠ ཨེཝཾ-སདྡོ ཝཙནསམྤཊིཙྪནཏྠོ ཝུཏྟོ, ཏེན ‘‘ཨེཝཾ, བྷནྟེ, སཱདྷུ བྷནྟེ, སུཊྛུ བྷནྟེ’’ཏི ཝུཏྟཾ ཧོཏི. ཨེཝཉྩ ཝདེཧཱིཏི ‘‘ཡཐཱཧཾ ཝདཱམི, ཨེཝཾ སམཎཾ ཨཱནནྡཾ ཝདེཧཱི’’ཏི ཝདནཱཀཱརོ ཨིདཱནི ཝཏྟབྦོ ཨེཝཾ-སདྡེན ནིདསྶཱིཡཏཱིཏི ནིདསྶནཏྠོ ཝུཏྟོ. ཨེཝཾ ནོཏི ཨེཏྠཱཔི ཏེསཾ ཡཐཱཝུཏྟདྷམྨཱནཾ ཨཧིཏདུཀྑཱཝཧབྷཱཝེ སནྣིཊྛཱནཛནནཏྠཾ ཨནུམཏིགྒཧཎཝསེན ‘‘ནོ ཝཱ, ཀཐཾ ཝོ ཨེཏྠ ཧོཏཱི’’ཏི པུཙྪཱཡ ཀཏཱཡ ‘‘ཨེཝཾ ནོ ཨེཏྠ ཧོཏཱི’’ཏི ཝུཏྟཏྟཱ ཏདཱཀཱརསནྣིཊྛཱནཾ ཨེཝཾ-སདྡེན ཝིབྷཱཝིཏནྟི ཝིཉྙཱཡཏི. སོ པན ཏེསཾ དྷམྨཱནཾ ཨཧིཏཱཡ དུཀྑཱཡ སཾཝཏྟནཱཀཱརོ ནིཡམིཡམཱནོ ཨཝདྷཱརཎཏྠོ ཧོཏཱིཏི ཨཱཧ – ‘‘ཨེཝཾ ནོ ཨེཏྠ ཧོཏཱིཏིཨཱདཱིསུ ཨཝདྷཱརཎེ’’ཏི.

ནཱནཱནཡནིཔུཎནྟི ཨེཀཏྟནཱནཏྟཨབྱཱཔཱརཨེཝཾདྷམྨཏཱསངྑཱཏཱ, ནནྡིཡཱཝཊྚཏིཔུཀྑལསཱིཧཝིཀྐཱིལི༹ཏཨངྐུསདིསཱལོཙནསངྑཱཏཱ ཝཱ ཨཱདྷཱརཱདིབྷེདཝསེན ནཱནཱཝིདྷཱ ནཡཱ ནཱནཱནཡཱ. ནཡཱ ཝཱ པཱལི༹གཏིཡོ, ཏཱ ཙ པཉྙཏྟིཨཱདིཝསེན སཾཀིལེསབྷཱགིཡཱདིལོཀིཡཱདིཏདུབྷཡཝོམིསྶཀཏཱདིཝསེན ཀུསལཱདིཝསེན ཁནྡྷཱདིཝསེན སངྒཧཱདིཝསེན སམཡཝིམུཏྟཱདིཝསེན པདྷཱནཱདིཝསེན ཀུསལམཱུལཱདིཝསེན ཏིཀཔཊྛཱནཱདིཝསེན ཙ ནཱནཔྤཀཱརཱཏི ནཱནཱནཡཱ, ཏེཧི ནིཔུཎཾ སཎྷཾ སུཁུམནྟི ནཱནཱནཡནིཔུཎཾ. ཨཱསཡོཝ ཨཛ྄ཛྷཱསཡོ, ཏེ ཙ སསྶཏཱདིབྷེདེན ཏཏྠ ཙ ཨཔྤརཛཀྑཏཱདིབྷེདེན ཙ ཨནེཀེ, ཨཏྟཛ྄ཛྷཱསཡཱདཡོ ཨེཝ ཝཱ སམུཊྛཱནཾ ཨུཔྤཏྟིཧེཏུ ཨེཏསྶཱཏི ཨནེཀཛ྄ཛྷཱསཡསམུཊྛཱནཾ. ཨཏྠབྱཉྫནསམྤནྣནྟི ཨཏྠབྱཉྫནཔརིཔུཎྞཾ ཨུཔནེཏབྦཱབྷཱཝཏོ. སངྐཱསནཔཀཱསནཝིཝརཎཝིབྷཛནཨུཏྟཱནཱིཀརཎཔཉྙཏྟིཝསེན ཚཧི ཨཏྠཔདེཧི ཨཀྑརཔདབྱཉྫནཱཀཱརནིརུཏྟིནིདྡེསཝསེན ཚཧི བྱཉྫནཔདེཧི ཙ སམནྣཱགཏནྟི ཝཱ ཨཏྠོ དཊྛབྦོ.

ཝིཝིདྷཔཱཊིཧཱརིཡནྟི ཨེཏྠ པཱཊིཧཱརིཡཔདསྶ ཝཙནཏྠཾ ‘‘པཊིཔཀྑཧརཎཏོ རཱགཱདིཀིལེསཱཔནཡནཏོ ཙ པཱཊིཧཱརིཡ’’ནྟི ཝདནྟི. བྷགཝཏོ པན པཊིཔཀྑཱ རཱགཱདཡོ ན སནྟི ¶ , ཡེ ཧརིཏབྦཱ. པུཐུཛྫནཱནམྤི ཝིགཏཱུཔཀྐིལེསེ ཨཊྛགུཎསམནྣཱགཏེ ཙིཏྟེ ཧཏཔཊིཔཀྑེ ཨིདྡྷིཝིདྷཾ པཝཏྟཏི, ཏསྨཱ ཏཏྠ པཝཏྟཝོཧཱརེན ཙ ན སཀྐཱ ཨིདྷ ‘‘པཱཊིཧཱརིཡ’’ནྟི ཝཏྠུཾ. སཙེ པན མཧཱཀཱརུཎིཀསྶ བྷགཝཏོ ཝེནེཡྻགཏཱ ཙ ཀིལེསཱ ¶ པཊིཔཀྑཱ, ཏེསཾ ཧརཎཏོ ‘‘པཱཊིཧཱརིཡ’’ནྟི ཝུཏྟཾ, ཨེཝཾ སཏི ཡུཏྟམེཏཾ. ཨཐ ཝཱ བྷགཝཏོ ཙ སཱསནསྶ ཙ པཊིཔཀྑཱ ཏིཏྠིཡཱ, ཏེསཾ ཧརཎཏོ པཱཊིཧཱརིཡཾ. ཏེ ཧི དིཊྛིཧརཎཝསེན ཙ དིཊྛིཔྤཀཱསནེ ཨསམཏྠབྷཱཝེན ཙ ཨིདྡྷིཨཱདེསནཱནུསཱསནཱིཧི ཧརིཏཱ ཨཔནཱིཏཱ ཧོནྟཱིཏི. ‘‘པཊཱི’’ཏི ཝཱ ཨཡཾ སདྡོ ‘‘པཙྪཱ’’ཏི ཨེཏསྶ ཨཏྠཾ བོདྷེཏི ‘‘ཏསྨིཾ པཊིཔཝིཊྛམྷི, ཨཉྙོ ཨཱགཉྪི བྲཱཧྨཎོ’’ཏིཨཱདཱིསུ (སུ. ནི. ༩༨༥; ཙཱུལ༹ནི. པཱརཱཡནཝགྒོ, ཝཏྠུགཱཐཱ ༤) ཝིཡ, ཏསྨཱ སམཱཧིཏེ ཙིཏྟེ ཝིགཏཱུཔཀྐིལེསེ ཀཏཀིཙྩེན པཙྪཱ ཧརིཏབྦཾ པཝཏྟེཏབྦནྟི པཊིཧཱརིཡཾ, ཨཏྟནོ ཝཱ ཨུཔཀྐིལེསེསུ ཙཏུཏྠཛ྄ཛྷཱནམགྒེཧི ཧརིཏེསུ པཙྪཱ ཧརཎཾ པཊིཧཱརིཡཾ, ཨིདྡྷིཨཱདེསནཱནུསཱསནིཡོ ཙ ཝིགཏཱུཔཀྐིལེསེན ཀཏཀིཙྩེན ཙ སཏྟཧིཏཏྠཾ པུན པཝཏྟེཏབྦཱ, ཧརིཏེསུ ཙ ཨཏྟནོ ཨུཔཀྐིལེསེསུ པརསཏྟཱནཾ ཨུཔཀྐིལེསཧརཎཱནི ཧོནྟཱིཏི པཊིཧཱརིཡཱནི བྷཝནྟི. པཊིཧཱརིཡམེཝ པཱཊིཧཱརིཡཾ, པཊིཧཱརིཡེ ཝཱ ཨིདྡྷིཨཱདེསནཱནུསཱསནིསམུདཱཡེ བྷཝཾ ཨེཀམེཀཾ པཱཊིཧཱརིཡནྟི ཝུཙྩཏི. པཊིཧཱརིཡཾ ཝཱ ཙཏུཏྠཛ྄ཛྷཱནཾ མགྒོ ཙ པཊིཔཀྑཧརཎཏོ, ཏཏྠ ཛཱཏཾ, ཏསྨིཾ ཝཱ ནིམིཏྟབྷཱུཏེ, ཏཏོ ཝཱ ཨཱགཏནྟི པཱཊིཧཱརིཡཾ. ཏསྶ པན ཨིདྡྷིཨཱདིབྷེདེན ཝིསཡབྷེདེན ཙ བཧུཝིདྷསྶ བྷགཝཏོ དེསནཱཡཾ ལབྦྷམཱནཏྟཱ ཨཱཧ – ‘‘ཝིཝིདྷཔཱཊིཧཱརིཡ’’ནྟི.

ན ཨཉྙཐཱཏི བྷགཝཏོ སམྨུཁཱ སུཏཱཀཱརཏོ ན ཨཉྙཐཱཏི ཨཏྠོ, ན པན བྷགཝཏོ དེསིཏཱཀཱརཏོ. ཨཙིནྟེཡྻཱནུབྷཱཝཱ ཧི བྷགཝཏོ དེསནཱ. ཨེཝཉྩ ཀཏྭཱ ‘‘སབྦཔྤཀཱརེན ཀོ སམཏྠོ ཝིཉྙཱཏུ’’ནྟི ཨིདཾ ཝཙནཾ སམཏྠིཏཾ བྷཝཏི, དྷཱརཎབལདསྶནཉྩ ན ཝིརུཛ྄ཛྷཏི སུཏཱཀཱརཱཝིརུཛ྄ཛྷནསྶ ཨདྷིཔྤེཏཏྟཱ. ན ཧེཏྠ ཨཏྠནྟརཏཱཔརིཧཱརོ དྭིནྣཾ ཨཏྠཱནཾ ཨེཀཝིསཡཏྟཱ, ཨིཏརཐཱ ཐེརོ བྷགཝཏོ དེསནཱཡ སབྦཐཱ པཊིགྒཧཎེ སམཏྠོ ཨསམཏྠོ ཙཱཏི ཨཱཔཛྫེཡྻཱཏི.

‘‘ཡོ པརོ ན ཧོཏི, སོ ཨཏྟཱ’’ཏི ཨེཝཾ ཝུཏྟཱཡ ནིཡཀཛ྄ཛྷཏྟསངྑཱཏཱཡ སསནྟཏིཡཾ ཝཏྟནཏོ ཏིཝིདྷོཔི མེ-སདྡོ ཀིཉྩཱཔི ཨེཀསྨིཾཡེཝ ཨཏྠེ དིསྶཏི, ཀརཎསམྤདཱནསཱམིནིདྡེསཝསེན པན ཝིཛྫམཱནབྷེདཾ སནྡྷཱཡཱཧ – ‘‘མེ-སདྡོ ཏཱིསུ ཨཏྠེསུ དིསྶཏཱི’’ཏི.

ཀིཉྩཱཔི ¶ ཨུཔསགྒོ ཀིརིཡཾ ཝིསེསེཏི, ཛོཏཀབྷཱཝཏོ པན སཏིཔི ཏསྨིཾ སུཏ-སདྡོ ཨེཝ ཏཾ ཏམཏྠཾ ཝདཏཱིཏི ཨནུཔསགྒསྶ སུཏ-སདྡསྶ ཨཏྠུདྡྷཱརེ སཨུཔསགྒསྶ གཧཎཾ ན ཝིརུཛ྄ཛྷཏཱིཏི ¶ དསྶེནྟོ ‘‘སཨུཔསགྒོ ཙ ཨནུཔསགྒོ ཙཱ’’ཏི ཨཱཧ. ཨསྶཱཏི སུཏསདྡསྶ. ཀམྨབྷཱཝསཱདྷནཱནི ཨིདྷ སུཏསདྡེ སམྦྷཝནྟཱིཏི ཝུཏྟཾ – ‘‘ཨུཔདྷཱརིཏནྟི ཝཱ ཨུཔདྷཱརཎནྟི ཝཱ ཨཏྠོ’’ཏི. མཡཱཏི ཨཏྠེ སཏཱིཏི ཡདཱ མེ-སདྡསྶ ཀཏྟུཝསེན ཀརཎནིདྡེསོ, ཏདཱཏི ཨཏྠོ. མམཱཏི ཨཏྠེ སཏཱིཏི ཡདཱ སམྦནྡྷཝསེན སཱམིནིདྡེསོ, ཏདཱ.

སུཏསདྡསནྣིཊྛཱནེ པཡུཏྟེན ཨེཝཾ-སདྡེན སཝནཀིརིཡཱཛོཏཀེན བྷཝིཏབྦནྟི ཝུཏྟཾ – ‘‘ཨེཝནྟི སོཏཝིཉྙཱཎཱདིཝིཉྙཱཎཀིཙྩནིདསྶན’’ནྟི. ཨཱདི-སདྡེན སམྤཊིཙྪནཱདཱིནཾ སོཏདྭཱརིཀཝིཉྙཱཎཱནཾ ཏདབྷིནཱིཧཊཱནཉྩ མནོདྭཱརིཀཝིཉྙཱཎཱནཾ གཧཎཾ ཝེདིཏབྦཾ. སབྦེསམྤི ཝཱཀྱཱནཾ ཨེཝཀཱརཏྠསཧིཏཏྟཱ ‘‘སུཏ’’ནྟི ཨེཏསྶ སུཏམེཝཱཏི ཨཡམཏྠོ ལབྦྷཏཱིཏི ཨཱཧ – ‘‘ཨསྶཝནབྷཱཝཔྤཊིཀྑེཔཏོ’’ཏི. ཨེཏེན ཨཝདྷཱརཎེན ནིཡཱམཏཾ དསྶེཏི. ཡཐཱ ཙ སུཏཾ སུཏམེཝཱཏི ནིཡཱམེཏབྦཾ, ཏཾ སམྨཱ སུཏཾ ཧོཏཱིཏི ཨཱཧ – ‘‘ཨནཱུནཱདྷིཀཱཝིཔརཱིཏགྒཧཎནིདསྶན’’ནྟི. ཨཐ ཝཱ སདྡནྟརཏྠཱཔོཧནཝསེན སདྡོ ཨཏྠཾ ཝདཏཱིཏི སུཏནྟི ཨསྶུཏཾ ན ཧོཏཱིཏི ཨཡམེཏསྶ ཨཏྠོཏི ཝུཏྟཾ – ‘‘ཨསྶཝནབྷཱཝཔྤཊིཀྑེཔཏོ’’ཏི. ཨིམིནཱ དིཊྛཱདིཝིནིཝཏྟནཾ ཀརོཏི. ཨིདཾ ཝུཏྟཾ ཧོཏི – ན ཨིདཾ མཡཱ དིཊྛཾ, ན སཡམྦྷུཉཱཎེན སཙྪིཀཏཾ, ཨཐ ཁོ སུཏཾ, ཏཉྩ སམྨདེཝཱཏི. ཏེནེཝཱཧ – ‘‘ཨནཱུནཱདྷིཀཱཝིཔརཱིཏགྒཧཎནིདསྶན’’ནྟི. ཨཝདྷཱརཎཏྠེ ཝཱ ཨེཝཾ-སདྡེ ཨཡམཏྠཡོཛནཱ – ‘‘ཀརཱིཡཏཱི’’ཏི ཏདཔེཀྑསྶ སུཏ-སདྡསྶ ཨཡམཏྠོ ཝུཏྟོ ‘‘ཨསྶཝནབྷཱཝཔྤཊིཀྑེཔཏོ’’ཏི. ཏེནེཝཱཧ – ‘‘ཨནཱུནཱདྷིཀཱཝིཔརཱིཏགྒཧཎནིདསྶན’’ནྟི. སཝན-སདྡོ ཙེཏྠ ཀམྨཏྠོ ཝེདིཏབྦོ ‘‘སུཡྻཏཱི’’ཏི.

ཨེཝཾ སཝནཧེཏུསཝནཝིསེསཝསེན པདཏྟཡསྶ ཨེཀེན པཀཱརེན ཨཏྠཡོཛནཾ དསྶེཏྭཱ ཨིདཱནི པཀཱརནྟརེཧི ཏཾ དསྶེཏུཾ – ‘‘ཏཐཱ ཨེཝ’’ནྟིཨཱདི ཝུཏྟཾ. ཏཏྠ ཏསྶཱཏི ཡཱ སཱ བྷགཝཏོ སམྨུཁཱ དྷམྨསྶཝནཱཀཱརེན པཝཏྟཱ མནོདྭཱརཝིཉྙཱཎཝཱིཐི, ཏསྶཱ. སཱ ཧི ནཱནཔྤཀཱརེན ཨཱརམྨཎེ པཝཏྟིཏུཾ སམཏྠཱ. ཏཐཱ ཙ ཝུཏྟཾ – ‘‘སོཏདྭཱརཱནུསཱརེནཱ’’ཏི. ནཱནཔྤཀཱརེནཱཏི ཝཀྑམཱནཱནཾ ཨནེཀཝིཧིཏཱནཾ ¶ བྱཉྫནཏྠགྒཧཎཱནཾ ནཱནཱཀཱརེན. ཨེཏེན ཨིམིསྶཱ ཡོཛནཱཡ ཨཱཀཱརཏྠོ ཨེཝཾ-སདྡོ གཧིཏོཏི དཱིཔེཏི. པཝཏྟིབྷཱཝཔྤཀཱསནནྟི པཝཏྟིཡཱ ཨཏྠིབྷཱཝཔྤཀཱསནཾ. སུཏནྟི དྷམྨཔྤཀཱསནནྟི ཡསྨིཾ ཨཱརམྨཎེ ཝུཏྟཔྤཀཱརཱ ཝིཉྙཱཎཝཱིཐི ནཱནཔྤཀཱརེན པཝཏྟཱ, ཏསྶ དྷམྨཏྟཱ ཝུཏྟཾ, ན སུཏསདྡསྶ དྷམྨཏྠཏྟཱ. ཝུཏྟསྶེཝཏྠསྶ པཱཀཊཱིཀརཎཾ ‘‘ཨཡཉྷེཏྠཱ’’ཏིཨཱདི. ཏཏྠ ཝིཉྙཱཎཝཱིཐིཡཱཏི ཀརཎཏྠེ ཀརཎཝཙནཾ, མཡཱཏི ཀཏྟུཨཏྠེ.

ཨེཝནྟི ནིདྡིསིཏབྦཔྤཀཱསནནྟི ནིདསྶནཏྠཾ ཨེཝཾ-སདྡཾ གཧེཏྭཱ ཝུཏྟཾ ནིདསྶེཏབྦསྶ ནིདསྶིཏབྦཏྟཱབྷཱཝཱབྷཱཝཏོ ¶ . ཏེན ཨེཝཾ-སདྡེན སཀལམྤི སུཏྟཾ པཙྩཱམཊྛནྟི དསྶེཏི. སུཏསདྡསྶ ཀིརིཡཱསདྡཏྟཱ སཝནཀིརིཡཱཡ ཙ སཱདྷཱརཎཝིཉྙཱཎཔྤབནྡྷཔྤཊིབདྡྷཏྟཱ ཏཏྠ ཙ པུགྒལཝོཧཱརོཏི ཝུཏྟཾ – ‘‘སུཏནྟི པུགྒལཀིཙྩཔྤཀཱསན’’ནྟི. ན ཧི པུགྒལཝོཧཱརརཧིཏེ དྷམྨཔྤབནྡྷེ སཝནཀིརིཡཱ ལབྦྷཏཱིཏི.

ཡསྶ ཙིཏྟསནྟཱནསྶཱཏིཨཱདིཔི ཨཱཀཱརཏྠམེཝ ཨེཝཾ-སདྡཾ གཧེཏྭཱ པུརིམཡོཛནཱཡ ཨཉྙཐཱ ཨཏྠཡོཛནཾ དསྶེཏུཾ ཝུཏྟཾ. ཏཏྠ ཨཱཀཱརཔཉྙཏྟཱིཏི ཨུཔཱདཱཔཉྙཏྟི ཨེཝ དྷམྨཱནཾ པཝཏྟིཨཱཀཱརུཔཱདཱནཝསེན ཏཐཱ ཝུཏྟཱ. སུཏནྟི ཝིསཡནིདྡེསོཏི སོཏབྦབྷཱུཏོ དྷམྨོ སཝནཀིརིཡཱཀཏྟུཔུགྒལསྶ སཝནཀིརིཡཱཝསེན པཝཏྟིཊྛཱནནྟི ཀཏྭཱ ཝུཏྟཾ. ཙིཏྟསནྟཱནཝིནིམུཏྟསྶ པརམཏྠཏོ ཀསྶཙི ཀཏྟུཨབྷཱཝེཔི སདྡཝོཧཱརེན བུདྡྷིཔརིཀཔྤིཏབྷེདཝཙནིཙྪཱཡ ཙིཏྟསནྟཱནཏོ ཨཉྙཾ ཝིཡ ཏཾསམངྒིཾ ཀཏྭཱ ཝུཏྟཾ – ‘‘ཙིཏྟསནྟཱནེན ཏཾསམངྒཱིནོ’’ཏི. སཝནཀིརིཡཱཝིསཡོཔི སོཏབྦདྷམྨོ སཝནཀིརིཡཱཝསེན པཝཏྟཙིཏྟསནྟཱནསྶ ཨིདྷ པརམཏྠཏོ ཀཏྟུབྷཱཝཏོ, སཝནཝསེན ཙིཏྟཔཝཏྟིཡཱ ཨེཝ ཝཱ སཝནཀིརིཡཱབྷཱཝཏོ ཏཾཀིརིཡཱཀཏྟུ ཙ ཝིསཡོ ཧོཏཱིཏི ཀཏྭཱ ཝུཏྟཾ – ‘‘ཏཾསམངྒཱིནོ ཀཏྟུཝིསཡེ’’ཏི. སུཏཱཀཱརསྶ ཙ ཐེརསྶ སམྨཱནིཙྪིཏབྷཱཝཏོ ཨཱཧ – ‘‘གཧཎསནྣིཊྛཱན’’ནྟི. ཨེཏེན ཝཱ ཨཝདྷཱརཎཏྠཾ ཨེཝཾ-སདྡཾ གཧེཏྭཱ ཨཡམཏྠཡོཛནཱ ཀཏཱཏི དཊྛབྦཾ.

པུབྦེ སུཏཱནཾ ནཱནཱཝིཧིཏཱནཾ སུཏྟསངྑཱཏཱནཾ ཨཏྠབྱཉྫནཱནཾ ཨུཔདྷཱརིཏརཱུཔསྶ ཨཱཀཱརསྶ ནིདསྶནསྶ, ཨཝདྷཱརཎསྶ ཝཱ པཀཱསནསབྷཱཝོ ¶ ཨེཝཾ-སདྡོཏི ཏདཱཀཱརཱདིཨུཔདྷཱརཎསྶ པུགྒལཔཉྙཏྟིཡཱ ཨུཔཱདཱནབྷཱུཏདྷམྨཔྤབནྡྷབྱཱཔཱརཏཱཡ ཝུཏྟཾ – ‘‘ཨེཝནྟི པུགྒལཀིཙྩནིདྡེསོ’’ཏི. སཝནཀིརིཡཱ པན པུགྒལཝཱདིནོཔི ཝིཉྙཱཎནིརཔེཀྑཱ ནཏྠཱིཏི ཝིསེསཏོ ཝིཉྙཱཎབྱཱཔཱརོཏི ཨཱཧ – ‘‘སུཏནྟི ཝིཉྙཱཎཀིཙྩནིདྡེསོ’’ཏི. མེཏི སདྡཔྤཝཏྟིཡཱ ཨེཀནྟེནེཝ སཏྟཝིསཡཏྟཱ ཝིཉྙཱཎཀིཙྩསྶ ཙ ཏཏྠེཝ སམོདཧིཏབྦཏོ ‘‘མེཏི ཨུབྷཡཀིཙྩཡུཏྟཔུགྒལནིདྡེསོ’’ཏི ཝུཏྟཾ. ཨཝིཛྫམཱནཔཉྙཏྟིཝིཛྫམཱནཔཉྙཏྟིསབྷཱཝཱ ཡཐཱཀྐམཾ ཨེཝཾསདྡསུཏསདྡཱནཾ ཨཏྠཱཏི ཏེ ཏཐཱརཱུཔཔཉྙཏྟིཨུཔཱདཱནབྱཱཔཱརབྷཱཝེན དསྶེནྟོ ཨཱཧ – ‘‘ཨེཝནྟི པུགྒལཀིཙྩནིདྡེསོ, སུཏནྟི ཝིཉྙཱཎཀིཙྩནིདྡེསོ’’ཏི. ཨེཏྠ ཙ ཀརཎཀིརིཡཱཀཏྟུཀམྨཝིསེསཔྤཀཱསནཝསེན པུགྒལབྱཱཔཱརཝིསཡཔུགྒལབྱཱཔཱརནིདསྶནཝསེན གཧཎཱཀཱརགྒཱཧཀཏབྦིསཡཝིསེསནིདྡེསཝསེན ཀཏྟུཀརཎབྱཱཔཱརཀཏྟུནིདྡེསཝསེན ཙ དུཏིཡཱདཡོ ཙཏསྶོ ཨཏྠཡོཛནཱ དསྶིཏཱཏི དཊྛབྦཾ.

སབྦསྶཔི སདྡཱདྷིགམནཱིཡསྶ ཨཏྠསྶ པཉྙཏྟིམུཁེནེཝ པཊིཔཛྫིཏབྦཏྟཱ སབྦཔཉྙཏྟཱིནཉྩ ¶ ཝིཛྫམཱནཱདིཝསེན ཚསུ པཉྙཏྟིབྷེདེསུ ཨནྟོགདྷཏྟཱ ཏེསུ ‘‘ཨེཝ’’ནྟིཨཱདཱིནཾ པཉྙཏྟཱིནཾ སརཱུཔཾ ནིདྡྷཱརེནྟོ ཨཱཧ – ‘‘ཨེཝནྟི ཙ མེཏི ཙཱ’’ཏིཨཱདི. ཏཏྠ ཨེཝནྟི ཙ མེཏི ཙ ཝུཙྩམཱནསྶཏྠསྶ ཨཱཀཱརཱདིནོ དྷམྨཱནཾ ཨསལླཀྑཎབྷཱཝཏོ ཨཝིཛྫམཱནཔཉྙཏྟིབྷཱཝོཏི ཨཱཧ – ‘‘སཙྩིཀཊྛཔརམཏྠཝསེན ཨཝིཛྫམཱནཔཉྙཏྟཱི’’ཏི. ཏཏྠ སཙྩིཀཊྛཔརམཏྠཝསེནཱཏི བྷཱུཏཏྠཨུཏྟམཏྠཝསེན. ཨིདཾ ཝུཏྟཾ ཧོཏི – ཡོ མཱཡཱམརཱིཙིཨཱདཡོ ཝིཡ ཨབྷཱུཏཏྠོ, ཨནུསྶཝཱདཱིཧི གཧེཏབྦོ ཝིཡ ཨནུཏྟམཏྠོ ཙ ན ཧོཏི, སོ རཱུཔསདྡཱདིསབྷཱཝོ, རུཔྤནཱནུབྷཝནཱདིསབྷཱཝོ ཝཱ ཨཏྠོ སཙྩིཀཊྛོ པརམཏྠོ ཙཱཏི ཝུཙྩཏི, ན ཏཐཱ ‘‘ཨེཝཾ མེ’’ཏིཔདཱནཾ ཨཏྠོཏི. ཨེཏམེཝཏྠཾ པཱཀཊཏརཾ ཀཱཏུཾ ‘‘ཀིཉྷེཏྠ ཏ’’ནྟིཨཱདི ཝུཏྟཾ. སུཏནྟི པན སདྡཱཡཏནཾ སནྡྷཱཡཱཧ – ‘‘ཝིཛྫམཱནཔཉྙཏྟཱི’’ཏི. ཏེནེཝ ཧི ‘‘ཡཉྷི ཏཾ ཨེཏྠ སོཏེན ཨུཔལདྡྷ’’ནྟི ཝུཏྟཾ. ‘‘སོཏདྭཱརཱནུསཱརེན ཨུཔལདྡྷ’’ནྟི པན ཝུཏྟེ ཨཏྠབྱཉྫནཱདི སབྦཾ ལབྦྷཏི. ཏཾ ཏཾ ཨུཔཱདཱཡ ཝཏྟབྦཏོཏི སོཏཔཐམཱགཏེ དྷམྨེ ཨུཔཱདཱཡ ཏེསཾ ཨུཔདྷཱརིཏཱཀཱརཱདིནོ པཙྩཱམསནཝསེན ཨེཝནྟི, སསནྟཏིཔརིཡཱཔནྣེ ཁནྡྷེ ཨུཔཱདཱཡ མེཏི ཝཏྟབྦཏྟཱཏི ཨཏྠོ. དིཊྛཱདིསབྷཱཝརཧིཏེ སདྡཱཡཏནེ པཝཏྟམཱནོཔི ¶ སུཏཝོཧཱརོ ‘‘དུཏིཡཾ ཏཏིཡ’’ནྟིཨཱདིཀོ ཝིཡ པཋམཱདཱིནི དིཊྛམུཏཝིཉྙཱཏེ ཨཔེཀྑིཏྭཱ པཝཏྟོཏི ཨཱཧ – ‘‘དིཊྛཱདཱིནི ཨུཔནིདྷཱཡ ཝཏྟབྦཏོ’’ཏི. ཨསྶུཏཾ ན ཧོཏཱིཏི ཧི སུཏནྟི པཀཱསིཏོ ཨཡམཏྠོཏི.

ཨཏྟནཱ པཊིཝིདྡྷཱ སུཏྟསྶ པཀཱརཝིསེསཱ ཨེཝནྟི ཐེརེན པཙྩཱམཊྛཱཏི ཨཱཧ – ‘‘ཨསམྨོཧཾ དཱིཔེཏཱི’’ཏི. ནཱནཔྤཀཱརཔྤཊིཝེདྷསམཏྠོ ཧོཏཱིཏི ཨེཏེན ཝཀྑམཱནསྶ སུཏྟསྶ ནཱནཔྤཀཱརཏཾ དུཔྤཊིཝིཛ྄ཛྷཏཉྩ དསྶེཏི. སུཏསྶ ཨསམྨོསཾ དཱིཔེཏཱིཏི སུཏཱཀཱརསྶ ཡཱཐཱཝཏོ དསྶིཡམཱནཏྟཱ ཝུཏྟཾ. ཨསམྨོཧེནཱཏི སམྨོཧཱབྷཱཝེན, པཉྙཱཡ ཨེཝ ཝཱ སཝནཀཱལསམྦྷཱུཏཱཡ ཏདུཏྟརིཀཱལཔཉྙཱསིདྡྷི. ཨེཝཾ ཨསམྨོསེནཱཏི ཨེཏྠཱཔི ཝཏྟབྦཾ. བྱཉྫནཱནཾ པཊིཝིཛ྄ཛྷིཏབྦོ ཨཱཀཱརོ ནཱཏིགམྦྷཱིརོ, ཡཐཱསུཏདྷཱརཎམེཝ ཏཏྠ ཀརཎཱིཡནྟི སཏིཡཱ བྱཱཔཱརོ ཨདྷིཀོ, པཉྙཱ ཏཏྠ གུཎཱིབྷཱུཏཱཏི ཝུཏྟཾ – ‘‘པཉྙཱཔུབྦངྒམཱཡཱ’’ཏིཨཱདི ‘‘པཉྙཱཡ པུབྦངྒམཱ’’ཏི ཀཏྭཱ. པུབྦངྒམཏཱ ཙེཏྠ པདྷཱནབྷཱཝོ ‘‘མནོཔུབྦངྒམཱ’’ཏིཨཱདཱིསུ (དྷ. པ. ༡, ༢) ཝིཡ, པུབྦངྒམཏཱཡ ཝཱ ཙཀྑུཝིཉྙཱཎཱདཱིསུ ཨཱཝཛྫནཱདཱིནཾ ཝིཡ ཨཔྤདྷཱནཏྟེ པཉྙཱ པུབྦངྒམཱ ཨེཏིསྶཱཏི ཨཡམྤི ཨཏྠོ ཡུཛྫཏི, ཨེཝཾ སཏིཔུབྦངྒམཱཡཱཏི ཨེཏྠཱཔི ཝུཏྟནཡཱནུསཱརེན ཡཐཱསམྦྷཝམཏྠོ ཝེདིཏབྦོ. ཨཏྠབྱཉྫནསམྤནྣསྶཱཏི ཨཏྠབྱཉྫནཔརིཔུཎྞསྶ, སངྐཱསནཔྤཀཱསནཝིཝརཎཝིབྷཛནཨུཏྟཱནཱིཀརཎཔཉྙཏྟིཝསེན ཚཧི ཨཏྠཔདེཧི ཨཀྑརཔདབྱཉྫནཱཀཱརནིརུཏྟིནིདྡེསཝསེན ཚཧི བྱཉྫནཔདེཧི ཙ སམནྣཱགཏསྶཱཏི ཝཱ ཨཏྠོ དཊྛབྦོ.

ཡོནིསོམནསིཀཱརཾ ¶ དཱིཔེཏི ཨེཝཾ-སདྡེན ཝུཙྩམཱནཱནཾ ཨཱཀཱརནིདསྶནཱཝདྷཱརཎཏྠཱནཾ ཨཝིཔརཱིཏསདྡྷམྨཝིསཡཏྟཱཏི ཨདྷིཔྤཱཡོ. ཨཝིཀྑེཔཾ དཱིཔེཏཱིཏི ‘‘ཙིཏྟཔརིཡཱདཱནཾ ཀཏྠ བྷཱསིཏ’’ནྟིཨཱདིཔུཙྪཱཝསེ པཀརཎཔྤཏྟསྶ ཝཀྑམཱནསྶ སུཏྟསྶ སཝནཾ སམཱདྷཱནམནྟརེན ན སམྦྷཝཏཱིཏི ཀཏྭཱ ཝུཏྟཾ. ཝིཀྑིཏྟཙིཏྟསྶཱཏིཨཱདི ཏསྶེཝཏྠསྶ སམཏྠནཝསེན ཝུཏྟཾ. སབྦསམྤཏྟིཡཱཏི ཨཏྠབྱཉྫནདེསཀཔྤཡོཛནཱདིསམྤཏྟིཡཱ. ཨཝིཔརཱིཏསདྡྷམྨཝིསཡེཧི ཝིཡ ཨཱཀཱརནིདསྶནཱཝདྷཱརཎཏྠེཧི ཡོནིསོམནསིཀཱརསྶ, སདྡྷམྨསྶཝནེན ཝིཡ ཙ ཨཝིཀྑེཔསྶ ཡཐཱ ཡོནིསོམནསིཀཱརེན ཕལབྷཱུཏེན ཨཏྟསམྨཱཔཎིདྷིཔུབྦེཀཏཔུཉྙཏཱནཾ སིདྡྷི ཝུཏྟཱ ¶ ཏདཝིནཱབྷཱཝཏོ. ཨེཝཾ ཨཝིཀྑེཔེན ཕལབྷཱུཏེན ཀཱརཎབྷཱུཏཱནཾ སདྡྷམྨསྶཝནསཔྤུརིསཱུཔནིསྶཡཱནཾ སིདྡྷི དསྶེཏབྦཱ སིཡཱ ཨསྶུཏཝཏོ སཔྤུརིསཱུཔནིསྶཡརཧིཏསྶ ཙ ཏདབྷཱཝཏོ. ན ཧི ཝིཀྑིཏྟཙིཏྟོཏིཨཱདིནཱ སམཏྠནཝཙནེན པན ཨཝིཀྑེཔེན ཀཱརཎབྷཱུཏེན སཔྤུརིསཱུཔནིསྶཡེན ཙ ཕལབྷཱུཏསྶ སདྡྷམྨསྶཝནསྶ སིདྡྷི དསྶིཏཱ. ཨཡཾ པནེཏྠ ཨདྷིཔྤཱཡོ ཡུཏྟོ སིཡཱ, སདྡྷམྨསྶཝནསཔྤུརིསཱུཔནིསྶཡཱ ན ཨེཀནྟེན ཨཝིཀྑེཔསྶ ཀཱརཎཾ བཱཧིརངྒཏྟཱ, ཨཝིཀྑེཔོ པན སཔྤུརིསཱུཔནིསྶཡོ ཝིཡ སདྡྷམྨསྶཝནསྶ ཨེཀནྟཀཱརཎནྟི. ཨེཝམྤི ཨཝིཀྑེཔེན སཔྤུརིསཱུཔནིསྶཡསིདྡྷིཛོཏནཱ ན སམཏྠིཏཱཝ. ནོ ན སམཏྠིཏཱ ཝིཀྑིཏྟཙིཏྟཱནཾ སཔྤུརིསཔཡིརུཔཱསནཱབྷཱཝསྶ ཨཏྠསིདྡྷཏྟཱ. ཨེཏྠ ཙ པུརིམཾ ཕལེན ཀཱརཎསྶ སིདྡྷིདསྶནཾ ནདཱིཔཱུརེན ཝིཡ ཨུཔརི ཝུཊྛིསབྦྷཱཝསྶ, དུཏིཡཾ ཀཱརཎེན ཕལསྶ སིདྡྷིདསྶནཾ དཊྛབྦཾ ཨེཀནྟཝསྶིནཱ ཝིཡ མེགྷཝུཊྛཱནེན ཝུཊྛིཔྤཝཏྟིཡཱ.

བྷགཝཏོ ཝཙནསྶ ཨཏྠབྱཉྫནཔྤབྷེདཔརིཙྪེདཝསེན སཀལསཱསནསམྤཏྟིཨོགཱཧནཱཀཱརོ ནིརཝསེསཔརཧིཏཔཱརིཔཱུརིཏཱཀཱརཎནྟི ཝུཏྟཾ – ‘‘ཨེཝཾ བྷདྡཀོ ཨཱཀཱརོ’’ཏི. ཡསྨཱ ན ཧོཏཱིཏི སམྦནྡྷོ. པཙྪིམཙཀྐདྭཡསམྤཏྟིནྟི ཨཏྟསམྨཱཔཎིདྷིཔུབྦེཀཏཔུཉྙཏཱསངྑཱཏགུཎདྭཡཾ. ཨཔརཱཔརཾ ཝུཏྟིཡཱ ཙེཏྠ ཙཀྐབྷཱཝོ, ཙརནྟི ཨེཏེཧི སཏྟཱ སམྤཏྟིབྷཝེསཱུཏི ཝཱ. ཡེ སནྡྷཱཡ ཝུཏྟཾ – ‘‘ཙཏྟཱརིམཱནི, བྷིཀྑཝེ, ཙཀྐཱནི, ཡེཧི སམནྣཱགཏཱནཾ དེཝམནུསྶཱནཾ ཙཏུཙཀྐཾ ཝཏྟཏཱི’’ཏིཨཱདི (ཨ. ནི. ༤.༣༡). པུརིམཔཙྪིམབྷཱཝོ ཙེཏྠ དེསནཱཀྐམཝསེན དཊྛབྦོ. པཙྪིམཙཀྐདྭཡསིདྡྷིཡཱཏི པཙྪིམཙཀྐདྭཡསྶ ཨཏྠིཏཱཡ. སམྨཱཔཎིཧིཏཏྟོ པུབྦེ ཙ ཀཏཔུཉྙོ སུདྡྷཱསཡོ ཧོཏི ཏདསིདྡྷིཧེཏཱུནཾ ཀིལེསཱནཾ དཱུརཱིབྷཱཝཏོཏི ཨཱཧ – ‘‘ཨཱསཡསུདྡྷི སིདྡྷཱ ཧོཏཱི’’ཏི. ཏཐཱ ཧི ཝུཏྟཾ – ‘‘སམྨཱཔཎིཧིཏཾ ཙིཏྟཾ, སེཡྻསོ ནཾ ཏཏོ ཀརེ’’ཏི (དྷ. པ. ༤༣), ‘‘ཀཏཔུཉྙོསི ཏྭཾ, ཨཱནནྡ, པདྷཱནམནུཡུཉྫ, ཁིཔྤཾ ཧོཧིསི ཨནཱསཝོ’’ཏི (དཱི. ནི. ༢.༢༠༧) ཙ. ཏེནེཝཱཧ – ‘‘ཨཱསཡསུདྡྷིཡཱ ཨདྷིགམབྱཏྟིསིདྡྷཱི’’ཏི. པཡོགསུདྡྷིཡཱཏི ཡོནིསོམནསིཀཱརཔུབྦངྒམསྶ དྷམྨསྶཝནཔྤཡོགསྶ ཝིསདབྷཱཝེན. ཏཐཱ ཙཱཧ – ‘‘ཨཱགམབྱཏྟིསིདྡྷཱི’’ཏི ¶ , སབྦསྶ ཝཱ ཀཱཡཝཙཱིཔཡོགསྶ ནིདྡོསབྷཱཝེན. པརིསུདྡྷཀཱཡཝཙཱིཔཡོགོ ཧི ཝིཔྤཊིསཱརཱབྷཱཝཏོ ཨཝིཀྑིཏྟཙིཏྟོ པརིཡཏྟིཡཾ ཝིསཱརདོ ཧོཏཱིཏི.

ནཱནཔྤཀཱརཔཊིཝེདྷདཱིཔཀེནཱཏིཨཱདིནཱ ¶ ཨཏྠབྱཉྫནེསུ ཐེརསྶ ཨེཝཾ-སདྡསུཏ-སདྡཱནཾ ཨསམྨོཧདཱིཔནཏོ ཙཏུཔྤཊིསམྦྷིདཱཝསེན ཨཏྠཡོཛནཾ དསྶེཏི. ཏཏྠ སོཏཔྤབྷེདཔཊིཝེདྷདཱིཔཀེནཱཏི ཨེཏེན ཨཡཾ སུཏ-སདྡོ ཨེཝཾ-སདྡསནྣིདྷཱནཏོ, ཝཀྑམཱནཱཔེཀྑཱཡ ཝཱ སཱམཉྙེནེཝ སོཏབྦདྷམྨཝིསེསཾ ཨཱམསཏཱིཏི དསྶེཏི. མནོདིཊྛིཀརཎཱནཾ པརིཡཏྟིདྷམྨཱནཾ ཨནུཔེཀྑནསུཔྤཊིཝེདྷཱ ཝིསེསཏོ མནསིཀཱརཔྤཊིབདྡྷཱཏི ཏེ ཝུཏྟནཡེན ཡོནིསོམནསིཀཱརདཱིཔཀེན ཨེཝཾ-སདྡེན ཡོཛེཏྭཱ, སཝནདྷཱརཎཝཙཱིཔརིཙཡཱ པརིཡཏྟིདྷམྨཱ ཝིསེསེན སོཏཱཝདྷཱནཔྤཊིབདྡྷཱཏི ཏེ ཨཝིཀྑེཔདཱིཔཀེན སུཏ-སདྡེན ཡོཛེཏྭཱ དསྶེནྟོ སཱསནསམྤཏྟིཡཱ དྷམྨསྶཝནེ ཨུསྶཱཧཾ ཛནེཏི. ཏཏྠ དྷམྨཱཏི པརིཡཏྟིདྷམྨཱ. མནསཱ ཨནུཔེཀྑིཏཱཏི ‘‘ཨིདྷ སཱིལཾ ཀཐིཏཾ, ཨིདྷ སམཱདྷི, ཨིདྷ པཉྙཱ, ཨེཏྟཀཱ ཨེཏྠ ཨནུསནྡྷཡོ’’ཏིཨཱདིནཱ ནཡེན མནསཱ ཨནུ ཨནུ པེཀྑིཏཱ. དིཊྛིཡཱ སུཔྤཊིཝིདྡྷཱཏི ནིཛ྄ཛྷཱནཀྑནྟི བྷཱུཏཱཡ, ཉཱཏཔརིཉྙཱསངྑཱཏཱཡ ཝཱ དིཊྛིཡཱ ཏཏྠ ཏཏྠ ཝུཏྟརཱུཔཱརཱུཔདྷམྨེ ‘‘ཨིཏི རཱུཔཾ, ཨེཏྟཀཾ རཱུཔ’’ནྟིཨཱདིནཱ སུཊྛུ ཝཝཏྠཔེཏྭཱ པཊིཝིདྡྷཱ.

སཀལེན ཝཙནེནཱཏི པུབྦེ ཏཱིཧི པདེཧི ཝིསུཾ ཝིསུཾ ཡོཛིཏཏྟཱ ཝུཏྟཾ. ཨསཔྤུརིསབྷཱུམིནྟི ཨཀཏཉྙུཏཾ, ‘‘ཨིདྷེཀཙྩོ པཱཔབྷིཀྑུ ཏཐཱགཏཔྤཝེདིཏཾ དྷམྨཝིནཡཾ པརིཡཱཔུཎིཏྭཱ ཨཏྟནོ དཧཏཱི’’ཏི (པཱརཱ. ༡༩༥) ཨེཝཾ ཝུཏྟཾ ཨནརིཡཝོཧཱརཱཝཏྠཾ. སཱ ཨེཝ ཨནརིཡཝོཧཱརཱཝཏྠཱ ཨསདྡྷམྨོ. ནནུ ཙ ཨཱནནྡཏྠེརསྶ ‘‘མམེདཾ ཝཙན’’ནྟི ཨདྷིམཱནསྶ, མཧཱཀསྶཔཏྠེརཱདཱིནཉྩ ཏདཱསངྐཱཡ ཨབྷཱཝཏོ ཨསཔྤུརིསབྷཱུམིསམཏིཀྐམཱདིཝཙནཾ ནིརཏྠཀནྟི? ནཡིདམེཝཾ, ‘‘ཨེཝཾ མེ སུཏ’’ནྟི ཝདནྟེན ཨཡམྤི ཨཏྠོ ཝིབྷཱཝིཏོཏི དསྶནཏོ. ཀེཙི པན ‘‘དེཝཏཱནཾ པརིཝིཏཀྐཱཔེཀྑཾ ཏཐཱཝཙནནྟི ཨེདིསཱི ཙོདནཱ ཨནཝཀཱསཱ’’ཏི ཝདནྟི. ཏསྨིཾ ཀིར ཁཎེ ཨེཀཙྩཱནཾ དེཝཏཱནཾ ཨེཝཾ ཙེཏསོ པརིཝིཏཀྐོ ཨུདཔཱདི ‘‘བྷགཝཱ པརིནིབྦུཏོ, ཨཡཉྩ ཨཱཡསྨཱ དེསནཱཀུསལོ ཨིདཱནི དྷམྨཾ དེསེཏི, སཀྱཀུལཔྤསུཏོ ཏཐཱགཏསྶ བྷཱཏཱ ཙཱུལ༹པིཏུཔུཏྟོ, ཀིཾ ནུ ཁོ སཡཾ སཙྪིཀཏཾ དྷམྨཾ དེསེཏི, ཨུདཱཧུ བྷགཝཏོ ཨེཝ ཝཙནཾ ཡཐཱསུཏ’’ནྟི, ཨེཝཾ ཏདཱསངྐིཏཔྤཀཱརཏོ ཨསཔྤུརིསབྷཱུམིསམོཀྐམཱདིཏོ ཨཏིཀྐམཱདི ཝིབྷཱཝིཏནྟི. ཨཏྟནོ ཨདཧནྟོཏི ‘‘མམེད’’ནྟི ཨཏྟནི ཨཊྛཔེནྟོ. ཨཔྤེཏཱིཏི ¶ ནིདསྶེཏི. དིཊྛདྷམྨིཀསམྤརཱཡིཀཔརམཏྠེསུ ཡཐཱརཧཾ སཏྟེ ནེཏཱིཏི ནེཏྟི, དྷམྨོཡེཝ ནེཏྟི དྷམྨནེཏྟི.

དལ༹ྷཏརནིཝིཊྛཱ ¶ ཝིཙིཀིཙྪཱ ཀངྑཱ. ནཱཏིསཾསཔྤནཾ མཏིབྷེདམཏྟཾ ཝིམཏི. ཨསྶདྡྷིཡཾ ཝིནཱསེཏི བྷགཝཏཱ བྷཱསིཏཏྟཱ སམྨུཁཱ ཙསྶ པཊིགྒཧིཏཏྟཱ ཁལིཏདུརུཏྟཱདིགྒཧཎདོསཱབྷཱཝཏོ ཙ. ཨེཏྠ ཙ པཉྩམཱདཡོ ཏིསྶོ ཨཏྠཡོཛནཱ ཨཱཀཱརཱདིཨཏྠེསུ ཨགྒཧིཏཝིསེསམེཝ ཨེཝཾ-སདྡཾ གཧེཏྭཱ དསྶིཏཱ, ཏཏོ པརཱ ཙཏསྶོ ཨཱཀཱརཏྠམེཝ ཨེཝཾ-སདྡཾ གཧེཏྭཱ ཝིབྷཱཝིཏཱ, པཙྪིམཱ པན ཏིསྶོ ཡཐཱཀྐམཾ ཨཱཀཱརཏྠཾ ནིདསྶནཏྠཾ ཨཝདྷཱརཎཏྠཉྩ ཨེཝཾ-སདྡཾ གཧེཏྭཱ ཡོཛིཏཱཏི དཊྛབྦཾ.

ཨེཀ-སདྡོ ཨཉྙསེཊྛཨསཧཱཡསངྑཱདཱིསུ དིསྶཏི. ཏཐཱ ཧེས ‘‘སསྶཏོ ཨཏྟཱ ཙ ལོཀོ ཙ, ཨིདམེཝ སཙྩཾ མོགྷམཉྙནྟི ཨིཏྠེཀེ ཨབྷིཝདནྟཱི’’ཏིཨཱདཱིསུ (མ. ནི. ༣.༢༧) ཨཉྙཏྠེ དིསྶཏི, ‘‘ཙེཏསོ ཨེཀོདིབྷཱཝ’’ནྟིཨཱདཱིསུ (དཱི. ནི. ༡.༢༢༨; པཱརཱ. ༡༡) སེཊྛེ, ‘‘ཨེཀོ ཝཱུཔཀཊྛོ’’ཏིཨཱདཱིསུ (དཱི. ནི. ༡.༤༠༥; ༢.༢༡༥; མ. ནི. ༡.༨༠; སཾ. ནི. ༣.༦༣; ཙཱུལ༹ཝ. ༤༤༥) ཨསཧཱཡེ ‘‘ཨེཀོཝ ཁོ, བྷིཀྑཝེ, ཁཎོ ཙ སམཡོ ཙ བྲཧྨཙརིཡཝཱསཱཡཱ’’ཏིཨཱདཱིསུ (ཨ. ནི. ༨.༢༩) སངྑཱཡཾ. ཨིདྷཱཔི སངྑཱཡནྟི དསྶེནྟོ ཨཱཧ – ‘‘ཨེཀནྟི གཎནཔརིཙྪེདནིདྡེསོ’’ཏི. ཀཱལཉྩ སམཡཉྩཱཏི ཡུཏྟཀཱལཉྩ པཙྩཡསཱམགྒིཉྩ. ཁཎོཏི ཨོཀཱསོ. ཏཐཱགཏུཔྤཱདཱདིཀོ ཧི མགྒབྲཧྨཙརིཡསྶ ཨོཀཱསོ ཏཔྤཙྩཡཔྤཊིལཱབྷཧེཏུཏྟཱ. ཁཎོ ཨེཝ ཙ སམཡོ. ཡོ ཁཎོཏི ཙ སམཡོཏི ཙ ཝུཙྩཏི, སོ ཨེཀོ ཨེཝཱཏི ཧི ཨཏྠོ. མཧཱསམཡོཏི མཧཱསམཱུཧོ. སམཡོཔི ཁོཏི སིཀྑཱཔདཔཱུརཎསྶ ཧེཏུཔི. སམཡཔྤཝཱདཀེཏི དིཊྛིཔྤཝཱདཀེ. ཏཏྠ ཧི ནིསིནྣཱ ཏིཏྠིཡཱ ཨཏྟནོ ཨཏྟནོ སམཡཾ པཝདནྟཱིཏི. ཨཏྠཱབྷིསམཡཱཏི ཧིཏཔྤཊིལཱབྷཱ. ཨབྷིསམེཏབྦོཏི ཨབྷིསམཡོ, ཨབྷིསམཡོ ཨཏྠོ ཨབྷིསམཡཊྛོཏི པཱིལ༹ནཱདཱིནི ཨབྷིསམེཏབྦབྷཱཝེན ཨེཀཱིབྷཱཝཾ ཨུཔནེཏྭཱ ཝུཏྟཱནི. ཨབྷིསམཡསྶ ཝཱ པཊིཝེདྷསྶ ཝིསཡབྷཱུཏོ ཨཏྠོ ཨབྷིསམཡཊྛོཏི ཏཱནེཝ ཏཐཱ ཨེཀཏྟེན ཝུཏྟཱནི. ཏཏྠ ¶ པཱིལ༹ནཾ དུཀྑསཙྩསྶ ཏཾསམངྒིནོ ཧིཾསནཾ ཨཝིཔྥཱརིཀཏཱཀརཎཾ. སནྟཱཔོ དུཀྑདུཀྑཏཱདིཝསེན སནྟཔནཾ པརིདཧནཾ.

ཏཏྠ སཧཀཱརིཀཱརཎེ སནིཛ྄ཛྷཾ སམེཏི སམཝེཏཱིཏི སམཡོ, སམཝཱཡོ. སམེཏི སམཱགཙྪཏི ཨེཏྠ མགྒབྲཧྨཙརིཡཾ ཏདཱདྷཱརཔུགྒལེཧཱིཏི སམཡོ, ཁཎོ. སམེཏི ཨེཏྠ, ཨེཏེན ཝཱ སཾགཙྪཏི སཏྟོ, སབྷཱཝདྷམྨོ ཝཱ སཧཛཱཏཱདཱིཧི, ཨུཔྤཱདཱདཱིཧི ཝཱཏི སམཡོ, ཀཱལོ. དྷམྨཔྤཝཏྟིམཏྟཏཱཡ ཨཏྠཏོ ཨབྷཱུཏོཔི ཧི ཀཱལོ དྷམྨཔྤཝཏྟིཡཱ ཨདྷིཀརཎཾ ཀརཎཾ ཝིཡ ཙ ཀཔྤནཱམཏྟསིདྡྷེན རཱུཔེན ཝོཧརཱིཡཏཱིཏི. སམཾ, སཧ ཝཱ ཨཝཡཝཱནཾ ཨཡནཾ པཝཏྟི ཨཝཊྛཱནནྟི སམཡོ, སམཱུཧོ ཡཐཱ ‘‘སམུདཱཡོ’’ཏི. ཨཝཡཝསཧཱཝཊྛཱནམེཝ ཧི སམཱུཧོཏི. ཨཝསེསཔཙྩཡཱནཾ ¶ སམཱགམེ ཨེཏི ཕལཾ ཨེཏསྨཱ ཨུཔྤཛྫཏི པཝཏྟཏི ཙཱཏི སམཡོ, ཧེཏུ ཡཐཱ ‘‘སམུདཡོ’’ཏི. སམེཏི སཾཡོཛནབྷཱཝཏོ སམྦདྡྷོ ཨེཏི ཨཏྟནོ ཝིསཡེ པཝཏྟཏི, དལ༹ྷགྒཧཎབྷཱཝཏོ ཝཱ སཾཡུཏྟཱ ཨཡནྟི པཝཏྟནྟི སཏྟཱ ཡཐཱབྷིནིཝེསཾ ཨེཏེནཱཏི སམཡོ, དིཊྛི. དིཊྛིསཾཡོཛནེན ཧི སཏྟཱ ཨཏིཝིཡ བཛ྄ཛྷནྟཱིཏི. སམིཏི སངྒཏི སམོདྷཱནནྟི སམཡོ, པཊིལཱབྷོ. སམསྶ ཡཱནཾ, སམྨཱ ཝཱ ཡཱནཾ ཨཔགམོཏི སམཡོ, པཧཱནཾ. ཨབྷིམུཁཾ ཉཱཎེན སམྨཱ ཨེཏབྦོ ཨབྷིསམེཏབྦོཏི ཨབྷིསམཡོ, དྷམྨཱནཾ ཨཝིཔརཱིཏོ སབྷཱཝོ. ཨབྷིམུཁབྷཱཝེན སམྨཱ ཨེཏི གཙྪཏི བུཛ྄ཛྷཏཱིཏི ཨབྷིསམཡོ, དྷམྨཱནཾ ཨཝིཔརཱིཏསབྷཱཝཱཝབོདྷོ. ཨེཝཾ ཏསྨིཾ ཏསྨིཾ ཨཏྠེ སམཡསདྡསྶ པཝཏྟི ཝེདིཏབྦཱ. སམཡསདྡསྶ ཨཏྠུདྡྷཱརེ ཨབྷིསམཡསདྡསྶ ཨུདཱཧརཎཾ ཝུཏྟནཡེན ཝེདིཏབྦཾ. ཨསྶཱཏི སམཡསདྡསྶ. ཀཱལོ ཨཏྠོ སམཝཱཡཱདཱིནཾ ཨཏྠཱནཾ ཨིདྷ ཨསམྦྷཝཏོ, དེསདེསཀཔརིསཱནཾ ཝིཡ སུཏྟསྶ ནིདཱནབྷཱཝེན ཀཱལསྶ ཨཔདིསིཏབྦཏོ ཙ.

ཀསྨཱ པནེཏྠ ཨནིཡམིཏཝསེནེཝ ཀཱལོ ནིདྡིཊྛོ, ན ཨུཏུསཾཝཙྪརཱདིཝསེན ནིཡམེཏྭཱཏི ཨཱཧ – ‘‘ཏཏྠ ཀིཉྩཱཔཱི’’ཏིཨཱདི. ཨུཏུསཾཝཙྪརཱདིཝསེན ནིཡམཾ ཨཀཏྭཱ སམཡསདྡསྶ ཝཙནེ ཨཡམྤི གུཎོ ལདྡྷོ ཧོཏཱིཏི དསྶེནྟོ ‘‘ཡེ ཝཱ ཨིམེ’’ཏིཨཱདིམཱཧ. སཱམཉྙཛོཏནཱ ཧི ཝིསེསེ ཨཝཏིཊྛཏཱིཏི. ཏཏྠ དིཊྛདྷམྨསུཁཝིཧཱརསམཡོ དེཝསིཀཾ ཛྷཱནསམཱཔཏྟཱིཧི ཝཱིཏིནཱམནཀཱལོ, ཝིསེསཏོ སཏྟསཏྟཱཧཱནི. སུཔྤཀཱསཱཏི དསསཧསྶིལོཀདྷཱཏུཡཱ པཀམྤནཨོབྷཱསཔཱཏུབྷཱཝཱདཱིཧི ¶ པཱཀཊཱ. ཡཐཱཝུཏྟབྷེདེསུ ཨེཝ སམཡེསུ ཨེཀདེསཾ པཀཱརནྟརེཧི སངྒཧེཏྭཱ དསྶེཏུཾ ‘‘ཡོ ཙཱཡ’’ནྟིཨཱདིམཱཧ. ཏཐཱ ཧི ཉཱཎཀིཙྩསམཡོ ཨཏྟཧིཏཔྤཊིཔཏྟིསམཡོ ཙ ཨབྷིསམྦོདྷིསམཡོ, ཨརིཡཏུཎྷཱིབྷཱཝསམཡོ དིཊྛདྷམྨསུཁཝིཧཱརསམཡོ, ཀརུཎཱཀིཙྩཔརཧིཏཔྤཊིཔཏྟིདྷམྨིཀཐཱསམཡོ དེསནཱསམཡོཡེཝ.

ཀརཎཝཙནེན ནིདྡེསོ ཀཏོཏི སམྦནྡྷོ. ཏཏྠཱཏི ཨབྷིདྷམྨཝིནཡེསུ. ཏཐཱཏི བྷུམྨཀརཎེཧི. ཨདྷིཀརཎཏྠོ ཨཱདྷཱརཏྠོ. བྷཱཝོ ནཱམ ཀིརིཡཱ, ཀིརིཡཱཡ ཀིརིཡནྟརལཀྑཎཾ བྷཱཝེནབྷཱཝལཀྑཎཾ. ཏཏྠ ཡཐཱ ཀཱལོ སབྷཱཝདྷམྨཔརིཙྪིནྣོ སཡཾ པརམཏྠཏོ ཨཝིཛྫམཱནོཔི ཨཱདྷཱརབྷཱཝེན པཉྙཱཏོ ཏངྑཎཔྤཝཏྟཱནཾ ཏཏོ པུབྦེ པརཏོ ཙ ཨབྷཱཝཏོ ‘‘པུབྦཎྷེ ཛཱཏོ, སཱཡནྷེ གཙྪཏཱི’’ཏི ཙ ཨཱདཱིསུ, སམཱུཧོ ཙ ཨཝཡཝཝིནིམུཏྟོ ཨཝིཛྫམཱནོཔི ཀཔྤནཱམཏྟསིདྡྷོ ཨཝཡཝཱནཾ ཨཱདྷཱརབྷཱཝེན པཉྙཱཔཱིཡཏི ‘‘རུཀྑེ སཱཁཱ, ཡཝརཱསིཡཾ སམྦྷཱུཏོ’’ཏིཨཱདཱིསུ, ཨེཝཾ ཨིདྷཱཔཱིཏི དསྶེནྟོ ཨཱཧ – ‘‘ཨདྷིཀརཎཾ…པེ… དྷམྨཱན’’ནྟི. ཡསྨིཾ ཀཱལེ, དྷམྨཔུཉྫེ ཝཱ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི, ཏསྨིཾ ཨེཝ ཀཱལེ, དྷམྨཔུཉྫེ ¶ ཙ ཕསྶཱདཡོཔི ཧོནྟཱིཏི ཨཡཉྷི ཏཏྠ ཨཏྠོ. ཡཐཱ ‘‘གཱཝཱིསུ དུཡ྄ཧམཱནཱསུ གཏོ, དུདྡྷཱསུ ཨཱགཏོ’’ཏི དོཧནཀིརིཡཱཡ གམནཀིརིཡཱ ལཀྑཱིཡཏི, ཨེཝཾ ཨིདྷཱཔི ‘‘ཡསྨིཾ སམཡེ, ཏསྨིཾ སམཡེ’’ཏི ཙ ཝུཏྟེ ‘‘སཏཱི’’ཏི ཨཡམཏྠོ ཝིཉྙཱཡམཱནོ ཨེཝ ཧོཏི པདཏྠསྶ སཏྟཱཝིརཧཱབྷཱཝཏོཏི སམཡསྶ སཏྟཱཀིརིཡཱཡ ཙིཏྟསྶ ཨུཔྤཱདཀིརིཡཱ, ཕསྶཱདཱིནཾ བྷཝནཀིརིཡཱ ཙ ལཀྑཱིཡཏཱིཏི. ཡསྨིཾ སམཡེཏི ཡསྨིཾ ནཝམེ ཁཎེ, ཡསྨིཾ ཡོནིསོམནསིཀཱརཱདིཧེཏུམྷི, པཙྩཡསམཝཱཡེ ཝཱ སཏི ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏི, ཏསྨིཾཡེཝ ཁཎེ ཧེཏུམྷི པཙྩཡསམཝཱཡེ ཙ ཕསྶཱདཡོཔི ཧོནྟཱིཏི ཨུབྷཡཏྠ སམཡསདྡེ བྷུམྨནིདྡེསོ ཀཏོ ལཀྑཎབྷཱུཏབྷཱཝཡུཏྟོཏི དསྶེནྟོ ཨཱཧ – ‘‘ཁཎ…པེ… ལཀྑཱིཡཏཱི’’ཏི.

ཧེཏུཨཏྠོ ཀརཎཏྠོ ཙ སམྦྷཝཏི ‘‘ཨནྣེན ཝསཏི, ཨཛ྄ཛྷེནེན ཝསཏི, ཕརསུནཱ ཚིནྡཏི, ཀུདཱལེན ཁཎཏཱི’’ཏིཨཱདཱིསུ ཝིཡ. ཝཱིཏིཀྐམཉྷི སུཏྭཱ བྷིཀྑུསངྒྷཾ སནྣིཔཱཏཱཔེཏྭཱ ཨོཏིཎྞེ ཝཏྠུསྨིཾ ཏཾ པུགྒལཾ པཊིཔུཙྪིཏྭཱ ¶ ཝིགརཧིཏྭཱ ཙ ཏཾ ཏཾ ཝཏྠུཾ ཨོཏིཎྞཀཱལཾ ཨནཏིཀྐམིཏྭཱ ཏེནེཝ ཀཱལེན སིཀྑཱཔདཱནི པཉྙཱཔེནྟོ བྷགཝཱ ཝིཧརཏི སིཀྑཱཔདཔཉྙཏྟིཧེཏུཉྩ ཨཔེཀྑམཱནོ ཏཏིཡཔཱརཱཛིཀཱདཱིསུ ཝིཡ.

ཨཙྩནྟམེཝ ཨཱརམྦྷཏོ པཊྛཱཡ ཡཱཝ དེསནཱནིཊྛཱནཾ པརཧིཏཔྤཊིཔཏྟིསངྑཱཏེན ཀརུཎཱཝིཧཱརེན. ཏདཏྠཛོཏནཏྠནྟི ཨཙྩནྟསཾཡོགཏྠཛོཏནཏྠཾ. ཨུཔཡོགཝཙནནིདྡེསོ ཀཏོ ཡཐཱ ‘‘མཱསཾ ཨཛ྄ཛྷེཏཱི’’ཏི. པོརཱཎཱཏི ཨཊྛཀཐཱཙརིཡཱ. ཨབྷིལཱཔམཏྟབྷེདོཏི ཝཙནམཏྟེན ཝིསེསོ. ཏེན སུཏྟཝིནཡེསུ ཝིབྷཏྟིབྱཏྟཡོ ཀཏོཏི དསྶེཏི.

ཨིདཱནི ‘‘བྷགཝཱ’’ཏི ཨིམསྶ ཨཏྠཾ དསྶེནྟོ ཨཱཧ – ‘‘བྷགཝཱཏི གརཱུ’’ཏིཨཱདི. བྷགཝཱཏི ཝཙནཾ སེཊྛནྟི སེཊྛཝཱཙཀཾ ཝཙནཾ, སེཊྛགུཎསཧཙརཎཾ སེཊྛནྟི ཝུཏྟཾ. ཨཐ ཝཱ ཝུཙྩཏཱིཏི ཝཙནཾ, ཨཏྠོ. ཡསྨཱ ཡོ ‘‘བྷགཝཱ’’ཏི ཝཙནེན ཝཙནཱིཡོ ཨཏྠོ, སོ སེཊྛོཏི ཨཏྠོ. བྷགཝཱཏི ཝཙནམུཏྟམནྟི ཨེཏྠཱཔི ཨེསེཝ ནཡོ. གཱརཝཡུཏྟོཏི གརུབྷཱཝཡུཏྟོ གརུགུཎཡོགཏོ. གརུཀརཎཾ ཝཱ སཱཏིསཡཾ ཨརཧཏཱིཏི གཱརཝཡུཏྟོ, གཱརཝཱརཧོཏི ཨཏྠོ. སིཔྤཱདིསིཀྑཱཔཀཱ གརཱུ ཧོནྟི, ན ཙ གཱརཝཡུཏྟཱ, ཨཡཾ པན ཏཱདིསོ ན ཧོཏི, ཏསྨཱ གརཱུཏི ཝཏྭཱ གཱརཝཡུཏྟོཏི ཝུཏྟནྟི ཀེཙི. ཝུཏྟོཡེཝ, ན ཨིདྷ ཝཏྟབྦོ ཝིསུདྡྷིམགྒསྶ ཨིམིསྶཱ ཨཊྛཀཐཱཡ ཨེཀདེསབྷཱཝཏོཏི ཨདྷིཔྤཱཡོ.

དྷམྨསརཱིརཾ པཙྩཀྑཾ ཀརོཏཱིཏི ‘‘ཡོ ཝོ, ཨཱནནྡ, མཡཱ དྷམྨོ ཙ ཝིནཡོ ཙ དེསིཏོ པཉྙཏྟོ ¶ , སོ ཝོ མམཙྩཡེན སཏྠཱ’’ཏི (དཱི. ནི. ༢.༢༡༦) ཝཙནཏོ དྷམྨསྶ སཏྠུབྷཱཝཔརིཡཱཡོ ཝིཛྫཏཱིཏི ཀཏྭཱ ཝུཏྟཾ. ཝཛིརསངྒྷཱཏསམཱནཀཱཡོ པརེཧི ཨབྷེཛྫསརཱིརཏྟཱ. ན ཧི བྷགཝཏོ རཱུཔཀཱཡེ ཀེནཙི སཀྐཱ ཨནྟརཱཡོ ཀཱཏུནྟི. དེསནཱསམྤཏྟིཾ ནིདྡིསཏི ཝཀྑམཱནསྶ སཀལསུཏྟསྶ ཨེཝནྟི ནིདྡིསནཏོ. སཱཝཀསམྤཏྟིཾ ནིདྡིསཏི པཊིསམྦྷིདཱཔཏྟེན པཉྩསུ ཋཱནེསུ བྷགཝཏཱ ཨེཏདགྒེ ཋཔིཏེན མཡཱ མཧཱསཱཝཀེན སུཏཾ, ཏཉྩ ཁོ མཡཱ སུཏཾ, ན ཨནུསྶུཏིཀཾ, ན པརམྤརཱབྷཏནྟི ཨིམསྶ ཨཏྠསྶ དཱིཔནཏོ. ཀཱལསམྤཏྟིཾ ནིདྡིསཏི ‘‘བྷགཝཱ’’ཏི པདསྶ སནྣིདྷཱནེ པཡུཏྟསྶ སམཡསདྡསྶ ཀཱལསྶ བུདྡྷུཔྤཱདཔྤཊིམཎྜིཏབྷཱཝདཱིཔནཏོ ¶ . བུདྡྷུཔྤཱདཔརམཱ ཧི ཀཱལསམྤདཱ. ཏེནེཏཾ ཝུཙྩཏི –

‘‘ཀཔྤཀསཱཡེ ཀལིཡུགེ, བུདྡྷུཔྤཱདོ ཨཧོ མཧཙྪརིཡཾ;

ཧུཏཱཝཧམཛ྄ཛྷེ ཛཱཏཾ, སམུདིཏམཀརནྡམརཝིནྡ’’ནྟི. (དཱི. ནི. ཊཱི. ༡.༡; སཾ. ནི. ཊཱི. ༡.༡.༡ དེཝཏཱསཾཡུཏྟ);

བྷགཝཱཏི དེསཀསམྤཏྟིཾ ནིདྡིསཏི གུཎཝིསིཊྛསཏྟུཏྟམགརུགཱརཝཱདྷིཝཙནབྷཱཝཏོ.

ཨེཝཾནཱམཀེ ནགརེཏི ཀཐཾ པནེཏཾ ནགརཾ ཨེཝཾནཱམཀཾ ཛཱཏནྟི? ཝུཙྩཏེ, ཡཐཱ ཀཱཀནྡསྶ ཨིསིནོ ནིཝཱསཊྛཱནེ མཱཔིཏཱ ནགརཱི ཀཱཀནྡཱི, མཱཀནྡསྶ ནིཝཱསཊྛཱནེ མཱཔིཏཱ མཱཀནྡཱི, ཀུསམྦསྶ ནིཝཱསཊྛཱནེ མཱཔིཏཱ ཀོསམྦཱིཏི ཝུཙྩཏི, ཨེཝཾ སཝཏྠསྶ ཨིསིནོ ནིཝཱསཊྛཱནེ མཱཔིཏཱ ནགརཱི སཱཝཏྠཱིཏི ཝུཙྩཏི. ཨེཝཾ ཏཱཝ ཨཀྑརཙིནྟཀཱ ཝདནྟི. ཨཊྛཀཐཱཙརིཡཱ པན བྷཎནྟི – ‘‘ཡཾ ཀིཉྩི མནུསྶཱནཾ ཨུཔབྷོགཔརིབྷོགཾ, སབྦམེཏྠ ཨཏྠཱི’’ཏི སཱཝཏྠི. སཏྠསམཱཡོགེ ཙ ‘ཀིཾ བྷཎྜམཏྠཱི’ཏི པུཙྪིཏེ ‘སབྦམཏྠཱི’ཏི ཝཙནམུཔཱདཱཡ སཱཝཏྠི.

‘‘སབྦདཱ སབྦཱུཔཀརཎཾ, སཱཝཏྠིཡཾ སམོཧིཏཾ;

ཏསྨཱ སབྦམུཔཱདཱཡ, སཱཝཏྠཱིཏི པཝུཙྩཏི. (མ. ནི. ཨཊྛ. ༡.༡༤; ཁུ. པཱ. ཨཊྛ. ༥.མངྒལསུཏྟཝཎྞནཱ; ཨུདཱ. ཨཊྛ. ༥; པཊི. མ. ༢.༡.༡༨༤);

‘‘ཀོསལཱནཾ པུརཾ རམྨཾ, དསྶནེཡྻཾ མནོརམཾ;

དསཧི སདྡེཧི ཨཝིཝིཏྟཾ, ཨནྣཔཱནསམཱཡུཏཾ.

‘‘ཝུདྡྷིཾ ¶ ཝེཔུལླཏཾ པཏྟཾ, ཨིདྡྷཾ ཕཱིཏཾ མནོརམཾ;

ཨཱལ༹ཀམནྡཱཝ དེཝཱནཾ, སཱཝཏྠིཔུརམུཏྟམ’’ནྟི. (མ. ནི. ཨཊྛ. ༡.༡༤; ཁུ. པཱ. ཨཊྛ. ༥.མངྒལསུཏྟཝཎྞནཱ);

ཨཝིསེསེནཱཏི ན ཝིསེསེན, ཝིཧཱརབྷཱཝསཱམཉྙེནཱཏི ཨཏྠོ. ཨིརིཡཱཔཐཝིཧཱརོ…པེ… ཝིཧཱརེསཱུཏི ཨིརིཡཱཔཐཝིཧཱརོ དིབྦཝིཧཱརོ བྲཧྨཝིཧཱརོ ཨརིཡཝིཧཱརོཏི ཨེཏེསུ ཙཏཱུསུ ཝིཧཱརེསུ. སམངྒིཔརིདཱིཔནནྟི སམངྒིབྷཱཝཔརིདཱིཔནཾ. ཨེཏནྟི ཝིཧརཏཱིཏི ཨེཏཾ པདཾ. ཏཐཱ ཧི ཏཾ ‘‘ཨིདྷེཀཙྩོ གིཧིསཾསཊྛོ ཝིཧརཏི སཧནནྡཱི སཧསོཀཱི’’ཏིཨཱདཱིསུ (སཾ. ནི. ༤.༢༤༡) ཨིརིཡཱཔཐཝིཧཱརེ ཨཱགཏཾ, ‘‘ཡསྨིཾ སམཡེ, བྷིཀྑཝེ, བྷིཀྑུ ཝིཝིཙྩེཝ ཀཱམེཧི ¶ … པཋམཾ ཛྷཱནཾ ཨུཔསམྤཛྫ ཝིཧརཏཱི’’ཏིཨཱདཱིསུ (དྷ. ས. ༤༩༩; ཝིབྷ. ༦༢༤) དིབྦཝིཧཱརེ, ‘‘སོ མེཏྟཱསཧགཏེན ཙེཏསཱ ཨེཀཾ དིསཾ ཕརིཏྭཱ ཝིཧརཏཱི’’ཏིཨཱདཱིསུ (དཱི. ནི. ༡.༥༥༦; ༣.༣༠༨; མ. ནི. ༡.༧༧, ༤༥༩, ༥༠༩; ༢.༣༠༩, ༣༡༥, ༤༥༡, ༤༧༡; ༣.༢༣༠, ཝིབྷ. ༦༤༢, ༦༤༣) བྲཧྨཝིཧཱརེ, ‘‘སོ ཁོཧཾ, ཨགྒིཝེསྶན, ཏསྶཱཡེཝ ཀཐཱཡ པརིཡོསཱནེ ཏསྨིཾཡེཝ པུརིམསྨིཾ སམཱདྷིནིམིཏྟེ ཨཛ྄ཛྷཏྟམེཝ ཙིཏྟཾ སཎྛཔེམི སནྣིསཱདེམི ཨེཀོདིཾ ཀརོམི, སམཱདཧཱམི, ཡེན སུདཾ ནིཙྩཀཔྤཾ ཝིཧརཱམཱི’’ཏིཨཱདཱིསུ (མ. ནི. ༡.༣༨༧) ཨརིཡཝིཧཱརེ.

ཏཏྠ ཨིརིཡནཾ པཝཏྟནཾ ཨིརིཡཱ, ཀཱཡཔྤཡོགོ. ཏསྶཱ པཝཏྟནཱུཔཱཡབྷཱཝཏོ ཋཱནཱདི ཨིརིཡཱཔཐོ. ཋཱནསམངྒཱི ཝཱ ཧི ཀཱཡེན ཀིཉྩི ཀརེཡྻ གམནཱདཱིསུ ཨཉྙཏརསམངྒཱི ཝཱ. ཨཐ ཝཱ ཨིརིཡཏི པཝཏྟཏི ཨེཏེན ཨཏྟབྷཱཝོ, ཀཱཡཀིཙྩཾ ཝཱཏི ཨིརིཡཱ, ཏསྶཱ པཝཏྟིཡཱ ཨུཔཱཡབྷཱཝཏོ པཐོཏི ཨིརིཡཱཔཐོ, ཋཱནཱདི ཨེཝ. སོ ཙ ཨཏྠཏོ གཏིནིཝཏྟིཨཱདིཨཱཀཱརེན པཝཏྟོ ཙཏུསནྟཏིརཱུཔཔྤབནྡྷོ ཨེཝ. ཝིཧརཎཾ, ཝིཧརཏི ཨེཏེནཱཏི ཝཱ ཝིཧཱརོ. དིཝི བྷཝོ དིབྦོ, ཏཏྠ བཧུལཔྤཝཏྟིཡཱ བྲཧྨཔཱརིསཛྫཱདིདེཝལོཀེ བྷཝོཏི ཨཏྠོ. ཏཏྠ ཡོ དིབྦཱནུབྷཱཝོ, ཏདཏྠཱཡ སཾཝཏྟཏཱིཏི ཝཱ དིབྦོ, ཨབྷིཉྙཱབྷིནཱིཧཱརཝསེན མཧཱགཏིཀཏྟཱ ཝཱ དིབྦོ, དིབྦོ ཙ སོ ཝིཧཱརོ ཙཱཏི དིབྦཝིཧཱརོ, ཙཏསྶོ རཱུཔཱཝཙརསམཱཔཏྟིཡོ. ཨརཱུཔསམཱཔཏྟིཡོཔི ཨེཏྠེཝ སངྒཧཾ གཙྪནྟི. བྲཧྨཱནཾ, བྲཧྨཱནོ ཝཱ ཝིཧཱརཱ བྲཧྨཝིཧཱརཱ, ཙཏསྶོ ཨཔྤམཉྙཱཡོ. ཨརིཡོ, ཨརིཡཱནཾ ཝཱ ཝིཧཱརོ ཨརིཡཝིཧཱརོ, ཙཏྟཱརི སཱམཉྙཕལཱནི. སོ ཧི ཨེཀཾ ཨིརིཡཱཔཐབཱདྷནནྟིཨཱདི ཡདིཔི བྷགཝཱ ཨེཀེནཔི ཨིརིཡཱཔཐེན ཙིརཏརཾ ཀཱལཾ ཨཏྟབྷཱཝཾ པཝཏྟེཏུཾ སཀྐོཏི, ཏཐཱཔི ཨུཔཱདིནྣཀསརཱིརསྶ ཨཡཾ སབྷཱཝོཏི དསྶེཏུཾ ཝུཏྟཾ. ཡསྨཱ ཝཱ བྷགཝཱ ཡཏྠ ཀཏྠཙི ཝསནྟོ ཝེནེཡྻཱནཾ དྷམྨཾ དེསེནྟོ ནཱནཱསམཱཔཏྟཱིཧི ¶ ཙ ཀཱལཾ ཝཱིཏིནཱམེནྟོ ཝསཏཱིཏི སཏྟཱནཾ ཨཏྟནོ ཙ ཝིཝིདྷཧིཏསུཁཾ ཧརཏི ཨུཔནེཏི ཨུཔྤཱདེཏི, ཏསྨཱ ཝིཝིདྷཾ ཧརཏཱིཏི ཝིཧརཏཱིཏི ཨེཝམེཏྠ ཨཏྠོ ཝེདིཏབྦོ.

ཛེཏསྶ ¶ རཱཛཀུམཱརསྶཱཏི ཨེཏྠ ཨཏྟནོ པཙྩཏྠིཀཛནཾ ཛིནཱཏཱིཏི ཛེཏོ. སོཏསདྡོ ཝིཡ ཧི ཀཏྟུསཱདྷནོ ཛེཏསདྡོ. ཨཐ ཝཱ རཉྙཱ པསེནདིཀོསལེན ཨཏྟནོ པཙྩཏྠིཀཛནེ ཛིཏེ ཛཱཏོཏི ཛེཏོ. རཉྙོ ཧི ཛཡཾ ཨཱརོཔེཏྭཱ ཀུམཱརོ ཛིཏཝཱཏི ཛེཏོཏི ཝུཏྟོ. མངྒལཀཱམཏཱཡ ཝཱ ཏསྶ ཨེཝཾནཱམམེཝ ཀཏནྟི ཛེཏོ. མངྒལཀཱམཏཱཡ ཧི ཛེཡྻོཏི ཨེཏསྨིཾ ཨཏྠེ ཛེཏོཏི ཝུཏྟཾ. ཝིཏྠཱརོ པནཱཏིཨཱདིནཱ ‘‘ཨནཱཐཔིཎྜིཀསྶ ཨཱརཱམེ’’ཏི ཨེཏྠ སུདཏྟོ ནཱམ སོ, གཧཔཏི, མཱཏཱཔིཏཱུཧི ཀཏནཱམཝསེན, སབྦཀཱམསམིདྡྷཏཱཡ པན ཝིགཏམཙྪེརཏཱཡ ཀརུཎཱདིགུཎསམངྒིཏཱཡ ཙ ནིཙྩཀཱལཾ ཨནཱཐཱནཾ པིཎྜམདཱསི. ཏེན ཨནཱཐཔིཎྜིཀོཏི སངྑཾ གཏོ. ཨཱརམནྟི ཨེཏྠ པཱཎིནོ, ཝིསེསེན ཝཱ པབྦཛིཏཱཏི ཨཱརཱམོ, ཏསྶ པུཔྥཕལཱདིསོབྷཱཡ ནཱཏིདཱུརནཙྩཱསནྣཏཱདིཔཉྩཝིདྷསེནཱསནངྒསམྤཏྟིཡཱ ཙ ཏཏོ ཏཏོ ཨཱགམྨ རམནྟི ཨབྷིརམནྟི, ཨནུཀྐཎྛིཏཱ ཧུཏྭཱ ནིཝསནྟཱིཏི ཨཏྠོ. ཝུཏྟཔྤཀཱརཱཡ ཝཱ སམྤཏྟིཡཱ ཏཏྠ ཏཏྠ གཏེཔི ཨཏྟནོ ཨབྦྷནྟརཾཡེཝ ཨཱནེཏྭཱ རམེཏཱིཏི ཨཱརཱམོ. སོ ཧི ཨནཱཐཔིཎྜིཀེན གཧཔཏིནཱ ཛེཏསྶ རཱཛཀུམཱརསྶ ཧཏྠཏོ ཨཊྛཱརསཧིརཉྙཀོཊཱིཧི སནྠཱརེན ཀིཎིཏྭཱ ཨཊྛཱརསཧིརཉྙཀོཊཱིཧི སེནཱསནཱནི ཀཱརཱཔེཏྭཱ ཨཊྛཱརསཧིརཉྙཀོཊཱིཧི ཝིཧཱརམཧཾ ནིཊྛཱཔེཏྭཱ ཨེཝཾ ཙཏུཔཉྙཱསཧིརཉྙཀོཊིཔརིཙྩཱགེན བུདྡྷཔྤམུཁསྶ བྷིཀྑུསངྒྷསྶ ནིཡྻཱཏིཏོ, ཏསྨཱ ‘‘ཨནཱཐཔིཎྜིཀསྶ ཨཱརཱམོ’’ཏི ཝུཙྩཏཱིཏི ཨིམམཏྠཾ ནིདསྶེཏི.

ཏཏྠཱཏི ‘‘ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ’’ཏི ཡཾ ཝུཏྟཾ ཝཱཀྱཾ, ཏཏྠ. སིཡཱཏི ཀསྶཙི ཨེཝཾ པརིཝིཏཀྐོ སིཡཱ, ཝཀྑམཱནཱཀཱརེན ཀདཱཙི ཙོདེཡྻ ཝཱཏི ཨཏྠོ. ཨཐ ཏཏྠ ཝིཧརཏཱིཏི ཡདི ཛེཏཝནེ ཨནཱཐཔིཎྜིཀསྶ ཨཱརཱམེ ཝིཧརཏི. ན ཝཏྟབྦནྟི ནཱནཱཋཱནབྷཱུཏཏྟཱ སཱཝཏྠིཛེཏཝནཱནཾ, ‘‘ཨེཀཾ སམཡ’’ནྟི ཙ ཝུཏྟཏྟཱཏི ཨདྷིཔྤཱཡོ. ཨིདཱནི ཙོདཀོ ཏམེཝ ཨཏྟནོ ཨདྷིཔྤཱཡཾ ‘‘ན ཧི སཀྐཱ’’ཏིཨཱདིནཱ ཝིཝརཏི. ཨིཏརོ སབྦམེཏཾ ཨཝིཔརཱིཏཾ ཨཏྠཾ ཨཛཱནནྟེན ཏཡཱ ཝུཏྟནྟི དསྶེནྟོ ‘‘ན ཁོ པནེཏཾ ཨེཝཾ དཊྛབྦ’’ནྟིཨཱདིམཱཧ. ཏཏྠ ཨེཏནྟི ‘‘སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ’’ཏི ཨེཏཾ ཝཙནཾ. ཨེཝནྟི ‘‘ཡདི ཏཱཝ བྷགཝཱ’’ཏིཨཱདིནཱ ¶ ཡཾ ཏཾ བྷཝཏཱ ཙོདིཏཾ, ཏཾ ཨཏྠཏོ ཨེཝཾ ན ཁོ པན དཊྛབྦཾ, ན ཨུབྷཡཏྠ ཨཔུབྦཾ ཨཙརིམཾ ཝིཧཱརདསྶནཏྠནྟི ཨཏྠོ. ཨིདཱནི ཨཏྟནཱ ཡཐཱདྷིཔྤེཏཾ ཨཝིཔརཱིཏམཏྠཾ, ཏསྶ ཙ པཊིཀཙྩེཝ ཝུཏྟབྷཱཝཾ, ཏེན ཙ ཨཔྤཊིཝིདྡྷཏཾ པཀཱསེནྟོ ‘‘ནནུ ཨཝོཙུམྷ…པེ… ཛེཏཝནེ’’ཏི ཨཱཧ. ཨེཝམྤི ¶ ‘‘ཛེཏཝནེ ཨནཱཐཔིཎྜིཀསྶ ཨཱརཱམེ ཝིཧརཏི’’ཙྩེཝ ཝཏྟབྦཾ, ན ‘‘སཱཝཏྠིཡ’’ནྟི ཙོདནཾ མནསི ཀཏྭཱ ཝུཏྟཾ – ‘‘གོཙརགཱམནིདསྶནཏྠ’’ནྟིཨཱདི.

ཨཝསྶཉྩེཏྠ གོཙརགཱམཀིཏྟནཾ ཀཏྟབྦཾ. ཏཐཱ ཧི ཏཾ ཡཐཱ ཛེཏཝནཱདིཀིཏྟནཾ པབྦཛིཏཱནུགྒཧཀརཎཱདིཨནེཀཔྤཡོཛནཾ, ཨེཝཾ གོཙརགཱམཀིཏྟནམྤི གཧཊྛཱནུགྒཧཀརཎཱདིཝིཝིདྷཔཡོཛནནྟི དསྶེནྟོ ‘‘སཱཝཏྠིཝཙནེནཱ’’ཏིཨཱདིམཱཧ. ཏཏྠ པཙྩཡགྒཧཎེན ཨུཔསངྐམཔཡིརུཔཱསནཱནཾ ཨོཀཱསདཱནེན དྷམྨདེསནཱཡ སརཎེསུ སཱིལེསུ ཙ པཏིཊྛཱཔནེན ཡཐཱུཔནིསྶཡཾ ཨུཔརིཝིསེསཱདྷིགམཱཝཧནེན ཙ གཧཊྛཱནུགྒཧཀརཎཾ, ཨུགྒཧཔརིཔུཙྪཱནཾ ཀམྨཊྛཱནཱནུཡོགསྶ ཙ ཨནུརཱུཔཝསནཊྛཱནཔརིགྒཧེནེཏྠ པབྦཛིཏཱནུགྒཧཀརཎཾ ཝེདིཏབྦཾ. ཀརུཎཱཡ ཨུཔགམནཾ, ན ལཱབྷཱདིནིམིཏྟཾ. པཉྙཱཡ ཨཔགམནཾ, ན ཝིརོདྷཱདིནིམིཏྟནྟི ཨུཔགམནཱཔགམནཱནཾ ནིརུཔཀྐིལེསཏཾ ཝིབྷཱཝེཏི. དྷམྨིཀསུཁཾ ནཱམ ཨནཝཛྫསུཁཾ. དེཝཏཱནཾ ཨུཔཀཱརབཧུལཏཱ ཛནཝིཝིཏྟཏཱཡ. པཙུརཛནཝིཝིཏྟཉྷི ཋཱནཾ དེཝཱ ཨུཔསངྐམིཏབྦཾ མཉྙནྟི. ཏདཏྠཔརིནིཔྥཱདནནྟི ལོཀཏྠནིཔྥཱདནཾ, བུདྡྷཀིཙྩསམྤཱདནནྟི ཨཏྠོ. ཨེཝམཱདིནཱཏི ཨཱདི-སདྡེན སཱཝཏྠིཀིཏྟནེན རཱུཔཀཱཡསྶ ཨནུགྒཎྷནཾ དསྶེཏི, ཛེཏཝནཱདིཀིཏྟནེན དྷམྨཀཱཡསྶ. ཏཐཱ པུརིམེན པརཱདྷཱིནཀིརིཡཱཀརཎཾ, དུཏིཡེན ཨཏྟཱདྷཱིནཀིརིཡཱཀརཎཾ. པུརིམེན ཝཱ ཀརུཎཱཀིཙྩཾ, ཨིཏརེན པཉྙཱཀིཙྩཾ. པུརིམེན ཙསྶ པརམཱཡ ཨནུཀམྤཱཡ སམནྣཱགམཾ, པཙྪིམེན པརམཱཡ ཨུཔེཀྑཱཡ སམནྣཱགམཾ དཱིཔེཏི. བྷགཝཱ ཧི སབྦསཏྟེ པརམཱཡ ཨནུཀམྤཱཡ ཨནུཀམྤཏི, ན ཙ ཏཏྠ སིནེཧདོསཱནུཔཏིཏོ པརམུཔེཀྑཀབྷཱཝཏོ. ཨུཔེཀྑཀོ ཙ ན པརཧིཏསུཁཀརཎེ ཨཔྤོསྶུཀྐོ མཧཱཀཱརུཎིཀབྷཱཝཏོ. ཏསྶ མཧཱཀཱརུཎིཀཏཱཡ ལོཀནཱཐཏཱ, ཨུཔེཀྑཀཏཱཡ ཨཏྟནཱཐཏཱ.

ཏཐཱ ཧེས བོདྷིསཏྟབྷཱུཏོ མཧཱཀརུཎཱཡ སཉྩོདིཏམཱནསོ སཀལལོཀཧིཏཱཡ ཨུསྶུཀྐམཱཔནྣོ མཧཱབྷིནཱིཧཱརཏོ པཊྛཱཡ ¶ ཏདཏྠནིཔྥཱདནཏྠཾ པུཉྙཉཱཎསམྦྷཱརེ སམྤཱདེནྟོ ཨཔརིམིཏཾ ཀཱལཾ ཨནཔྤཀཾ དུཀྑམནུབྷོསི, ཨུཔེཀྑཀཏཱཡ སམྨཱ པཏིཏེཧི དུཀྑེཧི ན ཝིཀམྤིཏཏཱ. མཧཱཀཱརུཎིཀཏཱཡ སཾསཱརཱབྷིམུཁཏཱ, ཨུཔེཀྑཀཏཱཡ ཏཏོ ནིབྦིནྡནཱ. ཏཐཱ ཨུཔེཀྑཀཏཱཡ ནིབྦཱནཱབྷིམུཁཏཱ, མཧཱཀཱརུཎིཀཏཱཡ ཏདདྷིགམོ. ཏཐཱ མཧཱཀཱརུཎིཀཏཱཡ པརེསཾ ཨཧིཾསཱཔནཾ, ཨུཔེཀྑཀཏཱཡ སཡཾ པརེཧི ཨབྷཱཡནཾ. མཧཱཀཱརུཎིཀཏཱཡ པརཾ རཀྑཏོ ཨཏྟནོ རཀྑཎཾ, ཨུཔེཀྑཀཏཱཡ ཨཏྟཱནཾ རཀྑཏོ པརེསཾ རཀྑཎཾ. ཏེནསྶ ཨཏྟཧིཏཱཡ པཊིཔནྣཱདཱིསུ ཙཏུཏྠཔུགྒལབྷཱཝོ སིདྡྷོ ཧོཏི. ཏཐཱ མཧཱཀཱརུཎིཀཏཱཡ སཙྩཱདྷིཊྛཱནསྶ ཙ ཙཱགཱདྷིཊྛཱནསྶ ཙ པཱརིཔཱུརཱི, ཨུཔེཀྑཀཏཱཡ ཨུཔསམཱདྷིཊྛཱནསྶ ཙ པཉྙཱདྷིཊྛཱནསྶ ཙ པཱརིཔཱུརཱི ¶ . ཨེཝཾ པུརིསུདྡྷཱསཡཔྤཡོགསྶ མཧཱཀཱརུཎིཀཏཱཡ ལོཀཧིཏཏྠམེཝ རཛྫསམྤདཱདིབྷཝསམྤཏྟིཡཱ ཨུཔགམནཾ, ཨུཔེཀྑཀཏཱཡ ཏིཎཱཡཔི ཨམཉྙམཱནསྶ ཏཏོ ཨཔགམནཾ. ཨིཏི སུཝིསུདྡྷཨུཔགམཱཔགམསྶ མཧཱཀཱརུཎིཀཏཱཡ ལོཀཧིཏཏྠམེཝ དཱནཝསེན སམྤཏྟཱིནཾ པརིཙྩཛནཱ, ཨུཔེཀྑཀཏཱཡ ཙསྶ ཕལསྶ ཨཏྟནོ ཨཔཙྩཱསཱིསནཱ. ཨེཝཾ སམུདཱགམནཏོ པཊྛཱཡ ཨཙྪརིཡབྦྷུཏགུཎསམནྣཱགཏསྶ མཧཱཀཱརུཎིཀཏཱཡ པརེསཾ ཧིཏསུཁཏྠཾ ཨཏིདུཀྐརཀཱརིཏཱ, ཨུཔེཀྑཀཏཱཡ ཀཱཡམྤི ཨནལངྐཱརིཏཱ.

ཏཐཱ མཧཱཀཱརུཎིཀཏཱཡ ཙརིམཏྟབྷཱཝེ ཛིཎྞཱཏུརམཏདསྶནེན སཉྫཱཏསཾཝེགོ, ཨུཔེཀྑཀཏཱཡ ཨུལཱ༹རེསུ དེཝབྷོགསདིསེསུ བྷོགེསུ ནིརཔེཀྑོ མཧཱབྷིནིཀྑམནཾ ནིཀྑམི. ཏཐཱ མཧཱཀཱརུཎིཀཏཱཡ ‘‘ཀིཙྪཾ ཝཏཱཡཾ ལོཀོ ཨཱཔནྣོ’’ཏིཨཱདིནཱ (དཱི. ནི. ༢.༥༧; སཾ. ནི. ༢.༤, ༡༠) ཀརུཎཱམུཁེནེཝ ཝིཔསྶནཱརམྦྷོ, ཨུཔེཀྑཀཏཱཡ བུདྡྷབྷཱུཏསྶ སཏྟ སཏྟཱཧཱནི ཝིཝེཀསུཁེནེཝ ཝཱིཏིནཱམནཾ. མཧཱཀཱརུཎིཀཏཱཡ དྷམྨགམྦྷཱིརཏཾ པཙྩཝེཀྑིཏྭཱ དྷམྨདེསནཱཡ ཨཔྤོསྶུཀྐནཾ ཨཱཔཛྫིཏྭཱཔི མཧཱབྲཧྨུནོ ཨཛ྄ཛྷེསནཱཔདེསེན ཨོཀཱསཀརཎཾ, ཨུཔེཀྑཀཏཱཡ པཉྩཝགྒིཡཱདིཝེནེཡྻཱནཾ ཨནནུརཱུཔསམུདཱཙཱརེཔི ཨནཉྙཐཱབྷཱཝོ. མཧཱཀཱརུཎིཀཏཱཡ ཀཏྠཙི པཊིགྷཱཏཱབྷཱཝེནསྶ སབྦཏྠ ཨམིཏྟསཉྙཱབྷཱཝོ, ཨུཔེཀྑཀཏཱཡ ཀཏྠཙིཔི ཨནུརོདྷཱབྷཱཝེན སབྦཏྠ སིནེཧསནྠཝཱབྷཱཝོ. མཧཱཀཱརུཎིཀཏཱཡ པརེསཾ པསཱདནཱ, ཨུཔེཀྑཀཏཱཡ ¶ པསནྣཱཀཱརེཧི ན ཝིཀམྤནཱ. མཧཱཀཱརུཎིཀཏཱཡ དྷམྨཱནུརཱགཱབྷཱཝེན ཏཏྠ ཨཱཙརིཡམུཊྛིཨབྷཱཝོ, ཨུཔེཀྑཀཏཱཡ སཱཝཀཱནུརཱགཱབྷཱཝེན པརིཝཱརཔརིཀམྨཏཱབྷཱཝོ. མཧཱཀཱརུཎིཀཏཱཡ དྷམྨཾ དེསེཏུཾ པརེཧི སཾསགྒམུཔགཙྪཏོཔི ཨུཔེཀྑཀཏཱཡ ན ཏཏྠ ཨབྷིརཏི. མཧཱཀཱརུཎིཀཏཱཡ གཱམཱདཱིནཾ ཨཱསནྣཊྛཱནེ ཝསཏོཔི ཨུཔེཀྑཀཏཱཡ ཨརཉྙཊྛཱནེ ཨེཝ ཝིཧརཎཾ. ཏེན ཝུཏྟཾ – ‘‘པུརིམེནསྶ པརམཱཡ ཨནུཀམྤཱཡ སམནྣཱགམཾ དཱིཔེཏཱི’’ཏི.

ཏནྟི ཏཏྲཱཏི པདཾ. ‘‘དེསཀཱལཔརིདཱིཔན’’ནྟི ཡེ དེསཀཱལཱ ཨིདྷ ཝིཧརཎཀིརིཡཱཝིསེསནབྷཱཝེན ཝུཏྟཱ, ཏེསཾ པརིདཱིཔནནྟི དསྶེནྟོ ‘‘ཡཾ སམཡཾ…པེ… དཱིཔེཏཱི’’ཏི ཨཱཧ. ཏཾ-སདྡོ ཧི ཝུཏྟསྶ ཨཏྠསྶ པཊིནིདྡེསོ, ཏསྨཱ ཨིདྷ ཀཱལསྶ དེསསྶ ཝཱ པཊིནིདྡེསོ བྷཝིཏུམརཧཏི, ན ཨཉྙསྶ. ཨཡཾ ཏཱཝ ཏཏྲ-སདྡསྶ པཊིནིདྡེསབྷཱཝེ ཨཏྠཝིབྷཱཝནཱ. ཡསྨཱ པན ཨཱིདིསེསུ ཋཱནེསུ ཏཏྲ-སདྡོ དྷམྨདེསནཱཝིསིཊྛཾ དེསཀཱལཉྩ ཝིབྷཱཝེཏི, ཏསྨཱ ཝུཏྟཾ – ‘‘བྷཱསིཏབྦཡུཏྟེ ཝཱ དེསཀཱལེ དཱིཔེཏཱི’’ཏི. ཏེན ཏཏྲཱཏི ཡཏྲ བྷགཝཱ དྷམྨདེསནཏྠཾ བྷིཀྑཱུ ཨཱལཔཏི བྷཱསཏི, ཏཱདིསེ དེསེ, ཀཱལེ ཝཱཏི ཨཏྠོ. ན ཧཱིཏིཨཱདིནཱ ཏམེཝཏྠཾ སམཏྠེཏི. ནནུ ཙ ཡཏྠ ཋིཏོ བྷགཝཱ ‘‘ཨཀཱལོ ཁོ ཏཱཝཱ’’ཏིཨཱདིནཱ ¶ བཱཧིཡསྶ དྷམྨདེསནཾ པཊིཀྑིཔི, ཏཏྠེཝ ཨནྟརཝཱིཐིཡཾ ཋིཏོ ཏསྶ དྷམྨཾ དེསེསཱིཏི? སཙྩམེཏཾ, ཨདེསེཏབྦཀཱལེ ཨདེསནཱཡ ཨིདཾ ཨུདཱཧརཎཾ. ཏེནེཝཱཧ – ‘‘ཨཀཱལོ ཁོ ཏཱཝཱ’’ཏི.

ཡཾ པན ཏཏྠ ཝུཏྟཾ – ‘‘ཨནྟརགྷརཾ པཝིཊྛམྷཱ’’ཏི, ཏམྤི ཏསྶ ཨཀཱལབྷཱཝསྶེཝ པརིཡཱཡེན དསྶནཏྠཾ ཝུཏྟཾ. ཏསྶ ཧི ཏདཱ ཨདྡྷཱནཔརིསྶམེན རཱུཔཀཱཡེ ཨཀམྨཉྙཏཱ ཨཧོསི, བལཝཔཱིཏིཝེགེན ནཱམཀཱཡེ. ཏདུབྷཡསྶ ཝཱུཔསམཾ ཨཱགམེནྟོ པཔཉྩཔརིཧཱརཏྠཾ བྷགཝཱ ‘‘ཨཀཱལོ ཁོ’’ཏི པརིཡཱཡེན པཊིཀྑིཔི. ཨདེསེཏབྦདེསེ ཨདེསནཱཡ པན ཨུདཱཧརཎཾ ‘‘ཨཐ ཁོ བྷགཝཱ མགྒཱ ཨོཀྐམྨ ཨཉྙཏརསྨིཾ རུཀྑམཱུལེ ནིསཱིདི (སཾ. ནི. ༢.༡༥༤), ཝིཧཱརཔཙྪཱཡཱཡཾ པཉྙཏྟེ ཨཱསནེ ནིསཱིདཱི’’ཏི (དཱི. ནི. ༡.༣༦༣) ཙ ཨེཝམཱདིཀཾ ཨིདྷ ཨཱདིསདྡེན སངྒཧིཏཾ. ‘‘ཨཐ ཁོ སོ, བྷིཀྑཝེ, བཱལོ ཨིདྷ པུབྦེ ནེསཱདོ ཨིདྷ པཱཔཱནི ཀམྨཱནི ཀརིཏྭཱ’’ཏིཨཱདཱིསུ (མ. ནི. ༣.༢༥༡) པདཔཱུརཎམཏྟེ ཁོ-སདྡོ, ‘‘དུཀྑཾ ཁོ ཨགཱརཝོ ཝིཧརཏི ¶ ཨཔྤཏིསྶོ’’ཏིཨཱདཱིསུ (ཨ. ནི. ༤.༢༡) ཨཝདྷཱརཎེ, ‘‘ཀིཏྟཱཝཏཱ ནུ ཁོ, ཨཱཝུསོ, སཏྠུ པཝིཝིཏྟསྶ ཝིཧརཏོ སཱཝཀཱ ཝིཝེཀཾ ནཱནུསིཀྑནྟཱི’’ཏིཨཱདཱིསུ (མ. ནི. ༡.༣༡) ཨཱདིཀཱལཏྠེ, ཝཱཀྱཱརམྦྷེཏི ཨཏྠོ. ཏཏྠ པདཔཱུརཎེན ཝཙནཱལངྐཱརམཏྟཾ ཀཏཾ ཧོཏི, ཨཱདིཀཱལཏྠེན ཝཱཀྱསྶ ཨུཔཉྙཱསམཏྟཾ. ཨཝདྷཱརཎཏྠེན པན ནིཡམདསྶནཾ, ཏསྨཱ ཨཱམནྟེསི ཨེཝཱཏི ཨཱམནྟནེ ནིཡམོ དསྶིཏོ ཧོཏི.

བྷགཝཱཏི ལོཀགརུདཱིཔནནྟི ཀསྨཱ ཝུཏྟཾ, ནནུ པུབྦེཔི བྷགཝཱསདྡསྶ ཨཏྠོ ཝུཏྟོཏི? ཡདིཔི ཝུཏྟོ, ཏཾ པནསྶ ཡཐཱཝུཏྟེ ཋཱནེ ཝིཧརཎཀིརིཡཱཡ ཀཏྟུ ཝིསེསདསྶནཏྠཾ ཀཏཾ, ན ཨཱམནྟནཀིརིཡཱཡ, ཨིདྷ པན ཨཱམནྟནཀིརིཡཱཡ, ཏསྨཱ ཏདཏྠཾ པུན ‘‘བྷགཝཱ’’ཏི པཱལི༹ཡཾ ཝུཏྟནྟི ཏསྶཏྠཾ དསྶེཏུཾ ‘‘བྷགཝཱཏི ལོཀགརུདཱིཔན’’ནྟི ཨཱཧ. ཏེན ལོཀགརུབྷཱཝཏོ ཏདནུརཱུཔཾ པཊིཔཏྟིཾ པཏྠེནྟོ ཨཏྟནོ སནྟིཀཾ ཨུཔགཏཱནཾ བྷིཀྑཱུནཾ ཨཛ྄ཛྷཱསཡཱནུརཱུཔཾ དྷམྨཾ དེསེཏུཾ ཏེ ཨཱམནྟེསཱིཏི དསྶེཏི. ཀཐཱསཝནཡུཏྟཔུགྒལཝཙནནྟི ཝཀྑམཱནཱཡ ཙིཏྟཔརིཡཱདཱནདེསནཱཡ སཝནཡོགྒཔུགྒལཝཙནཾ. ཙཏཱུསུཔི པརིསཱསུ བྷིཀྑཱུ ཨེཝ ཨེདིསཱནཾ དེསནཱནཾ ཝིསེསེན བྷཱཛནབྷཱུཏཱཏི སཱཏིསཡཾ སཱསནསམྤཊིགྒཱཧཀབྷཱཝདསྶནཏྠཾ ཨིདྷ བྷིཀྑུགྒཧཎནྟི དསྶེཏྭཱ ཨིདཱནི སདྡཏྠཾ དསྶེཏུཾ ‘‘ཨཔིཙཱ’’ཏིཨཱདིམཱཧ. ཏཏྠ བྷིཀྑཀོཏི བྷིཀྑཱུཏི བྷིཀྑནདྷམྨཏཱཡ བྷིཀྑཱུཏི ཨཏྠོ. བྷིཀྑཱཙརིཡཾ ཨཛ྄ཛྷུཔགཏོཏི བུདྡྷཱདཱིཧི ཨཛ྄ཛྷུཔགཏཾ བྷིཀྑཱཙརིཡཾ, ཨུཉྪཱཙརིཡཾ, ཨཛ྄ཛྷུཔགཏཏྟཱ ཨནུཊྛིཏཏྟཱ བྷིཀྑུ. ཡོ ཧི ཨཔྤཾ ཝཱ མཧནྟཾ ཝཱ བྷོགཀྑནྡྷཾ པཧཱཡ ཨགཱརསྨཱ ཨནགཱརིཡཾ པབྦཛིཏོ, སོ ཀསིགོརཀྑཱདིཛཱིཝིཀཱཀཔྤནཾ ཧིཏྭཱ ལིངྒསམྤཊིཙྪནེནེཝ ¶ བྷིཀྑཱཙརིཡཾ ཨཛ྄ཛྷུཔགཏཏྟཱ བྷིཀྑུ, པརཔྤཊིབདྡྷཛཱིཝིཀཏྟཱ ཝཱ ཝིཧཱརམཛ྄ཛྷེ ཀཱཛབྷཏྟཾ བྷུཉྫམཱནོཔི བྷིཀྑཱཙརིཡཾ ཨཛ྄ཛྷུཔགཏོཏི བྷིཀྑུ, པིཎྜིཡཱལོཔབྷོཛནཾ ནིསྶཱཡ པབྦཛྫཱཡ ཨུསྶཱཧཛཱཏཏྟཱ ཝཱ བྷིཀྑཱཙརིཡཾ ཨཛ྄ཛྷུཔགཏོཏི བྷིཀྑཱུཏི ཨེཝམེཏྠ ཨཏྠོ དཊྛབྦོ. ཨཱདིནཱ ནཡེནཱཏི ‘‘ཚིནྣབྷིནྣཔཊདྷརོཏི བྷིཀྑུ, བྷིནྡཏི པཱཔཀེ ཨཀུསལེ དྷམྨེཏི བྷིཀྑུ, བྷིནྣཏྟཱ པཱཔཀཱནཾ ཨཀུསལཱནཾ དྷམྨཱནཾ བྷིཀྑཱུ’’ཏིཨཱདིནཱ (ཝིབྷ. ༥༡༠) ཝིབྷངྒེ ཨཱགཏནཡེན. ཉཱཔནེཏི ཨཝབོདྷནེ, པཊིཝེདནེཏི ཨཏྠོ.

བྷིཀྑནསཱིལཏཱཏི ¶ བྷིཀྑནེན ཛཱིཝནསཱིལཏཱ, ན ཀསིཝཱཎིཛྫཱདིནཱ ཛཱིཝནསཱིལཏཱ. བྷིཀྑནདྷམྨཏཱཏི ‘‘ཨུདྡིསྶ ཨརིཡཱ ཏིཊྛནྟཱི’’ཏི (ཛཱ. ༡.༧.༥༩) ཨེཝཾ ཝུཏྟཱ བྷིཀྑནསབྷཱཝཏཱ, ན ཡཱཙནཀོཧཉྙསབྷཱཝཏཱ. བྷིཀྑནེ སཱདྷུཀཱརིཏཱཏི ‘‘ཨུཏྟིཊྛེ ནཔྤམཛྫེཡྻཱ’’ཏི (དྷ. པ. ༡༦༨) ཝཙནཾ ཨནུསྶརིཏྭཱ ཏཏྠ ཨཔྤམཛྫནཱ. ཨཐ ཝཱ སཱིལཾ ནཱམ པཀཏིསབྷཱཝོ, ཨིདྷ པན ཏདདྷིཊྛཱནཾ. དྷམྨོཏི ཝཏཾ. སཱདྷུཀཱརིཏཱཏི སཀྐཙྩཀཱརིཏཱ ཨཱདརཀིརིཡཱ. ཧཱིནཱདྷིཀཛནསེཝིཏནྟི ཡེ བྷིཀྑུབྷཱཝེ ཋིཏཱཔི ཛཱཏིམདཱདིཝསེན ཨུདྡྷཏཱ ཨུནྣལཱ༹, ཡེ ཙ གིཧིབྷཱཝེ པརེསཾ ཨདྷིཀབྷཱཝམྤི ཨནུཔགཏཏྟཱ བྷིཀྑཱཙརིཡཾ པརམཀཱརུཉྙཏཾ མཉྙནྟི, ཏེསཾ ཨུབྷཡེསམྤི ཡཐཱཀྐམཾ ‘‘བྷིཀྑཝོ’’ཏི ཝཙནེན ཧཱིནཛནེཧི དལིདྡེཧི པརམཀཱརུཉྙཏཾ པཏྟེཧི པརཀུལེསུ བྷིཀྑཱཙརིཡཱཡ ཛཱིཝིཀཾ ཀཔྤེནྟེཧི སེཝིཏཾ ཝུཏྟིཾ པཀཱསེནྟོ ཨུདྡྷཏབྷཱཝནིགྒཧཾ ཀརོཏི. ཨདྷིཀཛནེཧི ཨུལཱ༹རབྷོགཁཏྟིཡཀུལཱདིཏོ པབྦཛིཏེཧི བུདྡྷཱདཱིཧི ཨཱཛཱིཝཝིསོདྷནཏྠཾ སེཝིཏཾ ཝུཏྟིཾ པཀཱསེནྟོ དཱིནབྷཱཝནིགྒཧཾ ཀརོཏཱིཏི ཡོཛེཏབྦཾ. ཡསྨཱ ‘‘བྷིཀྑཝོ’’ཏི ཝཙནཾ ཨཱམནྟནབྷཱཝཏོ ཨབྷིམུཁཱིཀརཎཾ, པཀརཎཏོ སཱམཏྠིཡཏོ ཙ སུསྶུསཱཛནནཾ སཀྐཙྩསཝནམནསིཀཱརནིཡོཛནཉྩ ཧོཏི, ཏསྨཱ ཏམཏྠཾ དསྶེནྟོ ‘‘བྷིཀྑཝོཏི ཨིམིནཱ’’ཏིཨཱདིམཱཧ. ཏཏྠ སཱདྷུཀཾ སཝནམནསིཀཱརེཏི སཱདྷུཀསཝནེ སཱདྷུཀམནསིཀཱརེ ཙ. ཀཐཾ པན པཝཏྟིཏཱ སཝནཱདཡོ སཱདྷུཀཾ པཝཏྟིཏཱ ཧོནྟཱིཏི? ‘‘ཨདྡྷཱ ཨིམཱཡ སམྨཱཔཊིཔཏྟིཡཱ སཀལསཱསནསམྤཏྟི ཧཏྠགཏཱ བྷཝིསྶཏཱི’’ཏི ཨཱདརགཱརཝཡོགེན ཀཐཱདཱིསུ ཨཔརིབྷཝཱདིནཱ ཙ. ཝུཏྟཉྷི ‘‘པཉྩཧི, བྷིཀྑཝེ, དྷམྨེཧི སམནྣཱགཏོ སུཎནྟོ སདྡྷམྨཾ བྷབྦོ ནིཡཱམཾ ཨོཀྐམིཏུཾ ཀུསལེསུ དྷམྨེསུ སམྨཏྟཾ. ཀཏམེཧི པཉྩཧི? ཀཐཾ ན པརིབྷོཏི, ཀཐིཏཾ ན པརིབྷོཏི, ན ཨཏྟཱནཾ པརིབྷོཏི, ཨཝིཀྑིཏྟཙིཏྟོ དྷམྨཾ སུཎཱཏི ཨེཀགྒཙིཏྟོ, ཡོནིསོ ཙ མནསིཀརོཏི. ཨིམེཧི ཁོ, བྷིཀྑཝེ, པཉྩཧི དྷམྨེཧི སམནྣཱགཏོ སུཎནྟོ སདྡྷམྨཾ བྷབྦོ ནིཡཱམཾ ཨོཀྐམིཏུཾ ཀུསལེསུ དྷམྨེསུ སམྨཏྟ’’ནྟི (ཨ. ནི. ༥.༡༥༡). ཏེནེཝཱཧ – ‘‘སཱདྷུཀཾ སཝནམནསིཀཱརཱཡཏྟཱ ཧི སཱསནསམྤཏྟཱི’’ཏི.

པུབྦེ ¶ སབྦཔརིསཱསཱདྷཱརཎཏྟེཔི བྷགཝཏོ དྷམྨདེསནཱཡ ‘‘ཛེཊྛསེཊྛཱ’’ཏིཨཱདིནཱ བྷིཀྑཱུནཾ ཨེཝ ཨཱམནྟནེ ཀཱརཎཾ དསྶེཏྭཱ ཨིདཱནི བྷིཀྑཱུ ¶ ཨཱམནྟེཏྭཱཝ དྷམྨདེསནཱཡ པཡོཛནཾ དསྶེཏུཾ ‘‘ཀིམཏྠཾ པན བྷགཝཱ’’ཏི ཙོདནཾ སམུཊྛཱཔེཏི. ཏཏྠ ཨཉྙཾ ཙིནྟེནྟཱཏི ཨཉྙཝིཧིཏཱ. ཝིཀྑིཏྟཙིཏྟཱཏི ཨསམཱཧིཏཙིཏྟཱ. དྷམྨཾ པཙྩཝེཀྑནྟཱཏི ཧིཡྻོ ཏཏོ པརཾ དིཝསེསུ ཝཱ སུཏདྷམྨཾ པཏི པཏི མནསཱ ཨཝེཀྑནྟཱ. བྷིཀྑཱུ ཨཱམནྟེཏྭཱ དྷམྨེ དེསིཡམཱནེ ཨཱདིཏོ པཊྛཱཡ དེསནཾ སལླཀྑེཏུཾ སཀྐོནྟཱིཏི ཨིམམཏྠཾ བྱཏིརེཀམུཁེན དསྶེཏུཾ ‘‘ཏེ ཨནཱམནྟེཏྭཱ’’ཏིཨཱདི ཝུཏྟཾ.

བྷིཀྑཝོཏི ཙེཏྠ སནྡྷིཝསེན ཨི-ཀཱརལོཔོ དཊྛབྦོ. བྷིཀྑཝོ ཨིཏཱིཏི ཨཡཾ ཨིཏི-སདྡོ ཧེཏུཔརིསམཱཔནཱདིཨཏྠཔདཏྠཝིཔརིཡཱཡཔཀཱརཱཝདྷཱརཎནིདསྶནཱདིཨནེཀཏྠཔྤབྷེདོ. ཏཐཱ ཧེས ‘‘རུཔྤཏཱིཏི ཁོ, བྷིཀྑཝེ, ཏསྨཱ རཱུཔནྟི ཝུཙྩཏཱི’’ཏིཨཱདཱིསུ (སཾ. ནི. ༣.༧༩) ཧེཏྭཏྠེ དིསྶཏི. ‘‘ཏསྨཱཏིཧ མེ, བྷིཀྑཝེ, དྷམྨདཱཡཱདཱ བྷཝཐ, མཱ ཨཱམིསདཱཡཱདཱ. ཨཏྠི མེ ཏུམྷེསུ ཨནུཀམྤཱ. ཀིནྟི མེ སཱཝཀཱ དྷམྨདཱཡཱདཱ བྷཝེཡྻུཾ, ནོ ཨཱམིསདཱཡཱདཱ’’ཏིཨཱདཱིསུ (མ. ནི. ༡.༡༩) པརིསམཱཔནེ. ‘‘ཨིཏི ཝཱ ཨིཏི ཨེཝརཱུཔཱ ནཙྩགཱིཏཝཱདིཏཝིསཱུཀདསྶནཱ པཊིཝིརཏོ’’ཏིཨཱདཱིསུ (དཱི. ནི. ༡.༡༣) ཨཱདིཨཏྠེ. ‘‘མཱགཎྜིཡོཏི ཏསྶ བྲཱཧྨཎསྶ སངྑཱ སམཉྙཱ པཉྙཏྟི ཝོཧཱརོ ནཱམཾ ནཱམཀམྨཾ ནཱམདྷེཡྻཾ ནིརུཏྟི བྱཉྫནམབྷིལཱཔོ’’ཏིཨཱདཱིསུ (མཧཱནི. ༧༣, ༧༥) པདཏྠཝིཔརིཡཱཡེ. ‘‘ཨིཏི ཁོ, བྷིཀྑཝེ, སཔྤཊིབྷཡོ བཱལོ, ཨཔྤཊིབྷཡོ པཎྜིཏོ, སཨུཔདྡཝོ བཱལོ, ཨནུཔདྡཝོ པཎྜིཏོ, སཨུཔསགྒོ བཱལོ, ཨནུཔསགྒོ པཎྜིཏོ’’ཏིཨཱདཱིསུ (མ. ནི. ༣.༡༢༤) པཀཱརེ. ‘‘ཨཏྠི ཨིདཔྤཙྩཡཱ ཛརཱམརཎནྟི པུཊྛེན སཏཱ, ‘ཨཱནནྡ, ཨཏྠཱི’ཏིསྶ ཝཙནཱིཡཾ. ‘ཀིཾ པཙྩཡཱ ཛརཱམརཎ’ནྟི ཨིཏི ཙེ ཝདེཡྻ. ཛཱཏིཔཙྩཡཱ ཛརཱམརཎཾ ཨིཙྩསྶ ཝཙནཱིཡ’’ནྟིཨཱདཱིསུ (དཱི. ནི. ༢.༩༦) ཨཝདྷཱརཎེ. ‘‘ཨཏྠཱིཏི ཁོ, ཀཙྩཱན, ཨཡམེཀོ ཨནྟོ, ནཏྠཱིཏི ཁོ, ཀཙྩཱན, ཨཡཾ དུཏིཡོ ཨནྟོ’’ཏིཨཱདཱིསུ (སཾ. ནི. ༢.༡༥; སཾ. ནི. ༣.༩༠) ནིདསྶནེ. ཨིདྷཱཔི ནིདསྶནེ ཨེཝ དཊྛབྦོ. བྷིཀྑཝོཏི ཧི ཨཱམནྟནཱཀཱརོ. ཏམེས ཨིཏི-སདྡོ ནིདསྶེཏི ‘‘བྷིཀྑཝོཏི ཨཱམནྟེསཱི’’ཏི. ཨིམིནཱ ནཡེན ‘‘བྷདྡནྟེ’’ཏིཨཱདཱིསུཔི ཡཐཱརཧཾ ཨིཏི-སདྡསྶ ཨཏྠོ ཝེདིཏབྦོ. པུབྦེ ‘‘བྷགཝཱ ཨཱམནྟེསཱི’’ཏི ཝུཏྟཏྟཱ ‘‘བྷགཝཏོ པཙྩསྶོསུ’’ནྟི ¶ ཨིདྷ ‘‘བྷགཝཏོ’’ཏི སཱམིཝཙནཾ ཨཱམནྟནམེཝ སམྦནྡྷིཨནྟརཾ ཨཔེཀྑཏཱིཏི ཨིམིནཱ ཨདྷིཔྤཱཡེན ‘‘བྷགཝཏོ ཨཱམནྟནཾ པཊིཨསྶོསུ’’ནྟི ཝུཏྟཾ. ‘‘བྷགཝཏོ’’ཏི པན ཨིདཾ པཊིསྶཝསམྦནྡྷེན སམྤདཱནཝཙནཾ ཡཐཱ ‘‘དེཝདཏྟཱཡ པཊིསྶུཎོཏཱི’’ཏི. ཡཾ ནིདཱནཾ བྷཱསིཏནྟི སམྦནྡྷོ. ཨིམསྶ སུཏྟསྶ སུཁཱཝགཱཧཎཏྠནྟི ཀམལཀུཝལཡུཛྫལཝིམལསཱདུརསསལིལཱཡ པོཀྑརཎིཡཱ ¶ སུཁཱཝཏརཎཏྠཾ ནིམྨལསིལཱཏལརཙནཱཝིལཱསསོབྷིཏརཏནསོཔཱནཾ ཝིཔྤཀིཎྞམུཏྟཱཏལསདིསཝཱལུཀཱཙུཎྞཔཎྜརབྷཱུམིབྷཱགཾ ཏིཏྠཾ ཝིཡ སུཝིབྷཏྟབྷིཏྟིཝིཙིཏྲཝེདིཀཱཔརིཀྑིཏྟསྶ ནཀྑཏྟཔཐཾ ཕུསིཏུཀཱམཏཱཡ ཝིཡ པཊིཝིཛམྦྷིཏསམུསྶཡསྶ པཱསཱདཝརསྶ སུཁཱརོཧནཏྠཾ དནྟམཡསཎྷམུདུཕལཀཉྩནལཏཱཝིནདྡྷམཎིགཎཔྤབྷཱསམུདཡུཛྫལསོབྷཾ སོཔཱནཾ ཝིཡ སུཝཎྞཝལཡནཱུཔུརཱདིསངྒྷཊྚནསདྡསམྨིསྶིཏསྶ ཀཐིཏཧསིཏམདྷུརསྶརགེཧཛནཝིཛམྦྷིཏཝིཙརིཏསྶ ཨུལཱ༹རཨིསྶརིཡཝིབྷཝསོབྷིཏསྶ མཧཱགྷརསྶ སུཁཔྤཝེསནཏྠཾ སུཝཎྞརཛཏམཎིམུཏྟཱཔཝཱལཱ༹དིཛུཏིཝིསྶརཝིཛྫོཏིཏསུཔྤཏིཊྛིཏཝིསཱལདྭཱརབཱཧཾ མཧཱདྭཱརཾ ཝིཡ ཙ ཨཏྠབྱཉྫནསམྤནྣསྶ བུདྡྷཱནཾ དེསནཱཉཱཎགམྦྷཱིརབྷཱཝསཾསཱུཙཀསྶ ཨིམསྶ སུཏྟསྶ སུཁཱཝགཱཧཏྠཾ.

ཨེཏྠཱཧ – ‘‘ཀིམཏྠཾ པན དྷམྨཝིནཡསངྒཧེ ཀཡིརམཱནེ ནིདཱནཝཙནཾ, ནནུ བྷགཝཏཱ བྷཱསིཏཝཙནསྶེཝ སངྒཧོ ཀཱཏབྦོ’’ཏི? ཝུཙྩཏེ, དེསནཱཡ ཋིཏིཨསམྨོསསདྡྷེཡྻབྷཱཝསམྤཱདནཏྠཾ. ཀཱལདེསདེསཀནིམིཏྟཔརིསཱཔདེསེཧི ཨུཔནིབནྡྷིཏྭཱ ཋཔིཏཱ ཧི དེསནཱ ཙིརཊྛིཏིཀཱ ཧོཏི ཨསམྨོསདྷམྨཱ སདྡྷེཡྻཱ ཙ. དེསཀཱལཀཏྟུཧེཏུནིམིཏྟེཧི ཨུཔནིབདྡྷོ ཝིཡ ཝོཧཱརཝིནིཙྪཡོ. ཏེནེཝ ཙ ཨཱཡསྨཏཱ མཧཱཀསྶཔེན ‘‘ཙིཏྟཔརིཡཱདཱནསུཏྟཾ, ཨཱཝུསོ ཨཱནནྡ, ཀཏྠ བྷཱསིཏ’’ནྟིཨཱདིནཱ དེསཱདིཔུཙྪཱསུ ཀཏཱསུ ཏཱསཾ ཝིསྶཛྫནཾ ཀརོནྟེན དྷམྨབྷཎྜཱགཱརིཀེན ‘‘ཨེཝཾ མེ སུཏ’’ནྟིཨཱདིནཱ ཨིམསྶ སུཏྟསྶ ནིདཱནཾ བྷཱསིཏཾ. ཨཔིཙ སཏྠུསམྤཏྟིཔྤཀཱསནཏྠཾ ནིདཱནཝཙནཾ. ཏཐཱགཏསྶ ཧི བྷགཝཏོ པུབྦཙརཎཱནུམཱནཱགམཏཀྐཱབྷཱཝཏོ སམྨཱསམྦུདྡྷབྷཱཝསིདྡྷི. ན ཧི སམྨཱསམྦུསྶ པུབྦཙརཎཱདཱིཧི ཨཏྠོ ཨཏྠི སབྦཏྠ ཨཔྤཊིཧཏཉཱཎཙཱརཏཱཡ ཨེཀཔྤམཱཎཏྟཱ ཙ ཉེཡྻདྷམྨེསུ. ཏཐཱ ཨཱཙརིཡམུཊྛིདྷམྨམཙྪརིཡསཱསནསཱཝཀཱནཱནུརཱགཱབྷཱཝཏོ ཁཱིཎཱསཝབྷཱཝསིདྡྷི. ན ཧི སབྦསོ ཁཱིཎཱསཝསྶ ཏེ སམྦྷཝནྟཱིཏི སུཝིསུདྡྷསྶ པརཱནུགྒཧཔྤཝཏྟི. ཨེཝཾ ¶ དེསཀསཾཀིལེསབྷཱུཏཱནཾ དིཊྛིསཱིལསམྤདཱདཱུསཀཱནཾ ཨཝིཛྫཱཏཎྷཱནཾ ཨཙྩནྟཱབྷཱཝསཾསཱུཙཀེཧི ཉཱཎཔྤཧཱནསམྤདཱབྷིབྱཉྫནཀེཧི ཙ སམྦུདྡྷཝིསུདྡྷབྷཱཝེཧི པུརིམཝེསཱརཛྫདྭཡསིདྡྷི, ཏཏོ ཙ ཨནྟརཱཡིཀནིཡྻཱནིཀདྷམྨེསུ སམྨོཧཱབྷཱཝསིདྡྷིཏོ པཙྪིམཝེསཱརཛྫདྭཡསིདྡྷཱིཏི བྷགཝཏོ ཙཏུཝེསཱརཛྫསམནྣཱགམོ ཨཏྟཧིཏཔརཧིཏཔྤཊིཔཏྟི ཙ ནིདཱནཝཙནེན པཀཱསིཏཱ ཧོཏི. ཏཏྠ ཏཏྠ སམྤཏྟཔརིསཱཡ ཨཛ྄ཛྷཱསཡཱནུརཱུཔཾ ཋཱནུཔྤཏྟིཀཔྤཊིབྷཱནེན དྷམྨདེསནཱདཱིཔནཏོ, ཨིདྷ པན རཱུཔགརུཀཱནཾ པུགྒལཱནཾ ཨཛ྄ཛྷཱསཡཱནུརཱུཔཾ ཋཱནུཔྤཏྟིཀཔྤཊིབྷཱནེན དྷམྨདེསནཱདཱིཔནཏོཏི ཡོཛེཏབྦཾ. ཏེན ཝུཏྟཾ – ‘‘སཏྠུསམྤཏྟིཔྤཀཱསནཏྠཾ ནིདཱནཝཙན’’ནྟི.

ཏཐཱ སཱསནསམྤཏྟིཔྤཀཱསནཏྠཾ ནིདཱནཝཙནཾ. ཉཱཎཀརུཎཱཔརིགྒཧིཏསབྦཀིརིཡསྶ ཧི བྷགཝཏོ ¶ ནཏྠི ནིརཏྠཀཱ པཊིཔཏྟི, ཨཏྟཧིཏཏྠཱ ཝཱ. ཏསྨཱ པརེསཾ ཨེཝ ཨཏྠཱཡ པཝཏྟསབྦཀིརིཡསྶ སམྨཱསམྦུདྡྷསྶ སཀལམྤི ཀཱཡཝཙཱིམནོཀམྨཾ ཡཐཱཔཝཏྟཾ ཝུཙྩམཱནཾ དིཊྛདྷམྨིཀསམྤརཱཡིཀཔརམཏྠེཧི ཡཐཱརཧཾ སཏྟཱནཾ ཨནུསཱསནཊྛེན སཱསནཾ, ན ཀཔྤརཙནཱ. ཏཡིདཾ སཏྠུཙརིཏཾ ཀཱལདེསདེསཀཔརིསཱཔདེསེཧི སདྡྷིཾ ཏཏྠ ཏཏྠ ནིདཱནཝཙནེཧི ཡཐཱརཧཾ པཀཱསཱིཡཏི. ‘‘ཨིདྷ པན རཱུཔགརུཀཱནཾ པུགྒལཱན’’ནྟིཨཱདི སབྦཾ པུརིམསདིསམེཝ. ཏེན ཝུཏྟཾ – ‘‘སཱསནསམྤཏྟིཔྤཀཱསནཏྠཾ ནིདཱནཝཙན’’ནྟི. ཨཔིཙ སཏྠུནོ པམཱཎབྷཱཝཔྤཀཱསནེན ཝཙནེན སཱསནསྶ པམཱཎབྷཱཝདསྶནཏྠཾ ནིདཱནཝཙནཾ, ཏཉྩ དེསཀཔྤམཱཎབྷཱཝདསྶནཾ ཧེཊྛཱ ཝུཏྟནཡཱནུསཱརེན ‘‘བྷགཝཱ’’ཏི ཙ ཨིམིནཱ པདེན ཝིབྷཱཝིཏནྟི ཝེདིཏབྦཾ. བྷགཝཱཏི ཧི ཏཐཱགཏསྶ རཱགདོསམོཧཱདིསབྦཀིལེསམལདུཙྩརིཏདོསཔྤཧཱནདཱིཔནེན ཝཙནེན ཨནཉྙསཱདྷཱརཎསུཔརིསུདྡྷཉཱཎཀརུཎཱདིགུཎཝིསེསཡོགཔརིདཱིཔནེན ཏཏོ ཨེཝ སབྦསཏྟུཏྟམབྷཱཝདཱིཔནེན ཨཡམཏྠོ སབྦཐཱ པཀཱསིཏོ ཧོཏཱིཏི. ཨིདམེཏྠ ནིདཱནཝཙནཔྤཡོཛནསྶ མུཁམཏྟནིདསྶནཾ.

ནིཀྑིཏྟསྶཱཏི དེསིཏསྶ. དེསནཱ ཧི དེསེཏབྦསྶ སཱིལཱདིཨཏྠསྶ ཝེནེཡྻསནྟཱནེསུ ནིཀྑིཔནཏོ ‘‘ནིཀྑེཔོ’’ཏི ཝུཙྩཏི. སུཏྟནིཀྑེཔཾ ཝིཙཱརེཏྭཱཝ ཝུཙྩམཱནཱ པཱཀཊཱ ཧོཏཱིཏི སཱམཉྙཏོ བྷགཝཏོ དེསནཱཡ སམུཊྛཱནསྶ ཝིབྷཱགཾ དསྶེཏྭཱ ‘‘ཨེཏྠཱཡཾ དེསནཱ ཨེཝཾསམུཊྛཱནཱ’’ཏི དེསནཱཡ སམུཊྛཱནེ དསྶིཏེ སུཏྟསྶ སམྨདེཝ ནིདཱནཔརིཛཱནནེན ཝཎྞནཱཡ སུཝིཉྙེཡྻཏྟཱ ཝུཏྟཾ. ཏཏྠ ཡཐཱ ¶ ཨནེཀསཏཨནེཀསཧསྶབྷེདཱནིཔི སུཏྟནྟཱནི སཾཀིལེསབྷཱགིཡཱདིཔཊྛཱནནཡཝསེན སོལ༹སཝིདྷཏཾ ནཱཏིཝཏྟནྟི, ཨེཝཾ ཨཏྟཛ྄ཛྷཱསཡཱདིསུཏྟནིཀྑེཔཝསེན ཙཏུབྦིདྷབྷཱཝནྟི ཨཱཧ – ‘‘ཙཏྟཱརོ ཧི སུཏྟནིཀྑེཔཱ’’ཏི. ཨེཏྠ ཙ ཡཐཱ ཨཏྟཛ྄ཛྷཱསཡསྶ ཨཊྛུཔྤཏྟིཡཱ ཙ པརཛ྄ཛྷཱསཡཔུཙྪཱཧི སདྡྷིཾ སཾསགྒབྷེདོ སམྦྷཝཏི ‘‘ཨཏྟཛ྄ཛྷཱསཡོ ཙ པརཛ྄ཛྷཱསཡོ ཙ, ཨཏྟཛ྄ཛྷཱསཡོ ཙ པུཙྪཱཝསིཀོ ཙ, ཨཊྛུཔྤཏྟིཀོ ཙ པརཛ྄ཛྷཱསཡོ ཙ, ཨཊྛུཔྤཏྟིཀོ ཙ པུཙྪཱཝསིཀོ ཙཱ’’ཏི ཨཛ྄ཛྷཱསཡཔུཙྪཱནུསནྡྷིསབྦྷཱཝཏོ, ཨེཝཾ ཡདིཔི ཨཊྛུཔྤཏྟིཡཱ ཨཏྟཛ྄ཛྷཱསཡེནཔི སཾསགྒབྷེདོ སམྦྷཝཏི, ཨཏྟཛ྄ཛྷཱསཡཱདཱིཧི པན པུརཏོ ཋིཏེཧི ཨཊྛུཔྤཏྟིཡཱ སཾསགྒོ ནཏྠཱིཏི ན ཨིདྷ ནིརཝསེསོ ཝིཏྠཱརནཡོ སམྦྷཝཏཱིཏི ‘‘ཙཏྟཱརོ སུཏྟནིཀྑེཔཱ’’ཏི ཝུཏྟཾ. ཏདནྟོགདྷཏྟཱ ཝཱ སེསནིཀྑེཔཱནཾ མཱུལནིཀྑེཔཝསེན ཙཏྟཱརོཝ དསྶིཏཱ. ཡཐཱདསྶནཉྷེཏྠ ཨཡཾ སཾསགྒབྷེདོ གཧེཏབྦོཏི.

ཏཏྲཱཡཾ ཝཙནཏྠོ – ནིཀྑིཔཱིཡཏཱིཏི ནིཀྑེཔོ, སུཏྟཾ ཨེཝ ནིཀྑེཔོ སུཏྟནིཀྑེཔོ. ཨཐ ཝཱ ནིཀྑིཔནཾ ནིཀྑེཔོ, སུཏྟསྶ ནིཀྑེཔོ སུཏྟནིཀྑེཔོ, སུཏྟདེསནཱཏི ཨཏྠོ. ཨཏྟནོ ཨཛ྄ཛྷཱསཡོ ཨཏྟཛ྄ཛྷཱསཡོ, སོ ཨསྶ ཨཏྠི ཀཱརཎབྷཱུཏོཏི ཨཏྟཛ྄ཛྷཱསཡོ. ཨཏྟནོ ཨཛ྄ཛྷཱསཡོ ཨེཏསྶཱཏི ¶ ཝཱ ཨཏྟཛ྄ཛྷཱསཡོ. པརཛ྄ཛྷཱསཡེཔི ཨེསེཝ ནཡོ. པུཙྪཱཡ ཝསོ པུཙྪཱཝསོ, སོ ཨེཏསྶ ཨཏྠཱིཏི པུཙྪཱཝསིཀོ. སུཏྟདེསནཱཝཏྠུབྷཱུཏསྶ ཨཏྠསྶ ཨུཔྤཏྟི ཨཏྠུཔྤཏྟི, ཨཏྠུཔྤཏྟིཡེཝ ཨཊྛུཔྤཏྟི ཏྠ-ཀཱརསྶ ཊྛ-ཀཱརཾ ཀཏྭཱ. སཱ ཨེཏསྶ ཨཏྠཱིཏི ཨཊྛུཔྤཏྟིཀོ. ཨཐ ཝཱ ནིཀྑིཔཱིཡཏི སུཏྟཾ ཨེཏེནཱཏི སུཏྟནིཀྑེཔོ, ཨཏྟཛ྄ཛྷཱསཡཱདི ཨེཝ. ཨེཏསྨིཾ ཨཏྠཝིཀཔྤེ ཨཏྟནོ ཨཛ྄ཛྷཱསཡོ ཨཏྟཛ྄ཛྷཱསཡོ. པརེསཾ ཨཛ྄ཛྷཱསཡོ པརཛ྄ཛྷཱསཡོ. པུཙྪཱིཡཏཱིཏི པུཙྪཱ, པུཙྪིཏབྦོ ཨཏྠོ. པུཙྪཱཝསེན པཝཏྟཾ དྷམྨཔྤཊིགྒཱཧཀཱནཾ ཝཙནཾ པུཙྪཱཝསིཀཾ, ཏདེཝ ནིཀྑེཔསདྡཱཔེཀྑཱཡ པུལླིངྒཝསེན ཝུཏྟཾ – ‘‘པུཙྪཱཝསིཀོ’’ཏི. ཏཐཱ ཨཊྛུཔྤཏྟི ཨེཝ ཨཊྛུཔྤཏྟིཀོཏི ཨེཝམེཏྠ ཨཏྠོ ཝེདིཏབྦོ.

ཨཔིཙེཏྠ པརེསཾ ཨིནྡྲིཡཔརིཔཱཀཱདིཀཱརཎནིརཔེཀྑཏྟཱ ཨཏྟཛ྄ཛྷཱསཡསྶ ཝིསུཾ སུཏྟནིཀྑེཔབྷཱཝོ ཡུཏྟོ ཀེཝལཾ ཨཏྟནོ ཨཛ྄ཛྷཱསཡེནེཝ དྷམྨཏནྟིཊྛཔནཏྠཾ པཝཏྟིཏདེསནཏྟཱ. པརཛ྄ཛྷཱསཡཔུཙྪཱཝསིཀཱནཾ པན པརེསཾ ཨཛ྄ཛྷཱསཡཔུཙྪཱནཾ དེསནཱཔཝཏྟིཧེཏུབྷཱུཏཱནཾ ཨུཔྤཏྟིཡཾ པཝཏྟིཏཱནཾ ¶ ཀཐམཊྛུཔྤཏྟིཡཱ ཨནཝརོདྷོ, པུཙྪཱཝསིཀཨཊྛུཔྤཏྟིཀཱནཾ ཝཱ པརཛ྄ཛྷཱསཡཱནུརོདྷེན པཝཏྟིཏཱནཾ ཀཐཾ པརཛ྄ཛྷཱསཡེ ཨནཝརོདྷོཏི? ན ཙོདེཏབྦམེཏཾ. པརེསཉྷི ཨབྷིནཱིཧཱརཔརིཔུཙྪཱདིཝིནིམུཏྟསྶེཝ སུཏྟདེསནཱཀཱརཎུཔྤཱདསྶ ཨཊྛུཔྤཏྟིབྷཱཝེན གཧིཏཏྟཱ པརཛ྄ཛྷཱསཡཔུཙྪཱཝསིཀཱནཾ ཝིསུཾ གཧཎཾ. ཏཐཱ ཧི བྲཧྨཛཱལདྷམྨདཱཡཱདསུཏྟཱདཱིནཾ ཝཎྞཱཝཎྞཨཱམིསུཔྤཱདཱདིདེསནཱནིམིཏྟཾ ‘‘ཨཊྛུཔྤཏྟཱི’’ཏི ཝུཙྩཏི. པརེསཾ པུཙྪཾ ཝིནཱ ཨཛ྄ཛྷཱསཡཾ ཨེཝ ནིམིཏྟཾ ཀཏྭཱ དེསིཏོ པརཛ྄ཛྷཱསཡོ, པུཙྪཱཝསེན དེསིཏོ པུཙྪཱཝསིཀོཏི པཱཀཊོཡམཏྠོཏི. ཨཏྟནོ ཨཛ྄ཛྷཱསཡེནེཝ ཀཐེསཱིཏི དྷམྨཏནྟིཊྛཔནཏྠཾ ཀཐེསི. ཝིམུཏྟིཔརིཔཱཙནཱིཡཱ དྷམྨཱ སདྡྷིནྡྲིཡཱདཡོ. ཨཛ྄ཛྷཱསཡནྟི ཨདྷིམུཏྟིཾ. ཁནྟིནྟི དིཊྛིནིཛ྄ཛྷཱནཀྑནྟིཾ. མནནྟི པཉྙཏྟིཙིཏྟཾ. ཨབྷིནཱིཧཱརནྟི པཎིདྷཱནཾ. བུཛ྄ཛྷནབྷཱཝནྟི བུཛ྄ཛྷནསབྷཱཝཾ, པཊིཝིཛ྄ཛྷནཱཀཱརཾ ཝཱ. རཱུཔགརུཀཱནནྟི པཉྩསུ ཨཱརམྨཎེསུ རཱུཔཱརམྨཎགརུཀཱ རཱུཔགརུཀཱ. ཙིཏྟེན རཱུཔནིནྣཱ རཱུཔཔོཎཱ རཱུཔཔབྦྷཱརཱ རཱུཔདསྶནཔྤསུཏཱ རཱུཔེན ཨཱཀཌྜྷིཏཧདཡཱ, ཏེསཾ རཱུཔགརུཀཱནཾ.

པཊིསེདྷཏྠོཏི པཊིཀྑེཔཏྠོ. ཀསྶ པན པཊིཀྑེཔཏྠོཏི? ཀིརིཡཱཔདྷཱནཉྷི ཝཱཀྱཾ, ཏསྨཱ ‘‘ན སམནུཔསྶཱམཱི’’ཏི སམནུཔསྶནཱཀིརིཡཱཔཊིསེདྷཏྠོ. ཏེནཱཧ – ‘‘ཨིམསྶ པན པདསྶཱ’’ཏིཨཱདི. ཡོ པརོ ན ཧོཏི, སོ ཨཏྟཱཏི ལོཀསམཉྙཱམཏྟསིདྡྷཾ སཏྟསནྟཱནཾ སནྡྷཱཡ – ‘‘ཨཧ’’ནྟི སཏྠཱ ཝདཏི, ན བཱཧིརཀཔརིཀཔྤིཏཾ ཨཧཾཀཱརཝིསཡཾ ཨཧཾཀཱརསྶ བོདྷིམཱུལེཡེཝ སམུཙྪིནྣཏྟཱ. ལོཀསམཉྙཱནཏིཀྐམནྟཱ ཨེཝ ཧི བུདྡྷཱནཾ ལོཀིཡེ ཝིསཡེ དེསནཱཔཝཏྟི. བྷིཀྑཝེཏི ཨཱལཔནེ ཀཱརཎཾ ཧེཊྛཱ ཝུཏྟམེཝ. ཨཉྙནྟི ཨཔེཀྑཱསིདྡྷཏྟཱ ཨཉྙཏྠསྶ ¶ ‘‘ཨིདཱནི ཝཏྟབྦཨིཏྠིརཱུཔཏོ ཨཉྙ’’ནྟི ཨཱཧ. ཨེཀམྤི རཱུཔནྟི ཨེཀཾ ཝཎྞཱཡཏནཾ. སམཾ ཝིསམཾ སམྨཱ ཡཱཐཱཝཏོ ཨནུ ཨནུ པསྶཏཱིཏི སམནུཔསྶནཱ, ཉཱཎཾ. སཾཀིལིསྶནཝསེན ཨནུ ཨནུ པསྶཏཱིཏི སམནུཔསྶནཱ, དིཊྛི. ནོ ནིཙྩཏོཏི ཨེཏྠ ཨིཏི-སདྡོ ཨཱདིཨཏྠོ, ཨེཝམཱདིཀོཏི ཨཏྠོ. ཏེན ‘‘དུཀྑཏོ སམནུཔསྶཏཱི’’ཏི ཨེཝམཱདཱིནི སངྒཎྷཱཏི. ཨོལོཀེནྟོཔཱིཏི དེཝམནུསྶཝིམཱནཀཔྤརུཀྑམཎིཀནཀཱདིགཏཱནི རཱུཔཱནི ཨནཝསེསཾ སབྦཉྙུཏཉྙཱཎེན ཨོལོཀེནྟོཔི. སཱམཉྙཝཙནོཔི ཡཾ-སདྡོ ‘‘ཨེཀརཱུཔམྤཱི’’ཏི རཱུཔསྶ ¶ ཨདྷིགཏཏྟཱ རཱུཔཝིསཡོ ཨིཙྪིཏོཏི ‘‘ཡཾ རཱུཔ’’ནྟི ཝུཏྟཾ. ཏཐཱ པུརིསསདྡོ པརིཡཱདིཡིཏབྦཙིཏྟཔུགྒལཝིསཡོཏི རཱུཔགརུཀསྶཱཏི ཝིསེསིཏཾ. གཧཎཾ ‘‘ཁེཔན’’ནྟི ཙ ཨདྷིཔྤེཏཾ, པརིཡཱདཱནཉྩ ཨུཔྤཏྟིནིཝཱརཎནྟི ཨཱཧ – ‘‘ཙཏུབྷཱུམཀཀུསལཙིཏྟ’’ནྟི. ཏཉྷི རཱུཔཾ ཏཱདིསསྶ པརིཏྟཀུསལསྶཔི ཨུཔྤཏྟིཾ ནིཝཱརེཏི, ཀིམངྒཾ པན མཧགྒཏཱནུཏྟརཙིཏྟསྶཱཏི ལོཀུཏྟརཀུསལཙིཏྟསྶཔི ཨུཔྤཏྟིཡཱ ནིཝཱརཎཾ ཧོཏུཾ སམཏྠཾ, ལོཀིཡཀུསལུཔྤཏྟིཡཱ ནིཝཱརཀཏྟེ ཝཏྟབྦམེཝ ནཏྠཱིཏི ‘‘ཙཏུབྷཱུམཀཀུསལཙིཏྟཾ པརིཡཱདིཡིཏྭཱ’’ཏི ཝུཏྟཾ. ན ཧི ཀཱམགུཎསྶཱདཔྤསུཏསྶ པུརིསསྶ དཱནཱདིཝསེན སཝིཔྥཱརིཀཱ ཀུསལུཔྤཏྟི སམྦྷཝཏི. གཎྷིཏྭཱ ཁེཔེཏྭཱཏི ཨཏྟཱནཾ ཨསྶཱདེཏྭཱ པཝཏྟམཱནསྶ ཨཀུསལཙིཏྟསྶ པཙྩཡོ ཧོནྟཾ པཝཏྟིནིཝཱརཎེན མུཊྛིགཏཾ ཝིཡ གཧེཏྭཱ ཨནུཔྤཱདནིརོདྷེན ཁེཔེཏྭཱ ཝིཡ ཏིཊྛཏི. ཏཱཝ མཧཏི ལོཀསནྣིཝཱསེ ཏསྶ པརིཡཱདིཡཊྛཱནཾ ཨཝིཙྪེདཏོ ལབྦྷཏཱིཏི ཨཱཧ – ‘‘ཏིཊྛཏཱི’’ཏི ཡཐཱ ‘‘པབྦཏཱ ཏིཊྛནྟི, ནཛྫོ སནྡནྟཱི’’ཏི. ཏེནཱཧ – ‘‘ཨིདྷ ཨུབྷཡམྤི ཝཊྚཏཱི’’ཏིཨཱདི.

ཡཐཡིདནྟི སནྡྷིཝསེན ཨཱཀཱརསྶ རསྶཏྟཾ ཡཀཱརཱགམོ ཙཱཏི ཨཱཧ – ‘‘ཡཐཱ ཨིད’’ནྟི. ཨིཏྠིཡཱ རཱུཔནྟི ཨིཏྠིསརཱིརགཏཾ ཏཔྤཊིབདྡྷཉྩ རཱུཔཱཡཏནཾ. པརམཏྠསྶ ནིརུལ༹ྷོ, པཋམཾ སཱདྷཱརཎཏོ སདྡསཏྠལཀྑཎཱནི ཝིབྷཱཝེཏབྦཱནི, པཙྪཱ ཨསཱདྷཱརཎཏོཏི ཏཱནི པཱལི༹ཝསེན ཝིབྷཱཝེཏུཾ – ‘‘རུཔྤཏཱིཏི ཁོ…པེ… ཝེདིཏབྦ’’ནྟི ཨཱཧ. ཏཏྠ རུཔྤཏཱིཏི སཱིཏཱདིཝིརོདྷིཔཙྩཡེཧི ཝིཀཱརཾ ཨཱཔཱདཱིཡཏི, ཨཱཔཛྫཏཱིཏི ཝཱ ཨཏྠོ. ཝིཀཱརུཔྤཏྟི ཙ ཝིརོདྷིཔཙྩཡསནྣིཔཱཏེ ཝིསདིསུཔྤཏྟི ཝིབྷཱུཏཏརཱ, ཀུཏོ པནཱཡཾ ཝིསེསོཏི ཙེ? ‘‘སཱིཏེནཱ’’ཏིཨཱདིཝཙནཏོ. ཨེཝཉྩ ཀཏྭཱ ཝེདནཱདཱིསུ ཨནཝསེསརཱུཔསམཉྙཱ སཱམཉྙལཀྑཎནྟི སབྦརཱུཔདྷམྨསཱདྷཱརཎཾ རཱུཔྤནཾ. ཨིདཱནི ཨཏྠུདྡྷཱརནཡེན རཱུཔསདྡཾ སཾཝཎྞེནྟོ ‘‘ཨཡཾ པནཱ’’ཏིཨཱདིམཱཧ. རཱུཔཀྑནྡྷེ ཝཏྟཏཱིཏི ‘‘ཨོལཱ༹རིཀཾ ཝཱ སུཁུམཾ ཝཱ’’ཏིཨཱདིཝཙནཏོ (མ. ནི. ༡.༣༦༡; ༢.༡༡༣; ༣.༨༦, ༨༩; ཝིབྷ. ༢). རཱུཔཱུཔཔཏྟིཡཱཏི ཨེཏྠ རཱུཔབྷཝོ རཱུཔཾ ཨུཏྟརཔདལོཔེན. རཱུཔབྷཝཱུཔཔཏྟིཡཱཏི ཨཡཉྷེཏྠ ཨཏྠོ. ཀསིཎནིམིཏྟེཏི པཐཝཱིཀསིཎཱདིསཉྙིཏེ པཊིབྷཱགནིམིཏྟེ. རཱུཔྤཏི ཨཏྟནོ ཕལསྶ སབྷཱཝཾ ཀརོཏཱིཏི རཱུཔཾ, སབྷཱཝཧེཏཱུཏི ¶ ¶ ཨཱཧ – ‘‘སརཱུཔཱ…པེ… ཨེཏྠ པཙྩཡེ’’ཏི. ཀརཙརཎཱདིཨཝཡཝསངྒྷཱཏབྷཱཝེན རཱུཔཱིཡཏི ནིརཱུཔཱིཡཏཱིཏི རཱུཔཾ, རཱུཔཀཱཡོཏི ཨཱཧ – ‘‘ཨཱཀཱསོ…པེ… ཨེཏྠ སརཱིརེ’’ཏི.

རཱུཔཡཏི ཝཎྞཝིཀཱརཾ ཨཱཔཛྫམཱནཾ ཧདཡངྒཏབྷཱཝཾ པཀཱསེཏཱིཏི རཱུཔཾ, ཝཎྞཱཡཏནཾ. ཨཱརོཧཔརིཎཱཧཱདིབྷེདརཱུཔགཏཾ སཎྛཱནསམྤཏྟིཾ ནིསྶཱཡ པསཱདཾ ཨཱཔཛྫམཱནོ རཱུཔཔྤམཱཎོཏི ཝུཏྟོཏི ཨཱཧ – ‘‘ཨེཏྠ སཎྛཱནེ’’ཏི. པིཡརཱུཔནྟིཨཱདཱིསུ སབྷཱཝཏྠོ རཱུཔསདྡོ. ཨཱདིསདྡེན རཱུཔཛ྄ཛྷཱནཱདཱིནཾ སངྒཧོ. ‘‘རཱུཔཱི རཱུཔཱནི པསྶཏཱི’’ཏི ཨེཏྠ ཨཛ྄ཛྷཏྟཾ ཀེསཱདཱིསུ པརིཀམྨསཉྙཱཝསེན པཊིལདྡྷརཱུཔཛ྄ཛྷཱནཾ རཱུཔཾ, ཏཾ ཨསྶ ཨཏྠཱིཏི རཱུཔཱིཏི ཝུཏྟོ. ཨིཏྠིཡཱ ཙཏུསམུཊྛཱནེ ཝཎྞེཏི ཨིཏྠིསརཱིརཔརིཡཱཔནྣམེཝ རཱུཔཾ གཧིཏཾ, ཏཔྤཊིབདྡྷཝཏྠཱལངྐཱརཱདིརཱུཔམྤི པན པུརིསཙིཏྟསྶ པརིཡཱདཱཡཀཾ ཧོཏཱིཏི དསྶེཏུཾ – ‘‘ཨཔིཙཱ’’ཏིཨཱདི ཝུཏྟཾ. གནྡྷཝཎྞགྒཧཎེན ཝིལེཔནཾ ཝུཏྟཾ. ཀཱམཾ ‘‘ཨསུཀཱཡ ཨིཏྠིཡཱ པསཱདྷན’’ནྟི སལླཀྑིཏསྶ ཨཀཱཡཔྤཊིབདྡྷསྶཔི ཝཎྞོ པཊིབདྡྷཙིཏྟསྶ པུརིསསྶ ཙིཏྟཾ པརིཡཱདཱཡ ཏིཊྛེཡྻ, ཏཾ པན ན ཨེཀནྟིཀནྟི ཨེཀནྟིཀཾ དསྶེནྟོ ‘‘ཀཱཡཔྤཊིབདྡྷོ’’ཏིཨཱཧ. ཨུཔཀཔྤཏཱིཏི ཙིཏྟསྶ པརིཡཱདཱནཱཡ ཨུཔཀཔྤཏི. པུརིམསྶེཝཱཏི པུབྦེ ཝུཏྟཨཏྠསྶེཝ དལ༹ྷཱིཀརཎཏྠཾ ཝུཏྟཾ ཡཐཱ ‘‘དྭིཀྑཏྟུཾ བནྡྷཾ སུབནྡྷ’’ནྟི. ནིགམནཝསེན ཝཱ ཨེཏཾ ཝུཏྟནྟི དཊྛབྦཾ. ཨོཔམྨཝསེན ཝུཏྟནྟི ‘‘ཡཾ ཨེཝཾ པུརིསསྶ ཙིཏྟཾ པརིཡཱདཱཡ ཏིཊྛཏཱི’’ཏི སཀལམེཝིདཾ པུརིམཝཙནཾ ཨུཔམཱཝསེན ཝུཏྟཾ, ཏཏྠ པན ཨུཔམཱབྷཱུཏཾ ཨཏྠཾ དསྶེཏུཾ – ‘‘ཡཐཡིདཾ…པེ… ཨིཏྠིརཱུཔ’’ནྟི ཝུཏྟཾ. པརིཡཱདཱནེ ཨཱནུབྷཱཝོ སམྦྷཝོ པརིཡཱདཱནཱནུབྷཱཝོ, ཏསྶ དསྶནཝསེན ཝུཏྟཾ.

ཨིདཾ པན ‘‘ཨིཏྠིརཱུཔ’’ནྟིཨཱདིཝཙནཾ པརིཡཱདཱནཱནུབྷཱཝེ སཱདྷེཏབྦེ དཱིཔེཏབྦེ ཝཏྠུ ཀཱརཎཾ. ནཱགོ ནཱམ སོ རཱཛཱ, དཱིགྷདཱཋིཀཏྟཱ པན ‘‘མཧཱདཱཋིཀནཱགརཱཛཱ’’ཏི ཝུཏྟོ. ཨསཾཝརནིཡཱམེནཱཏི ཙཀྑུདྭཱརིཀེན ཨསཾཝརནཱིཧཱརེན. ནིམིཏྟཾ གཧེཏྭཱཏི རཱགུཔྤཏྟིཧེཏུབྷཱུཏཾ རཱུཔཾ སུབྷནིམིཏྟཾ གཧེཏྭཱ. ཝིསིཀཱདསྶནཾ གནྟྭཱཏི སིཝཐིཀདསྶནཾ གནྟྭཱ. ཏཏྠ ཧི ཨཱདཱིནཝཱནུཔསྶནཱ ཨིཛ྄ཛྷཏི. ཝཏྠུལོབྷེན ཀུཏོ ཏཱདིསཱཡ མརཎནྟི ཨསདྡཧནྟོ ‘‘མུཁཾ ཏུམྷཱཀཾ དྷཱུམཝཎྞ’’ནྟི ཏེ དཧརསཱམཎེརེ ཨུཔྤཎྜེནྟོ ཝདཏི.

རཏནཏྟཡེ སུཔྤསནྣཏྟཱ ཀཱཀཝཎྞཏིསྶཱདཱིཧི ཝིསེསནཏྠཉྩ སོ ཏིསྶམཧཱརཱཛཱ སདྡྷཱསདྡེན ཝིསེསེཏྭཱ ཝུཙྩཏི. དཧརསྶ ཙིཏྟཾ པརིཡཱདཱཡ ¶ ཏིཊྛཏཱིཏི ཨདྷིཀཱརཝསེན ཝུཏྟཾ. ནིཊྛིཏུདྡེསཀིཙྩོཏི གཱམེ ཨསཔྤཱཡརཱུཔདསྶནཾ ཨིམསྶ ཨནཏྠཱཡ སིཡཱཏི ཨཱཙརིཡེན ནིཝཱརིཏགཱམཔྤཝེསོ པཙྪཱ ནིཊྛིཏུདྡེསཀིཙྩོ ཧུཏྭཱ ཋིཏོ. ཏེན ཝུཏྟཾ – ‘‘ཨཏྠཀཱམཱནཾ ཝཙནཾ ཨགྒཧེཏྭཱ’’ཏི ¶ . ནིཝཏྠཝཏྠཾ སཉྫཱནིཏྭཱཏི ཨཏྟནཱ དིཊྛདིཝསེ ནིཝཏྠཝཏྠཾ ཏསྶཱ མཏདིཝསེ སིཝཐིཀདསྶནཏྠཾ གཏེན ལདྡྷཾ སཉྫཱནིཏྭཱ. ཨེཝམྤཱིཏི ཨེཝཾ མརཎསམྤཱཔནཝསེནཔི. ཨཡཾ ཏཱཝེཏྠ ཨཊྛཀཐཱཡ ཨནུཏྟཱནཏྠདཱིཔནཱ.

ནེཏྟིནཡཝཎྞནཱ

ཨིདཱནི པཀརཎནཡེན པཱལི༹ཡཱ ཨཏྠཝཎྞནཾ ཀརིསྶཱམ. སཱ པན ཨཏྠསཾཝཎྞནཱ ཡསྨཱ དེསནཱཡ སམུཊྛཱནཔྤཡོཛནབྷཱཛནེསུ པིཎྜཏྠེསུ ཙ ནིདྡྷཱརིཏེསུ སུཀརཱ ཧོཏི སུཝིཉྙེཡྻཱ ཙ, ཏསྨཱ སུཏྟདེསནཱཡ སམུཊྛཱནཱདཱིནི པཋམཾ ནིདྡྷཱརཡིསྶཱམ. ཏཏྠ སམུཊྛཱནཾ ནཱམ དེསནཱནིདཱནཾ, ཏཾ སཱདྷཱརཎམསཱདྷཱརཎནྟི དུཝིདྷཾ. ཏཏྠ སཱདྷཱརཎམྤི ཨཛ྄ཛྷཏྟིཀབཱཧིརབྷེདཏོ དུཝིདྷཾ. ཏཏྠ སཱདྷཱརཎཾ ཨཛ྄ཛྷཏྟིཀསམུཊྛཱནཾ ནཱམ ལོཀནཱཐསྶ མཧཱཀརུཎཱ. ཏཱཡ ཧི སམུསྶཱཧིཏསྶ བྷགཝཏོ ཝེནེཡྻཱནཾ དྷམྨདེསནཱཡ ཙིཏྟཾ ཨུདཔཱདི, ཡཾ སནྡྷཱཡ ཝུཏྟཾ – ‘‘སཏྟེསུ ཙ ཀཱརུཉྙཏཾ པཊིཙྩ བུདྡྷཙཀྑུནཱ ལོཀཾ ཝོལོཀེསཱི’’ཏིཨཱདི (མ. ནི. ༡.༢༨༣; མཧཱཝ. ༩; སཾ. ནི. ༡.༡༧༣). ཨེཏྠ ཙ ཧེཏཱཝཏྠཱཡཔི མཧཱཀརུཎཱཡ སངྒཧོ དཊྛབྦོ ཡཱཝདེཝ སཾསཱརམཧོགྷཏོ སདྡྷམྨདེསནཱཧཏྠདཱནེཧི སཏྟསནྟཱརཎཏྠཾ ཏདུཔྤཏྟིཏོ. ཡཐཱ ཙ མཧཱཀརུཎཱ, ཨེཝཾ སབྦཉྙུཏཉྙཱཎཾ དསབལཉཱཎཱདཡོ ཙ དེསནཱཡ ཨབྦྷནྟརསམུཊྛཱནབྷཱཝེན ཝཏྟབྦཱ. སབྦཉྷི ཉེཡྻདྷམྨཾ ཏེསཾ དེསེཏབྦཱཀཱརཾ སཏྟཱནཉྩ ཨཱསཡཱནུསཡཱདིཾ ཡཱཐཱཝཏོ ཛཱནནྟོ བྷགཝཱ ཋཱནཱཊྛཱནཱདཱིསུ ཀོསལླེན ཝེནེཡྻཛ྄ཛྷཱསཡཱནུརཱུཔཾ ཝིཙིཏྟནཡདེསནཾ པཝཏྟེསཱིཏི. བཱཧིརཾ པན སཱདྷཱརཎཾ སམུཊྛཱནཾ དསསཧསྶམཧཱབྲཧྨཔརིཝཱརསྶ སཧམྤཏིབྲཧྨུནོ ཨཛ྄ཛྷེསནཾ. ཏདཛ྄ཛྷེསནུཏྟརཀཱལཉྷི དྷམྨགམྦྷཱིརཏཱཔཙྩཝེཀྑཎཱཛནིཏཾ ཨཔྤོསྶུཀྐཏཾ པཊིཔྤསྶམྦྷེཏྭཱ དྷམྨསྶཱམཱི དྷམྨདེསནཱཡ ཨུསྶཱཧཛཱཏོ ཨཧོསི. ཨསཱདྷཱརཎམྤི ཨབྦྷནྟརབཱཧིརབྷེདཏོ དུཝིདྷམེཝ. ཏཏྠ ཨབྦྷནྟརཾ ཡཱཡ མཧཱཀརུཎཱཡ ཡེན ཙ དེསནཱཉཱཎེན ¶ ཨིདཾ སུཏྟཾ པཝཏྟིཏཾ, ཏདུབྷཡཾ ཝེདིཏབྦཾ. བཱཧིརཾ པན རཱུཔགརུཀཱནཾ པུགྒལཱནཾ ཨཛ྄ཛྷཱསཡོ. སྭཱཡམཏྠོ ཨཊྛཀཐཱཡཾ ཝུཏྟོ ཨེཝ.

པཡོཛནམྤི སཱདྷཱརཎཱསཱདྷཱརཎཏོ དུཝིདྷཾ. ཏཏྠ སཱདྷཱརཎཾ ཡཱཝ ཨནུཔཱདཱཔརིནིབྦཱནཾ ཝིམུཏྟིརསཏྟཱ བྷགཝཏོ དེསནཱཡ. ཏེནེཝཱཧ – ‘‘ཨེཏདཏྠཱ ཀཐཱ, ཨེཏདཏྠཱ མནྟནཱ’’ཏིཨཱདི. ཨསཱདྷཱརཎཾ པན ཏེསཾ རཱུཔགརུཀཱནཾ པུགྒལཱནཾ རཱུཔེ ཚནྡརཱགསྶ ཛཧཱཔནཾ, ཨུབྷཡམྤེཏཾ བཱཧིརམེཝ. སཙེ པན ཝེནེཡྻསནྟཱནགཏམྤི དེསནཱབལསིདྡྷིསངྑཱཏཾ པཡོཛནཾ ཨདྷིཔྤཱཡསམིཛ྄ཛྷནབྷཱཝཏོ ཡཐཱདྷིཔྤེཏཏྠསིདྡྷིཡཱ མཧཱཀཱརུཎིཀསྶ བྷགཝཏོཔི པཡོཛནམེཝཱཏི གཎྷེཡྻ, ཨིམིནཱ པརིཡཱཡེནསྶ ཨབྦྷནྟརཏཱཔི སིཡཱ.

ཨཔིཙ ¶ ཏེསཾ རཱུཔགརུཀཱནཾ པུགྒལཱནཾ རཱུཔསྨིཾ ཝིཛྫམཱནསྶ ཨཱདཱིནཝསྶ ཡཱཐཱཝཏོ ཨནཝབོདྷོ ཨིམིསྶཱ དེསནཱཡ སམུཊྛཱནཾ, ཏདཝབོདྷོ པཡོཛནཾ. སོ ཧི ཨིམཱཡ དེསནཱཡ བྷགཝནྟཾ པཡོཛེཏི ཏནྣིཔྥཱདནཔརཱཡཾ དེསནཱཏི ཀཏྭཱ. ཡཉྷི དེསནཱཡ སཱདྷེཏབྦཾ ཕལཾ, ཏཾ ཨཱཀངྑིཏབྦཏྟཱ དེསཀཾ དེསནཱཡ པཡོཛེཏཱིཏི པཡོཛནནྟི ཝུཙྩཏི. ཏཐཱ ཏེསཾ པུགྒལཱནཾ ཏདཉྙེསཉྩ ཝེནེཡྻཱནཾ རཱུཔམུཁེན པཉྩསུ ཨུཔཱདཱནཀྑནྡྷེསུ ཨཱདཱིནཝདསྶནཉྩེཏྠ པཡོཛནཾ. ཏཐཱ སཾསཱརཙཀྐནིཝཏྟིསདྡྷམྨཙཀྐཔྤཝཏྟིསསྶཏཱདིམིཙྪཱཝཱདནིརཱཀརཎཾ སམྨཱཝཱདཔུརེཀྑཱརོ ཨཀུསལམཱུལསམཱུཧནནཾ ཀུསལམཱུལསམཱརོཔནཾ ཨཔཱཡདྭཱརཔིདཧནཾ སགྒམགྒདྭཱརཝིཝརཎཾ པརིཡུཊྛཱནཝཱུཔསམནཾ ཨནུསཡསམུགྒྷཱཏནཾ ‘‘མུཏྟོ མོཙེསྶཱམཱི’’ཏི པུརིམཔཊིཉྙཱཝིསཾཝཱདནཾ ཏཔྤཊིཔཀྑམཱརམནོརཐཝིསཾཝཱདནཾ ཏིཏྠིཡདྷམྨནིམྨཐནཾ བུདྡྷདྷམྨཔཏིཊྛཱཔནནྟི ཨེཝམཱདཱིནིཔི པཡོཛནཱནི ཨིདྷ ཝེདིཏབྦཱནི.

ཡཐཱ ཏེ པུགྒལཱ རཱུཔགརུཀཱ, ཨེཝཾ ཏདཉྙེ ཙ སཀྐཱཡགརུཀཱ སཀྐཱཡསྨིཾ ཨལླཱིནཱ སངྑཏདྷམྨཱནཾ སམྨཱསམྦུདྡྷསྶ ཙ པཊིཔཏྟིཾ ཨཛཱནནྟཱ ཨསདྡྷམྨསྶཝནསཱདྷཱརཎཔརིཙརིཡམནསིཀཱརཔརཱ སདྡྷམྨསྶཝནདྷཱརཎཔརིཙཡཔྤཊིཝེདྷཝིམུཁཱ ཙ བྷཝཝིཔྤམོཀྑེསིནོ ཝེནེཡྻཱ ཨིམིསྶཱ དེསནཱཡ བྷཱཛནཾ.

པིཎྜཏྟཱ ¶ ཙེཏྠ རཱུཔགྒཧཎེན རཱུཔདྷཱཏུརཱུཔཱཡཏནརཱུཔཀྑནྡྷཔརིགྒཎྷནཾ རཱུཔམུཁེན ཙཏུདྷམྨཱནཾ ཝཊྚཏྟཡཝིཙྪེདནཱུཔཱཡོ ཨཱསཝོགྷཱདིཝིཝེཙནཾ ཨབྷིནནྡནནིཝཱརཎསངྒཏིཀྐམོ ཝིཝཱདམཱུལཔརིཙྩཱགོ སིཀྑཏྟཡཱནུཡོགོ པཧཱནཏྟཡདཱིཔནཱ སམཐཝིཔསྶནཱནུཊྛཱནཾ བྷཱཝནཱསཙྪིཀིརིཡཱསིདྡྷཱིཏི ཨེཝམཱདཡོ ཝེདིཏབྦཱ.

ཨིཏོ པརཾ པན སོལ༹ས ཧཱརཱ དསྶེཏབྦཱ. ཏཏྠ ‘‘རཱུཔ’’ནྟི སཧཛཱཏཱ ཏསྶ ནིསྶཡབྷཱུཏཱ ཏཔྤཊིབདྡྷཱ ཙ སབྦེ རཱུཔཱརཱུཔདྷམྨཱ ཏཎྷཱཝཛྫཱ དུཀྑསཙྩཾ. ཏཾསམུཊྛཱཔིཀཱ ཏདཱརམྨཎཱ ཙ ཏཎྷཱ སམུདཡསཙྩཾ. ཏདུབྷཡེསཾ ཨཔྤཝཏྟི ནིརོདྷསཙྩཾ. ནིརོདྷཔྤཛཱནནཱ པཊིཔདཱ མགྒསཙྩཾ. ཏཏྠ སམུདཡེན ཨསྶཱདོ, དུཀྑེན ཨཱདཱིནཝོ, མགྒནིརོདྷེཧི ནིསྶརཎཾ, རཱུཔཱརམྨཎསྶ ཨཀུསལཙིཏྟསྶ ཀུསལཙིཏྟསྶ ཙ པརིཡཱདཱནཾ ཕལཾ. ཡཉྷི དེསནཱཡ སཱདྷེཏབྦཾ པཡོཛནཾ, ཏཾ ཕལནྟི ཝུཏྟོཝཱཡམཏྠོ. ཏདཏྠཾ ཧིདཾ སུཏྟཾ བྷགཝཏཱ དེསིཏནྟི. ཡཐཱ ཏཾ ཀུསལཙིཏྟཾ ན པརིཡཱདིཡཏི, ཨེཝཾ པཊིསངྑཱནབྷཱཝནཱབལཔརིགྒཧིཏཱ ཨིནྡྲིཡེསུ གུཏྟདྭཱརཏཱ ཨུཔཱཡོ. པུརིསསྶ ཀུསལཙིཏྟཔརིཡཱདཱནེནསྶ རཱུཔསྶ ཨཉྙརཱུཔཱསཱདྷཱརཎཏཱདསྶནཱཔདེསེན ཨཏྠཀཱམེཧི ¶ ཏཏོ ཙིཏྟཾ སཱདྷུཀཾ རཀྑིཏབྦཾ. ཨཡམེཏྠ བྷགཝཏོ ཨཱཎཏྟཱིཏི ཨཡཾ དེསནཱཧཱརོ. ཨསྶཱདཱདིསནྡསྶནཝིབྷཱཝནལཀྑཎོ ཧི དེསནཱཧཱརོ. ཝུཏྟཉྷེཏཾ ནེཏྟིཔྤཀརཎེ –

‘‘ཨསྶཱདཱདཱིནཝཏཱ, ནིསྶརཎམྤི ཙ ཕལཾ ཨུཔཱཡོ ཙ;

ཨཱཎཏྟཱི ཙ བྷགཝཏོ, ཡོགཱིནཾ དེསནཱཧཱརོ’’ཏི. (ནེཏྟི. ༤ ནིདྡེསཝཱར);

དེསཱིཡཏི སཾཝཎྞཱིཡཏི ཨེཏཱཡ སུཏྟཏྠོཏི དེསནཱ, དེསནཱཡ སཧཙརཎཏོ ཝཱ དེསནཱ. ནནུ ཙ ཨཉྙེཔི ཧཱརཱ དེསནཱསངྑཱཏསྶ སུཏྟསྶ ཨཏྠསཾཝཎྞནཱཏོ དེསནཱཡ སཧཙཱརིནོ ཝཱཏི? སཙྩམེཏཾ, ཨཡཾ པན ཧཱརོ ཡེབྷུཡྻེན ཡཐཱརུཏཝསེནེཝ ཝིཉྙཱཡམཱནོ དེསནཱཡ སཧ ཙརཏཱིཏི ཝཏྟབྦཏཾ ཨརཧཏི, ན ཏཐཱཔརེ. ན ཧི ཨསྶཱདཱདཱིནཝནིསྶརཎཱདིསནྡསྶནརཧིཏཱ སུཏྟདེསནཱ ཨཏྠི. ཀིཾ པན ཏེསཾ ཨསྶཱདཱདཱིནཾ ཨནཝསེསཱནཾ ཝཙནཾ དེསནཱཧཱརོ, ཨུདཱཧུ ¶ ཨེཀཙྩཱནནྟི? ནིརཝསེསཱནཾཡེཝ. ཡསྨིཉྷི སུཏྟེ ཨསྶཱདཱདཱིནཝནིསྶརཎཱནི སརཱུཔཏོ ཨཱགཏཱནི, ཏཏྠ ཝཏྟབྦམེཝ ནཏྠི. ཡཏྠ པན ཨེཀདེསེན ཨཱགཏཱནི, ན ཙ སརཱུཔེན, ཏཏྠ ཨནཱགཏཾ ཨཏྠཝསེན ནིདྡྷཱརེཏྭཱ ཧཱརོ ཡོཛེཏབྦོ.

སཡཾ སམནྟཙཀྑུབྷཱཝཏོ ཏཾདསྶནེན སབྷཱཝཏོ ཙ ‘‘ཨཧ’’ནྟི ཝུཏྟཾ. བྷིཀྑནསཱིལཏཱདིགུཎཡོགཏོ ཨབྷིམུཁཱིཀརཎཏྠཉྩ, ‘‘བྷིཀྑཝེ’’ཏི ཝུཏྟཾ. ཨཏྟཱབྷཱཝཏོ ཨཔརཏཱདསྶནཏྠཉྩ ‘‘ཨཉྙ’’ནྟི ཝུཏྟཾ. ཨེཀསྶ ཨནུཔལབྦྷདསྶནཏྠཾ ཨནེཀབྷཱཝཔྤཊིསེདྷནཏྠཉྩ ‘‘ཨེཀརཱུཔམྤཱི’’ཏི ཝུཏྟཾ. ཏཱདིསསྶ རཱུཔསྶ ཨབྷཱཝཏོ ཨདསྶནཏོ ཙ ‘‘ན སམནུཔསྶཱམཱི’’ཏི ཝུཏྟཾ. ཏསྶ པཙྩཱམསནཏོ ཨནིཡམཏོ ཙ ‘‘ཡ’’ནྟི ཝུཏྟཾ. ཨིདཱནི ཝུཙྩམཱནཱཀཱརཔརཱམསནཏོ ཏདཉྙཱཀཱརནིསེདྷནཏོ ཙ ‘‘ཨེཝ’’ནྟི ཝུཏྟཾ. ཝིསབྷཱགིནྡྲིཡཝཏྠུཏོ སབྷཱགཝཏྠུསྨིཾ ཏདབྷཱཝཏོ ཙ ‘‘པུརིསསྶཱ’’ཏི ཝུཏྟཾ. ནིམིཏྟགྒཱཧསྶ ཝཏྠུབྷཱཝཏོ ཏཐཱ པརིཀཔྤིཏཏྟཱ ཙ ‘‘ཙིཏྟཾ པརིཡཱདཱཡ ཏིཊྛཏཱི’’ཏི ཝུཏྟཾ. ཨེཝནྟི ཝུཏྟཱཀཱརཔརཱམསནཏྠཉྩེཝ ནིདསྶནཏྠཉྩ ‘‘ཡཐཱ’’ཏི ཝུཏྟཾ. ཨཏྟནོ པཙྩཀྑབྷཱཝཏོ བྷིཀྑཱུནཾ པཙྩཀྑཀརཎཏྠཉྩ ‘‘ཨིད’’ནྟི ཝུཏྟཾ. ཨིཏྠིསནྟཱནཔརིཡཱཔནྣཏོ ཏཔྤཊིབདྡྷབྷཱཝཏོ ཙ ‘‘ཨིཏྠིརཱུཔ’’ནྟི ཝུཏྟནྟི ཨེཝཾ ཨནུཔདཝིཙཡཏོ ཝིཙཡོ ཧཱརོ. ཝིཙཱིཡནྟི ཨེཏེན, ཨེཏྠ ཝཱ པདཔཉྷཱདཡོཏི ཝིཙཡོ, ཝིཙིཏི ཨེཝ ཝཱ ཏེསནྟི ཝིཙཡོ. པདཔུཙྪཱཝིསྶཛྫནཔུབྦཱཔརཱནུགྒཧནཾ ཨསྶཱདཱདཱིནཉྩ ཝིསེསནིདྡྷཱརཎཝསེན པཝིཙཡལཀྑཎོ ཧི ཝིཙཡོ ཧཱརོ. ཝུཏྟམྤི ཙེཏཾ –

‘‘ཡཾ ¶ པུཙྪིཏཉྩ ཝིསྶཛྫིཏཉྩ, སུཏྟསྶ ཡཱ ཙ ཨནུགཱིཏི;

སུཏྟསྶ ཡོ པཝིཙཡོ, ཧཱརོ ཝིཙཡོཏི ནིདྡིཊྛོ’’ཏི. (ནེཏྟི. ༤ ནིདྡེསཝཱར);

ཨནཱདིམཏི སཾསཱརེ ཨིཏྠིཔུརིསཱནཾ ཨཉྙམཉྙརཱུཔཱབྷིརཱམཏཱཡ ‘‘ཨིཏྠིརཱུཔཾ པུརིསསྶ ཙིཏྟཾ པརིཡཱདཱཡ ཏིཊྛཏཱི’’ཏི ཡུཛྫཏཱིཏི ཨཡཾ ཡུཏྟིཧཱརོ. བྱཉྫནཏྠཱནཾ ཡུཏྟཱཡུཏྟཝིབྷཱགཝིབྷཱཝནལཀྑཎོ ཧི ཡུཏྟིཧཱརོ. ཝུཏྟམྤི ཙེཏཾ –

‘‘སབྦེསཾ ཧཱརཱནཾ, ཡཱ བྷཱུམཱི ཡོ ཙ གོཙརོ ཏེསཾ;

ཡུཏྟཱཡུཏྟིཔརིཀྑཱ, ཧཱརོ ཡུཏྟཱིཏི ནིདྡིཊྛོ’’ཏི. (ནེཏྟི. ༤ ནིདྡེསཝཱར);

ཡུཏྟཱིཏི ¶ ཙ ཨུཔཔཏྟི སཱདྷནཡུཏྟི, ཨིདྷ པན ཡུཏྟིཝིཙཱརཎཱ ཡུཏྟི ཨུཏྟརཔདལོཔེན ‘‘རཱུཔབྷཝོ རཱུཔ’’ནྟི ཡཐཱ. ཡུཏྟིསཧཙརཎཏོ ཝཱ ཡུཏྟི.

ཨིཏྠིརཱུཔཾ ཨཡོནིསོ ཨོལོཀིཡམཱནཾ ཨིནྡྲིཡེསུ ཨགུཏྟདྭཱརཏཱཡ པདཊྛཱནཾ, སཱ ཀུསལཱནཾ དྷམྨཱནཾ ཨབྷཱཝནཱཡ པདཊྛཱནཾ, སཱ སབྦསྶཔི སཾཀིལེསཔཀྑསྶ པརིཝུདྡྷིཡཱ པདཊྛཱནཾ. བྱཏིརེཀཏོ པན ཨིཏྠིརཱུཔཾ ཡོནིསོ ཨོལོཀིཡམཱནཾ སཏིཔཊྛཱནབྷཱཝནཱཡ པདཊྛཱནཾ, སཱ བོཛ྄ཛྷངྒཱནཾ བྷཱཝནཱཔཱརིཔཱུརིཡཱ པདཊྛཱནཾ, སཱ ཝིཛྫཱཝིམུཏྟཱིནཾ པཱརིཔཱུརིཡཱ པདཊྛཱནཾ, ཀུསལསྶ ཙིཏྟསྶ པརིཡཱདཱནཾ སམྨོཧཱབྷིནིཝེསསྶ པདཊྛཱནཾ, སོ སངྑཱརཱནཾ པདཊྛཱནཾ, སངྑཱརཱ ཝིཉྙཱཎསྶཱཏི སབྦཾ ཨཱཝཏྟཏི བྷཝཙཀྐཾ. བྱཏིརེཀཏོ པན ཀུསལསྶ ཙིཏྟསྶ ཨཔརིཡཱདཱནཾ ཏེསཾ ཏེསཾ ཀུསལཱནཾ དྷམྨཱནཾ ཨུཔྤཱདཱཡ པཱརིཔཱུརིཡཱ པདཊྛཱནནྟི ཨཡཾ ཏཱཝ ཨཝིསེསཏོ ནཡོ. ཝིསེསཏོ པན སཱིལསྶ ཨཔརིཡཱདཱནཾ ཨཝིཔྤཊིསཱརསྶ པདཊྛཱནཾ, ཨཝིཔྤཊིསཱརོ པཱམོཛྫསྶཱཏིཨཱདིནཱ ཡཱཝ ཨནུཔཱདཱཔརིནིབྦཱནཾ ནེཏབྦཾ. ཨཡཾ པདཊྛཱནོ ཧཱརོ. སུཏྟེ ཨཱགཏདྷམྨཱནཾ པདཊྛཱནབྷཱུཏེ དྷམྨེ ཏེསཉྩ པདཊྛཱནབྷཱུཏེཏི སམྦྷཝཏོ པདཊྛཱནབྷཱུཏདྷམྨནིདྡྷཱརཎལཀྑཎོ ཧི པདཊྛཱནོ ཧཱརོ. ཝུཏྟཉྩེཏཾ –

‘‘དྷམྨཾ དེསེཏི ཛིནོ, ཏསྶ ཙ དྷམྨསྶ ཡཾ པདཊྛཱནཾ;

ཨིཏི ཡཱཝ སབྦདྷམྨཱ, ཨེསོ ཧཱརོ པདཊྛཱནོ’’ཏི. (ནེཏྟི. ༤ ནིདྡེསཝཱར);

པདཊྛཱནནྟི ¶ ཨཱསནྣཀཱརཎཾ. ཨིདྷ པན པདཊྛཱནཝིཙཱརཎཱ པདཊྛཱནོཏིཨཱདི ཡུཏྟིཧཱརེ ཝུཏྟནཡེནེཝ ཝེདིཏབྦཾ.

ཨེཀརཱུཔནྟི ཙ རཱུཔཱཡཏནགྒཧཎེན ཚནྣམྤི བཱཧིརཱནཾ ཨཱཡཏནཱནཾ གཧཎཾ བཱཧིརཱཡཏནབྷཱཝེན ཨེཀལཀྑཎཏྟཱ. ཙིཏྟནྟི མནཱཡཏནགྒཧཎེན ཚནྣམྤི ཨཛ྄ཛྷཏྟིཀཱནཾ ཨཱཡཏནཱནཾ གཧཎཾ ཨཛ྄ཛྷཏྟིཀཱཡཏནབྷཱཝེན ཨེཀལཀྑཎཏྟཱ. ཨེཝཾ ཁནྡྷདྷཱཏཱདིཝསེནཔི ཨེཀལཀྑཎཏཱ ཝཏྟབྦཱ. ཨཡཾ ལཀྑཎོ ཧཱརོ. ལཀྑཱིཡནྟི ཨེཏེན, ཨེཏྠ ཝཱ ཨེཀལཀྑཎདྷམྨཱ ཨཝུཏྟཱཔི ཨེཀཙྩཝཙནེནཱཏི ལཀྑཎོ. སུཏྟེ ཨནཱགཏེཔི དྷམྨེ ཝུཏྟཔྤཀཱརེ ཨཱགཏེ ཝིཡ ནིདྡྷཱརེཏྭཱ ཡཱ སཾཝཎྞནཱ, སོ ལཀྑཎོ ཧཱརོ. ཝུཏྟམྤི ཙེཏཾ –

‘‘ཝུཏྟམྷི ¶ ཨེཀདྷམྨེ, ཡེ དྷམྨཱ ཨེཀལཀྑཎཱ ཀེཙི;

ཝུཏྟཱ བྷཝནྟི སབྦེ, སོ ཧཱརོ ལཀྑཎོ ནཱམཱ’’ཏི. (ནེཏྟི. ༤ ནིདྡེསཝཱར);

ནིདཱནེ ཨིམིསྶཱ དེསནཱཡ རཱུཔགརུཀཱནཾ པུགྒལཱནཾ རཱུཔསྨིཾ ཨནཱདཱིནཝདསྶིཏཱ ཝུཏྟཱ, ‘‘ཀཐཾ ནུ ཁོ ཨིམེ ཨིམཾ དེསནཾ སུཏྭཱ རཱུཔེ ཨཱདཱིནཝདསྶནམུཁེན སབྦསྨིམྤི ཁནྡྷཔཉྩཀེ སབྦསོ ཚནྡརཱགཾ པཧཱཡ སཀལཝཊྚདུཀྑཏོ མུཙྩེཡྻུཾ, པརེ ཙ ཏཏྠ པཏིཊྛཱཔེཡྻུ’’ནྟི ཨཡམེཏྠ བྷགཝཏོ ཨདྷིཔྤཱཡོ. པདནིབྦཙནཾ ནིརུཏྟཾ, ཏཾ ‘‘ཨེཝ’’ནྟིཨཱདིནིདཱནཔདཱནཾ ‘‘ནཱཧ’’ནྟིཨཱདིཔཱལི༹པདཱནཉྩ ཨཊྛཀཐཱཡཾ ཏསྶཱ ལཱིནཏྠཝཎྞནཱཡ ཙ ཝུཏྟནཡཱནུསཱརེན སུཀརཏྟཱ ན ཝིཏྠཱརཡིམྷ.

པདཔདཏྠདེསནཱདེསནཱནིཀྑེཔསུཏྟསནྡྷིཝསེན པཉྩཝིདྷཱ སནྡྷི. ཏཏྠ པདསྶ པདནྟརེན སམྦནྡྷོ པདསནྡྷི. པདཏྠསྶ པདཏྠནྟརེན སམྦནྡྷོ པདཏྠསནྡྷི, ཡོ ‘‘ཀིརིཡཱཀཱརཀསམྦནྡྷོ’’ཏི ཝུཙྩཏི. ནཱནཱནུསནྡྷིཀསྶ སུཏྟསྶ ཏཾཏཾཨནུསནྡྷཱིཧི སམྦནྡྷོ, ཨེཀཱནུསནྡྷིཀསྶ ཙ པུབྦཱཔརསམྦནྡྷོ དེསནཱསནྡྷི, ཡཱ ཨཊྛཀཐཱཡཾ ‘‘པུཙྪཱནུསནྡྷི, ཨཛ྄ཛྷཱསཡཱནུསནྡྷི, ཡཐཱནུསནྡྷཱི’’ཏི ཏིདྷཱ ཝིབྷཏྟཱ. ཨཛ྄ཛྷཱསཡོ ཙེཏྠ ཨཏྟཛ྄ཛྷཱསཡོ པརཛ྄ཛྷཱསཡོཏི དྭིདྷཱ ཝེདིཏབྦོ. དེསནཱནིཀྑེཔསནྡྷི ཙཏུནྣཾ སུཏྟནིཀྑེཔཱནཾ ཝསེན ཝེདིཏབྦཱ. སུཏྟསནྡྷི ཨིདྷ པཋམནིཀྑེཔཝསེནེཝ ཝེདིཏབྦཱ. ‘‘ཀསྨཱ པནེཏྠ ཨིདམེཝ ཙིཏྟཔརིཡཱདཱནསུཏྟཾ པཋམཾ ནིཀྑིཏྟ’’ནྟི ནཱཡམནུཡོགོ ཀཏྠཙི ན པཝཏྟཏི. ཨཔིཙ ཨིམེ སཏྟཱ ཨནཱདིམཏི སཾསཱརེ པརིབྦྷམནྟཱ ཨིཏྠིཔུརིསཱ ཨཉྙམཉྙེསཾ པཉྩཀཱམགུཎསངྑཱཏརཱུཔཱབྷིརཱམཱ, ཏཏྠ ཨིཏྠཱི པུརིསསྶ རཱུཔེ སཏྟཱ གིདྡྷཱ གདྷིཏཱ ལགྒཱ ལགྒིཏཱ ཨཱསཏྟཱ, སཱ ཙསྶཱ ཏཏྠ ཨཱསཏྟི དུབྦིཝེཙནཱིཡཱ ¶ . ཏཐཱ པུརིསོ ཨིཏྠིཡཱ རཱུཔེ, ཏཏྠ ཙ དསྶནསཾསགྒོ གརུཏརོ ཨིཏརེསཉྩ མཱུལབྷཱུཏོ. ཏེནེཝ ཧི བྷགཝཱ ‘‘ཀཐཾ ནུ ཁོ མཱཏུགཱམེ པཊིཔཛྫིཏབྦ’’ནྟི (དཱི. ནི. ༢.༢༠༣) པུཊྛོ ‘‘ཨདསྶནམེཝཱ’’ཏི ཨཝོཙ. ཏསྨཱ བྷགཝཱ པཉྩསུ ཀཱམགུཎེསུ རཱུཔེ ཚནྡརཱགཧཱཔནཏྠཾ ཨིདམེཝ སུཏྟཾ པཋམཾ དེསེསི. ནིབྦཱནཱདྷིགམཱཡ པཊིཔཏྟིཡཱ ཨཱདི རེསཱ པཊིཔཏྟཱིཏི. ཡཾ པན ཨེཀིསྶཱ དེསནཱཡ དེསནནྟརེན སཾསནྡནཾ, ཨཡམྤི དེསནཱསནྡྷི. སཱ ཨིདྷ ཨེཝཾ ཝེདིཏབྦཱ. ‘‘ནཱཧཾ, བྷིཀྑཝེ…པེ… ཏིཊྛཏཱི’’ཏི ཨཡཾ དེསནཱ. ‘‘ཡེ ཁོ, བྷིཀྑཝེ, ཙཀྑུཝིཉྙེཡྻཱ རཱུཔཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ ¶ , ཏཉྩེ བྷིཀྑུ ཨབྷིནནྡཏི ཨབྷིཝདཏི ཨཛ྄ཛྷོསཱཡ ཏིཊྛཏི, ཏསྶ ཏཾ ཨབྷིནནྡཏོ ཨབྷིཝདཏོ ཨཛ྄ཛྷོསཱཡ ཏིཊྛཏོ ཨུཔྤཛྫནྟི ཨནེཀེ པཱཔཀཱ ཨཀུསལཱ དྷམྨཱ’’ཏི (སཾ. ནི. ༤.༡༡༨) ཨིམཱཡ དེསནཱཡ སཾསནྡཏི. ཏཐཱ ‘‘རཱུཔེ མཉྙཏི, རཱུཔེསུ མཉྙཏི, རཱུཔཏོ མཉྙཏི, རཱུཔཾ ‘མེ’ཏི མཉྙཏི. རཱུཔཾ, བྷིཀྑཝེ, ཨནབྷིཛཱནཾ ཨཔརིཛཱནཾ ཨཝིརཱཛཡཾ ཨཔྤཛཧཾ ཨབྷབྦོ དུཀྑཀྑཡཱཡཱ’’ཏི (སཾ. ནི. ༤.༡༡༢) ཨེཝམཱདཱིཧི དེསནཱཧི སཾསནྡཏཱིཏི ཨཡཾ ཙཏུབྱཱུཧོ ཧཱརོ. ཝིཡཱུཧཱིཡནྟི ཝིབྷཱགེན པིཎྜཱིཡནྟི ཨེཏེན, ཨེཏྠ ཝཱཏི བྱཱུཧོ, ནིབྦཙནཱདཱིནཾ ཙཏུནྣཾ བྱཱུཧོཏི ཙཏུབྱཱུཧོ, ཙཏུནྣཾ ཝཱ བྱཱུཧོ ཨེཏྠཱཏི ཙཏུབྱཱུཧོ. ནིབྦཙནཱདྷིཔྤཱཡཱདཱིནཾ ཙཏུནྣཾ ཝིབྷཱགལཀྑཎོ ཧི ཙཏུབྱཱུཧོ ཧཱརོ. ཝུཏྟཉྷེཏཾ –

‘‘ནེརུཏྟམདྷིཔྤཱཡོ, བྱཉྫནམཐ དེསནཱནིདཱནཉྩ;

པུབྦཱཔརཱནུསནྡྷཱི, ཨེསོ ཧཱརོ ཙཏུབྱཱུཧོ’’ཏི. (ནེཏྟི. ༤ ནིདྡེསཝཱར);

‘‘ནཱཧཾ, བྷིཀྑཝེ, ཨཉྙཾ…པེ… ཨིཏྠིརཱུཔ’’ནྟི ཨེཏེན ཨཡོནིསོམནསིཀཱརོ དཱིཔིཏོ. ཡཾ ཏཏྠ ཙིཏྟཾ པརིཡཱདིཡཏི, ཏེན ཡོནིསོམནསིཀཱརོ. ཏཏྠ ཨཡོནིསོམནསིཀརོཏོ ཏཎྷཱཝིཛྫཱ པརིཝཌྜྷནྟི, ཏཱསུ ཏཎྷཱགཧཎེན ནཝ ཏཎྷཱམཱུལཀཱ དྷམྨཱ ཨཱཝཊྚནྟི, ཨཝིཛྫཱགཧཎེན ཨཝིཛྫཱམཱུལཀཾ སབྦཾ བྷཝཙཀྐཾ ཨཱཝཊྚཏི, ཡོནིསོམནསིཀཱརགྒཧཎེན ཙ ཡོནིསོམནསིཀཱརམཱུལཀཱ དྷམྨཱ ཨཱཝཊྚནྟི, ཙཏུབྦིདྷཉྩ སམྤཏྟིཙཀྐནྟི. ཨཡཾ ཨཱཝཊྚོ ཧཱརོ. ཨཱཝཊྚཡནྟི ཨེཏེན, ཨེཏྠ ཝཱ སབྷཱགཝིསབྷཱགཱ ཙ དྷམྨཱ, ཏེསཾ ཝཱ ཨཱཝཊྚནནྟི ཨཱཝཊྚོ. དེསནཱཡ གཧིཏདྷམྨཱནཾ སབྷཱགཱསབྷཱགདྷམྨཝསེན ཨཱཝཊྚནལཀྑཎོ ཧི ཨཱཝཊྚོ ཧཱརོ. ཝུཏྟམྤི ཙེཏཾ –

‘‘ཨེཀམྷི པདཊྛཱནེ, པརིཡེསཏི སེསཀཾ པདཊྛཱནཾ;

ཨཱཝཊྚཏི པཊིཔཀྑེ, ཨཱཝཊྚོ ནཱམ སོ ཧཱརོ’’ཏི. (ནེཏྟི. ༤ ནིདྡེསཝཱར);

རཱུཔཾ ¶ ཙཏུབྦིདྷཾ ཀམྨསམུཊྛཱནཾ, ཙིཏྟསམུཊྛཱནཾ, ཨུཏུསམུཊྛཱནཾ, ཨཱཧཱརསམུཊྛཱནཾ, ཏཐཱ ཨིཊྛཾ ཨིཊྛམཛ྄ཛྷཏྟཾ ཨནིཊྛཾ ཨནིཊྛམཛ྄ཛྷཏྟནྟི. ཨིདྷ པན ཨིཊྛཾ ཨདྷིཔྤེཏཾ. ཙིཏྟཾ ཀུསལཙིཏྟམེཏྠ ཝེདིཏབྦཾ. ཏཾ ཀཱམཱཝཙརཾ, རཱུཔཱཝཙརཾ, ཨརཱུཔཱཝཙརཾ, ལོཀུཏྟརནྟི ཙཏུབྦིདྷཾ. ཝེདནཱདིསམྤཡུཏྟདྷམྨབྷེདཏོ ཨནེཀཝིདྷནྟི ¶ ཨཡཾ ཝིབྷཏྟིཧཱརོ. ཝིབྷཛཱིཡནྟི ཨེཏེན, ཨེཏྠ ཝཱ སཱདྷཱརཎཱསཱདྷཱརཎཱནཾ སཾཀིལེསཝོདཱནདྷམྨཱནཾ བྷཱུམིཡོཏི ཝིབྷཏྟི. ཝིབྷཛནཾ ཝཱ ཨེཏེསཾ བྷཱུམིཡོཏི ཝིབྷཏྟི. སཾཀིལེསདྷམྨེ ཝོདཱནདྷམྨེ ཙ སཱདྷཱརཎཱསཱདྷཱརཎཏོ པདཊྛཱནཏོ བྷཱུམིཏོ ཝིབྷཛནལཀྑཎོ ཧི ཝིབྷཏྟིཧཱརོ. ཝུཏྟམྤི ཙེཏཾ –

‘‘དྷམྨཉྩ པདཊྛཱནཾ, བྷཱུམིཉྩ ཝིབྷཛྫཏེ ཨཡཾ ཧཱརོ;

སཱདྷཱརཎེ ཨསཱདྷཱརཎེ ཙ ནེཡྻོ ཝིབྷཏྟཱི’’ཏི. (ནེཏྟི. ༤ ནིདྡེསཝཱར);

ཨིཏྠིརཱུཔཾ པུརིསསྶ ཙིཏྟཾ པརིཡཱདཱཡ ཏིཊྛཏི ཨཡོནིསོ མནསིཀརོཏོ, ཡོནིསོ མནསིཀརོཏོ ན པརིཡཱདིཡཏི སུསཾཝུཏིནྡྲིཡཏྟཱ སཱིལེསུ སམཱཧིཏསྶཱཏི ཨཡཾ པརིཝཏྟོ ཧཱརོ. པཊིཔཀྑཝསེན པརིཝཏྟཱིཡནྟི ཨིམིནཱ, ཨེཏྠ ཝཱ སུཏྟེ ཝུཏྟདྷམྨཱ, པརིཝཏྟནཾ ཝཱ ཏེསནྟི པརིཝཏྟོ. ནིདྡིཊྛཱནཾ དྷམྨཱནཾ པཊིཔཀྑཏོ པརིཝཏྟནལཀྑཎོ ཧི པརིཝཏྟོ ཧཱརོ. ཝུཏྟཉྷེཏཾ –

‘‘ཀུསལཱཀུསལེ དྷམྨེ, ནིདྡིཊྛེ བྷཱཝིཏེ པཧཱིནེ ཙ;

པརིཝཏྟཏི པཊིཔཀྑེ, ཧཱརོ པརིཝཏྟནོ ནཱམཱ’’ཏི. (ནེཏྟི. ༤ ནིདྡེསཝཱར);

བྷིཀྑཝེ, སམཎཱ པབྦཛིཏཱཏི པརིཡཱཡཝཙནཾ. ཨཉྙཾ པརཾ ཀིཉྩཱིཏི པརིཡཱཡཝཙནཾ. རཱུཔཾ ཝཎྞཾ ཙཀྑུཝིཉྙེཡྻནྟི པརིཡཱཡཝཙནཾ. སམནུཔསྶཱམི ཨོལོཀེསྶཱམི ཛཱནཱམཱིཏི པརིཡཱཡཝཙནཾ. ཨེཝཾ ཨིཏྠཾ ཨིམཾ པཀཱརནྟི པརིཡཱཡཝཙནཾ. པུརིསསྶ པུགྒལསྶཱཏི པརིཡཱཡཝཙནཾ. ཙིཏྟཾ ཝིཉྙཱཎཾ མནོཏི པརིཡཱཡཝཙནཾ. པརིཡཱདཱཡ གཧེཏྭཱ ཁེཔེཏྭཱཏི པརིཡཱཡཝཙནཾ. ཏིཊྛཏི དྷརཏི ཋཱཏཱིཏི པརིཡཱཡཝཙནཾ. ཡཐཱ ཡེན པཀཱརེན ཡེནཱཀཱརེནཱཏི པརིཡཱཡཝཙནཾ. ཨིཏྠཱི ནཱརཱི མཱཏུགཱམོཏི པརིཡཱཡཝཙནནྟི ཨཡཾ ཝེཝཙནོ ཧཱརོ. ཝིཝིདྷཾ ཝཙནཾ ཨེཀསྶེཝཏྠསྶ ཝཱཙཀམེཏྠཱཏི ཝིཝཙནཾ, ཝིཝཙནམེཝ ཝེཝཙནཾ. ཝིཝིདྷཾ ཝུཙྩཏི ཨེཏེན ཨཏྠོཏི ཝཱ ཝིཝཙནཾ, ཝིཝཙནམེཝ ཝེཝཙནཾ. ཨེཀསྨིཾ ཨཏྠེ ཨནེཀཔརིཡཱཡསདྡཔྤཡོཛནལཀྑཎོ ཧི ཝེཝཙནོ ཧཱརོ. ཝུཏྟཉྷེཏཾ –

‘‘ཝེཝཙནཱནི ¶ བཧཱུནི ཏུ, སུཏྟེ ཝུཏྟཱནི ཨེཀདྷམྨསྶ;

ཡོ ཛཱནཱཏི སུཏྟཝིདཱུ, ཝེཝཙནོ ནཱམ སོ ཧཱརོ’’ཏི. (ནེཏྟི. ༤ ནིདྡེསཝཱར);

རཱུཔཾ ¶ ཀཱལ༹སཱམཱདིཝསེན ཨནེཀདྷཱ པཉྙཏྟཾ. པུརིསོ ཁཏྟིཡཱདིཝསེན ཨནེཀདྷཱ པཉྙཏྟོ. ཙིཏྟཾ པརིཏྟམཧགྒཏཱདིཝསེན ཨནེཀདྷཱ པཉྙཏྟཾ. ‘‘པརིཡཱདཱཡཱ’’ཏི ཨེཏྠ པརིཡཱདཱནཾ པརིཡཱདཱཡཀཱནཾ པཱཔདྷམྨཱནཾ ཝསེན ཝཱིཏིཀྐམཔརིཡུཊྛཱནཱདིནཱ ཙ ཨནེཀདྷཱ པཉྙཏྟཾ. ཨཡཾ པཉྙཏྟིཧཱརོ. པཀཱརེཧི, པབྷེདཏོ ཝཱ ཉཱཔཱིཡནྟི ཨིམིནཱ, ཨེཏྠ ཝཱ ཨཏྠཱཏི པཉྙཏྟི. ཨེཀེཀསྶ དྷམྨསྶ ཨནེཀཱཧི པཉྙཏྟཱིཧི པཉྙཱཔེཏབྦཱཀཱརཝིབྷཱཝནལཀྑཎོ ཧི པཉྙཏྟིཧཱརོ. ཝུཏྟཉྷེཏཾ –

‘‘ཨེཀཾ བྷགཝཱ དྷམྨཾ, པཉྙཏྟཱིཧི ཝིཝིདྷཱཧི དེསེཏི;

སོ ཨཱཀཱརོ ཉེཡྻོ, པཉྙཏྟཱི ནཱམ སོ ཧཱརོ’’ཏི. (ནེཏྟི. ༤ ནིདྡེསཝཱར);

ཝིརོདྷིཔཙྩཡསམཝཱཡེ ཝིསདིསུཔྤཏྟིརུཔྤནཝཎྞཝིཀཱརཱཔཏྟིཡཱ ཏཾསམངྒིནོ ཧདཡངྒཏབྷཱཝཔྤཀཱསནཾ རཱུཔཊྛོཏི ཨནིཙྩཏཱམུཁེན ཨོཏརཎཾ, ཨནིཙྩསྶ པན དུཀྑཏྟཱ དུཀྑཏཱམུཁེན, དུཀྑསྶ ཙ ཨནཏྟཀཏྟཱ སུཉྙཏཱམུཁེན ཨོཏརཎཾ. ཙིཏྟཾ མནོཝིཉྙཱཎདྷཱཏུ, ཏསྶཱ པརིཡཱདཱཡིཀཱ ཏཎྷཱ ཏདེཀཊྛཱ ཙ པཱཔདྷམྨཱ དྷམྨདྷཱཏཱུཏི དྷཱཏུམུཁེན ཨོཏརཎཾ. ཨེཝཾ ཁནྡྷཱཡཏནཱདིམུཁེཧིཔི ཨོཏརཎཾ ཝཏྟབྦནྟི ཨཡཾ ཨོཏརཎོ ཧཱརོ. ཨོཏཱརཱིཡནྟི ཨནུཔྤཝེསཱིཡནྟི ཨེཏེན, ཨེཏྠ ཝཱ སུཏྟཱགཏཱ དྷམྨཱ པཊིཙྩསམུཔྤཱདཱདཱིསཱུཏི ཨོཏརཎོ. པཊིཙྩསམུཔྤཱདཱདིམུཁེན སུཏྟཏྠསྶ ཨོཏརཎལཀྑཎོ ཧི ཨོཏརཎོ ཧཱརོ. ཝུཏྟཉྷེཏཾ –

‘‘ཡོ ཙ པཊིཙྩུཔྤཱདོ, ཨིནྡྲིཡཁནྡྷཱ ཙ དྷཱཏུཨཱཡཏནཱ;

ཨེཏེཧི ཨོཏརཏི ཡོ, ཨོཏརཎོ ནཱམ སོ ཧཱརོ’’ཏི. (ནེཏྟི. ༤ ནིདྡེསཝཱར);

ནཱཧཾ, བྷིཀྑཝེ…པེ… སམནུཔསྶཱམཱིཏི ཨཱརམྦྷོ. ཨེཝཾ པུརིསསྶ ཙིཏྟཾ པརིཡཱདཱཡ ཏིཊྛཏཱིཏི པདསུདྡྷི, ན པན ཨཱརམྦྷསུདྡྷི. ཡཐཡིདནྟིཨཱདི པདསུདྡྷི ཙེཝ ཨཱརམྦྷསུདྡྷི ཙཱཏི ཨཡཾ སོདྷནོ ཧཱརོ. སོདྷཱིཡནྟི སམཱདྷཱིཡནྟི ཨེཏེན, ཨེཏྠ ཝཱ སུཏྟེ པདཔདཏྠཔཉྷཱརམྦྷཱཏི སོདྷནོ. སུཏྟེ པདཔདཏྠཔཉྷཱརམྦྷཱནཾ སོདྷནལཀྑཎོ ཧི སོདྷནོ ཧཱརོ. ཝུཏྟཉྷེཏཾ –

‘‘ཝིསྶཛྫིཏམྷི ¶ པཉྷེ, གཱཐཱཡཾ པུཙྪིཏཱཡམཱརབྦྷ;

སུདྡྷཱསུདྡྷཔརིཀྑཱ, ཧཱརོ སོ སོདྷནོ ནཱམཱ’’ཏི. (ནེཏྟི. ༤ ནིདྡེསཝཱར);

ཨཉྙནྟི ¶ སཱམཉྙཏོ ཨདྷིཊྛཱནཾ ཀསྶཙི ཝིསེསསྶ ཨནཱམཊྛཏྟཱ. ཨེཀརཱུཔམྤཱིཏི ཏཾ ཨཝིཀཔྤེཏྭཱ ཝིསེསཝཙནཾ. ཡཐཡིདནྟི སཱམཉྙཏོ ཨདྷིཊྛཱནཾ ཨནིཡམཝཙནབྷཱཝཏོ. ཨིཏྠིརཱུཔནྟི ཏཾ ཨཝིཀཔྤེཏྭཱ ཝིསེསཝཙནནྟི ཨཡཾ ཨདྷིཊྛཱནོ ཧཱརོ. ཨདྷིཊྛཱིཡནྟི ཨནུཔྤཝཏྟཱིཡནྟི ཨེཏེན, ཨེཏྠ ཝཱ སཱམཉྙཝིསེསབྷཱུཏཱ དྷམྨཱ ཝིནཱ ཝིཀཔྤེནཱཏི ཨདྷིཊྛཱནོ. སུཏྟཱགཏཱནཾ དྷམྨཱནཾ ཨཝིཀཔྤནཝསེནེཝ སཱམཉྙཝིསེསནིདྡྷཱརཎལཀྑཎོ ཧི ཨདྷིཊྛཱནོ ཧཱརོ. ཝུཏྟམྤི ཙེཏཾ –

‘‘ཨེཀཏྟཏཱཡ དྷམྨཱ, ཡེཔི ཙ ཝེམཏྟཏཱཡ ནིདྡིཊྛཱ;

ཏེན ཝིཀཔྤཡིཏབྦཱ, ཨེསོ ཧཱརོ ཨདྷིཊྛཱནོ’’ཏི. (ནེཏྟི. ༤ ནིདྡེསཝཱར);

རཱུཔསྶ ཀམྨཱཝིཛྫཱདཡོ ཀམྨཙིཏྟཱདཡོ ཙ ཧེཏུ. སམནུཔསྶནཱཡ ཨཱཝཛྫནཱདཡོ. ཀུསལསྶ ཙིཏྟསྶ ཡོནིསོ མནསིཀཱརཱདཡོ. པརིཡཱདཱཡཱཏི ཨེཏྠ པརིཡཱདཱནསྶ ཨཡོནིསོམནསིཀཱརཱདཡོཏི ཨཡཾ པརིཀྑཱརོ ཧཱརོ. པརིཀརོཏི ཨབྷིསངྑརོཏི ཕལནྟི པརིཀྑཱརོ, ཧེཏུ པཙྩཡོ ཙ. པརིཀྑཱརཾ ཨཱཙིཀྑཏཱིཏི པརིཀྑཱརོ, ཧཱརོ. པརིཀྑཱརཝིསཡཏྟཱ, པརིཀྑཱརསཧཙརཎཏོ ཝཱ པརིཀྑཱརོ. སུཏྟེ ཨཱགཏདྷམྨཱནཾ པརིཀྑཱརསངྑཱཏཧེཏུཔཙྩཡེ ནིདྡྷཱརེཏྭཱ སཾཝཎྞནཱལཀྑཎོ ཧི པརིཀྑཱརོ ཧཱརོ. ཝུཏྟཉྷེཏཾ –

‘‘ཡེ དྷམྨཱ ཡཾ དྷམྨཾ, ཛནཡནྟིཔྤཙྩཡཱ པརམྤརཏོ;

ཧེཏུམཝཀཌྜྷཡིཏྭཱ, ཨེསོ ཧཱརོ པརིཀྑཱརོ’’ཏི. (ནེཏྟི. ༤ ནིདྡེསཝཱར);

པུརིསསྶ ཙིཏྟཾ པརིཡཱདཱཡ ཏིཊྛཏཱིཏི ཨེཏྠ པརིཡཱདཱཡིཀཱ ཝིསེསཏོ ཏཎྷཱཝིཛྫཱ ཝེདིཏབྦཱ ཏཱསཾ ཝསེན པརིཡཱདཱནསམྦྷཝཏོ. ཏཱསུ ཏཎྷཱཡ རཱུཔམདྷིཊྛཱནཾ, ཨཝིཛྫཱཡ ཨརཱུཔཾ. ཝིསེསཏོ ཏཎྷཱཡ སམཐོ པཊིཔཀྑོ, ཨཝིཛྫཱཡ ཝིཔསྶནཱ. སམཐསྶ ཙེཏོཝིམུཏྟི, ཕལཝིཔསྶནཱཡ པཉྙཱཝིམུཏྟི. ཏཐཱ ཧི ཏཱ རཱགཝིརཱགཱ ཨཝིཛྫཱཝིརཱགཱཏི ཝིསེསེཏྭཱ ཝུཙྩནྟཱིཏི ཨཡཾ སམཱརོཔནོ ཧཱརོ. སམཱརོཔཱིཡནྟི ཨེཏེན, ཨེཏྠ ཝཱ པདཊྛཱནཱདིམུཁེན དྷམྨཱཏི སམཱརོཔནོ. སུཏྟེ ཨཱགཏདྷམྨཱནཾ པདཊྛཱནཝེཝཙནབྷཱཝནཱཔཧཱནསམཱརོཔནཝིཙཱརཎལཀྑཎོ ཧི སམཱརོཔནོ ཧཱརོ. ཝུཏྟཉྷེཏཾ –

‘‘ཡེ ¶ ¶ དྷམྨཱ ཡཾ མཱུལཱ, ཡེ ཙེཀཏྠཱ པཀཱསིཏཱ མུནིནཱ;

ཏེ སམཱརོཔཡིཏབྦཱ, ཨེས སམཱརོཔནོ ཧཱརོ’’ཏི. (ནེཏྟི. ༤ ནིདྡེསཝཱར);

ཨེཏྟཱཝཏཱ ཙ –

‘‘དེསནཱ ཝིཙཡོ ཡུཏྟི, པདཊྛཱནོ ཙ ལཀྑཎོ;

ཙཏུབྱཱུཧོ ཙ ཨཱཝཊྚོ, ཝིབྷཏྟི པརིཝཏྟནོ.

ཝེཝཙནོ ཙ པཉྙཏྟི, ཨོཏརཎོ ཙ སོདྷནོ;

ཨདྷིཊྛཱནོ པརིཀྑཱརོ, སམཱརོཔནོ སོལ༹སོ’’ཏི. (ནེཏྟི. ༡ ཨུདྡེསཝཱར) –

ཨེཝཾ ཝུཏྟཱ སོལ༹ས ཧཱརཱ དསྶིཏཱཏི ཝེདིཏབྦཱ. ཧརཱིཡནྟི ཨེཏེཧི, ཨེཏྠ ཝཱ སུཏྟགེཡྻཱདིཝིསཡཱ ཨཉྙཱཎསཾསཡཝིཔལླཱསཱཏི ཧཱརཱ. ཧརནྟི ཝཱ སཡཾ ཏཱནི, ཧརཎམཏྟམེཝ ཝཱཏི ཧཱརཱ ཕལཱུཔཙཱརེན. ཨཐ ཝཱ ཧརཱིཡནྟི ཝོཧརཱིཡནྟི དྷམྨསཾཝཎྞཀདྷམྨཔྤཊིགྒཱཧཀེཧི དྷམྨསྶ དཱནགྒཧཎཝསེནཱཏི ཧཱརཱ. ཨཐ ཝཱ ཧཱརཱ ཝིཡཱཏི ཧཱརཱ. ཡཐཱ ཧི ཨནེཀརཏནཱཝལིསམཱུཧོ ཧཱརསངྑཱཏོ ཨཏྟནོ ཨཝཡཝབྷཱུཏརཏནསམྥསྶེཧི སམུཔཛནིཡམཱནཧིལཱདསུཁོ ཧུཏྭཱ ཏདུཔབྷོགིཛནསརཱིརསནྟཱཔཾ ནིདཱགྷཔརིལཱ༹ཧཱུཔཛནིཏཾ ཝཱུཔསམེཏི, ཨེཝམེཝ ཏེཔི ནཱནཱཝིདྷཔརམཏྠརཏནཔྤབནྡྷཱ སཾཝཎྞནཱཝིསེསཱ ཨཏྟནོ ཨཝཡཝབྷཱུཏཔརམཏྠརཏནཱདྷིགམེན སམུཔྤཱདིཡམཱནནིབྦུཏིསུཁཱ དྷམྨཔྤཊིགྒཱཧཀཛནཧདཡཔརིཏཱཔཾ ཀཱམརཱགཱདིཀིལེསཧེཏུཀཾ ཝཱུཔསམེནྟཱིཏི. ཨཐ ཝཱ ཧཱརཡནྟི ཨཉྙཱཎཱདིནཱིཧཱརཾ ཨཔགམཾ ཀརོནྟི ཨཱཙིཀྑནྟཱིཏི ཝཱ ཧཱརཱ. ཨཐ ཝཱ སོཏུཛནཙིཏྟསྶ ཧརཎཏོ རམཎཏོ ཙ ཧཱརཱ ནིརུཏྟིནཡེན ཡཐཱ ‘‘བྷཝེསུ ཝནྟགམནོ བྷགཝཱ’’ཏི (ཝིསུདྡྷི. ༡.༡༤༤; པཱརཱ. ཨཊྛ. ༡.ཝེརཉྫཀཎྜཝཎྞནཱ).

ཨིཏོ པརཾ པན ནནྡིཡཱཝཊྚཱདིཔཉྩཝིདྷནཡཱ ཝེདིཏབྦཱ – ཏཏྠ ཏཎྷཱཝིཛྫཱ སམུདཡསཙྩཾ, ཏཱསཾ ཨདྷིཊྛཱནཱདིབྷཱུཏཱ རཱུཔདྷམྨཱ དུཀྑསཙྩཾ, ཏེསཾ ཨཔྤཝཏྟི ནིརོདྷསཙྩཾ, ནིརོདྷཔྤཛཱནནཱ པཊིཔདཱ མགྒསཙྩཾ. ཏཎྷཱགཧཎེན ཙེཏྠ མཱཡཱསཱཋེཡྻམཱནཱཏིམཱནམདཔྤམཱདཔཱཔིཙྪཏཱཔཱཔམིཏྟཏཱཨཧིརིཀཨནོཏྟཔྤཱདིཝསེན ཨཀུསལཔཀྑོ ནེཏབྦོ. ཨཝིཛྫཱགཧཎེན ཝིཔརཱིཏམནསིཀཱརཀོདྷཱུཔནཱཧམཀྑཔལཱ༹སཨིསྶཱམཙྪརིཡ- སཱརམྦྷདོཝཙསྶཏཱབྷཝདིཊྛིཝིབྷཝདིཊྛིཨཱདིཝསེན ཨཀུསལཔཀྑོ ནེཏབྦོ. ཝུཏྟཝིཔརིཡཱཡཏོ ¶ ཀུསལཔཀྑོ ནེཏབྦོ. ཀཐཾ? ཨམཱཡཱཨསཱཋེཡྻཱདིཝསེན ཨཝིཔརཱིཏམནསིཀཱརཱདིཝསེན ཙ. ཏཐཱ སམཐཔཀྑིཡཱནཾ སདྡྷིནྡྲིཡཱདཱིནཾ ¶ , ཝིཔསྶནཱཔཀྑིཡཱནཾ ཨནིཙྩསཉྙཱདཱིནཉྩ ཝསེན ཝོདཱནཔཀྑོ ནེཏབྦོཏི ཨཡཾ ནནྡིཡཱཝཊྚསྶ ནཡསྶ བྷཱུམི. ཡོ ཧི ཏཎྷཱཨཝིཛྫཱཧི སཾཀིལེསཔཀྑསྶ སུཏྟཏྠསྶ སམཐཝིཔསྶནཱཧི ཝོདཱནཔཀྑསྶ ཙ ཙཏུསཙྩཡོཛནམུཁེན ནཡནལཀྑཎོ སཾཝཎྞནཱཝིསེསོ, ཨཡཾ ནནྡིཡཱཝཊྚནཡོ ནཱམ. ཝུཏྟཉྷེཏཾ –

‘‘ཏཎྷཉྩ ཨཝིཛྫམྤི ཙ, སམཐེན ཝིཔསྶནཱཡ ཡོ ནེཏི;

སཙྩེཧི ཡོཛཡིཏྭཱ, ཨཡཾ ནཡོ ནནྡིཡཱཝཊྚོ’’ཏི. (ནེཏྟི. ༤ ནིདྡེསཝཱར);

ནནྡིཡཱཝཊྚསྶ ཝིཡ ཨཱཝཊྚོ ཨེཏསྶཱཏི ནནྡིཡཱཝཊྚོ. ཡཐཱ ཧི ནནྡིཡཱཝཊྚོ ཨནྟོ ཋིཏེན པདྷཱནཱཝཡཝེན བཧིདྡྷཱ ཨཱཝཊྚཏི, ཨེཝམཡམྤི ནཡོཏི ཨཏྠོ. ཨཐ ཝཱ ནནྡིཡཱ ཏཎྷཱཡ པམོདསྶ ཝཱ ཨཱཝཊྚོ ཨེཏྠཱཏི ནནྡིཡཱཝཊྚོ.

ཧེཊྛཱ ཝུཏྟནཡེན གཧིཏེསུ ཏཎྷཱཝིཛྫཱཏཔྤཀྑིཡདྷམྨེསུ ཏཎྷཱ ལོབྷོ, ཨཝིཛྫཱ མོཧོ, ཨཝིཛྫཱཡ སམྤཡུཏྟོ ལོཧིཏེ སཏི པུབྦོ ཝིཡ ཏཎྷཱཡ སཏི སིཛ྄ཛྷམཱནོ ཨཱགྷཱཏོ དོསོ ཨིཏི ཏཱིཧི ཨཀུསལམཱུལེཧི གཧིཏེཧི, ཏཔྤཊིཔཀྑཏོ ཀུསལཙིཏྟགྒཧཎེན ཙ ཏཱིཎི ཀུསལམཱུལཱནི གཧིཏཱནི ཨེཝ ཧོནྟི. ཨིདྷཱཔི ལོབྷོ སབྦཱནི ཝཱ སཱསཝཀུསལམཱུལཱནི སམུདཡསཙྩཾ, ཏནྣིབྦཏྟཱ ཏེསཾ ཨདྷིཊྛཱནགོཙརབྷཱུཏཱ ཨུཔཱདཱནཀྑནྡྷཱ དུཀྑསཙྩནྟིཨཱདིནཱ སཙྩཡོཛནཱ ཝེདིཏབྦཱ. ཕལཾ པནེཏྠ ཝིམོཀྑཏྟཡཝསེན ནིདྡྷཱརེཏབྦཾ, ཏཱིཧི ཨཀུསལམཱུལེཧི ཏིཝིདྷདུཙྩརིཏསཾཀིལེསམལཝིསམཨཀུསལསཉྙཱཝིཏཀྐཱདིཝསེན ཨཀུསལཔཀྑོ ནེཏབྦོ, ཏཐཱ ཏཱིཧི ཀུསལམཱུལེཧི ཏིཝིདྷསུཙརིཏསམཀུསལསཉྙཱཝིཏཀྐསདྡྷམྨསམཱདྷིཝིམོཀྑམུཁཱདིཝསེན ཝོདཱནཔཀྑོ ནེཏབྦོཏི ཨཡཾ ཏིཔུཀྑལསྶ ནཡསྶ བྷཱུམི. ཡོ ཧི ཨཀུསལམཱུལེཧི སཾཀིལེསཔཀྑསྶ ཀུསལམཱུལེཧི ཝོདཱནཔཀྑསྶ སུཏྟཏྠསྶ ཙ ཙཏུསཙྩཡོཛནཱམུཁེན ནཡནལཀྑཎོ སཾཝཎྞནཱཝིསེསོ, ཨཡཾ ཏིཔུཀྑལནཡོ ནཱམ. ཏཱིཧི ཨཝཡཝེཧི ¶ ལོབྷཱདཱིཧི སཾཀིལེསཔཀྑེ, ཨལོབྷཱདཱིཧི ཙ ཝོདཱནཔཀྑེ པུཀྑལོ སོབྷནོཏི ཏིཔུཀྑལོ. ཝུཏྟཉྷེཏཾ –

‘‘ཡོ ཨཀུསལེ སམཱུལེཧི,

ནེཏི ཀུསལེ ཙ ཀུསལམཱུལེཧི;

བྷཱུཏཾ ཏཐཾ ཨཝིཏཐཾ,

ཏིཔུཀྑལཾ ཏཾ ནཡཾ ཨཱཧཱུ’’ཏི. (ནེཏྟི. ༤ ནིདྡེསཝཱར);

ཝུཏྟནཡེན ¶ གཧིཏེསུ ཏཎྷཱཝིཛྫཱཏཔྤཀྑིཡདྷམྨེསུ ཝིསེསཏོ ཏཎྷཱདིཊྛཱིནཾ ཝསེན ཨསུབྷེ ‘‘སུབྷ’’ནྟི, དུཀྑེ ‘‘སུཁ’’ནྟི ཙ ཝིཔལླཱསཱ, ཨཝིཛྫཱདིཊྛཱིནཾ ཝསེན ཨནིཙྩེ ‘‘ནིཙྩ’’ནྟི, ཨནཏྟནི ‘‘ཨཏྟཱ’’ཏི ཝིཔལླཱསཱ ཝེདིཏབྦཱ. ཏེསཾ པཊིཔཀྑཏོ ཀུསལཙིཏྟགྒཧཎེན སིདྡྷེཧི སཏིཝཱིརིཡསམཱདྷིཔཉྙིནྡྲིཡེཧི ཙཏྟཱརི སཏིཔཊྛཱནཱནི སིདྡྷཱནིཡེཝ ཧོནྟི.

ཏཏྠ ཙཏཱུཧི ཨིནྡྲིཡེཧི ཙཏྟཱརོ པུགྒལཱ ནིདྡིསིཏབྦཱ. ཀཐཾ? དུཝིདྷོ ཧི ཏཎྷཱཙརིཏོ མུདིནྡྲིཡོ ཏིཀྑིནྡྲིཡོཏི, ཏཐཱ དིཊྛིཙརིཏོ. ཏེསུ པཋམོ ཨསུབྷེ ‘‘སུབྷ’’ནྟི ཝིཔརིཡེསགྒཱཧཱི སཏིབལེན ཡཐཱབྷཱུཏཾ ཀཱཡསབྷཱཝཾ སལླཀྑེནྟོ བྷཱཝནཱབལེན ཏཾ ཝིཔལླཱསཾ སམུགྒྷཱཏེཏྭཱ སམྨཏྟནིཡཱམཾ ཨོཀྐམཏི. དུཏིཡོ ཨསུཁེ ‘‘སུཁ’’ནྟི ཝིཔརིཡེསགྒཱཧཱི ‘‘ཨུཔྤནྣཾ ཀཱམཝིཏཀྐཾ ནཱདྷིཝཱསེཏཱི’’ཏིཨཱདིནཱ (མ. ནི. ༡.༢༦; ཨ. ནི. ༤.༡༤; ༦.༥༨) ཝུཏྟེན ཝཱིརིཡསཾཝརབྷཱུཏེན ཝཱིརིཡབལེན པཊིཔཀྑཾ ཝིནོདེནྟོ བྷཱཝནཱབལེན ཏཾ ཝིཔལླཱསཾ ཝིདྷམེཏྭཱ སམྨཏྟནིཡཱམཾ ཨོཀྐམཏི. ཏཏིཡོ ཨནིཙྩེ ‘‘ནིཙྩ’’ནྟི ཝིཔལླཱསགྒཱཧཱི སམཐབལེན སམཱཧིཏཙིཏྟོ སངྑཱརཱནཾ ཁཎིཀབྷཱཝཾ སལླཀྑེནྟོ བྷཱཝནཱབལེན ཏཾ ཝིཔལླཱསཾ སམུགྒྷཱཏེཏྭཱ སམྨཏྟནིཡཱམཾ ཨོཀྐམཏི. ཙཏུཏྠོ སནྟཏིསམཱུཧཀིཙྩཱརམྨཎགྷནཝཉྩིཏཏཱཡ ཕསྶཱདིདྷམྨཔུཉྫམཏྟེ ཨནཏྟནི ‘‘ཨཏྟཱ’’ཏི མིཙྪཱབྷིནིཝེསཱི ཙཏུཀོཊིཀསུཉྙཏཱམནསིཀཱརེན ཏཾ མིཙྪཱབྷིནིཝེསཾ ཝིདྡྷཾསེནྟོ སཱམཉྙཕལཾ སཙྪིཀརོཏི. སུབྷསཉྙཱདཱིཧི ཙཏཱུཧིཔི ཝཱ ཝིཔལླཱསེཧི སམུདཡསཙྩཾ, ཏེསམདྷིཊྛཱནཱརམྨཎབྷཱུཏཱ པཉྩུཔཱདཱནཀྑནྡྷཱ དུཀྑསཙྩནྟིཨཱདིནཱ སཙྩཡོཛནཱ ཝེདིཏབྦཱ. ཕལཾ པནེཏྠ ཙཏྟཱརི སཱམཉྙཕལཱནི, ཙཏཱུཧི ཙེཏྠ ཝིཔལླཱསེཧི ཙཏུརཱསཝོགྷཡོགགནྠཨགཏིཏཎྷུཔཱདཱནསལླཝིཉྙཱཎཊྛིཏིཨཔརིཉྙཱདིཝསེན ཨཀུསལཔཀྑོ ནེཏབྦོ, ཏཐཱ ཙཏཱུཧི སཏིཔཊྛཱནེཧི ¶ ཙཏུབྦིདྷཛ྄ཛྷཱནཝིཧཱརཱདྷིཊྛཱནསུཁབྷཱགིཡདྷམྨཨཔྤམཉྙཱསམྨཔྤདྷཱནཨིདྡྷིཔཱདཱདིཝསེན ཝོདཱནཔཀྑོ ནེཏབྦོཏི ཨཡཾ སཱིཧཝིཀྐཱིལི༹ཏསྶ ནཡསྶ བྷཱུམི. ཡོ ཧི སུབྷསཉྙཱདཱིཧི ཝིཔལླཱསེཧི སཀལསྶ སཾཀིལེསཔཀྑསྶ སདྡྷིནྡྲིཡཱདཱིཧི ཙ ཝོདཱནཔཀྑསྶ ཙཏུསཙྩཡོཛནཱཝསེན ནཡནལཀྑཎོ སཾཝཎྞནཱཝིསེསོ, ཨཡཾ སཱིཧཝིཀྐཱིལི༹ཏོ ནཱམ. ཝུཏྟཉྷེཏཾ –

‘‘ཡོ ནེཏི ཝིཔལླཱསེཧི,

ཀིལེསེ ཨིནྡྲིཡེཧི སདྡྷམྨེ;

ཨེཏཾ ནཡཾ ནཡཝིདཱུ,

སཱིཧཝིཀྐཱིལི༹ཏཾ ཨཱཧཱུ’’ཏི. (ནེཏྟི. ༤ ནིདྡེསཝཱར);

ཨསནྟཱསནཛཝཔརཀྐམཱདིཝིསེསཡོགེན ¶ སཱིཧོ བྷགཝཱ, ཏསྶ ཝིཀྐཱིལི༹ཏཾ དེསནཱ ཝཙཱིཀམྨབྷཱུཏོ ཝིཧཱརོཏི ཀཏྭཱ ཝིཔལླཱསཏཔྤཊིཔཀྑཔརིདཱིཔནཏོ སཱིཧསྶ ཝིཀྐཱིལི༹ཏཾ ཨེཏྠཱཏི སཱིཧཝིཀྐཱིལི༹ཏོ, ནཡོ. བལཝིསེསཡོགདཱིཔནཏོ ཝཱ སཱིཧཝིཀྐཱིལི༹ཏསདིསཏྟཱ ནཡོ སཱིཧཝིཀྐཱིལི༹ཏོ. བལཝིསེསོ ཙེཏྠ སདྡྷཱདིབལཾ, དསབལཱནི ཨེཝ ཝཱ.

ཨིམེསཾ པན ཏིཎྞཾ ཨཏྠནཡཱནཾ སིདྡྷིཡཱ ཝོཧཱརནཡདྭཡཾ སིདྡྷམེཝ ཧོཏི. ཏཐཱ ཧི ཨཏྠནཡཏྟཡདིསཱབྷཱཝེན ཀུསལཱདིདྷམྨཱནཾ ཨཱལོཙནཾ དིསཱལོཙནཾ. ཝུཏྟཉྷེཏཾ –

‘‘ཝེཡྻཱཀརཎེསུ ཧི ཡེ,

ཀུསལཱཀུསལཱ ཏཧིཾ ཏཧིཾ ཝུཏྟཱ;

མནསཱ ཨོལོཀཡཏེ,

ཏཾ ཁུ དིསཱལོཙནཾ ཨཱཧཱུ’’ཏི. (ནེཏྟི. ༤ ནིདྡེསཝཱར);

ཏཐཱ ཨཱལོཙིཏཱནཾ ཏེསཾ དྷམྨཱནཾ ཨཏྠནཡཏྟཡཡོཛནེ སམཱནཡནཏོ ཨངྐུསོ ཝིཡ ཨངྐུསོ. ཝུཏྟཉྷེཏཾ –

‘‘ཨོལོཀེཏྭཱ དིསལོཙནེན, ཨུཀྑིཔིཡ ཡཾ སམཱནེཏི;

སབྦེ ཀུསལཱཀུསལེ, ཨཡཾ ནཡོ ཨངྐུསོ ནཱམཱ’’ཏི. (ནེཏྟི. ༤ ནིདྡེསཝཱར);

ཏསྨཱ མནསཱཝ ཨཏྠནཡཱནཾ དིསཱབྷཱུཏདྷམྨཱནཾ ལོཙནཾ དིསཱལོཙནཾ, ཏེསཾ སམཱནཡནཾ ཨངྐུསོཏི པཉྩཔི ནཡཱནི ཡུཏྟཱནི ཧོནྟི.

ཨེཏྟཱཝཏཱ ¶ ཙ –

‘‘པཋམོ ནནྡིཡཱཝཊྚོ, དུཏིཡོ ཙ ཏིཔུཀྑལོ;

སཱིཧཝིཀྐཱིལི༹ཏོ ནཱམ, ཏཏིཡོ ནཡལཉྫཀོ.

དིསཱལོཙནམཱཧཾསུ, ཙཏུཏྠཾ ནཡམུཏྟམཾ;

པཉྩམོ ཨངྐུསོ ནཱམ, སབྦེ པཉྩ ནཡཱ གཏཱ’’ཏི. (ནེཏྟི. ༡ ཨུདྡེསཝཱར) –

ཨེཝཾ ¶ ཝུཏྟཔཉྩནཡཱཔི ཨེཏྠ དསྶིཏཱཏི ཝེདིཏབྦཱ. ནཡཏི སཾཀིལེསཾ ཝོདཱནཉྩ ཝིབྷཱགཏོ ཉཱཔེཏཱིཏི ནཡོ, ལཉྫེཏི པཀཱསེཏི སུཏྟཏྠནྟི ལཉྫཀོ, ནཡོ ཙ སོ ལཉྫཀོ ཙཱཏི ནཡལཉྫཀོ. ཨིདཉྩ སུཏྟཾ སོལ༹སཝིདྷེ སུཏྟནྟཔཊྛཱནེ སཾཀིལེསབྷཱགིཡཾ བྱཏིརེཀམུཁེན ནིབྦེདྷཱསེཀྑབྷཱགིཡནྟི དཊྛབྦཾ. ཨཊྛཝཱིསཏིཝིདྷེ པན སུཏྟནྟཔཊྛཱནེ ལོཀིཡལོཀུཏྟརཾ སཏྟདྷམྨཱདྷིཊྛཱནཾ ཉཱཎཉྙེཡྻཾ དསྶནབྷཱཝནཾ སཀཝཙནཾ ཝིསྶཛྫནཱིཡཾ ཀུསལཱཀུསལཾ ཨནུཉྙཱཏཾ པཊིཀྑིཏྟཉྩཱཏི ཝེདིཏབྦཾ.

ཏཏྠ སོལ༹སཝིདྷསུཏྟནྟཾ པཊྛཱནཾ ནཱམ ‘‘སཾཀིལེསབྷཱགིཡཾ སུཏྟཾ, ཝཱསནཱབྷཱགིཡཾ སུཏྟཾ, ནིབྦེདྷབྷཱགིཡཾ སུཏྟཾ, ཨསེཀྑབྷཱགིཡཾ སུཏྟཾ, སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟཾ, སཾཀིལེསབྷཱགིཡཉྩ ནིབྦེདྷབྷཱགིཡཉྩ སུཏྟཾ, སཾཀིལེསབྷཱགིཡཉྩ ཨསེཀྑབྷཱགིཡཉྩ སུཏྟཾ, ཝཱསནཱབྷཱགིཡཉྩ ནིབྦེདྷབྷཱགིཡཉྩ སུཏྟཾ, ཝཱསནཱབྷཱགིཡཉྩ ཨསེཀྑབྷཱགིཡཉྩ སུཏྟཾ, ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟཾ, སཾཀིལེསབྷཱགིཡཉྩ ཝཱསནཱབྷཱགིཡཉྩ ནིབྦེདྷབྷཱགིཡཉྩ སུཏྟཾ, སཾཀིལེསབྷཱགིཡཉྩ ཝཱསནཱབྷཱགིཡཉྩ ཨསེཀྑབྷཱགིཡཉྩ སུཏྟཾ, སཾཀིལེསབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟཾ, ཝཱསནཱབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟཾ, སཾཀིལེསབྷཱགིཡཉྩ ཝཱསནཱབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟཾ, ནེཝ སཾཀིལེསབྷཱགིཡཾ ན ཝཱསནཱབྷཱགིཡཾ ན ནིབྦེདྷབྷཱགིཡཾ ན ཨསེཀྑབྷཱགིཡཾ སུཏྟ’’ནྟི (ནེཏྟི. ༨༩) ཨེཝཾ ཝུཏྟསོལ༹སསཱསནཔཊྛཱནཱནི.

ཏཏྠ སཾཀིལིསྶནྟི ཨེཏེནཱཏི སཾཀིལེསོ, སཾཀིལེསབྷཱགེ སཾཀིལེསཀོཊྛཱསེ པཝཏྟཾ སཾཀིལེསབྷཱགིཡཾ. ཝཱསནཱ པུཉྙབྷཱཝནཱ, ཝཱསནཱབྷཱགེ པཝཏྟཾ ཝཱསནཱབྷཱགིཡཾ, ཝཱསནཾ བྷཛཱཔེཏཱིཏི ཝཱ ཝཱསནཱབྷཱགིཡཾ. ནིབྦིཛ྄ཛྷནཾ ལོབྷཀྑནྡྷཱདཱིནཾ པདཱལནཾ ནིབྦེདྷོ, ནིབྦེདྷབྷཱགེ ¶ པཝཏྟཾ, ནིབྦེདྷཾ བྷཛཱཔེཏཱིཏི ཝཱ ནིབྦེདྷབྷཱགིཡཾ. པརིནིཊྛིཏསིཀྑཱ དྷམྨཱ ཨསེཀྑཱ, ཨསེཀྑབྷཱགེ པཝཏྟཾ, ཨསེཀྑེ བྷཛཱཔེཏཱིཏི ཝཱ ཨསེཀྑབྷཱགིཡཾ. ཏེསུ ཡཏྠ ཏཎྷཱདིསཾཀིལེསོ ཝིབྷཏྟོ, ཨིདཾ སཾཀིལེསབྷཱགིཡཾ. ཡཏྠ དཱནཱདིཔུཉྙཀིརིཡཝཏྠུ ཝིབྷཏྟཾ, ཨིདཾ ཝཱསནཱབྷཱགིཡཾ. ཡཏྠ སེཀྑཱ སཱིལཀྑནྡྷཱདཡོ ཝིབྷཏྟཱ, ཨིདཾ ནིབྦེདྷབྷཱགིཡཾ. ཡཏྠ པན ཨསེཀྑཱ སཱིལཀྑནྡྷཱདཡོ ཝིབྷཏྟཱ, ཨིདཾ ཨསེཀྑབྷཱགིཡཾ. ཨིཏརཱནི ཏེསཾ ཝོམིསྶཀནཡཝསེན ཝུཏྟཱནི. སབྦཱསཝསཾཝརཔརིཡཱཡཱདཱིནཾ ཝསེན སབྦབྷཱགིཡཾ ཝེདིཏབྦཾ. ཏཏྠ ཧི སཾཀིལེསདྷམྨཱ ལོཀིཡསུཙརིཏདྷམྨཱ སེཀྑཱ དྷམྨཱ ཨསེཀྑཱ དྷམྨཱ ཙ ཝིབྷཏྟཱ. སབྦབྷཱགིཡཾ པན ‘‘པསྶཾ ན པསྶཏཱི’’ཏིཨཱདིཀཾ ཨུདཀཱདིཨནུཝཱདཝཙནཾ ཝེདིཏབྦཾ.

ཨཊྛཝཱིསཏིཝིདྷཾ ¶ སུཏྟནྟཔཊྛཱནཾ པན ‘‘ལོཀིཡཾ, ལོཀུཏྟརཾ, ལོཀིཡཉྩ ལོཀུཏྟརཉྩ, སཏྟཱདྷིཊྛཱནཾ, དྷམྨཱདྷིཊྛཱནཾ, སཏྟཱདྷིཊྛཱནཉྩ དྷམྨཱདྷིཊྛཱནཉྩ, ཉཱཎཾ, ཉེཡྻཾ, ཉཱཎཉྩ ཉེཡྻཉྩ, དསྶནཾ, བྷཱཝནཱ, དསྶནཉྩ བྷཱཝནཱ ཙ, སཀཝཙནཾ, པརཝཙནཾ, སཀཝཙནཉྩ པརཝཙནཉྩ, ཝིསྶཛྫནཱིཡཾ, ཨཝིསྶཛྫནཱིཡཾ, ཝིསྶཛྫནཱིཡཉྩ ཨཝིསྶཛྫནཱིཡཉྩ, ཀམྨཾ, ཝིཔཱཀོ, ཀམྨཉྩ ཝིཔཱཀོ ཙ ཀུསལཾ, ཨཀུསལཾ, ཀུསལཉྩ ཨཀུསལཉྩ ཨནུཉྙཱཏཾ, པཊིཀྑིཏྟཾ, ཨནུཉྙཱཏཉྩ པཊིཀྑིཏྟཉྩ, ཐཝོ’’ཏི (ནེཏྟི. ༡༡༢) ཨེཝམཱགཏཱནི ཨཊྛཝཱིསཏི སཱསནཔཊྛཱནཱནི. ཏཏྠ ལོཀིཡནྟི ལོཀེ ནིཡུཏྟོ, ལོཀེ ཝཱ ཝིདིཏོ ལོཀིཡོ. ཨིདྷ པན ལོཀིཡོ ཨཏྠོ ཡསྨིཾ སུཏྟེ ཝུཏྟོ, ཏཾ སུཏྟཾ ལོཀིཡཾ. ཏཐཱ ལོཀུཏྟརཾ. ཡསྨིཾ པན སུཏྟེ པདེསེན ལོཀིཡཾ, པདེསེན ལོཀུཏྟརཾ ཝུཏྟཾ, ཏཾ ལོཀིཡཉྩ ལོཀུཏྟརཉྩ. སཏྟཨདྷིཔྤཱཡསཏྟཔཉྙཏྟིམུཁེན དེསིཏཾ སཏྟཱདྷིཊྛཱནཾ. དྷམྨཝསེན དེསིཏཾ དྷམྨཱདྷིཊྛཱནཾ. ཨུབྷཡཝསེན དེསིཏཾ སཏྟཱདྷིཊྛཱནཉྩ དྷམྨཱདྷིཊྛཱནཉྩ. ཨིམིནཱ ནཡེན སབྦཔདེསུ ཨཏྠོ ཝེདིཏབྦོ. བུདྡྷཱདཱིནཾ པན གུཎཱབྷིཏྠཝནཝསེན པཝཏྟཾ སུཏྟཾ ཐཝོ ནཱམ –

‘‘མགྒཱནཊྛངྒིཀོ སེཊྛོ, སཙྩཱནཾ ཙཏུརོ པདཱ;

ཝིརཱགོ སེཊྛོ དྷམྨཱནཾ, དྭིཔདཱནཉྩ ཙཀྑུམཱ’’ཏི. (དྷ. པ. ༢༧༣; ནེཏྟི. ༡༧༠; པེཊཀོ. ༣༠) ཨཱདིཀཾ ཝིཡ –

ནེཏྟིནཡཝཎྞནཱ ནིཊྛིཏཱ.

༢. སདྡགརུཀཱདཱིནནྟི ¶ ཨཱདིསདྡེན གནྡྷརསཕོཊྛབྦགརུཀེ སངྒཎྷཱཏི. ཨཱསཡཝསེནཱཏི ཨཛ྄ཛྷཱསཡཝསེན. ཨུཏུསམུཊྛཱནོཔི ཨིཏྠིསནྟཱནགཏོ སདྡོ ལབྦྷཏི, སོ ཨིདྷ ནཱདྷིཔྤེཏོཏི ‘‘ཙིཏྟསམུཊྛཱནོ’’ཏི ཝུཏྟཾ. ཀཐིཏསདྡོ ཨཱལཱཔཱདིསདྡོ. གཱིཏསདྡོ སརེན གཱཡནསདྡོ. ཨིཏྠིཡཱ ཧསནསདྡོཔེཏྠ སངྒཧེཏབྦོ ཏསྶཔི པུརིསེན ཨསྶཱདེཏབྦཏོ. ཏེནཱཧ – ‘‘ཨཔིཙ ཁོ མཱཏུགཱམསྶ སདྡཾ སུཎཱཏི ཏིརོཀུཊྚཱ ཝཱ ཏིརོཔཱཀཱརཱ ཝཱ ཧསནྟིཡཱ ཝཱ བྷཎནྟིཡཱ ཝཱ གཱཡནྟིཡཱ ཝཱ, སོ ཏདསྶཱདེཏཱི’’ཏིཨཱདི. ནིཝཏྠནིཝཱསནསྶཱཏི ཁལིཏྠདྡྷསྶ ནིཝཱསནསྶ. ཨལངྐཱརསྶཱཏི ནཱུཔུརཱདིཀསྶ ཨལངྐཱརསྶ. ཨིཏྠིསདྡོཏྭེཝ ཝེདིཏབྦོཏི ཨིཏྠིཔཊིབདྡྷབྷཱཝཏོ ཝུཏྟཾ. ཏེནཱཧ – ‘‘སབྦོཔཱི’’ཏིཨཱདི. ཨཝིདཱུརཊྛཱནེཏི ཏསྶ ཧཏྠིཀུལསྶ ཝསནཊྛཱནཏོ ཨཝིདཱུརཊྛཱནེ. ཀཱཡཱུཔཔནྣོཏི སམྤནྣཀཱཡོ ཐིརཀཐིནམཧཱཀཱཡོ. མཧཱཧཏྠཱིཏི མཧཱནུབྷཱཝོ ཧཏྠཱི. ཛེཊྛཀཾ ཀཏྭཱཏི ཡཱུཐཔཏིཾ ཀཏྭཱ.

ཀཐིནཏིཀྑབྷཱཝེན ¶ སིངྒསདིསཏྟཱ ཨལ༹སངྑཱཏཱནི སིངྒཱནི ཨེཏསྶ ཨཏྠཱིཏི སིངྒཱི, སུཝཎྞཝཎྞཏཱཡ མཧཱབལཏཱཡ ཙ སཱིཧཧཏྠིཨཱདིམིགསདིསཏྟཱ མིགོ ཝིཡཱཏི མིགོ. ཏཏྠ ཏཏྠ ཀིཙྩཾ ནེཏུབྷཱཝེན ཙཀྑུཡེཝ ནེཏྟཾ, ཏཾ ཨུགྒཏཊྛེན ཨཱཡཏཾ ཨེཏསྶཱཏི ཨཱཡཏཙཀྑུནེཏྟོ. ཨཊྛི ཨེཝ ཏཙོ ཨེཏསྶཱཏི ཨཊྛིཏྟཙོ. ཏེནཱབྷིབྷཱུཏོཏི ཏེན མིགེན ཨབྷིབྷཱུཏོ ཨཛ྄ཛྷོཏྠཊོ ནིཙྩལགྒཧིཏོ ཧུཏྭཱ. ཀརུཎཾ རུདཱམཱིཏི ཀཱརུཉྙཔཏྟོ ཧུཏྭཱ རོདཱམི ཝིརཝཱམི. པཙྩཏྠིཀབྷཡཏོ མུཏྟི ནཱམ ཡཐཱ ཏཐཱ སཧཱཡཝཏོ ཧོཏི, ན ཨེཀཱཀིནོཏི ཨཱཧ – ‘‘མཱ ཧེཝ མཾ པཱཎསམཾ ཛཧེཡྻཱ’’ཏི. ཏཏྠ མཱ ཧེཝ མནྟི མཾ ཨེཝརཱུཔཾ བྱསནཾ པཏྟཾ ཨཏྟནོ པཱཎསམཾ པིཡསཱམིཀཾ ཏྭཾ མཱཧེཝ ཛཧི.

ཀུཉྩེ གིརིཀཱུཊེ རམཏི ཨབྷིརམཏི, ཏཏྠ ཝཱ ཝིཙརཏི, ཀོཉྫནཱདཾ ནདནྟོ ཝཱ ཝིཙརཏི, ཀུ ཝཱ པཐཝཱི, ཏདབྷིགྷཱཏེན ཛཱིརཏཱིཏི ཀུཉྫརོ. སཊྛིཧཱཡནནྟི ཛཱཏིཡཱ སཊྛིཝསྶཀཱལསྨིཾ ཀུཉྫརཱ ཐཱམེན པརིཧཱཡནྟི, ཏཾ སནྡྷཱཡ ཨེཝམཱཧ. པཐབྱཱ ཙཱཏུརནྟཱཡཱཏི ཙཏཱུསུ དིསཱསུ སམུདྡཾ པཏྭཱ ཋིཏཱཡ ཙཱཏུརནྟཱཡ པཐཝིཡཱ. སུཔྤིཡོཏི སུཊྛུ པིཡོ. ཏེསཾ ཏྭཾ ཝཱརིཛོ སེཊྛོཏི ཡེ སམུདྡེ ཝཱ གངྒཱཡ ཝཱ ཡམུནཱཡ ཝཱ ནམྨདཱནདིཡཱ ཝཱ ཀུལཱི༹རཱ, ཏེསཾ སབྦེསཾ ཝཎྞསམྤཏྟིཡཱ མཧནྟཏྟེན ཙ ཝཱརིམྷི ¶ ཛཱཏཏྟཱ ཝཱརིཛོ ཏྭམེཝ སེཊྛོ པསཏྠཏརོ. མུཉྩ རོདནྟིཡཱ པཏིནྟི སབྦེསཾ སེཊྛཏྟཱ ཏམེཝ ཡཱཙཱམི, རོདམཱནཱཡ མཡ྄ཧཾ སཱམིཀཾ མུཉྩ. ཨཐཱཏི གཧཎསྶ སིཐིལཀརཎསམནནྟརམེཝ. ཨེཏསྶཱཏི པཊིསཏྟུམདྡནསྶ.

པབྦཏགཧནཾ ནིསྶཱཡཱཏི ཏིསྶོ པབྦཏརཱཛིཡོ ཨཏིཀྐམིཏྭཱ ཙཏུཏྠཱཡ པབྦཏརཱཛིཡཾ པབྦཏགཧནཾ ཨུཔནིསྶཱཡ. ཨེཝཾ ཝདཏཱིཏི ‘‘ཨུདེཏཡཾ ཙཀྑུམཱ’’ཏིཨཱདིནཱ (ཛཱ. ༡.༢.༡༧) ཨིམཾ བུདྡྷམནྟཾ མནྟེནྟོ ཝདཏི.

ཏཏྠ ཨུདེཏཱིཏི པཱཙཱིནལོཀདྷཱཏུཏོ ཨུགྒཙྪཏི. ཙཀྑུམཱཏི སཀལཙཀྐཝཱལ༹ཝཱསཱིནཾ ཨནྡྷཀཱརཾ ཝིདྷམིཏྭཱ ཙཀྑུཔྤཊིལཱབྷཀརཎེན ཡནྟེན ཏེསཾ དིནྣཾ ཙཀྑུ, ཏེན ཙཀྑུནཱ ཙཀྑུམཱ. ཨེཀརཱཛཱཏི སཀལཙཀྐཝཱལེ༹ ཨཱལོཀཀརཱནཾ ཨནྟརེ སེཊྛཊྛེན རཉྫནཊྛེན ཙ ཨེཀརཱཛཱ. ཧརིསྶཝཎྞོཏི ཧརིསམཱནཝཎྞོ, སུཝཎྞཝཎྞོཏི ཨཏྠོ. པཐཝིཾ པབྷཱསེཏཱིཏི པཐཝིཔྤབྷཱསོ. ཏཾ ཏཾ ནམསྶཱམཱིཏི ཏསྨཱ ཏཾ ཨེཝརཱུཔཾ བྷཝནྟཾ ནམསྶཱམི ཝནྡཱམི. ཏཡཱཛྫ གུཏྟཱ ཝིཧརེམྷ དིཝསནྟི ཏཡཱ ཨཛྫ རཀྑིཏཱ ཧུཏྭཱ ཨིམཾ དིཝསཾ ཙཏུཨིརིཡཱཔཐཝིཧཱརེན སུཁཾ ཝིཧརེཡྻཱམ.

ཨེཝཾ ¶ བོདྷིསཏྟོ ཨིམཱཡ གཱཐཱཡ སཱུརིཡཾ ནམསྶིཏྭཱ དུཏིཡགཱཐཱཡ ཨཏཱིཏེ པརིནིབྦུཏེ བུདྡྷེ ཙེཝ བུདྡྷགུཎེ ཙ ནམསྶཏི ‘‘ཡེ བྲཱཧྨཎཱ’’ཏིཨཱདིནཱ. ཏཏྠ ཡེ བྲཱཧྨཎཱཏི ཡེ བཱཧིཏཔཱཔཱ པརིསུདྡྷཱ བྲཱཧྨཎཱ. ཝེདགཱུཏི ཝེདཱནཾ པཱརཾ གཏཱ, ཝེདེཧི པཱརཾ གཏཱཏི ཝཱ ཝེདགཱུ. ཨིདྷ པན སབྦེ སངྑཏདྷམྨེ ཝིདིཏེ པཱཀཊེ ཀཏྭཱ ཀཏཱཏི ཝེདགཱུ. ཏེནེཝཱཧ – ‘‘སབྦདྷམྨེ’’ཏི. སབྦེ ཁནྡྷཱཡཏནདྷཱཏུདྷམྨེ སལཀྑཎསཱམཉྙལཀྑཎཝསེན ཨཏྟནོ ཉཱཎསྶ ཝིདིཏེ པཱཀཊེ ཀཏྭཱ ཏིཎྞཾ མཱརཱནཾ མཏྠཀཾ མདྡིཏྭཱ སམྨཱསམྦོདྷིཾ པཏྟཱ, སཾསཱརཾ ཝཱ ཨཏིཀྐནྟཱཏི ཨཏྠོ. ཏེ མེ ནམོཏི ཏེ མམ ཨིམཾ ནམཀྐཱརཾ པཊིཙྪནྟུ. ཏེ ཙ མཾ པཱལཡནྟཱུཏི ཨེཝཾ མཡཱ ནམསྶིཏཱ ཙ ཏེ བྷགཝནྟོ མཾ པཱལཡནྟུ རཀྑནྟུ. ནམཏྟུ བུདྡྷཱནཾ…པེ… ཝིམུཏྟིཡཱཏི ཨཡཾ མམ ནམཀྐཱརོ ཨཏཱིཏཱནཾ པརིནིབྦུཏཱནཾ བུདྡྷཱནཾ ཨཏྠུ, ཏེསཾཡེཝ ཙཏཱུསུ ཕལེསུ ཉཱཎསངྑཱཏཱཡ བོདྷིཡཱ ཨཏྠུ, ཏཐཱ ཏེསཉྙེཝ ཨརཧཏྟཕལཝིམུཏྟིཡཱ ¶ ཝིམུཏྟཱནཾ ཨཏྠུ, ཡཱ ཙ ནེསཾ ཏདངྒཝིཀྑམྦྷནསམུཙྪེདཔྤཊིཔྤསྶདྡྷིནིསྶརཎསངྑཱཏཱ པཉྩཝིདྷཱ ཝིམུཏྟི, ཏཱཡ ཝིམུཏྟིཡཱཔི ཨཡཾ མཡ྄ཧཾ ནམཀྐཱརོ ཨཏྠཱུཏི ཨཏྠོ. ཨིམཾ སོ པརིཏྟཾ ཀཏྭཱ, མོརོ ཙརཏི ཨེསནཱཏི ཨིདཾ པན པདདྭཡཾ སཏྠཱ ཨབྷིསམྦུདྡྷོ ཧུཏྭཱ ཨཱཧ. ཏསྶཏྠོ – བྷིཀྑཝེ, སོ མོརོ ཨིམཾ པརིཏྟཾ ཨིམཾ རཀྑཾ ཀཏྭཱ ཨཏྟནོ གོཙརབྷཱུམིཡཾ པུཔྥཕལཱདཱིནཾ ཨཏྠཱཡ ནཱནཔྤཀཱརཱཡ ཨེསནཱཡ ཙརཏཱིཏི.

ཨེཝཾ དིཝསཾ ཙརིཏྭཱ སཱཡཾ པབྦཏམཏྠཀེ ནིསཱིདིཏྭཱ ཨཏྠཾ གཙྪནྟཾ སཱུརིཡཾ ཨོལོཀེནྟོ བུདྡྷགུཎེ ཨཱཝཛྫེཏྭཱ ནིཝཱསཊྛཱནེ རཀྑཱཝརཎཏྠཱཡ པུན བྲཧྨམནྟཾ ཝདནྟོ ‘‘ཨཔེཏཡ’’ནྟིཨཱདིམཱཧ. ཏེནེཝཱཧ – ‘‘དིཝསཾ གོཙརཾ གཧེཏྭཱ’’ཏིཨཱདི. ཏཏྠ ཨཔེཏཱིཏི ཨཔཡཱཏི ཨཏྠཾ གཙྪཏི. ཨིམཾ སོ པརིཏྟཾ ཀཏྭཱ མོརོ ཝཱསམཀཔྤཡཱིཏི ཨིདམྤི ཨབྷིསམྦུདྡྷོ ཧུཏྭཱ ཨཱཧ. ཏསྶཏྠོ – བྷིཀྑཝེ, སོ མོརོ ཨིམཾ པརིཏྟཾ ཨིམཾ རཀྑཾ ཀཏྭཱ ཨཏྟནོ ནིཝཱསཊྛཱནེ ཝཱསཾ སཾཀཔྤཡིཏྠཱཏི. པརིཏྟཀམྨཏོ པུརེཏརམེཝཱཏི པརིཏྟཀམྨཀརཎཏོ པུརེཏརམེཝ. མོརཀུཀྐུཊིཀཱཡཱཏི ཀུཀྐུཊིཀཱསདིསཱཡ མོརཙྪཱཔིཀཱཡ.

༣. ཏཏིཡེ རཱུཔཱཡཏནསྶ ཝིཡ གནྡྷཱཡཏནསྶཔི སམུཊྛཱཔཀཔཙྩཡཝསེན ཝིསེསོ ནཏྠཱིཏི ཨཱཧ – ‘‘ཙཏུསམུཊྛཱནིཀ’’ནྟི. ཨིཏྠིཡཱ སརཱིརགནྡྷསྶ ཀཱཡཱརུལ༹ྷཨནུལེཔནཱདིགནྡྷསྶ ཙ ཏཔྤཊིབདྡྷབྷཱཝཏོ ཨཝིསེསེན གཧཎཔྤསངྒེ ཨིདྷཱདྷིཔྤེཏགནྡྷཾ ནིདྡྷཱརེནྟོ ‘‘སྭཱཡ’’ནྟིཨཱདིམཱཧ. ཏཏྠ ཨིཏྠིཡཱཏི པཱཀཏིཀཱཡ ཨིཏྠིཡཱ. དུགྒནྡྷོཏི པཱཀཏིཀཱཡ ཨིཏྠིཡཱ སརཱིརགནྡྷབྷཱཝཏོ དུགྒནྡྷོ ཧོཏི. ཨིདྷཱདྷིཔྤེཏོཏི ཨིཊྛབྷཱཝཏོ ཨསྶཱདེཏབྦཏྟཱ ཝུཏྟཾ. ཀཐཾ པན ཨིཏྠིཡཱ སརཱིརགནྡྷསྶ དུགྒནྡྷབྷཱཝོཏི ཨཱཧ – ‘‘ཨེཀཙྩཱ ཧཱི’’ཏིཨཱདི. ཏཏྠ ཨསྶསྶ ཝིཡ གནྡྷོ ¶ ཨསྶཱ ཨཏྠཱིཏི ཨསྶགནྡྷིནཱི. མེཎྜཀསྶ ཝིཡ གནྡྷོ ཨསྶཱ ཨཏྠཱིཏི མེཎྜཀགནྡྷིནཱི. སེདསྶ ཝིཡ གནྡྷོ ཨསྶཱ ཨཏྠཱིཏི སེདགནྡྷིནཱི. སོཎིཏསྶ ཝིཡ གནྡྷོ ཨསྶཱ ཨཏྠཱིཏི སོཎིཏགནྡྷིནཱི. རཛྫཏེཝཱཏི ཨནཱདིམཏི སཾསཱརེ ཨཝིཛྫཱདིཀིལེསཝཱསནཱཡ པརིཀཌྜྷིཏཧདཡཏྟཱ ཕོཊྛབྦསྶཱདགདྷིཏཙིཏྟཏཱཡ ཙ ཨནྡྷབཱལོ ཨེཝརཱུཔཱཡཔི དུགྒནྡྷསརཱིརཱཡ ཨིཏྠིཡཱ རཛྫཏིཡེཝ. པཱཀཏིཀཱཡ ཨིཏྠིཡཱ སརཱིརགནྡྷསྶ དུགྒནྡྷབྷཱཝཾ དསྶེཏྭཱ ཨིདཱནི ཝིསིཊྛཱཡ ཨེཀཙྩཱཡ ཨིཏྠིཡཱ ཏདབྷཱཝཾ དསྶེཏུཾ – ‘‘ཙཀྐཝཏྟིནོ ¶ པནཱ’’ཏིཨཱདིམཱཧ. ཡདི ཨེཝཾ ཨཱིདིསཱཡ ཨིཏྠིཡཱ སརཱིརགནྡྷོཔི ཨིདྷ ཀསྨཱ ནཱདྷིཔྤེཏོཏི ཨཱཧ – ‘‘ཨཡཾ ན སབྦཱསཾ ཧོཏཱི’’ཏིཨཱདི. ཏིརཙྪཱནགཏཱཡ ཨིཏྠིཡཱ ཨེཀཙྩཱཡ ཙ མནུསྶིཏྠིཡཱ སརཱིརགནྡྷསྶ ཨཏིཝིཡ ཨསྶཱདེཏབྦབྷཱཝདསྶནཏོ པུན ཏམྤི ཨཝིསེསེན ཨནུཛཱནནྟོ ‘‘ཨིཏྠིཀཱཡེ གནྡྷོ ཝཱ ཧོཏཱུ’’ཏིཨཱདིམཱཧ. ཨིཏྠིགནྡྷོཏྭེཝ ཝེདིཏབྦོཏི ཏཔྤཊིབདྡྷབྷཱཝཏོ ཝུཏྟཾ.

༤. ཙཏུཏྠཱདཱིསུ ཀིཾ ཏེནཱཏི ཛིཝ྄ཧཱཝིཉྙེཡྻརསེ ཨིདྷཱདྷིཔྤེཏེ ཀིཾ ཏེན ཨཝཡཝརསཱདིནཱ ཝུཏྟེན པཡོཛནཾ. ཨོཊྛམཾསཾ སམྨཀྑེཏཱིཏི ཨོཊྛམཾསསམྨཀྑནོ, ཁེལཱ༹དཱིནི. ཨཱདིསདྡེན ཨོཊྛམཾསམཀྑནོ ཏམྦུལམུཁཝཱསཱདིརསོ གཡ྄ཧཏི. སབྦོ སོ ཨིཏྠིརསོཏི ཨིཏྠིཡཱཝསྶ གཧེཏབྦཏྟཱ.

༥. ཨིཏྠིཕོཊྛབྦོཏི ཨེཏྠཱཔི ཨེསེཝ ནཡོ. ཡདི པནེཏྠ ཨིཏྠིགཏཱནི རཱུཔཱརམྨཎཱདཱིནི ཨཝིསེསཏོ པུརིསསྶ ཙིཏྟཾ པརིཡཱདཱཡ ཏིཊྛནྟི, ཨཐ ཀསྨཱ བྷགཝཏཱ ཏཱནི ཝིསུཾ ཝིསུཾ གཧེཏྭཱ དེསིཏཱནཱིཏི ཨཱཧ – ‘‘ཨིཏི སཏྠཱ’’ཏིཨཱདི. ཡཐཱ ཧཱིཏིཨཱདིནཱ ཏམེཝཏྠཾ སམཏྠེཏི. གམེཏཱིཏི ཝིཀྑེཔཾ གམེཏི, ཨཡམེཝ ཝཱ པཱཋོ. གམེཏཱིཏི ཙ སངྒམེཏི. ན ཏཐཱ སེསཱ སདྡཱདཡོ, ན ཏཐཱ རཱུཔཱདཱིནི ཨཱརམྨཎཱནཱིཏི ཨེཏེན སཏྟེསུ རཱུཔཱདིགརུཀཏཱ ཨསཾཀིཎྞཱ ཝིཡ དསྶིཏཱ, ན ཁོ པནེཏཾ ཨེཝཾ དཊྛབྦཾ ཨནེཀཝིདྷཏྟཱ སཏྟཱནཾ ཨཛ྄ཛྷཱསཡསྶཱཏི དསྶེཏུཾ – ‘‘ཨེཀཙྩསྶ ཙཱ’’ཏིཨཱདི ཝུཏྟཾ. པཉྩགརུཀཝསེནཱཏི པཉྩཱརམྨཎགརུཀཝསེན. ཨེཀཙྩསྶ ཧི པུརིསསྶ ཡཐཱཝུཏྟེསུ པཉྩསུཔི ཨཱརམྨཎེསུ གརུཀཏཱ ཧོཏི, ཨེཀཙྩསྶ ཏཏྠ ཀཏིཔཡེསུ, ཨེཀསྨིཾ ཨེཝ ཝཱ, ཏེ སབྦེཔི པཉྩགརུཀཱཏྭེཝ ཝེདིཏབྦཱ ཡཐཱ ‘‘སཏྟིསཡོ ཨཊྛཝིམོཀྑཱ’’ཏི. ན པཉྩགརུཀཛཱཏཀཝསེན ཨེཀེཀཱརམྨཎེ གརུཀསྶེཝ ནཱདྷིཔྤེཏཏྟཱ. ཨེཀེཀཱརམྨཎགརུཀཱནཉྷི པཉྩནྣཾ པུགྒལཱནཾ ཏཏྠ ཨཱགཏཏྟཱ ཏཾ ཛཱཏཀཾ ‘‘པཉྩགརུཀཛཱཏཀ’’ནྟི ཝུཏྟཾ. ཡདི ཨེཝཾ ཏེན ཨིདྷ པཡོཛནཾ ནཏྠཱིཏི ཨཱཧ – ‘‘སཀྑིབྷཱཝཏྠཱཡཱ’’ཏི. ཨཱཧརིཏྭཱ ཀཐེཏབྦནྟི རཱུཔཱདིགརུཀཏཱཡ ཨེཏེ ཨནཡབྱསནཾ པཏྟཱཏི དསྶེཏུཾ ཀཐེཏབྦཾ.

༦-༨. ཏེསནྟི ¶ ¶ སུཏྟཱནཾ. ཨུཔྤཎྜེཏྭཱ གཎྷིཏུཾ ན ཨིཙྪཱིཏི ཏསྶ ཐོཀཾ ཝིརཱུཔདྷཱཏུཀཏྟཱ ན ཨིཙྪི. ཨནཏིཀྐམནྟོཏི སཾསནྡེནྟོ. དྭེ ཧཏྠཾ པཏྟཱནཱིཏི དྭེ ཨུཔྤལཱནི ཧཏྠཾ གཏཱནི. པཧཊྛཱཀཱརཾ དསྶེཏྭཱཏི ཨཔརཱཧི ཨིཏྠཱིཧི ཨེཀེཀཾ ལདྡྷཾ, མཡཱ དྭེ ལདྡྷཱནཱིཏི སནྟུཊྛཱཀཱརཾ དསྶེཏྭཱ. པརོདཱིཏི ཏསྶཱ པུབྦསཱམིཀསྶ མུཁགནྡྷཾ སརིཏྭཱ. ཏསྶ ཧི མུཁཏོ ཨུཔྤལགནྡྷོ ཝཱཡཏི. ཧཱརེཏྭཱཏི ཏསྨཱ ཋཱནཱ ཨཔནེཏྭཱ, ‘‘ཧརཱཔེཏྭཱ’’ཏི ཝཱ པཱཋོ, ཨཡམེཝཏྠོ.

སཱདྷུ སཱདྷཱུཏི བྷཱསཏོཏི དྷམྨཀཐཱཡ ཨནུམོདནཝསེན ‘‘སཱདྷུ སཱདྷཱུ’’ཏི བྷཱསཏོ. ཨུཔྤལཾཝ ཡཐོདཀེཏི ཡཐཱ ཨུཔྤལཾ ཨུཔྤལགནྡྷོ མུཁཏོ ནིབྦཏྟོཏི. ཝཊྚམེཝ ཀཐིཏནྟི ཡཐཱརུཏཝསེན ཝུཏྟཾ. ཡདིཔི ཨེཝཾ ཝུཏྟཾ, ཏཐཱཔི ཡཐཱརུཏམཏྠེ ཨཝཏྭཱ ཝིཝཊྚཾ ནཱིཧརིཏྭཱ ཀཐེཏབྦཾ ཝིམུཏྟིརསཏྟཱ བྷགཝཏོ དེསནཱཡ.

རཱུཔཱདིཝགྒཝཎྞནཱ ནིཊྛིཏཱ.

ཨིཏི མནོརཐཔཱུརཎིཡཱ ཨངྒུཏྟརནིཀཱཡ-ཨཊྛཀཐཱཡ

པཋམཝགྒཝཎྞནཱཡ ཨནུཏྟཱནཏྠདཱིཔནཱ ནིཊྛིཏཱ.

༢. ནཱིཝརཎཔྤཧཱནཝགྒཝཎྞནཱ

༡༡. དུཏིཡསྶཱཏི ¶ དུཏིཡཝགྒསྶ. ཨེཀདྷམྨམྤཱིཏི ཨེཏྠ ‘‘ཨེཀསབྷཱཝམྤཱི’’ཏི ཨིམིནཱ སབྷཱཝཏྠོཡཾ དྷམྨསདྡོ ‘‘ཀུསལཱ དྷམྨཱ’’ཏིཨཱདཱིསུ ཝིཡཱཏི དསྶིཏཾ ཧོཏི. ཡདགྒེན ཙ སབྷཱཝཏྠོ, ཏདགྒེན ནིསྶཏྟཏྠོ སིདྡྷོ ཨེཝཱཏི ‘‘ནིསྶཏྟཊྛེན དྷམྨོ ཝེདིཏབྦོ’’ཏི ཝུཏྟཾ. སུབྷནིམིཏྟནྟི དྷམྨཔརིཡཱཡེན ཝུཏྟཾ. ཏཉྷི ཨཏྠཏོ ཀཱམཙྪནྡོ ཝཱ སིཡཱ. སོ ཧི ཨཏྟནོ གཧཎཱཀཱརེན སུབྷནྟི, ཏེནཱཀཱརེན པཝཏྟནཀསྶ ཨཉྙསྶ ཀཱམཙྪནྡསྶ ནིམིཏྟཏྟཱ ‘‘སུབྷནིམིཏྟ’’ནྟི ཙ ཝུཙྩཏི. ཏསྶ ཨཱརམྨཎཾ ཝཱ སུབྷནིམིཏྟཾ. ཨིཊྛཉྷི ཨིཊྛཱཀཱརེན ཝཱ གཡ྄ཧམཱནཾ རཱུཔཱདིཨཱརམྨཎཾ ‘‘སུབྷནིམིཏྟ’’ནྟི ཝུཙྩཏི. ཨཱརམྨཎམེཝ ཙེཏྠ ནིམིཏྟཾ. ཏཐཱ ཧི ཝཀྑཏི – ‘‘སུབྷནིམིཏྟནྟི རཱགཊྛཱནིཡཾ ཨཱརམྨཎ’’ནྟི. སམུཙྩཡཏྠོ ཝཱ-སདྡོ ཨནེཀཏྠཏྟཱ ནིཔཱཏཱནཾ. བྷིཡྻོབྷཱཝཱཡཱཏི པུནཔྤུནཾ བྷཱཝཱཡ. ཝེཔུལླཱཡཱཏི ཝིཔུལབྷཱཝཱཡ, ཝཌྜྷིཡཱཏི ཨཏྠོ. ཨཛཱཏོ ནིཛྫཱཏོ. སེསཔདཱནི ཏསྶེཝ ¶ ཝེཝཙནཱནི. ཀཱམེསཱུཏི པཉྩསུ ཀཱམགུཎེསུ. ཀཱམཙྪནྡོཏི ཀཱམསངྑཱཏོ ཚནྡོ, ན ཀཏྟུཀམྱཏཱཚནྡོ ན དྷམྨཙྪནྡོ. ཀཱམནཝསེན རཛྫནཝསེན ཙ ཀཱམོ ཨེཝ རཱགོ ཀཱམརཱགོ. ཀཱམནཝསེན ནནྡནཝསེན ཙ ཀཱམོ ཨེཝ ནནྡཱིཏི ཀཱམནནྡཱི. ཀཱམནཝསེན ཏཎྷཱཡནཝསེན ཙ ཀཱམཏཎྷཱ. ཨཱདིསདྡེན ‘‘ཀཱམསྣེཧོ ཀཱམཔརིལཱ༹ཧོ ཀཱམམུཙྪཱ ཀཱམཛ྄ཛྷོསཱན’’ནྟི ཨེཏེསཾ པདཱནཾ སངྒཧོ དཊྛབྦོ. ཏཏྠ ཝུཏྟནཡེནེཝ ཀཱམཏྠཾ ཝིདིཏྭཱ སིནེཧནཊྛེན ཀཱམསྣེཧོ, པརིལཱ༹ཧནཊྛེན ཀཱམཔརིལཱ༹ཧོ, མུཙྪནཊྛེན ཀཱམམུཙྪཱ, གིལིཏྭཱ པརིནིཊྛཱཔནཊྛེན ཀཱམཛ྄ཛྷོསཱནཾ ཝེདིཏབྦཾ. ཀཱམཙྪནྡོ ཨེཝ ཀུསལཔྤཝཏྟིཏོ ཙིཏྟསྶ ནཱིཝརཎཊྛེན ཀཱམཙྪནྡནཱིཝརཎཾ, སོཏི ཀཱམཙྪནྡོ. ཨསམུདཱཙཱརཝསེནཱཏི ཨསམུདཱཙཱརབྷཱཝེན. ཨནནུབྷཱུཏཱརམྨཎཝསེནཱཏི ‘‘ཨིདཾ ནཱམེཏ’’ནྟི ཝཏྠུཝསེན ཨུཏྭཱ ཏསྨིཾ ཨཏྟབྷཱཝེ ཨནནུབྷཱུཏསྶ ཨཱརམྨཎསྶ ཝསེན. རཱུཔསདྡཱདིབྷེདཾ པན ཨཱརམྨཎཾ ཨེཀསྨིམྤི ཨཏྟབྷཱཝེ ཨནནུབྷཱུཏཾ ནཱམ ནཏྠེཝ, ཀིམངྒཾ པན ཨནཱདིམཏི སཾསཱརེ.

ཡཾ ཝུཏྟཾ – ‘‘ཨསམུདཱཙཱརཝསེན ཙཱ’’ཏིཨཱདི, ཏཾ ཨཏིསཾཁིཏྟནྟི ཝིཏྠཱརཏོ དསྶེཏུཾ – ‘‘ཏཏྠཱ’’ཏིཨཱདིམཱཧ. ཏཏྠ བྷཝགྒཧཎེན མཧགྒཏབྷཝོ གཧིཏོ. སོ ཧི ཨོལཱ༹རིཀཀིལེསསམུདཱཙཱརརཧིཏོ. ཏཛྫནཱིཡཀམྨཀཏཱདིཀཱལེ པཱརིཝཱསིཀཀཱལེ ཙ ཙརིཏབྦཱནི དྭེཨསཱིཏི ཁུདྡཀཝཏྟཱནི ནཱམ. ན ཧི ཏཱནི སབྦཱསུ ཨཝཏྠཱསུ ཙརིཏབྦཱནི, ཏསྨཱ ཏཱནི ན མཧཱཝཏྟེསུ ཨནྟོགདྷཱནཱིཏི ‘‘ཙུདྡས མཧཱཝཏྟཱནཱི’’ཏི ཝུཏྟཾ. ཏཐཱ ཨཱགནྟུཀཝཏྟཨཱཝཱསིཀགམིཀ-ཨནུམོདནབྷཏྟགྒ- པིཎྜཙཱརིཀཨཱརཉྙཀསེནཱསནཛནྟཱགྷརཝཙྩཀུཊིཨུཔཛ྄ཛྷཱཡ- སདྡྷིཝིཧཱརིཀཨཱཙརིཡ-ཨནྟེཝཱསིཀཝཏྟཱནཱིཏི ¶ ཨེཏཱནི ཙུདྡས མཧཱཝཏྟཱནི ནཱམཱཏི ཝུཏྟཾ. ཨིཏརཱནི པན ‘‘པཱརིཝཱསིཀཱནཾ བྷིཀྑཱུནཾ ཝཏྟཾ པཉྙཱཔེསྶཱམཱི’’ཏི (ཙཱུལ༹ཝ. ༧༥) ཨཱརབྷིཏྭཱ ‘‘ན ཨུཔསམྤཱདེཏབྦཾ, ན ཚམཱཡཾ ཙངྐམནྟེ ཙངྐམེ ཙངྐམིཏབྦ’’ནྟི (ཙཱུལ༹ཝ. ༨༡) ཝུཏྟཱནི པཀཏཏྟེ ཙརིཏབྦཝཏྟཱནི ཚསཊྛི, ཏཏོ པརཾ ‘‘ན, བྷིཀྑཝེ, པཱརིཝཱསིཀེན བྷིཀྑུནཱ པཱརིཝཱསིཀཝུཌྜྷཏརེན བྷིཀྑུནཱ སདྡྷིཾ, མཱུལཱཡཔཊིཀསྶནཱརཧེན, མཱནཏྟཱརཧེན, མཱནཏྟཙཱརིཀེན, ཨབྦྷཱནཱརཧེན བྷིཀྑུནཱ སདྡིཾ ཨེཀཙྪནྣེ ཨཱཝཱསེ ཝཏྠབྦ’’ནྟིཨཱདཱིནི པཀཏཏྟེ ཙརིཏབྦེཧི ཨནཉྙཏྟཱ ཝིསུཾ ཝིསུཾ ཨགཎེཏྭཱ པཱརིཝཱསིཀཝུཌྜྷཏརཱདཱིསུ པུགྒལནྟརེསུ ཙརིཏབྦཏྟཱ ¶ ཏེསཾ ཝསེན སམྤིཎྜེཏྭཱ ཨེཀེཀཾ ཀཏྭཱ གཎིཏཱནི པཉྩཱཏི ཨེཀསཏྟཏིཝཏྟཱནི. ཨུཀྑེཔནཱིཡཀམྨཀཏཝཏྟེསུ ཝཏྟཔཉྙཱཔནཝསེན ཝུཏྟཾ – ‘‘ན པཀཏཏྟསྶ བྷིཀྑུནོ ཨབྷིཝཱདནཾ པཙྩུཊྛཱནཾ…པེ… པིཊྛིཔརིཀམྨཾ སཱདིཏབྦ’’ནྟི ཨིདཾ ཨབྷིཝཱདནཱདཱིནཾ ཨསྶཱདིཡནཾ ཨེཀཾ, ‘‘ན པཀཏཏྟོ བྷིཀྑུ སཱིལཝིཔཏྟིཡཱ ཨནུདྡྷཾསེཏབྦོ’’ཏིཨཱདཱིནི (ཙཱུལ༹ཝ. ༥༡) ཙ དསཱཏི ཨེཝཾ དྭཱསཱིཏི ཧོནྟི. ཨེཏེསྭེཝ པན ཀཱནིཙི ཏཛྫནཱིཡཀམྨཀཏཱདིཝཏྟཱནི ཀཱནིཙི པཱརིཝཱསིཀཱདིཝཏྟཱནཱིཏི ཨགྒཧིཏགྒཧཎེན དྭཱཝཱིསཏིཝཏྟནྟི ཝེདིཏབྦཾ. ‘‘ཙུདྡས མཧཱཝཏྟཱནཱི’’ཏི ཝཏྭཱཔི ‘‘ཨཱགནྟུཀགམིཀཝཏྟཱནི ཙཱ’’ཏི ཨིམེསཾ ཝིསུཾ གཧཎཾ ཨིམཱནི ཨབྷིཎྷཾ སམྦྷཝནྟཱིཏི ཀཏྭཱ. ཀིལེསོ ཨོཀཱསཾ ན ལབྷཏི སབྦདཱ ཝཏྟཔྤཊིཔཏྟིཡཾཡེཝ བྱཱཝཊཙིཏྟཏཱཡ. ཨཡོནིསོམནསིཀཱརནྟི ཨནིཙྩཱདཱིསུ ‘‘ནིཙྩ’’ནྟིཨཱདིནཱ པཝཏྟཾ ཨནུཔཱཡམནསིཀཱརཾ. སཏིཝོསྶགྒནྟི སཏིཡཱ ཝིསྶཛྫནཾ, སཏིཝིརཧནྟི ཨཏྠོ. ཨེཝམྤཱིཏི ཝཀྑམཱནཱཔེཀྑཱཡ ཨཝུཏྟསམྤིཎྜནཏྠོ པི-སདྡོ.

ཨནུསནྡྷིཝསེནཱཏི པུཙྪཱནུསནྡྷིཨཱདིཨནུསནྡྷིཝསེན. པུབྦཱཔརཝསེནཱཏི པུབྦཱཔརགནྠསལླཀྑཎཝསེན. གཎྷནྟསྶཱཏི ཨཱཙརིཡམུཁཏོ གཎྷནྟསྶ. སཛ྄ཛྷཱཡནྟསྶཱཏི ཨཱཙརིཡམུཁཏོ ཨུགྒཧིཏགནྠཾ སཛ྄ཛྷཱཡནྟསྶ. ཝཱཙེནྟསྶཱཏི པཱལི༹ཾ ཏདཏྠཉྩ ཨུགྒཎྷཱཔནཝསེན པརེསཾ ཝཱཙེནྟསྶ. དེསེནྟསྶཱཏི དེསནཱཝསེན པརེསཾ དྷམྨཾ དེསེནྟསྶ. པཀཱསེནྟསྶཱཏི ཨཏྟནོ ཨཏྟནོ སཾསཡཊྛཱནེ པུཙྪནྟཱནཾ ཡཱཐཱཝཏོ ཨཏྠཾ པཀཱསེནྟསྶ. ཀིལེསོ ཨོཀཱསཾ ན ལབྷཏི རཏྟིནྡིཝཾ གནྠཀམྨེསུཡེཝ བྱཱཝཊཙིཏྟཏཱཡ. ཨེཝམྤཱིཏི ཝུཏྟསམྤིཎྜནཏྠོ པི-སདྡོ. ཨེཝཾ སེསེསུཔི.

དྷུཏངྒདྷརོ ཧོཏཱིཏི ཝུཏྟམེཝཏྠཾ པཀཱསེཏི ‘‘ཏེརས དྷུཏངྒགུཎེ སམཱདཱཡ ཝཏྟཏཱི’’ཏི. བཱཧུལླཱཡཱཏི ཙཱིཝརཱདིཔཙྩཡབཱཧུལླཱཡ. ཡཐཱ ཙཱིཝརཱདཡོ པཙྩཡཱ བཧུལཾ ཨུཔྤཛྫནྟི, ཏཐཱ ཨཱཝཏྟསྶ ¶ པཝཏྟསྶཱཏི ཨཏྠོ. པརིཧཱིནཛ྄ཛྷཱནསྶཱཏི ཛྷཱནནྟརཱཡཀརེན ཝིསབྷཱགརཱུཔདསྶནཱདིནཱ ཀེནཙི ནིམིཏྟེན པརིཧཱིནཛ྄ཛྷཱནསྶ. ཝིསྶཊྛཛ྄ཛྷཱནསྶཱཏི ཨསམཱཔཛྫནཝསེན པརིཙྩཏྟཛ྄ཛྷཱནསྶ. བྷསྶཱདཱིསཱུཏི ཨཱདི-སདྡེན གཎསངྒཎིཀནིདྡཱནཝཀམྨཱདིཾ སངྒཎྷཱཏི. སཏྟསུ ཝཱ ཨནུཔསྶནཱསཱུཏི ཨེཏྠ སཏྟ ཨནུཔསྶནཱ ནཱམ ཨནིཙྩཱནུཔསྶནཱ དུཀྑཱནུཔསྶནཱ ཨནཏྟཱནུཔསྶནཱ ནིབྦིདཱནུཔསྶནཱ ཝིརཱགཱནུཔསྶནཱ ¶ ནིརོདྷཱནུཔསྶནཱ པཊིནིསྶགྒཱནུཔསྶནཱ ཁཡཱནུཔསྶནཱ ཝཡཱནུཔསྶནཱ ཝིཔརིཎཱམཱནུཔསྶནཱ ཨནིམིཏྟཱནུཔསྶནཱ ཨཔྤཎིཧིཏཱནུཔསྶནཱ སུཉྙཏཱནུཔསྶནཱ ཨདྷིཔཉྙཱདྷམྨཝིཔསྶནཱ ཡཐཱབྷཱུཏཉཱཎདསྶནཾ ཨཱདཱིནཝཱནུཔསྶནཱ པཊིསངྑཱནུཔསྶནཱ ཝིཝཊྚཱནུཔསྶནཱཏི ཨིམཱསུ ཨཊྛཱརསསུ མཧཱཝིཔསྶནཱསུ ཨཱདིཏོ ཝུཏྟཱ ཨནིཙྩཱནུཔསྶནཱདི-པཊིནིསྶགྒཱནུཔསྶནཱཔརིཡནྟཱ སཏྟ. ཨེཏྠ ཡཾ ཝཏྟབྦཾ, ཏཾ ཝིསུདྡྷིམགྒསཾཝཎྞནཱཏོ (ཝིསུདྡྷི. མཧཱཊཱི. ༢.༧༤༡) གཧེཏབྦཾ.

ཨནཱསེཝནཏཱཡཱཏི པུརིམཏྟབྷཱཝེ ཛྷཱནེན ཝིཀྑམྦྷིཏཀིལེསསྶ ཀཱམཙྪནྡཱདིཨཱསེཝནཱཡ ཨབྷཱཝཏོ. ཨནནུབྷཱུཏཔུབྦནྟི ཏསྨིཾ ཨཏྟབྷཱཝེ ཨནནུབྷཱུཏཔུབྦཾ. ཛཱཏོཏི ཨེཏསྶེཝ ཝེཝཙནཾ སཉྫཱཏོཏིཨཱདི. ནནུ ཙ ཁཎིཀཏྟཱ སབྦདྷམྨཱནཾ ཨུཔྤནྣསྶ ཀཱམཙྪནྡསྶ ཏངྑཎཾཡེཝ ཨཝསྶཾ ནིརོདྷསམྦྷཝཏོ ནིརུདྡྷེ ཙ ཏསྨིཾ པུན ཨཉྙསྶེཝ ཨུཔྤཛྫནཏོ ཙ ཀཐཾ ཏསྶ པུནཔྤུནབྷཱཝོ རཱསིབྷཱཝོ ཙཱཏི ཨཱཧ – ‘‘ཏཏྠ སཀིཾ ཨུཔྤནྣོ ཀཱམཙྪནྡོ’’ཏིཨཱདི. ཨཊྛཱནམེཏནྟི ཨཀཱརཎམེཏཾ. ཡེན ཀཱརཎེན ཨུཔྤནྣོ ཀཱམཙྪནྡོ ན ནིརུཛ྄ཛྷཏི, ནིརུདྡྷོ ཙ སྭེཝ པུན ཨུཔྤཛྫིསྶཏི, ཏཱདིསཾ ཀཱརཎཾ ནཏྠཱིཏི ཨཏྠོ.

རཱགཊྛཱནིཡནྟི རཱགཛནཀཾ. ཨནིཙྩཱདཱིསུ ནིཙྩཱདིཝསེན ཝིཔརཱིཏམནསིཀཱརོ, ཨིདྷ ཨཡོནིསོམནསིཀཱརོཏི ཨཱཧ – ‘‘ཨནིཙྩེ ནིཙྩ’’ནྟིཨཱདི. ཨཡོནིསོམནསིཀཱརོཏི ཨནུཔཱཡམནསིཀཱརོ, ཀུསལདྷམྨཔྤཝཏྟིཡཱ ཨཀཱརཎབྷཱུཏོ མནསིཀཱརོཏི ཨཏྠོ. ཨུཔྤཐམནསིཀཱརོཏི ཀུསལདྷམྨཔྤཝཏྟིཡཱ ཨམགྒབྷཱུཏོ མནསིཀཱརོ. སཙྩཝིཔྤཊིཀཱུལེནཱཏི སཙྩཱབྷིསམཡསྶ ཨནུནུལོམཝསེན. ཨཱཝཛྫནཱཏིཨཱདིནཱ ཨཱཝཛྫནཱཡ པཙྩཡབྷཱུཏཱ ཏཏོ པུརིམུཔྤནྣཱ མནོདྭཱརིཀཱ ཨཀུསལཛཝནཔྤཝཏྟི ཕལཝོཧཱརེན ཏཐཱ ཝུཏྟཱ. ཏསྶ ཧི ཝསེན སཱ ཨཀུསལཔྤཝཏྟིཡཱ ཨུཔནིསྶཡོ ཧོཏི. ཨཱཝཛྫནཱཏི བྷཝངྒཙིཏྟཾ ཨཱཝཛྫཡཏཱིཏི ཨཱཝཛྫནཱ. ཨནུ ཨནུ ཨཱཝཛྫེཏཱིཏི ཨནྭཱཝཛྫནཱ. བྷཝངྒཱརམྨཎཏོ ཨཉྙཾ ཨཱབྷུཛཏཱིཏི ཨཱབྷོགོ. སམནྣཱཧརཏཱིཏི སམནྣཱཧཱརོ. ཏདེཝཱརམྨཎཾ ཨཏྟཱནཾ ཨནུབནྡྷིཏྭཱ ཨུཔྤཛྫམཱནོ མནསི ཀརོཏི ཋཔེཏཱིཏི མནསིཀཱརོ. ཨཡཾ ཝུཙྩཏི ཨཡོནིསོམནསིཀཱརོཏི ཨཡཾ ཨནུཔཱཡཨུཔྤཐམནསིཀཱརལཀྑཎོ ཨཡོནིསོམནསིཀཱརོ ནཱམ ཝུཙྩཏི.

༡༢. དུཏིཡེ ¶ ¶ བྷཏྟབྱཱཔཏྟི ཝིཡཱཏི བྷཏྟསྶ པཱུཏིབྷཱཝེན ཝིཔྤཀཱརཔྤཏྟི ཝིཡ, ཙིཏྟསྶ བྱཱཔཛྫནནྟི ཙིཏྟསྶ ཝིཀཱརབྷཱཝཱཔཱདནཾ. ཏེནེཝཱཧ – ‘‘པཀཏིཝིཛཧནབྷཱཝོ’’ཏི. བྱཱཔཛྫཏི ཏེན ཙིཏྟཾ པཱུཏིཀུམྨཱསཱདཡོ ཝིཡ པུརིམཔཀཏིཾ ཛཧཏཱིཏི བྱཱཔཱདོ. པཊིགྷོཡེཝ ཨུཔརཱུཔརི ཨུཔྤཛྫམཱནསྶ པཊིགྷསྶ ནིམིཏྟབྷཱཝཏོ པཊིགྷནིམིཏྟཾ, པཊིགྷསྶ ཙ ཀཱརཎབྷཱུཏཾ ཨཱརམྨཎཾ པཊིགྷནིམིཏྟནྟི ཨཱཧ – ‘‘པཊིགྷསྶཔི པཊིགྷཱརམྨཎསྶཔི ཨེཏཾ ཨདྷིཝཙན’’ནྟི. ཨཊྛཀཐཱཡནྟི མཧཱཨཊྛཀཐཱཡཾ.

༡༣. ཏཏིཡེ ཐིནཏཱ ཐིནཾ, སཔྤིཔིཎྜོ ཝིཡ ཨཝིཔྥཱརིཀཏཱཡ ཙིཏྟསྶ གྷནབྷཱཝོ བདྡྷཏཱཏི ཨཏྠོ. མེདྷཏཱིཏི མིདྡྷཾ, ཨཀམྨཉྙབྷཱཝེན ཧིཾསཏཱིཏི ཨཏྠོ. ‘‘ཡཱ ཏསྨིཾ སམཡེ ཙིཏྟསྶ ཨཀལྱཏཱ’’ཏིཨཱདིནཱ (དྷ. ས. ༡༡༦༢) ཐིནསྶ, ‘‘ཡཱ ཏསྨིཾ སམཡེ ཀཱཡསྶ ཨཀལྱཏཱ’’ཏིཨཱདིནཱ (དྷ. ས. ༡༡༦༣) ཙ མིདྡྷསྶ ཨབྷིདྷམྨེ ནིདྡིཊྛཏྟཱ ཝུཏྟཾ – ‘‘ཙིཏྟསྶ ཨཀམྨཉྙཏཱ ཐིནཾ, ཏིཎྞཾ ཁནྡྷཱནཾ ཨཀམྨཉྙཏཱ མིདྡྷ’’ནྟི. སཏིཔི ཨཉྙམཉྙཱཝིཔྤཡོགེ ཙིཏྟཀཱཡལཧུཏཱདཱིནཾ ཝིཡ ཙིཏྟཙེཏསིཀཱནཾ ཡཐཱཀྐམཾ ཏཾཏཾཝིསེསོ སིཡཱ, ཡཱ ཏེསཾ ཨཀལྱཏཱདཱིནཾ ཝིསེསཔཙྩཡཏཱ, ཨཡམེཏེསཾ སབྷཱཝོཏི དཊྛབྦཾ. ཀཔིམིདྡྷསྶཱཏི ཝུཏྟམེཝཏྠཾ ཝིབྷཱཝེཏི ‘‘པཙལཱཡིཀབྷཱཝསྶཱ’’ཏི. ཨཀྑིདལཱནཾ པཙལབྷཱཝཾ ཀརོཏཱིཏི པཙལཱཡིཀོ, པཙལཱཡིཀསྶ བྷཱཝོ པཙལཱཡིཀབྷཱཝོ, པཙལཱཡིཀཏྟནྟི ཝུཏྟཾ ཧོཏི. ཨུབྷིནྣནྟི ཐིནམིདྡྷཱནཾ. ‘‘ཝིཏྠཱརོ ཝེདིཏབྦོ’’ཏི ཨིམིནཱ སམྦནྡྷོ ཝེདིཏབྦོ. ཙིཏྟསྶ ཨཀལྱཏཱཏི ཙིཏྟསྶ གིལཱནབྷཱཝོ. གིལཱནོ ཧི ཨཀལྱཀོཏི ཝུཙྩཏི. ཝིནཡེཔི ཝུཏྟཾ – ‘‘ནཱཧཾ, བྷནྟེ, ཨཀལྱཀོ’’ཏི (པཱརཱ. ༡༥༡). ཀཱལཾ ཁམཏཱིཏི ཧི ཀལྱཾ, ཨརོགཏཱ, ཏསྶཾ ནིཡུཏྟོ ཀལྱཀོ, ན ཀལྱཀོ ཨཀལྱཀོ. ཨཀམྨཉྙཏཱཏི ཙིཏྟགེལཉྙསངྑཱཏོཝ ཨཀམྨཉྙཏཱཀཱརོ. ཨོལཱིཡནཱཏི ཨོལཱིཡནཱཀཱརོ. ཨིརིཡཱཔཐཱུཔཏྠམྦྷིཏཉྷི ཙིཏྟཾ ཨིརིཡཱཔཐཾ སནྡྷཱརེཏུཾ ཨསཀྐོནྟཾ རུཀྑེ ཝགྒུལི ཝིཡ ཁཱིལེ ལགྒིཏཕཱཎིཏཝཱརཀོ ཝིཡ ཙ ཨོལཱིཡཏི ལམྦཏི, ཏསྶ ཏཾ ཨཱཀཱརཾ སནྡྷཱཡ – ‘‘ཨོལཱིཡནཱ’’ཏི ཝུཏྟཾ. དུཏིཡཔདཾ ཨུཔསགྒེན ཝཌྜྷིཏཾ. ཀཱཡསྶཱཏི ཝེདནཱདིཀྑནྡྷཏྟཡསངྑཱཏསྶ ནཱམཀཱཡསྶ. ཨཀལྱཏཱ ཨཀམྨཉྙཏཱཏི ཧེཊྛཱ ཝུཏྟནཡམེཝ. མེགྷོ ཝིཡ ཨཱཀཱསཾ ཨོནཡ྄ཧཏཱིཏི ཨོནཱཧོ. ཨོནཡ྄ཧཏཱིཏི ཙ ཚཱདེཏི ཨཝཏྠརཏི ཝཱཏི ཨཏྠོ ¶ . སབྦཏོབྷཱགེན ཨོནཱཧོཏི པརིཡོནཱཧོ. ཨརཏིཨཱདཱིནཾ ཨཏྠོ ཝིབྷངྒེ (ཝིབྷ. ༨༥༦) ཝུཏྟནཡེནེཝ ཝེདིཏབྦོཏི ཏཏྠ ཝུཏྟཔཱལི༹ཡཱ དསྶེཏུཾ – ‘‘ཝུཏྟཾ ཧེཏ’’ནྟིཨཱདིམཱཧ.

ཏཏྠ པནྟེསཱུཏི དཱུརེསུ, ཝིཝིཏྟེསུ ཝཱ. ཨདྷིཀུསལེསཱུཏི སམཐཝིཔསྶནཱདྷམྨེསུ. ཨརཏཱིཏི རཏིཔྤཊིཀྑེཔོ. ཨརཏིཏཱཏི ཨརམནཱཀཱརོ. ཨནབྷིརཏཱིཏི ཨནབྷིརཏབྷཱཝོ. ཨནབྷིརམནཱཏི ཨནབྷིརམནཱཀཱརོ ¶ . ཨུཀྐཎྛིཏཱཏི ཨུཀྐཎྛནཱཀཱརོ. པརིཏསྶིཏཱཏི ཨུཀྐཎྛནཝསེནེཝ པརིཏསྶནཱ, ཨུཀྐཎྛིཏསྶེཝ ཏཏྠ ཏཏྠ ཏཎྷཱཡནཱཏི ཝུཏྟཾ ཧོཏི. པརིཏསྶིཏཱཏི ཝཱ ཀམྤནཱ. ཏནྡཱིཏི ཛཱཏིཨཱལསིཡཾ, པཀཏིཨཱལསིཡནྟི ཨཏྠོ. ཏཐཱ ཧི ཀུསལཀརཎེ ཀཱཡསྶ ཨཝིཔྥཱརིཀཏཱ ལཱིནཏཱ ཛཱཏིཨཱལསིཡཾ ཏནྡཱི ནཱམ, ན རོགཨུཏུཛཱདཱིཧི ཀཱཡགེལཉྙཾ. ཏནྡིཡནཱཏི ཏནྡིཡནཱཀཱརོ. ཏནྡིམནཏཱཏི ཏནྡིཡཱ ཨབྷིབྷཱུཏཙིཏྟཏཱ. ཨལསསྶ བྷཱཝོ ཨཱལསྱཾ, ཨཱལསྱཱཡནཱཀཱརོ ཨཱལསྱཱཡནཱ. ཨཱལསྱཱཡིཏསྶ བྷཱཝོ ཨཱལསྱཱཡིཏཏྟཾ. ཨིཏི སབྦེཧིཔི ཨིམེཧི པདེཧི ཀིལེསཝསེན ཀཱཡཱལསིཡཾ ཀཐིཏཾ. ཐིནམིདྡྷཀཱརཎཱནཉྷི རཱགཱདིཀིལེསཱནཾ ཝསེན ནཱམཀཱཡསྶ ཨཱལསིཡཾ, ཏདེཝ རཱུཔཀཱཡསྶཱཔཱིཏི དཊྛབྦཾ. ཛམྦྷནཱཏི ཕནྡནཱ. པུནཔྤུནཾ ཛམྦྷནཱ ཝིཛམྦྷནཱ. ཨཱནམནཱཏི པུརཏོ ནམནཱ. ཝིནམནཱཏི པཙྪཏོ ནམནཱ. སནྣམནཱཏི སམནྟཏོ ནམནཱ. པཎམནཱཏི ཡཐཱ ཏནྟཏོ ཨུཊྛིཏཔེསཀཱརོ ཀིསྨིཉྩིདེཝ གཧེཏྭཱ ཨུཛུཾ ཀཱཡཾ ཨུསྶཱཔེཏི, ཨེཝཾ ཀཱཡསྶ ཨུདྡྷཾ ཋཔནཱ. བྱཱདྷིཡཀནྟི ཨུཔྤནྣབྱཱདྷིཏཱ. ཨིཏི སབྦེཧིཔི ཨིམེཧི པདེཧི ཐིནམིདྡྷཀཱརཎཱནཾ རཱགཱདིཀིལེསཱནཾ ཝསེན ཀཱཡབདྡྷནམེཝ ཀཐིཏཾ. བྷུཏྟཱཝིསྶཱཏི བྷུཏྟཝཏོ. བྷཏྟམུཙྪཱཏི བྷཏྟགེལཉྙཾ. བལཝབྷཏྟེན ཧི མུཙྪཱཔཏྟོ ཝིཡ ཧོཏི. བྷཏྟཀིལམཐོཏི བྷཏྟེན ཀིལནྟབྷཱཝོ. བྷཏྟཔརིལཱ༹ཧོཏི བྷཏྟདརཐོ. ཏསྨིཉྷི སམཡེ པརིལཱ༹ཧུཔྤཏྟིཡཱ ཨུཔཧཏིནྡྲིཡོ ཧོཏི, ཀཱཡོ ཛཱིརཏཱིཏི. ཀཱཡདུཊྛུལླནྟི བྷཏྟཾ ནིསྶཱཡ ཀཱཡསྶ ཨཀམྨཉྙཏཾ. ཨཀལྱཏཱཏིཨཱདི ཧེཊྛཱ ཝུཏྟནཡམེཝ. ལཱིནནྟི ཨཝིཔྥཱརིཀཏཱཡ པཊིཀུཊིཏཾ. ཨིཏརེ དྭེ ཨཱཀཱརབྷཱཝནིདྡེསཱ. ཐིནནྟི སཔྤིཔིཎྜོ ཝིཡ ཨཝིཔྥཱརིཀཏཱཡ གྷནབྷཱཝེན ཋིཏཾ. ཐིཡནཱཏི ཨཱཀཱརནིདྡེསོ. ཐིཡིབྷཱཝོ ཐིཡིཏཏྟཾ ¶ , ཨཝིཔྥཱརཝསེནེཝ བདྡྷཏཱཏི ཨཏྠོ. ཨིམེཧི པན སབྦེཧིཔི པདེཧི ཐིནམིདྡྷཀཱརཎཱནཾ རཱགཱདིཀིལེསཱནཾ ཝསེན ཙིཏྟསྶ གིལཱནཱཀཱརོ ཀཐིཏོཏི ཝེདིཏབྦོ. པུརིམཱ ཙཏྟཱརོ དྷམྨཱཏི ཨརཏི, ཏནྡཱི, ཝིཛམྦྷིཏཱ, བྷཏྟསམྨདོཏི ཨེཏེ ཙཏྟཱརོ དྷམྨཱ. ཡདཱ ཐིནམིདྡྷཾ ཨུཔྤནྣཾ ཧོཏི, ཏདཱ ཨརཏིཨཱདཱིནམྤི སམྦྷཝཏོ ‘‘ཨུཔནིསྶཡཀོཊིཡཱ པན ཧོཏཱི’’ཏི ཝུཏྟཾ, ཨུཔནིསྶཡཀོཊིཡཱ པཙྩཡོ ཧོཏཱིཏི ཨཏྠོ.

༡༤. ཙཏུཏྠེ ཨུདྡཏསྶ བྷཱཝོ ཨུདྡྷཙྩཾ. ཡསྶ དྷམྨསྶ ཝསེན ཨུདྡྷཏཾ ཧོཏི ཙིཏྟཾ, ཏཾསམྤཡུཏྟཱ ཝཱ དྷམྨཱ, སོ དྷམྨོ ཨུདྡཙྩཾ. ཀུཙྪིཏཾ ཀཏཾ ཀུཀཏཾ, དུཙྩརིཏཾ སུཙརིཏཉྩ. ཨཀཏམྤི ཧི ཀུཀཏམེཝ. ཨེཝཉྷི ཝཏྟཱརོ ཧོནྟི ‘‘ཡཾ མཡཱ ན ཀཏཾ, ཏཾ ཀུཀཏ’’ནྟི. ཨེཝཾ ཀཏཱཀཏཾ དུཙྩརིཏཾ སུཙརིཏཉྩ ཀུཀཏཾ, ཏཾ ཨཱརབྦྷ ཝིཔྤཊིསཱརཝསེན པཝཏྟཾ པན ཙིཏྟཾ ཨིདྷ ཀུཀཏནྟི ཝེདིཏབྦཾ. ཏསྶ བྷཱཝོ ཀུཀྐུཙྩཾ. ཙིཏྟསྶ ཨུདྡྷཏཱཀཱརོཏི ཙིཏྟསྶ ཨཝཱུཔསམཱཀཱརོཝ ཝུཏྟོ. ཨཝཱུཔསམལཀྑཎཉྷི ཨུདྡྷཙྩཾ. ཡཐཱཔཝཏྟསྶ ཀཏཱཀཏཱཀཱརཝིསིཊྛསྶ དུཙྩརིཏསུཙརིཏསྶ ¶ ཨནུསོཙནཝསེན ཝིརཱུཔཾ པཊིསརཎཾ ཝིཔྤཊིསཱརོ. ཀུཀྐུཙྩསྶཔི ཀཏཱཀཏཱནུསོཙནཝསེན ཙིཏྟཝིཀྑེཔབྷཱཝཏོ ཨཝཱུཔསམཱཀཱརོ སམྦྷཝཏཱིཏི ཨཱཧ – ‘‘ཙེཏསོ ཨཝཱུཔསམོཏི ཨུདྡྷཙྩཀུཀྐུཙྩསྶེཝཏཾ ནཱམ’’ནྟི. སྭེཝ ཙ ཙེཏསོ ཨཝཱུཔསམོཏི ཨུདྡྷཙྩཀུཀྐུཙྩམེཝ ནིདྡིཊྛཾ. ཏཉྩ ཨཏྟནོཝ ཨཏྟནཱ སཧཛཱཏཾ ན ཧོཏཱིཏི ཨཱཧ – ‘‘ཨཡཾ པན ཨུཔནིསྶཡཀོཊིཡཱ པཙྩཡོ ཧོཏཱི’’ཏི. ཨུཔནིསྶཡཔཙྩཡཏཱ ཙ པུརིམུཔྤནྣཝསེན ཝེདིཏབྦཱ.

༡༥. པཉྩམེ ཝིགཏཱ ཙིཀིཙྪཱ ཨསྶཱཏི ཝིཙིཀིཙྪཱ. སབྷཱཝཾ ཝིཙིནནྟོ ཏཱཡ ཀིཙྪཏཱིཏི ཝཱ ཝིཙིཀིཙྪཱ.

༡༦. ཚཊྛེ ཧེཏུཾ ཝཱ པཙྩཡཾ ཝཱ ན ལབྷཏཱིཏི ཨེཏྠ ཧེཏུགྒཧཎེན ཛནཀཾ ཀཱརཎམཱཧ, པཙྩཡགྒཧཎེན ཨནུཔཱལནཀཾ ཀཱརཎཾ. ཧེཏུནྟི ཝཱ ཨུཔཱདཱནཀཱརཎཾ. པཙྩཡནྟི སཧཀཱརཎཾ ཝུཏྟཾ. ཏནྟི ཀིལེསཾ. ཝིཝཊྚེཏྭཱ ཨརཧཏྟཾ གཎྷཱཏཱིཏི ཝིཝཊྚཱབྷིམུཁཾ ཙིཏྟཾ པེསེཏྭཱ ཝིཔསྶནཾ ཝཌྜྷེནྟོ ཨརཧཏྟཕལཾ གཎྷཱཏི. བྷིཀྑཱཡ ཙརནྟི ཨེཏྠཱཏི བྷིཀྑཱཙཱརོ, གོཙརགཱམསྶེཏཾ ཨདྷིཝཙནཾ, ཏསྨིཾ བྷིཀྑཱཙཱརེ. ཝཡཾ ཨཱགམྨཱཏི དཱརབྷརཎཱནུརཱུཔཾ ཝཡཾ ཨཱགམྨ. ཨཱཡཱུཧནྟོཏི ཨུཔཙིནནྟོ. ཨངྒཱརཔཀྐནྟི ཝཱིཏཙྩིཀངྒཱརེསུ པཀྐཾ. ཀིཾ ནཱམེཏནྟི བྷིཀྑཱུ གརཧནྟོ ཨཱཧ. ཛཱིཝམཱནཔེཏཀསཏྟོཏི ¶ ཛཱིཝམཱནོ ཧུཏྭཱ ‘‘ཏེནེཝ ཨཏྟབྷཱཝེན པེཏབྷཱཝཾ པཏྟསཏྟོ བྷཝིསྶཏཱི’’ཏི པརིཀཔྤཝསེན ཝུཏྟཾ. ཀུཊནྟི པཱནཱིཡགྷཊཾ. ཡཱཝ དཱརུཎནྟི ཨཏིཝིཡ དཱརུཎཾ. ཝིཔཱཀོ ཀཱིདིསོ བྷཝིསྶཏཱིཏི ཏཡཱ ཀཏཀམྨསྶ ཨཱཡཏིཾ ཨནུབྷཝིཏབྦཝིཔཱཀོ ཀཱིདིསོ བྷཝིསྶཏི.

ཝིསངྑརིཏྭཱཏི ཚེདནབྷེདནཱདཱིཧི ཝིནཱསེཏྭཱ. དཱིཔཀམིགཔཀྑིནོཏི ཨཏྟནོ ནིསིནྣབྷཱཝསྶ དཱིཔནཏོ ཨེཝཾལདྡྷནཱམཱ མིགཔཀྑིནོ, ཡེན ཨརཉྙཾ ནེཏྭཱ ནེསཱདོ ཏེསཾ སདྡེན ཨཱགཏཱགཏེ མིགཔཀྑིནོ ཝདྷིཏྭཱ གཎྷཱཏི. ཐེརནྟི ཙཱུལ༹པིཎྜཔཱཏིཀཏིསྶཏྠེརཾ. ཨིདྡྷིཡཱ ཨབྷིསངྑརིཏྭཱཏི ཨདྷིཊྛཱནཱདིཝསེན ཨིདྡྷིཾ ཨབྷིསངྑརིཏྭཱ. ཨུཔཡོགཏྠེ ཙེཏཾ ཀརཎཝཙནཾ. ཨགྒིཔཔཊིཀནྟི ཨཙྩིཀརཎཾ, ཝིཔྥུལིངྒནྟི ཨཏྠོ. པསྶནྟསྶེཝཱཏི ཨནཱདརེ སཱམིཝཙནཾ. ཏསྶ ཐེརསྶཱཏི ཏསྶ མིལཀྑཏིསྶཏྠེརསྶ. ཏསྶཱཏི ཏསྶཱ ཨགྒིཔཔཊིཀཱཡ. པཊིབལསྶཱཏི ཨུགྒཧཎསཛ྄ཛྷཱཡཱདཱིསུ པཊིབལསྶ. དུཀྑཾ ཨུཔནིསཱ ཀཱརཎམེཏིསྶཱཏི དུཀྑཱུཔནིསཱ, དུཀྑནིབནྡྷནཱ དུཀྑཧེཏུཀཱ སདྡྷཱཏི ཝུཏྟཾ ཧོཏི. ཝཏྟམུཁེན ཀམྨཊྛཱནསྶ ཀཐིཏཏྟཱ ‘‘ཝཏྟསཱིསེ ཋཏྭཱ’’ཏི ཝུཏྟཾ. པལཱལཝརཎཀནྟི པལཱལཔུཉྫཾ.

ཨཱརམྦྷཐཱཏི སམཐཝིཔསྶནཱདཱིསུ ཝཱིརིཡཾ ཀརོཐ. ནིཀྐམཐཱཏི ཀོསཛྫཏོ ནིཀྑམཐ, ཀཱམཱནཾ ¶ ཝཱ པནཱུདནཱཡ ནིཀྑམཐ, ཨུབྷཡེནཔི ཝཱིརིཡམེཝ ཝུཏྟཾ. ཝཱིརིཡཉྷི ཨཱརམྦྷནཀཝསེན ཨཱརམྦྷོ, ཀོསཛྫཏོ ནིཀྑམནཝསེན ‘‘ནིཀྐམོ’’ཏི ཝུཙྩཏི. ཡུཉྫཐ བུདྡྷསཱསནེཏི བུདྡྷསྶ བྷགཝཏོ པརིཡཏྟིཔཊིཔཏྟིཔཊིཝེདྷསངྑཱཏེ ཏིཝིདྷསཱསནེ ཡུཉྫཐ ཡོགཾ ཀརོཐ. ཨེཝམནུཡུཉྫནྟཱ མཙྩུནོ སེནཾ དྷུནཱཐ ཝིདྡྷཾསེཐ. ཏཏྠ མཙྩུནོ སེནནྟི –

‘‘ཀཱམཱ ཏེ པཋམཱ སེནཱ, དུཏིཡཱ ཨརཏི ཝུཙྩཏི;

ཏཏིཡཱ ཁུཔྤིཔཱསཱ ཏེ, ཙཏུཏྠཱི ཏཎྷཱ པཝུཙྩཏི.

‘‘པཉྩམཾ ཐིནམིདྡྷཾ ཏེ, ཚཊྛཱ བྷཱིརཱུ པཝུཙྩཏི;

སཏྟམཱི ཝིཙིཀིཙྪཱ ཏེ, མཀྑོ ཐམྦྷོ ཏེ ཨཊྛམོ.

‘‘ལཱབྷོ ¶ སིལོཀོ སཀྐཱརོ,

མིཙྪཱལདྡྷོ ཙ ཡོ ཡསོ;

ཡོ ཙཏྟཱནཾ སམུཀྐཾསེ,

པརེ ཙ ཨཝཛཱནཱཏི.

‘‘ཨེསཱ ནམུཙི ཏེ སེནཱ, ཀཎྷསྶཱབྷིཔྤཧཱརིནཱི;

ན ནཾ ཨསཱུརོ ཛིནཱཏི, ཛེཏྭཱ ཙ ལབྷཏེ སུཁ’’ནྟི. (སུ. ནི. ༤༣༨-༤༤༡) –

ཨེཝམཱགཏཾ ཀཱམཱདིབྷེདཾ མཙྩུནོ སེནཾ. ཨེཏྠ ཙ ཡསྨཱ ཨཱདིཏོཝ ཨགཱརིཡབྷཱུཏེ སཏྟེ ཝཏྠུཀཱམེསུ ཀིལེསཀཱམཱ མོསཡནྟི, ཏེ ཨབྷིབྷུཡྻ ཨནགཱརིཡབྷཱཝཾ ཨུཔགཏཱནཾ པནྟེསུ སེནཱསནེསུ ཨཉྙཏརཉྙཏརེསུ ཝཱ ཨདྷིཀུསལེསུ དྷམྨེསུ ཨརཏི ཨུཔྤཛྫཏི. ཝུཏྟཉྷེཏཾ – ‘‘པབྦཛིཏེན ཁོ, ཨཱཝུསོ, ཨབྷིརཏི དུཀྐརཱ’’ཏི (སཾ. ནི. ༤.༣༣༡). ཏཏོ ཏེ པརཔྤཊིབདྡྷཛཱིཝིཀཏྟཱ ཁུཔྤིཔཱསཱ བཱདྷཏི, ཏཱཡ བཱདྷིཏཱནཾ པརིཡེསནཏཎྷཱ ཙིཏྟཾ ཀིལམཡཏི. ཨཐ ནེསཾ ཀིལནྟཙིཏྟཱནཾ ཐིནམིདྡྷཾ ཨོཀྐམཏི, ཏཏོ ཝིསེསམནདྷིགཙྪནྟཱནཾ དུརབྷིསམྦྷཝེསུ ཨརཉྙཝནཔཏྠེསུ པནྟེསུ སེནཱསནེསུ ཝིཧརཏཾ ཨུཏྲཱསསཉྙིཏཱ བྷཱིརུ ཛཱཡཏི. ཏེསཾ ཨུསྶངྐིཏཔརིསངྐིཏཱནཾ དཱིགྷརཏྟཾ ཝིཝེཀརསམནསྶཱདཡམཱནཱནཾ ཝིཧརཏཾ ‘‘ན སིཡཱ ནུ ཁོ ཨེས མགྒོ’’ཏི པཊིཔཏྟིཡཾ ཝིཙིཀིཙྪཱ ཨུཔྤཛྫཏི. ཏཾ ཝིནོདེཏྭཱ ཝིཧརཏཾ ཨཔྤམཏྟཀེན ཝིསེསཱདྷིགམེན མཱནམཀྑཐམྦྷཱ ཛཱཡནྟི. ཏེཔི ཝིནོདེཏྭཱ ཝིཧརཏཾ ཏཏོ ཨདྷིཀཏརཾ ཝིསེསཱདྷིགམནཾ ¶ ནིསྶཱཡ ལཱབྷསཀྐཱརསིལོཀཱ ཨུཔྤཛྫནྟི. ལཱབྷཱདཱིཧི མུཙྪིཏྭཱ དྷམྨཔྤཏིརཱུཔཀཱནི པཀཱསེནྟོ མིཙྪཱཡསཾ ཨདྷིགནྟྭཱ ཏཏྠ ཋིཏཱ ཛཱཏིཨཱདཱིཧི ཨཏྟཱནཾ ཨུཀྐཾསེནྟི, པརཾ ཝམྦྷེནྟི, ཏསྨཱ ཀཱམཱདཱིནཾ པཋམསེནཱདིབྷཱཝོ ཝེདིཏབྦོ. ནལཱ༹གཱརནྟི ནལེ༹ཧི ཝིནདྡྷཏིཎཙྪནྣགེཧཾ.

ཝིཧསྶཏཱིཏི ཨུགྒཧཎསཛ྄ཛྷཱཡནམནསིཀཱརཱདཱིཧི ཝིཧརིསྶཏི. ཛཱཏིསཾསཱརནྟི པུནཔྤུནཾ ཛཱཏིསངྑཱཏསཾསཱརཝཊྚཾ. དུཀྑསྶནྟཾ ཀརིསྶཏཱིཏི དུཀྑསྶ ཨནྟསངྑཱཏཾ ནིབྦཱནཾ སཙྪིཀརིསྶཏི. པལཱལཔུཉྫཱཧནྟི པལཱལཔུཉྫཾ ཨཧནྟི པདཙྪེདོ. ཏཏིཡཾ ཋཱནནྟི ཨནཱགཱམིཕལཾ སནྡྷཱཡ ཝདཏི.

ཏིཝསྶབྷིཀྑུཀཱལེཏི ཨུཔསམྤདཏོ ཏཱིཎི ཝསྶཱནི ཨསྶཱཏི ཏིཝསྶོ, ཏིཝསྶོ ཙ སོ བྷིཀྑུ ཙཱཏི ཏིཝསྶབྷིཀྑུ, ཏསྶ, ཏེན ཝཱ ¶ ཨུཔལཀྑིཏོ ཀཱལོ ཏིཝསྶབྷིཀྑུཀཱལོ, ཏསྨིཾ. ཡདཱ སོ ཏིཝསྶོ བྷིཀྑུ ནཱམ ཧོཏི, ཏདཱཏི ཝུཏྟཾ ཧོཏི. ཀམྨཾ ཀརོཏཱིཏི བྷཱཝནཱཀམྨཾ ཀརོཏི. གནྠཀམྨནྟི གནྠཝིསཡཾ ཨུགྒཧཎཱདིཀམྨཾ. པིཎྜཱཔཙིཏིཾ ཀཏྭཱཏི ཨནྟོཝསྶེ ཏེམཱསཾ དིནྣཔིཎྜསྶ ཀིལེསཀྑཡཀརཎེན ཨཔཙིཏིཾ པཱུཛཾ ཀཏྭཱ. པིཎྜཱཔཙིཏིཾ ཀརོནྟོ ཧི བྷིཀྑུ ཡེཧི ཨཏྟནོ ཡོ པིཎྜཔཱཏོ དིནྣོ, ཏེསཾ ཏསྶ མཧཔྥལབྷཱཝཾ ཨིཙྪནྟོ ཨཏྟནོ སནྟཱནམེཝ ཀིལེསཀྑཡཀརཎེན ཝིསོདྷེཏྭཱ ཨརཧཏྟཾ གཎྷཱཏི.

མཧཱབྷཱུཏཱིཏི ཨེཏྠ པཱུཛཱཝཙནོ མཧནྟསདྡོ, བྷཱུཏཱིཏི ཙ ནཱམེཀདེསེན ཏིསྶབྷཱུཏིཏྠེརཾ ཨཱལཔཏི. བྷཝཏི ཧི ནཱམེཀདེསེནཔི ཝོཧཱརོ ཡཐཱ ‘‘དེཝདཏྟོ དཏྟོ’’ཏི. མཧཱབྷཱུཏཱིཏི ཝཱ པིཡསམུདཱཧཱརོ, སོ མཧཏི བྷཱུཏི ཝིབྷཱུཏི པུཉྙཉཱཎཱདིསམྤདཱ ཨསྶཱཏི མཧཱབྷཱུཏི. ཚནྣཾ སེཔཎྞིགཙྪམཱུལནྟི སཱཁཱཔལཱསཱདཱིཧི ཚནྣཾ གྷནཙྪཱཡཾ སེཔཎྞིགཙྪམཱུལཾ. ཨསུབྷཀམྨཊྛཱནཾ པཱདཀཾ ཀཏྭཱཏི ཀེསཱདིཨསུབྷཀོཊྛཱསབྷཱཝནཱཡ པཊིལདྡྷཾ ཨུཔཙཱརསམཱདྷིཾ ཨཔྤནཱསམཱདྷིཾ ཝཱ པཱདཀཾ ཀཏྭཱ. ཨསུབྷཝིསཡཾ ཨུཔཙཱརཛ྄ཛྷཱནཱདིཀམྨམེཝེཏྠ ཨུཔརི པཝཏྟེཏབྦབྷཱཝནཱཀམྨསྶ ཀཱརཎབྷཱཝཏོ ཋཱནནྟི ཀམྨཊྛཱནཾ.

སཧསྶདྭིསཧསྶསངྑཱམཏྟཏྟཱ ‘‘མཧཱགཎེ’’ཏི ཝུཏྟཾ. ཨཏྟནོ ཝསནཊྛཱནཏོ ཐེརསྶ སནྟིཀཾ གནྟྭཱཏི ཨཏྟནོ ཝསནཊྛཱནཏོ ཨཱཀཱསེན གནྟྭཱ ཝིཧཱརསམཱིཔེ ཨོཏརིཏྭཱ དིཝཱཊྛཱནེ ནིསིནྣཏྠེརསྶ སནྟིཀཾ གནྟྭཱ. ཀིཾ ཨཱགཏོསཱིཏི ཀིཾཀཱརཎཱ ཨཱགཏོསི. སབྦེསུ རཏྟིདིཝསབྷཱགེསུ ཨོཀཱསཾ ཨལབྷནྟོཏི སོ ཀིར ཐེརོ ‘‘ཏུཡ྄ཧཾ ཨོཀཱསོ ན བྷཝིསྶཏི, ཨཱཝུསོ’’ཏི ¶ ཝུཏྟེཔི ‘‘ཝིཏཀྐམཱལ༹ཀེ ཋིཏཀཱལེ པུཙྪིསྶཱམི, བྷནྟེ’’ཏི ཝཏྭཱ ‘‘ཏསྨིཾ ཋཱནེ ཨཉྙེ པུཙྪིསྶནྟཱི’’ཏི ཝུཏྟེ ‘‘བྷིཀྑཱཙཱརམགྒེ, བྷནྟེ’’ཏི ཝཏྭཱ ‘‘ཏཏྲཱཔི ཨཉྙེ པུཙྪནྟཱི’’ཏི ཝུཏྟེ དུཔཊྚནིཝཱསནཊྛཱནེ, སངྒྷཱཊིཔཱརུཔནཊྛཱནེ, པཏྟནཱིཧརཎཊྛཱནེ, གཱམེ ཙརིཏྭཱ ཨཱསནསཱལཱཡ ཡཱགུཔཱིཏཀཱལེ, བྷནྟེཏི. ཏཏྠཱཔི ཐེརཱ ཨཏྟནོ ཀངྑཾ ཝིནོདེནྟི, ཨཱཝུསོཏི. ཨནྟོགཱམཏོ ནིཀྑམནཀཱལེ པུཙྪིསྶཱམི, བྷནྟེཏི. ཏཏྲཱཔི ཨཉྙེ པུཙྪནྟི, ཨཱཝུསོཏི. ཨནྟརཱམགྒེ, བྷནྟེཏི. བྷོཛནསཱལཱཡ བྷཏྟཀིཙྩཔརིཡོསཱནེ, བྷནྟེ. དིཝཱཊྛཱནེ པཱདདྷོཝནཀཱལེ, བྷནྟེཏི. ཏཏོ པཊྛཱཡ ¶ ཡཱཝ ཨརུཎཱ ཨཔརེ པུཙྪནྟི, ཨཱཝུསོཏི. དནྟཀཊྛཾ གཧེཏྭཱ མུཁདྷོཝནཏྠཾ གམནཀཱལེ, བྷནྟེཏི. ཏདཱཔི ཨཉྙེ པུཙྪནྟཱིཏི. མུཁཾ དྷོཝིཏྭཱ ཨཱགམནཀཱལེ, བྷནྟེཏི. ཏཏྲཱཔི ཨཉྙེ པུཙྪིསྶནྟཱིཏི. སེནཱསནཾ པཝིསིཏྭཱ ནིསིནྣཀཱལེ, བྷནྟེཏི. ཏཏྲཱཔི ཨཉྙེ པུཙྪནྟི, ཨཱཝུསོཏི. ཨེཝཾ སབྦེསུ རཏྟིདིཝསབྷཱགེསུ ཡཱཙམཱནོ ཨོཀཱསཾ ན ལབྷི, ཏཾ སནྡྷཱཡེཏཾ ཝུཏྟཾ – ‘‘ཨེཝཾ ཨོཀཱསེ ཨསཏི མརཎསྶ ཀཐཾ ཨོཀཱསཾ ལབྷིསྶཐཱ’’ཏི. བྷནྟེ, ནནུ མུཁཾ དྷོཝིཏྭཱ སེནཱསནཾ པཝིསིཏྭཱ ཏཡོ ཙཏྟཱརོ པལླངྐེ ཨུཎྷཱཔེཏྭཱ ཡོནིསོམནསིཀཱརཀམྨཾ ཀརོནྟཱནཾ ཨོཀཱསལཱབྷེན བྷཝིཏབྦཾ སིཡཱཏི ཨདྷིཔྤཱཡེན ཝདཏི. མཎིཝཎྞེཏི ཨིནྡནཱིལམཎིཝཎྞེ.

གྷཊེནྟསྶེཝཱཏི ཝཱཡཱམནྟསྶེཝ. ཝིསུདྡྷིཔཝཱརཎནྟི ‘‘པརིསུདྡྷོ ཨཧ’’ནྟི ཨེཝཾ པཝཏྟཾ ཝིསུདྡྷིཔཝཱརཎཾ. ཨརཧནྟཱནམེཝ ཧེསཱ པཝཱརཎཱ. ཀཱལ༹ཀཾ ཝཱཏི མཧནྟཾ ཀཱལ༹ཀཾ སནྡྷཱཡ ཝདཏི, ཏིལཀོ ཝཱཏི ཁུདྡཀཾ སནྡྷཱཡ. ཨུབྷཡེནཔི སཱིལསྶ པརིསུདྡྷབྷཱཝམེཝ ཝིབྷཱཝེཏི.

པདྷཱནཀམྨིཀཱཏི པདྷཱནཀམྨེ ནིཡུཏྟཱ. ལདྡྷམགྒནྟི ལདྡྷཱུཔཱཡཾ, པཋམམེཝ ལདྡྷཱུཔདེསནྟི ཝུཏྟཾ ཧོཏི. ཨཔཏྟཱནཱིཏི ཚཌྜིཏཱནི. ཨལཱབཱུནེཝ སཱརདེཏི སརདཀཱལེ ཝཱཏཱཏཔཧཏཱནི ཏཏྠ ཏཏྠ ཝིཔྤཀིཎྞཨལཱབཱུནི ཝིཡ. ཀཱཔོཏཀཱནཱིཏི ཀཔོཏཀཝཎྞཱནི. ཏཱནི དིསྭཱན ཀཱ རཏཱིཏི ཏཱནི ཨེཝརཱུཔཱནི ཨཊྛཱིནི དིསྭཱ ཏུམྷཱཀཾ ཀཱ ནཱམ རཏི, ནནུ ཨཔྤམཏྟཀཱཔི རཏི ཀཱཏུཾ ན ཝཊྚཏིཡེཝཱཏི ཨཏྠོ. དུཏིཡཀཐཾ ཨཀཐིཏཔུབྦོཏི ཨཏྟནོ ཝུཌྜྷཏརེན སདྡྷིཾ ཝུཏྟཝཙནསྶ པཙྩནཱིཀཾ དུཏིཡཀཐཾ ཨཀཐིཏཔུབྦོ.

ཏདངྒེན, ཏདངྒསྶ པཧཱནཾ ཏདངྒཔྤཧཱནཾ. ཡཉྷི རཏྟིབྷཱགེ སམུཛྫལིཏེན དཱིཔེན ཨནྡྷཀཱརསྶ ཝིཡ ཏེན ཏེན ཝིཔསྶནཱཡ ཨཝཡཝབྷཱུཏེན ཉཱཎངྒེན པཊིཔཀྑཝསེནེཝ ཏསྶ ཏསྶ པཧཱཏབྦདྷམྨསྶ པཧཱནམིདཾ ཏདངྒཔྤཧཱནཾ ནཱམ. ཡཐཱ ཀཱམཙྪནྡཱདཡོ ན ཙིཏྟཾ པརིཡུཊྛཱཡ ཏིཊྛནྟི, ཨེཝཾ པརིཡུཊྛཱནསྶ ནིསེདྷནཾ ཨཔྤཝཏྟིཀརཎཾ ཝིཀྑམྦྷནཾ ཝིཀྑམྦྷནཔྤཧཱནཾ. ཡཉྷི ¶ སསེཝཱལེ ཨུདཀེ པཀྑིཏྟེན གྷཊེན སེཝཱལསྶ ཝིཡ ཏེན ཏེན ལོཀིཡསམཱདྷིནཱ ནཱིཝརཎཱདཱིནཾ པཙྩནཱིཀདྷམྨཱནཾ ཝིཀྑམྦྷནམིདཾ ཝིཀྑམྦྷནཔྤཧཱནཾ ནཱམ. སམྨཱ ཨུཔཙྪིཛྫནྟི ཨེཏེན ཀིལེསཱཏི སམུཙྪེདོ, པཧཱིཡནྟི ཨེཏེན ཀིལེསཱཏི པཧཱནཾ, སམུཙྪེདསངྑཱཏཾ ¶ པཧཱནཾ ནིརཝསེསཔྤཧཱནནྟི སམུཙྪེདཔྤཧཱནཾ. ཡཉྷི ཨསནིཝིཙཀྐཱབྷིཧཏསྶ རུཀྑསྶ ཝིཡ ཨརིཡམགྒཉཱཎེན སཾཡོཛནཱདཱིནཾ དྷམྨཱནཾ ཡཐཱ ན པུན ཝཏྟནྟི, ཨེཝཾ པཧཱནམིདཾ སམུཙྪེདཔྤཧཱནཾ ནཱམ. པཊིཔྤསྶམྦྷཏི ཝཱུཔསམྨཏི ཀིལེསདརཐོ ཨེཏཱཡཱཏི པཊིཔྤསྶདྡྷི, ཕལཾ, སཱཡེཝ པཧཱནནྟི པཊིཔྤསྶདྡྷིཔྤཧཱནཾ. སབྦེ ཀིལེསཱ སབྦསངྑཏཱ ཝཱ ནིསྶརནྟི ཨཔགཙྪནྟི ཨེཏེནཱཏི ནིསྶརཎཾ, ནིབྦཱནཾ, ཏདེཝ པཧཱནནྟི ནིསྶརཎཔྤཧཱནཾ. པཊིཔྤསྶམྦྷཡམཱནནྟི པཊིཔྤསྶམྦྷཾ ཀིལེསཝཱུཔསམཾ ཀུརུམཱནཾ. ལོཀིཡལོཀུཏྟརེཧཱིཏི ཏདངྒཝིཀྑམྦྷནཔྤཧཱནཱནཾ ལོཀིཡཏྟཱ, ཨིཏརེསཾ ལོཀུཏྟརཏྟཱ ཝུཏྟཾ.

ནིམཱིཡཏི ཕལཾ ཨེཏེན ཨུཔྤཛྫནཊྛཱནེ པཀྑིཔམཱནཾ ཝིཡ ཧོཏཱིཏི ནིམིཏྟཾ, ཀཱརཎསྶེཏཾ ཨདྷིཝཙནཾ. ཨསུབྷསྶ ནིམིཏྟཾ, ཨསུབྷམེཝ ཝཱ ནིམིཏྟནྟི ཨསུབྷནིམིཏྟཾ. ཨསུབྷནིསྶིཏམྤི ཧི ཛྷཱནཾ ནིསྶིཏེ ནིསྶཡཝོཧཱརེན ཨསུབྷནྟི ཝོཧརཱིཡཏི ཡཐཱ ‘‘མཉྩཱ ཨུཀྐུཊྛིཾ ཀརོནྟཱི’’ཏི. ཏེནེཝཱཧ – ‘‘དསསུ ཨསུབྷེསུ ཨུཔྤནྣཾ སཱརམྨཎཾ པཋམཛ྄ཛྷཱན’’ནྟི. ཨནིཙྩེ ཨནིཙྩནྟིཨཱདིནཱ ནཡེན ཝུཏྟསྶཱཏི ཨིམིནཱ ཙཏུབྦིདྷཾ ཡོནིསོམནསིཀཱརཾ དསྶེཏི. ཧེཊྛཱ ཙེཏྠ ཨིདྷ ཙ ཙཏུབྦིདྷསྶ ཨཡོནིསོམནསིཀཱརསྶ ཡོནིསོམནསིཀཱརསྶ ཙ གཧཎཾ ནིརཝསེསདསྶནཏྠཾ ཀཏནྟི དཊྛབྦཾ. ཏེསུ པན ཨསུབྷེ ‘‘ཨསུབྷ’’ནྟི མནསིཀཱརོ ཨིདྷཱདྷིཔྤེཏོ, ཏདནུཀཱུལཏྟཱ ཝཱ ཨིཏརེསམྤི གཧཎཾ དཊྛབྦཾ.

ཨེཀཱདསསུ ཨསུབྷེསུ པཊིཀཱུལཱཀཱརསྶ ཨུགྒཎྷནཾ, ཡཐཱ ཝཱ ཏཏྠ ཨུགྒཧནིམིཏྟཾ ཨུཔྤཛྫཏི, ཏཐཱ པཊིཔཏྟི ཨསུབྷནིམིཏྟསྶ ཨུགྒཧོ. ཨུཔཙཱརཔྤནཱཝཧཱཡ ཨསུབྷབྷཱཝནཱཡ ཨནུཡུཉྫནཾ ཨསུབྷབྷཱཝནཱནུཡོགོ. བྷོཛནེ མཏྟཉྙུནོ ཐིནམིདྡྷཱབྷིབྷཝཱབྷཱཝཱ ཨོཏཱརཾ ཨལབྷམཱནོ ཀཱམཙྪནྡོ པཧཱིཡཏཱིཏི ཝདནྟི. བྷོཛནནིསྶིཏཾ པན ཨཱཧཱརེ པཊིཀཱུལསཉྙཾ, ཏབྦིཔརིཎཱམསྶ ཏདཱདྷཱརསྶ ཏསྶ ཙ ཨུདརིཡབྷཱུཏསྶ ཨསུབྷཏཱདསྶནཾ, ཀཱཡསྶ ཙ ཨཱཧཱརཊྛིཏིཀཏཱདསྶནཾ ཡོ ཨུཔྤཱདེཏི, སོ ཝིསེསཏོ བྷོཛནེ པམཱཎཉྙཱུ ནཱམ, ཏསྶ ཙ ཀཱམཙྪནྡོ པཧཱིཡཏེཝ. དསཝིདྷཉྷི ཨསུབྷནིམིཏྟནྟི པཱཀཊཝསེན ཝུཏྟཾ. ཀཱཡགཏཱསཏིཾ པན གཧེཏྭཱ ཨེཀཱདསཝིདྷམྤི ཨསུབྷནིམིཏྟཾ ཝེདིཏབྦཾ.

ཨབྷུཏྭཱ ཨུདཀཾ པིཝེཏི པཱནཱིཡསྶ ཨོཀཱསདཱནཏྠཾ ཙཏྟཱརོ པཉྩ ཨཱལོཔེ ཨབྷུཏྭཱ པཱནཱིཡཾ ¶ པིཝེཡྻཱཏི ཨཏྠོ. ཏེན ཝུཏྟཾ – ‘‘ཙཏུནྣཾ ¶ པཉྩནྣཾ ཨཱལོཔཱནཾ ཨོཀཱསེ སཏཱི’’ཏི. ཨབྷིདྷམྨཊཱིཀཱཀཱརེན པནེཏྠ ‘‘ཙཏྟཱརོ པཉྩ ཨཱལོཔེ, བྷུཏྭཱན ཨུདཀཾ པིཝེ’’ཏི པཱཋཾ པརིཀཔྤེཏྭཱ ཨཉྙཐཱ ཨཏྠོ ཝཎྞིཏོ, སོ ཨཊྛཀཐཱཡ ན སམེཏི. ཨསུབྷཀམྨིཀཏིསྶཏྠེརོ དནྟཊྛིདསྶཱཝཱི.

༡༧. སཏྟམེ མིཛྫཏི ཧིཏཕརཎཝསེན སིནིཡ྄ཧཏཱིཏི མིཏྟོ, ཧིཏེསཱི པུགྒལོ, ཏསྨིཾ མིཏྟེ བྷཝཱ, མིཏྟསྶ ཝཱ ཨེསཱཏི མེཏྟཱ, ཧིཏེསིཏཱ. ཏཏྠ ‘‘མེཏྟཱ’’ཏི ཝུཏྟེ ཨཔྤནཱཔི ཨུཔཙཱརོཔི ཝཊྚཏི སཱདྷཱརཎཝཙནབྷཱཝཏོཏི ཨཱཧ – ‘‘མེཏྟཱཏི ཨེཏྟཱཝཏཱ པུབྦབྷཱགོཔི ཝཊྚཏཱི’’ཏི. ཨཔི-སདྡོ ཨཔྤནཾ སམྤིཎྜེཏི. ཨཔྤནཾ ཨཔྤཏྟཱཡ མེཏྟཱཡ སུཊྛུ མུཙྩནསྶ ཨབྷཱཝཏོ ཙེཏོཝིམུཏྟཱིཏི ‘‘ཨཔྤནཱཝ ཨདྷིཔྤེཏཱ’’ཏི ཝུཏྟཾ.

སཏྟེསུ མེཏྟཱཡནསྶ ཧིཏཱུཔསཾཧཱརསྶ ཨུཔྤཱདནཾ པཝཏྟནཾ མེཏྟཱནིམིཏྟསྶ ཨུགྒཧོ. པཋམུཔྤནྣོ མེཏྟཱམནསིཀཱརོ པརཏོ ཨུཔྤཛྫནཀསྶ ཀཱརཎབྷཱཝཏོ མེཏྟཱམནསིཀཱརོཝ མེཏྟཱནིམིཏྟཾ. ཀམྨཾཡེཝ སཀཾ ཨེཏེསནྟི ཀམྨསྶཀཱ, སཏྟཱ, ཏབྦྷཱཝོ ཀམྨསྶཀཏཱ, ཀམྨདཱཡཱདཏཱ. དོསམེཏྟཱསུ ཡཱཐཱཝཏོ ཨཱདཱིནཝཱནིསཾསཱནཾ པཊིསངྑཱནཝཱིམཾསཱ ཨིདྷ པཊིསངྑཱནཾ. མེཏྟཱཝིཧཱརཱིཀལྱཱཎམིཏྟཝནྟཏཱ ཨིདྷ ཀལྱཱཎམིཏྟཏཱ. ཨོདིསྶཀཨནོདིསྶཀདིསཱཕརཎཱནནྟི ཨཏྟཨཏིཔིཡམཛ྄ཛྷཏྟཝེརིཝསེན ཨོདིསྶཀཏཱ, སཱིམཱསམྦྷེདེ ཀཏེ ཨནོདིསྶཀཏཱ, ཨེཀཱདིདིསཱཕརཎཝསེན དིསཱཕརཎཏཱ མེཏྟཱཡ ཨུགྒཧཎེ ཝེདིཏབྦཱ. ཝིཧཱརརཙྪགཱམཱདིཝསེན ཝཱ ཨོདིསྶཀདིསཱཕརཎཾ. ཝིཧཱརཱདིཨུདྡེསརཧིཏཾ པུརཏྠིམཱདིདིསཱཝསེན ཨནོདིསྶཀདིསཱཕརཎཾ. ཨེཝཾ ཝཱ དྭིདྷཱ ཨུགྒཧཎཾ སནྡྷཱཡ – ‘‘ཨོདིསྶཀཨནོདིསྶཀདིསཱཕརཎ’’ནྟི ཝུཏྟཾ. ཨུགྒཧོ ཙ ཡཱཝ ཨུཔཙཱརཱ དཊྛབྦོ. ཨུགྒཧིཏཱཡ ཨཱསེཝནཱ བྷཱཝནཱ. ཏཏྠ སབྦེ སཏྟཱ, པཱཎཱ, བྷཱུཏཱ, པུགྒལཱ, ཨཏྟབྷཱཝཔརིཡཱཔནྣཱཏི ཨེཏེསཾ ཝསེན པཉྩཝིདྷཱ. ཨེཀེཀསྨིཾ ཨཝེརཱ ཧོནྟུ, ཨབྱཱཔཛ྄ཛྷཱ, ཨནཱིགྷཱ, སུཁཱི ཨཏྟཱནཾ པརིཧརནྟཱུཏི ཙཏུདྷཱ པཝཏྟིཏོ ཝཱིསཏིཝིདྷཱ ཨནོདྷིསོཕརཎཱ མེཏྟཱ. སབྦཱ ཨིཏྠིཡོ, པུརིསཱ, ཨརིཡཱ, ཨནརིཡཱ, དེཝཱ, མནུསྶཱ, ཝིནིཔཱཏིཀཱཏི སཏྟཱདྷིཀརཎཝསེན པཝཏྟཱ སཏྟཝིདྷཱ ཨཊྛཝཱིསཏིཝིདྷཱ ཝཱ, དསཧི དིསཱཧི དིསཱདྷིཀརཎཝསེན པཝཏྟཱ དསཝིདྷཱ ཙ, ཨེཀེཀཱཡ ¶ ཝཱ དིསཱཡ སཏྟཱདིཨིཏྠཱདིཨཝེརཱདིབྷེདེན ཨསཱིཏཱདྷིཀཙཏུསཏཔྤབྷེདཱ ཙ ཨོདྷིསོཕརཎཱ ཝེདིཏབྦཱ. མེཏྟཾ བྷཱཝེནྟསྶཱཏི མེཏྟཱཛྷཱནཾ བྷཱཝེནྟསྶ. ཏྭཾ ཨེཏསྶ ཀུདྡྷོཏིཨཱདི པཙྩཝེཀྑཎཱཝིདྷིདསྶནཾ. ཨཔྤཊིཙྪིཏཔཧེཎཀཾ ཝིཡཱཏི ཨསམྤཊིཙྪིཏཔཎྞཱཀཱརཾ ཝིཡ. པཊིསངྑཱནེཏི ཝཱིམཾསཱཡཾ. ཝཏྟནིཨཊཝིཡཾ ཨཏྟགུཏྟཏྠེརསདིསེ.

༡༨. ཨཊྛམེ ¶ ཀུསལདྷམྨསམྤཊིཔཏྟིཡཱ པཊྛཔནསབྷཱཝཏཱཡ ཏཔྤཊིཔཀྑཱནཾ ཝིསོསནསབྷཱཝཏཱཡ ཙ ཨཱརམྦྷདྷཱཏུཨཱདིཏོ པཝཏྟཝཱིརིཡནྟི ཨཱཧ – ‘‘པཋམཱརམྦྷཝཱིརིཡ’’ནྟི. ཡསྨཱ པཋམཱརམྦྷམཏྟསྶ ཀོསཛྫཝིདྷམནཾ ཐཱམགམནཉྩ ནཏྠི, ཏསྨཱ ཝུཏྟཾ – ‘‘ཀོསཛྫཏོ ནིཀྑནྟཏྟཱ ཏཏོ བལཝཏར’’ནྟི. ཡསྨཱ པན ཨཔརཱཔརུཔྤཏྟིཡཱ ལདྡྷཱསེཝནཾ ཨུཔརཱུཔརི ཝིསེསཾ ཨཱཝཧནྟཾ ཨཏིཝིཡ ཐཱམགཏམེཝ ཧོཏི, ཏསྨཱ ཝུཏྟཾ – ‘‘པརཾ པརཾ ཋཱནཾ ཨཀྐམནཏོ ཏཏོཔི བལཝཏར’’ནྟི. པནཱུདནཱཡཱཏི ནཱིཧརཎཱཡ. ཡཐཱ མཧཏོ པལིགྷསྶ ཨུགྒྷཱཊཀཛནསྶ མཧནྟོ ཨུསྶཱཧོ ཨིཙྪིཏབྦོ, ཨེཝམིདྷཱཔཱིཏི ‘‘ནིཀྐམོ ཙེཏསོ པལིགྷུགྒྷཱཊནཱཡཱ’’ཏི ཝུཏྟཾ. མཧཱཔརཀྐམོ ཨེཝ པརེན ཀཏཾ བནྡྷནཾ ཚིནྡེཡྻ, ཨེཝམིདྷཱཔཱིཏི ཝུཏྟཾ – ‘‘པརཀྐམོ ཙེཏསོ བནྡྷནཙྪེདནཱཡཱ’’ཏི.

ཨཱརདྡྷཾ སཾསཱདྷིཏཾ པརིཔཱུརིཏཾ ཝཱིརིཡཾ ཨེཏསྶཱཏི ཨཱརདྡྷཝཱིརིཡོ, ནིཔྥནྣཝཱིརིཡོ, ཨཱརདྡྷཾ པཊྛཔིཏཾ ཝཱིརིཡཾ ཨེཏསྶཱཏི ཨཱརདྡྷཝཱིརིཡོ. ཝཱིརིཡཱརམྦྷཔྤསུཏོཏི ཨཱཧ – ‘‘ཨཱརདྡྷཝཱིརིཡསྶཱཏི པརིཔུཎྞཝཱིརིཡསྶཙེཝ པགྒཧིཏཝཱིརིཡསྶ ཙཱ’’ཏི. ཙཏུདོསཱཔགཏནྟི ཨཏིལཱིནཏཱདཱིཧི ཙཏཱུཧི དོསེཧི ཨཔགཏཾ. ཙཏུདོསཱཔགཏཏྟམེཝ ཝིབྷཱཝེཏི ‘‘ན ཙ ཨཏིལཱིན’’ནྟིཨཱདིནཱ. ཨཏིལཱིནཉྷི བྷཱཝནཱཙིཏྟཾ ཀོསཛྫཔཀྑིཀཾ སིཡཱ, ཨཏིཔགྒཧིཏཉྩ ཨུདྡྷཙྩཔཀྑིཀཾ. བྷཱཝནཱཝཱིཐིཾ ཨནཛ྄ཛྷོགཱཧེཏྭཱ སངྐོཙཱཔཏྟི ཨཏིལཱིནཏཱ. ཨཛ྄ཛྷོགཱཧེཏྭཱ ཨནྟོསངྐོཙོ ཨཛ྄ཛྷཏྟཾ སཾཁིཏྟཏཱ. ཨཏིཔགྒཧིཏཏཱ ཨཙྩཱརདྡྷཝཱིརིཡཏཱ. བཧིདྡྷཱ ཝིཀྑིཏྟཏཱ བཧིཝིསཊཝིཏཀྐཱནུདྷཱཝནཱ. ཏདེཏཾ ཝཱིརིཡཾ ཙངྐམཱདིཀཱཡིཀཔྤཡོགཱཝཧཾ ཀཱཡིཀཾ, ཏདཉྙཾ ཙེཏསིཀཾ. རཏྟིདིཝསྶ པཉྩ ཀོཊྛཱསེཏི པུབྦཎྷསཱཡནྷཔཋམམཛ྄ཛྷིམཔཙྪིམཡཱམསངྑཱཏེ པཉྩ ཀོཊྛཱསེ. ཏདུབྷཡམྤཱིཏི ཀཱཡིཀཾ ཙེཏསིཀཉྩ ཝཱིརིཡཾ. མིལཀྑཏིསྶཏྠེརསྶ མཧཱསཱིཝཏྠེརསྶ ཙ ཝཏྠུ ཧེཊྛཱ དསྶིཏམེཝ.

པཱིཏིམལླཀཏྠེརསྶ ¶ ཝཏྠུ པན ཨེཝཾ ཝེདིཏབྦཾ. སོ ཀིར གིཧིཀཱལེ མལླཡུདྡྷཱཡ ཨཱཧིཎྜནྟོ ཏཱིསུ རཛྫེསུ པཊཱཀཾ གཧེཏྭཱ ཏམྦཔཎྞིདཱིཔཾ ཨཱགམྨ རཱཛཱནཾ དིསྭཱ རཉྙཱ ཀཏཱནུགྒཧོ ཨེཀདིཝསཾ ཀིལཉྩཀཱསནསཱལཱདྭཱརེན གཙྪནྟོ ‘‘རཱུཔཾ, བྷིཀྑཝེ, ན ཏུམྷཱཀཾ, ཏཾ པཛཧཐ, ཏཾ ཝོ པཧཱིནཾ དཱིགྷརཏྟཾ ཧིཏཱཡ སུཁཱཡ བྷཝིསྶཏཱི’’ཏི (སཾ. ནི. ༣.༣༣-༣༤; ༤.༡༠༢; མ. ནི. ༡.༢༤༧) ནཏུམྷཱཀཝགྒཾ སུཏྭཱ ཙིནྟེསི – ‘‘ནེཝ ཀིར རཱུཔཾ ཨཏྟནོ, ན ཝེདནཱ’’ཏི. སོ ཏཾཡེཝ ཨངྐུསཾ ཀཏྭཱ ནིཀྑམིཏྭཱ མཧཱཝིཧཱརཾ གནྟྭཱ པབྦཛྫཾ ཡཱཙིཏྭཱ པབྦཛིཏོ ཨུཔསམྤནྣོ དྭེམཱཏིཀཱ པགུཎཾ ཀཏྭཱ ཏིཾས བྷིཀྑཱུ གཧེཏྭཱ ཨཝརཝཱལིཡཨངྒཎཾ གནྟྭཱ སམཎདྷམྨཾ ཨཀཱསི. པཱདེསུ ཨཝཧནྟེསུ ཛཎྞུཀེཧི ཙངྐམཏི. ཏམེནཾ ¶ རཏྟིཾ ཨེཀོ མིགལུདྡཀོ ‘‘མིགོ’’ཏི མཉྙམཱནོ པཧརི, སཏྟི ཝིནིཝིཛ྄ཛྷིཏྭཱ གཏཱ. སོ ཏཾ སཏྟིཾ ཧརཱཔེཏྭཱ པཧཱརམུཁཱནི ཏིཎཝཊྚིཡཱ པཱུརཱཔེཏྭཱ པཱསཱཎཔིཊྛིཡཾ ཨཏྟཱནཾ ནིསཱིདཱཔེཏྭཱ ཨོཀཱསཾ ཀཱརེཏྭཱ ཝིཔསྶནཾ ཝཌྜྷེཏྭཱ སཧ པཊིསམྦྷིདཱཧི ཨརཧཏྟཾ པཏྭཱ ཨུཀྐཱསིཏསདྡེན ཨཱགཏཱནཾ བྷིཀྑཱུནཾ བྱཱཀརིཏྭཱ ཨིམཾ ཨུདཱནཾ ཨུདཱནེསི –

‘‘བྷཱསིཏཾ བུདྡྷསེཊྛསྶ, སབྦལོཀགྒཝཱདིནོ;

ན ཏུམྷཱཀཾ ཨིདཾ རཱུཔཾ, ཏཾ ཛཧེཡྻཱཐ བྷིཀྑཝོ. (དཱི. ནི. ཨཊྛ. ༢.༣༧༣; མ. ནི. ཨཊྛ. ༡.༡༠༦);

‘‘ཨནིཙྩཱ ཝཏ སངྑཱརཱ, ཨུཔྤཱདཝཡདྷམྨིནོ;

ཨུཔྤཛྫིཏྭཱ ནིརུཛ྄ཛྷནྟི, ཏེསཾ ཝཱུཔསམོ སུཁོ’’ཏི. (དཱི. ནི. ཨཊྛ. ༢.༣༧༣; མ. ནི. ཨཊྛ. ༡.༡༠༦; ཐེརགཱ. ༡༡༦༨);

ཀུཊུམྦིཡཔུཏྟཏིསྶཏྠེརསྶཔི ཝཏྠུ ཨེཝཾ ཝེདིཏབྦཾ. སཱཝཏྠིཡཾ ཀིར ཏིསྶོ ནཱམ ཀུཊུམྦིཡཔུཏྟོ ཙཏྟཱལཱིས ཧིརཉྙཀོཊིཡོ པཧཱཡ པབྦཛིཏྭཱ ཨགཱམཀེ ཨརཉྙེ ཝིཧརཏི, ཏསྶ ཀནིཊྛབྷཱཏུབྷརིཡཱ ‘‘གཙྪཐ, ནཾ ཛཱིཝིཏཱ ཝོརོཔེཐཱ’’ཏི པཉྩསཏེ ཙོརེ པེསེསི, ཏེ གནྟྭཱ ཐེརཾ པརིཝཱརེཏྭཱ ནིསཱིདིཾསུ. ཐེརོ ཨཱཧ – ‘‘ཀསྨཱ ཨཱགཏཏྠ ཨུཔཱསཀཱ’’ཏི? ཏཾ ཛཱིཝིཏཱ ཝོརོཔེསྶཱམཱཏི. པཱཊིབྷོགཾ མེ ཨུཔཱསཀཱ གཧེཏྭཱ ཨཛྫེཀརཏྟིཾ ཛཱིཝིཏཾ དེཐཱཏི. ཀོ ཏེ, སམཎ, ཨིམསྨིཾ ཋཱནེ པཱཊིབྷོགོ བྷཝིསྶཏཱིཏི? ཐེརོ མཧནྟཾ པཱསཱཎཾ གཧེཏྭཱ ཨཱུརུཊྛཱིནི བྷིནྡིཏྭཱ ‘‘ཝཊྚཏི ཨུཔཱསཀཱ པཱཊིབྷོགོ’’ཏི ཨཱཧ. ཏེ ཨཔཀྐམིཏྭཱ ཙངྐམནསཱིསེ ཨགྒིཾ ཀཏྭཱ ནིཔཛྫིཾསུ. ཐེརསྶ ཝེདནཾ ཝིཀྑམྦྷེཏྭཱ ¶ སཱིལཾ པཙྩཝེཀྑཏོ པརིསུདྡྷསཱིལཾ ནིསྶཱཡ པཱིཏིཔཱམོཛྫཾ ཨུཔྤཛྫི. ཏཏོ ཨནུཀྐམེན ཝིཔསྶནཾ ཝཌྜྷེནྟོ ཏིཡཱམརཏྟིཾ སམཎདྷམྨཾ ཀཏྭཱ ཨརུཎུགྒམནེ ཨརཧཏྟཾ པཏྟོ ཨིམཾ ཨུདཱནཾ ཨུདཱནེསི –

‘‘ཨུབྷོ པཱདཱནི བྷིནྡིཏྭཱ, སཉྙཔེསྶཱམི ཝོ ཨཧཾ;

ཨཊྚིཡཱམི ཧརཱཡཱམི, སརཱགམརཎཾ ཨཧཾ.

‘‘ཨེཝཱཧཾ ཙིནྟཡིཏྭཱན, ཡཐཱབྷཱུཏཾ ཝིཔསྶིསཾ;

སམྤཏྟེ ཨརུཎུགྒམྷི, ཨརཧཏྟཾ ཨཔཱཔུཎི’’ནྟི. (ཝིསུདྡྷི. ༡.༢༠; དཱི. ནི. ཨཊྛ. ༢.༣༧༣; མ. ནི. ཨཊྛ. ༡.༡༠༦);

ཨཏིབྷོཛནེ ¶ ནིམིཏྟགྒཱཧོཏི ཨཏིབྷོཛནེ ཐིནམིདྡྷསྶ ནིམིཏྟགྒཱཧོ, ‘‘ཨེཏྟཀེ བྷུཏྟེ ཏཾ བྷོཛནཾ ཐིནམིདྡྷསྶ ཀཱརཎཾ ཧོཏི, ཨེཏྟཀེ ན ཧོཏཱི’’ཏི ཐིནམིདྡྷསྶ ཀཱརཎཱཀཱརཎགྒཱཧོ ཧོཏཱིཏི ཨཏྠོ. བྱཏིརེཀཝསེན ཙེཏཾ ཝུཏྟཾ, ཏསྨཱ ཨེཏྟཀེ བྷུཏྟེ ཏཾ བྷོཛནཾ ཐིནམིདྡྷསྶ ཀཱརཎཾ ན ཧོཏཱིཏི བྷོཛནེ མཏྟཉྙུཏཱཝ ཨཏྠཏོ དསྶིཏཱཏི དཊྛབྦཾ. ཏེནཱཧ – ‘‘ཙཏུཔཉྩ…པེ… ཏཾ ན ཧོཏཱི’’ཏི. དིཝཱ སཱུརིཡཱལོཀནྟི དིཝཱ གཧིཏནིམིཏྟཾ སཱུརིཡཱལོཀཾ རཏྟིཡཾ མནསིཀརོནྟསྶཔཱིཏི ཨེཝམེཏྠ ཨཏྠོ ཝེདིཏབྦོ. དྷུཏངྒཱནཾ ཝཱིརིཡནིསྶིཏཏྟཱ ཝུཏྟཾ – ‘‘དྷུཏངྒནིསྶིཏསཔྤཱཡཀཐཱཡཔཱི’’ཏི.

༡༩. ནཝམེ ཛྷཱནེན ཝཱ ཝིཔསྶནཱཡ ཝཱ ཝཱུཔསམིཏཙིཏྟསྶཱཏི ཛྷཱནེན ཝཱ ཝིཔསྶནཱཡ ཝཱ ཨཝཱུཔསམཀརཀིལེསཝིགམནེན ཝཱུཔསམིཏཙིཏྟསྶ. ཀུཀྐུཙྩམྤི ཀཏཱཀཏཱནུསོཙནཝསེན པཝཏྟམཱནཾ ཙེཏསོ ཨཝཱུཔསམཱཝཧཏཱཡ ཨུདྡྷཙྩེན སམཱནལཀྑཎནྟི ཨུབྷཡསྶ པཧཱནཀཱརཎཾ ཨབྷིནྣཾ ཀཏྭཱ ཝུཏྟཾ. བཧུསྶུཏསྶ གནྠཏོ ཨཏྠཏོ ཙ སུཏྟཱདཱིནི ཝིཙཱརེནྟསྶ ཏབྦཧུལཝིཧཱརིནོ ཨཏྠཝེདཱདིཔྤཊིལཱབྷསམྦྷཝཏོ ཝིཀྑེཔོ ན ཧོཏི. ཡཐཱ ཝིདྷིཔྤཊིཔཏྟིཡཱ ཡཐཱནུརཱུཔཔཏྟིཀཱརཔྤཝཏྟིཡཱ ཙ ཝིཀྑེཔོ ཙ ཀཏཱཀཏཱནུསོཙནཉྩ ན ཧོཏཱིཏི ‘‘བཱཧུསཙྩེནཔི ཨུདྡྷཙྩཀུཀྐུཙྩཾ པཧཱིཡཏཱི’’ཏི ཨཱཧ. ཡདགྒེན བཱཧུསཙྩེན ཨུདྡྷཙྩཀུཀྐུཙྩཾ པཧཱིཡཏི, ཏདགྒེན པརིཔུཙྪཀཏཱཝིནཡཔྤཀཏཉྙུཏཱཧིཔི ཏཾ པཧཱིཡཏཱིཏི དཊྛབྦཾ. ཝུདྡྷསེཝིཏཱ ཙ ཝུདྡྷསཱིལིཏཾ ཨཱཝཧཏཱིཏི ཙེཏསོ ཝཱུཔསམཀརཏྟཱ ‘‘ཨུདྡྷཙྩཀུཀྐུཙྩཔྤཧཱནཀཱརཱི’’ཏི ཝུཏྟཾ, ཝུདྡྷཏཾ པན ཨནཔེཀྑིཏྭཱ ཀུཀྐུཙྩཝིནོདཀཱ ཝིནཡདྷརཱ ཀལྱཱཎམིཏྟཱཏི ཝུཏྟཱཏི དཊྛབྦཾ. ཝིཀྑེཔོ ཙ པབྦཛིཏཱནཾ ཡེབྷུཡྻེན ¶ ཀུཀྐུཙྩཧེཏུཀོ ཧོཏཱིཏི ‘‘ཀཔྤིཡཱཀཔྤིཡཔརིཔུཙྪཱབཧུལསྶཱ’’ཏིཨཱདིནཱ ཝིནཡནཡེནེཝ པརིཔུཙྪཀཏཱདཡོ ནིདྡིཊྛཱ.

༢༠. དསམེ བཧུསྶུཏཱནཾ དྷམྨསབྷཱཝཱཝབོདྷསམྦྷཝཏོ ཝིཙིཀིཙྪཱ ཨནཝཀཱསཱ ཨེཝཱཏི ཨཱཧ – ‘‘བཱཧུསཙྩེནཔི…པེ… ཝིཙིཀིཙྪཱ པཧཱིཡཏཱི’’ཏི. ཀཱམཾ བཱཧུསཙྩཔརིཔུཙྪཀཏཱཧི སབྦཱཔི ཨཊྛཝཏྠུཀཱ ཝིཙིཀིཙྪཱ པཧཱིཡཏི, ཏཐཱཔི རཏནཏྟཡཝིཙིཀིཙྪཱམཱུལིཀཱ སེསཝིཙིཀིཙྪཱཏི ཨཱཧ – ‘‘ཏཱིཎི རཏནཱནི ཨཱརབྦྷ པརིཔུཙྪཱབཧུལསྶཔཱི’’ཏི. རཏནཏྟཡགུཎཱཝབོདྷེཧི ‘‘སཏྠརི ཀངྑཏཱི’’ཏིཨཱདིཝིཙིཀིཙྪཱཡ ཨསམྦྷཝོཏི. ཝིནཡེ པཀཏཉྙུཏཱ ‘‘སིཀྑཱཡ ཀངྑཏཱི’’ཏི (དྷ. ས. ༡༠༠༨; ཝིབྷ. ༩༡༥) ཝུཏྟཱཡ ཝིཙིཀིཙྪཱཡ པཧཱནཾ ཀརོཏཱིཏི ཨཱཧ – ‘‘ཝིནཡེ ཙིཎྞཝསཱིབྷཱཝསྶཔཱི’’ཏི. ཨོཀཔྤནིཡསདྡྷཱསངྑཱཏཨདྷིམོཀྑབཧུལསྶཱཏི སདྡྷེཡྻཝཏྠུནོ ཨནུཔྤཝིསནསདྡྷཱསངྑཱཏཨདྷིམོཀྑེན ཨདྷིམུཙྩནབཧུལསྶ. ཨདྷིམུཙྩནཉྩ ཨདྷིམོཀྑུཔྤཱདནམེཝཱཏི དཊྛབྦཾ. སདྡྷཱཡ ཝཱ ཏཾནིནྣཔོཎཏཱ ཨདྷིམུཏྟི ཨདྷིམོཀྑོ ¶ . ནཱིཝརཎཱནཾ པཙྩཡསྶ ཙེཝ པཙྩཡགྷཱཏསྶ ཙ ཝིབྷཱཝིཏཏྟཱ ཝུཏྟཾ – ‘‘ཝཊྚཝིཝཊྚཾ ཀཐིཏ’’ནྟི.

ནཱིཝརཎཔྤཧཱནཝགྒཝཎྞནཱ ནིཊྛིཏཱ.

༣. ཨཀམྨནིཡཝགྒཝཎྞནཱ

༢༡. ཏཏིཡསྶ ¶ པཋམེ ཨབྷཱཝིཏནྟི སམཐཝིཔསྶནཱབྷཱཝནཱཝསེན ན བྷཱཝིཏཾ ཏཐཱ ཨབྷཱཝིཏཏྟཱ. ཏཉྷི ‘‘ཨཝཌྜྷིཏ’’ནྟི ཝུཙྩཏི པཊིཔཀྑཱབྷིབྷཝེན པརིབྲཱུཧནཱབྷཱཝཏོ. ཏེནཱཧ བྷགཝཱ – ‘‘ཨཀམྨནིཡཾ ཧོཏཱི’’ཏི.

༢༢. དུཏིཡེ ཝུཏྟཝིཔརིཡཱཡེན ཨཏྠོ ཝེདིཏབྦོ. པཋམེཏི ཏཏིཡཝགྒསྶ པཋམསུཏྟེ. ཝཊྚཝསེནཱཏི ཝིཔཱཀཝཊྚཝསེན. ཏེབྷཱུམཀཝཊྚནྟི ཏེབྷཱུམཀཝིཔཱཀཝཊྚཾ. ཝཊྚཔཊིལཱབྷཱཡ ཀམྨནྟི ཝིཔཱཀཝཊྚསྶ པཊིལཱབྷཱཡ ཨུཔནིསྶཡབྷཱུཏཾ ཀམྨཾ, ཏསྶ སཧཱཡབྷཱུཏཾ ཀིལེསཝཊྚམྤི ཀམྨགྒཧཎེནེཝ སངྒཧིཏནྟི དཊྛབྦཾ. ཝིཝཊྚཔཊིལཱབྷཱཡ ཀམྨནྟི ཝིཝཊྚཱདྷིགམསྶ ཨུཔནིསྶཡབྷཱུཏཾ ཀམྨཾ. ཡཾ པན ཙརིམབྷཝནིབྦཏྟཀཾ ཀམྨཾ, ཏཾ ཝིཝཊྚཔྤཊིལཱབྷཱཡ ཀམྨཾ ཧོཏི, ན ཧོཏཱིཏི? ན ཧོཏི ཝཊྚཔཱདཀབྷཱཝཏོ. ཙརིམབྷཝཔཊིསནྡྷི ¶ ཝིཡ པན ཝིཝཊྚཱུཔནིསྶཡོཏི སཀྐཱ ཝིཉྙཱཏུཾ. ན ཧི ཀདཱཙི ཏིཧེཏུཀཔཊིསནྡྷིཡཱ ཝིནཱ ཝིསེསཱདྷིགམོ སམྦྷཝཏི. ཨིམེསུ སུཏྟེསཱུཏི ཨིམེསུ པན པཋམདུཏིཡསུཏྟེསུ ཡཐཱཀྐམཾ ཝཊྚཝིཝཊྚམེཝ ཀཐིཏཾ.

༢༣. ཏཏིཡེ ཨབྷཱཝིཏནྟི ཨེཏྠ བྷཱཝནཱ ནཱམ སམཱདྷིབྷཱཝནཱ. སཱ ཡཏྠ ཨཱསངྐིཏབྦཱ, ཏཾ ཀཱམཱཝཙརཔཋམམཧཱཀུསལཙིཏྟཱདིཨབྷཱཝིཏནྟི ཨདྷིཔྤེཏནྟི ཨཱཧ – ‘‘དེཝམནུསྶསམྤཏྟིཡོ’’ཏིཨཱདི.

༢༤. ཙཏུཏྠེ ཡསྨཱ ཙིཏྟནྟི ཝིཝཊྚཝསེནེཝ ཨུཔྤནྣཙིཏྟཾ ཨདྷིཔྤེཏཾ, ཏསྨཱ ཛཱཏིཛརཱབྱཱདྷིམརཎསོཀཱདིདུཀྑསྶ ཨནིབྦཏྟནཏོ མཧཏོ ཨཏྠཱཡ སཾཝཏྟཏཱིཏི ཡོཛནཱ ཝེདིཏབྦཱ.

༢༥-༢༦. པཉྩམཚཊྛེསུ ཨུཔྤནྣནྟི ཨཝིགཏུཔྤཱདཱདིཁཎཏྟཡམྤི ཨབྷཱཝིཏཾ བྷཱཝནཱརཧིཏཾ ཨཔཱཏུབྷཱུཏམེཝ པཎྜིཏསམྨཏསྶ ཨུཔྤནྣཀིཙྩསྶ ཨསཱདྷནཏོ ཡཐཱ ‘‘ཨཔུཏྟོ’’ཏི. སོ ཧི སམཏྠོ ཧུཏྭཱ པིཏུ པུཏྟཀིཙྩཾ ཨསཱདྷེནྟོ ཨཔུཏྟོཏི ལོཀེ ཝུཙྩཏི, ཨེཝཾ སམྤདམིདཾ. ཏེནཱཧ – ‘‘ཀསྨཱ’’ཏིཨཱདི. ཏེསུ དྷམྨེསཱུཏི ལོཀུཏྟརཔཱདཀཛ྄ཛྷཱནཱདཱིསུ. ཐེརོ པན མཏྠཀཔྤཏྟམེཝ བྷཱཝིཏཾ ཙིཏྟཾ དསྶེནྟོ ‘‘མགྒཙིཏྟམེཝཱ’’ཏི ཨཱཧ.

༢༧-༢༨. སཏྟམཊྛམེསུ ¶ པུནཔྤུནཾ ཨཀཏནྟི བྷཱཝནཱབཧུལཱིཀཱརཝསེན པུནཔྤུནཾ ན ཀཏཾ. ཨིམཱནིཔི དྭེཏི ཨིམེསུ དྭཱིསུ སུཏྟེསུ ཨཱགཏཱནི ཨིམཱནིཔི དྭེ ཙིཏྟཱནི.

༢༩-༣༠. ནཝམེ ཨདྷིཝཧཏཱིཏི ཨཱནེཏི. དུཀྑེནཱཏི ཀིཙྪེན. དུཔྤེསནཏོཏི དུཀྑེན པེསེཏབྦཏོ. མཏྠཀཔྤཏྟཾ ཝིཔསྶནཱསུཁཾ པཱཀཏིཀཛ྄ཛྷཱནསུཁཏོ སནྟཏརཔཎཱིཏཏརམེཝཱཏི ཨཱཧ – ‘‘ཛྷཱནསུཁཏོ ཝིཔསྶནཱསུཁ’’ནྟི. ཏེནཱཧ བྷགཝཱ –

‘‘སུཉྙཱགཱརཾ པཝིཊྛསྶ, སནྟཙིཏྟསྶ བྷིཀྑུནོ;

ཨམཱནུསཱི རཏི ཧོཏི, སམྨཱ དྷམྨཾ ཝིཔསྶཏོ.

‘‘ཡཏོ ¶ ཡཏོ སམྨསཏི, ཁནྡྷཱནཾ ཨུདཡབྦཡཾ;

ལབྷཏཱི པཱིཏིཔཱམོཛྫཾ, ཨམཏཾ ཏཾ ཝིཛཱནཏ’’ནྟི. (དྷ. པ. ༣༧༤);

ཏཉྷི ཙིཏྟཾ ཝིསྶཊྛཨིནྡཝཛིརསདིསཾ ཨམོགྷབྷཱཝཏོ.

ཨཀམྨནིཡཝགྒཝཎྞནཱ ནིཊྛིཏཱ.

༤. ཨདནྟཝགྒཝཎྞནཱ

༣༡-༣༦. ཙཏུཏྠསྶ ¶ པཋམེ ཨདནྟནྟི ཙིཏྟབྷཱཝནཱཡ ཝིནཱ ན དནྟཾ. ཏེནཱཧ – ‘‘སཏིསཾཝརརཧིཏ’’ནྟི. ཙཏུཏྠེ ཏཏིཡེ ཝུཏྟཝིཔརིཡཱཡེན ཨཏྠོ ཝེདིཏབྦོ. པཉྩམཚཊྛེསུ པུརིམསདིསོཡེཝཱཏི ཏཏིཡཙཏུཏྠསདིསོ ཨེཝ.

༣༧-༣༨. སཏྟམཊྛམེསུ ཨུཔམཱ པནེཏྠཱཏི ཡཐཱ པཋམཱདཱིསུ ཨདནྟཧཏྠིཨསྶཱདཡོ ཨུཔམཱབྷཱཝེན གཧིཏཱ, ཨེཝམེཏྠ སཏྠམཊྛམེསུ ‘‘ཨསཾཝུཏགྷརདྭཱརཱདིཝསེན ཝེདིཏབྦཱ’’ཏི ཝུཏྟཾ.

༣༩-༤༠. ནཝམདསམེསུ ཙཏཱུཧིཔི པདེཧཱིཏི ཨདནྟཱདཱིཧི ཙཏཱུཧི པདེཧི ཡོཛེཏྭཱ ནཝམདསམཱནི སུཏྟཱནི ཝུཏྟཱནཱིཏི ཡོཛནཱ.

ཨདནྟཝགྒཝཎྞནཱ ནིཊྛིཏཱ.

༥. པཎིཧིཏཨཙྪཝགྒཝཎྞནཱ

༤༡. པཉྩམསྶ ¶ པཋམེ ཨུཔམཱཝ ཨོཔམྨཾ, སོ ཨེཝ ཨཏྠོ, ཏསྨིཾ ཨོཔམྨཏྠེ བོདྷེཏབྦེ ནིཔཱཏོ. སེཡྻཐཱཔཱིཏི ཡཐཱཏི ཨཏྠོ. ཨེཏྠ ཙ ཏཏྲ བྷགཝཱ ཀཏྠཙི ཨཏྠེན ཨུཔམཾ པརིཝཱརེཏྭཱ དསྶེཏི ཝཏྠསུཏྟེ ཝིཡ, པཱརིཙྪཏྟཀོཔམ (ཨ. ནི. ༧.༦༩) ཨགྒིཀྑནྡྷོཔམཱདི (ཨ. ནི. ༧.༧༢) སུཏྟེསུ ཝིཡ ཙ. ཀཏྠཙི ཨུཔམཱཡ ཨཏྠཾ པརིཝཱརེཏྭཱ དསྶེཏི ལོཎམྦིལསུཏྟེ (ཨ. ནི. ༣.༡༠༡) ཝིཡ, སུཝཎྞཀཱརསཏྟསཱུརིཡོཔམཱདིསུཏྟེསུ ¶ (ཨ. ནི. ༧.༦༦) ཝིཡ ཙ. ཨིམསྨིཾ པན སཱལིསཱུཀོཔམེ ཨུཔམཱཡ ཨཏྠཾ པརིཝཱརེཏྭཱ དསྶེནྟོ ‘‘སེཡྻཐཱཔི, བྷིཀྑཝེ’’ཏིཨཱདིམཱཧཱཏི པོཏྠཀེསུ ལིཁནྟི, ཏཾ མཛ྄ཛྷིམཊྛཀཐཱཡ ཝཏྠསུཏྟཝཎྞནཱཡ (མ. ནི. ཨཊྛ. ༡.༧༠) ན སམེཏི. ཏཏྠ ཧི ཨིདཾ ཝུཏྟཾ –

སེཡྻཐཱཔི, བྷིཀྑཝེ, ཝཏྠནྟི ཨུཔམཱཝཙནམེཝེཏཾ. ཨུཔམཾ ཀརོནྟོ ཙ བྷགཝཱ ཀཏྠཙི པཋམཾཡེཝ ཨུཔམཾ དསྶེཏྭཱ པཙྪཱ ཨཏྠཾ དསྶེཏི, ཀཏྠཙི པཋམཾ ཨཏྠཾ དསྶེཏྭཱ པཙྪཱ ཨུཔམཾ, ཀཏྠཙི ཨུཔམཱཡ ཨཏྠཾ པརིཝཱརེཏྭཱ དསྶེཏི, ཀཏྠཙི ཨཏྠེན ཨུཔམཾ. ཏཐཱ ཧེས ‘‘སེཡྻཐཱཔིསྶུ, བྷིཀྑཝེ, དྭེ ཨགཱརཱ སདྭཱརཱ, ཏཏྠ ཙཀྑུམཱ པུརིསོ མཛ྄ཛྷེ ཋིཏོ པསྶེཡྻཱ’’ཏི སཀལམྤི དེཝདཱུཏསུཏྟཾ (མ. ནི. ༣.༢༦༡ ཨཱདཡོ) ཨུཔམཾ པཋམཾ དསྶེཏྭཱ པཙྪཱ ཨཏྠཾ དསྶེནྟོ ཨཱཧ. ‘‘ཏིརོཀུཊྚཾ ཏིརོཔཱཀཱརཾ ཏིརོཔབྦཏཾ ཨསཛྫམཱནོ གཙྪཏི, སེཡྻཐཱཔི, ཨཱཀཱསེ’’ཏིཨཱདིནཱ པན ནཡེན སཀལམྤི ཨིདྡྷིཝིདྷཾ ཨཏྠཾ པཋམཾ དསྶེཏྭཱ པཙྪཱ ཨུཔམཾ དསྶེནྟོ ཨཱཧ. ‘‘སེཡྻཐཱཔི, བྲཱཧྨཎཔུརིསོ སཱརཏྠིཀོ སཱརགཝེསཱི’’ཏིཨཱདིནཱ (མ. ནི. ༡.༣༡༤) ནཡེན སཀལམྤི ཙཱུལ༹སཱརོཔམསུཏྟཾ ཨུཔམཱཡ ཨཏྠཾ པརིཝཱརེཏྭཱ དསྶེནྟོ ཨཱཧ. ‘‘ཨིདྷ པན, བྷིཀྑཝེ, ཨེཀཙྩེ ཀུལཔུཏྟཱ དྷམྨཾ པརིཡཱཔུཎནྟི སུཏྟཾ…པེ… སེཡྻཐཱཔི, བྷིཀྑཝེ, པུརིསོ ཨལགདྡཏྠིཀོ’’ཏིཨཱདིནཱ ནཡེན སཀལམྤི ཨལགདྡསུཏྟཾ (མ. ནི. ༡.༢༣༨) མཧཱསཱརོཔམསུཏྟནྟི ཨེཝམཱདཱིནི སུཏྟཱནི ཨཏྠེན ཨུཔམཾ པརིཝཱརེཏྭཱ དསྶེནྟོ ཨཱཧ. སྭཱཡཾ ཨིདྷ པཋམཾ ཨུཔམཾ དསྶེཏྭཱ པཙྪཱ ཨཏྠཾ དསྶེཏཱིཏི.

ཨེཏྠ ཧི ཙཱུལ༹སཱརོཔམཱདཱིསུ (མ. ནི. ༡.༣༡༢) པཋམཾ ཨུཔམཾ ཝཏྭཱ ཏདནནྟརཾ ཨུཔམེཡྻཏྠཾ ཝཏྭཱ པུན ཨུཔམཾ ཝདནྟོ ཨུཔམཱཡ ཨཏྠཾ པརིཝཱརེཏྭཱ དསྶེཏཱིཏི ཝུཏྟོ. ཨལགདྡཱུཔམསུཏྟཱདཱིསུ ¶ པན ཨཏྠཾ པཋམཾ ཝཏྭཱ ཏདནནྟརཾ ཨུཔམཾ ཝཏྭཱ པུན ཨཏྠཾ ཝདནྟོ ཨཏྠེན ཨུཔམཾ པརིཝཱརེཏྭཱ དསྶེཏཱིཏི ཝུཏྟོ. ཏེནེཝེཏྠ ལཱིནཏྠཔྤཀཱསིནིཡཾ ཝུཏྟཾ – ‘‘ཨུཔམེཡྻཏྠཾ པཋམཾ ཝཏྭཱ ཏདནནྟརཾ ཨཏྠཾ ཝཏྭཱ པུན ཨུཔམཾ ཝདནྟོ ཨུཔམཱཡ ཨཏྠཾ པརིཝཱརེཏྭཱ ¶ དསྶེཏཱི’’ཏི ཝུཏྟོ. ཨཏྠེན ཨུཔམཾ པརིཝཱརེཏྭཱཏི ཨེཏྠཱཔི ཨེསེཝ ནཡོཏི. ཨིདྷ པན ཀཏྠཙི ཨཏྠེན ཨུཔམཾ པརིཝཱརེཏྭཱ དསྶེཏི. ‘‘ཝཏྠསུཏྟེ ཝིཡ པཱརིཙྪཏྟཀོཔམཨགྒིཀྑནྡྷོཔམཱདིསུཏྟེསུ ཝིཡ ཙཱ’’ཏི ཝུཏྟཾ. ཏཏྠ ཝཏྠསུཏྟེ ཏཱཝ ‘‘སེཡྻཐཱཔི, བྷིཀྑཝེ, ཝཏྠཾ སཾཀིལིཊྛཾ མལགྒཧིཏཾ, ཏམེནཾ རཛཀོ ཡསྨིཾ ཡསྨིཾ རངྒཛཱཏེ ཨུཔསཾཧརེཡྻ. ཡདི ནཱིལཀཱཡ, ཡདི པཱིཏཀཱཡ, ཡདི ལོཧིཏཀཱཡ, ཡདི མཉྫིཊྛཀཱཡ, དུརཏྟཝཎྞམེཝསྶ ཨཔརིསུདྡྷཝཎྞམེཝསྶ. ཏཾ ཀིསྶ ཧེཏུ? ཨཔརིསུདྡྷཏྟཱ, བྷིཀྑཝེ, ཝཏྠསྶ. ཨེཝམེཝ ཁོ, བྷིཀྑཝེ, ཙིཏྟེ སཾཀིལིཊྛེ དུགྒཏི པཱཊིཀངྑཱ’’ཏིཨཱདིནཱ (མ. ནི. ༡.༧༠) པཋམཾ ཨུཔམཾ དསྶེཏྭཱ པཙྪཱ ཨུཔམེཡྻཏྠོ ཝུཏྟོ, ན པན པཋམཾ ཨཏྠཾ ཝཏྭཱ ཏདནནྟརཾ ཨུཔམཾ དསྶེཏྭཱ པུན ཨཏྠོ ཝུཏྟོ. ཡེན ཀཏྠཙི ཨཏྠེན ཨུཔམཾ པརིཝཱརེཏྭཱ དསྶེཏི. ཝཏྠསུཏྟེ ཝིཡཱཏི ཝདེཡྻ.

ཏཐཱ པཱརིཙྪཏྟཀོཔམེཔི ‘‘ཡསྨིཾ, བྷིཀྑཝེ, སམཡེ དེཝཱནཾ ཏཱཝཏིཾསཱནཾ པཱརིཙྪཏྟཀོ ཀོཝིལཱ༹རོ པཎྜུཔལཱསོ ཧོཏི, ཨཏྟམནཱ, བྷིཀྑཝེ, དེཝཱ ཏཱཝཏིཾསཱ, ཏསྨིཾ སམཡེ ཧོནྟི པཎྜུཔལཱསོ དཱནི པཱརིཙྪཏྟཀོ ཀོཝིལཱ༹རོ, ན ཙིརསྶེཝ དཱནི པནྣཔལཱསོ བྷཝིསྶཏི…པེ… ཨེཝམེཝ ཁོ, བྷིཀྑཝེ, ཡསྨིཾ སམཡེ ཨརིཡསཱཝཀོ ཨགཱརསྨཱ ཨནགཱརིཡཾ པབྦཛྫཱཡ ཙེཏེཏི. པཎྜུཔལཱསོ, བྷིཀྑཝེ, ཨརིཡསཱཝཀོ ཏསྨིཾ སམཡེ ཧོཏཱི’’ཏིཨཱདིནཱ (ཨ. ནི. ༧.༦༩) པཋམཾ ཨུཔམཾ དསྶེཏྭཱ པཙྪཱ ཨཏྠོ ཝུཏྟོ. ཨགྒིཀྑནྡྷོཔམེ ‘‘པསྶཐ ནོ ཏུམྷེ, བྷིཀྑཝེ, ཨམུཾ མཧནྟཾ ཨགྒིཀྑནྡྷཾ ཨཱདིཏྟཾ སམྤཛྫལིཏཾ སཛོཏིབྷཱུཏནྟི. ཨེཝཾ, བྷནྟེཏི. ཏཾ ཀིཾ མཉྙཐ, བྷིཀྑཝེ, ཀཏམཾ ནུ ཁོ ཝརཾ ཡཾ ཨམུཾ མཧནྟཾ ཨགྒིཀྑནྡྷཾ ཨཱདིཏྟཾ སམྤཛྫལིཏཾ སཛོཏིབྷཱུཏཾ ཨཱལིངྒེཏྭཱ ཨུཔནིསཱིདེཡྻ ཝཱ ཨུཔནིཔཛྫེཡྻ ཝཱ, ཡཾ ཁཏྟིཡཀཉྙཾ ཝཱ བྲཱཧྨཎཀཉྙཾ ཝཱ གཧཔཏིཀཉྙཾ ཝཱ མུདུཏལུནཧཏྠཔཱདཾ ཨཱལིངྒེཏྭཱ ཨུཔནིསཱིདེཡྻ ཝཱ ཨུཔནིཔཛྫེཡྻ ཝཱ’’ཏིཨཱདིནཱ (ཨ. ནི. ༧.༧༢) པཋམཾ ཨུཔམཾཡེཝ དསྶེཏྭཱ པཙྪཱ ཨཏྠོ ཝུཏྟོ, ན པན པཋམཾ ཨཏྠཾ ཝཏྭཱ ཏདནནྟརཾ ཨུཔམཾ དསྶེཏྭཱ པུན ཨཏྠོ ཝུཏྟོ, ཏསྨཱ ‘‘ཀཏྠཙི ཨཏྠེན ཨུཔམཾ པརིཝཱརེཏྭཱ དསྶེཏི ཝཏྠསུཏྟེ ཝིཡ པཱརིཙྪཏྟཀོཔམཨགྒིཀྑནྡྷོཔམཱདིསུཏྟེསུ ཝིཡ ཙཱ’’ཏི ན ཝཏྟབྦཾ.

ཀེཙི ¶ པནེཏྠ ཨེཝཾ ཝཎྞཡནྟི ‘‘ཨཏྠཾ པཋམཾ ཝཏྭཱ པཙྪཱ ཙ ཨུཔམཾ དསྶེནྟོ ཨཏྠེན ཨུཔམཾ པརིཝཱརེཏྭཱ དསྶེཏི ནཱམ, ཨུཔམཾ པན པཋམཾ ཝཏྭཱ པཙྪཱ ཨཏྠཾ དསྶེནྟོ ཨུཔམཱཡ ཨཏྠཾ ¶ པརིཝཱརེཏྭཱ དསྶེཏི ནཱམ, ཏདུབྷཡསྶཔི ཨཱགཏཊྛཱནཾ ནིདསྶེནྟོ ‘ཝཏྠསུཏྟེ ཝིཡཱ’ཏིཨཱདིམཱཧཱ’’ཏི. ཏམྤི ‘‘ཀཏྠཙི ཨཏྠེན ཨུཔམཾ པརིཝཱརེཏྭཱ དསྶེཏི ཝཏྠསུཏྟེ ཝིཡ པཱརིཙྪཏྟཀོཔམཨགྒིཀྑནྡྷོཔམཱདིསུཏྟེསུ ཝིཡ ཙཱ’’ཏི ཝཏྟབྦཾ, ཨེཝཉྩ ཝུཙྩམཱནེ ‘‘ཀཏྠཙི ཨུཔམཱཡ ཨཏྠཾ པརིཝཱརེཏྭཱ དསྶེཏི ལོཎམྦིལསུཏྟེ ཝིཡཱ’’ཏི ཝིསུཾ ན ཝཏྟབྦཾ ‘‘ཨགྒིཀྑནྡྷོཔམཱདིསུཏྟེ ཝིཡཱ’’ཏི ཨེཏྠ ཨཱདིསདྡེནེཝ སངྒཧིཏཏྟཱ. ལོཎམྦིལསུཏྟེཔི ཧི –

‘‘སེཡྻཐཱཔི, བྷིཀྑཝེ, པཎྜིཏོ བྱཏྟོ ཀུསལོ སཱུདོ རཱཛཱནཾ ཝཱ རཱཛམཧཱམཏྟཾ ཝཱ ནཱནཙྩཡེཧི སཱུཔེཧི པཙྩུཔཊྛིཏོ ཨསྶ ཨམྦིལགྒེཧིཔི ཏིཏྟཀགྒེཧིཔི ཀཊུཀགྒེཧིཔི མདྷུརགྒེཧིཔི ཁཱརིཀེཧིཔི ཨཁཱརིཀེཧིཔི ལོཎིཀེཧིཔི ཨལོཎིཀེཧིཔི.

‘‘ས ཁོ སོ, བྷིཀྑཝེ, པཎྜིཏོ བྱཏྟོ ཀུསལོ སཱུདོ སཀསྶ བྷཏྟསྶ ནིམིཏྟཾ ཨུགྒཎྷཱཏི ‘ཨིདཾ ཝཱ མེ ཨཛྫ བྷཏྟསཱུཔེཡྻཾ རུཙྩཏི, ཨིམསྶ ཝཱ ཨབྷིཧརཏི, ཨིམསྶ ཝཱ བཧུཾ གཎྷཱཏི, ཨིམསྶ ཝཱ ཝཎྞཾ བྷཱསཏི. ཨམྦིལགྒཾ ཝཱ མེ ཨཛྫ བྷཏྟསཱུཔེཡྻཾ རུཙྩཏི, ཨམྦིལགྒསྶ ཝཱ ཨབྷིཧརཏི, ཨམྦིལགྒསྶ ཝཱ བཧུཾ གཎྷཱཏི, ཨམྦིལགྒསྶ ཝཱ ཝཎྞཾ བྷཱསཏི…པེ… ཨལོཎིཀསྶ ཝཱ ཝཎྞཾ བྷཱསཏཱི’ཏི. ས ཁོ སོ, བྷིཀྑཝེ, པཎྜིཏོ བྱཏྟོ ཀུསལོ སཱུདོ ལཱབྷཱི ཙེཝ ཧོཏི ཨཙྪཱདནསྶ, ལཱབྷཱི ཝེཏནསྶ, ལཱབྷཱི ཨབྷིཧཱརཱནཾ. ཏཾ ཀིསྶ ཧེཏུ? ཏཐཱ ཧི སོ, བྷིཀྑཝེ, པཎྜིཏོ བྱཏྟོ ཀུསལོ སཱུདོ སཀསྶ བྷཏྟནིམིཏྟཾ ཨུགྒཎྷཱཏི. ཨེཝམེཝ ཁོ, བྷིཀྑཝེ, ཨིདྷེཀཙྩོ པཎྜིཏོ བྱཏྟོ ཀུསལོ བྷིཀྑུ ཀཱཡེ ཀཱཡཱནུཔསྶཱི ཝིཧརཏི…པེ… ཝེདནཱསུ…པེ… ཙིཏྟེ…པེ… དྷམྨེསུ དྷམྨཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ. ཏསྶ དྷམྨེསུ དྷམྨཱནུཔསྶིནོ ཝིཧརཏོ ཙིཏྟཾ སམཱདྷིཡཏི, ཨུཔཀྐིལེསཱ པཧཱིཡནྟི, སོ ཏཾ ནིམིཏྟཾ ཨུགྒཎྷཱཏི.

‘‘ས ¶ ཁོ, བྷིཀྑཝེ, པཎྜིཏོ བྱཏྟོ ཀུསལོ བྷིཀྑུ ལཱབྷཱི ཙེཝ ཧོཏི དིཊྛེཝ དྷམྨེ སུཁཝིཧཱརཱནཾ, ལཱབྷཱི ཧོཏི སཏིསམྤཛཉྙསྶ. ཏཾ ཀིསྶ ཧེཏུ? ཏཐཱ ཧི སོ, བྷིཀྑཝེ, པཎྜིཏོ བྱཏྟོ ཀུསལོ བྷིཀྑུ སཀསྶ ཙིཏྟསྶ ནིམིཏྟཾ ཨུགྒཎྷཱཏཱི’’ཏི (སཾ. ནི. ༥.༣༧༤) –

ཨེཝཾ པཋམཾ ཨུཔམཾ དསྶེཏྭཱ པཙྪཱ ཨཏྠོ ཝུཏྟོ. ‘‘སུཝཎྞཀཱརསཱུརིཡོཔམཱདིསུཏྟེསུ ཝིཡ ཙཱ’’ཏི ¶ ཨིདཉྩ ཨུདཱཧརཎམཏྟེན སངྒཧཾ གཙྪཏི སུཝཎྞཀཱརསུཏྟཱདཱིསུ པཋམཾ ཨུཔམཱཡ ཨདསྶིཏཏྟཱ. ཨེཏེསུ ཧི སུཝཎྞཀཱརོཔམསུཏྟེ (ཨ. ནི. ༣.༡༠༣) ཏཱཝ –

‘‘ཨདྷིཙིཏྟམནུཡུཏྟེན, བྷིཀྑཝེ, བྷིཀྑུནཱ ཏཱིཎི ནིམིཏྟཱནི ཀཱལེན ཀཱལཾ མནསི ཀཱཏབྦཱནི, ཀཱལེན ཀཱལཾ སམཱདྷིནིམིཏྟཾ མནསི ཀཱཏབྦཾ, ཀཱལེན ཀཱལཾ པགྒཧནིམིཏྟཾ མནསི ཀཱཏབྦཾ, ཀཱལེན ཀཱལཾ ཨུཔེཀྑཱནིམིཏྟཾ མནསི ཀཱཏབྦཾ. སཙེ, བྷིཀྑཝེ, ཨདྷིཙིཏྟམནུཡུཏྟོ བྷིཀྑུ ཨེཀནྟཾ སམཱདྷིནིམིཏྟཾཡེཝ མནསི ཀརེཡྻ, ཋཱནཾ ཏཾ ཙིཏྟཾ ཀོསཛྫཱཡ སཾཝཏྟེཡྻ. སཙེ, བྷིཀྑཝེ, ཨདྷིཙིཏྟམནུཡུཏྟོ བྷིཀྑུ ཨེཀནྟཾ པགྒཧནིམིཏྟཾཡེཝ མནསི ཀརེཡྻ, ཋཱནཾ ཏཾ ཙིཏྟཾ ཨུདྡྷཙྩཱཡ སཾཝཏྟེཡྻ. སཙེ, བྷིཀྑཝེ, ཨདྷིཙིཏྟམནུཡུཏྟོ བྷིཀྑུ ཨེཀནྟཾ ཨུཔེཀྑཱནིམིཏྟཾཡེཝ མནསི ཀརེཡྻ, ཋཱནཾ ཏཾ ཙིཏྟཾ ན སམྨཱ སམཱདྷིཡེཡྻ ཨཱསཝཱནཾ ཁཡཱཡ. ཡཏོ ཙ ཁོ, བྷིཀྑཝེ, ཨདྷིཙིཏྟམནུཡུཏྟོ བྷིཀྑུ ཀཱལེན ཀཱལཾ སམཱདྷིནིམིཏྟཾ…པེ… པགྒཧནིམིཏྟཾ…པེ… ཨུཔེཀྑཱནིམིཏྟཾ མནསི ཀརོཏི, ཏཾ ཧོཏི ཙིཏྟཾ མུདུཉྩ ཀམྨནིཡཉྩ པབྷསྶརཉྩ, ན ཙ པབྷངྒུ, སམྨཱ སམཱདྷིཡཏི ཨཱསཝཱནཾ ཁཡཱཡ.

‘‘སེཡྻཐཱཔི, བྷིཀྑཝེ, སུཝཎྞཀཱརོ ཝཱ སུཝཎྞཀཱརནྟེཝཱསཱི ཝཱ ཨུཀྐཾ བནྡྷེཡྻ, ཨུཀྐཾ བནྡྷིཏྭཱ ཨུཀྐཱམུཁཾ ཨཱལིམྤེཡྻ, ཨུཀྐཱམུཁཾ ཨཱལིམྤིཏྭཱ སཎྜཱསེན ཛཱཏརཱུཔཾ གཧེཏྭཱ ཨུཀྐཱམུཁེ པཀྑིཔེཡྻ, ཨུཀྐཱམུཁེ པཀྑིཔིཏྭཱ ཀཱལེན ཀཱལཾ ཨབྷིདྷམཏི, ཀཱལེན ཀཱལཾ ཨུདཀེན པརིཔྥོསེཏི, ཀཱལེན ཀཱལཾ ཨཛ྄ཛྷུཔེཀྑཏི. སཙེ, བྷིཀྑཝེ, སུཝཎྞཀཱརོ ཝཱ སུཝཎྞཀཱརནྟེཝཱསཱི ཝཱ ཏཾ ཛཱཏརཱུཔཾ ཨེཀནྟཾ ཨབྷིདྷམེཡྻ, ཋཱནཾ ཏཾ ཛཱཏརཱུཔཾ ¶ དཧེཡྻ. སཙེ, བྷིཀྑཝེ, སུཝཎྞཀཱརོ ཝཱ སུཝཎྞཀཱརནྟེཝཱསཱི ཝཱ ཏཾ ཛཱཏརཱུཔཾ ཨེཀནྟཾ ཨུདཀེན པརིཔྥོསེཡྻ, ཋཱནཾ ཏཾ ཛཱཏརཱུཔཾ ནིབྦཱཔེཡྻ. སཙེ, བྷིཀྑཝེ, སུཝཎྞཀཱརོ ཝཱ སུཝཎྞཀཱརནྟེཝཱསཱི ཝཱ ཏཾ ཛཱཏརཱུཔཾ ཨེཀནྟཾ ཨཛ྄ཛྷུཔེཀྑེཡྻ, ཋཱནཾ ཏཾ ཛཱཏརཱུཔཾ ན སམྨཱ པརིཔཱཀཾ གཙྪེཡྻ. ཡཏོ ཙ ཁོ, བྷིཀྑཝེ, སུཝཎྞཀཱརོ ཝཱ སུཝཎྞཀཱརནྟེཝཱསཱི ཝཱ ཏཾ ཛཱཏརཱུཔཾ ཀཱལེན ཀཱལཾ ཨབྷིདྷམཏི, ཀཱལེན ཀཱལཾ ཨུདཀེན པརིཔྥོསེཏི, ཀཱལེན ཀཱལཾ ཨཛ྄ཛྷུཔེཀྑཏི, ཏཾ ཧོཏི ཛཱཏརཱུཔཾ མུདུཉྩ ཀམྨནིཡཉྩ པབྷསྶརཉྩ, ན ཙ པབྷངྒུ, སམྨཱ ཨུཔེཏི ཀམྨཱཡ. ཡསྶཱ ཡསྶཱ ཙ པིལ༹ནྡྷནཝིཀཏིཡཱ ཨཱཀངྑཏི, ཡདི པཊྚིཀཱཡ ཡདི ཀུཎྜལཱཡ ཡདི གཱིཝེཡྻཀེན ཡདི སུཝཎྞམཱལཱཡ, ཏཉྩསྶ ཨཏྠཾ ཨནུབྷོཏི.

‘‘ཨེཝམེཝ ¶ ཁོ, བྷིཀྑཝེ, ཨདྷིཙིཏྟམནུཡུཏྟེན བྷིཀྑུ…པེ… སམྨཱ སམཱདྷིཡཏི ཨཱསཝཱནཾ ཁཡཱཡ. ཡསྶ ཡསྶ ཙ ཨབྷིཉྙཱསཙྪིཀརཎཱིཡསྶ དྷམྨསྶ ཙིཏྟཾ ཨབྷིནིནྣཱམེཏི ཨབྷིཉྙཱསཙྪིཀིརིཡཱཡ, ཏཏྲ ཏཏྲེཝ སཀྑིབྷབྦཏཾ པཱཔུཎཱཏི སཏི སཏིཨཱཡཏནེ’’ཏི (ཨ. ནི. ༣.༡༠༣) –

ཨེཝཾ པཋམཾ ཨཏྠཾ དསྶེཏྭཱ ཏདཏནྟརཾ ཨུཔམཾ ཝཏྭཱ པུནཔི ཨཏྠོ ཨེཝཾ པཋམཾ ཨཏྠཾ དསྶེཏྭཱ ཏདནནྟརཾ ཨུཔམཾ ཝཏྭཱ པུནཔི ཨཏྠོ ཝུཏྟོ.

སཏྟསཱུརིཡོཔམེ ཙ –

‘‘ཨནིཙྩཱ, བྷིཀྑཝེ, སངྑཱརཱ, ཨདྷུཝཱ, བྷིཀྑཝེ, སངྑཱརཱ, ཨནསྶཱསིཀཱ, བྷིཀྑཝེ, སངྑཱརཱ, ཡཱཝཉྩིདཾ, བྷིཀྑཝེ, ཨལམེཝ སབྦསངྑཱརེསུ ནིབྦིནྡིཏུཾ ཨལཾ ཝིརཛྫིཏུཾ ཨལཾ ཝིམུཙྩིཏུཾ. སིནེརུ, བྷིཀྑཝེ, པབྦཏརཱཛཱ ཙཏུརཱསཱིཏིཡོཛནསཧསྶཱནི ཨཱཡཱམེན, ཙཏུརཱསཱིཏིཡོཛནསཧསྶཱནི ཝིཏྠཱརེན, ཙཏུརཱསཱིཏིཡོཛནསཧསྶཱནི མཧཱསམུདྡེ ཨཛ྄ཛྷོགཱལ༹ྷོ, ཙཏུརཱསཱིཏིཡོཛནསཧསྶཱནི མཧཱསམུདྡཱ ཨཙྩུགྒཏོ. ཧོཏི སོ ཁོ, བྷིཀྑཝེ, སམཡོ, ཡཾ ཀདཱཙི ཀརཧཙི དཱིགྷསྶ ཨདྡྷུནོ ཨཙྩཡེན བཧཱུནི ཝསྶཱནི བཧཱུནི ཝསྶསཏཱནི བཧཱུནི ཝསྶསཧསྶཱནི བཧཱུནི ཝསྶསཏསཧསྶཱནི དེཝོ ན ཝསྶཏི, དེཝེ ¶ ཁོ པན, བྷིཀྑཝེ, ཨཝསྶནྟེ ཡེ ཀེཙིམེ བཱིཛགཱམབྷཱུཏགཱམཱ ཨོསདྷིཏིཎཝནཔྤཏཡོ, ཏེ ཨུསྶུསྶནྟི ཝིསུསྶནྟི ན བྷཝནྟི. ཨེཝཾ ཨནིཙྩཱ, བྷིཀྑཝེ, སངྑཱརཱ, ཨེཝཾ ཨདྷུཝཱ, བྷིཀྑཝེ, སངྑཱརཱ’’ཏིཨཱདིནཱ (ཨ. ནི. ༧.༦༦) –

པཋམཾ ཨཏྠཾ དསྶེཏྭཱ ཏདནནྟརཾ ཨུཔམཾ ཝཏྭཱ པུནཔི ཨཏྠོ ཝུཏྟོ. ཨཐ ཝཱ ‘‘སཱུརིཡསྶ, བྷིཀྑཝེ, ཨུདཡཏོ ཨེཏཾ པུབྦངྒམཾ ཨེཏཾ པུབྦནིམིཏྟཾ, ཡདིདཾ ཨརུཎུགྒཾ. ཨེཝམེཝ ཁོ, བྷིཀྑཝེ, བྷིཀྑུནོ ཨརིཡསྶ ཨཊྛངྒིཀསྶ མགྒསྶ ཨུཔྤཱདཱཡ ཨེཏཾ པུབྦངྒམཾ ཨེཏཾ པུབྦནིམིཏྟཾ, ཡདིདཾ ཀལྱཱཎམིཏྟཏཱ’’ཏི ཡདེཏཾ སཾཡུཏྟནིཀཱཡེ (སཾ. ནི. ༥.༤༩) ཨཱགཏཾ, ཏཾ ཨིདྷ སཱུརིཡོཔམསུཏྟནྟི ཨདྷིཔྤེཏཾ སིཡཱ. ཏམྤི ‘‘ཀཏྠཙི ཨུཔམཱཡ ཨཏྠཾ པརིཝཱརེཏྭཱ དསྶེཏཱི’’ཏི ཨིམིནཱ ན སམེཏི པཋམཾ ཨུཔམཾ ཝཏྭཱ ཏདནནྟརཾ ཨཏྠཾ དསྶེཏྭཱ པུན ཨུཔམཱཡ ཨཝུཏྟཏྟཱ. པཋམམེཝ ཧི ཏཏྠ ཨུཔམཱ དསྶིཏཱ, ‘‘ཨིམསྨིཾ པན སཱལིསཱུཀོཔམེ ཨུཔམཱཡ ཨཏྠཾ པརིཝཱརེཏྭཱ དསྶེནྟོ སེཡྻཐཱཔི, བྷིཀྑཝེཏི ཨཱདིམཱཧཱ’’ཏི. ཨིདམྤི ཝཙནམསངྒཧིཏཾ ཝཏྠསུཏྟསྶ ཨིམསྶ ཙ ཝིསེསཱབྷཱཝཏོ. ཨུབྷཡཏྠཱཔི ཧི པཋམཾ ཨུཔམཾ དསྶེཏྭཱ པཙྪཱ ཨཏྠོ ཝུཏྟོ ¶ , ཏསྨཱ ཨེཝམེཏྠ པཱཋེན བྷཝིཏབྦཾ ‘‘ཏཏྲ བྷགཝཱ ཀཏྠཙི པཋམཾཡེཝ ཨུཔམཾ དསྶེཏྭཱ པཙྪཱ ཨཏྠཾ དསྶེཏི ཝཏྠསུཏྟེ ཝིཡ པཱརིཙྪཏྟཀོཔམ- (ཨ. ནི. ༧.༦༩) ཨགྒིཀྑནྡྷོཔམཱདིསུཏྟེསུ (ཨ. ནི. ༧.༧༢) ཝིཡ ཙ, ཀཏྠཙི ཨཏྠེན ཨུཔམཾ པརིཝཱརེཏྭཱ དསྶེཏི སུཝཎྞཀཱརསཏྟསཱུརིཡོཔམཱདིསུཏྟེསུ (ཨ. ནི. ༧.༦༦) ཝིཡ, ཨིམསྨིཾ པན སཱལིསཱུཀོཔམེ པཋམཾ ཨུཔམཾ དསྶེཏྭཱ པཙྪཱ ཨཏྠཾ དསྶེནྟོ སེཡྻཐཱཔི, བྷིཀྑཝེཏི ཨཱདིམཱཧཱ’’ཏི. ཨཉྙཐཱ མཛ྄ཛྷིམཊྛཀཐཱཡ ཝིརུཛ྄ཛྷཏི. ཨིདྷཱཔི ཙ པུབྦེནཱཔརཾ ན སམེཏི. མཛ྄ཛྷིམཊྛཀཐཱཡ ཝུཏྟནཡེནེཝ ཝཱ ཨིདྷཱཔི པཱཋོ གཧེཏབྦོ.

ཀཎསདིསོ སཱལིཕལསྶ ཏུཎྜེ ཨུཔྤཛྫནཀཝཱལོ སཱལིསཱུཀཾ, ཏཐཱ ཡཝསཱུཀཾ. སཱུཀསྶ ཏནུཀབྷཱཝཏོ བྷེདཝཏོ བྷེདོ ནཱཏིམཧཱ ཧོཏཱིཏི ཨཱཧ – ‘‘བྷིནྡིསྶཏི, ཚཝིཾ ཚིནྡིསྶཏཱིཏི ཨཏྠོ’’ཏི. ཡཐཱ མིཙྪཱཋཔིཏསཱལིསཱུཀཱདི ཨཀྐནྟམྤི ཧཏྠཱདིཾ ན བྷིནྡཏི བྷིནྡིཏུཾ ཨཡོགྒབྷཱཝེན ཋིཏཏྟཱ, ཨེཝཾ ཨཱཙཡགཱམིཙིཏྟཾ ཨཝིཛྫཾ ན བྷིནྡཏི བྷིནྡིཏུཾ ¶ ཨཡོགྒབྷཱཝེན ཨུཔྤནྣཏྟཱཏི ཨིམམཏྠཾ དསྶེཏི ‘‘མིཙྪཱཋཔིཏེནཱ’’ཏིཨཱདིནཱ. ཨཊྛསུ ཋཱནེསཱུཏི ‘‘དུཀྑེ ཨཉྙཱཎ’’ནྟིཨཱདིནཱ ཝུཏྟེསུ དུཀྑཱདཱིསུ ཙཏཱུསུ སཙྩེསུ པུབྦནྟཱདཱིསུ ཙཏཱུསུ ཙཱཏི ཨཊྛསུ ཋཱནེསུ. གྷནབཧལནྟི ཙིརཀཱལཔརིབྷཱཝནཱཡ ཨཏིཝིཡ བཧལཾ. མཧཱཝིསཡཏཱཡ མཧཱཔཊིཔཀྑཏཱཡ བཧུཔརིཝཱརཏཱཡ བཧུདུཀྑཏཱཡ ཙ མཧཏཱི ཨཝིཛྫཱཏི མཧཱཨཝིཛྫཱ. ཏཾ མཧཱཨཝིཛྫཾ. མཧཱསདྡོ ཧི བཧུབྷཱཝཏྠོཔི ཧོཏི ‘‘མཧཱཛནོ’’ཏིཨཱདཱིསུ ཝིཡ. ཏཎྷཱཝཱནཏོ ནིཀྑནྟབྷཱཝེནཱཏི ཏཏྠ ཏཎྷཱཡ ཨབྷཱཝམེཝ ཝདཏི.

༤༢. དུཏིཡེ པཱདེནེཝ ཨཝམདྡིཏེ ཨཀྐནྟནྟི ཝུཙྩམཱནེ ཧཏྠེན ཨཝམདྡིཏཾ ཨཀྐནྟཾ ཝིཡ ཨཀྐནྟནྟི རུལ༹ྷཱི ཧེསཱཏི ཨཱཧ – ‘‘ཨཀྐནྟནྟེཝ ཝུཏྟ’’ནྟི. ཨརིཡཝོཧཱརོཏི ཨརིཡདེསཝཱསཱིནཾ ཝོཧཱརོ. མཧནྟཾ ཨགྒཧེཏྭཱ ཨཔྤམཏྟཀསྶེཝ གཧཎེ པཡོཛནཾ དསྶེཏུཾ – ‘‘ཀསྨཱ པནཱ’’ཏིཨཱདི ཨཱརདྡྷཾ. ཏེན ‘‘ཝིཝཊྚཱུཔནིསྶཡཀུསལཾ ནཱམ ཡོནིསོ ཨུཔྤཱདིཏཾ ཨཔྤཀ’’ནྟི ན ཙིནྟེཏབྦཾ, ཨནུཀྐམེན ལདྡྷཔཙྩཡཾ ཧུཏྭཱ ཝཌྜྷམཱནཾ ཁུདྡཀནདཱི ཝིཡ པཀྑནྡམཧོགྷཱ སམུདྡཾ, ཨནུཀྐམེན ནིབྦཱནམཧཱསམུདྡམེཝ པུརིསཾ པཱཔེཏཱིཏི དཱིཔེཏི. པཙྩེཀབོདྷིཾ བུདྡྷབྷཱུམིནྟི ཙ པཙྩཏྟེ ཨུཔཡོགཝཙནཾ. ཝཊྚཝིཝཊྚཾ ཀཐིཏནྟི ཡཐཱཀྐམེན ཝུཏྟཾ.

༤༣. ཏཏིཡེ དོསེན པདུཊྛཙིཏྟནྟི སམྤཡུཏྟདྷམྨཱནཾ, ཡསྨིཾ སནྟཱནེ ཨུཔྤཛྫཏི, ཏསྶ ཙ དཱུསནེན ཝིསསཾསཊྛཔཱུཏིམུཏྟསདིསེན དོསེན པདཱུསིཏཙིཏྟཾ. ཨཏྟནོ ཙིཏྟེནཱཏི ཨཏྟནོ ཙེཏོཔརིཡཉཱཎེན སབྦཉྙུཏཉྙཱཎེན ཝཱ སཧིཏེན ཙིཏྟེན. པརིཙྪིནྡིཏྭཱཏི ཉཱཎེན པརིཙྪིནྡིཏྭཱ ¶ . ཨིཊྛཱཀཱརེན ཨེཏཱིཏི ཨཡོ, སུཁཾ. སབྦསོ ཨཔེཏོ ཨཡོ ཨེཏསྶ, ཨེཏསྨཱཏི ཝཱ ཨཔཱཡོ, ཀཱཡིཀསྶ ཙེཏསིཀསྶ ཙ དུཀྑསྶ གཏི པཝཏྟིཊྛཱནནྟི དུགྒཏི, ཀཱརཎཱཝསེན ཝིཝིདྷཾ ཝིཀཱརེན ཙ ནིཔཱཏིཡནྟི ཨེཏྠཱཏི ཝིནིཔཱཏོ, ཨཔྤཀོཔི ནཏྠི ཨཡོ སུཁཾ ཨེཏྠཱཏི ནིརཡོཏི ཨེཝམེཏྠ ཨཏྠོ ཝེདིཏབྦོ.

༤༤. ཙཏུཏྠེ སདྡྷཱཔསཱདེན པསནྣནྟི སདྡྷཱསངྑཱཏེན པསཱདེན པསནྣཾ, ན ཨིནྡྲིཡཱནཾ ཨཝིཔྤསནྣཏཱཡ. སུཁསྶ གཏིནྟི སུཁསྶ པཝཏྟིཊྛཱནཾ. སུཁམེཝེཏྠ གཙྪནྟི, ན དུཀྑནྟི ཝཱ སུགཏི. མནཱཔིཡརཱུཔཱདིཏཱཡ སཧ ཨགྒེཧཱིཏི སགྒཾ, ལོཀཾ.

༤༥. པཉྩམེ ¶ པརིལཱ༹ཧཝཱུཔསམཀརོ རཧདོ ཨེཏྠཱཏི རཧདོ, ཨུདཀཔུཎྞོ རཧདོ ཨུདཀརཧདོ. ཨུདཀཾ དཧཏི དྷཱརེཏཱིཏི ཨུདཀདཧོ. ཨཱཝིལོཏི ཀལལབཧུལཏཱཡ ཨཱཀུལོ. ཏེནཱཧ – ‘‘ཨཝིཔྤསནྣོ’’ཏི. ལུལི༹ཏོཏི ཝཱཏེན ཨཱལོལི༹ཏོ. ཏེནཱཧ – ‘‘ཨཔརིསཎྛིཏོ’’ཏི. ཝཱཏཱབྷིགྷཱཏེན ཝཱིཙིཏརངྒམལསམཱཀུལཏཱཡ ཧི པརིཏོ ན སཎྛིཏོ ཝཱ ཨཔརིསཎྛིཏོ. ཝཱཏཱབྷིགྷཱཏེན ཨུདཀསྶ ཙ ཨཔྤབྷཱཝེན ཀལལཱིབྷཱུཏོ ཀདྡམབྷཱཝཔྤཏྟོཏི ཨཱཧ – ‘‘ཀདྡམཱིབྷཱུཏོ’’ཏི. སིཔྤིཡོ མུཏྟསིཔྤིཨཱདཡོ. སམྦུཀཱ སངྑསལཱཀཝིསེསཱ. ཙརནྟམྤི ཏིཊྛནྟམྤཱིཏི ཡཐཱལཱབྷཝཙནམེཏཾ དཊྛབྦཾ. ཏམེཝ ཧི ཡཐཱལཱབྷཝཙནཏཾ དསྶེཏུཾ – ‘‘ཨེཏྠཱ’’ཏིཨཱདི ཨཱརདྡྷཾ.

པརིཡོནདྡྷེནཱཏི པཊིཙྪཱདིཏེན. ཏཡིདཾ ཀཱརཎེན ཨཱཝིལབྷཱཝསྶ དསྶནཾ. དིཊྛདྷམྨེ ཨིམསྨིཾ ཨཏྟབྷཱཝེ བྷཝོ དིཊྛདྷམྨིཀོ, སོ པན ལོཀིཡོཔི ཧོཏི ལོཀུཏྟརོཔཱིཏི ཨཱཧ – ‘‘ལོཀིཡལོཀུཏྟརམིསྶཀོ’’ཏི. པེཙྩ སམྤརེཏབྦཏོ སམྤརཱཡོ, པརལོཀོ. ཏེནཱཧ – ‘‘སོ ཧི པརཏྠ ཨཏྠོཏི པརཏྠོ’’ཏི. ཨིཏི དྭིདྷཱཔི སཀསནྟཏིཔརིཡཱཔནྣོ ཨེཝ གཧིཏོཏི ཨིཏརམྤི སངྒཧེཏྭཱ དསྶེཏུཾ – ‘‘ཨཔིཙཱ’’ཏིཨཱདིམཱཧ. ཨཡནྟི ཀུསལཀམྨཔཐསངྑཱཏོ དསཝིདྷོ དྷམྨོ. སཏྠནྟརཀཔྤཱཝསཱནེཏི ཨིདཾ ཏསྶ ཨཱསནྣབྷཱཝཾ སནྡྷཱཡ ཝུཏྟཾ. ཡསྶ ཀསྶཙི ཨནྟརཀཔྤསྶཱཝསཱནེཏི ཝེདིཏབྦཾ. ཨརིཡཱནཾ ཡུཏྟནྟི ཨརིཡཱནཾ ཨརིཡབྷཱཝཱཡ ཡུཏྟཾ, ཏཏོ ཨེཝ ཨརིཡབྷཱཝཾ ཀཱཏུཾ སམཏྠཾ. ཉཱཎམེཝ ཉེཡྻསྶ པཙྩཀྑཀརཎཊྛེན དསྶནནྟི ཨཱཧ – ‘‘ཉཱཎམེཝ ཧཱི’’ཏིཨཱདི. ཀིཾ པན ཏནྟི ཨཱཧ – ‘‘དིབྦཙཀྑཱུ’’ཏིཨཱདི.

༤༦. ཚཊྛེ ཨཙྪོཏི ཏནུཀོ. ཏནུབྷཱཝམེཝ ཧི སནྡྷཱཡ ‘‘ཨབཧལོ’’ཏི ཝུཏྟཾ. ཡསྨཱ པསནྣོ ནཱམ ཨཙྪོ ན བཧལོ, ཏསྨཱ ‘‘པསནྣོཏིཔི ཝཊྚཏཱི’’ཏི ཝུཏྟཾ. ཝིཔྤསནྣོཏི ཝིསེསེན པསནྣོ ¶ . སོ པན སམྨཱ པསནྣོ ནཱམ ཧོཏཱིཏི ཨཱཧ – ‘‘སུཊྛུ པསནྣོ’’ཏི. ཨནཱཝིལོཏི ཨཀལུསོ. ཏེནཱཧ – ‘‘པརིསུདྡྷོ’’ཏིཨཱདི. སངྑནྟི ཁུདྡཀསེཝཱལཾ, ཡཾ ‘‘ཏིལབཱིཛཀ’’ནྟི ཝུཙྩཏི. སེཝཱལནྟི ཀཎྞིཀསེཝཱལཾ. པཎཀནྟི ཨུདཀམལཾ. ཙིཏྟསྶ ཨཱཝིལབྷཱཝོ ནཱིཝརཎཧེཏུཀོཏི ཨཱཧ – ‘‘ཨནཱཝིལེནཱཏི པཉྩནཱིཝརཎཝིམུཏྟེནཱ’’ཏི.

༤༧. སཏྟམེ ¶ རུཀྑཛཱཏཱནཱིཏི ཨེཏྠ ཛཱཏསདྡེན པདཝཌྜྷནམེཝ ཀཏཾ ཡཐཱ ‘‘ཀོསཛཱཏ’’ནྟི ཨཱཧ – ‘‘རུཀྑཱནམེཝེཏཾ ཨདྷིཝཙན’’ནྟི. ཀོཙི ཧི རུཀྑོ ཝཎྞེན ཨགྒོ ཧོཏི ཡཐཱ ཏཾ རཏྟཙནྡནཱདི. ཀོཙི གནྡྷེན ཡཐཱ ཏཾ གོསཱིཏཙནྡནཾ. ཀོཙི རསེན ཁདིརཱདི. ཀོཙི ཐདྡྷཏཱཡ ཙམྤཀཱདི. མགྒཕལཱཝཧཏཱཡ ཝིཔསྶནཱཝསེན བྷཱཝིཏམྤི གཧིཏཾ. ‘‘ཏཏྠ ཏཏྠེཝ སཀྑིབྷབྦཏཾ པཱཔུཎཱཏཱི’’ཏི (ཨ. ནི. ༣.༡༠༣) ཝཙནཏོ ‘‘ཨབྷིཉྙཱཔཱདཀཙཏུཏྠཛ྄ཛྷཱནཙིཏྟམེཝ, ཨཱཝུསོ’’ཏི ཕུསྶམིཏྟཏྠེརོ ཝདཏི.

༤༨. ཨཊྛམེ ཙིཏྟསྶ པརིཝཏྟནཾ ཨུཔྤཱདནིརོདྷཱ ཨེཝཱཏི ཨཱཧ – ‘‘ཨེཝཾ ལཧུཾ ཨུཔྤཛྫིཏྭཱ ལཧུཾ ནིརུཛ྄ཛྷནཀ’’ནྟི. ཨདྷིམཏྟཔམཱཎཏྠེཏི ཨཏིཀྐནྟཔམཱཎཏྠེ, པམཱཎཱཏཱིཏཏཱཡནྟི ཨཏྠོ. ཏེནཱཧ – ‘‘ཨཏིཝིཡ ན སུཀརཱ’’ཏི. ཙཀྑུཝིཉྙཱཎམྤི ཨདྷིཔྤེཏམེཝཱཏི སབྦསྶཔི ཙིཏྟསྶ སམཱནཁཎཏྟཱ ཝུཏྟཾ. ཙིཏྟསྶ ཨཏིཝིཡ ལཧུཔརིཝཏྟིབྷཱཝཾ ཐེརཝཱདེན དཱིཔེཏུཾ – ‘‘ཨིམསྨིཾ པནཏྠེ’’ཏིཨཱདི ཝུཏྟཾ. ཙིཏྟསངྑཱརཱཏི སསམྤཡུཏྟཾ ཙིཏྟཾ ཝདཏི. ཝཱཧསཏཱནཾ ཁོ, མཧཱརཱཛ, ཝཱིཧཱིནནྟི པོཏྠཀེསུ ལིཁནྟི, ‘‘ཝཱཧསཏཾ ཁོ, མཧཱརཱཛ, ཝཱིཧཱིན’’ནྟི པན པཱཋེན བྷཝིཏབྦཾ. མིལིནྡཔཉྷེཔི (མི. པ. ༤.༡.༢) ཧི ཀཏྠཙི ཨཡམེཝ པཱཋོ དིསྶཏི. ‘‘ཝཱཧསཏཱན’’ནྟི ཝཱ པཙྩཏྟེ སཱམིཝཙནཾ བྱཏྟཡེན ཝུཏྟནྟི དཊྛབྦཾ. ཨཌྜྷཙཱུལ༹ནྟི ཐོཀེན ཨཱུནཾ ཨུཔཌྜྷཾ. ཀསྶ པན ཨུཔཌྜྷནྟི? ཨདྷིཀཱརཏོ ཝཱཧསྶཱཏི ཝིཉྙཱཡཏི. ‘‘ཨཌྜྷཙུདྡས’’ནྟི ཀེཙི. ‘‘ཨཌྜྷཙཏུཏྠ’’ནྟི ཨཔརེ. སཱདྷིཀཾ དིཡཌྜྷསཏཾ ཝཱཧཱཏི དལ༹ྷཾ ཀཏྭཱ ཝདནྟི, ཝཱིམཾསིཏབྦཾ. ཙཏུནཱལི༹ཀོ ཏུམྦོ. པུཙྪཱཡ ཨབྷཱཝེནཱཏི ‘‘སཀྐཱ པན, བྷནྟེ, ཨུཔམཾ ཀཱཏུ’’ནྟི ཨེཝཾ པཝཏྟཱཡ པུཙྪཱཡ ཨབྷཱཝེན ན ཀཏཱ ཨུཔམཱ. དྷམྨདེསནཱཔརིཡོསཱནེཏི སནྣིཔཏིཏཔརིསཱཡ ཡཐཱརདྡྷདྷམྨདེསནཱཡ པརིཡོསཱནེ.

༤༩. ནཝམེ པབྷསྶརནྟི པརིཡོདཱཏཾ སབྷཱཝཔརིསུདྡྷཊྛེན. ཏེནཱཧ – ‘‘པཎྜརཾ པརིསུདྡྷ’’ནྟི. པབྷསྶརཏཱདཡོ ནཱམ ཝཎྞདྷཱཏུཡཾ ལབྦྷནཀཝིསེསཱཏི ཨཱཧ – ‘‘ཀིཾ པན ཙིཏྟསྶ ཝཎྞོ ནཱམ ཨཏྠཱི’’ཏི? ཨིཏརོ ཨརཱུཔཏཱཡ ‘‘ནཏྠཱི’’ཏི པཊིཀྑིཔིཏྭཱ པརིཡཱཡཀཐཱ ཨཡཾ ཏཱདིསསྶ ཙིཏྟསྶ པརིསུདྡྷབྷཱཝནཱདཱིཔནཱཡཱཏི དསྶེནྟོ ‘‘ནཱིལཱདཱིན’’ནྟིཨཱདིམཱཧ. ཏཐཱ ¶ ཧི ‘‘སོ ཨེཝཾ སམཱཧིཏེ ཙིཏྟེ པརིསུདྡྷེ པརིཡོདཱཏེ’’ཏི (དཱི. ནི. ༡.༢༤༣-༢༤༤; མ. ནི. ༡.༣༨༤-༣༨༦, ༤༣༡-༤༣༣; པཱརཱ. ༡༢-༡༣) ཝུཏྟཾ ¶ . ཏེནེཝཱཧ – ‘‘ཨིདམྤི ནིརུཔཀྐིལེསཏཱཡ པརིསུདྡྷནྟི པབྷསྶར’’ནྟི. ཀིཾ པན བྷཝངྒཙིཏྟཾ ནིརུཔཀྐིལེསནྟི? ཨཱམ སབྷཱཝཏོ ནིརུཔཀྐིལེསཾ, ཨཱགནྟུཀཨུཔཀྐིལེསཝསེན པན སིཡཱ ཨུཔཀྐིལིཊྛཾ. ཏེནཱཧ – ‘‘ཏཉྩ ཁོ’’ཏིཨཱདི. ཏཏྠ ཨཏྟནོ ཏེསཉྩ བྷིཀྑཱུནཾ པཙྩཀྑབྷཱཝཏོ པུབྦེ ‘‘ཨིད’’ནྟི ཝཏྭཱ ཨིདཱནི པཙྩཱམསནཝསེན ‘‘ཏ’’ནྟི ཨཱཧ. ཙ-སདྡོ ཨཏྠཱུཔནཡནེ. ཁོ-སདྡོ ཝཙནཱལངྐཱརེ, ཨཝདྷཱརཎེ ཝཱ. ཝཀྑམཱནསྶ ཨཏྠསྶ ནིཙྪིཏབྷཱཝཏོ བྷཝངྒཙིཏྟེན སཧཱཝཊྛཱནཱབྷཱཝཏོ ཨུཔཀྐིལེསཱནཾ ཨཱགནྟུཀཏཱཏི ཨཱཧ – ‘‘ཨསཧཛཱཏེཧཱི’’ཏིཨཱདི. རཱགཱདཡོ ཨུཔེཙྩ ཙིཏྟསནྟཱནཾ ཀིལིསྶནྟི ཝིབཱདྷེནྟི ཨུཔཏཱཔེནྟི ཙཱཏི ཨཱཧ – ‘‘ཨུཔཀྐིལེསེཧཱིཏི རཱགཱདཱིཧཱི’’ཏི. བྷཝངྒཙིཏྟསྶ ནིཔྤརིཡཱཡཏོ ཨུཔཀྐིལེསེཧི ཨུཔཀྐིལིཊྛཏཱ ནཱམ ནཏྠི ཨསཾསཊྛབྷཱཝཏོ, ཨེཀསནྟཏིཔརིཡཱཔནྣཏཱཡ པན སིཡཱ ཨུཔཀྐིལིཊྛཏཱཔརིཡཱཡོཏི ཨཱཧ – ‘‘ཨུཔཀྐིལིཊྛཾ ནཱམཱཏི ཝུཙྩཏཱི’’ཏི. ཨིདཱནི ཏམཏྠཾ ཨུཔམཱཡ ཝིབྷཱཝེཏུཾ ‘‘ཡཐཱ ཧཱི’’ཏིཨཱདིམཱཧ. ཏེན བྷིནྣསནྟཱནགཏཱཡཔི ནཱམ ཨིརིཡཱཡ ལོཀེ གཱརཡ྄ཧཏཱ དིསྶཏི, པགེཝ ཨེཀསནྟཱནགཏཱཡ ཨིརིཡཱཡཱཏི ཨིམཾ ཝིསེསཾ དསྶེཏི. ཏེནཱཧ – ‘‘ཛཝནཀྑཎེ…པེ… ཨུཔཀྐིལིཊྛཾ ནཱམ ཧོཏཱི’’ཏི.

༥༠. དསམེ བྷཝངྒཙིཏྟམེཝ ཙིཏྟནྟི ‘‘པབྷསྶརམིདཾ, བྷིཀྑཝེ, ཙིཏྟ’’ནྟི ཝུཏྟཾ བྷཝངྒཙིཏྟམེཝ. ཡདགྒེན བྷཝངྒཙིཏྟཾ ཏཱདིསཔཙྩཡསམཝཱཡེ ཨུཔཀྐིལིཊྛཾ ནཱམ ཝུཙྩཏི, ཏདགྒེན ཏབྦིདྷུརཔཙྩཡསམཝཱཡེ ཨུཔཀྐིལེསཏོ ཝིམུཏྟནྟི ཝུཙྩཏི. ཏེནཱཧ – ‘‘ཨུཔཀྐིལེསེཧི ཝིཔྤམུཏྟཾ ནཱམ ཧོཏཱི’’ཏི. སེསམེཏྠ ནཝམསུཏྟེ ཝུཏྟནཡཱནུསཱརེན ཝེདིཏབྦཾ.

པཎིཧིཏཨཙྪཝགྒཝཎྞནཱ ནིཊྛིཏཱ.

༦. ཨཙྪརཱསངྒྷཱཏཝགྒཝཎྞནཱ

༥༡. ཚཊྛསྶ ¶ པཋམེ ཨསྶུཏཝཱཏི ཨེཏྠ ‘‘སཱདྷུ པཉྙཱཎཝཱ ནརོ’’ཏིཨཱདཱིསུ (ཛཱ. ༢.༡༨.༡༠༡) ཨཏྠིཏཱམཏྟསྶ བོདྷཀོ ཝཱ-སདྡོ. ‘‘སཱིལཝཱ ཧོཏི ཀལྱཱཎདྷམྨོ’’ཏིཨཱདཱིསུ (མ. ནི. ༣.༣༨༡) པསཾསཱཝིསིཊྛཱཡ ཨཏྠིཏཱཡ. ‘‘པཉྙཝཱ ཧོཏི ¶ ཨུདཡཏྠགཱམིནིཡཱ པཉྙཱཡ སམནྣཱགཏོ’’ཏིཨཱདཱིསུ (དཱི. ནི. ༣.༣༡༧; མ. ནི. ༢.༢༥) ཨཏིསཡཏྠཝིསིཊྛཱཡ ཨཏྠིཏཱཡ, ཏསྨཱ ཡསྶ པསཏྠཾ ཨཏིསཡེན ཝཱ སུཏཾ ཨཏྠི, སོ སུཏཝཱ, སཾཀིལེསཝིདྡྷཾསནསམཏྠཾ པརིཡཏྟིདྷམྨསྶཝནཾ, ཏཾ སུཏྭཱ ཏཐཏྟཱཡ པཊིཔཏྟི ཙ ‘‘སུཏཝཱ’’ཏི ཨིམིནཱ པདེན པཀཱསིཏཱ. སོཏབྦཡུཏྟཾ སུཏྭཱ ཀཏྟབྦནིཔྥཏྟིཝསེན སུཎཱིཏི ཝཱ སུཏཝཱ, ཏཔྤཊིཀྑེཔེན ན སུཏཝཱཏི ཨསྶུཏཝཱ.

ཨཡཉྷི ཨཀཱརོ ‘‘ཨཧེཏུཀཱ དྷམྨཱ (དྷ. ས. ༢ དུཀམཱཏིཀཱ), ཨབྷིཀྑུཀོ ཨཱཝཱསོ’’ཏིཨཱདཱིསུ (པཱཙི. ༡༠༤༧) ཏཾསམཱཡོགནིཝཏྟིཡཾ དིཊྛོ. ‘‘ཨཔྤཙྩཡཱ དྷམྨཱ’’ཏི (དྷ. ས. ༧ དུཀམཱཏིཀཱ) ཏཾསམྦནྡྷིབྷཱཝནིཝཏྟིཡཾ. པཙྩཡུཔྤནྣཉྷི པཙྩཡསམྦནྡྷཱིཏི ཨཔཙྩཡུཔྤནྣཏྟཱ ཨཏཾསམྦནྡྷིཏཱ ཨེཏྠ ཛོཏིཏཱ. ‘‘ཨནིདསྶནཱ དྷམྨཱ’’ཏི (དྷ. ས. ༩ དུཀམཱཏིཀཱ) ཏཾསབྷཱཝནིཝཏྟིཡཾ. ནིདསྶནཉྷི ཨེཏྠ དཊྛབྦཏཱ. ཨཐ ཝཱ པསྶཏཱིཏི ནིདསྶནཾ, ཙཀྑུཝིཉྙཱཎཾ. ཏགྒཧེཏབྦཏཱནིཝཏྟིཡཾ, ཏཐཱ ‘‘ཨནཱསཝཱ དྷམྨཱ’’ཏི (དྷ. ས. ༡༥ དུཀམཱཏིཀཱ). ‘‘ཨཔྤཊིགྷཱ དྷམྨཱ (དྷ. ས. ༡༠ དུཀམཱཏིཀཱ) ཨནཱརམྨཎཱ དྷམྨཱ’’ཏི (དྷ. ས. ༥༥ དུཀམཱཏིཀཱ) ཏཾཀིཙྩནིཝཏྟིཡཾ. ‘‘ཨརཱུཔིནོ དྷམྨཱ ཨཙེཏསིཀཱདྷམྨཱ’’ཏི ཏཾསབྷཱཝནིཝཏྟིཡཾ. ཏདཉྙཏཱ ཧི ཨིདྷ པཀཱསིཏཱ. ‘‘ཨམནུསྶོ’’ཏི ཏབྦྷཱཝམཏྟནིཝཏྟིཡཾ. མནུསྶཏྟམཏྟཾ ནཏྠི, ཨཉྙཾ ཏཾསདིསནྟི. སདིསཏཱ ཧི ཨེཏྠ སཱུཙིཏཱ. ‘‘ཨསྶམཎོ སམཎཔཊིཉྙོ ཨབྲཧྨཙཱརཱི བྲཧྨཙཱརིཔཊིཉྙོ’’ཏི (ཨ. ནི. ༣.༡༣) ཙ ཏཾསམྦྷཱཝནཱིཡགུཎནིཝཏྟིཡཾ. གརཧཱ ཧི ཨིདྷ ཉཱཡཏི. ‘‘ཀཙྩི བྷོཏོ ཨནཱམཡཾ (ཛཱ. ༡.༡༥.༡༤༦; ༢.༢༠.༡༢༩) ཨནུདརཱ ཀཉྙཱ’’ཏི ཙ ཏདནཔྤབྷཱཝནིཝཏྟིཡཾ. ‘‘ཨནུཔྤནྣཱ དྷམྨཱ’’ཏི (དྷ. ས. ༡༧ ཏིཀམཱཏིཀཱ) ཏཾསདིསབྷཱཝནིཝཏྟིཡཾ. ཨཏཱིཏཱནཉྷི ཨུཔྤནྣཔུབྦཏྟཱ ཨུཔྤཱདིདྷམྨཱནཉྩ པཙྩཡེཀདེསསིདྡྷིཡཱ ཨཱརདྡྷུཔྤཱདབྷཱཝཏོ ཀཱལཝིནིམུཏྟསྶ ཙ ཝིཛྫམཱནཏྟཱ ཨུཔྤནྣཱནུཀཱུལཏཱ, པགེཝ པཙྩུཔྤནྣཱནནྟི ཏབྦིདྷུརཏཱ ཧེཏྠ ཝིཉྙཱཡཏི. ‘‘ཨསེཀྑཱ དྷམྨཱ’’ཏི (དྷ. ས. ༡༡ ཏིཀམཱཏིཀཱ) ཏདཔརིཡོསཱནནིཝཏྟིཡཾ. ཏནྣིཊྛཱནཉྷེཏྠ པཀཱསིཏནྟི ཨེཝཾ ཨནེཀེསཾ ¶ ཨཏྠཱནཾ ཛོཏཀོ. ཨིདྷ པན ‘‘ཨརཱུཔིནོ དྷམྨཱ (དྷ. ས. ༡༡ དུཀམཱཏིཀཱ), ཨཙེཏསིཀཱ དྷམྨཱ’’ཏིཨཱདཱིསུ (དྷ. ས. ༥༧ དུཀམཱཏིཀཱ) ཝིཡ ཏཾསབྷཱཝནིཝཏྟིཡཾ དཊྛབྦོ, ཨཉྙཏྠེཏི ཨཏྠོ. ཨེཏེནསྶ སུཏཱདིཉཱཎཝིརཧཾ དསྶེཏི. ཏེན ཝུཏྟཾ – ‘‘ཨཱགམཱདྷིགམཱབྷཱཝཱ ཉེཡྻོ ཨསྶུཏཝཱ ཨིཏཱི’’ཏི.

ཨིདཱནི ¶ ཏསྶཏྠཾ ཝིཝརནྟོ ‘‘ཡོ ཧཱི’’ཏིཨཱདིམཱཧ. ཏཏྠ ཡསྨཱ ཁནྡྷདྷཱཏཱདིཀོསལླེནཔི ཨུཔཀྐིལེསཨུཔཀྐིལིཊྛཱནཾ ཛཱནནཧེཏུབྷཱུཏཾ བཱཧུསཙྩཾ ཧོཏི. ཡཐཱཧ – ‘‘ཀིཏྟཱཝཏཱ ནུ ཁོ, བྷནྟེ, བཧུསྶུཏོ ཧོཏི? ཡཏོ ཁོ, བྷིཀྑུ, ཁནྡྷཀུསལོ ཧོཏི. དྷཱཏུ…པེ… ཨཱཡཏན…པེ… པཊིཙྩསམུཔྤཱདཀུསལོ ཧོཏི. ཨེཏྟཱཝཏཱ ཁོ, བྷིཀྑུ, བཧུསྶུཏོ ཧོཏཱི’’ཏི. ཏསྨཱ ‘‘ཡསྶ ཙ ཁནྡྷདྷཱཏུཨཱཡཏནཔཙྩཡཱཀཱརསཏིཔཊྛཱནཱདཱིསཱུ’’ཏིཨཱདི ཝུཏྟཾ. ཏཏྠ ཝཱཙུགྒཏཀརཎཾ ཨུགྒཧོ. ཨཏྠཔརིཔུཙྪནཾ པུརིཔུཙྪཱ. ཀུསལེཧི སཧ ཙོདནཱཔརིཧརཎཝསེན ཝིནིཙྪཡཀརཎཾ ཝིནིཙྪཡོ. ཨཱཙརིཡེ པན པཡིརུཔཱསིཏྭཱ ཨཏྠདྷམྨཱནཾ ཨཱགམནཾ སུཏམཡཉཱཎཝསེན ཨཝབུཛ྄ཛྷནཾ ཨཱགམོ. མགྒཕལནིབྦཱནཱནཾ སཙྪིཀིརིཡཱ ཨདྷིགམོ.

བཧཱུནཾ ནཱནཔྤཀཱརཱནཾ སཀྐཱཡདིཊྛཱདཱིནཾ ཨཝིཧཏཏྟཱ ཏཱ ཛནེནྟི, ཏཱཧི ཝཱ ཛནིཏཱཏི པུཐུཛྫནཱ. ཨཝིགྷཱཏམེཝ ཝཱ ཛན-སདྡོ ཝདཏི. པུཐུ སཏྠཱརཱནཾ མུཁུལློཀིཀཱཏི ཨེཏྠ པུཐཱུ ཛནཱ སཏྠུཔཊིཉྙཱ ཨེཏེསནྟི པུཐུཛྫནཱ. སབྦགཏཱིཧི ཨཝུཊྛིཏཱཏི ཨེཏྠ ཛནེཏབྦཱ, ཛཱཡནྟི ཝཱ ཨེཏྠ སཏྟཱཏི ཛནཱ, གཏིཡོ, ཏཱ པུཐཱུ ཨེཏེསནྟི པུཐུཛྫནཱ. ཨིཏོ པརེ ཛཱཡནྟི ཨེཏེཧཱིཏི ཛནཱ, ཨབྷིསངྑཱརཱདཡོ, ཏེ ཨེཏེསཾ པུཐཱུ ཝིཛྫནྟཱིཏི པུཐུཛྫནཱ. ཨབྷིསངྑཱརཱདིཨཏྠོ ཨེཝ ཝཱ ཛན-སདྡོ དཊྛབྦོ. ཨོགྷཱ ཀཱམོགྷཱདཡོ. རཱགགྒིཨཱདཡོ སནྟཱཔཱ. ཏེ ཨེཝ སབྦེཔི ཝཱ ཀིལེསཱ པརིལཱ༹ཧཱ. པུཐུ པཉྩསུ ཀཱམགུཎེསུ རཏྟཱཏི ཨེཏྠ ཛཱཡཏཱིཏི ཛནོ, རཱགོ གེདྷོཏི ཨེཝམཱདིཀོ, པུཐུ ཛནོ ཨེཏེསནྟི པུཐུཛྫནཱ. པུཐཱུསུ ཛནཱ ཛཱཏཱ རཏྟཱཏི ཨེཝཾ རཱགཱདིཨཏྠོ ཨེཝ ཝཱ ཛན-སདྡོ དཊྛབྦོ.

རཏྟཱཏི ཝཏྠཾ ཝིཡ རངྒཛཱཏེན ཙིཏྟསྶ ཝིཔརིཎཱམཀརེན ཚནྡརཱགེན རཏྟཱ སཱརཏྟཱ. གིདྡྷཱཏི ཨབྷིཀངྑནསབྷཱཝེན ཨབྷིགིཛ྄ཛྷནེན གིདྡྷཱ གེདྷཾ ཨཱཔནྣཱ. གདྷིཏཱཏི གནྠིཏཱ ཝིཡ དུམྨོཙནཱིཡབྷཱཝེན ཏཏྠ པཊིབདྡྷཱ. མུཙྪིཏཱཏི ཀིལེསཝསེན ཝིསཉྙིབྷཱུཏཱ ཝིཡ ཨནཉྙཀིཙྩཱ མོཧམཱཔནྣཱ. ཨཛ྄ཛྷོཔནྣཱཏི ཨནཉྙསཱདྷཱརཎེ ཝིཡ ཀཏྭཱ གིལིཏྭཱ པརིནིཊྛཱཔེཏྭཱ ཋིཏཱ. ལགྒཱཏི ཝངྐཀཎྚཀེ ཝིཡ ཨཱསཏྟཱ, མཧཱཔལིཔེ ཡཱཝ ནཱསིཀགྒཱ པལིཔནྣཔུརིསོ ཝིཡ ཨུདྡྷརིཏུཾ ཨསཀྐུཎེཡྻབྷཱཝེན ནིམུགྒཱ ¶ . ལགྒིཏཱཏི མཀྐཊཱལེཔེ ཨཱལགྒབྷཱཝེན ¶ སམྨསིཏོ ཝིཡ མཀྐཊོ པཉྩནྣཾ ཨིནྡྲིཡཱནཾ ཝསེན ཨཱལགྒིཏཱ. པལིབུདྡྷཱཏི སམྦདྡྷཱ, ཨུཔདྡུཏཱ ཝཱ. ཨཱཝུཏཱཏི ཨཱཝརིཏཱ. ནིཝུཏཱཏི ནིཝཱརིཏཱ. ཨོཝུཏཱཏི པལིགུཎྛིཏཱ, པརིཡོནདྡྷཱ ཝཱ. པིཧིཏཱཏི པིདཧིཏཱ. པཊིཙྪནྣཱཏི ཚཱདིཏཱ. པཊིཀུཛྫིཏཱཏི ཧེཊྛཱམུཁཛཱཏཱ.

‘‘ཨསྶུཏཝཱ’’ཏི ཨེཏེན ཨཝིཛྫནྡྷཏཱ ཝུཏྟཱཏི ཨཱཧ – ‘‘ཨནྡྷཔུཐུཛྫནོ ཝུཏྟོ’’ཏི. ཙིཏྟཊྛིཏི ཙིཏྟཔརིགྒཧོ ནཏྠཱིཏི ཡཱཡ པཊིཔཏྟིཡཱ ཙིཏྟསྶ ཨུཔཀྐིལེསཾ ཏཏོ ཝིཔྤམུཏྟིཉྩ ཡཐཱསབྷཱཝཏོ ཛཱནེཡྻ, སཱ ཙིཏྟབྷཱཝནཱ ཙིཏྟཊྛིཏི. ཨེཀཱརམྨཎེ སུཊྛུ སམཱདྷཱནཝསེན ཨཝཊྛིཏིཾ པཱདཀཾ ཀཏྭཱ པཝཏྟིཏཱ སམྤཡུཏྟདྷམྨེཧི ནིསྶཡཱརམྨཎེཧི ཙ སདྡྷིཾ ཙིཏྟསྶ པརིགྒཧསཉྙིཏཱ ཝིཔསྶནཱབྷཱཝནཱཔི ནཏྠི, ཡཱཡ ཝུཏྟམཏྠཾ ཡཐཱསབྷཱཝཏོ ཛཱནེཡྻ.

༥༢. དུཏིཡེ སུཏཝཱཏི པདསྶ ཨཏྠོ ཨནནྟརསུཏྟེ ཝུཏྟོཡེཝ. ཨརིཡསཱཝཀོཏི ཨེཏྠ ཙཏུཀྐཾ སམྦྷཝཏཱིཏི ཏཾ དསྶེཏུཾ – ‘‘ཨཏྠི ཨརིཡོ’’ཏིཨཱདི ཨཱརདྡྷཾ. པཙྩེཀཾ སཙྩཱནི བུདྡྷཝནྟོཏི པཙྩེཀབུདྡྷཱ. ནནུ སབྦེཔི ཨརིཡཱ པཙྩེཀམེཝ སཙྩཱནི པཊིཝིཛ྄ཛྷནྟི དྷམྨསྶ པཙྩཏྟཝེདནཱིཡབྷཱཝཏོ? ནཡིདམཱིདིསཾ པཊིཝེདྷཾ སནྡྷཱཡ ཝུཏྟཾ. ཡཐཱ པན སཱཝཀཱ ཨཉྙེསཾ ནིསྶཡེན སཙྩཱནི པཊིཝིཛ྄ཛྷནྟི པརཏོགྷོསེན ཝིནཱ ཏེསཾ དསྶནམགྒསྶ ཨནུཔྤཛྫནཏོ. ཡཐཱ ཙ སམྨཱསམྦུདྡྷཱ ཨཉྙེསཾ ནིསྶཡབྷཱཝེན སཙྩཱནི ཨབྷིསམྦུཛ྄ཛྷནྟི, ན ཨེཝམེཏེ, ཨེཏེ པན ཨཔརནེཡྻཱ ཧུཏྭཱ ཨཔརནཱཡཀབྷཱཝེན སཙྩཱནི པཊིཝིཛ྄ཛྷནྟི. ཏེན ཝུཏྟཾ – ‘‘པཙྩེཀཾ སཙྩཱནི བུདྡྷཝནྟོཏི པཙྩེཀབུདྡྷཱ’’ཏི.

ཨཏྠི སཱཝཀོ ན ཨརིཡོཏི ཨེཏྠ པོཐུཛྫནིཀཱཡ སདྡྷཱཡ རཏནཏྟཡེ ཨབྷིཔྤསནྣོ སདྡྷོཔི གཧིཏོ ཨེཝ. གིཧཱི ཨནཱགཏཕལོཏི ཨིདཾ པན ནིདསྶནམཏྟཾ དཊྛབྦཾ. ཡཐཱཝུཏྟཔུགྒལོ ཧི སརཎགམནཏོ པཊྛཱཡ སོཏཱཔཏྟིཕལསཙྪིཀིརིཡཱཡ པཊིཔནྣོཨིཙྩེཝ ཝཏྟབྦཏཾ ལབྷཏི. སྭཱཡམཏྠོ དཀྑིཎཱཝིསུདྡྷིསུཏྟེན (མ. ནི. ༣.༣༧༦ ཨཱདཡོ) དཱིཔེཏབྦོ. སུཏཝཱཏི ཨེཏྠ ཝུཏྟཨཏྠོ ནཱམ ཨཏྟཧིཏཔརཧིཏཔྤཊིཔཏྟི, ཏསྶ ཝསེན སུཏསམྤནྣོ. ཡཾ སནྡྷཱཡ ཝུཏྟཾ – ‘‘སོ ཙ ཧོཏི སུཏེན ཨུཔཔནྣོ, ཨཔྤམྤི ¶ ཙེ སཧིཏཾ བྷཱསམཱནོ’’ཏི ཙ ཨཱདི. ཨརིཡསཱཝཀོཏི ཝེདིཏབྦོཏི ཨརིཡསྶ བྷགཝཏོ དྷམྨསྶཝནཀིཙྩེ ཡུཏྟཔྤཡུཏྟབྷཱཝཏོ ཝུཏྟཾ. ཨུཔཀྐིལེསེཧི ཝིཔྤམུཏྟི ཨནུཔཀྐིལིཊྛཏཱ, ཏསྶཱ ཡཐཱསབྷཱཝཛཱནནཾ དལ༹ྷཏརཱཡ ཨེཝ ཙིཏྟབྷཱཝནཱཡ སཏི ཧོཏི, ན ཨཉྙཐཱཏི ‘‘བལཝཝིཔསྶནཱ ཀཐིཏཱ’’ཏི ཝུཏྟཾ.

༥༣. ཏཏིཡེ ཨགྒིཀྑནྡྷོཔམསུཏྟནྟཨཊྛུཔྤཏྟིཡནྟི ཨགྒིཀྑནྡྷོཔམསུཏྟེ (ཨ. ནི. ༧.༧༢) དེསནཱཨཊྛུཔྤཏྟིཡཾ ¶ . ཏཾདེསནཱཧེཏུཀཉྷི ཨེཀཙྩཱནཾ བྷིཀྑཱུནཾ མིཙྪཱཔཊིཔཏྟིཾ ནིམིཏྟཾ ཀཏྭཱ བྷགཝཱ ཨིམཾ སུཏྟཾ དེསེསི. ཨཝིཛཧིཏམེཝ ཧོཏི སབྦཀཱལཾ སུཔྤཏིཊྛིཏསཏིསམྤཛཉྙཏྟཱ. ཡསྨཱ བུདྡྷཱནཾ རཱུཔཀཱཡོ བཱཧིརབྦྷནྟརེཧི མལེཧི ཨནུཔཀྐིལིཊྛོ སུདྷོཏཛཱཏིམཎིསདིསོ, ཏསྨཱ ཝུཏྟཾ – ‘‘ཨུཔཊྛཱཀཱནུགྒཧཏྠཾ སརཱིརཕཱསུཀཏྠཉྩཱ’’ཏི. ཝཱིཏིནཱམེཏྭཱཏི ཕལསམཱཔཏྟཱིཧི ཝཱིཏིནཱམེཏྭཱ. ཀཱལཔརིཙྪེདཝསེན ཝིཝིཏྟཱསནེ ཝཱིཏིནཱམནཾ ཝིཝེཀནིནྣཏཱཡ ཙེཝ པརེསཾ དིཊྛཱནུགཏིཨཱཔཛྫནཏྠཉྩ. ནིཝཱསེཏྭཱཏི ཝིཧཱརནིཝཱསནཔརིཝཏྟནཝསེན ནིཝཱསེཏྭཱ. ཀདཱཙི ཨེཀཀསྶ, ཀདཱཙི བྷིཀྑུསངྒྷཔརིཝུཏསྶ, ཀདཱཙི པཀཏིཡཱ, ཀདཱཙི པཱཊིཧཱརིཡེཧི ཝཏྟམཱནེཧི ཙ གཱམཔྤཝེསོ ཏཐཱ ཏཐཱ ཝིནེཏབྦཔུགྒལཝསེན. ཨུཔསཾཧརིཏྭཱཏི ཧིམཝནྟཱདཱིསུ པུཔྥིཏརུཀྑཱདིཏོ ཨཱནེཏྭཱ. ཨོཎཏུཎྞཏཱཡ བྷཱུམིཡཱ སཏྠུ པདནིཀྑེཔསམཡེ སམབྷཱཝཱཔཏྟི, སུཁསམྥསྶཝིཀསིཏཔདུམསམྤཊིཙྪནཉྩ སུཔྤཏིཊྛིཏཔཱདཏཱཡ ནིསྶནྡཕལཾ, ན ཨིདྡྷིནིམྨཱནཾ. ནིདསྶནམཏྟཉྩེཏཾ སཀྑརཱཀཋལཀཎྚཀསངྐུཀལལཱདིཨཔགམོ སུཙིབྷཱཝཱཔཏྟཱིཏི ཨེཝམཱདཱིནམྤི ཏདཱ ལབྦྷནཏོ.

ཨིནྡཁཱིལསྶ ཨནྟོ ཋཔིཏམཏྟེཏི ཨིདཾ ཡཱཝདེཝ ཝེནེཡྻཛནཝིནཡཏྠཱཡ སཏྠུ པཱཊིཧཱརིཡཾ པཝཏྟནྟི ཀཏྭཱ ཝུཏྟཾ. དཀྑིཎཔཱདེཏི ཨིདཾ བུདྡྷཱནཾ སབྦཔདཀྑིཎཏཱཡ. ‘‘ཚབྦཎྞརསྨིཡོ’’ཏི ཝཏྭཱཔི ‘‘སུཝཎྞརསཔིཉྫརཱནི ཝིཡཱ’’ཏི ཨིདཾ བུདྡྷཱནཾ སརཱིརེ པཱིཏཱབྷཱཡ ཡེབྷུཡྻཏཱཡ ཝུཏྟཾ. མདྷུརེནཱཀཱརེན སདྡཾ ཀརོནྟི དཊྛབྦསཱརསྶ དིཊྛཏཱཡ. བྷེརིཨཱདཱིནཾ པན སདྡཱཡནཾ དྷམྨཏཱཝ. པཊིམཱནེནྟཱིཏི ‘‘སུདུལླབྷཾ ཨིདཾ ཨཛྫ ཨམྷེཧི ལབྦྷཏི, ཡེ མཡཾ ཨཱིདིསེན པཎཱིཏེན ཨཱཧཱརེན བྷགཝནྟཾ ཨུཔཊྛཧཱམཱ’’ཏི པཏཱིཏམཱནསཱ མཱནེནྟི པཱུཛེནྟི. ཏེསཾ སནྟཱནཱནི ཨོལོཀེཏྭཱཏི ¶ ཏེསཾ ཏཐཱ ཨུཔཊྛཱཀཱནཾ པུགྒལཱནཾ ཨཏཱིཏེ ཨེཏརཧི ཙ པཝཏྟཙིཏྟསནྟཱནཱནི ཨོལོཀེཏྭཱ. ཨརཧཏྟེ པཏིཊྛཧནྟཱིཏི སམྦནྡྷོ. ཏཏྠཱཏི ཝིཧཱརེ. གནྡྷམཎྜལམཱལེ༹ཏི ཙཏུཛྫཱཏིཡགནྡྷེན ཀཏཔརིབྷཎྜེ མཎྜལམཱལེ༹.

དུལླབྷཱ ཁཎསམྤཏྟཱིཏི སཏིཔི མནུསྶཏྟཔྤཊིལཱབྷེ པཏིརཱུཔདེསཝཱསཨིནྡྲིཡཱཝེཀལླསདྡྷཱཔཊིལཱབྷཱདཡོ གུཎཱ དུལླབྷཱཏི ཨཏྠོ. ཙཱཏུམཧཱརཱཛིཀ…པེ… ཝསཝཏྟིབྷཝནཾ གཙྪནྟཱིཏི ཨིདཾ ཏཏྠ སུཉྙཝིམཱནཱནི སནྡྷཱཡ ཝུཏྟཾ. བྷགཝཱ གནྡྷཀུཊིཾ པཝིསིཏྭཱ པཙྪཱབྷཏྟཾ ཏཡོ བྷཱགེ ཀཏྭཱ པཋམབྷཱགེ སཙེ ཨཱཀངྑཏི, དཀྑིཎེན པསྶེན སཱིཧསེཡྻཾ ཀཔྤེཏི. སཙེ ཨཱཀངྑཏི, བུདྡྷཱཙིཎྞཕལསམཱཔཏྟིཾ སམཱཔཛྫཏི. ཨཐ ཡཐཱཀཱལཔརིཙྪེདཾ ཏཏོ ཝུཊྛཧིཏྭཱ དུཏིཡབྷཱགེ པཙྪིམཡཱམེ ཏཏིཡཀོཊྛཱསེ ཝིཡ ལོཀཾ ཝོལོཀེཏི ཝེནེཡྻཱནཾ ཉཱཎཔརིཔཱཀཾ པསྶིཏུཾ. ཏེནཱཧ – ‘‘སཙེ ཨཱཀངྑཏཱི’’ཏིཨཱདི.

ཀཱལཡུཏྟནྟི ¶ པཏྟཀལླཾ, ‘‘ཨིམིསྶཱ ཝེལཱཡ ཨིམསྶ ཨེཝཾ ཝཏྟབྦ’’ནྟི ཏཾཀཱལཱནུརཱུཔཾ. སམཡཡུཏྟནྟི ཏསྶེཝ ཝེཝཙནཾ, ཨཊྛུཔྤཏྟིཨནུརཱུཔཾ ཝཱ. སམཡཡུཏྟནྟི ཝཱ ཨརིཡསམཡསཾཡུཏྟཾ. དེསཀཱལཱནུརཱུཔམེཝ ཧི བུདྡྷཱ བྷགཝནྟོ དྷམྨཾ དེསེནྟི, དེསེནྟཱ ཙ ཨརིཡསམྨཏཾ པཊིཙྩསམུཔྤཱདནཡཾ དཱིཔེནྟཱཝ དེསེནྟི. ཨཐ ཝཱ སམཡཡུཏྟནྟི ཧེཏཱུདཱཧརཎསཧིཏཾ. ཀཱལེན སཱཔདེསཉྷི བྷགཝཱ དྷམྨཾ དེསེཏི, ཀཱལཾ ཝིདིཏྭཱ པརིསཾ ཨུཡྻོཛེཏི, ན ཡཱཝ སམནྡྷཀཱརཱ དྷམྨཾ དེསེཏི.

ཨུཏུཾ གཎྷཱཔེཏི, ན པན མལཾ པཀྑཱལེཏཱིཏི ཨདྷིཔྤཱཡོ. ན ཧི བྷགཝཏོ ཀཱཡེ རཛོཛལླཾ ཨུཔལིམྤཏཱིཏི. ཏཏོ ཏཏོཏི ཨཏྟནོ ཨཏྟནོ དིཝཱཊྛཱནཱདིཏོ. ཨོཀཱསཾ ལབྷམཱནཱཏི པུརེབྷཏྟཔཙྪཱབྷཏྟཔུརིམཡཱམེསུ ཨོཀཱསཾ ཨལབྷིཏྭཱ ཨིདཱནི མཛ྄ཛྷིམཡཱམེ ཨོཀཱསཾ ལབྷམཱནཱ, བྷགཝཏཱ ཝཱ ཀཏོཀཱསཏཱཡ ཨོཀཱསཾ ལབྷམཱནཱ. པཙྪཱབྷཏྟསྶ ཏཱིསུ བྷཱགེསུ པཋམབྷཱགེ སཱིཧསེཡྻཀཔྤནཾ ཨེཀནྟིཀཾ ན ཧོཏཱིཏི ཨཱཧ – ‘‘པུརེབྷཏྟཏོ པཊྛཱཡ ནིསཛྫཱཔཱིལི༹ཏསྶ སརཱིརསྶཱ’’ཏི. ཏེནེཝ ཧི ཏཏྠ ‘‘སཙེ ཨཱཀངྑཏཱི’’ཏི ཏདཱ སཱིཧསེཡྻཀཔྤནསྶ ཨནིབདྡྷཏཱ ཝིབྷཱཝིཏཱ. ཀིལཱསུབྷཱཝོ པརིསྶམོ ¶ . སཱིཧསེཡྻཾ ཀཔྤེཏི སརཱིརསྶ ཀིལཱསུབྷཱཝམོཙནཏྠནྟི ཡོཛེཏབྦཾ. བུདྡྷཙཀྑུནཱ ལོཀཾ ཝོལོཀེཏཱིཏི ཨིདཾ པཙྪིམཡཱམེ བྷགཝཏོ བཧུལཾ ཨཱཙིཎྞཝསེན ཝུཏྟཾ. ཨཔྤེཀདཱ ཨཝསིཊྛབལཉཱཎེཧི སབྦཉྙུཏཉྙཱཎེནེཝ ཙ བྷགཝཱ ཏམཏྠཾ སཱདྷེཏཱིཏི.

ཨིམསྨིཾཡེཝ ཀིཙྩེཏི པཙྪིམཡཱམཀིཙྩེ. བལཝཏཱ པཙྩནུཏཱཔེན སཾཝཌྜྷམཱནེན ཀརཛཀཱཡེ མཧཱཔརིལཱ༹ཧོ ཨུཔྤཛྫཏཱིཏི ཨཱཧ – ‘‘ནཱམཀཱཡེ སནྟཏྟེ ཀརཛཀཱཡོ སནྟཏྟོ’’ཏི. ནིདྷཱནགཏནྟི སནྣིཙིཏལོཧིཏཾ སནྡྷཱཡ ཝུཏྟཾ. ཨུཎྷཾ ལོཧིཏཾ མུཁཏོ ཨུགྒཉྪཱིཏི ལོཧིཏཾ ཨུཎྷཾ ཧུཏྭཱ མུཁཏོ ཨུགྒཉྪི. ཋཱནནྟི བྷིཀྑུཔཊིཉྙཾ. ཏཾ པཱཔཾ ཝཌྜྷམཱནནྟི བྷིཀྑུཔཊིཉྙཱཡ ཨཝིཛཧིཏཏྟཱ ཏཐཱ པཝཌྜྷམཱནཔཱཔཾ. ཨནྟིམཝཏྠུཨཛ྄ཛྷཱཔནྣཱནམྤི ཨུཔཱཡེན པཝཏྟིཡམཱནོ ཡོནིསོམནསིཀཱརོ སཱཏྠཀོ ཧོཏིཡེཝཱཏི དསྶེནྟོ ‘‘ཛཱཏསཾཝེགཱ’’ཏིཨཱདིམཱཧ. ཨཧོ སལླེཁིཏནྟི ཨཧོ ཨཏིཝིཡ སལླེཁེན ཨིཏཾ པཝཏྟཾ. ཀཱསཱཝཔཛྫོཏོཏི བྷིཀྑཱུནཾ བཧུབྷཱཝཏོ ཨིཏོ ཙིཏོ ཙ ཝིཙརནྟཱནཾ ཏེསཾ ཀཱསཱཝཛུཏིཡཱ པཛྫོཏིཏོ. ཨིསིཝཱཏཔརིཝཱཏོཏི སཱིལཀྑནྡྷཱདཱིནཾ ནིབྦཱནསྶ ཙ ཨེསནཏོ ཨིསཱིནཾ བྷིཀྑཱུནཾ གུཎགནྡྷེན ཙེཝ གུཎགནྡྷཝཱསིཏེན སརཱིརགནྡྷེན ཙ པརིཏོ སམནྟཏོ ཝཱཡིཏོ.

དྷམྨསཾཝེགོ ཨུཔྤཛྫི ཨནཱཝཛྫནེན པུབྦེ ཏསྶ ཨཏྠསྶ ཨསཾཝིདིཏཏྟཱ. དྷམྨསཾཝེགོཏི ཙ ¶ ཏཱདིསེ ཨཏྠེ དྷམྨཏཱཝསེན ཨུཔྤཛྫནཀཾ སཧོཏྟཔྤཉཱཎཾ. ཨསྶཱསཊྛཱནནྟི ཙིཏྟསྶཱསཀཱརཎཾ ཀམྨཊྛཱནཾ. སབྦེསཾ ཀིཙྩཱནཾ པུབྦབྷཱགོ སབྦཔུབྦབྷཱགོ. ‘‘སབྦེ སཏྟཱ ཨཝེརཱ ཧོནྟཱུ’’ཏིཨཱདིནཱ ཧི ཙིཏྟསྶ པཊྛཱནཾ ཨུཔཊྛཱནཾ ཧིཏཕརཎཾ. ཨིཏརཾ ཨིཏོ ཐོཀཾ མཧནྟནྟི ཀཏྭཱ ཨིདཾ ‘‘ཙཱུལ༹ཙྪརཱསངྒྷཱཏསུཏྟ’’ནྟི ཝུཏྟཾ. ཨཙྪརཱསངྒྷཱཏོ ཝུཙྩཏི ཨངྒུལིཕོཊནཀྑཎོ ཨཀྑིནིམིསཀཱལོ, ཡོ ཨེཀསྶ ཨཀྑརསྶ ཨུཙྩཱརཎཀྑཎོ. ཏེནཱཧ – ‘‘དྭེ ཨངྒུལིཡོ པཧརིཏྭཱ སདྡཀརཎམཏྟ’’ནྟི. སབྦསཏྟཱནཾ ཧིཏཕརཎཙིཏྟནྟི སབྦེསམྤི སཏྟཱནཾ སམྨདེཝ ཧིཏེསིཏཝསེན པཝཏྟཙིཏྟཾ. ཨཱཝཛྫེནྟོ ཨཱསེཝཏཱིཏི ཧིཏེསིཏཝསེན ཨཱཝཛྫེནྟོ. ཨཱཝཛྫནེན ཨཱབྷུཛནྟོཔི ཨཱསེཝཏི ནཱམ ཉཱཎཝིཔྤཡུཏྟེན. ཛཱནནྟོཏི ཏཐཱ ཉཱཎམཏྟཾ ཨུཔྤཱདེནྟོཔི. པསྶནྟོཏི ཏཐཱ ཉཱཎཙཀྑུནཱ པཙྩཀྑཏོ ཝིཡ ཝིཔསྶནྟོཔི. པཙྩཝེཀྑནྟོཏི ཏམཏྠཾ པཏི ¶ པཏི ཨཝེཀྑནྟོཔི. སདྡྷཱཡ ཨདྷིམུཙྩནྟོཏིཨཱདི པཉྩནྣཾ ཨིནྡྲིཡཱནཾ ཝསེན ཝུཏྟཾ. ཨབྷིཉྙེཡྻནྟིཨཱདི ཙཏུསཙྩཝསེན ཝུཏྟཾ. སབྦམེཝ ཙེཏཾ ཝིཏྠཱརཏོ, སཱམཉྙེན ཨཱསེཝནདསྶནམེཝཱཏི ཨིདྷཱདྷིཔྤེཏམེཝ ཨཱསེཝནཏྠཾ དསྶེཏུཾ – ‘‘ཨིདྷ པནཱ’’ཏིཨཱདི ཝུཏྟཾ.

ཨརིཏྟཛ྄ཛྷཱནོཏི ཨཝིརཧིཏཛ྄ཛྷཱནོ. ཨཏུཙྪཛ྄ཛྷཱནོཏི ཛྷཱནེན ཨཏུཙྪོ. ཙཱགོ ཝཱ ཝེཝཙནནྟི ཨཱཧ – ‘‘ཨཔརིཙྩཏྟཛ྄ཛྷཱནོ’’ཏི. ཝིཧརཏཱིཏི པདསྶ ཝིབྷངྒེ (ཝིབྷ. ༥༤༠) ཨཱགཏནཡེན ཨཏྠཾ དསྶེནྟོ ‘‘ཝིཧརཏཱིཏི ཨིརིཡཏཱི’’ཏིཨཱདིམཱཧ. ཨཡཾ པནེཏྠ སདྡཏྠོ – ཝིཧརཏཱིཏི ཨེཏྠ ཝི-སདྡོ ཝིཙྪེདཏྠཛོཏནོ. ཧརཏཱིཏི ནེཏི, པཝཏྟེཏཱིཏི ཨཏྠོ, ཝིཙྪིནྡིཏྭཱ ཧརཏི ཝིཧརཏཱིཏི ཝུཏྟཾ ཧོཏི. སོ ཧི ཨེཀཾ ཨིརིཡཱཔཐབཱདྷནཾ ཨཉྙེན ཨིརིཡཱཔཐེན ཝིཙྪིནྡིཏྭཱ ཨཔརིཔཏནྟཾ ཨཏྟབྷཱཝཾ ཧརཏི པཝཏྟེཏི, ཏསྨཱ ‘‘ཝིཧརཏཱི’’ཏི ཝུཙྩཏི. ཨིརིཡཏཱིཏི ཋཱནནིསཛྫཱདིཀིརིཡཾ ཀརོནྟོ པཝཏྟཏི. པཝཏྟཏཱིཏི ཋཱནཱདིསམངྒཱི ཧུཏྭཱ པཝཏྟཏི. པཱལེཏཱིཏི ཨེཀཾ ཨིརིཡཱཔཐབཱདྷནཾ ཨིརིཡཱཔཐནྟརེཧི རཀྑནྟོ པཱལེཏི. ཡཔེཏི ཡཱཔེཏཱིཏི ཏསྶེཝ ཝེཝཙནཾ. ཨེཀཉྷི ཨིརིཡཱཔཐབཱདྷནཾ ཨཉྙེན ཨིརིཡཱཔཐེན ཝིཙྪིནྡིཏྭཱ ཨཔརིཔཏནྟཾ ཨཏྟབྷཱཝཾ པཱལེནྟོ ཡཔེཏི ཡཱཔེཏཱིཏི ཝུཙྩཏི. ཙརཏཱིཏི ཋཱནནིསཛྫཱདཱིསུ ཨཉྙཏརསམངྒཱི ཧུཏྭཱ པཝཏྟཏི. ཨིམིནཱ པདེནཱཏི ‘‘ཝིཧརཏཱི’’ཏི ཨིམིནཱ པདེན.

ཨིརིཡཱཔཐཝིཧཱརོཏི ཨེཏྠ ཨིརིཡནཾ པཝཏྟནཾ ཨིརིཡཱ, ཀཱཡཔྤཡོགོ ཀཱཡིཀཀིརིཡཱ. ཏསྶཱ པཝཏྟནཱུཔཱཡབྷཱཝཏོ ཨིརིཡཱཡ པཐོ ཨིརིཡཱཔཐོ, ཋཱནནིསཛྫཱདི. ན ཧི ཋཱནནིསཛྫཱདཱིཧི ཨཝཏྠཱཧི ཝིནཱ ཀིཉྩི ཀཱཡིཀཀིརིཡཾ པཝཏྟེཏུཾ སཀྐཱ. ཋཱནསམངྒཱི ཝཱ ཧི ཀཱཡེན ཀིཉྩི ཀརེཡྻ, གམནཱདཱིསུ ཨཉྙཏརསམངྒཱི ཝཱ. ཝིཧརཎཾ, ཝིཧརཏི ཨེཏེནཱཏི ཝཱ ཝིཧཱརོ, ཨིརིཡཱཔཐོཝ ཝིཧཱརོ ཨིརིཡཱཔཐཝིཧཱརོ, སོ ཙ ཨཏྠཏོ ཋཱནནིསཛྫཱདིཨཱཀཱརཔྤཝཏྟོ ཙཏུསནྟཏིརཱུཔཔྤབནྡྷོ ¶ ཨེཝ. ཨོཝཱདཱནུསཱསནཱིནཾ ཨེཀཱནེཀཝཱརཱདིཝིསིཊྛོཡེཝ བྷེདོ, ན པན པརམཏྠཏོ ཏེསཾ ནཱནཱཀརཎནྟི དསྶེཏུཾ – ‘‘པརམཏྠཏོ པནཱ’’ཏིཨཱདིམཱཧ. ཏཏྠ ཨེསེ ཨེཀེ ཨེཀཊྛེཏིཨཱདཱིསུ ཨེསོ ཨེཀོ ཨེཀཏྠོཏིཨཱདིནཱ ཨཏྠོ ཝེདིཏབྦོ.

རཊྛསྶ ¶ , རཊྛཏོ ཝཱ ལདྡྷོ པིཎྜོ རཊྛཔིཎྜོ. ཏེནཱཧ – ‘‘ཉཱཏིཔརིཝཊྚཾ པཧཱཡཱ’’ཏིཨཱདི. ཏཏྠ ‘‘ཨམྷཱཀམེཏེ’’ཏི ཝིཉྙཱཡནྟཱིཏི ཉཱཏཱི, པིཏཱམཧཔིཏུཔུཏྟཱདིཝསེན པརིཝཊྚནཊྛེན པརིཝཊྚོ, ཉཱཏིཡེཝ པརིཝཊྚོ ཉཱཏིཔརིཝཊྚོ. ཐེཡྻཔརིབྷོགོ ནཱམ ཨནརཧསྶ པརིབྷོགོ. བྷགཝཏཱ ཧི ཨཏྟནོ སཱསནེ སཱིལཝཏོ པཙྩཡཱ ཨནུཉྙཱཏཱ, ན དུསྶཱིལསྶ. དཱཡཀཱནམྤི སཱིལཝཏོ ཨེཝ པརིཙྩཱགོ, ན དུསྶཱིལསྶ ཨཏྟནོ ཀཱརཱནཾ མཧཔྥལབྷཱཝསྶ པཙྩཱསཱིསནཏོ. ཨིཏི སཏྠཱརཱ ཨནནུཉྙཱཏཏྟཱ དཱཡཀེཧི ཙ ཨཔརིཙྩཏྟཏྟཱ སངྒྷམཛ྄ཛྷེཔི ནིསཱིདིཏྭཱ པརིབྷུཉྫནྟསྶ དུསྶཱིལསྶ པརིབྷོགོ ཐེཡྻཱཡ པརིབྷོགོ ཐེཡྻཔརིབྷོགོ. ཨིཎཝསེན པརིབྷོགོ ཨིཎཔརིབྷོགོ པཊིགྒཱཧཀཏོ དཀྑིཎཱཝིསུདྡྷིཡཱ ཨབྷཱཝཏོ ཨིཎཾ གཧེཏྭཱ པརིབྷོགོ ཝིཡཱཏི ཨཏྠོ.

དཱཏབྦཊྛེན དཱཡཾ, ཏཾ ཨཱདིཡནྟཱིཏི དཱཡཱདཱ, པུཏྟཱནམེཏཾ ཨདྷིཝཙནཾ, ཏེསཾ བྷཱཝོ དཱཡཛྫཾ, དཱཡཛྫཝསེན པརིབྷོགོ དཱཡཛྫཔརིབྷོགོ, པུཏྟབྷཱཝེན པརིབྷོགོཏི ཝུཏྟཾ ཧོཏི. སེཀྑཱ ཧི བྷིཀྑཱུ བྷགཝཏོ ཨོརསཔུཏྟཱ, ཏེ པིཏུ སནྟཀཱནཾ དཱཡཱདཱ ཧུཏྭཱ ཏེ པཙྩཡེ པརིབྷུཉྫནྟི. ཀིཾ པན ཏེ བྷགཝཏོ པཙྩཡེ པརིབྷུཉྫནྟི, ཨུདཱཧུ གིཧཱིནནྟི? གིཧཱིཧི དིནྣཱཔི བྷགཝཏཱ ཨནུཉྙཱཏཏྟཱ བྷགཝཏོ སནྟཀཱ ཨནནུཉྙཱཏེསུ སབྦེན སབྦཾ པརིབྷོགཱབྷཱཝཏོ, ཨནུཉྙཱཏེསུཡེཝ ཙ པརིབྷོགསམྦྷཝཏོ. དྷམྨདཱཡཱདསུཏྟཉྩེཏྠ སཱདྷཀཾ.

ཝཱིཏརཱགཱ ཨེཝ ཏཎྷཱཡ དཱསབྱཾ ཨཏཱིཏཏྟཱ སཱམིནོ ཧུཏྭཱ པརིབྷུཉྫནྟཱིཏི ཨཱཧ – ‘‘ཁཱིཎཱསཝསྶ པརིབྷོགོ སཱམིཔརིབྷོགོ ནཱམཱ’’ཏི. ཨཝཱིཏརཱགཱནཉྷི ཏཎྷཱཔརཝསཏཱཡ པཙྩཡཔརིབྷོགེ སཱམིབྷཱཝོ ནཏྠི, ཏདབྷཱཝེན ཝཱིཏརཱགཱནཾ ཏཏྠ སཱམིབྷཱཝོ ཡཐཱརུཙིཔརིབྷོགསམྦྷཝཏོ. ཏཐཱ ཧི ཏེ པཊིཀཱུལམྤི ཨཔྤཊིཀཱུལཱཀཱརེན, ཨཔྤཊིཀཱུལམྤི པཊིཀཱུལཱཀཱརེན, ཏདུབྷཡམྤི ཝཛྫེཏྭཱ ཨཛ྄ཛྷུཔེཀྑནཱཀཱརེན པཙྩཡེ པརིབྷུཉྫནྟི, དཱཡཀཱནཉྩ མནོརཐཾ པཱུརེནྟི. ཡོ པནཱཡཾ སཱིལཝཏོ པཙྩཝེཀྑིཏཔརིབྷོགོ, སོ ཨིཎཔརིབྷོགསྶ པཙྩནཱིཀཏྟཱ ཨཱཎཎྱཔརིབྷོགོ ནཱམ ཧོཏི. ཡཐཱ ཧི ཨིཎཱཡིཀོ ཨཏྟནོ རུཙིཡཱ ཨིཙྪིཏཾ དེསཾ གནྟུཾ ན ལབྷཏི, ཨེཝཾ ཨིཎཔརིབྷོགཡུཏྟོ ལོཀཏོ ¶ ནིསྶརིཏུཾ ན ལབྷཏཱིཏི ཏཔྤཊིཔཀྑཏྟཱ སཱིལཝཏོ པཙྩཝེཀྑིཏཔརིབྷོགོ ‘‘ཨཱཎཎྱཔརིབྷོགོ’’ཏི ཝུཙྩཏི, ཏསྨཱ ནིཔྤརིཡཱཡཏོ ཙཏུཔརིབྷོགཝིནིམུཏྟོ ¶ ཝིསུཾཡེཝཱཡཾ པརིབྷོགོཏི ཝེདིཏབྦོ. སོ ཨིདྷ ཝིསུཾ ན ཝུཏྟོ, དཱཡཛྫཔརིབྷོགེཡེཝ ཝཱ སངྒཧཾ གཙྪཏི. སཱིལཝཱཔི ཧི ཨིམཱཡ སིཀྑཱཡ སམནྣཱགཏཏྟཱ ‘‘སེཁོ’’ཏྭེཝ ཝུཙྩཏི. ཨིམེསུ པརིབྷོགེསུ སཱམིཔརིབྷོགོ དཱཡཛྫཔརིབྷོགོ ཙ ཨརིཡཱནཾ པུཐུཛྫནཱནཉྩ ཝཊྚཏི, ཨིཎཔརིབྷོགོ ན ཝཊྚཏི. ཐེཡྻཔརིབྷོགེ ཀཐཱཡེཝ ནཏྠི. ཀཐཾ པནེཏྠ སཱམིཔརིབྷོགོ དཱཡཛྫཔརིབྷོགོ ཙ པུཐུཛྫནཱནཾ སམྦྷཝཏི? ཨུཔཙཱརཝསེན. ཡོ ཧི པུཐུཛྫནསྶཔི སལླེཁཔྤཊིཔཏྟིཡཾ ཋིཏསྶ པཙྩཡགེདྷཾ པཧཱཡ ཏཏྠ ཨནུཔལིཏྟེན ཙིཏྟེན པརིབྷོགོ, སོ སཱམིཔརིབྷོགོ ཝིཡ ཧོཏི. སཱིལཝཏོ པན པཙྩཝེཀྑིཏཔརིབྷོགོ དཱཡཛྫཔརིབྷོགོ ཝིཡ ཧོཏི དཱཡཀཱནཾ མནོརཐསྶ ཨཝིརཱདྷནཏོ. ཀལྱཱཎཔུཐུཛྫནསྶ པརིབྷོགེ ཝཏྟབྦམེཝ ནཏྠི ཏསྶ སེཀྑསངྒཧཏོ. སེཀྑསུཏྟཾ (སཾ. ནི. ༥.༡༣) ཧེཏསྶ ཨཏྠསྶ སཱདྷཀཾ.

ཨིམསྶ བྷིཀྑུནོཏི ཨཙྪརཱསངྒྷཱཏམཏྟམྤི ཀཱལཾ མེཏྟཙིཏྟཾ ཨཱསེཝནྟསྶ བྷིཀྑུནོ. ཨམོགྷོ རཊྛཔིཎྜཔརིབྷོགོཏི ‘‘ཨཡཾ པབྦཛིཏོ སམཎོ བྷིཀྑཱུཏི ཨཱམིསཾ དེནྟཱནཾ ཏཱཡ མེཏྟཱསེཝནཱཡ ཨཏྟནོ སནྟཱནེ དོསམལསྶ ཝཱ ཏདེཀཊྛཱནཉྩ པཱཔདྷམྨཱནཾ པབྦཱཛནཏོ ཝཱུཔསམནཏོ སཾསཱརེ ཙ བྷཡསྶ སམྨཱཝ ཨིཀྑཎཏོ ཨཛ྄ཛྷཱསཡསྶ ཨཝིསཾཝཱདནེནསྶ ཨམོགྷོ རཊྛཔིཎྜཔརིབྷོགོ. མཧཊྛིཡནྟི མཧཏྠིཀཾ མཧཱཔཡོཛནཾ. མཧཔྥལནྟི ཝིཔུལཔྥལཾ. མཧཱནིསཾསནྟི མཧཱནིསྶནྡཔྥལཾ. མཧཱཛུཏིཀནྟི མཧཱནུབྷཱཝཾ. མཧཱཝིཔྥཱརནྟི མཧཱཝིཏྠཱརཾ. ཨེཏྠ ཙ པཋམཾ ཀཱརཎཾ མེཏྟཱསེཝནཱཡ ཏསྶ བྷིཀྑུནོ སཱམིཨཱདིབྷཱཝེན རཊྛཔིཎྜཔརིབྷོགཱརཧཏཱ, དུཏིཡཾ པརེཧི དིནྣསྶ དཱནསྶ མཧཊྛིཡབྷཱཝཀརཎཾ. ཀོ པན ཝཱདོཏི མེཏྟཱཡ ཨཱསེཝནམཏྟམྤི ཨེཝཾམཧཱནུབྷཱཝཾ, ཀོ པན ཝཱདོ བཧུལཱིཀཱརེ, ཨེཏྠ ཝཏྟབྦམེཝ ནཏྠཱི’’ཏི ཨཏྠོ.

༥༤. ཙཏུཏྠེ ཨུཔྤཱདེཏི ཝཌྜྷེཏཱིཏི ཨེཏྠ བྷཱཝནཱསདྡསྶ ཨུཔྤཱདནཝཌྜྷནཏྠཏཱ པུབྦེ ཝུཏྟཱ ཨེཝ.

༥༥. པཉྩམེ ¶ ཨིམེསུ དྭཱིསཱུཏི ཙཏུཏྠཔཉྩམེསུ. ‘‘ཏཏིཡེ ཝུཏྟནཡེནེཝ ཝེདིཏབྦ’’ནྟི ཝཏྭཱ ཏཐཱ ཝེདིཏབྦཏཾ དསྶེཏུཾ – ‘‘ཡོ ཧི ཨཱསེཝཏཱི’’ཏིཨཱདི ཝུཏྟཾ. ཏེན ཨཱསེཝནཱབྷཱཝནཱམནསིཀཱརཱནཾ ཨཏྠཝིསེསཱབྷཱཝམཱཧ. ཡདི ཨེཝཾ སུཏྟནྟསྶ དེསནཱ ཀཐནྟི ཨཱཧ – ‘‘སམྨཱསམྦུདྡྷོ པནཱ’’ཏིཨཱདི. ཡཱཡ དྷམྨདྷཱཏུཡཱཏི སབྦཉྙུཏཉྙཱཎམཱཧ. ཏེན ཧི དྷམྨཱནཾ ཨཱཀཱརབྷེདཾ ཉཏྭཱ ཏདནུརཱུཔཾ ཨེཀམྤི དྷམྨཾ ཏཐཱ ཝིབྷཛིཏྭཱ བྷགཝཱ དསྶེཏི. ཏཱིཧི ཀོཊྛཱསེཧཱིཏི ¶ ཨཱསེཝནཱབྷཱཝནཱམནསིཀཱརབྷཱགེཧི. མེཏྟཱ ཧི སབྦཝཏྠུནོ མེཏྟཱཡནཝསེན ཨཱནཱིཏཱ སེཝནཱ ཨཱསེཝནཱ, ཏསྶཱ ཝཌྜྷནཱ བྷཱཝནཱ, ཨཝིསྶཛྫེཏྭཱ མནསི ཋཔནཾ མནསིཀཱརོ.

༥༦. ཚཊྛེ ཨནིཡམིཏཝཙནཾ ‘‘ཨིམེ ནཱམཱ’’ཏི ནིཡམེཏྭཱ ཨཝུཏྟཏྟཱ. ནིཡམིཏཝཙནཾ ‘‘ཨཀུསལཱ’’ཏི སརཱུཔེནེཝ ཝུཏྟཏྟཱ. ཨསེསཏོ པརིཡཱདིནྣཱ ཧོནྟི ཨཔྤཀསྶཔི ཨཀུསལབྷཱགསྶ ཨགྒཧིཏསྶ ཨབྷཱཝཏོ. ཨཀུསལཾ བྷཛནྟཱིཏི ཨཀུསལབྷཱགིཡཱ. ཨཀུསལཔཀྑེ བྷཝཱཏི ཨཀུསལཔཀྑིཀཱ. ཏེནཱཧ – ‘‘ཨཀུསལཱཡེཝཱ’’ཏིཨཱདི. པཋམཏརཾ གཙྪཏཱིཏི པཋམཏརཾ པཝཏྟཏི, པཋམོ པདྷཱནོ ཧུཏྭཱ ཝཏྟཏཱིཏི ཨཏྠོ. ཨེཀུཔྤཱདཱདིཝསེན ཧི ཨེཀཛ྄ཛྷཾ པཝཏྟམཱནེསུ ཙཏཱུསུ ཨརཱུཔཀྑནྡྷེསུ ཨཡམེཝ པཋམཾ ཨུཔྤཛྫཏཱིཏི ཨིདཾ ནཏྠི, ལོཀུཏྟརམགྒེསུ ཝིཡ པན པཉྙིནྡྲིཡསྶ, ལོཀིཡདྷམྨེསུ མནིནྡྲིཡསྶ པུརེཏརསྶ བྷཱཝོ སཱཏིསཡོཏི ‘‘སབྦེཏེ མནོཔུབྦངྒམཱ’’ཏི ཝུཏྟཾ. ཏཐཱ ཧི ཨབྷིདྷམྨེཔི (དྷ. ས. ༡) ‘‘ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏཱི’’ཏི ཙིཏྟཾ པུབྦངྒམཾ ཛེཊྛཾ ཀཏྭཱ དེསནཱ པཝཏྟཱ. སུཏྟེསུཔི ཝུཏྟཾ – ‘‘མནོཔུབྦངྒམཱ དྷམྨཱ (དྷ. པ. ༡, ༢), ཚདྭཱརཱདྷིཔཏི རཱཛཱ’’ཏི (དྷ. པ. ཨཊྛ. ༢.བུདྡྷཝགྒོ, ཨེརཀཔཏྟནཱགརཱཛཝཏྠུ). ཏེནཱཧ – ‘‘ཨེཏེ ཧཱི’’ཏིཨཱདི. ཏེསཾ མནོ ཨུཔྤཱདཀོཏི ཙ ཡདགྒེན མནོ སམྤཡུཏྟདྷམྨཱནཾ ཛེཊྛཀོ ཧུཏྭཱ པཝཏྟཏི, ཏདགྒེན ཏེ ཨཏྟཱནཾ ཨནུཝཏྟཱཔེནྟོ ཏེ ཏཐཱ ཨུཔྤཱདེནྟོ ནཱམ ཧོཏཱིཏི ཀཏྭཱ ཝུཏྟཾ. ཨཊྛཀཐཱཡཾ པན ཙིཏྟསྶ ཛེཊྛཀབྷཱཝམེཝ སནྡྷཱཡ རཱཛགམནཉྙཱཡེན སཧུཔྤཏྟིཔི པཋམུཔྤཏྟི ཝིཡ ཀཏྭཱ ཝུཏྟཱཏི ཨཡམཏྠོ དསྶིཏོ. ཨནྭདེཝཱཏི ཨེཏེནེཝ ཙིཏྟསྶ ཁཎཝསེན པཋམུཔྤཏྟིཡཱ ཨབྷཱཝོ དཱིཔིཏོཏི དཊྛབྦོ. ཏེནེཝཱཧ – ‘‘ཨེཀཏོཡེཝཱཏི ཨཏྠོ’’ཏི.

༥༧. སཏྟམེ ¶ ཙཏུབྷཱུམཀཱཔི ཀུསལཱ དྷམྨཱ ཀཐིཏཱཏི ‘‘ཡེ ཀེཙི ཀུསལཱ དྷམྨཱ’’ཏི ཨནཝསེསཔརིཡཱདཱནཏོ ཝུཏྟཾ.

༥༨. ཨཊྛམེ ཨིདནྟི ལིངྒཝིཔལླཱསེན ནིདྡེསོ, ནིཔཱཏཔདཾ ཝཱ ཨེཏཾ ‘‘ཡདིད’’ནྟིཨཱདཱིསུ ཝིཡཱཏི ཨཱཧ – ‘‘ཨཡཾ པམཱདོཏི ཨཏྠོ’’ཏི. པམཛྫནཱཀཱརོཏི པམཱདཱཔཏྟི. ཙིཏྟསྶ ཝོསྶགྒོཏི ཨིམེསུ ཨེཏྟཀེསུ ཋཱནེསུ སཏིཡཱ ཨནིགྒཎྷིཏྭཱ ཙིཏྟསྶ ཝོསྶཛྫནཾ སཏིཝིརཧོ. ཝོསྶགྒཱནུཔྤདཱནནྟི ཝོསྶགྒསྶ ཨནུ ཨནུ པདཱནཾ པུནཔྤུནཾ ཝིསྶཛྫནཾ. ཨསཀྐཙྩཀིརིཡཏཱཏི ཨེཏེསཾ དཱནཱདཱིནཾ ཀུསལདྷམྨཱནཾ པཝཏྟནེ པུགྒལསྶ ཝཱ དེཡྻདྷམྨསྶ ཝཱ ཨསཀྐཙྩཀིརིཡཱ. སཏཏབྷཱཝོ སཱཏཙྩཾ, སཱཏཙྩེན ཀིརིཡཱ སཱཏཙྩཀིརིཡཱ, སཱཡེཝ སཱཏཙྩཀིརིཡཏཱ, ན སཱཏཙྩཀིརིཡཏཱ ཨསཱཏཙྩཀིརིཡཏཱ. ཨནཊྛིཏཀིརིཡཏཱཏི ¶ ཨནིཊྛིཏཀིརིཡཏཱ ནིརནྟརཾ ན ཨནུཊྛིཏཀིརིཡཏཱ ཙ. ཨོལཱིནཝུཏྟིཏཱཏི ནིརནྟརཀརཎསངྑཱཏསྶ ཝིཔྥཱརསྶ ཨབྷཱཝེན ཨོལཱིནཝུཏྟིཏཱ. ནིཀྑིཏྟཚནྡཏཱཏི ཀུསལཀིརིཡཱཡ ཝཱིརིཡཚནྡསྶ ནིཀྑིཏྟབྷཱཝོ. ནིཀྑིཏྟདྷུརཏཱཏི ཝཱིརིཡདྷུརསྶ ཨོརོཔནཾ, ཨོསཀྐིཏམཱནསཏཱཏི ཨཏྠོ. ཨནདྷིཊྛཱནནྟི ཀུསལཀརཎེ ཨཔྤཏིཊྛིཏབྷཱཝོ. ཨནནུཡོགོཏི ཨནནུཡུཉྫནཾ. ཀུསལདྷམྨེསུ ཨཱསེཝནཱདཱིནཾ ཨབྷཱཝོ ཨནཱསེཝནཱདཡོ. པམཱདོཏི སརཱུཔནིདྡེསོ. པམཛྫནཱཏི ཨཱཀཱརནིདྡེསོ. པམཛྫིཏཏྟནྟི བྷཱཝནིདྡེསོ. པརིཧཱཡནྟཱིཏི ཨིམིནཱ པམཱདསྶ སཱཝཛྫཏཾ དསྶེཏི. ཏཡིདཾ ལོཀིཡཱནཾ ཝསེན, ན ལོཀུཏྟརཱནནྟི ཨཱཧ – ‘‘ཨུཔྤནྣཱ…པེ… ཨིད’’ནྟིཨཱདི.

༥༩. ནཝམེ ན པམཛྫཏི ཨེཏེནཱཏི ཨཔྤམཱདོ, པམཱདསྶ པཊིཔཀྑོ སཏིཡཱ ཨཝིཔྤཝཱསོ. ཨཏྠཏོ ནིཙྩཾ ཨུཔཊྛིཏཱཡ སཏིཡཱ ཨེཏཾ ནཱམཾ. པམཱདོ པན སཏིཡཱ སཏིསམྤཛཉྙསྶ ཝཱ པཊིཔཀྑབྷཱུཏོ ཨཀུསལཙིཏྟུཔྤཱདོ དཊྛབྦོ. ཏེནཱཧ – ‘‘པམཱདསྶ པཊིཔཀྑཝསེན ཝིཏྠཱརཏོ ཝེདིཏབྦོ’’ཏི.

༦༠. དསམེ ཀུཙྪིཏཾ སཱིདཏཱིཏི ཀུསཱིཏོ ད-ཀཱརསྶ ཏ-ཀཱརཾ ཀཏྭཱ, ཏསྶ བྷཱཝོ ཀོསཛྫཾ, ཨཱལསིཡནྟི ཨཏྠོ.

ཨཙྪརཱསངྒྷཱཏཝགྒཝཎྞནཱ ནིཊྛིཏཱ.

༧. ཝཱིརིཡཱརམྦྷཱདིཝགྒཝཎྞནཱ

༦༡. སཏྟམསྶ ¶ ¶ པཋམེ ཝཱིརཱནཾ ཀམྨནྟི ཝཱིརིཡཾ, ཝིདྷིནཱ ཝཱ ཨཱིརཡིཏབྦཾ པཝཏྟེཏབྦནྟི ཝཱིརིཡཾ, ཏདེཝ ཀུསལཀིརིཡཱཡ པདྷཱནཊྛེན ཨཱརམྦྷོ ཝཱིརིཡཱརམྦྷོ. ཨཱརདྡྷཝཱིརིཡཏཱ པགྒཧིཏཝཱིརིཡཏཱ པརིཔུཎྞཝཱིརིཡཏཱཏི པཙྩེཀཾ ཝཱིརིཡཏཱསདྡོ ཡོཛེཏབྦོ.

༦༢. དུཏིཡེ མཧཏཱི ཨིཙྪཱ ཨེཏསྶཱཏི མཧིཙྪོ, ཏསྶ བྷཱཝོ མཧིཙྪཏཱ. མཧཱཝིསཡོ ལོབྷོ མཧཱལོབྷོ མཧནྟཱནཾ ཝཏྠཱུནཾ བཧཱུནཉྩ ཨབྷིགིཛ྄ཛྷནཏོ. ཨིཏརཱིཏརཱཏིཨཱདིནཱ པབྦཛིཏཱནཾ ཨུཔྤཛྫནམཧིཙྪཏཱ ཝུཏྟཱ. པཉྩཧི ཀཱམགུཎེཧཱིཏིཨཱདི གཧཊྛཱནཾ ཝསེན ཝུཏྟཾ. ཨིཙྪཱཏི སབྷཱཝནིདྡེསོ. ཨིཙྪཱགཏཱཏི ཨིཙྪཱཔཝཏྟཱ. མཧིཙྪཏཱཏི མཧཱཨིཙྪཏཱ. ཨཏྠཏོ པནཱཡཾ རཱགོ ཨེཝཱཏི ཝུཏྟཾ – ‘‘རཱགོ སཱརཱགོ’’ཏིཨཱདི.

༦༣. ཏཏིཡེ ཨཔྤིཙྪསྶཱཏི ཨེཏྠ ཨཔྤ-སདྡོ ཨབྷཱཝཏྠོ ‘‘ཨཔྤཱབཱདྷོ ཧོཏི ཨཔྤཱཏངྐོ’’ཏིཨཱདཱིསུ (མ. ནི. ༢.༣༠༤) ཝིཡཱཏི ཨཱཧ – ‘‘ཨནིཙྪསྶཱ’’ཏི. ལོཀེ པཱཀཊསྶ ཧི ཨཀྑིརོགཀུཙྪིརོགཱདིབྷེདསྶ ཨཱབཱདྷསྶ ཨབྷཱཝཾ སནྡྷཱཡ ‘‘ཨཔྤཱབཱདྷོ’’ཏི ཝུཏྟཾ. ཨིདཱནི ཝུཏྟམེཝཏྠཾ པཱཀཊཏརཾ ཀཱཏུཾ ‘‘ཨེཏྠ ཧཱི’’ཏིཨཱདི ཝུཏྟཾ. བྱཉྫནཾ སཱཝསེསཾ ཝིཡ པརིཏྟཀེཔི ཨཔྤསདྡསྶ དིསྶམཱནཏྟཱ. ཨཏྠོ པན ནིརཝསེསོ སབྦསོ པཙྩཡིཙྪཱཡ ཨབྷཱཝསྶ ཨདྷིཔྤེཏཏྟཱ. ཏེནཱཧ – ‘‘ན ཧཱི’’ཏིཨཱདི.

ཨིཙྪཱཡ ཨབྷཱཝེནེཝ ཨཔྤིཙྪོ ནཱམ ཧོཏཱིཏི ཨིམམཏྠཾ པཀཱརནྟརེན དཱིཔེཏུཾ – ‘‘ཨཔིཙཱ’’ཏིཨཱདི ཝུཏྟཾ. ཨཏྲིཙྪཏཱ ནཱམ ཨཏྲ ཨཏྲ ཨིཙྪཱ. ཨསནྟགུཎསམྦྷཱཝནཏཱཡ པཱཔཱ ལཱམིཀཱ ནིཧཱིནཱ ཨིཙྪཱ པཱཔིཙྪཏཱ. ཡཱཡ པཙྩཡུཔྤཱདནཏྠཾ ཨཏྟནི ཝིཛྫམཱནགུཎེ སམྦྷཱཝེཏི, པཙྩཡཱནཾ པཊིགྒཧཎེ ཙ ན མཏྟཾ ཛཱནཱཏི, ཨཡཾ མཧིཙྪཏཱ. ཨསནྟགུཎསམྦྷཱཝནཏཱཏི ཨཏྟནི ཨཝིཛྫམཱནཱནཾ གུཎཱནཾ ཝིཛྫམཱནཱནཾ ཝིཡ པརེསཾ པཀཱསནཱ. སནྟགུཎསམྦྷཱཝནཏཱཏི ཨིཙྪཱཙཱརེ ཋཏྭཱ ཨཏྟནི ཝིཛྫམཱནསཱིལདྷུཏདྷམྨཱདིགུཎཝིབྷཱཝནཱ. ཏཱདིསསྶཔི པཊིགྒཧཎེ ཨམཏྟཉྙུཏཱཔི ཧོཏི, སཱཔི ཨབྷིདྷམྨེ ཨཱགཏཱཡེཝཱཏི སམྦནྡྷོ. དུསྶནྟཔྤཡོཏི དུཏྟཔྤཡོ.

ཨཏིལཱུཁབྷཱཝནྟི ¶ པཏྟཙཱིཝརཝསེན ཨཏིཝིཡ ལཱུཁབྷཱཝཾ. ཏདསྶ དིསྭཱ མནུསྶཱ ‘‘ཨཡཾ ཨམངྒལདིཝསོ ¶ , སུམྦྷཀསིནིདྡྷཔཏྟཙཱིཝརོ ཨཡྻོ པུབྦངྒམོ ཀཱཏབྦོ’’ཏི ཙིནྟེཏྭཱ, ‘‘བྷནྟེ, ཐོཀཾ བཧི ཧོཐཱ’’ཏི ཨཱཧཾསུ. ཨུམྨུཛྫཱིཏི མནུསྶཱནཾ ཨཛཱནནྟཱནཾཡེཝ པཐཝིཡཾ ནིམུཛྫིཏྭཱ གཎྷནྟོཡེཝ ཨུམྨུཛྫི. ཡདི ཐེརོ ‘‘ཁཱིཎཱསཝབྷཱཝཾ ཛཱནནྟཱུ’’ཏི ཨིཙྪེཡྻ, ན ནཾ མནུསྶཱ ‘‘བཧི ཧོཐཱ’’ཏི ཝདེཡྻུཾ, ཁཱིཎཱསཝཱནཾ པན ཏཐཱཙིཏྟམེཝ ན ཨུཔྤཛྫེཡྻ.

ཨཔྤིཙྪཏཱཔདྷཱནཾ པུགྒལཱདྷིཊྛཱནཾ ཙཏུབྦིདྷཨིཙྪཱཔབྷེདཾ དསྶེཏྭཱ པུནཔི པུགྒལཱདྷིཊྛཱནེན ཙཏུབྦིདྷཾ ཨིཙྪཱབྷེདཾ དསྶེནྟོ ‘‘ཨཔརོཔི ཙཏུབྦིདྷོ ཨཔྤིཙྪོ’’ཏིཨཱདིམཱཧ. པཙྩཡཨཔྤིཙྪོཏི པཙྩཡེསུ ཨིཙྪཱརཧིཏོ. དྷུཏངྒཨཔྤིཙྪོཏི དྷུཏགུཎསམྦྷཱཝནཱཡ ཨིཙྪཱརཧིཏོ. པརིཡཏྟིཨཔྤིཙྪོཏི བཧུསྶུཏསམྦྷཱཝནཱཡ ཨིཙྪཱརཧིཏོ. ཨདྷིགམཨཔྤིཙྪོཏི ‘‘ཨརིཡོ’’ཏི སམྦྷཱཝནཱཡ ཨིཙྪཱརཧིཏོ. དཱཡཀསྶ ཝསནྟི ཨཔྤཾ ཝཱ ཡཾ དཱཏུཀཱམོ བཧུཾ ཝཱཏི དཱཡཀསྶ ཙིཏྟསྶ ཝསཾ, ཨཛ྄ཛྷཱསཡནྟི ཨཏྠོ. དེཡྻདྷམྨསྶ ཝསནྟི དེཡྻདྷམྨསྶ ཨབཧུབྷཱཝཾ. ཨཏྟནོ ཐཱམནྟི ཨཏྟནོ པམཱཎཾ. ཡཏྟཀེན ཨཏྟཱ ཡཱཔེཏི, ཏཏྟཀསྶེཝ གཧཎཾ. ཡདི ཧཱིཏིཨཱདི སངྑེཔཏོ ཝུཏྟསྶ ཨཏྠསྶ ཝིཝརཎཾ. པམཱཎེནེཝཱཏི ཡཱཔནཔྤམཱཎེནེཝ.

ཨེཀབྷིཀྑུཔི ནཱཉྙཱསཱིཏི སོསཱནིཀཝཏྟེ སམྨདེཝ ཝཏྟིཏཏྟཱ ཨེཀོཔི བྷིཀྑུ ན ཨཉྙཱསི. ཨབྦོཀིཎྞནྟི ཨཝིཙྪེདཾ. དུཏིཡོ མཾ ཛཱནེཡྻཱཏི དུཏིཡོ སཧཱཡབྷཱུཏོཔི ཡཐཱ མཾ ཛཱནིཏུཾ ན སཀྐུཎེཡྻ, ཏཐཱ སཊྛི ཝསྶཱནི ནིརནྟརཾ སུསཱནེ ཝསཱམི, ཏསྨཱ ཨཧཾ ཨཧོ སོསཱནིཀུཏྟམོ. ཨུཔཀཱརོ ཧུཏྭཱཏི ཨུགྒཧཔརིཔུཙྪཱདཱིཧི པརིཡཏྟིདྷམྨཝསེན ཨུཔཀཱརོ ཧུཏྭཱ. དྷམྨཀཐཱཡ ཛནཔདཾ ཁོབྷེཏྭཱཏི ལོམཧཾསནསཱདྷུཀཱརདཱནཙེལུཀྑེཔཱདིཝསེན སནྣིཔཏིཏཾ ཨིཏརཉྩ ‘‘ཀཐཾ ནུ ཁོ ཨཔྤཾ ཨཡྻསྶ སནྟིཀེ དྷམྨཾ སོསྶཱམཱ’’ཏི ཀོལཱཧལཝསེན མཧཱཛནཾ ཁོབྷེཏྭཱ? ཡདི ཐེརོ བཧུསྶུཏབྷཱཝཾ ཛཱནཱཔེཏུཾ ཨིཙྪེཡྻ, པུབྦེཝ ཛནཔདཾ ཁོབྷེནྟོ དྷམྨཾ ཀཐེཡྻ. གཏོཏི ‘‘ཨཡཾ སོ, ཡེན རཏྟིཡཾ དྷམྨཀཐཱ ཀཏཱ’’ཏི ཛཱནནབྷཱཝེན པརིཡཏྟིཨཔྤིཙྪཏཱཡ པུརཱརུཎཱཝ གཏོ.

ཏཡོ ¶ ཀུལཔུཏྟཱ ཝིཡཱཏི པཱཙཱིནཝཾསདཱཡེ སཱམགྒིཝཱསཾཝུཊྛཱ ཨནུརུདྡྷོ, ནནྡིཡོ, ཀིམིལོཏི ཨིམེ ཏཡོ ཀུལཔུཏྟཱ ཝིཡ. ཨེཏེསུཔི ཧི ཨནུརུདྡྷཏྠེརེན བྷགཝཏཱ ‘‘ཨཏྠི པན ཝོ ཨནུརུདྡྷཱ ཨེཝཾ ཨཔྤམཏྟཱནཾ ཨཱཏཱཔཱིནཾ པཧིཏཏྟཱནཾ ཝིཧརནྟཱནཾ ཨུཏྟརིམནུསྶདྷམྨོ ཨལམརིཡཉཱཎདསྶནཝིསེསོ ཨདྷིགཏོ ཕཱསུཝིཧཱརོ’’ཏི (མ. ནི. ༡.༣༢༨) པུཊྛེན ‘‘ཨིདྷ པན མཡཾ, བྷནྟེ, ཡཱཝདེཝ ཨཱཀངྑཱམ, ཝིཝིཙྩེཝ ཀཱམེཧི ཝིཝིཙྩ ཨཀུསལེཧི དྷམྨེཧི སཝིཏཀྐཾ སཝིཙཱརཾ ཝིཝེཀཛཾ པཱིཏིསུཁཾ པཋམཾ ཛྷཱནཾ ཨུཔསམྤཛྫ ཝིཧརཱམཱ’’ཏིཨཱདིནཱ (མ. ནི. ༡.༣༢༨) ཨནུཔུབྦཝིཧཱརསམཱཔཏྟཱིསུ ¶ ཨཱརོཙིཏཱསུ ཨིཏརེ ཐེརཱ ན ཨིཙྪིཾསུ. ཏཐཱ ཧི ཏེ པཀྐནྟེ བྷགཝཏི ཨཱཡསྨནྟཾ ཨནུརུདྡྷཾ ཨེཏདཝོཙུཾ – ‘‘ཀིནྣུ མཡཾ ཨཱཡསྨཏོ ཨནུརུདྡྷསྶ ཨེཝམཱརོཙིམྷ ‘ཨིམཱསཉྩ ཨིམཱསཉྩ ཝིཧཱརསམཱཔཏྟཱིནཾ མཡཾ ལཱབྷིནོ’ཏི? ཡཾ ནོ ཨཱཡསྨཱ ཨནུརུདྡྷོ བྷགཝཏོ སམྨུཁཱཔི ཨཱསཝཱནཾ ཁཡཾ པཀཱསེཏཱི’’ཏི? གྷཊཱིཀཱརོཔི ཨཏྟནོ ཨརིཡབྷཱཝེ ཀིཀིསྶ རཉྙོ བྷགཝཏཱ ཨཱརོཙིཏེ ན ཨཏྟམནོ ཨཧོསི? ཏེནཱཧ – ‘‘གྷཊཱིཀཱརཀུམྦྷཀཱརོ ཝིཡཱ’’ཏི. ཨིམསྨིཾ པནཏྠེཏི ‘‘ཡཐཡིདཾ, བྷིཀྑཝེ, ཨཔྤིཙྪཏཱ’’ཏི ཝུཏྟེ ཨཔྤིཙྪཏཱསངྑཱཏེ ཨཏྠེ. བལཝཨལོབྷེནཱཏི དལ༹ྷཏརཔྤཝཏྟིཀེན ཨལོབྷེན.

༦༤. ཙཏུཏྠེ ནཏྠི ཨེཏསྶ སནྟུཊྛཱིཏི ཨསནྟུཊྛི, ཏསྶ བྷཱཝོ ཨསནྟུཊྛིཏཱ. ཏཾ པན སརཱུཔཏོ དསྶེནྟོ ‘‘ཨསནྟུཊྛེ པུགྒལེ…པེ… ལོབྷོ’’ཏི ཨཱཧ. སེཝནྟསྶཱཏིཨཱདཱིནི ཨཉྙམཉྙཝེཝཙནཱནི.

༦༥-༦༧. པཉྩམེ ཏུསྶནཾ ཏུཊྛི, སམཾ, སཀེན, སནྟེན ཝཱ ཏུཊྛི ཨེཏསྶཱཏི སནྟུཊྛི, ཏསྶ བྷཱཝོ སནྟུཊྛིཏཱ. ཡསྶ སནྟོསསྶ ཨཏྠིཏཱཡ བྷིཀྑུ ‘‘སནྟུཊྛོ’’ཏི ཝུཙྩཏི, ཏཾ དསྶེནྟོ ‘‘ཨིཏརཱིཏརཔཙྩཡསནྟོསེན སམནྣཱགཏསྶཱ’’ཏི ཨཱཧ – ཙཱིཝརཱདིཀེ ཡཏྠ ཀཏྠཙི ཀཔྤིཡེ པཙྩཡེ སནྟུསྶནེན སམངྒཱིབྷཱུཏསྶཱཏི ཨཏྠོ. ཨཐ ཝཱ ཨིཏརཾ ཝུཙྩཏི ཧཱིནཾ པཎཱིཏཏོ ཨཉྙཏྟཱ, ཏཐཱ པཎཱིཏམྤི ཨིཏརཾ ཧཱིནཏོ ཨཉྙཏྟཱ. ཨཔེཀྑཱསིདྡྷཱ ཧི ཨིཏརཏཱ. ཨིཏི ཡེན དྷམྨེན ཧཱིནེན ཝཱ པཎཱིཏེན ཝཱ ཙཱིཝརཱདིཔཙྩཡེན སནྟུསྶཏི, སོ ཏཐཱ པཝཏྟོ ཨལོབྷོ ཨིཏརཱིཏརཔཙྩཡསནྟོསོ, ཏེན སམནྣཱགཏསྶ ¶ . ཡཐཱལཱབྷཾ ཨཏྟནོ ལཱབྷཱནུརཱུཔཾ སནྟོསོ ཡཐཱལཱབྷསནྟོསོ. སེསཔདདྭཡེཔི ཨེསེཝ ནཡོ. ལབྦྷཏཱིཏི ཝཱ ལཱབྷོ, ཡོ ཡོ ལཱབྷོ ཡཐཱལཱབྷོ, ཏེན སནྟོསོ ཡཐཱལཱབྷསནྟོསོ. བལནྟི ཀཱཡབལཾ. སཱརུཔྤནྟི བྷིཀྑུནོ ཨནུཙྪཝིཀཏཱ.

ཡཐཱལདྡྷཏོ ཨཉྙསྶ ཨཔཏྠནཱ ནཱམ སིཡཱ ཨཔྤིཙྪཏཱཔི པཝཏྟིཨཱཀཱརོཏི ཏཏོ ཝིནིཝེཙིཏམེཝ སནྟོསསྶ སརཱུཔཾ དསྶེནྟོ ‘‘ལབྷནྟོཔི ན གཎྷཱཏཱི’’ཏི ཨཱཧ. ཏཾ པརིཝཏྟེཏྭཱ པཀཏིདུབྦལཱདཱིནཾ གརུཙཱིཝརཾ ཨཕཱསུབྷཱཝཱཝཧཾ སརཱིརཁེདཱཝཧཉྩ ཧོཏཱིཏི པཡོཛནཝསེན ན ཨཏྲིཙྪཏཱདིཝསེན ཏཾ པརིཝཏྟེཏྭཱ ལཧུཀཙཱིཝརཔརིབྷོགོ སནྟོསཝིརོདྷི ན ཧོཏཱིཏི ཨཱཧ – ‘‘ལཧུཀེན ཡཱཔེནྟོཔི སནྟུཊྛོཝ ཧོཏཱི’’ཏི. མཧགྒྷཙཱིཝརཾ བཧཱུནི ཝཱ ཙཱིཝརཱནི ལབྷིཏྭཱ ཏཱནི ཝིསྶཛྫེཏྭཱ ཏདཉྙསྶ གཧཎཾ ཡཐཱསཱརུཔྤནཡེ ཋིཏཏྟཱ ན སནྟོསཝིརོདྷཱིཏི ཨཱཧ – ‘‘ཏེསཾ…པེ… དྷཱརེནྟོཔི སནྟུཊྛོཝ ཧོཏཱི’’ཏི. ཨེཝཾ སེསཔཙྩཡེསུཔི ཡཐཱསཱརུཔྤནིདྡེསེ ¶ ཨཔི-སདྡགྒཧཎེ ཨདྷིཔྤཱཡོ ཝེདིཏབྦོ. མུཏྟཧརཱིཏཀནྟི གོམུཏྟཔརིབྷཱཝིཏཾ, པཱུཏིབྷཱཝེན ཝཱ ཚཌྜིཏཾ ཧརཱིཏཀཾ. བུདྡྷཱདཱིཧི ཝཎྞིཏནྟི ཨཔྤིཙྪཏཱསནྟུཊྛཱིསུ བྷིཀྑཱུ ནིཡོཛེཏུཾ ‘‘པཱུཏིམུཏྟབྷེསཛྫཾ ནིསྶཱཡ པབྦཛྫཱ’’ཏིཨཱདིནཱ (མཧཱཝ. ༧༣, ༡༢༨) བུདྡྷཱདཱིཧི པསཏྠཾ. པརམསནྟུཊྛོཝ ཧོཏི པརམེན ཨུཀྐཾསགཏེན སནྟོསེན སམནྣཱགཏཏྟཱ. ཡཐཱསཱརུཔྤསནྟོསོཝ ཨགྒོཏི ཏཏྠ ཏཏྠ བྷིཀྑུ སཱརུཔྤཾཡེཝ ནིསྶཱཡ སནྟུསྶནཝསེན པཝཏྟནཏོ ཨགྒོ. ཚཊྛསཏྟམེསུ ནཏྠི ཝཏྟབྦཾ.

༦༨-༦༩. ཨཊྛམནཝམེསུ ན སམྤཛཱནཱཏཱིཏི ཨསམྤཛཱནོ, ཏསྶ བྷཱཝོ ཨསམྤཛཉྙཾ. ཝུཏྟཔྤཊིཔཀྑེན སམྤཛཉྙཾ ཝེདིཏབྦཾ.

༧༠. དསམེ པཱཔམིཏྟཱ དེཝདཏྟསདིསཱ. ཏེ ཧི ཧཱིནཱཙཱརཏཱཡ, དུཀྑསྶ ཝཱ སམྤཱཔཀཏཱཡ ‘‘པཱཔཱ’’ཏི ཝུཙྩནྟི. ཏེནཱཀཱརེན པཝཏྟཱནནྟི ཡོ པཱཔམིཏྟསྶ ཁནྟི རུཙི ཨདྷིམུཏྟི ཏནྣིནྣཏཱཏཾསམྤཝངྐཏཱདིཨཱཀཱརོ, ཏེནཱཀཱརེན པཝཏྟཱནཾ. ཙཏུནྣཾ ཁནྡྷཱནམེཝེཏཾ ནཱམནྟི ཙཏུནྣཾ ཨརཱུཔཀྑནྡྷཱནཾ ¶ ‘‘པཱཔམིཏྟཏཱ’’ཏི ཨེཏཾ ནཱམཾ. ཡསྨཱ ཨསྶདྡྷིཡཱདིཔཱཔདྷམྨསམནྣཱགཏཱ པུགྒལཱ ཝིསེསཏོ པཱཔཱ པུཉྙདྷམྨཝིམོཀྑཏཱཡ, ཏེ ཡསྶ མིཏྟཱ སཧཱཡཱ, སོ པཱཔམིཏྟོ, ཏསྶ བྷཱཝོ པཱཔམིཏྟཏཱ. ཏེནཱཧ – ‘‘ཡེ ཏེ པུགྒལཱ ཨསྶདྡྷཱ’’ཏིཨཱདི.

ཝཱིརིཡཱརམྦྷཱདིཝགྒཝཎྞནཱ ནིཊྛིཏཱ.

༨. ཀལྱཱཎམིཏྟཱདིཝགྒཝཎྞནཱ

༧༡. ཨཊྛམསྶ ¶ པཋམེ བུདྡྷཱ, སཱརིཔུཏྟཱདཡོ ཝཱ ཀལྱཱཎམིཏྟཱ. ཝུཏྟཔཊིཔཀྑནཡེནཱཏི ‘‘པཱཔམིཏྟཏཱ’’ཏི པདེ ཝུཏྟསྶ པཊིཔཀྑནཡེན.

༧༢-༧༣. དུཏིཡེ ཡོགོཏི སམངྒཱིབྷཱཝོ. པཡོགོཏི པཡུཉྫནཾ པཊིཔཏྟི. ཨཡོགོཏི ཨསམངྒཱིབྷཱཝོ. ཨཔྤཡོགོཏི ཨཔྤཡུཉྫནཾ ཨཔྤཊིཔཏྟི. ཨནུཡོགེནཱཏི ཨནུཡོགཧེཏུ.

༧༤. ཙཏུཏྠེ བུཛ྄ཛྷནཀསཏྟསྶཱཏི ཙཏུནྣཾ ཨརིཡསཙྩཱནཾ པཊིཝིཛ྄ཛྷནཀཔུགྒལསྶ. ཨངྒབྷཱུཏཱཏི ཏསྶེཝ པཊིཝེདྷསྶ ཀཱརཎབྷཱུཏཱ. ཨེཏྠ ཙ ཙཏྟཱརི ཨརིཡསཙྩཱནི བུཛ྄ཛྷཏི, ཨཉྙཱཎནིདྡཱཡ ཝཱཔི བུཛ྄ཛྷཏཱིཏི བོདྷཱིཏི ལདྡྷནཱམོ ཨརིཡསཱཝཀོ བུཛ྄ཛྷནཀསཏྟོ, ཏསྶ བུཛ྄ཛྷནཀསཏྟསྶ. བོདྷིཡཱཏི ཏསྶཱ དྷམྨསཱམགྒིསངྑཱཏཱཡ བོདྷིཡཱ. བུཛ྄ཛྷནཊྛེན བོདྷིཡོ, བོདྷིཡོ ཨེཝ སཙྩསམྤཊིབོདྷསྶ ཨངྒཱཏི ཝུཏྟཾ. ‘‘བུཛ྄ཛྷནྟཱིཏི བོཛ྄ཛྷངྒཱ’’ཏི. ཝིཔསྶནཱདཱིནཾ ཀཱརཎཱནཾ བུཛ྄ཛྷིཏབྦཱནཉྩ སཙྩཱནཾ ཨནུརཱུཔཾ བུཛ྄ཛྷནཏོ ཨནུབུཛ྄ཛྷནྟཱིཏི བོཛ྄ཛྷངྒཱ, པཊིམུཁཾ པཙྩཀྑབྷཱཝེན ཨབྷིམུཁཾ བུཛ྄ཛྷནཏོ པཊིབུཛ྄ཛྷནྟཱིཏི བོཛ྄ཛྷངྒཱ, སམྨཱ ཨཝིཔརཱིཏཏོ བུཛ྄ཛྷནཏོ སམྦུཛ྄ཛྷནྟཱིཏི བོཛ྄ཛྷངྒཱཏི ཨེཝཾ ཨཏྠཝིསེསདཱིཔཀེཧི ཨུཔསགྒེཧི ཨནུབུཛ྄ཛྷནྟཱིཏིཨཱདི ཝུཏྟཾ. བོདྷིསདྡོ སབྦཝིསེསཡུཏྟཾ བུཛ྄ཛྷནསཱམཉྙེན སངྒཎྷཱཏི. བོདྷཱཡ སཾཝཏྟནྟཱིཏི ཨིམིནཱ ཏསྶཱ དྷམྨསཱམགྒིཡཱ བུཛ྄ཛྷནསྶ ཨེཀནྟཀཱརཎཏཾ དསྶེཏི. ཨེཝཾ པནེཏཾ པདཾ ཝིབྷཏྟམེཝཱཏི ཝུཏྟཔྤཀཱརེན ཨེཏཾ ‘‘བོཛ྄ཛྷངྒཱ’’ཏི (པཊི. མ. ༢.༡༧) པདཾ ནིདྡེསེ པཊིསམྦྷིདཱམགྒེ ཝིབྷཏྟམེཝ.

༧༥. པཉྩམེ ¶ ཡཱཐཱཝསརསབྷཱུམཱིཏི ཡཱཐཱཝཏོ སཀིཙྩཀརཎབྷཱུམི. སཱཏི ཡཱཐཱཝསརསབྷཱུམི. ཝིཔསྶནཱཏི བལཝཝིཔསྶནཱ. ཀེཙི ‘‘བྷངྒཉཱཎཏོ པཊྛཱཡཱ’’ཏི ཝདནྟི. ཝིཔསྶནཱཡ པཱདཀཛ྄ཛྷཱནེ ཙ སཏིཨཱདཡོ བོཛ྄ཛྷངྒཔཀྑིཀཱ ཨེཝ པརིཡཱཡབོདྷིཔཀྑིཡབྷཱཝཏོ. ཏཏྠཱཏིཨཱདི ཙཏུབྦིདྷཱནཾ བོཛ྄ཛྷངྒཱནཾ བྷཱུམིཝིབྷཱགདསྶནཾ.

༧༦. ཚཊྛེ ཏེསཾ ཨནྟརེཏི ཏེསཾ བྷིཀྑཱུནཾ ཨནྟརེ. ཀཱམཾ སངྒཱིཏིཨཱརུལ༹ྷཝསེན ཨཔྤཀམིདཾ སུཏྟཔདཾ, བྷགཝཱ པནེཏྠ སནྣིཔཏིཏཔརིསཱཡ ཨཛ྄ཛྷཱསཡཱནུརཱུཔཾ ཝིཏྠཱརིཀཾ ཀརོཏཱིཏི ཀཏྭཱ ཨིདཾ ཝུཏྟཾ – ‘‘མཧཏཱི དེསནཱ བྷཝིསྶཏཱི’’ཏི. གཱམནིགམཱདིཀཐཱ ནཏྠཱིཏི ཏསྶཱ ཀཐཱཡ ཨཏིརཙྪཱནཀཐཱབྷཱཝམཱཧུ ¶ . ཏཐཱ ཧི སཱ པུབྦེ བཧུཉཱཏིཀཾ ཨཧོསི བཧུཔཀྑཾ, ཨིདཱནི ཨཔྤཉཱཏིཀཾ ཨཔྤཔཀྑནྟི ཨནིཙྩཏཱམུཁེན ནིཡྻཱནིཀཔཀྑིཀཱ ཛཱཏཱ. ཨེཏཱཡཱཏི ཡཐཱཝུཏྟཱཡ པརིཧཱནིཡཱ. པཏིཀིཊྛནྟི ནིཧཱིནཾ. མམ སཱསནེཏི ཨིདཾ ཀམྨསྶཀཏཛ྄ཛྷཱནཔཉྙཱནམྤི ཝིསེསནམེཝ. ཏདུབྷཡམྤི ཧི བཱཧིརཀཱནཾ ཏཔྤཉྙཱདྭཡཏོ སཱཏིསཡམེཝ སབྦཉྙུབུདྡྷཱནཾ དེསནཱཡ ལདྡྷཝིསེསཏོ ཝིཝཊྚཱུཔནིསྶཡཏོ ཙ.

༧༧. སཏྟམེ ཏེསཾ ཙིཏྟཱཙཱརཾ ཉཏྭཱཏི ཏཐཱ ཀཐེནྟཱནཾ ཏེསཾ བྷིཀྑཱུནཾ ཏཏྠ ཨུཔགམནེན ཨཏྟནོ དེསནཱཡ བྷཱཛནབྷཱུཏཾ ཙིཏྟཔྤཝཏྟིཾ ཉཏྭཱ. ཀམྨསྶཀཏཱདཱིཏི ཨཱདིསདྡེན ཛྷཱནཔཉྙཱདཱིནཾ ཙཏུནྣམྤི པཉྙཱནཾ གཧཎཾ.

༧༨-༨༠. ཨཊྛམཱདཱིསུ ཧེཊྛཱ ཝུཏྟནཡེནེཝཱཏི ‘‘ཡཱ ཨེས མམ སཱསནེ’’ཏིཨཱདིནཱ ཧེཊྛཱ ཝུཏྟནཡེནེཝ. སེསམེཏྠ ཨུཏྟཱནཏྠམེཝ.

ཀལྱཱཎམིཏྟཱདིཝགྒཝཎྞནཱ ནིཊྛིཏཱ.

༨༡-༨༢. ནཝམེ ཝགྒེ ནཏྠི ཝཏྟབྦཾ.

༡༠. དུཏིཡཔམཱདཱདིཝགྒཝཎྞནཱ

༩༨-༡༡༥. དསམེ ¶ ཝགྒེ ཨཛ྄ཛྷཏྟསནྟཱནེ བྷཝཾ ཨཛ྄ཛྷཏྟིཀཾ. ཨཛ྄ཛྷཏྟསནྟཱནཏོ བཧིདྡྷཱ བྷཝཾ བཱཧིརཾ. ཝུཏྟཔཊིཔཀྑནཡེནཱཏི ‘‘ཨཝིནཱསཱཡཱ’’ཏི ཨེཝམཱདིནཱ ཨཏྠོ གཧེཏབྦོ. ཙཏུཀྐོཊིཀེཏི ‘‘ཨནུཡོགོ ཨཀུསལཱནཾ ¶ , ཨནནུཡོགོ ཀུསལཱནཾ, ཨནུཡོགོ ཀུསལཱནཾ, ཨནནུཡོགོ ཨཀུསལཱན’’ནྟི (ཨ. ནི. ༡.༩༦) ཨེཝཾ པརིཡོསཱནསུཏྟེ ཨཱགཏནཡཾ གཧེཏྭཱ ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམཱི’’ཏིཨཱདིནཱ (ཨ. ནི. ༡.༡༡) ཨཱགཏསུཏྟཱནཾ སམཉྙཱ ཛཱཏཱ.

༡༣༠. སུཏྟནྟནཡེ ཡཐཱཙོདནཱ སཾཀིལེསདྷམྨཱནཾ ཝིཔརིཡེསནཾ, ཏཾཏཾདྷམྨཀོཊྛཱསཱནཉྩ ཨཱུནཏོ ཨདྷིཀཏོ ཙ པཝེདནཾ ཨདྷམྨཾ དྷམྨོཏི དཱིཔནཾ. ཏེསཾཡེཝ པན ཨཝིཔརཱིཏཏོ ཨནཱུནཱདྷིཀཏོ ཙ པཝེདནཾ དྷམྨཾ དྷམྨོཏི དཱིཔནཾ. ཨེཝཾ ཝིནཡཔྤཊིཔཏྟིཡཱ ཨཡཐཱཝིདྷིཔྤཝེདནཾ ཨདྷམྨཾ དྷམྨོཏི དཱིཔནཾ. ཡཐཱཝིདྷིཔྤཝེདནཾ དྷམྨཾ དྷམྨོཏི དཱིཔནཾ. སུཏྟནྟནཡེན པཉྩཝིདྷོ སཾཝརཝིནཡོ པཧཱནཝིནཡོ ཙ ཝིནཡོ, ཏཔྤཊིཔཀྑེན ཨཝིནཡོ. ཝིནཡནཡེན ཝཏྠུསམྤདཱདིནཱ ཡཐཱཝིདྷིཔྤཊིཔཏྟི ཨེཝ ཝིནཡོ, ཏབྦིཔརིཡཱཡེན ཨཝིནཡོ ཝེདིཏབྦོ. ཏིཾས ནིསྶགྒིཡཱ པཱཙིཏྟིཡཱཏི ཨེཏྠ ཨིཏི-སདྡོ ཨཱདྱཏྠོ. ཏེན དྭེནཝུཏི པཱཙིཏྟིཡཱ, ཙཏྟཱརོ པཱཊིདེསནིཡཱ, སཏྟ ཨདྷིཀརཎསམཐཱཏི ཨིམེསཾ སངྒཧོ. ཨེཀཏིཾས ནིསྶགྒིཡཱཏི ཨེཏྠ ‘‘ཏེནཝུཏི པཱཙིཏྟིཡཱ’’ཏིཨཱདིནཱ ཝཏྟབྦཾ. སེསམེཏྠ སུཝིཉྙེཡྻམེཝ.

ཨདྷིགནྟབྦཏོ ཨདྷིགམོ, མགྒཕལཱནི. ནིབྦཱནཾ པན ཨནྟརདྷཱནཱབྷཱཝཏོ ཨིདྷ ན གཡ྄ཧཏི. པཊིཔཛྫནཾ པཊིཔཏྟི, སིཀྑཏྟཡསམཱཡོགོ. པཊིཔཛྫིཏབྦཏོ ཝཱ པཊིཔཏྟི. པརིཡཱཔུཎིཏབྦཏོ པརིཡཏྟི, པིཊཀཏྟཡཾ. མགྒགྒཧཎེན གཧིཏཱཔི ཏཏིཡཝིཛྫཱཚཊྛཱབྷིཉྙཱ ཝིཛྫཱབྷིཉྙཱསཱམཉྙཏོ ‘‘ཏིསྶོ ཝིཛྫཱ ཚ ཨབྷིཉྙཱ’’ཏི པུནཔི གཧིཏཱ. ཏཏོ པརཾ ཚ ཨབྷིཉྙཱཏི ཝསྶསཧསྶཏོ པརཾ ཚ ཨབྷིཉྙཱ ནིབྦཏྟེཏུཾ སཀྐོནྟི, ན པཊིསམྦྷིདཱཏི ཨདྷིཔྤཱཡོ. ཏཏོཏི ཨབྷིཉྙཱཀཱལཏོ པཙྪཱ. ཏཱཏི ཨབྷིཉྙཱཡོ. པུབྦབྷཱགེ ཛྷཱནསིནེཧཱབྷཱཝེན ཀེཝལཱཡ ཝིཔསྶནཱཡ ཋཏྭཱ ཨགྒཕལཔྤཏྟཱ སུཀྑཝིཔསྶཀཱ ནཱམ, མགྒཀྑཎེ པན ‘‘ཛྷཱནསིནེཧོ ནཏྠཱི’’ཏི ན ཝཏྟབྦོ ‘‘སམཐཝིཔསྶནཾ ཡུགནདྡྷཾ བྷཱཝེཏཱི’’ཏི (ཨ. ནི. ༤.༡༧༠) ཝཙནཏོ. པཙྪིམཀསྶཱཏི སབྦཔཙྪིམསྶ. ཀིཉྩཱཔི ཨརིཡོ ཨཔརིཧཱནདྷམྨོ ¶ ¶ , སོཏཱཔནྣསྶ པན ཨུདྡྷཾ ཛཱིཝིཏཔརིཡཱདཱནཱ ཨདྷིགཏདྷམྨོ ཨུཔྤནྣོ ནཱམ ནཏྠི, པཙྩཡསཱམགྒིཡཱ ཨསཏི ཡཱཝ ཨུཔརིཝིསེསཾ ནིབྦཏྟེཏུཾ ན སཀྐོནྟི, ཏཱཝ ཨདྷིགམསྶ ཨསམྦྷཝོ ཨེཝཱཏི ཨཱཧ – ‘‘སོཏཱཔནྣསྶ…པེ… ནཱམ ཧོཏཱི’’ཏི. ཏསྶིདཾ མནུསྶལོཀཝསེན ཝུཏྟནྟི དཊྛབྦཾ.

ན ཙོདེནྟཱིཏི ཨཉྙམཉྙསྨིཾ ཝིཛྫམཱནཾ དོསཾ ཛཱནནྟཱཔི ན ཙོདེནྟི ན སཱརེནྟི. ཨཀུཀྐུཙྩཀཱ ཧོནྟཱིཏི ཀུཀྐུཙྩཾ ན ཨུཔྤཱདེནྟི. ‘‘ཨསཀྐཙྩཀཱརིནོ ཧོནྟཱི’’ཏི ཙ པཋནྟི, སཱཐལིཀཏཱཡ སིཀྑཱསུ ཨསཀྐཙྩཀཱརིནོ ཧོནྟཱིཏི ཨཏྠོ. བྷིཀྑཱུནཾ སཏེཔི སཧསྶེཔི དྷརམཱནེཏི ཨིདཾ བཱཧུལླཝསེན ཝུཏྟཾ. ཨནྟིམཝཏྠུཨནཛ྄ཛྷཱཔནྣེསུ ཀཏིཔཡམཏྟེསུཔི བྷིཀྑཱུསུ དྷརནྟེསུ, ཨེཀསྨིཾ ཝཱ དྷརནྟེ པཊིཔཏྟི ཨནནྟརཧིཏཱ ཨེཝ ནཱམ ཧོཏི. ཏེནེཝཱཧ – ‘‘པཙྪིམཀསྶ…པེ… ཨནྟརཧིཏཱ ཧོཏཱི’’ཏི.

ཨནྟེཝཱསིཀེ གཧེཏུནྟི ཨནྟེཝཱསིཀེ སངྒཧེཏུཾ. ཨཏྠཝསེནཱཏི ཨཊྛཀཐཱཝསེན. མཏྠཀཏོ པཊྛཱཡཱཏི ཨུཔརིཏོ པཊྛཱཡ. ཨུཔོསཐཀྑནྡྷཀམཏྟནྟི ཝིནཡམཱཏིཀཱཔཱལི༹མཱཧ. ཨཱལ༹ཝཀཔཉྷཱདཱིནཾ ཝིཡ དེཝེསུ པརིཡཏྟིཡཱ པཝཏྟི ཨཔྤམཱཎནྟི ཨཱཧ – ‘‘མནུསྶེསཱུ’’ཏི.

ཨོཊྛཊྛིཝཎྞནྟི ཨོཊྛཱནཾ ཨཊྛིཝཎྞཾ, དནྟཀསཱཝཾ ཨེཀཾ ཝཱ དྭེ ཝཱ ཝཱརེ རཛིཏྭཱ དནྟཝཎྞཾ ཀཏྭཱ དྷཱརེནྟཱིཏི ཝུཏྟཾ ཧོཏི. ཀེསེསུ ཝཱ ཨལླཱིཡཱཔེནྟཱིཏི ཏེན ཀཱསཱཝཁཎྜེན ཀེསེ བནྡྷནྟཱ ཨལླཱིཡཱཔེནྟི. བྷིཀྑུགོཏྟསྶ ཨབྷིབྷཝནཏོ ཝིནཱསནཏོ གོཏྲབྷུནོ. ཨཐ ཝཱ གོཏྟཾ ཝུཙྩཏི སཱདྷཱརཎཾ ནཱམཾ, མཏྟསདྡོ ལུཏྟནིདྡིཊྛོ, ཏསྨཱ ‘‘སམཎཱ’’ཏི གོཏྟམཏྟཾ ཨནུབྷཝནྟི དྷཱརེནྟཱིཏི གོཏྲབྷུནོ, ནཱམམཏྟསམཎཱཏི ཨཏྠོ. ཀཱསཱཝགཏཀཎྛཏཱཡ, ཀཱསཱཝགྒཧཎཧེཏུཨུཔྤཛྫནཀསོཀཏཱཡ ཝཱ ཀཱསཱཝཀཎྛཱ. སངྒྷགཏནྟི སངྒྷཾ ཨུདྡིསྶ དིནྣཏྟཱ སངྒྷགཏཾ. ཏཾ སརཱིརནྟི ཏཾ དྷཱཏུསརཱིརཾ.

ཏེནེཝཱཏི པརིཡཏྟིཨནྟརདྷཱནམཱུལཀཏྟཱ ཨེཝ ཨིཏརཨནྟརདྷཱནསྶ. སཀྐོ དེཝརཱཛཱ ཚཱཏཀབྷཡེ པརཏཱིརགམནཱཡ བྷིཀྑཱུ ཨུསྶུཀྐམཀཱསཱིཏི ཨདྷིཔྤཱཡོ. ནེཏི ཨུབྷཡེཔི པཾསུཀཱུལིཀཏྠེརེ དྷམྨཀཐིཀཏྠེརེ ཙ. ཐེརཱཏི ཏཏྠ ཋིཏཱ སཀྑིབྷཱུཏཱ ཐེརཱ. དྷམྨཀཐིཀཏྠེརཱ ‘‘ཡཱཝ ཏིཊྛནྟི ¶ སུཏྟནྟཱ…པེ… ཡོགཀྑེམཱ ན དྷཾསཏཱི’’ཏི ཨིདཾ སུཏྟཾ ཨཱཧརིཏྭཱ ‘‘སུཏྟནྟེ རཀྑིཏེ སནྟེ, པཊིཔཏྟི ཧོཏི རཀྑིཏཱ’’ཏི ཨིམིནཱ ཝཙནེན པཾསུཀཱུལིཀཏྠེརེ ཨཔྤཊིབྷཱནེ ཨཀཾསུ ¶ . ཨིདཱནི པརིཡཏྟིཡཱ ཨནནྟརདྷཱནམེཝ ཨིཏརེསཾ ཨནནྟརདྷཱནཧེཏཱུཏི ཨིམམཏྠཾ བྱཏིརེཀཏོ ཨནྭཡཏོ ཙ ཨུཔམཱཧི ཝིབྷཱཝེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. ཏཾ སུཝིཉྙེཡྻམེཝ.

དུཏིཡཔམཱདཱདིཝགྒཝཎྞནཱ ནིཊྛིཏཱ.

༡༤༠-༡༥༠. ཨེཀཱདསམདྭཱདསམཝགྒཱ སུཝིཉྙེཡྻཱ ཨེཝ.

༡༣. ཨེཀཔུགྒལཝགྒཝཎྞནཱ

༡༧༠. ཨེཀཔུགྒལསྶཱཏི ¶ ཨེཀཔུགྒལཝགྒསྶ. ཏེནཱཧ – ‘‘པཋམེ’’ཏི. ཨེཀོཏི གཎནཔརིཙྪེདོ, ཏཏོ ཨེཝ དུཏིཡཱདིཔཊིཀྑེཔཏྠོ. པདྷཱནཱསཧཱཡཏྠོཔི ཨེཀསདྡོ ཧོཏཱིཏི ཏནྣིཝཏྟནཏྠཾ ‘‘གཎནཔརིཙྪེདོ’’ཏི ཨཱཧ. སམྨུཏིཡཱ དེསནཱ སམྨུཏིདེསནཱ. པརམཏྠསྶ དེསནཱ པརམཏྠདེསནཱ. ཏཏྠཱཏི སམྨུཏིཔརམཏྠདེསནཱསུ, ན སམྨུཏིཔརམཏྠེསུ. ཏེནཱཧ – ‘‘ཨེཝརཱུཔཱ སམྨུཏིདེསནཱ, ཨེཝརཱུཔཱ པརམཏྠདེསནཱ’’ཏི. ཏཏྲིདཾ སམྨུཏིཔརམཏྠཱནཾ ལཀྑཎཾ – ཡསྨིཾ བྷིནྣེ, བུདྡྷིཡཱ ཝཱ ཨཝཡཝཝིནིབྦྷོགེ ཀཏེ ན ཏཾསམཉྙཱ, སཱ གྷཊཔཊཱདིཔྤབྷེདཱ སམྨུཏི, ཏབྦིཔརིཡཱཡེན པརམཏྠཱ. ན ཧི ཀཀྑལ༹ཕུསནཱདིསབྷཱཝེ སོ ནཡོ ལབྦྷཏི. ཏཏྠ རཱུཔཱདིདྷམྨསམཱུཧཾ སནྟཱནཝསེན པཝཏྟམཱནཾ ཨུཔཱདཱཡ པུགྒལཝོཧཱརོཏི པུགྒལོཏི སམྨུཏིདེསནཱ. སེསཔདེསུཔི ཨེསེཝ ནཡོ. ཨུཔྤཱདཝཡཝནྟོ སབྷཱཝདྷམྨཱ ན ནིཙྩཱཏི ཨནིཙྩཱཏི ཨཱཧ – ‘‘ཨནིཙྩནྟི པརམཏྠདེསནཱ’’ཏི. ཨེས ནཡོ སེསཔདེསུཔི. ནནུ ཁནྡྷདེསནཱཔི སམྨུཏིདེསནཱཝ. རཱསཊྛོ ཝཱ ཧི ཁནྡྷཊྛོ ཀོཊྛཱསཊྛོ ཝཱཏི? སཙྩམེཏཾ, ཨཡཾ པན ཁནྡྷསམཉྙཱ ཕསྶཱདཱིསུ པཝཏྟཏཛྫཱཔཉྙཏྟི ཝིཡ པརམཏྠསནྣིསྶཡཱ ཏསྶ ཨཱསནྣཏརཱ, པུགྒལསམཉྙཱདཡོ ཝིཡ ན དཱུརེཏི པརམཏྠསངྒཧཱ ཝུཏྟཱ. ཁནྡྷསཱིསེན ཝཱ ཏདུཔཱདཱནསབྷཱཝདྷམྨཱ ཨེཝ གཧིཏཱ. ནནུ ཙ སབྷཱཝདྷམྨཱ སབྦེཔི སམྨུཏིམུཁེནེཝ དེསནཾ ཨཱརོཧནྟི, ན སམུཁེནཱཏི སབྦཱཔི དེསནཱ སམྨུཏིདེསནཱཝ སིཡཱཏི? ནཡིདམེཝཾ, དེསེཏབྦདྷམྨཝིབྷཱགེན དེསནཱཝིབྷཱགསྶ ཨདྷིཔྤེཏཏྟཱ. ན ཧི སདྡོ ཀེནཙི པཝཏྟིནིམིཏྟེན ཝིནཱ ཨཏྠཾ པཀཱསེཏཱིཏི.

སམྨུཏིཝསེན ¶ དེསནཾ སུཏྭཱཏི ‘‘ཨིདྷེཀཙྩོ པུགྒལོ ཨཏྟནྟཔོ ཧོཏི ཨཏྟཔརིཏཱཔཱནུཡོགམནུཡུཏྟོ’’ཏིཨཱདིནཱ (པུ. པ. ༡༧༤) སམྨུཏིམུཁེན པཝཏྟིཏདེསནཾ སུཏམཡཉཱཎུཔྤཱདཝསེན སུཏྭཱ. ཨཏྠཾ པཊིཝིཛ྄ཛྷིཏྭཱཏི ཏདནུསཱརེན ཙཏུསཙྩསངྑཱཏཾ ཨཏྠཾ སཧ ཝིཔསྶནཱཡ མགྒཔཉྙཱཡ པཊིཝིཛ྄ཛྷིཏྭཱ. མོཧཾ པཧཱཡཱཏི ཏདེཀཊྛཀིལེསེཧི སདྡྷིཾ ཨནཝསེསཾ མོཧཾ པཛཧིཏྭཱ. ཝིསེསནྟི ཨགྒཕལནིབྦཱནསངྑཱཏཾ ཝིསེསཾ. ཏེསནྟི ཏཱདིསཱནཾ ཝེནེཡྻཱནཾ. པརམཏྠཝསེནཱཏི ‘‘པཉྩིམཱནི, བྷིཀྑཝེ, ཨིནྡྲིཡཱནཱི’’ཏིཨཱདིནཱ (སཾ. ནི. ༥.༤༧༡-༤༧༦ ཨཱདཡོ) པརམཏྠདྷམྨཝསེན. སེསཾ ཨནནྟརནཡེ ཝུཏྟསདིསམེཝ.

ཏཏྲཱཏི ཏསྶཾ སམྨུཏིཝསེན པརམཏྠཝསེན ཙ དེསནཱཡཾ. དེསབྷཱསཱཀུསལོཏི ནཱནཱདེསབྷཱསཱསུ ¶ ཀུསལོ. ཏིཎྞཾ ཝེདཱནནྟི ནིདསྶནམཏྟཾ, ཏིཎྞཾ ཝེདཱནཾ སིཔྤུགྒཧཎཊྛཱནཱནམྤཱིཏི ཨདྷིཔྤཱཡོ. ཏེནེཝ སིཔྤུགྒཧཎཾ པརཏོ ཝཀྑཏི. སིཔྤཱནི ཝཱ ཝིཛྫཱཊྛཱནབྷཱཝེན ཝེདནྟོགདྷཱནི ཀཏྭཱ ‘‘ཏིཎྞཾ ཝེདཱན’’ནྟི ཝུཏྟཾ. ཀཐེཏབྦབྷཱཝེན ཋིཏཱནི, ན ཀཏྠཙི སནྣིཙིཏབྷཱཝེནཱཏི ཝེདཱནམྤི ཀཐེཏབྦབྷཱཝེནེཝ ཋཱནཾ དཱིཔེནྟོ ‘‘གུཧཱ ཏཱིཎི ནིཧིཏཱ ན གཡ྄ཧནྟཱི’’ཏིཨཱདིམིཙྪཱཝཱདཾ པཊིཀྑིཔཏི. ནཱནཱཝིདྷཱ དེསབྷཱསཱ ཨེཏེསནྟི ནཱནཱདེསབྷཱསཱ.

པརམོ ཨུཏྟམོ ཨཏྠོ པརམཏྠོ, དྷམྨཱནཾ ཡཐཱབྷཱུཏསབྷཱཝོ. ལོཀསངྐེཏམཏྟསིདྡྷཱ སམྨུཏི. ཡདི ཨེཝཾ ཀཐཾ སམྨུཏིཀཐཱཡ སཙྩཏཱཏི ཨཱཧ – ‘‘ལོཀསམྨུཏིཀཱརཎཱ’’ཏི, ལོཀསམཉྙཾ ནིསྶཱཡ པཝཏྟནཏོཏི ཨཏྠོ. ལོཀསམཉྙཱ ཧི ཨབྷིནིཝེསེན ཝིཉྙེཡྻཱ, ནཱཉྙཱཔནཱ ཨེཀཙྩསྶ སུཏསྶ སཱཝནཱ ཝིཡ ན མུསཱ ཨནཏིདྷཱཝིཏབྦཏོ ཏསྶཱ. ཏེནཱཧ བྷགཝཱ – ‘‘ཛནཔདནིརུཏྟིཾ ནཱབྷིནིཝེསེཡྻ, སམཉྙཾ ནཱཏིདྷཱཝཡེ’’ཏི. དྷམྨཱནནྟི སབྷཱཝདྷམྨཱནཾ. བྷཱུཏཀཱརཎཱཏི ཡཐཱབྷཱུཏཀཱརཎཱ ཡཐཱབྷཱུཏཾ ནིསྶཱཡ པཝཏྟནཏོ. སམྨུཏིཾ ཝོཧརནྟསྶཱཏི ‘‘པུགྒལོ, སཏྟོ’’ཏིཨཱདིནཱ ལོཀསམཉྙཾ ཀཐེནྟསྶ.

ཧིརོཏྟཔྤདཱིཔནཏྠནྟི ལོཀཔཱལནཀིཙྩེ ཧིརོཏྟཔྤདྷམྨེ ཀིཙྩཏོ པཀཱསེཏུཾ. ཏེསཉྷི ཀིཙྩཾ སཏྟསནྟཱནེ ཨེཝ པཱཀཊཾ ཧོཏཱིཏི པུགྒལཱདྷིཊྛཱནཱཡ ཀཐཱཡ ཏཾ ཝཏྟབྦཾ. ཨེས ནཡོ སེསེསུཔི. ཡསྨིཉྷི ¶ ཙིཏྟུཔྤཱདེ ཀམྨཾ ཨུཔྤནྣཾ, ཏཾསནྟཱནེ ཨེཝ ཏསྶ ཕལསྶ ཨུཔྤཏྟི ཀམྨསྶཀཏཱ. ཨེཝཉྷི ཀཏཝིཉྙཱཎནཱསོ ཨཀཏཱགམོ ཙ ནཏྠཱིཏི སཱ པུགྒལཱདྷིཊྛཱནཱཡ ཨེཝ དེསནཱཡ དཱིཔེཏབྦཱ. ཏེཧི སཏྟེཧི ཀཱཏབྦཔུཉྙཀིརིཡཱ པཙྩཏྟཔུརིསཀཱརོ. སོཔི སནྟཱནཝསེན ནིཊྛཔེཏབྦཏོ པུགྒལཱདྷིཊྛཱནཱཡ ཨེཝ ཀཐཱཡ དཱིཔེཏབྦོ. ཨཱནནྟརིཡདཱིཔནཏྠནྟི ཙུཏིཨནནྟརཾ ཕལཾ ཨནནྟརཾ ནཱམ, ཏསྨིཾ ཨནནྟརེ ནིཡུཏྟཱནི ཏཾནིབྦཏྟནེན ཨནནྟརཀརཎསཱིལཱནི, ཨནནྟརཀརཎཔཡོཛནཱནི ཝཱཏི ཨཱནནྟརིཡཱནི, མཱཏུགྷཱཏཱདཱིནི, ཏེསཾ དཱིཔནཏྠཾ. ཏཱནིཔི ཧི སནྟཱནཝསེན ནིཊྛཔེཏབྦཏོ ‘‘མཱཏརཾ ཛཱིཝིཏཱ ཝོརོཔེཏཱི’’ཏིཨཱདིནཱ (པཊྛཱ. ༡.༡.༤༢༣) པུགྒལཱདྷིཊྛཱནཱཡ ཨེཝ ཀཐཱཡ དཱིཔེཏབྦཱནི, ཏཐཱ ‘‘སོ མེཏྟཱསཧགཏེན ཙེཏསཱ ཨེཀཾ དིསཾ ཕརིཏྭཱ ཝིཧརཏཱི’’ཏིཨཱདིནཱ (དཱི. ནི. ༡.༥༥༦; ༣.༣༠༨; མ. ནི. ༡.༧༧; ༢.༣༠༩; ༣.༢༣༠; ཝིབྷ. ༦༤༢-༦༤༣) ‘‘སོ ཨནེཀཝིཧིཏཾ པུབྦེནིཝཱསཾ ཨནུསྶརཏི ཨེཀམྤི ཛཱཏི’’ནྟིཨཱདིནཱ (དཱི. ནི. ༡.༢༤༤-༢༤༥; མ. ནི. ༡.༡༤༨, ༣༨༤, ༤༣༡; པཱརཱ. ༡༢), ‘‘ཨཏྠི དཀྑིཎཱ དཱཡཀཏོ ཝིསུཛ྄ཛྷཏི, ནོ པཊིགྒཱཧཀཏོ’’ཏིཨཱདིནཱ (མ. ནི. ༣.༣༨༡) ཙ པཝཏྟཱ བྲཧྨཝིཧཱརཔུབྦེནིཝཱསདཀྑིཎཱཝིསུདྡྷིཀཐཱ པུགྒལཱདྷིཊྛཱནཱ ¶ ཨེཝ ཀཏྭཱ དཱིཔེཏབྦཱ སཏྟསནྟཱནཝིསཡཏྟཱ. ‘‘ཨཊྛ པུརིསཔུགྒལཱ (སཾ. ནི. ༡.༢༤༩) ན སམཡཝིམུཏྟོ པུགྒལོ’’ཏིཨཱདིནཱ (པུ. པ. ༢) ཙ པརམཏྠཀཐཾ ཀཐེནྟོཔི ལོཀསམྨུཏིཡཱ ཨཔྤཧཱནཏྠཾ པུགྒལཀཐཾ ཀཐེཏི. ཨེཏེན ཝུཏྟཱཝསེསཱཡ ཀཐཱཡ པུགྒལཱདྷིཊྛཱནབྷཱཝེ པཡོཛནཾ སཱམཉྙཝསེན སངྒཧིཏནྟི དཊྛབྦཾ. ཀཱམཉྩེཏཾ སབྦཾ ཨཔརིཉྙཱཏཝཏྠུཀཱནཾ ཝསེན ཝུཏྟཾ, པརིཉྙཱཏཝཏྠུཀཱནམྤི པན ཨེཝཾ དེསནཱ སུཁཱཝཧཱ ཧོཏི.

ཨེཀཔུགྒལོཏི ཝིསིཊྛསམཱཙཱརཱཔསྶཡཝིརཧིཏོ ཨེཀཔུགྒལོ. བུདྡྷཱནཉྷི སཱིལཱདིགུཎེན སདེཝཀེ ལོཀེ ཝིསིཊྛོ ནཱམ ཀོཙི ནཏྠི, ཏཐཱ སདིསོཔི སམཱནཀཱལེ. ཏེནཱཧ – ‘‘ན ཨིམསྨིཾ ལོཀེ པརསྨིཾ ཝཱ པན བུདྡྷེན སེཊྛོ སདིསོ ཙ ཝིཛྫཏཱི’’ཏི (ཝི. ཝ. ༡༠༤༧; ཀཐཱ. ༧༩༩), ཏསྨཱ སདིསོཔི ཀོཙི ནཏྠི. ཧཱིནོཔི ཨཔསྶཡབྷཱུཏོ ནཏྠེཝ. ཏེན ཝུཏྟཾ – ‘‘ཝིསིཊྛསམཱཙཱརཱཔསྶཡཝིརཧིཏོ ཨེཀཔུགྒལོ’’ཏི. ཡེ ¶ ཙ སཱིལཱདིགུཎེཧི ནཏྠི ཨེཏེསཾ སམཱཏི ཨསམཱ, པུརིམཀཱ སམྨཱསམྦུདྡྷཱ. ཏེཧི སམོ མཛ྄ཛྷེ བྷིནྣསུཝཎྞནེཀྑཾ ཝིཡ ནིབྦིསིཊྛོཏི ཨསམསམཊྛེནཔི ཨེཀཔུགྒལོ ཨཉྙསྶ ཏཱདིསསྶ ཨབྷཱཝཱ. ཏེན ཝུཏྟཾ – ‘‘ཨསདིསཊྛེནཱ’’ཏིཨཱདི.

སཏྟལོཀོ ཨདྷིཔྤེཏོ སཏྟནིཀཱཡེ ཨུཔྤཛྫནཏོ. མནུསྶལོཀེ ཨེཝ ཨུཔྤཛྫཏི དེཝབྲཧྨལོཀཱནཾ བུདྡྷཱནཾ ཨུཔྤཏྟིཡཱ ཨནོཀཱསབྷཱཝཏོ. ཀཱམདེཝལོཀེ ཏཱཝ ནུཔྤཛྫཏི བྲཧྨཙརིཡཝཱསསྶ ཨཊྛཱནབྷཱཝཏོ ཏཐཱ ཨནཙྪརིཡབྷཱཝཏོ. ཨཙྪརིཡདྷམྨཱ ཧི བུདྡྷཱ བྷགཝནྟོ. ཏེསཾ སཱ ཨཙྪརིཡདྷམྨཏཱ དེཝཏྟབྷཱཝེ ཋིཏཱནཾ ལོཀེ ན པཱཀཊཱ ཧོཏི ཡཐཱ མནུསྶབྷཱུཏཱནཾ. དེཝབྷཱུཏེ ཧི སམྨཱསམྦུདྡྷེ དིསྶམཱནཾ བུདྡྷཱནུབྷཱཝཾ དེཝཱནུབྷཱཝཏོཝ ལོཀེ དཧཏི, ན བུདྡྷཱནུབྷཱཝཏོ. ཏཐཱ སཏི ‘‘ཨཡཾ སམྨཱསམྦུདྡྷོ’’ཏི ནཱདྷིམུཙྩཏི ན སམྤསཱིདཏི, ཨིསྶརཀུཏྟགྒཱཧཾ ན ཝིསྶཛྫེཏི, དེཝཏྟབྷཱཝསྶ ཙ ཙིརཀཱལཱཝཊྛཱནཏོ ཨེཀཙྩསསྶཏཝཱདཏོ ན པརིམུཙྩཏི. བྲཧྨལོཀེ ནུཔྤཛྫཏཱིཏི ཨེཏྠཱཔི ཨེསེཝ ནཡོ. སཏྟཱནཾ ཏཱདིསགྒཱཧཝིནིམོཙནཏྠཉྷི བུདྡྷཱ བྷགཝནྟོ མནུསྶསུགཏིཡཾཡེཝ ཨུཔྤཛྫནྟི, ན དེཝསུགཏིཡཾ. ཡསྨཱ ཨིམཾ ཙཀྐཝཱལ༹ཾ མཛ྄ཛྷེ ཀཏྭཱ ཨིམིནཱ སདྡྷིཾ ཙཀྐཝཱལཱ༹ནཾ དསསཧསྶསྶེཝ ཛཱཏིཀྑེཏྟབྷཱཝོ དཱིཔིཏོ ཨིཏོ ཨཉྙསྶ བུདྡྷཱནཾ ཨུཔྤཏྟིཊྛཱནསྶ ཏེཔིཊཀེ བུདྡྷཝཙནེ ཨཱགཏཊྛཱནསྶ ཨབྷཱཝཏོ. ཏསྨཱ ཝུཏྟཾ – ‘‘ཨིམསྨིཾཡེཝ ཙཀྐཝཱལེ༹ ཨུཔྤཛྫཏཱི’’ཏི.

ཨིདྷ ཨུཔྤཛྫནྟོཔི ཀསྨཱ ཛམྦུདཱིཔེ ཨེཝ ཨུཔྤཛྫཏི, ན སེསདཱིཔེསཱུཏི? ཀེཙི ཏཱཝ ཨཱཧུ – ‘‘ཡསྨཱ པཐཝིཡཱ ནཱབྷིབྷཱུཏཱ བུདྡྷབྷཱཝསཧཱ ཨཙལཊྛཱནབྷཱུཏཱ བོདྷིམཎྜབྷཱུམི ཛམྦུདཱིཔེ ཨེཝ ¶ , ཏསྨཱ ཛམྦུདཱིཔེ ཨེཝ ཨུཔྤཛྫཏཱི’’ཏི. ཨེཏེནེཝ ‘‘ཏཏྠ མཛ྄ཛྷིམདེསེ ཨེཝ ཨུཔྤཛྫཏཱི’’ཏི ཨེཏམྤི སཾཝཎྞིཏནྟི དཊྛབྦཾ ཏཐཱ ཨིཏརེསམྤི ཨཝིཛཧིཏཊྛཱནཱནཾ ཏཏྠེཝ ལབྦྷནཏོ. ཡསྨཱ པུརིམབུདྡྷཱནཾ མཧཱབོདྷིསཏྟཱནཾ པཙྩེཀབུདྡྷཱནཉྩ ནིབྦཏྟིཡཱ སཱཝཀབོདྷིསཏྟཱནཾ སཱཝཀབོདྷིཡཱ ཨབྷིནཱིཧཱརོ སཱཝཀཔཱརམིཡཱ སམྦྷརཎཔརིཔཱཙནཉྩ བུདྡྷཀྑེཏྟབྷཱུཏེ ཨིམསྨིཾཡེཝ ཙཀྐཝཱལེ༹ ཛམྦུདཱིཔེ ཨེཝ ཨིཛ྄ཛྷཏི, ན ཨཉྙཏྠ. ཝེནེཡྻཛནཝིནཡནཏྠོ ཙ བུདྡྷུཔྤཱདོ, ཏསྨཱ ཨགྒསཱཝཀམཧཱསཱཝཀཱདིཝེནེཡྻཝིསེསཱཔེཀྑཱཡ ཨིམསྨིཾ ཛམྦུདཱིཔེ ཨེཝ བུདྡྷཱ ནིབྦཏྟནྟི, ན སེསདཱིཔེསུ. ཨཡཉྩ ནཡོ སབྦབུདྡྷཱནཾ ཨཱཙིཎྞསམཱཙིཎྞོཏི ཏེསཾ ཨུཏྟམཔུརིསཱནཾ ¶ ཏཏྠེཝ ཨུཔྤཏྟི སམྤཏྟིཙཀྐཱནཾ ཝིཡ ཨཉྙམཉྙཱུཔནིསྶཡཏཱཡ དཊྛབྦཱ. ཏེན ཝུཏྟཾ – ཨཊྛཀཐཱཡཾ ‘‘ཏཱིསུ དཱིཔེསུ བུདྡྷཱ ན ནིབྦཏྟནྟི, ཛམྦུདཱིཔེ ཨེཝ ནིབྦཏྟནྟཱིཏི དཱིཔཾ པསྶཱི’’ཏི (དཱི. ནི. ཨཊྛ. ༢.༡༧; བུ. ཝཾ. ཨཊྛ. ༢༧ ཨཝིདཱུརེནིདཱནཀཐཱ).

ཨུབྷཡམྤིདཾ ཝིཔྤཀཏཝཙནམེཝ ཨུཔྤཱདཀིརིཡཱཡ ཝཏྟམཱནཀཱལིཀཏྟཱ. ཨུཔྤཛྫམཱནོཏི ཝཱ ཨུཔྤཛྫིཏུཾ སམཏྠོ. སཏྟིཨཏྠོ ཙཱཡཾ མཱན-སདྡོ. ཡཱཝཏཱ ཧི སཱམཏྠིཡེན མཧཱབོདྷིསཏྟཱནཾ ཙརིམབྷཝེ ཨུཔྤཏྟི ཨིཙྪིཏབྦཱ, ཏཏྠཀེན བོདྷིསམྦྷཱརསམྦྷཱུཏེན པརིཔུཎྞེན སམནྣཱགཏོཏི ཨཏྠོ. བྷེདོཏི ཝིསེསོ. ཏམེཝ ཧི ཏིཝིདྷཾ ཝིསེསཾ དསྶེཏུཾ – ‘‘ཨེས ཧཱི’’ཏིཨཱདི ཝུཏྟཾ. ཨཊྛངྒསམནྣཱགཏསྶ མཧཱབྷིནཱིཧཱརསྶ སིདྡྷཀཱལཏོ པཊྛཱཡ མཧཱབོདྷིསཏྟོ བུདྡྷབྷཱཝཱཡ ནིཡཏབྷཱཝཔྤཏྟཏཱཡ བོདྷིསམྦྷཱརཔཊིཔདཾ པཊིཔཛྫམཱནོ ཡཐཱཝུཏྟསཱམཏྠིཡཡོགེན ཨུཔྤཛྫམཱནོ ནཱམཱཏི ཨཏྠོ ཨུཔྤཱདསྶ ཨེཀནྟིཀཏྟཱ. པརིཡེསནྟོཏི ཝིཙིནནྟོ. པརིཔཀྐགཏེ ཉཱཎེཏི ཨིམིནཱ ཏཏོ པུབྦེ ཉཱཎསྶ ཨཔརིཔཀྐཏཱཡ ཨེཝ ལདྡྷཱཝསརཱཡ ཀམྨཔིལོཏིཡཱ ཝསེན བོདྷིསཏྟོ ཏཐཱ མཧཱཔདྷཱནཾ པདཧཱིཏི དསྶེཏི. ཨརཧཏྟཕལཀྑཎེ ཨུཔྤནྣོ ནཱམ ‘‘ཨུཔྤནྣོ ཧོཏཱི’’ཏི ཝཏྟབྦཏྟཱ. ཨཱགཏོཝ ནཱམ ཧེཏུསམྤདཱཡ སམྨདེཝ ནིཔྥནྣཏྟཱ.

ཧིཏཏྠཱཡཱཏི ལོཀིཡལོཀུཏྟརསྶ ཧིཏསྶ སིདྡྷིཡཱ. སུཁཏྠཱཡཱཏི ཨེཏྠཱཔི ཨེསེཝ ནཡོ. ཏསྶཱཏི ཏསྶ སཏྟལོཀསྶ. སོ པནཱཡཾ སཏྟལོཀོ ཡེན ཨནུཀྐམེན དྷམྨཱབྷིསམཡཾ པཱཔུཎི, ཏཾ ཏེནེཝ ཨནུཀྐམེན དསྶེནྟོ ‘‘མཧཱབོདྷིམཎྜེ’’ཏིཨཱདིམཱཧ. ཡཱཝཛྫདིཝསཱཏི ཨེཏྠ ཨཛྫ-སདྡེན སཱསནསྶ ཨཝཊྛཱནཀཱལཾ ཝདཏི. དེཝམནུསྶཱནནྟི ཨུཀྐཊྛནིདྡེསོཏི དསྶེཏུཾ – ‘‘ན ཀེཝལ’’ནྟིཨཱདི ཝུཏྟཾ. ཨེཏེསམྤཱིཏི ནཱགསུཔཎྞཱདཱིནམྤི.

ཨཡཾ པུཙྪཱཏི ཨིམིནཱ ‘‘ཀཏམོ’’ཏི པདསྶ སཱམཉྙཏོ པུཙྪཱབྷཱཝོ དསྶིཏོ, ན ཝིསེསཏོཏི ཏསྶ པུཙྪཱཝིསེསབྷཱཝཉཱཔནཏྠཾ མཧཱནིདྡེསེ (མཧཱནི. ༡༥༠) ཨཱགཏཱ སབྦཱཔི པུཙྪཱ ¶ ཨཏྠུདྡྷཱརནཡེན དསྶེཏི ‘‘པུཙྪཱ ཙ ནཱམེསཱ’’ཏིཨཱདིནཱ. ཨདིཊྛཾ ཛོཏཱིཡཏི ཨེཏཱཡཱཏི ཨདིཊྛཛོཏནཱ. དིཊྛཾ སཾསནྡཱིཡཏི ཨེཏཱཡཱཏི དིཊྛསཾསནྡནཱ. སཾསནྡནཉྩ སཱཀཙྪཱཝསེན ¶ ཝིནིཙྪཡཀརཎཾ. ཝིམཏིཾ ཚིནྡཏི ཨེཏཱཡཱཏི ཝིམཏིཙྪེདནཱ. ཨནུམཏིཡཱ པུཙྪཱ ཨནུམཏིཔུཙྪཱ. ‘‘ཏཾ ཀིཾ མཉྙཐ, བྷིཀྑཝེ’’ཏིཨཱདི པུཙྪཱཡ ‘‘ཀཱ ཏུམྷཱཀཾ ཨནུམཏཱི’’ཏི ཨནུམཏི པུཙྪིཏཱ ཧོཏི. ཀཐེཏུཀམྱཏཱཔུཙྪཱཏི ཀཐེཏུཀམྱཏཱཡ པུཙྪཱ. ལཀྑཎནྟི ཉཱཏུཾ ཨིཙྪིཏོ ཡོ ཀོཙི སབྷཱཝོ. ཨཉྙཱཏནྟི ཡེན ཀེནཙི ཉཱཎེན ཨཉྙཱཏབྷཱཝམཱཧ. ཨདིཊྛནྟི དསྶནབྷཱུཏེན ཉཱཎེན པཙྩཀྑཾ ཝིཡ ཨདིཊྛཏཾ. ཨཏུལིཏནྟི ‘‘ཨེཏྟཀཾ ཨེཏ’’ནྟི ཏུལཱབྷཱུཏེན ཨཏུལིཏཏཾ. ཨཏཱིརིཏནྟི ཏཱིརཎབྷཱུཏེན ཨཀཏཉཱཎཀིརིཡཱསམཱཔནཏཾ. ཨཝིབྷཱུཏནྟི ཉཱཎསྶ ཨཔཱཀཊབྷཱཝཾ. ཨཝིབྷཱཝིཏནྟི ཉཱཎེན ཨཔཱཀཊཀཏབྷཱཝཾ.

ཡེཧི གུཎཝིསེསེཧི ནིམིཏྟབྷཱུཏེཧི བྷགཝཏི ‘‘ཏཐཱགཏོ’’ཏི ཨཡཾ སམཉྙཱ པཝཏྟཱ, ཏཾདསྶནཏྠཾ ‘‘ཨཊྛཧི ཀཱརཎེཧི བྷགཝཱ ཏཐཱགཏོ’’ཏིཨཱདི ཝུཏྟཾ. གུཎཝིསེསནེམིཏྟིཀཱནེཝ ཧི བྷགཝཏོ སབྦཱནི ནཱམཱནི. ཡཐཱཧ –

‘‘ཨསངྑྱེཡྻཱནི ནཱམཱནི, སགུཎེན མཧེསིནོ;

གུཎེན ནཱམམུདྡྷེཡྻཾ, ཨཔི ནཱམསཧསྶཏོ’’ཏི. (དྷ. ས. ཨཊྛ. ༡༣༡༣; ཨུདཱ. ཨཊྛ. ༥༣; པཊི. མ. ཨཊྛ. ༡.༡.༧༦);

ཏཐཱ ཨཱགཏོཏི ཨེཏྠ ཨཱཀཱརནིཡམནཝསེན ཨོཔམྨསམྤཊིཔཱདནཏྠོ ཏཐཱ-སདྡོ. སཱམཉྙཛོཏནཱཔི ཧི ཝིསེསེ ཨཝཏིཊྛཏཱིཏི. པཊིཔདཱགམནཏྠོ ཨཱགཏ-སདྡོ, ན ཉཱཎགམནཏྠོ ‘‘ཏཐལཀྑཎཾ ཨཱགཏོ’’ཏིཨཱདཱིསུ (དཱི. ནི. ཨཊྛ. ༡.༧; མ. ནི. ཨཊྛ. ༡.༡༢; སཾ. ནི. ཨཊྛ. ༢.༣.༧༨; ཨ. ནི. ཨཊྛ. ༡.༡.༡༧༠; ཨུདཱ. ཨཊྛ. ༡༨) ཝིཡ, ནཱཔི ཀཱཡགམནཏྠོ ‘‘ཨཱགཏོ ཁོ མཧཱསམཎོ, མགདྷཱནཾ གིརིབྦཛ’’ནྟིཨཱདཱིསུ (མཧཱཝ. ༦༣) ཝིཡ. ཏཏྠ ཡདཱཀཱརནིཡམནཝསེན ཨོཔམྨསམྤཊིཔཱདནཏྠོ ཏཐཱ-སདྡོ, ཏཾཀརུཎཱཔདྷཱནཏྟཱ མཧཱཀརུཎཱམུཁེན པུརིམབུདྡྷཱནཾ ཨཱགམནཔྤཊིཔདཾ ཨུདཱཧརཎཝསེན སཱམཉྙཏོ དསྶེནྟོ ཡཾ-ཏཾ-སདྡཱནཾ ཨེཀནྟསམྦནྡྷབྷཱཝཏོ ‘‘ཡཐཱ སབྦལོཀ…པེ… ཨཱགཏཱ’’ཏི སཱདྷཱརཎཏོ ཝཏྭཱ པུན ཏཾ པཊིཔདཾ མཧཱཔདྷཱནསུཏྟཱདཱིསུ (དཱི. ནི. ༢.༡ ཨཱདཡོ) སམྦཧུལནིདྡེསེན སུཔཱཀཊཱནཾ ཨཱསནྣཱནཉྩ ཝིཔསྶིཨཱདཱིནཾ ཚནྣཾ སམྨཱསམྦུདྡྷཱནཾ ཝསེན ནིདསྶེནྟོ ‘‘ཡཐཱ ཝིཔསྶཱི བྷགཝཱ’’ཏིཨཱདིམཱཧ. ཏཏྠ ཡེན ཨབྷིནཱིཧཱརེནཱཏི མནུསྶཏྟལིངྒསམྤཏྟིཧེཏུསཏྠུདསྶནཔབྦཛྫཱཨབྷིཉྙཱདིགུཎསམྤཏྟིཨདྷིཀཱརཙྪནྡཱནཾ ཝསེན ཨཊྛངྒསམནྣཱགཏེན ¶ མཧཱཔཎིདྷཱནེན. སབྦེསཉྷི ¶ བུདྡྷཱནཾ ཀཱཡཔྤཎིདྷཱནཾ ཨིམིནཱཝ ཨབྷིནཱིཧཱརེན སམིཛ྄ཛྷཏཱིཏི. ཨེཝཾ མཧཱབྷིནཱིཧཱརཝིསེསེན ‘‘ཏཐཱགཏོ’’ཏི པདསྶ ཨཏྠཾ དསྶེཏྭཱ ཨིདཱནི པཱརམིཔཱུརཎཝསེན དསྶེཏུཾ – ‘‘ཡཐཱ ཝིཔསྶཱི བྷགཝཱ…པེ… ཀསྶཔོ བྷགཝཱ དཱནཔཱརམིཾ པཱུརེཏྭཱ’’ཏིཨཱདིམཱཧ.

ཨེཏྠ ཙ སུཏྟནྟིཀཱནཾ མཧཱབོདྷིཔྤཊིཔདཱཡ ཀོསལླཛནནཏྠཾ ཀཱ པནེཏཱ པཱརམིཡོ, ཀེནཊྛེན པཱརམིཡོ, ཀཏིཝིདྷཱ ཙེཏཱ, ཀོ ཏཱསཾ ཀམོ, ཀཱནི ལཀྑཎརསཔཙྩུཔཊྛཱནཔདཊྛཱནཱནི, ཀོ པཙྩཡོ, ཀོ སཾཀིལེསོ, ཀིཾ ཝོདཱནཾ, ཀོ པཊིཔཀྑོ, ཀཱ པཊིཔཏྟི, ཀོ ཝིབྷཱགོ, ཀོ སངྒཧོ, ཀོ སམྤཱདནཱུཔཱཡོ, ཀིཏྟཀེན ཀཱལེན སམྤཱདནཾ, ཀོ ཨཱནིསཾསོ, ཀིཉྩེཏཱསཾ ཕལནྟི པཱརམཱིསུ ཨཡཾ ཝིཏྠཱརཀཐཱ ཝེདིཏབྦཱ. སཱ པནེསཱ ཨིཙྪནྟེན དཱིགྷཱགམཊཱིཀཱཡཾ (དཱི. ནི. ཊཱི. ༡.༧) ཝུཏྟནཡེནེཝ ཝེདིཏབྦཱ, ན ཨིདྷ དསྶིཏཱ. ཡཐཱཝུཏྟཱཡ པཊིཔདཱཡ ཡཐཱཝུཏྟཝིབྷཱགཱནཾ པཱརམཱིནཾ པཱུརིཏབྷཱཝཾ སནྡྷཱཡཱཧ – ‘‘སམཏིཾས པཱརམིཡོ པཱུརེཏྭཱ’’ཏི.

སཏིཔི མཧཱཔརིཙྩཱགཱནཾ དཱནཔཱརམིབྷཱཝེ པརིཙྩཱགཝིསེསབྷཱཝདསྶནཏྠཉྩེཝ སུདུཀྐརབྷཱཝདསྶནཏྠཉྩ མཧཱཔརིཙྩཱགེཧི ཝིསུཾ གཧཎཾ. ཏཏོཡེཝ ཙ ཨངྒཔརིཙྩཱགཏོ ཝིསུཾ ནཡནཔརིཙྩཱགགྒཧཎཾ, པརིཙྩཱགབྷཱཝསཱམཉྙེཔི དྷནརཛྫཔརིཙྩཱགཏོ པུཏྟདཱརཔརིཙྩཱགགྒཧཎཉྩ ཀཏཾ. གཏཔཙྩཱགཏིཀཝཏྟསངྑཱཏཱཡ པུབྦབྷཱགཔྤཊིཔདཱཡ སདྡྷིཾ ཨབྷིཉྙཱསམཱཔཏྟིནིཔྥཱདནཾ པུབྦཡོགོ. དཱནཱདཱིསུཡེཝ སཱཏིསཡཔྤཊིཔཏྟིནིཔྥཱདནཾ པུབྦཙརིཡཱ, ཡཱ ཝཱ ཙརིཡཱཔིཊཀསངྒཧིཏཱ. ‘‘ཨབྷིནཱིཧཱརོ པུབྦཡོགོ, དཱནཱདིཔྤཊིཔཏྟི ཝཱ ཀཱཡཝིཝེཀཝསེན ཨེཀཙརིཡཱ ཝཱ པུབྦཙརིཡཱ’’ཏི ཀེཙི. དཱནཱདཱིནཉྩེཝ ཨཔྤིཙྪཏཱདཱིནཉྩ སཾསཱརནིབྦཱནེསུ ཨཱདཱིནཝཱནིསཾསཱནཉྩ ཝིབྷཱཝནཝསེན སཏྟཱནཾ བོདྷིཏྟཡེ པཏིཊྛཱཔནཔརིཔཱཙནཝསེན ཙ པཝཏྟཱ ཀཐཱ དྷམྨཀྑཱནཾ. ཉཱཏཱིནཾ ཨཏྠཙརིཡཱ ཉཱཏཏྠཙརིཡཱ. སཱཔི ཀརུཎཱཡནཝསེནེཝ. ཨཱདི-སདྡེན ལོཀཏྠཙརིཡཱདཡོ སངྒཎྷཱཏི. ཀམྨསྶཀཏཉཱཎཝསེན ཨནཝཛྫཀམྨཱཡཏནསིཔྤཱཡཏནཝིཛྫཱཊྛཱནཔརིཙཡཝསེན ཁནྡྷཱཡཏནཱདིཔརིཙཡཝསེན ལཀྑཎཏྟཡཏཱིརཎཝསེན ཙ ཉཱཎཙཱརོ བུདྡྷིཙརིཡཱ. སཱ པན ཨཏྠཏོ པཉྙཱཔཱརམཱིཡེཝ, ཉཱཎསམྦྷཱརདསྶནཏྠཾ ཝིསུཾ ¶ གཧཎཾ. ཀོཊཱིཏི པརིཡནྟོ, ཨུཀྐཾསོཏི ཨཏྠོ. ཙཏྟཱརོ སཏིཔཊྛཱནེ བྷཱཝེཏྭཱཏི སམྦནྡྷོ. ཏཏྠ བྷཱཝེཏྭཱཏི ཨུཔྤཱདེཏྭཱ. བྲཱུཧེཏྭཱཏི ཝཌྜྷེཏྭཱ. སཏིཔཊྛཱནཱདིགྒཧཎེན ཨཱགམནཔྤཊིཔདཾ མཏྠཀཾ པཱཔེཏྭཱ དསྶེཏི. ཝིཔསྶནཱསཧགཏཱ ཨེཝ ཝཱ སཏིཔཊྛཱནཱདཡོ དཊྛབྦཱ. ཨེཏྠ ཙ ‘‘ཡེན ཨབྷིནཱིཧཱརེནཱ’’ཏིཨཱདིནཱ ཨཱགམནཔྤཊིཔདཱཡ ཨཱདིཾ དསྶེཏི, ‘‘དཱནཔཱརམི’’ནྟིཨཱདིནཱ མཛ྄ཛྷཾ, ‘‘ཙཏྟཱརོ སཏིཔཊྛཱནེ’’ཏིཨཱདིནཱ པརིཡོསཱནནྟི ཝེདིཏབྦཾ.

སམྤཏིཛཱཏོཏི ¶ མུཧུཏྟཛཱཏོ ནིཀྑནྟམཏྟོ. ནིཀྑནྟམཏྟཉྷི མཧཱསཏྟཾ པཋམཾ བྲཧྨཱནོ སུཝཎྞཛཱལེན པཊིགྒཎྷིཾསུ, ཏེསཾ ཧཏྠཏོ ཙཏྟཱརོ མཧཱརཱཛཱནོ ཨཛིནཔྤཝེཎིཡཱ, ཏེསཾ ཧཏྠཏོ མནུསྶཱ དུཀཱུལཙུམྦཊཀེན པཊིགྒཎྷིཾསུ, མནུསྶཱནཾ ཧཏྠཏོ མུཙྩིཏྭཱ པཐཝིཡཾ པཏིཊྛིཏོ. ཡཐཱཧཱཏིཨཱདིནཱ མཧཱཔདཱནདེསནཱཡ ཝུཏྟཝཙནཾ ནིདསྶེཏི. སེཏམྷི ཚཏྟེཏི དིབྦསེཏཙྪཏྟེ. ཨནུདྷཱརིཡམཱནེཏི དྷཱརིཡམཱནེ. ཨེཏྠ ཙ ཚཏྟགྒཧཎེནེཝ ཁགྒཱདཱིནི པཉྩ ཀཀུདྷབྷཎྜཱནི ཝུཏྟཱནེཝཱཏི དཊྛབྦཾ. ཁགྒཏཱལཝཎྚམོརཧཏྠཀཝཱལབཱིཛནིཨུཎྷཱིསཔཊྚཱཔི ཧི ཚཏྟེན སཧ ཏདཱ ཨུཔཊྛིཏཱ ཨཧེསུཾ. ཚཏྟཱདཱིནིཡེཝ ཙ ཏདཱ པཉྙཱཡིཾསུ, ན ཚཏྟཱདིགྒཱཧཀཱ. སབྦཱ ཙ དིསཱཏི དས དིསཱ, ནཡིདཾ སབྦདིསཱཝིལོཀནཾ སཏྟཔདཝཱིཏིཧཱརུཏྟརཀཱལཾ. མཧཱསཏྟོ ཧི མནུསྶཱནཾ ཧཏྠཏོ མུཙྩིཏྭཱ པུརཏྠིམཾ དིསཾ ཨོལོཀེསི, ཏཏྠ དེཝམནུསྶཱ གནྡྷམཱལཱདཱིཧི པཱུཛཡམཱནཱ, ‘‘མཧཱཔུརིས, ཨིདྷ ཏུམྷེཧི སདིསོཔི ནཏྠི, ཀུཏོ ཨུཏྟརིཏརོ’’ཏི ཨཱཧཾསུ. ཨེཝཾ ཙཏསྶོ དིསཱ ཙཏསྶོ ཨནུདིསཱ ཧེཊྛཱ ཨུཔརཱིཏི སབྦཱ དིསཱ ཨནུཝིལོཀེཏྭཱ སབྦཏྠ ཨཏྟནཱ སདིསཾ ཨདིསྭཱ ‘‘ཨཡཾ ཨུཏྟརཱ དིསཱ’’ཏི སཏྟཔདཝཱིཏིཧཱརེན ཨགམཱསི. ཨཱསབྷིནྟི ཨུཏྟམཾ. ཨགྒོཏི སབྦཔཋམོ. ཛེཊྛོཏི སེཊྛོཏི ཙ ཏསྶེཝ ཝེཝཙནཾ. ཨཡམནྟིམཱ ཛཱཏི, ནཏྠི དཱནི པུནབྦྷཝོཏི ཨིམསྨིཾ ཨཏྟབྷཱཝེ པཏྟབྦཾ ཨརཧཏྟཾ བྱཱཀཱསི. ‘‘ཨནེཀེསཾ ཝིསེསཱདྷིགམཱནཾ པུབྦནིམིཏྟབྷཱཝེནཱ’’ཏི སཾཁིཏྟེན ཝུཏྟམཏྠཾ ‘‘ཡཉྷཱི’’ཏིཨཱདིནཱ ཝིཏྠཱརཏོ དསྶེཏི. ཏཏྠ ཨེཏྠཱཏི –

‘‘ཨནེཀསཱཁཉྩ ¶ སཧསྶམཎྜལཾ,

ཚཏྟཾ མརཱུ དྷཱརཡུམནྟལིཀྑེ;

སུཝཎྞདཎྜཱ ཝཱིཏིཔཏནྟི ཙཱམརཱ,

ན དིསྶརེ ཙཱམརཚཏྟགཱཧཀཱ’’ཏི. (སུ. ནི. ༦༩༣) –

ཨིམིསྶཱ གཱཐཱཡ. སབྦཉྙུཏཉྙཱཎམེཝ སབྦཏྠ ཨཔྤཊིཧཏཙཱརཏཱཡ ཨནཱཝརཎཉཱཎནྟི ཨཱཧ – ‘‘སབྦཉྙུཏཱནཱཝརཎཉཱཎཔཊིལཱབྷསྶཱ’’ཏི. ཏཐཱ ཨཡཾ བྷགཝཱཔི གཏོ…པེ… པུབྦནིམིཏྟབྷཱཝེནཱཏི ཨེཏེན ཨབྷིཛཱཏིཡཾ དྷམྨཏཱཝསེན ཨུཔྤཛྫནཀཝིསེསཱ སབྦབོདྷིསཏྟཱནཾ སཱདྷཱརཎཱཏི དསྶེཏི. པཱརམིཏཱནིསྶནྡཱ ཧི ཏེཏི.

ཝིཀྐམཱིཏི ཨགམཱསི. མརཱུཏི དེཝཱ. སམཱཏི ཝིལོཀནསམཏཱཡ སམཱ སདིསིཡོ. མཧཱཔུརིསོ ཧི ཡཐཱ ཨེཀཾ དིསཾ ཝིལོཀེསི, ཨེཝཾ སེསདིསཱཔི, ན ཀཏྠཙི ཝིལོཀནེ ཝིབནྡྷོ ཏསྶ ¶ ཨཧོསཱིཏི. སམཱཏི ཝཱ ཝིལོཀེཏུཾ ཡུཏྟཱཏི ཨཏྠོ. ན ཧི ཏདཱ བོདྷིསཏྟསྶ ཝིརཱུཔབཱིབྷཙྪཝིསམརཱུཔཱནི ཝིལོཀེཏུཾ ཨཡུཏྟཱནི དིསཱསུ ཨུཔཊྛཧནྟཱིཏི.

‘‘ཨེཝཾ ཏཐཱ གཏོ’’ཏི ཀཱཡགམནཊྛེན གཏསདྡེན ཏཐཱགཏསདྡཾ ནིདྡིསིཏྭཱ ཨིདཱནི ཉཱཎགམནཊྛེན ཏཾ དསྶེཏུཾ – ‘‘ཨཐ ཝཱ’’ཏིཨཱདིམཱཧ. ཏཏྠ ནེཀྑམྨེནཱཏི ཨལོབྷཔྤདྷཱནེན ཀུསལཙིཏྟུཔྤཱདེན. ཀུསལཱ ཧི དྷམྨཱ ཨིདྷ ནེཀྑམྨཾ, ན པབྦཛྫཱདཡོ. ‘‘པཋམཛ྄ཛྷཱནེནཱ’’ཏི ཙ ཝདནྟི. པཧཱཡཱཏི པཛཧིཏྭཱ. གཏོ ཨདྷིགཏོ, པཊིཔནྣོ ཨུཏྟརིཝིསེསནྟི ཨཏྠོ. པཧཱཡཱཏི ཝཱ པཧཱནཧེཏུ, པཧཱནལཀྑཎཾ ཝཱ. ཧེཏུལཀྑཎཏྠོ ཧི ཨཡཾ པཧཱཡསདྡོ. ཀཱམཙྪནྡཱདིཔྤཧཱནཧེཏུཀཉྷི ‘‘གཏོ’’ཏི ཨེཏྠ ཝུཏྟཾ གམནཾ ཨཝབོདྷོ, པཊིཔཏྟི ཨེཝ ཝཱ ཀཱམཙྪནྡཱདིཔྤཧཱནེན ཙ ལཀྑཱིཡཏི. ཨེས ནཡོ པདཱལེཏྭཱཏིཨཱདཱིསུཔི. ཨབྱཱཔཱདེནཱཏི མེཏྟཱཡ. ཨཱལོཀསཉྙཱཡཱཏི ཝིབྷཱུཏཾ ཀཏྭཱ མནསིཀརཎེན ཨུཔཊྛིཏཨཱལོཀསཉྫཱནནེན. ཨཝིཀྑེཔེནཱཏི སམཱདྷིནཱ. དྷམྨཝཝཏྠཱནེནཱཏི ཀུསལཱདིདྷམྨཱནཾ ཡཱཐཱཝནིཙྪཡེན. ‘‘སཔྤཙྩཡནཱམརཱུཔཝཝཏྠཱནེནཱ’’ཏིཔི ཝདནྟི. ཨེཝཾ ཀཱམཙྪནྡཱདིནཱིཝརཎཔྤཧཱནེན ‘‘ཨབྷིཛ྄ཛྷཾ ལོཀེ པཧཱཡཱ’’ཏིཨཱདིནཱ (ཝིབྷ. ༥༠༨) ཝུཏྟཱཡ པཋམཛ྄ཛྷཱནསྶ པུབྦབྷཱགཔྤཊིཔདཱཡ བྷགཝཏོ ཏཐཱགཏབྷཱཝཾ དསྶེཏྭཱ ཨིདཱནི སཧ ཨུཔཱཡེན ཨཊྛཧི ¶ སམཱཔཏྟཱིཧི ཨཊྛཱརསཧི ཙ མཧཱཝིཔསྶནཱཧི ཏཾ དསྶེཏུཾ – ‘‘ཉཱཎེནཱ’’ཏིཨཱདིམཱཧ. ནཱམརཱུཔཔརིགྒཧཀངྑཱཝིཏརཎཱནཉྷི ཝིབནྡྷབྷཱུཏསྶ མོཧསྶ དཱུརཱིཀརཎེན ཉཱཏཔརིཉྙཱཡཾ ཋིཏསྶ ཨནིཙྩསཉྙཱདཡོ སིཛ྄ཛྷནྟི, ཏཐཱ ཛྷཱནསམཱཔཏྟཱིསུ ཨབྷིརཏིནིམིཏྟེན པཱམོཛྫེན ཏཏྠ ཨནབྷིརཏིཡཱ ཝིནོདིཏཱཡ ཛྷཱནཱདཱིནཾ སམདྷིགམོཏི སམཱཔཏྟིཝིཔསྶནཱནཾ ཨརཏིཝིནོདནཨཝིཛྫཱཔདཱལནཱདིཨུཔཱཡོ, ཨུཔྤཊིཔཱཊིནིདྡེསོ པན ནཱིཝརཎསབྷཱཝཱཡ ཨཝིཛྫཱཡ ཧེཊྛཱ ནཱིཝརཎེསུཔི སངྒཧདསྶནཏྠནྟི དཊྛབྦོ. སམཱཔཏྟིཝིཧཱརཔྤཝེསཝིབནྡྷནེན ནཱིཝརཎཱནི ཀཝཱཊསདིསཱནཱིཏི ཨཱཧ – ‘‘ནཱིཝརཎཀཝཱཊཾ ཨུགྒྷཱཊེཏྭཱ’’ཏི.

‘‘རཏྟིཾ ཝིཏཀྐེཏྭཱ ཝིཙཱརེཏྭཱ དིཝཱ ཀམྨནྟེ པཡོཛེཏཱི’’ཏི (མ. ནི. ༡.༢༥༡) ཝུཏྟཊྛཱནེ ཝིཏཀྐཝིཙཱརཱ དྷཱུམཱཡནཱ ཨདྷིཔྤེཏཱཏི ཨཱཧ – ‘‘ཝིཏཀྐཝིཙཱརདྷཱུམ’’ནྟི. ཀིཉྩཱཔི པཋམཛ྄ཛྷཱནཱུཔཙཱརེཡེཝ དུཀྑཾ, ཙཏུཏྠཛ྄ཛྷཱནོཔཙཱརེཡེཝ ཙ སུཁཾ པཧཱིཡཏི, ཨཏིསཡཔྤཧཱནཾ པན སནྡྷཱཡཱཧ – ‘‘ཙཏུཏྠཛ྄ཛྷཱནེན སུཁདུཀྑཾ པཧཱཡཱ’’ཏི. རཱུཔསཉྙཱཏི སཉྙཱསཱིསེན རཱུཔཱཝཙརཛ྄ཛྷཱནཱནི ཙེཝ ཏདཱརམྨཎཱནི ཙ ཝུཏྟཱནི. རཱུཔཱཝཙརཛ྄ཛྷཱནམྤི ཧི ‘‘རཱུཔ’’ནྟི ཝུཙྩཏི ཨུཏྟརཔདལོཔེན ‘‘རཱུཔཱི རཱུཔཱནི པསྶཏཱི’’ཏིཨཱདཱིསུ (མ. ནི. ༢.༢༤༨; ༣.༣༡༢; དྷ. ས. ༢༤༨; པཊི. མ. ༡.༢༠༩). ཏསྶ ཨཱརམྨཎམྤི ཀསིཎརཱུཔཾ ‘‘རཱུཔ’’ནྟི ཝུཙྩཏི ¶ པུརིམཔདལོཔེན ‘‘བཧིདྡྷཱ རཱུཔཱནི པསྶཏི སུཝཎྞདུབྦཎྞཱནཱི’’ཏིཨཱདཱིསུ (དཱི. ནི. ༢.༡༧༣-༡༧༤; མ. ནི. ༢.༢༤༩; དྷ. ས. ༢༤༤-༢༤༥). ཏསྨཱ ཨིདྷ རཱུཔེ རཱུཔཛ྄ཛྷཱནེ ཏཾསཧགཏསཉྙཱ རཱུཔསཉྙཱཏི ཨེཝཾ སཉྙཱསཱིསེན རཱུཔཱཝཙརཛ྄ཛྷཱནཱནི ཝུཏྟཱནི. རཱུཔཾ སཉྙཱ ཨསྶཱཏི རཱུཔསཉྙཾ, རཱུཔསྶ ནཱམནྟི ཝུཏྟཾ ཧོཏི. ཨེཝཾ པཐཝཱིཀསིཎཱདིབྷེདསྶ ཏདཱརམྨཎསྶ ཙེཏཾ ཨདྷིཝཙནནྟི ཝེདིཏབྦཾ. པཊིགྷསཉྙཱཏི ཙཀྑཱདཱིནཾ ཝཏྠཱུནཾ རཱུཔཱདཱིནཾ ཨཱརམྨཎཱནཉྩ པཊིགྷཱཏེན པཊིཧནནེན ཝིསཡིཝིསཡསམོདྷཱནེ སམུཔྤནྣཱ དྭིཔཉྩཝིཉྙཱཎསཧགཏཱ སཉྙཱ པཊིགྷསཉྙཱ. ནཱནཏྟསཉྙཱཡོཏི ནཱནཏྟེ གོཙརེ པཝཏྟཱ སཉྙཱ, ནཱནཏྟཱ ཝཱ སཉྙཱ ནཱནཏྟསཉྙཱ, ཨཊྛ ཀཱམཱཝཙརཀུསལསཉྙཱ, དྭཱདས ཨཀུསལསཉྙཱ, ཨེཀཱདས ཀཱམཱཝཙརཀུསལཝིཔཱཀསཉྙཱ, དྭེ ཨཀུསལཝིཔཱཀསཉྙཱ, ཨེཀཱདས ཀཱམཱཝཙརཀིརིཡསཉྙཱཏི ཨེཏཱསཾ ཙཏུཙཏྟཱལཱིསསཉྙཱནམེཏཾ ཨདྷིཝཙནཾ. ཨེཏཱ ཧི ཡསྨཱ རཱུཔསཉྙཱདིབྷེདེ ནཱནཏྟེ ¶ ནཱནཱསབྷཱཝེ གོཙརེ པཝཏྟནྟི, ཡསྨཱ ཙ ནཱནཏྟཱ ནཱནཱསབྷཱཝཱ ཨཉྙམཉྙཾ ཨསདིསཱ, ཏསྨཱ ‘‘ནཱནཏྟསཉྙཱ’’ཏི ཝུཙྩནྟི.

ཨནིཙྩསྶ, ཨནིཙྩནྟི ཝཱ ཨནུཔསྶནཱ ཨནིཙྩཱནུཔསྶནཱ, ཏེབྷཱུམཀདྷམྨཱནཾ ཨནིཙྩཏཾ གཧེཏྭཱ པཝཏྟཱཡ ཨནུཔསྶནཱཡེཏཾ ནཱམཾ. ནིཙྩསཉྙནྟི སངྑཏདྷམྨེ ‘‘ནིཙྩཱ སསྶཏཱ’’ཏི པཝཏྟཾ མིཙྪཱསཉྙཾ. སཉྙཱསཱིསེན དིཊྛིཙིཏྟཱནམྤི གཧཎཾ དཊྛབྦཾ. ཨེས ནཡོ ཨིཏོ པརེསུཔི. ནིབྦིདཱནུཔསྶནཱཡཱཏི སངྑཱརེསུ ནིབྦིཛྫནཱཀཱརེན པཝཏྟཱཡ ཨནུཔསྶནཱཡ. ནནྡིནྟི སཔྤཱིཏིཀཏཎྷཾ. ཝིརཱགཱནུཔསྶནཱཡཱཏི སངྑཱརེསུ ཝིརཛྫནཱཀཱརེན པཝཏྟཱཡ ཨནུཔསྶནཱཡ. ནིརོདྷཱནུཔསྶནཱཡཱཏི སངྑཱརཱནཾ ནིརོདྷསྶ ཨནུཔསྶནཱཡ. ‘‘ཏེ སངྑཱརཱ ནིརུཛ྄ཛྷནྟིཡེཝ, ཨཱཡཏིཾ སམུདཡཝསེན ན ཨུཔྤཛྫནྟཱི’’ཏི ཨེཝཾ ཝཱ ཨནུཔསྶནཱ ནིརོདྷཱནུཔསྶནཱ. ཏེནེཝཱཧ – ‘‘ནིརོདྷཱནུཔསྶནཱཡ ནིརོདྷེཏི, ནོ སམུདེཏཱི’’ཏི. མུཙྩིཏུཀམྱཏཱ ཧི ཨཡཾ བལཔྤཏྟཱཏི. པཊིནིསྶཛྫནཱཀཱརེན པཝཏྟཱ ཨནུཔསྶནཱ པཊིནིསྶགྒཱནུཔསྶནཱ. པཊིསངྑཱ སནྟིཊྛནཱ ཧི ཨཡཾ. ཨཱདཱནནྟི ནིཙྩཱདིཝསེན གཧཎཾ. སནྟཏིསམཱུཧཀིཙྩཱརམྨཎཱནཾ ཝསེན ཨེཀཏྟགྒཧཎཾ གྷནསཉྙཱ. ཨཱཡཱུཧནཾ ཨབྷིསངྑརཎཾ. ཨཝཏྠཱཝིསེསཱཔཏྟི ཝིཔརིཎཱམོ. དྷུཝསཉྙནྟི ཐིརབྷཱཝགྒཧཎཾ. ནིམིཏྟནྟི སམཱུཧཱདིགྷནཝསེན སཀིཙྩཔརིཙྪེདཏཱཡ ཙ སངྑཱརཱནཾ སཝིགྒཧགྒཧཎཾ. པཎིདྷིནྟི རཱགཱདིཔཎིདྷིཾ. སཱ པནཏྠཏོ ཏཎྷཱཝསེན སངྑཱརེསུ ནནྡིཏཱ. ཨབྷིནིཝེསནྟི ཨཏྟཱནུདིཊྛིཾ.

ཨནིཙྩདུཀྑཱདིཝསེན སབྦདྷམྨཏཱིརཎཾ ཨདྷིཔཉྙཱདྷམྨཝིཔསྶནཱ. སཱརཱདཱནཱབྷིནིཝེསནྟི ཨསཱརེ སཱརགྒཧཎཝིཔལླཱསཾ. ཨིསྶརཀུཏྟཱདིཝསེན ལོཀོ སམུཔྤནྣོཏི ཨབྷིནིཝེསོ སམྨོཧཱབྷིནིཝེསོ ¶ . ཀེཙི པན ‘‘ཨཧོསིཾ ནུ ཁོ ཨཧམཏཱིཏམདྡྷཱནནྟིཨཱདིནཱ པཝཏྟསཾསཡཱཔཏྟི སམྨོཧཱབྷིནིཝེསོ’’ཏི ཝདནྟི. སངྑཱརེསུ ལེཎཏཱཎབྷཱཝགྒཧཎཾ ཨཱལཡཱབྷིནིཝེསོ. ‘‘ཨཱལཡརཏཱ ཨཱལཡསམྨུདིཏཱ’’ཏི (དཱི. ནི. ༢.༦༤; མ. ནི. ༡.༢༨༡; ༢.༣༣༧; སཾ. ནི. ༡.༡༧༢; མཧཱཝ. ༧) ཝཙནཏོ ཨཱལཡོ ཏཎྷཱ, སཱཡེཝ ཙཀྑཱདཱིསུ རཱུཔཱདཱིསུ ཙ ཨབྷིནིཝེསཝསེན པཝཏྟིཡཱ ཨཱལཡཱབྷིནིཝེསོཏི ཀེཙི. ‘‘ཨེཝཾཝིདྷཱ སངྑཱརཱ པཊིནིསྶཛྫཱིཡནྟཱི’’ཏི པཝཏྟཾ ཉཱཎཾ པཊིསངྑཱནུཔསྶནཱ. ཝཊྚཏོ ཝིགཏཏྟཱ ཝིཝཊྚཾ, ནིབྦཱནཾ. ཏཏྠ ཨཱརམྨཎཀརཎསངྑཱཏེན ཨནུཔསྶནེན པཝཏྟིཡཱ ཝིཝཊྚཱནུཔསྶནཱ, གོཏྲབྷཱུ. སཾཡོགཱབྷིནིཝེསནྟི སཾཡུཛྫནཝསེན སངྑཱརེསུ ¶ ཨབྷིནིཝིསནཾ. དིཊྛེཀཊྛེཏི དིཊྛིཡཱ སཧཛཱཏེཀཊྛེ པཧཱནེཀཊྛེ ཙ. ཨོལཱ༹རིཀེཏི ཨུཔརིམགྒཝཛ྄ཛྷེ ཀིལེསེ ཨཔེཀྑིཏྭཱ ཝུཏྟཾ, ཨཉྙཐཱ དསྶནཔཧཱཏབྦཱཔི དུཏིཡམགྒཝཛ྄ཛྷེཧི ཨོལཱ༹རིཀཱཏི. ཨཎུསཧགཏེཏི ཨཎུབྷཱུཏེ. ཨིདཾ ཧེཊྛིམམགྒཝཛ྄ཛྷེ ཨཔེཀྑིཏྭཱ ཝུཏྟཾ. སབྦཀིལེསེཏི ཨཝསིཊྛསབྦཀིལེསེ. ན ཧི པཋམཱདིམགྒེཧིཔི པཧཱིནཱ ཀིལེསཱ པུན པཧཱིཡནྟཱིཏི.

ཀཀྑལ༹ཏྟཾ ཀཐིནབྷཱཝོ. པགྒྷརཎཾ དྲཝབྷཱཝོ. ལོཀིཡཝཱཡུནཱ བྷསྟཱཡ ཝིཡ ཡེན ཏཾཏཾཀལཱཔསྶ ཨུདྡྷུམཱཡནཾ, ཐདྡྷབྷཱཝོ ཝཱ, ཏཾ ཝིཏྠམྦྷནཾ. ཝིཛྫམཱནེཔི ཀལཱཔནྟརབྷཱུཏཱནཾ ཀལཱཔནྟརབྷཱུཏེཧི ཕུཊྛབྷཱཝེ ཏཾཏཾབྷཱུཏཝིཝིཏྟཏཱ རཱུཔཔརིཡནྟོ ཨཱཀཱསོཏི ཡེསཾ ཡོ པརིཙྪེདོ, ཏེཧི སོ ཨསམྥུཊྛོཝ, ཨཉྙཐཱ བྷཱུཏཱནཾ པརིཙྪེདབྷཱཝོ ན སིཡཱ བྱཱཔིཏབྷཱཝཱཔཏྟིཏོ. ཡསྨིཾ ཀལཱཔེ བྷཱུཏཱནཾ པརིཙྪེདོ, ཏེཧི ཨསམྥུཊྛབྷཱཝོ ཨསམྥུཊྛལཀྑཎཾ. ཏེནཱཧ – བྷགཝཱ ཨཱཀཱསདྷཱཏུནིདྡེསེ (དྷ. ས. ༦༣༧) ‘‘ཨསམྥུཊྛོ ཙཏཱུཧི མཧཱབྷཱུཏེཧཱི’’ཏི.

ཝིརོདྷིཔཙྩཡསནྣིཔཱཏེ ཝིསདིསུཔྤཏྟི རུཔྤནཾ. ཙེཏནཱཔདྷཱནཏྟཱ སངྑཱརཀྑནྡྷདྷམྨཱནཾ ཙེཏནཱཝསེནེཏཾ ཝུཏྟཾ – ‘‘སངྑཱརཱནཾ ཨབྷིསངྑརཎལཀྑཎ’’ནྟི. ཏཐཱ ཧི སུཏྟནྟབྷཱཛནཱིཡེ སངྑཱརཀྑནྡྷཝིབྷངྒེ (ཝིབྷ. ༩༢) ‘‘ཙཀྑུསམྥསྶཛཱ ཙེཏནཱ’’ཏིཨཱདིནཱ ཙེཏནཱཝ ཝིབྷཏྟཱ. ཨབྷིསངྑརལཀྑཎཱ ཙ ཙེཏནཱ. ཡཐཱཧ – ‘‘ཏཏྠ ཀཏམོ པུཉྙཱབྷིསངྑཱརོ, ཀུསལཱ ཙེཏནཱ ཀཱམཱཝཙརཱ’’ཏིཨཱདི. ཕརཎཾ སཝིཔྥཱརིཀཏཱ. ཨསྶདྡྷིཡེཏི ཨསྶདྡྷིཡཧེཏུ. ནིམིཏྟཏྠེ བྷུམྨཾ. ཨེས ནཡོ ཀོསཛྫེཏིཨཱདཱིསུ. ཝཱུཔསམལཀྑཎནྟི ཀཱཡཙིཏྟཔརིལཱ༹ཧཱུཔསམལཀྑཎཾ. ལཱིནུདྡྷཙྩརཧིཏེ ཨདྷིཙིཏྟེ པཝཏྟམཱནེ པགྒཧནིགྒཧསམྤཧཾསནེསུ ཨབྱཱཝཊཏཱཡ ཨཛ྄ཛྷུཔེཀྑནཾ པཊིསངྑཱནཾ པཀྑཔཱཏུཔཙྪེདཏོ.

མུསཱཝཱདཱདཱིནཾ ཝིསཾཝཱདནཱདིཀིཙྩཏཱཡ ལཱུཁཱནཾ ཨཔརིགྒཱཧཀཱནཾ པཊིཔཀྑབྷཱཝཏོ པརིགྒཱཧཀསབྷཱཝཱ ¶ སམྨཱཝཱཙཱ, སིནིདྡྷབྷཱཝཏོ སམྤཡུཏྟདྷམྨེ སམྨཱཝཱཙཱཔཙྩཡསུབྷཱསིཏཱནཾ སོཏཱརཉྩ པུགྒལཾ པརིགྒཎྷཱཏཱིཏི སཱ པརིགྒཧལཀྑཎཱ. ཀཱཡིཀཀིརིཡཱ ཀིཉྩི ཀཏྟབྦཾ སམུཊྛཱཔེཏི, སཡཉྩ སམུཊྛཧནཾ གྷཊནཾ ཧོཏཱིཏི སམྨཱཀམྨནྟསངྑཱཏཱ ཝིརཏཱིཔི ¶ སམུཊྛཱནལཀྑཎཱ དཊྛབྦཱ, སམྤཡུཏྟདྷམྨཱནཾ ཝཱ ཨུཀྑིཔནཾ སམུཊྛཱཔནཾ ཀཱཡིཀཀིརིཡཱཡ བྷཱརུཀྑིཔནཾ ཝིཡ. ཛཱིཝམཱནསྶ སཏྟསྶ, སམྤཡུཏྟདྷམྨཱནཾ ཝཱ ཛཱིཝིཏིནྡྲིཡཔཝཏྟིཡཱ, ཨཱཛཱིཝསྶེཝ ཝཱ སུདྡྷི ཝོདཱནཾ. ‘‘སངྑཱརཱ’’ཏི ཨིདྷ ཙེཏནཱ ཨདྷིཔྤེཏཱཏི ཝུཏྟཾ – ‘‘སངྑཱརཱནཾ ཙེཏནཱལཀྑཎ’’ནྟི. ནམནཾ ཨཱརམྨཎཱབྷིམུཁབྷཱཝོ. ཨཱཡཏནཾ པཝཏྟནཾ. ཨཱཡཏནཝསེན ཧི ཨཱཡསངྑཱཏཱནཾ ཙིཏྟཙེཏསིཀཱནཾ པཝཏྟི. ཏཎྷཱཡ ཧེཏུལཀྑཎནྟི ཝཊྚསྶ ཛནཀཧེཏུབྷཱཝོ, མགྒསྶ པན ནིབྦཱནསམྤཱཔཀཏྟནྟི ཨཡམེཏེསཾ ཝིསེསོ.

ཏཐལཀྑཎཾ ཨཝིཔརཱིཏསབྷཱཝོ. ཨེཀརསོ ཨཉྙམཉྙནཱཏིཝཏྟནཾ ཨནཱུནཱདྷིཀབྷཱཝོ. ཡུགནདྡྷཱ སམཐཝིཔསྶནཱཝ. ‘‘སདྡྷཱཔཉྙཱ པགྒཧཱཝིཀྑེཔཱ’’ཏིཔི ཝདནྟི. ཁཡོཏི ཀིལེསཀྑཡོ མགྒོ. ཨནུཔྤཱདཔརིཡོསཱནཏཱཡ ཨནུཔྤཱདོ ཕལཾ. པསྶདྡྷི ཀིལེསཝཱུཔསམོ. ཚནྡསྶཱཏི ཀཏྟུཀཱམཏཱཚནྡསྶ. མཱུལལཀྑཎཾ པཏིཊྛཱབྷཱཝོ. སམུཊྛཱནལཀྑཎཾ ཨཱརམྨཎཔྤཊིཔཱདཀཏཱཡ སམྤཡུཏྟདྷམྨཱནཾ ཨུཔྤཏྟིཧེཏུཏཱ. སམོདྷཱནཾ ཝིསཡཱདིསནྣིཔཱཏེན གཧེཏབྦཱཀཱརོ, ཡཱ སངྒཏཱིཏི ཝུཙྩཏི. སམཾ, སཧ ཨོདཧནྟི ཨནེན སམྤཡུཏྟདྷམྨཱཏི ཝཱ སམོདྷཱནཾ, ཕསྶོ. སམོསརནྟི སནྣིཔཏནྟི ཨེཏྠཱཏི སམོསརཎཾ. ཝེདནཱཡ ཝིནཱ ཨཔྤཝཏྟམཱནཱ སམྤཡུཏྟདྷམྨཱ ཝེདནཱནུབྷཝནནིམིཏྟཾ སམོསཊཱ ཝིཡ ཧོནྟཱིཏི ཨེཝཾ ཝུཏྟཾ. གོཔཱནསཱིནཾ ཀཱུཊཾ ཝིཡ སམྤཡུཏྟཱནཾ པཱམོཀྑབྷཱཝོ པམུཁལཀྑཎཾ. ཏཏོ, ཏེསཾ ཝཱ སམྤཡུཏྟདྷམྨཱནཾ ཨུཏྟརི པདྷཱནནྟི ཏཏུཏྟརི. པཉྙུཏྟརཱ ཧི ཀུསལཱ དྷམྨཱ. ཝིམུཏྟིཡཱཏི ཕལསྶ. ཏཉྷི སཱིལཱདིགུཎསཱརསྶ པརམུཀྐཾསབྷཱཝེན སཱརཾ. ཨཡཉྩ ལཀྑཎཝིབྷཱགོ ཚདྷཱཏུཔཉྩཛྷཱནངྒཱདིཝསེན ཏཾཏཾསུཏྟཔདཱནུསཱརེན པོརཱཎཊྛཀཐཱཡཾ ཨཱགཏནཡེན ཙ ཀཏོཏི དཊྛབྦཾ. ཏཐཱ ཧི པུབྦེ ཝུཏྟོཔི ཀོཙི དྷམྨོ པརིཡཱཡནྟརཔྤཀཱསནཏྠཾ པུན དསྶིཏོ, ཏཏོ ཨེཝ ཙ ‘‘ཚནྡམཱུལཀཱ ཀུསལཱ དྷམྨཱ མནསིཀཱརསམུཊྛཱནཱ ཕསྶསམོདྷཱནཱ ཝེདནཱསམོསརཎཱ’’ཏི, ‘‘པཉྙུཏྟརཱ ཀུསལཱ དྷམྨཱ’’ཏི, ‘‘ཝིམུཏྟིསཱརམིདཾ བྲཧྨཙརིཡ’’ནྟི, ‘‘ནིབྦཱནོགདྷཉྷི, ཨཱཝུསོ, བྲཧྨཙརིཡཾ ནིབྦཱནཔརིཡོསཱན’’ནྟི (སཾ. ནི. ༥.༥༡༢) ཙ སུཏྟཔདཱནཾ ཝསེན ‘‘ཚནྡསྶ མཱུལལཀྑཎ’’ནྟིཨཱདི ཝུཏྟཾ.

ཏཐདྷམྨཱ ¶ ནཱམ ཙཏྟཱརི ཨརིཡསཙྩཱནི ཨཝིཔརཱིཏསབྷཱཝཏྟཱ. ཏཐཱནི ཏཾསབྷཱཝཏྟཱ, ཨཝིཏཐཱནི ཨམུསཱསབྷཱཝཏྟཱ, ཨནཉྙཐཱནི ཨཉྙཱཀཱརརཧིཏཏྟཱ. ཛཱཏིཔཙྩཡསམྦྷཱུཏསམུདཱགཏཊྛོཏི ¶ ཛཱཏིཔཙྩཡཱ སམྦྷཱུཏཾ ཧུཏྭཱ སཧིཏསྶ ཨཏྟནོ པཙྩཡཱནུརཱུཔསྶ ཨུདྡྷཾ ཨུདྡྷཾ ཨཱགཏབྷཱཝོ, ཨནུཔཝཏྟཏྠོཏི ཨཏྠོ. ཨཐ ཝཱ སམྦྷཱུཏཊྛོ ཙ སམུདཱགཏཊྛོ ཙ སམྦྷཱུཏསམུདཱགཏཊྛོ, ན ཛཱཏིཏོ ཛརཱམརཎཾ ན ཧོཏི, ན ཙ ཛཱཏིཾ ཝིནཱ ཨཉྙཏོ ཧོཏཱིཏི ཛཱཏིཔཙྩཡསམྦྷཱུཏཊྛོ, ཨིཏྠཉྩ ཛཱཏིཏོ སམུདཱགཙྪཏཱིཏི ཛཱཏིཔཙྩཡསམུདཱགཏཊྛོ. ཡཱ ཡཱ ཛཱཏི ཡཐཱ ཡཐཱ པཙྩཡོ ཧོཏི, ཏདནུརཱུཔཾ པཱཏུབྷཱཝོཏི ཨཏྠོ. ཨཝིཛྫཱཡ སངྑཱརཱནཾ པཙྩཡཊྛོཏི ཨེཏྠཱཔི ན ཨཝིཛྫཱ སངྑཱརཱནཾ པཙྩཡོ ན ཧོཏི, ན ཙ ཨཝིཛྫཾ ཝིནཱ སངྑཱརཱ ཨུཔྤཛྫནྟི. ཡཱ ཡཱ ཨཝིཛྫཱ ཡེསཾ ཡེསཾ སངྑཱརཱནཾ ཡཐཱ ཡཐཱ པཙྩཡོ ཧོཏི, ཨཡཾ ཨཝིཛྫཱཡ སངྑཱརཱནཾ པཙྩཡཊྛོ, པཙྩཡབྷཱཝོཏི ཨཏྠོ.

བྷགཝཱ ཏཾ ཛཱནཱཏི པསྶཏཱིཏི སམྦནྡྷོ. ཏེནཱཏི བྷགཝཏཱ. ཏཾ ཝིབྷཛྫམཱནནྟི ཡོཛེཏབྦཾ. ཏནྟི རཱུཔཱཡཏནཾ. ཨིཊྛཱནིཊྛཱདཱིཏི ཨཱདི-སདྡེན མཛ྄ཛྷཏྟཾ སངྒཎྷཱཏི, ཏཐཱ ཨཏཱིཏཱནཱགཏཔཙྩུཔྤནྣཔརིཏྟཨཛ྄ཛྷཏྟབཧིདྡྷཱཏདུབྷཡཱདིབྷེདཾ. ལབྦྷམཱནཀཔདཝསེནཱཏི ‘‘རཱུཔཱཡཏནཾ དིཊྛཾ, སདྡཱཡཏནཾ སུཏཾ, གནྡྷཱཡཏནཾ རསཱཡཏནཾ ཕོཊྛབྦཱཡཏནཾ མུཏཾ, སབྦཾ རཱུཔཾ མནསཱ ཝིཉྙཱཏ’’ནྟི (དྷ. ས. ༩༦༦) ཝཙནཏོ དིཊྛཔདཉྩ ཝིཉྙཱཏཔདཉྩ རཱུཔཱརམྨཎེ ལབྦྷཏི. ཨནེཀེཧི ནཱམེཧཱིཏི ‘‘རཱུཔཱརམྨཎཾ ཨིཊྛཾ ཨནིཊྛཾ མཛ྄ཛྷཏྟཾ པརིཏྟཾ ཨཏཱིཏཾ ཨནཱགཏཾ པཙྩུཔྤནྣཾ ཨཛ྄ཛྷཏྟཾ བཧིདྡྷཱ དིཊྛཾ ཝིཉྙཱཏཾ རཱུཔཾ རཱུཔཱཡཏནཾ རཱུཔདྷཱཏུ ཝཎྞནིབྷཱ སནིདསྶནཾ སཔྤཊིགྷཾ ནཱིལཾ པཱིཏཀ’’ནྟི ཨེཝམཱདཱིཧི ཨནེཀེཧི ནཱམེཧི. ཏེརསཧི ཝཱརེཧཱིཏི རཱུཔཀཎྜེ ཨཱགཏེ ཏེརས ནིདྡེསཝཱརེ སནྡྷཱཡཱཧ. དྭེཔཉྙཱསཱཡ ནཡེཧཱིཏི ཨེཀེཀསྨིཾ ཝཱརེ ཙཏུནྣཾ ཙཏུནྣཾ ཝཝཏྠཱཔནནཡཱནཾ ཝསེན དྭིཔཉྙཱསཱཡ ནཡེཧི. ཏཐམེཝཱཏི ཨཝིཔརཱིཏདསྶིཏཱཡ ཨཔྤཊིཝཏྟིཡདེསནཏཱཡ ཙ ཏཐམེཝ ཧོཏི. ཛཱནཱམི ཨབྦྷཉྙཱསིནྟི ཝཏྟམཱནཱཏཱིཏཀཱལེསུ ཉཱཎཔྤཝཏྟིདསྶནེན ཨནཱགཏེཔི ཉཱཎཔྤཝཏྟི ཝུཏྟཱཡེཝཱཏི དཊྛབྦཱ. ཝིདིཏ-སདྡོ ཨནཱམཊྛཀཱལཝིསེསོ ཝེདིཏབྦོ ‘‘དིཊྛཾ སུཏཾ མུཏ’’ནྟིཨཱདཱིསུ (དཱི. ནི. ༣.༡༨༨; མ. ནི. ༡.༧-༨; སཾ. ནི. ༣.༢༠༨; ཨ. ནི. ༤.༢༣) ཝིཡ. ན ཨུཔཊྛཱསཱིཏི ཨཏྟཏྟནིཡཝསེན ན ཨུཔགཉྪི ¶ . ཡཐཱ རཱུཔཱརམྨཎཱདཡོ དྷམྨཱ ཡཾསབྷཱཝཱ ཡཾཔཀཱརཱ ཙ, ཏཐཱ ནེ པསྶཏི ཛཱནཱཏི གཙྪཏཱིཏི ཏཐཱགཏོཏི ཨེཝཾ པདསམྦྷཝོ ཝེདིཏབྦོ. ཀེཙི པན ‘‘ནིརུཏྟིནཡེན པིསོདརཱདིཔཀྑེཔེན ཝཱ དསྶཱིསདྡསྶ ལོཔཾ, ཨཱགཏ-སདྡསྶ ཙཱགམཾ ཀཏྭཱ ཏཐཱགཏོ’’ཏི ཝཎྞེནྟི.

ཡཾ རཏྟིནྟི ཡསྶཾ རཏྟིཡཾ. ཨཙྩནྟསཾཡོགེ ཙེཏཾ ཨུཔཡོགཝཙནཾ. ཏིཎྞཾ མཱརཱནནྟི ཀིལེསཱབྷིསངྑཱརདེཝཔུཏྟསངྑཱཏཱནཾ ཏིཎྞཾ མཱརཱནཾ. ཨནུཔཝཛྫནྟི ནིདྡོསཏཱཡ ན ཨུཔཝཛྫཾ. ཨནཱུནནྟི པཀྑིཔིཏབྦཱབྷཱཝེན ན ཨཱུནཾ. ཨནདྷིཀནྟི ཨཔནེཏབྦཱབྷཱཝེན ན ཨདྷིཀཾ. སབྦཱཀཱརཔརིཔུཎྞནྟི ¶ ཨཏྠབྱཉྫནཱདིསམྤཏྟིཡཱ སབྦཱཀཱརེན པརིཔུཎྞཾ. ནོ ཨཉྙཐཱཏི ‘‘ཏཐེཝཱ’’ཏི ཝུཏྟམེཝཏྠཾ བྱཏིརེཀེན སམྤཱདེཏི. ཏེན ཡདཏྠཾ བྷཱསིཏཾ, ཏདཏྠནིཔྥཱདནཏོ ཡཐཱ བྷཱསིཏཾ བྷགཝཏཱ, ཏཐེཝཱཏི ཨཝིཔརཱིཏདེསནཏཾ དསྶེཏི. གདཏྠོཏི ཨེཏེན ཏཐཾ གདཏཱིཏི ཏཐཱགཏོཏི ད-ཀཱརསྶ ཏ-ཀཱརཾ ཀཏྭཱ ནིརུཏྟིནཡེན ཝུཏྟནྟི དསྶེཏི. ཏཐཱ གཏམསྶཱཏི ཏཐཱགཏོ. གཏནྟི ཙ ཀཱཡསྶ ཝཱཙཱཡ ཝཱ པཝཏྟཱིཏི ཨཏྠོ. ཏཐཱཏི ཙ ཝུཏྟེ ཡཾ-ཏཾ-སདྡཱནཾ ཨབྱབྷིཙཱརིཏསམྦནྡྷཏཱཡ ཡཐཱཏི ཨཡམཏྠོ ཨུཔཊྛིཏོཡེཝ ཧོཏི. ཀཱཡཝཱཙཱཀིརིཡཱནཉྩ ཨཉྙམཉྙཱནུལོམེན ཝཙནིཙྪཱཡཾ ཀཱཡསྶ ཝཱཙཱ, ཝཱཙཱཡ ཙ ཀཱཡོ སམྦནྡྷབྷཱཝེན ཨུཔཏིཊྛཏཱིཏི ཨིམམཏྠཾ དསྶེནྟོ ཨཱཧ – ‘‘བྷགཝཏོ ཧཱི’’ཏིཨཱདི. ཨིམསྨིཾ པན ཨཏྠེ ཏཐཱཝཱདིཏཱཡ ཏཐཱགཏོཏི ཨཡམྤི ཨཏྠོ སིདྡྷོ ཧོཏི. སོ པན པུབྦེ པཀཱརནྟརེན དསྶིཏོཏི ཨཱཧ – ‘‘ཨེཝཾ ཏཐཱཀཱརིཏཱཡ ཏཐཱགཏོ’’ཏི.

ཏིརིཡཾ ཨཔརིམཱཎཱསུ ལོཀདྷཱཏཱུསཱུཏི ཨེཏེན ཡདེཀེ ‘‘ཏིརིཡཾ ཝིཡ ཨུཔརི ཨདྷོ ཙ སནྟི ལོཀདྷཱཏུཡོ’’ཏི ཝདནྟི, ཏཾ པཊིསེདྷེཏི. དེསནཱཝིལཱསོཡེཝ དེསནཱཝིལཱསམཡོ ཡཐཱ ‘‘པུཉྙམཡཾ དཱནམཡ’’ནྟིཨཱདཱིསུ (དཱི. ནི. ༣.༣༠༥; ཨིཏིཝུ. ༦༠; ནེཏྟི. ༣༣). ནིཔཱཏཱནཾ ཝཱཙཀསདྡསནྣིདྷཱནེ ཏདཏྠཛོཏནབྷཱཝེན པཝཏྟནཏོ གཏ-སདྡོཡེཝ ཨཝགཏཏྠཾ ཨཏཱིཏཏྠཉྩ ཝདཏཱིཏི ཨཱཧ – ‘‘གཏོཏི ཨཝགཏོ ཨཏཱིཏོ’’ཏི. ཨཐ ཝཱ ཨབྷིནཱིཧཱརཏོ པཊྛཱཡ ཡཱཝ ¶ སམྦོདྷི, ཨེཏྠནྟརེ མཧཱབོདྷིཡཱནཔཊིཔཏྟིཡཱ ཧཱནཊྛཱནསཾཀིལེསནིཝཏྟཱིནཾ ཨབྷཱཝཏོ ཡཐཱ པཎིདྷཱནཾ, ཏཐཱ གཏོ ཨབྷིནཱིཧཱརཱནུརཱུཔཾ པཊིཔནྣོཏི ཏཐཱགཏོ. ཨཐ ཝཱ མཧིདྡྷིཀཏཱཡ པཊིསམྦྷིདཱནཾ ཨུཀྐཾསཱདྷིགམེན ཨནཱཝརཎཉཱཎཏཱཡ ཙ ཀཏྠཙིཔི པཊིགྷཱཏཱབྷཱཝཏོ ཡཐཱ རུཙི, ཏཐཱ ཀཱཡཝཱཙཱཙིཏྟཱནཾ གཏཱནི གམནཱནི པཝཏྟིཡོ ཨེཏསྶཱཏི ཏཐཱགཏོ. ཡསྨཱ ཙ ལོཀེ ཝིདྷཡུཏྟགཏཔཀཱརསདྡཱ སམཱནཏྠཱ དིསྶནྟི, ཏསྨཱ ཡཐཱཝིདྷཱ ཝིཔསྶིཨཱདཡོ བྷགཝནྟོ, ཨཡམྤི བྷགཝཱ ཏཐཱཝིདྷོཏི ཏཐཱགཏོ. ཡཐཱ ཡུཏྟཱ ཙ ཏེ བྷགཝནྟོ, ཨཡམྤི བྷགཝཱ ཏཐཱ ཡུཏྟོཏི ཏཐཱགཏོ. ཨཐ ཝཱ ཡསྨཱ སཙྩཾ ཏཏྭཾ ཏཙྪཾ ཏཐནྟི ཉཱཎསྶེཏཾ ཨདྷིཝཙནཾ, ཏསྨཱ ཏཐེན ཉཱཎེན ཨཱགཏོཏི ཏཐཱགཏོཏི ཨེཝམྤི ཏཐཱགཏསདྡསྶ ཨཏྠོ ཝེདིཏབྦོ.

‘‘པཧཱཡ ཀཱམཱདིམལེ ཡཐཱ གཏཱ,

སམཱདྷིཉཱཎེཧི ཝིཔསྶིཨཱདཡོ;

མཧེསིནོ སཀྱམུནཱི ཛུཏིནྡྷརོ,

ཏཐཱགཏོ ཏེན ཏཐཱགཏོ མཏོ.

‘‘ཏཐཉྩ ¶ དྷཱཏཱཡཏནཱདིལཀྑཎཾ,

སབྷཱཝསཱམཉྙཝིབྷཱགབྷེདཏོ;

སཡམྦྷུཉཱཎེན ཛིནོཡམཱགཏོ,

ཏཐཱགཏོ ཝུཙྩཏི སཀྱཔུངྒཝོ.

‘‘ཏཐཱནི སཙྩཱནི སམནྟཙཀྑུནཱ,

ཏཐཱ ཨིདཔྤཙྩཡཏཱ ཙ སབྦསོ;

ཨནཉྙནེཡྻེན ཡཏོ ཝིབྷཱཝིཏཱ,

ཡཱཐཱཝཏོ ཏེན ཛིནོ ཏཐཱགཏོ.

‘‘ཨནེཀབྷེདཱསུཔི ལོཀདྷཱཏུསུ,

ཛིནསྶ རུཔཱཡཏནཱདིགོཙརེ;

ཝིཙིཏྟབྷེདེ ཏཐམེཝ དསྶནཾ,

ཏཐཱགཏོ ཏེན སམནྟལོཙནོ.

‘‘ཡཏོ ¶ ཙ དྷམྨཾ ཏཐམེཝ བྷཱསཏི,

ཀརོཏི ཝཱཙཱཡནུལོམམཏྟནོ;

གུཎེཧི ལོཀཾ ཨབྷིབྷུཡྻིརཱིཡཏི,

ཏཐཱགཏོ ཏེནཔི ལོཀནཱཡཀོ.

‘‘ཡཐཱབྷིནཱིཧཱརམཏོ ཡཐཱརུཙི,

པཝཏྟཝཱཙཱ ཏནུཙིཏྟབྷཱཝཏོ;

ཡཐཱཝིདྷཱ ཡེན པུརཱ མཧེསིནོ,

ཏཐཱཝིདྷོ ཏེན ཛིནོ ཏཐཱགཏོ’’ཏི. (དཱི. ནི. ཊཱི. ༡.༧) –

སངྒཧགཱཐཱ མུཁམཏྟམེཝ, ཀསྨཱ? ཨཔྤམཱདཔདཾ ཝིཡ སཀལཀུསལདྷམྨསམྤཊིཔཏྟིཡཱ སབྦབུདྡྷགུཎཱནཾ སངྒཱཧཀཏྟཱ. ཏེནེཝཱཧ – ‘‘སབྦཱཀཱརེནཱ’’ཏིཨཱདི. སེསམེཏྠ ཨུཏྟཱནཏྠམེཝ.

༡༧༡. དུཏིཡེ ཨུཔྤཏྟཱིཏི པཋམཱཡ ཛཱཏིཡཱ ནིབྦཏྟིཾ ཝཏྭཱ ཨརིཡཱཡ ཛཱཏིཡཱ ནིབྦཏྟིཾ དསྶེཏུཾ – ‘‘ནིཔྥཏྟཱི’’ཏི ཨཱཧ. ཏདཱ ཧིསྶ བུདྡྷབྷཱཝནིཔྥཏྟཱིཏི. ‘‘དུལླབྷོ’’ཏིཨཱདིཾ ¶ ཝཏྭཱ ཀཱརཎསྶ དཱུརསམྦྷཱརབྷཱཝཏོ ཏཏྠ ཀཱརཎཾ དསྶེནྟོ ‘‘ཨེཀཝཱར’’ནྟིཨཱདིམཱཧ. ཨིདཾ ཝུཏྟཾ ཧོཏི – ཏཏྠ ཝཱརགཎནཱ ནཱམ མཱསསཾཝཙྪརཀཔྤགཎནཱདིཀཱ, ཀཔྤཱནཾ ཨེཀཾ ཨསངྑྱེཡྻཾ དྭེ ཨསངྑྱེཡྻཱནི ཏཱིཎི ཨསངྑྱེཡྻཱནིཔི པཱརམིཡོ པཱུརེཏྭཱཔི བུདྡྷེན བྷཝིཏུཾ ན སཀྐཱ, ཧེཊྛིམཀོཊིཡཱ པན ཙཏྟཱརི ཨསངྑྱེཡྻཱནི ཀཔྤསཏསཧསྶཉྩ ནིརནྟརཾ དས པཱརམིཡོ པཱུརེཏྭཱ བུདྡྷབྷཱཝཾ པཏྟུཾ སཀྐཱ, ན ཨིཏོ ཨཉྙཐཱཏི ཨིམིནཱ ཀཱརཎེན དུལླབྷོ པཱཏུབྷཱཝོ བུདྡྷཱནནྟི.

༡༧༢. ཏཏིཡེ ནིཙྩཾ ན ཧོཏཱིཏི ཨབྷིཎྷཔྤཝཏྟིཀཾ ན ཧོཏི ཀདཱཙིདེཝ སམྦྷཝཏོ. ཡེབྷུཡྻེན མནུསྶཱ ཨཙྪརིཡཾ དིསྭཱ ཨཙྪརཾ པཧརནྟི, ཏཾ སནྡྷཱཡ ཝུཏྟཾ – ‘‘ཨཙྪརཾ པཧརིཏྭཱ པསྶིཏབྦོ’’ཏི. སམནྣཱགཏཏྟཱཏི ཨེཏེན ཨཙྪརིཡཱ གུཎདྷམྨཱ ཨེཏསྨིཾ སནྟཱིཏི ཨཙྪརིཡོཏི དསྶེཏི. ཨཔིཙ ཨཱདིཏོ པབྷུཏི ཨབྷིནཱིཧཱརཱཝཧོ, ཏཏོ པརམྤི ཨནཉྙསཱདྷཱརཎེ གུཎདྷམྨེ ཨཱཙིཎྞཝཱཏི ཨཙྪརིཡོཏི ཨཱཧ – ‘‘ཨཱཙིཎྞམནུསྶོཏིཔི ཨཙྪརིཡམནུསྶོ’’ཏིཨཱདི. མཧཱབོདྷིཉཱཎམེཝ མཎྜབྷཱུཏཾ མཧཱབོདྷིམཎྜོ. སབྦཉྙུཏཉྙཱཎཔདཊྛཱནཉྷི མགྒཉཱཎཾ, མགྒཉཱཎཔདཊྛཱནཉྩ སབྦཉྙུཏཉྙཱཎཾ ¶ ‘‘མཧཱབོདྷཱི’’ཏི ཝུཙྩཏི. ཨནིཝཏྟཀེནཱཏི བོདྷིཡཱ ནིཡཏབྷཱཝཱཔཏྟིཡཱ མཧཱབོདྷིསཏྟབྷཱཝཏོ ཨནིཝཏྟནསབྷཱཝེན. བུདྡྷཀཱརཀདྷམྨཱནཾ པཱུརཎམྤི ན ཨཉྙསྶ ཀསྶཙི ཨཱཙིཎྞནྟིཨཱདིནཱ ཧེཏུཨཝཏྠཱཡ ཕལཱཝཏྠཱཡ སཏྟཱནཾ ཨུཔཀཱརཱཝཏྠཱཡ ཙཱཏི ཏཱིསུཔི ཨཝཏྠཱསུ ལོཀནཱཐོ ཨནཉྙསཱདྷཱརཎཱནཾ གུཎདྷམྨཱནཾ ཨཱཙིཎྞཏཱཡ ཨཙྪརིཡམནུསྶོ ཝུཏྟོཏི དསྶེཏི.

༡༧༣. ཙཏུཏྠེ ཀཱལེ ཀིརིཡཱཏི ཀཱལཀིརིཡཱ. ཀཏརསྨིཾ ཀཱལེ ཀཱིདིསཱི ཀིརིཡཱ. སཱམཉྙཛོཏནཱ ཧི ཝིསེསེ ཨཝཏིཊྛཏི, ཝིསེསཏྠིནཱ ཙ ཝིསེསོ ཨནུཔྤཡོཛིཏབྦོཏི ཨཱཧ – ‘‘ཨེཀསྨིཾ ཀཱལེ པཱཀཊཱ ཀིརིཡཱ’’ཏི. ཀཏརསྨིཾ པན ཨེཀསྨིཾ ཀཱལེ, ཀཐཉྩ པཱཀཊཱཏི? ཀཔྤཱནཾ སཏསཧསྶཱདྷིཀཱནི ཨནེཀཱནི ཨསངྑྱེཡྻཱནི ཨབྷིཀྐམིཏྭཱ ཡཐཱདྷིཔྤེཏམནོརཐཔཱརིཔཱུརིཝསེན སམུཔལདྡྷེ ཨེཀསྨིཾ ཀཱལེ, སདེཝལོཀེ ཨཏིཝིཡ ཨཙྪརིཡམནུསྶསྶ པརིནིབྦཱནནྟི ཨཙྩནྟཔཱཀཊཱ. ཨནུཏཱཔཀརཱཏི ཙེཏོདུཀྑཱཝཧཱ. དསསཧསྶཙཀྐཝཱལེ༹སཱུཏི ཝུཏྟཾ ཏསྶ བུདྡྷཀྑེཏྟབྷཱཝེན པརིཙྪིནྣཏྟཱ, ཏདཉྙེསཉྩ ཨཝིསཡཏྟཱ.

༡༧༤. པཉྩམེ དུཏིཡསྶ བུདྡྷསྶཱཏི དུཏིཡསྶ སབྦཉྙུབུདྡྷསྶ ཨབྷཱཝཱ. སུཏབུདྡྷོ ནཱམ སུཏམཡེན ཉཱཎེན བུཛ྄ཛྷིཏབྦསྶ བུདྡྷཏྟཱ. ཙཏུསཙྩབུདྡྷོ ནཱམ ཙཏུནྣཾ ཨརིཡསཙྩཱནཾ ཨནཝསེསཏོ བུདྡྷཏྟཱ. པཙྩེཀབུདྡྷོ ནཱམ པཙྩེཀཾ ཨཏྟནོཡེཝ ཡཐཱ ཙཏུསཙྩསམྦོདྷོ ཧོཏི, ཨེཝཾ ¶ བུདྡྷཏྟཱ. སམྨཱསམྦུདྡྷོ ཨེཝ ཧི ཡཐཱ སདེཝཀསྶ ལོཀསྶ ཙཏུསཙྩསམྦོདྷོ ཧོཏི, ཨེཝཾ སཙྩཱནི ཨབྷིསམྦུཛ྄ཛྷཏི. ཙཏྟཱརི ཝཱ ཨཊྛ ཝཱ སོལ༹ས ཝཱཏི ཨིདཾ ཀཏམཧཱབྷིནཱིཧཱརཱནཾ མཧཱབོདྷིསཏྟཱནཾ པཉྙཱདྷིཀསདྡྷཱདྷིཀཝཱིརིཡཱདྷིཀཝིབྷཱགཝསེན ཝུཏྟཾ. ‘‘པཉྙཱདྷིཀཱནཉྷི སདྡྷཱ མནྡཱ ཧོཏི, པཉྙཱ ཏིཀྑཱ. སདྡྷཱདྷིཀཱནཾ པཉྙཱ མཛ྄ཛྷིམཱ ཧོཏི. ཝཱིརིཡཱདྷིཀཱནཾ པཉྙཱ མནྡཱ, པཉྙཱནུབྷཱཝེན ཙ སམྨཱསམྦོདྷི ཨདྷིགནྟབྦཱ’’ཏི ཨཊྛཀཐཱཡཾ ཝུཏྟཾ. ཨཝིསེསེན པན ཝིམུཏྟིཔརིཔཱཙནཱིཡདྷམྨཱནཾ ཏིཀྑམཛ྄ཛྷིམམུདུབྷཱཝེན ཏཡོཔེཏེ བྷེདཱ ཡུཏྟཱཏི ཝདནྟི. ཏིཝིདྷཱ ཧི བོདྷིསཏྟཱ ཨབྷིནཱིཧཱརཀྑཎེ བྷཝནྟི ཨུགྒྷཊིཏཉྙུཝིཔཉྩིཏཉྙུནེཡྻབྷེདེན. ཏེསུ ¶ ཨུགྒྷཊིཏཉྙཱུ སམྨཱསམྦུདྡྷསྶ སམྨུཁཱ ཙཱཏུཔྤདིཀཾ གཱཐཾ སུཎནྟོ ཏཏིཡཔདེ ཨཔརིཡོསིཏེཡེཝ ཚཧི ཨབྷིཉྙཱཧི སཧ པཊིསམྦྷིདཱཧི ཨརཧཏྟཾ པཏྟུཾ སམཏྠཱུཔནིསྶཡོ ཧོཏི. དུཏིཡོ སཏྠུ སམྨུཁཱ ཨེཀཾ གཱཐཾ སུཎནྟོ ཨཔརིཡོསིཏེཡེཝ ཙཏུཏྠཔདེ ཚཧི ཨབྷིཉྙཱཧི ཨརཧཏྟཾ པཏྟུཾ སམཏྠཱུཔནིསྶཡོ ཧོཏི. ཨིཏརོ བྷགཝཏོ སམྨུཁཱ ཙཱཏུཔྤདིཀགཱཐཾ སུཏྭཱ པརིཡོསིཏཱཡ གཱཐཱཡ ཚཧི ཨབྷིཉྙཱཧི ཨརཧཏྟཾ པཏྟུཾ སམཏྠཱུཔནིསྶཡོ ཧོཏི. ཏཡོཔེཏེ ཝིནཱ ཀཱལབྷེདེན ཀཏཱབྷིནཱིཧཱརཱ ལདྡྷབྱཱཀརཎཱ པཱརམིཡོ པཱུརེནྟོ ཡཐཱཀྐམཾ ཡཐཱཝུཏྟབྷེདེན ཀཱལེན སམྨཱསམྦོདྷིཾ པཱཔུཎནྟི, ཏེསུ ཏེསུ པན ཀཱལབྷེདེསུ ཨཔརིཔུཎྞེསུ ཏེ ཏེ མཧཱསཏྟཱ དིཝསེ དིཝསེ ཝེསྶནྟརདཱནསདིསཾ དཱནཾ དེནྟཱཔི ཏདནུརཱུཔཾ སཱིལཱདིསེསཔཱརམིདྷམྨེ ཨཱཙིནནྟཱཔི ཨནྟརཱ བུདྡྷཱ བྷཝིསྶནྟཱིཏི ཨཀཱརཎམེཏཾ. ཀསྨཱ? ཉཱཎསྶ ཨཔརིཔཙྩནཏོ. པརིཙྪིནྣཀཱལནིཔྥཱདིཏཾ ཝིཡ ཧི སསྶཾ པརིཙྪིནྣཀཱལེ ནིཔྥཱདིཏཱ སམྨཱསམྦོདྷི ཏདནྟརཱ སབྦུསྶཱཧེན ཝཱཡམནྟེནཔི ན སཀྐཱ པཱཔུཎིཏུནྟི པཱརམིཔཱུརཱི ཡཐཱཝུཏྟཀཱལཝིསེསེན སམྤཛྫཏཱིཏི ཝེདིཏབྦཾ. སདྡྷིནྟི སམཱནཀཱལེ.

ཨསཧཱཡོཏི ནིཔྤརིཡཱཡཏོ ཝུཏྟཾ. སཧཨཡནཊྛོ ཧི སཧཱཡཊྛོ. པཊིཔཏྟིཝསེན བྷགཝཏཱ སཧ སམཾ ཨཡནཾ ནཱམ ཀསྶཙིཔི ནཏྠེཝ. ཧཏྠཱདིཨཝཡཝཏོ པཊི པཊི མིནིཏབྦཏོ པཊིམཱ ཝུཙྩཏི ཨཏྟབྷཱཝོ. སམཏྠོ ནཱམ ནཏྠཱིཏི དེཝོ ཝཱ མཱརོ ཝཱ བྲཧྨཱ ཝཱ ཀོཙི ནཏྠི. པཊིསམོཏི པཊིནིདྷིབྷཱཝེན སམོ. པཊིབྷཱགཾ དཱཏུནྟི ‘‘ཙཏྟཱརོ སཏིཔཊྛཱནཱ’’ཏིཨཱདིནཱ ཝུཏྟསྶ དྷམྨབྷཱགསྶ དྷམྨཀོཊྛཱསསྶ པཊིཔཀྑབྷཱུཏཾ ཀཏྭཱ བྷཱགཾ ཀོཊྛཱསཾ པཊིཝཙནཾ དཱཏུཾ སམཏྠོ ནཱམ ནཏྠི. ནཏྠི ཨེཏསྶ སཱིལཱདིགུཎེཧི པཊིབིམྦབྷཱུཏོ པུགྒལོཏི ཨཔྤཊིཔུགྒལོ. ཏེནཱཧ – ‘‘ཨཉྙོ ཀོཙཱི’’ཏིཨཱདི. ཏིསཧསྶིམཧཱསཧསྶཱིནཾ ཝིབྷཱགོ པརཏོ ཨཱཝི བྷཝིསྶཏི. སེསམེཏྠ སུཝིཉྙེཡྻམེཝ.

༡༧༥. ཚཊྛཱདཱིསུ ཏསྨིཾ པུགྒལེཏི སམྨཱསམྦུདྡྷེ. ཏནྟི པཉྙཱཙཀྑུ. པཱཏུབྷཱུཏམེཝ ཧོཏི ཏསྶ ¶ སཧསྶ ཨུཔྤཛྫནཏོ. ཨུཔྤཏྟཱིཏི ཨུཔྤཛྫནཾ. ནིཔྥཏྟཱིཏི པརིཝུདྡྷི. ཀཱིཝརཱུཔསྶཱཏི ཀཱིདིསསྶ. སཱཝཀཝིསཡེཝ ཧཏྠགཏཾ པཉྙཱཙཀྑུ ནཱམ དྭིནྣཾ ཨགྒསཱཝཀཱནཾཡེཝཱཏི ཨཱཧ – ‘‘སཱརིཔུཏྟཏྠེརསྶཱ’’ཏིཨཱདི. སམཱདྷིཔཉྙཱཏི སམཱདྷིསཧགཏཱ པཉྙཱ. ‘‘སམཱདྷིསཾཝཏྟནིཀཱ ¶ ཁིཔྤནིསནྟིཨཱདིཝིསེསཱཝཧཱ པཉྙཱ’’ཏི ཀེཙི. ཨཱལོཀོཏི པཉྙཱཨཱལོཀོ ཨེཝ. ཏཐཱ ཨོབྷཱསོ. ཏཱིཎིཔཱིཏི ཏཱིཎིཔི སུཏྟཱནི. ལོཀིཡལོཀུཏྟརམིསྶཀཱནཱིཏི པུབྦབྷཱགཔཉྙཱཡ ཨདྷིཔྤེཏཏྟཱ ཝུཏྟཾ.

ཨུཏྟམདྷམྨཱནནྟི ཨཏྟནོ ཨུཏྟརིཏརསྶ ཨབྷཱཝེན སེཊྛདྷམྨཱནཾ. དཊྛབྦཏོ དསྶནཾ, བྷགཝཏོ རཱུཔཀཱཡོ. ཏཏྠཔི ཝིསེསཏོ རཱུཔཱཡཏནཾ. ཏེནཱཧ – ‘‘ཙཀྑུཝིཉྙཱཎེན དཊྛུཾ ལབྷཏཱི’’ཏི. ནཏྠི ཨིཏོ ཨུཏྟརནྟི ཨནུཏྟརཾ, ཏདེཝ ཨནུཏྟརིཡཾ, དསྶནཉྩ ཏཾ ཨནུཏྟརིཡཉྩཱཏི དསྶནཱནུཏྟརིཡཾ. སེསཔདེསུཔི ཨེསེཝ ནཡོ. ཨཡཾ པན པདཝིསེསོ – སུཡྻཏཱིཏི སཝནཾ, བྷགཝཏོ ཝཙནཾ. ལབྦྷཏཱིཏི ལཱབྷོ, བྷགཝཏི སདྡྷཱ. སིཀྑིཏབྦཏོ སིཀྑཱ. སཱིལསམཱདྷིཔཉྙཱཔརིཙརཎཾ པཱརིཙརིཡཱ, ཨུཔཊྛཱནཾ. ཨནུསྶརཎཾ ཨནུསྶཏི, སཏྠུ གུཎཱནུསྶརཎཾ. ཨིམེསནྟི ཡཐཱཝུཏྟཱནཾ ཚནྣཾ ཨནུཏྟརིཡཱནཾ. པཱཏུབྷཱཝོ ཧོཏཱིཏི ཏཐཱགཏསྶ པཱཏུབྷཱཝཱ ཏཔྤཊིབདྡྷཏྟཱ ཏབྦིསཡཏྟཱ ཙ པཱཏུབྷཱཝོ ཧོཏི. ‘‘དསྶནཱནུཏྟརིཡ’’ནྟི ཙ སདེཝཀེ ལོཀེ ཨུཏྟརིཏརསྶ བྷགཝཏོ རཱུཔསྶ ན དསྶནམཏྟཾ ཨདྷིཔྤེཏཾ, ཨཐ ཁོ ཏསྶ རཱུཔདསྶནམུཁེན ཨཝེཙྩཔྤསཱདེན བུདྡྷགུཎེ ཨོཀཔྤེཏྭཱ ཨོགཱཧེཏྭཱ དསྶནཾ དཊྛབྦཾ. ཏེནཱཧ – ‘‘ཨཱཡསྨཱ ཧཱི’’ཏིཨཱདི. ཨིདམྤི དསྶནཱནུཏྟརིཡནྟི པུབྦེ ཝུཏྟཏོ ནིབྦིསེསཏྟཱ ཝུཏྟཾ. དསབལཾ དསྶནཱཡ ལབྷིཏྭཱཏི ཨཱནནྡཏྠེརོ ཝིཡ པསཱདབྷཏྟིམེཏྟཱཔུབྦཀཾ དསབལཾ དསྶནཱཡ ལབྷིཏྭཱ. དསྶནཾ ཝཌྜྷེཏྭཱཏི དསྶནམུཁེན པཝཏྟཾ ཝིཔསྶནཱཙཱརཾ ཝཌྜྷེཏྭཱ. དསྶནམུཁེན ཡཱཝ ཨནུལོམཉཱཎཾ ཝིཔསྶནཱཙཱརཾ ཝཌྜྷེཏྭཱ ཏདནནྟརཾ ཨཊྛམཀམཧཱབྷཱུམིཾ ཨོཀྐམནྟོ དསྶནཾ སོཏཱཔཏྟིམགྒཾ པཱཔེཏི ནཱམ. ཨིདྷ པརཏོ པཝཏྟཾ དསྶནཾ དསྶནམེཝ ནཱམ, མཱུལདསྶནཾ པན སཙྩདསྶནསྶཔི ཀཱརཎབྷཱཝཏོ དསྶནཱནུཏྟརིཡཾ ནཱམ. ཨེས ནཡོ སེསཱནུཏྟརིཡེསུཔི.

དསབལེ སདྡྷཾ པཊིལབྷཏཱིཏི སམྨཱསམྦུདྡྷེ བྷགཝཏི སདྡྷཾ པཊིལབྷཏི. ཏིསྶོ སིཀྑཱ སིཀྑིཏྭཱཏི ཏིསྶོ པུབྦབྷཱགསིཀྑཱ སིཀྑིཏྭཱ. པརིཙརཏཱིཏི ཨུཔཊྛཱནཾ ཀརོཏི. ‘‘ཨིཏིཔི སོ བྷགཝཱ’’ཏིཨཱདིནཱ བུདྡྷཱནུསྶཏིཝསེན ཨནུསྶཏིཛ྄ཛྷཱནཾ ཨུཔྤཱདེཏྭཱ ཏཾ པདཊྛཱནཾ ཀཏྭཱ ཝིཔསྶནཾ ཝཌྜྷེནྟོ ‘‘ཨནུསྶཏིཾ ཝཌྜྷེཏྭཱ’’ཏི ཝུཏྟོ.

སཙྪིཀིརིཡཱ ¶ ཧོཏཱིཏི པཙྩཀྑཀརཎཾ ཧོཏི. མགྒཀྑཎེ ཧི ལབྦྷམཱནཱ པཊིསམྦྷིདཱ ཕལཀྑཎེ ¶ སཙྪིཀཏཱ ནཱམ ཧོཏི ཏཏོ པརཾ ཨཏྠཱདཱིསུ ཡཐིཙྪིཏཾ ཝིནིཡོགཀྑམབྷཱཝཏོ. ཙཏསྶོཏི གཎནཔརིཙྪེདོ. པཊིསམྦྷིདཱཏི པབྷེདཱ. ཀསྶ པན པབྷེདཱཏི? ‘‘ཨཏྠེ ཉཱཎཾ ཨཏྠཔཊིསམྦྷིདཱ’’ཏིཨཱདིཝཙནཏོ (ཝིབྷ. ༧༡༨-༧༢༡) ཉཱཎསྶེཏཱ པབྷེདཱ. ཏསྨཱ ཙཏསྶོ པཊིསམྦྷིདཱཏི ཙཏྟཱརོ ཉཱཎཔྤབྷེདཱཏི ཨཏྠོ. ཨཏྠཔཊིསམྦྷིདཱཏི ཨཏྠེ པཊིསམྦྷིདཱ, ཨཏྠཔབྷེདསྶ སལཀྑཎཝིབྷཱཝནཝཝཏྠཱནཀརཎསམཏྠཾ ཨཏྠེ པབྷེདགཏཾ ཉཱཎནྟི ཨཏྠོ. ཏཐཱ དྷམྨཔབྷེདསྶ སལཀྑཎཝིབྷཱཝནཝཝཏྠཱནཀརཎསམཏྠཾ དྷམྨེ པབྷེདགཏཾ ཉཱཎཾ དྷམྨཔཊིསམྦྷིདཱ. ནིརུཏྟིཔབྷེདསྶ སལཀྑཎཝིབྷཱཝནཝཝཏྠཱནཀརཎསམཏྠཾ ནིརུཏྟཱབྷིལཱཔེ པབྷེདགཏཾ ཉཱཎཾ ནིརུཏྟིཔཊིསམྦྷིདཱ. པཊིབྷཱནཔབྷེདསྶ སལཀྑཎཝིབྷཱཝནཝཝཏྠཱནཀརཎསམཏྠཾ པཊིབྷཱནེ པབྷེདགཏཾ ཉཱཎཾ པཊིབྷཱནཔཊིསམྦྷིདཱ.

ཨཏྠེསུ ཉཱཎནྟིཨཱདཱིསུ ཨཏྠོཏི སངྑེཔཏོ ཧེཏུཕལཾ. ཏཉྷི ཧེཏུཝསེན ཨརཎཱིཡཾ གནྟབྦཾ པཏྟབྦཾ, ཏསྨཱ ‘‘ཨཏྠོ’’ཏི ཝུཙྩཏི. པབྷེདཏོ པན ཡཾ ཀིཉྩི པཙྩཡུཔྤནྣཾ, ནིབྦཱནཾ, བྷཱསིཏཏྠོ, ཝིཔཱཀོ, ཀིརིཡཱཏི ཨིམེ པཉྩ དྷམྨཱ ‘‘ཨཏྠོ’’ཏི ཝེདིཏབྦཱ. ཏཾ ཨཏྠཾ པཙྩཝེཀྑནྟསྶ ཏསྨིཾ པབྷེདགཏཾ ཉཱཎཾ ཨཏྠཔཊིསམྦྷིདཱ. དྷམྨོཏི སངྑེཔཏོ པཙྩཡོ. སོ ཧི ཡསྨཱ ཏནྟི དཧཏི ཝིདཧཏི པཝཏྟེཏི ཙེཝ པཱཔེཏི ཙ ཋཔེཏི ཙ, ཏསྨཱ ‘‘དྷམྨོ’’ཏི ཝུཙྩཏི. པབྷེདཏོ པན ཡོ ཀོཙི ཕལནིབྦཏྟཀོ ཧེཏུ ཨརིཡམགྒོ བྷཱསིཏཾ ཀུསལཾ ཨཀུསལནྟི པཉྩཝིདྷོཏི ཝེདིཏབྦོ, ཏཾ དྷམྨཾ པཙྩཝེཀྑནྟསྶ ཏསྨིཾ དྷམྨེ པབྷེདགཏཾ ཉཱཎཾ དྷམྨཔཊིསམྦྷིདཱ.

ཨཏྠདྷམྨནིརུཏྟཱབྷིལཱཔེ ཉཱཎནྟི ཏསྨིཾ ཨཏྠེ ཙ དྷམྨེ ཙ སབྷཱཝནིརུཏྟིསདྡཾ ཨཱརམྨཎཾ ཀཏྭཱ པཙྩཝེཀྑནྟསྶ ཏསྨིཾ སབྷཱཝནིརུཏྟིཨབྷིལཱཔེ པབྷེདགཏཾ ཉཱཎཾ. ཨེཝམཡཾ ནིརུཏྟིཔཊིསམྦྷིདཱ སདྡཱརམྨཎཱ ནཱམ ཛཱཏཱ, ན པཉྙཏྟིཨཱརམྨཎཱ. ཀསྨཱ? ཡསྨཱ སདྡཾ སུཏྭཱ ‘‘ཨཡཾ སབྷཱཝནིརུཏྟི, ཨཡཾ ན སབྷཱཝནིརུཏྟཱི’’ཏི པཛཱནཱཏི. པཊིསམྦྷིདཱཔཏྟོ ཧི ‘‘ཕསྶོ’’ཏི ཝུཏྟེ ‘‘ཨཡཾ སབྷཱཝནིརུཏྟཱི’’ཏི ཛཱནཱཏི, ‘‘ཕསྶཱ’’ཏི ཝཱ ‘‘ཕསྶ’’ནྟི ཝཱ ཝུཏྟེ ‘‘ཨཡཾ ན སབྷཱཝནིརུཏྟཱི’’ཏི ཛཱནཱཏི. ཝེདནཱདཱིསུཔི ཨེསེཝ ནཡོ. ཨཡཾ པནེས ¶ ནཱམཱཁྱཱཏོཔསགྒཱབྱཡཔདམྤི ཛཱནཱཏིཡེཝ སབྷཱཝནིརུཏྟིཡཱ ཡཱཐཱཝཏོ ཛཱནནཏོ. ཉཱཎེསུ ཉཱཎནྟི སབྦཏྠཀཉཱཎཾ ཨཱརམྨཎཾ ཀཏྭཱ པཙྩཝེཀྑནྟསྶ པབྷེདགཏཾ ཉཱཎཾ.

ཨིམཱ པན ཙཏསྶོ པཊིསམྦྷིདཱ སེཀྑབྷཱུམིཡཾ ཨསེཀྑབྷཱུམིཡནྟི དྭཱིསུ ཋཱནེསུ པབྷེདཾ གཙྪནྟི. ཨདྷིགམོ པརིཡཏྟི སཝནཾ པརིཔུཙྪཱ པུབྦཡོགོཏི ཨིམེཧི པཉྩཧི ཀཱརཎེཧི ཝིསདཱ ¶ ཧོནྟི. ཨདྷིགམོ ནཱམ སཙྩཔྤཊིཝེདྷོ. པརིཡཏྟི ནཱམ བུདྡྷཝཙནཾ. ཏཉྷི གཎྷནྟསྶ པཊིསམྦྷིདཱ ཝིསདཱ ཧོནྟི. སཝནཾ ནཱམ དྷམྨསྶཝནཾ. སཀྐཙྩཾ དྷམྨཾ སུཎནྟསྶཔི ཧི པཊིསམྦྷིདཱ ཝིསདཱ ཧོནྟི. པརིཔུཙྪཱ ནཱམ ཨཊྛཀཐཱ. ཨུགྒཧིཏཔཱལི༹ཡཱ ཨཏྠཾ ཀཐེནྟསྶཔི ཧི པཊིསམྦྷིདཱ ཝིསདཱ ཧོནྟི. པུབྦཡོགོ ནཱམ པུབྦཡོགཱཝཙརཏཱ. ཧརཎཔཙྩཱཧརཎནཡེན པཊིཔཱཀཊཀམྨཊྛཱནསྶཔི པཊིསམྦྷིདཱ ཝིསདཱ ཧོནྟཱིཏི. ལོཀིཡལོཀུཏྟརཱ ཝཱཏི ཨེཏྠ ཏིསྶོ པཊིསམྦྷིདཱ ལོཀིཡཱ, ཨཏྠཔཊིསམྦྷིདཱ སིཡཱ ལོཀིཡཱ, སིཡཱ ལོཀུཏྟརཱཏི ཨེཝཾ ཝིབྷཛིཏྭཱ ཨཏྠོ ཝེདིཏབྦོ.

བུདྡྷུཔྤཱདེཡེཝཱཏི ཨཝདྷཱརཎེན བུདྡྷུཔྤཱདེ ཨེཝ ལབྦྷནཏོ, ཨབུདྡྷུཔྤཱདེ ཨལབྦྷནཏོ ཨནཉྙསཱདྷཱརཎོ པཊིཝེདྷོ ཨདྷིཔྤེཏོ. ཨེཝཉྩ ཀཏྭཱ ‘‘མཧཏོ ཙཀྑུསྶཱ’’ཏིཨཱདཱིསུ པཉྙཱམཧཏྟཱདིཀམྤི ཨནཉྙསཱདྷཱརཎམེཝ ཨདྷིཔྤེཏནྟི དཊྛབྦཾ. ཏཐཱ ཝིཛྫཱཝིམུཏྟིཕལསཙྪིཀིརིཡཱདཡོཔི པརེསཾ ཏབྦྷཱཝཱཝཧཱ དཊྛབྦཱ. ཡཱ ཀཱཙི དྷཱཏུཡོ ལོཀིཡཱ ལོཀུཏྟརཱ ཝཱ, སབྦཱ ཏཱ ཨིམཱཧེཝ སངྒཧིཏཱ, ཨེཏྠེཝ ཨནྟོགདྷཱཏི ཝུཏྟཾ – ‘‘ཨིམཱཝ ཨཊྛཱརས དྷཱཏུཡོ ནཱནཱསབྷཱཝཏོ ནཱནཱདྷཱཏུཡོ’’ཏི. སྭཱཡམཏྠོ ཨནེཀདྷཱཏུནཱནཱདྷཱཏུཉཱཎཝིབྷངྒེན (ཝིབྷ. ༧༥༡) དཱིཔེཏབྦོ. ‘‘སཙྪིཀིརིཡཱ’’ཏི ཝུཏྟཏྟཱ ‘‘ཝིཛྫཱཏི ཕལེ ཉཱཎ’’ནྟི ཝུཏྟཾ.

༡༨༧. ཡསྨཱ ཙཀྐཏི ཨཔརཱཔརཾ པརིཝཏྟཏཱིཏི ཙཀྐཾ, ཏསྨཱ ཨིརིཡཱཔཐཱཔི ཨཔརཱཔརཾ པརིཝཏྟནཊྛེན ཙཀྐསདིསཏྟཱ ཙཀྐནྟི ཝུཏྟཱ, ཏཐཱ པཏིརཱུཔདེསཝཱསཱདིསམྤཏྟིཡོ. ཏཏོ པཊྛཱཡ དྷམྨཙཀྐཾ ཨབྷིནཱིཧརཏི ནཱམཱཏི ཨེཏྠ ཏདཱ མཧཱསཏྟོ ཨཏྟཱནཾ ཨབྷིནཱིཧཱརཡོགཾ ཀརོནྟོ ‘‘དྷམྨཙཀྐཾ ཨབྷིནཱིཧརཏི ནཱམཱ’’ཏི ཝུཏྟོ ཏཏོ པཊྛཱཡ དྷམྨཙཀྐཱབྷིནཱིཧཱརཝིབནྡྷཀརདྷམྨཱནུཔྤཛྫནཏོ. ཨབྷིནཱིཧཊཾ ནཱམཱཏི ཨེཏྠཔི ཨཡམེཝ ¶ ནཡོ. ཨརཧཏྟམགྒཾ པཊིཝིཛ྄ཛྷནྟོཔི དྷམྨཙཀྐཾ ཨུཔྤཱདེཏིཡེཝ ནཱམ ཏདཏྠཾ ཉཱཎཾ པརིཔཱཙེཏཱིཏི ཀཏྭཱ. ཨརཧཏྟཕལཀྑཎེ དྷམྨཙཀྐཾ ཨུཔྤཱདིཏཾ ནཱམ ཏསྨིཾ ཁཎེ དྷམྨཙཀྐསྶ ཨུཔྤཱདནཱཡ ཀཱཏབྦཀིཙྩསྶ ཀསྶཙི ཨབྷཱཝཱ. པཊིཝེདྷཉཱཎཉྷི ཨིདྷ ‘‘དྷམྨཙཀྐ’’ནྟི ཨདྷིཔྤེཏཾ. ཨིདཱནི དེསནཱཉཱཎཝསེན དྷམྨཙཀྐཾ དསྶེཏུཾ – ‘‘ཀདཱ པཝཏྟེཏི ནཱམཱ’’ཏིཨཱདིམཱཧ. ན ཀེཝལཾ ཐེརསྶེཝ, ཨཐ ཁོ སབྦེསམྤི སཱསནིཀཱནཾ དྷམྨཀཐཱ བྷགཝཏོ དྷམྨདེསནཱ ཙཏུནྣཾ ཨརིཡསཙྩཱནཾ ཙཏུནྣཉྩ ཨེཀཏྟཱདིནཡཱནཾ ཨཝིརཱདྷནཏོཏི དསྶེཏུཾ – ‘‘ཡོ ཧི ཀོཙི བྷིཀྑུ ཝཱ’’ཏིཨཱདི ཨཱརདྡྷཾ. སེསཾ སུཝིཉྙེཡྻམེཝ.

ཨེཀཔུགྒལཝགྒཝཎྞནཱ ནིཊྛིཏཱ.

༡༤. ཨེཏདགྒཝགྒོ

(༡༤) ༡. པཋམཨེཏདགྒཝགྒོ

ཨེཏདགྒཔདཝཎྞནཱ

༡༨༨. ཨེཏདགྒེསུ ¶ པཋམཝགྒསྶ པཋམེ ཨཱདིམྷི དིསྶཏཱིཏི ཨེཏྠ ཨགྒསདྡོཏི ཨཱནེཏྭཱ ཡོཛེཏབྦཾ. ཨཛྫཏགྒེཏི ཨཛྫདིཝསཾ ཨཱདིཾ ཀཏྭཱཏི ཨཏྠོ. ཨངྒུལགྒེནཱཏི ཨངྒུལིཀོཊིཡཱ. ཨམྦིལགྒནྟི ཨམྦིལཀོཊྛཱསོ. ཀོཊིབྷཱུཏཱཏི པརམཀོཊིབྷཱུཏཱ ཏསྨིཾ ཋཱནེ ཏཱདིསཱནཾ ཨཉྙེསཾ ཨབྷཱཝཏོ. ཏཏོ ཨེཝ སེཊྛབྷཱུཏཱཏིཔི ཨགྒཱ. ཨེཏདགྒསནྣིཀྑེཔོཏི ཨེཏདགྒེ ཋཔནཾ ཨཊྛུཔྤཏྟིཨཱདཱིཧི ཙཏཱུཧིཔི ཀཱརཎེཧི. མཧཱཔཉྙཏཱཡ ཐེརེན ཨེཏདགྒཊྛཱནསྶ ལདྡྷབྷཱཝཾ ཝིཏྠཱརཏོ དསྶེཏུཾ – ‘‘ཀཐ’’ནྟིཨཱདིམཱཧ. དྭེ པདནྟརཱནཱིཏི ཀཎྜམྦམཱུལེ ཡུགནྡྷརཔབྦཏེཏི དྭཱིསུ ཋཱནེསུ དྭེ པདཱནི དསྶེཏྭཱ. མུཎྜཔཱིཋཀནྟི ཡཾ སཏྟངྒཾ པཉྩངྒཾ ཝཱ ན ཧོཏི, ཀེཝལཾ མུཎྜཀཔཱིཋཾ, ཏཾ སནྡྷཱཡེཏཾ ཝུཏྟཾ. ཨཝཏྠརིཏྭཱ ནིསཱིདཱིཏི བུདྡྷཱནུབྷཱཝེན ཨཛ྄ཛྷོཏྠརིཏྭཱ ནིསཱིདི. ཏེནཱཧ – ‘‘ཨེཝཾ ནིསཱིདནྟོ’’ཏིཨཱདི. ཀཱཡསཀྑིཾ ཀཏྭཱཏི ནཱམཀཱཡེན དེསནཱཡ སམྤཊིཙྪནཝསེན སཀྑིབྷཱུཏཾ ཀཏྭཱ. ཀུསལཱ དྷམྨཱ ཨཀུསལཱ དྷམྨཱ ཨབྱཱཀཏཱ དྷམྨཱཏི ཨིཏི-སདྡོ ཨཱདྱཏྠོ, ཏེན སབྦཾ ཨབྷིདྷམྨདེསནཾ སངྒཎྷཱཏི.

པཱཊིཧཱརིཡཊྛཱནེཏི ཡམཀཔཱཊིཧཱརིཡསྶ ཀཏཊྛཱནེ. པསྶཐཱཏི ཏེསཾ བཧུབྷཱཝཾ སནྡྷཱཡ ཝུཏྟཾ. ཨསྶཱཏི མནུསྶསམཱུཧསྶ ཨེཀབྷཱཝཾ. ཨཱཀཔྤནྟི ¶ ཨཱཀཱརཾ. མཧཱཛནོཏི སདེཝཀེ ལོཀེ སབྦོ མཧཱཛནོ. ཡཐཱ ནིརཡདསྶནཾ སཾཝེགཛནནཏྠཾ, ཨེཝཾ དེཝལོཀདསྶནམྤི སཾཝེགཛནནཏྠམེཝ ‘‘ཨནུཔུབྦིཀཐཱཡཾ སགྒཀཐཱ ཝིཡ ཨེཝཾ སབྦསམྤཏྟིསམུཔེཏོཔི སགྒོ ཨནིཙྩོ ཨདྡྷུཝོ ཙཝནདྷམྨོ’’ཏི. སཛྫེཏྭཱཏི སམཔཎྞཱསཱཡ མུཙྪནཱཧི ཡཐཱ ཀཱམེན ནིཝཱདེཏུཾ སཀྐཱ, ཨེཝཾ སཛྫེཏྭཱ.

པུཐུཛྫནཔཉྩཀཾ པཉྷནྟི པུཐུཛྫནཔཉྷཾ ཨཱདིཾ ཀཏྭཱ པཝཏྟིཏཾ ཁཱིཎཱསཝཔཉྷཔརིཡནྟཾ པཉྷཔཉྩཀཾ. པཋམཾ…པེ… པུཙྪཱིཏི པུཐུཛྫནཝིསཡེ པཉྷཾ པུཙྪི. པཊིསམྦྷིདཱ ཡཐཱབྷིནཱིཧཱརཾ ¶ ཡཐཱསཀཾ ཝིཔསྶནཱབྷིནཱིཧཱརེན པཋམབྷཱུམིཡཱདཡོ ཝིཡ པཝཏྟིཏཝིསཡཱཏི ཝུཏྟཾ – ‘‘ཏེ ཨཏྟནོ ཨཏྟནོ པཊིསམྦྷིདཱཝིསཡེ ཋཏྭཱ ཀཐཡིཾསཱུ’’ཏི. བུདྡྷཝིསཡེ པཉྷཾ པུཙྪཱིཏི –

‘‘ཡེ ཙ སངྑཱཏདྷམྨཱསེ, ཡེ ཙ སེཁཱ པུཐཱུ ཨིདྷ;

ཏེསཾ མེ ནིཔཀོ ཨིརིཡཾ, པུཊྛོ པབྲཱུཧི མཱརིསཱ’’ཏི. (སུ. ནི. ༡༠༤༤) –

ཨིདཾ པཉྷཾ པུཙྪི. ཏཏྠ སངྑཱཏདྷམྨཱཏི སངྑཱཏཱ ཉཱཏཱ ཙཏུསཙྩདྷམྨཱ, ཡེ ཙ སངྑཱཏདྷམྨཱ ཙཏཱུཧི མགྒེཧི པཊིཝིདྡྷཙཏུསཙྩདྷམྨཱཏི ཨཏྠོ. ཨིམིནཱ ཨསེཀྑཱ ཀཐིཏཱ. པུཐུ-སདྡོ ཨུབྷཡཏྠཔི ཡོཛེཏབྦོ ‘‘ཡེ པུཐཱུ སངྑཱཏདྷམྨཱ, ཡེ ཙ པུཐཱུ སེཁཱ’’ཏི. ཏེསནྟི ཏེསཾ དྭིནྣཾ སེཀྑཱསེཀྑཔུགྒལཱནཾ མེ པུཊྛོཏི ཡོཛེཏབྦཾ, མཡཱ པུཊྛོཏི ཨཏྠོ. ཨིརིཡནྟི སེཀྑཱསེཀྑབྷཱུམིཡཱ ཨཱགམནཔྤཊིཔདཾ. ཨིརིཡཏི གཙྪཏི སེཀྑབྷཱུམིཾ ཨསེཀྑབྷཱུམིཉྩ ཨེཏཱཡཱཏི ཨིརིཡཱ, ཏཾ ཏེསཾ ཨིརིཡཾ ཨཱགམནཔྤཊིཔདཾ མཡཱ པུཊྛོ པབྲཱུཧི ཀཐེཧཱིཏི ཨཏྠོ. ཨེཝཾ བྷགཝཱ བུདྡྷཝིསཡེ པཉྷཾ པུཙྪིཏྭཱ ‘‘ཨིམསྶ ནུ ཁོ, སཱརིཔུཏྟ, སཾཁིཏྟེན བྷཱསིཏསྶ ཀཐཾ ཝིཏྠཱརེན ཨཏྠོ དཊྛབྦོ’’ཏི ཨཱཧ. ཐེརོ པཉྷཾ ཨོལོཀེཏྭཱ ‘‘སཏྠཱ མཾ སེཀྑཱསེཀྑཱནཾ བྷིཀྑཱུནཾ ཨཱགམནཔྤཊིཔདཾ པུཙྪཏཱི’’ཏི པཉྷེ ནིཀྐངྑོ ཧུཏྭཱ ‘‘ཨཱགམནཔྤཊིཔདཱ ནཱམ ཁནྡྷཱདིཝསེན བཧཱུཧིཔི མུཁེཧི སཀྐཱ ཀཐེཏུཾ, ཀཏརཱཀཱརེན ནུ ཁོ ཀཐེནྟོ སཏྠུ ཨཛ྄ཛྷཱསཡཾ གཎྷིཏུཾ སཀྑིསྶཱམཱི’’ཏི ཨཛ྄ཛྷཱསཡེ ཀངྑི, ཏཾ སནྡྷཱཡེཏཾ ཝུཏྟཾ – ‘‘དྷམྨསེནཱཔཏི…པེ… ན སཀྐོཏཱི’’ཏི. པུཙྪིཏཔཉྷཾ ཝིསྶཛྫེཏུཾ པཊིབྷཱནེ ཨསཏི དིསཱཝིལོཀནཾ སཏྟཱནཾ སབྷཱཝོཏི དསྶེནྟོ, ‘‘པུརཏྠིམ…པེ... ནཱསཀྑཱི’’ཏི ཨཱཧ. ཏཏྠ པཉྷུཔྤཏྟིཊྛཱནནྟི པཉྷུཔྤཏྟིཀཱརཎཾ.

ཐེརསྶ ¶ ཀིལམནབྷཱཝཾ ཛཱནིཏྭཱཏི ‘‘སཱརིཔུཏྟོ པཉྷེ ནིཀྐངྑོ, ཨཛ྄ཛྷཱསཡེ མེ ཀངྑམཱནོ ཀིལམཏཱི’’ཏི ཐེརསྶ ཀིལམནབྷཱཝཾ ཉཏྭཱ. ཙཏུམཧཱབྷཱུཏིཀཀཱཡཔརིགྒཧནྟི ཨེཏེན ཁནྡྷམུཁེན ནཱམརཱུཔཔརིགྒཧོ ཝུཏྟོ. ‘‘བྷཱུཏམིདནྟི, སཱརིཔུཏྟ, སམནུཔསྶསཱི’’ཏི ཧི ཝདནྟེན བྷགཝཏཱ ཁནྡྷཝསེན ནཱམརཱུཔཔརིགྒཧོ དསྶིཏོ. ཨེཝཾ ཀིརསྶ བྷགཝཏོ ཨཧོསི ‘‘སཱརིཔུཏྟོ མཡཱ ནཡེ ཨདིནྣེ ཀཐེཏུཾ ན སཀྑིསྶཏི, དིནྣེ པན ནཡེ མམཛ྄ཛྷཱསཡཾ གཧེཏྭཱ ཁནྡྷཝསེན ཀཐེསྶཏཱི’’ཏི. ཐེརསྶ སཧ ནཡདཱནེན སོ པཉྷོ ནཡསཏེན ནཡསཧསྶེན ཨུཔཊྛཱསི. ཏེནཱཧ – ‘‘ཨཉྙཱཏཾ བྷགཝཱ, ཨཉྙཱཏཾ སུགཏཱ’’ཏི.

ཨརཱུཔཱཝཙརེ པཊིསནྡྷི ནཱམ ན ཧོཏཱིཏི བོདྷིསམྦྷཱརསམྦྷརཎསྶ ཨནོཀཱསབྷཱཝཏོ ཝུཏྟཾ. ཏེནཱཧ – ‘‘ཨབྷབྦཊྛཱནཏྟཱ’’ཏི, ལདྡྷབྱཱཀརཎཱནཾ བོདྷིསཏྟཱནཾ ཨུཔྤཏྟིཡཱ ཨབྷབྦདེསཏྟཱཏི ཨཏྠོ ¶ . རཱུཔཱཝཙརེ ནིབྦཏྟཱིཏི ཀམྨཝསིཏཱསམྦྷཝཏོ ཨརཱུཔཱཝཙརེ ཨནིབྦཏྟིཏྭཱ རཱུཔཱཝཙརེ ནིབྦཏྟི.

པརོསཧསྶནྟིཨཱདིནཱ པརོསཧསྶཛཱཏཀཾ དསྶེཏི. ཏཏྠ པརོསཧསྶམྤཱིཏི ཨཏིརེཀསཧསྶམྤི. སམཱགཏཱནནྟི སནྣིཔཏིཏཱནཾ བྷཱསིཏསྶ ཨཏྠཾ ཛཱནིཏུཾ ཨསཀྐོནྟཱནཾ བཱལཱནཾ. ཀནྡེཡྻུཾ ཏེ ཝསྶསཏཾ ཨཔཉྙཱཏི ཏེ ཨེཝཾ སམཱགཏཱ ཨཔཉྙཱ ཨིམེ བཱལཏྟཱ སསཱ ཝིཡ ཝསྶསཏམྤི ཝསྶསཧསྶམྤི རོདེཡྻུཾ པརིདེཝེཡྻུཾ. རོདམཱནཱཔི པན ཨཏྠཾ ཝཱ ཀཱརཎཾ ཝཱ ནེཝ ཛཱནེཡྻུནྟི དཱིཔེཏི. ཨེཀོཝ སེཡྻོ པུརིསོ སཔཉྙོཏི ཨེཝརཱུཔཱནཾ བཱལཱནཾ པརོསཧསྶཏོཔི ཨེཀོ པཎྜིཏཔུརིསོཝ སེཡྻོ ཝརཏརོཏི ཨཏྠོ. ཀཱིདིསོ སཔཉྙོཏི ཨཱཧ – ‘‘ཡོ བྷཱསིཏསྶ ཝིཛཱནཱཏི ཨཏྠ’’ནྟི, ཨཡཾ ཛེཊྛནྟེཝཱསིཀོ ཝིཡ ཡོ བྷཱསིཏསྶ ཨཏྠཾ ཛཱནཱཏི, སོ ཏཱདིསོ སཔཉྙོ ཝརཏརོཏི ཨཏྠོ. དུཏིཡེ པརོསཏཛཱཏཀེ ཛྷཱཡེཡྻུནྟི ཡཱཐཱཝཏོ ཨཏྠཾ ཛཱནིཏུཾ སམཱཧིཏཱ ཧུཏྭཱ ཙིནྟེཡྻུཾ. སེསམེཏྠ ཝུཏྟནཡམེཝ.

ཏཏིཡཛཱཏཀེ ཡེ སཉྙིནོཏི ཋཔེཏྭཱ ནེཝསཉྙཱནཱསཉྙཱཡཏནལཱབྷིནོ ཨཝསེསཙིཏྟཀསཏྟེ དསྶེཏི. ཏེཔི དུགྒཏཱཏི ཏསྶཱ ནེཝསཉྙཱནཱསཉྙཱཡཏནསམཱཔཏྟིཡཱ ཨལཱབྷཏོ ཏེཔི དུགྒཏཱ དུཀྑཾ ཨུཔགཏཱ སཉྙཱིབྷཝེ. ‘‘སཉྙཱ རོགོ སཉྙཱ གཎྜོ སཉྙཱ སལླ’’ནྟི ¶ (མ. ནི. ༣.༢༤) ཧི ཏེ སཉྙཱཡ ཨཱདཱིནཝདསྶིནོ. ཡེཔི ཨསཉྙིནོཏི ཨསཉྙཱིབྷཝེ ནིབྦཏྟེ ཨཙིཏྟཀསཏྟེ དསྶེཏི. ཏེཔི ཨིམིསྶཱཡེཝ སམཱཔཏྟིཡཱ ཨལཱབྷཏོ དུགྒཏཱཡེཝ. ཛྷཱནསུཁཾ ཨནངྒཎཾ ནིདྡོསཾ ཡཐཱཝུཏྟདོསཱབྷཱཝཏོ. བལཝཙིཏྟེཀགྒཏཱསབྷཱཝེནཔི ཏཾ ཨནངྒཎཾ ནཱམ ཛཱཏཾ. ནེཝསཉྙཱི ནཱསཉྙཱིཏི ཨཱཧཱཏི ཨཏཱིཏེ ཀིར བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨརཉྙཱཡཏནེ ཀཱལཾ ཀརོནྟོ ཨནྟེཝཱསིཀེཧི པུཊྛོ ‘‘ནེཝསཉྙཱི ནཱསཉྙཱི’’ཏི ཨཱཧ. པུརིམཛཱཏཀེ ཝུཏྟནཡེནེཝ ཏཱཔསཱ ཛེཊྛནྟེཝཱསིཀསྶ ཀཐཾ ན གཎྷིཾསུ. བོདྷིསཏྟོ ཨཱབྷསྶརཏོ ཨཱགནྟྭཱ ཨཱཀཱསེ ཋཏྭཱ ཨིམཾ གཱཐམཱཧ. ཏེན ཝུཏྟཾ – ‘‘སེསཾ ཝུཏྟནཡེནེཝ ཝེདིཏབྦ’’ནྟི.

ཙཏུཏྠཛཱཏཀེ (ཛཱ. ༡.༡.༡༣༥) ཙནྡསྶ ཝིཡ ཨཱབྷཱ ཨེཏསྶཱཏི ཙནྡཱབྷཾ, ཨོདཱཏཀསིཎཾ. སཱུརིཡཱབྷནྟི སཱུརིཡསྶ ཝིཡ ཨཱབྷཱ ཨེཏསྶཱཏི སཱུརིཡཱབྷཾ, པཱིཏཀསིཎཾ. ཡོདྷ པཉྙཱཡ གཱདྷཏཱིཏི ཡོ པུགྒལོ ཨིདྷ སཏྟལོཀེ ཨིདཾ ཀསིཎདྭཡཾ པཉྙཱཡ གཱདྷཏི, ཨཱརམྨཎཾ ཀཏྭཱ ཨནུཔྤཝིསཏི, ཏཏྠ ཝཱ པཏིཊྛཧཏི. ཨཝིཏཀྐེན དུཏིཡཛ྄ཛྷཱནེན ཨཱབྷསྶརཱུཔགོ ཧོཏཱིཏི སོ པུགྒལོ ཏཐཱ ཀཏྭཱ པཊིལདྡྷེན དུཏིཡེན ཛྷཱནེན ཨཱབྷསྶརབྲཧྨལོཀཱུཔགོ ཧོཏི. སེསཾ པུརིམནཡེནེཝ ¶ ཝེདིཏབྦནྟི ཨིམིནཱ ཨིམཾ དསྶེཏི (ཛཱ. ཨཊྛ. ༡.༡.༡༣༥ ཙནྡཱབྷཛཱཏཀཝཎྞནཱ) – ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨརཉྙཱཡཏནེ ཀཱལཾ ཀརོནྟོ ཨནྟེཝཱསིཀེཧི པུཙྪིཏོ ‘‘ཙནྡཱབྷཾ སཱུརིཡཱབྷ’’ནྟི ཝཏྭཱ ཨཱབྷསྶརེ ནིབྦཏྟོ. ཏཱཔསཱ ཛེཊྛནྟེཝཱསིཀསྶ ན སདྡཧིཾསུ. བོདྷིསཏྟོ ཨཱགནྟྭཱ ཨཱཀཱསེ ཋིཏོ ཨིམཾ གཱཐཾ ཨབྷཱསི.

པཉྩམཛཱཏཀེ ཨཱསཱིསེཐེཝཱཏི ཨཱསཱཙྪེདཾ ཨཀཏྭཱ ཨཏྟནོ ཀམྨེསུ ཨཱསཾ ཀརེཡྻེཝ. ན ནིབྦིནྡེཡྻཱཏི ན ནིབྦེདཾ ཨུཔྤཱདེཡྻ, ན ཨུཀྐཎྛེཡྻཱཏི ཨཏྠོ. ཝོཏི ནིཔཱཏམཏྟཾ. ཡཐཱ ཨིཙྪིནྟི ཨཧཉྷི སཊྛིཧཏྠཱ ནརཀཱ ཨུཊྛཱནཾ ཨིཙྪིཾ, སོམྷི ཏཐེཝ ཛཱཏོ, ཏཏོ ཨུཊྛིཏོཡེཝཱཏི དཱིཔེཏི.

ཨཏཱིཏེ (ཛཱ. ཨཊྛ. ༤.༡༣.སརབྷམིགཛཱཏཀཝཎྞནཱ) ཀིར བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ སརབྷམིགཡོནིཡཾ ནིབྦཏྟིཏྭཱ ཨརཉྙེ པཊིཝསཏི. རཱཛཱ མིགཝིཏྟཀོ ཨཧོསི ¶ ཐཱམསམྤནྣོ. ཨེཀདིཝསཾ གནྟྭཱ ཨམཙྩེ ཨཱཧ – ‘‘ཡསྶ པསྶེན མིགོ པལཱཡཏི, ཏེནེཝ སོ དཱཏབྦོ’’ཏི. ཨཐེཀདིཝསཾ སརབྷམིགོ ཨུཊྛཱཡ རཉྙོ ཋིཏཊྛཱནེན པལཱཡི. ཨཐ ནཾ ཨམཙྩཱ ཨུཔྤཎྜེསུཾ. རཱཛཱ ཙིནྟེསི – ‘‘ཨིམེ མཾ པརིཧཱསནྟི, མམ པམཱཎཾ ན ཛཱནནྟཱི’’ཏི གཱལ༹ྷཾ ནིཝཱསེཏྭཱ པཏྟིཀོཝ ཁགྒཾ ཨཱདཱཡ ‘‘སརབྷཾ གཎྷིསྶཱམཱི’’ཏི ཝེགེན པཀྑནྡི. ཨཐ ནཾ དིསྭཱ ཏཱིཎི ཡོཛནཱནི ཨནུབནྡྷི. སརབྷོ ཨརཉྙཾ པཱཝིསི. རཱཛཱཔི པཱཝིསིཡེཝ. ཏཏྠ སརབྷམིགསྶ གམནམགྒེ སཊྛིཧཏྠམཏྟོ མཧཱཔཱུཏིཔཱཏནརཀཨཱཝཱཊོ ཨཏྠི, སོ ཏིཾསཧཏྠམཏྟཾ ཨུདཀེན པུཎྞོ ཏིཎེཧི ཙ པཊིཙྪནྣོ. སརབྷོ ཨུདཀགནྡྷཾ གྷཱཡིཏྭཱཝ ཨཱཝཱཊབྷཱཝཾ ཉཏྭཱ ཐོཀཾ ཨོསཀྐིཏྭཱ གཏོ. རཱཛཱ པན ཨུཛུཀམེཝ ཨཱགཙྪནྟོ ཏསྨིཾ པཏི.

སརབྷོ ཏསྶ པདསདྡཾ ཨསུཎནྟོ ནིཝཏྟིཏྭཱ ཏཾ ཨཔསྶནྟོ ‘‘ནརཀཨཱཝཱཊེ པཏིཏོ བྷཝིསྶཏཱི’’ཏི ཉཏྭཱ ཨཱགནྟྭཱ ཨོལོཀེནྟོ ཏཾ གམྦྷཱིརེ ཨུདཀེ ཨཔྤཏིཊྛེ ཀིལམནྟཾ དིསྭཱ ཏེན ཀཏཱཔརཱདྷཾ ཧདཡེ ཨཀཏྭཱ སཉྫཱཏཀཱརུཉྙོ ‘‘མཱ མཡི པསྶནྟེ ཝརཱཀོ ནསྶཏུ, ཨིམམྷཱ ཏཾ དུཀྑཱ མོཙེསྶཱམཱི’’ཏི ཨཱཝཱཊཏཱིརེ ཋིཏོ ‘‘མཱ བྷཱཡི, མཧཱརཱཛ, ཨཧཾ ཏཾ དུཀྑཱ མོཙེསྶཱམཱི’’ཏི ཝཏྭཱ ཨཏྟནོ པིཡཔུཏྟཾ ཨུདྡྷརིཏུཾ ཨུསྶཱཧཾ ཀརོནྟོ ཝིཡ ཏསྶུདྡྷརཎཏྠཱཡ སིལཱཡ ཡོགྒཾ ཀཏྭཱ ‘‘ཝིཛ྄ཛྷིསྶཱམཱི’’ཏི ཨཱགཏཾ རཱཛཱནཾ སཊྛིཧཏྠཱ ནརཀཱ ཨུདྡྷརིཏྭཱ ཨསྶཱསེཏྭཱ པིཊྛིཾ ཨཱརོཔེཏྭཱ ཨརཉྙཱ ནཱིཧརིཏྭཱ སེནཱཡ ཨཝིདཱུརེ ཨོཏཱརེཏྭཱ ཨོཝཱདམསྶ དཏྭཱ ¶ པཉྩསུ སཱིལེསུ པཏིཊྛཱཔེསི. རཱཛཱ སེནངྒཔརིཝུཏོ ནགརཾ གནྟྭཱ ‘‘ཨིཏོ པཊྛཱཡ སཀལརཊྛཝཱསིནོ པཉྩ སཱིལཱནི རཀྑནྟཱུ’’ཏི དྷམྨབྷེརིཾ ཙརཱཔེསི. མཧཱསཏྟེན པན ཨཏྟནོ ཀཏགུཎཾ ཀསྶཙི ཨཀཐེཏྭཱ སཱཡཾ ནཱནགྒརསབྷོཛནཾ བྷུཉྫིཏྭཱ ཨལངྐཏསཡནེ སཡིཏྭཱ པཙྩཱུསཀཱལེ མཧཱསཏྟསྶ གུཎཾ སརིཏྭཱ ཨུཊྛཱཡ སཡནཔིཊྛེ པལླངྐེན ནིསཱིདིཏྭཱ པཱིཏིཔུཎྞེན ཧདཡེན ཨུདཱནཾ ཨུདཱནེནྟོ ‘‘ཨཱསཱིསེཐེཝ པུརིསོ’’ཏིཨཱདིནཱ ཨིམཱ ཚ གཱཐཱ ཨབྷཱསི.

ཏཏྠ ཨཧིཏཱ ཧིཏཱ ཙཱཏི དུཀྑཕསྶཱ སུཁཕསྶཱ ཙ, མརཎཕསྶཱ, ཛཱིཝིཏཕསྶཱཏིཔི ཨཏྠོ. སཏྟཱནཉྷི མརཎཕསྶོ ཨཧིཏོ, ཛཱིཝིཏཕསྶོ ཧིཏོ. ཏེསཾ ཨཙིནྟིཏོ མརཎཕསྶོ ཨཱགཙྪཏཱིཏི དསྶེཏི ¶ . ཨཙིནྟིཏམྤཱིཏི མཡཱ ‘‘ཨཱཝཱཊེ པཏིསྶཱམཱི’’ཏི ན ཙིནྟིཏཾ, ‘‘སརབྷཾ མཱརེསྶཱམཱི’’ཏི ཙིནྟིཏཾ. ཨིདཱནི པན མེ ཙིནྟིཏཾ ནཊྛཾ, ཨཙིནྟིཏམེཝ ཛཱཏནྟི ཨུདཱནཝསེན ཝདཏི. བྷོགཱཏི ཡསཔརིཝཱརཱ, ཨེཏེ ཙིནྟཱམཡཱ ན ཧོནྟི. ཏསྨཱ ཉཱཎཝཏཱ ཝཱིརིཡམེཝ ཀཱཏབྦནྟི ཝདཏི. ཝཱིརིཡཝཏོ ཧི ཨཙིནྟིཏམྤི ཧོཏིཡེཝ.

ཏསྶེཏཾ ཨུདཱནཾ ཨུདཱནེནྟསྶེཝ ཨརུཎཾ ཨུཊྛཧི. པུརོཧིཏོ པཱཏོཝ སུཁསེཡྻཔུཙྪནཏྠཾ ཨཱགནྟྭཱ དྭཱརེ ཋིཏོ ཏསྶ ཨུདཱནགཱིཏསདྡཾ སུཏྭཱ ཙིནྟེསི – ‘‘རཱཛཱ ཧིཡྻོ མིགཝཾ ཨགམཱསི, ཏཏྠ སརབྷམིགཾ ཝིདྡྷོ བྷཝིསྶཏི, ཏེན མཉྙེ ཨུདཱནཾ ཨུདཱནེཏཱི’’ཏི. ཨེཝཾ བྲཱཧྨཎསྶ རཉྙོ པརིཔུཎྞབྱཉྫནཾ ཨུདཱནཾ སུཏྭཱ སུམཛྫིཏེ ཨཱདཱསེ མུཁཾ ཨོལོཀེནྟསྶ ཚཱཡཱ ཝིཡ རཉྙཱ ཙ སརབྷེན ཙ ཀཏཀཱརཎཾ པཱཀཊཾ ཨཧོསི, སོ ནཁགྒེན དྭཱརཾ ཨཱཀོཊེསི. རཱཛཱ ‘‘ཀོ ཨེསོ’’ཏི པུཙྪི. ཨཧཾ, དེཝ, པུརོཧིཏོཏི. ཨཐསྶ དྭཱརཾ ཝིཝརིཏྭཱ ‘‘ཨིཏོ ཨེཧཱཙརིཡཱ’’ཏི ཨཱཧ. སོ པཝིསིཏྭཱ རཱཛཱནཾ ཛཡཱཔེཏྭཱ ཨེཀམནྟཾ ཋིཏོ ‘‘ཨཧཾ, མཧཱརཱཛ, ཏཡཱ ཨརཉྙེ ཀཏཀཱརཎཾ ཛཱནཱམི, ཏྭཾ ཨེཀཾ སརབྷམིགཾ ཨནུབནྡྷནྟོ ནརཀེ པཏིཏོ, ཨཐ ནཾ སོ སརབྷོ སིལཱཡ ཡོགྒཾ ཀཏྭཱ ནརཀཏོ ཨུདྡྷརི, སོ ཏྭཾ ཏསྶ གུཎཾ སརིཏྭཱ ཨུདཱནཾ ཨུདཱནེསཱི’’ཏི ཝཏྭཱ ‘‘སརབྷཾ གིརིདུགྒསྨི’’ནྟིཨཱདིནཱ དྭེ གཱཐཱ ཨབྷཱསི.

ཏཏྠ ཨནུསརཱིཏི ཨནུབནྡྷི. ཝིཀྐནྟནྟི ཨུདྡྷརཎཏྠཱཡ ཀཏཔརཀྐམཾ. ཨནུཛཱིཝསཱིཏི ཨུཔཛཱིཝསི, ཏསྶཱནུབྷཱཝེན ཏཡཱ ཛཱིཝིཏཾ ལདྡྷནྟི ཨཏྠོ. སམུདྡྷརཱིཏི ཨུདྡྷརཎཾ ཨཀཱསི. སིལཱཡ ཡོགྒཾ སརབྷོ ཀརིཏྭཱཏི སིལཱཡ སོཔཱནསདིསཱཡ ནརཀཏོ ཨུདྡྷརཎཡོགྒཏཾ ཀརིཏྭཱ. ཨལཱིནཙིཏྟནྟི སངྐོཙཾ ཨཔྤཏྟཙིཏྟཾ. ཏ མིགཾ ཝདེསཱིཏི སུཝཎྞསརབྷམིགཾ ཨིདྷ སིརིསཡནེ ནིཔནྣོ ཝཎྞེསི. ཏཾ སུཏྭཱ རཱཛཱ, ‘‘ཨཡཾ མཡཱ སདྡྷིཾ ན མིགཝཾ ཨཱགཏོ, སབྦཉྩ པཝཏྟིཾ ཛཱནཱཏི, ཀཐཾ ནུ ཁོ ཛཱནཱཏི, པུཙྪིསྶཱམི ན’’ནྟི ཙིནྟེཏྭཱ – ‘‘ཀིཾ ཏྭཾ ནུ ཏཏྠེཝཱ’’ཏི ནཝམགཱཐམཱཧ ¶ . ཏཏྠ བྷིཾསརཱུཔནྟི ཀིཾ ནུ ཏེ ཉཱཎཾ བལཝཛཱཏིཀཾ, ཏེནེཏཾ ཛཱནཱསཱིཏི ཝདཏི. བྲཱཧྨཎོ ‘‘ནཱཧཾ སབྦཉྙུབུདྡྷོ, བྱཉྫནཾ ཨམཀྑེཏྭཱ ཏཡཱ ཀཐིཏགཱཐཱཡ པན མཡ྄ཧཾ ཨཏྠོ ཨུཔཊྛཱཏཱི’’ཏི དཱིཔེནྟོ ‘‘ན ཙེཝཧ’’ནྟི དསམགཱཐམཱཧ ¶ . ཏཏྠ སུབྷཱསིཏཱནནྟི བྱཉྫནཾ ཨམཀྑེཏྭཱ སུཊྛུ བྷཱསིཏཱནཾ. ཨཏྠཾ ཏདཱནེནྟཱིཏི ཡོ ཏེསཾ ཨཏྠོ, ཏཾ ཨཱནེནྟི ཨུཔདྷཱརེནྟཱིཏི ཨཏྠོ. ཏདཱ པུརོཧིཏོ དྷམྨསེནཱཔཏི ཨཧོསི. ཏེནེཝཱཧ – ‘‘ཨཏཱིཏེཔཱི’’ཏིཨཱདི. སེསཾ ཨུཏྟཱནཏྠམེཝ.

ཨཉྙཱསིཀོཎྜཉྙཏྠེརཝཏྠུ

ཨཉྙཱསིཀོཎྜཉྙཏྠེརཱདཡོཏིཨཱདཱིསུ པན ཡཱཐཱཝསརསགུཎཝསེནཱཏི ཡཐཱསབྷཱཝགུཎཝསེན. པབྦཛྫཱཝསེན པཊིཝེདྷཝསེན སུཙིརཾ སུནིཔུཎཾ རཏྟིནྡིཝཔརིཙྪེདཛཱནནཝསེན ཙ རཏྟཉྙུཏཱ ཝེདིཏབྦཱཏི ཏཾ དསྶེནྟོ ‘‘ཋཔེཏྭཱ ཧི སམྨཱསམྦུདྡྷ’’ནྟིཨཱདིམཱཧ. པཱཀཊོཝ ཧོཏཱིཏི སཏིཔཉྙཱཝེཔུལླཔྤཏྟིཀོ པཱཀཊོ ཝིབྷཱུཏོ ཧོཏི. ཨཉྙཱསིཀོཎྜཉྙོཏི སཱཝཀེསུ སབྦཔཋམཾ ཙཏྟཱརི ཨརིཡསཙྩཱནི ཉཱཏཀོཎྜཉྙོ. སབྦེསུཔི ཨེཏདགྒེསཱུཏི སབྦེསུཔི ཨེཏདགྒསུཏྟེསུ, སབྦེསུ ཝཱ ཨེཏདགྒཊྛཔནེསུ.

དྷུརཔཏྟཱནཱིཏི པཏྟཱནཾ པམུཁབྷཱུཏཱནི བཱཧིརཔཏྟཱནི. ནཝུཏིཧཏྠཱནཱིཏི མཛ྄ཛྷིམཔུརིསསྶ ཧཏྠེན ནཝུཏིརཏནཱནི. པདུམེནེཝ ཏཾ ཏཾ པདེསཾ ཨུཏྟརཏི ཨཏིཀྐམཏཱིཏི པདུམུཏྟརོ, བྷགཝཱ. གནྡྷདཱམམཱལཱདཱམཱདཱིཧཱིཏི ཨཱདིསདྡེན པཏྟདཱམཱདིཾ སངྒཎྷཱཏི. ཏཏྠ གནྡྷདཱམེཧི ཀཏམཱལཱ གནྡྷདཱམཾ. ལཝངྒཏཀྐོལཛཱཏིཔུཔྥཱདཱིཧི ཀཏམཱལཱ མཱལཱདཱམཾ. ཏམཱལཔཏྟཱདཱིཧི ཀཏམཱལཱ པཏྟདཱམཾ. ཝངྒཔཊྚེཏི ཝངྒདེསེ ཨུཔྤནྣགྷནསུཁུམཝཏྠེ. ཨུཏྟམསུཁུམཝཏྠནྟི ཀཱསིཀཝཏྠམཱཧ.

ཏེཔརིཝཊྚདྷམྨཙཀྐཔྤཝཏྟནསུཏྟནྟཔརིཡོསཱནེཏི ཨེཏྠ ‘‘ཨིདཾ དུཀྑཾ ཨརིཡསཙྩ’’ནྟིཨཱདིནཱ སཙྩཝསེན, ‘‘དུཀྑཾ ཨརིཡསཙྩཾ པརིཉྙེཡྻ’’ནྟིཨཱདིནཱ ཀིཙྩཝསེན, ‘‘དུཀྑཾ ཨརིཡསཙྩཾ པརིཉྙཱཏ’’ནྟིཨཱདིནཱ ཀཏཝསེན ཙ ཏཱིཧི ཨཱཀཱརེཧི པརིཝཊྚེཏྭཱ ཙཏུནྣཾ སཙྩཱནཾ དེསིཏཏྟཱ ཏཡོ པརིཝཊྚཱ ཨེཏསྶ ཨཏྠཱིཏི ཏིཔརིཝཊྚཾ, ཏིཔརིཝཊྚམེཝ ཏེཔརིཝཊྚཾ, ཏེཔརིཝཊྚཉྩ ཏཾ དྷམྨཙཀྐཔྤཝཏྟནཉྩཱཏི ཏེཔརིཝཊྚདྷམྨཙཀྐཔྤཝཏྟནཾ, ཏདེཝ སུཏྟནྟཾ, ཏསྶ པརིཡོསཱནེཏི ཨཏྠོ.

སཱལིགབྦྷཾ ཕཱལེཏྭཱ ཨཱདཱཡཱཏི སཱལིགབྦྷཾ ཕཱལེཏྭཱ ཏཏྠ ལབྦྷམཱནཾ སཱལིཁཱིརརསཾ ཨཱདཱཡ. ཨནུཙྪཝིཀནྟི བུདྡྷཱནཾ ཨནུཙྪཝིཀཾ ཁཱིརཔཱཡསཾ པཙཱཔེམ. ཝེཎིཡོ པུརིསབྷཱཝཝསེན བནྡྷིཏྭཱ ¶ ཀལཱཔཀརཎེ ¶ ཀལཱཔགྒཾ. ཁལེ ཀལཱཔཱནཾ ཋཔནདིཝསེ ཁལགྒཾ. མདྡིཏྭཱ ཝཱིཧཱིནཾ རཱསིཀརཎདིཝསེ ཁལབྷཎྜགྒཾ. ཀོཊྛེསུ ཧི དྷཉྙསྶ པཀྑིཔནདིཝསེ ཀོཊྛགྒཾ.

དྭེ གཏིཡོཏི དྭེ ཨེཝ ནིཔྥཏྟིཡོ, དྭེ ནིཊྛཱཏི ཨཏྠོ. ཏསྨིཾ ཀུམཱརེ སབྦཉྙུཏཾ པཏྟེཏི ཀོཎྜཉྙམཱཎཝསྶེཝ ལདྡྷིཡཾ ཋཏྭཱ ཨིཏརེཔི ཚ ཛནཱ པུཏྟེ ཨནུསཱསིཾསུ. བོདྷིརུཀྑམཱུལེ པཱཙཱིནཔསྶཾ ཨཙལཊྛཱནཾ ནཱམ, ཡཾ ‘‘ཝཛིརཱསན’’ནྟིཔི ཝུཙྩཏི. མཧཏཾ མཧཏིཡོ ཝཧཏཱིཏི ‘‘པཱཙཱིནམུཁོ’’ཏི ཨཝཏྭཱ ‘‘པཱཙཱིནལོཀདྷཱཏུཨབྷིམུཁོ’’ཏི ཝུཏྟཾ. མཾསཙཀྑུཔི ལོཀནཱཐསྶ ཨཔྤཊིགྷཱཏཾ མཧཱཝིསཡཉྩཱཏི. ཙཏུརངྒསམནྣཱགཏནྟི ‘‘ཀཱམཾ ཏཙོ ཙ ནྷཱརུ ཙ, ཨཊྛི ཙ ཨཝསིསྶཏཱུ’’ཏིཨཱདིནཱ (མ. ནི. ༢.༡༨༤; སཾ. ནི. ༢.༢༢, ༢༣༧; ཨ. ནི. ༢.༥; མཧཱནི. ༡༩༦) ཝུཏྟཙཏུརངྒསམནྣཱགཏཾ.

ཨིདཾ པན སབྦམེཝཱཏི ‘‘ཀསྶ ནུ ཁོ ཨཧཾ པཋམཾ དྷམྨཾ དེསེསྶཱམཱི’’ཏིཨཱདིནཡཔྤཝཏྟཾ (མ. ནི. ༡.༢༨༤; ༢.༣༤༡; མཧཱཝ. ༡༠) སབྦམེཝ. པརིཝིཏཀྐམཏྟམེཝ ཏཐཱ ཨཏྠསིདྡྷིཡཱ ཨབྷཱཝཏོ. པུཔྥིཏཕལིཏཾ ཀཏྭཱཏི ཨབྷིཉྙཱཔཊིསམྦྷིདཱཧི སབྦཔཱལིཕུལླཾ, མགྒཕལེཧི སབྦསོ ཕལབྷཱརབྷརིཏཉྩ ཀརོནྟོ པུཔྥིཏཾ ཕལིཏཾ ཀཏྭཱ. ཨཔཀྐམིཏུཀཱམོ ཧུཏྭཱཏི དྭེཔི ཨགྒསཱཝཀེ ཨཏྟནོ ནིཔཙྩཀཱརཾ ཀརོནྟེ དིསྭཱ ཏེསཾ གུཎཱཏིརེཀཏཾ བཧུ མཉྙནྟོ བུདྡྷཱནཾ སནྟིཀཱ ཨཔཀྐམིཏུཀཱམོ ཧུཏྭཱ. ཏཏྠེཝཱཏི ཚདྡནྟདཧཏཱིརེཡེཝ.

སཱརིཔུཏྟ-མོགྒལླཱནཏྠེརཝཏྠུ

༡༨༩-༡༩༠. དུཏིཡཏཏིཡེསུ ཨིདྡྷིམནྟཱནནྟི ཨེཏྠ མནྟ-སདྡོ ཨཏིསཡཏྠཝིསཡོཏི ཐེརསྶ ཨཏིསཡིཀཨིདྡྷིཏཾ དསྶེཏུཾ – ‘‘ཨིདྡྷིཡཱ སམྤནྣཱན’’ནྟི ཝུཏྟཾ. སཧ པཾསཱུཧི ཀཱིལི༹ཾསཱུཏི སཧཔཾསུཀཱིལི༹ཏཱ. ཨིདྷལོཀཏྟབྷཱཝམེཝཱཏི དིཊྛདྷམྨིཀཨཏྟབྷཱཝམེཝ. སོལ༹ས པཉྙཱ པཊིཝིཛ྄ཛྷིཏྭཱ ཋིཏོཏི མཛ྄ཛྷིམནིཀཱཡེ ཨནུཔདསུཏྟནྟདེསནཱཡ ‘‘མཧཱཔཉྙོ, བྷིཀྑཝེ, སཱརིཔུཏྟོ, པུཐུཔཉྙོ, བྷིཀྑཝེ, སཱརིཔུཏྟོ, ཧཱསཔཉྙོ, བྷིཀྑཝེ, སཱརིཔུཏྟོ, ཛཝནཔཉྙོ, བྷིཀྑཝེ, སཱརིཔུཏྟོ, ཏིཀྑཔཉྙོ, བྷིཀྑཝེ, སཱརིཔུཏྟོ, ནིབྦེདྷིཀཔཉྙོ, བྷིཀྑཝེ, སཱརིཔུཏྟོ’’ཏི (མ. ནི. ༣.༩༣) ཨེཝམཱགཏཱ ¶ མཧཱཔཉྙཱདིཀཱ ཚ, ཏསྨིཾཡེཝ སུཏྟེ ཨཱགཏཱ ནཝཱནུཔུབྦཝིཧཱརསམཱཔཏྟིཔཉྙཱ, ཨརཧཏྟམགྒཔཉྙཱཏི ཨིམཱ སོལ༹སཝིདྷཱ པཉྙཱ པཊིཝིཛ྄ཛྷིཏྭཱ སཙྪིཀཏྭཱ ཋིཏོ.

པཉྷསཱཀཙྪནྟི ¶ པཉྷསྶ པུཙྪནཝསེན ཝིསྶཛྫནཝསེན ཙ སཱཀཙྪཾ ཀརོཏི. ཨཏྠིཀེཧི ཨུཔཉྙཱཏཾ མགྒནྟི ཨེཏཾ ཨནུབནྡྷནསྶ ཀཱརཎཝཙནཾ. ཨིདཉྷི ཝུཏྟཾ ཧོཏི – ཡཾནཱུནཱཧཾ ཨིམཾ བྷིཀྑུཾ པིཊྛིཏོ པིཊྛིཏོ ཨནུབནྡྷེཡྻཾ. ཀསྨཱ? ཡསྨཱ ཨིདཾ པིཊྛིཏོ པིཊྛིཏོ ཨནུབནྡྷནཾ ནཱམ ཨཏྠིཀེཧི ཨུཔཉྙཱཏཾ མགྒཾ, ཉཱཏོ ཙེཝ ཨུཔགཏོ ཙ མགྒོཏི ཨཏྠོ. ཨཐ ཝཱ ཨཏྠིཀེཧི ཨམྷེཧི མརཎེ སཏི ཨམཏེནཔི བྷཝིཏབྦནྟི ཨེཝཾ ཀེཝལཾ ཨཏྠཱིཏི ཨུཔཉྙཱཏཾ, ཨནུམཱནཉཱཎེན ཨུཔགནྟྭཱ ཉཱཏཾ ནིབྦཱནཾ ནཱམ ཨཏྠི, ཏཾ མགྒནྟོ པརིཡེསནྟོཏི ཨེཝམྤེཏྠ ཨཏྠོ དཊྛབྦོ.

ནེསཾ པརིསཱཡཱཏི དྭིནྣཾ ཨགྒསཱཝཀཱནཾ པརིཝཱརབྷཱུཏཔརིསཱཡ. དྭེ ཨགྒསཱཝཀེཏི སཱརིཔུཏྟམོགྒལླཱནེ དྭེ མཧཱནུབྷཱཝེ སཱཝཀེ. ཋཱནནྟརེཏི ཨགྒསཱཝཀཏྟསཉྙིཏེ ཋཱནནྟརེ ཋཔེསི. ཀསྨཱ པནེཏྠ ‘‘ཨགྒསཱཝཀེ’’ཏི ཨཝཏྭཱ ‘‘མཧཱསཱཝཀེ’’ཏི ཝུཏྟཾ. ཡདི ཨཉྙེཔི མཧཱཐེརཱ ཨབྷིཉྙཱཏཱདིགུཎཝིསེསཡོགེན ‘‘མཧཱསཱཝཀཱ’’ཏི ཝཏྟབྦཏཾ ལབྷནྟི, ཨིམེཡེཝ པན སཱཝཀེསུ ཨནཉྙསཱདྷཱརཎབྷཱུཏཱ ཝིསེསཏོ ‘‘མཧཱསཱཝཀཱ’’ཏི ཝཏྟབྦཱཏི དསྶནཏྠཾ ‘‘དྭེཔི མཧཱསཱཝཀེ’’ཏི ཝུཏྟཾ.

མཧཱཀསྶཔཏྠེརཝཏྠུ

༡༩༡. ཙཏུཏྠེ ཡསྨཱ དྷུཏཝཱདདྷུཏདྷམྨདྷུཏངྒཱནི དྷུཏམཱུལཀཱནི, ཏསྨཱ ‘‘དྷུཏོ ཝེདིཏབྦོ’’ཏི ཨཱརདྡྷཾ, ཏཏྠ ཀིལེསེ དྷུནི དྷུཏཝཱཏི དྷུཏོ, དྷུཏཀིལེསོ པུགྒལོ, ཀིལེསདྷུནནོ ཝཱ དྷམྨོ, ཀིལེསདྷུནནོ དྷམྨོཏི ཙ སཔུབྦབྷཱགོ ཨརིཡམགྒོ དཊྛབྦོ. ཏཾ དྷུཏསཉྙིཏཾ ཀིལེསདྷུནནདྷམྨཾ ཝདཏི, པརེ ཏཏྠ པཏིཊྛཱཔེཏཱིཏི དྷུཏཝཱདོ. ཙཏུཀྐཉྩེཏྠ སམྦྷཝཏཱིཏི ཏཾ དསྶེཏུཾ – ‘‘ཨེཏྠ པནཱ’’ཏིཨཱདི ཨཱརདྡྷཾ. ཏཡིདནྟི ནིཔཱཏོ, ཏསྶ སོ ཨཡནྟི ཨཏྠོ. དྷུཏབྷཱུཏསྶ དྷུཏབྷཱུཏཱ དྷམྨཱ དྷུཏདྷམྨཱ. ཨཔྤིཙྪཏཱ སནྟུཊྛིཏཱ ཧེཊྛཱ ཝུཏྟཱ ཨེཝ ¶ . ཀིལེསེ སམྨཱ ལིཁཏི ཏཙྪཏཱིཏི སལླེཁོ, ཀིལེསཛེགུཙྪཱི, ཏསྶ བྷཱཝོ སལླེཁཏཱ. དྭཱིཧིཔི ཀཱམེཧི ཝིཝིཙྩཏཱིཏི པཝིཝེཀོ, ཡོནིསོམནསིཀཱརབཧུལོ པུགྒལོ, ཏསྶ བྷཱཝོ པཝིཝེཀཏཱ. ཨིམིནཱ སརཱིརཊྛཔནམཏྟེན ཨཏྠཱིཏི ཨིདམཊྛི ཏྠ-ཀཱརསྶ ཊྛ-ཀཱརཾ ཀཏྭཱ, ཏསྶ བྷཱཝོ ཨིདམཊྛིཏཱ, ཨིམེཧི ཝཱ ཀུསལདྷམྨེཧི ཨཏྠི ཨིདམཊྛི, ཡེན ཉཱཎེན ‘‘པབྦཛིཏེན ནཱམ པཾསུཀཱུལིཀངྒཱདཱིསུ པཏིཊྛིཏེན བྷཝིཏབྦ’’ནྟི ཡཐཱནུསིཊྛཾ དྷུཏགུཎེ སམཱདིཡཏི ཙེཝ པརིཧརཏི ཙ, ཏཾ ཉཱཎཾ ཨིདམཊྛིཏཱ. ཏེནཱཧ – ‘‘ཨིདམཊྛིཏཱ ཉཱཎམེཝཱ’’ཏི. དྷུཏདྷམྨཱ ནཱམཱཏི དྷུཏངྒསེཝནཱཡ པཊིཔཀྑབྷཱུཏཱནཾ པཱཔདྷམྨཱནཾ དྷུནནཝསེན པཝཏྟིཡཱ དྷུཏོཏི ལདྡྷནཱམཱཡ དྷུཏངྒཙེཏནཱཡ ཨུཔཀཱརཀཱ དྷམྨཱཏི ཀཏྭཱ དྷུཏདྷམྨཱ ནཱམ ¶ . ཨནུཔཏནྟཱིཏི ཏདནྟོགདྷཱ ཏཔྤརིཡཱཔནྣཱ ཧོནྟི ཏདུབྷཡསྶེཝ པཝཏྟིཝིསེསབྷཱཝཏོ. པཊིཀྑེཔཝཏྠཱུསཱུཏི དྷུཏངྒསེཝནཱཡ པཊིཀྑིཔིཏབྦཝཏྠཱུསུ པཧཱཏབྦཝཏྠཱུསུ.

པཾསུཀཱུལིཀངྒཾ…པེ… ནེསཛྫིཀངྒནྟི ཨུདྡེསོཔི པེཡྻཱལནཡེན དསྶིཏོ. ཡདེཏྠ ཝཏྟབྦཾ, ཏཾ སབྦཾ ཝིསུདྡྷིམགྒེ (ཝིསུདྡྷི. ༡.༢༢ ཨཱདཡོ) ཝིཏྠཱརཏོ ཝུཏྟཾ. དྷུཏཝཱདགྒཧཎེནེཝ ཐེརསྶ དྷུཏབྷཱཝོཔི གཧིཏོ ཧོཏཱིཏི ‘‘དྷུཏཝཱདཱན’’ནྟེཝ ཝུཏྟཾ. ཨཡཾ མཧཱཏི ཨབྷིནཱིཧཱརཱདིམཧནྟཏཱཡཔི སཱསནསྶ ཨུཔཀཱརིཏཱཡཔི ཨཡཾ ཐེརོ མཧཱ, གུཎམཧནྟཏཱཡ པསཾསཱཝཙནམེཝ ཝཱ ཨེཏཾ ཐེརསྶ ཡདིདཾ མཧཱཀསྶཔོཏི ཡཐཱ ‘‘མཧཱམོགྒལླཱནོ’’ཏི.

སཏྠུ དྷམྨདེསནཱཡ ཝཏྠུཏྟཡེ སཉྫཱཏཔྤསཱདཏཱཡ ཨུཔཱསཀབྷཱཝེ ཋིཏཏྟཱ ཝུཏྟཾ – ‘‘ཨུཔོསཐངྒཱནི ཨདྷིཊྛཱཡཱ’’ཏིཨཱདི. ཨེཏསྶ ཨགྒབྷཱཝསྶཱཏི ཡོཛེཏབྦཾ. སཙྩཀཱརོཏི སཙྩབྷཱཝཱཝཧོ ཀཱརོ, ཨཝིསཾཝཱདནཝསེན ཝཱ ཏདཏྠསཱདྷནོཏི ཨཏྠོ. ཀོལཱཧལནྟི ཀུཏཱུཧལཝིཔྥཱརོ. སཏྠཱ སཏྟམེ སཏྟམེ སཾཝཙྪརེ དྷམྨཾ ཀཐེནྟོ སཏྟཱནཾ སཝནཡོགྒཾ ཀཱལཾ སལླཀྑེནྟོ དིཝཱ སཱཡནྷསམཡཾ ཀཐེཏི, རཏྟིཡཾ སཀལཡཱམཾ. ཏེནཱཧ – ‘‘བྲཱཧྨཎོ བྲཱཧྨཎེ ཨཱཧ – ‘བྷོཏི ཀིཾ རཏྟིཾ དྷམྨཾ སུཎིསྶསི དིཝཱ’’’ཏི. ཝིསྶཱསིཀོཏི ཝིསྶཱསིཀབྷཱཝོ. ‘‘ཏཏོ པཊྛཱཡ སོ’’ཏི ཝཱ པཱཋོ.

དྭེ ¶ ཨསངྑྱེཡྻཱནི པཱུརིཏཔཱརམིསྶཱཏི ཨིདཾ སཱ པརམྤརཱཡ སོཏཔཏིཏཾ ཨཏྠཾ གཧེཏྭཱ ཨཱཧ. ཨདིནྣཝིཔཱཀསྶཱཏི ཨཝིཔཀྐཝིཔཱཀསྶ. བྷདྡཀེ ཀཱལེཏི ཡུཏྟེ ཀཱལེ. ནཀྑཏྟནྟི ནཀྑཏྟེན ལཀྑིཏཾ ཚཎཾ. ཏསྨིཾ ཏསྨིཉྷི ནཀྑཏྟེ ཨནུབྷཝིཏབྦཚཎཱནི ནཀྑཏྟཱནི ནཱམ, ཨིཏརཱནི པན ཚཎཱནི ནཱམ. སམྨཱཔཏིཏདུཀྑཏོ ཝིམོཙནེན ཏཏོ ནིཡྻཱནཱཝཧཏཱཡ ཨིཙྪིཏཏྠསྶ ལབྷཱཔནཏོ ཙ ནིཡྻཱནིཀཾ. ཏེསནྟི སུཝཎྞཔདུམཱནཾ. ཨོལམྦཀཱཏི སུཝཎྞརཏནཝིཙིཏྟཱ རཏནདཱམཱ. པུཉྙནིཡཱམེནཱཏི པུཉྙཱནུབྷཱཝསིདྡྷེན ནིཡཱམེན. སྭསྶ བཱརཱཎསིརཛྫཾ དཱཏུཾ ཀཏོཀཱསོ. ཕུསྶརཐནྟི མངྒལརཐཾ. སེཏཙྪཏྟཨུཎྷཱིསཝཱལབཱིཛནིཁགྒམཎིཔཱདུཀཱནི པཉྩཝིདྷཾ རཱཛཀཀུདྷབྷཎྜནྟི ཝདནྟི. ཨིདྷ པན སེཏཙྪཏྟཾ ཝིསུཾ གཧིཏནྟི སཱིཧཱསནཾ པཉྩམཾ ཀཏྭཱ ཝདནྟི. པཱརུཔནཀཎྞནྟི པཱརུཔནཝཏྠསྶ དསནྟཾ. དིབྦཝཏྠདཱཡིཔུཉྙཱནུབྷཱཝཙོདིཏོ ‘‘ནནུ ཏཱཏཱ ཐཱུལ’’ནྟི ཨཱཧ. ཨཧོ ཏཔསྶཱིཏི ཨཧོ ཀཔཎོ ཨཧཾ རཱཛཱཏི ཨཏྠོ. བུདྡྷཱནཾ སདྡཧིཏྭཱཏི བུདྡྷཱནཾ སཱསནཾ སདྡཧིཏྭཱ. ཙངྐམནསཏཱནཱིཏི ཨིཏི-སདྡོ ཨཱདྱཏྠོ. ཏེན ཧི ཨགྒིསཱལཱདཱིནི པབྦཛིཏསཱརུཔྤཱནི ཋཱནཱནི སངྒཎྷཱཏི.

སཱདྷུཀཱིལི༹ཏནྟི ¶ ཨརིཡཱནཾ པརིནིབྦུཏཊྛཱནེ ཀཱཏབྦསཀྐཱརཾ ཝདཏི. ནཔྤམཛྫི, ནིརོགཱ ཨཡྻཱཏི པུཙྪིཏཱཀཱརདསྶནཾ. པརིནིབྦུཏཱ དེཝཱཏི དེཝཱི པཊིཝཙནཾ ཨདཱསི. པཊིཡཱདེཏྭཱཏི ནིཡྻཱཏེཏྭཱ. སམཎཀཔབྦཛྫནྟི སམིཏཔཱཔེཧི ཨརིཡེཧི ཨནུཊྛཱཏབྦཔབྦཛྫཾ. སོ ཧི རཱཛཱ པཙྩེཀབུདྡྷཱནཾ ཝེསསྶ དིཊྛཏྟཱ ‘‘ཨིདམེཝ བྷདྡཀ’’ནྟི ཏཱདིསཾཡེཝ ལིངྒཾ གཎྷི. ཏཏྠེཝཱཏི བྲཧྨལོཀེ ཨེཝ. ཝཱིསཏིམེ ཝསྶེ སམྤཏྟེཏི ཨཱཧརིཏྭཱ སམྦནྡྷོ. བྲཧྨལོཀཏོ ཙཝིཏྭཱ ནིབྦཏྟཏྟཱ, བྲཧྨཙརིཡཱདྷིཀཱརསྶ ཙ ཙིརཀཱལསམྦྷཱུཏཏྟཱ ‘‘ཨེཝརཱུཔཾ ཀཐཾ མཱ ཀཐེཐཱ’’ཏི ཨཱཧ. ཝཱིསཏི དྷརཎཱནི ནིཀྑནྟི ཝདནྟི, པཉྩཔལཾ ནིཀྑནྟི ཨཔརེ. ཨིཏྠཱཀརོཏི ཨིཏྠིརཏནསྶ ཨུཔྤཏྟིཊྛཱནཾ. ཨཡྻདྷཱིཏཱཏི ཨམྷཱཀཾ ཨཡྻསྶ དྷཱིཏཱ, བྷདྡཀཱཔིལཱནཱིཏི ཨཏྠོ. སམཱནཔཎྞནྟི སདིསཔཎྞཾ སདིསལེཁཾ ཀུམཱརསྶ ཀུམཱརིཀཱཡ ཙ ཡུཏྟཾ པཎྞལེཁཾ. ཏེ པུརིསཱ སམཱགཏཊྛཱནཏོ མགདྷརཊྛེ མཧཱཏིཏྠགཱམཾ མདྡརཊྛེ སཱགལནགརཉྩ ཨུདྡིསྶ ཨཔཀྐམནྟཱ ཨཉྙམཉྙཾ ཝིསྶཛྫནྟཱ ནཱམ ཧོནྟཱིཏི ‘‘ཨིཏོ ཙ ཨེཏྟོ ཙ པེསེསུ’’ནྟི ཝུཏྟཱ.

པུཔྥདཱམནྟི ཧཏྠིཧཏྠཔྤམཱཎཾ པུཔྥདཱམཾ. ཏཱནཱིཏི ཏཱནི ཨུབྷོཧི གནྠཱཔིཏཱནི དྭེ པུཔྥདཱམཱནི. ཏེཏི ཨུབྷོ བྷདྡཱ ཙེཝ པིཔྤལིཀུམཱརོ ཙ ¶ . ལོཀཱམིསེནཱཏི ཀཱམསྶཱདེན. ཨསཾསཊྛཱཏི ན སཾཡུཏྟཱ གྷཊེ ཛལནྟེན ཝིཡ པདཱིཔེན ཨཛ྄ཛྷཱསཡེ སམུཛྫལནྟེན ཝིམོཀྑབཱིཛེན སམུསྶཱཧིཏཙིཏྟཏྟཱ. ཡནྟབདྡྷཱནཱིཏི སསྶསམྤཱདནཏྠཾ ཏཏྠ ཏཏྠ དྭཱརཀཝཱཊཡོཛནཝསེན བདྡྷཱནི ནིཀྑམནཏུམྦཱནི. ཀམྨནྟོཏི ཀསིཀམྨཀརཎཊྛཱནཾ. དཱསིཀགཱམཱཏི དཱསཱནཾ ཝསནགཱམཱ. ཨོསཱརེཏྭཱཏི པཀྑིཔིཏྭཱ. ཨཱཀཔྤཀུཏྟཝསེནཱཏི ཨཱཀཱརཝསེན ཀིརིཡཱཝསེན. ཨནནུཙྪཝིཀནྟི པབྦཛིཏབྷཱཝསྶ ཨནནུརཱུཔཾ. ཏསྶ མཏྠཀེཏི དྭེདྷཱཔཐསྶ དྭིདྷཱབྷཱུཏཊྛཱནེ. ཨེཏེསཾ སངྒཧཾ ཀཱཏུཾ ཝཊྚཏཱིཏི ནིསཱིདཏཱིཏི སམྦནྡྷོ. སཱ པན ཏཏྠ སཏྠུ ནིསཛྫཱ ཨེདིསཱིཏི དསྶེཏུཾ – ‘‘ནིསཱིདནྟོ པནཱ’’ཏིཨཱདི ཝུཏྟཾ. ཏཏྠ ཡཱ བུདྡྷཱནཾ ཨཔརིམིཏཀཱལསམྦྷཱུཏཱཙིནྟེཡྻཱཔརིཉྙེཡྻཔུཉྙསམྦྷཱརཱུཔཙཡནིབྦཏྟཱ རཱུཔཔྤབྷཱཝབུདྡྷགུཎཝིཛྫོཏིཏཱ དྭཏྟིཾསམཧཱཔུརིསལཀྑཎཨསཱིཏིཨནུབྱཉྫནསམུཛྫལིཏཱ བྱཱམཔྤབྷཱཀེཏུམཱལཱལངྐཏཱ སབྷཱཝསིདྡྷིཏཱཡ ཨཀིཏྟིམཱ རཱུཔཀཱཡསིརཱི, ཏཾཡེཝ མཧཱཀསྶཔསྶ ཨདིཊྛཔུབྦཔྤསཱདསཾཝདྡྷནཏྠཾ ཨནིགྒཱུཧིཏྭཱ ནིསིནྣོ བྷགཝཱ ‘‘བུདྡྷཝེསཾ གཧེཏྭཱ…པེ… ནིསཱིདཱི’’ཏི ཝུཏྟོ. ཨསཱིཏིཧཏྠཔྤདེསཾ བྱཱཔེཏྭཱ པཝཏྟིཡཱ ཨསཱིཏིཧཏྠཱཏི ཝུཏྟཱ. སཏསཱཁོཏི བཧུསཱཁོ ཨནེཀསཱཁོ. སུཝཎྞཝཎྞོཝ ཨཧོསི ནིརནྟརཾ བུདྡྷརསྨཱིཧི སམནྟཏོ སམོཀིཎྞབྷཱཝཏོ.

ཏཱིསུ ཋཱནེསཱུཏི དཱུརཏོ ནཱཏིདཱུརེ ཨཱསནྣེཏི ཏཱིསུ ཋཱནེསུ. ཏཱིཧི ཨོཝཱདེཧཱིཏི ‘‘ཏསྨཱཏིཧ ཏེ, ཀསྶཔ, ཨེཝཾ སིཀྑིཏབྦཾ ‘ཏིབྦཾ མེ ཧིརོཏྟཔྤཾ པཙྩུཔཊྛིཏཾ བྷཝིསྶཏི ཐེརེསུ ནཝེསུ ¶ མཛ྄ཛྷིམེསཱུ’ཏི. ཨེཝཉྷི ཏེ, ཀསྶཔ, སིཀྑིཏབྦཾ. ཏསྨཱཏིཧ ཏེ, ཀསྶཔ, ཨེཝཾ སིཀྑིཏབྦཾ ‘ཡཾ ཀིཉྩི དྷམྨཾ སུཎིསྶཱམི ཀུསལཱུཔསཾཧིཏཾ, སབྦཾ ཏཾ ཨཊྛིཾ ཀཏྭཱ མནསི ཀརིཏྭཱ སབྦཾ ཙེཏསཱ སམནྣཱཧརིཏྭཱ ཨོཧིཏསོཏོ དྷམྨཾ སུཎིསྶཱམཱི’ཏི, ཨེཝཉྷི ཏེ, ཀསྶཔ, སིཀྑིཏབྦཾ. ཏསྨཱཏིཧ ཏེ, ཀསྶཔ, ཨེཝཾ སིཀྑིཏབྦཾ ‘སཱཏསཧགཏཱ ཙ མེ ཀཱཡགཏཱསཏི ན ཝིཛཧིསྶཏཱི’ཏི, ཨེཝཉྷི ཏེ, ཀསྶཔ, སིཀྑིཏབྦ’’ནྟི (སཾ. ནི. ༢.༡༥༤) ཨིམེཧི ཏཱིཧི ཨོཝཱདེཧི. ཨེཏྠ ཧི བྷགཝཱ པཋམཾ ཨོཝཱདཾ ཐེརསྶ བྲཱཧྨཎཛཱཏིཀཏྟཱ ཛཱཏིམཱནཔྤཧཱནཏྠམབྷཱསི, དུཏིཡཾ བཱཧུསཙྩཾ ནིསྶཱཡ ཨུཔྤཛྫནཀཨཧཾཀཱརཔྤཧཱནཏྠཾ, ཏཏིཡཾ ཨུཔདྷིསམྤཏྟིཾ ནིསྶཱཡ ཨུཔྤཛྫནཀཨཏྟསིནེཧཔྤཧཱནཏྠཾ ¶ . མུདུཀཱ ཁོ ཏྱཱཡནྟི མུདུཀཱ ཁོ ཏེ ཨཡཾ. ཀསྨཱ པན བྷགཝཱ ཨེཝམཱཧ? ཐེརེན སཧ ཙཱིཝརཾ པརིཝཏྟེཏུཀཱམཏཱཡ. ཀསྨཱ པརིཝཏྟེཏུཀཱམོ ཛཱཏོཏི? ཐེརཾ ཨཏྟནོ ཋཱནེ ཋཔེཏུཀཱམཏཱཡ. ཀིཾ སཱརིཔུཏྟམོགྒལླཱནཱ ནཏྠཱིཏི? ཨཏྠི, ཨེཝཾ པནསྶ ཨཧོསི ‘‘ཨིམེན ཙིརཾ ཋསྶནྟི, ཀསྶཔོ པན ཝཱིསཏིཝསྶསཏཱཡུཀོ, སོ མཡི པརིནིབྦུཏེ སཏྟཔཎྞིགུཧཱཡཾ ཝསིཏྭཱ དྷམྨཝིནཡསངྒཧཾ ཀཏྭཱ མམ སཱསནཾ པཉྩཝསྶསཧསྶཔརིམཱཎཀཱལཔྤཝཏྟནཀཾ ཀརིསྶཏཱིཏི ཨཏྟནོ ཋཱནེ ཋཔེསི. ཨེཝཾ བྷིཀྑཱུ ཀསྶཔསྶ སུསྶཱུསིཏབྦཾ མཉྙིསྶནྟཱི’’ཏི. ཏསྨཱ ཨེཝམཱཧ.

ཙནྡཱུཔམོཏི ཙནྡསདིསོ ཧུཏྭཱ. ཀིཾ པརིམཎྜལཏཱཡ? ནོ, ཨཔིཙ ཁོ ཡཐཱ ཙནྡོ གགནཏལཾ པཀྑནྡམཱནོ ན ཀེནཙི སདྡྷིཾ སནྠཝཾ ཝཱ སིནེཧཾ ཝཱ ཨཱལཡཾ ཝཱ ཀརོཏི, ན ཙ ན ཧོཏི མཧཱཛནསྶ པིཡོ མནཱཔོ, ཨཡམྤི ཨེཝཾ ཀེནཙི སདྡྷིཾ སནྠཝཱདཱིནཾ ཨཀརཎེན བཧུཛནསྶ པིཡོ མནཱཔོ ཙནྡཱུཔམོ ཧུཏྭཱ ཁཏྟིཡཀུལཱདཱིནི ཙཏྟཱརི ཀུལཱནི ཨུཔསངྐམཏཱིཏི ཨཏྠོ. ཨཔཀསྶེཝ ཀཱཡཾ ཨཔཀསྶ ཙིཏྟནྟི ཏེནེཝ སནྠཝཱདཱིནཾ ཨཀརཎེན ཀཱཡཉྩ ཙིཏྟཉྩ ཨཔཀཌྜྷིཏྭཱ, ཨཔནེཏྭཱཏི ཨཏྠོ. ནིཙྩཾ ནཝོཏི ནིཙྩནཝཀོཝ, ཨཱགནྟུཀསདིསོ ཧུཏྭཱཏི ཨཏྠོ. ཨཱགནྟུཀོ ཧི པཊིཔཱཊིཡཱ སམྤཏྟགེཧཾ པཝིསིཏྭཱ སཙེ ནཾ གྷརསཱམིཀཱ དིསྭཱ ‘‘ཨམྷཱཀམྤི པུཏྟབྷཱཏརོ ཝིཔྤཝཱསཾ གནྟྭཱ ཨེཝཾ ཝིཙརིཾསཱུ’’ཏི ཨནུཀམྤམཱནཱ ནིསཱིདཱཔེཏྭཱ བྷོཛེནྟི, བྷུཏྟམཏྟོཡེཝ ‘‘ཏུམྷཱཀཾ བྷཱཛནཾ གཎྷཐཱ’’ཏི ཨུཊྛཱཡ པཀྐམཏི, ན ཏེཧི སདྡྷིཾ སནྠཝཾ ཝཱ ཀརོཏི, ཀིཙྩཀརཎཱིཡཱནི ཝཱ སཾཝིདཧཏི, ཨེཝམཡམྤི པཊིཔཱཊིཡཱ སམྤཏྟཾ གྷརཾ པཝིསིཏྭཱ ཡཾ ཨིརིཡཱཔཐེ པསནྣཱ མནུསྶཱ དེནྟི, ཏཾ གཧེཏྭཱ ཚིནྣསནྠཝོ ཏེསཾ ཀིཙྩཀརཎཱིཡེ ཨབྱཱཝཊོ ཧུཏྭཱ ནིཀྑམཏཱིཏི དཱིཔེཏི.

ཨཔྤགབྦྷོཏི ནཔྤགབྦྷོ, ཨཊྛཊྛཱནེན ཀཱཡཔཱགབྦྷིཡེན, ཙཏུཊྛཱནེན ཝཙཱིཔཱགབྦྷིཡེན, ཨནེཀཊྛཱནེན མནོཔཱགབྦྷིཡེན ཙ ཝིརཧིཏོཏི ཨཏྠོ. ཨཊྛཊྛཱནཾ ཀཱཡཔཱགབྦྷིཡཾ ནཱམ སངྒྷགཎཔུགྒལབྷོཛནསཱལཛནྟཱགྷརནཧཱནཏིཏྠབྷིཀྑཱཙཱརམགྒེསུ ¶ ཨནྟརགྷརཔཝེསནེ ཙ ཀཱཡེན ཨཔྤཏིརཱུཔཀརཎཾ. ཙཏུཊྛཱནཾ ཝཙཱིཔཱགབྦྷིཡཾ ནཱམ སངྒྷགཎཔུགྒལཨནྟརགྷརེསུ ཨཔྤཏིརཱུཔཝཱཙཱནིཙྪཱརཎཾ. ཨནེཀཊྛཱནཾ མནོཔཱགབྦྷིཡཾ ནཱམ ཏེསུ ཏེསུ ¶ ཋཱནེསུ ཀཱཡཝཱཙཱཧི ཨཛ྄ཛྷཱཙཱརཾ ཨནཱཔཛྫིཏྭཱཔི མནསཱ ཀཱམཝིཏཀྐཱདཱིནཾ ཝིཏཀྐནཾ. སབྦེསམྤི ཨིམེསཾ པཱགབྦྷིཡཱནཾ ཨབྷཱཝེན ཨཔྤགབྦྷོ ཧུཏྭཱ ཀུལཱནི ཨུཔསངྐམཏཱིཏི ཨཏྠོ. ཀསྶཔསཾཡུཏྟེན ཙ ཙནྡཱུཔམཔྤཊིཔདཱདིཐེརསྶ དྷུཏཝཱདེསུ ཨགྒབྷཱཝསྶ བོདྷིཏཏྟཱ ཝུཏྟཾ ‘‘ཨེཏདེཝ ཀསྶཔསཾཡུཏྟཾ ཨཊྛུཔྤཏྟིཾ ཀཏྭཱ’’ཏི.

ཨནུརུདྡྷཏྠེརཝཏྠུ

༡༩༢. པཉྩམེ བྷོཛནཔཔཉྩམཏྟནྟི གོཙརགཱམེ པིཎྜཱཡ ཙརཎཱཧཱརཔརིབྷོགསཉྙིཏཾ བྷོཛནཔཔཉྩམཏྟཾ. དཱིཔརུཀྑཱནནྟི ལོཧདནྟཀཊྛམཡཱནཾ མཧནྟཱནཾ དཱིཔརུཀྑཱནཾ. ལོཧམཡེསུཔི ཧི ཏེསུ དཱིཔཱདྷཱརེསུ དཱིཔརུཀྑཀཱཏི རུལ༹ྷིརེསཱ དཊྛབྦཱ. ཨོལམྦཀདཱིཔམཎྜལདཱིཔསཉྩརཎདཱིཔཱདིཀཱ སེསདཱིཔཱ.

ཨནུཔརིཡཱཡི པདཀྑིཎཀརཎཝསེན. ཨཧཾ ཏེནཱཏི ཡེན ཏུཡ྄ཧཾ ཨཏྠོ, ཨཧཾ ཏེན པཝཱརེམི, ཏསྨཱ ཏཾ ཨཱཧརཱཔེཏྭཱ གཎྷཱཏི ཨཏྠོ. སུཝཎྞཔཱཏིཡཾཡེཝསྶ བྷཏྟཾ ཨུཔྤཛྫཱིཏི དེཝཏཱནུབྷཱཝེན ཨུཔྤཛྫི, ན ཀིཉྩི པཙནཀིཙྩཾ ཨཏྠི. སཏྟ མཧཱཔུརིསཝིཏཀྐེ ཝིཏཀྐེསཱིཏི ‘‘ཨཔྤིཙྪསྶཱཡཾ དྷམྨོ, ནཱཡཾ དྷམྨོ མཧིཙྪསྶཱ’’ཏིཨཱདིཀེ སཏྟ མཧཱཔུརིསཝིཏཀྐེ ཝིཏཀྐེསི. ཨཊྛམེཏི ‘‘ནིཔྤཔཉྩཱརཱམསྶཱཡཾ དྷམྨོ, ནཱཡཾ དྷམྨོ པཔཉྩཱརཱམསྶཱ’’ཏི ཨེཏསྨིཾ པུརིསཝིཏཀྐེ.

མམ སངྐཔྤམཉྙཱཡཱཏི ‘‘ཨཔྤིཙྪསྶཱཡཾ དྷམྨོ, ནཱཡཾ དྷམྨོ མཧིཙྪསྶཱ’’ཏིཨཱདིནཱ (དཱི. ནི. ༣.༣༥༨; ཨ. ནི. ༨.༣༠) མཧཱཔུརིསཝིཏཀྐཝསེན ཨཱརདྡྷམཏྟཾ མཏྠཀཾ པཱཔེཏུཾ ཨསམཏྠབྷཱཝེན ཋིཏཾ མམ སངྐཔྤཾ ཛཱནིཏྭཱ. མནོམཡེནཱཏི མནོམཡེན ཝིཡ མནསཱ ནིམྨིཏསདིསེན, པརིཎཱམིཏེནཱཏི ཨཏྠོ. ཨིདྡྷིཡཱཏི ‘‘ཨཡཾ ཀཱཡོ ཨིདཾ ཙིཏྟཾ ཝིཡ ཧོཏཱུ’’ཏི ཨེཝཾ པཝཏྟཱཡ ཨདྷིཊྛཱནིདྡྷིཡཱ.

ཡདཱ མེ ཨཧུ སངྐཔྤོཏི ཡསྨིཾ ཀཱལེ མཡ྄ཧཾ ‘‘ཀཱིདིསོ ནུ ཁོ ཨཊྛམོ མཧཱཔུརིསཝིཏཀྐོ’’ཏི པརིཝིཏཀྐོ ཨཧོསི, ཡདཱ མེ ཨཧུ སངྐཔྤོ, ཏཏོ མམ སངྐཔྤམཉྙཱཡ ¶ ཨིདྡྷིཡཱ ཨུཔསངྐམི, ཨུཏྟརི དེསཡཱིཏི ཡོཛནཱ. ཨུཏྟརི དེསཡཱིཏི ‘‘ནིཔྤཔཉྩཱརཱམསྶཱཡཾ དྷམྨོ ནིཔྤཔཉྩརཏིནོ ¶ , ནཱཡཾ དྷམྨོ པཔཉྩཱརཱམསྶ པཔཉྩརཏིནོ’’ཏི (དཱི. ནི. ༣.༣༥༨; ཨ. ནི. ༨.༣༠) ཨིམཾ ཨཊྛམཾ མཧཱཔུརིསཝིཏཀྐཾ པཱུརེནྟོ ཨུཔརི དེསཡི. ཏཾ པན དེསིཏཾ དསྶེནྟོ ཨཱཧ – ‘‘ནིཔྤཔཉྩརཏོ བུདྡྷོ, ནིཔྤཔཉྩམདེསཡཱི’’ཏི, པཔཉྩཱ ནཱམ རཱགཱདཡོ ཀིལེསཱ, ཏེསཾ ཝཱུཔསམནཏཱཡ ཏདབྷཱཝཏོ ཙ ལོཀུཏྟརདྷམྨཱ ནིཔྤཔཉྩཱ ནཱམ. ཡཐཱ ཏཾ པཱཔུཎཱཏི, ཏཐཱ དྷམྨཾ དེསེསི, སཱམུཀྐཾསིཀཾ ཙཏུསཙྩདེསནཾ ཨདེསཡཱིཏི ཨཏྠོ.

ཏསྶཱཧཾ དྷམྨམཉྙཱཡཱཏི ཏསྶ སཏྠུ དེསནཱདྷམྨཾ ཛཱནིཏྭཱ. ཝིཧཱསིནྟི ཡཐཱནུསིཊྛཾ པཊིཔཛྫནྟོ ཝིཧརིཾ. སཱསནེ རཏོཏི སིཀྑཏྟཡསངྒཧེ སཱསནེ ཨབྷིརཏོ. ཏིསྶོ ཝིཛྫཱ ཨནུཔྤཏྟཱཏི པུབྦེནིཝཱསཉཱཎཾ, དིབྦཙཀྑུཉཱཎཾ, ཨཱསཝཀྑཡཉཱཎནྟི ཨིམཱ ཏིསྶོ ཝིཛྫཱ མཡཱ ཨནུཔྤཏྟཱ སཙྪིཀཏཱ. ཏཏོ ཨེཝ ཀཏཾ བུདྡྷསྶ སཱསནཾ, ཨནུསིཊྛི ཨོཝཱདོ ཨནུཊྛིཏོཏི ཨཏྠོ.

བྷདྡིཡཏྠེརཝཏྠུ

༡༩༣. ཚཊྛེ ཨུཙྩ-སདྡེན སམཱནཏྠོ ཨུཙྩཱ-སདྡོཏི ཨཱཧ – ‘‘ཨུཙྩཱཀུལིཀཱནནྟི ཨུཙྩེ ཀུལེ ཛཱཏཱན’’ནྟི. ཀཱལཱི༹ སཱ དེཝཱིཏི ཀཱལ༹ཝཎྞཏཱཡ ཀཱལཱི༹ སཱ དེཝཱི. ཀུལཱནུཀྐམེན རཛྫཱནུཔྤཏྟི མཧཱཀུལིནསྶེཝཱཏི ཝུཏྟཾ – ‘‘སོཡེཝ ཙཱ’’ཏིཨཱདི.

ལཀུཎྜཀབྷདྡིཡཏྠེརཝཏྠུ

༡༩༤. སཏྟམེ རིཏྟཀོཏི དེཡྻཝཏྠུརཧིཏོ. གུཎེ ཨཱཝཛྫེཏྭཱཏི བྷགཝཏོ རཱུཔགུཎེ ཙེཝ ཨཱཀཔྤསམྤདཱདིགུཎེ ཙ ཨཏྟནོ ཨདྷིཔྤཱཡཾ ཉཏྭཱ ཨམྦཔཀྐསྶ པཊིགྒཧཎཾ པརིབྷུཉྫནནྟི ཨེཝམཱདིཀེ ཡཐཱཨུཔཊྛིཏེ གུཎེ ཨཱཝཛྫེཏྭཱ.

པིཎྜོལབྷཱརདྭཱཛཏྠེརཝཏྠུ

༡༩༥. ཨཊྛམེ ཨབྷཱིཏནཱདབྷཱཝེན སཱིཧསྶ ཝིཡ ནཱདོ སཱིཧནཱདོ, སོ ཨེཏེསཾ ཨཏྠཱིཏི སཱིཧནཱདིཀཱ, ཏེསཾ སཱིཧནཱདིཀཱནཾ. གརཧིཏབྦཔསཾསིཏབྦདྷམྨེ ཡཱཐཱཝཏོ ཛཱནནྟསྶེཝ གརཧཱ པསཾསཱ ¶ ¶ ཙ ཡུཏྟརཱུཔཱཏི ཨཱཧ – ‘‘བུདྡྷཱ ཙ ནཱམཱ’’ཏིཨཱདི. ཁཱིཎཱ ཛཱཏཱིཏིཨཱདཱིཧི པཙྩཝེཀྑཎཉཱཎསྶ བྷཱུམིཾ དསྶེཏི. ཏེན ཧི ཉཱཎེན ཨརིཡསཱཝཀོ པཙྩཝེཀྑནྟོ ‘‘ཁཱིཎཱ ཛཱཏཱི’’ཏིཨཱདིཾ པཛཱནཱཏི. ཀཏམཱ པནསྶ ཛཱཏི ཁཱིཎཱ, ཀཐཉྩ པཛཱནཱཏཱིཏི? ན ཏཱཝསྶ ཨཏཱིཏཱ ཁཱིཎཱ པུབྦེཝ ཁཱིཎཏྟཱ, ན ཨནཱགཏཱ ཨནཱགཏེ ཝཱཡཱམཱབྷཱཝཏོ, ན པཙྩུཔྤནྣཱ ཝིཛྫམཱནཏྟཱ. ཡཱ པན མགྒསྶ ཨབྷཱཝིཏཏྟཱ ཨུཔྤཛྫེཡྻ ཨེཀཙཏུཔཉྩཝོཀཱརབྷཝེསུ ཨེཀཙཏུཔཉྩཀྑནྡྷཔྤབྷེདཱ ཛཱཏི, སཱ མགྒསྶ བྷཱཝིཏཏྟཱ ཨནུཔྤཱདདྷམྨཏཾ ཨཱཔཛྫནེན ཁཱིཎཱ. ཏཾ སོ མགྒབྷཱཝནཱཡ པཧཱིནཀིལེསེ པཙྩཝེཀྑིཏྭཱ ‘‘ཀིལེསཱབྷཱཝེ ཝིཛྫམཱནམྤི ཀམྨཾ ཨཱཡཏིཾ ཨཔྤཊིསནྡྷིཀཾ ཧོཏཱི’’ཏི ཛཱནནྟོ པཛཱནཱཏི.

ཝུསིཏནྟི ཝུཊྛཾ པརིཝུཊྛཾ, ཀཏཾ ཙརིཏཾ ནིཊྛིཏནྟི ཨཏྠོ. བྲཧྨཙརིཡནྟི མགྒབྲཧྨཙརིཡཾ. པུཐུཛྫནཀལྱཱཎཀེན ཧི སདྡྷིཾ སཏྟ སེཀྑཱ མགྒབྲཧྨཙརིཡཾ ཝསནྟི ནཱམ, ཁཱིཎཱསཝོ ཝུཊྛཝཱསོ. ཏསྨཱ ཨརིཡསཱཝཀོ ཨཏྟནོ བྲཧྨཙརིཡཝཱསཾ པཙྩཝེཀྑནྟོ ‘‘ཝུསིཏཾ བྲཧྨཙརིཡ’’ནྟི པཛཱནཱཏི. ཀཏཾ ཀརཎཱིཡནྟི ཙཏཱུསུ སཙྩེསུ ཙཏཱུཧི མགྒེཧི པརིཉྙཱཔཧཱནསཙྪིཀིརིཡཱབྷཱཝནཱབྷིསམཡཝསེན སོལ༹སཝིདྷཾ ཀིཙྩཾ ནིཊྛཱཔིཏནྟི ཨཏྠོ. པུཐུཛྫནཀལྱཱཎཀཱདཡོ ཧི ཏཾ ཀིཙྩཾ ཀརོནྟི, ཁཱིཎཱསཝོ ཀཏཀརཎཱིཡོ. ཏསྨཱ ཨརིཡསཱཝཀོ ཨཏྟནོ ཀརཎཱིཡཾ པཙྩཝེཀྑནྟོ ‘‘ཀཏཾ ཀརཎཱིཡ’’ནྟི པཛཱནཱཏི. ནཱཔརཾ ཨིཏྠཏྟཱཡཱཏི ཨིདཱནི པུན ཨིཏྠབྷཱཝཱཡ ཨེཝཾ སོལ༹སཝིདྷཀིཙྩབྷཱཝཱཡ, ཀིལེསཀྑཡཱཡ ཝཱ མགྒབྷཱཝནཱཡ ཀིཙྩཾ མེ ནཏྠཱིཏི པཛཱནཱཏི. ཨཐ ཝཱ ཨིཏྠཏྟཱཡཱཏི ཨིཏྠབྷཱཝཏོ ཨིམསྨཱ ཨེཝཾཔཀཱརཱ ཨིདཱནི ཝཏྟམཱནཀྑནྡྷསནྟཱནཱ ཨཔརཾ ཁནྡྷསནྟཱནཾ མཡ྄ཧཾ ནཏྠི, ཨིམེ པན པཉྩཀྑནྡྷཱ པརིཉྙཱཏཱ ཏིཊྛནྟི ཚིནྣམཱུལཀཱ རུཀྑཱ ཝིཡ, ཏེ ཙརིམཀཝིཉྙཱཎནིརོདྷེན ཨནུཔཱདཱནོ ཝིཡ ཛཱཏཝེདོ ནིབྦཱཡིསྶནྟཱིཏི པཛཱནཱཏི.

མནྟཱཎིཔུཏྟཔུཎྞཏྠེརཝཏྠུ

༡༩༦. ནཝམེ ཨཊྛཱརསསུཔི ཝིཛྫཱཊྛཱནེསུ ནིཔྥཏྟིཾ གཏཏྟཱ ‘‘སབྦསིཔྤེསུ ཀོཝིདོ ཧུཏྭཱ’’ཏི ཝུཏྟཾ. ཨབྷིདཡཱཨབྦྷཉྙཱཝཧསྶེཝ དྷམྨསྶ ཏཏྠ ཨུཔལབྦྷནཏོ ‘‘མོཀྑདྷམྨཾ ཨདིསྭཱ’’ཏི ཝུཏྟཾ. ཏེནཱཧ – ‘‘ཨིདཾ ཝེདཏྟཡཾ ནཱམཱ’’ཏིཨཱདི ¶ . ཏཐཱ ཧི ཨནེན དུགྒཏིཔརིམུཙྩནམྤི དུལླབྷཾ, ཨབྷིཉྙཱཔརིཝཱརཱནཾ ཨཊྛནྣཾ སམཱཔཏྟཱིནཾ ལཱབྷིཏཱཡ སཡཾ ཨེཀདེསེན ཨུཔསནྟོ པརམུཀྐཾསགཏཾ ཨུཏྟམདམཐསམཐཾ ཨནཉྙསཱདྷཱརཎཾ བྷགཝནྟཾ སམྦྷཱཝེནྟོ ‘‘ཨཡཾ པུརིསོ’’ཏིཨཱདིམཱཧ. པིཊཀཱནི གཧེཏྭཱ ཨཱགཙྪནྟཱིཏི ཕལབྷཱཛནཱནི གཧེཏྭཱ ཨསྶཱམིཀཱཡ ¶ ཨཱགཙྪནྟི. བུདྡྷཱནནྟི གཱརཝཝསེན བཧུཝཙནནིདྡེསོ ཀཏོ. པརིབྷུཉྫཱིཏི དེཝཏཱཧི པཀྑིཏྟདིབྦོཛཾ ཝནམཱུལཕལཱཕལཾ པརིབྷུཉྫི. པཏྟེ པཏིཊྛཱཔིཏསམནནྟརམེཝ ཧི དེཝཏཱ ཏཏྠ དིབྦོཛཾ པཀྑིཔིཾསུ. སམྨསིཏྭཱཏི པཙྩཝེཀྑིཏྭཱ, པརིཝཏྟེཏྭཱཏི ཙ ཝདནྟི. ཨརཧཏྟཾ པཱཔུཎིཾསཱུཏི མཧཱདེཝཏྠེརསྶ ཨནུམོདནཀཐཱཡ ཨནུཔུབྦིཀཐཱསཀྑིཀཱཡ སུཝིསོདྷིཏཙིཏྟསནྟཱནཱ ཨརཧཏྟཾ པཱཔུཎིཾསུ.

དསཧི ཀཐཱཝཏྠཱུཧཱིཏི ཨཔྤིཙྪཀཐཱ སནྟུཊྛིཀཐཱ པཝིཝེཀཀཐཱ ཨསཾསགྒཀཐཱ ཝཱིརིཡཱརམྦྷཀཐཱ སཱིལསམྤདཱཀཐཱ སམཱདྷིསམྤདཱཀཐཱ པཉྙཱསམྤདཱཀཐཱ ཝིམུཏྟིསམྤདཱཀཐཱ ཝིམུཏྟིཉཱཎདསྶནསམྤདཱཀཐཱཏི ཨིམེཧི དསཧི ཀཐཱཝཏྠཱུཧི. ཛཱཏིབྷཱུམིརཊྛཝཱསིནོཏི ཛཱཏིབྷཱུམིཝནྟདེསཝཱསིནོ, སཏྠུ ཛཱཏདེསཝཱསིནོཏི ཨཏྠོ. སཱིསཱནུལོཀིཀོཏི པུརཏོ གཙྪནྟསྶ སཱིསཾ ཨནུ ཨནུ པསྶནྟོ. ཨོཀཱསཾ སལླཀྑེཏྭཱཏི སཱཀཙྪཱཡ ཨཝསརཾ སལླཀྑེཏྭཱ. སཏྟཝིསུདྡྷིཀྐམཾ པུཙྪཱིཏི ‘‘ཀིཾ ནུ ཁོ, ཨཱཝུསོ, སཱིལཝིསུདྡྷཏྠཾ བྷགཝཏི བྲཧྨཙརིཡཾ ཝུསྶཏཱི’’ཏིཨཱདིནཱ (མ. ནི. ༡.༢༥༧) སཏྟ ཝིསུདྡྷིཡོ པུཙྪི. དྷམྨཀཐིཀཱནཾ ཨགྒཊྛཱནེ ཋཔེསི སཝིསེསེན དསཀཐཱཝཏྠུལཱབྷིཏཱཡ.

མཧཱཀཙྩཱནཏྠེརཝཏྠུ

༡༩༧. དསམེ སཾཁིཏྟེན ཀཐིཏདྷམྨསྶཱཏི མདྷུཔིཎྜིཀསུཏྟནྟདེསནཱསུ ཝིཡ སངྑེཔེན དེསིཏདྷམྨསྶ. ཏཾ དེསནཾ ཝིཏྠཱརེཏྭཱཏི ཏཾ སངྑེཔདེསནཾ ཨཱཡཏནཱདིཝསེན ཝིཏྠཱརེཏྭཱ. ཨཏྠཾ ཝིབྷཛམཱནཱནནྟི ཏསྶཱ སངྑེཔདེསནཱཡ ཨཏྠཾ ཝིབྷཛིཏྭཱ ཀཐེནྟཱནཾ. ཨཏྠཝསེན ཝཱཏི ‘‘ཨེཏྟཀཱ ཨེཏསྶ ཨཏྠཱ’’ཏི ཨཏྠཝསེན ཝཱ དེསནཾ པཱུརེཏུཾ སཀྐོནྟི. བྱཉྫནཝསེན ཝཱཏི ‘‘ཨེཏྟཀཱནི ཨེཏྠ བྱཉྫནཱནི དེསནཱཝསེན ཝཏྟབྦཱནཱི’’ཏི བྱཉྫནཝསེན ཝཱ པཱུརེཏུཾ སཀྐོནྟི. ཨཡཾ པན མཧཱཀཙྩཱནཏྠེརོ ཨུབྷཡཝསེནཔི སཀྐོཏི ཏསྶ སངྑེཔེན ཨུདྡིཊྛསྶ ཝིཏྠཱརེན སཏྠུ ཨཛ྄ཛྷཱསཡཱནུརཱུཔཾ ¶ དེསནཏོ, ཏསྨཱ ཏཏྠ ཨགྒོཏི ཝུཏྟོ. ཝུཏྟནཡེནེཝཱཏི ‘‘པཱཏོཝ སུབྷོཛནཾ བྷུཉྫིཏྭཱ ཨུཔོསཐངྒཱནི ཨདྷིཊྛཱཡཱ’’ཏིཨཱདིནཱ ཧེཊྛཱ ཝུཏྟནཡེནེཝ. ཨཉྙེཧཱིཏི ཨཉྙཱསཾ ཨིཏྠཱིནཾ ཀེསེཧི ཨཏིཝིཡ དཱིགྷཱ. ན ཀེཝལཉྩ དཱིགྷཱ ཨེཝ, ཨཐ ཁོ སིནིདྡྷནཱིལམུདུཀཉྩིཀཱ ཙ. ནིཀྐེསཱིཏི ཨཔྤཀེསཱི ཡཐཱ ‘‘ཨནུདརཱ ཀཉྙཱ’’ཏི.

པཎིཡནྟི ཝིཀྐེཏབྦབྷཎྜཾ. ཨཱཝཛྫེཏྭཱཏི ཨུཔནིསྶཡཾ ཀེསཱནཾ པཀཏིབྷཱཝཱཔཏྟིཉྩ ཨཱཝཛྫེཏྭཱ. གཱརཝེནཱཏི མུཎྜསཱིསཱཔི ཐེརེ གཱརཝེན ཨེཀཝཙནེནེཝ ཨཱགནྟྭཱ. ནིམནྟེཏྭཱཏི སྭཱཏནཱཡ ¶ ནིམནྟེཏྭཱ. ཨིམིསྶཱ ཨིཏྠིཡཱཏི ཡཐཱཝུཏྟསེཊྛིདྷཱིཏརམཱཧ. དིཊྛདྷམྨིཀོཝཱཏི ཨཝདྷཱརཎཾ ཨཊྛཱནཔཡུཏྟཾ, དིཊྛདྷམྨིཀོ ཡསཔཊིལཱབྷོཝ ཨཧོསཱིཏི ཨཏྠོ. ཡསཔཊིལཱབྷོཏི ཙ བྷཝསམྤཏྟིཔཊིལཱབྷོ. སཏྟསུ ཧི ཛཝནཙེཏནཱསུ པཋམཱ དིཊྛདྷམྨཝེདནཱིཡཕལཱ, པཙྪིམཱ ཨུཔཔཛྫཝེདནཱིཡཕལཱ, མཛ྄ཛྷེ པཉྩ ཨཔརཱཔརིཡཝེདནཱིཡཕལཱ, ཏསྨཱ པཋམཾ ཨེཀཾ ཙེཏནཾ ཋཔེཏྭཱ སེསཱ ཡཐཱསཀཾ པརིཔུཎྞཕལདཱཡིནོ ཧོནྟི, པཋམཙེཏནཱཡ པན དིཊྛདྷམྨིཀོ ཡསཔཊིལཱབྷོཝ ཨཧོསི.

པཋམཨེཏདགྒཝགྒཝཎྞནཱ ནིཊྛིཏཱ.

༡༤. ཨེཏདགྒཝགྒོ

(༡༤) ༢. དུཏིཡཨེཏདགྒཝགྒཝཎྞནཱ

ཙཱུལ༹པནྠཀཏྠེརཝཏྠུ

༡༩༨-༢༠༠. དུཏིཡསྶ ¶ པཋམེ མནེན ནིབྦཏྟིཏནྟི ཨབྷིཉྙཱམནེན ཨུཔྤཱདིཏཾ. མནེན ཀཏཀཱཡོཏི ཨབྷིཉྙཱཙིཏྟེན དེསནྟརཾ པཏྟཀཱཡོ. མནེན ནིབྦཏྟིཏཀཱཡོཏི ཨབྷིཉྙཱམནསཱ ནིམྨིཏཀཱཡོ ‘‘ཨཉྙཾ ཀཱཡཾ ཨབྷིནིམྨིནཱཏཱི’’ཏིཨཱདཱིསུ (དཱི. ནི. ༡.༢༣༦-༢༣༧; པཊི. མ. ༣.༡༤) ཝིཡ. ཨེཀསདིསེཡེཝཱཏི ཨཏྟསདིསེཡེཝ. ཨེཀཝིདྷམེཝཱཏི ཨཏྟནཱ ཀཏཔྤཀཱརམེཝ. ཨེཏཔྤརམོ ཧི ཡེབྷུཡྻེན སཱཝཀཱནཾ ཨིདྡྷིནིམྨཱནཝིདྷི. ཨགྒོ ནཱམ ཛཱཏོ ཨེཀདེསེན སཏྠུ ཨིདྡྷིནིམྨཱནཱནུཝིདྷཱནཏོ.

ལཱབྷིཏཱཡཱཏི ¶ ཨེཏྠ ལཱབྷཱིཏི ཨཱིཀཱརོ ཨཏིསཡཏྠོ. ཏེན ཐེརསྶ ཙཏུནྣཾ རཱུཔཱཝཙརཛ྄ཛྷཱནཱནཾ ཨཏིསཡེན སཝིསེསལཱབྷིཏཾ དསྶེཏི. ཨརཱུཔཱཝཙརཛ྄ཛྷཱནཱནཾ ལཱབྷིཏཱཡཱཏི ཨེཏྠཱཔི ཨེསེཝ ནཡོ. ན ཀེཝལཉྩེཏཱ ཙེཏོསཉྙཱཝིཝཊྚཀུསལཏཱ རཱུཔཱརཱུཔཛ྄ཛྷཱནལཱབྷིཏཱཡ ཨེཝ, ཨཐ ཁོ ཨིམེཧིཔི ཀཱརཎེཧཱིཏི དསྶེཏུཾ – ‘‘ཙཱུལ༹པནྠཀོ ཙཱ’’ཏིཨཱདི ཝུཏྟཾ. ཙེཏོཏི ཙེཏྠ ཙིཏྟསཱིསེན སམཱདྷི ཝུཏྟོ, ཏསྨཱ ཙེཏསོ སམཱདྷིསྶ ཝིཝཊྚནཾ ཙེཏོཝིཝཊྚོ, ཨེཀསྨིཾཡེཝཱརམྨཎེ སམཱདྷིཙིཏྟཾ ཝིཝཊྚེཏྭཱ ཧེཊྛིམསྶ ཧེཊྛིམསྶ ཨུཔརཱུཔརི ཧཱཔནཏོ རཱུཔཱཝཙརཛ྄ཛྷཱནལཱབྷཱི ཙེཏོཝིཝཊྚཀུསལོ ནཱམ. ‘‘སབྦསོ རཱུཔསཉྙཱན’’ནྟིཨཱདིནཱ (དྷ. ས. ༢༦༥) ཝུཏྟསཉྙཱ ཨཏིཀྐམིཏྭཱ ‘‘ཨཱཀཱསཱནཉྩཱཡཏནསཉྙཱསཧགཏཾ…པེ… ནེཝསཉྙཱནཱསཉྙཱཡཏནསཉྙཱསཧགཏ’’ནྟི (དྷ. ས. ༢༦༥-༢༦༨) སཉྙཱསཱིསེན ཝུཏྟཛ྄ཛྷཱནཱནཾ ཝིཝཊྚཀུསལོ, ཏཐཱ ཨིཏྠིཔུརིསཱདིསཉྙཱ ནིཙྩསཉྙཱདིཏོ ཙིཏྟཾ ཝིཝཊྚེཏྭཱ ཀེཝལེ རཱུཔཱརཱུཔདྷམྨམཏྟེ ཨསངྑཏེ ནིབྦཱནེ ཙ ཝིསེསཏོ ཝཊྚནཏོ ཙ སུཉྙཏཱནུཔསྶནཱབཧུལོ སཉྙཱཝིཝཊྚཀུསལོ. སམཱདྷིཀུསལཏཱཡ ཙེཏོཝིཝཊྚཀུསལཏཱ ཏབྦཧུལཝིཧཱརིཏཱཡ. ཏཐཱ ཝིཔསྶནཱཀུསལཏཱཡ སཉྙཱཝིཝཊྚཀུསལཏཱ. ཨེཀོཏི ཙཱུལ༹པནྠཀཏྠེརཾ ཝདཏི. སམཱདྷིལཀྑཎེཏི སཝིཏཀྐསཝིཙཱརཱདིསམཱདྷིསབྷཱཝེ. པུན ཨེཀོཏི མཧཱཔནྠཀཏྠེརམཱཧ. ཝིཔསྶནཱལཀྑཎེཏི སཏྟཨནུཔསྶནཱ ཨཊྛཱརསམཧཱཝིཔསྶནཱདིཝིཔསྶནཱསབྷཱཝེ. སམཱདྷིགཱལ༹ྷོཏི སམཱདྷིསྨིཾ ཨོགཱལ༹ྷཙིཏྟོ སུབྷཱཝིཏབྷཱཝནཏཱ. ཨངྒསཾཁིཏྟེཏི ¶ ཙཏུརངྒིཀཏིཝངྒིཀཱདིཝསེན ཛྷཱནངྒཱནཾ སངྑིཔནེ. ཨཱརམྨཎསཾཁིཏྟེཏི ཀསིཎུགྒྷཱཊིམཱཀཱསཱདིནིབྦཏྟནེན ཀསིཎཱདིཨཱརམྨཎཱནཾ སཾཁིཔནེ. ཨངྒཝཝཏྠཱཔནེཏི ཝིཏཀྐཱདཱིནཾ ཛྷཱནངྒཱནཾ ཝཝཏྠཱཔནེ. ཨཱརམྨཎཝཝཏྠཱཔནེཏི པཐཝཱིཀསིཎཱདིཛ྄ཛྷཱནཱརམྨཎཱནཾ ཝཝཏྠཱཔནེ.

ཛྷཱནངྒེཧཱིཏི རཱུཔཱཝཙརཛ྄ཛྷཱནངྒེཧི, ཛྷཱནངྒཱནེཝ ཛྷཱནཾ. པུན ཛྷཱནངྒེཧཱིཏི ཨརཱུཔཱཝཙརཛ྄ཛྷཱནངྒེཧི. བྷཱཏཱཏི ཛེཊྛབྷཱཏཱ. ཨསྶཱཏི ཀུཊུམྦིཡསྶ. སུཝཎྞཔཱུཛནྟི སོཝཎྞམཡཾ པུཔྥཔཱུཛཾ ཀཏྭཱ. དེཝཔུརེཏི ཏཱཝཏིཾསབྷཝནེ སུདསྶནམཧཱནགརེ. ཨགྒདྭཱརེནཱཏི ཏསྨིཾ དིཝསེ ཨགྒཾ སབྦཔཋམཾ ཝིཝཊེན ནགརདྭཱརེན ནིཀྑམིཏྭཱ.

ཀོཀནདནྟི ¶ པདུམཝིསེསནཾ ཡཐཱ ‘‘ཀོཀཱསཀ’’ནྟི. ཏཾ ཀིར བཧུཔཏྟཾ ཝཎྞསམྤནྣཾ ཨཏིསུགནྡྷཉྩ ཧོཏི. ‘‘ཀོཀནདཾ ནཱམ སེཏཔདུམ’’ནྟིཔི ཝདནྟི. པཱཏོཏི པགེཝ. ཨཡཉྷེཏྠ ཨཏྠོ – ཡཐཱ ཀོཀནདསངྑཱཏཾ པདུམཾ པཱཏོ སཱུརིཡུགྒམནཝེལཱཡཾ ཕུལླཾ ཝིཀསིཏཾ ཨཝཱིཏགནྡྷཾ སིཡཱ ཝིརོཙམཱནཾ, ཨེཝཾ སརཱིརགནྡྷེན གུཎགནྡྷེན ཙ སུགནྡྷཾ སརདཀཱལེ ཨནྟལིཀྑེ ཨཱདིཙྩམིཝ ཨཏྟནོ ཏེཛསཱ ཏཔནྟཾ ཨངྒེཧི ནིཙྪརཎཀཛུཏིཡཱ ཨངྒཱིརསཾ སམྨཱསམྦུདྡྷཾ པསྶཱཏི.

ཙཱུལ༹པནྠཀོ ཀིར ཀསྶཔསམྨཱསམྦུདྡྷཀཱལེ པབྦཛིཏྭཱ པཉྙཝཱ ཧུཏྭཱ ཨཉྙཏརསྶ དནྡྷབྷིཀྑུནོ ཨུདྡེསགཧཎཀཱལེ པརིཧཱསཀེལི༹ཾ ཨཀཱསི. སོ བྷིཀྑུ ཏེན པརིཧཱསེན ལཛྫིཏོ ནེཝ ཨུདྡེསཾ གཎྷི, ན སཛ྄ཛྷཱཡམཀཱསི. ཏེན ཀམྨེནཱཡཾ པབྦཛིཏྭཱཝ དནྡྷོ ཛཱཏོ, ཏསྨཱ གཧིཏགཧིཏཔདཾ ཨུཔརིཨུཔརིཔདཾ གཎྷནྟསྶ ནསྶཏི. ཨིདྡྷིཡཱ ཨབྷིསངྑརིཏྭཱ སུདྡྷཾ ཙོལ༹ཁཎྜཾ ཨདཱསཱིཏི ཏསྶ པུབྦཧེཏུཾ དིསྭཱ ཏདནུརཱུཔེ ཀམྨཊྛཱནེ ནིཡོཛེནྟོ སུདྡྷཾ ཙོལ༹ཁཎྜཾ ཨདཱསི. སོ ཀིར པུབྦེ རཱཛཱ ཧུཏྭཱ ནགརཾ པདཀྑིཎཾ ཀརོནྟོ ནལཱཊཏོ སེདེ མུཙྩནྟེ པརིསུདྡྷེན སཱཊཀེན ནལཱཊཾ པུཉྪི, སཱཊཀོ ཀིལིཊྛོ ཨཧོསི. སོ ‘‘ཨིམཾ སརཱིརཾ ནིསྶཱཡ ཨེཝརཱུཔོ པརིསུདྡྷསཱཊཀོ པཀཏིཾ ཛཧིཏྭཱ ཀིལིཊྛོ ཛཱཏོ, ཨནིཙྩཱ ཝཏ སངྑཱརཱ’’ཏི ཨནིཙྩསཉྙཾ པཊིལབྷི. ཏེན ཀཱརཎེནསྶ རཛོཧརཎམེཝ པཙྩཡོ ཛཱཏོ.

ལོམཱནཱིཏི ཙོལ༹ཁཎྜཏནྟགཏཨཾསུཀེ ཝདཏི. ‘‘ཀིལིཊྛདྷཱཏུཀཱནཱི’’ཏི ཀིལིཊྛསབྷཱཝཱནི. ཨེཝཾགཏིཀམེཝཱཏི ཨིདཾ ཙིཏྟམྤི བྷཝངྒཝསེན པཀཏིཡཱ པཎྜརཾ པརིསུདྡྷཾ རཱགཱདིསམྤཡུཏྟདྷམྨཝསེན སཾཀིལིཊྛཾ ཛཱཏནྟི དསྶེཏི. ནཀྑཏྟཾ སམཱནེཏྭཱཏི ནཀྑཏྟཾ སམནྣཱཧརིཏྭཱ, ཨཱཝཛྫེཏྭཱཏི ཨཏྠོ ¶ . བིལཱ༹རསྶཏྠཱཡཱཏི བིལཱ༹རསྶ གོཙརཏྠཱཡ. ཛལཔཐཀམྨིཀེནཱཏི སམུདྡཀམྨིཀེན. ཙཱརིནྟི ཁཱདིཏབྦཏིཎཾ. སཙྩཀཱརནྟི སཙྩབྷཱཝཱཝཧཾ ཀཱརཾ, ‘‘ཨཏྟནཱ གཧིཏེ བྷཎྜེ ཨཉྙེསཾ ན དཱཏབྦ’’ནྟི ཝཏྭཱ དཱཏབྦལཉྫནྟི ཝུཏྟཾ ཧོཏི. ཏཏིཡེན པཊིཧཱརེནཱཏི ཏཏིཡེན སཱསནེན. པཏྟིཀཱ ཧུཏྭཱཏི སཱམིནོ ཧུཏྭཱ.

ཨཔྤཀེནཔཱིཏི ཐོཀེནཔི པརིཏྟེནཔི. མེདྷཱཝཱིཏི པཉྙཝཱ. པཱབྷཏེནཱཏི བྷཎྜམཱུལེན. ཝིཙཀྑཎོཏི ཝོཧཱརཀུསལོ. སམུཊྛཱཔེཏི ཨཏྟཱནནྟི མཧནྟཾ དྷནཾ ཡསཉྩ ཨུཔྤཱདེཏྭཱ ཏཏྠ ཨཏྟཱནཾ སཎྛཔེཏི པཏིཊྛཱཔེཏི ¶ . ཡཐཱ ཀིཾ? ཨཎུཾ ཨགྒིཾཝ སནྡྷམཾ, ཡཐཱ པཎྜིཏོ པུརིསོ པརིཏྟཀཾ ཨགྒིཾ ཨནུཀྐམེན གོམཡཙུཎྞཱདཱིནི པཀྑིཔིཏྭཱ མུཁཝཱཏེན དྷམེནྟོ སམུཊྛཱཔེཏི ཝཌྜྷེཏི, མཧནྟཾ ཨགྒིཀྑནྡྷཾ ཀརོཏི, ཨེཝམེཝ པཎྜིཏོ ཐོཀམྤི པཱབྷཏཾ ལབྷིཏྭཱ ནཱནཱཨུཔཱཡེཧི པཡོཛེཏྭཱ དྷནཉྩ ཡསཉྩ ཝཌྜྷེཏི, ཝཌྜྷེཏྭཱ པུན ཏཏྠ ཨཏྟཱནཾ པཏིཊྛཱཔེཏི. ཏཱཡ ཨེཝ ཝཱ པན དྷནསྶ མཧནྟཏཱཡ ཨཏྟཱནཾ སམུཊྛཱཔེཏི, ཨབྷིཉྙཱཏཾ པཱཀཊཾ ཀརོཏཱིཏི ཨཏྠོ.

སུབྷཱུཏིཏྠེརཝཏྠུ

༢༠༡-༢༠༢. ཏཏིཡེ རཎཱཏི ཧི རཱགཱདཡོ ཀིལེསཱ ཝུཙྩནྟཱིཏི ‘‘སརཎཱ དྷམྨཱ’’ཏིཨཱདཱིསུ (དྷ. ས. ༡༠༠ དུཀམཱཏིཀཱ) རཱགཱདཡོ ཀིལེསཱ ‘‘རཎཱ’’ཏི ཝུཙྩནྟི. རཎནྟི ཨེཏེཧཱིཏི རཎཱ. ཡེཧི ཨབྷིབྷཱུཏཱ སཏྟཱ ནཱནཔྤཀཱརེན ཀནྡནྟི པརིདེཝནྟི, ཏསྨཱ ཏེ རཱགཱདཡོ ‘‘རཎཱ’’ཏི ཝུཏྟཱ. དེསིཏནིཡཱམཏོ ཨནོཀྐམིཏྭཱཏི དེསིཏཱནོཀྐམནཏོ ཨནུཔགནྟྭཱ དེསེཏི, སཏྠཱརཱ དེསིཏནིཡཱམེནེཝ ཨནོདིསྶཀཾ ཀཏྭཱ དྷམྨཾ དེསེཏཱིཏི ཝུཏྟཾ ཧོཏི. ཨེཝནྟི ཨེཝཾ མེཏྟཱཛྷཱནཏོ ཝུཊྛཱཡ བྷིཀྑཱགཧཎེ སཏི. བྷིཀྑཱདཱཡཀཱནཾ མཧཔྥལཾ བྷཝིསྶཏཱིཏི ཨིདཾ ཙཱུལ༹ཙྪརཱསངྒྷཱཏསུཏྟེན (ཨ. ནི. ༡.༥༡ ཨཱདཡོ) དཱིཔེཏབྦཾ. ཨཙྪརཱསངྒྷཱཏམཏྟམྤི ཧི ཀཱལཾ མེཏྟཙིཏྟཾ ཨཱསེཝནྟསྶ བྷིཀྑུནོ དིནྣདཱནཾ མཧཔྥལཾ ཧོཏི མཧཱནིསཾསཾ, ཏེན ཙ སོ ཨམོགྷཾ རཊྛཔིཎྜཾ བྷུཉྫཏཱིཏི ཨཡམཏྠོ ཏཏྠ ཨཱགཏོཡེཝ. ནིམིཏྟཾ གཎྷིཏྭཱཏི ཨཱཀཱརཾ སལླཀྑེཏྭཱ.

ཁདིརཝནིཡརེཝཏཏྠེརཝཏྠུ

༢༠༣. པཉྩམེ ཝནསབྷཱགནྟི སབྷཱགཾ ཝནཾ, སབྷཱགནྟི ཙ སཔྤཱཡནྟི ཨཏྠོ. ཡཉྷི པཀཏིཝིརུདྡྷཾ ¶ བྱཱདྷིཝིརུདྡྷཉྩ ན ཧོཏི, ཏཾ ‘‘སབྷཱག’’ནྟི ཝུཙྩཏི. ཨུདཀསབྷཱགནྟིཨཱདཱིསུཔི ཨིམིནཱཝ ནཡེན ཨཏྠོ ཝེདིཏབྦོ. ཀལྱཱཎཀམྨཱཡཱུཧནཀྑཎོཏི ཀལྱཱཎཀམྨཱུཔཙཡསྶ ཨོཀཱསོ. ཏིཎྞཾ བྷཱཏིཀཱནནྟི ཨུཔཏིསྶོ, ཙུནྡོ, ཨུཔསེནོཏི ཨིམེསཾ ཏིཎྞཾ ཛེཊྛབྷཱཏིཀཱནཾ. ཏིསྶནྣཉྩ བྷགིནཱིནནྟི ཙཱལཱ, ཨུཔཙཱལཱ, སཱིསུཔཙཱལཱཏི ཨིམེསཾ ཏིསྶནྣཾ ཛེཊྛབྷགིནཱིནཾ. ཨེཏྠ ཙ སཱརིཔུཏྟཏྠེརོ སཡཾ པབྦཛིཏྭཱ ¶ ཙཱལཱ, ཨུཔཙཱལཱ, སཱིསུཔཙཱལཱཏི ཏིསྶོ བྷགིནིཡོ, ཙུནྡོ ཨུཔསེནོཏི ཨིམེ བྷཱཏརོ པབྦཱཛེསི, རེཝཏཀུམཱརོ ཨེཀོཝ གེཧེ ཨཝསིསྶཏི. ཏེན ཝུཏྟཾ – ‘‘ཨམྷཱཀཾ…པེ… པབྦཱཛེནྟཱི’’ཏི. མཧལླཀཏརཱཏི ཝུདྡྷཏརཱ. ཨིདཉྩ ཀུམཱརིཀཱཡ ཙིརཛཱིཝིཏཾ ཨབྷིཀངྑམཱནཱ ཨཱཧཾསུ. སཱ ཀིར ཏསྶ ཨཡྻིཀཱ ཝཱིསཏིཝསྶསཏིཀཱ ཁཎྜདནྟཱ པལིཏཀེསཱ ཝལིཏྟཙཱ ཏིལཀཱཧཏགཏྟཱ གོཔཱནསིཝངྐཱ ཨཧོསི. ཝིདྷཱཝནིཀནྟི ཝིདྷཱཝནཀཱིལི༹ཀཾ. ཏིསྶནྣཾ སམྤཏྟཱིནནྟི ཨནུསྶཝཝསེན མནུསྶདེཝམོཀྑསམྤཏྟིཡོ སནྡྷཱཡ ཝདཏི, མནུསྶདེཝབྲཧྨསམྤཏྟིཡོ ཝཱ. སཱིཝལིསྶ པུཉྙཾ ཝཱིམཾསིསྶཱམཱཏི ‘‘སཱིཝལིནཱ ཀཏཔུཉྙསྶ ཝིཔཱཀདཱནཊྛཱནམིད’’ནྟི ཉཏྭཱ ཨེཝམཱཧ. སབྷཱགཊྛཱནནྟི སམཾ དེསཾ.

ཏཾ བྷཱུམིརཱམཎེཡྻཀནྟི ཀིཉྩཱཔི ཨརཧནྟོ གཱམནྟེ ཀཱཡཝིཝེཀཾ ན ལབྷནྟི, ཙིཏྟཝིཝེཀཾ པན ལབྷནྟེཝ. ཏེསཉྷི དིབྦཔྤཊིབྷཱགཱནིཔི ཨཱརམྨཎཱནི ཙིཏྟཾ ཙཱལེཏུཾ ན སཀྐོནྟི, ཏསྨཱ གཱམོ ཝཱ ཧོཏུ ཨརཉྙཱདཱིནཾ ཝཱ ཨཉྙཏརཾ, ‘ཡཏྠ ཨརཧནྟོ ཝིཧརནྟི, ཏཾ བྷཱུམིརཱམཎེཡྻཀཾ’, སོ བྷཱུམིཔྤདེསོ རམཎཱིཡོ ཨེཝཱཏི ཨཏྠོ.

ཀངྑཱརེཝཏཏྠེརཝཏྠུ

༢༠༤. ཚཊྛེ ཨཀཔྤིཡོ, ཨཱཝུསོ, གུལོ༹ཏི ཨེཀདིཝསཾ ཐེརོ ཨནྟརཱམགྒེ གུལ༹ཀརཎཾ ཨོཀྐམིཏྭཱ གུལེ༹ པིཊྛམྤི ཚཱརིཀམྤི པཀྑིཏྟེ དིསྭཱན ‘‘ཨཀཔྤིཡོ གུལོ༹, སཱམིསོ ན ཀཔྤཏི གུལོ༹ ཝིཀཱལེ པརིབྷུཉྫིཏུ’’ནྟི ཀུཀྐུཙྩཱཡནྟོ ཨེཝམཱཧ. ཨཀཔྤིཡཱ མུགྒཱཏི ཨེཀདིཝསཾ ཨནྟརཱམགྒེ ཝཙྩེ མུགྒཾ ཛཱཏཾ དིསྭཱ ‘‘ཨཀཔྤིཡཱ མུགྒཱ, པཀྐཱཔི མུགྒཱ ཛཱཡནྟཱི’’ཏི ཀུཀྐུཙྩཱཡནྟོ ཨེཝམཱཧ. སེསམེཏྠ སབྦཾ ཨུཏྟཱནམེཝ.

སོཎཀོལི༹ཝིསཏྠེརཝཏྠུ

༢༠༥. སཏྟམེ ཧཱཔེཏབྦམེཝ ཨཧོསི ཨཙྩཱརདྡྷཝཱིརིཡཏྟཱ. ཨུདཀེན སམུཔབྱཱུལ༹ྷེཏི ཨུདཀེན ཐལཾ ཨུསྶཱརེཏྭཱ ཏཏྠ ཏཏྠ རཱསིཀཏེ. ཧརིཏཱུཔལིཏྟཱཡཱཏི གོམཡཔརིབྷཎྜཀཏཱཡ. ཏིཝིདྷེན ཨུདཀེན ¶ པོསེནྟཱིཏི ཁཱིརོདཀཾ གནྡྷོདཀཾ ཀེཝལོདཀནྟི ཨེཝཾ ཏིཝིདྷེན ཨུདཀེན པོསེནྟི པརིཔཱལེནྟི. པརིསྶཱཝེཏྭཱཏི པརིསོདྷེཏྭཱ གཧིཏེ ཏཎྜུལེཏི ཡོཛེཏབྦཾ. དེཝོ མཉྙེཏི དེཝོ ཝིཡ ¶ . ཝཱིཎོཝཱདེནཱཏི ‘‘ཏཾ ཀིཾ མཉྙསི, སོཎ, ཡདཱ ཏེ ཝཱིཎཱཡ ཏནྟིཡོ ཨཙྩཱཡཏཱ ཧོནྟི, ཨཔི ནུ ཏེ ཝཱིཎཱ ཏསྨིཾ སམཡེ སརཝཏཱི ཝཱ ཧོཏི ཀམྨཉྙཱ ཝཱཏི? ནོ ཧེཏཾ, བྷནྟེཏི. ཨེཝམེཝ ཁོ, སོཎ, ཨཙྩཱརདྡྷཝཱིརིཡཾ ཨུདྡྷཙྩཱཡ སཾཝཏྟཏི, ཨཏིསིཐིལཝཱིརིཡཾ ཀོསཛྫཱཡ སཾཝཏྟཏི. ཏསྨཱཏིཧ ཏྭཾ, སོཎ, ཝཱིརིཡསམཏཾ ཨདྷིཊྛཧ, ཨིནྡྲིཡཱནཉྩ སམཏཾ པཊིཝིཛ྄ཛྷཱ’’ཏི (མཧཱཝ. ༢༤༣) ཨེཝཾ ཝཱིཎཾ ཨུཔམཾ ཀཏྭཱ པཝཏྟིཏེན ཝཱིཎོཔམོཝཱདེན. ཝཱིརིཡསམཐཡོཛནཏྠཱཡཱཏི ཝཱིརིཡསྶ སམཐེན ཡོཛནཏྠཱཡ.

སོཎཀུཊིཀཎྞཏྠེརཝཏྠུ

༢༠༦. ཨཊྛམེ ཀུཊིཀཎྞོཏི ཝུཙྩཏཱིཏི ‘‘ཀོཊིཀཎྞོ’’ཏི ཝཏྟབྦེ ‘‘ཀུཊིཀཎྞོ’’ཏི ཝོཧརཱིཡཏི. ཀུལགྷརེ བྷཝཱ ཀུལགྷརིཀཱ. སཱ ཀིར ཨཝནྟིརཊྛེ ཀུལགྷརེ མཧཱཝིབྷཝསྶ སེཊྛིསྶ བྷརིཡཱ. དསབལསྶ དྷམྨཀཐཾ སུཏྭཱ སོཏཱཔཏྟིཕལེ པཏིཊྛཱཡ ཙིནྟེསཱིཏི ཨིདཾ ཨངྒུཏྟརབྷཱཎཀཱནཾ མཏེན ཝུཏྟཾ. སུཏྟནིཔཱཏཊྛཀཐཱཡཾ པན ‘‘སཔརིསོ བྷགཝནྟཾ ཨུཔསངྐམྨ དྷམྨདེསནཾ ཨསྶོསི, ན ཙ ཀཉྩི ཝིསེསཾ ཨདྷིགཉྪི. ཀསྨཱ? སོ ཧི དྷམྨཾ སུཎནྟོ ཧེམཝཏཾ ཨནུསྶརིཏྭཱ ‘ཨཱགཏོ ནུ ཁོ མེ སཧཱཡཀོ, ནོ’ཏི དིསཱདིསཾ ཨོལོཀེཏྭཱ ཏཾ ཨཔསྶནྟོ ‘ཝཉྩིཏོ མེ སཧཱཡོ, ཡོ ཨེཝཾ ཝིཙིཏྟཔྤཊིབྷཱནཾ བྷགཝཏོ དེསནཾ ན སུཎཱཏཱི’ཏི ཝིཀྑིཏྟཙིཏྟོ ཨཧོསཱི’’ཏི ཝུཏྟཾ.

ཡསྨཱ པཊིསནྡྷིཛཱཏིཨབྷིནིཀྑམནབོདྷིཔརིནིབྦཱནེསྭེཝ དྭཏྟིཾས པུབྦནིམིཏྟཱནི ཧུཏྭཱཝ པཊིཝིགཙྪནྟི, ན ཙིརཊྛིཏིཀཱནི ཧོནྟི, དྷམྨཙཀྐཔྤཝཏྟནེ (སཾ. ནི. ༥.༡༠༨༡; པཊི. མ. ༢.༣༠) པན ཏཱནི སཝིསེསཱནི ཧུཏྭཱ ཙིརཏརཾ ཋཏྭཱ ནིརུཛ྄ཛྷནྟི, ཏསྨཱ ཝུཏྟཾ – ‘‘ཏིཡོཛནསཧསྶཾ ཧིམཝནྟཾ ཨཀཱལཔུཔྥིཏཾ དིསྭཱ’’ཏིཨཱདི. ཨགྒབལཀཱཡཱཏི སབྦཔུརཏོ གཙྪནྟཱ བལཀཱཡཱ. ཀེན པུཔྥིཏབྷཱཝཾ ཛཱནཱསཱིཏི ཀེན ཀཱརཎེན ཧིམཝནྟསྶ པུཔྥིཏབྷཱཝཾ ཛཱནཱསཱིཏི, ཡེན ཀཱརཎེན ཨིམཾ ཨཀཱལཔུཔྥཔཱཊིཧཱརིཡཾ ཛཱཏཾ, ཏཾ ཛཱནཱསཱིཏི ཝུཏྟཾ ཧོཏི. ཏསྶ པཝཏྟིཏབྷཱཝནྟི ཏསྶ དྷམྨཙཀྐསྶ བྷགཝཏཱ པཝཏྟིཏབྷཱཝཾ. སདྡེ ནིམིཏྟཾ གཎྷཱིཏི སདྡེ ཨཱཀཱརཾ སལླཀྑེསི. ཏཏོཏི ‘‘ཨཧཾ ‘ཨེཏཾ ཨམཏདྷམྨཾ ཏམྤི ¶ ཛཱནཱཔེསྶཱམཱི’ཏི ཏཝ སནྟིཀཾ ཨཱགཏོསྨཱི’’ཏི ཡཾ ཝུཏྟཾ, ཏདནནྟརནྟི ཨཏྠོ.

སཱཏཱགིརོ ¶ ཧེམཝཏསྶ བུདྡྷུཔྤཱདཾ ཀཐེཏྭཱ ཏཾ བྷགཝཏོ སནྟིཀཾ ཨཱནེཏུཀཱམོ ‘‘ཨཛྫ པནྣརསོ’’ཏིཨཱདིགཱཐམཱཧ. ཏཏྠ (སུ. ནི. ཨཊྛ. ༡.༡༥༣) ཨཛྫཱཏི ཨཡཾ རཏྟིནྡིཝོ པཀྑགཎནཏོ པནྣརསོ, ཨུཔཝསིཏབྦཏོ ཨུཔོསཐོ. ཏཱིསུ ཝཱ ཨུཔོསཐེསུ ཨཛྫ པནྣརསོ ཨུཔོསཐོ, ན ཙཱཏུདྡསིཨུཔོསཐོ, ན སཱམགྒཱིཨུཔོསཐོ. དིཝི བྷཝཱནི དིབྦཱནི, དིབྦཱནི ཨེཏྠ ཨཏྠཱིཏི དིབྦཱནི. ཀཱནི ཏཱནི? རཱུཔཱནི. ཏཉྷི རཏྟིཾ དེཝཱནཾ དསསཧསྶིལོཀདྷཱཏུཏོ སནྣིཔཏིཏཱནཾ སརཱིརཝཏྠཱབྷརཎཝིམཱནཔྤབྷཱཧི ཨབྦྷཱདིཨུཔཀྐིལེསཝིརཧིཏཱཡ ཙནྡཔྤབྷཱཡ ཙ སཀལཛམྦུདཱིཔོ ཨལངྐཏོ ཨཧོསཱིཏི ཨཏིཝིཡ ཨལངྐཏོ ཙ པརིཝིསུདྡྷིདེཝསྶ བྷགཝཏོ སརཱིརཔྤབྷཱཡ. ཏེནཱཧ – ‘‘དིབྦཱ རཏྟི ཨུཔཊྛིཏཱ’’ཏི.

ཨེཝཾ རཏྟིགུཎཝཎྞནཱཔདེསེནཔི སཧཱཡསྶ ཙིཏྟཾ པསཱདཾ ཛནེནྟོ བུདྡྷུཔྤཱདཾ ཀཐེཏྭཱ ཨཱཧ – ‘‘ཨནོམནཱམཾ སཏྠཱརཾ, ཧནྡ པསྶཱམ གོཏམ’’ནྟི. ཏཏྠ ཨནོམེཧི ཨལཱམཀེཧི སབྦཱཀཱརཔརིཔཱུརེཧི གུཎེཧི ནཱམཾ ཨསྶཱཏི ཨནོམནཱམོ. ཏཐཱ ཧིསྶ ‘‘བུཛ྄ཛྷིཏཱ སཙྩཱནཱིཏི བུདྡྷོ, བོདྷེཏཱ པཛཱཡཱཏི བུདྡྷོ’’ཏིཨཱདིནཱ (མཧཱནི. ༡༩༢; ཙཱུལ༹ནི. པཱརཱཡནཏྠུཏིགཱཐཱནིདྡེསོ ༩༧; པཊི. མ. ༡.༡༦༢) ནཡེན བུདྡྷོཏི ཨནོམེཧི གུཎེཧི ནཱམཾ. ‘‘བྷགྒརཱགོཏི བྷགཝཱ, བྷགྒདོསོཏི བྷགཝཱ’’ཏིཨཱདིནཱ (མཧཱནི. ༨༤) ནཡེན བྷགཝཱཏི ཨནོམེཧི གུཎེཧི ནཱམཾ. ཨེས ནཡོ ‘‘ཨརཧཾ སམྨཱསམྦུདྡྷོ ཝིཛྫཱཙརཎསམྤནྣོ’’ཏིཨཱདཱིསུ. དིཊྛདྷམྨིཀཱདིཨཏྠེཧི དེཝམནུསྶེ ཨནུསཱསཏི ‘‘ཨིམཾ པཛཧཐ, ཨིམཾ སམཱདཱཡ ཝཏྟཐཱ’’ཏི སཏྠཱ. ཏཾ ཨནོམནཱམཾ སཏྠཱརཾ. ཧནྡཱཏི ཝཙསཱཡཏྠེ ནིཔཱཏོ. པསྶཱམཱཏི ཏེན ཨཏྟཱནཾ སཧ སངྒཧེཏྭཱ པཙྩུཔྤནྣབཧུཝཙནཾ. གོཏམནྟི གོཏམགོཏྟཾ. ཨིདཾ ཝུཏྟཾ ཧོཏི – ‘‘སཏྠཱ, ན སཏྠཱ’’ཏི མཱ ཝིམཏིཾ ཨཀཱསི, ཨེཀནྟབྱཝསིཏོ ཧུཏྭཱཝ ཨེཧི པསྶཱམ གོཏམནྟི.

ཨེཝཾ ཝུཏྟེ ཧེམཝཏོ ‘‘ཨཡཾ སཱཏཱགིརོ ‘ཨནོམནཱམཾ སཏྠཱར’ནྟི བྷཎནྟོ ཏསྶ སབྦཉྙུཏཾ པཀཱསེཏི, སབྦཉྙུནོ ཙ དུལླབྷཱ ལོཀེ, སབྦཉྙུཔཊིཉྙེཧི པཱུརཎཱདིསདིསེཧེཝ ལོཀོ ཨུཔདྡུཏོ. སོ པན ཡདི སབྦཉྙཱུ, ཨདྡྷཱ ཏཱདིལཀྑཎཾ པཏྟོ བྷཝིསྶཏི, ཏེན ཨེཝཾ གཧེསྶཱམཱི’’ཏི ¶ ཙིནྟེཏྭཱ ཏཱདིལཀྑཎཾ པུཙྪནྟོ ཨཱཧ – ‘‘ཀཙྩི མནོ’’ཏིཨཱདི. ཏཏྠ ཀཙྩཱིཏི པུཙྪཱ. མནོཏི ཙིཏྟཾ. སུཔཎིཧིཏོཏི སུཊྛུ ཋཔིཏོ ཨཙལོ ཨསམྤཝེདྷཱི. སབྦེསུ བྷཱུཏེསུ སབྦབྷཱུཏེསུ. ཏཱདིནོཏི ཏཱདིལཀྑཎཾ པཏྟསྶེཝ སཏོ. པུཙྪཱ ཨེཝ ཝཱ ཨཡཾ ‘‘སོ ཏཝ སཏྠཱ སབྦབྷཱུཏེསུ ཏཱདཱི, ཨུདཱཧུ ནོ’’ཏི. ཨིཊྛེ ཨནིཊྛེཙཱཏི ཨེཝརཱུཔེ ཨཱརམྨཎེ. སངྐཔྤཱཏི ཝིཏཀྐཱ. ཝསཱིཀཏཱཏི ཝསཾ གམིཏཱ. ཨིདཾ ཝུཏྟཾ ཧོཏི – ཡཾ ཏཾ སཏྠཱརཾ ཝདསི, ཏསྶ ཏེ སཏྠུནོ ¶ ཀཙྩི ཏཱདིལཀྑཎཾ སམྤཏྟསྶ སཏོ སབྦབྷཱུཏེསུ མནོ སུཔཎིཧིཏོ, ཨུདཱཧུ ཡཱཝ པཙྩཡཾ ན ལབྷཏི, ཏཱཝ སུཔཎིཧིཏོ ཝིཡ ཁཱཡཏི. སོ ཝཱ ཏེ སཏྠཱ ཀཙྩི སབྦབྷཱུཏེསུ སཏྟེསུ ཏཱདཱི, ཨུདཱཧུ ནོ, ཡེ ཙ ཨིཊྛཱནིཊྛེསུ ཨཱརམྨཎེསུ རཱགདོསཝསེན སངྐཔྤཱ ཨུཔྤཛྫེཡྻུཾ, ཏྱཱསྶ ཀཙྩི ཝསཱིཀཏཱ, ཨུདཱཧུ ཀདཱཙི ཏེསམྤི ཝསེན ཝཏྟཏཱིཏི.

ཏཱིཎི ཝསྶཱནཱིཏི སོཎསྶ པབྦཛིཏདིཝསཏོ པཊྛཱཡ ཏཱིཎི ཝསྶཱནི. ཏདཱ ཀིར བྷིཀྑཱུ ཡེབྷུཡྻེན མཛ྄ཛྷིམདེསེཡེཝ ཝསིཾསུ, ཏསྨཱ ཏཏྠ ཀཏིཔཡཱ ཨེཝ ཨཧེསུཾ. ཏེ ཙ ཨེཀསྨིཾ ནིགམེ ཨེཀོ དྭེཏི ཨེཝཾ ཝིསུཾ ཝིསུཾ ཝསིཾསུ, ཐེརཱནཉྩ ཀཏིཔཡེ བྷིཀྑཱུ ཨཱནེཏྭཱ ཨཉྙེསུ ཨཱནཱིཡམཱནེསུ པུབྦཾ ཨཱནཱིཏཱ ཀེནཙིདེཝ ཀརཎཱིཡེན པཀྐམིཾསུ, ཀཉྩི ཀཱལཾ ཨཱགམེཏྭཱ པུན ཏེསུ ཨཱནཱིཡམཱནེསུ ཨིཏརེ པཀྐམིཾསུ, ཨེཝཾ པུནཔྤུནཾ ཨཱནཡནེན སནྣིཔཱཏོ ཙིརེནེཝ ཨཧོསི, ཐེརོ ཙ ཏདཱ ཨེཀཝིཧཱརཱི ཨཧོསི. ཏེན ཝུཏྟཾ – ‘‘ཏཱིཎི ཝསྶཱནི གཎཾ པརིཡེསིཏྭཱ’’ཏི. ཏཱིཎི ཝསྶཱནཱིཏི ཙ ཨཙྩནྟསཾཡོགེ ཨུཔཡོགཝཙནཾ. སཏྠུ ཨདྷིཔྤཱཡཾ ཉཏྭཱཏི ཨཏྟནོ ཨཱཎཱཔནེནེཝ ‘‘ཨིམིནཱ སདྡྷིཾ ཨེཀགནྡྷཀུཊིཡཾ ཝསིཏུཀཱམོ བྷགཝཱ’’ཏི སཏྠུ ཨདྷིཔྤཱཡཾ ཛཱནིཏྭཱ. བྷགཝཱ ཀིར ཡེན སདྡྷིཾ ཨེཀགནྡྷཀུཊིཡཾ ཝསིཏུཀཱམོ, ཏསྶ སེནཱསནཔཉྙཏྟིཡཾ ཨཱནནྡཏྠེརཾ ཨཱཎཱཔེཏི.

ཨཛ྄ཛྷོཀཱསེ ཝཱིཏིནཱམེཏྭཱཏི ཨཛ྄ཛྷོཀཱསེ ནིསཛྫཱཡ ཝཱིཏིནཱམེཏྭཱ. ཡསྨཱ བྷགཝཱ ཨཱཡསྨཏོ སོཎསྶ སམཱཔཏྟིསམཱཔཛྫནེན པཊིསནྠཱརཾ ཀརོནྟོ སཱཝཀསཱདྷཱརཎཱ སབྦཱ སམཱཔཏྟིཡོ ཨནུལོམཔྤཊིལོམཾ སམཱཔཛྫནྟོ བཧུདེཝ རཏྟིཾ ཨཛ྄ཛྷོཀཱསེ ནིསཛྫཱཡ ཝཱིཏིནཱམེཏྭཱ པཱདེ པཀྑཱལེཏྭཱ ཝིཧཱརཾ པཱཝིསི, ཏསྨཱ ཨཱཡསྨཱཔི སོཎོ བྷགཝཏོ ཨདྷིཔྤཱཡཾ ཉཏྭཱ ཏདནུརཱུཔཾ སབྦཱ ཏཱ སམཱཔཏྟིཡོ ¶ སམཱཔཛྫནྟོ བཧུདེཝ རཏྟིཾ ཨཛ྄ཛྷོཀཱསེ ནིསཛྫཱཡ ཝཱིཏིནཱམེཏྭཱ པཱདེ པཀྑཱལེཏྭཱ ཝིཧཱརཾ པཱཝིསཱིཏི ཝདནྟི. པཝིསིཏྭཱ ཙ བྷགཝཏཱ ཨནུཉྙཱཏོ ཙཱིཝརཏིརོཀརཎིཡཾ ཀཏྭཱ བྷགཝཏོ པཱདཔསྶེ ནིསཛྫཱཡ ཝཱིཏིནཱམེསི. ཨཛ྄ཛྷེསཱིཏི ཨཱཎཱཔེསི. པཊིབྷཱཏུ ཏཾ བྷིཀྑུ དྷམྨོ བྷཱསིཏུནྟི བྷིཀྑུ ཏུཡ྄ཧཾ དྷམྨོ བྷཱསིཏུཾ ཨུཔཊྛཱཏུ, ཉཱཎམུཁཾ ཨཱགཙྪཏུ, ཡཐཱསུཏཾ ཡཐཱཔརིཡཏྟཾ དྷམྨཾ བྷཎཱཧཱིཏི ཨཏྠོ. ཨཊྛཀཝགྒིཡཱནཱིཏི ཨཊྛཀཝགྒབྷཱུཏཱནི ཀཱམསུཏྟཱདིསོལ༹སསུཏྟཱནི (མཧཱནི. ༡). སུགྒཧིཏོཏི སམྨཱ ཨུགྒཧིཏོ. སབྦེ ཝརེ ཡཱཙཱིཏི ཝིནཡདྷརཔཉྩམེན གཎེན ཨུཔསམྤདཱ དྷུཝནྷཱནཾ ཙམྨཏྠརཎཾ གཎངྒཎཱུཔཱཧནཾ ཙཱིཝརཝིཔྤཝཱསོཏི ཨིམེ པཉྩ ཝརེ ཡཱཙི. སུཏྟེ ཨཱགཏམེཝཱཏི ཨུདཱནཔཱལི༹ཡཾ ཨཱགཏསུཏྟཾ སནྡྷཱཡ ཝདཏི.

སཱིཝལིཏྠེརཝཏྠུ

༢༠༧. ནཝམེ ¶ སཱཀཙྪིཏྭཱ སཱཀཙྪིཏྭཱཏི རཉྙཱ སདྡྷིཾ པཊིཝིརུཛ྄ཛྷནཝསེན པུནཔྤུནཾ སཱཀཙྪཾ ཀཏྭཱ. གུལ༹དདྷིནྟི པཏྠིནྣཾ གུལ༹སདིསཾ ཀཋིནདདྷིཾ. ཨཏིཨཉྪིཏུནྟི ཨཏིཝིཡ ཨཱཀཌྜྷིཏུཾ. ཀཉྫིཡཾ ཝཱཧེཏྭཱཏི དདྷིམཏྠུཾ པཝཱཧེཏྭཱ, པརིསྶཱཝེཏྭཱཏི ཨཏྠོ. ‘‘དདྷིཏོ ཀཉྫིཡཾ གཧེཏྭཱ’’ཏིཔི པཱཋོ. ནནྟི སུཔྤཝཱསཾ. བཱིཛཔཙྪིཾ ཕུསཱཔེནྟཱིཏི ཨིམིནཱ སམྦནྡྷོ. ཡཱཝ ན ཨུཀྐཌྜྷནྟཱིཏི ཡཱཝ དཱནེ ན ཨུཀྐཌྜྷནྟི, དཱཏུཀཱམཱཝ ཧོནྟཱིཏི ཨདྷིཔྤཱཡོ མཧཱདུཀྑཾ ཨནུབྷོསཱིཏི པསཝནིབནྡྷནཾ མཧནྟཾ དུཀྑཾ ཨནུབྷོསི. སཱམིཀཾ ཨཱམནྟེཏྭཱཏི སཏྟཱཧཾ མཱུལ༹ྷགབྦྷཱ ཏིབྦཱཧི ཁརཱཧི དུཀྑཝེདནཱཧི ཕུཊྛཱ ‘‘སམྨཱསམྦུདྡྷོ ཝཏ སོ བྷགཝཱ, ཡོ ཨིམསྶ ཨེཝརཱུཔསྶ དུཀྑསྶ པཧཱནཱཡ དྷམྨཾ དེསེཏི. སུཔྤཊིཔནྣོ ཝཏ ཏསྶ བྷགཝཏོ སཱཝཀསངྒྷོ, ཡོ ཨིམསྶ ཨེཝརཱུཔསྶ དུཀྑསྶ པཧཱནཱཡ པཊིཔནྣོ. སུསུཁཾ ཝཏ ནིབྦཱནཾ, ཡཏྠིདཾ ཨེཝརཱུཔཾ དུཀྑཾ ན སཾཝིཛྫཏཱི’’ཏི (ཨུདཱ. ༡༨) ཨིམེཧི ཏཱིཧི ཝིཏཀྐེཧི ཏཾ དུཀྑཾ ཨདྷིཝཱསེནྟཱི སཏྠུ སནྟིཀཾ པེསེཏུཀཱམཏཱཡ སཱམིཀཾ ཨཱམནྟེཏྭཱ. པུརེ མརཎཱཏི མརཎཏོ པུརེཏརམེཝ. ཨིངྒིཏནྟི ཨཱཀཱརཾ. ཛཱིཝིཏབྷཏྟནྟི ཛཱིཝིཏསཾསཡེ དཱཏབྦབྷཏྟཾ. སབྦཀམྨཀྑམོ ཨཧོསཱིཏི སཏྟཝསྶིཀེཧི དཱརཀེཧི ཀཱཏབྦཾ ཡཾ ཀིཉྩི ཀམྨཾ ཀཱཏུཾ སམཏྠཏཱཡ སབྦསྶ ཀམྨསྶ ཁམོ ཨཧོསི. ཏེནེཝ སོ སཏྟཱཧཾ མཧཱདཱནེ ¶ དཱིཡམཱནེ ཛཱཏདིཝསཏོ པཊྛཱཡ དྷམྨཀརཎཾ ཨཱདཱཡ སངྒྷསྶ ཨུདཀཾ པརིསྶཱཝེཏྭཱ ཨདཱསི.

ཡོམནྟིཨཱདིགཱཐཱཡ ‘‘ཡོ བྷིཀྑུ ཨིམཾ རཱགཔལིཔཐཉྩེཝ ཀིལེསདུགྒཉྩ སཾསཱརཝཊྚཉྩ ཙཏུནྣཾ སཙྩཱནཾ ཨཔྤཊིཝིཛ྄ཛྷནཀམོཧཉྩ ཨཏཱིཏོ ཙཏྟཱརོ ཨོགྷེ ཏིཎྞོ ཧུཏྭཱ པཱརཾ ཨནུཔྤཏྟོ, དུཝིདྷེན ཛྷཱནེན ཛྷཱཡཱི, ཏཎྷཱཡ ཨབྷཱཝེན ཨནེཛོ, ཀཐཾཀཐཱཡ ཨབྷཱཝེན ཨཀཐཾཀཐཱི, ཨུཔཱདཱནཱནཾ ཨབྷཱཝེན ཨནུཔཱདིཡིཏྭཱ ཀིལེསནིབྦཱནེན ནིབྦུཏོ, ཏམཧཾ བྲཱཧྨཎཾ ཝདཱམཱི’’ཏི ཨཏྠོ.

སབྦེསཾཡེཝ པན ཀེསཱནཾ ཨོརོཔནཉྩ ཨརཧཏྟསཙྪིཀིརིཡཱ ཙ ཨཔཙྪཱཨཔུརིམཱ ཨཧོསཱིཏི ཨིམིནཱ ཐེརསྶ ཁུརགྒེཡེཝ ཨརཧཏྟུཔྤཏྟི དཱིཔིཏཱ. ཨེཀཙྩེ པན ཨཱཙརིཡཱ ཨེཝཾ ཝདནྟི ‘‘ཧེཊྛཱ ཝུཏྟནཡེན དྷམྨསེནཱཔཏིནཱ ཨོཝཱདེ དིནྣེ ‘ཡཾ མཡཱ ཀཱཏུཾ སཀྐཱ, ཏམཧཾ ཛཱནིསྶཱམཱི’ཏི པབྦཛིཏྭཱ ཝིཔསྶནཱཀམྨཊྛཱནཾ གཧེཏྭཱ ཏཾ དིཝསཾཡེཝ ཨཉྙཏརཾ ཝིཙིཏྟཾ ཀུཊིཀཾ དིསྭཱ པཝིསིཏྭཱ མཱཏུཀུཙྪིཡཾ སཏྟ ཝསྶཱནི ཨཏྟནཱ ཨནུབྷཱུཏདུཀྑཾ ཨནུསྶརིཏྭཱ ཏདནུསཱརེན ཨཏཱིཏཱནཱགཏེ ཉཱཎཾ ནེནྟསྶ ཨཱདིཏྟཱ ཝིཡ ཏཡོ བྷཝཱ ཨུཔཊྛཧིཾསུ. ཉཱཎསྶ པརིཔཱཀཾ གཏཏྟཱ ¶ ཝིཔསྶནཱཝཱིཐིཾ ཨོཏརིཏྭཱ ཏཱཝདེཝ མགྒཔྤཊིཔཱཊིཡཱ སབྦེཔི ཨཱསཝེ ཁེཔེནྟོ ཨརཧཏྟཾ པཱཔུཎཱི’’ཏི. ཨུབྷཡཐཱཔི ཐེརསྶ ཨརཧཏྟུཔྤཏྟིཡེཝ པཀཱསིཏཱ, ཐེརོ པན པབྷིནྣཔྤཊིསམྦྷིདོ ཚལ༹བྷིཉྙོ ཨཧོསི.

ཝཀྐལིཏྠེརཝཏྠུ

༢༠༨. དསམེ ཨཱཧཱརཀརཎཝེལནྟི བྷོཛནཀིཙྩཝེལཾ. ཨདྷིགཙྪེ པདཾ སནྟནྟི སངྑཱརཱུཔསམཾ སུཁནྟི ལདྡྷནཱམཾ སནྟཾ པདཾ ནིབྦཱནཾ ཨདྷིགཙྪེཡྻ. པཋམཔཱདེན པབྦཏེ ཋིཏོཡེཝཱཏི པཋམེན པཱདེན གིཛ྄ཛྷཀཱུཊེ པབྦཏེ ཋིཏོཡེཝ. སེསམེཏྠ སུཝིཉྙེཡྻམེཝ.

དུཏིཡཨེཏདགྒཝགྒཝཎྞནཱ ནིཊྛིཏཱ.

༡༤. ཨེཏདགྒཝགྒོ

(༡༤) ༣. ཏཏིཡཨེཏདགྒཝགྒཝཎྞནཱ

རཱཧུལ-རཊྛཔཱལཏྠེརཝཏྠུ

༢༠༩-༢༡༠. ཏཏིཡསྶ ¶ ¶ པཋམདུཏིཡེསུ ཏིསྶོ སིཀྑཱཏི ཨདྷིསཱིལཨདྷིཙིཏྟཨདྷིཔཉྙཱསངྑཱཏཱ ཏིསྶོ སིཀྑཱ. ཙུདྡས བྷཏྟཙྪེདེ ཀཏྭཱཏི སཏྟཱཧཾ ནིརཱཧཱརཏཱཡ ཨེཀེཀསྨིཾ དིཝསེ དྭིནྣཾ བྷཏྟཙྪེདཱནཾ ཝསེན ཙུདྡས བྷཏྟཙྪེདེ ཀཏྭཱ.

ཏེསནྟི ཏེསཾ ཏཱཔསཱནཾ. ལཱབུབྷཱཛནཱདིཔརིཀྑཱརཾ སཾཝིདྷཱཡཱཏི ལཱབུབྷཱཛནཱདིཏཱཔསཔརིཀྑཱརཾ སཾཝིདཧིཏྭཱ. སཔརིལཱ༹ཧཀཱཡདྷཱཏུཀོཏི ཨུསྶནྣཔིཏྟཏཱཡ སཔརིལཱ༹ཧཀཱཡསབྷཱཝོ. སཏསཧསྶཱཏི སཏསཧསྶཔརིམཱཎཱ. སཏསཧསྶཾ པརིམཱཎཾ ཨེཏེསནྟི སཏསཧསྶཱ ཨུཏྟརཔདལོཔེན ཡཐཱ ‘‘རཱུཔབྷཝོ རཱུཔ’’ནྟི, ཨཏྠིཨཏྠེ ཝཱ ཨཀཱརཔཙྩཡོ དཊྛབྦོ. པཱཎཱཏིཔཱཏཱདིཨཀུསལདྷམྨསམུདཱཙཱརསངྑཱཏོ ཨཱམགནྡྷོ ཀུཎཔགནྡྷོ ནཏྠི ཨེཏེསནྟི ནིརཱམགནྡྷཱ, ཡཐཱཝུཏྟཀིལེསསམུདཱཙཱརརཧིཏཱཏི ཨཏྠོ. ཀིལེསསམུདཱཙཱརོ ཧེཏྠ ‘‘ཨཱམགནྡྷོ’’ཏི ཝུཏྟོ. ཀིཾཀཱརཎཱ? ཨམནུཉྙཏྟཱ, ཀིལེསཨསུཙིམིསྶཏྟཱ, སབྦྷི ཛིགུཙྪིཏཏྟཱ, པརམདུགྒནྡྷབྷཱཝཝཧཏྟཱ ཙ. ཏཐཱ ཧི ཡེ ཡེ ཨུསྶནྣཀིལེསཱ སཏྟཱ, ཏེ ཏེ ཨཏིདུགྒནྡྷཱ ཧོནྟི. ཏེནེཝ ནིཀྐིལེསཱནཾ མཏསརཱིརམྤི དུགྒནྡྷཾ ན ཧོཏི. དཱནགྒཔརིཝཧནཀེཏི དཱནགྒདྷུརཝཧནཀེ. མཱཔཀོཏི དིཝསེ དིཝསེ པརིམིཏཔརིབྦཡདཱནཝསེན དྷཉྙམཱཔཀོ.

པཱལི༹ཡནྟི ཝིནཡཔཱལི༹ཡཾ. མིགཛཱཏཀཾ ཨཱཧརིཏྭཱ ཀཐེསཱིཏི ཨཏཱིཏེ ཀིར བོདྷིསཏྟོ མིགཡོནིཡཾ ནིབྦཏྟིཏྭཱ མིགགཎཔརིཝུཏོ ཨརཉྙེ ཝསཏི. ཨཐསྶ བྷགིནཱི ཨཏྟནོ པུཏྟཀཾ ཨུཔནེཏྭཱ ‘‘བྷཱཏིཀ ཨིམཾ བྷཱགིནེཡྻཾ མིགམཱཡཾ སིཀྑཱཔེཧཱི’’ཏི ཨཱཧ. བོདྷིསཏྟོ ‘‘སཱདྷཱུ’’ཏི པཊིསྶུཎིཏྭཱ ‘‘གཙྪ ཏཱཏ, ཨསུཀཝེལཱཡཾ ནཱམ ཨཱགནྟྭཱ སིཀྑེཡྻཱསཱི’’ཏི ཨཱཧ. སོ མཱཏུལེན ཝུཏྟཝེལཾ ཨནཏིཀྐམིཏྭཱ ཏཾ ཨུཔསངྐམིཏྭཱ མིགམཱཡཾ སིཀྑི. སོ ཨེཀདིཝསཾ ཝནེ ཝིཙརནྟོ པཱསེན བདྡྷོ བདྡྷརཝཾ ཝིརཝི. མིགགཎོ པལཱཡིཏྭཱ ‘‘པུཏྟོ ཏེ པཱསེན བདྡྷོ’’ཏི ཏསྶ མཱཏུཡཱ ཨཱརོཙེསི. སཱ བྷཱཏུ སནྟིཀཾ གནྟྭཱ ‘‘བྷཱཏིཀ བྷཱགིནེཡྻོ ¶ ཏེ མིགམཱཡཾ སིཀྑཱཔིཏོ’’ཏི ¶ པུཙྪི. བོདྷིསཏྟོ ‘‘མཱ ཏྭཾ པུཏྟསྶ ཀིཉྩི པཱཔཀཾ ཨཱསངྐི, སུགྒཧིཏཱ ཏེན མིགམཱཡཱ, ཨིདཱནི ཏཾ ཧཱསཡམཱནོ ཨཱགཙྪིསྶཏཱི’’ཏི ཝཏྭཱ ‘‘མིགཾ ཏིཔལླཏྠ’’ནྟིཨཱདིམཱཧ.

ཏཏྠ མིགནྟི བྷཱགིནེཡྻམིགཾ. ཏིཔལླཏྠཾ ཝུཙྩཏི སཡནཾ, ཨུབྷོཧི པསྶེཧི ཨུཛུཀམེཝ ཙ ནིཔནྣཀཝསེན ཏཱིཧཱཀཱརེཧི པལླཏྠཾ ཨསྶ, ཏཱིཎི ཝཱ པལླཏྠཱནི ཨསྶཱཏི ཏིཔལླཏྠོ, ཏཾ ཏིཔལླཏྠཾ. ཨནེཀམཱཡནྟི བཧུམཱཡཾ བཧུཝཉྩནཾ. ཨཊྛཀྑུརནྟི ཨེཀེཀསྨིཾ པཱདེ དྭིནྣཾ དྭིནྣཾ ཝསེན ཨཊྛཧི ཁུརེཧི སམནྣཱགཏཾ. ཨཌྜྷརཏྟཱཔཔཱཡིནྟི པུརིམཡཱམཾ ཨཏིཀྐམིཏྭཱ མཛ྄ཛྷིམཡཱམེ ཨརཉྙཏོ ཨཱགམྨ པཱནཱིཡསྶ པིཝནཏོ ཨཌྜྷརཏྟེ ཨཱཔཾ པིཝཏཱིཏི ཨཌྜྷརཏྟཱཔཔཱཡཱི. ‘‘ཨཌྜྷརཏྟེ ཨཱཔཔཱཡི’’ནྟིཔི པཱཋོ. མམ བྷཱགིནེཡྻཾ མིགཾ ཨཧཾ སཱདྷུཀཾ མིགམཱཡཾ ཨུགྒཎྷཱཔེསིཾ. ཀཐཾ? ཡཐཱ ཨེཀེན སོཏེན ཚམཱཡཾ ཨསྶསནྟོ ཚཧི ཀལཱཧི ཨཏིབྷོཏི བྷཱགིནེཡྻོ. ཨིདཾ ཝུཏྟཾ ཧོཏི – ཨཡཉྷི ཏཝ པུཏྟཾ ཏཐཱ ཨུགྒཎྷཱཔེསིཾ, ཡཐཱ ཨེཀསྨིཾ ཨུཔརིམནཱསིཀཱསོཏེ ཝཱཏཾ སནྣིརུམྦྷིཏྭཱ པཐཝིཡཾ ཨལླཱིནེན ཨེཀེན ཧེཊྛིམནཱསིཀཱསོཏེན ཏཐེཝ ཚམཱཡཾ ཨསྶསནྟོ ཚཧི ཀལཱཧི ལུདྡཀཾ ཨཏིབྷོཏི, ཚཧི ཀོཊྛཱསེཧི ཨཛ྄ཛྷོཏྠརཏི ཝཉྩེཏཱིཏི ཨཏྠོ. ཀཏམེཧི ཚཧི? ཙཏྟཱརོ པཱདེ པསཱརེཏྭཱ ཨེཀེན པསྶེན སེཡྻཱཡ, ཁུརེཧི ཏིཎཔཾསུཁཎནེན, ཛིཝ྄ཧཱནིནྣཱམནེན, ཨུདརསྶ ཨུདྡྷུམཱཏབྷཱཝཀརཎེན, ཨུཙྩཱརཔསྶཱཝཝིསྶཛྫནེན, ཝཱཏསྶ ནིརུམྦྷནེནཱཏི. ཨཐ ཝཱ ཏཐཱ ནཾ ཨུགྒཎྷཱཔེསིཾ, ཡཐཱ ཨེཀེན སོཏེན ཚམཱཡཾ ཨསྶསནྟོ. ཚཧཱིཏི ཧེཊྛཱ ཝུཏྟེཧི ཚཧི ཀཱརཎེཧི. ཀལཱཧཱིཏི ཀལཱཡིསྶཏི, ལུདྡཀཾ ཝཉྩེསྶཏཱིཏི ཨཏྠོ. བྷོཏཱིཏི བྷགིནིཾ ཨཱལཔཏི. བྷཱགིནེཡྻོཏི ཨེཝཾ ཚཧི ཀཱརཎེཧི ཝཉྩཀཾ བྷཱགིནེཡྻཾ ནིདྡིསཏི.

ཨེཝཾ བོདྷིསཏྟོ བྷཱགིནེཡྻསྶ མིགམཱཡཾ སཱདྷུཀཾ ཨུགྒཧིཏབྷཱཝཾ ཝདནྟོ བྷགིནིཾ སམསྶཱསེསི. སོཔི མིགཔོཏཀོ པཱསེ བདྡྷོ ཨནིབནྡྷིཏྭཱཡེཝ བྷཱུམིཡཾ མཧཱཕཱསུཀཔསྶེན པཱདེ པསཱརེཏྭཱ ནིཔནྣོ པཱདཱནཾ ཨཱསནྣཊྛཱནེ ཁུརེཧི ཨེཝ པཧརིཏྭཱ པཾསུཉྩ ཏིཎཱནི ཙ ཨུཔྤཱཊེཏྭཱ ཨུཙྩཱརཔསྶཱཝཾ ཝིསྶཛྫེཏྭཱ སཱིསཾ པཱཏེཏྭཱ ཛིཝ྄ཧཾ ནིནྣཱམེཏྭཱ སརཱིརཾ ཁེལ༹ཀིལིནྣཾ ཀཏྭཱ ཝཱཏགྒཧཎེན ཨུདརཾ ཨུདྡྷུམཱཏཀཾ ཀཏྭཱ ཨཀྑཱིནི པརིཝཏྟེཏྭཱ ཧེཊྛཱནཱསིཀཱསོཏེན ཝཱཏཾ སཉྩརཱཔེནྟོ ཨུཔརིམནཱསིཀཱསོཏེན ¶ ཝཱཏཾ སནྣིརུམྦྷིཏྭཱ སཀལསརཱིརཾ ཐདྡྷབྷཱཝཾ གཱཧཱཔེཏྭཱ མཏཀཱཀཱརཾ དསྶེསི, ནཱིལམཀྑིཀཱཔི ནཾ སམྤརིཝཱརེསུཾ, ཏསྨིཾ ཏསྨིཾ ཋཱནེ ཀཱཀཱ ནིལཱིཡིཾསུ. ལུདྡོ ཨཱགནྟྭཱ ཨུདརེ ཧཏྠེན པཧརིཏྭཱ ‘‘པཱཏོཝ བདྡྷོ བྷཝིསྶཏི, པཱུཏིཀོ ཛཱཏོ’’ཏི ཏསྶ བནྡྷནརཛྫུཾ མོཙེཏྭཱ ‘‘ཨེཏྠེཝ དཱནི ནཾ ཨུཀྐནྟིཏྭཱ མཾསཾ ཨཱདཱཡ གམིསྶཱམཱི’’ཏི ¶ ནིརཱསངྐོ ཧུཏྭཱ སཱཁཱཔལཱསཾ གཧེཏུཾ ཨཱརདྡྷོ. མིགཔོཏཀོཔི ཨུཊྛཱཡ ཙཏཱུཧི པཱདེཧི ཋཏྭཱ ཀཱཡཾ ཝིདྷུནིཏྭཱ གཱིཝཾ པསཱརེཏྭཱ མཧཱཝཱཏེན ཚིནྣཝལཱཧཀོ ཝིཡ ཝེགེན མཱཏུ སནྟིཀཾ ཨགམཱསི. སཏྠཱ ‘‘ན, བྷིཀྑཝེ, རཱཧུལོ ཨིདཱནེཝ སིཀྑཱཀཱམོ, པུབྦེཔི སིཀྑཱཀཱམོཡེཝཱ’’ཏི ཨེཝཾ མིགཛཱཏཀཾ ཨཱཧརིཏྭཱ ཀཐེསི.

ཨམྦལཊྛིཡརཱཧུལོཝཱདཾ དེསེསཱིཏི ‘‘པསྶསི ནོ ཏྭཾ, རཱཧུལ, ཨིམཾ པརིཏྟཾ ཨུདཀཱཝསེསཾ ཨུདཀཱདཱནེ ཋཔིཏནྟི? ཨེཝཾ, བྷནྟེ. ཨེཝཾ པརིཏྟཀཾ ཁོ, རཱཧུལ, ཏེསཾ སཱམཉྙཾ, ཡེསཾ ནཏྠི སམྤཛཱནམུསཱཝཱདེ ལཛྫཱ’’ཏི ཨེཝམཱདིནཱ ཨམྦལཊྛིཡརཱཧུལོཝཱདཾ (མ. ནི. ༢.༡༠༧ ཨཱདཡོ) ཀཐེསི. གེཧསིཏཾ ཝིཏཀྐཾ ཝིཏཀྐེནྟསྶཱཏི ཨཱཡསྨཱ ཀིར རཱཧུལོ བྷགཝཏོ པིཊྛིཏོ པིཊྛིཏོ གཙྪནྟོཝ པཱདཏལཏོ ཡཱཝ ཨུཔརི ཀེསནྟཱ ཏཐཱགཏཾ ཨོལོཀེསི, སོ བྷགཝཏོ བུདྡྷཝེསཝིལཱསཾ དིསྭཱ ‘‘སོབྷཏི བྷགཝཱ དྭཏྟིཾསམཧཱཔུརིསལཀྑཎཝིཙིཏྟསརཱིརོ བྱཱམཔྤབྷཱཔརིཀྑིཏྟཏཱཡ ཝིཔྤཀིཎྞསུཝཎྞཙུཎྞམཛ྄ཛྷགཏོ ཝིཡ ཝིཛྫུལཏཱཔརིཀྑིཏྟོ ཀནཀཔབྦཏོ ཝིཡ ཡནྟསམཱཀཌྜྷིཏརཏནཝིཙིཏྟསུཝཎྞཨགྒྷིཀཾ ཝིཡ པཾསུཀཱུལཙཱིཝརཔྤཊིཙྪནྣོཔི རཏྟཀམྦལཔརིཀྑིཏྟཀནཀཔབྦཏོ ཝིཡ པཝཱལ༹ལཏཱཔཊིམཎྜིཏསུཝཎྞགྷཊིཀཾ ཝིཡ ཙཱིནཔིཊྛཙུཎྞཔཱུཛིཏསུཝཎྞཙེཏིཡཾ ཝིཡ ལཱཁཱརསཱནུལིཏྟོ ཀནཀཐཱུཔོ ཝིཡ རཏྟཝལཱཧཀནྟརགཏོ ཏངྑཎམུགྒཏཔུཎྞཙནྡོ ཝིཡ ཨཧོ སམཏིཾསཔཱརམིཏཱནུབྷཱཝེན སཛྫིཏསྶ ཨཏྟབྷཱཝསྶ སིརིསམྤཏྟཱི’’ཏི ཙིནྟེསི. ཏཏོ ཨཏྟཱནམྤི ཨོལོཀེཏྭཱ ‘‘ཨཧམྤི སོབྷཱམི, སཙེ བྷགཝཱ ཙཏཱུསུ མཧཱདཱིཔེསུ ཙཀྐཝཏྟིརཛྫཾ ཨཀརིསྶ, མཡ྄ཧཾ པརིཎཱཡཀཊྛཱནནྟརམདསྶ, ཨེཝཾ སནྟེ ཨཏིཝིཡ ཛམྦུདཱིཔཏལཾ ཨཏིསོབྷིསྶཱ’’ཏི ཨཏྟབྷཱཝཾ ནིསྶཱཡ གེཧསིཏཾ ཚནྡརཱགཾ ཨུཔྤཱདེསི. ཏཾ སནྡྷཱཡེཏཾ ཝུཏྟཾ – ‘‘སཏྠུ ཙེཝ ཨཏྟནོ ཙ རཱུཔསམྤཏྟིཾ དིསྭཱ གེཧསིཏཾ ཝིཏཀྐཾ ཝིཏཀྐེནྟསྶཱ’’ཏི.

བྷགཝཱཔི ¶ པུརཏོ གཙྪནྟོཝ ཙིནྟེསི – ‘‘པརིཔུཎྞཙྪཝིམཾསལོཧིཏོ དཱནི རཱཧུལསྶ ཨཏྟབྷཱཝོ, རཛནཱིཡེསུ རཱུཔཱརམྨཎཱདཱིསུ ཙིཏྟསྶ པཀྑནྡནཀཱལོ ཛཱཏོ, ནིཔྥལཏཱཡ ནུ ཁོ རཱཧུལོ ཝཱིཏིནཱམེཏཱི’’ཏི. ཨཐ སཧཱཝཛྫནེནེཝ པསནྣེ ཨུདཀེ མཙྪཾ ཝིཡ པརིསུདྡྷེ ཨཱདཱསམཎྜལེ མུཁནིམིཏྟཾ ཝིཡ ཙ ཏསྶ ཏཾ ཙིཏྟུཔྤཱདཾ ཨདྡས, དིསྭཱ ཙ ‘‘ཨཡཾ རཱཧུལོ མཡ྄ཧཾ ཨཏྲཛོ ཧུཏྭཱ མམ པཙྪཏོ ཨཱགཙྪནྟོ ‘ཨཧཾ སོབྷཱམི, མཡ྄ཧཾ ཝཎྞཱཡཏནཾ པསནྣ’ནྟི ཨཏྟབྷཱཝཾ ནིསྶཱཡ གེཧསིཏཾ ཚནྡརཱགཾ ཨུཔྤཱདེཏི, ཨཏིཏྠེ པཀྑནྡོ, ཨུཔྤཐཾ པཊིཔནྣོ, ཨགོཙརེ ཙརཏི, དིསཱམཱུལ༹ྷཨདྡྷིཀོ ཝིཡ ཨགནྟབྦཾ དིསཾ གཙྪཏི, ཨཡཾ ཁོ པནསྶ ཀིལེསོ ཨབྦྷནྟརེ ཝཌྜྷནྟོ ཨཏྟཏྠམྤི ཡཐཱབྷཱུཏཾ པསྶིཏུཾ ན དསྶིསྶཏི པརཏྠམྤི ཨུབྷཡཏྠམྤི, ཏཏོ ¶ ནིརཡེཔི པཊིསནྡྷིཾ གཎྷཱཔེསྶཏི, ཏིརཙྪཱནཡོནིཡམྤི པེཏྟིཝིསཡེཔི ཨསུརཀཱཡེཔི སམྦཱདྷེཔི མཱཏུཀུཙྪིསྨིནྟི ཨནམཏགྒེ སཾསཱརཝཊྚེ པརིཔཱཏེསྶཏི. ཡཐཱ ཁོ པན ཨནེཀརཏནཔཱུརཱ མཧཱནཱཝཱ བྷིནྣཕལཀནྟརེན ཨུདཀཾ ཨཱདིཡམཱནཱ མུཧུཏྟམྤི ན ཨཛ྄ཛྷུཔེཀྑིཏབྦཱ ཧོཏི, ཝེགེན ཝེགེནསྶཱ ཝིཝརཾ པིདཧིཏུཾ ཝཊྚཏི, ཨེཝམེཝ ཨཡམྤི ན ཨཛ྄ཛྷུཔེཀྑིཏབྦོ. ཡཱཝསྶ ཨཡཾ ཀིལེསོ ཨབྦྷནྟརེ སཱིལརཏནཱདཱིནི ན ཝིནཱསེཏི, ཏཱཝདེཝ ནཾ ནིགྒཎྷིསྶཱམཱི’’ཏི ཨཛ྄ཛྷཱསཡཾ ཨཀཱསི. ཏཏོ རཱཧུལཾ ཨཱམནྟེཏྭཱ ‘‘ཡཾ ཀིཉྩི, རཱཧུལ, རཱུཔཾ ཨཏཱིཏཱནཱགཏཔཙྩུཔྤནྣཾ ཨཛ྄ཛྷཏྟཾ ཝཱ བཧིདྡྷཱ ཝཱ ཨོལཱ༹རིཀཾ ཝཱ སུཁུམཾ ཝཱ ཧཱིནཾ ཝཱ པཎཱིཏཾ ཝཱ ཡཾ དཱུརེ སནྟིཀེ ཝཱ, སབྦཾ རཱུཔཾ ‘ནེཏཾ མམ, ནེསོཧམསྨི, ན མེསོ ཨཏྟཱ’ཏི ཨེཝམེཏཾ ཡཐཱབྷཱུཏཾ སམྨཔྤཉྙཱཡ དཊྛབྦནྟི. རཱུཔམེཝ ནུ ཁོ བྷགཝཱ རཱུཔམེཝ ནུ ཁོ སུགཏཱཏི. རཱུཔམྤི རཱཧུལ, ཝེདནཱཔི རཱཧུལ, སཉྙཱཔི རཱཧུལ, སངྑཱརཱཔི རཱཧུལ, ཝིཉྙཱཎམྤི རཱཧུལཱ’’ཏི མཧཱརཱཧུལོཝཱདསུཏྟཾ (མ. ནི. ༢.༡༡༣ ཨཱདཡོ) ཨབྷཱསི. ཏཾ དསྶེཏུཾ – ‘‘ཡཾ ཀིཉྩི རཱཧུལ…པེ… ཀཐེསཱི’’ཏི ཝུཏྟཾ.

སཾཡུཏྟཀེ པན རཱཧུལོཝཱདོཏི རཱཧུལསཾཡུཏྟེ ཝུཏྟརཱཧུལོཝཱདཾ སནྡྷཱཡ ཝདནྟི. ཏཏྠ ‘‘སཱདྷུ མེ, བྷནྟེ, བྷགཝཱ སཾཁིཏྟེན དྷམྨཾ དེསེཏུ, ཡམཧཾ, བྷནྟེ, བྷགཝཏོ དྷམྨཾ སུཏྭཱ ཨེཀོ ཝཱུཔཀཊྛོ ཨཔྤམཏྟོ ཨཱཏཱཔཱི པཧིཏཏྟོ ཝིཧརེཡྻ’’ནྟི ཐེརེན ཡཱཙིཏོ ‘‘ཏཾ ཀིཾ མཉྙསི, རཱཧུལ, ཙཀྑུ ནིཙྩཾ ཝཱ ཨནིཙྩཾ ཝཱཏི? ཨནིཙྩཾ, བྷནྟེ. ཡཾ པནཱནིཙྩཾ ¶ , དུཀྑཾ ཝཱ ཏཾ སུཁཾ ཝཱཏི? དུཀྑཾ, བྷནྟེ. ཡཾ པནཱནིཙྩཾ དུཀྑཾ ཝིཔརིཎཱམདྷམྨཾ, ཀལླཾ ནུ ཏཾ སམནུཔསྶིཏུཾ ‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’’’ཏིཨཱདིནཱ རཱཧུལོཝཱདཾ (སཾ. ནི. ༢.༡༨༨ ཨཱདཡོ) ཨཱརབྷི. ཐེརསྶ ཝིཔསྶནཱཙཱརོཡེཝ, ན པན མཧཱརཱཧུལོཝཱདོ ཝིཡ ཝིཏཀྐཱུཔཙྪེདཱཡ ཝུཏྟོཏི ཨདྷིཔྤཱཡོ.

ཨཐསྶ སཏྠཱ ཉཱཎཔརིཔཱཀཾ ཉཏྭཱཏིཨཱདཱིསུ བྷགཝཏོ ཀིར རཧོགཏསྶ པཊིསལླཱིནསྶ ཨེཝཾ ཙེཏསོ པརིཝིཏཀྐོ ཨུདཔཱདི ‘‘པརིཔཀྐཱ ཁོ རཱཧུལསྶ ཝིམུཏྟིཔརིཔཱཙནཱིཡཱ དྷམྨཱ, ཡནྣཱུནཱཧཾ རཱཧུལཾ ཨུཏྟརི ཨཱསཝཱནཾ ཁཡེ ཝིནེཡྻ’’ནྟི? ཨཐསྶ བྷགཝཱ པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ སཱཝཏྠིཡཾ པིཎྜཱཡ ཙརིཏྭཱ པཙྪཱབྷཏྟཾ པིཎྜཔཱཏཔཊིཀྐནྟོ ཨཱཡསྨནྟཾ རཱཧུལཾ ཨཱམནྟེསི – ‘‘གཎྷཱཧི, རཱཧུལ, ནིསཱིདནཾ, ཡེན ཨནྡྷཝནཾ ཏེནུཔསངྐམིསྶཱམ དིཝཱཝིཧཱརཱཡཱ’’ཏི. ‘‘ཨེཝཾ, བྷནྟེ’’ཏི ཁོ ཨཱཡསྨཱ རཱཧུལོ བྷགཝཏོ པཊིསྶུཏྭཱ ནིསཱིདནཾ ཨཱདཱཡ བྷགཝཏོ པིཊྛིཏོ པིཊྛིཏོ ཨནུབནྡྷི. ཏེན ཁོ པན སམཡེན ཨནེཀཱནི དེཝཏཱསཧསྶཱནི བྷགཝནྟཾ ཨབྷིཝནྡིཏྭཱ ཨནུབནྡྷིཏཱ ཧོནྟི ‘‘ཨཛྫ བྷགཝཱ ཨཱཡསྨནྟཾ རཱཧུལཾ ¶ ཨུཏྟརི ཨཱསཝཱནཾ ཁཡེ ཝིནེསྶཏཱི’’ཏི. ཨཐ ཁོ བྷགཝཱ ཨནྡྷཝནཾ ཨཛ྄ཛྷོགཱཧེཏྭཱ ཨཉྙཏརསྨིཾ རུཀྑམཱུལེ པཉྙཏྟེ ཨཱསནེ ནིསཱིདི. ཨཱཡསྨཱཔི རཱཧུལོ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི. ཨཐ ཨཱཡསྨནྟཾ རཱཧུལཾ ཨཱམནྟེཏྭཱ ‘‘ཏཾ ཀིཾ མཉྙསི, རཱཧུལ, ཙཀྑུ ནིཙྩཾ ཝཱ ཨནིཙྩཾ ཝཱཏི? ཨནིཙྩཾ, བྷནྟེ. ཡཾ པནཱནིཙྩཾ, དུཀྑཾ ཝཱ ཏཾ སུཁཾ ཝཱཏི? དུཀྑཾ, བྷནྟེ. ཡཾ པནཱནིཙྩཾ དུཀྑཾ ཝིཔརིཎཱམདྷམྨཾ, ཀལླཾ ནུ ཏཾ སམནུཔསྶིཏུཾ ‘ཨེཏཾ མམ, ཨེསོཧམསྨི, ཨེསོ མེ ཨཏྟཱ’’’ཏིཨཱདིནཱ རཱཧུལོཝཱདཾ (སཾ. ནི. ༤.༡༢༡) ཨདཱསི. ཏཾ སནྡྷཱཡེཏཾ ཝུཏྟཾ – ‘‘ཨནྡྷཝནེ ནིསིནྣོ ཙཱུལ༹རཱཧུལོཝཱདཾ ཀཐེསཱི’’ཏི.

ཀོཊིསཏསཧསྶདེཝཏཱཧཱིཏི ཨཱཡསྨཏཱ རཱཧུལེན པདུམུཏྟརསྶ བྷགཝཏོ པཱདམཱུལེ པཐཝིནྡྷརརཱཛཀཱལེ པཏྠནཾ ཋཔེནྟེན སདྡྷིཾ པཏྠནཾ ཋཔིཏདེཝཏཱཡེཝེཏཱ. ཏཱསུ པན ཀཱཙི བྷཱུམཊྛདེཝཏཱ, ཀཱཙི ཨནྟལིཀྑཊྛཀཱ, ཀཱཙི ཙཱཏུམཧཱརཱཛིཀཱདིདེཝལོཀེ, ཀཱཙི བྲཧྨལོཀེ ནིབྦཏྟཱ, ཨིམསྨིཾ པན དིཝསེ སབྦཱ ཨེཀཊྛཱནེ ཨནྡྷཝནསྨིཾཡེཝ སནྣིཔཏིཏཱ.

ཨཱབྷིདོསིཀནྟི ¶ པཱརིཝཱསིཀཾ ཨེཀརཏྟཱཏིཀྐནྟཾ པཱུཏིབྷཱུཏཾ. ཨེཀརཏྟཱཏིཀྐནྟསྶེཝ ཧི ནཱམསཉྙཱ ཨེསཱ, ཡདིདཾ ཨཱབྷིདོསིཀོཏི. ཨཡཾ པནེཏྠ ཝཙནཏྠོ – པཱུཏིབྷཱཝདོསེན ཨབྷིབྷཱུཏོཏི ཨབྷིདོསོ, ཨབྷིདོསོཡེཝ ཨཱབྷིདོསིཀོ. ཀུམྨཱསནྟི ཡཝཀུམྨཱསཾ. ཨདྷིཝཱསེཏྭཱཏི ‘‘ཏེན ཧི, ཏཱཏ རཊྛཔཱལ, ཨདྷིཝཱསེཧི སྭཱཏནཱཡ བྷཏྟ’’ནྟི པིཏརཱ ནིམནྟིཏོ སྭཱཏནཱཡ བྷིཀྑཾ ཨདྷིཝཱསེཏྭཱ. ཨེཏྠ ཙ ཐེརོ པཀཏིཡཱ ཨུཀྐཊྛསཔདཱནཙཱརིཀོ སྭཱཏནཱཡ བྷིཀྑཾ ནཱམ ནཱདྷིཝཱསེཏི, མཱཏུ ཨནུགྒཧེན པན ཨདྷིཝཱསེཏི. མཱཏུ ཀིརསྶ ཐེརཾ ཨནུསྶརིཏྭཱ ཨནུསྶརིཏྭཱ མཧཱསོཀོ ཨུཔྤཛྫཏི, རོདནེནེཝ དུཀྑཱི ཝིཡ ཛཱཏཱ, ཏསྨཱ ཐེརོ ‘‘སཙཱཧཾ ཏཾ ཨཔསྶིཏྭཱ གམིསྶཱམི, ཧདཡམྤིསྶཱ ཕལེཡྻཱ’’ཏི ཨནུགྒཧེན ཨདྷིཝཱསེསི. པཎྜིཏཱ ཧི བྷིཀྑཱུ མཱཏཱཔིཏཱུནཾ ཨཱཙརིཡུཔཛ྄ཛྷཱཡཱནཾ ཝཱ ཀཱཏབྦཾ ཨནུགྒཧཾ ཨཛ྄ཛྷུཔེཀྑིཏྭཱ དྷུཏངྒསུདྡྷིཀཱ ན བྷཝནྟི.

ཨལངྐཏཔཊིཡཏྟེ ཨིཏྠིཛནེཏི པིཏརཱ ཨུཡྻོཛིཏེ ཨིཏྠིཛནེ. པིཏཱ ཀིརསྶ དུཏིཡདིཝསེ སཀནིཝེསནེ མཧནྟཾ ཧིརཉྙསུཝཎྞསྶ པུཉྫཾ ཀཱརཱཔེཏྭཱ ཀིལཉྫེཧི པཊིཙྪཱདཱཔེཏྭཱ ཨཱཡསྨཏོ རཊྛཔཱལསྶ པུརཱཎདུཏིཡིཀཱཡོ ‘‘ཨེཐ ཏུམྷེ ཝདྷཱུ, ཡེན ཨལངྐཱརེན ཨལངྐཏཱ པུབྦེ རཊྛཔཱལསྶ ཀུལཔུཏྟསྶ པིཡཱ ཧོཐ མནཱཔཱ, ཏེན ཨལངྐཱརེན ཨལངྐརོཐཱ’’ཏི ཨཱཎཱཔེཏྭཱ པཎཱིཏཾ ཁཱདནཱིཡཾ བྷོཛནཱིཡཾ པཊིཡཱདཱཔེཏྭཱ ཀཱལེ ཨཱརོཙིཏེ ཨཱགནྟྭཱ པཉྙཏྟེ ཨཱསནེ ནིསིནྣཾ ‘‘ཨིདཾ ཏེ, རཊྛཔཱལ, མཏྟིཀཾ དྷནཾ, ཨཉྙཾ པེཏྟིཀཾ, ཨཉྙཾ པིཏཱམཧཾ; སཀྐཱ, ཏཱཏ རཊྛཔཱལ, བྷོགེ ¶ ཙ བྷུཉྫིཏུཾ, པུཉྙཱནི ཙ ཀཱཏུཾ? ཨེཧི ཏྭཾ, ཏཱཏ རཊྛཔཱལ, སིཀྑཾ པཙྩཀྑཱཡ ཧཱིནཱཡཱཝཏྟིཏྭཱ བྷོགེ ཙ བྷུཉྫསྶུ, པུཉྙཱནི ཙ ཀརོཧཱི’’ཏི ཡཱཙིཏྭཱ ཏེན པཊིཀྑིཔིཏྭཱ དྷམྨེ དེསིཏེ ‘‘ཨཧཾ ཨིམཾ ཨུཔྤབྦཱཛེསྶཱམཱི’’ཏི ཨཱནཡིཾ, སོ ‘‘དཱནི མེ དྷམྨཀཐཾ ཀཱཏུཾ ཨཱརདྡྷོ, ཨལཾ མེ ཝཙནཾ ན ཀརིསྶཏཱི’’ཏི ཨུཊྛཱཡ གནྟྭཱ ཏསྶ ཨོརོདྷཱནཾ དྭཱརཾ ཝིཝརཱཔེཏྭཱ ‘‘ཨཡཾ ཝོ སཱམིཀོ, གཙྪཐ, ཡཾ ཀིཉྩི ཀཏྭཱན གཎྷིཏུཾ ཝཱཡམཐཱ’’ཏི ཨུཡྻོཛེསི. ཏཱིསུ ཝཡེསུ ཋིཏཱ ནཱཊཀིཏྠིཡོ ཐེརཾ པརིཝཱརཡིཾསུ. ཏཱསུ ཨཡཾ ཨསུབྷསཉྙཾ ཨུཔྤཱདེསི. ཏེན ཝུཏྟཾ – ‘‘ཨལངྐཏཔཊིཡཏྟེ ཨིཏྠིཛནེ ཨསུབྷསཉྙཾ ཨུཔྤཱདེཏྭཱ’’ཏི.

ཋིཏཀོཝ ¶ དྷམྨཾ དེསེཏྭཱཏི –

‘‘པསྶ ཙིཏྟཀཏཾ བིམྦཾ, ཨརུཀཱཡཾ སམུསྶིཏཾ;

ཨཱཏུརཾ བཧུསངྐཔྤཾ, ཡསྶ ནཏྠི དྷུཝཾ ཋིཏི.

‘‘པསྶ ཙིཏྟཀཏཾ རཱུཔཾ, མཎིནཱ ཀུཎྜལེན ཙ;

ཨཊྛིཾ ཏཙེན ཨོནདྡྷཾ, སཧ ཝཏྠེཧི སོབྷཏི.

‘‘ཨལཏྟཀཀཏཱ པཱདཱ, མུཁཾ ཙུཎྞཀམཀྑིཏཾ;

ཨལཾ བཱལསྶ མོཧཱཡ, ནོ ཙ པཱརགཝེསིནོ.

‘‘ཨཊྛཱཔདཀཏཱ ཀེསཱ, ནེཏྟཱ ཨཉྫནམཀྑིཏཱ;

ཨལཾ བཱལསྶ མོཧཱཡ, ནོ ཙ པཱརགཝེསིནོ.

‘‘ཨཉྫནཱིཝཎྞཝཱ ཙིཏྟཱ, པཱུཏིཀཱཡོ ཨལངྐཏོ;

ཨལཾ བཱལསྶ མོཧཱཡ, ནོ ཙ པཱརགཝེསིནོ.

‘‘ཨོདཧི མིགཝོ པཱསཾ, ནཱསདཱ ཝཱགུརཾ མིགོ;

བྷུཏྭཱ ནིཝཱཔཾ གཙྪཱམི, ཀནྡནྟེ མིགབནྡྷཀེ’’ཏི. (མ. ནི. ༢.༣༠༢; ཐེརགཱ. ༧༦༩-༧༧༤) –

ཨིམཱཧི གཱཐཱཧི དྷམྨཾ དེསེཏྭཱ.

ཨཱཀཱསཾ ¶ ཨུཔྤཏིཏྭཱཏི ཨཱཀཱསཾ པཀྑནྡིཏྭཱ. ཀསྨཱ པན ཐེརོ ཨཱཀཱསེན གཏོ? པིཏཱ ཀིརསྶ སེཊྛི སཏྟསུ དྭཱརཀོཊྛཀེསུ ཨགྒལཱ༹ནི དཱཔེཏྭཱ མལླེ ཨཱཎཱཔེསི ‘‘སཙེ ནིཀྑམིཏྭཱ གཙྪཏི, ཧཏྠཔཱདེསུ ནཾ གཧེཏྭཱ ཀཱསཱཡཱནི ཧརིཏྭཱ གིཧིཝེསཾ གཎྷཱཔེཐཱ’’ཏི. ཏསྨཱ ཐེརོ ‘‘ཨེཏེ མཱདིསཾ མཧཱཁཱིཎཱསཝཾ ཧཏྠེ ཝཱ པཱདེ ཝཱ གཧེཏྭཱ ཨཔུཉྙཾ པསཝེཡྻུཾ, ཏཾ ནེསཾ མཱ ཨཧོསཱི’’ཏི ཙིནྟེཏྭཱ ཨཱཀཱསེན ཨགམཱསི. མིགཙཱིརནྟི ཨེཝཾནཱམཀཾ ཨུཡྻཱནཾ. ཙཏུཔཱརིཛུཉྙཔཊིམཎྜིཏནྟི ཛརཱཔཱརིཛུཉྙཾ, བྱཱདྷིཔཱརིཛུཉྙཾ, བྷོགཔཱརིཛུཉྙཾ, ཉཱཏིཔཱརིཛུཉྙནྟི ཨིམེཧི ཙཏཱུཧི པཱརིཛུཉྙེཧི པཊིམཎྜིཏཾ. པཱརིཛུཉྙནྟི ཙ པརིཧཱནཱིཏི ཨཏྠོ. སེསམེཏྠ སུཝིཉྙེཡྻམེཝ.

ཀུཎྜདྷཱནཏྠེརཝཏྠུ

༢༡༡. ཏཏིཡེ སལཱཀཾ གཎྷནྟཱིཏི སལཱཀགཱཧཀཱ. སུནཱཔརནྟཛནཔདཾ གཙྪནྟེཔི པཋམམེཝ སལཱཀཾ གཎྷཱིཏི སམྦནྡྷོ. ཚབྦསྶནྟརེཏི ཚནྣཾ ¶ ཝསྶཱནཾ ཨབྦྷནྟརེ. མེཏྟཱིཏི མིཏྟབྷཱཝོ. བྷེདཀེ སཏཱིཏི བྷེདཀརཎེ སཏི. གུམྦསབྷཱགཏོཏི གུམྦསམཱིཔཏོ, ཨཡམེཝ ཝཱ པཱཋོ. ཨིཏྠཱི ཧུཏྭཱཏི ཨིཏྠཱི ཝིཡ ཧུཏྭཱ, མནུསྶིཏྠིཝཎྞཾ མཱཔེཏྭཱཏི ཨཏྠོ. དཱིགྷརཏྟཱནུགཏོཏི དཱིགྷཀཱལཾ ཨནུབནྡྷོ. ཨེཏྟཀཾ ཨདྡྷཱནནྟི ཨེཏྟཀཾ ཀཱལཾ. ཧནྡཱཝུསོཏི གཎྷཱཝུསོ. ཨཏྠཾ གཧེཏྭཱཏི བྷཱུཏཏྠཾ གཧེཏྭཱ, ཨཡམེཝ ཝཱ པཱཋོ. ཀོཎྜོ ཛཱཏོཏི དྷུཏྟོ ཛཱཏོ.

མཱཝོཙ ཕརུསཾ ཀཉྩཱིཏི ཀཉྩི ཨེཀཔུགྒལཾ ཕརུསཾ མཱ ཨཝོཙ. ཝུཏྟཱ པཊིཝདེཡྻུ ཏནྟི ཏཡཱ པརེ དུསྶཱིལཱཏི ཝུཏྟཱ ཏམྤི ཏཐེཝ པཊིཝདེཡྻུཾ. དུཀྑཱ ཧི སཱརམྦྷཀཐཱཏི ཨེསཱ ཀཱརཎུཏྟརཱ ཡུགགྒཱཧཀཐཱ ནཱམ དུཀྑཱ. པཊིདཎྜཱ ཕུསེཡྻུ ཏནྟི ཀཱཡདཎྜཱདཱིཧི པརཾ པཧརནྟསྶ ཏཱདིསཱཝ པཊིདཎྜཱ ཏཝ མཏྠཀེ པཏེཡྻུཾ.

སཙེ ནེརེསི ཨཏྟཱནནྟི སཙེ ཨཏྟཱནཾ ནིཙྩལཾ ཀཱཏུཾ སཀྑིསྶསི. ཀཾསོ ཨུཔཧཏོ ཡཐཱཏི མུཁཝཊྚིཡཾ ཚིནྡིཏྭཱ ཏལམཏྟཾ ཀཏྭཱ ཋཔིཏཾ ཀཾསཏཱལཾ ཝིཡ. ཏཱདིསཉྷི ཧཏྠེཧི པཱདེཧི དཎྜེན ཝཱ པཧཏམྤི སདྡཾ ན ཀརོཏི. ཨེས པཏྟོསི ནིབྦཱནནྟི སཙེ ཨེཝརཱུཔོ བྷཝིཏུཾ སཀྑིསྶསི, ཨིམཾ པཊིཔདཾ པཱུརཡམཱནོ ཨེསོ ཏྭཾ ཨིདཱནི ཨཔྤཏྟོཔི ནིབྦཱནཾ པཏྟོསི ནཱམ. སཱརམྦྷོ ཏེ ན ཝིཛྫཏཱིཏི ‘‘ཨེཝཉྩ སཏི ཏྭཾ དུསྶཱིལོ, ཨཧཾ སུསཱིལོ’’ཏི ཨེཝམཱདིཀོ ཨུཏྟརིཀརཎཝཱཙཱལཀྑཎོ སཱརམྦྷོ ཏེ ན ཝིཛྫཏི, ན བྷཝིསྶཏིཡེཝཱཏི ཨཏྠོ. པརིཀྐིལེསེནཱཏི སཾཀིལེསཧེཏུནཱ.

ཝངྒཱིསཏྠེརཝཏྠུ

༢༡༢. ཙཏུཏྠེ ¶ སམྤནྣཔཊིབྷཱནཱནནྟི པརིཔུཎྞཔཊིབྷཱནཱནཾ. ཙུཏིཾ ཡོ ཝེདི…པེ… སབྦསོཏི ཡོ སཏྟཱནཾ ཙུཏིཉྩ པཊིསནྡྷིཉྩ སབྦཱཀཱརེན པཱཀཊཾ ཀཏྭཱ ཛཱནཱཏི, ཏཾ ཨཧཾ ཨལགྒནཏཱཡ ཨསཏྟཾ, པཊིཔཏྟིཡཱ སུཊྛུ གཏཏྟཱ སུགཏཾ, ཙཏུནྣཾ སཙྩཱནཾ སམྦུདྡྷཏྟཱ བུདྡྷཾ བྲཱཧྨཎཾ ཝདཱམཱིཏི ཨཏྠོ. ཡསྶ གཏིནྟི ཡསྶེཏེ དེཝཱདཡོ གཏིཾ ན ཛཱནནྟི, ཏམཧཾ ཨཱསཝཱནཾ ཁཱིཎཏཱཡ ཁཱིཎཱསཝཾ, ཀིལེསེཧི ཨཱརཀཏྟཱ ཨརཧནྟཾ བྲཱཧྨཎཾ ཝདཱམཱིཏི ཨཏྠོ.

ཨུཔསེནཝངྒནྟཔུཏྟཏྠེརཝཏྠུ

༢༡༣. པཉྩམེ ¶ སབྦཔཱསཱདིཀཱནནྟི སབྦསོ པསཱདཾ ཛནེནྟཱནཾ. ཀིནྟཱཡནྟི ཀིཾ ཏེ ཨཡཾ. ཨཏིལཧུནྟི ཨཏིསཱིགྷཾ. ཡསྶ ཏསྨིཾ ཨཏྟབྷཱཝེ ཨུཔྤཛྫནཱརཧཱནཾ མགྒཕལཱནཾ ཨུཔནིསྶཡོ ནཏྠི, ཏཾ བུདྡྷཱ ‘‘མོགྷཔུརིསོ’’ཏི ཝདནྟི ཨརིཊྛལཱལུ༹དཱཡིཨཱདིཀེ ཝིཡ. ཨུཔནིསྶཡེ སཏིཔི ཏསྨིཾ ཁཎེ མགྒེ ཝཱ ཕལེ ཝཱ ཨསཏི ‘‘མོགྷཔུརིསཱ’’ཏི ཝདནྟིཡེཝ དྷནིཡཏྠེརཱདིཀེ ཝིཡ. ཨིམསྶཔི ཏསྨིཾ ཁཎེ མགྒཕལཱནཾ ཨབྷཱཝཏོ ‘‘མོགྷཔུརིསཱ’’ཏི ཨཱཧ, ཏུཙྪམནུསྶཱཏི ཨཏྠོ. བཱཧུལླཱཡཱཏི པརིསབཱཧུལླཱཡ. ཨནེཀཔརིཡཱཡེནཱཏི ཨནེཀཀཱརཎེན.

ཨིཙྪཱམཧཾ, བྷིཀྑཝེཏི བྷགཝཱ ཀིར ཏཾ ཨདྡྷམཱསཾ ན ཀཉྩི བོདྷནེཡྻསཏྟཾ ཨདྡས, ཏསྨཱ ཨེཝམཱཧ, ཨེཝཾ སནྟེཔི ཏནྟིཝསེན དྷམྨདེསནཱ ཀཏྟབྦཱ སིཡཱ. ཡསྨཱ པནསྶ ཨེཏདཧོསི – ‘‘མཡི ཨོཀཱསཾ ཀཱརེཏྭཱ པཊིསལླཱིནེ བྷིཀྑཱུ ཨདྷམྨིཀཾ ཀཏིཀཝཏྟཾ ཀརིསྶནྟི, ཏཾ ཨུཔསེནོ བྷིནྡིསྶཏི, ཨཧཾ ཏསྶ པསཱིདིཏྭཱ བྷིཀྑཱུནཾ དསྶནཾ ཨནུཛཱནིསྶཱམི. ཏཏོ མཾ པསྶིཏུཀཱམཱ བཧཱུ བྷིཀྑཱུ དྷུཏངྒཱནི སམཱདིཡིསྶནྟི, ཨཧཉྩ ཏེཧི ཨུཛ྄ཛྷིཏསནྠཏཔཙྩཡཱ སིཀྑཱཔདཾ པཉྙཔེསྶཱམཱི’’ཏི, ཏསྨཱ ཨེཝམཱཧ. ཐེརསྶཱཏི ཨུཔསེནཏྠེརསྶ. མནཱཔཱནི ཏེ བྷིཀྑུ པཾསུཀཱུལཱནཱིཏི ‘‘བྷིཀྑུ ཏཝ ཨིམཱནི པཾསུཀཱུལཱནི མནཱཔཱནི ཨཏྟནོ རུཙིཡཱ ཁནྟིཡཱ གཧིཏཱནཱི’’ཏི པུཙྪཏི. ན ཁོ མེ, བྷནྟེ, མནཱཔཱནི པཾསུཀཱུལཱནཱིཏི, བྷནྟེ, ན མཡཱ ཨཏྟནོ རུཙིཡཱ ཁནྟིཡཱ གཧིཏཱནི, གལགྒཱཧེན ཝིཡ མཏྠཀཏཱལ༹ནེན ཝིཡ ཙ གཱཧིཏོ མཡཱཏི དསྶེཏི. པཱལི༹ཡཾ ཨཱགཏམེཝཱཏི ཝིནཡཔཱལི༹ཾ སནྡྷཱཡ ཝདཏི.

དབྦཏྠེརཝཏྠུ

༢༡༤. ཚཊྛེ ¶ ཨཊྛཱརསསུ མཧཱཝིཧཱརེསཱུཏི རཱཛགཧསྶ སམནྟཏོ ཋིཏེསུ ཨཊྛཱརསསུ མཧཱཝིཧཱརེསུ. ཨུཔཝིཛཉྙཱཏི ཨཱསནྣཔསཱུཏིཀཱལཱ. རཧོགཏོཏི རཧསི གཏོ. སངྒྷསྶ ཝེཡྻཱཝཙྩཀརཎེ ཀཱཡཾ ཡོཛེཏུཀཱམོ ཙིནྟེསཱིཏི ཐེརོ ཀིར ཨཏྟནོ ཀཏཀིཙྩབྷཱཝཾ དིསྭཱ ‘‘ཨཧཾ ཨིམཾ སརཱིརཾ དྷཱརེམི, ཏཉྩ ཁོ ཝཱཏམུཁེ ཋིཏཔདཱིཔོ ཝིཡ ཨནིཙྩཏཱམུཁེ ཋིཏཾ ནཙིརསྶེཝ ནིབྦཱཡནདྷམྨཾ ཡཱཝ ¶ ན ནིབྦཱཡཏི, ཏཱཝ ཀིཾ ནུ ཁོ ཨཧཾ སངྒྷསྶ ཝེཡྻཱཝཙྩཾ ཀརེཡྻ’’ནྟི ཙིནྟེནྟོ ཨིཏི པཊིསཉྩིཀྑཏི ‘‘ཏིརོརཊྛེསུ བཧཱུ ཀུལཔུཏྟཱ བྷགཝནྟཾ ཨདིསྭཱཝ པབྦཛནྟི, ཏེ ‘བྷགཝནྟཾ པསྶིསྶཱམ ཙེཝ ཝནྡིསྶཱམཱ’ཏི ཙ དཱུརཏོཔི ཨཱགཙྪནྟི, ཏཏྲ ཡེསཾ སེནཱསནཾ ནཔྤཧོཏི, ཏེ སིལཱཔཏྟཀེཔི སེཡྻཾ ཀཔྤེནྟི. པཧོམི ཁོ པནཱཧཾ ཨཏྟནོ ཨཱནུབྷཱཝེན ཏེསཾ ཏེསཾ ཀུལཔུཏྟཱནཾ ཨིཙྪཱཝསེན པཱསཱདཝིཧཱརཨཌྜྷཡོགཱདཱིནི མཉྩཔཱིཋཏྠརཎཱནི ནིམྨིནིཏྭཱ དཱཏུཾ? པུནདིཝསེ ཙེཏྠ ཨེཀཙྩེ ཨཏིཝིཡ ཀིལནྟརཱུཔཱ ཧོནྟི, ཏེ གཱརཝེན བྷིཀྑཱུནཾ པུརཏོ ཋཏྭཱ བྷཏྟཱནིཔི ན ཨུདྡིསཱཔེནྟི, ཨཧཾ ཁོ པན ཏེསཾ བྷཏྟཱནིཔི ཨུདྡིསིཏུཾ པཧོམཱི’’ཏི. ཨིཏི པཊིསཉྩིཀྑནྟོ ‘‘ཡཾནཱུནཱཧཾ སངྒྷསྶ སེནཱསནཉྩ པཉྙཔེཡྻཾ, བྷཏྟཱནི ཙ ཨུདྡིསེཡྻ’’ནྟི ཙིནྟེསི. སབྷཱགསབྷཱགཱནནྟི སུཏྟནྟིཀཱདིགུཎཝསེན སབྷཱགཱནཾ, ན མིཏྟསནྠཝཝསེན. ཐེརོ ཧི ཡཱཝཏིཀཱ སུཏྟནྟིཀཱ ཧོནྟི, ཏེ ཨུཙྩིནིཏྭཱ ཨུཙྩིནིཏྭཱ ཨེཀཏོ ཏེསཾ ཨནུརཱུཔམེཝ སེནཱསནཾ པཉྙཔེཏི. ཝེནཡིཀཱབྷིདྷམྨིཀཀམྨཊྛཱནིཀཀཱཡདལ༹ྷིབཧུལེསུཔི ཨེསེཝ ནཡོ. ཏེནེཝ པཱལི༹ཡཾ (པཱརཱ. ༣༨༠) ཝུཏྟཾ – ‘‘ཡེཏེ བྷིཀྑཱུ སུཏྟནྟིཀཱ, ཏེསཾ ཨེཀཛ྄ཛྷཾ སེནཱསནཾ པཉྙཔེཏཱི’’ཏིཨཱདི.

ཨངྒུལིཡཱ ཛལམཱནཱཡཱཏི ཏེཛོཀསིཎཙཏུཏྠཛ྄ཛྷཱནཾ སམཱཔཛྫིཏྭཱ ཝུཊྛཱཡ ཨབྷིཉྙཱཉཱཎེན ཨངྒུལིཛལནཾ ཨདྷིཊྛཧིཏྭཱ ཏེནེཝ ཏེཛོདྷཱཏུསམཱཔཏྟིཛནིཏེན ཨགྒིཛཱལེན ཨངྒུལིཡཱ ཛལམཱནཱཡ. ཨཡཾ མཉྩོཏིཨཱདཱིསུ པན ཐེརེ ‘‘ཨཡཾ མཉྩོ’’ཏིཨཱདིཾ ཝདནྟེ ནིམྨིཏཱཔི ཨཏྟནོ ཨཏྟནོ གཏཊྛཱནེ ‘‘ཨཡཾ མཉྩོ’’ཏིཨཱདིཾ ཝདནྟི. ཨཡཉྷི ནིམྨིཏཱནཾ དྷམྨཏཱ.

‘‘ཨེཀསྨིཾ བྷཱསམཱནསྨིཾ, སབྦེ བྷཱསནྟི ནིམྨིཏཱ;

ཨེཀསྨིཾ ཏུཎྷིམཱསིནེ, སབྦེ ཏུཎྷཱི བྷཝནྟི ཏེ’’ཏི. (དཱི. ནི. ༢.༢༨༦);

ཡསྨིཾ པན ཝིཧཱརེ མཉྩཔཱིཋཱདཱིནི ན པརིཔཱུརེནྟི, ཏཏྠ ཨཏྟནོ ཨཱནུབྷཱཝེན པཱུརེནྟི, ཏེན ནིམྨིཏཱནཾ ཨཝཏྠུཀཾ ཝཙནཾ ན ཧོཏི སབྦཏྠ མཉྩཔཱིཋཱདཱིནཾ སབྦྷཱཝཏོ. སབྦཝིཧཱརེསུ ཙ ¶ གམནམགྒེ སམཔྤམཱཎེ ཀཏྭཱ ཨདྷིཊྛཱཏི. ཀཏིཀསཎྛཱནཱདཱིནཾ པན ནཱནཔྤཀཱརཏྟཱ ཏསྨིཾ ཏསྨིཾ ཝིཧཱརེ ཀཏིཀཝཏྟཱནི ཝིསུཾ ཝིསུཾ ཀཐཱཔེཏཱིཏི ཝེདིཏབྦཾ. ཨནིཡམེཏྭཱ ¶ ནིམྨིཏཱནཉྷི ‘‘ཨེཀསྨིཾ བྷཱསམཱནསྨི’’ནྟིཨཱདིདྷམྨཏཱ ཝུཏྟཱ. ཏཐཱ ཧི ཡེ ཝཎྞཝཡསརཱིརཱཝཡཝཔརིཀྑཱརཀིརིཡཱཝིསེསཱདཱིཧི ནིཡམཾ ཨཀཏྭཱ ནིམྨིཏཱ ཧོནྟི, ཏེ ཨནིཡམེཏྭཱ ནིམྨིཏཏྟཱ ཨིདྡྷིམཏཱ སདིསཱཝ ཧོནྟི. ཋཱནནིསཛྫཱདཱིསུ བྷཱསིཏཏུཎྷཱིབྷཱཝཱདཱིསུ ཝཱ ཡཾ ཡཾ ཨིདྡྷིམཱ ཀརོཏི, ཏཾ ཏདེཝ ཀརོནྟི. སཙེ པན ནཱནཔྤཀཱརེ ཀཱཏུཀཱམོ ཧོཏི, ཀེཙི པཋམཝཡེ, ཀེཙི མཛ྄ཛྷིམཝཡེ, ཀེཙི པཙྪིམཝཡེ, ཏཐཱ དཱིགྷཀེསེ ཨུཔཌྜྷམུཎྜེ མིསྶཀཀེསེ ཨུཔཌྜྷརཏྟཙཱིཝརེ པཎྜུཀཙཱིཝརེ, པདབྷཱཎདྷམྨཀཐཱསརབྷཉྙཔཉྷཔུཙྪནཔཉྷཝིསྶཛྫནརཛནཔཙནཙཱིཝརསིབྦནདྷོཝནཱདཱིནི ཀརོནྟེ, ཨཔརེཔི ཝཱ ནཱནཔྤཀཱརེ ཀཱཏུཀཱམོ ཧོཏི, ཏེན པཱདཀཛ྄ཛྷཱནཏོ ཝུཊྛཱཡ ‘‘ཨེཏྟཀཱ བྷིཀྑཱུ པཋམཝཡཱ ཧོནྟཱུ’’ཏིཨཱདིནཱ ནཡེན པརིཀམྨཾ ཀཏྭཱ པུན སམཱཔཛྫིཏྭཱ ཝུཊྛཱཡ ཨདྷིཊྛིཏེ ཨདྷིཊྛཱནཙིཏྟེན སདྡྷིཾ ཨིཙྪིཏིཙྪིཏཔྤཀཱརཱཡེཝ ཧོནྟི. པུན ཨཏྟནོ ཝསནཊྛཱནམེཝ ཨཱགཙྪཏཱིཏི ཏེཧི སདྡྷིཾ ཛནཔདཀཐཾ ཀཐེནྟོ ཨནིསཱིདིཏྭཱ ཨཏྟནོ ཝསནཊྛཱནཾ ཝེལུ༹ཝནམེཝ པཙྩཱགཙྪཏི. པཱལི༹ཡནྟི ཝིནཡཔཱལི༹ཡཾ.

པིལིནྡཝཙྪཏྠེརཝཏྠུ

༢༡༥. སཏྟམེ པིཡཱནནྟི པིཡཱཡིཏབྦཱནཾ. མནཱཔཱནནྟི མནཝཌྜྷནཀཱནཾ. པིལིནྡོཏི པནསྶ གོཏྟཾ, ཝཙྪོཏི ནཱམནྟི ཨེཏྠ ཝུཏྟཝིཔརིཡཱཡེནཔི ཝདནྟི ‘‘པིལིནྡོཏི ནཱམཾ, ཝཙྪོཏི གོཏྟ’’ནྟི. ཏེནེཝ ཨཱཙརིཡདྷམྨཔཱལཏྠེརེན ཐེརགཱཐཱསཾཝཎྞནཱཡ (ཐེརགཱ. ཨཊྛ. ༡.༨ པིལིནྡཝཙྪཏྠེརགཱཐཱཝཎྞནཱ) ཝུཏྟཾ – ‘‘པིལིནྡོཏིསྶ ནཱམཾ ཨཀཾསུ, ཝཙྪོཏི པན གོཏྟཾ. ཏེན སོ ཨཔརབྷཱགེ པིལིནྡཝཙྪོཏི པཉྙཱཡིཏྠཱ’’ཏི. སཾསནྡེཏྭཱཏི ཨེཀཏོ ཀཏྭཱ.

སཏྠུ དྷམྨདེསནཾ སུཏྭཱ པཊིལདྡྷསདྡྷོ པབྦཛིཏྭཱཏི ཨིདཾ ཨངྒུཏྟརབྷཱཎཀཱནཾ ཀཐཱམགྒེན ཝུཏྟཾ. ཨཔརེ པན བྷཎནྟི – ཨནུཔྤནྣེཡེཝ ཨམྷཱཀཾ བྷགཝཏི སཱཝཏྠིཡཾ བྲཱཧྨཎགེཧེ ནིབྦཏྟིཏྭཱ པིལིནྡཝཙྪོཏི པཉྙཱཏོ སཾསཱརེ སཾཝེགབཧུལཏཱཡ པརིབྦཱཛཀཔབྦཛྫཾ པབྦཛིཏྭཱ ཙཱུལ༹གནྡྷཱརཾ ནཱམ ཝིཛྫཾ སཱདྷེཏྭཱ ཨཱཀཱསཙཱརཱི པརཙིཏྟཝིདཱུ ཙ ཧུཏྭཱ རཱཛགཧེ ལཱབྷགྒཡསགྒཔྤཏྟོ པཊིཝསཏི. ཨཐ ཡདཱ ཨམྷཱཀཾ བྷགཝཱ ཨབྷིསམྦུདྡྷོ ཧུཏྭཱ ཨནུཀྐམེན རཱཛགཧཾ ཨུཔགཏོ, ཏཏོ པཊྛཱཡ བུདྡྷཱནུབྷཱཝེན ¶ ཏསྶ སཱ ཝིཛྫཱ ན སམྤཛྫཏི, ཨཏྠཀིཙྩཾ ན སཱདྷེཏི. སོ ཙིནྟེསི – ‘‘སུཏཾ ཁོ པན མེཏཾ ‘ཨཱཙརིཡཔཱཙརིཡཱནཾ བྷཱསམཱནཱནཾ ཡཏྠ མཧཱགནྡྷཱརཝིཛྫཱ དྷརཏི, ཏཏྠ ཙཱུལ༹གནྡྷཱརཝིཛྫཱ ན སམྤཛྫཏཱི’ཏི. སམཎསྶ པན གོཏམསྶ ཨཱགཏཀཱལཏོ ¶ པཊྛཱཡ ནཱཡཾ མམ ཝིཛྫཱ སམྤཛྫཏི, ནིསྶཾསཡཾ སམཎོ གོཏམོ མཧཱགནྡྷཱརཝིཛྫཾ ཛཱནཱཏི, ཡནྣཱུནཱཧཾ ཏཾ པཡིརུཔཱསིཏྭཱ ཏསྶ སནྟིཀེ ཝིཛྫཾ པརིཡཱཔུཎེཡྻ’’ནྟི. སོ བྷགཝནྟཾ ཨུཔསངྐམིཏྭཱ ཨེཏདཝོཙ – ‘‘ཨཧཾ, མཧཱསམཎ, ཏཝ སནྟིཀེ ཨེཀཾ ཝིཛྫཾ པརིཡཱཔུཎིཏུཀཱམོ, ཨོཀཱསཾ མེ ཀརོཧཱི’’ཏི. བྷགཝཱ ‘‘ཏེན ཧི པབྦཛཱ’’ཏི ཨཱཧ. སོ ‘‘ཝིཛྫཱཡ པརིཀམྨཾ པབྦཛྫཱ’’ཏི མཉྙམཱནོ པབྦཛཱིཏི. པརཝམྦྷནཝསེནཱཏི པརེསཾ གརཧནཝསེན.

ཨཀཀྐསནྟི ཨཕརུསཾ. ཝིཉྙཱཔནིནྟི ཨཏྠཝིཉྙཱཔནིཾ. སཙྩནྟི བྷཱུཏཏྠཾ. ནཱབྷིསཛེཏི ཡཱཡ གིརཱཡ ཨཉྙཾ ཀུཛ྄ཛྷཱཔནཝསེན ན ལགཱཔེཡྻ, ཁཱིཎཱསཝོ ནཱམ ཨེཝརཱུཔམེཝ གིརཾ ན བྷཱསེཡྻ, ཏསྨཱ ཏམཧཾ བྲཱུམི བྲཱཧྨཎཾ ཝདཱམཱིཏི ཨཏྠོ.

ཨནུཝིཙིནིཏྭཱཏི ཨནུཝིཙཱརེཏྭཱ. ཙཎྜིཀཏཾ གཙྪནྟནྟི སཱིགྷགཏིཡཱ གཙྪནྟཾ.

བཱཧིཡདཱརུཙཱིརིཡཏྠེརཝཏྠུ

༢༡༦. ཨཊྛམེ ཨེཀརཏྟིཝཱསེན གནྟྭཱཏི དེཝཏཱནུབྷཱཝེན གནྟྭཱ. ‘‘བུདྡྷཱནུབྷཱཝེནཱ’’ཏིཔི ཝདནྟི. ཨེཝཾ གཏོ ཙ ཝིཧཱརཾ པཝིསིཏྭཱ སམྦཧུལེ བྷིཀྑཱུ བྷུཏྟཔཱཏརཱསེ ཀཱཡཱལསིཡཝིམོཙནཏྠཱཡ ཨབྦྷོཀཱསེ ཙངྐམནྟེ དིསྭཱ ‘‘ཀཧཾ ཨེཏརཧི སཏྠཱ’’ཏི པུཙྪི. བྷིཀྑཱུ ‘‘སཱཝཏྠིཡཾ པིཎྜཱཡ པཝིཊྛོ’’ཏི ཝཏྭཱ ཏཾ པུཙྪིཾསུ – ‘‘ཏྭཾ པན ཀུཏོ ཨཱགཏོ’’ཏི? སུཔྤཱརཀཱ ཨཱགཏོམྷཱིཏི. ཀདཱ ནིཀྑནྟོསཱིཏི? ཧིཡྻོ སཱཡཾ ནིཀྑནྟོམྷཱིཏི. དཱུརཏོ ཨཱགཏོ, ཏཝ པཱདེ དྷོཝིཏྭཱ ཏེལེན མཀྑེཏྭཱ ཐོཀཾ ཝིསྶམཱཧི, ཨཱགཏཀཱལེ སཏྠཱརཾ དཀྑིསྶཏཱིཏི. ཨཧཾ, བྷནྟེ, སཏྠུ ཝཱ ཨཏྟནོ ཝཱ ཛཱིཝིཏནྟརཱཡཾ ན ཛཱནཱམི, ཨེཀརཏྟེནེཝམྷི ཀཏྠཙི ཨཊྛཏྭཱ ཨནིསཱིདིཏྭཱ ཝཱིསཡོཛནསཏིཀཾ མགྒཾ ཨཱགཏོ, སཏྠཱརཾ པསྶིཏྭཱཝ ཝིསྶམིསྶཱམཱིཏི. སོ ཨེཝཾ ཝཏྭཱ ཏརམཱནརཱུཔོ སཱཝཏྠིཾ པཝིསིཏྭཱ བྷགཝནྟཾ ཨནོཔམཱཡ བུདྡྷསིརིཡཱ པིཎྜཱཡ ཙརནྟཾ དིསྭཱ ¶ ‘‘ཙིརསྶཾ ཝཏ མེ དིཊྛོ སམྨཱསམྦུདྡྷོ’’ཏི དིཊྛཊྛཱནཏོ པཊྛཱཡ ཨོཎཏསརཱིརོ གནྟྭཱ ཨནྟརཝཱིཐིཡམེཝ པཉྩཔཏིཊྛིཏེན ཝནྡིཏྭཱ གོཔྥཀེསུ དལ༹ྷཾ གཧེཏྭཱ ཨེཝམཱཧ – ‘‘དེསེཏུ མེ, བྷནྟེ, བྷགཝཱ དྷམྨཾ, དེསེཏུ མེ སུགཏོ དྷམྨཾ, ཡཾ མམསྶ དཱིགྷརཏྟཾ ཧིཏཱཡ སུཁཱཡཱ’’ཏི.

ཨཐ ནཾ སཏྠཱ ‘‘ཨཀཱལོ ཁོ ཏཱཝ, བཱཧིཡ, ཨནྟརགྷརཾ པཝིཊྛོམྷི པིཎྜཱཡཱ’’ཏི པཊིཀྑིཔི ¶ . ཏཾ སུཏྭཱ བཱཧིཡོ, ‘‘བྷནྟེ, སཾསཱརེ སཾསརནྟེན ཀབལཱི༹ཀཱརཱཧཱརོ ན ནོ ལདྡྷཔུབྦོ, ཏུམྷཱཀཾ ཝཱ མཡ྄ཧཾ ཝཱ ཛཱིཝིཏནྟརཱཡཾ ན ཛཱནཱམི, དེསེཐ མེ དྷམྨ’’ནྟི. སཏྠཱ དུཏིཡམྤི པཊིཀྑིཔིཡེཝ. ཨེཝཾ ཀིརསྶ ཨཧོསི ‘‘ཨིམསྶ མཾ དིཊྛཀཱལཏོ པཊྛཱཡ སཀལསརཱིརཾ པཱིཏིཡཱ ནིརནྟརཾ ཨཛ྄ཛྷོཏྠཊཾ ཧོཏི, བལཝཔཱིཏིཝེགེན དྷམྨཾ སུཏྭཱཔི ན སཀྑིསྶཏི པཊིཝིཛ྄ཛྷིཏུཾ, མཛ྄ཛྷཏྟུཔེཀྑཱ ཏཱཝ ཏིཊྛཏུ, ཨེཀརཏྟེནེཝ ཝཱིསཡོཛནསཏཾ མགྒཾ ཨཱགཏཏྟཱ དརཐོཔིསྶ བལཝཱ, སོཔི ཏཱཝ པཊིཔྤསྶམྦྷཏཱུ’’ཏི. ཏསྨཱ དྭིཀྑཏྟུཾ པཊིཀྑིཔིཏྭཱ ཏཏིཡཾ ཡཱཙིཏོ ཨནྟརཝཱིཐིཡཾ ཋིཏོཝ ‘‘ཏསྨཱཏིཧ ཏེ, བཱཧིཡ, ཨེཝཾ སིཀྑིཏབྦཾ དིཊྛེ དིཊྛམཏྟཾ བྷཝིསྶཏཱི’’ཏིཨཱདིནཱ (ཨུདཱ. ༡༠) ནཡེན དྷམྨཾ དེསེཏི. ཨིམམཏྠཾ སཾཁིཔིཏྭཱ དསྶེནྟོ ‘‘སཏྠཱརཾ པིཎྜཱཡ པཝིཊྛ’’ནྟིཨཱདིམཱཧ. ཏཏྠ ཨནྟརགྷརེཏི ཨནྟརཝཱིཐིཡཾ.

ཨཔརིཔུཎྞཔཏྟཙཱིཝརཏཱཡ པཏྟཙཱིཝརཾ པརིཡེསནྟོཏི སོ ཀིར ཝཱིསཏིཝསྶསཧསྶཱནི སམཎདྷམྨཾ ཀརོནྟོ ‘‘བྷིཀྑུནཱ ནཱམ ཨཏྟནོ པཙྩཡེ ལབྷིཏྭཱ ཨཉྙཾ ཨནོལོཀེཏྭཱ སཡམེཝ བྷུཉྫིཏུཾ ཝཊྚཏཱི’’ཏི ཨེཀབྷིཀྑུསྶཔི པཏྟེན ཝཱ ཙཱིཝརེན ཝཱ སངྒཧཾ ནཱཀཱསི. ཏེནསྶ ‘‘ཨིདྡྷིམཡཔཏྟཙཱིཝརཾ ན ཨུཔྤཛྫིསྶཏཱི’’ཏི ཉཏྭཱ ཨེཧིབྷིཀྑུབྷཱཝེན པབྦཛྫཾ ན ཨདཱསི. ཏཱཝདེཝ ཙ པབྦཛྫཾ ཡཱཙིཏོ ‘‘པརིཔུཎྞཾ ཏེ པཏྟཙཱིཝར’’ནྟི པུཙྪིཏྭཱ ‘‘ཨཔརིཔུཎྞ’’ནྟི ཝུཏྟེ ‘‘ཏེན ཧི པཏྟཙཱིཝརཾ པརིཡེསཱཧཱི’’ཏི ཝཏྭཱ པཀྐཱམི. ཏསྨཱ སོ པཏྟཙཱིཝརཾ པརིཡེསནྟོ སངྐཱརཊྛཱནཏོ ཙོལ༹ཁཎྜཱནི སཾཀཌྜྷཏི.

སཧསྶམཔཱིཏི པརིཙྪེདཝཙནཾ. ཨེཀསཧསྶཾ དྭེསཧསྶཱནཱིཏི ཨེཝཾ སཧསྶེན ཙེ པརིཙྪིནྣཱ གཱཐཱ ཧོནྟི, ཏཱ ཙ ཨནཏྠཔདསཾཧིཏཱ ཨཱཀཱསཝཎྞཔབྦཏཝཎྞཱདཱིནི པཀཱསཀེཧི ཨནིབྦཱནདཱིཔཀེཧི ཨནཏྠཀེཧི པདེཧི སཾཧིཏཱ ཡཱཝ བཧུཀཱ ཧོནྟི, ཏཱཝ པཱཔིཀཱ ཨེཝཱཏི ཨཏྠོ ¶ . ཨེཀཾ གཱཐཱཔདཾ སེཡྻོཏི ‘‘ཨཔྤམཱདོ ཨམཏཔདཾ…པེ… ཡཐཱ མཏཱ’’ཏི (དྷ. པ. ༢༡) ཨེཝརཱུཔཱ ཨེཀགཱཐཱཔི སེཡྻོཏི ཨཏྠོ.

ཀུམཱརཀསྶཔཏྠེརཝཏྠུ

༢༡༧. ནཝམེ ཨེཀཾ བུདྡྷནྟརཾ སམྤཏྟིཾ ཨནུབྷཝམཱནོཏི སཱཝཀབོདྷིཡཱ ནིཡཏཏཱཡ པུཉྙསམྦྷཱརསྶ ཙ སཱཏིསཡཏྟཱ ཝིནིཔཱཏཾ ཨགནྟྭཱ ཨེཀཾ བུདྡྷནྟརཾ དེཝེསུ ཙ མནུསྶེསུ ཙ སམྤཏྟིཾ ཨནུབྷཝམཱནོ. ‘‘ཨེཀིསྶཱ ཀུལདཱརིཀཱཡ ཀུཙྪིམྷི ཨུཔྤནྣོ’’ཏི ཝཏྭཱ ཏམེཝསྶ ཨུཔྤནྣབྷཱཝཾ ¶ མཱུལཏོ པཊྛཱཡ དསྶེཏུཾ – ‘‘སཱ ཙཱ’’ཏིཨཱདི ཝུཏྟཾ. ཏཏྠ སཱཏི ཀུལདཱརིཀཱ. ཙ-སདྡོ བྱཏིརེཀཏྠོ. ཏེན ཝུཙྩམཱནཾ ཝིསེསཾ ཛོཏཡཏི. ཀུལགྷརནྟི པཏིཀུལགེཧཾ. གབྦྷནིམིཏྟནྟི གབྦྷསྶ སཎྛིཏབྷཱཝཝིགྒཧཾ. སཏིཔི ཝིསཱཁཱཡ སཱཝཏྠིཝཱསིཀུལཔརིཡཱཔནྣཏྟེ ཏསྶཱ ཏཏྠ པདྷཱནབྷཱཝདསྶནཏྠཾ ‘‘ཝིསཱཁཉྩཱ’’ཏིཨཱདི ཝུཏྟཾ ཡཐཱ ‘‘བྲཱཧྨཎཱ ཨཱགཏཱ, ཝཱསིཊྛོཔི ཨཱགཏོ’’ཏི. བྷགཝཏཱ ཨེཝཾ གཧིཏནཱམཏྟཱཏི ཡོཛནཱ. ཡསྨཱ རཱཛཔུཏྟཱ ལོཀེ ‘‘ཀུམཱརཱ’’ཏི ཝོཧརཱིཡནྟི, ཨཡཉྩ རཉྙོ ཀིཏྟིམཔུཏྟོ, ཏསྨཱ ཨཱཧ – ‘‘རཉྙོ…པེ… སཉྫཱནིཾསཱུ’’ཏི.

པཉྩདས པཉྷེ ཨབྷིསངྑརིཏྭཱཏི ‘‘བྷིཀྑུ, བྷིཀྑུ, ཨཡཾ ཝམྨིཀོ རཏྟིཾ དྷཱུཔཱཡཏི, དིཝཱ པཛྫལཏཱི’’ཏིཨཱདིནཱ ཝམྨིཀསུཏྟེ (མ. ནི. ༡.༢༤༩) ཨཱགཏནཡེན པཉྩདས པཉྷེ ཨབྷིསངྑརིཏྭཱ. པཱཡཱསིརཉྙོཏི ‘‘ནཏྠི པརལོཀོ, ནཏྠི སཏྟཱ ཨོཔཔཱཏིཀཱ, ནཏྠི སུཀཏདུཀྐཊཱནཾ ཀམྨཱནཾ ཕལཾ ཝིཔཱཀོ’’ཏི (དཱི. ནི. ༢.༤༡༠, ༤༡༢) ཨེཝཾལདྡྷིཀསྶ པཱཡཱསིརཱཛསྶ. རཱཛཱ ཧི ཏདཱ ཨནབྷིསིཏྟོ ཧུཏྭཱ པསེནདིནཱ ཀོསལེན དིནྣསེཏབྱནགརཾ ཨཛ྄ཛྷཱཝསནྟོ ཨིམཾ དིཊྛིཾ གཎྷི. པཉྩདསཧི པཉྷེཧི པཊིམཎྜེཏྭཱཏི ‘‘ཏཾ ཀིཾ མཉྙསི, རཱཛཉྙ, ཨིམེ ཙནྡིམསཱུརིཡཱ ཨིམསྨིཾ ཝཱ ལོཀེ པརསྨིཾ ཝཱ དེཝཱ ཝཱ ཏེ མནུསྶཱ’’ཏི ཨེཝམཱདཱིཧི (དཱི. ནི. ༢.༤༡༡) པཉྩདསཧི པཉྷེཧི པཊིམཎྜིཏཾ ཀཏྭཱ. སུཏྟནྟེཏི པཱཡཱསིསུཏྟནྟེ (དཱི. ནི. ༢.༤༠༦ ཨཱདཡོ).

མཧཱཀོཊྛིཀཏྠེརཝཏྠུ

༢༡༨. དསམཾ ཨུཏྟཱནཏྠམེཝ.

ཏཏིཡཨེཏདགྒཝགྒཝཎྞནཱ ནིཊྛིཏཱ.

༡༤. ཨེཏདགྒཝགྒོ

(༡༤) ༤. ཙཏུཏྠཨེཏདགྒཝགྒཝཎྞནཱ

ཨཱནནྡཏྠེརཝཏྠུ

༢༡༩-༢༢༣. ཙཏུཏྠཝགྒསྶ ¶ ¶ པཋམེ ཧེཊྛཱ ཝུཏྟཔྤམཱཎནྟི ཧེཊྛཱ ཀོཎྜཉྙཏྠེརསྶ ཝཏྠུམྷི ‘‘ཏསྶ དྷུརཔཏྟཱནི ནཝུཏིཧཏྠཱནི ཧོནྟི, ཀེསརཾ ཏིཾསཧཏྠཾ, ཀཎྞིཀཱ དྭཱདསཧཏྠཱ, པཱདེན པཏིཊྛིཏཊྛཱནཾ ཨེཀཱདསཧཏྠ’’ནྟི ཨེཝཾ ཝུཏྟཔྤམཱཎཾ. རཉྙོ པེསེསཱིཏི པཙྩནྟསྶ ཀུཔིཏབྷཱཝཾ ཨཱརོཙེཏྭཱ པེསེསི. ཐེརགཱཐཱསཾཝཎྞནཱཡཾ (ཐེརགཱ. ཨཊྛ. ༢.༡༠༡༦ ཨཱནནྡཏྠེརགཱཐཱཝཎྞནཱ) པན ‘‘པཙྩནྟསྶ ཀུཔིཏབྷཱཝཾ རཉྙོ ཨནཱརོཙེཏྭཱ སཡམེཝ ཏཾ ཝཱུཔསམེསི, ཏཾ སུཏྭཱ རཱཛཱ ཏུཊྛམཱནསོ པུཏྟཾ པཀྐོསཱཔེཏྭཱ ‘ཝརཾ ཏེ, སུམན, དམྨི, གཎྷཱཧཱི’ཏི ཨཱཧཱ’’ཏི ཝུཏྟཾ. ན མེཏཾ ཙིཏྟཾ ཨཏྠཱིཏི མམ ཨེཝརཱུཔཾ ཙིཏྟཾ ནཏྠི. ཨཝཉྫྷནྟི ཨཏུཙྪཾ. ཨཉྙཾ ཝརེཧཱིཏི ཨཉྙཾ པཏྠེཧི, ཨཉྙཾ གཎྷཱཧཱིཏི ཝུཏྟཾ ཧོཏི. ཨུདཀཾ ཨདྷིཊྛཱཡཱཏི ‘‘ཨུདཀཾ ཧོཏཱུ’’ཏི ཨདྷིཊྛཧིཏྭཱ. གཏེནཱཏི གམནེན. ན ཨཱམིསཙཀྑུཀཱཏི ཙཱིཝརཱདིཔཙྩཡསངྑཱཏཾ ཨཱམིསཾ ན ཨོལོཀེནྟི.

ཝསནཊྛཱནསབྷཱགེཡེཝཱཏི ཝསནཊྛཱནསམཱིཔེཡེཝ. ཨེཀནྟཝལླབྷོཏི ཨུཔཊྛཱཀཊྛཱནེ ཨེཀནྟེན ཝལླབྷོ. ཨེཏསྶེཝཱཏི ཨེཏསྶེཝ བྷིཀྑུསྶ. དྭེཛ྄ཛྷཀཐཱ ན ཧོནྟཱིཏི དྭིདྷཱབྷཱུཏཀཐཱ ན ཧོནྟི, ཨནེཀནྟིཀཀཐཱ ན ཧོནྟཱིཏི ཝུཏྟཾ ཧོཏི. ཨནིབདྡྷཱཏི ཨནིཡཏཱ. ལོཧིཏེན གལནྟེནཱཏི ཨིཏྠམྦྷཱུཏཀྑཱནེ ཀརཎཝཙནཾ, གལནྟེན ལོཧིཏེན ཡུཏྟོཏི ཨཏྠོ. ཨནྭཱསཏྟོཏི ཨནུགཏོ. ཨུཊྛེཧི, ཨཱཝུསོ ཨཱནནྡ, ཨུཊྛེཧི, ཨཱཝུསོ ཨཱནནྡཱཏི ཏུརིཏེ ཨིདམཱམེཌིཏཝཙནཾ. དུཝིདྷེན ཨུདཀེནཱཏི སཱིཏུདཀེན ཨུཎྷུདཀེན ཙ. ཏིཝིདྷེན དནྟཀཊྛེནཱཏི ཁུདྡཀཾ མཧནྟཾ མཛ྄ཛྷིམནྟི ཨེཝཾ ཏིཔྤཀཱརེན དནྟཀཊྛེན. ནཝ ཝཱརེ ཨནུཔརིཡཱཡཏཱིཏི སཏྠརི པཀྐོསནྟེ པཊིཝཙནདཱནཱཡ ཐིནམིདྡྷཝིནོདནཏྠཾ ནཝཀྑཏྟུཾ ཨནུཔརིཡཱཡཏི. ཏེནེཝཱཧ – ‘‘ཨེཝཉྷིསྶ ཨཧོསཱི’’ཏིཨཱདི. སེསམེཏྠ སུཝིཉྙེཡྻམེཝ.

ཨུརུཝེལཀསྶཔཏྠེརཝཏྠུ

༢༢༤. དུཏིཡེ ¶ ཡཾ ཝཏྟབྦཾ, ཏཾ ཝིཏྠཱརཏོ ཝིནཡཔཱལི༹ཡཾ ཨཱགཏམེཝ.

ཀཱལུ༹དཱཡིཏྠེརཝཏྠུ

༢༢༥. ཏཏིཡེ ¶ གམནཱཀཔྤནྟི གམནཱཀཱརཾ. སེསམེཏྠ ཨུཏྟཱནམེཝ.

བཱཀུལཏྠེརཝཏྠུ

༢༢༦. ཙཏུཏྠེ ནིརཱབཱདྷཱནནྟི ཨཱབཱདྷརཧིཏཱནཾ. ཡཐཱ ‘‘དྭཱཝཱིསཏི དྭཏྟིཾསཱ’’ཏིཨཱདིམྷི ཝཏྟབྦེ ‘‘བཱཝཱིསཏི བཱཏྟིཾསཱ’’ཏིཨཱདཱིནི ཝུཙྩནྟི, ཨེཝམེཝཾ དྭེ ཀུལཱནི ཨསྶཱཏི དྭིཀུལོ, དྭེཀུལོཏི ཝཱ ཝཏྟབྦེ བཱཀུལོཏི ཝུཏྟནྟི ཨཱཧ – ‘‘བཱཀུལོཏི དྭཱིསུ ཀུལེསུ ཝཌྜྷིཏཏྟཱ ཨེཝཾལདྡྷནཱམོ’’ཏི. ཨུཔཡོགེནཱཏི ཨཱནུབྷཱཝེན. ཕཱསུཀཀཱལེཏི ཨརོགཀཱལེ. གདྡུཧནམཏྟམྤཱིཏི གོདུཧནམཏྟམྤི ཀཱལཾ. ཨིདྷ པན ན སཀལོ གོདུཧནཀྑཎོ ཨདྷིཔྤེཏོ, ཨཐ ཁོ གཱཝིཾ ཐནེ གཧེཏྭཱ ཨེཀཁཱིརབིནྡུདུཧནཀཱལམཏྟཾ ཨདྷིཔྤེཏཾ. ཨཱརོགྱསཱལནྟི ཨཱཏུརཱནཾ ཨརོགབྷཱཝཀརཎཏྠཱཡ ཀཏསཱལཾ.

ནིམུཛྫནུམྨུཛྫནཝསེནཱཏི ཛཱཎུཔྤམཱཎེ ཨུདཀེ ཐོཀཾཡེཝ ནིམུཛྫནུམྨུཛྫནཝསེན. ཚཌྜེཏྭཱ པལཱཡཱིཏི མཙྪསྶ མུཁསམཱིཔེཡེཝ ཚཌྜེཏྭཱ པལཱཡི. དཱརཀསྶ ཏེཛེནཱཏི དཱརཀསྶ པུཉྙཏེཛེན. མཱརིཡམཱནཱཝ མརནྟཱིཏི དཎྜཱདཱིཧི པོཐེཏྭཱ མཱརིཡམཱནཱཝ མརནྟི, ན ཛཱལེན བདྡྷཏཱམཏྟེན ཨམཱརིཡམཱནཱ. ནཱིཧཊམཏྟོཝ མཏོཏི ནཱིཧཊཀྑཎེཡེཝ མཏོ. ཏེནསྶ མཱརཎཏྠཾ ཨུཔཀྐམོ ན ཀཏོ, ཡེན ཨུཔཀྐམེན དཱརཀསྶ ཨཱབཱདྷོ སིཡཱ. ཏནྟི མཙྪཾ. སཀལམེཝཱཏི ཨཝིཀལམེཝ པརིཔུཎྞཱཝཡཝམེཝ. ན ཀེལཱ༹ཡཏཱིཏི ན ནནྡཏི, ཀིསྨིཉྩི ན མཉྙཏི. པིཊྛིཏོ ཕཱལེནྟཱིཏི དཱརཀསྶ པུཉྙཏེཛེན པིཊྛིཏོ ཕཱལེནྟཱི. བྷེརིཾ ཙརཱཔེཏྭཱཏི ‘‘པུཏྟཾ ལབྷི’’ནྟི ཨུགྒྷོསནཝསེན བྷེརིཾ ཙརཱཔེཏྭཱ. པཀཏིཾ ཨཱཙིཀྑཱིཏི ཨཏྟནོ པུཏྟབྷཱཝཾ ཀཐེསི. ཀུཙྪིཡཱ དྷཱརིཏཏྟཱ ཨམཱཏཱ ཀཱཏུཾ ན སཀྐཱཏི ཛནནཱིབྷཱཝཏོ ཨམཱཏཱ ཀཱཏུཾ ན སཀྐཱ. མཙྪཾ གཎྷནྟཱཔཱིཏི མཙྪཾ ཝིཀྐིཎིཏྭཱ གཎྷནྟཱཔི. ཏཐཱ གཎྷནྟཱ ཙ ཏཔྤརིཡཱཔནྣཾ སབྦཾ གཎྷནྟི ནཱམཱཏི ཨཱཧ – ‘‘ཝཀྐཡཀནཱདཱིནི བཧི ཀཏྭཱ གཎྷནྟཱ ནཱམ ནཏྠཱི’’ཏི. ཨཡམྤི ཨམཱཏཱ ཀཱཏུཾ ན སཀྐཱཏི དིནྣཔུཏྟབྷཱཝཏོ ན སཀྐཱ.

སོབྷིཏཏྠེརཝཏྠུ

༢༢༧. པཉྩམཾ ¶ ¶ ཨུཏྟཱནཏྠམེཝ.

ཨུཔཱལིཏྠེརཝཏྠུ

༢༢༨. ཚཊྛེ བྷཱརུཀཙྪཀཝཏྠུནྟི ཨཉྙཏརོ ཀིར བྷཱརུཀཙྪདེསཝཱསཱི བྷིཀྑུ སུཔིནནྟེ པུརཱཎདུཏིཡིཀཱཡ མེཐུནཾ དྷམྨཾ པཊིསེཝིཏྭཱ ‘‘ཨསྶམཎོ ཨཧཾ ཝིབྦྷམིསྶཱམཱི’’ཏི བྷཱརུཀཙྪཾ གཙྪནྟོ ཨནྟརཱམགྒེ ཨཱཡསྨནྟཾ ཨུཔཱལིཾ པསྶིཏྭཱ ཨེཏམཏྠཾ ཨཱརོཙེསི. ཨཱཡསྨཱ ཨུཔཱལི, ཨེཝམཱཧ – ‘‘ཨནཱཔཏྟི, ཨཱཝུསོ, སུཔིནནྟེནཱ’’ཏི. ཡསྨཱ སུཔིནནྟེ ཨཝིསཡཏྟཱ ཨེཝཾ ཧོཏི. ཏསྨཱ ཨུཔཱལིཏྠེརོ བྷགཝཏཱ ཨཝིནིཙྪིཏཔུབྦམྤི ཨིམཾ ཝཏྠུཾ ནཡགྒཱཧེན ཨེཝཾ ཝིནིཙྪིནི. གཧཔཏིནོ དྭེ དཱརཀཱ ཧོནྟི པུཏྟོ ཙ བྷཱགིནེཡྻོ ཙ. ཨཐ སོ གཧཔཏི གིལཱནོ ཧུཏྭཱ ཨཱཡསྨནྟཾ ཨཛྫུཀཾ ཨེཏདཝོཙ – ‘‘ཨིམཾ, བྷནྟེ, ཨོཀཱསཾ ཡོ ཨིམེསཾ དཱརཀཱནཾ སདྡྷོ ཧོཏི པསནྣོ, ཏསྶ ཨཱཙིཀྑེཡྻཱསཱི’’ཏི. ཏེན ཙ སམཡེན ཏསྶ ཙ གཧཔཏིནོ བྷཱགིནེཡྻོ སདྡྷོ ཧོཏི པསནྣོ. ཨཐཱཡསྨཱ ཨཛྫུཀོ ཏཾ ཨོཀཱསཾ ཏསྶ དཱརཀསྶ ཨཱཙིཀྑི. སོ ཏེན སཱཔཏེཡྻེན ཀུཊུམྦཉྩ སཎྛཔེསི, དཱནཉྩ པཊྛཔེསི. ཨཐ ཏསྶ གཧཔཏིནོ པུཏྟོ ཨཱཡསྨནྟཾ ཨཱནནྡཾ ཨེཏདཝོཙ – ‘‘ཀོ ནུ ཁོ, བྷནྟེ ཨཱནནྡ, པིཏུནོ དཱཡཛྫོ པུཏྟོ ཝཱ བྷཱགིནེཡྻོ ཝཱ’’ཏི. པུཏྟོ ཁོ, ཨཱཝུསོ, པིཏུནོ དཱཡཛྫོཏི. ཨཱཡསྨཱ, བྷནྟེ, ཨཡྻོ ཨཛྫུཀོ ཨམྷཱཀཾ སཱཔཏེཡྻཾ ཨམྷཱཀཾ མེཐུནཀསྶ ཨཱཙིཀྑཱིཏི. ཨསྶམཎོ, ཨཱཝུསོ, སོ ཨཛྫུཀོཏི. ཨཐཱཡསྨཱ ཨཛྫུཀོ ཨཱཡསྨནྟཾ ཨཱནནྡཾ ཨེཏདཝོཙ – ‘‘དེཧི མེ, ཨཱཝུསོ ཨཱནནྡ, ཝིནིཙྪཡ’’ནྟི. ཏེ ཨུབྷོཔི ཨུཔཱལིཏྠེརསྶ སནྟིཀཾ ཨགམཾསུ. ཨཐཱཡསྨཱ ཨུཔཱལི, ཨཱཡསྨནྟཾ ཨཱནནྡཾ ཨེཏདཝོཙ – ‘‘ཡོ ནུ ཁོ, ཨཱཝུསོ ཨཱནནྡ, སཱམིཀེན ‘ཨིམཾ ཨོཀཱསཾ ཨིཏྠནྣཱམསྶ ཨཱཙིཀྑཱ’ཏི ཝུཏྟོ, ཏསྶ ཨཱཙིཀྑཏི, ཀིཾ སོ ཨཱཔཛྫཏཱི’’ཏི? ན, བྷནྟེ, ཀིཉྩི ཨཱཔཛྫཏི ཨནྟམསོ དུཀྐཊམཏྠམྤཱིཏི. ཨཡཾ, ཨཱཝུསོ, ཨཱཡསྨཱ ཨཛྫུཀོ སཱམིཀེན ‘‘ཨིམཾ ཨོཀཱསཾ ཨིཏྠནྣཱམསྶ ཨཱཙིཀྑཱ’’ཏི ཝུཏྟོ ཏསྶ ཨཱཙིཀྑཏི, ཨནཱཔཏྟི, ཨཱཝུསོ, ཨཱཡསྨཏོ ཨཛྫུཀསྶཱཏི. བྷགཝཱ ཏཾ སུཏྭཱ ‘‘སུཀཐིཏཾ, བྷིཀྑཝེ, ཨུཔཱལིནཱ’’ཏི ཝཏྭཱ ¶ སཱདྷུཀཱརམདཱསི, ཏཾ སནྡྷཱཡེཏཾ ཝུཏྟཾ. ཀུམཱརཀསྶཔཝཏྠུ (ཨ. ནི. ཨཊྛ. ༡.༡.༢༡༧) པན ཧེཊྛཱ ཨཱགཏམེཝ.

ཚནྣཾ ཁཏྟིཡཱནནྟི བྷདྡིཡོ སཀྱརཱཛཱ ཨནུརུདྡྷོ ཨཱནནྡོ བྷགུ ཀིམིལོ དེཝདཏྟོཏི ཨིམེསཾ ¶ ཚནྣཾ ཁཏྟིཡཱནཾ. པསཱདྷཀོཏི མཎྜཡིཏཱ. པཱལི༹ཡནྟི སངྒྷབྷེདཀྑནྡྷཀཔཱལི༹ཡནྟི (ཙཱུལ༹ཝ. ༣༣༠ ཨཱདཡོ).

ནནྡཀཏྠེརཝཏྠུ

༢༢༩. སཏྟམེ ཨེཀསམོདྷཱནེཏི ཨེཀསྨིཾ སམོདྷཱནེ, ཨེཀསྨིཾ སནྣིཔཱཏེཏི ཨཏྠོ. སེསཾ སུཝིཉྙེཡྻམེཝ.

ནནྡཏྠེརཝཏྠུ

༢༣༠. ཨཊྛམེ ན ཏཾ ཙཏུསམྤཛཉྙཝསེན ཨཔརིཙྪིནྡིཏྭཱ ཨོལོཀེཏཱིཏི སཱཏྠཀསཔྤཱཡགོཙརཨསམྨོཧསམྤཛཉྙསངྑཱཏཱནཾ ཙཏུནྣཾ སམྤཛཉྙཱནཾ ཝསེན ཨཔརིཙྪིནྡིཏྭཱ ཏཾ དིསཾ ན ཨོལོཀེཏི. སོ ཧི ཨཱཡསྨཱ ‘‘ཡམེཝཱཧཾ ཨིནྡྲིཡེསུ ཨགུཏྟདྭཱརཏཾ ནིསྶཱཡ སཱསནེ ཨནབྷིརཏིཨཱདིཝིཔྤཀཱརཔྤཏྟོ, ཏམེཝ སུཊྛུ ནིགྒཧེསྶཱམཱི’’ཏི ཨུསྶཱཧཛཱཏོ བལཝཧིརོཏྟཔྤོ, ཏཏྠ ཙ ཀཏཱདྷིཀཱརཏྟཱ ཨིནྡྲིཡསཾཝརོ ཨུཀྐཾསཔཱརམིཔྤཏྟོ ཙཏུསམྤཛཉྙཾ ཨམུཉྩིཏྭཱཝ སབྦདིསཾ ཨཱལོཀེཏི. ཝུཏྟཉྩེཏཾ བྷགཝཏཱ –

‘‘སཙེ, བྷིཀྑཝེ, ནནྡསྶ པུརཏྠིམཱ དིསཱ ཨཱལོཀེཏབྦཱ ཧོཏི, སབྦཾ ཙེཏསོ སམནྣཱཧརིཏྭཱ ནནྡོ པུརཏྠིམཾ དིསཾ ཨཱལོཀེཏི ‘ཨེཝཾ མེ པུརཏྠིམཾ དིསཾ ཨཱལོཀཡཏོ ནཱབྷིཛ྄ཛྷཱདོམནསྶཱ པཱཔཀཱ ཨཀུསལཱ དྷམྨཱ ཨནྭཱསཝིསྶནྟཱི’ཏི. ཨིཏིཧ ཏཏྠ སམྤཛཱནོ ཧོཏི. སཙེ, བྷིཀྑཝེ, ནནྡསྶ པཙྪིམཱ དིསཱ, ཨུཏྟརཱ དིསཱ, དཀྑིཎཱ དིསཱ, ཨུདྡྷཾ, ཨདྷོ, ཨནུདིསཱ ཨནུཝིལོཀེཏབྦཱ ཧོཏི, སབྦཾ ཙེཏསོ སམནྣཱཧརིཏྭཱ ནནྡོ ཨནུདིསཾ ཨནུཝིལོཀེཏི ‘ཨེཝཾ མེ ཨནུདིསཾ ཨནུཝིལོཀཡཏོ…པེ… སམྤཛཱནོ ཧོཏཱི’’’ཏི (ཨ. ནི. ༨.༩).

ཨབྷིསེཀགེཧཔཝེསནཨཱཝཱཧམངྒལེསུ ¶ ཝཏྟམཱནེསཱུཏི ཨིདྷ ཏཱིཎི མངྒལཱནི ཝུཏྟཱནི, ཝིནཡཊྛཀཐཱཡཾ པན ‘‘ཏཾ དིཝསམེཝ ནནྡཀུམཱརསྶ ཀེསཝིསྶཛྫནཾ, པཊྚབནྡྷོ, གྷརམངྒལཾ, ཚཏྟམངྒལཾ, ཨཱཝཱཧམངྒལནྟི པཉྩ མངྒལཱནི ཧོནྟཱི’’ཏི ཝུཏྟཾ. ཏཏྠ ཀུལམརིཡཱདཝསེན ཀེསོརོཔནཾ ཀེསཝིསྶཛྫནཾ. ཡུཝརཱཛཔཊྚབནྡྷནཾ པཊྚབནྡྷོ. ཨབྷིནཝགྷརཔྤཝེསནམཧོ གྷརམངྒལཾ. ཝིཝཱཧཀརཎམཧོ ཨཱཝཱཧམངྒལཾ. ཡུཝརཱཛཚཏྟམཧོ ཚཏྟམངྒལཾ.

ནནྡཀུམཱརཾ ¶ ཨབྷིསེཀམངྒལཾ ན ཏཐཱ པཱིལེ༹སི, ཡཐཱ ཛནཔདཀལྱཱཎིཡཱ ཝུཏྟཝཙནནྟི ཨཛ྄ཛྷཱཧརིཏབྦཾ. ཏདེཝ པན ཝཙནཾ སརཱུཔཏོ དསྶེཏུཾ – ‘‘པཏྟཾ ཨཱདཱཡ གམནཀཱལེ’’ཏིཨཱདི ཝུཏྟཾ. ཛནཔདཀལྱཱཎཱིཏི ཛནཔདམྷི ཀལྱཱཎཱི ཨུཏྟམཱ ཚ སརཱིརདོསརཧིཏཱ པཉྩ ཀལྱཱཎསམནྣཱགཏཱ. སཱ ཧི ཡསྨཱ ནཱཏིདཱིགྷཱ ནཱཏིརསྶཱ ནཱཏིཀིསཱ ནཱཏིཐཱུལཱ ནཱཏིཀཱལཱི༹ ནཱཙྩོདཱཏཱཏི ཨཏིཀྐནྟཱ མཱནུསཝཎྞཾ, ཨསམྤཏྟཱ དིབྦཝཎྞཾ, ཏསྨཱ ཚ སརཱིརདོསརཧིཏཱ. ཚཝིཀལྱཱཎཾ མཾསཀལྱཱཎཾ ནྷཱརུཀལྱཱཎཾ ཨཊྛིཀལྱཱཎཾ ཝཡཀལྱཱཎནྟི ཨིམེཧི པན ཀལྱཱཎེཧི སམནྣཱགཏཏྟཱ པཉྩ ཀལྱཱཎསམནྣཱགཏཱ ནཱམ. ཏསྶཱ ཧི ཨཱགནྟུཀོབྷཱསཀིཙྩཾ ནཏྠི, ཨཏྟནོ སརཱིརོབྷཱསེནེཝ དྭཱདསཧཏྠེ ཋཱནེ ཨཱལོཀཾ ཀརོཏི, པིཡངྒུསཱམཱ ཝཱ ཧོཏི སུཝཎྞསཱམཱ ཝཱ, ཨཡམསྶཱ ཚཝིཀལྱཱཎཏཱ. ཙཏྟཱརོ པནསྶཱ ཧཏྠཔཱདཱ མུཁཔརིཡོསཱནཉྩ ལཱཁཱརསཔརིཀམྨཀཏཾ ཝིཡ རཏྟཔཝཱལ༹རཏྟཀམྦལསདིསཾ ཧོཏི, ཨཡམསྶཱ མཾསཀལྱཱཎཏཱ. ཝཱིསཏི པན ནཁཔཏྟཱནི མཾསཏོ ཨམུཏྟཊྛཱནེ ལཱཁཱརསཔཱུརིཏཱནི ཝིཡ, མུཏྟཊྛཱནེ ཁཱིརདྷཱརཱསདིསཱནི ཧོནྟི, ཨཡམསྶཱ ནྷཱརུཀལྱཱཎཏཱ. དྭཏྟིཾས དནྟཱ སུཕུསིཏཱ སུདྷོཏཝཛིརཔནྟི ཝིཡ ཁཱཡནྟི, ཨཡམསྶཱ ཨཊྛིཀལྱཱཎཏཱ. ཝཱིསཾཝསྶསཏིཀཱཔི སམཱནཱ སོལ༹སཝསྶུདྡེསིཀཱ ཝིཡ ཧོཏི ནིཔྤལིཏེན, ཨཡམསྶཱ ཝཡཀལྱཱཎཏཱ. ཨིཏི ཨིམེཧི པཉྩཧི ཀལྱཱཎེཧི སམནྣཱགཏཏྟཱ ‘‘ཛནཔདཀལྱཱཎཱི’’ཏི ཝུཙྩཏི. ཏུཝཊནྟི སཱིགྷཾ.

ཨིམསྨིཾ ཋཱནེ ནིཝཏྟེསྶཏི, ཨིམསྨིཾ ཋཱནེ ནིཝཏྟེསྶཏཱིཏི ཙིནྟེནྟམེཝཱཏི སོ ཀིར ཏཐཱགཏེ གཱརཝཝསེན ‘‘པཏྟཾ ཝོ, བྷནྟེ, གཎྷཐཱ’’ཏི ཝཏྟུཾ ཨཝིསཧནྟོ ཨེཝཾ ཙིནྟེསི – ‘‘སོཔཱནསཱིསེ པཏྟཾ གཎྷིསྶཏཱི’’ཏི ¶ . སཏྠཱ ཏསྨིམྤི ཋཱནེ ན གཎྷི. ཨིཏརོ ‘‘སོཔཱནཔཱདམཱུལེ གཎྷིསྶཏཱི’’ཏི ཙིནྟེསི. སཏྠཱ ཏཏྠཱཔི ན གཎྷི. ཨིཏརོ ‘‘རཱཛངྒཎེ གཎྷིསྶཏཱི’’ཏི ཙིནྟེསི. སཏྠཱ ཏཏྠཱཔི ན གཎྷི. ཨེཝཾ ‘‘ཨིདྷ གཎྷིསྶཏི, ཨེཏྠ གཎྷིསྶཏཱི’’ཏི ཙིནྟེནྟམེཝ སཏྠཱ ཝིཧཱརཾ ནེཏྭཱ པབྦཱཛེསི.

མཧཱཀཔྤིནཏྠེརཝཏྠུ

༢༣༡. ནཝམེ སུཏཝིཏྟཀོཏི དྷམྨསྶཝནཔིཡོ. པཊིཧཱརཀསྶཱཏི དོཝཱརིཀསྶ. སཙྩཀཱརེནཱཏི སཙྩཀིརིཡཱཡ. སཏྠཱ ‘‘ཨུཔྤལཝཎྞཱ ཨཱགཙྪཏཱུ’’ཏི ཙིནྟེསི. ཐེརཱི ཨཱགནྟྭཱ སབྦཱ པབྦཱཛེཏྭཱ བྷིཀྑུནཱིཨུཔསྶཡཾ གཏཱཏི ཨིདཾ ཨངྒུཏྟརབྷཱཎཀཱནཾ ཀཐཱམགྒཾ དསྶེནྟེན ཝུཏྟཾ. ཏེནེཝ དྷམྨཔདཊྛཀཐཱཡཾ (དྷ. པ. ཨཊྛ. ༡.མཧཱཀཔྤིནཏྠེརཝཏྠུ) ཝུཏྟཾ –

‘‘ཏཱ ¶ སཏྠཱརཾ ཝནྡིཏྭཱ ཨེཀམནྟཾ ཋིཏཱ པབྦཛྫཾ ཡཱཙིཾསུ. ཨེཝཾ ཀིར ཝུཏྟེ སཏྠཱ ཨུཔྤལཝཎྞཱཡ ཨཱགམནཾ ཙིནྟེསཱིཏི ཨེཀཙྩེ ཝདནྟི. སཏྠཱ པན ཏཱ ཨུཔཱསིཀཱཡོ ཨཱཧ – ‘སཱཝཏྠིཾ གནྟྭཱ བྷིཀྑུནཱིཨུཔསྶཡེ པབྦཱཛེཐཱ’ཏི. ཏཱ ཨནུཔུབྦེན ཛནཔདཙཱརིཀཾ ཙརམཱནཱ ཨནྟརཱམགྒེ མཧཱཛནེན ཨབྷིཧཊསཀྐཱརསམྨཱནཱ པདསཱཝ ཝཱིསཡོཛནསཏིཀཾ མགྒཾ གནྟྭཱ བྷིཀྑུནཱིཨུཔསྶཡེ པབྦཛིཏྭཱ ཨརཧཏྟཾ པཱཔུཎིཾསཱུ’’ཏི.

དྷམྨཔཱིཏཱིཏི དྷམྨཔཱཡཀོ, དྷམྨཾ པིཝནྟོཏི ཨཏྠོ. དྷམྨོ ཙ ནཱམེས ན སཀྐཱ བྷཱཛནེན ཡཱགུཨཱདཱིནི ཝིཡ པཱཏུཾ, ནཝཝིདྷཾ པན ལོཀུཏྟརདྷམྨཾ ནཱམཀཱཡེན ཕུསནྟོ ཨཱརམྨཎཏོ སཙྪིཀརོནྟོ པརིཉྙཱབྷིསམཡཱདཱིཧི དུཀྑཱདཱིནི ཨརིཡསཙྩཱནི པཊིཝིཛ྄ཛྷནྟོ དྷམྨཾ པིཝཏི ནཱམ. སུཁཾ སེཏཱིཏི དེསནཱམཏྟམེཏཾ, ཙཏཱུཧིཔི ཨིརིཡཱཔཐེཧི སུཁཾ ཝིཧརཏཱིཏི ཨཏྠོ. ཝིཔྤསནྣེནཱཏི ཨནཱཝིལེན ནིརུཔཀྐིལེསེན. ཨརིཡཔྤཝེདིཏེཏི བུདྡྷཱདཱིཧི ཨརིཡེཧི པཝེདིཏེ སཏིཔཊྛཱནཱདིབྷེདེ བོདྷིཔཀྑིཡདྷམྨེ. སདཱ རམཏཱིཏི ཨེཝརཱུཔོ དྷམྨཔཱིཏི ཝིཔྤསནྣེན ཙེཏསཱ ཝིཧརནྟོ པཎྜིཙྩེན སམནྣཱགཏོ སདཱ རམཏི ཨབྷིརམཏི. བཱཧིཏཔཱཔཏྟཱ ‘‘བྲཱཧྨཎཱ’’ཏི ཐེརཾ ཨཱལཔཏི.

སཱགཏཏྠེརཝཏྠུ

༢༣༢. དསམེ ¶ ཚབྦགྒིཡཱནཾ ཝཙནེནཱཏི ཀོསམྦིཀཱ ཀིར ཨུཔཱསཀཱ ཨཱཡསྨནྟཾ སཱགཏཾ ཨུཔསངྐམིཏྭཱ ཨབྷིཝཱདེཏྭཱ ཨེཀམནྟཾ ཋིཏཱ ཨེཝམཱཧཾསུ – ‘‘ཀིཾ, བྷནྟེ, ཨཡྻཱནཾ དུལླབྷཉྩ མནཱཔཉྩ, ཀིཾ པཊིཡཱདེམཱ’’ཏི? ཨེཝཾ ཝུཏྟེ ཚབྦགྒིཡཱ བྷིཀྑཱུ ཀོསམྦིཀེ ཨུཔཱསཀེ ཨེཏདཝོཙུཾ – ‘‘ཨཏྠཱཝུསོ ཀཱཔོཏིཀཱ, ནཱམ པསནྣཱ བྷིཀྑཱུནཾ དུལླབྷཱ ཙ མནཱཔཱ ཙ, ཏཾ པཊིཡཱདེཐཱ’’ཏི. ཨཐ ཀོསམྦིཀཱ ཨུཔཱསཀཱ གྷརེ གྷརེ ཀཱཔོཏིཀཾ པསནྣཾ པཊིཡཱདེཏྭཱ ཨཱཡསྨནྟཾ སཱགཏཾ པིཎྜཱཡ ཙརནྟཾ དིསྭཱ ཨེཏདཝོཙུཾ – ‘‘པིཝཏུ, བྷནྟེ, ཨཡྻོ སཱགཏོ ཀཱཔོཏིཀཾ པསནྣཾ, པིཝཏུ, བྷནྟེ, ཨཡྻོ སཱགཏོ ཀཱཔོཏིཀཾ པསནྣ’’ནྟི. ཨཐཱཡསྨཱ སཱགཏོ གྷརེ གྷརེ ཀཱཔོཏིཀཾ པསནྣཾ པིཝིཏྭཱ ནགརམྷཱ ནིཀྑམནྟོ ནགརདྭཱརེ པཏི. ཏེན ཝུཏྟཾ – ‘‘ཚབྦགྒིཡཱནཾ ཝཙནེན སབྦགེཧེསུ ཀཱཔོཏིཀཾ པསནྣཾ པཊིཡཱདེཏྭཱ’’ཏིཨཱདི. ཏཏྠ ཀཱཔོཏིཀཱ ནཱམ ཀཔོཏཔཱདསམཱནཝཎྞཱ རཏྟོབྷཱསཱ. པསནྣཱཏི སུརཱམཎྜསྶེཏཾ ཨདྷིཝཙནཾ. ཝིནཡེ སམུཊྛིཏནྟི སུརཱཔཱནསིཀྑཱཔདེ (པཱཙི. ༣༢༦ ཨཱདཡོ) ཨཱགཏཾ.

རཱདྷཏྠེརཝཏྠུ

༢༣༣. ཨེཀཱདསམེ ¶ སཏྠཱ སཱརིཔུཏྟཏྠེརསྶ སཉྙཾ ཨདཱསཱིཏི བྲཱཧྨཎཾ པབྦཱཛེཏུཾ སཉྙཾ ཨདཱསི, ཨཱཎཱཔེསཱིཏི ཝུཏྟཾ ཧོཏི. བྷགཝཱ ཀིར ཏཾ བྲཱཧྨཎཾ པབྦཛྫཾ ཨལབྷིཏྭཱ ཀིསཾ ལཱུཁཾ དུབྦཎྞཾ ཨུཔྤཎྜུཔྤཎྜུཀཛཱཏཾ དིསྭཱ བྷིཀྑཱུ ཨཱམནྟེསི – ‘‘ཀོ, བྷིཀྑཝེ, ཏསྶ བྲཱཧྨཎསྶ ཨདྷིཀཱརཾ སརཏཱི’’ཏི. ཨེཝཾ ཝུཏྟེ ཨཱཡསྨཱ སཱརིཔུཏྟོ བྷགཝནྟཾ ཨེཏདཝོཙ – ‘‘ཨཧཾ ཁོ, བྷནྟེ, ཏསྶ བྲཱཧྨཎསྶ ཨདྷིཀཱརཾ སརཱམཱི’’ཏི. ཀིཾ པན ཏྭཾ, སཱརིཔུཏྟ, བྲཱཧྨཎསྶ ཨདྷིཀཱརཾ སརསཱིཏི. ཨིདྷ མེ, བྷནྟེ, སོ བྲཱཧྨཎོ རཱཛགཧེ པིཎྜཱཡ ཙརནྟསྶ ཀཊཙྪུབྷིཀྑཾ དཱཔེསི, ཨིམཾ ཁོ ཨཧཾ, བྷནྟེ, ཏསྶ བྲཱཧྨཎསྶ ཨདྷིཀཱརཾ སརཱམཱི’’ཏི. སཱདྷུ སཱདྷུ, སཱརིཔུཏྟ. ཀཏཉྙུནོ ཧི, སཱརིཔུཏྟ, སཔྤུརིསཱ ཀཏཝེདིནོ, ཏེན ཧི ཏྭཾ, སཱརིཔུཏྟ, ཏཾ བྲཱཧྨཎཾ པབྦཱཛེཧི ཨུཔསམྤཱདེཧཱིཏི. ཨཊྛུཔྤཏྟིཡཾ ཨཱགཏོཏི ཨལཱིནཙིཏྟཛཱཏཀསྶ (ཛཱ. ༡.༢.༡༡-༡༢) ཨཊྛུཔྤཏྟིཡཾ (ཛཱ. ཨཊྛ. ༢.༢.ཨལཱིནཙིཏྟཛཱཏཀཝཎྞནཱ) ཨཱགཏོ.

ནིདྷཱིནནྟི ¶ ཏཏྠ ཏཏྠ ནིདཧིཏྭཱ ཋཔིཏཱནཾ ཧིརཉྙསུཝཎྞཱདིཔཱུརཱནཾ ནིདྷིཀུམྦྷཱིནཾ. པཝཏྟཱརནྟི ཀིཙྪཛཱིཝིཀེ དུགྒཏམནུསྶེ ཨནུཀམྤཾ ཀཏྭཱ ‘‘ཨེཧི, ཏེ སུཁེན ཛཱིཝནུཔཱཡཾ དསྶེསྶཱམཱི’’ཏི ནིདྷིཊྛཱནཾ ནེཏྭཱ ཧཏྠཾ པསཱརེཏྭཱ ‘‘ཨིམཾ གཧེཏྭཱ སུཁཾ ཛཱིཝཱ’’ཏི ཨཱཙིཀྑིཏཱརཾ ཝིཡ. ཝཛྫདསྶིནནྟི དྭེ ཝཛྫདསྶིནོ ‘‘ཨིམིནཱ ནཾ ཨསཱརུཔྤེན ཝཱ ཁལིཏེན ཝཱ སངྒྷམཛ྄ཛྷེ ནིགྒཎྷིསྶཱམཱི’’ཏི རནྡྷགཝེསཀོ ཙ, ཨནཉྙཱཏཾ ཉཱཔནཏྠཱཡ ཉཱཏཾ ཨནུགྒཎྷནཏྠཱཡ སཱིལཱདཱིནམསྶ ཝུདྡྷིཀཱམཏཱཡ ཏཾ ཏཾ ཝཛྫཾ ཨོལོཀནེན ཨུལླུམྤནསབྷཱཝསཎྛིཏོ ཙ. ཨཡཾ ཨིདྷ ཨདྷིཔྤེཏོ. ཡཐཱ ཧི དུགྒཏམནུསྶོ ‘‘ཨིམཾ གཎྷཱཧཱི’’ཏི ཏཛྫེཏྭཱཔི པོཐེཏྭཱཔི ནིདྷིཾ དསྶེནྟེ ཀོཔཾ ན ཀརོཏི, པམུདིཏོཝ ཧོཏི, ཨེཝམེཝཾ ཨེཝརཱུཔེ པུགྒལེ ཨསཱརུཔྤཾ ཝཱ ཁལིཏཾ ཝཱ དིསྭཱ ཨཱཙིཀྑནྟེ ཀོཔོ ན ཀཱཏབྦོ, ཏུཊྛེནེཝ བྷཝིཏབྦཾ. ‘‘བྷནྟེ, མཧནྟཾ ཝོ ཀམྨཾ ཀཏཾ མཡ྄ཧཾ ཨཱཙརིཡུཔཛ྄ཛྷཱཡཊྛཱནེ ཋཏྭཱ ཨོཝདནྟེཧི, པུནཔི མཾ ཝདེཡྻཱཐཱ’’ཏི པཝཱརེཏབྦམེཝ.

ནིགྒཡ྄ཧཝཱདིནྟི ཨེཀཙྩོ ཧི སདྡྷིཝིཧཱརིཀཱདཱིནཾ ཨསཱརུཔྤཾ ཝཱ ཁལིཏཾ ཝཱ དིསྭཱ ‘‘ཨཡཾ མེ མུཁོདཀདཱནཱདཱིཧི སཀྐཙྩཾ ཨུཔཊྛཧཏི, སཙེ ནཾ ཝཀྑཱམི, ན མཾ ཨུཔཊྛཧིསྶཏི, ཨེཝཾ མེ པརིཧཱནི བྷཝིསྶཏཱི’’ཏི ཏཾ ཝཏྟུཾ ཨཝིསཧནྟོ ན ནིགྒཡ྄ཧཝཱདཱི ནཱམ ཧོཏི, སོ ཨིམསྨིཾ སཱསནེ ཀཙཝརཾ ཨཱཀིརཏི. ཡོ པན ཏཐཱརཱུཔཾ ཝཛྫཾ དིསྭཱ ཝཛྫཱནུརཱུཔཾ ཏཛྫེནྟོ པཎཱམེནྟོ དཎྜཀམྨཾ ཀརོནྟོ ཝིཧཱརཱ ནཱིཧརནྟོ སིཀྑཱཔེཏི, ཨཡཾ ནིགྒཡ྄ཧཝཱདཱི ནཱམ སེཡྻཐཱཔི, སམྨཱསམྦུདྡྷོ. ཝུཏྟཉྷེཏཾ – ‘‘ནིགྒཡ྄ཧ ནིགྒཡ྄ཧཱཧཾ, ཨཱནནྡ, ཝཀྑཱམི, པཝཡ྄ཧ པཝཡ྄ཧ ¶ , ཨཱནནྡ, ཝཀྑཱམི, ཡོ སཱརོ, སོ ཋསྶཏཱི’’ཏི (མ. ནི. ༣.༡༩༦). མེདྷཱཝིནྟི དྷམྨོཛཔཉྙཱཡ སམནྣཱགཏཾ. ཏཱདིསནྟི ཨེཝརཱུཔཾ པཎྜིཏཾ བྷཛེཡྻ པཡིརུཔཱསེཡྻ. ཏཱདིསཉྷི ཨཱཙརིཡཾ བྷཛམཱནསྶ ཨནྟེཝཱསིཀསྶ སེཡྻོ ཧོཏི ན པཱཔིཡོ, ཝཌྜྷིཡེཝ ཧོཏི, ནོ པརིཧཱནཱིཏི.

མོགྷརཱཛཏྠེརཝཏྠུ

༢༣༤. དྭཱདསམེ ཀཊྛཝཱཧནནགརེཏི ཀཊྛཝཱཧནེན གཧིཏཏྟཱ ཨེཝཾལདྡྷནཱམཀེ ནགརེ. ཨཏཱིཏེ ཀིར བཱརཱཎསིཝཱསཱི ཨེཀོ རུཀྑཝཌྜྷཀཱི སཀེ ཨཱཙརིཡཀེ ཨདུཏིཡོ. ཏསྶ སོལ༹ས སིསྶཱ ཨེཀམེཀསྶ སཧསྶཾ ཨནྟེཝཱསིཀཱ. ཨེཝཾ ཏེ སཏྟརསཱདྷིཀཱ སོལ༹ས སཧསྶཱ ཨཱཙརིཡནྟེཝཱསིཀཱ ¶ སབྦེཔི བཱརཱཎསིཾ ཨུཔནིསྶཱཡ ཛཱིཝིཀཾ ཀཔྤེནྟཱ པབྦཏསམཱིཔཾ གནྟྭཱ རུཀྑེ གཧེཏྭཱ ཏཏྠེཝ ནཱནཱཔཱསཱདཝིཀཏིཡོ ནིཊྛཱཔེཏྭཱ ཀུལླཾ བནྡྷིཏྭཱ གངྒཱཡ བཱརཱཎསིཾ ཨཱནེཏྭཱ སཙེ རཱཛཱ ཨཏྠིཀོ ཧོཏི, རཉྙོ ཨེཀབྷཱུམཀཾ ཝཱ སཏྟབྷཱུམཀཾ ཝཱ པཱསཱདཾ ཡོཛེཏྭཱ དེནྟི. ནོ ཙེ, ཨཉྙེསམྤི ཝིཀྐིཎིཏྭཱ པུཏྟདཱརཾ པོསེནྟི. ཨཐ ནེསཾ ཨེཀདིཝསཾ ཨཱཙརིཡོ ‘‘ན སཀྐཱ ཝཌྜྷཀིཀམྨེན ནིཙྩཾ ཛཱིཝིཏུཾ, དུཀྐརཉྷི ཛརཱཀཱལེ ཨེཏཾ ཀམྨ’’ནྟི ཙིནྟེཏྭཱ ཨནྟེཝཱསིཀེ ཨཱམནྟེསི – ‘‘ཏཱཏཱ, ཨུདུམྦརཱདཡོ ཨཔྤསཱརརུཀྑེ ཨཱནེཐཱ’’ཏི. ཏེ ‘‘སཱདྷཱུ’’ཏི པཊིསྶུཎིཏྭཱ ཨཱནཡིཾསུ. སོ ཏེཧི ཀཊྛསཀུཎཾ ཀཏྭཱ ཏསྶབྦྷནྟརཾ པཝིསིཏྭཱ ཝཱཏེན ཡནྟཾ པཱུརེསི. ཀཊྛསཀུཎོ སུཝཎྞཧཾསརཱཛཱ ཝིཡ ཨཱཀཱསེ ལངྒྷིཏྭཱ ཝནསྶ ཨུཔརི ཙརིཏྭཱ ཨནྟེཝཱསཱིནཾ པུརཏོ ཨོརུཧི.

ཨཐཱཙརིཡོ སིསྶེ ཨཱཧ – ‘‘ཏཱཏཱ ཨཱིདིསཱནི ཀཊྛཝཱཧནཱནི ཀཏྭཱ སཀྐཱ སཀལཛམྦུདཱིཔེ རཛྫེ གཧེཏུཾ, ཏུམྷེཔི ཏཱཏཱ ཨེཏཱནི ཀརོཐ, རཛྫཾ གཧེཏྭཱ ཛཱིཝིསྶཱམ, དུཀྐརཾ ཝཌྜྷཀིསིཔྤེན ཛཱིཝིཏུ’’ནྟི. ཏེ ཏཐཱ ཀཏྭཱ ཨཱཙརིཡསྶ པཊིཝེདེསུཾ. ཏཏོ ནེ ཨཱཙརིཡོ ཨཱཧ – ‘‘ཀཏམཾ ཏཱཏཱ རཛྫཾ གཎྷཱམཱ’’ཏི? བཱརཱཎསིརཛྫཾ ཨཱཙརིཡཱཏི. ཨལཾ ཏཱཏཱ, མཱ ཨེཏཾ རུཙིཏྠ, མཡཉྷི ཏཾ གཧེཏྭཱཔི ‘‘ཝཌྜྷཀིརཱཛཱ, ཝཌྜྷཀིཡུཝརཱཛཱ’’ཏི ཝཌྜྷཀིཝཱདཱ ན མུཙྩིསྶཱམ, མཧནྟོ ཛམྦུདཱིཔོ, ཨཉྙཏྠ གཙྪཱམཱཏི. ཏཏོ སཔུཏྟདཱརཀཱ ཀཊྛཝཱཧནཱནི ཨབྷིརུཧིཏྭཱ སཛྫཱཝུདྷཱ ཧུཏྭཱ ཧིམཝནྟཱབྷིམུཁཱ གནྟྭཱ ཧིམཝཏི ཨཉྙཏརཾ ནགརཾ པཝིསིཏྭཱ རཉྙོ ནིཝེསནེཡེཝ པཙྩུཊྛཾསུ. ཏེ ཏཏྠ རཛྫཾ གཧེཏྭཱ ཨཱཙརིཡཾ རཛྫེ ཨབྷིསིཉྩིཾསུ. སོ ‘‘ཀཊྛཝཱཧནོ རཱཛཱ’’ཏི པཱཀཊོ ཨཧོསི, ཏཾ ནགརཾ ཏེན གཧིཏཏྟཱ ‘‘ཀཊྛཝཱཧནནགར’’ནྟེཝ ནཱམཾ ལབྷི.

ཏཔཙཱརནྟི ¶ ཏཔཙརཎཾ. པཱསཱཎཙེཏིཡེ པིཊྛིཔཱསཱཎེ ནིསཱིདཱིཏི པཱསཱཎཀཙེཏིཡནྟི ལདྡྷཝོཧཱརེ པིཊྛིཔཱསཱཎེ སཀྐེན མཱཔིཏེ མཧཱམཎྜཔེ ནིསཱིདི. ཏཏྠ ཀིར མཧཏོ པཱསཱཎསྶ ཨུཔརི པུབྦེ དེཝཊྛཱནཾ ཨཧོསི, ཨུཔྤནྣེ པན བྷགཝཏི ཝིཧཱརོ ཛཱཏོ, སོ ཏེནེཝ པུརིམཝོཧཱརེན ‘‘པཱསཱཎཙེཏིཡ’’ནྟི ཝུཙྩཏི.

ཏེན ¶ པུཙྪིཏེ དུཏིཡོ ཧུཏྭཱ སཏྠཱརཾ པཉྷཾ པུཙྪཱིཏི –

‘‘མུདྡྷཾ མུདྡྷཱདྷིཔཱཏཉྩ, བཱཝརཱི པརིཔུཙྪཏི;

ཏཾ བྱཱཀརོཧི བྷགཝཱ, ཀངྑཾ ཝིནཡ ནོ ཨིསེ’’ཏི. (སུ. ནི. ༡༠༣༡) –

ཨེཝཾ ཏེན པཉྷེ པུཙྪིཏེ བྷགཝཏཱ ཙ –

‘‘ཨཝིཛྫཱ མུདྡྷཱཏི ཛཱནཱཧི, ཝིཛྫཱ མུདྡྷཱདྷིཔཱཏིནཱི;

སདྡྷཱསཏིསམཱདྷཱིཧི, ཚནྡཝཱིརིཡེན སཾཡུཏཱ’’ཏི. (སུ. ནི. ༡༠༣༢) –

པཉྷེ ཝིསྶཛྫིཏེ དུཏིཡོ ཧུཏྭཱ པཉྷཾ པུཙྪི.

ཨཐསྶ…པེ… པཉྷཾ ཀཐེསཱིཏི –

‘‘ཀཐཾ ལོཀཾ ཨཝེཀྑནྟཾ, མཙྩུརཱཛཱ ན པསྶཏཱི’’ཏི. (སུ. ནི. ༡༡༢༤) –

ཏེན པཉྷེ པུཙྪིཏེ –

‘‘སུཉྙཏོ ལོཀཾ ཨཝེཀྑསྶུ, མོགྷརཱཛ སདཱ སཏོ;

ཨཏྟཱནུདིཊྛིཾ ཨཱུཧཙྩ, ཨེཝཾ མཙྩུཏརོ སིཡཱ;

ཨེཝཾ ལོཀཾ ཨཝེཀྑནྟཾ, མཙྩུརཱཛཱ ན པསྶཏཱི’’ཏི. (སུ. ནི. ༡༡༢༥) –

པཉྷཾ ཝིསྶཛྫེསི.

སེསཛནཱཏི ཏསྨིཾ སམཱགམེ སནྣིཔཏིཏཱ སེསཛནཱ. ན ཀཐཱིཡནྟཱིཏི ‘‘ཨེཏྟཀཱ སོཏཱཔནྣཱ’’ཏིཨཱདིནཱ ¶ ན ཝུཙྩནྟི. ཨེཝཾ པཱརཱཡནེ ཝཏྠུ སམུཊྛིཏནྟི པཱརཱཡནཝགྒེ ཨིདཾ ཝཏྠུ སམུཊྛིཏཾ.

ཙཏུཏྠཨེཏདགྒཝགྒཝཎྞནཱ ནིཊྛིཏཱ.

ཐེརཔཱལི༹སཾཝཎྞནཱ ནིཊྛིཏཱ.

༡༤. ཨེཏདགྒཝགྒོ

(༡༤) ༥. པཉྩམཨེཏདགྒཝགྒཝཎྞནཱ

མཧཱཔཛཱཔཏིགོཏམཱིཐེརཱིཝཏྠུ

༢༣༥. ཐེརིཔཱལི༹སཾཝཎྞནཱཡ ¶ པཋམེ ཡདིདཾ མཧཱགོཏམཱིཏི ཨེཏྠ ‘‘ཡདིདཾ མཧཱཔཛཱཔཏི གོཏམཱི’’ཏི ཙ པཋནྟི. ཏཏྠ གོཏམཱིཏི གོཏྟཾ. ནཱམཀརཎདིཝསེ ¶ པནསྶཱ ལདྡྷསཀྐཱརཱ བྲཱཧྨཎཱ ལཀྑཎསམྤཏྟིཾ དིསྭཱ ‘‘སཙེ ཨཡཾ དྷཱིཏརཾ ལབྷིསྶཏི, ཙཀྐཝཏྟིརཉྙོ མཧེསཱི བྷཝིསྶཏི. སཙེ པུཏྟཾ ལབྷིསྶཏི, ཙཀྐཝཏྟིརཱཛཱ བྷཝིསྶཏཱི’’ཏི ཨུབྷཡཐཱཔི ‘‘མཧཏཱིཡེཝསྶཱ པཛཱ བྷཝིསྶཏཱི’’ཏི བྱཱཀརིཾསུ, ཏསྨཱ པུཏྟཔཛཱཡ ཙེཝ དྷཱིཏུཔཛཱཡ ཙ མཧནྟཏཱཡ ‘‘མཧཱཔཛཱཔཏཱི’’ཏི ཝོཧརིཾསུ. ཏདུབྷཡཾ པན སཾསནྡེཏྭཱ ‘‘མཧཱཔཛཱཔཏིགོཏམཱི’’ཏི ཝུཏྟཾ. ཝཱརབྷིཀྑནྟི ཝཱརེན དཱཏབྦཾ བྷིཀྑཾ. ནཱམཾ ཨཀཾསཱུཏི གོཏྟཾཡེཝ ནཱམཾ ཨཀཾསུ. མཱཏུཙྪནྟི ཙཱུལ༹མཱཏརཾ. མཱཏུབྷགིནཱི ཧི མཱཏུཙྪཱཏི ཝུཙྩཏི. ཀལཧཝིཝཱདསུཏྟཔརིཡོསཱནེཏི ‘‘ཀུཏོཔཧཱུཏཱ ཀལཧཱ ཝིཝཱདཱ’’ཏིཨཱདིནཱ སུཏྟནིཔཱཏེ ཨཱགཏསྶ ཀལཧཝིཝཱདསུཏྟསྶ (སུ. ནི. ༨༦༨ ཨཱདཡོ) པརིཡོསཱནེ. ཨིདཉྩ ཨངྒུཏྟརབྷཱཎཀཱནཾ ཀཐཱམགྒཱནུསཱརེན ཝུཏྟཾ. ཨཔརེ པན ‘‘ཏསྨིཾཡེཝ སུཏྟནིཔཱཏེ ‘ཨཏྟདཎྜཱབྷཡཾ ཛཱཏ’ནྟིཨཱདིནཱ ཨཱགཏསྶ ཨཏྟདཎྜསུཏྟསྶ (སུ. ནི. ༩༤༡ ཨཱདཡོ) པརིཡོསཱནེ’’ཏི ཝདནྟི. ནིཀྑམིཏྭཱ པབྦཛིཏཱནནྟི ཨེཏྠ ཨེཧིབྷིཀྑུཔབྦཛྫཱཡ ཨེཏེ པབྦཛིཏཱཏི ཝདནྟི. ཏེནེཝ སུཏྟནིཔཱཏེ ཨཏྟདཎྜསུཏྟསཾཝཎྞནཱཡ (སུ. ནི. ཨཊྛ. ༢.༩༤༢ ཨཱདཡོ) ཝུཏྟཾ – ‘‘དེསནཱཔརིཡོསཱནེ པཉྩསཏཱ སཱཀིཡཀུམཱརཱ ཀོལི༹ཡཀུམཱརཱ ཙ ཨེཧིབྷིཀྑུཔབྦཛྫཱཡ པབྦཛིཏཱ. ཏེ གཧེཏྭཱ བྷགཝཱ མཧཱཝནཾ པཱཝིསཱི’’ཏི. སེསམེཏྠ སུཝིཉྙེཡྻམེཝ.

ཁེམཱཐེརཱིཝཏྠུ

༢༣༦. དུཏིཡེ པརཔརིཡཱཔནྣཱ ཧུཏྭཱཏི པརེསཾ དཱསཱི ཧུཏྭཱ. སུཝཎྞརསཔིཉྫརོ ཨཧོསཱིཏི སུཝཎྞརསཔིཉྫརོ ཝིཡ ཨཧོསི.

མཀྐཊཀོཝ ¶ ཛཱལནྟི ཡཐཱ ནཱམ མཀྐཊཀོ སུཏྟཛཱལཾ ཀཏྭཱ མཛ྄ཛྷཊྛཱནེ ནཱབྷིམཎྜལེ ནིཔནྣོ པརིཡནྟེ པཏིཏཾ པཊངྒཾ ཝཱ མཀྑིཀཾ ཝཱ ཝེགེན གནྟྭཱ ཝིཛ྄ཛྷིཏྭཱ ཏསྶ རསཾ པིཝིཏྭཱ པུནཱགནྟྭཱ ཏསྨིཾཡེཝ ཋཱནེ ནིཔཛྫཏི, ཨེཝམེཝ ཡེ སཏྟཱ རཱགརཏྟཱ དོསཔདུཊྛཱ མོཧམཱུལ༹ྷཱ སཡཾཀཏཾ ཏཎྷཱསོཏཾ ཨནུཔཏནྟི, ཏེ ཏཾ སམཏིཀྐམིཏུཾ ན སཀྐོནྟི, ཨེཝཾ དུརཏིཀྐམཾ. ཨེཏམྤི ཚེཏྭཱན ཝཛནྟི དྷཱིརཱཏི པཎྜིཏཱ ཨེཏཾ བནྡྷནཾ ཚིནྡིཏྭཱ ཨནཔེཀྑིནོ ནིརཱལཡཱ ཧུཏྭཱ ཨརཧཏྟམགྒེན སབྦཾ དུཀྑཾ པཧཱཡ ཝཛནྟི གཙྪནྟཱིཏི ཨཏྠོ.

ཨུཔྤལཝཎྞཱཐེརཱིཝཏྠུ

༢༣༧. ཏཏིཡཾ ¶ ཨུཏྟཱནཏྠམེཝ.

པཊཱཙཱརཱཐེརཱིཝཏྠུ

༢༣༨. ཙཏུཏྠེ པཊིཧཱརསཏེནཔཱིཏི དྭཱརསཏེནཔི. པཊིཧཱརསདྡོ ཧི དྭཱརེ དོཝཱརིཀེ ཙ དིསྶཏི. ཀུལསབྷཱགནྟི ཨཏྟནོ གེཧསམཱིཔཾ.

ཏཱཎཱཡཱཏི ཏཱཎབྷཱཝཱཡ པཏིཊྛཱནཏྠཱཡ. བནྡྷཝཱཏི པུཏྟེ ཙ པིཏརོ ཙ ཋཔེཏྭཱ ཨཝསེསཱ ཉཱཏིསུཧཛྫཱ. ཨནྟཀེནཱདྷིཔནྣསྶཱཏི མརཎེན ཨབྷིབྷཱུཏསྶ. པཝཏྟིཡཉྷི པུཏྟཱདཡོ ཨནྣཔཱནཱདིདཱནེན ཙེཝ ཨུཔྤནྣཀིཙྩནིཏྠརཎེན ཙ ཏཱཎཱ ཧུཏྭཱཔི མརཎཀཱལེ ཀེནཙི ཨུཔཱཡེན མརཎཾ པཊིབཱཧིཏུཾ ཨསམཏྠཏཱཡ ཏཱཎཏྠཱཡ ལེཎཏྠཱཡ ན སནྟི ནཱམ. ཏེནེཝ ཝུཏྟཾ – ‘‘ནཏྠི ཉཱཏཱིསུ ཏཱཎཏཱ’’ཏི.

ཨེཏམཏྠཝསནྟི ཨེཏཾ ཏེསཾ ཨཉྙམཉྙསྶ ཏཱཎཾ བྷཝིཏུཾ ཨསམཏྠབྷཱཝསངྑཱཏཾ ཀཱརཎཾ ཛཱནིཏྭཱ པཎྜིཏོ ཙཏུཔཱརིསུདྡྷིསཱིལེན སཾཝུཏོ རཀྑིཏགོཔིཏོ ཧུཏྭཱ ནིབྦཱནགམནཾ ཨཊྛངྒིཀཾ མགྒཾ སཱིགྷཾ སོདྷེཡྻཱཏི ཨཏྠོ.

དྷམྨདིནྣཱཐེརཱིཝཏྠུ

༢༣༩. པཉྩམེ པརཱཡཏྟཊྛཱནེཏི པརེསཾ དཱསིཊྛཱནེ. སུཛཱཏཏྠེརསྶ ཨདྷིཀཱརཀམྨཾ ཀཏྭཱཏི སཱ ཀིར ཨཏྟནོ ཀེསེ ཝིཀྐིཎིཏྭཱ སུཛཱཏཏྠེརསྶ ནཱམ ཨགྒསཱཝཀསྶ དཱནཾ དཏྭཱ པཏྠནཾ ཨཀཱསི ¶ . ཏཾ སནྡྷཱཡེཏཾ ཝུཏྟཾ. ཧཏྠེ པསཱརིཏེཏི ཏསྶ ཧཏྠཱཝལམྦནཏྠཾ པུབྦཱཙིཎྞཝསེན ཧཏྠེ པསཱརིཏེ. སོ ཀིར ཨནཱགཱམཱི ཧུཏྭཱ གེཧཾ ཨཱགཙྪནྟོ ཡཐཱ ཨཉྙེསུ དིཝསེསུ ཨིཏོ ཙིཏོ ཙ ཨོལོཀེནྟོ སིཏཾ ཀུརུམཱནོ ཧསམཱནོ ཨཱགཙྪཏི, ཨེཝཾ ཨནཱགནྟྭཱ སནྟིནྡྲིཡོ སནྟམཱནསོ ཧུཏྭཱ ཨགམཱསི. དྷམྨདིནྣཱ སཱིཧཔཉྫརཾ ཨུགྒྷཱཊེཏྭཱ ཝཱིཐིཾ ཨོལོཀཡམཱནཱ ཏསྶ ཨཱགམནཱཀཱརཾ དིསྭཱ ‘‘ཀིཾ ནུ ཁོ ཨེཏ’’ནྟི ཙིནྟེཏྭཱ ཏསྶ པཙྩུགྒམནཾ ཀུརུམཱནཱ སོཔཱནསཱིསེ ཋཏྭཱ ཨོལམྦནཏྠཾ ཧཏྠཾ པསཱརེསི. ཨུཔཱསཀོ ཨཏྟནོ ཧཏྠཾ སམིཉྫེསི. སཱ ¶ ‘‘པཱཏརཱསབྷོཛནཀཱལེ ཛཱནིསྶཱམཱི’’ཏི ཙིནྟེསི. ཨུཔཱསཀོ པུབྦེ ཏཱཡ སདྡྷིཾ ཨེཀཏོ བྷུཉྫཏི. ཏཾ དིཝསཾ པན ཏཾ ཨནཔལོཀེཏྭཱ ཡོགཱཝཙརབྷིཀྑུ ཝིཡ ཨེཀཀོཝ བྷུཉྫི. ཏེནཱཧ – ‘‘བྷུཉྫམཱནོཔི ཨིམཾ དེཐ, ཨིམཾ ཧརཐཱཏི ན བྱཱཧརཱི’’ཏི. ཏཏྠ ཨིམཾ དེཐཱཏི ཨིམཾ ཁཱདནཱིཡཾ ཝཱ བྷོཛནཱིཡཾ ཝཱ དེཐ. ཨིམཾ ཧརཐཱཏི ཨིམཾ ཁཱདནཱིཡཾ ཝཱ བྷོཛནཱིཡཾ ཝཱ ཨཔཧརཐ. སནྠཝཝསེནཱཏི ཀིལེསསནྠཝཝསེན. ཙིརཀཱལཔརིབྷཱཝིཏཱཡ གྷཊདཱིཔཛཱལཱཡ ཝིཡ ཨབྦྷནྟརེ དིབྦམཱནཱཡ ཧེཏུསམྤཏྟིཡཱ ཙོདིཡམཱནཱ ཨཱཧ – ‘‘ཨེཝཾ སནྟེ…པེ… མཡ྄ཧཾ པབྦཛྫཾ ཨནུཛཱནཱཐཱ’’ཏི.

ཨཡཾ ཏཱཝ སེཊྛི གྷརམཛ྄ཛྷེ ཋིཏོཝ དུཀྑསྶནྟཾ ཨཀཱསཱིཏི སཱ ཀིར ‘‘དྷམྨདིནྣེ ཏུཡ྄ཧཾ དོསོ ནཏྠི, ཨཧཾ པན ཨཛྫ པཊྛཱཡ སནྠཝཝསེན…པེ… ཀུལགྷརཾ གཙྪཱ’’ཏི ཝུཏྟེ ཨེཝཾ ཙིནྟེསི – ‘‘པཀཏིཔུརིསོ ཨེཝཾ ཝཏྟཱ ནཱམ ནཏྠི, ཨདྡྷཱ ཨེཏེན ལོཀུཏྟརདྷམྨོ ནཱམ པཊིཝིདྡྷོ’’ཏི. ཏེནསྶཱ ཨཡཾ སངྐཔྤོ ཨཧོསི ‘‘ཨཡཾ ཏཱཝ སེཊྛི གྷརམཛ྄ཛྷེ ཋིཏོཝ དུཀྑསྶནྟཾ ཨཀཱསཱི’’ཏི. མཛ྄ཛྷིམནིཀཱཡཊྛཀཐཱཡཾ (མ. ནི. ཨཊྛ. ༡.༤༦༠) པན ‘‘ཨཐ ཀསྨཱ མཡཱ སདྡྷིཾ ཡཐཱཔཀཏིཡཱ ཨཱལཱཔསལླཱཔམཏྟམྤི ན ཀརོཐཱཏི སོ ཙིནྟེསི – ‘ཨཡཾ ལོཀུཏྟརདྷམྨོ ནཱམ གརུ བྷཱརིཡོ ན པཀཱསེཏབྦོ; སཙེ ཁོ པནཱཧཾ ན ཀཐེསྶཱམི, ཨཡཾ ཧདཡཾ ཕཱལེཏྭཱ ཨེཏྠེཝ ཀཱལཾ ཀརེཡྻཱ’ཏི ཏསྶཱ ཨནུགྒཧཏྠཱཡ ཀཐེསི – ‘དྷམྨདིནྣེ ཨཧཾ སཏྠུ དྷམྨདེསནཾ སུཏྭཱ ལོཀུཏྟརདྷམྨཾ ནཱམ ཨདྷིགཏོ, ཏཾ ཨདྷིགཏསྶ ཨེཝརཱུཔཱ ལོཀིཡཀིརིཡཱ ན ཝཊྚཏཱི’’’ཏི ཝུཏྟཾ.

པཉྩཀྑནྡྷཱདིཝསེན པཉྷེ པུཙྪཱིཏི ‘‘སཀྐཱཡོ སཀྐཱཡོཏི ཨཡྻེ ཝུཙྩཏི, ཀཏམོ ནུ ཁོ ཨཡྻེ སཀྐཱཡོ ཝུཏྟོ བྷགཝཏཱ’’ཏིཨཱདིནཱ ཙཱུལ༹ཝེདལླསུཏྟེ (མ. ནི. ༡.༤༦༠ ཨཱདཡོ) ཨཱགཏནཡེན པུཙྪི. པུཙྪིཏཾ པུཙྪིཏཾ ཝིསྶཛྫེསཱིཏི ‘‘པཉྩ ཁོ ཨིམེ, ཨཱཝུསོ ཝིསཱཁ, ཨུཔཱདཱནཀྑནྡྷཱ སཀྐཱཡོ ཝུཏྟོ བྷགཝཏཱ’’ཏིཨཱདིནཱ (མ. ནི. ༡.༤༦༠ ཨཱདཡོ) ཏཏྠེཝ ཨཱགཏནཡེན ཝིསྶཛྫེསི. སཱུརབྷཱཝནྟི ཏིཀྑབྷཱཝཾ. ཨནདྷིགཏཨརཧཏྟམགྒསྶ ཨུགྒཧེན ¶ ཝིནཱ ཏཏྠ པཉྷོ ན ཨུཔཊྛཱཏཱིཏི ཨཱཧ – ‘‘ཨུགྒཧཝསེན ཨརཧཏྟམགྒེཔི པུཙྪཱི’’ཏི. ཏཾ ནིཝཏྟེནྟཱིཏི ‘‘ཝིམུཏྟིཡཱ པནཱཡྻེ ཀིཾ པཊིབྷཱགོ’’ཏི པུཙྪིཏེ ‘‘ཝིམུཏྟིཡཱ ཁོ, ཨཱཝུསོ ཝིསཱཁ, ནིབྦཱནཾ པཊིབྷཱགོ’’ཏི (མ. ནི. ༡.༤༦༦) ཝུཏྟེ ‘‘ནིབྦཱནསྶ, པནཱཡྻེ, ཀིཾ པཊིབྷཱགོ’’ཏི པུན པུཙྪིཏེ ཏཾ ནིཝཏྟེནྟཱི ‘‘ཨཙྩསརཱཝུསོ ¶ ཝིསཱཁཱ’’ཏིཨཱདིམཱཧ. ཏཏྠ ཨཙྩསརཱཏི ཨཔུཙྪིཏབྦཾ པུཙྪནྟོ པཉྷཾ ཨཏིཀྐཱམིཏཱ ཨཧོསཱིཏི ཨཏྠོ. ནཱསཀྑི པཉྷཱནཾ པརིཡནྟཾ གཧེཏུནྟི པཉྷཱནཾ པརིཙྪེདཔྤམཱཎཾ གཧེཏུཾ ནཱསཀྑི. པཉྷཱནཉྷི པརིཙྪེདཾ གཧེཏུཾ ཡུཏྟཊྛཱནེ ཨཊྛཏྭཱ ཏཏོ པརཾ པུཙྪནྟོ ནཱསཀྑི པཉྷཱནཾ པརིཡནྟཾ གཧེཏུཾ. ཨཔྤཊིབྷཱགདྷམྨསྶ ཙ པཊིབྷཱགཾ པུཙྪི. ནིབྦཱནཾ ནཱམེཏཾ ཨཔྤཊིབྷཱགཾ, ན སཀྐཱ ནཱིལཾ ཝཱ པཱིཏཀཾ ཝཱཏི ཀེནཙི དྷམྨེན སདྡྷིཾ པཊིབྷཱགཾ ཀཏྭཱ དསྶེཏུཾ, ཏཉྩ ཏྭཾ ཨིམིནཱ ཨདྷིཔྤཱཡེན པུཙྪསཱིཏི ཨཏྠོ. ནིབྦཱནོགདྷནྟི ནིབྦཱནཾ ཨོགཱཧེཏྭཱ ཋིཏཾ, ནིབྦཱནནྟོགདྷཾ ནིབྦཱནཾ ཨནུཔྤཝིཊྛནྟི ཨཏྠོ. ནིབྦཱནཔརཱཡཎནྟི ནིབྦཱནཾ པརཾ ཨཡནམསྶ པརཱགཏི, ན ཏཏོ པརཾ གཙྪཏཱིཏི ཨཏྠོ. ནིབྦཱནཾ པརིཡོསཱནཾ ཨཝསཱནཾ ཨསྶཱཏི ནིབྦཱནཔརིཡོསཱནཾ.

པུརེཏི ཨཏཱིཏེསུ ཁནྡྷེསུ. པཙྪཱཏི ཨནཱགཏེསུ ཁནྡྷེསུ. མཛ྄ཛྷེཏི པཙྩུཔྤནྣེསུ ཁནྡྷེསུ. ཨཀིཉྩནནྟི ཡསྶ ཨེཏེསུ ཏཱིསུ ཏཎྷཱགཱཧསངྑཱཏཾ ཀིཉྩནཾ ནཏྠི, ཏམཧཾ རཱགཀིཉྩནཱདཱིཧི ཨཀིཉྩནཾ ཀསྶཙི གཧཎསྶ ཨབྷཱཝེན ཨནཱདཱནཾ བྲཱཧྨཎཾ ཝདཱམཱིཏི ཨཏྠོ.

པཎྜིཏཱཏི དྷཱཏུཨཱཡཏནཱདིཀུསལཏཱསངྑཱཏེན པཎྜིཙྩེན སམནྣཱགཏཱ. ཝུཏྟཉྷེཏཾ –

‘‘ཀིཏྟཱཝཏཱ ནུ ཁོ, བྷནྟེ, པཎྜིཏོ ཧོཏི? ཡཏོ ཁོ, ཨཱནནྡ, བྷིཀྑུ དྷཱཏུཀུསལོ ཙ ཧོཏི ཨཱཡཏནཀུསལོ ཙ པཊིཙྩསམུཔྤཱདཀུསལོ ཙ ཋཱནཱཊྛཱནཀུསལོ ཙ, ཨེཏྟཱཝཏཱ ཁོ, ཨཱནནྡ, བྷིཀྑུ པཎྜིཏོ ཧོཏཱི’’ཏི.

མཧཱཔཉྙཱཏི མཧནྟེ ཨཏྠེ མཧནྟེ དྷམྨེ མཧནྟཱ ནིརུཏྟིཡོ མཧནྟཱནི པཊིབྷཱནཱནི པརིགྒཧཎེ སམཏྠཱཡ པཉྙཱཡ སམནྣཱགཏཱ. ཨིམིསྶཱ ཧི ཐེརིཡཱ ཨསེཀྑཔྤཊིསམྦྷིདཱཔྤཏྟཏཱཡ པཊིསམྦྷིདཱཡོ པཱུརེཏྭཱ ཋིཏཏཱཡ པཉྙཱམཧཏྟཾ. ཡཐཱ ཏཾ དྷམྨདིནྣཱཡཱཏི ཡཐཱ དྷམྨདིནྣཱཡ བྷིཀྑུནིཡཱ བྱཱཀཏཾ, ཨཧཾ ཨེཝམེཝ བྱཱཀརེཡྻནྟི ཨཏྠོ. ཏནྟི ནིཔཱཏམཏྠཾ.

ནནྡཱཐེརཱིཝཏྠུ

༢༤༠. ཚཊྛེ ¶ ¶ ཨཉྙཾ མགྒཾ ཨཔསྶནྟཱིཏི ཨཉྙཾ ཨུཔཱཡཾ ཨཔསྶནྟཱི. ཝིསྶཏྠཱཏི ནིརཱསངྐཱ. ཨིཏྠིནིམིཏྟནྟི ཨིཏྠིཡཱ སུབྷནིམིཏྟཾ, སུབྷཱཀཱརནྟི ཝུཏྟཾ ཧོཏི. དྷམྨཔདེ གཱཐཾ ཝཏྭཱཏི –

‘‘ཨཊྛཱིནཾ ནགརཾ ཀཏཾ, མཾསལོཧིཏལེཔནཾ;

ཡཏྠ ཛརཱ ཙ མཙྩུ ཙ, མཱནོ མཀྑོ ཙ ཨོཧིཏོ’’ཏི. (དྷ. པ. ༡༥༠) –

ཨིམཾ གཱཐཾ ཝཏྭཱ. ཏཏྲཱཡམདྷིཔྤཱཡོ – ཡཐེཝ ཧི པུབྦཎྞཱཔརཎྞཱདཱིནཾ ཨོདཧནཏྠཱཡ ཀཊྛཱནི ཨུསྶཱཔེཏྭཱ ཝལླཱིཧི བནྡྷིཏྭཱ མཏྟིཀཱཡ ཝིལིམྤིཏྭཱ ནགརསངྑཱཏཾ བཧིདྡྷཱ གེཧཾ ཀརོནྟི, ཨེཝམིདཾ ཨཛ྄ཛྷཏྟིཀམྤི ཏཱིཎི ཨཊྛིསཏཱནི ཨུསྶཱཔེཏྭཱ ནྷཱརུཝིནདྡྷཾ མཾསལོཧིཏལེཔནཾ ཏཙཔཊིཙྪནྣཾ ཛཱིརཎལཀྑཎཱཡ ཛརཱཡ མརཎལཀྑཎསྶ མཙྩུནོ ཨཱརོགྱསམྤདཱདཱིནི པཊིཙྩ ཨུཔྤཛྫནལཀྑཎསྶ མཱནསྶ སུཀཏཀཱརཎཝིནཱསནལཀྑཎསྶ མཀྑསྶ ཙ ཨོདཧནཏྠཱཡ ནགརཾ ཀཏཾ. ཨེཝརཱུཔོ ཨེཝ ཧི ཨེཏྠ ཀཱཡིཀཙེཏསིཀོ ཨཱབཱདྷོ ཨོཧིཏོ, ཨིཏོ ཨུདྡྷཾ ཀིཉྩི གཡ྄ཧཱུཔགཾ ནཏྠཱིཏི.

སུཏྟཾ ཨབྷཱསཱིཏི –

‘‘ཙརཾ ཝཱ ཡདི ཝཱ ཏིཊྛཾ, ནིསིནྣོ ཨུད ཝཱ སཡཾ;

སམིཉྫེཏི པསཱརེཏི, ཨེསཱ ཀཱཡསྶ ཨིཉྫནཱ.

‘‘ཨཊྛིནཧཱརུསཾཡུཏྟོ, ཏཙམཾསཱཝལེཔནོ;

ཚཝིཡཱ ཀཱཡོ པཊིཙྪནྣོ, ཡཐཱབྷཱུཏཾ ན དིསྶཏཱི’’ཏི. (སུ. ནི. ༡༩༥-༡༩༦) –

ཨཱདིནཱ སུཏྟམབྷཱསི.

སོཎཱཐེརཱིཝཏྠུ

༢༤༡. སཏྟམེ ¶ སབྦེཔི ཝིསུཾ ཝིསུཾ གྷརཱཝཱསེ པཏིཊྛཱཔེསཱིཏི ཨེཏྠ སབྦེཔི ཝིསུཾ ཝིསུཾ གྷརཱཝཱསེ པཏིཊྛཱཔེཏྭཱ ‘‘པུཏྟཱཝ མཾ པཊིཛགྒིསྶནྟི, ཀིཾ མེ ཝིསུཾ ཀུཊུམྦེནཱ’’ཏི སབྦཾ སཱཔཏེཡྻམྤི ཝིབྷཛིཏྭཱ ཨདཱསཱིཏི ཝེདིཏབྦཾ. ཏེནེཝ ཧི ཏཏོ པཊྛཱཡ ‘‘ཨཡཾ ཨམྷཱཀཾ ཀིཾ ཀརིསྶཏཱི’’ཏི ཨཏྟནོ སནྟིཀཾ ཨཱགཏཾ ‘‘མཱཏཱ’’ཏི སཉྙམྤི ན ཀརིཾསུ. ཏཐཱ ཧི ནཾ ཀཏིཔཱཧཙྩཡེན ཛེཊྛཔུཏྟསྶ བྷརིཡཱ ‘‘ཨཧོ ཨམྷཱཀཾ ཨཡཾ ཛེཊྛེཔུཏྟོ ¶ མེཏི དྭེ ཀོཊྛཱསེ དཏྭཱ ཝིཡ ཨིམམེཝ གེཧཾ ཨཱགཙྪཏཱི’’ཏི ཨཱཧ. སེསཔུཏྟཱནཾ བྷརིཡཱཡོཔི ཨེཝམེཝཾ ཝདིཾསུ. ཛེཊྛདྷཱིཏརཾ ཨཱདིཾ ཀཏྭཱ ཏཱསཾ གེཧཾ གཏཀཱལེ ཏཱཔི ནཾ ཨེཝམེཝ ཝདིཾསུ. སཱ ཨཝམཱནཔྤཏྟཱ ཧུཏྭཱ ‘‘ཀིཾ མེ ཨིམེསཾ སནྟིཀེ ཝུཏྠེན, བྷིཀྑུནཱི ཧུཏྭཱ ཛཱིཝིསྶཱམཱི’’ཏི བྷིཀྑུནཱིཨུཔསྶཡཾ གནྟྭཱ པབྦཛྫཾ ཡཱཙི, ཏཱ ནཾ པབྦཱཛེསུཾ. ཨིམམེཝ ཝཏྠུཾ དསྶེནྟོ ‘‘བཧུཔུཏྟིཀསོཎཱ ཏེསཾ ཨཏྟནི ཨགཱརཝབྷཱཝཾ ཉཏྭཱ ‘གྷརཱཝཱསེན ཀིཾ ཀརིསྶཱམཱི’ཏི ནིཀྑམིཏྭཱ པབྦཛཱི’’ཏི ཨཱཧ.

ཝིཧཱརཾ གཙྪནྟིཡོཏི བྷིཀྑུཝིཧཱརཾ གཙྪནྟིཡོ. དྷམྨམུཏྟམནྟི ནཝཝིདྷལོཀུཏྟརདྷམྨཾ. སོ ཧི ཨུཏྟམདྷམྨོ ནཱམ ཡོ ཧི ཏཾ ན པསྶཏི, ཏསྶ ཝསྶསཏམྤི ཛཱིཝནཏོ ཏཾ དྷམྨཾ པསྶནྟསྶ པཊིཝིཛ྄ཛྷནྟསྶ ཨེཀཱཧམྤི ཨེཀཀྑཎམྤི ཛཱིཝིཏཾ སེཡྻོ. ཨཱགནྟུཀཛནོཏི ཝིཧཱརགཏཾ བྷིཀྑུནཱིཛནཾ སནྡྷཱཡ ཝདཏི. ཨནུཔདྷཱརེཏྭཱཏི ཨསལླཀྑེཏྭཱ.

བཀུལཱཐེརཱིཝཏྠུ

༢༤༢. ཨཊྛམཾ ཨུཏྟཱནཏྠམེཝ.

ཀུཎྜལཀེསཱཐེརཱིཝཏྠུ

༢༤༣. ནཝམེ ཙཏུཀྐེཏི ཝཱིཐིཙཏུཀྐེ. ཙཏུནྣཾ སམཱཧཱརོ ཙཏུཀྐཾ. ཙཱརཀཏོཏི བནྡྷནཱགཱརཏོ. ཨུབྦཊྚེཏྭཱཏི ཨུདྡྷརིཏྭཱ.

མུཧུཏྟམཔི ཙིནྟཡེཏི མུཧུཏྟཾ ཏངྑཎམྤི ཋཱནུཔྤཏྟིཀཔཉྙཱཡ ཏངྑཎཱནུརཱུཔཾ ཨཏྠཾ ཙིནྟིཏུཾ སཀྐུཎེཡྻ. སཧསྶམཔི ཙེ གཱཐཱ, ཨནཏྠཔདསཾཧིཏཱཏི ཨཡཾ གཱཐཱ དཱརུཙཱིརིཡཏྠེརསྶ བྷགཝཏཱ བྷཱསིཏཱ, ཨིདྷཱཔི ཙ སཱཡེཝ གཱཐཱ དསྶིཏཱ. ཐེརིགཱཐཱསཾཝཎྞནཱཡཾ ཨཱཙརིཡདྷམྨཔཱལཏྠེརེནཔི ཀུཎྜལཀེསིཏྠེརིཡཱ ¶ ཝཏྠུམྷི ཨཡམེཝ གཱཐཱ ཝུཏྟཱ. དྷམྨཔདཊྛཀཐཱཡཾ པན ཀུཎྜལཀེསིཏྠེརིཡཱ ཝཏྠུམྷི –

‘‘ཡོ ཙ གཱཐཱསཏཾ བྷཱསེ, ཨནཏྠཔདསཾཧིཏཱ;

ཨེཀཾ དྷམྨཔདཾ སེཡྻོ, ཡཾ སུཏྭཱ ཨུཔསམྨཏཱི’’ཏི. (དྷ. པ. ཨཊྛ. ༡.༡༠༢) –

ཨཡཾ གཱཐཱ ཨཱགཏཱ. ཏཾཏཾབྷཱཎཀཱནཾ ཀཐཱམགྒཱནུསཱརེན ཏཏྠ ཏཏྠ ཏཐཱ ཝུཏྟནྟི ན ཨིདྷ ཨཱཙརིཡསྶ པུབྦཱཔརཝིརོདྷོ སངྐིཏབྦོ.

བྷདྡཱཀཱཔིལཱནཱིཐེརཱི-བྷདྡཱཀཙྩཱནཱཐེརཱིཝཏྠུ

༢༤༤-༢༤༥. དསམཾ ¶ ཨེཀཱདསམཉྩ ཨུཏྟཱནཏྠམེཝ.

ཀིསཱགོཏམཱིཐེརཱིཝཏྠུ

༢༤༦. དྭཱདསམེ ཏཱིཧི ལཱུཁེཧཱིཏི ཝཏྠལཱུཁསུཏྟལཱུཁརཛནལཱུཁསངྑཱཏེཧི ཏཱིཧི ལཱུཁེཧི. སིདྡྷཏྠཀནྟི སཱསཔབཱིཛཾ.

ཏཾ པུཏྟཔསུསམྨཏྟནྟི ཏཾ རཱུཔབལཱདིསམྤནྣེ པུཏྟེ ཙ པསཱུ ཙ ལབྷིཏྭཱ ‘‘མམ པུཏྟཱ ཨབྷིརཱུཔཱ བལསམྤནྣཱ པཎྜིཏཱ སབྦཀིཙྩསམཏྠཱ, མམ གོཎོ ཨརོགོ ཨབྷིརཱུཔོ མཧཱབྷཱརཝཧོ, མམ གཱཝཱི བཧུཁཱིརཱ’’ཏི ཨེཝཾ པུཏྟེཧི ཙ པསཱུཧི ཙ སམྨཏྟཾ ནརཾ. བྱཱསཏྟམནསནྟི ཙཀྑུཝིཉྙེཡྻཱདཱིསུ ཨཱརམྨཎེསུ ཧིརཉྙསུཝཎྞཱདཱིསུ པཏྟཙཱིཝརཱདཱིསུ ཝཱ ཡཾ ཡཾ ལདྡྷཾ ཧོཏི, ཏཏྠ ཏཏྠེཝ ལགྒནཱཡ སཏྟམཱནསཾ. སུཏྟཾ གཱམནྟི ནིདྡཾ ཨུཔགཏཾ སཏྟཀཱཡཾ. མཧོགྷོཝཱཏི ཡཐཱ ཨེཝརཱུཔཾ གཱམཾ གམྦྷཱིརཏོ ཝིཏྠཱརཏོ ཙ མཧནྟོ མཧཱནདིཨོགྷོ ཨནྟམསོ སུནཁམྤི ཨསེསེཏྭཱ སབྦཾ ཨཱདཱཡ གཙྪཏི, ཨེཝཾ ཝུཏྟཔྤཀཱརཾ ནརཾ མཙྩུ ཨཱདཱཡ གཙྪཏཱིཏི ཨཏྠོ. ཨམཏཾ པདནྟི མརཎརཧིཏཾ ཀོཊྛཱསཾ, ཨམཏཾ མཧཱནིབྦཱནནྟི ཨཏྠོ. སེསམེཏྠ ཨུཏྟཱནམེཝ.

སིངྒཱལཀམཱཏཱཐེརཱིཝཏྠུ

༢༤༧. ཏེརསམཾ ¶ ཨུཏྟཱནཏྠམེཝ.

(པཉྩམཨེཏདགྒཝགྒཝཎྞནཱ ནིཊྛིཏཱ.)

ཐེརིཔཱལི༹སཾཝཎྞནཱ ནིཊྛིཏཱ.

༡༤. ཨེཏདགྒཝགྒོ

(༡༤) ༦. ཚཊྛཨེཏདགྒཝགྒཝཎྞནཱ

ཏཔུསྶ-བྷལླིཀཝཏྠུ

༢༤༨. ཨུཔཱསཀཔཱལི༹སཾཝཎྞནཱཡ ¶ ¶ པཋམེ སབྦཔཋམཾ སརཎཾ གཙྪནྟཱནནྟི སབྦེསཾ པཋམཾ ཧུཏྭཱ སརཎཾ གཙྪནྟཱནཾ. ཨིཏོ པརནྟི སཏྟསཏྟཱཧཏོ པརཾ. གམནཱུཔཙྪེདཾ ཨཀཱསཱིཏི གམནཝིཙྪེདཾ ཨཀཱསི. ཡཐཱ ཏེ གོཎཱ དྷུརཾ ཚཌྜེཏྭཱ པོཐིཡམཱནཱཔི ན གཙྪནྟི, ཏཐཱ ཨཀཱསཱིཏི ཨཏྠོ. ཏེསནྟི ཏཔུསྶབྷལླིཀཱནཾ. ཨདྷིམུཙྩིཏྭཱཏི ཨཱཝིསིཏྭཱ. ཡཀྑསྶ ཨཱཝཊྚོ ཡཀྑཱཝཊྚོ. ཨེཝཾ སེསེསུཔི. ཨཏཱིཏབུདྡྷཱནཾ ཨཱཙིཎྞཾ ཨོལོཀེསཱིཏི ཨཏཱིཏབུདྡྷཱ ཀེན བྷཱཛནེན པཊིགྒཎྷིཾསཱུཏི བུདྡྷཱཙིཎྞཾ ཨོལོཀེསི. དྭེཝཱཙིཀེ སརཎེ པཏིཊྛཱཡཱཏི སངྒྷསྶ ཨནུཔྤནྣཏྟཱ བུདྡྷདྷམྨཝསེན དྭེཝཱཙིཀེ སརཎེ པཏིཊྛཧིཏྭཱ. ཙེཏིཡནྟི པཱུཛནཱིཡཝཏྠུཾ. ཛཱིཝཀེསདྷཱཏུཡཱཏི ཛཱིཝམཱནསྶ བྷགཝཏོ ཀེསདྷཱཏུཡཱ.

ཨནཱཐཔིཎྜིཀསེཊྛིཝཏྠུ

༢༤༩. དུཏིཡེ ཏེནེཝ གུཎེནཱཏི ཏེནེཝ དཱཡཀབྷཱཝསངྑཱཏེན གུཎེན. སོ ཧི སབྦཀཱམསམིདྡྷཏཱཡ ཝིགཏམཙྪེརཏཱཡ ཀརུཎཱདིགུཎསམངྒིཏཱཡ ཙ ནིཙྩཀཱལཾ ཨནཱཐཱནཾ པིཎྜམདཱསི. ཏེན སབྦཀཱལཾ ཨུཔཊྛིཏོ ཨནཱཐཱནཾ པིཎྜོ ཨེཏསྶ ཨཏྠཱིཏི ཨནཱཐཔིཎྜིཀོཏི སངྑཾ གཏོ. ཡོཛནིཀཝིཧཱརེ ཀཱརེཏྭཱཏི ཡོཛནེ ཡོཛནེ ཨེཀམེཀཾ ཝིཧཱརཾ ཀཱརེཏྭཱ. ‘‘ཨེཝརཱུཔཾ དཱནཾ པཝཏྟེསཱི’’ཏི ཝཏྭཱ ཏམེཝ དཱནཾ ཝིབྷཛིཏྭཱ དསྶེནྟོ ‘‘དེཝསིཀཾ པཉྩ སལཱཀབྷཏྟཱནི ཧོནྟཱི’’ཏིཨཱདིམཱཧ. ཏཏྠ སལཱཀཱཡ གཱཧེཏབྦཾ བྷཏྟཾ སལཱཀབྷཏྟཾ. ཨེཀསྨིཾ པཀྑེ ཨེཀདིཝསཾ དཱཏབྦཾ བྷཏྟཾ པཀྑིཀབྷཏྟཾ. དྷུརགེཧེ ཋཔེཏྭཱ དཱཏབྦཾ བྷཏྟཾ དྷུརབྷཏྟཾ. ཨཱགནྟུཀཱནཾ དཱཏབྦཾ བྷཏྟཾ ཨཱགནྟུཀབྷཏྟཾ. ཨེཝཾ སེསེསུཔི. པཉྩ ཨཱསནསཏཱནི གེཧེ ནིཙྩཔཉྙཏྟཱནེཝ ཧོནྟཱིཏི གེཧེ ནིསཱིདཱཔེཏྭཱ བྷུཉྫནྟཱནཾ པཉྩནྣཾ བྷིཀྑུསཏཱནཾ པཉྩ ཨཱསནསཏཱནི ནིཙྩཔཉྙཏྟཱནི ཧོནྟི.

ཙིཏྟགཧཔཏིཝཏྠུ

༢༥༠. ཏཏིཡེ ¶ མིགཱ ཨེཝ མིགརཱུཔཱནི. བྷིཀྑཾ སམཱདཱཔེཏྭཱཏི, ‘‘བྷནྟེ, མཡ྄ཧཾ ཨནུགྒཧཾ ཀརོཐ, ཨིདྷ ནིསཱིདིཏྭཱ བྷིཀྑཾ གཎྷཐཱ’’ཏི བྷིཀྑཱགཧཎཏྠཾ སམཱདཱཔེཏྭཱ ¶ . ཝིཝཊྚཾ ཨུདྡིསྶ ཨུཔཙིཏཾ ནིབྦེདྷབྷཱགིཡཀུསལཾ ཨུཔནིསྶཡོ. སལཱ༹ཡཏནཝིབྷཏྟིམེཝ དེསེསཱིཏི སལཱ༹ཡཏནཝིབྷཱགཔྤཊིསཾཡུཏྟམེཝ དྷམྨཀཐཾ ཀཐེསི. ཐེརེནཱཏི ཏཏྠ སནྣིཧིཏཱནཾ སབྦེསཾ ཛེཊྛེན མཧཱཐེརེན. པཉྷཾ ཝིསྶཛྫེཏུཾ ཨསཀྐོནྟེནཱཏི ཙིཏྟེན གཧཔཏིནཱ ‘‘ཡཱ ཨིམཱ, བྷནྟེ ཐེར, ཨནེཀཝིཧིཏཱ དིཊྛིཡོ ལོཀེ ཨུཔྤཛྫནྟི, ‘སསྶཏོ ལོཀོ’ཏི ཝཱ, ‘ཨསསྶཏོ ལོཀོ’ཏི ཝཱ, ‘ཨནྟཝཱ ལོཀོ’ཏི ཝཱ, ‘ཨནནྟཝཱ ལོཀོ’ཏི ཝཱ, ‘ཏཾ ཛཱིཝཾ ཏཾ སརཱིར’ནྟི ཝཱ, ‘ཨཉྙཾ ཛཱིཝཾ ཨཉྙཾ སརཱིར’ནྟི ཝཱ, ‘ཧོཏི ཏཐཱགཏོ པརཾ མརཎཱ’ཏི ཝཱ, ‘ན ཧོཏི ཏཐཱགཏོ པརཾ མརཎཱ’ཏི ཝཱ, ‘ཧོཏི ཙ ན ཧོཏི ཙ ཏཐཱགཏོ པརཾ མརཎཱ’ཏི ཝཱ, ‘ནེཝ ཧོཏི ན ན ཧོཏི ཏཐཱགཏོ པརཾ མརཎཱ’ཏི ཝཱ ཡཱནི ཙིམཱནི དྭཱསཊྛི དིཊྛིགཏཱནི བྲཧྨཛཱལེ གཎིཏཱནི, ཨིམཱ ནུ ཁོ, བྷནྟེ, དིཊྛིཡོ ཀིསྨིཾ སཏི ཧོནྟི, ཀིསྨིཾ ཨསཏི ན ཧོནྟཱི’’ཏི ཨེཝམཱདིནཱ (སཾ. ནི. ༤.༣༤༥) པཉྷེ པུཊྛེ ཏཾ པཉྷཾ ཝིསྶཛྫེཏུཾ ཨསཀྐོནྟེན. ཨིམཾ ཀིར པཉྷཾ ཡཱཝཏཏིཡཾ པུཊྛོ མཧཱཐེརོ ཏུཎྷཱི ཨཧོསི. ཨཐ ཨིསིདཏྟཏྠེརོ ཙིནྟེསི – ‘‘ཨཡཾ ཐེརོ ནེཝ ཨཏྟནཱ བྱཱཀརོཏི, ན ཨཉྙཾ ཨཛ྄ཛྷེསཏི, ཨུཔཱསཀོ ཙ བྷིཀྑུསངྒྷཾ ཝིཧེསཏི, ཨཧམེཏཾ བྱཱཀརིཏྭཱ ཕཱསུཝིཧཱརཾ ཀཏྭཱ དསྶཱམཱི’’ཏི. ཨེཝཾ ཙིནྟེཏྭཱ ཙ ཨཱསནཏོ ཝུཊྛཱཡ ཐེརསྶ སནྟིཀཾ གནྟྭཱ ‘‘བྱཱཀརོམཧཾ, བྷནྟེ, ཙིཏྟསྶ གཧཔཏིནོ ཨེཏཾ པཉྷ’’ནྟི (སཾ. ནི. ༤.༣༤༥) ཨཱཧ. ཨེཝཾ ཝུཏྟེ ཐེརོ ‘‘བྱཱཀརོཧི ཏྭཾ, ཨཱཝུསོ ཨིསིདཏྟ, ཙིཏྟསྶ གཧཔཏིནོ ཨེཏཾ པཉྷ’’ནྟི ཨིསིདཏྟཾ ཨཛ྄ཛྷེསི. ཏེན ཝུཏྟཾ – ‘‘པཉྷཾ ཝིསྶཛྫེཏུཾ ཨསཀྐོནྟེན ཨཛ྄ཛྷིཊྛོ’’ཏི.

པཉྷཾ ཝིསྶཛྫེཏྭཱཏི ‘‘ཡཱ ཨིམཱ, གཧཔཏི, ཨནེཀཝིཧིཏཱ དིཊྛིཡོ ལོཀེ ཨུཔྤཛྫནྟི ‘སསྶཏོ ལོཀོ’ཏི ཝཱ, ‘ཨསསྶཏོ ལོཀོ’ཏི ཝཱ…པེ… ཡཱནི ཙིམཱནི དྭཱསཊྛི དིཊྛིགཏཱནི བྲཧྨཛཱལེ གཎིཏཱནི, ཨིམཱ ཁོ, གཧཔཏི, དིཊྛིཡོ སཀྐཱཡདིཊྛིཡཱ སཏི ཧོནྟི, སཀྐཱཡདིཊྛིཡཱ ཨསཏི ན ཧོནྟཱི’’ཏིཨཱདིནཱ ནཡེན པཉྷཾ ཝིསྶཛྫེཏྭཱ. གིཧིསཧཱཡཀབྷཱཝེ ཉཱཏེཏི ཐེརསྶ གིཧིསཧཱཡཀབྷཱཝེ ཙིཏྟེན གཧཔཏིནཱ ཉཱཏེ. ཙིཏྟོ ཀིར, གཧཔཏི, ཏསྶ པཉྷཝེཡྻཱཀརཎེ ཏུཊྛོ ‘‘ཀུཏོ, བྷནྟེ, ཨཡྻོ ཨིསིདཏྟོ ཨཱགཙྪཏཱི’’ཏི ཝཏྭཱ ‘‘ཨཝནྟིཡཱ ཁོ ཨཧཾ, གཧཔཏི, ཨཱགཙྪཱམཱི’’ཏི ཝུཏྟོ ‘‘ཨཏྠི, བྷནྟེ, ཨཝནྟིཡཱ ¶ ཨིསིདཏྟོ ནཱམ ཀུལཔུཏྟོ ཨམྷཱཀཾ ཨདིཊྛསཧཱཡོ པབྦཛིཏོ, དིཊྛོ སོ ཨཱཡསྨཏཱ’’ཏི པུཙྪི. ཐེརོ ཙ ‘‘ཨེཝཾ, གཧཔཏཱི’’ཏི ཝཏྭཱ ‘‘ཀཧཾ ནུ ཁོ, བྷནྟེ, སོ ཨཱཡསྨཱ ཨེཏརཧི ཝིཧརཏཱི’’ཏི པུན པུཊྛོ ¶ ཏུཎྷཱི ཨཧོསི. ཨཐ ཙིཏྟོ གཧཔཏི ‘‘ཨཡྻོ ནོ, བྷནྟེ, ཨིསིདཏྟོ’’ཏི པུཙྪིཏྭཱ ‘‘ཨེཝཾ, གཧཔཏཱི’’ཏི ཝུཏྟེ ཨཏྟནོ གིཧིསཧཱཡབྷཱཝཾ ཨཉྙཱསི.

ཏེཛོསམཱཔཏྟིཔཱཊིཧཱརིཡཾ དསྶེཏྭཱཏི ཨེཀསྨིཾ ཀིར དིཝསེ ཙིཏྟོ གཧཔཏི ‘‘སཱདྷུ མེ, བྷནྟེ, ཨཡྻོ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ དསྶེཏཱུ’’ཏི མཧཱཐེརཾ ཡཱཙི. ཐེརོ ‘‘ཏེན ཧི ཏྭཾ, གཧཔཏི, ཨཱལི༹ནྡེ ཨུཏྟརཱསངྒཾ པཉྙཱཔེཏྭཱ ཏཏྠ ཏིཎཀལཱཔཾ ཨོཀིརཱ’’ཏི ཝཏྭཱ ཏེན ཙ ཏཐཱ ཀཏེ སཡཾ ཝིཧཱརཾ པཝིསིཏྭཱ ཙ གྷཊིཀཾ དཏྭཱ ཏཐཱརཱུཔཾ ཨིདྡྷཱབྷིསངྑཱརཾ ཨབྷིསངྑཱརེསི, ཡཐཱ ཏཱལ༹ཙྪིགྒལེ༹ན ཙ ཨགྒལ༹ནྟརིཀཱཡ ཙ ཨཙྩི ནིཀྑམིཏྭཱ ཏིཎཱནི ཛྷཱཔེཏི, ཨུཏྟརཱསངྒཾ ན ཛྷཱཔེཏི. ཨཐ ཙིཏྟོ གཧཔཏི ཨུཏྟརཱསངྒཾ པཔྥོཊེཏྭཱ སཾཝིགྒོ ལོམཧཊྛཛཱཏོ ཨེཀམནྟཾ ཋིཏོ ཐེརཾ བཧི ནིཀྑམནྟཾ དིསྭཱ ‘‘ཨབྷིརམཏུ, བྷནྟེ, ཨཡྻོ མཙྪིཀཱསཎྜེ, རམཎཱིཡཾ ཨམྦཱཊཀཝནཾ, ཨཧཾ ཨཡྻསྶ ཨུསྶུཀྐཾ ཀརིསྶཱམི ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱན’’ནྟི ཨཱཧ. ཏཏོ ཐེརོ ‘‘ན དཱནི ཨིདྷ ཝསིཏུཾ སཀྐཱ’’ཏི ཏམྷཱ ཝིཧཱརཱ པཀྐཱམི. ཏཾ སནྡྷཱཡེཏཾ ཝུཏྟཾ – ‘‘ཏེཛོསམཱཔཏྟི པཱཊིཧཱརིཡཾ དསྶེཏྭཱ ‘ཨིདཱནི ཨིདྷ ཝསིཏུཾ ན ཡུཏྟ’ནྟི ཡཐཱསུཁཾ པཀྐཱམཱི’’ཏི. དྭེ ཨགྒསཱཝཀཱཏིཨཱདཱིསུ ཡཾ ཝཏྟབྦཾ, ཏཾ ཝིཏྠཱརཏོ ཝིནཡཔཱལི༹ཡཾ ཨཱགཏམེཝ.

སདྡྷོཏི ལོཀིཡལོཀུཏྟརཱཡ སདྡྷཱཡ སམནྣཱགཏོ. སཱིལེནཱཏི ཨགཱརིཡསཱིལཾ ཨནགཱརིཡསཱིལནྟི དུཝིདྷཾ སཱིལཾ, ཏེསུ ཨིདྷ ཨགཱརིཡཾ སཱིལཾ ཨདྷིཔྤེཏཾ, ཏེན སམནྣཱགཏོཏི ཨཏྠོ. ཡསོབྷོགསམཔྤིཏོཏི ཡཱདིསོ ཨནཱཐཔིཎྜིཀཱདཱིནཾ པཉྩཨུཔཱསཀསཏཔརིཝཱརསངྑཱཏོ ཨགཱརིཡོ ཡསོ, ཏཱདིསེནེཝ ཡསེན, ཡོ ཙ དྷནདྷཉྙཱདིཀོ ཙེཝ སཏྟཝིདྷཨརིཡདྷནསངྑཱཏོ ཙཱཏི དུཝིདྷོ བྷོགོ, ཏེན ཙ སམནྣཱགཏོཏི ཨཏྠོ. ཡཾ ཡཾ པདེསནྟི པུརཏྠིམཱདཱིསུ དིསཱསུ ཨེཝརཱུཔོ ཀུལཔུཏྟོ ཡཾ ཡཾ པདེསཾ བྷཛཏི, ཏཏྠ ཏཏྠ ཨེཝརཱུཔེན ལཱབྷསཀྐཱརེན པཱུཛིཏོཝ ཧོཏཱིཏི ཨཏྠོ.

ཧཏྠཀཨཱལ༹ཝཀཝཏྠུ

༢༥༡. ཙཏུཏྠེ ¶ ཙཏུབྦིདྷེན སངྒཧཝཏྠུནཱཏི དཱནཔིཡཝཙནཨཏྠཙརིཡཱསམཱནཏྟཏཱསངྑཱཏེན ཙཏུབྦིདྷེན སངྒཧཝཏྠུནཱ. ‘‘སྭེ བྷཏྟཙཱཊིཡཱ སདྡྷིཾ ཨཱལ༹ཝཀསྶ པེསེཏབྦོ ཨཧོསཱི’’ཏི ཝུཏྟམཏྠཾ པཱཀཊཾ ཀཏྭཱ དསྶེཏུཾ – ‘‘ཏཏྲཱཡཾ ཨནུཔུབྦིཀཐཱ’’ཏིཨཱདིམཱཧ. མིགཝཏྠཱཡ ཨརཉྙཾ གནྟྭཱཏི ཨཱལ༹ཝཀོ རཱཛཱ ཝིཝིདྷནཱཊཀཱུཔབྷོགཾ ཚཌྜེཏྭཱ ཙོརཔྤཊིབཱཧནཏྠཉྩ པཊིརཱཛནིསེདྷནཏྠཉྩ བྱཱཡཱམཀརཎཏྠཉྩ སཏྟམེ སཏྟམེ དིཝསེ མིགཝཾ གཙྪནྟོ ཨེཀདིཝསཾ བལཀཱཡེན སདྡྷིཾ ‘‘ཡསྶ པསྶེན ¶ མིགོ པལཱཡཏི, ཏསྶེཝ སོ བྷཱརོ’’ཏི ཀཏཀཏིཀཝཏྟོ མིགཝཏྠཱཡ ཨརཉྙཾ གནྟྭཱ. ཨེཀཾ མིགནྟི ཨཏྟནོ ཋིཏཊྛཱནེན པལཱཏཾ ཨེཎིམིགཾ. ཨནུབནྡྷིཏྭཱཏི ཏིཡོཛནམགྒཾ ཨེཀཀོཝ ཨནུབནྡྷིཏྭཱ. ཛཝསམྤནྣོ ཧི རཱཛཱ དྷནུཾ གཧེཏྭཱ པཏྟིཀོཝ ཏིཡོཛནཾ ཏཾ མིགམནུབནྡྷི. གྷཱཏེཏྭཱཏི ཡསྨཱ ཨེཎིམིགཱ ཏིཡོཛནཝེགཱ ཨེཝ ཧོནྟི, ཏསྨཱ པརིཀྑིཎཛཝཾ ཏཾ མིགཾ ཨུདཀཾ པཝིསིཏྭཱ ཋིཏཾ གྷཱཏེཏྭཱ. དྭིདྷཱ ཚེཏྭཱ དྷནུཀོཊིཡཾ ལགེཏྭཱ ནིཝཏྟེཏྭཱ ཨཱགཙྪནྟོཏི ཨནཏྠིཀོཔི མཾསེན ‘‘ནཱསཀྑི མིགཾ གཧེཏུ’’ནྟི ཨཔཝཱདམོཙནཏྠཾ དྭིདྷཱ ཚིནྣཾ དྷནུཀོཊིཡཾ ལགེཏྭཱ ཨཱགཙྪནྟོ. སནྡཙྪཱཡནྟི གྷནཙྪཱཡཾ བཧལཔཏྟཔལཱསཾ.

རུཀྑེ ཨདྷིཝཏྠཱ དེཝཏཱཏི ཨཱལ༹ཝཀཾ ཡཀྑཾ སནྡྷཱཡ ཝདཏི. སོ ཧི མཧཱརཱཛཱུནཾ སནྟིཀཱ ཝརཾ ལབྷིཏྭཱ མཛ྄ཛྷནྷིཀསམཡེ ཏསྶ རུཀྑསྶ ཚཱཡཱཡ ཕུཊྛོཀཱསཾ པཝིཊྛེ པཱཎིནོ ཁཱདནྟོ ཏཏྠ པཊིཝསཏི. ཨཱལ༹ཝཀསྶ ནིསཱིདནཔལླངྐེ ནིསཱིདཱིཏི ཡཏྠ ཨབྷིལཀྑིཏེསུ མངྒལདིཝསཱདཱིསུ ཨཱལ༹ཝཀོ ནིསཱིདིཏྭཱ སིརིཾ ཨནུབྷོཏི, ཏསྨིཾཡེཝ དིབྦརཏནཔལླངྐེ ནིསཱིདི. ཨཏྟནོ གམནེ ཨསམྤཛྫམཱནེ ‘‘ཀིཾ ནུ ཁོ ཀཱརཎ’’ནྟི ཨཱཝཛྫེནྟཱཏི ཏདཱ ཀིར སཱཏཱགིརཧེམཝཏཱ བྷགཝནྟཾ ཛེཏཝནེཡེཝ ཝནྡིཏྭཱ ‘‘ཡཀྑསམཱགམཾ གམིསྶཱམཱ’’ཏི སཔརིཝཱརཱ ནཱནཱཡཱནེཧི ཨཱཀཱསེན གཙྪནྟི, ཨཱཀཱསེ ཙ ཡཀྑཱནཾ ན སབྦཏྠ མགྒོ ཨཏྠི, ཨཱཀཱསཊྛཱནི ཝིམཱནཱནི པརིཧརིཏྭཱ མགྒཊྛཱནེནེཝ མགྒོ ཧོཏི, ཨཱལ༹ཝཀསྶ པན ཝིམཱནཾ བྷཱུམཊྛཾ སུགུཏྟཾ པཱཀཱརཔརིཀྑིཏྟཾ སུསཾཝིཧིཏདྭཱརཊྚཱལཀགོཔུརཾ ཨུཔརི ཀཾསཛཱལསཉྪནྣམཉྫཱུསཱསདིསཾ ཏིཡོཛནཾ ཨུབྦེདྷེན, ཏསྶ ཨུཔརི མགྒོ ཧོཏི, ཏེ ཏཾ པདེསམཱགམྨ གནྟུམསམཏྠཱ ¶ ཨཧེསུཾ. བུདྡྷཱནཉྷི ནིསིནྣོཀཱསསྶ ཨུཔརིབྷཱགེན ཡཱཝ བྷཝགྒཱ ཀོཙི གནྟུམསམཏྠོ, ཏསྨཱ ཨཏྟནོ གམནེ ཨསམྤཛྫམཱནེ ‘‘ཀིཾ ནུ ཁོ ཀཱརཎ’’ནྟི ཨཱཝཛྫེསུཾ. ཏེསཾ ཀཐཾ སུཏྭཱ ཙིནྟེསཱིཏི ཡསྨཱ ཨསྶདྡྷསྶ སདྡྷཱཀཐཱ དུཀྐཐཱ ཧོཏི དུསྶཱིལཱདཱིནཾ སཱིལཀཐཱདཡོ ཝིཡ, ཏསྨཱ ཏེསཾ ཡཀྑཱནཾ སནྟིཀཱ བྷགཝཏོ པསཾསཾ སུཏྭཱ ཨེཝ ཨགྒིམྷི པཀྑིཏྟལོཎསཀྑརཱ ཝིཡ ཨབྦྷནྟརེ ཨུཔྤནྣཀོཔེན པཊཔཊཱཡམཱནཧདཡོ ཧུཏྭཱ ཙིནྟེསི. པབྦཏཀཱུཊནྟི ཀེལཱསཔབྦཏཀཱུཊཾ.

ཨིཏོ པཊྛཱཡ ཨཱལ༹ཝཀཡུདྡྷཾ ཝིཏྠཱརེཏབྦནྟི སོ ཀིར མནོསིལཱཏལེ ཝཱམཔཱདེན ཋཏྭཱ ‘‘པསྶཐ དཱནི ཏུམྷཱཀཾ ཝཱ སཏྠཱ མཧཱནུབྷཱཝོ, ཨཧཾ ཝཱ’’ཏི དཀྑིཎཔཱདེན སཊྛིཡོཛནམཏྟཾ ཀེལཱསཀཱུཊཔབྦཏཾ ཨཀྐམི, ཏཾ ཨཡོཀཱུཊཔྤཧཏོ ཝིཡ ནིདྡྷནྟཨཡཔིཎྜོ པཔཊིཀཱཡོ མུཉྩི. སོ ཏཏྲ ཋཏྭཱ ‘‘ཨཧཾ ཨཱལ༹ཝཀོ’’ཏི ཨུགྒྷོསེསི, སཀལཛམྦུདཱིཔཾ སདྡོ ཕརི. ཏིཡོཛནསཧསྶཝིཏྠཏཧིམཝཱཔི སམྤཀམྤི ཡཀྑསྶཱནུབྷཱཝེན. སོ ཝཱཏམཎྜལཾ སམུཊྛཱཔེསི ‘‘ཨེཏེནེཝ སམཎཾ ¶ པལཱཔེསྶཱམཱི’’ཏི. ཏེ པུརཏྠིམཱདིབྷེདཱ ཝཱཏཱ སམུཊྛཧིཏྭཱ ཨཌྜྷཡོཛནཡོཛནདྭིཡོཛནཏིཡོཛནཔྤམཱཎཱནི པབྦཏཀཱུཊཱནི པདཱལེཏྭཱ ཝནགཙྪརུཀྑཱདཱིནི ཨུམྨཱུལེཏྭཱ ཨཱལ༹ཝིནགརཾ པཀྑནྡཱ ཛིཎྞཧཏྠིསཱལཱདཱིནི ཙུཎྞེནྟཱ ཚདནིཊྛཀཱ ཨཱཀཱསེ བྷམེནྟཱ. བྷགཝཱ ‘‘མཱ ཀསྶཙི ཨུཔརོདྷོ ཧོཏཱུ’’ཏི ཨདྷིཊྛཱསི. ཏེ ཝཱཏཱ དསབལཾ པཏྭཱ ཙཱིཝརཀཎྞམཏྟམྤི ཙཱལེཏུཾ ནཱསཀྑིཾསུ. ཏཏོ མཧཱཝསྶཾ སམུཊྛཱཔེསི ‘‘ཨུདཀེན ཨཛ྄ཛྷོཏྠརིཏྭཱ སམཎཾ མཱརེསྶཱམཱི’’ཏི. ཏསྶཱནུབྷཱཝེན ཨུཔརཱུཔརི སཏཔཊལསཧསྶཔཊལཱདིབྷེདཱ ཝལཱཧཀཱ ཨུཊྛཧིཏྭཱ པཝསྶིཾསུ. ཝུཊྛིདྷཱརཱཝེགེན པཐཝཱི ཚིདྡཱ ཨཧོསི. ཝནརུཀྑཱདཱིནཾ ཨུཔརི མཧོགྷོ ཨཱགནྟྭཱ དསབལསྶ ཙཱིཝརེ ཨུསྶཱཝབིནྡུམཏྟམྤི ཏེམེཏུཾ ནཱསཀྑི. ཏཏོ པཱསཱཎཝསྶཾ སམུཊྛཱཔེསི. མཧནྟཱནི མཧནྟཱནི པབྦཏཀཱུཊཱནི དྷཱུམཱཡནྟཱནི པཛྫལནྟཱནི ཨཱཀཱསེནཱགནྟྭཱ དསབལཾ པཏྭཱ དིབྦམཱལཱགུལཱ༹ནི སམྤཛྫིཾསུ. ཏཏོ པཧརཎཝསྶཾ སམུཊྛཱཔེསི. ཨེཀཏོདྷཱརཱ ཨུབྷཏོདྷཱརཱ ཨསིསཏྟིཁུརཔྤཱདཡོ དྷཱུམཱཡནྟཱ པཛྫལནྟཱ ཨཱཀཱསེནཱགནྟྭཱ དསབལསྶ པཱདམཱུལེ དིབྦཔུཔྥཱནི ཨཧེསུཾ.

ཏཏོ ¶ ཨངྒཱརཝསྶཾ སམུཊྛཱཔེསི. ཀིཾསུཀཝཎྞཱ ཨངྒཱརཱ ཨཱཀཱསེནཱགནྟྭཱ དསབལསྶ པཱདམཱུལེ དིབྦཔུཔྥཱནི ཧུཏྭཱ ཝིཀིརིཾསུ. ཏཏོ ཀུཀྐུལ༹ཝསྶཾ སམུཊྛཱཔེསི. ཨཙྩུཎྷོ ཀུཀྐུལོ༹ ཨཱཀཱསེནཱགནྟྭཱ དསབལསྶ པཱདམཱུལེ ཙནྡནཙུཎྞཾ ཧུཏྭཱ ནིཔཏི. ཏཏོ ཝཱལིཀཝསྶཾ སམུཊྛཱཔེསི. ཨཏིསུཁུམཱ ཝཱལིཀཱ དྷཱུམཱཡནྟཱ པཛྫལནྟཱ ཨཱཀཱསེནཱགནྟྭཱ དསབལསྶ པཱདམཱུལེ དིབྦཔུཔྥཱནི ཧུཏྭཱ ནིཔཏིཾསུ. ཏཏོ ཀལལཝསྶཾ སམུཊྛཱཔེསི. ཏཾ དྷཱུམཱཡནྟཾ པཛྫལནྟཾ ཨཱཀཱསེནཱགནྟྭཱ དསབལསྶ པཱདམཱུལེ དིབྦགནྡྷཾ ཧུཏྭཱ ནིཔཏི. ཏཏོ ཨནྡྷཀཱརཾ སམུཊྛཱཔེསི ‘‘བྷིཾསེཏྭཱ སམཎཾ པལཱཔེསྶཱམཱི’’ཏི. ཙཏུརངྒསམནྣཱགཏཾ ཨནྡྷཀཱརསདིསཾ ཧུཏྭཱ དསབལཾ པཏྭཱ སཱུརིཡཔྤབྷཱཝིཧཏམིཝནྡྷཀཱརཾ ཨནྟརདྷཱཡི. ཨེཝཾ ཡཀྑོ ཨིམཱཧི ནཝཧི ཝཱཏཝསྶཔཱསཱཎཔཧརཎངྒཱརཀུཀྐུལ༹ཝཱལིཀཀལལནྡྷཀཱརཝུཊྛཱིཧི བྷགཝནྟཾ པལཱཔེཏུམསཀྐོནྟོ ནཱནཱཝིདྷཔྤཧརཎཧཏྠཨནེཀཔྤཀཱརརཱུཔབྷཱུཏགཎསམཱཀུལཱཡ ཙཏུརངྒིནིཡཱ སེནཱཡ སཡམེཝ བྷགཝནྟཾ ཨབྷིགཏོ. ཏེ བྷཱུཏགཎཱ ཨནེཀཔྤཀཱརཝིཀཱརེ ཀཏྭཱ ‘‘གཎྷཐ ཧནཐཱ’’ཏི བྷགཝཏོ ཨུཔརི ཨཱགཙྪནྟཱ ཝིཡ ཙ ཧོནྟི. ཨཔིཙ ཁོ ནིདྡྷནྟལོཧཔིཎྜཾ ཝིཡ མཀྑིཀཱ བྷགཝནྟཾ ཨལླཱིཡིཏུམསམཏྠཱ ཨེཝ ཨཧེསུཾ.

ཨེཝཾ སབྦརཏྟིཾ ཨནེཀཔྤཀཱརཝིབྷིཾསཱཀཱརདསྶནེནཔི བྷགཝནྟཾ ཙཱལེཏུམསཀྐོནྟོ ཨཱལ༹ཝཀོ ཙིནྟེསི – ‘‘ཡཾནཱུནཱཧཾ ཀེནཙི ཨཛེཡྻཾ དུསྶཱཝུདྷཾ མུཉྩེཡྻ’’ནྟི. སཙེ ཧི སོ དུཊྛོ ཨཱཀཱསེ ཏཾ དུསྶཱཝུདྷཾ མུཉྩེཡྻ, དྭཱདས ཝསྶཱནི དེཝོ ན ཝསྶེཡྻ. སཙེ པཐཝིཡཾ མུཉྩེཡྻ ¶ , སབྦརུཀྑཏིཎཱདཱིནི སུསྶིཏྭཱ དྭཱདསཝསྶནྟརཾ ན པུན རུཧེཡྻུཾ. སཙེ སམུདྡེ མུཉྩེཡྻ, ཏཏྟཀཔཱལེ ཨུདཀབིནྡུ ཝིཡ སབྦཾ སུསྶེཡྻ. སཙེ སིནེརུཔབྦཏེ མུཉྩེཡྻ, ཁཎྜཱཁཎྜཾ ཧུཏྭཱ ཝིཀིརེཡྻ. སོ ཨེཝཾམཧཱནུབྷཱཝཾ དུསྶཱཝུདྷཾ ཨུཏྟརིསཱཊཀཾ མུཉྩིཏྭཱ ཨགྒཧེསི. ཡེབྷུཡྻེན དསསཧསྶིལོཀདྷཱཏུདེཝཏཱ ཝེགེན སནྣིཔཏིཾསུ ‘‘ཨཛྫ བྷགཝཱ ཨཱལ༹ཝཀཾ དམེསྶཏི, ཏཏྠ དྷམྨཾ སོསྶཱམཱ’’ཏི. ཡུདྡྷདསྶནཀཱམཱཔི དེཝཏཱ སནྣིཔཏིཾསུ. ཨེཝཾ སཀལམྤི ཨཱཀཱསཾ དེཝཏཱཧི པརིཔུཎྞཾ ཨཧོསི. ཨཐཱལ༹ཝཀོ བྷགཝཏོ སམཱིཔེ ཨུཔརཱུཔརི ཝིཙརིཏྭཱ ཝཏྠཱཝུདྷཾ མུཉྩི ¶ . ཏཾ ཨསནིཙཀྐཾ ཝིཡ ཨཱཀཱསེ བྷེརཝསདྡཾ ཀརོནྟཾ དྷཱུམཱཡནྟཾ པཛྫལནྟཾ བྷགཝནྟཾ པཏྭཱ ཡཀྑསྶ མཱནམདྡནཏྠཾ པཱདཔུཉྪནཙོལ༹ཾ ཧུཏྭཱ པཱདམཱུལེ ནིཔཏི. ཨཱལ༹ཝཀོ ཏཾ དིསྭཱ ཚིནྣཝིསཱཎོ ཝིཡ ཨུསབྷོ, ཨུདྡྷཊདཱཋོ ཝིཡ སཔྤོ ནིཏྟེཛོ ནིམྨདོ ནིཔཱཏིཏམཱནདྡྷཛོ ཨཧོསི. ཨེཝམིདཾ ཨཱལ༹ཝཀཡུདྡྷཾ ཝིཏྠཱརེཏབྦཾ.

ཨཊྛ པཉྷེ པུཙྪཱིཏི –

‘‘ཀིཾ སཱུདྷ ཝིཏྟཾ པུརིསསྶ སེཊྛཾ,

ཀིཾ སུ སུཙིཎྞཾ སུཁམཱཝཧཱཏི;

ཀིཾ སུ ཧཝེ སཱདུཏརཾ རསཱནཾ,

ཀཐཾ ཛཱིཝིཾ ཛཱིཝིཏམཱཧུ སེཊྛ’’ནྟི. (སཾ. ནི. ༡.༢༤༦; སུ. ནི. ༡༨༣) –

ཨཱདིནཱ ཨཊྛ པཉྷེ པུཙྪི. སཏྠཱ ཝིསྶཛྫེསཱིཏི –

‘‘སདྡྷཱིདྷ ཝིཏྟཾ པུརིསསྶ སེཊྛཾ,

དྷམྨོ སུཙིཎྞོ སུཁམཱཝཧཱཏི;

སཙྩཾ ཧཝེ སཱདུཏརཾ རསཱནཾ,

པཉྙཱཛཱིཝིཾ ཛཱིཝིཏམཱཧུ སེཊྛ’’ནྟི. (སཾ. ནི. ༡.༢༤༦; སུ. ནི. ༡༨༤) –

ཨཱདིནཱ ཝིསྶཛྫེསི. ཝིཀྐནྡམཱནཱཡཱཏི ཨཙྩནྟཾ པརིདེཝམཱནཱཡ.

མཧཱནཱམསཀྐཝཏྠུ

༢༥༢. པཉྩམེ ¶ སཏྠཱ ཏཏོ པརཾ པཊིཉྙཾ ནཱདཱསཱིཏི སཾཝཙྪརཏོ པརཾ སིཀྑཱཔདཔཉྙཏྟིཡཱ པཙྩཡཔྤཝཱརཎཱསཱདིཡནསྶ ཝཱརིཏཏྟཱ ‘‘པཊིཉྙཾ ནཱདཱསཱི’’ཏི ཝུཏྟཾ. ཏཐཱ ཧི བྷགཝཱ ཏཏིཡཝཱརེཔི མཧཱནཱམེན སཀྐེན ‘‘ཨིཙྪཱམཧཾ, བྷནྟེ, སངྒྷཾ ཡཱཝཛཱིཝཾ བྷེསཛྫེན པཝཱརེཏུ’’ནྟི (པཱཙི. ༣༠༤-༣༠༥) ཝུཏྟེ ‘‘སཱདྷུ སཱདྷུ, མཧཱནཱམ, ཏེན ཧི ཏྭཾ, མཧཱནཱམ, སངྒྷཾ ཡཱཝཛཱིཝཾ བྷེསཛྫེན པཝཱརེཧཱི’’ཏི པཊིཉྙཾ ཨདཱསིཡེཝ. ཨེཝཾ པཊིཉྙཾ དཏྭཱ པཙྪཱ ཚབྦགྒིཡེཧི བྷིཀྑཱུཧི མཧཱནཱམསྶ སཀྐསྶ ཝིཧེཋིཏབྷཱཝཾ སུཏྭཱ ཚབྦགྒིཡེ བྷིཀྑཱུ ཝིགརཧིཏྭཱ སིཀྑཱཔདཾ པཉྙཔེསི ‘‘ཨགིལཱནེན བྷིཀྑུནཱ ཙཱཏུམཱསཔྤཙྩཡཔཝཱརཎཱ སཱདིཏབྦཱ ཨཉྙཏྲ པུནཔྤཝཱརཎཱཡ ཨཉྙཏྲ ནིཙྩཔྤཝཱརཎཱཡ. ཏཏོ ཙེ ཨུཏྟརི སཱདིཡེཡྻ, པཱཙིཏྟིཡ’’ནྟི. ཏསྨཱ པཋམཾ ཨནུཛཱནིཏྭཱཔི པཙྪཱ སིཀྑཱཔདབནྡྷནེན ཝཱརིཏཏྟཱ ‘‘པཊིཉྙཾ ནཱདཱསཱི’’ཏི ཝུཏྟཾ.

ཨུགྒགཧཔཏྱཱདིཝཏྠུ

༢༥༣-༢༥༦. ཚཊྛསཏྟམཨཊྛམནཝམཱནི ¶ སུཝིཉྙེཡྻཱནེཝ.

ནཀུལཔིཏུགཧཔཏིཝཏྠུ

༢༥༧. དསམེ སུསུམཱརགིརིནགརེཏི ཨེཝཾནཱམཀེ ནགརེ. ཏསྶ ཀིར ནགརསྶ ཝཏྠུཔརིགྒཧདིཝསེ ཨཝིདཱུརེ ཨུདཀརཧདེ སུསུམཱརོ སདྡམཀཱསི, གིརཾ ནིཙྪཱརེསི. ཨཐ ནགརེ ཨནནྟརཱཡེན མཱཔིཏེ ཏམེཝ སུསུམཱརགིརཀརཎཾ སུབྷནིམིཏྟཾ ཀཏྭཱ ‘‘སུསུམཱརགིརཱི’’ཏྭེཝསྶ ནཱམཾ ཨཀཾསུ. ཀེཙི པན ‘‘སུསུམཱརསཎྛཱནཏྟཱ སུསུམཱརོ ནཱམ ཨེཀོ གིརི, སོ ཏསྶ ནགརསྶ སམཱིཔེ, ཏསྨཱ ཏཾ སུསུམཱརགིརི ཨེཏསྶ ཨཏྠཱིཏི སུསུམཱརགིརཱིཏི ཝུཙྩཏཱི’’ཏི ཝདནྟི. བྷེསཀལཱ༹ཝནེཏི བྷེསཀལཱ༹ནཱམཀེ ཝནེ. ‘‘བྷེསཀལཱཝནེ’’ཏིཔི པཱཋོ. ཀཐཾ པན བྷགཝཏི ནེསཾ པུཏྟསཉྙཱ པཏིཊྛཱསཱིཏི ཨཱཧ – ‘‘ཨཡཾ ཀིརཱ’’ཏིཨཱདི. དཧརསྶེཝ དཧརཱ ཨཱནཱིཏཱཏི མེ དཧརསྶེཝ སཏོ དཧརཱ ཨཱནཱིཏཱཏི ཨཏྠོ. ཨཏིཙརིཏཱཏི ཨཏིཀྐམིཏྭཱ ཙརནྟོ.

(ཚཊྛཨེཏདགྒཝགྒཝཎྞནཱ ནིཊྛིཏཱ.)

ཨུཔཱསཀཔཱལི༹སཾཝཎྞནཱ ནིཊྛིཏཱ.

༡༤. ཨེཏདགྒཝགྒོ

(༡༤) ༧. སཏྟམཨེཏདགྒཝགྒཝཎྞནཱ

སུཛཱཏཱཝཏྠུ

༢༥༨. ཨུཔཱསིཀཱཔཱལི༹སཾཝཎྞནཱཡ ¶ པཋམཾ སུཝིཉྙེཡྻམེཝ.

ཝིསཱཁཱཝཏྠུ

༢༥༩. དུཏིཡེ མཧཱལཏཱཔསཱདྷནསྶཱཏི མཧཱལཏཱཔིལ༹ནྡྷནསྶ. ཏསྨིཉྩ པིལ༹ནྡྷནེ ཙཏསྶོ ཝཛིརནཱལི༹ཡོ ཨུཔཡོགཾ ཨགམཾསུ. མུཏྟཱནཾ ཨེཀཱདས ནཱལི༹ཡོ, པཝཱལ༹སྶ དྭཱཝཱིསཏི ནཱལི༹ཡོ, པདུམརཱགམཎཱིནཾ ཏེཏྟིཾས ནཱལི༹ཡོ. ཨིཏི ཨེཏེཧི ཙ ཨཉྙེཧི ཙ ཨིནྡནཱིལཱདཱིཧི ནཱིལཔཱིཏལོཧིཏོདཱཏམཉྫིཊྛསཱམཀབརཝཎྞཝསེན སཏྟཝཎྞེཧི ཝརརཏནེཧི ནིཊྛཱནཾ ཨགམཱསི, ཏཾ སཱིསེ པཊིམུཀྐཾ ཡཱཝ པཱདཔིཊྛིཡཱ བྷསྶཏི, པཉྩནྣཾ ¶ ཧཏྠཱིནཾ བལཾ དྷཱརཡམཱནཱཝ ནཾ ཨིཏྠཱི དྷཱརེཏུཾ སཀྐོཏི. ཨནྟོཨགྒི བཧི ན ནཱིཧརིཏབྦོཏིཨཱདཱིནཾ ཨཏྠོ ཨུཔརི ཨཱཝི བྷཝིསྶཏི. སེསམེཏྠ སུཝིཉྙེཡྻམེཝ.

ཁུཛྫུཏྟརཱ-སཱམཱཝཏཱིཝཏྠུ

༢༦༠-༢༦༡. ཏཏིཡཙཏུཏྠེསུ པཱཡཱསསྶཱཏི བཧལཏརསྶ པཱཡཱསསྶ. ཏཾ པཱཡཱསཾ བྷུཉྫནྟེསཱུཏི ཏཾ བཧལཏརཾ གརུསིནིདྡྷཾ པཱཡཱསཾ བྷུཉྫནྟེསུ. ཛཱིརཱཔེཏུཾ ཨསཀྐོནྟོཏི ཨནྟརཱམགྒེ ཨཔྤཱཧཱརཏཱཡ མནྡགཧཎིཀཏྟཱ ཛཱིརཱཔེཏུཾ ཨསཀྐོནྟོ. ཝཱལ༹མིགཊྛཱནེཏི ཝཱལ༹མིགེཧི ཨདྷིཊྛིཏཊྛཱནེ. ཨནུཝིཛྫནྟོཏི ཝིཙཱརེནྟོ. སཱལཱཏི ནལ༹ཀཱརསཱལཱ. མུདྷཱ ན ཀརིསྶཏཱིཏི མཱུལྱཾ ཝིནཱ ན ཀརིསྶཏི. ཨཱལིམྤེསཱིཏི ཨགྒིཾ ཨདཱསི, ཨགྒིཾ ཛཱལེསཱིཏི ཨཏྠོ. པེཀྑཱཏི ཨཱགམེཧི. ཨུཔདྷིསམྤདཱཏི སརཱིརསམྤཏྟི. ཝཊརུཀྑཾ པཏྭཱཏི ནིགྲོདྷརུཀྑཾ པཏྭཱ. སུཝཎྞཀཊཀེཏི སུཝཎྞཝལཡེ. ཨབྦྷུཾ མེཏི མེ ཨཝཌྜྷཱིཏི ཨཏྠོ. ཨནྟོ ཨསོདྷེཏྭཱཏི པཎྞསཱལཱཡ ¶ ཨནྟོ ཀསྶཙི ཨཏྠིབྷཱཝཾ ཝཱ ནཏྠིབྷཱཝཾ ཝཱ ཨནུཔདྷཱརེཏྭཱ. སེསཾ སུཝིཉྙེཡྻམེཝ.

ཨུཏྟརཱནནྡམཱཏཱཝཏྠུ

༢༦༢. པཉྩམེ ཨུཔནིསྶཡཾ དིསྭཱཏི ཨིམིནཱ ཡཐཱ ཝིསེསཱདྷིགམསྶ སཏིཔི པཙྩུཔྤནྣཔཙྩཡསམཝཱཡེ ཨཝསྶཾ ཨུཔནིསྶཡསམྤདཱ ཨིཙྪིཏབྦཱ, ཨེཝཾ དིཊྛདྷམྨཝེདནཱིཡབྷཱཝེན ཝིཔཙྩནཀསྶ ཀམྨསྶཔི པཙྩུཔྤནྣསམཝཱཡོ ཝིཡ ཨུཔནིསྶཡསམྤདཱཔི སཝིསེསཱ ཨིཙྪིཏབྦཱཏི དསྶེཏི. ཏཐཱ ཧི ཨུཀྐཾསགཏསཔྤུརིསཱུཔནིསྶཡཡོནིསོམནསིཀཱརེསུ ལབྦྷམཱནེསུཔི ཨུཔནིསྶཡརཧིཏསྶ ཝིསེསཱདྷིགམོ ན སམྤཛྫཏེཝཱཏི. ཀཔྤིཡཾ ཀཏྭཱཏི ཡཐཱ ཀཔྤིཡཾ ཧོཏི, ཏཐཱ ཀཏྭཱ. པཏྟེ པཏིཊྛཔེཡྻཱཏི ཨཱཧཱརཾ དཱནམུཁེ ཝིསྶཛྫེཡྻ. ཏཱིཧི ཙེཏནཱཧཱིཏི པུབྦབྷཱགམུཉྩཨནུམོདནཱཙེཏནཱཧི. ཝུཏྟཉྷེཏཾ –

‘‘པུབྦེཝ དཱནཱ སུམནོ, དདཾ ཙིཏྟཾ པསཱདཡེ;

དཏྭཱ ཨཏྟམནོ ཧོཏི, ཨེསཱ པུཉྙསྶ སམྤདཱ’’ཏི. (ཨ. ནི. ༦.༣༧; པེ. ཝ. ༣༠༥);

ཏཝ ¶ མནཾ སནྡྷཱརེཧཱིཏི ‘‘ཨཛྫ བྷཏྟཾ ཙིརཱཡིཏ’’ནྟི ཀོདྷཏོ ཏཝ ཙིཏྟཾ སནྡྷཱརེཧི, མཱ ཀུཛ྄ཛྷཱིཏི ཨཏྠོ. ཨོལོཀིཏོལོཀིཏཊྛཱནཾ…པེ… སམྤརིཀིཎྞཾ ཝིཡ ཨཧོསཱིཏི ཏེན ཀསིཏཊྛཱནཾ སབྦཾ སུཝཎྞབྷཱཝཱཔཏྟིཡཱ མཧཱཀོསཱཏཀིཔུཔྥེཧི སཉྪནྣཾ ཝིཡ ཨཧོསི. ཏཱདིསེཏི ཏཡཱ སདིསེ. ན ཀོཔེམཱིཏི ན ཝིནཱསེམི, ཛཱཏིཡཱ ན ཧཱིལེ༹མི. པཱུཛཾ ཀརོཏཱིཏི སམྨཱསམྦུདྡྷསྶ པཱུཛཾ ཀརོཏི. ཨནྟརཝཏྠུནྟི གེཧངྒཎཾ. བྷོཏི སམྦོདྷནེ ནིཔཱཏོ. ཛེཏི ཨཝཉྙཱལཔནཾ. སཡཾ ཨརིཡསཱཝིཀཱབྷཱཝཏོ སཏྠུཝསེན ‘‘སཔིཏིཀཱ དྷཱིཏཱ’’ཏི ཝཏྭཱ སཏྠུ སམྨུཁཱ དྷམྨསྶཝནེན ཏསྶཱ ཝིསེསཱདྷིགམཾ པཙྩཱསཱིསནྟཱི ‘‘དསབལེ ཁམནྟེཡེཝ ཁམིསྶཱམཱི’’ཏི ཨཱཧ. ཀདརིཡནྟི ཐདྡྷམཙྪརིཾ.

སུཔྤཝཱསཱཝཏྠུ

༢༦༣. ཚཊྛེ པཎཱིཏདཱཡིཀཱནནྟི པཎཱིཏརསཝཏྠཱུནཾ དཱཡིཀཱནཾ. ཨཱཡུནོ ཋིཏིཧེཏུཾ བྷོཛནཾ དེནྟཱི ཨཱཡུཾ དེཏི ནཱམ. ཨེས ནཡོ ཝཎྞཾ དེཏཱིཏིཨཱདཱིསུ. ཏེནཱཧ – ‘‘པཉྩ ཋཱནཱནཱི’’ཏི. ཀམྨསརིཀྑཀཉྩེཏཾ ¶ ཕལནྟི དསྶེནྟོ ‘‘ཨཱཡུཾ ཁོ པན དཏྭཱ’’ཏིཨཱདིམཱཧ. ཏཏྠ དཏྭཱཏི དཱནཧེཏུ. བྷཱགིནཱིཏི བྷཱགཝཏཱི ལདྡྷུཾ བྷབྦཱ.

སུཔྤིཡཱཝཏྠུ

༢༦༤. སཏྟམེ ཨཱུརུམཾསཾ ཚིནྡིཏྭཱ དཱསིཡཱ ཨདཱསཱིཏི ཨཱགཏཕལཱ ཝིཉྙཱཏསཱསནཱ ཨརིཡསཱཝིཀཱ ཨཏྟནོ སརཱིརདུཀྑཾ ཨཙིནྟེཏྭཱ ཏསྶ བྷིཀྑུནོ རོགཝཱུཔསམམེཝ པཙྩཱསཱིསནྟཱི ཨཏྟནོ ཨཱུརུམཾསཾ ཚིནྡིཏྭཱ དཱསིཡཱ ཨདཱསི. སཏྠཱཔི ཏསྶཱ ཏཐཱཔཝཏྟཾ ཨཛ྄ཛྷཱསཡསམྤཏྟིཾ དིསྭཱ ‘‘མམ སམྨུཁཱིབྷཱཝཱུཔགམནེནེཝསྶཱ ཝཎོ རུཧིཏྭཱ སཉྪཝི ཛཱཡཏི, ཕཱསུབྷཱཝོ ཧོཏཱི’’ཏི ཙ དིསྭཱ ‘‘པཀྐོསཐ ན’’ནྟི ཨཱཧ. སཱ ཙིནྟེསཱིཏི ‘‘སབྦལོཀསྶ ཧིཏཱནུཀམྤཀོ སཏྠཱ ན མཾ དུཀྑཱཔེཏུཾ པཀྐོསཏི, ཨཏྠེཏྠ ཀཱརཎ’’ནྟི ཙིནྟེསི. ཨཏྟནཱ ཀཏཀཱརཎཾ སབྦཾ ཀཐེསཱིཏི བུདྡྷཱནུབྷཱཝཝིབྷཱཝནཏྠཾ ཀཐེསི, ན ཨཏྟནོ དལ༹ྷཛ྄ཛྷཱསཡཏཱཡ ཝིབྷཱཝནཏྠཾ. གིལཱནུཔཊྛཱཀཱིནཾ ཨགྒཊྛཱནེ ཋཔེསཱིཏི ཨགཎིཏཏྟདུཀྑཱ གིལཱནཱནཾ བྷིཀྑཱུནཾ གེལཉྙཝཱུཔསམནེ ཡུཏྟཔྤཡུཏྟཱཏི གིལཱནུཔཊྛཱཀཱིནཾ ཨགྒཊྛཱནེ ཋཔེསཱིཏི.

ཀཱཏིཡཱནཱིཝཏྠུ

༢༦༥. ཨཊྛམེ ¶ ཨཝེཙྩཔྤསནྣཱནནྟི རཏནཏྟཡགུཎེ ཡཱཐཱཝཏོ ཉཏྭཱ པསནྣཱནཾ, སོ པནསྶ པསཱདོ མགྒེནཱགཏཏྟཱ ཀེནཙི ཨཀམྤནཱིཡོ. ཨདྷིགཏེནཱཏི མགྒཱདྷིགམེནེཝ ཨདྷིགཏེན. ‘‘ཨཝིགཏེནཱ’’ཏི ཝཱ པཱཋོ, ཏསྶཏྠོ ‘‘ཀདཱཙི ཨཝིགཙྪནྟེནཱ’’ཏི. སོ ཨཔྤདྷཾསིཡོ ཙ ཧོཏི, ཏསྨཱ ཝུཏྟཾ – ‘‘ཨདྷིགཏེན ཨཙལཔྤསཱདེནཱ’’ཏི. ཏཏྠ ཀཱཡསཀྑིཾ ཀཏྭཱཏི པམུཁཾ ཀཏྭཱ, ཝཙནཏྠཏོ པན ནཱམཀཱཡེན དེསནཱཡ སམྤཊིཙྪནཝསེན སཀྑིབྷཱུཏཾ ཀཏྭཱཏི ཨཏྠོ. ཨུམྨགྒཾ ཁནིཏྭཱཏི གྷརསནྡྷིཙྪེདནེན ཨནྟོཔཝིསནམགྒཾ ཁནིཏྭཱ. དུལླབྷསྶཝནནྟི དུལླབྷསདྡྷམྨསྶཝནཾ. མཧཱཔཐཝཱི པཝིསིཏབྦཱ བྷཝེཡྻཱཏི ཨཝཱིཙིཔྤཝེསནཾ ཝདཏི.

ནཀུལམཱཏཱཝཏྠུ

༢༦༦. ནཝམེ ཝིསྶཱསཀཐནེནེཝ ནཀུལམཱཏཱ ནཀུལཔིཏཱ ཙ སཏྠུཝིསྶཱསིཀཱ ནཱམ ཛཱཏཱཏི ཝུཏྟཾ – ‘‘ཝིསྶཱསིཀཱནནྟི ཝིསྶཱསཀཐཾ ཀཐེནྟཱིནཾ ཨུཔཱསིཀཱན’’ནྟི. གཧཔཏཱནཱིཏི གེཧསཱམིནཱི. ཝུཏྟམེཝཱཏི ཨུཔཱསཀཔཱལི༹ཡཾ ནཀུལཔིཏུཀཐཱཡཾ ཝུཏྟནཡམེཝ.

ཀཱལཱི༹ཀུརརགྷརིཀཱཝཏྠུ

༢༦༧. དསམེ ¶ ཨནུསྶཝེནེཝཱཏི པཙྩཀྑཏོ རཱུཔདསྶནེན སཏྠུ སམྨུཁཱ དྷམྨསྶཝནེན ཙ ཝིནཱ ཀེཝལཾ ཨནུསྶཝནེནེཝ པརསྶ ཝཙནཾ ཨནུགཏསྶཝནེནེཝ ཨུཔྤནྣེན པསཱདེན. ཨནུསྶཝིཀཔྤསཱདནྟི ཨནུསྶཝཏོ ཨཱགཏཔྤསཱདཾ.

(སཏྟམཨེཏདགྒཝགྒཝཎྞནཱ ནིཊྛིཏཱ.)

ཨུཔཱསིཀཱཔཱལི༹སཾཝཎྞནཱ སམཏྟཱ.

ནིཊྛིཏཱ ཙ མནོརཐཔཱུརཎིཡཱ

ཨངྒུཏྟརནིཀཱཡ-ཨཊྛཀཐཱཡ

ཨེཏདགྒཝགྒཝཎྞནཱཡ ཨནུཏྟཱནཏྠདཱིཔནཱ.

༡༥. ཨཊྛཱནཔཱལི༹ (པཋམཝགྒ)

(༡༥) ༡. ཨཊྛཱནཔཱལི༹-པཋམཝགྒཝཎྞནཱ

༢༦༨. ཨཊྛཱནཔཱལི༹ཝཎྞནཱཡཾ ¶ ¶ ཨཝིཛྫམཱནཾ ཋཱནཾ ཨཊྛཱནཾ, ནཏྠི ཋཱནནྟི ཝཱ ཨཊྛཱནཾ. ཨནཝཀཱསོཏི ཨེཏྠཱཔི ཨེསེཝ ནཡོ. ཏདཏྠནིགམནམེཝ ཧི ‘‘ནེཏཾ ཋཱནཾ ཝིཛྫཏཱི’’ཏི ཝཙནནྟི. ཏེནཱཧ – ‘‘ཨུབྷཡེནཔཱི’’ཏིཨཱདི. ཡནྟི ཀཱརཎཏྠེ པཙྩཏྟཝཙནཾ. ཧེཏུཨཏྠོ ཙེཏྠ ཀཱརཎཏྠོཏི ཨཱཧ – ‘‘ཡནྟི ཡེན ཀཱརཎེནཱ’’ཏི. ཨུཀྐཊྛནིདྡེསེནེཏྠ དིཊྛིསམྤཏྟི ཝེདིཏབྦཱཏི ཝུཏྟཾ – ‘‘མགྒདིཊྛིཡཱ སམྤནྣོ’’ཏི. ཀུཏོ པནཱཡམཏྠོ ལབྦྷཏཱིཏི? ལིངྒཏོ, ལིངྒཾ ཙེཏསྶ ནིཙྩཏོ ཨུཔགམནཔྤཊིཀྑེཔོ. ཙཏུབྷཱུམཀེསཱུཏི ཨིདཾ ཙཏུཏྠབྷཱུམཀསངྑཱརཱནཾ ཨརིཡསཱཝཀསྶ ཝིསཡབྷཱཝཱུཔགམནཏོ ཝུཏྟཾ, ན པན ཏེ ཨཱརབྦྷ ནིཙྩཏོ ཨུཔགམནསབྦྷཱཝཏོ. ཝཀྑཏི ཧི ‘‘ཏདབྷཱཝེ ཙཏུཏྠབྷཱུམཀསངྑཱརཱ པནཱ’’ཏིཨཱདིནཱ. ཨབྷིསངྑཏསངྑཱརཨབྷིསངྑརཎཀསངྑཱརཱནཾ སཔྤདེསཏྟཱ ནིཔྤདེསསངྑཱརགྒཧཎཏྠཾ ‘‘སངྑཏསངྑཱརེསཱུ’’ཏི ཝུཏྟཾ, ལོཀུཏྟརསངྑཱརཱནཾ པན ནིཝཏྟནེ ཀཱརཎཾ སཡམེཝ ཝཀྑཏི. ཨེཏཾ ཀཱརཎཾ ནཏྠཱིཏི ཏཐཱ ཨུཔགམནེ སེཏུགྷཱཏོ ནཏྠི. ཏེཛུསྶདཏྟཱཏི སཾཀིལེསཝིདྷམནཏེཛསྶ ཨདྷིཀབྷཱཝཏོ. ཏཐཱ ཧི ཏེ གམྦྷཱིརབྷཱཝེན དུདྡསཱ ཨཀུསལཱནཾ ཨཱརམྨཎཾ ན ཧོནྟཱིཏི. ཨིདཾ པན པཀརཎཝསེན ཝུཏྟཾ. ཨཔྤཧཱིནཝིཔལླཱསཱནཉྷི སནྟཱནེསུ ཀུསལདྷམྨཱནམྤི ཏེ ཨཱརམྨཎཾ ན ཧོནྟི.

༢༦༩. ཨསུཁེ སུཁནྟི ཝིཔལླཱསོ ཙ ཨིདྷ སུཁཏོ ཨུཔགམནསྶ ཋཱནནྟི དསྶེནྟོ ‘‘ཨེཀནྟ…པེ… ཨཏྟདིཊྛིཝསེནཱ’’ཏི པདྷཱནདིཊྛིམཱཧ. གཱུཐནྟི གཱུཐཊྛཱནཾ, དིཊྛིཡཱ ནིབྦཱནསྶ ཨཝིསཡབྷཱཝོ ཧེཊྛཱ ཝུཏྟོ ཨེཝཱཏི ཀསིཎཱདིཔཎྞཏྟིསངྒཧཏྠནྟི ཝུཏྟཾ.

༢༧༠. པརིཙྪེདོཏི པརིཙྪིནྡནཾ པརིཙྪིཛྫ ཏསྶ གཧཎཾ. སྭཱཡཾ ཡེསུ ནིཙྩཱདིཏོ ཨུཔགམནཾ སམྦྷཝཏི, ཏེསཾ ཝསེནཡེཝ ཀཱཏབྦོཏི དསྶེནྟོ ‘‘སབྦཝཱརེསུ ཝཱ’’ཏིཨཱདིམཱཧ. སབྦཝཱརེསཱུཏི ‘‘ནིཙྩཏོ ཨུཔགཙྪེཡྻཱ’’ཏིཨཱདིནཱ ཨཱགཏེསུ སབྦེསུ སུཏྟཔདེསུ. པུཐུཛྫནོ ཧཱིཏི ཧི-སདྡོ ཧེཏུཨཏྠོ. ཡསྨཱ ཡཾ ཡཾ སངྑཱརཾ པུཐུཛྫནོ ནིཙྩཱདིཝསེན གཎྷཱཏི, ཏཾ ཏཾ ཨརིཡསཱཝཀོ ཨནིཙྩཱདིཝསེན གཎྷནྟོ ཡཱཐཱཝཏོ ¶ ཛཱནནྟོ ཏཾ གཱཧཾ ཏཾ དིཊྛིཾ ཝིསྶཛྫེཏི, ཏསྨཱ ཡཏྠ ¶ གཱཧོ, ཏཏྠ ཝིསྶཛྫནཱཏི ཙཏུབྷཱུམཀསངྑཱརཱ ཨིདྷ སངྑཱརགྒཧཎེན ན གཡ྄ཧནྟཱིཏི ཨཏྠོ.

༢༧༡. པུཏྟསམྦནྡྷེན མཱཏུཔིཏུསམཉྙཱ དཏྟཀིཏྟིམཱདིཝསེནཔི པུཏྟཝོཧཱརོ ལོཀེ དིསྶཏི, སོ ཙ ཁོ པརིཡཱཡེནཱཏི ནིཔྤརིཡཱཡེན སིདྡྷཾ ཏཾ དསྶེཏུཾ – ‘‘ཛནིཀཱཝ མཱཏཱ, ཛནཀོཝ པིཏཱ’’ཏི ཝུཏྟཾ. ཏཐཱ ཨཱནནྟརིཡཀམྨསྶ ཨདྷིཔྤེཏཏྟཱ ‘‘མནུསྶབྷཱུཏོཝ ཁཱིཎཱསཝོ ཨརཧཱཏི ཨདྷིཔྤེཏོ’’ཏི ཝུཏྟཾ. ‘‘ཨཊྛཱནམེཏ’’ནྟིཨཱདིནཱ ‘‘མཱཏུཨཱདཱིནཾཡེཝ ཛཱིཝིཏཱ ཝོརོཔནེ ཨརིཡསཱཝཀསྶ ཨབྷབྦབྷཱཝདསྶནཏོ ཏདཉྙཾ ཨརིཡསཱཝཀོ ཛཱིཝིཏཱ ཝོརོཔེཏཱིཏི ཨིདཾ ཨཏྠཏོ ཨཱཔནྣམེཝཱ’’ཏི མཉྙམཱནོ ཝདཏི – ‘‘ཀིཾ པན ཨརིཡསཱཝཀོ ཨཉྙཾ ཛཱིཝིཏཱ ཝོརོཔེཡྻཱ’’ཏི? ‘‘ཨཊྛཱནམེཏཾ ཨནཝཀཱསོ, ཡཾ དིཊྛིསམྤནྣོ པུགྒལོ སཉྩིཙྩ པཱཎཾ ཛཱིཝིཏཱ ཝོརོཔེཡྻ, ནེཏཾ ཋཱནཾ ཝིཛྫཏཱི’’ཏི ཝཙནཏོ ‘‘ཨེཏམྤི ཨཊྛཱན’’ནྟི ཝུཏྟཾ. ཏེནེཝཱཧ – ‘‘སཙེ ཧཱི’’ཏིཨཱདི. ཨེཝཾ སནྟེ ཀསྨཱ ‘‘མཱཏར’’ནྟིཨཱདིནཱ ཝིསེསེཏྭཱ ཝུཏྟནྟི ཨཱཧ – ‘‘པུཐུཛྫནབྷཱཝསྶ པནཱ’’ཏིཨཱདི. ཏཏྠ བལདཱིཔནཏྠནྟི སདྡྷཱདིབལསམནྣཱགམདཱིཔནཏྠཾ. ཨརིཡམགྒེནཱགཏསདྡྷཱདྷིབལཝསེན ཧི ཨརིཡསཱཝཀོ ཏཱདིསཾ སཱཝཛྫཾ ན ཀརོཏི.

༢༧༥. པཉྩཧི ཀཱརཎེཧཱིཏི ཨིདམེཏྠ ནིཔྥཱདཀཱནི ཏེསཾ པུབྦབྷཱགིཡཱནི ཙ ཀཱརཎཱནི ཀཱརཎབྷཱཝསཱམཉྙེན ཨེཀཛ྄ཛྷཾ གཧེཏྭཱ ཝུཏྟཾ, ན པན སབྦེསཾ སམཱནཡོགཀྑམཏྟཱ. ཨཱཀཱརེཧཱིཏི ཀཱརཎེཧི. ཨནུསྶཱཝནེནཱཏི ཨནུརཱུཔཾ སཱཝནེན. བྷེདསྶ ཨནུརཱུཔཾ ཡཐཱ བྷེདོ ཧོཏི, ཨེཝཾ བྷིནྡིཏབྦཱནཾ བྷིཀྑཱུནཾ ཨཏྟནོ ཝཙནསྶ སཱཝནེན ཝིཉྙཱཔནེན. ཏེནཱཧ – ‘‘ནནུ ཏུམྷེ’’ཏིཨཱདི. ཀཎྞམཱུལེ ཝཙཱིབྷེདཾ ཀཏྭཱཏི ཨེཏེན པཱཀཊཾ ཀཏྭཱ བྷེདཀརཝཏྠུདཱིཔནཾ ཝོཧཱརོ, ཏཏྠ ཨཏྟནོ ནིཙྪིཏམཏྠཾ རཧསྶཝསེན ཝིཉྙཱཔནཾ ཨནུསྶཱཝནནྟི དསྶེཏི.

ཀམྨམེཝ ཨུདྡེསོ ཝཱ པམཱཎནྟི ཏེཧི སངྒྷབྷེདསིདྡྷིཏོ ཝུཏྟཾ, ཨིཏརེ པན ཏེསཾ སམྦྷཱརབྷཱུཏཱ. ཏེནཱཧ – ‘‘ཝོཧཱརཱ’’ཏིཨཱདི. ཏཏྠཱཏི ཝོཧརཎེ. ཙུཏིཨནནྟརཾ ཕལཾ ཨནནྟརཾ ནཱམ, ཏསྨིཾ ཨནནྟརེ ནིཡུཏྟཱནི, ཏནྣིབྦཏྟནེན ཨནནྟརཀརཎསཱིལཱནི, ཨནནྟརཔྤཡོཛནཱནི ཙཱཏི ཨཱནནྟརིཡཱནི, ཏཱནི ཨེཝ ཀམྨཱནཱིཏི ཨཱནནྟརིཡཀམྨཱནི.

ཀམྨཏོཏི ¶ ‘‘ཨེཝཾ ཨཱནནྟརིཡཀམྨཾ ཧོཏི, ཨེཝཾ ཨཱནནྟརིཡཀམྨསདིས’’ནྟི ཨེཝཾ ཀམྨཝིབྷཱགཏོ. དྭཱརཏོཏི ཀཱཡདྭཱརཏོ. ཀཔྤཊྛིཏིཡཏོཏི ‘‘ཨིདཾ ཀཔྤཊྛིཏིཡཝིཔཱཀཾ, ཨིདཾ ན ཀཔྤཊྛིཏིཡཝིཔཱཀ’’ནྟི ཨེཝཾ ཀཔྤཊྛིཏིཡཝིབྷཱགཏོ. པཱཀསཱདྷཱརཎཱདཱིཧཱིཏི ‘‘ཨིདམེཏྠ ཝིཔཙྩཏི, ཨིདཾ ¶ ན ཝིཔཙྩཏཱི’’ཏི ཝིཔཙྩནཝིབྷཱགཏོ, གཧཊྛཔབྦཛིཏཱནཾ སཱདྷཱརཎཱསཱདྷཱརཎཏོ, ཨཱདི-སདྡེན ཝེདནཱདིཝིབྷཱགཏོ ཙ.

ཀམྨཏོ ཏཱཝ ཝིནིཙྪཡོ ཝུཙྩཏཱིཏི སམྦནྡྷོ. ཡསྨཱ མནུསྶཏྟབྷཱཝེ ཋིཏསྶེཝ ཀུསལདྷམྨཱནཾ ཏིཀྑཝིསདབྷཱཝཱཔཏྟི, ཡཐཱ ཏིཎྞཾ བོདྷིསཏྟཱནཾ བོདྷིཏྟཡནིབྦཏྟིཡཾ, ཨེཝཾ མནུསྶབྷཱཝེ ཋིཏསྶེཝ ཨེདིསཱནཾ ཨཀུསལདྷམྨཱནམྤི ཏིཀྑཝིསདབྷཱཝཱཔཏྟཱིཏི ཨཱཧ – ‘‘མནུསྶབྷཱུཏསྶེཝཱ’’ཏི. པཱཀཏིཀམནུསྶཱནམྤི ཙ ཀུསལདྷམྨཱནཾ ཝིསེསཔྤཏྟི ཝིམཱནཝཏྠུཨཊྛཀཐཱཡཾ ཝུཏྟནཡེནེཝ ཝེདིཏབྦཱ. ཡཐཱཝུཏྟོ ཙ ཨཏྠོ སམཱནཛཱཏིཡསྶ ཝིཀོཔནེ གརུཏརོ, ན ཏཐཱ ཝིཛཱཏིཡསྶཱཏི ཝུཏྟཾ – ‘‘མནུསྶབྷཱུཏཾ མཱཏརཾ ཝཱ པིཏརཾ ཝཱ’’ཏི. ལིངྒཔརིཝཏྟེ ཙ སོ ཨེཝ ཨེཀཀམྨནིབྦཏྟོ བྷཝངྒཔྤབནྡྷོ ཛཱིཝིཏིནྡྲིཡཔབནྡྷོ ཙ, ན ཨཉྙོཏི ཨཱཧ – ‘‘ཨཔི པརིཝཏྟལིངྒ’’ནྟི. ཨརཧཏྟཾ པཏྟེཔི ཨེསེཝ ནཡོ. ཏསྶ ཝིཔཱཀནྟིཨཱདི ཀམྨསྶ ཨཱནནྟརིཡབྷཱཝསམཏྠནཾ. ཙཏུཀྐོཊིཡཉྩེཏྠ སམྦྷཝཏི. ཏཏྠ པཋམཱ ཀོཊི དསྶིཏཱ, ཨིཏརཱསུ ཝིསངྐེཏབྷཱཝཾ དསྶེཏུཾ – ‘‘ཡོ པནཱ’’ཏིཨཱདི ཝུཏྟཾ. ཡདིཔི ཏཏྠ ཝིསངྐེཏོ, ཀམྨཾ པན གརུཏརཾ ཨཱནནྟརིཡསདིསཾ བྷཱཡིཏབྦནྟི ཨཱཧ – ‘‘བྷཱརིཡཾ…པེ… ཏིཊྛཏཱི’’ཏི. ཨཡཾ པཉྷོཏི ཉཱཔནིཙྪཱནིབྦཏྟཱ ཀཐཱ.

ཨབྷིསནྡྷིནཱཏི ཨདྷིཔྤཱཡེན. ཨཱནནྟརིཡཾ ཕུསཏཱིཏི མརཎཱདྷིཔྤཱཡེནེཝ ཨཱནནྟརིཡཝཏྠུནོ ཝིཀོཔིཏཏྟཱ ཝུཏྟཾ. ཨཱནནྟརིཡཾ ན ཕུསཏཱིཏི ཨཱནནྟརིཡཝཏྠུཨབྷཱཝཏོ ཨཱནནྟརིཡཾ ན ཧོཏི. སབྦཏྠ ཧི པུརིམཾ ཨབྷིསནྡྷིཙིཏྟཾ ཨཔྤམཱཎཾ, ཝདྷཀཙིཏྟཾ པན ཏདཱརམྨཎཾ ཛཱིཝིཏིནྡྲིཡཉྩ ཨཱནནྟརིཡབྷཱཝེ པམཱཎནྟི དཊྛབྦཾ. སངྒཱམཙཏུཀྐཾ སམྤཏྟཝསེན ཡོཛེཏབྦཾ. ཡོ ཧི པརསེནཱཡ ཨཉྙཉྩ ཡོདྷཾ པིཏརཉྩ ཀམྨཾ ཀརོནྟེ དིསྭཱ ཡོདྷསྶ ཨུསུཾ ཁིཔཏི ‘‘ཨེཏཾ ཝིཛ྄ཛྷིཏྭཱ མམ པིཏརཾ ཝིཛ྄ཛྷིསྶཏཱི’’ཏི, ཡཐཱདྷིཔྤཱཡཾ གཏེ པིཏུགྷཱཏཀོ ཧོཏི. ‘‘ཡོདྷེ ཝིདྡྷེ མམ པིཏཱ པལཱཡིསྶཏཱི’’ཏི ཁིཔཏི, ཨུསུཾ ཨཡཐཱདྷིཔྤཱཡཾ གནྟྭཱ པིཏརཾ མཱརེཏི, ཝོཧཱརཝསེན པིཏུགྷཱཏཀོཏི ཝུཙྩཏི, ཨཱནནྟརིཡཾ པན ནཏྠཱིཏི. ཙོརཙཏུཀྐཾ པན ཡོ ‘‘ཙོརཾ མཱརེསྶཱམཱི’’ཏི ¶ ཙོརཝེསེན གཙྪནྟཾ པིཏརཾ མཱརེཏི, ཨཱནནྟརིཡཾ ཕུསཏཱིཏིཨཱདིནཱ ཡོཛེཏབྦཾ. ཏེནེཝཱཏི ཏེནེཝ པཡོགེན. ཨརཧནྟགྷཱཏཀོ ཧོཏིཡེཝཱཏི ཨརཧཏོ མཱརིཏཏྟཱ ཝུཏྟཾ, པུཐུཛྫནསྶེཝ ཏཾ དིནྣཾ ཧོཏཱིཏི ཨེཏྠཱཡམདྷིཔྤཱཡོ – ཡཐཱ ཝདྷཀཙེཏནཱ པཙྩུཔྤནྣཱརམྨཎཱཔི པབནྡྷཝིཙྪེདནཝསེན ཛཱིཝིཏིནྡྲིཡཾ ཨཱརམྨཎཾ ཀཏྭཱ པཝཏྟཏི, ན ཨེཝཾ ཙཱགཙེཏནཱ. སཱ ཧི ཙཛིཏབྦཝཏྠུཾ ཨཱརམྨཎཾ ཀཏྭཱ ཙཛནམཏྟམེཝ ཧོཏི, ཨཉྙསནྟཀབྷཱཝཀརཎཉྩ ཏསྶ ཙཛནཾ, ཏསྨཱ ཡསྶ ཏཾ སནྟཀཾ ཀཏཾ, ཏསྶེཝ དིནྣཾ ཧོཏཱིཏི.

ལོཧིཏཾ ¶ སམོསརཏཱིཏི ཨབྷིགྷཱཏེན པཀུཔྤམཱནཾ སཉྩིཏཾ ཧོཏི. མཧནྟཏརནྟི གརུཏརཾ. སརཱིརཔྤཊིཛགྒནེ ཝིཡཱཏི སཏྠུརཱུཔཀཱཡཔྤཊིཛགྒནེ ཝིཡ.

ཨསནྣིཔཏིཏེཏི ཨིདཾ སཱམགྒིཡདཱིཔནཾ. བྷེདོ ཙ ཧོཏཱིཏི སངྒྷསྶ བྷེདོ ཙ ཧོཏི. ཝཊྚཏཱིཏི སཉྙཱཡཱཏི ‘‘ཨཱིདིསཾ ཀརཎཾ སངྒྷབྷེདཱཡ ན ཧོཏཱི’’ཏི སཉྙཱཡ. ཏཐཱ ནཝཏོ ཨཱུནཔརིསཱཡཱཏི ནཝཏོ ཨཱུནཔརིསཱཡ ཀརོནྟསྶ ཏཐཱཏི ཡོཛེཏབྦཾ. ཏཐཱཏི ཙ ཨིམིནཱ ‘‘ན ཨཱནནྟརིཡཀམྨ’’ནྟི ཨིམཾ ཨཱཀཌྜྷཏི, ན པན ‘‘བྷེདོཝ ཧོཏཱི’’ཏི ཨིདཾ. ཧེཊྛིམནྟེན ཧི ནཝནྣམེཝ ཝསེན སངྒྷབྷེདོ. དྷམྨཝཱདིནོ ཨནཝཛྫཱཏི ཡཐཱདྷམྨཾ ཨནཝཊྛཱནཏོ. སངྒྷབྷེདསྶ པུབྦབྷཱགོ སངྒྷརཱཛི.

ཀཱཡདྭཱརམེཝ པཱུརེནྟི ཀཱཡཀམྨབྷཱཝེནེཝ ལཀྑིཏབྦཏོ. སཎྛཧནྟེཧི ཀཔྤེ…པེ… མུཙྩཏཱིཏི ཨིདཾ ཀཔྤཊྛཀཐཱཡ (ཀཐཱ. ༦༥༤ ཨཱདཡོ) ན སམེཏི. ཏཏྠ ཧི ཨཊྛཀཐཱཡ (ཀཐཱ. ཨཊྛ. ༦༥༤-༦༥༧) ཝུཏྟཾ – ‘‘ཨཱཔཱཡིཀོཏི ཨིདཾ སུཏྟཾ ཡཾ སོ ཨེཀཾ ཀཔྤཾ ཨསཱིཏིབྷཱགེ ཀཏྭཱ ཏཏོ ཨེཀབྷཱགམཏྟཾ ཀཱལཾ ཏིཊྛེཡྻ, ཏཾ ཨཱཡུཀཔྤཾ སནྡྷཱཡ ཝུཏྟ’’ནྟི. ཀཔྤཝིནཱསེཡེཝཱཏི ཙ ཨཱཡུཀཔྤཝིནཱསེ ཨེཝཱཏི ཨཏྠེ སཏི ནཏྠི ཝིརོདྷོ. ཨེཏྠ ཙ སཎྛཧནྟེཏི ཨིདམྤི ‘‘སྭེཝ ཝིནསྶིསྶཏཱི’’ཏི ཝིཡ ཨབྷཱུཏཔརིཀཔྤཝསེན ཝུཏྟཾ. ཨེཀདིཝསམེཝ ནིརཡེ པཙྩཏི, ཏཏོ པརཾ ཀཔྤཱབྷཱཝེ ཨཱཡུཀཔྤསྶཔི ཨབྷཱཝཏོཏི ཨཝིརོདྷཏོ ཨཏྠཡོཛནཱ དཊྛབྦཱ. སེསཱནཱིཏི སངྒྷབྷེདཏོ ཨཉྙཱནི ཨཱནནྟརིཡཀམྨཱནི.

ཡདི ཏཱནི ཨཧོསིཀམྨསངྑཾ གཙྪནྟི, ཨེཝཾ སཏི ཀཐཾ ནེསཾ ཨཱནནྟརིཡཏཱ ཙུཏིཨནནྟརཾ ཝིཔཱཀདཱནཱབྷཱཝཏོ. ཨཐ སཏི ཕལདཱནེ ཙུཏིཨནནྟརོ ¶ ཨེཝ ཨེཏེསཾ ཕལཀཱལོ, ན ཨཉྙོཏི ཕལཀཱལནིཡམེན ནིཡཏཏཱ ཨིཙྪིཏཱ, ན ཕལདཱནནིཡམེན. ཨེཝམྤི ནིཡཏཕལཀཱལཱནཾ ཨཉྙེསམྤི ཨུཔཔཛྫཝེདནཱིཡཱནཾ དིཊྛདྷམྨཝེདནཱིཡཱནཉྩ ནིཡཏཏཱ ཨཱཔཛྫེཡྻ, ཏསྨཱ ཝིཔཱཀདྷམྨདྷམྨཱནཾ པཙྩཡནྟརཝིཀལཏཱདཱིཧི ཨཝིཔཙྩམཱནཱནམྤི ཨཏྟནོ སབྷཱཝེན ཝིཔཱཀདྷམྨཏཱ ཝིཡ བལཝཏཱ ཨཱནནྟརིཡེན ཝིཔཱཀེ དིནྣེ ཨཝིཔཙྩམཱནཱནམྤི ཨཱནནྟརིཡཱནཾ ཕལདཱནེ ནིཡཏསབྷཱཝཱ ཨཱནནྟརིཡསབྷཱཝཱ ཙ པཝཏྟཱིཏི ཨཏྟནོ སབྷཱཝེན ཕལདཱནནིཡམེནེཝ ནིཡཏཱ ཨཱནནྟརིཡཏཱ ཙ ཝེདིཏབྦཱ. ཨཝསྶཉྩ ཨཱནནྟརིཡསབྷཱཝཱ ཏཏོ ཨེཝ ནིཡཏསབྷཱཝཱ ཙ ཏེསཾ པཝཏྟཱིཏི སམྤཊིཙྪིཏབྦམེཏཾ, ཨཉྙསྶ བལཝཏོ ཨཱནནྟརིཡསྶ ཨབྷཱཝེ སཏི ཙུཏིཨནནྟརཾ ཨེཀནྟེན ཕལདཱནཏོ.

ནནུ ¶ ཨེཝཾ ཨཉྙེསམྤི ཨུཔཔཛྫཝེདནཱིཡཱནཾ ཨཉྙསྨིཾ ཝིཔཱཀདཱཡཀེ ཨསཏི ཙུཏིཨནནྟརམེཝ ཨེཀནྟེན ཕལདཱནཏོ ནིཡཏསབྷཱཝཱ ཨཱནནྟརིཡསབྷཱཝཱ ཙ པཝཏྟི ཨཱཔཛྫཏཱིཏི? ནཱཔཛྫཏི ཨསམཱནཛཱཏིཀེན ཙེཏོཔཎིདྷིཝསེན ཨུཔགྷཱཏཀེན ཙ ནིཝཏྟེཏབྦཝིཔཱཀཏྟཱ ཨནནྟརེ ཨེཀནྟཕལདཱཡཀཏྟཱབྷཱཝཱ, ན པན ཨཱནནྟརིཡཱནཾ པཋམཛ྄ཛྷཱནཱདཱིནཾ དུཏིཡཛ྄ཛྷཱནཱདཱིནི ཝིཡ ཨསམཱནཛཱཏིཀཾ ཕལནིཝཏྟཀཾ ཨཏྠི སབྦཱནནྟརིཡཱནཾ ཨཝཱིཙིཕལཏྟཱ, ན ཙ ཧེཊྛཱུཔཔཏྟིཾ ཨིཙྪཏོ སཱིལཝཏོ ཙེཏོཔཎིདྷི ཝིཡ ཨུཔརཱུཔཔཏྟིཛནཀཀམྨཕལཾ ཨཱནནྟརིཡཕལཾ ནིཝཏྟེཏུཾ སམཏྠོ ཙེཏོཔཎིདྷི ཨཏྠི ཨནིཙྪནྟསྶེཝ ཨཝཱིཙིཔཱཏནཏོ, ན ཙ ཨཱནནྟརིཡོཔགྷཱཏཀཾ ཀིཉྩི ཀམྨཾ ཨཏྠི, ཏསྨཱ ཏེསཾཡེཝ ཨནནྟརེ ཨེཀནྟཝིཔཱཀཛནཀསབྷཱཝཱ པཝཏྟཱིཏི. ཨནེཀཱནི ཙ ཨཱནནྟརིཡཱནི ཀཏཱནི ཨེཀནྟེན ཝིཔཱཀེ ནིཡཏསབྷཱཝཏྟཱ ཨུཔརཏཱཝིཔཙྩནསབྷཱཝཱསངྐཏྟཱ ནིཙྪིཏཱནི སབྷཱཝཏོ ནིཡཏཱནེཝ. ཏེསུ པན སམཱནསབྷཱཝེསུ ཨེཀེན ཝིཔཱཀེ དིནྣེ ཨིཏརཱནི ཨཏྟནཱ ཀཏྟབྦཀིཙྩསྶ ཏེནེཝ ཀཏཏྟཱ ན དུཏིཡཾ ཏཏིཡམྤི ཙ པཊིསནྡྷིཾ ཀརོནྟི, ན སམཏྠཏཱཝིགྷཱཏཏྟཱཏི ནཏྠི ཏེསཾ ཨཱནནྟརིཡཀཏཱནིཝཏྟི, གརུགརུཏརབྷཱཝོ པན ཏེསཾ ལབྦྷཏེཝཱཏི སངྒྷབྷེདསྶ སིཡཱ གརུཏརབྷཱཝོཏི ‘‘ཡེན…པེ… ཝིཔཙྩཏཱི’’ཏི ཨཱཧ. ཨེཀསྶ པན ཨཉྙཱནི ཨུཔཏྠམྦྷཀཱནི ཧོནྟཱིཏི དཊྛབྦཱནི. པཊིསནྡྷིཝསེན ཝིཔཙྩཏཱིཏི ཝཙནེན ཨིཏརེསཾ པཝཏྟིཝིཔཱཀདཱཡིཏཱ ཨནུཉྙཱཏཱ ཝིཡ དིསྶཏི. ནོ ཝཱ ཏཐཱ སཱིལཝཏཱིཏི ཡཐཱ པིཏཱ སཱིལཝཱ, ཏཐཱ སཱིལཝཏཱི ¶ ནོ ཝཱ ཧོཏཱིཏི ཡོཛནཱ. སཙེ མཱཏཱ སཱིལཝཏཱི, མཱཏུགྷཱཏོ པཊིསནྡྷིཝསེན ཝིཔཙྩཏཱིཏི ཡོཛནཱ.

པཀཏཏྟོཏི ཨནུཀྑིཏྟོ. སམཱནསཾཝཱསཀོཏི ཨཔཱརཱཛིཀོ. སམཱནསཱིམཱཡནྟི ཨེཀསཱིམཱཡཾ.

༢༧༦. སཏྠུ ཀིཙྩཾ ཀཱཏུཾ ཨསམཏྠོཏི ཡཾ སཏྠཱརཱ ཀཱཏབྦཀིཙྩཾ ཨནུསཱསནཱདི, ནཾ ཀཱཏུཾ ཨསམཏྠོཏི བྷགཝནྟཾ པཙྩཀྑཱཡ. ཨཉྙཾ ཏིཏྠཀརནྟི ཨཉྙཾ སཏྠཱརཾ. ཝུཏྟཉྷེཏཾ –

‘‘ཏིཏྠཾ ཛཱནིཏབྦཾ, ཏིཏྠཀརོ ཛཱནིཏབྦོ, ཏིཏྠིཡཱ ཛཱནིཏབྦཱ, ཏིཏྠིཡསཱཝཀཱ ཛཱནིཏབྦཱ. ཏཏྠ ཏིཏྠཾ ནཱམ དྭཱསཊྛི དིཊྛིཡོ. ཨེཏྠ ཧི སཏྠཱ ཏརནྟི ཨུཔླཝནྟི ཨུམྨུཛྫནིམུཛྫཾ ཀརོནྟི, ཏསྨཱ ཏིཏྠནྟི ཝུཙྩནྟི. ཏཱདིསཱནཾ དིཊྛཱིནཾ ཨུཔྤཱདེཏཱ ཏིཏྠཀརོ ནཱམ པཱུརཎཀསྶཔཱདིཀོ. ཏསྶ ལདྡྷིཾ གཧེཏྭཱ པབྦཛིཏཱ ཏིཏྠིཡཱ ནཱམ. ཏེ ཧི ཏིཏྠེ ཛཱཏཱཏི ཏིཏྠིཡཱ. ཡཐཱཝུཏྟཾ ཝཱ དིཊྛིགཏསངྑཱཏཾ ཏིཏྠཾ ཨེཏེསཾ ཨཏྠཱིཏི ཏིཏྠིཀཱ ¶ , ཏིཏྠིཀཱ ཨེཝ ཏིཏྠིཡཱ. ཏེསཾ པཙྩཡདཱཡཀཱ ཏིཏྠིཡསཱཝཀཱཏི ཝེདིཏབྦཱ’’ཏི (མ. ནི. ཨཊྛ. ༡.༡༤༠).

༢༧༧. ཨབྷིཛཱཏིཨཱདཱིསུ པཀམྤནདེཝཏཱུཔསངྐམནཱདིནཱ ཛཱཏཙཀྐཝཱལེ༹ན སམཱནཡོགཀྑམཾ དསསཧསྶཔརིམཱཎཾ ཙཀྐཝཱལ༹ཾ ཛཱཏིཁེཏྟཾ. སརསེནེཝ ཨཱཎཱཔཝཏྟནཊྛཱནཾ ཨཱཎཱཁེཏྟཾ. ཝིསཡབྷཱུཏཾ ཋཱནཾ ཝིསཡཁེཏྟཾ. དསསཧསྶཱི ལོཀདྷཱཏཱུཏི ཨིམཱཡ ལོཀདྷཱཏུཡཱ སདྡྷིཾ ཨིམཾ ལོཀདྷཱཏུཾ པརིཝཱརེཏྭཱ ཋིཏཱ དསསཧསྶཱི ལོཀདྷཱཏུ. ཏཏྟཀཱནཾཡེཝ ཛཱཏིཁེཏྟབྷཱཝོ དྷམྨཏཱཝསེན ཝེདིཏབྦོ. ‘‘པརིགྒཧཝསེནཱ’’ཏི ཀེཙི, ‘‘སབྦེསཾཡེཝ བུདྡྷཱནཾ ཏཏྟཀཾཡེཝ ཛཱཏིཁེཏྟཾ ཏནྣིཝཱསཱིནཾཡེཝ དེཝཏཱནཾ དྷམྨཱབྷིསམཡོ’’ཏི ཙ ཝདནྟི. མཱཏུཀུཙྪི ཨོཀྐམནཀཱལཱདཱིནཾ ཚནྣཾ ཨེཝ གཧཎཾ ནིདསྶནམཏྟཾ མཧཱབྷིནཱིཧཱརཱདིཀཱལེཔི ཏསྶ པཀམྤནསྶ ལབྦྷནཏོ. ཨཱཎཱཁེཏྟཾ ནཱམ ཡཾ ཨེཀཛ྄ཛྷཾ སཾཝཊྚཏི ཝིཝཊྚཏི ཙ, ཨཱཎཱ པཝཏྟཏི ཨཱཎཱཡ ཏནྣིཝཱསིདེཝཏཱནཾ སིརསཱ སམྤཊིཙྪནེན, ཏཉྩ ཁོ ཀེཝལཾ བུདྡྷཱནཾ ཨཱནུབྷཱཝེནེཝ, ན ཨདྷིཔྤཱཡཝསེན. ཨདྷིཔྤཱཡཝསེན ¶ པན ‘‘ཡཱཝཏཱ ཝཱ པན ཨཱཀངྑེཡྻཱ’’ཏི (ཨ. ནི. ༣.༨༡) ཝཙནཏོ ཏཏོ པརམྤི ཨཱཎཱ ཝཏྟེཡྻེཝ.

ན ཨུཔྤཛྫནྟཱིཏི པན ཨཏྠཱིཏི ‘‘ན མེ ཨཱཙརིཡོ ཨཏྠི, སདིསོ མེ ན ཝིཛྫཏཱི’’ཏིཨཱདིཾ (མ. ནི. ༡.༢༨༥; མཧཱཝ. ༡༡; ཀཐཱ. ༤༠༥) ཨིམིསྶཱ ལོཀདྷཱཏུཡཱ ཋཏྭཱ ཝདནྟེན བྷགཝཏཱ ‘‘ཀིཾ པནཱཝུསོ, སཱརིཔུཏྟ, ཨཏྠེཏརཧི ཨཉྙེ སམཎཱ ཝཱ བྲཱཧྨཎཱ ཝཱ བྷགཝཏཱ སམསམཱ སམྦོདྷིཡནྟི, ཨེཝཾ པུཊྛོ ཨཧཾ, བྷནྟེ, ‘ནོ’ཏི ཝདེཡྻ’’ནྟི (དཱི. ནི. ༣.༡༦༡) ཝཏྭཱ ཏསྶ ཀཱརཎཾ དསྶེཏུཾ – ‘‘ཨཊྛཱནམེཏཾ ཨནཝཀཱསོ, ཡཾ ཨེཀིསྶཱ ལོཀདྷཱཏུཡཱ དྭེ ཨརཧནྟོ སམྨཱསམྦུདྡྷཱ ཨཔུབྦཾ ཨཙརིམཾ ཨུཔྤཛྫེཡྻུ’’ནྟི ཨིམཾ སུཏྟཾ (ཨ. ནི. ༡.༢༧༧; ཝིབྷ. ༨༠༩; མ. ནི. ༣.༡༢༩; མི. པ. ༥.༡.༡) ཨཱཧརནྟེན དྷམྨསེནཱཔཏིནཱ ཙ བུདྡྷཁེཏྟབྷཱུཏཾ ཨིམཾ ལོཀདྷཱཏུཾ ཋཔེཏྭཱ ཨཉྙཏྠ ཨནུཔྤཏྟི ཝུཏྟཱ ཧོཏཱིཏི ཨདྷིཔྤཱཡོ.

ཨེཀཏོཏི སཧ, ཨེཀསྨིཾ ཀཱལེཏི ཨཏྠོ, སོ པན ཀཱལོ ཀཐཾ པརིཙྪིནྣོཏི ཙརིམབྷཝེ པཊིསནྡྷིགྒཧཎཏོ པཊྛཱཡ ཡཱཝ དྷཱཏུཔརིནིབྦཱནཱཏི དསྶེནྟོ, ‘‘ཏཏྠཱ’’ཏིཨཱདིམཱཧ. ཨནཙྪརིཡཏྟཱཏི དྭཱིསུཔི ཨུཔྤཛྫམཱནེསུ ཨཙྪརིཡཏྟཱབྷཱཝཏོཏི ཨཏྠོ. དྭཱིསུཔི ཨུཔྤཛྫམཱནེསུ ཨནཙྪརིཡཏཱ, ཀིམངྒཾ པན བཧཱུསཱུཏི དསྶེནྟོ, ‘‘ཡདི ཙཱ’’ཏིཨཱདིམཱཧ. བུདྡྷཱ ནཱམ མཛ྄ཛྷེ བྷིནྣསུཝཎྞཾ ཝིཡ ཨེཀསདིསཱཏི ཏེསཾ དེསནཱཔི ཨེཀརསཱ ཨེཀདྷཱཏི ཨཱཧ – ‘‘དེསནཱཡ ཙ ཝིསེསཱབྷཱཝཏོ’’ཏི ¶ . ཨེཏེནཔི ཨནཙྪརིཡཏྟམེཝ སཱདྷེཏི. ཝིཝཱདབྷཱཝཏོཏི ཨེཏེན ཝིཝཱདཱབྷཱཝཏྠཾ དྭེ བུདྡྷཱ ཨེཀཏོ ན ཨུཔྤཛྫནྟཱིཏི དསྶེཏི. ཨེཏཾ ཀཱརཎནྟི ཨེཏཾ ཨནཙྪརིཡཏཱདིཀཱརཎཾ. ཏཏྠཱཏི མིལིནྡཔཉྷེ.

ཨེཀཾ ཨེཝ བུདྡྷཾ དྷཱརེཏཱིཏི ཨེཀབུདྡྷདྷཱརཎཱི. ཨེཏེན ཨེཝཾསབྷཱཝཱ ཨེཏེ བུདྡྷགུཎཱ, ཡེན དུཏིཡབུདྡྷགུཎེ དྷཱརེཏུཾ ཨསམཏྠཱ ཨཡཾ ལོཀདྷཱཏཱུཏི དསྶེཏི. པཙྩཡཝིསེསནིཔྥནྣཱནཉྷི གུཎདྷམྨཱནཾ བྷཱརིཡོ ཝིསེསོ མཧཱཔཐཝིཡཱཔི དུསྶཧོཏི སཀྐཱ ཝིཉྙཱཏུཾ. ཏཐཱ ཧི ཨབྷིསམྦོདྷིསམཡེ ཨུཔགཏསྶ ལོཀནཱཐསྶ གུཎབྷཱརཾ བོདྷིརུཀྑསྶ ཏཱིསུཔི དིསཱསུ མཧཱཔཐཝཱི སནྡྷཱརེཏུཾ ནཱསཀྑི. ཏསྨཱ ‘‘ན དྷཱརེཡྻཱ’’ཏི ཝཏྭཱ ཏམེཝ ཨདྷཱརཎཾ པརིཡཱཡནྟརེཧི པཀཱསེནྟོ ‘‘ཙལེཡྻཱ’’ཏིཨཱདིམཱཧ. ཏཏྠ ཙལེཡྻཱཏི པརིཔྥནྡེཡྻ. ཀམྤེཡྻཱཏི པཝེདྷེཡྻ ¶ . ནམེཡྻཱཏི ཨེཀཔསྶེན ནམེཡྻ. ཨོནམེཡྻཱཏི ཨོསཱིདེཡྻ. ཝིནམེཡྻཱཏི ཝིཝིདྷཾ ཨིཏོ ཙིཏོ ཙ ནམེཡྻ. ཝིཀིརེཡྻཱཏི ཝཱཏེན ཐུསམུཊྛི ཝིཡ ཝིཔྤཀིརེཡྻ. ཝིདྷམེཡྻཱཏི ཝིནསྶེཡྻ. ཝིདྡྷཾསེཡྻཱཏི སབྦསོ ཝིདྡྷསྟཱ བྷཝེཡྻ. ཏཐཱབྷཱུཏཱ ཙ ན ཀཏྠཙི ཏིཊྛེཡྻཱཏི ཨཱཧ – ‘‘ན ཋཱནམུཔགཙྪེཡྻཱ’’ཏི.

ཨིདཱནི ཏཏྠ ནིདསྶནཾ དསྶེནྟོ, ‘‘ཡཐཱ, མཧཱརཱཛཱ’’ཏིཨཱདིམཱཧ. ཏཏྠ ཨེཀེ པུརིསེཏི ཨེཀསྨིཾ པུརིསེ. སམུཔཱདིཀཱཏི སམཾ ཨུདྡྷཾ པཛྫཏི པཝཏྟཏཱིཏི སམུཔཱདིཀཱ, ཨུདཀསྶ ཨུཔརི སམཾ གཱམིནཱིཏི ཨཏྠོ. ‘‘སམུཔྤཱདིཀཱ’’ཏིཔི པཋནྟི, ཨཡམེཝཏྠོ. ཝཎྞེནཱཏི སཎྛཱནེན. པམཱཎེནཱཏི ཨཱརོཧེན. ཀིསཐཱུལེནཱཏི ཀིསཐཱུལབྷཱཝེན, པརིཎཱཧེནཱཏི ཨཏྠོ. དྭིནྣམྤཱིཏི དྭེཔི, དྭིནྣམྤི ཝཱ སརཱིརབྷཱརཾ.

ཚཱདེནྟནྟི རོཙེནྟཾ རུཙིཾ ཨུཔྤཱདེནྟཾ. ཏནྡིཀཏོཏི ཏེན བྷོཛནེན ཏནྡིབྷཱུཏོ. ཨནོནམིཏདཎྜཛཱཏོཏི ཡཱཝདཏྠཾ བྷོཛནེན ཨོནམིཏུཾ ཨསཀྐུཎེཡྻཏཱཡ ཨནོནམནདཎྜོ ཝིཡ ཛཱཏོ. སཀིཾ བྷུཏྟོ ཝམེཡྻཱཏི ཨེཀམྤི ཨཱལོཔཾ ཨཛ྄ཛྷོཧརིཏྭཱ ཝམེཡྻཱཏི ཨཏྠོ.

ཨཏིདྷམྨབྷཱརེན པཐཝཱི ཙལཏཱིཏི དྷམྨེན ནཱམ པཐཝཱི ཏིཊྛེཡྻ. སཱ ཀིཾ ཏེནེཝ ཙལཏི ཝིནསྶཏཱིཏི ཨདྷིཔྤཱཡེན པུཙྪཏི. པུན ཐེརོ ‘‘རཏནཾ ནཱམ ལོཀེ ཀུཊུམྦཾ སནྡྷཱརེནྟཾ ཨབྷིམཏཉྩ ལོཀེན ཨཏྟནོ གརུསབྷཱཝཏཱཡ སཀཊབྷངྒསྶ ཀཱརཎཾ ཨཏིབྷཱརབྷཱུཏཾ དིཊྛཾ. ཨེཝཾ དྷམྨོ ཙ ཧིཏསུཁཝིསེསེཧི ཏཾསམངྒཱིནཾ དྷཱརེནྟོ ཨབྷིམཏོ ཙ ཝིཉྙཱུནཾ གམྦྷཱིརཔྤམེཡྻབྷཱཝེན གརུསབྷཱཝཏྟཱ ཨཏིབྷཱརབྷཱུཏོ པཐཝཱིཙལནསྶ ཀཱརཎཾ ཧོཏཱི’’ཏི དསྶེནྟོ, ‘‘ཨིདྷ, མཧཱརཱཛ, དྭེ སཀཊཱ’’ཏིཨཱདིམཱཧ ¶ . ཨེཏེནེཝ ཏཐཱགཏསྶ མཱཏུཀུཙྪིཨོཀྐམནཱདིཀཱལེ པཐཝཱིཀམྤནཀཱརཎཾ སཾཝཎྞིཏནྟི དཊྛབྦཾ. ཨེཀསྶཱཏི ཨེཀསྨཱ, ཨེཀསྶ ཝཱ སཀཊསྶ རཏནཾ, ཏསྨཱ སཀཊཱ གཧེཏྭཱཏི ཨཏྠོ.

ཨོསཱརིཏནྟི ཨུཙྩཱརིཏཾ, ཝུཏྟནྟི ཨཏྠོ. ཨགྒོཏི སབྦསཏྟེཧི ཨགྒོ. ཛེཊྛོཏི ཝུདྡྷཏརོ. སེཊྛོཏི པསཏྠཏརོ. ཝིསིཊྛེཧི སཱིལཱདཱིཧི གུཎེཧི སམནྣཱགཏཏྟཱ ཝིསིཊྛོ. ཨུགྒཏཏམོཏི ཨུཏྟམོ. པཝརོཏི ¶ ཏསྶེཝ ཝེཝཙནཾ. ནཏྠི ཨེཏསྶ སམོཏི ཨསམོ. ཨསམཱ པུབྦབུདྡྷཱ, ཏེཧི སམོཏི ཨསམསམོ. ནཏྠི ཨེཏསྶ པཊིསམོ པཊིཔུགྒལོཏི ཨཔྤཊིསམོ. ནཏྠི ཨེཏསྶ པཊིབྷཱགོཏི ཨཔྤཊིབྷཱགོ. ནཏྠི ཨེཏསྶ པཊིཔུགྒལོཏི ཨཔྤཊིཔུགྒལོ.

སབྷཱཝཔཀཏིཀཱཏི སབྷཱཝབྷཱུཏཱ ཨཀིཏྟིམཱ པཀཏི. ཀཱརཎམཧནྟཏྟཱཏི ཀཱརཎཱནཾ མཧནྟཏཱཡ, མཧནྟེཧི བུདྡྷཀརདྷམྨེཧི པཱརམིསངྑཱཏེཧི ཀཱརཎེཧི བུདྡྷགུཎཱནཾ ནིབྦཏྟིཏོཏི ཝུཏྟཾ ཧོཏི. པཐཝཱིཨཱདཱིནི མཧནྟཱནི ཝཏྠཱུནི, མཧནྟཱ ཙཀྐཝཱལཱ༹དཡོ ཨཏྟནོ ཨཏྟནོ ཝིསཡེ ཨེཀེཀཱཝ, ཨེཝཾ སམྨཱསམྦུདྡྷོཔི མཧནྟོ ཨཏྟནོ ཝིསཡེ ཨེཀོ ཨེཝ. ཀོ ཙ ཏསྶ ཝིསཡོ? བུདྡྷབྷཱུམི, ཡཱཝཏཀཾ ཝཱ ཉེཡྻཾ. ‘‘ཨཱཀཱསོ ཝིཡ ཨནནྟཝིསཡོ བྷགཝཱ ཨེཀོ ཨེཝ ཧོཏཱི’’ཏི ཝདནྟོ པརཙཀྐཝཱལེ༹སུཔི དུཏིཡསྶ བུདྡྷསྶ ཨབྷཱཝཾ དསྶེཏི.

ཨིམིནཱཝ པདེནཱཏི ‘‘ཨེཀིསྶཱ ལོཀདྷཱཏུཡཱ’’ཏི ཨིམིནཱ ཨེཝ པདེན. དས ཙཀྐཝཱལ༹སཧསྶཱནི གཧིཏཱནཱིཏི ཛཱཏིཁེཏྟཱཔེཀྑཱཡ གཧིཏཱནི. ཨེཀཙཀྐཝཱལེ༹ནེཝཱཏི ཨིམིནཱ ཨེཝ ཨེཀཙཀྐཝཱལེ༹ན, ན ཡེན ཀེནཙི. ཡཐཱ ‘‘ཨིམསྨིཾཡེཝ ཙཀྐཝཱལེ༹ ཨུཔྤཛྫནྟཱི’’ཏི ཝུཏྟེ ཨིམསྨིམྤི ཙཀྐཝཱལེ༹ ཛམྦུདཱིཔེ ཨེཝ, ཏཏྠཱཔི མཛ྄ཛྷིམདེསེ ཨེཝཱཏི པརིཙྪིནྡིཏུཾ ཝཊྚཏི, ཨེཝཾ ‘‘ཨེཀིསྶཱ ལོཀདྷཱཏུཡཱ’’ཏི ཛཱཏིཁེཏྟེ ཨདྷིཔྤེཏེཔི ཨིམིནཱཝ ཙཀྐཝཱལེ༹ན པརིཙྪིནྡིཏུཾ ཝཊྚཏི.

པཋམཝགྒཝཎྞནཱ ནིཊྛིཏཱ.

༡༥. ཨཊྛཱནཔཱལི༹ (དུཏིཡཝགྒ)

(༡༥) ༢. ཨཊྛཱནཔཱལི༹-དུཏིཡཝགྒཝཎྞནཱ

༢༧༨. ཝིཝཱདུཔཙྪེདཏོཏི ¶ ཝིཝཱདུཔཙྪེདཀཱརཎཱ. དྭཱིསུ ཨུཔྤནྣེསུ ཡོ ཝིཝཱདོ བྷཝེཡྻ, ཏསྶ ཨནུཔྤཱདོཡེཝེཏྠ ཝིཝཱདུཔཙྪེདོ. ཨེཀསྨིཾ དཱིཔེཏིཨཱདིནཱ དཱིཔནྟརེཔི ཨེཀཛ྄ཛྷཾ ན ཨུཔྤཛྫཏི, པགེཝ ཨེཀདཱིཔེཏི དསྶེཏི. སོཔི པརིཧཱཡེཐཱཏི ཙཀྐཝཱལ༹སྶ པདེསེ ཨེཝ པཝཏྟིཏབྦཏྟཱ པརིཧཱཡེཡྻ.

༢༧༩-༢༨༠. མནུསྶཏྟནྟི ¶ མནུསྶབྷཱཝོ ཏསྶེཝ པབྦཛྫཱདིགུཎཱནཾ ཡོགྒབྷཱཝཏོ. ལིངྒསམྤཏྟཱིཏི པུརིསབྷཱཝོ. ཧེཏཱུཏི མནོཝཙཱིཔཎིདྷཱནཔུབྦིཀཱ ཧེཏུསམྤདཱ. སཏྠཱརདསྶནནྟི སཏྠུསམྨུཁཱིབྷཱཝོ. པབྦཛྫཱཏི ཀམྨཀིརིཡཝཱདཱིསུ ཏཱཔསེསུ, བྷིཀྑཱུསུ ཝཱ པབྦཛྫཱ. གུཎསམྤཏྟཱིཏི ཨབྷིཉྙཱདིགུཎསམྤདཱ. ཨདྷིཀཱརོཏི བུདྡྷེ ཨུདྡིསྶ ཨདྷིཀོ ཀཱརོ, སཝིསེསཱ ཨུཔཀཱརཀིརིཡཱ ཨདྷིཀོ སཀྐཱརོཏི ཝུཏྟཾ ཧོཏི. ཚནྡོཝ ཚནྡཏཱ, སམྨཱསམྦོདྷིཾ ཨུདྡིསྶ སཱཏིསཡོ ཀཏྟུཀམྱཏཱཀུསལཙྪནྡོ. ཨཊྛདྷམྨསམོདྷཱནཱཏི ཨེཏེསཾ ཨཊྛནྣཾ དྷམྨཱནཾ སམཱཡོགེན. ཨབྷིནཱིཧཱརོཏི ཀཱཡཔཎིདྷཱནཾ. སམིཛ྄ཛྷཏཱིཏི ནིཔྥཛྫཏི. ཨཡམེཏྠ སངྑེཔོ, ཝིཏྠཱརོ པན པརམཏྠདཱིཔནིཡཱ ཙརིཡཱཔིཊཀཝཎྞནཱཡ (ཙརིཡཱ. ཨཊྛ. པཀིཎྞཀཀཐཱ) ཝུཏྟནཡེན ཝེདིཏབྦོ. སབྦཱཀཱརཔརིཔཱུརམེཝཱཏི པརིཔུཎྞལཀྑཎཏཱཡ སཏྟུཏྟམཱདཱིཧི སབྦཱཀཱརེན སམྤནྣམེཝ. ན ཧི ཨིཏྠིཡཱ ཀོསོཧིཏཝཏྠགུཡ྄ཧཏཱདི སམྦྷཝཏི. དུཏིཡཔཀཏི ཙ ནཱམ པཋམཔཀཏིཏོ ནིཧཱིནཱ ཨེཝ. ཏེནེཝཱཧ – ཨནནྟརཝཱརེ ‘‘ཡསྨཱ’’ཏིཨཱདི.

༢༨༡. ཨིདྷ པུརིསསྶ ཏཏྠ ནིབྦཏྟནཏོཏི ཨིམསྨིཾ མནུསྶལོཀེ པུརིསབྷཱུཏསྶ ཏཏྠ བྲཧྨལོཀེ བྲཧྨཏྟབྷཱཝེན ནིབྦཏྟནཏོ. ཏེན ཨསཏིཔི པུརིསལིངྒེ པུརིསཱཀཱརཱ བྲཧྨཱནོ ཧོནྟཱིཏི དསྶེཏི. ཏཾཡེཝ ཙ པུརིསཱཀཱརཾ སནྡྷཱཡ ཝུཏྟཾ བྷགཝཏཱ ‘‘ཡཾ པུརིསོ བྲཧྨཏྟཾ ཀཱརེཡྻཱ’’ཏི. ཏེནེཝཱཧ – ‘‘སམཱནེཔཱི’’ཏིཨཱདི. ཡདི ཨེཝཾ ཨིཏྠིཡོ བྲཧྨལོཀེ ན ཨུཔྤཛྫེཡྻུནྟི ཨཱཧ – ‘‘བྲཧྨཏྟ’’ནྟིཨཱདི.

༢༩༠-༢༩༥. ‘‘ཀཱཡདུཙྩརིཏསྶཱ’’ཏིཨཱདིཔཱལི༹ཡཱ ¶ ཀམྨནིཡཱམོ ནཱམ ཀཐིཏོ. སམཉྫནཾ སམངྒོ, སམནྣཱགམོ, སོ ཨེཏསྶ ཨཏྠཱིཏི སམངྒཱི, སམནྣཱགཏོ, སམཉྫནསཱིལོ ཝཱ སམངྒཱི, པུབྦབྷཱགེ ཨུཔཀརཎསམུདཱཡཏོ པབྷུཏི ཨཱཡཱུཧནཝསེན ཨཱཡཱུཧནསམངྒཱིཏཱ, སནྣིཊྛཱཔཀཙེཏནཱཝསེན ཙེཏནཱསམངྒིཏཱ. ཙེཏནཱསནྟཏིཝསེན ཝཱ ཨཱཡཱུཧནསམངྒིཏཱ, ཏཾཏཾཙེཏནཱཀྑཎཝསེན ཙེཏནཱསམངྒཱིཏཱ. ཀཏཱུཔཙིཏསྶ ཨཝིཔཀྐཝིཔཱཀསྶ ཀམྨསྶ ཝསེན ཀམྨསམངྒིཏཱ. ཀམྨེ པན ཝིཔཙྩིཏུཾ ཨཱརདྡྷེ ཝིཔཱཀཔྤཝཏྟིཝསེན ཝིཔཱཀསམངྒིཏཱ. ཀམྨཱདཱིནཾ ཨུཔཊྛཱནཀཱལཝསེན ཨུཔཊྛཱནསམངྒིཏཱ. ཀུསལཱཀུསལཀམྨཱཡཱུཧནཀྑཎེཏི ཀུསལཀམྨསྶ ཨཀུསལཀམྨསྶ ¶ ཙ སམཱིཧནཀྑཎེ. ཏཐཱཏི ཨིམིནཱ ཀུསལཱཀུསལཀམྨཔདཾ ཨཱཀཌྜྷཏི. ཡཐཱ ཀཏཾ ཀམྨཾ ཕལདཱནསམཏྠཾ ཧོཏི, ཏཐཱ ཀཏཾ ཨུཔཙིཏཾ. ཝིཔཱཀཱརཧནྟི དུཏིཡབྷཝཱདཱིསུ ཝིཔཙྩནཱརཧཾ. ཨུཔྤཛྫམཱནཱནཾ ཨུཔཔཏྟིནིམིཏྟཾ ཨུཔཊྛཱཏཱིཏི ཡོཛནཱ. ཨུཔཔཏྟིཡཱ ཨུཔྤཛྫནསྶ ནིམིཏྟཾ ཀཱརཎནྟི ཨུཔཔཏྟིནིམིཏྟཾ, ཀམྨཾ, ཀམྨནིམིཏྟཾ, གཏིནིམིཏྟཉྩ. ཨཊྛཀཐཱཡཾ པན གཏིནིམིཏྟཝསེནེཝ ཡོཛནཱ དསྶིཏཱ. ཀམྨཀམྨནིམིཏྟཱནམྤི ཨུཔཊྛཱནཾ ཡཐཱརཧཾ དཊྛབྦཾ. ‘‘ཡཱནིསྶ ཏཱནི པུབྦེ ཀཏཱནི ཀམྨཱནི, ཏཱནིསྶ ཏསྨིཾ སམཡེ ཨོལམྦནྟི ཨཛ྄ཛྷོལམྦནྟི ཨབྷིལམྦནྟི’’ཏི (མ. ནི. ༣.༢༤༨) ཝཙནཏོ སཱཡནྷེ མཧནྟཱནཾ པབྦཏཀཱུཊཱནཾ ཚཱཡཱ ཝིཡ ཨཱསནྣམརཎསྶ སཏྟསྶ ཙིཏྟེ སུཔིནེ ཝིཡ ཝིཔཙྩིཏུཾ ཀཏོཀཱསཾ ཀམྨཾ, ཏསྶ ནིམིཏྟཾ གཏིནིམིཏྟཾ ཨུཔཏིཊྛཏེཝ. ཙལཏཱིཏི པརིཝཏྟཏི. ཨེཀེན ཧི ཀམྨུནཱ ཏཛྫེ ནིམིཏྟེ ཨུཔཊྛིཏེ པཙྩཡཝིསེསཝསེན ཏཏོ ཨཉྙེན ཀམྨུནཱ ཏདཉྙསྶ ནིམིཏྟསྶ ཨུཔཊྛཱནཾ པརིཝཏྟནཾ. སེསཱ ནིཙྩལཱ ཨཝསེསཱ ཙཏུབྦིདྷཱཔི སམངྒིཏཱ ནིཙྩལཱ ཨཔརིཝཏྟནཏོ.

སུནཁཝཱཛིཀོཏི སུནཁེཧི མིགཝཱཛཝསེན ཝཛནསཱིལོ, སུནཁལུདྡཀོཏི ཨཏྠོ. ཏལསནྠརཎཔཱུཛནྟི བྷཱུམིཏལསྶ པུཔྥེཧི སནྠརཎཔཱུཛཾ. ཨཱཡཱུཧནཙེཏནཱ ཀམྨསམངྒིཏཱཝསེནཱཏི ཀཱཡདུཙྩརིཏསྶ ཨཔརཱཔརཾ ཨཱཡཱུཧནེན སནྣིཊྛཱཔཀཙེཏནཱཡ ཏསྶེཝ པཀཔྤནེ ཀམྨཀྑཡཀརཉཱཎེན ཨཁེཔིཏཏྟཱ ཡཐཱུཔཙིཏཀམྨུནཱ ཙ སམངྒིབྷཱཝསྶ ཝསེན.

ཀམྨནྟི ཨཀུསལཀམྨཾ. ཏསྨིཾཡེཝ ཁཎེཏི ཨཱཡཱུཧནཀྑཎེཡེཝ. ཏསྶཱཏི ཀམྨསམངྒིནོ པུགྒལསྶ སགྒོ ཝཱརིཏོ, ཏཉྩེ ཀམྨཾ ཝིཔཱཀཝཱརཾ ལབྷེཡྻཱཏི ཨདྷིཔྤཱཡོ. སགྒོ ཝཱརིཏོཏི ཙ ནིདསྶནམཏྟཾ. མནུསྶལོཀོཔིསྶ ཝཱརིཏོཝཱཏི. ཨཔརེ པན པུརིམེཧི ཝིཔཱཀཱཝརཎསྶ ཨནུདྡྷཊཏྟཱ ‘‘ཏསྨིཾཡེཝ ཁཎེ’’ཏི ཙ ཨཝིསེསེན ཝུཏྟཏྟཱ ཏཾ དོསཾ པརིཧརིཏུཾ ‘‘ཨཱཡཱུཧིཏཀམྨཾ ནཱམཱ’’ཏིཨཱདིམཱཧ. ཡདཱ ཀམྨཾ ཝིཔཱཀཝཱརཾ ལབྷཏཱིཏི ཨིདཾ ཀཏོཀཱསསྶ ཨཔྤཊིབཱཧིཡཏྟཱ ཝུཏྟཾ ¶ . ཏཐཱ ཧི བྷགཝཱ ཏཏིཡཔཱརཱཛིཀཝཏྠུསྨིཾ (པཱརཱ. ༡༦༢ ཨཱདཡོ) པཊིསལླཱིཡི, ཨིམསྨིཾ སུཏྟེ ‘‘ཀཱཡདུཙྩརིཏསམངྒཱི’’ཏི ཨཱགཏཏྟཱ ཝིཔཱཀཱུཔཊྛཱནསམངྒིཏཱ ན ལབྦྷནྟི.

(དུཏིཡཝགྒཝཎྞནཱ ནིཊྛིཏཱ.)

ཨཊྛཱནཔཱལི༹ཝཎྞནཱཡཾ ཨནུཏྟཱནཏྠདཱིཔནཱ ནིཊྛིཏཱ.

༡༦. ཨེཀདྷམྨཔཱལི༹

(༡༦) ༡. ཨེཀདྷམྨཔཱལི༹-པཋམཝགྒཝཎྞནཱ

༢༩༦. ཨེཀདྷམྨཔཱལི༹ཝཎྞནཱཡཾ ¶ ¶ ཨིདྷ དྷམྨ-སདྡོ སབྷཱཝཏྠོ ‘‘ཀུསལཱ དྷམྨཱ’’ཏིཨཱདཱིསུ ཝིཡཱཏི ཨཱཧ – ‘‘ཨེཀསབྷཱཝོ’’ཏི. ཨེཀནྟེནཱཏི ཨེཀཾསེན, ཨཝསྶནྟི ཨཏྠོ. ཝཊྚེཏི སཾསཱརཝཊྚེ. ནིབྦིནྡནཏྠཱཡཱཏི ཨནབྷིརམནཏྠཱཡ. ཝིརཛྫནཏྠཱཡཱཏི ཨརཛྫནཏྠཱཡ. ཝིརཛྫནཱཡཱཏི པལུཛྫནཱཡ. ཏེནེཝཱཧ – ‘‘ཝིགམཱཡཱ’’ཏི. རཱགཱདཱིནཾ ནིརོདྷཱཡཱཏི མགྒཉཱཎེན རཱགཱདཱིནཾ ནིརོདྷནཏྠཱཡ. མགྒཉཱཎེན ནིརོདྷནཾ ནཱམ ཨཙྩནྟཾ ཨཔྤཝཏྟིཀརཎནྟི ཨཱཧ – ‘‘ཨཔྤཝཏྟིཀརཎཏྠཱཡཱ’’ཏི. ཡཐཱ ཁཱདནཱིཡསྶ མུཁེ ཀཏྭཱ ཁཱདནཾ ནཱམ ཡཱཝདེཝ ཨཛ྄ཛྷོཧརཎཏྠཾ, ཨེཝཾ རཱགཱདཱིནཾ ནིརོདྷནཾ ཝཊྚནིརོདྷནཏྠམེཝཱཏི ཝུཏྟཾ – ‘‘ཝཊྚསྶེཝ ཝཱ ནིརུཛ྄ཛྷནཏྠཱཡཱ’’ཏི. ཡསྨཱ ཀིལེསེསུ ཁཱིཎེསུ ཨིཏརཾ ཝཊྚདྭཡམྤི ཁཱིཎམེཝ ཧོཏི, ཏསྨཱ མཱུལམེཝ གཎྷནྟོ ‘‘ཨུཔསམཱཡཱཏི ཀིལེསཝཱུཔསམནཏྠཱཡཱ’’ཏི ཨཱཧ. སངྑཏདྷམྨཱནཾ ཨབྷིཛཱནནཾ ནཱམ ཏཏྠ ལཀྑཎཏྟཡཱརོཔནམུཁེནེཝཱཏི ཨཱཧ – ‘‘ཨནིཙྩཱདི…པེ… ཨབྷིཛཱནནཏྠཱཡཱ’’ཏི. སམྦུཛ྄ཛྷིཏབྦཱནི ནཱམ ཙཏྟཱརི ཨརིཡསཙྩཱནི ཏབྦིནིམུཏྟསྶ ཉེཡྻསྶ ཨབྷཱཝཏོ. ‘‘ཙཏུནྣཾ སཙྩཱནཾ བུཛ྄ཛྷནཏྠཱཡཱ’’ཏི ཝཏྭཱ ཏཡིདཾ བུཛ྄ཛྷནཾ ཡསྶ ཉཱཎསྶ ཝསེན ཨིཛ྄ཛྷཏི, ཏསྶ ཉཱཎསྶ ཝསེན དསྶེཏུཾ – ‘‘བོདྷི ཝུཙྩཏཱི’’ཏིཨཱདི ཝུཏྟཾ. ཨཔྤཙྩཡནིབྦཱནསྶཱཏི ཨམཏདྷཱཏུཡཱ.

ཨུསྶཱཧཛནནཏྠནྟི ཀམྨཊྛཱནེ ཨབྷིརུཙིཨུཔྤཱདནཱཡ. ཝིསཀཎྚཀོཏི གུལ༹སྶ ཝཱཎིཛསམཉྙཱ. ‘‘ཀིསྨིཉྩི དེསེ དེསབྷཱསཱ’’ཏི ཀེཙི. ཨུཙྪུརསོ སམཔཱཀཔཀྐོ ཙུཎྞཱདཱིཧི མིསྶེཏྭཱ པིཎྜཱིཀཏོ གུལོ༹, ཨཔིཎྜཱིཀཏོ ཕཱཎིཏཾ. པཱཀཝིསེསེན ཁཎྜཁཎྜསེདིཏོ ཁཎྜོ, མལཱབྷཱཝཾ ཨཱཔནྣོ སཀྐརཱ.

སརཏཱིཏི སཏི. ཨནུ ཨནུ སརཏཱིཏི ཨནུསྶཏི, ཨནུ ཨནུརཱུཔཱ སཏཱིཏིཔི ཨནུསྶཏི. དུཝིདྷཾ ཧོཏཱིཏི པཡོཛནཝསེན དུཝིདྷཾ ཧོཏི. ཙིཏྟསམྤཧཾསནཏྠནྟི པསཱདནཱིཡཝཏྠུསྨིཾ པསཱདུཔྤཱདནེན བྷཱཝནཱཙིཏྟསྶ པརིཏོསནཏྠཾ. ཝིཔསྶནཏྠནྟི ཝིཔསྶནཱསུཁཏྠཾ. ཨུཔཙཱརསམཱདྷིནཱ ཧི ཙིཏྟེ སམཱཧིཏེ ཝིཔསྶནཱསུཁེན ཨིཛ྄ཛྷཏི. ཙིཏྟུཔྤཱདོཏི བྷཱཝནཱཝསེན པཝཏྟོ ཙིཏྟུཔྤཱདོ ¶ . ཨུཔཧཉྙཏི པཏིཧཉྙཏི པཊིཀཱུལཏྟཱ ཨཱརམྨཎསྶ. ཏཏོ ¶ ཨེཝ ཨུཀྐཎྛཏི, ཀམྨཊྛཱནཾ རིཉྩཏི, ནིརསྶཱདོ ཧོཏི བྷཱཝནསྶཱདསྶ ཨལབྦྷནཏོ. པསཱིདཏི བུདྡྷགུཎཱནཾ པསཱདནཱིཡཏྟཱ. ཏཐཱ ཙ ཀངྑཱདིཙེཏོཁིལཱབྷཱཝེན ཝིནཱིཝརཎོ ཧོཏི. དམེཏྭཱཏི ནཱིཝརཎནིརཱཀརཎེན ནིབྦིསེཝནཾ ཀཏྭཱ. ཨེཝཾ ཀམྨཊྛཱནནྟརཱནུཡུཉྫནེན ཙིཏྟཔརིདམནསྶ ཨུཔམཾ དསྶེནྟོ, ‘‘ཀཐ’’ནྟིཨཱདིམཱཧ.

ཀོ ཨཡཾ…པེ… ཨནུསྶརཱིཏི ཀོ ཨཡཾ མམ ཨབྦྷནྟརེ ཋཏྭཱ ཨནུསྶརི. པརིགྒཎྷནྟོཏི བཱཧིརཀཔརིཀཔྤིཏསྶ ཨནུསྶརཀསྶ སབྦསོ ཨབྷཱཝདསྶནམེཏཾ. ཏེནཱཧ – ‘‘ན ཨཉྙོ ཀོཙཱི’’ཏི. དིསྭཱཏི པརིཡེསནནཡེན ཝུཏྟཔྤཀཱརཾ ཙིཏྟམེཝ ཨནུསྶརཱིཏི དིསྭཱ སབྦམྤེཏནྟི ཨེཏཾ ཧདཡཝཏྠུཨཱདིཔྤབྷེདཾ སབྦམྤི. ཨིདཉྩ རཱུཔཾ པུརིམཉྩ ཨརཱུཔནྟི ཨིདཾ རུཔྤནསབྷཱཝཏྟཱ རཱུཔཾ, པུརིམཾ ཨཏཾསབྷཱཝཏྟཱ ཨརཱུཔནྟི སངྑེཔཏོ རཱུཔཱརཱུཔཾ ཝཝཏྠཔེཏྭཱ. པཉྩཀྑནྡྷེ ཝཝཏྠཔེཏྭཱཏི ཡོཛནཱ. སམྦྷཱཝིཀཱཏི སམུཊྛཱཔིཀཱ. ཏསྶཱཏི སམུདཡསཙྩསྶ. ནིརོདྷོཏི ནིརོདྷནིམིཏྟཾ. ཨཔྤནཱཝཱརོཏི ཡཐཱརདྡྷཱཡ དེསནཱཡ ནིགམནཝཱརོ.

༢༩༧. ཨེསེཝ ནཡོཏི ཨིམིནཱ ཡྭཱཡཾ ‘‘ཏཾ པནེཏ’’ནྟིཨཱདིནཱ ཨཏྠནཡོ བུདྡྷཱནུསྶཏིཡཾ ཝིབྷཱཝིཏོཏི ཨཏིདིསཏི, སྭཱཡཾ ཨཏིདེསོ པཡོཛནཝསེན ནཝསུཔི ཨནུསྶཏཱིསུ སཱདྷཱརཎཝསེན ཝུཏྟོཔི ཨཱནཱཔཱནསྶཏིཨཱདཱིསུ ཏཱིསུ ཝིཔསྶནཏྠཱནེཝ ཧོནྟཱིཏི ཨིམིནཱ ཨཔཝཱདེན ནིཝཏྟིཏོཏི ཏཱསཾ ཨེཀཔྤཡོཛནཏཱཝ དཊྛབྦཱ. དྷམྨེ ཨནུསྶཏི དྷམྨཱནུསྶཏཱིཏི སམཱསཔདཝིབྷཱགདསྶནམྤི ཝཙནཏྠདསྶནཔཀྑིཀམེཝཱཏི ཨཱཧ – ‘‘ཨཡཾ པནེཏྠ ཝཙནཏྠོ’’ཏི. དྷམྨཾ ཨཱརབྦྷཱཏི ཧི དྷམྨསྶ ཨནུསྶཏིཡཱ ཝིསཡབྷཱཝདསྶནམེཏཾ. ཨེས ནཡོ སེསེསུཔི. སཱིལཾ ཨཱརབྦྷཱཏི ཨཏྟནོ པཱརིསུདྡྷིསཱིལཾ ཨཱརབྦྷ. ཙཱགཾ ཨཱརབྦྷཱཏི ཨཏྟནོ ཙཱགགུཎཾ ཨཱརབྦྷ. དེཝཏཱ ཨཱརབྦྷཱཏི ཨེཏྠ དེཝཏཱགུཎསདིསཏཱཡ ཨཏྟནོ སདྡྷཱསཱིལསུཏཙཱགཔཉྙཱསུ དེཝཏཱསམཉྙཱ. བྷཝཏི ཧི ཏཾསདིསེཔི ཏབྦོཧཱརོ ཡཐཱ ‘‘ཏཱནི ཨོསདྷཱནི, ཨེས བྲཧྨདཏྟོ’’ཏི ཙ. ཏེནཱཧ – ‘‘དེཝཏཱ སཀྑིཊྛཱནེ ཋཔེཏྭཱ’’ཏིཨཱདི. ཏཏྠ དེཝཏཱ སཀྑིཊྛཱནེ ཋཔེཏྭཱཏི ‘‘ཡཐཱརཱུཔཱཡ སདྡྷཱཡ སམནྣཱགཏཱ ཏཱ དེཝཏཱ ཨིཏོ ཙུཏཱ ཏཏྠ ཨུཔཔནྣཱ, མཡ྄ཧམྤི ཏཐཱརཱུཔཱ སདྡྷཱ སཾཝིཛྫཏི. ཡཐཱརཱུཔེན སཱིལེན, ཡཐཱརཱུཔེན ¶ སུཏེན, ཡཐཱརཱུཔེན ཙཱགེན, ཡཐཱརཱུཔཱཡ པཉྙཱཡ སམནྣཱགཏཱ ཏཱ དེཝཏཱ ཨིཏོ ཙུཏཱ ཏཏྠ ཨུཔཔནྣཱ, མཡ྄ཧམྤི ཏཐཱརཱུཔཱ པཉྙཱ སཾཝིཛྫཏཱི’’ཏི ཨེཝཾ དེཝཏཱ སཀྑིཊྛཱནེ ཋཔེཏྭཱ. ཨསྶཱསཔསྶཱསནིམིཏྟཾ ནཱམ ཏཏྠ ལདྡྷབྦཔྤཊིབྷཱགནིམིཏྟཾ. གཏཱཏི ཨཱརམྨཎཀརཎཝསེན ཨུཔགཏཱ པཝཏྟཱ.

ཨུཔསམྨཏི ¶ ཨེཏྠ དུཀྑནྟི ཨུཔསམོ, ནིབྦཱནཾ. ཨཙྩནྟམེཝ ཨེཏྠ ཨུཔསམྨཏི ཝཊྚཏྟཡནྟི ཨཙྩནྟཱུཔསམོ, ནིབྦཱནམེཝ. ཁིཎོཏི ཁེཔེཏི ཀིལེསེཏི ཁཡོ, ཨརིཡམགྒོ. ཏེ ཨེཝ ཨུཔསམེཏཱིཏི ཨུཔསམོ, ཨརིཡམགྒོ ཨེཝ. ཁཡོ ཙ སོ ཨུཔསམོ ཙཱཏི ཁཡཱུཔསམོ. ཏཏྲཙཱཡཾ ཨུཔསམོ དྷམྨོ ཨེཝཱཏི དྷམྨཱནུསྶཏིཡཱ ཨུཔསམཱནུསྶཏི ཨེཀསངྒཧོཏི? སཙྩཾ ཨེཀསངྒཧོ དྷམྨབྷཱཝསཱམཉྙེ ཨདྷིཔྤེཏེ, སངྑཏདྷམྨཏོ པན ཨསངྑཏདྷམྨོ སཱཏིསཡོ ཨུལཱ༹རཏམཔཎཱིཏཏམབྷཱཝཏོཏི དཱིཔེཏུཾ ཝིསུཾ ནཱིཧརིཏྭཱ ཝུཏྟཾ. ཨིམམེཝ ཧི ཝིསེསཾ སནྡྷཱཡ བྷགཝཱ – ‘‘དྷམྨཱནུསྶཏཱི’’ཏི ཝཏྭཱཔི ཨུཔསམཱནུསྶཏིཾ ཨཝོཙ ཨནུསྶརནྟསྶ སཝིསེསཾ སནྟཔཎཱིཏབྷཱཝེན ཨུཔཊྛཱནཏོ. ཨེཝཉྩ ཀཏྭཱ ཨིདྷ ཁཡཱུཔསམགྒཧཎམྤི སམཏྠིཏནྟི དཊྛབྦཾ. ཡཐེཝ ཧི སམཱནེཔི ལོཀུཏྟརདྷམྨབྷཱཝེ ‘‘ཡཱཝཏཱ, བྷིཀྑཝེ, དྷམྨཱ སངྑཏཱ ཝཱ ཨསངྑཏཱ ཝཱ, ཝིརཱགོ ཏེསཾ ཨགྒམཀྑཱཡཏཱི’’ཏིཨཱདིཝཙནཏོ (ཨིཏིཝུ. ༩༠) མགྒཕལདྷམྨེཧི ནིབྦཱནདྷམྨོ སཱཏིསཡོ, ཨེཝཾ ཕལདྷམྨཏོ མགྒདྷམྨོ ཀིལེསཔྤཧཱནེན ཨཙྪརིཡདྷམྨབྷཱཝཏོ, ཏསྨཱ ཨཙྩནྟཱུཔསམེན སདྡྷིཾ ཁཡཱུཔསམོཔི གཧིཏོཏི དཊྛབྦཾ. ཝིཔསྶནཏྠཱནེཝ ཧོནྟཱིཏི ཀསྨཱ ཝུཏྟནྟི? ‘‘ཨེཀནྟནིབྦིདཱཡཱཏིཨཱདིཝཙནཏོ’’ཏི ཀེཙི, ཏཾ ཨཀཱརཎཾ བུདྡྷཱནུསྶཏིཨཱདཱིསུཔི ཏཐཱ དེསནཱཡ ཨཱགཏཏྟཱ. ཡཐཱ པན བུདྡྷཱནུསྶཏིཨཱདཱིནི ཀམྨཊྛཱནཱནི ཝིཔསྶནཏྠཱནི ཧོནྟི, ནིམིཏྟསམྤཧཾསནཏྠཱནིཔི ཧོནྟི, ན ཨེཝམེཏཱནི, ཨེཏཱནི པན ཝིཔསྶནཏྠཱནེཝཱཏི ཏཐཱ ཝུཏྟཾ.

པཋམཝགྒཝཎྞནཱ ནིཊྛིཏཱ.

༡༦. ཨེཀདྷམྨཔཱལི༹

(༡༦) ༢. ཨེཀདྷམྨཔཱལི༹-དུཏིཡཝགྒཝཎྞནཱ

༢༩༨. མིཙྪཱ ¶ པསྶཏི ཏཱཡ, སཡཾ ཝཱ མིཙྪཱ པསྶཏི, མིཙྪཱདསྶནམེཝ ཝཱ ཏནྟི མིཙྪཱདིཊྛི, ཡཾ ཀིཉྩི ཝིཔརཱིཏདསྶནཾ. ཏེནཱཧ – ‘‘དྭཱསཊྛིཝིདྷཱཡཱ’’ཏིཨཱདི ¶ . མིཙྪཱདིཊྛི ཨེཏསྶཱཏི མིཙྪཱདིཊྛིཀོ. ཏསྶ མིཙྪཱདིཊྛིཀསྶ.

༢༩༩. སམྨཱ པསྶཏི ཏཱཡ, སཡཾ ཝཱ སམྨཱ པསྶཏི, སམྨཱདསྶནམཏྟམེཝ ཝཱ ཏནྟི སམྨཱདིཊྛི. པཉྩཝིདྷཱཡཱཏི ཀམྨསྶཀཏཱཛྷཱནཝིཔསྶནཱམགྒཕལཝསེན པཉྩཝིདྷཱཡ. ཏཏྠ ཛྷཱནཙིཏྟུཔྤཱདཔརིཡཱཔནྣཾ ཉཱཎཾ ཛྷཱནསམྨཱདིཊྛི, ཝིཔསྶནཱཉཱཎཾ ཝིཔསྶནཱསམྨཱདིཊྛི.

༣༠༢. པཉྩསུ ཁནྡྷེསུ ‘‘ནིཙྩ’’ནྟིཨཱདིནཱ པཝཏྟོ ཨནུཔཱཡམནསིཀཱརོ.

༣༠༣. ‘‘ཨནིཙྩ’’ནྟིཨཱདིནཱ པཝཏྟོ ཨུཔཱཡམནསིཀཱརོ. ཡཱཝ ནིཡཱམོཀྐམནཱཏི ཡཱཝ མིཙྪཏྟནིཡཱམོཀྐམནཱ. མིཙྪཏྟནིཡཱམོཀྐམནནཡོ པན སཱམཉྙཕལསུཏྟཝཎྞནཱཡཾ ཏཊྚཱིཀཱཡ ཙ ཝུཏྟནཡེནེཝ ཝེདིཏབྦོ.

༣༠༤. ཨཡཾ ཏིཝིདྷཱ སགྒཱཝརཎཱ ཙེཝ ཧོཏཱིཏི ཀམྨཔཐཔྤཏྟིཡཱ མཧཱསཱཝཛྫབྷཱཝཏོ ཝུཏྟཾ. སགྒཱཝརཎཱཡ ཧོནྟིཡཱ མགྒཝིབནྡྷཀབྷཱཝེ ཝཏྟབྦམེཝ ནཏྠཱིཏི ཝུཏྟཾ – ‘‘མགྒཱཝརཎཱ ཙཱ’’ཏི. ‘‘སསྶཏོ ལོཀོ’’ཏིཨཱདིཀཱ དསཝཏྠུཀཱ ཨནྟགྒཱཧིཀཱ མིཙྪཱདིཊྛི. མགྒཱཝརཎཱཝ ཧོཏི ཝིཔརཱིཏདསྶནབྷཱཝཏོ, ན སགྒཱཝརཎཱ ཨཀམྨཔཐཔཏྟིཏོཏི ཨདྷིཔྤཱཡོ. ཨིདཾ པན ཝིདྷཱནཾ པཊིཀྑིཔིཏྭཱཏི ཝིཔརཱིཏདསྶནཉྩ ན མགྒཱཝརཎཉྩཱཏི ཝིརུདྡྷམེཏཾ ཨུདྡྷམྨབྷཱཝཏོ. ཏཐཱ ཧི སཏི ཨཔྤཧཱིནཱཡ ཨེཝ སཀྐཱཡདིཊྛིཡཱ མགྒཱདྷིགམེན བྷཝིཏབྦནྟི ཨདྷིཔྤཱཡེན ཡཐཱཝུཏྟཝིདྷཱནཾ པཊིཀྑིཔིཏྭཱ. ‘‘ན སགྒཱཝརཎཱ’’ཏི སགྒཱུཔཔཏྟིཡཱ ཨཝིབནྡྷཀཏྟཾ ཝདནྟེཧི དིཊྛིཡཱ སགྒཱཝཧཏཱཔི ནཱམ ཨནུཉྙཱཏཱ ཧོཏཱིཏི ཏཾ ཝཱདཾ པཊིཀྑིཔནྟེན ‘‘དིཊྛི ནཱམ སགྒཾ ཨུཔནེཏུཾ སམཏྠཱ ནཱམ ནཏྠཱི’’ཏི ཝུཏྟཾ. ཀསྨཱ? ཨེཀནྟགརུཏརསཱཝཛྫབྷཱཝཏོ. ཏེནཱཧ – ‘‘ཨེཀནྟཾ ནིརཡསྨིཾཡེཝ ནིམུཛྫཱཔེཏཱི’’ཏིཨཱདི.

༣༠༥. ཝཊྚཾ ¶ ཝིདྡྷཾསེཏཱིཏི མགྒསམྨཱདིཊྛི ཀིལེསཝཊྚཾ ཀམྨཝཊྚཉྩ ཝིདྡྷཾསེཏི. ཝིཔཱཀཝཊྚཾ ཀཱ ནུ ཝིདྡྷཾསེཏི ནཱམ. ཨེཝཾ པན ཨཏྟནོ ཀཱརཎེན ཝིདྡྷསྟབྷཝཾ ཕལསམྨཱདིཊྛི པཊིབཱཧཏཱིཏི ཝུཏྟཾ ཨཝསརདཱནཏོ. ཨིཙྩེཏཾ ཀུསལནྟི ཨརཧཏྟཾ པཱཔེཏུཾ སཙེ སཀྐོཏི, ཨེཝམེཏཾ ཝིཔསྶནཱཡ པཊིསནྡྷིཨནཱཀཌྜྷནཾ ¶ ཀུསལཾ ཨནཝཛྫཾ. སཏྟ བྷཝེ དེཏཱིཏི སོཏཱཔཏྟིམགྒསྶ པཙྩཡབྷཱུཏཱ ཝིཔསྶནཱསམྨཱདིཊྛི ཏསྶ པུགྒལསྶ སཏྟ བྷཝེ དེཏི. ཨེཝམཡནྟི པཉྩཝིདྷམྤི སམྨཱདིཊྛིཾ སནྡྷཱཡ ཝུཏྟཾ. ཏེནཱཧ – ‘‘ལོཀིཡལོཀུཏྟརཱ སམྨཱདིཊྛི ཀཐིཏཱ’’ཏི. ཨིམསྨིཾ པནཏྠེཏི ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམཱི’’ཏིཨཱདིནཱ ཝུཏྟེ གཏིམགྒསངྑཱཏེ ཨཏྠེ. ‘‘སུགཏིཾ སགྒཾ ལོཀཾ ཨུཔཔཛྫནྟཱི’’ཏི ཝུཏྟཏྟཱ ‘‘ལོཀིཀཱ བྷཝནིཔྥཱདིཀཱཝ ཝེདིཏབྦཱ’’ཏི ཝུཏྟཾ.

༣༠༦. ཡཐཱདིཊྛཱིཏི ཨཏྠབྱཱཔནིཙྪཱཡཾ ཡཐཱ-སདྡོ, ཏེན ཨུཏྟརཔདཏྠཔྤདྷཱནོ སམཱསོཏི ཨཱཧ – ‘‘ཡཱ ཡཱ དིཊྛཱི’’ཏི. ཏསྶཱ ཏསྶཱ ཨནུརཱུཔནྟི ཏཾཏཾདིཊྛིཨནུརཱུཔནྟི ཨཏྠོ. སམཏྟནྟི ཨནཝསེསཾ. ཏེནཱཧ – ‘‘པརིཔུཎྞ’’ནྟི. སམཱདིནྣནྟི ཨཱདིམཛ྄ཛྷཔརིཡོསཱནེསུ སམཾ ཨེཀསདིསཾ ཀཏྭཱ ཨཱདིནྣཾ གཧིཏཾ ཨནིསྶཊྛཾ. ཏདེཏནྟི ཡདེཏཾ ‘‘ཡཉྩེཝ ཀཱཡཀམྨ’’ནྟིཨཱདིནཱ ཝུཏྟཾ, ཏདེཏཾ ཀཱཡཀམྨཾ. ཡཐཱདིཊྛིཡཾ ཋིཏཀཱཡཀམྨནྟི ཡཱ པན དིཊྛི ‘‘ནཏྠི ཏཏོནིདཱནཾ པཱཔ’’ནྟིཨཱདིནཱ པཝཏྟཱ, ཏསྶཾ དིཊྛིཡཾ ཋིཏཀསྶ ཋིཏམཏྟསྶ ཨནིསྶཊྛསྶ ཏཾདིཊྛིཀསྶ ཀཱཡཀམྨཾ. དིཊྛིསཧཛཱཏཾ ཀཱཡཀམྨནྟི ཏསྶ ཡཐཱདིཊྛིཀསྶ པརེསཾ ཧཏྠམུདྡཱདིནཱ ཝིཉྙཱཔནཀཱལེ ཏཱཡ དིཊྛིཡཱ སཧཛཱཏཾ ཀཱཡཀམྨཾ. ན ཙེཏྠ ཝཙཱིཀམྨཱསངྐཱ ཨུཔྤཱདེཏབྦཱ པཱཎགྷཱཏཱདཱིནཾཡེཝ ཨདྷིཔྤེཏཏྟཱ. དིཊྛཱནུལོམིཀཾ ཀཱཡཀམྨནྟི ཡཐཱ པརེསཾ པཱཀཊཾ ཧོཏི, ཨེཝཾ དིཊྛིཡཱ ཨནུལོམིཀཾ ཀཏྭཱ པཝཏྟིཏཾ ཀཱཡཀམྨཾ. ཏེནཱཧ – ‘‘སམཱདིནྣཾ གཧིཏཾ པརཱམཊྛ’’ནྟི. ཏཏྠཱཏིཨཱདི སུཝིཉྙེཡྻམེཝ. ཨེསེཝ ནཡོཏི ཨིམིནཱ ཡཐཱཝུཏྟཱཡ དིཊྛིཡཱ ཋིཏཝཙཱིཀམྨཾ, དིཊྛིསཧཛཱཏཾ ཝཙཱིཀམྨཾ, དིཊྛཱནུལོམིཀཾ ཝཙཱིཀམྨནྟི ཏིཝིདྷཾ ཧོཏཱིཏི ཨེཝམཱདི ཨཏིདིསཏི. མིཙྪཱདིཊྛིཀསྶཱཏི ཀམྨཔཐཔྤཏྟཱཡ མིཙྪཱདིཊྛིཡཱ མིཙྪཱདིཊྛིཀསྶ. ‘‘ཡཱཡ ཀཱཡཙི མིཙྪཱདིཊྛིཡཱ མིཙྪཱདིཊྛིཀསྶ སཏོ’’ཏི ཨཔརེ.

དིཊྛིསཧཛཱཏཱཏི ཡཐཱཝུཏྟཱཡ དིཊྛིཡཱ སཧཛཱཏཱ ཙེཏནཱ. ཨེས ནཡོ སེསཔདེསུཔི. པཏྠནཱཏི ‘‘ཨིདཾ ནཱམ ཀརེཡྻ’’ནྟི ཏཎྷཱཔཏྠནཱ. ཙེཏནཱཔཏྠནཱནཾ ཝསེནཱཏི ཡཐཱཝུཏྟདིཊྛིགཏནིསྶིཏཙེཏསིཀནིཀཱམནཱནཾ ཝསེན. ཙིཏྟཊྛཔནཱཏི ཙིཏྟསྶ པཎིདཧནཱ. ཕསྶཱདཡོཏི ཙེཏནཱདིཊྛིཏཎྷཱདིཝིནིམུཏྟཱ ཕསྶཱདིདྷམྨཱ. ཡསྨཱ དིཊྛི པཱཔིཀཱ, ཏསྨཱ ཏསྶ པུགྒལསྶ སབྦེ ཏེ དྷམྨཱ ཨནིཊྛཱཡ…པེ… སཾཝཏྟནྟཱིཏི ཡོཛནཱ. པུརིམསྶེཝཱཏི ¶ ཏིཏྟཀཔདསྶེཝ ¶ . ཏིཏྟཀཾ ཀཊུཀནྟི ཙ ཨུབྷཡཾ ཨིདྷ ཨནིཊྛཔརིཡཱཡཾ དཊྛབྦཾ ‘‘པཙྪཱ ཏེ ཀཊུཀཾ བྷཝིསྶཏཱི’’ཏིཨཱདཱིསུ ཝིཡ.

ཨམྦོཡནྟི ཨམྦོ ཨཡཾ. ཏམེཝ པཱུཛནྟི ཏམེཝ པུབྦེ ལདྡྷཔརིསིཉྩནདཱནཱདིཔཱུཛཾ. ནིཝེསརེཏི པཝིསིཾསུ. ཨསཱཏསནྣིཝཱསེནཱཏི ཨམདྷུརནིམྦམཱུལསཾསགྒེན.

ཏཾ པན པཊིཀྑིཔིཏྭཱ…པེ… ཝུཏྟནྟི སབྦཱཔི མིཙྪཱདིཊྛི ཨེཀནྟསཱཝཛྫཏྟཱ ཨནིཊྛཱཡ དུཀྑཱཡ སཾཝཏྟཏཱིཏི ཨདྷིཔྤཱཡེན ཝུཏྟཾ. ཨནནྟརསུཏྟེཏི དསམསུཏྟེ. ཡོཛེཏྭཱ ཝེདིཏབྦཱནཱིཏི ནཝམསུཏྟེ ཝིཡ ཡོཛེཏྭཱ ཝེདིཏབྦཱནི. ཙིཏྟཊྛཔནཱཝ པཏྠནཱཏི ཨེཏྠ པཎིདྷི ཙཱཏི ཝཏྟབྦཾ.

དུཏིཡཝགྒཝཎྞནཱ ནིཊྛིཏཱ.

༡༦. ཨེཀདྷམྨཔཱལི༹

(༡༦) ༣. ཨེཀདྷམྨཔཱལི༹-ཏཏིཡཝགྒཝཎྞནཱ

༣༠༨. ཏཏིཡསྶ ¶ པཋམེ ཨཡཱཐཱཝདིཊྛིཀོཏི ཨནིཙྩཱདིབྷཱཝེསུ དྷམྨེསུ ནིཙྩཱཏིཨཱདིནཱ ཨུཔྤནྣདིཊྛིཀོ. ཏེནཱཧ – ‘‘ཏཱཡེཝ མིཙྪཱདིཊྛིཡཱ ཝིཔརཱིཏདསྶནོ’’ཏི སདྡྷམྨཱཏི ཨེཏྠ སནྟོ པསཏྠོ སུནྡརོ དྷམྨོ, ཡོ མནུསྶདྷམྨོཏིཔི ཝུཙྩཏི. ཏཏོ ཧི མིཙྪཱདིཊྛིཀོ པརཾ ཝུཊྛཱཔེཡྻ, ན ཨརིཡདྷམྨཏོ. ཏེནཱཧ – ‘‘དསཀུསལཀམྨཔཐདྷམྨཏོ’’ཏི. ཨེཝརཱུཔཱཏི ཨིམིནཱ པཱཐིཀཔུཏྟཱདིཀེ སངྒཎྷཱཏི.

༣༠༩. སབྦཉྙུབོདྷིསཏྟོཏི སབྦཉྙུབྷཱགཱི བོདྷིསཏྟོ. ཨཱདི-སདྡེན པཱུརིཏཔཱརམིཀཱ པཙྩེཀབོདྷིསཏྟཱ ཨེཀཙྩསཱཝཀབོདྷིསཏྟཱ ཙ སངྒཡ྄ཧནྟི.

༣༡༠. པརམཱཏི མཧཱསཱཝཛྫབྷཱཝེན པརམཱ, ཨུཀྐཾསགཏཱཏི ཨཏྠོ. ཏེསནྟི ཨཱནནྟརིཡཀམྨཱནཾ. པརིཙྪེདོཏི ཝིཔཱཀཝསེན པརིཡོསཱནཾ. ཝཊྚསྶ མཱུལཾ, ཏཏོ ཏཾསམངྒཱིཔུགྒལོ ཝཊྚསྶ ཁཱཎཱུཏི ཝུཙྩཏི. ཏེནཱཧ – ‘‘ཏཱཡཱ’’ཏིཨཱདི. ཏཉྩེ གཱཧཾ ན ཝིསྶཛྫེཏི, ཏསྶ པུནཔི ཏབྦྷཱཝཱཝཧཏྟཱ ཝུཏྟཾ – ‘‘བྷཝཏོ ཝུཊྛཱནཾ ནཏྠཱི’’ཏི, ན པན སབྦསོ ཝུཊྛཱནསྶ ཨབྷཱཝཏོ. ཡཱདིསེ ཧི པཙྩཡེ པཊིཙྩ ཨཡཾ ཏཾ དསྶནཾ ཨོཀྐནྟོ པུན ཀདཱཙི ཏཔྤཊིཔཀྑེ པཙྩཡེ པཊིཙྩ ཏཏོ སཱིསུཀྑིཔནམསྶ ན ཧོཏཱིཏི ན ¶ ཝཏྟབྦཾ. ཨཀུསལཉྷི ནཱམེཏཾ ཨབལཾ དུབྦལཾ, ན ཀུསལཾ ཝིཡ མཧཱབལཾ. ཨཉྙཐཱ སམྨཏྟནིཡཱམོ ཝིཡ མིཙྪཏྟནིཡཱམོཔི ཨཙྩནྟིཀོ སིཡཱ, ན ཙ མིཙྪཏྟནིཡཱམོ ཨཙྩནྟིཀོ. ཏེནེཝ པཔཉྩསཱུདནིཡཾ (མ. ནི. ཨཊྛ. ༢.༡༠༠) –

‘‘ཀིཾ པནེས ཨེཀསྨིཾཡེཝ ཨཏྟབྷཱཝེ ནིཡཏོ ཧོཏི, ཨུདཱཧུ ཨཉྙསྨིམྤཱིཏི? ཨེཀསྨིཾཡེཝ ནིཡཏོ, ཨཱསེཝནཝསེན བྷཝནྟརེཔི ཏཾ དིཊྛིཾ རོཙེཏི ཨེཝཱ’’ཏི –

ཝུཏྟཾ. ཏཏོཡེཝ ཙ སུམངྒལཝིལཱསིནིཡམྤི (དཱི. ནི. ཨཊྛ. ༡.༡༧༠-༡༧༢) ཝུཏྟཾ –

‘‘ཡེ ¶ ཝཱ པན ཏེསཾ ལདྡྷིཾ གཧེཏྭཱ རཏྟིཊྛཱནེ དིཝཱཊྛཱནེ ནིསིནྣཱ སཛ྄ཛྷཱཡནྟི ཝཱིམཾསནྟི, ཏེསཾ ‘ཀརོཏོ ན ཀརཱིཡཏི པཱཔཾ, ནཏྠི ཧེཏུ, ནཏྠི པཙྩཡོ, མཏོ ཨུཙྪིཛྫཏཱི’ཏི ཏསྨིཾ ཨཱརམྨཎེ མིཙྪཱསཏི སནྟིཊྛཏི, ཙིཏྟཾ ཨེཀགྒཾ ཧོཏི, ཛཝནཱནི ཛཝནྟི. པཋམཛཝནེ སཏེཀིཙྪཱ ཧོནྟི, ཏཐཱ དུཏིཡཱདཱིསུ. སཏྟམེ བུདྡྷཱནམྤི ཨཏེཀིཙྪཱ ཨནིཝཏྟིནོ ཨརིཊྛཀཎྚཀསདིསཱ, ཏཏྠ ཀོཙི ཨེཀཾ དསྶནཾ ཨོཀྐམཏི, ཀོཙི དྭེ, ཀོཙི ཏཱིཎིཔི, ཨེཀསྨིཾ ཨོཀྐནྟེཔི དྭཱིསུ ཏཱིསུ ཨོཀྐནྟེསུཔི ནིཡཏམིཙྪཱདིཊྛིཀོཝ ཧོཏི. པཏྟོ སགྒམགྒཱཝརཎཉྩེཝ མོཀྑམགྒཱཝརཎཉྩ, ཨབྷབྦོ ཏསྶཏྟབྷཱཝསྶ ཨནནྟརཾ སགྒམྤི གནྟུཾ, པགེཝ མོཀྑཾ, ཝཊྚཁཱཎུ ནཱམེས སཏྟོ པཐཝིགོཔཀོ, ཡེབྷུཡྻེན ཨེཝརཱུཔསྶ བྷཝཏོ ཝུཊྛཱནཾ ནཏྠཱི’’ཏི.

པིཊྛིཙཀྐཝཱལེ༹ཏི ཛྷཱཡམཱནཙཀྐཝཱལ༹སྶ པརཏོ ཨེཀསྨིཾ ཨོཀཱསེ. ཡཾ ཛྷཱཡམཱནཱནཾ ཨཛ྄ཛྷཱཡམཱནཱནཉྩ ཙཀྐཝཱལཱ༹ནམནྟརཾ, ཡཏྠ ལོཀནྟརིཀནིརཡསམཉྙཱ, ཏཱདིསེ ཨེཀསྨིཾ ཨོཀཱསེ. པཙྩཏིཡེཝཱཏི ཙཀྐཝཱལེ༹ ཛྷཱཡམཱནེ ཨཛ྄ཛྷཱཡམཱནེཔི ཨཏྟནོ ཀམྨབལེན པཙྩཏིཡེཝ.

༣༡༡. ཙཏུཏྠེ ‘‘མཱ ཁལཱི’’ཏི ཝཙནཾ ཨུཔཱདཱཡ ཨེཝཾལདྡྷནཱམོཏི ཏཾ ཀིར སཀདྡམཱཡ བྷཱུམིཡཱ ཏེལགྷཊཾ གཧེཏྭཱ གཙྪནྟཾ, ‘‘ཏཱཏ, མཱ ཁལཱི’’ཏི སཱམིཀོ ཨཱཧ. སོ པམཱདེན ཁལིཏྭཱ པཏིཏྭཱ སཱམིཀསྶ བྷཡེན པལཱཡིཏུཾ ཨཱརདྡྷོ. སཱམིཀོ ཨུཔདྷཱཝིཏྭཱ སཱཊཀཀཎྞེ ཨགྒཧེསི. སོ སཱཊཀཾ ཚཌྜེཏྭཱ ཨཙེལཀོ ཧུཏྭཱ པལཱཏོ པཎྞེན ཝཱ ཏིཎེན ཝཱ པཊིཙྪཱདེཏུམྤི ཨཛཱནནྟོ ཛཱཏརཱུཔེནེཝ ཨེཀཾ གཱམཾ ¶ པཱཝིསི. མནུསྶཱ ཏཾ དིསྭཱ ‘‘ཨཡཾ སམཎོ ཨརཧཱ ཨཔྤིཙྪོ, ནཏྠི ཨིམིནཱ སདིསོ’’ཏི པཱུཝབྷཏྟཱདཱིནི གཧེཏྭཱ ཨུཔསངྐམིཏྭཱ ‘‘མཡ྄ཧཾ སཱཊཀཾ ཨནིཝཏྠབྷཱཝེན ཨིདཾ ཨུཔྤནྣ’’ནྟི ཏཏོ པཊྛཱཡ སཱཊཀཾ ལབྷིཏྭཱཔི ན ནིཝཱསེསི, ཏདེཝ ཙ པབྦཛྫཾ ཨགྒཧེསི. ཏསྶ སནྟིཀེ ཨཉྙེཔི ཨཉྙེཔཱིཏི པཉྩསཏཱ མནུསྶཱ པབྦཛིཾསུ. ཏཾ སནྡྷཱཡེཏཾ ཝུཏྟཾ – ‘‘མཱ ཁལཱིཏི ཝཙནཾ ཨུཔཱདཱཡ ཨེཝཾལདྡྷནཱམོ ཏིཏྠཀརོ’’ཏི.

སམཱགཏཊྛཱནེཏི དྭིནྣཾ ནདཱིནཾ ཨུདཀཔྤཝཱཧསྶ སནྣིཔཱཏཊྛཱནེ. དྭིནྣཾ ཨུདཀཱནནྟི དྭིནྣཾ ཨུདཀཔྤཝཱཧཱནཾ. ཡཐཱཝུཏྟཊྛཱནེ མཙྪགྒཧཎཏྠཾ ཁིཔིཏབྦཏོ ཁིཔྤཾ, ཀུམིནཾ, ཏདེཝ ཨིདྷ ཁིཔྤནྟི ཝུཏྟཾ. ཏེནཱཧ – ‘‘ཀུམིན’’ནྟི. ཨུཙྪཱུཧཱིཏི ཨུདཀཨུཙྪཱུཧི. ཏུཙྪཔུརིསོ ཨརིཡདྷམྨཱབྷཱཝཏོ. ཛྷཱནམཏྟམྤི ¶ ཧི ཏསྶ ནཏྠེཝ, ཀུཏོ ཨརིཡམགྒོ. མནུསྶཁིཔྤཾ མཉྙེཏི མནུསྶཱ པཏིཏྭཱ བྱསནཔྤཏྟིཨཏྠཾ ཨོཊྚིཏཾ ཀུམིནཾ ཝིཡ. ཏེནཱཧ – ‘‘མཧཱཛནསྶཱ’’ཏིཨཱདི.

༣༡༢. པཉྩམཱདཱིསུ བཱཧིརཀསཱསནནྟི ཨཝིསེསེན ཝུཏྟཾ – ཏསྶ སབྦསྶཔི ཨནིཡྻཱནིཀཏྟཱ སཏྠུཔཊིཉྙསྶཔི ཨསབྦཉྙུབྷཱཝཏོ. ཏེནཱཧ – ‘‘ཏཏྠ ཧཱི’’ཏིཨཱདི. གཎོཏི སཱཝཀགཎོ. ཏཐཱབྷཱཝཱཡཱཏི ཨཱཙརིཡེན ཝུཏྟཱཀཱརཏཱཡ སམངྒིབྷཱཝཏྠཾ. ཛངྒྷསཏནྟི བཧཱུ ཨནེཀེ སཏྟེ. སམཀམེཝ ཨཀུསལཾ པཱཔུཎཱཏཱིཏི ཏེསཾ སབྦེསཾ ཨེཀཛ྄ཛྷཾ སམཱདཔནེཔི ཏེསཾ ཨཀུསལེན སམཀམེཝ ཨཀུསལཾ པཱཔུཎཱཏི ཨེཀཛ྄ཛྷཾ བཧཱུནཾ སམཱདཔནེཔི ཏཐཱ ཨུསྶཧནསྶ བལཝབྷཱཝཏོ. ཝིསུཾ ཝིསུཾ སམཱདཔནེ ཝཏྟབྦམེཝ ནཏྠི. ཡཐཱ ཧི དྷམྨཙརིཡཱཡཾ སམཀམེཝཱཏི ཝཏྟབྦཱ ཀལྱཱཎམིཏྟཏཱ, ཨེཝཾ ཨདྷམྨཙརིཡཱཡཾ ཨཀལྱཱཎམིཏྟཏཱཏི.

༣༡༣. སུཊྛུ ཨཀྑཱཏེཏི ཨེཀནྟཏོ ནིཡྻཱནིཀབྷཱཝེན ཨཀྑཱཏེ. སཏྠཱ ཙ སབྦཉྙཱུ ཧོཏཱིཏི ཨསབྦཉྙུནོ ནིཡྻཱནིཀབྷཱཝེན ཀཐེཏུཾ ཨསཀྐུཎེཡྻཏྟཱ. དྷམྨོ ཙ སྭཱཀྑཱཏོ སམྨཱསམྦུདྡྷཔྤཝེདིཏཏྟཱ. གཎོ ཙ སུཔྤཊིཔནྣོ སཏྠཱརཱ སུཝིནཱིཏཏྟཱ. སམཱདཔཀོ ཧཱིཏིཨཱདི སུཔྤཊིཔཏྟིཡཱ ནིདསྶནཾ དཊྛབྦཾ.

༣༡༤. པམཱཎཾ ཛཱནིཏབྦནྟི ‘‘ཨཡཾ ཨེཏྟཀེན ཡཱཔེཏི, ཨིམསྶ ཨེཏྟཀཾ དཱཏུཾ ཡུཏྟ’’ནྟི ཨེཝཾ པམཱཎཾ ཛཱནིཏབྦཾ. ཨཏིརེཀེ…པེ… ནིབྦཱནསམྤཏྟི ཝཱ ནཏྠི དུརཀྑཱཏཏྟཱ དྷམྨསྶ. ཏསྶཱཏི པཊིགྒཱཧཀསྶ. ཨཔྤིཙྪཔཊིཔདཱ ནཱམ ནཏྠི དུརཀྑཱཏེ དྷམྨཝིནཡེཏི ཨདྷིཔྤཱཡོ.

༣༡༥. དཱཡཀསྶ ¶ ཝསོ ནཱམ ཨུལཱ༹རུལཱ༹རཏཱབྷེདོ ཨཛ྄ཛྷཱསཡོ. དེཡྻདྷམྨསྶ པན ཐོཀབཧུཏཱཝ དེཡྻདྷམྨསྶ ཝསོ ནཱམ. ཨཏྟནོ ཐཱམོཏི ཡཱཔནཔྤམཱཎཾ. ཡདི ཧཱིཏིཨཱདི ‘‘ཀཐ’’ནྟིཨཱདིནཱ སངྑེཔཏོ ཝུཏྟསྶ ཨཏྠསྶ ཝིཝརཎཾ. ཨནུཔྤནྣསྶཱཏི ཨནུཔྤནྣོ ཨསྶ པུགྒལསྶ. ཙཀྑུབྷཱུཏོ ཧོཏཱིཏི མཧཱཛནསྶ ཙཀྑུ ཝིཡ ཧོཏི. སཱསནཾ ཙིརཊྛིཏིཏཾ ཀརོཏཱིཏི ཨནུཔྤནྣལཱབྷུཔྤཱདནེན མཧཱཛནསྶ པསཱདུཔྤཱདནེན ཙ ཙིརཊྛིཏིཀཾ ཀརོཏི.

ཀུཊུམྦརིཡཝིཧཱརེཏི ཀུཊུམྦརིཡགཱམསནྣིསྶིཏཝིཧཱརེ. བྷུཉྫནཏྠཱཡཱཏི ཏསྨིཾཡེཝ གེཧེ ནིསཱིདིཏྭཱ བྷུཉྫནཏྠཱཡ. གཧེཏྭཱ གམནཏྠཱཡཱཏི གེཧཏོ བཧི གཧེཏྭཱ གམནཏྠཱཡ. དྷུརབྷཏྟཱནཱིཏི ནིཙྩབྷཏྟཱནི. ཙཱུལུ༹པཊྛཱཀནྟི ཝེཡྻཱཝཙྩཀརཾ. ཝཱིམཾསིཏྭཱཏི ཡཐཱ ཨུདྡིསྶ ཀཏཾ ན ཧོཏི, ཨེཝཾ ཝཱིམཾསིཏྭཱ ¶ . མཧཱཛནོ ཨཔྤིཙྪོ བྷཝིཏུཾ མཉྙཏཱིཏི མཧཱཛནོ སཡཾ ཨཔྤིཙྪོ བྷཝིཏུཾ མཉྙཏི དིཊྛཱནུགཏིཾ ཨཱཔཛྫནེན. མཧཱཛནསྶཱཏི བཧུཛནསྶ. ཨཝཏྠརིཏྭཱཏི ཝིཏྠཱརིཀཾ ཀཏྭཱ.

༣༡༦. པཉྩཱཏཔཏཔྤནཾ ཙཏཱུསུ པསྶེསུ ཨགྒིསནྟཱཔསྶ ཨུཔརི སཱུརིཡསནྟཱཔསྶ ཙ ཏཔྤནཾ, ཏཉྩ ཁོ གིམྷཀཱལེ. ཚིནྣཔྤཔཱཏཔབྦཏསིཁརཏོ པཏནཾ མརུཔྤཔཱཏཔཏནཾ. པུབྦཎྷཱདཱིསུ ཨཱདིཙྩཱབྷིམུཁཱཝཊྚནཾ ཨཱདིཙྩཱནུཔརིཝཏྟནཾ.

༣༡༧. ཨཡམྤཱིཏི སྭཱཀྑཱཏེ དྷམྨཝིནཡེ ཀུསཱིཏོཔི. སཱམཉྙནྟི ཏཔཙརཎཾ. དུཔྤརཱམཊྛནྟི མིཙྪཱཙརིཏཾ སཾཀིལིཊྛཾ. ནིརཡཱཡུཔཀཌྜྷཏཱིཏི ནིརཡདུཀྑཱཡ ནཾ ཀཌྜྷཏི.

༣༡༨. ཝུཏྟཔྤཀཱརེཏི པཉྩཱཏཔཏཔྤནཱདིཀེ ཝུཏྟཔྤཀཱརེ.

༣༡༩. ཨེཝནྟི ཝུཏྟཔྤཀཱརཱཡ ཙིཏྟཔྤསཱདཝ྄ཧཡསུཔྤཊིཔཏྟིཡཱ. ཏེན སམཎདྷམྨཀརཎསུཁཉྩ སངྒཎྷཱཏི.

༣༢༠. ནཝཀནིཔཱཏེཏི ཨིམསྨིཾཡེཝ ཨངྒུཏྟརནིཀཱཡེ ཝཀྑམཱནཾ ནཝཀནིཔཱཏཾ སནྡྷཱཡཱཧ. ནཝ པུགྒལཱཏི སཏྟཀྑཏྟུཔརམཀོལཾཀོལཱདཡོ ནཝ པུགྒལཱ. སབྦཏྠཱཏི ཨིམསྨིཾ སུཏྟེ ཝུཏྟཱཝསིཊྛེསུ སབྦེསུ སུཏྟེསུ.

ཏཏིཡཝགྒཝཎྞནཱ ནིཊྛིཏཱ.

༡༦. ཨེཀདྷམྨཔཱལི༹

(༡༦) ༤. ཨེཀདྷམྨཔཱལི༹-ཙཏུཏྠཝགྒཝཎྞནཱ

༣༢༢. ཙཏུཏྠསྶ ¶ ¶ པཋམེ སཉྙཱཎབྷཱུཏཱཏི ཨུཔལཀྑཎབྷཱུཏཱ. པཉྩདསཡོཛནཱཝཊྚཀྑནྡྷཱཏི པཉྩདསཡོཛནཀྑནྡྷཔརིཀྑེཔཱ. ཡཐཱ ཙཱཏི ཙ-སདྡེན ཀདམྦརུཀྑཱདཱིནཾ ཀཔྤཊྛཱཡིབྷཱཝཾ ཝིཡ ཡོཛནསཏུབྦེདྷཱདིབྷཱཝཾ སམུཙྩིནོཏི, ན པན ཛམྦུཡཱ ཛམྦུདཱིཔསྶ ཝིཡ ཏེཧི ཨཔརགོཡཱནཱདཱིནཾ སཉྙཱཎབྷཱཝཾ. རཱམཎེཡྻཀནྟི རམཎཱིཡབྷཱཝཾ. སེསཔདེསཱུཏི ཝནརཱམཎེཡྻཀཱདིཔདེསུ. ཨུགྒཏཾ ཀཱུལཾ ཨུསྶིཏབྷཱཝོ ཨེཏསྶཱཏི ཨུཀྐཱུལཾ, ཝིགཏཾ ཨཔགཏཾ ཀཱུལཾ ཨེཏསྶཱཏི ཝིཀཱུལནྟི ཨཱཧ – ‘‘ཨུནྣཏཊྛཱནཾ ནིནྣཊྛཱན’’ནྟི ཙ. ནནྡིཡཱཝཊྚམཙྪཔིཊྛེནེཝཱཏི ཀུཛྫཀཀུལིསཀམཙྪསངྒྷཱཏཔིཊྛེནེཝ.

༣༢༣. དུཏིཡཱདཱིསུ ཙཏྟཱརོ ཨཔཱཡཱ ཨཉྙཏྲ མནུསྶེཧཱིཏི ཨདྷིཔྤེཏཱ, ན དེཝཱ ཨཉྙཏྲ མནུསྶེཧཱིཏི ཧཱིནཱཡ ཛཱཏིཡཱ ཨདྷིཔྤེཏཏྟཱ. ཨུཔཱདཱཡུཔཱདཱཡཱཔི མཛ྄ཛྷིམདེསོ ལབྦྷཏི, ཡཏྠ གཏི བྷིཀྑཱུནཾ བྷིཀྑུནཱིནཾ ཨུཔཱསཀཱནཾ ཨུཔཱསིཀཱནཾ ཨཉྙེསམྤི ཀམྨཝཱདིཀིརིཡཝཱདིཝིཉྙུཛཱཏིཀཱནཾ, ཡོ པཏིརཱུཔདེསོཏི ཝུཙྩཏི. ཏེནཱཧ – ‘‘སཀལོཔི ཧཱི’’ཏིཨཱདི.

༣༢༤. ཨེལཱ༹ཏི དོསོ. ཏེནཱཧ – ‘‘ནིདྡོསམུཁཱཏི ཨཏྠོ’’ཏི.

༣༢༦. ཏཐཱགཏསྶ གུཎེ ཛཱནིཏྭཱ ཙཀྑུནཱཔི དསྶནཾ དསྶནམེཝ, ཨཛཱནིཏྭཱ པན དསྶནཾ ཏིརཙྪཱནགཏཱནམྤི ཧོཏིཡེཝཱཏི ཨཱཧ – ‘‘ཡེ ཏཐཱགཏསྶ གུཎེ ཛཱནིཏྭཱ’’ཏིཨཱདི.

༣༢༧. པཀཱསེཏྭཱ ཀཐིཏནྟི སཙྩཱནི པཀཱསེཏྭཱ ཀཐིཏཾ.

༣༢༨. སུཏཱནཾ དྷམྨཱནཾ ཨསམྨོསོ དྷཱརཎནྟི ཨཱཧ – ‘‘དྷཱརེནྟཱིཏི ན པམྨུསྶནྟཱི’’ཏི.

༣༢༩. ཨཏྠཱནཏྠཾ ཨུཔཔརིཀྑནྟཱིཏི ‘‘ཨཡཾ ཨིམིསྶཱ པཱལི༹ཡཱ ཨཏྠོ, ཨཡཾ ན ཨཏྠོ’’ཏི ¶ ཨཏྠཱནཏྠཾ ཨུཔཔརིཀྑནྟི. ཨནཏྠཔརིཧཱརེན ཧི ཨཏྠགྒཧཎཾ ཡཐཱ ཨདྷམྨཔརིཝཛྫནེན དྷམྨཔྤཊིཔཏྟི.

༣༣༠. ཨནུལོམཔཊིཔདནྟི ནིབྦཱནསྶ ཨནུལོམིཀཾ པཊིཔདཾ.

༣༣༡. སཾཝེགཛནཀེསུ ¶ ཀཱརཎེསཱུཏི སཾཝེགཛནཀེསུ ཛཱཏིཨཱདཱིསུ ཀཱརཎེསུ. སཾཝེཛནཱིཡེསུ ཋཱནེསུ སཧོཏྟཔྤཉཱཎཾ སཾཝེགོ.

༣༣༢. ཨུཔཱཡེནཱཏི ཡེན ཨུཔཱཡེན ཝཊྚཱུཔཙྪེདོ, ཏེན ཨུཔཱཡེན. པདྷཱནཝཱིརིཡཾ ཀརོནྟཱིཏི སམྨཔྤདྷཱནསངྑཱཏཾ ཝཱིརིཡཾ ཀརོནྟི ཨུཔྤཱདེནྟི.

༣༣༣. ཝཝསྶཛཱིཡནྟི ཝིསྶཛྫཱིཡནྟི ཨེཏྠ སངྑཱརཱཏི ཝཝསྶགྒོ, ཨསངྑཏཱ དྷཱཏཱུཏི ཨཱཧ – ‘‘ཝཝསྶགྒོ ཝུཙྩཏི ནིབྦཱན’’ནྟི.

༣༣༤. ཨུཏྟམནྣཱནནྟི ཨུཏྟམཱནཾ པཉྩནྣཾ བྷོཛནཱནཾ. ཨུཏྟམརསཱནནྟི ཨུཏྟམཱནཾ རསཱནཾ. ཨུཉྪཱཙཱརེནཱཏི ཨུཉྪཱཙརིཡཱཡ ཀསྶཙི ཨཔརིགྒཧབྷཱུཏསྶ ཀིཉྩི ཨཡཱཙིཏྭཱ གཧཎཾ ཨུཉྪཱཙཱརོ. ཨེཏྠ ཙཱཏིཨཱདིནཱ ཨནྣཱདཱིནཾ ཨགྒབྷཱཝོ ནཱམ མནཱཔཔརམོ ཨིཙྪིཏཀྑཎལཱབྷོ, ན ཏེསཾ ལཱབྷིཏཱམཏྟནྟི དསྶེཏི. པཊིལབྷནྟཱིཏི དེནྟི པཎཱིཏབྷཱཝེན. བྷཏྟསྶ ཨེཀཔཱཏཱིཏི ཨེཀཔཱཏིཔཱུརཾ བྷཏྟཾ. ཨིདཾ ཀིཾ ནཱམཱཏི ‘‘ཨིདཾ ཨནྣགྒརསགྒཾ ནཱམ ཧོཏི, ན ཧོཏཱི’’ཏི པུཙྪཏི. ཨུཉྪེན ཀཔཱལཱབྷཏེནཱཏི མིསྶཀབྷཏྟེན. ཡཱཔེནྟེཏི ཡཱཔནསཱིསེན ཡཱཔནཧེཏུཾ བྷཏྟཾ ཝདཏི. ཨུཔཱདཱཡ ཨགྒརསཾ ནཱམཱཏི ཏཾ ཏཾ ཨུཔཱདཱཡུཔཱདཱཡ ཨནྣགྒརསགྒཾ དཊྛབྦནྟི དསྶེཏི. ཙཀྐཝཏྟིཨཱཧཱརཏོ ཧི ཙཱཏུམཧཱརཱཛིཀཱནཾ ཨཱཧཱརོ ཨགྒོཏི ཨེཝཾ ཡཱཝ པརནིམྨིཏཝསཝཏྟིདེཝཱ ནེཏབྦཾ.

༣༣༥. ཨཏྠརསོ ནཱམ ཙཏྟཱརི སཱམཉྙཕལཱནི ‘‘ཨརིཡམགྒཱནཾ ཕལབྷཱུཏོ རསོ’’ཏི ཀཏྭཱ. དྷམྨརསོ ནཱམ ཙཏྟཱརོ མགྒཱ ‘‘སཱམཉྙཕལསྶ ཧེཏུབྷཱུཏོ རསོ’’ཏི ཀཏྭཱ ཝིམུཏྟིརསོ ནཱམ ཨམཏཾ ནིབྦཱནཾ ‘‘སབྦསངྑཱརསམཐོ’’ཏི ཀཏྭཱ.

ཙཏུཏྠཝགྒཝཎྞནཱ ནིཊྛིཏཱ.

ཛམྦུདཱིཔཔེཡྻཱལོ ནིཊྛིཏོ.

༡༧. པསཱདཀརདྷམྨཝགྒཝཎྞནཱ

༣༦༦. ཨདྡྷམིདནྟི ¶ སནྡྷིཝསེན པཱལི༹ཡཾ རསྶཾ ཀཏྭཱ ཝུཏྟཾ, མ-ཀཱརོ པདསནྡྷིཀརོཏི ཨཱཧ – ‘‘ཨདྡྷཱ ཨིད’’ནྟི. ཨེཀཾསོ ཨེསཱཏི ཨེཀཾསོ ཧེཏུ ¶ ཨེས ལཱབྷཱནཾ. པཱཔཀཾ ནཱམཱཏི ཨཔྤཀམྤི པཱཔཾ ནཱམ བྱཏྟཾ ཨེཀཾསེན ན ཀརོཏི. ཏཐསྶཱཏི ཏཐཱ སམྨཱཔཊིཔཛྫམཱནསྶ ཨསྶ. ཨཱརཉྙིཀཏྟཾ…པེ… ཏེཙཱིཝརིཀཏྟནྟི ཨིམེསཾ དྷུཏདྷམྨཱནཾ གཧཎེནེཝ ཨིཏརེསམྤི ཏཾསབྷཱགཱནཾ གཧིཏབྷཱཝོ དཊྛབྦོ. ཐཱཝརཔྤཏྟབྷཱཝོཏི སཱསནེ ཐིརབྷཱཝཔྤཏྟི ཐེརབྷཱཝོ. ཨཱཀཔྤསྶ སམྤཏྟཱིཏི ‘‘ཨཉྙོ མེ ཨཱཀཔྤོ ཀརཎཱིཡོ’’ཏི ཨེཝཾ ཝུཏྟསྶ ཨཱཀཔྤསྶ སམྤཏྟི. ཀོལཔུཏྟཱིཏི ཀོལཔུཏྟིཡནྟི ཨཱཧ – ‘‘ཀུལཔུཏྟབྷཱཝོ’’ཏི. སམྤནྣརཱུཔཏཱཏི ཨུཔདྷིསམྤདཱ. ཝཙནཀིརིཡཱཡཱཏི ཝཙནཔྤཡོགསྶ མདྷུརབྷཱཝོ མཉྫུསྶརཏཱ. ཏེནསྶ ལཱབྷོ ཨུཔྤཛྫཏཱིཏི ཨིདཾ ན ལཱབྷུཔྤཱདནཱུཔཱཡདསྶནཔརཾ, ཨཐ ཁོ ཨེཝཾ སམྨཱཔཊིཔཛྫམཱནསྶ ཨནིཙྪནྟསྶེཝ ལཱབྷོ ཨུཔྤཛྫཏཱིཏི ལཱབྷསྶ ཨབྱབྷིཙཱརཧེཏུདསྶནཔརཾ དཊྛབྦཾ. ཡཐཱཧ –

‘‘ཨཱཀངྑེཡྻ ཙེ, བྷིཀྑཝེ, བྷིཀྑུ ལཱབྷཱི ཨསྶཾ ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱནནྟི, སཱིལེསྭེཝསྶ པརིཔཱུརཀཱརཱི’’ཏི (མ. ནི. ༡.༦༥).

པསཱདཀརདྷམྨཝགྒཝཎྞནཱ ནིཊྛིཏཱ.

༡༨. ཨཔརཨཙྪརཱསངྒྷཱཏཝགྒཝཎྞནཱ

༣༨༢. ཨིདམྤི ¶ སུཏྟནྟི ཨེཏྠ པི-སདྡོ ཧེཊྛཱ ཝུཏྟཙཱུལ༹ཙྪརཱསངྒྷཱཏསུཏྟཾ སམྤིཎྜེཏི. ཙཱུལ༹ཙྪརཱསངྒྷཱཏསུཏྟེ ཨཔྤནཾ ཨཔྤཏྟཱཡ མེཏྟཱཡ ཏཱཝམཧནྟོ ཝིཔཱཀོ དསྶིཏོ, ཀིམངྒཾ པན ཨིམིསྶཱ ཨཔྤནཱཔྤཏྟཱཡ མེཏྟཱཡཱཏི དསྶེཏུཾ – ‘‘ཨཔྤནཱཔྤཏྟཱཡ ཧཱི’’ཏིཨཱདིམཱཧ. ཝིཔཱཀཀཐཱཡེཝ ནཏྠཱིཏི ཝིཔཱཀེ ཀཐཱཡེཝ ནཏྠི, ཨཡམེཝ ཝཱ པཱཋོ. གཎནཱནུཔུབྦཏཱཏི གཎནཱནུཔུབྦཏཱཡ. པཋམཾ ཨུཔྤནྣནྟིཔི པཋམཾ, པཋམཾ སམཱཔཛྫཏཱིཏི ཨིདཾ པན ན ཨེཀནྟལཀྑཎཾ. ཙིཎྞཝསཱིབྷཱཝོ ཧི ཨཊྛསམཱཔཏྟིལཱབྷཱི ཨཱདིཏོ པཊྛཱཡ མཏྠཀཾ པཱཔེནྟོཔི སམཱཔཛྫིཏུཾ སཀྐོཏི, མཏྠཀཏོ པཊྛཱཡ ཨཱདིཾ པཱཔེནྟོཔི, ཨནྟརནྟརཱ ཨོཀྐནྟོཔི སམཱཔཛྫིཏུཾ སཀྐོཏི ཨེཝ. པུབྦུཔྤཏྟིཡཊྛེན པན པཋམཾ ནཱམ ཧོཏི. ཝིབྷངྒེཏི ཛྷཱནཝིབྷངྒེ. ཝིཔསྶནཾ ཀཡིརམཱནཾ ལཀྑཎཱུཔནིཛ྄ཛྷཱནཀིཙྩཾ མགྒེན སིཛ྄ཛྷཏི ཏགྒཏསམྨོཧཝིདྡྷཾསནཏོ ¶ . ཨཔིཙ ཝིཔསྶནཱཡ ལཀྑཎཱུཔནིཛ྄ཛྷཱནཾ མགྒེན ཨུཔྤནྣེན སིཛ྄ཛྷཏི ཨིཏརཐཱ པརིཝཏྟནཏོ, ཏསྨཱ མགྒོ ལཀྑཎཱུཔནིཛ྄ཛྷཱནཾ, ན ཨནིཙྩཱདིལཀྑཎཱནཾ ཨཱརམྨཎཀརཎཏོ. ཡཐཱ ཕལཾ ནིབྦཱནསྶ ཨསངྑཏལཀྑཎཾ ཨཱརམྨཎཀརཎཝསེན ཨུཔནིཛ྄ཛྷཱཡཏི, ཨེཝཾ མགྒོཔི. ཨེཝམྤིསྶ ལཀྑཎཱུཔནིཛ྄ཛྷཱནཏཾ ཝེདིཏབྦཾ. ཝཏྟབྦམེཝ ནཏྠི ཨརིཏྟཛ྄ཛྷཱནཏཱཡ. སེསཾ ཝིསེསཾ, ཨརིཏྟཛ྄ཛྷཱནཱ ཨེཝཱཏི ཨཏྠོ.

༣༨༦-༣༨༧. ཧིཏཕརཎནྟི སཏྟེསུ ཧིཏཱནུརཱུཔཾ ཛྷཱནསྶ ཕརིཏྭཱ པཝཏྟནཾ. ཙེཏོཔཊིཔཀྑཏོ ཝིམུཙྩཏི ཨེཏཱཡཱཏི ཙེཏོཝིམུཏྟི, ཨཔྤནཱཔྤཏྟཱ མེཏྟཱ. ཏེནཱཧ – ‘‘ཨིདྷཱ’’ཏིཨཱདི. ཨེསེཝ ནཡོཏི ཨིམིནཱ ཀརུཎཱདཱིནམྤི ཨཔྤནཱཔྤཏྟཏཾ ཨཏིདིསཏི. ཝཊྚཾ ཧོནྟི ཀམྨཝཊྚབྷཱཝཏོ. ཝཊྚཔཱདཱ ཧོནྟཱིཏི ཝིཔཱཀཝཊྚསྶ ཀཱརཎཾ ཧོནྟི.

༣༩༠. ཨཛ྄ཛྷཏྟཔརིཀམྨཝསེནཱཏི ཨཏྟནོ ཀེསཱདཱིསུ པརིཀམྨཀརཎཝསེན. ཨཊྛཱརསཝིདྷེཏི ཨཊྛཱརསཔྤབྷེདེ. ཀཱཡེཏི རཱུཔཀཱཡེ. རཱུཔཀཱཡོ ཧི ཨིདྷ ཨངྒཔཙྩངྒཱནཾ ཀེསཱདཱིནཉྩ དྷམྨཱནཾ སམཱུཧཊྛེན ཧཏྠིཀཱཡརཐཀཱཡཱདཡོ ཝིཡ ཀཱཡོཏི ཨདྷིཔྤེཏོ. སམཱུཧཝིསཡཏཱཡ ཙསྶ ཀཱཡསདྡསྶ སམུདཱཡཱུཔཱདནཏཱཡ ཙ ཨསུབྷཱཀཱརསྶ ‘‘ཀཱཡེ’’ཏི ཨེཀཝཙནཾ. ཏཐཱ ཨཱརམྨཎཱདིཝིབྷཱགེན ཨནེཀབྷེདབྷིནྣམྤི ཙིཏྟཾ ཙིཏྟབྷཱཝསཱམཉྙེན ཨེཀཛ྄ཛྷཾ གཧེཏྭཱ ‘‘ཙིཏྟེ’’ཏི ཨེཀཝཙནཾ ཀཏཾ. ཀཱཡཱནུཔསྶཱིཏི ཨིམསྶ ཨཏྠཾ དསྶེཏུཾ – ‘‘ཏམེཝ ཀཱཡཾ པཉྙཱཡ ཨནུཔསྶནྟོ’’ཏི ཨཱཧ. ཏམེཝ ཀཱཡནྟི ཙ ¶ ཨཝདྷཱརཎེན ཝེདནཱདིཨནུཔསྶནཾ ནིཝཏྟེཏི. ཏེན ཙ པུན ཀཱཡགྒཧཎསྶ པཡོཛནཾ སཱུཙིཏནྟི དཊྛབྦཾ. ‘‘ཀཱཡེ’’ཏི ཧི ཝཏྭཱཔི པུན ‘‘ཀཱཡཱནུཔསྶཱི’’ཏི དུཏིཡཾ ཀཱཡགྒཧཎཾ ཨསམྨིསྶཏོ ཝཝཏྠཱནགྷནཝིནིབྦྷོགཱདིདསྶནཏྠཾ ཀཏཾ. ཏེན ཝེདནཱདཡོཔི ཨེཏྠ སིཏཱ, ཨེཏྠ པཊིབདྡྷཱཏི ཀཱཡཝེདནཱདིཨནུཔསྶནཔྤསངྒེཔི ཨཱཔནྣེ ན ཀཱཡེ ཝེདནཱནུཔསྶཱི ཙིཏྟཱནུཔསྶཱི དྷམྨཱནུཔསྶཱི ཝཱ. ཨཐ ཁོ ཀཱཡཱནུཔསྶཱིཡེཝཱཏི ཀཱཡསངྑཱཏཝཏྠུསྨིཾ ཀཱཡཱནུཔསྶནཱཀཱརསྶེཝ དསྶནེན ཨསམྨིསྶཏོ ཝཝཏྠཱནཾ དསྶིཏཾ ཧོཏི. ཏཐཱ ན ཀཱཡེ ཨངྒཔཙྩངྒཝིནིམུཏྟཨེཀདྷམྨཱནུཔསྶཱི, ནཱཔི ཀེསལོམཱདིཝིནིམུཏྟཨིཏྠིཔུརིསཱནུཔསྶཱི. ཡོཔི ཙེཏྠ ཀེསལོམཱདིཀོ བྷཱུཏུཔཱདཱཡསམཱུཧསངྑཱཏོ ཀཱཡོ, ཀཏྠཔི ན བྷཱུཏུཔཱདཱཡཝིནིམུཏྟཨེཀདྷམྨཱནུཔསྶཱི, ཨཐ ཁོ རཐསམྦྷཱརཱནུཔསྶཀོ ཝིཡ ཨངྒཔཙྩངྒསམཱུཧཱནུཔསྶཱི ¶ , ནཱགརཱཝཡཝཱནུཔསྶཀོ ཝིཡ ཀེསལོམཱདིསམཱུཧཱནུཔསྶཱི, ཀདལིཀྑནྡྷཔཏྟཝཊྚིཝིནིབྦྷུཛྫཀོ རིཏྟམུཊྛིཝིནིཝེཋཀོ ཝིཡ ཙ བྷཱུཏུཔཱདཱཡསམཱུཧཱནུཔསྶཱིཡེཝཱཏི ནཱནཔྤཀཱརཏོ སམཱུཧཝསེནེཝ ཀཱཡསངྑཱཏསྶ ཝཏྠུནོ དསྶནེན གྷནཝིནིབྦྷོགོ དསྶིཏོ ཧོཏི. ན ཧེཏྠ ཡཐཱཝུཏྟསམཱུཧཝིནིམུཏྟོ ཀཱཡོ ཝཱ ཨིཏྠཱི ཝཱ པུརིསོ ཝཱ ཨཉྙོ ཝཱ ཀོཙི དྷམྨོ དིསྶཏི, ཡཐཱཝུཏྟདྷམྨསམཱུཧམཏྟེཡེཝ པན ཏཐཱ ཏཐཱ སཏྟཱ མིཙྪཱབྷིནིཝེསཾ ཀརོནྟི.

ཨཊྛཱརསཝིདྷེནཱཏི ཨཊྛཱརསཝིདྷཱ. སཏིཔཊྛཱནབྷཱཝཀསྶཱཏི སཏིཔཊྛཱནབྷཱཝཾ བྷཱཝེནྟསྶ. ཏཱིསུ བྷཝེསུ ཀིལེསེ ཨཱཏཔེཏཱིཏི ཨཱཏཱཔོ, ཝཱིརིཡསྶེཏཾ ནཱམཾ. ཡདིཔི ཧི ཀིལེསཱནཾ པཧཱནཾ ཨཱཏཱཔནནྟི, ཏཾ སམྨཱདིཊྛིཨཱདཱིནམྤི ཨཏྠེཝ. ཨཱཏཔསདྡོ ཝིཡ པན ཨཱཏཱཔསདྡོཔི ཝཱིརིཡེཝ ནིརུལ༹ྷོ. ཨཐ ཝཱ པཊིཔཀྑཔྤཧཱནེ སམྤཡུཏྟདྷམྨཱནཾ ཨབྦྷུསྶཧནཝསེན པཝཏྟམཱནསྶ ཝཱིརིཡསྶ སཱཏིསཡཾ ཏདཱཏཱཔནནྟི ཝཱིརིཡམེཝ ཏཐཱ ཝུཙྩཏི, ན ཨཉྙདྷམྨཱ, ཏསྨཱ ཨཱཏཱཔོཏི ཝཱིརིཡསྶ ནཱམཾ, སོ ཨསྶ ཨཏྠཱིཏི ཨཱཏཱཔཱི. ཨཡཉྩ ཨཱིཀཱརོ པསཾསཱཡ ཨཏིསཡསྶ ཝཱ དཱིཔཀོཏི ཨཱཏཱཔིགྒཧཎེན སམྨཔྤདྷཱནསམངྒིཏཾ དསྶེཏི. ཏེནེཝཱཧ – ‘‘ཨཱཏཱཔཱིཏི…པེ… ཝཱིརིཡེན ཝཱིརིཡཝཱ’’ཏི. སམྤཛཱནོཏི སམྤཛཉྙསངྑཱཏེན ཉཱཎེན སམནྣཱགཏོ. ཏེནཱཧ – ‘‘ཨཊྛཱརསཝིདྷེན…པེ… སམྨཱ པཛཱནནྟོ’’ཏི. ཨཡཾ པནེཏྠ ཝཙནཏྠོ – སམྨཱ སམནྟཏོ སཱམཉྩ པཛཱནནྟོ སམྤཛཱནོ, ཨསམྨིསྶཏོ ཝཝཏྠཱནེ ཨཉྙདྷམྨཱནུཔསྶིཏཱབྷཱཝེན སམྨཱ ཨཝིཔརཱིཏཾ སབྦཱཀཱརཔྤཛཱནེན སམནྟཏོ ཨུཔརཱུཔརིཝིསེསཱཝཧབྷཱཝེན པཝཏྟིཡཱ སམྨཱ པཛཱནནྟོཏི ཨཏྠོ.

ཀཱཡོ ཙ ཨིདྷ ལུཛྫནཔྤལུཛྫནཊྛེན ལོཀོཏི ཨདྷིཔྤེཏོཏི ཨཱཧ – ‘‘ཏསྨིཾཡེཝ ཀཱཡསངྑཱཏེ ལོཀེ’’ཏི. པཉྩཀཱམགུཎིཀཏཎྷནྟི རཱུཔཱདཱིསུ པཉྩསུ ཀཱམགུཎེསུ པཝཏྟམཱནཾ ཏཎྷཾ ¶ . ཡསྨཱ པནེཏྠ ཨབྷིཛ྄ཛྷཱགཧཎེན ཀཱམཙྪནྡོ, དོམནསྶགྒཧཎེན བྱཱཔཱདོ སངྒཧཾ གཙྪཏི, ཏསྨཱ ནཱིཝརཎཔརིཡཱཔནྣབལཝདྷམྨདྭཡདསྶནེན ནཱིཝརཎཔྤཧཱནཾ ཝུཏྟཾ ཧོཏཱིཏི ཝེདིཏབྦཾ. ཝིསེསེན ཙེཏྠ ཨབྷིཛ྄ཛྷཱཝིནཡེན ཀཱཡསམྤཏྟིམཱུལཀསྶ ཨནུརོདྷསྶ, དོམནསྶཝིནཡེན ཀཱཡཝིཔཏྟིམཱུལཀསྶ ཝིརོདྷསྶ, ཨབྷིཛ྄ཛྷཱཝིནཡེན ཙ ཀཱཡེ ཨབྷིརཏིཡཱ, དོམནསྶཝིནཡེན ཀཱཡབྷཱཝནཱཡ ཨནབྷིརཏིཡཱ, ཨབྷིཛ྄ཛྷཱཝིནཡེན ཀཱཡེ ཨབྷཱུཏཱནཾ ¶ སུབྷསུཁབྷཱཝཱདཱིནཾ པཀྑེཔསྶ, དོམནསྶཝིནཡེན ཀཱཡེ བྷཱུཏཱནཾ ཨསུབྷཱསུཁབྷཱཝཱདཱིནཾ ཨཔནཡནསྶ ཙ པཧཱནཾ ཝུཏྟཾ. ཏེན ཡོགཱཝཙརསྶ ཡོགཱནུབྷཱཝོ ཡོགསམཏྠཏཱ ཙ དཱིཔིཏཱ ཧོཏི. ཡོགཱནུབྷཱཝོ ཧི ཨེས, ཡདིདཾ ཨནུརོདྷཝིརོདྷཝིཔྤམུཏྟོ ཨརཏིརཏིསཧོ ཨབྷཱུཏཔཀྑེཔབྷཱུཏཱཔནཡནཝིརཧིཏོ ཙ ཧོཏི. ཨནུརོདྷཝིརོདྷཝིཔྤམུཏྟོ ཙེས ཨརཏིརཏིསཧོ ཨབྷཱུཏཾ ཨཔཀྑིཔནྟོ བྷཱུཏཉྩ ཨནཔནེནྟོ ཡོགསམཏྠོ ཧོཏཱིཏི. སུདྡྷརཱུཔསམྨསནམེཝ ཀཐིཏནྟི ཀེཝལཾ ཀཱཡཱནུཔསྶནཱབྷཱཝཏོ ཝུཏྟཾ.

སུཁཱདིབྷེདཱསུ ཝེདནཱསཱུཏི སུཁདུཀྑཨདུཀྑམསུཁསཱམིསནིརཱམིསབྷེདཱསུ ཝེདནཱསུ. ཏཏྠ སུཁཡཏཱིཏི སུཁཱ, སམྤཡུཏྟདྷམྨེ ཀཱཡཉྩ ལདྡྷསྶཱདེ ཀརོཏཱིཏི ཨཏྠོ. སུཊྛུ ཝཱ ཁཱདཏི, ཁནཏི ཝཱ ཀཱཡིཀཾ ཙེཏསིཀཉྩ ཨཱབཱདྷནྟི སུཁཱ, སུཀརཾ ཨོཀཱསདཱནཾ ཨེཏིསྶཱཏི ཝཱ སུཁཱ. དུཀྑཡཏཱིཏི དུཀྑཱ, སམྤཡུཏྟདྷམྨེ ཀཱཡཉྩ པཱིལེ༹ཏི ཝིབཱདྷཏཱིཏི ཨཏྠོ. དུཊྛུ ཝཱ ཁཱདཏི, ཁནཏི ཝཱ ཀཱཡིཀཾ ཙེཏསིཀཉྩ སཱཏནྟི དུཀྑཱ, དུཀྐརཾ ཨོཀཱསདཱནཾ ཨེཏིསྶཱཏི ཝཱ དུཀྑཱ. དུཀྑསུཁཔྤཊིཀྑེཔེན ཨདུཀྑམསུཁཱཏི ཨུཔེཀྑཱ ཝུཏྟཱ. ཝེདིཡཏི ཨཱརམྨཎརསཾ ཨནུབྷཝཏཱིཏི ཝེདནཱ. ཝེདིཡམཱནོཏི ཨནུབྷཝམཱནོ. སུཁཾ ཝེདནཾ ཝེདིཡཱམཱིཏི པཛཱནཱཏཱིཏི ཀཱཡིཀཾ ཝཱ ཙེཏསིཀཾ ཝཱ སུཁཾ ཝེདནཾ ཝེདིཡམཱནོ ‘‘ཨཧཾ སུཁཾ ཝེདནཾ ཝེདིཡཱམཱི’’ཏི པཛཱནཱཏཱིཏི ཨཏྠོ. ཏཏྠ ཀཱམཾ ཨུཏྟཱནསེཡྻཀཱཔི དཱརཀཱ ཐཉྙཔིཝནཱདིཀཱལེ སུཁཾ ཝེདནཾ ཝེདིཡམཱནཱ ‘‘སུཁཾ ཝེདནཾ ཝེདིཡཱམཱ’’ཏི པཛཱནནྟི, ན པནེཏཾ ཨེཝརཱུཔཾ པཛཱནནཾ སནྡྷཱཡ ཝུཏྟཾ. ཨེཝརཱུཔཉྷི ཛཱནནཾ སཏྟུཔལདྡྷིཾ ན ཛཧཏི, ཨཏྟསཉྙཾ ན ཨུགྒྷཱཊེཏི, ཀམྨཊྛཱནཾ ཝཱ སཏིཔཊྛཱནབྷཱཝནཱ ཝཱ ན ཧོཏི. ཨིམསྶ པན བྷིཀྑུནོ ཛཱནནཾ སཏྟུཔལདྡྷིཾ ཛཧཏི, ཨཏྟསཉྙཾ ཨུགྒྷཱཊེཏི, ཀམྨཊྛཱནཉྩེཝ སཏིཔཊྛཱནབྷཱཝནཱ ཙ ཧོཏི. ཨིདཉྷི ‘‘ཀོ ཝེདིཡཏི, ཏསྶ ཝེདནཱ, ཀིཾ ཀཱརཎཱ ཝེདནཱ’’ཏི ཨེཝཾ སམྤཛཱནནྟསྶ ཝེདིཡནཾ སནྡྷཱཡ ཝུཏྟཾ.

ཏཏྠ ཀོ ཝེདིཡཏཱིཏི? ན ཀོཙི སཏྟོ ཝཱ པུགྒལོ ཝཱ ཝེདིཡཏི. ཀསྶ ཝེདནཱཏི? ན ཀསྶཙི སཏྟསྶ ཝཱ པུགྒལསྶ ཝཱ ཝེདནཱ. ཀིཾ ཀཱརཎཱ ཝེདནཱཏི? ཝཏྠུཨཱརམྨཎཱ ཙ པནསྶ ཝེདནཱཏི. ཏསྨཱ ཨེས ཨེཝཾ པཛཱནཱཏི ‘‘ཏཾ ཏཾ སུཁཱདཱིནཾ ཝཏྠུབྷཱུཏཾ རཱུཔཱདིཾ ཨཱརམྨཎཾ ཀཏྭཱ ཝེདནཱཝ ¶ ཝེདིཡཏི, ཏཾ པན ཝེདནཱཔཝཏྟིཾ ཨུཔཱདཱཡ ‘ཨཧཾ ཝེདིཡཱམཱི’ཏི ¶ ཝོཧཱརམཏྟཾ ཧོཏཱི’’ཏི. ཨེཝཾ ‘‘སུཁཱདཱིནཾ ཝཏྠུབྷཱུཏཾ རཱུཔཱདིཾ ཨཱརམྨཎཾ ཀཏྭཱ ཝེདནཱཝ ཝེདིཡཏཱི’’ཏི སལླཀྑེནྟོ ཨེས ‘‘སུཁཾ ཝེདནཾ ཝེདིཡཱམཱི’’ཏི པཛཱནཱཏཱིཏི ཝེདིཏབྦོ.

ཨཐ ཝཱ སུཁཾ ཝེདནཾ ཝེདིཡཱམཱིཏི པཛཱནཱཏཱིཏི སུཁཝེདནཱཀྑཎེ དུཀྑཱཡ ཝེདནཱཡ ཨབྷཱཝཏོ སུཁཾ ཝེདནཾ ཝེདིཡམཱནོ ‘‘སུཁཾ ཝེདནཾཡེཝ ཝེདིཡཱམཱི’’ཏི པཛཱནཱཏི. ཏེན ཡཱ པུབྦེ བྷཱུཏཔུབྦཱ དུཀྑཱ ཝེདནཱ, ཏསྶཱ ཨིདཱནི ཨབྷཱཝཏོ ཨིམིསྶཱ ཙ སུཁཱཡ ཝེདནཱཡ ཨིཏོ པརཾ པཋམཾ ཨབྷཱཝཏོ ‘‘ཝེདནཱ ནཱམ ཨནིཙྩཱ ཨདྡྷུཝཱ ཝིཔརིཎཱམདྷམྨཱ’’ཏི ཨིཏིཧ ཏཏྠ སམྤཛཱནོ ཧོཏི. དུཀྑཾ ཝེདནཾ ཝེདིཡཱམཱིཏི པཛཱནཱཏཱིཏིཨཱདཱིསུཔི ཨེསེཝ ནཡོ.

སཱམིསཾ ཝཱ སུཁནྟིཨཱདཱིསུ ཡསྨཱ ཀིལེསེཧི ཨཱམསིཏབྦཏོ ཨཱམིསཱ ནཱམ པཉྩ ཀཱམགུཎཱ. ཨཱརམྨཎཀརཎཝསེན སཧ ཨཱམིསེཧཱིཏི སཱམིསཱ, ཏསྨཱ སཱམིསཱ སུཁཱ ནཱམ པཉྩཀཱམགུཎཱམིསནིསྶིཏཱ ཚསུ དྭཱརེསུ ཨུཔྤནྣཱ ཚགེཧསྶིཏཱ སོམནསྶཝེདནཱ. སཱམིསཱ དུཀྑཱ ནཱམ ཚགེཧསྶིཏཱ དོམནསྶཝེདནཱ. སཱ ཙ ཚསུ དྭཱརེསུ ‘‘ཨིཊྛཱརམྨཎཾ ནཱནུབྷཝིསྶཱམི ནཱནུབྷཝཱམཱི’’ཏི ཝིཏཀྐཡཏོ ཨུཔྤནྣཱ ཀཱམགུཎནིསྶིཏཱ དོམནསྶཝེདནཱ ཝེདིཏབྦཱ. ནིརཱམིསཱ སུཁཱ ནཱམ ཚནེཀྑམྨསྶིཏཱ སོམནསྶཝེདནཱ. སཱ ཙ ཚསུ དྭཱརེསུ ཨིཊྛཱརམྨཎེ ཨཱཔཱཐགཏེ ཨནིཙྩཱདིཝསེན ཝིཔསྶནཾ པཊྛཔེཏྭཱ ཨུསྶུཀྐཱཔེཏུཾ སཀྐོནྟསྶ ‘‘ཨུསྶཀྐིཏཱ མེ ཝིཔསྶནཱ’’ཏི སོམནསྶཛཱཏསྶ ཨུཔྤནྣཱ སོམནསྶཝེདནཱ དཊྛབྦཱ.

ནིརཱམིསཱ དུཀྑཱ ནཱམ ཚནེཀྑམྨསྶིཏཱ དོམནསྶཝེདནཱ. སཱ པན ཚསུ དྭཱརེསུ ཨིཊྛཱརམྨཎེ ཨཱཔཱཐགཏེ ཨནུཏྟརཝིམོཀྑསངྑཱཏཨརིཡཕལདྷམྨེསུ པིཧཾ པཊྛཔེཏྭཱ ཏདདྷིགམཱཡ ཨནིཙྩཱདིཝསེན ཝིཔསྶནཾ པཊྛཔེཏྭཱ ཨུསྶུཀྐཱཔེཏུཾ ཨསཀྐོནྟསྶ ‘‘ཨིམམྤི པཀྑཾ ཨིམམྤི མཱསཾ ཨིམམྤི སཾཝཙྪརཾ ཝིཔསྶནཾ ཨུསྶུཀྐཱཔེཏྭཱ ཨརིཡབྷཱུམིཾ པཱཔུཎིཏུཾ ནཱསཀྑི’’ནྟི ཨནུསོཙཏོ ཨུཔྤནྣཱ དོམནསྶཝེདནཱ.

སཱམིསཱ ཨདུཀྑམསུཁཱ ནཱམ ཚགེཧསྶིཏཱ ཨུཔེཀྑཱཝེདནཱ. སཱ ཙ ཚསུ དྭཱརེསུ ཨིཊྛཱརམྨཎེ ཨཱཔཱཐགཏེ གུལ༹པིཎྜཀེ ནིལཱིནམཀྑིཀཱ ཝིཡ རཱུཔཱདཱིནི ཨནུཝཏྟམཱནཱ ཏཏྠེཝ ལགྒཱ ལགྒིཏཱ ཧུཏྭཱ ཨུཔྤནྣཱ ཀཱམགུཎནིསྶིཏཱ ¶ ཨུཔེཀྑཱཝེདནཱ. ནིརཱམིསཱ ཨདུཀྑམསུཁཱ ནཱམ ཚནེཀྑམྨསྶིཏཱ ཨུཔེཀྑཱཝེདནཱ. སཱ པན ཚསུ དྭཱརེསུ ཨིཊྛཱདིཨཱརམྨཎེ ཨཱཔཱཐགཏེ ཨིཊྛེ ཨརཛྫནྟསྶ, ཨནིཊྛེ ཨདུསྶནྟསྶ, ཨསམཔེཀྑནེན ཨམུཡ྄ཧནྟསྶ ཨུཔྤནྣཱ ཝིཔསྶནཱཉཱཎསམྤཡུཏྟཱ ¶ ཨུཔེཀྑཱཝེདནཱ. ཨེཝཾ ཝུཏྟནྟི མཧཱསཏིཔཊྛཱནསུཏྟེ ཝུཏྟཾ. སཱཝ ཝེདནཱ ཝེདིཏབྦཱཏི ལུཛྫནཔྤལུཛྫནཊྛེན སཱ ཝེདནཱ ‘‘ལོཀོ’’ཏི ཝེདིཏབྦཱ.

ཨེཝཾ ཝིཏྠཱརིཏེཏི ‘‘སརཱགཾ ཝཱ ཙིཏྟཾ སརཱགཾ ཙིཏྟནྟི པཛཱནཱཏི, ཝཱིཏརཱགཾ ཝཱ ཙིཏྟཾ…པེ… སདོསཾ ཝཱ ཙིཏྟཾ, ཝཱིཏདོསཾ ཝཱ ཙིཏྟཾ, སམོཧཾ ཝཱ ཙིཏྟཾ, ཝཱིཏམོཧཾ ཝཱ ཙིཏྟཾ, སཾཁིཏྟཾ ཝཱ ཙིཏྟཾ, ཝིཀྑིཏྟཾ ཝཱ ཙིཏྟཾ, མཧགྒཏཾ ཝཱ ཙིཏྟཾ, ཨམཧགྒཏཾ ཝཱ ཙིཏྟཾ, སཨུཏྟརཾ ཝཱ ཙིཏྟཾ, ཨནུཏྟརཾ ཝཱ ཙིཏྟཾ, སམཱཧིཏཾ ཝཱ ཙིཏྟཾ, ཨསམཱཧིཏཾ ཝཱ ཙིཏྟཾ, ཝིམུཏྟཾ ཝཱ ཙིཏྟཾ, ཨཝིམུཏྟཾ ཝཱ ཙིཏྟནྟི པཛཱནཱཏཱི’’ཏི ཨེཝཾ སཏིཔཊྛཱནསུཏྟེ (དཱི. ནི. ༢.༣༨༡; མ. ནི. ༡.༡༡༤) ཝིཏྠཱརེཏྭཱ དསྶིཏེ སོལ༹སཝིདྷེ ཙིཏྟེ.

ཏཏྠ སརཱགནྟི ཨཊྛཝིདྷཾ ལོབྷསཧགཏཾ. ཝཱིཏརཱགནྟི ལོཀིཡཀུསལཱབྱཱཀཏཾ. ཨིདཾ པན ཡསྨཱ སམྨསནཾ ན དྷམྨསམོདྷཱནཾ, ཏསྨཱ ཨིདྷ ཨེཀཔདེཔི ལོཀུཏྟརཾ ན ལབྦྷཏི. སེསཱནི ཙཏྟཱརི ཨཀུསལཙིཏྟཱནི ནེཝ པུརིམཔདཾ, ན པཙྪིམཔདཾ བྷཛནྟི. སདོསནྟི དུཝིདྷཾ དོམནསྶསཧགཏཾ. ཝཱིཏདོསནྟི ལོཀིཡཀུསལཱབྱཱཀཏཾ. སེསཱནི དས ཨཀུསལཙིཏྟཱནི ནེཝ པུརིམཔདཾ, ན པཙྪིམཔདཾ བྷཛནྟི. སམོཧནྟི ཝིཙིཀིཙྪཱསཧགཏཉྩེཝ ཨུདྡྷཙྩསཧགཏཉྩཱཏི དུཝིདྷཾ. ཡསྨཱ པན མོཧོ སབྦཱཀུསལེསུ ཨུཔྤཛྫཏི, ཏསྨཱ སེསཱནིཔི ཨིདྷ ཝཏྟནྟིཡེཝ. ཨིམསྨིཉྙེཝ ཧི དུཀེ དྭཱདསཱཀུསལཙིཏྟཱནི པརིཡཱདིནྣཱནཱིཏི. ཝཱིཏམོཧནྟི ལོཀིཡཀུསལཱབྱཱཀཏཾ.

སཾཁིཏྟནྟི ཐིནམིདྡྷཱནུཔཏིཏཾ. ཨེཏཉྷི སངྐུཙིཏཙིཏྟཾ ནཱམ ཨཱརམྨཎེ སངྐོཙཝསེན པཝཏྟནཏོ. ཝིཀྑིཏྟནྟི ཨུདྡྷཙྩསཧགཏཾ. ཨེཏཉྷི པསཊཙིཏྟཾ ནཱམ ཨཱརམྨཎེ སཝིསེསཾ ཝིཀྑེཔཝསེན ཝིསཊབྷཱཝེན པཝཏྟནཏོ. མཧགྒཏནྟི རཱུཔཱཝཙརཾ ཨརཱུཔཱཝཙརཉྩ. ཨམཧགྒཏནྟི ཀཱམཱཝཙརཾ. སཨུཏྟརནྟི ཀཱམཱཝཙརཾ. ཨནུཏྟརནྟི རཱུཔཱཝཙརཾ ཨརཱུཔཱཝཙརཉྩ. ཏཏྲཱཔི སཨུཏྟརཾ རཱུཔཱཝཙརཾ, ཨནུཏྟརཾ ཨརཱུཔཱཝཙརམེཝ. སམཱཧིཏནྟི ཡསྶ ཨཔྤནཱསམཱདྷི ཝཱ ཨུཔཙཱརསམཱདྷི ཝཱ ཨཏྠི. ཨསམཱཧིཏནྟི ཨུབྷཡསམཱདྷིཝིརཧིཏཾ. ཝིམུཏྟནྟི ¶ ཏདངྒཝིཀྑམྦྷནཝིམུཏྟཱིཧི ཝིམུཏྟཾ. ཨཝིམུཏྟནྟི ཨུབྷཡཝིམུཏྟིརཧིཏཾ. སམུཙྪེདཔྤཊིཔྤསྶདྡྷིནིསྶརཎཝིམུཏྟཱིནཾ པན ཨིདྷ ཨོཀཱསོཝ ནཏྠི, ཨོཀཱསཱབྷཱཝོ ཙ སམྨསནཙཱརསྶ ཨདྷིཔྤེཏཏྟཱ ཝེདིཏབྦོ.

ཨུཔཱདཱནསྶ ཁནྡྷཱ ཨུཔཱདཱནཀྑནྡྷཱ, ཨུཔཱདཱནསྶ པཙྩཡབྷཱུཏཱ དྷམྨཔུཉྫཱ དྷམྨརཱསཡོཏི ཨཏྠོ. ཨུཔཱདཱནེཧི ཨཱརམྨཎཀརཎཱདིཝསེན ཨུཔཱདཱཏབྦཱ ཝཱ ཁནྡྷཱ ཨུཔཱདཱནཀྑནྡྷཱ. ཚ ཨཛ྄ཛྷཏྟིཀབཱཧིརཱཡཏནཱནཱིཏི ¶ ཙཀྑུ སོཏཾ གྷཱནཾ ཛིཝ྄ཧཱ ཀཱཡོ མནོཏི ཨིམཱནི ཚ ཨཛ྄ཛྷཏྟིཀཱཡཏནཱནི ཙེཝ, རཱུཔཾ སདྡོ གནྡྷོ རསོ ཕོཊྛབྦོ དྷམྨཱཏི ཨིམཱནི ཚ བཱཧིརཱཡཏནཱནི ཙ. ཨེཏྠ པན ལོཀུཏྟརདྷམྨཱ ན གཧེཏབྦཱ སམྨསནཙཱརསྶ ཨདྷིཔྤེཏཏྟཱ. སཏྟ སམྦོཛ྄ཛྷངྒཱཏི སཏིསམྦོཛ྄ཛྷངྒཱདཡོ སཏྟ སམྦོཛ྄ཛྷངྒཱ. སཏིཨཱདཡོ ཧི སམྦོདྷིསྶ, སམྦོདྷིཡཱ ཝཱ ཨངྒཱཏི སམྦོཛ྄ཛྷངྒཱ. ཏཐཱ ཧི སམྦུཛ྄ཛྷཏི ཨཱརདྡྷཝིཔསྶཀཏོ པཊྛཱཡ ཡོགཱཝཙརོཏི སམྦོདྷི, ཡཱཡ ཝཱ སོ སཏིཨཱདིཀཱཡ སཏྟདྷམྨསཱམགྒིཡཱ སམྦུཛ྄ཛྷཏི, ཀིལེསནིདྡཱཏོ ཨུཊྛཱཏི, སཙྩཱནི ཝཱ པཊིཝིཛ྄ཛྷཏི, སཱ དྷམྨསཱམགྒཱི སམྦོདྷི, ཏསྶ སམྦོདྷིསྶ, ཏསྶཱ ཝཱ སམྦོདྷིཡཱ ཨངྒཱཏི སམྦོཛ྄ཛྷངྒཱ.

ཙཏྟཱརི ཨརིཡསཙྩཱནཱིཏི ‘‘དུཀྑཾ དུཀྑསམུདཡོ དུཀྑནིརོདྷོ དུཀྑནིརོདྷགཱམིནིཔཊིཔདཱ’’ཏི (སཾ. ནི. ༥.༡༠༧༡-༡༠༧༢) ཨེཝཾ ཝུཏྟཱནི ཙཏྟཱརི ཨརིཡསཙྩཱནི. ཏཏྠ པུརིམཱནི དྭེ སཙྩཱནི ཝཊྚཾ པཝཏྟིཧེཏུབྷཱཝཏོ. པཙྪིམཱནི ཝིཝཊྚཾ ནིཝཊྚཏདདྷིགམཱུཔཱཡབྷཱཝཏོ. ཏེསུ བྷིཀྑུནོ ཝཊྚེ ཀམྨཊྛཱནཱབྷིནིཝེསོ ཧོཏི སརཱུཔཏོ པརིགྒཧསམྦྷཝཏོ. ཝིཝཊྚེ ནཏྠི ཨབྷིནིཝེསོ ཨཝིསཡཏྟཱ ཨཝིསཡཏྟེ ཙ པཡོཛནཱབྷཱཝཏོ. པཉྩདྷཱ ཝུཏྟེསཱུཏི སཏིཔཊྛཱནསུཏྟེ ཝུཏྟེསུ. སུདྡྷཨརཱུཔསམྨསནམེཝཱཏི རཱུཔེན ཨམིསྶིཏཏྟཱ ཀེཝལཾ ཨརཱུཔསམྨསནམེཝ. ཁནྡྷཱཡཏནསཙྩཀོཊྛཱསཱནཾ པཉྩཀྑནྡྷསངྒཧཏོ ‘‘རཱུཔཱརཱུཔསམྨསན’’ནྟི ཝུཏྟཾ. པུབྦབྷཱགིཡཱནམྤི སཏིཔཊྛཱནཱནཾ སངྒཧིཏཏྟཱ ‘‘ལོཀིཡལོཀུཏྟརམིསྶཀཱནེཝ ཀཐིཏཱནཱི’’ཏི ཨཱཧ.

༣༩༤. ཨནིབྦཏྟཱནནྟི ཨཛཱཏཱནཾ. པཡོགཾ པརཀྐམནྟི ཨེཏྠ བྷུསཾ ཡོགོ པཡོགོ, པཡོགོཝ པརཀྐམོ, པཡོགསངྑཱཏཾ པརཀྐམནྟི ཨཏྠོ. ཙིཏྟཾ ཨུཀྑིཔཏཱིཏི ཀོསཛྫཔཀྑེ པཏིཏུཾ ཨཔདཱནཝསེན ཨུཀྑིཔཏི. པདྷཱནཝཱིརིཡནྟི ¶ སམྨཔྤདྷཱནལཀྑཎཔྤཏྟཝཱིརིཡཾ. ལོཀིཡཱཏི ལོཀིཡསམྨཔྤདྷཱནཀཐཱ. སབྦཔུབྦབྷཱགེཏི སབྦམགྒཱནཾ པུབྦབྷཱགེ. ཀསྶཔསཾཡུཏྟཔརིཡཱཡེནཱཏི ཀསྶཔསཾཡུཏྟེ ཨཱགཏསུཏྟེན ‘‘ཨུཔྤནྣཱ མེ པཱཔཀཱ ཨཀུསལཱ དྷམྨཱ ཨཔྤཧཱིཡམཱནཱ ཨནཏྠཱཡ སཾཝཏྟེཡྻུ’’ནྟི (སཾ. ནི. ༢.༡༤༥) ཨཱགཏཏྟཱ. སཱ ལོཀིཡཱཏི ཝེདིཏབྦཱ.

སམཐཝིཔསྶནཱཝཱཏི ཨཝདྷཱརཎེན མགྒཾ ནིཝཏྟེཏྭཱ ཏསྶ ནིཝཏྟནེ ཀཱརཎཾ དསྶེནྟོ, ‘‘མགྒོ པནཱ’’ཏིཨཱདིམཱཧ. སཀིཾ ཨུཔྤཛྫིཏྭཱཏི ཨིདཾ བྷཱུཏཀཐནམཏྟཾ. ནིརུདྡྷསྶ པུན ཨནུཔྤཛྫནཏོ ‘‘ན ཀོཙི གུཎོ’’ཏི ཨཱསངྐེཡྻཱཏི ཨཱཧ – ‘‘སོ ཧཱི’’ཏིཨཱདི. ཨནནྟརམེཝ ཡཐཱ ཕལཾ ཨུཔྤཛྫཏི, ཏཐཱ པཝཏྟིཡེཝསྶ པཙྩཡདཱནཾ. པུརིམསྨིམྤཱིཏི ‘‘ཨནུཔྤནྣཱ མེ ཀུསལཱ དྷམྨཱ ཨུཔྤཛྫམཱནཱ ཨནཏྠཱཡ སཾཝཏྟེཡྻུ’’ནྟི ཨེཏྠཔི. ཝུཏྟནྟི པོརཱཎཊྛཀཐཱཡཾ. ཏཾ པན ཏཐཱཝུཏྟཝཙནཾ ¶ ན ཡུཏྟཾ དུཏིཡསྨིཾ ཝིཡ པུརིམསྨིཾ མགྒསྶ ཨགྒཧཎེ ཀཱརཎཱབྷཱཝཏོ. པུརིམསྨིཾ ཨགྒཧིཏེ མགྒེ ཨནུཔྤཛྫམཱནོ མགྒོ ཨནཏྠཱཡ སཾཝཏྟེཡྻཱཏི ཨཱཔཛྫེཡྻ, ན ཙེཏཾ ཡུཏྟཾ ཨཱཔཛྫམཱནེ ཏསྨིཾ པདྷཱནཏྠསམྦྷཝཏོ. ཙཏུཀིཙྩསཱདྷནཝསེནཱཏི ཨནུཔྤནྣཱཀུསལཱནུཔྤཱདནཱདིཙཏུཀིཙྩསཱདྷནཝསེན.

ཝུཏྟནཡེནཱཏི ‘‘ཨསམུདཱཙཱརཝསེན ཝཱ ཨནནུབྷཱུཏཱརམྨཎཝསེན ཝཱ’’ཏིཨཱདིནཱ ཝུཏྟནཡེན. ཝིཛྫམཱནཱཏི དྷརམཱནསབྷཱཝཱ. ཁཎཏྟཡཔརིཡཱཔནྣཏྟཱ ཨུཔྤཱདཱདིསམངྒིནོ ཝཏྟམཱནབྷཱཝེན ཨུཔྤནྣཾ ཝཏྟམཱནུཔྤནྣཾ. ཏཉྷི ཨུཔྤཱདཏོ པཊྛཱཡ ཡཱཝ བྷངྒཱ ཨུདྡྷཾ པནྣཾ པཏྟནྟི ནིཔྤརིཡཱཡཏོ ‘‘ཨུཔྤནྣ’’ནྟི ཝུཙྩཏི. ཨནུབྷཝིཏྭཱ བྷཝིཏྭཱ ཙ ཝིགཏཾ བྷུཏྭཱཝིགཏཾ. ཨནུབྷཝནབྷཝནཱནི ཧི བྷཝནསཱམཉྙེན བྷུཏྭཱ-སདྡེན ཝུཏྟཱནི. སཱམཉྙམེཝ ཧི ཨུཔསགྒེན ཝིསེསཱིཡཏི. ཨིདྷ ཝིཔཱཀཱནུབྷཝནཝསེན ཏདཱརམྨཎཾ ཨཝིཔཀྐཝིཔཱཀསྶ སབྦཐཱ ཨཝིགཏཏྟཱ བྷཝིཏྭཱཝིགཏམཏྟཝསེན ཀམྨཉྩ ‘‘བྷུཏྭཱཝིགཏུཔྤནྣ’’ནྟི ཝུཏྟཾ. ན ཨཊྛསཱལིནིཡཾ ཝིཡ རཛྫནཱདིཝསེན ཨནུབྷཱུཏཱཔགཏཾ ཛཝནཾ ཨུཔྤཛྫིཏྭཱ ནིརུདྡྷཏཱཝསེན བྷཱུཏཱཔགཏཉྩ སངྑཏཾ བྷཱུཏཱཔགཏུཔྤནྣནྟི. ཏསྨཱ ཨིདྷ ཨོཀཱསཀཏུཔྤནྣཾ ཝིཔཱཀམེཝ ཝདཏི, ན ཏཏྠ ཝིཡ ཀམྨམྤི. ཨཊྛསཱལིནིཡཉྷི བྷཱུཏཱཝིགཏུཔྤནྣཾ ཨོཀཱསཀཏུཔྤནྣཉྩ ཨཉྙཐཱ དསྶིཏཾ. ཝུཏྟཉྷི ཏཏྠ (དྷ. ས. ཨཊྛ. ༡ ཀཱམཱཝཙརཀུསལཔདབྷཱཛནཱིཡ) –

‘‘ཨཱརམྨཎརསཾ ¶ ཨནུབྷཝིཏྭཱ ནིརུདྡྷཾ ཨནུབྷཱུཏཱཔགཏསངྑཱཏཾ ཀུསལཱཀུསལཾ, ཨུཔཱདཱདིཏྟཡཾ ཨནུཔྤཏྭཱ ནིརུདྡྷཾ བྷཱུཏཱཔགཏསངྑཱཏཾ སེསསངྑཏཉྩ བྷཱུཏཱཔགཏུཔྤནྣཾ ནཱམ. ‘ཡཱནིསྶ ཏཱནི པུབྦེ ཀཏཱནི ཀམྨཱནཱི’ཏི ཨེཝམཱདིནཱ ནཡེན ཝུཏྟཾ ཀམྨཾ ཨཏཱིཏམྤི སམཱནཾ ཨཉྙཾ ཝིཔཱཀཾ པཊིབཱཧིཏྭཱ ཨཏྟནོ ཝིཔཱཀསྶོཀཱསཾ ཀཏྭཱ ཋིཏཏྟཱ, ཏཐཱཀཏོཀཱསཉྩ ཝིཔཱཀཾ ཨནུཔྤནྣམྤི སམཱནཾ ཨེཝཾ ཀཏེ ཨོཀཱསེ ཨེཀནྟེན ཨུཔྤཛྫནཏོ ཨོཀཱསཀཏུཔྤནྣཾ ནཱམཱ’’ཏི.

ཨིདྷ པན སམྨོཧཝིནོདནིཡཾ ཝུཏྟནཡེནེཝ བྷུཏྭཱཝིགཏུཔྤནྣཾ ཨོཀཱསཀཏུཔྤནྣཉྩ དསྶིཏཾ. ཝུཏྟཉྷི, སམྨོཧཝིནོདནིཡཾ (ཝིབྷ. ཨཊྛ. ༤༠༦) –

‘‘ཀམྨེ པན ཛཧིཏེ ཨཱརམྨཎརསཾ ཨནུབྷཝིཏྭཱ ནིརུདྡྷོ ཝིཔཱཀོ བྷུཏྭཱཝིགཏཾ ནཱམ. ཀམྨཾ ཨུཔྤཛྫིཏྭཱ ནིརུདྡྷཾ བྷུཏྭཱཝིགཏཾ ནཱམ. ཏདུབྷཡམྤི བྷུཏྭཱཝིགཏུཔྤནྣནྟི སངྑྱཾ གཙྪཏི. ཀུསལཱཀུསལཾ ཀམྨཾ ཨཉྙཀམྨསྶ ཝིཔཱཀཾ པཊིབཱཧིཏྭཱ ཨཏྟནོ ཝིཔཱཀསྶ ¶ ཨོཀཱསཾ ཀརོཏི. ཨེཝཾ ཀཏེ ཨོཀཱསེ ཝིཔཱཀོ ཨུཔྤཛྫམཱནོ ཨོཀཱསཀརཎཏོ པཊྛཱཡ ཨུཔྤནྣོཏི ཝུཙྩཏི. ཨིདཾ ཨོཀཱསཀཏུཔྤནྣཾ ནཱམཱ’’ཏི.

ཏཏྠ ཨཊྛསཱལིནིཡཱ ཨཡམདྷིཔྤཱཡོ – ‘‘སཏིཔི སབྦེསམྤི ཙིཏྟུཔྤཱདཱནཾ སཾཝེདཡིཏསབྷཱཝཱ ཨཱརམྨཎཱནུབྷཝནེ སཝིཔལླཱསེ པན སནྟཱནེ ཙིཏྟཱབྷིསངྑཱརཝསེན པཝཏྟིཏོ ཨབྱཱཀཏེཧི ཝིསིཊྛོ ཀུསལཱཀུསལཱནཾ སཱཏིསཡོ ཝིསཡཱནུབྷཝནཱཀཱརོ. ཡཐཱ ཝིཀཔྤགྒཱཧཝསེན རཱགཱདཱིཧི ཏབྦིཔཀྑེཧི ཙ ཨཀུསལཾ ཀུསལཉྩ ནིཔྤརིཡཱཡཏོ ཨཱརམྨཎརསཾ ཨནུབྷཝཏི, ན ཏཐཱ ཝིཔཱཀོ ཀམྨཝེགཀྑིཏྟཏྟཱ, ནཱཔི ཀིརིཡཱ ཨཧེཏུཀཱནཾ ཨཏིདུབྦལཏཱཡ, སཧེཏུཀཱནཉྩ ཁཱིཎཀིལེསསྶ ཚལ༹ངྒུཔེཀྑཱཝཏོ ཨུཔྤཛྫམཱནཱནཾ ཨཏིསནྟཝུཏྟིཏྟཱ, ཏསྨཱ རཛྫནཱདིཝསེན ཨཱརམྨཎརསཱནུབྷཝནཾ སཱཏིསཡནྟི ཨཀུསལཾ ཀུསལཉྩ ཨུཔྤཛྫིཏྭཱ ནིརུདྡྷཏཱསཱམཉྙེན སེསསངྑཏཉྩ བྷཱུཏཱཔགཏ’’ནྟི ཝུཏྟཾ. སམྨོཧཝིནོདནིཡཱ པན ཝིཔཱཀཱནུབྷཝནཝསེན ཏདཱརམྨཎཾ ཨཝིཔཀྐཔཱཀསྶ སབྦཐཱ ཨཝིགཏཏྟཱ བྷཝིཏྭཱཝིགཏམཏྟཝསེན ཀམྨཉྩ བྷུཏྭཱཔགཏནྟི ¶ ཝུཏྟཾ. ཏེནེཝ ཏཏྠ ཨོཀཱསཀཏུཔྤནྣནྟི ཝིཔཱཀམེཝཱཧ, ན ཀམྨམྤི, ཏསྨཱ ཨིདྷཱཔི སམྨོཧཝིནོདནིཡཾ ཝུཏྟནཡེནེཝ བྷུཏྭཱཔགཏུཔྤནྣཾ ཨོཀཱསཀཏུཔྤནྣཉྩ ཝིབྷཏྟནྟི དཊྛབྦཾ.

པཉྩཀྑནྡྷཱ པན ཝིཔསྶནཱཡ བྷཱུམི ནཱམཱཏི སམྨསནསྶ ཋཱནབྷཱཝཏོ ཝུཏྟཾ. ཏེསཱུཏི ཨཏཱིཏཱདིབྷེདེསུ. ཨནུསཡིཏཀིལེསཱཏི ཨཔྤཧཱིནཱ མགྒེན པཧཱཏབྦཱ ཨདྷིཔྤེཏཱ. ཏེནཱཧ – ‘‘ཨཏཱིཏཱ ཝཱ…པེ… ན ཝཏྟབྦཱ’’ཏི. ཧོནྟུ ཏཱཝ ‘‘ཨཏཱིཏཱ’’ཏི ཝཱ ‘‘པཙྩུཔྤནྣཱ’’ཏི ཝཱ ན ཝཏྟབྦཱ, ‘‘ཨནཱགཏཱ’’ཏི པན ཀསྨཱ ན ཝཏྟབྦཱ, ནནུ ཀཱརཎལཱབྷེ ཨུཔྤཛྫནཱརཧཱ ཨཔྤཧཱིནཊྛེན ཐཱམགཏཱ ཀིལེསཱ ཨནུསཡཱཏི ཝུཙྩནྟཱིཏི? སཙྩམེཏཾ, ཨནཱགཏབྷཱཝོཔི ནེསཾ ན པརིཙྪིནྣོ ཨིཏརཱནཱགཏཀྑནྡྷཱནཾ ཝིཡཱཏི ‘‘ཨནཱགཏཱ ཝཱཏི ན ཝཏྟབྦཱ’’ཏི ཝུཏྟཾ. ཡདི ཧི ནེསཾ པརིཙྪིནྣོ ཨནཱགཏབྷཱཝོ སིཡཱ, ཏཏོ ‘‘པཙྩུཔྤནྣཱ, ཨཏཱིཏཱ’’ཏི ཙ ཝཏྟབྦཱ སིཡུཾ, པཙྩཡསམཝཱཡེ པན ཨུཔྤཛྫནཱརཧཏཾ ཨུཔཱདཱཡ ཨནཱགཏཝོཧཱརོ ཏཏྠ ཝེདིཏབྦོ.

ཨིདཾ བྷཱུམིལདྡྷུཔྤནྣཾ ནཱམཱཏི ཨིདཾ ཡཐཱཝུཏྟཾ ཀིལེསཛཱཏཾ ཨཔྤཧཱིནཊྛེན བྷཱུམིལདྡྷུཔྤནྣཾ ནཱམ ཀཱརཎལཱབྷེ སཏི ཝིཛྫམཱནཀིཙྩཀརཎཏོ. ཏཱསུ ཏཱསུ བྷཱུམིསཱུཏི མནུསྶདེཝཱདིཨཏྟབྷཱཝསངྑཱཏེསུ ཨུཔཱདཱནཀྑནྡྷེསུ. ཨཱརམྨཎཀརཎཝསེན ཧི བྷཝནྟི ཨེཏྠ ཀིལེསཱཏི བྷཱུམིཡོ, ཨུཔཱདཱནཀྑནྡྷཱ. ཨསམུགྒྷཱཏགཏཱཏི ཏསྨིཾ ཏསྨིཾ སནྟཱནེ ཨནུཔྤཏྟིདྷམྨཏཾ ཨནཱཔཱདིཏཏཱཡ སམུགྒྷཱཏཾ སམུཙྪེདཾ ན གཏཱཏི ཨསམུགྒྷཱཏགཏཱ. བྷཱུམིལདྡྷུཔྤནྣཾ ནཱམཱཏི ཨེཏྠ ལདྡྷབྷཱུམིཀཾ ¶ བྷཱུམིལདྡྷནྟི ཝུཏྟཾ ཨགྒིཨཱཧིཏོ ཝིཡ. ཨོཀཱསཀཏུཔྤནྣསདྡེཔི ཙ ཨཊྛསཱལིནིཡཾ (དྷ. ས. ཨཊྛ. ༡ ཀཱམཱཝཙརཀུསལཔདབྷཱཛནཱིཡ) ཨཱགཏནཡེན ཨོཀཱསོ ཀཏོ ཨེཏེན ཀུསལཱཀུསལཀམྨེན, ཨོཀཱསོ ཀཏོ ཨེཏསྶ ཝིཔཱཀསྶཱཏི ཙ དུཝིདྷཏྠེཔི ཨེཝམེཝ ཀཏསདྡསྶ པརནིཔཱཏོ ཝེདིཏབྦོ. ཨིདྷ པན ཨོཀཱསཀཏུཔྤནྣསདྡེན ཝིཔཱཀསྶེཝ གཧིཏཏྟཱ ‘‘ཨོཀཱསོ ཀཏོ ཨེཏསྶ ཝིཔཱཀསྶཱ’’ཏི ཨེཝཾ ཝིགྒཧོ དཊྛབྦོ.

ཁཎཏྟཡསམངྒིཏཱཡ སམུདཱཙཱརཔྤཏྟཾ སམུདཱཙཱརུཔྤནྣཾ. ཏེནཱཧ – ‘‘སམྤཏི ཝཏྟམཱནཾཡེཝཱ’’ཏི. ཨཱརམྨཎཾ ཨདྷིགྒཡ྄ཧ དལ༹ྷཾ གཧེཏྭཱ པཝཏྟཾ ཨཱརམྨཎཱདྷིགྒཧིཏུཔྤནྣཾ. ཝིཀྑམྦྷནཔྤཧཱནཝསེན ཨཔྤཧཱིནཱ ཨཝིཀྑམྦྷིཏཱ. སམུཙྪེདཔྤཧཱནཝསེན ཨཔྤཧཱིནཱ ཨསམུགྒྷཱཏིཏཱ. ནིམིཏྟགྒཱཧཝསེན ཨཱརམྨཎསྶ ཨདྷིགྒཧིཏཏྟཱ ¶ ཏཾ ཨཱརམྨཎཾ ཨནུསྶརིཏཱནུསྶརིཏཀྑཎེ ཀིལེསུཔྤཏྟིཧེཏུབྷཱཝེན ཨུཔཏིཊྛནཏོ ཨདྷིགྒཧིཏམེཝ ནཱམཾ ཧོཏཱིཏི ཨཱཧ – ‘‘ཨཱརམྨཎསྶ ཨདྷིགྒཧིཏཏྟཱ’’ཏི. ཨེཏྠ ཙ ཨཱཧཊཁཱིརརུཀྑོ ཝིཡ ནིམིཏྟགྒཱཧཝསེན ཨདྷིགྒཧིཏཾ ཨཱརམྨཎཾ, ཨནཱཧཊཁཱིརརུཀྑོ ཝིཡ ཨཝིཀྑམྦྷིཏཏཱཡ ཨནྟོགཏཀིལེསཨཱརམྨཎཾ དཊྛབྦཾ. ནིམིཏྟགྒཱཧིཀཱ ཨཝིཀྑམྦྷིཏཀིལེསཱ ཝཱ པུགྒལཱ ཝཱ ཨཱཧཊཱནཱཧཊཁཱིརརུཀྑསདིསཱ. པུརིམནཡེནེཝཱཏི ཨཝིཀྑམྦྷིཏུཔྤནྣེ ཝུཏྟནཡེནེཝ. ཝིཏྠཱརེཏབྦནྟི ‘‘ཨིམསྨིཾ ནཱམ ཋཱནེ ནུཔྤཛྫིསྶནྟཱི’’ཏི ན ཝཏྟབྦཱ. ཀསྨཱ? ཨསམུགྒྷཱཏིཏཏྟཱ. ཡཐཱ ཀིཾ? ཡཐཱ སཙེ ཁཱིརརུཀྑཾ ཀུཋཱརིཡཱ ཨཱཧནེཡྻུཾ, ཨིམསྨིཾ ནཱམ ཋཱནེ ཁཱིརཾ ན ནིཀྑམེཡྻཱཏི ན ཝཏྟབྦཾ, ཨེཝཾ. ཨིདཾ ཨསམུགྒྷཱཏིཏུཔྤནྣཾ ནཱམཱཏི ཨེཝཾ ཡོཛེཏྭཱ ཝིཏྠཱརེཏབྦཾ.

ཨིམེསུ ཨུཔྤནྣེསཱུཏི ཡཐཱཝུཏྟེསུ ཨཊྛསུ ཨུཔྤནྣེསུ. ཨིདཾ ན མགྒཝཛ྄ཛྷཾ ཨཔྤཧཱཏབྦཝཏྠུཏྟཱ. མགྒཝཛ྄ཛྷཾ མགྒེན པཧེཡྻཝཏྠུཏྟཱ. རཏྟོཏི རཱགེན སམནྣཱགཏོ. ཨེས ནཡོ དུཊྛོ མཱུལ༹ྷོཏི ཨེཏྠཱཔི. ཝིནིབདྡྷོཏི མཱནསཾཡོཛནེན ཝིརཱུཔཾ ནིབནྡྷིཏོ. པརཱམཊྛོཏི དིཊྛིཔརཱམཱསེན དྷམྨསབྷཱཝཾ ཨཏིཀྐམྨ པརཏོ ཨཱམཊྛོ. ཨནིཊྛངྒཏོཏི ནིཊྛཾ ཨགཏོ, སཾསཡཱཔནྣོཏི ཨཏྠོ. ཐཱམགཏོཏི ཨནུསཡཝསེན དལ༹ྷཏཾ ཨུཔགཏོ. ཡུགནདྡྷཱཏི པཧཱཏབྦཔྤཧཱཡཀཡུགེ ནདྡྷཱ ཝིཡ ཝཏྟནཀཱ ཨེཀཀཱལིཀཏྟཱ. སཾཀིལེསིཀཱཏི སཾཀིལེསདྷམྨསཧིཏཱ.

པཱལི༹ཡནྟི པཊིསམྦྷིདཱཔཱལི༹ཡཾ (པཊི. མ. ༣.༢༡). ཏིཀཱལིཀེསུཔི ཀིལེསེསུ ཝཱཡཱམཱབྷཱཝདསྶནཏྠཾ ཨཛཱཏཕལཏརུཎརུཀྑོ པཱལི༹ཡཾ ནིདསྶིཏོ, ཨཊྛཀཐཱཡཾ པན ཛཱཏོ སཏྟོ ཨསམུདཱཧཊཀིལེསོ ནཱམ ནཏྠཱིཏི ‘‘ཛཱཏཕལརུཀྑེན དཱིཔེཏབྦ’’ནྟི ཝཏྭཱ ཏམཏྠཾ ཝིཝརིཏུཾ ‘‘ཡཐཱ ཧཱི’’ཏིཨཱདི ཝུཏྟཾ. ཨཐ ཝཱ མགྒེན པཧཱིནཀིལེསཱནམེཝ ཨཏཱིཏཱདིབྷེདེན ཏིདྷཱ ¶ ནཝཏྟབྦཏཾ པཱཀཊཾ ཀཱཏུཾ ཨཛཱཏཕལརུཀྑོ ཨུཔམཱཝསེན པཱལི༹ཡཾ ཨཱབྷཏོ, ཨཏཱིཏཱདཱིནཾ ཨཔྤཧཱིནཏཱདསྶནཏྠམྤི ‘‘ཛཱཏཕལརུཀྑེན དཱིཔེཏབྦ’’ནྟི ཨཊྛཀཐཱཡཾ ཝུཏྟཾ. ཏཏྠ ཡཐཱ ཨཙྪིནྣེ རུཀྑེ ནིབྦཏྟནཱརཧཱནི ཕལཱནི ཚིནྣེ ཨནུཔྤཛྫམཱནཱནི ཀདཱཙི སསབྷཱཝཱནི ཨཧེསུཾ, ཧོནྟི, བྷཝིསྶནྟི ཝཱཏི ཨཏཱིཏཱདིབྷཱཝེན ན ཝཏྟབྦཱནི, ཨེཝཾ མགྒེན པཧཱིནཀིལེསཱ ཙ དཊྛབྦཱ མགྒེ ཨནུཔྤནྣེ ཨུཔྤཏྟིརཧཱནཾ ཨུཔྤནྣེ སབྦེན སབྦཾ ཨབྷཱཝཏོ ¶ . ཡཐཱ ཙ ཚེདེ ཨསཏི ཕལཱནི ཨུཔྤཛྫིསྶནྟཱིཏི ཚེདནསྶ སཱཏྠཀཏཱ, ཨེཝཾ མགྒབྷཱཝནཱཡ ཙ སཱཏྠཀཏཱ ཡོཛེཏབྦཱ. ནཱཔི ན པཛཧཏཱིཏི ཨུཔྤཛྫནཱརཧཱནཾ པཛཧནཏོ ཝུཏྟཾ. ཨུཔྤཛྫིཏྭཱཏི ལཀྑཎེ ཏྭཱ-སདྡོ. མགྒསྶ ཨུཔྤཛྫནཀིརིཡཱཡ ཧི སམུདཡཔྤཧཱནནིབྦཱནསཚིཀརཎཀིརིཡཱ ཝིཡ ཁནྡྷཱནཾ པརིཛཱནནཀིརིཡཱ ལཀྑཱིཡཏི.

ཏེཔི པཛཧཏིཡེཝཱཏི ཡེ ཏེཧི ཀིལེསེཧི ཛནེཏབྦཱ ཨུཔཱདིནྣཀྑནྡྷཱ, ཏེཔི པཛཧཏིཡེཝ ཏནྣིམིཏྟསྶ ཨབྷིསངྑཱརཝིཉྙཱཎསྶ ནིརོདྷནཏོ. ཏེནཱཧ – ‘‘ཝུཏྟམྤི ཙེཏ’’ནྟིཨཱདི. ཨབྷིསངྑཱརཝིཉྙཱཎསྶ ནིརོདྷེནཱཏི ཀམྨཝིཉྙཱཎསྶ ཨནུཔྤཏྟིདྷམྨཏཱཔཱདནེན. ཨེཏྠཱཏི ཨེཏསྨིཾ སོཏཱཔཏྟིམགྒཉཱཎེ ཧེཏུབྷཱུཏེ. ཨེཏེཏི ནཱམརཱུཔསཉྙིཏཱ སངྑཱརཱ. སབྦབྷཝེཧི ཝུཊྛཱཏིཡེཝཱཏིཔི ཝདནྟཱིཏི ཨརཧཏྟམགྒོ སབྦབྷཝེཧི ཝུཊྛཱཏིཡེཝཱཏི ཝདནྟི ཏདུཔྤཏྟིཏོ ཨུདྡྷཾ བྷཝཱུཔཔཏྟིཡཱ ཀིལེསསྶཔི ཨབྷཱཝཏོ.

ཨེཀཙིཏྟཀྑཎིཀཏྟཱ མགྒསྶཱཏི ཨདྷིཔྤཱཡེན ‘‘ཀཐཾ ཨནུཔྤནྣཱནཾ…པེ… ཋིཏིཡཱ བྷཱཝནཱ ཧོཏཱི’’ཏི པུཙྪཏི. མགྒཔྤཝཏྟིཡཱཡེཝ ཨུབྷཡཀིཙྩསིདྡྷིཏོ ཨཱཧ – ‘‘མགྒཔྤཝཏྟིཡཱཡེཝཱ’’ཏི. མགྒོ ཧཱིཏིཨཱདིནཱ ཏམཏྠཾ ཝིཝརཏི. ཨནུཔྤནྣོ ནཱམ ཝུཙྩཏི, ཏསྨཱ ཏསྶ བྷཱཝནཱ ཨནུཔྤནྣཱནཾ ཨུཔྤཱདཱཡ བྷཱཝནཱ ཝུཏྟཱཏི ཡོཛེཏབྦཱ. ཝཏྟུཾ ཝཊྚཏཱིཏི ཡཱཝཏཱ མགྒསྶ པཝཏྟིཡེཝ ཋིཏི, ཏཏྟཀཱནེཝ ནིབྦཏྟིཏལོཀུཏྟརཱནི.

༣༩༨-༤༠༡. ཀཏྟུཀམྱཏཱཚནྡཾ ཨདྷིཔཏིཾ ཀརིཏྭཱ པཊིལདྡྷསམཱདྷི ཚནྡསམཱདྷཱིཏི ཨཱཧ – ‘‘ཚནྡཾ ནིསྶཱཡ པཝཏྟོ སམཱདྷི ཚནྡསམཱདྷཱི’’ཏི པདྷཱནསངྑཱརཱཏི ཙཏུཀིཙྩསཱདྷཀསྶ སམྨཔྤདྷཱནཝཱིརིཡསྶེཏཾ ཨདྷིཝཙནཾ. ཏེནཱཧ – ‘‘པདྷཱནབྷཱུཏཱ སངྑཱརཱ པདྷཱནསངྑཱརཱ’’ཏི. ཏཏྠ པདྷཱནབྷཱུཏཱཏི ཝཱིརིཡབྷཱུཏཱ. སངྑཏསངྑཱརཱདིནིཝཏྟནཏྠཾ པདྷཱནགྒཧཎནྟི. ཨཐ ཝཱ ཏཾ ཏཾ ཝིསེསཾ སངྑརོཏཱིཏི སངྑཱརོ, སབྦཾ ཝཱིརིཡཾ. ཏཏྠ ཙཏུཀིཙྩསཱདྷཀཏོ སེསནིཝཏྟནཏྠཾ པདྷཱནགྒཧཎནྟི, པདྷཱནབྷཱུཏཱ སེཊྛབྷཱུཏཱཏི ཨཏྠོ. ཙཏུབྦིདྷསྶ པན ཝཱིརིཡསྶ ཨདྷིཔྤེཏཏྟཱ བཧུཝཙནནིདྡེསོ ཀཏོ. ཏེཧི དྷམྨེཧཱིཏི ཚནྡསམཱདྷིནཱ པདྷཱནསངྑཱརེཧི ཙ. ཨིདྡྷིཔཱདནྟི ཨེཏྠ ཨིཛ྄ཛྷཏཱིཏི ཨིདྡྷི, སམིཛ྄ཛྷཏི ¶ ནིཔྥཛྫཏཱིཏི ཨཏྠོ. ཨིཛ྄ཛྷནྟི ཝཱ ཨེཏཱཡ སཏྟཱ ཨིདྡྷཱ ཝུདྡྷཱ ཨུཀྐཾསགཏཱ ཧོནྟཱིཏིཔི ཨིདྡྷི. པཋམེནཏྠེན ཨིདྡྷི ཨེཝ པཱདོ ¶ ཨིདྡྷིཔཱདོ, ཨིདྡྷིཀོཊྛཱསོཏི ཨཏྠོ. དུཏིཡེནཏྠེན ཨིདྡྷིཡཱ པཱདོཏི ཨིདྡྷིཔཱདོ, པཱདོཏི པཏིཊྛཱ, ཨདྷིགམཱུཔཱཡོཏི ཨཏྠོ. ཏེན ཧི ཡསྨཱ ཨུཔརཱུཔརིཝིསེསསངྑཱཏཾ ཨིདྡྷིཾ པཛྫནྟི པཱཔུཎནྟི, ཏསྨཱ པཱདོཏི ཝུཙྩཏི. ཏེནཱཧ – ‘‘ཨིདྡྷིཡཱ པཱདཾ, ཨིདྡྷིབྷཱུཏཾ ཝཱ པཱདཾ ཨིདྡྷིཔཱད’’ནྟི.

ཨཐ ཝཱ ཨིདྡྷིཔཱདནྟི ནིཔྥཏྟིཔརིཡཱཡེན ཨིཛ྄ཛྷནཊྛེན, ཨིཛ྄ཛྷནྟི ཨེཏཱཡ སཏྟཱ ཨིདྡྷཱ ཝུདྡྷཱ ཨུཀྐཾསགཏཱ ཧོནྟཱིཏི ཨིམིནཱ ཝཱ པརིཡཱཡེན ཨིདྡྷཱིཏི སངྑཾ གཏཱནཾ ཨུཔཙཱརཛ྄ཛྷཱནཱདིཀུསལཙིཏྟསམྤཡུཏྟཱནཾ ཚནྡསམཱདྷིཔདྷཱནསངྑཱརཱནཾ ཨདྷིཊྛཱནཊྛེན པཱདབྷཱུཏཾ སེསཙིཏྟཙེཏསིཀརཱསིནྟི ཨཏྠོ. ཏེནེཝ ཨིདྡྷིཔཱདཝིབྷངྒེ (ཝིབྷ. ༤༣༤-༤༣༧) ‘‘ཨིདྡྷིཔཱདོཏི ཏཐཱབྷཱུཏསྶ ཝེདནཱཀྑནྡྷོ…པེ… ཝིཉྙཱཎཀྑནྡྷོ’’ཏི ཝུཏྟཾ. སཱ ཨེཝ ཙ ཏཐཱཝུཏྟཱ ཨིདྡྷི ཡསྨཱ ཧེཊྛིམཱ ཧེཊྛིམཱ ཨུཔརིམཱཡ ཨུཔརིམཱཡ ཏཡོ ཚནྡསམཱདྷིཔྤདྷཱནསངྑཱརཱ པཱདབྷཱུཏཱ ཨདྷིཊྛཱནབྷཱུཏཱ, ཏསྨཱ ཝུཏྟཾ ‘‘ཨིདྡྷིབྷཱུཏཾ ཝཱ པཱད’’ནྟི. ཏཐཱ ཧེཊྛཱ དྷམྨཱ ཨིདྡྷིཔི ཧོནྟི ཨིདྡྷིཔཱདཱཔི, སེསཱ པན སམྤཡུཏྟཀཱ ཙཏྟཱརོ ཁནྡྷཱ ཨིདྡྷིཔཱདཱཡེཝ. ཝཱིརིཡཙིཏྟཝཱིམཾསཱསམཱདྷིཔྤདྷཱནསངྑཱརསངྑཱཏཱཔི ཏཡོ ཏཡོ དྷམྨཱ ཨིདྡྷིཔི ཧོནྟི ཨིདྡྷིཔཱདཱཔི, སེསཱ པན སམྤཡུཏྟཀཱ ཙཏྟཱརོ ཁནྡྷཱ ཨིདྡྷིཔཱདཱཡེཝ.

ཨཔིཙ པུབྦབྷཱགོ པུབྦབྷཱགོ ཨིདྡྷིཔཱདོ ནཱམ, པཊིལཱབྷོ པཊིལཱབྷོ ཨིདྡྷི ནཱམཱཏི ཝེདིཏབྦཱ. ཨཡམཏྠོ ཨུཔཙཱརེན ཝཱ ཝིཔསྶནཱཡ ཝཱ དཱིཔེཏབྦོ. པཋམཛ྄ཛྷཱནཔརིཀམྨཉྷི ཨིདྡྷིཔཱདོ ནཱམ, པཋམཛ྄ཛྷཱནཾ ཨིདྡྷི ནཱམ. དུཏིཡཛྷཱན… ཏཏིཡཛྷཱན… ཙཏུཏྠཛྷཱན… ཨཱཀཱསཱནཉྩཱཡཏན… ཝིཉྙཱཎཉྩཱཡཏན… ཨཱཀིཉྩཉྙཱཡཏན… ནེཝསཉྙཱནཱསཉྙཱཡཏནཔརིཀམྨཾ ཨིདྡྷིཔཱདོ ནཱམ, ནེཝསཉྙཱནཱསཉྙཱཡཏནཾ ཨིདྡྷི ནཱམ. སོཏཱཔཏྟིམགྒསྶ ཝིཔསྶནཱ ཨིདྡྷིཔཱདོ ནཱམ, སོཏཱཔཏྟིམགྒོ ཨིདྡྷི ནཱམ. སཀདཱགཱམི-ཨནཱགཱམི-ཨརཧཏྟམགྒསྶ ཝིཔསྶནཱ ཨིདྡྷིཔཱདོ ནཱམ, ཨརཧཏྟམགྒོ ཨིདྡྷི ནཱམ. པཊིལཱབྷེནཔི དཱིཔེཏུཾ ཝཊྚཏིཡེཝ. པཋམཛ྄ཛྷཱནཉྷི ཨིདྡྷིཔཱདོ ནཱམ, དུཏིཡཛ྄ཛྷཱནཾ ཨིདྡྷི ནཱམ. དུཏིཡཛ྄ཛྷཱནཾ ཨིདྡྷིཔཱདོ ནཱམ, ཏཏིཡཛ྄ཛྷཱནཾ ཨིདྡྷི ནཱམ…པེ… ཨནཱགཱམིམགྒོ ཨིདྡྷིཔཱདོ ནཱམ, ཨརཧཏྟམགྒོ ཨིདྡྷི ནཱམ.

སེསེསུཔཱིཏི ཝཱིརིཡསམཱདྷིཨཱདཱིསུཔི. ཏཏྠ ཧི ཝཱིརིཡཾ, ཙིཏྟཾ, ཝཱིམཾསཾ ཨདྷིཔཏིཾ ཀརིཏྭཱ པཊིལདྡྷསམཱདྷི ཝཱིརིཡསམཱདྷི, ཙིཏྟསམཱདྷི, ཝཱིམཾསཱསམཱདྷཱིཏི ¶ ཨཏྠོ ཝེདིཏབྦོ. ཚནྡཱདཱིསུ ཨེཀནྟི ¶ ཚནྡཱདཱིསུ ཙཏཱུསུ ཨཱདིཏོ ཝུཏྟཏྟཱ ཨཱདིབྷཱུཏཾ ཨེཀཾ པདྷཱནཾ ཚནྡནྟི ཨདྷིཔྤཱཡོ. ཏེནེཝཱཧ – ‘‘ཏདཱསྶ པཋམིདྡྷིཔཱདོ’’ཏི. ཨེཝཾ སེསཱཔཱིཏི ཨེཏེན ཝཱིརིཡཾ ཙིཏྟཾ ཝཱིམཾསཾ ནིསྶཱཡ ཝིཔསྶནཾ ཝཌྜྷེཏྭཱ ཨརཧཏྟཾ པཱཔུཎནྟཱནཾ ཝསེན དུཏིཡཝཱིརིཡིདྡྷིཔཱདཱདཡོ ཡོཛེཏབྦཱཏི དསྶེཏི. ཨིམིནཱ ཧི སུཏྟནྟེན ཙཏུནྣཾ བྷིཀྑཱུནཾ མཏྠཀཔྤཏྟཾ ཀམྨཊྛཱནཾ དསྶིཏཾ. ཨེཀོ ཧི བྷིཀྑུ ཚནྡཾ ཨཝསྶཡཏི, ཀཏྟུཀམྱཏཱཀུསལདྷམྨཙྪནྡེན ཨཏྠནིཔྥཏྟིཡཾ སཏི ‘‘ཨཧཾ ལོཀུཏྟརདྷམྨཾ ནིབྦཏྟེསྶཱམི, ནཏྠི མཡ྄ཧཾ ཨེཏསྶ ནིབྦཏྟནེ བྷཱརོ’’ཏི ཚནྡཾ ཛེཊྛཀཾ ཚནྡཾ དྷུརཾ ཚནྡཾ པུབྦངྒམཾ ཀཏྭཱ ལོཀུཏྟརདྷམྨཾ ནིབྦཏྟེཏི. ཨེཀོ ཝཱིརིཡཾ ཨཝསྶཡཏི, ཨེཀོ ཙིཏྟཾ, ཨེཀོ པཉྙཾ ཨཝསྶཡཏི, པཉྙཱཡ ཨཏྠནིཔྥཏྟིཡཾ སཏི ‘‘ཨཧཾ ལོཀུཏྟརདྷམྨཾ ནིབྦཏྟེསྶཱམི, ནཏྠི མཡ྄ཧཾ ཨེཏསྶ ནིབྦཏྟནེ བྷཱརོ’’ཏི པཉྙཾ ཛེཊྛཀཾ པཉྙཾ དྷུརཾ པཉྙཾ པུབྦངྒམཾ ཀཏྭཱ ལོཀུཏྟརདྷམྨཾ ནིབྦཏྟེཏི.

ཀཐཾ? ཡཐཱ ཧི ཙཏཱུསུ ཨམཙྩཔུཏྟེསུ ཋཱནནྟརཾ པཏྠེཏྭཱ ཝིཙརནྟེསུ ཨེཀོ ཨུཔཊྛཱནཾ ཨཝསྶཡཏི, ཨེཀོ སཱུརབྷཱཝཾ, ཨེཀོ ཛཱཏིཾ, ཨེཀོ མནྟཾ. ཀཐཾ? ཏེསུ ཧི པཋམོ ཨུཔཊྛཱནེ ཨཔྤམཱདཀཱརིཏཱཡ ཨཏྠནིཔྥཏྟིཡཱ སཏི ལབྦྷམཱནཾ ‘‘ལཙྪཱམེཏཾ ཋཱནནྟར’’ནྟི ཨུཔཊྛཱནཾ ཨཝསྶཡཏི. དུཏིཡོ ཨུཔཊྛཱནེ ཨཔྤམཏྟོཔི ‘‘ཨེཀཙྩོ སངྒཱམེ པཙྩུཔཊྛིཏེ སཎྛཱཏུཾ ན སཀྐོཏི, ཨཝསྶཾ པན རཉྙོ པཙྩནྟོ ཀུཔྤིསྶཏི, ཏསྨིཾ ཀུཔྤིཏེ རཐསྶ པུརཏོ ཀམྨཾ ཀཏྭཱ རཱཛཱནཾ ཨཱརཱདྷེཏྭཱ ཨཱཧརཱཔེསྶཱམེཏཾ ཋཱནནྟར’’ནྟི སཱུརབྷཱཝཾ ཨཝསྶཡཏི. ཏཏིཡོ ‘‘སཱུརབྷཱཝེཔི སཏི ཨེཀཙྩོ ཧཱིནཛཱཏིཀོ ཧོཏི, ཛཱཏིཾ སོདྷེཏྭཱ ཋཱནནྟརཾ དེནྟོ མཡ྄ཧཾ དསྶཏཱི’’ཏི ཛཱཏིཾ ཨཝསྶཡཏི. ཙཏུཏྠོ ‘‘ཛཱཏིམཱཔི ཨེཀོ ཨམནྟནཱིཡོ ཧོཏི, མནྟེན ཀཏྟབྦཀིཙྩེ ཨུཔྤནྣེ ཨཱཧརཱཔེསྶཱམེཏཾ ཋཱནནྟར’’ནྟི མནྟཾ ཨཝསྶཡཏི. ཏེ སབྦེཔི ཨཏྟནོ ཨཏྟནོ ཨཝསྶཡབལེན ཋཱནནྟརཱནི པཱཔུཎིཾསུ.

ཏཏྠ ཨུཔཊྛཱནེ ཨཔྤམཏྟོ ཧུཏྭཱ ཋཱནནྟརཾ པཏྟོ ཝིཡ ཚནྡཾ ཨཝསྶཱཡ ཀཏྟུཀམྱཏཱཀུསལདྷམྨཙྪནྡེན ‘‘ཨཏྠནིཔྥཏྟིཡཾ སཏི ཨཧཾ ལོཀུཏྟརདྷམྨཾ ནིབྦཏྟེསྶཱམི, ནཏྠི མཡ྄ཧཾ ཨེཏསྶ ནིབྦཏྟནེ སཱརོ’’ཏི ཚནྡཾ ཛེཊྛཀཾ ཚནྡཾ དྷུརཾ ཚནྡཾ པུབྦངྒམཾ ཀཏྭཱ ལོཀུཏྟརདྷམྨནིབྦཏྟཀོ ¶ དཊྛབྦོ ¶ རཊྛཔཱལཏྠེརོ (མ. ནི. ༢.༢༩༣ ཨཱདཡོ) ཝིཡ. སོ ཧི ཨཱཡསྨཱ ‘‘ཚནྡེ སཏི ཀཐཾ ནཱནུཛཱནིསྶནྟཱི’’ཏི སཏྟཱཧམྤི བྷཏྟཱནི ཨབྷུཉྫིཏྭཱ མཱཏཱཔིཏརོ ཨནུཛཱནཱཔེཏྭཱ པབྦཛིཏྭཱ ཚནྡམེཝ ཨཝསྶཱཡ ལོཀུཏྟརདྷམྨཾ ནིབྦཏྟེསི. སཱུརབྷཱཝེན རཱཛཱནཾ ཨཱརཱདྷེཏྭཱ ཋཱནནྟརཾ པཏྟོ ཝིཡ ཝཱིརིཡཾ ཛེཊྛཀཾ ཝཱིརིཡཾ དྷུརཾ ཝཱིརིཡཾ པུབྦངྒམཾ ཀཏྭཱ ལོཀུཏྟརདྷམྨནིབྦཏྟཀོ དཊྛབྦོ སོཎཏྠེརོ (མཧཱཝ. ༢༤༣ ཨཱདཡོ) ཝིཡ. སོ ཧི ཨཱཡསྨཱ ཝཱིརིཡཾ དྷུརཾ ཀཏྭཱ ལོཀུཏྟརདྷམྨཾ ནིབྦཏྟེསི.

ཛཱཏིསམྤཏྟིཡཱ ཋཱནནྟརཾ པཏྟོཝིཡ ཙིཏྟཾ ཛེཊྛཀཾ ཙིཏྟཾ དྷུརཾ ཙིཏྟཾ པུབྦངྒམཾ ཀཏྭཱ ལོཀུཏྟརདྷམྨནིབྦཏྟཀོ དཊྛབྦོ སམྦྷཱུཏཏྠེརོ (ཐེརགཱ. ཨཊྛ. ༢ སམྦྷཱུཏཏྠེརགཱཐཱཝཎྞནཱ) ཝིཡ. སོ ཧི ཨཱཡསྨཱ ཙིཏྟཾ ཛེཊྛཀཾ ཙིཏྟཾ དྷུརཾ ཙིཏྟཾ པུབྦངྒམཾ ཀཏྭཱ ལོཀུཏྟརདྷམྨཾ ནིབྦཏྟེསི. མནྟཾ ཨཝསྶཱཡ ཋཱནནྟརཾ པཏྟོ ཝིཡ ཝཱིམཾསཾ ཛེཊྛཀཾ ཝཱིམཾསཾ དྷུརཾ ཝཱིམཾསཾ པུབྦངྒམཾ ཀཏྭཱ ལོཀུཏྟརདྷམྨནིབྦཏྟཀོ དཊྛབྦོ ཐེརོ མོགྷརཱཛཱ (སུ. ནི. ༡༡༢༢ ཨཱདཡོ; ཙཱུལ༹ནི. མོགྷརཱཛམཱཎཝཔུཙྪཱནིདྡེསོ ༨༥) ཝིཡ. སོ ཧི ཨཱཡསྨཱ ཝཱིམཾསཾ ཛེཊྛཀཾ ཝཱིམཾསཾ དྷུརཾ ཝཱིམཾསཾ པུབྦངྒམཾ ཀཏྭཱ ལོཀུཏྟརདྷམྨཾ ནིབྦཏྟེསི. ཏསྶ ཧི བྷགཝཱ ‘‘སུཉྙཏོ ལོཀཾ ཨཝེཀྑསྶཱུ’’ཏི (སུ. ནི. ༡༡༢༥; ཙཱུལ༹ནི. མོགྷརཱཛམཱཎཝཔུཙྪཱནིདྡེསོ ༨༨) སུཉྙཏཱཀཐཾ ཀཐེསི. པཉྙཱནིསྶིཏམཱནནིགྒཧཏྠཉྩ དྭིཀྑཏྟུཾ པུཙྪིཏོ པཉྷཾ ན ཀཐེསི. ཨེཏྠ ཙ པུནཔྤུནཾ ཚནྡུཔྤཱདནཾ ཏོསནཾ ཝིཡ ཧོཏཱིཏི ཚནྡསྶ ཨུཔཊྛཱནསདིསཏཱ ཝུཏྟཱ, ཐཱམབྷཱཝཏོ ཝཱིརིཡསྶ སཱུརཏྟསདིསཏཱ, ‘‘ཚདྭཱརཱདྷིཔཏི རཱཛཱ’’ཏི (དྷ. པ. ཨཊྛ. ༢.ཨེརཀཔཏྟནཱགརཱཛཝཏྠུ) ཝཙནཏོ པུབྦངྒམཏཱ ཙིཏྟསྶ ཝིསིཊྛཛཱཏིསདིསཏཱ.

༤༠༢-༤༠༦. ཨཏྟནོ སདྡྷཱདྷུརེཏི ཨཏྟནོ སདྡྷཱཀིཙྩེ སདྡཧནཀིརིཡཱཡ. ཨིནྡཊྛཾ ཀཱརེཏཱིཏི ཨནུཝཏྟནཝསེན སམྤཡུཏྟདྷམྨེསུ ཨིནྡཊྛཾ ཀཱརེཏི, ཏསྨཱ ཨཱདྷིཔཏེཡྻཊྛེན སདྡྷཱ ཨེཝ ཨིནྡྲིཡནྟི སདྡྷིནྡྲིཡཾ. ཏཐཱ ཝཱིརིཡཱདཱིནཾ སཀསཀཀིཙྩེསཱུཏི ཨཱཧ – ‘‘ཝཱིརིཡིནྡྲིཡཱདཱིསུཔི ཨེསེཝ ནཡོ’’ཏི. ཝིསོདྷེནྟོཏི ཝིཔཀྑཝིཝཛྫནསཔཀྑནིསེཝནསརིཀྑཱུཔནིསྶཡསངྒཎྷནལཀྑཎེཧི ཏཱིཧི ཀཱརཎེཧི ཝིསོདྷནཝསེན སོདྷེནྟོ.

ཨསྶདྡྷེ པུགྒལེ པརིཝཛྫཡཏོཏི བུདྡྷཱདཱིསུ པསཱདསིནེཧཱབྷཱཝེན སདྡྷཱརཧིཏེ ལཱུཁཔུགྒལེ སབྦསོ ཝཛྫཡཏོ. སདྡྷེ པུགྒལེ སེཝཏོཏི ¶ བུདྡྷཱདཱིསུ སདྡྷཱདྷིམུཏྟེ ཝཀྐལིཏྠེརསདིསེ སེཝཏོ. པསཱདནཱིཡེཏི པསཱདཱཝཧེ སམྤསཱདནཱིཡསུཏྟཱདིཀེ (དཱི. ནི. ༣.༡༤༡ ཨཱདཡོ). པཙྩཝེཀྑཏོཏི པཱལི༹ཏོ ཨཏྠཏོ ཙ པཏི པཏི ཨཝེཀྑནྟསྶ ཙིནྟེནྟསྶ. ཝིསུཛ྄ཛྷཏཱིཏི པཊིཔཀྑམལཝིགམཏོ པཙྩཡཝསེན སབྷཱཝསཾསུདྡྷིཏོ ཝིསུདྡྷཕལནིབྦཏྟིཏོ ཙ སདྡྷིནྡྲིཡཾ ཝིསུཛ྄ཛྷཏི. ཨེས ནཡོ སེསེསུཔི. སམྨཔྤདྷཱནེཏི སམྨཔྤདྷཱནཔྤཊིསཾཡུཏྟེ (སཾ. ནི. ༥.༦༥༡-༦༦༢ ཨཱདཡོ) སུཏྟནྟེ. ཨེས ནཡོ སེསེསུཔི. ཛྷཱནཝིམོཀྑེཏི པཋམཛ྄ཛྷཱནཱདིཛ྄ཛྷཱནཱནི ¶ ཙེཝ པཋམཝིམོཀྑཱདིཝིམོཀྑེ ཙ. ཀཱམཉྩེཏྠ ཛྷཱནཱནིཡེཝ ཝིམོཀྑཱ, པཝཏྟིཨཱཀཱརཝསེན པན ཝིསུཾ གཧཎཾ.

གམྦྷཱིརཉཱཎཙརིཡནྟི གམྦྷཱིརཱནཾ ཉཱཎཱནཾ པཝཏྟིཊྛཱནཾ. ཏེནཱཧ – ‘‘སཎྷསུཁུམ’’ནྟིཨཱདི. ཁནྡྷནྟརནྟི སབྷཱཝཛཱཏིབྷཱུམིཨཱདིཝསེན ཁནྡྷཱནཾ ནཱནཏྟཾ. ཨེས ནཡོ སེསེསུཔི. ཨཀཏཱབྷིནིཝེསོཏི པུབྦེ ཨཀཏབྷཱཝནཱབྷིནིཝེསོ. སདྡྷཱདྷུརཱདཱིསཱུཏི སདྡྷཱདྷུརེ པཉྙཱདྷུརེ ཙ. ཨཝསཱནེཏི བྷཱཝནཱཔརིཡོསཱནེ. ཝིཝཊྚེཏྭཱཏི སངྑཱརཱརམྨཎཏོ ཝིཝཊྚེཏྭཱ ནིབྦཱནཾ ཨཱརམྨཎཾ ཀཏྭཱ. ཨརཧཏྟཾ གཎྷཱཏཱིཏི མགྒཔརམྤརཱཡ ཨརཧཏྟཾ གཎྷཱཏི. ཨཀམྤིཡཊྛེནཱཏི པཊིཔཀྑེཧི ཨཀམྤིཡབྷཱཝེན. ཨེཏེནེཝསྶ སམྤཡུཏྟདྷམྨེསུ ཐིརབྷཱཝོཔི ཝིབྷཱཝིཏོ དཊྛབྦོ. ན ཧི སམྤཡུཏྟདྷམྨེསུ ཐིརབྷཱཝེན ཝིནཱ པཊིཔཀྑེཧི ཨཀམྤིཡཏཱ སམྦྷཝཏི. སམྤཡུཏྟདྷམྨེསུ ཐིརབྷཱཝེནེཝ ཧི ཨཀུསལཱནཾ ཨབྱཱཀཏཱནཉྩ ནེསཾ བལཝབྷཱཝཱུཔཔཏྟི. ཨསྶདྡྷིཡེཏི ཨསྶདྡྷིཡཧེཏུ. ནིམིཏྟཏྠེ ཧེཏཾ བྷུམྨཝཙནཾ. ཨེས ནཡོ སེསེསུཔི.

༤༡༨. ཨཱདིཔདཱནནྟི སཏིཨཱདིཔདཱནཾ. སརཎཊྛེནཱཏི ཙིརཀཏཙིརབྷཱསིཏཱནཾ ཨནུསྶརཎཊྛེན. ཨུཔཊྛཱནལཀྑཎཱཏི ཀཱཡཱདཱིསུ ཨསུབྷཱཀཱརཱདིསལླཀྑཎམུཁེན ཏཏྠ ཨུཔཏིཊྛནསབྷཱཝཱ. ཨུཔཏིཊྛནཉྩ ཨཱརམྨཎཾ ཨུཔགནྟྭཱ ཋཱནཾ, ཨཝིསྶཛྫནཾ ཝཱ ཨཱརམྨཎསྶ. ཨཔིལཱཔནལཀྑཎཱཏི ཨསམྨུསྶནསབྷཱཝཱ, ཨུདཀེ ཨལཱབུ ཝིཡ ཨཱརམྨཎེ པླཝིཏྭཱ གནྟུཾ ཨཔྤདཱནཾ, པཱསཱཎསྶ ཝིཡ ནིཙྩལསྶ ཨཱརམྨཎསྶ ཋཔནཾ སཱརཎཾ ཨསམྨུཊྛཀརཎཾ ཨཔིལཱཔནཾ. སཱཔཏེཡྻནྟི སནྟཀཾ. ཨཔིལཱཔནཾ ཨསམྨུཊྛཾ ཀརོཏི ཨཔིལཱཔེཏི, སཱཡཾ པཱཏཉྩ རཱཛཱནཾ ཨིསྶརིཡསམྤཏྟིཾ སལླཀྑཱཔེཏི སཱརེཏཱིཏི ཨཏྠོ. ཀཎྷསུཀྐསཔྤཊིབྷཱགེ དྷམྨེཏི ཀཎྷསུཀྐསངྑཱཏེ སཔྤཊིབྷཱགེ དྷམྨེ. ཀཎྷོ ཧི དྷམྨོ སུཀྐེན, སུཀྐོ ¶ ཙ ཀཎྷེན སཔྤཊིབྷཱགོ. ཝིཏྠཱར-སདྡོ ཨཱདིསདྡཏྠོ. ཏེན ‘‘ཨིམེ ཙཏྟཱརོ དྷམྨཱ སམྨཔྤདྷཱནཱ, ཨིམེ ཙཏྟཱརོ ཨིདྡྷིཔཱདཱ, ཨིམཱནི པཉྩིནྡྲིཡཱནི, ཨིམཱནི པཉྩ བལཱནི, ཨིམེ སཏྟ བོཛ྄ཛྷངྒཱ, ཨཡཾ ཨརིཡོ ཨཊྛངྒིཀོ མགྒོ, ཨཡཾ སམཐོ, ཨཡཾ ཝིཔསྶནཱ, ཨཡཾ ཝིཛྫཱ, ཨཡཾ ཝིམུཏྟི, ཨིམེ ལོཀུཏྟརདྷམྨཱཏི ཨེཝཾ ཁོ, མཧཱརཱཛ, ཨཔིལཱཔནལཀྑཎཱ སཏཱི’’ཏི (མི. པ. ༢.༡.༡༣) ཨིམཾ པཱལི༹སེསཾ སངྒཎྷཱཏི. ཐེརེནཱཏི ནཱགསེནཏྠེརེན. སོ ཧི དྷམྨཱནཾ ཀིཙྩཾ ལཀྑཎཾ ཀཏྭཱ ཨསྶེཏི ‘‘ཨཔིལཱཔནལཀྑཎཱ སཏི, ཨཱཀོཊནལཀྑཎོ ཝིཏཀྐོ’’ཏིཨཱདིནཱ. ཨེཝཉྷི དྷམྨཱ སུབོདྷཱ ཧོནྟཱིཏི. སམྨོསཔཙྩནཱིཀཾ ཀིཙྩཾ ཨསམྨོསོ, ན སམྨོསཱབྷཱཝམཏྟནྟི ཨཱཧ – ‘‘ཨསམྨོསརསཱ ཝཱ’’ཏི. ཡསྶ དྷམྨསྶ བལེན སམྤཡུཏྟདྷམྨཱ ཨཱརམྨཎཱབྷིམུཁཱ བྷཝནྟི, སཱ སཏི. ཏསྨཱ སཱ ཏེསཾ ཨཱརམྨཎཱབྷིམུཁབྷཱཝཾ པཙྩུཔཊྛཱཔེསི, སཡཾ ཝཱ ཨཱརམྨཎཱབྷིམུཁབྷཱཝེན པཙྩུཔཏིཊྛཏཱིཏི ¶ ཝུཏྟཾ – ‘‘གོཙརཱབྷིམུཁཱིབྷཱཝཔཙྩུཔཊྛཱནཱ’’ཏི. སམྨཱ པསཏྠོ བོཛ྄ཛྷངྒོཏི སམྦོཛ྄ཛྷངྒོ. བོདྷིཡཱ ཝཀྑམཱནཱཡ དྷམྨསཱམགྒིཡཱ, བོདྷིསྶ ཝཱ ཨརིཡསཱཝཀསྶ ཨངྒོཏི བོཛ྄ཛྷངྒོ. ཡཱ ཧཱིཏིཨཱདིནཱ ཏམེཝ སངྑེཔཏོ ཝུཏྟམཏྠཾ ཝིཝརཏི. ‘‘ཡཱ ཧི ཨཡཾ དྷམྨསཱམགྒཱི’’ཏི ཨེཏསྶ ‘‘བོདྷཱིཏི ཝུཙྩཏཱི’’ཏི ཨིམིནཱ སམྦནྡྷོ. དྷམྨསཱམགྒིཡཱཏི དྷམྨསམཱུཧེན, ཡཱཡ དྷམྨསཱམགྒིཡཱཏི སམྦནྡྷོ. པཏིཊྛཱནཱཡཱུཧནཱ ཨོགྷཏརཎསུཏྟཝཎྞནཱཡཾ (སཾ. ནི. ཨཊྛ. ༡.༡.༡) ‘‘ཀིལེསཝསེན པཏིཊྛཱནཾ, ཨབྷིསངྑཱརཝསེན ཨཱཡཱུཧནཱ. ཏཎྷཱ དིཊྛིཝསེན པཏིཊྛཱནཾ, ཨཝསེསཀིལེསཱབྷིསངྑཱརེཧི ཨཱཡཱུཧནཱ. ཏཎྷཱཝསེན པཏིཊྛཱནཾ, དིཊྛིཝསེན ཨཱཡཱུཧནཱ. སསྶཏདིཊྛིཡཱ པཏིཊྛཱནཾ, ཨུཙྪེདདིཊྛིཡཱ ཨཱཡཱུཧནཱ. ལཱིནཝསེན པཏིཊྛཱནཾ, ཨུདྡྷཙྩཝསེན ཨཱཡཱུཧནཱ. ཀཱམསུཁལླིཀཱནུཡོགཝསེན པཏིཊྛཱནཾ, ཨཏྟཀིལམཐཱནུཡོགཝསེན ཨཱཡཱུཧནཱ. སབྦཱཀུསལཱབྷིསངྑཱརཝསེན པཏིཊྛཱནཾ, སབྦལོཀིཡཀུསལཱབྷིསངྑཱརཝསེན ཨཱཡཱུཧནཱ’’ཏི ཨེཝཾ ཝུཏྟེསུ སཏྟསུ པཀཱརེསུ ཨིདྷ ཨཝུཏྟཱནཾ ཝསེན ཝེདིཏབྦཱ. པཊིཔཀྑབྷཱུཏཱཡཱཏི ཨེཏྠ ལཱིནཔྤཏིཊྛཱནཀཱམསུཁལླིཀཱནུཡོགཨུཙྪེདཱབྷིནིཝེསཱནཾ དྷམྨཝིཙཡཝཱིརིཡཔཱིཏིཔྤདྷཱནཱ དྷམྨསཱམགྒཱི པཊིཔཀྑོ, ཨུདྡྷཙྩཱཡཱུཧནཨཏྟཀིལམཐཱནུཡོགསསྶཏཱབྷིནིཝེསཱནཾ པསྶདྡྷིསམཱདྷིཨུཔེཀྑཱཔདྷཱནཱ དྷམྨསཱམགྒཱི པཊིཔཀྑོ. སཏི པན ཨུབྷཡཏྠཱཔི ཨིཙྪིཏབྦཱ. ཏཐཱ ཧི སཱ ‘‘སབྦཏྠིཀཱ’’ཏི ཝུཏྟཱ.

ཀིལེསསནྟཱནནིདྡཱཡ ¶ ཨུཊྛཧཏཱིཏི ཨེཏེན སིཁཱཔྤཏྟཝིཔསྶནཱཡ སཧགཏཱནམྤི སཏིཨཱདཱིནཾ བོཛ྄ཛྷངྒབྷཱཝཾ དསྶེཏི. ཝུཊྛཱནགཱམིནིཝིཔསྶནཱ ཧི ཀིལེསེ ནིརོདྷེནྟཱི ཨེཝ པཝཏྟཏཱིཏི. ཙཏྟཱརི ཝཱཏིཨཱདིནཱ པན མགྒཕལསཧགཏཱནཾ བོཛ྄ཛྷངྒབྷཱཝཾ དསྶེཏི. སཏྟཧི བོཛ྄ཛྷངྒེཧི བྷཱཝིཏེཧི སཙྩཔྤཊིཝེདྷོ ཧོཏཱིཏི ཀཐམིདཾ ཛཱནིཏབྦནྟི ཙོདནཾ སནྡྷཱཡཱཧ – ‘‘ཡཐཱཧཱ’’ཏིཨཱདི. ཛྷཱནངྒམགྒངྒཱདཡོ ཝིཡཱཏི ཨེཏེན བོདྷིབོཛ྄ཛྷངྒསདྡཱནཾ སམུདཱཡཱཝཡཝཝིསཡཏཾ དསྶེཏི. སེནངྒརཐངྒཱདཡོ ཝིཡཱཏི ཨེཏེན པུགྒལཔཉྙཏྟིཡཱ ཨཝིཛྫམཱནཔཉྙཏྟིབྷཱཝཾ དསྶེཏི.

བོདྷཱཡ སཾཝཏྟནྟཱིཏི བོཛ྄ཛྷངྒཱཏི ཀཱརཎཏྠོ ཨངྒསདྡོཏི ཀཏྭཱ ཝུཏྟཾ. བུཛ྄ཛྷནྟཱིཏི བོདྷིཡོ, བོདྷིཡོ ཨེཝ ཨངྒཱནི བོཛ྄ཛྷངྒཱནཱིཏི ཝུཏྟཾ – ‘‘བུཛ྄ཛྷནྟཱིཏི བོཛ྄ཛྷངྒཱ’’ཏི. ཝིཔསྶནཱདཱིནཾ ཀཱརཎཱདཱིནཾ བུཛ྄ཛྷིཏབྦཱནཉྩ སཙྩཱནཾ ཨནུརཱུཔཾ པཙྩཀྑབྷཱཝེན པཊིམུཁཾ ཨཝིཔརཱིཏཏཱཡ སམྨཱ ཙ བུཛ྄ཛྷནྟཱིཏི ཨེཝཾ ཨཏྠཝིསེསདཱིཔཀེཧི ཨུཔསགྒེཧི ‘‘ཨནུབུཛ྄ཛྷནྟཱི’’ཏིཨཱདི ཝུཏྟཾ. བོདྷིསདྡོ ཧི སབྦཝིསེསཡུཏྟབུཛ྄ཛྷནཾ སཱམཉྙེན སངྒཎྷཱཏི. སཾ-སདྡོ པསཾསཱཡཾ སུནྡརབྷཱཝེ ཙ དིསྶཏཱིཏི ཨཱཧ – ‘‘པསཏྠོ སུནྡརོ ཙ བོཛ྄ཛྷངྒོ སམྦོཛ྄ཛྷངྒོ’’ཏི.

དྷམྨེ ¶ ཝིཙིནཏཱིཏི དྷམྨཝིཙཡོ. ཏཏྠ དྷམྨེཏི ཙཏུསཙྩདྷམྨེ ཏབྦིནིམུཏྟསྶ སབྷཱཝདྷམྨསྶ ཨབྷཱཝཏོ. ཏཏོ ཨེཝ སོ པཝིཙཡལཀྑཎོ. ཨོབྷཱསནརསོཏི ཝིསཡོབྷཱསནརསོ. ཨསམྨུཡ྄ཧནཱཀཱརེན པཙྩུཔཏིཊྛཏཱིཏི ཨསམྨོཧཔཙྩུཔཊྛཱནོ.

ཝཱིརསྶ བྷཱཝོ, ཀམྨཾ ཝཱཏི ཝཱིརིཡཾ. ཨཱིརཡིཏབྦཏོཏི པཝཏྟེཏབྦཏོ. པགྒཧལཀྑཎནྟི ཀོསཛྫཔཀྑེ པཏིཏུཾ ཨདཏྭཱ སམྤཡུཏྟདྷམྨཱནཾ པགྒཧལཀྑཎཾ. ཏཏོ ཨེཝ སམྤཡུཏྟདྷམྨེ ཨུཔཏྠམྦྷནརསཾ. ཨནོསཱིདནཾ ཨསཾསཱིདནཾ.

པཱིཎཡཏཱིཏི ཏཔྤེཏི. པཱིཎནཀིཙྩེན སམྤཡུཏྟདྷམྨཱནཾ ཝིཡ ཏཾསམུཊྛཱནཔཎཱིཏརཱུཔེཧི ཀཱཡསྶཱབྱཔནཾ. ཕརཎཔཱིཏིཝསེན ཧེཏཾ ལཀྑཎཾ ཝུཏྟཾ, ཏཐཱ རསོཏི. ཨུདགྒབྷཱཝོ ཨོདགྱཾ, ཏཾ པཙྩུཔཊྛཔེཏཱིཏི ཨོདགྱཔཙྩུཔཊྛཱནཱ. ཨུབྦེགཔཱིཏིཝསེན ཙེཏཾ ཝུཏྟཾ.

ཀཱཡཙིཏྟདརཐཔྤསྶམྦྷནཏོཏི ཀཱཡདརཐསྶ ཙིཏྟདརཐསྶ ཙ པསྶམྦྷནཏོ ཝཱུཔསམནཏོ. ཏེནཱཧ – ‘‘ཨུཔསམལཀྑཎཱ’’ཏི, ཀཱཡཙིཏྟདརཐཱནཾ ¶ ཝཱུཔསམནལཀྑཎཱཏི ཨཏྠོ. ཀཱཡོཏི ཙེཏྠ ཝེདནཱདཡོ ཏཡོ ཁནྡྷཱ. དརཐོ སཱརམྦྷོ, དུཀྑདོམནསྶཔཙྩཡཱནཾ ཨུདྡྷཙྩཱདིཀཱནཾ ཀིལེསཱནཾ, ཏཐཱཔཝཏྟཱནཾ ཝཱ ཙཏུནྣཾ ཁནྡྷཱནམེཏཾ ཨདྷིཝཙནཾ. དརཐནིམྨདྡནེན པརིལཱ༹ཧཔརིཔྥནྡནཝིརཧིཏོ སཱིཏིབྷཱཝོ ཨཔརིཔྥནྡནསཱིཏིབྷཱཝོ.

སམྨཱ ཙིཏྟསྶ ཋཔནཾ སམཱདྷཱནཾ. ཨཝིཀྑེཔོ སམྤཡུཏྟཱནཾ ཨཝིཀྑིཏྟཏཱ. ཡེན སམྤཡུཏྟཱ ཨཝིཀྑིཏྟཱ ཧོནྟི, སོ དྷམྨོ ཨཝིཀྑེཔོ. ཨཝིསཱརོ ཨཏྟནོ ཨེཝ ཨཝིསརཎབྷཱཝོ. ཨཐ ཝཱ ཝིཀྑེཔཔྤཊིཔཀྑཏཱཡ ཨཝིཀྑེཔལཀྑཎོ. ནྷཱནཱིཡཙུཎྞསྶ ཨུདཀཾ ཝིཡ སམྤཡུཏྟདྷམྨཱནཾ སམྤིཎྜནཀིཙྩཏཱཡ ཨཝིསཱརབྷཱཝེན ལཀྑིཏབྦོ ཨཝིསཱརལཀྑཎོ. ནིཝཱཏེ དཱིཔཙྩིཊྛིཏི ཝིཡ ཙེཏསོ ཋིཏིབྷཱཝེན པཙྩུཔཏིཊྛཏཱིཏི ཙིཏྟཊྛིཏིཔཙྩུཔཊྛཱནོ.

ཨཛ྄ཛྷུཔེཀྑནཏོཏི སམཔྤཝཏྟེསུ ཨསྶེསུ སཱརཐི ཝིཡ སམྤཡུཏྟདྷམྨཱནཾ ཨཛ྄ཛྷུཔེཀྑནཏོ. པཊིསངྑཱནལཀྑཎཱཏི མཛ྄ཛྷཏྟབྷཱཝེ ཋཏྭཱ ཝཱིམཾསནསངྑཱཏཔྤཊིསངྑཱནལཀྑཎཱ. སམཝཱཧིཏལཀྑཎཱཏི སམཾ ཨཝིསམཾ ཡཐཱསཀཀིཙྩེསུ སམྤཡུཏྟདྷམྨཱནཾ པཝཏྟནལཀྑཎཱ. ཨུདཱསཱིནབྷཱཝེན པཝཏྟམཱནཱཔི སེསསམྤཡུཏྟདྷམྨེ ཡཐཱསཀཀིཙྩེསུ པཝཏྟེཏི, ཡཐཱ རཱཛཱ ཏུཎྷཱི ནིསིནྣོཔི ཨཏྠཀརཎེ དྷམྨཊྛེ ཡཐཱསཀཾ ཀིཙྩེསུ ཨཔྤམཏྟོ པཝཏྟེཏི. ཨལཱིནཱནུདྡྷཏཔྤཝཏྟིཔཙྩཡཏྟཱ ཨཱུནཱདྷིཀནིཝཱརཎརསཱ. པཀྑཔཱཏུཔཙྪེདནརསཱཏི ‘‘ཨིདཾ ནིཧཱིནཀིཙྩཾ ¶ ཧོཏུ, ཨིདཾ ཨཏིརེཀཏརཀིཙྩ’’ནྟི ཨེཝཾ པཀྑཔཱཏནཝསེན ཝིཡ པཝཏྟི པཀྑཔཱཏོ, ཏཾ ཨུཔཙྪིནྡནྟཱི ཝིཡ ཧོཏཱིཏི པཀྑཔཱཏུཔཙྪེདནརསཱ. སམྤཡུཏྟདྷམྨཱནཾ སཀསཀཀིཙྩེ མཛ྄ཛྷཏྟབྷཱཝེན པཙྩུཔཏིཊྛཏཱིཏི མཛ྄ཛྷཏྟབྷཱཝཔཙྩུཔཊྛཱནོ. བོཛ྄ཛྷངྒཱནཾ ཨུཔརཱུཔརི ཨུཔྤཱདནམེཝ བྲཱུཧནཾ ཝཌྜྷནཉྩཱཏི ཨཱཧ – ‘‘ཨུཔྤཱདེཏཱི’’ཏི.

སཏི ཙ སམྤཛཉྙཉྩ སཏིསམྤཛཉྙཾ, སཏིཔདྷཱནཾ ཝཱ སམྤཛཉྙཾ སཏིསམྤཛཉྙཾ. ཏཾ སབྦཏྠ སཏོཀཱརིབྷཱཝཱཝཧཏྟཱ སཏིསམྦོཛ྄ཛྷངྒསྶ ཨུཔྤཱདཱཡ ཧོཏི. ཡཐཱ པཙྩནཱིཀདྷམྨཔྤཧཱནཾ ཨནུརཱུཔདྷམྨསེཝནཱ ཙ ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ ཧོཏི, ཨེཝཾ སཏིརཧིཏཔུགྒལཝིཝཛྫནཱ, སཏོཀཱརིཔུགྒལསེཝནཱ, ཏཏྠ ཙ ཡུཏྟཏཱ སཏིསམྦོཛ྄ཛྷངྒསྶ ཨུཔྤཱདཱཡ ¶ ཧོཏཱིཏི ཨིམམཏྠཾ དསྶེཏི, ‘‘སཏིསམྤཛཉྙ’’ནྟིཨཱདིནཱ. སཏྟསུ ཋཱནེསཱུཏི ‘‘ཨབྷིཀྐནྟེ པཊིཀྐནྟེ སམྤཛཱནཀཱརཱི ཧོཏི, ཨཱལོཀིཏེ ཝིལོཀིཏེ སམྤཛཱནཀཱརཱི ཧོཏི, སམིཉྫིཏེ པསཱརིཏེ སམྤཛཱནཀཱརཱི ཧོཏི, སངྒྷཱཊིཔཏྟཙཱིཝརདྷཱརཎེ སམྤཛཱནཀཱརཱི ཧོཏི, ཨསིཏེ པཱིཏེ ཁཱཡིཏེ སཱཡིཏེ སམྤཛཱནཀཱརཱི ཧོཏི, ཨུཙྩཱརཔསྶཱཝཀམྨེ སམྤཛཱནཀཱརཱི ཧོཏི, གཏེ ཋིཏེ ནིསིནྣེ སུཏྟེ ཛཱགརིཏེ བྷཱསིཏེ ཏུཎྷཱིབྷཱཝེ སམྤཛཱནཀཱརཱི ཧོཏཱི’’ཏི (དཱི. ནི. ༢.༣༧༦; མ. ནི. ༡.༡༠༩) ཨེཝཾ ཝུཏྟེསུ ཨབྷིཀྐནྟཱདཱིསུ སཏྟསུ ཋཱནེསུ. ཏིསྶདཏྟཏྠེརོ ནཱམ ཡོ བོདྷིམཎྜེ སུཝཎྞསལཱཀཾ གཧེཏྭཱ ‘‘ཨཊྛཱརསསུ བྷཱསཱསུ ཀཏརབྷཱསཱཡ དྷམྨཾ ཀཐེམཱི’’ཏི པརིསཾ པདྷཱརེསི. ཨབྷཡཏྠེརོཏི དཏྟཱབྷཡཏྠེརམཱཧ. ཨབྷིནིཝེསནྟི ཝིཔསྶནཱབྷིནིཝེསཾ.

པརིཔུཙྪཀཏཱཏི པརིཡོགཱཧེཏྭཱ པུཙྪཀབྷཱཝོ. ཨཱཙརིཡེ པཡིརུཔཱསིཏྭཱ པཉྩཔི ནིཀཱཡེ སཧ ཨཊྛཀཐཱཡ པརིཡོགཱཧེཏྭཱ ཡཾ ཡཾ ཏཏྠ གཎྛིཊྛཱནབྷཱུཏཾ, ཏཾ ཏཾ ‘‘ཨིདཾ, བྷནྟེ, ཀཐཾ, ཨིམསྶ ཀོ ཨཏྠོ’’ཏི ཁནྡྷཱཡཏནཱདིཨཏྠཾ པུཙྪནྟསྶ ཧི དྷམྨཝིཙཡསམྦོཛ྄ཛྷངྒོ ཨུཔྤཛྫཏི. ཏེནཱཧ – ‘‘ཁནྡྷདྷཱཏུ…པེ… བཧུལཏཱ’’ཏི.

ཝཏྠུཝིསདཀིརིཡཱཏི ཨེཏྠ ཙིཏྟཙེཏསིཀཱནཾ པཝཏྟིཊྛཱནབྷཱཝཏོ སརཱིརཾ ཏཔྤཊིབདྡྷཱནི ཙཱིཝརཱདཱིནི ཙ ཝཏྠཱུནཱིཏི ཨདྷིཔྤེཏཱནི. ཏཱནི ཡཐཱ ཙིཏྟསྶ སུཁཱཝཧཱནི ཧོནྟི, ཏཐཱ ཀརཎཾ ཏེསཾ ཝིསདཀིརིཡཱ. ཏེནཱཧ – ‘‘ཨཛ྄ཛྷཏྟིཀབཱཧིརཱན’’ནྟིཨཱདི. ཨུསྶནྣདོསནྟི ཝཱཏཔིཏྟཱདིཝསེན ཨུཔཙིཏདོསཾ. སེདམལམཀྑིཏནྟི སེདེན ཙེཝ ཛལླིཀཱསངྑཱཏེན སརཱིརམལེན ཙ མཀྑིཏཾ. ཙ-སདྡེན ཨཉྙམྤི སརཱིརསྶ པཱིལཱ༹ཝཧཾ ཨཙྩཱསནཱདིཾ སངྒཎྷཱཏི. སེནཱསནཾ ཝཱཏི ཝཱ-སདྡེན མལགྒཧིཏཔཏྟཱདཱིནཾ སངྒཧོ དཊྛབྦོ. པརིབྷཎྜཀརཎཱདཱིཧཱིཏི ཨཱདི-སདྡེན པཏྟཔཙནཱདཱིནཾ སངྒཧོ དཊྛབྦོ. ཨཝིསདེཏི ཝཏྠུམྷི ཨཝིསདེ སཏི, ཝིསཡབྷཱུཏེ ཝཱ. ཀཐཾ བྷཱཝནམནུཡུཏྟསྶ ¶ ཏཱནི ཨཛ྄ཛྷཏྟིཀབཱཧིརཝཏྠཱུནི ཝིསཡོ? ཨནྟརནྟརཱ པཝཏྟནཀཙིཏྟུཔྤཱདཝསེནེཝ ཝུཏྟཾ. ཏེ ཧི ཙིཏྟུཔྤཱདཱ ཙིཏྟེཀགྒཏཱཡ ཨཔརིསུདྡྷབྷཱཝཱཡ སཾཝཏྟནྟི. ཙིཏྟཙེཏསིཀེསཱུཏི ནིསྶཡཱདིཔཙྩཡབྷཱུཏེསུ ཙིཏྟཙེཏསིཀེསུ. ཉཱཎམྤཱིཏི ཨཔི-སདྡོ སམྤིཎྜནཏྠོ. ཏེན ‘‘ན ཀེཝལཾ ཝཏྠུཡེཝ, ཨཐ ཁོ ཏསྨིཾ ཨཔརིསུདྡྷེ ཉཱཎམྤི ཨཔརིསུདྡྷཾ ¶ ཧོཏཱི’’ཏི ནིསྶཡཱཔརིསུདྡྷིཡཱ ཏཾནིསྶིཏཱཔརིསུདྡྷི ཝིཡ ཝིསཡསྶ ཨཔརིསུདྡྷཏཱཡ ཝིསཡིནོ ཨཔརིསུདྡྷིཾ དསྶེཏི.

སམབྷཱཝཀརཎནྟི ཀིཙྩཏོ ཨནཱུནཱདྷིཀབྷཱཝཀརཎཾ. སདྡྷིནྡྲིཡཾ བལཝཾ ཧོཏི, སདྡྷེཡྻཝཏྠུསྨིཾ པཙྩཡཝསེན ཨདྷིམོཀྑཀིཙྩསྶ པཊུཏརབྷཱཝེན པཉྙཱཡ ཨཝིསདཏཱཡ ཝཱིརིཡཱདཱིནཉྩ སིཐིལཏཱདིནཱ སདྡྷིནྡྲིཡཾ བལཝཾ ཧོཏི. ཏེནཱཧ – ‘‘ཨིཏརཱནི མནྡཱནཱི’’ཏི. ཏཏོཏི ཏསྨཱ, སདྡྷིནྡྲིཡསྶ བལཝབྷཱཝཏོ ཨིཏརེསཉྩ མནྡཏྟཱཏི ཨཏྠོ. ཀོསཛྫཔཀྑེ པཏིཏུཾ ཨདཏྭཱ སམྤཡུཏྟདྷམྨཱནཾ པགྒཎྷནཾ ཨནུབལཔྤདཱནཾ པགྒཧོ. པགྒཧོཝ ཀིཙྩཾ པགྒཧཀིཙྩཾ. ཀཱཏུཾ ན སཀྐོཏཱིཏི ཨཱནེཏྭཱ སམྦནྡྷིཏབྦཾ. ཨཱརམྨཎཾ ཨུཔགནྟྭཱ ཋཱནཾ, ཨནིསྶཛྫནཾ ཝཱ ཨུཔཊྛཱནཾ. ཝིཀྑེཔཔྤཊིཔཀྑོ, ཡེན ཝཱ སམྤཡུཏྟཱ ཨཝིཀྑིཏྟཱ ཧོནྟི, སོ ཨཝིཀྑེཔོ. རཱུཔགཏཾ ཝིཡ ཙཀྑུནཱ ཡེན ཡཱཐཱཝཏོ ཝིསཡསབྷཱཝཾ པསྶཏི, ཏཾ དསྶནཀིཙྩཾ ཀཱཏུཾ ན སཀྐོཏི བལཝཏཱ སདྡྷིནྡྲིཡེན ཨདྷིབྷཱུཏཏྟཱ. སཧཛཱཏདྷམྨེསུ ཧི ཨིནྡཊྛཾ ཀཱརེནྟཱནཾ སཧཔཝཏྟམཱནཱནཾ དྷམྨཱནཾ ཨེཀདེསཏཱཝསེནེཝ ཨཏྠསིདྡྷི, ན ཨཉྙཐཱ. ཏསྨཱཏི ཝུཏྟམེཝཏྠཾ ཀཱརཎབྷཱཝེན པཙྩཱམསཏི. ཏནྟི སདྡྷིནྡྲིཡཾ. དྷམྨསབྷཱཝཔཙྩཝེཀྑཎེནཱཏི ཡསྶ སདྡྷེཡྻསྶ ཝཏྠུནོ ཨུལཱ༹རཏཱདིགུཎེ ཨདྷིམུཙྩནསྶ སཱཏིསཡཔྤཝཏྟིཡཱ སདྡྷིནྡྲིཡཾ བལཝཾ ཛཱཏཾ, ཏསྶ པཙྩཡཔཙྩཡུཔྤནྣཏཱདིཝིབྷཱགཏོ ཡཱཐཱཝཏོ ཝཱིམཾསནེན. ཨེཝཉྷི ཨེཝཾདྷམྨཏཱནཡེན ཡཱཐཱཝསརསཏོ པརིགྒཡ྄ཧམཱནེ སཝིཔྥཱརོ ཨདྷིམོཀྑོ ན ཧོཏི ‘‘ཨཡཾ ཨིམེསཾ དྷམྨཱནཾ སབྷཱཝོ’’ཏི པརིཛཱནནཝསེན པཉྙཱབྱཱཔཱརསྶ སཱཏིསཡཏྟཱ. དྷུརིཡདྷམྨེསུ ཧི ཡཐཱ སདྡྷཱཡ བལཝབྷཱཝེ པཉྙཱཡ མནྡབྷཱཝོ ཧོཏི, ཨེཝཾ པཉྙཱཡ བལཝབྷཱཝེ སདྡྷཱཡ མནྡབྷཱཝོ ཧོཏི. ཏེན ཝུཏྟཾ – ‘‘ཏཾ དྷམྨསབྷཱཝཔཙྩཝེཀྑཎེན ཧཱཔེཏབྦ’’ནྟི.

ཏཐཱ ཨམནསིཀཱརེནཱཏི ཡེནཱཀཱརེན བྷཱཝནམནུཡུཉྫནྟསྶ སདྡྷིནྡྲིཡཾ བལཝཾ ཛཱཏཾ, ཏེནཱཀཱརེན བྷཱཝནཱཡ ཨནནུཡུཉྫནཏོཏི ཝུཏྟཾ ཧོཏི. ཨིདྷ དུཝིདྷེན སདྡྷིནྡྲིཡསྶ བལཝབྷཱཝོ ཨཏྟནོ ཝཱ པཙྩཡཝིསེསེན ཀིཙྩུཏྟརིཡཏོ ཝཱིརིཡཱདཱིནཾ ཝཱ མནྡཀིཙྩཏཱཡ. ཏཏྠ པཋམཝིཀཔྤེ ཧཱཔནཝིདྷི དསྶིཏོ, དུཏིཡཝིཀཔྤེ པན ཡཐཱ མནསིཀརོཏོ ཝཱིརིཡཱདཱིནཾ མནྡཀིཙྩཏཱཡ སདྡྷིནྡྲིཡཾ བལཝཾ ཛཱཏཾ, ཏཐཱ ཨམནསིཀཱརེན ཝཱིརིཡཱདཱིནཾ ¶ པཊུཀིཙྩབྷཱཝཱཝཧེན མནསིཀཱརེན ¶ སདྡྷིནྡྲིཡཾ ཏེཧི སམརསཾ ཀརོནྟེན ཧཱཔེཏབྦཾ. ཨིམིནཱ ནཡེན སེསིནྡྲིཡེསུཔི ཧཱཔནཝིདྷི ཝེདིཏབྦོ.

ཝཀྐལིཏྠེརཝཏྠཱུཏི སོ ཧི ཨཱཡསྨཱ སདྡྷཱདྷིམུཏྟཏཱཡ ཀཏཱདྷིཀཱརོ སཏྠུ རཱུཔདསྶནཔྤསུཏོ ཨེཝ ཧུཏྭཱ ཝིཧརནྟོ སཏྠཱརཱ ‘‘ཀིཾ ཏེ, ཝཀྐལི, ཨིམིནཱ པཱུཏིཀཱཡེན དིཊྛེན, ཡོ ཁོ, ཝཀྐལི, དྷམྨཾ པསྶཏི, སོ མཾ པསྶཏཱི’’ཏིཨཱདིནཱ (སཾ. ནི. ༣.༨༧) ནཡེན ཨོཝདིཏྭཱ ཀམྨཊྛཱནེ ནིཡོཛིཏོཔི ཏཾ ཨནནུཡུཉྫནྟོ པཎཱམིཏོ ཨཏྟཱནཾ ཝིནིཔཱཏེཏུཾ པཔཱཏཊྛཱནཾ ཨབྷིརུཧི. ཨཐ ནཾ སཏྠཱ ཡཐཱནིསིནྣོཝ ཨོབྷཱསཝིསྶཛྫནེན ཨཏྟཱནཾ དསྶེཏྭཱ –

‘‘པཱམོཛྫབཧུལོ བྷིཀྑུ, པསནྣོ བུདྡྷསཱསནེ;

ཨདྷིགཙྪེ པདཾ སནྟཾ, སངྑཱརཱུཔསམཾ སུཁ’’ནྟི. (དྷ. པ. ༣༨༡) –

གཱཐཾ ཝཏྭཱ ‘‘ཨེཧི, ཝཀྐལཱི’’ཏི ཨཱཧ. སོ ཏེནེཝ ཨམཏེན ཨབྷིསིཏྟོ ཧཊྛཏུཊྛོ ཧུཏྭཱ ཝིཔསྶནཾ པཊྛཔེསི, སདྡྷཱཡ པན བལཝབྷཱཝེན ཝིཔསྶནཱཝཱིཐིཾ ན ཨོཏརི. ཏཾ ཉཏྭཱ བྷགཝཱ ཏསྶ ཨིནྡྲིཡསམཏྟཔྤཊིཔཱདནཱཡ ཀམྨཊྛཱནཾ སོདྷེཏྭཱ ཨདཱསི. སོ སཏྠཱརཱ དིནྣནཡེ ཋཏྭཱ ཝིཔསྶནཾ ཨུསྶུཀྐཱཔེཏྭཱ མགྒཔྤཊིཔཱཊིཡཱ ཨརཧཏྟཾ པཱཔུཎི. ཏེན ཝུཏྟཾ – ‘‘ཝཀྐལིཏྠེརཝཏྠུ ཙེཏྠ ནིདསྶན’’ནྟི. ཨེཏྠཱཏི སདྡྷིནྡྲིཡསྶ ཨདྷིམཏྟབྷཱཝེ སེསིནྡྲིཡཱནཾ སཀིཙྩཱཀརཎེ. ཨིཏརཀིཙྩབྷེདནྟི ཨུཔཊྛཱནཱདིཀིཙྩཝིསེསཾ. པསྶདྡྷཱདཱིཏི ཨཱདི-སདྡེན སམཱདྷིཨུཔེཀྑཱསམྦོཛ྄ཛྷངྒཱནཾ སངྒཧོ. ཧཱཔེཏབྦནྟི ཡཐཱ སདྡྷིནྡྲིཡསྶ བལཝབྷཱཝོ དྷམྨསབྷཱཝཔཙྩཝེཀྑཎེན ཧཱཡཏི, ཨེཝཾ ཝཱིརིཡིནྡྲིཡསྶ ཨདྷིམཏྟཏཱ པསྶདྡྷིཨཱདིབྷཱཝནཱཡ ཧཱཡཏི སམཱདྷིཔཀྑིཡཏྟཱ ཏསྶཱ. ཏཐཱ ཧི སམཱདྷིནྡྲིཡསྶ ཨདྷིམཏྟཏཾ ཀོསཛྫཔཱཏཏོ རཀྑནྟཱི ཝཱིརིཡཱདིབྷཱཝནཱ ཝིཡ ཝཱིརིཡིནྡྲིཡསྶ ཨདྷིམཏྟཏཾ ཨུདྡྷཙྩཔཱཏཏོ རཀྑནྟཱི པསྶདྡྷཱདིབྷཱཝནཱ ཨེཀཾསཏོ ཧཱཔེཏི. ཏེན ཝུཏྟཾ – ‘‘པསྶདྡྷཱདིབྷཱཝནཱཡ ཧཱཔེཏབྦ’’ནྟི.

སོཎཏྠེརསྶ ཝཏྠཱུཏི སུཁུམཱལསོཎཏྠེརསྶ ཝཏྠུ. སོ ཧི ཨཱཡསྨཱ སཏྠུ སནྟིཀེ ཀམྨཊྛཱནཾ གཧེཏྭཱ སཱིཏཝནེ ཝིཧརནྟོ ‘‘མམ སརཱིརཾ སུཁུམཱལཾ, ན ཙ སཀྐཱ སུཁེནེཝ སུཁཾ ཨདྷིགནྟུཾ, ཀིལམེཏྭཱཔི སམཎདྷམྨོ ¶ ཀཱཏབྦོ’’ཏི ཋཱནཙངྐམམེཝ ཨདྷིཊྛཱཡ པདྷཱནམནུཡུཉྫནྟོ པཱདཏལེསུ ཕོཊེསུ ཨུཊྛིཏེསུཔི ཝེདནཾ ཨཛ྄ཛྷུཔེཀྑིཏྭཱ དལ༹ྷཝཱིརིཡཾ ཀརོནྟོ ཨཙྩཱརདྡྷཝཱིརིཡཏཱཡ ཝིསེསཾ ནིབྦཏྟེཏུཾ ནཱསཀྑི. སཏྠཱ ཏཏྠ གནྟྭཱ ཝཱིཎཱུཔམོཝཱདེན ཨོཝདིཏྭཱ ¶ ཝཱིརིཡསམཏཱཡོཛནཝིདྷིཾ དསྶེནྟོ ཀམྨཊྛཱནཾ ཝིསོདྷེཏྭཱ གིཛ྄ཛྷཀཱུཊཾ གཏོ. ཐེརོཔི སཏྠཱརཱ དིནྣནཡེན ཝཱིརིཡསམཏཾ ཡོཛེཏྭཱ བྷཱཝེནྟོ ཝིཔསྶནམྤི ཨུསྶུཀྐཱཔེཏྭཱ ཨརཧཏྟེ པཏིཊྛཱསི. ཏེན ཝུཏྟཾ – ‘‘སོཎཏྠེརསྶ ཝཏྠུ དསྶེཏབྦ’’ནྟི. སེསེསུཔཱིཏི སཏིསམཱདྷིཔཉྙིནྡྲིཡེསུཔི.

སམཏནྟི སདྡྷཱཔཉྙཱནཾ ཨཉྙམཉྙཾ ཨནཱུནཱདྷིཀབྷཱཝཾ, ཏཐཱ སམཱདྷིཝཱིརིཡཱནཾ. ཡཐཱ ཧི སདྡྷཱཔཉྙཱནཾ ཝིསུཾ དྷུརིཡདྷམྨབྷཱུཏཱནཾ ཀིཙྩཏོ ཨཉྙམཉྙཱནཏིཝཏྟནཾ ཝིསེསཏོ ཨིཙྪིཏབྦཾ, ཡཏོ ནེསཾ སམདྷུརཏཱཡ ཨཔྤནཱ སམྤཛྫཏི, ཨེཝཾ སམཱདྷིཝཱིརིཡཱནཾ ཀོསཛྫུདྡྷཙྩཔཀྑིཀཱནཾ སམརསཏཱཡ སཏི ཨཉྙམཉྙཱུཔཏྠམྦྷནཏོ སམྤཡུཏྟདྷམྨཱནཾ ཨནྟདྭཡཔཱཏཱབྷཱཝེན སམྨདེཝ ཨཔྤནཱ ཨིཛ྄ཛྷཏི. བལཝསདྡྷོཏིཨཱདི བྱཏིརེཀམུཁེན ཝུཏྟསྶེཝཏྠསྶ སམཏྠནཾ. ཏསྶཏྠོ – ཡོ བལཝཏིཡཱ སདྡྷཱཡ སམནྣཱགཏོ ཨཝིསདཉཱཎོ, སོ མུདྷཔྤསནྣོ ཧོཏི, ན ཨཝེཙྩཔྤསནྣོ. ཏཐཱ ཧི ཨཝཏྠུསྨིཾ པསཱིདཏི སེཡྻཐཱཔི ཏིཏྠིཡསཱཝཀཱ. ཀེརཱཊིཀཔཀྑནྟི སཱཋེཡྻཔཀྑཾ བྷཛཏི. སདྡྷཱཧཱིནཱཡ པཉྙཱཡ ཨཏིདྷཱཝནྟོ ‘‘དེཡྻཝཏྠུཔརིཙྩཱགེན ཝིནཱ ཙིཏྟུཔྤཱདམཏྟེནཔི དཱནམཡཾ པུཉྙཾ ཧོཏཱི’’ཏིཨཱདཱིནི པརིཀཔྤེཏི ཧེཏུཔྤཊིརཱུཔཀེཧི ཝཉྩིཏོ, ཨེཝཾབྷཱུཏོ སུཀྑཏཀྐཝིལུཏྟཙིཏྟོ པཎྜིཏཱནཾ ཝཙནཾ ནཱདིཡཏི, སཉྙཏྟིཾ ན གཙྪཏི. ཏེནཱཧ – ‘‘བྷེསཛྫསམུཊྛིཏོ ཝིཡ རོགོ ཨཏེཀིཙྪོ ཧོཏཱི’’ཏི. ཡཐཱ ཙེཏྠ སདྡྷཱཔཉྙཱནཾ ཨཉྙམཉྙཾ སམབྷཱཝོ ཨཏྠཱཝཧོ, ཨནཏྠཱཝཧོ ཝིསམབྷཱཝོ, ཨེཝཾ སམཱདྷིཝཱིརིཡཱནཾ ཨཉྙམཉྙཾ ཨཝིཀྑེཔཱཝཧོ སམབྷཱཝོ, ཨིཏརོ ཝིཀྑེཔཱཝཧོ ཙཱཏི ཀོསཛྫཾ ཨབྷིབྷཝཏི, ཏེན ཨཔྤནཾ ན པཱཔུཎཱཏཱིཏི ཨདྷིཔྤཱཡོ. ཨུདྡྷཙྩཾ ཨབྷིབྷཝཏཱིཏི ཨེཏྠཱཔི ཨེསེཝ ནཡོ. ཏཾ ཨུབྷཡནྟི སདྡྷཱཔཉྙཱདྭཡཾ སམཱདྷིཝཱིརིཡདྭཡཉྩ. སམཾ ཀཏྟབྦནྟི སམརསཾ ཀཱཏབྦཾ.

སམཱདྷིཀམྨིཀསྶཱཏི སམཐཀམྨཊྛཱནིཀསྶ. ཨེཝནྟི ཨེཝཾ སནྟེ, སདྡྷཱཡ ཐོཀཾ བལཝབྷཱཝེ སཏཱིཏི ཨཏྠོ. སདྡཧནྟོཏི ‘‘པཐཝཱི པཐཝཱིཏི མནསིཀརཎམཏྟེན ¶ ཀཐཾ ཛྷཱནུཔྤཏྟཱི’’ཏི ཨཙིནྟེཏྭཱ ‘‘ཨདྡྷཱ སམྨཱསམྦུདྡྷེན ཝུཏྟཝིདྷི ཨིཛ྄ཛྷིསྶཏཱི’’ཏི སདྡཧནྟོ སདྡྷཾ ཛནེནྟོ. ཨོཀཔྤེནྟོཏི ཨཱརམྨཎཾ ཨནུཔྤཝིསིཏྭཱ ཝིཡ ཨདྷིམུཙྩནཝསེན ཨཝཀཔྤེནྟོ པཀྑནྡནྟོ. ཨེཀགྒཏཱ བལཝཏཱི ཝཊྚཏི སམཱདྷིཔྤདྷཱནཏྟཱ ཛྷཱནསྶ. ཨུབྷིནྣནྟི སམཱདྷིཔཉྙཱནཾ. སམཱདྷིཀམྨིཀསྶ སམཱདྷིནོ ཨདྷིམཏྟཏཱ ཝིཡ པཉྙཱཡ ཨདྷིམཏྟཏཱཔི ཨིཙྪིཏབྦཱཏི ཨཱཧ – ‘‘སམཏཱཡཔཱི’’ཏི, སམབྷཱཝེནཔཱིཏི ཨཏྠོ. ཨཔྤནཱཏི ལོཀིཡཨཔྤནཱ. ཏཐཱ ཧི ‘‘ཧོཏིཡེཝཱ’’ཏི སཱསངྐཾ ཝདཏི. ལོཀུཏྟརཔྤནཱ པན ཏེསཾ སམབྷཱཝེནེཝ ཨིཙྪིཏཱ. ཡཐཱཧ – ‘‘སམཐཝིཔསྶནཾ ཡུགནདྡྷཾ བྷཱཝེཏཱི’’ཏི (ཨ. ནི. ༤.༡༧༠; པཊི. མ. ༢.༥).

ཡདི ¶ ཝིསེསཏོ སདྡྷཱཔཉྙཱནཾ སམཱདྷིཝཱིརིཡཱནཉྩ སམཏཱཝ ཨིཙྪིཏཱ, ཀཐཾ སཏཱིཏི ཨཱཧ – ‘‘སཏི པན སབྦཏྠ བལཝཏཱི ཝཊྚཏཱི’’ཏི. སབྦཏྠཱཏི ལཱིནུདྡྷཙྩཔཀྑིཀེསུ པཉྩསུ ཨིནྡྲིཡེསུ. ཨུདྡྷཙྩཔཀྑིཀེ གཎྷནྟོ ‘‘སདྡྷཱཝཱིརིཡཔཉྙཱན’’ནྟི ཨཱཧ. ཨཉྙཐཱཔཱིཏི ཙ གཧེཏབྦཱ སིཡཱ. ཏཐཱ ཧི ཀོསཛྫཔཀྑིཀེན ཙ སམཱདྷིནཱཨིཙྩེཝ ཝུཏྟཾ, ན ‘‘པསྶདྡྷིསམཱདྷིཨུཔེཀྑཱཧཱི’’ཏི. སཱཏི སཏི. སབྦེསུ རཱཛཀམྨེསུ ནིཡུཏྟོ སབྦཀམྨིཀོ. ཏེནཱཏི ཏེན སབྦཏྠ ཨིཙྪིཏབྦཏྠེན ཀཱརཎེན. ཨཱཧ ཨཊྛཀཐཱཡཾ. སབྦཏྠ ནིཡུཏྟཱ སབྦཏྠིཀཱ སབྦཏྠ ལཱིནེ ཨུདྡྷཏེ ཙ ཙིཏྟེ ཨིཙྪིཏབྦཏྟཱ, སབྦེན ཝཱ ལཱིནུདྡྷཙྩཔཀྑིཡེན བོཛ྄ཛྷངྒགཎེན ཨཏྠེཏབྦཱཏི སབྦཏྠཱ, སཱཝ སབྦཏྠིཀཱ. ཙིཏྟནྟི ཀུསལཙིཏྟཾ. ཏསྶ ཧི སཏིཔཊིསརཎཾ པརཱཡཎཾ ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ. ཏེནཱཧ – ‘‘ཨཱརཀྑཔཙྩུཔཊྛཱནཱ’’ཏིཨཱདི.

ཁནྡྷཱདིབྷེདེསུ ཨནོགཱལ༹ྷཔཉྙཱནནྟི པརིཡཏྟིབཱཧུསཙྩཝསེནཔི ཁནྡྷཱཡཏནཱདཱིསུ ཨཔྤཏིཊྛིཏབུདྡྷཱིནཾ. བཧུསྶུཏསེཝནཱ ཧི སུཏམཡཉཱཎཱཝཧཱ. ཏརུཎཝིཔསྶནཱསམངྒཱིཔི བྷཱཝནཱམཡཉཱཎེ ཋིཏཏྟཱ ཨེཀཾསཏོ པཉྙཝཱ ཨེཝ ནཱམ ཧོཏཱིཏི ཨཱཧ – ‘‘སམཔཉྙཱས…པེ… པུགྒལསེཝནཱ’’ཏི. ཉེཡྻདྷམྨསྶ གམྦྷཱིརབྷཱཝཝསེན ཏཔྤརིཙྪེདཀཉཱཎསྶ གམྦྷཱིརབྷཱཝགྒཧཎནྟི ཨཱཧ – ‘‘གམྦྷཱིརེསུ ཁནྡྷཱདཱིསུ པཝཏྟཱཡ གམྦྷཱིརཔཉྙཱཡཱ’’ཏི. ཏཉྷི ཉེཡྻཾ ཏཱདིསཱཡ པཉྙཱཡ ཙརིཏབྦཏོ གམྦྷཱིརཉཱཎཙརིཡཾ. ཏསྶཱ ཝཱ པཉྙཱཡ ཏཏྠ པབྷེདཏོ པཝཏྟི གམྦྷཱིརཉཱཎཙརིཡཱ, ཏསྶཱ པཙྩཝེཀྑཎཱཏི ཨཱཧ – ‘‘གམྦྷཱིརཔཉྙཱཡ པབྷེདཔཙྩཝེཀྑཎཱ’’ཏི.

པཉྩཝིདྷབནྡྷནཀམྨཀཱརཎཾ ¶ ནིརཡེ ནིབྦཏྟསཏྟསྶ ཡེབྷུཡྻེན སབྦཔཋམཾ ཀརོནྟཱིཏི དེཝདཱུཏསུཏྟཱདཱིསུ ཨཱདིཏོ ཝུཏྟཏྟཱ ཙ ཨཱཧ – ‘‘པཉྩཝིདྷབནྡྷནཀམྨཀཱརཎཏོ པཊྛཱཡཱ’’ཏི. སཀཊཝཧནཱདིཀཱལེཏི ཨཱདི-སདྡེན ཏདཉྙཾ མནུསྶེཧི ཏིརཙྪཱནེཧི ཙ ཝིབཱདྷིཏབྦཀཱལཾ སངྒཎྷཱཏི. ཨེཀཾ བུདྡྷནྟརནྟི ཨིདཾ ཨཔརཱཔརེསུ པེཏེསུཡེཝ ཨུཔྤཛྫནཀསཏྟཝསེན ཝུཏྟཾ, ཨེཀཙྩཱནཾ ཝཱ པེཏཱནཾ ཨེཀཙྩཏིརཙྪཱནཱནཾ ཝིཡ དཱིགྷཱཡུཀཏཱ སིཡཱཏི ཏཐཱ ཝུཏྟཾ. ཏཐཱ ཧི ཀཱལོ༹ ནཱགརཱཛཱ ཙཏུནྣཾ བུདྡྷཱནཾ སམྨུཁཱིབྷཱཝཾ ལབྷིཏྭཱ ཋིཏོཔི མེཏྟེཡྻསྶཔི བྷགཝཏོ སམྨུཁཱིབྷཱཝཾ ལབྷིསྶཏཱིཏི ཝདནྟི, ཡཏསྶ ཀཔྤཱཡུཀཏཱ ཝུཏྟཱ.

ཨེཝཾ ཨཱནིསཾསདསྶཱཝིནོཏི ཝཱིརིཡཱཡཏྟོ ཨེཝ སབྦོ ལོཀིཡོ ལོཀུཏྟརོ ཙ ཝིསེསཱདྷིགམོཏི ཨེཝཾ ཝཱིརིཡེ ཨཱནིསཾསདསྶནསཱིལསྶ. གམནཝཱིཐིནྟི སཔུབྦབྷཱགཾ ནིབྦཱནགཱམིནིཔཊིཔདཾ ¶ , སཧ ཝིཔསྶནཱཡ ཨརིཡམགྒཔྤཊིཔཱཊི, སཏྟཝིསུདྡྷིཔརམྤརཱ ཝཱ. སཱ ཧི ‘‘བྷིཀྑུནོ ཝཊྚནིཡྻཱནཱཡ གནྟབྦཱ པཊིཔཛྫིཏབྦཱ པཊིཔདཱ’’ཏི ཀཏྭཱ གམནཝཱིཐི ནཱམ.

ཀཱཡདལ༹ྷཱིབཧུལོཏི ཡཐཱ ཏཐཱ ཀཱཡསྶ དལ༹ྷཱིཀམྨཔྤསུཏོ. པིཎྜཔཱཏནྟི རཊྛཔིཎྜཾ. པཙྩཡདཱཡཀཱནཾ ཨཏྟནི ཀཱརསྶ ཨཏྟནོ སམྨཱཔཊིཔཏྟིཡཱ མཧཔྥལབྷཱཝསྶ ཀརཎེན པིཎྜསྶ བྷིཀྑཱཡ པཊིཔཱུཛནཱ པིཎྜཔཱཏཱཔཙཱཡནཾ.

ནཱིཧརནྟོཏི པཏྟཏྠཝིཀཏོ ནཱིཧརནྟོ. ཏཾ སདྡཾ སུཏྭཱཏི ཏཾ ཨུཔཱསིཀཱཡ ཝཙནཾ པཎྞསཱལཱདྭཱརེ ཋིཏོཝ པཉྩཱབྷིཉྙཏཱཡ དིབྦསོཏེན སུཏྭཱ. མནུསྶསམྤཏྟི, དིབྦསམྤཏྟི, ནིབྦཱནསམྤཏྟཱིཏི ཨིམཱ ཏིསྶོ སམྤཏྟིཡོ. དཱཏུཾ སཀྑིསྶསཱིཏི ཏཡི ཀཏེན དཱནམཡེན ཝེཡྻཱཝཙྩམཡེན ཙ པུཉྙཀམྨེན ཁེཏྟཝིསེསབྷཱཝཱུཔགམནེན ཨཔརཱཔརཾ དེཝམནུསྶཱནཾ སམྤཏྟིཡོ ཨནྟེ ནིབྦཱནསམྤཏྟིཉྩ དཱཏུཾ སཀྑིསྶསཱིཏི ཐེརོ ཨཏྟཱནཾ པུཙྪཏི. སིཏཾ ཀརོནྟོཏི ‘‘ཨཀིཙྪེནེཝ མཡཱ ཝཊྚདུཀྑཾ སམཏིཀྐནྟ’’ནྟི པཙྩཝེཀྑཎཱཝསཱནེ སཉྫཱཏཔཱམོཛྫཝསེན སིཏཾ ཀརོནྟོ.

ནིཔྤརིསྶཡཀཱལོཏི ནིརུཔདྡཝཀཱལོ, ཏདཱ བྷིཀྑུསངྒྷསྶ སུལབྷཱ པཙྩཡཱ ཧོནྟཱིཏི པཙྩཡཧེཏུཀཱ ཙིཏྟཔཱིལཱ༹ ནཏྠཱིཏི ཨདྷིཔྤཱཡོ. པསྶནྟཱནཾཡེཝཱཏི ཨནཱདརེ སཱམིཝཙནཾ. ཁཱིརདྷེནུནྟི ཁཱིརདཱཡིཀཾ དྷེནུཾ ¶ . ཀིཉྩིདེཝ ཀཏྭཱཏི ཀིཉྩིདེཝ བྷཏིཀམྨཾ ཀཏྭཱ. ཨུཙྪུཡནྟཀམྨནྟི ཨུཙྪུཡནྟསཱལཱཡ ཀཱཏབྦཾ ཀིཙྩཾ. ཏམེཝ མགྒནྟི ཨུཔཱསཀེན པཊིཔནྣམགྒཾ. ཨུཔཀཊྛཱཡཱཏི ཨཱསནྣཱཡ. ཝིཔྤཊིཔནྣནྟི ཛཱཏིདྷམྨཀུལདྷམྨཱདིལངྒྷནེན ཨསམྨཱཔཊིཔནྣཾ. ཨེཝནྟི ཡཐཱ ཨསམྨཱཔཊིཔནྣོ པུཏྟོ ཏཱཡ ཨེཝ ཨསམྨཱཔཊིཔཏྟིཡཱ ཀུལསནྟཱནཏོ བཱཧིརོ ཧུཏྭཱ པིཏུ སནྟིཀཱ དཱཡཛྫསྶ ན བྷཱགཱི, ཨེཝཾ ཀུསཱིཏོཔི ཏེནེཝ ཀུསཱིཏབྷཱཝེན ན སམྨཱཔཊིཔནྣོ སཏྠུ སནྟིཀཱ ལདྡྷབྦཨརིཡདྷནདཱཡཛྫསྶ ན བྷཱགཱི. ཨཱརདྡྷཝཱིརིཡོཝ ལབྷཏི སམྨཱཔཊིཔཛྫནཏོ. ཨུཔྤཛྫཏི ཝཱིརིཡསམྦོཛ྄ཛྷངྒོཏི ཡོཛནཱ, ཨེཝཾ སབྦཏྠ.

མཧཱཏི སཱིལཱདིགུཎེཧི མཧནྟོ ཝིཔུལོ ཨནཉྙསཱདྷཱརཎོ. ཏཾ པནསྶ གུཎམཧཏྟཾ དསསཧསྶིལོཀདྷཱཏུཀམྤནེན ལོཀེ པཱཀཊནྟི དསྶེནྟོ ‘‘སཏྠུནོ ཧཱི’’ཏིཨཱདིམཱཧ.

ཡསྨཱ ¶ སཏྠུསཱསནེ པབྦཛིཏསྶ པབྦཛྫཱུཔགམནེན སཀྱཔུཏྟིཡབྷཱཝོ སཉྫཱཡཏི, ཏསྨཱ བུདྡྷཔུཏྟབྷཱཝཾ དསྶེནྟོ ‘‘ཨསམྦྷིནྣཱཡཱ’’ཏིཨཱདིམཱཧ.

ཨལསཱནཾ བྷཱཝནཱཡ ནཱམམཏྟམྤི ཨཛཱནནྟཱནཾ ཀཱཡདལ༹ྷཱིབཧུལཱནཾ ཡཱཝདཏྠཾ བྷུཉྫིཏྭཱ སེཡྻསུཁཱདིཨནུཡུཉྫནཀཱནཾ ཏིརཙྪཱནགཏིཀཱནཾ པུགྒལཱནཾ དཱུརཏོ ཝཛྫནཱ ཀུསཱིཏཔུགྒལཔརིཝཛྫནཱཏི ཨཱཧ – ‘‘ཀུཙྪིཾ པཱུརེཏྭཱ ཋིཏཨཛགརསདིསེ’’ཏིཨཱདི. ‘‘དིཝསཾ ཙངྐམེན ནིསཛྫཱཡ ཨཱཝརཎཱིཡེཧི དྷམྨེཧི ཙིཏྟཾ པརིསོདྷེསྶཱམཱ’’ཏིཨཱདིནཱ བྷཱཝནཱརམྦྷཝསེན ཨཱརདྡྷཝཱིརིཡཱནཾ དལ༹ྷཔརཀྐམཱནཾ ཀཱལེན ཀཱལཾ ཨུཔསངྐམནཱ ཨཱརདྡྷཝཱིརིཡཔུགྒལསེཝནཱཏི ཨཱཧ – ‘‘ཨཱརདྡྷཝཱིརིཡེ’’ཏིཨཱདི. ཝིསུདྡྷིམགྒེ (ཝིསུདྡྷི. ༡.༦༤-༦༥) པན ཛཱཏིམཧཏྟཔཙྩཝེཀྑཎཱ སབྲཧྨཙཱརིམཧཏྟཔཙྩཝེཀྑཎཱཏི ཨིདཾ དྭཡཾ ན གཧིཏཾ, ཐིནམིདྡྷཝིནོདནཏཱ སམྨཔྤདྷཱནཔཙྩཝེཀྑཎཏཱཏི ཨིདཾ དྭཡཾ གཧིཏཾ. ཏཏྠ ཨཱནིསཾསདསྶཱཝིཏཱཡ ཨེཝ སམྨཔྤདྷཱནཔཙྩཝེཀྑཎཱ གཧིཏཱ ཧོཏི ལོཀིཡལོཀུཏྟརཝིསེསཱདྷིགམསྶ ཝཱིརིཡཱཡཏྟཏཱདསྶནབྷཱཝཏོ, ཐིནམིདྡྷཝིནོདནཾ པན ཏདདྷིམུཏྟཏཱཡ ཨེཝ གཧིཏཾ ཧོཏི. ཝཱིརིཡུཔྤཱདནེ ཡུཏྟཔྤཡུཏྟསྶ ཐིནམིདྡྷཝིནོདནཾ ཨཏྠསིདྡྷམེཝཱཏི. ཏཏྠ ¶ ཐིནམིདྡྷཝིནོདནཀུསཱིཏཔུགྒལཔརིཝཛྫནཨཱརདྡྷཝཱིརིཡཔུགྒལསེཝནཏདདྷི- མུཏྟཏཱཔཊིཔཀྑཝིདྷམནཔཙྩཡཱུཔསཾཧཱརཝསེན ཨཔཱཡབྷཡཔཙྩཝེཀྑཎཱདཡོ སམུཏྟེཛནཝསེན ཝཱིརིཡསམྦོཛ྄ཛྷངྒསྶ ཨུཔྤཱདཀཱ དཊྛབྦཱ.

བུདྡྷཱནུསྶཏིཡཱ ཨུཔཙཱརསམཱདྷིནིཊྛཏྟཱ ཝུཏྟཾ – ‘‘ཡཱཝ ཨུཔཙཱརཱ’’ཏི. སཀལསརཱིརཾ ཕརམཱནོཏི པཱིཏིསམུཊྛཱནེཧི པཎཱིཏརཱུཔེཧི སཀལསརཱིརཾ ཕརམཱནོ, དྷམྨསངྒྷགུཎེ ཨནུསྶརནྟསྶཔི ཡཱཝ ཨུཔཙཱརཱ སཀལསརཱིརཾ ཕརམཱནོ པཱིཏིསམྦོཛ྄ཛྷངྒོ ཨུཔྤཛྫཏཱིཏི ཨེཝཾ སེསཨནུསྶཏཱིསུ, པསཱདནཱིཡསུཏྟནྟཔཙྩཝེཀྑཎཱཡ ཙ ཡོཛེཏབྦཾ ཏསྶཱཔི ཝིམུཏྟཱཡཏནབྷཱཝེན ཏགྒཏིཀཏྟཱ. ཨེཝརཱུཔེ ཀཱལེཏི ‘‘དུབྦྷིཀྑབྷཡཱདཱིསཱུ’’ཏི ཝུཏྟཀཱལེ. སམཱཔཏྟི…པེ… ན སམུདཱཙརནྟཱིཏི ཨིདཾ ཨུཔསམཱནུསྶཏིཡཱ ཝསེན ཝུཏྟཾ. སངྑཱརཱནཉྷི ཝསེན སཔྤདེསཝཱུཔསམེཔི ནིཔྤདེསཝཱུཔསམེ ཝིཡ ཏཐཱ སཉྙཱཡ པཝཏྟིཏོ བྷཱཝནཱམནསིཀཱརོ ཀིལེསཝིཀྑམྦྷནསམཏྠོ ཧུཏྭཱ ཨུཔཙཱརསམཱདྷིཾ ཨཱཝཧནྟོ ཏཐཱརཱུཔཔཱིཏིསོམནསྶསམནྣཱགཏོ པཱིཏིསམྦོཛ྄ཛྷངྒསྶ ཨུཔཱདཱཡ ཧོཏཱིཏི. ཏཏྠ ‘‘ཝིཀྑམྦྷིཏཱ ཀིལེསཱ’’ཏི པཱཋོ. ན སམུདཱཙརནྟཱིཏི ཨིཏི-སདྡོ ཀཱརཎཏྠོ. ཡསྨཱ ན སམུདཱཙརནྟི, ཏསྨཱ ཏཾ ནེསཾ ཨསམུདཱཙཱརཾ པཙྩཝེཀྑནྟསྶཱཏི ཡོཛནཱ. ན ཧི ཀིལེསེ པཙྩཝེཀྑནྟསྶ བོཛ྄ཛྷངྒུཔྤཏྟི ཡུཏྟཱ, པསཱདནཱིཡེསུ ཋཱནེསུ པསཱདསིནེཧཱབྷཱཝེན ལཱུཁཧདཡཏཱཡ ལཱུཁཏཱ. སཱ ཏཏྠ ཨཱདརགཱརཝཱཀརཎེན ཝིཉྙཱཡཏཱིཏི ཨཱཧ – ‘‘ཨསཀྐཙྩཀིརིཡཱཡ སཾསཱུཙིཏལཱུཁབྷཱཝེ’’ཏི.

པཎཱིཏབྷོཛནསེཝནཏཱཏི ¶ པཎཱིཏསཔྤཱཡབྷོཛནསེཝནཏཱ. ཨུཏུཨིརིཡཱཔཐསུཁགྒཧཎེན སཔྤཱཡཨུཏུཨིརིཡཱཔཐགྒཧཎཾ དཊྛབྦཾ. ཏཉྷི ཏིཝིདྷམྤི སཔྤཱཡཾ སེཝིཡམཱནཾ ཀཱཡསྶ ཀལྱཏཱཔཱདནཝསེན ཙིཏྟསྶ ཀལྱཏཾ ཨཱཝཧནྟཾ དུཝིདྷཱཡཔི པསྶདྡྷིཡཱ ཀཱརཎཾ ཧོཏི. ཨཧེཏུཀསཏྟེསུ ལབྦྷམཱནཾ སུཁདུཀྑནྟི ཨཡམེཀོ ཨནྟོ, ཨིསྶརཱདིཝིསམཧེཏུཀནྟི པན ཨཡཾ དུཏིཡོ. ཨེཏེ ཨུབྷོ ཨནྟེ ཨནུཔགམྨ ཡཐཱསཀཾ ཀམྨུནཱ ཧོཏཱིཏི ཨཡཾ མཛ྄ཛྷིམཱ པཊིཔཏྟི. མཛ྄ཛྷཏྟོ པཡོགོ ཡསྶ སོ མཛ྄ཛྷཏྟཔཡོགོ, ཏསྶ བྷཱཝོ མཛ྄ཛྷཏྟཔཡོགཏཱ. ཨཡཉྷི སབྷཱཝཱསཱརདྡྷཏཱཡ ཏཾཔསྶདྡྷཀཱཡཏཱཡ ཀཱརཎཾ ཧོཏི, པསྶདྡྷིདྭཡཾ ¶ ཨཱཝཧཏི. ཨེཏེནེཝ སཱརདྡྷཀཱཡཔུགྒལཔརིཝཛྫནཔསྶདྡྷཀཱཡཔུགྒལསེཝནཱནཾ ཏདཱཝཧནཏཱ སཾཝཎྞིཏཱཏི དཊྛབྦཾ.

ཝཏྠུཝིསདཀིརིཡཱ ཨིནྡྲིཡསམཏྟཔྤཊིཔཱདནཱ ཙ པཉྙཱཝཧཱ ཝུཏྟཱ, སམཱདྷཱནཱཝཧཱཔི ཏཱ ཧོནྟི. སམཱདྷཱནཱཝཧབྷཱཝེནེཝ པཉྙཱཝཧབྷཱཝཏོཏི ཝུཏྟཾ – ‘‘ཝཏྠུཝིསདཀིརིཡཱ…པེ… ཝེདིཏབྦཱ’’ཏི.

ཀཱརཎཀོསལླབྷཱཝནཱཀོསལླཱནཾ ནཱནནྟརིཡབྷཱཝཏོ རཀྑནཱཀོསལླསྶ ཙ ཏཾམཱུལཀཏྟཱ ‘‘ནིམིཏྟཀུསལཏཱ ནཱམ ཀསིཎནིམིཏྟསྶ ཨུགྒཧཀུསལཏཱ’’ཨིཙྩེཝ ཝུཏྟཾ. ཀསིཎནིམིཏྟསྶཱཏི ཙ ནིདསྶནམཏྟཾ དཊྛབྦཾ. ཨསུབྷནིམིཏྟཱདིཀསྶཔི ཧི ཡསྶ ཀསྶཙི ཛྷཱནུཔྤཏྟིནིམིཏྟསྶ ཨུགྒཧཀོསལླཾ ནིམིཏྟཀུསལཏཱ ཨེཝཱཏི. ཨཏིསིཐིལཝཱིརིཡཏཱདཱིཧཱིཏི ཨཱདི-སདྡེན པཉྙཱཔཡོགམནྡཏཾ པཡོགཝེཀལླཉྩ སངྒཎྷཱཏི. ཏསྶ པགྒཎྷནནྟི ཏསྶ ལཱིནསྶ ཙིཏྟསྶ དྷམྨཝིཙཡསམྦོཛ྄ཛྷངྒཱདིསམུཊྛཱཔནེན ལཡཱཔཏྟིཏོ སམུདྡྷརཎཾ. ཝུཏྟཉྷེཏཾ བྷགཝཏཱ –

‘‘ཡསྨིཉྩ ཁོ, བྷིཀྑཝེ, སམཡེ ལཱིནཾ ཙིཏྟཾ ཧོཏི, ཀཱལོ ཏསྨིཾ སམཡེ དྷམྨཝིཙཡསམྦོཛ྄ཛྷངྒསྶ བྷཱཝནཱཡ, ཀཱལོ ཝཱིརིཡསམྦོཛ྄ཛྷངྒསྶ བྷཱཝནཱཡ, ཀཱལོ པཱིཏིསམྦོཛ྄ཛྷངྒསྶ བྷཱཝནཱཡ. ཏཾ ཀིསྶ ཧེཏུ? ལཱིནཾ, བྷིཀྑཝེ, ཙིཏྟཾ, ཏཾ ཨེཏེཧི དྷམྨེཧི སུསམུཊྛཱཔཡཾ ཧོཏི. སེཡྻཐཱཔི, བྷིཀྑཝེ, པུརིསོ པརིཏྟཾ ཨགྒིཾ ཨུཛྫཱལེཏུཀཱམོ ཨསྶ. སོ ཏཏྠ སུཀྑཱནི ཙེཝ ཏིཎཱནི པཀྑིཔེཡྻ, སུཀྑཱནི ཙ གོམཡཱནི པཀྑིཔེཡྻ, སུཀྑཱནི ཙ ཀཊྛཱནི པཀྑིཔེཡྻ, མུཁཝཱཏཉྩ དདེཡྻ, ན ཙ པཾསུཀེན ཨོཀིརེཡྻ, བྷབྦོ ནུ ཁོ སོ པུརིསོ པརིཏྟཾ ཨགྒིཾ ཨུཛྫཱལེཏུནྟི? ཨེཝཾ, བྷནྟེ’’ཏི (སཾ. ནི. ༥.༢༣༤).

ཨེཏྠ ¶ ཙ ཡཐཱསཀཾ ཨཱཧཱརཝསེན དྷམྨཝིཙཡསམྦོཛ྄ཛྷངྒཱདཱིནཾ བྷཱཝནཱ སམུཊྛཱཔནཱཏི ཝེདིཏབྦཱ, སཱ ཨནནྟརཾ ཝིབྷཱཝིཏཱ ཨེཝ.

ཨཙྩཱརདྡྷཝཱིརིཡཏཱདཱིཧཱིཏི ཨཱདི-སདྡེན པཉྙཱཔཡོགབལཝཏཾ པམོདུཔྤིལཱཔནཉྩ སངྒཎྷཱཏི. ཏསྶ ནིགྒཎྷནནྟི ཏསྶ ཨུདྡྷཏསྶ ཙིཏྟསྶ སམཱདྷིསམྦོཛ྄ཛྷངྒཱདིསམུཊྛཱཔནེན ཨུདྡྷཏཱཔཏྟིཏོ ནིསེདྷནཾ. ཝུཏྟམྤི ཙེཏཾ བྷགཝཏཱ –

‘‘ཡསྨིཉྩ ¶ ཁོ, བྷིཀྑཝེ, སམཡེ ཨུདྡྷཏཾ ཙིཏྟཾ ཧོཏི, ཀཱལོ ཏསྨིཾ སམཡེ པསྶདྡྷིསམྦོཛ྄ཛྷངྒསྶ བྷཱཝནཱཡ, ཀཱལོ སམཱདྷིསམྦོཛ྄ཛྷངྒསྶ བྷཱཝནཱཡ, ཀཱལོ ཨུཔེཀྑཱསམྦོཛ྄ཛྷངྒསྶ བྷཱཝནཱཡ. ཏཾ ཀིསྶ ཧེཏུ? ཨུདྡྷཏཾ, བྷིཀྑཝེ, ཙིཏྟཾ, ཏཾ ཨེཏེཧི དྷམྨེཧི སུཝཱུཔསམཾ ཧོཏི. སེཡྻཐཱཔི, བྷིཀྑཝེ, པུརིསོ མཧནྟཾ ཨགྒིཀྑནྡྷཾ ནིབྦཱཔེཏུཀཱམོ ཨསྶ, སོ ཏཏྠ ཨལླཱནི ཙེཝ ཏིཎཱནི པཀྑིཔེཡྻ, ཨལླཱནི ཙ གོམཡཱནི ནིཀྑིཔེཡྻ, ཨལླཱནི ཙ ཀཊྛཱནི པཀྑིཔེཡྻ, མུཁཝཱཏཉྩ ན དདེཡྻ, པཾསུཀེན ཙ ཨོཀིརེཡྻ, བྷབྦོ ནུ ཁོ སོ པུརིསོ མཧནྟཾ ཨགྒིཀྑནྡྷཾ ནིབྦཱཔེཏུནྟི? ཨེཝཾ, བྷནྟེ’’ཏི (སཾ. ནི. ༥.༢༣༤).

ཨེཏྠཱཔི ཡཐཱསཀཾ ཨཱཧཱརཝསེན པསྶདྡྷིསམྦོཛ྄ཛྷངྒཱདཱིནཾ བྷཱཝནཱ སམུཊྛཱཔནཱཏི ཝེདིཏབྦཱ. ཏཏྠ པསྶདྡྷིསམྦོཛ྄ཛྷངྒསྶ བྷཱཝནཱ ཝུཏྟཱ ཨེཝ, སམཱདྷིསམྦོཛ྄ཛྷངྒསྶ ཝུཙྩམཱནཱ, ཨིཏརསྶ ཨནནྟརཾ ཝཀྑཏི.

པཉྙཱཔཡོགམནྡཏཱཡཱཏི པཉྙཱབྱཱཔཱརསྶ ཨཔྤཀབྷཱཝེན. ཡཐཱ ཧི དཱནཾ ཨལོབྷཔྤདྷཱནཾ, སཱིལཾ ཨདོསཔྤདྷཱནཾ, ཨེཝཾ བྷཱཝནཱ ཨམོཧཔྤདྷཱནཱ. ཏཏྠ ཡདཱ པཉྙཱ ན བལཝཏཱི ཧོཏི, ཏདཱ བྷཱཝནཱ པུབྦེནཱཔརཾ ཝིསེསཱཝཧཱ ན ཧོཏི. ཨནབྷིསངྒཏོ ཝིཡ ཨཱཧཱརོ པུརིསསྶ, ཡོགིནོ ཙིཏྟསྶ ཨབྷིརུཙིཾ ན ཛནེཏི, ཏེན ཏཾ ནིརསྶཱདཾ ཧོཏི. ཏཐཱ བྷཱཝནཱཡ སམྨདེཝ ཨཝཱིཐིཔཊིཔཏྟིཡཱ ཨུཔསམསུཁཾ ན ཝིནྡཏི, ཏེནཔི ཙིཏྟཾ ནིརསྶཱདཾ ཧོཏི. ཏེན ཝུཏྟཾ – ‘‘པཉྙཱཔཡོགམནྡཏཱཡཱ…པེ… ནིརསྶཱདཾ ཧོཏཱི’’ཏི. ཏསྶ སཾཝེགུཔྤཱདནཾ པསཱདུཔྤཱདནཉྩ ཏིཀིཙྪནནྟི ཏཾ དསྶེནྟོ, ‘‘ཨཊྛ སཾཝེགཝཏྠཱུནཱི’’ཏིཨཱདིམཱཧ. ཏཏྠ ཛཱཏིཛརཱབྱཱདྷིམརཎཱནི ཡཐཱརཧཾ སུགཏིཡཾ དུགྒཏིཡཉྩ ཧོནྟཱིཏི ཏདཉྙམེཝ པཉྩཝིདྷབནྡྷནཱདིཁུཔྤིཔཱསཱདིཨཉྙམཉྙཝིཧེཋནཱདིཧེཏུཀཾ ཨཔཱཡདུཀྑཾ དཊྛབྦཾ. ཏཡིདཾ སབྦཾ ཏེསཾ ཏེསཾ སཏྟཱནཾ པཙྩུཔྤནྣབྷཝནིསྶིཏཾ གཧིཏནྟི ཨཏཱིཏེ ཨནཱགཏེ ཙ ཀཱལེ ཝཊྚམཱུལཀདུཀྑཱནི ཝིསུཾ གཧིཏཱནི ¶ . ཡེ པན སཏྟཱ ཨཱཧཱརཱུཔཛཱིཝིནོ, ཏཏྠ ཙ ཨུཊྛཱནཕལཱུཔཛཱིཝིནོ, ཏེསཾ ཨཉྙེཧི ཨསཱདྷཱརཎཛཱིཝིཏདུཀྑཾ ཨཊྛམཾ སཾཝེགཝཏྠུ གཧིཏནྟི དཊྛབྦཾ. ཨཡཾ ཝུཙྩཏི སམཡེ སམྤཧཾསནཏཱཏི ཨཡཾ བྷཱཝནཱཙིཏྟསྶ སམྤཧཾསིཏབྦསམཡེ ཝུཏྟནཡེནེཝ སཾཝེགཛནནཝསེན ¶ ཙེཝ པསཱདུཔྤཱདནཝསེན ཙ སམྨདེཝ པཧཾསནཱ, སཾཝེགཛནནཔུབྦཀཔསཱདུཔྤཱདནེན ཏོསནཱཏི ཨཏྠོ.

སམྨཱཔཊིཔཏྟིཾ ཨཱགམྨཱཏི ལཱིནུདྡྷཙྩཝིརཧེན སམཐཝཱིཐིཔཊིཔཏྟིཡཱ ཙ སམྨཱ ཨཝིསམཾ སམྨདེཝ བྷཱཝནཱཔཊིཔཏྟིཾ ཨཱགམྨ. ཨལཱིནནྟིཨཱདཱིསུ ཀོསཛྫཔཀྑིཡཱནཾ དྷམྨཱནཾ ཨནདྷིམཏྟཏཱཡ ཨལཱིནཾ, ཨུདྡྷཙྩཔཀྑིཀཱནཾ ཨནདྷིམཏྟཏཱཡ ཨནུདྡྷཏཾ, པཉྙཱཔཡོགསམྤཏྟིཡཱ ཨུཔསམསུཁཱདྷིགམེན ཙ ཨནིརསྶཱདཾ, ཏཏོ ཨེཝ ཨཱརམྨཎེ སམཔྤཝཏྟཾ སམཐཝཱིཐིཔཊིཔནྣཾ. ཨལཱིནཱནུདྡྷཏཱཧི ཝཱ ཨཱརམྨཎེ སམཔྤཝཏྟཾ, ཨནིརསྶཱདཏཱཡ སམཐཝཱིཐིཔཊིཔནྣཾ. སམཔྤཝཏྟིཡཱ ཝཱ ཨལཱིནཾ ཨནུདྡྷཏཾ, སམཐཝཱིཐིཔཊིཔཏྟིཡཱ ཨནིརསྶཱདནྟི དཊྛབྦཾ. ཏཏྠ ཨལཱིནཏཱཡ པགྒཧེ, ཨནུདྡྷཏཏཱཡ ནིགྒཧེ, ཨནིརསྶཱདཏཱཡ སམྤཧཾསནེ ན བྱཱཔཱརཾ ཨཱཔཛྫཏི. ཨཡཾ ཝུཙྩཏི སམཡེ ཨཛ྄ཛྷུཔེཀྑནཏཱཏི ཨཡཾ ཨཛ྄ཛྷུཔེཀྑིཏབྦསམཡེ བྷཱཝནཱཙིཏྟསྶ པགྒཧནིགྒཧསམྤཧཾསནེསུ བྱཱཝཊཏཱསངྑཱཏཾ པཊིཔཀྑཾ ཨབྷིབྷུཡྻ ཨཛ྄ཛྷུཔེཀྑནཱ ཝུཙྩཏི. པཊིཔཀྑཝིཀྑམྦྷནཏོ ཝིཔསྶནཱཡ ཨདྷིཊྛཱནབྷཱཝཱུཔགམནཏོ ཙ ཨུཔཙཱརཛ྄ཛྷཱནམྤི སམཱདྷཱནཀིཙྩནིཔྥཏྟིཡཱ པུགྒལསྶ སམཱཧིཏབྷཱཝསཱདྷནམེཝཱཏི ཏཏྠ སམདྷུརབྷཱཝེནཱཧ – ‘‘ཨུཔཙཱརཾ ཝཱ ཨཔྤནཾ ཝཱ’’ཏི. ཨེས ཨུཔྤཛྫཏཱིཏི ཨེས སམཱདྷིསམྦོཛ྄ཛྷངྒོ ཨནུཔྤནྣོ ཨུཔྤཛྫཏི.

ཨནུརོདྷཝིརོདྷཔྤཧཱནཝསེན མཛ྄ཛྷཏྟབྷཱཝོ ཨུཔེཀྑཱསམྦོཛ྄ཛྷངྒསྶ ཀཱརཎཾ ཏསྨིཾ སཏི སིཛ྄ཛྷནཏོ, ཨསཏི ཙ ཨསིཛ྄ཛྷནཏོ, སོ ཙ མཛ྄ཛྷཏྟབྷཱཝོ ཝིསཡཝསེན དུཝིདྷོཏི ཨཱཧ – ‘‘སཏྟམཛ྄ཛྷཏྟཏཱ སངྑཱརམཛ྄ཛྷཏྟཏཱ’’ཏི. ཏདུབྷཡེན ཙ ཝིརུཛ྄ཛྷནཾ པསྶདྡྷིསམྦོཛ྄ཛྷངྒབྷཱཝནཱཡ ཨེཝ དཱུརཱིཀཏནྟི ཨནུརུཛ྄ཛྷནསྶེཝ པཧཱནཝིདྷིཾ དསྶེཏུཾ – ‘‘སཏྟམཛ྄ཛྷཏྟཏཱ’’ཏིཨཱདི ཝུཏྟཾ. ཏེནཱཧ – ‘‘སཏྟསངྑཱརཀེལཱཡནཔུགྒལཔརིཝཛྫནཏཱ’’ཏི. ཨུཔེཀྑཱཡ ཧི ཝིསེསཏོ རཱགོ པཊིཔཀྑོ. ཏཐཱ ཙཱཧ – ‘‘ཨུཔེཀྑཱ རཱགབཧུལསྶ ཝིསུདྡྷིམགྒོ’’ཏི (ཝིསུདྡྷི. ༡.༢༦༩). དྭཱིཧཱཀཱརེཧཱིཏི ཀམྨསྶཀཏཱཔཙྩཝེཀྑཎཾ, ཨཏྟསུཉྙཏཱཔཙྩཝེཀྑཎནྟི, ཨིམེཧི དྭཱིཧི ཀཱརཎེཧི. དྭཱིཧེཝཱཏི ཨཝདྷཱརཎཾ སངྑྱཱསམཱནཏཱདསྶནཏྠཾ. སངྑྱཱ ཨེཝ ཧེཏྠ སམཱནཱ, ན སངྑྱེཡྻཾ སབྦཐཱ སམཱནནྟི. ཨསྶཱམིཀབྷཱཝོ ཨནཏྟནིཡཏཱ. སཏི ཧི ཨཏྟནི ཏསྶ ཀིཉྩནབྷཱཝེན ཙཱིཝརཾ ཨཉྙཾ ཝཱ ཀིཉྩི ཨཏྟནིཡཾ ནཱམ སིཡཱ, སོ ¶ པན ཀོཙི ནཏྠེཝཱཏི ཨདྷིཔྤཱཡོ. ཨནདྡྷནིཡནྟི ན ཨདྡྷཱནཀྑམཾ, ན ཙིརཊྛཱཡཱི ཨིཏྟརཾ ཨནིཙྩནྟི ཨཏྠོ. ཏཱཝཀཱལིཀནྟི ཏསྶེཝ ཝེཝཙནཾ.

མམཱཡཏཱིཏི ¶ མམཏྟཾ ཀརོཏི, མམཱཏི ཏཎྷཱཡ པརིགྒཡ྄ཧ ཏིཊྛཏི. དྷནཱཡནྟཱཏི དྷནཾ དབྦཾ ཀརོནྟཱ.

༤༡༩. སམྨཱདསྶནལཀྑཎཱཏི སམྨཱ ཨཝིཔརཱིཏཾ ཨནིཙྩཱདིཝསེན དསྶནསབྷཱཝཱ. སམྨཱཨབྷིནིརོཔནལཀྑཎོཏི སམྨདེཝ ཨཱརམྨཎེ ཙིཏྟསྶ ཨབྷིནིརོཔནསབྷཱཝོ. ཙཏུརངྒསམནྣཱགཏཱ ཝཱཙཱ ཛནཾ སངྒཎྷཱཏཱིཏི ཏབྦིཔཀྑཝིརཏིསབྷཱཝཱ སམྨཱཝཱཙཱ བྷེདཀརམིཙྪཱཝཱཙཱཔཧཱནེན ཛནེ སམྤཡུཏྟེ ཙ པརིགྒཎྷནཀིཙྩཝཏཱི ཧོཏཱིཏི ‘‘པརིགྒཧལཀྑཎཱ’’ཏི ཝུཏྟཱ. ཝིསཾཝཱདནཱདིཀིཙྩཏཱཡ ཧི ལཱུཁཱནཾ ཨཔརིགྒཱཧཀཱནཾ མུསཱཝཱདཱདཱིནཾ པཊིཔཀྑབྷཱུཏཱ སིནིདྡྷབྷཱཝེན པརིགྒཧཎསབྷཱཝཱ སམྨཱཛཔྤནཀིཙྩཱ སམྨཱཝཱཙཱ ཏཔྤཙྩཡསུབྷཱསིཏསམྤཊིགྒཱཧཀེ ཛནེ སམྤཡུཏྟདྷམྨེ ཙ པརིགྒཎྷནྟཱི པཝཏྟཏཱིཏི པརིགྒཧལཀྑཎཱ. ཡཐཱ ཙཱིཝརཀམྨཱདིཔྤཡོགསངྑཱཏོ ཀམྨནྟོ ཀཱཏབྦཾ ཙཱིཝརརཛནཱདིཀཾ སམུཊྛཱཔེཏི ནིཔྥཱདེཏི, ཏཾཏཾཀིརིཡཱནིཔྥཱདཀོ ཝཱ ཙེཏནཱསངྑཱཏོ ཀམྨནྟོ ཧཏྠཙལནཱདིཀཾ ཀིརིཡཾ སམུཊྛཱཔེཏི, ཨེཝཾ སཱཝཛྫཀཏྟབྦཀིརིཡཱསམུཊྛཱཔཀམིཙྪཱཀམྨནྟཔྤཧཱནེན སམྨཱཀམྨནྟོ ནིརཝཛྫསྶ ཀཏྟབྦསྶ ནིརཝཛྫཱཀཱརེན སམུཊྛཱཔནཀིཙྩཝཱ ཧོཏཱིཏི ཨཱཧ – ‘‘སམྨཱསམུཊྛཱཔནལཀྑཎོ’’ཏི. སམྤཡུཏྟདྷམྨཱནཾ ཝཱ ཨུཀྑིཔནཾ སམུཊྛཱཔནཾ ཀཱཡིཀཀིརིཡཱཡ བྷཱརུཀྑིཔནཾ ཝིཡ. སམྨཱཝོདཱཔནལཀྑཎོཏི ཛཱིཝམཱནསྶ པུགྒལསྶ, སམྤཡུཏྟདྷམྨཱནཾ ཝཱ ཛཱིཝིཏིནྡྲིཡཝུཏྟིཡཱ, ཨཱཛཱིཝསྶེཝ ཝཱ སམྨདེཝ སོདྷནཾ ཝོདཱཔནཾ ལཀྑཎཾ ཨེཏསྶཱཏི སམྨཱཝོདཱཔནལཀྑཎོ. ཨཐ ཝཱ ཀཱཡཝཱཙཱནཾ ཁནྡྷསནྟཱནསྶ ཙ སཾཀིལེསབྷཱུཏམིཙྪཱཨཱཛཱིཝཔྤཧཱནེན སམྨཱཨཱཛཱིཝོ ‘‘ཝོདཱཔནལཀྑཎོ’’ཏི ཝུཏྟོ. སམྨཱཝཱཡཱམསཏིསམཱདྷཱིསུ ཝཏྟབྦཾ ཧེཊྛཱ ཝུཏྟམེཝ.

པཉྙཱཡ ཀུསལཱནཾ དྷམྨཱནཾ པུབྦངྒམབྷཱཝཏོ སབྦེཔི ཨཀུསལཱ དྷམྨཱ ཏསྶཱ པཊིཔཀྑཱཝཱཏི ཝུཏྟཾ – ‘‘ཨཉྙེཧིཔི ཨཏྟནོ པཙྩནཱིཀཀིལེསེཧི སདྡྷི’’ནྟི. ཨཐ ཝཱ ཨཏྟནོ པཙྩནཱིཀཀིལེསཱ དིཊྛེཀཊྛཱ ཨཝིཛྫཱདཡོ པཉྙཱཡ ཨུཛུཔཙྩནཱིཀབྷཱཝཏོ. པསྶཏཱིཏི པསྶནྟཱི ¶ ཝིཡ ཧོཏི ཝིབནྡྷཱབྷཱཝཏོ. ཏེནཱཧ – ‘‘ཏཔྤཊིཙྪཱདཀ…པེ… ཨསམྨོཧཏོ’’ཏི. སམྨཱསངྐཔྤཱདཱིནཾ མིཙྪཱསངྐཔྤཱདཡོ ཨུཛུཝིཔཙྩནཱིཀཱཏི ཨཱཧ – ‘‘སམྨཱསངྐཔྤཱདཡོ…པེ… པཛཧནྟཱི’’ཏི. ཏཐེཝཱཏི ཨིམིནཱ ཨཏྟནོ པཙྩནཱིཀཀིལེསེཧི སདྡྷིནྟི ཨིམམཏྠཾ ཨནུཀཌྜྷཏི. ཝིསེསཏོཏི སམྨཱདིཊྛིཡཱ ཝུཏྟཀིཙྩཏོ ཝིསེསེན. ཨེཏྠཱཏི ཨེཏེསུ སམྨཱསངྐཔྤཱདཱིསུ.

ཨེསཱ སམྨཱདིཊྛི ནཱམཱཏི ལོཀིཡཾ ལོཀུཏྟརཉྩ ཨེཀཛ྄ཛྷཾ ཀཏྭཱ ཝདཏི མིསྶཀཏཱབྷཱཝཏོ ¶ . ཏེནཱཧ – ‘‘པུབྦབྷཱགེ’’ཏིཨཱདི. ཨེཀཱརམྨཎཱ ནིབྦཱནཱརམྨཎཏྟཱ. ཀིཙྩཏོཏི པུབྦབྷཱགེ དུཀྑཱདཱིཧི ཉཱཎེཧི ཀཱཏབྦཀིཙྩསྶ ཨིདྷ ནིཔྥཏྟིཏོ, ཨིམསྶེཝ ཝཱ ཉཱཎསྶ དུཀྑཱདིཔྤཀཱསནཀིཙྩཏོ. ཙཏྟཱརི ནཱམཱནི ལབྷཏི དུཀྑཔརིཉྙཱདིཙཏུཀིཙྩསཱདྷནཏོ. ཏཱིཎི ནཱམཱནི ལབྷཏི ཀཱམསངྐཔྤཱདིཔྤཧཱནཀིཙྩནིཔྥཏྟིཏོ. སིཀྑཱཔདཝིབྷངྒེ (ཝིབྷ. ༧༠༣ ཨཱདཡོ) ‘‘ཝིརཏིཙེཏནཱ ཏཾསམྤཡུཏྟཱ ཙ དྷམྨཱ སིཀྑཱཔདཱནཱི’’ཏི ཝུཏྟཱནི, ཏཏྠ པདྷཱནཱནཾ ཝིརཏིཙེཏནཱནཾ ཝསེན ‘‘ཝིརཏིཡོཔི ཧོནྟི ཙེཏནཱདཡོཔཱི’’ཏི ཨཱཧ. ‘‘སམྨཱ ཝདཏི ཨེཏཱཡཱ’’ཏིཨཱདིནཱ ཨཏྠསམྦྷཝཏོ སམྨཱཝཱཙཱདཡོ ཏཡོ ཝིརཏིཡོཔི ཧོནྟི ཙེཏནཱདཡོཔི. མུསཱཝཱདཱདཱིཧི ཝིརམཎཀཱལེ ཝིརཏིཡོ, སུབྷཱསིཏཱདིཝཱཙཱབྷཱསནཱདིཀཱལེ ཙེཏནཱདཡོ ཡོཛེཏབྦཱ. མགྒཀྑཎེ པན ཝིརཏིཡོཝ མགྒལཀྑཎཔྤཏྟིཏོ. ན ཧི ཙེཏནཱ ནིཡྻཱནསབྷཱཝཱ. ཨཐ ཝཱ ཨེཀསྶ ཉཱཎསྶ དུཀྑཱདིཉཱཎཏཱ ཝིཡ ཨེཀཱཡ ཝིརཏིཡཱ མུསཱཝཱདཱདིཝིརཏིབྷཱཝོ ཝིཡ ཙ ཨེཀཱཡ ཙེཏནཱཡ སམྨཱཝཱཙཱདིཀིཙྩཏྟཡསཱདྷནསབྷཱཝཱ སམྨཱཝཱཙཱདིབྷཱཝཱསིདྡྷིཏོ ‘‘མགྒཀྑཎེ ཝིརཏིཡོཝཱ’’ཏི ཝུཏྟཾ.

ཙཏྟཱརི ནཱམཱནི ལབྷཏཱིཏི ཙཏུསམྨཔྤདྷཱནཙཏུསཏིཔཊྛཱནཝསེན ལབྷཏི. མགྒཀྑཎེཏི ཨཱནེཏྭཱ སམྦནྡྷོ. པུབྦབྷཱགེཔི མགྒཀྑཎེཔི སམྨཱསམཱདྷི ཨེཝཱཏི ཡདིཔི སམཱདྷིཨུཔཀཱརཀཱནཾ ཨབྷིནིརོཔནཱནུམཛྫནསམྤིཡཱཡནབྲཱུཧནསནྟསུཁཱནཾ ཝིཏཀྐཱདཱིནཾ ཝསེན ཙཏཱུཧི ཛྷཱནེཧི སམྨཱསམཱདྷི ཝིབྷཏྟོ, ཏཐཱཔི ཝཱཡཱམོ ཝིཡ ཨནུཔྤནྣཱཀུསལཱནུཔྤཱདནཱདིཙཏུཝཱཡཱམཀིཙྩཾ, སཏི ཝིཡ ཙ ཨསུབྷཱསུཁཱནིཙྩཱནཏྟེསུ ཀཱཡཱདཱིསུ སུབྷཱདིསཉྙཱཔཧཱནལཀྑཎཾ ཙཏུསཏིཀིཙྩཾ, ཨེཀོ སམཱདྷི ཙཏུཛ྄ཛྷཱནསམཱདྷིཀིཙྩཾ ན སཱདྷེཏཱིཏི པུབྦབྷཱགེཔི པཋམཛ྄ཛྷཱནསམཱདྷི, པཋམཛ྄ཛྷཱནསམཱདྷི ¶ ཨེཝ མགྒཀྑཎེཔི, ཏཐཱ པུབྦབྷཱགེཔི ཙཏུཏྠཛ྄ཛྷཱནསམཱདྷི, ཙཏུཏྠཛ྄ཛྷཱནསམཱདྷི ཨེཝ མགྒཀྑཎེཔཱིཏི ཨཏྠོ.

‘‘ཀིཾ པནཱཡཾ མགྒདྷམྨཱནཾ དེསནཱནུཀྐམོ, ཀེཝལཾ ཝཱཙཱཡ ཀམཝཏྟིནིབྷཱཝཏོ, ཨུདཱཧུ ཀཉྩི ཝིསེསཾ ཨུཔཱདཱཡཱ’’ཏི ཝིཙཱརཎཱཡཾ ཀཉྩི ཝིསེསཾ ཨུཔཱདཱཡཱཏི དསྶེནྟོ ཨཱཧ – ‘‘ཨིམེསཱུ’’ཏིཨཱདི. ཏཏྠ བྷཱཝནཱནུབྷཱཝཱ ཧིཏཕལཱཡ སཱཏིསཡཾ ཏིཀྑཝིསདབྷཱཝཔྤཏྟིཡཱ ཨཙྪརིཡབྦྷུཏསམཏྠཏཱཡོགེན སབྦསོ པཊིཔཀྑཝིདྷམནེན ཡཱཐཱཝཏོ དྷམྨསབྷཱཝབོདྷནེན ཙ སམྨཱདིཊྛིཡཱ བཧུཀཱརཏཱ ཝེདིཏབྦཱ. ཏེནཱཧ – ‘‘ཨཡཾ ཧཱི’’ཏིཨཱདི.

ཏསྶཱཏི ¶ སམྨཱདིཊྛིཡཱ. བཧུཀཱརོཏི དྷམྨསམྤཊིཝེདྷེ བཧཱུཔཀཱརོ. ཨིདཱནི ཏམཏྠཾ ཨུཔམཱཧི ཝིབྷཱཝེཏུཾ, ‘‘ཡཐཱ ཧཱི’’ཏིཨཱདི ཝུཏྟཾ.

ཝཙཱིབྷེདསྶ ཀཱརཀོ ཝིཏཀྐོ སཱཝཛྫཱནཝཛྫཝཙཱིབྷེདནིཝཏྟནཔྤཝཏྟནཱཀཱརཱཡ སམྨཱཝཱཙཱཡཔི ཨུཔཀཱརཀོ ཨེཝཱཏི ཨཱཧ – ‘‘སྭཱཡཾ…པེ… སམྨཱཝཱཙཱཡཔི ཨུཔཀཱརཀོ’’ཏི. སམྨཱསངྐཔྤོ ཧི སཙྩཝཱཙཱཡ ཝིརཏིཝཱཙཱཡཔི ཝིསེསཔཙྩཡོ མིཙྪཱསངྐཔྤཏདེཀཊྛཀིལེསཔྤཧཱནཏོ.

སཾཝིདཧིཏྭཱཏིཨཱདཱིསུ སམྨཱ ཝིདཧནཾ ཀམྨནྟཔྤཡོཛནཉྩ ཨེཀནྟཱནཝཛྫཝཙཱིཀཱཡཀམྨཝསེན ཨིཙྪིཏབྦནྟི ཝིརཏིཝཱཙཱཝསེན སཾཝིདཧནཾ ཝིརཏིཀམྨནྟསྶེཝ པཡོཛནཉྩ ནིདསྶིཏནྟི དཊྛབྦཾ. ཨེཝཾ ཧིསྶ སམྨཱཝཱཙཱཡ སམྨཱཀམྨནྟསྶཱཔི བཧུཀཱརཏཱ ཛོཏིཏཱ སིཡཱ. ཝཙཱིབྷེདནིཡཱམིཀཱ ཧི ཝཙཱིདུཙྩརིཏཝིརཏི ཀཱཡིཀཀིརིཡནིཡཱམིཀཱཡ ཀཱཡདུཙྩརིཏཝིརཏིཡཱ ཨུཔཀཱརིཀཱ. ཏཐཱ ཧི ཝིསཾཝཱདནཱདིམིཙྪཱཝཱཙཏོ ཨཝིརཏོ མིཙྪཱཀམྨནྟཏོཔི ན ཝིརམཏེཝ. ཡཐཱཧ – ‘‘ཨེཀཾ དྷམྨཾ ཨཏཱིཏསྶ…པེ… ནཏྠི པཱཔཾ ཨཀཱརིཡ’’ནྟི. ཏསྨཱ ཨཝིསཾཝཱདནཱདིསམྨཱཝཱཙཱཡ ཋིཏོ སམྨཱཀམྨནྟམྤི པཱུརེཏིཡེཝཱཏི ཝཙཱིདུཙྩརིཏཝིརཏི ཀཱཡདུཙྩརིཏཝིརཏིཡཱ ཨུཔཀཱརིཀཱ.

ཡསྨཱ ཨཱཛཱིཝཔཱརིསུདྡྷི ནཱམ དུསྶཱིལྱཔྤཧཱནཔུབྦིཀཱ, ཏསྨཱ སམྨཱཝཱཙཱཀམྨནྟཱནནྟརཾ སམྨཱཨཱཛཱིཝོ དེསིཏོཏི དསྶེཏུཾ – ‘‘ཙཏུབྦིདྷཾ པནཱ’’ཏིཨཱདི ¶ ཝུཏྟཾ. ཨེཏྟཱཝཏཱཏི པརིསུདྡྷསཱིལཱཛཱིཝིཀཱམཏྟེན. ཨིདཾ ཝཱིརིཡནྟི ཙཏུསམྨཔྤདྷཱནཝཱིརིཡཾ.

ཝཱིརིཡཱརམྦྷོཔི སམྨཱསཏིཔརིགྒཧིཏོ ཨེཝ ནིབྦཱནཱཝཧོ, ན ཀེཝལོཏི དསྶེཏུཾ – ‘‘ཏཏོ’’ཏིཨཱདི ཝུཏྟཾ. སཱུཔཊྛིཏཱཏི བཧིདྡྷཱཝིཀྑེཔཾ པཧཱཡ སུཊྛུ ཨུཔཊྛིཏཱ ཀཱཏབྦཱ. སམཱདྷིསྶ ཨུཔཀཱརདྷམྨཱ ནཱམ ཡཐཱཝུཏྟཝཏྠུཝིསདཀིརིཡཱདཡོ. ཏཔྤཊིཔཀྑཏོ ཨནུཔཀཱརདྷམྨཱ ཝེདིཏབྦཱ. གཏིཡོཏི ནིཔྥཏྟིཡོ. སམནྭེསིཏྭཱཏི སམྨཱ པརིཡེསིཏྭཱ.

༤༢༧. ཡཐཱ ཨིཏྠཱིསུ ཀཐཱ པཝཏྟཱ ཨདྷིཏྠཱིཏི ཝུཙྩཏི, ཨེཝཾ ཨཏྟཱནཾ ཨདྷིཀིཙྩ པཝཏྟཱ ཨཛ྄ཛྷཏྟཾ. ‘‘ཨེཝཾ པཝཏྟམཱནཱ མཡཾ ‘ཨཏྟཱ’ཏི གཧཎཾ གམིསྶཱམཱ’’ཏི ཨིམིནཱ ཝིཡ ཨདྷིཔྤཱཡེན ཨཏྟཱནཾ ཨདྷིཀིཙྩ ཨུདྡིསྶ པཝཏྟཱ སཏྟསནྟཏིཔརིཡཱཔནྣཱ ཨཛ྄ཛྷཏྟཾ. ཏསྨིཾ ཨཛ྄ཛྷཏྟརཱུཔེ, ཨཏྟནོ ཀེསཱདིཝཏྠུཀེ ཀསིཎརཱུཔེཏི ཨཏྠོ. པརིཀམྨཝསེན ཨཛ྄ཛྷཏྟཾ རཱུཔསཉྙཱིཏི པརིཀམྨཀརཎཝསེན ¶ ཨཛ྄ཛྷཏྟཾ རཱུཔསཉྙཱི, ན ཨཔྤནཱཝསེན. ན ཧི པཊིབྷཱགནིམིཏྟཱརམྨཎཱ ཨཔྤནཱ ཨཛ྄ཛྷཏྟཝིསཡཱ སམྦྷཝཏི. ཏཾ པན ཨཛ྄ཛྷཏྟཾ པརིཀམྨཝསེན ལདྡྷཾ ཀསིཎནིམིཏྟཾ ཨཝིསུདྡྷམེཝ ཧོཏི, ན བཧིདྡྷཱ པརིཀམྨཝསེན ལདྡྷཾ ཝིཡ ཝིསུདྡྷཾ. ཏེནཱཧ – ‘‘ཏཾ པནཱ’’ཏིཨཱདི.

ཡསྶེཝཾ པརིཀམྨཾ ཨཛ྄ཛྷཏྟཾ ཨུཔྤནྣནྟི ཡསྶ པུགྒལསྶ ཨེཝཾ ཝུཏྟཔྤཀཱརེན ཨཛ྄ཛྷཏྟཾ པརིཀམྨཾ ཛཱཏཾ. ནིམིཏྟཾ པན བཧིདྡྷཱཏི པཊིབྷཱགནིམིཏྟཾ སསནྟཏིཔརིཡཱཔནྣཾ ན ཧོཏཱིཏི བཧིདྡྷཱ. པརིཏྟཱནཱིཏི ཡཐཱལདྡྷཱནི སུཔྤསརཱཝམཏྟཱནི. ཏེནཱཧ – ‘‘ཨཝཌྜྷིཏཱནཱི’’ཏི. པརིཏྟཝསེནེཝཱཏི ཝཎྞཝསེན ཨཱབྷོགེ ཝིཛྫམཱནེཔི པརིཏྟཝསེནེཝ ཨིདཾ ཨབྷིབྷཱཡཏནཾ ཝུཏྟཾ པརིཏྟཏཱ ཧེཏྠ ཨབྷིབྷཝནསྶ ཀཱརཎཾ. ཝཎྞཱབྷོགེ སཏིཔི ཨསཏིཔི ཨབྷིབྷཝཏཱིཏི ཨབྷིབྷུ, པརིཀམྨཾ, ཉཱཎཾ ཝཱ. ཨབྷིབྷུ ཨཱཡཏནཾ ཨེཏསྶཱཏི ཨབྷིབྷཱཡཏནཾ, ཛྷཱནཾ. ཨབྷིབྷཝིཏབྦཾ ཝཱ ཨཱརམྨཎསངྑཱཏཾ ཨཱཡཏནཾ ཨེཏསྶཱཏི ཨབྷིབྷཱཡཏནཾ. ཨཐ ཝཱ ཨཱརམྨཎཱབྷིབྷཝནཏོ ཨབྷིབྷུ ཙ ཏཾ ཨཱཡཏནཉྩ ཡོགིནོ སུཁཝིསེསཱནཾ ཨདྷིཊྛཱནབྷཱཝཏོ མནཱཡཏནདྷམྨཱཡཏནབྷཱཝཏོ ཙཱཏི སསམྤཡུཏྟཛ྄ཛྷཱནཾ ཨབྷིབྷཱཡཏནཾ. ཨབྷིབྷཱཡཏནབྷཱཝནཱ ནཱམ ཏིཀྑཔཉྙསྶེཝ སམྦྷཝཏི, ན ཨིཏརསྶཱཏི ཨཱཧ – ‘‘ཉཱཎུཏྟརིཀོ པུགྒལོ’’ཏི. ཨབྷིབྷཝིཏྭཱ སམཱཔཛྫཏཱིཏི ཨེཏྠ ཨབྷིབྷཝནཾ ¶ སམཱཔཛྫནཉྩ ཨུཔཙཱརཛ྄ཛྷཱནཱདྷིགམནསམནནྟརམེཝ ཨཔྤནཱཛྷཱནུཔྤཱདནནྟི ཨཱཧ – ‘‘སཧ ནིམིཏྟུཔྤཱདེནེཝེཏྠ ཨཔྤནཾ པཱཔེཏཱི’’ཏི. སཧ ནིམིཏྟུཔྤཱདེནཱཏི ཙ ཨཔྤནཱཔརིཝཱསཱབྷཱཝསྶ ལཀྑཎཝཙནམེཏཾ. ཡོ ཁིཔྤཱབྷིཉྙོཏི ཝུཙྩཏི, ཏཏོཔི ཉཱཎུཏྟརསྶེཝ ཨབྷིབྷཱཡཏནབྷཱཝནཱ. ཨེཏྠཱཏི ཨེཏསྨིཾ ནིམིཏྟེ. ཨཔྤནཾ པཱཔེཏཱིཏི བྷཱཝནཱཨཔྤནཾ ནེཏི.

ཨེཏྠ ཙ ཀེཙི ‘‘ཨུཔྤནྣེ ཨུཔཙཱརཛ྄ཛྷཱནེ ཏཾ ཨཱརབྦྷ ཡེ ཧེཊྛིམནྟེན དྭེ ཏཡོ ཛཝནཝཱརཱ པཝཏྟནྟི, ཏེ ཨུཔཙཱརཛ྄ཛྷཱནཔཀྑིཀཱ ཨེཝ, ཏདནནྟརཾ བྷཝངྒཔརིཝཱསེན ཨུཔཙཱརསེཝནཱཡ ཙ ཝིནཱ ཨཔྤནཱ ཧོཏི, སཧ ནིམིཏྟུཔྤཱདེནེཝ ཨཔྤནཾ པཱཔེཏཱི’’ཏི ཝདནྟི, ཏཾ ཏེསཾ མཏིམཏྟཾ. ན ཧི པཱརིཝཱསིཀཔརིཀམྨེན ཨཔྤནཱཝཱརོ ཨིཙྪིཏོ, ནཱཔི མཧགྒཏཔྤམཱཎཛ྄ཛྷཱནེསུ ཝིཡ ཨུཔཙཱརཛ྄ཛྷཱནེ ཨེཀནྟཏོ པཙྩཝེཀྑཎཱ ཨིཙྪིཏབྦཱ. ཏསྨཱ ཨུཔཙཱརཛ྄ཛྷཱནཱདྷིགམཏོ པརཾ ཀཏིཔཡབྷཝངྒཙིཏྟཱཝསཱནེ ཨཔྤནཾ པཱཔུཎནྟོ ‘‘སཧ ནིམིཏྟུཔྤཱདེནེཝེཏྠ ཨཔྤནཾ པཱཔེཏཱི’’ཏི ཝུཏྟོ. སཧ ནིམིཏྟུཔྤཱདེནཱཏི ཙ ཨདྷིཔྤཱཡིཀམིདཾ ཝཙནཾ, ན ནཱིཏཏྠཾ, ཏཏྠ ཨདྷིཔྤཱཡོ ཝུཏྟནཡེནེཝ ཝེདིཏབྦོ. ན ཨནྟོསམཱཔཏྟིཡཾ ཏདཱ ཏཐཱརཱུཔསྶ ཨཱབྷོགསྶ ཨསམྦྷཝཏོ. སམཱཔཏྟིཏོ ཝུཊྛིཏསྶ ཨཱབྷོགོ པུབྦབྷཱགབྷཱཝནཱཝསེན ཛྷཱནཀྑཎེ པཝཏྟཾ ཨབྷིབྷཝནཱཀཱརཾ གཧེཏྭཱ པཝཏྟོཏི དཊྛབྦཾ. ཨབྷིདྷམྨཊྛཀཐཱཡཾ པན ‘‘ཨིམིནཱསྶ པུབྦཱབྷོགོ ཀཐིཏོ’’ཏི ཝུཏྟཾ. ཨནྟོསམཱཔཏྟིཡཾ ¶ ཏདཱ ཏཐཱ ཨཱབྷོགཱབྷཱཝེ ཀསྨཱ ཛྷཱནསཉྙཱཡཔཱིཏི ཝུཏྟནྟི ཨཱཧ – ‘‘ཨབྷིབྷཝསཉྙཱ ཧིསྶ ཨནྟོསམཱཔཏྟིཡམྤི ཨཏྠཱི’’ཏི.

ཝཌྜྷིཏཔྤམཱཎཱནཱིཏི ཝིཔུལཔྤམཱཎཱནཱིཏི ཨཏྠོ, ན ཨེཀངྒུལདྭངྒུལཱདིཝཌྜྷིཾ པཱཔིཏཱནི ཏཐཱ ཝཌྜྷནསྶེཝེཏྠ ཨསམྦྷཝཏོ. ཏེནཱཧ – ‘‘མཧནྟཱནཱི’’ཏི. བྷཏྟཝཌྜྷིཏཀནྟི བྷུཉྫནབྷཱཛནེ ཝཌྜྷེཏྭཱ དིནྣཾ བྷཏྟཾ, ཨེཀཱསནེ པུརིསེན བྷུཉྫིཏབྦབྷཏྟཏོ ཨུཔཌྜྷབྷཏྟནྟི ཨཏྠོ.

རཱུཔེ སཉྙཱ རཱུཔསཉྙཱ, སཱ ཨསྶ ཨཏྠཱིཏི རཱུཔསཉྙཱི, ན རཱུཔསཉྙཱི ཨརཱུཔསཉྙཱི. སཉྙཱསཱིསེན ཛྷཱནཾ ཝདཏི. རཱུཔསཉྙཱཡ ཨནུཔྤཱདནམེཝེཏྠ ཨལཱབྷིཏཱ. བཧིདྡྷཱཝ ཨུཔྤནྣནྟི བཧིདྡྷཱཝཏྠུསྨིཾཡེཝ ཨུཔྤནྣཾ. ཨེཏྠ ཙ –

‘‘ཨཛ྄ཛྷཏྟཾ རཱུཔསཉྙཱི བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི. ཨཛ྄ཛྷཏྟཾ རཱུཔསཉྙཱི བཧིདྡྷཱ རཱུཔཱནི པསྶཏི ཨཔྤམཱཎཱནི སུཝཎྞདུབྦཎྞཱནི ¶ . ཨཛ྄ཛྷཏྟཾ ཨརཱུཔསཉྙཱི བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི. ཨཛ྄ཛྷཏྟཾ ཨརཱུཔསཉྙཱི བཧིདྡྷཱ རཱུཔཱནི པསྶཏི ཨཔྤམཱཎཱནི སུཝཎྞདུབྦཎྞཱནཱི’’ཏི (དཱི. ནི. ༣.༣༣༨, ༣༥༨; ཨ. ནི. ༨.༦༥; ༡༠.༢༩) –

ཨེཝམིདྷ ཙཏྟཱརི ཨབྷིབྷཱཡཏནཱནི ཨཱགཏཱནི. ཨབྷིདྷམྨེ (དྷ. ས. ༢༤༤-༢༤༥) པན ‘‘ཨཛ྄ཛྷཏྟཾ ཨརཱུཔསཉྙཱི བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི, ཨཔྤམཱཎཱནི སུཝཎྞདུབྦཎྞཱནཱི’’ཏི ཨེཝམཱགཏཱནི. ཏཏྠ ཙ ཀཱརཎཾ ཨབྷིདྷམྨཊྛཀཐཱཡཾ ཝུཏྟམེཝ. ཏཐཱ ཧི ཝུཏྟཾ ཨཊྛསཱལིནིཡཾ (དྷ. ས. ཨཊྛ. ༢༠༤) –

‘‘ཀསྨཱ པན ཡཐཱ སུཏྟནྟེ ‘ཨཛ྄ཛྷཏྟཾ རཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པརིཏྟཱནཱི’ཏིཨཱདི ཝུཏྟཾ, ཨེཝཾ ཨཝཏྭཱ ཨིདྷ ཙཏཱུསུཔི ཨབྷིབྷཱཡཏནེསུ ཨཛ྄ཛྷཏྟཾ ཨརཱུཔསཉྙིཏཱཝ ཝུཏྟཱཏི. ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏོ. ཏཏྠ ཝཱ ཧི ཨིདྷ ཝཱ བཧིདྡྷཱ རཱུཔཱནེཝ ཨབྷིབྷཝིཏབྦཱནི, ཏསྨཱ ཏཱནི ནིཡམཏོ ཝཏྟབྦཱནཱི’’ཏི.

ཏཏྲཱཔི ཨིདྷཔི ཝུཏྟཱནི ‘‘ཨཛ྄ཛྷཏྟཾ རཱུཔསཉྙཱི ཨཛ྄ཛྷཏྟཾ ཨརཱུཔསཉྙཱིཏི ཨིདཾ པན སཏྠུ དེསནཱཝིལཱསམཏྟམེཝཱ’’ཏི. ཨཡཾ པནེཏྠ ཨདྷིཔྤཱཡོ – ཨིདྷ ཝཎྞཱབྷོགརཧིཏཱནི སཧིཏཱནི ཙ སབྦཱནི པརིཏྟཱནི སུཝཎྞདུབྦཎྞཱནི ཨབྷིབྷུཡྻཱཏི. པརིཡཱཡཀཐཱ ཧི སུཏྟནྟདེསནཱཏི. ཨབྷིདྷམྨེ ¶ པན ནིཔྤརིཡཱཡདེསནཏྟཱ ཝཎྞཱབྷོགརཧིཏཱནི ཝིསུཾ ཝུཏྟཱནི, ཏཐཱ སཧིཏཱནི. ཨཏྠི ཧི ཨུབྷཡཏྠ ཨབྷིབྷཝནཝིསེསོཏི. ཏཐཱ ཨིདྷ པརིཡཱཡདེསནཏྟཱ ཝིམོཀྑཱནམྤི ཨབྷིབྷཝནཔརིཡཱཡོ ཨཏྠཱིཏི ‘‘ཨཛ྄ཛྷཏྟཾ རཱུཔསཉྙཱི’’ཏིཨཱདིནཱ པཋམདུཏིཡཨབྷིབྷཱཡཏནེསུ པཋམཝིམོཀྑོ, ཏཏིཡཙཏུཏྠཨབྷིབྷཱཡཏནེསུ དུཏིཡཝིམོཀྑོ, ཝཎྞཱབྷིབྷཱཡཏནེསུ ཏཏིཡཝིམོཀྑོ ཙ ཨབྷིབྷཝནཔཏྟིཏོ སངྒཧིཏོ. ཨབྷིདྷམྨེ པན ནིཔྤརིཡཱཡདེསནཏྟཱ ཝིམོཀྑཱབྷིབྷཱཡཏནཱནི ཨསངྐརཏོ དེསེཏུཾ ཝིམོཀྑེ ཝཛྫེཏྭཱ ཨབྷིབྷཱཡཏནཱནི ཀཐིཏཱནི. སབྦཱནི ཙ ཝིམོཀྑཀིཙྩཱནི ཛྷཱནཱནི ཝིམོཀྑདེསནཱཡཾ ཝུཏྟཱནི. ཏདེཏཾ ‘‘ཨཛ྄ཛྷཏྟཾ རཱུཔསཉྙཱི’’ཏི ཨཱགཏསྶ ཨབྷིབྷཱཡཏནདྭཡསྶ ཨབྷིདྷམྨེ ཨབྷིབྷཱཡཏནེསུ ཨཝཙནཏོ ‘‘རཱུཔཱི རཱུཔཱནི པསྶཏཱི’’ཏིཨཱདཱིནཉྩ སབྦཝིམོཀྑཀིཙྩསཱདྷཱརཎཝཙནབྷཱཝཏོ ཝཝཏྠཱནཾ ཀཏནྟི ཝིཉྙཱཡཏི.

ཨཛ྄ཛྷཏྟརཱུཔཱནཾ ¶ ཨནབྷིབྷཝནཱིཡཏོཏི ཨིདཾ ཨབྷིདྷམྨེ ཀཏྠཙིཔི ‘‘ཨཛ྄ཛྷཏྟརཱུཔཱནི པསྶཏཱི’’ཏི ཨཝཏྭཱ སབྦཏྠ ཡཾ ཝུཏྟཾ – ‘‘བཧིདྡྷཱ རཱུཔཱནི པསྶཏཱི’’ཏི, ཏསྶ ཀཱརཎཝཙནཾ. ཏེན ཡཾ ཨཉྙཧེཏུཀཾ སུཏྟནྟེ ‘‘བཧིདྡྷཱ རཱུཔཱནི པསྶཏཱི’’ཏི ཝཙནཾ, ཏཾ ཏེན ཧེཏུནཱ ཝུཏྟཾ. ཡཾ པན དེསནཱཝིལཱསཧེཏུཀཾ ཨཛ྄ཛྷཏྟཾ ཨརཱུཔསཉྙིཏཱཡ ཨེཝ ཨབྷིདྷམྨེ ཝཙནཾ, ན ཏསྶ ཨཉྙཾ ཀཱརཎཾ མགྒིཏབྦནྟི དསྶེཏི. ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏཱ ཙ ཏེསཾ བཧིདྡྷཱརཱུཔཱནཾ ཝིཡ ཨཝིབྷཱུཏཏྟཱ. དེསནཱཝིལཱསོ ཙ ཡཐཱཝུཏྟཝཝཏྠཱནཝསེན ཝེདིཏབྦོ ཝེནེཡྻཛ྄ཛྷཱསཡཝསེན ཝིཛྫམཱནཔརིཡཱཡཀཐནབྷཱཝཏོ. དེསནཱཝིལཱསོ ཧི ནཱམ ཝེནེཡྻཛ྄ཛྷཱསཡཱནུརཱུཔཾ ཝིཛྫམཱནསྶ ཙ པརིཡཱཡསྶ ཝིབྷཱཝནཾ, ན ཡསྶ ཀསྶཙི, ཏསྨཱ ‘‘ཨིདྷ པརིཡཱཡདེསནཏྟཱ’’ཏིཨཱདིནཱ ཝུཏྟཔྤཀཱརཾ ཝཝཏྠཱནཾ དེསནཱཝིལཱསནིབནྡྷནནྟི དཊྛབྦཾ.

སུཝཎྞདུབྦཎྞཱནཱིཏི ཨེཏེནེཝ སིདྡྷཏྟཱ ན ནཱིལཱདིཨབྷིབྷཱཡཏནཱནི ཝཏྟབྦཱནཱིཏི ཙེ? ན ནཱིལཱདཱིསུ ཀཏཱདྷིཀཱརཱནཾ ནཱིལཱདིབྷཱཝསྶེཝ ཨབྷིབྷཝནཀཱརཎཏྟཱ. ན ཧི ཏེསཾ པརིསུདྡྷཱཔརིསུདྡྷཝཎྞཱནཾ པརིཏྟཏཱ ཨཔྤམཱཎཏཱ ཝཱ ཨབྷིབྷཝནཀཱརཎཾ, ཨཐ ཁོ ནཱིལཱདིབྷཱཝོ ཨེཝཱཏི. ཨེཏེསུ ཙ པརིཏྟཱདིཀསིཎརཱུཔེསུ ཡཾཡཾཙརིཏསྶ ཨིམཱནི ཨབྷིབྷཱཡཏནཱནི ཨིཛ྄ཛྷནྟི, ཏཾ དསྶེཏུཾ – ‘‘ཨིམེསུ པནཱ’’ཏིཨཱདི ཝུཏྟཾ.

སབྦསངྒཱཧིཀཝསེནཱཏི ནཱིལཝཎྞནཱིལནིདསྶནནཱིལནིབྷཱསཱནཾ སཱདྷཱརཎཝསེན. ཝཎྞཝསེནཱཏི སབྷཱཝཝཎྞཝསེན. ནིདསྶནཝསེནཱཏི པསྶིཏབྦཏཱཝསེན, ཙཀྑུཝིཉྙཱཎཝཱིཐིཡཱ གཧེཏབྦཏཱཝསེན ¶ . ཨོབྷཱསཝསེནཱཏི སཔྤབྷཱསཏཱཡ ཨཝབྷཱསནཝསེན. ཝཎྞདྷཱཏུཡཱ ཝཱཏི ཨཉྫནརཛཏཝཏྠཱདིཝཎྞདྷཱཏུཡཱ. ལོཀིཡཱནེཝ རཱུཔཱཝཙརཛ྄ཛྷཱནབྷཱཝཏོ.

༤༣༥. རཱུཔཱིཏི ཨེཏྠ ཡེནཱཡཾ སསནྟཏིཔརིཡཱཔནྣེན རཱུཔེན སམནྣཱགཏོ, ཏཾ ཡསྶ ཛྷཱནསྶ ཧེཏུབྷཱཝེན ཝིསིཊྛརཱུཔཾ ཧོཏི. ཡེན ཝིསིཊྛེན རཱུཔཱིཏི ཝུཙྩེཡྻ, ཏདེཝ སསནྟཏིཔརིཡཱཔནྣརཱུཔནིམིཏྟཾ ཛྷཱནཾ. ཨིདྷ པན པརམཏྠཏོ རཱུཔིབྷཱཝསཱདྷཀནྟི ཨཱཧ – ‘‘ཨཛ྄ཛྷཏྟཾ ཀེསཱདཱིསཱུ’’ཏིཨཱདི. རཱུཔཛ྄ཛྷཱནཾ རཱུཔནྟི ཨུཏྟརཔདལོཔེན ཝུཏྟཾ – ‘‘རཱུཔཱུཔཔཏྟིཡཱ’’ཏིཨཱདཱིསུ (དྷ. ས. ༡༦༠-༡༦༡, ༡༨༥-༡༩༠ ཨཱདཡོ, ༢༤༤-༢༤༥ ཨཱདཡོ; ཝིབྷ. ༦༢༥) ཝིཡ.

སུབྷནྟྭེཝ ¶ ཨདྷིམུཏྟོ ཧོཏཱིཏི ཨཡཾ ཏཏིཡཝིམོཀྑོ. ཨིདྷ སུཔརིསུདྡྷནཱིལཱདིཝཎྞཀསིཎཛ྄ཛྷཱནཝསེན ཝུཏྟོཏི དསྶེཏྭཱ ཨིདཱནི པཊིསམྦྷིདཱཔཱལི༹ཡཾ ཏསྶ བྲཧྨཝིཧཱརཛ྄ཛྷཱནཝསེན ཨཱགཏབྷཱཝཾ དསྶེཏུཾ – ‘‘པཊིསམྦྷིདཱམགྒེ པནཱ’’ཏིཨཱདི ཨཱརདྡྷཾ. ཨིདྷ པན ཨུཔརིཔཱལི༹ཡཾཡེཝ བྲཧྨཝིཧཱརཱནཾ ཨཱགཏཏྟཱ ཏཾ ནཡཾ པཊིཀྑིཔིཏྭཱ པརིསུདྡྷནཱིལཱདིཝཎྞཀསིཎཝསེནེཝ སུབྷཝིམོཀྑོ ཨནུཉྙཱཏོ.

༤༤༣. པརིཀམྨཔཐཝིཡཱཔཱིཏི ཨཀཏཱཡ ཝཱ ཀཏཱཡ ཝཱ དལ༹ྷམཎྜལཱདིསངྑཱཏཔརིཀམྨཔཐཝིཡཱཔི. ཨུགྒཧནིམིཏྟཱདཱིནཾ པཐཝཱིཀསིཎནྟི ནཱམཾ ནིསྶིཏེ ནིསྶཡཝོཧཱརཝསེན ཝུཏྟནྟི དཊྛབྦཾ, ཡཐཱ ‘‘མཉྩཱ ཨུཀྐུཊྛིཾ ཀརོནྟཱི’’ཏི.

སཱིལཱནཱིཏི པཱཏིམོཀྑསཾཝརཱདཱིནི ཙཏྟཱརི སཱིལཱནི. སོདྷེཏྭཱཏི ཨནཱཔཛྫནེན ཨཱཔནྣཝུཊྛཱཔནེན ཀིལེསེཧི ཨཔྤཊིཔཱིལ༹ནེན ཙ ཝིསོདྷེཏྭཱ. ཏིཝིདྷཉྷི སཱིལསྶ ཝིསོདྷནཾ ནཱམ – ཨནཱཔཛྫནཾ ཨཱཔནྣཝུཊྛཱཔནཾ ཀིལེསེཧི ཙ ཨཔྤཊིཔཱིལ༹ནནྟི. ཀམྨཊྛཱནབྷཱཝནཾ པརིབུནྡྷེཏི ཨུཔརོདྷེཏི པཝཏྟིཏུཾ ན དེཏཱིཏི པལིབོདྷོ རཀཱརསྶ ལཀཱརཾ ཀཏྭཱ, པརིབནྡྷོཏི ཨཏྠོ. ཨུཔཙྪིནྡིཏྭཱཏི སམཱཔནྣེན སངྒཱཧཎེན ཝཱ ཨུཔརུནྡྷིཏྭཱ, ཨཔལིབོདྷཾ ཀཏྭཱཏི ཨཏྠོ. ཀལྱཱཎམིཏྟཾ ཨུཔསངྐམིཏྭཱཏི –

‘‘པིཡོ གརུ བྷཱཝནཱིཡོ, ཝཏྟཱ ཙ ཝཙནཀྑམོ;

གམྦྷཱིརཉྩ ཀཐཾ ཀཏྟཱ, ནོ ཙཊྛཱནེ ནིཡོཛཀོ’’ཏི. (ཨ. ནི. ༧.༣༧) –

ཨེཝམཱདིགུཎསམནྣཱགཏཾ ཨེཀནྟཧིཏེསིཾ ཝུདྡྷིཔཀྑེ ཋིཏཾ ཀལྱཱཎམིཏྟཾ ཨུཔསངྐམིཏྭཱ.

ཨནནུརཱུཔཾ ¶ ཝིཧཱརནྟི ཨཊྛཱརསནྣཾ དོསཱནཾ ཨཉྙཏརེན སམནྣཱགཏཾ. ཝུཏྟཉྷེཏཾ ཨཊྛཀཐཱསུ –

‘‘མཧཱཝཱསཾ ནཝཱཝཱསཾ, ཛརཱཝཱསཉྩ པནྠནིཾ;

སོཎྜིཾ པཎྞཉྩ པུཔྥཉྩ, ཕལཾ པཏྠིཏམེཝ ཙ.

‘‘ནགརཾ དཱརུནཱ ཁེཏྟཾ, ཝིསབྷཱགེན པཊྚནཾ;

པཙྩནྟསཱིམཱ སཔྤཱཡཾ, ཡཏྠ མིཏྟོ ན ལབྦྷཏི.

‘‘ཨཊྛཱརསེཏཱནི ཋཱནཱནི, ཨིཏི ཝིཉྙཱཡ པཎྜིཏོ;

ཨཱརཀཱ པརིཝཛྫེཡྻ, མགྒཾ སཔྤཊིབྷཡཾ ཡཐཱ’’ཏི. (ཝིསུདྡྷི. ༡.༥༢);

ཨནུརཱུཔེཏི ¶ གོཙརགཱམཏོ ནཱཏིདཱུརནཙྩཱསནྣཏཱདཱིཧི པཉྩཧི ཨངྒེཧི སམནྣཱགཏེ. ཝུཏྟཉྷེཏཾ བྷགཝཏཱ –

‘‘ཀཐཉྩ, བྷིཀྑཝེ, སེནཱསནཾ པཉྩངྒསམནྣཱགཏཾ ཧོཏི? ཨིདྷ, བྷིཀྑཝེ, སེནཱསནཾ ནཱཏིདཱུརཾ ཧོཏི ནཙྩཱསནྣཾ གམནཱགམནསམྤནྣཾ དིཝཱ ཨཔྤཱཀིཎྞཾ རཏྟིཾ ཨཔྤསདྡཾ ཨཔྤནིགྒྷོསཾ ཨཔྤཌཾསམཀསཝཱཏཱཏཔསརཱིསཔསམྥསྶཾ. ཏསྨིཾ ཁོ པན སེནཱསནེ ཝིཧརནྟསྶ ཨཔྤཀསིརེན ཨུཔྤཛྫནྟི ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱ. ཏསྨིཾ ཁོ པན སེནཱསནེ ཐེརཱ བྷིཀྑཱུ ཝིཧརནྟི བཧུསྶུཏཱ ཨཱགཏཱགམཱ དྷམྨདྷརཱ ཝིནཡདྷརཱ མཱཏིཀཱདྷརཱ. ཏེ ཀཱལེན ཀཱལཾ ཨུཔསངྐམིཏྭཱ པརིཔུཙྪཏི པརིཔཉྷཏི ‘ཨིདཾ, བྷནྟེ, ཀཐཾ ཨིམསྶ ཀོ ཨཏྠོ’ཏི. ཏསྶ ཏེ ཨཱཡསྨནྟོ ཨཝིཝཊཉྩེཝ ཝིཝརནྟི, ཨནུཏྟཱནཱིཀཏཉྩ ཨུཏྟཱནིཾ ཀརོནྟི, ཨནེཀཝིཧིཏེསུ ཙ ཀངྑཱཋཱནིཡེསུ དྷམྨེསུ ཀངྑཾ པཊིཝིནོདེནྟི. ཨེཝཾ ཁོ, བྷིཀྑཝེ, སེནཱསནཾ པཉྩངྒསམནྣཱགཏཾ ཧོཏཱི’’ཏི (ཨ. ནི. ༡༠.༡༡).

ཨེཏྠ ཙ ནཱཏིདཱུརཾ ནཙྩཱསནྣཾ གམནཱགམནསམྤནྣནྟི ཨེཀཾ ཨངྒཾ, དིཝཱ ཨཔྤཱཀིཎྞཾ རཏྟིཾ ཨཔྤསདྡཾ ཨཔྤནིགྒྷོསནྟི ཨེཀཾ, ཨཔྤཌཾསམཀསཝཱཏཱཏཔསརཱིསཔསམྥསྶནྟི ཨེཀཾ, ཏསྨིཾ ཁོ པན སེནཱསནེ ཝིཧརནྟསྶ…པེ… པརིཀྑཱརཱཏི ཨེཀཾ, ཏསྨིཾ ཁོ པན སེནཱསནེ ཐེརཱ…པེ… ཀངྑཾ པཊིཝིནོདེནྟཱིཏི ཨེཀནྟི ཨེཝཾ པཉྩངྒཱནི ཝེདིཏབྦཱནི.

ཁུདྡཀཔལིབོདྷཾ ¶ ཨུཔཙྪིནྡིཏྭཱཏི དཱིགྷཀེསནཁལོམཱནཾ ཚེདནེན ཙཱིཝརཀམྨཙཱིཝརརཛནཔཏྟཔཙནམཉྩཔཱིཋཱདིསོདྷནཝསེན ཁུདྡཀཔལིབོདྷཾ ཨུཔཙྪིནྡིཏྭཱ.

༤༥༣. ཨུདྡྷུམཱཏཀཱདཱིསཱུཏི ཨེཏྠ ཨཱདི-སདྡེན ཝིནཱིལཀཝིཔུབྦཀཝིཙྪིདྡཀཝིཀྑཱཡིཏཀཧཏཝིཀྑིཏྟཀལོཧིཏཀཔུལ༹ཝཀཨཊྛིཀཱནཾ སངྒཧོ དཊྛབྦོ. ཏཏྠ བྷསྟཱ ཝིཡ ཝཱཡུནཱ ཨུདྡྷཾ ཛཱིཝིཏཔརིཡཱདཱནཱ ཡཐཱནུཀྐམཾ སམུགྒཏེན སཱུནབྷཱཝེན དྷུམཱཏཏྟཱ ཨུདྡྷུམཱཏཾ, ཨུདྡྷུམཱཏམེཝ ཨུདྡྷུམཱཏཀཾ, པཊིཀཱུལཏྟཱ ཝཱ ཀུཙྪིཏཾ ཨུདྡྷུམཱཏནྟི ཨུདྡྷུམཱཏཀཾ, ཏཐཱརཱུཔསྶ ཚཝསརཱིརསྶེཏཾ ཨདྷིཝཙནཾ. ཝིནཱིལཾ ཝུཙྩཏི ཝིཔརིབྷིནྣནཱིལཝཎྞཾ, ཝིནཱིལམེཝ ཝིནཱིལཀཾ, པཊིཀཱུལཏྟཱ ཝཱ ཀུཙྪིཏཾ ཝིནཱིལནྟི ཝིནཱིལཀཾ, མཾསུསྶདཊྛཱནེསུ རཏྟཝཎྞསྶ ¶ , པུབྦསནྣིཙཡཊྛཱནེསུ སེཏཝཎྞསྶ, ཡེབྷུཡྻེན ཙ ནཱིལཝཎྞསྶ ནིལཊྛཱནེ ནཱིལསཱཊཀཔཱརུཏསྶེཝ ཚཝསརཱིརསྶེཏཾ ཨདྷིཝཙནཾ. པརིབྷིནྣཊྛཱནེསུ ཝིསྶནྡམཱནཔུབྦཾ ཝིཔུབྦཾ, ཝིཔུབྦམེཝ ཝིཔུབྦཀཾ, པཊིཀཱུལཏྟཱ ཝཱ ཀུཙྪིཏཾ ཝིཔུབྦནྟི ཝིཔུབྦཀཾ, ཏཐཱརཱུཔསྶ ཚཝསརཱིརསྶེཏཾ ཨདྷིཝཙནཾ. ཝིཙྪིདྡཾ ཝུཙྩཏི དྭིདྷཱ ཚིནྡནེན ཨཔདྷཱརིཏཾ, ཝིཙྪིདྡམེཝ ཝིཙྪིདྡཀཾ, པཊིཀཱུལཏྟཱ ཝཱ ཀུཙྪིཏཾ ཝིཙྪིདྡནྟི ཝིཙྪིདྡཀཾ, ཝེམཛ྄ཛྷེ ཚིནྣསྶ ཚཝསརཱིརསྶེཏཾ ཨདྷིཝཙནཾ. ཨིཏོ ཙ ཨེཏྟོ ཙ ཝིཝིདྷཱཀཱརེན སོཎསིངྒཱལཱདཱིཧི ཁཱཡིཏཾ ཝིཀྑཱཡིཏཾ, ཝིཀྑཱཡིཏམེཝ ཝིཀྑཱཡིཏཀཾ, པཊིཀཱུལཏྟཱ ཝཱ ཀུཙྪིཏཾ ཝིཀྑཱཡིཏནྟི ཝིཀྑཱཡིཏཀཾ, ཏཐཱརཱུཔསྶ ཚཝསརཱིརསྶེཏཾ ཨདྷིཝཙནཾ.

ཝིཝིདྷཱ ཁིཏྟཾ ཝིཀྑིཏྟཾ, ཝིཀྑིཏྟམེཝ ཝིཀྑིཏྟཀཾ, པཊིཀཱུལཏྟཱ ཝཱ ཀུཙྪིཏཾ ཝིཀྑིཏྟནྟི ཝིཀྑིཏྟཀཾ, ཨཉྙེན ཧཏྠཾ, ཨཉྙེན པཱདཾ, ཨཉྙེན སཱིསནྟི ཨེཝཾ ཏཏོ ཏཏོ ཝིཀྑིཏྟསྶ ཚཝསརཱིརསྶེཏཾ ཨདྷིཝཙནཾ. ཧཏཉྩ ཏཾ པུརིམནཡེནེཝ ཝིཀྑིཏྟཀཉྩཱཏི ཧཏཝིཀྑིཏྟཀཾ, ཀཱཀཔདཱཀཱརེན ཨངྒཔཙྩངྒེསུ སཏྠེན ཧནིཏྭཱ ཝུཏྟནཡེནེཝ ཝིཀྑིཏྟསྶ ཚཝསརཱིརསྶེཏཾ ཨདྷིཝཙནཾ. ལོཧིཏཾ ཀིརཏི ཝིཀྑིཔཏི ཨིཏོ ཙིཏོ ཙ པགྒྷརཏཱིཏི ལོཧིཏཀཾ, པགྒྷརིཏལོཧིཏམཀྑིཏསྶ ཚཝསརཱིརསྶེཏཾ ཨདྷིཝཙནཾ. པུལ༹ཝཱ ཝུཙྩནྟི ཀིམཡོ, པུལ༹ཝེ ཀིརཏཱིཏི པུལ༹ཝཀཾ, ཀིམིཔརིཔུཎྞསྶ ཚཝསརཱིརསྶེཏཾ ཨདྷིཝཙནཾ. ཨཊྛིཡེཝ ཨཊྛིཀཾ, པཊིཀཱུལཏྟཱ ཝཱ ཀུཙྪིཏཾ ཨཊྛཱིཏི ཨཊྛིཀཾ, ཨཊྛིསངྑལིཀཱཡཔི ཨེཀཊྛིཀསྶཔི ཨེཏཾ ཨདྷིཝཙནཾ. ཨིམེསུ དསསུ ཨསུབྷེསུ པཋམཛ྄ཛྷཱནམེཝ ཨུཔྤཛྫཏི, ན དུཏིཡཱདཱིནི. ཏེནཱཧ – ཨིདྷ ‘‘པཋམཛ྄ཛྷཱནསཧགཏཱ སཉྙཱ’’ཏི. ཏཐཱ ཧི ཨཔརིསཎྛིཏཛལཱཡ སཱིགྷསོཏཱཡ ནདིཡཱ ཨརིཏྟབལེནེཝ ནཱཝཱ ཏིཊྛཏི, ཝིནཱ ཨརིཏྟེན ན སཀྐཱ ཋཔེཏུཾ. ཨེཝམེཝཾ དུབྦལཏྟཱ ཨཱརམྨཎསྶ ཝིཏཀྐབལེནེཝ ཙིཏྟཾ ཨེཀགྒཾ ཧུཏྭཱ ཏིཊྛཏི, ཝིནཱ ཝིཏཀྐེན ན སཀྐཱ ཋཔེཏུཾ ¶ . ཏསྨཱ པཋམཛ྄ཛྷཱནམེཝེཏྠ ཧོཏི, ན དུཏིཡཱདཱིནི. ཨཱརམྨཎསྶ དུབྦལཏཱ ཙེཏྠ པཊིཀཱུལབྷཱཝེན ཙིཏྟཾ ཋཔེཏུཾ ཨསམཏྠཏཱ.

‘‘རུཀྑོ མཏོ, ལོཧཾ མཏ’’ནྟིཨཱདཱིསུ ཡཾ ཁནྡྷཔྤབནྡྷཾ ཨུཔཱདཱཡ རུཀྑཱདིསམཉྙཱ, ཏསྨིཾ ཨནུཔཙྪིནྣེཔི ཨལླཏཱདིཝིགམནཾ ནིསྶཱཡ མཏཝོཧཱརོ སམྨུཏིམརཎཾ. སངྑཱརཱནཾ ཁཎབྷངྒསངྑཱཏཾ ཁཎིཀམརཎཾ. སམུཙྪེདམརཎནྟི ཨརཧཏོ སནྟཱནསྶ སབྦསོ ཨུཙྪེདབྷཱུཏཾ མརཎཾ. ཝིཔསྶནཱབྷཱཝནཱཝསེན ཙེཏཾ ཝུཏྟཾ. མརཎཱནུསྶཏིབྷཱཝནཱཡཾ པན ཏིཝིདྷམྤེཏཾ ནཱདྷིཔྤེཏཾ ¶ ཨསཾཝེགཝཏྠུཏོ ཨནུཔཊྛཧནཏོ ཨབཱཧུལླཏོ ཙ. མརཎཱནུསྶཏིཡཉྷི ཨེཀེན བྷཝེན པརིཙྪིནྣསྶ ཛཱིཝིཏིནྡྲིཡཔྤབནྡྷསྶ ཝིཙྪེདོ མརཎནྟི ཨདྷིཔྤེཏོ སཾཝེགཝཏྠུཏོ ཨུཔཊྛཧནཏོ བཱཧུལླཏོ ཙ. ཨིདཱནི ཨིམམེཝ མརཎཾ སནྡྷཱཡ ཝིཀཔྤནྟརཾ དསྶེནྟོ, ‘‘ཧེཊྛཱ ཝུཏྟལཀྑཎཱ ཝཱ’’ཏིཨཱདིམཱཧ.

ཨསིཏཔཱིཏཱདིབྷེདེཏི ཨསིཏཔཱིཏཁཱཡིཏསཱཡིཏཔྤབྷེདེ, ཨསིཏབྦཁཱདིཏབྦསཱཡིཏབྦཝིབྷཱགེཏི ཨཏྠོ ཀཱལབྷེདཝཙནིཙྪཱཡ ཨབྷཱཝཏོ ཡཐཱ ‘‘དུདྡྷ’’ནྟི. ཀབལ༹ཾ ཀརཱིཡཏཱིཏི ཀབལཱི༹ཀཱརོ, ཨཱཧརཱིཡཏཱིཏི ཨཱཧཱརོ, ཀབལཱི༹ཀཱརོ ཙ སོ ཨཱཧཱརོ ཙཱཏི ཀབལཱི༹ཀཱརཱཧཱརོ. ཝཏྠུཝསེན ཙེཏཾ ཝུཏྟཾ. སཝཏྠུཀོ ཨེཝ ཧི ཨཱཧཱརོ ཨིདྷ ཀམྨཊྛཱནབྷཱཝེན ཨདྷིཔྤེཏོ. ཨོཛཱལཀྑཎོ པན ཨཱཧཱརོ ཨོཛཊྛམཀཾ རཱུཔཾ ཨཱཧརཏཱིཏི ཨཱཧཱརོཏི ཝུཙྩཏི. སོ ཨིདྷ ནཱདྷིཔྤེཏོ པཊིཀཱུལཱཀཱརགྒཧཎསྶ ཨསམྦྷཝཏོ. ནཝ པཊིཀཱུལཱནཱིཏི གམནཔརིཡེསནཔརིབྷོགཱསཡནིདཱནཨཔརིཔཀྐཔརིཔཀྐཕལནིསྶནྡཔྤཊིཀཱུལཝསེན ནཝ པཊིཀཱུལཱནི. སམཀྑནཔྤཊིཀཱུལཾ པན པརིབྷོགཱདཱིསུ ལབྦྷམཱནཏྟཱ ཨིདྷ ཝིསུཾ ན གཧིཏཾ, ཨཉྙཐཱ ཏེན སདྡྷིཾ ‘‘དས པཊིཀཱུལཱནཱི’’ཏི ཝཏྟབྦཾ. ཝིསུདྡྷིམགྒེ (ཝིསུདྡྷི. ༡.༣༠༣-༣༠༤) པན སམཀྑནཾ པརིབྷོགཱདཱིསུ ལབྦྷམཱནམྤི ནིསྶནྡཝསེན ཝིསེསཏོ པཊིཀཱུལནྟི ཝིསུཾ གཧེཏྭཱ དསཧཱཀཱརེཧི པཊིཀཱུལཏཱ ཝུཏྟཱ.

ཨུཔྤཛྫནཀསཉྙནྟི པཊིཀཱུལཱཀཱརགྒཧཎཝསེན ཨུཔྤཛྫནཀསཉྙཾ. སཉྙཱསདྡོ ཙཱཡཾ ‘‘རཱུཔསཉྙཱ སདྡསཉྙཱ’’ཏིཨཱདཱིསུ (སཾ. ནི. ༣.༥༧) སཉྫཱནནལཀྑཎེ དྷམྨེ ཨཱགཏོ, ‘‘ཨནིཙྩསཉྙཱ དུཀྑསཉྙཱ’’ཏིཨཱདཱིསུ ཝིཔསྶནཱཡ ཨཱགཏོ, ‘‘ཨུདྡྷུམཱཏཀསཉྙཱཏི ཝཱ སོཔཱཀརཱུཔསཉྙཱཏི ཝཱ ཨིམེ དྷམྨཱ ཨེཀཊྛཱ, ཨུདཱཧུ ནཱནཊྛཱ’’ཏིཨཱདཱིསུ སམཐེ ཨཱགཏོ. ཨིདྷ པན སམཐསྶ པརིཀམྨེ དཊྛབྦོ. ཨཱཧཱརེཧི པཊིཀཱུལཱཀཱརགྒཧཎཾ, ཏཔྤབྷཱཝིཏཾ ཝཱ ཨུཔཙཱརཛ྄ཛྷཱནཾ ཨིདྷ ‘‘ཨཱཧཱརེ པཊིཀཱུལསཉྙཱ’’ཏི ཨདྷིཔྤེཏཾ.

ཨུཀྐཎྛིཏསཉྙནྟི ¶ ནིབྦིནྡནཱཀཱརེན ཨུཔྤཛྫནཀསཉྙཾ. ཨནིཙྩསཉྙནྟི ཨེཏྠ ཨནིཙྩཾ ཁནྡྷཔཉྩཀཾ ཨུཔྤཱདཝཡཉྙཐཏྟབྷཱཝཏོ, ཧུཏྭཱ ཨབྷཱཝཏོ ཝཱ, ཏསྨིཾ ཨནིཙྩེ ཁནྡྷཔཉྩཀེ ཨནིཙྩནྟི ཨུཔྤཛྫམཱནཱ ཨནིཙྩལཀྑཎཔརིགྒཱཧིཀཱ སཉྙཱ ཨནིཙྩསཉྙཱ. ཏེནཱཧ – ‘‘པཉྩནྣཾ ཨུཔཱདཱནཀྑནྡྷཱན’’ནྟིཨཱདི. ཏཏྠ ཨུདཡོ ¶ ནིབྦཏྟིལཀྑཎཾ, ཝཡོ ཝིཔརིཎཱམལཀྑཎཾ, ཨཉྙཐཏྟཾ ཛརཱ. ཨུདཡབྦཡཉྙཐཏྟགྒཧཎེན ཨནིཙྩལཀྑཎཾ དསྶེཏི. ཨུཔྤཱདཝཡཉྙཐཏྟབྷཱཝཏོ ཧི ཁནྡྷཔཉྩཀཾ ཨནིཙྩནྟི ཝུཙྩཏི. ཡསྶ ཙ སབྷཱཝེན ཁནྡྷཔཉྩཀཾ ཨནིཙྩནྟི ཝུཙྩཏི, ཏཾ ཨནིཙྩལཀྑཎཾ. ཏེན ཧི ཏཾ ཨནིཙྩནྟི ལཀྑཱིཡཏི, ཨནིཙྩལཀྑཎཉྩ ཨུདཡབྦཡཱནཾ ཨམནསིཀཱརཱ སནྟཏིཡཱ པཊིཙྪནྣཏྟཱ ན ཨུཔཊྛཱཏི, ཨུདཡབྦཡཾ པན པརིགྒཧེཏྭཱ སནྟཏིཡཱ ཝིཀོཔིཏཱཡ ཨནིཙྩལཀྑཎཾ ཡཱཐཱཝསརསཏོ ཨུཔཊྛཱཏི. ན ཧི སམྨདེཝ ཨུདཡབྦཡཾ སལླཀྑེནྟསྶ པུབྦཱཔརིཡེན པཝཏྟམཱནཱནཾ དྷམྨཱནཾ ཨཉྙོཉྙབྷཱཝཾ སལླཀྑཎེན སནྟཏིཡཱ ཨུགྒྷཱཊིཏཱཡ དྷམྨཱ སམྦནྡྷབྷཱཝེན ཨུཔཊྛཧནྟི, ཨཐ ཁོ ཨཡོསལཱཀཱ ཝིཡ ཨསམྦནྡྷབྷཱཝེནཱཏི སུཊྛུཏརཾ ཨནིཙྩལཀྑཎཾ པཱཀཊཾ ཧོཏི.

‘‘ཡདནིཙྩཾ, ཏཾ དུཀྑ’’ནྟི (སཾ. ནི. ༣.༡༥, ༤༥, ༤༦, ༧༦, ༧༧, ༨༥; ༢.༤.༡, ༤) ཝཙནཏོ ཏདེཝ ཁནྡྷཔཉྩཀཾ ཨབྷིཎྷཔྤཊིཔཱིལ༹ནཏོ དུཀྑཾ, ཨབྷིཎྷཔྤཊིཔཱིལ༹ནཱཀཱརོ པན དུཀྑལཀྑཎཾ. ཏེནེཝཱཧ – ‘‘ཨནིཙྩེ ཁནྡྷཔཉྩཀེ…པེ… སཉྙཾ བྷཱཝེཏཱི’’ཏི. ཏཏྠ པཊིཔཱིལ༹ནཾ ནཱམ ཡཐཱཔརིགྒཧིཏཾ ཨུདཡཝཡཝསེན སངྑཱརཱནཾ ནིརནྟརཾ པཊིཔཱིལི༹ཡམཱནཏཱ ཝིབཱདྷིཡམཱནཏཱ. དུཀྑལཀྑཎཉྩ ཨབྷིཎྷསམྤཊིཔཱིལ༹ནསྶ ཨམནསིཀཱརཱ ཨིརིཡཱཔཐེཧི པཊིཙྪནྣཏྟཱ ན ཨུཔཊྛཱཏི, ཨབྷིཎྷསམྤཊིཔཱིལ༹ནཾ པན མནསི ཀརིཏྭཱ ཨིརིཡཱཔཐེ ལབྦྷམཱནདུཀྑཔྤཊིཙྪཱདཀབྷཱཝེ ཨུགྒྷཱཊིཏེ དུཀྑལཀྑཎཾ ཡཱཐཱཝསརསཏོ ཨུཔཊྛཱཏི. ཏཐཱ ཧི ཨིརིཡཱཔཐེཧི པཊིཙྪནྣཏྟཱ དུཀྑལཀྑཎཾ ན ཨུཔཊྛཱཏི, ཏེ ཙ ཨིརིཡཱཔཐཱ ཨབྷིཎྷསམྤཊིཔཱིལ༹ནཱམནསིཀཱརེན པཊིཙྪཱདཀཱ ཛཱཏཱ. ཨེཀསྨིཉྷི ཨིརིཡཱཔཐེ ཨུཔྤནྣསྶ དུཀྑསྶ ཝིནོདཀཾ ཨིརིཡཱཔཐནྟརཾ ཏསྶ པཊིཙྪཱདཀཾ ཝིཡ ཧོཏི, ཨེཝཾ སེསཱཔི. ཨིརིཡཱཔཐཱནཾ པན ཏཾཏཾདུཀྑཔཏིཏཱཀཱརབྷཱཝེ ཡཱཐཱཝཏོ ཉཱཏེ ཏེསཾ དུཀྑཔྤཊིཙྪཱདཀབྷཱཝོ ཨུགྒྷཱཊིཏོ ནཱམ ཧོཏི སངྑཱརཱནཾ ནིརནྟརཾ དུཀྑཱབྷིཏུནྣཏཱཡ པཱཀཊབྷཱཝཏོ. ཏསྨཱ ཨབྷིཎྷསམྤཊིཔཱིལ༹ནཾ མནསི ཀརིཏྭཱ ཨིརིཡཱཔཐེ ལབྦྷམཱནདུཀྑཔྤཊིཙྪཱདཀབྷཱཝེ ཨུགྒྷཱཊིཏེ དུཀྑལཀྑཎཾ ཡཱཐཱཝསརསཏོ ཨུཔཊྛཱཏི.

‘‘ཡཾ དུཀྑཾ, ཏདནཏྟཱ’’ཏི ཝཙནཏོ ཏདེཝ ཁནྡྷཔཉྩཀཾ ཨཝསཝཏྟནཏོ ཨནཏྟཱ, ཨཝསཝཏྟནཱཀཱརོ པན ཨནཏྟལཀྑཎཾ. ཏེནཱཧ – ‘‘པཊིཔཱིལ༹ནཊྛེནཱ’’ཏིཨཱདི ¶ . ཨནཏྟལཀྑཎཉྩ ནཱནཱདྷཱཏུཝིནིབྦྷོགསྶ ¶ ཨམནསིཀཱརཱ གྷནེན པཊིཙྪནྣཏྟཱ ན ཨུཔཊྛཱཏི, ནཱནཱདྷཱཏུཡོ པན ཝིནིབྦྷུཛྫིཏྭཱ ‘‘ཨཉྙཱ པཐཝཱིདྷཱཏུ, ཨཉྙཱ ཨཱཔོདྷཱཏཱུ’’ཏིཨཱདིནཱ, ‘‘ཨཉྙོ ཕསྶོ, ཨཉྙཱ ཝེདནཱ’’ཏིཨཱདིནཱ ཙ ཝིསུཾ ཝིསུཾ ཀཏྭཱ གྷནཝིནིབྦྷོགེ ཀཏེ སམཱུཧགྷནེ ཀིཙྩཱརམྨཎགྷནེ ཙ བྷེདིཏེ ཨནཏྟལཀྑཎཾ ཡཱཐཱཝསརསཏོ ཨུཔཊྛཱཏི. ཡཱ ཧེསཱ ཨཉྙམཉྙཱུཔཏྠམྦྷེསུ སམུདིཏེསུ རཱུཔཱརཱུཔདྷམྨེསུ ཨེཀཏྟཱབྷིནིཝེསཝསེན ཨཔརིམདྡིཏསངྑཱརེཧི མམཱཡམཱནཱ སམཱུཧགྷནཏཱ, ཏཐཱ ཏེསཾ ཏེསཾ དྷམྨཱནཾ ཀིཙྩབྷེདསྶ སཏིཔི པཊིནིཡཏབྷཱཝེ ཨེཀཏོ གཡ྄ཧམཱནཱ ཀིཙྩགྷནཏཱ, ཏཐཱ སཱརམྨཎདྷམྨཱནཾ སཏིཔི ཨཱརམྨཎཀརཎབྷེདེ ཨེཀཏོ གཡ྄ཧམཱནཱ ཨཱརམྨཎགྷནཏཱ. སཱ ཙཏཱུསུ དྷཱཏཱུསུ ཉཱཎེན ཝིནིབྦྷུཛིཏྭཱ དིསྶམཱནཱསུ ཧཏྠེན པརིམདྡིཡམཱནོ ཕེཎཔིཎྜོ ཝིཡ ཝིལཱིནཾ ཨཱགཙྪཏི, ཡཐཱཔཙྩཡཾ པཝཏྟམཱནཱ སུཉྙཱ ཨེཏེ དྷམྨམཏྟཱཏི ཨཝསཝཏྟནཱཀཱརསངྑཱཏཾ ཨནཏྟལཀྑཎཾ པཱཀཊཏརཾ ཧོཏི.

ཨཔརཨཙྪརཱསངྒྷཱཏཝགྒཝཎྞནཱ ནིཊྛིཏཱ.

༡༩. ཀཱཡགཏཱསཏིཝགྒཝཎྞནཱ

༥༦༣. ཙེཏསཱ ¶ ཕུཊོཏི ཙིཏྟེན ཕརིཏོ. ཙིཏྟེན ཕརཎཉྩ སམུདྡསྶ དྭིདྷཱ སམྦྷཝཏཱིཏི ཨཱཧ – ‘‘དུཝིདྷཾ ཕརཎ’’ནྟིཨཱདི. པུརིམེན ཨཏྠེནཱཏི ‘‘སམྤཡོགཝསེན ཝིཛྫཾ བྷཛནྟཱི’’ཏི ཝུཏྟེན ཨཏྠེན. པཙྪིམེནཱཏི ‘‘ཝིཛྫཱབྷཱགེ ཝིཛྫཱཀོཊྛཱསེ ཝཏྟནྟཱི’’ཏི ཝུཏྟེན.

༥༦༤. མཧཏོ སཾཝེགཱཡ སཾཝཏྟཏཱིཏིཨཱདཱིསུ ཨཡཾ པན ཨཔརོ ནཡོ. ཡཱཐཱཝཏོ ཀཱཡསབྷཱཝཔྤཝེདནཏོ མཧཏོ སཾཝེགཱཡ སཾཝཏྟཏི. ཨཏྠཱཡཱཏི དིཊྛདྷམྨིཀཱདིཨཏྠཱཡ. ཡོགཀྑེམཱཡཱཏི ཙཏཱུཧི ཡོགེཧི ཁེམབྷཱཝཱཡ. སཏིསམྤཛཉྙཱཡཱཏི སབྦཏྠ སཏིཨཝིཔྤཝཱསཱཡ སཏྟཊྛཱནིཡསམྤཛཉྙཱཡ ཙ. ཉཱཎདསྶནཔྤཊིལཱབྷཱཡཱཏི ཝིཔསྶནཱཉཱཎཱདྷིགམཱཡ. ཝིཛྫཱཝིམུཏྟིཕལསཙྪིཀིརིཡཱཡཱཏི ཏིསྶོ ཝིཛྫཱ ཙིཏྟསྶ ཨདྷིམུཏྟི ནིབྦཱནཾ ཙཏྟཱརི སཱམཉྙཕལཱནཱིཏི ཨེཏེསཾ པཙྩཀྑཀརཎཱཡ.

༥༨༤. པཉྙཱཔཊིལཱབྷཱཡཱཏིཨཱདཱིསུ ¶ སོལ༹སསུ པདེསུ པཉྙཱཔཊིལཱབྷཱཡ པཉྙཱཝུདྡྷིཡཱ པཉྙཱཝེཔུལླཱཡ པཉྙཱབཱཧུལླཱཡཱཏི ཨིམཱནི ཙཏྟཱརི པཉྙཱཝསེན བྷཱཝཝཙནཱནི, སེསཱནི དྭཱདས པུགྒལཝསེན བྷཱཝཝཙནཱནི. སཔྤུརིསསཾསེཝོཏི སཔྤུརིསཱནཾ བྷཛནཾ. སདྡྷམྨསྶཝནནྟི ཏེསཾ སཔྤུརིསཱནཾ སནྟིཀེ སཱིལཱདིཔྤཊིཔཏྟིདཱིཔཀསྶ སདྡྷམྨཝཙནསྶ སཝནཾ. ཡོནིསོ མནསིཀཱརོཏི སུཏཱནཾ དྷམྨཱནཾ ཨཏྠཱུཔཔརིཀྑཱཝསེན ཨུཔཱཡེན མནསིཀཱརོ. དྷམྨཱནུདྷམྨཔྤཊིཔཏྟཱིཏི ལོཀུཏྟརདྷམྨེ ཨནུགཏསྶ སཱིལཱདིཔྤཊིཔདཱདྷམྨསྶ པཊིཔཛྫནཾ.

ཚནྣཾ ཨབྷིཉྙཱཉཱཎཱནནྟི ཨིདྡྷིཝིདྷདིབྦསོཏཙེཏོཔརིཡཔུབྦེནིཝཱསདིབྦཙཀྑུཨཱསཝཀྑཡཉཱཎཱནཾ. ཏེསཏྟཏཱིནཾ ཉཱཎཱནནྟི པཊིསམྦྷིདཱཔཱལི༹ཡཾ (པཊི. མ. ༡.༡-༢ མཱཏིཀཱ) ‘‘སོཏཱཝདྷཱནེ པཉྙཱ སུཏམཡེ ཉཱཎཾ, སུཏྭཱན སཾཝརེ པཉྙཱ སཱིལམཡེ ཉཱཎ’’ནྟིཨཱདིནཱ ཉཱཎཀཐཱཡ ནིདྡིཊྛཱནཾ སཱཝཀསཱདྷཱརཎཱསཱདྷཱརཎཱནཾ ཉཱཎཱནཾ. ཨིམེསཉྷི ཏེསཏྟཏིཉཱཎཱནཾ སུཏམཡཉཱཎཱདཱིནི སཏྟསཊྛིཉཱཎཱནི སཱཝཀསྶ སཱདྷཱརཎཱནི, ‘‘ཨིནྡྲིཡཔརོཔརིཡཏྟེ ཉཱཎཾ, སཏྟཱནཾ ཨཱསཡཱནུསཡེ ཉཱཎཾ, ཡམཀཔཱཊིཧཱིརེ ཉཱཎཾ, མཧཱཀརུཎཱསམཱཔཏྟིཡཱ ཉཱཎཾ, སབྦཉྙུཏཉྙཱཎཾ, ཨནཱཝརཎཉཱཎ’’ནྟི (པཊི. མ. ༡.༦༨-༧༣ མཱཏིཀཱ) ཨིམཱནི ཚ ཨསཱདྷཱརཎཉཱཎཱནི སཱཝཀེཧི.

སཏྟསཏྟཏཱིནཾ ¶ ཉཱཎཱནནྟི ཨེཏྠ –

‘‘ཛཱཏིཔཙྩཡཱ ཛརཱམརཎནྟི ཉཱཎཾ, ཨསཏི ཛཱཏིཡཱ ནཏྠི ཛརཱམརཎནྟི ཉཱཎཾ. ཨཏཱིཏམྤི ཨདྡྷཱནཾ ཛཱཏིཔཙྩཡཱ ཛརཱམརཎནྟི ཉཱཎཾ, ཨསཏི ཛཱཏིཡཱ ནཏྠི ཛརཱམརཎནྟི ཉཱཎཾ. ཨནཱགཏམྤི ཨདྡྷཱནཾ ཛཱཏིཔཙྩཡཱ ཛརཱམརཎནྟི ཉཱཎཾ, ཨསཏི ཛཱཏིཡཱ ནཏྠི ཛརཱམརཎནྟི ཉཱཎཾ. ཡམྤིསྶ ཏཾ དྷམྨཊྛིཏིཉཱཎཾ, ཏམྤི ཁཡདྷམྨཾ ཝཡདྷམྨཾ ཝིརཱགདྷམྨཾ ནིརོདྷདྷམྨནྟི ཉཱཎཾ. བྷཝཔཙྩཡཱ ཛཱཏཱིཏི ཉཱཎཾ…པེ… ཨུཔཱདཱནཔཙྩཡཱ བྷཝོཏི ཉཱཎཾ, ཏཎྷཱཔཙྩཡཱ ཨུཔཱདཱནནྟི ཉཱཎཾ, ཝེདནཱཔཙྩཡཱ ཏཎྷཱཏི ཉཱཎཾ, ཕསྶཔཙྩཡཱ ཝེདནཱཏི ཉཱཎཾ, སལཱ༹ཡཏནཔཙྩཡཱ ཕསྶོཏི ཉཱཎཾ, ནཱམརཱུཔཔཙྩཡཱ སལཱ༹ཡཏནནྟི ཉཱཎཾ, ཝིཉྙཱཎཔཙྩཡཱ ནཱམརཱུཔནྟི ཉཱཎཾ, སངྑཱརཔཙྩཡཱ ཝིཉྙཱཎནྟི ཉཱཎཾ, ཨཝིཛྫཱཔཙྩཡཱ སངྑཱརཱཏི ཉཱཎཾ, ཨསཏི ¶ ཨཝིཛྫཱཡ ནཏྠི སངྑཱརཱཏི ཉཱཎཾ, ཨཏཱིཏམྤི ཨདྡྷཱནཾ ཨཝིཛྫཱཔཙྩཡཱ སངྑཱརཱཏི ཉཱཎཾ, ཨསཏི ཨཝིཛྫཱཡ ནཏྠི སངྑཱརཱཏི ཉཱཎཾ, ཨནཱགཏམྤི ཨདྡྷཱནཾ ཨཝིཛྫཱཔཙྩཡཱ སངྑཱརཱཏི ཉཱཎཾ, ཨསཏི ཨཝིཛྫཱཡ ནཏྠི སངྑཱརཱཏི ཉཱཎཾ, ཡམྤིསྶ ཏཾ དྷམྨཊྛིཏིཉཱཎཾ, ཏམྤི ཁཡདྷམཾ ཝཡདྷམྨཾ ཝིརཱགདྷམྨཾ ནིརོདྷདྷམྨནྟི ཉཱཎ’’ནྟི –

བྷགཝཏཱ ནིདཱནཝགྒེ (སཾ. ནི. ༢.༣༤-༣༥) ཛརཱམརཎཱདཱིསུ ཨེཀཱདསསུ པཊིཙྩསམུཔྤཱདངྒེསུ པཙྩེཀཾ སཏྟ སཏྟ ཀཏྭཱ ཝུཏྟཱནི སཏྟསཏྟཏིཉཱཎཱནི.

ཏཏྠ དྷམྨཊྛིཏིཉཱཎནྟི པཙྩཡཱཀཱརཉཱཎཾ. པཙྩཡཱཀཱརོ ཧི དྷམྨཱནཾ པཝཏྟིསངྑཱཏཱཡ ཋིཏིཡཱ ཀཱརཎཏྟཱ ‘‘དྷམྨཊྛིཏཱི’’ཏི ཝུཙྩཏི, ཏཏྠ ཉཱཎཾ དྷམྨཊྛིཏིཉཱཎཾ, ‘‘ཛཱཏིཔཙྩཡཱ ཛརཱམརཎ’’ནྟིཨཱདིནཱ ཝུཏྟསྶེཝ ཚབྦིདྷསྶ ཉཱཎསྶེཏཾ ཨདྷིཝཙནཾ. ཁཡདྷམྨནྟི ཁཡགམནསབྷཱཝཾ. ཝཡདྷམྨནྟི ཝཡགམནསབྷཱཝཾ. ཝིརཱགདྷམྨནྟི ཝིརཛྫནསབྷཱཝཾ. ནིརོདྷདྷམྨནྟི ནིརུཛ྄ཛྷནསབྷཱཝནྟི ཨཏྠོ.

ལཱབྷོཏིཨཱདཱིསུ ལཱབྷོཡེཝ ཨུཔསགྒེན ཝིསེསེཏྭཱ ‘‘པཊིལཱབྷོ’’ཏི ཝུཏྟོ. པུན ཏསྶེཝ ཨཏྠཝིཝརཎཝསེན ‘‘པཏྟི སམྤཏྟཱི’’ཏི ཝུཏྟཾ. ཕུསནཱཏི ཨདྷིགམནཝསེན ཕུསནཱ. སཙྪིཀིརིཡཱཏི པཊིལཱབྷསཙྪིཀིརིཡཱ. ཨུཔསམྤདཱཏི ནིཔྥཱདནཱ.

སཏྟནྣཉྩ ¶ སེཀྑཱནནྟི ཏིསྶོ སིཀྑཱ སིཀྑནྟཱིཏི སེཀྑསཉྙིཏཱནཾ སོཏཱཔཏྟིམགྒཊྛཱདཱིནཾ སཏྟནྣཾ. པུཐུཛྫནཀལྱཱཎཀསྶ ཙཱཏི ནིབྦཱནགཱམིནིཡཱ པཊིཔདཱཡ ཡུཏྟཏྟཱ སུནྡརཊྛེན ཀལྱཱཎསཉྙིཏསྶ པུཐུཛྫནསྶ. ཝཌྜྷིཏཾ ཝཌྜྷནཾ ཨེཀཱཡཱཏི ཝཌྜྷིཏཝཌྜྷནཱ. ཡཐཱཝུཏྟཱནཾ ཨཊྛནྣམྤི པཉྙཱནཾ ཝསེན ཝིསེསཏོཝ ཨརཧཏོ པཉྙཱཝསེན པཉྙཱཝུདྡྷིཡཱ. ཏཐཱ པཉྙཱཝེཔུལླཱཡ.

ཡསྶ ཀསྶཙིཔི ཝིསེསཏོ ཨནུརཱུཔདྷམྨསྶ མཧནྟཾ ནཱམ ཀིཙྩསིདྡྷིཡཱ ཝེདིཏབྦནྟི ཏདསྶ ཀིཙྩསིདྡྷིཡཱ དསྶེནྟོ ‘‘མཧནྟེ ཨཏྠེ པརིགྒཎྷཱཏཱི’’ཏིཨཱདིམཱཧ. ཏཏྠ ཨཏྠཱདཱིནཾ མཧནྟབྷཱཝོ མཧཱཝིསཡཏཱཡ ཝེདིཏབྦོ, མཧཱཝིསཡཏཱ ཙ ཏེསཾ པཊིསམྦྷིདཱམགྒེ ཨཱགཏནཡེན ཝེདིཏབྦཱ. སཱིལཀྑནྡྷསྶ པན ཧེཏུམཧནྟཏཱཡ, པཙྩཡམཧནྟཏཱཡ, ནིསྶཡམཧནྟཏཱཡ ¶ , པབྷེདམཧནྟཏཱཡ, ཀིཙྩམཧནྟཏཱཡ, ཕལམཧནྟཏཱཡ, ཨཱནིསཾསམཧནྟཏཱཡ ཙ མཧནྟབྷཱཝོ ཝེདིཏབྦོ. ཏཏྠ ཧེཏུ ཨལོབྷཱདཡོ. པཙྩཡོ ཧིརོཏྟཔྤསདྡྷཱསཏིཝཱིརིཡཱདཡོ. ནིསྶཡོ སཱཝཀབོདྷིཔཙྩེཀབོདྷིནིཡཏཏཱ ཏཾསམངྒིནོ ཙ པུརིསཝིསེསཱ. པབྷེདོ ཙཱརིཏྟཝཱརིཏྟཱདིཝིབྷཱགོ. ཀིཙྩཾ ཏདངྒཱདིཝསེན པཊིཔཀྑཝིདྷམནཾ. ཕལཾ སགྒསམྤདཱ ནིབྦཱནསམྤདཱ ཙ. ཨཱནིསཾསོ པིཡམནཱཔཏཱདི. ཨཡམེཏྠ སངྑེཔོ, ཝིཏྠཱརོ པན ཝིསུདྡྷིམགྒེ (ཝིསུདྡྷི. ༡.༩) ཨཱཀངྑེཡྻསུཏྟཱདཱིསུ (མ. ནི. ༡.༦༤ ཨཱདཡོ) ཙ ཨཱགཏནཡེན ཝེདིཏབྦོ. ཨིམིནཱ ནཡེན སམཱདྷིཀྑནྡྷཱདཱིནམྤི མཧནྟཏཱ ཡཐཱརཧཾ ནིདྡྷཱརེཏྭཱ ཝཏྟབྦཱ. ཋཱནཱཊྛཱནཱདཱིནཾ མཧནྟབྷཱཝོ པན མཧཱཝིསཡཏཱཡ ཝེདིཏབྦོ. ཏཏྠ ཋཱནཱཊྛཱནཱནཾ མཧཱཝིསཡཏཱ བཧུདྷཱཏུཀསུཏྟཱདཱིསུ ཨཱགཏནཡེན ཝེདིཏབྦཱ.

ཝིཧཱརསམཱཔཏྟཱིནཾ མཧཱཝིསཡཏཱ སམཱདྷིཀྑནྡྷེ མཧཱཝིསཡཏཱནིདྡྷཱརཎནཡེན ཝེདིཏབྦཱ, ཨརིཡསཙྩཱནཾ སཀལཡཱནསངྒཱཧཀཏོ སཙྩཝིབྷངྒེ (ཝིབྷ. ༡༨༩ ཨཱདཡོ) ཏཾསཾཝཎྞནཱསུ (ཝིབྷ. ཨཊྛ. ༡༨༩ ཨཱདཡོ) ཙ ཨཱགཏནཡེན, སཏིཔཊྛཱནཱདཱིནཾ སཏིཔཊྛཱནཝིབྷངྒཱདཱིསུ (ཝིབྷ. ༣༥༥ ཨཱདཡོ) ཏཾསཾཝཎྞནཱདཱིསུ (ཝིབྷ. ཨཊྛ. ༣༥༥ ཨཱདཡོ) ཙ ཨཱགཏནཡེན, སཱམཉྙཕལཱནཾ མཧཏོ ཧིཏསྶ མཧཏོ སུཁསྶ མཧཏོ ཨཏྠསྶ མཧཏོ ཡོགཀྑེམསྶ ནིཔྥཏྟིབྷཱཝཏོ སནྟཔཎཱིཏཨཏཀྐཱཝཙརཔཎྜིཏཝེདནཱིཡབྷཱཝཏོ, ཨབྷིཉྙཱནཾ མཧཱསམྦྷཱརཏོ མཧཱཝིསཡཏོ མཧཱཀིཙྩཏོ མཧཱནུབྷཱཝཏོ མཧཱནིཔྥཏྟིཏོ, ནིབྦཱནསྶ མདནིམྨདནཱདིམཧཏྠསིདྡྷིཏོ ཙ མཧནྟབྷཱཝོ ཝེདིཏབྦོ. པརིགྒཎྷཱཏཱིཏི སབྷཱཝཱདིཏོ པརིཙྪིཛྫ གཎྷཱཏི ཛཱནཱཏི, པཊིཝིཛ྄ཛྷཏཱིཏི ཨཏྠོ.

པུཐུཔཉྙཱཏི ¶ ཨེཏྠཱཔི ཝུཏྟནཡཱནུསཱརེན ཨཏྠོ ཝེདིཏབྦོ. ཨཡཾ པན ཝིསེསོ – པུཐུ ནཱནཱཀྑནྡྷེསུ ཉཱཎཾ པཝཏྟཏཱིཏི ‘‘ཨཡཾ རཱུཔཀྑནྡྷོ ནཱམ…པེ… ཨཡཾ ཝིཉྙཱཎཀྑནྡྷོ ནཱམཱ’’ཏི ཨེཝཾ པཉྩནྣཾ ཁནྡྷཱནཾ ནཱནཱཀརཎཾ པཊིཙྩ ཉཱཎཾ པཝཏྟཏི. ཏེསུཔི ཨེཀཝིདྷེན རཱུཔཀྑནྡྷོ…པེ… ཨེཀཱདསཝིདྷེན རཱུཔཀྑནྡྷོ. ཨེཀཝིདྷེན ཝེདནཱཀྑནྡྷོ…པེ… བཧུཝིདྷེན ཝེདནཱཀྑནྡྷོ. ཨེཀཝིདྷེན སཉྙཱཀྑནྡྷོ…པེ… བཧུཝིདྷེན སཉྙཱཀྑནྡྷོ. ཨེཀཝིདྷེན སངྑཱརཀྑནྡྷོ…པེ… བཧུཝིདྷེན སངྑཱརཀྑནྡྷོ. ཨེཀཝིདྷེན ཝིཉྙཱཎཀྑནྡྷོ…པེ… བཧུཝིདྷེན ¶ ཝིཉྙཱཎཀྑནྡྷོཏི ཨེཝཾ ཨེཀེཀསྶ ཁནྡྷསྶ ཨེཀཝིདྷཱདིཝསེན ཨཏཱིཏཱདིཝསེནཔི ནཱནཱཀརཎཾ པཊིཙྩ ཉཱཎཾ པཝཏྟཏི.

པུཐུ ནཱནཱདྷཱཏཱུསཱུཏི ‘‘ཨཡཾ ཙཀྑུདྷཱཏུ ནཱམ…པེ… ཨཡཾ མནོཝིཉྙཱཎདྷཱཏུ ནཱམ. ཏཏྠ སོལ༹ས དྷཱཏུཡོ ཀཱམཱཝཙརཱ, དྭེ ཙཱཏུབྷཱུམིཀཱ’’ཏི ཨེཝཾ དྷཱཏཱུསུ ནཱནཱཀརཎཾ པཊིཙྩ ཉཱཎཾ པཝཏྟཏི. ཏཡིདཾ ཨུཔཱདིནྣདྷཱཏུཝསེན ཝུཏྟཾ. པཙྩེཀབུདྡྷཱནཉྷི དྭིནྣཉྩ ཨགྒསཱཝཀཱནཾ ཨུཔཱདིནྣདྷཱཏཱུསུ ཨེཝ ནཱནཱཀརཎཾ པཊིཙྩ ཉཱཎཾ པཝཏྟཏི, ཏཉྩ ཁོ ཨེཀདེསཏོཝ, ན ནིཔྤདེསཏོ. བཧིདྡྷཱ ཨནུཔཱདིནྣདྷཱཏཱུནཾ ནཱནཱཀརཎཾ ཏེསཾ ཨཝིསཡོཝ, སབྦཉྙུབུདྡྷཱནཾཡེཝ པན ‘‘ཨིམཱཡ དྷཱཏུཡཱ ཨུསྶནྣཏྟཱ ཨིམསྶ རུཀྑསྶ ཁནྡྷོ སེཏོ ཧོཏི, ཨིམསྶ ཀཱལོ༹, ཨིམསྶ མཊྛོ, ཨིམསྶ ཁརོ, ཨིམསྶ བཧལཏཙོ, ཨིམསྶ སུཀྑཏཙོ. ཨིམསྶ པཏྟཾ ཝཎྞསཎྛཱནཱདིཝསེན ཨེཝརཱུཔཾ. ཨིམསྶ པུཔྥཾ ནཱིལཾ, པཱིཏཾ, ལོཧིཏཾ, ཨོདཱཏཾ, སུགནྡྷཾ, དུགྒནྡྷཾ, མིསྶཀགནྡྷཾ. ཕལཾ ཁུདྡཀཾ, མཧནྟཾ, དཱིགྷཾ, ཝཊྚཾ, སུཝཎྞཾ, དུབྦཎྞཾ, མཊྛཾ, ཕརུསཾ, སུགནྡྷཾ, དུགྒནྡྷཾ, མདྷུརཾ, ཏིཏྟཀཾ, ཨམྦིལཾ, ཀཊུཀཾ, ཀསཱཝཾ. ཀཎྚཀོ ཏིཁིཎོ, ཨཏིཁིཎོ, ཨུཛུཀོ, ཀུཊིལོ, ཏམྦོ, ནཱིལོ, ལོཧིཏོ, ཨོདཱཏོ’’ཏིཨཱདིནཱ དྷཱཏུནཱནཏྟཾ པཊིཙྩ ཉཱཎཾ པཝཏྟཏི.

པུཐུ ནཱནཱཨཱཡཏནེསཱུཏི ‘‘ཨིདཾ ཙཀྑཱཡཏནཾ ནཱམ…པེ… ཨིདཾ དྷམྨཱཡཏནཾ ནཱམ. ཏཏྠ དསཱཡཏནཱ ཀཱམཱཝཙརཱ, དྭེ ཙཱཏུབྷཱུམཀཱ’’ཏི ཨེཝཾ ཨཱཡཏནནཱནཏྟཾ པཊིཙྩ ཉཱཎཾ པཝཏྟཏི.

པུཐུ ནཱནཱཔཊིཙྩསམུཔྤཱདེསཱུཏི ཨཛ྄ཛྷཏྟབཧིདྡྷཱབྷེདཏོ སནྟཱནབྷེདཏོ ཙ ནཱནཔྤབྷེདེསུ པཊིཙྩསམུཔྤཱདངྒེསུ. ཨཝིཛྫཱདིཨངྒཱནི ཧི པཙྩེཀཾ པཊིཙྩསམུཔྤཱདསཉྙིཏཱནི. ཏེནཱཧ – སངྑཱརཔིཊཀེ ‘‘དྭཱདས པཙྩཡཱ དྭཱདས པཊིཙྩསམུཔྤཱདཱ’’ཏི (སཾ. ནི. ཊཱི. ༡.༡.༡༡༠).

པུཐུ ནཱནཱསུཉྙཏམནུཔལབྦྷེསཱུཏི ནཱནཱསབྷཱཝེསུ ནིཙྩསཱརཱདིཝིརཧིཏེསུ སུཉྙསབྷཱཝེསུ, ཏཏོ ཨེཝ ཨིཏྠིཔུརིསཨཏྟཏྟནིཡཱདིཝསེན ཨནུཔལབྦྷམཱནསབྷཱཝེསུ. མ-ཀཱརོ ཧེཏྠ པདསནྡྷིཀརོ.

པུཐུ ¶ ནཱནཱཨཏྠེསཱུཏི ཨཏྠཔཊིསམྦྷིདཱཝིསཡེསུ པཙྩཡུཔྤནྣཱདིནཱནཱཨཏྠེསུ. དྷམྨེསཱུཏི དྷམྨཔཊིསམྦྷིདཱཝིསཡེསུ པཙྩཡཱདིནཱནཱདྷམྨེསུ. ནིརུཏྟཱིསཱུཏི ¶ ཏེསཾཡེཝ ཨཏྠདྷམྨཱནཾ ནིདྡྷཱརཎཝཙནསངྑཱཏེསུ ནཱནཱནིརུཏྟཱིསུ. པུཐུ ནཱནཱཔཊིབྷཱནེསཱུཏི ཨཏྠཔཊིསམྦྷིདཱདིཝིསཡེསུ ཨིམཱནི ཉཱཎཱནི ཨིདམཏྠཛོཏཀཱནཱིཏི ཏཐཱ ཏཐཱ པཊིབྷཱནཏོ ཨུཔཏིཊྛནཏོ པཊིབྷཱནཱནཱིཏི ལདྡྷནཱམེསུ ནཱནཱཉཱཎེསུ.

པུཐུ ནཱནཱསཱིལཀྑནྡྷེསཱུཏིཨཱདཱིསུ སཱིལསྶ པུཐུཏྟཾ ནཱནཏྟཉྩ ཝུཏྟམེཝ, ཨིཏརེསཾ པན ཝུཏྟནཡཱནུསཱརེན སུཝིཉྙེཡྻཏྟཱ པཱཀཊམེཝ. ཡཾ པན ཨབྷིནྣཾ ཨེཀམེཝ ནིབྦཱནཾ, ཏཏྠ ཨུཔཙཱརཝསེན པུཐུཏྟཾ གཧེཏབྦནྟི ཨཱཧ – ‘‘པུཐུ ནཱནཱཛནསཱདྷཱརཎེ དྷམྨེ སམཏིཀྐམྨཱ’’ཏི. ཏེནསྶ མདནིམྨདནཱདིཔརིཡཱཡེན པུཐུཏྟཾ པརིདཱིཔིཏཾ ཧོཏི.

ཝིཔུལེ ཨཏྠེཏི མཧནྟེ ཨཏྠེ. མཧནྟཔརིཡཱཡོ ཧི ཝིཔུལསདྡོ. གམྦྷཱིརེསཱུཏི སསཱདཱིཧི ཝིཡ མཧཱསམུདྡོ ཨནུཔཙིཏཉཱཎསམྦྷཱརེཧི ཨལབྦྷནེཡྻཔྤཏིཊྛེསུ ཁནྡྷེསུ ཉཱཎཾ པཝཏྟཏཱིཏི ཝིསཡསྶ གམྦྷཱིརཏཱཡ ཉཱཎསྶ གམྦྷཱིརཏཱ ཝིབྷཱཝིཏཱ.

ཏིཀྑཝིསདབྷཱཝཱདིགུཎེཧི ཨསཱདྷཱརཎཏྟཱ པརེསཾ པཉྙཱཡ ན སཱམནྟཱ, ཨཐ ཁོ སུཝིདཱུརཝིདཱུརེཏི ཨསམནྟཔཉྙཱ ཨཱཀཱརསྶ རསྶཏྟཾ ཀཏྭཱ. ཀེཙི ‘‘ཨསམཏྠཔཉྙཱ’’ཏི པཋནྟི, ཏེསཾ ཡཐཱཝུཏྟགུཎེཧི ཨཉྙེཧི ཨསཱདྷཱརཎཏྟཱ ནཏྠི ཨེཏིསྶཱ ཀཱཡཙི སམཏྠནྟི ཨསམཏྠཱ པཉྙཱཏི ཡོཛནཱ. ཨཏྠཝཝཏྠཱནཏོཏི ཨཏྠཔྤབྷེདསྶ ཡཱཐཱཝཏོ སནྣིཊྛཱནཏོ. ན ཨཉྙོ ཀོཙི སཀྐོཏི ཨབྷིསམྦྷཝིཏུནྟི ཉཱཎགཏིཡཱ སམྤཱཔུཎིཏུཾ ན ཨཉྙོ ཀོཙིཔི སཀྐོཏི, ཏསྨཱ ཨཡཾ སུཝིདཱུརཝིདཱུརེཏི ཨསམནྟཔཉྙཱ. ཨིདཱནི པུགྒལནྟརཝསེན ཨསམནྟཔཉྙཾ ཝིབྷཱཝེཏུཾ, ‘‘པུཐུཛྫནཀལྱཱཎཀསྶཱ’’ཏིཨཱདི ཨཱརདྡྷཾ.

‘‘པཉྙཱཔབྷེདཀུསལོ ཨབྷིནྣཉཱཎོ ཨདྷིགཏཔྤཊིསམྦྷིདོ ཙཏུཝེསཱརཛྫཔྤཏྟོ དསབལདྷཱརཱི པུརིསཱསབྷོ པུརིསསཱིཧོ པུརིསནཱགོ པུརིསཱཛཉྙོ པུརིསདྷོརཡ྄ཧོ ཨནནྟཉཱཎོ ཨནནྟཏེཛོ ཨནནྟཡསོ ཨཌྜྷོ མཧདྡྷནོ བལཝཱ ནེཏཱ ཝིནེཏཱ ཨནུནེཏཱ པཉྙཱཔེཏཱ ཝིནིཛ྄ཛྷཱཔེཏཱ པེཀྑཏཱ པསཱདེཏཱ. སོ ཧི བྷགཝཱ ཨནུཔྤནྣསྶ མགྒསྶ ཨུཔྤཱདེཏཱ, ཨསཉྫཱཏསྶ མགྒསྶ སཉྫནེཏཱ, ཨནཀྑཱཏསྶ མགྒསྶ ཨཀྑཱཏཱ, མགྒཉྙཱུ མགྒཝིདཱུ མགྒཀོཝིདོ. མགྒཱནུགཱམཱི ཙ པན ཨེཏརཧི སཱཝཀཱ ཝིཧརནྟི པཙྪཱ སམནྣཱགཏཱ.

‘‘སོ ¶ ¶ ཧི བྷགཝཱ ཛཱནཾ ཛཱནཱཏི, པསྶཾ པསྶཏི, ཙཀྑུབྷཱུཏོ ཉཱཎབྷཱུཏོ དྷམྨབྷཱུཏོ བྲཧྨབྷཱུཏོ ཝཏྟཱ པཝཏྟཱ ཨཏྠསྶ ནིནྣེཏཱ ཨམཏསྶ དཱཏཱ དྷམྨསྶཱམཱི ཏཐཱགཏོ, ནཏྠི ཏསྶ བྷགཝཏོ ཨཉྙཱཏཾ ཨདིཊྛཾ ཨཝིདིཏཾ ཨསཙྪིཀཏཾ ཨཕསྶིཏཾ པཉྙཱཡ. ཨཏཱིཏཾ ཨནཱགཏཾ པཙྩུཔྤནྣཾ ཨུཔཱདཱཡ སབྦེ དྷམྨཱ སབྦཱཀཱརེན བུདྡྷསྶ བྷགཝཏོ ཉཱཎམུཁེ ཨཱཔཱཐཾ ཨཱགཙྪནྟི, ཡཾ ཀིཉྩི ནེཡྻཾ ནཱམ ཨཏྠི ཏཾ སབྦཾ ཛཱནིཏབྦཾ, ཨཏྟཏྠོ ཝཱ པརཏྠོ ཝཱ ཨུབྷཡཏྠོ ཝཱ དིཊྛདྷམྨིཀོ ཝཱ ཨཏྠོ སམྤརཱཡིཀོ ཝཱ ཨཏྠོ ཨུཏྟཱནོ ཝཱ ཨཏྠོ གམྦྷཱིརོ ཝཱ ཨཏྠོ གཱུལ༹ྷོ ཝཱ ཨཏྠོ པཊིཙྪནྣོ ཝཱ ཨཏྠོ ནེཡྻོ ཝཱ ཨཏྠོ ནཱིཏོ ཝཱ ཨཏྠོ ཨནཝཛྫོ ཝཱ ཨཏྠོ ནིཀྐིལེསོ ཝཱ ཨཏྠོ ཝོདཱནོ ཝཱ ཨཏྠོ པརམཏྠོ ཝཱ ཨཏྠོ, སབྦཾ ཏཾ ཨནྟོབུདྡྷཉཱཎེ པརིཝཏྟཏི.

‘‘སབྦཾ ཀཱཡཀམྨཾ བུདྡྷསྶ བྷགཝཏོ ཉཱཎཱནུཔརིཝཏྟི, སབྦཾ ཝཙཱིཀམྨཾ བུདྡྷསྶ བྷགཝཏོ ཉཱཎཱནུཔརིཝཏྟི, སབྦཾ མནོཀམྨཾ བུདྡྷསྶ བྷགཝཏོ ཉཱཎཱནུཔརིཝཏྟི. ཨཏཱིཏེ བུདྡྷསྶ བྷགཝཏོ ཨཔྤཊིཧཏཾ ཉཱཎཾ, ཨནཱགཏེ བུདྡྷསྶ བྷགཝཏོ ཨཔྤཊིཧཏཾ ཉཱཎཾ, པཙྩུཔྤནྣེ བུདྡྷསྶ བྷགཝཏོ ཨཔྤཊིཧཏཾ ཉཱཎཾ, ཡཱཝཏཀཾ ནེཡྻཾ, ཏཱཝཏཀཾ ཉཱཎཾ. ཡཱཝཏཀཾ ཉཱཎཾ, ཏཱཝཏཀཾ ནེཡྻཾ. ནེཡྻཔརིཡནྟིཀཾ ཉཱཎཾ, ཉཱཎཔརིཡནྟིཀཾ ནེཡྻཾ, ནེཡྻཾ ཨཏིཀྐམིཏྭཱ ཉཱཎཾ ནཔྤཝཏྟཏི, ཉཱཎཾ ཨཏིཀྐམིཏྭཱ ནེཡྻཔཐོ ནཏྠི, ཨཉྙམཉྙཔརིཡནྟཊྛཱཡིནོ ཏེ དྷམྨཱ, ཡཐཱ དྭིནྣཾ སམུགྒཔཊལཱནཾ སམྨཱ ཕུསིཏཱནཾ ཧེཊྛིམཾ སམུགྒཔཊལཾ ཨུཔརིམཾ ནཱཏིཝཏྟཏི, ཨུཔརིམཾ སམུགྒཔཊལཾ ཧེཊྛིམཾ ནཱཏིཝཏྟཏི, ཨཉྙམཉྙཔརིཡནྟཊྛཱཡིནོ, ཨེཝམེཝཾ བུདྡྷསྶ བྷགཝཏོ ནེཡྻཉྩ ཉཱཎཉྩ ཨཉྙམཉྙཔརིཡནྟཊྛཱཡིནོ. ཡཱཝཏཀཾ ནེཡྻཾ, ཏཱཝཏཀཾ ཉཱཎཾ. ཡཱཝཏཀཾ ཉཱཎཾ, ཏཱཝཏཀཾ ནེཡྻཾ, ནེཡྻཔརིཡནྟིཀཾ ཉཱཎཾ, ཉཱཎཔརིཡནྟིཀཾ ནེཡྻཾ, ནེཡྻཾ ཨཏིཀྐམིཏྭཱ ཉཱཎཾ ནཔྤཝཏྟཏི, ཉཱཎཾ ཨཏིཀྐམིཏྭཱ ནེཡྻཔཐོ ནཏྠི. ཨཉྙམཉྙཔརིཡནྟཊྛཱཡིནོ ཏེ དྷམྨཱ. སབྦདྷམྨེསུ བུདྡྷསྶ བྷགཝཏོ ཉཱཎཾ པཝཏྟཏི.

‘‘སབྦེ ¶ དྷམྨཱ བུདྡྷསྶ བྷགཝཏོ ཨཱཝཛྫནཔྤཊིབདྡྷཱ ཨཱཀངྑཔྤཊིབདྡྷཱ མནསིཀཱརཔྤཊིབདྡྷཱ ཙིཏྟུཔྤཱདཔྤཊིབདྡྷཱ, སབྦསཏྟེསུ བུདྡྷསྶ བྷགཝཏོ ཉཱཎཾ པཝཏྟཏི. སབྦེསཾ སཏྟཱནཾ བུདྡྷོ ཨཱསཡཾ ཛཱནཱཏི, ཨནུསཡཾ ཛཱནཱཏི, ཙརིཏཾ ཛཱནཱཏི, ཨདྷིམུཏྟིཾ ཛཱནཱཏི, ཨཔྤརཛཀྑེ མཧཱརཛཀྑེ ཏིཀྑིནྡྲིཡེ མུདིནྡྲིཡེ སྭཱཀཱརེ དྭཱཀཱརེ སུཝིཉྙཱཔཡེ དུཝིཉྙཱཔཡེ བྷབྦཱ སབྦེ སཏྟེ པཛཱནཱཏི, སདེཝཀོ ལོཀོ ¶ སམཱརཀོ སབྲཧྨཀོ སསྶམཎབྲཱཧྨཎཱི པཛཱ སདེཝམནུསྶཱ ཨནྟོབུདྡྷཉཱཎེ པརིཝཏྟཏི.

‘‘ཡཐཱ ཡེ ཀེཙི མཙྪཀཙྪཔཱ ཨནྟམསོ ཏིམིཏིམིངྒལཾ ཨུཔཱདཱཡ ཨནྟོམཧཱསམུདྡེ པརིཝཏྟནྟི, ཨེཝམེཝ སདེཝཀོ ལོཀོ སམཱརཀོ སབྲཧྨཀོ སསྶམཎབྲཱཧྨཎཱི པཛཱ སདེཝམནུསྶཱ ཨནྟོབུདྡྷཉཱཎེ པརིཝཏྟཏི. ཡཐཱ ཡེ ཀེཙི པཀྑིནོ ཨནྟམསོ གརུལ༹ཾ ཝེནཏེཡྻཾ ཨུཔཱདཱཡ ཨཱཀཱསསྶ པདེསེ པརིཝཏྟནྟི, ཨེཝམེཝ ཡེཔི ཏེ སཱརིཔུཏྟསམཱ པཉྙཱཡ, ཏེཔི བུདྡྷཉཱཎསྶ པདེསེ པརིཝཏྟནྟི, བུདྡྷཉཱཎཾ དེཝམནུསྶཱནཾ པཉྙཾ ཕརིཏྭཱ ཨཏིགྷཾསིཏྭཱ ཏིཊྛཏི. ཡེཔི ཏེ ཁཏྟིཡཔཎྜིཏཱ བྲཱཧྨཎཔཎྜིཏཱ གཧཔཏིཔཎྜིཏཱ སམཎཔཎྜིཏཱ ནིཔུཎཱ ཀཏཔརཔྤཝཱདཱ ཝཱལཝེདྷིརཱུཔཱ, ཝོབྷིནྡནྟཱ མཉྙེ ཙརནྟི པཉྙཱགཏེན དིཊྛིགཏཱནི, ཏེ ཏེ པཉྷཾ ཨབྷིསངྑརིཏྭཱ ཨབྷིསངྑརིཏྭཱ’’ཏི (པཊི. མ. ༣.༥) –

ཨཱདིནཱ ནིདྡིཊྛཔཱལི༹ཾ པེཡྻཱལམུཁེན སཾཁིཔིཏྭཱ དསྶེནྟོ ‘‘པཉྙཱཔབྷེདཀུསལོ པབྷིནྣཉཱཎོ…པེ… ཏེ པཉྷཾ ཨབྷིསངྑརིཏྭཱ ཨབྷིསངྑརིཏྭཱ’’ཏིཨཱདིམཱཧ.

ཏཏྠ པབྷིནྣཉཱཎོཏི ཨཏྠཱདཱིསུ པབྷེདགཏཉཱཎོ. ‘‘པབྷེདཉཱཎོ’’ཏིཔི པཋནྟི, སོཡེཝ ཨཏྠོ. ཏེ པཉྷནྟི ཏེ ཏེ ཨཏྟནཱ ཨདྷིཔྤེཏཾ པཉྷཾ. ནིདྡིཊྛཀཱརཎཱཏི ཝིསྶཛྫིཏཀཱརཎཱ. ཨུཔཀྑིཏྟཀཱཏི བྷགཝཏོ པཉྙཱཝེཡྻཏྟིཡེན སམཱིཔེ ཁིཏྟཀཱ ཨནྟེཝཱསིཀཱ སམྤཛྫནྟི.

བྷཝཏི ¶ ཨབྷིབྷཝཏཱིཏི བྷཱུརི. ཀིཾ? རཱགཱདིཾ. ཨུཔསགྒེ སཏིཔི ཏདེཝ པདཾ ཏམཏྠཾ ཝདཏཱིཏི ཨུཔསགྒེན ཝིནཱཔི སོ ཨཏྠོ ཝིཉྙེཡྻོ ཨནེཀཏྠཏྟཱ དྷཱཏཱུནནྟི ཝུཏྟཾ – ‘‘ཨབྷིབྷུཡྻཏཱི’’ཏི. ཀཱརཀབྱཏྟཡེན ཙེཏཾ ཝུཏྟཾ, ཏསྨཱ རཱགཾ ཨབྷིབྷུཡྻཏཱིཏི སཱ སཱ མགྒཔཉྙཱ ཨཏྟནཱ ཨཏྟནཱ ཝཛ྄ཛྷཾ རཱགཾ ཨབྷིབྷུཡྻཏི ཨབྷིབྷཝཏི, མདཏཱིཏི ཨཏྠོ. ཨབྷིབྷཝཏཱིཏི སཱ སཱ ཕལཔཉྙཱ ཏཾ ཏཾ རཱགཾ བྷཝི ཨབྷིབྷཝི མདྡཱིཏི བྷཱུརིཔཉྙཱ. ‘‘ཨབྷིབྷཝིཏཱ’’ཏི ཝཱ པཱཋོ, ‘‘ཨབྷིབྷཝིཏྭཱ’’ཏིཔི པཋནྟི. ཨབྷིབྷཝིཏྭཱཏི ཙ ཀིརིཡཱཡ སིདྡྷབྷཱཝདསྶནཾ. པཉྙཱ ཙེ སིདྡྷཱ, རཱགཱབྷིབྷཝོ ཙ སིདྡྷོ ཨེཝཱཏི. སེསེསུཔི ཨེསེཝ ནཡོ.

རཱགཱདཱིསུ པན རཛྫནལཀྑཎོ རཱགོ. དུསྶནལཀྑཎོ དོསོ. མུཡ྄ཧནལཀྑཎོ མོཧོ. ཀུཛ྄ཛྷནལཀྑཎོ ¶ ཀོདྷོ, ཨུཔནནྡྷནལཀྑཎོ ཨུཔནཱཧོ. པུབྦཀཱལཾ ཀོདྷོ, ཨཔརཀཱལཾ ཨུཔནཱཧོ. པརགུཎམཀྑནལཀྑཎོ མཀྑོ, ཡུགགྒཱཧལཀྑཎོ པལཱསོ. པརསམྤཏྟིཁཱིཡནལཀྑཎཱ ཨིསྶཱ, ཨཏྟནོ སམྤཏྟིནིགྒཱུཧནལཀྑཎཾ མཙྪརིཡཾ. ཨཏྟནཱ ཀཏཔཱཔཔྤཊིཙྪཱདནལཀྑཎཱ མཱཡཱ, ཨཏྟནོ ཨཝིཛྫམཱནགུཎཔྤཀཱསནལཀྑཎཾ སཱཋེཡྻཾ. ཙིཏྟསྶ ཨུདྡྷུམཱཏབྷཱཝལཀྑཎོ ཐམྦྷོ, ཀརཎུཏྟརིཡལཀྑཎོ སཱརམྦྷོ. ཨུནྣཏིལཀྑཎོ མཱནོ, ཨབྦྷུནྣཏིལཀྑཎོ ཨཏིམཱནོ. མཏྟབྷཱཝལཀྑཎོ མདོ, པཉྩཀཱམགུཎེསུ ཙིཏྟཝོསྶགྒལཀྑཎོ པམཱདོ. བྷཝཏི ཨབྷིབྷཝཏི ཨརིནྟི བྷཱུརི ཨསརཱུཔཏོ པརསྶ ཨཀཱརསྶ ལོཔཾ ཀཏྭཱ. ཏེནཱཧ – ‘‘ཨརིཾ མདྡནིཔཉྙཱཏི བྷཱུརིཔཉྙཱ’’ཏི. བྷཝཏི ཨེཏྠ ཐཱཝརཛངྒམནྟི བྷཱུརི ཝུཙྩཏི པཐཝཱི ཡཐཱ ‘‘བྷཱུམཱི’’ཏི བྷཱུརི ཝིཡཱཏི བྷཱུརིཔཉྙཱ ཝིཏྠཏཝིཔུལཊྛེན སབྦཾ སཧཏཱཡ ཙ. ཏེནཱཧ – ‘‘ཏཱཡཱ’’ཏིཨཱདི. ཏཏྠ པཐཝིསམཱཡཱཏི ཝིཏྠཏཝིཔུལཊྛེནེཝ པཐཝིསམཱཡ. ཝིཏྠཏཱཡཱཏི པཛཱནིཏབྦེ ཝིསཡེ ཝིཏྠཏཱཡ, ན ཨེཀདེསེ ཝཏྟམཱནཱཡ. ཝིཔུལཱཡཱཏི ཨུལཱ༹རབྷཱུཏཱཡ. སམནྣཱགཏོཏི པུགྒལོ. ཨིཏི-སདྡོ ཀཱརཎཏྠེ, ཨིམིནཱ ཀཱརཎེན པུགྒལསྶ བྷཱུརིཔཉྙཱཡ སམནྣཱགཏཏྟཱ ཏསྶ པཉྙཱ བྷཱུརིཔཉྙཱ ནཱམཱཏི ཨཏྠོ. ‘‘བྷཱུརིཔཉྙསྶ པཉྙཱ བྷཱུརིཔཉྙཔཉྙཱ’’ཏི ཝཏྟབྦེ ཨེཀསྶ པཉྙཱསདྡསྶ ལོཔཾ ཀཏྭཱ ‘‘བྷཱུརིཔཉྙཱ’’ཏི ཝུཏྟཾ.

ཨཔིཙཱཏི ¶ པཉྙཱཔརིཡཱཡདསྶནཏྠཾ ཝུཏྟཾ. པཉྙཱཡམེཏནྟི པཉྙཱཡ ཨེཏཾ. ཨདྷིཝཙནནྟི ཨདྷིཀཾ ཝཙནཾ. བྷཱུརཱིཏི བྷཱུཏེ ཨཏྠེ ཁནྡྷཱདིཀེ རམཏི སཙྩསབྷཱཝེན, དིཊྛི ཝིཡ ན ཨབྷཱུཏེཏི བྷཱུརི. མེདྷཱཏི ཨསནི ཝིཡ སིལུཙྩཡེ ཀིལེསེ མེདྷཏི ཧིཾསཏཱིཏི མེདྷཱ, ཁིཔྤཾ གཧཎདྷཱརཎཊྛེན ཝཱ མེདྷཱ. པརིཎཱཡིཀཱཏི ཡསྶུཔྤཛྫཏི, ཏཾ སཏྟཾ ཨཏྟཧིཏཔྤཊིཔཏྟིཡཾ སམྤཡུཏྟདྷམྨེ ཙ ཡཱཐཱཝལཀྑཎཔྤཊིཝེདྷེ པརིཎེཏཱིཏི པརིཎཱཡིཀཱ. ཨིམེཧེཝ ཨཉྙཱནིཔི པཉྙཱཔརིཡཱཡཝཙནཱནི ཧོནྟི.

པཉྙཱབཱཧུལླནྟི པཉྙཱ བཧུལཱ ཨསྶཱཏི པཉྙཱབཧུལོ, ཏསྶ བྷཱཝོ པཉྙཱབཱཧུལླཾ. ཏཉྩ པཉྙཱཡ བཱཧུལླཾ པཝཏྟི ཨེཝཱཏི ཏམཏྠཾ པཉྙཱགརུཀསྶ པུགྒལསྶ ཝསེན དསྶེནྟོ, ‘‘ཨིདྷེཀཙྩོ པཉྙཱགརུཀོ ཧོཏཱི’’ཏིཨཱདིམཱཧ. ཏཏྠ ཨིདྷེཀཙྩོཏི པུཐུཛྫནཀལྱཱཎཀོ, ཨརིཡོ ཝཱ. པཉྙཱ གརུ ཨེཀསྶཱཏི པཉྙཱགརུཀོ. པཉྙཱཡ ཙརིཏོ པཝཏྟིཏོ པཉྙཱཙརིཏོ, པཉྙཱཡ ཙརིཏཾ པཝཏྟཾ ཨསྶཱཏི ཝཱ པཉྙཱཙརིཏོ. ཨནུལོམིཀཁནྟིཨཱདིཝིབྷཱགཱ པཉྙཱ ཨཱསཡོ ཨེཏསྶཱཏི པཉྙཱསཡོ. པཉྙཱཡ ཨདྷིམུཏྟོ ཏནྣིནྣོཏི པཉྙཱདྷིམུཏྟོ. སམུསྶིཏཊྛེན པཉྙཱ དྷཛོ ཨེཏསྶཱཏི པཉྙཱདྷཛོ. པཉྙཱཀེཏཱུཏི ཏསྶེཝ ཝེཝཙནཾ. པཉྙཱནིམིཏྟཾ ཨཱདྷིཔཏེཡྻཾ ཨེཏསྶཱཏི པཉྙཱདྷིཔཏེཡྻོ. པཉྙཱསངྑཱཏོ ཝིཙཡོ, དྷམྨསབྷཱཝཝིཙིནནཾ ཝཱ བཧུལཾ ཨེཏསྶཱཏི ཝིཙཡབཧུལོ ¶ . ནཱནཔྤཀཱརེན དྷམྨསབྷཱཝཝིཙིནནཾ བཧུལཾ ཨསྶཱཏི པཝིཙཡབཧུལོ. ཨོཀྑཱཡནཾ ཡཱཐཱཝཏོ དྷམྨཱནཾ ཨུཔཊྛཱནཾ བཧུལཾ ཨེཏསྶཱཏི ཨོཀྑཱཡནབཧུལོ. པཉྙཱཡ ཏསྶ ཏསྶ དྷམྨསྶ སམྨཱཔེཀྑནཱ སམྤེཀྑཱ, སམྤེཀྑཱཡ ཨཡནཾ པཝཏྟནཾ སམྤེཀྑཱཡནཾ, སམྤེཀྑཱཡནཾ དྷམྨོ པཀཏི ཨསྶཱཏི སམྤེཀྑཱཡནདྷམྨོ. སམྤེཀྑཱཡནཾ ཝཱ ཡཱཐཱཝཏོ དསྶནདྷམྨོ སབྷཱཝོ ཨེཏསྶཱཏི སམྤེཀྑཱཡནདྷམྨོ. སབྦཾ དྷམྨཛཱཏཾ ཝིབྷཱུཏཾ ཝིབྷཱཝིཏཾ ཀཏྭཱ ཝིཧརཎསཱིལོཏི ཝིབྷཱུཏཝིཧཱརཱི.

ཏཙྩརིཏོཏིཨཱདཱིསུ ཏཾ-སདྡེན པཉྙཱ པཙྩཱམཊྛཱ, ཏསྨཱ ཏཏྠ ‘‘པཉྙཱཙརིཏོ’’ཏིཨཱདིནཱ ཨཏྠོ ཝེདིཏབྦོ. སཱ པཉྙཱ ཙརིཏཱ གརུཀཱ བཧུལཱ ཨསྶཱཏི ཏཙྩརིཏོ ཏགྒརུཀོ ཏབྦཧུལོ. ཏསྶཾ པཉྙཱཡཾ ནིནྣོ པོཎོ པབྦྷཱརོ ཨདྷིམུཏྟོཏི ཏནྣིནྣོ ཏཔྤོཎོ ཏཔྤབྦྷཱརོ ཏདདྷིམུཏྟོ. སཱ པཉྙཱ ཨདྷིཔཏི ཏདདྷིཔཏི, ཏདདྷིཔཏིཏོ ཨཱགཏོ ¶ ཏདཱདྷིཔཏེཡྻོ. པཉྙཱགརུཀོཏིཨཱདཱིནི ‘‘ཀཱམཾ སེཝནྟཾཡེཝ ཛཱནཱཏི, ཨཡཾ པུགྒལོ ནེཀྑམྨགརུཀོ’’ཏིཨཱདཱིསུ (པཊི. མ. ༡.༡༡༤) ཝིཡ པུརིམཛཱཏིཏོ པབྷུཏི ཝུཏྟཱནི. ཏཙྩརིཏོཏིཨཱདཱིནི ཨིམིསྶཱ ཛཱཏིཡཱ ཝུཏྟཱནི. ཨིདཱནི ཝུཏྟམེཝཏྠཾ ནིདསྶནཝསེནཔི དསྶེཏུཾ – ‘‘ཡཐཱ’’ཏིཨཱདི ཝུཏྟཾ. ཨེཝམེཝནྟིཨཱདཱིནི དསྶིཏབྦནིགམནཾ.

སཱིགྷཔཉྙཱཏི ཨཏྟནོ ཝིསཡེ སཱིགྷཔྤཝཏྟིཀཱ པཉྙཱ, ཡཱ སམཱརདྡྷཱ ཨཏྟནོ པཉྙཱཀིཙྩཾ ཨདནྡྷཱཡནྟཱི ཨཝིཏྠཱཡནྟཱི ཁིཔྤམེཝ སམྤཱཔེཏི. ཏེནཱཧ – ‘‘སཱིགྷཾ སཱིགྷཾ སཱིལཱནི པརིཔཱུརེཏཱི’’ཏིཨཱདི. ཏཏྠ སཱིགྷཾ སཱིགྷནྟི བཧཱུནཾ སཱིལཱདཱིནཾ སངྒཧཏྠཾ དྭིཀྑཏྟུཾ ཝུཏྟཾ. སཱིལཱནཱིཏི ཙཱརིཏྟཝཱརིཏྟཝསེན པཉྙཏྟཱནི པཱཏིམོཀྑསཾཝརསཱིལཱནི, ཋཔེཏྭཱ ཝཱ ཨིནྡྲིཡསཾཝརཾ ཏསྶ ཝིསུཾ གཧིཏཏྟཱ ཨིཏརཱནི ཏིཝིདྷསཱིལཱནི. ཨིནྡྲིཡསཾཝརནྟི ཙཀྑཱདཱིནཾ ཚནྣཾ ཨིནྡྲིཡཱནཾ རཱགཔྤཊིགྷཔྤཝེསཾ ཨཀཏྭཱ སཏིཀཝཱཊེན ནིཝཱརཎཾ ཐཀནཾ. བྷོཛནེ མཏྟཉྙུཏནྟི པཙྩཝེཀྑིཏཔརིབྷོགཝསེན བྷོཛནེ པམཱཎཉྙུབྷཱཝཾ. ཛཱགརིཡཱནུཡོགནྟི དིཝསསྶ ཏཱིསུ ཀོཊྛཱསེསུ རཏྟིཡཱ པཋམམཛ྄ཛྷིམཀོཊྛཱསེསུ ཙ ཛཱགརཏི ན ནིདྡཱཡཏི, སམཎདྷམྨམེཝ ཀརོཏཱིཏི ཛཱགརོ, ཛཱགརསྶ བྷཱཝོ, ཀམྨཾ ཝཱ ཛཱགརིཡཾ, ཛཱགརིཡསྶ ཨནུཡོགོ ཛཱགརིཡཱནུཡོགོ, ཏཾ ཛཱགརིཡཱནུཡོགཾ. སཱིལཀྑནྡྷནྟི སེཀྑཾ ཝཱ ཨསེཀྑཾ ཝཱ སཱིལཀྑནྡྷཾ. ཨེཝམིཏརེཔི ཁནྡྷཱ ཝེདིཏབྦཱ. པཉྙཱཀྑནྡྷནྟི མགྒཔཉྙཱ ཙ སེཀྑཱསེཀྑཱནཾ ལོཀིཡཔཉྙཱ ཙ. ཝིམུཏྟིཀྑནྡྷནྟི ཕལཝིམུཏྟི. ཝིམུཏྟིཉཱཎདསྶནཀྑནྡྷནྟི པཙྩཝེཀྑཎཉཱཎཾ. སཱིགྷཔཉྙཱནིདྡེསསདིསོཡེཝ ལཧུཔཉྙཱནིདྡེསོ, ཏཐཱ ཧཱསཔཉྙཱནིདྡེསོ. ཛཝནཔཉྙཱནིདྡེསོ པན ཀལཱཔསམྨསནནཡེན པཝཏྟོ. ཏིཀྑཔཉྙཱནིདྡེསོ ཝཱིརིཡསྶ ཨུསྶུཀྐཱཔནཝསེན, ནིབྦེདྷིཀཔཉྙཱནིདྡེསོ ¶ སབྦལོཀེ ཨནབྷིརཏསཉྙཱཝསེན པཝཏྟོ. ཏཏྠ ཏུརིཏཀིརིཡཱ སཱིགྷཏཱ. ཨདནྡྷཏཱ ལཧུཏཱ. ཝེགཱཡིཏཏྟཾ ཁིཔྤཏཱ.

ཧཱསབཧུལོཏི པཱིཏིབཧུལོ. སེསཔདཱནི ཏསྶེཝ ཝེཝཙནཱནི. ཨཐ ཝཱ ཧཱསབཧུལོཏི མཱུལཔདཾ. ཝེདབཧུལོཏི ཏསྶཱ ཨེཝ པཱིཏིཡཱ སམྤཡུཏྟསོམནསྶཝེདནཱཝསེན ནིདྡེསཔདཾ. ཏུཊྛིབཧུལོཏི ནཱཏིབལཝཔཱིཏིཡཱ ཏུཊྛཱཀཱརཝསེན. པཱམོཛྫབཧུལོཏི བལཝཔཱིཏིཡཱ པམུདིཏབྷཱཝཝསེན. སཱིལཱནི པརིཔཱུརེཏཱིཏི ཧཊྛཔྤཧཊྛོ ཨུདགྒཱུདགྒོ ¶ སམྤིཡཱཡམཱནོ སཱིལཱནི སམྤཱདེཏི. པཱིཏིསོམནསྶསཧགཏཱ ཧི པཉྙཱ ཨབྷིརཏིཝསེན ཨཱརམྨཎེ ཕུལླིཏཱ ཝིཀསིཏཱ ཝིཡ པཝཏྟཏི, ན ཨེཝཾ ཨུཔེཀྑཱསཧགཏཱཏི.

ཨནིཙྩཏོ ཁིཔྤཾ ཛཝཏཱིཏི ‘‘ཁནྡྷཔཉྩཀཾ ཨནིཙྩ’’ནྟི ཝེགཱཡིཏེན པཝཏྟཏི, པཊིཔཀྑདཱུརཱིབྷཱཝེན པུབྦཱབྷིསངྑཱརསྶ སཱཏིསཡཏྟཱ ཨིནྡེན ཝིསྶཊྛཝཛིརཾ ཝིཡ ལཀྑཎཾ ཨཝིརཛ྄ཛྷནྟཱི ཨདནྡྷཱཡནྟཱི ཨནིཙྩལཀྑཎཾ ཝེགསཱ པཊིཝིཛ྄ཛྷཏི, ཏསྨཱ སཱ ཛཝནཔཉྙཱ ནཱམཱཏི ཨཏྠོ. སེསཔདེསུཔི ཨེསེཝ ནཡོ. ཨེཝཾ ལཀྑཎཱརམྨཎིཀཝིཔསྶནཱཝསེན ཛཝནཔཉྙཾ དསྶེཏྭཱ བལཝཝིཔསྶནཱཝསེན དསྶེཏུཾ – ‘‘རཱུཔ’’ནྟིཨཱདི ཝུཏྟཾ. ཏཏྠ ཁཡཊྛེནཱཏི ཡཏྠ ཡཏྠ ཨུཔྤཛྫཏི, ཏཏྠ ཏཏྠེཝ བྷིཛྫནཏོ ཁཡསབྷཱཝཏྟཱ. བྷཡཊྛེནཱཏི བྷཡཱནཀབྷཱཝཏོ. ཨསཱརཀཊྛེནཱཏི ཨཏྟསཱརཝིརཧཏོ ནིཙྩསཱརཱདིཝིརཧཏོ ཙ. ཏུལཡིཏྭཱཏི ཏུལཱབྷཱུཏཱཡ ཝིཔསྶནཱཔཉྙཱཡ ཏུལེཏྭཱ. ཏཱིརཡིཏྭཱཏི ཏཱཡ ཨེཝ ཏཱིརཎབྷཱུཏཱཡ ཏཱིརེཏྭཱ. ཝིབྷཱཝཡིཏྭཱཏི ཡཱཐཱཝཏོ པཀཱསེཏྭཱ པཱཀཊཾ ཀཏྭཱ. ཨཐ ཝཱ ཏུལཡིཏྭཱཏི ཀལཱཔསམྨསནཝསེན ཏུལཡིཏྭཱ. ཏཱིརཡིཏྭཱཏི ཨུདཡབྦཡཱནུཔསྶནཱཝསེན ཏཱིརེཏྭཱ. ཝིབྷཱཝཡིཏྭཱཏི བྷངྒཱནུཔསྶནཱདིཝསེན པཱཀཊཾ ཀཏྭཱ. ཝིབྷཱུཏཾ ཀཏྭཱཏི སངྑཱརུཔེཀྑཱནུལོམཝསེན ཕུཊཾ ཀཏྭཱ. རཱུཔནིརོདྷེཏི རཱུཔཀྑནྡྷསྶ ནིརོདྷབྷཱུཏེ ནིབྦཱནེ. ཁིཔྤཾ ཛཝཏཱིཏི ནིནྣཔོཎཔབྦྷཱརཝསེན ཛཝཏི པཝཏྟཏི. ཨིདཱནི སིཁཱཔྤཏྟཝིཔསྶནཱཝསེན ཛཝནཔཉྙཾ དསྶེཏུཾ, པུན ‘‘རཱུཔ’’ནྟིཨཱདི ཝུཏྟཾ.

ཉཱཎསྶ ཏིཀྑབྷཱཝོ ནཱམ སཝིསེསཾ པཊིཔཀྑསམུཙྪིནྡནེན ཝེདིཏབྦོཏི ‘‘ཁིཔྤཾ ཀིལེསེ ཚིནྡཏཱིཏི ཏིཀྑཔཉྙཱ’’ཏི ཝཏྭཱ ཏེ པན ཀིལེསེ ཝིབྷཱགེན དསྶེནྟོ, ‘‘ཨུཔྤནྣཾ ཀཱམཝིཏཀྐ’’ནྟིཨཱདིམཱཧ. སམཐཝིཔསྶནཱཧི ཝིཀྑམྦྷནཏདངྒཝསེན པཧཱིནམྤི ཨརིཡམགྒེན ཨསམཱུཧཏཏྟཱ ཨུཔྤཏྟིདྷམྨཏཾ ཨནཏཱིཏཏཱཡ ཨསམཱུཧཏུཔྤནྣནྟི ཝུཙྩཏི, ཏཾ ཨིདྷ ‘‘ཨུཔྤནྣ’’ནྟི ཨདྷིཔྤེཏཾ. ནཱདྷིཝཱསེཏཱིཏི སནྟཱནཾ ཨཱརོཔེཏྭཱ ན ཝཱསེཏི. པཛཧཏཱིཏི སམུཙྪེདཝསེན པཛཧཏི. ཝིནོདེཏཱིཏི ཁིཔཏི. བྱནྟིཾ ཀརོཏཱིཏི ཝིགཏནྟཾ ཀརོཏི. ཨནབྷཱཝཾ གམེཏཱིཏི ཨནུ ཨབྷཱཝཾ ¶ གམེཏི, ཝིཔསྶནཱཀྐམེན ཨརིཡམགྒཾ པཏྭཱ སམུཙྪེདཝསེནེཝ ཨབྷཱཝཾ གམཡཏཱིཏི ཨཏྠོ. ཨེཏྠ ཙ ཀཱམཔྤཊིསཾཡུཏྟོ ཝིཏཀྐོ ཀཱམཝིཏཀྐོ. ‘‘ཨིམེ སཏྟཱ ¶ མརནྟཱུ’’ཏི པརེསཾ མརཎཔྤཊིསཾཡུཏྟོ ཝིཏཀྐོ བྱཱཔཱདཝིཏཀྐོ. ‘‘ཨིམེ སཏྟཱ ཝིཧིཾསིཡནྟཱུ’’ཏི པརེསཾ ཝིཧིཾསཱཔཊིསཾཡུཏྟོ ཝིཏཀྐོ ཝིཧིཾསཱཝིཏཀྐོ. པཱཔཀེཏི ལཱམཀེ. ཨཀུསལེ དྷམྨེཏི ཨཀོསལླསམྦྷཱུཏེ དྷམྨེ. ཏིཀྑཔཉྙོ ནཱམ ཁིཔྤཱབྷིཉྙོ ཧོཏི, པཊིཔདཱ ཙསྶ ན ཙལཏཱིཏི ཨཱཧ – ‘‘ཨེཀམྷི ཨཱསནེ ཙཏྟཱརོ ཨརིཡམགྒཱ’’ཏིཨཱདི.

‘‘སབྦེ སངྑཱརཱ ཨནིཙྩཱ དུཀྑཱ ཝིཔརིཎཱམདྷམྨཱ སངྑཏཱ པཊིཙྩསམུཔྤནྣཱ ཁཡདྷམྨཱ ཝཡདྷམྨཱ ཝིརཱགདྷམྨཱ ནིརོདྷདྷམྨཱ’’ཏི ཡཱཐཱཝཏོ དསྶནེན སཙྩཔྤཊིཝེདྷོ ཨིཛ྄ཛྷཏི, ན ཨཉྙཐཱཏི ཀཱརཎམུཁེན ནིབྦེདྷིཀཔཉྙཾ དསྶེཏུཾ – ‘‘སབྦསངྑཱརེསུ ཨུབྦེགབཧུལོ ཧོཏཱི’’ཏིཨཱདི ཝུཏྟཾ. ཏཏྠ ཨུབྦེགབཧུལོཏི ‘‘སབྦེ སངྑཱརཱ ཨནིཙྩཱ’’ཏིཨཱདིནཱ (དྷ. པ. ༢༧༧) ནཡེན སབྦསངྑཱརེསུ ཨབྷིཎྷཔྤཝཏྟསཾཝེགོ. ཨུཏྟཱསབཧུལོཏི ཉཱཎབྷཡཝསེན སབྦསངྑཱརེསུ བཧུསོ ཨུཏྲསྟམཱནསོ. ཏེན ཨཱདཱིནཝཱནུཔསྶནམཱཧ. ཨུཀྐཎྛནབཧུལོཏི སངྑཱརཏོ ཨུདྡྷཾ ཝིསངྑཱརཱབྷིམུཁཏཱཡ ཨུཀྐཎྛནབཧུལོ. ཨིམིནཱ ནིབྦིདཱནུཔསྶནམཱཧ. ཨརཏིབཧུལོཏིཨཱདིནཱ ཏསྶཱ ཨེཝ ཨཔརཱཔརཱུཔཔཏྟིཾ. བཧིམུཁོཏི སབྦསངྑཱརཏོ བཧིབྷཱུཏཾ ནིབྦཱནཾ ཨུདྡིསྶ པཝཏྟཉཱཎམུཁོ. ཏཐཱ པཝཏྟིཏཝིམོཀྑམུཁོ. ནིབྦིཛ྄ཛྷནཾ པཊིཝིཛ྄ཛྷནཾ ནིབྦེདྷོ, སོ ཨེཏིསྶཱ ཨཏྠཱིཏི ནིབྦེདྷིཀཱ, ནིབྦིཛ྄ཛྷཏཱིཏི ཝཱ ནིབྦེདྷིཀཱ, སཱ ཨེཝ པཉྙཱ ནིབྦེདྷིཀཔཉྙཱ. ཨནིབྦིདྡྷཔུབྦནྟི ཨནམཏགྒེ སཾསཱརེ ཨནྟཾ པཱཔེཏྭཱ ཨནིཝིདྡྷཔུབྦཾ. ཨཔྤདཱལིཏཔུབྦནྟི ཏསྶེཝ ཨཏྠཝཙནཾ, ཨནྟཀརཎེནེཝ ཨཔྤདཱལིཏཔུབྦནྟི ཨཏྠོ. ལོབྷཀྑནྡྷནྟི ལོབྷརཱསིཾ, ལོབྷཀོཊྛཱསཾ ཝཱ.

ཀཱཡགཏཱསཏིཝགྒཝཎྞནཱ ནིཊྛིཏཱ.

༢༠. ཨམཏཝགྒཝཎྞནཱ

༦༠༠-༦༡༡. ནཏྠི ¶ ཨེཏྠ མཏཾ མརཎཾ ཝིནཱསོཏི ཨམཏཾ, ནིབྦཱནནྟི ཨཱཧ – ‘‘མརཎཝིརཧིཏཾ ནིབྦཱནཾ པརིབྷུཉྫནྟཱི’’ཏི. ཨམཏསྶ ཝཱ ནིབྦཱནསྶ ཨདྷིགམཧེཏུཏཱཡ ¶ ཨམཏསདིསཨཏཔྤཀསུཁཔཏིཏཏཱཡ ཙ ཀཱཡགཏཱསཏི ‘‘ཨམཏ’’ནྟི ཝུཏྟཱ. པརིབྷུཉྫནྟཱིཏི ཛྷཱནསམཱཔཛྫནེན ཝལ༹ཉྫནྟི. ཝིརདྡྷནྟི ཨནདྷིགམེན ཝིརཛ྄ཛྷིཏཾ. ཏེནཱཧ – ‘‘ཝིརཱདྷིཏཾ ནཱདྷིགཏ’’ནྟི. ཨཱརདྡྷནྟི སཱདྷིཏཾ ནིཔྥཱདིཏཾ. ཏཉྩ པརིཔུཎྞཾ ནཱམ ཧོཏཱིཏི ཨཱཧ – ‘‘ཨཱརདྡྷནྟི པརིཔུཎྞ’’ནྟི. པམཱདིཾསཱུཏི ཀཱལབྱཏྟཡེནེདཾ ཝུཏྟནྟི ཨཱཧ – ‘‘པམཛྫནྟཱི’’ཏི.

ཨམཏཝགྒཝཎྞནཱ ནིཊྛིཏཱ.

ཨིཏི མནོརཐཔཱུརཎིཡཱ ཨངྒུཏྟརནིཀཱཡ-ཨཊྛཀཐཱཡ

ཨེཀཀནིཔཱཏཝཎྞནཱཡ ཨནུཏྟཱནཏྠདཱིཔནཱ སམཏྟཱ.

པཋམོ བྷཱགོ ནིཊྛིཏོ.