📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ.

ཨངྒུཏྟརནིཀཱཡེ

དུཀནིཔཱཏ-ཊཱིཀཱ

༡. པཋམཔཎྞཱསཀཾ

༡. ཀམྨཀཱརཎཝགྒོ

༡. ཝཛྫསུཏྟཝཎྞནཱ

༡. དུཀནིཔཱཏསྶ ¶ ¶ པཋམེ པཧཱརསཱདྷནཏྠནྟི དཎྜཔྤཧཱརསྶ སུཁསིདྡྷི-ཨཏྠཾ. ཀཉྫིཏོ ནིབྦཏྟཾ ཀཉྫིཡཾ, ཨཱརནཱལཾ, ཡཾ བིལངྒནྟིཔི ཝུཙྩཏི, ཏཾ ཡཏྠ སིཉྩཏི, སཱ ཀཉྫིཡཨུཀྑལིཀཱ བིལངྒཐཱལིཀཱ, ཏཾསདིསཾ ཀཱརཎཾ བིལངྒཐཱལིཀཾ. སཱིསཀཊཱཧཾ ཨུཔྤཱཊེཏྭཱཏི ཨཡོགུལ༹པྤཝེསཔྤམཱཎཾ ཚིདྡཾ ཀཏྭཱ. སངྑམུཎྜཀམྨཀཱརཎནྟི སངྑཾ ཝིཡ མུཎྜཀརཎཾ ཀམྨཀཱརཎཾ. རཱཧུམུཁཀམྨཀཱརཎནྟི རཱཧུམུཁགཏསཱུརིཡསདིསཀམྨཀཱརཎཾ.

ཛོཏིམཱལིཀནྟི ¶ ཛོཏིམཱལཝནྟཾ ཀམྨཀཱརཎཾ. ཧཏྠཔཛྫོཏིཀནྟི ཧཏྠསྶ པཛྫོཏནཀམྨཀཱརཎཾ. ཨེརཀཝཏྟཀམྨཀཱརཎནྟི ཨེརཀཝཏྟསདིསེ སརཱིརཏོ ཙམྨཝཏྟེ ཨུཔྤཱཊནཀམྨཀཱརཎཾ. ཙཱིརཀཝཱསིཀཀམྨཀཱརཎནྟི སརཱིརཏོ ཨུཔྤཱཊིཏཝཏྟཙཱིརཀེཧི ནིཝཱསཱཔནཀམྨཀཱརཎཾ. ཏཾ ཀརོནྟཱ ཡཐཱ གཱིཝཏོ པཊྛཱཡ ཝདྡྷེ ཀནྟིཏྭཱ ཀཊིཡཾ ཋཔེནྟི, ཨེཝཾ གོཔྥཀཏོ པཊྛཱཡ ཀནྟིཏྭཱཔི ཀཊིཡམེཝ ཋཔེནྟི. ཨཊྛཀཐཱཡཾ པན ¶ ‘‘ཀཊིཏོ པཊྛཱཡ ཀནྟིཏྭཱ གོཔྥཀེསུ ཋཔེནྟཱི’’ཏི ཝུཏྟཾ. ཨེཎེཡྻཀཀམྨཀཱརཎནྟི ཨེཎིམིགསདིསཀམྨཀཱརཎཾ. ཨཡཝལཡཱནི དཏྭཱཏི ཨཡཝལཡཱནི པཊིམུཉྩིཏྭཱ. ཨཡསཱུལཱནི ཀོཊྚེནྟཱིཏི ཀཔྤརཛཎྞུཀཀོཊཱིསུ ཨཡསཱུལཱནི པཝེསེནྟི. ཏནྟི ཏཾ ཏཐཱཀཏཀམྨཀཱརཎཾ སཏྟཾ.

བལི༹སམཾསིཀནྟི བལིསེཧི མཾསུཔྤཱཊནཀམྨཀཱརཎཾ. ཀཧཱཔཎིཀནྟི ཀཧཱཔཎམཏྟསོ ཚིནྡནཀམྨཀཱརཎཾ. ཀོཊྚེནྟཱིཏི ཚིནྡནྟི. ཁཱརཱཔཏཙྪིཀནྟི ཏཙྪེཏྭཱ ཁཱརཱཔསིཉྩནཀམྨཀཱརཎཾ. པལིགྷཔརིཝཏྟིཀནྟི པལིགྷསྶ ཝིཡ པརིཝཏྟནཀམྨཀཱརཎཾ. ཨེཀཱབདྡྷཾ ཀརོནྟི ཨཡསཱུལསྶ ཀོཊྚནེན. པལཱལཔཱིཋཀནྟི པལཱལཔཱིཋསྶ ཝིཡ སརཱིརསྶ སཾཝེལླནཀམྨཀཱརཎཾ. ཀཱརཎིཀཱཏི གྷཱཏནཀཱརཀཱ. པལཱལཝཊྚིཾ ཝིཡ ཀཏྭཱཏི ཡཐཱ པལཱལཔཱིཋཾ ཀརོནྟཱ པལཱལཾ ཝཊྚིཾ ཀཏྭཱ སཾཝེལླནཝསེན པུན ཝེཋེནྟི, ཨེཝཾ ཀརོནྟཱིཏི ཨཏྠོ. ཚཱཏཀསུནཁེཧཱིཏི ཁུདྡཀེཧི ཀོལེཡྻཀསུནཁེཧི. ཏེ ཧི བལཝནྟཱ ཛཝཡོགཱ སཱུརཱ ཙ ཧོནྟི. སཧསྶབྷཎྜིཀནྟི སཧསྶཏྠཝིཀཾ.

ཡཱཧནྟི ཡཾ ཨཧཾ. ཡནྟི ཙ ཀཱརཎཝཙནཾ. ཏེནཱཧ ‘‘ཡེན ཨཧ’’ནྟི. ཚིནྣམཱུལཀེཏི ཏཎྷཱམཱུལསྶ ཨུཙྪིནྣཏྟཱ སཉྪིནྣམཱུལཀེ.

ཝཛྫསུཏྟཝཎྞནཱ ནིཊྛིཏཱ.

༢. པདྷཱནསུཏྟཝཎྞནཱ

༢. དུཏིཡེ ཨུབྷཏོབྱཱུལ༹ྷསངྒཱམཔྤཝེསནསདིསནྟི ཡུདྡྷཏྠཱཡ ཨུབྷཏོརཱསིཀཏཙཏུརངྒིནིསེནཱམཛ྄ཛྷཔྤཝེསནསདིསཾ. དཱནཉྩ ཡུདྡྷཉྩ སམཱནམཱཧཱུཏི ཨེཏྠ ཀཐཾ པནཱིདམུབྷཡཾ སམཱནཾ? ཛཱིཝིཏཝིནཱསབྷཱིརུཀོ ཧི ཡུཛ྄ཛྷིཏུཾ ན སཀྐོཏི, བྷོགཀྑཡབྷཱིརུཀོ དཱནཾ དཱཏུཾ ན སཀྐོཏི. ‘‘ཛཱིཝིཏཉྩ རཀྑིསྶཱམི, ཡུཛ྄ཛྷིསྶཱམཱི’’ཏི ཧི ཝདནྟོ ན ཡུཛ྄ཛྷཏི, ཛཱིཝིཏེ པན ཨཱལཡཾ ཝིསྶཛྫེཏྭཱ ‘‘ཧཏྠཔཱདཱདིཙྪེདོ ཝཱ ཧོཏུ མརཎཾ ཝཱ, གཎྷིསྶཱམེཏཾ ཨིསྶརིཡ’’ནྟི ཨུསྶཧནྟོཝ ཡུཛ྄ཛྷཏི ¶ . ‘‘བྷོགེ ཙ རཀྑིསྶཱམི, དཱནཉྩ དསྶཱམཱི’’ཏི ཝདནྟོཔི ན དདཱཏི, བྷོགེསུ པན ཨཱལཡཾ པིསྶཛྫེཏྭཱ ‘‘མཧཱདཱནཾ དསྶཱམཱི’’ཏི ཨུསྶཧནྟོཝ དེཏི. ཨེཝཾ ¶ དཱནཉྩ ཡུདྡྷཉྩ སམཾ ཧོཏི. ཀིཉྩ བྷིཡྻོ – ཨཔྤཱཔི སནྟཱ བཧུཀེ ཛིནནྟི, ཡཐཱ ཙ ཡུདྡྷེ ཨཔྤཀཱཔི ཝཱིརཔུརིསཱ བཧུཀེ བྷཱིརུཔུརིསེ ཛིནནྟི, ཨེཝཾ སདྡྷཱདིསམྤནྣོ ཨཔྤཀམྤི དཱནཾ དདནྟོ བཧུཝིདྷཾ ལོབྷདོསཨིསྶཱམཙྪརིཡདིཊྛིཝིཙིཀིཙྪཱདིབྷེདཾ ཏཔྤཊིཔཀྑཾ ཨབྷིབྷཝཏི, བཧུཉྩ དཱནཝིཔཱཀཾ ཨདྷིགཙྪཏི. ཨེཝམྤི དཱནཉྩ ཡུདྡྷཉྩ སམཱནཾ. ཏེནཱཧ ‘‘ཨཔྤམྤི ཙེ སདྡཧཱནོ དདཱཏི, ཏེནེཝ སོ ཧོཏི སུཁཱི པརཏྠཱ’’ཏི.

ཨགཱརསྶ ཧིཏཾ ཀསིགོརཀྑཱདི ཨགཱརིཡཾ, ཏཾ ནཏྠི ཨེཏྠཱཏི ཨནགཱརིཡཾ, པབྦཛྫཱཏི ཨཱཧ ‘‘ཨགཱརསྶ…པེ… ཨནགཱརིཡཾ པབྦཛྫ’’ནྟི. སབྦཱུཔདྷིཔཊིནིསྶགྒཏྠཱཡཱཏི ཨེཏྠ ཙཏྟཱརོ ཨུཔདྷཱི – ཀཱམུཔདྷི, ཁནྡྷུཔདྷི, ཀིལེསུཔདྷི, ཨབྷིསངྑཱརུཔདྷཱིཏི. ཀཱམཱཔི ཧི ‘‘ཡཾ པཉྩ ཀཱམགུཎེ པཊིཙྩ ཨུཔྤཛྫཏི སུཁཾ སོམནསྶཾ, ཨཡཾ ཀཱམཱནཾ ཨསྶཱདོ’’ཏི (ཨ. ནི. ༩.༣༤) ཨེཝཾ ཝུཏྟསྶ སུཁསྶ, ཏདསྶཱདནིམིཏྟསྶ ཝཱ དུཀྑསྶ ཨདྷིཊྛཱནབྷཱཝཏོ ཨུཔདྷཱིཡཏི ཨེཏྠ སུཁནྟི ཨིམིནཱ ཝཙནཏྠེན ‘‘ཨུཔདྷཱི’’ཏི ཝུཙྩནྟི. ཁནྡྷཱཔི ཁནྡྷམཱུལཀསྶ དུཀྑསྶ ཨདྷིཊྛཱནབྷཱཝཏོ, ཀིལེསཱཔི ཨཔཱཡདུཀྑསྶ ཨདྷིཊྛཱནབྷཱཝཏོ, ཨབྷིསངྑཱརཱཔི བྷཝདུཀྑསྶ ཨདྷིཊྛཱནབྷཱཝཏོ ‘‘ཨུཔདྷཱི’’ཏི ཝུཙྩནྟི. སབྦེསཾ ཨུཔདྷཱིནཾ པཊིནིསྶགྒོ པཧཱནཾ ཨེཏྠཱཏི སབྦཱུཔདྷིཔཊིནིསྶགྒཾ, ནིབྦཱནཾ. ཏེནཱཧ ‘‘སབྦེསཾ ཁནྡྷཱུཔདྷི…པེ… ནིབྦཱནསྶ ཨཏྠཱཡཱ’’ཏི.

པདྷཱནསུཏྟཝཎྞནཱ ནིཊྛིཏཱ.

༣. ཏཔནཱིཡསུཏྟཝཎྞནཱ

༣. ཏཏིཡེ ཏཔནཱིཡཱཏི ཨེཏྠ ཀཏྟུཨཏྠེ ཨནཱིཡ-སདྡོཏི ཨཱཧ ‘‘ཏཔནྟཱིཏི ཏཔནཱིཡཱ’’ཏི. ཏཔནྟཱིཏི ཝིབཱདྷེནྟི, ཝིཧེཋེནྟཱིཏི ཨཏྠོ. ཏཔནཾ ཝཱ དུཀྑཾ, དིཊྛེ ཙེཝ དྷམྨེ ཨབྷིསམྤརཱཡཉྩ ཏསྶ ཨུཔྤཱདནེན ཙེཝ ཨནུབལཔྤདཱནེན ཙ ཧིཏཱཏི ཏཔནཱིཡཱ. ཨཐ ཝཱ ཏཔནྟི ཏེནཱཏི ཏཔནཾ, ཨནུཏཱཔོ, ཝིཔྤཊིསཱརོཏི ཨཏྠོ. ཏསྶ ཧེཏུབྷཱཝཏོ ཧིཏཱཏི ཏཔནཱིཡཱ. ཨནུསོཙཏཱིཏི ཝིཔྤཊིསཱརཱི ཧུཏྭཱ ཀཏཱཀཏཾ ཨནུགམྨ སོཙཏི. སོཙནཉྷི ཀཏཏྟཱ ཙ ཧོཏི ཨཀཏཏྟཱ ཙ. ཏཐཱ ཙེཝ པཱལི༹ཡཾ ཝིབྷཏྟཾ. ནནྡཡཀྑཱདཱིནཾ ཝཏྠཱུནི པཱཀཊཱནཱིཏི ཏཱནི ¶ ཨདསྶེཏྭཱ ¶ དྭེབྷཱཏིཀཝཏྠུཾ དསྶེནྟོ ‘‘ཏེ ཀིརཱ’’ཏི ཨཱདིམཱཧ. ཏཏྠ ཏེཏི དྭེ བྷཱཏརོ. པུན ཀིཾ མགྒསཱིཏི པུན ཀིཾ ཨིཙྪསི.

ཏཔནཱིཡསུཏྟཝཎྞནཱ ནིཊྛིཏཱ.

༥. ཨུཔཉྙཱཏསུཏྟཝཎྞནཱ

༥. པཉྩམེ ཨིམཉྷི དྷམྨདྭཡནྟི ཀུསལེསུ དྷམྨེསུ ཨསནྟུཊྛིཏཱ, པདྷཱནསྨིཾ ཨནོསཀྐནསངྑཱཏཾ དྷམྨདྭཡཾ. ཨིམིནཱཏི ‘‘ཨསནྟུཊྛིཏཱ ཀུསལེསུ དྷམྨེསཱུ’’ཏི ཝཙནེན. ཨིམཾ དཱིཔེཏཱིཏི ‘‘ཡཱཝ སོ ཨུཔྤཛྫཏི, ན ཏཱཝཱཧཾ སནྟུཊྛོ ཨཧོསི’’ནྟི ཨེཏཾ པརིཡནྟཾ ཀཏྭཱ ཝཀྑམཱནཏྠཾ དཱིཔེཏི. པདྷཱནསྨིནྟི ཝཱིརིཡཱརམྦྷེ. ཨིམམཏྠནྟི ‘‘པདྷཱནསྨིཉྩཱ’’ཏིཨཱདིནཱ ཝུཏྟམཏྠཾ. ཝཱིརིཡཔྤཝཱཧེ ཝཏྟམཱནེ ཨནྟརཱ ཨེཝ པཊིགམནཾ ནིཝཏྟནཾ པཊིཝཱནཾ, ཏདསྶ ཨཏྠཱིཏི པཊིཝཱནཱི, ན པཊིཝཱནཱི ཨཔྤཊིཝཱནཱི, ཏསྶ བྷཱཝོ ཨཔྤཊིཝཱནིཏཱ, ཨནོསཀྐནཱཏི ཨཱཧ ‘‘ཨཔྤཊིཝཱནིཏཱཏི ཨཔྤཊིཀྐམནཱ ཨནོསཀྐནཱ’’ཏི. ཏཏྠ ཨནོསཀྐནཱཏི ཨཔྤཊིནིཝཏྟི.

ཨཱགམནཱིཡཔཊིཔདཱཏི སམཐཝིཔསྶནཱསངྑཱཏཱ པུབྦབྷཱགཔཊིཔཏྟི. སཱ ཧི ཨཱགཙྪནྟི ཝིསེསམདྷིགཙྪནྟི ཨེཏཱཡ, ཨཱགཙྪཏི ཝཱ ཝིསེསཱདྷིགམོ ཨེཏཱཡཱཏི ཨཱགམནཱིཡཱ, སཱ ཨེཝ པཊིཔཛྫིཏབྦཏོ པཊིཔདཱཏི ཨཱགམནཱིཡཔཊིཔདཱ. ཨཔྤཊིཝཱནཔདྷཱནནྟི ཨོསཀྐནཱརཧིཏཔྤདྷཱནཾ, ཨནྟརཱ ཨནོསཀྐིཏྭཱ ཀཏཝཱིརིཡནྟི ཨཏྠོ.

ཨུཔཉྙཱཏསུཏྟཝཎྞནཱ ནིཊྛིཏཱ.

༦. སཾཡོཛནསུཏྟཝཎྞནཱ

༦. ཚཊྛེ སཾཡོཛནཱནཾ ཧིཏཱ པཙྩཡབྷཱཝེནཱཏི སཾཡོཛནིཡཱ, ཏེབྷཱུམཀཱ དྷམྨཱ. ཏེནཱཧ ‘‘དསནྣཾ སཾཡོཛནཱན’’ནྟིཨཱདི. སཾཡོཛནིཡེ དྷམྨེ ཨསྶཱདཏོ ཨནུཔསྶཏི སཱིལེནཱཏི ཨསྶཱདཱནུཔསྶཱི, ཏསྶ བྷཱཝོ ཨསྶཱདཱནུཔསྶིཏཱ. ནིབྦིདཱནུཔསྶིཏཱཏི ཨེཏྠཱཔི ཨེསེཝ ནཡོ. ཨུཀྐཎྛནཝསེནཱཏི སཾཡོཛནིཡེསུ ཏེབྷཱུམཀདྷམྨེསུ ནིབྦིནྡནཝསེན. ཛནནཾ ཛཱཏི, ཁནྡྷཱནཾ པཱཏུབྷཱཝོཏི ཨཱཧ ‘‘ཛཱཏིཡཱཏི ཁནྡྷནིབྦཏྟིཏོ’’ཏི, ཁནྡྷཱནཾ ཏཏྠ ཏཏྠ བྷཝེ ཨཔརཱཔརཾ ནིབྦཏྟིཏོཏི ཨཏྠོ. ཁནྡྷཔརིཔཱཀོ ¶ ཨེཀབྷཝཔརིཡཱཔནྣཱནཾ ཁནྡྷཱནཾ པུརཱཎབྷཱཝོ. ཨེཀབྷཝཔརིཡཱཔནྣཛཱིཝིཏིནྡྲིཡཔྤབནྡྷཝིཙྪེདཝསེན ¶ ཁནྡྷཱནཾ བྷེདོ ཨིདྷ མརཎནྟི ཨཱཧ ‘‘མརཎེནཱཏི ཁནྡྷབྷེདཏོ’’ཏི. ཨནྟོནིཛ྄ཛྷཱནཾ ཙིཏྟསནྟཱཔོ. པརིདེཝོ ནཱམ ཉཱཏིབྱསནཱདཱིཧི ཕུཊྛསྶ ཝཱཙཱཝིཔྤལཱཔོ. སོ ཙ སོཀསམུཊྛཱནོཏི ཨཱཧ ‘‘ཏནྣིསྶིཏལཱལཔྤིཏལཀྑཎེཧི པརིདེཝེཧཱི’’ཏི. ལཱལཔྤིཏཾ ཝཱཙཱཝིཔྤལཱཔོ, སོ ཙ ཨཏྠཏོ སདྡོཡེཝ.

དུཀྑནྟི ཨིདྷ ཀཱཡིཀཾ དུཀྑཾ ཨདྷིཔྤེཏནྟི ཨཱཧ ‘‘ཀཱཡཔཊིཔཱིལ༹ནདུཀྑེཧཱི’’ཏི. མནོཝིགྷཱཏདོམནསྶེཧཱིཏི མནསོ ཝིགྷཱཏཀརེཧི དོམནསྶེཧི. བྱཱཔཱདསམྤཡོགེན མནསོ ཝིཧནནརསཉྷི དོམནསྶཾ. བྷུསོ ཨཱཡཱསོ ཨུཔཱཡཱསོ ཡཐཱ ‘‘བྷུསམཱདཱནཾ ཨུཔཱདཱན’’ནྟི, སོ ཙ ཨཏྠཏོ ཉཱཏིབྱསནཱདཱིཧི ཕུཊྛསྶ ཨདྷིམཏྟཙེཏོདུཀྑཔྤབྷཱཝིཏོ དོསོཡེཝ. ཀཱཡཙིཏྟཱནཉྷི ཨཱཡཱསནཝསེན དོསསྶེཝ པཝཏྟིཨཱཀཱརོ ཨུཔཱཡཱསོཏི ཝུཙྩཏི སངྑཱརཀྑནྡྷཔརིཡཱཔནྣོ. ཏཾ ཙུདྡསཧི ཨཀུསལཙེཏསིཀེཧི ཨཉྙོ ཨེཀོ ཙེཏསིཀདྷམྨོཏི ཨེཀེ. ཡཾ ཝིསཱདོཏི ཙ ཝདནྟི.

སཾཡོཛནསུཏྟཝཎྞནཱ ནིཊྛིཏཱ.

༧. ཀཎྷསུཏྟཝཎྞནཱ

༧. སཏྟམེ ཡཐཱ ‘‘ཀཎྷཱ གཱཝཱི’’ཏིཨཱདཱིསུ ཀཱལ༹ཝཎྞེན སམནྣཱགཏཱ ‘‘ཀཎྷཱ’’ཏི ཝུཙྩཏི, ན ཨེཝཾ ཀཱལ༹ཝཎྞཏཱཡ དྷམྨཱ ‘‘ཀཎྷཱ’’ཏི ཝུཙྩནྟི, ཨཐ ཁོ ཀཎྷཱབྷིཛཱཏིནིབྦཏྟིཧེཏུཏོ ཨཔྤབྷསྶརབྷཱཝཀརཎཏོ ཝཱ ‘‘ཀཎྷཱ’’ཏི ཝུཙྩནྟཱིཏི དསྶེནྟོ ‘‘ན ཀཱལ༹ཝཎྞཏཱཡཱ’’ཏིཨཱདིམཱཧ. ཀཎྷཏཱཡཱཏི ཀཎྷཱབྷིཛཱཏིཏཱཡ. ཀཎྷཱབྷིཛཱཏཱིཏི ཙ ཨཔཱཡཱ ཝུཙྩནྟི མནུསྶེསུ ཙ དོབྷགྒིཡཾ. སརསེནཱཏི སབྷཱཝེན. ན ཧིརཱིཡཏི ན ལཛྫཏཱིཏི ཨཧིརིཀོ, པུགྒལོ, ཙིཏྟཾ, ཏཾ སམྤཡུཏྟདྷམྨསམུདཱཡོ ཝཱ. ཏསྶ བྷཱཝོ ཨཧིརིཀྐནྟི ཝཏྟབྦེ ཨེཀསྶ ཀ-ཀཱརསྶ ལོཔཾ ཀཏྭཱ ཨཧིརིཀནྟི ཝུཏྟནྟི ཨཱཧ ‘‘ཨཧིརིཀནྟི ཨཧིརིཀབྷཱཝོ’’ཏི. ན ཨོཏྟཔྤཏཱིཏི ཨནོཏྟཱཔཱི, པུགྒལོ, ཡཐཱཝུཏྟདྷམྨསམུདཱཡོ ཝཱ, ཏསྶ བྷཱཝོ ཨནོཏྟཔྤནྟི ཨཱཧ ‘‘ཨནོཏྟཱཔིབྷཱཝོ’’ཏི.

ཀཎྷསུཏྟཝཎྞནཱ ནིཊྛིཏཱ.

༨. སུཀྐསུཏྟཝཎྞནཱ

༨. ཨཊྛམེ ¶ ‘‘སུཀྐཾ ཝཏྠ’’ནྟིཨཱདཱིསུ ཝིཡ ན ཝཎྞསུཀྐཏཱཡ དྷམྨཱནཾ སུཀྐཏཱ, ཨཐ ཁོ ¶ སུཀྐཱབྷིཛཱཏིཧེཏུཏོ པབྷསྶརབྷཱཝཀརཎཏོ ཙཱཏི དསྶེནྟོ ‘‘ན ཝཎྞསུཀྐཏཱཡཱ’’ཏིཨཱདིམཱཧ. སུཀྐཏཱཡཱཏི སུཀྐཱབྷིཛཱཏིཏཱཡ. ཧིརཱི པཱཔདྷམྨེ གཱུཐཾ ཝིཡ པསྶནྟཱི ཛིགུཙྪཏཱིཏི ཨཱཧ ‘‘པཱཔཏོ ཛིགུཙྪནལཀྑཎཱ ཧིརཱི’’ཏི. ཨོཏྟཔྤཾ ཏེ ཨུཎྷཾ ཝིཡ པསྶནྟཾ ཏཏོ བྷཱཡཏཱིཏི ཝུཏྟཾ ‘‘བྷཱཡནལཀྑཎཾ ཨོཏཔྤ’’ནྟི. ཨིདཉྩ ཧིརོཏྟཔྤཾ ཨཉྙམཉྙཝིཔྤཡོགཱི པཱཔཏོ ཝིམུཁབྷཱུཏཉྩ, ཏསྨཱ ནེསཾ ཨིདཾ ནཱནཱཀརཎཾ – ཨཛ྄ཛྷཏྟསམུཊྛཱནཱ ཧིརཱི, བཧིདྡྷཱསམུཊྛཱནཾ ཨོཏྟཔྤཾ. ཨཏྟཱདྷིཔཏི ཧིརཱི, ལོཀཱདྷིཔཏི ཨོཏཔྤཾ. ལཛྫཱསབྷཱཝསཎྛིཏཱ ཧིརཱི, བྷཡསབྷཱཝསཎྛིཏཾ ཨོཏྟཔྤཾ. སཔྤཏིསྶཝལཀྑཎཱ ཧིརཱི, ཝཛྫབྷཱིརུཀབྷཡདསྶཱཝིལཀྑཎཾ ཨོཏྟཔྤནྟི.

ཏཏྠ ཨཛ྄ཛྷཏྟསམུཊྛཱནཾ ཧིརིཾ ཙཏཱུཧི ཀཱརཎེཧི སམུཊྛཱཔེཏི ཛཱཏིཾ པཙྩཝེཀྑིཏྭཱ, ཝཡཾ, སཱུརབྷཱཝཾ, བཱཧུསཙྩཾ པཙྩཝེཀྑིཏྭཱ. ཀཐཾ? ‘‘པཱཔཀརཎཾ ནཱམེཏཾ ན ཛཱཏིསམྤནྣཱནཾ ཀམྨཾ, ཧཱིནཛཙྩཱནཾ ཀེཝཊྚཱདཱིནཾ ཀམྨཾ, མཱདིསསྶ ཛཱཏིསམྤནྣསྶ ཨིདཾ ཀཱཏུཾ ན ཡུཏྟ’’ནྟི ཨེཝཾ ཏཱཝ ཛཱཏིཾ པཙྩཝེཀྑིཏྭཱ པཱཔཾ ཨཀརོནྟོ ཧིརིཾ སམུཊྛཱཔེཏི. ཏཐཱ ‘‘པཱཔཀརཎཾ ནཱམེཏཾ དཧརེཧི ཀཏྟབྦཾ ཀམྨཾ, མཱདིསསྶ ཝཡེ ཋིཏསྶ ཨིདཾ ཀཱཏུཾ ན ཡུཏྟ’’ནྟི ཨེཝཾ ཝཡཾ པཙྩཝེཀྑིཏྭཱ པཱཔཾ ཨཀརོནྟོ ཧིརིཾ སམུཊྛཱཔེཏི. ཏཐཱ ‘‘པཱཔཀརཎཾ ནཱམེཏཾ དུབྦལཛཱཏིཀཱནཾ ཀམྨཾ, མཱདིསསྶ སཱུརབྷཱཝསམྤནྣསྶ ཨིདཾ ཀཱཏུཾ ན ཡུཏྟ’’ནྟི ཨེཝཾ སཱུརབྷཱཝཾ པཙྩཝེཀྑིཏྭཱ པཱཔཾ ཨཀརོནྟོ ཧིརིཾ སམུཊྛཱཔེཏི. ཏཐཱ ‘‘པཱཔཀམྨཾ ནཱམེཏཾ ཨནྡྷབཱལཱནཾ ཀམྨཾ, ན པཎྜིཏཱནཾ, མཱདིསསྶ པཎྜིཏསྶ བཧུསྶུཏསྶ ཨིདཾ ཀཱཏུཾ ན ཡུཏྟ’’ནྟི ཨེཝཾ བཱཧུསཙྩཾ པཙྩཝེཀྑིཏྭཱ པཱཔཾ ཨཀརོནྟོ ཧིརིཾ སམུཊྛཱཔེཏི. ཨེཝཾ ཨཛ྄ཛྷཏྟསམུཊྛཱནཾ ཧིརིཾ ཙཏཱུཧི ཀཱརཎེཧི སམུཊྛཱཔེཏི, སམུཊྛཱཔེནྟོ ཙ ཧིརིཾ ནིསྶཱཡ པཱཔཀམྨཾ ན ཀརོཏི.

ཀཐཾ བཧིདྡྷཱསམུཊྛཱནཾ ཨོཏྟཔྤཾ? ‘‘སཙེ ཏྭཾ པཱཔཀམྨཾ ཀརིསྶསི, ཙཏཱུསུ པརིསཱསུ གརཧཔྤཏྟོ བྷཝིསྶསི, ཏཏོ ཏཾ སཱིལཝནྟོ སབྲཧྨཙཱརཱི ཝིཝཛྫིསྶནྟཱི’’ཏི པཙྩཝེཀྑིཏྭཱ བཧིདྡྷཱསམུཊྛཱནཾ ཨོཏྟཔྤཾ ནིསྶཱཡ པཱཔཀམྨཾ ན ཀརོཏི. ཨེཝཾ བཧིདྡྷཱསམུཊྛཱནཾ ཨོཏྟཔྤཾ.

ཀཐཾ ¶ ཨཏྟཱདྷིཔཏི ཧིརཱི? ཨིདྷེཀཙྩོ ཀུལཔུཏྟོ ཨཏྟཱནཾ ཨདྷིཔཏིཾ ཛེཊྛཀཾ ཀཏྭཱ ‘‘མཱདིསསྶ སདྡྷཱཔབྦཛིཏསྶ བཧུསྶུཏསྶ དྷུཏདྷརསྶ ན ཡུཏྟཾ པཱཔཀམྨཾ ཀཱཏུ’’ནྟི པཱཔཾ ན ཀརོཏི. ཨེཝཾ ཨཏྟཱདྷིཔཏི ཧིརཱི. ཏེནཱཧ བྷགཝཱ ‘‘སོ ཨཏྟཱནཾཡེཝ ཨདྷིཔཏིཾ ཀརིཏྭཱ ཨཀུསལཾ པཛཧཏི, ཀུསལཾ བྷཱཝེཏི, སཱཝཛྫཾ པཛཧཏི, ཨནཝཛྫཾ བྷཱཝེཏི, སུདྡྷཾ ཨཏྟཱནཾ པརིཧརཏཱི’’ཏི (ཨ. ནི. ༣.༤༠).

ཀཐཾ ¶ ལོཀཱདྷིཔཏི ཨོཏྟཔྤཾ? ཨིདྷེཀཙྩོ ཀུལཔུཏྟོ ལོཀཾ ཨདྷིཔཏིཾ ཛེཊྛཀཾ ཀཏྭཱ ‘‘སཙེ ཁོ ཏྭཾ པཱཔཀམྨཾ ཀརེཡྻཱསི, སབྲཧྨཙཱརིནོ ཏཱཝ ཏཾ ཛཱནིསྶནྟི, མཧིདྡྷིཀཱ མཧཱནུབྷཱཝཱ ལོཀེ ཙ སམཎབྲཱཧྨཎཱ དེཝཏཱ ཙ, ཏསྨཱ ཏེ ན ཡུཏྟཾ པཱཔཾ ཀཱཏུ’’ནྟི པཱཔཀམྨཾ ན ཀརོཏི. ཡཐཱཧ – ‘‘མཧཱ ཁོ པནཱཡཾ ལོཀསནྣིཝཱསོ, མཧནྟསྨིཾ ཁོ པན ལོཀསནྣིཝཱསེ སནྟི སམཎབྲཱཧྨཎཱ ཨིདྡྷིམནྟོ དིབྦཙཀྑུཀཱ པརཙིཏྟཝིདུནོ. ཏེ དཱུརཏོཔི པསྶནྟི, ཨཱསནྣཱཔི ན དིསྶནྟི, ཙེཏསཱཔི ཙིཏྟཾ ཛཱནནྟི, ཏེཔི མཾ ཨེཝཾ ཛཱནིསྶནྟི ‘པསྶཐ, བྷོ, ཨིམཾ ཀུལཔུཏྟཾ, སདྡྷཱ ཨགཱརསྨཱ ཨནགཱརིཡཾ པབྦཛིཏོ སམཱནོ ཝོཀིཎྞོ ཝིཧརཏི པཱཔཀེཧི ཨཀུསལེཧི དྷམྨེཧཱི’ཏི. སནྟི དེཝཏཱ ཨིདྡྷིམནྟིནིཡོ དིབྦཙཀྑུཀཱ པརཙིཏྟཝིདུནིཡོ, ཏཱ དཱུརཏོཔི པསྶནྟི, ཨཱསནྣཱཔི ན དིསྶནྟི, ཙེཏསཱཔི ཙིཏྟཾ ཛཱནནྟི, ཏཱཔི མཾ ཛཱནིསྶནྟི ‘པསྶཐ, བྷོ, ཨིམཾ ཀུལཔུཏྟཾ, སདྡྷཱ ཨགཱརསྨཱ ཨནགཱརིཡཾ པབྦཛིཏོ སམཱནོ ཝོཀིཎྞོ ཝིཧརཏི པཱཔཀེཧི ཨཀུསལེཧི དྷམྨེཧཱི’ཏི…པེ… སོ ལོཀཾཡེཝ ཨདྷིཔཏིཾ ཀརིཏྭཱ ཨཀུསལཾ…པེ… པརིཧརཏཱི’’ཏི. ཨེཝཾ ལོཀཱདྷིཔཏི ཨོཏྟཔྤཾ.

ལཛྫཱསབྷཱཝསཎྛིཏཱཏི ཨེཏྠ ལཛྫཱཏི ལཛྫནཱཀཱརོ, ཏེན སབྷཱཝེན སཎྛིཏཱ ཧིརཱི. བྷཡནྟི ཨཔཱཡབྷཡཾ, ཏེན སབྷཱཝེན སཎྛིཏཾ ཨོཏྟཔྤཾ. ཏདུབྷཡཾ པཱཔཔརིཝཛྫནེ པཱཀཊཾ ཧོཏི. ཏཏྠ ཡཐཱ དྭཱིསུ ཨཡོགུལེ༹སུ ཨེཀོ སཱིཏལོ བྷཝེཡྻ གཱུཐམཀྑིཏོ, ཨེཀོ ཨུཎྷོ ཨཱདིཏྟོ. ཏེསུ ཡཐཱ སཱིཏལཾ གཱུཐམཀྑིཏཏྟཱ ཛིགུཙྪནྟོ ཝིཉྙུཛཱཏིཀོ ན གཎྷཱཏི, ཨིཏརཾ ཌཱཧབྷཡེན. ཨེཝཾ པཎྜིཏོ ལཛྫཱཡ ཛིགུཙྪནྟོ པཱཔཾ ན ཀརོཏི, ཨོཏྟཔྤེན ཨཔཱཡབྷཡབྷཱིཏོ པཱཔཾ ན ཀརོཏི, ཨེཝཾ ལཛྫཱསབྷཱཝསཎྛིཏཱ ཧིརཱི, བྷཡསབྷཱཝསཎྛིཏཾ ཨོཏྟཔྤཾ.

ཀཐཾ ¶ སཔྤཏིསྶཝལཀྑཎཱ ཧིརཱི, ཝཛྫབྷཱིརུཀབྷཡདསྶཱཝིལཀྑཎཾ ཨོཏྟཔྤཾ? ཨེཀཙྩོ ཧི ཛཱཏིམཧཏྟཔཙྩཝེཀྑཎཱ, སཏྠུམཧཏྟཔཙྩཝེཀྑཎཱ, དཱཡཛྫམཧཏྟཔཙྩཝེཀྑཎཱ, སབྲཧྨཙཱརིམཧཏྟཔཙྩཝེཀྑཎཱཏི ཨེཝཾ ཙཏཱུཧི ཀཱརཎེཧི ཏཏྠ གཱརཝེན སཔྤཏིསྶཝལཀྑཎཾ ཧིརིཾ སམུཊྛཱཔེཏྭཱ པཱཔཾ ན ཀརོཏི. ཨེཀཙྩོ ཨཏྟཱནུཝཱདབྷཡཾ, པརཱནུཝཱདབྷཡཾ, དཎྜབྷཡཾ, དུགྒཏིབྷཡནྟི ཨེཝཾ ཙཏཱུཧི ཀཱརཎེཧི ཝཛྫཏོ བྷཱཡནྟོ ཝཛྫབྷཱིརུཀབྷཡདསྶཱཝིལཀྑཎཾ ཨོཏྟཔྤཾ པཙྩུཔཊྛཱཔེཏྭཱ པཱཔཀམྨཾ ན ཀརོཏི. ཨེཏྠ ཙ ཨཛ྄ཛྷཏྟསམུཊྛཱནཱདིཏཱ ཧིརོཏྟཔྤཱནཾ ཏཏྠ ཏཏྠ པཱཀཊབྷཱཝེན ཝུཏྟཱ, ན པན ནེསཾ ཀདཱཙི ཨཉྙམཉྙཝིཔྤཡོགོ. ན ཧི ལཛྫནཾ ནིབྦྷཡཾ, པཱཔབྷཡཾ ཝཱ ཨལཛྫནཾ ཨཏྠཱིཏི. ཨེཝམེཏྠ ཝིཏྠཱརཏོ ཨཏྠཝཎྞནཱ ཝེདིཏབྦཱ.

སུཀྐསུཏྟཝཎྞནཱ ནིཊྛིཏཱ.

༩. ཙརིཡསུཏྟཝཎྞནཱ

༩. ནཝམེ ¶ ལོཀནྟི སཏྟལོཀཾ. སནྡྷཱརེནྟཱིཏི ཨཱཙཱརསནྡྷཱརཎཝསེན དྷཱརེནྟི. ཋཔེནྟཱིཏི མརིཡཱདཱཡཾ ཋཔེནྟི. རཀྑནྟཱིཏི ཨཱཙཱརསནྡྷཱརཎེན མརིཡཱདཱཡཾ ཋཔེཏྭཱ རཀྑནྟི. གརུཙིཏྟཱིཀཱརཝསེན ན པཉྙཱཡེཐཱཏི གརུཾ ཀཏྭཱ ཙིཏྟེ ཀརཎཝསེན ན པཉྙཱཡེཐ, ཨཡམཱཙཱརོ ན ལབྦྷེཡྻ. མཱཏུཙྪཱཏི ཝཱཏི ཨེཏྠ ཨིཏི-སདྡོ ཨཱདྱཏྠོ. ཏེན མཱཏུལཱནཱིཏི ཝཱ ཨཱཙརིཡབྷརིཡཱཏི ཝཱ གརཱུནཾ དཱརཱཏི ཝཱཏི ཨིམེ སངྒཎྷཱཏི. ཏཏྠ མཱཏུ བྷགིནཱི མཱཏུཙྪཱ. མཱཏུལབྷརིཡཱ མཱཏུལཱནཱི. གརཱུནཾ དཱརཱ མཧཱཔིཏུཙཱུལ༹པིཏུཛེཊྛབྷཱཏུཨཱདཱིནཾ གརུཊྛཱནིཡཱནཾ བྷརིཡཱ. ཡཐཱ ཨཛེལ༹ཀཱཏིཨཱདཱིསུ ཨཡཾ སངྑེཔཏྠོ – ཡཐཱ ཨཛེལ༹ཀཱདཡོ ཏིརཙྪཱནཱ ཧིརོཏྟཔྤརཧིཏཱ མཱཏཱཏི སཉྙཾ ཨཀཏྭཱ བྷིནྣམརིཡཱདཱ སབྦཏྠ སམྦྷེདེན ཝཏྟནྟི, ཨེཝམཡཾ མནུསྶལོཀོ ཡདི ལོཀཔཱལདྷམྨཱ ན བྷཝེཡྻུཾ, སབྦཏྠ སམྦྷེདེན ཝཏྟེཡྻ. ཡསྨཱ པནིམེ ལོཀཔཱལཀདྷམྨཱ ལོཀཾ པཱལེནྟི, ཏསྨཱ ནཏྠི སམྦྷེདོཏི.

ཙརིཡསུཏྟཝཎྞནཱ ནིཊྛིཏཱ.

༡༠. ཝསྶཱུཔནཱཡིཀསུཏྟཝཎྞནཱ

༡༠. དསམེ ¶ ཨཔཉྙཏྟཱཏི ཨནནུཉྙཱཏཱ, ཨཝིཧིཏཱ ཝཱ. ཝསྶེཏི ཝསྶཱརཏྟཾ སནྡྷཱཡ ཝདཏི, ཨུཏུཝསྶེཏི ཧེམནྟཾ སནྡྷཱཡ. ཨེཀིནྡྲིཡཾ ཛཱིཝཾ ཝིཧེཋེནྟཱཏི རུཀྑལཏཱདཱིསུ ཛཱིཝསཉྙིཏཱཡ ཨེཝམཱཧཾསུ. ཨེཀིནྡྲིཡནྟི ཙ ཀཱཡིནྡྲིཡཾ ཨཏྠཱིཏི མཉྙམཱནཱ ཝདནྟི. སངྒྷཱཏཾ ཨཱཔཱདེནྟཱཏི ཝིནཱསཾ ཨཱཔཱདེནྟཱ. སཾཀསཱཡིསྶནྟཱིཏི ཨཔྤོསྶུཀྐཱ ནིབདྡྷཝཱསཾ ཝསིསྶནྟི. ཨཔརཛྫུགཏཱཡ ཨཱསཱལ༹ྷིཡཱ ཨུཔགནྟབྦཱཏི ཨེཏྠ ཨཔརཛྫུ གཏཱཡ ཨསྶཱཏི ཨཔརཛྫུགཏཱ, ཏསྶཱ ཨཔརཛྫུགཏཱཡ ཨཏིཀྐནྟཱཡ, ཨཔརསྨིཾ དིཝསེཏི ཨཏྠོ, ཏསྨཱ ཨཱསཱལ༹ྷིཔུཎྞམཱཡ ཨནནྟརེ པཱཊིཔདདིཝསེ ཨུཔགནྟབྦཱཏི ཨེཝམེཏྠ ཨཏྠོ དཊྛབྦོ. མཱསགཏཱཡ ཨཱསཱལ༹ྷིཡཱ ཨུཔགནྟབྦཱཏི མཱསོ གཏཱཡ ཨསྶཱཏི མཱསགཏཱ, ཏསྶཱ མཱསགཏཱཡ ཨཏིཀྐནྟཱཡ, མཱསེ པརིཔུཎྞེཏི ཨཏྠོ. ཏསྨཱ ཨཱསཱལ༹ྷིཔུཎྞམཏོ པརཱཡ པུཎྞམཱཡ ཨནནྟརེ པཱཊིཔདདིཝསེ ཨུཔགནྟབྦཱཏི ཨཏྠོ དཊྛབྦོ.

ཝསྶཱུཔནཱཡིཀསུཏྟཝཎྞནཱ ནིཊྛིཏཱ.

ཀམྨཀཱརཎཝགྒཝཎྞནཱཡ ལཱིནཏྠཔྤཀཱསནཱ ནིཊྛིཏཱ.

༢. ཨདྷིཀརཎཝགྒཝཎྞནཱ

༡༡. དུཏིཡཝགྒསྶ ¶ པཋམེ ཨཔྤཊིསངྑཱནེ ན ཀམྤཏཱིཏི པཊིསངྑཱནབལཾ, ཨུཔཔརིཀྑནཔཉྙཱཡེཏཾ ནཱམཾ. ཝཱིརིཡསཱིསེན སཏྟ བོཛ྄ཛྷངྒེ བྷཱཝེནྟསྶ ཨུཔྤནྣཾ བལཾ བྷཱཝནཱབལཾ. ཝཱིརིཡུཔཏྠམྦྷེན ཧི ཀུསལབྷཱཝནཱ བལཝཏཱི ཐིརཱ ཨུཔྤཛྫཏི, ཏཐཱ ཨུཔྤནྣཱ བལཝཏཱི ཀུསལབྷཱཝནཱ བལཝནྟོ སཏྟ བོཛ྄ཛྷངྒཱཏིཔི ཝུཙྩནྟི. ཨཏྠཏོ ཝཱིརིཡསམྦོཛ྄ཛྷངྒསཱིསེན སཏྟ བོཛ྄ཛྷངྒཱ ཧོནྟི. ཝུཏྟམྤི ཙེཏཾ – ‘‘ཏཏྠ ཀཏམཾ བྷཱཝནཱབལཾ? ཡཱ ཀུསལཱནཾ དྷམྨཱནཾ ཨཱསེཝནཱ བྷཱཝནཱ བཧུལཱིཀམྨཾ, ཨིདཾ ཝུཙྩཏི བྷཱཝནཱབལཾ. སཏྟཔི བོཛ྄ཛྷངྒཱ བྷཱཝནཱབལ’’ནྟི (དྷ. ས. ༡༣༦༡).

ཨཀམྤིཡཊྛེནཱཏི པཊིཔཀྑེཧི ཨཀམྤནཱིཡཊྛེན. དུརབྷིབྷཝནཊྛེནཱཏི དུརབྷིབྷཝནཱིཡཊྛེན. ཨནཛ྄ཛྷོམདྡནཊྛེནཱཏི ཨདྷིབྷཝིཏྭཱ ཨནཝམདྡནཊྛེན. ཨེཏཱནཱིཏི ¶ ཨེཏཱནི ཡཐཱཝུཏྟཱནི དྭེཔི བལཱནི. ཨེཏདགྒཾ ནཱགཏནྟི ‘‘ཨེཏདགྒཾ, བྷིཀྑཝེ, དྭིནྣཾ བལཱནཾ ཡདིདཾ བྷཱཝནཱབལ’’ནྟི ཨེཝམེཏྠ ཨེཏདགྒཾ ནཱགཏནྟི ཨཏྠོ.

༡༢. དུཏིཡེ ཝིཝེཀཾ ནིསྶིཏནྟི ཝིཝེཀནིསྶིཏཾ, ཡཐཱ ཝཱ ཝིཝེཀཝསེན པཝཏྟཾ ཛྷཱནཾ ‘‘ཝིཝེཀཛ’’ནྟི ཝུཏྟཾ, ཨེཝཾ ཝིཝེཀཝསེན པཝཏྟོ སཏིསམྦོཛ྄ཛྷངྒོ ‘‘ཝིཝེཀནིསྶིཏོ’’ཏི དཊྛབྦོ. ནིསྶཡཊྛོ ཙ ཝིཔསྶནཱམགྒཱནཾ ཝསེན མགྒཕལཱནཾ ཝེདིཏབྦོ, ཨསཏིཔི ཝཱ པུབྦཱཔརབྷཱཝེ ‘‘པཊིཙྩསམུཔྤཱདོ’’ཏི ཨེཏྠ པཙྩཡེན སམུཔྤཱདནཾ ཝིཡ ཨཝིནཱབྷཱཝིདྷམྨབྱཱཔཱརཱ ནིསྶཡནབྷཱཝནཱ སམྦྷཝནྟཱིཏི. ‘‘ཏདངྒསམུཙྪེདནིསྶརཎཝིཝེཀནིསྶིཏ’’ནྟི ཝཏྭཱ པཊིཔྤསྶདྡྷིཝིཝེཀནིསྶིཏསྶ ཨཝཙནཾ ‘‘སཏིསམྦོཛ྄ཛྷངྒཾ བྷཱཝེཏཱི’’ཏིཨཱདིནཱ ཨིདྷ བྷཱཝེཏབྦཱནཾ སམྦོཛ྄ཛྷངྒཱནཾ ཝུཏྟཏྟཱ. བྷཱཝིཏབོཛ྄ཛྷངྒསྶ ཧི སཙྪིཀཱཏབྦཱ བལབོཛ྄ཛྷངྒཱ, ཏེསཾ ཀིཙྩཾ པཊིཔྤསྶདྡྷིཝིཝེཀོ. ཨཛ྄ཛྷཱསཡཏོཏི ‘‘ནིབྦཱནཾ སཙྪིཀརིསྶཱམཱི’’ཏི པཝཏྟཨཛ྄ཛྷཱསཡཏོ. ཡདིཔི ཧི ཝིཔསྶནཱཀྑཎེ སངྑཱརཱརམྨཎཾ ཙིཏྟཾ, སངྑཱརེསུ པན ཨཱདཱིནཝཾ དིསྭཱ ཏཔྤཊིཔཀྑེ ནིབྦཱནེ ནིནྣཏཱཡ ཨཛ྄ཛྷཱསཡཏོ ནིསྶརཎཝིཝེཀནིསྶིཏོ ཧོཏི ཨུཎྷཱབྷིབྷཱུཏསྶ པུགྒལསྶ སཱིཏནིནྣཙིཏྟཏཱ ཝིཡ.

‘‘པཉྩཝིདྷཝིཝེཀནིསྶིཏམྤཱིཏི ཨེཀེ’’ཏི ཝཏྭཱ ཏཏྠ ཡཐཱཝུཏྟཝིཝེཀཏྟཡཏོ ཨཉྙཾ ཝིཝེཀདྭཡཾ ¶ ཨུདྡྷརིཏྭཱ དསྶེཏུཾ ‘‘ཏེ ཧཱི’’ཏིཨཱདི ཝུཏྟཾ. ཏཏྠ ཛྷཱནཀྑཎེ ཏཱཝ ཀིཙྩཏོ ཝིཀྑམྦྷནཝིཝེཀནིསྶིཏཾ, ཝིཔསྶནཱཀྑཎེ ཨཛ྄ཛྷཱསཡཏོ པཊིཔྤསྶདྡྷིཝིཝེཀནིསྶིཏཾ བྷཱཝེཏཱིཏི ཝཏྟབྦཾ ‘‘ཨེཝཱཧཾ ཨནུཏྟརཾ ཝིམོཀྑཾ ཨུཔསམྤཛྫ ཝིཧརིསྶཱམཱི’’ཏི ཏཏྠ ནིནྣཛ྄ཛྷཱསཡཏཱཡ. ཏེནཱཧ ‘‘ཏསྨཱ ཏེསཾ མཏེནཱ’’ཏིཨཱདི. ཧེཊྛཱ ཀསིཎཛ྄ཛྷཱནགྒཧཎེན ཨཱརུཔྤཱནམྤི གཧཎཾ དཊྛབྦཾ, ཏསྨཱ ‘‘ཨེཏེསཾ ཛྷཱནཱན’’ནྟི ཨིམིནཱཔི ཏེསཾ སངྒཧོ ཝེདིཏབྦོ. ཡསྨཱ པཧཱནཝིནཡོ ཝིཡ ཝིརཱགནིརོདྷཱཔི ཨིདྷཱདྷིཔྤེཏཝིཝེཀེན ཨཏྠཏོ ནིབྦིསིཊྛཱ, ཏསྨཱ ཝུཏྟཾ ‘‘ཨེས ནཡོ ཝིརཱགནིསྶིཏནྟིཨཱདཱིསཱུ’’ཏི. ཏེནཱཧ ‘‘ཝིཝེཀཏྠཱ ཨེཝ ཧི ཝིརཱགཱདཡོ’’ཏི.

ཝོསྶགྒ-སདྡོ པརིཙྩཱགཏྠོ པཀྑནྡནཏྠོ ཙཱཏི ཝོསྶགྒསྶ དུཝིདྷཏཱ ཝུཏྟཱ. ཝོསྶཛྫནཉྷི པཧཱནཾ ཝིསྶཊྛབྷཱཝེན ནིརོདྷནཔཀྑནྡནམྤི ཙ ¶ . ཏསྨཱ ཝིཔསྶནཱཀྑཎེ ཏདངྒཝསེན མགྒཀྑཎེ སམུཙྪེདཝསེན པཊིཔཀྑསྶ པཧཱནཾ ཝོསྶགྒོ, ཏཐཱ ཝིཔསྶནཱཀྑཎེ ཏནྣིནྣབྷཱཝེན, མགྒཀྑཎེ ཨཱརམྨཎཀརཎེན ཝིསྶཊྛསབྷཱཝཏཱ ཝོསྶགྒོཏི ཝེདིཏབྦཾ. ཏེནེཝཱཧ ‘‘ཏཏྠ པརིཙྩཱགཝོསྶགྒོ’’ཏིཨཱདི. ཨཡཾ སཏིསམྦོཛ྄ཛྷངྒོཏི ཨཡཾ མིསྶཀཝསེན ཝུཏྟོ སཏིསམྦོཛ྄ཛྷངྒོ. ཡཐཱཝུཏྟེན པཀཱརེནཱཏི ཏདངྒཔྤཧཱནསམུཙྪེདཔྤཧཱནཔྤཀཱརེན ཏནྣིནྣཏདཱརམྨཎཔྤཀཱརེན ཙ. པུབྦེ ཝོསྶགྒཝཙནསྶེཝ ཨཏྠསྶ ཝུཏྟཏྟཱ ཨཱཧ ‘‘སཀལེན ཝཙནེནཱ’’ཏི. པརིཎམནྟནྟི ཝིཔསྶནཱཀྑཎེ ཏདངྒཏནྣིནྣཔྤཀཱརེན པརིཎམནྟཾ. པརིཎཏནྟི མགྒཀྑཎེ སམུཙྪེདཏདཱརམྨཎཔྤཀཱརེན པརིཎཏཾ. པརིཎཱམོ ནཱམ ཨིདྷ པརིཔཱཀོཏི ཨཱཧ ‘‘པརིཔཙྩནྟཾ པརིཔཀྐཉྩཱ’’ཏི. པརིཔཱཀོ ཙ ཨཱསེཝནལཱབྷེན ལདྡྷསཱམཏྠིཡསྶ ཀིལེསེ པརིཙྩཛིཏུཾ ནིབྦཱནཾ པཀྑནྡིཏུཾ ཏིཀྑཝིསདབྷཱཝོ. ཏེནཱཧ ‘‘ཨཡཉྷཱི’’ཏིཨཱདི. ཨེས ནཡོཏི ཡྭཱཡཾ ནཡོ ‘‘ཝིཝེཀནིསྶིཏ’’ནྟིཨཱདིནཱ སཏིསམྦོཛ྄ཛྷངྒེ ཝུཏྟོ, སེསེསུ དྷམྨཝིཙཡསམྦོཛ྄ཛྷངྒཱདཱིསུཔི ཨེསེཝ ནཡོ, ཨེཝཾ ཏཏྠ ནེཏབྦནྟི ཨཏྠོ.

‘‘ཝིཝེཀནིསྶིཏ’’ནྟིཨཱདཱིསུ ལབྦྷམཱནམཏྠཾ སཱམཉྙཏོ དསྶེཏྭཱ ཨིདཱནི ཨིདྷཱདྷིཔྤེཏམཏྠཾ དསྶེནྟོ ‘‘ཨིདྷ པནཱ’’ཏིཨཱདིམཱཧ. ཏཏྠ སབྦསངྑཏེཧཱིཏི སབྦེཧི པཙྩཡསམུཔྤནྣདྷམྨེཧི. སབྦེསནྟི སངྑཏདྷམྨཱནཾ. ཝིཝེཀཾ ཨཱརམྨཎཾ ཀཏྭཱཏི ནིབྦཱནསངྑཱཏཾ ཝིཝེཀཾ ཨཱརམྨཎཾ ཀཏྭཱ. ཏཉྩ ཁོཏི ཏདེཝ སཏིསམྦོཛ྄ཛྷངྒཾ.

༡༣. ཏཏིཡེ ཙིཏྟེཀགྒཏྠཱཡཱཏི ཙིཏྟསམཱདྷཱནཏྠཱཡ, དིཊྛདྷམྨེ སུཁཝིཧཱརཱཡཱཏི ཨཏྠོ. ཙིཏྟེཀགྒཏཱསཱིསེན ཧི དིཊྛདྷམྨསུཁཝིཧཱརོ ཝུཏྟོ. སུཀྑཝིཔསྶཀཁཱིཎཱསཝཱནཾ ཝསེན ཧེཏཾ ཝུཏྟཾ. ཏེ ཧི སམཱཔཛྫིཏྭཱ ‘‘ཨེཀགྒཙིཏྟཱ སུཁཾ དིཝསཾ ཝིཧརིསྶཱམཱ’’ཏི ཨིཙྩེཝ ཀསིཎཔརིཀམྨཾ ¶ ཀཏྭཱ ཨཊྛ སམཱཔཏྟིཡོ ནིབྦཏྟེནྟི. ཝིཔསྶནཱཔཱདཀཏྠཱཡཱཏིཨཱདཱིསུ པན སེཀྑཔུཐུཛྫནཱ ‘‘སམཱཔཏྟིཏོ ཝུཊྛཱཡ སམཱཧིཏེན ཙིཏྟེན ཝིཔསྶཱམཱ’’ཏི ནིབྦཏྟེནྟཱ ཝིཔསྶནཱཔཱདཀཏྠཱཡ བྷཱཝེནྟི.

ཡེ པན ཨཊྛ སམཱཔཏྟིཡོ ནིབྦཏྟེཏྭཱ ཨབྷིཉྙཱཔཱདཀཛ྄ཛྷཱནཾ སམཱཔཛྫིཏྭཱ སམཱཔཏྟིཏོ ཝུཊྛཱཡ ‘‘ཨེཀོཔི ཧུཏྭཱ བཧུདྷཱ ཧོཏཱི’’ཏི (དཱི. ནི. ༡.༢༣༨; མ. ནི. ༡.༡༤༧; སཾ. ནི. ༢.༧༠; ༥.༨༣༤, ༨༤༢) ཝུཏྟནཡཱ ¶ ཨབྷིཉྙཱཡོ པཏྠེནྟཱ ནིབྦཏྟེནྟི, ཏེ ཨབྷིཉྙཱཔཱདཀཏྠཱཡ བྷཱཝེནྟི. ཡེ ཨཊྛ སམཱཔཏྟིཡོ ནིབྦཏྟེཏྭཱ ནིརོདྷསམཱཔཏྟིཾ སམཱཔཛྫིཏྭཱ ‘‘སཏྟཱཧཾ ཨཙིཏྟཱ ཧུཏྭཱ དིཊྛེཝ དྷམྨེ ནིརོདྷཾ ནིབྦཱནཾ པཏྭཱ སུཁཾ ཝིཧརིསྶཱམཱ’’ཏི ནིབྦཏྟེནྟི, ཏེ ནིརོདྷཔཱདཀཏྠཱཡ བྷཱཝེནྟི. ཡེ པན ཨཊྛ སམཱཔཏྟིཡོ ནིབྦཏྟེཏྭཱ ‘‘ཨཔརིཧཱིནཛ྄ཛྷཱནཱ བྲཧྨལོཀེ ཨུཔྤཛྫིསྶཱམཱ’’ཏི ནིབྦཏྟེནྟི, ཏེ བྷཝཝིསེསཏྠཱཡ བྷཱཝེནྟི.

ཡུཏྟཾ ཏཱཝ ཙིཏྟེཀགྒཏཱཡ བྷཝཝིསེསཏྠཏཱ ཝིཡ ཝིཔསྶནཱཔཱདཀཏྠཏཱཔི ཙཏུཀྐཛ྄ཛྷཱནསཱདྷཱརཎཱཏི ཏེསཾ ཝསེན ‘‘ཙཏྟཱརི ཛྷཱནཱནཱི’’ཏི ཝཙནཾ, ཨབྷིཉྙཱཔཱདཀཏྠཏཱ པན ནིརོདྷཔཱདཀཏྠཏཱ ཙ ཙཏུཏྠསྶེཝ ཛྷཱནསྶ ཨཱཝེཎིཀཱ, སཱ ཀཐཾ ཙཏུཀྐཛ྄ཛྷཱནསཱདྷཱརཎཱ ཝུཏྟཱཏི? པརམྤརཱདྷིཊྛཱནབྷཱཝཏོ. པདཊྛཱནཔདཊྛཱནམྤི ཧི པདཊྛཱནནྟི ཝུཙྩཏི ཀཱརཎཀཱརཎནྟི ཡཐཱ ‘‘ཏིཎེཧི བྷཏྟཾ སིདྡྷ’’ནྟི.

༡༤. ཙཏུཏྠེ སསཀསྶ ཨུཔྤཏནཾ ཝིཡ ཧོཏཱིཏི པཐཝིཛིགུཙྪནསསཀསྶ ཨུཔྤཏནཾ ཝིཡ ཧོཏི. ཏཏྠཱཡཾ ཨཏྠསལླཱཔིཀཱ ཨུཔམཱ – པཐཝཱི ཀིར སསཀཾ ཨཱཧ – ‘‘ཧེ སསཀཱ’’ཏི. སསཀོ ཨཱཧ – ‘‘ཀོ ཨེསོ’’ཏི. ཀསྨཱ མམེཝ ཨུཔརི སབྦཨིརིཡཱཔཐེ ཀཔྤེནྟོ ཨུཙྩཱརཔསྶཱཝཾ ཀརོནྟོ མཾ ན ཛཱནཱསཱིཏི? སུཊྛུ ཏཡཱ ཨཧཾ དིཊྛོ, མཡཱ ཨཀྐནྟཊྛཱནཉྷི ཨངྒུལགྒེཧི ཕུཊྛཊྛཱནཾ ཝིཡ ཧོཏི, ཝིསྶཊྛཨུདཀཾ ཨཔྤམཏྟཀཾ, ཀརཱིསཾ ཀཊཀཕལམཏྟཾ, ཧཏྠིཨསྶཱདཱིཧི པན ཨཀྐནྟཊྛཱནམྤི མཧནྟཾ, པསྶཱཝོཔི ནེསཾ གྷཊམཏྟོ, ཨུཙྩཱརོཔི པཙྪིམཏྟོ ཧོཏི, ཨལཾ མཡ྄ཧཾ ཏཡཱཏི ཨུཔྤཏིཏྭཱ ཨཉྙསྨིཾ ཋཱནེ པཏིཏོ. ཏཏོ ནཾ པཐཝཱི ཨཱཧ – ‘‘ཨཧོ དཱུརཾ གཏོཔི ནནུ མཡ྄ཧཾཡེཝ ཨུཔརི པཏིཏོསཱི’’ཏི? སོ པུན ཏཾ ཛིགུཙྪནྟོ ཨུཔྤཏིཏྭཱ ཨཉྙཏྠ པཏིཏོ. ཨེཝཾ ཝསྶསཧསྶམྤི ཨུཔྤཏིཏྭཱ ཨུཔྤཏིཏྭཱ པཏམཱནོ སསཀོ ནེཝ པཐཝིཡཱ ཨནྟཾ པཱཔུཎིཏུཾ སཀྐོཏི. ན ཀོཊིནྟི ན པུབྦཀོཊིཾ. ཨིཏརེསནྟི ཝིཔཉྩིཏཉྙུནེཡྻཔདཔརམཱནཾ.

༡༥. པཉྩམེ ¶ སམཐེཧི ཨདྷིཀརཱིཡཏི ཝཱུཔསམྨཏཱིཏི ཨདྷིཀརཎཾ, ཨཊྛཱརས བྷེདཀརཝཏྠཱུནི ནིསྶཱཡ ཨུཔྤནྣོ ཝིཝཱདོཡེཝ ཝིཝཱདཱདྷིཀརཎཾ. ‘‘ཨིདྷ བྷིཀྑཱུ བྷིཀྑུཾ ཨནུཝདནྟི སཱིལཝིཔཏྟིཡཱ ཝཱ’’ཏིཨཱདིནཱ (ཙཱུལ༹ཝ. ༢༡༥) ཙཏསྶོ ¶ ཝིཔཏྟིཡོ ནིསྶཱཡ ཨུཔྤནྣོ ཨནུཝཱདོཡེཝ ཨནུཝཱདཱདྷིཀརཎཾ. པཉྩཔི ཨཱཔཏྟིཀྑནྡྷཱ ཨཱཔཏྟཱདྷིཀརཎཾ. ‘‘སཏྟཔི ཨཱཔཏྟིཀྑནྡྷཱ ཨཱཔཏྟཱདྷིཀརཎ’’ནྟི (ཙཱུལ༹ཝ. ༢༡༥) ཝཙནཏོ ཨཱཔཏྟིཡེཝ ཨཱཔཏྟཱདྷིཀརཎཾ. ‘‘ཡཱ སངྒྷསྶ ཀིཙྩཡཏཱ ཀརཎཱིཡཏཱ ཨཔལོཀནཀམྨཾ ཉཏྟིཀམྨཾ ཉཏྟིདུཏིཡཀམྨཾ ཉཏྟིཙཏུཏྠཀམྨ’’ནྟི (ཙཱུལ༹ཝ. ༢༡༥) ཨེཝམཱགཏཾ ཙཏུབྦིདྷཾ སངྒྷཀིཙྩཾ ཀིཙྩཱདྷིཀརཎནྟི ཝེདིཏབྦཾ. སེསམེཏྠ ཨུཏྟཱནམེཝ.

༡༦. ཚཊྛེ ཨཔཱཀཊནཱམོཏི ‘‘སེལོ, ཀཱུཊདནྟོ’’ཏིཨཱདིནཱ ཨནབྷིཉྙཱཏོ. ཡེན ཝཱ ཀཱརཎེནཱཏི ཧེཏུམྷི ཨིདཾ ཀརཎཝཙནཾ. ཧེཏུཨཏྠོ ཧི ཀིརིཡཱཀཱརཎཾ, ན ཀརཎཾ ཝིཡ ཀིརིཡཏྠོ, ཏསྨཱ ནཱནཔྤཀཱརགུཎཝིསེསཱདྷིགམཏྠཱ ཨིདྷ ཨུཔསངྐམནཀིརིཡཱཏི ‘‘ཨནྣེན ཝསཏི, ཨཛ྄ཛྷེནེན ཝསཏཱི’’ཏིཨཱདཱིསུ ཝིཡ ཧེཏུཨཏྠམེཝེཏཾ ཀརཎཝཙནཾ ཡུཏྟཾ, ན ཀརཎཏྠཾ ཏསྶ ཨཡུཛྫམཱནཏྟཱཏི ཝུཏྟཾ ‘‘ཡེན ཝཱ ཀཱརཎེནཱ’’ཏི. ཨཝིབྷཱགཏོ སཏཏཾ པཝཏྟིཏནིརཏིསཡསཱདུཝིཔུལཱམཏརསསདྡྷམྨཕལཏཱཡ སཱདུཕལནིཙྩཕལིཏམཧཱརུཀྑེན བྷགཝཱ ཨུཔམིཏོ. སཱདུཕལཱུཔབྷོགཱདྷིཔྤཱཡགྒཧཎེནེཝ ཧི རུཀྑསྶ སཱདུཕལཏཱ གཧིཏཱཏི. ཨུཔསངྐམཱིཏི ཨུཔསངྐནྟོ. སམྤཏྟཀཱམཏཱཡ ཧི ཀིཉྩི ཋཱནཾ གཙྪནྟོ ཏཾཏཾཔདེསཱཏིཀྐམནེན ཨུཔསངྐམི, ཨུཔསངྐནྟོཏི ཙ ཝཏྟབྦཏཾ ལབྷཏི. ཏེནཱཧ ‘‘གཏོཏི ཝུཏྟཾ ཧོཏཱི’’ཏི, ཨུཔགཏོཏི ཨཏྠོ. ཨུཔསངྐམིཏྭཱཏི པུབྦཀཱལཀིརིཡཱནིདྡེསོཏི ཨཱཧ ‘‘ཨུཔསངྐམནཔརིཡོསཱནདཱིཔན’’ནྟི. ཏཏོཏི ཡཾ ཋཱནཾ པཏྟོ ‘‘ཨུཔསངྐམཱི’’ཏི ཝུཏྟོ, ཏཏོ ཨུཔགཏཊྛཱནཏོ.

ཡཐཱ ཁམནཱིཡཱདཱིནི པུཙྪནྟོཏི ཡཐཱ བྷགཝཱ ‘‘ཀཙྩི ཏེ, བྲཱཧྨཎ, ཁམནཱིཡཾ, ཀཙྩི ཡཱཔནཱིཡ’’ནྟིཨཱདིནཱ ཁམནཱིཡཱདཱིནི པུཙྪནྟོ ཏེན བྲཱཧྨཎེན སདྡྷིཾ སམཔྤཝཏྟམོདོ ཨཧོསི པུབྦབྷཱསིཏཱཡ, ཨེཝཾ སོཔི བྲཱཧྨཎོ ཏདནུཀརཎེན བྷགཝཏཱ སདྡྷིཾ སམཔྤཝཏྟམོདོ ཨཧོསཱིཏི ཡོཛནཱ. ཏཾ པན སམཔྤཝཏྟམོདཏཾ ཨུཔམཱཡ དསྶེཏུཾ ‘‘སཱིཏོདཀཾ ཝིཡཱ’’ཏིཨཱདི ཝུཏྟཾ. ཏཏྠ སམྨོདིཏནྟི སཾསནྡིཏཾ. ཨེཀཱིབྷཱཝནྟི སམྨོདནཀིརིཡཱཡ སམཱནཏཾ. ཁམནཱིཡནྟི ‘‘ཨིདཾ ཙཏུཙཀྐཾ ནཝདྭཱརཾ སརཱིརཡནྟཾ དུཀྑབཧུལཏཱཡ སབྷཱཝཏོ དུསྶཧཾ, ཀཙྩི ཁམིཏུཾ སཀྐུཎེཡྻ’’ནྟི ¶ པུཙྪཏི. ཡཱཔནཱིཡནྟི ཨཱཧཱརཱདིཔྤཊིབདྡྷཝུཏྟིཀཾ ཙིརཔྤབནྡྷསངྑཱཏཱཡ ཡཱཔནཱཡ ཀཙྩི ཡཱཔེཏུཾ སཀྐུཎེཡྻཾ. སཱིསརོགཱདིཨཱབཱདྷཱབྷཱཝེན ཀཙྩི ཨཔྤཱབཱདྷཾ. དུཀྑཛཱིཝིཀཱབྷཱཝེན ཀཙྩི ཨཔྤཱཏངྐཾ. ཏཾཏཾཀིཙྩཀརཎེ ཨུཊྛཱནསུཁཏཱཡ ཀཙྩི ལཧུཊྛཱནཾ. ཏདནུརཱུཔབལཡོགཏོ ཀཙྩི བལཾ ¶ . སུཁཝིཧཱརསམྦྷཝེན ཀཙྩི ཕཱསུཝིཧཱརོ ཨཏྠཱིཏི སབྦཏྠ ཀཙྩི-སདྡཾ ཡོཛེཏྭཱ ཨཏྠོ ཝེདིཏབྦོ.

བལཔྤཏྟཱ པཱིཏི པཱིཏིཡེཝ. ཏརུཎཔཱིཏི པཱམོཛྫཾ. སམྨོདཾ ཛནེཏི ཀརོཏཱིཏི སམྨོདནཱིཀཾ, ཏདེཝ སམྨོདནཱིཡཾ. སམྨོདིཏབྦཏོ སམྨོདནཱིཡནྟི ཨིམཾ པན ཨཏྠཾ དསྶེཏུཾ ‘‘སམྨོདིཏུཾ ཡུཏྟབྷཱཝཏོ’’ཏི ཨཱཧ. སརིཏབྦབྷཱཝཏོཏི ཨནུསྶརིཏབྦབྷཱཝཏོ. ‘‘སརཎཱིཡ’’ནྟི ཝཏྟབྦེ དཱིགྷཾ ཀཏྭཱ ‘‘སཱརཎཱིཡ’’ནྟི ཝུཏྟཾ. སུཡྻམཱནསུཁཏོཏི ཨཱཔཱཐགཏམདྷུརཏཾ ཨཱཧ, ཨནུསྶརིཡམཱནསུཁཏོཏི ཝིམདྡརམཎཱིཡཏཾ. བྱཉྫནཔརིསུདྡྷཏཱཡཱཏི སབྷཱཝནིརུཏྟིབྷཱཝེན ཏསྶཱ ཀཐཱཡ ཝཙནཙཱཏུརིཡམཱཧ. ཨཏྠཔརིསུདྡྷཏཱཡཱཏི ཨཏྠསྶ ནིརུཔཀྐིལེསཏཾ. ཨནེཀེཧི པརིཡཱཡེཧཱིཏི ཨནེཀེཧི ཀཱརཎེཧི.

ཨཏིདཱུརཨཙྩཱསནྣཔྤཊིཀྑེཔེན ནཱཏིདཱུརཾ ནཙྩཱསནྣཾ ནཱམ གཧིཏཾ, ཏཾ པན ཨཝཀཾསཏོ ཨུབྷིནྣཾ པསཱརིཏཧཏྠཱསངྒྷཊྚནེན དཊྛབྦཾ. གཱིཝཾ པསཱརེཏྭཱཏི གཱིཝཾ པརིཝཊྚནཝསེན པསཱརེཏྭཱ.

ཨེཏདཝོཙཱཏི ཨེཏཾ ‘‘ཀོ ནུ ཁོ, བྷནྟེ, ཧེཏཱུ’’ཏིཨཱདིཔུཙྪཱཝཙནཾ ཨཝོཙ. ཏེནེཝ ‘‘ཨེཏདཝོཙཱ’’ཏི པདཾ ཨུདྡྷརིཏྭཱ དུཝིདྷཱ ཧི པུཙྪཱཏིཨཱདིནཱ པུཙྪཱཝིབྷཱགཾ དསྶེཏི. ཏཏྠ ཨགཱརེ ནིཡུཏྟོ ཨགཱརིཀོ, ཏསྶ པུཙྪཱ ཨགཱརིཀཔུཙྪཱ. ཨགཱརིཀཏོ ཨཉྙོ ཨནགཱརིཀོ པབྦཛྫཱུཔགཏོ, ཏསྶ པུཙྪཱ ཨནགཱརིཀཔུཙྪཱ. ཀིཉྩཱཔི ཨཉྙཏྠ ‘‘ཛནཀོ ཧེཏུ, པགྒཱཧཀོ པཙྩཡོ. ཨསཱདྷཱརཎོ ཧེཏུ, སཱདྷཱརཎོ པཙྩཡོ. སབྷཱགོ ཧེཏུ, ཨསབྷཱགོ པཙྩཡོ. པུབྦཀཱལིཀོ ཧེཏུ, སཧཔཝཏྟོ པཙྩཡོ’’ཏིཨཱདིནཱ ཧེཏུཔཙྩཡཱ ཝིབྷཛྫ ཝུཙྩནྟི. ཨིདྷ པན ‘‘ཙཏྟཱརོ ཁོ, བྷིཀྑཝེ, མཧཱབྷཱུཏཱ ཧེཏུ ཙཏྟཱརོ མཧཱབྷཱུཏཱ པཙྩཡོ རཱུཔཀྑནྡྷསྶ པཉྙཱཔནཱཡཱ’’ཏིཨཱདཱིསུ (མ. ནི. ༣.༨༦) ཝིཡ ཧེཏུཔཙྩཡསདྡཱ སམཱནཏྠཱཏི དསྶེནྟོ ‘‘ཨུབྷཡམྤེཏཾ ཀཱརཎཝེཝཙནམེཝཱ’’ཏི ཨཱཧ. ཝིསམཙརིཡཱཏི བྷཱཝནཔུཾསཀནིདྡེསོ.

ཨབྷིཀྐནྟཱཏི ¶ ཨཏིཀྐནྟཱ, ཝིགཏཱཏི ཨཏྠོཏི ཨཱཧ ‘‘ཁཡེ དིསྶཏཱི’’ཏི. ཏཐཱ ཧི ‘‘ནིཀྑནྟོ པཋམོ ཡཱམོ’’ཏི ཨུཔརི ཝུཏྟཾ. ཨབྷིཀྐནྟཏརོཏི ཨཏིཝིཡ ཀནྟཏརོ མནོརམོ, ཏཱདིསོ ཙ སུནྡརོ བྷདྡཀོ ནཱམ ཧོཏཱིཏི ཨཱཧ ‘‘སུནྡརེ དིསྶཏཱི’’ཏི. ཀོཏི དེཝནཱགཡཀྑགནྡྷབྦཱདཱིསུ ཀོ ཀཏམོ? མེཏི མམ. པཱདཱནཱིཏི པཱདེ. ཨིདྡྷིཡཱཏི ཨིམཱཡ ཨེཝརཱུཔཱཡ དེཝིདྡྷིཡཱ. ཡསསཱཏི ཨིམིནཱ ཨེདིསེན པརིཝཱརེན པརིཙྪེདེན ཙ. ཛལནྟི ཝིཛྫོཏམཱནོ. ཨབྷིཀྐནྟེནཱཏི ཨཏིཝིཡ ཀནྟེན ཀམནཱིཡེན ཨབྷིརཱུཔེན. ཝཎྞེནཱཏི ཚཝིཝཎྞེན ¶ སརཱིརཝཎྞནིབྷཱཡ. སབྦཱ ཨོབྷཱསཡཾ དིསཱཏི དས དིསཱ པབྷཱསེནྟོ, ཙནྡོ ཝིཡ སཱུརིཡོ ཝིཡ ཙ ཨེཀོབྷཱསཾ ཨེཀཱལོཀཾ ཀརོནྟོཏི གཱཐཱཡ ཨཏྠོ. ཨབྷིརཱུཔེཏི ཨུལཱ༹རརཱུཔེ སམྤནྣརཱུཔེ.

‘‘ཙོརོ, ཙོརོ; སཔྤོ, སཔྤོ’’ཏིཨཱདཱིསུ བྷཡེ ཨཱམེཌིཏཾ. ‘‘ཝིཛ྄ཛྷ, ཝིཛ྄ཛྷ; པཧར, པཧརཱ’’ཏིཨཱདཱིསུ ཀོདྷེ. ‘‘སཱདྷུ, སཱདྷཱུ’’ཏིཨཱདཱིསུ (མ. ནི. ༣༢༧.སཾ. ནི. ༢.༡༢༧; ༣.༣༥; ༥.༡༠༨༥) པསཾསཱཡཾ. ‘‘གཙྪ, གཙྪ; ལུནཱཧི, ལུནཱཧཱི’’ཏིཨཱདཱིསུ ཏུརིཏེ. ‘‘ཨཱགཙྪ, ཨཱགཙྪཱ’’ཏིཨཱདཱིསུ ཀོཏཱུཧལེ. ‘‘བུདྡྷོ, བུདྡྷོཏི ཙིནྟེནྟོ’’ཏིཨཱདཱིསུ (བུ. ཝཾ. ༢.༤༤) ཨཙྪརེ. ‘‘ཨབྷིཀྐམཐཱཡསྨནྟོ, ཨབྷིཀྐམཐཱཡསྨནྟོ’’ཏིཨཱདཱིསུ ཧཱསེ. ‘‘ཀཧཾ ཨེཀཔུཏྟཀ, ཀཧཾ ཨེཀཔུཏྟཀཱ’’ཏིཨཱདཱིསུ (མ. ནི. ༢.༣༥༣; སཾ. ནི. ༢.༦༣) སོཀེ. ‘‘ཨཧོ སུཁཾ, ཨཧོ སུཁ’’ནྟིཨཱདཱིསུ (ཨུདཱ. ༢༠; དཱི. ནི. ༣.༣༠༥; ཙཱུལ༹ཝ. ༣༣༢) པསཱདེ. ཙ-སདྡོ ཨཝུཏྟསམུཙྩཡཏྟོ. ཏེན གརཧཱཨསམྨཱནཱདཱིནཾ སངྒཧོ དཊྛབྦོ. ཏཏྠ ‘‘པཱཔོ, པཱཔོ’’ཏིཨཱདཱིསུ གརཧཱཡཾ. ‘‘ཨབྷིརཱུཔཀ, ཨབྷིརཱུཔཀཱ’’ཏིཨཱདཱིསུ ཨསམྨཱནེ དཊྛབྦཾ.

ནཡིདཾ ཨཱམེཌིཏཝསེན དྭིཀྑཏྟུཾ ཝུཏྟཾ, ཨཐ ཁོ ཨཏྠདྭཡཝསེནཱཏི དསྶེནྟོ ‘‘ཨཐ ཝཱ’’ཏིཨཱདིམཱཧ. ‘‘ཨབྷིཀྐནྟ’’ནྟི ཝཙནཾ ཨཔེཀྑིཏྭཱ ནཔུཾསཀཝསེན ཝུཏྟཾ, ཏཾ པན བྷགཝཏོ ཝཙནཾ དྷམྨསྶ དེསནཱཏི ཀཏྭཱ ཏཐཱ ཝུཏྟཾ ‘‘བྷོཏོ གོཏམསྶ དྷམྨདེསནཱ’’ཏི. དུཏིཡཔདེཔི ཨེསེཝ ནཡོ. དོསནཱསནཏོཏི རཱགཱདིཀིལེསཝིདྷམནཏོ. གུཎཱདྷིགམནཏོཏི སཱིལཱདིགུཎཱནཾ སམྤཱཔནཏོ. ཡེ གུཎེ དེསནཱ ཨདྷིགམེཏི, ཏེསུ པདྷཱནབྷཱུཏེ ཏཱཝ དསྶེཏུཾ ‘‘སདྡྷཱཛནནཏོ པཉྙཱཛནནཏོ’’ཏི ཝུཏྟཾ. སདྡྷཱཔམུཁཱ ཧི ལོཀིཡཱ གུཎཱ, པཉྙཱཔམུཁཱ ལོཀུཏྟརཱ ¶ .

སཱིལཱདིཨཏྠསམྤཏྟིཡཱ སཱཏྠཏོ, སབྷཱཝནིརུཏྟིསམྤཏྟིཡཱ སབྱཉྫནཏོ. སུཝིཉྙེཡྻསདྡཔྤཡོགཏཱཡ ཨུཏྟཱནཔདཏོ, སཎྷསུཁུམབྷཱཝེན དུཝིཉྙེཡྻཏྠཏཱཡ གམྦྷཱིརཏྠཏོ. སིནིདྡྷམུདུམདྷུརསདྡཔྤཡོགཏཱཡ ཀཎྞསུཁཏོ, ཝིཔུལཝིསུདྡྷཔེམནཱིཡཏྠཏཱཡ ཧདཡངྒམཏོ. མཱནཱཏིམཱནཝིདྷམནེན ཨནཏྟུཀྐཾསནཏོ, ཐམྦྷསཱརམྦྷནིམྨདྡནེན ཨཔརཝམྦྷནཏོ. ཧིཏཱདྷིཔྤཱཡཔྤཝཏྟིཡཱ པརེསཾ རཱགཔརིལཱ༹ཧཱདིཝཱུཔསམནེན ཀརུཎཱསཱིཏལཏོ, ཀིལེསནྡྷཀཱརཝིདྷམནེན པཉྙཱཝདཱཏཏོ. ཀརཝཱིཀརུཏམཉྫུཏཱཡ ཨཱཔཱཐརམཎཱིཡཏོ, པུབྦཱཔརཱཝིརུདྡྷསུཝིསུདྡྷཏྠཏཱཡ ཝིམདྡཀྑམཏོ. ཨཱཔཱཐརམཎཱིཡཏཱཡ ཨེཝཾ སུཡྻམཱནསུཁཏོ, ཝིམདྡཀྑམཏཱཡ ཧིཏཛ྄ཛྷཱསཡཔྤཝཏྟིཏཏཱཡ ཙ ཝཱིམཾསིཡམཱནཧིཏཏོ ¶ . ཨེཝམཱདཱིཧཱིཏི ཨཱདི-སདྡེན སཾསཱརཙཀྐནིཝཏྟནཏོ, སདྡྷམྨཙཀྐཔྤཝཏྟནཏོ, མིཙྪཱཝཱདཝིགམནཏོ, སམྨཱཝཱདཔཏིཊྛཱཔནཏོ, ཨཀུསལམཱུལསམུདྡྷརཎཏོ, ཀུསལམཱུལསཾརོཔནཏོ, ཨཔཱཡདྭཱརཔིདྷཱནཏོ, སགྒམོཀྑདྭཱརཝིཝརཎཏོ, པརིཡུཊྛཱནཝཱུཔསམནཏོ, ཨནུསཡསམུགྒྷཱཏནཏོཏི ཨེཝམཱདཱིནཾ སངྒཧོ དཊྛབྦོ.

ཨདྷོམུཁཊྛཔིཏནྟི ཀེནཙི ཨདྷོམུཁཾ ཋཔིཏཾ. ཧེཊྛཱམུཁཛཱཏནྟི སབྷཱཝེནེཝ ཧེཊྛཱམུཁཛཱཏཾ. ཨུཔརིམུཁནྟི ཨུདྡྷཾམུཁཾ. ཨུགྒྷཱཊེཡྻཱཏི ཝིཝཊཾ ཀརེཡྻ. ཧཏྠེ གཧེཏྭཱཏི ‘‘པུརཏྠཱབྷིམུཁོ ཨུཏྟརཱབྷིམུཁོ ཝཱ གཙྪཱ’’ཏིཨཱདཱིནི ཨཝཏྭཱ ཧཏྠེ གཧེཏྭཱ ‘‘ནིསྶནྡེཧཾ ཨེས མགྒོ, ཨེཝཾ གཙྪེཡྻཱ’’ཏི ཝདེཡྻ. ཀཱལ༹པཀྑཙཱཏུདྡསཱིཏི ཀཱལ༹པཀྑེ ཙཱཏུདྡསཱི.

ནིཀྐུཛྫིཏཾ ཨཱདྷེཡྻསྶ ཨནཱདྷཱརབྷཱུཏཾ བྷཱཛནཾ ཨཱདྷཱརབྷཱཝཱཔཱདནཝསེན ཨུཀྐུཛྫེཡྻ. ཧེཊྛཱམུཁཛཱཏཏཱཡ སདྡྷམྨཝིམུཁཾ, ཨདྷོམུཁཋཔིཏཏཱཡ ཨསདྡྷམྨེ པཏིཏནྟི ཨེཝཾ པདདྭཡཾ ཡཐཱརཧཾ ཡོཛེཏབྦཾ, ན ཡཐཱསངྑྱཾ. ཀཱམཾ ཀཱམཙྪནྡཱདཡོཔི པཊིཙྪཱདཀཱ ནཱིཝརཎབྷཱཝཏོ, མིཙྪཱདིཊྛི པན སཝིསེསཾ པཊིཙྪཱདིཀཱ སཏྟེ མིཙྪཱབྷིནིཝེསནཝསེནཱཏི ཨཱཧ ‘‘མིཙྪཱདིཊྛིགཧནཔཊིཙྪནྣ’’ནྟི. ཏེནཱཧ བྷགཝཱ ‘‘མིཙྪཱདིཊྛིཔརམཱཧཾ, བྷིཀྑཝེ, ཝཛྫཾ ཝདཱམཱི’’ཏི (ཨ. ནི. ༡.༣༡༠). སབྦོ ཨཔཱཡགཱམིམགྒོ ཀུམྨགྒོ ‘‘ཀུཙྪིཏོ མགྒོ’’ཏི ཀཏྭཱ. སམྨཱདིཊྛིཨཱདཱིནཾ ཨུཛུཔཊིཔཀྑཏཱཡ མིཙྪཱདིཊྛིཨཱདཡོ ཨཊྛ མིཙྪཏྟདྷམྨཱ མིཙྪཱམགྒོ. ཏེནེཝ ཧི ཏདུབྷཡཔྤཊིཔཀྑཏཾ སནྡྷཱཡ ‘‘སགྒམོཀྑམགྒཾ ཨཱཝིཀརོནྟེནཱ’’ཏི ཝུཏྟཾ. སཔྤིཨཱདིསནྣིསྶཡོ པདཱིཔོ ¶ ན ཏཐཱ ཨུཛྫལོ, ཡཐཱ ཏེལསནྣིསྶཡོཏི ཏེལཔཛྫོཏགྒཧཎཾ. ཨེཏེཧི པརིཡཱཡེཧཱིཏི ཨེཏེཧི ནིཀྐུཛྫིཏུཀྐུཛྫནཔྤཊིཙྪནྣཝིཝརཎཱདིཨུཔམོཔམིཏབྦཱཀཱརེཧི.

པསནྣཀཱརནྟི པསནྣེཧི ཀཱཏབྦཾ སཀྐཱརཾ. སརཎནྟི པཊིསརཎཾ. ཏེནཱཧ ‘‘པརཱཡཎ’’ནྟི. པརཱཡཎབྷཱཝོ ཙ ཨནཏྠནིསེདྷནེན ཨཏྠསམྤཊིཔཱདནེན ཙ ཧོཏཱིཏི ཨཱཧ ‘‘ཨགྷསྶ, ཏཱཏཱ, ཧིཏསྶ ཙ ཝིདྷཱཏཱ’’ཏི. ཨགྷསྶཱཏི དུཀྑཏོཏི ཝདནྟི, པཱཔཏོཏི པན ཨཏྠོ ཡུཏྟོ. ནིསྶཀྐེ ཙེཏཾ སཱམིཝཙནཾ. ཨེཏྠ ཙ ནཱཡཾ གམི-སདྡོ ནཱི-སདྡཱདཡོ ཝིཡ དྭིཀམྨཀོ, ཏསྨཱ ཡཐཱ ‘‘ཨཛཾ གཱམཾ ནེཏཱི’’ཏི ཝུཙྩཏི, ཨེཝཾ ‘‘བྷགཝནྟཾ སརཎཾ གཙྪཱམཱི’’ཏི ཝཏྟུཾ ན སཀྐཱ. ‘‘སརཎནྟི གཙྪཱམཱི’’ཏི པན ཝཏྟབྦཾ. ཨིཏི-སདྡོ ཙེཏྠ ལུཏྟནིདྡིཊྛོ. ཏསྶ ཙཱཡམཏྠོ – གམནཉྩ ཏདདྷིཔྤཱཡེན བྷཛནཾ ཛཱནནཾ ཝཱཏི དསྶེནྟོ ‘‘ཨིཏི ཨིམིནཱ ཨདྷིཔྤཱཡེནཱ’’ཏིཨཱདིམཱཧ. ཏཏྠ བྷཛཱམཱིཏིཨཱདཱིསུ པུརིམསྶ པུརིམསྶ པཙྪིམཾ པཙྪིམཾ ཨཏྠཝཙནཾ. བྷཛནཾ ཝཱ སརཎཱདྷིཔྤཱཡེན ཨུཔསངྐམནཾ. སེཝནཾ སནྟིཀཱཝཙརཏཱ. པཡིརུཔཱསནཾ ཝཏྟཔྤཊིཝཏྟཀརཎེན ཨུཔཊྛཱནནྟི ¶ ཨེཝཾ སབྦཐཱཔི ཨནཉྙསརཎཏཾཡེཝ དཱིཔེཏི. ‘‘གཙྪཱམཱི’’ཏི པདསྶ བུཛ྄ཛྷཱམཱིཏི ཨཡམཏྠོ ཀཐཾ ལབྦྷཏཱིཏི ཨཱཧ ‘‘ཡེསཾ ཧཱི’’ཏིཨཱདི.

ཨདྷིགཏམགྒེ སཙྪིཀཏནིརོདྷེཏི པདདྭཡེནཔི ཕལཊྛཱ ཨེཝ དསྶིཏཱ, ན མགྒཊྛཱཏི ཏེ དསྶེནྟོ ‘‘ཡཐཱནུསིཊྛཾ པཊིཔཛྫམཱནེ ཙཱ’’ཏི ཨཱཧ. ནནུ ཙ ཀལྱཱཎཔུཐུཛྫནོཔི ཡཐཱནུསིཊྛཾ པཊིཔཛྫཏཱིཏི ཝུཙྩཏཱིཏི? ཀིཉྩཱཔི ཝུཙྩཏི, ནིཔྤརིཡཱཡེན པན མགྒཊྛཱ ཨེཝ ཏཐཱ ཝཏྟབྦཱ, ན ཨིཏརེ སམྨཏྟནིཡཱམོཀྐམནཱབྷཱཝཏོ. ཏཐཱ ཧི ཏེ ཨེཝ ཝུཏྟཱ ‘‘ཨཔཱཡེསུ ཨཔཏམཱནེ དྷཱརེཏཱི’’ཏི. སམྨཏྟནིཡཱམོཀྐམནེན ཧི ཨཔཱཡཝིནིམུཏྟིསམྦྷཝོ. ཨཀྑཱཡཏཱིཏི ཨེཏྠ ཨིཏི-སདྡོ ཨཱདྱཏྠོ, པཀཱརཏྠོ ཝཱ. ཏེན ‘‘ཡཱཝཏཱ, བྷིཀྑཝེ, དྷམྨཱ སངྑཏཱ ཝཱ ཨསངྑཏཱ ཝཱ, ཝིརཱགོ ཏེསཾ ཨགྒམཀྑཱཡཏཱི’’ཏི (ཨིཏིཝུ. ༩༠; ཨ. ནི. ༤.༣༤) སུཏྟཔདཾ སངྒཎྷཱཏི, ‘‘ཝིཏྠཱརོ’’ཏི ཝཱ ཨིམིནཱ. ཨེཏྠ ཙ ཨརིཡམགྒོ ནིཡྻཱནིཀཏཱཡ, ནིབྦཱནཾ ཏསྶ ཏདཏྠསིདྡྷིཧེཏུཏཱཡཱཏི ཨུབྷཡམེཝ ནིཔྤརིཡཱཡེན དྷམྨོཏི ཝུཏྟོ. ནིབྦཱནཉྷི ཨཱརམྨཎཔཙྩཡབྷཱུཏཾ ལབྷིཏྭཱ ཨརིཡམགྒོ ཏདཏྠསིདྡྷིཡཱ སཾཝཏྟཏི, ཏཐཱཔི ཡསྨཱ ཨརིཡཕལཱནཾ ‘‘ཏཱཡ སདྡྷཱཡ ཨཝཱུཔསནྟཱཡཱ’’ཏིཨཱདིཝཙནཏོ མགྒེན ¶ སམུཙྪིནྣཱནཾ ཀིལེསཱནཾ པཊིཔྤསྶདྡྷིཔྤཧཱནཀིཙྩཏཱཡ ནིཡྻཱནཱནུགུཎཏཱཡ ནིཡྻཱནཔརིཡོསཱནཏཱཡ ཙ. པརིཡཏྟིདྷམྨསྶ པན ནིཡྻཱནིཀདྷམྨསམདྷིགམཧེཏུཏཱཡཱཏི ཨིམིནཱ པརིཡཱཡེན ཝུཏྟནཡེན དྷམྨབྷཱཝོ ལབྦྷཏི ཨེཝ. སྭཱཡམཏྠོ པཱཋཱརུལ༹ྷོ ཨེཝཱཏི དསྶེནྟོ ‘‘ན ཀེཝལ’’ནྟིཨཱདིམཱཧ.

ཀཱམརཱགོ བྷཝརཱགོཏི ཨེཝམཱདིབྷེདོ སབྦོཔི རཱགོ ཝིརཛྫཏི པཧཱིཡཏི ཨེཏེནཱཏི རཱགཝིརཱགོཏི མགྒོ ཀཐིཏོ. ཨེཛཱསངྑཱཏཱཡ ཏཎྷཱཡ ཨནྟོནིཛ྄ཛྷཱནལཀྑཎསྶ སོཀསྶ ཙ ཏདུཔྤཏྟིཡཾ སབྦསོ པརིཀྑཱིཎཏྟཱ ཨནེཛམསོཀནྟི ཕལཾ ཀཐིཏཾ. ཨཔྤཊིཀཱུལནྟི ཨཝིརོདྷདཱིཔནཏོ ཀེནཙི ཨཝིརུདྡྷཾ, ཨིཊྛཾ པཎཱིཏནྟི ཝཱ ཨཏྠོ. པགུཎརཱུཔེན པཝཏྟིཏཏྟཱ, པཀཊྛགུཎཝིབྷཱཝནཏོ ཝཱ པགུཎཾ. སབྦདྷམྨཀྑནྡྷཱ ཀཐིཏཱཏི ཡོཛནཱ.

དིཊྛིསཱིལསངྒྷཱཏེནཱཏི ‘‘ཡཱཡཾ དིཊྛི ཨརིཡཱ ནིཡྻཱནིཀཱ ནིཡྻཱཏི ཏཀྐརསྶ སམྨཱ དུཀྑཀྑཡཱཡ, ཏཐཱརཱུཔཱཡ དིཊྛིཡཱ དིཊྛིསཱམཉྙགཏོ ཝིཧརཏཱི’’ཏི (དཱི. ནི. ༣.༣༢༤, ༣༥༧; མ. ནི. ༡.༤༩༢; ༣.༥༤; ཨ. ནི. ༦.༡༢; པརི. ༢༧༤) ཨེཝཾ ¶ ཝུཏྟཱཡ དིཊྛིཡཱ, ‘‘ཡཱནི ཏཱནི སཱིལཱནི ཨཁཎྜཱནི ཨཙྪིདྡཱནི ཨསབལཱནི ཨཀམྨཱསཱནི བྷུཛིསྶཱནི ཝིཉྙུཔྤསཏྠཱནི ཨཔརཱམཊྛཱནི སམཱདྷིསཾཝཏྟནིཀཱནི, ཏཐཱརཱུཔེཧི སཱིལེཧི སཱིལསཱམཉྙགཏོ ཝིཧརཏཱི’’ཏི (དཱི. ནི. ༣.༣༢༤; མ. ནི. ༡.༤༩༢; ༣.༥༤; ཨ. ནི. ༦.༡༢; པརི. ༢༧༤) ཙ ཨེཝཾ ཝུཏྟཱནཾ སཱིལཱནཉྩ སཾཧཏབྷཱཝེན, དིཊྛིསཱིལསཱམཉྙེནཱཏི ཨཏྠོ. སཾཧཏོཏི གྷཊིཏོ, སམེཏོཏི ཨཏྠོ. ཨརིཡཔུགྒལཱ ཧི ཡཏྠ ཀཏྠཙི དཱུརེ ཋིཏཱཔི ཨཏྟནོ གུཎསཱམགྒིཡཱ སཾཧཏཱ ཨེཝ. ཨཊྛ ཙ པུགྒལ དྷམྨདསཱ ཏེཏི ཏེ པུརིསཡུགཝསེན ཙཏྟཱརོཔི པུགྒལཝསེན ཨཊྛེཝ ཨརིཡདྷམྨསྶ པཙྩཀྑདསྶཱཝིཏཱཡ དྷམྨདསཱ. ཏཱིཎི ཝཏྠཱུནི སརཎནྟི གམནེན ཏིཀྑཏྟུཾ གམནེན ཙ ཏཱིཎི སརཎགམནཱནི. པཊིཝེདེསཱིཏི ཨཏྟནོ ཧདཡགཏཾ ཝཱཙཱཡ པཝེདེསི.

སརཎགམནསྶ ཝིསཡཔྤབྷེདཕལསཾཀིལེསབྷེདཱནཾ ཝིཡ ཀཏྟུཝིབྷཱཝནཱ ཏཏྠ ཀོསལླཱཡ ཧོཏཱིཏི སརཎགམནེསུ ཨཏྠཀོསལླཏྠཾ ‘‘སརཎཾ, སརཎགམནཾ, ཡོ ཙ སརཎཾ གཙྪཏི, སརཎགམནཔྤབྷེདོ, སརཎགམནཕལཾ, སཾཀིལེསོ, བྷེདོཏི ཨཡཾ ཝིདྷི ཝེདིཏབྦོ’’ཏི ¶ ཝུཏྟཾ ཏེན ཝིནཱ སརཎགམནསྶེཝ ཨསམྦྷཝཏོ. ཀསྨཱ པནེཏྠ ཝོདཱནཾ ན གཧིཏཾ, ནནུ ཝོདཱནཝིབྷཱཝནཱཔི ཏཏྠ ཀོསལླཱཡ ཧོཏཱིཏི? སཙྩམེཏཾ, ཏཾ པན སཾཀིལེསགྒཧཎེན ཨཏྠཏོ དཱིཔིཏཾ ཧོཏཱིཏི ན གཧིཏཾ. ཡཱནི ཧི ནེསཾ སཾཀིལེསཀཱརཎཱནི ཨཉྙཱཎཱདཱིནི, ཏེསཾ སབྦེན སབྦཾ ཨནུཔྤནྣཱནཾ ཨནུཔྤཱདནེན, ཨུཔྤནྣཱནཉྩ པཧཱནེན ཝོདཱནཾ ཧོཏཱིཏི.

ཧིཾསཏྠསྶ དྷཱཏུསདྡསྶ ཝསེནེཏཾ པདཾ དཊྛབྦནྟི ‘‘ཧིཾསཏཱིཏི སརཎ’’ནྟི ཝཏྭཱ ཏཾ པན ཧིཾསནཾ ཀེསཾ, ཀཐཾ, ཀསྶ ཝཱཏི ཙོདནཾ སོདྷེནྟོ ‘‘སརཎགཏཱན’’ནྟིཨཱདིམཱཧ. ཏཏྠ བྷཡནྟི ཝཊྚབྷཡཾ. སནྟཱསནྟི ཙིཏྟུཏྲཱསཾ. ཏེནེཝ ཙེཏསིཀདུཀྑསྶ གཧིཏཏྟཱ དུཀྑནྟི ཀཱཡིཀཾ དུཀྑཾ. དུགྒཏིཔརིཀིལེསནྟི དུགྒཏིཔརིཡཱཔནྣཾ སབྦམྤི དུཀྑཾ. ཏཡིདཾ སབྦཾ པརཏོ ཕལཀཐཱཡ ཨཱཝི བྷཝིསྶཏི. ཨེཏནྟི སརཎནྟི པདཾ. ཨེཝཾ ཨཝིསེསཏོ སརཎསདྡསྶ པདཏྠཾ དསྶེཏྭཱ ཨིདཱནི ཝིསེསཏོ དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ. ཧིཏེ པཝཏྟནེནཱཏི ‘‘སམྤནྣསཱིལཱ, བྷིཀྑཝེ, ཝིཧརཐཱ’’ཏིཨཱདིནཱ (མ. ནི. ༡.༦༤, ༦༩) ཨཏྠེ ནིཡོཛནེན. ཨཧིཏཱ ནིཝཏྟནེནཱཏི ‘‘པཱཎཱཏིཔཱཏསྶ ཁོ པཱཔཀོ ཝིཔཱཀོ ཨབྷིསམྤརཱཡ’’ནྟིཨཱདིནཱ ཨཱདཱིནཝདསྶནཱདིམུཁེན ཨནཏྠཏོ ནིཝཏྟནེན. བྷཡཾ ཧིཾསཏཱིཏི ཧིཏཱཧིཏེསུ ཨཔྤཝཏྟིཔྤཝཏྟིཧེཏུཀཾ བྱསནཾ ཨཔྤཝཏྟིཀརཎེན ཝིནཱསེཏི བུདྡྷོ. བྷཝཀནྟཱརཱ ཨུཏྟཱརཎེན མགྒསངྑཱཏོ དྷམྨོ. ཨིཏརོ ཨསྶཱསདཱནེན སཏྟཱནཾ བྷཡཾ ཧིཾསཏཱིཏི ཡོཛནཱ. ཀཱརཱནནྟི དཱནཝསེན པཱུཛཱཝསེན ཙ ཨུཔནཱིཏཱནཾ སཀྐཱརཱནཾ. ཝིཔུལཕལཔྤཊིལཱབྷཀརཎེན སཏྟཱནཾ བྷཡཾ ཧིཾསཏི སངྒྷོ ཨནུཏྟརདཀྑིཎེཡྻབྷཱཝཏོཏི ཨདྷིཔྤཱཡོ. ཨིམིནཱཔི པརིཡཱཡེནཱཏི ཨིམིནཱཔི ཝིབྷཛིཏྭཱ ཝུཏྟེན ཀཱརཎེན.

‘‘སམྨཱསམྦུདྡྷོ ¶ བྷགཝཱ, སྭཱཀྑཱཏོ དྷམྨོ, སུཔྤཊིཔནྣོ སངྒྷོ’’ཏི ཨེཝཾ པཝཏྟོ ཏཏྠ རཏནཏྟཡེ པསཱདོ ཏཔྤསཱདོ, ཏདེཝ རཏྟནཏྟཡཾ གརུ ཨེཏསྶཱཏི ཏགྒརུ, ཏབྦྷཱཝོ ཏགྒརུཏཱ, ཏཔྤསཱདོ ཙ ཏགྒརུཏཱ ཙ ཏཔྤསཱདཏགྒརུཏཱ. ཏཱཧི ཏཔྤསཱདཏགྒརུཏཱཧི. ཝིདྷུཏདིཊྛིཝིཙིཀིཙྪཱསམྨོཧཨསྶདྡྷིཡཱདིཏཱཡ ཝིཧཏཀིལེསོ. ཏདེཝ རཏནཏྟཡཾ པརཱཡཎཾ གཏི ཏཱཎཾ ལེཎནྟི ཨེཝཾ པཝཏྟིཡཱ ཏཔྤརཱཡཎཏཱཀཱརཔྤཝཏྟོ ཙིཏྟུཔྤཱདོ ¶ སརཎགམནཾ སརཎནྟི གཙྪཏི ཨེཏེནཱཏི. ཏཾསམངྒཱིཏི ཏེན ཡཐཱཝུཏྟཙིཏྟུཔྤཱདེན སམནྣཱགཏོ. ཨེཝཾ ཨུཔེཏཱིཏི ཨེཝཾ བྷཛཏི སེཝཏི པཡིརུཔཱསཏི, ཨེཝཾ ཝཱ ཛཱནཱཏི བུཛ྄ཛྷཏཱིཏི ཨེཝམཏྠོ ཝེདིཏབྦོ.

ཨེཏྠ ཙ པསཱདགྒཧཎེན ལོཀིཡསརཎགམནམཱཧ. ཏཉྷི པསཱདཔྤདྷཱནཾ. གརུཏཱགཧཎེན ལོཀུཏྟརཾ. ཨརིཡཱ ཧི རཏནཏྟཡགུཎཱབྷིཉྙཏཱཡ པཱསཱཎཙྪཏྟཾ པིཡ གརུཾ ཀཏྭཱ པསྶནྟི, ཏསྨཱ ཏཔྤསཱདེན ཝིཀྑམྦྷནཝསེན ཝིཧཏཀིལེསོ, ཏགྒརུཏཱཡ སམུཙྪེདཝསེནཱཏི ཡོཛེཏབྦཾ ཨགཱརཝཀརཎཧེཏཱུནཾ སམུཙྪིནྡནཏོ. ཏཔྤརཱཡཎཏཱ པནེཏྠ ཏགྒཏིཀཏཱཏི ཏཱཡ ཙཏུབྦིདྷམྤི ཝཀྑམཱནཾ སརཎགམནཾ གཧིཏནྟི དཊྛབྦཾ. ཨཝིསེསེན ཝཱ པསཱདགརུཏཱ ཛོཏིཏཱཏི པསཱདགྒཧཎེན ཨཝེཙྩཔྤསཱདསྶ ཨིཏརསྶ ཙ གཧཎཾ, ཏཐཱ གརུཏཱགཧཎེནཱཏི ཨུབྷཡེནཔི ཨུབྷཡཾ སརཎགམནཾ ཡོཛེཏབྦཾ.

མགྒཀྑཎེ ཨིཛ྄ཛྷཏཱིཏི ཡོཛནཱ. ནིབྦཱནཱརམྨཎཾ ཧུཏྭཱཏི ཨེཏེན ཨཏྠཏོ ཙཏུསཙྩཱདྷིགམོ ཨེཝ ལོཀུཏྟརསརཎགམནནྟི དསྶེཏི. ཏཏྠ ཧི ནིབྦཱནདྷམྨོ སཙྪིཀིརིཡཱབྷིསམཡཝསེན, མགྒདྷམྨོ བྷཱཝནཱབྷིསམཡཝསེན པཊིཝིཛ྄ཛྷིཡམཱནོཡེཝ སརཎགམནཏྟཾ སཱདྷེཏི, བུདྡྷགུཎཱ པན སཱཝཀགོཙརབྷཱུཏཱ པརིཉྙཱབྷིསམཡཝསེན, ཏཐཱ ཨརིཡསངྒྷགུཎཱ. ཏེནཱཧ ‘‘ཀིཙྩཏོ སཀལེཔི རཏནཏྟཡེ ཨིཛ྄ཛྷཏཱི’’ཏི. ཨིཛ྄ཛྷནྟཉྩ སཧེཝ ཨིཛ྄ཛྷཏི, ན ལོཀིཡཾ ཝིཡ པཊིཔཱཊིཡཱ ཨསམྨོཧཔྤཊིཝེདྷེན པཊིཝིདྡྷཏྟཱཏི ཨདྷིཔྤཱཡོ. ཡེ པན ཝདནྟི ‘‘ན སརཎགམནཾ ནིབྦཱནཱརམྨཎཾ ཧུཏྭཱ པཝཏྟཏི, མགྒསྶ ཨདྷིགཏཏྟཱ པན ཨདྷིགཏམེཝ ཧོཏི ཨེཀཙྩཱནཾ ཏེཝིཛྫཱདཱིནཾ ལོཀིཡཝིཛྫཱདཡོ ཝིཡཱ’’ཏི, ཏེསཾ ལོཀིཡམེཝ སརཎགམནཾ སིཡཱ, ན ལོཀུཏྟརཾ, ཏཉྩ ཨཡུཏྟཾ དུཝིདྷསྶཔི ཨིཙྪིཏབྦཏྟཱ.

ཏནྟི ལོཀིཡསརཎགམནཾ. སདྡྷཱཔཊིལཱབྷོ ‘‘སམྨཱསམྦུདྡྷོ བྷགཝཱ’’ཏིཨཱདིནཱ. སདྡྷཱམཱུལིཀཱཏི ཡཐཱཝུཏྟསདྡྷཱཔུབྦངྒམཱ. སམྨཱདིཊྛི བུདྡྷསུབུདྡྷཏཾ, དྷམྨསུདྷམྨཏཾ, སངྒྷསུཔྤཊིཔཏྟིཉྩ ལོཀིཡཱཝབོདྷཝསེནེཝ སམྨཱ ཉཱཡེན དསྶནཏོ. སདྡྷཱམཱུལིཀཱ ཙ སམྨཱདིཊྛཱིཏི ཨེཏེན སདྡྷཱུཔནིསྶཡཱ ཡཐཱཝུཏྟལཀྑཎཱ པཉྙཱ ལོཀིཡསརཎགམནནྟི དསྶེཏི. ཏེནཱཧ ¶ ‘‘དིཊྛིཛུཀམྨནྟི ཝུཙྩཏཱི’’ཏི. དིཊྛིཡེཝ ཨཏྟནོ པཙྩཡེཧི ཨུཛུ ཀརཱིཡཏཱིཏི ཀཏྭཱ ¶ , དིཊྛི ཝཱ ཨུཛུ ཀརཱིཡཏི ཨེཏེནཱཏི དིཊྛིཛུཀམྨཾ, ཏཐཱཔཝཏྟོ ཙིཏྟུཔྤཱདོ. ཨེཝཉྩ ཀཏྭཱ ‘‘ཏཔྤརཱཡཎཏཱཀཱརཔྤཝཏྟོ ཙིཏྟུཔྤཱདོ’’ཏི ཨིདཉྩ ཝཙནཾ སམཏྠིཏཾ ཧོཏི, སདྡྷཱཔུབྦངྒམསམྨཱདིཊྛིགྒཧཎཾ པན ཙིཏྟུཔྤཱདསྶ ཏཔྤདྷཱནཏཱཡཱཏི དཊྛབྦཾ. སདྡྷཱཔཊིལཱབྷོཏི ཨིམིནཱ མཱཏཱདཱིཧི ཨུསྶཱཧིཏདཱརཀཱདཱིནཾ ཝིཡ ཉཱཎཝིཔྤཡུཏྟཾ སརཎགམནཾ དསྶེཏི, སམྨཱདིཊྛཱིཏི ཨིམིནཱ ཉཱཎསམྤཡུཏྟཾ སརཎགམནཾ.

ཏཡིདཾ ལོཀིཡཾ སརཎགམནཾ. ཨཏྟཱ སནྣིཡྻཱཏཱིཡཏི ཨཔྤཱིཡཏི པརིཙྩཛཱིཡཏི ཨེཏེནཱཏི ཨཏྟསནྣིཡྻཱཏནཾ, ཡཐཱཝུཏྟཾ དིཊྛིཛུཀམྨཾ. ཏཾ རཏནཏྟཡཾ པརཱཡཎཾ པཊིསརཎཾ ཨེཏསྶཱཏི ཏཔྤརཱཡཎོ, པུགྒལོ ཙིཏྟུཔྤཱདོ ཝཱ, ཏསྶ བྷཱཝོ ཏཔྤརཱཡཎཏཱ, ཡཐཱཝུཏྟཾ དིཊྛིཛུཀམྨམེཝ. སརཎནྟི ཨདྷིཔྤཱཡེན སིསྶབྷཱཝཾ ཨནྟེཝཱསིཀབྷཱཝཾ ཨུཔགཙྪཏི ཨེཏེནཱཏི སིསྶབྷཱཝཱུཔགམནཾ. སརཎགམནཱདྷིཔྤཱཡེནེཝ པཎིཔཏཏི ཨེཏེནཱཏི པཎིཔཱཏོ. སབྦཏྠ ཡཐཱཝུཏྟདིཊྛིཛུཀམྨཝསེནེཝ ཨཏྠོ ཝེདིཏབྦོ. ཨཏྟཔརིཙྩཛནནྟི སཾསཱརདུཀྑནིསྶརཎཏྠཾ ཨཏྟནོ ཨཏྠབྷཱཝསྶ པརིཙྩཛནཾ. ཨེས ནཡོ སེསེསུཔི. བུདྡྷཱདཱིནཾཡེཝཱཏི ཨཝདྷཱརཎཾ ཨཏྟསནྣིཡྻཱཏནཱདཱིསུཔི ཏཏྠ ཏཏྠ ཝཏྟབྦཾ. ཨེཝཉྷི ཏདཉྙནིཝཏྟནཾ ཀཏཾ ཧོཏི.

ཨེཝཾ ཨཏྟསནྣིཡྻཱཏནཱདཱིནི ཨེཀེན པཀཱརེན དསྶེཏྭཱ ཨིདཱནི ཨཔརེཧིཔི པཀཱརེཧི དསྶེཏུཾ ‘‘ཨཔིཙཱ’’ཏིཨཱདི ཨཱརདྡྷཾ. ཏེན པརིཡཱཡནྟརེཧིཔི ཨཏྟསནྣིཡྻཱཏནཾ ཀཏམེཝ ཧོཏི ཨཏྠསྶ ཨབྷིནྣཏྟཱཏི དསྶེཏི. ཨཱལ༹ཝཀཱདཱིནནྟི ཨཱདི-སདྡེན སཱཏཱགིརིཧེམཝཏཱདཱིནཾ སངྒཧོ དཊྛབྦོ. ནནུ ཙེཏེ ཨཱལ༹ཝཀཱདཡོ མགྒེནེཝ ཨཱགཏསརཎགམནཱ, ཀཐཾ ཏེསཾ ཏཔྤརཱཡཎཏཱསརཎགམནཾ ཝུཏྟནྟི? མགྒེནཱགཏསརཎགམནེཧིཔི ‘‘སོ ཨཧཾ ཝིཙརིསྶཱམི…པེ… སུདྷམྨཏཾ (སཾ. ནི. ༡.༢༤༦; སུ. ནི. ༡༩༤). ཏེ མཡཾ ཝིཙརིསྶཱམ, གཱམཱ གཱམཾ ནགཱ ནགཾ…པེ… སུདྷམྨཏ’’ནྟི (སུ. ནི. ༡༨༢) ཙ ཏེཧི ཏཔྤརཱཡཎཏཱཀཱརསྶ པཝེདིཏཏྟཱ ཏཐཱ ཝུཏྟཾ.

སོ པནེས ཉཱཏི…པེ… ཝསེནཱཏི ཨེཏྠ ཉཱཏིཝསེན, བྷཡཝསེན, ཨཱཙརིཡཝསེན, དཀྑིཎེཡྻཝསེནཱཏི པཙྩེཀཾ ‘‘ཝསེནཱ’’ཏི པདཾ ཡོཛེཏབྦཾ. ཏཏྠ ཉཱཏིཝསེནཱཏི ཉཱཏིབྷཱཝཝསེན. ཨེཝཾ སེསེསུཔི ¶ . དཀྑིཎེཡྻཔཎིཔཱཏེནཱཏི དཀྑིཎེཡྻཏཱཧེཏུཀེན པཎིཔཏནེནཱཏི ཨཏྠོ. ཨིཏརེཧཱིཏི ཉཱཏིབྷཱཝཱདིཝསཔྤཝཏྟེཧི ཏཱིཧི པཎིཔཱཏེཧི. ཨིཏརེཧཱིཏིཨཱདིནཱ སངྑེཔཏོ ཝུཏྟམཏྠཾ ཝིཏྠཱརཏོ དསྶེཏུཾ ‘‘ཏསྨཱ’’ཏིཨཱདི ཝུཏྟཾ. ཝནྡཏཱིཏི པཎིཔཱཏསྶ ལཀྑཎཝཙནཾ ¶ . ཨེཝརཱུཔནྟི དིཊྛདྷམྨིཀཾ སནྡྷཱཡ ཝདཏི. སམྤརཱཡིཀཉྷི ནིཡྻཱནིཀཾ ཝཱ ཨནིཡྻཱནིཀཾ ཝཱ ཨནུསཱསནིཾ པཙྩཱསཱིསནྟོ དཀྑིཎེཡྻཔཎིཔཱཏམེཝ ཀརོཏཱིཏི ཨདྷིཔྤཱཡོ. སརཎགམནཔྤབྷེདོཏི སརཎགམནཝིབྷཱགོ.

ཨརིཡམགྒོ ཨེཝ ལོཀུཏྟརཾ སརཎགམནནྟི ཨཱཧ ‘‘ཙཏྟཱརི སཱམཉྙཕལཱནི ཝིཔཱཀཕལ’’ནྟི. སབྦདུཀྑཀྑཡོཏི སཀལསྶ ཝཊྚདུཀྑསྶ ཨནུཔྤཱདནིརོདྷོ. ཨེཏནྟི ‘‘ཙཏྟཱརི ཨརིཡསཙྩཱནི, སམྨཔྤཉྙཱཡ པསྶཏཱི’’ཏི (དྷ. པ. ༡༩༠) ཨེཝཾ ཝུཏྟཾ ཨརིཡསཙྩཱནཾ དསྶནཾ.

ནིཙྩཏོ ཨནུཔགམནཱདིཝསེནཱཏི ནིཙྩནྟི ཨགྒཧཎཱདིཝསེན. ཨཊྛཱནནྟི ཧེཏུཔྤཊིཀྑེཔོ. ཨནཝཀཱསོཏི པཙྩཡཔྤཊིཀྑེཔོ. ཨུབྷཡེནཔི ཀཱརཎམེཝ པཊིཀྑིཔཏི. ཡནྟི ཡེན ཀཱརཎེན. དིཊྛིསམྤནྣོཏི མགྒདིཊྛིཡཱ སམནྣཱགཏོ སོཏཱཔནྣོ. ཀཉྩི སངྑཱརནྟི ཙཏུབྷཱུམཀེསུ སངྑཏསངྑཱརེསུ ཨེཀསངྑཱརམྤི. ནིཙྩཏོ ཨུཔགཙྪེཡྻཱཏི ནིཙྩོཏི གཎྷེཡྻ. སུཁཏོ ཨུཔགཙྪེཡྻཱཏི ‘‘ཨེཀནྟསུཁཱི ཨཏྟཱ ཧོཏི ཨརོགོ པརཾ མརཎཱ’’ཏི (དཱི. ནི. ༡.༧༦, ༧༩) ཨེཝཾ ཨཏྟདིཊྛིཝསེན སུཁཏོ གཱཧཾ སནྡྷཱཡེཏཾ ཝུཏྟཾ. དིཊྛིཝིཔྤཡུཏྟཙིཏྟེན པན ཨརིཡསཱཝཀོ པརིལཱ༹ཧཝཱུཔསམནཏྠཾ མཏྟཧཏྠིཔརིཏཱསིཏོ ཝིཡ ཙོཀྑབྲཱཧྨཎོ ཨུཀྐཱརབྷཱུམིཾ ཀཉྩི སངྑཱརཾ སུཁཏོ ཨུཔགཙྪཏི. ཨཏྟཝཱརེ ཀསིཎཱདིཔཉྙཏྟིསངྒཧཏྠཾ ‘‘སངྑཱར’’ནྟི ཨཝཏྭཱ ‘‘ཀཉྩི དྷམྨ’’ནྟི ཝུཏྟཾ. ཨིམེསུཔི ཋཱནེསུ ཙཏུབྷཱུམཀཝསེནེཝ པརིཙྪེདོ ཝེདིཏབྦོ ཏེབྷཱུམཀཝསེནེཝ ཝཱ. ཡཾ ཡཉྷི པུཐུཛྫནོ གཱཧཝསེན གཎྷཱཏི, ཏཏོ ཏཏོ ཨརིཡསཱཝཀོ གཱཧཾ ཝིནིཝེཋེཏི.

མཱཏརནྟིཨཱདཱིསུ ཛནིཀཱ མཱཏཱ, ཛནཀོ པིཏཱ, མནུསྶབྷཱུཏོ ཁཱིཎཱསཝོ ཨརཧཱཏི ཨདྷིཔྤེཏོ. ཀིཾ པན ཨརིཡསཱཝཀོ ཨཉྙཾ ཛཱིཝིཏཱ ཝོརོཔེཡྻཱཏི? ཨེཏམྤི ཨཊྛཱནཾ, པུཐུཛྫནབྷཱཝསྶ པན མཧཱསཱཝཛྫབྷཱཝདསྶནཏྠཾ ཨརིཡབྷཱཝསྶ ཙ ཕལདསྶནཏྠཾ ཨེཝཾ ཝུཏྟཾ. པདུཊྛཙིཏྟོཏི ཝདྷཀཙིཏྟེན པདུཊྛཙིཏྟོ. ལོཧིཏཾ ཨུཔྤཱདེཡྻཱཏི ཛཱིཝམཱནཀསརཱིརེ ¶ ཁུདྡཀམཀྑིཀཱཡ པིཝནམཏྟམྤི ལོཧིཏཾ ཨུཔྤཱདེཡྻ. སངྒྷཾ བྷིནྡེཡྻཱཏི སམཱནསཾཝཱསཀཾ སམཱནསཱིམཱཡཾ ཋིཏཾ སངྒྷཾ ‘‘ཀམྨེན ཨུདྡེསེན ཝོཧརནྟོ ཨནུསྶཱཝནེན སལཱཀགྒཱཧེནཱ’’ཏི (པརི. ༤༥༨) ཨེཝཾ ཝུཏྟེཧི པཉྩཧི ཀཱརཎེཧི བྷིནྡེཡྻ. ཨཉྙཾ སཏྠཱརནྟི ཨཉྙཾ ཏིཏྠཀརཾ ‘‘ཨཡཾ མེ སཏྠཱ’’ཏི ཨེཝཾ གཎྷེཡྻཱཏི ནེཏཾ ཋཱནཾ ཝིཛྫཏཱིཏི ཨཏྠོ.

ན ཏེ ¶ གམིསྶནྟི ཨཔཱཡནྟི ཏེ བུདྡྷཾ སརཎཾ གཏཱ ཏནྣིམིཏྟཾ ཨཔཱཡཾ ན གམིསྶནྟི, དེཝཀཱཡཾ པན པརིཔཱུརེསྶནྟཱིཏི ཨཏྠོ. དསཧི ཋཱནེཧཱིཏི དསཧི ཀཱརཎེཧི. ཨདྷིགཎྷནྟཱིཏི ཨདྷིབྷཝནྟི.

ཝེལཱམསུཏྟཱདིཝསེནཱཏི ཨེཏྠ ‘‘ཀརཱིསསྶ ཙཏུཏྠབྷཱགཔྤམཱཎཱནཾ ཙཏུརཱསཱིཏིསཧསྶསངྑཱནཾ སུཝཎྞཔཱཏིརཱུཔིཡཔཱཏིཀཾསཔཱཏཱིནཾ ཡཐཱཀྐམཾ རཱུཔིཡསུཝཎྞཧིརཉྙཔཱུརཱནཾ སབྦཱལངྐཱརཔྤཊིམཎྜིཏཱནཾ ཙཏུརཱསཱིཏིཡཱ ཧཏྠིསཧསྶཱནཾ, ཙཏུརཱསཱིཏིཡཱ ཨསྶསཧསྶཱནཾ, ཙཏུརཱསཱིཏིཡཱ རཐསཧསྶཱནཾ, ཙཏུརཱསཱིཏིཡཱ དྷེནུསཧསྶཱནཾ, ཙཏུརཱསཱིཏིཡཱ ཀཉྙཱསཧསྶཱནཾ, ཙཏུརཱསཱིཏིཡཱ པལླངྐསཧསྶཱནཾ, ཙཏུརཱསཱིཏིཡཱ ཝཏྠཀོཊིསཧསྶཱནཾ, ཨཔརིམཱཎསྶ ཙ ཁཛྫབྷོཛྫཱདིབྷེདསྶ ཨཱཧཱརསྶ པརིཙྩཛནཝསེན སཏྟམཱསཱདྷིཀཱནི སཏྟ སཾཝཙྪརཱནི ནིརནྟརཾ པཝཏྟཝེལཱམམཧཱདཱནཏོ ཨེཀསྶ སོཏཱཔནྣསྶ དིནྣདཱནཾ མཧཔྥལཏརཾ. ཏཏོ སཏཾ སོཏཱཔནྣཱནཾ དིནྣདཱནཏོ ཨེཀསྶ སཀདཱགཱམིནོ, ཏཏོ ཨེཀསྶ ཨནཱགཱམིནོ, ཏཏོ ཨེཀསྶ ཨརཧཏོ, ཏཏོ ཨེཀསྶ པཙྩེཀབུདྡྷསྶ, ཏཏོ སམྨཱསམྦུདྡྷསྶ, ཏཏོ བུདྡྷཔྤམུཁསྶ སངྒྷསྶ དིནྣདཱནཾ མཧཔྥལཏརཾ, ཏཏོ ཙཱཏུདྡིསཾ སངྒྷཾ ཨུདྡིསྶ ཝིཧཱརཀརཎཾ, ཏཏོ སརཎགམནཾ མཧཔྥལཏར’’ནྟི ཨིམམཏྠཾ པཀཱསེནྟསྶ ཝེལཱམསུཏྟསྶ (ཨ. ནི. ༩.༢༠) ཝསེན. ཝུཏྟཉྷེཏཾ ‘‘ཡཾ, གཧཔཏི, ཝེལཱམོ བྲཱཧྨཎོ དཱནཾ ཨདཱསི མཧཱདཱནཾ, ཡོ ཨེཀཾ དིཊྛིསམྤནྣཾ བྷོཛེཡྻ, ཨིདཾ ཏཏོ མཧཔྥལཏར’’ནྟིཨཱདི (ཨ. ནི. ༩.༢༠). ཝེལཱམསུཏྟཱདཱིཏི ཨཱདི-སདྡེན ཨགྒཔྤསཱདསུཏྟཱདཱིནཾ (ཨ. ནི. ༤.༣༤; ཨིཏིཝུ. ༩༠) སངྒཧོ དཊྛབྦོ.

ཨཉྙཱཎཾ ཝཏྠུཏྟཡསྶ གུཎཱནཾ ཨཛཱནནཾ ཏཏྠ སམྨོཧོ, ‘‘བུདྡྷོ ནུ ཁོ, ན ནུ ཁོ’’ཏིཨཱདིནཱ ཝིཙིཀིཙྪཱ སཾསཡོ. མིཙྪཱཉཱཎཾ ཏསྶ གུཎཱནཾ ཨགུཎབྷཱཝཔརིཀཔྤནེན ཝིཔརཱིཏགྒཱཧོ. ཨཱདི-སདྡེན ཨནཱདརཱགཱརཝཱདཱིནཾ ¶ སངྒཧོ. ན མཧཱཛུཏིཀནྟི ན ཨུཛྫལཾ, ཨཔརིསུདྡྷཾ ཨཔརིཡོདཱཏནྟི ཨཏྠོ. ན མཧཱཝིཔྥཱརནྟི ཨནུལཱ༹རཾ. སཱཝཛྫོཏི དིཊྛིཏཎྷཱདིཝསེན སདོསོ. ལོཀིཡཾ སརཎགམནཾ སིཀྑཱསམཱདཱནཾ ཝིཡ ཨགྒཧིཏཀཱལཔརིཙྪེདཾ ཛཱིཝིཏཔརིཡནྟམེཝ ཧོཏི, ཏསྨཱ ཏསྶ ཁནྡྷབྷེདེན བྷེདོཏི ཨཱཧ ‘‘ཨནཝཛྫོ ཀཱལཀིརིཡཱཡཱ’’ཏི. སོཏི ཨནཝཛྫོ སརཎགམནབྷེདོ. སཏིཔི ཨནཝཛྫཏྟེ ཨིཊྛཕལོཔི ན ཧོཏཱིཏི ཨཱཧ ‘‘ཨཕལོ’’ཏི. ཀསྨཱ? ཨཝིཔཱཀཏྟཱ. ན ཧི ཏཾ ཨཀུསལནྟི.

ཀོ ཨུཔཱསཀོཏི སརཱུཔཔུཙྪཱ, ཏསྨཱ ‘‘ཀིཾལཀྑཎོ ཨུཔཱསཀོ’’ཏི ཝུཏྟཾ ཧོཏི. ཀསྨཱཏི ཧེཏུཔུཙྪཱ. ཏེན ཀེན པཝཏྟིནིམིཏྟེན ཨུཔཱསཀསདྡོ ཏསྨིཾ པུགྒལེ ནིརུལ༹ྷོཏི དསྶེཏི ¶ . ཏེནཱཧ ‘‘ཀསྨཱ ཨུཔཱསཀོཏི ཝུཙྩཏཱི’’ཏི. སདྡསྶ ཨབྷིདྷེཡྻོ པཝཏྟིནིམིཏྟཾ ཏདཏྠསྶ ཏབྦྷཱཝཀཱརཎཾ. ཀིམསྶ སཱིལནྟི ཀཱིདིསཾ ཨསྶ ཨུཔཱསཀསྶ སཱིལཾ, ཀིཏྟཀེན སཱིལེནཱཡཾ སཱིལསམྤནྣོ ནཱམ ཧོཏཱིཏི ཨཏྠོ. ཀོ ཨཱཛཱིཝོཏི ཀོ ཨསྶ སམྨཱཨཱཛཱིཝོ? སོ པན མིཙྪཱཛཱིཝསྶ པརིཝཛྫནེན ཧོཏཱིཏི སོཔི ཝིབྷཛཱིཡཏཱིཏི. ཀཱ ཝིཔཏྟཱིཏི ཀཱ སཱིལསྶ, ཨཱཛཱིཝསྶ ཝཱ ཝིཔཏྟི. ཨནནྟརསྶ ཧི ཝིདྷི ཝཱ པཊིསེདྷོ ཝཱཏི. ཀཱ སམྤཏཱིཏི ཨེཏྠཱཔི ཨེསེཝ ནཡོ.

ཡོ ཀོཙཱིཏི ཁཏྟིཡཱདཱིསུ ཡོ ཀོཙི. ཏེན སརཎགམནམེཝེཏྠ ཀཱརཎཾ, ན ཛཱཏིཨཱདིཝིསེསོཏི དསྶེཏི. ཨུཔཱསནཏོཏི ཏེནེཝ སརཎགམནེན ཏཏྠ ཙ སཀྐཙྩཀིརིཡཱཡ ཨཱདརགཱརཝབཧུམཱནཱདིཡོགེན པཡིརུཔཱསནཏོ. ཝེརམཎིཡོཏི ཝེརཾ ཝུཙྩཏི པཱཎཱཏིཔཱཏཱདིདུསྶཱིལྱཾ, ཏསྶ མཎནཏོ ཧནནཏོ ཝིནཱསནཏོ ཝེརམཎིཡོ, པཉྩ ཝིརཏིཡོ ཝིརཏིཔྤདྷཱནཏྟཱ ཏསྶ སཱིལསྶ. ཏེནེཝཱཧ ‘‘པཊིཝིརཏོ ཧོཏཱི’’ཏི.

མིཙྪཱཝཎིཛྫཱཏི ན སམྨཱཝཎིཛྫཱ ཨཡུཏྟཝཎིཛྫཱ ཨསཱརུཔྤཝཎིཛྫཱ. པཧཱཡཱཏི ཨཀརཎེནེཝ པཛཧིཏྭཱ. དྷམྨེནཱཏི དྷམྨཏོ ཨནཔེཏེན. ཏེན ཨཉྙམྤི ཨདྷམྨིཀཾ ཛཱིཝིཀཾ པཊིཀྑིཔཏི. སམེནཱཏི ཨཝིསམེན. ཏེན ཀཱཡཝིསམཱདིདུཙྩརིཏཾ ཝཛྫེཏྭཱ ཀཱཡསམཱདིནཱ སུཙརིཏེན ཨཱཛཱིཝཾ དསྶེཏི. སཏྠཝཎིཛྫཱཏི ཨཱཡུདྷབྷཎྜཾ ཀཏྭཱ ཝཱ ཀཱརེཏྭཱ ཝཱ ཡཐཱཀཏཾ ¶ ཝཱ པཊིལབྷིཏྭཱ ཏསྶ ཝིཀྐཡོ. སཏྟཝཎིཛྫཱཏི མནུསྶཝིཀྐཡོ. མཾསཝཎིཛྫཱཏི སཱུནཀཱརཱདཡོ ཝིཡ མིགསཱུཀརཱདིཀེ པོསེཏྭཱ མཾསཾ སམྤཱདེཏྭཱ ཝིཀྐཡོ. མཛྫཝཎིཛྫཱཏི ཡཾ ཀིཉྩི མཛྫཾ ཡོཛེཏྭཱ ཏསྶ ཝིཀྐཡོ. ཝིསཝཎིཛྫཱཏི ཝིསཾ ཡོཛེཏྭཱ ཝིསཾ གཧེཏྭཱ ཝཱ ཏསྶ ཝིཀྐཡོ. ཏཏྠ སཏྠཝཎིཛྫཱ པརོཔརོདྷནིམིཏྟཏཱཡ ཨཀརཎཱིཡཱ ཝུཏྟཱ. སཏྟཝཎིཛྫཱ ཨབྷུཛིསྶབྷཱཝཀརཎཏོ, མཾསཝིསཝཎིཛྫཱ ཝདྷཧེཏུཏོ, མཛྫཝཎིཛྫཱ པམཱདཊྛཱནཏོ.

ཏསྶེཝཱཏི པཉྩཝེརམཎིལཀྑཎསྶ སཱིལསྶ ཙེཝ པཉྩམིཙྪཱཝཎིཛྫཱལཀྑཎསྶ ཨཱཛཱིཝསྶ ཙ. ཝིཔཏྟཱིཏི བྷེདོ པཀོཔོ ཙ. ཡཱཡཱཏི ཡཱཡ པཊིཔཏྟིཡཱ. ཙཎྜཱལོཏི ཨུཔཱསཀཙཎྜཱལོ. མལནྟི ཨུཔཱསཀམལཾ. པཊིཀུཊྛོཏི ཨུཔཱསཀནིཧཱིནོ. བུདྡྷཱདཱིསུ ཀམྨཀམྨཕལེསུ ཙ སདྡྷཱཝིཔརིཡཱཡོ ཨསྶདྡྷིཡཾ མིཙྪཱདྷིམོཀྑོ, ཡཐཱཝུཏྟེན ཨསྶདྡྷིཡེན སམནྣཱགཏོ ཨསྶདྡྷོ. ཡཐཱཝུཏྟསཱིལཝིཔཏྟིཨཱཛཱིཝཝིཔཏྟིཝསེན དུསྶཱིལོ. ‘‘ཨིམིནཱ དིཊྛཱདིནཱ ཨིདཾ ནཱམ མངྒལཾ ཧོཏཱི’’ཏི – ཨེཝཾ བཱལཛནཔརིཀཔྤིཏཀོཏཱུཧལསངྑཱཏེན དིཊྛསུཏམུཏམངྒལེན སམནྣཱགཏོ ཀོཏཱུཧལམངྒལིཀོ. མངྒལཾ པཙྩེཏཱིཏི དིཊྛམངྒལཱདིབྷེདཾ མངྒལམེཝ པཏྟིཡཱཡཏི. ནོ ཀམྨནྟི ¶ ཀམྨསྶཀཏཾ ནོ པཏྟིཡཱཡཏི. ཨིཏོ བཧིདྡྷཱཏི ཨིཏོ སབྦཉྙུབུདྡྷསཱསནཏོ བཧིདྡྷཱ བཱཧིརཀསམཡེ. དཀྑིཎེཡྻཾ པརིཡེསཏཱིཏི དུཔྤཊིཔནྣཾ དཀྑིཎཱརཧསཉྙཱི གཝེསཏི. པུབྦཀཱརཾ ཀརོཏཱིཏི དཱནམཱནནཱདིཀཾ ཀུསལཀིརིཡཾ པཋམཏརཾ ཀརོཏི. ཨེཏྠ ཙ དཀྑིཎེཡྻཔརིཡེསནཔུབྦཀཱརེ ཨེཀཾ ཀཏྭཱ པཉྩ དྷམྨཱ ཝེདིཏབྦཱ.

ཝིཔཏྟིཡཾ ཝུཏྟཝིཔརིཡཱཡེན སམྤཏྟི ཝེདིཏབྦཱ. ཨཡཾ པན ཝིསེསོ – ཙཏུནྣམྤི པརིསཱནཾ རཏིཛནནཊྛེན ཨུཔཱསཀོཝ རཏནཾ ཨུཔཱསཀརཏནཾ. གུཎསོབྷཱཀིཏྟིསདྡསུགནྡྷཏཱཧི ཨུཔཱསཀོཝ པདུམཾ ཨུཔཱསཀཔདུམཾ. ཏཐཱ ཨུཔཱསཀཔུཎྜརཱིཀོ.

ཨཱདིམྷཱིཏི ཨཱདིཨཏྠེ. ཀོཊིཡནྟི པརིཡནྟཀོཊིཡཾ. ཝིཧཱརགྒེནཱཏི ཨོཝརཀཀོཊྛཱསེན, ‘‘ཨིམསྨིཾ གབྦྷེ ཝསནྟཱནཾ ཨིདཾ ནཱམ ཕལཾ པཱཔུཎཱཏཱི’’ཏིཨཱདཱིནཱ ཏཾ ཏཾ ཝསནཊྛཱནཀོཊྛཱསེནཱཏི ཨཏྠོ. ཨཛྫཏནྟི ཨཛྫ ཨིཙྩེཝ ཨཏྠོ.

པཱཎེཧི ¶ ཨུཔེཏནྟི ཨིམིནཱ ཏསྶ སརཎགམནསྶ ཨཱཔཱཎཀོཊིཀཏཾ དསྶེནྟོ ‘‘ཡཱཝ མེ ཛཱིཝིཏཾ པཝཏྟཏཱི’’ཏིཨཱདཱིནི ཝཏྭཱ པུན ཛཱིཝིཏེནཔི ཏཾ ཝཏྠུཏྟཡཾ པཊིཔཱུཛེནྟོ སརཎགམནཾ རཀྑཱམཱིཏི ཨུཔྤནྣཾ ཏསྶ བྲཱཧྨཎསྶ ཨདྷིཔྤཱཡཾ ཝིབྷཱཝེནྟོ ‘‘ཨཧཉྷཱི’’ཏིཨཱདིམཱཧ. པཱཎེཧི ཨུཔེཏནྟི ཧི ཡཱཝ མེ པཱཎཱ དྷརནྟི, ཏཱཝ སརཎཾ ཨུཔེཏཾ. ཨུཔེནྟོ ཙ ན ཝཱཙཱམཏྟེན ན ཨེཀཝཱརཾ ཙིཏྟུཔྤཱདམཏྟེན, ཨཐ ཁོ པཱཎཱནཾ པརིཙྩཛནཝསེནཔི ཡཱཝཛཱིཝཾ ཨུཔེཏནྟི ཨེཝམེཏྠ ཨཏྠོ ཝེདིཏབྦོ.

༡༧-༡༩. སཏྟམེ ཛཱཎུསྶོཎཱིཏི ནེཏཾ ཏསྶ མཱཏཱཔིཏཱུཧི ཀཏཾ ནཱམཾ, ཨཔིཙ ཁོ ཋཱནནྟརཔྤཊིལཱབྷལདྡྷནྟི དསྶེནྟོ ཨཱཧ ‘‘ཛཱཎུསྶོཎཱིཏི ཋཱནནྟརཾ ཀིརཱ’’ཏིཨཱདི. ཨེཀཾ ཋཱནནྟརནྟི ཨེཀཾ པུརོཧིཏཊྛཱནཾ. ཨུཎྷཱིསཨཱདིཀཀུདྷབྷཎྜེཧི སདྡྷིཾ ལདྡྷཾ ཏཐཱ ཙསྶ རཉྙཱ དིནྣནྟི ཝདནྟི. ཏེནཱཧ ‘‘རཉྙོ སནྟིཀེ ཙ ལདྡྷཛཱཎུསྶོཎིསཀྐཱརཏྟཱ’’ཏི. སེསམེཏྠ ཨུཏྟཱནམེཝ. ཨཊྛམནཝམེསུ ནཏྠི ཝཏྟབྦཾ.

༢༠-༢༡. དསམེ དུནྣིཀྑིཏྟནྟི དུཊྛུ ནིཀྑིཏྟཾ པདཔཙྩཱབྷཊྛཾ ཀཏྭཱ མནསི ཋཔིཏཾ. པཛྫཏི ཉཱཡཏི ཨཏྠོ ཨེཏེནཱཏི པདཾ, ཨཏྠཾ བྱཉྫཡཏི པཀཱསེཏཱིཏི བྱཉྫནཾ, པདམེཝ. ཏེནེཝཱཧ ‘‘ཨུཔྤཊིཔཱཊིཡཱ…པེ… བྱཉྫནནྟི ཝུཙྩཏཱི’’ཏི. པདསམུདཱཡབྱཏིརེཀེན ཝིསུཾ པཱལི༹ ནཱམ ¶ ནཏྠཱིཏི ཨཱཧ ‘‘ཨུབྷཡམེཏཾ པཱལི༹ཡཱཝ ནཱམ’’ནྟི. པཀཊྛཱནཉྷི ཝཙནཔྤབནྡྷཱནཾ ཨཱལི༹ཡེཝ པཱལཱི༹ཏི ཝུཙྩཏི. སེསམེཏྠ ཨེཀཱདསམཉྩ ཨུཏྟཱནཏྠམེཝ.

ཨདྷིཀརཎཝགྒཝཎྞནཱ ནིཊྛིཏཱ.

༣. བཱལཝགྒཝཎྞནཱ

༢༢-༢༤. ཏཏིཡསྶ པཋམདུཏིཡཏཏིཡཱནི ཨུཏྟཱནཏྠཱནེཝ.

༢༥. ཙཏུཏྠེ ནེཏབྦོཏི ཨཉྙཏོ ཨཱཧརིཏྭཱ བོདྷེཏབྦོ, ཉཱཔེཏབྦོཏི ཨཏྠོ.

༢༧. ཚཊྛེ ནོ ཙེཔི པཊིཙྪཱདེཏྭཱ ཀརོནྟཱིཏི པཱཎཱཏིཔཱཏཱདཱིནི ཀརོནྟོ སཙེཔི ཨཔྤཊིཙྪཱདེཏྭཱ ཀརོནྟི. པཊིཙྪནྣམེཝཱཏི ཝིཉྙཱུཧི གརཧིཏབྦབྷཱཝཏོ ¶ པཊིཙྪཱདནཱརཧཏྟཱ པཊིཙྪནྣམེཝཱཏི ཝུཙྩཏི. ཨཝཱིཙིཨཱདཡོ པདེསཝིསེསཱ ཏཏྠཱུཔཔནྣཱ སཏྟཱ ཙ ནིརཡགྒཧཎེན གཧིཏཱཏི ཨཱཧ ‘‘ནིརཡོཏི སཧོཀཱསཀཱ ཁནྡྷཱ’’ཏི. ཏིརཙྪཱནཡོནི ནཱམ ཝིསུཾ པདེསཝིསེསོ ནཏྠཱིཏི ཨཱཧ ‘‘ཏིརཙྪཱནཡོནིཡཾ ཁནྡྷཱཝ ལབྦྷནྟཱི’’ཏི.

༣༡. དསམེ ཨཏྠོ ཕལཾ ཏདདྷཱིནཝུཏྟིཏཱཡ ཝསོ ཨེཏསྶཱཏི ཨཏྠཝསོ, ཧེཏཱུཏི ཨཱཧ ‘‘ཨཏྠཝསེཏི ཀཱརཎཱནཱི’’ཏི. ཨརཉྙཝནཔཏྠཱནཱིཏི ཨརཉྙལཀྑཎཔྤཏྟཱནི ཝནཔཏྠཱནི. ཝནཔཏྠ-སདྡོ ཧི སཎྜབྷཱུཏེ རུཀྑསམཱུཧེཔི ཝཏྟཏཱིཏི ཨརཉྙགྒཧཎཾ. ཝནཱིཡཏི ཝིཝེཀཀཱམེཧི བྷཛཱིཡཏི, ཝནུཏེ ཝཱ ཏེ ཨཏྟསམྤཏྟིཡཱ ཝསནཏྠཱཡ ཡཱཙནྟོ ཝིཡ ཧོཏཱིཏི ཝནཾ, པཏིཊྛཧནྟི ཨེཏྠ ཝིཝེཀཀཱམཱ ཡཐཱདྷིཔྤེཏཝིསེསཱདྷིགམེནཱཏི པཏྠཾ, ཝནེསུ པཏྠཾ གཧནཊྛཱནེ སེནཱསནཾ ཝནཔཏྠཾ. ཀིཉྩཱཔཱིཏི ཨནུཛཱནནསམྦྷཱཝནཏྠེ ནིཔཱཏོ. ཀིཾ ཨནུཛཱནཱཏི? ནིཔྤརིཡཱཡཏོ ཨརཉྙབྷཱཝཾ གཱམཏོ བཧི ཨརཉྙནྟི. ཏེནཱཧ ‘‘ནིཔྤརིཡཱཡེནཱ’’ཏིཨཱདི. ཀིཾ སམྦྷཱཝེཏི? ཨཱརཉྙཀངྒནིཔྥཱདཀཏྟཾ. ཡཉྷི ཨཱརཉྙཀངྒནིཔྥཱདཀཾ, ཏཾ ཝིསེསཏོ ཨརཉྙནྟི ཝཏྟབྦནྟི. ཏེནཱཧ ‘‘ཡཾ ཏཾ པཉྩདྷནུསཏིཀ’’ནྟིཨཱདི. ནིཀྑམིཏྭཱ བཧི ཨིནྡཁཱིལཱཏི ཨིནྡཁཱིལཏོ བཧི ནིཀྑམིཏྭཱ, ཏཏོ བཧི པཊྛཱཡཱཏི ཨཏྠོ. བཧི ཨིནྡཁཱིལཱཏི ཝཱ ཡཏྠ དྭེ ཏཱིཎི ཨིནྡཁཱིལཱནི, ¶ ཏཏྠ བཧིདྡྷཱ ཨིནྡཁཱིལཏོ པཊྛཱཡ. ཡཏྠ ཏཾ ནཏྠི, ཏདརཧཊྛཱནཏོ པཊྛཱཡཱཏི ཝདནྟི. གཱམནྟནྟི གཱམསམཱིཔཾ. ཨནུཔཙཱརཊྛཱནནྟི ནིཙྩཀིཙྩཝསེན ན ཨུཔཙརིཏབྦཊྛཱནཾ. ཏེནཱཧ ‘‘ཡཏྠ ན ཀསཱིཡཏི ན ཝཔཱིཡཏཱི’’ཏི.

ཨཏྟནོ ཙ དིཊྛདྷམྨསུཁཝིཧཱརནྟི ཨེཏེན སཏྠཱ ཨཏྟནོ ཝིཝེཀཱབྷིརཏིཾ པཀཱསེཏི. ཏཏྠ དིཊྛདྷམྨོ ནཱམ ཨཡཾ པཙྩཀྑོ ཨཏྟབྷཱཝོ, སུཁཝིཧཱརོ ནཱམ ཙཏུནྣཾ ཨིརིཡཱཔཐཝིཧཱརཱནཾ ཕཱསུཏཱ. ཨེཀཀསྶ ཧི ཨརཉྙེ ཨནྟམསོ ཨུཙྩཱརཝསྶཱཝཀིཙྩཾ ཨུཔཱདཱཡ སབྦེ ཨིརིཡཱཔཐཱ ཕཱསུཀཱ ཧོནྟི, ཏསྨཱ དིཊྛདྷམྨེ སུཁཝིཧཱརཾ དིཊྛདྷམྨསུཁཝིཧཱརནྟི ཨེཝཾ ཝཱ ཨེཏྠ ཨཏྠོ དཊྛབྦོ.

པཙྪིམཉྩ ཛནཏཾ ཨནུཀམྤམཱནོཏི ཀཐཾ ཨརཉྙཝཱསེན པཙྪིམཱ ཛནཏཱ ཨནུཀམྤིཏཱ ཧོཏི? སདྡྷཱཔབྦཛིཏཱ ཧི ཀུལཔུཏྟཱ བྷགཝཏོ ཨརཉྙཝཱསཾ ¶ དིསྭཱ ‘‘བྷགཝཱཔི ནཱམ ཨརཉྙསེནཱསནཱནི ན མུཉྩཏི, ཡསྶ ནེཝཏྠི པརིཉྙཱཏབྦཾ ན པཧཱཏབྦཾ ན བྷཱཝེཏབྦཾ ན སཙྪིཀཱཏབྦཾ, ཀིམངྒཾ པན མཡ’’ནྟི ཙིནྟེཏྭཱ ཏཏྠ ཝསིཏབྦམེཝ མཉྙིསྶནྟི, ཨེཝཾ ཁིཔྤམེཝ དུཀྑསྶནྟཀརཱ བྷཝིསྶནྟི. ཨེཝཾ པཙྪིམཱ ཛནཏཱ ཨནུཀམྤིཏཱ ཧོཏི. ཨེཏམཏྠཾ དསྶེནྟོ ཨཱཧ ‘‘པཙྪིམེ མམ སཱཝཀེ ཨནུཀམྤནྟོ’’ཏི.

༣༢. ཨེཀཱདསམེ ཝིཛྫཾ བྷཛནྟཱིཏི ཝིཛྫཱབྷཱགིཡཱ, ཝིཛྫཱབྷཱགེ ཝིཛྫཱཀོཊྛཱསེ ཝཏྟནྟཱིཏིཔི ཝིཛྫཱབྷཱགིཡཱ. པདཾ པཙྪིནྡཏཱིཏི མགྒཙིཏྟསྶ པཏིཊྛཾ ཨུཔཙྪིནྡཏི, མགྒཙིཏྟཾ པཏིཊྛཱཔེཏུཾ ན དེཏཱིཏི ཨཏྠོ. ཨུབྦཊྚེཏྭཱཏི སམུཙྪེདཝསེན སམཱུལཾ ཨུདྡྷརིཏྭཱ. ཨཊྛསུ ཋཱནེསཱུཏི བུདྡྷཱདཱིསུ ཨཊྛསུ ཋཱནེསུ. རཱགསྶ ཁཡཝིརཱགེནཱཏི རཱགསྶ ཁཡསངྑཱཏེན ཝིརཱགེན, རཱགསྶ ཨནུཔྤཏྟིདྷམྨཏཱཔཱདནེནཱཏི ཝུཏྟཾ ཧོཏི.

བཱལཝགྒཝཎྞནཱ ནིཊྛིཏཱ.

༤. སམཙིཏྟཝགྒཝཎྞནཱ

༣༣. ཙཏུཏྠསྶ ¶ པཋམེ བྷཝནྟི ཨེཏྠ པཏིཊྛཧནྟཱིཏི བྷཱུམི, ཨསཔྤུརིསཱནཾ བྷཱུམི ཨསཔྤུརིསབྷཱུམི. སཔྤུརིསབྷཱུམིཡམྤི ཨེསེཝ ནཡོ. ཀཏཾ ན ཛཱནཱཏཱིཏི ཨཀཏཉྙཱུ, ཨསམཏྠསམཱསོཡཾ གམཀཏྟཱ ‘‘ཨསཱུརིཡཔསྶཱ’’ཏིཨཱདཱིསུ ཝིཡ. ཏེནཱཧ ‘‘ཀཏཾ ན ཛཱནཱཏཱི’’ཏི. ཨཀཏཝེདཱིཏི ཨེཏྠཱཔི ཨེསེཝ ནཡོ. པཱཀཊཾ ཀཏྭཱ ན ཛཱནཱཏཱིཏི ‘‘ཨིདཉྩིདཉྩ མཡ྄ཧཾ ཨིམིནཱ ཀཏ’’ནྟི སངྒྷམཛ྄ཛྷགཎམཛ྄ཛྷཱདཱིསུ པཱཀཊཾ ཀཏྭཱ ན ཛཱནཱཏི, ན པཀཱསེཏཱིཏི ཝུཏྟཾ ཧོཏི. ཨུཔཉྙཱཏནྟི ཐོམནཱཝསེན ཨུཔགནྟྭཱ ཉཱཏཾ. ཏེནཱཧ ‘‘ཝཎྞིཏ’’ནྟིཨཱདི.

༣༤. དུཏིཡེ ཝསྶསཏཔརིམཱཎམཱཡུ ཨསྶཱཏི ཝསྶསཏཱཡུཀོ, ཝསྶསཏཱཡུཀཏཉྩ ཝསྶསཏཱཡུཀཀཱལེ ཛཱཏསྶེཝ ཧོཏི, ནཱཉྙསྶཱཏི ཨཱཧ ‘‘ཝསྶསཏཱཡུཀཀཱལེ ཛཱཏོ’’ཏི. ཝསྶསཏཾ ཛཱིཝཏི སཱིལེནཱཏི ཝསྶསཏཛཱིཝཱི. ཝསྶསཏནྟི ཙ ཨཙྩནྟསཾཡོགེ ཨུཔཡོགཝཙནཾ. ཏེནཱཧ ‘‘སཀལཾ ཝསྶསཏཾ ཛཱིཝནྟོ’’ཏི. མཱཏཱཔིཏཱུནཾ མཱཏཱཝ བཧཱུཔཀཱརཏརཱཏི ཏསྶཱཡེཝ པདྷཱནབྷཱཝེན པཊིཀཱཏབྦཏྟཱ དཀྑིཎཾ ཨཾསཀཱུཊཾ ཝདནྟི. ཧདཡལོཧིཏཾ པཱཡེཏྭཱཏི ཁཱིརཾ སནྡྷཱཡ ¶ ཝདཏི. ལོཧིཏཉྷི ཁཱིརབྷཱཝེན པརིཎཱམཾ གཙྪཏི. ཏྱཱསྶཱཏི ཏེ ཨསྶ. སེསམེཏྠ ཨུཏྟཱནམེཝ.

༣༥. ཏཏིཡེ ཏེནུཔསངྐམཱིཏི ཨེཏྠ ཡེནཱདྷིཔྤཱཡེན སོ བྲཱཧྨཎོ བྷགཝནྟཾ ཨུཔསངྐམི, ཏཾ པཱཀཊཾ ཀཏྭཱ དསྶེཏུཾ ‘‘སོ ཧི བྲཱཧྨཎོ’’ཏིཨཱདིམཱཧ. ཝིརཛ྄ཛྷནཔཉྷནྟི ཡཾ པཉྷཾ པུཊྛོ ཝིརཛ྄ཛྷིཏྭཱ ཀཐེསི, ཨཝིཔརཱིཏཾ ཀཏྭཱ སམྤཱདེཏུཾ ན སཀྐོཏི, ཏཱདིསཾ པཉྷནྟི ཨཏྠོ. ཨུབྷཏོཀོཊིཀཾ པཉྷནྟི ཨུབྷོཧི ཀོཊཱིཧི ཡུཏྟཾ པཉྷཾ. ‘‘ཀིཾཝཱདཱི བྷཝཾ གོཏམོ’’ཏི ཧི པུཊྛོ ‘‘ཀིརིཡཝཱདིམྷཱི’’ཏི ཝཱ ཝདེཡྻ ‘‘ཨཀིརིཡཝཱདིམྷཱི’’ཏི ཝཱ, ཏསྨཱ ཨིམསྶ པཉྷསྶ ཝིསྶཛྫནེ ‘‘ཀིརིཡཝཱདིམྷཱི’’ཏི ཨེཀཱ ཀོཊི, ‘‘ཨཀིརིཡཝཱདིམྷཱི’’ཏི དུཏིཡཱཏི ཀོཊིདྭཡཡུཏྟོ ཨཡཾ པཉྷོ. ཨུགྒིལིཏུནྟི དྭེ ཀོཊིཡོ མོཙེཏྭཱ ཀཐེཏུཾ ཨསཀྐོནྟོ བཧི ནཱིཧརིཏུཾ ཨཏྠཏོ ཨཔནེཏུཾ ན སཀྑིསྶཏི. དྭེ ཀོཊིཡོ མོཙེནྟོ ཧི ཏཾ བཧི ནཱིཧརཏི ནཱམ. ནིགྒིལིཏུནྟི པུཙྪཱཡ དོསཾ དཏྭཱ ཧཱརེཏུཾ ཨསཀྐོནྟོ པཝེསེཏུཾ ན སཀྑིསྶཏི. ཏཏྠ དོསཾ དཏྭཱ ཧཱརེནྟོ ཧི གིལིཏྭཱ ཝིཡ ཨདསྶནཾ གམེནྟོ པཝེསེཏི ནཱམ. ཀིཾལདྡྷིཀོཏི ཀིཾདྡིཊྛིཀོ. ཝདནྟི ཨེཏེནཱཏི ཝཱདོ, དིཊྛི. ཀོ ཝཱདོ ཨེཏསྶཱཏི ཀིཾཝཱདཱི. ཀིམཀྑཱཡཱིཏི ཀིམབྷིདྷཱཡཱི, ཀཱིདིསཱི དྷམྨཀཐཱ. ཏེནཱཧ ‘‘ཀིཾ ནཱམ…པེ… པུཙྪཏཱི’’ཏི. སེསམེཏྠ ཨུཏྟཱནམེཝ.

༣༦. ཙཏུཏྠེ ¶ དཀྑིཎཾ ཨརཧནྟཱིཏི དཀྑིཎེཡྻཱ. ཨཱཧུནཾ ཝུཙྩཏི དཱནཾ, ཏཾ ཨརཧནྟཱིཏི ཨཱཧུནེཡྻཱ.

༣༧. པཉྩམེ ཀཐམཡཾ མིགཱརམཱཏཱ ནཱམ ཛཱཏཱཏི ཨཱཧ ‘‘སཱ ཧཱི’’ཏིཨཱདི. སབྦཛེཊྛཀསྶ པུཏྟསྶཱཏི ཨཏྟནོ པུཏྟེསུ སབྦཔཋམཾ ཛཱཏསྶ པུཏྟསྶ. ཨཡྻཀསེཊྛིནོཝ སམཱནནཱམཀཏྟཱཏི མིགཱརསེཊྛིནཱ ཨེཝ སདིསནཱམཀཏྟཱ. ཏསྶཱ ཀིར སབྦཛེཊྛསྶ པུཏྟསྶ ནཱམགྒཧཎདིཝསེ ཨཡྻཀསྶ མིགཱརསེཊྛིསྶེཝ ནཱམཾ ཨཀཾསུ. ཨནིབདྡྷཝཱསོ ཧུཏྭཱཏི ཨེཀསྨིཾཡེཝ ཝིཧཱརེ ནིབདྡྷཝཱསོ ཨཧུཏྭཱ. དྷུཝཔརིབྷོགཱནཱིཏི ནིཡཏཔརིབྷོགཱནི. ནནུ བྷགཝཱ ཀདཱཙི ཙཱརིཀམྤི པཀྐམཏི, ཀཐཾ ཏཱནི སེནཱསནཱནི དྷུཝཔརིབྷོགེན པརིབྷུཉྫཱིཏི ཨཱཧ ‘‘ཨུཏུཝསྶཾ ཙཱརིཀཾ ཙརིཏྭཱཔཱི’’ཏིཨཱདི. ཏཏྠ ཨུཏུཝསྶནྟི ཧེམནྟགིམྷེ སནྡྷཱཡ ཝདཏི. མགྒཾ ཋཔེཏྭཱཏི ཐེརསྶ ཨཱགམནམགྒཾ ཋཔེཏྭཱ. ཨུཎྷཝལཱཧཀཱཏི ཨུཎྷཨུཏུནོ ¶ པཙྩཡབྷཱུཏམེགྷམཱལཱསམུཊྛཱཔཀཱ དེཝཔུཏྟཱ. ཏེསཾ ཀིར ཏཐཱཙིཏྟུཔྤཱདསམཀཱལམེཝ ཡཐིཙྪིཏཾ ཋཱནཾ ཨུཎྷཾ ཕརམཱནཱ, ཝལཱཧཀམཱལཱ ནཱཏིབཧལཱ ཨིཏོ ཙིཏོ ནབྷཾ ཚཱདེནྟཱི ཝིདྷཱཝཏི. ཨེས ནཡོ སཱིཏཝལཱཧཀཝསྶཝལཱཧཀཱསུ. ཨབྦྷཝལཱཧཀཱ པན དེཝཏཱ སཱིཏུཎྷཝསྶེཧི ཝིནཱ ཀེཝལཾ ཨབྦྷཔཊལསྶེཝ སམུཊྛཱཔཀཱ ཝེདིཏབྦཱ. ཀེཝལཾ ཝཱ ཝཱཏསྶེཝ, ཏེནེཝ དེཝཏཱ ཝཱཏཝལཱཧཀཱ.

ཨེཏྠ ཙ ཡཾ ཝསྶཱནེ ཙ སིསིརེ ཙ ཨབྦྷཾ ཨུཔྤཛྫཏི, ཏཾ ཨུཏུསམུཊྛཱནཾ པཱཀཏིཀམེཝ. ཡཾ པན ཨབྦྷམྷིཡེཝ ཨཏིཨབྦྷཾ སཏྟཱཧམྤི ཙནྡསཱུརིཡེ ཚཱདེཏྭཱ ཨེཀནྡྷཀཱརཾ ཀརོཏི, ཡཉྩ ཙིཏྟཝེསཱཁམཱསེསུ ཨབྦྷཾ, ཏཾ དེཝཏཱནུབྷཱཝེན ཨུཔྤནྣཾ ཨབྦྷནྟི ཝེདིཏབྦཾ. ཡོ ཙ ཏསྨིཾ ཏསྨིཾ ཨུཏུམྷི ཨུཏྟརདཀྑིཎཱདིཔཀཏིཝཱཏོ ཧོཏི, ཨཡཾ ཨུཏུསམུཊྛཱནོ. ཝཱཏེཔི ཝནརུཀྑཀྑནྡྷཱདིཔྤདཱལནོ ཨཏིཝཱཏོ ནཱམ ཨཏྠི. ཨཡཉྩེཝ, ཡོ ཙ ཨཉྙོཔི ཨཀཱལཝཱཏོ, ཨཡཉྩ དེཝཏཱནུབྷཱཝེན ནིབྦཏྟོ. ཡཾ གིམྷཱནེ ཨུཎྷཾ, ཏཾ ཨུཏུསམུཊྛཱནིཀཾ པཱཀཏིམེཝ. ཡཾ པན ཨུཎྷེཔི ཨཏིཨུཎྷཾ སཱིཏཀཱལེ ཙ ཨུཔྤནྣཾ ཨུཎྷཾ, ཏཾ དེཝཏཱནུབྷཱཝེན ནིབྦཏྟཾ. ཡཾ ཝསྶཱནེ ཙ ཧེམནྟེ ཙ སཱིཏཾ ཧོཏི, ཏཾ ཨུཏུསམུཊྛཱནམེཝ. ཡཾ པན སཱིཏེཔི ཨཏིསཱིཏཾ, གིམྷེ ཙ ཨུཔྤནྣཾ སཱིཏཾ, ཏཾ དེཝཏཱནུབྷཱཝེན ནིབྦཏྟཾ. ཡཾ ཝསྶིཀེ ཙཏྟཱརོ མཱསེ ཝསྶཾ, ཏཾ ཨུཏུསམུཊྛཱནམེཝ, ཡཾ པན ཝསྶེཡེཝ ཨཏིཝསྶཾ, ཡཉྩ ཙིཏྟཝེསཱཁམཱསེསུ ཝསྶཾ, ཏཾ དེཝཏཱནུབྷཱཝེན ནིབྦཏྟཾ.

ཏཏྲིདཾ ཝཏྠུ – ཨེཀོ ཀིར ཝསྶཝལཱཧཀདེཝཔུཏྟོ ཏགརཀཱུཊཝཱསིཁཱིཎཱསཝཏྠེརསྶ སནྟིཀཾ གནྟྭཱ ཝནྡིཏྭཱ ཨཊྛཱསི. ཐེརོ – ‘‘ཀོསི ཏྭ’’ནྟི པུཙྪི. ཨཧཾ, བྷནྟེ, ཝསྶཝལཱཧཀོ དེཝཔུཏྟོཏི ¶ . ཏུམྷཱཀཾ ཀིར ཙིཏྟེན དེཝོ ཝསྶཏཱིཏི? ཨཱམ, བྷནྟེཏི. པསྶིཏུཀཱམཱ མཡནྟི. ཏེམིསྶཐ, བྷནྟེཏི. མེགྷསཱིསཾ ཝཱ གཛྫིཏཾ ཝཱ ན པཉྙཱཡཏི, ཀཐཾ ཏེམིསྶཱམཱཏི? བྷནྟེ, ཨམྷཱཀཾ ཙིཏྟེན དེཝོ ཝསྶཏི, ཏུམྷེ པཎྞསཱལཾ པཝིསཐཱཏི. སཱདྷུ དེཝཔུཏྟཱཏི པཱདེ དྷོཝིཏྭཱ པཎྞསཱལཾ པཱཝིསི. དེཝཔུཏྟོ ཏསྨིཾ པཝིསནྟེཡེཝ ཨེཀཾ གཱིཏཾ གཱཡིཏྭཱ ཧཏྠཾ ཨུཀྑིཔི, སམནྟཱ ཏིཡོཛནཊྛཱནཾ ཨེཀམེགྷཾ ཨཧོསི. ཐེརོ ཨཌྜྷཏིནྟོ པཎྞསཱལཾ པཝིཊྛོཏི.

ཀཱམཾ ¶ ཧེཊྛཱ ཝུཏྟཱཔི དེཝཏཱ ཙཱཏུམཧཱརཱཛིཀཱཝ, ཏཱ པན ཏེན ཏེན ཝིསེསེན ཝཏྭཱ ཨིདཱནི ཏདཉྙེ པཋམབྷཱུམིཀེ ཀཱམཱཝཙརདེཝེ སཱམཉྙཏོ གཎྷནྟོ ‘‘ཙཱཏུམཧཱརཱཛིཀཱ’’ཏི ཨཱཧ. དྷཏརཊྛཝིརཱུལ༹ྷཀཝིརཱུཔཀྑཀུཝེརསངྑཱཏཱ ཙཏྟཱརོ མཧཱརཱཛཱནོ ཨེཏེསནྟི ཙཱཏུམཧཱརཱཛིཀཱ, ཏེ སིནེརུསྶ པབྦཏསྶ ཝེམཛ྄ཛྷེ ཧོནྟི. ཏེསུ པབྦཏཊྛཀཱཔི ཨཏྠི ཨཱཀཱསཊྛཀཱཔི. ཏེསཾ པརམྤརཱ ཙཀྐཝཱལ༹པབྦཏཾ པཏྟཱ. ཁིཌྜཱཔདོསིཀཱ མནོཔདོསིཀཱ ཙནྡིམཱ དེཝཔུཏྟོ སཱུརིཡོ དེཝཔུཏྟོཏི ཨེཏེ སབྦེཔི ཙཱཏུམཧཱརཱཛིཀདེཝལོཀཊྛཱ ཨེཝ.

ཏཱཝཏིཾསཱཏི ཏཱཝཏིཾསཱནཾ དེཝཱནཾ ནཱམཾ, ཏེཔི ཨཏྠི པབྦཏཊྛཀཱ, ཨཏྠི ཨཱཀཱསཊྛཀཱ, ཏེསཾ པརམྤརཱ ཙཀྐཝཱལ༹པབྦཏཾ པཏྟཱ. ཏཐཱ ཡཱམཱདཱིནཾ. ཨེཀདེཝལོཀེཔི ཧི དེཝཱནཾ པརམྤརཱ ཙཀྐཝཱལ༹པབྦཏཾ ཨཔྤཏྟཱ ནཱམ ནཏྠི. ཏཏྠ མགྷེན མཱཎཝེན སདྡྷིཾ མཙལགཱམེ ཀཱལཾ ཀཏྭཱ ཏེཏྟིཾས སཧཔུཉྙཀཱརིནོ ཨེཏྠ ནིབྦཏྟཱཏི ཏཾ སཧཙཱརིཏཾ ཋཱནཾ ཏེཏྟིཾསཾ, ཏདེཝ ཏཱཝཏིཾསཾ, ཏཾ ནིཝཱསོ ཨེཏེསནྟི ཏཱཝཏིཾསཱཏི ཝདནྟི. ཡསྨཱ པན སེསཙཀྐཝཱལེ༹སུཔི ཚཀཱམཱཝཙརདེཝལོཀཱ ཨཏྠི. ཝུཏྟམྤི ཙེཏཾ ‘‘སཧསྶཾ ཙཱཏུམཧཱརཱཛིཀཱནཾ སཧསྶཾ ཏཱཝཏིཾསཱན’’ནྟི (ཨ. ནི. ༣.༨༡). ཏསྨཱ ནཱམཔཎྞཏྟིཡེཝེསཱ ཏསྶ དེཝལོཀསྶཱཏི ཝེདིཏབྦཱ. དུཀྑཏོ ཡཱཏཱ ཨཔཡཱཏཱཏི ཡཱམཱ. ཨཏྟནོ སིརིསམྤཏྟིཡཱ ཏུསཾ ཨིཏཱ གཏཱཏི ཏུསིཏཱ. ནིམྨཱནེ རཏི ཨེཏེསནྟི ནིམྨཱནརཏིནོ. ཝསཝཏྟཱི དེཝཏཱཏི པརནིམྨིཏཝསཝཏྟིནོ དེཝཱ. པརནིམྨིཏེསུ བྷོགེསུ ཝསཾ ཝཏྟེནྟཱིཏི པརནིམྨིཏཝསཝཏྟིནོ.

བྲཱུཧིཏོ པརིཝུདྡྷོ ཏེཧི ཏེཧི ཛྷཱནཱདཱིཧི ཝིསིཊྛེཧི གུཎེཧཱིཏི བྲཧྨཱ. ཝཎྞཝནྟཏཱཡ ཙེཝ དཱིགྷཱཡུཀཏཱཡ ཙ བྲཧྨཔཱརིསཛྫཱདཱིཧི མཧནྟོ བྲཧྨཱཏི མཧཱབྲཧྨཱ. ཏསྶ པརིསཱཡཾ བྷཝཱ པརིཙཱརིཀཱཏི བྲཧྨཔཱརིསཛྫཱ. ཏསྶེཝ པུརོཧིཏཊྛཱནེ ཋིཏཱཏི བྲཧྨཔུརོཧིཏཱ. ཨཱབྷསྶརེཧི པརིཏྟཱ ཨཱབྷཱ ཨེཏེསནྟི པརིཏྟཱབྷཱ. ཨཔྤམཱཎཱ ཨཱབྷཱ ཨེཏེསནྟི ཨཔྤམཱཎཱབྷཱ. དཱིཔིཀཱཡ ཨཙྩི ཝིཡ ཨེཏེསཾ སརཱིརཏོ ཨཱབྷཱ ཚིཛྫིཏྭཱ ཚིཛྫིཏྭཱ པཏནྟཱི ཝིཡ སརཏི ཝིསྶརཏཱིཏི ཨཱབྷསྶརཱ, ཡཐཱཝུཏྟཔྤབྷཱཡ ཨཱབྷཱསནསཱིལཱ ཝཱ ཨཱབྷསྶརཱ. སུབྷཱཏི སོབྷནཱ པབྷཱ. སུབྷཱཏི ཧི ¶ ཨེཀགྒྷནཱ ནིཙྩལཱ སརཱིརཱབྷཱ ཝུཙྩཏི ¶ , སཱ པརིཏྟཱ སུབྷཱ ཨེཏེསནྟི པརིཏྟསུབྷཱ. ཨཔྤམཱཎཱ སུབྷཱ ཨེཏེསནྟི ཨཔྤམཱཎསུབྷཱ. སུབྷེན ཨོཀིཎྞཱ ཝིཀིཎྞཱ, སུབྷེན སརཱིརཔྤབྷཱཝཎྞེན ཨེཀགྒྷནཱ སུཝཎྞམཉྫཱུསཱཡ ཋཔིཏསམྤཛྫལིཏཀཉྩནཔིཎྜསསྶིརིཀཱཏི སུབྷཀིཎྞཱ. ཏཏྠ སོབྷནཱཡ པབྷཱཡ ཀིཎྞཱ སུབྷཱཀིཎྞཱཏི ཝཏྟབྦེ བྷཱ-སདྡསྶ རསྶཏྟཾ ཨནྟིམ ཎ-ཀཱརསྶ ཧ-ཀཱརཉྩ ཀཏྭཱ ‘‘སུབྷཀིཎྷཱ’’ཏི ཝུཏྟཾ. ཝིཔུལཕལཱ ཝེཧཔྥལཱ. ཝིཔུལཕལཱཏི ཙ ཝིཔུལསནྟསུཁཝཎྞཱདིཕལཱ. ཨཔྤཀེན ཀཱལེན ཨཏྟནོ ཋཱནཾ ན ཝིཛཧནྟཱིཏི ཨཝིཧཱ. ཀེནཙི ན ཏཔནཱིཡཱཏི ཨཏཔྤཱ. ཨཀིཙྪེན སུཁེན པསྶིཏབྦཱ མནུཉྙརཱུཔཏཱཡཱཏི སུདསྶཱ. སུཔརིསུདྡྷདསྶནཏཱཡ སམྨཱ པསྶནྟི སཱིལེནཱཏི སུདསྶཱི. ཨུཀྐཊྛསམྤཏྟཱིཧི ཡོགཏོ ནཏྠི ཨེཏེསཾ ཀནིཊྛཱ སམྤཏྟཱིཏི ཨཀནིཊྛཱ.

ཀཱཡསཀྑཱིཧཱིཏི ནཱམཀཱཡེན དེསནཱཡ སམྤཊིཙྪནཝསེན སཀྑིབྷཱུཏེཧི. ཧལཱཧལནྟི ཀོལཱཧལཾ. མཧགྒཏཙིཏྟེནཱཏི ཙཏུཏྠཛ྄ཛྷཱནཔཱདཀེན ཨབྷིཉྙཱཙིཏྟེན.

ནནུ ཙ ‘‘ཨཛ྄ཛྷཏྟནྟི ཀཱམབྷཝོ, བཧིདྡྷཱཏི རཱུཔཱརཱུཔབྷཝོ’’ཏི ཙ ཨཡུཏྟམེཏཾ? ཡསྨིཉྷི བྷཝེ སཏྟཱ བཧུཏརཾ ཀཱལཾ ཝསནྟི, སོ ནེསཾ ཨཛ྄ཛྷཏྟཾ. ཡསྨིཉྩ ཨཔྤཏརཾ ཀཱལཾ ཝསནྟི, སོ ནེསཾ བཧིདྡྷཱཏི ཝཏྟུཾ ཡུཏྟཾ. རཱུཔཱརཱུཔབྷཝེ ཙ སཏྟཱ ཙིརཏརཾ ཝསནྟི, ཨཔྤཏརཾ ཀཱམབྷཝེ, ཏསྨཱ ‘‘ཨཛ྄ཛྷཏྟནྟི ཀཱམབྷཝོ, བཧིདྡྷཱཏི རཱུཔཱརཱུཔབྷཝོ’’ཏི ཀསྨཱ ཝུཏྟནྟི ཨཱཧ ‘‘ཀིཉྩཱཔཱི’’ཏིཨཱདི. ཙཏུཏྠམེཝ ཀོཊྛཱསནྟི ཝིཝཊྚཊྛཱཡིསངྑཱཏཾ ཙཏུཏྠཾ ཨསངྑྱེཡྻཀཔྤཾ. ཨིཏརེསཱུཏི སཾཝཊྚསཾཝཊྚཊྛཱཡིཝིཝཊྚསངྑཱཏེསུ ཏཱིསུ ཨསངྑྱེཡྻཀཔྤེསུ. ཨཱལཡོཏི སངྒོ. པཏྠནཱཏི ‘‘ཀཐཾ ནཱམ ཏཏྲཱུཔཔནྣཱ བྷཝིསྶཱམཱ’’ཏི ཨབྷིཔཏྠནཱ. ཨབྷིལཱསོཏི ཏཏྲཱུཔཔཛྫིཏུཀཱམཏཱ. ཏསྨཱཏིཨཱདིནཱ ཡཐཱཝུཏྟམཏྠཾ ནིགམེཏི.

ཨེཏྠཱཡཾ ཨདྷིཔྤཱཡོ – ཀསྶཙིཔི ཀིལེསསྶ ཨཝིཀྑམྦྷིཏཏྟཱ ཀེནཙིཔི པཀཱརེན ཝིཀྑམྦྷནམཏྟེནཔི ཨཝིམུཏྟོ ཀཱམབྷཝོ ཨཛ྄ཛྷཏྟགྒཧཎསྶ ཨཏྟཱནཾ ཨདྷིཀིཙྩ ཨུདྡིསྶ པཝཏྟགྒཱཧསྶ ཝིསེསཔཙྩཡོཏི ཨཛ྄ཛྷཏྟཾ ནཱམ. ཏཏྠ བནྡྷནཾ ཨཛ྄ཛྷཏྟསཾཡོཛནཾ, ཏེན སཾཡུཏྟོ ཨཛ྄ཛྷཏྟསཾཡོཛནོ. ཏབྦིཔརིཡཱཡཏོ བཧིདྡྷཱསཾཡོཛནོཏི.

ཚནྡརཱགཝསེནེཝ ¶ ཨཛ྄ཛྷཏྟསཾཡོཛནཾ བཧིདྡྷཱསཾཡོཛནཉྩ པུགྒལཾ དསྶེཏྭཱ ཨིདཱནི ཨོརམྦྷཱགིཡཨུདྡྷམྦྷཱགིཡསཾཡོཛནཝསེནཔི དསྶེཏུཾ ‘‘ཨོརམྦྷཱགིཡཱནི ཝཱ’’ཏིཨཱདིམཱཧ. ཨོརཾ ཝུཙྩཏི ཀཱམདྷཱཏུ, པཊིསནྡྷིཡཱ པཙྩཡབྷཱཝེན ཏཾ ཨོརཾ བྷཛནྟཱིཏི ཨོརམྦྷཱགིཡཱནི. ཏཏྠ ཙ ཀམྨུནཱ ¶ ཝིཔཱཀཾ སཏྟེན ཙ དུཀྑཾ སཾཡོཛེནྟཱིཏི སཾཡོཛནཱནི, སཀྐཱཡདིཊྛིཝིཙིཀིཙྪཱསཱིལབྦཏཔརཱམཱསཀཱམརཱགཔཊིགྷཱ. ཨུདྡྷཾ ཝུཙྩཏི རཱུཔཱརཱུཔདྷཱཏུ, ཝུཏྟནཡེནེཏཾ ཨུདྡྷཾ བྷཛནྟཱིཏི ཨུདྡྷམྦྷཱགིཡཱནི, སཾཡོཛནཱནི. རཱུཔརཱགཱརཱུཔརཱགམཱནུདྡྷཙྩཱཝིཛྫཱ. ཨཐ ཝཱ ཨོརམྦྷཱགོ ཝུཙྩཏི ཀཱམདྷཱཏུ རཱུཔཱརཱུཔབྷཝཏོ ཧེཊྛཱབྷཱུཏཏྟཱ, ཏཏྲཱུཔཔཏྟིཡཱ པཙྩཡབྷཱཝཏོ ཨོརམྦྷཱགསྶ ཧིཏཱནཱིཏི ཨོརམྦྷཱགིཡཱནི ཡཐཱ ‘‘ཝཙྪཱཡོགོ དུཧཀོ’’ཏི. ཨུདྡྷམྦྷཱགོ ནཱམ མཧགྒཏབྷཱཝོ, ཏསྶ ཧིཏཱནི ཨུདྡྷམྦྷཱགིཡཱནི. པཱདེསུ བདྡྷཔཱསཱཎོ ཝིཡ པཉྩོརམྦྷཱགིཡསཾཡོཛནཱནི ཧེཊྛཱ ཨཱཀཌྜྷམཱནཱཀཱརཱནི ཧོནྟི. ཧཏྠེཧི གཧིཏརུཀྑསཱཁཱ ཝིཡ པཉྩུདྡྷམྦྷཱགིཡསཾཡོཛནཱནི ཨུཔརི ཨཱཀཌྜྷམཱནཱཀཱརཱནི. ཡེསཉྷི སཀྐཱཡདིཊྛིཨཱདཱིནི ཨཔྤཧཱིནཱནི, ཏེ བྷཝགྒེཔི ནིབྦཏྟེ ཨེཏཱནི ཨཱཀཌྜྷིཏྭཱ ཀཱམབྷཝེཡེཝ པཱཏེནྟི, ཏསྨཱ ཨེཏཱནི པཉྩ གཙྪནྟཾ ཝཱརེནྟི, གཏཾ པུན ཨཱནེནྟི. རཱུཔརཱགཱདཱིནི པཉྩ གཙྪནྟཾ ན ཝཱརེནྟི, ཨཱགནྟུཾ པན ན དེནྟི.

ཨསམུཙྪིནྣེསུ ཨོརམྦྷཱགིཡསཾཡོཛནེསུ ལདྡྷཔཙྩཡེསུ ཨུདྡྷམྦྷཱགིཡཱནི སཾཡོཛནཱནི ཨགཎནཱུཔགཱནི ཧོནྟཱིཏི ལབྦྷམཱནཱནམྤི པུཐུཛྫནཱནཾ ཝསེན ཨཝིབྷཛིཏྭཱ ཨརིཡཱནཾ ཡོགཝསེན ཝིབྷཛིཏུཀཱམོ ‘‘ཨུབྷཡམྤི ཙེཏ’’ནྟིཨཱདིམཱཧ. ཏཏྠ ཝཊྚནིསྶིཏམཧཱཛནསྶཱཏི པུཐུཛྫནེ སནྡྷཱཡ ཝདཏི. དྭེདྷཱ པརིཙྪིནྣོཏི ཀཱམསུགཏིརཱུཔཱརཱུཔབྷཝཝསེན དྭཱིཧི པཀཱརེཧི པརིཙྪིནྣོ.

ཝཙྪཀསཱལོཔམཾ ཨུཏྟཱནཏྠམེཝ. ཨོཔམྨསཾསནྡནེ པན ཀསྶཙི ཀིལེསསྶ ཨཝིཀྑམྦྷིཏཏྟཱ, ཀཐཉྩིཔི ཨཝིམུཏྟོ ཀཱམབྷཝོ ཨཛ྄ཛྷཏྟགྒཧཎསྶ ཝིསེསཔཙྩཡཏྟཱ, ཨིམེསཾ སཏྟཱནཾ ཨབྦྷནྟརཊྛེན ཨནྟོ ནཱམ. རཱུཔཱརཱུཔབྷཝོ ཏབྦིཔརིཡཱཡཏོ བཧི ནཱམ. ཏཐཱ ཧི ཡསྶ ཨོརམྦྷཱགིཡཱནི སཾཡོཛནཱནི ཨཔྤཧཱིནཱནི, སོ ཨཛ྄ཛྷཏྟསཾཡོཛནོ ཝུཏྟོ. ཡསྶ ཏཱནི པཧཱིནཱནི, སོ བཧིདྡྷཱསཾཡོཛནོ. ཏསྨཱ ཨནྟོ ཨསམུཙྪིནྣབནྡྷནཏཱཡ བཧི ཙ པཝཏྟམཱནབྷཝངྒསནྟཱནཏཱཡ ཨནྟོབདྡྷོ བཧིསཡིཏོ ¶ ནཱམ. ནིརནྟརཔྤཝཏྟབྷཝངྒསནྟཱནཝསེན ཧི སཡིཏཝོཧཱརོ. ཀཱམཾ ནེསཾ བཧིབནྡྷནམྤི ཨསམུཙྪིནྣཾ, ཨནྟོབནྡྷནསྶ པན མཱུལཏཱཡ ཨེཝཾ ཝུཏྟཾ. ཏེནཱཧ ‘‘སཾཡོཛནཾ པན ཏེསཾ ཀཱམཱཝཙརཱུཔནིབདྡྷམེཝཱ’’ཏི. ཨིམིནཱ ནཡེན སེསཏྟཡེཔི ཨཏྠོ ཝེདིཏབྦོ.

ཨེཏྟཱཝཏཱ ཙ ཀིརཱཏི ཀིར-སདྡོ ཨརུཙིསཾསཱུཙནཏྠོ. ཏེནེཏྠ ཨཱཙརིཡཝཱདསྶ ཨཏྟནོ ཨརུཙྩནབྷཱཝཾ དཱིཔེཏི. ‘‘སཱིལཝཱ’’ཏི ཨནཱམཊྛཝིསེསསཱམཉྙཏོ སཱིལསངྑེཔེན གཧིཏཾ, ཏཉྩ ཙཏུབྦིདྷནྟི ཨཱཙརིཡཏྠེརོ ‘‘ཙཏུཔཱརིསུདྡྷིསཱིལཾ ཨུདྡིསིཏྭཱ’’ཏི ཨཱཧ. ཏཏྠཱཏི ཙཏུཔཱརིསུདྡྷིསཱིལེསུ. ཛེཊྛཀསཱིལནྟི པདྷཱནསཱིལཾ. ཨུབྷཡཏྠཱཏི ཨུདྡེསནིདྡེསེསུ, ནིདྡེསེ ཝིཡ ཨུདྡེསེཔི ¶ པཱཏིམོཀྑསཾཝརོཝ ཐེརེན ཝུཏྟོ ‘‘སཱིལཝཱ’’ཏི ཝུཏྟཏྟཱཏི ཨདྷིཔྤཱཡོ. སཱིལགྒཧཎཉྷི པཱལི༹ཡཾ པཱཏིམོཀྑསཾཝརཝསེནེཝ ཨཱགཏཾ. ཏེནཱཧ ‘‘པཱཏིམོཀྑསཾཝརོཡེཝཱ’’ཏིཨཱདི. ཏཏྠ ཨཝདྷཱརཎེན ཨིཏརེསཾ ཏིཎྞཾ ཨེཀདེསེན པཱཏིམོཀྑནྟོགདྷབྷཱཝཾ དཱིཔེཏི. ཏཐཱ ཧི ཨནོལོཀིཡོལོཀནེ ཨཱཛཱིཝཧེཏུ ཙ སིཀྑཱཔདཝཱིཏིཀྐམེ གིལཱནཔཙྩཡསྶ ཨཔཙྩཝེཀྑིཏཔརིབྷོགེ ཙ ཨཱཔཏྟི ཝིཧིཏཱཏི. ཏཱིཎཱིཏི ཨིནྡྲིཡསཾཝརསཱིལཱདཱིནི. སཱིལནྟི ཝུཏྟཊྛཱནཾ ནཱམ ཨཏྠཱིཏི སཱིལཔརིཡཱཡེན ཏེསཾ ཀཏྠཙི སུཏྟེ གཧིཏཊྛཱནཾ ནཱམ ཀིཾ ཨཏྠི ཡཐཱ ‘‘པཱཏིམོཀྑསཾཝརོ’’ཏི? ཨཱཙརིཡསྶ སམྨུཁཏཱཡ ཨཔྤཊིཀྑིཔནྟོ ཨུཔཙཱརེན པུཙྪནྟོ ཝིཡ ཝདཏི. ཏེནཱཧ ‘‘ཨནནུཛཱནནྟོ’’ཏི. ཚདྭཱརརཀྑཱམཏྟཀམེཝཱཏི ཏསྶ སལླཧུཀབྷཱཝམཱཧ ཙིཏྟཱདྷིཊྛཱནབྷཱཝམཏྟེན པཊིཔཱཀཏིཀབྷཱཝཱཔཏྟིཏོ. ཨིཏརདྭཡེཔི ཨེསེཝ ནཡོ. པཙྩཡུཔྤཏྟིམཏྟཀནྟི ཕལེན ཧེཏུཾ དསྶེཏི. ཨུཔྤཱདནཧེཏུཀཱ ཧི པཙྩཡཱནཾ ཨུཔྤཏྟི. ཨིདམཏྠནྟི ཨིདཾ པཡོཛནཾ ཨིམསྶ པཙྩཡསྶ པརིབྷུཉྫནེཏི ཨདྷིཔྤཱཡོ. ནིཔྤརིཡཱཡེནཱཏི ཨིམིནཱ ཨིནྡྲིཡསཾཝརཱདཱིནི ཏཱིཎི པདྷཱནསྶ སཱིལསྶ པརིཔཱལནཝསེན པཝཏྟིཡཱ པརིཡཱཡསཱིལཱནི ནཱམཱཏི དསྶེཏི. ཨིདཱནི པཱཏིམོཀྑསཾཝརསྶེཝ པདྷཱནབྷཱཝཾ བྱཏིརེཀཏོ ཨནྭཡཏོ ཙ ཨུཔམཱཡ ཝིབྷཱཝེཏུཾ ‘‘ཡསྶཱ’’ཏིཨཱདིམཱཧ. ཏཏྠ སོ པཱཏིམོཀྑསཾཝརོ. སེསཱནི ཨིནྡྲིཡསཾཝརཱདཱིནི.

པཱཏིམོཀྑསཾཝརསཾཝུཏོཏི ¶ ཡོ ཧི ནཾ པཱཏི རཀྑཏི, ཏཾ མོཀྑེཏི མོཙེཏི ཨཱཔཱཡིཀཱདཱིཧི དུཀྑེཧཱིཏི པཱཏིམོཀྑནྟི ལདྡྷནཱམེན སིཀྑཱཔདསཱིལེན པིཧིཏཀཱཡཝཙཱིདྭཱརོ. སོ པན ཡསྨཱ ཨེཝཾབྷཱུཏོ ཏེན སམནྣཱགཏོ ནཱམ ཧོཏི, ཏསྨཱ ཝུཏྟཾ ‘‘པཱཏཱིམོཀྑསཾཝརེན སམནྣཱགཏོ’’ཏི.

ཨཔརོ ནཡོ – ཀིལེསཱནཾ བལཝབྷཱཝཏོ, པཱཔཀིརིཡཱཡ ཙ སུཀརབྷཱཝཏོ, པུཉྙཀིརིཡཱཡ ཙ དུཀྐརབྷཱཝཏོ བཧུཀྑཏྟུཾ ཨཔཱཡེསུ པཏནསཱིལོཏི པཱཏཱི, པུཐུཛྫནོ. ཨནིཙྩཏཱཡ ཝཱ བྷཝཱདཱིསུ ཀམྨཝེགཀྑིཏྟོ གྷཊིཡནྟཾ ཝིཡ ཨནཝཊྛཱནེན པརིབྦྷམནཏོ གམནཏོ གམནསཱིལོཏི པཱཏཱི, མརཎཝསེན ཏམྷི ཏམྷི སཏྟནིཀཱཡེ ཨཏྟབྷཱཝསྶ པཱཏནསཱིལོ ཝཱ པཱཏཱི, སཏྟསནྟཱནོ, ཙིཏྟམེཝ ཝཱ. ཏཾ པཱཏིཾ སཾསཱརདུཀྑཏོ མོཀྑེཏཱིཏི པཱཏིམོཀྑཾ. ཙིཏྟསྶ ཧི ཝིམོཀྑེན སཏྟོ ཝིམུཏྟོཏི ཝུཙྩཏི. ཝུཏྟཉྷི ‘‘ཙིཏྟཝོདཱནཱ ཝིསུཛ྄ཛྷནྟཱི’’ཏི, ‘‘ཨནུཔཱདཱཡ ཨཱསཝེཧི ཙིཏྟཾ ཝིམུཏྟ’’ནྟི (མཧཱཝ. ༢༨) ཙ.

ཨཐ ཝཱ ཨཝིཛྫཱདིནཱ ཧེཏུནཱ སཾསཱརེ པཏཏི གཙྪཏི པཝཏྟཏཱིཏི པཱཏི, ‘‘ཨཝིཛྫཱནཱིཝརཎཱནཾ སཏྟཱནཾ ཏཎྷཱསཾཡོཛནཱནཾ སནྡྷཱཝཏཾ སཾསརཏ’’ནྟི ¶ (སཾ. ནི. ༢.༡༢༤) ཧི ཝུཏྟཾ, ཏསྶ པཱཏིནོ སཏྟསྶ ཏཎྷཱདིསཾཀིལེསཏྟཡཏོ མོཀྑོ ཨེཏེནཱཏི པཱཏིམོཀྑོ. ‘‘ཀཎྛེཀཱལོ༹’’ཏིཨཱདཱིནཾ ཝིཡསྶ སམཱསསིདྡྷི ཝེདིཏབྦཱ.

ཨཐ ཝཱ པཱཏེཏི ཝིནིཔཱཏེཏི དུཀྑེཏི པཱཏི, ཙིཏྟཾ. ཝུཏྟཉྷི –

‘‘ཙིཏྟེན ནཱིཡཏེ ལོཀོ, ཙིཏྟེན པརིཀསྶཏཱི’’ཏི; (སཾ. ནི. ༡.༦༢);

ཏསྶ པཱཏིནོ མོཀྑོ ཨེཏེནཱཏི པཱཏིམོཀྑོ. པཏཏི ཝཱ ཨེཏེན ཨཔཱཡདུཀྑེ སཾསཱརདུཀྑེ ཙཱཏི པཱཏི, ཏཎྷཱདིསཾཀིལེསོ. ཝུཏྟཉྷི –

‘‘ཏཎྷཱ ཛནེཧི པུརིསཾ, (སཾ. ནི. ༡.༥༦-༥༧) ཏཎྷཱདུཏིཡོ པུརིསོ’’ཏི (ཨིཏིཝུ. ༡༥, ༡༠༥; ཨ. ནི. ༤.༩) ཙ ཨཱདི;

ཏཏོ པཱཏིཏོ མོཀྑོཏི པཱཏིམོཀྑོ.

ཨཐ ¶ ཝཱ པཏཏི ཨེཏྠཱཏི པཱཏི, ཚ ཨཛ྄ཛྷཏྟིཀབཱཧིརཱནི ཨཱཡཏནཱནི. ཝུཏྟཉྷི –

‘‘ཚསུ ལོཀོ སམུཔྤནྣོ, ཚསུ ཀུབྦཏི སནྠཝ’’ནྟི (སཾ. ནི. ༡.༧༠; སུ. ནི. ༡༧༡);

ཏཏོ ཚཨཛ྄ཛྷཏྟིཀབཱཧིརཱཡཏནསངྑཱཏཏོ པཱཏིཏོ མོཀྑོཏི པཱཏིམོཀྑོ.

ཨཐ ཝཱ པཱཏོ ཝིནིཔཱཏོ ཨསྶ ཨཏྠཱིཏི པཱཏཱི, སཾསཱརོ. ཏཏོ མོཀྑོཏི པཱཏིམོཀྑོ.

ཨཐ ཝཱ སབྦལོཀཱདྷིཔཏིབྷཱཝཏོ དྷམྨིསྶརོ བྷགཝཱ ‘‘པཏཱི’’ཏི ཝུཙྩཏི, མུཙྩཏི ཨེཏེནཱཏི མོཀྑོ, པཏིནོ མོཀྑོ པཏིམོཀྑོ ཏེན པཉྙཏྟཏྟཱཏི, པཏིམོཀྑོ ཨེཝ པཱཏིམོཀྑོ. སབྦགུཎཱནཾ ཝཱ མཱུལབྷཱཝཏོ ཨུཏྟམཊྛེན པཏི ཙ སོ ཡཐཱཝུཏྟཊྛེན མོཀྑོ ཙཱཏི པཏིམོཀྑོ, པཏིམོཀྑོ ཨེཝ པཱཏིམོཀྑོ. ཏཐཱ ཧི ཝུཏྟཾ ‘‘པཱཏིམོཀྑནྟི ཨཱདིམེཏཾ མུཁམེཏཾ པམུཁམེཏ’’ནྟི (མཧཱཝ. ༡༣༥) ཝིཏྠཱརོ.

ཨཐ ¶ ཝཱ པ-ཨིཏི པཀཱརེ, ཨཏཱིཏི ཨཙྩནྟཏྠེ ནིཔཱཏོ, ཏསྨཱ པཀཱརེཧི ཨཙྩནྟཾ མོཀྑེཏཱིཏི པཱཏིམོཀྑོ. ཨིདཉྷི སཱིལཾ སཡཾ ཏདངྒཝསེན, སམཱདྷིསཧིཏཾ པཉྙཱསཧིཏཉྩ ཝིཀྑམྦྷནཝསེན, སམུཙྪེདཝསེན ཙ ཨཙྩནྟཾ མོཀྑེཏི མོཙེཏཱིཏི པཱཏིམོཀྑོ. པཏི པཏི མོཀྑོཏི ཝཱ པཏིམོཀྑོ, ཏམྷཱ ཏམྷཱ ཝཱིཏིཀྐམདོསཏོ པཙྩེཀཾ མོཀྑོཏི ཨཏྠོ. པཏིམོཀྑོ ཨེཝ པཱཏིམོཀྑོ. མོཀྑོ ཝཱ ནིབྦཱནཾ, ཏསྶ མོཀྑསྶ པཏིབིམྦབྷཱུཏོཏི པཏིམོཀྑོ. སཱིལསཾཝརོ ཧི སཱུརིཡསྶ ཨརུཎུགྒམནཾ ཝིཡ ནིབྦཱནསྶ ཨུདཡབྷཱུཏོ ཏཔྤཊིབྷཱགོ ཝིཡ ཡཐཱརཧཾ ཀིལེསནིབྦཱཔནཏོ པཏིམོཀྑཾ, པཏིམོཀྑཾཡེཝ པཱཏིམོཀྑཾ.

ཨཐ ཝཱ མོཀྑཾ པཏི ཝཏྟཏི, མོཀྑཱབྷིམུཁནྟི ཝཱ པཏིམོཀྑཾ, པཏིམོཀྑམེཝ པཱཏིམོཀྑནྟི ཨེཝམེཏྠ པཱཏིམོཀྑསདྡསྶ ཨཏྠོ ཝེདིཏབྦོ.

ཨཱཙཱརགོཙརསམྤནྣོཏི ཀཱཡིཀཝཱཙསིཀཨཝཱིཏིཀྐམསངྑཱཏེན ཨཱཙཱརེན, ནཝེསིཡཱདིགོཙརཏཱདིསངྑཱཏེན གོཙརེན སམྤནྣོ, སམྤནྣཨཱཙཱརགོཙརོཏི ¶ ཨཏྠོ. ཨཔྤམཏྟཀེསཱུཏི པརིཏྟཀེསུ ཨནཱཔཏྟིགམནཱིཡེསུ. ‘‘དུཀྐཊདུབྦྷཱསིཏམཏྟེསཱུ’’ཏི ཨཔརེ. ཝཛྫེསཱུཏི གཱརཡ྄ཧེསུ. ཏེ པན ཨེཀནྟཏོ ཨཀུསལསབྷཱཝཱ ཧོནྟཱིཏི ཨཱཧ ‘‘ཨཀུསལདྷམྨེསཱུ’’ཏི. བྷཡདསྶཱིཏི བྷཡཏོ དསྶནསཱིལོ, པརམཱཎུམཏྟམྤི ཝཛྫཾ སིནེརུཔྤམཱཎཾ ཝིཡ ཀཏྭཱ བྷཱཡནསཱིལོ. སམྨཱ ཨཱདིཡིཏྭཱཏི སམྨདེཝ སཀྐཙྩཾ སབྦསོཝ ཨཱདིཡིཏྭཱ. སིཀྑཱཔདེསཱུཏི ནིདྡྷཱརཎེ བྷུམྨནྟི སམུདཱཡཏོ ཨཝཡཝནིདྡྷཱརཎཾ དསྶེནྟོ ‘‘སིཀྑཱཔདེསུ ཏཾ ཏཾ སིཀྑཱཔདཾ སམཱདིཡིཏྭཱ སིཀྑཏཱི’’ཏི ཨཏྠམཱཧ, སིཀྑཱཔདམེཝ ཧི སམཱདཱཏབྦཾ སིཀྑིཏབྦཉྩཱཏི ཨདྷིཔྤཱཡོ. ཡཾ ཀིཉྩི སིཀྑཱཔདེསཱུཏི སིཀྑཱཀོཊྛཱསེསུ མཱུལཔཉྙཏྟིཨནུཔཉྙཏྟིསབྦཏྠཔཉྙཏྟིཔདེསཔཉྙཏྟིཨཱདིབྷེདཾ ཡཾ ཀིཉྩི སིཀྑིཏབྦཾ. ཡཾ པཊིཔཛྫིཏབྦཾ པཱུརེཏབྦཾ སཱིལཾ, ཏཾ པན དྭཱརཝསེན དུཝིདྷམེཝཱཏི ཨཱཧ ‘‘ཀཱཡིཀཾ ཝཱ ཝཱཙསིཀཾ ཝཱ’’ཏི. ཨིམསྨིཾ ཨཏྠཝིཀཔྤེ སིཀྑཱཔདེསཱུཏི ཨཱདྷཱརེ བྷུམྨཾ སིཀྑཱབྷཱགེསུ ཀསྶཙི ཝིསུཾ ཨགྒཧཎཏོ. ཏེནཱཧ ‘‘ཏཾ སབྦ’’ནྟི.

ཨཉྙཏརཾ དེཝགྷཊནྟི ཨཉྙཏརཾ དེཝནིཀཱཡཾ. ཨཱགཱམཱི ཧོཏཱིཏི པཊིསནྡྷིཝསེན ཨཱགམནསཱིལོ ཧོཏི. ཨཱགནྟཱཏི ཨེཏྠཱཔི ཨེསེཝ ནཡོ. ཨིམིནཱ ཨངྒེནཱཏི ཨིམིནཱ ཀཱརཎེན.

སུཀྑཝིཔསྶཀོ ཡེབྷུཡྻེན ཙཏུདྷཱཏུཝཝཏྠཱནམུཁེན ཀམྨཊྛཱནཱབྷིནིཝེསཱི ཧོཏཱིཏི ཨཱཧ ‘‘སུཀྑཝིཔསྶཀསྶ དྷཱཏུཀམྨཊྛཱནིཀབྷིཀྑུནོ’’ཏི. ཝུཏྟམེཝཏྠཾ སམྤིཎྜེཏྭཱ ནིགམེནྟོ ‘‘པཋམེན ཨངྒེནཱ’’ཏིཨཱདིམཱཧ.

ཙིཏྟསྶ ¶ སུཁུམབྷཱཝོ ཨིདྷ སུཁམཏྟབྷཱཝམཱཔནྣེན དཊྛབྦོཏི ཨཱཧ ‘‘སབྦཱཔི ཧི ཏཱ’’ཏིཨཱདི. ཏནྟིཝསེནཱཏི ཀེཝལཾ ཏནྟིཊྛཔནཝསེན, ན པན ཐེརསྶ ཀསྶཙི མགྒསྶ ཝཱ ཕལསྶ ཝཱ ཨུཔྤཱདནཏྠཱཡ, ནཱཔི སམྨཱཔཊིཔཏྟིཡཾ ཡོཛནཏྠཱཡཱཏི ཨདྷིཔྤཱཡོ.

༣༨. ཚཊྛེ མཧཱཀཙྩཱནོཏི གིཧིཀཱལེ ཨུཛྫེནིརཉྙོ པུརོཧིཏཔུཏྟོ ཨབྷིརཱུཔོ དསྶནཱིཡོ པཱསཱདིཀོ སུཝཎྞཝཎྞོ ཙ. ཝརཎཱ ནཱམ རུཀྑོ, ཏསྶ ཨཝིདཱུརེ བྷཝཏྟཱ ནགརམྤི ཝརཎསདྡེན ཝུཙྩཏཱིཏི ཨཱཧ ‘‘ཝརཎཱ ནཱམ ཨེཀཾ ནགར’’ནྟི. དྭནྡཔདསྶ པཙྩེཀཾ ཨབྷིསམྦནྡྷོ ཧོཏཱིཏི ¶ ཧེཏུསདྡཾ པཙྩེཀཾ ཡོཛེཏྭཱ དསྶེནྟོ ‘‘ཀཱམརཱགཱབྷིནིཝེསཧེཏཱུ’’ཏིཨཱདིམཱཧ. ཧེཏུསདྡེན སམྦནྡྷེ སཏི ཡོ ཨཏྠོ སམྦྷཝཏི, ཏཾ དསྶེཏུཾ ‘‘ཨིདཾ ཝུཏྟཾ ཧོཏཱི’’ཏིཨཱདིམཱཧ. ཏཏྠ ཀཱམརཱགེན ཨབྷིནིཝིཊྛཏྟཱཏི ཨེཏེན ཀཱམརཱགཱབྷིནིཝེསཧེཏཱུཏི ཨིམསྶ ཨཏྠཾ དཱིཔེཏི, ཏཐཱ ཝིནིབདྡྷཏྟཱཏིཨཱདཱིཧི ཀཱམརཱགཝིནིབདྡྷཧེཏཱུཏིཨཱདཱིནཾ. ཏཏོ མུཁོཏི ཏདབྷིམུཁོ. མཱནནྟི ཨཱལ༹ྷཀཱདིམཱནབྷཎྜཾ. སེསམེཏྠ ཨུཏྟཱནམེཝ.

༣༩. སཏྟམེ མདྷུརཱཡནྟི ཨུཏྟརམདྷུརཱཡཾ. གུནྡཱཝནེཏི ཀཎྷགུནྡཱཝནེ, ཀཱལ༹པིཔྤལིཝནེཏི ཨཏྠོ. ཛརཱཛིཎྞེཏི ཛརཱཡ ཛིཎྞེ, ན བྱཱདྷིཨཱདཱིནཾ ཝསེན ཛིཎྞསདིསེ ནཱཔི ཨཀཱལིཀེན ཛརཱཡ ཨབྷིབྷཱུཏེ. ཝཡོཝུདྡྷེཏི ཛིཎྞཏྟཱ ཨེཝ ཙསྶ ཝཡོཝུདྡྷིཔྤཏྟིཡཱ ཝུདྡྷེན སཱིལཱདིཝུདྡྷིཡཱ. ཛཱཏིམཧལླཀེཏི ཛཱཏིཡཱ མཧནྟཏཱཡ ཙིརརཏྟཏཱཡ མཧལླཀེ, ན བྷོགཔརིཝཱརཱདཱིཧཱིཏི ཨཏྠོ. ཨདྡྷགཏེཏི ཨེཏྠ ཨདྡྷ-སདྡོ དཱིགྷཀཱལཝཱཙཱིཏི ཨཱཧ ‘‘དཱིགྷཀཱལདྡྷཱནཾ ཨཏིཀྐནྟེ’’ཏི. ཝཡོཏི པུརིམཔདལོཔེནཱཡཾ ནིདྡེསོཏི ཨཱཧ ‘‘པཙྪིམཝཡ’’ནྟི, ཝསྶསཏསྶ ཏཏིཡཀོཊྛཱསསངྑཱཏཾ པཙྪིམཝཡཾ ཨནུཔྤཏྟེཏི ཨཏྠོ.

བྷཝཏི ཨེཏྠ ཕལཾ ཏདཱཡཏྟཝུཏྟིཏཱཡཱཏི བྷཱུམི, ཀཱརཎནྟི ཨཱཧ ‘‘ཡེན ཀཱརཎེནཱ’’ཏིཨཱདི. པརིཔཀྐོཏི པརིཎཏོ, ཝུདྡྷིབྷཱཝཾ པཏྟོཏི ཨཏྠོ. མོགྷཛིཎྞོཏི ཨནྟོ ཐིརཀརཎཱནཾ དྷམྨཱནཾ ཨབྷཱཝེན ཏུཙྪཛིཎྞོ ནཱམ. བཱལདཱརཀོཔི དཧརོཏི ཝུཙྩཏཱིཏི ཏཏོ ཝིསེསནཏྠཾ ‘‘ཡུཝཱ’’ཏི ཝུཏྟཾ. ཨཏིཀྐནྟཔཋམཝཡཱ ཨེཝ སཏྟཱ སབྷཱཝེན པལིཏསིརཱ ཧོནྟཱིཏི པཋམཝཡེ ཋིཏབྷཱཝཾ དསྶེཏུཾ ‘‘སུསུཀཱལ༹ཀེསོ’’ཏི ཝུཏྟཾ. བྷདྲེནཱཏི ལདྡྷཀེན. ཨེཀཙྩོ ཧི དཧརོཔི སམཱནོ ཀཱཎོ ཝཱ ཧོཏི ཀུཎིཨཱདཱིནཾ ཝཱ ཨཉྙཏརོ, སོ ན བྷདྲེན ཡོབྦནེན སམནྣཱགཏོ ནཱམ ཧོཏི. ཡོ པན ཨབྷིརཱུཔོ ཧོཏི དསྶནཱིཡོ པཱསཱདིཀོ སབྦསམྤཏྟིསམྤནྣོ ཡཾ ཡདེཝ ཨལངྐཱརཔརིཧཱརཾ ཨིཙྪཏི, ཏེན ཏེན ཨལངྐཏོ དེཝཔུཏྟོ ཝིཡ ཙརཏི, ཨཡཾ བྷདྲེན ཡོབྦནེན སམནྣཱགཏོ ནཱམ ཧོཏི. ཏེནེཝཱཧ ‘‘ཡེན ཡོབྦནེན སམནྣཱགཏོ’’ཏིཨཱདི.

ཡམྷི ¶ སཙྩཉྩ དྷམྨོ ཙཱཏི ཡམྷི པུགྒལེ སོལ༹སཧཱཀཱརེཧི པཊིཝིདྡྷཏྟཱ ཙཏུབྦིདྷཾ སཙྩཾ, ཉཱཎེན སཙྪིཀཏཏྟཱ ནཝཝིདྷལོཀུཏྟརདྷམྨོ ཙ ཨཏྠི. ཨཧིཾསཱཏི ¶ དེསནཱམཏྟམེཏཾ, ཡམྷི པན ཙཏུབྦིདྷཱཔི ཨཔྤམཉྙཱབྷཱཝནཱ ཨཏྠཱིཏི ཨཏྠོ. སཾཡམོ དམོཏི སཱིལཉྩེཝ ཨིནྡྲིཡསཾཝརོ ཙ. ཝནྟམལོཏི མགྒཉཱཎེན ནཱིཧཊམལོ. དྷཱིརོཏི དྷིཏིསམྤནྣོ. ཐེརོཏི སོ ཨིམེཧི ཐིརབྷཱཝཀཱརཎེཧི སམནྣཱགཏཏྟཱ ཐེརོཏི པཝུཙྩཏཱིཏི ཨཏྠོ.

༤༠. ཨཊྛམེ ‘‘ཙོརཱ བལཝནྟོ ཧོནྟཱི’’ཏི པདཾ ཨུདྡྷརིཏྭཱ ཡེཧི ཀཱརཎེཧི ཏེ བལཝནྟོ ཧོནྟི, ཏེསཾ སབྦྷཱཝཾ དསྶེནྟོ ‘‘པཀྑསམྤནྣཱ’’ཏིཨཱདིམཱཧ. ཏཏྠ ནིཝཱསཊྛཱནསམྤནྣཏཱ གིརིདུགྒཱདིསབྦྷཱཝཏོ. ཨཏིཡཱཏུནྟི ཨནྟོ ཡཱཏུཾ, གནྟུཾ པཝིསིཏུནྟི ཨཏྠོ. ཏཾ པན ཨནྟོཔཝིསནཾ ཀེནཙི ཀཱརཎེན བཧིགཏསྶ ཧོཏཱིཏི ཨཱཧ ‘‘བཧིདྡྷཱ ཛནཔདཙཱརིཀཾ ཙརིཏྭཱ’’ཏིཨཱདི. ནིཡྻཱཏུནྟི བཧི ནིཀྑམིཏུཾ. ཏཉྩ བཧིནིཀྑམནཾ བཧིདྡྷཱཀརཎཱིཡེ སཏི སམྦྷཝཏཱིཏི ཨཱཧ ‘‘ཙོརཱ ཛནཔདཾ ཝིལུམྤནྟཱི’’ཏིཨཱདི. ཨནུསཉྙཱཏུནྟི ཨནུསཉྩརིཏུཾ. སེསམེཏྠ ཨུཏྟཱནམེཝ.

༤༡. ནཝམེ མིཙྪཱཔཊིཔཏྟཱདྷིཀརཎཧེཏཱུཏི ཨེཏྠ ཨདྷི-སདྡོ ཨནཏྠཀོཏི ཨཱཧ ‘‘མིཙྪཱཔཊིཔཏྟིཡཱ ཀརཎཧེཏཱུ’’ཏི. ན ཨཱརཱདྷཀོཏི ན སམྤཱདཀོ ན པརིཔཱུརཀོ. ཉཱཡཏི པཊིཝིཛ྄ཛྷནཝསེན ནིབྦཱནཾ གཙྪཏཱིཏི ཉཱཡོ, སོ ཨེཝ ཏཾསམངྒིནཾ ཝཊྚདུཀྑཔཱཏཏོ དྷཱརཎཊྛེན དྷམྨོཏི ཉཱཡོ དྷམྨོ, ཨརིཡམགྒོ. སོ པནེཏྠ སཧ ཝིཔསྶནཱཡ ཨདྷིཔྤེཏོཏི ཨཱཧ ‘‘སཧཝིཔསྶནཀཾ མགྒ’’ནྟི. ཨཱརཱདྷནཾ ནཱམ སཾསིདྡྷི, སཱ པན ཡསྨཱ སམྤཱདནེན པརིཔཱུརཎེན ཨིཙྪིཏཱ, ཏསྨཱ ཝུཏྟཾ ‘‘སམྤཱདེཏུཾ པཱུརེཏུ’’ནྟི.

༤༢. དསམེ དུགྒཧིཏེཧཱིཏི ཨཏྠཏོ བྱཉྫནཏོ ཙ དུཊྛུ གཧིཏེཧི, ཨཱུནཱདྷིཀཝིཔརཱིཏཔདཔཙྩཱབྷཊྛཱདིཝསེན ཝིལོམེཏྭཱ གཧིཏེཧཱིཏི ཨཏྠོ. ཨུཔྤཊིཔཱཊིཡཱ གཧིཏེཧཱིཏི ཨིདཾ པན ནིདསྶནམཏྟཾ དུགྒཧསྶ ཨཱུནཱདྷིཀཱདིཝསེནཔི སམྦྷཝཏོ. ཏེནེཝཱཧ ‘‘ཨཏྟནོ དུགྒཧིཏསུཏྟནྟཱནཾཡེཝ ཨཏྠཉྩ པཱལི༹ཉྩ ཨུཏྟརིཏརཾ ཀཏྭཱ དསྶེནྟཱི’’ཏི.

སམཙིཏྟཝགྒཝཎྞནཱ ནིཊྛིཏཱ.

༥. པརིསཝགྒཝཎྞནཱ

༤༣. པཉྩམསྶ ¶ པཋམེ ཨུདྡྷཙྩེན སམནྣཱགཏཱཏི ཨཀཔྤིཡེ ཀཔྤིཡསཉྙིཏཱཡ, ཀཔྤིཡེ ཨཀཔྤིཡསཉྙིཏཱཡ, ཨཝཛྫེ ཝཛྫསཉྙིཏཱཡ, ཝཛྫེ ཨཝཛྫསཉྙིཏཱཡ ¶ ཨུདྡྷཙྩཔྤཀཏིཀཱ. ཡེ ཧི ཝིནཡེ ཨཔཀཏཉྙུནོ སཾཀིལེསཝོདཱནིཡེསུ དྷམྨེསུ ན ཀུསལཱ སཀིཉྩནཀཱརིནོ ཝིཔྤཊིསཱརབཧུལཱ, ཏེསཾ ཨནུཔྤནྣཉྩ ཨུདྡྷཙྩཾ ཨུཔྤཛྫཏི, ཨུཔྤནྣཉྩ བྷིཡྻོབྷཱཝཾ ཝེཔུལླཾ ཨཱཔཛྫཏི. སཱརཱབྷཱཝེན ཏུཙྪཏྟཱ ནལོ༹ ཝིཡཱཏི ནལོ༹, མཱནོཏི ཨཱཧ ‘‘ཨུནྣལཱ༹ཏི ཨུགྒཏནལཱ༹’’ཏི. ཏེནཱཧ ‘‘ཨུཊྛིཏཏུཙྪམཱནཱ’’ཏི. མཱནོ ཧི སེཡྻསྶ སེཡྻོཏི སདིསོཏི ཙ པཝཏྟིཡཱ ཝིསེསཏོ ཏུཙྪོ. ཙཱཔལླེནཱཏི ཙཔལབྷཱཝེན, ཏཎྷཱལོལུཔྤེནཱཏི ཨཏྠོ. མུཁཁརཱཏི མུཁེན ཕརུསཱ, ཕརུསཝཱདིནོཏི ཨཏྠོ.

ཝིཀིཎྞཝཱཙཱཏི ཝིསྶཊཝཙནཱ སམྥཔྤལཱཔིཏཱཡ ཨཔརིཡནྟཝཙནཱ. ཏེནཱཧ ‘‘ཨསཾཡཏཝཙནཱ’’ཏིཨཱདི. ཝིསྶཊྛསཏིནོཏི སཏིཝིརཧིཏཱ. པཙྩཡཝེཀལླེན ཝིཛྫམཱནཱཡཔི སཏིཡཱ སཏིཀིཙྩཾ ཀཱཏུཾ ཨསམཏྠཏཱཡ ཨེཝཾ ཝུཏྟཱ. ན སམྤཛཱནནྟཱིཏི ཨསམྤཛཱནཱ, ཏཾཡོགནིཝཏྟིཡཾ ཙཱཡཾ ཨཀཱརོ ‘‘ཨཧེཏུཀཱ དྷམྨཱ (དྷ. ས. དུཀམཱཏིཀཱ ༢), ཨབྷིཀྑུཀོ ཨཱཝཱསོ’’ཏིཨཱདཱིསུ (ཙཱུལ༹ཝ. ༧༦) ཝིཡཱཏི ཨཱཧ ‘‘ནིཔྤཉྙཱ’’ཏི, པཉྙཱརཧིཏཱཏི ཨཏྠོ. པཱལི༹ཡཾ ཝིབྦྷནྟཙིཏྟཱཏི ཨུབྦྷནྟཙིཏྟཱ. སམཱདྷིཝིརཧེན ལདྡྷོཀཱསེན ཨུདྡྷཙྩེན ཏེསཾ སམཱདྷིཝིརཧཱནཾ ཙིཏྟཾ ནཱནཱརམྨཎེསུ པརིབྦྷམཏི ཝནམཀྐཊོ ཝིཡ ཝནསཱཁཱསུ. པཱཀཏིནྡྲིཡཱཏི སཾཝརཱབྷཱཝེན གིཧིཀཱལེ ཝིཡ ཝིཝཊཨིནྡྲིཡཱ. ཏེནཱཧ ‘‘པཀཏིཡཱ ཋིཏེཧཱི’’ཏིཨཱདི. ཝིཝཊེཧཱིཏི ཨསཾཝུཏེཧི.

༤༤. དུཏིཡེ བྷཎྜནཾ ཝུཙྩཏི ཀལཧསྶ པུབྦབྷཱགོཏི ཀལཧསྶ ཧེཏུབྷཱུཏཱ པརིབྷཱསཱ ཏཾསདིསཱི ཙ ཨནིཊྛཀིརིཡཱ བྷཎྜནཾ ནཱམ. ཀལཧཛཱཏཱཏི ཧཏྠཔརཱམཱསཱདིཝསེན མཏྠཀཔྤཏྟོ ཀལཧོ ཛཱཏོ ཨེཏེསནྟི ཀལཧཛཱཏཱཏི ཨེཝམེཏྠ ཨཏྠོ དཊྛབྦོ. ཝིརུདྡྷཝཱདནྟི ‘‘ཨཡཾ དྷམྨོ, ནཱཡཾ དྷམྨོ’’ཏིཨཱདིནཱ ཝིརུདྡྷཝཱདབྷཱུཏཾ ཝིཝཱདཾ. མུཁསནྣིསྶིཏཏཱཡ ཝཱཙཱ ཨིདྷ ‘‘མུཁ’’ནྟི ཨདྷིཔྤེཏཱཏི ཨཱཧ ‘‘དུབྦྷཱསིཏཱ ཝཱཙཱ མུཁསཏྟིཡོཏི ཝུཙྩནྟཱི’’ཏི. ཙཏུབྦིདྷམྤི སངྒྷཀམྨཾ སཱིམཱཔརིཙྪིནྣེཧི པཀཏཏྟེཧི བྷིཀྑཱུཧི ཨེཀཏོ ཀཏྟབྦཏྟཱ ཨེཀཀམྨཾ ནཱམ. པཉྩཝིདྷོཔི པཱཏིམོཀྑུདྡེསོ ཨེཀཏོ ཨུདྡིསིཏབྦཏྟཱ ཨེཀུདྡེསོ ནཱམ. པཉྙཏྟཾ པན སིཀྑཱཔདཾ སབྦེཧིཔི ལཛྫཱིཔུགྒལེཧི སམཾ སིཀྑིཏབྦབྷཱཝཏོ སམསིཀྑཏཱ ནཱམ ¶ . པཱལི༹ཡཾ ཁཱིརོདཀཱིབྷཱུཏཱཏི ཡཐཱ ཁཱིརཉྩ ¶ ཨུདཀཉྩ ཨཉྙམཉྙཾ སཾསནྡཏི, ཝིསུཾ ན ཧོཏི, ཨེཀཏྟཾ ཝིཡ ཨུཔེཏི. སཏིཔི ཧི ཨུབྷཡེསཾ ཀལཱཔཱནཾ པརམཏྠཏོ བྷེདེ པཙུརཛནེཧི པན དུཝིཉྙེཡྻནཱནཏྟཾ ཁཱིརོདཀཾ སམོདིཏཾ ཨཙྩནྟམེཝ སཾསཊྛཾ ཝིཡ ཧུཏྭཱ ཏིཊྛཏི, ཨེཝཾ སཱམགྒིཝསེན ཨེཀཏྟཱུཔགཏཙིཏྟུཔྤཱདཱ ཝིཡཱཏི ཁཱིརོདཀཱིབྷཱུཏཱཏི ཨེཝམེཏྠ ཨཏྠོ དཊྛབྦོ. མེཏྟཱཙཀྑཱུཧཱིཏི མེཏྟཱཙིཏྟཾ པཙྩུཔཊྛཔེཏྭཱ ཨོལོཀནཙཀྑཱུཧི. ཏཱནི ཧི པིཡབྷཱཝདཱིཔནཏོ ‘‘པིཡཙཀྑཱུནཱི’’ཏི ཝུཙྩནྟི.

༤༥. ཏཏིཡེ ཨགྒཝཏཱིཏི ཨེཏྠ ཨགྒ-སདྡོ ཨུཏྟམཔརིཡཱཡོ, ཏེན ཝིསིཊྛསྶ པུགྒལསྶ, ཝིསིཊྛཱཡ ཝཱ པཊིཔཏྟིཡཱ གཧཎཾ ཨིདྷཱདྷིཔྤེཏནྟི ཨཱཧ ‘‘ཨགྒཝཏཱིཏི ཨུཏྟམཔུགྒལཝཏཱི’’ཏིཨཱདི. ཨཝིགཏཏཎྷཏཱཡ ཏཾ ཏཾ པརིཀྑཱརཛཱཏཾ བཧུཾ ལནྟི ཨཱདིཡནྟཱིཏི བཧུལཱ, བཧུལཱ ཨེཝ བཱཧུལིཀཱ ཡཐཱ ‘‘ཝེནཡིཀོ’’ཏི (ཨ. ནི. ༨.༡༡; པཱརཱ. ༨; མ. ནི. ༡.༢༤༦). ཏེ པན ཡསྨཱ པཙྩཡབཧུབྷཱཝཱཡ ཡུཏྟཔྤཡུཏྟཱ ནཱམ ཧོནྟི, ཏསྨཱ ཨཱཧ ‘‘ཙཱིཝརཱདིབཱཧུལླཱཡ པཊིཔནྣཱ’’ཏི. སིཀྑཱཡ ཨཱདརགཱརཝཱབྷཱཝཏོ སིཐིལཾ ཨདལ༹ྷཾ གཎྷནྟཱིཏི སཱཐལིཀཱཏི ཝུཏྟཾ. སིཐིལནྟི ཙ བྷཱཝནཔུཾསཀནིདྡེསོ, སིཐིལསདྡེན ཝཱ སམཱནཏྠསྶ སཱཐལསདྡསྶ ཝསེན སཱཐལིཀཱཏི པདསིདྡྷི ཝེདིཏབྦཱ. ཨཝགམནཊྛེནཱཏི ཨདྷོགམནཊྛེན, ཨོརམྦྷཱགིཡབྷཱཝེནཱཏི ཨཏྠོ. ཨུཔདྷིཝིཝེཀེཏི སབྦཱུཔདྷིཔཊིནིསྶགྒཏཱཡ ཨུཔདྷིཝིཝིཏྟེ. ཨོརོཔིཏདྷུརཱཏི ཨུཛ྄ཛྷིཏུསྶཱཧཱ. དུཝིདྷམྤི ཝཱིརིཡནྟི ཀཱཡིཀཾ ཙེཏསིཀཉྩ ཝཱིརིཡཾ.

༤༦. ཙཏུཏྠེ ཨིདཾ དུཀྑནྟི དུཀྑསྶ ཨརིཡསཙྩསྶ པཙྩཀྑཏོ ཨགྒཧིཏབྷཱཝདསྶནཏྠཾ ཝུཏྟཾ. ཨེཏྟཀམེཝ དུཀྑནྟི ཏསྶ པརིཙྪིཛྫ ཨགྒཧིཏབྷཱཝདསྶནཏྠཾ. ཨིཏོ ཨུདྡྷཾ དུཀྑཾ ནཏྠཱིཏི ཨནཝསེསེཏྭཱ ཨགྒཧིཏབྷཱཝདསྶནཏྠཾ. ཡཐཱསབྷཱཝཏོ ནཔྤཛཱནནྟཱིཏི སརསལཀྑཎཔྤཊིཝེདྷེན ཨསམྨོཧཏོ ནཔྤཊིཝིཛ྄ཛྷནྟི. ཨསམྨོཧཔཊིཝེདྷོ ཙ ཡཐཱ ཏསྨིཾ ཉཱཎེ པཝཏྟེ པཙྩཱ དུཀྑསྶ རཱུཔཱདིཔརིཙྪེདེ སམྨོཧོ ན ཧོཏི, ཏཐཱ པཝཏྟི. ཨཙྩནྟཀྑཡོཏི ཨཙྩནྟཀྑཡནིམིཏྟཾ ནིབྦཱནཾ. ཨསམུཔྤཏྟཱིཏི ཨེཏྠཱཔི ཨེསེཝ ནཡོ. ཡཾ ནིབྦཱནཾ མགྒསྶ ཨཱརམྨཎཔཙྩཡཊྛེན ཀཱརཎབྷཱུཏཾ ཨཱགམྨ ཏདུབྷཡམྤི ནིརུཛ྄ཛྷཏི, ཏཾ ཏེསཾ ཨསམུཔྤཏྟི ནིབྦཱནཾ དུཀྑནིརོདྷོཏི ཝུཙྩཏི.

༤༧. པཉྩམེ ¶ ཝིསེསནསྶ པརནིཔཱཏེན ‘‘པརིསཱཀསཊོ’’ཏི ཝུཏྟནྟི ཨཱཧ ‘‘ཀསཊཔརིསཱ’’ཏིཨཱདི. ‘‘ཀསཊཔརིསཱ’’ཏི ཧི ཝཏྟབྦེ ‘‘པརིསཱཀསཊོ’’ཏི ཝུཏྟཾ. པརིསཱམཎྜོཏི ཨེཏྠཱཔི ཨེསེཝ ནཡོ. སེསམེཏྠ ཨུཏྟཱནམེཝ.

༤༨. ཚཊྛེ ¶ གམྦྷཱིརཱཏི ཨགཱདྷཱ དུཀྑོགཱལ༹ྷཱ. པཱལི༹ཝསེནཱཏི ཨིམིནཱ ཡོ དྷམྨཔཊིསམྦྷིདཱཡ ཝིསཡོ གམྦྷཱིརབྷཱཝོ, ཏམཱཧ. དྷམྨཔྤཊིཝེདྷསྶ ཧི དུཀྐརབྷཱཝཏོ དྷམྨསྶ པཱལི༹ཡཱ དུཀྑོགཱལ༹ྷཏཱཡ གམྦྷཱིརབྷཱཝོ. ‘‘པཱལི༹ཝསེན གམྦྷཱིརཱ’’ཏི ཝཏྭཱ ‘‘སལླསུཏྟསདིསཱ’’ཏི ཝུཏྟཾ ཏསྶ ‘‘ཨནིམིཏྟམནཉྙཱཏ’’ནྟིཨཱདིནཱ (སུ. ནི. ༥༧༩) པཱལི༹ཝསེན གམྦྷཱིརཏཱཡ ལབྦྷནཏོ. ཏཐཱ ཧི ཏཏྠ ཏཱ གཱཐཱ དུཝིཉྙེཡྻརཱུཔཱ ཏིཊྛནྟི. དུཝིཉྙེཡྻཉྷི ཉཱཎེན དུཀྑོགཱལ༹ྷནྟི ཀཏྭཱ ‘‘གམྦྷཱིར’’ནྟི ཝུཙྩཏི. པུབྦཱཔརམྤེཏྠ ཀཱསཉྩི གཱཐཱནཾ དུཝིཉྙེཡྻཏཱཡ དུཀྑོགཱལ༹ྷམེཝ, ཏསྨཱ ཏཾ ‘‘པཱལི༹ཝསེན གམྦྷཱིརཱ’’ཏི ཝུཏྟཾ. ཨིམིནཱཝ ནཡེན ‘‘ཨཏྠཝསེན གམྦྷཱིརཱ’’ཏི ཨེཏྠཱཔི ཨཏྠོ ཝེདིཏབྦོ. མཧཱཝེདལླསུཏྟསྶ (མ. ནི. ༡.༤༤༩ ཨཱདཡོ) ཨཏྠཝསེན གམྦྷཱིརཏཱ སུཝིཉྙེཡྻཱཝ. ལོཀཾ ཨུཏྟརཏཱིཏི ལོཀུཏྟརོ, ནཝཝིདྷོ ཨཔྤམཱཎདྷམྨོ. སོ ཨཏྠབྷཱུཏོ ཨེཏེསཾ ཨཏྠཱིཏི ལོཀུཏྟརཱ. ཏེནཱཧ ‘‘ལོཀུཏྟརཨཏྠདཱིཔཀཱ’’ཏི.

སཏྟསུཉྙཾ དྷམྨམཏྟམེཝཱཏི སཏྟེན ཨཏྟནཱ སུཉྙཾ ཀེཝལཾ དྷམྨམཏྟམེཝ. ཨུགྒཧེཏབྦཾ པརིཡཱཔུཎིཏབྦནྟི ལིངྒཝཙནཝིཔལླཱསེན ཝུཏྟནྟི ཨཱཧ ‘‘ཨུགྒཧེཏབྦེ ཙ པརིཡཱཔུཎིཏབྦེ ཙཱ’’ཏི. ཀཝིནོ ཀམྨཾ ཀཝིཏཱ. ཡཾ པནསྶ ཀམྨཾ, ཏཾ ཏེན ཀཏནྟི ཝུཙྩཏཱིཏི ཨཱཧ ‘‘ཀཝིཏཱཏི ཀཝཱིཧི ཀཏཱ’’ཏི. ཨིཏརནྟི ཀཱཝེཡྻཱཏི པདཾ, ཀཱབྱནྟི ཝུཏྟཾ ཧོཏི. ཀཱབྱནྟི ཙ ཀཝིནཱ ཝུཏྟནྟི ཨཏྠོ. ཏེནཱཧ ‘‘ཏསྶེཝ ཝེཝཙན’’ནྟི. ཝིཙིཏྲཨཀྑརཱཏི ཝིཙིཏྟཱཀཱརཀྑརཱ ཝིཉྙཱཔནཱིཡཱ. སཱསནཏོ བཧིབྷཱུཏཱཏི ན སཱསནཱཝཙརཱ. ཏེསཾ སཱཝཀེཧཱིཏི བུདྡྷཱནཾ སཱཝཀཱཏི ཨཔཉྙཱཏཱནཾ ཡེསཾ ཀེསཉྩི སཱཝཀེཧི. ན ཙེཝ ཨཉྙམཉྙཾ པཊིཔུཙྪནྟཱིཏི ཡེ ཝཱཙེནྟི, ཡེ ཙ སུཎནྟི, ཏེ ཨཉྙམཉྙཾ ཨཏྠཱདིཾ ནཔྤཊིཔུཙྪནྟི, ཀེཝལཾ ཝཱཙནསཝནམཏྟེནེཝ པརིཏུཊྛཱ ཧོནྟི. ཙཱརིཀཾ ན ཝིཙརནྟཱིཏི ཨསུཀསྨིཾ ཋཱནེ ཨཏྠཱདིཾ ཛཱནནྟཱ ཨཏྠཱིཏི པུཙྪནཏྠཱཡ ཙཱརིཀཾ ན གཙྪནྟི ཏཱདིསསྶ པུགྒལསྶ ཨབྷཱཝཏོ ཏསྶ ཙ པུབྦཱཔརཝིརོདྷཏོ. ཀཐཾ རོཔེཏབྦནྟི ཀེན པཀཱརེན ནིཀྑིཔིཏབྦཾ. ཨཏྠོ ནཱམ སབྷཱཝཏོ ཨནུསནྡྷིཏོ སམྦནྡྷཏོ ¶ པུབྦཱཔརཏོ ཨཱདིཔརིཡོསཱནཏོ ཙ ཉཱཏོ སམྨཱཉཱཏོ ཧོཏཱིཏི ཨཱཧ ‘‘ཀོ ཨཏྠོ’’ཏིཨཱདི. ཨནུཏྟཱནཱིཀཏནྟི ཨཀྑརསནྣིཝེསཱདིནཱ ཨནུཏྟཱནཱིཀཏཾ. ཀངྑཱཡཱཏི སཾསཡསྶ.

༤༩. སཏྟམེ ཀིལེསེཧཱི ཨཱམསིཏབྦཏོ ཨཱམིསཾ, ཙཏྟཱརོ པཙྩཡཱ. ཏདེཝ གརུ གརུཀཱཏབྦཾ ཨེཏེསཾ, ན དྷམྨོཏི ཨཱམིསགརཱུ. ཏེནཱཧ ‘‘ལོཀུཏྟརདྷམྨཾ ལཱམཀཏོ གཧེཏྭཱ ཋིཏཔརིསཱ’’ཏི. ཨུབྷཏོ བྷཱགཏོ ཝིམུཏྟོཏི ཨུབྷཏོབྷཱགཝིམུཏྟོ. དྭཱིཧི བྷཱགེཧི དྭེ ཝཱརེ ཝིམུཏྟོ. པཉྙཱཡ ཝིམུཏྟོཏི སམཐསནྣིསྶཡེན ཝིནཱ ཨགྒམགྒཔཉྙཱཡ ཝིམུཏྟོ. ཏེནཱཧ ‘‘སུཀྑཝིཔསྶཀཁཱིཎཱསཝོ’’ཏི ¶ . ཀཱཡེནཱཏི ནཱམཀཱཡེན. ཛྷཱནཕསྶཾ ཕུསིཏྭཱཏི ཨཊྛསམཱཔཏྟིསཉྙིཏཾ ཛྷཱནཕསྶཾ ཨདྷིགམཝསེན ཕུསིཏྭཱ. པཙྪཱ ནིརོདྷཾ ནིབྦཱནཾ ཡཐཱ ཨཱལོཙིཏཾ ནཱམཀཱཡེན སཙྪིཀརོཏཱིཏི ཀཱཡསཀྑཱི. ན ཏུ ཝིམུཏྟོ ཨེཀཙྩཱནཾ ཨཱསཝཱནཾ ཨཔརིཀྑཱིཎཏྟཱ. དིཊྛནྟཾ པཏྟོཏི དིཊྛསྶ ཨནྟོ ཨནནྟརོ ཀཱལོ དིཊྛནྟོ, དསྶནསངྑཱཏསྶ སོཏཱཔཏྟིམགྒཉཱཎསྶ ཨནནྟརཾ པཏྟོཏི ཨཏྠོ. པཋམཕལཏོ པཊྛཱཡ ཧི ཡཱཝ ཨགྒམགྒཱ དིཊྛིཔྤཏྟོ. ཏེནཱཧ ‘‘ཨིམེ དྭེཔི ཚསུ ཋཱནེསུ ལབྦྷནྟཱི’’ཏི.

སདྡཧནྟོ ཝིམུཏྟོཏི ཨེཏེན སབྦཐཱ ཨཝིམུཏྟསྶ སདྡྷཱམཏྟེན ཝིམུཏྟབྷཱཝདསྶནེན སདྡྷཱཝིམུཏྟསྶ སེཀྑབྷཱཝམེཝ ཝིབྷཱཝེཏི. སདྡྷཱཝིམུཏྟོཏི ཝཱ སདྡྷཱཡ ཨཝིམུཏྟོཏི ཨཏྠོ. ཚསུ ཋཱནེསཱུཏི པཋམཕལཏོ པཊྛཱཡ ཚསུ ཋཱནེསུ. དྷམྨཾ ཨནུསྶརཏཱིཏི པཋམམགྒཔཉྙཱསངྑཱཏཾ དྷམྨཾ ཨནུསྶརཏི. སདྡྷཾ ཨནུསྶརཏཱིཏི ཨེཏྠཱཔི ཨེསེཝ ནཡོ. ཨུབྷོཔི ཧེཏེ སོཏཱཔཏྟིམགྒཊྛཱཡེཝ. ཨིམཾ ཀསྨཱ གཎྷནྟཱིཏི ཨེཝཾ ཨེཀནྟཔཱསཾསེསུ ཨརིཡེསུ གཡ྄ཧམཱནེསུ ཨིམཾ ཨེཀནྟནིནྡིཏཾ ལཱམཀཾ དུསྶཱིལཾ ཀསྨཱ གཎྷནྟི. སབྦེསུ སབྦཏཱ སདིསེསུ ལབྦྷམཱནོཔི ཝིསེསོ ན པཉྙཱཡཏི, ཝིསབྷཱགེ པན སཏི ཨེཝ པཉྙཱཡཏི པཊབྷཱཝེན ཝིཡ ཙིཏྟཔཊསྶཱཏི ཨཱཧ ‘‘ཨེཀཙྩེསུ པནཱ’’ཏིཨཱདི. གནྠིཏཱཏི ཨཝབདྡྷཱ. མུཙྪིཏཱཏི མུཙྪཾ སམྨོཧཾ ཨཱཔནྣཱ. ཚནྡརཱགཨཔཀཌྜྷནཱཡཱཏི ཚནྡརཱགསྶ ཨཔནཡནཏྠཾ. ནིསྶརཎཔཉྙཱཡཱཏི ཏཏོ ནིསྶརཎཱཝཧཱཡ པཉྙཱཡ ཝིརཧིཏཱ.

པཉྙཱདྷུརེནཱཏི ¶ ཝིཔསྶནཱབྷིནིཝེསེན. ཨབྷིནིཝིཊྛོཏི ཝིཔསྶནཱམགྒཾ ཨོཏིཎྞོ. ཏསྨིཾ ཁཎེཏི སོཏཱཔཏྟིམགྒཀྑཎེ. དྷམྨཱནུསཱརཱི ནཱམ པཉྙཱསངྑཱཏེན དྷམྨེན ཨརིཡམགྒསོཏསྶ ཨནུསྶརཎཏོ. ཀཱཡསཀྑཱི ནཱམ ནཱམཀཱཡེན སཙྪིཀཱཏབྦསྶ ནིབྦཱནསྶ སཙྪིཀརཎཏོ. ཝིཀྑམྦྷནསམུཙྪེདཱནཾ ཝསེན དྭིཀྑཏྟུཾ. ཨརཱུཔཛ྄ཛྷཱནེཧི རཱུཔཀཱཡཏོ, ཨགྒམགྒེན སེསཀཱཡཏོཏི དྭཱིཧི བྷཱགེཧི ནིསྶཀྐཝཙནཉྩེཏཾ. དིཊྛནྟཾ པཏྟོ, དིཊྛཏྟཱ ཝཱ པཏྟོཏི དིཊྛིཔྤཏྟོ. ཏཏྠ དིཊྛནྟཾ པཏྟོཏི དསྶནསངྑཱཏསྶ སོཏཱཔཏྟིམགྒཉཱཎསྶ ཨནནྟརཾ པཏྟོཏི ཨཏྠོ. དིཊྛཏྟཱཏི ཙཏུསཙྩདསྶནསངྑཱཏཱཡ པཉྙཱཡ ནིརོདྷསྶ དིཊྛཏྟཱ. ཛྷཱནཕསྶརཧིཏཱཡ སཱཏིསཡཱཡ པཉྙཱཡ ཨེཝ ཝིམུཏྟོཏི པཉྙཱཝིམུཏྟོ. སེསཾ ཝུཏྟནཡཏྟཱ སུཝིཉྙེཡྻམེཝ.

༥༠. ཨཊྛམེ ན སམཱཏི ཝིསམཱ. ཀཱཡཀམྨཱདཱིནཾ ཝིསམཏྟཱ ཏཏོ ཨེཝ ཏཏྠ པཀྑལནཾ སུལབྷནྟི ཨཱཧ ‘‘སཔཀྑལནཊྛེནཱ’’ཏི. ནིཔྤཀྑལནཊྛེནཱཏི པཀྑལནཱབྷཱཝེན. ཨུདྡྷམྨཱནཱིཏི དྷམྨཏོ ཨཔེཏཱནི. ཨུབྦིནཡཱནཱིཏི ཨེཏྠཱཔི ཨེསེཝ ནཡོ.

༥༡. ནཝམེ ¶ ཨདྷམྨིཀཱཏི ཨདྷམྨེ ནིཡུཏྟཱ. ཏེནཱཧ ‘‘ནིདྡྷམྨཱ’’ཏི, དྷམྨརཧིཏཱཏི ཨཏྠོ.

༥༢. དསམེ གཎྷནྟཱིཏི པཝཏྟེནྟི. ན ཙེཝ ཨཉྙམཉྙཾ སཉྙཱཔེནྟཱིཏི མཱུལཏོ པཊྛཱཡ ཏཾ ཨདྷིཀརཎཾ ཡཐཱ ཝཱུཔསམྨཏི, ཨེཝཾ ཨཉྙམཉྙཾ ཨིཏརཱིཏརེ ན སམྨཱ ཛཱནཱཔེནྟི. སཉྙཱཔནཏྠཾ སནྣིཔཱཏེ སཏི ཏཏྠ ཡུཏྟཔཏྟཀརཎེན སཉྙཏྟིཡཱ བྷཝིཏབྦཾ, ཏེ པན སཉྙཱཔནཏྠཾ ན སནྣིཔཏནྟི. ན པེཀྑཱཔེནྟཱིཏི ཏཾ ཨདྷིཀརཎཾ མཱུལཏོ པཊྛཱཡ ཨཉྙམཉྙཾ ན པེཀྑཱཔེནྟི. ཨསཉྙཏྟིཡེཝ ཨཏྟནཱ གཧིཏཔཀྑསྶ བལཾ ཨེཏེསནྟི ཨསཉྙཏྟིབལཱ. ན ཏཐཱ མནྟེནྟཱིཏི སནྡིཊྛིཔརཱམཱསིཨཱདྷཱནགྒཱཧིདུཔྤཊིནིསྶགྒིབྷཱཝེན ཏཐཱ ན མནྟེནྟི. ཏེནཱཧ ‘‘ཐཱམསཱ’’ཏིཨཱདི. ཨུཏྟཱནཏྠོཡེཝ ཀཎྷཔཀྑེ ཝུཏྟཔྤཊིཔཀྑེན གཧེཏབྦཏྟཱ.

པརིསཝགྒཝཎྞནཱ ནིཊྛིཏཱ.

པཋམཔཎྞཱསཀཾ ནིཊྛིཏཾ.

༢. དུཏིཡཔཎྞཱསཀཾ

(༦) ༡. པུགྒལཝགྒཝཎྞནཱ

༥༣. དུཏིཡཔཎྞཱསཀསྶ ¶ ¶ པཋམེ ཧིཏགྒཧཎེན མེཏྟཱ ཝུཏྟཱ ཧོཏི, ན ཀརུཎཱ, ཨནུཀམྤཱགཧཎེན པན ཀརུཎཱཏི ཙཀྐཝཏྟིནཱ སདྡྷིཾ གཧིཏཏྟཱ ‘‘ལོཀཱནུཀམྤཱཡཱ’’ཏི ན ཝུཏྟཾ. ནིཔྤརིཡཱཡཏོ ལོཀཱནུཀམྤཱ ནཱམ སམྨཱསམྦུདྡྷཱདྷཱིནཱཏི. དྭེཏི མནུསྶདེཝསམྤཏྟིཝསེན དྭེ སམྤཏྟིཡོ. ཏཱ དྭེ, ནིབྦཱནསམྤཏྟི ཙཱཏི ཏིསྶོ.

༥༤. དུཏིཡེ བཧུསོ ལོཀེ ན ཙིཎྞཱ ན པཝཏྟཱ མནུསྶཱཏི ཨཱཙིཎྞམནུསྶཱ. ཀདཱཙིདེཝ ཧི ནེསཾ ལོཀེ ནིབྦཏྟི ཨབྷཱུཏཔུབྦཱ བྷཱུཏཱཏི ཨབྦྷུཏམནུསྶཱ.

༥༥. ཏཏིཡེ དསསུ ཙཀྐཝཱལ༹སཧསྶེསུ ཨནུཏཱཔཾ ཀརོཏི ཏསྶ ཨེཀབུདྡྷཁེཏྟབྷཱཝཏོ.

༥༦. ཙཏུཏྠེ ཐཱུཔསྶ ཡུཏྟཱཏི དྷཱཏུཡོ པཀྑིཔིཏྭཱ ཐཱུཔཀརཎསྶ ཡུཏྟཱ.

༥༧. པཉྩམེ ཨཏྟནོ ཨཱནུབྷཱཝེནཱཏི སཡམྦྷུཉཱཎེན. བུདྡྷཱཏི བུདྡྷཝནྟོ.

༥༨. ཚཊྛེ པཧཱིནཏྟཱ ན བྷཱཡཏཱིཏི ཨཏྟསིནེཧཱབྷཱཝཏོ ན བྷཱཡཏི. སཀྐཱཡདིཊྛིགྒཧཎཉྩེཏྠ ནིདསྶནམཏྟཾ, ཨཏྟསིནེཧསྶ པཊིགྷསྶ ཏདེཀཊྛསམྨོཧསྶ ཙ ཝསེན བྷཱཡནཾ ཧོཏཱིཏི ཏེསམྤི པཧཱིནཏྟཱ ན བྷཱཡཏི, ཨཉྙཐཱ སོཏཱཔནྣཱདཱིནཾ ཨབྷཡེན བྷཝིཏབྦཾ སིཡཱ. སཀྐཱཡདིཊྛིཡཱ བལཝཏྟཱཏི ཨེཏྠ ཨཧཾཀཱརསམྨོཧནཏཱདཱིནམྤི བལཝཏྟཱཏི ཝཏྟབྦཾ.

༥༩. སཏྟམེ ཨསྶཱཛཱནཱིཡོཏི ལིཁནྟི, ཨུསབྷཱཛཱནཱིཡོཏི པན པཱཋོཏི.

༦༡. ནཝམེ ཏཏྠཱཏི ཨནྟརཱཔཎེ. ཨེཀོཏི དྭཱིསུ ཀིནྣརེསུ ཨེཀོ. ཨམྦིལིཀཱཕལཉྩ ཨདྡསཱཏི ཨཱནེཏྭཱ སམྦནྡྷོ. ཨམྦིལིཀཱཕལནྟི ཏིནྟིཎཱིཕལནྟི ¶ ཝདནྟི, ཙཏུརམྦིལནྟི ཨཔརེ. དྭེ ཨཏྠེཏི པཱལི༹ཡཾ ཝུཏྟེ དྭེ ཨཏྠེ.

༦༢. དསམེ ¶ ཡཐཱཨཱརདྡྷེ ཀིཙྩེ ཝཏྟམཱནེ ཨནྟརཱ ཨེཝ པཊིགམནཾ པཊིཝཱནཾ, ནཏྠི ཨེཏསྶ པཊིཝཱནནྟི ཨཔྤཊིཝཱནོ. ཏཏྠ ཨསཾཀོཙཔྤཏྟོ. ཏེནཱཧ ‘‘ཨནུཀྐཎྛིཏོ’’ཏིཨཱདི.

༦༣. ཨེཀཱདསམེ སནྣིཝཱསནྟི སཧཝཱསཾ. ཡཐཱ ཨསཔྤུརིསཱ སཧ ཝསནྟཱ ཨཉྙམཉྙཾ ཨགཱརཝེན ཨནཱདརིཡཾ ཀརོནྟི, ཏཔྤཊིཀྑེཔེན སཔྤུརིསཱནཾ སགཱརཝཔྤཊིཔཏྟིདསྶནཔརམིདཾ སུཏྟཾ དཊྛབྦཾ.

༦༤. དྭཱདསམེ དྭཱིསུཔི པཀྑེསཱུཏི ཝིཝཱདཱཔནྣཱནཾ བྷིཀྑཱུནཾ དྭཱིསུཔི པཀྑེསུ. སཾསརམཱནཱཏི པཝཏྟམཱནཱ. དིཊྛིཔལཱ༹སོཏི དིཊྛིསནྣིསྶཡོ པལཱ༹སོ ཡུགགྒཱཧོ. ཨཱགྷཱཏེནྟོཏི ཨཱཧནནྟོ བཱདྷེནྟོ. ཨནབྷིརཱདྷནཝསེནཱཏི ཡསྶ ཨུཔྤཛྫཏི, ཏསྶ ཏདཉྙེསཉྩ ཨཏྠསྶ ཨནབྷིརཱདྷནཝསེན. སབྦམྤེཏནྟི ཝཙཱིསཾསཱརོཏི སབྦམྤེཏཾ. ཨཏྟནོ ཙིཏྟེ པརིསཱཡ ཙ ཙིཏྟེཏི ཨཱནེཏྭཱ སམྦནྡྷོ.

པུགྒལཝགྒཝཎྞནཱ ནིཊྛིཏཱ.

(༧) ༢. སུཁཝགྒཝཎྞནཱ

༦༥. དུཏིཡསྶ པཋམེ སབྦཀཱམནིཔྥཏྟིམཱུལཀཾ སུཁནྟི ཨནཝསེསཨུཔབྷོགཔརིབྷོགཝཏྠུནིཔྥཏྟིཧེཏུཀཾ ཀཱམསུཁཾ. པབྦཛྫཱམཱུལཀཾ སུཁནྟི པབྦཛྫཱཧེཏུཀཾ པཝིཝེཀསུཁཾ.

༦༦. དུཏིཡེ ཀཱམེཏི པཉྩ ཀཱམགུཎེ, སབྦེཔི ཝཱ ཏེབྷཱུམཀེ དྷམྨེ. ཝུཏྟཉྷེཏཾ ‘‘སབྦེཔི ཏེབྷཱུམཀཱ དྷམྨཱ ཀམནཱིཡཊྛེན ཀཱམཱ’’ཏི (མཧཱནི. ༡). ནེཀྑམྨཾ ཝུཙྩཏི པབྦཛྫཱ གྷརབནྡྷནཏོ ནིཀྑནྟཏྟཱ. ནིབྦཱནམེཝ ཝཱ –

‘‘པབྦཛྫཱ པཋམཾ ཛྷཱནཾ, ནིབྦཱནཉྩ ཝིཔསྶནཱ;

སབྦེཔི ཀུསལཱ དྷམྨཱ, ནེཀྑམྨནྟི པཝུཙྩརེ’’ཏི. (ཨིཏིཝུ. ཨཊྛ. ༡༠༩) –

ཧི ཝུཏྟཾ.

༦༧. ཏཏིཡེ ¶ ¶ ཨུཔདྷཱི ཝུཙྩནྟི པཉྩུཔཱདཱནཀྑནྡྷཱ, ཏནྣིསྶིཏཾ སུཁཾ ཨུཔདྷིསུཁཾ. ཏཔྤཊིཔཀྑཏོ ནིརུཔདྷིསུཁཾ ལོཀུཏྟརསུཁཾ.

༦༨. ཙཏུཏྠེ ཝཊྚཔརིཡཱཔནྣཾ སུཁཾ ཝཊྚསུཁཾ. ནིབྦཱནཱརམྨཎཾ སུཁཾ ཝིཝཊྚསུཁཾ.

༦༩. པཉྩམེ སཾཀིལེསནྟི སཾཀིལིཊྛཾ. ཏེནཱཧ ‘‘ཝཊྚགཱམིསུཁ’’ནྟི. ཝིཝཊྚསུཁནྟི མགྒཕལསཧགཏཾ སུཁཾ.

༧༠. ཚཊྛེ ཨརིཡཱནམེཝ སུཁཾ ཨརིཡསུཁཾ, ཨརིཡཉྩ ཏཾ སུཁཉྩཱཏིཔི ཨརིཡསུཁཾ. ཨནརིཡཱནམེཝ སུཁཾ ཨནརིཡསུཁཾ. ཨནརིཡཉྩ ཏཾ སུཁཉྩཱཏིཔི ཨནརིཡསུཁཾ.

༧༡. སཏྟམེ ཏནྟི ཙེཏསིཀསུཁཾ.

༧༢. ཨཊྛམེ སཧ པཱིཏིཡཱ ཝཏྟཏཱིཏི སཔྤཱིཏིཀཾ, པཱིཏིསཧགཏཾ སུཁཾ. སབྷཱཝཏོ ཝིརཱགཏོ ཙ ནཏྠི ཨེཏསྶ པཱིཏཱིཏི ནིཔྤཱིཏིཀཾ སུཁཾ. ཨཊྛཀཐཱཡཾ པནེཏྠ ཛྷཱནསུཁམེཝ ཨུདྡྷཊཾ, ཏཐཱ ཙ ‘‘ལོཀིཡསཔྤཱིཏིཀསུཁཏོ ལོཀིཡནིཔྤཱིཏིཀསུཁཾ ཨགྒ’’ནྟི ཝུཏྟཾ. ལོཀིཡནིཔྤཱིཏིཀམྤི ཧི ཨགྒཾ ལབྦྷཏེཝཱཏི བྷཱུམནྟརཾ བྷིནྡིཏྭཱ ཨགྒབྷཱཝོ ཝེདིཏབྦོ.

༧༣. ནཝམེ སཱཏསབྷཱཝམེཝ སུཁཾ སཱཏསུཁཾ, ན ཨུཔེཀྑཱསུཁཾ ཝིཡ ཨསཱཏསབྷཱཝཾ. ཀཱམཉྩེཏྠ ཀཱཡཝིཉྙཱཎསཧགཏམྤི སཱཏསུཁམེཝ, ཨཊྛཀཐཱཡཾ པན ‘‘ཏཱིསུ ཛྷཱནེསུ སུཁ’’ནྟེཝ ཝུཏྟཾ.

༧༤. དསམེ སམཱདྷིསམྤཡུཏྟཾ སུཁཾ སམཱདྷིསུཁཾ. ན སམཱདྷིསམྤཡུཏྟཾ སུཁཾ ཨསམཱདྷིསུཁཾ.

༧༥. ཨེཀཱདསམེ སུཏྟནྟཀཐཱ ཨེསཱཏི ‘‘སཔྤཱིཏིཀཾ ཛྷཱནདྭཡ’’ནྟི ཝུཏྟཾ.

༧༧. ཏེརསམེ རཱུཔཛ྄ཛྷཱནཾ རཱུཔཾ ཨུཏྟརཔདལོཔེན, ཏཾ ཨཱརམྨཎཾ ཨེཏསྶཱཏི རཱུཔཱརམྨཎཾ. ཙཏུཏྠཛ྄ཛྷཱནགྒཧཎཾ པན ཡདསྶ པཊིཡོགཱི, ཏེན སམཱནཡོགཀྑམདསྶནཔརཾ. ཡཾ ཀིཉྩི རཱུཔནྟི ཡཾ ཀིཉྩི རུཔྤནལཀྑཎཾ རཱུཔཾ. ཏཔྤཊིཀྑེཔེན ཨརཱུཔཾ ཝེདིཏབྦཾ.

སུཁཝགྒཝཎྞནཱ ནིཊྛིཏཱ.

(༨) ༣. སནིམིཏྟཝགྒཝཎྞནཱ

༧༨-༧༩. ཏཏིཡསྶ ¶ ¶ པཋམེ ནིམཱིཡཏི ཨེཏྠ ཕལཾ ཨཝསེསཔཙྩཡེཧི པཀྑིཔཱིཡཏི ཝིཡཱཏི ནིམིཏྟཾ, ཀཱརཎནྟི ཨཱཧ ‘‘སནིམིཏྟཱཏི སཀཱརཎཱ’’ཏི. དུཏིཡཱདཱིསཱུཏི དུཏིཡསུཏྟཱདཱིསུ. ཨེསེཝ ནཡོཏི ཨིམིནཱ ནིདཱནཱདིཔདཱནམྤི ཀཱརཎཔརིཡཱཡམེཝ དཱིཔེཏི. ནིདདཱཏི ཕལནྟི ནིདཱནཾ, ཧིནོཏི ཕལཾ པཏིཊྛཱཏི ཨེཏེནཱཏི ཧེཏུ, སངྑརོཏི ཕལནྟི སངྑཱརོ, པཊིཙྩ ཨེཏསྨཱ ཕལཾ ཨེཏཱིཏི པཙྩཡོ, རུཔྤཏི ནིརུཔྤཏི ཕལཾ ཨེཏྠཱཏི རཱུཔནྟི ཨེཝཾ ནིདཱནཱདིཔདཱནམྤི ཧེཏུཔརིཡཱཡཏཱ ཝེདིཏབྦཱ.

༨༤. སཏྟམེ པཙྩཡབྷཱུཏཱཡཱཏི སཧཛཱཏཱདིཔཙྩཡབྷཱུཏཱཡ.

༨༧. དསམེ སམེཙྩ སམྦྷུཡྻ པཙྩཡེཧི ཀཏོཏི སངྑཏོ, སངྑཏོ དྷམྨོ ཨཱརམྨཎཾ ཨེཏེསནྟི སངྑཏཱརམྨཎཱ. མགྒཀྑཎེ ན ཧོནྟི ནཱམ པཧཱིཡནྟཱིཏི ཀཏྭཱ. ནཱཧེསུནྟི ཨེཏྠ ‘‘ཝུཙྩནྟཱི’’ཏི ཨཛ྄ཛྷཱཧརིཏབྦཾ. ཡཱཝ ཨརཧཏྟཱ དེསནཱ དེསིཏཱ ཏཾཏཾསུཏྟཔརིཡོསཱནེ ‘‘ན ཧོནྟཱི’’ཏི ཝུཏྟཏྟཱ.

སནིམིཏྟཝགྒཝཎྞནཱ ནིཊྛིཏཱ.

(༩) ༤. དྷམྨཝགྒཝཎྞནཱ

༨༨. ཙཏུཏྠསྶ པཋམེ ཕལསམཱདྷཱིཏི ཙཏཱུསུཔི ཨརིཡཕལེསུ སམཱདྷི. ཏཐཱ ཕལཔཉྙཱ ཝེདིཏབྦཱ.

༨༩. དུཏིཡེ སམྤཡུཏྟདྷམྨེ པརིགྒཎྷཱཏཱིཏི པགྒཱཧོ. ན ཝིཀྑིཔཏཱིཏི ཨཝིཀྑེཔོ.

༩༠. ཏཏིཡེ ནམནཊྛེན ནཱམཾ. རུཔྤནཊྛེན རཱུཔཾ. སམྨསནཙཱརསྶ ཨདྷིཔྤེཏཏྟཱ ‘‘ཙཏྟཱརོ ཨརཱུཔཀྑནྡྷཱ’’ཏྭེཝ ཝུཏྟཾ. ཏེནཱཧ ‘‘དྷམྨ-ཀོཊྛཱསཔརིཙྪེདཉཱཎཾ ནཱམ ཀཐིཏ’’ནྟི.

༩༡. ཙཏུཏྠེ ¶ ཝིཛཱནནཊྛེན ཝིཛྫཱ. ཝིམུཙྩནཊྛེན ཝིམུཏྟི.

༩༢. པཉྩམེ ¶ བྷཝོ ནཱམ སསྶཏཾ སདཱ བྷཱཝཏོ, སསྶཏཝསེན ཨུཔྤཛྫནདིཊྛི བྷཝདིཊྛི. ཝིབྷཝོ ནཱམ ཨུཙྪེདོ ཝིནཱསནཊྛེན, ཝིབྷཝཝསེན ཨུཔྤཛྫནདིཊྛི ཝིབྷཝདིཊྛི. ཨུཏྟཱནཏྠཱནེཝ ཧེཊྛཱ ཝུཏྟནཡཏྟཱ.

༩༥. ཨཊྛམེ དུཀྑཾ ཝཙོ ཨེཏསྨིཾ ཝིཔྤཊིཀཱུལགཱཧིམྷི ཝིཔཙྩནཱིཀསཱཏེ ཨནཱདརེ པུགྒལེཏི དུབྦཙོ, ཏསྶ ཀམྨཾ དོཝཙསྶཾ, ཏསྶ དུབྦཙསྶ པུགྒལསྶ ཨནཱདརིཡཝསེན པཝཏྟཱ ཙེཏནཱ. ཏསྶ བྷཱཝོ དོཝཙསྶཏཱ. ཏསྶ བྷཱཝོཏི ཙ ཏསྶ ཡཐཱཝུཏྟསྶ དོཝཙསྶསྶ ཨཏྠིབྷཱཝོ, ཨཏྠཏོ དོཝཙསྶམེཝ. ཝིཏྠཱརཏོ པནེསཱ ‘‘ཏཏྠ ཀཏམཱ དོཝཙསྶཏཱ? སཧདྷམྨིཀེ ཝུཙྩམཱནེ དོཝཙསྶཱཡ’’ནྟི ཨབྷིདྷམྨེ ཨཱགཏཱ. སཱ ཨཏྠཏོ སངྑཱརཀྑནྡྷོ ཧོཏི. ཙཏུནྣཾ ཝཱ ཁནྡྷཱནཾ ཨེཏེནཱཀཱརེན པཝཏྟཱནཾ ཨེཏཾ ཨདྷིཝཙནནྟི ཝདནྟི.

པཱཔཡོགཏོ པཱཔཱ ཨསྶདྡྷཱདཡོ པུགྒལཱ ཨེཏསྶ མིཏྟཱཏི པཱཔམིཏྟོ, ཏསྶ བྷཱཝོ པཱཔམིཏྟཏཱ. ཝིཏྠཱརཏོ པནེསཱ ‘‘ཏཏྠ ཀཏམཱ པཱཔམིཏྟཏཱ? ཡེ ཏེ པུགྒལཱ ཨསྶདྡྷཱ དུསྶཱིལཱ ཨཔྤསྶུཏཱ མཙྪརིནོ དུཔྤཉྙཱ. ཡཱ ཏེསཾ སེཝནཱ ནིསེཝནཱ སཾསེཝནཱ བྷཛནཱ སམྦྷཛནཱ བྷཏྟི སམྦྷཏྟི ཏཾསམྤཝངྐཏཱ’’ཏི (དྷ. ས. ༡༣༣༣) ཨེཝཾ ཨཱགཏཱ. སཱཔི ཨཏྠཏོ དོཝཙསྶཏཱ ཝིཡ དཊྛབྦཱ. ཡཱཡ ཧི ཙེཏནཱཡ པུགྒལོ པཱཔསམྤཝངྐོ ནཱམ ཧོཏི, སཱ ཙེཏནཱ ཙཏྟཱརོཔི ཝཱ ཨརཱུཔིནོ ཁནྡྷཱ ཏདཱཀཱརཔྤཝཏྟཱ པཱཔམིཏྟཏཱ.

༩༦. ནཝམེ སུཁཾ ཝཙོ ཨེཏསྨིཾ པདཀྑིཎགཱཧིམྷི ཨནུལོམསཱཏེ སཱདརེ པུགྒལེཏི སུབྦཙོཏིཨཱདིནཱ, ཀལྱཱཎཱ སདྡྷཱདཡོ པུགྒལཱ ཨེཏསྶ མིཏྟཱཏི ཀལྱཱཎམིཏྟོཏིཨཱདིནཱ ཝུཏྟཝིཔརིཡཱཡེན ཨཏྠོ ཝེདིཏབྦོ.

༩༧. དསམེ པཐཝཱིདྷཱཏུཨཱདཡོ སུཁདྷཱཏུཀཱམདྷཱཏུཨཱདཡོ ཙ ཨེཏཱསྭེཝ ཨནྟོགདྷཱཏི ཨེཏཱསུ ཀོསལླེ དསྶིཏེ ཏཱསུཔི ཀོསལླཾ དསྶིཏམེཝ ཧོཏཱིཏི ‘‘ཨཊྛཱརས དྷཱཏུཡོ’’ཏི ཝུཏྟཾ. དྷཱཏཱུཏི ཛཱནནནྟི ཨིམིནཱ ཨཊྛཱརསནྣཾ དྷཱཏཱུནཾ སབྷཱཝཔརིཙྪེདིཀཱ སཝནདྷཱརཎསམྨསནཔྤཊིཝེདྷཔཉྙཱ ཝུཏྟཱ. ཏཏྠ དྷཱཏཱུནཾ སཝནདྷཱརཎཔཉྙཱ སུཏམཡཱ, ཨིཏརཱ བྷཱཝནཱམཡཱ. ཏཏྠཱཔི སམྨསནཔཉྙཱ ལོཀིཡཱ ¶ . ཝིཔསྶནཱ ཧི སཱ, ཨིཏརཱ ལོཀུཏྟརཱ. ལཀྑཎཱདིཝསེན ཨནིཙྩཱདིཝསེན ཙ མནསིཀརཎཾ མནསིཀཱརོ, ཏཏྠ ཀོསལླཾ མནསིཀཱརཀུསལཏཱ. ཨཊྛཱརསནྣཾཡེཝ ¶ དྷཱཏཱུནཾ སམྨསནཔྤཊིཝེདྷཔཙྩཝེཀྑཎཔཉྙཱ མནསིཀཱརཀུསལཏཱ, སཱ ཨཱདིམཛ྄ཛྷཔརིཡོསཱནཝསེན ཏིདྷཱ བྷིནྣཱ. ཏཐཱ ཧི སམྨསནཔཉྙཱ ཏསྶཱ ཨཱདི, པཊིཝེདྷཔཉྙཱ མཛ྄ཛྷེ, པཙྩཝེཀྑཎཔཉྙཱ པརིཡོསཱནཾ.

༩༨. ཨེཀཱདསམེ ཨཱཔཏྟིཡོཝ ཨཱཔཏྟིཀྑནྡྷཱ. ཏཱ པན ཨནྟརཱཔཏྟཱིནཾ ཨགྒཧཎེན པཉྩ, ཏཱསཾ གཧཎེན སཏྟ ཧོནྟཱིཏི ཨཱཧ ‘‘པཉྩནྣཉྩ སཏྟནྣཉྩ ཨཱཔཏྟིཀྑནྡྷཱན’’ནྟི. ཛཱནནནྟི ‘‘ཨིམཱ ཨཱཔཏྟིཡོ, ཨེཏྟཀཱ ཨཱཔཏྟིཡོ, ཨེཝཉྩ ཏཱསཾ ཨཱཔཛྫནཾ ཧོཏཱི’’ཏི ཛཱནནཾ. ཨེཝཾ ཏིཔྤཀཱརེན ཛཱནནཔཉྙཱ ཧི ཨཱཔཏྟིཀུསལཏཱ ནཱམ. ཨཱཔཏྟིཏོ ཝུཊྛཱཔནཔྤཡོགཏཱཡ ཀམྨབྷཱུཏཱ ཝཱཙཱ ཀམྨཝཱཙཱ, ཏཐཱབྷཱུཏཱ ཨནུསྶཱཝནཝཱཙཱ. ‘‘ཨིམཱཡ ཀམྨཝཱཙཱཡ ཨིཏོ ཨཱཔཏྟིཏོ ཝུཊྛཱནཾ ཧོཏི, ཧོནྟཉྩ པཋམེ, ཏཏིཡེ ཝཱ ཨནུསྶཱཝནེ ཡྻ-ཀཱརཾ པཏྟེ, ‘སཾཝརིསྶཱམཱི’ཏི ཝཱ པདེ པརིཡོསིཏེ ཧོཏཱི’’ཏི ཨེཝཾ ཏཾ ཏཾ ཨཱཔཏྟཱིཧི ཝུཊྛཱནཔརིཙྪེདཛཱནནཔཉྙཱ ཨཱཔཏྟིཝུཊྛཱནཀུསལཏཱ. ཝུཊྛཱནནྟི ཙ ཡཐཱཔནྣཱཡ ཨཱཔཏྟིཡཱ ཡཐཱ ཏཐཱ ཨནནྟརཱཡཏཱཔཱདནཾ. ཨེཝཾ ཝུཊྛཱནགྒཧཎེནེཝ དེསནཱཡཔི སངྒཧོ སིདྡྷོ ཧོཏི.

དྷམྨཝགྒཝཎྞནཱ ནིཊྛིཏཱ.

(༡༠) ༥. བཱལཝགྒཝཎྞནཱ

༩༩. པཉྩམསྶ པཋམེ ཨནཱགཏཾ བྷཱརཾ ཝཧཏཱིཏི ཨཏྟནོ ཨསམྤཏྟཾ བྷཱརཾ ཝཧཏི. ཨཐེརོཝ སམཱནོ ཐེརེཧི ཝཧིཏབྦཾ བཱིཛནགྒཱཧདྷམྨཛ྄ཛྷེསནཱདིབྷཱརཾ ཝཧཏཱིཏི ཨེཝམེཏྠ ཨཏྠོ དཊྛབྦོ. ཨཊྛཀཐཱཡཾ (མཧཱཝ. ཨཊྛ. ༡༥༩-༡༦༠) པན ཡསྨཱ སམྨཛྫནཱདིནཝཝིདྷཾ པུབྦཀིཙྩཾ ཨཱཎཏྟེནེཝ ཀཱཏབྦཾ, པཱཏིམོཀྑཉྩ ཨཱཎཏྟེནེཝ ཨུདྡིསིཏབྦཾ, ཏསྨཱ ཏཾ སབྦཾ ཝིནཱ ཨཱཎཏྟིཡཱ ཀརོནྟོ ཨནཱགཏཾ བྷཱརཾ ཝཧཏི ནཱམཱཏི དསྶེཏུཾ ‘‘སམྨཛྫནཱི པདཱིཔོ’’ཏིཨཱདི ཝུཏྟཾ. ཡཉྷི ‘‘ཨནུཛཱནཱམི, བྷིཀྑཝེ, ཨུཔོསཐཱགཱརཾ སམྨཛྫིཏུ’’ནྟིཨཱདིནཱ ནཡེན པཱལི༹ཡཾ ཨཱགཏཾ. ཨཊྛཀཐཱསུ ཙ –

‘‘སམྨཛྫནཱི ¶ ¶ པདཱིཔོ ཙ, ཨུདཀཾ ཨཱསནེན ཙ;

ཨུཔོསཐསྶ ཨེཏཱནི, ‘པུབྦཀརཎ’ནྟི ཝུཙྩཏི.

‘‘ཚནྡཔཱརིསུདྡྷིཨུཏུཀྑཱནཾ, བྷིཀྑུགཎནཱ ཙ ཨོཝཱདོ;

ཨུཔོསཐསྶ ཨེཏཱནི, ‘པུབྦཀིཙྩ’ནྟི ཝུཙྩཏཱི’’ཏི. (མཧཱཝ. ཨཊྛ ༡༦༨) –

ཨེཝཾ དྭཱིཧི ནཱམེཧི ནཝཝིདྷཾ པུབྦཀིཙྩཾ དསྶིཏཾ, ཏཾ ཨཀཏྭཱ ཨུཔོསཐཾ ཀཱཏུཾ ན ཝཊྚཏི. ཏསྨཱ ‘‘ཨནུཛཱནཱམི, བྷིཀྑཝེ, ཐེརེན བྷིཀྑུནཱ ནཝཾ བྷིཀྑུཾ ཨཱཎཱཔེཏུ’’ནྟི ཝཙནཏོ ཐེརེན ཨཱཎཏྟེན ཨགིལཱནེན བྷིཀྑུནཱ ཨུཔོསཐཱགཱརཾ སམྨཛྫིཏབྦཾ, པཱནཱིཡཾ པརིབྷོཛནཱིཡཾ ཨུཔཊྛཔེཏབྦཾ, ཨཱསནཾ པཉྙཱཔེཏབྦཾ, པདཱིཔོ ཀཱཏབྦོ, ཨཀརོནྟོ དུཀྐཊཾ ཨཱཔཛྫཏི.

ཐེརེནཔི པཏིརཱུཔཾ ཉཏྭཱ ཨཱཎཱཔེཏབྦཾ, ཨཱཎཱཔེནྟེནཔི ཡཾ ཀིཉྩི ཀམྨཾ ཀརོནྟོ ཝཱ སདཱ ཀཱལམེཝ ཨེཀོ ཝཱ བྷཱརནིཏྠརཎཀོ ཝཱ སརབྷཱཎཀདྷམྨཀཐིཀཱདཱིསུ ཝཱ ཨཉྙཏརོ ན ཨུཔོསཐཱགཱརསམྨཛྫནཏྠཾ ཨཱཎཱཔེཏབྦོ, ཨཝསེསཱ པན ཝཱརེན ཨཱཎཱཔེཏབྦཱ. སཙེ ཨཱཎཏྟོ སམྨཛྫནིཾ ཏཱཝཀཱལིཀམྤི ན ལབྷཏི, སཱཁཱབྷངྒཾ ཀཔྤིཡཾ ཀཱརེཏྭཱ སམྨཛྫིཏབྦཾ, ཏམྤི ཨལབྷནྟསྶ ལདྡྷཀཔྤིཡཾ ཧོཏི. པདཱིཔཀརཎེཔི ཝུཏྟནཡེནེཝ ཨཱཎཱཔེཏབྦོ, ཨཱཎཱཔེནྟེན ཙ ‘‘ཨམུཀསྨིཾ ནཱམ ཨོཀཱསེ ཏེལཾ ཝཱ ཀཔལླིཀཱ ཝཱ ཨཏྠི, ཏཾ གཧེཏྭཱ ཀརོཧཱི’’ཏི ཝཏྟབྦོ. སཙེ ཏེལཱདཱིནི ནཏྠི, པརིཡེསིཏབྦཱནི. པརིཡེསིཏྭཱ ཨལབྷནྟསྶ ལདྡྷཀཔྤིཡཾ ཧོཏི. ཨཔི ཙ ཀཔཱལེ ཨགྒི ཛཱལེཏབྦོ. ཨཱསནཔཉྙཱཔནཱཎཏྟིཡམྤི ཝུཏྟནཡེནེཝ ཨཱཎཱཔེཏབྦོ, ཨཱཎཏྟེན ཙ སཙེ ཨུཔོསཐཱགཱརེ ཨཱསནཱནི ནཏྠི, སངྒྷིཀཱཝཱསཏོ ཨཱཧརིཏྭཱ པཉྙཱཔེཏྭཱ པུན ཨཱཧརིཏབྦཱནི, ཨཱསནེསུ ཨསཏི ཀཊསཱརཀེཔི ཏཊྚིཀཱཡོཔི པཉྙཱཔེཏུཾ ཝཊྚཏི, ཏཱསུཔི ཨསཏི སཱཁཱབྷངྒཱནི ཀཔྤིཡཾ ཀཱརེཏྭཱ པཉྙཱཔེཏབྦཱནི. ཀཔྤིཡཀཱརཀཾ ཨལབྷནྟསྶ ལདྡྷཀཔྤིཡཾ ཧོཏི.

ཚནྡཔཱརིསུདྡྷཱིཏི ཨེཏྠ ཨུཔོསཐཀརཎཏྠཾ སནྣིཔཏིཏེ སངྒྷེ བཧི ཨུཔོསཐཾ ཀཏྭཱ ཨཱགཏེན སནྣིཔཱཏཊྛཱནཾ གནྟྭཱ ཀཱཡསཱམགྒིཾ ཨདེནྟེན ཚནྡོ དཱཏབྦོ. ཡོཔི གིལཱནོ ཝཱ ཀིཙྩཔྤསུཏོ ཝཱ, ཏེན པཱརིསུདྡྷིཾ དེནྟེན ཚནྡོ དཱཏབྦོ. ཀཐཾ དཱཏབྦོ? ཨེཀསྶ བྷིཀྑུནོ ¶ སནྟིཀེ ‘‘ཚནྡཾ དམྨི, ཚནྡཾ མེ ཧར, ཚནྡཾ མེ ཨཱརོཙེཧཱི’’ཏི ཨཡམཏྠོ ཀཱཡེན ཝཱ ཝཱཙཱཡ ཝཱ ཨུབྷཡེན ཝཱ ཝིཉྙཱཔེཏབྦོ. ཨེཝཾ དིནྣོ ཧོཏི ཚནྡོ. ཨཀཏཱུཔོསཐེན པན གིལཱནེན ཝཱ ཀིཙྩཔྤསུཏེན ཝཱ པཱརིསུདྡྷི ¶ དཱཏབྦཱ. ཀཐཾ དཱཏབྦཱ? ཨེཀསྶ བྷིཀྑུནོ སནྟིཀེ ‘‘པཱརིསུདྡྷིཾ དམྨི, པཱརིསུདྡྷིཾ མེ ཧར, པཱརིསུདྡྷིཾ མེ ཨཱརོཙེཧཱི’’ཏི ཨཡམཏྠོ ཀཱཡེན ཝཱ ཝཱཙཱཡ ཝཱ ཨུབྷཡེན ཝཱ ཝིཉྙཱཔེཏབྦོ. ཨེཝཾ དིནྣཱ ཧོཏི པཱརིསུདྡྷི. ཏཾ པན དེནྟེན ཚནྡོཔི དཱཏབྦོ. ཝུཏྟཉྷེཏཾ བྷགཝཏཱ – ‘‘ཨནུཛཱནཱམི, བྷིཀྑཝེ, ཏདཧུཔོསཐེ པཱརིསུདྡྷིཾ དེནྟེན ཚནྡམྤི དཱཏུཾ, སནྟི སངྒྷསྶ ཀརཎཱིཡ’’ནྟི. ཏཏྠ པཱརིསུདྡྷིདཱནཾ སངྒྷསྶཔི ཨཏྟནོཔི ཨུཔོསཐཀརཎཾ སམྤཱདེཏི, ན ཨཝསེསཾ སངྒྷཀིཙྩཾ. ཚནྡདཱནཾ སངྒྷསྶེཝ ཨུཔོསཐཀརཎཉྩ སེསཀིཙྩཉྩ སམྤཱདེཏི, ཨཏྟནོ པན ཨུཔོསཐོ ཨཀཏོཡེཝ ཧོཏི, ཏསྨཱ པཱརིསུདྡྷིཾ དེནྟེན ཚནྡོཔི དཱཏབྦོ.

ཨུཏུཀྑཱནནྟི ‘‘ཧེམནྟཱདཱིནཾ ཨུཏཱུནཾ ཨེཏྟཀཾ ཨཏིཀྐནྟཾ, ཨེཏྟཀཾ ཨཝསིཊྛ’’ནྟི ཨེཝཾ ཨུཏཱུནཾ ཨཱཙིཀྑནཾ. བྷིཀྑུགཎནཱཏི ‘‘ཨེཏྟཀཱ བྷིཀྑཱུ ཨུཔོསཐགྒེ སནྣིཔཏིཏཱ’’ཏི བྷིཀྑཱུནཾ གཎནཱ. ཨིདམྤི ཨུབྷཡཾ ཀཏྭཱཝ ཨུཔོསཐོ ཀཱཏབྦོ. ཨོཝཱདོཏི བྷིཀྑུནོཝཱདོ. ན ཧི བྷིཀྑཱུནཱིཧི ཡཱཙིཏཾ ཨོཝཱདཾ ཨནཱརོཙེཏྭཱ ཨུཔོསཐཾ ཀཱཏུཾ ཝཊྚཏི. བྷིཀྑུནིཡོ ཧི ‘‘སྭེ ཨུཔོསཐོ’’ཏི ཨཱགནྟྭཱ ‘‘ཨཡཾ ཨུཔོསཐོ ཙཱཏུདྡསོ, པནྣརསོ’’ཏི པུཙྪིཏྭཱ པུན ཨུཔོསཐདིཝསེ ཨཱགནྟྭཱ ‘‘བྷིཀྑུནིསངྒྷོ, ཨཡྻ, བྷིཀྑུསངྒྷསྶ པཱདེ ཝནྡཏི, ཨོཝཱདཱུཔསངྐམནཉྩ ཡཱཙཏི, ལབྷཏུ ཀིར, ཨཡྻ, བྷིཀྑུནིསངྒྷོ ཨོཝཱདཱུཔསངྐམན’’ནྟི ཨེཝཾ ཨོཝཱདཾ ཡཱཙནྟི. ཏཾ ཋཔེཏྭཱ བཱལགིལཱནགམིཡེ ཨཉྙོ སཙེཔི ཨཱརཉྙཀོ ཧོཏི, ཨཔྤཊིགྒཧེཏུཾ ན ལབྷཏི, ཏསྨཱ ཡེན སོ པཊིགྒཧིཏོ, ཏེན བྷིཀྑུནཱ ཨུཔོསཐགྒེ པཱཏིམོཀྑུདྡེསཀོ བྷིཀྑུ ཨེཝཾ ཝཏྟབྦོ ‘‘བྷིཀྑུནིསངྒྷོ, བྷནྟེ, བྷིཀྑུསངྒྷསྶ པཱདེ ཝནྡཏི, ཨོཝཱདཱུཔསངྐམནཉྩ ཡཱཙཏི, ལབྷཏུ ཀིར, བྷནྟེ, བྷིཀྑུནིསངྒྷོ ཨོཝཱདཱུཔསངྐམན’’ནྟི.

པཱཏིམོཀྑུདྡེསཀེན ཝཏྟབྦཾ – ‘‘ཨཏྠི ཀོཙི བྷིཀྑུ བྷིཀྑུནོཝཱདཀོ སམྨཏོ’’ཏི. སཙེ ཧོཏི ཀོཙི བྷིཀྑུ བྷིཀྑུནོཝཱདཀོ སམྨཏོ, ཏཏོ ཏེན སོ ཝཏྟབྦོ – ‘‘ཨིཏྠནྣཱམཀོ བྷིཀྑུ ¶ བྷིཀྑུནོཝཱདཀོ སམྨཏོ, ཏཾ བྷིཀྑུནིསངྒྷོ ཨུཔསངྐམཏཱུ’’ཏི. སཙེ ནཏྠི, ཏཏོ ཏེན པུཙྪིཏབྦཾ – ‘‘ཀོ ཨཱཡསྨཱ ཨུསྶཧཏི བྷིཀྑུནིཡོ ཨོཝདིཏུ’’ནྟི. སཙེ ཀོཙི ཨུསྶཧཏི, སོཔི ཙ ཨཊྛཧི ཨངྒེཧི སམནྣཱགཏོ, ཏཾ ཏཏྠེཝ སམྨནྣིཏྭཱ ཨོཝཱདཔྤཊིགྒཱཧཀོ ཝཏྟབྦོ – ‘‘ཨིཏྠནྣཱམོ བྷིཀྑུ བྷིཀྑུནོཝཱདཀོ སམྨཏོ, ཏཾ བྷིཀྑུནིསངྒྷོ ཨུཔསངྐམཏཱུ’’ཏི. སཙེ པན ན ཀོཙི ཨུསྶཧཏི, པཱཏིམོཀྑུདྡེསཀེན ཝཏྟབྦཾ – ‘‘ནཏྠི ཀོཙི བྷིཀྑུ བྷིཀྑུནོཝཱདཀོ སམྨཏོ, པཱསཱདིཀེན བྷིཀྑུནིསངྒྷོ སམྤཱདེཏཱུ’’ཏི. ཨེཏྟཱཝཏཱ ཧི སིཀྑཏྟཡསངྒཧིཏཾ སཀལཾ སཱསནཾ ཨཱརོཙིཏཾ ཧོཏི. ཏེན བྷིཀྑུནཱ ‘‘སཱདྷཱུ’’ཏི སམྤཊིཙྪིཏྭཱ པཱཊིཔདེ བྷིཀྑུནཱིནཾ ཨཱརོཙེཏབྦཾ. པཱཏིམོཀྑམྤི ‘‘ན, བྷིཀྑཝེ, ཨནཛ྄ཛྷིཊྛེན པཱཏིམོཀྑཾ ཨུདྡིསིཏབྦཾ, ཡོ ཨུདྡིསེཡྻ, ཨཱཔཏྟི དུཀྐཊསྶཱ’’ཏི ཝཙནཏོ ཨནཱཎཏྟེན ན ཨུདྡིསིཏབྦཾ. ‘‘ཐེརཱདྷེཡྻཾ པཱཏིམོཀྑ’’ནྟི ཧི ཝཙནཏོ སངྒྷཏྠེརོ ཝཱ པཱཏིམོཀྑཾ ཨུདྡིསེཡྻ ¶ , ‘‘ཨནུཛཱནཱམི, བྷིཀྑཝེ, ཡོ ཏཏྠ བྷིཀྑུ བྱཏྟོ པཊིབལོ, ཏསྶཱདྷེཡྻཾ པཱཏིམོཀྑ’’ནྟི ཝཙནཏོ ནཝཀཏརོ ཝཱ ཐེརེན ཨཱཎཏྟོ. དུཏིཡཱདཱིནི ཨུཏྟཱནཏྠཱནེཝ.

༡༠༩. ཨེཀཱདསམེ ན ཀུཀྐུཙྩཱཡིཏབྦཾ ཀུཀྐུཙྩཱཡཏཱིཏི ན ཀུཀྐུཙྩཱཡིཏུཾ ཡུཏྟཀཾ ཀུཀྐུཙྩཱཡཏི. སཱུཀརམཾསཾ ལབྷིཏྭཱ ‘‘ཨཙྪམཾས’’ནྟི ཀུཀྐུཙྩཱཡཏི, ‘‘སཱུཀརམཾས’’ནྟི ཛཱནནྟོཔི ‘‘ཨཙྪམཾས’’ནྟི ཀུཀྐུཙྩཱཡཏི, ན པརིབྷུཉྫཏཱིཏི ཝུཏྟཾ ཧོཏི. ཨེཝཾ མིགམཾསཾ ‘‘དཱིཔིམཾས’’ནྟི, ཀཱལེ སནྟེཡེཝ ‘‘ཀཱལོ ནཏྠཱི’’ཏི, ཨཔྤཝཱརེཏྭཱ ‘‘པཝཱརིཏོམྷཱི’’ཏི, པཏྟེ རཛསྨིཾ ཨཔཏིཏེཡེཝ ‘‘པཏིཏ’’ནྟི, ཨཏྟཱནཾ ཨུདྡིསྶ མཙྪམཾསེ ཨཀཏེཡེཝ ‘‘མཾ ཨུདྡིསྶ ཀཏ’’ནྟི ཀུཀྐུཙྩཱཡཏི. ཀུཀྐུཙྩཱཡིཏབྦཾ ན ཀུཀྐུཙྩཱཡཏཱིཏི ཀུཀྐུཙྩཱཡིཏུཾ ཡུཏྟཾ ན ཀུཀྐུཙྩཱཡཏི. ཨཙྪམཾསཾ ལབྷིཏྭཱ ‘‘སཱུཀརམཾས’’ནྟི ན ཀུཀྐུཙྩཱཡཏི, ‘‘ཨཙྪམཾས’’ནྟི ཛཱནནྟོཔི ‘‘སཱུཀརམཾས’’ནྟི ན ཀུཀྐུཙྩཱཡཏི, མདྡིཏྭཱ ཝཱིཏིཀྐམཏཱིཏི ཝུཏྟཾ ཧོཏི. ཨེཝཾ དཱིཔིམཾསཾ མིགམཾསནྟི…པེ… ཨཏྟཱནཾ ཨུདྡིསྶ མཙྪམཾསེ ཀཏེ ‘‘མཾ ཨུདྡིསྶ ཀཏ’’ནྟི ན ཀུཀྐུཙྩཱཡཏཱིཏི ཨེཝམེཏྠ ཨཏྠོ དཊྛབྦོ. ཨཊྛཀཐཱཡཾ པན ‘‘ན ཀུཀྐུཙྩཱཡིཏབྦནྟི སངྒྷབྷོགསྶ ཨཔཊྛཔནཾ ཨཝིཙཱརཎཾ ན ཀུཀྐུཙྩཱཡིཏབྦཾ ནཱམ, ཏཾ ཀུཀྐུཙྩཱཡཏི. ཀུཀྐུཙྩཱཡིཏབྦནྟི ཏསྶེཝ པཊྛཔནཾ ཝིཙཱརཎཾ, ཏཾ ན ཀུཀྐུཙྩཱཡཏཱི’’ཏི ཨེཏྟཀམེཝ ཝུཏྟཾ. ཏཏྠ ¶ སངྒྷབྷོགསྶཱཏི སངྒྷསྶ ཙཏུཔཙྩཡཔརིབྷོགཏྠཱཡ དིནྣཁེཏྟཝཏྠུཏལཱ༹ཀཱདིཀསྶ, ཏཏོ ཨུཔྤནྣདྷཉྙཧིརཉྙཱདིཀསྶ ཙ སངྒྷསྶ བྷོགསྶ. ཨཔཊྛཔནནྟི ཨསཾཝིདཧནཾ. ཏེནཱཧ ‘‘ཨཝིཙཱརཎ’’ནྟི. ཏསྶེཝཱཏི ཡཐཱཝུཏྟསྶེཝ སངྒྷབྷོགསྶ.

བཱལཝགྒཝཎྞནཱ ནིཊྛིཏཱ.

དུཏིཡཔཎྞཱསཀཾ ནིཊྛིཏཾ.

༣. ཏཏིཡཔཎྞཱསཀཾ

(༡༡) ༡. ཨཱསཱདུཔྤཛཧཝགྒཝཎྞནཱ

༡༡༩. ཏཏིཡཔཎྞཱསཀསྶ ¶ ¶ པཋམེ དུཀྑེན པཛཧིཏབྦཱཏི དུཔྤཛཧཱ. དུཙྩཛཱཏིཨཱདཱིསུཔི ཨེསེཝ ནཡོ. དྭིནྣཾ ཨཱསཱནཾ དུཙྩཛབྷཱཝོ ཀཐཾ ཛཱནིཏབྦོཏི པཋམཾ ཏཱཝ ལཱབྷཱསཱཡ དུཙྩཛབྷཱཝཾ ཝིབྷཱཝེཏི ‘‘ལཱབྷཱསཱཡཱ’’ཏིཨཱདིནཱ. ཨུབྷཏོབྱཱུལ༹ྷནྟི ཡུདྡྷཏྠཱཡ ཨུབྷཏོ སནྣིཔཏིཏཾ. པཀྑནྡནྟཱིཏི ཨནུཔྤཝིསནྟི. ཛཱིཝིཏཱསཱཡ དུཔྤཛཧཏྟཱཏིཨཱདིནཱ ཛཱིཝིཏཱསཱཡ དུཙྩཛབྷཱཝཾ ཝིབྷཱཝེཏི.

༡༢༠. དུཏིཡེ དུལླབྷཱཏི ན སུལབྷཱ. ཨིཎཾ དེམཱིཏི སཉྙཾ ཀརོཏཱིཏི ཨེཝཾ སཉྙཾ ཀརོནྟོ ཝིཡ ཧོཏཱིཏི ཨཏྠོ. ཨེཏྠ ཙ ‘‘པུབྦཀཱརཱིཏི པཋམཾ ཨུཔཀཱརསྶ ཀཱརཀོ. ཀཏཉྙཱུ ཀཏཝེདཱིཏི ཏེན ཀཏཾ ཉཏྭཱ པཙྪཱ ཀཱརཀོ. ཏེསུ པུབྦཀཱརཱི ‘ཨིཎཾ དེམཱི’ཏི སཉྙཾ ཀརོཏི, པཙྪཱ ཀཱརཀོ ‘ཨིཎཾ ཛཱིརཱཔེམཱི’ཏི སཉྙཾ ཀརོཏཱི’’ཏི ཨེཏྟཀམེཝ ཨིདྷ ཝུཏྟཾ. པུགྒལཔཎྞཏྟིསཾཝཎྞནཱཡཾ (པུ. པ. ཨཊྛ. ༨༣) པན –

‘‘པུབྦཀཱརཱིཏི པཋམམེཝ ཀཱརཀོ. ཀཏཝེདཱིཏི ཀཏཾ ཝེདེཏི, ཝིདིཏཾ པཱཀཊཾ ཀརོཏི. ཏེ ཨགཱརིཡཱནགཱརིཡེཧི དཱིཔེཏབྦཱ. ཨགཱརིཀེསུ ཧི མཱཏཱཔིཏརོ པུབྦཀཱརིནོ ནཱམ, པུཏྟདྷཱིཏརོ པན མཱཏཱཔིཏརོ པཊིཛགྒནྟཱ ཨབྷིཝཱདནཱདཱིནི ཏེསཾ ཀུརུམཱནཱ ཀཏཝེདིནོ ནཱམ. ཨནགཱརིཡེསུ ཨཱཙརིཡུཔཛ྄ཛྷཱཡཱ པུབྦཀཱརིནོ ནཱམ, ཨནྟེཝཱསིཀསདྡྷིཝིཧཱརིཀཱ ཨཱཙརིཡུཔཛ྄ཛྷཱཡེ པཊིཛགྒནྟཱ ཨབྷིཝཱདནཱདཱིནི ཙ ཏེསཾ ཀུརུམཱནཱ ཀཏཝེདིནོ ནཱམ. ཏེསཾ ཨཱཝིབྷཱཝཏྠཱཡ ཨུཔཛ྄ཛྷཱཡཔོསཀསོཎཏྠེརཱདཱིནཾ ཝཏྠཱུནི ཀཐེཏབྦཱནི.

‘‘ཨཔརོ ནཡོ – པརེན ཨཀཏེཡེཝ ཨུཔཀཱརེ ཨཏྟནི ཀཏཾ ཨུཔཀཱརཾ ཨནཔེཀྑིཏྭཱ ཀཱརཀོ པུབྦཀཱརཱི, སེཡྻཐཱཔི མཱཏཱཔིཏརོ ཙེཝ ཨཱཙརིཡུཔཛ྄ཛྷཱཡཱ ཙ. སོ དུལླབྷོ སཏྟཱནཾ ཏཎྷཱབྷིབྷཱུཏཏྟཱ. པརེན ཀཏསྶ ཨུཔཀཱརསྶ ཨནུརཱུཔཔྤཝཏྟིཾ ¶ ཨཏྟནི ¶ ཀཏཾ ཨུཔཀཱརཾ ཨུཔཀཱརཏོ ཛཱནནྟོ ཝེདིཡནྟོ ཀཏཉྙུཀཏཝེདཱི སེཡྻཐཱཔི མཱཏཱཔིཏུཨཱཙརིཡུཔཛ྄ཛྷཱཡེསུ སམྨཱཔཊིཔནྣོ. སོཔི དུལླབྷོ སཏྟཱནཾ ཨཝིཛྫཱབྷིབྷཱུཏཏྟཱ. ཨཔིཙ ཨཀཱརཎཝཙྪལོ པུབྦཀཱརཱི, སཀཱརཎཝཙྪལོ ཀཏཉྙུཀཏཝེདཱི. ‘ཀརིསྶཏི མེ’ཏི ཨེཝམཱདིཀཱརཎནིརཔེཀྑཀིརིཡོ པུབྦཀཱརཱི, ‘ཀརིསྶཏི མེ’ཏི ཨེཝམཱདིཀཱརཎསཱཔེཀྑཀིརིཡོ ཀཏཉྙུཀཏཝེདཱི. ཏམོཛོཏིཔརཱཡཎོ པུབྦཀཱརཱི, ཛོཏིཛོཏིཔརཱཡཎོ ཀཏཉྙུཀཏཝེདཱི. དེསེཏཱ པུབྦཀཱརཱི, པཊིཔཛྫིཏཱ ཀཏཉྙུཀཏཝེདཱི. སདེཝཀེ ལོཀེ ཨརཧཾ སམྨཱསམྦུདྡྷོ པུབྦཀཱརཱི, ཨརིཡསཱཝཀོ ཀཏཉྙུཀཏཝེདཱི’’ཏི ཝུཏྟཾ.

ཏཏྠ ཀཱརཎེན ཝིནཱ པཝཏྟཧིཏཙིཏྟོ ཨཀཱརཎཝཙྪལོ. ཨནཱགཏམྷི པཡོཛནཾ ཨཔེཀྑམཱནོ ‘‘ཀརིསྶཏི མེ’’ཏིཨཱདིནཱ ཙིཏྟེན པཋམཾ གཧིཏཾ ཏཱདིསཾ ཀཏཾ ཨུཔཱདཱཡ ཀཏཉྙཱུ ཨེཝ ནཱམ ཧོཏི, ན པུབྦཀཱརཱིཏི ཨདྷིཔྤཱཡེན ‘‘ཀརིསྶཏི མེཏི ཨེཝམཱདིཀཱརཎསཱཔེཀྑཀིརིཡོ ཀཏཉྙུཀཏཝེདཱི’’ཏི ཝུཏྟཾ. ཏམོཛོཏིཔརཱཡཎོ པུཉྙཕལཱནི ཨནུཔཛཱིཝནྟོ ཨེཝ པུཉྙཱནི ཀརོཏཱིཏི ‘‘པུབྦཀཱརཱི’’ཏི ཝུཏྟོ. པུཉྙཕལཾ ཨུཔཛཱིཝནྟོ ཧི ཀཏཉྙུཔཀྑེ ཏིཊྛཏི.

༡༢༡. ཏཏིཡེ ཏིཏྟོཏི སུཧིཏོ པརིཡོསིཏོ ནིཊྛིཏཀིཙྩཏཱཡ ནིརུསྶུཀྐོ. གུཎཔཱརིཔཱུརིཡཱ ཧི པརིཔུཎྞོ ཡཱཝདཏྠོ ཨིདྷ ཏིཏྟོ ཝུཏྟོ. ཏཔྤེཏཱཏི ཨཉྙེསམྤི ཏིཏྟིཀརོ. པཙྩེཀབུདྡྷོ ཙ ཏཐཱགཏསཱཝཀོ ཙ ཁཱིཎཱསཝོ ཏིཏྟོཏི ཨེཏྠ པཙྩེཀབུདྡྷོ ནཝལོཀུཏྟརདྷམྨེཧི སཡཾ ཏིཏྟོ པརིཔུཎྞོ, ཨཉྙཾ པན ཏཔྤེཏུཾ ན སཀྐོཏི. ཏསྶ ཧི དྷམྨཀཐཱཡ ཨབྷིསམཡོ ན ཧོཏི, སཱཝཀཱནཾ པན དྷམྨཀཐཱཡ ཨཔརིམཱཎཱནཾ དེཝམནུསྶཱནཾ ཨབྷིསམཡོ ཧོཏི. ཨེཝཾ སནྟེཔི ཡསྨཱ ཏེ དྷམྨཾ དེསེནྟཱ ན ཨཏྟནོ ཝཙནཾ ཀཏྭཱ ཀཐེནྟི, བུདྡྷཱནཾ ཝཙནཾ ཀཏྭཱ ཀཐེནྟི, སོཏུཾ ནིསིནྣཔརིསཱཔི – ‘‘ཨཡཾ བྷིཀྑུ ན ཨཏྟནཱ པཊིཝིདྡྷཾ དྷམྨཾ ཀཐེཏཱི’’ཏི ཙིཏྟཱིཀཱརཾ ཀརོཏི. ཨིཏི སོ ཙིཏྟཱིཀཱརོ བུདྡྷཱནཾཡེཝ ཧོཏི. ཨེཝཾ ཏཏྠ སམྨཱསམྦུདྡྷོཝ ཏཔྤེཏཱ ནཱམ. ཡཐཱ ཧི ‘‘ཨསུཀསྶ ནཱམ ཨིདཉྩིདཉྩ དེཐཱ’’ཏི རཉྙཱ ཨཱཎཏྟེ ¶ ཀིཉྩཱཔི ཨཱནེཏྭཱ དེནྟི, ཨཐ ཁོ རཱཛཱཝ ཏཏྠ དཱཡཀོ. ཡེཧིཔི ལདྡྷཾ ཧོཏི, ཏེ ‘‘རཉྙཱ ཨམྷཱཀཾ ཋཱནནྟརཾ དིནྣཾ, ཨིསྶརིཡཝིབྷཝོ དིནྣོ’’ཏྭེཝ གཎྷནྟི, ན ‘‘རཱཛཔུརིསེཧཱི’’ཏི ཨེཝཾསམྤདམིདཾ ཝེདིཏབྦཾ.

༡༢༢. ཙཏུཏྠེ དུཏྟཔྤཡཱཏི ཨཏཔྤཡཱ, ན སཀྐཱ ཀེནཙི ཏཔྤེཏུཾ. ཡོ ཧི ཨུཔཊྛཱཀཀུལཾ ཝཱ ཉཱཏིཀུལཾ ཝཱ ནིསྶཱཡ ཝསམཱནོ ཙཱིཝརེ ཛིཎྞེ ཏེཧི དིནྣཾ ཙཱིཝརཾ ནིཀྑིཔཏི, ན པརིབྷུཉྫཏི ¶ . པུནཔྤུནཾ དིནྣམྤི གཧེཏྭཱ ནིཀྑིཔཏེཝ. ཡོ ཙ ཏེནེཝ ནཡེན ལདྡྷཾ ལདྡྷཾ ཝིསྶཛྫེཏི, པརསྶ དེཏི, པུནཔྤུནཾ ལདྡྷམྤི ཏཐེཝ ཀརོཏི. ཨིམེ དྭེ པུགྒལཱ སཀཊེཧིཔི པཙྩཡེ ཨུཔནེནྟེན ཏཔྤེཏུཾ ན སཀྐཱཏི དུཏྟཔྤཡཱ.

༡༢༣. པཉྩམེ ན ཝིསྶཛྫེཏཱིཏི ཨཏྟནོ ཨཀཏྭཱ པརསྶ ན དེཏི, ཨཏིརེཀེ པན སཏི ན ནིཀྑིཔཏི, པརསྶ དེཏི. ཏེནེཝཱཧ ‘‘སབྦཾཡེཝ པརེསཾ ན དེཏཱི’’ཏིཨཱདི. ཨིདཾ ཝུཏྟཾ ཧོཏི ‘‘ཡོ བྷིཀྑུ ཨུཔཊྛཱཀཀུལཱ ཝཱ ཉཱཏིཀུལཱ ཝཱ ཛིཎྞཙཱིཝརོ སཱཊཀཾ ལབྷིཏྭཱ ཙཱིཝརཾ ཀཏྭཱ པརིབྷུཉྫཏི ན ནིཀྑིཔཏི, ཨགྒལ༹ཾ དཏྭཱ པཱརུཔནྟོཔི པུནཔི དིཡྻམཱནེ སཧསཱ ནཔྤཊིགྒཎྷཱཏི. ཡོ ཙ ལདྡྷཾ ལདྡྷཾ ཨཏྟནཱ པརིབྷུཉྫཏི, པརེསཾ ན དེཏི. ཨིམེ དྭེཔི སུཁེན སཀྐཱ ཏཔྤེཏུནྟི སུཏཔྤཡཱ’’ཏི.

༡༢༤-༡༢༧. ཚཊྛསཏྟམཱདཱིནི ཨུཏྟཱནཏྠཱནེཝ.

ཨཱསཱདུཔྤཛཧཝགྒཝཎྞནཱ ནིཊྛིཏཱ.

(༡༢) ༢. ཨཱཡཱཙནཝགྒཝཎྞནཱ

༡༣༡. སདྡྷོ བྷིཀྑཱུཏི སདྡྷཱཡ སམནྣཱགཏོ བྷིཀྑུ. ཡོ བྷིཀྑུ སཱརིཔུཏྟམོགྒལླཱནེཧི སདིསབྷཱཝཾ པཏྠེཏི, སོ ཡེཧི གུཎེཧི སཱརིཔུཏྟམོགྒལླཱནཱ ཨེཏདགྒེ ཋཔིཏཱ, ཏེ གུཎེ ཨཏྟནོ ཨབྷིཀངྑེཡྻཱཏི ཨཱཧ ‘‘ཡཱདིསོ སཱརིཔུཏྟཏྠེརོ པཉྙཱཡཱ’’ཏིཨཱདི. ཨིཏོ ཨུཏྟརི པཏྠེནྟོ མིཙྪཱ པཏྠེཡྻཱཏི སཱརིཔུཏྟམོགྒལླཱནཱནཾ ཡེ པཉྙཱདཡོ གུཎཱ ཨུཔལབྦྷནྟི, ཏཏོ ཨུཏྟརི པཏྠེནྟོ མིཙྪཱ པཏྠེཡྻ. ཨགྒསཱཝཀགུཎཔརམཱ ཧི སཱཝཀགུཎམརིཡཱདཱ. ཏེསཾ སཱཝཀགུཎཱནཾ ¶ ཡདིདཾ ཨགྒསཱཝཀགུཎཱ, ན ཏཏོ པརཾ སཱཝཀགུཎཱ ནཱམ ཨཏྠི. ཏེནེཝཱཧ ‘‘ཡཾ ནཏྠི, ཏསྶ པཏྠིཏཏྟཱ’’ཏི. སེསམེཏྠ ཨུཏྟཱནམེཝ.

༡༣༥. པཉྩམེ ཡསྶ གུཎཱ ཁཏཱ ཨུཔཧཏཱ ཙ, སོ ཁཏོ ཨུཔཧཏོ ནཱམ ཧོཏཱིཏི ཨཱཧ ‘‘གུཎཱནཾ ཁཏཏྟཱ’’ཏིཨཱདི. ཁཏཏྟཱཏི ཚིནྣཏྟཱ. ཨུཔཧཏཏྟཱཏི ནཊྛཏྟཱ. ཏེནཱཧ ‘‘ཚིནྣགུཎཾ ནཊྛགུཎནྟི ¶ ཨཏྠོ’’ཏི. ཨཔུཉྙསྶ པསཝོ ནཱམ ཨཏྠཏོ པཊིལཱབྷོཏི ཨཱཧ ‘‘པསཝཏཱིཏི པཊིལབྷཏཱི’’ཏི, ཨཏྟནོ སནྟཱནེ ཨུཔྤཱདེཏཱིཏི ཨཏྠོ. ཨནནུཔཝིསིཏྭཱཏི ཉཱཎེན ཨནོགཱཧེཏྭཱ. སེསམེཏྠ ཚཊྛཱདཱིནི ཙ སུཝིཉྙེཡྻཱནེཝ.

ཨཱཡཱཙནཝགྒཝཎྞནཱ ནིཊྛིཏཱ.

(༡༣) ༣. དཱནཝགྒཝཎྞནཱ

༡༤༢. ཏཏིཡསྶ པཋམེ དཱིཡཏཱིཏི དཱནཾ, དེཡྻདྷམྨསྶེཏཾ ཨདྷིཝཙནཾ. དཱིཡཏི ཨནེནཱཏི ཝཱ དཱནཾ, པརིཙྩཱགཙེཏནཱཡེཏཾ ཨདྷིཝཙནཾ. ཨཡཾ དུཝིདྷོཔི ཨཏྠོ ཨིདྷཱདྷིཔྤེཏོཏི ཨཱཧ ‘‘དིཡྻནཀཝསེན དཱནཱནཱི’’ཏིཨཱདི. ཏཏྠ དིཡྻནཀཝསེནཱཏི དཱཏབྦཝསེན. ཨམཏཔཏྟིཔཊིཔདནྟི ཨམཏཔྤཏྟིཧེཏུབྷཱུཏཾ སམྨཱཔཊིཔདཾ.

༡༤༣-༡༥༡. དུཏིཡཱདཱིནི ཙ སུཝིཉྙེཡྻཱནེཝ.

དཱནཝགྒཝཎྞནཱ ནིཊྛིཏཱ.

(༡༤) ༤. སནྠཱརཝགྒཝཎྞནཱ

༡༥༢. ཙཏུཏྠསྶ པཋམེ ཨཱམིསསྶ ཙ དྷམྨསྶ ཙ ཨལཱབྷེན ཨཏྟནོ པརསྶ ཙ ཨནྟརེ སམྦྷཝནྟསྶ ཚིདྡསྶ ཝིཝརསྶ བྷེདསྶ སནྠརཎཾ པིདཧནཾ སངྒཎྷནཾ སནྠཱརོ. ཨཡཉྷི ལོཀསནྣིཝཱསོ ཨལབྦྷམཱནེན ཨཱམིསེན དྷམྨེན ཙཱཏི དྭཱིཧི ཚིདྡོ. ཏསྶ ཏཾ ཚིདྡཾ ཡཐཱ ན པཉྙཱཡཏི ¶ , ཨེཝཾ པཱིཋསྶ ཝིཡ པཙྩཏྠརཎེན ཨཱམིསེན དྷམྨེན ཙ སནྠརཎཾ སངྒཎྷནཾ སནྠཱརོཏི ཝུཙྩཏི. ཨེཏྠ ཙ ཨཱམིསེན སངྒཧོ ཨཱམིསསནྠཱརོ ནཱམ. ཏཾ ཀརོནྟེན མཱཏཱཔིཏཱུནཾ བྷིཀྑུགཏིཀསྶ ¶ ཝེཡྻཱཝཙྩཀརསྶ རཉྙོ ཙོརཱནཉྩ ཨགྒཾ ཨགྒཧེཏྭཱཔི དཱཏུཾ ཝཊྚཏི. ཨཱམསིཏྭཱ དིནྣེཧི རཱཛཱནོ ཙ ཙོརཱ ཙ ཨནཏྠམྤི ཀརོནྟི, ཛཱིཝིཏཀྑཡམྤི པཱཔེནྟི. ཨནཱམསིཏྭཱ དིནྣེན ཨཏྟམནཱ ཧོནྟི, ཙོརནཱགཝཏྠུཨཱདཱིནི ཙེཏྠ ཝཏྠཱུནི ཀཐེཏབྦཱནི. ཏཱནི སམནྟཔཱསཱདིཀཱཡ ཝིནཡཊྛཀཐཱཡཾ (པཱརཱ. ༡༨༥) ཝིཏྠཱརིཏཱནི. སཀྐཙྩཾ ཨུདྡེསདཱནཾ པཱལི༹ཝཎྞནཱ དྷམྨཀཐཱཀཐནནྟི ཨེཝཾ དྷམྨེན སངྒཧོ དྷམྨསནྠཱརོ ནཱམ.

༡༥༣-༡༦༣. དུཏིཡཱདཱིནི ཨུཏྟཱནཏྠཱནེཝ.

སནྠཱརཝགྒཝཎྞནཱ ནིཊྛིཏཱ.

(༡༥) ༥. སམཱཔཏྟིཝགྒཝཎྞནཱ

༡༦༤. པཉྩམསྶ པཋམེ ‘‘ཨིཏོ པུབྦེ པརིཀམྨཾ པཝཏྟཾ, ཨིཏོ པརཾ བྷཝངྒཾ མཛ྄ཛྷེ སམཱཔཏྟཱི’’ཏི ཨེཝཾ སཧ པརིཀམྨེན ཨཔྤནཱཔརིཙྪེདཔྤཛཱནནཱ པཉྙཱ སམཱཔཏྟིཀུསལཏཱ. ཝུཊྛཱནེ ཀུསལབྷཱཝོ ཝུཊྛཱནཀུསལཏཱ. པགེཝ ཝུཊྛཱནཔརིཙྪེདཀཉཱཎནྟི ཨེཝམེཏྠ ཨཏྠོ དཊྛབྦོ.

༡༦༥. དུཏིཡེ ཨུཛུནོ བྷཱཝོ ཨཛྫཝཾ, ཨཛིམྷཏཱ ཨཀུཊིལཏཱ ཨཝངྐཏཱཏི ཨཏྠོ. ཨབྷིདྷམྨེཔི (དྷ. ས. ༡༣༤༦) ཝུཏྟཾ – ‘‘ཏཏྠ ཀཏམོ ཨཛྫཝོ? ཡཱ ཨཛྫཝཏཱ ཨཛིམྷཏཱ ཨཀུཊིལཏཱ ཨཝངྐཏཱ, ཨཡཾ ཝུཙྩཏི ཨཛྫཝོ’’ཏི. ཨནཛྫཝཉྩ ཨཛྫཝཔྤཊིཀྑེཔེན ཝེདིཏབྦཾ. གོམུཏྟཝངྐཏཱ, ཙནྡལེཁཱཝངྐཏཱ, ནངྒལཀོཊིཝངྐཏཱཏི ཧི ཏཡོ ཨནཛྫཝཱ. ཨེཀཙྩོ ཧི བྷིཀྑུ པཋམཝཡེ མཛ྄ཛྷིམ-པཙྪིམཝཡེ ཙ ཨེཀཝཱིསཏིཡཱ ཨནེསནཱསུ ཚསུ ཙ ཨགོཙརེསུ ཙརཏི, ཨཡཾ གོམུཏྟཝངྐཏཱ ནཱམ, ཨཱདིཏོ པཊྛཱཡ ཡཱཝ པརིཡོསཱནཱ པཊིཔཏྟིཡཱ ཝངྐབྷཱཝཏོ. ཨེཀོ པཋམཝཡེ པཙྪིམཝཡེ ཙ ཙཏུཔཱརིསུདྡྷིསཱིལཾ པཱུརེཏི, ལཛྫཱི ཀུཀྐུཙྩཀོ སིཀྑཱཀཱམོ ཧོཏི, མཛ྄ཛྷིམཝཡེ པུརིམསདིསོ, ཨཡཾ ཙནྡལེཁཱཝངྐཏཱ ནཱམ, པཊིཔཏྟིཡཱ མཛ྄ཛྷཊྛཱནེ ¶ ཝངྐབྷཱཝཱཔཏྟིཏོ. ཨེཀོ པཋམཝཡེཔི མཛ྄ཛྷིམཝཡེཔི ཙཏུཔཱརིསུདྡྷིསཱིལཾ པཱུརེཏི, ལཛྫཱི ཀུཀྐུཙྩཀོ སིཀྑཱཀཱམོ ཧོཏི, པཙྪིམཝཡེ པུརིམསདིསོ, ཨཡཾ ནངྒལཀོཊིཝངྐཏཱ ནཱམ, པརིཡོསཱནེ ཝངྐབྷཱཝཱཔཏྟིཏོ. ཨེཀོ སབྦམྤེཏཾ ཝངྐཏཾ པཧཱཡ ཏཱིསུ ཝཡེསུ ¶ པེསལོ ལཛྫཱི ཀུཀྐུཙྩཀོ སིཀྑཱཀཱམོ ཧོཏི, ཏསྶ ཡོ སོ ཨུཛུབྷཱཝོ, ཨིདཾ ཨཛྫཝཾ ནཱམ, སབྦཏྠ ཨུཛུབྷཱཝསིདྡྷིཏོ.

མདྡཝནྟི ཨེཏྠ ‘‘ལཛྫཝ’’ནྟིཔི པཋནྟི. ཨེཝཾ པནེཏྠ ཨཏྠོ – ‘‘ཏཏྠ ཀཏམོ ལཛྫཝོ? ཡོ ཧིརཱིཡཏི ཧིརཱིཡིཏབྦེན ཧིརཱིཡཏི པཱཔཀཱནཾ ཨཀུསལཱནཾ དྷམྨཱནཾ སམཱཔཏྟིཡཱ, ཨཡཾ ཝུཙྩཏི ལཛྫཝོ’’ཏི ཨེཝཾ ཝུཏྟོ ལཛྫིབྷཱཝོ ལཛྫཝཾ ནཱམ. ཨིདཾ པནེཏྠ ནིབྦཙནཾ – ལཛྫཏཱིཏི ལཛྫོ, ཧིརིམཱ, ཏསྶ བྷཱཝོ ལཛྫཝཾ, ཧིརཱིཏི ཨཏྠོ. ལཛྫཱ ཨེཏསྶ ཨཏྠཱིཏི ལཛྫཱི ཡཐཱ ‘‘མཱལཱི མཱཡཱི’’ཏི, ཏསྶ བྷཱཝོ ལཛྫིབྷཱཝོ, སཱ ཨེཝ ལཛྫཱ.

༡༦༦. ཏཏིཡེ ཨདྷིཝཱསནཁནྟཱིཏི ཨེཏྠ ཨདྷིཝཱསནཾ ཝུཙྩཏི ཁམནཾ. ཏཉྷི པརེསཾ དུཀྐཊཾ དུརུཏྟཉྩ པཊིཝིརོདྷཱཀརཎེན ཨཏྟནོ ཨུཔརི ཨཱརོཔེཏྭཱ ཝཱསནཏོ ‘‘ཨདྷིཝཱསན’’ནྟི ཝུཙྩཏི. ཨདྷིཝཱསནལཀྑཎཱ ཁནྟི ཨདྷིཝཱསནཁནྟི. སུཙིསཱིལཏཱ སོརཙྩཾ. སཱ ཧི སོབྷནཀམྨརཏཏཱ. སུཊྛུ ཝཱ པཱཔཏོ ཨོརཏབྷཱཝོ ཝིརཏཏཱཏི ཨཱཧ ‘‘སུརཏབྷཱཝོ’’ཏི. ཏེནེཝ ཨབྷིདྷམྨེཔི (དྷ. ས. ༡༣༤༩) –

‘‘ཏཏྠ ཀཏམཾ སོརཙྩཾ? ཡོ ཀཱཡིཀོ ཨཝཱིཏིཀྐམོ ཝཱཙསིཀོ ཨཝཱིཏིཀྐམོ ཀཱཡིཀཝཱཙསིཀོ ཨཝཱིཏིཀྐམོ, ཨིདཾ ཝུཙྩཏི སོརཙྩཾ, སབྦོཔི སཱིལསཾཝརོ སོརཙྩ’’ནྟི – ཨཱགཏོ.

༡༦༧. ཙཏུཏྠེ སཁིལོ ཝུཙྩཏི སཎྷཝཱཙོ, ཏསྶ བྷཱཝོ སཱཁལྱཾ, སཎྷཝཱཙཏཱ. ཏེནཱཧ ‘‘སཎྷཝཱཙཱཝསེན སམྨོདམཱནབྷཱཝོ’’ཏི. སཎྷཝཱཙཱཝསེན ཧི སམྨོདམཱནསྶ པུགྒལསྶ བྷཱཝོ ནཱམ སཎྷཝཱཙཏཱ. ཏེནེཝ ཨབྷིདྷམྨེ (དྷ. ས. ༡༣༥༠) –

‘‘ཏཏྠ ཀཏམཾ སཱཁལྱཾ? ཡཱ སཱ ཝཱཙཱ ཨཎྜཀཱ ཀཀྐསཱ པརཀཊུཀཱ པརཱབྷིསཛྫནཱི ཀོདྷསཱམནྟཱ ཨསམཱདྷིསཾཝཏྟནིཀཱ, ཏཐཱརཱུཔིཾ ¶ ཝཱཙཾ པཧཱཡ ཡཱ སཱ ཝཱཙཱ ནེལཱ ཀཎྞསུཁཱ པེམནཱིཡཱ ཧདཡངྒམཱ པོརཱི བཧུཛནཀནྟཱ བཧུཛནམནཱཔཱ, ཏཐཱརཱུཔིཾ ཝཱཙཾ བྷཱསིཏཱ ཧོཏི, ཡཱ ཏཏྠ སཎྷཝཱཙཏཱ སཁིལཝཱཙཏཱ ཨཕརུསཝཱཙཏཱ, ཨིདཾ ཝུཙྩཏི སཱཁལྱ’’ནྟི ཝུཏྟཾ.

ཏཏྠ ཨཎྜཀཱཏི སདོསེ སཝཎེ རུཀྑེ ནིཡྻཱསཔིཎྜོ, ཨཧིཙྪཏྟཱདཱིནི ཝཱ ཨུཊྛིཏཱནི ཨཎྜཀཱནཱིཏི ¶ ཝདནྟི, ཕེགྒུརུཀྑསྶ པན ཀུཐིཏསྶ ཨཎྜཱནི ཝིཡ ཨུཊྛིཏཱ ཙུཎྞཔིཎྜིཡོ ཝཱ གཎྛིཡོ ཝཱ ཨཎྜཀཱ. ཨིདྷ པན བྱཱཔཛྫནཀཀྐསཱདིསབྷཱཝཏོ ཀཎྚཀཔྤཊིབྷཱགེན ཝཱཙཱ ཨཎྜཀཱཏི ཝུཏྟཱ. པདུམནཱལ༹ཾ ཝིཡ སོཏཾ གྷཾསཡམཱནཱ པཝིསནྟཱི ཀཀྐསཱ དཊྛབྦཱ. ཀོདྷེན ནིབྦཏྟཱ ཏསྶ པརིཝཱརབྷཱུཏཱ ཀོདྷསཱམནྟཱ. པུརེ སཾཝདྡྷནཱརཱི པོརཱི. སཱ ཝིཡ སུཀུམཱརཱ མུདུཀཱ ཝཱཙཱ པོརཱི ཝིཡཱཏི པོརཱི. སཎྷཝཱཙཏཱཏིཨཱདིནཱ ཏཾ ཝཱཙཾ པཝཏྟམཱནཾ དསྶེཏི.

༡༦༨. པཉྩམེ ‘‘ཨཝིཧིཾསཱཏི ཀརུཎཱཔུབྦབྷཱགོ’’ཏི ཨེཏྟཀམེཝ ཨིདྷ ཝུཏྟཾ, དཱིགྷནིཀཱཡཊྛཀཐཱཡ སངྒཱིཏིསུཏྟཝཎྞནཱཡཾ (དཱི. ནི. ཨཊྛ. ༣.༣༠༤) པན ‘‘ཨཝིཧིཾསཱཏི ཀརུཎཱཔི ཀརུཎཱཔུབྦབྷཱགོཔཱི’’ཏི ཝུཏྟཾ. ཨབྷིདྷམྨེཔི (ཝིབྷ. ༡༨༢) ‘‘ཏཏྠ ཀཏམཱ ཨཝིཧིཾསཱ? ཡཱ སཏྟེསུ ཀརུཎཱ ཀརུཎཱཡནཱ ཀརུཎཱཡིཏཏྟཾ ཀརུཎཱཙེཏོཝིམུཏྟི, ཨཡཾ ཝུཙྩཏི ཨཝིཧིཾསཱ’’ཏི ཨཱགཏཾ. ཨེཏྠཱཔི ཧི ཡཱ ཀཱཙི ཀརུཎཱ ‘‘ཀརུཎཱ’’ཏི ཝུཏྟཱ, ཀརུཎཱཙེཏོཝིམུཏྟི པན ཨཔྤནཱཔྤཏྟཱཝ.

སུཙིསདྡཏོ བྷཱཝེ ཡཀཱརཾ ཨིཀཱརསྶ ཙ ཨུཀཱརཱདེསཾ ཀཏྭཱ ཨཡཾ ནིདྡེསོཏི ཨཱཧ ‘‘སོཙབྱཾ སུཙིབྷཱཝོ’’ཏི. ཨེཏྠ ཙ སོཙབྱནྟི སཱིལཝསེན སུཙིབྷཱཝོཏི ཝུཏྟཾ. དཱིགྷནིཀཱཡཊྛཀཐཱཡ སངྒཱིཏིསུཏྟཝཎྞནཱཡཾ (དཱི. ནི. ཨཊྛ. ༣.༣༠༤) པན ‘‘སོཙེཡྻནྟི མེཏྟཱཡ ཙ མེཏྟཱཔུབྦབྷཱགསྶ ཙ ཝསེན སུཙིབྷཱཝོ’’ཏི ཝུཏྟཾ. ཏེནེཝ ཨབྷིདྷམྨེཔི ‘‘ཏཏྠ ཀཏམཾ སོཙབྱཾ? ཡཱ སཏྟེསུ མེཏྟི མེཏྟཱཡནཱ མེཏྟཱཡིཏཏྟཾ མེཏྟཱཙེཏོཝིམུཏྟི, ཨིདཾ ཝུཙྩཏི སོཙབྱ’’ནྟི ནིདྡེསོ ཀཏོ. ཨེཏྠཱཔི ཧི ‘‘མེཏྟཱི’’ཏིཨཱདིནཱ ཡཱ ཀཱཙི མེཏྟཱ ཝུཏྟཱ, མེཏྟཱཙེཏོཝིམུཏྟི པན ཨཔྤནཱཔྤཏྟཱཝ.

༡༦༩-༡༧༡. ཚཊྛསཏྟམཨཊྛམཱནི ¶ ཧེཊྛཱ ཝུཏྟནཡཱནེཝ.

༡༧༢. ནཝམེ ཀཱམཾ སམྤཡུཏྟདྷམྨེསུ ཐིརབྷཱཝོཔི བལཊྛོ ཨེཝ, པཊིཔཀྑེཧི པན ཨཀམྤནཱིཡཏཾ སཱཏིསཡཾ བལཊྛོཏི ཝུཏྟཾ ‘‘མུཊྛསྶཙྩེ ཨཀམྤནེནཱ’’ཏིཨཱདི.

༡༧༣. དསམེ པཙྩནཱིཀདྷམྨསམནཏོ སམཐོ, སམཱདྷཱིཏི ཨཱཧ ‘‘སམཐོཏི ཙིཏྟེཀགྒཏཱ’’ཏི. ཨནིཙྩཱདིནཱ ཝིཝིདྷེནཱཀཱརེན དསྶནཏོ པསྶནཏོ ཝིཔསྶནཱ, པཉྙཱཏི ཨཱཧ ‘‘སངྑཱརཔརིགྒཱཧཀཉཱཎ’’ནྟི.

༡༧༤. ཨེཀཱདསམེ ¶ དུསྶཱིལྱནྟི སམཱདིནྣསྶ སཱིལསྶ བྷེདཀརོ ཝཱིཏིཀྐམོ. དིཊྛིཝིཔཏྟཱིཏི ‘‘ཨཏྠི དིནྣ’’ནྟིཨཱདིནཡཔྤཝཏྟཱཡ སམྨཱདིཊྛིཡཱ དཱུསིཀཱ མིཙྪཱདིཊྛཱིཏི ཨཱཧ ‘‘དིཊྛིཝིཔཏྟཱིཏི མིཙྪཱདིཊྛཱི’’ཏི.

༡༧༥. དྭཱདསམེ སཱིལསམྤདཱཏི སབྦབྷཱགཏོ ཏསྶ ཨནཱུནཏཱཔཏྟི པརིཔུཎྞབྷཱཝོ སཱིལསམྤདཱ. པརིཔཱུརཎཏྠོ ཧེཏྠ སམྤདཱསདྡོ. ཏེནེཝཱཧ ‘‘པརིཔུཎྞསཱིལཏཱ’’ཏི. དིཊྛིསམྤདཱཏི ཨཏྠིཀདིཊྛིཨཱདིསམྨཱདིཊྛིཔཱརིཔཱུརིབྷཱཝེན པཝཏྟཾ ཉཱཎཾ. ཏཉྩ ཀམྨསྶཀཏཱསམྨཱདིཊྛིཨཱདིཝསེན པཉྩཝིདྷཾ ཧོཏཱིཏི ཨཱཧ ‘‘ཏེན ཀམྨསྶཀཏཱ’’ཏི.

༡༧༦. ཏེརསམེ སཱིལཝིསུདྡྷཱིཏི ཝིསུདྡྷིཾ པཱཔེཏུཾ སམཏྠཾ སཱིལཾ, ཙིཏྟཝིསུདྡྷིཨཱདིཨུཔརིཝིསུདྡྷིཡཱ པཙྩཡོ བྷཝིཏུཾ སམཏྠཾ ཝིསུདྡྷསཱིལནྟི ཝུཏྟཾ ཧོཏི. སུཝིསུདྡྷམེཝ ཧི སཱིལཾ ཏསྶཱ པདཊྛཱནཾ ཧོཏི. ཏེནཱཧ ‘‘སཱིལཝིསུདྡྷཱིཧི ཝིསུདྡྷིསམྤཱཔཀཾ སཱིལ’’ནྟི. ཨེཏྠཱཔི ཝིསུདྡྷིསམྤཱཔཀནྟི ཙིཏྟཝིསུདྡྷིཨཱདིཨུཔརིཝིསུདྡྷིཡཱ སམྤཱཔཀནྟི ཨཏྠོ དཊྛབྦོ. ཨབྷིདྷམྨེ (དྷ. ས. ༡༣༧༢) པནཱཡཾ ‘‘ཏཏྠ ཀཏམཱ སཱིལཝིསུདྡྷི? ཀཱཡིཀོ ཨཝཱིཏིཀྐམོ ཝཱཙསིཀོ ཨཝཱིཏིཀྐམོ ཀཱཡིཀཝཱཙསིཀོ ཨཝཱིཏིཀྐམོ, ཨཡཾ ཝུཙྩཏི སཱིལཝིསུདྡྷཱི’’ཏི ཨེཝཾ ཝིབྷཏྟཱ.

དིཊྛིཝིསུདྡྷཱིཏི ཝིསུདྡྷིཾ པཱཔེཏུཾ སམཏྠཾ དསྶནཉཱཎཾ དསྶནཝིསུདྡྷི, པརམཏྠཝིསུདྡྷིཾ ནིབྦཱནཉྩ པཱཔེཏུཾ ཨུཔནེཏུཾ སམཏྠཾ ཀམྨསྶཀཏཉཱཎཱདི སམྨཱདསྶནནྟི ཨཏྠོ. ཏེནཱཧ ‘‘ཝིསུདྡྷིསམྤཱཔིཀཱ…པེ… པཉྩཝིདྷཱཔི ཝཱ སམྨཱདིཊྛཱི’’ཏི. ཨེཏྠཱཔི ཝིསུདྡྷིསམྤཱཔིཀཱཏི ཉཱཎདསྶནཝིསུདྡྷིཡཱ དསྶནནིབྦཱནསངྑཱཏཱཡ ¶ པརམཏྠཝིསུདྡྷིཡཱ ཙ སམྤཱཔིཀཱཏི ཨེཝམཏྠོ དཊྛབྦོ. ཨབྷིདྷམྨེ (དྷ. ས. ༡༣༧༣) པནཱཡཾ ‘‘ཏཏྠ ཀཏམཱ དིཊྛིཝིསུདྡྷི? ཀམྨསྶཀཏཉཱཎཾ, སཙྩཱནུལོམིཀཾ ཉཱཎཾ, མགྒསྶ མགྒསམངྒིསྶ ཉཱཎཾ, ཕལསམངྒིསྶ ཉཱཎ’’ནྟི ཨེཝཾ ཝུཏྟཾ.

ཨེཏྠ ཙ ཨིདཾ ཨཀུསལཀམྨཾ ནོ སཀཾ, ཨིདཾ པན ཀམྨཾ སཀནྟི ཨེཝཾ བྱཏིརེཀཏོ ཨནྭཡཏོ ཙ ཀམྨསྶཀཏཛཱནནཉཱཎཾ ཀམྨསྶཀཏཉཱཎཾ. ཏིཝིདྷདུཙྩརིཏཉྷི ཨཏྟནཱ ཀཏམྤི པརེན ཀཏམྤི ནོ སཀཀམྨཾ ནཱམ ཧོཏི ཨཏྠབྷཉྫནཏོ, སུཙརིཏཾ སཀཀམྨཾ ནཱམ ཨཏྠཛནནཏོ. ཝིཔསྶནཱཉཱཎཾ པན ཝཙཱིསཙྩཉྩ ཨནུལོམེཏི, པརམཏྠསཙྩཉྩ ན ཝིལོམེཏཱིཏི སཙྩཱནུལོམིཀཉཱཎནྟི ཝུཏྟཾ. ཝིཔསྶནཱཉཱཎཉྷི ལཀྑཎཱནི པཊིཝིཛ྄ཛྷནཏྠཾ ཨཱརམྦྷཀཱལེ ¶ ‘‘ཨནིཙྩཾ དུཀྑཾ ཨནཏྟཱ’’ཏི པཝཏྟཾ ཝཙཱིསཙྩཉྩ ཨནུལོམེཏི, ཏཐེཝ པཊིཝིཛ྄ཛྷནཏོ པརམཏྠསཙྩཾ ནིབྦཱནཉྩ ན ཝིལོམེཏི ན ཝིརཱདྷེཏི ཨེཀནྟེནེཝ སམྤཱཔནཏོ.

༡༧༧. ཙུདྡསམེ དིཊྛིཝིསུདྡྷཱིཏི པཋམམགྒསམྨཱདིཊྛི ཝུཏྟཱ. ཡཐཱདིཊྛིསྶ ཙ པདྷཱནནྟི ཏཾསམྤཡུཏྟམེཝ ཝཱིརིཡཾ. ཏེནེཝ དཱིགྷནིཀཱཡཊྛཀཐཱཡཾ (དཱི. ནི. ཨཊྛ. ༣.༣༠༤) ‘‘དིཊྛིཝིསུདྡྷཱིཏི ཉཱཎདསྶནཾ ཀཐིཏཾ. ཡཐཱདིཊྛིསྶ ཙ པདྷཱནནྟི ཏཾསམྤཡུཏྟམེཝ ཝཱིརིཡ’’ནྟི ཝུཏྟཾ. ཨེཏྠ ཧི ཉཱཎདསྶནནྟི ཉཱཎབྷཱུཏཾ དསྶནཾ. ཏེན དསྶནམགྒཾ ཝདཏི. ཏཾསམྤཡུཏྟམེཝ ཝཱིརིཡནྟི པཋམམགྒསམྤཡུཏྟཝཱིརིཡམཱཧ. ཨཔིཙ དིཊྛིཝིསུདྡྷཱིཏི སབྦཱཔི མགྒསམྨཱདིཊྛི. ཡཐཱདིཊྛིསྶ ཙ པདྷཱནནྟི ཏཾསམྤཡུཏྟམེཝ ཝཱིརིཡཾ. ཏེནེཝ དཱིགྷནིཀཱཡཊྛཀཐཱཡཾ ‘‘ཨཔིཙ པུརིམཔདེན ཙཏུམགྒཉཱཎཾ, པཙྪིམཔདེན ཏཾསམྤཡུཏྟཾ ཝཱིརིཡ’’ནྟི ཝུཏྟཾ.

ཨཐ ཝཱ དིཊྛཱིཝིསུདྡྷཱིཏི ཀམྨསྶཀཏཉཱཎཱདིསངྑཱཏཱ སབྦཱཔི སམྨཱདིཊྛི ཝུཏྟཱ. ཡཐཱདིཊྛིསྶ ཙ པདྷཱནནྟི ཡོ ཙེཏསིཀོ ཝཱིརིཡཱརམྦྷོ…པེ… སམྨཱཝཱཡཱམོཏི. ཨཡམེཝ པཱལི༹ཡཱ སམེཏི. ཨབྷིདྷམྨེ ཧི ‘‘དིཊྛིཝིསུདྡྷི ཁོ པནཱཏི ཡཱ པཉྙཱ པཛཱནནཱ…པེ… ཨམོཧོ དྷམྨཝིཙཡོ སམྨཱདིཊྛི. ཡཐཱདིཊྛིསྶ ཙ པདྷཱནནྟི ཡོ ཙེཏསིཀོ ཝཱིརིཡཱརམྦྷོ…པེ… སམྨཱཝཱཡཱམོ’’ཏི ཨེཝམཡཾ དུཀོ ཝིབྷཏྟོ. ཏེནེཝ ཨབྷིདྷམྨཊྛཀཐཱཡཾ (དྷ. ས. ཨཊྛ. ༡༣༧༤) ‘‘ཡཱ པཉྙཱ པཛཱནནཱཏིཨཱདཱིཧི ཧེཊྛཱ ཝུཏྟཱནི ཀམྨསྶཀཏཉཱཎཱདཱིནེཝ ཙཏྟཱརི ཉཱཎཱནི ཝིབྷཏྟཱནི. ‘ཡོ ཙེཏསིཀོ ཝཱིརིཡཱརམྦྷོ’ཏིཨཱདཱིཧི ¶ པདེཧི ནིདྡིཊྛཾ ཝཱིརིཡཾ གཧིཏཾ པཉྙཱཡ ལོཀིཡཊྛཱནེ ལོཀིཡཾ, ལོཀུཏྟརཊྛཱནེ ལོཀུཏྟར’’ནྟི ཝུཏྟཾ.

ཨིདྷཱཔི ཝིསུདྡྷིསམྤཱཔིཀཱ ཙཏུམགྒསམྨཱདིཊྛི, པཉྩཝིདྷཱཔི ཝཱ སམྨཱདིཊྛི དིཊྛིཝིསུདྡྷཱིཏི ཨདྷིཔྤཱཡེན ‘‘དིཊྛིཝིསུདྡྷཱིཏི ཝིསུདྡྷིསམྤཱཔིཀཱ སམྨཱདིཊྛིཡེཝཱ’’ཏི ཝུཏྟཾ. ཧེཊྛིམམགྒསམྤཡུཏྟཾ ཝཱིརིཡནྟི ཨིདཾ པན ‘‘ཡཐཱདིཊྛིསྶ ཙ པདྷཱནནྟི པཋམམགྒསམྤཡུཏྟཾ ཝཱིརིཡནྟི ཝུཏྟ’’ནྟི ཨདྷིཔྤཱཡེན ཝདཏི. ཨེཏྠ ཙ ཏཾཏཾབྷཱཎཀཱནཾ མཏབྷེདེནཱཡཾ ཝཎྞནཱབྷེདོཏི ན ཨཊྛཀཐཱཝཙནཱནཾ ཨཉྙམཉྙཝིརོདྷོ སངྐིཏབྦོ. ཨཐ ཡཐཱདིཊྛིསྶ ཙ པདྷཱནནྟི ཧེཊྛིམམགྒསམྤཡུཏྟམེཝ ཝཱིརིཡཾ ཀསྨཱ ཝུཏྟནྟི ཨཱཧ ‘‘ཏཉྷི ཏསྶཱ དིཊྛིཡཱ ཨནུརཱུཔཏྟཱ’’ཏིཨཱདི. ཏཏྠ ཏསྶཱ དིཊྛིཡཱཏི ཧེཊྛིམམགྒསམྤཡུཏྟཱཡ དིཊྛིཡཱ. ཡཐཱདིཊྛིསྶཱཏི ཨནུརཱུཔདིཊྛིསྶ ཀལྱཱཎདིཊྛིསྶ ནིབྦཏྟིཏཔྤཀཱརདིཊྛིསྶ ཝཱ ནིབྦཏྟེཏབྦཔདྷཱནཱནུརཱུཔདིཊྛིསྶ ཡཐཱདིཊྛིཔྤཝཏྟཀིརིཡསྶ ཝཱཏི ཨེཝམྤེཏྠ ཨཏྠཾ སཾཝཎྞཡནྟི.

༡༧༨. པནྣརསམེ ¶ སམཏྟཾ ཏུསྶནཾ ཏིཏྟི སནྟུཊྛི, ནཏྠི ཨེཏསྶ སནྟུཊྛཱིཏི ཨསནྟུཊྛི, ཨསནྟུཊྛིསྶ བྷཱཝོ ཨསནྟུཊྛིཏཱ. ཡཱ ཀུསལཱནཾ དྷམྨཱནཾ བྷཱཝནཱཡ ཨསནྟུཊྛསྶ བྷིཡྻོཀམྱཏཱ, ཏསྶཱ ཨེཏཾ ཨདྷིཝཙནཾ. ཏཱཡ ཧི སམངྒིབྷཱུཏོ པུགྒལོ སཱིལཾ པཱུརེཏྭཱ ཛྷཱནཾ ཨུཔྤཱདེཏི, ཛྷཱནཾ ལབྷིཏྭཱ ཝིཔསྶནཾ ཨཱརབྷཏི, ཨཱརདྡྷཝིཔསྶཀོ ཨརཧཏྟཾ ཨགྒཧེཏྭཱ ཨནྟརཱ ཝོསཱནཾ ནཱཔཛྫཏི, ‘‘ཨལམེཏྟཱཝཏཱ ཀཏམེཏྟཱཝཏཱ’’ཏི སངྐོཙཾ ན པཱཔུཎཱཏི. ཏེནཱཧ ‘‘ཨཉྙཏྲ ཨརཧཏྟམགྒཱ ཀུསལེསུ དྷམྨེསུ ཨསནྟུཊྛིབྷཱཝོ’’ཏི. ཏཏྲ ཨཉྙཏྲ ཨརཧཏྟམགྒཱཏི ཨརཧཏྟམགྒསམྤཏྟཾ ཝིནཱཏི ཨཏྠོ. ‘‘ཨཔྤཊིཝཱནིཏཱ ཙ པདྷཱནསྨི’’ནྟི ཨིདཾ ཧེཊྛཱ ཝུཏྟནཡཏྟཱ ཨུཏྟཱནཏྠམེཝཱཏི ན ཝིབྷཏྟཾ.

༡༧༩. སོལ༹སམེ མུཊྛཱ ནཊྛཱ སཏི ཨེཏསྶཱཏི མུཊྛསྶཏི, ཏསྶ བྷཱཝོ མུཊྛསྶཙྩནྟི ཨཱཧ ‘‘མུཊྛསྶཙྩནྟི མུཊྛསྶཏིབྷཱཝོ’’ཏི. མུཊྛསྶཏིབྷཱཝོཏི ཙ སཏིཔྤཊིཔཀྑོ དྷམྨོ, ན སཏིཡཱ ཨབྷཱཝམཏྟཾ. ཨསམྤཛཉྙནྟི ‘‘ཏཏྠ ཀཏམཾ ཨསམྤཛཉྙཾ? ཡཾ ཨཉྙཱཎཾ ཨདསྶནཾ…པེ… ཨཝིཛྫཱལངྒྷཱི མོཧོ ཨཀུསལམཱུལ’’ནྟི (དྷ. ས. ༡༣༥༧) ཨེཝཾ ཝུཏྟཱ ཨཝིཛྫཱཡེཝ. ཏཐཱ ཧི ཝིཛྫཱཔཊིཔཀྑོ ཨཝིཛྫཱ ཝིཛྫཱཡ པཧཱཏབྦཏོ, ཨེཝཾ སམྤཛཉྙཔྤཊིཔཀྑོ ཨསམྤཛཉྙཾ ¶ . ཡསྨཱ པན སམྤཛཉྙཔྤཊིཔཀྑེ སཏི ཏསྶ ཝསེན ཉཱཎསྶ ཨབྷཱཝོ ཧོཏི, ཏསྨཱ ཝུཏྟཾ ‘‘ཨཉྙཱཎབྷཱཝོ’’ཏི.

༡༨༠. སཏྟརསམེ ཨཔིལཱཔནལཀྑཎཱ སཏཱིཏི ཨུདཀེ ལཱབུ ཝིཡ ཡེན ཙིཏྟཾ ཨཱརམྨཎེ པིལཝིཏྭཱ ཝིཡ ཏིཊྛཏི, ན ཨོགཱཧཏི, ཏཾ པིལཱཔནཾ. ན པིལཱཔནཾ ཨཔིལཱཔནཾ, ཏཾ ལཀྑཎཾ སབྷཱཝོ ཨེཏིསྶཱཏི ཨཔིལཱཔནལཀྑཎཱ.

སམཱཔཏྟིཝགྒཝཎྞནཱ ནིཊྛིཏཱ.

ཏཏིཡཔཎྞཱསཀཾ ནིཊྛིཏཾ.

༡. ཀོདྷཔེཡྻཱལཾ

༡༨༡. ཨིཏོ པརེསུ ཀོདྷཝགྒཱདཱིསུ ཨུཔནནྡྷནལཀྑཎོཏི ཀུཛ྄ཛྷནཝསེན ‘‘ཨཀྐོཙྪི མཾ ཨཝདྷི ¶ མ’’ནྟིཨཱདིནཱ (དྷ. པ. ༣, ༤) ཙིཏྟཔརིཡོནནྡྷནལཀྑཎོ. པུབྦཀཱལིཀཾ ཀོདྷཾ ཨུཔནཡ྄ཧཏི བནྡྷཏི, ཀུཛ྄ཛྷནཱཀཱརཾ པབནྡྷཏི གྷཊེཏི. ཨཱགྷཱཏཝཏྠུནཱ ཙིཏྟཾ བནྡྷནྟཱི ཝིཡ ཧོཏཱིཏི ཨཔརཀཱལོ ཀོདྷོ ཨུཔནཱཧོ. སུཊྛུ ཀཏཾ ཀཱརཎཾ ཨུཔཀཱརོ སུཀཏཀཱརཎཾ, ཏསྶ པུབྦཀཱརིཏཱལཀྑཎསྶ གུཎསྶ མཀྑནཾ ཨུདཀཔུཉྪནིཡཱ ཝིཡ སརཱིརཱནུགཏསྶ ཨུདཀསྶ པུཉྪནཾ ཝིནཱསནཾ ལཀྑཎམེཏསྶཱཏི སུཀཏཀརཎམཀྑནལཀྑཎོ. ཏཐཱ ཧི སོ པརེསཾ གུཎཱནཾ མཀྑནཊྛེན མཀྑོཏི ཝུཙྩཏི. བཧུསྶུཏེཔི པུགྒལེ ཨཛ྄ཛྷོཏྠརིཾསུ, ‘‘ཨཱིདིསསྶ ཙ བཧུསྶུཏསྶ ཨནིཡཏཱ གཧིཏཱ, ཏཝ ཙ མམ ཙ ཀོ ཝིསེསོ’’ཏིཨཱདིནཱ ནཡེན ཨུཔྤཛྫམཱནོ ཡུགགྒཱཧཱི པལཱསོཏི ཨཱཧ ‘‘ཡུགགྒཱཧལཀྑཎོ པལཱསོ’’ཏི. ཏཏྠ ཡུགགྒཱཧོ ནཱམ སམདྷུརགྒཱཧོ, ཨསམམྤི ཨཏྟནཱ སམཾ ཀཏྭཱ གཎྷནཾ. པལཱསཏཱིཏི པལཱསོ, པརེསཾ གུཎེ ཌཾསིཏྭཱ དནྟེཧི ཝིཡ ཚིནྡིཏྭཱ ཨཏྟནོ གུཎེཧི སམེ ཀརོཏཱིཏི ཨཏྠོ.

ཨུསཱུཡནལཀྑཎཱཏི པརེསཾ སཀྐཱརཱདཱིནི ཁིཡྻནལཀྑཎཱ. མཙྪེརསྶ བྷཱཝོ མཙྪརིཡཾ. ཏཉྩ ཨཱཝཱསམཙྪརིཡཱདིཝསེན པཉྩཝིདྷནྟི ཨཱཧ ‘‘པཉྩམཙྪེརབྷཱཝོ མཙྪརིཡ’’ནྟི. མཙྪརཱཡནལཀྑཎནྟི ཨཏྟནོ སམྤཏྟིཡཱ ¶ པརེཧི སཱདྷཱརཎབྷཱཝེ ཨསཧནལཀྑཎཾ. ཀཏཔྤཊིཙྪཱདནལཀྑཎཱཏི ཀཏཔཱཔཔྤཊིཙྪཱདནལཀྑཎཱ. ཀེརཱཊིཀབྷཱཝེན ཨུཔྤཛྫམཱནཾ སཱཋེཡྻནྟི ཨཱཧ ‘‘ཀེརཱཊིཀལཀྑཎཾ སཱཋེཡྻ’’ནྟི. ཨཉྙཐཱ ཨཏྟནོ པཝེདནཔུགྒལོ ཀེརཱཊིཀོ ནེཀཏིཀཝཱཎིཛོཏི ཝདནྟི. ཀེརཱཊིཀོ ཧི པུགྒལོ ཨཱནནྡམཙྪོ ཝིཡ ཧོཏི.

༡༨༧. ཡཐཱབྷཏཾ ནིཀྑིཏྟོ ཨེཝཾ ནིརཡེཏི ཡཐཱ ཨཱབྷཏཾ ཀཉྩི ཨཱཧརིཏྭཱ ཋཔིཏོ, ཨེཝཾ ཨཏྟནོ ཀམྨུནཱ ནིཀྑིཏྟོ ནིརཡེ ཋཔིཏོཡེཝཱཏི ཨཏྠོ.

༢. ཨཀུསལཔེཡྻཱལཾ

༡༩༡-༢༠༠. དུཀྑསྶ ཝཌྜྷི ཨེཏེསནྟི དུཀྑཝཌྜྷིཀཱ. ཡེ ཧི དུཀྑཾ ཝཌྜྷེནྟི, པུནཔྤུནཾ ཨུཔྤཱདེནྟི, དུཀྑསྶ ཝཌྜྷི ཏེསཾ ཨཏྠཱིཏི ཨེཝཾ ཝུཏྟཾ. སུཁཝཌྜྷིཀཱཏི ཨེཏྠཱཔི ཨེསེཝ ནཡོ.

༣. ཝིནཡཔེཡྻཱལཾ

༢༠༡. ཨཏྠཝསེཏི ¶ ཝུདྡྷིཝིསེསེ ཨཱནིསཾསཝིསེསེ. ཏེསཾ པན སིཀྑཱཔདཔཉྙཏྟིཀཱརཎཏྟཱ ཨཱཧ ‘‘དྭེ ཀཱརཎཱནི སནྡྷཱཡཱ’’ཏི. ཨཏྠོཡེཝ ཝཱ ཨཏྠཝསོ, དྭེ ཨཏྠེ དྭེ ཀཱརཎཱནཱིཏི ཝུཏྟཾ ཧོཏི. ཨཐ ཝཱ ཨཏྠོ ཕལཾ ཏདདྷཱིནཝུཏྟིཏཱཡ ཝསོ ཨེཏསྶཱཏི ཨཏྠཝསོ, ཀཱརཎནྟི ཨེཝམྤེཏྠ ཨཏྠོ དཊྛབྦོ. ཡཐཱ ‘‘ཨནབྷིཛ྄ཛྷཱ དྷམྨཔད’’ནྟི ཝུཏྟེ ཨནབྷིཛ྄ཛྷཱ ཨེཀོ དྷམྨཀོཊྛཱསོཏི ཨཏྠོ ཧོཏི. ཨེཝམིདྷཱཔི སིཀྑཱཔདནྟི སིཀྑཱཀོཊྛཱསོ སིཀྑཱཡ ཨེཀོ པདེསོཏི ཨཡམེཏྠ ཨཏྠོ དཊྛབྦོཏི ཨཱཧ ‘‘སིཀྑཱཔདཾ པཉྙཏྟནྟི སིཀྑཱཀོཊྛཱསོ ཋཔིཏོ’’ཏི.

སངྒྷསུཊྛུ ནཱམ སངྒྷསྶ སུཊྛུབྷཱཝོ ‘‘སུཊྛུ དེཝཱ’’ཏི (པཱརཱ. ཨཊྛ. ༣༩) ཨཱགཏཊྛཱནེ ཝིཡ ‘‘སུཊྛུ, བྷནྟེ’’ཏི ཝཙནསམྤཊིཙྪནབྷཱཝོ. ཏེནཱཧ ‘‘སངྒྷསུཊྛུཏཱཡཱཏི སངྒྷསྶ སུཊྛུབྷཱཝཱཡཱ’’ཏིཨཱདི. དུམྨངྐཱུནཾ པུགྒལཱནཾ ནིགྒཧཱཡཱཏི དུམྨངྐཱུ ནཱམ དུསྶཱིལཔུགྒལཱ. ཡེ མངྐུཏཾ ཨཱཔཱདིཡམཱནཱཔི དུཀྑེན ཨཱཔཛྫནྟི, ཝཱིཏིཀྐམཾ ཀརོནྟཱ ཝཱ ཀཏྭཱ ཝཱ ¶ ན ལཛྫནྟི, ཏེསཾ ནིགྒཧཏྠཱཡ. ཏེ ཧི སིཀྑཱཔདེ ཨསཏི ‘‘ཀིཾ ཏུམྷེཧི དིཊྛཾ, ཀིཾ སུཏཾ, ཀིཾ ཨམྷེཧི ཀཏཾ, ཀཏརསྨིཾ ཝཏྠུསྨིཾ ཀཏམཾ ཨཱཔཏྟིཾ རོཔེཏྭཱ ཨམྷེ ནིགྒཎྷཐཱ’’ཏི སངྒྷཾ ཝིཧེཋེསྶནྟི, སིཀྑཱཔདེ པན སཏི ཏེསཾ སངྒྷོ སིཀྑཱཔདཾ དསྶེཏྭཱ དྷམྨེན ཝིནཡེན སཏྠུསཱསནེན ནིགྒཧེསྶཏི. ཏེན ཝུཏྟཾ ‘‘དུམྨངྐཱུནཾ པུགྒལཱནཾ ནིགྒཧཱཡཱ’’ཏི.

པེསལཱནཾ བྷིཀྑཱུནཾ ཕཱསུཝིཧཱརཱཡཱཏི པེསལཱནཾ པིཡསཱིལཱནཾ བྷིཀྑཱུནཾ ཕཱསུཝིཧཱརཏྠཱཡ. པིཡསཱིལཱ ཧི བྷིཀྑཱུ ཀཏྟབྦཱཀཏྟབྦཾ སཱཝཛྫཱནཝཛྫཾ ཝེལཾ མརིཡཱདཾ ཨཛཱནནྟཱ སིཀྑཏྟཡཔཱརིཔཱུརིཡཱ གྷཊམཱནཱ ཀིལམནྟི, ཨུབྦཱལ༹ྷཱ ཧོནྟི, ཀཏྟབྦཱཀཏྟབྦཾ པན སཱཝཛྫཱནཝཛྫཾ ཝེལཾ མརིཡཱདཉྩ ཉཏྭཱ སིཀྑཏྟཡཔཱརིཔཱུརིཡཱ གྷཊེནྟཱ ན ཀིལམནྟི, ན ཨུབྦཱལ༹ྷཱ ཧོནྟི. ཏེན ཏེསཾ སིཀྑཱཔདཔྤཉྙཱཔནཱ ཕཱསུཝིཧཱརཱཡ སཾཝཏྟཏི. ཡོ ཝཱ དུམྨངྐཱུནཾ པུགྒལཱནཾ ནིགྒཧོ, སྭེཝ ཨེཏེསཾ ཕཱསུཝིཧཱརོ. དུསྶཱིལཔུགྒལེ ནིསྶཱཡ ཧི ཨུཔོསཐོ ན ཏིཊྛཏི, པཝཱརཎཱ ན ཏིཊྛཏི, སངྒྷཀམྨཱནི ནཔྤཝཏྟནྟི, སཱམགྒཱི ན ཧོཏི, བྷིཀྑཱུ ཨནེཀགྒཱ ཨུདྡེསཔརིཔུཙྪཱཀམྨཊྛཱནཱདཱིནི ཨནུཡུཉྫིཏུཾ ན སཀྐོནྟི. དུསྶཱིལེསུ པན ནིགྒཧིཏེསུ སབྦོཔི ཨཡཾ ཨུཔདྡཝོ ན ཧོཏི, ཏཏོ པེསལཱ བྷིཀྑཱུ ཕཱསུ ཝིཧརནྟི. ཨེཝཾ ‘‘པེསལཱནཾ བྷིཀྑཱུནཾ ཕཱསུཝིཧཱརཱཡཱ’’ཏི ཨེཏྠ དྭིདྷཱ ཨཏྠོ ཝེདིཏབྦོ.

‘‘ན ¶ ཝོ ཨཧཾ, ཙུནྡ, དིཊྛདྷམྨིཀཱནཾཡེཝ ཨཱསཝཱནཾ སཾཝརཱཡ དྷམྨཾ དེསེམཱི’’ཏི (དཱི. ནི. ༣.༡༨༢) ཨེཏྠ ཝིཝཱདམཱུལབྷཱུཏཱ ཀིལེསཱ ཨཱསཝཱཏི ཨཱགཏཱ.

‘‘ཡེན དེཝཱུཔཔཏྱསྶ, གནྡྷབྦོ ཝཱ ཝིཧངྒམོ;

ཡཀྑཏྟཾ ཡེན གཙྪེཡྻཾ, མནུསྶཏྟཉྩ ཨབྦཛེ;

ཏེ མཡ྄ཧཾ ཨཱསཝཱ ཁཱིཎཱ, ཝིདྡྷསྟཱ ཝིནལཱི༹ཀཏཱ’’ཏི. (ཨ. ནི. ༤.༣༦) –

ཨེཏྠ ཏེབྷཱུམཀཾ ཀམྨཾ ཨཝསེསཱ ཙ ཨཀུསལཱ དྷམྨཱ. ཨིདྷ པན པརཱུཔཝཱདཝིཔྤཊིསཱརཝདྷབནྡྷནཱདཡོ ཙེཝ ཨཔཱཡདུཀྑབྷཱུཏཱ ཙ ནཱནཔྤཀཱརཱ ཨུཔདྡཝཱ ཨཱསཝཱཏི ཨཱཧ – ‘‘དིཊྛདྷམྨེ ཨིམསྨིཾཡེཝ ཨཏྟབྷཱཝེ ཝཱིཏིཀྐམཔཙྩཡཱ པཊིལདྡྷབྦཱན’’ནྟིཨཱདི. ཡདི ཧི བྷགཝཱ སིཀྑཱཔདཾ ན པཉྙཱཔེཡྻ, ཏཏོ ཨསདྡྷམྨཔྤཊིསེཝནཨདིནྣཱདཱནཔཱཎཱཏིཔཱཏཱདིཧེཏུ ཡེ ཨུཔྤཛྫེཡྻུཾ པརཱུཔཝཱདཱདཡོ དིཊྛདྷམྨིཀཱ ནཱནཔྤཀཱརཱ ཨནཏྠཱ, ཡེ ཙ ཏནྣིམིཏྟམེཝ ¶ ནིརཡཱདཱིསུ ནིབྦཏྟསྶ པཉྙཝིདྷབནྡྷནཀམྨཀཱརཎཱདིཝསེན མཧཱདུཀྑཱནུབྷཝནཔྤཀཱརཱ ཨནཏྠཱ, ཏེ སནྡྷཱཡ ཨིདཾ ཝུཏྟཾ ‘‘དིཊྛདྷམྨིཀཱནཾ ཨཱསཝཱནཾ སཾཝརཱཡ སམྤརཱཡིཀཱནཾ ཨཱསཝཱནཾ པཊིགྷཱཏཱཡཱ’’ཏི. དིཊྛདྷམྨོ ཝུཙྩཏི པཙྩཀྑོ ཨཏྟབྷཱཝོ, ཏཏྠ བྷཝཱ དིཊྛདྷམྨིཀཱ. སམྤརེཏབྦཏོ པེཙྩ གནྟབྦཏོ སམྤརཱཡོ, པརལོཀོ, ཏཏྠ བྷཝཱ སམྤརཱཡིཀཱ.

ཨཀུསལཝེརཱནནྟི པཱཎཱཏིཔཱཏཱདིཔཉྩདུཙྩརིཏཱནཾ. ཏཱནི ཝེརཀཱརཎཏྟཱ ‘‘ཝེརཱནཱི’’ཏི ཝུཙྩནྟི, པུགྒལེསུ པན ཨུཔྤཛྫམཱནཱནི ཝེརཱནི. ཏེ ཨེཝ ཝཱ དུཀྑདྷམྨཱཏི ཧེཊྛཱ ཝུཏྟཱ ཝདྷབནྡྷནཱདཡོ. ཏེསཾ པཀྑུཔཙྪེདནཏྠཱཡཱཏི ཏེསཾ པཱཔིཙྪཱནཾ པཀྑུཔཙྪེདཱཡ གཎབྷོཛནསདིསཾ སིཀྑཱཔདཾ པཉྙཏྟཾ. པཎྜིཏམནུསྶཱནནྟི ལོཀིཡཔརིཀྑཀཛནཱནཾ. ཏེ ཧི སིཀྑཱཔདཔཉྙཏྟིཡཱ སཏི སིཀྑཱཔདཔཉྙཏྟིཾ ཉཏྭཱ ཝཱ ཡཐཱཔཉྙཏྟཾ པཊིཔཛྫམཱནེ བྷིཀྑཱུ དིསྭཱ ཝཱ – ‘‘ཡཱནི ཝཏ ལོཀེ མཧཱཛནསྶ རཛྫནདུསྶནམུཡ྄ཧནཊྛཱནཱནི, ཏེཧི ཨིམེ སམཎཱ སཀྱཔུཏྟིཡཱ ཨཱརཀཱ ཝིཧརནྟི, དུཀྐརཾ ཝཏ ཀརོནྟི, བྷཱརིཡཾ ཝཏ ཀརོནྟཱི’’ཏི པསཱདཾ ཨཱཔཛྫནྟི ཝིནཡཔིཊཀེ པོཏྠཀཾ དིསྭཱ མིཙྪཱདིཊྛིཀཏཝེདིབྲཱཧྨཎོ ཝིཡ. ཨུཔརཱུཔརིཔསཱདབྷཱཝཱཡཱཏི བྷིཡྻོ བྷིཡྻོ པསཱདུཔྤཱདནཏྠཾ. ཡེཔི ཧི སཱསནེ པསནྣཱ ཀུལཔུཏྟཱ, ཏེཔི སིཀྑཱཔདཔཉྙཏྟིཾ ཝཱ ཉཏྭཱ ཡཐཱཔཉྙཏྟཾ པཊིཔཛྫམཱནེ བྷིཀྑཱུ ཝཱ དིསྭཱ ‘‘ཨཧོ, ཨཡྻཱ, དུཀྐརཀཱརིནོ, ཡེ ཡཱཝཛཱིཝཾ ཨེཀབྷཏྟཾ བྲཧྨཙརིཡཾ ཝིནཡསཾཝརཾ ཨནུཔཱལེནྟཱི’’ཏི བྷིཡྻོ བྷིཡྻོ པསཱིདནྟི.

སདྡྷམྨསྶ ¶ ཙིརཊྛིཏཏྠནྟི པརིཡཏྟིསདྡྷམྨོ, པཊིཔཏྟིསདྡྷམྨོ, ཨདྷིགམསདྡྷམྨོཏི ཏིཝིདྷསྶཔི སདྡྷམྨསྶ ཙིརཊྛིཏཏྠཾ. ཏཏྠ པིཊཀཏྟཡསངྒཧིཏཾ སབྦམྤི བུདྡྷཝཙནཾ པརིཡཏྟིསདྡྷམྨོ ནཱམ. ཏེརས དྷུཏགུཎཱ, ཙུདྡས ཁནྡྷཀཝཏྟཱནི, དྭེཨསཱིཏི མཧཱཝཏྟཱནི, སཱིལསམཱདྷིཝིཔསྶནཱཏི ཨཡཾ པཊིཔཏྟིསདྡྷམྨོ ནཱམ. ཙཏྟཱརོ ཨརིཡམགྒཱ ཙཏྟཱརི ཙ སཱམཉྙཕལཱནི ནིབྦཱནཉྩཱཏི ཨཡཾ ཨདྷིགམསདྡྷམྨོ ནཱམ. སོ སབྦོ ཡསྨཱ སིཀྑཱཔདཔཉྙཏྟིཡཱ སཏི བྷིཀྑཱུ སིཀྑཱཔདཉྩ ཏསྶ ཝིབྷངྒཉྩ ཏདཏྠཛོཏནཏྠཾ ཨཉྙཉྩ བུདྡྷཝཙནཾ པརིཡཱཔུཎནྟི, ཡཐཱཔཉྙཏྟཉྩ པཊིཔཛྫམཱནཱ པཊིཔཏྟིཾ པཱུརེཏྭཱ པཊིཔཏྟིཡཱ ཨདྷིགནྟབྦཾ ལོཀུཏྟརདྷམྨཾ ཨདྷིགཙྪནྟི, ཏསྨཱ སིཀྑཱཔདཔཉྙཏྟིཡཱ ཙིརཊྛིཏིཀོ ཧོཏི.

པཉྩཝིདྷསྶཔི ¶ ཝིནཡསྶཱཏི ཏདངྒཝིནཡཱདིཝསེན པཉྩཔྤཀཱརསྶ ཝིནཡསྶ. ཝིནཡཊྛཀཐཱཡཾ (པཱརཱ. ཨཊྛ. ༣༩) པན སིཀྑཱཔདཔཉྙཏྟིཡཱ སཏི སཾཝརཝིནཡོ ཙ པཧཱནཝིནཡོ ཙ སམཐཝིནཡོ ཙ པཉྙཏྟིཝིནཡོ ཙཱཏི ཙཏུབྦིདྷོཔི ཝིནཡོ ཨནུགྒཧིཏོ ཧོཏི ཨུཔཏྠམྦྷིཏོ སུཔཏྠམྦྷིཏོ. ཏེན ཝུཏྟཾ ‘‘ཝིནཡཱནུགྒཧཱཡཱ’’ཏི. ཏཏྠ སཾཝརཝིནཡོཏི སཱིལསཾཝརོ, སཏིསཾཝརོ, ཉཱཎསཾཝརོ, ཁནྟིསཾཝརོ, ཝཱིརིཡསཾཝརོཏི པཉྩཝིདྷོཔི སཾཝརོ ཡཐཱསཀཾ སཾཝརིཏབྦཱནཾ ཝིནེཏབྦཱནཉྩ ཀཱཡདུཙྩརིཏཱདཱིནཾ སཾཝརཎཏོ སཾཝརོ, ཝིནཡནཏོ ཝིནཡོཏི ཝུཙྩཏི. པཧཱནཝིནཡོཏི ཏདངྒཔྤཧཱནཾ, ཝིཀྑམྦྷནཔྤཧཱནཾ, སམུཙྪེདཔྤཧཱནཾ, པཊིཔྤསྶདྡྷིཔྤཧཱནཾ, ནིསྶརཎཔྤཧཱནནྟི པཉྩཝིདྷམྤི པཧཱནཾ ཡསྨཱ ཙཱགཊྛེན པཧཱནཾ, ཝིནཡནཊྛེན ཝིནཡོ, ཏསྨཱ པཧཱནཝིནཡོཏི ཝུཙྩཏི. སམཐཝིནཡོཏི སཏྟ ཨདྷིཀརཎསམཐཱ. པཉྙཏྟིཝིནཡོཏི སིཀྑཱཔདམེཝ. སིཀྑཱཔདཔཉྙཏྟིཡཱ ཧི ཝིཛྫམཱནཱཡ ཨེཝ སིཀྑཱཔདསམྦྷཝཏོ སིཀྑཱཔདསངྑཱཏོ པཉྙཏྟིཝིནཡོཏི སིཀྑཱཔདཔཉྙཏྟིཡཱ ཨནུགྒཧིཏོ ཧོཏི.

༢༠༢-༢༣༠. བྷིཀྑཱུནཾ པཉྩཱཏི ནིདཱནཔཱརཱཛིཀསངྒྷཱདིསེསཱནིཡཏཝིཏྠཱརུདྡེསཝསེན པཉྩ བྷིཀྑཱུནཾ ཨུདྡེསཱ. བྷིཀྑུནཱིནཾ ཙཏྟཱརོཏི བྷིཀྑཱུནཾ ཝུཏྟེསུ ཨནིཡཏུདྡེསཾ ཋཔེཏྭཱ ཨཝསེསཱ ཙཏྟཱརོ.

ཨེཧིབྷིཀྑཱུཔསམྤདཱཏི ‘‘ཨེཧི བྷིཀྑཱུ’’ཏི ཝཙནམཏྟེན པཉྙཏྟཨུཔསམྤདཱ. བྷགཝཱ ཧི ཨེཧིབྷིཀྑུབྷཱཝཱཡ ཨུཔནིསྶཡསམྤནྣཾ པུགྒལཾ དིསྭཱ རཏྟཔཾསུཀཱུལནྟརཏོ སུཝཎྞཝཎྞཾ དཀྑིཎཧཏྠཾ ནཱིཧརིཏྭཱ བྲཧྨགྷོསཾ ནིཙྪཱརེནྟོ ‘‘ཨེཧི བྷིཀྑུ, ཙར བྲཧྨཙརིཡཾ སམྨཱ དུཀྑསྶ ཨནྟཀིརིཡཱཡཱ’’ཏི ཝདཏི. ཏསྶ སཧེཝ བྷགཝཏོ ཝཙནེན གིཧིལིངྒཾ ཨནྟརདྷཱཡཏི, པབྦཛྫཱ ཙ ཨུཔསམྤདཱ ཙ རུཧཏི, བྷཎྜུ ཀཱསཱཝཝསནོ ཧོཏི – ཨེཀཾ ནིཝཱསེཏྭཱ ཨེཀཾ པཱརུཔིཏྭཱ ཨེཀཾ ཨཾསེ ཋཔེཏྭཱ ཝཱམཨཾསཀཱུཊེ ཨཱསཏྟནཱིལུཔྤལཝཎྞམཏྟིཀཱཔཏྟོ.

‘‘ཏིཙཱིཝརཉྩ ¶ པཏྟོ ཙ, ཝཱསི སཱུཙི ཙ བནྡྷནཾ;

པརིསྶཱཝནེན ཨཊྛེཏེ, ཡུཏྟཡོགསྶ བྷིཀྑུནོ’’ཏི. (དཱི. ནི. ཨཊྛ. ༡.༢༡༥; མ. ནི. ཨཊྛ. ༡.༢༩༤; ༢.༣༤༩; ཨ. ནི. ཨཊྛ. ༢.༤.༡༩༨; པཱརཱ. ཨཊྛ. ༤༥ པདབྷཱཛནཱིཡཝཎྞནཱ; ཨཔ. ཨཊྛ. ༡.ཨཝིདཱུརེནིདཱནཀཐཱ; བུ. ཝཾ. ཨཊྛ. ༢༧.ཨཝིདཱུརེནིདཱནཀཐཱ; ཛཱ. ཨཊྛ. ༡.ཨཝིདཱུརེནིདཱནཀཐཱ; མཧཱནི. ཨཊྛ. ༢༠༦) –

ཨེཝཾ ¶ ཝུཏྟེཧི ཨཊྛཧི པརིཀྑཱརེཧི སརཱིརེ པཊིམུཀྐེཧིཡེཝ ཝསྶསཏིཀཏྠེརོ ཝིཡ ཨིརིཡཱཔཐསམྤནྣོ བུདྡྷཱཙརིཡཀོ བུདྡྷུཔཛ྄ཛྷཱཡཀོ སམྨཱསམྦུདྡྷཾ ཝནྡམཱནོཡེཝ ཏིཊྛཏི.

སརཎགམནཱུཔསམྤདཱཏི ‘‘བུདྡྷཾ སརཎཾ གཙྪཱམཱི’’ཏིཨཱདིནཱ ནཡེན ཏིཀྑཏྟུཾ ཝཱཙཾ བྷིནྡིཏྭཱ ཝུཏྟེཧི ཏཱིཧི སརཎགམནེཧི ཨནུཉྙཱཏཨུཔསམྤདཱ. ཨོཝཱདཱུཔསམྤདཱཏི ཨོཝཱདཔྤཊིགྒཧཎཨུཔསམྤདཱ. སཱ ཙ ‘‘ཏསྨཱཏིཧ ཏེ, ཀསྶཔ, ཨེཝཾ སིཀྑིཏབྦཾ ‘ཏིབྦཾ མེ ཧིརོཏྟཔྤཾ, པཙྩུཔཊྛིཏཾ བྷཝིསྶཏི ཐེརེསུ ནཝེསུ མཛ྄ཛྷིམེསཱུ’ཏི. ཨེཝཉྷི ཏེ, ཀསྶཔ, སིཀྑིཏབྦཾ. ཏསྨཱཏིཧ ཏེ, ཀསྶཔ, ཨེཝཾ སིཀྑིཏབྦཾ ‘ཡཾ ཀིཉྩི དྷམྨཾ སུཎིསྶཱམི ཀུསལཱུཔསཾཧིཏཾ, སབྦཾ ཏཾ ཨཊྛིཾ ཀཏྭཱ མནསི ཀརིཏྭཱ སབྦཙེཏསཱ སམནྣཱཧརིཏྭཱ ཨོཧིཏསོཏོ དྷམྨཾ སུཎིསྶཱམཱི’ཏི, ཨེཝཉྷི ཏེ, ཀསྶཔ, སིཀྑིཏབྦཾ. ཏསྨཱཏིཧ ཏེ, ཀསྶཔ, ཨེཝཾ སིཀྑིཏབྦཾ ‘སཱཏསཧགཏཱ ཙ མེ ཀཱཡགཏཱསཏི ན ཝིཛཧིསྶཏཱི’ཏི, ཨེཝཉྷི ཏེ, ཀསྶཔ, སིཀྑིཏབྦ’’ནྟི (སཾ. ནི. ༢.༡༥༤) ཨིམིནཱ ཨོཝཱདཔྤཊིགྒཧཎེན མཧཱཀསྶཔཏྠེརསྶ ཨནུཉྙཱཏཨུཔསམྤདཱ.

པཉྷབྱཱཀརཎཱུཔསམྤདཱ ནཱམ སོཔཱཀསྶ ཨནུཉྙཱཏཨུཔསམྤདཱ. བྷགཝཱ ཀིར པུབྦཱརཱམེ ཨནུཙངྐམནྟཾ སོཔཱཀསཱམཎེརཾ ‘‘ཨུདྡྷུམཱཏཀསཉྙཱཏི ཝཱ, སོཔཱཀ, རཱུཔསཉྙཱཏི ཝཱ ཨིམེ དྷམྨཱ ནཱནཏྠཱ ནཱནཱབྱཉྫནཱ, ཨུདཱཧུ ཨེཀཏྠཱ བྱཉྫནམེཝ ནཱན’’ནྟི དས ཨསུབྷནིསྶིཏེ པཉྷེ པུཙྪི. སོ བྱཱཀཱསི. བྷགཝཱ ཏསྶ སཱདྷུཀཱརཾ དཏྭཱ ‘‘ཀཏིཝསྶོསི, ཏྭཾ སོཔཱཀཱ’’ཏི པུཙྪི. སཏྟཝསྶོཧཾ བྷགཝཱཏི. སོཔཱཀ, ཏྭཾ མམ སབྦཉྙུཏཉྙཱཎེན སདྡྷིཾ སཾསནྡིཏྭཱ པཉྷེ བྱཱཀཱསཱིཏི ཨཱརདྡྷཙིཏྟོ ཨུཔསམྤདཾ ཨནུཛཱནི. ཨཡཾ པཉྷབྱཱཀརཎཱུཔསམྤདཱ.

ཉཏྟིཙཏུཏྠཨུཔསམྤདཱ ནཱམ བྷིཀྑཱུནཾ ཨེཏརཧི ཨུཔསམྤདཱ. གརུདྷམྨཱུཔསམྤདཱཏི གརུདྷམྨཔྤཊིགྒཧཎེན ཨུཔསམྤདཱ. སཱ ཙ མཧཱཔཛཱཔཏིཡཱ ཨཊྛགརུདྷམྨཔྤཊིགྒཧཎེན ཨནུཉྙཱཏཱ ¶ . ཨུབྷཏོསངྒྷེ ཨུཔསམྤདཱ ནཱམ བྷིཀྑུནིཡཱ བྷིཀྑུནིསངྒྷཏོ ཉཏྟིཙཏུཏྠེན, བྷིཀྑུསངྒྷཏོ ཉཏྟིཙཏུཏྠེནཱཏི ཨིམེཧི དྭཱིཧི ཀམྨེཧི ཨནུཉྙཱཏཱ ཨཊྛཝཱཙིཀཱུཔསམྤདཱ. དཱུཏེན ཨུཔསམྤདཱ ནཱམ ཨཌྜྷཀཱསིཡཱ གཎིཀཱཡ ཨནུཉྙཱཏཱ ཨུཔསམྤདཱ.

ཉཏྟིཀམྨཾ ¶ ནཝ ཋཱནཱནི གཙྪཏཱིཏི ཀཏམཱནི ནཝ ཋཱནཱནི གཙྪཏི? ཨོསཱརཎཾ, ནིསྶཱརཎཾ, ཨུཔོསཐོ, པཝཱརཎཱ, སམྨུཏི, དཱནཾ, པཊིགྒཧཾ, པཙྩུཀྐཌྜྷནཾ, ཀམྨལཀྑཎཉྙེཝ ནཝམནྟི ཨེཝཾ ཝུཏྟཱནི ནཝ ཋཱནཱནི གཙྪཏི. ཏཏྠ ‘‘སུཎཱཏུ མེ, བྷནྟེ, སངྒྷོ, ཨིཏྠནྣཱམོ ཨིཏྠནྣཱམསྶ ཨཱཡསྨཏོ ཨུཔསམྤདཱཔེཀྑོ, ཨནུསིཊྛོ སོ མཡཱ, ཡདི སངྒྷསྶ པཏྟཀལླཾ, ཨིཏྠནྣཱམོ ཨཱགཙྪེཡྻ, ཨཱགཙྪཱཧཱིཏི ཝཏྟབྦོ’’ཏི (མཧཱཝ. ༡༢༦) ཨེཝཾ ཨུཔསམྤདཱཔེཀྑསྶ ཨོསཱརཎཱ ཨོསཱརཎཱ ནཱམ.

‘‘སུཎནྟུ མེ, ཨཱཡསྨནྟཱ, ཨཡཾ ཨིཏྠནྣཱམོ བྷིཀྑུ དྷམྨཀཐིཀོ, ཨིམསྶ ནེཝ སུཏྟཾ ཨཱགཙྪཏི, ནོ སུཏྟཝིབྷངྒོ, སོ ཨཏྠཾ ཨསལླཀྑེཏྭཱ བྱཉྫནཙྪཱཡཱཡ ཨཏྠཾ པཊིབཱཧཏི. ཡདཱཡསྨནྟཱནཾ པཏྟཀལླཾ, ཨིཏྠནྣཱམཾ བྷིཀྑུཾ ཝུཊྛཱཔེཏྭཱ ཨཝསེསཱ ཨིམཾ ཨདྷིཀརཎཾ ཝཱུཔསམེཡྻཱམཱ’’ཏི ཨེཝཾ ཨུབྦཱཧིཀཝིནིཙྪཡེ དྷམྨཀཐིཀསྶ བྷིཀྑུནོ ནིསྶཱརཎཱ ནིསྶཱརཎཱ ནཱམ.

‘‘སུཎཱཏུ མེ, བྷནྟེ, སངྒྷོ, ཨཛྫུཔོསཐོ པནྣརསོ. ཡདི སངྒྷསྶ པཏྟཀལླཾ, སངྒྷོ ཨུཔོསཐཾ ཀརེཡྻཱ’’ཏི ཨེཝཾ ཨུཔོསཐཀམྨཝསེན ཋཔིཏཱ ཉཏྟི ཨུཔོསཐོ ནཱམ.

‘‘སུཎཱཏུ མེ, བྷནྟེ, སངྒྷོ, ཨཛྫ པཝཱརཎཱ པནྣརསཱི. ཡདི སངྒྷསྶ པཏྟཀལླཾ, སངྒྷོ པཝཱརེཡྻཱ’’ཏི ཨེཝཾ པཝཱརཎཱཀམྨཝསེན ཋཔིཏཱ ཉཏྟི པཝཱརཎཱ ནཱམ.

‘‘སུཎཱཏུ མེ, བྷནྟེ, སངྒྷོ, ཨིཏྠནྣཱམོ ཨིཏྠནྣཱམསྶ ཨཱཡསྨཏོ ཨུཔསམྤདཱཔེཀྑོ. ཡདི སངྒྷསྶ པཏྟཀལླཾ, ཨཧཾ ཨིཏྠནྣཱམཾ ཨནུསཱསེཡྻ’’ནྟི, ‘‘ཡདི སངྒྷསྶ པཏྟཀལླཾ, ཨིཏྠནྣཱམོ ཨིཏྠནྣཱམཾ ཨནུསཱསེཡྻཱ’’ཏི, ‘‘ཡདི སངྒྷསྶ པཏྟཀལླཾ, ཨཧཾ ཨིཏྠནྣཱམཾ ཨནྟརཱཡིཀེ དྷམྨེ པུཙྪེཡྻ’’ནྟི, ‘‘ཡདི སངྒྷསྶ པཏྟཀལླཾ, ཨིཏྠནྣཱམོ ཨིཏྠནྣཱམཾ ཨནྟརཱཡིཀེ དྷམྨེ པུཙྪེཡྻཱ’’ཏི, ‘‘ཡདི སངྒྷསྶ པཏྟཀལླཾ, ཨཧཾ ཨིཏྠནྣཱམཾ ཝིནཡཾ པུཙྪེཡྻ’’ནྟི, ‘‘ཡདི སངྒྷསྶ པཏྟཀལླཾ, ཨིཏྠནྣཱམོ ཨིཏྠནྣཱམཾ ཝིནཡཾ པུཙྪེཡྻཱ’’ཏི, ‘‘ཡདི སངྒྷསྶ པཏྟཀལླཾ, ཨཧཾ ཨིཏྠནྣཱམེན ཝིནཡཾ པུཊྛོ ¶ ཝིསྶཛྫེཡྻ’’ནྟི, ‘‘ཡདི སངྒྷསྶ པཏྟཀལླཾ, ཨིཏྠནྣཱམོ ཨིཏྠནྣཱམེན ཝིནཡཾ པུཊྛོ ¶ ཝིསྶཛྫེཡྻཱ’’ཏི ཨེཝཾ ཨཏྟཱནཾ ཝཱ པརཾ ཝཱ སམྨནྣིཏུཾ ཋཔིཏཱ ཉཏྟི སམྨུཏི ནཱམ.

‘‘སུཎཱཏུ མེ, བྷནྟེ, སངྒྷོ, ཨིདཾ ཙཱིཝརཾ ཨིཏྠནྣཱམསྶ བྷིཀྑུནོ ནིསྶགྒིཡཾ སངྒྷསྶ ནིསྶཊྛཾ. ཡདི སངྒྷསྶ པཏྟཀལླཾ, སངྒྷོ ཨིམཾ ཙཱིཝརཾ ཨིཏྠནྣཱམསྶ བྷིཀྑུནོ དདེཡྻཱ’’ཏི, ‘‘ཡདཱཡསྨནྟཱནཾ པཏྟཀལླཾ, ཨཱཡསྨནྟཱ ཨིམཾ ཙཱིཝརཾ ཨིཏྠནྣཱམསྶ བྷིཀྑུནོ དདེཡྻུ’’ནྟི ཨེཝཾ ནིསྶཊྛཙཱིཝརཔཏྟཱདཱིནཾ དཱནཾ དཱནཾ ནཱམ.

‘‘སུཎཱཏུ མེ, བྷནྟེ, སངྒྷོ, ཨཡཾ ཨིཏྠནྣཱམོ བྷིཀྑུ ཨཱཔཏྟིཾ སརཏི ཝིཝརཏི ཨུཏྟཱནིཾ ཀརོཏི དེསེཏི. ཡདི སངྒྷསྶ པཏྟཀལླཾ, ཨཧཾ ཨིཏྠནྣཱམསྶ བྷིཀྑུནོ ཨཱཔཏྟིཾ པཊིགྒཎྷེཡྻ’’ནྟི, ‘‘ཡདཱཡསྨནྟཱནཾ པཏྟཀལླཾ, ཨཧཾ ཨིཏྠནྣཱམསྶ བྷིཀྑུནོ ཨཱཔཏིཾ པཊིགྒཎྷེཡྻ’’ནྟི, ཏེན ཝཏྟབྦོ ‘‘པསྶསཱི’’ཏི? ཨཱམ པསྶཱམཱིཏི. ‘‘ཨཱཡཏིཾ སཾཝརེཡྻཱསཱི’’ཏི ཨེཝཾ ཨཱཔཏྟིཔྤཊིགྒཧོ པཊིགྒཧོ ནཱམ.

‘‘སུཎནྟུ མེ, ཨཱཡསྨནྟཱ ཨཱཝཱསིཀཱ, ཡདཱཡསྨནྟཱནཾ པཏྟཀལླཾ, ཨིདཱནི ཨུཔོསཐཾ ཀརེཡྻཱམ, པཱཏིམོཀྑཾ ཨུདྡིསེཡྻཱམ, ཨཱགམེ ཀཱལེ པཝཱརེཡྻཱམཱ’’ཏི, ཏེ ཙེ, བྷིཀྑཝེ, བྷིཀྑཱུ བྷཎྜནཀཱརཀཱ ཀལཧཀཱརཀཱ སངྒྷེ ཨདྷིཀརཎཀཱརཀཱ ཏཾ ཀཱལཾ ཨནུཝསེཡྻུཾ, ཨཱཝཱསིཀེན བྷིཀྑུནཱ བྱཏྟེན པཊིབལེན ཨཱཝཱསིཀཱ བྷིཀྑཱུ ཉཱཔེཏབྦཱ ‘‘སུཎནྟུ མེ, ཨཱཡསྨནྟཱ ཨཱཝཱསིཀཱ, ཡདཱཡསྨནྟཱནཾ པཏྟཀལླཾ, ཨིདཱནི ཨུཔོསཐཾ ཀརེཡྻཱམ, པཱཏིམོཀྑཾ ཨུདྡིསེཡྻཱམ, ཨཱགམེ ཛུཎྷེ པཝཱརེཡྻཱམཱ’’ཏི ཨེཝཾ ཀཏཱ པཝཱརཎཱ པཙྩུཀྐཌྜྷནཱ ནཱམ.

སབྦེཧེཝ ཨེཀཛ྄ཛྷཾ སནྣིཔཏིཏབྦཾ, སནྣིཔཏིཏྭཱ བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ ‘‘སུཎཱཏུ མེ, བྷནྟེ, སངྒྷོ, ཨམྷཱཀཾ བྷཎྜནཛཱཏཱནཾ ཀལཧཛཱཏཱནཾ ཝིཝཱདཱཔནྣཱནཾ ཝིཧརཏཾ བཧུ ཨསྶཱམཎཀཾ ཨཛ྄ཛྷཱཙིཎྞཾ བྷཱསིཏཔརིཀྐནྟཾ. སཙེ མཡཾ ཨིམཱཧི ཨཱཔཏྟཱིཧི ཨཉྙམཉྙཾ ཀཱརེསྶཱམ, སིཡཱཔི ཏཾ ཨདྷིཀརཎཾ ཀཀྑལ༹ཏྟཱཡ ཝཱལ༹ཏྟཱཡ བྷེདཱཡ སཾཝཏྟེཡྻ. ཡདི སངྒྷསྶ པཏྟཀལླཾ, སངྒྷོ ཨིམཾ ཨདྷིཀརཎཾ ཏིཎཝཏྠཱརཀེན ཝཱུཔསམེཡྻ ཋཔེཏྭཱ ཐུལླཝཛྫཾ, ཋཔེཏྭཱ གིཧིཔཊིསཾཡུཏྟ’’ནྟི ཨེཝཾ ཏིཎཝཏྠཱརཀསམཐེ ཀཏཱ སབྦཔཋམཱ སབྦསངྒཱཧིཀཉཏྟི ཀམྨལཀྑཎཾ ནཱམ.

ཉཏྟིདུཏིཡཾ ¶ ཀམྨཾ སཏྟ ཋཱནཱནི གཙྪཏཱིཏི ཀཏམཱནི སཏྟ ཋཱནཱནི གཙྪཏི? ཨོསཱརཎཾ ¶ , ནིསྶཱརཎཾ, སམྨུཏི, དཱནཾ, ཨུདྡྷརཎཾ, དེསནཾ, ཀམྨལཀྑཎཉྙེཝ སཏྟམནྟི ཨེཝཾ ཝུཏྟཱནི སཏྟ ཋཱནཱནི གཙྪཏི. ཏཏྠ ཝཌྜྷསྶ ལིཙྪཝིནོ པཏྟནིཀྐུཛྫནཝསེན ཁནྡྷཀེ ཝུཏྟཱ ནིསྶཱརཎཱ, ཏསྶེཝ པཏཨུཀྐུཛྫནཝསེན ཝུཏྟཱ ཨོསཱརཎཱ ཙ ཝེདིཏབྦཱ. སཱིམཱསམྨུཏི ཏིཙཱིཝརེན ཨཝིཔྤཝཱསསམྨུཏི སནྠཏསམྨུཏི བྷཏྟུདྡེསཀསེནཱསནགྒཱཧཱཔཀབྷཎྜཱགཱརིཀ- ཙཱིཝརཔྤཊིགྒཱཧཀ-ཙཱིཝརབྷཱཛཀ-ཡཱགུབྷཱཛཀ-ཕལབྷཱཛཀ-ཁཛྫབྷཱཛཀ-ཨཔྤམཏྟཀཝིསྶཛྫཀ- སཱཊིཡགྒཱཧཱཔཀ-པཏྟགྒཱཧཱཔཀ-ཨཱརཱམིཀཔེསཀ-སཱམཎེརཔེསཀསམྨུཏཱིཏི ཨེཏཱསཾ སམྨུཏཱིནཾ ཝསེན སམྨུཏི ཝེདིཏབྦཱ. ཀཋིནཙཱིཝརདཱནམཏཀཙཱིཝརདཱནཝསེན དཱནཾ ཝེདིཏབྦཾ. ཀཋིནུདྡྷཱརཎཝསེན ཨུདྡྷཱརོ ཝེདིཏབྦོ. ཀུཊིཝཏྠུཝིཧཱརཝཏྠུདེསནཱཝསེན དེསནཱ ཝེདིཏབྦཱ. ཡཱ པན ཏིཎཝཏྠཱརཀསམཐེ སབྦསངྒཱཧིཀཉཏྟིཉྩ ཨེཀེཀསྨིཾ པཀྑེ ཨེཀེཀཾ ཉཏྟིཉྩཱཏི ཏིསྶོཔི ཉཏྟིཡོ ཋཔེཏྭཱ པུན ཨེཀསྨིཾ པཀྑེ ཨེཀཱ, ཨེཀསྨིཾ པཀྑེ ཨེཀཱཏི དྭེཔི ཉཏྟིདུཏིཡཀམྨཝཱཙཱ ཝུཏྟཱ. ཏཱསཾ ཝསེན ཀམྨལཀྑཎཾ ཝེདིཏབྦཾ.

ཉཏྟིཙཏུཏྠཀམྨཾ སཏྟ ཋཱནཱནི གཙྪཏཱིཏི ཀཏམཱནི སཏྟ ཋཱནཱནི གཙྪཏི? ཨོསཱརཎཾ, ནིསྶཱརཎཾ, སམྨུཏི, དཱནཾ, ནིགྒཧཾ, སམནུབྷཱསནཾ, ཀམྨལཀྑཎཉྙེཝ སཏྟམནྟི ཨེཝཾ ཝུཏྟཱནི སཏྟ ཋཱནཱནི གཙྪཏི. ཏཏྠ ཏཛྫནཱིཡཀམྨཱདཱིནཾ སཏྟནྣཾ ཀམྨཱནཾ ཝསེན ནིསྶཱརཎཱ, ཏེསཾཡེཝ ཙ ཀམྨཱནཾ པཊིཔྤསྶམྦྷནཝསེན ཨོསཱརཎཱ ཝེདིཏབྦཱ. བྷིཀྑུནོཝཱདཀསམྨུཏིཝསེན སམྨུཏི ཝེདིཏབྦཱ. པརིཝཱསདཱནམཱནཏྟདཱནཝསེན དཱནཾ ཝེདིཏབྦཾ. མཱུལཱཡཔཊིཀསྶནཀམྨཝསེན ནིགྒཧོ ཝེདིཏབྦོ. ཨུཀྑིཏྟཱནུཝཏྟཀཱ, ཨཊྛ ཡཱཝཏཏིཡཀཱ, ཨརིཊྛོ, ཙཎྜཀཱལཱི༹ ཙ ཨིམེཏེ ཡཱཝཏཏིཡཀཱཏི ཨིམཱསཾ ཨེཀཱདསནྣཾ སམནུབྷཱསནཱནཾ ཝསེན སམནུབྷཱསནཱ ཝེདིཏབྦཱ. ཨུཔསམྤདཀམྨཨབྦྷཱནཀམྨཝསེན ཀམྨལཀྑཎཾ ཝེདིཏབྦཾ.

དྷམྨསམྨུཁཏཱཏིཨཱདཱིསུ ཡེན དྷམྨེན, ཡེན ཝིནཡེན, ཡེན སཏྠུསཱསནེན སངྒྷོ ཀམྨཾ ཀརོཏི, ཨཡཾ དྷམྨསམྨུཁཏཱ, ཝིནཡསམྨུཁཏཱ, སཏྠུསཱསནསམྨུཁཏཱ. ཏཏྠ དྷམྨོཏི བྷཱུཏཝཏྠུ. ཝིནཡོཏི ཙོདནཱ ཙེཝ སཱརཎཱ ཙ. སཏྠུསཱསནཾ ནཱམ ཉཏྟིསམྤདཱ ཙེཝ ཨནུསཱཝནསམྤདཱ ཙ. ཡཱཝཏིཀཱ བྷིཀྑཱུ ཀམྨཔྤཏྟཱ, ཏེ ཨཱགཏཱ ཧོནྟི, ཚནྡཱརཧཱནཾ ¶ ཚནྡོ ཨཱཧཊོ ཧོཏི, སམྨུཁཱིབྷཱུཏཱ ནཔྤཊིཀྐོསནྟི, ཨཡཾ སངྒྷསམྨུཁཏཱ. ཡསྶ སངྒྷོ ཀམྨཾ ཀརོཏི, ཏསྶ སམྨུཁཱིབྷཱཝོ པུགྒལསམྨུཁཏཱ. སེསམེཏྠ ཝུཏྟནཡཏྟཱ ཨུཏྟཱནཏྠམེཝ.

ཨིཏི མནོརཐཔཱུརཎིཡཱ ཨངྒུཏྟརནིཀཱཡ-ཨཊྛཀཐཱཡ

དུཀནིཔཱཏཝཎྞནཱཡ ཨནུཏྟཱནཏྠདཱིཔནཱ སམཏྟཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ.

ཨངྒུཏྟརནིཀཱཡེ

ཏིཀནིཔཱཏ-ཊཱིཀཱ

༡. པཋམཔཎྞཱསཀཾ

༡. བཱལཝགྒོ

༡. བྷཡསུཏྟཝཎྞནཱ

༡. ཏིཀནིཔཱཏསྶ ¶ ¶ པཋམེ བྷཡནྟི བྷཱིཏི ཙེཏསོ བྱདྷོཏི ཨཱཧ ‘‘ཙིཏྟུཏྲཱསོ’’ཏི. ཨུཔདྡཝོཏི ཨནྟརཱཡོ. ཏསྶ པན ཝིཀྑེཔཀཱརཎཏྟཱ ཝུཏྟཾ ‘‘ཨནེཀགྒཏཱཀཱརོ’’ཏི. ཨུཔསགྒོཏི ཨུཔསཛྫནཾ, དེཝཏོཔཔཱིལཱ༹དིནཱ ཨཔྤཊིཀཱརཝིགྷཱཏཱཔཏྟི. སཱ པན ཡསྨཱ པཊིཀཱརཱབྷཱཝེན ཝིཧཉྙམཱནསྶ ཀིཉྩི ཀཱཏུཾ ཨསམཏྠསྶ ཨོསཱིདནཀཱརཎཾ, ཏསྨཱ ཝུཏྟཾ ‘‘ཏཏྠ ཏཏྠ ལགྒནཱཀཱརོ’’ཏི. ཡཐཱཝུཏྟེ དིཝསེ ཨནཱགཙྪནྟེསཱུཏི ཝཉྩེཏྭཱ ཨཱགནྟུཾ ནིཡམིཏདིཝསེ ཨནཱགཙྪནྟེསུ. དྭཱརེ ཨགྒིཾ དཏྭཱཏི བཧི ཨནིཀྑམནཏྠཱཡ དྭཱརེ ཨགྒིཾ དཏྭཱ.

ནལེ༹ཧི ¶ ཚནྣཔཊིཙྪནྣཱཏི ནལེ༹ཧི ཏིཎཙྪདནསངྑེཔེན ཨུཔརི ཚཱདེཏྭཱ ཏེཧིཡེཝ དཱརུཀུཊིཀནིཡཱམེན པརིཏོཔི ཚཱདིཏཱ. ཨེསེཝ ནཡོཏི ཨིམིནཱ ཏིཎེཧི ཚནྣཏཾ སེསསམྦྷཱརཱནཾ རུཀྑམཡཏཉྩ ཨཏིདིསཏི.

ཝིདྷཝཔུཏྟེཏི ཨནྟབྷཱཝོཔལཀྑཎཾ. ཏེ ཧི ནིཔྤིཏིཀཱ ཨཝིནཱིཏཱ ཨསཾཡཏཱ ཡཾ ཀིཉྩི ཀཱརིནོ. སེསམེཏྠ ཨུཏྟཱནམེཝ.

བྷཡསུཏྟཝཎྞནཱ ནིཊྛིཏཱ.

༢. ལཀྑཎསུཏྟཝཎྞནཱ

༢. དུཏིཡེ ལཀྑཱིཡཏི བཱལོ ཨཡནྟི ཉཱཡཏི ཨེཏེནཱཏི ལཀྑཎཾ, ཀམྨཾ ལཀྑཎམེཏསྶཱཏི ཀམྨལཀྑཎོཏི ཨཱཧ ‘‘ཀཱཡདྭཱརཱདིཔཝཏྟཾ ཀམྨ’’ནྟིཨཱདི. ཨཔདཱིཡནྟི དོསཱ ཨེཏེན རཀྑཱིཡནྟི, ལཱུཡནྟི ཚིཛྫནྟི ཝཱཏི ཨཔདཱནཾ, སཏྟཱནཾ སམྨཱ, མིཙྪཱ ཝཱ པཝཏྟཔྤཡོགོ. ཏེན སོབྷཏཱིཏི ཨཔདཱནསོབྷནཱི ¶ . ཏེནཱཧ ‘‘པཉྙཱ ནཱམཱ’’ཏིཨཱདི. ཨཏྟནོ ཙརིཏེནེཝཱཏི ཨཏྟནོ ཙརིཡཱཡ ཨེཝ. སེསམེཏྠ ཨུཏྟཱནམེཝ.

ལཀྑཎསུཏྟཝཎྞནཱ ནིཊྛིཏཱ.

༣-༤. ཙིནྟཱིསུཏྟཱདིཝཎྞནཱ

༣-༤. ཏཏིཡེ ཨེཏེཧཱིཏི དུཙྩིནྟིཏཙིནྟིཏཱདཱིཧི. ཨེཏེན ལཀྑཎསདྡསྶ སརཎཏྠཏམཱཧ. ཏཱནེཝཱཏི ལཀྑཎཱནི ཨེཝ. ཨསྶཱཏི བཱལསྶ. བཱལོ ཨཡནྟི ནིམཱིཡཏི སཉྫཱནཱིཡཏི ཨེཏེཧཱིཏི བཱལནིམིཏྟཱནི. ཨཔདཱནཾ ཝུཙྩཏི, ཝིཁྱཱཏཾ ཀམྨཾ, དུཙྩིནྟིཏཙིནྟིཏཱདཱིནི ཙ བཱལེ ཝིཁྱཱཏཱནི ཨསཱདྷཱརཎབྷཱཝེན. ཏསྨཱ ‘‘བཱལསྶ ཨཔདཱནཱནཱི’’ཏི. ཨབྷིཛ྄ཛྷཱདཱིཧི དུཊྛཾ དཱུསིཏཾ ཙིནྟིཏཾ དུཙྩིནྟིཏཾ, ཏཾ ཙིནྟེཏཱིཏི དུཙྩིནྟིཏཙིནྟཱི. ལོབྷཱདཱིཧི དུཊྛཾ བྷཱསིཏཾ མུསཱཝཱདཱདིཾ བྷཱསཏཱིཏི དུབྦྷཱསིཏབྷཱསཱི. ཏེསཾཡེཝ ཝསེན ཀཏྟབྦཏོ དུཀྐཊཀམྨཾ པཱཎཱཏིཔཱཏཱདིཾ ཀརོཏཱིཏི དུཀྐཊཀམྨཀཱརཱི. ཏེནཱཧ ‘‘ཙིནྟཡནྟོ’’ཏིཨཱདི. ཝུཏྟཱནུསཱརེནཱཏི ‘‘བཱལོ ཨཡ’’ནྟིཨཱདིནཱ ཝུཏྟསྶ ཨཏྠཝཙནསྶ ‘‘པཎྜིཏོ ཨཡནྟི ཨེཏེཧི ལཀྑཱིཡཏཱི’’ཏིཨཱདིནཱ ཨནུསྶརཎེན. མནོསུཙརིཏཱདཱིནཾ ཝསེནཱཏི ‘‘ཙིནྟཡནྟོ ཨནབྷིཛ྄ཛྷཱབྱཱཔཱདསམྨཱདསྶནཝསེན ¶ སུཙིནྟིཏམེཝ ཙིནྟེཏཱི’’ཏིཨཱདིནཱ མནོསུཙརིཏཱདཱིནཾ ཏིཎྞཾ སུཙརིཏཱནཾ ཝསེན ཡོཛེཏབྦཱནི. ཙཏུཏྠཾ ཝུཏྟནཡཏྟཱ ཨུཏྟཱནཏྠམེཝ.

ཙིནྟཱིསུཏྟཱདིཝཎྞནཱ ནིཊྛིཏཱ.

༥-༡༠. ཨཡོནིསོསུཏྟཱདིཝཎྞནཱ

༥-༡༠. པཉྩམེ ཀཏི ནུ ཁོ ཨནུསྶཏིཊྛཱནཱནཱིཏིཨཱདི ཚཀྐེ ཨཱཝི བྷཝིསྶཏཱིཏི. ཨེཝཾ ཙིནྟིཏནྟི ཨཡོནིསོ ཙིནྟིཏཾ. ཨཔཉྷམེཝ པཉྷནྟི ཀཐེསཱིཏི ཨཔཉྷམེཝ པཉྷོ ཨཡནྟི མཉྙམཱནོ ཝིསྶཛྫེསི. དསཝིདྷཾ བྱཉྫནབུདྡྷིཾ ཨཔརིཧཱཔེཏྭཱཏི –

‘‘སིཐིལཾ ¶ དྷནིཏཉྩ དཱིགྷརསྶཾ, གརུཀཾ ལཧུཀཉྩ ནིགྒཧཱིཏཾ;

སམྦནྡྷཾ ཝཝཏྠིཏཾ ཝིམུཏྟཾ, དསདྷཱ བྱཉྫནབུདྡྷིཡཱ པབྷེདོ’’ཏི. (དཱི. ནི. ཨཊྛ. ༡.༡༩༠; མ. ནི. ཨཊྛ. ༢.༢༩༡; པརི. ཨཊྛ. ༤༨༥; ཝི. སངྒ. ཨཊྛ. ༢༥༢) –

ཨེཝཾ ཝུཏྟཾ དསཝིདྷཾ བྱཉྫནབུདྡྷིཾ ཨཔརིཧཱཔེཏྭཱ.

ཏཏྠ ཋཱནཀརཎཱནི སིཐིལཱནི ཀཏྭཱ ཨུཙྩཱརེཏབྦཾ ཨཀྑརཾ སིཐིལཾ, ཏཱནིཡེཝ དྷནིཏཱནི ཨསིཐིལཱནི ཀཏྭཱ ཨུཙྩཱརེཏབྦཾ ཨཀྑརཾ དྷནིཏཾ. དྭིམཏྟཀཱལཾ དཱིགྷཾ, ཨེཀམཏྟཀཱལཾ རསྶཾ. གརུཀནྟི དཱིགྷམེཝ, ཡཾ ཝཱ ‘‘ཨཱཡསྨཏོ བུདྡྷརཀྑིཏཏྠེརསྶཱ’’ཏི སཾཡོགཔརཾ ཀཏྭཱ ཝུཙྩཏི, ལཧུཀནྟི རསྶམེཝ, ཡཾ ཝཱ ‘‘ཨཱཡསྨཏོ བུདྡྷརཀྑིཏཐེརསྶཱ’’ཏི ཨེཝཾ ཝིསཾཡོགཔརཾ ཀཏྭཱ ཝུཙྩཏི. ནིགྒཧཱིཏནྟི ཡཾ ཀརཎཱནི ནིགྒཧེཏྭཱ ཨཝིསྶཛྫེཏྭཱ ཨཝིཝཊེན མུཁེན སཱནུནཱསིཀཾ ཀཏྭཱ ཝཏྟབྦཾ. སམྦནྡྷནྟི ཡཾ པརཔདེན སམྦནྡྷིཏྭཱ ‘‘ཏུཎྷསྶཱ’’ཏི ཝུཙྩཏི. ཝཝཏྠིཏནྟི ཡཾ པརཔདེན ཨསམྦནྡྷཾ ཀཏྭཱ ཝིཙྪིནྡིཏྭཱ ‘‘ཏུཎྷཱི ཨསྶཱ’’ཏི ཝུཙྩཏི. ཝིམུཏྟནྟི ཡཾ ཀརཎཱནི ཨནིགྒཧེཏྭཱ ཝིསྶཛྫེཏྭཱ ཝིཝཊེན མུཁེན སཱནུནཱསིཀཾ ཨཀཏྭཱ ཝུཙྩཏི. དསདྷཱ བྱཉྫནབུདྡྷིཡཱ པབྷེདོཏི ཨེཝཾ སིཐིལཱདིཝསེན བྱཉྫནབུདྡྷིཡཱ ཨཀྑརུཔྤཱདཀཙིཏྟསྶ དསཔྤཀཱརེན པབྷེདོ. སབྦཱནི ཧི ཨཀྑརཱནི ཙིཏྟསམུཊྛཱནཱནི ཡཐཱདྷིཔྤེཏཏྠབྱཉྫནཏོ བྱཉྫནཱནི ཙ.

‘‘ཨཊྛཱནཾ ¶ ཁོ ཨེཏཾ, ཨཱཝུསོ སཱརིཔུཏྟཱ’’ཏིཨཱདི པཉྩཀེ ཨཱཝི བྷཝིསྶཏི. ‘‘ཀཏི ནུ ཁོ, ཨཱནནྡ, ཨནུསྶཏིཊྛཱནཱནཱི’’ཏིཨཱདི པན ཚཀྐེ ཨཱཝི བྷཝིསྶཏི. ཚཊྛཱདཱིསུ ནཏྠི ཝཏྟབྦཾ.

ཨཡོནིསོསུཏྟཱདིཝཎྞནཱ ནིཊྛིཏཱ.

བཱལཝགྒཝཎྞནཱ ནིཊྛིཏཱ.

༢. རཐཀཱརཝགྒོ

༡. ཉཱཏསུཏྟཝཎྞནཱ

༡༡. དུཏིཡསྶ པཋམེ ཉཱཏོཡེཝ པཉྙཱཏོཏི ཨཱཧ ‘‘ཉཱཏོ པཉྙཱཏོ’’ཏི. ཀསྶ ཨནནུལོམིཀེཏི ཨཱཧ ‘‘སཱསནསྶཱ’’ཏི, སཱསནསྶ ཨནནུལོམིཀེ ཨཔྤཏིརཱུཔེཏི ཨཏྠོ. ཨིདཱནི ཨནནུལོམིཀསདྡསྶ ནིབྦཙནཾ དསྶེནྟོ ‘‘ན ཨནུལོམེཏཱིཏི ཨནནུལོམིཀ’’ནྟི ཨཱཧ ¶ . སཱསནསྶཱཏི ཝཱ སཱསནནྟི ཨཏྠོ. སཱསནཾ ན ཨནུལོམེཏཱིཏི ཨནནུལོམིཀནྟི ཨེཝམེཏྠ སམྦནྡྷོ དཊྛབྦོ. སབྷཱགཝིསབྷཱགནྟི ལིངྒཏོ སབྷཱགཝིསབྷཱགཾ. ‘‘ཝིཡཔུགྒལེ’’ཏི ཨཱཧཱཏི ལིངྒསབྷཱགེཧི ཨཝིསེསེཏྭཱ ཨཱཧ. ཨུམྨཱདཾ པཱཔུཎཱིཏི སོ ཀིར སཱིལཾ ཨདྷིཊྛཱཡ པིཧིཏདྭཱརགབྦྷེ སཡནཔིཊྛེ ནིསཱིདིཏྭཱ བྷརིཡཾ ཨཱརབྦྷ མེཏྟཾ བྷཱཝེནྟོ མེཏྟཱམུཁེན ཨུཔྤནྣེན རཱགེན ཨནྡྷཱིཀཏོ བྷརིཡཱཡ སནྟིཀཾ གནྟུཀཱམོ དྭཱརཾ ཨསལླཀྑེཏྭཱ བྷིཏྟིཾ བྷིནྡིཏྭཱཔི ནིཀྑམིཏུཀཱམཏཱཡ བྷིཏྟིཾ པཧརནྟོ སབྦརཏྟིཾ བྷིཏྟིཡུདྡྷམཀཱསི. སེསམེཏྠ སུཝིཉྙེཡྻམེཝ.

ཉཱཏསུཏྟཝཎྞནཱ ནིཊྛིཏཱ.

༢. སཱརཎཱིཡསུཏྟཝཎྞནཱ

༡༢. དུཏིཡེ ཙཏུཔཱརིསུདྡྷིསཱིལམྤི པབྦཛྫཱནིསྶིཏམེཝཱཏི ཨིམིནཱ པབྦཛྫཱུཔགཏསམནནྟརམེཝ ཙཏུཔཱརིསུདྡྷིསཱིལམྤི སམཱདིནྣམེཝ ཧོཏཱིཏི དསྶེཏི. མགྒསནྣིསྶིཏཱནེཝ ཧོནྟཱིཏི ¶ མགྒཱདྷིགམཏྠཱཡ པཊིཔཛྫིཏབྦཏྟཱ ཀསིཎཔརིཀམྨཱདཱིནི མགྒསནྣིསྶིཏཱནེཝ ཧོནྟི, ཏསྨཱ མགྒགྒཧཎེནེཝ ཏེསམྤི གཧཎཾ ཝེདིཏབྦཾ, ཏེཧི ཝིནཱ མགྒཱདྷིགམསྶ ཨསམྦྷཝཏོཏི ཨདྷིཔྤཱཡོ.

ཨགྒམགྒཱདྷིགམེན ཨསམྨོཧཔྤཊིཝེདྷསྶ སིཁཱཔཏྟཏྟཱ མགྒདྷམྨེསུ ཝིཡ ཕལདྷམྨེསུཔི སཱཏིསཡོ ཨསམྨོཧོཏི ‘‘སཡཾ ཨབྷིཉྙཱ’’ཏི ཝུཏྟཾ, སཱམཾ ཛཱནིཏྭཱཏི ཨཏྠོ. ཏཐཱ ཛཱནནཱ པནསྶ སཙྪིཀརཎཾ ཨཏྟཔཙྩཀྑཀིརིཡཱཏི ‘‘སཙྪིཀཏྭཱ’’ཏི ཝུཏྟཾ. ཏེནཱཧ ‘‘ཨཏྟནཱཝ ཨབྷིཝིསིཊྛཱཡ པཉྙཱཡ པཙྩཀྑཾ ཀཏྭཱ’’ཏི. ཏཐཱ སཙྪིཀིརིཡཱ ཙསྶ ཨཏྟནི པཊིལཱབྷོཏི ‘‘ཨུཔསམྤཛྫཱ’’ཏི ཝུཏྟནྟི ཨཱཧ ‘‘པཊིལབྷིཏྭཱ’’ཏི.

སཱརཎཱིཡསུཏྟཝཎྞནཱ ནིཊྛིཏཱ.

༣. ཨཱསཾསསུཏྟཝཎྞནཱ

༡༣. ཏཏིཡེ སནྟོཏི ཨེཏྠ སནྟ-སདྡོ ‘‘དཱིགྷཾ སནྟསྶ ཡོཛན’’ནྟིཨཱདཱིསུ (དྷ. པ. ༦༠) ཀིལནྟབྷཱཝེ ཨཱགཏོ. ‘‘ཨཡཉྩ ཝིཏཀྐོ, ཨཡཉྩ ཝིཙཱརོ ¶ སནྟོ ཧོནྟི སམིཏཱ’’ཏིཨཱདཱིསུ (ཝིབྷ. ༥༧༦) ནིརུདྡྷབྷཱཝེ. ‘‘ཨདྷིགཏོ ཁོ མྱཱཡཾ དྷམྨོ, གམྦྷཱིརོ དུདྡསོ དུརནུབོདྷོ སནྟོ པཎཱིཏོ’’ཏིཨཱདཱིསུ (དཱི. ནི. ༢.༦༧; མ. ནི. ༡.༢༨༡; སཾ. ནི. ༡.༡༧༢; མཧཱཝ. ༧-༨) སནྟཉཱཎགོཙརཏཱཡཾ. ‘‘ཨུཔསནྟསྶ སདཱ སཏིམཏོ’’ཏིཨཱདཱིསུ (ཨུདཱ. ༢༧) ཀིལེསཝཱུཔསམེ. ‘‘སནྟོ ཧཝེ སབྦྷི པཝེདཡནྟཱི’’ཏིཨཱདཱིསུ (དྷ. པ. ༡༥༡) སཱདྷཱུསུ. ‘‘པཉྩིམེ, བྷིཀྑཝེ, མཧཱཙོརཱ སནྟོ སཾཝིཛྫམཱནཱ’’ཏིཨཱདཱིསུ (པཱརཱ. ༡༩༥) ཨཏྠིབྷཱཝེ. ཨིདྷཱཔི ཨཏྠིབྷཱཝེཡེཝཱཏི ཨཱཧ ‘‘སནྟོཏི ཨཏྠི ཨུཔལབྦྷནྟཱི’’ཏི. ཏཏྠ ཨཏྠཱིཏི ལོཀསངྐེཏཝསེན སཾཝིཛྫནྟི. ཨཏྠིབྷཱཝོ ཧེཏྠ པུགྒལསམྦནྡྷེན ཝུཏྟཏྟཱ ལོཀསམཉྙཱཝསེནེཝ ཝེདིཏབྦོ, ན པརམཏྠཝསེན. ཨཏྠཱིཏི ཙེཏཾ ནིཔཱཏཔདཾ དཊྛབྦཾ ‘‘ཨཏྠི ཨིམསྨིཾ ཀཱཡེ ཀེསཱ’’ཏིཨཱདཱིསུ (མ. ནི. ༡.༡༡༠) ཝིཡ.

སཾཝིཛྫམཱནཱཏི ཨུཔལབྦྷམཱནཱ. ཡཉྷི སཾཝིཛྫཏི, ཏཾ ཨུཔལབྦྷཏི. ཏེནཱཧ ‘‘སཾཝིཛྫམཱནཱཏི ཏསྶེཝ ཝེཝཙན’’ནྟི. ཨནཱསོཏི པཏྠནཱརཧིཏོ. ཏེནཱཧ ‘‘ཨཔཏྠནོ’’ཏི. ཨཱསཾསཏི པཏྠེཏཱིཏི ཨཱསཾསོ. ཝེཎུཝེཏྟཱདིཝིལཱིཝེཧི སུཔྤཱདིབྷཱཛནཀཱརཀཱ ཝིལཱིཝཀཱརཀཱ. མིགམཙྪཱདཱིནཾ ནིསཱདནཏོ ནེསཱདཱ, མཱགཝིཀམཙྪབནྡྷཱདཡོ. རཐེསུ ཙམྨེན ནཧནཀརཎཏོ རཐཀཱརཱ ¶ , དྷམྨཀཱརཱ. པུཨིཏི ཀརཱིསསྶ ནཱམཾ, ཏཾ ཀུསེནྟི ཨཔནེནྟཱིཏི པུཀྐུསཱ, པུཔྥཙྪཌྜཀཱ.

དུབྦཎྞོཏི ཝིརཱུཔོ. ཨོཀོཊིམཀོཏི ཨཱརོཧཱབྷཱཝེན ཧེཊྛིམཀོ, རསྶཀཱཡོཏི ཨཏྠོ. ཏེནཱཧ ‘‘ལཀུཎྜཀོ’’ཏི. ལཀུ ཝིཡ གྷཊིཀཱ ཝིཡ ཌེཏི པཝཏྟཏཱིཏི ཧི ལཀུཎྜཀོ, རསྶོ. ཀཎཏི ནིམཱིལཏཱིཏི ཀཱཎོ. ཏཾ པནསྶ ནིམཱིལནཾ ཨེཀེན ཨཀྑིནཱ དྭཱིཧིཔི ཙཱཏི ཨཱཧ ‘‘ཨེཀཀྑིཀཱཎོ ཝཱ ཨུབྷཡཀྑིཀཱཎོ ཝཱ’’ཏི. ཀུཎནཾ ཀུཎོ, ཧཏྠཝེཀལླཾ. ཏཾ ཨེཏསྶ ཨཏྠཱིཏི ཀུཎཱི. ཁཉྫོ ཝུཙྩཏི པཱདཝིཀལོ. ཧེཊྛིམཀཱཡསངྑཱཏོ སརཱིརསྶ པཀྑོ པདེསོ ཧཏོ ཨསྶཱཏི པཀྑཧཏོ. ཏེནཱཧ ‘‘པཱིཋསཔྤཱི’’ཏི. པདཱིཔེ པདཱིཔནེ ཨེཏབྦཾ ནེཏབྦནྟི པདཱིཔེཡྻཾ, ཏེལཱདིཨུཔཀརཎཾ.

ཨཱསཾ ན ཀརོཏཱིཏི རཛྫཱབྷིསེཀེ ཀནིཊྛོ པཏྠནཾ ན ཀརོཏི ཛེཊྛེ སཏི ཀནིཊྛསྶ ཨནདྷིཀཱརཏྟཱ. ཨབྷིསེཀཾ ཨརཧཏཱིཏི ཨབྷིསེཀཱརཧོ, ན ཨབྷིསེཀཱརཧོ ཀཱཎཀུཎིཨཱདིདོསསམནྣཱགཏོ.

སཱིལསྶ ¶ དུཊྛུ ནཱམ ནཏྠི, ཏསྨཱ ཨབྷཱཝཏྠོ ཨིདྷ དུ-སདྡོཏི ཨཱཧ ‘‘ནིསྶཱིལོ’’ཏི. ‘‘པཱཔཾ པཱཔེན སུཀར’’ནྟིཨཱདཱིསུ (ཨུདཱ. ༤༨; ཙཱུལ༹ཝ. ༣༤༣) ཝིཡ པཱཔ-སདྡོ ནིཧཱིནཔརིཡཱཡོཏི ཨཱཧ ‘‘ལཱམཀདྷམྨོ’’ཏི. སཱིལཝིཔཏྟིཡཱ ཝཱ དུསྶཱིལོ. དིཊྛིཝིཔཏྟིཡཱ པཱཔདྷམྨོ. ཀཱཡཝཱཙཱསཾཝརབྷེདེན ཝཱ དུསྶཱིལོ, མནོསཾཝརབྷེདེན, སཏིསཾཝརཱདིབྷེདེན ཝཱ པཱཔདྷམྨོ. ཨསུདྡྷཔྤཡོགཏཱཡ དུསྶཱིལོ, ཨསུདྡྷཱསཡཏཱཡ པཱཔདྷམྨོ. ཀུསལསཱིལཝིརཧེན དུསྶཱིལོ, ཨཀུསལསཱིལསམནྣཱགམེན པཱཔདྷམྨོ. ཨསུཙཱིཧཱིཏི ཨཔརིསུདྡྷེཧི. སངྐཱཧི སརིཏབྦསམཱཙཱརོཏི ‘‘ཨིམསྶ མཉྙེ ཨིདཾ ཀམྨ’’ནྟི ཨེཝཾ པརེཧི སངྐཱཡ སརིཏབྦསམཱཙཱརོ. ཏེནཱཧ ‘‘ཀིཉྩིདེཝཱ’’ཏིཨཱདི. ཨཏྟནཱཡེཝ ཝཱ སངྐཱཧི སརིཏབྦསམཱཙཱརོཏི ཨེཏེནཔི ཀམྨསཱདྷནཏཾཡེཝ སངྐསྶརསདྡསྶ དསྶེཏི. ཨཏྟནོ སངྐཱཡ པརེསཾ སམཱཙཱརཀིརིཡཾ སརཏི ཨཱསངྐཏི ཝིདྷཱཝཏཱིཏིཔི སངྐསྶརསམཱཙཱརོཏི ཨེཝམེཏྠ ཀཏྟུསཱདྷནཏཱཔི དཊྛབྦཱ. ཏསྶ ཧི དྭེ ཏཡོ ཛནེ ཀཐེནྟེ དིསྭཱ ‘‘མམ དོསཾ མཉྙེ ཀཐེནྟཱི’’ཏི ཏེསཾ སམཱཙཱརཾ སངྐཱཡ སརཏི དྷཱཝཏི.

ཨེཝཾཔཊིཉྙོཏི སལཱཀགྒཧཎཱདཱིསུ ‘‘ཀིཏྟཀཱ ཝིཧཱརེ སམཎཱ’’ཏི གཎནཱཡ ཨཱརདྡྷཱཡ ‘‘ཨཧམྤི སམཎོ, ཨཧམྤི སམཎོ’’ཏི པཊིཉྙཾ དཏྭཱ སལཱཀགྒཧཎཱདཱིནི ཀརོཏཱིཏི སམཎོ ཨཧནྟི ¶ ཨེཝཾསམཎཔྤཊིཉྙོ. སུམྦྷཀཔཏྟདྷརེཏི མཏྟིཀཱཔཏྟདྷརེ. པཱུཏིནཱ ཀམྨེནཱཏི སཾཀིལིཊྛཀམྨེན, ནིགྒུཎཏཱཡ ཝཱ གུཎསཱརཝིརཧིཏཏྟཱ ཨནྟོཔཱུཏི. ཀསམྦུཀཙཝརོ ཛཱཏོ སཉྫཱཏོ ཨསྶཱཏི ཀསམྦུཛཱཏོཏི ཨཱཧ ‘‘སཉྫཱཏརཱགཱདིཀཙཝརོ’’ཏི. ཨཐ ཝཱ ཀསམྦུ ཝུཙྩཏི ཏིནྟཀུཎཔཀསཊཾ ཨུདཀཾ, ཨིམསྨིཉྩ སཱསནེ དུསྶཱིལོ ནཱམ ཛིགུཙྪནཱིཡཏྟཱ ཏིནྟཀུཎཔཨུདཀསདིསོ, ཏསྨཱ ཀསམྦུ ཝིཡ ཛཱཏོཏི ཀསམྦུཛཱཏོ. ལོཀུཏྟརདྷམྨཨུཔནིསྶཡསྶ ནཏྠིཏཱཡཱཏི ཡཏྠ པཏིཊྛིཏེན སཀྐཱ བྷཝེཡྻ ཨརཧཏྟཾ ལདྡྷུཾ, ཏསྶཱ པཏིཊྛཱཡ བྷིནྣཏྟཱ ཝུཏྟཾ. མཧཱསཱིལསྨིཾ པརིཔཱུརཀཱརིཏཱཡཱཏི ཡཏྠ པཏིཊྛིཏེན སཀྐཱ བྷཝེཡྻ ཨརཧཏྟཾ པཱཔུཎིཏུཾ, ཏསྨིཾ པརིཔཱུརཀཱརིཏཱཡ.

ཨཱསཾསསུཏྟཝཎྞནཱ ནིཊྛིཏཱ.

༤. ཙཀྐཝཏྟིསུཏྟཝཎྞནཱ

༡༤. ཙཏུཏྠེ ¶ ཙཏཱུཧི སངྒཧཝཏྠཱུཧཱིཏི དཱནཔིཡཝཙནཨཏྠཙརིཡཱསམཱནཏྟཏཱསངྑཱཏེཧི ཙཏཱུཧི སངྒཧཀཱརཎེཧི. ཙཀྐཾ ཝཏྟེཏཱིཏི ཨཱཎཱཙཀྐཾ པཝཏྟེཏི. ཙཀྐནྟི ཝཱ ཨིདྷ རཏནཙཀྐཾ ཝེདིཏབྦཾ. ཨཡཉྷི ཙཀྐསདྡོ སམྤཏྟིཡཾ, ལཀྑཎེ, རཐངྒེ, ཨིརིཡཱཔཐེ, དཱནེ, རཏནདྷམྨཁུརཙཀྐཱདཱིསུ ཙ དིསྶཏི. ‘‘ཙཏྟཱརིམཱནི, བྷིཀྑཝེ, ཙཀྐཱནི, ཡེཧི སམནྣཱགཏཱནཾ དེཝམནུསྶཱན’’ནྟིཨཱདཱིསུ (ཨ. ནི. ༤.༣༡) ཧི སམྤཏྟིཡཾ དིསྶཏི. ‘‘པཱདཏལེསུ ཙཀྐཱནི ཛཱཏཱནཱི’’ཏི (དཱི. ནི. ༢.༣༥; ༣.༢༠༤) ཨེཏྠ ལཀྑཎེ. ‘‘ཙཀྐཾཝ ཝཧཏོ པད’’ནྟི (དྷ. པ. ༡) ཨེཏྠ རཐངྒེ. ‘‘ཙཏུཙཀྐཾ ནཝདྭཱར’’ནྟི (སཾ. ནི. ༡.༢༩) ཨེཏྠ ཨིརིཡཱཔཐེ. ‘‘དདཾ བྷུཉྫ མཱ ཙ པམཱདོ, ཙཀྐཾ ཝཏྟཡ སབྦཔཱཎིན’’ནྟི (ཛཱ. ༡.༧.༡༤༩) ཨེཏྠ དཱནེ. ‘‘དིབྦཾ ཙཀྐརཏནཾ པཱཏུརཧོསཱི’’ཏི (དཱི. ནི. ༢.༢༤༣) ཨེཏྠ རཏནཙཀྐེ. ‘‘མཡཱ པཝཏྟིཏཾ ཙཀྐ’’ནྟི (སུ. ནི. ༥༦༢) ཨེཏྠ དྷམྨཙཀྐེ. ‘‘ཨིཙྪཱཧཏསྶ པོསསྶ, ཙཀྐཾ བྷམཏི མཏྠཀེ’’ཏི (ཛཱ. ༡.༥.༡༠༣) ཨེཏྠ ཁུརཙཀྐེ. ‘‘ཁུརཔརིཡནྟེན ཙཀྐེནཱ’’ཏི (དཱི. ནི. ༡.༡༦༦) ཨེཏྠ པཧརཎཙཀྐེ. ‘‘ཨསནིཝིཙཀྐ’’ནྟི (དཱི. ནི. ༣.༦༡) ཨེཏྠ ཨསནིམཎྜལེ. ཨིདྷ པནཱཡཾ རཏནཙཀྐེ དཊྛབྦོ.

ཀིཏྟཱཝཏཱ པནཱཡཾ ཙཀྐཝཏྟཱི ནཱམ ཧོཏི? ཨེཀངྒུལདྭངྒུལམཏྟམྤི ཙཀྐརཏནཾ ཨཱཀཱསཾ ཨབྦྷུགྒནྟྭཱ པཝཏྟཏི. སབྦཙཀྐཝཏྟཱིནཉྷི ནིསིནྣཱསནཏོ ཨུཊྛཧིཏྭཱ ཙཀྐརཏནསམཱིཔཾ གནྟྭཱ ཧཏྠིསོཎྜསདིསཔནཱལི༹ཾ སུཝཎྞབྷིངྒཱརཾ ཨུཀྑིཔིཏྭཱ ཨུདཀེན ཨབྦྷུཀྐིརིཏྭཱ ‘‘ཨབྷིཝིཛིནཱཏུ ¶ བྷཝཾ ཙཀྐརཏན’’ནྟི ཝཙནསམནནྟརམེཝ ཝེཧཱསཾ ཨབྦྷུགྒནྟྭཱ ཙཀྐརཏནཾ པཝཏྟཏཱིཏི. ཡསྶ པཝཏྟིསམཀཱལམེཝ, སོ རཱཛཱ ཙཀྐཝཏྟཱི ནཱམ ཧོཏི.

དྷམྨོཏི དསཀུསལཀམྨཔཐདྷམྨོ, དསཝིདྷཾ ཝཱ ཙཀྐཝཏྟིཝཏྟཾ. དསཝིདྷེ ཝཱ ཀུསལདྷམྨེ ཨགརཧིཏེ ཝཱ རཱཛདྷམྨེ ནིཡུཏྟོཏི དྷམྨིཀོ. ཏེན ཙ དྷམྨེན སཀལལོཀཾ རཉྫེཏཱིཏི དྷམྨརཱཛཱ. དྷམྨེན ཝཱ ལདྡྷརཛྫཏྟཱ དྷམྨརཱཛཱ. ཙཀྐཝཏྟཱིཧི དྷམྨེན ཉཱཡེན རཛྫཾ ཨདྷིགཙྪཏི, ན ཨདྷམྨེན. དསཝིདྷེན ཙཀྐཝཏྟིཝཏྟེནཱཏི དསཔྤབྷེདེན ཙཀྐཝཏྟཱིནཾ ཝཏྟེན.

ཀིཾ ¶ པན ཏཾ དསཝིདྷཾ ཙཀྐཝཏྟིཝཏྟནྟི? ཝུཙྩཏེ –

‘‘ཀཏམཾ པན ཏཾ, དེཝ, ཨརིཡཾ ཙཀྐཝཏྟིཝཏྟནྟི? ཏེན ཧི ཏྭཾ, ཏཱཏ, དྷམྨཾཡེཝ ནིསྶཱཡ དྷམྨཾ སཀྐརོནྟོ དྷམྨཾ གརུཾ ཀརོནྟོ དྷམྨཾ མཱནེནྟོ དྷམྨཾ པཱུཛེནྟོ དྷམྨཾ ཨཔཙཱཡམཱནོ དྷམྨདྡྷཛོ དྷམྨཀེཏུ དྷམྨཱདྷིཔཏེཡྻོ དྷམྨིཀཾ རཀྑཱཝརཎགུཏྟིཾ སཾཝིདཧསྶུ ཨནྟོཛནསྨིཾ བལཀཱཡསྨིཾ ཁཏྟིཡེསུ ཨནུཡནྟེསུ བྲཱཧྨཎགཧཔཏིཀེསུ ནེགམཛཱནཔདེསུ སམཎབྲཱཧྨཎེསུ མིགཔཀྑཱིསུ. མཱ ཙ ཏེ, ཏཱཏ, ཝིཛིཏེ ཨདྷམྨཀཱརོ པཝཏྟིཏྠ. ཡེ ཙ ཏེ, ཏཱཏ, ཝིཛིཏེ ཨདྷནཱ ཨསྶུ, ཏེསཉྩ དྷནམནུཔྤདེཡྻཱསི. ཡེ ཙ ཏེ, ཏཱཏ, ཝིཛིཏེ སམཎབྲཱཧྨཎཱ མདཔྤམཱདཱ པཊིཝིརཏཱ ཁནྟིསོརཙྩེ ནིཝིཊྛཱ ཨེཀམཏྟཱནཾ དམེནྟི, ཨེཀམཏྟཱནཾ སམེནྟི, ཨེཀམཏྟཱནཾ པརིནིབྦཱཔེནྟི. ཏེ ཀཱལེན ཀཱལཾ ཨུཔསངྐམིཏྭཱ པརིཔུཙྪེཡྻཱསི པརིགྒཎྷེཡྻཱསི – ‘ཀིཾ, བྷནྟེ, ཀུསལཾ ཀིཾ ཨཀུསལཾ, ཀིཾ སཱཝཛྫཾ ཀིཾ ཨནཝཛྫཾ, ཀིཾ སེཝིཏབྦཾ ཀིཾ ན སེཝིཏབྦཾ, ཀིཾ མེ ཀརིཡམཱནཾ དཱིགྷརཏྟཾ ཨཧིཏཱཡ དུཀྑཱཡ ཨསྶ, ཀིཾ ཝཱ པན མེ ཀརིཡམཱནཾ དཱིགྷརཏྟཾ ཧིཏཱཡ སུཁཱཡ ཨསྶཱ’ཏི. ཏེསཾ སུཏྭཱ ཡཾ ཨཀུསལཾ, ཏཾ ཨབྷིནིཝཛྫེཡྻཱསི, ཡཾ ཀུསལཾ, ཏཾ སམཱདཱཡ ཝཏྟེཡྻཱསི. ཨིདཾ ཁོ, ཏཱཏ, ཏཾ ཨརིཡཾ ཙཀྐཝཏྟིཝཏྟ’’ནྟི –

ཨེཝཾ ཙཀྐཝཏྟིསུཏྟེ (དཱི. ནི. ༣.༨༤) ཨཱགཏནཡེན ཨནྟོཛནསྨིཾ བལཀཱཡེ ཨེཀཾ, ཁཏྟིཡེསུ ཨེཀཾ, ཨནུཡནྟེསུ ཨེཀཾ, བྲཱཧྨཎགཧཔཏིཀེསུ ཨེཀཾ, ནེགམཛཱནཔདེསུ ཨེཀཾ, སམཎབྲཱཧྨཎེསུ ཨེཀཾ, མིགཔཀྑཱིསུ ཨེཀཾ, ཨདྷམྨཀཱརཔྤཊིཀྑེཔོ ཨེཀཾ, ཨདྷནཱནཾ དྷནཱནུཔྤདཱནཾ ཨེཀཾ, སམཎབྲཱཧྨཎེ ཨུཔསངྐམིཏྭཱ པཉྷཔུཙྪནཾ ཨེཀནྟི ཨེཝམེཝཾ ཏཾ ཙཀྐཝཏྟིཝཏྟཾ དསཝིདྷཾ ཧོཏི. གཧཔཏིཀེ པན པཀྑིཛཱཏེ ཙ ཝིསུཾ ཀཏྭཱ གཎྷནྟསྶ དྭཱདསཝིདྷཾ ཧོཏི.

ཨཉྙཐཱ ¶ ཝཏྟིཏུཾ ཨདེནྟོ སོ དྷམྨོ ཨདྷིཊྛཱནཾ ཨེཏསྶཱཏི ཏདདྷིཊྛཱནཾ. ཏེན ཏདདྷིཊྛཱནེན ཙེཏསཱ. སཀྐརོནྟོཏི ཨཱདརཀིརིཡཱཝསེན ཀརོནྟོ. ཏེནཱཧ ‘‘ཡཐཱ’’ཏིཨཱདི. གརུཾ ཀརོནྟོཏི པཱསཱཎཙྪཏྟཾ ཝིཡ གརུཀརཎཝསེན གརུཾ ཀརོནྟོ. ཏེནེཝཱཧ ¶ ‘‘ཏསྨིཾ གཱརཝུཔྤཏྟིཡཱ’’ཏི. དྷམྨཱདྷིཔཏིབྷཱུཏཱགཏབྷཱཝེནཱཏི ཨིམིནཱ ཡཐཱཝུཏྟདྷམྨསྶ ཛེཊྛཀབྷཱཝེན པུརིམཏརཾ ཨཏྟབྷཱཝེསུ སཀྐཙྩཾ སམུཔཙིཏབྷཱཝཾ དསྶེཏི. དྷམྨཝསེནེཝ ཙ སབྦཀིརིཡཱནཾ ཀརཎེནཱཏི ཨེཏེན ཋཱནནིསཛྫཱདཱིསུ ཡཐཱཝུཏྟདྷམྨནིནྣཔོཎཔབྦྷཱརབྷཱཝཾ དསྶེཏི. ཨསྶཱཏི རཀྑཱཝརཎགུཏྟིཡཱ. པརཾ རཀྑནྟོཏི ཨཉྙཾ དིཊྛདྷམྨིཀཱདིཨནཏྠཏོ རཀྑནྟོ. ཏེནེཝ པརརཀྑསཱདྷནེན ཁནྟིཨཱདིགུཎེན ཨཏྟཱནཾ ཏཏོ ཨེཝ རཀྑཏི. མེཏྟཙིཏྟཏཱཏི མེཏྟཙིཏྟཏཱཡ. ནིཝཱསནཔཱརུཔནགེཧཱདཱིནི སཱིཏུཎྷཱདིཔྤཊིབཱཧནེན ཨཱཝརཎཾ.

ཨནྟོཛནསྨིནྟི ཨབྦྷནྟརབྷཱུཏེ པུཏྟདཱརཱདིཛནེ. སཱིལསཾཝརེ པཏིཊྛཱཔེནྟོཏི ཨིམིནཱ རཀྑཾ དསྶེཏི. ཝཏྠགནྡྷམཱལཱདཱིནི ཙསྶ དདམཱནོཏི ཨིམིནཱ ཨཱཝརཎཾ, ཨིཏརེན གུཏྟིཾ. སམྤདཱནེནཔཱིཏི པི-སདྡེན སཱིལསཾཝརེསུ པཏིཊྛཱཔནཱདཱིནཾ སམྤིཎྜེཏི. ཨེས ནཡོ པརེསུཔི པི-སདྡགྒཧཎེ. ནིགམོ ནིཝཱསོ ཨེཏེསནྟི ནེགམཱ. ཨེཝཾ ཛཱནཔདཱཏི ཨཱཧ ‘‘ཏཐཱ ནིགམཝཱསིནོ’’ཏིཨཱདིནཱ.

རཀྑཱཝརཎགུཏྟིཡཱ ཀཱཡཀམྨཱདཱིསུ སཾཝིདཧནཾ ཋཔནཾ ནཱམ ཏདུཔདེསོཡེཝཱཏི ཝུཏྟཾ ‘‘ཀཐེཏྭཱ’’ཏི. ཨེཏེསཱུཏི པཱལི༹ཡཾ ཝུཏྟེསུ སམཎཱདཱིསུ. པཊིཝཏྟེཏུཾ ན སཀྐཱ ཁཱིཎཱནཾ ཀིལེསཱནཾ པུན ཨནུཔྤཛྫནཏོ. སེསམེཏྠ སུཝིཉྙེཡྻམེཝ.

ཙཀྐཝཏྟིསུཏྟཝཎྞནཱ ནིཊྛིཏཱ.

༥. སཙེཏནསུཏྟཝཎྞནཱ

༡༥. པཉྩམེ ཨིསཡོ པཏནྟི སནྣིཔཏནྟི ཨེཏྠཱཏི ཨིསིཔཏནནྟི ཨཱཧ ‘‘བུདྡྷཔཙྩེཀབུདྡྷསངྑཱཏཱན’’ནྟིཨཱདི. སབྦཱུཔཀརཎཱནི སཛྫེཏྭཱཏི སབྦཱནི རུཀྑསྶ ཚེདནཏཙྪནཱདིསཱདྷནཱནི ཨུཔཀརཎཱནི རཉྙཱ ཨཱཎཏྟདིཝསེཡེཝ སཛྫེཏྭཱ. ནཱནཱ ཀརཱིཡཏི ཨེཏེནཱཏི ནཱནཱཀརཎཾ, ནཱནཱབྷཱཝོཏི ཨཱཧ ‘‘ནཱནཏྟ’’ནྟི. ནེསནྟི སརལོཔེནཱཡཾ ནིདྡེསོཏི ཨཱཧ ‘‘ན ཨེས’’ནྟི. ཏཐཱ ཨཏྠེསནྟི ཨེཏྠཱཔཱིཏི ཨཱཧ ‘‘ཨཏྠི ཨེས’’ནྟི. པཝཏྟནཏྠཾ ཨབྷིསངྑརཎཾ ཨབྷིསངྑཱརོ, ཏསྶ གཏི ཝེགསཱ པཝཏྟི. ཏཾ སནྡྷཱཡཱཧ ‘‘པཡོགསྶ གམན’’ནྟི.

སགཎྜཱཏི ¶ ¶ ཁུདྡཱནུཁུདྡཀགཎྜཱ. ཏེནཱཧ ‘‘ཨུཎྞཏོཎཏཊྛཱནཡུཏྟཱ’’ཏི. སཀསཱཝཱཏི སཀསཊཱ. ཏེནཱཧ ‘‘པཱུཏིསཱརེནཱ’’ཏིཨཱདི. ཨེཝཾ གུཎཔཏནེན པཏིཏཱཏི ཡཐཱ ཏཾ ཙཀྐཾ ནཱབྷིཨརནེམཱིནཾ སདོསཏཱཡ ན པཏིཊྛཱསི, ཨེཝམེཀཙྩེ པུགྒལཱ ཀཱཡཝངྐཱདིཝསེན སདོསཏཱཡ གུཎཔཏནེན པཏིཏཱ སཀཊྛཱནེ ན ཏིཊྛནྟི. ཨེཏྠ ཙ ཕརུསཝཱཙཱདཡོཔི ཨཔཱཡགམནཱིཡཱ སོཏཱཔཏྟིམགྒེནེཝ པཧཱིཡནྟཱིཏི དཊྛབྦཱ.

སཙེཏནསུཏྟཝཎྞནཱ ནིཊྛིཏཱ.

༦. ཨཔཎྞཀསུཏྟཝཎྞནཱ

༡༦. ཚཊྛེ ཝིརཛ྄ཛྷནཀིརིཡཱ ནཱམ པཙྪཱ སམཱདཱཏབྦཏཱཡ ཨཔཎྞཀཔྤཡོགསམཱདཱནཱ ཝིཡ ཧོཏི, ཨཝིརཛ྄ཛྷནཀིརིཡཱ པན པཙྪཱ ཨསམཱདཱཏབྦཏཱཡ ཨནཱུནཱཏི ཏཾསམངྒིཔུགྒལོ ཨཔཎྞཀོ, ཏསྶ བྷཱཝོ ཨཔཎྞཀཏཱཏི ཨཱཧ ‘‘ཨཔཎྞཀཔཊིཔདནྟི ཨཝིརདྡྷཔཊིཔད’’ནྟིཨཱདི. ཡསྨཱ སཱ ཨདྷིཔྤེཏཏྠསཱདྷནེན ཨེཀཾསིཀཱ ཝཊྚཏོ ནིཡྻཱནཱཝཧཱ, ཏཏྠ ཙ ཡུཏྟིཡུཏྟཱ ཨསཱརཱཔགཏཱ ཨཝིརུདྡྷཏཱཡ ཨཔཙྩནཱིཀཱ ཨནུལོམིཀཱ ཨནུདྷམྨབྷཱུཏཱ ཙ, ཏསྨཱ ཝུཏྟཾ ‘‘ཨེཀཾསཔཊིཔད’’ནྟིཨཱདི. ན ཏཀྐགྒཱཧེན ཝཱ ནཡགྒཱཧེན ཝཱཏི ཏཀྐགྒཱཧེན ཝཱ པཊིཔནྣོ ན ཧོཏི ནཡགྒཱཧེན ཝཱ ཨཔཎྞཀཔཊིཔདཾ པཊིཔནྣོ. ཏཏྠ ཏཀྐགྒཱཧེན ཝཱཏི ཨཱཙརིཡཾ ཨལབྷིཏྭཱ ‘‘ཨེཝཾ མེ སུགཏི, ནིབྦཱནཾ ཝཱ བྷཝིསྶཏཱི’’ཏི ཨཏྟནོ ཏཀྐགྒཧཎམཏྟེན. ནཡགྒཱཧེནཱཏི པཙྩཀྑཏོ ཨདིསྭཱ ནཡཏོ ཨནུམཱནཏོ གཧཎེན. ཨེཝཾ གཧེཏྭཱ པཊིཔནྣོཏི ཏཀྐམཏྟེན, ནཡགྒཱཧེན ཝཱ པཊིཔནྣོ. པཎྜིཏསཏྠཝཱཧོ ཝིཡ སམྤཏྟཱིཧི ན པརིཧཱཡཏཱིཏི ཡོཛནཱ.

ཡཾ སནྡྷཱཡ ཝུཏྟནྟི པརིཧཱནཉྩ ཨཔརིཧཱནཉྩ སནྡྷཱཡ ཛཱཏཀེ (ཛཱ. ༡.༡.༡) ཝུཏྟཾ. ཨཡཾ པནེཏྠ གཱཐཱཡ ཨཏྠཡོཛནཱ – ཨཔཎྞཀཾ ཋཱནཾ ཨཝིརདྡྷཀཱརཎཾ ནིཡྻཱནིཀཀཱརཎཾ ཨེཀེ བོདྷིསཏྟཔྤམུཁཱ པཎྜིཏམནུསྶཱ གཎྷིཾསུ. ཡེ པན ཏེ བཱལསཏྠཝཱཧཔུཏྟཔྤམུཁཱ ཏཀྐིཀཱ ཨཱཧུ, ཏེ དུཏིཡཾ སཱཔརཱདྷཾ ¶ ཨནེཀཾསིཀཾ ཋཱནཾ ཨནིཡྻཱནིཀཾ ཀཱརཎཾ ཨགྒཧེསུཾ, ཏེ ཀཎྷཔཊིཔདཾ པཊིཔནྣཱ. ཏཏྠ སུཀྐཔཊིཔདཱ ཨཔརིཧཱནིཔཊིཔདཱ, ཀཎྷཔཊིཔདཱ པརིཧཱནིཔཊིཔདཱ, ཏསྨཱ ཡེ སུཀྐཔཊིཔདཾ པཊིཔནྣཱ, ཏེ ཨཔརིཧཱིནཱ སོཏྠིབྷཱཝཾ པཏྟཱ. ཡེ པན ཀཎྷཔཊིཔདཾ པཊིཔནྣཱ, ཏེ པརིཧཱིནཱ ཨནཡབྱསནཾ ཨཱཔནྣཱཏི ཨིམམཏྠཾ བྷགཝཱ ཨནཱཐཔིཎྜིཀསྶ གཧཔཏིནོ ཝཏྭཱ ཨུཏྟརི ཨིདམཱཧ ‘‘ཨེཏདཉྙཱཡ མེདྷཱཝཱི, ཏཾ གཎྷེ ཡདཔཎྞཀ’’ནྟི.

ཏཏྠ ¶ ཨེཏདཉྙཱཡ མེདྷཱཝཱིཏི མེདྷཱཏི ལདྡྷནཱམཱཡ ཝིསུདྡྷཱཡ ཨུཏྟམཱཡ པཉྙཱཡ སམནྣཱགཏོ ཀུལཔུཏྟོ ཨེཏཾ ཨཔཎྞཀཾ ཋཱནཾ དུཏིཡཉྩཱཏི དྭཱིསུ ཨཏཀྐགྒཱཧཏཀྐགྒཱཧསངྑཱཏེསུ ཋཱནེསུ གུཎདོསཾ ཝུདྡྷིཧཱནིཾ ཨཏྠཱནཏྠཾ ཉཏྭཱཏི ཨཏྠོ. ཏཾ གཎྷེ ཡདཔཎྞཀནྟི ཡཾ ཨཔཎྞཀཾ ཨེཀཾསིཀཾ སུཀྐཔཊིཔདཱཨཔརིཧཱནིཡཔཊིཔདཱསངྑཱཏཾ ནིཡྻཱནིཀཀཱརཎཾ, ཏདེཝ གཎྷེཡྻ. ཀསྨཱ? ཨེཀཾསིཀཱདིབྷཱཝཏོཡེཝ. ཨིཏརཾ པན ན གཎྷེཡྻ. ཀསྨཱ? ཨནེཀཾསིཀཱདིབྷཱཝཏོཡེཝ.

ཡཝནྟི ཏཱཡ སཏྟཱ ཨམིསྶིཏཱཔི སམཱནཛཱཏིཏཱཡ མིསྶིཏཱ ཝིཡ ཧོནྟཱིཏི ཡོནི. སཱ པན ཨཏྠཏོ ཨཎྜཱདིཨུཔྤཏྟིཊྛཱནཝིསིཊྛོ ཁནྡྷཱནཾ བྷཱགསོ པཝཏྟིཝིསེསོཏི ཨཱཧ ‘‘ཁནྡྷཀོཊྛཱསོ ཡོནི ནཱམཱ’’ཏི. ཀཱརཎཾ ཡོནི ནཱམ, ཡོནཱིཏི ཏཾ ཏཾ ཕལཾ ཨནུཔཙིཏཉཱཎསམྦྷཱརེཧི དུརཝགཱདྷབྷེདཏཱཡ མིསྶིཏཾ ཝིཡ ཧོཏཱིཏི. ཡཏོ ཨེཀཏྟནཡེན སོ ཨེཝཱཡནྟི བཱལཱནཾ མིཙྪཱགཱཧོ. པསྶཱཝམགྒོ ཡོནི ནཱམ ཡཝནྟི ཏཱཡ སཏྟཱ ཡོནིསམྦནྡྷེན མིསྶིཏཱ ཧོནྟཱིཏི. པགྒཧིཏཱ ཨནུཊྛཱནེན, པུནཔྤུནཾ ཨཱསེཝནཱཡ པརིཔུཎྞཱ.

‘‘ཙཀྑུཏོཔཱི’’ཏིཨཱདིམྷི པན ཙཀྑུཝིཉྙཱཎཱདིཝཱིཐཱིསུ ཏདནུགཏམནོཝིཉྙཱཎཝཱིཐཱིསུ ཙ ཀིཉྩཱཔི ཀུསལཱདཱིནཾ པཝཏྟི ཨཏྠི, ཀཱམཱསཝཱདཡོ ཨེཝ པན ཝཎཏོ ཡཱུསཾ ཝིཡ པགྒྷརནཀཨསུཙིབྷཱཝེན སནྡནྟི, ཏསྨཱ ཏེ ཨེཝ ‘‘ཨཱསཝཱ’’ཏི ཝུཙྩནྟི. ཏཏྠ ཧི པགྒྷརནཀཨསུཙིམྷི ཨཱསཝསདྡོ ནིརུལ༹ྷོཏི. དྷམྨཏོ ཡཱཝ གོཏྲབྷཱུཏི ཏཏོ པརཾ མགྒཕལེསུ ཨཔྤཝཏྟནཏོ ཝུཏྟཾ. ཨེཏེ ཧི ཨཱརམྨཎཀརཎཝསེན དྷམྨེ གཙྪནྟཱ ཏཏོ པརཾ ན གཙྪནྟི. ནནུ ཏཏོ པརཾ བྷཝངྒཱདཱིནིཔི གཙྪནྟཱིཏི ཙེ? ན, ཏེསམྤི པུབྦེ ཨཱལམྦིཏེསུ ལོཀིཡདྷམྨེསུ ¶ སཱསཝབྷཱཝེན ཨནྟོགདྷཏྟཱ ཏཏོ པརཏཱབྷཱཝཏོ. ཨེཏྠ ཙ གོཏྲབྷུཝཙནེན གོཏྲབྷུཝོདཱནཕལསམཱཔཏྟིཔུརེཙཱརིཀཔརིཀམྨཱནི ཝུཏྟཱནཱིཏི ཝེདིཏབྦཱནི. པཋམམགྒཔུརེཙཱརིཀམེཝ ཝཱ གོཏྲབྷུ ཨཝདྷིནིདསྶནབྷཱཝེན གཧིཏཾ, ཏཏོ པརཾ པན མགྒཕལསམཱནཏཱཡ ཨཉྙེསུ མགྒེསུ མགྒཝཱིཐིཡཾ སམཱཔཏྟིཝཱིཐཱིཡཾ ནིརོདྷཱནནྟརཉྩ པཝཏྟམཱནེསུ ཕལེསུ ནིབྦཱནེ ཙ ཨཱསཝཱནཾ པཝཏྟི ནིཝཱརིཏཱཏི ཝེདིཏབྦཾ. སཝནྟཱིཏི གཙྪནྟི, ཨཱརམྨཎཀརཎཝསེན པཝཏྟནྟཱིཏི ཨཏྠོ. ཨཝདྷིཨཏྠོ ཨཱ-ཀཱརོ, ཨཝདྷི ཙ མརིཡཱདཱབྷིཝིདྷིབྷེདཏོ དུཝིདྷོ. ཏཏྠ མརིཡཱདཾ ཀིརིཡཾ བཧི ཀཏྭཱ པཝཏྟཏི ཡཐཱ ‘‘ཨཱཔཱཊལཱིཔུཏྟཾ ཝུཊྛོ དེཝོ’’ཏི. ཨབྷིཝིདྷི པན ཀིརིཡཾ བྱཱཔེཏྭཱ པཝཏྟཏི ཡཐཱ ‘‘ཨཱབྷཝགྒཾ བྷགཝཏོ ཡསོ པཝཏྟཏཱི’’ཏི. ཨབྷིཝིདྷིཨཏྠོ ཙཱཡམཱ-ཀཱརོ ཨིདྷ གཧིཏོཏི ཝུཏྟཾ ‘‘ཨནྟོཀརཎཏྠོ’’ཏི.

མདིརཱདཡོཏི ¶ ཨཱདི-སདྡེན སིནྡྷཝཀཱདམྦརིཀཱཔོཏིཀཱདཱིནཾ སངྒཧོ དཊྛབྦོ. ཙིརཔཱརིཝཱསིཡཊྛོ ཙིརཔརིཝུཊྛཏཱ པུརཱཎབྷཱཝོ. ཨཝིཛྫཱ ནཱཧོསཱིཏིཨཱདཱིཏི ཨེཏྠ ཨཱདི-སདྡེན ‘‘པུརིམཱ, བྷིཀྑཝེ, ཀོཊི ན པཉྙཱཡཏི བྷཝཏཎྷཱཡཱ’’ཏི (ཨ. ནི. ༡༠.༦༢) ཨིདཾ སུཏྟཾ སངྒཧིཏཾ. ཨཝིཛྫཱསཝབྷཝཱསཝཱནཾ ཙིརཔརིཝུཊྛཏཱཡ དསྶིཏཱཡ ཏབྦྷཱཝབྷཱཝིནོ ཀཱམཱསཝསྶ ཙིརཔརིཝུཊྛཏཱ དསྶིཏཱཝ ཧོཏི. ཨཉྙེསུ ཙ ཡཐཱཝུཏྟེ དྷམྨེ ཨོཀཱསཉྩ ཨཱརམྨཎཾ ཀཏྭཱ པཝཏྟམཱནེསུ མཱནཱདཱིསུ ཝིཛྫམཱནེསུ ཨཏྟཏྟནིཡཱདིགྒཱཧཝསེན ཨབྷིབྱཱཔནཾ མདཀརཎཝསེན ཨཱསཝསདིསཏཱ ཙ ཨེཏེསཾཡེཝ, ན ཨཉྙེསནྟི ཨེཏེསྭེཝ ཨཱསཝསདྡོ ནིརུལ༹ྷོཏི དཊྛབྦོ. ཨཱཡཏཾ ཨནཱདིཀཱལིཀཏྟཱ. པསཝནྟཱིཏི ཕལནྟི. ན ཧི ཀིཉྩི སཾསཱརདུཀྑཾ ཨཏྠི, ཡཾ ཨཱསཝེཧི ཝིནཱ ཨུཔྤཛྫེཡྻ. པུརིམཱནི ཙེཏྠཱཏི ཨེཏེསུ ཙཏཱུསུ ཨཏྠཝིཀཔྤེསུ པུརིམཱནི ཏཱིཎི. ཡཏྠཱཏི ཡེསུ སུཏྟཱབྷིདྷམྨཔྤདེསེསུ. ཏཏྠ ཡུཛྫནྟི ཀིལེསེསུཡེཝ ཡཐཱཝུཏྟསྶ ཨཏྠཏྟཡསྶ སམྦྷཝཏོ. པཙྪིམཾ ཀམྨེཔཱིཏི པཙྪིམཾ ‘‘ཨཱཡཏཾ ཝཱ སཾསཱརདུཀྑཾ སཝནྟི པསཝནྟཱི’’ཏི ཝུཏྟནིབྦཙནཾ ཀམྨེཔི ཡུཛྫཏི དུཀྑཔྤསཝནསྶ ཀིལེསཀམྨསཱདྷཱརཎཏྟཱ.

དིཊྛདྷམྨཱ ཝུཙྩནྟི པཙྩཀྑབྷཱུཏཱ ཁནྡྷཱ, དིཊྛདྷམྨེ བྷཝཱ དིཊྛདྷམྨིཀཱ. ཝིཝཱདམཱུལབྷཱུཏཱཏི ཝིཝཱདསྶ མཱུལཀཱརཎབྷཱུཏཱ ཀོདྷཱུཔནཱཧམཀྑཔལཱསཨིསྶཱམཙྪརིཡམཱཡཱསཱཋེཡྻཐམྦྷསཱརམྦྷམཱནཱཏིམཱནཱ. ཡེན དེཝཱུཔཔཏྱསྶཱཏི ¶ ཡེན ཀམྨཀིལེསཔྤཀཱརེན ཨཱསཝེན དེཝེསུ ཨུཔཔཏྟི ནིབྦཏྟི ཨསྶ མཡ྄ཧནྟི སམྦནྡྷོ. གནྡྷབྦོ ཝཱ ཝིཧངྒམོ ཨཱཀཱསཙཱརཱི ཨསྶནྟི ཝིབྷཏྟིཾ ཝིཔརིཎཱམེཏྭཱ ཡོཛེཏབྦཾ. ཨེཏྠ ཙ ཡཀྑགནྡྷབྦཝིནིམུཏྟཱ སབྦཱ དེཝཏཱ དེཝགྒཧཎེན གཧིཏཱ. ནལོ༹ ཝུཙྩཏི མཱུལཾ, ཏསྨཱ ཝིནལཱི༹ཀཏཱཏི ཝིགཏནལཱ༹ ཝིགཏམཱུལཱ ཀཏཱཏི ཨཏྠོ. ཨཝསེསཱ ཙ ཨཀུསལཱ དྷམྨཱཏི ཨཀུསལཀམྨཏོ ཨཝསེསཱ ཨཀུསལཱ དྷམྨཱ ཨཱསཝཱཏི ཨཱགཏཱཏི སམྦནྡྷོ.

པཊིགྷཱཏཱཡཱཏི པཊིསེདྷནཱཡ. པརཱུཔཝཱད…པེ… ཨུཔདྡཝཱཏི ཨིདཾ ཡདི བྷགཝཱ སིཀྑཱཔདཾ ན པཉྙཱཔེཡྻ, ཏཏོ ཨསདྡྷམྨཔྤཊིསེཝནཨདིནྣཱདཱནཔཱཎཱཏིཔཱཏཱདིཧེཏུ ཡེ ཨུཔྤཛྫེཡྻུཾ པརཱུཔཝཱདཱདཡོ དིཊྛདྷམྨིཀཱ ནཱནཔྤཀཱརཱ ཨནཏྠཱ, ཡེ ཙ ཏནྣིམིཏྟམེཝ ནིརཡཱདཱིསུ ནིབྦཏྟསྶ པཉྩཝིདྷབནྡྷནཀམྨཀཱརཎཱདིཝསེན མཧཱདུཀྑཱནུབྷཝཱདིཔྤཀཱརཱ ཨནཏྠཱ, ཏེ སནྡྷཱཡ ཝུཏྟཾ.

ཏེ ¶ པནེཏེཏི ཨེཏེ ཀཱམརཱགཱདིཀིལེསཏེབྷཱུམཀཀམྨཔརཱུཔཝཱདཱདིཨུཔྤདྡཝཔྤཀཱརཱ ཨཱསཝཱ. ཡཏྠཱཏི ཡསྨིཾ ཝིནཡཱདིཔཱལི༹པྤདེསེ. ཡཐཱཏི ཡེན དུཝིདྷཱདིཔྤཀཱརེན ཨཝསེསེསུ ཙ སུཏྟནྟེསུ ཏིདྷཱ ཨཱགཏཱཏི སམྦནྡྷོ. ནིརཡཾ གམེནྟཱིཏི ནིརཡགཱམིནིཡཱ. ཚཀྐནིཔཱཏེཏི ཚཀྐནིཔཱཏེ ཨཱཧུནེཡྻསུཏྟེ (ཨ. ནི. ༦.༥༨). ཏཏྠ ཧི ཨཱསཝཱ ཚདྷཱ ཨཱགཏཱ.

སརསབྷེདོཏི ཁཎིཀནིརོདྷོ. ཁཱིཎཱཀཱརོཏི ཨཙྩནྟཱཡ ཁཱིཎཏཱ. ཨཱསཝཱ ཁཱིཡནྟི པཧཱིཡནྟི ཨེཏེནཱཏི ཨཱསཝཀྑཡོ, མགྒོ. ཨཱསཝཱནཾ ཁཡནྟེ ཨུཔྤཛྫནཏོ ཨཱསཝཀྑཡོ, ཕལཾ. ཨཱསཝཀྑཡེན པཏྟབྦཏོ ཨཱསཝཱ ཁཱིཡནྟི ཨེཏྠཱཏི ཨཱསཝཀྑཡོ, ནིབྦཱནཾ. ཝིསུདྡྷིམགྒེ (ཝིསུདྡྷི. ༢.༥༥༧-༥༦༠) ཝིཏྠཱརིཏོ, ཏསྨཱ ཏཏྠ, ཏཾ སཾཝཎྞནཱཡ ཙ ཝུཏྟནཡེན ཝེདིཏབྦོ.

ཏཐཱཏི ཨིམིནཱ ཝིསུདྡྷིམགྒེ ཝིཏྠཱརིཏཏཾ ཨུཔསཾཧརཏི. ཀུསལཔྤཝཏྟིཾ ཨཱཝརནྟི ནིཝཱརེནྟཱིཏི ཨཱཝརཎཱིཡཱ. པུརིམཔྤཝཏྟིཝསེནཱཏི ནིདྡོཀྐམནཏོ པུབྦེ ཀམྨཊྛཱནསྶ པཝཏྟིཝསེན. ཋཔེཏྭཱཏི ཧཏྠགཏཾ ཀིཉྩི ཋཔེནྟོ ཝིཡ ཀམྨཊྛཱནཾ སཏིསམྤཛཉྙཝསེན ཋཔེཏྭཱ ཀམྨཊྛཱནམེཝ མནསིཀརོནྟོ ནིདྡཾ ཨོཀྐམཏི, ཛྷཱནསམཱཔནྣོ ཝིཡ ཡཐཱཔརིཙྪིནྣེནེཝ ཀཱལེན ¶ པབུཛ྄ཛྷམཱནོ ཀམྨཊྛཱནཾ ཋཔིཏཊྛཱནེ གཎྷནྟོཡེཝ པབུཛ྄ཛྷཏི ནཱམ. ཏེན ཝུཏྟཾ ‘‘ཏསྨཱ…པེ… ནཱམ ཧོཏཱི’’ཏི. མཱུལཀམྨཊྛཱནེཏི ཨཱདིཏོ པཊྛཱཡ པརིཧརིཡམཱནཀམྨཊྛཱནེ. པརིགྒཧཀམྨཊྛཱནཝསེནཱཏི སཡནཾ ཨུཔགཙྪནྟེན པརིགྒཧམཱནཀམྨཊྛཱནམནསིཀཱརཝསེན. སོ པན དྷཱཏུམནསིཀཱརཝསེན ཨིཙྪིཏབྦོཏི དསྶེཏུཾ ‘‘ཨཡཾ ཧཱི’’ཏིཨཱདི ཝུཏྟཾ.

ཨཔཎྞཀསུཏྟཝཎྞནཱ ནིཊྛིཏཱ.

༧. ཨཏྟབྱཱབཱདྷསུཏྟཝཎྞནཱ

༡༧. སཏྟམེ བྱཱབཱདྷནཾ དུཀྑཱཔནནྟི ཨཱཧ ‘‘ཨཏྟབྱཱབཱདྷཱཡཱཏི ཨཏྟདུཀྑཱཡཱ’’ཏི. མགྒཕལཙིཏྟུཔྤཱདཱཔི ཀཱཡསུཙརིཏཱདིསངྒཧོ ཨེཝཱཏི ཨཱཧ ‘‘ཨཝཱརིཏཱནེཝཱ’’ཏི.

ཨཏྟབྱཱབཱདྷསུཏྟཝཎྞནཱ ནིཊྛིཏཱ.

༨. དེཝལོཀསུཏྟཝཎྞནཱ

༡༨. ཨཊྛམེ ¶ ཨིཏཱིཏི པདསནྡྷིབྱཉྫནསིལིཊྛཏཱཏི པུརིམཔདཱནཾ པཙྪིམཔདེཧི ཨཏྠཏོ སཧིཏཏཱཡ བྱཉྫནཱནཾ ཝཱཀྱཱནཾ སིལིཊྛཏཱཡ དཱིཔནེ ནིཔཱཏོ.

དེཝལོཀསུཏྟཝཎྞནཱ ནིཊྛིཏཱ.

༩. པཋམཔཱཔཎིཀསུཏྟཝཎྞནཱ

༡༩. ནཝམེ ཨུགྒྷཱཊེཏྭཱཏི ཨཱསནདྭཱརཉྩེཝ བྷཎྜཔསིབྦཀེ ཙ ཝིཝརིཏྭཱ. ནཱདྷིཊྛཱཏཱིཏི ཏཾཏཾཀཡཝིཀྐཡེ ཨཏྟནཱ ཝོཡོགཾ ནཱཔཛྫཏི. དིཝཱཀཱལེཏི མཛ྄ཛྷནྷིཀསམཡེ. ཨསྶཱམིཀོ ཧོཏི ཏཱིསུཔི ཀཱལེསུ ལདྡྷབྦལཱབྷསྶ ཨལབྷནཏོ. ཨཔཏིཝཱཏཱབཱདྷཾ རཏྟིཊྛཱནཾ. ཚཱཡུདཀསམྤནྣཾ དིཝཱཊྛཱནཾ. ཝིཔསྶནཱཔི ཝཊྚཏི ཝིཔསྶནཱཀམྨིཀོཡེཝ. ཏེནཔི ཧི ནཝདྷཱ ཨིནྡྲིཡཱནཾ ཏིཀྑཏྟཾ ཨཱཔཱདེནྟེན སམཱདྷིནིམིཏྟཾ གཧེཏབྦཾ, ཝིཔསྶནཱནིམིཏྟཾ སམཱཧིཏཱཀཱརསལླཀྑཎཱཡ.

པཋམཔཱཔཎིཀསུཏྟཝཎྞནཱ ནིཊྛིཏཱ.

༡༠. དུཏིཡཔཱཔཎིཀསུཏྟཝཎྞནཱ

༢༠. དསམེ ¶ ཝིསིཊྛདྷུརོཏི ཝིསིཊྛདྷུརསམྤགྒཱཧོ ཝཱིརིཡསམྤནྣོ. ཉཱཎཝཱིརིཡཱཡཏྟཱ ཧི ཨཏྠསིདྡྷིཡོ. ཏེནཱཧ ‘‘ཨུཏྟམདྷུརོ’’ཏིཨཱདི. ཝིཀྐཱཡིཀབྷཎྜནྟི ཝིཀྐཡེཏབྦབྷཎྜཾ. ནིཀྑིཏྟདྷནེནཱཏི ནིདཧིཏྭཱ ཋཔིཏདྷནཝསེན. ཝལ༹ཉྫནཀཝསེནཱཏི དིཝསེ དིཝསེ དཱནཱུཔབྷོགཝསེན ཝལ༹ཉྫིཏབྦདྷནཝསེན. ཨུཔབྷོགཔརིབྷོགབྷཎྜེནཱཏི ཨུཔབྷོགཔརིབྷོགཱུཔཀརཎེན. ནིཔཏནྟཱིཏི ནིཔཱཏེནྟི, ཨཏྟནོ དྷནགྒཧེན ནིཔཱཏཝུཏྟིཀེ ཀརོནྟི. ཏེནཱཧ ‘‘ནིམནྟེནྟཱི’’ཏི.

ཉཱཎཐཱམེནཱཏི ཉཱཎསྶ ཐིརབྷཱཝེན. ཉཱཎཔརཀྐམེནཱཏི ཉཱཎསཧིཏེན ཝཱིརིཡེན. དིཊྛདྷམྨིཀསམྤརཱཡིཀཔརམཏྠབྷེདཉྷི ཡེན སུཏེན ཨིཛ྄ཛྷཏི, ཏཾ སུཏཾ ནཱམ. ཨུཀྐཊྛནིདྡེསེན དསྶེནྟོ ‘‘ཨེཀནིཀཱཡ…པེ… བཧུསྶུཏཱ’’ཏི ཨཱཧ. ཨཱགཏོཏི སུཔྤཝཏྟིབྷཱཝེན སྭཱགཏོ. ཏེནཱཧ ‘‘པགུཎོ པཝཏྟིཏོ’’ཏི. ཨབྷིདྷམྨེ ཨཱགཏཱ ཀུསལཱདིཀྑནྡྷཱདིབྷེདབྷིནྣཱ དྷམྨཱ སུཏྟནྟཔིཊཀེཔི ཨོཏརནྟཱིཏི ‘‘དྷམྨདྷརཱཏི སུཏྟནྟཔིཊཀདྷརཱ’’ཨིཙྩེཝ ཝུཏྟཾ. ན ཧི ཨཱབྷིདྷམྨིཀབྷཱཝེན ¶ ཝིནཱ ནིཔྤརིཡཱཡཏོ སུཏྟནྟཔིཊཀཉྙུཏཱ སམྦྷཝཏི. དྭེམཱཏིཀཱདྷརཱཏི བྷིཀྑུབྷིཀྑུནིམཱཏིཀཱཝསེན དྭེམཱཏིཀཱདྷརཱཏི ཝདནྟི, ‘‘ཝིནཡཱབྷིདྷམྨམཱཏིཀཱདྷརཱ’’ཏི ཡུཏྟཾ. པརིཔུཙྪཏཱིཏི སབྦབྷཱགེན པུཙྪིཏབྦཾ པུཙྪཏི. ཏེནཱཧ ‘‘ཨཏྠཱནཏྠཾ ཀཱརཎཱཀཱརཎཾ པུཙྪཏཱི’’ཏི. པརིགྒཎྷཱཏཱིཏི ཝིཙཱརེཏི.

ན ཨེཝཾ ཨཏྠོ དཊྛབྦོཏི ཨེཝཾ དེསནཱནུཀྐམེན ཨཏྠོ ན གཧེཏབྦོ. ཨཉྙོ ཧི དེསནཱཀྐམོ ཝེནེཡྻཛ྄ཛྷཱསཡཝསེན པཝཏྟནཏོ, ཨཉྙོ པཊིཔཏྟིཀྐམོ. ཧེཊྛིམེན ཝཱ པརིཙྪེདོཏི སཱིལསམཱདྷིཔཉྙཱསངྑཱཏེསུ ཏཱིསུ བྷཱགེསུ ཀཏྠཙི ཧེཊྛིམནཡེན དེསནཱཡ པརིཙྪེདཾ ཝེདིཏབྦཾ སཱིལེན, ཀཏྠཙི ཨུཔརིམེན བྷཱགེན པཉྙཱཡ, ཀཏྠཙི དྭཱིཧིཔི བྷཱགེཧི སཱིལཔཉྙཱཝསེན. ཨིདྷ པན སུཏྟེ ཨུཔརིམེན བྷཱགེན པརིཙྪེདོ ཝེདིཏབྦོཏི ཝཏྭཱ ཏཾ དསྶེནྟོ ‘‘ཏསྨཱ’’ཏིཨཱདིམཱཧ. ཡསྨཱ ཝཱ བྷགཝཱ ཝེནེཡྻཛ྄ཛྷཱསཡཝསེན པཋམཾ ཀལྱཱཎམིཏྟཾ དསྶེནྟོ ཨརཧཏྟཾ པཝེདེཏྭཱ ‘‘ཏཡིདཾ ཨརཧཏྟཾ ཨིམཱཡ ཨཱརདྡྷཝཱིརིཡཏཱཡ ཧོཏཱི’’ཏི དསྶེནྟོ ཝཱིརིཡཱརམྦྷཾ པཝེདེཏྭཱ ‘‘སྭཱཡཾ ཝཱིརིཡཱརམྦྷོ ཨིམིནཱ ཀལྱཱཎམིཏྟསནྣིསྶཡེན ¶ བྷཝཏཱི’’ཏི དསྶེནྟོ ནིསྶཡསམྤཏྟིཾ པཝེདེཏི ཧེཊྛཱ དསྶིཏནིདསྶནཱནུརཱུཔནྟི དཊྛབྦཾ.

དུཏིཡཔཱཔཎིཀསུཏྟཝཎྞནཱ ནིཊྛིཏཱ.

རཐཀཱརཝགྒཝཎྞནཱ ནིཊྛིཏཱ.

༣. པུགྒལཝགྒོ

༡. སམིདྡྷསུཏྟཝཎྞནཱ

༢༡. ཏཏིཡསྶ པཋམེ རུཙྩཏཱིཏི ཀཱཡསཀྑིཨཱདཱིསུ པུགྒལེསུ ཨཏིཝིཡ སུནྡརཏརཔཎཱིཏཏརབྷཱཝེན ཏེ ཙིཏྟསྶ ཨབྷིརུཙིཨུཔྤཱདཀོ ཀཏམོཏི པུཙྪཏི. སདྡྷིནྡྲིཡཾ དྷུརཾ ཨཧོསི སདྡྷཱདྷུརཾ མགྒཝུཊྛཱནནྟི ཀཏྭཱ, སེསིནྡྲིཡཱནི པན ཀཐནྟི ཨཱཧ ‘‘སེསཱནཱི’’ཏིཨཱདི. པཊིཝིདྡྷམགྒོཝཱཏི ཏཱིཧིཔི ཐེརེཧི ཨཏྟནོ ཨཏྟནོ པཊིཝིདྡྷཨརཧཏྟམགྒོ ཨེཝ ཀཐིཏོ, ཏསྨཱ ན ¶ སུཀརཾ ཨེཀཾསེན བྱཱཀཱཏུཾ ‘‘ཨཡཾ…པེ… པཎཱིཏཏརོ ཙཱ’’ཏི. བྷུམྨནྟརེནེཝ ཀཐེསི ‘‘ཏཱིསུཔི པུགྒལེསུ ཨགྒམགྒཊྛོཝ པཎཱིཏཏརོ’’ཏི.

སམིདྡྷསུཏྟཝཎྞནཱ ནིཊྛིཏཱ.

༢. གིལཱནསུཏྟཝཎྞནཱ

༢༢. དུཏིཡེ ཧིཏཱནཱིཏི བྷབྱཱནི. ཝུདྡྷིཀརཱནཱིཏི ཨཱརོགྱཱདིཝུདྡྷིཀརཱནི. ཨནུཙྪཝིཀནྟི ཨུཔཊྛཱནཀིརིཡཱཡ ཨནུརཱུཔཾ. ཝཱཏཱཔམཱརརོགེནཱཏི ཝཱཏརོགེན ཙ ཨཔམཱརརོགེན ཙ, ཝཱཏནིདཱནེན ཝཱ ཨཔམཱརརོགེན. ནིཊྛཔྤཏྟགིལཱནོཏི ‘‘ཨིམིནཱ རོགེན ན ཙིརསྶེཝ མརིསྶཏཱི’’ཏི ནིཊྛཾ པཏྟོ གིལཱནོ. ཁིཔིཏཀཾ ནཱམ ཝམཐུརོགོ. ཀཙྪཱུཏི ཐུལླཀཙྪུཨཱབཱདྷོ. ཏིཎཔུཔྥཀཛརོ ཝིསམཝཱཏསམྥསྶཛརོགོ. ཡེསནྟི ཡེསཾ རོགཱནཾ. པཊིཛགྒནེནཱཏི པཊིཀཱརམཏྟེན. ཕཱསུཀནྟི བྱཱདྷིཝཱུཔསམནེན སརཱིརསྶ ཕཱསུབྷཱཝོ. བྱཱདྷིནིདཱནསམུཊྛཱནཛཱནནེན པཎྜིཏོ, པཊིཀཱརཀིརིཡཱཡ ཡུཏྟཀཱརིཏཱཡ དཀྑོ, ཨུཊྛཱནཝཱིརིཡསམྤཏྟིཡཱ ཨནལསོ.

པདཔརམོ ¶ པུགྒལོ ཀཐིཏོ སམྨཏྟནིཡཱམོཀྐམནསྶ ཨཡོགྒབྷཱཝཏོ. ཨལབྷནྟོཝ ཏཐཱགཏཔྤཝེདིཏཾ དྷམྨཝིནཡཾ སཝནཱཡ ཨོཀྐམཏི ནིཡཱམཾ ཀུསལེསུ དྷམྨེསུ སམྨཏྟཾ པཙྩེཀབོདྷིཾ. ཡནྟི, ཡཏོ. ཨོཝཱདཾ ལབྷིཏྭཱཏི ཨཱབྷིསམཱཙཱརིཀཝཏྟཾ ཨོཝཱདམཏྟཾ. ཨེཏྟཀོཔི ཧི ཏསྶ ཧིཏཱཝཧོཏི. ཏནྣིསྶིཏོཝཱཏི ཝིཔཉྩིཏཉྙུནིསྶིཏོཝ ཧོཏི. པུནཔྤུནཾ དེསེཏབྦོཝ སམྨཏྟནིཡཱམོཀྐམནསྶ ཡོགྒབྷཱཝཏོ.

གིལཱནསུཏྟཝཎྞནཱ ནིཊྛིཏཱ.

༣. སངྑཱརསུཏྟཝཎྞནཱ

༢༣. ཏཏིཡེ ཝིཝིདྷེཧི ཨཱཀཱརེཧི ཨཱབཱདྷནཏོ བྱཱབཱདྷོཝ བྱཱབཛ྄ཛྷཾ, ཀཱཡིཀཾ ཙེཏསིཀཉྩ དུཀྑཾ. སཧ བྱཱབཛ྄ཛྷེན ཝཏྟཏཱིཏི སབྱཱབཛ྄ཛྷཾ. ཏེནཱཧ ‘‘སདུཀྑ’’ནྟི. ཙེཏནཱརཱསིནྟི པུབྦཙེཏནཱདིརཱསིཾ. ཙེཏནཾ པུནཔྤུནཾ པཝཏྟེནྟོ ‘‘རཱསིཾ ཀརོཏི པིཎྜཾ ཀརོཏཱི’’ཏི ཙ ཝུཏྟོ. སདུཀྑནྟི ནིརནྟརདུཀྑཾ. ཏེནཱཧ ‘‘སཱབཱདྷཾ ནིརསྶཱད’’ནྟི. ཨཏྠཱིཏི ཨུཛུཀཾ དུཀྑཝེདནཱ ¶ ནཏྠཱིཏི ཨཝཏྟབྦཏྟཱ ཝུཏྟཾ. ཨནིཊྛསབྷཱཝཏྟཱ ཨནིཊྛཱརམྨཎཏྟཱ ཙ དུཀྑཔཀྑིཀཱཝ སཱ དཊྛབྦཱ. ན ཧི ཨཀུསལཝིཔཱཀཱ ཨིཊྛཱ ནཱམ ཨཏྠཱི, ཀུསལཝིཔཱཀཱ པན ཨུཔེཀྑཱཝེདནཱ ཏཏྠ ཨཔྤཱཝསརཱ. ཨཊྛཀཐཱཡཾ པན ནིརཡསྶ དུཀྑབཧུལཏྟཱ དུཀྑསྶ ཙ ཏཏྠ བལཝཏཱཡ སཱ ཨབྦོཧཱརིཀཊྛཱནེ ཋིཏཱཏི ཝུཏྟཾ. ཨུཔམཾ ཀཏྭཱ ཨཱཧཊོ ཝིསེསོ ཝིཡ སཱམཉྙསྶ ཡཐཱ ཨཡོཔིཎྜིརོཧིནོ ཝིཡ རཱུཔཱནནྟི. པཊིབྷཱགཨུཔམཱཏི པཊིབིམྦཨུཔམཱ.

ཏེ ཨགྒཧེཏྭཱཏི ཧེཊྛིམབྲཧྨལོཀེ ཨགྒཧེཏྭཱ. ཝོམིསྶཀསུཁདུཀྑནྟི ཝིམིསྶཀསུཁདུཀྑཾ པཱིཏིམིསྶཀབྷཱཝཏོ. ཀམྨནྟི པཱཔཀམྨཾ. ཀམྨསཱིསེན ཕལཾ ཝདཏི. ཀཱམཉྩེཏྠ ‘‘ཨབྱཱབཛ྄ཛྷཾ ལོཀཾ ཨུཔཔཛྫཏཱི’’ཏི ཨཱགཏཾ, ‘‘ཨབྱཱབཛ྄ཛྷཱ ཕསྶཱ ཕུསནྟཱི’’ཏི པན ཝཙནེན ལོཀུཏྟརཕསྶཱཔི སངྒཡ྄ཧནྟཱིཏི ‘‘ཏཱིཎི སུཙརིཏཱནི ལོཀིཡལོཀུཏྟརམིསྶཀཱནི ཀཐིཏཱནཱི’’ཏི ཝུཏྟཾ.

སངྑཱརསུཏྟཝཎྞནཱ ནིཊྛིཏཱ.

༤. བཧུཀཱརསུཏྟཝཎྞནཱ

༢༤. ཙཏུཏྠེ ¶ ཨཝསྶཡཾ གཏོཏི ཝཊྚདུཀྑཔརིམུཏྟིཡཱ ཨཝསྶཡོ མཡ྄ཧནྟི སརཎགམནཀྐམེན ཨུཔགཏོ ཧོཏི. སཏནྟིཀནྟི སཔརིཡཏྟིདྷམྨཾ. ཨགྒཧིཏསརཎཔུབྦསྶཱཏི ཨགྒཧིཏཔུབྦསརཎསྶ. ཨཀཏཱབྷིནིཝེསསྶ ཝསེན ཝུཏྟནྟི ཏསྨིཾ ཨཏྟབྷཱཝེ ན ཀཏོ སརཎགམནཱབྷིནིཝེསོ ཡེནཱཏི ཨཀཏཱབྷིནིཝེསོ, ཏསྶ ཝསེན ཝུཏྟཾ. ཀཱམཾ པུབྦེཔི སརཎདཱཡཀོ ཨཱཙརིཡོ ཝུཏྟོ, པབྦཛྫཱདཱཡཀོཔི སརཎདཱཡཀོཝ. པུབྦེ པན ཨུཔཱསཀབྷཱཝཱཔཱདཀཝསེན སརཎདཱཡཀོ ཨདྷིཔྤེཏོ. ཨིདཾ པན གཧིཏཔབྦཛྫསྶ སརཎགམནཾ. པབྦཛཱ ཧི སཝིསེསཾ སརཎགམནནྟི པབྦཛྫཱདཱཡཀོ པུན ཝུཏྟོ. ཨེཏེཏི པབྦཛྫཱདཱཡཀཱདཡོ. དུཝིདྷེན པརིཙྪིནྣཱཏི ལོཀིཡདྷམྨསམྤཱཔཀོ ལོཀུཏྟརདྷམྨསམྤཱཔཀོཏི དྭིཔྤཀཱརེན པརིཙྪིནྣཱ, ཀཏཱབྷིནིཝེསཨཀཏཱབྷིནིཝེསཝསེན ཝཱ. ཨུཔརཱིཏི པཋམམགྒཏོ ཨུཔརི. ནེཝ སཀྐོཏཱིཏི ཨཱཙརིཡེན ཀཏསྶ ཨུཔཀཱརསྶ མཧཱནུབྷཱཝཏྟཱ ཏསྶ པཏིཀཱརཾ ནཱམ ཀཱཏུཾ ན སཀྐོཏི.

བཧུཀཱརསུཏྟཝཎྞནཱ ནིཊྛིཏཱ.

༥. ཝཛིརཱུཔམསུཏྟཝཎྞནཱ

༢༥. པཉྩམེ ¶ ཨརུཨིཏི པུརཱཎཾ དུཊྛཝཎཾ ཝུཙྩཏི. ཀ-ཀཱརོ པདསནྡྷིཀརོཏི ཨརུཀཱུཔམཾ ཙིཏྟཾ ཨེཏསྶཱཏི ཨརུཀཱུཔམཙིཏྟོ ཨཔྤམཏྟཀསྶཔི དུཀྑསྶ ཨསཧནཏོ. སེསཔདདྭཡེཔི ཨེསེཝ ནཡོ. ཨིཏྟརཀཱལོབྷཱསེནཱཏི པརིཏྟམེཝ ཀཱལོ ཉཱཎོབྷཱསཝིརཧེན. ལགཏཱིཏི ཀོདྷཱསངྒཝསེན ཀུཔྤནྟོ པུགྒལོ སམྨུཁཱ, ‘‘ཀིཾ ཝདསཱི’’ཏིཨཱདིནཱ པརམྨུཁཱ ཙ ཨུཔནཡ྄ཧནཝསེན ལགཏི, ན ཏཎྷཱསངྒཝསེན. ཀུཔྤཏཱིཏི ཀུཛ྄ཛྷཏི. བྱཱཔཛྫཏཱིཏི ཝིཔནྣཙིཏྟོ ཧོཏི. ཐདྡྷབྷཱཝཾ ཨཱཔཛྫཏི ཨཱིསཀམྤི མུདུཏྟཱབྷཱཝཏོ. དུཊྛཱརུཀོཏི མཾསལོཧིཏཱནཾ དུཊྛབྷཱཝེན པཀཏིབྷཱཝཾ ཛཧིཏྭཱ ཋིཏོ དུཊྛཝཎོ. ‘‘དུཊྛཱརུཏཱ’’ཏིཔི པཋནྟི, ཏཏྠཱཔི ཏཱཀཱརོ པདསནྡྷིཀརོ.

ཏསྶཱཏི དུཊྛཱརུཀསྶ. སཝནནྟི ཨསུཙིཝིསནྡནཾ. ཨུདྡྷུམཱཏསྶ ཝིཡཱཏི ཀོདྷེན ཨུདྡྷཾ ཨུདྡྷཾ དྷུམཱཏཀསྶ ཝིཡ ཀོདྷཱུཔཱཡཱསསྶ ཨཝིསྶཛྫནཏོ. ཙཎྜིཀཏསྶཱཏི ¶ ཀུཔིཏསྶ. ཨེཏྠ ཙ ཀིཉྩཱཔི ཧེཊྛིམམགྒཝཛ྄ཛྷཱཔི ཀིལེསཱ ཏེཧི ཨནུཔྤཏྟིདྷམྨཏཾ ཨཱཔཱདིཏཏྟཱ སམུཙྪིནྣཱ, ཏཐཱཔི ཏསྨིཾ སནྟཱནེ ཨགྒམགྒསྶ ཨནུཔྤནྣཏྟཱ ཏཏྠ ཨཔྤཧཱིནཱཔི ཀིལེསཱ ཨཏྠེཝཱཏི ཀཏྭཱ ཏེསཾ ཉཱཎཱནཾ ཝིཛྫཱུཔམཏཱ ཝུཏྟཱ, ན ཏེཧི མགྒེཧི པཧཱིནཱནཾ ཀིལེསཱནཾ ཨཏྠིབྷཱཝཏོཏི དཊྛབྦཾ.

ཝཛིརཱུཔམསུཏྟཝཎྞནཱ ནིཊྛིཏཱ.

༦. སེཝིཏབྦསུཏྟཝཎྞནཱ

༢༦. ཚཊྛེ ཨུཔསངྐམིཏབྦོཏི ཀཱལེན ཀཱལཾ ཨུཔསངྐམིཏབྦོ. ཨལླཱིཡིཏབྦོཏི ཚཱཡཱཡ ཝིཡ ཝིནཱ བྷཱཝནཱཡ ནིལླཱིཡིཏབྦོ. པུནཔྤུནཾ ཨུཔཱསིཏབྦོཏི ཨབྷིཎྷསོ ཨུཔནིསཱིདིཏབྦོ. ཨནུདྡཡཱཏི མེཏྟཱཔུབྦབྷཱགོ. ཨུཔསངྐམིཏུཾ ཝཊྚཏཱིཏི ‘‘ཨེཏསྶ སཱིལེན ཨབྷིཝུདྡྷི བྷཝིསྶཏཱི’’ཏི ཨུཔཀཱརཏྠཾ ཨུཔསེཝནཱདི ཝཊྚཏི.

ན པཊིཧཉྙིསྶཏཱིཏི ‘‘ཨཔེཧི, ཀིཾ ཨེཏེནཱ’’ཏི པཊིཀྑེཔཱབྷཱཝཏོ པིཡསཱིལཏྟཱ ན པཊིཧཉྙིསྶཏི. ཕཱསུ བྷཝིསྶཏཱིཏི དྭཱིསུ ཧི སཱིལཝནྟེསུ ཨེཀེན སཱིལསྶ ཝཎྞེ ཀཐིཏེ ཨིཏརོ ཨནུམོདཏི. ཏེན ཏེསཾ ཀཐཱ ཕཱསུ ཙེཝ ཧོཏི པཝཏྟིནཱི ཙ. ཨེཀསྨིཾ པན དུསྶཱིལེ སཏི དུསྶཱིལསྶ སཱིལཀཐཱ དུཀྐཐཱ, ནེཝ སཱིལཀཐཱ ཧོཏི, ན ཕཱསུ ཧོཏི, ན པཝཏྟིནཱི. དུསྶཱིལསྶ ཧི སཱིལཀཐཱ ཨཕཱསུ བྷཝིསྶཏི. སཱིལཀཐཱཡ ཝུཏྟམཏྠཾ སམཱདྷིཔཉྙཱཀཐཱསུཔི ཨཏིདིསཏི ¶ ‘‘སམཱདྷིཔཉྙཱཀཐཱསུཔི ཨེསེཝ ནཡོ’’ཏི. དྭེ ཧི སམཱདྷིལཱབྷིནོ སམཱདྷིཀཐཾ སཔྤཉྙཱ ཙ པཉྙཱཀཐཾ ཀཐེནྟཱ རཏྟིཾ ཝཱ དིཝསཾ ཝཱ ཨཏིཀྐམནྟམྤི ན ཛཱནནྟི.

ཏཏྠ ཏཏྠ པཉྙཱཡ ཨནུགྒཧེསྶཱམཱིཏི ཏསྨིཾ ཏསྨིཾ ཨནུགྒཧེཏབྦེ པཉྙཱཡ སོདྷེཏབྦེ ཝཌྜྷེཏབྦེ ཙ ཨདྷིཀསཱིལཾ ནིསྶཱཡ ཨུཔྤནྣཔཉྙཱཡ ཨནུགྒཧེསྶཱམཱིཏི ཨཏྠོ. ཏཉྩ ཨནུགྒཎྷནཾ སཱིལསྶ ཨསཔྤཱཡཱནུཔཀཱརདྷམྨེ ཝཛྫེཏྭཱ ཏཔྤཊིཔཀྑསེཝནེན ཧོཏཱིཏི ཨཱཧ ‘‘སཱིལསྶ ཨསཔྤཱཡེ’’ཏིཨཱདི. སཱིལསྶ ཨསཔྤཱཡཱནུཔཀཱརདྷམྨཱ ནཱམ ཨནཱཙཱརཱགོཙརཱདཡོ, ཏཔྤཊིཔཀྑཏོ ཨུཔཀཱརདྷམྨཱ ཝེདིཏབྦཱ. ཏསྨིཾ ཏསྨིཾ ¶ ཋཱནེཏི ཏཾཏཾསིཀྑཱཀོཊྛཱསཔདཊྛཱནེ. ཨནུགྒཎྷཱཏི ནཱམཱཏི ཨབྷིནྣཾ ཨསཾཀིལིཊྛཾ ཀཏྭཱ ཨནུགྒཎྷཱཏི ནཱམ. ཁཱརཔརིསྶཱཝནེཏི རཛཀཱནཾ ཨཱུསཁཱརཱདིཁཱརཔརིསྶཱཝནཔཊེ. ཧཱཡཏཱིཏི སཱིལཱདིནཱ པརིཧཱཡཏི. སེཊྛཾ པུགྒལནྟི སཱིལཱདིགུཎེཧི སེཊྛཾ ཨུཏྟརིཏརཾ ཨུཏྟམཾ པུགྒལཾ.

སེཝིཏབྦསུཏྟཝཎྞནཱ ནིཊྛིཏཱ.

༧. ཛིགུཙྪིཏབྦསུཏྟཝཎྞནཱ

༢༧. སཏྟམེ ཨབྦྷུགྒཙྪཏཱིཏི ཨེཏྠ ཨབྷི-སདྡཱཔེཀྑཱཡ ‘‘ན’’ནྟི སཱམིཨཏྠེ ཨུཔཡོགཝཙནནྟི ཨཱཧ ‘‘ཨསྶཱ’’ཏི ‘‘ཏཾ ཁོ པན བྷཝནྟ’’ནྟིཨཱདཱིསུ ཝིཡ. པཱཔཀོ ཀིཏྟིསདྡོཏི ལཱམཀབྷཱཝེན ཀཐེཏབྦསདྡོ. གཱུཐཀཱུཔོ ཝིཡ དུསྶཱིལྱནྟི ཨེཏེན དུསྶཱིལསྶ གཱུཐསདིསཏྟམེཝ དསྶེཏི. ཝཙནནྟི ཨནིཊྛཝཙནཾ. པུརིམནཡེནེཝཱཏི ‘‘གཱུཐཀཱུཔོ ཝིཡ དུསྶཱིལྱ’’ནྟིཨཱདིནཱ པུབྦེ ཝུཏྟནཡེན. སུཙིམིཏྟོཏི སཱིལཱཙཱརསུདྡྷིཡཱ སུཙིམིཏྟོ. སཧ ཨཡནྟི པཝཏྟནྟཱིཏི སཧཱཡཱཏི ཨཱཧ ‘‘སཧགཱམིནོ’’ཏི.

ཛིགུཙྪིཏབྦསུཏྟཝཎྞནཱ ནིཊྛིཏཱ.

༨. གཱུཐབྷཱཎཱིསུཏྟཝཎྞནཱ

༢༨. ཨཊྛམེ གཱུཐབྷཱཎཱིཏི གཱུཐསདིསཝཙནཏྟཱ གཱུཐབྷཱཎཱི. ཡཐཱ ཧི གཱུཐཾ ནཱམ མཧཱཛནསྶ ཨནིཊྛཾ ཧོཏི, ཨེཝམེཝ ཨིམསྶ པུགྒལསྶ ཝཙནཾ དེཝམནུསྶཱནཾ ཨནིཊྛཾ ཧོཏི. དུགྒནྡྷཀཐནྟི ཀིལེསཱསུཙིསཾཀིལིཊྛཏཱཡ གཱུཐཾ ཝིཡ དུགྒནྡྷཝཱཡནཀཐཾ. པུཔྥབྷཱཎཱིཏི སུཔུཔྥསདིསཝཙནཏྟཱ པུཔྥབྷཱཎཱི ¶ . ཡཐཱ ཧི ཕུལླཱནི ཝསྶིཀཱནི ཝཱ ཨདྷིམུཏྟིཀཱནི ཝཱ མཧཱཛནསྶ ཨིཊྛཱནི ཀནྟཱནི ཧོནྟི, ཨེཝམེཝ ཨིམསྶ པུགྒལསྶ ཝཙནཾ དེཝམནུསྶཱནཾ ཨིཊྛཾ ཧོཏི ཀནྟཾ. པུཔྥཱནི ཝིཡཱཏི ཙམྤཀསུམནཱདིསུགནྡྷཔུཔྥཱནི ཝིཡ. སུགནྡྷཀཐནྟི སུཙིགནྡྷཝཱཡནཀཐཾ ཀིལེསདུགྒནྡྷཱབྷཱཝཏོ. མདྷུབྷཱཎཱིཏི ཨེཏྠ ‘‘མུདུབྷཱཎཱི’’ཏིཔི པཋནྟི. ཨུབྷཡཏྠཱཔི ཧི མདྷུརཝཙནོཏི ཨཏྠོ. ཡཐཱ ཧི ¶ ཙཏུམདྷུརཾ ནཱམ མདྷུརཾ པཎཱིཏཾ, ཨེཝམེཝ ཨིམསྶ པུགྒལསྶ ཝཙནཾ དེཝམནུསྶཱནཾ མདྷུརཾ ཧོཏི. མདྷུརཀཐནྟི ཀཎྞསུཁཏཱཡ པེམནཱིཡཏཱཡ ཙ སདྡཏོ ཨཏྠཏོ ཙ མདྷུརསབྷཱཝཀཐཾ. ཨཏྟཧེཏུ ཝཱཏི ཨཏྟནོ ཝཱ ཧཏྠཔཱདཱདིཙྪེདནཧརཎཧེཏུ. པརཧེཏུ ཝཱཏི ཨེཏྠཱཔི ཨེསེཝ ནཡོ. ཏེནཱཧ ‘‘ཨཏྟནོ ཝཱ’’ཏིཨཱདི.

‘‘ནེལངྒོཏི ཁོ, བྷནྟེ, སཱིལཱནམེཏཾ ཨདྷིཝཙན’’ནྟི སུཏྟེ (སཾ. ནི. ༤.༣༤༧) ཨཱགཏཏྟཱ ཝུཏྟཾ ‘‘ཨེཏྠ ཝུཏྟསཱིལཾ ཝིཡཱ’’ཏི. པཱུརེཏི གུཎཱནཾ པཱརིཔཱུརིཡཾ. སུཀུམཱརཱཏི ཨཕརུསཏཱཡ མུདུཀཱ ཀོམལཱ. པུརསྶཱཏི ཨེཏྠ པུར-སདྡོ ཏནྣིཝཱསིཝཱཙཀོ དཊྛབྦོ ‘‘གཱམོ ཨཱགཏོ’’ཏིཨཱདཱིསུ ཝིཡ. ཏེནཱཧ ‘‘ནགརཝཱསཱིན’’ནྟི. མནཾ ཨཔྤཱཡཏི ཝཌྜྷེཏཱིཏི མནཱཔཱ. ཏེནཱཧ ‘‘ཙིཏྟཝུདྡྷིཀརཱ’’ཏི.

གཱུཐབྷཱཎཱིསུཏྟཝཎྞནཱ ནིཊྛིཏཱ.

༩. ཨནྡྷསུཏྟཝཎྞནཱ

༢༩. ནཝམེ ཨནྡྷོཏིཨཱདཱིསུ པཱལི༹པདེསུ པཋམོ དིཊྛདྷམྨིཀབྷོགསཾཧརཎཔཉྙཱཙཀྑུནོ ཙ སམྤརཱཡིཀཏྠསཱདྷནཔཉྙཱཙཀྑུནོ ཙ ཨབྷཱཝཱ ‘‘ཨནྡྷོ’’ཏི ཝུཙྩཏི དུཏིཡོཔི, ཏཏིཡོ པན དྭིནྣམྤི བྷཱཝཱ ‘‘དྭིཙཀྑཱུ’’ཏི ཝུཙྩཏི. པཉྙཱཙཀྑཱུཏི ཨཱཡཀོསལླབྷཱུཏཱ པཉྙཱཙཀྑུ. ཏེནཱཧ ‘‘ཕཱཏིཾ ཀརེཡྻཱ’’ཏི. ཨདྷམུཏྟམེཏི ཨདྷམེ ཙེཝ ཨུཏྟམེ ཙ. པཊིཔཀྑཝསེནཱཏི པཊིཔཀྑསྶ ཨཏྠིཏཱཝསེན. སུཀྐསཔྤཊིབྷཱགཱཏི སུཀྐདྷམྨེཧི པཧཱཡཀེཧི སཔྤཊིབྷཱགཱཏི ཛཱནེཡྻ. ཀཎྷསཔྤཊིབྷཱགཱཏི ཀཎྷདྷམྨེཧི པཧཱཏབྦེཧི སཔྤཊིབྷཱགཱཏི ཛཱནེཡྻ.

ཏཐཱཛཱཏིཀཱཏི ཡཱདིསེཧི སཔུཏྟདཱརཔརིཛནསཉཱཏིམིཏྟབནྡྷཝགྒཾ ཨཏྟཱནཾ སུཁེཏི པཱིཎེཏི, ཏཱདིསཱ བྷོགཱཔི ན སནྟི. པུཉྙཱནི ཙ ན ཀརོཏཱིཏི སམཎབྲཱཧྨཎཀཔཎདྡྷིཀཡཱཙཀཱནཾ སནྟཔྤནཝསེན པུཉྙཱནི ན ཀརོཏི. ཨུབྷཡཏྠཱཏི ཨུབྷཡསྨིཾ ལོཀེ, ཨུབྷཡསྨིཾ ཝཱ ཨཏྠེཏི ཝིགྒཧོཏི དསྶེནྟོ ‘‘ཨིདྷལོཀེ’’ཏིཨཱདིམཱཧ. ཨུབྷཡེནཱཏི ཝུཏྟམཏྠཾ ¶ ཡོཛེཏྭཱ དསྶེཏུཾ ‘‘ཀཐ’’ནྟིཨཱདི ཝུཏྟཾ. ཡསྨིཾ ཋཱནེཏི ཡསྨིཾཡེཝ ¶ ཋཱནེ. ན སོཙཏཱིཏི སོཀཧེཏཱུནཾ ཏཏྠ ཨབྷཱཝཏོ ན སོཙཏི.

ཨནྡྷསུཏྟཝཎྞནཱ ནིཊྛིཏཱ.

༡༠. ཨཝཀུཛྫསུཏྟཝཎྞནཱ

༣༠. དསམེ ཨཝཀུཛྫཔཉྙོཏི ནིཀྐུཛྫཔཉྙོ. ཏེནཱཧ ‘‘ཨདྷོམུཁཔཉྙོ’’ཏི. པུབྦཔཊྛཔནཱཏི པཋམཱརམྦྷོ. སནྣིཊྛཱནནྟི ཀཐཱཔརིཡོསཱནཾ. ཨཔྤནཱཏི དེསནཱཡ ནིཊྛཱཔནཾ. ཨནེཀེ ཝཱ ཨནུསནྡྷིཡོཏི ཡོཛེཏབྦཾ. སམཱདྷི ཝཱཏིཨཱདཱིསུ ལོཀུཏྟརདྷམྨཱ པརམཏྠཏོ སཱསནནྟི ཏདཏྠོཔཱདཀསམཱདྷི ཏསྶ ཨཱདཱིཏི ཝུཏྟོ, ཏདཱསནྣཏྟཱ ཝིཔསྶནཱ, ཏསྶ མཱུལབྷཱཝེན ཨེཀདེསཏྟཱ མགྒོ.

སཱསནསྶ པཱརིཔཱུརིསུདྡྷིཡོ ནཱམ སཏྠཱརཱ དེསིཏནིཡཱམེནེཝ སིདྡྷཱ, ཏཱ པནེཏྠ ཀཐེནྟསྶ ཝསེན གཧེཏབྦཱཏི དསྶེཏུཾ ‘‘ཨནཱུནཾ ཀཏྭཱ དེསེནྟཱི’’ཏི, ‘‘ནིགྒཎྛིཾ ཀཏྭཱ དེསེནྟཱི’’ཏི ཙ ཝུཏྟཾ. ཏཏྠ ནིཛྫཊནྟི ནིགྒུམྦཾ ཨནཱཀུལཾ. ནིགྒཎྛིནྟི གཎྛིཊྛཱནརཧིཏཾ སུཝིཉྙེཡྻཾ ཀཏྭཱ.

ཨཱཀིཎྞཱནཱིཏི ཨཱཀིརིཏྭཱ སཾཀིརིཏྭཱ ཋཔིཏཱནཱིཏི ཨཏྠོ. ཏེནཱཧ ‘‘པཀྑིཏྟཱནཱི’’ཏི. ཨུཙྪངྒོ ཝིཡ ཨུཙྪངྒཔཉྙོ པུགྒལོ དཊྛབྦོཏི ཨུཙྪངྒསདིསཔཉྙཏཱཡ ཨུཙྪངྒཔཉྙོ. ཨེཝཾ པཉྙཱ ཝིཡ པུགྒལོཔི ཨུཙྪངྒོ ཝིཡ ཧོཏི, ཏསྨིཾ དྷམྨཱནཾ ཨཙིརཊྛཱནཏོཏི ཨདྷིཔྤཱཡེན ཝུཏྟཾ. ཡཐཱ ཙ ཨུཙྪངྒསདིསཱ པཉྙཱ, ཨེཝཾ ནིཀྐུཛྫཀུམྦྷསདིསཱ པཉྙཱ ཨེཝཱཏི དཊྛབྦཱ.

སཾཝིདཧནཔཉྙཱཡཱཏི ‘‘ཨེཝཾ ཀཏེ ཨིདཾ ནཱམ བྷཝིསྶཏཱི’’ཏི ཨེཝཾ ཏཾཏཾཨཏྠཀིཙྩཾ སཾཝིདྷཱཏུཾ སམཏྠཏཱཡ ཝིཙཱརཎཔཉྙཱཡ རཧིཏོ. སེཡྻོཏི སེཊྛོ པཱསཾསོ. པུབྦབྷཱགཔཊིཔདནྟི ཙིཏྟཝིསུདྡྷིཨཱདིཀཾ ཨརིཡམགྒསྶ ཨདྷིགམཱཡ པུབྦབྷཱགཔཊིཔཏྟིཾ.

ཨཝཀུཛྫསུཏྟཝཎྞནཱ ནིཊྛིཏཱ.

པུགྒལཝགྒཝཎྞནཱ ནིཊྛིཏཱ.

༤. དེཝདཱུཏཝགྒོ

༡. སབྲཧྨཀསུཏྟཝཎྞནཱ

༣༡. ཙཏུཏྠསྶ ¶ ¶ པཋམེ སབྲཧྨཀཱནཱིཏི སསེཊྛཀཱནི. ཡེསནྟི ཡེསཾ ཀུལཱནཾ. པུཏྟཱནནྟི པུཏྟེཧི. པཱུཛིཏསདྡཡོགེན ཧི ཨིདཾ ཀརཎཏྠེ སཱམིཝཙནཾ. ཏེནཱཏི ཨཱཧཱརཱདིནཱ. པཊིཛགྒིཏཱ གོཔིཏཱཏི ཡཐཱཀཱལཾ ཏསྶ ཏསྶ དཱཏབྦསྶ དཱནེན ཝེཡྻཱཝཙྩསྶ ཙ ཀརཎེན པཊིཛགྒིཏཱ ཙེཝ ཨུཔྤནྣཱནཏྠཔྤཧརཎེན གོཔིཏཱ ཙ ཧོནྟི. ཏེསནྟི མཱཏཱཔིཏཱུནཾ. བྲཧྨཱདིབྷཱཝསཱདྷནཏྠནྟི ཏེསཾ གུཎཱནཾ ཨཏྠིཏཱཡ ལོཀེ བྲཧྨཱ ནཱམ ཝུཙྩཏི, ཨཱཙརིཡོ ནཱམ ཝུཙྩཏི, ཨཱཧུནེཡྻོ ནཱམ ཝུཙྩཏི, ཏེ མཱཏཱཔིཏཱུནཾ པུཏྟཀཾ པཊིལབྷནྟཱིཏི དསྶནཝསེན ནེསཾ བྲཧྨཱདིབྷཱཝསཱདྷནཏྠཾ ‘‘བཧུཀཱརཱ’’ཏི, ཝཏྭཱ ཏཾ ཏེསཾ བཧུཀཱརཏཾ ནཱནཱཀཱརཏོ དསྶེཏུཾ ‘‘ཨཱཔཱདཀཱ’’ཏིཨཱདི ཝུཏྟཾ. མཱཏཱཔིཏརོ ཧི པུཏྟཱནཾ ཛཱིཝིཏསྶ ཨཱཔཱདཀཱ, སརཱིརསྶ པོསཀཱ, ཨཱཙཱརསམཱཙཱརཱནཾ སིཀྑཱཔཀཱ སཀལསྶཔི ཨིམསྶ ལོཀསྶ དསྶེཏཱརོ. ཏེནཱཧ ‘‘པུཏྟཱནཾ ཧཱི’’ཏིཨཱདི. ཨིཊྛཱརམྨཎཾ ཏཱཝ ཏེ དསྶེནྟུ, ཨནིཊྛཱརམྨཎཾ ཀཐནྟི? ཏམྤི དསྶེཏབྦམེཝ ཝཛྫནཱིཡབྷཱཝཛཱནཱཔནཏྠཾ.

ཨཝིཛཧིཏཱ ཧོནྟཱིཏི ཏཱསཾ བྷཱཝནཱཡ བྲཧྨཱནཾ བྲཧྨལོཀེ ཨུཔྤནྣཏྟཱ ཨཝིཛཧིཏཱ ཧོནྟི བྷཱཝནཱ. ལོབྷནཱིཡཝཡསྨིཾ པཋམཡོབྦནེ ཨཏིཝིཡ མུདུབྷཱཝཔྤཏྟདསྶནཏྠཾ སཏཝིཧཏགྒཧཎཾ. པཱཊིཡེཀྐནྟི ཝིསུཾ. ཨིམིནཱ ཀཱརཎེནཱཏི ཨིམིནཱ ཡཐཱཝུཏྟེན པུཏྟེསུ པཝཏྟིཏེཧི ཨཏིཀྐམེན མེཏྟཱདིསམུཔྤཏྟིསངྑཱཏེན ཀཱརཎེན.

ཐརུསིཔྤནྟི ཨསིསཏྟིཀུནྟཀལཱཔཱདིཨཱཡུདྷསིཔྤཾ. མུདྡཱགཎནཱཏི ཨངྒུལིསཾཀོཙནཱདིནཱ ཧཏྠམུདྡཱཡ གཎནཱ. ཨཱདིསདྡེན པཱཎཱདཱིནཾ སངྒཧོ. པཙྪཱཙརིཡཱ ནཱམ མཱཏཱཔིཏཱུནཾ སནྟིཀེ ཨུགྒཧིཏགཧཊྛཝཏྟསྶེཝ པུགྒལསྶ ཡཐཱསཀཾ ཧཏྠཱཙརིཡཱདཱིནཾ སིཔྤགྒཱཧཱཔནནྟི ཀཏྭཱ སབྦཔཋམཾ ཨཱཙརིཡཱ ནཱམཱཏི ཡོཛེཏབྦཾ. ཨཱནཱིཡ ཧུཏཾ ཨཱཧུཏཾ. པཀཱརེཧི ཧུཏཾ པཱཧུཏཾ. ཨབྷིསངྑཏནྟི ཏསྶེཝ ཝེཝཙནཾ.

ནམོ ཀརེཡྻཱཏི སཱཡཾ པཱཏཾ ཨུཔཊྛཱནཾ གནྟྭཱ ‘‘ཨིདཾ མཡ྄ཧཾ ཨུཏྟམཔུཉྙཀྑེཏྟ’’ནྟི ནམཀྐཱརཾ ཀརེཡྻ. ཏཱཡ ནཾ པཱརིཙརིཡཱཡཱཏི ཨེཏྠ ནནྟི ནིཔཱཏམཏྟཾ, ཡཐཱཝུཏྟཔརིཙརཎེནཱཏི ཨཏྠོ ¶ . ཨཐ ཝཱ པཱརིཙརིཡཱཡཱཏི ¶ བྷརཎཀིཙྩཀརཎཀུལཝཾསཔྤཏིཊྛཱནཱཔནཱདིནཱ པཉྩཝིདྷཨུཔཊྛཱནེན. ཝུཏྟཉྷེཏཾ –

‘‘པཉྩཧི ཁོ, གཧཔཏིཔུཏྟ, ཋཱནེཧི པུཏྟེན པུརཏྠིམཱ དིསཱ མཱཏཱཔིཏརོ པཙྩུཔཊྛཱཏབྦཱ – ‘བྷཏོ ནེསཾ བྷརིསྶཱམི, ཀིཙྩཾ ནེསཾ ཀརིསྶཱམི, ཀུལཝཾསཾ ཋཔེསྶཱམི, དཱཡཛྫཾ པཊིཔཛྫཱམི, ཨཐ ཝཱ པན པེཏཱནཾ ཀཱལཀཏཱནཾ དཀྑིཎཾ ཨནུཔྤདསྶཱམཱི’ཏི. ཨིམེཧི ཁོ, གཧཔཏིཔུཏྟ, པཉྩཧི ཋཱནེཧི པུཏྟེན པུརཏྠིམཱ དིསཱ མཱཏཱཔིཏརོ པཙྩུཔཊྛིཏཱ པཉྩཧི ཋཱནེཧི པུཏྟཾ ཨནུཀམྤནྟི, པཱཔཱ ནིཝཱརེནྟི, ཀལྱཱཎེ ནིཝེསེནྟི, སིཔྤཾ སིཀྑཱཔེནྟི, པཏིརཱུཔེན དཱརེན སཾཡོཛེནྟི, སམཡེ དཱཡཛྫཾ ནིཡྻཱདེནྟཱི’’ཏི (དཱི. ནི. ༣.༢༦༧).

ཨཔིཙ ཡོ མཱཏཱཔིཏརོ ཏཱིསུ ཝཏྠཱུསུ ཨབྷིཔྤསནྣེ ཀཏྭཱ སཱིལེསུ ཝཱ པཏིཊྛཱཔེཏྭཱ པབྦཛྫཱཡ ཝཱ ནིཡོཛེཏྭཱ ཨུཔཊྛཧཏི, ཨཡཾ མཱཏཱཔིཏཱུཔཊྛཱཀཱནཾ ཨགྒོཏི ཝེདིཏབྦོ. སཱ པནཱཡཾ པཱརིཙརིཡཱ པུཏྟསྶ ཨུབྷཡལོཀཧིཏསུཁཱཝཧཱཏི ཏཾ དསྶེཏུཾ ‘‘ཨིདྷེཝ ནཾ པསཾསནྟི, པེཙྩ སགྒེ པམོདཏཱི’’ཏི ཝུཏྟཾ. པསཾསནྟཱིཏི ‘‘ཨཡཾ པུགྒལོ མཏྟེཡྻོ པེཏྟེཡྻོ སགྒསཾཝཏྟནིཡཾ པཊིཔདཾ པཱུརེཏཱི’’ཏི ཨིདྷེཝ ནཾ པསཾསནྟི. ཨཱམོདཏི ཨཱདིཏོ པཊྛཱཡ མོདཔྤཏྟིཡཱ. པམོདཏི ནཱནཔྤཀཱརམོདསམྤཝཏྟིཡཱ.

སབྲཧྨཀསུཏྟཝཎྞནཱ ནིཊྛིཏཱ.

༢. ཨཱནནྡསུཏྟཝཎྞནཱ

༣༢. དུཏིཡེ ཏཐཱཛཱཏིཀོཏི ཏཐཱསབྷཱཝོ. ཙིཏྟེཀགྒཏཱལཱབྷོཏི ཙིཏྟེཀགྒཏཱཡ ཨདྷིགམོ. རཱུཔམེཝ ཀིལེསུཔྤཏྟིཡཱ ཀཱརཎབྷཱཝཏོ རཱུཔནིམིཏྟཾ. ཨེས ནཡོ སེསེསུཔི. སསྶཏཱདིནིམིཏྟནྟི སསྶཏུཙྪེདབྷཱཝནིམིཏྟཾ. པུགྒལནིམིཏྟནྟི པུགྒལཱབྷིནིཝེསནནིམིཏྟཾ. དྷམྨནིམིཏྟནྟི དྷམྨཱརམྨཎསངྑཱཏཾ ནིམིཏྟཾ. ‘‘སིཡཱ ནུ ཁོ, བྷནྟེ’’ཏི ཐེརེན པུཊྛོ བྷགཝཱ ‘‘སིཡཱ’’ཏི ཨཝོཙ ལོཀུཏྟརསམཱདྷིཔྤཊིལཱབྷཾ སནྡྷཱཡ. སོ ཧི ནིབྦཱནཾ སནྟཾ པཎཱིཏནྟི ཙ པསྶཏི. ཏེནཱཧ ‘‘ཨིདྷཱནནྡཱ’’ཏིཨཱདི.

ནིབྦཱནཾ ¶ སནྟནྟི སམཱཔཏྟིཾ ཨཔྤེཏྭཱཏི ནིབྦཱནཾ སནྟནྟི ཨཱབྷུཛིཏྭཱ ཕལསམཱཔཏྟིཾ ཨཔྤེཏྭཱ ¶ . དིཝསམྤཱིཏིཨཱདིནཱ ཨསངྑཏཱཡ དྷཱཏུཡཱ ཨཙྩནྟསནྟཔཎཱིཏཱདིབྷཱཝཾ དསྶེཏི. ཨཊྛཝིདྷེཏི ‘‘སནྟཾ པཎཱིཏཾ སབྦསངྑཱརསམཐོ སབྦཱུཔདྷིཔཊིནིསྶགྒོ ཏཎྷཱཀྑཡོ ཝིརཱགོ ནིརོདྷོ ནིབྦཱན’’ནྟི ཨེཝཾ ཨཊྛཝིདྷེ ཨཱབྷོགསཉྙིཏེ སམནྣཱཧཱརེ. ནིདྡྷཱརཎེ ཙེཏཾ བྷུམྨཾ. ཨིམསྨིཾ ཋཱནེ…པེ… ལབྦྷནྟེཝཱཏི ‘‘ཨིདྷཱནནྡ, བྷིཀྑུནོ ཨེཝཾ ཧོཏཱི’’ཏི ཨཱགཏེ ཨིམསྨིཾ སུཏྟཔྤདེསེ ཨེཀོཔི ཨཱབྷོགསམནྣཱཧཱརོ ཙེཔི སབྦེ ཨཊྛཔི ཨཱབྷོགསམནྣཱཧཱརཱ ལབྦྷནྟེཝ སམནྣཱཧརཏཾ ཨཏྠཱཝཧཏྟཱ.

ཉཱཎེན ཛཱནིཏྭཱཏི ཝིཔསྶནཱཉཱཎསཧིཏེན མགྒཉཱཎེན ཛཱནིཏྭཱ. པརཱནི ཙ ཨོཔརཱནི ཙ ཙཀྑཱདཱིནི ཨཱཡཏནཱནི. སནྟཏཱཡཱཏི པཊིཔྤསྶདྡྷིཏཱཡ. ཀཱཡདུཙྩརིཏཱདིདྷཱུམཝིརཧིཏོཏི ཀཱཡདུཙྩརིཏཱདི ཨེཝ སནྟཱཔནཊྛེན དྷཱུམོ, ཏེན ཝིརཧིཏོ. ཨནཱིགྷོཏི ཨཔཱཔོ. ཛཱཏིཛརཱགཧཎེནེཝ བྱཱདྷིམརཎམྤི གཧིཏམེཝཱཏི ཏབྦྷཱཝབྷཱཝཏོཏི ཝུཏྟཾ.

ཨཱནནྡསུཏྟཝཎྞནཱ ནིཊྛིཏཱ.

༣. སཱརིཔུཏྟསུཏྟཝཎྞནཱ

༣༣. ཏཏིཡེ, ‘‘སཱརིཔུཏྟ, མཡཱ སཾཁིཏྟེན དེསིཏཾ དྷམྨཾ ཏཱདིསེནཔི ན སུཀརཾ ཝིཉྙཱཏུ’’ནྟི ཨིམིནཱ ཨདྷིཔྤཱཡེནེཝ ཝདནྟོ ཐེརསྶ ཉཱཎཾ སབྦམཏིཀྐམཾ. ཨཉྙཱཏཱརོ ཙ དུལླབྷཱཏི ཧི ཨིམིནཱ སཱམཉྙཝཙནེན སཱརིཔུཏྟཏྠེརམྤི ཨནྟོགདྷཾ ཀཏྭཱ དསྶེནྟོ ཏེནཔི ཨཏྟནོ དེསནཱཡ དུཔྤཊིཝིདྡྷབྷཱཝཾ དསྶེཏི.

སམྨཱཏི ཧེཏུནཱ ཀཱརཎེན. ཏེནཱཧ ‘‘ཨུཔཱཡེནཱ’’ཏིཨཱདི. མཱནཱབྷིསམཡཱཏི མཱནསྶ དསྶནཱབྷིསམཡཱ. པཧཱནཱབྷིསམཡོཏི ཙ དསྶནཱབྷིསམཡོཏི ཙ པརིཉྙཱབྷིསམཡོ ཝུཏྟོ. ཨརཧཏྟམགྒོ ཧི པརིཉྙཱཀིཙྩསིདྡྷིཡཱ ཀིཙྩཝསེན མཱནཾ པསྶཏི, ཨསམྨོཧཔྤཊིཝེདྷཝསེནཱཏི ཝུཏྟཾ ཧོཏི, ཨཡམསྶ དསྶནཱབྷིསམཡོ. ཏེན དིཊྛོ པན པཧཱནཱབྷིསམཡོ ཙ. དསྶནཱབྷིསམཡེན ཧི པརིཉྙཱབྷིསམཡམེཝ པཧཱིཡཏི. དིཊྛཝིསེན དིཊྛསཏྟཱནཾ ཛཱིཝིཏཾ ཝིཡ ཨཡམསྶ པཧཱནཱབྷིསམཡོ ¶ . ཨཊྛཀཐཱཡཾ པན པཧཱནཱབྷིསམཡསྶ དསྶནཱབྷིསམཡནཱནནྟརིཡཀཏྟཱ ‘‘པཧཱནཱབྷིསམཡེན’’ཨིཙྩེཝ ཝུཏྟཾ. པཧཱནཱབྷིསམཡེ ཧི གཧིཏེ དསྶནཱབྷིསམཡོ གཧིཏོཝ ཧོཏི.

ཨནྟམཀཱསི ¶ དུཀྑསྶཱཏི ཨརཧཏྟམགྒེན མཱནསྶ པཧཱིནཏྟཱ ཡེ ཨིམེ ‘‘ཀཱཡབནྡྷནསྶ ཨནྟོ ཛཱིརཏི (ཙཱུལ༹ཝ. ༢༧༨), ཧརིཏནྟཾ ཝཱ’’ཏི (མ. ནི. ༡.༣༠༤) ཨེཝཾ ཝུཏྟཨནྟིམམརིཡཱདནྟོ ཙ ‘‘ཨནྟམིདཾ, བྷིཀྑཝེ, ཛཱིཝིཀཱན’’ནྟི (སཾ. ནི. ༣.༨༠; ཨིཏིཝུ. ༩༡) ཨེཝཾ ཝུཏྟལཱམཀནྟོ ཙ ‘‘སཀྐཱཡོ ཨེཀོ ཨནྟོ’’ཏི (སཾ. ནི. ༣.༡༠༣) ཨེཝཾ ཝུཏྟཀོཊྛཱསནྟོ ཙ ‘‘ཨེསེཝནྟོ དུཀྑསྶ སཔཙྩཡསངྑཡཱ’’ཏི ཨེཝཾ ཝུཏྟཀོཊྛཱསནྟོ ཙཱཏི ཙཏྟཱརོ ཨནྟཱ, ཏེསུ སབྦསྶེཝ ཝཊྚདུཀྑསྶ ཨདུཾ ཙཏུཏྠཀོཊིསངྑཱཏཾ ཨནྟམཀཱསི, པརིཙྪེདཾ པརིཝཊུམཾ ཨཀཱསི, ཨནྟིམསམུདཡམཏྟཱཝསེསཾ དུཀྑམཀཱསཱིཏི ཝུཏྟཾ ཧོཏི. ཏེནཱཧ ‘‘ཝཊྚདུཀྑསྶ ཨནྟམཀཱསཱི’’ཏི.

ནནུ ཙ ‘‘པཧཱན’’ནྟི ཨིམསྶ ནིདྡེསེ ནིབྦཱནཾ ཨཱགཏཾ? ཨིདྷ པཊིཔྤསྶདྡྷིཔྤཧཱནསངྑཱཏཾ ཨརཧཏྟཕལཾ ཝུཏྟཾ, ཏསྨཱ ནིདྡེསེནཱཡཾ ཝཎྞནཱ ཝིརུཛ྄ཛྷཏཱིཏི ཨཱཧ ‘‘ནིདྡེསེ པནཱ’’ཏིཨཱདི. ཏཏྠ ཏཱནི པདཱནི ཨཱགཏཱནཱིཏི ཏསྨིཾ ནིདྡེསེ ‘‘པཧཱནཾ ཝཱུཔསམཾ པཊིནིསྶགྒ’’ནྟིཨཱདཱིནི (ཙཱུལ༹ནི. ༧༥ ཨུདཡམཱཎཝཔུཙྪཱནིདྡེསོ) པདཱནི ཨཱགཏཱནི.

དྷམྨཏཀྐཔུརེཛཝནྟི ཨིམིནཱ ཏསྨིཾ ཙཏུཏྠཛ྄ཛྷཱནཝིམོཀྑེ ཋཏྭཱ ཛྷཱནངྒཱནི ཝིཔསྶིཏྭཱ ཨདྷིགཏཾ ཨརཧཏྟཝིམོཀྑཾ ཝདཏི. ཨརཧཏྟཝིམོཀྑསྶ ཧི མགྒསམྤཡུཏྟསམྨཱསངྐཔྤསངྑཱཏོ དྷམྨཏཀྐོ པུརེཛཝོ ཧོཏི.

སཱརིཔུཏྟསུཏྟཝཎྞནཱ ནིཊྛིཏཱ.

༤. ནིདཱནསུཏྟཝཎྞནཱ

༣༤. ཙཏུཏྠེ པིཎྜཀརཎཏྠཱཡཱཏི ཨཱཡཱུཧནཝསེན རཱསིཀརཎཏྠཱཡ. ཨབྷིནྣཱནཱིཏི ཨེཀདེསེནཔི ཨཁཎྜིཏཱནི. བྷིནྣཀཱལཏོ པཊྛཱཡ ཧི བཱིཛཾ བཱིཛཀིཙྩཱཡ ན ཨུཔཀཔྤཏི. ཨཔཱུཏཱིནཱིཏི ཨུདཀཏེམནེན པཱུཏིབྷཱཝཾ ན ཨུཔགཏཱནི. པཱུཏིབཱིཛཉྷི བཱིཛཏྠཱཡ ན ཨུཔཀཔྤཏི. ཏེནཱཧ ‘‘པཱུཏིབྷཱཝེན ཨབཱིཛཏྟཾ ཨཔྤཏྟཱནཱི’’ཏི. ན ཝཱཏེན ན ཙ ཨཱཏཔེན ཧཏཱནཱིཏི ¶ ཝཱཏེན ཙ ཨཱཏཔེན ཙ ན ཧཏཱནི, ནིརོཛཏཾ ན པཱཔིཏཱནི. ནིརོཛཉྷི ཀསཊབཱིཛཾ བཱིཛཏྠཱཡ ན ཨུཔཀཔྤཏི. སཱརཱདཱནཱིཏི ཏཎྜུལསཱརསྶ ཨཱདཱནཏོ སཱརཱདཱནི. ནིསྶཱརཉྷི བཱིཛཾ བཱིཛཏྠཱཡ ན ཨུཔཀཔྤཏི. ཏེནཱཧ ‘‘གཧིཏསཱརཱནཱི’’ཏི, པཏིཊྛིཏསཱརཱནཱིཏི ཨཏྠོ. སནྣིཙཡབྷཱཝེན སུཁཾ སཡིཏཱནཱིཏི ཙཏྟཱརོ མཱསེ ཀོཊྛཔཀྑིཏྟནིཡཱམེནེཝ སུཁསཡིཏཱནི.

ཀམྨཝིབྷཏྟཱིཏི ¶ ཀམྨཝིབྷཱགོ. དིཊྛདྷམྨོ ཝུཙྩཏི པཙྩཀྑབྷཱུཏོ པཙྩུཔྤནྣོ ཨཏྟབྷཱཝོ, ཏཏྠ ཝེདིཏབྦཕལཾ ཀམྨཾ དིཊྛདྷམྨཝེདནཱིཡཾ. པཙྩུཔནྣབྷཝཏོ ཨནནྟརཾ ཝེདིཏབྦཕལཾ ཀམྨཾ ཨུཔཔཛྫཝེདནཱིཡཾ. ཨཔརཔརིཡཱཡཝེདནཱིཡནྟི དིཊྛདྷམྨཱནནྟརབྷཝཏོ ཨཉྙསྨིཾ ཨཏྟབྷཱཝཔརིཡཱཡེ ཨཏྟབྷཱཝཔརིཝཏྟེ ཝེདིཏབྦཕལཾ ཀམྨཾ. པཊིཔཀྑེཧི ཨནབྷིབྷཱུཏཏཱཡ པཙྩཡཝིསེསེན པཊིལདྡྷཝིསེསཏཱཡ ཙ བལཝབྷཱཝཔྤཏྟཱ ཏཱདིསསྶ པུབྦཱབྷིསངྑཱརསྶ ཝསེན སཱཏིསཡཱ ཧུཏྭཱ པཝཏྟཱ པཋམཛཝནཙེཏནཱ ཏསྨིཾཡེཝ ཨཏྟབྷཱཝེ ཕལདཱཡིནཱི དིཊྛདྷམྨཝེདནཱིཡཀམྨཾ ནཱམ. སཱ ཧི ཝུཏྟཱཀཱརེན བལཝཏཱི ཛཝནསནྟཱནེ གུཎཝིསེསཡུཏྟེསུ ཨུཔཀཱརཱནུཔཀཱརཝསཔྤཝཏྟིཡཱ ཨཱསེཝནཱལཱབྷེན ཨཔྤཝིཔཱཀཏཱཡ ཙ པཋམཛཝནཙེཏནཱ ཨིཏརདྭཡཾ ཝིཡ པཝཏྟསནྟཱནུཔརམཱཔེཀྑཾ ཨོཀཱསལཱབྷཱཔེཀྑཉྩ ཀམྨཾ ན ཧོཏཱིཏི ཨིདྷེཝ པུཔྥམཏྟཾ ཝིཡ པཝཏྟིཝིཔཱཀམཏྟཾ ཕལཾ དེཏི. ཏཐཱ ཨསཀྐོནྟནྟི ཀམྨསྶ ཝིཔཱཀདཱནཾ ནཱམ ཨུཔདྷིཔྤཡོགཱདིཔཙྩཡནྟརསམཝཱཡེནེཝ ཧོཏཱིཏི ཏདབྷཱཝཏོ ཏསྨིཾཡེཝ ཨཏྟབྷཱཝེ ཝིཔཱཀཾ དཱཏུཾ ཨསཀྐོནྟཾ. ཨཧོསིཀམྨནྟི ཨཧོསི ཨེཝ ཀམྨཾ, ན ཏསྶ ཝིཔཱཀོ ཨཧོསི ཨཏྠི བྷཝིསྶཏི ཙཱཏི ཨེཝཾ ཝེདིཏབྦཾ ཀམྨཾ.

ཨཏྠསཱདྷིཀཱཏི དཱནཱདིཔཱཎཱཏིཔཱཏཱདིཨཏྠསྶ ནིཔྥཱདིཀཱ. ཀཱ པན སཱཏི ཨཱཧ ‘‘སཏྟམཛཝནཙེཏནཱ’’ཏི. སཱ ཧི སནྣིཊྛཱཔཀཙེཏནཱ ཝུཏྟནཡེན པཊིལདྡྷཝིསེསཱ པུརིམཛཝནཙེཏནཱཧི ལདྡྷཱསེཝནཱ ཙ སམཱནཱ ཨནནྟརཏྟབྷཱཝེ ཝིཔཱཀདཱཡིནཱི ཨུཔཔཛྫཝེདནཱིཡཀམྨཾ ནཱམ. པུརིམཨུཔམཱཡཡེཝཱཏི མིགལུདྡཀོཔམཱཡཡེཝ.

སཏི སཾསཱརཔྤཝཏྟིཡཱཏི ཨིམིནཱ ཨསཏི སཾསཱརཔྤཝཏྟིཡཾ ཨཧོསིཀམྨཔཀྑེ ཏིཊྛཏི ཝིཔཙྩནོཀཱསསྶ ཨབྷཱཝཏོཏི དཱིཔེཏི. ཡཾ གརུཀནྟི ¶ ཡཾ ཨཀུསལཾ མཧཱསཱཝཛྫཾ, ཀུསལཉྩ མཧཱནུབྷཱཝཾ ཀམྨཾ. ཀུསལཾ ཝཱ ཧི ཧོཏུ ཨཀུསལཾ ཝཱ, ཡཾ གརུཀཾ མཱཏུགྷཱཏཱདིཀམྨཾ ཝཱ མཧགྒཏཀམྨཾ ཝཱ, ཏདེཝ པཋམཾ ཝིཔཙྩཏི. ཏེནཱཧ ‘‘ཀུསལཱཀུསལེསུ པནཱ’’ཏིཨཱདི. ཡཾ བཧུལནྟི ཡཾ བཧུལཾ ཨབྷིཎྷསོ ཀཏཾ སམཱསེཝིཏཾ. ཏེནཱཧ ‘‘ཀུསལཱཀུསལེསུ པན ཡཾ བཧུལཾ ཧོཏཱི’’ཏིཨཱདི. ཡདཱསནྣཾ ནཱམ མརཎཀཱལེ ཨནུསྶརིཏཾ ཀམྨཾ, ཨཱསནྣཀཱལེ ཀཏེ པན ཝཏྟབྦམེཝ ནཏྠཱིཏི ཨཱཧ ‘‘ཡཾ པན ཀུསལཱཀུསལེསུ ཨཱསནྣམརཎེ’’ཏིཨཱདི. ཨནུསྶརིཏུནྟི པརིབྱཏྟབྷཱཝེན ཨནུསྶརིཏུཾ.

ཏེསཾ ཨབྷཱཝེཏི ཏེསཾ ཡཾགརུཀཱདཱིནཾ ཏིཎྞཾ ཀམྨཱནཾ ཨབྷཱཝེ. ཡཏྠ ཀཏྠཙི ཝིཔཱཀཾ དེཏཱིཏི པཊིསནྡྷིཛནཀཝསེན ཝིཔཱཀཾ དེཏི. པཊིསནྡྷིཛནཀཝསེན ཧི གརུཀཱདིཀམྨཙཏུཀྐཾ ཝུཏྟཾ. ཏཏྠ གརུཀཾ སབྦཔཋམཾ ཝིཔཙྩཏི, གརུཀེ ཨསཏི བཧུལཱིཀཏཾ, ཏསྨིཾ ཨསཏི ཡདཱསནྣཾ ¶ , ཏསྨིཾ ཨསཏི ‘‘ཀཊཏྟཱ ཝཱ པནཱ’’ཏི ཝུཏྟཾ པུརིམཛཱཏཱིསུ ཀཏཀམྨཾ ཝིཔཙྩཏི. བཧུལཱསནྣཔུབྦཀཏེསུ ཙ བལཱབལཾ ཛཱནིཏབྦཾ. པཱཔཏོ པཱཔནྟརཾ ཀལྱཱཎཉྩ, ཀལྱཱཎཏོ ཀལྱཱཎནྟརཾ པཱཔཉྩ བཧུལཱིཀཏཾ. ཏཏོ མཧཏོཝ པུབྦཀཏཱདི ཨཔྤཉྩ བཧུལཱནུསྶརཎེན ཝིཔྤཊིསཱརཱདིཛནནཏོ, པཊིཔཀྑསྶ ཨཔརིཔུཎྞཏཱཡ ཨཱརདྡྷཝིཔཱཀསྶ ཀམྨསྶ ཀམྨསེསསྶ ཝཱ ཨཔརཔརིཡཱཡཝེདནཱིཡསྶ ཨཔརིཀྑཱིཎཏཱཡ སནྟཏིཡཱ པརིཎཱམཝིསེསཏོཏི ཏེཧི ཏེཧི ཀཱརཎེཧི ཨཱཡཱུཧིཏཕལཾ པཋམཾ ཝིཔཙྩཏི. མཧཱནཱརདཀསྶཔཛཱཏཀེ (ཛཱ. ༢.༢༢.༡༡༥༣ ཨཱདཡོ) ཝིདེཧརཉྙོ སེནཱཔཏི ཨལཱཏོ, བཱིཛཀོ དཱསོ, རཱཛཀཉྙཱ རུཙཱ ཙ ཨེཏྠ ནིདསྶནཾ. ཏཐཱ ཧི ཝུཏྟཾ བྷགཝཏཱ –

‘‘ཏཏྲཱནནྡ, ཡྭཱཡཾ པུགྒལོ ཨིདྷ པཱཎཱཏིཔཱཏཱི…པེ… མིཙྪཱདིཊྛི. ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫཏི, པུབྦེ ཝཱསྶ ཏཾ ཀཏཾ ཧོཏི པཱཔཀམྨཾ དུཀྑཝེདནཱིཡཾ, པཙྪཱ ཝཱསྶ ཏཾ ཀཏཾ ཧོཏི པཱཔཀམྨཾ དུཀྑཝེདནཱིཡཾ, མརཎཀཱལེ ཝཱསྶ ཧོཏི མིཙྪཱདིཊྛི སམཏྟཱ སམཱདིནྣཱ, ཏེན སོ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫཏཱི’’ཏི –

ཨཱདི ¶ . སབྦཾ མཧཱཀམྨཝིབྷངྒསུཏྟཾ (མ. ནི. ༣.༣༠༣) ཝིཏྠཱརེཏབྦཾ. ཀིཾ བཧུནཱ. ཡཾ ཏཾ ཏཐཱགཏསྶ མཧཱཀམྨཝིབྷངྒཉཱཎཾ, ཏསྶེཝཱཡཾ ཝིསཡོ, ཡདིདཾ ཏསྶ ཏསྶ ཀམྨསྶ ཏེན ཏེན ཀཱརཎེན པུབྦཱཔརཝིཔཱཀཏཱ སམཏྠཱིཡཏི.

ཨིདཱནི ཛནཀཱདིཀམྨཙཏུཀྐཾ ཝིབྷཛནྟོ ‘‘ཛནཀཾ ནཱམཱ’’ཏིཨཱདིམཱཧ. པཝཏྟིཾ ན ཛནེཏཱིཏི པཝཏྟིཝིཔཱཀཾ ན ཛནེཏི. པཋམནཡེ ཛནཀཀམྨསྶ པཊིསནྡྷིཝིཔཱཀམཏྟསྶེཝ ཝུཏྟཏྟཱ ཏསྶ པཝཏྟིཝིཔཱཀདཱཡཀཏྟམྤི ཨནུཛཱནནྟོ ‘‘ཨཔརོ ནཡོ’’ཏིཨཱདིམཱཧ. ཏཏྠ པཊིསནྡྷིདཱནཱདིཝསེན ཝིཔཱཀསནྟཱནསྶ ནིབྦཏྟཀཾ ཛནཀཾ. སུཁདུཀྑསནྟཱནསྶ ནཱམརཱུཔཔྤབནྡྷསྶ ཝཱ ཙིརཏརཾ པཝཏྟིཧེཏུབྷཱུཏཾ ཨུཔཏྠམྦྷཀཾ. ཏེནཱཧ ‘‘སུཁདུཀྑཾ ཨུཔཏྠམྦྷེཏི, ཨདྡྷཱནཾ པཝཏྟེཏཱི’’ཏི. ཨུཔཔཱིལ༹ཀཾ སུཁདུཀྑཔྤབནྡྷེ པཝཏྟམཱནེ སཎིཀཾ སཎིཀཾ ཧཱཔེཏི. ཏེནཱཧ ‘‘སུཁདུཀྑཾ པཱིལེ༹ཏི བཱདྷེཏི, ཨདྡྷཱནཾ པཝཏྟིཏུཾ ན དེཏཱི’’ཏི.

ཝཱཏཀཱལ༹ཀོ མཧལླཀོ ཙོརེ གྷཱཏེཏུཾ ན སཀྐོཏཱིཏི སོ ཀིར མཧལླཀཀཱལེ ཨེཀཔྤཧཱརེན སཱིསཾ ཚིནྡིཏུཾ ན སཀྐོཏི, དྭེ ཏཡོ ཝཱརེ པཧརནྟོ མནུསྶེ ཀིལམེཏི, ཏསྨཱ ཏེ ཨེཝམཱཧཾསུ. ཨནུལོམིཀཾ ཁནྟིཾ པཊིལབྷིཏྭཱཏི སོཏཱཔཏྟིམགྒསྶ ཨོརཏོ ཨནུལོམིཀཾ ཁནྟིཾ ལབྷིཏྭཱ ¶ . ཏརུཎཝཙྪཱཡ གཱཝིཡཱ མདྡིཏྭཱ ཛཱིཝིཏཀྑཡཾ པཱཔིཏོཏི ཨེཀཱ ཀིར ཡཀྑིནཱི དྷེནུཝེསེན ཨཱགནྟྭཱ ཨུརེ པཧརིཏྭཱ མཱརེསི, ཏཾ སནྡྷཱཡེཏཾ ཝུཏྟཾ. ནགརེ བྷཝོ ནཱགརིཡོ.

གྷཱཏེཏྭཱཏི ཨུཔཙྪིནྡིཏྭཱ. ཀམྨསྶ ཨུཔཙྪིནྡནཾ ནཱམ ཏསྶ ཝིཔཱཀཔྤཊིབཱཧནམེཝཱཏི ཨཱཧ ‘‘ཏསྶ ཝིཔཱཀཾ པཊིབཱཧིཏྭཱ’’ཏི. ཏཉྩ ཨཏྟནོ ཝིཔཱཀུཔྤཏྟིཡཱ ཨོཀཱསཀརཎནྟི ཝུཏྟཾ ‘‘ཨཏྟནོ ཝིཔཱཀསྶ ཨོཀཱསཾ ཀརོཏཱི’’ཏི. ཝིཔཙྩནཱཡ ཀཏོཀཱསཾ ཀམྨཾ ཝིཔཀྐམྨེཝ ནཱམ ཧོཏཱིཏི ཨཱཧ ‘‘ཨེཝཾ པན ཀམྨེན ཀཏེ ཨོཀཱསེ ཏཾ ཝིཔཱཀཾ ཨུཔྤནྣཾ ནཱམ ཝུཙྩཏཱི’’ཏི. ཨུཔཔཱིལ༹ཀཾ ཨཉྙསྶ ཝིཔཱཀཾ ཨུཔཙྪིནྡཏི, ན སཡཾ ཨཏྟནོ ཝིཔཱཀཾ དེཏི. ཨུཔགྷཱཏཀཾ པན དུབྦལཀམྨཾ ཨུཔཙྪིནྡིཏྭཱ ཨཏྟནོ ཝིཔཱཀཾ ཨུཔྤཱདེཏཱིཏི ཨཡམེཏེསཾ ཝིསེསོ. ཀིཉྩི བཧྭཱབཱདྷཏཱདིཔཙྩཡཱུཔསནྣིཔཱཏེན ཝིཔཱཀསྶ ཝིབཱདྷཀཾ ཨུཔཔཱིལ༹ཀཾ, ཏཐཱ ཝིཔཱཀསྶེཝ ཨུཔཙྪེདཀཾ. ཨུཔགྷཱཏཀཀམྨཾ པན ཨུཔགྷཱཏེཏྭཱ ཨཏྟནོ ཝིཔཱཀསྶ ཨོཀཱསཀརཎེན ཝིཔཙྩནེ ¶ སཏི ཛནཀམེཝ སིཡཱ. ཛནཀཱདིབྷཱཝོ ནཱམ ཝིཔཱཀཾ པཏི ཨིཙྪིཏབྦོ, ན ཀམྨཾ པཏཱིཏི ཝིཔཱཀསྶེཝ ཨུཔགྷཱཏཀཏཱ ཡུཏྟཱ ཝིཡ དིསྶཏི, ཝཱིམཾསིཏབྦཾ.

ཨཔརོ ནཡོ – ཡསྨིཾ ཀམྨེ ཀཏེ པཊིསནྡྷིཡཾ པཝཏྟེ ཙ ཝིཔཱཀཀཊཏྟཱརཱུཔཱནཾ ཨུཔྤཏྟི ཧོཏི, ཏཾ ཛནཀཾ. ཡསྨིཾ པན ཀཏེ ཨཉྙེན ཛནིཏསྶ ཨིཊྛསྶ ཝཱ ཨནིཊྛསྶ ཝཱ ཕལསྶ ཝིབཱདྷཀཝིཙྪེདཀཔཙྩཡཱནུཔྤཏྟིཡཱ ཨུཔབྲཱུཧནཔཙྩཡུཔྤཏྟིཡཱ ཛནཀསཱམཏྠིཡཱནུརཱུཔཾ པརིསུདྡྷིཙིརཏརཔྤབནྡྷཱ ཧོཏི, ཏཾ ཨུཔཏྠམྦྷཀཾ. ཛནཀེན ནིབྦཏྟིཏཾ ཀུསལཕལཾ ཝཱ ཨཀུསལཕལཾ ཝཱ ཡེན པཙྩནཱིཀབྷཱུཏེན རོགདྷཱཏུཝིསམཏཱདིནིམིཏྟཏཱཡ ཝིབཱདྷཡཏི, ཏཾ ཨུཔཔཱིལ༹ཀཾ. ཡེན པན ཀམྨུནཱ ཛནཀསཱམཏྠིཡཝསེན ཙིརཏརཔྤབནྡྷཱརཧམྤི སམཱནཾ ཕལཾ ཝིཙྪེདཀཔཙྩཡུཔྤཏྟིཡཱ ཨུཔཧཉྙཏི ཝིཙྪིཛྫཏི, ཏཾ ཨུཔགྷཱཏཀནྟི ཨཡམེཏྠ སཱརོ.

ཏཏྠ ཀེཙི དུཏིཡསྶ ཀུསལབྷཱཝཾ ཨིཏྠཏྟམཱགཏསྶ ཨཔྤཱབཱདྷདཱིགྷཱཡུཀཏཱསཾཝཏྟནཝསེན, པཙྪིམཱནཾ དྭིནྣཾ ཨཀུསལབྷཱཝཾ བཧྭཱབཱདྷཨཔྤཱཡུཀཏཱསཾཝཏྟནཝསེན ཝཎྞེནྟི. ཏཐཱ ཙ ཝུཏྟཾ མཛ྄ཛྷིམནིཀཱཡེ ཙཱུལ༹ཀམྨཝིབྷངྒསུཏྟཝཎྞནཱཡཾ (མ. ནི. ཨཊྛ. ༣.༢༩༠) –

‘‘ཙཏྟཱརི ཧི ཀམྨཱནི – ཨུཔཔཱིལ༹ཀཾ, ཨུཔཙྪེདཀཾ, ཛནཀཾ, ཨུཔཏྠམྦྷཀནྟི. བལཝཀམྨེན ཧི ནིབྦཏྟཾ པཝཏྟེ ཨུཔཔཱིལ༹ཀཾ ཨཱགནྟྭཱ ཨཏྠཏོ ཨེཝཾ ཝདཏི ནཱམ ‘སཙཱཧཾ པཋམཏརཾ ཛཱནེཡྻཾ, ན ཏེ ཨིདྷ ནིབྦཏྟིཏུཾ དདེཡྻཾ, ཙཏཱུསུཡེཝ ཏཾ ཨཔཱཡེསུ ནིབྦཏྟཱཔེཡྻཾ. ཧོཏུ, ཏྭཾ ཡཏྠ ཀཏྠཙི ནིབྦཏྟ, ཨཧཾ ཨུཔཔཱིལ༹ཀཀམྨཾ ནཱམ ཏཾ པཱིལེ༹ཏྭཱ ¶ ནིརོཛཾ ནིཡཱུསཾ ཀསཊཾ ཀརིསྶཱམཱི’ཏི. ཏཏོ པཊྛཱཡ ཏཾ ཏཱདིསཾ ཀརོཏི. ཀིཾ ཀརོཏི? པརིསྶཡཾ ཨུཔནེཏི, བྷོགེ ཝིནཱསེཏི.

‘‘ཏཏྠ དཱརཀསྶ མཱཏུཀུཙྪིཡཾ ནིབྦཏྟཀཱལཏོ པཊྛཱཡ མཱཏུ ཨསྶཱདོ ཝཱ སུཁཾ ཝཱ ན ཧོཏི, མཱཏཱཔིཏཱུནཾ པཱིལཱ༹ཝ ཨུཔྤཛྫཏི. ཨེཝཾ པརིསྶཡཾ ཨུཔནེཏི. དཱརཀསྶ པན མཱཏུཀུཙྪིམྷི ནིབྦཏྟཀཱལཏོ པཊྛཱཡ གེཧེ བྷོགཱ ཨུདཀཾ པཏྭཱ ལོཎཾ ཝིཡ རཱཛཱདཱིནཾ ཝསེན ནསྶནྟི, ཀུམྦྷདོཧནདྷེནུཡོ ¶ ཁཱིརཾ ན དེནྟི, སཱུརཏཱ གོཎཱ ཙཎྜཱ ཧོནྟི, ཀཱཎཱ ཧོནྟི, ཁཉྫཱ ཧོནྟི, གོམཎྜལེ རོགོ པཏཏི, དཱསཱདཡོ ཝཙནཾ ན ཀརོནྟི, ཝཱཔིཏཾ སསྶཾ ན ཛཱཡཏི, གེཧགཏཾ གེཧེ, ཨརཉྙགཏཾ ཨརཉྙེ ནསྶཏི, ཨནུཔུབྦེན གྷཱསཙྪཱདནམཏྟཾ དུལླབྷཾ ཧོཏི, གབྦྷཔརིཧཱརོ ན ཧོཏི, ཝིཛཱཏཀཱལེ མཱཏུ ཐཉྙཾ ཚིཛྫཏི, དཱརཀོ པརིཧཱརཾ ཨལབྷནྟོ པཱིལི༹ཏོ ནིརོཛོ ནིཡཱུསོ ཀསཊོ ཧོཏི. ཨིདཾ ཨུཔཔཱིལ༹ཀཀམྨཾ ནཱམ.

‘‘དཱིགྷཱཡུཀཀམྨེན པན ནིབྦཏྟསྶ ཨུཔཙྪེདཀཀམྨཾ ཨཱགནྟྭཱ ཨཱཡུཾ ཚིནྡཏི. ཡཐཱ ཧི པུརིསོ ཨཊྛུསབྷགམནཾ ཀཏྭཱ སརཾ ཁིཔེཡྻ, ཏམཉྙོ དྷནུཏོ མུཏྟམཏྟཾ མུགྒརེན པཧརིཏྭཱ ཏཏྠེཝ པཱཏེཡྻ, ཨེཝཾ དཱིགྷཱཡུཀཀམྨེན ནིབྦཏྟསྶ ཨུཔཙྪེདཀཀམྨཾ ཨཱཡུཾ ཚིནྡཏི. ཀིཾ ཀརོཏི? ཙོརཱནཾ ཨཊཝིཾ པཝེསེཏི, ཝཱལ༹མཙྪོདཀཾ ཨོཏཱརེཏི, ཨཉྙཏརཾ ཝཱ པན སཔརིསྶཡཋཱནཾ ཨུཔནེཏི. ཨིདཾ ཨུཔཙྪེདཀཀམྨཾ ནཱམ. ‘ཨུཔགྷཱཏཀ’ནྟིཔི ཨེཏསྶེཝ ནཱམཾ. པཊིསནྡྷིནིབྦཏྟཀཾ པན ཀམྨཾ ཛནཀཀམྨཾ ནཱམ. ཨཔྤབྷོགཀུལཱདཱིསུ ནིབྦཏྟསྶ བྷོགསམྤདཱདིཀརཎེན ཨུཔཏྠམྦྷཀཀམྨཾ ཨུཔཏྠམྦྷཀཀམྨཾ ནཱམ.

‘‘པརིཏྟཀམྨེནཔི ནིབྦཏྟཾ ཨེཏཾ པཝཏྟེ པཱཎཱཏིཔཱཏཱདིཝིརཏིཀམྨཾ ཨཱགནྟྭཱ ཨཏྠཏོ ཨེཝཾ ཝདཏི ནཱམ ‘སཙཱཧཾ པཋམཏརཾ ཛཱནེཡྻཾ, ན ཏེ ཨིདྷ ནིབྦཏྟིཏུཾ དདེཡྻཾ, དེཝལོཀེཡེཝ ཏཾ ནིབྦཏྟཱཔེཡྻཾ, ཧོཏུ, ཏྭཾ ཡཏྠ ཀཏྠཙི ནིབྦཏྟ, ཨཧཾ ཨུཔཏྠམྦྷཀཀམྨཾ ནཱམ ཨུཔཏྠམྦྷཾ ཏེ ཀརིསྶཱམཱི’ཏི ཨུཔཏྠམྦྷཾ ཀརོཏི. ཀིཾ ཀརོཏི? པརིསྶཡཾ ནཱསེཏི, བྷོགེ ཨུཔྤཱདེཏི.

‘‘ཏཏྠ དཱརཀསྶ མཱཏུཀུཙྪིཡཾ ནིབྦཏྟཀཱལཏོ པཊྛཱཡ མཱཏཱཔིཏཱུནཾ སུཁམེཝ སཱཏམེཝ ཧོཏི. ཡེཔི པཀཏིཡཱ མནུསྶཱམནུསྶཔརིསྶཡཱ ཧོནྟི, ཏེ སབྦེ ཨཔགཙྪནྟི ¶ . ཨེཝཾ པརིསྶཡཾ ནཱསེཏི. དཱརཀསྶ པན མཱཏུཀུཙྪིམྷི ནིབྦཏྟཀཱལཏོ པཊྛཱཡ གེཧེ བྷོགཱནཾ པམཱཎཾ ན ཧོཏི, ནིདྷིཀུམྦྷིཡོ པུརཏོཔི པཙྪཏོཔི གེཧཾ པརིཝཊྚམཱནཱ པཝིསནྟི. མཱཏཱཔིཏརོ ¶ པརེཧི ཋཔིཏདྷནསྶཔི སམྨུཁཱིབྷཱཝཾ གཙྪནྟི, དྷེནུཡོ བཧུཁཱིརཱ ཧོནྟི, གོཎཱ སུཁསཱིལཱ ཧོནྟི, ཝཔྤཊྛཱནེ སསྶཱནི སམྤཛྫནྟི, ཝཌྜྷིཡཱ ཝཱ སམྤཡུཏྟཾ, ཏཱཝཀཱལིཀཾ ཝཱ དིནྣཾ དྷནཾ ཨཙོདིཏཱ སཡམེཝ ཨཱཧརིཏྭཱ དེནྟི, དཱསཱདཡོ སུབྦཙཱ ཧོནྟི, ཀམྨནྟཱ ན པརིཧཱཡནྟི, དཱརཀོ གབྦྷཏོ པཊྛཱཡ པརིཧཱརཾ ལབྷཏི, ཀོམཱརིཀཝེཛྫཱ སནྣིཧིཏཱཝ ཧོནྟི. གཧཔཏིཀུལེ ཛཱཏོ སེཊྛིཊྛཱནཾ, ཨམཙྩཀུལཱདཱིསུ ཛཱཏོ སེནཱཔཏིཊྛཱནཱདཱིནི ལབྷཏི. ཨེཝཾ བྷོགེ ཨུཔྤཱདེཏི. སོ ཨཔརིསྶཡོ སབྷོགོ ཙིརཾ ཛཱིཝཏི. ཨིདཾ ཨུཔཏྠམྦྷཀཀམྨཾ ནཱམ. ཨིམེསུ ཙཏཱུསུ པུརིམཱནི དྭེ ཨཀུསལཱནེཝ, ཛནཀཾ ཀུསལམྤི ཨཀུསལམྤི, ཨུཔཏྠམྦྷཀཾ ཀུསལམེཝཱ’’ཏི.

ཨེཏྠ ཝིབཱདྷཱུཔགྷཱཏཱ ནཱམ ཀུསལཝིཔཱཀམྷི ན ཡུཏྟཱཏི ཨདྷིཔྤཱཡེན ‘‘དྭེ ཨཀུསལཱནེཝཱ’’ཏི ཝུཏྟཾ. དེཝདཏྟཱདཱིནཾ པན ནཱགཱདཱིནཾ ཨིཏོ ཨནུཔྤདིནྣཡཱཔནཀཔེཏཱནཉྩ ནརཀཱདཱིསུ ཨཀུསལཝིཔཱཀཱུཔཏྠམྦྷནཱུཔཔཱིལ༹ནཱུཔགྷཱཏཀཱནི སནྟཱིཏི ཙཏུནྣམྤི ཀུསལཱཀུསལབྷཱཝོ ན ཝིརུཛ྄ཛྷཏི. ཨེཝཉྩ ཀཏྭཱ ཡཱ བཧཱུསུ ཨཱནནྟརིཡེསུ ཀཏེསུ ཨེཀེན གཧིཏཔྤཊིསནྡྷིཀསྶ ཨིཏརེསཾ ཏསྶ ཨནུབལཔྤདཱཡིཏཱ ཝུཏྟཱ, སཱཔི སམཏྠིཏཱ ཧོཏི.

སུཏྟནྟཔརིཡཱཡེན ཨེཀཱདས ཀམྨཱནི ཝིབྷཛིཏྭཱ ཨིདཱནི ཨབྷིདྷམྨཔརིཡཱཔནྣཾ དསྶེནྟོ ‘‘ཨཏྠེཀཙྩཱནི པཱཔཀཱནི ཀམྨསམཱདཱནཱནཱི’’ཏིཨཱདིནཱ ཝིབྷངྒཔཱལི༹ཾ (ཝིབྷ. ༨༡༠) དསྶེཏི. ཏཏྠ གཏིསམྤཏྟིཔཊིབཱལ༹ྷཱནཱིཏི གཏིསམྤཏྟིཡཱ པཊིབཱཧིཏཱནི ནིཝཱརིཏཱནི པཊིསེདྷིཏཱནི. སེསཔདེསུཔི ཨེསེཝ ནཡོ. ཏཏྠ ཙ གཏིསམྤཏྟཱིཏི སམྤནྣགཏི དེཝལོཀོ ཙ མནུསྶལོཀོ ཙ. གཏིཝིཔཏྟཱིཏི ཝིཔནྣགཏི ཙཏྟཱརོ ཨཔཱཡཱ. ཨུཔདྷིསམྤཏྟཱིཏི ཨཏྟབྷཱཝསམིདྡྷི. ཨུཔདྷིཝིཔཏྟཱིཏི ཧཱིནཨཏྟབྷཱཝཏཱ. ཀཱལསམྤཏྟཱིཏི སུརཱཛསུམནུསྶཀཱལསངྑཱཏོ སམྤནྣཀཱལོ. ཀཱལཝིཔཏྟཱིཏི དུརཱཛདུམྨནུསྶཀཱལསངྑཱཏོ ཝིཔནྣཀཱལོ. པཡོགསམྤཏྟཱིཏི སམྨཱཔཡོགོ. པཡོགཝིཔཏྟཱིཏི མིཙྪཱཔཡོགོ.

ཨིདཱནི ¶ ཡཐཱཝུཏྟཔཱལི༹ཡཱ ཨཏྠཾ དསྶེནྟོ ‘‘ཏཏྠཱ’’ཏིཨཱདིམཱཧ. ཏཏྠ ཨནིཊྛཱརམྨཎཱནུབྷཝནཱརཧེ ཀམྨེ ཝིཛྫམཱནེཡེཝཱཏི ཨིམིནཱ ཨནིཊྛཱརམྨཎཱནུབྷཝནནིམྨིཏྟཀསྶ པཱཔཀམྨསྶ སབྦྷཱཝཾ དསྶེཏི. ཏཾ ཀམྨནྟི ཏཾ པཱཔཀཾ ཀམྨཾ. ཨེཀཙྩསྶ ཧི ཨནིཊྛཱརམྨཎཱནུབྷཝནནིམིཏྟཾ ¶ བཧུཔཱཔཀམྨཾ ཝིཛྫམཱནམྤི གཏིཝིཔཏྟིཡཾ ཋིཏསྶེཝ ཝིཔཙྩཏི. ཡདི པན སོ ཨེཀེན ཀལྱཱཎཀམྨེན གཏིསམྤཏྟིཡཾ དེཝེསུ ཝཱ མནུསྶེསུ ཝཱ ནིབྦཏྟེཡྻ, ཏཱདིསེ ཋཱནེ ཨཀུསལསྶ ཝཱརོ ནཏྠི, ཨེཀནྟཾ ཀུསལསྶེཝཱཏི ཏཾ ཀམྨཾ གཏིསམྤཏྟིཔཊིབཱལ༹ྷཾ ན ཝིཔཙྩཏི. པཏིབཱཧིཏཾ ཧུཏྭཱཏི བཱདྷིཏཾ ཧུཏྭཱ. ཨཏྟབྷཱཝསམིདྡྷིཡནྟི སརཱིརསམྤཏྟིཡཾ. ཀིལིཊྛཀམྨསྶཱཏི ཧཏྠིམེཎྜཨསྶབནྡྷཀགོཔཱལཀཱདིཀམྨསྶ. པལཱཡིཏབྦཡུཏྟཀཱལེཏི ཧཏྠིཨཱདིཔཙྩཏྠིཀསམཱགམཀཱལེ. ལཉྫཾ དེཏཱིཏི ཨེཝཾ མེ བཱདྷཏཾ པརེསཾ ཝསེ ན ཧོཏཱིཏི དེཏི. ཙོརིཀཡུཏྟཀཱལེཏི པཀྑབལཱདཱིནཾ ལབྦྷམཱནཀཱལེ. ཨནྟརཀཔྤེཏི པརིཡོསཱནཔྤཏྟེ ཨནྟརཀཔྤེ.

ཨབྷིདྷམྨནཡེན སོལ༹ས ཀམྨཱནི ཝིབྷཛིཏྭཱ པཊིསམྦྷིདཱམགྒཔརིཡཱཡེན (པཊི. མ. ༡.༢༣༤-༢༣༥) དྭཱདས ཀམྨཱནི ཝིབྷཛིཏྭཱ དསྶེཏུཾ ‘‘ཨཔརཱནིཔཱི’’ཏིཨཱདིམཱཧ. ཏཏྠ ཨཏཱིཏབྷཝེསུ ཀཏསྶ ཀམྨསྶ ཨཏཱིཏབྷཝེསུཡེཝ ཝིཔཀྐཝིཔཱཀཾ གཧེཏྭཱ ‘‘ཨཧོསི ཀམྨཾ ཨཧོསི ཀམྨཝིཔཱཀོ’’ཏི ཝུཏྟནྟི ཨཱཧ ‘‘ཡཾ ཀམྨཾ ཨཏཱིཏེ ཨཱཡཱུཧིཏ’’ནྟིཨཱདི. ཝིཔཱཀཝཱརནྟི ཝིཔཙྩནཱཝསརཾ ཝིཔཱཀཝཱརཾ. ‘‘ཝིཔཱཀཝཱརཾ ལབྷཏཱི’’ཏི ཨིམིནཱ ཝུཏྟམེཝཏྠཾ ‘‘པཊིསནྡྷིཾ ཛནེསཱི’’ཏིཨཱདིནཱ ཝིབྷཱཝེཏི. ཏཏྠ པཊིསནྡྷིཾ ཛནེསཱིཏི ཨིམིནཱ ཙ པཊིསནྡྷིདཱཡཀསྶ ཀམྨསྶ པཝཏྟིཝིཔཱཀདཱཡིཏཱཔི ཝུཏྟཱ ཧོཏི. པཝཏྟིཝིཔཱཀསྶེཝ པན དཱཡཀཾ རཱུཔཛནཀསཱིསེན ཝདཏི. ཏསྶེཝ ཨཏཱིཏསྶ ཀམྨསྶ དིཊྛདྷམྨཝེདནཱིཡསྶ ཨུཔཔཛྫཝེདནཱིཡསྶ ཙ པཙྩཡཝེཀལླེན ཨཏཱིཏབྷཝེསུཡེཝ ཨཝིཔཀྐཝིཔཱཀཉྩ, ཨཏཱིཏེཡེཝ པརིནིབྦུཏསྶ དིཊྛདྷམྨཝེདནཱིཡཨུཔཔཛྫཝེདནཱིཡཨཔརཔརིཡཱཡཝེདནཱིཡསྶ ཀམྨསྶ ཨཝིཔཀྐཝིཔཱཀཉྩ གཧེཏྭཱ ‘‘ཨཧོསི ཀམྨཾ ནཱཧོསི ཀམྨཝིཔཱཀོ’’ཏིཔི ཝུཏྟནྟི ཨཱཧ ‘‘ཡཾ པན ཝིཔཱཀཝཱརཾ ན ལབྷཱི’’ཏིཨཱདི.

ཨཏཱིཏསྶེཝ ཀམྨསྶ ཨཝིཔཀྐཝིཔཱཀསྶ པཙྩུཔྤནྣབྷཝེ པཙྩཡསམྤཏྟིཡཱ ཝིཔཙྩམཱནཾ ཝིཔཱཀཾ གཧེཏྭཱ ‘‘ཨཧོསི ཀམྨཾ ཨཏྠི ཀམྨཝིཔཱཀོ’’ཏི ཝུཏྟནྟི ཨཱཧ ‘‘ཡཾ པན ཨཏཱིཏེ ཨཱཡཱུཧིཏ’’ནྟིཨཱདིམཱཧ. ཨཏཱིཏསྶེཝ ཀམྨསྶ ¶ ཨཏིཀྐནྟཝིཔཱཀཀཱལསྶ ཙ པཙྩུཔྤནྣབྷཝེ པརིནིབྦཱཡནྟསྶ ཙ ཨཝིཔཙྩམཱནཝིཔཱཀཾ གཧེཏྭཱ ‘‘ཨཧོསི ཀམྨཾ ནཏྠི ཀམྨཝིཔཱཀོ’’ཏི ཝུཏྟནྟི ཨཱཧ ‘‘ཨལདྡྷཝིཔཱཀཝཱར’’ནྟིཨཱདི. ཨཏཱིཏསྶེཝ ཀམྨསྶ ཝིཔཱཀཱརཧསྶ ཨཝིཔཀྐཝིཔཱཀསྶ ཨནཱགཏབྷཝེ པཙྩཡསམྤཏྟིཡཱ ཝིཔཙྩིཏབྦཾ ཝིཔཱཀཾ གཧེཏྭཱ ‘‘ཨཧོསི ཀམྨཾ བྷཝིསྶཏི ཀམྨཝིཔཱཀོ’’ཏི ཝུཏྟནྟི དསྶེནྟོ ‘‘ཡཾ པན ཨཏཱིཏེ ཨཱཡཱུཧིཏ’’ནྟིཨཱདིམཱཧ. ཨཏཱིཏསྶེཝ ཀམྨསྶ ཨཏིཀྐནྟཝིཔཱཀཀཱལསྶ ཙ ཨནཱགཏབྷཝེ པརིནིབྦཱཡིཏབྦསྶ ཨཝིཔཙྩིཏབྦཝིཔཱཀཉྩ གཧེཏྭཱ ‘‘ཨཧོསི ཀམྨཾ ན བྷཝིསྶཏི ཀམྨཝིཔཱཀོ’’ཏི ¶ ཝུཏྟནྟི ཨཱཧ ‘‘ཡཾ ཨནཱགཏེ ཝིཔཱཀཝཱརཾ ན ལབྷིསྶཏཱི’’ཏིཨཱདི. ཨེཝཾ ཏཱཝ ཨཏཱིཏཀམྨཾ ཨཏཱིཏཔཙྩུཔྤནྣཱནཱགཏཝིཔཱཀཱཝིཔཱཀཝསེན ཚདྷཱ དསྶིཏཾ.

ཨིདཱནི པཙྩུཔྤནྣབྷཝེ ཀཏསྶ དིཊྛདྷམྨཝེདནཱིཡསྶ ཨིདྷེཝ ཝིཔཙྩམཱནཾ ཝིཔཱཀཾ གཧེཏྭཱ ‘‘ཨཏྠི ཀམྨཾ ཨཏྠི ཀམྨཝིཔཱཀོ’’ཏི ཝུཏྟནྟི དསྶེནྟོ ‘‘ཡཾ པན ཨེཏརཧི ཨཱཡཱུཧིཏ’’ནྟིཨཱདིམཱཧ. ཡཾ པན ཨེཏརཧི ཝིཔཱཀཝཱརཾ ན ལབྷཏཱིཏིཨཱདིནཱ ཏསྶེཝ པཙྩུཔྤནྣསྶ ཀམྨསྶ པཙྩཡཝེཀལླེན ཨིདྷ ཨཝིཔཙྩམཱནཉྩ དིཊྛེཝ དྷམྨེ པརིནིབྦཱཡནྟསྶ ཨིདྷ ཨཝིཔཙྩམཱནཉྩ ཝིཔཱཀཾ གཧེཏྭཱ ‘‘ཨཏྠི ཀམྨཾ ནཏྠི ཀམྨཝིཔཱཀོ’’ཏི ཝུཏྟནྟི དསྶེཏི. པཙྩུཔྤནྣསྶེཝ ཀམྨསྶ ཨུཔཔཛྫཝེདནཱིཡསྶ ཨཔརཔརིཡཱཡཝེདནཱིཡསྶ ཙ ཨནཱགཏབྷཝེ ཝིཔཙྩིཏབྦཝིཔཱཀཾ གཧེཏྭཱ ‘‘ཨཏྠི ཀམྨཾ བྷཝིསྶཏི ཀམྨཝིཔཱཀོ’’ཏི ཝུཏྟནྟི ཨཱཧ ‘‘ཡཾ པན ཨེཏརཧི ཨཱཡཱུཧིཏཾ ཨནཱགཏེ ཝིཔཱཀཝཱརཾ ལབྷིསྶཏཱི’’ཏིཨཱདི. པཙྩུཔྤནྣསྶེཝ ཀམྨསྶ ཨུཔཔཛྫཝེདནཱིཡསྶ པཙྩཡཝེཀལླེན ཨནཱགཏབྷཝེ ཨཝིཔཙྩིཏབྦཉྩ ཨནཱགཏབྷཝེ པརིནིབྦཱཡིཏབྦསྶ ཨཔརཔརིཡཱཡཝེདནཱིཡསྶ ཨཝིཔཙྩིཏབྦཉྩ ཝིཔཱཀཾ གཧེཏྭཱ ‘‘ཨཏྠི ཀམྨཾ ན བྷཝིསྶཏི ཀམྨཝིཔཱཀོ’’ཏི ཝུཏྟནྟི ཨཱཧ ‘‘ཡཾ པན ཝིཔཱཀཝཱརཾ ན ལབྷིསྶཏཱི’’ཏིཨཱདི.

ཨེཝཉྩ པཙྩུཔྤནྣཀམྨཾ པཙྩུཔྤནྣཱནཱགཏཝིཔཱཀཱཝིཔཱཀཝསེན ཙཏུདྷཱ དསྶེཏྭཱ ཨིདཱནི ཨནཱགཏབྷཝེ ཀཏསྶ ཀམྨསྶ ཨནཱགཏེ ཝིཔཙྩིཏབྦཝིཔཱཀཾ གཧེཏྭཱ ‘‘བྷཝིསྶཏི ཀམྨཾ བྷཝིསྶཏི ཀམྨཝིཔཱཀོ’’ཏི ཝུཏྟནྟི དསྶེནྟོ ‘‘ཡཾ པནཱནཱགཏེ ཨཱཡཱུཧིསྶཏཱི’’ཏིཨཱདིམཱཧ. ཏསྶེཝ ཨནཱགཏསྶ ཀམྨསྶ པཙྩཡཝེཀལླེན ཨཝིཔཙྩིཏབྦཉྩ ཨནཱགཏབྷཝེ པརིནིབྦཱཡིཏབྦསྶ ཨཝིཔཙྩིཏབྦཉྩ ཝིཔཱཀཾ གཧེཏྭཱ ‘‘བྷཝིསྶཏི ཀམྨཾ ན བྷཝིསྶཏི ཀམྨཝིཔཱཀོ’’ཏི ཝུཏྟནྟི ཨཱཧ ‘‘ཡཾ པན ཝིཔཱཀཝཱརཾ ན ལབྷིསྶཏཱི’’ཏིཨཱདི ¶ . ཨེཝཾ ཨནཱགཏཀམྨཾ ཨནཱགཏཝིཔཱཀཱཝིཔཱཀཝསེན དྭིདྷཱ དསྶིཏཾ. ཨེཝནྟིཨཱདིནཱ ཡཐཱཝུཏྟདྭཱདསཀམྨཱནི ནིགམེཏི.

ཨིདཱནི སབྦེསུ ཡཐཱཝུཏྟཔྤབྷེདེསུ ཀམྨེསུ ཡཱནི ཨབྷིདྷམྨནཡེན ཝིབྷཏྟཱནི སོལ༹ས ཀམྨཱནི, ཡཱནི ཙ པཊིསམྦྷིདཱམགྒཔརིཡཱཡེན ཝིབྷཏྟཱནི དྭཱདས ཀམྨཱནི, ཏཱནི སབྦཱནི སུཏྟནྟིཀཔརིཡཱཡེན ཝིབྷཏྟེསུ ཨེཀཱདསཝིདྷེསུཡེཝ ཀམྨེསུ ཨནྟོགདྷཱནི, ཏཱནི ཙ དིཊྛདྷམྨཝེདནཱིཡཨུཔཔཛྫཝེདནཱིཡཨཔརཔརིཡཱཡཝེདནཱིཡེསུ ཏཱིསུཡེཝ ཨནྟོགདྷཱནཱིཏི དསྶེནྟོ ‘‘ཨིཏི ཨིམཱནི ཙེཝཱ’’ཏིཨཱདིམཱཧ. ཏཏྠ ཨཏྟནོ ཋཱནཱ ཨོསཀྐིཏྭཱཏི ཨཏྟནོ ཡཐཱཝུཏྟདྭཱདསསོལ༹སཔྤབྷེདསངྑཱཏཊྛཱནཏོ པརིཧཱཔེཏྭཱ, ཏཾ ཏཾ པབྷེདཾ ཧིཏྭཱཏི ཝུཏྟཾ ཧོཏི. ཨེཀཱདས ཀམྨཱནིཡེཝ ¶ བྷཝནྟཱིཏི ཏཾསབྷཱཝཱནཾཡེཝ ཀམྨཱནཾ དྭཱདསདྷཱ སོལ༹སདྷཱ ཙ ཝིབྷཛིཏྭཱ ཝུཏྟཏྟཱ ཨེཝམཱཧ. ཡསྨཱ ཨེཀཱདསདྷཱ ཝུཏྟཀམྨཱནི དིཊྛདྷམྨཝེདནཱིཡཱནི ཝཱ སིཡུཾ ཨུཔཔཛྫཝེདནཱིཡཱནི ཝཱ ཨཔརཔརིཡཱཡཝེདནཱིཡཱནི ཝཱ, ཏསྨཱ ཝུཏྟཾ ‘‘ཏཱིཎིཡེཝ ཀམྨཱནི ཧོནྟཱི’’ཏི.

ཏེསཾ སངྐམནཾ ནཏྠཱིཏི ཏེསཾ དིཊྛདྷམྨཝེདནཱིཡཱདཱིནཾ སངྐམནཾ ནཏྠི, སངྐམནཾ ཨུཔཔཛྫཝེདནཱིཡཱདིབྷཱཝཱཔཏྟི. ཏེནཱཧ ‘‘ཡཐཱཋཱནེཡེཝ ཏིཊྛནྟཱི’’ཏི, ཨཏྟནོ དིཊྛདྷམྨཝེདནཱིཡཱདིཊྛཱནེཡེཝ ཏིཊྛནྟཱིཏི ཨཏྠོ. དིཊྛདྷམྨཝེདནཱིཡམེཝ ཧི པཋམཛཝནཙེཏནཱ, ཨུཔཔཛྫཝེདནཱིཡམེཝ སཏྟམཛཝནཙེཏནཱ, མཛ྄ཛྷེ པཉྩ ཨཔརཔརིཡཱཡཝེདནཱིཡམེཝཱཏི ནཏྠི ཏེསཾ ཨཉྙམཉྙཾ སངྒཧོ, ཏསྨཱ ཨཏྟནོ ཨཏྟནོ དིཊྛདྷམྨཝེདནཱིཡཱདིསབྷཱཝེཡེཝ ཏིཊྛནྟི. ཏེནེཝ བྷགཝཏཱ – ‘‘དིཊྛེ ཝཱ དྷམྨེ, ཨུཔཔཛྫ ཝཱ, ཨཔརེ ཝཱ པརིཡཱཡེ’’ཏི ཏཡོ ཝིཀཔྤཱ དསྶིཏཱ. ཏེནེཝཱཧ ‘‘དིཊྛདྷམྨཝེདནཱིཡཾ ཀམྨ’’ནྟིཨཱདི. ཏཏྠ ‘‘དིཊྛེ ཝཱ དྷམྨེ’’ཏི སཏྠཱ ན ཝདེཡྻཱཏི ཨསཏི ནིཡཱམེ ན ཝདེཡྻ. ཡསྨཱ པན ཏེསཾ སངྐམནཾ ནཏྠི, ནིཡཏསབྷཱཝཱ ཧི ཏཱནི, ཏསྨཱ སཏྠཱ ‘‘དིཊྛེ ཝཱ དྷམྨེ’’ཏིཨཱདིམཝོཙ.

སུཀྐཔཀྑེཏི ‘‘ཨལོབྷོ ནིདཱནཾ ཀམྨཱནཾ སམུདཡཱཡཱ’’ཏིཨཱདིནཱ ཨཱགཏེ ཀུསལཔཀྑེ. ནིརུདྡྷེཏི ཨརིཡམགྒཱདྷིགམེན ཨནུཔྤཱདནིརོདྷེན ནིརུདྡྷེ. ཏཱལཝཏྠུ ཝིཡ ཀཏནྟི ཡཐཱ ཏཱལེ ཚིནྣེ ཋིཏཊྛཱནེ ཀིཉྩི ན ཧོཏི, ཨེཝཾ ཀམྨེ པཧཱིནེ ཀིཉྩི ན ཧོཏཱིཏི ཨཏྠོ. ཏཱལཝཏྠཱུཏི ཝཱ མཏྠཀཙྪིནྣོ ཏཱལོ ཝུཏྟོ པཏྟཕལམཀུལསཱུཙིཨཱདཱིནཾ ཨབྷཱཝཏོ. ཏཏོ ཨེཝ སོ ཨཝིརུལ༹ྷིདྷམྨོ. ཨེཝཾ པཧཱིནཀམྨོ སཏྟསནྟཱནོ. ཏེནཱཧ ¶ ‘‘མཏྠཀཙྪིནྣཏཱལོ ཝིཡཱ’’ཏི. ཨནུཨབྷཱཝཾ ཀཏཾ པཙྪཏོ དྷམྨཔྤཝཏྟིཡཱ ཨབྷཱཝཏོ. ཏེནཱཧ ‘‘ཡཐཱ’’ཏིཨཱདི. ཨཔྤཝཏྟིཀཏཀཱལོ ཝིཡཱཏི བཱིཛཱནཾ སབྦསོ ཨཔྤཝཏྟིཡཱ ཀཏཀཱལོ ཝིཡ. ཚིནྣམཱུལཀཱནནྟི ཀིལེསམཱུལསྶ སབྦསོ ཚིནྣཏྟཱ ཚིནྣམཱུལཀཱནཾ. ཀིལེསཱ ཧི ཁནྡྷཱནཾ མཱུལཱནི.

ཝེདནཱིཡནྟི ཝེདིཏབྦཾ. ཨཉྙཾ ཝཏྠུ ནཏྠཱིཏི ཨཉྙཾ ཨདྷིཊྛཱནཾ ནཏྠི. སུགཏིསཉྙིཏཱཔི ཧེཊྛིམནྟེན སངྑཱརདུཀྑཏོ ཨནཔགཏཏྟཱ དུགྒཏིཡོ ཨེཝཱཏི ཝུཏྟཾ ‘‘སབྦཱ དུགྒཏིཡོ’’ཏི, ཨེཝཾ ཝཱ ཨེཏྠ ཨཏྠོ དཊྛབྦོ. ལོབྷོ ཨེཏསྶ ཀཱརཎབྷཱུཏོ ཨཏྠཱིཏི ལོབྷཾ, ལོབྷནིམིཏྟཾ ཀམྨཾ. ཏཐཱ དོསནྟི ཨེཏྠཱཔི. ཏེནཱཧ ‘‘ལོབྷདོསསཱིསེན ལོབྷཛཉྩ དོསཛཉྩ ཀམྨམེཝ ནིདྡིཊྛ’’ནྟི. ཝཊྚཝིཝཊྚནྟི ཝཊྚཉྩ ཝིཝཊྚཉྩ.

ནིདཱནསུཏྟཝཎྞནཱ ནིཊྛིཏཱ.

༥. ཧཏྠཀསུཏྟཝཎྞནཱ

༣༥. པཉྩམེ ¶ ཨཱལ༹ཝིཡནྟི ཨཱལ༹ཝིརཊྛེ, ན ཨཱལ༹ཝིནགརེ. ཏེནཱཧ ‘‘ཨཱལ༹ཝིཡནྟི ཨཱལ༹ཝིརཊྛེ’’ཏི. ཨཐཱཏི ཨཝིཙྪེདཏྠེ ནིཔཱཏོ. ཏཏྠ བྷགཝཏོ ནིསཛྫཱཡ ཨཝིཙྪིནྣཱཡ ཨེཝཱཏི ཨཏྠོ. ཏེནཱཧ ‘‘ཨེཝ’’ནྟིཨཱདི. ཧཏྠཏོ ཧཏྠཾ གཏཏྟཱཏི ཨཱལ༹ཝཀསྶ ཡཀྑསྶ ཧཏྠཏོ སམྨཱསམྦུདྡྷསྶ ཧཏྠཾ, ཏཏོ རཱཛཔུརིསཱནཾ ཧཏྠཾ གཏཏྟཱ.

མཱགྷསྶཱཏི མཱགྷམཱསསྶ. ཨེཝཾ ཕགྒུནསྶཱཏི ཨེཏྠཱཔི. ཁུརནྟརེཧི ཀདྡམོ ཨུགྒནྟྭཱ ཏིཊྛཏཱིཏི ཀདྡམོ ཁུརནྟརེཧི ཨུགྒནྟྭཱ ཏིཊྛཏི. ཙཏཱུཧི དིསཱཧི ཝཱཡནྟོ ཝཱཏོ ཝེརམྦྷོཏི ཝུཙྩཏི ཝེརམྦྷཝཱཏསདིསཏྟཱ.

པཉྩདྭཱརཀཱཡནྟི པཉྩདྭཱརཱནུསཱརེན པཝཏྟཾ ཝིཉྙཱཎཀཱཡཾ. ཁོབྷཡམཱནཱཏི ཀིལེསཁོབྷཝསེན ཁོབྷཡམཱནཱ ཙིཏྟཾ སངྑོབྷཾ ཀརོནྟཱ. ཙེཏསིཀཱཏི མནོདྭཱརིཀཙིཏྟསནྣིསྶིཏཱ. ཏེནཱཧ ‘‘མནོདྭཱརཾ ཁོབྷཡམཱནཱ’’ཏི. སོ རཱགོཏི ཏཾསདིསོ རཱགོ. བྷཝཏི ཧི ཏཾསདིསེ ཏབྦོཧཱརོ ཡཐཱ ‘‘སཱ ཨེཝ ཏིཏྟིརིཀཱ, ཏཱནི ཨེཝ ཨོསདྷཱནཱི’’ཏི. ཡཱདིསོ ཧི ཨེཀསྶ པུགྒལསྶ ཨུཔྤཛྫནཀརཱགོ, ཏཱདིསོ ཨེཝ ཏཏོ ཨཉྙསྶ རཱགབྷཱཝསཱམཉྙཏོ. ཏེན ཝུཏྟཾ ‘‘ཏཐཱརཱུཔོ ¶ རཱགོ’’ཏིཨཱདི. ཨིཙྪིཏཱལཱབྷེན རཛནཱིཡེསུ ཝཱ ནིརུདྡྷེསུ ཝཏྠཱུསུ དོམནསྶུཔྤཏྟིཡཱ དོསཔརིལཱ༹ཧཱནཾ སམྦྷཝོ ཝེདིཏབྦོ.

ན ལིམྤཏི ཨནུཔལིཏྟཙིཏྟཏྟཱ. སཱིཏིབྷཱུཏོ ནིབྦུཏསབྦཔརིལཱ༹ཧཏྟཱ. ཨཱསཏྟིཡོ ཝུཙྩནྟི ཏཎྷཱཡོ ཏཏྠ ཏཏྠ ཨཱསཉྫནཊྛེན. དརཐནྟི པརིལཱ༹ཧཛཱཏཾ. ཙེཏསོཏི སཱམིཝཙནཾ.

ཧཏྠཀསུཏྟཝཎྞནཱ ནིཊྛིཏཱ.

༦. དེཝདཱུཏསུཏྟཝཎྞནཱ

༣༦. ཚཊྛེ དེཝདཱུཏཱནཱིཏི ལིངྒཝིཔལླཱསཾ ཀཏྭཱ ཝུཏྟནྟི ཨཱཧ ‘‘དེཝདཱུཏཱ’’ཏི, ཨུབྷཡལིངྒཾ ཝཱ ཨེཏཾ པདཾ, ཏསྨཱ ནཔུཾསཀལིངྒཝསེན པཱལི༹ཡཾ ཝུཏྟསྶ པུལླིངྒཝསེན ཨཏྠདསྶནཾ ཀཏཾ. དེཝོཏི མཙྩཱུཏི ཨབྷིབྷཝནཊྛེན སཏྟཱནཾ ཨཏྟནོ ཝསེ ཝཏྟཱཔནཏོ མཙྩུརཱཛཱ ‘‘དེཝོ’’ཏི ཝུཙྩཏི. ཡཐཱ ཧི དེཝོ པཀཏིསཏྟེ ཨབྷིབྷཝཏི, ཨེཝཾ མཙྩུ སབྦསཏྟེ ཨབྷིབྷཝཏི, ཏསྨཱ དེཝོ ¶ ཝིཡཱཏི དེཝོ. ‘‘ཏསྶ དཱུཏཱ’’ཏི ཝཏྭཱ ཨིདཱནིསྶ དཱུཏེ ཏེསཾ དཱུཏབྷཱཝཉྩ ཝིབྷཱཝེཏུཾ ‘‘ཛིཎྞབྱཱདྷིམཏཱ ཧཱི’’ཏིཨཱདི ཝུཏྟཾ. ཏེན ཙོདནཏྠེན དེཝསྶ དཱུཏཱ ཝིཡཱཏི དེཝདཱུཏཱཏི དསྶེཏི. ‘‘ཨཧཾ ཨསུཀཾ པམདྡིཏུཾ ཨཱགམིསྶཱམི, ཏུཝཾ ཏསྶ ཀེསེ གཧེཏྭཱ མཱ ཝིསྶཛྫེཧཱི’’ཏི མཙྩུདེཝསྶ ཨཱཎཱཀརཱ དཱུཏཱ ཝིཡཱཏི ཧི དཱུཏཱཏི ཝུཙྩནྟི.

ཨིདཱནི སདྡྷཱཏབྦཊྛེན དེཝཱ ཝིཡ དཱུཏཱཏི དེཝདཱུཏཱཏི དསྶེནྟོ ‘‘དེཝཱ ཝིཡ དཱུཏཱ’’ཏིཨཱདིམཱཧ. ཏཏྠ ཨལངྐཏཔྤཊིཡཏྟཱཡཱཏི ཨིདཾ ཨཏྟནོ དིབྦཱནུབྷཱཝཾ ཨཱཝིཀཏྭཱ ཋིཏཱཡཱཏི དསྶནཏྠཾ ཝུཏྟཾ. དེཝཏཱཡ བྱཱཀརཎསདིསམེཝ ཧོཏི ན ཙིརསྶེཝ ཛརཱབྱཱདྷིམརཎསྶ སམྦྷཝཏོ. ཝིསུདྡྷིདེཝཱནནྟི ཁཱིཎཱསཝབྲཧྨཱནཾ. ཏེ ཧི ཙརིམབྷཝེ བོདྷིསཏྟཱནཾ ཛིཎྞཱདིབྷེདཾ དསྶེནྟི, ཏསྨཱ ཨནྟིམབྷཝིཀབོདྷིསཏྟཱནཾ ཝིསུདྡྷིདེཝེཧི ཨུཔཊྛཱཔིཏབྷཱཝཾ ཨུཔཱདཱཡ ཏདཉྙེསམྤི ཏེཧི ཨནུཔཊྛཱཔིཏཱནམྤི ཏཐཱ ཝོཧརིཏབྦཏཱ པརིཡཱཡསིདྡྷཱཏི ཝེདིཏབྦཱ. དིསྭཱཝཱཏི ¶ ཝིསུདྡྷིདེཝེཧི དསྶིཏེ དིསྭཱཝ. ཏཏོཡེཝ ཧི ཏེ ཝིསུདྡྷིདེཝཱནཾ དཱུཏཱ ཝུཏྟཱ.

ཀསྨཱ ཨཱརདྡྷནྟི ཀེཝལཾ དེཝདཱུཏེ ཨེཝ སརཱུཔཏོ ཨདསྶེཏྭཱཏི ཨདྷིཔྤཱཡོ. དེཝཱནཾ དཱུཏཱནཾ དསྶནཱུཔཱཡཏྟཱ ཏཐཱ ཝུཏྟནྟི དསྶེནྟོ ‘‘དེཝདཱུཏཱ…པེ… སམནུཡུཉྫཏཱི’’ཏི ཨཱཧ. ཏཏྠ དེཝདཱུཏཱ…པེ… དསྶནཏྠནྟི དེཝདཱུཏཱནཾ ཨནུཡུཉྫནཊྛཱནཱུཔགསྶ ཀམྨསྶ དསྶནཏྠཾ.

ཨེཀཙྩེ ཐེརཱཏི ཨནྡྷཀཱདིཀེ ཝིཉྙཱཎཝཱདིནོ ཙ སནྡྷཱཡ ཝདཏི. ནེརཡིཀེ ནིརཡེ པཱལེནྟི ཏཏོ ནིགྒནྟུཾ ཨཔྤདཱནཝསེན རཀྑནྟཱིཏི ནིརཡཔཱལཱ. ཨཐ ཝཱ ནིརཡཔཱལཏཱཡ ནེརཡིཀཱནཾ ནིརཡདུཀྑེན པརིཡོནདྡྷཱཡ ཨལཾ སམཏྠཱཏི ནིརཡཔཱལཱ. ཏནྟི ‘‘ནཏྠི ནིརཡཔཱལཱ’’ཏི ཝཙནཾ. པཊིསེདྷིཏམེཝཱཏི ‘‘ཨཏྠི ནིརཡེསུ ནིརཡཔཱལཱ ཨཏྠི ཙ ཀཱརཎིཀཱ’’ཏིཨཱདིནཱ ནཡེན ཨབྷིདྷམྨེ (ཀཐཱ. ༨༦༦) པཊིསེདྷིཏམེཝ. ཡདི ནིརཡཔཱལཱ ནཱམ ན སིཡུཾ, ཀམྨཀཱརཎཱཔི ན བྷཝེཡྻ. སཏི ཧི ཀཱརཎིཀེ ཀམྨཀཱརཎཱཡ བྷཝིཏབྦནྟི ཨདྷིཔྤཱཡོ. ཏེནཱཧ ‘‘ཡཐཱ ཧཱི’’ཏིཨཱདི. ཨེཏྠཱཧ – ‘‘ཀིཾ པནེཏེ ནིརཡཔཱལཱ ནེརཡིཀཱ, ཨུདཱཧུ ཨནེརཡིཀཱ’’ཏི. ཀིཉྩེཏྠ – ཡདི ཏཱཝ ནེརཡིཀཱ ནིརཡསཾཝཏྟནིཡེན ཀམྨེན ནིབྦཏྟཱ, སཡམྤི ནིརཡདུཀྑཾ པཙྩནུབྷཝེཡྻུཾ, ཏཐཱ སཏི ཨཉྙེསཾ ནེརཡིཀཱནཾ གྷཱཏནཱཡ ཨསམཏྠཱ སིཡུཾ, ‘‘ཨིམེ ནེརཡིཀཱ ཨིམེ ནིརཡཔཱལཱ’’ཏི ཝཝཏྠཱནཉྩ ན སིཡཱ. ཡེ ཙ ཡེ གྷཱཏེནྟི, ཏེཧི སམཱནརཱུཔབལཔྤམཱཎེཧི ཨིཏརེསཾ བྷཡསནྟཱསཱ ན སིཡུཾ. ཨཐ ཨནེརཡིཀཱ, ནེསཾ ཏཏྠ ཀཐཾ སམྦྷཝོཏི? ཝུཙྩཏེ – ཨནེརཡིཀཱ ནིརཡཔཱལཱ ཨནིརཡགཏིསཾཝཏྟནིཡཀམྨནིབྦཏྟིཏོ. ནིརཡཱུཔཔཏྟིསཾཝཏྟནིཡཀམྨཏོ ¶ ཧི ཨཉྙེནེཝ ཀམྨུནཱ ཏེ ནིབྦཏྟནྟི རཀྑསཛཱཏིཀཏྟཱ. ཏཐཱ ཧི ཝདནྟི སབྦཏྠིཝཱདིནོ –

‘‘ཀོདྷཱ ཀུརཱུརཀམྨནྟཱ, པཱཔཱབྷིརུཙིནོ ཏཐཱ;

དུཀྑིཏེསུ ཙ ནནྡནྟི, ཛཱཡནྟི ཡམརཀྑསཱ’’ཏི.

ཏཏྠ ཡདེཀེ ཝདནྟི ‘‘ཡཱཏནཱདུཀྑཾ པཊིསཾཝེདེཡྻུཾ, ཨཐ ཝཱ ཨཉྙམཉྙཾ གྷཱཏེཡྻུ’’ནྟིཨཱདི, ཏཡིདཾ ཨསཱརཾ ནིརཡཔཱལཱནཾ ནེརཡིཀབྷཱཝསྶེཝ ¶ ཨབྷཱཝཏོ. ཡདིཔི ཨནེརཡིཀཱ ནིརཡཔཱལཱ, ཨཡོམཡཱཡ པན ཨཱདིཏྟཱཡ སམྤཛྫལིཏཱཡ སཛོཏིབྷཱུཏཱཡ ནིརཡབྷཱུམིཡཱ པརིཀྐམམཱནཱ ཀཐཾ དཱཧདུཀྑཾ ནཱནུབྷཝནྟཱིཏི? ཀམྨཱནུབྷཱཝཏོ. ཡཐཱ ཧི ཨིདྡྷིམནྟོ ཙེཏོཝསིཔྤཏྟཱ མཧཱམོགྒལླཱནཱདཡོ ནེརཡིཀེ ཨནུཀམྤནྟཱ ཨིདྡྷིབལེན ནིརཡབྷཱུམིཾ ཨུཔགཏཱ དཱཧདུཀྑེན ན བཱདྷཱིཡནྟི, ཨེཝཾ སམྤདམིདཾ དཊྛབྦཾ.

ཨིདྡྷིཝིསཡསྶ ཨཙིནྟེཡྻབྷཱཝཏོཏི ཙེ? ཨིདམྤི ཏཾསམཱནཾ ཀམྨཝིཔཱཀསྶ ཨཙིནྟེཡྻབྷཱཝཏོ. ཏཐཱརཱུཔེན ཧི ཀམྨུནཱ ཏེ ནིབྦཏྟཱ ཡཐཱ ནིརཡདུཀྑེན ཨབཱདྷིཏཱ ཨེཝ ཧུཏྭཱ ནེརཡིཀེ གྷཱཏེནྟི, ན ཙེཏྟཀེན བཱཧིརཝིསཡཱབྷཱཝོ ཡུཛྫཏི ཨིཊྛཱནིཊྛཏཱཡ པཙྩེཀཾ དྭཱརཔུརིསེསུཔི ཝིབྷཏྟསབྷཱཝཏྟཱ. ཏཐཱ ཧི ཨེཀཙྩསྶ དྭཱརསྶ པུརིསསྶ ཙ ཨིཊྛཾ ཨེཀཙྩསྶ ཨནིཊྛཾ, ཨེཀཙྩསྶ ཙ ཨནིཊྛཾ ཨེཀཙྩསྶ ཨིཊྛཾ ཧོཏི. ཨེཝཉྩ ཀཏྭཱ ཡདེཀེ ཝདནྟི ‘‘ནཏྠི ཀམྨཝསེན ཏེཛསཱ པརཱུཔཏཱཔན’’ནྟིཨཱདི, ཏདཔཱཧཏཾ ཧོཏི. ཡཾ པན ཝདནྟི ‘‘ཨནེརཡིཀཱནཾ ཏེསཾ ཀཐཾ ཏཏྠ སམྦྷཝོ’’ཏི ནིརཡེ ནེརཡིཀཱནཾ ཡཱཏནཱསབྦྷཱཝབྷཱཝཏོ. ནེརཡིཀསཏྟཡཱཏནཱཡོགྒཉྷི ཨཏྟབྷཱཝཾ ནིབྦཏྟེནྟཾ ཀམྨཾ ཏཱདིསནིཀནྟི ཝིནཱམིཏཾ ནིརཡཊྛཱནེ ཨེཝ ནིབྦཏྟེཏི. ཏེ ཧི ནེརཡིཀེཧི ཨདྷིཀཏརབལཱརོཧཔརིཎཱཧཱ ཨཏིཝིཡ བྷཡཱནཀདསྶནཱ ཀུརཱུརཏརཔཡོགཱ ཙ ཧོནྟི. ཨེཏེནེཝ ཏཏྠ ནེརཡིཀཱནཾ ཝིབཱདྷཀཀཱཀསུནཁཱདཱིནམྤི ནིབྦཏྟིཡཱ ཨཏྠིབྷཱཝོ སཾཝཎྞིཏོཏི དཊྛབྦོ.

ཀཐམཉྙགཏིཀེཧི ཨཉྙགཏིཀབཱདྷནནྟི ཙ ན ཝཏྟབྦཾ ཨཉྙཏྠཱཔི ཏཐཱ དསྶནཏོ. ཡཾ པནེཀེ ཝདནྟི ‘‘ཨསཏྟསབྷཱཝཱ ཨེཝ ནིརཡེ ནིརཡཔཱལཱ ནིརཡེ སུནཁཱདཡོ ཙཱ’’ཏི, ཏམྤེཏེསཾ མཏིམཏྟཾ ཨཉྙཏྠ ཏཐཱ ཨདསྶནཏོ. ན ཧི ཀཱཙི ཨཏྠི ཏཱདིསཱི དྷམྨཔྤཝཏྟི, ཡཱ ཨསཏྟསབྷཱཝཱ, སམྤཏིསཏྟེཧི ཨཔྤཡོཛིཏཱ ཙ ཨཏྠཀིཙྩཾ སཱདྷེནྟཱི དིཊྛཔུབྦཱ. པེཏཱནཾ པཱནཱིཡནིཝཱརཀཱནཾ དཎྜཱདིཧཏྠཱནཉྩ པུརིསཱནཾ སབྦྷཱཝེ ཨསཏྟབྷཱཝེ ཙ ཝིསེསཀཱརཎཾ ནཏྠཱིཏི ཏཱདིསཱནཾ ¶ སབྦྷཱཝེ ཀིཾ པཱཔཀཱནཾ ཝཏྟབྦཾ. སུཔིནོཔགྷཱཏོཔི ཨཏྠཀིཙྩསམཏྠཏཱཡ ཨཔྤམཱཎཾ དསྶནཱདིམཏྟེནཔི ¶ ཏདཏྠསིདྡྷིཏོ. ཏཐཱ ཧི སུཔིནེ ཨཱཧཱརཱུཔབྷོགཱདིནཱ ན ཨཏྠསིདྡྷི, ཨིདྡྷིནིམྨཱནརཱུཔཾ པནེཏྠ ལདྡྷཔརིཧཱརཾ ཨིདྡྷིཝིསཡསྶ ཨཙིནྟེཡྻབྷཱཝཏོ. ཨིདྷཱཔི ཀམྨཝིཔཱཀསྶ ཨཙིནྟེཡྻབྷཱཝཏོཏི ཙེ? ཏཾ ན, ཨསིདྡྷཏྟཱ. ནེརཡིཀཱནཾ ཀམྨཝིཔཱཀོ ནིརཡཔཱལཱཏི སིདྡྷམེཏྟཾ, ཝུཏྟནཡེན པཱལི༹ཏོ ཙ ཏེསཾ སཏྟབྷཱཝོ ཨེཝ སིདྡྷོ. སཀྐཱ ཧི ཝཏྟུཾ སཏྟསངྑཱཏཱ ནིརཡཔཱལསཉྙིཏཱ དྷམྨཔྤཝཏྟི སཱབྷིསནྡྷིཀཔརཱུཔགྷཱཏི ཨཏྠཀིཙྩསབྦྷཱཝཏོ ཨོཛཱཧཱརཱདི རཀྑསསནྟཏི ཝིཡ. ཨབྷིསནྡྷིཔུབྦཀཏཱ ཙེཏྠ ན སཀྐཱ པཊིཀྑིཔིཏུཾ ཏཐཱ ཏཐཱ ཨབྷིསནྡྷིཡཱ གྷཱཏནཏོ. ཏཏོ ཨེཝ ན སངྒྷཱཏཔབྦཏེཧི ཨནེཀནྟིཀཏཱ. ཡེ པན ཝདནྟི ‘‘བྷཱུཏཝིསེསཱ ཨེཝ ཏེ ཝཎྞསཎྛཱནཱདིཝིསེསཝནྟོ བྷེརཝཱཀཱརཱ ནརཀཔཱལཱཏི སམཉྙཾ ལབྷནྟཱི’’ཏི, ཏདསིདྡྷཾ ཨུཛུཀམེཝ པཱལི༹ཡཾ ‘‘ཨཏྠི ནིརཡེ ནིརཡཔཱལཱ’’ཏི ཝཱདསྶ པཏིཊྛཱཔིཏཏྟཱ.

ཨཔིཙ ཡཐཱ ཨརིཡཝིནཡེ ནརཀཔཱལཱནཾ བྷཱུཏམཏྟཏཱ ཨསིདྡྷཱ, ཏཐཱ པཉྙཏྟིམཏྟཝཱདིནོཔི བྷཱུཏམཏྟཏཱ ཨསིདྡྷཱ སབྦསོ རཱུཔདྷམྨཱནཾ ཨཏྠིབྷཱཝསྶེཝ ཨཔྤཊིཛཱནནཏོ. ན ཧི ཏསྶ བྷཱུཏཱནི ནཱམ པརམཏྠཏོ སནྟི. ཡདི པརམཏྠཾ གཧེཏྭཱ ཝོཧརཏི, ཨཐ ཀསྨཱ ཙཀྑུརཱུཔཱདཱིནི པཊིཀྑིཔཏཱིཏི? ཏིཊྛཏེསཱ ཨནཝཊྛིཏཏཀྐཱནཾ ཨཔྤཧཱིནཝིཔལླཱསཱནཾ ཝཱདཝཱིམཾསཱ. ཨེཝཾ ཨཏྠེཝ ནིརཡེ ནིརཡཔཱལཱཏི ནིཊྛམེཏྠ གནྟབྦཾ. སཏི ཙ ནེསཾ སབྦྷཱཝེ ཨསཏིཔི བཱཧིརེ ཝིསཡེ ནརཀེ ཝིཡ དེསཱདིནིཡམོ ཧོཏཱིཏི ཝཱདོ ན སིཛ྄ཛྷཏི, སཏི ཨེཝ པན བཱཧིརེ ཝིསཡེ དེསཱདིནིཡམོཏི དཊྛབྦཾ.

དེཝདཱུཏསརཱཔནཝསེན སཏྟེ ཡཐཱུཔཙིཏེ པུཉྙཀམྨེ ཡམེཏི ནིཡམེཏཱིཏི ཡམོ. ཏསྶ ཡམསྶ ཝེམཱནིཀཔེཏཱནཾ རཱཛབྷཱཝཏོ རཉྙོ. ཏེནཱཧ ‘‘ཡམརཱཛཱ ནཱམ ཝེམཱནིཀཔེཏརཱཛཱ’’ཏི. ཀམྨཝིཔཱཀནྟི ཨཀུསལཀམྨཝིཔཱཀཾ. ཝེམཱནིཀཔེཏཱ ཧི ཀཎྷསུཀྐཝསེན མིསྶཀཾ ཀམྨཾ ཀཏྭཱ ཝིནིཔཱཏིཀདེཝཏཱ ཝིཡ སུཀྐེན ཀམྨུནཱ པཊིསནྡྷིཾ གཎྷནྟི. ཏཐཱ ཧི མགྒཕལབྷཱགིནོཔི ཧོནྟི, པཝཏྟིཡཾ པན ཀམྨཱནུརཱུཔཾ ཀདཱཙི པུཉྙཕལཾ, ཀདཱཙི ཨཔུཉྙཕལཾ པཙྩནུབྷཝནྟི. ཡེསཾ པན ཨརིཡམགྒོ ཨུཔྤཛྫཏི, ཏེསཾ མགྒཱདྷིགམཏོ པཊྛཱཡ པུཉྙཕལམེཝ ཨུཔྤཛྫཏཱིཏི དཊྛབྦཾ. ཨཔུཉྙཕལཾ པུབྦེ ཝིཡ ཀཊུཀཾ ན ཧོཏི, མནུསྶཏྟབྷཱཝེ ཋིཏཱནཾ ¶ ཝིཡ མུདུཀམེཝ ཧོཏཱིཏི ཨཔརེ. དྷམྨིཀོ རཱཛཱཏི ཨེཏྠ ཏསྶ དྷམྨིཀབྷཱཝོ དྷམྨདེཝཔུཏྟསྶ ཝིཡ ཨུཔྤཏྟིནིཡཏོ དྷམྨཏཱཝསེན ཝེདིཏབྦོ. དྭཱརེསཱུཏི ཨཝཱིཙིམཧཱནརཀསྶ ཙཏཱུསུ དྭཱརེསུ. ཁཱིཎཱསཝཱ བྲཱཧྨཎཱ ནཱམ ཨུཀྐཊྛནིདྡེསེན.

ཨནུཡོགཝཏྟནྟི ¶ ཨནུཡོགེ ཀཏེ ཝཏྟིཏབྦཝཏྟཾ. ཨཱརོཔེནྟོཏི ཀཱརཱཔེནྟོ, ཨཏྟནོ པུཙྪཾ ཨུདྡིསྶ པཊིཝཙནཾ དཱཔེནྟོ པུཙྪཏི. པརསྶ ཧི ཨདྷིཔྤཱཡཾ ཉཱཏུཾ ཨིཙྪནྟོ ཏདུཔགཾ པཡོགཾ ཀརོནྟོ པུཙྪཏི ནཱམ. ལདྡྷིནྟི གཱཧཾ. པཏིཊྛཱཔེནྟོཏི ཏཏྠ ནིཙྩཀཱལཾ ཀཱརཱཔེནྟོ. ཀཱརཎཾ པུཙྪནྟོཏི ཡུཏྟིཾ པུཙྪནྟོ. སམནུབྷཱསཏཱིཏི ཡཐཱནུཡུཏྟམཏྠཾ ཝིབྷཱུཏཾ ཀཏྭཱ ཀཐེཏི.

ཛིཎྞནྟི ཛརཱཔཏྟིཡཱ ཛིཎྞཾ. ཨེཀཙྩོ དཧརཀཱལཏོ པཊྛཱཡ པཎྜུརོགཱདིནཱ ཨབྷིབྷཱུཏཀཱཡཏཱཡ ཛིཎྞསདིསོ ཧོཏི, ཨཡཾ ན ཏཐཱ ཛརཱཔཏྟིཡཱ ཛིཎྞོཏི དསྶེཏི. གོཔཱནསཱི ཝིཡ ཝངྐནྟི ཝངྐགོཔཱནསཱི ཝིཡ ཝངྐཾ. ན ཧི ཝངྐབྷཱཝསྶ ནིདསྶནཏྠཾ ཨཝངྐགོཔཱནསཱི གཡ྄ཧཏི. བྷགྒནྟི བྷགྒསརཱིརཾ ཀཊིཡཾ བྷགྒཀཱཡཏྟཱ. ཏེནཱཧ ‘‘ཨིམིནཱཔིསྶ ཝངྐབྷཱཝམེཝ དཱིཔེཏཱི’’ཏི. དཎྜཔཊིསརཎནྟི ཋཱནགམནེསུ དཎྜོ པཊིསརཎཾ ཨེཏསྶཱཏི དཎྜཔཊིསརཎཾ ཏེན ཝིནཱ ཝཏྟིཏུཾ ཨསམཏྠཏྟཱ. ཏེནཱཧ ‘‘དཎྜདུཏིཡ’’ནྟི. ཛརཱཏུརནྟི ཛརཱཡ པཏྠཏསཾཀིལནྟཀཱཡཾ. སབྦསོ ཀིམིཧཏཾ ཝིཡ མཧཱཁལླཱཊཾ སཱིསམསྶཱཏི མཧཱཁལླཱཊསཱིསཾ. སཉྫཱཏཝལིནྟི སམནྟཏོ ཛཱཏཝལིཀཾ. ཛརཱདྷམྨོཏི ཛརཱཔཀཏིཀོ. ཏེནཱཧ ‘‘ཛརཱསབྷཱཝོ’’ཏི. སབྷཱཝོ ཙ ནཱམ ཏེཛོདྷཱཏུཡཱ ཨུཎྷཏཱ ཝིཡ ན ཀདཱཙི ཝིགཙྪཏཱིཏི ཨཱཧ ‘‘ཨཔརིམུཏྟོ ཛརཱཡཱ’’ཏིཨཱདི.

ཨཏྠཏོ ཨེཝཾ ཝདཏི ནཱམ, ཝཱཙཱཡ ཨཝདནྟོཔི ཨཏྠཱཔཏྟིཏོ ཨེཝཾ ཝདནྟོ ཝིཡ ཧོཏི ཝིཉྙཱུནནྟི ཨཏྠོ. ཏརུཎོ ཨཧོསིཾ ཡོབྦནེན སམནྣཱགཏོ. ཨཱུརཱུནཾ བལཾ ཨེཏསྶ ཨཏྠཱིཏི ཨཱུརུབལཱི. ཏེན དཱུརེཔི གམནཱགམནལངྒྷནཱདིསམཏྠཏཾ དསྶེཏི, བཱཧུབལཱིཏི པན ཨིམིནཱ ཧཏྠེཧི ཀཱཏབྦཀིཙྩསམཏྠཏཾ, ཛཝགྒཧཎེན ཝེགསཱ པཝཏྟིསམཏྠཏཾ. ཨནྟརཧིཏཱཏི ནཊྛཱ. ཨེཏྠ ཙ ན ཁོ པནཱཧནྟིཨཱདི ཛརཱཡ དེཝདཱུཏབྷཱཝདསྶནཾ. ཏེནཱཧ ‘‘ཏེནེས དེཝདཱུཏོ ནཱམ ཛཱཏོ’’ཏི. ཨཱབཱདྷསྶ ¶ ཨཏྠིཏཱཡ ཨཱབཱདྷིཀཾ. ཝིཝིདྷཾ དུཀྑཾ ཨཱདཧཏཱིཏི བྱཱདྷི, ཝིསེསེན ཝཱ ཨཱདྷིཡཏི ཨེཏེནཱཏི བྱཱདྷི, བྱཱདྷི སཾཛཱཏོ ཨེཏསྶཱཏི བྱཱདྷིཏཾ. ཨེས ནཡོ དུཀྑིཏནྟི ཨེཏྠཱཔི.

དུཏིཡཾ དེཝདཱུཏནྟི ཨེཏྠཱཔི ཝུཏྟནཡེནེཝ ཨཏྠོ ཝེདིཏབྦོ. བྱཱདྷིནཱ ཨབྷིཧཏོཏི བྱཱདྷིནཱ བཱདྷིཏོ, ཨུཔདྡུཏོཏི ཨཏྠོ.

ཝིཔརིབྷིནྣཝཎྞོཏི ཝིཔརིབྷིནྣནཱིལཝཎྞོ. ཏཉྷི ཡཏྠ ཡཏྠ གཧིཏཔུབྦཀཾ, ཏཏྠ ཏཏྠ པཎྜུཝཎྞཾ, མཾསུསྶདཊྛཱནེ རཏྟཝཎྞཾ, ཡེབྷུཡྻེན ཙ ནཱིལསཱཊཀཔཱརུཏཾ ཝིཡ ཧོཏི. ཏེན ཝུཏྟཾ ‘‘ཝིཔརིབྷིནྣནཱིལཝཎྞོ’’ཏི.

‘‘ཀོ ¶ ལབྷཏི, ཀོ ན ལབྷཏཱི’’ཏི ནིརཡུཔགསྶེཝ ཝསེནཱཡཾ ཝིཙཱརཎཱཏི ‘‘ཡེན ཏཱཝ བཧུ པཱཔཾ ཀཏ’’ནྟིཨཱདི ཨཱརདྡྷཾ. བཧུ པཱཔཾ ཀཏནྟི བཧུསོ པཱཔཾ ཀཏཾ. ཏེན པཱཔསྶ བཧུལཱིཀརཎམཱཧ. བཧཱུཏི ཝཱ མཧནྟཾ. མཧཏྠོཔི ཧི བཧུསདྡོ དིསྶཏི ‘‘བཧུ ཝཏ ཀཏཾ ཨསྶཱ’’ཏིཨཱདཱིསུ, གརུཀནྟི ཝུཏྟཾ ཧོཏི. སོ གརུཀཾ བཧུལཾ ཝཱ པཱཔཾ ཀཏྭཱ ཋིཏོ ནིརཡེ ནིབྦཏྟཏིཡེཝ, ན ཡམཔུརིསེཧི ཡམསྶ སནྟིཀཾ ནཱིཡཏཱིཏི. པརིཏྟནྟི པམཱཎཔརིཏྟཏཱཡ ཀཱལཔརིཏྟཏཱཡ ཙ པརིཏྟཾ. པུརིམསྨིཾ ཨཏྠེ ཨགརཱུཏི ཨཏྠོ, དུཏིཡསྨིཾ ཨབཧུལནྟི. ཡཐཱཝུཏྟམཏྠཾ ཨུཔམཱཡ ཝིབྷཱཝེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. ཀཏྟབྦམེཝ ཀརོནྟཱིཏི དཎྜམེཝ ཀརོནྟི. ཨནུཝིཛྫིཏྭཱཏི ཝཱིམཾསིཏྭཱ. ཝིནིཙྪཡཊྛཱནནྟི ཨཊྚཀརཎཊྛཱནཾ. པརིཏྟཔཱཔཀམྨཱཏི དུབྦལཔཱཔཀམྨཱ. ཨཏྟནོ དྷམྨཏཱཡཱཏི པརེཧི ཨསཱརིཡམཱནེཔི ཨཏྟནོ དྷམྨཏཱཡ སརནྟི. ཏེ ཧི པཱཔཀམྨསྶ དུབྦལབྷཱཝཏོ ཀཏཱུཔཙིཏསྶ ཙ ཨོཀཱསཱརཧཀུསལཀམྨསྶ བལཝབྷཱཝཏོ ཨཏྟནོ དྷམྨཏཱཡཔི སརནྟི. སཱརིཡམཱནཱཔཱིཏི ‘‘ཨིདཾ ནཱམ ཏཡཱ ཀཏཾ པུཉྙཀམྨ’’ནྟི པརེཧི སཱརིཡམཱནཱཔི.

ཨཱཀཱསཙེཏིཡནྟི གིརིསིཁརེ ཨབྦྷོཀཱསེ ཝིཝཊངྒཎེ ཀཏཙེཏིཡཾ. རཏྟཔཊེནཱཏི རཏྟཝཎྞེན པཊེན པཱུཛེསི པཊཱཀཾ ཀཏྭཱ. ཨགྒིཛཱལསདྡནྟི པཊཔཊཱཡནྟཾ ནརཀེ ཨགྒིཛཱལསདྡཾ སུཏྭཱཝ. ཨཏྟནཱ པཱུཛིཏཔཊཾ ཨནུསྶརཱིཏི ཏདཱ པཊཱཀཱཡ ཝཱཏཔྤཧཱརསདྡེ ནིམིཏྟསྶ གཧིཏཏྟཱ ‘‘མཡཱ ཏདཱ ཨཱཀཱསཙེཏིཡེ པཱུཛིཏརཏྟཔཊསདྡོ ཝིཡཱ’’ཏི ཨཏྟནཱ པཱུཛིཏཔཊཾ ཨནུསྶརི.

སུམནཔུཔྥཀུམྦྷེནཱཏི ¶ ཀུམྦྷཔརིམཱཎེན སུམནཔུཔྥརཱསིནཱ. ‘‘དསཱདྷིཀཾ ནཱལི༹སཧསྶཀུམྦྷ’’ནྟི ཀེཙི, ‘‘པཉྩཨམྦཎ’’ནྟི ཨཔརེ. ཏཱིཧིཔི ན སརཏི བལཝཏོ པཱཔཀམྨེན བྱཱམོཧིཏོ. ཏུཎྷཱི ཨཧོསཱིཏི ‘‘ཀམྨཱརཧོ ཨཡ’’ནྟི ཏཏྠ པཊིཀཱརཾ ཨཔསྶནྟོ ཏུཎྷཱི ཨཧོསི.

ཨེཀཔཀྑཙྪདནམཏྟཱཧཱིཏི མཛ྄ཛྷིམཔྤམཱཎསྶ གེཧསྶ ཨེཀཙྪདནཔྤམཱཎེཧི. སུཏྟཱཧཏཾ ཀརིཏྭཱཏི ཀཱལ༹སུཏྟཾ པཱཏེཏྭཱ. ཡཐཱ རཐོ སབྦསོ པཛྫལིཏོ ཧོཏི ཨཡོམཡོ, ཨེཝཾ ཡུགཱདཡོཔིསྶ པཛྫལིཏཱ སཛོཏིབྷཱུཏཱ ཨེཝ ཧོནྟཱིཏི ཨཱཧ ‘‘སདྡྷིཾ…པེ… རཐེ ཡོཛེཏྭཱ’’ཏི. མཧཱཀཱུཊཱགཱརཔྤམཱཎནྟི སཏྟབྷཱུམཀམཧཱཀཱུཊཱགཱརཔྤམཱཎཾ.

ཝིབྷཏྟོཏི སཏྟཱནཾ སཱདྷཱརཎེན པཱཔཀམྨུནཱ ཝིབྷཏྟོ. ཧཱིནཾ ཀཱཡནྟི ཧཱིནཾ སཏྟནིཀཱཡཾ, ཧཱིནཾ ཝཱ ཨཏྟབྷཱཝཾ. ཨུཔཱདཱནེཏི ཙཏུབྦིདྷེ ཨུཔཱདཱནེ. ཨཏྠཏོ པན ཏཎྷཱདིཊྛིགྒཱཧོཏི ཨཱཧ ‘‘ཏཎྷཱདིཊྛིགྒཧཎེ’’ཏི ¶ . སམྦྷཝཏི ཛརཱམརཎཾ ཨེཏེནཱཏི སམྦྷཝོ, ཨུཔཱདཱནནྟི ཨཱཧ ‘‘ཛཱཏིཡཱ ཙ མརཎསྶ ཚ ཀཱརཎབྷཱུཏེ’’ཏི. ཨནུཔཱདཱཏི ཨནུཔཱདཱཡ. ཏེནཱཧ ‘‘ཨནུཔཱདིཡིཏྭཱ’’ཏི. སཀལཝཊྚདུཀྑཾ ཨཏིཀྐནྟཱཏི ཙརིམཙིཏྟནིརོདྷེན ཝཊྚདུཀྑསྶ ཀིལེསཱནམྤི ཨསམྦྷཝཏོ སབྦཾ ཝཊྚདུཀྑཾ ཨཏིཀྐནྟཱ.

དེཝདཱུཏསུཏྟཝཎྞནཱ ནིཊྛིཏཱ.

༧. ཙཏུམཧཱརཱཛསུཏྟཝཎྞནཱ

༣༧. སཏྟམེ ཨམཱ སཧ ཝཏྟནྟི ཏསྨིཾ ཏསྨིཾ ཀིཙྩེཏི ཨམཙྩཱ, སཧིཏཱ. པརིསཏི བྷཝཱཏི པཱརིསཛྫཱ, པརིཝཱརཊྛཱནིཡཱ པརིསཱཔརིཡཱཔནྣཱ. ཏེནཱཧ ‘‘པརིཙཱརིཀདེཝཏཱ’’ཏི. ཏཱཏཱཏི ཨཱལཔནཾ. ཨེཝནྟི ‘‘ཀཙྩི བཧཱུ མནུསྶཱ’’ཏིཨཱདིནཱ ཝུཏྟཱཀཱརེན. ཨཊྛ ཝཱརེཏི ཨེཀསྨིཾ ཨཌྜྷམཱསེ ཙཏུཀྑཏྟུཾ ཏཐཱ ཨིཏརསྨིནྟི ཨེཝཾ ཨཊྛ ཝཱརེ. ཨདྷིཊྛཧནྟཱིཏི ཨདྷིཏིཊྛནྟི. པཊིཛཱགརོནྟཱིཏི པཊི པཊི ཛཱགརོནྟི. པུཉྙཾ ཀརོནྟཱ ཧི སཏྟཱ ཛཱགརོནྟི ནཱམ ཀཱཏབྦཀིཙྩཔྤསུཏཏྟཱ, ཨིཏརེ པན སུཔནྟི ནཱམ སཧིཏཔརཧིཏཝིམུཏྟཏྟཱ. ཙཱཏུདྡསིཨུཔོསཐསྶ ཨནུགམནཾ ཝིཡ པནྣརསིཨུཔོསཐསྶ པཙྩུགྒམནཾ ན ལབྦྷཏི དིཝསཱབྷཱཝཏོ.

ཏཏོཏི ¶ ཏཏོ ཏཏོ. ཏཾ ཨུཔནིསྶཱཡཱཏི ཏཱ ཏཱ གཱམནིགམརཱཛདྷཱནིཡོ ཨུཔནིསྶཱཡ. ཨདྷིཝཏྠཱཏི ཨཱརཱམཝནརུཀྑཱདཱིསུ ཨདྷིཝཏྠཱ དེཝཏཱ. ཏེཏི ཏེ དེཝཱ. སནྡྷཱཡ ཀཐེཏཱིཏི བྷགཝཱ ཀཐེཏི. ཝུཏྟནྟི ཨཊྛཀཐཱཡཾ ཝུཏྟཾ.

ནིཙྩཾ ནིབདྡྷཾ ཨུཔོསཐོ སཾཝཙྪརེ སཾཝཙྪརེ པཊི པཊི ཧརིཏབྦཏོ པཝཏྟེཏབྦཏོ པཱཊིཧཱརིཡཔཀྑོ ནཱམ. གུཎངྒེཧཱིཏི ཨུཔོསཐངྒེཧི.

ཝུཏྠཝཱསོཏི ཝུསིཏབྲཧྨཙརིཡཝཱསོ. ཀཏྟབྦཀིཙྩནྟི དུཀྑཱདཱིསུ པརིཉྙཱཏཱདིཀིཙྩཾ. ཨོཏཱརེཏྭཱཏི ཚཌྜེཏྭཱ. པརིཀྑཱིཎབྷཝསཾཡོཛནོཏི སབྦསོ ཁཱིཎབྷཝབནྡྷནོ. ཀཱརཎེན ཛཱནིཏྭཱཏི ཝིཔསྶནཱཔཉྙཱསཧིཏཱཡ མགྒཔཉྙཱཡ ཙཏྟཱརི ཨརིཡསཙྩཱནི ཛཱནིཏྭཱ.

ཛཱནནྟོཏི ‘‘ཨརཧནྟཱནཾ ཨནུཀརཎཔྤཊིཔཏྟི ཨེསཱ, ཡདིདཾ སམྨདེཝ ཨུཔོསཐཱནུཊྛཱན’’ནྟི ཨེཝཾ ཨུཔོསཐཀམྨསྶ གུཎཾ ཛཱནནྟོ. ཨེཝརཱུཔེནཱཏི ཡཱདིསོ བྷགཝཏོ ཨུཔོསཐབྷཱཝོ ཝིཧིཏོ, ཨེཝརཱུཔེན ¶ ཨརཧནྟཱནུཀརཎེན ཨུཔོསཐཀམྨེན. སཀྐཱ པཧིཏཏྟོ ཝིཔསྶནཾ ཨུསྶུཀྐཱཔེཏྭཱ ཁཱིཎཱསཝསམྤཏྟིཾ པཱཔུཎིཏུཾ. ཨཊྛམཾ ཨུཏྟཱནཏྠམེཝ སཏྟམེ ཝུཏྟནཡཏྟཱ.

ཙཏུམཧཱརཱཛསུཏྟཝཎྞནཱ ནིཊྛིཏཱ.

༩. སུཁུམཱལསུཏྟཝཎྞནཱ

༣༩. ནཝམེ ནིདྡུཀྑོཏི ཀཱཡིཀཙེཏསིཀདུཀྑཝིརཧིཏོ. སདུཀྑེ ཧི སཝིགྷཱཏེ སུཁུམཱལཏྟཱ ཨནཝསརཱ, ཏསྨཱ སུཁིཏོ ནིདྡུཀྑཏཱཡ སུཁུམཱལོ ནཱམ. ཡཱཝསྶ སུཁུམཱལཏྟཱ པརམུཀྐཾསགཏཱཏི ཨཱཧ ‘‘པརམསུཁུམཱལོ’’ཏི. ཨཏིཝིཡ སུཁུམཱལོཏི ཨཏྠོ. ཨནྟམཏཱིཏཾ ཨཙྩནྟཾ. སབྦདཱ སུཁུམཱལོཏི ཨཱཧ ‘‘སཏཏནིདྡུཀྑོ’’ཏི. ཙརིཡཀཱལེཏི བོདྷིཙརིཡཱཡ ཙརཎཀཱལེ. ཏེནཱཏི བོདྷིསཏྟེན. ཨཉྙཏྠ པན པདུམནྟི རཏྟཾ ཀམལཾ. པུཎྜརཱིཀནྟི སེཏཾ ཝུཙྩཏི. ཨིཏརཱཏི ཨིཏརཔོཀྑརཎིཡོ. ‘‘བོདྷིསཏྟསྶ ཀིརཱ’’ཏིཨཱདིཀཾ པོཀྑརཎཱིནཾ ¶ ཨུཔྤཏྟིདསྶནཾ. ཀུདྡཱལཀམྨཀཱརེཏི ཁཎཀེ. པོཀྑརཎིཊྛཱནཱནཱིཏི པོཀྑརཎིཁཎནཡོགྒཊྛཱནཱནི. གཎྷཱཔེསཱིཏི ཁཎཱཔེསི. པོཀྑརཎིསདྡོ ཙེཏྠ ཏཱདིསེ ཛལཱསཡེ ནིརུལ༹ྷོ དཊྛབྦོ པངྐཛཱདིསདྡཱ ཝིཡ. སོཔཱནབཱཧུཀཱནཾ མཏྠཀཊྛཱནཾ ཨུཎྷཱིསནྟི ཨདྷིཔྤེཏཾ. ཨུདཀསེཙནནཱལི༹ཀཱཏི ཨུདཀཙྪཊཱཝིསྶཛྫནནཱལི༹ཡནྟཱནི. པཉྩཝིདྷཱཏི ཝཎྞཝསེན ཛཱཏིཝསེན ཙ.

ཁོ པནསྶཱཏི ནིཔཱཏམཏྟཾ. ཀཱསིཀ-སདྡོ ཨཏིཝིཡ སཎྷེ སུཁུམེ མཧགྒྷཝཏྠེ ནིརུལ༹ྷོ, ཨཉྙསྨིམྤི ཏཐཱཛཱཏིཀེ རུལ༹ྷིཝསེན པཝཏྟཏཱིཏི དཊྛབྦཾ. ཏེནཱཧ ‘‘ཨཀཱསིཀཾ ཙནྡན’’ནྟི. ཧེམནྟེ ཝཱསོ ཧེམནྟཾ, ཧེམནྟཾ ཨརཧཏཱིཏི ཧེམནྟིཀོ, པཱསཱདོ. ‘‘ཨིཏརེསུཔི ཨེསེཝ ནཡོ’’ཏི ཝཏྭཱ ཏདེཝ ནེསཾ ཨརཧཏཾ དསྶེཏུཾ ‘‘ཏཏྠ ཧེམནྟིཀོ’’ཏིཨཱདི ཝུཏྟཾ. སཛཱལཱནཱིཏི སཛཱལཝཱཏཔཱནཱནི, ཨུདཀཡནྟཱནཱིཏི ཨུདཀདྷཱརཱཝིསྶནྡནཀཡནྟཱནི. པཱསཱདམཏྠཀེཏི པཱསཱདསྶ ཨུཔརིཨཱཀཱསཏལེ. བནྡྷིཏྭཱཏི པཡོཛིཏཡནྟེ སུཀྑམཧིཾསཙམྨཾ བནྡྷིཏྭཱ. ཡནྟཾ པརིཝཏྟེཏྭཱཏི ཡཐཱཔཡོཛིཏཾ ཡནྟཾ པཱསཱཎཱརོཔནཏྠཉྩེཝ པུན ཏེསཾ ཝིསྶཛྫནཏྠཉྩ པརིཝཏྟེཏྭཱ. ཏསྨིཾ ཝིསྶཛྫེནྟཱིཏི ཚདནཔིཊྛེ བདྡྷསུཀྑམཧིཾསཙམྨེ ཝིསྶཛྫེནྟི.

སཧསྶཐཱམནྟི པུརིསསཧསྶབལཾ, པུརིསསཧསྶེན ཝཧིཏབྦབྷཱརཝཧཾ. པལླངྐེ ནིསིནྣོཝཱཏི རཏནམཡཔལླངྐེ ཡཐཱནིསིནྣོ ཨེཝ. ཨུཔྤཏནཱཀཱརཔཏྟནྟི ཨུཔྤཏིཏྭཱ ཋིཏཾ ཝིཡ. ཛིཡཾ པོཐེནྟསྶཱཏི ཛིཡཱགྷཱཏཾ ཀརོནྟསྶ. ཛིཡཔྤཧཱརསདྡོཏི ཛིཡཱགྷཱཏསདྡོ. ཡནྟེ བདྡྷནྟི ཡནྟབདྡྷཾ ཀཏྭཱ ¶ ཋཔིཏཾ. སདྡནྟརེཏི ཐཱམམཛ྄ཛྷིམསྶ པུརིསསྶ སདྡསཝནཊྛཱནེ. གཱཝུཏསྶ ཙཏུཏྠོ བྷཱགོ ཀོསོཏིཔི ཝུཙྩཏི དྭིསཧསྶདཎྜཔྤམཱཎཊྛཱནཾ.

སབྦཊྛཱནཱནཱིཏི མཧཱཔུརིསསྶ ཏཱནི ཏཱནི སབྦཱནི ཝསནཊྛཱནཱནི. སིཁཱབདྡྷོཏི པུརིསསབྷཱཝསྶེཝ ཝིསེསཏོ དསྶནམེཏཾ. ན ཨུཔྤིལཱཝིཏབྷཱཝཏྠནྟི ཨུཔྤིལཱཝིཏབྷཱཝསངྑཱཏཾ ཨཏྠཾ ན ཀཐེསཱིཏི ཨཏྠོ. ཏསྶ ཧི བོདྷིམཱུལེཡེཝ སེཏུགྷཱཏོ. ཏེནེཝཱཏི ཨཔྤམཱདལཀྑཎསྶ ¶ དཱིཔནཏོ ཨེཝ. ཨཏྟཱནཾ ཨཏིཀྐམིཏྭཱཏི ཨཏྟནོ ཛརཱཔཏྟིཾ ཨཙིནྟེཏྭཱ ཨཊྚཱིཡཏི. ན པནེས མགྒེན པཧཱིནོ ཏདཱ མགྒསྶ ཨནདྷིགཏཏྟཱ. སིཀྑཾ པཊིཀྑིཔིཏྭཱཏི ཡཐཱསམཱདིནྣསིཀྑཾ པཧཱཡ.

ཨཝིཔརཱིཏབྱཱདྷིཨཱདིསབྷཱཝཱཝཱཏི ཨེཀནྟེན བྱཱདྷིཨཱདིསབྷཱཝཱ ཨེཝ. ཨེཝཾ ཛིགུཙྪཱཝིཧཱརེནཱཏི ཨེཝཾ སཀལསྶེཝ ཝཊྚདུཀྑསྶ ཛིགུཙྪནཝིཧཱརེན ཝིཧརནྟསྶ. ཨེཝཾ ཛིགུཙྪནནྟི ཨེཝཾ པརསྶ ཛིགུཙྪནཾ. པརཾ ཨཛིགུཙྪམཱནོཏི ཀརུཎཱཡནེན ཨེཝཾ པརཾ ཨཛིགུཙྪནྟོ. ཨབྷིབྷོསྨཱིཏི ཨབྷིབྷཝིཏཱ ཨསྨི. ཨུསྶཱཧོ ཨཧཱུཏི ཙཏུརངྒསམནྣཱགཏཾ ཝཱིརིཡམེཝ ཙཏུབྦིདྷསམྨཔྤདྷཱནཝཱིརིཡཉྩ ཨཧོསི, ཡེན མགྒབྲཧྨཙརིཡཔརཱཡཎོ ཛཱཏོ.

སུཁུམཱལསུཏྟཝཎྞནཱ ནིཊྛིཏཱ.

༡༠. ཨཱདྷིཔཏེཡྻསུཏྟཝཎྞནཱ

༤༠. དསམེ ཨབྷིབྷཝིཏྭཱ པཝཏྟནཊྛེན ཨདྷིཔཏི ཡཾ ཀིཉྩི ཛེཊྛཀཾ ན ཀཱརཀཾ ཨཏྟཱནཾ ཨདྷིཔཏཱིཏི ཀཏྭཱ ཨཏྟཱ ཨེཝ ཨདྷིཔཏི, ཏཏོ ཨཱགཏཾ ཨཏྟཱདྷིཔཏེཡྻཾ. ཏེནཱཧ ‘‘ཨཏྟཱན’’ནྟིཨཱདི. ལོཀནྟི སཏྟལོཀཾ. སོ ཙ ཁོ ཨིདྡྷིཝིདྷཱདིགུཎཝིསེསཡུཏྟོ ཨདྷིཔྤེཏོ ཨདྷིཔཏིབྷཱཝསྶ ཨདྷིཔྤེཏཏྟཱ. ནཝཝིདྷཾ ལོཀུཏྟརདྷམྨནྟི ཨུཀྐཊྛནིདྡེསེན ཝུཏྟཾ. ཨིཏི བྷཝོཏི ཨེཝཾ སམྤཏྟིབྷཝོ, ཏཏྠ ཨེཝཾ ཨབྷིཝུདྡྷཱིཏི. སམྤཏྟིབྷཝསྶ ཧེཏཱུཏི ཏཾཏཾསམྤཏྟིབྷཝསྶ ཏཏྠ ཙ ཨབྷིཝུདྡྷིཡཱ ཧེཏུ. ཛཱཏིནིམིཏྟསྶ ཀམྨབྷཝསྶ ཀཏཱུཔཙིཏཏྟཱ ཛཱཏི ཨནྟོཔཝིཊྛཱ. ཛརཱདཱིསུཔི ཨེསེཝ ནཡོ ཧེཏུསིདྡྷིཡཱ ཕལསིདྡྷིཏོ.

ཨསལླཱིནནྟི ན སངྐོཙཔྤཏྟཾ. ཨུཔཊྛིཏཱཏི ཀཱཡཱདིསབྷཱཝསལླཀྑཎཝསེན ཨུཔཊྛིཏཱ. ཨསམྨུཊྛཱ སམྨོསཱབྷཱཝཏོ. ཨསཱརདྡྷོཏི སཱརམྦྷསྶ སཱརམྦྷཧེཏཱུནཉྩ ཝིཀྑམྦྷནེན ཨསཱརདྡྷོ. ཨེཀགྒཾ ¶ ཨནེཀགྒབྷཱཝསྶ དཱུརསམུསྶཱཔིཏཏྟཱ. ནིམྨལཾ ཀཏྭཱཏི རཱགཱདིམལཱནཾ ཨཔནཡནེན མལརཧིཏཾ ཀཏྭཱ. གོཔཱཡཏཱིཏི སཾཀིལེསཱནཏྠཏོ རཀྑཏི. ཨཡནྟི ཨེཝཾཔཊིཔནྣོ བྷིཀྑུ. སུདྡྷམཏྟཱནཾ པརིཧརཏི ཨསུདྡྷབྷཱཝསྶ ཀིལེསསྶཔི ཨབྷཱཝཏོ.

ཨཏིཀྐམིཏྭཱ ¶ མཉྙསཱིཏི ཨསཀྑིཾ ཀཏྭཱ མཉྙསི. ཏཱཡ ཏཎྷཱཡ ནིབྦཏྟོཏི ཏམྨཡོ, ཏཎྷཱཝསིཀོ. ཏསྶ བྷཱཝོ ཏམྨཡཏཱ, ཏསྶཱ ཏམྨཡཏཱཡ ཨབྷཱཝེན. ན ཧཱཡཏི པཉྙཱདིགུཎཝེཔུལླཔྤཏྟིཡཱ.

ཨཱདྷིཔཏེཡྻསུཏྟཝཎྞནཱ ནིཊྛིཏཱ.

དེཝདཱུཏཝགྒཝཎྞནཱ ནིཊྛིཏཱ.

༥. ཙཱུལ༹ཝགྒོ

༡. སམྨུཁཱིབྷཱཝསུཏྟཝཎྞནཱ

༤༡. པཉྩམསྶ པཋམེ སམྨུཁོ བྷཝཏི ཡེན སོ སམྨུཁཱིབྷཱཝོ, པུརཏོ ཝིཛྫམཱནཏཱ, ཏསྨཱ སམྨུཁཱིབྷཱཝཱ. པུཉྙཀམྨནྟི དཱནསངྑཱཏཾ པུཉྙཀམྨཾ. དྭེ དྷམྨཱ སུལབྷཱ བཱཧིརཏྟཱ ཡཐཱསཀཾ པཙྩཡསམཝཱཡེན ལབྦྷནཏོ. སདྡྷཱ པན དུལླབྷཱ པཙུརཛནསྶ ཨནཝཊྛིཏཀིཙྩཏྟཱ. ཏེནེཝཱཧ ‘‘པུཐུཛྫནསྶཱ’’ཏིཨཱདི.

སམྨུཁཱིབྷཱཝསུཏྟཝཎྞནཱ ནིཊྛིཏཱ.

༢. ཏིཋཱནསུཏྟཝཎྞནཱ

༤༢. དུཏིཡེ མཙྪརིཡམེཝ མལཾ མཙྪརིཡམལཾ, ཙིཏྟསྶ མལཱིནསབྷཱཝཱཔཱདནཏོ ཝིགཏཾ མཙྪརིཡམལཾ ཨེཏྠཱཏི ཝིགཏམཙྪརིཡམལཾ. གེདྷཱབྷཱཝེན ཀོཙི ཀིཉྩི དེནྟོཔི ཏཏྠ ཨཱསཏྟིཾ ན ཝིསྶཛྫེཏི, ཨཡཾ པན ན ཏཱདིསོཏི ཨཱཧ ‘‘ཝིསྶཊྛཙཱགོ’’ཏི. མལཱིནཧཏྠོཝ ཙིཏྟཝིསུདྡྷིཡཱ ¶ ཨབྷཱཝཏོ. དྷོཏཧཏྠོཝ དྷོཏཧཏྠེན ཀཱཏབྦཀིཙྩསཱདྷནཏོ. ཏེན ཝུཏྟཾ – ‘‘ཙིཏྟེ སུདྡྷེ ཝིསུཛ྄ཛྷནྟི, ཨིཏི ཝུཏྟཾ མཧེསིནཱ’’ཏི. ཡཱཙིཏུཾ ཡུཏྟོ ཡཱཙཀཱནཾ མནོརཐཔཱུརཎཏོ. ཡཱཙཡོགོ པཡོགཱསཧེཧི ཡཱཙཀེཧི སུཊྛུ ཡུཏྟབྷཱཝཏོ. ཏཾསམངྒཱི ཨེཝ ཏཏྠ རཏོ ནཱམ, ན ཙིཏྟམཏྟེནེཝཱཏི ཨཱཧ ‘‘དཱནཾ…པེ… རཏོ ནཱམ ཧོཏཱི’’ཏི.

‘‘ཨུཙྩཱ, བྷནྟེ’’ཏི ཝཏྭཱ ཨཡཾ མཾ ཨུཙྩཏོ ཝདཏཱིཏི ཙིནྟེཡྻཱཏི པུན ‘‘ནཱཏིཨུཙྩཱ ཏུམྷེ’’ཏི ཨཱཧ, སརཱིརེནཱཏི ཨདྷིཔྤཱཡོ. མེཙཀཝཎྞསྶཱཏི ནཱིལོབྷཱསསྶ. པུཙྪཱིཏི བྷིཀྑཱུ པུཙྪི. བྷཱུམིཡཾ ལེཁཾ ལིཁནྟོ ཨཙྪཱིཏི པཋམཾ ¶ མཉྩེ ནིཔཛྫིཏྭཱ ཨུཊྛཱཡ བྷཱུམིཡཾ ལེཁཾ ལིཁནྟོ ཨཙྪི ‘‘ཨཁཱིཎཱསཝོཏི མཉྙནཱ ཧོཏཱུ’’ཏི. ཏཐཱ ཧི རཱཛཱ ཁཱིཎཱསཝསྶ ནཱམ…པེ… ནིཝཏྟི. དྷཛཔགྒཧིཏཱཝཱཏི པགྒཧིཏདྷཛཱཝ. སིལཱཙེཏིཡཊྛཱནནྟི ཐཱུཔཱརཱམསྶ ཙ མཧཱཙེཏིཡསྶ ཙ ཨནྟརེ སིལཱཡ ཀཏཙེཏིཡཊྛཱནཾ. ཙེཏིཡཾ…པེ… ཨཊྛཱསི སཱཝཀསྶ ཏཾ ཀཱུཊཱགཱརནྟི ཀཏྭཱ.

པཙྪཱབྷཱགེནཱཏི དྷམྨཀཐིཀསྶ ཐེརསྶ པིཊྛིཔསྶེན. གོནསོཏི མཎྜལསཔྤོ. དྷམྨསྶཝནནྟརཱཡ བཧཱུནཾ སགྒམགྒཔྤཊིལཱབྷནྟརཱཡོ བྷཝེཡྻཱཏི ཨདྷིཔྤཱཡེན ‘‘དྷམྨསྶཝནནྟརཱཡཾ ན ཀརིསྶཱམཱི’’ཏི ཙིནྟེསི. ཝིསཾ ཝིཀྑམྦྷེཏྭཱཏི ཝིཔསྶནཱཏེཛེན ཝིསཝེགཾ ཝིཀྑམྦྷེཏྭཱ. གཱཐཱསཧསྶནྟི གཱཐཱསཧསྶཝནྟཾ. པཊྛཱནགཱཐཱཡཱཏི པཊྛཱཔནགཱཐཱཡ, ཨཱདིགཱཐཱཡཱཏི ཨཏྠོ. པཊྛཱན…པེ… ཨཝསཱནགཱཐཾ ཨེཝ ཝཝཏྠཔེསི, ན དྭིནྣཾ ཨནྟརེ ཝུཏྟཾ ཀིལནྟཀཱཡཏྟཱ. སརབྷཱཎཾ སཱཡནྷདྷམྨཀཐཱ. པགྒཎྷཱཏཱིཏི པཙྩཀྑཾ ཀརོནྟཱི གཎྷཱཏི, སཀྐཙྩཾ སུཎཱཏཱིཏི ཨཏྠོ. དྷམྨཀཐནདིཝསེ དྷམྨཀཐིཀཱནཾ ཨཀིལམནཏྠཾ སདྡྷཱ ཨུཔཱསཀཱ སིནིདྡྷབྷོཛནཾ མདྷུཔཱནཀཉྩ དེནྟི སརསྶ མདྷུརབྷཱཝཱཡ སཔྤིམདྷུཀཏེལཱདིཉྩ བྷེསཛྫཾ. ཏེནཱཧ ‘‘ཨརིཡཝཾསཾ ཀཐེསྶཱམཱི’’ཏིཨཱདི. ཙཏཱུཧི དཱཋཱཧི ཌཾསིཏྭཱཏི དལ༹ྷདཊྛབྷཱཝདསྶནཾ. ཙརིསྶཱམཱིཏི སམྨཱནེསྶཱམི, སཀྐཙྩཾ སུཎིསྶཱམཱིཏི ཨཏྠོ. ནིམྨཐེཏྭཱཏི ནིམྨདྡིཏྭཱ, ཨཔནེཏྭཱཏི ཨཏྠོ.

ཏིཋཱནསུཏྟཝཎྞནཱ ནིཊྛིཏཱ.

༣. ཨཏྠཝསསུཏྟཝཎྞནཱ

༤༣. ཏཏིཡེ ཨཏྠོ ནཱམ ཕལཾ, ཏཾ ཨེཏསྶ ཝསོཏི ཨཏྠཝསོ. ཧེཏུ, ཨཏྠོ ཨེཏསྶ ཨཏྠཱིཏི ཨཏྠོ, སོ ཨེཝཱཏི ཨཱཧ ‘‘ཏཡོ ཨཏྠེ ཏཱིཎི ཀཱརཎཱནཱི’’ཏི. དྷམྨདེསནཱ ནཱམ ཨུཀྐཊྛནིདྡེསེན ¶ ཙཏུནྣཾ ཨརིཡསཙྩཱནཾ པཀཱསནཱཏི ཨཱཧ ‘‘ཙཏུསཙྩདྷམྨཾ པཀཱསེཏཱི’’ཏི. ཨཊྛཀཐཾ ཉཱཎེན པཊིསཾཝེདཱིཏི པཱལི༹པདཱནཾ ཨཏྠཾ ཝིཝརཎཉཱཎེན པཊི པཊི སཾཝེདནསཱིལོ ‘‘ཨཡཾ ཨིམསྶ བྷཱསིཏསྶ ཨཏྠོ’’ཏི. ཨེཏེན ཨཏྠཔཊིསམྦྷིདཱབྱཱཔཱརམཱཧ. པཱལི༹དྷམྨཾ པཊིསཾཝེདཱིཏི པཱལི༹གཏིཾ པཱལི༹ཾ པདཝིཝརཎཾ པཊི པཊི སཾཝེདནསཱིལོ. ཨེཏེན དྷམྨཔཊིསམྦྷིདཱབྱཱཔཱརམཱཧ.

ཨཏྠཝསསུཏྟཝཎྞནཱ ནིཊྛིཏཱ.

༤. ཀཐཱཔཝཏྟིསུཏྟཝཎྞནཱ

༤༤. ཙཏུཏྠེ ¶ པཝཏྟིནཱིཏི ཡཱཝ ཨདྷིཔྤེཏཏྠནིགམནཱ ཨཝིཙྪེདེན པཝཏྟིནཱི. པཊིགྷཱཏཱབྷཱཝེན ཨཔྤཊིཧཏཱ. ནིཡྻཱནིཀཱ སཔྤཱཊིཧཱིརཀཱ.

ཀཐཱཔཝཏྟིསུཏྟཝཎྞནཱ ནིཊྛིཏཱ.

༥. པཎྜིཏསུཏྟཝཎྞནཱ

༤༥. པཉྩམེ པཎྜིཏཔཉྙཏྟཱནཱིཏི པཎྜིཏེཧི པཋམཾ པཉྙཏྟཱནི. ཀཐིཏཱནཱིཏི སེཡྻསོ ཀཐིཏཱནི. མཧཱཔུརིསེཧཱིཏི བུདྡྷབོདྷིསཏྟེཧི. ཀརུཎཱཏི ཀརུཎཱཙེཏོཝིམུཏྟི ཝུཏྟཱ. པུབྦབྷཱགོཏི ཏསྶ ཨུཔཙཱརོ. དམོཏི ཨིནྡྲིཡསཾཝརོ ‘‘མནཙྪཊྛཱནཾ ཨིནྡྲིཡཱནཾ དམན’’ནྟི ཀཏྭཱ. ཨཏྟདམནནྟི ཙིཏྟདམནཾ. པུཎྞོཝཱདེ (མ. ནི. ༣.༣༩༦) ‘‘སཀྑིསྶསི ཁོ, ཏྭཾ པུཎྞ, ཨིམིནཱ དམཱུཔསམེནཱ’’ཏི ཨཱགཏཏྟཱ དམོཏི ཝུཏྟཱ ཁནྟིཔི. ཨཱལ༹ཝཀེ ཨཱལ༹ཝཀསུཏྟེ (སཾ. ནི. ༡.༢༤༦; སུ. ནི. ༡༩༠) ‘‘སཙྩཱ དམཱ ཙཱགཱ’’ཏི ཨེཝཾ ཝུཏྟཱ པཉྙཱཔི ཨིམསྨིཾ སུཏྟེ ‘‘དམོ’’ཏི ཝཏྟུཾ ཝཊྚཏི. རཀྑནཾ གོཔནཾ པཊིཛགྒནནྟི མཱཏཱཔིཏཱུནཾ མནུསྶཱམནུསྶཀཏཱུཔདྡཝཏོ རཀྑནཾ, བྱཱདྷིཨཱདིཨནཏྠཏོ གོཔནཾ, གྷཱསཙྪཱདནཱདཱིཧི ཝེཡྻཱཝཙྩཀརཎེན པཊིཛགྒནཾ. སནྟོ ནཱམ སབྦཀིལེསདརཐཔརིལཱ༹ཧཱུཔསམེན ཨུཔསནྟཀཱཡཝཙཱིསམཱཙཱརཏཱཡ ཙ. ཨུཏྟམཊྛེན སནྟཱནནྟི མཏྟེཡྻཏཱདཱིཧི སེཊྛཊྛེན སནྟཱནཾ.

ཨིདྷ ཨིམེསཾཡེཝ ཏིཎྞཾ ཋཱནཱནཾ ཀརཎེནཱཏི ཨིམསྨིཾ སུཏྟེ ཨཱགཏཱནཾ ཏིཎྞཾ ཋཱནཱནཾ ཀརཎེན ནིབྦཏྟནེན. ཨེཏཱནི…པེ… ཀཱརཎཱནཱིཏི མཱཏུཔཊྛཱནཾ པིཏུཔཊྛཱནནྟི ཨེཏཱནི དྭེ ཨུཏྟམཔུརིསཱནཾ ¶ ཀཱརཎཱནི. ཨུཏྟམཀིཙྩཀརཎེན ཧི མཱཏཱཔིཏུཨུཔཊྛཱཀཱ ‘‘ཨུཏྟམཔུརིསཱ’’ཏི ཝུཏྟཱ. ཏེནཱཧ ‘‘མཱཏཱཔིཏུ…པེ… ཝུཏྟོ’’ཏི. ཨནུཔདྡཝབྷཱཝེན ཁེམཾ.

པཎྜིཏསུཏྟཝཎྞནཱ ནིཊྛིཏཱ.

༦. སཱིལཝནྟསུཏྟཝཎྞནཱ

༤༦. ཚཊྛེ ¶ ལོཀིཡལོཀུཏྟརམིསྶཀནྟི ཨེཏྠ ‘‘མནུསྶཱ པུཉྙཾ པསཝནྟཱི’’ཏི ཨཝིསེསེན ཝུཏྟཏྟཱ བྷཱཝནཱམཡསྶཔི པུཉྙསྶ སངྒཎྷནཏོ ལོཀུཏྟརསྶཔི སམྦྷཝོ དཊྛབྦོ.

སཱིལཝནྟསུཏྟཝཎྞནཱ ནིཊྛིཏཱ.

༧. སངྑཏལཀྑཎསུཏྟཝཎྞནཱ

༤༧. སཏྟམེ སམེཙྩ སམྦྷཱུཡ པཙྩཡེཧི ཀཏཾ སངྑཏཾ. ནིམིཏྟཱནཱིཏི སཉྫཱནནསྶ ནིམིཏྟཱནི. ཧེཏུཔཙྩཡསམཝཱཡེ ཨུཔྤཛྫནཾ ཨུཔྤཱདོ, ཨཏྟལཱབྷོ. ཝཡོཏི བྷངྒོ. ཋིཏསྶཱཏི ཨུཔྤཱདཀྑཎཏོ ཨུདྡྷཾ ཋིཏིཀྑཎཔཏྟསྶ. སཱ པནསྶ ཨཝཏྠཱ ཨུཔྤཱདཱཝཏྠཱཡ བྷིནྣཱཏི ཀཏྭཱ ཨཉྙཐཏྟཾ ཛརཱཏི ཙ ཝུཏྟཱ. ཡསྨཱ དྷམྨོ ཨུཔྤཛྫམཱནོ ཨེཝ བྷིཛྫཏི, ཏཐཱ སཏི ཨུཔྤཱདབྷངྒཱ སམཱནཀྑཎཱ སིཡུཾ, ན ཙ ཏཾ ཡུཛྫཏི, ཏསྨཱ ཨུཔྤཱདཱཝཏྠཱཡ བྷིནྣཱ བྷངྒཱབྷིམུཁཱཝཏྠཱ ཛརཱཏི ཝེདིཏབྦཱ. ཡེ པན ‘‘སངྑཱརཱནཾ ཋིཏི ནཏྠཱི’’ཏི ཝདནྟི, ཏེསཾ ཏཾ མིཙྪཱ. ཡཐཱ ཧི ཏསྶེཝ དྷམྨསྶ ཨུཔྤཱདཱཝཏྠཱཡ བྷིནྣཱ བྷངྒཱཝཏྠཱ ཨིཙྪིཏཱ, ཨཉྙཐཱ ‘‘ཨཉྙཾ ཨུཔྤཛྫཏི, ཨཉྙཾ ནིརུཛ྄ཛྷཏཱི’’ཏི ཨཱཔཛྫཏི, ཨེཝཾ ཨུཔྤཛྫམཱནསྶ བྷངྒཱབྷིམུཁཱ དྷམྨཱ ཨིཙྪིཏབྦཱ. སཱ ཙ ཋིཏིཀྑཎོ. ན ཧི ཨུཔྤཛྫམཱནོ བྷིཛྫཏཱིཏི སཀྐཱ ཝིཉྙཱཏུནྟི.

སངྑཏནྟི ཏེབྷཱུམཀཱ དྷམྨཱ པཙྩཡསམུཔྤནྣཏྟཱ. ཡདི ཨེཝཾ མགྒཕལདྷམྨཱ ཀཐནྟི ཨཱཧ ‘‘མགྒཕལཱནི པནཱ’’ཏིཨཱདི. ལཀྑཎཀཐཱ ཧི ཡཱཝདེཝ སམྨསནཏྠཱ. ཨུཔྤཱདཀྑཎེ ཨུཔྤཱདོ, ན ཋཱནབྷངྒཀྑཎེསུ. ཀསྨཱ? ཨུཔྤཱདཨུཔྤཱདཀྑཎཱནཾ ཨཉྙམཉྙཾ པརིཙྪིནྣཏྟཱ. ཡཐཱ ཧི ཨུཔྤཱདསངྑཱཏེན ཝིཀཱརེན ཨུཔྤཱདཀྑཎོ པརིཙྪིནྣོ, ཨེཝཾ ཨུཔྤཱདཀྑཎེནཔི ཨུཔྤཱདོ པརིཙྪིནྣོ. སེསདྭཡེཔི ཨེསེཝ ནཡོ. དྷམྨཔྤཝཏྟིམཏྟཏཱཡཔི ཀཱལསྶ ལོཀསམཉྙཱཝསེནེཝ ཝུཏྟཾ. ལཀྑཎཾ ན སངྑཏཾ, སངྑཏཾ ན ལཀྑཎནྟི ནེསཾ བྷེདདསྶནཾ. ཨཝཏྠཱཝཏོ ཧི ཨཝཏྠཱ བྷིནྣཱཝཱཏི ¶ . པརིཙྪིནྣནྟི ཨེཏྠ ཨུཔྤཱདཝཡེཧི ཏཱཝ སངྑཏཾ པརིཙྪིནྣཾ ཧོཏུ, ཛརཱཡ པན ཏཾ ཀཐཾ པརིཙྪིནྣནྟི ཝུཙྩཏི? ན ཝུཙྩཏི པརིཙྪེདོ པུབྦནྟཱཔརནྟམཏྟེན, ཨཐ ཁོ སབྷཱཝབྷེདེནཱཏི ནཱཡཾ དོསོ. སངྑཏཾ དྷམྨཛཱཏཾ པརིཙྪིནྣཾ ཏབྦནྟཾ དྷམྨཛཱཏཾ ¶ སངྑཏནྟི པཉྙཱཡཏི ཨེཝཾ ཏེསཾ ཨབྷཱཝེན ནིབྦཱནམེཏནྟི ལཀྑིཏབྦཏོ སཉྫཱནིཏབྦཏོ. ཨིདཱནི ‘‘ཡཐཱ ཧཱི’’ཏིཨཱདིནཱ ཡཐཱཝུཏྟམཏྟཾ ཨུཔམཱཧི ཝིབྷཱཝེཏི.

སངྑཏལཀྑཎསུཏྟཝཎྞནཱ ནིཊྛིཏཱ.

༨. ཨསངྑཏལཀྑཎསུཏྟཝཎྞནཱ

༤༨. ཨཊྛམེ ཨསངྑཏསྶཱཏི ཝུཏྟནཡེན ན སངྑཏསྶ. ཏེནཱཧ ‘‘པཙྩཡེཧཱི’’ཏིཨཱདི. ཡཐཱ ཨུཔྤཱདཱདཱིནཾ བྷཱཝེན སངྑཏདྷམྨཛཱཏཾ སངྑཏནྟི པཉྙཱཡཏི, ཨེཝཾ ཏེསཾ ཨབྷཱཝེན ནིབྦཱནཾ ཨསངྑཏནྟི པཉྙཱཡཏི.

ཨསངྑཏལཀྑཎསུཏྟཝཎྞནཱ ནིཊྛིཏཱ.

༩. པབྦཏརཱཛསུཏྟཝཎྞནཱ

༤༩. ནཝམེ ཨིདྷ སཱལ-སདྡོ རུཀྑསཱམཉྙཔརིཡཱཡོ, ན རུཀྑཝིསེསཔརིཡཱཡོཏི ཨཱཧ ‘‘མཧཱསཱལཱཏི མཧཱརུཀྑཱ’’ཏི. ཀུལཛེཊྛཀནྟི ཏསྨིཾ ཀུལེ ཛེཊྛབྷཱུཏཾ སཱམིབྷཱུཏཾ. སིལཱམཡོ ན པཾསུམཡོ མིསྶཀོ ཙ. གཱམཾ གཱམཱུཔཙཱརཉྩ ཋཔེཏྭཱ སབྦཾ ཨརཉྙནྟི ཨཱཧ ‘‘ཨརཉྙསྨིནྟི ཨགཱམཀཊྛཱནེ’’ཏི. མཧནྟོ པབྦཏོ སེལོཏི ཡོཛནཱ.

པབྦཏརཱཛསུཏྟཝཎྞནཱ ནིཊྛིཏཱ.

༡༠. ཨཱཏཔྤཀརཎཱིཡསུཏྟཝཎྞནཱ

༥༠. དསམེ སརཱིརསམྦྷཝཱནནྟི སརཱིརེ སམྦྷཱུཏཱནཾ. དུཀྑཱནནྟི ཨནིཊྛཱནཾ. བཧལཱནནྟི ནིརནྟརཔྤཝཏྟིཡཱ ཨཝིརལཱ༹ནཾ. ཏཱཔནཝསེནཱཏི དུཀྑཱཔནཝསེན. ཏིབྦཱནནྟི ཀུརཱུརཱནཾ. ཏཱསཾ ཡཐཱཝུཏྟཱནཾ ཨདྷིཝཱསནཱཡ པཧཱཏབྦདུཀྑཝེདནཱནཾ པཛཧནཾ ནཱམ ཁམནམེཝཱཏི ཨཱཧ ‘‘ཁམནཏྠཱཡཱ’’ཏི ¶ . ཨཱཎཱཔེཏྭཱཏི ‘‘ཨཱཏཔྤཾ ཀརཎཱིཡ’’ནྟི བུདྡྷཱཎཾ ཝིདྷཱཡ. ལོཀིཡལོཀུཏྟརམིསྶཀཱ ཀཐིཏཱ སསམྦྷཱརཱནཾ མགྒདྷམྨཱནཾ ཀཐིཏཏྟཱ.

ཨཱཏཔྤཀརཎཱིཡསུཏྟཝཎྞནཱ ནིཊྛིཏཱ.

༡༡. མཧཱཙོརསུཏྟཝཎྞནཱ

༥༡. ཨེཀཱདསམེ ¶ མཧཱབལཝཙོརོ མཧཱཙོརོཏི ཨཱཧ ‘‘མཧནྟོ བལཝཙོརོ’’ཏི. བལཝཙོརོཏི ཙ མཧཱཐཱམཏཱཡ མཧཱཔརིཝཱརཏཱཡ མཧཱཙོརིཡཀམྨསམཏྠཏཱཡ ཙ ཝེདིཏབྦོ. མཧཏཾ གཱམནིགམཱནཾ ཝིལུཔྤནཾ མཧཱཝིལོཔོ. ཏཾ ཏཾ ཀཱརཎཾ པཀྑིཔིཏྭཱཏི ཏཾ ཏཾ ཨཀརཎམེཝ ཀཱརཎཾ ཀཏྭཱ ཏཔྤཊིབདྡྷཱཡ ཀཐཱཡ པཀྑིཔིཏྭཱ. ཨཏྠཾ ཀཐཡིསྶནྟཱིཏི ཏསྶ ཏསྶ ཨཏྠཉྩ ཀཐཡིསྶནྟི. ཧརནྟཱཏི ཨཔནེནྟཱ པརིཧརནྟཱ. དསཝཏྠུཀཱཡཱཏི ‘‘སསྶཏོ ལོཀོ’’ཏི (མ. ནི. ༡.༢༦༩) ཨཱདིདསཝཏྠུསནྣིསྶིཏཱཡ. ཨནྟཾ གཧེཏྭཱ ཋིཏདིཊྛིཡཱཏི ཏམེཝ སསྶཏཱདིཨནྟཾ གཧེཏྭཱ ཨཝིསྶཛྫེཏྭཱ ཋིཏདིཊྛིཡཱ.

མཧཱཙོརསུཏྟཝཎྞནཱ ནིཊྛིཏཱ.

ཙཱུལ༹ཝགྒཝཎྞནཱ ནིཊྛིཏཱ.

པཋམཔཎྞཱསཀཾ ནིཊྛིཏཾ.

༢. དུཏིཡཔཎྞཱསཀཾ

(༦) ༡. བྲཱཧྨཎཝགྒོ

༡. པཋམདྭེབྲཱཧྨཎསུཏྟཝཎྞནཱ

༥༢. བྲཱཧྨཎཝགྒསྶ ¶ ¶ པཋམེ ཛརཱཛིཎྞཱཏི ཛརཱཝསེན ཛིཎྞཱ, ན བྱཱདྷིཨཱདཱིནཾ ཝསེན ཛིཎྞསདིསཏྟཱ ཛིཎྞཱ. ཝཡོཝུདྡྷཱཏི ཝཡསོ ཝུདྡྷིཔྤཏྟིཡཱ ཝུདྡྷཱ, ན སཱིལཱདིཝུདྡྷིཡཱ. ཛཱཏིམཧལླཀཱཏི ཛཱཏིཡཱ མཧནྟཏཱཡ ཙིརརཏྟཉྙུཏཱཡ ཛཱཏིམཧལླཀཱ. ཏཡོ ཨདྡྷེ ཨཏིཀྐནྟཱཏི པཋམོ, མཛ྄ཛྷིམོ, པཙྪིམོཏི ཏཡོ ཨདྡྷེ ཨཏཱིཏཱ. ཏཏིཡཾ ཝཡཾ ཨནུཔྤཏྟཱཏི ཏཏོ ཨེཝ པཙྪིམཾ ཝཡཾ ཨནུཔྤཏྟཱ. ཨཀཏབྷཡཔརིཏྟཱཎཱཏི ཨེཏྠ བྷཡཔརིཏྟཱཎནྟི དུགྒཏིབྷཡཏོ པརིཏྟཱཡཀཾ པུཉྙཾ, ཏཾ ཨཀཏཾ ཨེཏེཧཱིཏི ཨཀཏབྷཡཔརིཏྟཱཎཱ. པཏིཊྛཱཀམྨནྟི སུགཏིསངྑཱཏཔྤཏིཊྛཱཝཧཾ ཀམྨཾ. ཨུཔསཾཧརཱིཡཏཱིཏི སམྤཱཔཱིཡཏི. ‘‘ཨུཔནཱིཡཏཱི’’ཏི ཝུཏྟཾ, ཀིཾ ཀེན ཨུཔནཱིཡཏཱིཏི ཨཱཧ ‘‘ཨཡཉྷི ཛཱཏིཡཱ ཛརཾ ཨུཔནཱིཡཏཱི’’ཏིཨཱདི. ཨཡནྟི ལོཀོ. ཛཱཏོ ན ཛཱཏབྷཱཝེནེཝ ཏིཊྛཏི, ཨཐ ཁོ ཏཏོ པརཾ ཛརཾ པཱཔཱིཡཏི, ཛརཱཡ བྱཱདྷིཾ པཱཔཱིཡཏི. ཨེཝཾ པརཏོ པརཾ དུཀྑམེཝ ཨུཔནཱིཡཏི.

ཏཱཡནཊྛེནཱཏི རཀྑནཊྛེན. ནིལཱིཡནཊྛེནཱཏི ནིལཱིནཊྛཱནབྷཱཝེན. པཏིཊྛཱནཊྛེནཱཏི པཏིཊྛཱནབྷཱཝེན. ཨཝསྶཡནཊྛེནཱཏི ཨཝསྶཡིཏབྦབྷཱཝེན. ཨུཏྟམགཏིཝསེནཱཏི པརམགཏིབྷཱཝེན.

པཋམདྭེབྲཱཧྨཎསུཏྟཝཎྞནཱ ནིཊྛིཏཱ.

༢. དུཏིཡདྭེབྲཱཧྨཎསུཏྟཝཎྞནཱ

༥༣. དུཏིཡེ བྷཛིཏབྦཊྛེན པརེསཾ བྷཱཛིཏབྦཊྛེན བྷཱཛནཾ, བྷཎྜཀཾ.

དུཏིཡདྭེབྲཱཧྨཎསུཏྟཝཎྞནཱ ནིཊྛིཏཱ.

༣-༤. ཨཉྙཏརབྲཱཧྨཎསུཏྟཱདིཝཎྞནཱ

༥༤-༥༥. ཏཏིཡེ ¶ ¶ ཡེསཾ རཱགཱདཱིནཾ ཨཔྤཧཱནེན པུརིསསྶ ཨཏྟབྱཱབཱདྷཱདཱིནཾ སམྦྷཝོ, པཧཱནེན ཨསམྦྷཝོཏི ཨེཝཾ རཱགཱདཱིནཾ པཧཱཡཀོ ཨརིཡདྷམྨོ མཧཱནུབྷཱཝཏཱཡ མཧཱནིསཾསཏཱཡ ཙ སཱམཾ པསྶིཏབྦོཏི སནྡིཊྛིཀོ. ཨིམིནཱ ནཡེན སེསེསུ པདེསུཔི ཡཐཱརཧཾ ནཱིཧརིཏྭཱ ཝཏྟབྦོ. སདྡཏྠོ པན ཝིསུདྡྷིམགྒསཾཝཎྞནཱསུ (ཝིསུདྡྷི. མཧཱཊཱི. ༡.༡༤༧) ཝུཏྟནཡེན ཝེདིཏབྦོ. ཙཏུཏྠཾ ཨུཏྟཱནཏྠམེཝ.

ཨཉྙཏརབྲཱཧྨཎསུཏྟཱདིཝཎྞནཱ ནིཊྛིཏཱ.

༥. ནིབྦུཏསུཏྟཝཎྞནཱ

༥༦. པཉྩམེ ན ཀཱལནྟརེ པཏྟབྦནྟི ཡདཱ སཙྩཔྤཊིཝེདྷོ, ཏདཱ ཨེཝ ལདྡྷབྦཏྟཱ ན ཀཱལནྟརེ པཏྟབྦཾ. མགྒཉཱཎེན ཨུཔནེཏབྦཏྟཱ ཨུཔནེཡྻཾ. ཨུཔནེཡྻམེཝ ཨོཔནེཡྻིཀནྟི ཨཱཧ ‘‘པཊིཔཏྟིཡཱ ཨུཔགནྟབྦ’’ནྟི.

ནིབྦུཏསུཏྟཝཎྞནཱ ནིཊྛིཏཱ.

༦. པལོཀསུཏྟཝཎྞནཱ

༥༧. ཚཊྛེ ཨཱཙརིཡཔཱཙརིཡཱནནྟི ཨཱཙརིཡཱནམྤི ཨཱཙརིཡཱནཾ. ནིརནྟརཕུཊོ ནེརཡིཀསཏྟེཧི ནིརཡགཱམིཀམྨསྶ ཀཱརཀཱནཾ བཧུབྷཱཝཱ. ཨུབྷཡམྤེཏནྟི ཡཐཱཝུཏྟཾ ཨཏྠདྭཡཾ. གྷནནིཝཱསཏནྟི གཱམཱནཾ གྷནསནྣིཝཱསཏཾ. ཨེཀནྟེནེཝ ཨདྷམྨོཏི ཨཡོནིསོམནསིཀཱརཧེཏུཀཏྟཱ ཨནཏྠཧེཏུཏཱཡ ཙ ནིཡམེནེཝ ཨདྷམྨོ. ན ཨདྷམྨརཱགོཏི ཨདྷིཔྤེཏོཏི པརཔརིཀྑཱརེསུ རཱགོ ཝིཡ ན མཧཱསཱཝཛྫོཏི ཀཏྭཱ ཝུཏྟཾ. ཏཐཱ ཧི སཀསཀཔརིཀྑཱརཝིསཡོ རཱགོ ཝིསམལོབྷོ ཝིཡ ན ཨེཀནྟཏོ ཨཔཱཡུཔྤཏྟིཛནཀོ. པརཔརིཀྑཱརེསུ ཨུཔྤཛྫམཱནསྶ མཧཱསཱཝཛྫཏཱཡ ཨདྷམྨརཱགཏཱ. ལོབྷསྶ སམཀཱལོ ནཱམ ནཏྠི ཀཱཡདུཙྩརིཏཱདཱིནཾ ཝིཡ ཨཡོནིསོམནསིཀཱརསམུཊྛཱནཏྟཱ. ཨེསཱཏི ཨེསོ པཱཔདྷམྨོ. སམལོབྷོ ཝིསམལཀྑཎཱབྷཱཝཏོ. ཏཐཱ ཧི ཏཾསམུཊྛཱནོ པཡོགོ མིཙྪཱཙཱརོཏི ¶ ན ཝུཙྩཏི. ཨཝཏྠུཔཊིསེཝནསངྑཱཏེནཱཏི ཡཾ ལོཀིཡསཱདྷུསམནུཉྙཱཏཾ རཱགསྶ ཝཏྠུཊྛཱནཾ, ཏཏོ ཨཉྙསྨིཾ ཝཏྠུསྨིཾ པཊིསེཝནསངྑཱཏེན.

ཝིཝིདྷསསྶཱནནྟི ¶ སཱལིཝཱིཧིཨཱདིནཱནཔྤཀཱརསསྶཱནཾ. དུསྶསྶནྟི པཙྩཡདཱུསེན དཱུསིཏཾ སསྶཾ. སམྤཛྫམཱནེཏི ནིཔྥཛྫནཏོ པགེཝ གབྦྷཔརིཝུདྡྷིཀཱལེ. པཱཎཀཱཏི སལབྷཱདིཔཱཎཀཱ. པཏནྟཱིཏི སསྶཱནཾ མཏྠཀེ པཏནྟི. སལཱཀཱམཏྟམེཝ སམྤཛྫཏཱིཏི ཝཌྜྷིཏྭཱ གབྦྷཾ གཧེཏུཾ ཨསམཏྠཾ སམྤཛྫཏི. ཏེཏི ཝཱལ༹ཨམནུསྶཱ. ལདྡྷོཀཱསཱཏི ཡཀྑཱདྷིཔཏཱིཧི ཨནུཉྙཱཏཏྟཱ ལདྡྷོཀཱསཱ.

པལོཀསུཏྟཝཎྞནཱ ནིཊྛིཏཱ.

༧. ཝཙྪགོཏྟསུཏྟཝཎྞནཱ

༥༨. སཏྟམེ མཧཱཝིཔཱཀནྟི ཨུལཱ༹རཕལཾ བཧུཝིཔཱཀཾ. དྷམྨོ ནཱམ ཀཐིཏཀཐཱ ‘‘ཨཏྠཾ དཧཏི ཝིདཧཏཱི’’ཏི ཀཏྭཱ. ཨནུདྷམྨོ ནཱམ པཊིཀཐནཾ ‘‘ཏཾ ཨནུགཏོ དྷམྨོ’’ཏི ཀཏྭཱ. སཧ དྷམྨེནཱཏི སཧདྷམྨོ, སོ ཨེཝ སཧདྷམྨིཀོ. དྷམྨསདྡོ ཙེཏྠ ཀཱརཎཔརིཡཱཡོཏི ཨཱཧ ‘‘སཀཱརཎོ’’ཏི. ཝཱདསྶཱཏི ཝཙནསྶ. ཨནུཔཱཏོ ཨནུཔཙྪཱ པཝཏྟི.

པརིཔནྠེ ཏིཊྛཏཱིཏི པཱརིཔནྠིཀོ. པནྠེ ཋཏྭཱ པརེསཾ སཱཔཏེཡྻཾ ཚིནྡནཏོ པནྠདཱུཧནཙོརོ. ཡདི པཙྩཝེཀྑཎཉཱཎཾ, ཀཐཾ ཏཾ ཨསེཀྑནྟི ཨཱཧ ‘‘ཨསེཀྑསྶ པཝཏྟཏྟཱ’’ཏི. ཨིཏརཱནཱིཏི སཱིལཀྑནྡྷཱདཱིནི. སཡམྤཱིཏི པི-སདྡོ ‘‘ཨསེཀྑསྶ པཝཏྟཱ ཙཱ’’ཏི ཨིམམཏྠཾ སམྤིཎྜེཏི.

ནིབྦིསེཝནོཏི ཝིསེཝནརཧིཏོ ཝིགཏཝིལོམབྷཱཝོ. ན ཨུཔཔརིཀྑནྟཱིཏི ན ཝིཙཱརེནྟི. ཛཱཏིཾ ནིབྦཏྟིཾ ཡཱཏི ཨུཔགཙྪཏཱིཏི ཛཱཏིཡོ, ཛཱཏོཏི ཨཏྠོ. ཏེནཱཧ ‘‘ཡཏྠ ཀཏྠཙི ཀུལཛཱཏེ’’ཏི.

ཀེཝལཱིཏི ཀེཝལཝཱ, པཱརིཔཱུརིམཱཏི ཨཏྠོ. ཏེནཱཧ ‘‘པརིཔུཎྞབྷཱཝེན ཡུཏྟོ’’ཏི. ཨེཏཾ ཀེཝལཱིཏི པདཾ. ཨབྷིཉྙཱཔཱརནྟི ཨབྷིཛཱནསྶ པཱརཾ. པརིཡནྟཾ གཏཏྟཱ པཱརགཱུ. ཨེས ནཡོ སེསཔདེསུཔི. ཁེཏྟཝིནིཙྪཡསཝནེནཱཏི ¶ ‘‘ཨིམེཧི སཱིལཱདིགུཎསམྤནྣཱ སདེཝཀེ ལོཀེ པུཉྙསྶ ཁེཏྟཾ, ཏདཉྙོ ན ཁེཏྟ’’ནྟི ཨེཝཾ ཁེཏྟཝིནིཙྪཡསཝནེན རཧིཏཱ.

ཝཙྪགོཏྟསུཏྟཝཎྞནཱ ནིཊྛིཏཱ.

༨. ཏིཀཎྞསུཏྟཝཎྞནཱ

༥༩. ཨཊྛམེ ¶ དུརཱསདཱཏི དུརུཔསངྐམནཱ. གརཧཱ མུཙྩིསྶཏཱིཏི མཡི ཨེཝཾ ཀཐེནྟེ སམཎོ གོཏམོ ཀིཉྩི ཀཐེསྶཏི, ཨེཝཾ མེ ཝཙནམཏྟམྤི ན ལདྡྷནྟི ཨཡཾ གརཧཱ མུཙྩིསྶཏཱིཏི. པཎྜིཏཱཏི པཎྜིཙྩེན སམནྣཱགཏཱ. དྷཱིརཱཏི དྷིཏིསམྤནྣཱ. བྱཏྟཱཏི པརཝཱདམདྡནསམཏྠེན ཝེཡྻཏྟིཡེན སམནྣཱགཏཱ. བཧུསྶུཏཱཏི བཱཧུསཙྩཝནྟོ. ཝཱདིནོཏི ཝཱདིམགྒཀུསལཱ. སམྨཏཱཏི བཧུནོ ཛནསྶ སཱདྷུསམྨཏཱ. པཎྜིཏཱདིཨཱཀཱརཔརིཙྪེདནྟི ཏེསཾ ཏེཝིཛྫཱནཾ པཎྜིཏཱཀཱརཱདིཨཱཀཱརཔརིཙྪེདཾ. ཨཱཀཱརསདྡོ ཀཱརཎཔརིཡཱཡོ, པརིཙྪེདསདྡོ པརིམཱཎཏྠོཏི ཨཱཧ ‘‘ཨེཏྟཀེན ཀཱརཎེནཱ’’ཏི.

ཡཐཱཏི ཡེནཱཀཱརེན, ཡེན ཀཱརཎེནཱཏི ཨཏྠོ. ཏེནཱཧ ‘‘ཡཐཱཏི ཀཱརཎཝཙན’’ནྟི. ‘‘དྭཱིཧིཔི པཀྑེཧཱི’’ཏི ཝཏྭཱ ཏེ པཀྑེ སརཱུཔཏོ དསྶེནྟོ ‘‘མཱཏིཏོ ཙ པིཏིཏོ ཙཱ’’ཏི ཨཱཧ. ཏེསཾ པཀྑཱནཾ ཝསེནསྶ སུཛཱཏཏཾ དསྶེཏུཾ ‘‘ཡསྶ མཱཏཱ’’ཏིཨཱདི ཝུཏྟཾ. ཛནཀཛནིཀཱབྷཱཝེན ཝིནཱཔི ལོཀེ མཱཏཱཔིཏུསམཉྙཱ དིསྶཏི, ཨིདྷ པན སཱ ཨོརསཔུཏྟཝསེནེཝ ཨིཙྪིཏཱཏི དསྶེཏུཾ ‘‘སཾསུདྡྷགཧཎིཀོ’’ཏི ཝུཏྟཾ. གབྦྷཾ གཎྷཱཏི དྷཱརེཏཱིཏི གཧཎཱི, གབྦྷཱསཡསཉྙིཏོ མཱཏུཀུཙྪིཔྤདེསོ. ཡཐཱབྷུཏྟསྶ ཨཱཧཱརསྶ ཝིཔཱཙནཝསེན གཎྷནཏོ ཨཚཌྜནཏོ གཧཎཱི, ཀམྨཛཏེཛོདྷཱཏུ.

པིཏཱ ཙ མཱཏཱ ཙ པིཏརོ, པིཏཱུནཾ པིཏརོ པིཏཱམཧཱ, ཏེསཾ ཡུགོ པིཏཱམཧཡུགོ, ཏསྨཱ ‘‘ཡཱཝ སཏྟམཱ པིཏཱམཧཡུགཱ པིཏཱམཧདྭནྡཱ’’ཏི ཨེཝམེཏྠ ཨཏྠོ དཊྛབྦོ. ཨཊྛཀཐཱཡཾ པན དྭནྡཾ ཨགྒཧེཏྭཱ ‘‘ཡུགནྟི ཨཱཡུཔྤམཱཎཾ ཝུཙྩཏཱི’’ཏི ཝུཏྟཾ. ཡུག-སདྡསྶ ཙ ཨཏྠཀཐཱ དསྶིཏཱ ‘‘པིཏཱམཧོཡེཝ ¶ པིཏཱམཧཡུག’’ནྟི. པུབྦཔུརིསཱཏི པུརིསགྒཧཎཉྩེཏྠ ཨུཀྐཊྛནིདྡེསཝསེན ཀཏནྟི དཊྛབྦཾ. ཨེཝཉྷི ‘‘མཱཏིཏོ’’ཏི པཱལི༹ཝཙནཾ སམཏྠིཏཾ ཧོཏི. ཨཀྑིཏྟོཏི ཨཀྑེཔོ. ཨནཝཀྑིཏྟོཏི སདྡྷཐཱལིཔཱཀཱདཱིསུ ཨནཝཀྑིཏྟོ ན ཚཌྜིཏོ. ཛཱཏིཝཱདེནཱཏི ཧེཏུམྷི ཀརཎཝཙནནྟི དསྶེཏུཾ ‘‘ཀེན ཀཱརཎེནཱ’’ཏིཨཱདི ཝུཏྟཾ. ཨེཏྠ ཙ ‘‘ཨུབྷཏོ…པེ… པིཏཱམཧཡུགཱ’’ཏི ཨེཏེན བྲཱཧྨཎསྶ ཡོནིདོསཱབྷཱཝོ དསྶིཏོ སཾསུདྡྷགཧཎིཀཏཱཀིཏྟནཏོ. ‘‘ཨཀྑིཏྟོ’’ཏི ཨིམིནཱ ཀིརིཡཱཔརཱདྷཱབྷཱཝོ. སཾསུདྡྷཛཱཏིཀཱཔི ཧི སཏྟཱ ཀིརིཡཱཔརཱདྷེན ཁེཔཾ པཱཔུཎནྟི. ‘‘ཨནུཔཀྐུཊྛོ’’ཏི ཨིམིནཱ ཨཡུཏྟསཾསགྒཱབྷཱཝོ. ཨཡུཏྟསཾསགྒཉྷི པཊིཙྩ སཏྟཱ སུདྡྷཛཱཏིཀཱ ཀིརིཡཱཔརཱདྷརཧིཏཱཔི ཨཀྐོསཾ ལབྷནྟི.

ཏནྟི ¶ གརཧཱཝཙནཾ. མནྟེ པརིཝཏྟེཏཱིཏི ཝེདེ སཛ྄ཛྷཱཡཏི, པརིཡཱཔུཎཱཏཱིཏི ཨཏྠོ. མནྟེ དྷཱརེཏཱིཏི ཡཐཱཨདྷཱིཏེ མནྟེ ཨསམྨུཊྛེ ཀཏྭཱ ཧདཡེ ཋཔེཏི.

ཨོཊྛཔཧཏཀརཎཝསེནཱཏི ཨཏྠཱཝདྷཱརཎཝསེན. སནིགྷཎྜུཀེཊུབྷཱནནྟི ཨེཏྠ ཝཙནཱིཡཝཱཙཀབྷཱཝེན ཨཏྠཾ སདྡཉྩ ཁཎྜཏི བྷིནྡཏི ཝིབྷཛྫ དསྶེཏཱིཏི ནིཁཎྜུ, སོ ཨེཝ ཨིདྷ ཁ-ཀཱརསྶ གྷ-ཀཱརཾ ཀཏྭཱ ‘‘ནིགྷཎྜཱུ’’ཏི ཝུཏྟོ. ཀིཊཏི གམེཏི ཀིརིཡཱདིཝིབྷཱགཾ, ཏཾ ཝཱ ཨནཝསེསཔརིཡཱདཱནཏོ གམེནྟོ པཱུརེཏཱིཏི ཀེཊུབྷཾ. ཝེཝཙནཔྤཀཱསཀནྟི པརིཡཱཡསདྡདཱིཔཀཾ, ཨེཀེཀསྶ ཨཏྠསྶ ཨནེཀཔརིཡཱཡཝཙནཝིབྷཱཝཀནྟི ཨཏྠོ. ནིདསྶནམཏྟཉྩེཏཾ ཨནེཀེསམྤི ཨཏྠཱནཾ ཨེཀསདྡཝཙནཱིཡཏཱཝིབྷཱཝནཝསེནཔི ཏསྶ གནྠསྶ པཝཏྟཏྟཱ. ཝཙཱིབྷེདཱདིལཀྑཎཱ ཀིརིཡཱ ཀཔྤཱིཡཏི ཝིཀཔྤཱིཡཏི ཨེཏེནཱཏི ཀིརིཡཱཀཔྤོ, སོ པན ཝཎྞཔདསམྦནྡྷཔདཏྠཱདིཝིབྷཱགཏོ བཧུཀཔྤོཏི ཨཱཧ ‘‘ཀིརིཡཱཀཔྤཝིཀཔྤོ’’ཏི. ཨིདཉྩ མཱུལཀིརིཡཱཀཔྤགནྠཾ སནྡྷཱཡ ཝུཏྟཾ. སོ ཧི མཧཱཝིསཡོ སཏསཧསྶཔརིམཱཎོ ནམཱཙརིཡཱདིཔྤཀརཎཾ. ཋཱནཀརཎཱདིཝིབྷཱགཏོ ནིབྦཙནཝིབྷཱགཏོ ཙ ཨཀྑརཱ པབྷེདཱིཡནྟི ཨེཏེཧཱིཏི ཨཀྑརཔྤབྷེདཱ, སིཀྑཱནིརུཏྟིཡོ. ཨེཏེསནྟི ཙཏུནྣཾ ཝེདཱནཾ.

པདནྟི ¶ ཙཏུབྦིདྷཾ, པཉྩཝིདྷཾ ཝཱ པདཾ, ཏཾ པདཾ ཀཱཡཏཱིཏི པདཀོ, ཏེཡེཝ ཝཱ ཝེདེ པདསོ ཀཱཡཏཱིཏི པདཀོ. ཏདཝསེསནྟི ཝུཏྟཱཝསེསཾ ཝཱཀྱཾ. ཨེཏྟཱཝཏཱ སདྡབྱཱཀརཎཾ ཝཏྭཱ པུན ‘‘བྱཱཀརཎ’’ནྟི ཨཏྠབྱཱཀརཎམཱཧ. ཏཾ ཏཾ སདྡཾ ཏདཏྠཉྩ བྱཱཀརོཏི བྱཱཙིཀྑཏི ཨེཏེནཱཏི བྱཱཀརཎཾ, སདྡསཏྠཾ. ཨཱཡཏིཾ ཧིཏཾ ཏེན ལོཀོ ན ཡཏཏི ན ཨཱིཧཏཱིཏི ལོཀཱཡཏཾ. ཏཉྷི གནྠཾ ནིསྶཱཡ སཏྟཱ པུཉྙཀིརིཡཱཡ ཙིཏྟམྤི ན ཨུཔྤཱདེནྟི.

ཨསཱིཏི མཧཱསཱཝཀཱཏི ཨཉྙཱསིཀོཎྜཉྙོ, ཝཔྤོ, བྷདྡིཡོ, མཧཱནཱམོ, ཨསྶཛི, ནཱལ༹ཀོ, ཡསོ, ཝིམལོ, སུབཱཧུ, པུཎྞཛི, གཝམྤཏི, ཨུརུཝེལཀསྶཔོ, ནདཱིཀསྶཔོ, གཡཱཀསྶཔོ, སཱརིཔུཏྟོ, མཧཱམོགྒལླཱནོ, མཧཱཀསྶཔོ, མཧཱཀཙྩཱནོ, མཧཱཀོཊྛིཀོ, མཧཱཀཔྤིནོ, མཧཱཙུནྡོ, ཨནུརུདྡྷོ, ཀངྑཱརེཝཏོ, ཨཱནནྡོ, ནནྡཀོ, བྷགུ, ནནྡིཡོ, ཀིམིལོ, བྷདྡིཡོ, རཱཧུལོ, སཱིཝལི, ཨུཔཱལི, དབྦོ, ཨུཔསེནོ, ཁདིརཝནིཡརེཝཏོ, པུཎྞོ མནྟཱནིཔུཏྟོ, པུཎྞོ སུནཱཔརནྟཀོ, སོཎོ ཀུཊིཀཎྞོ, སོཎོ ཀོལི༹ཝིསོ, རཱདྷོ, སུབྷཱུཏི, ཨངྒུལིམཱལོ, ཝཀྐལི, ཀཱལུ༹དཱཡཱི, མཧཱཨུདཱཡཱི, པིལིནྡཝཙྪོ, སོབྷིཏོ, ཀུམཱརཀསྶཔོ, རཊྛཔཱལོ, ཝངྒཱིསོ, སབྷིཡོ, སེལོ, ཨུཔཝཱཎོ, མེགྷིཡོ, སཱགཏོ, ནཱགིཏོ, ལཀུཎྜཀབྷདྡིཡོ, པིཎྜོལོ བྷཱརདྭཱཛོ, མཧཱཔནྠཀོ, ཙཱུལ༹པནྠཀོ, བཱཀུལོ, ཀུཎྜདྷཱནོ, དཱརུཙཱིརིཡོ, ཡསོཛོ, ཨཛིཏོ ¶ , ཏིསྶམེཏྟེཡྻོ, པུཎྞཀོ, མེཏྟགུ, དྷོཏཀོ, ཨུཔསཱིཝོ, ནནྡོ, ཧེམཀོ, ཏོདེཡྻོ, ཀཔྤོ, ཛཏུཀཎྞཱི, བྷདྲཱཝུདྷོ, ཨུདཡོ, པོསལོ, མོགྷརཱཛཱ, པིངྒིཡོཏི ཨེཏེ ཨསཱིཏི མཧཱསཱཝཀཱ ནཱམ.

ཀསྨཱ པནེཏེ ཨེཝ ཐེརཱ ‘‘མཧཱསཱཝཀཱ’’ཏི ཝུཙྩནྟཱིཏི? ཨབྷིནཱིཧཱརསྶ མཧནྟབྷཱཝཏོ. ཏཐཱ ཧི དྭེ ཨགྒསཱཝཀཱཔི མཧཱསཱཝཀེསུ ཨནྟོགདྷཱ. ཏེ ཧི སཱཝཀཔཱརམིཉཱཎསྶ མཏྠཀཔྤཏྟིཡཱ སཱཝཀེསུ ཨགྒདྷམྨཱདྷིགམེན ཨགྒཊྛཱནེ ཋིཏཱཔི ཨབྷིནཱིཧཱརམཧནྟཏཱསཱམཉྙེན ‘‘མཧཱསཱཝཀཱ’’ཏིཔི ཝུཙྩནྟི, ཨིཏརེ པན པཀཏིསཱཝཀེཧི སཱཏིསཡཾ མཧཱབྷིནཱིཧཱརཱ. ཏཐཱ ཧི ཏེ པདུམུཏྟརསྶ བྷགཝཏོ ཀཱལེ ཀཏཔཎིདྷཱནཱ, ཏཏོ ཨེཝ སཱཏིསཡཾ ཨབྷིཉྙཱསམཱཔཏྟཱིསུ ཝསིནོ པབྷིནྣཔྤཊིསམྦྷིདཱ ཙ. ཀཱམཾ སབྦེཔི ཨརཧནྟོ སཱིལཝིསུདྡྷིཨཱདིཀེ སམྤཱདེཏྭཱ ཙཏཱུསུ ¶ སཏིཔཊྛཱནེསུ སུཔྤཏིཊྛིཏཙིཏྟཱ སཏྟ བོཛ྄ཛྷངྒེ ཡཐཱབྷཱུཏཾ བྷཱཝེཏྭཱ མགྒཔྤཊིཔཱཊིཡཱ ཨནཝསེསཏོ ཀིལེསེ ཁེཔེཏྭཱ ཨགྒཕལེ པཏིཊྛཧནྟི, ཏཐཱཔི ཡཐཱ སདྡྷཱཝིམུཏྟཏོ དིཊྛིཔྤཏྟསྶ, པཉྙཱཝིམུཏྟཏོ ཙ ཨུབྷཏོབྷཱགཝིམུཏྟསྶ པུབྦབྷཱགབྷཱཝནཱཝིསེསསིདྡྷོ མགྒབྷཱཝནཱཝིསེསོ, ཨེཝཾ ཨབྷིནཱིཧཱརམཧནྟཏྟཔུབྦཡོགམཧནྟཏྟཱ ཧི སསནྟཱནེ སཱཏིསཡསྶ གུཎཝིསེསསྶ ནིཔྥཱདིཏཏྟཱ སཱིལཱདཱིཧི གུཎེཧི མཧནྟཱ སཱཝཀཱཏི མཧཱསཱཝཀཱ. ཏེསུཡེཝ པན ཡེ བོདྷིཔཀྑིཡདྷམྨེསུ པཱམོཀྑབྷཱཝེན དྷུརབྷཱུཏཱནཾ སམྨཱདིཊྛིསངྐཔྤཱདཱིནཾ སཱཏིསཡཾ ཀིཙྩཱནུབྷཱཝནིཔྥཏྟིཡཱ ཀཱརཎབྷཱུཏཱཡ ཏཛྫཱབྷིནཱིཧཱརཱབྷིནཱིཧཊཱཡ སཀྐཙྩཾ ནིརནྟརཾ ཙིརཀཱལསམྦྷཱཝིཏཱཡ སམྨཱཔཊིཔཏྟིཡཱ ཡཐཱཀྐམཾ པཉྙཱཡ སམཱདྷིསྨིཉྩ ཨུཀྐཊྛཔཱརམིཔྤཏྟིཡཱ སཝིསེསཾ སབྦགུཎེཧི ཨགྒབྷཱཝེ ཋིཏཱ, ཏེ སཱརིཔུཏྟམོགྒལླཱནཱ. ཨིཏརེ ཨཊྛསཏྟཏི ཐེརཱ སཱཝཀཔཱརམིཡཱ མཏྠཀེ སབྦསཱཝཀཱནཾ ཨགྒབྷཱཝེན ཨཊྛིཏཏྟཱ ‘‘མཧཱསཱཝཀཱ’’ཨིཙྩེཝ ཝུཙྩནྟི. པཀཏིསཱཝཀཱ པན ཨབྷིནཱིཧཱརམཧནྟཏྟཱབྷཱཝཏོ པུབྦཡོགམཧནྟཏྟཱབྷཱཝཏོ ཙ ‘‘སཏྠུསཱཝཀཱ’’ཨིཙྩེཝ ཝུཙྩནྟི. ཏེ པན ཨགྒསཱཝཀཱ ཝིཡ མཧཱསཱཝཀཱ ཝིཡ ཙ ན པརིམིཏཱ, ཨཐ ཁོ ཨནེཀསཏཱ ཨནེཀསཧསྶཱ.

ཝཡཏཱིཏི ཝཡོ, ཨཱདིམཛ྄ཛྷཔརིཡོསཱནེསུ ཀཏྠཙི ཨཔརིཀིལམནྟོ ཨཝིཏྠཱཡནྟོ ཏེ གནྠེ སནྟཱནེཏི པཎེཏཱིཏི ཨཏྠོ. དྭེ པཊིསེདྷཱ པཀཏིཾ གམེནྟཱིཏི དསྶེཏུཾ ‘‘ཨཝཡོ ན ཧོཏཱི’’ཏི ཝཏྭཱ ཏཏྠ ཨཝཡཾ དསྶེཏུཾ ‘‘ཨཝཡོ ནཱམ…པེ… ན སཀྐོཏཱི’’ཏི ཝུཏྟཾ.

ཨིདྷཱཏི ཨིམསྨིཾ སུཏྟེ. ཨེཏནྟི ‘‘ཝིཝིཙྩེཝ ཀཱམེཧཱི’’ཏིཨཱདིཝཙནཾ. ཏཏིཡཝིཛྫཱདྷིགམཱཡ པཊིཔཏྟིཀྐམོ ཝིསུདྡྷིམགྒེ (ཝིསུདྡྷི. ༡.༧༠) སཱཏིསཡཾ ཝིཏྠཱརིཏོ, ཏཐཱ ¶ ཨིདྷ ཨཝཏྟུཀཱམཏཱཡ བྷཡབྷེརཝསུཏྟཱདཱིསུ (མ. ནི. ༡.༣༤ ཨཱདཡོ) ཝིཡ སངྑེཔཏོ ཙ ཝཏྟུཀཱམཏཱཡ ‘‘དྭིནྣཾ ཝིཛྫཱན’’མིཙྩེཝ ཝུཏྟཾ.

ཝིཛྫཱཏི པུབྦེནིཝཱསཔྤཊིཙྪཱདཀསྶ མོཧཀྑནྡྷསྶ ཝིཛྫནཊྛེནཔི ཝིཛྫཱ. མོཧོ པཊིཙྪཱདཀཊྛེན ཏམོཏི ཝུཙྩཏི ཏམོ ཝིཡཱཏི ཀཏྭཱ. ཀཱཏབྦཏོ ཀརཎཾ, ཨོབྷཱསོཝ ཀརཎཾ ཨོབྷཱསཀརཎཾ, ཨཏྟནོ པཙྩཡེཧི ཨོབྷཱསབྷཱཝེན ནིབྦཏྟེཏབྦཊྛེནཱཏི ཨཏྠོ. ཨཡཾ ཨཏྠོཏི ¶ ཨཡམེཝ ཨདྷིཔྤེཏཏྠོ. པསཾསཱཝཙནནྟི ཏསྶེཝ ཨཏྠསྶ ཐོམནཱཝཙནཾ པཊིཔཀྑཝིདྷམནཔཝཏྟིཝིསེསཱནཾ བོདྷནཏོ. ཡོཛནཱཏི པསཾསཱཝསེན ཝུཏྟཔདཱནཾ ཨཏྠདསྶནཝསེན ཝུཏྟཔདསྶ ཙ ཡོཛནཱ. ཨཝིཛྫཱ ཝིཧཏཱཏི ཨེཏེན ཝིཛྫནཊྛེན ཝིཛྫཱཏི ཨཡམྤི ཨཏྠོ དཱིཔིཏོཏི དཊྛབྦཾ. ཡསྨཱ ཝིཛྫཱ ཨུཔྤནྣཱཏི ཨེཏེན ཝིཛྫཱཔཊིཔཀྑཱ ཨཝིཛྫཱ, པཊིཔཀྑཏཱ ཙསྶཱ པཧཱཏབྦབྷཱཝེན ཝིཛྫཱཡ ཙ པཧཱཡཀབྷཱཝེནཱཏི དསྶེཏི. ཨིཏརསྨིམྤི པདདྭཡེཏི ‘‘ཏམོ ཝིཧཏོ, ཨཱལོཀོ ཨུཔྤནྣོ’’ཏི པདདྭཡེཔི. ཨེསེཝ ནཡོཏི ཡཐཱཝུཏྟཡོཛནཾ ཨཏིདིསཏི. ཏཏྠཱཡཾ ཡོཛནཱ – ཨེཝཾ ཨདྷིགཏཝིཛྫསྶ ཏམོ ཝིཧཏོ ཝིདྡྷསྟོ. ཀསྨཱ? ཡསྨཱ ཨཱལོཀོ ཨུཔྤནྣོ ཉཱཎཱལོཀོ པཱཏུབྷཱུཏོཏི. པེསིཏཏྟསྶཱཏི ཡཐཱདྷིཔྤེཏཏྠསིདྡྷིཔྤཏྟིཾ ཝིསྶཊྛཙིཏྟསྶ, པཋམཝིཛྫཱདྷིགམཱཡ པེསིཏཙིཏྟསྶཱཏི ཝུཏྟཾ ཧོཏི.

ཝིཔསྶནཱཔཱདཀནྟི ཨིམིནཱ ཏསྶ ཛྷཱནཙིཏྟསྶ ནིབྦེདྷབྷཱགིཡཏམཱཧ. ཝིཔསྶནཱ ཏིཝིདྷཱ ཝིཔསྶཀཔུགྒལབྷེདེན. མཧཱབོདྷིསཏྟཱནཉྷི པཙྩེཀབོདྷིསཏྟཱནཉྩ ཝིཔསྶནཱ ཙིནྟཱམཡཉཱཎསཾཝཌྜྷིཏཏྟཱ སཡམྦྷུཉཱཎབྷཱུཏཱ, ཨིཏརེསཾ སུཏམཡཉཱཎསཾཝཌྜྷིཏཏྟཱ པརོཔདེསསམྦྷཱུཏཱ. སཱ ‘‘ཋཔེཏྭཱ ནེཝསཉྙཱནཱསཉྙཱཡཏནཾ ཨཝསེསརཱུཔཱརཱུཔཛ྄ཛྷཱནཱནཾ ཨཉྙཏརཏོ ཝུཊྛཱཡཱ’’ཏིཨཱདིནཱ ཨནེཀདྷཱ ཨརཱུཔམུཁཝསེན ཙཏུདྷཱཏུཝཝཏྠཱནེ ཝུཏྟཱནཾ ཏེསཾ ཏེསཾ དྷཱཏུཔརིགྒཧམུཁཱནཾ ཨཉྙཏརམུཁཝསེན ཙ ཨནེཀདྷཱཝ ཝིསུདྡྷིམགྒེ (ཝིསུདྡྷི. ༡.༣༠༦) ནཱནཱནཡཏོ ཝིབྷཱཝིཏཱ. མཧཱབོདྷིསཏྟཱནཾ པན ཙཏུཝཱིསཏིཀོཊིསཏསཧསྶམུཁེན པབྷེདགམནཏོ ནཱནཱནཡཾ སབྦཉྙུཏཉྙཱཎསནྣིསྶཡསྶ ཨརིཡམགྒཉཱཎསྶ ཨདྷིཊྛཱནབྷཱུཏཾ པུབྦབྷཱགཉཱཎགབྦྷཾ གཎྷཱཔེནྟཾ པརིཔཱཀཾ གཙྪནྟཾ པརམགམྦྷཱིརཾ སཎྷསུཁུམཏརཾ ཨནཉྙསཱདྷཱརཎཾ ཝིཔསྶནཱཉཱཎཾ ཧོཏི, ཡཾ ཨཊྛཀཐཱསུ ‘‘མཧཱཝཛིརཉཱཎ’’ནྟི ཝུཙྩཏི. ཡསྶ ཙ པཝཏྟིཝིབྷཱགེན ཙཏུཝཱིསཏིཀོཊིསཏསཧསྶཔྤབྷེདསྶ པཱདཀབྷཱཝེན སམཱཔཛྫིཡམཱནཱ ཙཏུཝཱིསཏིཀོཊིསཏསཧསྶསངྑཱ དེཝསིཀཾ སཏྠུ ཝལ༹ཉྫནཀསམཱཔཏྟིཡོ ཝུཙྩནྟི, སྭཱཡཾ བུདྡྷཱནཾ ཝིཔསྶནཱཙཱརོ པརམཏྠམཉྫཱུསཱཡཾ ཝིསུདྡྷིམགྒསཾཝཎྞནཱཡཾ (ཝིསུདྡྷི. མཧཱཊཱི. ༡.༡༤༤) དསྶིཏོ, ཨཏྠིཀེཧི ཏཏོ གཧེཏབྦོཏི. ཨིདྷ པན སཱཝཀཱནཾ ཝིཔསྶནཱཙཱརཾ སནྡྷཱཡ ‘‘ཝིཔསྶནཱཔཱདཀ’’ནྟི ཝུཏྟཾ.

ཀཱམཾ ¶ ¶ ཧེཊྛིམམགྒཉཱཎཱནིཔི ཨཱསཝཱནཾ ཁེཔནཉཱཎཱནི ཨེཝ, ཨནཝསེསཏོ པན ཏེསཾ ཁེཔནཾ ཨགྒམགྒཉཱཎེནེཝཱཏི ཨཱཧ ‘‘ཨརཧཏྟམགྒཉཱཎཏྠཱཡཱ’’ཏི. ཨཱསཝཝིནཱསནཏོཏི ཨཱསཝཱནཾ ནིསྶེསཾ སམུཙྪིནྡནཏོ. ཨཱསཝཱནཾ ཁཡེ ཉཱཎཾ ཨཱསཝཀྑཡཉཱཎནྟི དསྶེནྟོ ‘‘ཏཏྲ ཙེཏཾ ཉཱཎ’’ནྟི ཝཏྭཱ ‘‘ཁཡེ’’ཏི ཨཱདྷཱརེ བྷུམྨཾ, ན ཝིསཡེཏི དསྶེནྟོ ‘‘ཏཏྠ པརིཡཱཔནྣཏྟཱ’’ཏི ཨཱཧ. ཨབྷིནཱིཧརཏཱིཏི ཨབྷིམུཁཾ ནཱིཧརཏི, ཡཐཱ མགྒཱབྷིསམཡོ ཧོཏི, སཝནཾ ཏདབྷིམུཁཾ པཝཏྟེཏི. ཨིདཾ དུཀྑནྟི དུཀྑསྶ ཨརིཡསཙྩསྶ ཏདཱ བྷིཀྑུནཱ པཙྩཀྑཏོ གཧིཏབྷཱཝདསྶནཾ. ཨེཏྟཀཾ དུཀྑནྟི ཏསྶ པརིཙྪིཛྫ གཧིཏབྷཱཝདསྶནཾ. ན ཨིཏོ བྷིཡྻོཏི ཏསྶ ཨནཝསེསཏོ གཧིཏབྷཱཝདསྶནཾ. ཏེནཱཧ ‘‘སབྦམྤི དུཀྑསཙྩ’’ནྟིཨཱདི. སརསལཀྑཎཔཊིཝེདྷེནཱཏི སབྷཱཝསངྑཱཏསྶ ལཀྑཎསྶ ཨསམྨོཧཏོ པཊིཝིཛ྄ཛྷནེན. ཨསམྨོཧཔཊིཝེདྷོཏི ཙ ཡཐཱ ཏསྨིཾ ཉཱཎེ པཝཏྟེ པཙྪཱ དུཀྑསཙྩསྶ སརཱུཔཱདིཔརིཙྪེདེ སམྨོཧོ ན ཧོཏི, ཏཐཱ པཝཏྟི. ཏེནེཝཱཧ ‘‘ཡཐཱབྷཱུཏཾ པཛཱནཱཏཱི’’ཏི. དུཀྑཾ སམུདེཏི ཨེཏསྨཱཏི དུཀྑསམུདཡོ. ཡཾ ཋཱནཾ པཏྭཱཏི ཡཾ ནིབྦཱནཾ མགྒསྶ ཨཱརམྨཎཔཙྩཡཊྛེན ཀཱརཎབྷཱུཏཾ ཨཱགམྨ. པཏྭཱཏི ཙ ཏདུབྷཡཝཏོ པུགྒལསྶ པཝཏྟིཡཱཏི ཀཏྭཱ ཝུཏྟཾ. པཏྭཱཏི ཝཱ པཱཔུཎནཧེཏུ. ཨཔྤཝཏྟིནྟི ཨཔྤཝཏྟིནིམིཏྟཾ. ཏེ ཝཱ ན པཝཏྟནྟི ཨེཏྠཱཏི ཨཔྤཝཏྟི, ནིབྦཱནཾ. ཏསྶཱཏི དུཀྑནིརོདྷསྶ. སམྤཱཔཀནྟི སཙྪིཀིརིཡཱཝསེན སམྨདེཝ པཱཔཀཾ.

ཀིལེསཝསེནཱཏི ཨཱསཝསངྑཱཏཀིལེསཝསེན. ཡསྨཱ ཨཱསཝཱནཾ དུཀྑསཙྩཔརིཡཱཡོ ཏཔྤརིཡཱཔནྣཏྟཱ སེསསཙྩཱནཉྩ ཏཾསམུདཡཱདིཔརིཡཱཡོ ཨཏྠི, ཏསྨཱ ཝུཏྟཾ ‘‘པརིཡཱཡཏོ’’ཏི. དསྶེནྟོ སཙྩཱནཱིཏི ཡོཛནཱ. ཨཱསཝཱནཉྩེཏྠ གཧཎཾ ‘‘ཨཱསཝཱནཾ ཁཡཉཱཎཱཡཱ’’ཏི ཨཱརདྡྷཏྟཱ. ཏཐཱ ཧི ‘‘ཀཱམཱསཝཱཔི ཙིཏྟཾ ཝིམུཙྩཏཱི’’ཏིཨཱདིནཱ ཨཱསཝཝིམུཏྟིསཱིསེནེཝ སབྦཀིལེསཝིམུཏྟི ཝུཏྟཱ. ‘‘ཨིདཾ དུཀྑནྟི ཡཐཱབྷཱུཏཾ པཛཱནཱཏཱི’’ཏིཨཱདིནཱ མིསྶཀམགྒོ ཨིདྷ ཀཐིཏོཏི ‘‘སཧ ཝིཔསྶནཱཡ ཀོཊིཔྤཏྟཾ མགྒཾ ཀཐེསཱི’’ཏི ཝུཏྟཾ. ཛཱནཏོ པསྶཏོཏི ཨིམིནཱ པརིཉྙཱསཙྪིཀིརིཡཱབྷཱཝནཱབྷིསམཡཱ ཝུཏྟཱ. ཝིམུཙྩཏཱིཏི ཨིམིནཱ པཧཱནཱབྷིསམཡོ ཝུཏྟོཏི ཨཱཧ ‘‘ཨིམིནཱ མགྒཀྑཎཾ དསྶེཏཱི’’ཏི. ཛཱནཏོ ¶ པསྶཏོཏི ཝཱ ཧེཏུནིདྡེསོ. ཡཾ ཛཱནནཧེཏུ ཀཱམཱསཝཱཔི ཙིཏྟཾ ཝིམུཙྩཏཱིཏི ཡོཛནཱ. དྷམྨཱནཉྷི སམཱནཀཱལིཀཱནམྤི པཙྩཡཔཙྩཡུཔྤནྣཏཱ སཧཛཱཏཀོཊིཡཱ ལབྦྷཏི. བྷཝཱསཝགྒཧཎེནེཝ ཨེཏྠ བྷཝརཱགསྶ ཝིཡ བྷཝདིཊྛིཡཱཔི སམཝརོདྷོཏི དིཊྛཱསཝསྶཔི སངྒཧོ དཊྛབྦོ.

ཁཱིཎཱ ཛཱཏཱིཏིཨཱདཱིཧི པདེཧི. ཏསྶཱཏི པཙྩཝེཀྑཎཉཱཎསྶ. བྷཱུམིནྟི པཝཏྟིཊྛཱནཾ. ཡེནཱདྷིཔྤཱཡེན ‘‘ཀཏམཱ པནསྶཱ’’ཏིཨཱདིནཱ ཙོདནཱ ཀཏཱ, ཏཾ ཝིཝརནྟོ ‘‘ན ཏཱཝསྶཱ’’ཏིཨཱདིམཱཧ ¶ . ཏཏྠ ན ཏཱཝསྶ ཨཏཱིཏཱ ཛཱཏི ཁཱིཎཱ མགྒབྷཱཝནཱཡཱཏི ཨདྷིཔྤཱཡོ. ཏཏྠ ཀཱརཎམཱཧ ‘‘པུབྦེཝ ཁཱིཎཏྟཱ’’ཏི. ན ཨནཱགཏཱ ཨསྶ ཛཱཏི ཁཱིཎཱཏི ཡོཛནཱ. ན ཨནཱགཏཱཏི ཙ ཨནཱགཏབྷཱཝསཱམཉྙཾ གཧེཏྭཱ ལེསེན ཙོདེཏི. ཏེནཱཧ ‘‘ཨནཱགཏེ ཝཱཡཱམཱབྷཱཝཏོ’’ཏི. ཨནཱགཏཝིསེསོ པནེཏྠ ཨདྷིཔྤེཏོ, ཏསྶ ཁེཔནེ ཝཱཡཱམོ ལབྦྷཏེཝ. ཏེནཱཧ ‘‘ཡཱ པན མགྒསྶཱ’’ཏིཨཱདི. ཨེཀཙཏུཔཉྩཝོཀཱརབྷཝེསཱུཏི བྷཝཏྟཡགྒཧཎཾ ཝུཏྟནཡེན ཨནཝསེསཏོ ཛཱཏིཡཱ ཁཱིཎབྷཱཝདསྶནཏྠཾ. ཏནྟི ཡཐཱཝུཏྟཾ ཛཱཏིཾ. སོཏི ཁཱིཎཱསཝོ བྷིཀྑུ.

བྲཧྨཙརིཡཝཱསོ ནཱམ ཨིདྷ མགྒབྲཧྨཙརིཡསྶ ནིབྦཏྟནམེཝཱཏི ཨཱཧ ‘‘པརིཝུཏྠ’’ནྟི. སམྨཱདིཊྛིཡཱ ཙཏཱུསུ སཙྩེསུ པརིཉྙཱདིཀིཙྩསཱདྷནཝསེན པཝཏྟམཱནཱཡ སམྨཱསངྐཔྤཱདཱིནམྤི དུཀྑསཙྩེ པརིཉྙཱབྷིསམཡཱནུགུཎཱ པཝཏྟི, ཨིཏརེསུ ཙ སཙྩེསུ ནེསཾ པཧཱནཱབྷིསམཡཱདིཝསེན པཝཏྟི པཱཀཊཱ ཨེཝ. ཏེན ཝུཏྟཾ ‘‘ཙཏཱུསུ སཙྩེསུ ཙཏཱུཧི མགྒེཧི པརིཉྙཱཔཧཱནསཙྪིཀིརིཡཱབྷཱཝནཱབྷིསམཡཝསེནཱ’’ཏི. པུཐུཛྫནཀལྱཱཎཀཱདཡོཏི ཨཱདི-སདྡེན སཏྟསེཁཾ སངྒཎྷཱཏི.

ཨིཏྠཏྟཱཡཱཏི ཨིམེ པཀཱརཱ ཨིཏྠཾ, ཏབྦྷཱཝོ ཨིཏྠཏྟཾ, ཏདཏྠནྟི ཝུཏྟཾ ཧོཏི. ཏེ པན པཀཱརཱ ཨརིཡམགྒབྱཱཔཱརབྷཱུཏཱ པརིཉྙཱདཡོ ཨིདྷཱདྷིཔྤེཏཱཏི ཨཱཧ ‘‘ཨེཝཾསོལ༹སཝིདྷཀིཙྩབྷཱཝཱཡཱ’’ཏི. ཏེ ཧི མགྒཾ པཙྩཝེཀྑཏོ མགྒཱནུབྷཱཝེན པཱཀཊཱ ཧུཏྭཱ ཨུཔཊྛཧནྟི, པརིཉྙཱདཱིསུ ཙ པཧཱནམེཝ པདྷཱནཾ ཏདཏྠཏྟཱ ཨིཏརེསནྟི ཨཱཧ ‘‘ཀིལེསཀྑཡཱཡ ཝཱ’’ཏི. པཧཱིནཀིལེསཔཙྩཝེཀྑཎཝསེན ཝཱ ཨེཏཾ ཝུཏྟཾ. དུཏིཡཝིཀཔྤེ ཨིཏྠཏྟཱཡཱཏི ནིསྶཀྐེ སམྤདཱནཝཙནནྟི ཨཱཧ ‘‘ཨིཏྠབྷཱཝཏོ’’ཏི ¶ . ཨཔརནྟི ཨནཱགཏཾ. ཨིམེ པན ཙརིམཀཏྟབྷཱཝསངྑཱཏཱ པཉྩཀྑནྡྷཱ. པརིཉྙཱཏཱ ཏིཊྛནྟཱིཏི ཨེཏེན ཏེསཾ ཨཔྤཏིཊྛཏཾ དསྶེཏི. ཨཔརིཉྙཱམཱུལཀཱ ཧི པཏིཊྛཱ. ཡཐཱཧ ‘‘ཀབལཱི༹ཀཱརེ ཙེ, བྷིཀྑཝེ, ཨཱཧཱརེ ཨཏྠི རཱགོ, ཨཏྠི ནནྡཱི, ཨཏྠི ཏཎྷཱ, པཏིཊྛིཏཾ ཏཏྠ ཝིཉྙཱཎཾ ཝིརུལ༹ྷ’’ནྟིཨཱདི (སཾ. ནི. ༢.༦༤; ཀཐཱ. ༢༩༦; མཧཱནི. ༧). ཏེནེཝཱཧ – ‘‘ཚིནྣམཱུལཀཱ རུཀྑཱ ཝིཡཱ’’ཏིཨཱདི.

ཡསྶཱཏི པུཐུཛྫནསྶ. ཏསྶ ཧི སཱིལཾ ཀདཱཙི ཝཌྜྷཏི, ཀདཱཙི ཧཱཡཏི. སེཀྑཱཔི པན སཱིལེསུ པརིཔཱུརཀཱརིནོཝ, ཨསེཀྑེསུ ཝཏྟབྦམེཝ ནཏྠི. ཏེནཱཧ ‘‘ཁཱིཎཱསཝསྶཱ’’ཏིཨཱདི. ཝསིཔྤཏྟནྟི ཝསཱིབྷཱཝཔྤཏྟཾ. སུཊྛུ སམཱཧིཏནྟི ཨགྒཕལསམཱདྷིནཱ སམྨདེཝ སམཱཧིཏཾ. དྷིཏིསམྤནྣནྟི ཨགྒཕལདྷིཏིཡཱ སམནྣཱགཏཾ. མཙྩུཾ ཛཧིཏྭཱ ཋིཏནྟི ཨཱཡཏིཾ པུནབྦྷཝཱབྷཱཝཏོ ཝུཏྟཾ. ཀཐཾ པུནབྦྷཝཱབྷཱཝོཏི ཨཱཧ ‘‘སབྦེ པཱཔདྷམྨེ པཛཧིཏྭཱ ཋིཏ’’ནྟི. སབྦསྶཔི ཉེཡྻདྷམྨསྶ ཙཏུསཙྩནྟོགདྷཏྟཱ ཝུཏྟཾ ‘‘བུདྡྷནྟི ཙཏུསཙྩབུདྡྷ’’ནྟི. བུདྡྷསཱཝཀཱཏི སཱཝཀབུདྡྷཱ ནམསྶནྟི, ¶ པགེཝ ཨིཏརཱ པཛཱ. ཨིཏརཱ ཧི པཛཱ སཱཝཀེཔི ནམསྶནྟི. ཨིཏི ཨེཏྟཀེན ཋཱནེན སམྨཱསམྦུདྡྷསྶ ཝསེན གཱཐཱནཾ ཨཏྠཾ ཝཏྭཱ ཨིདཱནི སཱཝཀསྶཔི ཝསེན ཨཏྠཾ ཡོཛེཏྭཱ དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ. སཱཝཀོཔི གོཏམོ མུཁནིབྦཏྟེན སམྤཏྟེན སམྦནྡྷེན, ཡཏོ སབྦེཔི ཨརིཡསཱཝཀཱ བྷགཝཏོ ཨོརསཔུཏྟཱཏི ཝུཙྩནྟཱིཏི.

ནིཝུསྶཏཱིཏི ནིཝཱསོ, ནིཝུཏྠོ ཁནྡྷསནྟཱནོཏི ཨཱཧ ‘‘ནིཝུཏྠཀྑནྡྷཔརམྤར’’ནྟི. ཨཝེཏི, ཨཝེདཱིཏི པཱཋདྭཡེནཔི པུབྦེནིཝཱསཉཱཎསྶ ཀིཙྩསིདྡྷིཾཡེཝ དསྶེཏི. ཨེཀཏྟཀཱཡཨེཀཏྟསཉྙིབྷཱཝསཱམཉྙཏོ ཝེཧཔྥལཱཔི ཨེཏྠེཝ སངྒཧཾ གཙྪནྟཱིཏི ‘‘ཚ ཀཱམཱཝཙརེ, ནཝ བྲཧྨལོཀེ’’ཨིཙྩེཝ ཝུཏྟཾ. ཨིཏརེ པན ཨཔཙུརབྷཱཝཏོ ན ཝུཏྟཱ. ཨེཀཙྩཱནཾ ཨཝིསཡབྷཱཝཏོ ཙ ཨཝཙནཾ དཊྛབྦཾ. ཛཱཏི ཁཱིཡཏི ཨེཏེནཱཏི ཛཱཏིཀྑཡོ, ཨརཧཏྟནྟི ཨཱཧ ‘‘ཨརཧཏྟཾ པཏྟོ’’ཏི. ‘‘ཨབྷིཉྙཱཡཱ’’ཏི ཝཏྟབྦེ ཡཀཱརལོཔེན ‘‘ཨབྷིཉྙཱ’’ཏི ནིདྡེསོ ཀཏོཏི ཨཱཧ ‘‘ཛཱནིཏྭཱ’’ཏི. ཀིཙྩཝོསཱནེནཱཏི ཙཏཱུཧི མགྒེཧི ཀཏྟབྦསྶ སོལ༹སཝིདྷསྶ ཀིཙྩསྶ པརིཡོསཱནེན. ཝོསིཏོཏི པརིཡོསིཏོ, ནིཊྛིཏོཏི ཨཏྠོ. མོནེཡྻེན སམནྣཱགཏོཏི ཀཱཡམོནེཡྻཱདཱིཧི སམནྣཱགཏོ. ལཔིཏཾ ¶ ལཔཏཱིཏི ལཔིཏལཱཔནོ. ཨཏྟཔཙྩཀྑཏོ ཉཏྭཱཏི ཨིམིནཱ ཏེསཾ ཝིཛྫཱནཾ པཊིལདྡྷབྷཱཝཾ དཱིཔེཏི.

ཏིཀཎྞསུཏྟཝཎྞནཱ ནིཊྛིཏཱ.

༩. ཛཱཎུསྶོཎིསུཏྟཝཎྞནཱ

༦༠. ནཝམེ དེཡྻདྷམྨསྶེཏཾ ནཱམནྟི ཡཱགཾ ཀརོནྟེན དཱཏབྦདེཡྻདྷམྨཾ སནྡྷཱཡ ཝདཏི ཏདཉྙསྶ པཱལི༹ཡཾ དེཡྻདྷམྨགྒཧཎེནེཝ གཧིཏཏྟཱ. མཏཀབྷཏྟནྟི མཏཀེ ཨུདྡིསྶ དཱཏབྦབྷཏྟཾ, པིཏུཔིཎྜནྟི ཝུཏྟཾ ཧོཏི. ཝརཔུརིསཱནནྟི ཝིསིཊྛཔུརིསཱནཾ, ཨུཏྟམཔུརིསཱནནྟི ཨཏྠོ. སབྦམེཏཾ དཱནནྟི ཡཐཱཝུཏྟབྷེདཾ ཡཉྙསདྡྷཱདིདཱནཾ.

ཛཱཎུསྶོཎིསུཏྟཝཎྞནཱ ནིཊྛིཏཱ.

༡༠. སངྒཱརཝསུཏྟཝཎྞནཱ

༦༡. དསམེ ཛིཎྞཱནཾ ཧཏྠིསཱལཱདཱིནཾ པཊིསངྑརཎཾ པུན པཱཀཏིཀཀརཎཾ ཛིཎྞཔཊིསངྑརཎཾ ¶ , ཏསྶ ཀཱརཀོ ཛིཎྞཔཊིསངྑརཎཀཱརཀོ. བཱཧིརསམཡེཏི སཏྠུསཱསནཏོ བཱཧིརེ ཨཉྙཏིཏྠིཡསམཡེ. སབྦཙཏུཀྐེནཱཏིཨཱདཱིསུ སབྦེསུ དྭིཔདཙཏུཔྤདཱདིབྷེདེསུ པཱཎེསུ ཨེཀེཀསྨིཾ ཙཏྟཱརོ ཙཏྟཱརོ པཱཎེ ཝདྷིཏྭཱ ཡཛིཏབྦཾ ཡཉྙཾ སབྦཙཏུཀྐཾ ནཱམ. སེསེསུཔི ཨིམིནཱ ནཡེན ཨཏྠོ ཝེདིཏབྦོ. ཡསྶ ཝཱ ཏསྶ ཝཱཏི ནིསྶཀྐེ སཱམིཝཙནནྟི ཨཱཧ ‘‘ཡསྨཱ ཝཱ ཏསྨཱ ཝཱ’’ཏི. ཨེཝམསྶཱཡནྟི ཨེཏྠ ཨསྶཱུཏི ནིཔཱཏམཏྟནྟི ཨཱཧ ‘‘ཨེཝཾ སནྟེཔི ཨཡ’’ནྟི.

ཝཌྜྷེནྟོཏི པཊྛཔེནྟོ. མགྒབྲཧྨཙརིཡསྶ ཨོགདྷཾ མཱུལཾ པཏིཊྛཱབྷཱུཏཾ བྲཧྨཙརིཡོགདྷཾ. ཏེནཱཧ ‘‘ཨརཧཏྟམགྒསངྑཱཏསྶཱ’’ཏིཨཱདི. ཨུཀྐཊྛནིདྡེསེན ཙེཏྠ ཨརཧཏྟམགྒསྶེཝ གཧཎཾ ཀཏནྟི དཊྛབྦཾ. ཨུཏྟམཾ པཏིཊྛཱབྷཱུཏཾ ཨཱརམྨཎཱུཔནིསྶཡབྷཱཝེན.

ཨཔྤེཧི ཝེཡྻཱཝཙྩཀརཱདཱིཧི ཨཏྠོ ཨེཏིསྶཱཏི ཨཔྤཊྛཱ ཏྠ-ཀཱརསྶ ཊྛ-ཀཱརཾ ཀཏྭཱ. ཏེནཱཧ ‘‘ཡཏྠ བཧཱུ’’ཏིཨཱདི. ཡཏྠཱཏི ཡསྶཾ པཊིཔདཱཡཾ ¶ . ཨཔྤོ སམཱརམྦྷོ ཨེཏསྶཱཏི ཨཔྤསམཱརམྦྷོ. པཱསཾསཱཏི པསཾསཱརཧཱ. ཨེཏཾ ཡེཝ ཀཐཱཔེསྶཱམཱིཏི ཨེཏེནེཝ བྲཱཧྨཎེན ཀཐཱཔེསྶཱམི.

སོཔྤེནཱཏི ནིདྡཱཡ. པམཱདེནཱཏི ཛཱགརིཡཱདཱིསུ ཨནནུཡུཉྫནཏོ སཏིཝིཔྤཝཱསལཀྑཎེན པམཱདེན. པཙྩནཱིཀཔཊིཧརཎཝསེནཱཏི པཊིཔཀྑཱཔནཡནཝསེན. ཏཐཱ ཧི བྷགཝཏོ ཙ སཱསནསྶ ཙ པཊིཔཀྑཱ ཏིཏྠིཡཱ, ཏེསཾ ཧརཎཏོ པཊིཧཱརིཡཾ. ཏེ ཧི དིཊྛིཧརཎཝསེན དིཊྛིཔྤཀཱསནེ ཨསམཏྠབྷཱཝེན ཙ ཨིདྡྷིཨཱདེསནཱནུསཱསནཱིཧི ཧརིཏཱ ཨཔནཱིཏཱ ཧོནྟཱིཏི. ‘‘པཊཱི’’ཏི ཝཱ ཨཡཾ སདྡོ ‘‘པཙྪཱ’’ཏི ཨེཏསྶ ཨཏྠཾ བོདྷེཏི ‘‘ཏསྨིཾ པཊིཔཝིཊྛསྨིཾ, ཨཉྙོ ཨཱགཉྪི བྲཱཧྨཎོ’’ཏིཨཱདཱིསུ (སུ. ནི. ༩༨༥; ཙཱུལ༹ནི. ཝཏྠུགཱཐཱ ༤) ཝིཡ, ཏསྨཱ སམཱཧིཏེ ཙིཏྟེ ཝིགཏཱུཔཀྐིལེསེ ཀཏཀིཙྩེན པཙྪཱ ཧརིཏབྦཾ པཝཏྟེཏབྦནྟི པཊིཧཱརིཡཾ, ཨཏྟནོ ཝཱ ཨུཔཀྐིལེསེསུ ཙཏུཏྠཛ྄ཛྷཱནམགྒེཧི ཧརིཏེསུ པཙྪཱཧརཎཾ པཊིཧཱརིཡཾ, ཨིདྡྷིཨཱདེསནཱནུསཱསནིཡོ ཙ ཝིགཏཱུཔཀྐིལེསེན ཀཏཀིཙྩེན ཙ སཏྟཧིཏཏྠཾ པུན པཝཏྟེཏབྦཱ, ཧརིཏེསུ ཙ ཨཏྟནོ ཨུཔཀྐིལེསེསུ པརསཏྟཱནཾ ཨུཔཀྐིལེསཧརཎཱནི ཧོནྟཱིཏི པཊིཧཱརིཡཱནི བྷཝནྟི, པཊིཧཱརིཡམེཝ པཱཊིཧཱརིཡཾ. པཊིཧཱརིཡེ ཝཱ ཨིདྡྷིཨཱདེསནཱནུསཱསནིསམུདཱཡེ བྷཝཾ ཨེཀེཀཾ པཱཊིཧཱརིཡནྟི ཝུཙྩཏི. པཊིཧཱརིཡཾ ཝཱ ཙཏུཏྠཛ྄ཛྷཱནཾ མགྒོ ཙ པཊིཔཀྑཧརཎཏོ, ཏཏྠ ཛཱཏཾ ནིམིཏྟབྷཱུཏེ, ཏཏོ ཝཱ ཨཱགཏནྟི པཱཊིཧཱརིཡཾ.

ཨཱགཏནིམིཏྟེནཱཏི ཨཱགཏཱཀཱརསལླཀྑཎཝསེན. ཨེས ནཡོ སེསེསུཔི. ཨེཀོ རཱཛཱཏི དཀྑིཎམདྷུརཱདྷིཔཏི ¶ ཨེཀོ པཎྜུརཱཛཱ. ཨེཝམྤི ཏེ མནོཏི ཨིམིནཱ ཨཱཀཱརེན ཏཝ མནོ པཝཏྟོཏི ཨཏྠོ. ཏེན པཀཱརེན པཝཏྟོཏི ཨཱཧ ‘‘སོམནསྶིཏོ ཝཱ’’ཏིཨཱདི. སཱམཉྙཛོཏནཱ ཝིསེསེ ཨཝཏིཊྛཏཱིཏི ཨདྷིཔྤཱཡེནེཝཾ ཝུཏྟཾ. ‘‘ཨེཝཾ ཏཝ མནོ’’ཏི ཨིདཉྩ མནསོ སོམནསྶིཏཏཱདིམཏྟདསྶནཾ, ན པན ཡེན སོ སོམནསྶིཏོ ཝཱ དོམནསྶིཏོ ཝཱ, ཏཾདསྶནཾ. སོམནསྶགྒཧཎེན ཙེཏྠ ཏདེཀཊྛཱ རཱགཱདཡོ སདྡྷཱདཡོ ཙ དསྶིཏཱ ཧོནྟི, དོམནསྶགྒཧཎེན དོསཱདཡོ. དུཏིཡནྟི ‘‘ཨིཏྠམྤི ཏེ མནོ’’ཏི པདཾ. ཨིཏིཔཱིཏི ཨེཏྠ ཨིཏི-སདྡོ ནིདསྶནཏྠོ ‘‘ཨཏྠཱིཏི ¶ ཁོ, ཀཙྩཱན, ཨཡམེཀོ ཨནྟོ’’ཏིཨཱདཱིསུ (སཾ. ནི. ༢.༡༥; ༣.༩༠) ཝིཡ. ཏེནཱཧ ‘‘ཨིམཉྩ ཨིམཉྩ ཨཏྠཾ ཙིནྟཡམཱན’’ནྟི. པི-སདྡོ ཝུཏྟཏྠསམྤིཎྜནཏྠོ.

ཀཐེནྟཱནཾ སུཏྭཱཏི ཀཐེནྟཱནཾ སདྡཾ སུཏྭཱ. ཏསྶ ཝསེནཱཏི ཏསྶ ཝིཏཀྐིཏསྶ ཝསེན. ཨཊྚཀཱརཀེནཱཏི ཝིནིཙྪཡཀཱརཀེན.

ན ཨརིཡཱནནྟི ཨརིཡཱནཾ མགྒཕལཙིཏྟཾ ན ཛཱནཱཏཱིཏི ཨཏྠོ. ཏཉྷི ཏེན ཨནདྷིགཏཏྟཱ ཙེཏོཔརིཡཉཱཎེནཔི ན སཀྐཱ ཝིཉྙཱཏུཾ, ཨཉྙཾ པན ཙིཏྟཾ ཛཱནཱཏིཡེཝ. ཧེཊྛིམོ ཨུཔརིམསྶ ཙིཏྟཾ ན ཛཱནཱཏཱིཏིཨཱདཱིནིཔི མགྒཕལཙིཏྟམེཝ སནྡྷཱཡ ཝུཏྟཱནཱིཏི ཝེདིཏབྦཱནི. སོཏཱཔནྣཱདཡོཔི ཧི ཨཏྟནཱ ཨདྷིགཏམེཝ མགྒཕལཾ པརེཧི ཨུཔྤཱདིཏཾ སམྨཱ ཙེཏོཔརིཡཉཱཎེན ཛཱནིཏུཾ སཀྐོནྟི, ན ཨཏྟནཱ ཨནདྷིགཏཾ. སབྦེཔི ཨརིཡཱ ཨཏྟནོ ཕལཾ སམཱཔཛྫནྟི ཨདྷིགཏཏྟཱཏི དསྶེནྟོ ‘‘ཨེཏེསུ ཙཱ’’ཏིཨཱདིམཱཧ. ཡདི ཨརིཡཱ ཨཏྟནཱ ཨདྷིགཏཕལཾ སམཱཔཛྫནྟི, ཨུཔརིམཱཔི ཧེཊྛིམཾ ཕལཾ སམཱཔཛྫནྟི ཨདྷིགཏཏྟཱ ལོཀིཡསམཱཔཏྟིཡོ ཝིཡཱཏི ཀསྶཙི ཨཱསངྐཱ སིཡཱ, ཏནྣིཝཏྟནཏྠམཱཧ ‘‘ཨུཔརིམོ ཧེཊྛིམཾ ན སམཱཔཛྫཏཱི’’ཏི.

ཨུཔརིམོཏི སཀདཱགཱམིཨཱདིཨརིཡཔུགྒལོ. ཧེཊྛིམནྟི སོཏཱཔཏྟིཕལཱདིཾ. ན སམཱཔཛྫཏཱིཏི སཏིཔི ཨདྷིགཏཏྟེ ན སམཱཔཛྫཏི. ཀསྨཱཏི ཙེ? ཀཱརཎམཱཧ ‘‘ཏེསཉྷཱི’’ཏིཨཱདི, ཏེསཾ སཀདཱགཱམིཨཱདཱིནཾ ཧེཊྛིམཱ ཧེཊྛིམཱ ཕལསམཱཔཏྟི ཏེསུ ཏེསུཡེཝ ཧེཊྛིམེསུ ཨརིཡཔུགྒལེསུ པཝཏྟཏི, ན ཨུཔརིམེསཱུཏི ཨཏྠོ. ཨིམིནཱ ཧེཊྛིམཾ ཕལཙིཏྟཾ ཨུཔརིམསྶ ན ཨུཔྤཛྫཏཱིཏི དསྶེཏི. ཀསྨཱཏི ཙེ? པུགྒལནྟརབྷཱཝཱུཔགམནེན པཊིཔྤསྶདྡྷཏྟཱ. ཨེཏེན ཨུཔརིམོ ཨརིཡོ ཧེཊྛིམཾ ཕལསམཱཔཏྟིཾ སམཱཔཛྫཏི ཨཏྟནཱ ཨདྷིགཏཏྟཱ ཡཐཱ ཏཾ ལོཀིཡསམཱཔཏྟིནྟི ཨེཝཾ པཝཏྟོ ཧེཏུ བྱབྷིཙཱརིཏོཏི དཊྛབྦཾ. ན ཧི ལོཀིཡཛ྄ཛྷཱནེསུ པུགྒལནྟརབྷཱཝཱུཔགམནཾ ནཱམ ཨཏྠི ཝིསེསཱབྷཱཝཏོ, ཨིདྷ པན ཨསམུགྒྷཱཊིཏཀམྨཀིལེསནིརོདྷནེན པུཐུཛྫནེཧི ¶ ཝིཡ སོཏཱཔནྣསྶ སོཏཱཔནྣཱདཱིཧི སཀདཱགཱམིཨཱདཱིནཾ པུགྒལནྟརབྷཱཝཱུཔགམནཾ ཨཏྠི. ཡཏོ ཧེཊྛིམཱ ཧེཊྛིམཱ ཕལདྷམྨཱ ཨུཔརཱུཔརིམགྒདྷམྨེཧི ནིཝཏྟིཏཱ པཊིཔཀྑེཧི ཝིཡ ཨབྷིབྷཱུཏཱ ཨཔྤཝཏྟིདྷམྨཏཾཡེཝ ཨཱཔནྣཱ. ཏེནེཝ ཝུཏྟཾ ‘‘པཊིཔྤསྶདྡྷཏྟཱ’’ཏི.

ཨཔིཙ ¶ ཀུསལཀིརིཡཔྤཝཏྟི ནཱམ ཨཉྙཱ, ཝིཔཱཀཔྤཝཏྟི ཙ ཨཉྙཱཏི ཨནནྟརཕལཏྟཱ ཙ ལོཀུཏྟརཀུསལཱནཾ ཧེཊྛིམཏོ ཨུཔརིམོ བྷཝནྟརགཏོ ཝིཡ ཧོཏི. ཏཾཏཾཕལཝསེནེཝ ཧི ཨརིཡཱནཾ སོཏཱཔནྣཱདིནཱམལཱབྷོ. ཏེ སཙེ ཨཉྙཕལསམངྒིནོཔི ཧོནྟི, སོཏཱཔནྣཱདིནཱམམྤི ཏེསཾ ཨཝཝཏྠིཏཾ སིཡཱ. ཏསྶ ཏསྶ ཝཱ ཨརིཡསྶ ཏཾ ཏཾ ཕལཾ སདིསནྟི ཀཏྭཱ ན ཨུཔརིམསྶ ཧེཊྛིམཕལསམངྒིཏཱཡ ལེསོཔི སམྦྷཝཏི, ཀུཏོ ཏསྶཱ སམཱཔཛྫནནྟི དཊྛབྦཾ. ཧེཊྛིམཱ ཙ སོཏཱཔནྣཱདཡོ ཨུཔརིམཾ སཀདཱགཱམིཕལཱདིཾ ན སམཱཔཛྫནྟི ཨནདྷིགཏཏྟཱ. ན ཧི ཨནདྷིགཏཾ སམཱཔཏྟིཾ སམཱཔཛྫིཏུཾ སཀྐཱ, ཏསྨཱ སབྦེཔི ཨརིཡཱ ཨཏྟནོཡེཝ ཕལཾ སམཱཔཛྫནྟཱིཏི ནིཊྛམེཏྠ གནྟབྦཾ.

པཝཏྟེནྟཱཏི པཝཏྟཀཱ ཧུཏྭཱ, པཝཏྟནཝསེནཱཏི ཨཏྠོ. ཨེཝནྟི ཡཐཱནུསིཊྛཱཡ ཨནུསཱསནིཡཱ ཝིདྷིཝསེན པཊིསེདྷཝསེན ཙ པཝཏྟིཏཱཀཱརཔརཱམསནཾ. སཱ ཙ སམྨཱཝིཏཀྐཱ ནཱམ མིཙྪཱཝིཏཀྐཱནཉྩ པཝཏྟིཨཱཀཱརདསྶནཝསེན པཝཏྟཏི. ཏཏྠ ཨཱནིསཾསསྶ ཨཱདཱིནཝསྶ ཙ ཝིབྷཱཝནཏྠཾ ཨནིཙྩསཉྙམེཝ, ན ནིཙྩསཉྙནྟི ཨཏྠོ. པཊིཡོགིནིཝཏྟནཏྠཉྷི ཨེཝ-ཀཱརགྒཧཎཾ. ཨིདྷཱཔི ཨེཝསདྡགྒཧཎསྶ ཨཏྠོ པཡོཛནཉྩ ཝུཏྟནཡེནེཝ ཝེདིཏབྦཾ. ཨིདཾ-གཧཎེཔི ཨེསེཝ ནཡོ. པཉྩཀཱམགུཎརཱགནྟི ནིདསྶནམཏྟཾ དཊྛབྦཾ ཏདཉྙརཱགསྶ དོསཱདཱིནཉྩ པཧཱནསྶ ཨིཙྪིཏཏྟཱ ཏཔྤཧཱནསྶ ཙ ཏདཉྙརཱགཱདིཁེཔསྶ ཨུཔཱཡབྷཱཝཏོ. ཏཐཱ ཝུཏྟཾ དུཊྛལོཧིཏཝིམོཙནསྶ པུབྦདུཊྛམཾསཁེཔནཱུཔཱཡཏཱ ཝིཡ. ལོཀུཏྟརདྷམྨམེཝཱཏི ཨཝདྷཱརཎཾ པཊིཀྑེཔབྷཱཝཏོ སཱཝཛྫདྷམྨནིཝཏྟནཔརཾ དཊྛབྦཾ, ཏསྶ ཨདྷིགམཱུཔཱཡཱནིསཾསབྷཱུཏཱནཾ ཏདཉྙེསཾ ཨནཝཛྫདྷམྨཱནཾ ནཱནནྟརིཡབྷཱཝཏོ.

ཙིནྟཱམཎིཀཝིཛྫཱསརིཀྑཀཏནྟི ཨིམིནཱ ‘‘ཙིནྟཱམཎཱི’’ཏི ཨེཝཾ ལདྡྷནཱམཱ ལོཀེ ཨེཀཱ ཝིཛྫཱ ཨཏྠི, ཡཱཡ པརེསཾ ཙིཏྟཾ ཝིཛཱནནྟཱིཏི དཱིཔེཏི. ‘‘ཏསྶཱ ཀིར ཝིཛྫཱཡ སཱདྷཀོ པུགྒལོ ཏཱདིསེ དེསཀཱལེ མནྟཾ པརིཛཔྤིཏྭཱ ཡསྶ ཙིཏྟཾ ཛཱནིཏུཀཱམོ, ཏསྶ དིཊྛཧཏྠཱདིཝིསེསསཉྫཱནནམུཁེན ཙིཏྟཱཙཱརཾ ཨནུམིནནྟོ ཀཐེཏཱི’’ཏི ཀེཙི. ཨཔརེ ‘‘ཝཱཙཾ ནིཙྪརཱཔེཏྭཱ ཏཏྠ ཨཀྑརསལླཀྑཎཝསེནཱ’’ཏི ཝདནྟི.

ཨིདཉྩ ¶ ¶ པན སབྦནྟི ‘‘བྷཝཾ གོཏམོ ཨནེཀཝིཧིཏཾ ཨིདྡྷིཝིདྷཾ པཙྩནུབྷོཏཱི’’ཏིཨཱདིནཡཔྤཝཏྟཾ སབྦམྤི.

སངྒཱརཝསུཏྟཝཎྞནཱ ནིཊྛིཏཱ.

བྲཱཧྨཎཝགྒཝཎྞནཱ ནིཊྛིཏཱ.

(༧) ༢. མཧཱཝགྒོ

༡. ཏིཏྠཱཡཏནསུཏྟཝཎྞནཱ

༦༢. དུཏིཡསྶ པཋམེ ཏིཏྠཾ ནཱམ དྭཱསཊྛི དིཊྛིཡོ ཏབྦིནིམུཏྟསྶ ཀསྶཙི དིཊྛིཝིཔྥནྡིཏསྶ ཨབྷཱཝཏོ. ཨེཏྠ ཧི སཏྟཱ ཏརནྟི ཨུཔྤིལཝནྟི ཨུམྨུཛྫནིམུཛྫཾ ཀརོནྟི, ཏསྨཱ ‘‘ཏིཏྠ’’ནྟི ཝུཙྩཏི. པཱརགམནསངྑཱཏཉྷི ཏརཎཾ དིཊྛིགཏིཀཱནཾ ནཏྠི, ཏཏྠེཝ ཨཔརཱཔརཾ ནིམུཛྫནུམྨུཛྫནཝསེན པིལཝནམེཝ ཏེསཾ ཏརཎཾ ནཱམ. ཨུཔྤཱདཀཱཏི པཱུརཎཀསྶཔཱདཡོ. ཏིཏྠེ ཛཱཏཱ ཏིཏྠིཡཱ, ཡཐཱཝུཏྟཾ ཝཱ དིཊྛིགཏསངྑཱཏཾ ཏིཏྠཾ ཨེཏེསཾ ཨཏྠཱིཏི ཏིཏྠིཀཱ, ཏིཏྠིཀཱ ཨེཝ ཏིཏྠིཡཱ. མནོརམེཏི སཱདུཕལབྷརིཏཏཱཡ ཨབྷཡདིསཏཱཡ ཙ མནོརམེ. ཨིམེསུཡེཝ ཏཱིསུ ཋཱནེསཱུཏི ཡཐཱཝུཏྟེསུ ཏིཏྠཱཡཏནེསུ.

ཡོ ཡཐཱ ཛཱནཱཏི, ཏསྶ ཏཐཱ ཝུཙྩཏཱིཏི ཨིམིནཱ པུགྒལཛ྄ཛྷཱསཡཝསེན ཏཐཱ ཝུཏྟནྟི དསྶེཏི. པུགྒལ-སདྡོ ཙ ཏིསྶནྣམྤི པཀཏཱིནཾ སཱདྷཱརཎོ, ཏསྨཱ པུརིསགྒཧཎེན ཏཏོ ཝིསེསནཾ ཡཐཱ ‘‘ཨཊྛ པུརིསཔུགྒལཱ’’ཏི. པཊིསཾཝིདིཏཾ ཀརོཏཱིཏི ཀེཝལཾ ཛཱནནཝསེན ཝིདིཏཾ ཀརོཏི. ཨནུབྷཝཏི ཝཱཏི ཝིཔཱཀལཀྑཎཔྤཏྟཾ ཨནུབྷཝཏི. པུབྦེཀཏཧེཏཱུཏི ཨནྟོགདྷཱཝདྷཱརཎཾ པདནྟི ཨཱཧ ‘‘པུབྦེཀཏཀམྨཔཙྩཡེནེཝཱ’’ཏི. ཨིམིནཱཏི ‘‘སབྦཾ ཏཾ པུབྦེཀཏཧེཏཱུ’’ཏི ཨིམིནཱ ཝཙནེན. ཀམྨཝེདནནྟི ཀུསལཱཀུསལཀམྨསཧཛཾ ཝེདནཾ. ཀིརིཡཝེདནནྟི ‘‘ནེཝ ཀུསལཱཀུསལཱ ན ཙ ཀམྨཝིཔཱཀཱ’’ཏི ཨེཝཾ ཝུཏྟཾ ཀིརིཡཙིཏྟསཧཛཾ ཝེདནཾ. ན ཀེཝལཉྩ ཏེ ཀམྨཀིརིཡཝེདནཱ ཨེཝ པཊིཀྑིཔནྟི, ཨཐ ཁོ སཱསནེ ལོཀེ ཙ པཱཀཊེ ཝཱཏཱབཱདྷཱདིརོགེ ཙ པཊིཀྑིཔནྟི ཨེཝཱཏི དསྶེཏུཾ ‘‘ཡེ ཝཱ ཨིམེ’’ཏིཨཱདིམཱཧ. ཏཏྠ པིཏྟསམུཊྛཱནཱཏི པིཏྟཝིཀཱརཱདྷིཀསམྦྷཱུཏཱ ¶ . ཨནནྟརདྭཡེཔི ཨེསེཝ ནཡོ. སནྣིཔཱཏིཀཱཏི པིཏྟཱདཱིནཾ ཏིཎྞམྤི ¶ ཝིཀཱརཱནཾ སནྣིཔཱཏཏོ ཛཱཏཱ. ཨུཏུཔརིཎཱམཛཱཏི སཱིཏཱདིཨུཏུནོ ཝིཔརིཎཱམཏོ ཝིསམཔརིཝུཏྟིཏོ ཛཱཏཱ. ཝིསམཔརིཧཱརཛཱཏི ཨསཔྤཱཡཱཧཱརཡོགཔཊིསེཝནཝསེན ཀཱཡསྶ ཝིསམཾ པརིཧརཎཏོ ཛཱཏཱ. ཨོཔཀྐམིཀཱཏི ཨུཔཀྐམཏོ ནིབྦཏྟཱ. ཀམྨཝིཔཱཀཛཱཏི ཀམྨསྶ ཝིཔཱཀབྷཱུཏཀྑནྡྷཏོ ཛཱཏཱ. ཝིརོདྷིཔཙྩཡསམུཊྛཱནཱ དྷཱཏཱུནཾ ཝིཀཱརཱཝཏྠཱ, ཏཔྤཙྩཡཱ ཝཱ དུཀྑཱ ཝེདནཱ ཨཱབཱདྷནཊྛེན ཨཱབཱདྷོ, སོ ཨེཝ རུཛྫནཊྛེན རོགོ. ཏཏྠ ‘‘ཡོ ཡཱཔྱལཀྑཎོ, སོ རོགོ, ཨིཏརོ ཨཱབཱདྷོ’’ཏི ཝདནྟི. སབྦེསཉྩ ནེསཾ ཏཾཏཾདྷཱཏཱུནཾ ཝིསམཾ ཨཱསནྣཀཱརཎཾ, ན ཏཐཱ ཨིཏརཱནི. ཏཏྠཱཔི ཙ པཀོཔཱཝཏྠཱ དྷཱཏུཡོ ཨཱསནྣཀཱརཎཾ, ན ཏཐཱ པརཔཙྩཡཱཝཏྠཱཏི དཊྛབྦཾ. ཨཊྛམཾཡེཝ ཀམྨཝིཔཱཀཛཾ ཨཱབཱདྷཾ སམྤཊིཙྪནྟི ‘‘སབྦཾ ཏཾ པུབྦེཀཏཧེཏཱུ’’ཏི ཝིཔལླཱསགྒཱཧེན. ‘‘པུབྦེ’’ཏི པུརཱཏནསྶེཝ ཀམྨསྶ གཧིཏཏྟཱ ཨུཔཔཛྫཝེདནཱིཡམྤི ཏེ པཊིཀྑིཔནྟཱིཏི ཝུཏྟཾ ‘‘དྭེ པཊིབཱཧིཏྭཱ’’ཏི. སམྤཊིཙྪནྟཱིཏི ཨནུཛཱནནྟི.

ཨཏྟནཱ ཀཏམཱུལཀེནཱཏི སཱཧཏྠིཀཀམྨཧེཏུ. ཨཱཎཏྟིམཱུལཀེནཱཏི པརསྶ ཨཱཎཱཔནཝསེན ཀཏཀམྨཧེཏུ. ཨིམཱཏི ཏིསྶོ ཝེདནཱ. སབྦེ པཊིབཱཧནྟཱིཏི སབྦེ རོགེ པཊིསེདྷེནྟི སབྦེསམྤི ཏེསཾ ཨེཀེན ཨིསྶརེནེཝ ནིམྨིཏཏྟཱ ཏབྦྷཱཝཱིབྷཱཝཱསམྦྷཝཏོ. ཨེས ནཡོ སེསེསུཔི. སབྦཾ པཊིབཱཧནྟཱིཏི ཧེཏུཔཙྩཡཔཊིསེདྷནཏོ སབྦཾ ནིསེདྷེནྟི.

མཱཏིཀཾ ནིཀྑིཔིཏྭཱཏི ཏིཎྞམྤི ཝེདཱནཾ ཨསཱརབྷཱཝདསྶནཏྠཾ ཨུདྡེསཾ ཀཏྭཱ. ཏནྟི ཏཾ མཱཏིཀཾ. ཝིབྷཛིཏྭཱ དསྶེཏུནྟི དོསདསྶནཝསེནེཝ ཝིབྷཱགཏོ དསྶེཏུཾ. ལདྡྷིཔཏིཊྛཱཔནཏྠནྟི ཨཏྟནོ ལདྡྷིཡཱ པཊིཛཱནཱཔནཏྠཾ. ལདྡྷིཏོ ལདྡྷིཾ སངྐམནྟཱིཏི མཱུལལདྡྷིཏོ ཨཉྙལདྡྷིཾ ཨུཔགཙྪནྟི པཊིཛཱནནྟི. པུབྦེཀཏཧེཏུཡེཝ པཊིསཾཝེདེཏཱིཏི ཀམྨཝེདནམྤི ཝིཔཱཀཝེདནཾ ཀཏྭཱ ཝདནྟི. དིཊྛིགཏིཀཱ ཧི བྱཱམཱུལ༹ྷཙིཏྟཱ ཀམྨནྟརཝིཔཱཀནྟརཱདཱིནི ཨཱལོལེ༹ནྟི, ཨསངྐརཏོ སཉྙཱཔེཏུཾ ན སཀྐོནྟི. ཡཐཱ ཙ ཨཀུསལཀམྨེ, ཨེཝཾ ཀུསལཀམྨེཔཱིཏི དསྶེཏུཾ ‘‘ཨེཝཾ པཱཎཱཏིཔཱཏཱ’’ཏིཨཱདི ཝུཏྟཾ. ཏཏྠ ཨེཝནྟི ཡཐཱ པུབྦེཀཏཧེཏུ ཨེཝ པཱཎཱཏིཔཱཏིནོ ནཱམ ཧོནྟི, ན ཨིདཱནི སཡཾཀཏཀཱརཎཱ, ཨེཝཾ པཱཎཱཏིཔཱཏཱ ཝིརམཎམྤི པུབྦེཀཏཧེཏུ ཨེཝཱཏི ཝིཙཱརིཡམཱནོ པུབྦེཀཏཝཱདོ ཨཀིརིཡཝཱདོ ཨེཝ སམྤཛྫཏི.

ཀཏྟུཀམྱཏཱཚནྡོ ¶ ན ཏཎྷཱཚནྡོ. ཀཏྟུཀམྱཏཱཏི ཀཱཏུམིཙྪཱ. པཙྩཏྟཔུརིསཀཱརོཏི ཏེན ཏེན པུརིསེན ཀཏྟབྦཀིཙྩཾ ན ཧོཏི པུབྦེཀཏཧེཏུ ཨེཝ སིཛ྄ཛྷནཏོ. ཨུབྷཡམྤི ཏཾ ཨེས ན ལབྦྷཏཱིཏི ཀཏྟབྦཀརཎཾ སུཙརིཏཔཱུརཎཾ, ཨཀཏྟབྦཨཀརཎཾ དུཙྩརིཏཝིརཏཱིཏི ཨིདཾ ཨུབྷཡམྤི ཨེས ¶ ན ལབྷཏི. སམཎཱཔི ཧི པུབྦེཀཏཀཱརཎཱཡེཝ ཧོནྟཱིཏི པུབྦེཀཏཀཱརཎཱཡེཝ སམཎཱཔི ཧོནྟི, ན ཨིདཱནི སཾཝརསམཱདཱནཱདིནཱ. ཨསྶམཎཱཔི པུབྦེཀཏཀཱརཎཱཡེཝཱཏི པུབྦེཀཏཀཱརཎཱཡེཝ ཨསྶམཎཱཔི ཧོནྟི, ན སཾཝརབྷེདེན.

ཡཐཱ པུབྦེཀཏཝཱདེ ཚནྡཝཱཡཱམཱནཾ ཨསམྦྷཝཏོ པཙྩཏྟཔུརིསཀཱརཱནཾ ཨབྷཱཝོ, ཨེཝཾ ཨིསྶརནིམྨཱནཝཱདེཔི ཨིསྶརེནེཝ སབྦསྶ ནིམྨིཏབྷཱཝཱནུཛཱནནཏོཏི ཝུཏྟཾ ‘‘པུབྦེཀཏཝཱདེ ཝུཏྟནཡེནེཝ ཝེདིཏབྦོ’’ཏི. ཨེས ནཡོ ཨཧེཏུཀཝཱདེཔཱིཏི ཨཱཧ ‘‘ཏཐཱ ཨཧེཏུཀཝཱདེཔཱི’’ཏི.

ཨིམེསནྟིཨཱདིནཱ ཨིམེསཾ ཏིཏྠཱཡཏནཱནཾ ཏུཙྪཱསཱརཏཱཡ ཐུསཀོཊྚནེན ཀུཎྜཀམཏྟསྶཔི ཨལཱབྷོ ཝིཡ པརམཏྠལེསསྶཔི ཨབྷཱཝོ, ཏཐཱ ཁཛྫོཔནཀོབྷཱསཏོ ཏེཛསོ ཕུལིངྒམཏྟསྶཔི ཨབྷཱཝོ ཝིཡ ཨནྡྷཝེཎིཀསྶཔི མགྒསྶ ཨཔྤཊིལཱབྷོ ཝིཡ སདྡམཏྟཾ ནིསྶཱཡ མིཙྪཱབྷཱགེན ཝིཔལླཏྠཏཱཡ དདྡརཛཱཏཀེ (ཛཱ. ༡.༢.༤༣-༤༣) སསཀསདིསཏཱ ཙ ཝིབྷཱཝིཏཱ ཧོཏི. སཱརབྷཱཝནྟི སཱིལསཱརཱདིསམྤཏྟིཡཱ སཱརསབྦྷཱཝཾ. ནིཡྻཱནིཀབྷཱཝནྟི ཨེཀནྟེནེཝ ཝཊྚཏོ ནིཡྻཱནཱཝཧབྷཱཝཾ. ཨནིགྒཧིཏོཏི ན ནིགྒཧེཏབྦོ. ཏེནཱཧ ‘‘ནིགྒཧེཏུཾ ཨསཀྐུཎེཡྻོ’’ཏི. ཨསཾཀིལིཊྛོཏི སཾཀིལེསཝིརཧིཏོ. ཏེནཱཧ ‘‘ནིཀྐིལེསོ’’ཏིཨཱདི. ཨནུཔཝཛྫོཏི དྷམྨཏོ ན ཨུཔཝདིཏབྦོ. ཨཔྤཊིཀུཊྛོ ནཱམ ཨཔྤཊིསེདྷནཾ ཝཱ སིཡཱ ཨནཀྐོསནཾ ཝཱཏི ཏདུབྷཡཾ དསྶེནྟོ ‘‘ཨཔྤཊིབཱཧིཏོ ཨནུཔཀྐུཊྛོ’’ཏི ཨཱཧ.

ཏསྶ དྷམྨསྶཱཏི ‘‘ཨཡཾ ཁོ པན, བྷིཀྑཝེ’’ཏིཨཱདིནཱ ཨུདྡྷཊསྶ དྷམྨསྶ. པཉྷཾ པུཙྪིཏྭཱཏི ཀཐེཏུཀམྱཏཱཝསེན པཉྷཾ པུཙྪིཏྭཱ. ཡཐཱཔཊིཔཱཊིཡཱཏི མཱཏིཀཱཡ ཡཐཱནིཀྑིཏྟཔྤཊིཔཱཊིཡཱ. དྷཱཏུཡོཏི སབྷཱཝདྷཱརཎཊྛེན དྷཱཏུཡོ. ཏཱ པན ཡསྨཱ ཏཎྷཱདིཊྛིཀཔྤནཱཔརིཀཔྤིཏཨཏྟསུབྷསུཁསསྶཏཱདིཔཀཏིཨཱདིདྷུཝཱདིཛཱིཝཱདིཀཱཡཱདིཀཱ ཝིཡ ¶ ན ཨིཙྪཱསབྷཱཝཱ དིཊྛིཨཱདིརཧིཏེཧི ཝིམུཙྩམཱནཨུདུམྦརཔུཔྥཱདིལོཀཝོཧཱརཝཏྠཱུནི ཝིཡ ཙ ཝཱཙཱཝཏྠུམཏྟཱ, ཨཐ ཁོ སཙྩཔརམཏྠབྷཱུཏཱཏི ཨཱཧ ‘‘སབྷཱཝཱ’’ཏི, སཙྩསབྷཱཝཱཏི ཨཏྠོ. ཨཏྟནོ སབྷཱཝཾ དྷཱརེནྟཱིཏི ཧི དྷཱཏུཡོ. ནིཛྫཱིཝནིསྶཏྟབྷཱཝཔྤཀཱསཀོཏི བཱཧིརཔརིཀཔྤིཏཛཱིཝཱབྷཱཝཔྤཀཱསཀོ ལོཀིཡམཧཱཛནསཾཀཔྤིཏསཏྟཱབྷཱཝཔྤཀཱསཀོ ཙ. ཨཱཀརཊྛེནཱཏི ཨུཔྤཛྫནཊྛཱནབྷཱཝེན. ཨུཔྤཏྟིཊྛཱནམྤི ཧི ཨཱཀརོ ཨཱཡཏནནྟི ཝུཙྩཏི ཡཐཱ ‘‘ཀམྦོཛོ ཨསྶཱནཾ ཨཱཡཏན’’ནྟི. མནོཔཝིཙཱརཱཏི ཏཾ ཏཾ ཨཱརམྨཎཾ ཨུཔེཙྩ མནསོ ཝིཝིདྷཙརཎཱཀཱརོ. ཀེཧི ཀཏྠཱཏི ཨཱཧ ‘‘ཝིཏཀྐཝིཙཱརཔཱདེཧཱི’’ཏིཨཱདི. ཨཊྛཱརསསུ ཋཱནེསཱུཏི ཚ སོམནསྶཊྛཱནིཡཱནི ¶ , ཚ དོམནསྶཊྛཱནིཡཱནི, ཚ ཨུཔེཀྑཱཊྛཱནིཡཱནཱིཏི ཨེཝཾ ཨཊྛཱརསསུ ཋཱནེསུ.

པཏིཊྛཱདྷཱཏཱུཏི སེསབྷཱུཏཏྟཡསྶ ཙེཝ སབྦཱུཔཱདཱརཱུཔཱནཉྩ པཏིཊྛཱསབྷཱཝཱ དྷཱཏུ. ཨིམིནཱ ནཡེན ཨཱབནྡྷནདྷཱཏཱུཏིཨཱདཱིསུཔི ཨཏྠོ ཝེདིཏབྦོ. ཨཔིཙ ཀཀྑལ༹བྷཱཝསིདྡྷོ སཧཛཱཏདྷམྨཱནཾ ཨཱདྷཱརབྷཱཝོ པཏིཊྛཱབྷཱཝོ. དྲཝབྷཱཝསིདྡྷཾ སམྤིཎྜནཾ ཨཱབནྡྷནཾ. ཨུཎྷབྷཱཝསིདྡྷཾ མུདུཏཱཔཀྐཏཱཝཧཾ པརིཔཱཙནཾ. ཐདྡྷབྷཱཝཱཝཧཾ ཨུདྡྷུམཱཏནཾ ཝིཏྠམྦྷནཾ. རཱུཔཝིཝིཏྟོ རཱུཔཔརིཡནྟོ ཨཱཀཱསོཏི ཡེསཾ སོ པརིཙྪེདོ, ཏེཧི སོ ཨསམྥུཊྛོཝཱཏི ཝུཏྟཾ ‘‘ཨཱཀཱསདྷཱཏཱུཏི ཨསམྥུཊྛདྷཱཏཱུ’’ཏི. སཉྫཱནནཝིདྷུརཱ ཨཱརམྨཎཱུཔལདྡྷི ཝིཛཱནནདྷཱཏུ. ཝིཏྠཱརཏོཔི ཀཐེཏུཾ ཝཊྚཏི སངྑེཔནྟོགདྷཏྟཱ ཝིཏྠཱརསྶ. སངྑེཔཏོ ཀཐེཏུཾ ན ཝཊྚཏི ཀཐེཏབྦསྶ ཨཏྠསྶ ཨནཝསེསཔརིཡཱདཱནཱབྷཱཝཏོ. ཏེནཱཧ ‘‘ཝིཏྠཱརཏོཝ ཝཊྚཏཱི’’ཏི. ཨུབྷཡཐཱཏི སངྑེཔཏོ ཝིཏྠཱརཏོ ཙ.

ཨནིཔྥནྣཱཔི ཨཱཀཱསདྷཱཏུ བྷཱུཏཱནི ཨུཔཱདཱཡ གཧེཏབྦཏཱམཏྟེན ‘‘ཨུཔཱདཱརཱུཔ’’ནྟེཝ ཝུཙྩཏི. དིཊྛཱནེཝཱཏི སལླཀྑེཏབྦཱནི ཨུཔཱདཱརཱུཔབྷཱཝསཱམཉྙཏོ. ཏེན སཧཛཱཏཱ ཝེདནཱ ཝེདནཱཀྑནྡྷོ སམུདཱཡེ པཝཏྟཝོཧཱརསྶ ཨཝཡཝེཔི དིསྶནཏོ ཡཐཱ ‘‘ཝཏྠེཀདེསེ དཌྜྷེ ཝཏྠཾ དཌྜྷ’’ནྟི. ‘‘ཕསྶོ ཙ ཙེཏནཱ ཙ སངྑཱརཀྑནྡྷོ’’ཏི ཝུཏྟཾ མཧཱབྷཱུམཀཏྟཱ ཏེསཾ ཏཔྤདྷཱནཏྟཱ ཙ སངྑཱརཀྑནྡྷསྶ. ཨརཱུཔཀྑནྡྷཱ ནཱམཾ ཨཱརམྨཎཱབྷིམུཁཾ ནམནཏོ ནཱམཱདྷཱིནགྒཧཎཏོ ཙ. རཱུཔཀྑནྡྷོ རཱུཔཾ པརིབྱཏྟཾ རུཔྤནཊྛེན. པཙྩཡནྟི ནིསྶཡབྷཱུཏཾ པཙྩཡཾ. ཝིབྷཱགེན དྭཱཙཏྟཱལཱིས. ཨེཀཱསཱིཏི ¶ ཙིཏྟཱནི ‘‘སམྨསནཙཱརོཡ’’ནྟི ཀཏྭཱ. ཨནུཀྐམེན པཊིཔཛྫམཱནོཏི ཨེཝཾ ཀངྑཱཝིཏརཎཝིསུདྡྷིཡཾ ཋིཏོ ཨུཔརིམེན ཏིསྶནྣཾ ཝིསུདྡྷཱིནཾ སམྤཱདནཝསེན ཝིསུདྡྷིབྷཱཝནཾ ཨུསྶུཀྐཱཔེནྟོ.

ཕསྶཱཡཏནནྟི ཕསྶསྶ ཨུཔྤཏྟིཊྛཱནཾ. སུཝཎྞཱདཱིནནྟི སུཝཎྞམཎིཝཛིརཱདཱིནཾ. ཨཱཀིཎྞཾ ཝིཡ ཧུཏྭཱ ཨུཔྤཛྫནྟི ཨེཏྠཱཏི ཨཱཀརོ. ཡཐཱ ཙཀྑུ ཝིཔཱཀཕསྶསྶ ཝིསེསཔཙྩཡོ, ན ཏཐཱ ཨིཏརེསནྟི ཀཏྭཱ ཝུཏྟཾ ‘‘དྭེ ཙཀྑུཝིཉྙཱཎཱནཱི’’ཏིཨཱདི. ཨེས ནཡོ སེསཝཱརེསུཔི. དྭཏྟིཾསཱཡ ཝིཔཱཀཕསྶེསུ དྭིཔཉྩཝིཉྙཱཎསཧགཏཕསྶེ ཋཔེཏྭཱ སེསཱ དྭཱཝཱིསཏི ཝིཔཱཀཕསྶཱ ཝེདིཏབྦཱ. དིཊྛམེཝ ཧོཏི ཏེན སམཱནཡོགཀྑམཏྟཱ. ‘‘སངྑེཔཏོ ཏཱཝཱ’’ཏི སངྑེཔཀཐཾ ཨཱརབྷིཏྭཱཔི ཝིཏྠཱརཀཐཱཔེཏྠ ཝུཏྟནཡཏྟཱ སུཝིཉྙེཡྻཱཝཱཏི ཝུཏྟཾ ‘‘ཧེཊྛཱ…པེ… ཝེདིཏབྦ’’ནྟི.

སོམནསྶསྶ ¶ ཨུཔྤཏྟིཊྛཱནབྷཱུཏཾ སོམནསྶཊྛཱནིཡཾ. ཏེནཱཧ ‘‘སོམནསྶསྶ ཀཱརཎབྷཱུཏ’’ནྟི. ཨུཔཝིཙརཏཱིཏི ཨུཔེཙྩ པཝཏྟཏི. སབྷཱཝཏོ སངྐཔྤཏོ ཙ སོམནསྶཱདིཨུཔྤཏྟིཧེཏུཀཱ སོམནསྶཊྛཱནིཡཱདིཏཱཏི ཨཱཧ ‘‘ཨིཊྛཾ ཝཱ ཧོཏཱུ’’ཏིཨཱདི. ཙཏུཏྠཾ དིཊྛམེཝ ཧོཏི ཏདཝིནཱབྷཱཝཏོ.

ཨརིཡསཙྩཱནཱིཏི པུརིམཔདེ ཨུཏྟརཔདལོཔེནཱཡཾ ནིདྡེསོཏི ཨཱཧ ‘‘ཨརིཡབྷཱཝཀརཱནཱི’’ཏིཨཱདི. ཝིསུདྡྷིམགྒེ (ཝིསུདྡྷི. ༢.༥༣༡) པཀཱསིཏཾ, ཏསྨཱ ན ཨིདྷ པཀཱསེཏབྦནྟི ཨདྷིཔྤཱཡོ. སུཁཱཝབོདྷནཏྠནྟི དེསིཡམཱནཱཡ ཝཊྚཀཐཱཡ སུཁེན ཨཝབོདྷནཏྠཾ. ཏེནཱཧ ‘‘ཡསྶ ཧཱི’’ཏིཨཱདི. དྭཱདསཔདནྟི ཨཝིཛྫཱདཱིཧི པདེཧི དྭཱདསཔདཾ. པཙྩཡཝཊྚནྟི པཙྩཡཔྤབནྡྷཾ. ཀཐེཏུཀཱམོ ཧོཏི པཙྩཡཱཀཱརམུཁེན སཙྩཱནི དསྶེཏུཀཱམཏཱཡ. གབྦྷཱཝཀྐནྟིཝཊྚནྟི གབྦྷོཀྐནྟིམུཁེན ཝིཔཱཀཝཊྚཾ དསྶེཏི ‘‘གབྦྷསྶཱཝཀྐནྟི ཧོཏཱི’’ཏིཨཱདིནཱ. ཏསྨཱ པནེཏྠ གབྦྷཱཝཀྐནྟིཝསེནེཝ ཝཊྚཾ དསྶིཏནྟི ཨཱཧ ‘‘གབྦྷཱཝཀྐནྟིཝཊྚསྨིཾ ཧཱི’’ཏིཨཱདི. གབྦྷཱཝཀྐནྟིཝཊྚསྨིནྟི མཱཏུཀུཙྪིམྷི ནིབྦཏྟནཝསེན པཝཏྟདྷམྨཔྤབནྡྷེ. དསྶིཏེཏི དེསནཱཝསེན དསྶིཏེ. པུརིམཱ དྭེ ཡོནིཡོ ཨིཏརཱཧི ཨོལཱ༹རིཀཏཱཡ ¶ པརིབྱཏྟཏརཱཏི ཝུཏྟཾ ‘‘གབྦྷཱཝཀྐནྟི…པེ… ཨཝབོདྷེཏུམྤཱི’’ཏི.

པཙྩཡམཏྟནྟི ཚནྣཾ དྷཱཏཱུནཾ སཱདྷཱརཎཾ པཙྩཡབྷཱཝམཏྟཾ, ན ཏེཧི བྷཱགསོ ནིཔྥཱདིཡམཱནཾ པཙྩཡཝིསེསཾ ‘‘ཀུཏོ པནེཏཾ ཚནྣཾ དྷཱཏཱུན’’ནྟི ཨཝིབྷཱགེན ཝུཏྟཏྟཱ. ཏེནཱཧ ‘‘ཨིདཾ ཝུཏྟཾ ཧོཏཱི’’ཏིཨཱདི. ན མཱཏུ ན པིཏུ ཏཱསཾ དྷཱཏཱུནཾ ཨིམསྶ སཏྟསྶ བཱཧིརབྷཱཝཏོ. གབྦྷསྶཱཏི ཨེཏྠ གབྦྷཏི ཨཏྟབྷཱཝབྷཱཝེན ཝཏྟཏཱིཏི གབྦྷོ, ཀལལཱདིཨཝཏྠོ དྷམྨཔྤབནྡྷོ. ཏནྣིསྶིཏཏྟཱ པན སཏྟསནྟཱནོ གབྦྷོཏི ཝུཏྟོ ཡཐཱ མཉྩནིསྶིཏཱ ‘‘མཉྩཱ ཨུཀྐུཊྛིཾ ཀརོནྟཱི’’ཏི. ཏནྣིསྶཡབྷཱཝཏོ མཱཏུཀུཙྪི གབྦྷོཏི ཝུཙྩཏི ‘‘གབྦྷེ ཝསཏི མཱཎཝོ’’ཏིཨཱདཱིསུ (ཛཱ. ༡.༡༥.༣༦༣). གབྦྷོ ཝིཡཱཏི ཝཱ གབྦྷོ. ཡཐཱ ཧི ནིཝཱསཊྛཱནཏཱཡ སཏྟཱནཾ ཨོཝརཀོ ‘‘གབྦྷོ’’ཏི ཝུཙྩཏི, ཨེཝཾ གབྦྷསེཡྻཀཱནཾ སཏྟཱནཾ ཡཱཝ ཨབྷིཛཱཏི ནིཝཱསཊྛཱནཏཱཡ མཱཏུཀུཙྪི ‘‘གབྦྷོ’’ཏི ཝུཙྩཏི. ཨིདྷ པན པཋམཾ ཝུཏྟཨཏྠེནེཝ གབྦྷོཏི ཝེདིཏབྦོ. ཏེནཱཧ ‘‘གབྦྷོ ཙ ནཱམཱ’’ཏིཨཱདི.

ནིརཏིཨཏྠེན ནིརཡོ ཙ སོ ཡཐཱཝུཏྟེན ཨཏྠེན གབྦྷོ ཙཱཏི ནིརཡགབྦྷོ. ཨེས ནཡོ སེསཔདེསུཔི. ཨཡཾ པན ཝིསེསོ – དེཝམནུཛཱདཡོ ཝིཡ ཨུདྡྷཾ དཱིགྷཱ ཨཧུཏྭཱ ཏིརིཡཾ ཨཉྩིཏཱ དཱིགྷཱཏི ཏིརཙྪཱནཱ. ཏེ ཨེཝ ཁནྡྷཀོཊྛཱསབྷཱཝེན ཡོནི ཙ སོ ཝུཏྟནཡེན གབྦྷོ ཙཱཏི ¶ ཏིརཙྪཱནཡོནིགབྦྷོ. པཀཊྛཏོ སུཁཏོ ཨཔེཏཾ ཨཔགམོ པེཏབྷཱཝོ, ཏཾ པཏྟཱནཾ ཝིསཡོཏི པེཏྟིཝིསཡོ, པེཏཡོནི. མནསྶ ཨུསྶནྣཏཱཡ སཱུརབྷཱཝཱདིགུཎེཧི ཨུཔཙིཏམཱནསཏཱཡ ཨུཀྐཊྛགུཎཙིཏྟཏཱཡ མནུསྶཱ. དིབྦནྟི ཀཱམགུཎཱདཱིཧི ཀཱིལ༹ནྟི ལལ༹ནྟི ཛོཏནྟཱིཏི དེཝཱ. གབྦྷསདྡོ ཝུཏྟནཡོ ཨེཝ. ནཱནཔྤཀཱརོཏི ཡཐཱཝུཏྟེན ཏདནནྟརབྷེདེན ཙ ནཱནཔྤཀཱརཀོ. མནུསྶགབྦྷོ ཨདྷིཔྤེཏོ སུཔཱཀཊཏཱཡ པཙྩཀྑབྷཱཝཏོ. ཨོཀྐནྟི མཱཏུཀུཙྪིཾ ཨོཀྐམིཏྭཱ ཝིཡ ཨུཔྤཏིཏྭཱཏི ཀཏྭཱ. ནིབྦཏྟནཾ ནིབྦཏྟི. པཱཏུབྷཱཝོ ཨུཔྤཏྟིཔྤཀཱསཀོ ཙ.

སནྣིཔཱཏོ ནཱམ ཨཝེཀལླཛཱཏིཧཱིནཝེཀལླེཏི དསྶེཏུཾ ‘‘ཨིདྷ མཱཏཱཔིཏརོ’’ཏིཨཱདི ཝུཏྟཾ. ཨིདྷཱཏི ཨིམསྨིཾ སཏྟལོཀེ. སནྣིཔཏིཏཱཏི ¶ སམོདྷཱནབྷཱཝཏོ སནྣིཔཏིཏཱ སམཱགཏཱ སཾསིལིཊྛཱ. ཨུཏུནཱིཏི ཨུཏུམཏཱི སཉྫཱཏཔུཔྥཱ. ཨིདཉྩ ཨུཏུསམཡཾ སནྡྷཱཡ ཝུཏྟཾ, ན ལོཀསམཉྙཱཀརཛསྶ ལགྒནདིཝསམཏྟཾ. མཱཏུགཱམསྶ ཧི ཡསྨིཾ གབྦྷཱསཧསཉྙིཏེ ཨོཀཱསེ དཱརཀོ ནིབྦཏྟཏི, ཏཏྠ མཧཏཱི ལོཧིཏཔཱིལ༹ཀཱ སཎྛཧིཏྭཱ ཨགྒཧིཏཔུབྦཱ ཨེཝ བྷིཛྫིཏྭཱ པགྒྷརཏི, ཝཏྠུ སུདྡྷཾ ཧོཏི པགྒྷརིཏལོཧིཏཏྟཱ ཨནཱམཡཏྟཱ ཙ. ཝིསུདྡྷེ ཝཏྠུམྷི མཱཏཱཔིཏཱུསུ ཨེཀཝཱརཾ སནྣིཔཏིཏེསུ ཡཱཝ སཏྟ དིཝསཱནི ཁེཏྟམེཝ ཧོཏི. སུདྡྷཾ ཝཏྠུ ནཧཱནཏོ པརམྤི ཀཏིཔཡཱནི དིཝསཱནི གབྦྷསཎྛཧནཏཱཡ ཁེཏྟམེཝ ཧོཏི པརིཏྟསྶ ལོཧིཏལེསསྶ ཝིཛྫམཱནཏྟཱ. ཏསྨིཾ སམཡེ ཧཏྠགྒཱཧཝེཎིགྒཱཧཱདིནཱ ཨངྒཔརཱམསནེནཔི དཱརཀོ ནིབྦཏྟཏིཡེཝ. ཨིཏྠིསནྟཱནེཔི ཧི སཏྟཔི དྷཱཏཱུ ལབྦྷནྟེཝ. ཏཐཱ ཧི པཱརིཀཱཡ ནཱབྷིཔརཱམསནེན སཱམསྶ བོདྷིསཏྟསྶ, དིཊྛམངྒལིཀཱཡ ནཱབྷིཔརཱམསནེན (ཛཱ. ཨཊྛ. ༤.༡༥.མཱཏངྒཛཱཏཀཝཎྞནཱ; མ. ནི. ཨཊྛ. ༢.༦༥) མཎྜབྱསྶ ནིབྦཏྟི ཨཧོསི. གནྡྷནཏོ ཨུཔྤནྣགཏིཡཱ ནིམིཏྟཱུཔཊྛཱནེན སཱུཙནཏོ དཱིཔནཏོ གནྡྷོཏི ལདྡྷནཱམེན བྷཝགཱམིཀམྨུནཱ ཨབྦཏི པཝཏྟཏཱིཏི གནྡྷབྦོ, ཏཏྠ ཨུཔྤཛྫམཱནཀསཏྟོ. པཙྩུཔཊྛིཏོ ཧོཏཱིཏི ན མཱཏཱཔིཏཱུནཾ སནྣིཔཱཏཾ ཨོལོཀཡམཱནོ སམཱིཔེ ཋིཏོ པཙྩུཔཊྛིཏོ ནཱམ ཧོཏི, ཀམྨཡནྟཡནྟིཏོ པན ཨེཀོ སཏྟོ ཏསྨིཾ ཨོཀཱསེ ནིབྦཏྟནཀོ ཧོཏཱིཏི ཨཡམེཏྠ ཨདྷིཔྤཱཡོ. ཏདཱ ཧི ཏཏྲཱུཔགསཏྟོ ཏཏྲཱུཔཔཏྟིཨཱཝཧནྟཀམྨསངྑཱཏེན པེལླཀཡནྟེན ཏཐཏྠཱཡ པེལླིཏོ ཨུཔནཱིཏོ ཝིཡ ཧོཏི.

ཝིཉྙཱཎཔཙྩཡཱ ནཱམརཱུཔནྟི ཨེཏྠ ཝིཉྙཱཎསྶ པཙྩཡབྷཱཝེན གཧིཏཏྟཱ ‘‘ཏཡོ ཨརཱུཔིནོ ཁནྡྷཱ’’ཏི ཝུཏྟཾ. ཨིདྷ པན ཝིཉྙཱཎཾ པཙྩཡབྷཱཝེན ཨགྒཧེཏྭཱ གབྦྷོཀྐནྟིཡཱ ཨེཝ པཙྩཡབྷཱཝེན གཧིཏཏྟཱ ‘‘ཝིཉྙཱཎཀྑནྡྷམྤི པཀྑིཔིཏྭཱ’’ཏི ཝུཏྟཾ. ཨིདྷ པན མནུསྶགབྦྷསྶ ཨོཀྐནྟིཡཱ ཨདྷིཔྤེཏཏྟཱ ‘‘གབྦྷསེཡྻཀཱནཾ པཊིསནྡྷིཀྑཎེ’’ཏི ཝུཏྟཾ.

ཏཎྷཱཡ ¶ སམུདཡསཙྩབྷཱཝེན གཧིཏཏྟཱ ‘‘ཋཔེཏྭཱ ཏཎྷ’’ནྟི ཝུཏྟཾ. ཏསྶེཝ པབྷཱཝིཀཱཏི ཏསྶེཝ ཡཐཱཝུཏྟསྶ དུཀྑསཙྩསྶ ཨུཔྤཱདིཀཱ. དུཀྑནིརོདྷོཏི ¶ ཨེཏྠ དུཀྑགྒཧཎེན ཏཎྷཱཔི གཧིཏཱཏི ཨཱཧ ‘‘ཏེསཾ དྭིནྣམྤི…པེ… དུཀྑནིརོདྷོ’’ཏི. ཨཝིསེསེན ཧི ཏེབྷཱུམཀཝཊྚཾ ཨིདྷ དུཀྑནྟི ཨདྷིཔྤེཏཾ. ཨཐ ཝཱ དུཀྑསྶ ཨནུཔྤཏྟིནིརོདྷོ ཏབྦྷཱཝིཀཱཡ ཏཎྷཱཡ ཨནུཔྤཏྟིནིརོདྷེན ཝིནཱ ན ཧོཏཱིཏི ཝུཏྟཾ ‘‘ཏེསཾ དྭིནྣམྤི…པེ… དུཀྑནིརོདྷོ’’ཏི. ཨནུཔྤཏྟིནིརོདྷོཏི ཙ ཨནུཔྤཏྟིནིརོདྷནིམིཏྟཾ ནིབྦཱནཾ དསྶེཏི.

‘‘ཏཏྠ ཝུཏྟནཡེནེཝ ཝེདིཏབྦ’’ནྟི ཝཏྭཱ ཨུབྷཡཏྠ པཱལི༹ཡཱ པཝཏྟིཨཱཀཱརབྷེདཾ དསྶེཏུཾ ‘‘ཨཡཾ པན ཝིསེསོ’’ཏི ཨཱཧ. ཏཏྠཱཏི ཝིསདྡྷིམགྒེ. ཨིདྷཱཏི ཨིམསྨིཾ སུཏྟེ. ཨཝིཛྫཱཡ ཏྭེཝཱཏི ཨཝིཛྫཱཡ ཏུ ཨེཝ. ཨསེསཝིརཱགནིརོདྷཱཏི ཨེཏྠ ཨཙྩནྟམེཝ སངྑཱརེ ཝིརཛྫཏི ཨེཏེནཱཏི ཝིརཱགོ, མགྒོ, ཏསྨཱ ཝིརཱགསངྑཱཏེན མགྒེན ཨསེསནིརོདྷཱ ཨསེསེཏྭཱ ནིརོདྷཱ སམུཙྪིནྡནཱཏི ཨེཝམེཏྠ ཨཏྠོ དཊྛབྦོ.

སཀལསྶཱཏི ཨནཝསེསསྶ. ཀེཝལསྶཱཏི ཝཱ སུདྡྷསྶ, པརཔརིཀཔྤིཏསཏྟཛཱིཝཱདིཝིརཧིཏསྶཱཏི ཨཏྠོ. ཁཱིཎཱཀཱརོཔི ཝུཙྩཏི ‘‘ནིརུཛ྄ཛྷནཾ ནིརོདྷོ’’ཏི ཨིམིནཱ ཨཏྠེན. ཨརཧཏྟམྤི ནིརོདྷོཏི ཝུཙྩཏི ནིརོདྷནྟེ ཨུཔྤནྣཏྟཱ. ནིབྦཱནམྤི ནིརོདྷོཏི ཝུཙྩཏི ཨཝིཛྫཱདཱིནཾ ནིརོདྷསྶ ནིམིཏྟབྷཱཝཏོ ཨཝིཛྫཱདཡོ ནིརུཛ྄ཛྷནྟི ཨེཏྠཱཏི ནིརོདྷོཏི ཀཏྭཱ. ཁཱིཎཱཀཱརདསྶནཝསེནཱཏི ཨཝིཛྫཱདཱིནཾ ཨནུཔྤཏྟིནིརོདྷེན ནིརུཛ྄ཛྷནཱཀཱརདསྶནཝསེན. ནིབྦཱནམེཝ སནྡྷཱཡ, ན པན ཨརཧཏྟནྟི ཨདྷིཔྤཱཡོ. སབྷཱཝདྷམྨཱནཾ ནིགྒཧོ ནཱམ ཡཐཱཝུཏྟདྷམྨཔརིཙྪེདཏོ ཨཱུནཱདྷིཀབྷཱཝཔྤཀཱསནེན ཨཏྟསབྷཱཝཝིབྷཱཝནེནེཝ ཧོཏཱིཏི ཨཱཧ ‘‘ནིགྒཎྷནྟོ ཧཱི’’ཏིཨཱདི.

ཏིཏྠཱཡཏནསུཏྟཝཎྞནཱ ནིཊྛིཏཱ.

༢. བྷཡསུཏྟཝཎྞནཱ

༦༣. དུཏིཡེ པརིཏྟཱཏུཾ སམཏྠབྷཱཝེནཱཏི ཨུཔྤནྣབྷཡཏོ རཀྑིཏུཾ སམཏྠབྷཱཝེན. ནཏྠི ཨེཏྠ མཱཏཱཔུཏྟཾ ཨཉྙམཉྙཾ ཏཱཡིཏུཾ སམཏྠནྟི ཨམཱཏཱཔུཏྟཱནི, ཏཱནིཡེཝ ཨམཱཏཱཔུཏྟིཀཱནི. ཏེནཱཧ ‘‘ནཏྠི ཨེཏྠཱ’’ཏིཨཱདི. ཡནྟི བྷུམྨཏྠེ ཨུཔཡོགཝཙནནྟི ཨཱཧ ‘‘ཡསྨིཾ སམཡེ’’ཏི. མཱཏཱཔི པུཏྟཾ པསྶིཏུཾ ན ལབྷཏི, པརིཏྟཱཏུཾ ན སམཏྠནྟི ཨདྷིཔྤཱཡོ ¶ . པུཏྟོཔི མཱཏརནྟི ཨེཏྠཱཔི ཨེསེཝ ནཡོ. ཙིཏྟུཏྲཱསོཡེཝ བྷཡཾ ཙིཏྟུཏྲཱསབྷཡཾ. ཨིམིནཱ ཨོཏྟཔྤབྷཡཱདིཾ ནིཝཏྟེཏི. ཨཊཝིགྒཧཎེན ཨཊཝིཝཱསིནོ ¶ ཝུཏྟཱ ‘‘སབྦོ གཱམོ ཨཱགཏོ’’ཏིཨཱདཱིསུ ཝིཡཱཏི ཨཱཧ ‘‘ཨཊཝཱིཏི ཙེཏྠ ཨཊཝིཝཱསིནོ ཙོརཱ ཝེདིཏབྦཱ’’ཏི. ཨེཏེཏི ཨཊཝིཝཱསིནོ ཙོརཱ. ཨེཏཾ ཝུཏྟནྟི ‘‘ཨཊཝིསངྐོཔོ’’ཏི ཨིདཾ ཝུཏྟཾ. ཋཱནགམནཱདིཨིརིཡཱཔཐཙཀྐསམངྒིནོ ཨིརིཡཱཔཐཙཀྐསམཱརུལ༹ྷཱ ནཱམ ཧོནྟཱིཏི ཨཱཧ ‘‘ཨིརིཡཱཔཐཙཀྐམྤི ཝཊྚཏཱི’’ཏི. ཨིརིཡཱཔཐོཡེཝ པཝཏྟནཊྛེན ཙཀྐནྟི ཨིརིཡཱཔཐཙཀྐཾ.

པརིཡཱཡནྟཱིཏི པརིཏོ ཏེན ཏེན དིསཱབྷཱགེན གཙྪནྟི. ཏེནཱཧ ‘‘ཨིཏོ ཙིཏོ ཙ གཙྪནྟཱི’’ཏི. མཱཏུཔེམེན གནྟུཾ ཨཝིསཧིཏྭཱ ཨཏྟནོ སནྟིཀཾ ཨཱགཙྪནྟཾ. ཨཏྟསིནེཧསྶ བལཝབྷཱཝཏོ མཱཏརམྤི ཨནཔེཀྑིཏྭཱ ‘‘ཨཏྟཱནཾཡེཝ རཀྑིསྶཱམཱི’’ཏི གཙྪནྟཾ. ཨེཀསྨིཾ ཋཱནེ ནིལཱིནནྟི ཝུཏྟནཡེནེཝ གནྟྭཱ ཨེཀསྨིཾ ཁེམེ པདེསེ ནིསིནྣཾ. ཀུལླེ ཝཱཏིཨཱདཱིསུ ཀཱུལཾ པརཏཱིརཾ ཝཧཏི པཱཔེཏཱིཧི ཀུལློ, ཏརཎཏྠཱཡ ཝེལུ༹ནལཱ༹དཱིཧི ཀལཱཔཾ ཀཏྭཱ བདྡྷོ. པཏྠརིཏྭཱ བདྡྷོ པན ཨུལུ༹མྤོ, ཙཱཊིཨཱདི མཏྟིཀཱབྷཱཛནཾ. ཝུཡ྄ཧམཱནནྟི ཨུདཀོགྷེན ཨདྷོསོཏཾ ནཱིཡམཱནཾ.

ཡཐཱཝུཏྟཱནི ཏཱིཎི བྷཡཱནི སམཱཏཱཔུཏྟིཀཱནིཡེཝ ཨསྶུཏཝཏོ པུཐུཛྫནསྶ ཝསེན ཨམཱཏཱཔུཏྟིཀཱནི དསྶིཏཱནཱིཏི ཨཱཧ ‘‘ཨེཝཾ པརིཡཱཡཏོ ཨམཱཏཱཔུཏྟིཀཱནི བྷཡཱནི དསྶེཏྭཱ’’ཏི.

བྷཡསུཏྟཝཎྞནཱ ནིཊྛིཏཱ.

༣. ཝེནཱགཔུརསུཏྟཝཎྞནཱ

༦༤. ཏཏིཡེ ཨེཝཾནཱམཀེ ཛནཔདེཏི ཡཏྠ ནཱམགྒཧཎེན ཀོསལསདྡསྶ རུལ༹ྷཱིསདྡཏཾ དསྶེཏི. ཏཐཱ ཧི ཀོསལཱ ནཱམ ཛཱནཔདིནོ རཱཛཀུམཱརཱ, ཏེསཾ ནིཝཱསོ ཨེཀོཔི ཛནཔདོ རུལ༹ྷཱིསདྡེན ‘‘ཀོསལཱ’’ཏི ཝུཙྩཏི. ཨཀྑརཙིནྟཀཱ ཧི ཨཱིདིསེསུ ཋཱནེསུ ཡུཏྟེ ཝིཡ སལིངྒཝཙནཱནི (པཱཎིནི ༡.༢.༥༡) ཨིཙྪནྟི. ཨཡམེཏྠ རུལ༹ྷཱི ཡཐཱ ཨཉྙཏྠཱཔི ‘‘ཀུརཱུསུ ཝིཧརཏི, ཨངྒེསུ ཝིཧརཏཱི’’ཏི ཙ. ཏབྦིསེསནེ པན ཛནཔདསདྡེ ཛཱཏིསདྡེ ཨེཀཝཙནམེཝ ¶ ཡཐཱ ‘‘ཀོསལེསུ ཛནཔདེ’’ཏི. ཙཱརིཀནྟི ཙརཎཾ. ཙརཎཾ ཝཱ ཙཱརོ, སོ ཨེཝ ཙཱརིཀཱ. ཏཡིདཾ མགྒགམནཾ ཨིདྷཱདྷིཔྤེཏཾ, ན ཙུཎྞིཀགམནམཏྟནྟི ཨཱཧ ‘‘ཨདྡྷཱནགམནཾ གཙྪནྟོ’’ཏི. ཏཾ ཝིབྷཱགེན དསྶེཏུཾ ‘‘ཙཱརིཀཱ ཙ ནཱམེསཱ’’ཏིཨཱདི ཝུཏྟཾ. ཏཏྠ དཱུརེཔཱིཏི དཱུརེཔི ནཱཏིདཱུརེཔི. སཧསཱ གམནནྟི སཱིགྷགམནཾ. མཧཱཀསྶཔཔཙྩུགྒམནཱདཱིསཱུཏི ཨཱདི-སདྡེན ཨཱལ༹ཝཀཱདཱིནཾ ཨཏྠཱཡ གམནཾ སངྒཎྷཱཏི. བྷགཝཱ ཧི མཧཱཀསྶཔཏྠེརཾ པཙྩུགྒཙྪནྟོ མུཧུཏྟེན ཏིགཱཝུཏམགྒམགམཱསི. ཨཱལ༹ཝཀསྶཏྠཱཡ ¶ ཏིཾསཡོཛནཾ, ཏཐཱ ཨངྒུལིམཱལསྶ, པུཀྐུསཱཏིསྶ པན པཉྩཙཏྟཱལཱིསཡོཛནཾ, མཧཱཀཔྤིནསྶ ཝཱིསཡོཛནསཏཾ, དྷནིཡསྶཏྠཱཡ སཏྟ ཡོཛནསཏཱནི, དྷམྨསེནཱཔཏིནོ སདྡྷིཝིཧཱརིཀསྶ ཝནཝཱསིསྶ ཏིསྶསཱམཎེརསྶ ཏིགཱཝུཏཱདྷིཀཾ ཝཱིསཡོཛནསཏཾ ཨགམཱསི. ཨིམཾ སནྡྷཱཡཱཏི ཨིམཾ ཨཏུརིཏཙཱརིཀཾ སནྡྷཱཡ.

ཨུཔལབྷིཾསཱུཏི ཨེཏྠ སཝནཝསེན ཨུཔལབྷིཾསཱུཏི ཨིམམཏྠཾ དསྶེནྟོ ‘‘སོཏདྭཱར…པེ… ཛཱནིཾསཱུ’’ཏི ཨཱཧ. སབྦམྤི ཝཱཀྱཾ ཨཝདྷཱརཎཕལཏྟཱ ཨནྟོགདྷཱཝདྷཱརཎནྟི ཨཱཧ ‘‘པདཔཱུརཎམཏྟེ ཝཱ ནིཔཱཏོ’’ཏི. ཨཝདྷཱརཎཏྠེནཱཏི པན ཨིམིནཱ ཨིཊྛཏྠཏོཝདྷཱརཎཏྠཾ ཁོ-སདྡགྒཧཎནྟི དསྶེཏི. ཨསྶོསཱིཏི པདཾ ཁོ-སདྡེ གཧིཏེ ཏེན ཕུལླིཏམཎྜིཏཝིབྷཱུསིཏཾ ཝིཡ ཧོནྟཾ པཱུརིཏཾ ནཱམ ཧོཏི, ཏེན ཙ པུརིམཔཙྪིམཔདཱནི སཾསིལིཊྛཱནི ནཱམ ཧོནྟི, ན ཏསྨིཾ ཨགྒཧིཏེཏི ཨཱཧ ‘‘པདཔཱུརཎེན བྱཉྫནསིལིཊྛཏཱམཏྟམེཝཱ’’ཏི. མཏྟསདྡོ ཝིསེསནིཝཏྟིཨཏྠོ. ཏེནསྶ ཨནཏྠནྟརདཱིཔནཏཱ དསྶིཏཱ ཧོཏི, ཨེཝསདྡེན པན བྱཉྫནསིལིཊྛཏཱཡ ཨེཀནྟིཀཏཱ.

སམིཏཔཱཔཏྟཱཏི ཨཙྩནྟཾ ཨནཝསེསཏོ སཝཱསནཾ སམིཏཔཱཔཏྟཱ. ཨེཝཉྷི བཱཧིརཀཝཱིཏརཱགསེཀྑཱསེཀྑཔཱཔསམནཏོ བྷགཝཏོ པཱཔསམནཾ ཝིསེསིཏཾ ཧོཏི. ཏེནསྶ ཡཐཱབྷཱུཏགུཎཱདྷིགཏམེཏཾ ནཱམཾ ཡདིདཾ སམཎོཏི དཱིཔེཏི. ཨནེཀཏྠཏྟཱ ནིཔཱཏཱནཾ ཨིདྷ ཨནུསྶཝཏྠོ ཨདྷིཔྤེཏོཏི ཨཱཧ ‘‘ཁལཱུཏི ཨནུསྶཝཏྠེ ནིཔཱཏོ’’ཏི. ཨཱལཔནམཏྟནྟི པིཡཱལཱཔཝཙནམཏྟཾ. པིཡསམུདཱཧཱརཱ ཧེཏེ ‘‘བྷོ’’ཏི ཝཱ ‘‘ཨཱཝུསོ’’ཏི ཝཱ ‘‘དེཝཱནཾ པིཡཱ’’ཏི ཝཱ. གོཏྟཝསེནཱཏི ཨེཏྠ གཾ ཏཱཡཏཱིཏི གོཏྟཾ. གོཏམོཏི ཧི པཝཏྟམཱནཾ ཝཙནཾ བུདྡྷིཉྩ ཏཱཡཏི ཨེཀཾསིཀཝིསཡཏཱཡ རཀྑཏཱིཏི གོཏྟཾ. ཡཐཱ ཧི བུདྡྷི ཨཱརམྨཎབྷཱུཏེན ཨཏྠེན ¶ ཝིནཱ ན ཝཏྟཏི, ཏཐཱ ཨབྷིདྷཱནཾ ཨབྷིདྷེཡྻབྷཱུཏེན, ཏསྨཱ སོ གོཏྟསངྑཱཏོ ཨཏྠོ ཏཱནི ཏཱཡཏི རཀྑཏཱིཏི ཝུཙྩཏི. ཀོ པན སོཏི? ཨཉྙཀུལཔརམྤརཱསཱདྷཱརཎཾ ཏསྶ ཀུལསྶ ཨཱདིཔུརིསསམུདཱགཏཾ ཏཾཀུལཔརིཡཱཔནྣསཱདྷཱརཎཾ སཱམཉྙརཱུཔནྟི དཊྛབྦཾ. ཨེཏྠ ཙ སམཎོཏི ཨིམིནཱ པརིཀྑཀཛནེཧི བྷགཝཏོ བཧུམཏབྷཱཝོ དསྶིཏོ སམིཏཔཱཔཏཱཀིཏྟནཏོ. གོཏམོཏི ཨིམིནཱ ལོཀིཡཛནེཧི ཨུཙྩཱཀུལསམྦྷཱུཏཏཱ དཱིཔིཏཱ ཏེན ཨུདིཏོདིཏཝིཔུལཁཏྟིཡཀུལཝིབྷཱཝནཏོ. སབྦཁཏྟིཡཱནཉྷི ཨཱདིབྷཱུཏམཧཱསམྨཏམཧཱརཱཛཏོ པཊྛཱཡ ཨསམྦྷིནྣཾ ཨུལཱ༹རཏམཾ སཀྱརཱཛཀུལཾ.

ཀེནཙི པཱརིཛུཉྙེནཱཏི ཉཱཏིཔཱརིཛུཉྙབྷོགཔཱརིཛུཉྙཱདིནཱ ཀེནཙིཔི པཱརིཛུཉྙེན པརིཧཱནིཡཱ ཨནབྷིབྷཱུཏོ ཨནཛ྄ཛྷོཏྠཊོ. ཏཐཱ ཧི ཏསྶ ཀུལསྶ ན ཀིཉྩི པཱརིཛུཉྙཾ ལོཀནཱཐསྶ ཨབྷིཛཱཏིཡཾ, ཨཐ ཁོ ཝཌྜྷིཡེཝ. ཨབྷིནིཀྑམནེ ཙ ཏཏོཔི སམིདྡྷཏམབྷཱཝོ ལོཀེ ¶ པཱཀཊོ པཉྙཱཏོཏི. སཀྱཀུལཱ པབྦཛིཏོཏི ཨིདཾ ཝཙནཾ བྷགཝཏོ སདྡྷཱཔབྦཛིཏབྷཱཝདཱིཔནཾ ཝུཏྟཾ མཧནྟཾ ཉཱཏིཔརིཝཊྚཾ མཧནྟཉྩ བྷོགཀྑནྡྷཾ པཧཱཡ པབྦཛིཏབྷཱཝསིདྡྷིཏོ.

ཨིཏྠམྦྷཱུཏཱཁྱཱནཏྠེཏི ཨིཏྠཾ ཨེཝཾཔཀཱརོ བྷཱུཏོ ཛཱཏོཏི ཨེཝཾ ཀཐནཏྠེ. ཨུཔཡོགཝཙནནྟི ‘‘ཨབྦྷུགྒཏོ’’ཏི ཨེཏྠ ཨབྷི-སདྡོ ཨིཏྠམྦྷཱུཏཱཁྱཱནཏྠཛོཏཀོ, ཏེན ཡོགཏོ ‘‘ཏཾ ཁོ པན བྷཝནྟ’’ནྟི ཨིདཾ སཱམིཨཏྠེ ཨུཔཡོགཝཙནཾ. ཏེནཱཧ ‘‘ཏསྶ ཁོ པན བྷོཏོ གོཏམསྶཱཏི ཨཏྠོ’’ཏི. ཀལྱཱཎགུཎསམནྣཱགཏོཏི ཀལྱཱཎེཧི གུཎེཧི ཡུཏྟོ, ཏནྣིསྶིཏོ ཏབྦིསཡཏཱཡཱཏི ཨདྷིཔྤཱཡོ. སེཊྛོཏི ཨེཏྠཱཔི ཨེསེཝ ནཡོ. ཀིཏྟེཏབྦཏོ ཀིཏྟི, སཱ ཨེཝ སདྡནཱིཡཏོ སདྡོཏི ཨཱཧ ‘‘ཀིཏྟིསདྡོཏི ཀིཏྟིཡེཝཱ’’ཏི. ཨབྷིཏྠཝནཝསེན པཝཏྟོ སདྡོ ཐུཏིགྷོསོ. སདེཝཀཾ ལོཀཾ ཨཛ྄ཛྷོཏྠརིཏྭཱ ཨུགྒཏོཏི ཨནཉྙསཱདྷཱརཎེ གུཎེ ཨཱརབྦྷ པཝཏྟཏྟཱ སདེཝཀཾ ལོཀཾ ཨཛ྄ཛྷོཏྠརིཏྭཱ ཨབྷིབྷཝིཏྭཱ ཨུགྒཏོ.

སོ བྷགཝཱཏི ཡོ སོ སམཏིཾས པཱརམིཡོ པཱུརེཏྭཱ སབྦཀིལེསེ བྷཉྫིཏྭཱ ཨནུཏྟརཾ སམྨཱསམྦོདྷིཾ ཨབྷིསམྦུདྡྷོ དེཝཱནཾ ཨཏིདེཝོ ¶ སཀྐཱནཾ ཨཏིསཀྐོ བྲཧྨཱནཾ ཨཏིབྲཧྨཱ ལོཀནཱཐོ བྷཱགྱཝནྟཏཱདཱིཧི ཀཱརཎེཧི སདེཝཀེ ལོཀེ ‘‘བྷགཝཱ’’ཏི པཏྠཊཀིཏྟིསདྡོ, སོ བྷགཝཱ. ‘‘བྷགཝཱ’’ཏི ཙ ཨིདཾ སཏྠུ ནཱམཀིཏྟནཾ. ཏེནཱཧ ཨཱཡསྨཱ དྷམྨསེནཱཔཏི ‘‘བྷགཝཱཏི ནེཏཾ ནཱམཾ མཱཏརཱ ཀཏ’’ནྟིཨཱདི (མཧཱནི. ༨༤). པརཏོ པན བྷགཝཱཏི གུཎཀིཏྟནཾ. ཡཐཱ ཀམྨཊྛཱནིཀེན ‘‘ཨརཧ’’ནྟིཨཱདཱིསུ ནཝསུ ཋཱནེསུ པཙྩེཀཾ ཨིཏི-སདྡཾ ཡོཛེཏྭཱ བུདྡྷགུཎཱ ཨནུསྶརིཡནྟི, ཨེཝཾ བུདྡྷགུཎསཾཀིཏྟནེནཔཱིཏི དསྶེནྟོ ‘‘ཨིཏིཔི ཨརཧཾ ཨིཏིཔི སམྨཱསམྦུདྡྷོ…པེ… ཨིཏིཔི བྷགཝཱ’’ཏི ཨཱཧ. ‘‘ཨིཏིཔེཏཾ བྷཱུཏཾ ཨིཏིཔེཏཾ ཏཙྪ’’ནྟིཨཱདཱིསུ (དཱི. ནི. ༡.༦) ཝིཡ ཨིདྷ ཨིཏིསདྡོ ཨཱསནྣཔཙྩཀྑཀརཎཏྠོ, པི-སདྡོ སམྤིཎྜནཏྠོ, ཏེན ཙ ཏེསཾ གུཎཱནཾ བཧུབྷཱཝོ དཱིཔིཏོ, ཏཱནི ཙ སཾཀིཏྟེནྟེན ཝིཉྙུནཱ ཙིཏྟསྶ སམྨུཁཱིབྷཱུཏཱནེཝ ཀཏྭཱ སཾཀིཏྟེཏབྦཱནཱིཏི དསྶེནྟོ ‘‘ཨིམིནཱ ཙ ཨིམིནཱ ཙ ཀཱརཎེནཱཏི ཝུཏྟཾ ཧོཏཱི’’ཏི ཨཱཧ. ཨེཝཾ ནིརཱུཔེཏྭཱ ཀིཏྟེནྟོ ཡོ ཀིཏྟེཏི, ཏསྶ བྷགཝཏི ཨཏིཝིཡ ཨབྷིཔྤསཱདོ ཧོཏི.

ཨཱརཀཏྟཱཏི སུཝིདཱུརཏྟཱ. ཨརཱིནནྟི ཀིལེསཱརཱིནཾ. ཨརཱནནྟི སཾསཱརཙཀྐསྶ ཨརཱནཾ. ཧཏཏྟཱཏི ཝིདྡྷཾསིཏཏྟཱ. པཙྩཡཱདཱིནནྟི ཙཱིཝརཱདིཔཙྩཡཱནཉྩེཝ པཱུཛཱཝིསེསཱནཉྩ. ཏཏོཏི ཝིསུདྡྷིམགྒཏོ (ཝིསུདྡྷི. ༡.༡༢༥-༡༢༧). ཡཐཱ ཙ ཝིསུདྡྷིམགྒཏོ, ཨེཝཾ ཏཾསཾཝཎྞནཱཏོཔི ནེསཾ ཝིཏྠཱརོ གཧེཏབྦོ.

ཨིམཾ ¶ ལོཀནྟི ནཡིདཾ མཧཱཛནསྶ སམྨུཁམཏྟཾ སནྡྷཱཡ ཝུཏྟཾ, ཨཐ ཁོ ཨནཝསེསཾ པརིཡཱདཱཡཱཏི དསྶེཏུཾ ‘‘སདེཝཀ’’ནྟིཨཱདི ཝུཏྟཾ. ཏེནཱཧ ‘‘ཨིདཱནི ཝཏྟབྦཾ ནིདསྶེཏཱི’’ཏི. པཛཱཏཏྟཱཏི ཡཐཱསཀཾ ཀམྨཀིལེསེཧི ནིབྦཏྟཏྟཱ. པཉྩཀཱམཱཝཙརདེཝགྒཧཎཾ པཱརིསེསནཡེན ཨིཏརེསཾ པདནྟརེན གཧིཏཏྟཱ. སདེཝཀནྟི ཙ ཨཝཡཝེན ཝིགྒཧོ སམུདཱཡོ སམཱསཏྠོ. ཚཊྛཀཱམཱཝཙརདེཝགྒཧཎཾ པཙྩཱསཏྟིནཡེན. ཏཏྠ ཧི སོ ཛཱཏོ ཏནྣིཝཱསཱི ཙ. སབྲཧྨཀཝཙནེན བྲཧྨཀཱཡིཀཱདིབྲཧྨགྒཧཎནྟི ཨེཏྠཱཔི ཨེསེཝ ནཡོ. པཙྩཏྠིཀསམཎབྲཱཧྨཎགྒཧཎནྟི ནིདསྶནམཏྟམེཏཾ ཨཔཙྩཏྠིཀཱནཾ སམིཏབཱཧིཏཔཱཔཱནཉྩ སམཎབྲཱཧྨཎཱནཾ སམཎབྲཱཧྨཎཝཙནེན གཧིཏཏྟཱ. ཀཱམཾ ‘‘སདེཝཀ’’ནྟིཨཱདིཝིསེསནཱནཾ ཝསེན སཏྟཝིསཡོ ལོཀསདྡོཏི ཝིཉྙཱཡཏི ཏུལྱཡོགཝིསཡཏྟཱ ¶ ཏེསཾ, ‘‘སལོམཀོ སཔཀྑཀོ’’ཏིཨཱདཱིསུ པན ཨཏུལྱཡོགེཔི ཨཡཾ སམཱསོ ལབྦྷཏཱིཏི བྱབྷིཙཱརདསྶནཏོ པཛཱགཧཎནྟི ཨཱཧ ‘‘པཛཱཝཙནེན སཏྟལོཀགྒཧཎ’’ནྟི.

ཨརཱུཔིནོ སཏྟཱ ཨཏྟནོ ཨཱནེཉྫཝིཧཱརེན ཝིཧརནྟཱ དིབྦནྟཱིཏི དེཝཱཏི ཨིམཾ ནིབྦཙནཾ ལབྷནྟཱིཏི ཨཱཧ ‘‘སདེཝཀགྒཧཎེན ཨརཱུཔཱཝཙརལོཀོ གཧིཏོ’’ཏི. ཏེནཱཧ ‘‘ཨཱཀཱསཱནཉྩཱཡཏནཱུཔགཱནཾ དེཝཱནཾ སཧབྱཏ’’ནྟི (ཨ. ནི. ༣.༡༡༧). སམཱརཀགྒཧཎེན ཚཀཱམཱཝཙརདེཝལོཀོ གཧིཏོ ཏསྶ སཝིསེསཾ མཱརསྶ ཝསེ ཝཏྟནཏོ. སབྲཧྨཀགྒཧཎེན རཱུཔཱིབྲཧྨལོཀོ གཧིཏོ ཨརཱུཔཱིབྲཧྨལོཀསྶ གཧིཏཏྟཱ. ཙཏུཔརིསཝསེནཱཏི ཁཏྟིཡཱདིཙཏུཔརིསཝསེན. ཨིཏརཱ པན ཙཏསྶོ པརིསཱ སམཱརཀཱདིགྒཧཎེན གཧིཏཱ ཨེཝཱཏི. ཨཝསེསསཏྟལོཀོ ནཱགགརུལཱ༹དིབྷེདོ. ཏཱིཧཱཀཱརེཧཱིཏི དེཝམཱརབྲཧྨསཧིཏཏཱསངྑཱཏེཧི ཏཱིཧི པཀཱརེཧི. ཏཱིསུ པདེསཱུཏི ‘‘སདེཝཀ’’ནྟིཨཱདཱིསུ ཏཱིསུ པདེསུ. ཏེན ཏེནཱཀཱརེནཱཏི སདེཝཀཏྟཱདིནཱ ཏེན ཏེན པཀཱརེན. ཏེདྷཱཏུཀམེཝ པརིཡཱདིནྣནྟི པོརཱཎཱ ཨཱཧཱུཏི ཡོཛནཱ.

ཨབྷིཉྙཱཏི ཡཀཱརལོཔེནཱཡཾ ནིདྡེསོ, ཨབྷིཛཱནིཏྭཱཏི ཨཡམེཏྠ ཨཏྠོཏི ཨཱཧ ‘‘ཨབྷིཉྙཱཡ ཨདྷིཀེན ཉཱཎེན ཉཏྭཱ’’ཏི. ཨནུམཱནཱདིཔཊིཀྑེཔོཏི ཨནུམཱནཨཏྠཱཔཏྟིཨཱདིཔྤཊིཀྑེཔོ ཨེཀཔྤམཱཎཏྟཱ. སབྦཏྠ ཨཔྤཊིཧཏཉཱཎཙཱརཏཱཡ ཧི སབྦཔཙྩཀྑཱ བུདྡྷཱ བྷགཝནྟོ.

ཨནུཏྟརཾ ཝིཝེཀསུཁནྟི ཕལསམཱཔཏྟིསུཁཾ. ཏེན ཝིམིསྶཱཔི ཀདཱཙི བྷགཝཏོ དྷམྨདེསནཱ ཧོཏཱིཏི ‘‘ཧིཏྭཱཔཱི’’ཏི པི-སདྡགྒཧཎཾ. བྷགཝཱ ཧི དྷམྨཾ དེསེནྟོ ཡསྨིཾ ཁཎེ པརིསཱ སཱདྷུཀཱརཾ ཝཱ དེཏི, ཡཐཱསུཏཾ ཝཱ དྷམྨཾ པཙྩཝེཀྑཏི, ཏཾ ཁཎཾ པུབྦབྷཱགེན པརིཙྪིནྡིཏྭཱ ཕལསམཱཔཏྟིཾ སམཱཔཛྫཏི, ཡཐཱཔརིཙྪེདཉྩ སམཱཔཏྟིཏོ ཝུཊྛཱཡ ཋིཏཊྛཱནཏོ པཊྛཱཡ ¶ དྷམྨཾ དེསེཏི. ཨཔྤཾ ཝཱ བཧུཾ ཝཱ དེསེནྟོཏི ཨུགྒྷཊིཏཉྙུསྶ ཝསེན ཨཔྤཾ ཝཱ, ཝིཔཉྩིཏཉྙུསྶ ནེཡྻསྶ ཝཱ ཝསེན བཧུཾ ཝཱ དེསེནྟོ. དྷམྨསྶ ཀལྱཱཎཏཱ ཙ ནིཡྻཱནིཀཏཱ ཙ སབྦསོ ཨནཝཛྫབྷཱཝེནེཝཱཏི ཨཱཧ ‘‘ཨནཝཛྫམེཝ ཀཏྭཱ’’ཏི.

དེསཀཱཡཏྟེན ¶ ཨཱཎཱདིཝིདྷིནཱ ཨཏིསཛྫནཾ པབོདྷནཾ དེསནཱཏི སཱ པརིཡཏྟིདྷམྨཝསེན ཝེདིཏབྦཱཏི ཨཱཧ ‘‘དེསནཱཡ ཏཱཝ ཙཱཏུཔྤདིཀགཱཐཱཡཔཱི’’ཏིཨཱདི. ནིདཱནནིགམཱནིཔི སཏྠུ དེསནཱཡ ཨནུཝིདྷཱནཏོ ཏདནྟོགདྷཱནི ཨེཝཱཏི ཨཱཧ ‘‘ནིདཱནཾ ཨཱདི, ཨིདམཝོཙཱཏི པརིཡོསཱན’’ནྟི.

སཱསིཏབྦཔུགྒལགཏེན ཡཐཱཔརཱདྷཱདིསཱསིཏབྦབྷཱཝེན ཨནུསཱསནཾ ཏདངྒཝིནཡཱདིཝསེན ཝིནཡནཾ སཱསནནྟི ཏཾ པཊིཔཏྟིདྷམྨཝསེན ཝེདིཏབྦནྟི ཨཱཧ ‘‘སཱིལསམཱདྷིཝིཔསྶནཱ’’ཏིཨཱདི. ཀུསལཱནནྟི ཨནཝཛྫདྷམྨཱནཾ སཱིལསམཐཝིཔསྶནཱནཾ སཱིལདིཊྛཱིནཉྩ ཨཱདིབྷཱཝོ ཏཾམཱུལིཀཏྟཱ ཨུཏྟརིམནུསྶདྷམྨཱནཾ. ཨརིཡམགྒསྶ ཨནྟདྭཡཝིགམེན མཛ྄ཛྷིམཱཔཊིཔདཱབྷཱཝོ ཝིཡ སམྨཱཔཊིཔཏྟིཡཱ ཨཱརབྦྷ ནིབྦཏྟཱིནཾ ཝེམཛ྄ཛྷཏཱཔི མཛ྄ཛྷབྷཱཝོཏི ཝུཏྟཾ ‘‘ཨཏྠི, བྷིཀྑཝེ…པེ… མཛ྄ཛྷིམཾ ནཱམཱ’’ཏི. ཕལཾ པརིཡོསཱནཾ ནཱམ སཨུཔཱདིསེསཏཱཝསེན. ནིབྦཱནཾ པརིཡོསཱནཾ ནཱམ ཨནུཔཱདིསེསཏཱཝསེན. ཨིདཱནི ཏེསཾ དྭིནྣམྤི སཱསནསྶ པརིཡོསཱནཏཾ ཨཱགམེན དསྶེཏུཾ ‘‘ཏསྨཱཏིཧ ཏྭ’’ནྟིཨཱདི ཝུཏྟཾ. ‘‘སཱཏྠཾ སབྱཉྫན’’ནྟིཨཱདིཝཙནཏོ དྷམྨདེསནཱཡ ཨཱདིམཛ྄ཛྷཔརིཡོསཱནཾ ཨདྷིཔྤེཏནྟི ཨཱཧ ‘‘ཨིདྷ…པེ… ཨདྷིཔྤེཏ’’ནྟི. ཏསྨིཾ ཏསྨིཾ ཨཏྠེ ཀཐཱཝདྷིསདྡཔྤབནྡྷོ གཱཐཱཝསེན སུཏྟཝསེན ཙ ཝཝཏྠིཏོ པརིཡཏྟིདྷམྨོ, སོ ཨིདྷ དེསནཱཏི ཝུཏྟོ, ཏསྶ པན ཨཏྠོ ཝིསེསཏོ སཱིལཱདི ཨེཝཱཏི ཨཱཧ ‘‘བྷགཝཱ ཧི དྷམྨཾ དེསེནྟོ…པེ… དསྶེཏཱི’’ཏི. ཏཏྠ སཱིལཾ དསྶེཏྭཱཏི སཱིལགྒཧཎེན སསམྦྷཱརཾ སཱིལཾ གཧིཏཾ, ཏཐཱ མགྒགྒཧཎེན སསམྦྷཱརོ མགྒོཏི ཏདུབྷཡཝསེན ཨནཝསེསཏོ པརིཡཏྟིཨཏྠཾ པརིཡཱདཱཡ ཏིཊྛཏི. ཏེནཱཏི སཱིལཱདིདསྶནེན. ཨཏྠཝསེན ཧི ཨིདྷ དེསནཱཡ ཨཱདིཀལྱཱཎཱདིབྷཱཝོ ཨདྷིཔྤེཏོ. ཀཐིཀསཎྛིཏཱིཏི ཀཐིཀསྶ སཎྛཱནཾ ཀཐནཝསེན སམཝཊྛཱནཾ.

ན སོ སཱཏྠཾ དེསེཏི ནིཡྻཱནཏྠཝིརཧཏོ ཏསྶཱ དེསནཱཡ. ཨེཀབྱཉྫནཱདིཡུཏྟཱ ཝཱཏི སིཐིལཱདིབྷེདེསུ བྱཉྫནེསུ ཨེཀཔྤཀཱརེནེཝ དྭིཔྤཀཱརེནེཝ ཝཱ བྱཉྫནེན ཡུཏྟཱ དམིལ༹བྷཱསཱ ཝིཡ. ཝིཝཊཀརཎཏཱཡ ཨོཊྛེ ཨཕུསཱཔེཏྭཱ ཨུཙྩཱརེཏབྦཏོ སབྦནིརོཊྛབྱཉྫནཱ ཝཱ ཀིརཱཏབྷཱསཱ ཝིཡ. སབྦསྶེཝ ཝིསྶཛྫནཱིཡཡུཏྟཏཱཡ སབྦཝིསྶཊྛབྱཉྫནཱ ¶ ཝཱ ཡཝནབྷཱསཱ ཝིཡ. སབྦསྶེཝ སཱནུསཱརཏཱཡ ¶ སབྦནིགྒཧིཏབྱཉྫནཱ ཝཱ པཱརསིཀཱདིམིལཀྑབྷཱསཱ ཝིཡ. སབྦཱཔེསཱ བྱཉྫནེཀདེསཝསེནེཝ པཝཏྟིཡཱ ཨཔརིཔུཎྞབྱཉྫནཱཏི ཀཏྭཱ ‘‘ཨབྱཉྫནཱ’’ཏི ཝུཏྟཱ.

ཋཱནཀརཎཱནི སིཐིལཱནི ཀཏྭཱ ཨུཙྩཱརེཏབྦཾ ཨཀྑརཾ པཉྩསུ ཝགྒེསུ པཋམཏཏིཡནྟི ཨེཝམཱདི སིཐིལཾ. ཏཱནི ཨསིཐིལཱནི ཀཏྭཱ ཨུཙྩཱརེཏབྦཾ ཨཀྑརཾ ཝགྒེསུ དུཏིཡཙཏུཏྠནྟི ཨེཝམཱདི དྷནིཏཾ. དྭིམཏྟཀཱལཾ དཱིགྷཾ. ཨེཀམཏྟཀཱལཾ རསྶཾ. ཏདེཝ ལཧུཀཾ ལཧུཀམེཝ. སཾཡོགཔརཾ དཱིགྷཉྩ གརུཀཾ. ཋཱནཀརཎཱནི ནིགྒཧེཏྭཱ ཨུཙྩཱརེཏབྦཾ ནིགྒཧིཏཾ. པརེན སམྦནྡྷཾ ཀཏྭཱ ཨུཙྩཱརེཏབྦཾ སམྦནྡྷཾ. ཏཐཱ ན སམྦནྡྷཾ ཝཝཏྠིཏཾ. ཋཱནཀརཎཱནི ཝིསྶཊྛཱནི ཀཏྭཱ ཨུཙྩཱརེཏབྦཾ ཝིམུཏྟཾ. དསདྷཱ བྱཉྫནབུདྡྷིཡཱ པབྷེདོཏི ཨེཝཾ སིཐིལཱདིཝསེན བྱཉྫནབུདྡྷིཡཱ ཨཀྑརུཔྤཱདཀཙིཏྟསྶ དསཔྤཀཱརེན པབྷེདོ. སབྦཱནི ཧི ཨཀྑརཱནི ཙིཏྟསམུཊྛཱནཱནི ཡཐཱདྷིཔྤེཏཏྠབྱཉྫནཏོ བྱཉྫནཱནི ཙ.

ཨམཀྑེཏྭཱཏི ཨམིལེཙྪེཏྭཱ, ཨཝིནཱསེཏྭཱ, ཨཧཱཔེཏྭཱཏི ཨཏྠོ. བྷགཝཱ ཡམཏྠཾ ཉཱཔེཏུཾ ཨེཀགཱཐཾ ཨེཀཝཱཀྱམྤི དེསེཏི, ཏམཏྠཾ ཏཱཡ དེསནཱཡ པརིམཎྜལཔདབྱཉྫནཱཡ ཨེཝ དེསེཏཱིཏི ཨཱཧ ‘‘པརིཔུཎྞབྱཉྫནམེཝ ཀཏྭཱ དྷམྨཾ དེསེཏཱི’’ཏི. ཨིདྷ ཀེཝལསདྡོ ཨནཝསེསཝཱཙཀོ, ན ཨཝོམིསྶཏཱདིཝཱཙཀོཏི ཨཱཧ ‘‘སཀལཱདྷིཝཙན’’ནྟི. པརིཔུཎྞནྟི སབྦསོ པུཎྞཾ. ཏཾ པན ཀིཉྩི ཨཱུནཾ ཝཱ ཨདྷིཀཾ ཝཱ ན ཧོཏཱིཏི ‘‘ཨནཱུནཱདྷིཀཝཙན’’ནྟི ཝུཏྟཾ. ཏཏྠ ཡདཏྠཾ དེསིཏཾ, ཏསྶ སཱདྷཀཏྟཱ ཨནཱུནཏཱ ཝེདིཏབྦཱ, ཏབྦིདྷུརསྶ པན ཨསཱདྷཀཏྟཱ ཨནདྷིཀཏཱ. སཀལནྟི སབྦབྷཱགཝནྟཾ. པརིཔུཎྞམེཝཱཏི སབྦསོ པརིཔུཎྞམེཝ. ཏེནཱཧ ‘‘ཨེཀདེསནཱཔི ཨཔརིཔུཎྞཱ ནཏྠཱི’’ཏི. ཨཔརིསུདྡྷཱ དེསནཱ ནཱམ ཧོཏི ཏཎྷཱསཾཀིལེསཏྟཱ. ལོཀཱམིསཾ ཙཱིཝརཱདཡོ པཙྩཡཱ, ཏཏྠ ཨགདྷིཏཙིཏྟཏཱཡ ལོཀཱམིསནིརཔེཀྑོ. ཧིཏཕརཎེནཱཏི ཧིཏཱུཔསཾཧརཎེན. མེཏྟཱབྷཱཝནཱཡ མུདུཧདཡོཏི མེཏྟཱབྷཱཝནཱཡ ཀརུཎཱཡ ཝཱ མུདུཧདཡོ. ཨུལླུམྤནསབྷཱཝསཎྛིཏེནཱཏི སཀལསཾཀིལེསཏོ ཝཊྚདུཀྑཏོ ཙ ཨུདྡྷརཎཱཀཱརཱཝཊྛིཏེན ཙིཏྟེན, ཀརུཎཱདྷིཔྤཱཡེནཱཏི ཨཏྠོ. ཏསྨཱཏི ཡསྨཱ ¶ སིཀྑཏྟཡསངྒཧཾ སཀལཾ སཱསནཾ ཨིདྷ བྲཧྨཙརིཡནྟི ཨདྷིཔྤེཏཾ, ཏསྨཱ. བྲཧྨཙརིཡནྟི ཨིམིནཱ སམཱནཱདྷིཀརཎཱནི སབྦཔདཱནི ཡོཛེཏྭཱ ཨཏྠཾ དསྶེནྟོ ‘‘སོ དྷམྨཾ དེསེཏི…པེ… པཀཱསེཏཱིཏི ཨེཝམེཏྠ ཨཏྠོ དཊྛབྦོ’’ཏི ཨཱཧ.

སུནྡརནྟི བྷདྡཀཾ. བྷདྡཀཏཱ ཙ པསྶནྟསྶ ཧིཏསུཁཱཝཧབྷཱཝེན ཝེདིཏབྦཱཏི ཨཱཧ ‘‘ཨཏྠཱཝཧཾ སུཁཱཝཧ’’ནྟི. ཏཏྠ ཨཏྠཱཝཧནྟི དིཊྛདྷམྨིཀསམྤརཱཡིཀཔརམཏྠསཾཧིཏཧིཏཱཝཧཾ. སུཁཱཝཧནྟི ཡཐཱཝུཏྟཏིཝིདྷསུཁཱཝཧཾ. ཏཐཱནུརཱུཔཱནནྟི ཏཱདིསཱནཾ. ཡཱདིསེཧི པན གུཎེཧི བྷགཝཱ ¶ སམནྣཱགཏོ, ཏེཧི ཙཏུཔྤམཱཎིཀསྶ ལོཀསྶ སབྦཐཱཔི ཨཙྩནྟཔྤསཱདནཱིཡོ ཏེསཾ ཡཐཱབྷཱུཏསབྷཱཝཏྟཱཏི དསྶེནྟོ ‘‘ཡཐཱརཱུཔོ’’ཏིཨཱདིམཱཧ. ཏཏྠ ཡཐཱབྷཱུཏ…པེ… ཨརཧཏནྟི ཨིམིནཱ དྷམྨཔྤམཱཎལཱུཁཔྤམཱཎཱནཾ སཏྟཱནཾ བྷགཝཏོ པསཱདཱཝཧཏཱ དསྶིཏཱ, ཨིཏརེན ཨིཏརེསཾ. དསྶནམཏྟམྤི སཱདྷུ ཧོཏཱིཏི ཨེཏྠ ཀོསིཡཝཏྠུ ཀཐེཏབྦཾ. ཨུབྷཏོཔཀྑིཀཱཏི མིཙྪཱདིཊྛིསམྨཱདིཊྛིཝསེན ཨུབྷཡཔཀྑིཀཱ. ཀེརཱཊིཀཱཏི སཋཱ.

ཨནེཀཏྠཏྟཱ ནིཔཱཏཱནཾ ཡཱཝཉྩིདནྟི ནིཔཱཏསམུདཱཡོ ཨདྷིམཏྟཔྤམཱཎཔརིཙྪེདཾ དཱིཔེཏཱིཏི ཨཱཧ ‘‘ཨདྷིམཏྟཔྤམཱཎཔརིཙྪེདཝཙནམེཏ’’ནྟི. ཨདྷིམཏྟཝིཔྤསནྣཱནཱིཏི ཨདྷིཀཔྤམཱཎེན ཝིཔྤསནྣཱནི. ཝིཔྤསནྣཱནཱིཏི ཙ པཀཏིཨཱཀཱརཾ ཨཏིཀྐམིཏྭཱ ཝིཔྤསནྣཱནཱིཏི ཨཏྠོ. ནནུ ཙ ཙཀྑཱདཱིནཾ ཨིནྡྲིཡཱནཾ མནོཝིཉྙེཡྻཏྟཱ ཀཐཾ ཏེན ཏེསཾ ཝིཔྤསནྣཏཱ ཝིཉྙཱཡཏཱིཏི ཨཱཧ ‘‘ཏསྶ ཧཱི’’ཏིཨཱདི. ཏསྶཱཏི བྲཱཧྨཎསྶ. ཏེསནྟི ཙཀྑཱདཱིནཾ པཉྩནྣཾ ཨིནྡྲིཡཱནཾ. ཨེཝམྤི མནིནྡྲིཡེན པཏིཊྛིཏོཀཱསསྶ ཨདིཊྛཏྟཱ ཀཐཾ མནིནྡྲིཡསྶ ཝིཔྤསནྣཏཱ ཏེན ཝིཉྙཱཡཏཱིཏི ཨཱཧ ‘‘ཡསྨཱ པནཱ’’ཏིཨཱདི. ནཡགྒཱཧཔཉྙཱ ཧེསཱ ཏསྶ བྲཱཧྨཎསྶ. མནེ ཝིཔྤསནྣེཡེཝ ཧོཏི པསནྣཙིཏྟསམུཊྛིཏརཱུཔསམྤདཱཧི ཨེཝ ཙཀྑཱདཱིནཾ པཏིཊྛིཏོཀཱསསྶ པསནྣཏཱསམྦྷཝཏོ.

ཛམྦོནདསུཝཎྞཾ རཏྟཝཎྞམེཝ ཧོཏཱིཏི ཨཱཧ ‘‘སུརཏྟཝཎྞསྶཱ’’ཏི. ཛམྦོནདསུཝཎྞསྶ གྷཊིཀཱཏི ཛམྦོནདསུཝཎྞཔིཎྜཾ. ཨིམིནཱ ནེཀྑནྟི ནེཀྑཔྤམཱཎཛམྦོནདསུཝཎྞེན ཀཏཾ ཨཀཏབྷཎྜཾ ཝུཏྟནྟི དསྶེཏི. ནེཀྑནྟི ཝཱ ཨཏིརེཀཔཉྩསུཝཎྞེན ཀཏཔིལནྡྷནཾ ཀཏབྷཎྜཾ ཝུཏྟཾ. ཏཉྷི གྷཊྚནམཛྫནཀྑམཾ ཧོཏཱིཏི. སུཝཎྞནྟི ཙ པཉྩདྷརཎསྶ ¶ སམཉྙཱ, ཏསྨཱ པཉྩཝཱིསཏིདྷརཎཧིརཉྙཝིཙིཏཾ ཨཱབྷརཎཾ ཨིདྷ ནེཀྑནྟི ཨདྷིཔྤེཏཾ. ཛམྦོནདནྟི མཧཱཛམྦུསཱཁཱཡ པཝཏྟནདིཡཾ ནིབྦཏྟཾ. ཏཾ ཀིར རཏནཾ རཏྟཾ. སུཝཎྞཱཀཱརེ མཧཱཛམྦུཕལརསེ ཝཱ པཐཝིཡཾ པཝིཊྛེ སུཝཎྞངྐུརཱ ཨུཊྛཧནྟི, ཏེན སུཝཎྞེན ཀཏཔིལནྡྷནནྟིཔི ཨཏྠོ. སུཔརིཀམྨཀཏནྟི སུཊྛུ ཀཏཔརིཀམྨཾ. སམྤཧཊྛནྟི སམྨཱ པཧཊྛཾ གྷཊྚནཱདིཝསེན སུཀཏཔརིཀམྨཾ. ཏེནཱཧ ‘‘སུཝཎྞཀཱར…པེ… སུཔརིམཛྫིཏནྟི ཨཏྠོ’’ཏི.

ཝཱལ༹རཱུཔཱནཱིཏི ཨཱཧརིམཱནི ཝཱལ༹རཱུཔཱནི. ‘‘ཨཀཔྤིཡརཱུཔཱཀུལོ ཨཀཔྤིཡམཉྩོ པལླངྐོཏི སཱརསམཱསེ. རཏནཙིཏྲནྟི བྷིཏྟིཙྪེདཱདིཝསེན རཏནཙིཏྲཾ. རུཀྑཏཱུལལཏཱཏཱུལཔོཊཀིཏཱུལཱནཾ ཝསེན ཏིཎྞཾ ཏཱུལཱནཾ. ཨུདྡལོམིཡཾ ཀེཙཱིཏི སཱརསམཱསཱཙརིཡཱ ཨུཏྟརཝིཧཱརིནོ ཙ. ཏཐཱ ཨེཀནྟལོམིཡཾ. ཀོསེཡྻཀཊྚིསྶམཡནྟི ཀོསེཡྻཀསཊམཡཾ. ཨཛིནཙམྨེཧཱིཏི ¶ ཨཛིནམིགཙམྨེཧི. ཏཱནི ཀིར ཙམྨཱནི སུཁུམཏརཱནི. ཏསྨཱ དུཔཊྚཏིཔཊྚཱནི ཀཏྭཱ སིབྦནྟི. ཏེན ཝུཏྟཾ ‘‘ཨཛིནཔྤཝེཎཱི’’ཏིཨཱདི.

ནིཀཱམལཱབྷཱིཏི ཡཐིཙྪིཏལཱབྷཱི. ཏེནཱཧ ‘‘ཨིཙྪིཏིཙྪིཏལཱབྷཱི’’ཏི. ཝིཔུལལཱབྷཱིཏི ཨུལཱ༹རལཱབྷཱི. ཀསིརནྟི ཧི པརིཏྟཾ ཝུཙྩཏི, ཏཔྤཊིཀྑེཔེན ཨཀསིརཾ ཨུལཱ༹རཾ. ཏེནཱཧ ‘‘མཧནྟལཱབྷཱི’’ཏིཨཱདི.

ལདྡྷཱ ཙ ན ཀཔྤནྟཱིཏི སཱམཉྙེན པཊིསིདྡྷཏྟཱ སབྦཐཱ ན ཀཔྤཏཱིཏི ཀསྶཙི ཨཱསངྐཱ སིཡཱ, ཏནྣིཝཏྟནཏྠཾ ‘‘ཀིཉྩི ཀིཉྩི ཀཔྤཏཱི’’ཏིཨཱདིམཱཧ. ཏཏྠ སུདྡྷཀོསེཡྻནྟི རཏནཔརིསིབྦནརཧིཏཾ. ཨེཏྠ ཙ ‘‘སུདྡྷཀོསེཡྻཾ པན ཝཊྚཏཱི’’ཏི ཝིནཡེ (མཧཱཝ. ཨཊྛ. ༢༥༤) ཝུཏྟཏྟཱ ཨིདྷཱཔི ཨེཏྟཀམེཝ ཝུཏྟཾ. དཱིགྷནིཀཱཡཊྛཀཐཱཡཾ (དཱི. ནི. ཨཊྛ. ༡.༡༥) པན ‘‘ཋཔེཏྭཱ ཏཱུལིཀཾ སབྦཱནེཝ གོནཀཱདཱིནི རཏནཔརིསིབྦིཏཱནི ན ཝཊྚནྟཱི’’ཏི ཝུཏྟཾ. ཏཏྠ ‘‘ཋཔེཏྭཱ ཏཱུལིཀ’’ནྟི ཨེཏེན རཏནསིབྦནརཧིཏཱཔཱི ཏཱུལིཀཱ ན ཝཊྚཏཱིཏི དཱིཔེཏི. ཝཙནཏོཏི ཨེཏེན ཝིནཡེ (ཙཱུལ༹ཝ. ༢༩༧) ཝུཏྟབྷཱཝཾ དསྶེཏི. ཨེཀེན ཝིདྷཱནེནཱཏི ཡཐཱཝུཏྟམེཝ ཝིདྷཱནཾ སནྡྷཱཡ ཝདཏི. ཡདི ཨེཝཾ ཀསྨཱ བྷགཝཏཱ ‘‘ལདྡྷཱ ཙ ན ཀཔྤནྟཱི’’ཏི སཱམཉྙེན པཊིསེདྷོ ཀཏོཏི ཨཱཧ ‘‘ཨཀཔྤིཡཾ པན ཨུཔཱདཱཡཱ’’ཏིཨཱདི.

པལླངྐནྟི ཨེཏྠ པརི-སདྡོ སམནྟཏོཏི ཨེཏསྨིཾ ཨཏྠེ ཝཏྟཏི, ཏསྨཱ ཝཱམཱུརུཾ དཀྑིཎཱུརུཉྩ སམཾ ཋཔེཏྭཱ ཨུབྷོ པཱདེ ཨཉྙམཉྙསམྦནྡྷེ ཀཏྭཱ ¶ ནིསཛྫཱ པལླངྐནྟི ཨཱཧ ‘‘སམནྟཏོ ཨཱུརུབདྡྷཱསན’’ནྟི. ཨཱུརཱུནཾ བནྡྷནཝསེན ནིསཛྫཱ. པལླངྐཾ ཨཱབྷུཛིཏྭཱཏི ཙ ཡཐཱ པལླངྐཝསེན ནིསཛྫཱ ཧོཏི, ཨེཝཾ ཨུབྷོ པཱདེ ཨཱབྷུཛེ སམིཉྫིཏེ ཀཏྭཱཏི ཨཏྠོ. ཏཾ པན ཨུབྷིནྣཾ པཱདཱནཾ ཏཐཱ སམྦནྡྷཏཱཀརཎནྟི ཨཱཧ ‘‘བནྡྷིཏྭཱ’’ཏི. ཨུཛུཾ ཀཱཡཾ པཎིདྷཱཡཱཏི ཨུཔརིམཾ སརཱིརཾ ཨུཛུཀཾ ཋཔེཏྭཱ ཨཊྛཱརས པིཊྛིཀཎྚཀེ ཀོཊིཡཱ ཀོཊིཾ པཊིཔཱདེཏྭཱ. ཨེཝཉྷི ནིསིནྣསྶ ཙམྨམཾསནྷཱརཱུནི ན པཎམནྟི. ཨཐསྶ ཡཱ ཏེསཾ པཎམནཔཙྩཡཱ ཁཎེ ཁཎེ ཝེདནཱ ཨུཔྤཛྫེཡྻུཾ, ཏཱ ན ཨུཔྤཛྫནྟི. ཏཱསུ ཨནུཔྤཛྫམཱནཱསུ ཙིཏྟཾ ཨེཀགྒཾ ཧོཏི, ཀམྨཊྛཱནཾ ན པརིཔཏཏི, ཝུདྡྷིཾ ཕཱཏིཾ གཙྪཏི. ཏེནཱཧ ‘‘ཨཊྛཱརས པིཊྛིཀཎྚཀེ’’ཏིཨཱདི. ཨུཛུཾ ཀཱཡཾ ཋཔེཏྭཱཏི ཨུཔརིམཾ ཀཱཡཾ ཨུཛུཀཾ ཋཔེཏྭཱ, ཨཡམེཝ ཝཱ པཱཋོ. ཧེཊྛིམཀཱཡསྶ ཧི ཨནུཛུཀཊྛཔནཾ ནིསཛྫཱཝཙནེནེཝ བོདྷིཏནྟི. ཨུཛུཾ ཀཱཡནྟི ཨེཏྠ ཀཱཡ-སདྡོ ཨུཔརིམཀཱཡཝིསཡོ.

པརིམུཁནྟི ¶ ཨེཏྠ པརི-སདྡོ ཨབྷིསདྡེན སམཱནཏྠོཏི ཨཱཧ ‘‘ཀམྨཊྛཱནཱབྷིམུཁ’’ནྟི, བཧིདྡྷཱ པུཐུཏྟཱརམྨཎཏོ ནིཝཱརེཏྭཱ ཀམྨཊྛཱནཾཡེཝ པུརཀྑཏྭཱཏི ཨཏྠོ. ཨེཏྠ ཡཐཱ ‘‘ཝནནྟཉྙེཝ པཝིསཱམཱི’’ཏིཨཱདིནཱ བྷཱཝནཱནུརཱུཔཾ སེནཱསནཾ དསྶིཏཾ, ཨེཝཾ ‘‘ནིསཱིདཱམཱི’’ཏི ཨིམིནཱ ཨལཱིནཱནུདྡྷཙྩཔཀྑིཡོ སནྟོ ཨིརིཡཱཔཐོ དསྶིཏོ, ‘‘པལླངྐཾ ཨཱབྷུཛིཏྭཱ’’ཏི ཨིམིནཱ ནིསཛྫཱཡ དལ༹ྷབྷཱཝོ, ‘‘པརིམུཁཾ སཏིཾ ཨུཔཊྛཔེཏྭཱ’’ཏི ཨིམིནཱ ཨཱརམྨཎཔརིགྒཧཱུཔཱཡོ. པརིགྒཧིཏནིཡྻཱནནྟི སབྦཐཱ གཧིཏཱསམྨོསཾ པརིཙྩཏྟསམྨོསཾ སཏིཾ ཀཏྭཱ, པརམསཏིནེཔཀྐཾ ཨུཔཊྛཔེཏྭཱཏི ཨཏྠོ. པརཱིཏི པརིགྒཧཊྛོ ‘‘པརིཎཱཡིཀཱ’’ཏིཨཱདཱིསུ (དྷ. ས. ༡༦.༢༠) ཝིཡ. མུཁནྟི ནིཡྻཱནཊྛོ ‘‘སུཉྙཏཝིམོཀྑ’’ནྟིཨཱདཱིསུ (པཊི. མ. ༡.༢༠༩-༢༡༠) ཝིཡ. པཊིཔཀྑཏོ ནིགྒམནཊྛོ ཧི ནིཡྻཱནཊྛོ.

ཙཏྟཱརི རཱུཔཱཝཙརཛ྄ཛྷཱནཱནི དིབྦབྷཱཝཱཝཧཏྟཱ དིབྦཝིཧཱརཱ ནཱམ ཧོནྟཱིཏི ཏདཱསནྣཔྤཝཏྟཙངྐམོཔི ཏདུཔཙཱརཏོ དིབྦོ ནཱམ ཧོཏཱིཏི ཨཱཧ ‘‘ཙཏྟཱརི ཧི རཱུཔཛ྄ཛྷཱནཱནཱི’’ཏིཨཱདི. སམཱཔཛྫིཏྭཱ ཙངྐམནྟསྶཱཏི ཨིདཉྩ ཙངྐམནྟསྶ ཨནྟརནྟརཱ སམཱཔཏྟིཾ སམཱཔཛྫིཏྭཱ ཨུཊྛཱཡུཊྛཱཡ ཙངྐམནཾ སནྡྷཱཡ ཝུཏྟཾ. ན ཧི སམཱཔཏྟིཾ སམཱཔཛྫིཏྭཱ ཨཝུཊྛིཏེན སཀྐཱ ཙངྐམིཏུཾ. སམཱཔཏྟིཏོ ཝུཊྛཱཡ ཙངྐམནྟསྶཔི ཙངྐམོཏི ཨིདཾ པན སམཱཔཏྟིཏོ ཝུཊྛཧིཏྭཱ ཨནྟརནྟརཱ སམཱཔཛྫིཏྭཱ ཙངྐམནྟསྶ ཝསེན ཝུཏྟཾ. དྭཱིསུ ཝིཧཱརེསཱུཏི ¶ བྲཧྨཝིཧཱརེ, ཨརིཡཝིཧཱརེ ཙ. མེཏྟཱཛྷཱནཱདཡོ ཧིཏཱུཔསཾཧཱརཱདིཝསེན པཝཏྟིཡཱ བྲཧྨབྷཱུཏཱ སེཊྛབྷཱུཏཱ ཝིཧཱརཱཏི བྲཧྨཝིཧཱརཱ. ཨནཉྙསཱདྷཱརཎཏྟཱ པན ཨརིཡཱནཾ ཝིཧཱརཱཏི ཨརིཡཝིཧཱརཱ, ཙཏསྶོཔི ཕལསམཱཔཏྟིཡོ. ཨིདྷ པན ཨརཧཏྟཕལསམཱཔཏྟིཡེཝ ཨཱགཏཱ.

པཙྩཝེཀྑཎཱཡ ཕལསམཱཔཏྟི ཀཐིཏཱ སམཱཔཏྟིཾ སམཱཔཛྫིཏྭཱ ཝུཊྛིཏསྶ པཙྩཝེཀྑཎཱསམྦྷཝཏོ. ཙངྐམཱདཡོཏི ཕལསམཱཔཏྟིཾ སམཱཔནྣསྶཔི སམཱཔཏྟིཏོ ཝུཊྛིཏསྶཔི ཙངྐམཊྛཱནནིསཛྫཱདཡོ. ཨརིཡཙངྐམཱདཡོ ཧོནྟི ན པན པཙྩཝེཀྑནྟསྶཱཏི ཨདྷིཔྤཱཡོ.

ཝེནཱགཔུརསུཏྟཝཎྞནཱ ནིཊྛིཏཱ.

༤. སརབྷསུཏྟཝཎྞནཱ

༦༥. ཙཏུཏྠེ གིཛ྄ཛྷཱ ཨེཏྠ སནྟཱིཏི གིཛ྄ཛྷཾ, ཀཱུཊཾ. ཏཾ ཨེཏསྶཱཏི གིཛ྄ཛྷཀཱུཊོ. གིཛ྄ཛྷོ ཝིཡཱཏི ཝཱ གིཛ྄ཛྷཾ, ཀཱུཊཾ. ཏཾ ཨེཏསྶཱཏི གིཛ྄ཛྷཀཱུཊོ, པབྦཏོ. ཏསྨིཾ གིཛ྄ཛྷཀཱུཊེ. ཏེནཱཧ ‘‘གིཛ྄ཛྷཱ ¶ ཝཱ’’ཏིཨཱདི. ཨཙིརཔཀྐནྟོཏི ཨེཏྠ ན དེསནྟརཔཀྐམནཾ ཨདྷིཔྤེཏཾ, ཨཐ ཁོ སཱསནཔཀྐམནནྟི དསྶེནྟོ ‘‘ཨིམསྨིཾ སཱསནེ པབྦཛིཏྭཱ’’ཏིཨཱདིམཱཧ, ཏེནེཝ ཧི ‘‘ཨིམསྶཱ དྷམྨཝིནཡཱ’’ཏི ཝུཏྟཾ. ལབྦྷཏཱིཏི ལཱབྷོ, ཙཏུནྣཾ པཙྩཡཱནམེཏཾ ཨདྷིཝཙནཾ. སཀྐཙྩཾ ཀཱཏབྦོ དཱཏབྦོཏི སཀྐཱརོ. པཙྩཡཱ ཨེཝ ཧི པཎཱིཏཔཎཱིཏཱ སུནྡརསུནྡརཱ ཨབྷིསངྑརིཏྭཱ ཀཏཱ སཀྐཱརཱཏི ཝུཙྩནྟི. སཀྐཱརོཏི ཝཱ སུནྡརཀཱརོ, པརེཧི ཨཏྟནོ གཱརཝཀིརིཡཱ པུཔྥཱདཱིཧི ཝཱ པཱུཛཱ. ལཱབྷོ ཙ སཀྐཱརོ ཙ ལཱབྷསཀྐཱརཱ, ཏེ ནཊྛཱ པཧཱིནཱ ཨེཏེསནྟི ནཊྛལཱབྷསཀྐཱརཱ.

མཧཱལཱབྷསཀྐཱརོ ཨུཔྤཛྫཱིཏི ཏདཱ ཀིར བྷགཝཏོ མཧཱལཱབྷསཀྐཱརོ ཨུཔྤཛྫི ཡཐཱ ཏཾ ཙཏྟཱརོ ཨསངྑེཡྻེ པཱུརིཏདཱནཔཱརམིསཉྩཡསྶ. སབྦདིསཱསུ ཧི ཡམཀམཧཱམེགྷོ ཝུཊྛཧིཏྭཱ མཧོགྷོ ཝིཡ སབྦཔཱརམིཡོ ‘‘ཨེཀསྨིཾ ཨཏྟབྷཱཝེ ཝིཔཱཀཾ དསྶཱམཱ’’ཏི སམྤིཎྜིཏཱ ཝིཡ ལཱབྷསཀྐཱརམཧོགྷཾ ནིབྦཏྟཡིཾསུ. ཏཏོ ཏཏོ ཨནྣཔཱནཡཱནཝཏྠམཱལཱགནྡྷཝིལེཔནཱདིཧཏྠཱ ཁཏྟིཡབྲཱཧྨཎཱདཡོ ཨཱགནྟྭཱ ‘‘ཀཧཾ བུདྡྷོ ¶ , ཀཧཾ བྷགཝཱ, ཀཧཾ དེཝདེཝོ ནརཱསབྷོ པུརིསསཱིཧོ’’ཏི བྷགཝནྟཾ པརིཡེསནྟི, སཀཊསཏེཧིཔི པཙྩཡེ ཨཱཧརིཏྭཱ ཨོཀཱསཾ ཨལབྷམཱནཱ སམནྟཱ གཱཝུཏཔྤམཱཎམྤི སཀཊདྷུརེན སཀཊདྷུརཾ ཨཱཧཙྩ ཏིཊྛནྟི ཙེཝ ཨནུབནྡྷནྟི ཙ ཨནྡྷཀཝིནྡབྲཱཧྨཎོ ཝིཡ. ཡཐཱ ཙ བྷགཝཏོ, ཨེཝཾ བྷིཀྑུསངྒྷསྶཔི. ཝུཏྟམྤི ཙེཏཾ –

‘‘ཏེན ཁོ པན སམཡེན བྷགཝཱ སཀྐཏོ ཧོཏི གརུཀཏོ མཱནིཏོ པཱུཛིཏོ ཨཔཙིཏོ ལཱབྷཱི ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱནཾ, བྷིཀྑུསངྒྷོཔི སཀྐཏོ ཧོཏི…པེ… པརིཀྑཱརཱན’’ནྟི (ཨུདཱ. ༣༨).

ཏཐཱ –

‘‘ཡཱཝཏཱ ཁོ པན, ཙུནྡ, ཨེཏརཧི སངྒྷོ ཝཱ གཎོ ཝཱ ལོཀེ ཨུཔྤནྣོ, ནཱཧཾ, ཙུནྡ, ཨཉྙཾ ཨེཀཾ སངྒྷམྤི སམནུཔསྶཱམི ཨེཝཾལཱབྷགྒཡསགྒཔྤཏྟཾ ཡཐརིཝཱཡཾ, ཙུནྡ, བྷིཀྑུསངྒྷོ’’ཏི (དཱི. ནི. ༣.༡༧༦).

སྭཱཡཾ བྷགཝཏོ ཙ སངྒྷསྶ ཙ ཨུཔྤནྣོ ལཱབྷསཀྐཱརོ ཨེཀཏོ ཧུཏྭཱ དྭིནྣཾ མཧཱནདཱིནཾ ཨུདཀཾ ཝིཡ ཨཔྤམེཡྻོ ཨཧོསི, བྷགཝཏོ པན བྷིཀྑུསངྒྷསྶ ཙ ཨུཔྤནྣོ ལཱབྷསཀྐཱརོ དྷམྨསྶཔི ¶ ཨུཔྤནྣོཡེཝ. དྷམྨདྷརཱནཉྷི ཀཏོ སཀྐཱརོ དྷམྨསྶ ཀཏོ ནཱམ ཧོཏི. ཏེན ཝུཏྟཾ ‘‘ཏིཎྞཾ རཏནཱནཾ མཧཱལཱབྷསཀྐཱརོ ཨུཔྤཛྫཱི’’ཏི.

ཝུཏྟམཏྠཾ པཱལི༹ཡཱ ནིདསྶེནྟོ ‘‘ཡཐཱཧཱ’’ཏིཨཱདིམཱཧ. ཏཏྠ སཀྐཏོཏི སཀྐཱརཔྤཏྟོ. ཡསྶ ཧི ཙཏྟཱརོ པཙྩཡེ སཀྐཏྭཱ སུཨབྷིསངྑཏེ པཎཱིཏཔཎཱིཏེ ཨུཔནེཏི, སོ སཀྐཏོ. གརུཀཏོཏི གརུབྷཱཝཧེཏཱུནཾ ཨུཏྟམགུཎཱནཾ མཏྠཀཔྤཏྟིཡཱ ཨནཉྙསཱདྷཱརཎེན གརུཀཱརེན སབྦདེཝམནུསྶེཧི པཱསཱཎཙྪཏྟཾ ཝིཡ གརུཀཏོ. ཡསྨིཉྷི གརུབྷཱཝཾ པཙྩུཔཊྛཔེཏྭཱ པཙྩཡེ དེནྟི, སོ གརུཀཏོ. མཱནིཏོཏི སམྨཱཔཊིཔཏྟིཡཱ མཱནིཏོ མནེན པིཡཱཡིཏོ. ཏཱཡ ཧི ཝིཉྙཱུནཾ མནཱཔཏཱ. པཱུཛིཏོཏི མཱནནཱདིཔཱུཛཱཡ ཙེཝ ཙཏུཔཙྩཡཔཱུཛཱཡ ཙ པཱུཛིཏོ. ཡསྶ ཧི སབྦམེཏཾ པཱུཛནཉྩ ཀརོནྟི, སོ པཱུཛིཏོ. ཨཔཙིཏོཏི ནཱིཙཝུཏྟིཀརཎེན ཨཔཙིཏོ. སཏྠཱརཉྷི དིསྭཱ མནུསྶཱ ཧཏྠིཀྑནྡྷཱདཱིཧི ཨོཏརནྟི, མགྒཾ དེནྟི, ཨཾསཀཱུཊཏོ སཱཊཀཾ ཨཔནེནྟི. ཨཱསནཏོ ¶ ཝུཊྛཧནྟི, ཝནྡནྟཱིཏི ཨེཝཾ སོ ཏེཧི ཨཔཙིཏོ ནཱམ ཧོཏི.

ཨཝཎྞཾ པཏྠརིཏྭཱཏི ཨཝཎྞཾ ཏཏྠ ཏཏྠ སཾཀིཏྟནཝསེན པཏྠརིཏྭཱ. ཨཱཝཊྚནིམཱཡནྟི ཨཱཝཊྚེཏྭཱ གཧཎམཱཡཾ. ཨཱཝཊྚེཏི པུརིམཱཀཱརཏོ ནིཝཏྟེཏི ཨཏྟནོ ཝསེ ཝཏྟེཏི ཨེཏཱཡཱཏི ཨཱཝཊྚནཱི, མཱཡཱ, ཏཾ ཨཱཝཊྚནིམཱཡཾ ཨོསཱརེཏྭཱ པརིཛཔྤེཏྭཱཏི ཨཏྠོ. ཀོཊིཏོ པཊྛཱཡཱཏི ཨནྟིམཀོཊིཏོ པཊྛཱཡ. ཐདྡྷཀཱཡེན ཕརུསཝཱཙཱཡ ཏིཎྞཾ རཏནཱནཾ ཨཝཎྞཀཐནཾ ཨནཏྠཱཝཧཏྟཱ ཝིསསིཉྩནསདིསཱ ཧོཏཱིཏི ཨཱཧ ‘‘ཝིསཾ སིཉྩིཏྭཱ’’ཏི. ཨཉྙཱཏོཏི ཨཱཉཱཏོ. ཏེནཱཧ ‘‘ཉཱཏོ’’ཏིཨཱདི.

ཀཱཡངྒནྟི ཀཱཡམེཝ ཨངྒཾ, ཀཱཡསྶ ཝཱ ཨངྒཾ, སཱིསཱདི. ཝཱཙངྒནྟི ‘‘ཧོཏུ, སཱདྷཱུ’’ཏི ཨེཝམཱདིཝཱཙཱཡ ཨཝཡཝཾ. ཨེཀཀེནཱཏི ཨསཧཱཡེན. ཨིམསྶ པནཏྠསྶཱཏི ‘‘ཙརིཡཾ ཙརཎཀཱལེ’’ཏིཨཱདིནཱ ཝུཏྟསྶ. ཡཏོ ཡཏོ གརུ དྷུརནྟི ཡསྨིཾ ཡསྨིཾ ཋཱནེ དྷུརཾ གརུ བྷཱརིཀཾ ཧོཏི, ཨཉྙེ བལིབདྡཱ ཨུཀྑིཔིཏུཾ ན སཀྐོནྟི. ཡཏོ གམྦྷཱིརཝཏྟནཱིཏི ཝཏྟནྟི ཨེཏྠཱཏི ཝཏྟནཱི, དུམྨགྒསྶེཏཾ ནཱམཾ, ཡསྨིཾ ཋཱནེ ཨུདཀཙིཀྑལླམཧནྟཏཱཡ ཝཱ ཝིསམཙྪིནྣཏཊབྷཱཝེན ཝཱ མགྒོ གམྦྷཱིརོ ཧོཏཱིཏི ཨཏྠོ. ཏདཱསྶུ ཀཎྷཾ ཡུཉྫེནྟཱིཏི ཨསྶཱུཏི ནིཔཱཏམཏྟཾ, ཏདཱ ཀཎྷཾ ཡུཉྫེནྟཱིཏི ཨཏྠོ. ཡདཱ དྷུརཉྩ གརུ ཧོཏི མགྒོ ཙ གམྦྷཱིརོ, ཏདཱ ཨཉྙེ བལིབདྡེ ཨཔནེཏྭཱ ཀཎྷམེཝ ཡུཉྫེནྟཱིཏི ཝུཏྟཾ ཧོཏི. སྭཱསྶུ ཏཾ ཝཧཏེ དྷུརནྟི ཨེཏྠཔི ཨསྶཱུཏི ནིཔཱཏམཏྟམེཝ, སོ ཏཾ དྷུརཾ ཝཧཏཱིཏི ཨཏྠོ.

གེཧཝེཏནནྟི ¶ གེཧེ ནིཝུཊྛབྷཱཝཧེཏུ དཱཏབྦཾ. ཀཱལ༹ཀོ ནཱམ ནཱམེནཱཏི ཨཉྫནཝཎྞོ ཀིརེས, ཏེནསྶ ‘‘ཀཱལ༹ཀོ’’ཏི ནཱམཾ ཨཀཾསུ. ཀཱལ༹ཀཾ ཨུཔསངྐམིཏྭཱ ཨཱཧཱཏི ཀཱལ༹ཀོ ཀིར ཨེཀདིཝསཾ ཙིནྟེསི ‘‘མཡ྄ཧཾ མཱཏཱ དུགྒཏཱ མཾ པུཏྟཊྛཱནེ ཋཔེཏྭཱ དུཀྑེན པོསེཏི, ཡཾནཱུནཱཧཾ བྷཏིཾ ཀཏྭཱ ཨིམཾ དུགྒཏབྷཱཝཏོ མོཙེཡྻ’’ནྟི. སོ ཏཏོ པཊྛཱཡ བྷཏིཾ ཨུཔདྷཱརེནྟོ ཝིཙརཏི. ཨཐ ཏསྨིཾ དིཝསེ གཱམགོརཱུཔེཧི སདྡྷིཾ ཏཏྠ སམཱིཔེ ཙརཏི. སཏྠཝཱཧཔུཏྟོཔི གོསུཏྟཝིཏྟཀོ, སོ ‘‘ཨཏྠི ནུ ཁོ ཨེཏེསཾ གུནྣཾ ཨནྟརེ སཀཊཱནི ཨུཏྟཱརེཏུཾ སམཏྠོ ¶ ཨུསབྷཱཛཱནཱིཡོ’’ཏི ཨུཔདྷཱརཡམཱནོ བོདྷིསཏྟཾ དིསྭཱ ‘‘ཨཡཾ ཨཱཛཱནཱིཡོ སཀྑིསྶཏི མཡ྄ཧཾ སཀཊཱནི ཨུཏྟཱརེཏུ’’ནྟི ཨཉྙཱསི. ཏེན ཏཾ ཨུཔསངྐམིཏྭཱ ཨེཝམཱཧ. སོ ཨཉྙེསཾ…པེ… གེཧམེཝ ཨགམཱསཱིཏི ཏདཱ ཀིར གཱམདཱརཀཱ ‘‘ཀིཾ ནཱམེཏཾ ཀཱལ༹ཀསྶ གལེ’’ཏི ཏསྶ སནྟིཀཾ ཨཱགཙྪནྟི. སོ ཏེ ཨནུབནྡྷིཏྭཱ དཱུརཏོཝ པལཱཔེནྟོ མཱཏུ སནྟིཀཾ གཏོ. ཏཾ སནྡྷཱཡེཏཾ ཝུཏྟཾ.

སཱཡནྷསམཡནྟི སཱཡནྷཀཱལེ. བྷུམྨཏྠེ ཨེཏཾ ཨུཔཡོགཝཙནཾ. ན ཧེཏྠ ཨཙྩནྟསཾཡོགོ སམྦྷཝཏི. པཊིསལླཱནཱ ཝུཊྛིཏོཏི ཨེཏྠ ཏེཧི ཏེཧི སདྡྷིཝིཧཱརིཀཨནྟེཝཱསིཀཨུཔཱསཀཨུཔཱསིཀཱདིསཏྟེཧི ཙེཝ རཱུཔཱརམྨཎཱདིསངྑཱརེཧི ཙ པཊིནིཝཏྟེཏྭཱ ཨཔསཀྐིཏྭཱ ནིལཱིཡནཾ ཝིཝེཙནཾ ཀཱཡཙིཏྟེཧི ཏཏོ ཝིཝིཏྟཏཱཡ པཊིསལླཱནཾ ཀཱཡཝིཝེཀོ, ཙིཏྟཝིཝེཀོ ཙ. ཡོ ཏཏོ དུཝིདྷཝིཝེཀཏོ ཝུཊྛིཏོ བྷཝངྒཔྤཏྟིཡཱ སབྲཧྨཙཱརཱིཧི སམཱགམེན ཙ ཨཔེཏོ. སོ པཊིསལླཱནཱ ཝུཊྛིཏོ ནཱམ ཧོཏི. ཨཡཾ པན ཡསྨཱ པཊིསལླཱནཱནཾ ཨུཏྟམཏོ ཕལསམཱཔཏྟིཏོ ཝུཊྛཱསི, ཏསྨཱ ‘‘ཕལསམཱཔཏྟིཏོ’’ཏི ཝུཏྟཾ. ཀཱཡསཀྑིནོ བྷཝིསྶཱམཱཏི ནཱམཀཱཡེན དེསནཱསམྤཊིཙྪནཝསེན སཀྑིབྷཱུཏཱ བྷཝིསྶཱམ. ནནུ ཙ ‘‘པཉྙཏྟེ ཨཱསནེ ནིསཱིདཱི’’ཏི ཨིདཾ ཀསྨཱ ཝུཏྟཾ. ཏིཏྠིཡཱ ཧི བྷགཝཏོ པཊིཔཀྑཱ, ཏེ ཀསྨཱ ཏསྶ ཨཱསནཾ པཉྙཱཔེནྟཱིཏི ཨཱཧ ‘‘ཏཐཱགཏོ ཧཱི’’ཏིཨཱདི.

ཝིགྒཱཧིཀཀཐནྟི ཝིགྒཱཧསཾཝཏྟནིཀཾ སཱརམྦྷཀཐཾ. ཨཱཡཱཙེཡྻཱསཱིཏི ཝཙཱིབྷེདཾ ཀཏྭཱ ཡཱཙེཡྻཱསི. པཏྠེཡྻཱསཱིཏི མནསཱ ཨཱསཱིསེཡྻཱསི. པིཧེཡྻཱསཱིཏི ཏསྶེཝ ཝེཝཙནཾ. ནིཏྟེཛཏཾ ཨཱཔནྣོཏི ཏེཛཧཱནིཡཱ ནིཏྟེཛབྷཱཝཾ ཨཱཔནྣོ, ནིཏྟེཛབྷཱུཏོཏི ཨཏྠོ. ཏཏོ ཨེཝ བྷིཀྑུཨཱདཡོཔི སམྨུཁཱ ཨོལོཀེཏུཾ ཨསམཏྠཏཱཡ པཏྟཀྑནྡྷོ, པཏིཏཀྑནྡྷོཏི ཨཏྠོ. ཏེནཱཧ ‘‘ཨོནཏགཱིཝོ’’ཏི. དསྶིཏདྷམྨེསཱུཏི ཝུཏྟདྷམྨེསུ. ཝཙནམཏྟམེཝ ཧི ཏེསཾ, ན པན དསྶནཾ ཏཱདིསསྶེཝ དྷམྨསྶ ཨབྷཱཝཏོ. བྷགཝཏོ ཨེཝ ཝཱ ‘‘ཨིམེ དྷམྨཱ ཨནབྷིསམྦུདྡྷཱ’’ཏི པརསྶ ཝཙནཝསེན དསྶིཏདྷམྨེསུ. པཊིཙརིསྶཏཱིཏི པཊིཙྪཱདནཝསེ ཙརིསྶཏི པཝཏྟིསྶཏི, པཊིཙྪཱདནཏྠོ ¶ ཨེཝ ཝཱ ཙརཏི-སདྡོ ཨནེཀཏྠཏྟཱ དྷཱཏཱུནནྟི ཨཱཧ ‘‘པཊིཙྪཱདེསྶཏཱི’’ཏི. ཨཉྙེན ¶ ཝཱ ཨཉྙནྟི པན པཊིཙྪཱདནཱཀཱརདསྶནནྟི ཨཱཧ ‘‘ཨཉྙེན ཝཱ ཝཙནེནཱ’’ཏིཨཱདི.

ཏཏྠ ཨཉྙཾ ཝཙནནྟི ཡཾ སམནུཡུཉྫནྟེན བྷགཝཏཱ པརསྶ དོསཝིབྷཱཝནཾ ཝཙནཾ ཝུཏྟཾ, ཏཾ ཏཏོ ཨཉྙེནེཝ ཝཙནེན པཊིཙྪཱདེཏི. ‘‘ཨཱཔཏྟིཾ ཨཱཔནྣོསཱི’’ཏི ཙོདཀེན ཝུཏྟཝཙནཾ ཝིཡ ‘‘ཀོ ཨཱཔནྣོ, ཀིཾ ཨཱཔནྣོ, ཀིསྨིཾ ཨཱཔནྣོ, ཀཾ བྷཎཐ, ཀིཾ བྷཎཐཱ’’ཏིཨཱདིཝཙནེན ཨཉྙཾ ཨཱགནྟུཀཀཐཾ ཨཱཧརནྟོ ‘‘ཏྭཾ ཨིཏྠནྣཱམཾ ཨཱཔཏྟིཾ ཨཱཔནྣོསཱི’’ཏི པུཊྛོ ‘‘པཱཊལིཔུཏྟཾ གཏོམྷཱི’’ཏི ཝཏྭཱ པུན ‘‘ན ཏཝ པཱཊལིཔུཏྟགམནཾ པུཙྪཱམ, ཨཱཔཏྟིཾ པུཙྪཱམཱ’’ཏི ཝུཏྟེ ཏཏོ རཱཛགཧཾ གཏོམྷི. རཱཛགཧཾ ཝཱ ཡཱཧི བྲཱཧྨཎགེཧཾ ཝཱ, ཨཱཔཏྟིཾ ཨཱཔནྣོསཱིཏི. ‘‘ཏཏྠ མེ སཱུཀརམཾསཾ ལདྡྷ’’ནྟིཨཱདཱིནི ཝདནྟོ ཝིཡ སམནུཡུཉྫཀེན ཝུཏྟཝཙནཏོ ཨཉྙཾ ཨཱགནྟུཀཀཐཾ ཨཱཧརནྟོ ཨཔནཱམེསྶཏི, ཝིཀྑེཔཾ གམཡིསྶཏི. ཨཔྤཏཱིཏཱ ཧོནྟི ཏེན ཨཏུཊྛཱ ཨསོམནསྶིཀཱཏི ཨཔཙྩཡོ, དོམནསྶེཏཾ ཨདྷིཝཙནཾ. ནེཝ ཨཏྟནོ, ན པརེསཾ ཧིཏཾ ཨབྷིརཱདྷཡཏཱིཏི ཨནབྷིརདྡྷི, དོམནསྶམེཝ. ཏེནེཝཱཧ ‘‘ཨཔཙྩཡེན དོམནསྶཾ ཝུཏྟ’’ནྟི.

ཡསྶ ཁོ པན ཏེ ཨཏྠཱཡ དྷམྨོ དེསིཏོཏི ཨེཏྠ དྷམྨ-སདྡེན ཙཏུསཙྩདྷམྨོ ཝུཏྟོཏི ཨཱཧ ‘‘ཡསྶ མགྒསྶ ཝཱ ཕལསྶ ཝཱ ཨཏྠཱཡཱ’’ཏི. ཙཏུསཙྩདྷམྨོ ཧི མགྒཕལཱདྷིགམཏྠཱཡ དེསཱིཡཏི. ན ནིགྒཙྪཏཱིཏི ན པཝཏྟེཏི. ནནྟི ནཾ དྷམྨཾ. ཨིདཱནི ‘‘ཡསྶ ཁོ པན ཏེ ཨཏྠཱཡ དྷམྨོ དེསིཏོ’’ཏི ཨེཏྠ དྷམྨ-སདྡེན པཊིཔཏྟིདྷམྨོ དསྶིཏོ, ན པན ཙཏུསཙྩདྷམྨོཏི ཨདྷིཔྤཱཡེན ཨཏྠཝིཀཔྤཾ དསྶེནྟོ ‘‘ཨཐ ཝཱ’’ཏིཨཱདིམཱཧ. པཉྩ དྷམྨཱཏི གམྦྷཱིརཉཱཎཙརིཡབྷཱུཏཱནཾ ཁནྡྷཱདཱིནཾ ཨུགྒཧསཝནདྷཱརཎཔརིཙཡཡོནིསོམནསིཀཱརེ སནྡྷཱཡཱཧ. ཏཀྐརསྶ སམྨཱ དུཀྑཀྑཡཱཡཱཏི ཨེཏྠ སམྨཱསདྡོ ཨུབྷཡཏྠཱཔི ཡོཛེཏབྦོ ‘‘སམྨཱ ཏཀྐརསྶ སམྨཱ དུཀྑཀྑཡཱཡཱ’’ཏི. ཡོ ཧི སམྨཱ དྷམྨཾ པཊིཔཛྫཏི, ཏསྶེཝ སམྨཱ དུཀྑཀྑཡོ ཧོཏཱིཏི. ཡོ པན ཝུཏྟནཡེན ཏཀྐརོ, ཏསྶ ནིཡྻཱནཾ ཨཏྠཏོ དྷམྨསྶེཝ ནིཡྻཱནནྟི ཏཔྤཊིཀྑེཔེན ‘‘སོ དྷམྨོ…པེ… ན ནིཡྻཱཏི ན ནིགྒཙྪཏཱི’’ཏི ཨཱཧ.

ཡདི ཏིརཙྪཱནསཱིཧསྶ ནཱདོ སབྦཏིརཙྪཱནཨེཀཙྩམནུསྶཱམནུསྶནཱདཏོ སེཊྛཏྟཱ སེཊྛནཱདོ, ཀིམངྒཾ པན ཏཐཱགཏསཱིཧསྶ ནཱདོཏི ¶ ཨཱཧ ‘‘སཱིཧནཱདནྟི སེཊྛནཱད’’ནྟི. ཡདི ཝཱ ཏིརཙྪཱནསཱིཧནཱདསྶ སེཊྛནཱདཏཱ ནིབྦྷཡཏཱཡ ཨཔྤཊིསཏྟུཏཱཡ ཨིཙྪིཏཱ, ཏཐཱགཏསཱིཧནཱདསྶེཝ ཨཡམཏྠོ སཱཏིསཡོཏི ཨཱཧ ‘‘ཨབྷཱིཏནཱདཾ ཨཔྤཊིནཱད’’ནྟི. ‘‘ཨཊྛཱནམེཏཾ ཨནཝཀཱསོ’’ཏིཨཱདིནཱ (མ. ནི. ༣.༡༢༩; ཨ. ནི. ༡.༢༦༨-༢༧༡) ཧི ཡོ ཨཏྠོ ཝུཏྟོ, ཏསྶ བྷཱུཏཏཱཡ ¶ ཨཡཾ ནཱདོ སེཊྛནཱདོ ནཱམ ཧོཏི ཨུཏྟམནཱདོ. བྷཱུཏཏྠོ ཧི ཨུཏྟམཏྠོཏི. ཨིམམཏྠཾ པན ཝདནྟསྶ བྷགཝཏོ ཨཉྙཏོ བྷཡཾ ཝཱ ཨཱསངྐཱ ཝཱ ནཏྠཱིཏི ཨབྷཱིཏནཱདོ ནཱམ ཧོཏི. ཨབྷཱུཏཉྷི ཝདཏོ ཀུཏོཙི བྷཡཾ ཝཱ ཨཱསངྐཱ ཝཱ སིཡཱ, ཨེཝཾ པན ཝདནྟཾ བྷགཝནྟཾ ཀོཙི ཨུཊྛཧིཏྭཱ པཊིབཱཧིཏུཾ སམཏྠོ ནཱམ ནཏྠཱིཏི ཨཡཾ ནཱདོ ཨཔྤཊིནཱདོ ནཱམ ཧོཏི.

སམནྟཏོ ནིགྒཎྷནཝསེན ཏོདནཾ ཝིཛ྄ཛྷནཾ སནྣིཏོདཀཾ, སམྨཱ ཝཱ ནིཏུདནྟི པཱིལེ༹ནྟི ཨེཏེནཱཏི སནྣིཏོདཀཾ. ཝཱཙཱཡཱཏི ཙ པཙྩཏྟེ ཀརཎཝཙནཾ. ཏེནཱཧ ‘‘ཝཙནཔཏོདེནཱ’’ཏི. སཉྫམྦྷརིམཀཾསཱུཏི སམནྟཏོ སམྦྷརིཏཾ ཨཀཾསུ, སབྦེ པརིབྦཱཛཀཱ ཝཱཙཱཏོདནེཧི ཏུདིཾསཱུཏི ཨཏྠོ. ཏེནཱཧ ‘‘སམྦྷརིཏཾ…པེ… ཝིཛ྄ཛྷིཾསཱུ’’ཏི. སིངྒཱལཀཾཡེཝཱཏི སིངྒཱལམེཝ, ‘‘སེགཱལཀཾཡེཝཱ’’ཏིཔི པཱཋོ. ཏསྶེཝཱཏི སིངྒཱལརཝསྶེཝ. ཨཐ ཝཱ བྷེརཎྜཀཾཡེཝཱཏི བྷེདཎྜསཀུཎིསདིསཾཡེཝཱཏི ཨཏྠོ. བྷེདཎྜཾ ནཱམ ཨེཀོ པཀྑཱི དྭིམུཁོ, ཏསྶ ཀིར སདྡོ ཨཏིཝིཡ ཝིརཱུཔོ ཨམནཱཔོ. ཏེནཱཧ ‘‘ཨཔིཙ བྷིནྣསྶརཾ ཨམནཱཔསདྡཾ ནདཏཱི’’ཏི. སེསམེཏྠ ཨུཏྟཱནམེཝ.

སརབྷསུཏྟཝཎྞནཱ ནིཊྛིཏཱ.

༥. ཀེསམུཏྟིསུཏྟཝཎྞནཱ

༦༦. པཉྩམེ ཀེསམུཏྟཾ ནིཝཱསོ ཨེཏེསནྟི ཀེསམུཏྟིཡཱཏི ཨཱཧ ‘‘ཀེསམུཏྟནིགམཝཱསིནོ’’ཏི. ཨཊྛཝིདྷཔཱནཀཱནཱིཏི ཨམྦཔཱནཱདིཨཊྛཝིདྷཱནི པཱནཱནི.

‘‘མཱ ཨནུསྶཝེནཱ’’ཏིཨཱདཱིསུ པན ཨེཀོ དཧརཀཱལཏོ པཊྛཱཡ ཨེཝཾ ཨནུསྶཝོ ཨཏྠི, ཨེཝཾ ཙིརཀཱལཀཏཱཡ ཨནུསྶུཏིཡཱ ལབྦྷམཱནཾ ཀཐམིདཾ ¶ ཨཉྙཐཱ སིཡཱ, ཏསྨཱ བྷཱུཏམེཏནྟི ཨནུསྶཝེན གཎྷཱཏི, ཏཐཱ གཧཎཾ པཊིཀྑིཔནྟོ ‘‘མཱ ཨནུསྶཝེནཱ’’ཏི ཨཱཧ. ཨནུ ཨནུ སཝནཾ ཨནུསྶཝོ. ཨཔརོ ‘‘ཨམྷཱཀཾ པིཏུཔིཏཱམཧཱདིཝུདྡྷཱནཾ ཨུཔདེསཔརམྤརཱཡ ཨིདམཱབྷཏཾ, ཨེཝཾ པརམྤརཱབྷཏཀཐཾ ནཱམ ན ཨཉྙཐཱ སིཡཱ, ཏསྨཱ བྷཱུཏམེཏ’’ནྟི གཎྷཱཏི, ཏཾ པཊིཀྑིཔནྟོ ‘‘མཱ པརམྤརཱཡཱ’’ཏི ཨཱཧ. ཨེཀོ ཀེནཙི ཀིསྨིཉྩི ཝུཏྟམཏྟེ ‘‘ཨེཝཾ ཀིར ཨེཏ’’ནྟི གཎྷཱཏི, ཏཾ ནིསེདྷེནྟོ ‘‘མཱ ཨིཏིཀིརཱཡཱ’’ཏི ཨཱཧ. པིཊཀཾ གནྠོ སམྤདཱིཡཏི ཨེཏསྶཱཏི པིཊཀསམྤདཱནཾ, གནྠསྶ ཨུགྒཎྷནཀོ. ཏེན པིཊཀཨུགྒཎྷནཀབྷཱཝེན ཨེཀཙྩོ ཏཱདིསཾ གནྠཾ པགུཎཾ ཀཏྭཱ ཏེན ཏཾ སམེནྟཾ སམེཏི, ཏསྨཱ ‘‘བྷཱུཏམེཏ’’ནྟི གཎྷཱཏི, ཏཾ སནྡྷཱཡེས པཊིཀྑེཔོ ‘‘མཱ པིཊཀསམྤདཱནེནཱ’’ཏི, ཨཏྟནོ ཨུགྒཧགནྠསམྤཏྟིཡཱ མཱ གཎྷིཏྠཱཏི ཝུཏྟཾ ཧོཏི. སམེཏནྟི སཾགཏཾ.

ཀོཙི ¶ ཀཉྩི ཝིཏཀྐེནྟོ ‘‘ཨེཝམེཝ ཏེན བྷཝིཏབྦ’’ནྟི ཀེཝལཾ ཨཏྟནོ སངྐཔྤཝསེན ‘‘བྷཱུཏམིད’’ནྟི གཎྷཱཏི, ཏཾ སནྡྷཱཡེཏཾ ཝུཏྟཾ ‘‘མཱ ཏཀྐཧེཏཱུ’’ཏི. ཨཉྙོ ‘‘ཨིམཱཡ ཡུཏྟིཡཱ བྷཱུཏམིད’’ནྟི ཀེཝལཾ ཨནུམཱནཏོ ནཡགྒཱཧེན གཎྷཱཏི, ཏཾ པཊིཀྑིཔནྟོ ‘‘མཱ ནཡཧེཏཱུ’’ཏི ཨཱཧ. ཀསྶཙི ‘‘ཨེཝམེཏཾ སིཡཱ’’ཏི པརིཀཔྤེནྟསྶ ཨེཀཾ ཀཱརཎཾ ཨུཔཊྛཱཏི, སོ ‘‘ཨཏྠེཏ’’ནྟི ཨཏྟནོ པརིཀཔྤིཏཱཀཱརེན གཎྷཱཏི, ཏཾ པཊིསེདྷེནྟོ ‘‘མཱ ཨཱཀཱརཔརིཝིཏཀྐེནཱ’’ཏི ཨཱཧ. ཨཔརསྶ ཙིནྟཡཏོ ཡཐཱཔརིཀཔྤིཏཾ ཀཉྩི ཨཏྠཾ ‘‘ཨེཝམེཏཾ ན ཨཉྙཐཱ’’ཏི ཨབྷིནིཝིསནྟསྶ ཨེཀཱ དིཊྛི ཨུཔྤཛྫཏི. ཡཱ ཡསྶ ཏཾ ཀཱརཎཾ ནིཛ྄ཛྷཱཡནྟསྶ པཙྩཀྑཾ ཝིཡ ནིརཱུཔེཏྭཱ ཙིནྟེནྟསྶ ཁམཏི. སོ ‘‘ཨཏྠེཏ’’ནྟི དིཊྛིནིཛ྄ཛྷཱནཀྑནྟིཡཱ གཎྷཱཏི, ཏཾ སནྡྷཱཡཱཧ ‘‘མཱ དིཊྛིནིཛ྄ཛྷཱནཀྑནྟིཡཱ’’ཏི.

ཨཀུསལཝེརསྶཱཏི པཱཎཱཏིཔཱཏཱདིཔཉྩཝིདྷཾ ཝེརཾ སནྡྷཱཡ ཝདཏི. ཀོདྷོ ནཱམ ཙེཏསོ དུཀྑནྟི ཨཱཧ ‘‘ཀོདྷཙིཏྟསྶ ཨབྷཱཝེནཱ’’ཏི. ཀིལེསསྶཱཏི ཙིཏྟཾ ཝིབཱདྷེནྟསྶ ཨུཔཏཱཔེནྟསྶ ཨུདྡྷཙྩཀུཀྐུཙྩཱདིཀིལེསསྶ. སེསམེཏྠ ཨུཏྟཱནམེཝ.

ཀེསམུཏྟིསུཏྟཝཎྞནཱ ནིཊྛིཏཱ.

༦. སཱལ༹ྷསུཏྟཝཎྞནཱ

༦༧. ཚཊྛེ ¶ པཱཏོ ཨསིཏབྦབྷོཛནཾ པཱཏརཱསཾ, བྷུཏྟཾ པཱཏརཱསཾ ཨེཏེསནྟི བྷུཏྟཔཱཏརཱསཱ. དཱསཱ ནཱམ ཨནྟོཛཱཏཱ ཝཱ དྷནཀྐཱིཏཱ ཝཱ ཀརམརཱནཱིཏཱ ཝཱ སཡཾ ཝཱ དཱསབྱཾ ཨུཔགཏཱ. བྷཏྟཝེཏནབྷཏཱ ཀམྨཀཱརཱ ནཱམ.

ནིཙྪཱཏོཏི ཨེཏྠ ཚཱཏཾ ཝུཙྩཏི ཏཎྷཱ ཛིགྷཙྪཱཧེཏུཏཱཡ, སཱ ཨསྶ ནཏྠཱིཏི ནིཙྪཱཏོ. ཏེནཱཧ ‘‘ནིཏྟཎྷོ’’ཏི. ཨབྦྷནྟརེ སནྟཱཔཀརཱནཾ ཀིལེསཱནནྟི ཨཏྟནོ སནྟཱནེ དརཐཔརིལཱ༹ཧཛནནེན སནྟཱཔནཀིལེསཱནཾ. ཨནྟོཏཱཔནཀིལེསཱནཾ ཨབྷཱཝཱ སཱིཏོ སཱིཏལོ བྷཱུཏོ ཛཱཏོཏི སཱིཏིབྷཱུཏོ. ཏེནཱཧ ‘‘སཱིཏལཱིབྷཱུཏོ’’ཏི. མགྒཕལནིབྦཱནསུཁཱནི ཝཱ པཊིསཾཝེདེཏཱིཏི སུཁཔྤཊིསཾཝེདཱི. སེསཾ སུཝིཉྙེཡྻམེཝ.

སཱལ༹ྷསུཏྟཝཎྞནཱ ནིཊྛིཏཱ.

༧. ཀཐཱཝཏྠུསུཏྟཝཎྞནཱ

༦༨. སཏྟམེ ¶ ཀཐཱཝཏྠཱུནཱིཏི ཀཐཱཡ པཝཏྟིཊྛཱནཱནི. ཡསྨཱ ཏེཧི ཝིནཱ ཀཐཱ ན པཝཏྟཏི, ཏསྨཱ ‘‘ཀཐཱཀཱརཎཱནཱི’’ཏི ཝུཏྟཾ. ཨཏཏི སཏཏི སཏཏཾ གཙྪཏི པཝཏྟཏཱིཏི ཨདྡྷཱ, ཀཱལོཏི ཨཱཧ ‘‘ཨཏཱིཏམདྡྷཱནཾ ནཱམ ཀཱལོཔི ཝཏྟཏཱི’’ཏི. དྷམྨཔྤཝཏྟིམཏྟཏཱཡ ཧི པརམཏྠཏོ ཨཝིཛྫམཱནོཔི ཀཱལོ ཏསྶེཝ དྷམྨསྶ པཝཏྟིཨཝཏྠཱཝིསེསཾ ཨུཔཱདཱཡ ཏེནེཝ ཝོཧཱརེན ཨཏཱིཏོཏིཨཱདིནཱ ཝོཧརཱིཡཏི, ཨཏཱིཏཱདིབྷེདོ ཙ ནཱམཱཡཾ ནིཔྤརིཡཱཡཏོ དྷམྨཱནཾཡེཝ ཧོཏི, ན ཀཱལསྶཱཏི ཨཱཧ ‘‘ཁནྡྷཱཔི ཝཏྟནྟཱི’’ཏི. ཡཐཱཝུཏྟམཏྠཾ ཨིཏརེསུ དྭཱིསུ ཨཏིདིསཏི ‘‘ཨནཱགཏཔཙྩུཔྤནྣེསུཔི ཨེསེཝ ནཡོ’’ཏི. ཨཏཱིཏམདྡྷཱནནྟིཨཱདཱིསུ ཙ དྭེ པརིཡཱཡཱ སུཏྟནྟཔརིཡཱཡོ, ཨབྷིདྷམྨཔརིཡཱཡོ ཙ. སུཏྟནྟཔརིཡཱཡེན པཊིསནྡྷིཏོ པུབྦེ ཨཏཱིཏོ ཨདྡྷཱ ནཱམ, ཙུཏིཏོ པཙྪཱ ཨནཱགཏོ ཨདྡྷཱ ནཱམ, སཧ ཙུཏིཔཊིསནྡྷཱིཏི ཏདནྟརཾ པཙྩུཔྤནྣོ ཨདྡྷཱ ནཱམ. ཨབྷིདྷམྨཔརིཡཱཡེན ཏཱིསུ ཁཎེསུ ཨུཔྤཱདཏོ པུབྦེ ཨཏཱིཏོ ཨདྡྷཱ ནཱམ, ཨུཔྤཱདཏོ ཨུདྡྷཾ ཨནཱགཏོ ཨདྡྷཱ ¶ ནཱམ, ཁཎཏྟཡཾ པཙྩུཔྤནྣོ ཨདྡྷཱ ནཱམ. ཏཏྠཱཡཾ སུཏྟནྟདེསནཱཏི སུཏྟནྟཔརིཡཱཡེནེཝ ཨཏཱིཏཱདིཝིསཡཾ ཀཐཾ དསྶེནྟོ ‘‘ཨཏཱིཏེ ཀསྶཔོ ནཱམཱ’’ཏིཨཱདིམཱཧ.

ཨེཀཾསེནེཝ བྱཱཀཱཏབྦོ ཝིསྶཛྫེཏབྦོཏི ཨེཀཾསབྱཱཀརཎཱིཡོ. ‘‘ཙཀྑུ ཨནིཙྩ’’ནྟི པཉྷེ ཨུཏྟརཔདཱཝདྷཱརཎཾ སནྡྷཱཡ ‘‘ཨེཀཾསེནེཝ བྱཱཀཱཏབྦ’’ནྟི ཝུཏྟཾ ནིཙྩཏཱཡ ལེསསྶཔི ཏཏྠ ཨབྷཱཝཏོ, པུརིམཔདཱཝདྷཱརཎེ པན ཝིབྷཛྫབྱཱཀརཎཱིཡཏཱཡ. ཏེནཱཧ ‘‘ཨནིཙྩཾ ནཱམ ཙཀྑཱུཏི པུཊྛེན པནཱ’’ཏིཨཱདི. ཙཀྑུསོཏེ ཝིསེསཏྠསཱམཉྙཏྠཱནཾ ཨསཱདྷཱརཎབྷཱཝཏོ དྭིནྣཾ ཏེསཾ སདིསཙོདནཱ པཊིཙྪནྣམུཁེནེཝ བྱཱཀརཎཱིཡཱ པཊིཀྑེཔཝསེན ཨནུཉྙཱཏཝསེན ཙ ཝིསྶཛྫིཏབྦཏོཏི ཨཱཧ ‘‘ཡཐཱ ཙཀྑུ, ཏཐཱ སོཏཾ…པེ… ཨཡཾ པཊིཔུཙྪཱབྱཱཀརཎཱིཡོ པཉྷོ’’ཏི. ཏཾ ཛཱིཝཾ ཏཾ སརཱིརནྟི ཛཱིཝསརཱིརཱནཾ ཨནཉྙཏཱཔཉྷེ ཡསྶ ཡེན ཨནཉྙཏཱ ཙོདིཏཱ, སོ ཨེཝ པརམཏྠཏོ ནུཔལབྦྷཏཱིཏི ཙ ཛྷཱནཏྟཡསྶ མེཏྟེཡྻཏཱཀིཏྟནསདིསོཏི ཨབྱཱཀཱཏབྦཏཱཡ ཋཔནཱིཡོ ཝུཏྟོ. ཨེཝརཱུཔོ ཧི པཉྷོ ཏིདྷཱ ཨཝིསྶཛྫནཱིཡཏྟཱ བྱཱཀརཎཾ ཨཀཏྭཱ ཋཔེཏབྦོ.

ཏིཊྛཏི ཨེཏྠ ཕལཾ ཏདཱཡཏྟཝུཏྟིཏཱཡཱཏི ཋཱནཾ, ཀཱརཎནྟི ཨཱཧ ‘‘ཀཱརཎཱཀཱརཎེ’’ཏི. ཡུཏྟེན ཀཱརཎེནཱཏི ཨནུརཱུཔེན ཀཱརཎེན. པཧོཏཱིཏི ནིགྒཎྷིཏུཾ སམཏྠོ ཧོཏི. སསྶཏཝཱདིབྷཱཝམེཝ དཱིཔེཏཱིཏི ཨཏྟནཱ གཧིཏེ ཨུཙྪེདཝཱདེ དོསཾ དིསྭཱ ཨཏྟནོཔི སསྶཏཝཱདིབྷཱཝམེཝ ¶ དཱིཔེཏི. པུགྒལཝཱདིམྷཱིཏི ཨིམིནཱ ཝཙྪཀུཏྟིཡཝཱདིཾ དསྶེཏི. པཉྷཾ པུཙྪནྟེཧི པཊིཔཛྫིཏབྦཱ པཊིཔདཱ པཉྷཔུཙྪནཀཱནཾ ཝཏྟཾ.

པཊིཙརཏཱིཏི པཊིཙྪཱདནཝསེན ཙརཏི པཝཏྟཏི. པཊིཙྪཱདནཏྠོ ཨེཝ ཝཱ ཙརཏིསདྡོ ཨནེཀཏྠཏྟཱ དྷཱཏཱུནནྟི ཨཱཧ ‘‘པཊིཙྪཱདེཏཱི’’ཏི. ཨཉྙེནཉྙནྟི པན པཊིཙྪཱདནཱཀཱརདསྶནནྟི ཨཱཧ ‘‘ཨཉྙེན ཝཙནེནཱ’’ཏིཨཱདི. ཏཏྠ ཨཉྙེན ཝཙནེནཱཏི ཡཾ ཙོདཀེན ཙུདིཏཀསྶ དོསཝིབྷཱཝནཾ ཝཙནཾ ཝུཏྟཾ, ཏཾ ཏཏོ ཨཉྙེན ཝཙནེན པཊིཙྪཱདེཏི. ཡོ ཧི ‘‘ཨཱཔཏྟིཾ ཨཱཔནྣོསཱི’’ཏི ཝུཏྟེ ‘‘ཀོ ཨཱཔནྣོ, ཀིཾ ཨཱཔནྣོ, ཀིསྨིཾ ཨཱཔནྣོ, ཀཾ བྷཎཐ, ཀིཾ བྷཎཐཱ’’ཏི ཝདཏི. ‘‘ཨེཝརཱུཔཾ ཀིཉྩི ཏཡཱ དིཊྛ’’ནྟི ཝུཏྟེ ‘‘ན སུཎཱམཱི’’ཏི སོཏཾ ཝཱ ཨུཔནེཏི, ཨཡཾ ཨཉྙེནཉྙཾ པཊིཙརཏི ནཱམ. ‘‘ཀོ ཨཱཔནྣོ’’ཏིཨཱདིནཱ ཧི ཙོདནཾ ཨཝིསྶཛྫེཏྭཱཝ ཝིཀྑེཔཱཔཛྫནཾ ཨཉྙེནཉྙཾ ¶ པཊིཙརཎཾ, བཧིདྡྷཱ ཀཐཱཔནཱམནཾ ཝིསྶཛྫེཏྭཱཏི ཨཡམེཏེསཾ ཝིསེསོ. ཏེནེཝཱཧ ‘‘ཨཱགནྟུཀཀཐཾ ཨོཏཱརེནྟོ’’ཏིཨཱདི. ཏཏྠ ཨཔནཱམེཏཱིཏི ཝིཀྑེཔེཏི. ཏཏྲཱཏི ཏསྨིཾ བཧིདྡྷཱཀཐཱཡ ཨཔནཱམནེ.

ཨུཔནིསཱིདཏི ཕལཾ ཨེཏྠཱཏི ཀཱརཎཾ ཨུཔནིསཱ, ཨུཔེཙྩ ནིསྶཡཏཱིཏི ཝཱ ཨུཔནིསཱ, སཧ ཨུཔནིསཱཡཱཏི སཨུཔནིསོཏི ཨཱཧ ‘‘སཨུཔནིསྶཡོ སཔཙྩཡོ’’ཏི.

ཨོཧིཏསོཏོཏི ཨནཉྙཝིཧིཏཏྟཱ དྷམྨསྶཝནཱཡ ཨཔནཱམིཏསོཏོ. ཏཏོ ཨེཝ ཏདཏྠཾ ཋཔིཏསོཏོ. ཀུསལདྷམྨནྟི ཨརིཡམགྒོ ཨདྷིཔྤེཏོཏི ཨཱཧ ‘‘ཨརིཡམགྒ’’ནྟི.

ཀཐཱཝཏྠུསུཏྟཝཎྞནཱ ནིཊྛིཏཱ.

༨. ཨཉྙཏིཏྠིཡསུཏྟཝཎྞནཱ

༦༩. ཨཊྛམེ བྷགཝཱ མཱུལཾ ཀཱརཎཾ ཨེཏེསཾ ཡཱཐཱཝཏོ ཨདྷིགམཱཡཱཏི བྷགཝཾམཱུལཀཱ. ཏེནཱཧ ‘‘བྷགཝནྟཉྷི ནིསྶཱཡ མཡཾ ཨིམེ དྷམྨེ ཨཱཛཱནཱམ པཊིཝིཛ྄ཛྷཱམཱ’’ཏི. ཨམྷཱཀཾ དྷམྨཱཏི ཏེཧི ཨཏྟནཱ ཨདྷིགནྟབྦཏཱཡ ཝུཏྟཾ. སེཝིཏབྦཱསེཝིཏབྦཱནཉྷི ཡཱཐཱཝཏོ ཨདྷིགམཉྙཱཎཱནི ཨདྷིགཙྪནཀསམྦནྡྷཱིནི, ཏཱནི ཙ སམྨཱསམྦུདྡྷམཱུལཀཱནི ཨནཉྙཝིསཡཏྟཱ. ཏེནཱཧ ‘‘པུབྦེ ཀསྶཔསམྨཱསམྦུདྡྷེནཱ’’ཏིཨཱདི. ཨིམེ དྷམྨཱཏི ཨིམེ ཉཱཎདྷམྨཱ. ཨཱཛཱནཱམཱཏི ཨབྷིམུཁཾ པཙྩཀྑཏོ ཛཱནཱམ. པཊིཝིཛ྄ཛྷཱམཱཏི ཏསྶེཝ ཝེཝཙནཾ, ཨདྷིགཙྪཱམཱཏི ཨཏྠོ. བྷགཝཱ ནེཏཱ ཨེཏེསནྟི ¶ བྷགཝཾནེཏྟིཀཱ. ནེཏཱཏི སེཝིཏབྦདྷམྨེ ཝེནེཡྻསནྟཱནཾ པཱཔེཏཱ. ཝིནེཏཱཏི ཨསེཝིཏབྦདྷམྨེ ཝེནེཡྻསནྟཱནཏོ ཨཔནེཏཱ. ཏདངྒཝིནཡཱདིཝསེན ཝཱ ཝིནེཏཱ. ཨཐ ཝཱ ཡཐཱ ཨལམརིཡཉཱཎདསྶནཝིསེསོ ཧོཏི, ཨེཝཾ ཝིསེསཏོ ནེཏཱ. ཨནུནེཏཱཏི ‘‘ཨིམེ དྷམྨཱ སེཝིཏབྦཱ, ཨིམེ ན སེཝིཏབྦཱ’’ཏི ཨུབྷཡསམྤཱཔནཱཔནཡནཏྠཾ པཉྙཱཔེཏཱ. ཏེནཱཧ ‘‘ཡཐཱསབྷཱཝཏོ’’ཏིཨཱདི.

པཊིསརནྟི ¶ ཨེཏྠཱཏི པཊིསརཎཾ, བྷགཝཱ པཊིསརཎཾ ཨེཏེསནྟི བྷགཝཾཔཊིསརཎཱ. ཨཱཔཱཐཾ ཨུཔགཙྪནྟཱ ཧི བྷགཝཱ པཊིསརཎཾ སམོསརཎཊྛཱནཾ. ཏེནཱཧ ‘‘ཙཏུབྷཱུམཀདྷམྨཱ’’ཏིཨཱདི. པཊིསརཏི སབྷཱཝསམྤཊིཝེདྷཝསེན པཙྩེཀཾ ཨུཔགཙྪཏཱིཏི ཝཱ པཊིསརཎཾ, བྷགཝཱ པཊིསརཎཾ ཨེཏེསནྟི བྷགཝཾཔཊིསརཎཱ. པཊིསརཏི པཊིཝིཛ྄ཛྷཏཱིཏི ཝཱ པཊིསརཎཾ, ཏསྨཱ པཊིཝིཛ྄ཛྷནཝསེན བྷགཝཱ པཊིསརཎཾ ཨེཏེསནྟི བྷགཝཾཔཊིསརཎཱ. ཏེནཱཧ ‘‘ཨཔིཙཱ’’ཏིཨཱདི. པཊིཝེདྷཝསེནཱཏི པཊིཝིཛ྄ཛྷིཏབྦཏཱཝསེན. ཨསཏིཔི མུཁེ ཨཏྠཏོ ཨེཝཾ ཝདནྟོ ཝིཡ ཧོཏཱིཏི ཨཱཧ ‘‘ཕསྶོ ཨཱགཙྪཏི ཨཧཾ བྷགཝཱ ཀིནྣཱམོ’’ཏི. ཕསྶོ ཉཱཎསྶ ཨཱཔཱཐཾ ཨཱགཙྪནྟོཡེཝ ཧི ཨཏྟནོ ‘‘ཨཧཾ ཀིནྣཱམོ’’ཏི ནཱམཾ པུཙྪནྟོ ཝིཡ, བྷགཝཱ ཙསྶ ནཱམཾ ཀརོནྟོ ཝིཡ ཧོཏི.

པཊིབྷཱཏཱུཏི ཨེཏྠ པཊིསདྡཱཔེཀྑཱཡ ‘‘བྷགཝནྟ’’ནྟི ཨུཔཡོགཝཙནཾ, ཨཏྠོ པན སཱམིཝཙནཝསེནེཝ ཝེདིཏབྦོཏི དསྶེནྟོ ཨཱཧ ‘‘བྷགཝཏོ’’ཏི. པཊིབྷཱཏཱུཏི ཙ བྷཱགོ ཧོཏུ. བྷགཝཏོ ཧི ཨེས བྷཱགོ, ཡདིདཾ དྷམྨསྶ དེསནཱ, ཨམྷཱཀཾ པན བྷཱགོ སཝནནྟི ཨདྷིཔྤཱཡོ. ཨེཝཉྷི སདྡལཀྑཎེན སམེཏི. ཀེཙི པན པཊིབྷཱཏཱུཏི པདསྶ དིསྶཏཱུཏི ཨཏྠཾ ཝདནྟི, ཉཱཎེན དིསྶཏུ, དེསཱིཡཏཱུཏི ཝཱ ཨཏྠོ. ཨུཔཊྛཱཏཱུཏི ཉཱཎསྶ པཙྩུཔཏིཊྛཏུ. པཱལི༹ཡཾ ཀོ ཨདྷིཔྤཡཱསོཏི ཨེཏྠ ཀོ ཨདྷིཀཔྤཡོགོཏི ཨཏྠོ.

ལོཀཝཛྫཝསེནཱཏི ལོཀིཡཛནེཧི པཀཏིཡཱ གརཧིཏབྦཝཛྫཝསེན. ཝིཔཱཀཝཛྫཝསེནཱཏི ཝིཔཱཀསྶ ཨཔཱཡསཾཝཏྟནིཀཝཛྫཝསེན. ཀཐནྟིཨཱདིནཱ ཨུབྷཡཝཛྫཝསེནཔི ཨཔྤསཱཝཛྫཏཱཡ ཝིསཡཾ དསྶེཏི. སེསམེཏྠ སུཝིཉྙེཡྻམེཝ.

ཨཉྙཏིཏྠིཡསུཏྟཝཎྞནཱ ནིཊྛིཏཱ.

༩. ཨཀུསལམཱུལསུཏྟཝཎྞནཱ

༧༠. ནཝམེ ལུབྦྷཏཱིཏི ལོབྷོ. དུསྶཏཱིཏི དོསོ. མུཡ྄ཧཏཱིཏི མོཧོ. ལོབྷཱདཱིནི པནེཏཱནི ¶ ཨསཧཛཱཏཱནཾ པཱཎཱཏིཔཱཏཱདཱིནཾ ཀེསཉྩི ཨཀུསལཱནཾ ཨུཔནིསྶཡཔཙྩཡཊྛེན, སཧཛཱཏཱནཾ ཨདིནྣཱདཱནཱདཱིནཾ ཀེསཉྩི ¶ སམྤཡུཏྟཱ ཧུཏྭཱ ཨུཔྤཱདཀཊྛེན, སཡཉྩ ཨཀུསལཱནཱིཏི སཱཝཛྫདུཀྑཝིཔཱཀཊྛེནཱཏི ཨཱཧ ‘‘ཨཀུསལཱནཾ མཱུལཱནི, ཨཀུསལཱནི ཙ ཏཱནི མཱུལཱནཱི’’ཏི. ཝུཏྟམྤི ཙེཏཾ ‘‘རཏྟོ ཁོ, ཨཱཝུསོ, རཱགེན ཨབྷིབྷཱུཏོ པརིཡཱདིནྣཙིཏྟོ པཱཎམྤི ཧནཏཱི’’ཏིཨཱདི. ཡདཔཱིཏི ལིངྒཝིཔལླཱསེན ཝུཏྟནྟི ཨཱཧ ‘‘ཡོཔི, བྷིཀྑཝེ, ལོབྷོ’’ཏི. ཏདཔཱིཏི ཨེཏྠཱཔི ཨེསེཝ ནཡོཏི ཨཱཧ ‘‘སོཔི ཨཀུསལམཱུལ’’ནྟི. ཝིནཱཔི ལིངྒཝིཔལླཱསེན ཨཏྠཡོཛནཾ དསྶེནྟོ ‘‘ཨཀུསལམཱུལཾ ཝཱ’’ཏིཨཱདིམཱཧ. སབྦཏྠཱཏི ‘‘ཡདཔི, བྷིཀྑཝེ, དོསོ, ཏདཔི ཨཀུསལམཱུལ’’ནྟིཨཱདཱིསུ. ཨབྷིསངྑརོཏཱིཏི ཨེཏྠ ཨཱཡཱུཧཏཱིཏི ཨཏྠཾ ཝཏྭཱ ཏཉྩ ཨཱཡཱུཧནཾ པཙྩཡསམཝཱཡསིདྡྷིཏོ སམྤིཎྜནཾ རཱསིཀརཎཾ ཝིཡ ཧོཏཱིཏི ཨཱཧ ‘‘སམྤིཎྜེཏི རཱསིཾ ཀརོཏཱི’’ཏི.

པཱལི༹ཡཾ ‘‘ཝདྷེནཱ’’ཏིཨཱདཱིསུ ཝདྷེནཱཏི མཱརཎེན ཝཱ པོཐནེན ཝཱ. ཝདྷསདྡོ ཧི ཧིཾསནཏྠོ ཝིཧེཋནཏྠོ ཙ ཧོཏི. བནྡྷནེནཱཏི ཨདྡུབནྡྷནཱདིནཱ. ཛཱནིཡཱཏི དྷནཛཱནིཡཱ, ‘‘སཏཾ གཎྷཐ, སཧསྶཾ གཎྷཐཱ’’ཏི ཨེཝཾ པཝཏྟིཏདཎྜེནཱཏི ཨཏྠོ. གརཧཱཡཱཏི པཉྩསིཁམུཎྜཀཀརཎཾ, གོམཡསིཉྩནཾ, གཱིཝཱཡ ཀུརཎྜཀབནྡྷནནྟི ཨེཝམཱདཱིནི ཀཏྭཱ གརཧཔཱཔནེན. ཏཏྠ པཉྩསིཁམུཎྜཀཀརཎཾ ནཱམ ཀཱཀཔཀྑཀརཎཾ. གོམཡསིཉྩནཾ སཱིསེན ཀཎོདཀཱཝསེཙནཾ. ཀུརཎྜཀབནྡྷནཾ གདྡུལབནྡྷནཾ.

ཀཱལསྨིཾ ན ཝདཏཱིཏི ཡུཏྟཀཱལེ ན ཝདཏི, ཝཏྟབྦཀཱལསྶ པུབྦེ ཝཱ པཙྪཱ ཝཱ ཨཡུཏྟཀཱལེ ཝཏྟཱ ཧོཏི. ཨབྷཱུཏཝཱདཱིཏི ཡཾ ནཏྠི, ཏསྶ ཝཏྟཱ. ཏེནཱཧ ‘‘བྷཱུཏཾ ན ཝདཏཱི’’ཏི. ཨཏྠཾ ན ཝདཏཱིཏི ཀཱརཎཾ ན ཝདཏི, ཨཀཱརཎནིསྶིཏཾ ནིཔྥལཾ ཝཏྟཱ ཧོཏི. དྷམྨཾ ན ཝདཏཱིཏི སབྷཱཝཾ ན ཝདཏི, ཨསབྷཱཝཾ ཝཏྟཱ ཨཡཐཱཝཱདཱིཏི ཨཏྠོ. ཝིནཡཾ ན ཝདཏཱིཏི སཾཝརཝིནཡཾ ན ཝདཏི, ན སཾཝརཝིནཡཔྤཊིསཾཡུཏྟསྶ ཝཏྟཱ ཧོཏི, ཨཏྟནོ སུཎནྟསྶ ཙ ན སཾཝརཝིནཡཱཝཧསྶ ཝཏྟཱཏི ཨཏྠོ.

ཨཏཙྪནྟི ཨབྷཱུཏཏྠཾ. ཏེནཱཧ ‘‘ཨིཏརཾ ཏསྶེཝ ཝེཝཙན’’ནྟི. ཨཐ ཝཱ ཨབྷཱུཏནྟི ཨསནྟཾ ཨཝིཛྫམཱནཾ. ཨཏཙྪནྟི ཨཏཐཱཀཱརཾ.

པུཉྙཀམྨཏོ ཨེཏི ཨུཔྤཛྫཏཱིཏི ཨཡོ, ཝཌྜྷི. ཏཔྤཊིཀྑེཔེན ཨནཡོ, ཨཝཌྜྷཱིཏི ཨཱཧ ‘‘ཨནཡཾ ཨཱཔཛྫཏཱིཏི ཨཝཌྜྷིཾ ཨཱཔཛྫཏཱི’’ཏི. མཱལུཝཱསིཔཱཊིཀཱ ནཱམ དཱིགྷསཎྛཱནཾ མཱལུཝཱཔཀྐཾ ¶ , མཱལུཝཱཕལཔོཊྛལིཀཱཏི ཨཏྠོ ¶ . ཕལིཏཱཡཱཏི ཨཱཏཔེན སུསྶིཏྭཱ བྷིནྣཱཡ. ཝཊརུཀྑཱདཱིནཾ མཱུལེཏི ཝཊརུཀྑཱདཱིནཾ སམཱིཔེ. སཀབྷཱཝེན སཎྛཱཏུཾ ན སཀྐོནྟཱིཏི ཀསྨཱ ན སཀྐོནྟི? བྷཝནཝིནཱསབྷཡཱ. རུཀྑམཱུལེ པཏིཏམཱལུཝཱབཱིཛཏོ ཧི ལཏཱ ཨུཔྤཛྫིཏྭཱ རུཀྑཾ ཨབྷིརུཧཏི. སཱ མཧཱཔཏྟཱ ཙེཝ བཧུཔཏྟཱ ཙ མཧཱཀོལིརཔཏྟསཎྛཱནེཧི ཏཏོ ཙ མཧནྟཏརེཧི སཱཁཱཝིཊཔནྟརེཧི པཏྟེཧི སམནྣཱགཏཱ. ཨཐ ནཾ རུཀྑཾ མཱུལཏོ པཊྛཱཡ ཝིནནྡྷམཱནཱ སབྦཝིཊཔཱནི སཉྪཱདེཏྭཱ མཧནྟཾ བྷཱརཾ ཛནེཏྭཱ ཏིཊྛཏི, སཱ ཝཱཏེ ཝཱཡནྟེ དེཝེ ཝཱ ཝསྶནྟེ ཨོགྷནཧེཊྛཱགཏཱ ཨོལམྦནཧེཏུབྷཱུཏཾ གྷནབྷཱཝཾ ཛནེཏྭཱ ཏསྶ རུཀྑསྶ སབྦསཱཁཾ བྷིཛྫཏི, བྷཱུམིཡཾ ནིཔཱཏེཏི. ཏཏོ ཏསྨིཾ རུཀྑེ པཏིཊྛིཏཝིམཱནཾ བྷིཛྫཏི ཝིནསྶཏི. ཨིཏི ཏཱ དེཝཏཱཡོ བྷཝནཝིནཱསབྷཡཱ སཀབྷཱཝེན སཎྛཱཏུཾ ན སཀྐོནྟི. ཨེཏྠ ཙ ཡཾ སཱཁཊྛཀཝིམཱནཾ ཧོཏི, ཏཾ སཱཁཱསུ བྷིཛྫམཱནཱསུ ཏཏྠ ཏཏྠེཝ བྷིཛྫིཏྭཱ སབྦསཱཁཱསུ བྷིནྣཱསུ སབྦཾ བྷིཛྫཏི, རུཀྑཊྛཀཝིམཱནཾ པན ཡཱཝ རུཀྑསྶ མཱུལམཏྟམྤི ཏིཊྛཏི, ཏཱཝ ན ནསྶཏཱིཏི ཝེདིཏབྦཾ. ཏཏྠ ཏཏྠ པལུཛྫིཏྭཱཏི ཏཏྠ ཏཏྠ བྷིཛྫིཏྭཱ. སེསམེཏྠ སུཝིཉྙེཡྻམེཝ.

ཨཀུསལམཱུལསུཏྟཝཎྞནཱ ནིཊྛིཏཱ.

༡༠. ཨུཔོསཐསུཏྟཝཎྞནཱ

༧༡. དསམེ ཏདཧཱུཏི ཨེཏྠ ཏསྨིཾ ཨཧནཱིཏི ཨཏྠོཏི ཨཱཧ ‘‘ཏསྨིཾ ཨཧུ ཨུཔོསཐེ’’ཏི. ཨུཔཝསནྟི ཨེཏྠཱཏི ཨུཔོསཐོ, ཨུཔོསཐདིཝསོ. ཨུཔཝསནྟཱིཏི ཙ སཱིལེན ཝཱ ཨནསནེན ཝཱ ཁཱིརསཱཡནཱདིཝིདྷིནཱ ཝཱ ཨུཔེཏཱ ཧུཏྭཱ ཝསནྟཱིཏི ཨཏྠོ. ཨུཔོསཐདིཝསེ ཧི སཱསནིཀཱ སཱིལེན, བཱཧིརཀཱ སབྦསོ ཨཱཧཱརསྶ ཨབྷུཉྫནེན ཁཱིརསཱཡནམདྷུསཱཡནཱདིཝིདྷིནཱ ཝཱ ཨུཔེཏཱ ཧུཏྭཱ ཝིཧརནྟི. སོ པནེས ཨུཔོསཐདིཝསོ ཨཊྛམིཙཱཏུདྡསིཔནྣརསིབྷེདེན ཏིཝིདྷོ, ཏསྨཱ སེསདྭཡནིཝཱརཎཏྠཾ ‘‘པནྣརསིཀཨུཔོསཐདིཝསེ’’ཏི ཝུཏྟཾ. ཝཝསྶགྒཏྠེཏི ཝཙསཱཡཏྠེ. དིཝསདྡོ དིཝཱསདྡོ ཝིཡ དིཝསཔརིཡཱཡོ, ཏསྶ ཝིསེསནབྷཱཝེན ཝུཙྩམཱནོ དིཝཱསདྡོ སཝིསེསེན དཱིཔེཏཱིཏི ཨཱཧ ‘‘དིཝསསྶ དིཝཱ ¶ , མཛ྄ཛྷནྷིཀེ ཀཱལེཏི ཨཏྠོ’’ཏི. པཊིཙྪཱཔེཏྭཱཏི སམྤཊིཙྪནཾ ཀཱརེཏྭཱ. ཝིཔཱཀཕལེནཱཏི སདིསཕལེན. ན མཧཔྥལོ ཧོཏི མནོདུཙྩརིཏདུསྶཱིལྱེན ཨུཔཀྐིལིཊྛབྷཱཝཏོ. ཝིཔཱཀཱནིསཾསེནཱཏི ཨུདྲཡཕལེན. ཝིཔཱཀོབྷཱསེནཱཏི པཊིཔཀྑཝིགམཛནིཏེན སབྷཱཝསངྑཱཏེན ཝིཔཱཀོབྷཱསེན. ན མཧཱཨོབྷཱསོ ཨཔརིསུདྡྷབྷཱཝཏོ. ཝིཔཱཀཝིཔྥཱརསྶཱཏི ཝིཔཱཀཝེཔུལླསྶ.

ནཱཧཾ ¶ ཀྭཙནཱིཏིཨཱདིཝཙནསྶ མིཙྪཱབྷིནིཝེསཝསེན པཝཏྟཏྟཱ ‘‘ཨིདཾ ཏསྶ མུསཱཝཱདསྨིཾ ཝདཱམཱི’’ཏི པཱལི༹ཡཾ ཝུཏྟཾ, ཙཏུཀོཊིཀསུཉྙཏཱདསྶནཝསེན པཝཏྟཾ པན ཨརིཡདསྶནམེཝཱཏི ན ཏཏྠ མུསཱཝཱདོ. ཝུཏྟཉྷེཏཾ –

‘‘པུན ཙཔརཾ, བྷིཀྑཝེ, ཨརིཡསཱཝཀོ ཨིཏི པཊིསཉྩིཀྑཏི ‘ནཱཧཾ ཀྭཙནི, ཀསྶཙི ཀིཉྩནཏསྨིཾ, ན ཙ མམ ཀྭཙནི, ཀིསྨིཉྩི ཀིཉྩནཏཏྠཱི’’’ཏིཨཱདི (མ. ནི. ༣.༧༠).

ཨེཏྠ ཧི ཙཏུཀོཊིཀསུཉྙཏཱ ཀཐིཏཱ. ཀཐཾ? ཨརིཡོ (ཝིསུདྡྷི. ༢.༧༦༠; མ. ནི. ཨཊྛ. ༣.༧༠) ཧི ནཱཧཾ ཀྭཙནཱིཏི ཀྭཙི ཨཏྟཱནཾ ན པསྶཏི, ཀསྶཙི ཀིཉྩནཏསྨིནྟི ཨཏྟནོ ཨཏྟཱནཾ ཀསྶཙི པརསྶ ཀིཉྩནབྷཱཝེ ཨུཔནེཏབྦཾ ན པསྶཏི, བྷཱཏིཊྛཱནེ བྷཱཏརཾ, སཧཱཡཊྛཱནེ སཧཱཡཾ, པརིཀྑཱརཊྛཱནེ པརིཀྑཱརཾ མཉྙིཏྭཱ ཨུཔནེཏབྦཾ ན པསྶཏཱིཏི ཨཏྠོ. ན ཙ མམ ཀྭཙནཱིཏི ཨེཏྠ མམ-སདྡཾ ཏཱཝ ཋཔེཏྭཱ ཀྭཙནི པརསྶ ཙ ཨཏྟཱནཾ ཀྭཙི ན པསྶཏཱིཏི ཨཡམཏྠོ. ཨིདཱནི མམ-སདྡཾ ཨཱཧརིཏྭཱ ‘‘མམ ཀིསྨིཉྩི ཀིཉྩནཏཏྠཱི’’ཏི སོ པརསྶ ཨཏྟཱནཾ ‘‘མམ ཀིསྨིཉྩི ཀིཉྩནབྷཱཝེན ཨཏྠཱི’’ཏི ན པསྶཏི, ཨཏྟནོ བྷཱཏིཀཊྛཱནེ བྷཱཏརཾ, སཧཱཡཊྛཱནེ སཧཱཡཾ, པརིཀྑཱརཊྛཱནེ པརིཀྑཱརནྟི ཀིསྨིཉྩི ཋཱནེ པརསྶ ཨཏྟཱནཾ ཨིམིནཱ ཀིཉྩནབྷཱཝེན ཨུཔནེཏབྦཾ ན པསྶཏཱིཏི ཨཏྠོ. ཨེཝམཡཾ ཡསྨཱ ནེཝ ཀཏྠཙི ཨཏྟཱནཾ པསྶཏི, ན ཏཾ པརསྶ ཀིཉྩནབྷཱཝེ ཨུཔནེཏབྦཾ པསྶཏི. ན ཀཏྠཙི པརསྶ ཨཏྟཱནཾ པསྶཏི, ན པརསྶ ཨཏྟཱནཾ ཨཏྟནོ ཀིཉྩནབྷཱཝེ ཨུཔནེཏབྦཾ པསྶཏི, ཏསྨཱ ཨཡཾ སུཉྙཏཱ ཙཏུཀོཊིཀཱཏི ཝེདིཏབྦཱ.

ཡསྨཱ པན མིཙྪཱདིཊྛིཀཱནཾ ཡཱཐཱཝདསྶནསྶ ཨསམྦྷཝཏོ ཡཐཱཝུཏྟཙཏུཀོཊིཀསུཉྙཏཱདསྶནཾ ན སམྦྷཝཏི, ཏསྨཱ ‘‘ནཏྠི མཱཏཱ, ནཏྠི པིཏཱ’’ཏིཨཱདིཝཙནཾ ¶ (དཱི. ནི. ༡.༡༧༡) ཝིཡ མིཙྪཱགཱཧཝསེན ‘‘ནཱཧཾ ཀྭཙནཱི’’ཏིཨཱདི ཝུཏྟནྟི ཡུཏྟོ ཙེཏྠ མུསཱཝཱདསམྦྷཝོ. ཀཏྠཙཱིཏི ཋཱནེ, ཀཱལེ ཝཱ. ཨཐ ‘‘ནིཔྥལོ’’ཏི ཀསྨཱ ཝུཏྟཾ. ‘‘ན མཧཔྥལོ’’ཏི སདྡེན ཧི མཧཔྥལཱབྷཱཝོཝ ཛོཏིཏོ, ན པན སབྦཐཱ ཕལཱབྷཱཝོཏི ཨཱཧ ‘‘བྱཉྫནམེཝ ཧི ཨེཏྠ སཱཝསེས’’ནྟིཨཱདི. སེསཔདེསུཔཱིཏི ‘‘ན མཧཱནིསཾསོ’’ཏིཨཱདཱིསུཔི.

ཨཊྛཧི ཀཱརཎེཧཱིཏི –

‘‘ཨཐ ¶ ཁོ, བྷནྟེ, སཀྐོ དེཝཱནམིནྡོ དེཝཱནཾ ཏཱཝཏིཾསཱནཾ བྷགཝཏོ ཨཊྛ ཡཐཱབྷུཙྩེ ཝཎྞེ པཡིརུདཱཧཱསི – ‘ཏཾ ཀིཾ མཉྙནྟི, བྷོནྟོ དེཝཱ ཏཱཝཏིཾསཱ, ཡཱཝཉྩ སོ བྷགཝཱ བཧུཛནཧིཏཱཡ པཊིཔནྣོ བཧུཛནསུཁཱཡ ལོཀཱནུཀམྤཱཡ ཨཏྠཱཡ ཧིཏཱཡ སུཁཱཡ དེཝམནུསྶཱནཾ, ཨེཝཾ བཧུཛནཧིཏཱཡ པཊིཔནྣཾ བཧུཛནསུཁཱཡ ལོཀཱནུཀམྤཱཡ ཨཏྠཱཡ ཧིཏཱཡ སུཁཱཡ དེཝམནུསྶཱནཾ ཨིམིནཱཔངྒེན སམནྣཱགཏཾ སཏྠཱརཾ ནེཝ ཨཏཱིཏཾསེ སམནུཔསྶཱམི, ན པནེཏརཧི ཨཉྙཏྲ ཏེན བྷགཝཏཱ’’ཏི –

ཨཱདིནཱ མཧཱགོཝིནྡསུཏྟེ (དཱི. ནི. ༢.༢༩༦) ཝིཏྠཱརིཏེཧི བཧུཛནཧིཏཱཡ པཊིཔནྣཱདཱིཧི བུདྡྷཱནུབྷཱཝདཱིཔཀེཧི ཨཊྛཧི ཀཱརཎེཧི. ཨཐ ‘‘ནཝཧི ཀཱརཎེཧཱི’’ཏི ཨཝཏྭཱ ‘‘ཨཊྛཧི ཀཱརཎེཧཱི’’ཏི ཀསྨཱ ཝུཏྟནྟི ཨཱཧ ‘‘ཨེཏྠ ཧི…པེ… སབྦེ ལོཀིཡལོཀུཏྟརཱ བུདྡྷགུཎཱ སངྒཧིཏཱ’’ཏི. ཨིདཾ ཝུཏྟཾ ཧོཏི – ཨིམསྨིཾ སུཏྟེ ‘‘ཨིཏིཔི སོ བྷགཝཱ’’ཏི ཨིམིནཱ ཝཙནེན ཨཝིསེསཏོ སབྦེཔི ལོཀིཡལོཀུཏྟརཱ བུདྡྷགུཎཱ དཱིཔིཏཱ, ཏསྨཱ ཏེན དཱིཔིཏགུཎེ སནྡྷཱཡ ‘‘ཨཊྛཧི ཀཱརཎེཧཱི’’ཏི ཝུཏྟནྟི. ཨརཧནྟིཨཱདཱིཧི པཱཊིཡེཀྐགུཎཱཝ ནིདྡིཊྛཱཏི ཨརཧནྟིཨཱདཱིཧི ཨེཀེཀེཧི པདེཧི ཨེཀེཀེ གུཎཱཝ ནིདྡིཊྛཱཏི ཨཏྠོ.

སཧཏནྟིཀནྟི པཱལི༹དྷམྨསཧིཏཾ. པུརིམནཡེནེཝ ཡོཛནཱ ཀཱཏབྦཱཏི ‘‘ཀིལིཊྛསྨིཉྷི ཀཱཡེ པསཱདྷནཾ པསཱདྷེཏྭཱ ནཀྑཏྟཾ ཀཱིལ༹མཱནཱ ན སོབྷནྟཱི’’ཏིཨཱདིནཱ ནཡེན ཡོཛནཱ ཀཱཏབྦཱཏི ཨཏྠོ.

སངྒྷསྶ ¶ ཨནུསྶརཎཾ ནཱམ ཏསྶ གུཎཱནུསྶརཎམེཝཱཏི ཨཱཧ ‘‘ཨཊྛནྣཾ ཨརིཡཔུགྒལཱནཾ གུཎེ ཨནུསྶརཏཱི’’ཏི. དྭེ ཏཡོ ཝཱརེ གཱཧཱཔིཏཾ ཨུསུམནྟི དྭེ ཏཡོ ཝཱརེ ཨུདྡྷནཾ ཨཱརོཔེཏྭཱ སེདནཝསེན གཱཧཱཔིཏཾ ཨུསུམཾ. པུརིམནཡེནེཝ ཡོཛནཱ ཀཱཏབྦཱཏི ‘‘ཀིལིཊྛསྨིཉྷི ཝཏྠེ པསཱདྷནཾ པསཱདྷེཏྭཱ ནཀྑཏྟཾ ཀཱིལ༹མཱནཱ ན སོབྷནྟཱི’’ཏིཨཱདིནཱ ནཡེན ཡོཛནཱ ཀཱཏབྦཱ.

པཧཱིནཀཱལཏོ པཊྛཱཡ…པེ… ཝིརཏཱཝཱཏི ཨེཏེན པཧཱནཧེཏུཀཱ ཨིདྷཱདྷིཔྤེཏཱ ཝིརཏཱིཏི དསྶེཏི. ཀམྨཀྑཡཀརཉཱཎེན ཧི པཱཎཱཏིཔཱཏདུསྶཱིལྱསྶ པཧཱིནཏྟཱ ཨརཧནྟོ ཨཙྩནྟམེཝ ཏཏོ པཊིཝིརཏཱཏི ཝུཙྩཏི སམུཙྪེདཝསེན པཧཱནཝིརཏཱིནཾ ཨདྷིཔྤེཏཏྟཱ. ཀིཉྩཱཔི པཧཱནཝིརམཎཱནཾ པུརིམཔཙྪིམཀཱལཏཱ ནཏྠི, མགྒདྷམྨཱནཾ པན སམྨཱདིཊྛིཨཱདཱིནཾ སམྨཱཝཱཙཱདཱིནཉྩ པཙྩཡཔཙྩཡུཔྤནྣབྷཱཝེ ཨཔེཀྑིཏེ སཧཛཱཏཱནམྤི པཙྩཡཔཙྩཡུཔྤནྣབྷཱཝེན གཧཎཾ པུརིམཔཙྪིམབྷཱཝེནེཝ ཧོཏཱིཏི, གཧཎཔྤཝཏྟིཨཱཀཱརཝསེན པཙྩཡབྷཱུཏེསུ སམྨཱདིཊྛིཨཱདཱིསུ ¶ པཧཱཡཀདྷམྨེསུ པཧཱནཀིརིཡཱཡ པུརིམཀཱལཝོཧཱརོ, པཙྩཡུཔྤནྣཱསུ ཙ ཝིརཏཱིསུ ཝིརམཎཀིརིཡཱཡ ཨཔརཀཱལཝོཧཱརོ ཙ ཧོཏཱིཏི པཧཱནཾ ཝཱ སམུཙྪེདཝསེན, ཝིརཏི པཊིཔྤསྶདྡྷིཝསེན ཡོཛེཏབྦཱ.

ཨཐ ཝཱ པཱཎོ ཨཏིཔཱཏཱིཡཏི ཨེཏེནཱཏི པཱཎཱཏིཔཱཏོ, པཱཎགྷཱཏཧེཏུབྷཱུཏོ དྷམྨསམཱུཧོ. ཀོ པན སོ? ཨཧིརིཀཱནོཏྟཔྤདོསམོཧཝིཧིཾསཱདཡོ ཀིལེསཱ. ཏེ ཧི ཨརཧནྟོ ཨརིཡམགྒེན པཧཱཡ སམུགྒྷཱཏེཏྭཱ པཱཎཱཏིཔཱཏདུསྶཱིལྱཏོ ཨཙྩནྟམེཝ པཊིཝིརཏཱཏི ཝུཙྩནྟི, ཀིལེསེསུ པཧཱིནེསུ ཀིལེསནིམིཏྟསྶ ཀམྨསྶ ཨནུཔྤཛྫནཏོ. ཨདིནྣཱདཱནཾ པཧཱཡཱཏིཨཱདཱིསུཔི ཨེསེཝ ནཡོ. ཝིརཏཱཝཱཏི ཨཝདྷཱརཎེན ཏསྶཱ ཝིརཏིཡཱ ཀཱལཱདིཝསེན ཨཔརིཡནྟཏཾ དསྶེཏི. ཡཐཱ ཧི ཨཉྙེ སམཱདིནྣཝིརཏིཀཱཔི ཨནཝཊྛིཏཙིཏྟཏཱཡ ལཱབྷཛཱིཝིཏཱདིཧེཏུ སམཱདཱནཾ བྷིནྡནྟི, ན ཨེཝཾ ཨརཧནྟོ, ཨརཧནྟོ པན སབྦསོ པཧཱིནཔཱཎཱཏིཔཱཏཏྟཱ ཨཙྩནྟཝིརཏཱ ཨེཝཱཏི.

དཎྜནསངྑཱཏསྶ པརཝིཧེཋནསྶ ཙ པརིཝཛྫནབྷཱཝདཱིཔནཏྠཾ དཎྜསཏྠཱནཾ ནིཀྑེཔཝཙནནྟི ཨཱཧ ‘‘པརཱུཔགྷཱཏཏྠཱཡཱ’’ཏིཨཱདི. ལཛྫཱིཏི ཨེཏྠ ཝུཏྟལཛྫཱཡ ¶ ཨོཏྟཔྤམྤི ཝུཏྟམེཝཱཏི དཊྛབྦཾ. ན ཧི པཱཔཛིགུཙྪནཔཱཔུཏྟཱསརཧིཏཾ, པཱཔབྷཡཾ ཝཱ ཨལཛྫནཾ ཨཏྠཱིཏི. དྷམྨགརུཏཱཡ ཝཱ ཨརཧནྟཱནཾ དྷམྨསྶ ཙ ཨཏྟཱ དྷཱིནཏྟཱ ཨཏྟཱདྷིཔཏིབྷཱུཏཱ ལཛྫཱཝ ཝུཏྟཱ, ན པན ལོཀཱདྷིཔཏི ཨོཏྟཔྤཾ. ‘‘དཡཾ མེཏྟཙིཏྟཏཾ ཨཱཔནྣཱ’’ཏི ཀསྨཱ ཝུཏྟཾ, ནནུ དཡཱ-སདྡོ ‘‘ཨདཡཱཔནྣོ’’ཏིཨཱདཱིསུ ཀརུཎཱཡ པཝཏྟཏཱིཏི? སཙྩམེཏཾ, ཨཡཾ པན དཡཱ-སདྡོ ཨནུརཀྑཎཏྠཾ ཨནྟོནཱིཏཾ ཀཏྭཱ པཝཏྟམཱནོ མེཏྟཱཡ ཀརུཎཱཡ ཙ པཝཏྟཏཱིཏི ཨིདྷ མེཏྟཱཡ པཝཏྟམཱནོ ཝུཏྟོ. མིཛྫཏི སིནིཡ྄ཧཏཱིཏི མེཏྟཱ, མེཏྟཱ ཨེཏསྶ ཨཏྠཱིཏི མེཏྟཾ, མེཏྟཾ ཙིཏྟཾ ཨེཏསྶཱཏི མེཏྟཙིཏྟོ, ཏསྶ བྷཱཝོ མེཏྟཙིཏྟཏཱ, མེཏྟཱཨིཙྩེཝ ཨཏྠོ.

སབྦཔཱཎབྷཱུཏཧིཏཱནུཀམྤཱིཏི ཨེཏེན ཏསྶཱ ཝིརཏིཡཱ པཝཏྟཝསེན ཨཔརིཡནྟཏཾ དསྶེཏི. པཱཎབྷཱུཏེཏི པཱཎཛཱཏེ. ཨནུཀམྤཀཱཏི ཀརུཎཱཡནཀཱ, ཡསྨཱ པན མེཏྟཱ ཀརུཎཱཡ ཝིསེསཔཙྩཡོ ཧོཏི, ཏསྨཱ ཝུཏྟཾ ‘‘ཏཱཡ ཨེཝ དཡཱཔནྣཏཱཡཱ’’ཏི. ཨེཝཾ ཡེཧི དྷམྨེཧི པཱཎཱཏིཔཱཏཱ ཝིརཏི སམྤཛྫཏི, ཏེཧི ལཛྫཱམེཏྟཱཀརུཎཱདྷམྨེཧི སམངྒིབྷཱཝོ དསྶིཏོ.

པརཔརིགྒཧིཏསྶ ཨཱདཱནནྟི པརསནྟཀསྶ ཨཱདཱནཾ. ཐེནོ ཝུཙྩཏི ཙོརོ, ཏསྶ བྷཱཝོ ཐེཡྻཾ, ཀཱམཉྩེཏྠ ‘‘ལཛྫཱི དཡཱཔནྣོ’’ཏི ན ཝུཏྟཾ, ཨདྷིཀཱརཝསེན པན ཨཏྠཏོ ཝུཏྟམེཝཱཏི དཊྛབྦཾ. ཡཐཱ ཧི ལཛྫཱདཡོ པཱཎཱཏིཔཱཏཔྤཧཱནསྶ ཝིསེསཔཙྩཡཱ, ཨེཝཾ ཨདིནྣཱདཱནཔྤཧཱནསྶཔཱིཏི ¶ , ཏསྨཱ སཱཔི པཱལི༹ ཨཱནེཏྭཱ ཝཏྟབྦཱ. ཨེས ནཡོ ཨིཏོ པརེསུཔི. ཨཐ ཝཱ སུཙིབྷཱུཏེནཱཏི ཨེཏེན ཧིརོཏྟཔྤཱདཱིཧི སམནྣཱགམོ, ཨཧིརིཀཱདཱིནཉྩ པཧཱནཾ ཝུཏྟམེཝཱཏི ‘‘ལཛྫཱི’’ཏིཨཱདི ན ཝུཏྟནྟི དཊྛབྦཾ.

ཨསེཊྛཙརིཡནྟི ཨསེཊྛཱནཾ ཧཱིནཱནཾ, ཨསེཊྛཾ ཝཱ ལཱམཀཾ ཙརིཡཾ, ནིཧཱིནཝུཏྟིཾ མེཐུནནྟི ཨཏྠོ. བྲཧྨཾ སེཊྛཾ ཨཱཙཱརནྟི མེཐུནཝིརཏིམཱཧ. ཨཱརཱཙཱརཱི མེཐུནཱཏི ཨེཏེན – ‘‘ཨིདྷེཀཙྩོ ན ཧེཝ ཁོ མཱཏུགཱམེན སདྡྷིཾ དྭཡཾདྭཡསམཱཔཏྟིཾ སམཱཔཛྫཏི, ཨཔིཙ ཁོ མཱཏུགཱམསྶ ཨུཙྪཱདནཔརིམདྡནནྷཱཔནསམྦཱཧནཾ སཱདིཡཏི, སོ ཏཾ ཨསྶཱདེཏི, ཏཾ ནིཀཱམེཏི, ཏེན ཙ ཝིཏྟིཾ ཨཱཔཛྫཏཱི’’ཏིཨཱདིནཱ (ཨ. ནི. ༧.༥༠) ཝུཏྟཱ སཏྟཝིདྷམེཐུནསཾཡོགཱཔི པཊིཝིརཏི དསྶིཏཱཏི དཊྛབྦཾ.

‘‘སཙྩཏོ ¶ ཐེཏཏོ’’ཏིཨཱདཱིསུ (མ. ནི. ༡.༡༩) ཝིཡ ཐེཏ-སདྡོ ཐིརཔརིཡཱཡོ, ཐིརབྷཱཝོ ཙ སཙྩཝཱདིཏཱཡ ཋིཏཀཐཏྟཱ ཀཐཱཝསེན ཝེདིཏབྦོཏི ཨཱཧ ‘‘ཋིཏཀཐཱཏི ཨཏྠོ’’ཏི. ན ཋིཏཀཐོཏི ཡཐཱ ཧལིདྡིརཱགཱདཡོ ཨནཝཊྛིཏསབྷཱཝཏཱཡ ན ཋིཏཱ, ཨེཝཾ ན ཋིཏཱ ཀཐཱ ཡསྶ སོ ན ཋིཏཀཐོཏི ཧལིདྡིརཱགཱདཡོ ཡཐཱ ཀཐཱཡ ཨུཔམཱ ཧོནྟི, ཨེཝཾ ཡོཛེཏབྦཾ. ཨེས ནཡོ ‘‘པཱསཱཎལེཁཱ ཝིཡཱ’’ཏིཨཱདཱིསུཔི. སདྡྷཱ ཨཡཏི པཝཏྟཏི ཨེཏྠཱཏི སདྡྷཱཡཱ, སདྡྷཱཡཱ ཨེཝ སདྡྷཱཡིཀཱ ཡཐཱ ཝེནཡིཀཱ. སདྡྷཱཡ ཝཱ ཨཡིཏབྦཱ སདྡྷཱཡིཀཱ, སདྡྷེཡྻཱཏི ཨཏྠོ. ཝཏྟབྦཏཾ ཨཱཔཛྫཏི ཝིསཾཝཱདནཏོཏི ཨདྷིཔྤཱཡོ.

ཨེཀཾ བྷཏྟཾ ཨེཀབྷཏྟཾ, ཏཾ ཨེཏེསམཏྠཱིཏི ཨེཀབྷཏྟིཀཱ, ཨེཀསྨིཾ དིཝསེ ཨེཀཝཱརམེཝ བྷུཉྫནཀཱ. ཏཡིདཾ རཏྟིབྷོཛནེནཔི སིཡཱཏི ཨཱཧ ‘‘རཏྟཱུཔརཏཱ’’ཏི. ཨེཝམྤི སཱཡནྷབྷོཛནེནཔི སིཡུཾ ཨེཀབྷཏྟིཀཱཏི ཏདཱསངྐཱནིཝཏྟནཏྠཾ ‘‘ཝིརཏཱ ཝིཀཱལབྷོཛནཱ’’ཏི ཝུཏྟཾ. ཨརུཎུགྒམནཏོ པཊྛཱཡ ཡཱཝ མཛ྄ཛྷནྷིཀཱ ཨཡཾ བུདྡྷཱནཾ ཨརིཡཱནཾ ཨཱཙིཎྞསམཱཙིཎྞོ བྷོཛནསྶ ཀཱལོ ནཱམ, ཏདཉྙོ ཝིཀཱལོ. ཨཊྛཀཐཱཡཾ པན དུཏིཡཔདེན རཏྟིབྷོཛནསྶ པཊིཀྑིཏྟཏྟཱ ཨཔརཎྷོ ‘‘ཝིཀཱལོ’’ཏི ཝུཏྟོ.

སངྑེཔཏོ ‘‘སབྦཔཱཔསྶ ཨཀརཎ’’ནྟིཨཱདིནཡཔྤཝཏྟཾ (དཱི. ནི. ༢.༩༠; དྷ. པ. ༡༨༣) བྷགཝཏོ སཱསནཾ སཙྪནྡརཱགཔྤཝཏྟིཏོ ནཙྩཱདཱིནཾ དསྶནཾ ན ཨནུལོམེཏཱིཏི ཨཱཧ ‘‘སཱསནསྶ ཨནནུལོམཏྟཱ’’ཏི. ཨཏྟནཱ པཡོཛིཡམཱནཾ པརེཧི པཡོཛཱཔཱིཡམཱནཉྩ ནཙྩཾ ནཙྩབྷཱཝསཱམཉྙཏོ པཱལི༹ཡཾ ཨེཀེནེཝ ནཙྩསདྡེན གཧིཏཾ, ཏཐཱ གཱིཏཝཱདིཏསདྡཱ ཙཱཏི ཨཱཧ ‘‘ནཙྩནནཙྩཱཔནཱདིཝསེནཱ’’ཏི ¶ . ཨཱདི-སདྡེན གཱཡནགཱཡཱཔནཝཱདནཝཱདཱཔནཱནི སངྒཎྷཱཏི. དསྶནེན ཙེཏྠ སཝནམྤི སངྒཧིཏཾ ཝིརཱུཔེཀསེསནཡེན. ཨཱལོཙནསབྷཱཝཏཱཡ ཝཱ པཉྩནྣཾ ཝིཉྙཱཎཱནཾ སཝནཀིརིཡཱཡཔི དསྶནསངྑེཔསབྦྷཱཝཏོ དསྶནཱཨིཙྩེཝ ཝུཏྟཾ. ཨཝིསཱུཀབྷཱུཏསྶ གཱིཏསྶ སཝནཾ ཀདཱཙི ཝཊྚཏཱིཏི ཨཱཧ ‘‘ཝིསཱུཀབྷཱུཏཾ དསྶན’’ནྟི. ཏཐཱ ཧི ཝུཏྟཾ པརམཏྠཛོཏིཀཱཡ ཁུདྡཀཔཱཋཊྛཀཐཱཡ ‘‘དྷམྨཱུཔསཾཧིཏཾ གཱིཏཾ ཝཊྚཏི, གཱིཏཱུཔསཾཧིཏོ དྷམྨོ ན ཝཊྚཏཱི’’ཏི.

ཡཾ ¶ ཀིཉྩཱིཏི གནྠིཏཾ ཝཱ ཨགནྠིཏཾ ཝཱ ཡཾ ཀིཉྩི པུཔྥཾ. གནྡྷཛཱཏནྟི གནྡྷཛཱཏིཡཾ. ཏསྶཱཔི ‘‘ཡཾ ཀིཉྩཱི’’ཏི ཝཙནཏོ དྷཱུཔིཏསྶཔི ཨདྷཱུཔིཏསྶཔི ཡསྶ ཀསྶཙི ཝིལེཔནཱདི ན ཝཊྚཏཱིཏི དསྶེཏི. ཨུཙྩཱཏི ཨུཙྩསདྡེན སམཱནཏྠཾ ཨེཀཾ སདྡནྟརཾ. སེཏི ཨེཏྠཱཏི སཡནཾ. ཨུཙྩཱསཡནཾ མཧཱསཡནཉྩ སམཎསཱརུཔྤརཧིཏཾ ཨདྷིཔྤེཏནྟི ཨཱཧ ‘‘པམཱཎཱཏིཀྐནྟཾ ཨཀཔྤིཡཏྠརཎ’’ནྟི, ཨཱསནྡཱདིཨཱསནཉྩེཏྠ སཡནེན སངྒཧིཏནྟི དཊྛབྦཾ. ཡསྨཱ པན ཨཱདྷཱརེ པཊིཀྑིཏྟེ ཏདཱདྷཱརཀིརིཡཱ པཊིཀྑིཏྟཱཝ ཧོཏི, ཏསྨཱ ‘‘ཨུཙྩཱསཡནམཧཱསཡནཱ’’ཨིཙྩེཝ ཝུཏྟཾ. ཨཏྠཏོ པན ཏདུཔབྷོགབྷཱུཏནིསཛྫཱནིཔཛྫནེཧི ཝིརཏི དསྶིཏཱཏི དཊྛབྦཱ. ཨཐ ཝཱ ‘‘ཨུཙྩཱསཡནཱསནམཧཱསཡནཱསནཱ’’ཏི, ཨེཏསྨིཾ ཨཏྠེ ཨེཀསེསནཡེན ཨཡཾ ནིདྡེསོ ཀཏོ ཡཐཱ ‘‘ནཱམརཱུཔཔཙྩཡཱ སལཱ༹ཡཏན’’ནྟི. (མ. ནི. ༣.༡༢༦; སཾ. ནི. ༢.༡) ཨཱསནཀིརིཡཱཔུབྦཀཏྟཱ ཝཱ སཡནཀིརིཡཱཡ སཡནགྒཧཎེནེཝ ཨཱསནམྤི སངྒཧིཏནྟི ཝེདིཏབྦཾ.

‘‘ཀཱིཝཱ’’ཏི ཨཡཾ ནིཔཱཏོ. ‘‘ཀིཏྟཀ’’ནྟི ཨིམསྶ ཨཏྠཾ བོདྷེཏཱིཏི ཨཱཧ ‘‘ཀཱིཝམཧཔྥལོཏི ཀིཏྟཀཾ མཧཔྥལོ’’ཏི. སེསཔདེསཱུཏི ‘‘ཀཱིཝམཧཱནིསཾསོ’’ཏིཨཱདཱིསུ. རཏྟ-སདྡོ རཏནཔརིཡཱཡོཏི ཨཱཧ ‘‘པཧཱུཏརཏྟརཏནཱནནྟི པཧཱུཏེན རཏྟསངྑཱཏེན རཏནེན སམནྣཱགཏཱན’’ནྟི. པཱལི༹ཡཾ པན ‘‘པཧཱུཏསཏྟརཏནཱན’’ནྟིཔི པཱཋོ དིསྶཏི. བྷེརིཏལསདིསཾ ཀཏྭཱཏི བྷེརིཏལཾ ཝིཡ སམཾ ཀཏྭཱ. ཏཏོ ཨེཀཾ བྷཱགཾ ན ཨགྒྷཏཱིཏི ཡཐཱཝུཏྟཾ ཙཀྐཝཏྟིརཛྫཾ ཏཏོ སོལ༹སབྷཱགཏོ ཨེཀཾ བྷཱགཾ ན ཨགྒྷཏི. ཏཏོ བཧུཏརཾ ཧོཏཱིཏི ཙཀྐཝཏྟིརཛྫསིརིཏོ བཧུཏརཾ ཧོཏི.

ཙཱཏུམཧཱརཱཛཱིཀཱནནྟིཨཱདཱིསུ ཙཱཏུམཧཱརཱཛིཀཱ ནཱམ སིནེརུཔབྦཏསྶ ཝེམཛ྄ཛྷེ ཧོནྟི, ཏེསུ བཧཱུ པབྦཏཊྛཱཔི ཨཱཀཱསཊྛཱཔི, ཏེསཾ པརམྤརཱ ཙཀྐཝཱལ༹པབྦཏཾ པཏྟཱ, ཁིཌྜཱཔདོསིཀཱ, མནོཔདོསིཀཱ, སཱིཏཝལཱཧཀཱ, ཨུཎྷཝལཱཧཀཱ, ཙནྡིམཱ, དེཝཔུཏྟོ, སཱུརིཡོ, དེཝཔུཏྟོཏི ཨེཏེ སབྦེ ¶ ཙཱཏུམཧཱརཱཛིཀདེཝལོཀཊྛཀཱ ཨེཝ. ཏེཏྟིཾས ཛནཱ ཏཏྠ ཨུཔྤནྣཱཏི ཏཱཝཏིཾསཱ. ཨཔིཙ ཏཱཝཏིཾསཱཏི ཏེསཾ དེཝཱནཾ ནཱམམེཝཱཏི ཝུཏྟཾ. ཏེཔི ཨཏྠི པབྦཏཊྛཀཱ, ཨཏྠི ཨཱཀཱསཊྛཀཱ, ཏེསཾ པརམྤརཱ ཙཀྐཝཱལ༹པབྦཏཾ པཏྟཱ, ཏཐཱ ཡཱམཱདཱིནཾ. ཨེཀདེཝལོཀེཔི ¶ ཧི དེཝཱནཾ པརམྤརཱ ཙཀྐཝཱལ༹པབྦཏཾ ཨཔྤཏྟཱ ནཱམ ནཏྠི. ཏཏྠ དིབྦསུཁཾ ཡཱཏཱ པཡཱཏཱ སམྤཏྟཱཏི ཡཱམཱ. ཏུཊྛཱ པཧཊྛཱཏི ཏུསིཏཱ. པཀཏིཔཊིཡཏྟཱརམྨཎཏོ ཨཏིརེཀེན རམིཏུཀཱམཀཱལེ ཡཐཱརུཙིཏེ བྷོགེ ནིམྨིནིཏྭཱ ནིམྨིནིཏྭཱ རམནྟཱིཏི ནིམྨཱནརཏི. ཙིཏྟཱཙཱརཾ ཉཏྭཱ པརེཧི ནིམྨིཏེསུ བྷོགེསུ ཝསཾ ཝཏྟེནྟཱིཏི པརནིམྨིཏཝསཝཏྟཱི.

ཏཏྠ ཙཱཏུམཧཱརཱཛིཀཱནཾ དེཝཱནཾ མནུསྶགཎནཱཡ ནཝུཏིཝསྶསཏསཧསྶཱནི ཨཱཡུཔྤམཱཎཾ. ཏཱཝཏིཾསཱནཾ དེཝཱནཾ ཏིསྶོ ཙ ཝསྶཀོཊིཡོ སཊྛི ཙ ཝསྶསཏསཧསྶཱནི. ཡཱམཱནཾ དེཝཱནཾ ཙུདྡས ཙ ཝསྶཀོཊིཡོ ཙཏྟཱརི ཙ ཝསྶསཏསཧསྶཱནི. ཏུསིཏཱནཾ དེཝཱནཾ སཏྟཔཉྙཱས ཙ ཝསྶཀོཊིཡོ སཊྛི ཙ ཝསྶསཏསཧསྶཱནི. ནིམྨཱནརཏཱིནཾ དེཝཱནཾ དྭེ ཙ ཝསྶཀོཊིསཏཱནི ཏིསྶོ ཙ ཝསྶཀོཊིཡོ ཙཏྟཱརི ཙ ཝསྶསཏསཧསྶཱནི. པརནིམྨིཏཝསཝཏྟཱིནཾ དེཝཱནཾ ནཝ ཙ ཝསྶཀོཊིསཏཱནི ཨེཀཝཱིས ཀོཊིཡོ ཙ སཊྛི ཙ ཝསྶསཏསཧསྶཱནི.

མུཊྛིཧཏྠཔཱདཀེཏི པཱདཏལཏོ ཡཱཝ ཨཊནིཡཱ ཧེཊྛིམནྟོ, ཏཱཝ མུཊྛིརཏནཔྤམཱཎཔཱདཀེ. ཏཉྩ ཁོ མཛ྄ཛྷིམསྶ པུརིསསྶ ཧཏྠེན, ཡསྶིདཱནི ཝཌྜྷཀཱིཧཏྠོཏི སམཉྙཱ. སཱིལསམཱདཱནཏོ པཊྛཱཡ ཨཉྙཾ ཀིཉྩི ཨཀཏྭཱ དྷམྨསྶཝནེན ཝཱ ཀམྨཊྛཱནམནསིཀཱརེན ཝཱ ཝཱིཏིནཱམེཏབྦནྟི ཨཱཧ ‘‘ཏཾ པན ཨུཔཝསནྟེན…པེ… ཝིཙཱརེཏབྦ’’ནྟི.

ཝཱཙཾ བྷིནྡིཏྭཱ ཨུཔོསཐངྒཱནི སམཱདཱཏབྦཱནཱིཏི ‘‘ཨིམཉྩ རཏྟིཾ ཨིམཉྩ དིཝས’’ནྟི ཀཱལཔརིཙྪེདཾ ཀཏྭཱ ‘‘ཨུཔོསཐངྒཝསེན ཨཊྛ སིཀྑཱཔདཱནི སམཱདིཡཱམཱི’’ཏི ཨེཀཏོ ཀཏྭཱ པུན པཙྩེཀཾ ‘‘པཱཎཱཏིཔཱཏཱ ཝེརམཎིསིཀྑཱཔདཾ སམཱདིཡཱམི…པེ… ཨུཙྩཱསཡནམཧཱསཡནཱ ཝེརམཎིསིཀྑཱཔདཾ སམཱདིཡཱམཱི’’ཏི ཨེཝཾ ཝཙཱིབྷེདཾ ཀཏྭཱ ཡཐཱཔཱལི༹ སམཱདཱཏབྦཱནི. པཱལི༹ཾ ཨཛཱནནྟེན པན ཨཏྟནོ བྷཱསཱཡ པཙྩེཀཾ ཝཱ ‘‘བུདྡྷཔཉྙཏྟཾ ཨུཔོསཐཾ ཨདྷིཊྛཱམཱི’’ཏི ཨེཀཏོ ཨདྷིཊྛཱནཝསེན ཝཱ སམཱདཱཏབྦཱནི, ཨཉྙཾ ཨལབྷནྟེན ཨདྷིཊྛཱཏབྦཱནི. ཨུཔཱསཀསཱིལཉྷི ཨཏྟནཱ སམཱདིཡནྟེནཔི སམཱདིནྣཾ པརསནྟིཀེ སམཱདིཡནྟེནཔི, ཨེཀཛ྄ཛྷཾ སམཱདིནྣམྤི སམཱདིནྣམེཝ ཧོཏི པཙྩེཀཾ སམཱདིནྣམྤི. ཏཾ པན ཨེཀཛ྄ཛྷཾ སམཱདིཡཏོ ཨེཀཱཡེཝ ཝིརཏི ཨེཀཱ ཙེཏནཱ ཧོཏི. སཱ པན སབྦཝིརཏིཙེཏནཱནཾ ཀིཙྩཀཱརཱིཏི ཏེནཔི སབྦསིཀྑཱཔདཱནི སམཱདིནྣཱནེཝ. པཙྩེཀཾ སམཱདིཡཏོ པན ནཱནཱཝིརཏིཙེཏནཱཡོ ཡཐཱསཀཾ ཀིཙྩཝསེན ཨུཔྤཛྫནྟི ¶ , སབྦསམཱདཱནེ པན ¶ ཝཙཱིབྷེདོ ཀཱཏབྦོཡེཝ. པརཱུཔརོདྷཔཊིསཾཡུཏྟཱ པརཝིཧིཾསཱསཾཡུཏྟཱ.

ནནུ ཙ ‘‘མཎི’’ནྟི ཝུཏྟེ ཝེལུ༹རིཡམྤི སངྒཧིཏམེཝ, ཀིམཏྠཾ པན ཝེལུ༹རིཡནྟི ཨཱཧ ‘‘ཝེལུ༹རིཡནྟི…པེ… དསྶེཏཱི’’ཏི. ‘‘མཎི’’ནྟི ཝཏྭཱཝ ‘‘ཝེལུ༹རིཡ’’ནྟི ཨིམིནཱ ཛཱཏིམཎིབྷཱཝཾ དསྶེཏཱིཏི ཡོཛེཏབྦཾ. ཨེཀཝསྶིཀཝེལུ༹ཝཎྞནྟི ཛཱཏིཏོ ཨེཀཝསྶཱཏིཀྐནྟཝེལུ༹ཝཎྞཾ. ལདྡྷཀནྟི སུནྡརཾ. ཙནྡཔྤབྷཱ ཏཱརགཎཱཝ སབྦེཏི ཡཐཱ ཙནྡཔྤབྷཱཡ ཀལཾ སབྦེ ཏཱརཱགཎཱ ནཱནུབྷཝནྟཱིཏི ཨཡམེཏྠ ཨཏྠོཏི ཨཱཧ ‘‘ཙནྡཔྤབྷཱཏི སཱམིཨཏྠེ པཙྩཏྟ’’ནྟི.

ཨུཔོསཐསུཏྟཝཎྞནཱ ནིཊྛིཏཱ.

མཧཱཝགྒཝཎྞནཱ ནིཊྛིཏཱ.

(༨) ༣. ཨཱནནྡཝགྒོ

༡. ཚནྣསུཏྟཝཎྞནཱ

༧༢. ཏཏིཡསྶ པཋམེ ཚནྣཔརིབྦཱཛཀོཏི ན ནགྒཔརིབྦཱཛཀོ. བཱཧིརཀསམཡཾ ལུཉྩིཏྭཱ ཧརནྟོཏི བཱཧིརཀཱནཾ སམཡཾ ནིསེདྷེཏྭཱ ཨཱཔནྣོ.

པཉྙཱཙཀྑུསྶ ཝིབནྡྷནཏོ ཨནྡྷཾ ཀརོཏཱིཏི ཨནྡྷཀརཎོཏི ཨཱཧ ‘‘ཡསྶ རཱགོ ཨུཔྤཛྫཏཱི’’ཏིཨཱདི. ཨཙཀྑུཀརཎོཏི ཨསམཏྠསམཱསོཡཾ ‘‘ཨསཱུརིཡཔསྶཱནི མུཁཱནཱི’’ཏིཨཱདཱིསུ ཝིཡཱཏི ཨཱཧ ‘‘པཉྙཱཙཀྑུཾ ན ཀརོཏཱིཏི ཨཙཀྑུཀརཎོ’’ཏི. པཉྙཱནིརོདྷིཀོཏི ཨནུཔྤནྣཱཡ ལོཀིཡལོཀུཏྟརཱཡ པཉྙཱཡ ཨུཔྤཛྫིཏུཾ ན དེཏི, ལོཀིཡཔཉྙཾ པན ཨཊྛསམཱཔཏྟིཔཉྩཱབྷིཉྙཱཝསེན ཨུཔྤནྣམྤི སམུཙྪིནྡིཏྭཱ ཁིཔཏཱིཏི པཉྙཱནིརོདྷིཀོཏི ཨེཝམྤེཏྠ ཨཏྠོ དཊྛབྦོ. ཨནུཔྤནྣཱནུཔྤཱདཨུཔྤནྣཔརིཧཱནིནིམིཏྟཏཱཡ ཧི པཉྙཾ ནིརོདྷེཏཱིཏི པཉྙཱནིརོདྷིཀོ. ཝིཧནཏི ཝིབཱདྷཏཱིཏི ཝིགྷཱཏོ, དུཀྑནྟི ཨཱཧ ‘‘དུཀྑསངྑཱཏསྶ ཝིགྷཱཏསྶཱ’’ཏི. ཀིལེསནིབྦཱནནྟི ཨིམིནཱ ཨསངྑཏནིབྦཱནམེཝ ཝདཏི. ཨསངྑཏཉྷི ནིབྦཱནཾ ནཱམ, ཏཾ པཙྩཀྑཾ ¶ ཀཱཏུཾ ན དེཏཱིཏི ཨནིབྦཱནསཾཝཏྟནིཀོ. ལོཀུཏྟརམིསྶཀོ ཀཐིཏོ པུབྦབྷཱགིཡསྶཔི ཨརིཡམགྒསྶ ཀཐིཏཏྟཱ.

ཚནྣསུཏྟཝཎྞནཱ ནིཊྛིཏཱ.

༢. ཨཱཛཱིཝཀསུཏྟཝཎྞནཱ

༧༣. དུཏིཡེ ¶ ན ཨཉྙཱཏུཀཱམོཏི ན ཨཱཛཱནིཏུཀཱམོཡེཝཱཏི ཨཏྠོ. ཏེནཱཧ ‘‘པརིགྒཎྷནཏྠཾ པན ཨཱགཏོ’’ཏི, པཉྙཱཡ པརིཙྪིནྡིཏྭཱ ཨུཔཔརིཀྑིཏྭཱ གཎྷནཏྠནྟི ཨཏྠོ. ཀཱརཎཱཔདེསོཏི ཀཱརཎནིདྡེསོ. སེསམེཏྠ ཨུཏྟཱནམེཝ.

ཨཱཛཱིཝཀསུཏྟཝཎྞནཱ ནིཊྛིཏཱ.

༣. མཧཱནཱམསཀྐསུཏྟཝཎྞནཱ

༧༤. ཏཏིཡེ གིལཱནསྶ བྷཱཝོ གེལཉྙནྟི ཨཱཧ ‘‘གིལཱནབྷཱཝཏོ’’ཏི. དཱིཔེཏཱིཏི དེསནཱཀྐམེནེཝ པཉྙཱཔེཏི. པཋམཉྷི སེཁསཱིལསམཱདྷིཔཉྙཱཡོ ཝཏྭཱ པཙྪཱ ཨསེཁསཱིལཱདཱིནི ཝདནྟོ ཨིམམཏྠཾ དཱིཔེཏི.

མཧཱནཱམསཀྐསུཏྟཝཎྞནཱ ནིཊྛིཏཱ.

༤. ནིགཎྛསུཏྟཝཎྞནཱ

༧༥. ཙཏུཏྠེ ཧཾསཝཊྚཀཙྪནྣེནཱཏི ཧཾསཝཊྚཀཔརིཙྪནྣེན, ཧཾསམཎྜལཱཀཱརེནཱཏི ཨཏྠོ. ནཏྠི ཨེཏསྶ པརིསེསནྟི ཨཔརིསེསཾ. ཏེནཱཧ ‘‘ཨཔྤམཏྟཀམྤི ཨསེསེཏྭཱ’’ཏི. ཨཔརིསེསདྷམྨཛཱནནཏོ ཝཱ ཨཔརིསེསསངྑཱཏཾ ཉཱཎདསྶནཾ པཊིཛཱནཱཏཱིཏི ཨེཝམྤེཏྠ ཨཏྠོ དཊྛབྦོ. སཏཏནྟི ནིཙྩཾ. སམིཏནྟི ཏསྶེཝ ཝེཝཙནནྟི ཨཱཧ ‘‘སཏཏཾ སམིཏནྟི སབྦཀཱལཾ ནིརནྟར’’ནྟི. ཨཐ ཝཱ ནིཙྩཊྛེན སཏཏ-སདྡེན ཨབྷིཎྷཔྤཝཏྟི ཛོཏིཏཱ སིཡཱཏི ‘‘སམིཏ’’ནྟི ཝུཏྟཾ. ཏེན ནིརནྟརཔྤཝཏྟིཾ དསྶེཏཱིཏི ཨཱཧ ‘‘སབྦཀཱལཾ ནིརནྟར’’ནྟི.

ཝིསུདྡྷིསམྤཱཔནཏྠཱཡཱཏི ¶ རཱགཱདཱིཧི མལེཧི ཨབྷིཛ྄ཛྷཱཝིསམལོབྷཱདཱིཧི ཙ ཨུཔཀྐིལིཊྛཙིཏྟཱནཾ སཏྟཱནཾ ཝིསུདྡྷིཔཱཔནཏྠཱཡ. སམཏིཀྐམནཏྠཱཡཱཏི སོཀསྶ ཙ པརིདེཝསྶ ཙ པཧཱནཏྠཱཡ. ཨཏྠཾ གམནཏྠཱཡཱཏི ཀཱཡིཀདུཀྑསྶ ཙ ཙེཏསིཀདོམནསྶསྶ ཙཱཏི ཨིམེསཾ དྭིནྣཾ ཨཏྠངྒམནཱཡ, ནིརོདྷཱཡཱཏི ཨཏྠོ. ཉཱཡཏི ནིཙྪཡེན ཀམཏི ནིབྦཱནཾ. ཏཾ ཝཱ ¶ ཉཱཡཏི པཊིཝིཛ྄ཛྷཏི ཨེཏེནཱཏི ཉཱཡོ, ཨརིཡམགྒོཏི ཨཱཧ ‘‘མགྒསྶ ཨདྷིགམནཏྠཱཡཱ’’ཏི. ཨཔཙྩཡནིབྦཱནསྶ སཙྪིཀརཎཏྠཱཡཱཏི པཙྩཡརཧིཏཏྟཱ ཨཔཙྩཡསྶ ཨསངྑཏསྶ ཏཎྷཱཝཱནཝིརཧིཏཏྟཱ ནིབྦཱནནྟི ལདྡྷནཱམསྶ ཨམཏསྶ སཙྪིཀིརིཡཱཡ, ཨཏྟཔཙྩཀྑཏཱཡཱཏི ཝུཏྟཾ ཧོཏི. ཕུསིཏྭཱ ཕུསིཏྭཱཏི པཏྭཱ པཏྭཱ. སེསམེཏྠ སུཝིཉྙེཡྻམེཝ.

ནིགཎྛསུཏྟཝཎྞནཱ ནིཊྛིཏཱ.

༥. ནིཝེསཀསུཏྟཝཎྞནཱ

༧༦. པཉྩམེ ཀིཙྩཀརཎཱིཡེསུ སཧབྷཱཝཊྛེན ཨམཱ ཧོནྟཱིཏི ཨམཙྩཱ. ‘‘ཨཡཾ ཨཛ྄ཛྷཏྟིཀོ’’ཏི ཨེཝཾ ཛཱནནྟི, ཉཱཡནྟི ཝཱཏི ཉཱཏཱི. སསྶུསསུརཔཀྑིཀཱཏི སསྶུསསུརཱ ཙ ཏཔྤཀྑིཀོ ཙ སསྶུསསུརཔཀྑིཀཱ. ལོཧིཏེན སམྦདྡྷཱཏི སཱལོཧིཏཱ. པིཏུཔཀྑིཀཱ ཝཱ ཉཱཏཱི, མཱཏུཔཀྑིཀཱ སཱལོཧིཏཱ. མཱཏུཔིཏུཔཀྑིཀཱ ཝཱ ཉཱཏཱི, སསྶུསསུརཔཀྑིཀཱ སཱལོཧིཏཱ. ཨཝེཙྩ རཏནསྶ གུཎེ ཡཱཐཱཝཏོ ཉཏྭཱ པསཱདོ ཨཝེཙྩཔྤསཱདོ. སོ པན ཡསྨཱ མགྒེནཱགཏཏྟཱ ཀེནཙི ཨཀམྤནཱིཡོ ཙ ཨཔྤདྷཾསིཡོ ཙ ཧོཏི, ཏསྨཱ ཨེཝཾ ཝུཏྟཾ ‘‘ཨཙལཔྤསཱདོ’’ཏི. བྷཱཝཉྙཐཏྟནྟི སབྷཱཝསྶ ཨཉྙཐཏྟཾ.

ཝཱིསཏིཡཱ ཀོཊྛཱསེསཱུཏི ཀེསཱདིམཏྠལུངྒཔརིཡནྟེསུ. དྭཱདསསུ ཀོཊྛཱསེསཱུཏི པིཏྟཱདིམུཏྟཔརིཡནྟེསུ. ཙཏཱུསུ ཀོཊྛཱསེསཱུཏི ‘‘ཡེན ཙ སནྟཔྤཏི, ཡེན ཙ ཛཱིརཱིཡཏི, ཡེན ཙ པརིདཡ྄ཧཏི, ཡེན ཙ ཨསིཏཔཱིཏཁཱཡིཏསཱཡིཏཾ སམྨཱ པརིཎཱམཾ གཙྪཏཱི’’ཏི (མ. ནི. ༡.༣༠༤) ཨེཝཾ ཝུཏྟེསུ ཙཏཱུསུ ཀོཊྛཱསེསུ. ཚསུ ཀོཊྛཱསེསཱུཏི ‘‘ཨུདྡྷངྒམཱ ཝཱཏཱ, ཨདྷོགམཱ ཝཱཏཱ, ཀུཙྪིསཡཱ ཝཱཏཱ, ཀོཊྛཱསཡཱ ཝཱཏཱ, ཨངྒམངྒཱནུསཱརིནོ ཝཱཏཱ, ཨསྶཱསོ པསྶཱསོ’’ཏི (མ. ནི. ༢.༣༠༥) ཨེཝཾ ཝུཏྟེསུ ཚསུ ཀོཊྛཱསེསུ. ཝིཏྠམྦྷནཾ སེསབྷཱུཏཏྟཡསནྠམྦྷིཏཏཱཔཱདནཾ, ‘‘ཨུཔཀཱིལ༹ན’’ནྟི ཨེཀེ. སེསཾ སུཝིཉྙེཡྻམེཝ.

ནིཝེསཀསུཏྟཝཎྞནཱ ནིཊྛིཏཱ.

༦-༧. པཋམབྷཝསུཏྟཱདིཝཎྞནཱ

༧༧-༧༨. ཚཊྛེ ¶ ¶ ཨབྷིསངྑཱརཝིཉྙཱཎནྟི ཀམྨསཧཛཱཏཾ ཝིཉྙཱཎཾ. སེསམེཏྠ སུཝིཉྙེཡྻམེཝ. སཏྟམེ ནཏྠི ཝཏྟབྦཾ.

པཋམབྷཝསུཏྟཱདིཝཎྞནཱ ནིཊྛིཏཱ.

༨. སཱིལབྦཏསུཏྟཝཎྞནཱ

༧༩. ཨཊྛམེ དུཀྐརཀཱརིཀཱནུཡོགོཏི དུཀྐརཀིརིཡཱཡ ཨནུཡོགོ. ཨུཔཊྛཱནེན སཱརནྟི ཨུཔཊྛཱནཱཀཱརེན སཱརཾ. ‘‘ཨིདཾ ཝར’’ནྟིཨཱདིནཱ ཨུཔཊྛཱནཱཀཱརཾ ཝིབྷཱཝེཏི. ཨེཏྠཱཏི ཨེཏསྨིཾ སཏྠཱརཱ པུཙྪིཏེ པཉྷེ.

སཱིལབྦཏསུཏྟཝཎྞནཱ ནིཊྛིཏཱ.

༩. གནྡྷཛཱཏསུཏྟཝཎྞནཱ

༨༠. ནཝམེ མཱུལེ, མཱུལསྶ ཝཱ གནྡྷོ མཱུལགནྡྷོཏི ཨཱཧ ‘‘མཱུལཝཏྠུཀོ གནྡྷོ’’ཏི. མཱུལཾ ཝཏྠུ ཨེཏསྶཱཏི མཱུལཝཏྠུཀོ. ཨིདཱནི མཱུལཾ གནྡྷཡོགཏོ གནྡྷོཏི ཨིམམཏྠཾ དསྶེནྟོ ‘‘གནྡྷསམྤནྣཾ ཝཱ མཱུལམེཝ མཱུལགནྡྷོ’’ཏི ཨཱཧ. པཙྪིམོཡེཝེཏྠ ཨཏྠཝིཀཔྤོ ཡུཏྟཏརོཏི དསྶེཏུཾ ‘‘ཏསྶ ཧི གནྡྷོ’’ཏིཨཱདིམཱཧ. ཝསྶིཀཔུཔྥཱདཱིནནྟི སུམནཔུཔྥཱདཱིནཾ.

གནྡྷཛཱཏསུཏྟཝཎྞནཱ ནིཊྛིཏཱ.

༡༠. ཙཱུལ༹ནིཀཱསུཏྟཝཎྞནཱ

༨༡. དསམེ ཨརུཎཝཏིསུཏྟནྟཨཊྛུཔྤཏྟིཡནྟི ‘‘བྷཱུཏཔུབྦཾ, བྷིཀྑཝེ, རཱཛཱ ཨཧོསི ཨརུཎཝཱ ནཱམ. རཉྙོ ཁོ པན, བྷིཀྑཝེ, ཨརུཎཝཏོ ཨརུཎཝཏཱི ནཱམ རཱཛདྷཱནཱི ཨཧོསི. ཨརུཎཝཏིཾ ཁོ པན, བྷིཀྑཝེ, རཱཛདྷཱནིཾ སིཁཱི བྷགཝཱ ཨརཧཾ སམྨཱསམྦུདྡྷོ ཨུཔནིསྶཱཡ ཝིཧཱསི. སིཁིསྶ ¶ ཁོ པན, བྷིཀྑཝེ, བྷགཝཏོ ཨརཧཏོ སམྨཱསམྦུདྡྷསྶ ཨབྷིབྷཱུསམྦྷཝཾ ནཱམ སཱཝཀཡུགཾ ཨཧོསི ཨགྒཾ བྷདྡཡུགཾ. ཨཐ ཁོ, བྷིཀྑཝེ, སིཁཱི བྷགཝཱ ཨརཧཾ ¶ སམྨཱསམྦུདྡྷོ ཨབྷིབྷུཾ བྷིཀྑུཾ ཨཱམནྟེསཱི’’ཏིཨཱདིནཱ བྲཧྨསཾཡུཏྟེ (སཾ. ནི. ༡.༡༨༥) ཨཱགཏསྶ ཨརུཎཝཏིསུཏྟནྟསྶ ཨཊྛུཔྤཏྟིཡཾ. ཨཏིཔྤགོཏི ཨཏིཝིཡ པགོ, ཨཏིཝིཡ པཱཏོཏི ཨཏྠོ, ན ཏཱཝ ཀུལེསུ བྷཏྟཾ ནིཊྛཱཏཱིཏི ཝུཏྟཾ ཧོཏི.

ཨུཛ྄ཛྷཱཡནྟཱིཏི ཨཝཛྷཱཡནྟི, ཧེཊྛཱ ཀཏྭཱ ཙིནྟེནྟི, ལཱམཀཏོ ཙིནྟེནྟི. ཨནེཀཝིཧིཏཾ ཨིདྡྷིཝིཀུབྦནཾ ཀཏྭཱཏི ‘‘པཀཏིཝཎྞཾ ཝིཛཧིཏྭཱ ནཱགཝཎྞཾ ཝཱ དསྶེཏི, སུཔཎྞཝཎྞཾ ཝཱ དསྶེཏཱི’’ཏིཨཱདིནཱ (པཊི. མ. ༣.༡༣) ནཡེན ཨཱགཏཾ ཨནེཀཔྤཀཱརཾ ཨིདྡྷིཝིཀུབྦནཾ ཀཏྭཱ. སཧསྶིལོཀདྷཱཏུནྟི ཙཀྐཝཱལ༹སཧསྶཾ. གཱཐཱདྭཡཾ ཨབྷཱསཱིཏི ཐེརོ ཀིར ‘‘ཀཐཾ དེསིཏཱ ཁོ དྷམྨདེསནཱ སབྦེསཾ པིཡཱ མནཱཔཱ’’ཏི ཙིནྟེཏྭཱ ‘‘སབྦེཔི པཱསཎྜཱ སབྦེ དེཝམནུསྶཱ ཨཏྟནོ ཨཏྟནོ སམཡེ པུརིསཀཱརཾ ཝཎྞཡནྟི, ཝཱིརིཡསྶ ཨཝཎྞཝཱདཱི ནཱམ ནཏྠི, ཝཱིརིཡཔྤཊིསཾཡུཏྟཾ ཀཏྭཱ དེསེསྶཱམི. ཨེཝམསྶ དྷམྨདེསནཱ སབྦེསཾ པིཡཱ བྷཝིསྶཏི མནཱཔཱ’’ཏི ཉཏྭཱ ཏཱིསུ པིཊཀེསུ ཝིཙིནིཏྭཱ ‘‘ཨཱརམྦྷཐ ནིཀྐམཐཱ’’ཏི (སཾ. ནི. ༡.༡༨༦) ཨིདཾ གཱཐཱདྭཡཾ ཨབྷཱསི.

ཀིཾ ཨཱལོཀོ ཨཡནྟི ཀསྶ ནུ ཁོ ཨཡཾ ཨཱལོཀོཏི. ཝིཙིནནྟཱནནྟི ཙིནྟེནྟཱནཾ. སབྦེཏི ལོཀདྷཱཏུཡཾ སབྦེ དེཝཱ ཙ མནུསྶཱ ཙ. ཨོསཊཱཡ པརིསཱཡཱཏི དྷམྨསྶཝནཏྠཾ སམོསཊཱཡ པརིམིཏཔརིཙྪིནྣཱཡ པརིསཱཡ. ཨཏྠོཔི ནེསཾ པཱཀཊོ ཨཧོསཱིཏི ན ཀེཝལཾ ཏེ སདྡམེཝ ཨསྶོསུཾ, ཨཐ ཁོ ཨཏྠོཔི ཏེསཾ པཀཏིསཝནཱུཔཙཱརེ ཝིཡ པཱཀཊོ ཨཧོསི. ཏེན སཧསྶཾ ལོཀདྷཱཏུཾ ཝིཉྙཱཔེཏཱིཏི ཨདྷིཔྤཱཡོ.

པརིཧརནྟཱིཏི སིནེརུཾ དཀྑིཎཏོ ཀཏྭཱ པརིཝཏྟེནྟི. ཝིརོཙམཱནཱཏི ཨཏྟནོ ཛུཏིཡཱ དིབྦམཱནཱ, སོབྷམཱནཱ ཝཱ. ཏཱཝ སཧསྶདྷཱ ལོཀོཏི ཡཏྟཀོ ཙནྡིམསཱུརིཡེཧི ཨོབྷཱསིཡམཱནོ ལོཀདྷཱཏུསངྑཱཏོ ཨེཀེཀོ ལོཀོ, ཏཏྟཀེན པམཱཎེན སཧསྶདྷཱ ལོཀོ, ཨིམིནཱ ཙཀྐཝཱལེ༹ན སདྡྷིཾ ཙཀྐཝཱལ༹སཧསྶནྟི ཨཏྠོ. ཀསྨཱ པནེསཱ ཨཱནཱིཏཱཏི ཨེསཱ ཙཱུལ༹ནིཀཱ ལོཀདྷཱཏུ ¶ ཀསྨཱ བྷགཝཏཱ ཨཱནཱིཏཱ, དེསིཏཱཏི ཨཏྠོ. མཛ྄ཛྷིམིཀཱཡ ལོཀདྷཱཏུཡཱ པརིཙྪེདདསྶནཏྠནྟི དྭིསཧསྶིལོཀདྷཱཏུཡཱ པརིམཱཎདསྶནཏྠཾ.

སཧསྶིལོཀདྷཱཏུཡཱ སཧསྶཱི དྭིསཧསྶིལོཀདྷཱཏུ, སཱ ཙཀྐཝཱལ༹གཎནཱཡ དསསཏསཧསྶཙཀྐཝཱལ༹པརིམཱཎཱ. ཏེནཱཧ ‘‘སཧསྶཙཀྐཝཱལཱ༹ནི སཧསྶབྷཱགེན གཎེཏྭཱ’’ཏིཨཱདི. ཀམྤནདེཝཏཱུཔསངྐམནཱདིནཱ ཛཱཏཙཀྐཝཱལེ༹ན སཧ ཡོགཀྑེམཾ ཋཱནཾ ཛཱཏིཀྑེཏྟཾ. ཏཏྟཀཱཡ ཨེཝ ཛཱཏིཀྑེཏྟབྷཱཝོ ¶ དྷམྨཏཱཝསེནེཝ ཝེདིཏབྦོ, ‘‘པརིགྒཧཝསེནཱ’’ཏི ཀེཙི. སབྦེསམྤི བུདྡྷཱནཾ ཨེཝཾ ཛཱཏིཀྑེཏྟཾ ཏནྣིཝཱསཱིནཾཡེཝ ཙ དེཝཏཱནཾ དྷམྨཱབྷིསམཡོཏི ཝདནྟི. པཊིསནྡྷིགྒཧཎཱདཱིནཾ སཏྟནྣཾཡེཝ གཧཎཾ ནིདསྶནམཏྟཾ མཧཱབྷིནཱིཧཱརཱདིཀཱལེཔི ཏསྶ པཀམྤནསྶ ལབྦྷནཏོ.

སཧསྶཾ སཧསྶདྷཱ ཀཏྭཱ གཎིཏཾ མཛ྄ཛྷིམིཀནྟིཨཱདིནཱ མཛ྄ཛྷིམིཀཱཡ ལོཀདྷཱཏུཡཱ སཧསྶཾ ཏིསཧསྶིལོཀདྷཱཏུ, སཱཡེཝ ཙ མཧཱསཧསྶིལོཀདྷཱཏཱུཏི དསྶེཏི. སརསེནེཝ ཨཱཎཱཔཝཏྟནཾ ཨཱཎཱཀྑེཏྟཾ, ཡཾ ཨེཀཛ྄ཛྷཾ སཾཝཊྚཏི ཝིཝཊྚཏི ཙ. ཨཱཎཱ ཕརཏཱིཏི ཏནྣིཝཱསིདེཝཏཱནཾ སིརསཱ སམྤཊིཙྪནེན ཝཏྟཏི, ཏཉྩ ཁོ ཀེཝལཾ བུདྡྷཱནུབྷཱཝེནེཝ, ཨདྷིཔྤཱཡཝསེན ཙ པན ‘‘ཡཱཝཏཱ པན ཨཱཀངྑེཡྻཱ’’ཏི (ཨ. ནི. ༣.༨༡) ཝཙནཏོ བུདྡྷཱནཾ ཨཝིསཡོ ནཱམ ནཏྠི, ཝིསཡཀྑེཏྟསྶ པམཱཎཔརིཙྪེདོ ནཱམ ནཏྠི. ཝིསམོཏི སཱུརིཡུགྒམནཱདཱིནཾ ཝིསམབྷཱཝཏོ ཝིསམོ. ཏེནེཝཱཧ ‘‘ཨེཀསྨིཾ ཋཱནེ སཱུརིཡོ ཨུགྒཏོ ཧོཏཱི’’ཏིཨཱདི. སེསམེཏྠ སུཝིཉྙེཡྻམེཝ.

ཙཱུལ༹ནིཀཱསུཏྟཝཎྞནཱ ནིཊྛིཏཱ.

ཨཱནནྡཝགྒཝཎྞནཱ ནིཊྛིཏཱ.

(༩) ༤. སམཎཝགྒོ

༡-༥. སམཎསུཏྟཱདིཝཎྞནཱ

༨༢-༨༦. ཙཏུཏྠསྶ པཋམེ སམྨཱ ཨཱདཱནཾ གཧཎཾ སམཱདཱནནྟི ཨཱཧ ‘‘སམཱདཱནཾ ཝུཙྩཏི གཧཎ’’ནྟི. ཨདྷིཀཾ ཝིསིཊྛཾ སཱིལནྟི ཨདྷིསཱིལཾ. ལོཀིཡསཱིལསྶ ¶ ཨདྷིསཱིལབྷཱཝོ པརིཡཱཡེནཱཏི ནིཔྤརིཡཱཡམེཝ ཏཾ དསྶེཏུཾ ‘‘ཨཔིཙ སབྦམྤི ལོཀིཡསཱིལ’’ནྟིཨཱདི ཝུཏྟཾ. སིཀྑིཏབྦཏོཏི ཨཱསེཝིཏབྦཏོ. པཉྩཔི དསཔི ཝཱ སཱིལཱནི སཱིལཾ ནཱམ, པཱཏིམོཀྑསཾཝརོ ཨདྷིསཱིལཾ ནཱམ ཨནཝསེསཀཱཡིཀཙེཏསིཀསཾཝརབྷཱཝཏོ མགྒསཱིལསྶ པདཊྛཱནབྷཱཝཏོ ཙ. ཨཊྛ སམཱཔཏྟིཡོ ཙིཏྟཾ, ཝིཔསྶནཱཔཱདཀཛ྄ཛྷཱནཾ ཨདྷིཙིཏྟཾ མགྒསམཱདྷིསྶ ཨདྷིཊྛཱནབྷཱཝཏོ. ཀམྨསྶཀཏཉཱཎཾ པཉྙཱ, ཝིཔསྶནཱ ཨདྷིཔཉྙཱ མགྒཔཉྙཱཡ ཨདྷིཊྛཱནབྷཱཝཏོ. ཨཔིཙ ནིབྦཱནཾ ¶ པཏྠཡནྟེན སམཱདིནྣཾ པཉྩསཱིལཾ དསསཱིལམྤི ཨདྷིསཱིལམེཝ ནིབྦཱནཱདྷིགམསྶ པཙྩཡབྷཱཝཏོ. ནིབྦཱནཾ པཏྠཡནྟེན སམཱཔནྣཱ ཨཊྛ སམཱཔཏྟིཡོཔི ཨདྷིཙིཏྟམེཝ.

‘‘ཀལྱཱཎཀཱརཱི ཀལྱཱཎཾ, པཱཔཀཱརཱི ཙ པཱཔཀཾ;

ཨནུབྷོཏི དྭཡམེཏཾ, ཨནུབནྡྷཉྷི ཀཱརཎ’’ནྟི. –

ཨེཝཾ ཨཏཱིཏེ ཨནཱགཏེ ཙ ཝཊྚམཱུལཀདུཀྑསལླཀྑཎཝསེན སཾཝེགཝཏྠུཏཱཡ ཝིམུཏྟིཨཱཀངྑཱཡ པཙྩཡབྷཱུཏཱ ཀམྨསྶཀཏཔཉྙཱཔི ཨདྷིཔཉྙཱཏི ཝདནྟི. དུཏིཡཏཏིཡཙཏུཏྠཔཉྩམཱནི ཨུཏྟཱནཏྠཱནེཝ.

སམཎསུཏྟཱདིཝཎྞནཱ ནིཊྛིཏཱ.

༦. པཋམསིཀྑཱསུཏྟཝཎྞནཱ

༨༧. ཚཊྛེ སམཏྟཀཱརཱིཏི ཨནཱུནེན པརིཔཱུརེན ཨཱཀཱརེན སམནྣཱགཏོ. སིཀྑཱཔདཱནཾ ཁུདྡཱནུཁུདྡཀཏྟཾ ཨཔེཀྑཱསིདྡྷནྟི ཨཱཧ ‘‘ཏཏྲཱཔི སངྒྷཱདིསེསཾ ཁུདྡཀ’’ནྟིཨཱདི. ཨངྒུཏྟརམཧཱནིཀཱཡཝལ༹ཉྫནཀཨཱཙརིཡཱཏི ཨངྒུཏྟརནིཀཱཡཾ པརིཧརནྟཱ ཨཱཙརིཡཱ, ཨངྒུཏྟརབྷཱཎཀཱཏི ཝུཏྟཾ ཧོཏི. ལོཀཝཛྫཾ ནཱཔཛྫཏི ལོཀཝཛྫསིཀྑཱཔདཱནཾ ཝཱིཏིཀྐམསཱདྷཀསྶ ཀིལེསགཧནསྶ སབྦསོ པཧཱིནཏྟཱ. པཎྞཏྟིཝཛྫམེཝ ཨཱཔཛྫཏི པཎྞཏྟིཝཱིཏིཀྐམཾ ཝཱ ཨཛཱནཏོཔི ཨཱཔཏྟིསམྦྷཝཏོ. ཙིཏྟེན ཨཱཔཛྫནྟོ རཱུཔིཡཔྤཊིགྒཧཎཾ ཨཱཔཛྫཏཱིཏི ཨུཔནིཀྑིཏྟསཱདིཡེན ཨཱཔཛྫཏི.

བྲཧྨཙརིཡསྶ ཨཱདིབྷཱུཏཱནི ཨཱདིབྲཧྨཙརིཡཱནི, ཏཱནི ཨེཝ ཨཱདིབྲཧྨཙརིཡཀཱནི ཡཐཱ ‘‘ཝིནཡོ ཨེཝ ཝེནཡིཀོ’’ཏི ཨཱཧ ‘‘མགྒབྲཧྨཙརིཡསྶཱ’’ཏིཨཱདི. ཙཏྟཱརི མཧཱསཱིལསིཀྑཱཔདཱནཱིཏི ཙཏྟཱརི པཱརཱཛིཀཱནི སནྡྷཱཡ ¶ ཝདཏི. པཊིཔཀྑདྷམྨཱནཾ ཨནཝསེསཏོ སཝནཏོ པགྒྷརཎཏོ སོཏོ, ཨརིཡམགྒོཏི ཨཱཧ ‘‘སོཏསངྑཱཏེན མགྒེནཱ’’ཏི. ཝིནིཔཱཏེཏི ཝིརཱུཔཾ སདུཀྑཾ སཨུཔཱཡཱསཾ ནིཔཱཏེཏཱིཏི ཝིནིཔཱཏོ, ཨཔཱཡདུཀྑེ ཁིཔནཀོ. དྷམྨོཏི སབྷཱཝོ. ནཱསྶ ཝིནིཔཱཏོ དྷམྨོཏི ཨཝིནིཔཱཏདྷམྨོ, ན ཨཏྟཱནཾ ཨཔཱཡེསུ ཝིནིཔཱཏནསབྷཱཝོཏི ཝུཏྟཾ ཧོཏི. ཀསྨཱ? ཡེ དྷམྨཱ ཨཔཱཡགམནཱིཡཱ, ཏེསཾ པཧཱིནཏྟཱ. ཏེནཱཧ ‘‘ཨཝིནིཔཱཏདྷམྨོཏི ཙཏཱུསུ ཨཔཱཡེསུ ཨཔཏནསབྷཱཝོ’’ཏི. ཏཏྠ ཨཔཏནསབྷཱཝོཏི ཨནུཔྤཛྫནསབྷཱཝོ. སོཏཱཔཏྟིམགྒནིཡཱམེན ¶ ནིཡཏོཏི ཨུཔརིམགྒཱདྷིགམསྶ ཨཝསྶཾབྷཱཝཱིབྷཱཝཏོ ནིཡཏོ. ཏེནེཝཱཧ ‘‘སམྦོདྷིཔརཱཡཎོ’’ཏི. ཧེཊྛིམནྟཏོ སཏྟམབྷཝཏོ ཨུཔརི ཨནུཔྤཛྫནདྷམྨཏཱཡ ཝཱ ནིཡཏོ. སམྦུཛ྄ཛྷཏཱིཏི སམྦོདྷི, ཨརིཡམགྒོ. སོ པན པཋམམགྒསྶ ཨདྷིགཏཏྟཱ ཨཝསིཊྛོ ཙ ཨདྷིགནྟབྦབྷཱཝེན ཨིཙྪིཏབྦོཏི ཨུཔརིམགྒཏྟཡསངྑཱཏཱ སམྦོདྷི པརཾ ཨཡནཾ པརཱ གཏི ཨསྶཱཏི སམྦོདྷིཔརཱཡཎོ. ཏེནཱཧ ‘‘ཨུཔརིམགྒཏྟཡསམྦོདྷིཔརཱཡཎོ’’ཏི.

ཏནུབྷཱཝཱཏི པརིཡུཊྛཱནམནྡཏཱཡ ཙ ཀདཱཙི ཀརཧཙི ཨུཔྤཏྟིཡཱ ཙ ཏནུབྷཱཝེན. ཏནུཏྟཉྷི དྭཱིཧི ཀཱརཎེཧི ཝེདིཏབྦཾ ཨདྷིཙྩུཔྤཏྟིཡཱ ཙ པརིཡུཊྛཱནམནྡཏཱཡ ཙ. སཀདཱགཱམིསྶ ཧི ཝཊྚཱནུསཱརིམཧཱཛནསྶ ཝིཡ ཀིལེསཱ ཨབྷིཎྷཾ ན ཨུཔྤཛྫནྟི, ཀདཱཙི ཀརཧཙི ཨུཔྤཛྫནྟི ཝིརལཱ༹ཀཱརཱ ཧུཏྭཱ ཝིརལ༹ཝཱཔིཏེ ཁེཏྟེ ཨངྐུརཱ ཝིཡ. ཨུཔྤཛྫམཱནཱཔི ཙ ཝཊྚཱནུསཱརིམཧཱཛནསྶེཝ མདྡནྟཱ ཕརནྟཱ ཚཱདེནྟཱ ཨནྡྷཀཱརཾ ཀརོནྟཱ ན ཨུཔྤཛྫནྟི, མནྡམནྡཱ ཨུཔྤཛྫནྟི ཏནུཀཱཀཱརཱ ཧུཏྭཱ ཨབྦྷཔཊལམིཝ མཀྑིཀཱཔཏྟམིཝ ཙ. ཏཏྠ ཀེཙི ཐེརཱ བྷཎནྟི ‘‘སཀདཱགཱམིསྶ ཀིལེསཱ ཀིཉྩཱཔི ཙིརེན ཨུཔྤཛྫནྟི, བཧལཱཝ ཨུཔྤཛྫནྟི. ཏཐཱ ཧིསྶ པུཏྟཱ ཙ དྷཱིཏརོ ཙ དིསྶནྟཱི’’ཏི. ཨེཏཾ པན ཨཔྤམཱཎཾ. པུཏྟདྷཱིཏརོ ཧི ཨངྒཔཙྩངྒཔརཱམསནམཏྟེནཔི ཧོནྟཱིཏི. དྭཱིཧིཡེཝ ཀཱརཎེཧིསྶ ཀིལེསཱནཾ ཏནུཏྟཾ ཝེདིཏབྦཾ ཨདྷིཙྩུཔྤཏྟིཡཱ ཙ པརིཡུཊྛཱནམནྡཏཱཡ ཙཱཏི.

ཧེཊྛཱབྷཱགིཡཱནནྟི ཨེཏྠ ཧེཊྛཱཏི མཧགྒཏབྷཱུམིཏོ ཧེཊྛཱ, ཀཱམབྷཱུམིཡནྟི ཨཏྠོ. ཏེསཾ པཙྩཡབྷཱཝེན ཧེཊྛཱབྷཱགསྶ ཧིཏཱཏི ཧེཊྛཱབྷཱགིཡཱ, ཏེསཾ ཧེཊྛཱབྷཱགིཡཱནཾ, ཧེཊྛཱབྷཱགསྶ ཀཱམབྷཝསྶ པཙྩཡབྷཱཝེན གཧིཏཱནནྟི ཨཏྠོ. སཾཡོཛེནྟི བནྡྷནྟི ཁནྡྷགཏིབྷཝཱདཱིཧི ¶ ཁནྡྷགཏིབྷཝཱདཡོ, ཀམྨཾ ཝཱ ཕལེནཱཏི སཾཡོཛནཱནཱིཏི ཨཱཧ ‘‘སཾཡོཛནཱནནྟི བནྡྷནཱན’’ནྟི. ཨསམུཙྪིནྣརཱགཱདིཀསྶ ཧི ཨེཏརཧི ཁནྡྷཱདཱིནཾ ཨཱཡཏིཾ ཁནྡྷཱདཱིཧི སམྦནྡྷོ, སམུཙྪིནྣརཱགཱདིཀསྶ པན ཏཾ ནཏྠི, ཀཏཱནམྤི ཀམྨཱནཾ ཨསམཏྠབྷཱཝཱཔཏྟིཏོ རཱགཱདཱིནཾ ཨནྭཡཏོ བྱཏིརེཀཏོ ཙ སཾཡོཛནཊྛོ སིདྡྷོ. པརིཀྑཡེནཱཏི སམུཙྪེདེན.

ཨོཔཔཱཏིཀོཏི ཨུཔཔཱཏིཀཡོནིཀོ ཨུཔཔཏནེ སཱདྷུཀཱརཱི. སེསཡོནིཔཊིཀྑེཔཝཙནམེཏཾ. ཏེན གབྦྷཝཱསདུཀྑཱབྷཱཝམཱཧ. ཏཏྠ པརིནིབྦཱཡཱིཏི ཨིམིནཱ སེསདུཀྑཱབྷཱཝཾ. ཏཏྠ པརིནིབྦཱཡིཏཱ ཙསྶ ཀཱམལོཀེ ཁནྡྷབཱིཛསྶ ཨཔུནཱགམནཝསེནེཝཱཏི དསྶེཏུཾ ‘‘ཨནཱཝཏྟིདྷམྨོ’’ཏི ཝུཏྟཾ. ཨུཔརིཡེཝཱཏི བྲཧྨལོཀེཡེཝ. ཨནཱཝཏྟིདྷམྨོཏི ཏཏོ བྲཧྨལོཀཱ པུནཔྤུནཾ པཊིསནྡྷིཝསེན ན ཨཱཝཏྟནདྷམྨོ. ཏེནཱཧ ‘‘ཡོནིགཏིཝསེན ཨནཱགམནདྷམྨོ’’ཏི.

པདེསཾ ¶ པདེསཀཱརཱི ཨཱརཱདྷེཏཱིཏི སཱིལཀྑནྡྷཱདཱིནཾ པཱརིཔཱུརིཡཱ ཨེཀདེསབྷཱུཏཾ ཧེཊྛིམམགྒཏྟཡཾ པདེསོ, ཏཾ ཀརོནྟོ པདེསཾ ཨེཀདེསབྷཱུཏཾ ཧེཊྛིམཾ ཕལཏྟཡམེཝ ཨཱརཱདྷེཏི, ནིཔྥཱདེཏཱིཏི ཨཏྠོ. ཏེནཱཧ ‘‘པདེསཀཱརཱི པུགྒལོ ནཱམ སོཏཱཔནྣོ’’ཏིཨཱདི. པརིཔཱུརཾ པརིཔཱུརཀཱརཱིཏི སཱིལཀྑནྡྷཱདཱིཧི སདྡྷིནྡྲིཡཱདཱིཧི ཙ པརིཏོ པཱུརཎེན པརིཔཱུརསངྑཱཏཾ ཨརཧཏྟམགྒཾ ཀརོནྟོ ནིབྦཏྟེནྟོ པརིཔཱུརཾ ཨརཧཏྟཕལཾ ཨཱརཱདྷེཏི, ནིཔྥཱདེཏཱིཏི ཨཏྠོ. ཏེནཱཧ ‘‘པརིཔཱུརཀཱརཱི ནཱམ ཨརཧཱ’’ཏིཨཱདི.

པཋམསིཀྑཱསུཏྟཝཎྞནཱ ནིཊྛིཏཱ.

༧-༡༠. དུཏིཡསིཀྑཱསུཏྟཱདིཝཎྞནཱ

༨༨-༩༡. སཏྟམེ ཀུལཱ ཀུལཾ གམནཀོཏི ཀུལཏོ ཀུལཾ གཙྪནྟོ. དྭེ ཝཱ ཏཡོ ཝཱ བྷཝེཏི དེཝམནུསྶཝསེན དྭེ ཝཱ ཏཡོ ཝཱ བྷཝེ. མིསྶཀབྷཝཝསེན ཧེཏཾ ཝུཏྟཾ. དེསནཱམཏྟམེཝ ཙེཏཾ ‘‘དྭེ ཝཱ ཏཱིཎི ཝཱ’’ཏི. ཡཱཝ ཚཊྛབྷཝཱ སཾསརནྟོཔི ཀོལཾཀོལོཝ ཧོཏི. ཏེནེཝཱཧ ‘‘ཨཡཉྷི དྭེ ཝཱ བྷཝེ…པེ… ཨེཝམེཏྠ ཝིཀཔྤོ དཊྛབྦོ’’ཏི. ཨུལཱ༹རཀུལཝཙནོ ཝཱ ཨེཏྠ ཀུལསདྡོ, ཀུལཏོ ཀུལཾ གཙྪཏཱིཏི ¶ ཀོལཾཀོལོ. སོཏཱཔཏྟིཕལསཙྪིཀིརིཡཏོ པཊྛཱཡ ཧི ནཱིཙཀུལེ ཨུཔྤཏྟི ནཱམ ནཏྠི, མཧཱབྷོགཀུལེསུ ཨེཝ ནིབྦཏྟཏཱིཏི ཨཏྠོ. ཀེཝལོ ཧི ཀུལསདྡོ མཧཱཀུལམེཝ ཝདཏི ‘‘ཀུལཔུཏྟོ’’ཏིཨཱདཱིསུ ཝིཡ. ཨེཀབཱིཛཱིཏི ཨེཏྠ ཁནྡྷབཱིཛཾ ནཱམ ཀཐིཏཾ, ཁནྡྷབཱིཛནྟི ཙ པཊིསནྡྷིཝིཉྙཱཎཾ ཝུཙྩཏི. ཡསྶ ཧི སོཏཱཔནྣསྶ ཨེཀཾ ཁནྡྷབཱིཛཾ ཨཏྠི, ཨེཀཾ བྷཝགྒཧཎཾ, སོ ཨེཀབཱིཛཱི ནཱམ. ཏེནཱཧ ‘‘ཨེཀསྶེཝ བྷཝསྶ བཱིཛཾ ཨེཏསྶ ཨཏྠཱིཏི ཨེཀབཱིཛཱི’’ཏི. ‘‘མཱནུསཀཾ བྷཝ’’ནྟི ཨིདཾ པནེཏྠ དེསནཱམཏྟམེཝ, ‘‘དེཝབྷཝཾ ནིབྦཏྟེཏཱི’’ཏིཔི པན ཝཏྟུཾ ཝཊྚཏིཡེཝ.

ཨུདྡྷཾཝཱཧིབྷཱཝེན ཨུདྡྷམསྶ ཏཎྷཱསོཏཾ ཝཊྚསོཏཾ ཝཱཏི ཨུདྡྷཾསོཏོ, ཨུདྡྷཾ ཝཱ གནྟྭཱ པཊིལབྷིཏབྦཏོ ཨུདྡྷམསྶ མགྒསོཏནྟི ཨུདྡྷཾསོཏོ. པཊིསནྡྷིཝསེན ཨཀནིཊྛབྷཝཾ གཙྪཏཱིཏི ཨཀནིཊྛགཱམཱི. ཡཏྠ ཀཏྠཙཱིཏི ཨཝིཧཱདཱིསུ ཡཏྠ ཀཏྠཙི. སཔྤཡོགེནཱཏི ཝིཔསྶནཱཉཱཎཱབྷིསངྑཱརསངྑཱཏེན པཡོགེན སཧ, མཧཏཱ ཝིཔསྶནཱཔཡོགེནཱཏི ཨཏྠོ. ཨུཔཧཙྩཱཏི ཨེཏསྶ ཨུཔགནྟྭཱཏི ཨཏྠོ. ཏེན ཝེམཛ྄ཛྷཱཏིཀྐམོ ཀཱལཀིརིཡཱཔགམནཉྩ སངྒཧིཏཾ ཧོཏི, ཏསྨཱ ཨཱཡུཝེམཛ྄ཛྷཾ ཨཏིཀྐམིཏྭཱ པརིནིབྦཱཡནྟོ ཨུཔཧཙྩཔརིནིབྦཱཡཱི ནཱམ ཧོཏཱིཏི ཨཱཧ ‘‘ཡོ པན ཀཔྤསཧསྶཱཡུཀེསུ ཨཝིཧེསཱུ’’ཏིཨཱདི. སོ ཏིཝིདྷོ ཧོཏཱིཏི ཉཱཎསྶ ཏིཀྑམཛ྄ཛྷམུདུབྷཱཝེན ཏིཝིདྷོ ཧོཏི. ཏེནཱཧ ‘‘ཀཔྤསཧསྶཱཡུཀེསཱུ’’ཏིཨཱདི.

སདྡྷཱདྷུརེན ¶ ཨབྷིནིཝིསིཏྭཱཏི ‘‘སཙེ སདྡྷཱཡ སཀྐཱ ནིབྦཏྟེཏུཾ, ནིབྦཏྟེསྶཱམི ལོཀུཏྟརམགྒ’’ནྟི ཨེཝཾ སདྡྷཱདྷུརཝསེན ཨབྷིནིཝིསིཏྭཱ ཝིཔསྶནཾ པཊྛཔེཏྭཱ. པཉྙཱདྷུརེན ཨབྷིནིཝིཊྛོཏི ‘‘སཙེ པཉྙཱཡ སཀྐཱ, ནིབྦཏྟེསྶཱམི ལོཀུཏྟརམགྒ’’ནྟི ཨེཝཾ པཉྙཱདྷུརཾ ཀཏྭཱ ཨབྷིནིཝིཊྛོ. ཡཐཱཝུཏྟམེཝ ཨཊྛཝིདྷཏྟཾ ཀོལཾཀོལསཏྟཀྑཏྟུཔརམེསུ ཨཏིདིསནྟོ ‘‘ཏཐཱ ཀོལཾཀོལཱ སཏྟཀྑཏྟུཔརམཱ ཙཱ’’ཏི ཨཱཧ. ཝུཏྟནཡེནེཝ ཨཊྛ ཀོལཾཀོལཱ, ཨཊྛ སཏྟཀྑཏྟུཔརམཱཏི ཝུཏྟཾ ཧོཏི.

ཏཏྠ སཏྟཀྑཏྟུཾ པརམཱ བྷཝཱུཔཔཏྟི ཨཏྟབྷཱཝགྒཧཎཾ ཨསྶ, ཏཏོ པརཾ ཨཊྛམཾ བྷཝཾ ནཱདིཡཏཱིཏི སཏྟཀྑཏྟུཔརམོ. བྷགཝཏཱ གཧིཏནཱམཝསེནེཝ ཙེཏཱནི ཨརིཡཱཡ ཛཱཏིཡཱ ཛཱཏཱནཾ ཏེསཾ ནཱམཱནི ཛཱཏཱནི ཀུམཱརཱནཾ མཱཏཱཔིཏཱུཧི གཧིཏནཱམཱནི ཝིཡ. ཨེཏྟཀཉྷི ཋཱནཾ གཏོ ¶ ཨེཀབཱིཛཱི ནཱམ ཧོཏི, ཨེཏྟཀཾ ཀོལཾཀོལོ, ཨེཏྟཀཾ སཏྟཀྑཏྟུཔརམོཏི བྷགཝཏཱ ཨེཏེསཾ ནཱམཾ གཧིཏཾ. ནིཡམཏོ པན ཨཡཾ ཨེཀབཱིཛཱི, ཨཡཾ ཀོལཾཀོལོ, ཨཡཾ སཏྟཀྑཏྟུཔརམོཏི ནཏྠི. ཀོ པན ནེསཾ ཨེཏཾ པབྷེདཾ ནིཡམེཏཱིཏི? ཀེཙི ཏཱཝ ཐེརཱ ‘‘པུབྦཧེཏུ ནིཡམེཏཱི’’ཏི ཝདནྟི, ཀེཙི པཋམམགྒོ, ཀེཙི ཨུཔརི ཏཡོ མགྒཱ, ཀེཙི ཏིཎྞཾ མགྒཱནཾ ཝིཔསྶནཱཏི.

ཏཏྠ ‘‘པུབྦཧེཏུ ནིཡམེཏཱི’’ཏི ཝཱདེ པཋམམགྒསྶ ཨུཔནིསྶཡོ ཀཏོ ནཱམ ཧོཏི, ‘‘ཨུཔརི ཏཡོ མགྒཱ ནིརུཔནིསྶཡཱ ཨུཔྤནྣཱ’’ཏི ཝཙནཾ ཨཱཔཛྫཏི. ‘‘པཋམམགྒོ ནིཡམེཧཱི’’ཏི ཝཱདེ ཨུཔརི ཏིཎྞཾ མགྒཱནཾ ནིརཏྠཀཏཱ ཨཱཔཛྫཏི. ‘‘ཨུཔརི ཏཡོ མགྒཱ ནིཡམེནྟཱི’’ཏི ཝཱདེ པཋམམགྒེ ཨནུཔྤནྣེཡེཝ ཨུཔརི ཏཡོ མགྒཱ ཨུཔྤནྣཱཏི ཨཱཔཛྫཏཱིཏི. ‘‘ཏིཎྞཾ མགྒཱནཾ ཝིཔསྶནཱ ནིཡམེཏཱི’’ཏི ཝཱདོ པན ཡུཛྫཏི. སཙེ ཧི ཨུཔརི ཏིཎྞཾ མགྒཱནཾ ཝིཔསྶནཱ བལཝཏཱི ཧོཏི, ཨེཀབཱིཛཱི ནཱམ ཧོཏི, ཏཏོ མནྡཏརཱཡ ཀོལཾཀོལོ, ཏཏོ མནྡཏརཱཡ སཏྟཀྑཏྟུཔརམོཏི.

ཨེཀཙྩོ ཧི སོཏཱཔནྣོ ཝཊྚཛ྄ཛྷཱསཡོ ཧོཏི ཝཊྚཱབྷིརཏོ, པུནཔྤུནཾ ཝཊྚསྨིཾཡེཝ ཙརཏི སནྡིསྶཏི. ཨནཱཐཔིཎྜིཀོ སེཊྛི, ཝིསཱཁཱ ཨུཔཱསིཀཱ, ཙཱུལ༹རཐམཧཱརཐཱ དེཝཔུཏྟཱ, ཨནེཀཝཎྞོ དེཝཔུཏྟོ, སཀྐོ དེཝརཱཛཱ, ནཱགདཏྟོ དེཝཔུཏྟོཏི ཨིམེ ཧི ཨེཏྟཀཱ ཛནཱ ཝཊྚཛ྄ཛྷཱསཡཱ ཝཊྚཱབྷིརཏཱ ཨཱདིཏོ པཊྛཱཡ ཚ དེཝལོཀེ སོདྷེཏྭཱ ཨཀནིཊྛེ ཋཏྭཱ པརིནིབྦཱཡིསྶནྟི, ཨིམེ ཨིདྷ ན གཧིཏཱ. ན ཀེཝལཉྩིམེཝ, ཡོཔི མནུསྶེསུཡེཝ སཏྟཀྑཏྟུཾ སཾསརིཏྭཱ ཨརཧཏྟཾ པཱཔུཎཱཏི, ཡོཔི དེཝལོཀེ ནིབྦཏྟོ དེཝེསུཡེཝ སཏྟཀྑཏྟུཾ ཨཔརཱཔརཾ སཾསརིཏྭཱ ཨརཧཏྟཾ པཱཔུཎཱཏི. ཨིམེཔི ཨིདྷ ན གཧིཏཱ, ཀཱལེན དེཝེ, ཀཱལེན མནུསྶེ སཾསརིཏྭཱ ¶ པན ཨརཧཏྟཾ པཱཔུཎནྟོཝ ཨིདྷ གཧིཏོ, ཏསྨཱ ‘‘སཏྟཀྑཏྟུཔརམོ’’ཏི ཨིདཾ ཨིདྷཊྛཀཝོཀིཎྞབྷཝཱུཔཔཏྟིཀསུཀྑཝིཔསྶཀསྶ ནཱམཾ ཀཐིཏནྟི ཝེདིཏབྦཾ.

‘‘སཀིདེཝ ཨིམཾ ལོཀཾ ཨཱགནྟྭཱ’’ཏི (པུ. པ. ༣༤) ཝཙནཏོ པཉྩསུ སཀདཱགཱམཱིསུ ཙཏྟཱརོ ཝཛྫེཏྭཱ ཨེཀོཝ གཧིཏོ. ཨེཀཙྩོ ཧི ཨིདྷ སཀདཱགཱམིཕལཾ པཏྭཱ ཨིདྷེཝ པརིནིབྦཱཡཏི, ཨེཀཙྩོ ཨིདྷ པཏྭཱ དེཝལོཀེ པརིནིབྦཱཡཏི ¶ , ཨེཀཙྩོ དེཝལོཀེ པཏྭཱ ཏཏྠེཝ པརིནིབྦཱཡཏི, ཨེཀཙྩོ དེཝལོཀེ པཏྭཱ ཨིདྷཱུཔཔཛྫིཏྭཱ པརིནིབྦཱཡཏི. ཨིམེ ཙཏྟཱརོཔི ཨིདྷ ན གཧིཏཱ. ཡོ པན ཨིདྷ པཏྭཱ དེཝལོཀེ ཡཱཝཏཱཡུཀཾ ཝསིཏྭཱ པུན ཨིདྷཱུཔཔཛྫིཏྭཱ པརིནིབྦཱཡིསྶཏི, ཨཡཾ ཨེཀོཝ ཨིདྷ གཧིཏོཏི ཝེདིཏབྦོ.

ཨིདཱནི ཏསྶ པབྷེདཾ དསྶེནྟོ ‘‘ཏཱིསུ པན ཝིམོཀྑེསཱུ’’ཏིཨཱདིམཱཧ. ཨིམསྶ པན སཀདཱགཱམིནོ ཨེཀབཱིཛིནཱ སདྡྷིཾ ཀིཾ ནཱནཱཀརཎནྟི? ཨེཀབཱིཛིསྶ ཨེཀཱཝ པཊིསནྡྷི, སཀདཱགཱམིསྶ དྭེ པཊིསནྡྷིཡོ, ཨིདཾ ཏེསཾ ནཱནཱཀརཎཾ. སུཉྙཏཝིམོཀྑེན ཝིམུཏྟཁཱིཎཱསཝོ པཊིཔདཱཝསེན ཙཏུབྦིདྷོ ཧོཏི, ཏཐཱ ཨནིམིཏྟཨཔྤཎིཧིཏཝིམོཀྑེཧཱིཏི ཨེཝཾ དྭཱདས ཨརཧནྟཱ ཧོནྟཱིཏི ཨཱཧ ‘‘ཡཐཱ པན སཀདཱགཱམིནོ, ཏཐེཝ ཨརཧནྟོ དྭཱདས ཝེདིཏབྦཱ’’ཏི. ཨཊྛམནཝམདསམཱནི ཨུཏྟཱནཏྠཱནེཝ.

དུཏིཡསིཀྑཱསུཏྟཱདིཝཎྞནཱ ནིཊྛིཏཱ.

༡༡. སངྐཝཱསུཏྟཝཎྞནཱ

༩༢. ཨེཀཱདསམེ ཝིཧཱརཔཊིབདྡྷནཝཀམྨཱདིབྷཱརཾ ཧརཏི པཝཏྟེཏཱིཏི བྷཱརཧཱརོ. ཏེནེཝཱཧ ‘‘ནཝེ ཨཱཝཱསེ སམུཊྛཱཔེཏི, པུརཱཎེ པཊིཛགྒཏཱི’’ཏི. སིཀྑིཏབྦཏོ སིཀྑཱ, པཛྫིཏབྦཏོ, པཛྫནྟི ཨེཏེཧཱིཏི ཝཱ པདཱནི, སིཀྑཱཡེཝ པདཱནི སིཀྑཱཔདཱནཱིཏི ཨཱཧ ‘‘སིཀྑཱསངྑཱཏེཧི པདེཧཱི’’ཏི. དསྶེཏཱིཏི པཙྩཀྑཏོ དསྶེཏི, ཧཏྠཱམལཀཾ ཝིཡ པཱཀཊེ ཝིབྷཱུཏེ ཀཏྭཱ ཝིབྷཱཝེཏི. གཎྷཱཔེཏཱིཏི ཏེ དྷམྨེ མནསཱ ཨནུཔཀྑིཏེ དིཊྛིཡཱ སུཔྤཊིཝིདྡྷེ ཀཱརེནྟོ ཨུགྒཎྷཱཔེཏི. སམུསྶཱཧེཏཱིཏི སམཱདྷིམྷི ཨུསྶཱཧཾ ཛནེཏི. པཊིལདྡྷགུཎེཧཱིཏི ཏཱཡ དེསནཱཡ ཏནྣིསྶཡཔཙྩཏྟཔུརིསཀཱརེན ཙ ཏེསཾ པཊིཝིདྡྷགུཎེཧི. ཝོདཱཔེཏཱིཏི ཏེསཾ ཙིཏྟསནྟཱནཾ ཨསྶདྡྷིཡཱདིཀིལེསམལཱཔགམནེན པབྷསྶརཾ ཀརོཏི. སཎྷཾ སཎྷཾ ཀཐེཏཱིཏི ཨཏིཝིཡ སུཁུམཾ ཀཏྭཱ ཀཐེཏི.

ཨཙྩཡནཾ ¶ སཱདྷུམརིཡཱདཾ མདྡིཏྭཱ ཝཱིཏིཀྐམནཾ ཨཙྩཡོཏི ཨཱཧ ‘‘ཨཔརཱདྷོ’’ཏི. ཨཙྩེཏི ཨཏིཀྐམཏི ཨེཏེནཱཏི ཝཱ ཨཙྩཡོ, ཝཱིཏིཀྐམསྶ པཝཏྟནཀོ ཨཀུསལདྷམྨོ. སོ ཨེཝ ཨཔརཛ྄ཛྷཏི ཨེཏེནཱཏི ཨཔརཱདྷོ. སོ ཧི ཨཔརཛ྄ཛྷནྟཾ པུརིསཾ ཨདྷིབྷཝིཏྭཱ པཝཏྟཏི. ཏེནཱཧ ‘‘ཨཏིཀྐམྨ ¶ ཨདྷིབྷཝིཏྭཱ པཝཏྟོ’’ཏི. པཊིགྒཎྷཱཏཱུཏི ཨདྷིཝཱསནཝསེན སམྤཊིཙྪཏཱུཏི ཨཏྠོཏི ཨཱཧ ‘‘ཁམཏཱུ’’ཏི. སདེཝཀེན ལོཀེན ནིསྶརཎནྟི ཨརཎཱིཡཏོ ཨརིཡོ, ཏཐཱགཏོཏི ཨཱཧ ‘‘ཨརིཡསྶ ཝིནཡེཏི བུདྡྷསྶ བྷགཝཏོ སཱསནེ’’ཏི. པུགྒལཱདྷིཊྛཱནཾ ཀརོནྟོཏི ཀཱམཾ ‘‘ཝུདྡྷི ཧེསཱ’’ཏི དྷམྨཱདྷིཊྛཱནཝསེན ཝཱཀྱཾ ཨཱརདྡྷཾ, ཏཐཱཔི དེསནཾ པན པུགྒལཱདྷིཊྛཱནཾ ཀརོནྟོ ‘‘སཾཝརཾ ཨཱཔཛྫཏཱི’’ཏི ཨཱཧཱཏི ཡོཛནཱ.

སངྐཝཱསུཏྟཝཎྞནཱ ནིཊྛིཏཱ.

སམཎཝགྒཝཎྞནཱ ནིཊྛིཏཱ.

(༡༠) ༥. ལོཎཀཔལླཝགྒོ

༡. ཨཙྩཱཡིཀསུཏྟཝཎྞནཱ

༩༣. པཉྩམསྶ པཋམེ ཨཏིཔཱཏིཀཱནཱིཏི སཱིགྷཾ པཝཏྟེཏབྦཱནི. ཀརཎཱིཡཱནཱིཏི ཨེཏྠ ཨཝསྶཀེ ཨནཱིཡསདྡོ དཊྛབྦོཏི ཨཱཧ ‘‘ཨཝསྶཀིཙྩཱནཱི’’ཏི. ནིཀྑནྟསེཏངྐུརཱནཱིཏི བཱིཛཏོ ནིཀྑནྟསེཏངྐུརཱནི. སེསམེཏྠ ཨུཏྟཱནམེཝ.

ཨཙྩཱཡིཀསུཏྟཝཎྞནཱ ནིཊྛིཏཱ.

༢. པཝིཝེཀསུཏྟཝཎྞནཱ

༩༤. དུཏིཡེ སཱཎེཧི ཝཱཀེཧི ནིབྦཏྟིཏཱནི སཱཎཱནི. མིསྶསཱཎཱནི མསཱཎཱནི ན བྷངྒཱནི. ཨེརཀཏིཎཱདཱིནཱིཏི ཨཱདི-སདྡེན ཨཀྐམཀཙིཀདལིཝཱཀཱདཱིནཾ སངྒཧོ. ཨེརཀཱདཱིཧི ཀཏཱནི ཧི ཚཝཱནི ལཱམཀཱནི དུསྶཱནཱིཏི ‘‘ཚཝདུསྶཱནཱི’’ཏི ཝཏྟབྦཏཾ ལབྷནྟི. ཀུཎྜཀནྟི ཏནུཏརཾ ¶ ཏཎྜུལཔྤཀརཎཾ. པཉྩ དུསྶཱིལྱཱནཱིཏི པཱཎཱཏིཔཱཏཱདཱིནི པཉྩ. ཙཏྟཱརོ ཨཱསཝཱཏི ཀཱམཱསཝཱདཡོ ཙཏྟཱརོ ཨཱསཝཱ. སཱིལགྒཔྤཏྟོཏི སཱིལེན, སཱིལསྶ ཝཱ ཨགྒཔྤཏྟོ.

པཝིཝེཀསུཏྟཝཎྞནཱ ནིཊྛིཏཱ.

༣. སརདསུཏྟཝཎྞནཱ

༩༥. ཏཏིཡེ ¶ ཝིདྡྷེཏི དཱུརཱིབྷཱུཏེ. དཱུརབྷཱཝོ ཙ ཨཱཀཱསསྶ ཝལཱཧཀཝིགམེན ཧོཏཱིཏི ཨཱཧ ‘‘ཝལཱཧཀཝིགམེན དཱུརཱིབྷཱུཏེ’’ཏི. ཏེནེཝ ཧི ‘‘ཝིདྡྷེ ཝིགཏཝལཱཧཀེ’’ཏི ཝུཏྟཾ. ནབྷཾ ཨབྦྷུསྶཀྐམཱནོཏི ཨཱཀཱསཾ ཨབྷིལངྒྷནྟོ. ཨིམིནཱ ཏརུཎསཱུརིཡབྷཱཝོ དསྶིཏོ. ནཱཏིདཱུརོདིཏེ ཧི ཨཱདིཙྩེ ཏརུཎསཱུརིཡསམཉྙཱ. དུཝིདྷམེཝསྶ སཾཡོཛནཾ ནཏྠཱིཏི ཨོརམྦྷཱགིཡཨུདྡྷམྦྷཱགིཡཝསེན དུཝིདྷམྤི སཾཡོཛནཾ ཨསྶ པཋམཛ྄ཛྷཱནལཱབྷིནོ ཨརིཡསཱཝཀསྶ ནཏྠི. ཀསྨཱ པནསྶ ཨུདྡྷམྦྷཱགིཡསཾཡོཛནམྤི ནཏྠཱིཏི ཝུཏྟཾ. ཨོརམྦྷཱགིཡསཾཡོཛནཱནམེཝ ཧེཏྠ པཧཱནཾ ཝུཏྟནྟི ཨཱཧ ‘‘ཨིཏརམྤཱི’’ཏིཨཱདི, ཨིཏརཾ ཨུདྡྷམྦྷཱགིཡསཾཡོཛནཾ པུན ཨིམཾ ལོཀཾ པཊིསནྡྷིཝསེན ཨཱནེཏུཾ ཨསམཏྠཏཱཡ ནཏྠཱིཏི ཝུཏྟནྟི ཨཏྠོ. ཛྷཱནལཱབྷིནོ ཧི སབྦེཔི ཨརིཡཱ བྲཧྨལོཀཱུཔཔནྣཱ ཧེཊྛཱ ན ཨུཔྤཛྫནྟི, ཨུདྡྷཾ ཨུདྡྷཾ ཨུཔྤཛྫནྟཱཔི ཝེཧཔྥལཾ ཨཀནིཊྛཾ བྷཝགྒཉྩ པཏྭཱ ན པུནཉྙཏྠ ཛཱཡནྟི, ཏཏྠ ཏཏྠེཝ ཨརཧཏྟཾ པཏྭཱ པརིནིབྦཱཡནྟི. ཏེནེཝཱཧ ‘‘ཨིམསྨིཾ སུཏྟེ ཛྷཱནཱནཱགཱམཱི ནཱམ ཀཐིཏོ’’ཏི. ཛྷཱནཝསེན ཧི ཧེཊྛཱ ན ཨཱགཙྪཏཱིཏི ཛྷཱནཱནཱགཱམཱི.

སརདསུཏྟཝཎྞནཱ ནིཊྛིཏཱ.

༤. པརིསཱསུཏྟཝཎྞནཱ

༩༦. ཙཏུཏྠེ པཙྩཡབཱཧུལླིཀཱཏི ཙཱིཝརཱདིབཱཧུལླཱཡ པཊིཔནྣཱ. ཨཝཱིཏཏཎྷཏཱཡ ཧི ཏཾ ཏཾ པརིཀྑཱརཛཱཏཾ བཧུཾ ལནྟི ཨཱདིཡནྟཱིཏི བཧུལཱ, ཏེ ཨེཝ བཱཧུལིཀཱ ཡཐཱ ‘‘ཝེནཡིཀོ’’ཏི (མ. ནི. ༡.༢༤༦; ཨ. ནི. ༨.༡༡; པཱརཱ. ༨). ཏེ པཙྩཡབཱཧུལླཱཡ ཡུཏྟཔྤཡུཏྟཱ ཧོནྟཱིཏི ཙཱིཝརཱདིབཱཧུལླཱཡ པཊིཔནྣཱ ནཱམ ཧོནྟི. སིཀྑཱཡ ཨགཱརཝབྷཱཝཏོ སིཐིལཾ ཨགཱལ༹ྷཾ གཎྷནྟཱིཏི སཱཐལིཀཱ. སིཐིལནྟི ཙ བྷཱཝནཔུཾསཀནིདྡེསོ. སིཐིལསདྡེན སམཱནཏྠསྶ སཐལསདྡསྶ ཝསེན སཱཐལིཀཱཏི པདསིདྡྷི ཝེདིཏབྦཱ. ཨཝགམནཊྛེནཱཏི ཨདྷོགམནཊྛེན, ཨོརམྦྷཱགིཡབྷཱཝེནཱཏི ¶ ཨཏྠོ. ནིཀྑིཏྟདྷུརཱཏི ཨོརོཔིཏདྷུརཱ ཨུཛྫིཏུསྶཱཧཱ. ཨུཔདྷིཝིཝེཀོ ནིབྦཱནཾ. དུཝིདྷམྤི ཝཱིརིཡནྟི ཀཱཡིཀཾ ཙེཏསིཀཉྩ ཝཱིརིཡཾ.

བྷཎྜནཾ ¶ ཛཱཏཾ ཨེཏེསནྟི བྷཎྜནཛཱཏཱ. ཝིསེསནསྶ པརནིཔཱཏཝསེན ཙེཏཾ ཝུཏྟཾ. ཨཊྛཀཐཱཡཾ པན ཝིསེསནསྶ པུབྦནིཔཱཏཝསེནེཝ ཨཏྠཾ དསྶེནྟོ ‘‘ཛཱཏབྷཎྜནཱ’’ཏི ཨཱཧ. ཀལཧོ ཛཱཏོ ཨེཏེསནྟི ཀལཧཛཱཏཱཏི ཨེཏྠཱཔི ཨེསེཝ ནཡོ. ཀལཧསྶ པུབྦབྷཱགོཏི ཀལཧསྶ ཧེཏུབྷཱུཏཱ པཊིབྷཱགཱ ཏཾསདིསཱི ཙ ཨནིཊྛཀིརིཡཱ. ཧཏྠཔརཱམཱསཱདིཝསེནཱཏི ཀུཛ྄ཛྷིཏྭཱ ཨཉྙམཉྙསྶ ཧཏྠེ གཧེཏྭཱ པལཔནཨཙྪིནྡནཱདིཝསེན. ‘‘ཨཡཾ དྷམྨོ, ནཱཡཾ དྷམྨོ’’ཏིཨཱདིནཱ ཝིརུདྡྷཝཱདབྷཱུཏཾ ཝིཝཱདཾ ཨཱཔནྣཱཏི ཝིཝཱདཔནྣཱ. ཏེནཱཧ ‘‘ཝིརུདྡྷཝཱདཾ ཨཱཔནྣཱ’’ཏི. མུཁསནྣིསྶིཏཏཱཡ ཝཱཙཱ ཨིདྷ ‘‘མུཁ’’ནྟི ཨདྷིཔྤེཏཱཏི ཨཱཧ ‘‘ཕརུསཱ ཝཱཙཱ མུཁསཏྟིཡོ’’ཏི.

སཏིཔི ཨུབྷཡེསཾ ཀལཱཔཱནཾ པརམཏྠཏོ བྷེདེ པཙུརཛནེཧི པན དུཝིཉྙེཡྻནཱནཏྟཾ ཁཱིརོདཀསམྨོདིཏཾ ཨཙྩནྟམེཏཾ སཾསཊྛཾ ཝིཡ ཧུཏྭཱ ཏིཊྛཏཱིཏི ཨཱཧ ‘‘ཁཱིརོདཀཾ ཝིཡ བྷཱུཏཱ’’ཏི. ཡཐཱ ཁཱིརཉྩ ཨུདཀཉྩ ཨཉྙམཉྙཾ སཾསནྡཏི, ཝིསུཾ ན ཧོཏི, ཨེཀཏྟཾ ཝིཡ ཨུཔེཏི, ཨེཝཾ སཱམགྒིཝསེན ཨེཀཏྟཱུཔགཏཙིཏྟུཔྤཱདཱཏི ཨཏྠོ. མེཏྟཙིཏྟཾ པཙྩུཔཊྛཱཔེཏྭཱ ཨོལོཀནཾ ཙཀྑཱུནི ཝིཡ ཙཀྑཱུནི ནཱམཱཏི ཨཱཧ ‘‘ཨུཔསནྟེཧི མེཏྟཙཀྑཱུཧཱི’’ཏི. པིཡབྷཱཝདཱིཔཀཱནི ཧི ཙཀྑཱུནི པིཡཙཀྑཱུནི. པམུདིཏསྶ པཱིཏི ཛཱཡཏཱིཏི པམོདཔཙྩཡབལཝཔཱིཏིམཱཧ. པཉྩཝཎྞཱ པཱིཏི ཨུཔྤཛྫཏཱིཏི ཁུདྡིཀཱདིབྷེདེན པཉྩཔྤཀཱརཱ པཱིཏི ཨུཔྤཛྫཏི. པཱིཏིམནསྶཱཏི ཏཱཡ པཱིཏིཡཱ པཱིཎིཏམནསྶ, པསྶདྡྷིཨཱཝཧེཧི ཨུལཱ༹རེཧི པཱིཏིཝེགེཧི ཏིནྟཙིཏྟསྶཱཏི ཨཏྠོ. ཝིགཏདརཐོཏི ཀིལེསཔརིལཱ༹ཧཱནཾ དཱུརཱིབྷཱཝེན ཝཱུཔསནྟདརཐོ.

ཀེན ཨུདཀེན དཱརིཏོ པབྦཏཔྤདེསོཏི ཀཏྭཱ ཨཱཧ ‘‘ཀནྡརོ ནཱམཱ’’ཏིཨཱདི. ཨུདཀསྶ ཡཐཱནིནྣཾ པཝཏྟིཡཱ ནདིནིབྦཏྟནབྷཱཝེན ‘‘ནདིཀུཉྫོ’’ཏིཔི ཝུཙྩཏི. སཱཝཊྚཱ ནདིཡོ པདརཱ. ཨཊྛ མཱསེཏི ཧེམནྟགིམྷཨུཏུཝསེན ཨཊྛ མཱསེ. ཁུདྡཀཱ ཨུདཀཝཱཧིནིཡོ སཱཁཱ ཝིཡཱཏི སཱཁཱ. ཁུདྡཀསོབྦྷཱ ཀུསུབྦྷཱ ཨོཀཱརསྶ ཨུཀཱརཾ ཀཏྭཱ. ཡཏྠ ཨུཔརི ཨུནྣཏཔྤདེསཏོ ཨུདཀཾ ཨཱགནྟྭཱ ཏིཊྛཏི ཙེཝ སནྡཏི ཙ, ཏེ ¶ ཀུསུབྦྷཱ ཁུདྡཀཨཱཝཱཊཱ. ཁུདྡཀནདིཡོཏི པབྦཏཔཱདཱདིཏོ ནིཀྑནྟཱ ཁུདྡཀཱ ནདིཡོ.

པརིསཱསུཏྟཝཎྞནཱ ནིཊྛིཏཱ.

༥-༧. པཋམཨཱཛཱནཱིཡསུཏྟཱདིཝཎྞནཱ

༩༧-༩༩. པཉྩམེ ¶ ཨནུཙྪཝིཀོཏི རཉྙོ པརིབྷུཉྫནཡོགྒོ. ཧཏྠཔཱདཱདིཨངྒསམཏཱཡཱཏི ཧཏྠཔཱདཱདིཨཝཡཝསམཏཱཡ, རཉྙོ ཝཱ སེནཱཡ ཨངྒབྷཱུཏཏྟཱ རཉྙོ ཨངྒནྟི ཝུཙྩཏི. ཨཱནེཏྭཱ ཧུནིཏབྦནྟི ཨཱཧུནཾ, ཨཱཧུཏཱིཏི ཨཏྠཏོ ཨེཀནྟི ཨཱཧ ‘‘ཨཱཧུཏིསངྑཱཏཾ པིཎྜཔཱཏ’’ནྟི. དཱུརཏོཔི ཨཱནེཏྭཱ སཱིལཝནྟེསུ དཱཏབྦསྶེཏཾ ཨདྷིཝཙནཾ. པིཎྜཔཱཏནྟི ཙ ནིདསྶནམཏྟཾ. ཨཱནེཏྭཱ ཧུནིཏབྦཱནཉྷི ཙཱིཝརཱདཱིནཾ ཙཏུནྣཾ པཙྩཡཱནམེཏཾ ཨདྷིཝཙནཾ ཨཱཧུནནྟི. ཏཾ ཨརཧཏཱིཏི ཨཱཧུནེཡྻོ. པཊིགྒཧེཏུཾ ཡུཏྟོཏི ཏསྶ མཧཔྥལབྷཱཝཀརཎཏོ པཊིགྒཎྷིཏུཾ ཨནུཙྪཝིཀོ.

པཱཧུནཀབྷཏྟསྶཱཏི དིསཝིདིསཏོ ཨཱགཏཱནཾ པིཡམནཱཔཱནཾ ཉཱཏིམིཏྟཱནཾ ཨཏྠཱཡ སཀྐཱརེ པཊིཡཏྟསྶ ཨཱགནྟུཀབྷཏྟསྶ. ཏཉྷི ཋཔེཏྭཱ ཏེ ཏཐཱརཱུཔེ པཱཧུནཀེ སངྒྷསྶེཝ དཱཏུཾ ཡུཏྟཾ, སངྒྷོཝ ཏཾ པཊིགྒཧེཏུཾ ཡུཏྟོ. སངྒྷསདིསོ ཧི པཱཧུནཀོ ནཏྠི. ཏཐཱ ཧེས ཨེཀསྨིཾ བུདྡྷནྟརེ ཝཱིཏིཝཏྟེ དིསྶཏི, ཀདཱཙི ཨསངྑྱེཡྻེཔི ཀཔྤེ ཝཱིཏིཝཏྟེ. ཨབྦོཀིཎྞཉྩ པིཡམནཱཔཏཱདིཀརེཧི དྷམྨེཧི སམནྣཱགཏོ. ཨེཝཾ པཱཧུནམསྶ དཱཏུཾ ཡུཏྟཾ, པཱཧུནཉྩ པཊིགྒཧེཏུཾ ཡུཏྟོཏི པཱཧུནེཡྻོ. ཨཡཉྷེཏྠ ཨདྷིཔྤཱཡོ ‘‘ཉཱཏིམིཏྟཱ ཝིཔྤཝུཊྛཱ ན ཙིརསྶེཝ སམཱགཙྪནྟི, ཨནཝཊྛིཏཱ ཙ ཏེསུ པིཡམནཱཔཏཱ, ན ཨེཝམརིཡསངྒྷོ, ཏསྨཱ སངྒྷོཝ པཱཧུནེཡྻོ’’ཏི.

དཀྑནྟི ཨེཏཱཡ སཏྟཱ ཡཐཱདྷིཔྤེཏཱཧི སམྤཏྟཱིཧི ཝཌྜྷནྟཱིཏི དཀྑིཎཱ, པརལོཀཾ སདྡཧིཏྭཱ དཱནཾ. ཏཾ དཀྑིཎཾ ཨརཧཏི, དཀྑིཎཱཡ ཝཱ ཧིཏོ ཡསྨཱ མཧཔྥལཀརཎཏཱཡ ཝིསོདྷེཏཱིཏི དཀྑིཎེཡྻོ.

པུཉྙཏྠིཀེཧི ཨཉྫལི ཀརཎཱིཡོ ཨེཏྠཱཏི ཨཉྫལིཀརཎཱིཡོ. ཨུབྷོ ཧེཏྠ སིརསི པཏིཊྛཱཔེཏྭཱ སབྦལོཀེན ཀཡིརམཱནཾ ཨཉྫལིཀམྨཾ ཨརཧཏཱིཏི ¶ ཝཱ ཨཉྫལིཀརཎཱིཡོ. ཏེནཱཧ ‘‘ཨཉྫལིཔགྒཧཎསྶ ཨནུཙྪཝིཀོ’’ཏི.

ཡདིཔི པཱལི༹ཡཾ ‘‘ཨནུཏྟར’’ནྟི ཝུཏྟཾ, ནཏྠི ཨིཏོ ཨུཏྟརཾ ཝིསིཊྛནྟི ཧི ཨནུཏྟརཾ, སམམྤིསྶ པན ནཏྠཱིཏི དསྶེནྟོ ‘‘ཨསདིས’’ནྟི ཨཱཧ. ཁིཏྟཾ ཝུཏྟཾ བཱིཛཾ མཧཔྥལབྷཱཝཀརཎེན ཏཱཡཏི རཀྑཏི, ཁིཔནྟི ཝཔནྟི ཨེཏྠ བཱིཛཱནཱིཏི ཝཱ ཁེཏྟཾ, ཀེདཱརཱདི, ཁེཏྟཾ ཝིཡ ཁེཏྟཾ, པུཉྙཱནཾ ཁེཏྟཾ པུཉྙཀྑེཏྟཾ. ཡཐཱ ཧི རཉྙོ ཝཱ ཨམཙྩསྶ ཝཱ ¶ སཱལཱིནཾ ཝཱ ཡཝཱནཾ ཝཱ ཝིརུཧནཊྛཱནཾ ‘‘རཉྙོ སཱལིཀྑེཏཾ ཡཝཀྑེཏ’’ནྟི ཝུཙྩཏི, ཨེཝཾ སངྒྷོ སབྦལོཀསྶ པུཉྙཱནཾ ཝིརུཧནཊྛཱནཾ. སངྒྷཾ ནིསྶཱཡ ཧི ལོཀསྶ ནཱནཔྤཀཱརཧིཏསུཁསཾཝཏྟནིཀཱནི པུཉྙཱནི ཝིརུཧནྟི, ཏསྨཱ སངྒྷོ ཨནུཏྟརཾ པུཉྙཀྑེཏྟཾ ལོཀསྶ. སེསཾ སུཝིཉྙེཡྻམེཝ. ཚཊྛསཏྟམཱནི ཨུཏྟཱནཏྠཱནེཝ.

པཋམཨཱཛཱནཱིཡསུཏྟཱདིཝཎྞནཱ ནིཊྛིཏཱ.

༨. པོཏྠཀསུཏྟཝཎྞནཱ

༡༠༠. ཨཊྛམེ ནཝོཏི ནཝཝཱཡིམོ. ཏེནཱཧ ‘‘ཀརཎཾ ཨུཔཱདཱཡ ཝུཙྩཏཱི’’ཏི. ཝཱཀམཡཝཏྠནྟི སཱཎཱདིཝཱཀསཱཊཀཾ. དུབྦཎྞོཏི ཝིཝཎྞོ. དུཀྑསམྥསྶོཏི ཁརསམྥསྶོ. ཨཔྤཾ ཨགྒྷཏཱིཏི ཨཔྤགྒྷོ. ཨཏིབཧུཾ ཨགྒྷནྟོ ཀཧཱཔཎགྒྷནཀོ ཧོཏི. པརིབྷོགམཛ྄ཛྷིམོཏི པརིབྷོགཀཱལཝསེན མཛ྄ཛྷིམོ. སོ ཧི ནཝབྷཱཝཾ ཨཏིཀྐམིཏྭཱ ཛིཎྞབྷཱཝཾ ཨཔྤཏྟོ མཛ྄ཛྷེ པརིབྷོགཀཱལེཔི དུབྦཎྞོ ཙ དུཀྑསམྥསྶོ ཙ ཨཔྤགྒྷོཡེཝ ཧོཏི. ཨཏིབཧུཾ ཨགྒྷནྟོ ཨཌྜྷཾ ཨགྒྷཏི, ཛིཎྞཀཱལེ པན ཨཌྜྷམཱསཀཾ ཝཱ ཀཱཀཎིཀཾ ཝཱ ཨགྒྷཏི. ཨུཀྑལིཔརིཔུཉྪནནྟི ཀཱལུ༹ཀྑལིཔརིཔུཉྪནཾ. ནཝོཏིཔི ཨུཔསམྤདཱཡ པཉྩཝསྶཀཱལཏོ ཧེཊྛཱ ཛཱཏིཡཱ སཊྛིཝསྶོཔི ནཝོཡེཝ. དུབྦཎྞཏཱཡཱཏི སརཱིརཝཎྞེནཔི གུཎཝཎྞེནཔི དུབྦཎྞཏཱཡ. དུསྶཱིལསྶ ཧི པརིསམཛ྄ཛྷེ ནིཏྟེཛཏཱཡ སརཱིརཝཎྞོཔི ན སམྤཛྫཏི, གུཎཝཎྞེན ཝཏྟབྦམེཝ ནཏྠི. ཨཊྛཀཐཱཡཾ པན སརཱིརཝཎྞེན དུབྦཎྞཏཱཔི གུཎཝཎྞསྶ ཨབྷཱཝེན དུབྦཎྞཏཱཡཱཏི ཝུཏྟཾ.

ཡེ ཁོ པནསྶཱཏི ཡེ ཁོ པན ཏསྶ ཨུཔཊྛཱཀཱ ཝཱ ཉཱཏིམིཏྟཱདཡོ ཝཱ ཨེཏཾ པུགྒལཾ སེཝནྟི. ཏེསནྟི ཏེསཾ པུགྒལཱནཾ ཚ སཏྠཱརེ སེཝནྟཱནཾ ¶ མིཙྪཱདིཊྛིཀཱནཾ ཝིཡ. དེཝདཏྟེ སེཝནྟཱནཾ ཀོཀཱལིཀཱདཱིནཾ ཝིཡ ཙ ཏཾ སེཝནཾ དཱིགྷརཏྟཾ ཨཧིཏཱཡ དུཀྑཱཡ ཧོཏི. མཛ྄ཛྷིམོཏི པཉྩཝསྶཀཱལཏོ པཊྛཱཡ ཡཱཝ ནཝཝསྶཀཱལཱ མཛ྄ཛྷིམོ ནཱམ. ཐེརོཏི དསཝསྶཏོ པཊྛཱཡ ཐེརོ ནཱམ. ཨེཝམཱཧཾསཱུཏི ཨེཝཾ ཝདནྟི. ཀིཾ ནུ ཁོ ཏུཡ྄ཧནྟི ཏུཡ྄ཧཾ བཱལསྶ བྷཎིཏེན ཀོ ཨཏྠོཏི ཝུཏྟཾ ཧོཏི. ཏཐཱརཱུཔནྟི ཏཐཱཛཱཏིཀཾ ཏཐཱསབྷཱཝཾ ཨུཀྑེཔནཱིཡཀམྨསྶ ཀཱརཎབྷཱུཏཾ.

ཏཱིཧི ཀཔྤཱསཨཾསཱུཧི སུཏྟཾ ཀནྟིཏྭཱ ཀཏཝཏྠནྟི ཏཡོ ཀཔྤཱསཨཾསཱུ གཧེཏྭཱ ཀནྟིཏསུཏྟེན ཝཱཡིཏཾ སུཁུམཝཏྠཾ, ཏཾ ནཝཝཱཡིམཾ ཨནགྒྷཾ ཧོཏི, པརིབྷོགམཛ྄ཛྷིམཾ ཝཱིསམྤི ཏིཾསམྤི སཧསྶཱནི ཨགྒྷཏི, ཛིཎྞཀཱལེ, ཨཊྛཔི དསཔི སཧསྶཱནི ཨགྒྷཏི.

ཏེསཾ ¶ ཏཾ ཧོཏཱིཏི ཏེསཾ སམྨཱསམྦུདྡྷཱདཡོ སེཝནྟཱ ཝིཡ ཏཾ སེཝནཾ དཱིགྷརཏྟཾ ཧིཏཱཡ སུཁཱཡ ཧོཏི. སམྨཱསམྦུདྡྷཉྷི ཨེཀཾ ནིསྶཱཡ ཡཱཝཛྫཀཱལཱ མུཙྩནཀསཏྟཱནཾ པམཱཎཾ ནཏྠི, ཏཐཱ སཱརིཔུཏྟཏྠེརམཧཱམོགྒལླཱནཏྠེརེ ཨཝསེསེ ཙ ཨསཱིཏི མཧཱསཱཝཀེ ནིསྶཱཡ སགྒགཏསཏྟཱནཾ པམཱཎཾ ནཏྠི, ཡཱཝཛྫཀཱལཱ ཏེསཾ དིཊྛཱནུགཏིཾ པཊིཔནྣསཏྟཱནམྤི པམཱཎཾ ནཏྠིཡེཝ. ཨཱདྷེཡྻཾ གཙྪཏཱིཏི ཏསྶ མཧཱཐེརསྶ ཏཾ ཨཏྠནིསྶིཏཾ ཝཙནཾ ཡཐཱ གནྡྷཀརཎྜཀེ ཀཱསིཀཝཏྠཾ ཨཱདྷཱཏབྦཏཾ ཋཔེཏབྦཏཾ གཙྪཏི, ཨེཝཾ ཨུཏྟམངྒེ སིརསྨིཾ ཧདཡེ ཙ ཨཱདྷཱཏབྦཏཾ ཋཔེཏབྦཏཾ གཙྪཏི.

པོཏྠཀསུཏྟཝཎྞནཱ ནིཊྛིཏཱ.

༩. ལོཎཀཔལླསུཏྟཝཎྞནཱ

༡༠༡. ནཝམེ ཡཐཱ ཡཐཱ ཀམྨཾ ཀརོཏཱིཏི ཡེན ཡེན པཀཱརེན པཱཎགྷཱཏཱདིཔཱཔཀམྨཾ ཀརོཏི. ཝིཔཱཀཾ པཊིསཾཝེདིཡཏེཝཱཏི ཨཝདྷཱརཎེན ཀམྨསིདྡྷིཡཾ ཏབྦིཔཱཀསྶ ཨཔྤཝཏྟི ནཱམ ནཏྠཱིཏི དཱིཔེཏི. ཏེནེཝཱཧ ‘‘ན ཧི སཀྐཱ’’ཏིཨཱདི. ཨེཝཾ སནྟནྟི བྷུམྨཏྠེ ཨུཔཡོགཝཙནནྟི ཨཱཧ ‘‘ཨེཝཾ སནྟེ’’ཏི. ཨབྷིསངྑཱརཝིཉྙཱཎནིརོདྷེནཱཏི ཀམྨཝིཉྙཱཎསྶ ཨཱཡཏིཾ ཨནུཔྤཏྟིདྷམྨཏཱཔཛྫནེན.

‘‘ཨཡམྤི ¶ ཁོ ཀཱཡོ ཨེཝཾདྷམྨོ ཨེཝཾབྷཱཝཱི ཨེཝཾཨནཏཱིཏོ’’ཏིཨཱདིནཱ ཀཱཡསྶ ཨསུབྷཱནིཙྩཱདིཨཱཀཱརཨནུཔསྶནཱ ཀཱཡབྷཱཝནཱཏི ཨཱཧ ‘‘ཀཱཡཱནུཔསྶནཱསངྑཱཏཱཡ ཏཱཡ བྷཱཝནཱཡཱ’’ཏི. རཱགཱདཱིནནྟི ཨཱདི-སདྡེན དོསམོཧཱནཾ སངྒཧོ དཊྛབྦོ. ‘‘རཱགོ ཁོ, ཨཱཝུསོ, པམཱཎཀརཎོ, དོསོ པམཱཎཀརཎོ, མོཧོ པམཱཎཀརཎོ, ཏེ ཁཱིཎཱསཝསྶ བྷིཀྑུནོ པཧཱིནཱ ཨུཙྪིནྣམཱུལཱ ཏཱལཱཝཏྠུཀཏཱ ཨནབྷཱཝཾཀཏཱ ཨཱཡཏིཾ ཨནུཔྤཱདདྷམྨཱ’’ཏི (མ. ནི. ༡.༤༥༩) ཧི ཝུཏྟཾ.

ཡཐཱ ཧི པབྦཏཔཱདེ པཱུཏིཔཎྞསྶ ཨུདཀཾ ནཱམ ཧོཏི, ཀཱལ༹ཝཎྞཾ ཨོལོཀེནྟཱནཾ བྱཱམསཏཾ གམྦྷཱིརཾ ཝིཡ ཁཱཡཏི, ཡཊྛིཾ ཝཱ རཛྫུཾ ཝཱ གཧེཏྭཱ མིནནྟསྶ པིཊྛིཔཱདོདྡྷརཎམཏྟམྤི ན ཧོཏི, ཨེཝམེཝ ཨེཀཙྩསྶ ཡཱཝ རཱགཱདཡོ ནུཔྤཛྫནྟི, ཏཱཝ ཏཾ པུགྒལཾ སཉྫཱནིཏུཾ ན སཀྐཱ ཧོཏི, སོཏཱཔནྣོ ཝིཡ སཀདཱགཱམཱི ཝིཡ ཨནཱགཱམཱི ཝིཡ ཙ ཁཱཡཏི. ཡདཱ པནསྶ རཱགཱདཡོ ཨུཔྤཛྫནྟི, ཏདཱ རཏྟོ དུཊྛོ མཱུལ༹ྷོཏི པཉྙཱཡཏི. ཨིཏི ¶ ཏེ རཱགཱདཡོ ‘‘ཨེཏྟཀོ ཨཡ’’ནྟི པུགྒལསྶ པམཱཎཾ དསྶེནྟཱཝ ཨུཔྤཛྫནྟཱིཏི པམཱཎཀརཎཱ ནཱམ ཝུཏྟཱ.

ཛཱཔེཏུནྟི ཛིནདྷནཾ ཀཱཏུཾ. སོཏི རཱཛཱ, མཧཱམཏྟོ ཝཱ. ཨསྶཱཏི ཨཉྫལིཾ པགྒཧེཏྭཱ ཡཱཙནྟསྶ. སེསམེཏྠ ཨུཏྟཱནམེཝ.

ལོཎཀཔལླསུཏྟཝཎྞནཱ ནིཊྛིཏཱ.

༡༠. པཾསུདྷོཝཀསུཏྟཝཎྞནཱ

༡༠༢. དསམེ ཨནཱིཧཏདོསནྟི ཨནཔནཱིཏཐཱུལཀཱལ༹ཀཾ. ཨནཔནཱིཏཀསཱཝནྟི ཨནཔགཏསུཁུམཀཱལ༹ཀཾ. པཧཊམཏྟནྟི ཨཱཧཊམཏྟཾ.

དསཀུསལཀམྨཔཐཝསེན ཨུཔྤནྣཾ ཙིཏྟཾ ཙིཏྟམེཝ, ཝིཔསྶནཱཔཱདཀཨཊྛསམཱཔཏྟིཙིཏྟཾ ཝིཔསྶནཱཙིཏྟཉྩ ཏཏོ ཙིཏྟཏོ ཨདྷིཀཾ ཙིཏྟནྟི ཨདྷིཙིཏྟནྟི ཨཱཧ ‘‘ཨདྷིཙིཏྟནྟི སམཐཝིཔསྶནཱཙིཏྟ’’ནྟི. ཨནུཡུཏྟསྶཱཏི ཨནུཔྤནྣསྶ ཨུཔྤཱདནཝསེན ཨུཔྤནྣསྶ པཊིབྲཱུཧནཝསེན ཨནུ ཨནུ ཡུཏྟསྶ, ཏཏྠ ཡུཏྟཔྤཡུཏྟསྶཱཏི ཨཏྠོ. ཨེཏྠ ཙ པུརེབྷཏྟཾ པིཎྜཱཡ ཙརིཏྭཱ པཙྪཱབྷཏྟཾ པིཎྜཔཱཏཔྤཊིཀྐནྟོ ¶ ནིསཱིདནཾ ཨཱདཱཡ ‘‘ཨསུཀསྨིཾ རུཀྑམཱུལེ ཝཱ ཝནསཎྜེ ཝཱ པབྦྷཱརེ ཝཱ སམཎདྷམྨཾ ཀརིསྶཱམཱི’’ཏི ནིཀྑམནྟོཔི ཏཏྠ གནྟྭཱ ཧཏྠེཧི ཝཱ པཱདེཧི ཝཱ ནིསཛྫཊྛཱནཏོ ཏིཎཔཎྞཱནི ཨཔནེནྟོཔི ཨདྷིཙིཏྟཾ ཨནུཡུཏྟོཡེཝ. ནིསཱིདིཏྭཱ པན ཧཏྠཔཱདེ དྷོཝིཏྭཱ མཱུལཀམྨཊྛཱནཾ གཧེཏྭཱ བྷཱཝནཾ ཨནུཡུཉྫནྟོ བྷཱཝནཱཡ ཨཔྤནཾ ཨཔྤཏྟཱཡཔི ཨདྷིཙིཏྟམནུཡུཏྟོཡེཝ ཏདཏྠེནཔི ཏཾསདྡཝོཧཱརཏོ. ཙིཏྟསམྤནྣོཏི དྷམྨཙིཏྟསྶ སམནྣཱགཏཏྟཱ སམྤནྣཙིཏྟོ. པཎྜིཏཛཱཏིཀོཏི པཎྜིཏསབྷཱཝོ.

ཀཱམེ ཨཱརབྦྷཱཏི ཝཏྠུཀཱམེ ཨཱརབྦྷ. ཀཱམརཱགསངྑཱཏེན ཝཱ ཀཱམེན པཊིསཾཡུཏྟོ ཝིཏཀྐོ ཀཱམཝིཏཀྐོ. བྱཱཔཛྫཏི ཙིཏྟཾ ཨེཏེནཱཏི བྱཱཔཱདོ, དོསོ. ཝིཧིཾསནྟི ཨེཏཱཡ སཏྟེ, ཝིཧིཾསནཾ ཝཱ ཏེསཾ ཨེཏནྟི ཝིཧིཾསཱ, པརེསཾ ཝིཧེཋནཱཀཱརེན པཝཏྟསྶ ཀརུཎཱཔཊིཔཀྑསྶ པཱཔདྷམྨསྶེཏཾ ཨདྷིཝཙནཾ. ཉཱཏཀེ ཨཱརབྦྷ ཨུཔྤནྣོ ཝིཏཀྐོཏི ཉཱཏཀེ ཨཱརབྦྷ གེཧསྶིཏཔེམཝསེན ཨུཔྤནྣོ ཝིཏཀྐོ. ཛནཔདམཱརབྦྷ ཨུཔྤནྣོ ཝིཏཀྐོཏི ཨེཏྠཱཔི ཨེསེཝ ནཡོ. ཨཧོ ཝཏ མཾ…པེ… ཨུཔྤནྣོ ཝིཏཀྐོཏི ‘‘ཨཧོ ཝཏ མཾ པརེ ན ཨཝཛཱནེཡྻུཾ, ན ཧེཊྛཱ ཀཏྭཱ མཉྙེཡྻུཾ, པཱསཱཎཙྪཏྟཾ ཝིཡ ¶ གརུཾ ཀརེཡྻུ’’ནྟི ཨེཝཾ ཨུཔྤནྣཝིཏཀྐོ. དསཝིཔསྶནུཔཀྐིལེསཝིཏཀྐཱཏི ཨོབྷཱསཱདིདསཝིཔསྶནུཔཀྐིལེསེ ཨཱརབྦྷ ཨུཔྤནྣཝིཏཀྐཱ.

ཨཝསིཊྛཱ དྷམྨཝིཏཀྐཱ ཨེཏསྶཱཏི ཨཝསིཊྛདྷམྨཝིཏཀྐོ, ཝིཔསྶནཱསམཱདྷི. ན ཨེཀགྒབྷཱཝཔྤཏྟོ ན ཨེཀགྒཏཾ པཏྟོ. ཨེཀཾ ཨུདེཏཱིཏི ཧི ཨེཀོདི, པཊིཔཀྑེཧི ཨནབྷིབྷཱུཏཏྟཱ ཨགྒཾ སེཊྛཾ ཧུཏྭཱ ཨུདེཏཱིཏི ཨཏྠོ. སེཊྛོཔི ཧི ལོཀེ ཨེཀོཏི ཝུཙྩཏི, ཨེཀསྨིཾ ཨཱརམྨཎེ སམཱདྷཱནཝསེན པཝཏྟཙིཏྟསྶེཏཾ ཨདྷིཝཙནཾ. ཨེཀོདིསྶ བྷཱཝོ ཨེཀོདིབྷཱཝོ, ཨེཀགྒཏཱཡེཏཾ ཨདྷིཝཙནཾ.

ནིཡཀཛ྄ཛྷཏྟནྟི ཨཏྟསནྟཱནསྶེཏཾ ཨདྷིཝཙནཾ. གོཙརཛ྄ཛྷཏྟནྟི ཨིདྷ ནིབྦཱནཾ ཨདྷིཔྤེཏཾ. ཏེནཱཧ ‘‘ཨེཀསྨིཾ ནིབྦཱནགོཙརེཡེཝ ཏིཊྛཏཱི’’ཏི. སུཊྛུ ནིསཱིདཏཱིཏི སམཱདྷིཔཊིཔཀྑེ ཀིལེསེ སནྣིསཱིདེནྟོ སུཊྛུ ནིསཱིདཏི. ཨེཀགྒཾ ཧོཏཱིཏི ཨབྱགྒབྷཱཝཔྤཏྟིཡཱ ཨེཀགྒཾ ཧོཏི. སམྨཱ ཨཱདྷིཡཏཱིཏི ཡཐཱ ཨཱརམྨཎེ སུཊྛུ ཨཔྤིཏཾ ཧོཏི, ཨེཝཾ སམྨཱ སམྨདེཝ ཨཱདྷིཡཏི.

ཨབྷིཉྙཱ ¶ སཙྪིཀརཎཱིཡསྶཱཏི ཨེཏྠ ‘‘ཨབྷིཉྙཱཡ སཙྪིཀརཎཱིཡསྶཱ’’ཏི ཝཏྟབྦེ ‘‘ཨབྷིཉྙཱ’’ཏི ཡ-ཀཱརལོཔེན པན པུན ཀཱལཀིརིཡཱནིདྡེསོ ཀཏོཏི ཨཱཧ ‘‘ཨབྷིཛཱནིཏྭཱ པཙྩཀྑཾ ཀཱཏབྦསྶཱ’’ཏི. ཨབྷིཉྙཱཡ ཨིདྡྷིཝིདྷཱདིཉཱཎེན སཙྪིཀིརིཡཾ ཨིདྡྷིཝིདྷཔཙྩནུབྷཝནཱདིཀཾ ཨབྷིཉྙཱསཙྪིཀརཎཱིཡནྟི ཨེཝཾ ཝཱ ཨེཏྠ ཨཏྠོ དཊྛབྦོ. སཀྑིབྷབྦཏཾ པཱཔུཎཱཏཱིཏི ཨེཏྠ པན ཡསྶ པཙྩཀྑཾ ཨཏྠི, སོ སཀྑཱི, སཀྑིནོ བྷབྦཏཱ སཀྑིབྷབྦཏཱ, སཀྑིབྷཝནནྟི ཝུཏྟཾ ཧོཏི. སཀྑཱི ཙ སོ བྷབྦོ ཙཱཏི སཀྑིབྷབྦོ. ཨཡཉྷི ཨིདྡྷིཝིདྷཱདཱིནཾ བྷབྦོ ཏཏྠ ཙ སཀྑཱིཏི སཀྑིབྷབྦོ, ཏསྶ བྷཱཝོ སཀྑིབྷབྦཏཱ, ཏཾ པཱཔུཎཱཏཱིཏི ཨཏྠོ.

ཨབྷིཉྙཱཔཱདཀཛ྄ཛྷཱནཱདིབྷེདེཏི ཨེཏྠ ཨབྷིཉྙཱཔཱདཱ ཙ ཨབྷིཉྙཱཔཱདཀཛ྄ཛྷཱནཉྩ ཨབྷིཉྙཱཔཱདཀཛ྄ཛྷཱནཱནི. ཨཱདི-སདྡེན ཨརཧཏྟཉྩ ཨརཧཏྟསྶ ཝིཔསྶནཱ ཙ སངྒཧིཏཱཏི དཊྛབྦཾ. ཏེནེཝ མཛ྄ཛྷིམནིཀཱཡཊྛཀཐཱཡཾ (མ. ནི. ཨཊྛ. ༢.༡༩༨) –

‘‘སཏི སཏིཨཱཡཏནེཏི སཏི སཏིཀཱརཎེ. ཀིཉྩེཏྠ ཀཱརཎཾ? ཨབྷིཉྙཱ ཝཱ ཨབྷིཉྙཱཔཱདཀཛ྄ཛྷཱནཾ ཝཱ, ཨཝསཱནེ པན ཨརཧཏྟཾ ཝཱ ཀཱརཎཾ ཨརཧཏྟསྶ ཝིཔསྶནཱ ཝཱཏི ཝེདིཏབྦ’’ནྟི ཝུཏྟཾ.

ཡཉྷི ཏཾ ཏཏྲ ཏཏྲ སཀྑིབྷབྦཏཱསངྑཱཏཾ ཨིདྡྷིཝིདྷཔཙྩནུབྷཝནཱདི, ཏསྶ ཨབྷིཉྙཱ ཀཱརཎཾ ¶ . ཨཐ ཨིདྡྷིཝིདྷཔཙྩནུབྷཝནཱདི ཨབྷིཉྙཱ, ཨེཝཾ སཏི ཨབྷིཉྙཱཔཱདཀཛ྄ཛྷཱནཾ ཀཱརཎཾ. ཨཝསཱནེ ཚཊྛཱབྷིཉྙཱཡ པན ཨརཧཏྟཾ, ཨརཧཏྟསྶ ཝིཔསྶནཱ ཝཱ ཀཱརཎཾ. ཨརཧཏྟཉྷི ‘‘ཀུདཱསྶུ ནཱམཱཧཾ ཏདཱཡཏནཾ ཨུཔསམྤཛྫ ཝིཧརིསྶཱམི, ཡདརིཡཱ ཨེཏརཧི ཨུཔསམྤཛྫ ཝིཧརནྟཱི’’ཏི (མ. ནི. ༡.༤༦༥; ༣.༣༠༧) ཨནུཏྟརེསུ ཝིམོཀྑེསུ པིཧཾ ཨུཔཊྛཔེཏྭཱ ཨབྷིཉྙཱ ནིབྦཏྟེནྟསྶ ཀཱརཎཾ. ཨིདཉྩ སཱདྷཱརཎཾ ན ཧོཏི, སཱདྷཱརཎཝསེན པན ཨརཧཏྟསྶ ཝིཔསྶནཱ ཀཱརཎཾ. ཨིམསྨིཉྷི སུཏྟེ ཨརཧཏྟཕལཝསེན ཚཊྛཱབྷིཉྙཱ ཝུཏྟཱ. ཏེནེཝཱཧ ‘‘ཨཱསཝཱནཾ ཁཡཱཏིཨཱདི ཙེཏྠ ཕལསམཱཔཏྟིཝསེན ཝུཏྟནྟི ཝེདིཏབྦ’’ནྟི.

པཾསུདྷོཝཀསུཏྟཝཎྞནཱ ནིཊྛིཏཱ.

༡༡. ནིམིཏྟསུཏྟཝཎྞནཱ

༡༠༣. ཨེཀཱདསམེ ¶ ཡེཧི ཕལཾ ནིམཱིཡཏི, ཨུཔྤཛྫནཊྛཱནེ པཀྑིཔམཱནཾ ཝིཡ ཧོཏི, ཏཱནི ནིམིཏྟཱནི. ཏེནཱཧ ‘‘ཏཱིཎི ཀཱརཎཱནཱི’’ཏི. ཀཱལེན ཀཱལནྟི ཨེཏྠ ཀཱལེནཱཏི བྷུམྨཏྠེ ཀརཎཝཙནཾ. ཀཱལནྟི ཙ ཨུཔཡོགཝཙནནྟི ཨཱཧ ‘‘ཀཱལེ ཀཱལེ’’ཏི. མནསི ཀཱཏབྦཱཏི ཙིཏྟེ ཀཱཏབྦཱ, ཨུཔྤཱདེཏབྦཱཏི ཨཏྠོ. ཨུཔལཀྑིཏསམཱདྷཱནཱཀཱརོ སམཱདྷིཡེཝ ཨིདྷ སམཱདྷིནིམིཏྟནྟི ཨཱཧ ‘‘ཨེཀགྒཏཱ ཧི ཨིདྷ སམཱདྷིནིམིཏྟནྟི ཝུཏྟཱ’’ཏི. ཋཱནཾ ཏཾ ཙིཏྟཾ ཀོསཛྫཱཡ སཾཝཏྟེཡྻཱཏི ཨེཏྠ ཋཱནཾ ཨཏྠཱིཏི ཝཙནསེསོ. ཏཾ བྷཱཝནཱཙིཏྟཾ ཀོསཛྫཱཡ སཾཝཏྟེཡྻ, ཏསྶ སཾཝཏྟནསྶ ཀཱརཎཾ ཨཏྠཱིཏི ཨཏྠོ. ཏཾ ཝཱ མནསིཀརཎཾ ཙིཏྟཾ ཀོསཛྫཱཡ སཾཝཏྟེཡྻ, ཨེཏསྶ ཋཱནཾ ཀཱརཎཾ ཨཏྠཱིཏི ཨཏྠོ. ཏེནཱཧ ‘‘ཀཱརཎཾ ཝིཛྫཏཱི’’ཏིཨཱདི. ཉཱཎཛཝནྟི སངྑཱརེསུ ཨནིཙྩཱདིཝསེན པཝཏྟམཱནཾ པཉྙཱཛཝཾ.

ཡཾ ཀིཉྩི སུཝཎྞཏཱཔནཡོགྒཨངྒཱརབྷཱཛནཾ ཨིདྷ ‘‘ཨུཀྐཱ’’ཏི ཨདྷིཔྤེཏནྟི ཨཱཧ ‘‘ཨངྒཱརཀཔལླ’’ནྟི. སཛྫེཡྻཱཏི ཡཐཱ ཏཏྠ པཀྑིཏྟཾ སུཝཎྞཾ ཏཔྤཏི, ཨེཝཾ པཊིཡཱདིཡེཡྻ. ཨཱལིམྤེཡྻཱཏི ཨཱདིཡེཡྻ, ཛལེཡྻཱཏི ཨཏྠོ. ཏེནཱཧ ‘‘ཏཏྠ ཨངྒཱརེ…པེ… གཱཧཱཔེཡྻཱ’’ཏི. མཱུསཱཡ ཝཱ པཀྑིཔེཡྻཱཏི ཏཏྟཀེ ཝཱ པཀྑིཔེཡྻ. ཨུཔདྷཱརེཏཱིཏི སལླཀྑེཏི.

ནིམིཏྟསུཏྟཝཎྞནཱ ནིཊྛིཏཱ.

ལོཎཀཔལླཝགྒཝཎྞནཱ ནིཊྛིཏཱ.

དུཏིཡཔཎྞཱསཀཾ ནིཊྛིཏཾ.

༣. ཏཏིཡཔཎྞཱསཀཾ

(༡༡) ༡. སམྦོདྷཝགྒོ

༡-༣. པུབྦེཝསམྦོདྷསུཏྟཱདིཝཎྞནཱ

༡༠༤-༡༠༦. ཏཏིཡསྶ ¶ ¶ པཋམེ སམྦོདྷིཏོ པུབྦེཝཱཏི སམྦོདྷོ ཝུཙྩཏི ཙཏཱུསུ མགྒེསུ ཉཱཎཾ ‘‘སཱམཾ སམྨཱ བུཛ྄ཛྷི ཨེཏེནཱ’’ཏི ཀཏྭཱ, ཏཏོ པུབྦེཡེཝཱཏི ཨཏྠོ. ཏེནཱཧ ‘‘ཨརིཡམགྒཔྤཏྟིཏོ ཨཔརབྷཱགེཡེཝཱ’’ཏི. བོདྷིསཏྟསྶེཝ སཏོཏི ཨེཏྠ ཡཐཱ ཨུདཀཏོ ཨུགྒནྟྭཱ ཋིཏཾ པརིཔཱཀགཏཾ པདུམཾ སཱུརིཡརསྨིསམྥསྶེན ཨཝསྶཾ བུཛ྄ཛྷིསྶཏཱིཏི བུཛ྄ཛྷནཀཔདུམནྟི ཝུཙྩཏི. ཨེཝཾ བུདྡྷཱནཾ སནྟིཀེ བྱཱཀརཎསྶ ལདྡྷཏྟཱ ཨཝསྶཾ ཨནནྟརཱཡེན པཱརམིཡོ པཱུརེཏྭཱ བུཛ྄ཛྷིསྶཏཱིཏི བུཛ྄ཛྷནཀསཏྟོཏི བོདྷིསཏྟོ. ཏེནཱཧ ‘‘བུཛ྄ཛྷནཀསཏྟསྶེཝ…པེ… ཨཱརབྷནྟསྶེཝ སཏོ’’ཏི. ཡཱ ཝཱ ཨེསཱ ཙཏུམགྒཉཱཎསངྑཱཏཱ བོདྷི, ‘‘ཏཾ བོདྷིཾ ཀུདཱསྶུ ནཱམཱཧཾ པཱཔུཎིསྶཱམཱི’’ཏི པཏྠཡམཱནོ པཊིཔཛྫཏཱིཏི བོདྷིཡཾ སཏྟོ ཨཱསཏྟོཏིཔི བོདྷིསཏྟོ. ཏེནཱཧ ‘‘སམྦོདྷིཡཱ ཝཱ སཏྟསྶེཝ ལགྒསྶེཝ སཏོ’’ཏི.

ཨཐ ཝཱ བོདྷཱིཏི ཉཱཎཾ ‘‘བུཛ྄ཛྷཏི ཨེཏེནཱ’’ཏི ཀཏྭཱ, བོདྷིམཱ སཏྟོ བོདྷིསཏྟོ, པུརིམཔདེ ཨུཏྟརཔདལོཔཾ ཀཏྭཱ ཡཐཱ ‘‘ཉཱཎསཏྟོ’’ཏི, ཉཱཎཝཱ པཉྙཝཱ པཎྜིཏོ སཏྟོཏི ཨཏྠོ. བུདྡྷཱནཉྷི པཱདམཱུལེ ཨབྷིནཱིཧཱརཏོ པཊྛཱཡ པཎྜིཏོཝ སོ སཏྟོ, ན ཨནྡྷབཱལོཏི བོདྷིསཏྟོ. ཨེཝཾ གུཎཝཏོ ཨུཔྤནྣནཱམཝསེན བོདྷིསཏྟསྶེཝ སཏོ. ཨསྶཱདཱིཡཏཱིཏི ཨསྶཱདོ, སུཁཾ. ཏཉྩ སཱཏཱཀཱརལཀྑཎནྟི ཨཱཧ ‘‘ཨསྶཱདོཏི མདྷུརཱཀཱརོ’’ཏི. ཚནྡརཱགོ ཝིནཱིཡཏི ཙེཝ པཧཱིཡཏི ཙ ཨེཏྠཱཏི ནིབྦཱནཾ ‘‘ཚནྡརཱགཝིནཡོ ཚནྡརཱགཔྤཧཱནཉྩཱ’’ཏི ཝུཙྩཏི. ཏེནཱཧ ‘‘ནིབྦཱན’’ནྟིཨཱདི. ཏཏྠ ཨཱགམྨཱཏི ཨིདཾ ཡོ ཛནོ རཱགཾ ཝིནེཏི པཛཧཏི ཙ, ཏསྶ ཨཱརམྨཎཀརཎཾ སནྡྷཱཡ ཝུཏྟཾ. དུཏིཡཏཏིཡཱནི ཨུཏྟཱནཏྠཱནེཝ.

པུབྦེཝསམྦོདྷསུཏྟཱདིཝཎྞནཱ ནིཊྛིཏཱ.

༤-༩. སམཎབྲཱཧྨཎསུཏྟཱདིཝཎྞནཱ

༡༠༧-༡༡༢. ཙཏུཏྠེ ¶ ¶ སཱམཉྙནྟི ཨརིཡམགྒོ, ཏེན ཨརཎཱིཡཏོ ཨུཔགནྟབྦཏོ སཱམཉྙཏྠཾ, ཨརིཡཕལནྟི ཨཱཧ ‘‘སཱམཉྙཏྠནྟི ཙཏུབྦིདྷཾ ཨརིཡཕལ’’ནྟི. བྲཧྨཉྙཏྠནྟི ཨེཏྠཱཔི ཨེསེཝ ནཡོ. ཏེནཱཧ ‘‘ཨིཏརཾ ཏསྶེཝ ཝེཝཙན’’ནྟི. ཨརིཡམགྒསངྑཱཏཾ སཱམཉྙམེཝ ཝཱ ཨརཎཱིཡཏོ སཱམཉྙཏྠནྟི ཨཱཧ ‘‘སཱམཉྙཏྠེན ཝཱ ཙཏྟཱརོ མགྒཱ’’ཏི. པཉྩམཱདཱིནི ཨུཏྟཱནཏྠཱནེཝ.

སམཎབྲཱཧྨཎསུཏྟཱདིཝཎྞནཱ ནིཊྛིཏཱ.

༡༠. དུཏིཡནིདཱནསུཏྟཝཎྞནཱ

༡༡༣. དསམེ ཝིཝཊྚགཱམིཀམྨཱནནྟི ཝིཝཊྚཱུཔནིསྶཡཀམྨཱནཾ. ཏདབྷིནིཝཏྟེཏཱིཏི ཨེཏྠ ཏཾ-སདྡེན པཙྩཱམསནསྶ ཝིཔཱཀསྶ པརཱམཱསོཏི ཨཱཧ ‘‘ཏཾ ཨབྷིནིཝཏྟེཏཱི’’ཏི, ཏཾ ཝིཔཱཀཾ ཨབྷིབྷཝིཏྭཱ ནིཝཏྟེཏཱིཏི ཨཏྠོ. ཨིདཱནི ན ཀེཝལཾ ཝིཔཱཀསྶེཝ པརཱམཱསོ ཏཾ-སདྡེན, ཨཐ ཁོ ཚནྡརཱགཊྛཱནིཡཱནཾ དྷམྨཱནཾ ཏབྦིཔཱཀསྶ ཙ པརཱམཱསོ དཊྛབྦོཏི ཨཱཧ ‘‘ཡདཱ ཝཱ ཏེནཱ’’ཏིཨཱདི. ཏེ ཙེཝ དྷམྨེཏི ཏེ ཚནྡརཱགཊྛཱནིཡེ དྷམྨེ. ནིབྦིཛ྄ཛྷིཏྭཱ པསྶཏཱིཏི ཀིལེསེ ནིབྦིཛ྄ཛྷིཏྭཱ ཝིབྷཱུཏཾ པཱཀཊཾ ཀཏྭཱ པསྶཏཱིཏི.

དུཏིཡནིདཱནསུཏྟཝཎྞནཱ ནིཊྛིཏཱ.

སམྦོདྷཝགྒཝཎྞནཱ ནིཊྛིཏཱ.

(༡༢) ༢. ཨཱཔཱཡིཀཝགྒོ

༡. ཨཱཔཱཡིཀསུཏྟཝཎྞནཱ

༡༡༤. དུཏིཡསྶ པཋམེ ཨཔཱཡེསུ ནིབྦཏྟནསཱིལཏཱཡ ཨཔཱཡཱུཔགཱ ཨཱཔཱཡིཀཱཏི ཨཱཧ ‘‘ཨཔཱཡཾ གཙྪིསྶནྟཱིཏི ཨཱཔཱཡིཀཱ’’ཏི. ཨཉྙེ བྲཧྨཙཱརིནོ སུནིཝཏྠེ སུཔཱརུཏེ སུམྦྷཀཔཏྟདྷརེ གཱམནིགམརཱཛདྷཱནཱིསུ ¶ པིཎྜཱཡ ཙརིཏྭཱ ཛཱིཝིཀཾ ཀཔྤེནྟེ དིསྭཱ སཡམྤི ཏཱདིསེན ཨཱཀཱརེན ¶ ཏཐཱཔཊིཔཛྫནཏོ ‘‘ཨཧཾ བྲཧྨཙཱརཱི’’ཏི པཊིཉྙཾ དེནྟོ ཝིཡ ཧོཏཱིཏི ཨཱཧ ‘‘བྲཧྨཙཱརིཔཊིཉྙོཏི བྲཧྨཙཱརིཔཊིརཱུཔཀོ’’ཏི. ‘‘ཨཧམྤི བྷིཀྑཱུ’’ཏི ཝཏྭཱ ཨུཔོསཐངྒཱདཱིནི པཝིསནྟོ པན བྲཧྨཙཱརིཔཊིཉྙོ ཧོཏིཡེཝ, ཏཐཱ སངྒྷིཀཾ ལཱབྷཾ གཎྷནྟོ. ཏེནཱཧ ‘‘ཏེསཾ ཝཱ…པེ… ཨེཝཾཔཊིཉྙོ’’ཏི. ཨཀྐོསཏཱིཏི ‘‘ཨསྶམཎོསི, སམཎཔཊིཉྙོསཱི’’ཏིཨཱདིནཱ ཨཀྐོསཏི. པརིབྷཱསཏཱིཏི ‘‘སོ ཏྭཾ ‘ཧོཏུ, མུཎྜཀསམཎོ ཨཧ’ནྟི མཉྙསི, ཨིདཱནི ཏེ ཨསྶམཎབྷཱཝཾ ཨཱརོཔེསྶཱམཱི’’ཏིཨཱདིནཱ ཝདནྟོ པརིབྷཱསཏི.

ཀིལེསཀཱམོཔི ཨསྶཱདིཡམཱནོ ཝཏྠུཀཱམནྟོགདྷོཡེཝ, ཀིལེསཀཱམཝསེན ཙ ཏེསཾ ཨསྶཱདནཾ སིཡཱཏི ཨཱཧ ‘‘ཀིལེསཀཱམེན ཝཏྠུཀཱམེ སེཝནྟསྶཱ’’ཏི. ཀིལེསཀཱམེནཱཏི ཀརཎཏྠེ ཀརཎཝཙནཾ. ནཏྠི དོསོཏི ཨསྶཱདེཏྭཱ ཝིསཡཔརིབྷོགེ ནཏྠི ཨཱདཱིནཝོ, ཏཔྤཙྩཡཱ ན ཀོཙི ཨནྟརཱཡོཏི ཨདྷིཔྤཱཡོ. པཱཏབྦཏཾ ཨཱཔཛྫཏཱིཏི པརིབྷུཉྫནཀཏཾ ཨུཔགཙྪཏི. པརིབྷོགཏྠོ ཧི ཨཡཾ པཱ-སདྡོ, ཀཏྟུསཱདྷནོ ཙ ཏབྦ-སདྡོ, ཡཐཱརུཙི པརིབྷུཉྫཏཱིཏི ཨཏྠོ. པིཝིཏབྦཏཾ པརིབྷུཉྫིཏབྦཏནྟི ཨེཏྠཱཔི ཀཏྟུཝསེནེཝ ཨཏྠོ ཝེདིཏབྦོ.

ཨཱཔཱཡིཀསུཏྟཝཎྞནཱ ནིཊྛིཏཱ.

༢. དུལླབྷསུཏྟཝཎྞནཱ

༡༡༥. དུཏིཡེ པརེན ཀཏསྶ ཨུཔཀཱརསྶ ཨནུརཱུཔཔྤཝཏྟི ཨཏྟནི ཀཏཾ ཨུཔཀཱརཾ ཨུཔཀཱརཏོ ཛཱནནྟོ ཝེདིཡནྟོ ཀཏཉྙཱུ ཀཏཝེདཱིཏི ཨཱཧ ‘‘ཨིམིནཱ མཡ྄ཧཾ ཀཏ’’ནྟིཨཱདི.

དུལླབྷསུཏྟཝཎྞནཱ ནིཊྛིཏཱ.

༣. ཨཔྤམེཡྻསུཏྟཝཎྞནཱ

༡༡༦. ཏཏིཡེ སུཁེན མེཏབྦོཏི ཡཐཱ པརིཏྟསྶ ཨུདཀསྶ སུཁེན པམཱཎཾ གཡ྄ཧཏི, ཨེཝམེཝ ‘‘ཨུདྡྷཏོ’’ཏིཨཱདིནཱ ཡཐཱཝུཏྟེཧི ཨགུཎངྒེཧི ¶ སམནྣཱགཏསྶ སུཁེན པམཱཎཾ གཡ྄ཧཏཱིཏི, སུཁེན མེཏབྦོ. དུཀྑེན མེཏབྦོཏི ཡཐཱ མཧཱསམུདྡསྶ དུཀྑེན པམཱཎཾ གཡ྄ཧཏི, ཨེཝམེཝ ‘‘ཨནུདྡྷཏོ’’ཏིཨཱདིནཱ དསྶིཏེཧི གུཎངྒེཧི སམནྣཱགཏསྶ དུཀྑེན པམཱཎཾ གཡ྄ཧཏི, ‘‘ཨནཱགཱམཱི ¶ ནུ ཁོ ཁཱིཎཱསཝོ ནུ ཁོ’’ཏི ཝཏྟབྦཏཾ གཙྪཏི, ཏེནེས དུཀྑེན མེཏབྦོ. པམེཏུཾ ན སཀྐོཏཱིཏི ཡཐཱ ཨཱཀཱསསྶ ན སཀྐཱ པམཱཎཾ གཧེཏུཾ, ཨེཝཾ ཁཱིཎཱསཝསྶ, ཏེནེས པམེཏུཾ ན སཀྐཱཏི ཨཔྤམེཡྻོ.

སཱརཱབྷཱཝེན ཏུཙྪཏྟཱ ནལོ༹ ཝིཡ ནལོ༹, མཱནོཏི ཨཱཧ ‘‘ཨུནྣལོ༹ཏི ཨུགྒཏནལོ༹’’ཏི, ཨུཊྛིཏཏུཙྪམཱནོཏི ཝུཏྟཾ ཧོཏི. ཏེནཱཧ ‘‘ཏུཙྪམཱནཾ ཨུཀྑིཔིཏྭཱ ཋིཏོཏི ཨཏྠོ’’ཏི. མནོ ཧི སེཡྻསྶ སེཡྻོཏི སདིསོཏི ཙ པཝཏྟིཡཱ ཝིསེསཏོ ཏུཙྪོ. ཙཱཔལླེནཱཏི ཙཔལབྷཱཝེན, ཏཎྷཱལོལུཔྤེནཱཏི ཨཏྠོ. མུཁརོཏི མུཁེན ཕརུསོ, ཕརུསཝཱཙོཏི ཨཏྠོ. ཝིཀིཎྞཝཱཙོཏི ཝིསཊཝཙནོ སམྥཔྤལཱཔིཏཱཡ ཨཔརིཡནྟཝཙནོ. ཏེནཱཧ ‘‘ཨསཉྙཏཝཙནོ’’ཏི, དིཝསམྤི ནིརཏྠཀཝཙནཾ པལཱཔཱིཏི ཝུཏྟཾ ཧོཏི. ཙིཏྟེཀགྒཏཱརཧིཏོཏི ཨུཔཙཱརཔྤནཱསམཱདྷིརཧིཏོ ཙཎྜསོཏེ བདྡྷནཱཝཱ ཝིཡ ཨནཝཊྛིཏཀིརིཡོ. བྷནྟཙིཏྟོཏི ཨནཝཊྛིཏཙིཏྟོ པཎྞཱརུལ༹ྷཝཱལམིགསདིསོ. ཝིཝཊིནྡྲིཡོཏི སཾཝརཱབྷཱཝེན གིཧིཀཱལེ ཝིཡ ཨསཾཝུཏཙཀྑཱདིཨིནྡྲིཡོ.

ཨཔྤམེཡྻསུཏྟཝཎྞནཱ ནིཊྛིཏཱ.

༤. ཨཱནེཉྫསུཏྟཝཎྞནཱ

༡༡༧. ཙཏུཏྠེ སཧ བྱཡཏི གཙྪཏཱིཏི སཧབྱོ, སཧཔཝཏྟནཀོ. ཏསྶ བྷཱཝོ སཧབྱཏཱ, སཧཔཝཏྟཱིཏི ཨཱཧ ‘‘སཧབྷཱཝཾ ཨུཔཔཛྫཏཱི’’ཏི. ‘‘ཡཱཝཏཀཾ ཏེསཾ དེཝཱནཾ ཨཱཡུཔྤམཱཎཾ, ཏཾ སབྦཾ ཁེཔེཏྭཱ ནིརཡམྤི གཙྪཏཱི’’ཏིཨཱདིཝཙནཏོ ཨརཱུཔབྷཝཏོ ཙུཏསྶ ཨཔཱཡཱུཔཔཏྟི ཝུཏྟཱ ཝིཡ དིསྶཏཱིཏི ཏནྣིཝཏྟནཏྠཾ བྷགཝཏོ ཨདྷིཔྤཱཡཾ ཝིཝརནྟོ ‘‘སནྡྷཱཡབྷཱསིཏམིདཾ ཝཙན’’ནྟི དཱིཔེཏི ‘‘ནིརཡཱདཱིཧི ཨཝིཔྤམུཏྟཏྟཱ’’ཏིཨཱདིནཱ. ན ཧི ཏསྶ ཨུཔཙཱརཛ྄ཛྷཱནཏོ བལཝཏརཾ ཨཀུསལཾ ཨཏྠཱིཏི. ཨིམིནཱ ཏཏོ ཙཝནྟཱནཾ ཨུཔཙཱརཛ྄ཛྷཱནམེཝ པཊིསནྡྷིཛནཀཾ ཀམྨནྟི དཱིཔེཏི. ཨདྷིཀཾ ¶ པཡསཏི པཡུཛྫཏི ཨེཏེནཱཏི ཨདྷིཔྤཡཱསོ, སཝིསེསཾ ཨིཏིཀཏྟབྦཀིརིཡཱ. ཏེནཱཧ ‘‘ཨདྷིཀཔྤཡོགོ’’ཏི. སེསམེཏྠ ཨུཏྟཱནམེཝ.

ཨཱནེཉྫསུཏྟཝཎྞནཱ ནིཊྛིཏཱ.

༥. ཝིཔཏྟིསམྤདཱསུཏྟཝཎྞནཱ

༡༡༨. པཉྩམེ ¶ དིནྣནྟི དེཡྻདྷམྨསཱིསེན དཱནཾ ཝུཏྟནྟི ཨཱཧ ‘‘དིནྣསྶ ཕལཱབྷཱཝཾ སནྡྷཱཡ ཝདཏཱི’’ཏི. དིནྣཾ པན ཨནྣཱདིཝཏྠུཾ ཀཐཾ པཊིཀྑིཔཏི. ཨེས ནཡོ ‘‘ཡིཊྛཾ ཧུཏ’’ནྟི ཨེཏྠཱཔི. མཧཱཡཱགོཏི སབྦསཱདྷཱརཎཾ མཧཱདཱནཾ. པཧེཎཀསཀྐཱརོཏི པཱཧུནཀཱནཾ ཀཱཏབྦསཀྐཱརོ. ཕལནྟི ཨཱནིསཾསཕལཾ ནིསྶནྡཕལཉྩ. ཝིཔཱཀོཏི སདིསཕལཾ. པརལོཀེ ཋིཏསྶ ཨཡཾ ལོཀོ ནཏྠཱིཏི པརལོཀེ ཋིཏསྶ ཀམྨུནཱ ལདྡྷབྦོ ཨཡཾ ལོཀོ ན ཧོཏི. ཨིདྷལོཀེ ཋིཏསྶཔི པརལོཀོ ནཏྠཱིཏི ཨིདྷལོཀེ ཋིཏསྶ ཀམྨུནཱ ལདྡྷབྦོ པརལོཀོ ན ཧོཏི. ཏཏྠ ཀཱརཎམཱཧ ‘‘སབྦེ ཏཏྠ ཏཏྠེཝ ཨུཙྪིཛྫནྟཱི’’ཏི. ཨིམེ སཏྟཱ ཡཏྠ ཡཏྠ བྷཝཡོནིགཏིཨཱདཱིསུ ཋིཏཱ, ཏཏྠ ཏཏྠེཝ ཨུཙྪིཛྫནྟི, དྭཡཝིནཱསེན ཝིནསྶནྟི.

ཕལཱབྷཱཝཝསེནཱཏི མཱཏཱཔིཏཱུསུ སམྨཱཔཊིཔཏྟིམིཙྪཱཔཊིཔཏྟཱིནཾ ཕལསྶ ཨབྷཱཝཝསེན ‘‘ནཏྠི མཱཏཱ, ནཏྠི པིཏཱ’’ཏི ཝདཏི, ན མཱཏཱཔིཏཱུནཾ, ནཱཔི ཏེསུ སམྨཱཔཊིཔཏྟིམིཙྪཱཔཊིཔཏྟཱིནཾ ཨབྷཱཝཝསེན ཏེསཾ ལོཀཔཙྩཀྑཏྟཱ. པུབྦུལ༹ཀསྶ ཝིཡ ཨིམེསཾ སཏྟཱནཾ ཨུཔྤཱདོ ནཱམ ཀེཝལོ, ན ཙ ཁནཔུབྦཀོཏི དསྶནཏྠཾ ‘‘ནཏྠི སཏྟཱ ཨོཔཔཱཏིཀཱ’’ཏི ཝུཏྟནྟི ཨཱཧ ‘‘ཙཝིཏྭཱ ཨུཔྤཛྫནཀཱ སཏྟཱ ནཱམ ནཏྠཱིཏི ཝདཏཱི’’ཏི. སཡཾ ཨབྷིཉྙཱ སཙྪིཀཏྭཱ པཝེདེནྟཱིཏི ཡེ ཨིམཉྩ ལོཀཾ པརཉྩ ལོཀཾ ཨབྷིཝིསིཊྛཱཡ པཉྙཱཡ སཡཾ པཙྩཀྑཾ ཀཏྭཱ པཝེདེནྟི, ཏེ ནཏྠཱིཏི སབྦཉྙུབུདྡྷཱནཾ ཨབྷཱཝཾ དཱིཔེཏི.

ཝིཔཏྟིསམྤདཱསུཏྟཝཎྞནཱ ནིཊྛིཏཱ.

༦-༧. ཨཔཎྞཀསུཏྟཱདིཝཎྞནཱ

༡༡༩-༡༢༠. ཚཊྛེ ¶ ཚཧི ཏལེཧི སམནྣཱགཏོ པཱསཀོཏི ཙཏཱུསུ པསྶེསུ ཙཏྟཱརི ཏལཱནི, དྭཱིསུ ཀོཊཱིསུ དྭེ ཏལཱནཱིཏི ཨེཝཾ ཚཧི ཏལེཧི སམནྣཱགཏོ པཱསཀཀཱིལཱ༹པསུཏཱནཾ མཎིསདིསོ པཱསཀཝིསེསོ. སཏྟམཾ ཨུཏྟཱནམེཝ.

ཨཔཎྞཀསུཏྟཱདིཝཎྞནཱ ནིཊྛིཏཱ.

༨. པཋམསོཙེཡྻསུཏྟཝཎྞནཱ

༡༢༡. ཨཊྛམེ ¶ སུཙིབྷཱཝོཏི ཀིལེསཱསུཙིཝིགམེན སུདྡྷབྷཱཝོ ཨསཾཀིལིཊྛབྷཱཝོ, ཨཏྠཏོ ཀཱཡསུཙརིཏཱདཱིནི.

པཋམསོཙེཡྻསུཏྟཝཎྞནཱ ནིཊྛིཏཱ.

༩. དུཏིཡསོཙེཡྻསུཏྟཝཎྞནཱ

༡༢༢. ནཝམེ སམུཙྪེདཝསེན པཧཱིནསབྦཀཱཡདུཙྩརིཏཏཱཡ ཀཱཡེ, ཀཱཡེན ཝཱ སུཙི ཀཱཡསུཙི. ཏེནཱཧ ‘‘ཀཱཡདྭཱརེ’’ཏིཨཱདི. སོཙེཡྻསམྤནྣནྟི པཊིཔྤསྶདྡྷཀིལེསཏྟཱ པརིསུདྡྷཱཡ སོཙེཡྻསམྤཏྟིཡཱ ཨུཔེཏཾ. ནིནྷཱཏཱ ཨགྒམགྒསལིལེན ཝིཀྑཱལིཏཱ པཱཔཱ ཨེཏེནཱཏི ནིནྷཱཏཔཱཔཀོ, ཁཱིཎཱསཝོ. ཏེནཱཧ ‘‘ཁཱིཎཱསཝོཝ ཀཐིཏོ’’ཏི.

དུཏིཡསོཙེཡྻསུཏྟཝཎྞནཱ ནིཊྛིཏཱ.

༡༠. མོནེཡྻསུཏྟཝཎྞནཱ

༡༢༣. དསམེ མུནིནོ བྷཱཝཱ མོནེཡྻཱནི, ཡེཧི དྷམྨེཧི ཨུབྷཡཧིཏམུནནཏོ མུནི ནཱམ ཧོཏི, ཏེ མུནིབྷཱཝཀརཱ མོནེཡྻཱ པཊིཔདཱ དྷམྨཱ ཨེཝ ཝུཏྟཱ. མུནིནོ ཝཱ ཨེཏཱནི མོནེཡྻཱནི, ཡཐཱཝུཏྟདྷམྨཱ ཨེཝ. ཏཏྠ ཡསྨཱ ཀཱཡེན ཨཀཏྟབྦསྶ ཨཀརཎཾ, ཀཏྟབྦསྶ ཙ ཀརཎཾ ¶ , ‘‘ཨཏྠི ཨིམསྨིཾ ཀཱཡེ ཀེསཱ’’ཏིཨཱདིནཱ (དཱི. ནི. ༢.༣༧༧; མ. ནི. ༡.༡༡༠; སཾ. ནི. ༤.༡༢༧; ཁུ. པཱ. ༣.དྭཏྟིཾསཱཀཱར) ཀཱཡསངྑཱཏསྶ ཨཱརམྨཎསྶ ཛཱནནཾ, ཀཱཡསྶ ཙ སམུདཡཏོ ཨཏྠངྒམཏོ ཨསྶཱདཏོ ཨཱདཱིནཝཏོ ནིསྶརཎཏོ ཙ ཡཱཐཱཝཏོ པརིཛཱནནཏཱ, ཏཐཱ པརིཛཱནནཝསེན པན པཝཏྟོ ཝིཔསྶནཱམགྒོ, ཏེན ཙ ཀཱཡེ ཚནྡརཱགསྶ པཛཧནཾ, ཀཱཡསངྑཱརཾ ནིརོདྷེཏྭཱ པཏྟབྦསམཱཔཏྟི ཝཱ, སབྦེ ཨེཏེ ཀཱཡམུཁེན པཝཏྟཱ མོནེཡྻཔྤཊིཔདཱ དྷམྨཱ ཀཱཡམོནེཡྻཾ ནཱམ. ཏསྨཱ ཏམཏྠཾ དསྶེཏུཾ ‘‘ཀཏམཾ ཀཱཡམོནེཡྻཾ? ཏིཝིདྷཀཱཡདུཙྩརིཏསྶ པཧཱནཾ ཀཱཡམོནེཡྻཾ, ཏིཝིདྷཀཱཡསུཙརིཏམྤི ཀཱཡམོནེཡྻ’’ནྟིཨཱདིནཱ (མཧཱནི. ༡༤) པཱལི༹ ཨཱགཏཱ. ཨིདྷཱཔི ཏེནེཝ པཱལི༹ནཡེན ཨཏྠཾ དསྶེནྟོ ‘‘ཏིཝིདྷཀཱཡདུཙྩརིཏཔྤཧཱནཾ ཀཱཡམོནེཡྻཾ ནཱམཱ’’ཏིཨཱདིམཱཧ.

ཨིདཱནི ¶ ‘‘ཀཏམཾ ཝཙཱིམོནེཡྻཾ? ཙཏུབྦིདྷཝཙཱིདུཙྩརིཏསྶ པཧཱནཾ ཝཙཱིམོནེཡྻཾ, ཙཏུབྦིདྷཾ ཝཙཱིསུཙརིཏཾ, ཝཱཙཱརམྨཎེ ཉཱཎཾ, ཝཱཙཱཔརིཉྙཱ, པརིཉྙཱསཧགཏོ མགྒོ, ཝཱཙཱཡ ཚནྡརཱགསྶ པཧཱནཾ, ཝཙཱིསངྑཱརནིརོདྷོ དུཏིཡཛ྄ཛྷཱནསམཱཔཏྟི ཝཙཱིམོནེཡྻ’’ནྟི ཨིམཱཡ པཱལི༹ཡཱ ཝུཏྟམཏྠཾ ཨཏིདཱིཔེནྟོ ‘‘ཝཙཱིམོནེཡྻེཔི ཨེསེཝ ནཡོ’’ཏིཨཱདིམཱཧ. ཏཏྠ ཙོཔནཝཱཙཉྩེཝ སདྡཝཱཙཉྩ ཨཱརབྦྷ པཝཏྟཱ པཉྙཱ ཝཱཙཱརམྨཎེ ཉཱཎཾ. ཏསྶཱ ཝཱཙཱཡ སམུདཡཱདིཏོ པརིཛཱནནཾ ཝཱཙཱཔརིཉྙཱ.

‘‘ཀཏམཾ མནོམོནེཡྻཾ? ཏིཝིདྷམནོདུཙྩརིཏསྶ པཧཱནཾ མནོམོནེཡྻཾ, ཏིཝིདྷཾ མནོསུཙྩརིཏཾ, མནཱརམྨཎེ ཉཱཎཾ, མནཔརིཉྙཱ, པརིཉྙཱསཧགཏོ མགྒོ, མནསྨིཾ ཚནྡརཱགསྶ པཧཱནཾ, ཙིཏྟསངྑཱརནིརོདྷོ སཉྙཱཝེདཡིཏནིརོདྷསམཱཔཏྟི མནོམོནེཡྻ’’ནྟི ཨིམཱཡ པཱལི༹ཡཱ ཨཱགཏནཡེན ཨཏྠཾ ཝིབྷཱཝེནྟོ ‘‘མནོམོནེཡྻེཔི ཨིམིནཱཝ ནཡེན ཨཏྠཾ ཉཏྭཱ’’ཏིཨཱདིམཱཧ. ཏཏྠ ཙ ཨེཀཱསཱིཏིཝིདྷཾ ལོཀིཡཙིཏྟཾ ཨཱརབྦྷ པཝཏྟཉཱཎཾ མནཱརམྨཎེ ཉཱཎཾ. ཏསྶ སམུདཡཱདིཏོ པརིཛཱནནཾ མནཔརིཉྙཱཏི ཨཡཾ ཝིསེསོ.

མོནེཡྻསུཏྟཝཎྞནཱ ནིཊྛིཏཱ.

ཨཱཔཱཡིཀཝགྒཝཎྞནཱ ནིཊྛིཏཱ.

(༡༣) ༣. ཀུསིནཱརཝགྒོ

༡-༢. ཀུསིནཱརསུཏྟཱདིཝཎྞནཱ

༡༢༤-༡༢༥. ཏཏིཡསྶ ¶ པཋམེ ཏཎྷཱགེདྷེན གཐིཏོཏི ཏཎྷཱབནྡྷནེན བདྡྷོ. ཏཎྷཱམུཙྪནཱཡཱཏི ཏཎྷཱཡ ཝསེན མུཙྪཱཔཏྟིཡཱ. མུཙྪིཏོཏི མུཙྪཾ མོཧཾ པམཱདཾ ཨཱཔནྣོ. ཨཛ྄ཛྷོཔནྣོཏི ཨདྷིཨོཔནྣོ. ཏཎྷཱཡ ཨདྷིབྷཝིཏྭཱ ཨཛ྄ཛྷོཏྠཊོ གིལིཏྭཱ པརིནིཊྛཔེཏྭཱ ཝིཡ ཋིཏོ. ཏེནཱཧ ‘‘ཨཛ྄ཛྷོཔནྣོཏི ཏཎྷཱཡ གིལིཏྭཱ པརིནིཊྛཔེཏྭཱ པཝཏྟོ’’ཏི. ཨནཱདཱིནཝདསྶཱཝཱིཏི གཐིཏཱདིབྷཱཝེན པརིབྷོགེ ཨཱདཱིནཝམཏྟམྤི ན པསྶཏི. ནིསྶརཎཔཉྙོཏི ཨཡམཏྠོ ཨཱཧཱརཔརིབྷོགེཏི ཏཏྠ པཡོཛནཔརིཙྪེདིཀཱ ‘‘ཡཱཝདེཝ ཨིམསྶ ཀཱཡསྶ ཋིཏིཡཱ’’ཏིཨཱདིནཱ (མ. ནི. ༡.༢༣; ༢.༢༤; ༣.༧༥; སཾ. ནི. ༤.༡༢༠; ཨ. ནི. ༦.༥༨; ༨.༩) པཝཏྟཱ ¶ ཨཱཧཱརཔཊིབདྡྷཚནྡརཱགནིསྶརཎབྷཱུཏཱ པཉྙཱ ཨསྶ ཨཏྠཱིཏི ནིསྶརཎཔཉྙོ. སེསམེཏྠ ཨུཏྟཱནམེཝ. དུཏིཡེ ནཏྠི ཝཏྟབྦཾ.

ཀུསིནཱརསུཏྟཱདིཝཎྞནཱ ནིཊྛིཏཱ.

༣. གོཏམཀཙེཏིཡསུཏྟཝཎྞནཱ

༡༢༦. ཏཏིཡེ སམྦཧུལཱཏི པཉྩསཏམཏྟཱ. པཉྩསཏཱ ཀིར བྲཱཧྨཎཱ ཏིཎྞཾ ཝེདཱནཾ པཱརགཱུ ཨཔརབྷཱགེ བྷགཝཏོ དྷམྨདེསནཾ སུཏྭཱ ཀཱམེསུ ཨཱདཱིནཝཾ ནེཀྑམྨེ ཙ ཨཱནིསཾསཾ པསྶམཱནཱ བྷགཝཏོ སནྟིཀེ པབྦཛིཏྭཱ ན ཙིརསྶེཝ སབྦཾ བུདྡྷཝཙནཾ ཨུགྒཎྷིཏྭཱ པརིཡཏྟིཾ ནིསྶཱཡ མཱནཾ ཨུཔྤཱདེསུཾ – ‘‘ཡཾ ཡཾ བྷགཝཱ ཀཐེཏི, ཏཾ ཏཾ མཡཾ ཁིཔྤམེཝ ཛཱནཱམ. བྷགཝཱ ཧི ཨིཏྠིལིངྒཱདཱིནི ཏཱིཎི ལིངྒཱནི, ནཱམཱདཱིནི ཙཏྟཱརི པདཱནི, པཋམཱདཡོ སཏྟ ཝིབྷཏྟིཡོ མུཉྩིཏྭཱ ན ཀིཉྩི ཀཐེཏི, ཨེཝཾ ཀཐིཏེ ཙ ཨམྷཱཀཾ གཎྛིཔདཾ ནཱམ ནཏྠཱི’’ཏི, ཏེ བྷགཝཏི ཨགཱརཝཱ ཧུཏྭཱ ཏཏོ པཊྛཱཡ བྷགཝཏོ ཨུཔཊྛཱནམྤི དྷམྨསྶཝནམྤི ཨབྷིཎྷཾ ན གཙྪནྟི. ཏེ སནྡྷཱཡ ཝུཏྟཾ ‘‘སམྦཧུལཱ ཀིར བྲཱཧྨཎཔབྦཛིཏཱ…པེ… དྷམྨསྶཝནཾ ན གཙྪནྟཱི’’ཏི. མུཁཔཊིཉྙཾ གཧེཏྭཱཏི ‘‘སཙྩཾ ཀིར ཏུམྷེ, བྷིཀྑཝེ’’ཏིཨཱདིནཱ ཏམཏྠཾ པཊིཔུཙྪིཏྭཱ ‘‘སཙྩཾ བྷགཝཱ’’ཏི ཏེཧི བྷིཀྑཱུཧི ཝུཏྟཾ པཊིཝཙནཾ གཧེཏྭཱ. ཏཉྷི ཨཏྟནོ མུཁེནེཝ པཊིཉྙཱཏཏྟཱ ‘‘མུཁཔཊིཉྙཱ’’ཏི ཝུཙྩཏི.

ནེཝ ¶ ཨཱགཏཊྛཱནཾ ན གཏཊྛཱནཾ ཨདྡསཾསུ. ཀསྨཱ? ཨཉྙཱཎཏོ. ཏེ ཀིར ཏསྶ སུཏྟསྶ ཨཏྠཾ ན ཛཱནིཾསུ. ཏེསཉྷི ཏསྨིཾ སམཡེ ཝིཙིཏྲནཡཾ དེསནཱཝིལཱསཡུཏྟམྤི ཏཾ སུཏྟཾ གྷནཔུཐུལེན དུསྶཔཊྚེན མུཁཾ བདྡྷཾ ཀཏྭཱ པུརཏོ ཋཔིཏམནུཉྙབྷོཛནཾ ཝིཡ ཨཧོསི. ནནུ ཙ བྷགཝཱ ཨཏྟནཱ དེསིཏཾ དྷམྨཾ པརེ ཉཱཔེཏུཾ ཀཔྤསཏསཧསྶཱདྷིཀཱནི ཙཏྟཱརི ཨསངྑེཡྻཱནི པཱརམིཡོ པཱུརེཏྭཱ སབྦཉྙུཏཾ པཏྟོ, སོ ཀསྨཱ ཡཐཱ ཏེ ན ཛཱནནྟི, ཏཐཱ དེསེཏཱིཏི? ཏེསཾ མཱནབྷཉྫནཏྠཾ. བྷགཝཱ ཧི ‘‘ཨབྷབྦཱ ཨིམེ ཨིམཾ མཱནཁིལཾ ཨནུཔཧཙྩ མགྒཾ ཝཱ ཕལཾ ཝཱ སཙྪིཀཱཏུ’’ནྟི ཏེསཾ སུཏཔརིཡཏྟིཾ ནིསྶཱཡ ཨུཔྤནྣཾ ཨཊྛུཔྤཏྟིཾ ཀཏྭཱ དེསནཱཀུསལོ མཱནབྷཉྫནཏྠཾ ‘‘སབྦདྷམྨམཱུལཔརིཡཱཡ’’ནྟིཨཱདིནཱ མཱུལཔརིཡཱཡསུཏྟཾ (མ. ནི. ༡.༡) ཨབྷཱསི.

སམྨཱསམྦུདྡྷོ ¶ ‘‘མཡ྄ཧཾ ཀཐཱ ནིཡྻཱཏཱི’’ཏི མུཁསམྤཏྟམེཝ ཀཐེཏཱིཏི ཙིནྟཡིཾསཱུཏི ཨིདཾ ཨངྒུཏྟརབྷཱཎཀཱནཾ ཝལ༹ཉྫནཀཏནྟིནཱིཧཱརེན ཝུཏྟཾ. མཛ྄ཛྷིམབྷཱཎཀཱ པན ཨེཝཾ ཝདནྟི – ཨེཝཾ མཱནབྷཉྫནཏྠཾ དེསིཏཉྩ པན ཏཾ སུཏྟཾ སུཏྭཱ ཏེ བྷིཀྑཱུ ‘‘ཏཾཡེཝ ཀིར པཐཝིཾ དིཊྛིགཏིཀོ སཉྫཱནཱཏི, སེཁོཔི ཨརཧཱཔི ཏཐཱགཏོཔི ཨབྷིཛཱནཱཏི, ཀི ནཱམིདཾ ཀཐཾ ནཱམིད’’ནྟི ཙིནྟེནྟཱ ‘‘པུབྦེ མཡཾ བྷགཝཏཱ ཀཐིཏཾ ཡཾཀིཉྩི ཁིཔྤམེཝ ཛཱནཱམ, ཨིདཱནི པནིམསྶ མཱུལཔརིཡཱཡསྶ ཨནྟཾ ཝཱ ཀོཊིཾ ཝཱ ན ཛཱནཱམ ན པསྶཱམ, ཨཧོ བུདྡྷཱ ནཱམ ཨཔྤམེཡྻཱ ཨཏུལཱ’’ཏི ཨུདྡྷཏདཱཋཱ ཝིཡ སཔྤཱ ནིམྨདཱ ཧུཏྭཱ བུདྡྷཱུཔཊྛཱནཉྩ དྷམྨསྶཝནཉྩ སཀྐཙྩཾ ཨགམཾསུ. ཏེན སམཡེན དྷམྨསབྷཱཡཾ སནྣིསིནྣཱ བྷིཀྑཱུ ‘‘ཨཧོ བུདྡྷཱནཾ ཨཱནུབྷཱཝོ, ཏེ ནཱམབྲཱཧྨཎཔབྦཛིཏཱ ཏཐཱ མཱནམདམཏྟཱ བྷགཝཏཱ མཱུལཔརིཡཱཡདེསནཱཡ ནིཧཏམཱནཱ ཀཏཱ’’ཏི ཀཐཾ སམུཊྛཱཔེསུཾ. ཏཾ སུཏྭཱ བྷགཝཱ ‘‘ན, བྷིཀྑཝེ, ཨིདཱནེཝ, པུབྦེཔི ཨཧཾ ཨེཝཾ ཨིམེ མཱནཔགྒཧིཏསཱིསེ ཙརནྟེ ནིཧཏམཱནེ ཨཀཱསི’’ནྟི ཝཏྭཱ ཨཏཱིཏཾ ཨཱཧརནྟོ ‘‘བྷཱུཏཔུབྦཾ, བྷིཀྑཝེ, ཨཉྙཏརོ དིསཱཔཱམོཀྑོ བྲཱཧྨཎོ བཱརཱཎསིཡཾ པཊིཝསཏི ཏིཎྞཾ ཝེདཱནཾ པཱརགཱུ སནིགྷཎྚུཀེཊུབྷཱནཾ སཱཀྑརཔྤབྷེདཱནཾ ཨིཏིཧཱསཔཉྩམཱནཾ པདཀོ ཝེཡྻཱཀརཎོ ལོཀཱཡཏམཧཱཔུརིསལཀྑཎེསུ ཨནཝཡོ, སོ པཉྩམཏྟཱནི མཱཎཝཀསཏཱནི མནྟེ ཝཱཙེཏི. པཎྜིཏམཱཎཝཀཱ བཧུཉྩ གཎྷནྟི ལཧུཉྩ, སུཊྛུ ཙ ཨུཔདྷཱརེནྟཱི’’ཏིཨཱདིནཱ ཛཱཏཀཾ ཀཐེསི.

ཏཾ ¶ སུཏྭཱ ཏེ བྷིཀྑཱུ ‘‘པུབྦེཔི མཡཾ མཱནེནེཝ ཨུཔཧཏཱ’’ཏི བྷིཡྻོསོམཏྟཱཡ ནིཧཏམཱནཱ ཧུཏྭཱ ཨཏྟནོ ཨུཔཀཱརཀམྨཊྛཱནཔརཱཡཎཱ ཨཧེསུཾ. ཏཏོ བྷགཝཱ ཨེཀཾ སམཡཾ ཛནཔདཙཱརིཀཾ ཙརནྟོ ཝེསཱལིཾ པཏྭཱ གོཏམཀེ ཙེཏིཡེ ཝིཧརནྟོ ཨིམེསཾ པཉྩསཏཱནཾ བྷིཀྑཱུནཾ ཉཱཎཔརིཔཱཀཾ ཝིདིཏྭཱ ཨིདཾ གོཏམཀསུཏྟཾ ཀཐེསི. ཨིདཉྩ སུཏྟཾ སུཏྭཱ ཏེ པཉྩསཏཱ བྷིཀྑཱུ ཏསྨིཾཡེཝ ཨཱསནེ སཧ པཊིསམྦྷིདཱཧི ཨརཧཏྟཾ པཱཔུཎིཾསཱུཏི.

ཨབྷིཉྙཱཡཱཏི ཀུསལཱདིབྷེདཾ ཁནྡྷཱདིབྷེདཉྩ དེསེཏབྦཾ དྷམྨཾ, ཝེནེཡྻཱནཉྩ ཨཱསཡཱནུསཡཙརིཡཱདྷིམུཏྟིཨཱདིབྷེདཾ, ཏསྶ ཙ ནེསཾ དེསེཏབྦཔྤཀཱརཾ ཡཱཐཱཝཏོ ཨབྷིཛཱནིཏྭཱཏི ཨཏྠོ. ཨིམེ པཉྩཀྑནྡྷཱ དྭཱདསཱཡཏནཱནཱིཏིཨཱདི པནེཏྠ ནིདསྶནམཏྟཾ ཝུཏྟནྟི ཝེདིཏབྦཾ. སཔྤཙྩཡནྟི སཀཱརཎཾ, ཝེནེཡྻཱནཾ ཨཛ྄ཛྷཱསཡེན ཝཱ པུཙྪཱཡ ཝཱ ཨཊྛུཔྤཏྟིཡཱ ཝཱ སནིམིཏྟཾ ཧེཏཱུདཱཧརཎསཧིཏཉྩཱཏི ཨཏྠོ. རཱགཱདཱིནཾ པཊིཧརཎཾ པཊིཧཱརིཡཾ, ཏདེཝ པཱཊིཧཱརིཡཾ, སཧ པཱཊིཧཱརིཡེནཱཏི སཔྤཱཊིཧཱརིཡཾ. རཱགཱདིཔྤཊིསེདྷནཝསེནེཝ ཧི སཏྠཱ དྷམྨཾ དེསེཏི. ཏེནཱཧ ‘‘པཙྩནཱིཀཔཊིཧརཎེན སཔྤཱཊིཧཱརིཡམེཝ ཀཏྭཱ’’ཏི. ཨཔརེ པན ‘‘ཡཐཱརཧཾ ཨིདྡྷིཨཱདེསནཱནུསཱསནིཔཱཊིཧཱརིཡསཧིཏ’’ནྟི ¶ ཝདནྟི ཨནུསཱསནིཔཱཊིཧཱརིཡརཧིཏཱ དེསནཱ ནཏྠཱིཏི ཀཏྭཱ. སེསམེཏྠ ཨུཏྟཱནམེཝ.

གོཏམཀཙེཏིཡསུཏྟཝཎྞནཱ ནིཊྛིཏཱ.

༤. བྷརཎྜུཀཱལཱམསུཏྟཝཎྞནཱ

༡༢༧. ཙཏུཏྠེ ཨཱལཱ༹རཀཱལཱམཀཱལེཏི ཨཱལཱ༹རཀཱལཱམཱནཾ དྷརམཱནཀཱལེ. པརིཉྙནྟི པཧཱནཔརིཉྙཾ. སཱ ཧི སམཏིཀྐམོ, ན ཨིཏརཱ. ཏེནཱཧ ‘‘པརིཉྙཱ ནཱམ སམཏིཀྐམོ’’ཏི. ཨེཏྠ ཙ པཋམོ སཏྠཱ རཱུཔཱཝཙརསམཱཔཏྟིལཱབྷཱི དཊྛབྦོ, དུཏིཡོ ཨརཱུཔཱཝཙརསམཱཔཏྟིལཱབྷཱི, ཏཏིཡོ སམྨཱསམྦུདྡྷོ དཊྛབྦོ. ཝུཏྟཉྷེཏཾ པུགྒལཔཉྙཏྟིཡཾ (པུ. པ. ༡༣༠) –

‘‘ཡྭཱཡཾ ¶ སཏྠཱ ཀཱམཱནཾ པརིཉྙཾ པཉྙཱཔེཏི, ན རཱུཔཱནཾ པརིཉྙཾ པཉྙཱཔེཏི, ན ཝེདནཱནཾ པརིཉྙཾ པཉྙཱཔེཏི, རཱུཔཱཝཙརསམཱཔཏྟིཡཱ ལཱབྷཱི སཏྠཱ ཏེན དཊྛབྦོ. ཡྭཱཡཾ སཏྠཱ ཀཱམཱནཉྩ པརིཉྙཾ པཉྙཱཔེཏི, རཱུཔཱནཉྩ པརིཉྙཾ པཉྙཱཔེཏི, ན ཝེདནཱནཾ པརིཉྙཾ པཉྙཱཔེཏི, ཨརཱུཔཱཝཙརསམཱཔཏྟིཡཱ ལཱབྷཱི སཏྠཱ ཏེན དཊྛབྦོ. ཡྭཱཡཾ སཏྠཱ ཀཱམཱནཉྩ པརིཉྙཾ པཉྙཱཔེཏི, རཱུཔཱནཉྩ པརིཉྙཾ པཉྙཱཔེཏི, ཝེདནཱནཉྩ པརིཉྙཾ པཉྙཱཔེཏི, སམྨཱསམྦུདྡྷོ སཏྠཱ ཏེན དཊྛབྦོ’’ཏི.

ཏཏྠ ཏིཏྠིཡཱ སམཡཾ ཛཱནནྟཱ ཀཱམཱནཾ པརིཉྙཾ པཉྙཱཔེཡྻུཾ པཋམཛ྄ཛྷཱནཾ ཝདམཱནཱ. རཱུཔཱནཾ པརིཉྙཾ པཉྙཱཔེཡྻུཾ ཨརཱུཔརཱགཾ ཝདམཱནཱ. ཝེདནཱཔརིཉྙཾ པཉྙཱཔེཡྻུཾ ཨསཉྙཱརཱགཾ ཝདམཱནཱ. ཏེ པན ‘‘ཨིདཾ ནཱམ པཋམཛ྄ཛྷཱནཾ, ཨཡཾ རཱུཔབྷཝོ, ཨཡཾ ཨསཉྙཱབྷཝོ’’ཏིཔི ན ཛཱནནྟི. ཏེ པཉྙཱཔེཏུཾ ཨསཀྐོནྟཱཔི ཀེཝལཾ ‘‘པཉྙཱཔེམཱ’’ཏི ཝདནྟི. ཏཐཱགཏོ པན ཀཱམཱནཾ པརིཉྙཾ ཨནཱགཱམིམགྒེན པཉྙཱཔེཏི, རཱུཔཝེདནཱནཾ ཨརཧཏྟམགྒེན. ཨེཝམེཏྠ དྭེ ཛནཱ བཱཧིརཀཱ, ཨེཀོ སམྨཱསམྦུདྡྷོཏི ཨིམསྨིཾ ལོཀེ ཏཡོ སཏྠཱརོ ནཱམ.

བྷརཎྜུཀཱལཱམསུཏྟཝཎྞནཱ ནིཊྛིཏཱ.

༥. ཧཏྠཀསུཏྟཝཎྞནཱ

༡༢༨. པཉྩམེ ¶ ཨབྷིཀྐནྟཱཏི ཨཏིཀྐནྟཱ, ཝིགཏཱཏི ཨཏྠོཏི ཨཱཧ ‘‘ཁཡེ དིསྶཏཱི’’ཏི. ཏེནེཝ ཧི ‘‘ནིཀྑནྟོ པཋམོ ཡཱམོ’’ཏི ཨནནྟརཾ ཝུཏྟཾ. ཨབྷིཀྐནྟཏརོཏི ཨཏིཝིཡ ཀནྟཏརོ. ཏཱདིསོ ཙ སུནྡརོ བྷདྡཀོ ནཱམ ཧོཏཱིཏི ཨཱཧ ‘‘སུནྡརེ དིསྶཏཱི’’ཏི. ཀོཏི དེཝནཱགཡཀྑགནྡྷབྦཱདཱིསུ ཀོ ཀཏམོ? མེཏི མམ. པཱདཱནཱིཏི པཱདེ. ཨིདྡྷིཡཱཏི ཨིམཱཡ ཨེཝརཱུཔཱཡ དེཝིདྡྷིཡཱ. ཡསསཱཏི ཨིམིནཱ ཨེདིསེན པརིཝཱརེན པརིཙྪེདེན. ཛལནྟི ཝིཛྫོཏམཱནོ. ཨབྷིཀྐནྟེནཱཏི ཨཏིཝིཡ ཀནྟེན ཀམནཱིཡེན ཨབྷིརཱུཔེན. ཝཎྞེནཱཏི ཚཝིཝཎྞེན སརཱིརཝཎྞནིབྷཱཡ. སབྦཱ ཨོབྷཱསཡཾ དིསཱཏི དས དིསཱ པབྷཱསེནྟོ, ཙནྡོ ཝིཡ སཱུརིཡོ ཝིཡ ཙ ཨེཀོབྷཱསཾ ཨེཀཱལོཀཾ ཀརོནྟོཏི གཱཐཱཡ ཨཏྠོ. ཨབྷིརཱུཔེཏི ཨུལཱ༹རརཱུཔེ སམྤནྣརཱུཔེ. ཨབྦྷནུམོདནེཏི སམྤཧཾསནེ ¶ . ཨིདྷ པནཱཏི ‘‘ཨབྷིཀྐནྟཱཡ རཏྟིཡཱ’’ཏི ཨེཏསྨིཾ པདེ. ཏེནཱཏི སུནྡརཔརིཡཱཡཏྟཱ. ཁཡེ ཝཱ ཨིདྷ ཨབྷིཀྐནྟསདྡོ དཊྛབྦོ, ཏེན ‘‘ཨབྷིཀྐནྟཱཡ པརིཀྑཱིཎཱཡ རཏྟིཡཱ’’ཏི ཝུཏྟཾ ཧོཏི.

རཱུཔཱཡཏནཱདཱིསཱུཏི ཨཱདིསདྡེན ཨཀྑརཱདཱིནཾ སངྒཧོ དཊྛབྦོ. སུཝཎྞཝཎྞོཏི སུཝཎྞཙྪཝཱིཏི ཨཡམེཏྠ ཨཏྠོཏི ཨཱཧ ‘‘ཚཝིཡ’’ནྟི. ཏཐཱ ཧི ཝུཏྟཾ ‘‘ཀཉྩནསནྣིབྷཏྟཙོ’’ཏི (མ. ནི. ༢.༣༩༩; སུ. ནི. ༥༥༦). སཉྙཱུལ༹ྷཱཏི སམྦནྡྷིཏཱ, གནྠིཏཱཏི ཨཏྠོ. ཝཎྞཱཏི གུཎཝཎྞཱཏི ཨཱཧ ‘‘ཐུཏིཡ’’ནྟི, ཐོམནཱཡནྟི ཨཏྠོ. ཀུལཝགྒེཏི ཁཏྟིཡཱདིཀུལཀོཊྛཱསེ. ཏཏྠ ‘‘ཨཙྪོ ཝིཔྤསནྣོ’’ཏིཨཱདིནཱ ཝཎྞིཏབྦཊྛེན ཝཎྞོ, ཚཝི. ཝཎྞནཊྛེན ཨབྷིཏྠཝཊྛེན ཝཎྞོ, ཐུཏི. ཨཉྙམཉྙཾ ཨསངྐརཏོ ཝཎྞེཏབྦཏོ ཋཔེཏབྦཏོ ཝཎྞོ, ཁཏྟིཡཱདིཀུལཝགྒོ. ཝཎྞཱིཡཏི ཉཱཔཱིཡཏི ཨེཏེནཱཏི ཝཎྞོ, ཉཱཔཀཀཱརཎཾ. ཝཎྞནཏོ ཐཱུལརསྶཱདིབྷཱཝེན ཨུཔཊྛཱནཏོ ཝཎྞོ, སཎྛཱནཾ. མཧནྟཾ ཁུདྡཀཾ མཛ྄ཛྷིམནྟི ཝཎྞེཏབྦཏོ པམིཏབྦཏོ ཝཎྞོ, པམཱཎཾ. ཝཎྞཱིཡཏི ཙཀྑུནཱ པསྶཱིཡཏཱིཏི ཝཎྞོ, རཱུཔཱཡཏནནྟི ཨེཝཾ ཏསྨིཾ ཏསྨིཾ ཨཏྠེ ཝཎྞསདྡསྶ པཝཏྟི ཝེདིཏབྦཱ. སོཏི ཝཎྞསདྡོ. ཚཝིཡཱ དཊྛབྦོ རཱུཔཱཡཏནེ གཡ྄ཧམཱནསྶཔི ཚཝིམུཁེནེཝ གཧེཏབྦཏོ. ཚཝིགཏཱ པན ཝཎྞདྷཱཏུ ཨེཝ ‘‘སུཝཎྞཝཎྞོ’’ཏི ཨེཏྠ ཝཎྞགྒཧཎེན གཧིཏཱཏི ཨཔརེ.

ཀེཝལཔརིཔུཎྞནྟི ཨེཀདེསམྤི ཨསེསེཏྭཱ ནིརཝསེསཏོཝ པརིཔུཎྞནྟི ཨཡམེཏྠ ཨཏྠོཏི ཨཱཧ ‘‘ཨནཝསེསཏཱ ཨཏྠོ’’ཏི. ཀེཝལཀཔྤཱཏི ཀཔྤ-སདྡོ ནིཔཱཏོ པདཔཱུརཎམཏྟཾ, ‘‘ཀེཝལཾ’’ཨིཙྩེཝ ཨཏྠོ. ཀེཝལསདྡོ ཙ བཧུལཝཱཙཱིཏི ཨཱཧ ‘‘ཡེབྷུཡྻཏཱ ཨཏྠོ’’ཏི. ཀེཙི པན ¶ ‘‘ཨཱིསཀཾ ཨསམཏྟཾ ཀེཝལཾ ཀེཝལཀཔྤ’’ནྟི ཝདནྟི. ཨནཝསེསཏྠོ ཨེཏྠ ཀེཝལསདྡོ སིཡཱ, ཨནཏྠནྟརེན པན ཀཔྤསདྡེན པདཝཌྜྷནཾ ཀཏཾ ‘‘ཀེཝལཱ ཨེཝ ཀེཝལཀཔྤཱ’’ཏི. ཏཐཱ ཝཱ ཀཔྤནཱིཡཏྟཱ པཉྙཔེཏབྦཏྟཱ ཀེཝལཀཔྤཱ. ཨབྱཱམིསྶཏཱ ཝིཛཱཏིཡེན ཨསངྐརོ སུདྡྷཏཱ. ཨནཏིརེཀཏཱ ཏཾཔརམཏཱ ཝིསེསཱབྷཱཝོ. ཀེཝལཀཔྤནྟི ཀེཝལཾ ¶ དལ༹ྷཾ ཀཏྭཱཏི ཨཏྠོ. ཀེཝལཾ ཝུཙྩཏི ནིབྦཱནཾ སབྦསངྑཏཝིཝིཏྟཏྟཱ, ཏཾ ཨེཏསྶ ཨདྷིགཏཾ ཨཏྠཱིཏི ཀེཝལཱི, སཙྪིཀཏནིརོདྷོ ཁཱིཎཱསཝོ.

ཀཔྤ-སདྡོ པནཱཡཾ སཨུཔསགྒོ ཨནུཔསགྒོ ཙཱཏི ཨདྷིཔྤཱཡེན ཨོཀཔྤནིཡཔདེ ལབྦྷམཱནཾ ཨོཀཔྤསདྡམཏྟཾ ནིདསྶེཏི, ཨཉྙཐཱ ཀཔྤསདྡསྶ ཨཏྠུདྡྷཱརེ ཨོཀཔྤནིཡཔདཾ ཨནིདསྶནམེཝ སིཡཱ. སམཎཀཔྤེཧཱིཏི ཝིནཡསིདྡྷེཧི སམཎཝོཧཱརེཧི. ནིཙྩཀཔྤནྟི ནིཙྩཀཱལཾ. པཉྙཏྟཱིཏི ནཱམཾ. ནཱམཉྷེཏཾ ཏསྶ ཨཱཡསྨཏོ, ཡདིདཾ ཀཔྤོཏི. ཀཔྤིཏཀེསམསྶཱུཏི ཀཏྟརིཡཱ ཚེདིཏཀེསམསྶུ. དྭངྒུལཀཔྤོཏི མཛ྄ཛྷནྷིཀཝེལཱཡ ཝཱིཏིཀྐནྟཱཡ དྭངྒུལཏཱཝིཀཔྤོ. ལེསོཏི ཨཔདེསོ. ཨནཝསེསཾ ཕརིཏུཾ སམཏྠསྶ ཨོབྷཱསསྶ ཀེནཙི ཀཱརཎེན ཨེཀདེསཕརཎམྤི སིཡཱ, ཨཡཾ པན སབྦསྶེཝ ཕརཏཱིཏི དསྶེཏུཾ སམནྟཏྠོ ཀཔྤསདྡོ གཧིཏོཏི ཨཱཧ ‘‘ཨནཝསེསཾ སམནྟཏོ’’ཏི.

ཨཱབྷཱཡ ཕརིཏྭཱཏི ཝཏྠམཱལཱལངྐཱརསརཱིརསམུཊྛིཏཱཡ ཨཱབྷཱཡ ཕརིཏྭཱ. དེཝཏཱནཉྷི སརཱིརོབྷཱསཾ དྭཱདསཡོཛནམཏྟཾ ཋཱནཾ. ཏཏོ བྷིཡྻོཔི ཕརིཏྭཱ ཏིཊྛཏི, ཏཐཱ ཝཏྠཱབྷརཎཱདིསམུཊྛིཏཱ པབྷཱ.

ཧཏྠཀསུཏྟཝཎྞནཱ ནིཊྛིཏཱ.

༦. ཀཊུཝིཡསུཏྟཝཎྞནཱ

༡༢༩. ཚཊྛེ གཱཝཱིནཾ ཀཡཝིཀྐཡཝསེན ཡོགོ ཨེཏྠཱཏི གོཡོགོ, ཀཡཝིཀྐཡཾ ཀརོནྟོ གཱཝཱིཧི ཡུཛྫནྟི ཨེཏྠཱཏི ཝཱ གོཡོགོ, གཱཝཱིནཾ ཝིཀྐཡཊྛཱནཾ. ཏཏྠ ཛཱཏོ པིལཀྑརུཀྑོ གོཡོགཔིལཀྑོ, ཏསྨིཾ. སམཱིཔཏྠེ ཙེཏཾ བྷུམྨཝཙནཾ. ཏེནཱཧ ‘‘གཱཝཱིནཾ ཝིཀྐཡཊྛཱནེ ཨུཊྛིཏཔིལཀྑསྶ སནྟིཀེ’’ཏི. རིཏྟོ ཨསྶཱདོ ཨེཏསྶཱཏི རིཏྟསྶཱདོ. ཏེནཱཧ ‘‘ཛྷཱནསུཁཱབྷཱཝེན རིཏྟསྶཱད’’ནྟི. སེསམེཏྠ ཨུཏྟཱནམེཝ.

ཀཊུཝིཡསུཏྟཝཎྞནཱ ནིཊྛིཏཱ.

༨. དུཏིཡཨནུརུདྡྷསུཏྟཝཎྞནཱ

༡༣༡. ཨཊྛམེ ¶ ¶ ཨིདཾ ཏེ མཱནསྨིནྟི ཨེཏྠ མཱནསྨིནྟི པཙྩཏྟེ བྷུམྨཝཙནཾ. ཨིདནྟི ཙ ལིངྒཝིཔལླཱསེན ནཔུཾསཀནིདྡེསོ ཀཏོཏི ཨཱཧ ‘‘ཨཡཾ ཏེ ནཝཝིདྷེན ཝཌྜྷིཏམཱནོ’’ཏི. སེསེསུཔི ཨེསེཝ ནཡོ.

དུཏིཡཨནུརུདྡྷསུཏྟཝཎྞནཱ ནིཊྛིཏཱ.

༩. པཊིཙྪནྣསུཏྟཝཎྞནཱ

༡༣༢. ནཝམེ ཨསཱདྷཱརཎསིཀྑཱཔདནྟི བྷིཀྑུནཱིནཾ ཨསཱདྷཱརཎཾ བྷིཀྑཱུནཾཡེཝ པཉྙཏྟསིཀྑཱཔདཾ སཱདྷཱརཎསིཀྑཱཔདནྟི བྷིཀྑཱུནཾ བྷིཀྑུནཱིནཉྩ སཱདྷཱརཎཾ ཨུབྷཏོཔཉྙཏྟིསིཀྑཱཔདཾ.

པཊིཙྪནྣསུཏྟཝཎྞནཱ ནིཊྛིཏཱ.

༡༠. ལེཁསུཏྟཝཎྞནཱ

༡༣༣. དསམེ ཐིརཊྛཱནཏོཏི ཐིརཊྛཱནཏོཝ. པཱསཱཎེ ལེཁསདིསཱ པརཱཔརཱདྷནིབྦཏྟཱ ཀོདྷལེཁཱ ཡསྶ སོ པཱསཱཎལེཁཱུཔམསམནྣཱགཏོ པཱསཱཎལེཁཱུཔམོཏི ཝུཏྟོ. ཨེཝཾ ཨིཏརེཔི. ཨནུསེཏཱིཏི ཨཔྤཧཱིནཏཱཡ ཨནུསེཏི. ན ཁིཔྤཾ ལུཛྫཏཱིཏི ན ཨནྟརཱ ནསྶཏི ཀམྨཊྛཱནེནེཝ ནསྶནཏོ. ཨེཝམེཝནྟི ཨེཝཾ ཏསྶཔི པུགྒལསྶ ཀོདྷོ ན ཨནྟརཱ པུནདིཝསེ ཝཱ ཨཔརདིཝསེ ཝཱ ནིཊྛཱཏི, ཨདྡྷནིཡོ པན ཧོཏི, མརཎེནེཝ ནིཊྛཱཏཱིཏི ཨཏྠོ. ཀཀྑལེ༹ནཱཏི ཨཏིཀཀྑལེ༹ན དྷམྨཙྪེདཀེན ཐདྡྷཝཙནེན. སཾསནྡཏཱིཏི ཨེཀཱིབྷཝཏི. སམྨོདཏཱིཏི ནིརནྟརོ ཧོཏཱིཏི ཨེཝམེཏྠ ཨཏྠོ དཊྛབྦོ.

ཨཐ ཝཱ སནྡྷིཡཏཱིཏི ཋཱནགམནཱདཱིསུ ཀཱཡཀིརིཡཱསུ ཀཱཡེན སམོདྷཱནཾ གཙྪཏི, ཏིལཏཎྜུལཱ ཝིཡ མིསྶཱིབྷཱཝཾ ཨུཔེཏཱིཏི ཨཏྠོ. སཾསནྡཏཱིཏི ཙིཏྟཀིརིཡཱསུ ཙིཏྟེན སམོདྷཱནཾ གཙྪཏི, ཁཱིརོདཀཾ ཝིཡ ཨེཀཱིབྷཱཝཾ ཨུཔེཏཱིཏི ཨཏྠོ. སམྨོདཏཱིཏི ཨུདྡེསཔརིཔུཙྪཱདཱིསུ ཝཙཱིཀིརིཡཱསུ ¶ ཝཱཙཱཡ སམོདྷཱནཾ གཙྪཏི, ཝིཔྤཝཱསཱགཏོཔི པིཡསཧཱཡཀོ ཝིཡ པིཡཏརབྷཱཝཾ ཨུཔེཏཱིཏི ¶ ཨཏྠོ. ཨཔིཙ ཀིཙྩཀརཎཱིཡེསུ ཏེཧི སདྡྷིཾ ཨཱདཱིཏོཝ ཨེཀཀིརིཡཱབྷཱཝཾ ཨུཔགཙྪནྟོ སནྡྷིཡཏི, ཡཱཝ མཛ྄ཛྷཱ པཝཏྟནྟོ སཾསནྡཏི, ཡཱཝ པརིཡོསཱནཱ ཨནིཝཏྟནྟོ སམྨོདཏཱིཏི ཝེདིཏབྦོ.

ལེཁསུཏྟཝཎྞནཱ ནིཊྛིཏཱ.

ཀུསིནཱརཝགྒཝཎྞནཱ ནིཊྛིཏཱ.

(༡༤) ༤. ཡོདྷཱཛཱིཝཝགྒོ

༡. ཡོདྷཱཛཱིཝསུཏྟཝཎྞནཱ

༡༣༤. ཙཏུཏྠསྶ པཋམེ ཡུཛ྄ཛྷནཾ ཡོདྷོ, སོ ཨཱཛཱིཝོ ཨེཏསྶཱཏི ཡོདྷཱཛཱིཝོ. ཡུདྡྷམུཔཛཱིཝཏཱིཏི ཝཱ ཨེཏསྨིཾ ཨཏྠེ ཡོདྷཱཛཱིཝོཏི ནིརུཏྟིནཡེན པདསིདྡྷི ཝེདིཏབྦཱ. ཏེནཱཧ ‘‘ཡུདྡྷཾ ཨུཔཛཱིཝཏཱིཏི ཡོདྷཱཛཱིཝོ’’ཏི. སཧ…པེ… པསྶཏཱིཏི པུབྦབྷཱགེ ཝིཔསྶནཱཔཉྙཱཡ སམྨསནཝསེན, མགྒཀྑཎེ ཨབྷིསམཡཝསེན ཨཏྟཔཙྩཀྑེན ཉཱཎེན པསྶཏི.

ཡོདྷཱཛཱིཝསུཏྟཝཎྞནཱ ནིཊྛིཏཱ.

༢. པརིསཱསུཏྟཝཎྞནཱ

༡༣༥. དུཏིཡེ ཨཔྤཊིཔུཙྪིཏྭཱ ཝིནཱིཏཱཏི ‘‘ཏཾ ཀིཾ མཉྙཐ, བྷིཀྑཝེ, རཱུཔཾ ནིཙྩཾ ཝཱ ཨནིཙྩཾ ཝཱ’’ཏིཨཱདིནཱ ཨཔྤཊིཔུཙྪིཏྭཱ ཀེཝལཾ དྷམྨདེསནཱཝསེནེཝ ཝིནཱིཏཔརིསཱ. དུབྦིནཱིཏཔརིསཱཏི དུཀྑེན ཝིནཱིཏཔརིསཱ. པུཙྪིཏྭཱ ཝིནཱིཏཱཏི ‘‘ཏཾ ཀིཾ མཉྙཐ, བྷིཀྑཝེ’’ཏིཨཱདིནཱ པུཙྪིཏྭཱ ཨནུམཏིགྒཧཎཝསེན ཝིནཱིཏཱ. སུཝིནཱིཏཔརིསཱཏི སུཁེན ཝིནཱིཏཔརིསཱ. ཨནུམཏིགྒཧཎཝསེན ཝིནཡནཉྷི ན དུཀྐརཾ ཧོཏི.

པརིསཱསུཏྟཝཎྞནཱ ནིཊྛིཏཱ.

༤. ཨུཔྤཱདཱསུཏྟཝཎྞནཱ

༡༣༧. ཙཏུཏྠེ ¶ ¶ ཨུཔྤཱདཱ ཝཱ ཏཐཱགཏཱནནྟི ཏཐཱགཏཱནཾ ཨུཔྤཱདེཔི ཝེནེཡྻཔུགྒལཱནཾ མགྒཕལུཔྤཏྟི ཝིཡ སངྑཱརཱནཾ ཨནིཙྩཱདིསབྷཱཝོ ན ཏཐཱགཏུཔྤཱདཱཡཏྟོ, ཨཐ ཁོ ཏཐཱགཏཱནཾ ཨུཔྤཱདེཔི ཨནུཔྤཱདེཔི ཧོཏིམེཝཱཏི ཝུཏྟཾ ཧོཏི. ཋིཏཱཝ སཱ དྷཱཏཱུཏི ཋིཏོ ཨེཝ སོ ཨནིཙྩསབྷཱཝོ བྱབྷིཙཱརཱབྷཱཝཏོ ན ཀདཱཙི སངྑཱརཱ ཨནིཙྩཱ ན ཧོཏི. ཀཱམཾ ཨསངྑཏཱ ཝིཡ དྷཱཏུ ན ནིཙྩོ སོ སབྷཱཝོ, ཏཐཱཔི སབྦཀཱལིཀོཡེཝཱཏི ཨདྷིཔྤཱཡོ.

ཨཔརོ ནཡོ – ཋིཏཱཝ སཱ དྷཱཏཱུཏི ‘‘སབྦེ སངྑཱརཱ ཨནིཙྩཱ’’ཏི ཨེསཱ དྷཱཏུ ཨེས སབྷཱཝོ ཏཐཱགཏཱནཾ ཨུཔྤཱདཏོ པུབྦེ ཨུདྡྷཉྩ ཨཔྤཊིཝིཛ྄ཛྷིཡམཱནོ ན ཏཐཱགཏེཧི ཨུཔྤཱདིཏོ, ཨཐ ཁོ སབྦཀཱལཾ སབྦེ སངྑཱརཱ ཨནིཙྩཱ, ཋིཏཱཝ སཱ དྷཱཏུ, ཀེཝལཾ པན སཡམྦྷུཉཱཎེན ཨབྷིསམྦུཛ྄ཛྷནཏོ ‘‘ཨཡཾ དྷམྨོ ཏཐཱགཏེན ཨབྷིསམྦུདྡྷོ’’ཏི པཝེདནཏོ ཙ ཏཐཱགཏོ དྷམྨསྶཱམཱིཏི ཝུཙྩཏི ཨཔུབྦསྶ ཏསྶ ཨུཔྤཱདནཏོ. ཏེན ཝུཏྟཾ ‘‘ཋིཏཱཝ སཱ དྷཱཏཱུ’’ཏི.

ཨབྷིསམྦུཛ྄ཛྷཏཱིཏི ཉཱཎེན ཨབྷིསམྦུཛ྄ཛྷཏི. ཨབྷིསམེཏཱིཏི ཉཱཎེན ཨབྷིསམཱགཙྪཏི. ཨཱཙིཀྑཏཱིཏི ཀཐེཏི. དེསེཏཱིཏི དསྶེཏི. པཉྙཱཔེཏཱིཏི ཛཱནཱཔེཏི. པཊྛཔེཏཱིཏི ཉཱཎམུཁེ ཋཔེཏི. ཝིཝརཏཱིཏི ཝིཝརིཏྭཱ དསྶེཏི. ཝིབྷཛཏཱིཏི ཝིབྷཱགཏོ དསྶེཏི. ཨུཏྟཱནཱིཀརོཏཱིཏི པཱཀཊཾ ཀརོཏི.

ཨཐ ཝཱ ཨབྷིསམྦུཛ྄ཛྷཏཱིཏི པཙྩཀྑཀརཎེན ཨབྷིམུཁཾ བུཛ྄ཛྷཏི, ཡཱཐཱཝཏོ པཊིཝིཛ྄ཛྷཏི. ཏཏོ ཨེཝ ཨབྷིསམེཏི ཨབྷིམུཁཾ སམཱགཙྪཏི. ཨཱདིཏོ ཀཐེནྟོ ཨཱཙིཀྑཏི, ཨུདྡིསཏཱིཏི ཨཏྠོ. ཏམེཝ ཨུདྡེསཾ པརིཡོསཱཔེནྟོ དེསེཏི. ཡཐཱཨུདྡིཊྛམཏྠཾ ནིདསྶནཝསེན པཀཱརེཧི ཉཱཔེནྟོ པཉྙཱཔེཏི. པཀཱརེཧི ཨེཏམཏྠཾ པཏིཊྛཔེནྟོ པཊྛཔེཏི. ཡཐཱཨུདྡིཊྛཾ པཊིནིདསྶནཝསེན ཝིཝརཏི ཝིབྷཛཏི. ཝིཝཊཾ ཝིབྷཏྟཉྩ ཨཏྠཾ ཧེཏཱུདཱཧརཎདསྶནེཧི པཱཀཊཾ ཀརོནྟོ ཨུཏྟཱནཱིཀརོཏི.

ཨུཔྤཱདཱསུཏྟཝཎྞནཱ ནིཊྛིཏཱ.

༥-༡༠. ཀེསཀམྦལསུཏྟཱདིཝཎྞནཱ

༡༣༨-༡༤༣. པཉྩམེ ¶ ¶ ཏནྟཱཝུཏཱནཾ ཝཏྠཱནནྟི ཨིདཾ ‘‘ཡཱནི ཀཱནིཙཱི’’ཏི ཨིམིནཱ སམཱནཱདྷིཀརཎནྟི ཨཱཧ ‘‘པཙྩཏྟེ སཱམིཝཙན’’ནྟི. ཝཱཡིཏཱནནྟི ཝཱིཏཱནཾ. ལཱམཀོཏི ནིཧཱིནོ, མཀྑལི མོགྷཔུརིསོཏི ཨེཏྠ མཀྑལཱིཏི ཏསྶ ནཱམཾ. ཏཾ ཀིར སཀདྡམཱཡ བྷཱུམིཡཱ ཏེལགྷཊཾ གཧེཏྭཱ གཙྪནྟཾ, ‘‘ཏཱཏ, མཱ ཁལཱི’’ཏི སཱམིཀོ ཨཱཧ. སོ པམཱདེན ཁལིཏྭཱ པཏིཏྭཱ སཱམིཀསྶ བྷཡེན པལཱཡིཏུཾ ཨཱརདྡྷོ. སཱམིཀོ ཨུཔདྷཱཝིཏྭཱ ནཾ དུསྶཀཎྞེ ཨགྒཧེསི, སཱཊཀཾ ཚཌྜེཏྭཱ ཨཙེལཀོ ཧུཏྭཱ པལཱཡི. སོ པཎྞེན ཝཱ ཏིཎེན ཝཱ པཊིཙྪཱདེཏུམྤི ཨཛཱནནྟོ ཛཱཏརཱུཔེནེཝ ཨེཀཾ གཱམཾ པཱཝིསི. མནུསྶཱ ཏཾ དིསྭཱ ‘‘ཨཡཾ སམཎོ ཨརཧཱ ཨཔྤིཙྪོ, ནཏྠི ཨིམིནཱ སདིསོ’’ཏི པཱུཝབྷཏྟཱདཱིནི གཧེཏྭཱ ཨུཔསངྐམནྟི. སོ ‘‘མཡ྄ཧཾ སཱཊཀཾ ཨནིཝཏྠབྷཱཝེན ཨིདཾ ཨུཔྤནྣ’’ནྟི ཏཏོ པཊྛཱཡ སཱཊཀཾ ལབྷིཏྭཱཔི ན ནིཝཱསེསི, ཏདེཝ ཙ པབྦཛྫཾ ཨགྒཧེསི. ཏསྶ སནྟིཀེ ཨཉྙེཔི ཨཉྙེཔཱིཏི པཉྩསཏཱ མནུསྶཱ པབྦཛིཾསུ. ཏཾ སནྡྷཱཡཱཧ ‘‘མཀྑལི མོགྷཔུརིསོ’’ཏི. ཚཊྛཱདཱིནི ཨུཏྟཱནཏྠཱནི ཨེཝ.

ཀེསཀམྦལསུཏྟཱདིཝཎྞནཱ ནིཊྛིཏཱ.

༡༡-༡༣. པཋམམོརནིཝཱཔསུཏྟཱདིཝཎྞནཱ

༡༤༤-༡༤༦. ཨེཀཱདསམེ ཨཀུཔྤདྷམྨཏཱཡ ཁཡཝཡསངྑཱཏཾ ཨནྟཾ ཨཏཱིཏཱཏི ཨཙྩནྟཱ, ཨེཝཾ ཨཔརིཧཱཡནསབྷཱཝཏྟཱ ཨཙྩནྟཱ ནིཊྛཱ ཨསྶཱཏི ཨཙྩནྟནིཊྛོ. ཏེནཱཧ ‘‘ཨནྟཾ ཨཏིཀྐནྟནིཊྛོ’’ཏིཨཱདི. ན ཧི པཊིཝིདྡྷསྶ ལོཀུཏྟརདྷམྨསྶ དསྶནཾ ཀུཔྤནཾ ནཱམ ཨཏྠི. དྷུཝནིཊྛོཏི སཏཏནིཊྛོ. ཨཙྩནྟམེཝ ཙཏཱུཧི ཡོགེཧི ཁེམོ ཨེཏསྶ ཨཏྠཱིཏི ཨཙྩནྟཡོགཀྑེམཱི, ནིཙྩཡོགཀྑེམཱིཏི ཨཏྠོ. མགྒབྲཧྨཙརིཡསྶ ཝུསིཏཏྟཱ ཏསྶ ཨཝིཧཱཡནསབྷཱཝཏྟཱ ཨཙྩནྟཾ བྲཧྨཙཱརཱིཏི ཨཙྩནྟབྲཧྨཙཱརཱི, ནིཙྩབྲཧྨཙཱརཱིཏི ཨཏྠོ. པརིཡོསཱནནྟི བྲཧྨཙརིཡཔརིཡོསཱནཾ ཝཊྚདུཀྑཔརིཡོསཱནཉྩ ¶ . ཨཙྩནྟཾ པརིཡོསཱནམསྶཱཏི ཨཙྩནྟཔརིཡོསཱནོ. དྭཱདསམཏེརསམཱནི ཨུཏྟཱནཏྠཱནེཝ.

པཋམམོརནིཝཱཔསུཏྟཱདིཝཎྞནཱ ནིཊྛིཏཱ.

ཡོདྷཱཛཱིཝཝགྒཝཎྞནཱ ནིཊྛིཏཱ.

༡༤༧-༡༥༦. མངྒལཝགྒོ ¶ ཨུཏྟཱནཏྠོཡེཝ.

ཏཏིཡཔཎྞཱསཀཾ ནིཊྛིཏཾ.

(༡༦) ༦. ཨཙེལཀཝགྒཝཎྞནཱ

༡༥༧-༡༦༣. ཨིཏོ པརེསུ པན སུཏྟཔདེསུ ‘‘གཱལ༹ྷཱ’’ཏི ཝུཏྟམཏྠཾ ཝིཝརནྟོ ‘‘ཀཀྑལཱ༹’’ཏི ཨཱཧ. ཀཀྑལ༹ཙཱརོ ཙསྶཱ ན ལཱུཁསབྷཱཝོ. ཨཐ ཁོ ཏཎྷཱཝསེན ཐིརགྒཧཎནྟི ཨཱཧ ‘‘ལོབྷཝསེན ཐིརགྒཧཎཱ’’ཏི. ཨགཱལ༹ྷཱ པཊིཔདཱཏི ཝཱ ཀཱམཱནཾ ཨོགཱཧནཾ པཊིཔཏྟི, ཀཱམསུཁཱནུཡོགོཏི ཨཏྠོ. ནིཛ྄ཛྷཱམཱ པཊིཔདཱཏི ཀཱཡསྶ ནིཛ྄ཛྷཱཔནཝསེན ཁེཔནཝསེན པཝཏྟཱ པཊིཔཏྟི, ཨཏྟཀིལམཐཱནུཡོགོཏི ཨཏྠོ. ནིཙྩེལོཏི ནིསྶཊྛཙེལོ སབྦེན སབྦཾ པཊིཀྑིཏྟཙེལོ. ནགྒིཡཝཏསམཱདཱནེན ནགྒོ. ཋིཏཀོཝ ཨུཙྩཱརཾ ཀརོཏཱིཏིཨཱདི ནིདསྶནམཏྟཾ ཝམིཏྭཱ མུཁཝིཀྑཱལནཱདིཨཱཙཱརསྶཔི ཏེན ཝིསྶཊྛཏྟཱ. ཛིཝ྄ཧཱཡ ཧཏྠཾ ཨཔལེཁཏི ཨཝལེཁཏི ཨུདཀེན ཨདྷོཝནཏོ. དུཏིཡཝིཀཔྤེཔི ཨེསེཝ ནཡོ. ‘‘ཨེཧི, བྷདནྟེ’’ཏི ཝུཏྟེ ཨུཔགམནསངྑཱཏོ ཝིདྷི ཨེཧིབྷདནྟོ, ཏཾ ཙརཏཱིཏི ཨེཧིབྷདནྟིཀོ, ཏཔྤཊིཀྑེཔེན ན ཨེཧིབྷདནྟིཀོ. ན ཀརོཏི ‘‘སམཎེན ནཱམ པརསྶ ཝཙནཀརེན ན བྷཝིཏབྦ’’ནྟི ཨདྷིཔྤཱཡེན.

པུརེཏརནྟི ཏཾ ཋཱནཾ ཨཏྟནོ ཨུཔགམནཏོ པུརེཏརཾ. ཏཾ ཀིར སོ ‘‘བྷིཀྑུནཱ ནཱམ ཡདིཙྪཀཱ ཨེཝ བྷིཀྑཱ གཧེཏབྦཱ’’ཏི ཨདྷིཔྤཱཡེན ན གཎྷཱཏི. ཨུདྡིསྶ ཀཏཾ མམ ནིམིཏྟབྷཱཝེན བཧཱུ ཁུདྡཀཱ པཱཎཱ སངྒྷཱཏཾ ཨཱཔཱདིཏཱཏི ན གཎྷཱཏི. ནིམནྟནཾ ན སཱདིཡཏི ཨེཝཾ ཏེསཾ ཝཙནཾ ཀཏཾ བྷཝིསྶཏཱིཏི. ཀུམྦྷི ཨཱདཱིསུཔི སོ སཏྟསཉྙཱིཏི ཨཱཧ ‘‘ཀུམྦྷི-ཀལོ༹པིཡོ’’ཏིཨཱདི. ཀབལ༹ནྟརཱཡོ ཧོཏཱིཏི ཨུཊྛིཏསྶ དྭིནྣམྤི ཀབལ༹ནྟརཱཡོ ཧོཏི. གཱམསབྷཱགཱདིཝསེན སངྒམྨ ཀིཏྟེནྟི ཨེཏིསྶཱཏི སངྐིཏྟི, ཡཐཱསཾཧཏཏཎྜུལཱདིསཉྩཡོ. མཱནུསཀཱནཱིཏི ཝེཡྻཱཝཙྩཀརཱ མནུསྶཱ.

སུརཱཔཱནམེཝཱཏི ¶ ¶ མཛྫལཀྑཎཔྤཏྟཱཡ སུརཱཡ པཱནམེཝ. སུརཱགཧཎེནེཝེཏྠ མེརཡམྤི སངྒཧིཏཾ. ཨེཀཱགཱརམེཝ ཨུཉྪཏཱིཏི ཨེཀཱགཱརིཀོ. ཨེཀཱལོཔེནེཝ ཝཏྟཏཱིཏི ཨེཀཱལོཔིཀོ. དཱིཡཏི ཨེཏཱཡཱཏི དཏྟི, དྭཏྟིཨཱལོཔམཏྟགྒཱཧི ཁུདྡཀཾ བྷིཀྑཱདཱནབྷཱཛནཾ. ཏེནཱཧ ‘‘ཁུདྡཀཔཱཏཱི’’ཏི. ཨབྷུཉྫནཝསེན ཨེཀོ ཨཧོ ཨེཏསྶ ཨཏྠཱིཏི ཨེཀཱཧིཀོ, ཨཱཧཱརོ, ཏཾ ཨེཀཱཧིཀཾ. སོ པན ཨཏྠཏོ ཨེཀདིཝསཾ ལངྒྷཀོ ཧོཏཱིཏི ཨཱཧ ‘‘ཨེཀཱདིཝསནྟརིཀ’’ནྟི. དྭཱཧིཀནྟིཨཱདཱིསུཔི ཨེསེཝ ནཡོ. ཨེཀཱཧཾ ཨབྷུཉྫིཏྭཱ ཨེཀཱཧཾ བྷུཉྫནཾ ཨེཀཱཧཝཱརོ, ཏཾ ཨེཀཱཧིཀམེཝ ཨཏྠཏོ. དྭཱིཧཾ ཨབྷུཉྫིཏྭཱ དྭཱིཧཾ བྷུཉྫནཾ དྭཱིཧཝཱརོ. སེསཔདདྭཡེཔི ཨེསེཝ ནཡོ. ཨུཀྐཊྛོ པན པརིཡཱཡབྷཏྟབྷོཛནིཀོ དྭཱིཧཾ ཨབྷུཉྫིཏྭཱ ཨེཀཱཧམེཝ བྷུཉྫཏི. སེསདྭཡེཔི ཨེསེཝ ནཡོ.

མིཙྪཱཝཱཡཱམཝསེནེཝ ཨུཀྐུཊིཀཝཏཱནུཡོགོཏི ཨཱཧ ‘‘ཨུཀྐུཊིཀཝཱིརིཡམནུཡུཏྟོ’’ཏི. ཨཏྟཀིལམཐཱནུཡོགནྟི ཨཏྟནོ ཀིལམཐཱནུཡོགཾ, སརཱིརདུཀྑཀཱརཎནྟི ཨཏྠོ. སརཱིརཔརིཡཱཡོ ཧི ཨིདྷ ཨཏྟསདྡོ ‘‘ཨཏྟནྟཔོ’’ཏིཨཱདཱིསུ (མ. ནི. ༢.༤༡༣) ཝིཡ. དྭེ ཨནྟེཏི ཨུབྷོ ཀོཊིཡོ, ཨུབྷོ ལཱམཀཔཊིཔཏྟིཡོཏི ཨཏྠོ. ལཱམཀམྤི ཧི ཨནྟོཏི ཝུཙྩཏི ‘‘ཨནྟམིདཾ, བྷིཀྑཝེ, ཛཱིཝིཀཱནཾ (སཾ. ནི. ༣.༨༠; ཨིཏིཝུ. ༦༡), ཀོཊྛཀོ ཨནྟོ’’ཏི ཨེཝམཱདཱིསུ. མཛ྄ཛྷིམཔཊིཔདཱཡ ཨུཔྤཐབྷཱཝེན ཨམནཱིཡཱ གནྟབྦཱ ཉཱཏབྦཱཏི ཨནྟཱ. ཏཏོ ཨེཝ ལཱམཀཱ.

ཨཙེལཀཝགྒཝཎྞནཱ ནིཊྛིཏཱ.

པེཡྻཱལཝགྒཝཎྞནཱ

༡༦༤-༡༨༤. སམནུཉྙོཏི སམྨདེཝ ཀཏཱནུཉྙོ. ཏེནཱཧ ‘‘སམཱནཛ྄ཛྷཱསཡོ’’ཏི. སེསམེཏྠ ཨུཏྟཱནམེཝ.

ཨིཏི མནོརཐཔཱུརཎིཡཱ ཨངྒུཏྟརནིཀཱཡ-ཨཊྛཀཐཱཡ

ཏིཀནིཔཱཏཝཎྞནཱཡ ཨནུཏྟཱནཏྠདཱིཔནཱ སམཏྟཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ.

ཨངྒུཏྟརནིཀཱཡེ

ཙཏུཀྐནིཔཱཏ-ཊཱིཀཱ

༡. པཋམཔཎྞཱསཀཾ

༡. བྷཎྜགཱམཝགྒོ

༡-༢. ཨནུབུདྡྷསུཏྟཱདིཝཎྞནཱ

༡-༢. ཙཏུཀྐནིཔཱཏསྶ ¶ ¶ པཋམེ ཨནུབོདྷོ པུབྦབྷཱགིཡཾ ཉཱཎཾ, པཊིཝེདྷོ ཨནུབོདྷེན ཨབྷིསམཡོ. ཏཏྠ ཡསྨཱ ཨནུབོདྷཔུབྦཀོ པཊིཝེདྷོ ཨནུབོདྷེན ཝིནཱ ན ཧོཏི. ཨནུབོདྷོ ཧི ཨེཀཙྩོ པཊིཝེདྷསམྦདྡྷོ, ཏདུབྷཡཱབྷཱཝཧེཏུཀཉྩ ཝཊྚེ སཾསརཎཾ, ཏསྨཱ ཝུཏྟཾ པཱལི༹ཡཾ ‘‘ཨནནུབོདྷཱ…པེ… ཏུམྷཱཀཉྩཱ’’ཏི. པཊིསནྡྷིགྒཧཎཝསེན བྷཝཏོ བྷཝནྟརཱུཔགམནཾ སནྡྷཱཝནཾ, ཨཔརཱཔརཾ ཙཝནཱུཔཔཛྫནཝསེན སཉྩརཎཾ སཾསརཎནྟི ཨཱཧ ‘‘བྷཝཏོ’’ཏིཨཱདི. སནྡྷཱཝིཏསཾསརིཏཔདཱནཾ ཀམྨསཱདྷནཏཾ སནྡྷཱཡཱཧ ‘‘མཡཱ ཙ ཏུམྷེཧི ཙཱ’’ཏི པཋམཝིཀཔྤེ. དུཏིཡཝིཀཔྤེ པན བྷཱཝསཱདྷནཏཾ ཧདཡེ ཀཏྭཱ ‘‘མམཉྩེཝ ཏུམྷཱཀཉྩཱ’’ཏི ཡཐཱརུཏཝསེནེཝ ཝུཏྟཾ ¶ . དཱིགྷརཛྫུནཱ བདྡྷསཀུཎཾ ཝིཡ རཛྫུཧཏྠོ པུརིསོ དེསནྟརཾ ཏཎྷཱརཛྫུནཱ བདྡྷཾ སཏྟསནྟཱནཾ ཨབྷིསངྑཱརོ བྷཝནྟརཾ ནེཏི ཨེཏཱཡཱཏི བྷཝནེཏྟི. ཏེནཱཧ ‘‘བྷཝརཛྫཱུ’’ཏིཨཱདཱི.

ཝཊྚདུཀྑསྶ ཨནྟཀརོཏི སཀལཝཊྚདུཀྑསྶ སཀསནྟཱནེ པརསནྟཱནེ ཙ ཝིནཱསཀརོ ཨབྷཱཝཀརོ. བུདྡྷཙཀྑུདྷམྨཙཀྑུདིབྦཙཀྑུམཾསཙཀྑུསམནྟཙཀྑུསངྑཱཏེཧི པཉྩཧི ཙཀྑཱུཧི