ཏཱིཀཱ > སུཏྟཔིཊཀ (ཊཱིཀཱ) > ཨངྒུཏྟརནིཀཱཡ (ཊཱིཀཱ)

༢-༦. དུཏིཡེ ¶ ཧིརཱིཡཏཱིཏི ལཛྫཏི ཝིརཛྫཏི. ཡསྨཱ ཧིརཱི པཱཔཛིགུཙྪནལཀྑཎཱ, ཏསྨཱ ‘‘ཛིགུཙྪཏཱིཏི ཨཏྠོ’’ཏི ཝུཏྟཾ. ཨོཏྟཔྤཏཱིཏི ཨུཏྲསཏི. པཱཔུཏྲཱསལཀྑཎཉྷི ཨོཏྟཔྤཾ.

པགྒཧིཏཝཱིརིཡོཏི ¶ སངྐོཙཾ ཨནཱཔནྣཝཱིརིཡོ. ཏེནཱཧ ‘‘ཨནོསཀྐིཏམཱནསོ’’ཏི. པཧཱནཏྠཱཡཱཏི སམུཙྪིནྣཏྠཱཡ. ཀུསལཱནཾ དྷམྨཱནཾ ཨུཔསམྤདཱ ནཱམ སམདྷིགམོ ཨེཝཱཏི ཨཱཧ ‘‘པཊིལཱབྷཏྠཱཡཱ’’ཏི.

གཏིཨཏྠཱ དྷཱཏུསདྡཱ བུདྡྷིཨཏྠཱ ཧོནྟཱིཏི ཨཱཧ ‘‘ཨུདཡཉྩ ཝཡཉྩ པཊིཝིཛ྄ཛྷིཏུཾ སམཏྠཱཡཱ’’ཏི. མིསྶཀནཡེནཱཡཾ དེསནཱ གཏཱཏི ཨཱཧ ‘‘ཝིཀྑམྦྷནཝསེན ཙ སམུཙྪེདཝསེན ཙཱ’’ཏི. ཏེནཱཧ ‘‘ཝིཔསྶནཱཔཉྙཱཡ ཙེཝ མགྒཔཉྙཱཡ ཙཱ’’ཏི. ཝིཔསྶནཱཔཉྙཱཡ ཝིཀྑམྦྷནཀིརིཡཏོ སཱ ཙ ཁོ པདེསིཀཱཏི ནིཔྤདེསིཀཾ ཀཏྭཱ དསྶེཏུཾ ‘‘མགྒཔཉྙཱཡ པཊིལཱབྷསཾཝཏྟནཏོ’’ཏི ཝུཏྟཾ. དུཀྑཀྑཡགཱམིནིབྷཱཝེཔི ཨེསེཝ ནཡོ. སམྨཱཏི ཡཱཐཱཝཏོ. ཨཀུཔྤདྷམྨཏཱཡ ཧི མགྒཔཉྙཱཡ ཁེཔིཏཾ ཁེཔིཏམེཝ, ནཱསྶ པུན ཁེཔནཀིཙྩཾ ཨཏྠཱིཏི ཨུཔཱཡེན ཉཱཡེན སཱ པཝཏྟཏཱིཏི ཨཱཧ ‘‘ཧེཏུནཱ ནཡེནཱ’’ཏི. ཏཏིཡཱདཱིསུ ནཏྠི ཝཏྟབྦཾ.

༧. སཏྟམེ ཨསནྟི ལཱུནནྟི ཏེནཱཏི ཨསིཏཾ, དཱཏྟཾ. ཝིཝིདྷཱ ཨཱབྷཉྫནྟི བྷཱརཾ ཨོལམྦེནྟི ཏེནཱཏི བྱཱབྷངྒཱི, ཝིདྷཾ. ཀུལཔུཏྟོཏི ཨེཏྠ དུཝིདྷོ ཀུལཔུཏྟོ ཛཱཏིཀུལཔུཏྟོ, ཨཱཙཱརཀུལཔུཏྟོ ཙ. ཏཏྠ ‘‘ཏེན ཁོ པན སམཡེན རཊྛཔཱལོ ནཱམ ཀུལཔུཏྟོ ཏསྨིཾཡེཝ ཐུལླཀོཊྛིཀེ ཨགྒཀུལིཀསྶ པུཏྟོ’’ཏི (མ. ནི. ༢.༢༩༤) ཨེཝཾ ཨཱགཏོ ཨུཙྩཀུལཔྤསུཏོ ཛཱཏིཀུལཔུཏྟོ ནཱམ. ‘‘ཡེ ཏེ ཀུལཔུཏྟཱ སདྡྷཱ ཨགཱརསྨཱ ཨནགཱརིཡཾ པབྦཛིཏཱ’’ཏི (མ. ནི. ༡.༣༤) ཨེཝཾ ཨཱགཏཱ པན ཡཏྠ ཀཏྠཙི ཀུལེ པསུཏཱཔི ཨཱཙཱརསམྤནྣཱ ཨཱཙཱརཀུལཔུཏྟོ ནཱམ. ཨིདྷ པན ཨཱཙཱརཀུལཔུཏྟོ ཨདྷིཔྤེཏོ. ཏེནཱཧ ‘‘ཀུལཔུཏྟོཏི ཨཱཙཱརཀུལཔུཏྟོ’’ཏི. ཡུཏྟནྟི ཨནུཙྪཝིཀཾ, ཨེཝཾ ཝཏྟབྦཏཾ ཨརཧཏཱིཏི ཨཏྠོ. སེསམེཏྠ ཨུཏྟཱནམེཝ.

༨. ཨཊྛམེ ¶ ¶ སདྡྷཱཡཱཏི ཨིམིནཱ ཨདྷིགམསདྡྷཱ དསྶིཏཱ. ཙཏུབྦིདྷཱ ཧི སདྡྷཱ – ཨཱགམནཱིཡསདྡྷཱ, ཨདྷིགམསདྡྷཱ, པསཱདསདྡྷཱ, ཨོཀཔྤནསདྡྷཱཏི. ཏཏྠ ཨཱགམནཱིཡསདྡྷཱ སབྦཉྙུབོདྷིསཏྟཱནཾ པཝཏྟཱ ཧོཏི. ཨཱགམནཱིཡཔྤཊིཔདཱཡ ཨཱགཏཱ ཧི སདྡྷཱ སཱཏིསཡཱ མཧཱབོདྷིསཏྟཱནཾ པརོཔདེསེན ཝིནཱ སདྡྷེཡྻཝཏྠུཾ ཨཝིཔརཱིཏཏོ གཧེཏྭཱ ཨདྷིམུཙྩནཏོ. སཙྩཔྤཊིཝེདྷཏོ ཨཱགཏསདྡྷཱ ཨདྷིགམསདྡྷཱ སུཔྤབུདྡྷཱདཱིནཾ ཝིཡ. ‘‘སམྨཱསམྦུདྡྷོ བྷགཝཱ’’ཏིཨཱདིནཱ བུདྡྷཱདཱིསུ ཨུཔྤཛྫནཀཔྤསཱདོ པསཱདསདྡྷཱ མཧཱཀཔྤིནརཱཛཱདཱིནཾ ཝིཡ. ‘‘ཨེཝམེཏ’’ནྟི ཨོཀྐནྡིཏྭཱ པཀྑནྡིཏྭཱ སདྡཧནཝསེན ཀཔྤནཾ ཨོཀཔྤནཾ, ཏདེཝ སདྡྷཱཏི ཨོཀཔྤནསདྡྷཱ. ཏཏྠ པསཱདསདྡྷཱ པརནེཡྻརཱུཔཱ ཧོཏི, སཝནམཏྟེནཔི པསཱིདནཏོ. ཨོཀཔྤནསདྡྷཱ སདྡྷེཡྻཾ ཝཏྠུཾ ཨོགཱཧིཏྭཱ ཨནུཔཝིསིཏྭཱ ‘‘ཨེཝམེཏ’’ནྟི པཙྩཀྑཾ ཀརོནྟཱི ཝིཡ པཝཏྟཏི.

༩. ནཝམེ ཨཔྤཏིསྶཡོཏི ཨཔྤཏིསྶཝོ ཝ-ཀཱརསྶ ཡ-ཀཱརཾ ཀཏྭཱ ནིདྡེསོ. གརུནཱ ཀིསྨིཉྩི ཝུཏྟོ གཱརཝཝསེན པཏིསྶཝནཾ, པཏིསྶཝོ, པཏིསྶཝབྷཱུཏཾ, ཏཾསབྷཱཝཉྩ ཡཾ ཀིཉྩི གཱརཝཾ. ནཏྠི ཨེཏསྨིཾ པཏིསྶཝོཏི ཨཔྤཏིསྶཝོ, གཱརཝཝིརཧིཏོ. ཏེནཱཧ ‘‘ཨཛེཊྛཀོ ཨནཱིཙཝུཏྟཱི’’ཏི.

༡༠. དསམེ ཝུདྡྷིནྟིཨཱདཱིསུ སཱིལེན ཝུདྡྷིཾ, མགྒེན ཝིརུལ༹ྷིཾ, ནིབྦཱནེན ཝེཔུལླཾ. སཱིལསམཱདྷཱིཧི ཝཱ ཝུདྡྷིཾ, ཝིཔསྶནཱམགྒེཧི ཝིརུལ༹ྷིཾ, ཕལནིབྦཱནེཧི ཝེཔུལླཾ. ཨེཏྠ ཙ ཡསྶ ཙཏུབྦིདྷཾ སཱིལཾ ཨཁཎྜཱདིབྷཱཝཔྤཝཏྟིཡཱ སུཔརིསུདྡྷཾ ཝིསེསབྷཱགིཡཏྟཱ ཨཔྤཀསིརེནེཝ མགྒཕལཱཝཧཾ སངྒྷརཀྑིཏཏྠེརསྶ ཝིཡ, སོ ཏཱདིསེན སཱིལེན ཨིམསྨིཾ དྷམྨཝིནཡེ ཝུདྡྷིཾ ¶ ཨཱཔཛྫིསྶཏི. ཏེན ཝུཏྟཾ – ‘‘སཱིལེན ཝུདྡྷི’’ནྟི. ཡསྶ པན ཨརིཡམགྒོ ཨུཔྤནྣོ, སོ ཝིརཱུལ༹ྷམཱུལོ ཝིཡ པཱདཔོ སུཔྤཏིཊྛིཏཏྟཱ སཱསནེ ཝིརཱུལ༹ྷིཾ ཨཱཔནྣོ ནཱམ ཧོཏི. ཏེན ཝུཏྟཾ ¶ – ‘‘མགྒེན ཝིརཱུལ༹ྷི’’ནྟི. ཡོ སབྦཀིལེསནིབྦཱནཔྤཏྟོ, སོ ཨརཧཱ སཱིལཱདིདྷམྨཀྑནྡྷཔཱརིཔཱུརིཡཱ སཏི ཝེཔུལླཔྤཏྟོ ཧོཏི. ཏེན ཝུཏྟཾ ‘‘ནིབྦཱནེན ཝེཔུལླ’’ནྟི. དུཏིཡཝིཀཔྤེ ཨཏྠོ ཝུཏྟནཡཱནུསཱརེན ཝེདིཏབྦོ.

དུཏིཡཨགཱརཝསུཏྟཝཎྞནཱ ནིཊྛིཏཱ.

༡༡. དུཏིཡསྶ པཋམེ ཨབྷིཛཱནིཏྭཱཏི ཨབྷིཝིསིཊྛེན ཉཱཎེན ཛཱནིཏྭཱ. ཨཊྛཧི ཀཱརཎེཧི ཏཐཱགཏསྶཱཏི ‘‘ཏཐཱ ཨཱགཏོཏི ཏཐཱགཏོ. ཏཐཱ གཏོཏི ཏཐཱགཏོ. ཏཐལཀྑཎཾ ཨཱགཏོཏི ཏཐཱགཏོ. ཏཐདྷམྨེ ཡཱཐཱཝཏོ ཨབྷིསམྦུདྡྷོཏི ཏཐཱགཏོ. ཏཐདསྶིཏཱཡ ཏཐཱགཏོ. ཏཐཱཝཱདིཏཱཡ ཏཐཱགཏོ. ཏཐཱཀཱརིཏཱཡ ཏཐཱགཏོ. ཨབྷིབྷཝནཊྛེན ཏཐཱགཏོ’’ཏི ཨེཝཾ ཝུཏྟེཧི ཨཊྛཧི ཀཱརཎེཧི. ཨུསབྷསྶ ཨིདནྟི ཨཱསབྷཾ, སེཊྛཊྛཱནཾ. ཏེནཱཧ ‘‘ཨཱསབྷཾ ཋཱནནྟི སེཊྛཊྛཱན’’ནྟི. པརཏོ དསྶིཏབལཡོགེན ‘‘དསབལོཧ’’ནྟི ཨབྷཱིཏནཱདཾ ནདཏི. བྲཧྨཙཀྐནྟི ཨེཏྠ སེཊྛཔརིཡཱཡོ. བྲཧྨསདྡོཏི ཨཱཧ ‘‘སེཊྛཙཀྐ’’ནྟི. ཙཀྐཉྩེཏཾ དྷམྨཙཀྐཾ ཨདྷིཔྤེཏཾ.

༡༣. ཏཏིཡེ ཀཱམཾ སམྤཡུཏྟདྷམྨེསུ ཐིརབྷཱཝོཔི བལཊྛོ ཨེཝ, པཊིཔཀྑེཧི པན ཨཀམྤནཱིཡཏྟཾ སཱཏིསཡཾ བལཊྛོཏི ཝུཏྟཾ ‘‘མུཊྛསྶཙྩེ ན ཀམྤཏཱི’’ཏི.

༡༤. ཙཏུཏྠེ ¶ ¶ སཏིནེཔཀྐེནཱཏི སཏིཡཱ ནེཔཀྐེན, ཏིཀྑཝིསདསཱུརབྷཱཝེནཱཏི ཨཏྠོ. ཨཊྛཀཐཱཡཾ པན ནེཔཀྐཾ ནཱམ པཉྙཱཏི ཨདྷིཔྤཱཡེན ‘‘ནེཔཀྐཾ ཝུཙྩཏི པཉྙཱ’’ཏི ཝུཏྟཾ. ཨེཝཾ སཏི ཨཉྙོ ནིདྡིཊྛོ ནཱམ ཧོཏི. སཏིམཱཏི ཙ ཨིམིནཱ སཝིསེསཱ སཏི གཧིཏཱཏི པརཏོཔི ‘‘ཙིརཀཏམྤི ཙིརབྷཱསིཏམྤི སརིཏཱ ཨནུསྶརིཏཱ’’ཏི སཏིཀིཙྩམེཝ ནིདྡིཊྛཾ, ན པཉྙཱཀིཙྩཾ, ཏསྨཱ སཏིནེཔཀྐེནཱཏི སཏིཡཱ ནེཔཀྐབྷཱཝེནཱཏི སཀྐཱ ཝིཉྙཱཏུཾ ལབྦྷཏེཝ. པཙྩཡཝིསེསཝསེན ཨཉྙདྷམྨནིརཔེཀྑོ སཏིཡཱ བལཝབྷཱཝོ. ཏཐཱ ཧི ཉཱཎཝིཔྤཡུཏྟཙིཏྟེནཔི སཛ྄ཛྷཱཡནསམྨསནཱནི སམྦྷཝནྟི.

ཙིརཀཏམྤཱིཏི ཨཏྟནཱ ཝཱ པརེན ཝཱ ཀཱཡེན ཙིརཀཏཾ ཙེཏིཡངྒཎཝཏྟཱདིམཧཱཝཏྟཔྤཊིཔཏྟིཔཱུརཎཾ. ཙིརབྷཱསིཏམྤཱིཏི ཨཏྟནཱ ཝཱ པརེན ཝཱ ཝཱཙཱཡ ཙིརབྷཱསིཏཾ སཀྐཙྩཾ ཨུདྡིསནཨུདྡིསཱཔནདྷམྨཱསཱརཎདྷམྨདེསནཱཨུཔནིསིནྣཀཔརིཀཐཱཨནུམོདནཱིཡཱདིཝསེན པཝཏྟིཏཾ ཝཙཱིཀམྨཾ. སརིཏཱ ཨནུསྶརིཏཱཏི ཏསྨིཾ ཀཱཡེན ཙིརཀཏེ ཀཱཡོ ནཱམ ཀཱཡཝིཉྙཏྟི, ཙིརབྷཱསིཏེ ཝཱཙཱ ནཱམ ཝཙཱིཝིཉྙཏྟི, ཏདུབྷཡམྤི རཱུཔཾ, ཏཾསམུཊྛཱཔཀཱ ཙིཏྟཙེཏསིཀཱ ཨརཱུཔཾ. ཨིཏི ཨིམེ རཱུཔཱརཱུཔདྷམྨཱ ཨེཝཾ ཨུཔྤཛྫིཏྭཱ ཨེཝཾ ནིརུདྡྷཱཏི སརཏི ཙེཝ ཨནུསྶརཏི ཙ, སཏིསམྦོཛ྄ཛྷངྒཾ སམུཊྛཱཔེཏཱིཏི ཨཏྠོ. བོཛ྄ཛྷངྒསམུཊྛཱཔིཀཱ ཧི སཏི ཨིདྷ ཨདྷིཔྤེཏཱ. ཏཱཡ སཏིཡཱ ཨེས སཀིཾ སརཎེན སརིཏཱ, པུནཔྤུནཾ སརཎེན ཨནུསྶརིཏཱཏི ཝེདིཏབྦཱ.

༡༥-༢༠. པཉྩམེ སཝིསཡསྨིཾཡེཝཱཏི ཨཏྟནོ ཨཏྟནོ ཝིསཡེ ཨེཝ. ལོཀིཡལོཀུཏྟརདྷམྨེ ཀཐེཏུནྟི ལོཀིཡདྷམྨེ ལོཀུཏྟརདྷམྨེ ཙ ཏེན ཏེན པཝཏྟིཝིསེསེན ཀཐེཏུཾ. ཙཏཱུསུ སོཏཱཔཏྟིཡངྒེསཱུཏི སཔྤུརིསསཾསེཝོ སདྡྷམྨསྶཝནཾ ཡོནིསོམནསིཀཱརོ དྷམྨཱནུདྷམྨཔྤཊིཔཏྟཱིཏི ཨིམེསུ ཙཏཱུསུ སོཏཱཔཏྟིམགྒཀཱརཎེསུ. ཀཱམཉྩ ཏེསུ སཏིཨཱདཡོཔི དྷམྨཱ ཨིཙྪིཏབྦཱཝ ཏེཧི ཝིནཱ ཏེསཾ ཨསམྦྷཝཏོ ¶ , ཏཐཱཔི ཙེཏྠ སདྡྷཱ ཝིསེསཏོ ཀིཙྩཀཱརཱིཏི ཝེདིཏབྦཱ. སདྡྷོ ཨེཝ ཧི སཔྤུརིསེ པཡིརུཔཱསཏི, སདྡྷམྨཾ སུཎཱཏི, ཡོནིསོ ཙ ཨནིཙྩཱདིཏོ མནསི ཀརོཏི, ཨརིཡམགྒསྶ ¶ ཙ ཨནུདྷམྨཾ པཊིཔཛྫཏི, ཏསྨཱ ཝུཏྟཾ ‘‘ཨེཏྠ སདྡྷཱབལཾ དཊྛབྦ’’ནྟི. ཨིམིནཱ ནཡེན སེསབལེསུཔི ཨཏྠོ དཊྛབྦོ.

ཙཏཱུསུ སམྨཔྤདྷཱནེསཱུཏི ཙཏུབྦིདྷསམྨཔྤདྷཱནབྷཱཝནཱཡ. ཙཏཱུསུ སཏིཔཊྛཱནེསཱུཏིཨཱདཱིསུཔི ཨེསེཝ ནཡོ. ཨེཏྠ ཙ སོཏཱཔཏྟིཨངྒེསུ སདྡྷཱ ཝིཡ, སམྨཔྤདྷཱནབྷཱཝནཱཡ ཝཱིརིཡཾ ཝིཡ ཙ སཏིཔཊྛཱནབྷཱཝནཱཡ ཡསྨཱ ‘‘ཝིནེཡྻ ལོཀེ ཨབྷིཛ྄ཛྷཱདོམནསྶ’’ནྟི (དཱི. ནི. ༢.༣༧༣; མ. ནི. ༡.༡༠༦) ཝཙནཏོ པུབྦབྷཱགེ ཀིཙྩཏོ སཏི ཨདྷིཀཱ ཨིཙྪིཏབྦཱ, ཨེཝཾ སམཱདྷིཀམྨིཀསྶ སམཱདྷི, ‘‘ཨརིཡསཙྩབྷཱཝནཱ པཉྙཱབྷཱཝནཱ’’ཏི ཀཏྭཱ ཏཏྠ པཉྙཱ པུབྦབྷཱགེ ཨདྷིཀཱ ཨིཙྪིཏབྦཱཏི པཱཀཊོཡམཏྠོ. ཨདྷིགམཀྑཎེ པན སམཱདྷིཔཉྙཱནཾ ཝིཡ སབྦེསམྤི བལཱནཾ སདྡྷཱདཱིནཾ སམཏཱཝ ཨིཙྪིཏབྦཱ. ཏཐཱ ཧི ‘‘ཨེཏྠ སདྡྷཱབལ’’ནྟིཨཱདིནཱ ཏཏྠ ཏཏྠ ཨེཏྠགྒཧཎཾ ཀཏཾ.

ཨིདཱནི སདྡྷཱདཱིནཾ ཏཏྠ ཏཏྠ ཨཏིརེཀཀིཙྩཏཾ ཨུཔམཱཡ ཝིབྷཱཝེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. ཏཏྲིདཾ ཨུཔམཱ སཾསནྡནཾ – རཱཛཔཉྩམསཧཱཡཱ ཝིཡ ཝིམུཏྟིཔརིཔཱཙཀཱནི པཉྩ བལཱནི. ནེསཾ ཀཱིལ༹ནཏྠཾ ཨེཀཛ྄ཛྷཾ ཝཱིཐིཨོཏརཎཾ ཝིཡ བལཱནཾ ཨེཀཛ྄ཛྷཾ ཝིཔསྶནཱཝཱིཐིཨོཏརཎཾ, སཧཱཡེསུ པཋམཱདཱིནཾ ཡཐཱསཀཾ གེཧེཝ ཝིཙཱརཎཱ ཝིཡ སདྡྷཱདཱིནཾ སོཏཱཔཏྟིཨངྒཱདཱིནི པཏྭཱ པུབྦངྒམཏཱ. སཧཱཡེསུ ཨིཏརེསཾ ཏཏྠ ཏཏྠ ཏུཎྷཱིབྷཱཝོ ཝིཡ སེསབལཱནཾ ཏཏྠ ཏཏྠ ཏདནྭཡཏཱ, ཏསྶ པུབྦངྒམསྶ བལསྶ ཀིཙྩཱནུགཏཱ. ན ཧི ཏདཱ ཏེསཾ སསམྦྷཱརཔཐཝཱིཨཱདཱིསུ ཨཱཔཱདཱིནཾ ཝིཡ ཀིཙྩཾ པཱཀཊཾ ཧོཏི, སདྡྷཱདཱིནཾཡེཝ པན ཀིཙྩཾ ཝིབྷཱུཏཾ ཧུཏྭཱ ཏིཊྛཏི པུརེཏརཾ ཏཐཱཔཙྩཡེཧི ཙིཏྟསནྟཱནསྶ ཨབྷིསངྑཏཏྟཱ. ཨེཏྠ ཙ ཝིཔསྶནཱཀམྨིཀསྶ བྷཱཝནཱ ཝིསེསཏོ པཉྙུཏྟརཱཏི དསྶནཏྠཾ རཱཛཱནཾ ནིདསྶནཾ ཀཏྭཱ པཉྙིནྡྲིཡཾ ཝུཏྟཾ. ཚཊྛཱདཱིནི སུཝིཉྙེཡྻཱནི.

༢༡-༢༢. ཏཏིཡསྶ ¶ ¶ པཋམེ ཨཱབྷིསམཱཙཱརིཀནྟི ཨབྷིསམཱཙཱརེ ཨུཏྟམསམཱཙཱརེ བྷཝཾ. ཀིཾ པན ཏནྟི ཨཱཧ ‘‘ཝཏྟཝསེན པཉྙཏྟསཱིལ’’ནྟི. སེསཾ སུཝིཉྙེཡྻམེཝ. དུཏིཡེ ནཏྠི ཝཏྟབྦཾ.

པཋམཨགཱརཝསུཏྟཱདིཝཎྞནཱ ནིཊྛིཏཱ.

༢༣-༢༤. ཏཏིཡེ ན ཙ པབྷཱཝནྟནྟི ན ཙ པབྷཱསམྤནྣཾ. པབྷིཛྫནསབྷཱཝནྟི ཏཱཔེཏྭཱ ཏཱལ༹ཀཛྫནཔབྷངྒུརཾ. ཨཝསེསཾ ལོཧནྟི ཝུཏྟཱཝསེསཾ སཛཱཏིལོཧཾ, ཝིཛཱཏིལོཧཾ, པིསཱཙལོཧཾ, ཀིཏྟིམལོཧནྟི ཨེཝཾཔབྷེདཾ སབྦམྤི ལོཧཾ. ཨུཔྤཛྫིཏུཾ ཨཔྤདཱནེནཱཏི ཨེཏྠ ནནུ ལོཀིཡཀུསལཙིཏྟསྶཔི སུཝིསུདྡྷསྶཔི ཨུཔྤཛྫིཏུཾ ཨཔྤདཱནེནེཝ ཨུཔཀྐིལེསཏཱཏི? སཙྩམེཏཾ, ཡསྨིཾ པན སནྟཱནེ ནཱིཝརཎཱནི ལདྡྷཔྤཏིཊྛཱནི, ཏཏྠ མཧགྒཏཀུསལསྶཔི ཨསམྦྷཝོ, པགེཝ ལོཀུཏྟརཀུསལསྶ. པརིཏྟཀུསལཾ པན ཡཐཱཔཙྩཡཾ ཨུཔྤཛྫམཱནཾ ནཱིཝརཎེཧི ཨུཔཧཏེ སནྟཱནེ ཨུཔྤཏྟིཡཱ ཨཔརིསུདྡྷཾ ཧོནྟཾ ཨུཔཀྐིལིཊྛཾ ནཱམ ཧོཏི ཨཔརིསུདྡྷདཱིཔཀཔལླིཀཝཊྚིཏེལཱདིསནྣིསྶཡོ པདཱིཔོ ཝིཡ. ཨཔིཙ ནིཔྤརིཡཱཡཏོ ཨུཔྤཛྫིཏུཾ ཨཔྤདཱནེནེཝ ཏེསཾ ཨུཔཀྐིལེསཏཱཏི དསྶེནྟོ ‘‘ཡདགྒེན ཧཱི’’ཏིཨཱདིམཱཧ. ཨཱརམྨཎེ ཝིཀྑིཏྟཔྤཝཏྟིཝསེན ཙུཎྞཝིཙུཎྞཏཱ ཝེདིཏབྦཱ. ཙཏུཏྠེ ནཏྠི ཝཏྟབྦཾ.

ཨུཔཀྐིལེསསུཏྟཱདིཝཎྞནཱ ནིཊྛིཏཱ.

༢༥. པཉྩམེ སམྨཱདིཊྛཱིཏི ཝིཔསྶནཱསམྨཱདིཊྛཱིཏིཨཱདིནཱ ཨངྒུཏྟརབྷཱཎཀཱནཾ མཏེན ཨཡཾ ཨཏྠཝཎྞནཱ ཨཱརདྡྷཱ, མཛ྄ཛྷིམབྷཱཎཀཱ པནེཏྠ ཨཉྙཐཱ ཨཏྠཾ ཝདནྟི. ཝུཏྟཉྷེཏཾ མཛ྄ཛྷིམཊྛཀཐཱཡཾ (མ. ནི. ཨཊྛ. ༡.༤༥༢) –

‘‘ཨནུགྒཧིཏཱ’’ཏི ¶ ¶ ལདྡྷཱུཔཀཱརཱ. སམྨཱདིཊྛཱིཏི ཨརཧཏྟམགྒསམྨཱདིཊྛི. ཕལཀྑཎེ ནིབྦཏྟཱ ཙེཏོཝིམུཏྟི ཕལཾ ཨསྶཱཏི ཙེཏོཝིམུཏྟིཕལཱ. ཏདེཝ ཙེཏོཝིམུཏྟིསངྑཱཏཾ ཕལཾ ཨཱནིསཾསོ ཨསྶཱཏི ཙེཏོཝིམུཏྟིཕལཱནིསཾསཱ. དུཏིཡཔདེཔི ཨེསེཝ ནཡོ. ཨེཏྠ ཙཏུཏྠཕལཔཉྙཱ པཉྙཱཝིམུཏྟི ནཱམ, ཨཝསེསཱ དྷམྨཱ ཙེཏོཝིམུཏྟཱིཏི ཝེདིཏབྦཱ. ‘‘སཱིལཱནུགྒཧིཏཱ’’ཏིཨཱདཱིསུ སཱིལནྟི ཙཏུཔཱརིསུདྡྷིསཱིལཾ. སུཏནྟི སཔྤཱཡདྷམྨསྶཝནཾ. སཱཀཙྪཱཏི ཀམྨཊྛཱནེ ཁལནཔཀྑལནཙྪེདནཀཐཱ. སམཐོཏི ཝིཔསྶནཱཔཱདིཀཱ ཨཊྛ སམཱཔཏྟིཡོ. ཝིཔསྶནཱཏི སཏྟཝིདྷཱ ཨནུཔསྶནཱ. ཙཏུཔཱརིསུདྡྷིསཱིལཉྷི པཱུརེནྟསྶ, སཔྤཱཡདྷམྨསྶཝནཾ སུཎནྟསྶ, ཀམྨཊྛཱནེ ཁལནཔཀྑལནཾ ཚིནྡནྟསྶ ཝིཔསྶནཱཔཱདིཀཱསུ ཨཊྛསུ སམཱཔཏྟཱིསུ ཀམྨཾ ཀརོནྟསྶ, སཏྟཝིདྷཾ ཨནུཔསྶནཾ བྷཱཝེནྟསྶ ཨརཧཏྟམགྒོ ཨུཔྤཛྫིཏྭཱ ཕལཾ དེཏི.

‘‘ཡཐཱ ཧི མདྷུརཾ ཨམྦཔཀྐཾ པརིབྷུཉྫིཏུཀཱམོ ཨམྦཔོཏཀསྶ སམནྟཱ ཨུདཀཀོཊྛཀཾ ཐིརཾ ཀཏྭཱ བནྡྷཏི, གྷཊཾ གཧེཏྭཱ ཀཱལེན ཀཱལཾ ཨུདཀཾ ཨཱསིཉྩཏི, ཨུདཀསྶ ཨནིཀྑམནཏྠཾ མརིཡཱདཾ ཐིརཾ ཀརོཏི. ཡཱ ཧོཏི སམཱིཔེ ཝལླི ཝཱ སུཀྑདཎྜཀོ ཝཱ ཀིཔིལླིཀཔུཊོ ཝཱ མཀྐཊཀཛཱལཾ ཝཱ, ཏཾ ཨཔནེཏི, ཁཎིཏྟིཾ གཧེཏྭཱ ཀཱལེན ཀཱལཾ མཱུལཱནི པརིཁཎཏི, ཨེཝམསྶ ཨཔྤམཏྟསྶ ཨིམཱནི པཉྩ ཀཱརཎཱནི ཀརོཏོ སོ ཨམྦོ ཝཌྜྷིཏྭཱ ཕལཾ དེཏི, ཨེཝཾ སམྤདམིདཾ ཝེདིཏབྦཾ. རུཀྑསྶ སམནྟཏོ ཀོཊྛཀབནྡྷནཾ ཝིཡ ཧི སཱིལཾ དཊྛབྦཾ, ཀཱལེན ཀཱལཾ ཨུདཀསིཉྩནཾ ཝིཡ དྷམྨསྶཝནཾ, མརིཡཱདཱཡ ཐིརབྷཱཝཀརཎཾ ཝིཡ སམཐོ, སམཱིཔེ ཝལླིཨཱདཱིནཾ ཧརཎཾ ཝིཡ ཀམྨཊྛཱནེ ཁལནཔཀྑལནཙྪེདནཾ, ཀཱལེན ཀཱལཾ ཁཎིཏྟིཾ གཧེཏྭཱ མཱུལཁཎནཾ ཝིཡ སཏྟནྣཾ ཨནུཔསྶནཱནཾ བྷཱཝནཱ, ཏེཧི པཉྩཧི ཀཱརཎེཧི ཨནུགྒཧིཏསྶ ཨམྦརུཀྑསྶ མདྷུརཕལདཱནཀཱལོ ཝིཡ ཨིམསྶ བྷིཀྑུནོ ཨིམེཧི པཉྩཧི དྷམྨེཧི ཨནུགྒཧིཏཱཡ སམྨཱདིཊྛིཡཱ ཨརཧཏྟཕལདཱནཾ ཝེདིཏབྦ’’ནྟི.

ཨེཏྠ ཙ ལདྡྷཱུཔཀཱརཱཏི ཡཐཱརཧཾ ནིསྶཡཱདིཝསེན ལདྡྷཔཙྩཡཱ. ཝིཔསྶནཱསམྨཱདིཊྛིཡཱ ཨནུགྒཧིཏབྷཱཝེན གཧིཏཏྟཱ མགྒསམྨཱདིཊྛཱིསུ ཙ ཨརཧཏྟམགྒསམྨཱདིཊྛི ¶ . ཨནནྟརསྶ ཧི ཝིདྷི པཊིསེདྷོ ཝཱ, ཨགྒཕལསམཱདྷིམྷི ཏཔྤརིཀྑཱརདྷམྨེསུཡེཝ ཙ ཀེཝལོ ཙེཏོཔརིཡཱཡོ ནིརུལ༹ྷོཏི སམྨཱདིཊྛཱིཏི ཨརཧཏྟམགྒསམྨཱདིཊྛི. ཕལཀྑཎེཏི ཨནནྟརཾ ཀཱལནྟརེ ཙཱཏི དུཝིདྷེཔི ཕལཀྑཎེ. པཊིཔྤསྶདྡྷིཝསེན སབྦསཾཀིལེསེཧི ཙེཏོཝིམུཙྩཏི ཨེཏཱཡཱཏི ཙེཏོཝིམུཏྟི, ཨགྒཕལཔཉྙཾ ཋཔེཏྭཱ ཨཝསེསཱ ཕལདྷམྨཱ. ཏེནཱཧ ‘‘ཙེཏོཝིམུཏྟི ཕལཾ ཨསྶཱཏི, ཙེཏོཝིམུཏྟིསངྑཱཏཾ ¶ ཕལཾ ཨཱནིསཾསོ’’ཏི. སབྦཀིལེསེཧི ཙེཏསོ ཝིམུཙྩནསངྑཱཏཾ པཊིཔྤསྶམྦྷནསཉྙིཏཾ པཧཱནཾ ཕལཾ ཨཱནིསཾསོ ཙཱཏི ཡོཛནཱ. ཨིདྷ ཙེཏོཝིམུཏྟིསདྡེན པཧཱནམཏྟཾ གཧིཏཾ, པུབྦེ པཧཱཡཀདྷམྨཱ. ཨཉྙཐཱ ཕལདྷམྨཱ ཨེཝ ཨཱནིསཾསོཏི གཡ྄ཧམཱནེ པུནཝཙནཾ ནིརཏྠཀཾ སིཡཱ. པཉྙཱཝིམུཏྟིཕལཱནིསཾསཱཏི ཨེཏྠཱཔི ཨེཝམེཝ ཨཏྠོ ཝེདིཏབྦོ. སམྨཱཝཱཙཱཀམྨནྟཱཛཱིཝཱ སཱིལསབྷཱཝཏྟཱ ཝིསེསཏོ སམཱདྷིསྶ ཨུཔཀཱརཱ, ཏཐཱ སམྨཱསངྐཔྤོ ཛྷཱནསབྷཱཝཏྟཱ. ཏཐཱ ཧི སོ ‘‘ཨཔྤནཱ’’ཏི ནིདྡིཊྛོ. སམྨཱསཏིསམྨཱཝཱཡཱམཱ པན སམཱདྷིཔཀྑིཡཱ ཨེཝཱཏི ཨཱཧ ‘‘ཨཝསེསཱ དྷམྨཱ ཙེཏོཝིམུཏྟཱིཏི ཝེདིཏབྦཱ’’ཏི.

ཙཏུཔཱརིསུདྡྷིསཱིལནྟི ཨརིཡམགྒཱདྷིགམསྶ པདཊྛཱནབྷཱུཏཾ ཙཏུཔཱརིསུདྡྷིསཱིལཾ. སུཏཱདཱིསུཔི ཨེསེཝ ནཡོ. ཨཏྟནོ ཙིཏྟཔྤཝཏྟིཨཱརོཙནཝསེན སཧ ཀཐནཾ སཾཀཐཱ, སཾཀཐཱཝ སཱཀཙྪཱ. ཨིདྷ པན ཀམྨཊྛཱནཔྤཊིབདྡྷཱཏི ཨཱཧ ‘‘ཀམྨཊྛཱནེ…པེ… ཀཐཱ’’ཏི. ཏསྶ ཀམྨཊྛཱནསྶ ཨེཀཝཱརཾ ཝིདྷིཡཱ ཨཔྤཊིཔཛྫནཾ ཁལནཾ, ཨནེཀཝཱརཾ པཀྑལནཾ, ཏདུབྷཡསྶ ཝིཙྪེདནཱི ཨཔནཡནཱི ཀཐཱ ཁལནཔཀྑལནཙྪེདནཀཐཱ. པཱུརེནྟསྶཱཏི ཝིཝཊྚསནྣིསྶིཏཾ ཀཏྭཱ པཱལེནྟསྶ བྲཱུཧེནྟསྶ ཙ. སུཎནྟསྶཱཏི ‘‘ཡཐཱཨུགྒཧིཏཀམྨཊྛཱནཾ ཕཱཏིཾ གམིསྶཏཱི’’ཏི ཨེཝཾ སུཎནྟསྶ. ཏེནེཝ ཧི ‘‘སཔྤཱཡདྷམྨསྶཝན’’ནྟི ཝུཏྟཾ. ཀམྨཾ ཀརོནྟསྶཱཏི བྷཱཝནཱནུཡོགཀམྨཾ ཀརོནྟསྶ. པཉྩསུཔི ཋཱནེསུ ཨནྟ-སདྡོ ཧེཏུཨཏྠཛོཏནོ དཊྛབྦོ. ཨེཝཉྷི ‘‘ཡཐཱ ཧཱི’’ཏིཨཱདིནཱ ཝུཙྩམཱནཱ ཨམྦཱུཔམཱ ཡུཛྫེཡྻ.

ཨུདཀཀོཊྛཀནྟི ཛལཱཝཱཊཾ. ཐིརཾ ཀཏྭཱ བནྡྷཏཱིཏི ཨསིཐིལཾ དལ༹ྷཾ ནཱཏིམཧནྟཾ ནཱཏིཁུདྡཀཾ ཀཏྭཱ ཡོཛེཏི. ཐིརཾ ཀརོཏཱིཏི ཨུདཀསིཉྩནཀཱལེ ཏཏོ ཏཏོ པཝཏྟིཏྭཱ ཨུདཀསྶ ཨནིཀྑམནཏྠཾ ཛལཱཝཱཊཔཱལི༹ཾ ཐིརཏརཾ ཀརོཏི. སུཀྑདཎྜཀོཏི ཏསྶེཝ ཨམྦགཙྪསྶ སུཀྑཀོ སཱཁཱསཱིསཀོ ¶ . ཀིཔིལླིཀཔུཊོཏི ཏམྦཀིཔིལླིཀཔུཊོ. ཁཎིཏྟིནྟི ཀུདཱལཾ. ཀོཊྛཀབནྡྷནཾ ཝིཡ སཱིལཾ སམྨཱདིཊྛིཡཱ ཝཌྜྷནཱུཔཱཡསྶ མཱུལབྷཱཝཏོ. ཨུདཀསིཉྩནཾ ཝིཡ དྷམྨསྶཝནཾ བྷཱཝནཱཡ པརིབྲཱུཧནཏོ. མརིཡཱདཱཡ ཐིརབྷཱཝཀརཎཾ ཝིཡ སམཐོ ཡཐཱཝུཏྟཱཡ བྷཱཝནཱདྷིཊྛཱནཱཡ སཱིལམརིཡཱདཱཡ དལ༹ྷཱིབྷཱཝཱཔཱདནཏོ. སམཱཧིཏསྶ ཧི སཱིལཾ ཐིརཏརཾ ཧོཏི. སམཱིཔེ ཝལླིཨཱདཱིནཾ ཧརཎཾ ཝིཡ ཀམྨཊྛཱནེ ཁལནཔཀྑལནཙྪེདནཾ ཨིཙྪིཏབྦབྷཱཝནཱཡ ཝིབནྡྷནཱཔནཡནཏོ. མཱུལཁཎནཾ ཝིཡ སཏྟནྣཾ ཨནུཔསྶནཱནཾ བྷཱཝནཱ ཏསྶཱ ཝིབནྡྷསྶ མཱུལབྷཱུཏཱནཾ ཏཎྷཱམཱནདིཊྛཱིནཾ པལིཁཎནཏོ. ཨེཏྠ ཙ ཡསྨཱ སུཔརིསུདྡྷསཱིལསྶ ཀམྨཊྛཱནཾ ཨནུཡུཉྫནྟསྶ སཔྤཱཡདྷམྨསྶཝནཾ ཨིཙྪིཏབྦཾ, ཏཏོ ཡཐཱསུཏེ ཨཏྠེ སཱཀཙྪཱསམཱཔཛྫནཾ, ཏཏོ ཀམྨཊྛཱནཝིསོདྷནེན སམཐནིབྦཏྟི, ཏཏོ སམཱཧིཏསྶ ཨཱརདྡྷཝིཔསྶཀསྶ ཝིཔསྶནཱཔཱརིཔཱུརི, པརིཔུཎྞཱ ¶ ཝིཔསྶནཱ མགྒསམྨཱདིཊྛིཾ བྲཱུཧེཏཱིཏི ཨེཝམེཏེསཾ ཨངྒཱནཾ པརམྤརཱཡ སམྨུཁཱ ཨནུགྒཎྷནཏོ ཨཡམཱནུཔུབྦཱི ཀཐིཏཱཏི ཝེདིཏབྦཾ.

༢༦. ཚཊྛེ ཝིམུཏྟིཡཱ ཝཊྚདུཀྑཏོ ཝིམུཙྩནསྶ ཨཱཡཏནཱནི ཀཱརཎཱནི ཝིམུཏྟཱཡཏནཱནཱིཏི ཨཱཧ – ‘‘ཝིམུཙྩནཀཱརཎཱནཱི’’ཏི. པཱལི༹ཨཏྠཾ ཛཱནནྟསྶཱཏི ‘‘ཨིདྷ སཱིལཾ ཨཱགཏཾ, ཨིདྷ སམཱདྷི, ཨིདྷ པཉྙཱ’’ཏིཨཱདིནཱ ཏཾཏཾཔཱལི༹ཨཏྠཾ ཡཱཐཱཝཏོ ཛཱནནྟསྶ. པཱལི༹ཾ ཛཱནནྟསྶཱཏི ཏདཏྠབོདྷིནིཾ པཱལི༹ཾ ཡཱཐཱཝཏོ ཨུཔདྷཱརེནྟསྶ. ཏརུཎཔཱིཏཱིཏི སཉྫཱཏམཏྟཱ མུདུཀཱ པཱིཏི ཛཱཡཏི. ཀཐཾ ཛཱཡཏི? ཡཐཱདེསིཏཾ དྷམྨཾ ཨུཔདྷཱརེནྟསྶ ཏདནུཙྪཝིཀམེཝ ཨཏྟནོ ཀཱཡཝཱཙཱམནོསམཱཙཱརཾ པརིགྒཎྷནྟསྶ སོམནསྶཾ པཏྟསྶ པམོདལཀྑཎཾ པཱམོཛྫཾ ཛཱཡཏི. ཏུཊྛཱཀཱརབྷཱུཏཱ བལཝཔཱིཏཱིཏི པུརིམུཔྤནྣཱཡ པཱིཏིཡཱ ཝསེན ལདྡྷཱསེཝནཏྟཱ ཨཏིཝིཡ ཏུཊྛཱཀཱརབྷཱུཏཱ ཀཱཡཙིཏྟདརཐསྶ པསྶམྦྷནསམཏྠཏཱཡ པསྶདྡྷིཡཱ པཙྩཡོ བྷཝིཏུཾ སམཏྠཱ བལཔྤཏྟཱ པཱིཏི ཛཱཡཏི. ཡསྨཱ ནཱམཀཱཡེ པསྶདྡྷེ རཱུཔཀཱཡོཔི པསྶདྡྷོ ཨེཝ ཧོཏི, ཏསྨཱ ‘‘ནཱམཀཱཡོ པསྶམྦྷཏི’’ཙྩེཝ ཝུཏྟཾ.

སུཁཾ ¶ པཊིལབྷཏཱིཏི ཝཀྑམཱནསྶ ཙིཏྟསམཱདྷཱནསྶ པཙྩཡོ བྷཝིཏུཾ སམཏྠཾ ཙེཏསིཀཾ ནིརཱམིསསུཁཾ པཊིལབྷཏི ཝིནྡཏི. སམཱདྷིཡཏཱིཏི ཨེཏྠ པན ན ཡོ ཀོཙི སམཱདྷི ཨདྷིཔྤེཏོ, ཨཐ ཁོ ཨནུཏྟརསམཱདྷཱིཏི དསྶེནྟོ ‘‘ཨརཧཏྟ…པེ… སམཱདྷིཡཏཱི’’ཏི ཨཱཧ. ‘‘ཨཡཾ ཧཱི’’ཏིཨཱདི ཏསྶཾ དེསནཱཡཾ ཏཱདིསསྶ པུགྒལསྶ ཡཐཱཝུཏྟསམཱདྷིཔཊིལཱབྷསྶ ཀཱརཎབྷཱཝཝིབྷཱཝནཾ, ཡཾ ཏཐཱ ཝིམུཏྟཱཡཏནབྷཱཝོ. ཨོསཀྐིཏུནྟི དསྶིཏུཾ. སམཱདྷིཡེཝ སམཱདྷིནིམིཏྟནྟི ཀམྨཊྛཱནཔཱལི༹ཡཱ ཨཱརུལ༹ྷོ སམཱདྷི ཨེཝ པརཏོ ཨུཔྤཛྫནཀབྷཱཝནཱསམཱདྷིསྶ ཀཱརཎབྷཱཝཏོ སམཱདྷིནིམིཏྟཾ. ཏེནཱཧ ‘‘ཨཱཙརིཡསྶ སནྟིཀེ’’ཏིཨཱདི.

ཝིམུཏྟཱཡཏནསུཏྟཝཎྞནཱ ནིཊྛིཏཱ.

༢༧. སཏྟམེ ¶ སབྦསོ ཀིལེསདུཀྑདརཐཔརིལཱ༹ཧཱནཾ ཝིགཏཏྟཱ སཱཏིསཡམེཏྠ སུཁནྟི ཝུཏྟཾ ‘‘ཨཔྤིཏཔྤིཏཀྑཎེ སུཁཏྟཱ པཙྩུཔྤནྣསུཁོ’’ཏི. པུརིམསྶ པུརིམསྶ ཝསེན པཙྪིམཾ པཙྪིམཾ ལདྡྷཱསེཝནཏཱཡ སནྟཔཎཱིཏཏརབྷཱཝཔྤཏྟཾ ཧོཏཱིཏི ཨཱཧ ‘‘པུརིམོ…པེ… སུཁཝིཔཱཀོ’’ཏི. ཀིལེསཔྤཊིཔྤསྶདྡྷིཡཱཏི ཀིལེསཱནཾ པཊིཔྤསྶམྦྷནེན ལདྡྷཏྟཱ. ‘‘ཀིལེསཔྤཊིཔྤསྶདྡྷིབྷཱཝནྟི ཀིལེསཱནཾ པཊིཔྤསྶམྦྷནབྷཱཝཾ. ལདྡྷཏྟཱ པཏྟཏྟཱ ཏབྦྷཱཝཾ ཨུཔགཏཏྟཱ. ལོཀིཡསམཱདྷིསྶ པཙྩནཱིཀཱནི ནཱིཝརཎཔཋམཛ྄ཛྷཱནནིཀནྟིཨཱདཱིནི ནིགྒཧེཏབྦཱནི, ཨཉྙེ ཀིལེསཱ ཝཱརེཏབྦཱ. ཨིམསྶ པན ཨརཧཏྟསམཱདྷིསྶ པཊིཔྤསྶདྡྷསབྦཀིལེསཏྟཱ ན ནིགྒཧེཏབྦཾ ཝཱརེཏབྦཉྩ ཨཏྠཱིཏི མགྒཱནནྟརཾ སམཱཔཏྟིཀྑཎེ ཙ ཨཔྤཡོགེན ཨདྷིགཏཏྟཱ ཨཔྤིཏཏྟཱ ཙ ཨཔརིཧཱནིཝསེན ཝཱ ཨཔྤིཏཏྟཱ ན སསངྑཱརནིགྒཡ྄ཧཝཱརིཏགཏོ. སཏིཝེཔུལླཔྤཏྟཏྟཱཏི ཨེཏེན ཨཔྤཝཏྟམཱནཱཡཔི སཏིཡཱ སཏིབཧུལཏཱཡ སཏོ ཨེཝ ནཱམཱཏི དསྶེཏི. ཡཐཱཔརིཙྪིནྣཀཱལཝསེནཱཏི ཨེཏེན པརིཙྪིནྣསྶཏིཡཱ སཏོཏི དསྶེཏི. སེསེསཱུཏི ཉཱཎེསུ.

༢༨-༢༩. ཨཊྛམེ ¶ ཀརོ ཝུཙྩཏི པུཔྥསམྦྷཝཾ ‘‘གབྦྷཱསཡེ ཀིརཱིཡཏཱི’’ཏི ཀཏྭཱ. ཀརཏོ ཛཱཏོ ཀཱཡོ ཀརཛཀཱཡོ, ཏདུཔནིསྶཡོ ཙཏུསནྟཏིརཱུཔསམུདཱཡོ. ཀཱམཾ ནཱམཀཱཡོཔི ཝིཝེཀཛེན པཱིཏིསུཁེན ཏཐཱལདྡྷཱུཔཀཱརོ, ‘‘ཨབྷིསནྡེཏཱི’’ཏིཨཱདིཝཙནཏོ པན རཱུཔཀཱཡོ ཨིདྷ ཨདྷིཔྤེཏོཏི ཨཱཧ ‘‘ཨིམཾ ཀརཛཀཱཡ’’ནྟི. ཨབྷིསནྡེཏཱིཏི ཨབྷིསནྡནཾ ཀརོཏི. ཏཾ པན ཨབྷིསནྡནཾ ཛྷཱནམཡེན པཱིཏིསུཁེན ཀརཛཀཱཡསྶ ཏིནྟབྷཱཝཱཔཱདནཾ སབྦཏྠཀམེཝ ལཱུཁབྷཱཝཱཔནཡནནྟི ཨཱཧ ‘‘ཏེམེཏཱི’’ཏིཨཱདི. ཏཡིདཾ ཨབྷིསནྡནཾ ཨཏྠཏོ ཡཐཱཝུཏྟཔཱིཏིསུཁསམུཊྛཱནེཧི པཎཱིཏརཱུཔེཧི ཀཱཡསྶ པརིཔྥརཎཾ དཊྛབྦཾ. པརིསནྡེཏཱིཏིཨཱདཱིསུཔི ཨེསེཝ ནཡོ. སབྦཾ ཨེཏསྶ ཨཏྠཱིཏི སབྦཱཝཱ, ཏསྶ སབྦཱཝཏོ. ཨཝཡཝཱཝཡཝིསམྦནྡྷེ ཨཝཡཝིནི སཱམིཝཙནནྟི ཨཝཡཝཝིསཡོ སབྦ-སདྡོ, ཏསྨཱ ཝུཏྟཾ ‘‘སབྦཀོཊྛཱསཝཏོ’’ཏི. ཨཕུཊཾ ནཱམ ན ཧོཏི ཡཏྠ ཡཏྠ ཀམྨཛརཱུཔཾ, ཏཏྠ ཏཏྠ ཙིཏྟཛརཱུཔསྶ ཨབྷིབྱཱཔནཏོ. ཏེནཱཧ ‘‘ཨུཔཱདིནྣཀསནྟཏཱི’’ཏིཨཱདི.

ཚེཀོཏི ¶ ཀུསལོ. ཏཾ པནསྶ ཀོསལླཾ ནཧཱནཱིཡཙུཎྞཱནཾ ཀརཎེ པིཎྜིཀརཎེ ཙ སམཏྠཏཱཝསེན ཝེདིཏབྦནྟི ཨཱཧ ‘‘པཊིབལོ’’ཏིཨཱདི. ཀཾས-སདྡོ ‘‘མཧཏིཡཱ ཀཾསཔཱཏིཡཱ’’ཏིཨཱདཱིསུ (མ. ནི. ༡.༦༡) སུཝཎྞེ ཨཱགཏོ.‘‘ཀཾསོ ཨུཔཧཏོ ཡཐཱ’’ཏིཨཱདཱིསུ (དྷ. པ. ༡༣༤) ཀིཏྟིམལོཧེ. ཀཏྠཙི པཎྞཏྟིམཏྟེ ‘‘ཨུཔཀཾསོ ནཱམ རཱཛཱསི, མཧཱཀཾསསྶ ཨཏྲཛོ’’ཏིཨཱདི (ཛཱ. ཨཊྛ. ༤.༡༠.༡༦༤ གྷཊཔཎྜིཏཛཱཏཀཝཎྞནཱ). ཨིདྷ པན ཡཏྠ ཀཏྠཙི ལོཧེཏི ཨཱཧ ‘‘ཡེན ཀེནཙི ལོཧེན ཀཏབྷཱཛནེ’’ཏི. སྣེཧཱནུགཏཱཏི ཨུདཀསིནེཧེན ཨནུཔྤཝིསནཝསེན གཏཱ ཨུཔགཏཱ. སྣེཧཔརེཏཱཏི ཨུདཀསིནེཧེན པརིཏོ གཏཱ སམནྟཏོ ཕུཊཱ. ཏཏོ ཨེཝ སནྟརབཱཧིརཱ ཕུཊཱ སྣེཧེན. ཨེཏེན སབྦསོ ཨུདཀེན ཏེམིཏབྷཱཝམཱཧ. ན ཙ པགྒྷརིཎཱིཏི ཨེཏེན ཏིནྟསྶཔི ཏསྶ གྷནཐདྡྷབྷཱཝཾ ཝདཏི. ཏེནཱཧ ‘‘ན བིནྡུབིནྡཱུ’’ཏིཨཱདི.

ཏཱཧི ཏཱཧི ཨུདཀསིརཱཧི ཨུབྦྷིཛྫཏཱིཏི ཨུབྦྷིདཾ, ཨུབྦྷིདཾ ཨུདཀཾ ཨེཏསྶཱཏི ཨུབྦྷིདོདཀོ. ཨུབྦྷིནྣཨུདཀོཏི ནདཱིཏཱིརེ ཁཏཀཱུཔཀོ ཝིཡ ཨུབྦྷིཛྫནཀཨུདཀོ. ཨུགྒཙྪནཨུདཀོཏི དྷཱརཱཝསེན ཨུཊྛཧནཨུདཀོ. ཀསྨཱ པནེཏྠ ཨུབྦྷིདོདཀོཝ ¶ རཧདོ གཧིཏོ, ན ཨིཏརོཏི ཨཱཧ ‘‘ཧེཊྛཱ ཨུགྒཙྪནཨུདཀཉྷཱི’’ཏིཨཱདི. དྷཱརཱནིཔཱཏབུབྦུལ༹ཀེཧཱིཏི དྷཱརཱནིཔཱཏེཧི ཙ ཨུདཀབུབྦུལེ༹ཧི ཙ. ‘‘ཕེཎཔཊལེཧི ཙཱ’’ཏི ཝཏྟབྦཾ, སནྣིསིནྣམེཝ ཨཔརིཀྑོབྷཏཱཡ ནིཙྩལམེཝ, སུཔྤསནྣམེཝཱཏི ཨདྷིཔྤཱཡོ. སེསནྟི ‘‘ཨབྷིསནྡེཏཱི’’ཏིཨཱདིཀཾ.

ཨུཔྤལཱནཱིཏི ཨུཔྤལགཙྪཱནི. སེཏརཏྟནཱིལེསཱུཏི ཨུཔྤལེསུ, སེཏུཔྤལརཏྟུཔྤལནཱིལུཔྤལེསཱུཏི ཨཏྠོ. ཡཾ ཀིཉྩི ཨུཔྤལཾ ཨུཔྤལམེཝ སཱམཉྙགྒཧཎཏོ. སཏཔཏྟནྟི ཨེཏྠ སཏ-སདྡོ བཧུཔརིཡཱཡོ ‘‘སཏགྒྷཱི’’ཏིཨཱདཱིསུ ཝིཡ. ཏེན ཨནེཀསཏཔཏྟསྶཔི སངྒཧོ སིདྡྷོ ཧོཏི. ལོཀེ པན རཏྟཾ པདུམཾ, སེཏཾ པུཎྜརཱིཀནྟི ཝུཙྩཏི. ཡཱཝ ཨགྒཱ ཡཱཝ ཙ མཱུལཱ ཨུདཀེན ཨབྷིསནྡནཱདིསམྦྷཝདསྶནཏྠཾ ཨུདཀཱནུགྒཏགྒཧཎཾ. ཨིདྷ ཨུཔྤལཱདཱིནི ཝིཡ ཀརཛཀཱཡོ, ཨུདཀཾ ཝིཡ ཏཏིཡཛ྄ཛྷཱནསུཁཾ.

ཡསྨཱ པརིསུདྡྷེན ཙེཏསཱཏི ཙཏུཏྠཛ྄ཛྷཱནཙིཏྟམཱཧ, ཏཉྩ རཱགཱདིཨུཔཀྐིལེསམལཱཔགམཏོ ནིརུཔཀྐིལེསཾ ནིམྨལཾ, ཏསྨཱ ཨཱཧ ‘‘ནིརུཔཀྐིལེསཊྛེན པརིསུདྡྷ’’ནྟི. ཡསྨཱ པན པཱརིསུདྡྷིཡཱ ཨེཝ པཙྩཡཝིསེསེན པཝཏྟིཝིསེསོ པརིཡོདཱཏཏཱ སུདྷནྟསུཝཎྞསྶ ནིགྷཾསནེན པབྷསྶརཏཱ ཝིཡ, ཏསྨཱ ཨཱཧ ‘‘པབྷསྶརཊྛེན པརིཡོདཱཏཾ ཝེདིཏབྦ’’ནྟི. ཨིདནྟི ཨོདཱཏཝཙནཾ. ཨུཏུཕརཎཏྠནྟི ཨུཏུནོ ཕརཎདསྶནཏྠཾ. ཨུཏུཕརཎཾ ན ཧོཏི སེསནྟི ཨདྷིཔྤཱཡོ. ཏེནཱཧ ‘‘ཏངྑཎ ¶ …པེ… བལཝཾ ཧོཏཱི’’ཏི. ཝཏྠཾ ཝིཡ ཀརཛཀཱཡོཏི ཡོགིནོ ཀརཛཀཱཡོ ཝཏྠཾ ཝིཡ དཊྛབྦོ ཨུཏུཕརཎསདིསེན ཙཏུཏྠཛ྄ཛྷཱནསུཁེན ཕརིཏབྦཏྟཱ. པུརིསསྶ སརཱིརཾ ཝིཡ ཙཏུཏྠཛ྄ཛྷཱནཾ དཊྛབྦཾ ཨུཏུཕརཎཊྛཱནིཡསྶ སུཁསྶ ནིསྶཡབྷཱཝཏོ. ཏེནཱཧ ‘‘ཏསྨཱ’’ཏིཨཱདི. ཏཏྠ ཙ ‘‘པརིསུདྡྷེན ཙེཏསཱ’’ཏི ཙེཏོགཧཎེན ཛྷཱནསུཁཾ ཝུཏྟནྟི དཊྛབྦཾ. ཏེནཱཧ ‘‘ཨུཏུཕརཎཾ ཝིཡ ཙཏུཏྠཛ྄ཛྷཱནསུཁ’’ནྟི. ནནུ ཙ ཙཏུཏྠཛ྄ཛྷཱནེ སུཁམེཝ ནཏྠཱིཏི? སཙྩཾ ནཏྠི, སཱཏལཀྑཎསནྟསབྷཱཝཏྟཱ པནེཏྠ ཨུཔེཀྑཱ ‘‘སུཁ’’ནྟི ཨདྷིཔྤེཏཱ. ཏེན ཝུཏྟཾ སམྨོཧཝིནོདནིཡཾ (ཝིབྷ. ཨཊྛ. ༢༣༢) ‘‘ཨུཔེཀྑཱ པན སནྟཏྟཱ, སུཁམིཙྩེཝ བྷཱསིཏཱ’’ཏི.

ཏསྶ ¶ ཏསྶ སམཱདྷིསྶ སརཱུཔདསྶནསྶ པཙྩཡཏྟཱ པཙྩཝེཀྑཎཉཱཎཾ པཙྩཝེཀྑཎནིམིཏྟཾ. སམབྷརིཏོཏི སམཔུཎྞོ.

མཎྜབྷཱུམཱིཏི པཔཱཝཎྞབྷཱུམི. ཡཏྠ སལིལསིཉྩནེན ཝིནཱཝ སསྶཱནི ཋིཏཱནི སམྤཛྫནྟི. ཡུགེ ཡོཛེཏབྦཱནི ཡོགྒཱནི, ཏེསཾ ཨཱཙརིཡོ ཡོགྒཱཙརིཡོ. ཏེསཾ སིཀྑཱཔནཏོ ཧཏྠིཨཱདཡོཔི ‘‘ཡོགྒཱ’’ཏི ཝུཙྩནྟཱིཏི ཨཱཧ པཱལི༹ཡཾ ‘‘ཨསྶདམྨསཱརཐཱི’’ཏི. ཡེན ཡེནཱཏི ཙཏཱུསུ མགྒེསུ ཡེན ཡེན མགྒེན. ཡཾ ཡཾ གཏིནྟི ཛཝསམཛཝཱདིབྷེདཱསུ གཏཱིསུ ཡཾ ཡཾ གཏིཾ. ནཝམེ ནཏྠི ཝཏྟབྦཾ.

པཉྩངྒིཀསུཏྟཱདིཝཎྞནཱ ནིཊྛིཏཱ.

༣༠. དསམེ ཨུཙྩཱསདྡམཧཱསདྡཱཏི ཨུདྡྷཾ ཨུགྒཏཏྟཱ ཨུཙྩོ པཏྠཊོ མཧནྟོ ཝིནིབྦྷིཛྫིཏྭཱ གཧེཏུཾ ཨསཀྐུཎེཡྻོ སདྡོ ཨེཏེསནྟི ཨུཙྩཱསདྡམཧཱསདྡཱ. ཝཙཱིགྷོསོཔི ཧི བཧཱུཧི ཨེཀཛ྄ཛྷཾ པཝཏྟིཏོ ཨཏྠཏོ སདྡཏོ ཙ དུརཝབོདྷོ ཀེཝལཾ མཧཱནིགྒྷོསོ ཨེཝ ཧུཏྭཱ སོཏཔཐམཱགཙྪཏི. མཙྪཝིལོཔེཏི མཙྪཱནཾ ཝིལུམྤིཏྭཱ ཝིཡ གཧཎེ, མཙྪཱནཾ ཝཱ ཝིལུམྤནེ. ཀེཝཊྚཱནཉྷི མཙྪཔཙྪིཋཔིཏཊྛཱནེ མཧཱཛནོ སནྣིཔཏིཏྭཱ ‘‘ཨིདྷ ཨཉྙཾ ཨེཀཾ མཙྪཾ དེཧི, ཨེཀཾ མཙྪཕཱལཾ དེཧཱི’’ཏི, ‘‘ཨེཏསྶ ཏེ མཧཱ དིནྣོ, མཡ྄ཧཾ ཁུདྡཀོ’’ཏི ཨེཝཾ ཨུཙྩཱསདྡཾ མཧཱསདྡཾ ཀརོནྟི. མཙྪགྒཧཎཏྠཾ ཛཱལེ པཀྑིཏྟེཔི ཏསྨིཾ ཋཱནེ ཀེཝཊྚཱ ཙེཝ ཨཉྙེ ཙ ‘‘པཝིཊྛོ གཧིཏོ’’ཏི མཧཱསདྡཾ ཀརོནྟི. ཏཾ སནྡྷཱཡེཏཾ ཝུཏྟཾ. ཨསུཙིསུཁནྟི ཀཱཡཱསུཙིསནྣིསྶིཏཏྟཱ ཀིལེསཱསུཙིསནྣིསྶིཏཏྟཱ ¶ ཙ ཨསུཙིསནྣིསྶིཏསུཁཾ. ནེཀྑམྨསུཁསྶཱཏི ཀཱམཏོ ནིཀྑམནྟསྶ སུཁསྶ. པཝིཝེཀསུཁསྶཱཏི གཎསངྒཎིཀཏོ ཀིལེསསངྒཎིཀཏོ ཙ ཝིགཏསྶ སུཁསྶ. ཨུཔསམསུཁསྶཱཏི རཱགཱདིཝཱུཔསམཱཝཧསྶ སུཁསྶ. སམྦོདྷསུཁནྟི མགྒསངྑཱཏསྶ སམྦོདྷསྶ ནིཊྛཔྤཏྟཏྠཱཡ སུཁཾ. སེསཾ སུཝིཉྙེཡྻམེཝ.

༣༡. ཙཏུཏྠསྶ ¶ པཋམེ སཏཀྐཀཱུཏི སཏསིཁརོ, ཨནེཀཀཱུཊོཏི ཨཏྠོ. ཨིདཾ ཏསྶ མཧཱམེགྷབྷཱཝདསྶནཾ. སོ ཧི མཧཱཝསྶཾ ཝསྶཏི. ཏེནེཝཱཧ – ‘‘ཨིཏོ ཙིཏོ ཙ ཨུཊྛིཏེན ཝལཱཧཀཀཱུཊསཏེན སམནྣཱགཏོཏི ཨཏྠོ’’ཏི. དསྶནསམྤནྣོཏི ཨེཏྠ དསྶནཾ ནཱམ སོཏཱཔཏྟིམགྒོ. སོ ཧི པཋམཾ ནིབྦཱནདསྶནཏོ ‘‘དསྶན’’ནྟི ཝུཙྩཏི. ཡདིཔི ཏཾ གོཏྲབྷུ པཋམཏརཾ པསྶཏི, དིསྭཱ པན ཀཏྟབྦཀིཙྩསྶ ཀིལེསཔྤཧཱནསྶ ཨཀརཎཏོ ན ཏཾ ‘‘དསྶན’’ནྟི ཝུཙྩཏི. ཨཱཝཛྫནཊྛཱནིཡཉྷི ཏཾ ཉཱཎཾ. མགྒསྶ ནིབྦཱནཱརམྨཎཏཱསཱམཉྙེན ཙེཏཾ ཝུཏྟཾ, ན ནིབྦཱནཔྤཊིཝིཛ྄ཛྷནེན, ཏསྨཱ དྷམྨཙཀྑུཾ པུནཔྤུནཾ ནིབྦཏྟནེན བྷཱཝནཾ ཨཔྤཏྟཾ དསྶནཾ, དྷམྨཙཀྑུཉྩ པརིཉྙཱདིཀིཙྩཀརཎེན ཙཏུསཙྩདྷམྨདསྶནཾ ཏདབྷིསམཡོཏི ནཏྠེཏྠ གོཏྲབྷུསྶ དསྶནབྷཱཝཱཔཏྟི. སེསམེཏྠ སུཝིཉྙེཡྻམེཝ.

༣༢. དུཏིཡེ ‘‘ཨརིཡཀནྟེཧི སཱིལེཧི སམནྣཱགཏོ’’ཏིཨཱདཱིསུ (ཨ. ནི. ༥.༡༧༩) ཨརིཡཀནྟཱནཱིཏི པཉྩསཱིལཱནི ཨཱགཏཱནི. ཨརིཡཀནྟཱནི ¶ ཧི པཉྩསཱིལཱནི ཨརིཡཱནཾ ཀནྟཱནི པིཡཱནི, བྷཝནྟརགཏཱཔི ཨརིཡཱ ཏཱནི ན ཝིཛཧནྟི. ཨིདྷ པན ‘‘ཡཱཝཏཱ, ཙུནྡ, སཱིལཱནི ཨརིཡཀནྟཱནི སཱིལཱནི, ཏེསཾ ཨགྒམཀྑཱཡཏི…པེ… ཨགྒེ ཏེ པརིཔཱུརཀཱརིནོ’’ཏི ཝུཏྟཏྟཱ མགྒཕལཱནི སཱིལཱནི ཨདྷིཔྤེཏཱནཱིཏི ཨཱཧ ‘‘ཨརིཡཀནྟཱནི སཱིལཱནཱིཏི མགྒཕལསམྤཡུཏྟཱནི སཱིལཱནཱི’’ཏི.

༣༣. ཏཏིཡེ ¶ སབྦཔཋམཾ ཨུཊྛཱནསཱིལཱཏི རཏྟིཡཱ ཝིབྷཱཡནཝེལཱཡ སཱམིཀེ པརིཛནེ སེཡྻཱཡ ཨཝུཊྛིཏེ སབྦཔཋམཾ ཨུཊྛཱནསཱིལཱ. སཱམིཀཾ དིསྭཱ ནིསིནྣཱསནཏོ ཨགྒིདཌྜྷཱ ཝིཡ པཋམམེཝ ཝུཊྛཧནྟཱིཏི ཝཱ པུབྦུཊྛཱཡིནིཡོ. ཀིཾཀཱརནྟི ཀིཾཀརཎཱིཡཾ, ཀིཾཀརཎབྷཱཝེན པུཙྪིཏྭཱ ཀཱཏབྦཝེཡྻཱཝཙྩནྟི ཨཏྠོ. ཏཾ པཊིསྶུཎནྟཱ ཝིཙརནྟཱིཏི ཀིཾཀཱརཔྤཊིསྶཱཝིནིཡོ. མནཱཔཾཡེཝ ཀིརིཡཾ ཀརོནྟི སཱིལེནཱཏི མནཱཔཙཱརིནིཡོ. པིཡམེཝ ཝདནྟི སཱིལེནཱཏི པིཡཝཱདིནིཡོ.

ཏཏྲུཔཱཡཱཡཱཏི ཏཏྲ ཀམྨེ སཱདྷེཏབྦཨུཔཱཡབྷཱུཏཱཡ ཝཱིམཾསཱཡ. ཏེནཱཧ ‘‘ཏསྨིཾ ཨུཎྞཱཀཔྤཱསསཾཝིདྷཱནེ’’ཏིཨཱདི. ཨལཾ ཀཱཏུནྟི ཀཱཏུཾ སམཏྠཱ. ཨལཾ སཾཝིདྷཱཏུནྟི ཝིཙཱརེཏུཾ སམཏྠཱ. ཏེནཱཧ ‘‘ཨལཾ ཀཱཏུཾ ཨལཾ སཾཝིདྷཱཏུནྟི ཨཏྟནཱ ཀཱཏུམྤི པརེཧི ཀཱརཱཔེཏུམྤཱི’’ཏིཨཱདི. སེསམེཏྠ སུཝིཉྙེཡྻམེཝ.

༣༤-༣༥. ཙཏུཏྠེ སནྡིཊྛིཀནྟི ཨསམྤརཱཡིཀཏཱཡ སཱམཾ དཊྛབྦཾ. སཡཾ ཨནུབྷཝིཏབྦཾ ཨཏྟཔཙྩཀྑཾ དིཊྛདྷམྨིཀནྟི ཨཏྠོ. ན སདྡྷཱམཏྟཀེནེཝ ཏིཊྛཏཱིཏི ‘‘དཱནཾ ནཱམ སཱདྷུ སུནྡརཾ, བུདྡྷཱདཱིཧི པཎྜིཏེཧི པསཏྠ’’ནྟི ཨེཝཾ སདྡྷཱམཏྟཀེནེཝ ན ཏིཊྛཏི. ཡཾ དཱནཾ དེཏཱིཏི ཡཾ དེཡྻདྷམྨཾ པརསྶ དེཏི. ཏསྶ པཏི ཧུཏྭཱཏི ཏབྦིསཡཾ ལོབྷཾ སུཊྛུ ཨབྷིབྷཝནྟོ ཏསྶ ཨདྷིཔཏི ཧུཏྭཱ དེཏི. ཏེན ཨནདྷིབྷཝནཱིཡཏྟཱ ན དཱསོ ན སཧཱཡོཏི. ཏཏྠ ཏདུབྷཡཾ ཨནྭཡཏོ ¶ བྱཏིརེཀཏོ ཙ དསྶེཏུཾ ‘‘ཡོ ཧཱི’’ཏིཨཱདི ཝུཏྟཾ. དཱསོ ཧུཏྭཱ དེཏི ཏཎྷཱདཱསབྱསྶ ཨུཔགཏཏྟཱ. སཧཱཡོ ཧུཏྭཱ དེཏི ཏསྶ པིཡབྷཱཝཱཝིསྶཛྫནཏོ. སཱམཱི ཧུཏྭཱ དེཏི ཏཏྠ ཏཎྷཱདཱསབྱཏོ ཨཏྟཱནཾ མོཙེཏྭཱ ཨབྷིབྷུཡྻ པཝཏྟནཏོ. ཨཐ ཝཱ ཡོ དཱནསཱིལཏཱཡ དཱཡཀོ པུགྒལོ, སོ དཱནེ པཝཏྟིབྷེདེན དཱནདཱསོ, དཱནསཧཱཡོ, དཱནཔཏཱིཏི ཏིཔྤཀཱརོ ཧོཏི. ཏདསྶ ཏིཔྤཀཱརཏཾ ཝིབྷཛིཏྭཱ དསྶེཏུཾ ‘‘ཡོ ཧཱི’’ཏིཨཱདི ཝུཏྟཾ. དཱཏབྦཊྛེན དཱནཾ, ཨནྣཔཱནཱདི.

ཏཏྠ ¶ ཡཾ ཨཏྟནཱ པརིབྷུཉྫཏི, ཏཎྷཱདྷིཔནྣཏཱཡ ཏསྶ ཝསེན ཝཏྟནཏོ དཱསོ ཝིཡ ཧོཏི. ཡཾ པརེསཾ དཱིཡཏི, ཏཏྠཱཔི ཨནྣཔཱནསཱམཉྙེན ཨིདཾ ཝུཏྟཾ ‘‘དཱནསངྑཱཏསྶ དེཡྻདྷམྨསྶ དཱསོ ཧུཏྭཱ’’ཏི. སཧཱཡོ ཧུཏྭཱ དེཏི ཨཏྟནཱ པརིབྷུཉྫིཏབྦསྶ པརེསཾ དཱཏབྦསྶ ཙ སམསམཾ ཋཔནཏོ. པཏི ཧུཏྭཱ དེཏི སཡཾ དེཡྻདྷམྨསྶ ཝསེ ཨཝཏྟིཏྭཱ ཏསྶ ཨཏྟནོ ཝསེ ཝཏྟཱཔནཏོ. ཨཔརོ ནཡོ – ཡོ ཨཏྟནཱ པཎཱིཏཾ པརིབྷུཉྫིཏྭཱ པརེསཾ ནིཧཱིནཾ དེཏི, སོ དཱནདཱསོ ནཱམ ཏནྣིམིཏྟནིཧཱིནབྷཱཝཱཔཏྟིཏོ. ཡོ ཡཱདིསཾ ཨཏྟནཱ པརིབྷུཉྫཏི, ཏཱདིསམེཝ པརེསཾ དེཏི, སོ དཱནསཧཱཡོ ནཱམ ཏནྣིམིཏྟཧཱིནཱདྷིཀབྷཱཝཝིཝཛྫནེན སདིསབྷཱཝཱཔཏྟིཏོ. ཡོ ཨཏྟནཱ ནིཧཱིནཾ པརིབྷུཉྫིཏྭཱ པརེསཾ པཎཱིཏཾ དེཏི, སོ དཱནཔཏི ནཱམ ཏནྣིམིཏྟསེཊྛབྷཱཝཱཔཏྟིཏོ.

ནིཏྟེཛབྷཱུཏོ ཏེཛཧཱནིཔྤཏྟིཡཱ. སཧ བྱཏི གཙྪཏཱིཏི སཧབྱོ, སཧཔཝཏྟནཀོ, ཏསྶ བྷཱཝོ སཧབྱཏཱ, སཧཔཝཏྟཱིཏི ཨཱཧ ‘‘སཧབྷཱཝཾ ཨེཀཱིབྷཱཝཾ གཏཱ’’ཏི. ཨསིཏསྶཱཏི ཝཱ ཨབནྡྷསྶ, ཏཎྷཱབནྡྷནེན ཨབནྡྷསྶཱཏི ཨཏྠོ. པཉྩམཾ ཨུཏྟཱནམེཝ.

སཱིཧསེནཱཔཏིསུཏྟཱདིཝཎྞནཱ ནིཊྛིཏཱ.

༣༦-༣༧. ཚཊྛེ ཨཱརཱམཏོཏི ཕལཱརཱམཏོ. པཋམུཔྤནྣཱནཱིཏི སབྦཔཋམཾ སུཛཱཏཱནི. བྷཱསིཏཉྙཱུཏི བྷིཀྑཱུ གྷརདྭཱརེ ཋིཏཱ ཀིཉྩཱཔི ཏུཎྷཱི ཧོནྟི, ཨཏྠཏོ པན ‘‘བྷིཀྑཾ དེཐཱ’’ཏི ཝདནྟི ནཱམ ཨརིཡཱཡ ཡཱཙནཱཡ. ཝུཏྟཉྷེཏཾ ‘‘ཨུདྡྷིསྶ ཨརིཡཱ ཏིཊྛནྟི, ཨེསཱ ཨརིཡཱནཾ ཡཱཙནཱ’’ཏི. ཏཏྲ ཡེ ‘‘མཡཾ པཙཱམ, ཨིམེ ན པཙནྟི, པཙམཱནེ པཏྭཱ ཨལབྷནྟཱ ཀུཧིཾ ལབྷིསྶནྟཱི’’ཏི ¶ དེཡྻདྷམྨཾ སཾཝིབྷཛནྟི, ཏེ བྷཱསིཏཉྙཱུ ནཱམ ཉཏྭཱ ཀཏྟབྦསྶ ཀརཎཏོ. ཡུཏྟཔྤཏྟཀཱལེཏི དཱཏུཾ ཡུཏྟཔྤཏྟཀཱལེ. ཨཔྤཊིཝཱནཙིཏྟོཏི ཨནིཝཏྟནཙིཏྟོ. སཏྟམཾ ཨུཏྟཱནམེཝ.

༣༨. ཨཊྛམེ ¶ ཨནུཀམྤནྟཱིཏི ‘‘སབྦེ སཏྟཱ སུཁཱི ཧོནྟུ ཨཝེརཱ ཨབྱཱཔཛྫཱ’’ཏི ཨེཝཾ ཧིཏཕརཎེན ཨནུགྒཎྷནྟི. ཨཔིཙ ཨུཔཊྛཱཀཱནཾ གེཧཾ ཨཉྙེ སཱིལཝནྟེ སབྲཧྨཙཱརིནོ གཧེཏྭཱ པཝིསནྟཱཔི ཨནུགྒཎྷནྟི ནཱམ. ནཱིཙཝུཏྟིནྟི པཎིཔཱཏསཱིལཾ. ཀོདྷམཱནཐདྡྷཏཱཡ རཧིཏནྟི ཀོདྷམཱནཝསེན ཨུཔྤནྣོ ཡོ ཐདྡྷབྷཱཝོ ཙིཏྟསྶ ཨུདྡྷུམཱཏལཀྑཎོ, ཏེན ཝིརཧིཏནྟི ཨཏྠོ. སོརཙྩེནཱཏི ‘‘ཏཏྠ ཀཏམཾ སོརཙྩཾ? ཡོ ཀཱཡིཀོ ཨཝཱིཏིཀྐམོ, ཝཱཙསིཀོ ཨཝཱིཏིཀྐམོ, ཀཱཡིཀཝཱཙསིཀོ ཨཝཱིཏིཀྐམོ, ཨིདཾ ཝུཙྩཏི སོརཙྩཾ. སབྦོཔི སཱིལསཾཝརོ སོརཙྩ’’ནྟི ཨེཝམཱགཏེན སཱིལསཾཝརསངྑཱཏེན སོརཏབྷཱཝེན. སཁིལནྟི ‘‘ཏཏྠ ཀཏམཾ སཱཁལྱཾ? ཡཱ སཱ ཝཱཙཱ ཐདྡྷཀཱ ཀཀྐསཱ ཕརུསཱ ཀཊུཀཱ ཨབྷིསཛྫནཱི ཀོདྷསཱམནྟཱ ཨསམཱདྷིསཾཝཏྟནིཀཱ, ཏཐཱརཱུཔིཾ ཝཱཙཾ པཧཱཡ ཡཱ སཱ ཝཱཙཱ ནེལཱ ཀཎྞསུཁཱ པེམནཱིཡཱ ཧདཡངྒམཱ པོརཱི བཧུཛནཀནྟཱ བཧུཛནམནཱཔཱ, ཏཐཱརཱུཔིཾ ཝཱཙཾ བྷཱསིཏཱ ཧོཏི. ཡཱ ཏཏྠ སཎྷཝཱཙཏཱ སཁིལཝཱཙཏཱ ཨཕརུསཝཱཙཏཱ, ཨིདཾ ཝུཙྩཏི སཱཁལྱ’’ནྟི (དྷ. ས. ༡༣༥༠) ཨེཝཾ ཝུཏྟེན སམྨོདཀམུདུབྷཱཝེན སམནྣཱགཏཾ. ཏེནཱཧ ‘‘སཁིལནྟི སམྨོདཀ’’ནྟི.

༣༩-༤༠. ནཝམེ བྷཏོཏི པོསིཏོ. ཏཾ པན བྷརཎཾ ཛཱཏཀཱལཏོ པཊྛཱཡ སུཁཔཙྩཡཱུཔཧརཎེན དུཀྑཔཙྩཡཱཔཧརཎེན ཙ པཝཏྟིཏནྟི དསྶེཏུཾ ‘‘ཨམྷེཧཱི’’ཏིཨཱདི ཝུཏྟཾ. ཧཏྠཔཱདཝཌྜྷནཱདཱིཧཱིཏི ཨཱདི-སདྡེན མུཁེན སིངྒྷཱནིཀཱཔནཡནནཧཱཔནམཎྜནཱདིཉྩ སངྒཎྷཱཏི. མཱཏཱཔིཏཱུནཾ སནྟཀཾ ཁེཏྟཱདིཾ ཨཝིནཱསེཏྭཱ རཀྑིཏཾ ཏེསཾ པརམྤརཱཡ ཋིཏིཡཱ ཀཱརཎཾ ཧོཏཱིཏི ཨཱཧ ‘‘ཨམྷཱཀཾ སནྟཀཾ…པེ… ཀུལཝཾསོ ཙིརཾ ཋསྶཏཱི’’ཏི. སལཱཀབྷཏྟཱདཱིནི ཨནུཔཙྪིནྡིཏྭཱཏི སལཱཀབྷཏྟཱདཱིནི ཨཝིཙྪིནྡིཏྭཱ. ཡསྨཱ དཱཡཛྫཔྤཊིལཱབྷསྶ ཡོགྱབྷཱཝེན ཝཏྟམཱནོཡེཝ ¶ དཱཡསྶ པཊིཔཛྫིསྶཏི, ན ཨིཏརོཏི ཨཱཧ ‘‘ཀུལཝཾསཱནུརཱུཔཱཡ པཊིཔཏྟིཡཱ’’ཏིཨཱདི ¶ . ཨཏྟནཱ དཱཡཛྫཱརཧཾ ཀརོནྟོཏི ཨཏྟཱནཾ དཱཡཛྫཱརཧཾ ཀརོནྟོ. མཱཏཱཔིཏརོ ཧི ཨཏྟནོ ཨོཝཱདེ ཨཝཏྟམཱནེ མིཙྪཱཔཊིཔནྣེ དཱརཀེ ཝིནིཙྪཡཾ གནྟྭཱ ཨཔུཏྟེ ཀརོནྟི, ཏེ དཱཡཛྫཱརཧཱ ན ཧོནྟི. ཨོཝཱདེ ཝཏྟམཱནེ པན ཀུལསནྟཀསྶ སཱམིཀེ ཀརོནྟི. ཏཏིཡདིཝསཏོ པཊྛཱཡཱཏི མཏདིཝསཏོ ཏཏིཡདིཝསཏོ པཊྛཱཡ. སེསཾ སུཝིཉྙེཡྻམེཝ. དསམཾ ཨུཏྟཱནམེཝ.

༤༡-༤༢. པཉྩམསྶ པཋམེ ཨུཊྛཱནཝཱིརིཡཱདྷིགཏེཧཱིཏི ཝཱ ཨུཊྛཱནེན ཙ ཝཱིརིཡེན ཙ ཨདྷིགཏེཧི. ཏཏྠ ཨུཊྛཱནནྟི ཀཱཡིཀཾ ཝཱིརིཡཾ. ཝཱིརིཡནྟི ཙེཏསིཀནྟི ཝདནྟི. ཨུཊྛཱནནྟི ཝཱ བྷོགུཔྤཱདནེ ཡུཏྟཔྤཡུཏྟཏཱ. ཝཱིརིཡཾ ཏཛྫོ ཨུསྶཱཧོ. པཱིཎིཏནྟི དྷཱཏཾ སུཏིཏྟཾ. ཏཐཱབྷཱུཏོ པན ཡསྨཱ ཐཱུལསརཱིརོ ཧོཏི, ཏསྨཱ ‘‘ཐཱུལཾ ཀརོཏཱི’’ཏི ཝུཏྟཾ. དུཏིཡཾ ཨུཏྟཱནམེཝ.

༤༣. ཏཏིཡེ ཨཔྤམཱདཾ པསཾསནྟཱིཏི ‘‘ཨེཏཱནི ཨཱཡུཨཱདཱིནི པཏྠཡནྟེན ཨཔྤམཱདོ ཀཱཏབྦོ’’ཏི ཨཔྤམཱདམེཝ པསཾསནྟི པཎྜིཏཱ. ཡསྨཱ ཝཱ པུཉྙཀིརིཡཱསུ པཎྜིཏཱ ཨཔྤམཱདཾ པསཾསནྟི, ཏསྨཱ ཨཱཡུཨཱདཱིནི པཏྠཡནྟེན ཨཔྤམཱདོཝ ཀཱཏབྦོཏི ཨཏྠོ. པུརིམསྨིཾ ཨཏྠཝིཀཔྤེ ‘‘པུཉྙཀིརིཡཱསཱུ’’ཏི པདསྶ ‘‘ཨཔྤམཏྟོ’’ཏི ཨིམིནཱ སམྦནྡྷོ. ཡསྨཱ ¶ པཎྜིཏཱ ཨཔྤམཱདཾ པསཾསནྟི, ཡསྨཱ ཙ པུཉྙཀིརིཡཱསུ ཨཔྤམཏྟོ ཨུབྷོ ཨཏྠེ ཨདྷིགཏོ ཧོཏི, ཏསྨཱ ཨཱཡུཨཱདཱིནི པཏྠཡནྟེན ཨཔྤམཱདོཝ ¶ ཀཱཏབྦོ. དུཏིཡསྨིཾ ཨཏྠཝིཀཔྤེ པཎྜིཏཱ ཨཔྤམཱདཾ པསཾསནྟི. ཀཏྠཱཏི? པུཉྙཀིརིཡཱསུ. ཀསྨཱཏི ཙེ? ཡསྨཱ ཨཔྤམཏྟོ ཨུབྷོ ཨཏྠེ ཨདྷིགྒཎྷཱཏི པཎྜིཏོ, ཏསྨཱཏི ཨཏྠོ. ཨཏྠཔྤཊིལཱབྷེནཱཏི དིཊྛདྷམྨིཀཱདིཧིཏཔྤཊིལཱབྷེན.

༤༤. ཙཏུཏྠེ ཛྷཱནམནེན ནིབྦཏྟཾ མནོམཡནྟི ཨཱཧ ‘‘སུདྡྷཱཝཱསེསུ ཨེཀཾ ཛྷཱནམནེན ནིབྦཏྟཾ དེཝཀཱཡ’’ནྟི. སཏིཔི ཧི སབྦསཏྟཱནཾ ཨབྷིསངྑཱརམནསཱ ནིབྦཏྟབྷཱཝེ བཱཧིརཔཙྩཡེཧི ཝིནཱ མནསཱཝ ནིབྦཏྟཏྟཱ ‘‘མནོམཡཱ’’ཏི ཝུཙྩནྟི རཱུཔཱཝཙརསཏྟཱ. ཡདི ཨེཝཾ ཀཱམབྷཝེ ཨོཔཔཱཏིཀསཏྟཱནམྤི མནོམཡབྷཱཝོ ཨཱཔཛྫཏཱིཏི ཙེ? ན, ཏཏྠ བཱཧིརཔཙྩཡེཧི ནིབྦཏྟེཏབྦཏཱསངྐཱཡ ཨེཝ ཨབྷཱཝཏོ ‘‘མནསཱཝ ནིབྦཏྟཱ’’ཏི ཨཝདྷཱརཎཱསམྦྷཝཏོ. ནིརུལ༹ྷོ ཝཱཡཾ ལོཀེ མནོམཡཝོཧཱརོ རཱུཔཱཝཙརསཏྟེསུ. ཏཐཱ ཧི ‘‘ཨནྣམཡོ, པཱཎམཡོ, མནོམཡོ, ཨཱནནྡམཡོ, ཝིཉྙཱཎམཡོ’’ཏི པཉྩདྷཱ ཨཏྟཱནཾ ཝེདཝཱདིནོཔི ཝདནྟི. ཨུཙྪེདཝཱདིནོཔི ཝདནྟི ‘‘དིབྦོ རཱུཔཱི མནོམཡོ’’ཏི (དཱི. ནི. ༡.༨༧). ཏཱིསུ ཝཱ ཀུལསམྤཏྟཱིསཱུཏི བྲཱཧྨཎཁཏྟིཡཝེསྶསངྑཱཏེསུ སམྤནྣཀུལེསུ. ཚསུ ཝཱ ཀཱམསགྒེསཱུཏི ཚསུ ཀཱམཱཝཙརདེཝེསུ.

༤༥-༤༦. པཉྩམེ ཨསངྑེཡྻོཏི ཨཱལ༹ྷཀགཎནཱཡ ཨསངྑེཡྻོ. ཡོཛནཝསེན པནསྶ སངྑཱ ཨཏྠི ཧེཊྛཱ མཧཱཔཐཝིཡཱ ཨུཔརི ཨཱཀཱསེན པརིསམནྟཏོ ཙཀྐཝཱལ༹པབྦཏེན མཛ྄ཛྷེ ཏཏྠ ཏཏྠ ཋིཏཀེཧི དཱིཔཔབྦཏཔརིཡནྟེཧི པརིཙྪིནྣཏྟཱ ཛཱནནྟེན ཡོཛནཏོ སངྑཱཏུཾ སཀྐཱཏི ཀཏྭཱ. མཧཱསརཱིརམཙྪཀུམྦྷཱིལཡཀྑརཀྑསམཧཱནཱགདཱནཝཱདཱིནཾ སཝིཉྙཱཎཀཱནཾ བལཝཱམུཁཔཱཏཱལཱདཱིནཾ ¶ ཨཝིཉྙཱཎཀཱནཾ བྷེརཝཱརམྨཎཱནཾ ཝསེན བཧུབྷེརཝཾ ¶ . པུཐཱུཏི བཧཱུ. སཝནྟཱིཏི སནྡམཱནཱ. ཨུཔཡནྟཱིཏི ཨུཔགཙྪནྟི. ཚཊྛཾ ཨུཏྟཱནམེཝ.

པུཉྙཱབྷིསནྡསུཏྟཱདིཝཎྞནཱ ནིཊྛིཏཱ.

༤༧-༤༨. སཏྟམེ སདྡྷཱཏི མགྒེནཱགཏཱ སདྡྷཱ. སཱིལཉྩ ཡསྶ ཀལྱཱཎནྟི ཀལྱཱཎསཱིལཾ ནཱམ ཨརིཡསཱཝཀསྶ ཨརིཡཀནྟཾ སཱིལཾ ཝུཙྩཏི. ཏཏྠ ཀིཉྩཱཔི ཨརིཡསཱཝཀསྶ ཨེཀསཱིལམྤི ཨཀནྟཾ ནཱམ ནཏྠི, ཨིམསྨིཾ པནཏྠེ བྷཝནྟརེཔི ཨཔྤཧཱིནཾ པཉྩསཱིལཾ ཨདྷིཔྤེཏཾ. ཨཊྛམཾ ཨུཏྟཱནམེཝ.

༤༩. ནཝམེ པཏིཏཀྑནྡྷོཏི སམྨུཁཱ ཀིཉྩི ཨོལོཀེཏུཾ ཨསམཏྠཏཱཡ ཨདྷོམུཁོ. ནིཔྤཊིབྷཱནོཏི སཧདྷམྨིཀཾ ཀིཉྩི ཝཏྟུཾ ཨཝིསཧནཏོ ནིཔྤཊིབྷཱནོ པཊིབྷཱནརཧིཏོ.

༥༠. དསམེ ཨཛ྄ཛྷོམུཙྪིཏོཏི ཨདྷིམཏྟཱཡ ཏཎྷཱམུཙྪཱཡ མུཙྪིཏོ, མུཙྪཾ མོཧཾ པམཱདཾ ཨཱཔནྣོ. ཏེནཱཧ ‘‘གིལིཏྭཱ…པེ… ཨཏིརེཀམུཙྪཱཡ ཏཎྷཱཡ སམནྣཱགཏོ’’ཏི. མཧཙྩཱཏི མཧཏིཡཱ. ལིངྒཝིཔལླཱསེན ཙེཏཾ ཝུཏྟཾ. ཏེནཱཧ ‘‘མཧཏཱ རཱཛཱནུབྷཱཝེནཱ’’ཏི.

༥༡-༥༢. དུཏིཡསྶ ¶ ¶ པཋམེ ཨཱཝརནྟཱིཏི ཨཱཝརཎཱ, ནཱིཝཱརཡནྟཱིཏི ནཱིཝརཎཱ. ཨེཏྠ ཙ ཨཱཝརནྟཱིཏི ཀུསལདྷམྨུཔྤཏྟིཾ ཨཱདིཏོ པརིཝཱརེནྟི. ནཱིཝཱརཡནྟཱིཏི ནིརཝསེསཏོ ཝཱརཡནྟཱིཏི ཨཏྠོ, ཏསྨཱ ཨཱཝརཎཝསེནཱཏི ཨཱདིཏོ ཀུསལུཔྤཏྟིཝཱརཎཝསེན. ནཱིཝརཎཝསེནཱཏི ནིརཝསེསཏོ ཝཱརཎཝསེནཱཏི ཨེཝམེཏྠ ཨཏྠོ དཊྛབྦོ. ཡསྨཱ པཉྩ ནཱིཝརཎཱ ཨུཔྤཛྫམཱནཱ ཨནུཔྤནྣཱཡ ལོཀིཡལོཀུཏྟརཱཡ པཉྙཱཡ ཨུཔྤཛྫིཏུཾ ན དེནྟི, ཨུཔྤནྣཱཔི ཨཊྛ སམཱཔཏྟིཡོ པཉྩ ཝཱ ཨབྷིཉྙཱ ཨུཔཙྪིནྡིཏྭཱ པཱཏེནྟི, ཏསྨཱ ‘‘པཉྙཱཡ དུབྦལཱིཀརཎཱ’’ཏི ཝུཙྩནྟི. ཨུཔཙྪིནྡནཾ པཱཏནཉྩེཏྠ ཏཱསཾ པཉྙཱནཾ ཨནུཔྤནྣཱནཾ ཨུཔྤཛྫིཏུཾ ཨཔྤདཱནམེཝ. ཨིཏི མཧགྒཏཱནུཏྟརཔཉྙཱནཾ ཨེཀཙྩཱཡ ཙ པརིཏྟཔཉྙཱཡ ཨནུཔྤཏྟིཧེཏུབྷཱུཏཱ ནཱིཝརཎདྷམྨཱ ཨིཏརཱསཾ སམཏྠཏཾ ཝིཧནནྟིཡེཝཱཏི པཉྙཱཡ དུབྦལཱིཀརཎཱ ཝུཏྟཱ. བྷཱཝནཱམནསིཀཱརེན ཝིནཱ པཀཏིཡཱ མནུསྶེཧི ནིབྦཏྟེཏབྦོ དྷམྨོཏི མནུསྶདྷམྨོ, མནུསྶཏྟབྷཱཝཱཝཧོ ཝཱ དྷམྨོ མནུསྶདྷམྨོ, ཨནུལཱ༹རཾ པརིཏྟཀུསལཾ. ཡཾ ཨསཏིཔི བུདྡྷུཔྤཱདེ ཝཏྟཏི, ཡཉྩ སནྡྷཱཡཱཧ ‘‘ཧཱིནེན བྲཧྨཙརིཡེན, ཁཏྟིཡེ ཨུཔཔཛྫཏཱི’’ཏི (ཛཱ. ༡.༨.༧༥). ཨལཾ ཨརིཡཱཡ ཨརིཡབྷཱཝཱཡཱཏི ཨལམརིཡོ, ཨརིཡབྷཱཝཱཡ སམཏྠོཏི ཝུཏྟཾ ཧོཏི. ཉཱཎདསྶནམེཝ ཉཱཎདསྶནཝིསེསོ, ཨལམརིཡོ ཙ སོ ཉཱཎདསྶནཝིསེསོ ཙཱཏི ཨལམརིཡཉཱཎདསྶནཝིསེསོ.

ཉཱཎདསྶནནྟི ཙ དིབྦཙཀྑུཔི ཝིཔསྶནཱཔི མགྒོཔི ཕལམྤི པཙྩཝེཀྑཎཉཱཎམྤི སབྦཉྙུཏཉྙཱཎམྤི ཝུཙྩཏི. ‘‘ཨཔྤམཏྟོ སམཱནོ ཉཱཎདསྶནཾ ཨཱརཱདྷེཏཱི’’ཏི (མ. ནི. ༡.༣༡༡) ཧི ཨེཏྠ དིབྦཙཀྑུ ཉཱཎདསྶནཾ ནཱམ. ‘‘ཉཱཎདསྶནཱཡ ཙིཏྟཾ ཨབྷིནཱིཧརཏི ཨབྷིནིནྣཱམེཏཱི’’ཏི (དཱི. ནི. ༡.༢༣༤) ཨེཏྠ ཝིཔསྶནཱཉཱཎཾ. ‘‘ཨབྷབྦཱ ཏེ ཉཱཎཱཡ དསྶནཱཡ ཨནུཏྟརཱཡ སམྦོདྷཱཡཱ’’ཏི (ཨ. ནི. ༤.༡༩༦) ཨེཏྠ མགྒོ. ‘‘ཨཡམཉྙོ ¶ ཨུཏྟརིམནུསྶདྷམྨཱ ཨལམརིཡཉཱཎདསྶནཝིསེསོ ཨདྷིགཏོ ཕཱསུཝིཧཱརོ’’ཏི (མ. ནི. ༡.༣༢༨) ཨེཏྠ ¶ ཕལཾ. ‘‘ཉཱཎཉྩ པན མེ དསྶནཾ ཨུདཔཱདི, ཨཀུཔྤཱ མེ ཝིམུཏྟི, ཨཡམནྟིམཱ ཛཱཏི, ནཏྠི དཱནི པུནབྦྷཝོ’’ཏི (སཾ. ནི. ༥.༡༠༨༡; མཧཱཝ. ༡༦; པཊི. མ. ༢.༣༠) ཨེཏྠ པཙྩཝེཀྑཎཉཱཎཾ. ‘‘ཉཱཎཉྩ པན མེ དསྶནཾ ཨུདཔཱདི ‘སཏྟཱཧཀཱལཀཏོ ཨཱལཱ༹རོ ཀཱལཱམོ’’’ཏི (མ. ནི. ༡.༢༨༤; ༢.༣༤༠) ཨེཏྠ སབྦཉྙུཏཉྙཱཎཾ. ཨིདྷ པན ལོཀུཏྟརདྷམྨོ ཨདྷིཔྤེཏོ. ཨེཏྠ ཙ རཱུཔཱཡཏནཾ ཛཱནཱཏི ཙཀྑུཝིཉྙཱཎཾ ཝིཡ པསྶཏི ཙཱཏི ཉཱཎདསྶནཾ, དིབྦཙཀྑུ. སམྨསནཱུཔཙཱརེ ཙ དྷམྨལཀྑཎཏྟཡཉྩ ཏཐཱ ཛཱནཱཏི པསྶཏི ཙཱཏི ཉཱཎདསྶནཾ, ཝིཔསྶནཱ. ནིབྦཱནཾ ཙཏྟཱརི ཝཱ སཙྩཱནི ཨསམྨོཧཔྤཊིཝེདྷཏོ ཛཱནཱཏི པསྶཏི ཙཱཏི ཉཱཎདསྶནཾ, མགྒོ. ཕལཾ པན ནིབྦཱནཝསེནེཝ ཡོཛེཏབྦཾ. པཙྩཝེཀྑཎཱ མགྒཱདྷིགཏསྶ ཨཏྠསྶ སབྦསོ ཛོཏནཊྛེན ཉཱཎདསྶནཾ. སབྦཉྙུཏཱ ཨནཱཝརཎཏཱཡ སམནྟཙཀྑུཏཱཡ ཙ ཉཱཎདསྶནཾ. བྱཱདིཎྞཀཱལོཏི པརིཡཱདིནྣཀཱལོ. དུཏིཡཾ ཨུཏྟཱནམེཝ.

༥༣-༥༤. ཏཏིཡེ པདཧཏཱིཏི པདཧནོ, བྷཱཝནམནུཡུཏྟོ ཡོགཱི, ཏསྶ བྷཱཝོ བྷཱཝནཱནུཡོགོ པདཧནབྷཱཝོ. པདྷཱནམསྶ ཨཏྠཱིཏི པདྷཱནིཀོ, ཀ-ཀཱརསྶ ཡ-ཀཱརཾ ཀཏྭཱ ‘‘པདྷཱནིཡོ’’ཏི ཝུཏྟཾ. ‘‘ཨབྷིནཱིཧཱརཏོ པཊྛཱཡ ཨཱགཏཏྟཱ’’ཏི ཝུཏྟཏྟཱ པཙྩེཀབོདྷིསཏྟསཱཝཀབོདྷིསཏྟཱནམྤི པཎིདྷཱནཏོ པབྷུཏི ཨཱགཏསདྡྷཱ ཨཱགམནསདྡཱ ཨེཝ, ཨུཀྐཊྛནིདྡེསེན པན ‘‘སབྦཉྙུབོདྷིསཏྟཱན’’ནྟི ཝུཏྟཾ. ཨདྷིགམཏོ སམུདཱགཏཏྟཱ ཨགྒམགྒཕལསམྤཡུཏྟཱ ཙཱཔི ཨདྷིགམསདྡྷཱ ནཱམ, ཡཱ སོཏཱཔནྣསྶ ཨངྒབྷཱཝེན ཝུཏྟཱ. ཨཙལབྷཱཝེནཱཏི པཊིཔཀྑེན ཨནདྷིབྷཝནཱིཡཏྟཱ ནིཙྩལབྷཱཝེན. ཨོཀཔྤནནྟི ཨོཀྐནྡིཏྭཱ ཨདྷིམུཙྩནཾ, པསཱདུཔྤཏྟིཡཱ པསཱདནཱིཡཝཏྠུསྨིཾ པསཱིདནམེཝ. སུཔྤཊིཝིདྡྷནྟི སུཊྛུ པཊིཝིདྡྷཾ. ཡཐཱ ཏེན པཊིཝིདྡྷེན སབྦཉྙུཏཉྙཱཎཾ ཧཏྠགཏཾ ཨཧོསི, ཏཐཱ པཊིཝིདྡྷཾ. ཡསྶ བུདྡྷསུབུདྡྷཏཱཡ སདྡྷཱ ཨཙལཱ ཨསམྤཝེདྷི, ཏསྶ དྷམྨསུདྷམྨཏཱཡ སངྒྷསུཔྤཊིཔནྣཏཱཡ ¶ ཏེན པཊིཝེདྷེན སདྡྷཱ ན ཏཐཱཏི ཨཊྛཱནམེཏཾ ཨནཝཀཱསོ. ཏེནཱཧ བྷགཝཱ – ‘‘ཡོ, བྷིཀྑཝེ, བུདྡྷེ པསནྣོ དྷམྨེ པསནྣོ སངྒྷེ པསནྣོ’’ཏིཨཱདི. པདྷཱནཝཱིརིཡཾ ཨིཛ྄ཛྷཏི ‘‘ཨདྡྷཱ ཨིམཱཡ པཊིཔདཱཡ ཛརཱམརཎཏོ མུཙྩིསྶཱམཱི’’ཏི སཀྐཙྩཾ པདཧནཏོ.

ཨཔྤ-སདྡོ ¶ ཨབྷཱཝཏྠོ ‘‘ཨཔྤསདྡསྶ…པེ… ཁོ པནཱ’’ཏིཨཱདཱིསུ ཝིཡཱཏི ཨཱཧ ‘‘ཨརོགོ’’ཏི. སམཝེཔཱཀིནིཡཱཏི ཡཐཱབྷུཏྟམཱཧཱརཾ སམཱཀཱརེནེཝ པཙནསཱིལཱཡ. དལ༹ྷཾ ཀཏྭཱ པཙནྟཱི ཧི གཧཎཱི གྷོརབྷཱཝེན པིཏྟཝིཀཱརཱདིཝསེན རོགཾ ཛནེཏི, སིཐིལཾ ཀཏྭཱ པཙནྟཱི མནྡབྷཱཝེན ཝཱཏཝིཀཱརཱདིཝསེན ཏེནཱཧ ‘‘ནཱཏིསཱིཏཱཡ ནཱཙྩུཎྷཱཡཱ’’ཏི. གཧཎིཏེཛསྶ མནྡཔཊུཏཱཝསེན སཏྟཱནཾ ཡཐཱཀྐམཾ སཱིཏུཎྷསཧཏཱཏི ཨཱཧ ‘‘ཨཏིསཱིཏལགྒཧཎིཀོ’’ཏིཨཱདི. ཡཱཐཱཝཏོ ཨཙྩཡདེསནཱ ཨཏྟནོ ཨཱཝིཀརཎཾ ནཱམཱཏི ཨཱཧ ‘‘ཡཐཱབྷཱུཏཾ ཨཏྟནོ ཨགུཎཾ པཀཱསེཏཱ’’ཏི. ཨུདཡཏྠགཱམིནིཡཱཏི སངྑཱརཱནཾ ཨུདཡཉྩ ཝཡཉྩ པཊིཝིཛ྄ཛྷནྟིཡཱཏི ཨཡམེཏྠ ཨཏྠོཏི ཨཱཧ ‘‘ཨུདཡཉྩཱ’’ཏིཨཱདི. པརིསུདྡྷཱཡཱཏི ནིརུཔཀྐིལེསཱཡ. ནིབྦིཛ྄ཛྷིཏུཾ སམཏྠཱཡཱཏི ཏདངྒཝསེན སཝིསེསཾ པཛཧིཏུཾ སམཏྠཱཡ. ཏསྶ དུཀྑསྶ ཁཡགཱམིནིཡཱཏི ཡཾ དུཀྑཾ ཨིམསྨིཾ ཉཱཎེ ཨནདྷིགཏེ པཝཏྟིརཧཾ, ཨདྷིགཏེ ན པཝཏྟི, ཏཾ སནྡྷཱཡ ཝདཏི. ཏཐཱཧེས ཡོགཱཝཙརོ ‘‘ཙཱུལ༹སོཏཱཔནྣོ’’ཏི ཝུཙྩཏི. ཙཏུཏྠཾ ཨུཏྟཱནམེཝ.

པདྷཱནིཡངྒསུཏྟཱདིཝཎྞནཱ ནིཊྛིཏཱ.

༥༥. པཉྩམེ ཝིསྶཱསོཏི ཝིསཙྪཱཡསནྟཱནོ བྷཱཝོ. ཨོཏཱརོཏི ཏཏྠ ཙིཏྟསྶ ཨནུཔྤཝེསོ. གཧེཏྭཱཏི ཨཏྟནོ ཨེཝ ཨོཀཱསཾ གཧེཏྭཱ. ཁེཔེཏྭཱཏི ཀུསལཝཱརཾ ཁེཔེཏྭཱ.

གྷཊྚེཡྻཱཏི ཨཀྐམནཱདིཝསེན བཱདྷེཡྻ. ཏཱིཧི པརིཉྙཱཧཱིཏི ཉཱཏཏཱིརཎཔྤཧཱནསངྑཱཏཱཧི ཏཱིཧི པརིཉྙཱཧི. ནཏྠི ཨེཏེསཾ ཀུཏོཙི བྷཡནྟི ཨཀུཏོབྷཡཱ, ནིབྦྷཡཱཏི ཨཏྠོ. ཙཏུནྣཾ ཨོགྷཱནཾ, སཾསཱརམཧོགྷསྶེཝ ཝཱ པཱརཾ པརིཡནྟཾ གཏཱ. ཏེནཱཧ ‘‘པཱརཾ ཝུཙྩཏི ནིབྦཱན’’ནྟིཨཱདི.

༥༦. ཚཊྛེ ¶ མདྷུརཀབྷཱཝོ ནཱམ སརཱིརསྶ ཐམྦྷིཏཏྟཾ, ཏཾ པན གརུབྷཱཝཔུབྦཀནྟི ཨཱཧ ‘‘སཉྫཱཏགརུབྷཱཝོ’’ཏི ¶ . ན པཀྑཱཡནྟཱིཏི ནཔྤཀཱསེནྟི, ནཱནཱཀཱརཎཏོ ན ཨུཔཊྛཧནྟི. ཏེནཱཧ ‘‘ཙཏསྶོ དིསཱ ཙ ཨནུདིསཱ ཙ མཡ྄ཧཾ ན ཨུཔཊྛཧནྟཱི’’ཏི. སེསམེཏྠ ཨུཏྟཱནམེཝ.

༧. ཨབྷིཎྷཔཙྩཝེཀྑིཏབྦཊྛཱནསུཏྟཝཎྞནཱ

༥༧. སཏྟམེ ཛརཱདྷམྨོཏི དྷམྨ-སདྡོ ‘‘ཨསམྨོསདྷམྨོ ནིབྦཱན’’ནྟིཨཱདཱིསུ (སུ. ནི. ༧༦༣) ཝིཡ པཀཏིཔརིཡཱཡོ, ཏསྨཱ ཛརཱཔཀཏིཀོ ཛིཎྞསབྷཱཝོཏི ཨཏྠོ. ཏེནཱཧ ‘‘ཛརཱསབྷཱཝོ’’ཏིཨཱདི. སེསཔདེསུཔི ཨེསེཝ ནཡོ. ཀམྨུནཱ དཱཏབྦཾ ཨཱདིཡཏཱིཏི ཀམྨདཱཡཱདོ, ཨཏྟནཱ ཡཐཱུཔཙིཏཀམྨཕལབྷཱགཱིཏི ཨཏྠོ. ཏཾ པན དཱཡཛྫཾ ཀཱརཎཱུཔཙཱརེན ཝདནྟོ ‘‘ཀམྨཾ མཡ྄ཧཾ དཱཡཛྫཾ སནྟཀནྟི ཨཏྠོ’’ཏི ཨཱཧ ཡཐཱ ‘‘ཀུསལཱནཾ, བྷིཀྑཝེ, དྷམྨཱནཾ སམཱདཱནཧེཏུ, ཨེཝམིདཾ པུཉྙཾ ཝཌྜྷཏཱི’’ཏི (དཱི. ནི. ༣.༨༠). ཡོནཱིཧི ཕལཾ སབྷཱཝཏོ བྷིནྣམྤི ཨབྷིནྣཾ ཝིཡ མིསྶིཏཾ ཧོཏི. ཏེནཱཧ ‘‘ཀམྨཾ མཡ྄ཧཾ ཡོནི ཀཱརཎ’’ནྟི. མམཏྟཝསེན བཛ྄ཛྷནྟཱིཏི བནྡྷཱུ, ཉཱཏི སཱལོཧིཏོ ཙ, ཀམྨཾ པན ཨེཀནྟསམྦནྡྷཝཱཏི ཨཱཧ ‘‘ཀམྨཾ མཡ྄ཧཾ བནྡྷཱུ’’ཏི. པཏིཊྛཱཏི ཨཝསྶཡོ. ཀམྨསདིསོ ཧི སཏྟཱནཾ ཨཝསྶཡོ ནཏྠི.

ཡོབྦནཾ ཨཱརབྦྷ ཨུཔྤནྣམདོཏི ‘‘མཧལླཀཀཱལེ པུཉྙཾ ཀརིསྶཱམ, དཧརམྷ ཏཱཝཱ’’ཏི ཡོབྦནཾ ཨཔསྶཱཡ མཱནཀརཎཾ. ‘‘ཨཧཾ ནིརོགོ སཊྛི ཝཱ སཏྟཏི ཝཱ ཝསྶཱནི ཨཏིཀྐནྟཱནི, ན མེ ཧརཱིཏཀཁཎྜམྤི ཁཱདིཏབྦཾ, ཨིམེ པནཉྙེ ‘ཨསུཀཾ ནོ ཋཱནཾ རུཛྫཏི, བྷེསཛྫཾ ཁཱདཱམཱ’ཏི ཝིཙརནྟི, ཀོ ཨཉྙོ མཡཱ སདིསོ ནིརོགོ ནཱམཱ’’ཏི ཨེཝཾ མཱནཀརཎཾ ཨཱརོགྱམདོ. སབྦེསམྤི ཛཱིཝིཏཾ ནཱམ པབྷངྒུརཾ དུཀྑཱནུབནྡྷཉྩ, ཏདུབྷཡཾ ཨནོལོཀེཏྭཱ པབནྡྷཊྛིཏིཾ པཙྩཡསུལབྷཏཉྩ ནིསྶཱཡ ‘‘ཙིརཾ ཛཱིཝིཾ, ཙིརཾ ཛཱིཝཱམི, ཙིརཾ ཛཱིཝིསྶཱམི, སུཁཾ ཛཱིཝིཾ, སུཁཾ ཛཱིཝཱམི, སུཁཾ ཛཱིཝིསྶཱམཱི’’ཏི ཨེཝཾ མཱནཀརཎཾ ཛཱིཝིཏམདོ.

ཨུཔདྷིརཧིཏནྟི ¶ ཀཱམཱུཔདྷིརཧིཏཾ. ཙཏྟཱརོ ཧི ཨུཔདྷཱི – ཀཱམཱུཔདྷི, ཁནྡྷཱུཔདྷི, ཀིལེསཱུཔདྷི, ཨབྷིསངྑཱརཱུཔདྷཱིཏི. ཀཱམཱཔི ‘‘ཡཾ པཉྩ ཀཱམགུཎེ པཊིཙྩ ཨུཔྤཛྫཏི སུཁཾ སོམནསྶཾ, ཨཡཾ ཀཱམཱནཾ ཨསྶཱདོ’’ཏི (མ. ནི. ༡.༡༦༦) ཨེཝཾ ཝུཏྟསྶ སུཁསྶ ཨདྷིཊྛཱནབྷཱཝཏོ ‘‘ཨུཔདྷིཡཏི ཨེཏྠ སུཁ’’ནྟི ཨིམིནཱ ཝཙནཏྠེན ‘‘ཨུཔདྷཱི’’ཏི ཝུཙྩཏི, ཁནྡྷཱཔི ཁནྡྷམཱུལཀསྶ དུཀྑསྶ ¶ ཨདྷིཊྛཱནབྷཱཝཏོ, ཀིལེསཱཔི ཨཔཱཡདུཀྑསྶ ཨདྷིཊྛཱནབྷཱཝཏོ, ཨབྷིསངྑཱརཱཔི བྷཝདུཀྑསྶ ཨདྷིཊྛཱནབྷཱཝཏོ. སེསཾ སུཝིཉྙེཡྻམེཝ.

ཨབྷིཎྷཔཙྩཝེཀྑིཏབྦཊྛཱནསུཏྟཝཎྞནཱ ནིཊྛིཏཱ.

༨-༡༠. ལིཙྪཝིཀུམཱརཀསུཏྟཱདིཝཎྞནཱ

༥༨-༦༠. ཨཊྛམེ སཱཔཏེཡྻནྟི ཨེཏྠ སཾ ཝུཙྩཏི དྷནཾ, ཏསྶ པཏཱིཏི སཔཏི, དྷནསཱམིཀོ. ཏསྶ ཧིཏཱཝཧཏྟཱ སཱཔཏེཡྻཾ, དྲབྱཾ, དྷནནྟི ཨཏྠོ. ཨཏྟནོ རུཙིཝསེན གཱམཀིཙྩཾ ནེཏཱིཏི གཱམནིཡོ, གཱམནིཡོཡེཝ གཱམཎིཀོ.

ཨནྭཱཡ ཨུཔནིསྶཱཡ ཛཱིཝནསཱིལཱ ཨནུཛཱིཝིནོཏི ཨཱཧ ‘‘ཡེ ཙ ཨེཏཾ ཨུཔནིསྶཱཡ ཛཱིཝནྟཱི’’ཏི. ཨེཀཾ མཧཱཀུལཾ ནིསྶཱཡ པཎྞཱསམྤི སཊྛིཔི ཀུལཱནི ཛཱིཝནྟི, ཏེ མནུསྶེ སནྡྷཱཡེཏཾ ཝུཏྟཾ. སེསཾ སུཝིཉྙེཡྻམེཝ. ནཝམཱདཱིནི ཨུཏྟཱནཏྠཱནེཝ.

ལིཙྪཝིཀུམཱརཀསུཏྟཱདིཝཎྞནཱ ནིཊྛིཏཱ.

༦༡-༦༥. དུཏིཡསྶ པཋམེ ‘‘མཧཔྥལཱ མཧཱནིསཾསཱ’’ཏི ཨུབྷཡམྤེཏཾ ཨཏྠཏོ ཨེཀཾ, བྱཉྫནམེཝ ནཱནནྟི ཨཱཧ ‘‘མཧཔྥལཱ’’ཏིཨཱདི. ‘‘པཉྩིམེ གཧཔཏཡོ ཨཱནིསཾསཱ’’ཏིཨཱདཱིསུ (ཨུདཱ. ༧༦) ཨཱནིསཾས-སདྡོ ཕལཔརིཡཱཡོཔི ཧོཏི ¶ . མཧཏོ ལོཀུཏྟརསྶ སུཁསྶ པཙྩཡཱ ཧོནྟཱིཏི མཧཱནིསཾསཱ. ཨམཏོགདྷཱཏི ཨམཏབྦྷནྟརཱ ཨམཏཾ ཨནུཔྤཝིཊྛཱ ནིབྦཱནདིཊྛཏྟཱ, ཏཏོ པརཾ ན གཙྪནྟི. ཏེན ཝུཏྟཾ ‘‘ཨམཏཔརིཡོསཱནཱ’’ཏི. ཨམཏཾ པརིཡོསཱནཾ ཨཝསཱནཾ ཨེཏཱསནྟི ¶ ཨམཏཔརིཡོསཱནཱ. མརཎསཉྙཱཏི མརཎཱནུཔསྶནཱཉཱཎེན སཉྙཱ. ཨཱཧཱརེ པཊིཀཱུལསཉྙཱཏི ཨཱཧཱརཾ གམནཱདིཝསེན པཊིཀཱུལཏོ པརིགྒཎྷནྟསྶ ཨུཔྤནྣསཉྙཱ. ཨུཀྐཎྛིཏསྶཱཏི ནིབྦིནྡནྟསྶ ཀཏྠཙིཔི ཨསཛྫནྟསྶ. དུཏིཡཱདཱིནི ཨུཏྟཱནཏྠཱནེཝ.

༦༦-༧༠. ཚཊྛེ སཧ ཨཱཛཱིཝནྟི ཨེཏྠཱཏི སཱཛཱིཝོ, པཉྷསྶ པུཙྪནཾ ཝིསྶཛྫནཉྩ. ཏེནཱཧ ‘‘སཱཛཱིཝོཏི པཉྷཔུཙྪནཉྩེཝ པཉྷཝིསྶཛྫནཉྩཱ’’ཏིཨཱདི. ཨབྷིསངྑཏནྟི ཙིཏཾ. སཏྟམཱདཱིནི ཨུཏྟཱནཏྠཱནེཝ.

༡-༢. པཋམཙེཏོཝིམུཏྟིཕལསུཏྟཱདིཝཎྞནཱ

༧༡-༧༢. ཏཏིཡསྶ པཋམེ ཨཝིཛྫཱཔལིགྷནྟི ཨེཏྠ ཨཝིཛྫཱཏི ཝཊྚམཱུལིཀཱ ཨཝིཛྫཱ, ཨཡཾ པཙུརཛནེཧི ཨུཀྑིཔིཏུཾ ཨསཀྐུཎེཡྻབྷཱཝཏོ དུཀྑིཔནཊྛེན ནིབྦཱནདྭཱརཔྤཝེསཝིབནྡྷནེན ཙ ‘‘པལིགྷོ ཝིཡཱཏི པལིགྷོ’’ཏི ཝུཙྩཏི. ཏེནེས ཏསྶཱ ཨུཀྑིཏྟཏྟཱ ‘‘ཨུཀྑིཏྟཔལིགྷོ’’ཏི ཝུཏྟོ. པུནབྦྷཝསྶ ཀརཎསཱིལོ, པུནབྦྷཝཾ ཝཱ ཕལཾ ཨརཧཏཱིཏི པོནོབྷཝིཀཱ, པུནབྦྷཝདཱཡིཀཱཏི ཨཏྠོ. ཛཱཏིསཾསཱརོཏི ཛཱཡནཝསེན ཙེཝ སཾསརཎཝསེན ཙ ཨེཝཾལདྡྷནཱམཱནཾ པུནབྦྷཝཀྑནྡྷཱནཾ པཙྩཡོ ཀམྨཱབྷིསངྑཱརོ. ཛཱཏིསཾསཱརོཏི ཧི ཕལཱུཔཙཱརེན ཀཱརཎཾ ཝུཏྟཾ. ཏཉྷི པུནཔྤུནཾ ཨུཔྤཏྟིཀཱརཎཝསེན པརིཀྑིཔིཏྭཱ ཋིཏཏྟཱ ‘‘པརིཁཱ’’ཏི ཝུཙྩཏི སནྟཱནསྶ ¶ པརིཀྑིཔནཏོ. ཏེནེས ཏསྶ སཾཀིཎྞཏྟཱ ཝིཀིཎྞཏྟཱ སབྦསོ ཁིཏྟཏྟཱ ཝིནཱསིཏཏྟཱ ‘‘སཾཀིཎྞཔརིཁོ’’ཏི ཝུཏྟོ.

ཏཎྷཱསངྑཱཏནྟི ¶ ཨེཏྠ ཏཎྷཱཏི ཝཊྚམཱུལིཀཱ ཏཎྷཱ. ཨཡཉྷི གམྦྷཱིརཱནུགཏཊྛེན ‘‘ཨེསིཀཱ’’ཏི ཝུཙྩཏི. ལུཉྩིཏྭཱ ཨུདྡྷརིཏྭཱ. ཨོརམྦྷཱགིཡཱནཱིཏི ཨོརམྦྷཱགཛནཀཱནི ཀཱམབྷཝེ ཨུཔཔཏྟིཔཙྩཡཱནི ཀཱམརཱགསཾཡོཛནཱདཱིནི. ཨེཏཱནི ཧི ཀཝཱཊཾ ཝིཡ ནགརདྭཱརཾ ཙིཏྟཾ པིདཧིཏྭཱ ཋིཏཏྟཱ ‘‘ཨགྒལཱ༹’’ཏི ཝུཙྩནྟི. ཏེནེས ཏེསཾ ནིགྒཏཏྟཱ བྷིནྣཏྟཱ ‘‘ནིརགྒལོ༹’’ཏི ཝུཏྟོཏི. ཨགྒམགྒེན པནྣོ ཨཔཙིཏོ མཱནདྡྷཛོ ཨེཏསྶཱཏི པནྣདྡྷཛོ. པནྣབྷཱརོཏི ཁནྡྷབྷཱརཀིལེསབྷཱརཨབྷིསངྑཱརབྷཱརཱ ཨོརོཔིཏཱ ཨསྶཱཏི པནྣབྷཱརོ. ཝིསཾཡུཏྟོཏི ཙཏཱུཧི ཡོགེཧི སབྦཀིལེསེཧི ཙ ཝིསཾཡུཏྟོ. ཨསྨིམཱནོཏི རཱུཔེ ཨསྨཱིཏི མཱནོ, ཝེདནཱཡ, སཉྙཱཡ, སངྑཱརེསུ, ཝིཉྙཱཎེ ཨསྨིམཱནོ. ཨེཏྠ ཧི པཉྩཔི ཁནྡྷེ ཨཝིསེསཏོ ‘‘ཨསྨཱི’’ཏི གཧེཏྭཱ པཝཏྟམཱནོ ཨསྨིམཱནོཏི ཨདྷིཔྤེཏོ.

ནགརདྭཱརསྶ པརིསྶཡཔཊིབཱཧནཏྠཉྩེཝ སོདྷནཏྠཉྩ ཨུབྷོསུ པསྶེསུ ཨེསིཀཱཐམྦྷེ ནིཁཎིཏྭཱ ཋཔེཏཱིཏི ཨཱཧ ‘‘ནགརདྭཱརེ ཨུསྶཱཔིཏེ ཨེསིཀཱཐམྦྷེ’’ཏི. པཱཀཱརཝིདྡྷཾསནེནེཝ པརིཁཱབྷཱུམིསམཀརཎཾ ཧོཏཱིཏི ཨཱཧ ‘‘པཱཀཱརཾ བྷིནྡིཏྭཱ པརིཁཾ ཝིཀིརིཏྭཱ’’ཏི. ‘‘ཨེཝ’’ནྟིཨཱདི ཨུཔམཱསཾསནྡནཾ. སནྟོ སཾཝིཛྫམཱནོ ཀཱཡོ དྷམྨསམཱུཧོཏི སཀྐཱཡོ, ཨུཔཱདཱནཀྑནྡྷཔཉྩཀཾ. དྭཏྟིཾསཀམྨཀཱརཎཱ དུཀྑཀྑནྡྷེ ཨཱགཏདུཀྑཱནི. ཨཀྑིརོགསཱིསརོགཱདཡོ. ཨཊྛནཝུཏི རོགཱ, རཱཛབྷཡཱདཱིནི པཉྩཝཱིསཏིམཧཱབྷཡཱནི. དུཏིཡཾ ཨུཏྟཱནམེཝ.

པཋམཙེཏོཝིམུཏྟིཕལསུཏྟཱདིཝཎྞནཱ ནིཊྛིཏཱ.

༣-༤. པཋམདྷམྨཝིཧཱརཱིསུཏྟཱདིཝཎྞནཱ

༧༣-༧༤. ཏཏིཡེ ནིཡཀཛ྄ཛྷཏྟེཏི ཨཏྟནོ སནྟཱནེ. མེཏྟཱཡ ཨུཔསཾཧརཎཝསེན ཧིཏཾ ཨེསནྟེན. ཀརུཎཱཡ ཝསེན ཨནུཀམྤམཱནེན. པརིགྒཧེཏྭཱཏི པརིཏོ གཧེཏྭཱ, ཕརིཏྭཱཏི ཨཏྠོ. པརིཙྩཱཏི པརིཏོ ཀཏྭཱ, སམནྟཏོ ཕརིཏྭཱ ཨིཙྩེཝ ཨཏྠོ. ‘‘པཊིཙྩཱ’’ཏིཔི ¶ པཱཋོ. མཱ པམཛྫིཏྠཱཏི ‘‘ཛྷཱཡཐཱ’’ཏི ཝུཏྟསམཐཝིཔསྶནཱནཾ ཨནནུཡུཉྫནེན ཨཉྙེན ཝཱ ཀེནཙི པམཱདཀཱརཎེན མཱ པམཱདཾ ཨཱཔཛྫིཏྠ. ནིཡྻཱནིཀསཱསནེ ཨཀཏྟབྦཀརཎཾ ཝིཡ ཀཏྟབྦཱཀརཎམྤི པམཱདོཏི. ཝིཔཏྟིཀཱལེཏི སཏྟཨསཔྤཱཡཱདིཝིཔཏྟིཡུཏྟེ ཀཱལེ. སབྦེཔི སཱསནེ གུཎཱ ཨིདྷེཝ སངྒཧཾ གཙྪནྟཱིཏི ཨཱཧ ‘‘ཛྷཱཡཐ མཱ པམཱདཏྠ…པེ… ཨནུསཱསནཱི’’ཏི. ཙཏུཏྠེ ནཏྠི ཝཏྟབྦཾ.

པཋམདྷམྨཝིཧཱརཱིསུཏྟཱདིཝཎྞནཱ ནིཊྛིཏཱ.

༧༥. པཉྩམེ ¶ ཡུཛ྄ཛྷནཾ ཡོདྷོ, སོ ཨཱཛཱིཝོ ཨེཏེསནྟི ཡོདྷཱཛཱིཝཱ. ཏེནཱཧ ‘‘ཡུདྡྷཱུཔཛཱིཝིནོ’’ཏི. སནྠམྦྷིཏྭཱ ཋཱཏུཾ ན སཀྐོཏཱིཏི བདྡྷོ དྷིཏིསམྤནྣོ ཋཱཏུཾ ན སཀྐོཏི. སམཱགཏེཏི སམྤཏྟེ. བྱཱཔཛྫཏཱིཏི ཝིཀཱརམཱཔཛྫཏི. ཏེནཱཧ ‘‘པཀཏིབྷཱཝཾ ཛཧཏཱི’’ཏི.

རཛགྒསྨིནྟི པཙྩཏྟེ བྷུམྨཝཙནནྟི ཨཱཧ ‘‘ཀིཾ ཏསྶ པུགྒལསྶ རཛགྒཾ ནཱམཱ’’ཏི. ཝིནིབྦེཋེཏྭཱཏི གཧིཏགྒཧཎཾ ཝིསྶཛྫཱཔེཏྭཱ. མོཙེཏྭཱཏི སརཱིརཏོ ཨཔནེཏྭཱ.

པཋམཡོདྷཱཛཱིཝསུཏྟཝཎྞནཱ ནིཊྛིཏཱ.

༧༦. ཚཊྛེ ཙམྨནྟི ཨིམིནཱ ཙམྨམཡཾ ཙམྨམིཏི སིབྦིཏཾ, ཨཉྙཾ ཝཱ ཀེཊཀཕལཀཱདིཾ སངྒཎྷཱཏི. དྷནུཀལཱཔཾ སནྣཡ྄ཧིཏྭཱཏི དྷནུཉྩེཝ ཏཱུཎིརཉྩ སནྣཡ྄ཧིཏྭཱ སཛྫེཏྭཱ. དྷནུདཎྜསྶ ཛིཡཱཡཏྟབྷཱཝཀརཎཱདིཔི ཧི དྷནུནོ སནྣཡ྄ཧནཾ. ཏེནེཝཱཧ ‘‘དྷནུཉྩ སརཀལཱཔཉྩ སནྣཡ྄ཧིཏྭཱ’’ཏི. ཡུདྡྷསནྣིཝེསེན ཋིཏནྟི དྭིནྣཾ སེནཱནཾ བྱཱུཧནསཾཝིདྷཱནནཡེན ཀཏོ ཡོ སནྣིཝེསོ, ཏསྶ ཝསེན ཋིཏཾ, སེནཱབྱཱུཧསཾཝིདྷཱནཝསེན སནྣིཝིཊྛནྟི ཝུཏྟཾ ཧོཏི. ཨུསྶཱཧཉྩ ཝཱཡཱམཉྩ ཀརོཏཱིཏི ཡུཛ྄ཛྷནཝསེན ཨུསྶཱཧཾ ཝཱཡཱམཉྩ ཀརོཏི. པརིཡཱཔཱདེནྟཱིཏི མརཎཔརིཡནྟིཀཾ ཨཔརཾ པཱཔེནྟི. ཏེནཱཧ ‘‘པརིཡཱཔཱདཡནྟཱི’’ཏི, ཛཱིཝིཏཾ པརིཡཱཔཱདཡནྟི མརཎཾ པཊིཔཛྫཱཔེནྟཱིཏི ཝུཏྟཾ ཧོཏི.

ཨརཀྑིཏེནེཝ ¶ ཀཱཡེནཱཏིཨཱདཱིསུ ཧཏྠཔཱདེ ཀཱིལཱ༹པེནྟོ གཱིཝཾ ཝིཔརིཝཏྟེནྟོ ཀཱཡཾ ན རཀྑཏི ནཱམ. ནཱནཔྤཀཱརཾ དུཊྛུལླཾ ཀརོནྟོ ཝཱཙཾ ན རཀྑཏི ནཱམ. ཀཱམཝིཏཀྐཱདཡོ ཝིཏཀྐེནྟོ ཙིཏྟཾ ན རཀྑཏི ནཱམ. ཨནུཔཊྛིཏཱཡ སཏིཡཱཏི ཀཱཡགཏཱཡ སཏིཡཱ ཨནུཔཊྛིཏཱཡ. རཱགེན ཨནུགཏོཏི རཱགེན ཨནུཔཧཏོ. རཱགཔརེཏོཏི ཝཱ རཱགེན ཕུཊྛོ ཕུཊྛཝིསེན ཝིཡ སཔྤེན.

ཨནུདཧནཊྛེནཱཏི ཨནུཔཱཡཔྤཊིཔཏྟིཡཱ. སམྤཏི ཨཱཡཏིཉྩ མཧཱབྷིཏཱཔཊྛེན. ཨནཝཏྠིཏསབྷཱཝཏཱཡ ཨིཏྟརཔཙྩུཔཊྛཱནཊྛེན. མུཧུཏྟརམཎཱིཡཏཱཡ ཏཱཝཀཱལིཀཊྛེན. བྱཏྟེཧི ཨབྷིབྷཝནཱིཡཏཱཡ ¶ སབྦངྒཔཙྩངྒཔལིབྷཉྫནཊྛེན. ཚེདནབྷེདནཱདིཨདྷིཀརཎབྷཱཝེན ཨུགྒྷཊྚནསདིསཏཱཡ ཨདྷིཀུཊྚནཊྛེན. ཨཝཎེ ཝཎཾ ཨུཔྤཱདེཏྭཱ ཨནྟོ ཨནུཔཝིསནསབྷཱཝཏཱཡ ཝིནིཝིཛ྄ཛྷནཊྛེན. དིཊྛདྷམྨིཀསམྤརཱཡིཀ ཨནཏྠནིམིཏྟཏཱཡ སཱསངྐསཔྤཊིབྷཡཊྛེན.

དུཏིཡཡོདྷཱཛཱིཝསུཏྟཝཎྞནཱ ནིཊྛིཏཱ.

༧༧-༧༨. སཏྟམེ ཝིསེསསྶ པཏྟིཡཱ ཝིསེསསྶ པཱཔུཎནཏྠཾ. ཝཱིརིཡནྟི པདྷཱནཝཱིརིཡཾ. ཏཾ པན ཙངྐམནཝསེན ཀརཎེ ‘‘ཀཱཡིཀ’’ནྟིཔི ཝཏྟབྦཏཾ ལབྷཏཱིཏི ཨཱཧ – ‘‘དུཝིདྷམྤཱི’’ཏི. སཏྠཀཝཱཏཱཏི སནྡྷིབནྡྷནཱནི ཀཏྟརིཡཱ ཚིནྡནྟཱ ཝིཡ པཝཏྟཝཱཏཱ. ཏེནཱཧ – ‘‘སཏྠཾ ཝིཡཱ’’ཏིཨཱདི. ཀཏཀམྨེཧཱིཏི ཀཏཙོརཀམྨེཧི. ཏེ ཀིར ཀཏཀམྨཱ ཡཾ ནེསཾ དེཝཏཾ ཨཱཡཱཙིཏྭཱ ཀམྨཾ ནིཔྥནྣཾ, ཏསྶ ཨུཔཀཱརཏྠཱཡ མནུསྶེ མཱརེཏྭཱ གལལོཧིཏཱནི གཎྷནྟི. ཏེ ‘‘ཨཉྙེསུ མནུསྶེསུ མཱརིཡམཱནེསུ ཀོལཱཧལཾ ཨུཔྤཛྫིསྶཏི, པབྦཛིཏཾ པརིཡེསནྟོ ནཱམ ནཏྠཱི’’ཏི མཉྙམཱནཱ བྷིཀྑཱུ གཧེཏྭཱ མཱརེནྟི. ཏཾ སནྡྷཱཡེཏཾ ཝུཏྟཾ. ཨཀཏཀམྨེཧཱིཏི ཨཊཝིཏོ གཱམཾ ཨཱགམནཀཱལེ ཀམྨནིཔྥཏྟཏྠཾ པུརེཏརཾ བལིཀམྨཾ ཀཱཏུཀཱམེཧི. ཏེནེཝཱཧ – ‘‘ཙོརིཀཾ ཀཏྭཱ ནིཀྑནྟཱ ཀཏཀམྨཱ ནཱམཱ’’ཏིཨཱདི. ཨཊྛམེ ནཏྠི ཝཏྟབྦཾ.

པཋམཨནཱགཏབྷཡསུཏྟཱདིཝཎྞནཱ ནིཊྛིཏཱ.

༧༩. ནཝམེ ¶ པཱལི༹གམྦྷཱིརཱཏི (སཾ. ནི. ཊཱི. ༢.༢.༢༢༩) པཱལི༹ཝསེན གམྦྷཱིརཱ ཨགཱདྷཱ དུཀྑོགཱཧཱ སལླསུཏྟསདིསཱ. སལླསུཏྟཉྷི (སུ. ནི. ༥༧༩) ‘‘ཨནིམིཏྟམནཉྙཱཏ’’ནྟིཨཱདིནཱ པཱལི༹ཝསེན གམྦྷཱིརཾ, ན ཨཏྠགམྦྷཱིརཾ. ཏཐཱ ཧི ཏཏྠ ཏཱ ཏཱ གཱཐཱ དུཝིཉྙེཡྻརཱུཔཱ ཏིཊྛནྟི. དུཝིཉྙེཡྻཉྷི ཉཱཎེན དུཀྑོགཱཧནྟི ཀཏྭཱ ‘‘གམྦྷཱིར’’ནྟི ཝུཙྩཏི. པུབྦཱཔརཾཔེཏྠ ཀཱསཉྩི གཱཐཱནཾ དུཝིཉྙེཡྻཏཱཡ དུཀྑོགཱཧམེཝ, ཏསྨཱ པཱལི༹ཝསེན གམྦྷཱིརཾ. ཨཏྠགམྦྷཱིརཱཏི ཨཏྠཝསེན གམྦྷཱིརཱ མཧཱཝེདལླསུཏྟསདིསཱ, མཧཱཝེདལླསུཏྟསྶ (མ. ནི. ༡.༤༤༩ ཨཱདཡོ) ཨཏྠཝསེན གམྦྷཱིརཏཱ པཱཀཊཱཡེཝ. ལོཀཾ ཨུཏྟརཏཱིཏི ལོཀུཏྟརོ, སོ ཨཏྠབྷཱུཏོ ཨེཏེསཾ ཨཏྠཱིཏི ལོཀུཏྟརཱ. ཏེནཱཧ – ‘‘ལོཀུཏྟརདྷམྨདཱིཔཀཱ’’ཏི. སུཉྙཏཱཔཊིསཾཡུཏྟཱཏི སཏྟསུཉྙདྷམྨཔྤཀཱསཀཱ ¶ . ཏེནཱཧ ‘‘ཁནྡྷདྷཱཏུཨཱཡཏནཔཙྩཡཱཀཱརཔྤཊིསཾཡུཏྟཱ’’ཏི. ཨུགྒཧེཏབྦཾ པརིཡཱཔུཎིཏབྦནྟི ཙ ལིངྒཝཙནཝིཔལླཱསེན ཝུཏྟནྟི ཨཱཧ ‘‘ཨུགྒཧེཏབྦེ ཙེཝ ཝལ༹ཉྫེཏབྦེ ཙཱ’’ཏི. ཀཝིནོ ཀམྨཾ ཀཝིཏཱ. ཡསྶ པན ཡཾ ཀམྨཾ, ཏཾ ཏེན ཀཏནྟི ཝུཙྩཏཱིཏི ཨཱཧ ‘‘ཀཝིཏཱཏི ཀཝཱིཧི ཀཏཱ’’ཏི. ཀཱཝེཡྻནྟི ཀབྱཾ, ཀབྱནྟི ཙ ཀཝིནཱ ཝུཏྟནྟི ཨཏྠོ. ཏེནཱཧ ‘‘ཏསྶེཝ ཝེཝཙན’’ནྟི. ཙིཏྟཀྑརཱཏི ཙིཏྲཱཀཱརཨཀྑརཱ. ཨིཏརཾ ཏསྶེཝ ཝེཝཙནཾ. སཱསནཏོ བཧིདྡྷཱ ཋིཏཱཏི ན སཱསནཱཝཙརཱ. བཱཧིརཀསཱཝཀེཧཱིཏི ‘‘བུདྡྷཱ’’ཏི ཨཔྤཉྙཱཏཱནཾ ཡེསཾ ཀེསཉྩི སཱཝཀེཧི. སུསྶཱུསིསྶནྟཱིཏི ཨཀྑརཙིཏྟཏཱཡ ཙེཝ སརསམྤཏྟིཡཱ ཙ ཨཏྟམནཱ ཧུཏྭཱ སཱམཎེརདཧརབྷིཀྑུམཱཏུགཱམམཧཱགཧཔཏིཀཱདཡོ ‘‘ཨེས དྷམྨཀཐིཀོ’’ཏི སནྣིཔཏིཏྭཱ སོཏུཀཱམཱ བྷཝིསྶནྟི.

ཏཏིཡཨནཱགཏབྷཡསུཏྟཝཎྞནཱ ནིཊྛིཏཱ.

༨༠. དསམེ པཉྩཝིདྷེན སཾསགྒེནཱཏི ‘‘སཝནསཾསགྒོ, དསྶནསཾསགྒོ, སམུལླཱཔསཾསགྒོ, སམྦྷོགསཾསགྒོ, ཀཱཡསཾསགྒོ’’ཏི ཨེཝཾ ཝུཏྟེན པཉྩཝིདྷེན སཾསགྒེན. སཾསཛྫཏི ཨེཏེནཱཏི སཾསགྒོ, རཱགོ. སཝནཧེཏུཀོ, སཝནཝསེན ཝཱ པཝཏྟོ སཾསགྒོ སཝནསཾསགྒོ. ཨེས ནཡོ ¶ སེསེསུཔི. ཀཱཡསཾསགྒོ པན ཀཱཡཔརཱམཱསོ. ཏེསུ པརེཧི ཝཱ ཀཐིཡམཱནཾ རཱུཔཱདིསམྤཏྟིཾ ཨཏྟནཱ ཝཱ སིཏལཔིཏགཱིཏསདྡཾ སུཎནྟསྶ སོཏཝིཉྙཱཎཝཱིཐིཝསེན ཨུཔྤནྣོ རཱགོ སཝནསཾསགྒོ ནཱམ. ཝིསབྷཱགརཱུཔཾ ཨོལོཀེནྟསྶ པན ཙཀྑུཝིཉྙཱཎཝཱིཐིཝསེན ཨུཔྤནྣོ རཱགོ དསྶནསཾསགྒོ ནཱམ. ཨཉྙམཉྙཨཱལཱཔསལླཱཔཝསེན ཨུཔྤནྣརཱགོ སམུལླཱཔསཾསགྒོ ནཱམ. བྷིཀྑུནོ བྷིཀྑུནིཡཱ སནྟཀཾ, བྷིཀྑུནིཡཱ བྷིཀྑུསྶ སནྟཀཾ གཧེཏྭཱ པརིབྷོགཀརཎཝསེན ཨུཔྤནྣརཱགོ སམྦྷོགསཾསགྒོ ནཱམ. ཧཏྠགྒཱཧཱདིཝསེན ཨུཔྤནྣོ རཱགོ ཀཱཡསཾསགྒོ ནཱམ.

ཨནེཀཝིཧིཏནྟི ཨནྣསནྣིདྷིཔཱནསནྣིདྷིཝཏྠསནྣིདྷིཡཱནསནྣིདྷིསཡནསནྣིདྷིགནྡྷསནྣིདྷི- ཨཱམིསསནྣིདྷིཝསེན ཨནེཀཔྤཀཱརཾ. སནྣིདྷིཀཏསྶཱཏི ཨེཏེན ‘‘སནྣིདྷིཀཱརཔརིབྷོག’’ནྟི (དྷ. ས. ཏིཀམཱཏིཀཱ ༡༠) ཨེཏྠ ཀཱར-སདྡསྶ ཀམྨཏྠཏཾ དསྶེཏི. ཡཐཱ ཝཱ ‘‘ཨཱཙཡཾ གཱམིནོ’’ཏི ཝཏྟབྦེ ཨནུནཱསིཀལོཔེན ‘‘ཨཱཙཡགཱམིནོ’’ཏི ནིདྡེསོ ཀཏོ, ཨེཝཾ ‘‘སནྣིདྷིཀཱརཾ པརིབྷོག’’ནྟི ཝཏྟབྦེ ཨནུནཱསིཀལོཔེན ‘‘སནྣིདྷིཀཱརཔརིབྷོག’’ནྟི ཝུཏྟཾ, སནྣིདྷིཾ ཀཏྭཱ པརིབྷོགནྟི ཨཏྠོ.

‘‘སནྣིདྷིཀཏསྶ ¶ པརིབྷོག’’ནྟི ཨེཏྠ (དཱི. ནི. ཨཊྛ. ༡.༡༢) པན དུཝིདྷཱ ཀཐཱ ཝིནཡཝསེན སལླེཁཝསེན ཙ. ཝིནཡཝསེན ཏཱཝ ཡཾ ཀིཉྩི ཨནྣཾ ཨཛྫ པཊིགྒཧིཏཾ ཨཔརཛྫུ སནྣིདྷིཀཱརཾ ཧོཏི, ཏསྶ པརིབྷོགེ པཱཙིཏྟིཡཾ. ཨཏྟནཱ ལདྡྷཾ པན སཱམཎེརཱནཾ དཏྭཱ ཏེཧི ལདྡྷཾ ཝཱ པཱཔེཏྭཱ དུཏིཡདིཝསེ བྷུཉྫིཏུཾ ཝཊྚཏི, སལླེཁོ པན ན ཧོཏི. པཱནསནྣིདྷིམྷིཔི ཨེསེཝ ནཡོ. ཝཏྠསནྣིདྷིམྷི ཨནདྷིཊྛིཏཱཝིཀཔྤིཏཾ སནྣིདྷི ཙ ཧོཏི, སལླེཁཉྩ ཀོཔེཏི. ཨཡཾ ནིཔྤརིཡཱཡཀཐཱ. པརིཡཱཡཏོ པན ཏིཙཱིཝརསནྟུཊྛེན བྷཝིཏབྦཾ, ཙཏུཏྠཾ ལབྷིཏྭཱ ཨཉྙསྶ དཱཏབྦཾ. སཙེ ཡསྶ ཀསྶཙི དཱཏུཾ ན སཀྐོཏི, ཡསྶ པན དཱཏུཀཱམོ ཧོཏི, སོ ཨུདྡེསཏྠཱཡ ཝཱ པརིཔུཙྪཏྠཱཡ ཝཱ གཏོ, ཨཱགཏམཏྟེ དཱཏབྦཾ, ཨདཱཏུཾ ན ཝཊྚཏི. ཙཱིཝརེ པན ཨཔྤཧོནྟེ, སཏིཡཱ ཝཱ པཙྩཱསཱཡ ཨནུཉྙཱཏཀཱལཾ ཋཔེཏུཾ ཝཊྚཏི. སཱུཙིསུཏྟཙཱིཝརཀཱརཀཱནཾ ཨལཱབྷེ ཏཏོཔི ཝིནཡཀམྨཾ ཀཏྭཱ ཋཔེཏུཾ ཝཊྚཏི ‘‘ཨིམསྨིཾ ཛིཎྞེ པུན ཨཱིདིསཾ ཀུཏོ ལབྷིསྶཱམཱི’’ཏི པན ཋཔེཏུཾ ན ཝཊྚཏི, སནྣིདྷི ཙ ཧོཏི, སལླེཁཉྩ ཀོཔེཏི.

ཡཱནསནྣིདྷིམྷི ¶ ཡཱནཾ ནཱམ ཝཡ྄ཧཾ རཐོ སཀཊཾ སནྡམཱནིཀཱ པཱཊངྐཱིཏི. ན པནེཏཾ པབྦཛིཏསྶ ཡཱནཾ, ཨུཔཱཧནཾ པན ཡཱནཾ. ཨེཀབྷིཀྑུསྶ ཧི ཨེཀོ ཨརཉྙཝཱསཏྠཱཡ, ཨེཀོ དྷོཏཔཱདཀཏྠཱཡཱཏི ཨུཀྐཾསཏོ དྭེ ཨུཔཱཧནསངྒྷཱཊཀཱ ཝཊྚནྟི, ཏཏིཡཾ ལབྷིཏྭཱ ཨཉྙསྶ དཱཏབྦོ. ‘‘ཨིམསྨིཾ ཛིཎྞེ ཨཉྙཾ ཀུཏོ ལབྷིསྶཱམཱི’’ཏི ཋཔེཏུཾ ན ཝཊྚཏི, སནྣིདྷི ཙ ཧོཏི, སལླེཁཉྩ ཀོཔེཏི. སཡནསནྣིདྷིམྷི སཡནནྟི མཉྩོ. ཨེཀསྶ བྷིཀྑུནོ ཨེཀོ སཡནགབྦྷེ, ཨེཀོ དིཝཱཊྛཱནེཏི ཨུཀྐཾསཏོ དྭེ མཉྩཱ ཝཊྚནྟི. ཏཏོ ཨུཏྟརིཾ ལབྷིཏྭཱ ཨཉྙསྶ བྷིཀྑུནོ, གཎསྶ ཝཱ དཱཏབྦོ, ཨདཱཏུཾ ན ཝཊྚཏི, སནྣིདྷི ཙེཝ ཧོཏི, སལླེཁོ ཙ ཀུཔྤཏི. གནྡྷསནྣིདྷིམྷི བྷིཀྑུནོ ཀཎྜུཀཙྪུཚཝིདོསཱདིཨཱབཱདྷེ སཏི གནྡྷཱ ཝཊྚནྟི. གནྡྷཏྠིཀེན གནྡྷཉྩ ཨཱཧརཱཔེཏྭཱ ཏསྨིཾ རོགེ ཝཱུཔསནྟེ ཨཉྙེསཾ ཝཱ ཨཱབཱདྷིཀཱནཾ དཱཏབྦཾ, དྭཱརེ པཉྩངྒུལིགྷརདྷཱུཔནཱདཱིསུ ཝཱ ཨུཔནེཏབྦཾ. ‘‘པུན རོགེ སཏི བྷཝིསྶཏཱི’’ཏི ཋཔེཏུཾ ན ཝཊྚཏི, གནྡྷསནྣིདྷི ཙ ཧོཏི, སལླེཁཉྩ ཀོཔེཏི.

ཨཱམིསནྟི ཝུཏྟཱཝསེསཾ དཊྛབྦཾ. སེཡྻཐིདཾ – ཨིདྷེཀཙྩོ བྷིཀྑུ ‘‘ཏཐཱརཱུཔེ ཀཱལེ ཨུཔཀཱརཱཡ བྷཝིསྶནྟཱི’’ཏི ཏིལཏཎྜུལམུགྒམཱསནཱལི༹ཀེརལོཎམཙྪསཔྤིཏེལཀུལཱལབྷཱཛནཱདཱིནི ཨཱཧརཱཔེཏྭཱ ཋཔེཏི. སོ ཝསྶཀཱལེ ཀཱལསྶེཝ སཱམཎེརེཧི ཡཱགུཾ པཙཱཔེཏྭཱ པརིབྷུཉྫིཏྭཱ ‘‘སཱམཎེར ཨུདཀཀདྡམེ དུཀྑཾ གཱམཾ པཝིསིཏུཾ, གཙྪ ཨསུཀཀུལཾ གནྟྭཱ མཡ྄ཧཾ ཝིཧཱརེ ནིསིནྣབྷཱཝཾ ཨཱརོཙེཧི, ཨསུཀཀུལཏོ དདྷིཨཱདཱིནི ཨཱཧརཱ’’ཏི པེསེཏི. བྷིཀྑཱུཧི ‘‘ཀིཾ, བྷནྟེ ¶ , གཱམཾ པཝིསིསྶཱམཱ’’ཏི ཝུཏྟེཔི ‘‘དུཔྤཝེསོ, ཨཱཝུསོ, ཨིདཱནི གཱམོ’’ཏི ཝདཏི. ཏེ ‘‘ཧོཏུ, བྷནྟེ, ཨཙྪཐ ཏུམྷེ, མཡཾ བྷིཀྑཾ པརིཡེསིཏྭཱ ཨཱཧརིསྶཱམཱ’’ཏི གཙྪནྟི. ཨཐ སཱམཎེརོ དདྷིཨཱདཱིནི ཨཱཧརིཏྭཱ བྷཏྟཉྩ བྱཉྫནཉྩ སམྤཱདེཏྭཱ ཨུཔནེཏི, ཏཾ བྷུཉྫནྟསྶེཝ ཨུཔཊྛཱཀཱ བྷཏྟཾ པཧིཎནྟི, ཏཏོཔི མནཱཔམནཱཔཾ བྷུཉྫཏི. ཨཐ བྷིཀྑཱུ པིཎྜཔཱཏཾ གཧེཏྭཱ ཨཱགཙྪནྟི, ཏཏོཔི མནཱཔམནཱཔཾ བྷུཉྫཏིཡེཝ. ཨེཝཾ ཙཏུམཱསམྤི ཝཱིཏིནཱམེཏི. ཨཡཾ ཝུཙྩཏི བྷིཀྑུ མུཎྜཀུཊུམྦིཀཛཱིཝིཀཾ ཛཱིཝཏི, ན སམཎཛཱིཝིཀནྟི. ཨེཝརཱུཔོ ཨཱམིསསནྣིདྷི ནཱམ ཧོཏི. བྷིཀྑུནོ པན ཝསནཊྛཱནེ ཨེཀཱ ཏཎྜུལནཱལི༹ ཨེཀོ གུལ༹པིཎྜོ ¶ ཀུཌུཝམཏྟཾ སཔྤཱིཏི ཨེཏྟཀཾ ནིདྷེཏུཾ ཝཊྚཏི ཨཀཱལེ སམྤཏྟཙོརཱནཾ ཨཏྠཱཡ. ཏེ ཧི ཨེཏྟཀཾ ཨཱམིསཔཊིསནྠཱརཾ ཨལབྷནྟཱ ཛཱིཝིཏཱ ཝོརོཔེཡྻུཾ, ཏསྨཱ སཙེ ཧི ཨེཏྟཀཾ ནཏྠི, ཨཱཧརཱཔེཏྭཱཔི ཋཔེཏུཾ ཝཊྚཏི. ཨཕཱསུཀཀཱལེ ཙ ཡདེཏྠ ཀཔྤིཡཾ, ཏཾ ཨཏྟནཱཔི པརིབྷུཉྫིཏུཾ ཝཊྚཏི. ཀཔྤིཡཀུཊིཡཾ པན བཧུཾ ཋཔེནྟསྶཔི སནྣིདྷི ནཱམ ནཏྠི.

ཙཏུཏྠཨནཱགཏབྷཡསུཏྟཝཎྞནཱ ནིཊྛིཏཱ.

༨༡-༨༢. ཙཏུཏྠསྶ པཋམཾ སུཝིཉྙེཡྻམེཝ. དུཏིཡེ གུཎམཀྑནཱཡ པཝཏྟོཔི ཨཏྟནོ ཀཱརཀཾ གཱུཐེན པཧརནྟཾ གཱུཐོ ཝིཡ པཋམཏརཾ མཀྑེཏཱིཏི མཀྑོ, སོ ཨེཏསྶ ཨཏྠཱིཏི མཀྑཱི. པལཱ༹སཏཱིཏི པལཱ༹སོ, པརསྶ གུཎེ ཌཾསིཏྭཱ ཝིཡ ཨཔནེཏཱིཏི ཨཏྠོ. སོ ཨེཏསྶ ཨཏྠཱིཏི པལཱ༹སཱི. པལཱ༹སཱི པུགྒལོ ཧི དུཏིཡསྶ དྷུརཾ ན དེཏི, སམྤསཱརེཏྭཱ ཏིཊྛཏི. ཏེནཱཧ ‘‘ཡུགགྒཱཧལཀྑཎེན པལཱ༹སེན སམནྣཱགཏོ’’ཏི.

༨༣. ཏཏིཡེ ¶ ཏཱིཧི ཀུཧནཝཏྠཱུཧཱིཏི སཱམནྟཛཔྤནཨིརིཡཱཔཐསནྣིསྶིཏཔཙྩཡཔྤཊིསེཝནབྷེདཏོ ཏིཔྤབྷེདེཧི ཀུཧནཝཏྠཱུཧི. ཏིཝིདྷེན ཀུཧནཝཏྠུནཱ ལོཀཾ ཀུཧཡཏི ཝིམྷཱཔཡཏི ‘‘ཨཧོ ཨཙྪརིཡཔུརིསོ’’ཏི ཨཏྟནི པརེསཾ ཝིམྷཡཾ ཨུཔྤཱདེཏཱིཏི ཀུཧཀོ. ལཱབྷསཀྐཱརཏྠིཀོ ཧུཏྭཱ ལཔཏི ཨཏྟཱནཾ དཱཡཀཾ ཝཱ ཨུཀྑིཔིཏྭཱ ཡཐཱ སོ ཀིཉྩི དདཱཏི, ཨེཝཾ ཨུཀྐཱཙེཏྭཱ ཀཐེཏཱིཏི ལཔཀོ. ནིམིཏྟཾ སཱིལཾ ཏསྶཱཏི ནེམིཏྟིཀོ, ནིམིཏྟེན ཝཱ ཙརཏི, ནིམིཏྟཾ ཝཱ ཀརོཏཱིཏི ནེམིཏྟིཀོ. ནིམིཏྟནྟི ཙ པརེསཾ པཙྩཡདཱནསཉྙུཔྤཱདཀཾ ཀཱཡཝཙཱིཀམྨཾ ཝུཙྩཏི ¶ . ནིཔྤེསོ སཱིལམསྶཱཏི ནིཔྤེསིཀོ. ནིཔྤིསཏཱིཏི ཝཱ ནིཔྤེསོ, ནིཔྤེསོཡེཝ ནིཔྤེསིཀོ. ནིཔྤེསོཏི ཙ སཋཔུརིསོ ཝིཡ ལཱབྷསཀྐཱརཏྠཾ ཨཀྐོསནུཔྤཎྜནཔརཔིཊྛིམཾསིཀཏཱདི.

༦-༧. པཊིསམྦྷིདཱཔྤཏྟསུཏྟཱདིཝཎྞནཱ

༨༦-༨༧. ཚཊྛེ པཊིསམྦྷིདཱསུ ཡཾ ཝཏྟབྦཾ, ཏཾ ཧེཊྛཱ ཝུཏྟམེཝ. ཨུཙྩཱཝཙཱནཱིཏི ཨུཙྩནཱིཙཱནི. ཏེནཱཧ ‘‘མཧནྟཁུདྡཀཱནཱི’’ཏི. ཀིཾཀརཎཱིཡཱནཱིཏི ‘‘ཀིཾ ཀརོམཱི’’ཏི ཨེཝཾ ཝཏྭཱ ཀཏྟབྦཀམྨཱནི. ཏཏྠ ཨུཙྩཀམྨཱནི ནཱམ ཙཱིཝརསྶ ཀརཎཾ, རཛནཾ, ཙེཏིཡེ སུདྷཱཀམྨཾ, ཨུཔོསཐཱགཱརཙེཏིཡགྷརབོདྷིགྷརེསུ ཀཏྟབྦཀམྨནྟི ཨེཝམཱདི. ཨཝཙཀམྨཾ ནཱམ པཱདདྷོཝནམཀྑནཱདི ཁུདྡཀཀམྨཾ. ཏཏྲུཔཱཡཱསཱཏི ཏཏྲུཔགམནིཡཱ, ཏཏྲ ཏཏྲ མཧནྟེ ཁུདྡཀེ ཙ ཀམྨེ སཱདྷནཝསེན ཨུཔགཙྪནྟིཡཱཏི ཨཏྠོ. ཏསྶ ཏསྶ ཀམྨསྶ ནིཔྥཱདནེ སམཏྠཱཡཱཏི ཝུཏྟཾ ཧོཏི. ཏཏྲུཔཱཡཱཡཱཏི ཝཱ ཏཏྲ ཏཏྲ ཀམྨེ སཱདྷེཏབྦེ ཨུཔཱཡབྷཱུཏཱཡ. ཨལཾ ཀཱཏུནྟི ཀཱཏུཾ སམཏྠོ ཧོཏི. ཨལཾ སཾཝིདྷཱཏུནྟི ཝིཙཱརེཏུཾ སམཏྠོ. སཏྟམཾ ཨུཏྟཱནམེཝ.

པཊིསམྦྷིདཱཔྤཏྟསུཏྟཱདིཝཎྞནཱ ནིཊྛིཏཱ.

༨༨. ཨཊྛམེ ¶ ཐིརབྷཱཝཔྤཏྟོཏི སཱསནེ ཐིརབྷཱཝཾ ཨནིཝཏྟིབྷཱཝཾ པཏྠོ. པབྦཛིཏོ ཧུཏྭཱ བཧཱུ རཏྟིཡོ ཛཱནཱཏཱིཏི རཏྟཉྙཱུ. ཏེནཱཧ ‘‘པབྦཛིཏདིཝསཏོ པཊྛཱཡཱ’’ཏིཨཱདི. པཱཀཊོཏི ཨཡཐཱབྷཱུཏགུཎེཧི ཙེཝ ཡཐཱབྷཱུཏགུཎེཧི ཙ སམུགྒཏོ. ཡསོ ཨེཏསྶ ཨཏྠཱིཏི ཡསསྶཱི, ཡསཾ སིཏོ ནིསྶིཏོ ཝཱ ཡསསྶཱི. ཏེནཱཧ ‘‘ཡསནིསྶིཏོ’’ཏི. ཨསཏཾ ཨསཱདྷཱུནཾ དྷམྨཱ ཨསདྡྷམྨཱ, ཨསནྟཱ ཝཱ ཨསུནྡརཱ གཱརཡ྄ཧཱ ལཱམཀཱ དྷམྨཱཏི ཨསདྡྷམྨཱ. ཝིཔརིཡཱཡེན སདྡྷམྨཱ ཝེདིཏབྦཱ.

༨༩. ནཝམེ ¶ ཨཱརམིཏབྦཊྛེན ཀམྨཾ ཨཱརཱམོ ཨེཏསྶཱཏི ཀམྨཱརཱམོ, ཏསྶ བྷཱཝོ ཀམྨཱརཱམཏཱ. ཏཏྠ ཀམྨནྟི ཨིཏིཀཏྟབྦཾ ཀམྨཾ ཝུཙྩཏི. སེཡྻཐིདཾ – ཙཱིཝརཝིཙཱརཎཾ ཙཱིཝརཀམྨཀརཎཾ ཨུཔཏྠམྦྷནཾ པཏྟཏྠཝིཀཨཾསབདྡྷཀཀཱཡབནྡྷནདྷམྨཀརཎཨཱདྷཱརཀཔཱདཀཐལིཀསམྨཛྫནིཨཱདཱིནཾ ཀརཎནྟི. ཨེཀཙྩོ ཧི ཨེཏཱནི ཀརོནྟོ སཀལདིཝསཾ ཨེཏཱནེཝ ཀརོཏི, ཏཾ སནྡྷཱཡེས པཊིཀྑེཔོ. ཡོ པན ཨེཏེསཾ ཀརཎཝེལཱཡམེཝ ཏཱནི ཀརོཏི, ཨུདྡེསཝེལཱཡ ཨུདྡེསཾ གཎྷཱཏི, སཛ྄ཛྷཱཡཝེལཱཡ སཛ྄ཛྷཱཡཏི, ཙེཏིཡངྒཎཝཏྟཝེལཱཡ ཙེཏིཡངྒཎཝཏྟཾ ཀརོཏི, མནསིཀཱརཝེལཱཡ མནསིཀཱརཾ ཀརོཏི, ན སོ ཀམྨཱརཱམོ ནཱམ. བྷསྶཱརཱམཏཱཏི ཨེཏྠ ཡོ ཨིཏྠིཝཎྞཔུརིསཝཎྞཱདིཝསེན ཨཱལཱཔསལླཱཔཾ ཀརོནྟོཡེཝ དིཝསཉྩ རཏྟིཉྩ ཝཱིཏིནཱམེཏི, ཨེཝརཱུཔོ བྷསྶེ པརིཡནྟཀཱརཱི ན ཧོཏི, ཨཡཾ བྷསྶཱརཱམོ ནཱམ. ཡོ པན རཏྟིམྤི དིཝསམྤི དྷམྨཾ ཀཐེཏི, པཉྷཾ ཝིསྶཛྫེཏི, ཨཡཾ ཨཔྤབྷསྶོ བྷསྶེ པརིཡནྟཀཱརཱིཡེཝ. ཀསྨཱ? ‘‘སནྣིཔཏིཏཱནཾ ཝོ, བྷིཀྑཝེ, དྭཡཾ ཀརཎཱིཡཾ དྷམྨཱི ཝཱ ཀཐཱ, ཨརིཡོ ཝཱ ཏུཎྷཱིབྷཱཝོ’’ཏི (མ. ནི. ༡.༢༧༣; ཨུདཱ. ༡༢, ༢༨, ༢༩) ཝུཏྟཏྟཱ.

ནིདྡཱརཱམཏཱཏི ཨེཏྠ ཡོ གཙྪནྟོཔི ནིསིནྣོཔི ནིཔནྣོཔི ཐིནམིདྡྷཱབྷིབྷཱུཏོ ནིདྡཱཡཏིཡེཝ, ཨཡཾ ནིདྡཱརཱམོ ནཱམ. ཡསྶ པན ཀརཛཀཱཡེ གེལཉྙེན ཙིཏྟཾ བྷཝངྒེ ཨོཏརཏི, ནཱཡཾ ནིདྡཱརཱམོ. ཏེནེཝཱཧ – ‘‘ཨབྷིཛཱནཱམི ཁོ པནཱཧཾ, ཨགྒིཝེསྶན, གིམྷཱནཾ པཙྪིམེ མཱསེ པཙྪཱབྷཏྟཾ པིཎྜཔཱཏཔྤཊིཀྐནྟོ ཙཏུགྒུཎཾ སངྒྷཱཊིཾ པཉྙཱཔེཏྭཱ དཀྑིཎེན པསྶེན སཏོ སམྤཛཱནོ ནིདྡཾ ཨོཀྐམིཏཱ’’ཏི (མ. ནི. ༡.༣༨༧). སངྒཎིཀཱརཱམཏཱཏི ཨེཏྠ ¶ ཡོ ཨེཀསྶ དུཏིཡོ, དྭིནྣཾ ཏཏིཡོ, ཏིཎྞཾ ཙཏུཏྠོཏི ཨེཝཾ སཾསཊྛོཝ ཝིཧརཏི, ཨེཀཀོ ཨསྶཱདཾ ན ལབྷཏི, ཨཡཾ སངྒཎིཀཱརཱམོ. ཡོ པན ཙཏཱུསུ ཨིརིཡཱཔཐེསུ ཨེཀཀོཝ ཨསྶཱདཾ ལབྷཏི, ནཱཡཾ སངྒཎིཀཱརཱམོ ཝེདིཏབྦོ. སེཁཱནཾ པཊིལདྡྷགུཎསྶ པརིཧཱནཱསམྦྷཝཏོ ‘‘ཨུཔརིགུཎེཧཱི’’ཏིཨཱདི ཝུཏྟཾ.

༩༠. དསམེ ¶ ཨཏིཔཱཏོཝཱཏི སབྦརཏྟིཾ ནིདྡཱཡིཏྭཱ བལཝཔཙྩཱུསེ ཀོཊིསམྨུཉྫནིཡཱ ཐོཀཾ སམྨཛྫིཏྭཱ མུཁཾ དྷོཝིཏྭཱ ཡཱགུབྷིཀྑཏྠཱཡ པཱཏོཝ པཝིསཏི. ཏཾ ཨཏིཀྐམིཏྭཱཏི གིཧིསཾསགྒཝསེན ཀཱལཾ ཝཱིཏིནཱམེནྟོ མཛ྄ཛྷནྷིཀསམཡཾ ཨཏིཀྐམིཏྭཱ པཀྐམཏི. པཱཏོཡེཝ ཧི གཱམཾ པཝིསིཏྭཱ ཡཱགུཾ ཨཱདཱཡ ཨཱསནསཱལཾ གནྟྭཱ པིཝིཏྭཱ ཨེཀསྨིཾ ཋཱནེ ནིཔནྣོ ནིདྡཱཡིཏྭཱ མནུསྶཱནཾ བྷོཛནཝེལཱཡ ‘‘པཎཱིཏབྷིཀྑཾ ལབྷིསྶཱམཱི’’ཏི ཨུཔཀཊྛེ མཛ྄ཛྷནྷིཀེ ཨུཊྛཱཡ དྷམྨཀརཎེན ཨུདཀཾ གཧེཏྭཱ ཨཀྑཱིནི པུཉྪིཏྭཱ པིཎྜཱཡ ཙརིཏྭཱ ཡཱཝདཏྠཾ བྷུཉྫིཏྭཱ གིཧིསཾསཊྛོ ཀཱལཾ ཝཱིཏིནཱམེཏྭཱ མཛ྄ཛྷནྷེ ཝཱིཏིཝཏྟེ པཊིཀྐམཏི.

ཨཔྤིཙྪཀཐཱཏི, ‘‘ཨཱཝུསོ, ཨཏྲིཙྪཏཱ པཱཔིཙྪཏཱཏི ཨིམེ དྷམྨཱ པཧཱཏབྦཱ’’ཏི ཏེསུ ཨཱདཱིནཝཾ དསྶེཏྭཱ ‘‘ཨེཝརཱུཔཾ ཨཔྤིཙྪཏཾ སམཱདཱཡ ཝཏྟིཏབྦ’’ནྟིཨཱདིནཡཔྤཝཏྟཱ ཀཐཱ. ཏཱིཧི ཝིཝེཀེཧཱིཏི ཀཱཡཝིཝེཀོ, ཙིཏྟཝིཝེཀོ, ཨུཔདྷིཝིཝེཀོཏི ཨིམེཧི ཏཱིཧི ཝིཝེཀེཧི. ཏཏྠ ཨེཀོ གཙྪཏི, ཨེཀོ ཏིཊྛཏི, ཨེཀོ ནིསཱིདཏི, ཨེཀོ སེཡྻཾ ཀཔྤེཏི, ཨེཀོ གཱམཾ པིཎྜཱཡ པཝིསཏི, ཨེཀོ པཊིཀྐམཏི, ཨེཀོ ཙངྐམཾ ཨདྷིཊྛཱཏི, ཨེཀོ ཙརཏི, ཨེཀོ ཝིཧརཏཱིཏི ཨཡཾ ཀཱཡཝིཝེཀོ ནཱམ. ཨཊྛ སམཱཔཏྟིཡོ པན ཙིཏྟཝིཝེཀོ ནཱམ. ནིབྦཱནཾ ཨུཔདྷིཝིཝེཀོ ནཱམ. ཝུཏྟམྤི ཧེཏཾ – ‘‘ཀཱཡཝིཝེཀོ ཙ ཝིཝེཀཊྛཀཱཡཱནཾ ནེཀྑམྨཱབྷིརཏཱནཾ, ཙིཏྟཝིཝེཀོ ཙ པརིསུདྡྷཙིཏྟཱནཾ པརམཝོདཱནཔྤཏྟཱནཾ, ཨུཔདྷིཝིཝེཀོ ཙ ནིརུཔདྷཱིནཾ པུགྒལཱནཾ ཝིསངྑཱརགཏཱན’’ནྟི (མཧཱནི. ༥༧). དུཝིདྷཾ ཝཱིརིཡནྟི ཀཱཡིཀཾ, ཙེཏསིཀཉྩ ཝཱིརིཡཾ. སཱིལནྟི ཙཏུཔཱརིསུདྡྷིསཱིལཾ. སམཱདྷིནྟི ཝིཔསྶནཱཔཱདཀཱ ཨཊྛ སམཱཔཏྟིཡོ. ཝིམུཏྟིཀཐཱཏི ཝཱ ཨརིཡཕལཾ ཨཱརབྦྷ པཝཏྟཱ ཀཐཱ. སེསཾ ཨུཏྟཱནམེཝ.

༩༡-༡༠༠. པཉྩམསྶ ¶ ¶ པཋམེ དུཏིཡེ ཙ ནཏྠི ཝཏྟབྦཾ. ཏཏིཡེ ཨཱཛཱནནཏོ ཨཉྙཱ, ཨུཔརིམགྒཔཉྙཱ ཧེཊྛིམམགྒེན ཉཱཏཔརིཉྙཱཡ ཨེཝ ཛཱནནཏོ. ཏསྶཱ པན ཕལབྷཱཝཏོ མགྒཕལཔཉྙཱ ཏཾསཧགཏཱ སམྨཱསངྐཔྤཱདཡོ ཙ ཨིདྷ ‘‘ཨཉྙཱ’’ཏི ཝུཏྟཱ. ཨཉྙཱཡ བྱཱཀརཎཱནི ཨཉྙཱབྱཱཀརཎཱནི. ཏེནེཝཱཧ ‘‘ཨཉྙཱབྱཱཀརཎཱནཱིཏི ཨརཧཏྟབྱཱཀརཎཱནཱི’’ཏི. ཨདྷིགཏམཱནེནཱཏི ཨཔྤཏྟེ པཏྟསཉྙཱི, ཨནདྷིགཏེ ཨདྷིགཏསཉྙཱི ཧུཏྭཱ ཨདྷིགཏཾ མཡཱཏི མཱནེན. ཙཏུཏྠཱདཱིནི ཨུཏྟཱནཏྠཱནེཝ.

པཋམསམྤདཱསུཏྟཱདིཝཎྞནཱ ནིཊྛིཏཱ.

༡༠༡-༤. ཏཏིཡསྶ ¶ ¶ པཋམེ ནཏྠི ཝཏྟབྦཾ. དུཏིཡེ པིཎྜཔཱཏཱདིཨཏྠཱཡ ཨུཔསངྐམིཏུཾ ཡུཏྟཊྛཱནཾ གོཙརོ, ཝེསིཡཱ གོཙརོ ཨསྶཱཏི ཝེསིཡཱགོཙརོ, མིཏྟསནྠཝཝསེན ཨུཔསངྐམིཏབྦཊྛཱནནྟི ཨཏྠོ. ཝེསིཡཱ ནཱམ རཱུཔཱུཔཛཱིཝིནིཡོ, ཏཱ མིཏྟསནྠཝཝསེན ན ཨུཔསངྐམིཏབྦཱ སམཎབྷཱཝསྶ ཨནྟརཱཡཀརཏྟཱ, པརིསུདྡྷཱསཡསྶཔི གརཧཱཧེཏུཏོ, ཏསྨཱ དཀྑིཎཱདཱནཝསེན སཏིཾ ཨུཔཊྛཔེཏྭཱ ཨུཔསངྐམིཏབྦཾ. ཝིདྷཝཱ ཝུཙྩནྟི མཏཔཏིཀཱ, པཝུཏྠཔཏིཀཱ ཝཱ. ཐུལླཀུམཱརིཡོཏི མཧལླིཀཱ ཨནིཝིདྡྷཱ ཀུམཱརིཡོ. པཎྜཀཱཏི ནཔུཾསཀཱ. ཏེ ཧི ཨུསྶནྣཀིལེསཱ ཨཝཱུཔསནྟཔརིལཱ༹ཧཱ ལོཀཱམིསནིསྶིཏཀཐཱབཧུལཱ, ཏསྨཱ ན ཨུཔསངྐམིཏབྦཱ. བྷིཀྑུནིཡོ ནཱམ ཨུསྶནྣབྲཧྨཙརིཡཱ. ཏཐཱ བྷིཀྑཱུཔི. ཨཉྙམཉྙཾ ཝིསབྷཱགཝཏྠུབྷཱཝཏོ སནྠཝཝསེན ཨུཔསངྐམནེ ཀཏིཔཱཧེནེཝ བྲཧྨཙརིཡནྟརཱཡོ སིཡཱ, ཏསྨཱ ན ཨུཔསངྐམིཏབྦཱ, གིལཱནཔུཙྪནཱདིཝསེན ཨུཔསངྐམནེ སཏོཀཱརིནཱ བྷཝིཏབྦཾ. ཏཏིཡཙཏུཏྠཱནི ཨུཏྟཱནཏྠཱནེཝ.

༡༠༥. པཉྩམེ མེཏྟཱ ཨེཏསྶ ཨཏྠཱིཏི མེཏྟཾ, ཏཾསམུཊྛཱནཾ ཀཱཡཀམྨཾ མེཏྟཾ ཀཱཡཀམྨཾ. ཨེས ནཡོ སེསདྭཡེཔི. ཨཱཝཱིཏི པཀཱསནཾ. པཀཱསབྷཱཝོ ཙེཏྠ ཡཾ ཨུདྡིསྶ ཏཾ ཀཱཡཀམྨཾ ཀརཱིཡཏི, ཏསྶ སམྨུཁབྷཱཝཏོཏི ཨཱཧ ‘‘སམྨུཁཱ’’ཏི. རཧོཏི ཨཔྤཀཱསཾ. ཨཔྤཀཱསཏཱ ཙ ཡཾ ཨུདྡིསྶ ཏཾ ཀཱཡཀམྨཾ ཀརཱིཡཏི, ཏསྶ ཨཔཙྩཀྑབྷཱཝཏོཏི ཨཱཧ ‘‘པརམྨུཁཱ’’ཏི. ཨིམཱནི མེཏྟཀཱཡཀམྨཱདཱིནི བྷིཀྑཱུནཾ ཝསེན ཨཱགཏཱནི ཏེསཾ སེཊྛཔརིསབྷཱཝཏོ, གིཧཱིསུཔི ལབྦྷནྟིཡེཝ. བྷིཀྑཱུནཉྷི མེཏྟཙིཏྟེན ཨཱབྷིསམཱཙཱརིཀཔཱུརཎཾ མེཏྟཾ ཀཱཡཀམྨཾ ནཱམ ¶ . གིཧཱིནཾ ཙེཏིཡཝནྡནཏྠཱཡ ¶ བོདྷིཝནྡནཏྠཱཡ སངྒྷནིམནྟནཏྠཱཡ གམནཾ གཱམཾ པིཎྜཱཡ པཝིཊྛེ བྷིཀྑཱུ དིསྭཱ པཙྩུགྒམནཾ པཏྟཔྤཊིགྒཧཎཾ ཨཱསནཔཉྙཱཔནཾ ཨནུགམནནྟི ཨེཝམཱདིཀཾ མེཏྟཾ ཀཱཡཀམྨཾ ནཱམ. བྷིཀྑཱུནཾ མེཏྟཙིཏྟེན ཨཱཙཱརཔཉྙཏྟིསིཀྑཱཔནཾ ཀམྨཊྛཱནཀཐནཾ དྷམྨདེསནཱ ཏེཔིཊཀམྤི བུདྡྷཝཙནཾ མེཏྟཾ ཝཙཱིཀམྨཾ ནཱམ. གིཧཱིནཾ ‘‘ཙེཏིཡཝནྡནཱཡ གཙྪཱམ, བོདྷིཝནྡནཱཡ གཙྪཱམ, དྷམྨསྶཝནཾ ཀརིསྶཱམ, དཱིཔམཱལཾ པུཔྥཔཱུཛཾ ཀརིསྶཱམ, ཏཱིཎི སུཙརིཏཱནི སམཱདཱཡ ཝཏྟིསྶཱམ, སལཱཀབྷཏྟཱདཱིནི དསྶཱམ, ཝསྶཱཝཱསིཀཾ དསྶཱམ, ཨཛྫ སངྒྷསྶ ཙཏྟཱརོ པཙྩཡེ དསྶཱམ, སངྒྷཾ ནིམནྟེཏྭཱ ཁཱདནཱིཡཱདཱིནི སཾཝིདཧཐ, ཨཱསནཱནི པཉྙཔེཐ, པཱནཱིཡཾ ཨུཔཊྛཔེཐ, སངྒྷཾ པཙྩུགྒནྟྭཱ ཨཱནེཐ, པཉྙཏྟཱསནེ ནིསཱིདཱཔེཐ, ཚནྡཛཱཏཱ ཨུསྶཱཧཛཱཏཱ ཝེཡྻཱཝཙྩཾ ཀརོཐཱ’’ཏིཨཱདིཀཐནཀཱལེ མེཏྟཾ ཝཙཱིཀམྨཾ ནཱམ. བྷིཀྑཱུནཾ པཱཏོཝ ཨུཊྛཱཡ སརཱིརཔྤཊིཛགྒནཾ ཀཏྭཱ ཙེཏིཡངྒཎཾ གནྟྭཱ ཝཏྟཱདཱིནི ཀཏྭཱ ཝིཝིཏྟསེནཱསནེ ནིསཱིདིཏྭཱ ‘‘ཨིམསྨིཾ ཝིཧཱརེ བྷིཀྑཱུ སུཁཱི ཧོནྟུ ཨཝེརཱ ཨབྱཱཔཛྫཱ’’ཏི ཙིནྟནཾ མེཏྟཾ མནོཀམྨཾ ནཱམ, གིཧཱིནཾ ‘‘ཨཡྻཱ སུཁཱི ཧོནྟུ ཨཝེརཱ ཨབྱཱཔཛྫཱ’’ཏི ཙིནྟནཾ མེཏྟཾ མནོཀམྨཾ ནཱམ.

ཏཏྠ ནཝཀཱནཾ ཙཱིཝརཀམྨཱདཱིསུ སཧཱཡབྷཱཝགམནཾ སམྨུཁཱ ཀཱཡཀམྨཾ ནཱམ, ཐེརཱནཾ པན པཱདདྷོཝནསིཉྩནབཱིཛནདཱནཱདིབྷེདམྤི སབྦཾ སཱམཱིཙིཀམྨཾ སམྨུཁཱ ཀཱཡཀམྨཾ ནཱམ, ཨུབྷཡེཧིཔི དུནྣིཀྑིཏྟཱནཾ དཱརུབྷཎྜཱདཱིནཾ ཏེསུ ཨཝཉྙཾ ཨཀཏྭཱ ཨཏྟནཱ དུནྣིཀྑིཏྟཱནཾ ཝིཡ པཊིསཱམནཾ པརམྨུཁཱ མེཏྟཾ ཀཱཡཀམྨཾ ནཱམ. ‘‘དེཝཏྠེརོ ཏིསྶཏྠེརོ’’ཏི ཝུཏྟཾ ཨེཝཾ པགྒཡ྄ཧཝཙནཾ སམྨུཁཱ མེཏྟཾ ཝཙཱིཀམྨཾ ནཱམ, ཝིཧཱརེ ཨསནྟཾ པན པཊིཔུཙྪནྟསྶ ‘‘ཀུཧིཾ ཨམྷཱཀཾ དེཝཏྠེརོ, ཀུཧིཾ ཨམྷཱཀཾ ཏིསྶཏྠེརོ, ཀདཱ ནུ ཁོ ཨཱགམིསྶཏཱི’’ཏི ཨེཝཾ པིཡཝཙནཾ པརམྨུཁཱ མེཏྟཾ ཝཙཱིཀམྨཾ ནཱམ. མེཏྟཱསིནེཧསིནིདྡྷཱནི པན ནཡནཱནི ཨུམྨཱིལེཏྭཱ པསནྣེན མུཁེན ཨོལོཀནཾ སམྨུཁཱ མེཏྟཾ མནོཀམྨཾ ནཱམ, ‘‘དེཝཏྠེརོ ཏིསྶཏྠེརོ ཨརོགོ ཧོཏུ ཨབྱཱཔཛྫོ’’ཏི སམནྣཱཧརཎཾ པརམྨུཁཱ མེཏྟཾ མནོཀམྨཾ ནཱམ. ཀཱམཉྩེཏྠ མེཏྟཱསིནེཧསིནིདྡྷཱནཾ ནཡནཱནཾ ཨུམྨཱིལནཾ, པསནྣེན མུཁེན ཨོལོཀནཉྩ མེཏྟཾ ཀཱཡཀམྨམེཝ. ཡསྶ པན ཙིཏྟསྶ ཝསེན ནཡནཱནཾ མེཏྟཱསིནེཧསིནིདྡྷཏཱ, མུཁསྶ ཙ པསནྣཏཱ, ཏཾ སནྡྷཱཡ ཝུཏྟཾ ‘‘མེཏྟཾ མནོཀམྨཾ ནཱམཱ’’ཏི. སམཱདྷིསཾཝཏྟནཔྤཡོཛནཱནི སམཱདྷིསཾཝཏྟནིཀཱནི.

སམཱནསཱིལཏཾ ¶ གཏོཏི ཏེསུ ཏེསུ དིསཱབྷཱགེསུ ཝིཧརནྟེཧི བྷིཀྑཱུཧི སདྡྷིཾ སམཱནསཱིལཏཾ གཏོ. ཡཱཡནྟི ཡཱ ཨཡཾ མཡ྄ཧཉྩེཝ ཏུམྷཱཀཉྩ པཙྩཀྑབྷཱུཏཱ. དིཊྛཱིཏི སམྨཱདིཊྛི. ཨརིཡཱཏི ནིདྡོསཱ. ནིཡྻཱཏཱིཏི ཝཊྚདུཀྑཏོ ནིསྶརཏི ནིགྒཙྪཏི. སཡཾ ནིཡྻནྟཱིཡེཝ ཧི ཏཾསམངྒིཔུགྒལཾ ཝཊྚདུཀྑཏོ ནིཡྻཱཔེཏཱིཏི ཝུཙྩཏི. ཡཱ སཏྠུ ཨནུསིཊྛི, ཏཾ ཀརོཏཱིཏི ཏཀྐརོ ¶ , ཏསྶ, ཡཐཱནུསིཊྛཾ པཊིཔཛྫཀསྶཱཏི ཨཏྠོ. དུཀྑཀྑཡཱཡཱཏི སབྦདུཀྑཀྑཡཏྠཾ. དིཊྛིསཱམཉྙགཏོཏི སམཱནདིཊྛིབྷཱཝཾ ཨུཔགཏོ.

༡༠༦-༡༡༠. ཚཊྛེ ཨདྷིསཱིལེཏི ནིམིཏྟཏྠེ བྷུམྨཾ, སཱིལནིམིཏྟཾ ན ཨུཔཝདཏི ན ནིནྡཏཱིཏི ཨཏྠོ. ཨཏྟནི ཀམྨེ ཙ ཨནུ ཨནུ པེཀྑཏི སཱིལེནཱཏི ཨཏྟཱནུཔེཀྑཱི. སཏྟམཱདཱིནི ཨུཏྟཱནཏྠཱནེཝ.

༡༡༡-༡༡༤. དུཏིཡསྶ པཋམེ ཨསནྠཝེསུ ཀུལེསུ ཝིསྶཱསོ ཨེཏསྶཱཏི ཨསནྠཝཝིསྶཱསཱི. ཨནིསྶརོ ཧུཏྭཱ ཝིཀཔྤེཏི སཾཝིདཧཏི སཱིལེནཱཏི ཨནིསྶརཝིཀཔྤཱི. ཝིསྶཊྛཱནི ཝིསུཾ ཁིཏྟཱནི བྷེདེན ཨཝཏྠིཏཱནི ཀུལཱནི གྷཊནཏྠཱཡ ཨུཔསེཝཏི སཱིལེནཱཏི ཝིསྶཊྛུཔསེཝཱི. དུཏིཡཱདཱིནི ཨུཏྟཱནཏྠཱནེཝ.

ཀུལཱུཔཀསུཏྟཱདིཝཎྞནཱ ནིཊྛིཏཱ.

༡༡༥-༡༢༣. པཉྩམེ ¶ ¶ ཨཱཝཱསམཙྪརིཡཱདཱིནི པཉྩ ཨིདྷ བྷིཀྑུནིཡཱ ཝསེན ཨཱགཏཱནི, བྷིཀྑུསྶ ཝསེནཔི ཏཱནི ཝེདིཏབྦཱནི. ཨཱཝཱསམཙྪརིཡེན ཧི སམནྣཱགཏོ བྷིཀྑུ ཨཱགནྟུཀཾ དིསྭཱ ‘‘ཨེཏྠ ཙེཏིཡསྶ ཝཱ སངྒྷསྶ ཝཱ པརིཀྑཱརོ ཋཔིཏོ’’ཏིཨཱདཱིནི ཝཏྭཱ སངྒྷིཀཨཱཝཱསཾ ན དེཏི. ཀུལམཙྪརིཡེན སམནྣཱགཏོ བྷིཀྑུ ཏེཧི ཏེཧི ཀཱརཎེཧི ཨཱདཱིནཝཾ དསྶེཏྭཱ ཨཏྟནོ ཨུཔཊྛཱཀེ ཀུལེ ཨཉྙེསཾ པཝེསམྤི ནིཝཱརེཏི. ལཱབྷམཙྪརིཡེན སམནྣཱགཏོ སངྒྷིཀམྤི ལཱབྷཾ མཙྪརཱཡནྟོ ཡཐཱ ཨཉྙེ ན ལབྷནྟི, ཨེཝཾ ཀརོཏི ཨཏྟནཱ ཝིསམནིསྶིཏཏཱཡ བལཝནིསྶིཏཏཱཡ ཙ. ཝཎྞམཙྪརིཡེན སམནྣཱགཏོ ཨཏྟནོ ཝཎྞཾ ཝཎྞེཏི, པརེསཾ ཝཎྞེ ‘‘ཀིཾ ཝཎྞོ ཨེསོ’’ཏི ཏཾ ཏཾ དོསཾ ཝདཏི. ཝཎྞོཏི ཙེཏྠ སརཱིརཝཎྞོཔི, གུཎཝཎྞོཔི ཝེདིཏབྦོ.

དྷམྨམཙྪརིཡེན སམནྣཱགཏོ – ‘‘ཨིམཾ དྷམྨཾ པརིཡཱཔུཎིཏྭཱ ཨེསོ མཾ ཨབྷིབྷཝིསྶཏཱི’’ཏི ཨཉྙསྶ ན དེཏི. ཡོ པན – ‘‘ཨཡཾ ཨིམཾ དྷམྨཾ ཨུགྒཧེཏྭཱ ཨཉྙཐཱ ཨཏྠཾ ཝིཔརིཝཏྟེཏྭཱ ནཱསེསྶཏཱི’’ཏི དྷམྨནུགྒཧེན ཝཱ – ‘‘ཨཡཾ ཨིམཾ དྷམྨཾ ཨུགྒཧེཏྭཱ ཨུདྡྷཏོ ཨུནྣལོ༹ ཨཝཱུཔསནྟཙིཏྟོ ཨཔུཉྙཾ པསཝིསྶཏཱི’’ཏི པུགྒལཱནུགྒཧེན ཝཱ ན དེཏི, ན ཏཾ མཙྪརིཡཾ. དྷམྨོཏི ཙེཏྠ པརིཡཏྟིདྷམྨོ ཨདྷིཔྤེཏོ. པཊིཝེདྷདྷམྨོ ཧི ཨརིཡཱནཾཡེཝ ཧོཏི, ཏེ ཙ ནཾ ན མཙྪརཱཡནྟི མཙྪརིཡསྶ སབྦསོ པཧཱིནཏྟཱཏི ཏསྶ ཨསམྦྷཝོ ཨེཝ. ཏཏྠ ཨཱཝཱསམཙྪརིཡེན ལོཧགེཧེ པཙྩཏི, ཡཀྑོ ཝཱ པེཏོ ཝཱ ཧུཏྭཱ ཏསྶེཝ ཨཱཝཱསསྶ སངྐཱརཾ སཱིསེན ཨུཀྑིཔིཏྭཱ ཙརཏི. ཀུལམཙྪརིཡེན ཨཔྤབྷོགོ ཧོཏི. ལཱབྷམཙྪརིཡེན གཱུཐནིརཡེ ནིབྦཏྟཏི, སངྒྷསྶ ཝཱ གཎསྶ ཝཱ ལཱབྷཾ མཙྪརཱཡིཏྭཱ པུགྒལིཀཔརིབྷོགེན ཝཱ པརིབྷུཉྫིཏྭཱ ཡཀྑོ ཝཱ པེཏོ ཝཱ མཧཱཨཛགརོ ཝཱ ཧུཏྭཱ ནིབྦཏྟཏི. ཝཎྞམཙྪརིཡེན བྷཝེསུ ནིབྦཏྟསྶ ཝཎྞོ ནཱམ ན ཧོཏི. དྷམྨམཙྪརིཡེན ཀུཀྐུལ༹ནིརཡེ ནིབྦཏྟཏི. ཚཊྛཱདཱིནི ཨུཏྟཱནཏྠཱནེཝ.

མཙྪརིནཱིསུཏྟཱདིཝཎྞནཱ ནིཊྛིཏཱ.

༡༢༤-༡༣༠. ཏཏིཡོ ¶ ¶ ཝགྒོ ཨུཏྟཱནཏྠོཡེཝ.

༡༣༡. ཙཏུཏྠསྶ པཋམེ ཨཏྠཉྙཱུཏི ཧིཏཉྙཱུ. ཧིཏཔརིཡཱཡོ ཧེཏྠ ཨཏྠ-སདྡོ ‘‘ཨཏྟཏྠོ པརཏྠོ’’ཏིཨཱདཱིསུ (མཧཱནི. ༦༩; ཙཱུལ༹ནི. མོགྷརཱཛམཱཎཝཔུཙྪཱནིདྡེསོ ༨༥; པཊི. མ. ༣.༥) ཝིཡ. ཡསྨཱ ཙེས པརེསཾ ཧིཏཾ ཛཱནནྟོ ཏེ ཨཏྟནི རཉྫེཏི, ཏསྨཱ ཝུཏྟཾ ‘‘རཉྫིཏུཾ ཛཱནཱཏཱི’’ཏི. དཎྜེཏི ཨཔརཱདྷཱནུརཱུཔེ དཎྜནེ. བལམྷཱིཏི བལཀཱཡེ. པཉྩ ཨཏྠེཏི ཨཏྟཏྠོ, པརཏྠོ, ཨུབྷཡཏྠོ, དིཊྛདྷམྨིཀོ ཨཏྠོ, སམྤརཱཡིཀོ ཨཏྠོཏི ཨེཝཾ པཉྩཔྤབྷེདེ ཨཏྠེ. ཙཏྟཱརོ དྷམྨེཏི ཙཏུསཙྩདྷམྨེ, ཀཱམརཱུཔཱརཱུཔལོཀུཏྟརབྷེདེ ཝཱ ཙཏྟཱརོ དྷམྨེ. པཊིགྒཧཎཔརིབྷོགམཏྟཉྙུཏཱཡ ཨེཝ པརིཡེསནཝིསྶཛྫནམཏྟཉྙུཏཱཔི བོདྷིཏཱ ཧོནྟཱིཏི ‘‘པཊིགྒཧཎཔརིབྷོགམཏྟཾ ཛཱནཱཏི’’ཨིཙྩེཝ ཝུཏྟཾ.

ཨུཏྟརཏི ཨཏིཀྐམཏི, ཨབྷིབྷཝཏཱིཏི ཝཱ ཨུཏྟརཾ, ནཏྠི ཨེཏྠ ཨུཏྟརནྟི ཨནུཏྟརཾ. ཨནཏིསཡཾ, ཨཔྤཊིབྷཱགཾ ཝཱ ཨནེཀཱསུ དེཝམནུསྶཔརིསཱསུ ཨནེཀསཏཀྑཏྟུཾ ཏེསཾ ཨརིཡསཙྩཔྤཊིཝེདྷསམྤཱདནཝསེན པཝཏྟཱ བྷགཝཏོ དྷམྨདེསནཱ དྷམྨཙཀྐཾ. ཨཔིཙ སབྦཔཋམཾ ཨཉྙཱཏཀོཎྜཉྙཔྤམུཁཱཡ ཨཊྛཱརསཔརིསགཎཱཡ བྲཧྨཀོཊིཡཱ ཙཏུསཙྩསྶ པཊིཝེདྷཝིདྷཱཡིནཱི ཡཱ དྷམྨདེསནཱ, ཏསྶཱ སཱཏིསཡཱ དྷམྨཙཀྐསམཉྙཱ. ཏཏྠ སཏིཔཊྛཱནཱཏིདྷམྨོ ཨེཝ པཝཏྟནཊྛེན ཙཀྐནྟི དྷམྨཙཀྐཾ. ཙཀྐནྟི ཝཱ ཨཱཎཱ དྷམྨཏོ ཨནཔེཏཏྟཱ, དྷམྨཉྩ ཏཾ ཙཀྐཉྩཱཏི དྷམྨཙཀྐཾ. དྷམྨེན ཉཱཡེན ཙཀྐནྟིཔི དྷམྨཙཀྐཾ. ཡཐཱཧ ‘‘དྷམྨཉྩ པཝཏྟེཏི ཙཀྐཉྩཱཏི དྷམྨཙཀྐཾ, ཙཀྐཉྩ པཝཏྟེཏི དྷམྨཉྩཱཏི དྷམྨཙཀྐཾ, དྷམྨེན པཝཏྟེཏཱིཏི དྷམྨཙཀྐ’’ནྟིཨཱདི (པཊི. མ. ༢.༤༠-༤༡). ཨཔྤཊིཝཏྟིཡནྟི དྷམྨིསྶརསྶ བྷགཝཏོ སམྨཱསམྦུདྡྷསྶ དྷམྨཙཀྐསྶ ¶ ཨནུཏྟརབྷཱཝཏོ ཨཔྤཊིསེདྷནཱིཡཾ. ཀེཧི པན ཨཔྤཊིཝཏྟིཡནྟི ཨཱཧ – ‘‘སམཎེན ཝཱ’’ཏིཨཱདི. ཏཏྠ སམཎེནཱཏི པབྦཛྫཾ ཨུཔགཏེན. བྲཱཧྨཎེནཱཏི ཛཱཏིབྲཱཧྨཎེན. སཱསནཔརམཏྠསམཎབྲཱཧྨཎཱནཉྷི པཊིལོམཙིཏྟཾཡེཝ ནཏྠི. དེཝེནཱཏི ཀཱམཱཝཙརདེཝེན. ཀེནཙཱིཏི ཡེན ¶ ཀེནཙི ཨཝསིཊྛཔཱརིསཛྫེན. ཨེཏྟཱཝཏཱ ཨཊྛནྣམྤི པརིསཱནཾ ཨནཝསེསཔརིཡཱདཱནཾ དཊྛབྦཾ. ལོཀསྨིནྟི སཏྟལོཀེ.

པཋམཙཀྐཱནུཝཏྟནསུཏྟཝཎྞནཱ ནིཊྛིཏཱ.

༡༣༢. དུཏིཡེ ཙཀྐཝཏྟིཝཏྟནྟི དསཝིདྷཾ, དྭཱདསཝིདྷཾ ཝཱ ཙཀྐཝཏྟིབྷཱཝཱཝཧཾ ཝཏྟཾ. ཏཏྠ ཨནྟོཛནསྨིཾ བལཀཱཡེ དྷམྨིཀཱཡེཝ རཀྑཱཝརཎགུཏྟིཡཱ སཾཝིདྷཱནཾ, ཁཏྟིཡེསུ, ཨནུཡནྟེསུ, བྲཱཧྨཎགཧཔཏིཀེསུ, ནེགམཛཱནཔདེསུ, སམཎབྲཱཧྨཎེསུ, མིགཔཀྑཱིསུ, ཨདྷམྨིཀཔཊིཀྑེཔོ, ཨདྷནཱནཾ དྷནཱནུཔྤདཱནཾ, སམཎབྲཱཧྨཎེ ཨུཔསངྐམིཏྭཱ པཉྷཔུཙྪནནྟི ཨིདཾ དསཝིདྷཾ ཙཀྐཝཏྟིཝཏྟཾ. ཨིདམེཝ ཙ གཧཔཏིཀེ པཀྑིཛཱཏེ ཙ ཝིསུཾ ཀཏྭཱ གཧཎཝསེན དྭཱདསཝིདྷཾ. པིཏརཱ པཝཏྟིཏམེཝ ཨནུཔྤཝཏྟེཏཱིཏི དསཝིདྷཾ ཝཱ དྭཱདསཝིདྷཾ ཝཱ ཙཀྐཝཏྟིཝཏྟཾ པཱུརེཏྭཱ ནིསིནྣསྶ པུཏྟསྶ ཨཉྙཾ པཱཏུབྷཝཏི, སོ ཏཾ པཝཏྟེཏི. རཏནམཡཏྟཱ པན སདིསཊྛེན ཏདེཝེཏནྟི ཀཏྭཱ ‘‘པིཏརཱ པཝཏྟིཏ’’ནྟི ཝུཏྟཾ. ཡསྨཱ ཝཱ སོ ‘‘ཨཔྤོསྶུཀྐོ, ཏྭཾ དེཝ, ཧོཧི, ཨཧམནུསཱསིསྶཱམཱི’’ཏི ཨཱཧ. ཏསྨཱ པིཏརཱ པཝཏྟིཏཾ ཨཱཎཱཙཀྐཾ ཨནུཔྤཝཏྟེཏི ནཱམཱཏི ཨེཝམེཏྠ ཨཏྠོ དཊྛབྦོ. ཡཉྷི ཨཏྟནོ པུཉྙཱནུབྷཱཝསིདྡྷཾ ཙཀྐརཏནཾ, ཏཾ ནིཔྤརིཡཱཡཏོ ཏེན པཝཏྟིཏཾ ནཱམ, ནེཏརནྟི པཋམནཡོ ཝུཏྟོ. ཡསྨཱ པཝཏྟིཏསྶེཝ ཨནུཝཏྟནཾ, པཋམནཡོ ཙ ཏཾསདིསེ ཏབྦོཧཱརཝསེན ཝུཏྟོཏི ཏཾ ཨནཱདིཡིཏྭཱ དུཏིཡནཡོ ཝུཏྟོ.

དུཏིཡཙཀྐཱནུཝཏྟནསུཏྟཝཎྞནཱ ནིཊྛིཏཱ.

༡༣༤. ཙཏུཏྠེ ‘‘ཨུབྷཏོ སུཛཱཏོ’’ཏི ཨེཏྟཀེ ཝུཏྟེ ཡེཧི ཀེཧིཙི དྭཱིཧི བྷཱགེཧི སུཛཱཏཏཱ པཉྙཱཔེཡྻ, སུཛཱཏ-སདྡོ ཙ ‘‘སུཛཱཏོ ཙཱརུདསྶནོ’’ཏིཨཱདཱིསུ (མ. ནི. ༢.༣༩༩; སུ. ནི. ༥༥༣; ཐེརགཱ. ༨༡༨) ཨཱརོཧསམྤཏྟིཔརིཡཱཡོཏི ¶ ཛཱཏིཝསེན ¶ སུཛཱཏཏཾ ཝིབྷཱཝེཏུཾ ‘‘མཱཏིཏོ ཙ པིཏིཏོ ཙཱ’’ཏི ཝུཏྟཾ. ཨནོརསཔུཏྟཝསེནཔི ལོཀེ མཱཏུཔིཏུསམཉྙཱ དིསྶཏི, ཨིདྷ པན སཱ ཨོརསཔུཏྟཝསེན ཨིཙྪིཏཱཏི དསྶེཏུཾ ‘‘སཾསུདྡྷགྒཧཎིཀོ’’ཏི ཝུཏྟཾ. གབྦྷཾ གཎྷཱཏི དྷཱརེཏཱིཏི གཧཎཱི, གབྦྷཱསཡསཉྙིཏོ མཱཏུཀུཙྪིཔྤདེསོ. ཏེནཱཧ ‘‘སཾསུདྡྷཱཡ མཱཏུཀུཙྪིཡཱ སམནྣཱགཏོ’’ཏི. ཡཐཱབྷུཏྟསྶ ཨཱཧཱརསྶ ཝིཔཱཙནཝསེན གཎྷནཏོ ཨཚཌྜནཏོ གཧཎཱི, ཏེཛོདྷཱཏུ. པིཏཱ ཙ མཱཏཱ ཙ པིཏརོ. པིཏཱུནཾ པིཏརོ པིཏཱམཧཱ. ཏེསཾ ཡུགོ པིཏཱམཧཡུགོ, ཏསྨཱ ཡཱཝ སཏྟམཱ པིཏཱམཧཡུགཱ, པིཏཱམཧདྭནྡཱཏི ཨེཝམེཏྠ ཨཏྠོ དཊྛབྦོ. ཨེཝཉྷི པིཏཱམཧགྒཧཎེནེཝ མཱཏཱམཧོཔི གཧིཏོཏི སོ ཨཊྛཀཐཱཡཾ ཝིསུཾ ན ཨུདྡྷཏོ. ཡུག-སདྡོ ཙེཏྠ ཨེཀསེསནཡེན དཊྛབྦོ ‘‘ཡུགོ ཙ ཡུགོ ཙ ཡུགོ’’ཏི. ཨེཝཉྷི ཏཏྠ ཏཏྠ དྭིནྣཾ གཧིཏམེཝ ཧོཏི. ཏེནཱཧ ‘‘ཏཏོ ཨུདྡྷཾ སབྦེཔི པུབྦཔུརིསཱ པིཏཱམཧགྒཧཎེནེཝ གཧིཏཱ’’ཏི. པུརིསགྒཧཎཉྩེཏྠ ཨུཀྐཊྛནིདྡེསཝསེན ཀཏནྟི དཊྛབྦཾ. ཨེཝཉྷི ‘‘མཱཏིཏོ’’ཏི པཱལི༹ཝཙནཾ སམཏྠིཏཾ ཧོཏི.

ཨཀྑིཏྟོཏི ཨཔྤཏྟཀྑེཔོ. ཨནཝཀྑིཏྟོཏི སམྤཏྟཝིཝཱདཱདཱིསུ ན ཨཝཀྑིཏྟོ ན ཚཌྜིཏོ. ཛཱཏིཝཱདེནཱཏི ཧེཏུམྷི ཀརཎཝཙནནྟི དསྶེཏུཾ ‘‘ཀེན ཀཱརཎེནཱ’’ཏིཨཱདི ཝུཏྟཾ. ཨེཏྠ ཙ ‘‘ཨུབྷཏོ…པེ… པིཏཱམཧཡུགཱ’’ཏི ཨེཏེན ཁཏྟིཡསྶ ཡོནིདོསཱབྷཱཝོ དསྶིཏོ སཾསུདྡྷགྒཧཎིཀབྷཱཝཀིཏྟནཏོ. ‘‘ཨཀྑིཏྟོ’’ཏི ཨིམིནཱ ཀིརིཡཱཔརཱདྷཱབྷཱཝོ. ཀིརིཡཱཔརཱདྷེན ཧི སཏྟཱ ཁེཔཾ པཱཔུཎནྟི. ‘‘ཨནུཔཀྐུཊྛོ’’ཏི ཨིམིནཱ ཨཡུཏྟསཾསགྒཱབྷཱཝོ. ཨཡུཏྟསཾསགྒཉྷི པཊིཙྩ སཏྟཱ ཨཀྐོསཾ ལབྷནྟི.

ཨཌྜྷཏཱ ནཱམ ཝིབྷཝསམྤནྣཏཱ, སཱ ཏཾ ཏཾ ཨུཔཱདཱཡུཔཱདཱཡ ཝུཙྩཏཱིཏི ཨཱཧ ‘‘ཡོ ཀོཙི ཨཏྟནོ སནྟཀེན ཝིབྷཝེན ཨཌྜྷོ ཧོཏཱི’’ཏི. ཏཐཱ མཧདྡྷནཏཱཔཱིཏི ཏཾ ཨུཀྐཾསགཏཾ དསྶེཏུཾ ‘‘མཧཏཱ ཨཔརིམཱཎསངྑེན དྷནེན སམནྣཱགཏོ’’ཏི ཝུཏྟཾ. བྷུཉྫིཏབྦཏོ པརིབྷུཉྫིཏབྦཏོ ཝིསེསཏོ ཀཱམཱ བྷོགཱ ནཱམཱཏི ཨཱཧ ‘‘པཉྩཀཱམགུཎཝསེནཱ’’ཏི. ཀོཊྛཾ ཝུཙྩཏི དྷཉྙསྶ ཨཱཝསནཊྛཱནཾ, ཀོཊྛབྷཱུཏཾ ཨགཱརཾ ཀོཊྛཱགཱརཾ. ཏེནཱཧ ‘‘དྷཉྙེན ཙ པརིཔུཎྞཀོཊྛཱགཱརོ’’ཏི. ཨེཝཾ སཱརགབྦྷཾ ཀོསོ, དྷཉྙཔརིཊྛཔནཊྛཱནཉྩ ཀོཊྛཱགཱརནྟི དསྶེཏྭཱ ཨིདཱནི ཏཏོ ཨཉྙཐཱ ཏཾ དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ. ཏཏྠ ཡཐཱ ཨསིནོ ཏིཀྑབྷཱཝཔརིཧཱརཀོ ¶ པཊིཙྪདོ ‘‘ཀོསོ’’ཏི ཝུཙྩཏི. ཨེཝཾ རཉྙོ ཏིཀྑབྷཱཝཔརིཧཱརཾ ཀཏྭཱ ཙཏུརངྒིནཱི སེནཱ ཀོསོཏི ཨཱཧ ‘‘ཙཏུབྦིདྷོ ཀོསོ ཧཏྠཱི ཨསྶཱ རཐཱ པཏྟཱི’’ཏི. ཝཏྠཀོཊྛཱགཱརགྒཧཎེནེཝ སབྦསྶཔི བྷཎྜཊྛཔནཊྛཱནསྶ གཧིཏཏྟཱ ‘‘ཏིཝིདྷཾ ཀོཊྛཱགཱར’’ནྟི ཝུཏྟཾ.

ཡསྶཱ ¶ པཉྙཱཡ ཝསེན པུརིསོ ‘‘པཎྜིཏོ’’ཏི ཝུཙྩཏི, ཏཾ པཎྜིཙྩནྟི ཨཱཧ ‘‘པཎྜིཙྩེན སམནྣཱགཏོ’’ཏི. ཏཾཏཾཨིཏིཀཏྟབྦཏཱསུ ཚེཀབྷཱཝོ བྱཏྟབྷཱཝོ ཝེཡྻཏྟིཡཾ. སམྨོཧཾ ཧིཾསཏི ཝིདྷམཏཱིཏི མེདྷཱ, སཱ ཨེཏསྶ ཨཏྠཱིཏི མེདྷཱཝཱི. ཋཱནེ ཋཱནེ ཨུཔྤཏྟི ཨེཏིསྶཱ ཨཏྠཱིཏི ཋཱནུཔྤཏྟི, ཋཱནསོ ཨུཔྤཛྫནཔཉྙཱ. ཝཌྜྷིཨཏྠེཏི ཝཌྜྷིསངྑཱཏེ ཨཏྠེ.

༡༣༥-༩. པཉྩམེ ཧཏྠིསྨིནྟི ཧཏྠིསིཔྤེ. ཧཏྠཱིཏི ཧི ཧཏྠིཝིསཡཏྟཱ ཧཏྠིསནྣིསྶིཏཏྟཱ ཙ ཧཏྠིསིཔྤཾ གཧིཏཾ. སེསཔདེསུཔི ཨེསེཝ ནཡོ. ཝཡཏཱིཏི ཝཡོ, སོབྷནེསུ ཀཏྠཙི ཨཔཀྑལནྟོ ཨཝིཏྠཱཡནྟོ ཏཱནི སནྡྷཱརེཏུཾ སཀྐོཏཱིཏི ཨཏྠོ. ན ཝཡོ ཨཝཡོ, ཏཱནི ཨཏྠཏོ སདྡཏོ ཙ སནྡྷཱརེཏུཾ ན སཀྐོཏི. ཨཝཡོ ན ཧོཏཱིཏི ཨནཝཡོ. དྭེ པཊིསེདྷཱ པཀཏིཾ གམེནྟཱིཏི ཨཱཧ ‘‘ཨནཝཡོཏི སམཏྠོ’’ཏི. ཚཊྛཱདཱིནི ཨུཏྟཱནཏྠཱནེཝ.

༡༤༠. དསམེ ཏིབྦཱནནྟི ཏིཀྑཱནཾ. ཁརཱནནྟི ཀཀྐསཱནཾ. ཀཊུཀཱནནྟི དཱརུཎཱནཾ. ཨསཱཏཱནནྟི ནསཱཏཱནཾ ཨཔྤིཡཱནཾ. ན ཏཱསུ མནོ ཨཔྤེཏི, ན ཏཱ མནཾ ཨཔྤཱཡནྟི ཝཌྜྷེནྟཱིཏི ཨམནཱཔཱ.

༡༤༡. པཉྩམསྶ ¶ ¶ པཋམེ དཏྭཱ ཨཝཛཱནཱཏཱིཏི ཨེཏྠ ཨེཀོ བྷིཀྑུ མཧཱཔུཉྙོ ཙཏུཔཙྩཡལཱབྷཱི ཧོཏི, སོ ཙཱིཝརཱདཱིནི ལབྷིཏྭཱ ཨཉྙཾ ཨཔྤཔུཉྙཾ ཨཱཔུཙྪཏི. སོཔི ཏསྨིཾ པུནཔྤུནཾ ཨཱཔུཙྪནྟེཔི གཎྷཱཏིཡེཝ. ཨཐསྶ ཨིཏརོ ཐོཀཾ ཀུཔིཏོ ཧུཏྭཱ མངྐུབྷཱཝཾ ཨུཔྤཱདེཏུཀཱམོ ཝདཏི ‘‘ཨཡཾ ཨཏྟནོ དྷམྨཏཱཡ ཙཱིཝརཱདཱིནི ན ལབྷཏི, ཨམྷེ ནིསྶཱཡ ལབྷཏཱི’’ཏི. ཨེཝམྤི དཏྭཱ ཨཝཛཱནཱཏི ནཱམ. ཨེཀོ པན ཨེཀེན སདྡྷིཾ དྭེ ཏཱིཎི ཝསྶཱནི ཝསནྟོ པུབྦེ ཏཾ པུགྒལཾ གརུཾ ཀཏྭཱ གཙྪནྟེ གཙྪནྟེ ཀཱལེ ཙིཏྟཱིཀཱརཾ ན ཀརོཏི, ཨཱསནནིསིནྣཊྛཱནམྤི ན གཙྪཏི. ཨཡམྤི པུགྒལོ སཾཝཱསེན ཨཝཛཱནཱཏི ནཱམ. ཨཱདྷེཡྻམུཁོཏི ཨཱདིཏོ དྷེཡྻམུཁོ, པཋམཝཙནསྨིཾཡེཝ ཋཔིཏམུཁོཏི ཨཏྠོ. ཏཏྠཱཡཾ ནཡོ – ཨེཀོ པུགྒལོ སཱརུཔྤཾཡེཝ བྷིཀྑུཾ ‘‘ཨསཱརུཔྤོ ཨེསོ’’ཏི ཀཐེཏི. ཏཾ སུཏྭཱ ཨེས ནིཊྛཾ གཙྪཏི, པུན ཨཉྙེན སབྷཱགེན བྷིཀྑུནཱ ‘‘སཱརུཔྤོ ཨཡ’’ནྟི ཝུཏྟེཔི ཏསྶ ཝཙནཾ ན གཎྷཱཏི. ཨསུཀེན ནཱམ ‘‘ཨསཱརུཔྤོ ཨཡ’’ནྟི ཨམྷཱཀཾ ཀཐིཏནྟི པུརིམབྷིཀྑུནོཝ ཀཐཾ གཎྷཱཏི. ཨཔརོཔིསྶ དུསྶཱིལཾ ‘‘སཱིལཝཱ’’ཏི ཀཐེཏི. ཏསྶ ཝཙནཾ སདྡཧིཏྭཱ པུན ཨཉྙེན ‘‘ཨསཱརུཔྤོ ཨེསོ བྷིཀྑུ, ནཱཡཾ ཏུམྷཱཀཾ སནྟིཀཾ ཨུཔསངྐམིཏུཾ ཡུཏྟོ’’ཏི ཝུཏྟེཔི ཏསྶ ཝཙནཾ ཨགྒཧེཏྭཱ པུརིམཾཡེཝ ཀཐཾ གཎྷཱཏི. ཨཔརོ ཝཎྞམྤི ཀཐིཏཾ གཎྷཱཏི, ཨཝཎྞམྤི ཀཐིཏཾ གཎྷཱཏིཡེཝ. ཨཡམྤི ཨཱདྷེཡྻམུཁོཡེཝ ནཱམ ཨཱདྷཱཏབྦམུཁོ, ཡཾ ཡཾ སུཎཱཏི, ཏཏྠ ཏཏྠ ཋཔིཏམུཁོཏི ཨཏྠོ.

ལོལོཏི སདྡྷཱདཱིནཾ ཨིཏྟརཀཱལཔྤཏིཏཏྟཱ ཨསྶདྡྷིཡཱདཱིཧི ལུལིཏབྷཱཝེན ལོལོ. ཨིཏྟརབྷཏྟཱིཏིཨཱདཱིསུ པུནཔྤུནཾ བྷཛནེན སདྡྷཱཝ བྷཏྟིཔེམཾ. སདྡྷཱཔེམམྤི གེཧསྶིཏཔེམམྤི ཝཊྚཏི, པསཱདོ སདྡྷཱཔསཱདོ. ཨེཝཾ པུགྒལོ ལོལོ ཧོཏཱིཏི ཨེཝཾ ཨིཏྟརསདྡྷཱདིཏཱཡ པུགྒལོ ལོལོ ནཱམ ཧོཏི. ཧལིདྡིརཱགོ ཝིཡ, ཐུསརཱསིམྷི ཀོཊྚིཏཁཱནུཀོ ཝིཡ, ཨསྶཔིཊྛིཡཾ ཋཔིཏཀུམྦྷཎྜཾ ཝིཡ ཙ ཨནིབདྡྷཊྛཱནེ མུཧུཏྟེན ཀུཔྤཏི. མནྡོ མོམཱུཧོཏི ཨཉྙཱཎབྷཱཝེན མནྡོ, ཨཝིསཡཏཱཡ མོམཱུཧོ, མཧཱམཱུལ༹ྷོཏི ཨཏྠོ.

༡༤༢-༣. དུཏིཡེ ¶ ¶ ཨཱརབྷཏཱིཏི ཨེཏྠ ཨཱརམྦྷ-སདྡོ ཀམྨཀིརིཡཧིཾསནཝཱིརིཡཀོཔནཱཔཏྟིཝཱིཏིཀྐམེསུ ཝཏྟཏི. ཏཐཱ ཧེས ‘‘ཡཾ ཀིཉྩི དུཀྑཾ སམྦྷོཏི, སབྦཾ ཨཱརམྦྷཔཙྩཡཱ’’ཏི (སུ. ནི. ༧༤༩) ཀམྨེ ཨཱགཏོ. ‘‘མཧཱརམྦྷཱ མཧཱཡཉྙཱ, ན ཏེ ཧོནྟི མཧཔྥལཱ’’ཏི (སཾ. ནི. ༡.༡༢༠; ཨ. ནི. ༤.༣༩) ཀིརིཡཱཡ. ‘‘སམཎཾ གོཏམཾ ཨུདྡིསྶ པཱཎཾ ཨཱརབྷནྟཱི’’ཏི (མ. ནི. ༢.༥༡) ཧིཾསནེ. ‘‘ཨཱརམྦྷཐ ནིཀྑམཐ, ཡུཉྫཐ བུདྡྷསཱསནེ’’ཏི (སཾ. ནི. ༡.༡༨༥; ནེཏྟི. ༢༩; པེཊཀོ. ༣༨; མི. པ. ༥.༡.༤) ཝཱིརིཡེ. ‘‘བཱིཛགཱམབྷཱུཏགཱམསམཱརམྦྷཱ པཊིཝིརཏོ ཧོཏཱི’’ཏི (དཱི. ནི. ༡.༡༠, ༡༩༥; མ. ནི. ༡.༢༩༣) ཀོཔནེ. ‘‘ཨཱརབྷཏི ཙ ཝིཔྤཊིསཱརཱི ཙ ཧོཏཱི’’ཏི (ཨ. ནི. ༥.༡༤༢; པུ. པ. ༡༩༡) ཨཡཾ པན ཨཱཔཏྟིཝཱིཏིཀྐམེ ཨཱགཏོ, ཏསྨཱ ཨཱཔཏྟིཝཱིཏིཀྐམཝསེན ཨཱརབྷཏི ཙེཝ, ཏཔྤཙྩཡཱ ཙ ཝིཔྤཊིསཱརཱི ཧོཏཱིཏི ཨཡམེཏྠ ཨཏྠོ. ཡཐཱབྷཱུཏཾ ནཔྤཛཱནཱཏཱིཏི ཨནདྷིགཏཏྟཱ ཡཐཱསབྷཱཝཏོ ན ཛཱནཱཏི. ཡཏྠསྶཱཏི ཡསྨིཾ ཨསྶ, ཡཾ ཋཱནཾ པཏྭཱ ཨེཏསྶ པུགྒལསྶ ཨུཔྤནྣཱ པཱཔཀཱ ཨཀུསལཱ དྷམྨཱ ཨཔརིསེསཱ ནིརུཛ྄ཛྷནྟཱིཏི ཨཏྠོ. ཀིཾ པན པཏྭཱ ཏེ ནིརུཛ྄ཛྷནྟཱིཏི? ཨརཧཏྟམགྒཾ, ཕལཔྤཏྟསྶ པན ནིརུདྡྷཱ ནཱམ ཧོནྟི. ཨེཝཾ སནྟེཔི ཨིདྷ མགྒཀིཙྩཝསེན པན ཕལམེཝ ཝུཏྟནྟི ཝེདིཏབྦཾ.

ཨཱརབྷཏཱི ན ཝིཔྤཊིསཱརཱི ཧོཏཱིཏི ཨཱཔཏྟིཾ ཨཱཔཛྫཏི, ཏཾ པནེས དེསེཏུཾ སབྷཱགཔུགྒལཾ པརིཡེསཏི, ཏསྨཱ ན ཝིཔྤཊིསཱརཱི ཧོཏི. ན ཨཱརབྷཏི ཝིཔྤཊིསཱརཱི ཧོཏཱིཏི ཨཱཔཏྟིཾ ན ཨཱཔཛྫཏི, ཝིནཡཔཉྙཏྟིཡཾ པན ཨཀོཝིདཏྟཱ ཨནཱཔཏྟིཡཱ ཨཱཔཏྟིསཉྙཱི ཧུཏྭཱ ཝིཔྤཊིསཱརཱི ཧོཏཱིཏི ཨེཝམེཏྠ ཨཏྠོ དཊྛབྦོ. ‘‘ན ཨཱརབྷཏི ན ཝིཔྤཊིསཱརཱི ཧོཏཱི’’ཏི ཡོ ཝུཏྟོ, ཀཏརོ སོ པུགྒལོ? ཨོསྶཊྛཝཱིརིཡཔུགྒལོ. སོ ཧི ‘‘ཀིཾ མེ ཨིམསྨིཾ ཀཱལེ པརིནིབྦཱནེན, ཨནཱགཏེ མེཏྟེཡྻསམྨཱསམྦུདྡྷཀཱལེ པརིནིབྦཱཡིསྶཱམཱི’’ཏི ཝིསུདྡྷསཱིལོཔི པཊིཔཏྟིཾ ན པཱུརེཏི. སོ ཧི ‘‘ཀིམཏྠཾ ཨཱཡསྨཱ པམཏྟོ ཝིཧརཏི, པུཐུཛྫནསྶ ནཱམ གཏི ཨནིབདྡྷཱ, ཏསྨཱ ཧི མེཏྟེཡྻསམྨཱསམྦུདྡྷསྶ སམྨུཁཱིབྷཱཝཾ ལབྷེཡྻཱསི, ཨརཧཏྟཏྠཱཡ ཝིཔསྶནཾ བྷཱཝེཧཱི’’ཏི ཨོཝདིཏབྦོཝ.

སཱདྷཱུཏི ¶ ཨཱཡཱཙནཏྠེ ནིཔཱཏོ. ཨིདཾ ཝུཏྟཾ ཧོཏི – ཡཱཝ ཨཔརདྡྷཾ ཝཏ ཨཱཡསྨཏཱ, ཨེཝཾ སནྟེཔི མཡཾ ཨཱཡསྨནྟཾ ཡཱཙཱམ, དེསེཏབྦཡུཏྟཀསྶ དེསནཱཡ, ཝུཊྛཱཏབྦཡུཏྟཀསྶ ཝུཊྛཱནེན, ཨཱཝིཀཱཏབྦཡུཏྟཀསྶ ཨཱཝིཀིརིཡཱཡ ཨཱརམྦྷཛེ ཨཱསཝེ པཧཱཡ སུདྡྷནྟེ ཋིཏབྷཱཝཔཙྩཝེཀྑཎེན ¶ ཝིཔྤཊིསཱརཛེ ཨཱསཝེ པཊིཝིནོདེཏྭཱ ནཱིཧརིཏྭཱ ཝིཔསྶནཱཙིཏྟཉྩེཝ ཝིཔསྶནཱཔཉྙཉྩ ཝཌྜྷེཏཱུཏི. ཨམུནཱ པཉྩམེན པུགྒལེནཱཏི ཨེཏེན པཉྩམེན ཁཱིཎཱསཝཔུགྒལེན. སམསམོ བྷཝིསྶཏཱིཏི ལོཀུཏྟརགུཎེཧི སམབྷཱཝེནེཝ སམོ བྷཝིསྶཏཱིཏི ཨེཝཾ ཁཱིཎཱསཝེན ཨོཝདིཏབྦོཏི ཨཏྠོ. ཏཏིཡཾ ཨུཏྟཱནམེཝ.

༡༤༤-༦. ཙཏུཏྠེ པཊིཀཱུལེཏི ཨམནུཉྙེ ཨནིཊྛེ. ཨཔྤཊིཀཱུལསཉྙཱིཏི ཨིཊྛཱཀཱརེནེཝ པཝཏྟཙིཏྟོ. ཨིཊྛསྨིཾ ཝཏྠུསྨིཾ ཨསུབྷཱཡ ཝཱ ཕརཏི, ཨནིཙྩཏོ ཝཱ ཨུཔསཾཧརཏི ཨུཔནེཏི པཝཏྟེཏི. ཨནིཊྛསྨིཾ ཝཏྠུསྨིནྟི ཨནིཊྛེ སཏྟསཉྙིཏེ ཨཱརམྨཎེ. མེཏྟཱཡ ཝཱ ཕརཏཱིཏི མེཏྟཾ ཧིཏེསིཏཾ ཨུཔསཾཧརནྟོ སབྦཏྠཀམེཝ ཝཱ ཏཏྠ ཕརཏི. དྷཱཏུཏོ ཝཱ ཨུཔསཾཧརཏཱིཏི དྷམྨསབྷཱཝཙིནྟནེན དྷཱཏུཏོ པཙྩཝེཀྑཎཱཡ དྷཱཏུམནསིཀཱརཾ ཝཱ ཏཏྠ པཝཏྟེཏི. ཏདུབྷཡཾ ཨབྷིནིཝཛྫེཏྭཱཏི སབྷཱཝཏོ ཨཱནུབྷཱཝཏོ ཙ ཨུཔཏིཊྛནྟཾ ཨཱརམྨཎེ པཊིཀཱུལབྷཱཝཾ ཨཔྤཊིཀཱུལབྷཱཝཉྩཱཏི ཏཾ ཨུབྷཡཾ པཧཱཡ ཨགྒཧེཏྭཱ, སབྦསྨིཾ པན ཏསྨིཾ མཛ྄ཛྷཏྟོ ཧུཏྭཱཏི ཝུཏྟཾ ཧོཏི. མཛ྄ཛྷཏྟོ ཧུཏྭཱ ཝིཧརིཏུཀཱམོ པན ཀིཾ ཀརོཏཱིཏི? ཨིཊྛཱནིཊྛེསུ ཨཱཔཱཐཾ གཏེསུ ནེཝ སོམནསྶིཏོ ཧོཏི, ན དོམནསྶིཏོ ཧོཏི. ཨུཔེཀྑཀོ ཝིཧརེཡྻཱཏི ཨིཊྛེ ཨརཛྫནྟོ ཨནིཊྛེ ཨདུསྶནྟོ ཡཐཱ ཨཉྙེ ཨསམཔེཀྑནེན མོཧཾ ཨུཔྤཱདེནྟི, ཨེཝཾ ཨནུཔྤཱདེནྟོ ཚསུ ཨཱརམྨཎེསུ ཚལ༹ངྒུཔེཀྑཱཡ ཨུཔེཀྑཀོ ཝིཧརེཡྻ. ཏེནེཝཱཧ ‘‘ཚལ༹ངྒུཔེཀྑཱཝསེན པཉྩམོ’’ཏི. ཨིཊྛཱནིཊྛཚལཱ༹རམྨཎཱཔཱཐེ པརིསུདྡྷཔཀཏིབྷཱཝཱཝིཛཧནལཀྑཎཱཡ ཚསུ དྭཱརེསུ པཝཏྟནཏོ ‘‘ཚལ༹ངྒུཔེཀྑཱ’’ཏི ལདྡྷནཱམཱཡ ཏཏྲམཛ྄ཛྷཏྟུཔེཀྑཱཡ ཝསེན པཉྩམོ ཝཱརོ ཝུཏྟོཏི ཨཏྠོ. པཉྩམཾ ཚཊྛཉྩ ཨུཏྟཱནམེཝ.

ཏིཀཎྜཀཱིསུཏྟཱདིཝཎྞནཱ ནིཊྛིཏཱ.

༧-༡༠. ཨསཔྤུརིསདཱནསུཏྟཱདིཝཎྞནཱ

༡༤༧-༡༥༠. སཏྟམེ ¶ ཨསཀྐཙྩནྟི ཨནཱདརཾ ཀཏྭཱ. དེཡྻདྷམྨསྶ ཨསཀྐཙྩཀརཎཾ ནཱམ ཨསམྤནྣཾ ཀརོཏཱིཏི ཨཱཧ ‘‘ན སཀྐརིཏྭཱ སུཙིཾ ཀཏྭཱ དེཏཱི’’ཏི, ཨུཏྟཎྜུལཱདིདོསཝིརཧིཏཾ ¶ སུཙིསམྤནྣཾ ཀཏྭཱ ན དེཏཱིཏི ཨཏྠོ. ཨཙིཏྟཱིཀཏྭཱཏི ན ཙིཏྟེ ཀཏྭཱ, ན པཱུཛེཏྭཱཏི ཨཏྠོ. པཱུཛེནྟོ ཧི པཱུཛེཏབྦཝཏྠུཾ ཙིཏྟེ ཋཔེཏི, ན ཏཏོ བཧི ཀརོཏི. ཙིཏྟཾ ཝཱ ཨཙྪརིཡཾ ཀཏྭཱ པཊིཔཏྟིཝིཀརཎཾ སམྦྷཱཝནཀིརིཡཱ, ཏཔྤཊིཀྑེཔཏོ ཨཙིཏྟཱིཀརཎཾ ཨསམྦྷཱཝནཀིརིཡཱ. ཨགཱརཝེན དེཏཱིཏི པུགྒལེ ཨགརུཾ ཀརོནྟོ ནིསཱིདནཊྛཱནེ ཨསམྨཛྫིཏྭཱ ཡཏྠ ཝཱ ཏཏྠ ཝཱ ནིསཱིདཱཔེཏྭཱ ཡཾ ཝཱ ཏཾ ཝཱ ཨཱདྷཱརཀཾ ཋཔེཏྭཱ དཱནཾ དེཏི. ཨསཧཏྠཱཏི ན ཨཏྟནོ ཧཏྠེན དེཏི, དཱསཀམྨཀརོདཱིཧི དཱཔེཏི. ཨཔཝིདྡྷཾ དེཏཱིཏི ཨནྟརཱ ཨཔཝིདྡྷཾ ཝིཙྪེདཾ ཀཏྭཱ དེཏི. ཏེནཱཧ ‘‘ན ནིརནྟརཾ དེཏཱི’’ཏི. ཨཐ ཝཱ ཨཔཝིདྡྷཾ དེཏཱིཏི ཨུཙྪིཊྛཱདིཚཌྜནཱིཡདྷམྨཾ ཝིཡ ཨཝཀྑིཏྟཀཾ ཀཏྭཱ དེཏི. ཏེནཱཧ ‘‘ཚཌྜེཏུཀཱམོ ཝིཡ དེཏཱི’’ཏི. ‘‘ཨདྡྷཱ ཨིམསྶ དཱནསྶ ཕལམེཝ ཨཱགཙྪཏཱི’’ཏི ཨེཝཾ ཡསྶ ཀམྨསྶཀཏཱདིཊྛི ཨཏྠི, སོ ཨཱགམནདིཊྛིཀོ, ཨཡཾ པན ན ཏཱདིསོཏི ཨནཱགམནདིཊྛིཀོ. ཏེནཱཧ ‘‘ཀཏསྶ ནཱམ ཕལཾ ཨཱགམིསྶཏཱི’’ཏིཨཱདི. ཨཊྛམཱདཱིསུ ནཏྠི ཝཏྟབྦཾ.

ཨསཔྤུརིསདཱནསུཏྟཱདིཝཎྞནཱ ནིཊྛིཏཱ.

༡༥༡-༡༦༠. པཋམོ ¶ ཝགྒོ ཨུཏྟཱནཏྠོཡེཝ.

༡-༥. པཋམཨཱགྷཱཏཔཊིཝིནཡསུཏྟཱདིཝཎྞནཱ

༡༦༡-༡༦༥. དུཏིཡསྶ ¶ པཋམེ ནཏྠི ཝཏྟབྦཾ. དུཏིཡེ ཨཱགྷཱཏོ པཊིཝིནཡཏི ཨེཏྠ, ཨེཏེཧཱིཏི ཝཱ ཨཱགྷཱཏཔཊིཝིནཡཱ. ཏེནཱཧ ‘‘ཨཱགྷཱཏོ ཨེཏེཧི པཊིཝིནེཏབྦོ’’ཏིཨཱདི.

ནནྟཀནྟི ཨནནྟཀཾ, ཨནྟཝིརཧིཏཾ ཝཏྠཁཎྜཾ. ཡདི ཧི ཏསྶ ཨནྟོ བྷཝེཡྻ, ‘‘པིལོཏིཀཱ’’ཏི སངྑཾ ན གཙྪེཡྻ.

སེཝཱལེནཱཏི བཱིཛཀཎྞིཀཀེསརཱདིབྷེདེན སེཝཱལེན. ཨུདཀཔཔྤཊཀེནཱཏི ནཱིལམཎྜཱུཀཔིཊྛིཝཎྞེན ཨུདཀཔིཊྛིཾ ཚཱདེཏྭཱ ནིབྦཏྟེན ཨུདཀཔིཊྛིཀེན. གྷམྨེན ཨནུགཏོཏི གྷམྨེན ཕུཊྛོ ཨབྷིབྷཱུཏོ. ཙིཏྟུཔྤཱདནྟི པཊིགྷསམྤཡུཏྟཙིཏྟུཔྤཱདཾ.

ཝིསབྷཱགཝེདནུཔྤཏྟིཡཱ ཀཀཙེནེཝ ཨིརིཡཱཔཐཔཝཏྟིནིཝཱརཎེན ཚིནྡནྟོ ཨཱབཱདྷཏི པཱིལེ༹ཏཱིཏི ཨཱབཱདྷོ, སོ ཨསྶ ཨཏྠཱིཏི ཨཱབཱདྷིཀོ. ཏཾསམུཊྛཱནེན དུཀྑིཏོ སཉྫཱཏདུཀྑོ. བཱལ༹ྷགིལཱནོཏི ཨདྷིམཏྟགིལཱནོ. གཱམནྟནཱཡཀསྶཱཏི གཱམནྟསམྤཱཔཀསྶ.

པསནྣབྷཱཝེན ¶ ཨུདཀསྶ ཨཙྪབྷཱཝོ ཝེདིཏབྦོཏི ཨཱཧ ‘‘ཨཙྪོདཀཱཏི པསནྣོདཀཱ’’ཏི. སཱདུརསཏཱཡ སཱཏཏཱཏི ཨཱཧ ‘‘མདྷུརོདཀཱ’’ཏི. ཏནུཀམེཝ སལིལཾ ཝིསེསཏོ སཱིཏལཾ, ན བཧལཱཏི ཨཱཧ ‘‘ཏནུསཱིཏསལིལཱ’’ཏི. སེཏཀཱཏི ནིཀྐདྡམཱ. སཙིཀྑལླཱདིཝསེན ཧི ཨུདཀསྶ ཝིཝཎྞཏཱ. སབྷཱཝཏོ པན ཏཾ སེཏཝཎྞམེཝ. ཏཏིཡཱདཱིནི ཨུཏྟཱནཏྠཱནེཝ.

པཋམཨཱགྷཱཏཔཊིཝིནཡསུཏྟཱདིཝཎྞནཱ ནིཊྛིཏཱ.

༡༦༦. ཚཊྛེ ¶ ཨམརིསནཏྠེཏི ཨསཧནཏྠེ. ཨནཱགཏཝཙནཾ ཀཏནྟི ཨནཱགཏསདྡཔྤཡོགོ ཀཏོ, ཨཏྠོ པན ཝཏྟམཱནཀཱལིཀོཝ. ཨཀྑརཙིནྟཀཱ (པཱཎིནི. ༣.༣.༡༤༥-༡༤༦) ཧི ཨཱིདིསེསུ ཋཱནེསུ ཨནོཀཔྤནཱམརིསནཏྠཝསེན ཨཏྠིསདྡེ ཨུཔཔདེ ཝཏྟམཱནཀཱལེཔི ཨནཱགཏཝཙནཾ ཀརོནྟི.

༡༦༧-༩. སཏྟམེ ཝཏྠུསནྡསྶནཱཏི ཡསྨིཾ ཝཏྠུསྨིཾ ཨཱཔཏྟི, ཏསྶ སརཱུཔཏོ དསྶནཾ. ཨཱཔཏྟིསནྡསྶནཱཏི ཡཾ ཨཱཔཏྟིཾ སོ ཨཱཔནྣོ, ཏསྶཱ དསྶནཾ. སཾཝཱསཔྤཊིཀྑེཔོཏི ཨུཔོསཐཔྤཝཱརཎཱདིསཾཝཱསསྶ པཊིཀྑིཔནཾ ཨཀརཎཾ. སཱམཱིཙིཔྤཊིཀྑེཔོཏི ཨབྷིཝཱདནཱདིསཱམཱིཙིཀིརིཡཱཡ ཨཀརཎཾ. ཙོདཡམཱནེནཱཏི ཙོདེནྟེན. ཙུདིཏཀསྶ ཀཱལོཏི ཙུདིཏཀསྶ ཙོདེཏབྦཀཱལོ. པུགྒལནྟི ཙོདེཏབྦཔུགྒལཾ. ཨུཔཔརིཀྑིཏྭཱཏི ‘‘ཨཡཾ ཙུདིཏཀལཀྑཎེ ཏིཊྛཏི, ན ཏིཊྛཏཱི’’ཏི ཝཱིམཾསིཏྭཱ. ཨཡསཾ ཨཱརོཔེཏཱིཏི ‘‘ཨིམེ མཾ ཨབྷཱུཏེན ཨབྦྷཱཙིཀྑནྟཱ ཨཡསཾ བྱསནཾ ཨུཔྤཱདེནྟཱི’’ཏི བྷིཀྑཱུནཾ ཨཡསཾ ཨུཔྤཱདེཏི. ཨཊྛམནཝམཱནི ཨུཏྟཱནཏྠཱནེཝ.

༡༧༠. དསམེ ¶ ཨབྷིབྷཝིཏྭཱ ཋིཏོ ཨིམེ སཏྟེཏི ཨདྷིཔྤཱཡོ. ཡསྨཱ པན སོ ‘‘པཱསཾསབྷཱཝེན ཨུཏྟམབྷཱཝེན ཙ ཏེ སཏྟེ ཨབྷིབྷཝིཏྭཱ ཋིཏོ’’ཏི ཨཏྟཱནཾ མཉྙཏི, ཏསྨཱ ཝུཏྟཾ ‘‘ཛེཊྛཀོ’’ཏི. ཨཉྙདཏྠུ དསོཏི དསྶནེ ཨནྟརཱཡཱབྷཱཝཝཙནེན ཉེཡྻཝིསེསཔརིགྒཱཧིཀབྷཱཝེན ¶ ཙ ཨནཱཝརཎདསྶཱཝིཏཾ པཊིཛཱནཱཏཱིཏི ཨཱཧ ‘‘སབྦཾ པསྶཏཱིཏི ཨདྷིཔྤཱཡོ’’ཏི.

༡༧༡-༡༧༦. ཏཏིཡསྶ པཋམདུཏིཡཏཏིཡཙཏུཏྠེ ནཏྠི ཝཏྟབྦཾ. པཉྩམེ ཨུཔཱསཀཔཙྪིམཀོཏི ཨུཔཱསཀནིཧཱིནོ. ‘‘ཨིམིནཱ དིཊྛཱདིནཱ ཨིདཾ ནཱམ མངྒལཾ བྷཝིསྶཏཱི’’ཏི ཨེཝཾ བཱལཛནཔརིཀཔྤིཏཀོཏཱུཧལསངྑཱཏེན དིཊྛསུཏམུཏམངྒལེན སམནྣཱགཏོ ཀོཏཱུཧལམངྒལིཀོ. ཏེནཱཧ ‘‘ཨིམིནཱ ཨིདཾ བྷཝིསྶཏཱི’’ཏིཨཱདི. མངྒལཾ པཙྩེཏཱིཏི དིཊྛམངྒལཱདིབྷེདཾ མངྒལམེཝ པཏྠིཡཱཡཏི. ནོ ཀམྨནྟི ཀམྨསྶཀཏཾ ནོ པཏྠིཡཱཡཏི. ཨིམམྷཱ སཱསནཱཏི ཨིཏོ སབྦཉྙུབུདྡྷསཱསནཏོ. བཧིདྡྷཱཏི བཱཧིརཀསམཡེ. དཀྑིཎེཡྻཾ པརིཡེསཏཱིཏི ‘‘དུཔྤཊིཔནྣཱ དཀྑིཎེཡྻཱ’’ཏི སཉྙཱི གཝེསཏི. ཨེཏྠ དཀྑིཎཔརིཡེསནཔུབྦཀཱརེ ཨེཀཾ ཀཏྭཱ པཉྩ དྷམྨཱ ཝེདིཏབྦཱ. ཚཊྛཾ ཨུཏྟཱནམེཝ.

༡༧༧-༨. སཏྟམེ ¶ སཏྠཝཎིཛྫཱཏི ཨཱཝུདྷབྷཎྜཾ ཀཏྭཱ ཝཱ ཀཱརེཏྭཱ ཝཱ ཀཏཾ ཝཱ པཊིལབྷིཏྭཱ ཏསྶ ཝིཀྐཡོ. ཨཱཝུདྷབྷཎྜཾ ཀཱརེཏྭཱ ཏསྶ ཝིཀྐཡོཏི ཨིདཾ པན ནིདསྶནམཏྟཾ. སཱུཀརམིགཱདཡོ པོསེཏྭཱ ཏེསཾ ཝིཀྐཡོཏི སཱུཀརམིགཱདཡོ པོསེཏྭཱ ཏེསཾ མཾསཾ སམྤཱདེཏྭཱ ཝིཀྐཡོ. ཨེཏྠ ཙ སཏྠཝཎིཛྫཱ པརོཔརཱདྷནིམིཏྟཏཱཡ ཨཀརཎཱིཡཱ ཝུཏྟཱ, སཏྟཝཎིཛྫཱ ཨབྷུཛིསྶབྷཱཝཀརཎཏོ, མཾསཝིསཝཎིཛྫཱ ཝདྷཧེཏུཏོ, མཛྫཝཎིཛྫཱ པམཱདཊྛཱནཏོ. ཨཊྛམཾ ཨུཏྟཱནམེཝ.

༡༧༩. ནཝམེ ¶ ཨཱབྷིཙེཏསིཀཱནནྟི ཨབྷིཙེཏོཏི ཨབྷིཀྐནྟཾ ཝིསུདྡྷཙིཏྟཾ ཝུཙྩཏི ཨདྷིཙིཏྟཾ ཝཱ, ཨབྷིཙེཏསི ཛཱཏཱནི ཨཱབྷིཙེཏསིཀཱནི, ཨབྷིཙེཏོ སནྣིསྶིཏཱནཱིཏི ཝཱ ཨཱབྷིཙེཏསིཀཱནི. ཏེནེཝཱཧ ‘‘ཨུཏྟམཙིཏྟནིསྶིཏཱན’’ནྟི. དིཊྛདྷམྨསུཁཝིཧཱརཱནནྟི དིཊྛདྷམྨེ སུཁཝིཧཱརཱནཾ. དིཊྛདྷམྨོཏི པཙྩཀྑོ ཨཏྟབྷཱཝོ ཝུཙྩཏི, ཏཏྠ སུཁཝིཧཱརཱནནྟི ཨཏྠོ. རཱུཔཱཝཙརཛ྄ཛྷཱནཱནམེཏཾ ཨདྷིཝཙནཾ. ཏཱནི ཧི ཨཔྤེཏྭཱ ནིསིནྣཱ ཛྷཱཡིནོ ཨིམསྨིཾཡེཝ ཨཏྟབྷཱཝེ ཨསཾཀིལིཊྛཾ ནེཀྑམྨསུཁཾ ཝིནྡནྟི, ཏསྨཱ ‘‘དིཊྛདྷམྨསུཁཝིཧཱརཱནཱི’’ཏི ཝུཙྩནྟི.

ཙཏུབྦིདྷམེརཡནྟི པུཔྥཱསཝོ, ཕལཱསཝོ, གུལཱ༹སཝོ, མདྷྭཱསཝོཏི ཨེཝཾ ཙཏུཔྤབྷེདཾ མེརཡཾ. པཉྩཝིདྷཉྩ སུརནྟི པཱུཝསུརཱ, པིཊྛསུརཱ, ཨོདནསུརཱ, ཀིཎྞཔཀྑིཏྟཱ, སམྦྷཱརསཾཡུཏྟཱཏི ཨེཝཾ པཉྩཔྤབྷེདཾ སུརཾ. པུཉྙཾ ཨཏྠོ ཨེཏསྶཱཏི པུཉྙཏྠོ. ཡསྨཱ པནེས པུཉྙེན ཨཏྠིཀོ ནཱམ ཧོཏི, ཏསྨཱ ཝུཏྟཾ ‘‘པུཉྙེན ཨཏྠིཀསྶཱ’’ཏི. སེསམེཏྠ ཨུཏྟཱནམེཝ.

༡༨༠. དསམེ སུཀཱརཎནྟི བོདྷིཔརིཔཱཙནསྶ ཨེཀནྟིཀཾ སུནྡརཾ ཀཱརཎཾ. མནྡཧསིཏནྟི ཨཱིསཀཾ ¶ ཧསིཏཾ. ཀཧཾ ཀཧནྟི ཧཱསསདྡསྶ ཨནུཀརཎམེཏཾ. ཧཊྛཔྤཧཊྛཱཀཱརམཏྟནྟི ཧཊྛསྶ པཧཊྛཱཀཱརམཏྟཾ. ཡཐཱ གཧིཏསངྐེཏཱ ‘‘པཧཊྛོ བྷགཝཱ’’ཏི སཉྫཱནནྟི, ཨེཝཾ ཨཱཀཱརནིདསྶནམཏྟཾ.

ཨིདཱནི ཨིམིནཱ པསངྒེན ཧཱསསམུཊྛཱནཾ ཝིབྷཱགཏོ དསྶེཏུཾ ‘‘ཧསིཏཉྩ ནཱམེཏ’’ནྟིཨཱདི ཨཱརདྡྷཾ. ཏཏྠ ཨཛ྄ཛྷུཔེཀྑནཝསེནཔི ཧཱསོ ན སམྦྷཝཏི, པགེཝ དོམནསྶཝསེནཱཏི ཨཱཧ ‘‘ཏེརསཧི སོམནསྶསཧགཏཙིཏྟེཧཱི’’ཏི. ནནུ ཙ ཀེཙི ཀོདྷཝསེནཔི ཧསནྟཱིཏི? ན, ཏེ སམྤིཡནྟི ཀོདྷཝཏྠུཾ ཏཏྠ ‘‘མཡཾ དཱནི ཡཐཱཀཱམཀཱརིཏཾ ཨཱཔཛྫིསྶཱམཱ’’ཏི དུཝིཉྙེཡྻནྟརེན སོམནསྶཙིཏྟེནེཝ ཧཱསསྶ ཨུཔྤཛྫནཏོ. ཏེསཱུཏི ¶ པཉྩསུ སོམནསྶསཧགཏཀིརིཡཙིཏྟེསུ. བལཝཱརམྨཎེཏི ཨུལཱ༹རཏམེ ཨཱརམྨཎེ ཡམཀཔཱཊིཧཱརིཡསདིསེ. དུབྦལཱརམྨཎེཏི ཨནུལཱ༹རཨཱརམྨཎེ.

‘‘ཨིམསྨིཾ པན ཋཱནེ…པེ… ཨུཔྤཱདེཏཱི’’ཏི ཨིདཾ པོརཱཎཊྛཀཐཱཡཾ ཏཐཱ ཨཱགཏཏྟཱ ཝུཏྟཾ, ན སཧེཏུཀསོམནསྶསཧགཏཙིཏྟེཧི བྷགཝཏོ སིཏཾ ན ཧོཏཱིཏི དསྶནཏྟཾ. ཨབྷིདྷམྨཊཱིཀཱཡཾ (དྷ. ས. མཱུལཊཱི. ༩༦༨) པན ‘‘ཨཏཱིཏཾསཱདཱིསུ ཨཔྤཊིཧཏཾ ཉཱཎཾ ཝཏྭཱ ‘ཨིམེཧི དྷམྨེཧི སམནྣཱགཏསྶ བུདྡྷསྶ བྷགཝཏོ སབྦཾ ཀཱཡཀམྨཾ ཉཱཎཔུབྦངྒམཾ ཉཱཎཱནུཔརིཝཏྟཱི’ཏིཨཱདིཝཙནཏོ (མཧཱནི. ༡༥༦; པཊི. མ. ༣.༥) ‘བྷགཝཏོ ཨིདཾ ཙིཏྟཾ ཨུཔྤཛྫཏཱི’ཏི ཝུཏྟཝཙནཾ ཝིཙཱརེཏབྦ’’ནྟི ཝུཏྟཾ. ཏཏྠ ཨིམིནཱ ཧསིཏུཔྤཱདཙིཏྟེན པཝཏྟིཡམཱནམྤི བྷགཝཏོ སིཏཀརཎཾ པུབྦེནིཝཱསཨནཱགཏཾསསབྦཉྙུཏཉྙཱཎཱནཾ ཨནུཝཏྟཀཏྟཱ ཉཱཎཱནུཔརིཝཏྟིཡེཝཱཏི ཨེཝཾ པན ཉཱཎཱནུཔརིཝཏྟིབྷཱཝེ སཏི ན ཀོཙི པཱལི༹ཨཊྛཀཐཱནཾ ཝིརོདྷོ. ཏཐཱ ཧི ཨབྷིདྷམྨཊྛཀཐཱཡཾ (དྷ. ས. ཨཊྛ. ༥༦༨) ‘‘ཏེསཾ ཉཱཎཱནཾ ཙིཎྞཔརིཡནྟེ ཨིདཾ ཙིཏྟཾ ཨུཔྤཛྫཏཱི’’ཏི ཝུཏྟཾ. ཨཝསྶཉྩེཏཾ ཨེཝཾ ཨིཙྪིཏབྦཾ, ཨཉྙཐཱ ཨཱཝཛྫནཙིཏྟསྶཔི བྷགཝཏོ ཏཐཱརཱུཔེ ཀཱལེ ན ཡུཛྫེཡྻ. ཏསྶཔི ཧི ཝིཉྙཏྟིསམུཊྛཱཔཀབྷཱཝསྶ ནིཙྪིཏཏྟཱ. ཏཐཱ ཧི ཝུཏྟཾ ‘‘ཨེཝཉྩ ཀཏྭཱ མནོདྭཱརཱཝཛྫནསྶཔི ཝིཉྙཏྟིསམུཊྛཱཔཀཏྟཾ ཨུཔཔནྣཾ ཧོཏཱི’’ཏི (དྷ. ས. མཱུལཊཱི. ༡ ཀཱཡཀམྨདྭཱརཀཐཱཝཎྞནཱ) ན ཙ ཝིཉྙཏྟིསམུཊྛཱཔཀཏྟེ ཏཾསམུཊྛཱནཀཱཡཝིཉྙཏྟིཡཱ ཀཱཡཀམྨཱདིབྷཱཝཾ ཨཱཔཛྫནབྷཱཝོ ཝིསྶཛྫཏཱིཏི.

ཧསིཏནྟི སིཏམེཝ སནྡྷཱཡ ཝདཏི. ཏེནཱཧ ‘‘ཨེཝཾ ཨཔྤམཏྟཀམྤཱི’’ཏི. སམོསརིཏཱ ཝིཛྫུལཏཱ. སཱ ཧི ཨིཏརཝིཛྫུལཏཱ ཝིཡ ཁཎཊྛིཏིཡཱ སཱིགྷནིརོདྷཱ ཙ ན ཧོཏི, ཨཔིཙ ཁོ དནྡྷནིརོདྷཱ, ན ཙ སབྦཀཱལིཀཱ. དཱིདྷིཏི པཱཝཀམཧཱམེགྷཏོ ཝཱ ཙཱཏུདྡཱིཔིཀམཧཱམེགྷཏོ ཝཱ ¶ ནིཙྪརཏི. ཏེནཱཧ ‘‘ཙཱཏུདྡཱིཔིཀམཧཱམེགྷམུཁཏོ’’ཏི. ཨཡཾ ཀིར ཏཱསཾ རསྨཱིནཾ དྷམྨཏཱ, ཡདིདཾ ཏིཀྑཏྟུཾ སཱིསཾ པདཀྑིཎཾ ཀཏྭཱ དཱཋགྒེསུཡེཝ ཨནྟརདྷཱནཾ. སེསམེཏྠ སུཝིཉྙེཡྻམེཝ.

༡༨༡. ཙཏུཏྠསྶ ¶ པཋམེ ཨཔྤཱིཙྪཏཾཡེཝ ནིསྶཱཡཱཏིཨཱདཱིསུ ‘‘ཨིཏི ཨཔྤིཙྪོ བྷཝིསྶཱམཱི’’ཏི ཨིདཾ མེ ཨཱརཉྙིཀངྒཾ ཨཔྤིཙྪཏཱཡ སཾཝཏྟིསྶཏི, ‘‘ཨིཏི སནྟུཊྛོ བྷཝིསྶཱམཱི’’ཏི ཨིདཾ མེ ཨཱརཉྙིཀངྒཾ སནྟུཊྛིཡཱ སཾཝཏྟིསྶཏི, ‘‘ཨིཏི ཀིལེསེ སལླིཁིསྶཱམཱི’’ཏི ཨིདཾ མེ ཨཱརཉྙིཀངྒཾ ཀིལེསསལླིཁནཏྠཱཡ སཾཝཏྟིསྶཏཱིཏི ཨཱརཉྙིཀོ ཧོཏི. ཨགྒོཏི ཛེཊྛཀོ. སེསཱནི ཏསྶེཝ ཝེཝཙནཱནི.

གཝཱ ཁཱིརནྟི གཱཝིཏོ ཁཱིརཾ ནཱམ ཧོཏི, ན གཱཝིཡཱ དདྷི. ཁཱིརམྷཱ དདྷཱིཏིཨཱདཱིསུཔི ཨེསེཝ ནཡོ. ཨེཝམེཝནྟི ཡཐཱ ཨེཏེསུ པཉྩསུ གོརསེསུ སཔྤིམཎྜོ ཨགྒོ, ཨེཝམེཝཾ ཨིམེསུ པཉྩསུ ཨཱརཉྙིཀེསུ ཡོ ཨཡཾ ཨཔྤིཙྪཏཱདཱིནི ནིསྶཱཡ ཨཱརཉྙིཀོ ཧོཏི, ཨཡཾ ཨགྒོ ཙེཝ སེཊྛོ ཙ མོཀྑོ ཙ པཝརོ ཙ. ཨིམེསུ ཨཱརཉྙིཀེསུ ཛཱཏིཨཱརཉྙིཀཱ ཝེདིཏབྦཱ, ན ཨཱརཉྙིཀནཱམམཏྟེན ཨཱརཉྙིཀཱཏི ཝེདིཏབྦཱ. པཾསུཀཱུལིཀཱདཱིསུཔི ཨེསེཝ ནཡོ.

༡༩༡. པཉྩམསྶ ¶ པཋམེ སམྤིཡེནེཝཱཏི ཨཉྙམཉྙཔེམེནེཝ ཀཱཡེན ཙ ཙིཏྟེན ཙ མིསྶཱིབྷཱུཏཱ སངྒྷཊྚིཏཱ སཾསཊྛཱ ཧུཏྭཱ སཾཝཱསཾ ཝཏྟེནྟི, ན ཨཔྤིཡེན ནིགྒཧེན ཝཱཏི ཝུཏྟཾ ཧོཏི. ཏེནཱཧ ‘‘པིཡ’’ནྟིཨཱདི. ཨུདརཾ ཨཝདིཧཏི ཨུཔཙིནོཏི པཱུརེཏཱིཏི ཨུདརཱཝདེཧཀཾ. བྷཱཝནཔུཾསཀཉྩེཏཾ, ཨུདརཱཝདེཧཀཾ ཀཏྭཱ ཨུདརཾ པཱུརེཏྭཱཏི ཨཏྠོ. ཏེནཱཧ ‘‘ཨུདརཾ ཨཝདིཧིཏྭཱ’’ཏིཨཱདི.

༡༩༢. དུཏིཡེ ¶ པཝཏྟཱརོཏི (དཱི. ནི. ཊཱི. ༡.༢༨༥) པཱཝཙནབྷཱཝེན ཝཏྟཱརོ. ཡསྨཱ ཏེ ཏེསཾ མནྟཱནཾ པཝཏྟནཀཱ, ཏསྨཱ ཨཱཧ ‘‘པཝཏྟཡིཏཱརོ’’ཏི. སུདྡེ བཧི ཀཏྭཱ རཧོབྷཱསིཏབྦཊྛེན མནྟཱ ཨེཝ ཏཾཏཾཨཏྠཔྤཊིཔཏྟིཧེཏུཏཱཡ མནྟཔདཾ. ཨནུཔནཱིཏཱསཱདྷཱརཎཏཱཡ རཧསྶབྷཱཝེན ཝཏྟབྦཀིརིཡཱཡ ཨདྷིགམཱུཔཱཡཾ. སཛ྄ཛྷཱཡིཏནྟི གཱཡནཝསེན སཛ྄ཛྷཱཡིཏཾ. ཏཾ པན ཨུདཏྟཱནུདཏྟཱདཱིནཾ སརཱནཾ སམྤདཱཝསེནེཝ ཨིཙྪིཏནྟི ཨཱཧ ‘‘སརསམྤཏྟིཝསེནཱ’’ཏི. ཨཉྙེསཾ ཝུཏྟནྟི པཱཝཙནབྷཱཝེན ཨཉྙེསཾ ཝུཏྟཾ. སམུཔབྱཱུལ༹ྷནྟི སངྒཧེཏྭཱ ཨུཔརཱུཔརི སཉྙཱུལ༹ྷཾ. རཱསིཀཏནྟི ཨིརུཝེདཡཛུཝེདསཱམཝེདཱདིཝསེན, ཏཏྠཱཔི པཙྩེཀཾ མནྟབྲཧྨཱདིཝསེན, ཨཛ྄ཛྷཱཡཱནུཝཱཀཱདིཝསེན ཙ རཱསིཀཏཾ. ཏེསནྟི མནྟཱནཾ ཀཏྟཱུནཾ. དིབྦེན ཙཀྑུནཱ ཨོལོཀེཏྭཱཏི དིབྦཙཀྑུཔརིབྷཎྜེན ཡཐཱཀམྨཱུཔགཉཱཎེན སཏྟཱནཾ ཀམྨསྶཀཏཱདིཾ, པཙྩཀྑཏོ དསྶནཊྛེན དིབྦཙཀྑུསདིསེན པུབྦེནིཝཱསཉཱཎེན ཨཏཱིཏཀཔྤེ བྲཱཧྨཎཱནཾ མནྟཛ྄ཛྷེནཝིདྷིཉྩ ཨོལོཀེཏྭཱ. པཱཝཙནེན སཧ སཾསནྡེཏྭཱཏི ཀསྶཔསམྨཱསམྦུདྡྷསྶ ཡཾ ཝཙནཾ ཝཊྚསནྣིསྶིཏཾ, ཏེན སཧ ཨཝིརུདྡྷཾ ཀཏྭཱ. ན ཧི ཏེསཾ ཝིཝཊྚསནྣིསྶིཏོ ཨཏྠོ པཙྩཀྑོ ཧོཏི. ཨཔརཱཔརེཏི ཨཊྛཀཱདཱིཧི ཨཔརཱཔརེ པཙྪིམཱ ཨོཀྐཱཀརཱཛཀཱལཱདཱིསུ ཨུཔྤནྣཱ. པཀྑིཔིཏྭཱཏི ཨཊྛཀཱདཱིཧི གནྠིཏམནྟཔདེསུ ཀིལེསསནྣིསྶིཏཔདཱནཾ ཏཏྠ ཏཏྠ པདེ པཀྑིཔནཾ ཀཏྭཱ. ཝིརུདྡྷེ ཨཀཾསཱུཏི ¶ བྲཱཧྨཎདྷམྨིཀསུཏྟཱདཱིསུ (སུ. ནི. བྲཱཧྨཎདྷམྨིཀསུཏྟཾ ༢༨༦ ཨཱདཡོ) ཨཱགཏནཡེན སཾཀིལེསཏྠདཱིཔནཏོ པཙྩནཱིཀབྷཱུཏེ ཨཀཾསུ.

ཨུསཱུནཾ ཨསནཀམྨཾ ཨིསྶཏྠཾ, དྷནུསིཔྤེན ཛཱིཝིཀཱ. ཨིདྷ པན ཨིསྶཏྠཾ ཝིཡཱཏི ཨིསྶཏྠཾ, སབྦཨཱཝུདྷཛཱིཝིཀཱཏི ཨཱཧ ‘‘ཡོདྷཱཛཱིཝཀམྨེནཱ’’ཏི, ཨཱཝུདྷཾ གཧེཏྭཱ ཨུཔཊྛཱནཀམྨེནཱཏི ཨཏྠོ. རཱཛཔོརིསཾ ནཱམ ཝིནཱ ཨཱཝུདྷེན པོརོཧེཙྩཱམཙྩཀམྨཱདིརཱཛཀམྨཾ ཀཏྭཱ རཱཛུཔཊྛཱནཾ. སིཔྤཉྙཏརེནཱཏི གཧིཏཱཝསེསེན ཧཏྠིཨསྶསིཔྤཱདིནཱ. ཀུམཱརབྷཱཝཏོ པབྷུཏི ཙརཎེན ཀོམཱརབྲཧྨཙརིཡཾ.

ཨུདཀཾ པཱཏེཏྭཱ དེནྟཱིཏི དྭཱརེ ཋིཏསྶེཝ བྲཱཧྨཎསྶ ཧཏྠེ ཨུདཀཾ ཨཱསིཉྩནྟཱ ‘‘ཨིདཾ ཏེ, བྲཱཧྨཎ, བྷརིཡཾ པོསཱཔནཏྠཱཡ དེམཱ’’ཏི ཝཏྭཱ ¶ དེནྟི. ཀསྨཱ པན ཏེ ཨེཝཾ བྲཧྨཙརིཡཾ ཙརིཏྭཱཔི དཱརཾ པརིཡེསནྟི, ན ཡཱཝཛཱིཝཾ བྲཧྨཙཱརིནོ ཧོནྟཱིཏི? མིཙྪཱདིཊྛིཝསེན. ཏེསཉྷཱི ཨེཝཾ དིཊྛི ཧོཏི ‘‘ཡོ པུཏྟཾ ན ཨུཔྤཱདེཏི, སོ ཀུལཝཾསཙྪེདཀརོ ཧོཏི, ཏཏོ ནིརཡེ པཙྩཏཱི’’ཏི. ཙཏྟཱརོ ཀིར ཨབྷཱཡིཏབྦཾ བྷཱཡནྟི གཎྜུཔྤཱདཀོ, ཀིཀཱི, ཀོནྟིནཱི, བྲཱཧྨཎོཏི. གཎྜུཔྤཱདཱ ཀིར མཧཱཔཐཝིཡཱ ཁཡནབྷཡེན མཏྟབྷོཛནཱ ཧོནྟི, ན བཧུཾ མཏྟིཀཾ ཁཱདནྟི. ཀིཀཱི སཀུཎིཀཱ ཨཱཀཱསཔཏནབྷཡེན ཨཎྜསྶ ཨུཔརི ཨུཏྟཱནཱ སེཏི. ཀོནྟིནཱི སཀུཎཱི པཐཝཱིཀམྤནབྷཡེན པཱདེཧི བྷཱུམིཾ ན སུཊྛུ ཨཀྐམཏི. བྲཱཧྨཎཱ ཀུལཝཾསཱུཔཙྪེདབྷཡེན དཱརཾ པརིཡེསནྟི. ཨཱཧུ ཙེཏྠ –

‘‘གཎྜུཔྤཱདོ ཀིཀཱི ཙེཝ, ཀོནྟཱི བྲཱཧྨཎདྷམྨིཀོ;

ཨེཏེ ཨབྷཡཾ བྷཱཡནྟི, སམྨཱུལ༹ྷཱ ཙཏུརོ ཛནཱ’’ཏི. (སུ. ནི. ཨཊྛ. ༢.༢༩༣);

༡༩༣. ཏཏིཡེ (སཾ. ནི. ཊཱི. ༢.༥.༢༣༦) པཋམཉྙེཝཱཏི པུརེཏརཾཡེཝ, ཨསཛ྄ཛྷཱཡཀཏཱནཾ ¶ མནྟཱནཾ ཨཔྤཊིབྷཱནཾ པགེཝ པཋམཾཡེཝ སིདྡྷཾ, ཏཏྠ ཝཏྟབྦམེཝ ནཏྠཱིཏི ཨདྷིཔྤཱཡོ. པརིཡུཊྛཱནཾ ནཱམ ཨབྷིབྷཝོ གཧཎནྟི ཨཱཧ ‘‘ཀཱམརཱགཔརིཡུཊྛིཏེནཱཏི ཀཱམརཱགགྒཧིཏེནཱ’’ཏི. ཝིཀྑམྦྷེཏི ཨཔནེཏཱིཏི ཝིཀྑམྦྷནཾ, པཊིཔཀྑཏོ ནིསྶརཏི ཨེཏེནཱཏི ནིསྶརཎཾ. ཝིཀྑམྦྷནཉྩ ཏཾ ནིསྶརཎཉྩཱཏི ཝིཀྑམྦྷནནིསྶརཎཾ. ཏེནཱཧ ‘‘ཏཏྠཱ’’ཏིཨཱདི. སེསཔདདྭཡེཔི ཨེསེཝ ནཡོ. ཨཏྟནཱ ཨརཎཱིཡོ པཏྟབྦོ ཨཏྠོ ཨཏྟཏྠོ. ཏཐཱ པརཏྠོ ཝེདིཏབྦོ.

‘‘ཨནིཙྩཏོ ཨནུཔསྶནྟོ ནིཙྩསཉྙཾ པཛཧཏཱི’’ཏིཨཱདཱིསུ (པཊི. མ. ༡.༥༢) བྱཱཔཱདཱདཱིནཾ ཨནཱགཏཏྟཱ བྱཱཔཱདཝཱརེ ཏདངྒནིསྶརཎཾ ན གཧིཏཾ. ཀིཉྩཱཔི ན གཧིཏཾ, པཊིསངྑཱནཝསེན ཏསྶ ཝིནོདེཏབྦཏཱཡ ཏདངྒནིསྶརཎམྤི ལབྦྷཏེཝཱཏི སཀྐཱ ཝིཉྙཱཏུཾ. ཨཱལོཀསཉྙཱ ཨུཔཙཱརཔྤཏྟཱ ཝཱ ཨཔྤནཱཔྤཏྟཱ ¶ ཝཱ. ཡོ ཀོཙི ཀསིཎཛ྄ཛྷཱནཱདིབྷེདོ སམཐོ. དྷམྨཝཝཏྠཱནཾ ཨུཔཙཱརཔྤནཱཔྤཏྟཝསེན གཧེཏབྦཾ.

ཀུདྷིཏོཏི ཏཏྟོ. ཨུསྶཱུརཀཛཱཏོཏི ཏསྶེཝ ཀུདྷིཏབྷཱཝསྶ ཨུསྶཱུརཀཾ ཨཙྩུཎྷཏཾ པཏྟོ. ཏེནཱཧ ‘‘ཨུསུམཀཛཱཏོ’’ཏི. ཏིལབཱིཛཀཱདིབྷེདེནཱཏི ཏིལབཱིཛཀཎྞིཀཀེསརཱདིབྷེདེན སེཝཱལེན. པཎཀེནཱཏི ཨུདཀཔིཙྪིལླེན. ཨཔྤསནྣོ ཨཱཀུལཏཱཡ. ཨསནྣིསིནྣོ ཀལལུཔྤཏྟིཡཱ. ཨནཱལོཀཊྛཱནེཏི ཨཱལོཀརཧིཏེ ཋཱནེ.

༡༩༤. ཙཏུཏྠེ པཎྜིཏོ མཉྙེཏི ཨེཏྠ མཉྙེཏི ཨིདཾ ‘‘མཉྙཏཱི’’ཏི ཨིམིནཱ སམཱནཏྠཾ ནིཔཱཏཔདཾ. ཏསྶ ཨིཏི-སདྡཾ ཨཱནེཏྭཱ ཨཏྠཾ དསྶེནྟོ ‘‘པཎྜིཏོཏི མཉྙཏཱི’’ཏི ཨཱཧ. ཨནུམཏིཔུཙྪཱཝསེན ཙེཏཾ ཝུཏྟཾ. ཏེནེཝཱཧ ‘‘ཨུདཱཧུ ནོ’’ཏི. ‘‘ཏཾ ཀིཾ མཉྙཏི བྷཝཾ པིངྒིཡཱནཱི སམཎསྶ གོཏམསྶ པཉྙཱཝེཡྻཏྟིཡ’’ནྟི ཝུཏྟམེཝཏྠཾ པུན གཎྷནྟོ ‘‘པཎྜིཏོ མཉྙེ’’ཏི ཨཱཧ, ཏསྨཱ ཝུཏྟཾ ‘‘བྷཝཾ པིངྒིཡཱནཱི སམཎཾ གོཏམཾ པཎྜིཏོཏི མཉྙཏི ཨུདཱཧུ ནོ’’ཏི, ཡཐཱ ཏེ ཁམེཡྻ, ཏཐཱ ནཾ ཀཐེཧཱིཏི ཨདྷིཔྤཱཡོ. ཨཧཾ ཀོ ནཱམ, མམ ཨཝིསཡོ ཨེསོཏི དསྶེཏི. ཀོ ཙཱཏི ཧེཏུནིསྶཀྐེ པཙྩཏྟཝཙནནྟི ཨཱཧ ‘‘ཀུཏོ ཙཱ’’ཏི. ཏཐཱ ཙཱཧ ‘‘ཀེན ཀཱརཎེན ཛཱནིསྶཱམཱི’’ཏི, ཡེན ཀཱརཎེན སམཎསྶ གོཏམསྶ པཉྙཱཝེཡྻཏྟིཡཾ ཛཱནེཡྻཾ ¶ , ཏཾ ཀཱརཎཾ མཡི ནཏྠཱིཏི ཨདྷིཔྤཱཡོ. བུདྡྷོཡེཝ བྷཝེཡྻ ཨབུདྡྷསྶ སབྦཐཱ བུདྡྷཉཱཎཱནུབྷཱཝཾ ཛཱནིཏུཾ ཨསཀྐུཎེཡྻཏྟཱཏི. ཝུཏྟཉྷེཏཾ – ‘‘ཨཔྤམཏྟཀཾ པནེཏཾ, བྷིཀྑཝེ, ཨོརམཏྟཀཾ སཱིལམཏྟཀཾ, ཡེན པུཐུཛྫནོ ཏཐཱགཏསྶ ཝཎྞཾ ཝདམཱནོ ཝདེཡྻ (དཱི. ནི. ༡.༧). ཨཏྠི, བྷིཀྑཝེ, ཨཉྙེཝ དྷམྨཱ གམྦྷཱིརཱ དུདྡསཱ དུརནུབོདྷཱ…པེ… ཡེཧི ཏཐཱགཏསྶ ཡཐཱབྷཱུཏཾ ཝཎྞཾ སམྨཱ ཝདམཱནོ ཝདེཡྻཱ’’ཏི (དཱི. ནི. ༡.༢༨) ཙ. ཨེཏྠཱཏི ‘‘སོཔི ནཱུནསྶ ཏཱདིསོ’’ཏི ཨེཏསྨིཾ པདེ.

པསཏྠཔྤསཏྠོཏི ¶ པསཏྠེཧི པཱསཾསེཧི ཨཏྟནོ གུཎེཧེཝ སོ པསཏྠོ, ན ཏསྶ ཀིཏྟིནཱ, པསཾསཱསབྷཱཝེནེཝ པཱསཾསོཏི ཨཏྠོ. ཏེནཱཧ ‘‘སབྦགུཎཱན’’ནྟིཨཱདི. མཎིརཏནནྟི ཙཀྐཝཏྟིནོ མཎིརཏནཾ.

སདེཝཀེ པཱསཾསཱནམྤི པཱསཾསོཏི དསྶེཏུཾ ‘‘པསཏྠེཧི ཝཱ’’ཏི དུཏིཡཝིཀཔྤོ གཧིཏོ. ཨརཎཱིཡཏོ ཨཏྠོ, སོ ཨེཝ ཝསཏཱིཏི ཝསོཏི ཨཏྠཝསོ. ཏསྶ ཏསྶ པཡོགསྶ ཨཱནིསཾསབྷཱུཏཾ ཕལནྟི ཨཱཧ ‘‘ཨཏྠཝསནྟི ཨཏྠཱནིསཾས’’ནྟི. ཨཏྠོ ཝཱ ཕལཾ ཏདདྷཱིནཝུཏྟིཏཱཡ ཝསོ ཨེཏསྶཱཏི ཨཏྠཝསོ, ཀཱརཎཾ.

ཁུདྡཀམདྷཱུཏི ཁུདྡཀམཀྑིཀཱཧི ཀཏདཎྜཀམདྷུ. ཨནེལ༹ཀནྟི ནིདྡོསཾ ཨཔགཏམཀྑིཀཎྜཀཾ.

ཨུདཱཧརཱིཡཏི ཨུབྦེགཔཱིཏིཝསེནཱཏི ཨུདཱནཾ, ཏཐཱ ཝཱ ཨུདཱཧརཎཾ ཨུདཱནཾ. ཏེནཱཧ ‘‘ཨུདཱཧཱརཾ ཨུདཱཧརཱི’’ཏི. ཡཐཱ པན ཏཾ ཝཙནཾ ཨུདཱནནྟི ཝུཙྩཏི, ཏཾ དསྶེཏུཾ ‘‘ཡཐཱ ཧཱི’’ཏིཨཱདི ཝུཏྟཾ. སེསཾ སུཝིཉྙེཡྻམེཝ.

༡༩༥. པཉྩམེ སབྦསངྒཱཧིཀནྟི སརཱིརགཏསྶ ཙེཝ ཝཏྠཱལངྐཱརགཏསྶ ཙཱཏི སབྦསྶ ནཱིལབྷཱཝསྶ སངྒཱཧཀཝཙནཾ. ཏསྶེཝཱཏི ནཱིལཱདིསབྦསངྒཱཧིཀཝསེན ཝུཏྟཨཏྠསྶེཝ. ཝིབྷཱགདསྶནནྟི པབྷེདདསྶནཾ. ཡཐཱ ཏེ ལིཙྪཝིརཱཛཱནོ ཨཔཱིཏཱདིཝཎྞཱ ཨེཝ ཀེཙི ཀེཙི ཝིལེཔནཝསེན ¶ པཱིཏཱདིཝཎྞཱ ཁཱཡིཾསུ, ཨེཝཾ ཨནཱིལཱདིཝཎྞཱ ཨེཝ ཀེཙི ཝིལེཔནཝསེན ནཱིལཱདིཝཎྞཱ ཁཱཡིཾསུ. ཏེ ཀིར སུཝཎྞཝིཙིཏྟེཧི མཎིཨོབྷཱསེཧི ཨེཀནཱིལཱ ཝིཡ ཁཱཡནྟི.

ཀོཀནདནྟི ཝཱ པདུམཝིསེསནཾ ཡཐཱ ‘‘ཀོཀཱསཀ’’ནྟི. ཏཾ ཀིར བཧུཔཏྟཾ ཝཎྞསམྤནྣཾ ཨཏིཝིཡ སུགནྡྷཉྩ ཧོཏི. ཨཡཉྷེཏྠ ཨཏྠོ – ཡཐཱ ¶ ཀོཀནདསངྑཱཏཾ པདུམཾ པཱཏོ སཱུརིཡུགྒམནཝེལཱཡ ཕུལླཾ ཝིཀསིཏཾ ཨཝཱིཏགནྡྷཾ སིཡཱ ཝིརོཙམཱནཾ, ཨེཝཾ སརཱིརགནྡྷེན གུཎགནྡྷེན ཙ སུགནྡྷཾ, སརདཀཱལེ ཨནྟལིཀྑེ ཨཱདིཙྩམིཝ ཨཏྟནོ ཏེཛསཱ ཏཔནྟཾ, ཨངྒེཧི ནིཙྪརནྟཛུཏིཏཱཡ ཨངྒཱིརསཾ སམྦུདྡྷཾ པསྶཱཏི.

པིངྒིཡཱནཱིསུཏྟཝཎྞནཱ ནིཊྛིཏཱ.

༡༩༦. ཚཊྛེ དྷཱཏུཀྑོབྷཀརཎཔཙྩཡོ ནཱམ ཝིསབྷཱགབྷེསཛྫསེནཱསནཱཧཱརཱདིཔཙྩཡོ. ཨཏྠཀཱམཏཱཡ ཝཱ ཨནཏྠཀཱམཏཱཡ ཝཱཏི པསནྣཱ ཨཏྠཀཱམཏཱཡ, ཀུདྡྷཱ ཨནཏྠཀཱམཏཱཡ. ཨཏྠཱཡ ཝཱ ཨནཏྠཱཡ ཝཱཏི སབྷཱཝཏོ བྷཝིཏབྦཱཡ ཨཏྠཱཡ ཝཱ ཨནཏྠཱཡ ཝཱ. ཨུཔསཾཧརནྟཱིཏི ཨཏྟནོ དེཝཱནུབྷཱཝེན ཨུཔནེནྟི. བོདྷིསཏྟམཱཏཱ ཝིཡ པུཏྟཔཊིལཱབྷནིམིཏྟནྟི ཏདཱ ཀིར པུརེ པུཎྞམཱཡ སཏྟམདིཝསཏོ པཊྛཱཡ ཝིགཏསུརཱཔཱནཾ མཱལཱགནྡྷཱདིཝིབྷཱུཏིསམྤནྣཾ ནཀྑཏྟཀཱིལ༹ཾ ཨནུབྷཝམཱནཱ བོདྷིསཏྟམཱཏཱ སཏྟམེ དིཝསེ པཱཏོཝ ཨུཊྛཱཡ གནྡྷོདཀེན ནཧཱཡིཏྭཱ སབྦཱལངྐཱརབྷཱུསིཏཱ ཝརབྷོཛནཾ བྷུཉྫིཏྭཱ ཨུཔོསཐངྒཱནི ཨདྷིཊྛཱཡ སིརིགབྦྷཾ པཝིསིཏྭཱ སིརིསཡནེ ནིཔནྣཱ ནིདྡཾ ཨོཀྐམམཱནཱ ཨིམཾ སུཔིནཾ ཨདྡས – ཙཏྟཱརོ ཀིར ནཾ མཧཱརཱཛཱནོ སཡནེནེཝ སདྡྷིཾ ཨུཀྑིཔིཏྭཱ ཨནོཏཏྟདཧཾ ནེཏྭཱ ནཧཱཔེཏྭཱ དིབྦཝཏྠཾ ནིཝཱསེཏྭཱ དིབྦགནྡྷེཧི ཝིལིམྤེཏྭཱ དིབྦཔུཔྥཱནི པིལ༹ནྡྷེཏྭཱ ཏཏོ ཨཝིདཱུརེ རཛཏཔབྦཏོ, ཏསྶ ཨནྟོ ཀནཀཝིམཱནཾ ཨཏྠི, ཏསྨིཾ པཱཙཱིནཏོ སཱིསཾ ཀཏྭཱ ནིཔཛྫཱཔེསུཾ. ཨཐ བོདྷིསཏྟོ སེཏཝརཝཱརཎོ ཧུཏྭཱ ཏཏོ ཨཝིདཱུརེ ཨེཀོ སུཝཎྞཔབྦཏོ, ཏཏྠ ཙརིཏྭཱ ཏཏོ ཨོརུཡ྄ཧ རཛཏཔབྦཏཾ ཨཱརུཧིཏྭཱ ཀནཀཝིམཱནཾ པཝིསིཏྭཱ མཱཏརཾ པདཀྑིཎཾ ཀཏྭཱ དཀྑིཎཔསྶཾ ཕཱལེཏྭཱ ཀུཙྪིཾ པཝིཊྛསདིསོ ཨཧོསི. ཨིམཾ སུཔིནཾ སནྡྷཱཡ ཨེཏཾ ཝུཏྟཾ ‘‘བོདྷིསཏྟམཱཏཱ ཝིཡ པུཏྟཔཊིལཱབྷནིམིཏྟ’’ནྟི.

ཀོསལརཱཛཱ ¶ ¶ ཝིཡ སོལ༹ས སུཔིནེཏི –

ཏསཱ ཝཀཱ ཨེལ༹ཀཱནཾ བྷཡཱ ཧཱི’’ཏི. (ཛཱ. ༡.༡.༧༧) –

ཨིམེ སོལ༹ས སུཔིནེ པསྶནྟོ ཀོསལརཱཛཱ ཝིཡ.

༡. ཨེཀདིཝསཾ ཀིར ཀོསལམཧཱརཱཛཱ རཏྟིཾ ནིདྡཱུཔགཏོ པཙྪིམཡཱམེ སོལ༹ས མཧཱསུཔིནེ པསྶི (ཛཱ. ཨཊྛ. ༡.༡.༧༦ མཧཱསུཔིནཛཱཏཀཝཎྞནཱ). ཏཏྠ ཙཏྟཱརོ ཨཉྫནཝཎྞཱ ཀཱལ༹ཨུསབྷཱ ‘‘ཡུཛ྄ཛྷིསྶཱམཱ’’ཏི ཙཏཱུཧི དིསཱཧི རཱཛངྒཎཾ ཨཱགནྟྭཱ ‘‘ཨུསབྷཡུདྡྷཾ པསྶིསྶཱམཱ’’ཏི མཧཱཛནེ སནྣིཔཏིཏེ ཡུཛ྄ཛྷནཱཀཱརཾ དསྶེཏྭཱ ནདིཏྭཱ གཛྫིཏྭཱ ཨཡུཛ྄ཛྷིཏྭཱཝ པཊིཀྐནྟཱ. ཨིམཾ པཋམཾ སུཔིནཾ ཨདྡས.

༢. ཁུདྡཀཱ རུཀྑཱ ཙེཝ གཙྪཱ ཙ པཐཝིཾ བྷིནྡིཏྭཱ ཝིདཏྠིམཏྟམྤི རཏནམཏྟམྤི ཨནུགྒནྟྭཱཝ པུཔྥནྟི ཙེཝ ཕལནྟི ཙ. ཨིམཾ དུཏིཡཾ ཨདྡས.

༣. གཱཝིཡོ ཏདཧུཛཱཏཱནཾ ཝཙྪཱནཾ ཁཱིརཾ པིཝནྟིཡོ ཨདྡས. ཨཡཾ ཏཏིཡོ སུཔིནོ.

༤. དྷུརཝཱཧེ ཨཱརོཧཔརིཎཱཧསམྤནྣེ མཧཱགོཎེ ཡུགཔརམྤརཱཡ ཨཡོཛེཏྭཱ ཏརུཎེ གོདམྨེ དྷུརེ ཡོཛེནྟེ ཨདྡས. ཏེ དྷུརཾ ཝཧིཏུཾ ཨསཀྐོནྟཱ ཚཌྜེཏྭཱ ཨཊྛཾསུ, སཀཊཱནི ནཔྤཝཏྟིཾསུ. ཨཡཾ ཙཏུཏྠོ སུཔིནོ.

༥. ཨེཀཾ ཨུབྷཏོམུཁཾ ཨསྶཾ ཨདྡས. ཏསྶ ཨུབྷོསུ པསྶེསུ ཡཝསཾ དེནྟི, སོ དྭཱིཧིཔི མུཁེཧི ཁཱདཏི. ཨཡཾ པཉྩམོ སུཔིནོ.

༦. མཧཱཛནོ ¶ ¶ སཏསཧསྶགྒྷནིཀཾ སུཝཎྞཔཱཏིཾ སམྨཛྫིཏྭཱ ‘‘ཨིདྷ པསྶཱཝཾ ཀརོཧཱི’’ཏི ཨེཀསྶ ཛརསིངྒཱལསྶ ཨུཔནཱམེསི. ཏཾ ཏཏྠ པསྶཱཝཾ ཀརོནྟཾ ཨདྡས. ཨཡཾ ཚཊྛོ སུཔིནོ.

༧. ཨེཀོ པུརིསོ རཛྫུཾ ཝཊྚེཏྭཱ པཱདམཱུལེ ནིཀྑིཔཏི. ཏེན ནིསིནྣཔཱིཋསྶ ཧེཊྛཱ སཡིཏཱ ཚཱཏསིངྒཱལཱི ཏསྶ ཨཛཱནནྟསྶེཝ ཏཾ ཁཱདཏི. ཨིམཾ སཏྟམཾ སུཔིནཾ ཨདྡས.

༨. རཱཛདྭཱརེ བཧཱུཧི ཏུཙྪཀུམྦྷེཧི པརིཝཱརེཏྭཱ ཋཔིཏཾ ཨེཀཾ མཧནྟཾ པཱུརིཏཀུམྦྷཾ ཨདྡས. ཙཏྟཱརོཔི པན ཝཎྞཱ ཙཏཱུཧི དིསཱཧི ཙཏཱུཧི ཨནུདིསཱཧི ཙ གྷཊེཧི ཨུདཀཾ ཨཱནེཏྭཱ པཱུརིཏཀུམྦྷམེཝ པཱུརེནྟི, པཱུརིཏཾ པཱུརིཏཾ ཨུདཀཾ ཨུཏྟརིཏྭཱ པལཱཡཏི. ཏེཔི པུནཔྤུནཾ ཏཏྠེཝ ཨུདཀཾ ཨཱསིཉྩནྟི, ཏུཙྪཀུམྦྷེ ཨོལོཀེནྟཱཔི ནཏྠི. ཨཡཾ ཨཊྛམོ སུཔིནོ.

༩. ཨེཀཾ པཉྩཔདུམསཉྪནྣཾ གམྦྷཱིརཾ སབྦཏོཏིཏྠཾ པོཀྑརཎིཾ ཨདྡས. སམནྟཏོ དྭིཔདཙཏུཔྤདཱ ཨོཏརིཏྭཱ ཏཏྠ པཱནཱིཡཾ པིཝནྟི. ཏསྶ མཛ྄ཛྷེ གམྦྷཱིརཊྛཱནེ ཨུདཀཾ ཨཱཝིལཾ, ཏཱིརཔྤདེསེ དྭིཔདཙཏུཔྤདཱནཾ ཨཀྐམནཊྛཱནེ ཨཙྪཾ ཝིཔྤསནྣམནཱཝིལཾ. ཨཡཾ ནཝམོ སུཔིནོ.

༡༠. ཨེཀིསྶཱཡེཝ ཀུམྦྷིཡཱ པཙྩམཱནཾ ཨོདནཾ ཨཔཱཀཾ ཨདྡས. ‘‘ཨཔཱཀ’’ནྟི ཝིཙཱརེཏྭཱ ཝིབྷཛིཏྭཱ ཋཔིཏཾ ཝིཡ ཏཱིཧཱཀཱརེཧི པཙྩམཱནཾ ཨེཀསྨིཾ པསྶེ ཨཏིཀིལིནྣོ ཧོཏི, ཨེཀསྨིཾ ཨུཏྟཎྜུལོ, ཨེཀསྨིཾ སུཔཀྐོཏི. ཨཡཾ དསམོ སུཔིནོ.

༡༡. སཏསཧསྶགྒྷནཀཾ ཙནྡནསཱརཾ པཱུཏིཏཀྐེན ཝིཀྐིཎནྟེ ཨདྡས. ཨཡཾ ཨེཀཱདསམོ སུཔིནོ.

༡༢. ཏུཙྪལཱབཱུནི ཨུདཀེ སཱིདནྟཱནི ཨདྡས. ཨཡཾ དྭཱདསམོ སུཔིནོ.

༡༣. མཧནྟམཧནྟཱ ཀཱུཊཱགཱརཔྤམཱཎཱ གྷནསིལཱ ནཱཝཱ ཝིཡ ཨུདཀེ པླཝམཱནཱ ཨདྡས. ཨཡཾ ཏེརསམོ སུཔིནོ.

༡༤. ཁུདྡཀམདྷུཀཔུཔྥཔྤམཱཎཱ མཎྜཱུཀིཡོ མཧནྟེ ཀཎྷསཔྤེ ཝེགེན ཨནུབནྡྷིཏྭཱ ཨུཔྤལནཱལེ༹ ཝིཡ ཚིནྡིཏྭཱ མཾསཾ ཁཱདིཏྭཱ གིལནྟིཡོ ཨདྡས. ཨཡཾ ཙུདྡསམོ སུཔིནོ.

༡༥. དསཧི ¶ ¶ ཨསདྡྷམྨེཧི སམནྣཱགཏཾ གཱམགོཙརཾ ཀཱཀཾ ཀཉྩནཝཎྞཝཎྞཏཱཡ ‘‘སུཝཎྞཱ’’ཏི ལདྡྷནཱམེ སུཝཎྞརཱཛཧཾསེ པརིཝཱརེནྟེ ཨདྡས. ཨཡཾ པནྣརསམོ སུཔིནོ.

༡༦. པུབྦེ དཱིཔིནོ ཨེལ༹ཀེ ཁཱདནྟི. ཏེ པན ཨེལ༹ཀེ དཱིཔིནོ ཨནུབནྡྷིཏྭཱ མུརམུརཱཏི ཁཱདནྟེ ཨདྡས. ཨཐཉྙེ ཏསཱ ཝཀཱ ཨེལ༹ཀེ དཱུརཏོཝ དིསྭཱ ཏསིཏཱ ཏཱསཔྤཏྟཱ ཧུཏྭཱ ཨེལ༹ཀཱནཾ བྷཡཱ པལཱཡིཏྭཱ གུམྦགཧནཱནི པཝིསིཏྭཱ ནིལཱིཡིཾསུ. ཨཡཾ སོལ༹སམོ སུཔིནོ.

༡. ཏཏྠ ཨདྷམྨིཀཱནཾ རཱཛཱུནཾ, ཨདྷམྨིཀཱནཉྩ མནུསྶཱནཾ ཀཱལེ ལོཀེ ཝིཔརིཝཏྟམཱནེ ཀུསལེ ཨོསནྣེ ཨཀུསལེ ཨུསྶནྣེ ལོཀསྶ པརིཧཱནཀཱལེ དེཝོ ན སམྨཱ ཝསིསྶཏི, མེགྷཔཱདཱ པཙྪིཛྫིསྶནྟི, སསྶཱནི མིལཱཡིསྶནྟི, དུབྦྷིཀྑཾ བྷཝིསྶཏི, ཝསྶིཏུཀཱམཱ ཝིཡ ཙཏཱུཧི དིསཱཧི མེགྷཱ ཨུཊྛཧིཏྭཱ ཨིཏྠིཀཱཧི ཨཱཏཔེ པཏྠཊཱནཾ ཝཱིཧིཨཱདཱིནཾ ཏེམནབྷཡེན ཨནྟོཔཝེསིཏཀཱལེ པུརིསེསུ ཀུདཱལཔིཊཀེ ཨཱདཱཡ ཨཱལི༹བནྡྷནཏྠཱཡ ནིཀྑནྟེསུ ཝསྶནཱཀཱརཾ དསྶེཏྭཱ གཛྫིཏྭཱ ཝིཛྫུལཏཱ ནིཙྪཱརེཏྭཱ ཨུསབྷཱ ཝིཡ ཨཡུཛ྄ཛྷིཏྭཱ ཨཝསྶིཏྭཱཝ པལཱཡིསྶནྟི. ཨཡཾ པཋམསྶ ཝིཔཱཀོ.

༢. ལོཀསྶ པརིཧཱིནཀཱལེ མནུསྶཱནཾ པརིཏྟཱཡུཀཀཱལེ སཏྟཱ ཏིབྦརཱགཱ བྷཝིསྶནྟི, ཨསམྤཏྟཝཡཱཝ ཀུམཱརིཡོ པུརིསནྟརཾ གནྟྭཱ ཨུཏུནིཡོ ཙེཝ གབྦྷིནིཡོ ཙ ཧུཏྭཱ པུཏྟདྷཱིཏཱཧི ཝཌྜྷིསྶནྟི. ཁུདྡཀརུཀྑཱནཾ པུཔྥཾ ཝིཡ ཧི ཏཱསཾ ཨུཏུནིབྷཱཝོ, ཕལཾ ཝིཡ ཙ པུཏྟདྷཱིཏརོ བྷཝིསྶནྟི. ཨཡཾ དུཏིཡསྶ ཝིཔཱཀོ.

༣. མནུསྶཱནཾ ཛེཊྛཱཔཙཱཡིཀཀམྨསྶ ནཊྛཀཱལེ སཏྟཱ མཱཏཱཔིཏཱུསུ ཝཱ སསྶུསསུརེསུ ཝཱ ལཛྫཾ ཨནུཔཊྛཔེཏྭཱ སཡམེཝ ཀུཊུམྦཾ སཾཝིདཧནྟཱཝ གྷཱསཙྪཱདནམཏྟམྤི མཧལླཀཱནཾ དཱཏུཀཱམཱ དསྶནྟི, ཨདཱཏུཀཱམཱ ན དསྶནྟི. མཧལླཀཱ ཨནཱཐཱ ཧུཏྭཱ ཨསཡཾཝསཱི དཱརཀེ ཨཱརཱདྷེཏྭཱ ཛཱིཝིསྶནྟི ཏདཧུཛཱཏཱནཾ ཝཙྪཀཱནཾ ཁཱིརཾ པིཝནྟིཡོ མཧཱགཱཝིཡོ ཝིཡ. ཨཡཾ ཏཏིཡསྶ ཝིཔཱཀོ.

༤. ཨདྷམྨིཀརཱཛཱུནཾ ¶ ཀཱལེ ཨདྷམྨིཀརཱཛཱནོ པཎྜིཏཱནཾ པཝེཎིཀུསལཱནཾ ཀམྨནིཏྠརཎསམཏྠཱནཾ མཧཱམཏྟཱནཾ ཡསཾ ན དསྶནྟི, དྷམྨསབྷཱཡཾ ཝིནིཙྪཡཊྛཱནེཔི པཎྜིཏེ ཝོཧཱརཀུསལེ མཧལླཀེ ཨམཙྩེ ན ཋཔེསྶནྟི, ཏབྦིཔརཱིཏཱནཾ པན ཏརུཎཏརུཎཱནཾ ཡསཾ དསྶནྟི, ཏཐཱརཱུཔེ ཨེཝ ཙ ཝིནིཙྪཡཊྛཱནེ ཋཔེསྶནྟི. ཏེ རཱཛཀམྨཱནི ཙེཝ ཡུཏྟཱཡུཏྟཉྩ ཨཛཱནནྟཱ ¶ ནེཝ ཏཾ ཡསཾ ཨུཀྑིཔིཏུཾ སཀྑིསྶནྟི, ན རཱཛཀམྨཱནི ནིཏྠརིཏུཾ. ཏེ ཨསཀྐོནྟཱ ཀམྨདྷུརཾ ཚཌྜེསྶནྟི, མཧལླཀཱཔི པཎྜིཏཱམཙྩཱ ཡསཾ ཨལབྷནྟཱ ཀིཙྩཱནི ནིཏྠརིཏུཾ སམཏྠཱཔི ‘‘ཀིཾ ཨམྷཱཀཾ ཨེཏེཧི, མཡཾ བཱཧིརཀཱ ཛཱཏཱ, ཨབྦྷནྟརིཀཱ ཏརུཎདཱརཀཱ ཛཱནིསྶནྟཱི’’ཏི ཨུཔྤནྣཱནི ཀམྨཱནི ན ཀརིསྶནྟི. ཨེཝཾ སབྦཐཱཔི ཏེསཾ རཱཛཱུནཾ ཧཱནིཡེཝ བྷཝིསྶཏི, དྷུརཾ ཝཧིཏུཾ ཨསམཏྠཱནཾ ཝཙྪདམྨཱནཾ དྷུརེ ཡོཛིཏཀཱལོ ཝིཡ དཱུརཝཱཧཱནཉྩ མཧཱགོཎཱནཾ ཡུགཔརམྤརཱཡ ཨཡོཛིཏཀཱལོ ཝིཡ བྷཝིསྶཏི. ཨཡཾ ཙཏུཏྠསྶ ཝིཔཱཀོ.

༥. ཨདྷམྨིཀརཱཛཀཱལེཡེཝ ཨདྷམྨིཀབཱལརཱཛཱནོ ཨདྷམྨིཀེ ལོལམནུསྶེ ཝིནིཙྪཡེ ཋཔེསྶནྟི, ཏེ པཱཔཔུཉྙེསུ ཨནཱདརཱ བཱལཱ སབྷཱཡཾ ནིསཱིདིཏྭཱ ཝིནིཙྪཡཾ དེནྟཱ ཨུབྷིནྣམྤི ཨཏྠཔཙྩཏྠིཀཱནཾ ཧཏྠཏོ ལཉྫཾ གཧེཏྭཱ ཁཱདིསྶནྟི ཨསྶོ ཝིཡ དྭཱིཧི མུཁེཧི ཡཝསཾ. ཨཡཾ པཉྩམསྶ ཝིཔཱཀོ.

༦. ཨདྷམྨིཀཱཡེཝ ཝིཛཱཏིརཱཛཱནོ ཛཱཏིསམྤནྣཱནཾ ཀུལཔུཏྟཱནཾ ཨཱསངྐཱཡ ཡསཾ ན དསྶནྟི, ཨཀུལཱིནཱནཾཡེཝ དསྶནྟི. ཨེཝཾ མཧཱཀུལཱནི དུགྒཏཱནི བྷཝིསྶནྟི, ལཱམཀཀུལཱནི ཨིསྶརཱནི. ཏེ ཙ ཀུལཱིནཔུརིསཱ ཛཱིཝིཏུཾ ཨསཀྐོནྟཱ ‘‘ཨིམེ ནིསྶཱཡ ཛཱིཝིསྶཱམཱ’’ཏི ཨཀུལཱིནཱནཾ དྷཱིཏརོ དསྶནྟི, ཨིཏི ཏཱསཾ ཀུལདྷཱིཏཱནཾ ཨཀུལཱིནེཧི སདྡྷིཾ སཾཝཱསོ ཛརསིངྒཱལསྶ སུཝཎྞཔཱཏིཡཾ པསྶཱཝཀརཎསདིསོ བྷཝིསྶཏི. ཨཡཾ ཚཊྛསྶ ཝིཔཱཀོ.

༧. གཙྪནྟེ གཙྪནྟེ ཀཱལེ ཨིཏྠིཡོ པུརིསལོལཱ སུརཱལོལཱ ཨལངྐཱརལོལཱ ཝིསིཁཱལོལཱ ཨཱམིསལོལཱ བྷཝིསྶནྟི དུསྶཱིལཱ དུརཱཙཱརཱ. ཏཱ སཱམིཀེཧི ཀསིགོརཀྑཱདཱིནི ཀམྨཱནི ཀཏྭཱ ཀིཙྪེན ¶ ཀསིརེན སམྦྷཏཾ དྷནཾ ཛཱརེཧི སདྡྷིཾ སུརཾ པིཝནྟིཡོ མཱལཱགནྡྷཝིལེཔནཾ དྷཱརཡམཱནཱ ཨནྟོགེཧེ ཨཙྩཱཡིཀམྤི ཀིཙྩཾ ཨནོལོཀེཏྭཱ གེཧཔརིཀྑེཔསྶ ཨུཔརིབྷཱགེནཔི ཚིདྡཊྛཱནེཧིཔི ཛཱརེ ཨུཔདྷཱརཡམཱནཱ སྭེ ཝཔིཏབྦཡུཏྟཀཾ བཱིཛམྤི ཀོཊྚེཏྭཱ ཡཱགུབྷཏྟཁཛྫཀཱནི པཙིཏྭཱ ཁཱདམཱནཱ ཝིལུམྤིསྶནྟི ཧེཊྛཱཔཱིཋཀེ ནིཔནྣཚཱཏསིངྒཱལཱི ཝིཡ ཝཊྚེཏྭཱ ཝཊྚེཏྭཱ པཱདམཱུལེ ནིཀྑིཏྟརཛྫུཾ. ཨཡཾ སཏྟམསྶ ཝིཔཱཀོ.

༨. གཙྪནྟེ གཙྪནྟེ ཀཱལེ ལོཀོ པརིཧཱཡིསྶཏི, རཊྛཾ ནིརོཛཾ བྷཝིསྶཏི, རཱཛཱནོ དུགྒཏཱ ཀཔཎཱ བྷཝིསྶནྟི. ཡོ ཨིསྶརོ བྷཝིསྶཏི, ཏསྶ བྷཎྜཱགཱརེ སཏསཧསྶམཏྟཱ བྷཝིསྶནྟི. ཏེ ཨེཝཾདུགྒཏཱ སབྦེ ཛཱནཔདེ ཨཏྟནོཝ ཀམྨཾ ཀཱརེསྶནྟི, ཨུཔདྡུཏཱ མནུསྶཱ སཀེ ཀམྨནྟེ ཚཌྜེཏྭཱ རཱཛཱུནཾཡེཝ ཨཏྠཱཡ པུབྦཎྞཱཔརཎྞཱནི ཝཔནྟཱ རཀྑནྟཱ ལཱཡནྟཱ མདྡནྟཱ ¶ པཝེསེནྟཱ ཨུཙྪུཀྑེཏྟཱནི ཀརོནྟཱ ཡནྟཱནི ཝཱཧེནྟཱ ཕཱཎིཏཱདཱིནི པཙནྟཱ པུཔྥཱརཱམེ ཕལཱརཱམེ ཙ ཀརོནྟཱ ཏཏྠ ཏཏྠ ནིཔྥནྣཱནི པུབྦཎྞཱདཱིནི ཨཱཧརིཏྭཱ རཉྙོ ཀོཊྛཱགཱརམེཝ པཱུརེསྶནྟི. ཨཏྟནོ གེཧེསུ ཏུཙྪཀོཊྛེ ཨོལོཀེནྟཱཔི ན བྷཝིསྶནྟི, ཏུཙྪཀུམྦྷེ ཨནོལོཀེཏྭཱ པཱུརིཏཀུམྦྷཔཱུརཎསདིསམེཝ བྷཝིསྶཏི. ཨཡཾ ཨཊྛམསྶ ཝིཔཱཀོ.

༩. གཙྪནྟེ གཙྪནྟེ ཀཱལེ རཱཛཱནོ ཨདྷམྨིཀཱ བྷཝིསྶནྟི, ཚནྡཱདིཝསེན ཨགཏིཾ གཙྪནྟཱ རཛྫཾ ཀཱརེསྶནྟི, དྷམྨེན ཝིནིཙྪཡཾ ནཱམ ན དསྶནྟི ལཉྫཝིཏྟཀཱ བྷཝིསྶནྟི དྷནལོལཱ, རཊྛཝཱསིཀེསུ ཏེསཾ ཁནྟིམེཏྟཱནུདྡཡཱ ནཱམ ན བྷཝིསྶནྟི, ཀཀྑལཱ༹ ཕརུསཱ ཨུཙྪུཡནྟེ ཨུཙྪུབྷཎྜིཀཱ ཝིཡ མནུསྶེ པཱིལེ༹ནྟཱ ནཱནཔྤཀཱརཾ བལིཾ ཨུཔྤཱདེཏྭཱ དྷནཾ གཎྷིསྶནྟི. མནུསྶཱ བལིཔཱིལི༹ཏཱ ཀིཉྩི དཱཏུཾ ཨསཀྐོནྟཱ གཱམནིགམཱདཡོ ཚཌྜེཏྭཱ པཙྩནྟཾ གནྟྭཱ ཝཱསཾ ཀཔྤེསྶནྟི. མཛ྄ཛྷིམཛནཔདོ སུཉྙོ བྷཝིསྶཏི, པཙྩནྟོ གྷནཝཱསོ སེཡྻཐཱཔི པོཀྑརཎིཡཱ མཛ྄ཛྷེ ཨུདཀཾ ཨཱཝིལཾ པརིཡནྟེ ཝིཔྤསནྣཾ. ཨཡཾ ནཝམསྶ ཝིཔཱཀོ.

༡༠. གཙྪནྟེ གཙྪནྟེ ཀཱལེ རཱཛཱནོ ཨདྷམྨིཀཱ བྷཝིསྶནྟི, ཏེསུ ཨདྷམྨིཀེསུ རཱཛཡུཏྟཱཔི བྲཱཧྨཎགཧཔཏིཀཱཔི ནེགམཛཱནཔདཱཔཱིཏི སམཎབྲཱཧྨཎེ ¶ ཨུཔཱདཱཡ སབྦེ མནུསྶཱ ཨདྷམྨིཀཱ བྷཝིསྶནྟི. ཏཏོ ཏེསཾ ཨཱརཀྑདེཝཏཱ, བལིཔཊིགྒཱཧིཀདེཝཏཱ, རུཀྑདེཝཏཱ, ཨཱཀཱསཊྛདེཝཏཱཏི ཨེཝཾ དེཝཏཱཔི ཨདྷམྨིཀཱ བྷཝིསྶནྟི. ཨདྷམྨིཀརཱཛཱུནཾ རཛྫེ ཝཱཏཱ ཝིསམཱ ཁརཱ ཝཱཡིསྶནྟི, ཏེ ཨཱཀཱསཊྛཀཝིམཱནཱནི ཀམྤེསྶནྟི. ཏེསུ ཀམྤིཏེསུ དེཝཏཱ ཀུཔིཏཱ དེཝཾ ཝསྶིཏུཾ ན དསྶནྟི. ཝསྶམཱནོཔི སཀལརཊྛེ ཨེཀཔྤཧཱརེནེཝ ན ཝསྶིསྶཏི, ཝསྶམཱནོཔི སབྦཏྠ ཀསིཀམྨསྶ ཝཱ ཝཔྤཀམྨསྶ ཝཱ ཨུཔཀཱརོ ཧུཏྭཱ ན ཝསྶིསྶཏི. ཡཐཱ ཙ རཊྛེ, ཨེཝཾ ཛནཔདེཔི གཱམེཔི ཨེཀཏལཱ༹ཀསརེཔི ཨེཀཔྤཧཱརེན ན ཝསྶིསྶཏི, ཏལཱ༹ཀསྶ ཨུཔརིབྷཱགེ ཝསྶནྟོ ཧེཊྛཱབྷཱགེ ན ཝསྶིསྶཏི, ཧེཊྛཱ ཝསྶནྟོ ཨུཔརི ན ཝསྶིསྶཏི. ཨེཀསྨིཾ བྷཱགེ སསྶཾ ཨཏིཝསྶེན ནསྶིསྶཏི, ཨེཀསྨིཾ ཨཝསྶནེན མིལཱཡིསྶཏི, ཨེཀསྨིཾ སམྨཱ ཝསྶམཱནོ སམྤཱདེསྶཏི. ཨེཝཾ ཨེཀསྶ རཉྙོ རཛྫེ ཝུཏྟསསྶཱ ཝིཔཱཀོ. ཏིཔྤཀཱརཱ བྷཝིསྶནྟི ཨེཀཀུམྦྷིཡཱ ཨོདནོ ཝིཡ. ཨཡཾ དསམསྶ ཝིཔཱཀོ.

༡༡. གཙྪནྟེ གཙྪནྟེཡེཝ ཀཱལེ སཱསནེ པརིཧཱཡནྟེ པཙྩཡལོལཱ ཨལཛྫིཀཱ བཧཱུ བྷིཀྑཱུ བྷཝིསྶནྟི. ཏེ བྷགཝཏཱ པཙྩཡལོལུཔྤཾ ནིམྨཐེཏྭཱ ཀཐིཏདྷམྨདེསནཾ ཙཱིཝརཱདིཙཏུཔཙྩཡཧེཏུ པརེསཾ དེསེསྶནྟི. པཙྩཡེཧི མུཙྪིཏྭཱ ནིཏྠརཎཔཀྑེ ཋིཏཱ ནིབྦཱནཱབྷིམུཁཾ ཀཏྭཱ དེསེཏུཾ ན སཀྑིསྶནྟི. ཀེཝལཾ ‘‘པདབྱཉྫནསམྤཏྟིཉྩེཝ མདྷུརསདྡཉྩ སུཏྭཱ ¶ མཧགྒྷཱནི ཙཱིཝརཱདཱིནི དསྶནྟི’’ཨིཙྩེཝཾ དེསེསྶནྟི. ཨཔརེ ཨནྟརཝཱིཐིཙཏུཀྐརཱཛདྭཱརཱདཱིསུ ནིསཱིདིཏྭཱ ཀཧཱཔཎཨཌྜྷཀཧཱཔཎཔཱདམཱསཀརཱུཔཱདཱིནིཔི ནིསྶཱཡ དེསེསྶནྟི. ཨིཏི བྷགཝཏཱ ནིབྦཱནགྒྷནཀཾ ཀཏྭཱ དེསིཏཾ དྷམྨཾ ཙཏུཔཙྩཡཏྠཱཡ ཙེཝ ཀཧཱཔཎཱདིཨཏྠཱཡ ཙ ཝིཀྐིཎིཏྭཱ དེསེནྟཱ སཏསཧསྶགྒྷནཀཾ ཙནྡནསཱརཾ པཱུཏིཏཀྐེན ཝིཀྐིཎནྟཱ ཝིཡ བྷཝིསྶནྟི. ཨཡཾ ཨེཀཱདསམསྶ ཝིཔཱཀོ.

༡༢. ཨདྷམྨིཀརཱཛཀཱལེ ལོཀེ ཝིཔརིཝཏྟནྟེཡེཝ རཱཛཱནོ ཛཱཏིསམྤནྣཱནཾ ཀུལཔུཏྟཱནཾ ཡསཾ ན དསྶནྟི, ཨཀུལཱིནཱནཉྙེཝ དསྶནྟི. ཏེ ཨིསྶརཱ བྷཝིསྶནྟི, ཨིཏརཱ དལིདྡཱ. རཱཛསམྨུཁེཔི རཱཛདྭཱརེཔི ཨམཙྩསམྨུཁེཔི ཝིནིཙྪཡཊྛཱནེཔི ཏུཙྪལཱབུསདིསཱནཾ ཨཀུལཱིནཱནཾཡེཝ ཀཐཱ ཨོསཱིདིཏྭཱ ཋིཏཱ ཝིཡ ནིཙྩལཱ སུཔྤཏིཊྛིཏཱ བྷཝིསྶཏི. སངྒྷསནྣིཔཱཏེཔི སངྒྷཀམྨགཎཀམྨཊྛཱནེསུ ¶ ཙེཝ པཏྟཙཱིཝརཔརིཝེཎཱདིཝིནིཙྪཡཊྛཱནེསུ ཙ དུསྶཱིལཱནཾ པཱཔཔུགྒལཱནཾཡེཝ ཀཐཱ ནིཡྻཱནིཀཱ བྷཝིསྶཏི, ན ལཛྫིབྷིཀྑཱུནནྟི ཨེཝཾ སབྦཏྠཱཔི ཏུཙྪལཱབཱུནཾ སཱིདནཀཱལོ ཝིཡ བྷཝིསྶཏི. ཨཡཾ དྭཱདསམསྶ ཝིཔཱཀོ.

༡༣. ཏཱདིསེཡེཝ ཀཱལེ ཨདྷམྨིཀརཱཛཱནོ ཨཀུལཱིནཱནཾ ཡསཾ དསྶནྟི. ཏེ ཨིསྶརཱ བྷཝིསྶནྟི, ཀུལཱིནཱ དུགྒཏཱ. ཏེསུ ན ཀེཙི གཱརཝཾ ཀརིསྶནྟི, ཨིཏརེསུཡེཝ ཀརིསྶནྟི. རཱཛསམྨུཁེ ཝཱ ཨམཙྩསམྨུཁེ ཝཱ ཝིནིཙྪཡཊྛཱནེ ཝཱ ཝིནིཙྪཡཀུསལཱནཾ གྷནསིལཱསདིསཱནཾ ཀུལཔུཏྟཱནཾ ཀཐཱ ན ཨོགཱཧིཏྭཱ པཏིཊྛཧིསྶཏི. ཏེསུ ཀཐེནྟེསུ ‘‘ཀིཾ ཨིམེ ཀཐེནྟཱི’’ཏི ཨིཏརེ པརིཧཱསམེཝ ཀརིསྶནྟི. བྷིཀྑུསནྣིཔཱཏེཔི ཝུཏྟཔྤཀཱརེསུ ཋཱནེསུ ནེཝ པེསལེ བྷིཀྑཱུ གརུཀཱཏབྦེ མཉྙིསྶནྟི, ནཱཔི ནེསཾ ཀཐཱ པརིཡོགཱཧིཏྭཱ པཏིཊྛཧིསྶཏི, སིལཱནཾ པླཝནཀཱལོ ཝིཡ བྷཝིསྶཏི. ཨཡཾ ཏེརསམསྶ ཝིཔཱཀོ.

༡༤. ལོཀེ པརིཧཱཡནྟེཡེཝ མནུསྶཱ ཏིབྦརཱགཱདིཛཱཏིཀཱ ཀིལེསཱནུཝཏྟཀཱ ཧུཏྭཱ ཏརུཎཱནཾ ཨཏྟནོ བྷརིཡཱནཾ ཝསེ ཝཏྟིསྶནྟི. གེཧེ དཱསཀམྨཀཱརཱདཡོཔི གོམཧིཾསཱདཡོཔི ཧིརཉྙསུཝཎྞམྤི སབྦཾ ཏཱསཾཡེཝ ཨཱཡཏྟཾ བྷཝིསྶཏི. ‘‘ཨསུཀཾ ཧིརཉྙསུཝཎྞཾ ཝཱ པརིཙྪདཱདིཛཱཏཾ ཝཱ ཀཧ’’ནྟི ཝུཏྟེ ‘‘ཡཏྠ ཝཱ ཏཏྠ ཝཱ ཧོཏུ, ཀིཾ ཏུཡ྄ཧིམིནཱ བྱཱཔཱརེན, ཏྭཾ མཡ྄ཧཾ གྷརེ སནྟཾ ཝཱ ཨསནྟཾ ཝཱ ཛཱནིཏུཀཱམོ ཛཱཏོ’’ཏི ཝཏྭཱ ནཱནཔྤཀཱརེཧི ཨཀྐོསིཏྭཱ མུཁསཏྟཱིཧི ཀོཊྚེཏྭཱ དཱསཙེཊཀེ ཝིཡ ཝསེ ཀཏྭཱ ཨཏྟནོ ཨིསྶརིཡཾ པཝཏྟེསྶནྟི. ཨེཝཾ མདྷུཀཔུཔྥཔྤམཱཎཱནཾ མཎྜཱུཀཱིནཾ ཨཱསིཝིསེ ཀཎྷསཔྤེ གིལནཀཱལོ ཝིཡ བྷཝིསྶཏི. ཨཡཾ ཙུདྡསམསྶ ཝིཔཱཀོ.

༡༥. དུབྦལརཱཛཀཱལེ ¶ པན རཱཛཱནོ ཧཏྠིསིཔྤཱདཱིསུ ཨཀུསལཱ ཡུདྡྷེསུ ཨཝིསཱརདཱ བྷཝིསྶནྟི. ཏེ ཨཏྟནོ རཱཛཱདྷིཔཙྩཾ ཨཱསངྐམཱནཱ སམཱནཛཱཏིཀཱནཾ ཀུལཔུཏྟཱནཾ ཨིསྶརིཡཾ ཨདཏྭཱ ཨཏྟནོ པཱདམཱུལིཀནཧཱཔནཀཔྤཀཱདཱིནཾ དསྶནྟི. ཛཱཏིགོཏྟསམྤནྣཱ ཀུལཔུཏྟཱ རཱཛཀུལེ པཏིཊྛཾ ཨལབྷམཱནཱ ཛཱིཝིཀཾ ཀཔྤེཏུཾ ཨསམཏྠཱ ཧུཏྭཱ ཨིསྶརིཡེ ཋིཏེ ཛཱཏིགོཏྟཧཱིནེ ཨཀུལཱིནེ ཨུཔཊྛཧནྟཱ ཝིཙརིསྶནྟི, སུཝཎྞརཱཛཧཾསེཧི ཀཱཀསྶ པརིཝཱརིཏཀཱལོ ཝིཡ བྷཝིསྶཏི. ཨཡཾ པནྣརསམསྶ ཝིཔཱཀོ.

༡༦. ཨདྷམྨིཀརཱཛཀཱལེཡེཝ ¶ ཙ ཨཀུལཱིནཱཝ རཱཛཝལླབྷཱ ཨིསྶརཱ བྷཝིསྶནྟི, ཀུལཱིནཱ ཨཔཉྙཱཏཱ དུགྒཏཱ. ཏེ རཱཛཱནཾ ཨཏྟནོ ཀཐཾ གཱཧཱཔེཏྭཱ ཝིནིཙྪཡཊྛཱནཱདཱིསུ བལཝནྟོ ཧུཏྭཱ དུབྦལཱནཾ པཝེཎིཨཱགཏཱནི ཁེཏྟཝཏྠཱདཱིནི ‘‘ཨམྷཱཀཾ སནྟཀཱནཱི’’ཏི ཨབྷིཡུཉྫིཏྭཱ ཏེ ‘‘ན ཏུམྷཱཀཾ, ཨམྷཱཀ’’ནྟི ཨཱགནྟྭཱ ཝིནིཙྪཡཊྛཱནཱདཱིསུ ཝིཝདནྟེ ཝེཏྟལཏཱདཱིཧི པཧརཱཔེཏྭཱ གཱིཝཱཡཾ གཧེཏྭཱ ཨཔཀཌྜྷཱཔེཏྭཱ ‘‘ཨཏྟནོ པམཱཎཾ ན ཛཱནཱཐ, ཨམྷེཧི སདྡྷིཾ ཝིཝདཐ, ཨིདཱནི ཝོ པཧརཱཔེཏྭཱ རཉྙོ ཀཐེཏྭཱ ཧཏྠཔཱདཙྪེདཱདཱིནི ཀཱརེསྶཱམཱ’’ཏི སནྟཛྫེསྶནྟི. ཏེ ཏེསཾ བྷཡེན ཨཏྟནོ སནྟཀཱནི ཝཏྠཱུནི ‘‘ཏུམྷཱཀཾཡེཝ ཏཱནི, གཎྷཐཱ’’ཏི ནིཡྻཱཏེཏྭཱ ཨཏྟནོ གེཧཱནི པཝིསིཏྭཱ བྷཱིཏཱ ནིཔཛྫིསྶནྟི. པཱཔབྷིཀྑཱུཔི པེསལེ བྷིཀྑཱུ ཡཐཱརུཙི ཝིཧེཋེསྶནྟི. པེསལཱ བྷིཀྑཱུ པཊིསརཎཾ ཨལབྷམཱནཱ ཨརཉྙཾ པཝིསིཏྭཱ གཧནཊྛཱནེསུ ནིལཱིཡིསྶནྟི. ཨེཝཾ ཧཱིནཛཙྩེཧི ཙེཝ པཱཔབྷིཀྑཱུཧི ཙ ཨུཔདྡུཏཱནཾ ཛཱཏིམནྟཀུལཔུཏྟཱནཉྩེཝ པེསལབྷིཀྑཱུནཉྩ ཨེལ༹ཀཱནཾ བྷཡེན ཏསཝཀཱནཾ པལཱཡནཀཱལོ ཝིཡ བྷཝིསྶཏི. ཨཡཾ སོལ༹སམསྶ ཝིཔཱཀོ. ཨེཝཾ ཏསྶ ཏསྶ ཨནཏྠསྶ པུབྦནིམིཏྟབྷཱུཏེ སོལ༹ས མཧཱསུཔིནེ པསྶི. ཏེན ཝུཏྟཾ ‘‘ཀོསལརཱཛཱ ཝིཡ སོལ༹ས སུཔིནེ’’ཏི. ཨེཏྠ ཙ པུབྦནིམིཏྟཏོ ཨཏྟནོ ཨཏྠཱནཏྠནིམིཏྟཾ སུཔིནཾ པསྶནྟོ ཨཏྟནོ ཀམྨཱནུབྷཱཝེན པསྶཏི. ཀོསལརཱཛཱ ཝིཡ ལོཀསྶ ཨཏྠཱནཏྠནིམིཏྟཾ སུཔིནཾ པསྶནྟོ པན སབྦསཏྟསཱདྷཱརཎཀམྨཱནུབྷཱཝེན པསྶཏཱིཏི ཝེདིཏབྦཾ.

ཀུདྡྷཱ ཧི དེཝཏཱཏི མཧཱནཱགཝིཧཱརེ མཧཱཐེརསྶ ཀུདྡྷཱ དེཝཏཱ ཝིཡ. རོཧཎེ ཀིར མཧཱནཱགཝིཧཱརེ མཧཱཐེརོ བྷིཀྑུསངྒྷཾ ཨནཔལོཀེཏྭཱཝ ཨེཀཾ ནཱགརུཀྑཾ ཚིནྡཱཔེསི. རུཀྑེ ཨདྷིཝཏྠཱ དེཝཏཱ ཐེརསྶ ཀུདྡྷཱ པཋམམེཝ ནཾ སཙྩསུཔིནེན པལོབྷེཏྭཱ པཙྪཱ ‘‘ཨིཏོ ཏེ སཏྟདིཝསམཏྠཀེ ཨུཔཊྛཱཀོ རཱཛཱ མརིསྶཏཱི’’ཏི སུཔིནེ ཨཱརོཙེསི. ཐེརོ ཏཾ ཀཐཾ ཨཱཧརིཏྭཱ རཱཛོརོདྷཱནཾ ཨཱཙིཀྑི. ཏཱ ཨེཀཔྤཧཱརེནེཝ མཧཱཝིརཝཾ ཝིརཝིཾསུ. རཱཛཱ ‘‘ཀིཾ ཨེཏ’’ནྟི པུཙྪི. ཏཱ ‘‘ཨེཝཾ ཐེརེན ཝུཏྟ’’ནྟི ཨཱརོཙཡིཾསུ. རཱཛཱ དིཝསཾ གཎཱཔེཏྭཱ སཏྟཱཧེ ཝཱིཏིཝཏྟེ ཐེརསྶ ཧཏྠཔཱདེ ཚིནྡཱཔེསི. ཨེཀནྟཾ སཙྩམེཝ ཧོཏཱིཏི ཕལསྶ སཙྩབྷཱཝཏོ ཝུཏྟཾ, དསྶནཾ ¶ པན ཝིཔལླཏྠམེཝ ¶ . ཏེནེཝ པཧཱིནཝིཔལླཱསཱ པུབྦནིམིཏྟབྷཱུཏམྤི སུཔིནཾ ན པསྶནྟི. དྭཱིཧི ཏཱིཧིཔི ཀཱརཎེཧི ཀདཱཙི སུཔིནཾ པསྶཏཱིཏི ཨཱཧ ‘‘སཾསགྒབྷེདཏོ’’ཏི. ‘‘ཨསེཁཱ ན པསྶནྟི པཧཱིནཝིཔལླཱསཏྟཱ’’ཏི ཝཙནཏོ ཙཏུནྣམྤི ཀཱརཎཱནཾ ཝིཔལླཱསཱ ཨེཝ མཱུལཀཱརཎནྟི དཊྛབྦཾ.

ཏནྟི སུཔིནཀཱལེ པཝཏྟཾ བྷཝངྒཙིཏྟཾ. རཱུཔནིམིཏྟཱདིཨཱརམྨཎནྟི ཀམྨཀམྨནིམིཏྟགཏིནིམིཏྟཏོ ཨཉྙཾ རཱུཔནིམིཏྟཱདིཨཱརམྨཎཾ ན ཧོཏི. ཨཱིདིསཱནཱིཏི པཙྩཀྑཏོ ཨནུབྷཱུཏཔུབྦཔརིཀཔྤིཏརཱུཔཱདིཨཱརམྨཎཱནི ཙེཝ རཱགཱདིསམྤཡུཏྟཱནི ཙ. སབྦོཧཱརིཀཙིཏྟེནཱཏི པཀཏིཙིཏྟེན.

དྭཱིཧི ཨནྟེཧི མུཏྟོཏི ཀུསལཱཀུསལསངྑཱཏེཧི དྭཱིཧི ཨནྟེཧི མུཏྟོ. ཨཱཝཛྫནཏདཱརམྨཎཀྑཎེཏི ཨིདཾ ཡཱཝ ཏདཱརམྨཎུཔྤཏྟི, ཏཱཝ པཝཏྟཙིཏྟཝཱརཾ སནྡྷཱཡ ཝུཏྟཾ. ‘‘སུཔིནེནེཝ དིཊྛཾ ཝིཡ མེ, སུཏཾ ཝིཡ མེཏི ཀཐནཀཱལེ པན ཨབྱཱཀཏོཡེཝ ཨཱཝཛྫནམཏྟསྶེཝ ཨུཔྤཛྫནཏོ’’ཏི ཝདནྟི. ཨེཝཾ ཝདནྟེཧི པཉྩདྭཱརེ དུཏིཡམོགྷཝཱརེ ཝིཡ མནོདྭཱརེཔི ཨཱཝཛྫནཾ དྭཏྟིཀྑཏྟུཾ ཨུཔྤཛྫིཏྭཱ ཛཝནཊྛཱནེ ཋཏྭཱ བྷཝངྒཾ ཨོཏརཏཱིཏི ཨདྷིཔྤེཏནྟི དཊྛབྦཾ ཨེཀཙིཏྟཀྑཎིཀསྶ ཨཱཝཛྫནསྶ ཨུཔྤཏྟིཡཾ ‘‘དིཊྛཾ ཝིཡ མེ, སུཏཾ ཝིཡ མེ’’ཏི ཀཔྤནཱཡ ཨསམྦྷཝཏོ. ཨེཏྠ ཙ ‘‘སུཔིནནྟེཔི ཏདཱརམྨཎཝཙནཏོ པཙྩུཔྤནྣཝསེན ཨཏཱིཏཝསེན ཝཱ སབྷཱཝདྷམྨཱ སུཔིནནྟེ ཨཱརམྨཎཾ ཧོནྟཱི’’ཏི ཝདནྟི. ‘‘ཡདིཔི སུཔིནནྟེ ཝིབྷཱུཏཾ ཧུཏྭཱ ཨུཔཊྛིཏེ རཱུཔཱདིཝཏྠུམྷི ཏདཱརམྨཎཾ ཝུཏྟཾ, ཏཐཱཔི སུཔིནནྟེ ཨུཔཊྛིཏནིམིཏྟསྶ པརིཀཔྤཝསེན གཧེཏབྦཏཱཡ དུབྦལབྷཱཝཏོ དུབྦལཝཏྠུཀཏྟཱཏི ཝུཏྟ’’ནྟི ཝདནྟི. ཀེཙི པན ‘‘ཀརཛཀཱཡསྶ ནིརུསྶཱཧསནྟབྷཱཝཔྤཏྟིཏོ ཏནྣིསྶིཏཧདཡཝཏྠུ ན སུཔྤསནྣཾ ཧོཏི, ཏཏོ ཏནྣིསྶིཏཱཔི ཙིཏྟཔྤཝཏྟི ན སུཔྤསནྣཱ ཨསུཔྤསནྣཝཊྚིནིསྶིཏདཱིཔཔྤབྷཱ ཝིཡ, ཏསྨཱ དུབྦལཝཏྠུཀཏྟཱཏི ཨེཏྠ དུབྦལཧདཡཝཏྠུཀཏྟཱ’’ཏི ཨཏྠཾ ཝདནྟི. ཝཱིམཾསིཏྭཱ ཡུཏྟཏརཾ གཧེཏབྦཾ.

སུཔིནནྟཙེཏནཱཏི མནོདྭཱརིཀཛཝནཝསེན པཝཏྟཱ སུཔིནནྟཙེཏནཱ. སུཔིནཉྷི པསྶནྟོ མནོདྭཱརིཀེནེཝ ཛཝནེན པསྶཏི, ན པཉྩདྭཱརིཀེན. པཊིབུཛ྄ཛྷནྟོ ཙ མནོདྭཱརིཀེནེཝ པཊིབུཛ྄ཛྷཏི, ན པཉྩདྭཱརིཀེན. ནིདྡཱཡནྟསྶ ཧི མཧཱཝཊྚིཾ ཛཱལེཏྭཱ དཱིཔེ ཙཀྑུསམཱིཔཾ ཨུཔནཱིཏེ པཋམཾ ཙཀྑུདྭཱརིཀཾ ཨཱཝཛྫནཾ བྷཝངྒཾ ན ཨཱཝཊྚེཏི, མནོདྭཱརིཀམེཝ ཨཱཝཊྚེཏི. ཨཐ ཛཝནཾ ཛཝིཏྭཱ བྷཝངྒཾ ཨོཏརཏི. དུཏིཡཝཱརེ ཙཀྑུདྭཱརིཀཨཱཝཛྫནཾ བྷཝངྒཾ ཨཱཝཊྚེཏི ¶ , ཏཏོ ཙཀྑུཝིཉྙཱཎཱདཱིནི ཛཝནཔརིཡོསཱནཱནི པཝཏྟནྟི, ཏདནནྟརཾ བྷཝངྒཾ པཝཏྟཏི. ཏཏིཡཝཱརེ མནོདྭཱརིཀཨཱཝཛྫནེན བྷཝངྒེ ཨཱཝཊྚིཏེ མནོདྭཱརིཀཛཝནཾ ཛཝཏི. ཏེན ཙིཏྟེན ‘‘ཀིཾ ཨཡཾ ཨིམསྨིཾ ཋཱནེ ཨཱལོཀོ’’ཏི ཛཱནཱཏི. ཏཐཱ ནིདྡཱཡནྟསྶ ཀཎྞསམཱིཔེ ཏཱུརིཡེསུ པགྒཧིཏེསུ ¶ , གྷཱནསམཱིཔེ སུགནྡྷེསུ ཝཱ དུགྒནྡྷེསུ ཝཱ པུཔྥེསུ ཨུཔནཱིཏེསུ, མུཁེ སཔྤིམྷི ཝཱ ཕཱཎིཏེ ཝཱ པཀྑིཏྟེ, པིཊྛིཡཾ པཱཎིནཱ པཧཱརེ དིནྣེ པཋམཾ སོཏདྭཱརིཀཱདཱིནི ཨཱཝཛྫནཱནི བྷཝངྒཾ ན ཨཱཝཊྚེནྟི, མནོདྭཱརིཀམེཝ ཨཱཝཊྚེཏི, ཨཐ ཛཝནཾ ཛཝིཏྭཱ བྷཝངྒཾ ཨོཏརཏི. དུཏིཡཝཱརེ སོཏདྭཱརིཀཱདཱིནི ཨཱཝཛྫནཱནི བྷཝངྒཾ ཨཱཝཊྚེནྟི, ཏཏོ སོཏགྷཱནཛིཝ྄ཧཱཀཱཡཝིཉྙཱཎཱདཱིནི ཛཝནཔརིཡོསཱནཱནི པཝཏྟནྟི, ཏདནནྟརཾ བྷཝངྒཾ ཝཏྟཏི. ཏཏིཡཝཱརེ མནོདྭཱརིཀཨཱཝཛྫནེན བྷཝངྒེ ཨཱཝཊྚིཏེ མནོདྭཱརིཀཛཝནཾ ཛཝཏི, ཏེན ཙིཏྟེན ཉཏྭཱ ‘‘ཀིཾ ཨཡཾ ཨིམསྨིཾ ཋཱནེ སདྡོ, སངྑསདྡོ བྷེརིསདྡོ’’ཏི ཝཱ ‘‘ཀིཾ ཨཡཾ ཨིམསྨིཾ ཋཱནེ གནྡྷོ, མཱུལགནྡྷོ’’ཏི ཝཱ ‘‘ཀིཾ ཨིདཾ མཡ྄ཧཾ མུཁཾ པཀྑིཏྟཾ, སཔྤཱིཏི ཝཱ ཕཱཎིཏ’’ནྟི ཝཱ ‘‘ཀེནམྷི པིཊྛིཡཾ པཧཊོ, ཨཏིབདྡྷོ མེ པཧཱརོ’’ཏི ཝཱ ཝཏྟཱ ཧོཏི. ཨེཝཾ མནོདྭཱརིཀཛཝནེནེཝ པཊིབུཛ྄ཛྷཏི, ན པཉྩདྭཱརིཀེན. སུཔིནམྤི ཏེནེཝ པསྶཏི, ན པཉྩདྭཱརིཀེན. སེསམེཏྠ སུཝིཉྙེཡྻམེཝ.

༡༩༧. སཏྟམེ ཨུཏུསམུཊྛཱནནྟི ཝསྶིཀེ ཙཏྟཱརོ མཱསེ ཨུཔྤནྣཾ. ཨཀཱལེཔཱིཏི ཙིཏྟཝེསཱཁམཱསེསུཔི. ཝསྶཝལཱཧཀདེཝཔུཏྟཱནཉྷི ཨཏྟནོ རཏིཡཱ ཀཱིལི༹ཏུཀཱམཏཱཙིཏྟེ ཨུཔྤནྣེ ཨཀཱལེཔི དེཝོ ཝསྶཏི. ཏཏྲིདཾ ཝཏྠུ – ཨེཀོ ཀིར ཝསྶཝལཱཧཀདེཝཔུཏྟོ ཝཱཀརཀུཊཀཝཱསིཁཱིཎཱསཝཏྠེརསྶ སནྟིཀཾ གནྟྭཱ ཝནྡིཏྭཱ ཨཊྛཱསི. ཐེརོ ‘‘ཀོསི ཏྭ’’ནྟི པུཙྪི. ཨཧཾ, བྷནྟེ, ཝསྶཝལཱཧཀདེཝཔུཏྟོཏི. ཏུམྷཱཀཾ ཀིར ཙིཏྟེན དེཝོ ཝསྶཏཱིཏི. ཨཱམ, བྷནྟེཏི. པསྶིཏུཀཱམཱ མཡནྟི. ཏེམིསྶཐ, བྷནྟེཏི. མེགྷསཱིསཾ ཝཱ གཛྫིཏཾ ཝཱ ན པཉྙཱཡཏི, ཀཐཾ ཏེམིསྶཱམཱཏི. བྷནྟེ, ཨམྷཱཀཾ ཙིཏྟེན དེཝོ ཝསྶཏི, ཏུམྷེ པཎྞསཱལཾ པཝིསཐཱཏི. ‘‘སཱདྷུ, དེཝཔུཏྟཱ’’ཏི པཱདེ དྷོཝིཏྭཱ པཎྞསཱལཾ ¶ པཱཝིསི. དེཝཔུཏྟོ ཏསྨིཾ པཝིསནྟེཡེཝ ཨེཀཾ གཱིཏཾ གཱཡིཏྭཱ ཧཏྠཾ ཨུཀྑིཔི, སམནྟཱ ཏིཡོཛནཊྛཱནཾ ཨེཀམེགྷཾ ཨཧོསི. ཐེརོ ཨདྡྷཏིནྟོ པཎྞསཱལཾ པཝིཊྛོཏི.

༡༩༨-༩. ཨཊྛམེ ¶ ཨངྒེཧཱིཏི ཀཱརཎེཧི. ཨངྒཱིཡནྟི ཧེཏུབྷཱཝེན ཉཱཡནྟཱིཏི ཨངྒཱནི, ཀཱརཎཱནི. ཀཱརཎཏྠེ ཙ ཨངྒ-སདྡོ. པཉྩཧཱིཏི ཧེཏུམྷི ནིསྶཀྐཝཙནཾ. སམནྣཱགཏཱཏི སམནུཨཱགཏཱ པཝཏྟཱ ཡུཏྟཱ ཙ. ཝཱཙཱཏི སམུལླཔན-ཝཱཙཱ. ཡཱ ‘‘ཝཱཙཱ གིརཱ བྱཔྤཐོ’’ཏི (དྷ. ས. ༦༣༦) ཙ, ‘‘ནེལཱ ཀཎྞསུཁཱ’’ཏི (དཱི. ནི. ༡.༩) ཙ ཨཱགཙྪཏི. ཡཱ པན ‘‘ཝཱཙཱཡ ཙེ ཀཏཾ ཀམྨ’’ནྟི (དྷ. ས. ཨཊྛ. ༡ ཀཱཡཀམྨདྭཱར) ཨེཝཾ ཝིཉྙཏྟི ཙ, ‘‘ཡཱ ཙཏཱུཧི ཝཙཱིདུཙྩརིཏེཧི ཨཱརཏི…པེ… ཨཡཾ ཝུཙྩཏི སམྨཱཝཱཙཱ’’ཏི (དྷ. ས. ༢༩༩) ཨེཝཾ ཝིརཏི ཙ, ‘‘ཕརུསཝཱཙཱ, བྷིཀྑཝེ, ཨཱསེཝིཏཱ བྷཱཝིཏཱ བཧུལཱིཀཏཱ ནིརཡསཾཝཏྟནིཀཱ ཧོཏཱི’’ཏི (ཨ. ནི. ༨.༤༠) ཨེཝཾ ཙེཏནཱ ཙ ཝཱཙཱཏི ཨཱགཏཱ, ན སཱ ཨིདྷ ཨདྷིཔྤེཏཱ. ཀསྨཱ? ཨབྷཱསིཏབྦཏོ. ‘‘སུབྷཱསིཏཱ ཧོཏི, ནོ དུབྦྷཱསིཏཱ’’ཏི ཧི ཝུཏྟཾ. སུབྷཱསིཏཱཏི སུཊྛུ བྷཱསིཏཱ. ཏེནསྶཱ ཨཏྠཱཝཧཏཾ དཱིཔེཏི. ཨནཝཛྫཱཏི རཱགཱདིཨཝཛྫརཧིཏཱ. ཨིམིནཱསྶ ཀཱརཎསུདྡྷིཾ ཨགཏིགམནཱདིཔྤཝཏྟདོསཱབྷཱཝཉྩ དཱིཔེཏི. རཱགདོསཱདིཝིམུཏྟཉྷི ཡཾ བྷཱསཏོ ཨནུརོདྷཝིཝཛྫནཏོ ཨགཏིགམནཾ དུརསམུསྶིཏམེཝཱཏི. ཨནནུཝཛྫཱཏི ཨནུཝཱདཝིམུཏྟཱ. ཨིམིནཱསྶཱ སབྦཱཀཱརསམྤཏྟིཾ དཱིཔེཏི. སཏི ཧི སབྦཱཀཱརསམྤཏྟིཡཾ ཨནནུཝཛྫཏཱཏི. ཝིཉྙཱུནནྟི པཎྜིཏཱནཾ. ཏེན ནིནྡཱཔསཾསཱསུ བཱལཱ ཨཔྤམཱཎཱཏི དཱིཔེཏི.

ཨིམེཧི ཁོཏིཨཱདཱིནི ཏཱནི ཨངྒཱནི པཙྩཀྑཏོ དསྶེནྟོ ཏཾ ཝཱཙཾ ནིགམེཏི. ཡཉྩ ཨཉྙེ པཊིཉྙཱདཱིཧི ཨཝཡཝེཧི, ནཱམཱདཱིཧི པདེཧི, ལིངྒཝཙནཝིབྷཏྟིཀཱལཀཱརཀསམྤཏྟཱིཧི ཙ སམནྣཱགཏཾ མུསཱཝཱདཱདིཝཱཙམྤི སུབྷཱསིཏནྟི མཉྙནྟི, ཏཾ པཊིསེདྷེཏི. ཨཝཡཝཱདིསམནྣཱགཏཱཔི ཧི ཏཐཱརཱུཔཱི ¶ ཝཱཙཱ དུབྦྷཱསིཏཱཝ ཧོཏི ཨཏྟནོ ཙ པརེསཉྩ ཨནཏྠཱཝཧཏྟཱ. ཨིམེཧི པན པཉྩཧངྒེཧི སམནྣཱགཏཱ སཙེཔི མིལཀྑུབྷཱསཱཔརིཡཱཔནྣཱ གྷཊཙེཊིཀཱགཱིཏིཀཔརིཡཱཔནྣཱཔི ཧོཏི, ཏཐཱཔི སུབྷཱསིཏཱཝ ལོཀིཡལོཀུཏྟརཧིཏསུཁཱཝཧཏྟཱ. ཏཐཱ ཧི མགྒཔསྶེ སསྶཾ རཀྑནྟིཡཱ སཱིཧལ༹ཙེཊིཀཱཡ སཱིཧལ༹ཀེནེཝ ཛཱཏིཛརཱམརཎཡུཏྟཾ གཱིཏིཀཾ གཱཡནྟིཡཱ སདྡཾ སུཏྭཱ མགྒཾ གཙྪནྟཱ སཊྛིམཏྟཱ ཝིཔསྶཀབྷིཀྑཱུ ཨརཧཏྟཾ པཱཔུཎིཾསུ.

ཏཐཱ ཏིསྶོ ནཱམ ཨཱརདྡྷཝིཔསྶཀོ བྷིཀྑུ པདུམསྶརསམཱིཔེན གཙྪནྟོ པདུམསྶརེ པདུམཱནི བྷཉྫིཏྭཱ –

ཛརཱབྷིཝེགེན མདྡཱིཡནྟཱི’’ཏི. (སཾ. ནི. ཨཊྛ. ༡.༡.༢༡༣; སུ. ནི. ཨཊྛ. ༢.༤༥༢ སུབྷཱསིཏསུཏྟཝཎྞནཱ) –

ཨིམཾ གཱིཏིཾ གཱཡནྟིཡཱ ཙེཊིཀཱཡ སུཏྭཱ ཨརཧཏྟཾ པཏྟོ.

བུདྡྷནྟརེཔི ཨཉྙཏརོ པུརིསོ སཏྟཧི པུཏྟེཧི སདྡྷིཾ ཨཊཝིཏོ ཨཱགམྨ ཨཉྙཏརཱཡ ཨིཏྠིཡཱ མུསལེན ཏཎྜུལེ ཀོཊྚེནྟིཡཱ –

‘‘ཛརཱཡ པརིམདྡིཏཾ ཨེཏཾ, མིལཱཏཙམྨནིསྶིཏཾ;

མརཎེན བྷིཛྫཏི ཨེཏཾ, མཙྩུསྶ གྷཱསམཱམིསཾ.

‘‘ཀིམཱིནཾ ཨཱལཡཾ ཨེཏཾ, ནཱནཱཀུཎཔེན པཱུརིཏཾ;

ཨསུཙིབྷཱཛནཾ ཨེཏཾ, ཏདལིཀྑནྡྷསམཾ ཨིད’’ནྟི. (སཾ. ནི. ཨཊྛ. ༡.༡.༢༡༣; སུ. ནི. ཨཊྛ. ༢.༤༥༢ སུབྷཱསིཏསུཏྟཝཎྞནཱ) –

ཨིམཾ གཱིཏཾ སུཏྭཱ པཙྩཝེཀྑནྟོ སཧ པུཏྟེཧི པཙྩེཀབོདྷིཾ པཏྟོ. ཨེཝཾ ཨིམེཧི པཉྩཧི ཨངྒེཧི སམནྣཱགཏཱ ཝཱཙཱ སཙེཔི མིལཀྑུབྷཱསཱཡ པརིཡཱཔནྣཱ གྷཊཙེཊིཀཱགཱིཏིཀཔརིཡཱཔནྣཱ ཝཱཙཱ ཧོཏི, ཏཐཱཔི སུབྷཱསིཏཱཏི ཝེདིཏབྦཱ. སུབྷཱསིཏཱ ཨེཝ ཨནཝཛྫཱ ཨནནུཝཛྫཱ ཙ ཝིཉྙཱུནཾ ཨཏྠཏྠིཀཱནཾ ཀུལཔུཏྟཱནཾ ཨཏྠཔྤཊིསརཎཱནཾ, ནོ བྱཉྫནཔྤཊིསརཎཱནནྟི. ནཝམཾ ཨུཏྟཱནམེཝ.

༢༠༠. དསམེ ¶ ནིསྶརནྟཱིཏི ནིསྶརཎཱིཡཱཏི ཝཏྟབྦེ དཱིགྷཾ ཀཏྭཱ ནིདྡེསོ. ཀཏྟརི ཧེས ཨནཱིཡ-སདྡོ ཡཐཱ ‘‘ནིཡྻཱནིཡཱ’’ཏི. ཏེནཱཧ ‘‘ནིསྶཊཱ’’ཏི. ཀུཏོ པན ནིསྶཊཱ? ཡཐཱསཀཾ པཊིཔཀྑཏོ. ནིཛྫཱིཝཊྛེན དྷཱཏུཡོཏི ཨཱཧ ‘‘ཨཏྟསུཉྙསབྷཱཝཱ’’ཏི. ཨཏྠཏོ པན དྷམྨདྷཱཏུམནོཝིཉྙཱཎདྷཱཏུཝིསེསོ ¶ . ཏཱདིསསྶ བྷིཀྑུནོ ཀིལེསཝསེན ཀཱམེསུ མནསིཀཱརོ ནཏྠཱིཏི ཨཱཧ ‘‘ཝཱིམཾསནཏྠ’’ནྟི, ‘‘ནེཀྑམྨནིཡཏཾ ཨིདཱནི མེ ཙིཏྟཾ, ཀིཾ ནུ ཁོ ཀཱམཝིཏཀྐོཔི ཨུཔྤཛྫིསྶཏཱི’’ཏི ཝཱིམཾསནྟསྶཱཏི ཨཏྠོ. པཀྑནྡནཾ ནཱམ ཨནུཔྤཝེསོ. སོ པན ཏཏྠ ནཏྠཱིཏི ཨཱཧ ‘‘ནཔྤཝིསཏཱི’’ཏི. པསཱིདནཾ ནཱམ ཨབྷིརུཙི. སནྟིཊྛནཾ པཏིཊྛཱནཾ. ཝིམུཙྩནཾ ཨདྷིམུཙྩནནྟི. ཏཾ སབྦཾ པཊིཀྑིཔནྟོ ཝདཏི ‘‘པསཱདཾ ནཱཔཛྫཏཱི’’ཏིཨཱདི. ཨེཝཾབྷཱུཏཾ པནསྶ ཙིཏྟཾ ཏསྶ ཀཐཾ ཏིཊྛཏཱིཏི ཨཱཧ ‘‘ཡཐཱ’’ཏིཨཱདི.

ཏནྟི པཋམཛ྄ཛྷཱནཾ. ཨསྶཱཏི བྷིཀྑུནོ. ཙིཏྟཾ པཀྑནྡཏཱིཏི པརིཀམྨཙིཏྟེན སདྡྷིཾ ཛྷཱནཙིཏྟཾ ཨེཀཏྟཝསེན ཨེཀཛ྄ཛྷཾ ཀཏྭཱ ཝདཏི. གོཙརེ གཏཏྟཱཏི ཨཏྟནོ ཨཱརམྨཎེ ཨེཝ པཝཏྟཏྟཱ. ཨཧཱནབྷཱགིཡཏྟཱཏི ཋིཏིབྷཱགིཡཏྟཱ. སུཊྛུ ཝིམུཏྟནྟི ཝིཀྑམྦྷནཝིམུཏྟིཡཱ སམྨདེཝ ཝིམུཏྟཾ. ཙིཏྟསྶ ཙ ཀཱཡསྶ ཙ ཝིཧནནཏོ ཝིགྷཱཏོ. དུཀྑཾ པརིདཧནཏོ པརིལཱ༹ཧོ. ཀཱམཝེདནཾ ན ཝེདིཡཏི ཨནུཔྤཛྫནཏོ. ནིསྶརནྟི ཏཏོཏི ནིསྶརཎཾ. ཀེ ནིསྶརནྟི? ཀཱམཱ. ཨེཝཉྩ ཀཱམཱནནྟི ཀཏྟུསཱམིཝཙནཾ སུཊྛུ ཡུཛྫཏི. ཡདགྒེན ཀཱམཱ ཏཏོ ནིསྶཊཱཏི ཝུཙྩནྟི, ཏདགྒེན ཛྷཱནམྤི ཀཱམཏོ ནིསྶཊནྟི ཝཏྟབྦཏཾ ལབྷཏཱིཏི ཝུཏྟཾ ‘‘ཀཱམེཧི ནིསྶཊཏྟཱ’’ཏི. ཨེཝཾ ཝིཀྑམྦྷནཝསེན ཀཱམནིསྶརཎཾ ཝཏྭཱ ཨིདཱནི སམུཙྪེདཝསེན ཨཙྩནྟཏོ ནིསྶརཎཾ དསྶེཏུཾ ‘‘ཡོ པནཱ’’ཏིཨཱདི ཝུཏྟཾ. སེསཔདེསཱུཏི སེསཀོཊྛཱསེསུ.

ཨཡཾ པན ཝིསེསོཏི ཝིསེསཾ ཝདནྟེན ཏཾ ཛྷཱནཾ པཱདཀཾ ཀཏྭཱཏིཨཱདིཀོ ཨཝིསེསོཏི ཀཏྭཱ དུཏིཡཏཏིཡཝཱརེསུ སབྦསོ ཨནཱམཊྛོ, ཙཏུཏྠཝཱརེ པན ཨཡམྤི ཝིསེསོཏི དསྶེཏུཾ ‘‘ཨཙྩནྟནིསྶརཎཉྩེཏྠ ཨརཧཏྟཕལཾ ཡོཛེཏབྦ’’ནྟི ཝུཏྟཾ. ཡསྨཱ ཨརཱུཔཛ྄ཛྷཱནཾ ¶ པཱདཀཾ ཀཏྭཱ ཨགྒམགྒཾ ཨདྷིགནྟྭཱ ཨརཧཏྟེ ཋིཏསྶ ཙིཏྟཾ སབྦསོ རཱུཔེཧི ནིསྶཊཾ ནཱམ ཧོཏི. ཏསྶ ཧི ཕལསམཱཔཏྟིཏོ ཝུཊྛཱཡ ཝཱིམཾསནཏྠཾ རཱུཔཱབྷིམུཁཾ ཙིཏྟཾ པེསེནྟསྶ. ཨིདམཀྑཱཏནྟི སམཐཡཱནིཀཱནཾ ཝསེན ཧེཊྛཱ ཙཏྟཱརོ ཝཱརཱ གཧིཏཱ. ཨིདཾ པན སུཀྑཝིཔསྶཀསྶ ཝསེནཱཏི ཨཱཧ ‘‘སུདྡྷསངྑཱརེ’’ཏིཨཱདི. ‘‘པུན སཀྐཱཡོ ནཏྠཱི’’ཏི ཨུཔྤནྣནྟི ‘‘ཨིདཱནི མེ སཀྐཱཡཔྤབནྡྷོ ནཏྠཱི’’ཏི ཝཱིམཾསནྟསྶ ཨུཔྤནྣཾ.

ནིསྶཱརཎཱིཡསུཏྟཝཎྞནཱ ནིཊྛིཏཱ.

༢༠༡-༤. པཉྩམསྶ ¶ ¶ པཋམདུཏིཡཱནི ཨུཏྟཱནཏྠཱནེཝ. ཏཏིཡེ ཨདྷིཝཱསནཾ ཁམནཾ, པརེསཾ དུཀྐཊཾ དུརུཏྟཉྩ པཊིཝིརོདྷཱཀརཎེན ཨཏྟནོ ཨུཔརི ཨཱརོཔེཏྭཱ ཝཱསནཾ ཨདྷིཝཱསནཾ, ཏདེཝ ཁནྟཱིཏི ཨདྷིཝཱསནཀྑནྟི. སུབྷེ རཏོཏི སཱུརཏོ, སུཊྛུ ཝཱ པཱཔཏོ ཨོརཏོ ཝིརཏོ སོརཏོ, ཏསྶ བྷཱཝོ སོརཙྩཾ. ཏེནཱཧ ‘‘སོརཙྩེནཱཏི སུཙིསཱིལཏཱཡཱ’’ཏི. སཱ ཧི སོབྷནཀམྨརཏཏཱ, སུཊྛུ ཝཱ པཱཔཏོ ཨོརཏབྷཱཝོ ཝིརཏཏཱ. ཙཏུཏྠེ ནཏྠི ཝཏྟབྦཾ.

༢༠༥. པཉྩམེ ཙེཏོཁིལཱ ནཱམ ཨཏྠཏོ ཝིཙིཀིཙྪཱ ཀོདྷོ ཙ. ཏེ པན ཡསྨིཾ སནྟཱནེ ཨུཔྤཛྫནྟི, ཏསྶ ཁརབྷཱཝོ ཀཀྑལ༹བྷཱཝོ ཧུཏྭཱ ཨུཔཏིཊྛནྟི, པགེཝ ཨཏྟནཱ སམྤཡུཏྟཙིཏྟསྶཱཏི ཨཱཧ ‘‘ཙིཏྟསྶ ཐདྡྷབྷཱཝཱ’’ཏི. ཡཐཱ ལཀྑཎཔཱརིཔཱུརིཡཱ གཧིཏཱཡ སབྦཱ སཏྠུ རཱུཔཀཱཡསིརཱི གཧིཏཱ ཨེཝ ནཱམ ཧོཏི ཨེཝཾ སབྦཉྙུཏཱཡ སབྦདྷམྨཀཱཡསིརཱི གཧིཏཱ ཨེཝ ནཱམ ཧོཏཱིཏི ཏདུབྷཡཝཏྠུཀམེཝ ཀངྑཾ དསྶེནྟོ ‘‘སརཱིརེ ཀངྑམཱནོ’’ཏིཨཱདིམཱཧ. ཝིཙིནནྟོཏི དྷམྨསབྷཱཝཾ ཝཱིམཾསནྟོ. ཀིཙྪཏཱིཏི ཀིལམཏི. ཝིནིཙྪེཏུཾ ན སཀྐོཏཱིཏི སནྣིཊྛཱཏུཾ ན སཀྐོཏི. ཨཱཏཔཏི ཀིལེསེཏི ཨཱཏཔྤཾ, སམྨཱཝཱཡཱམོཏི ཨཱཧ ‘‘ཨཱཏཔྤཱཡཱཏི ཀིལེསསནྟཱཔནཝཱིརིཡཀརཎཏྠཱཡཱ’’ཏི. པུནཔྤུནཾ ཡོགཱཡཱཏི བྷཱཝནཾ པུནཔྤུནཾ ཡུཉྫནཱཡ. སཏཏཀིརིཡཱཡཱཏི བྷཱཝནཱཡ ནིརནྟརཔྤཡོགཱཡ.

པཊིཝེདྷདྷམྨེ ཀངྑམཱནོཏི ཨེཏྠ ཀཐཾ ལོཀུཏྟརདྷམྨེ ཀངྑཱ པཝཏྟཱིཏི? ན ཨཱརམྨཎཀརཎཝསེན ¶ , ཨནུསྶུཏཱཀཱརཔརིཝིཏཀྐལདྡྷེ པརིཀཔྤིཏརཱུཔེ ཀངྑཱ ¶ པཝཏྟཏཱིཏི དསྶེནྟོ ཨཱཧ ‘‘ཝིཔསྶནཱ…པེ… ཝདནྟི, ཏཾ ཨཏྠི ནུ ཁོ ནཏྠཱིཏི ཀངྑཏཱི’’ཏི. སིཀྑཱཏི ཙེཏྠ པུབྦབྷཱགསིཀྑཱ ཝེདིཏབྦཱ. ཀཱམཉྩེཏྠ ཝིསེསུཔྤཏྟིཡཱ མཧཱསཱཝཛྫཏཱཡ ཙེཝ སཾཝཱསནིམིཏྟཾ གྷཊནཱཧེཏུ ཨབྷིཎྷུཔྤཏྟིཀཏཱཡ ཙ སབྲཧྨཙཱརཱིསཱུཏི ཀོཔསྶ ཝིསཡོ ཝིསེསེཏྭཱ ཝུཏྟོ, ཨཉྙཏྠཱཔི ཀོཔོ ན ཙེཏོཁིལོཏི ན སཀྐཱ ཝིཉྙཱཏུནྟི ཀེཙི. ཡདི ཨེཝཾ ཝིཙིཀིཙྪཱཡཔི ཨཡཾ ནཡོ ཨཱཔཛྫཏི, ཏསྨཱ ཡཐཱརུཏཝསེན གཧེཏབྦཾ.

༢༠༦-༨. ཚཊྛེ པཝཏྟིཏུཾ ཨཔྤདཱནཝསེན ཀུསལཙིཏྟཾ ཝིནིབནྡྷནྟཱིཏི ཙེཏསོཝིནིབནྡྷཱ. ཏཾ པན ཝིནིབནྡྷནྟཱ མུཊྛིགྒཱཧཾ གཎྷནྟཱ ཝིཡ ཧོནྟཱིཏི ཨཱཧ ‘‘ཙིཏྟཾ ཝིནིབནྡྷིཏྭཱ’’ཏིཨཱདི. ཀཱམགིདྡྷོ པུགྒལོ ཝཏྠུཀཱམེཔི ཀིལེསཀཱམེཔི ཨསྶཱདེཏི ཨབྷིནནྡཏཱིཏི ཝུཏྟཾ ‘‘ཝཏྠུཀཱམེཔི ཀིལེསཀཱམེཔཱི’’ཏི. ཨཏྟནོ ཀཱཡེཏི ཨཏྟནོ ནཱམཀཱཡེ, ཨཏྟབྷཱཝེ ཝཱ. བཧིདྡྷཱརཱུཔེཏི པརེསཾ ཀཱཡེ ཨནིནྡྲིཡབདྡྷརཱུཔེ ཙ. ཨུདརཾ ཨཝདིཧཏི ཨུཔཙིནོཏི པཱུརེཏཱིཏི ཨུདརཱཝདེཧཀཾ. སེཡྻསུཁནྟི སེཡྻཱཡ སཡནཝསེན ཨུཔྤཛྫནཀསུཁཾ. སམྤརིཝཏྟཀནྟི སམྤརིཝཏྟིཏྭཱ. པཎིདྷཱཡཱཏི ཏཎྷཱཝསེནེཝ པཎིདཧིཏྭཱ. ཨིཏི པཉྩཝིདྷོཔི ལོབྷཝིསེསོ ཨེཝ ‘‘ཙེཏོཝིནིབནྡྷོ’’ཏི ཝུཏྟོཏི ཝེདིཏབྦོ. སཏྟམཊྛམེསུ ནཏྠི ཝཏྟབྦཾ.

ཝིནིབནྡྷསུཏྟཱདིཝཎྞནཱ ནིཊྛིཏཱ.

༢༠༩-༢༡༠. ནཝམེ ཨཱཡཏཀོ ནཱམ གཱིཏསྶརོ ཏཾ ཏཾ ཝཏྟཾ བྷིནྡིཏྭཱ ཨཀྑརཱནི ཝིནཱསེཏྭཱ པཝཏྟོཏི ཨཱཧ ‘‘ཨཱཡཏཀེནཱ’’ཏིཨཱདི. དྷམྨེཧི སུཏྟཝཏྟཾ ནཱམ ཨཏྠི, གཱཐཱཝཏྟཾ ནཱམ ཨཏྠི, ཏཾ ཝིནཱསེཏྭཱ ཨཏིདཱིགྷཾ ཀཱཏུཾ ན ཝཊྚཏི. དྷམྨཉྷི བྷཱསནྟེན ཙཏུརསྶེན ཝཏྟེན པརིམཎྜལཱནི ¶ པདབྱཉྫནཱནི དསྶེཏབྦཱནི. ‘‘ཨནུཛཱནཱམི, བྷིཀྑཝེ, སརབྷཉྙ’’ནྟི (ཙཱུལ༹ཝ. ༢༤༩) ཙ ཝཙནཏོ སརེན དྷམྨཾ བྷཎིཏུཾ ཝཊྚཏི. སརབྷཉྙེ ཀིར ཏརངྒཝཏྟདྷོཏཀཝཏྟབྷཱགགྒཧཀཝཏྟཱདཱིནི ¶ དྭཏྟིཾས ཝཏྟཱནི ཨཏྠི. ཏེསུ ཡཾ ཨིཙྪཏི, ཏཾ ཀཱཏུཾ ལབྷཏཱིཏི. དསམེ ནཏྠི ཝཏྟབྦཾ.

གཱིཏསྶརསུཏྟཱདིཝཎྞནཱ ནིཊྛིཏཱ.

༢༡༡-༢. དུཏིཡསྶ པཋམེ དསཧི ཨཀྐོསཝཏྠཱུཧི ཨཀྐོསཀོཏི ‘‘བཱལོསི, མཱུལ༹ྷོསི, ཨོཊྛོསི, གོཎོསི, གདྲབྷོསཱི’’ཏིཨཱདིནཱ དསཧི ཨཀྐོསཝཏྠཱུཧི ཨཀྐོསཀོ. ‘‘ཧོཏུ, མུཎྜཀསམཎ, ཨདཎྜོ ཨཧནྟི ཀརོསི, ཨིདཱནི ཏེ རཱཛཀུལཾ གནྟྭཱ དཎྜཾ ཨཱརོཔེསྶཱམཱི’’ཏིཨཱདཱིནི ཝདནྟོ པརིབྷཱསཀོ ནཱམཱཏི ཨཱཧ ‘‘བྷཡདསྶནེན པརིབྷཱསཀོ’’ཏི. ལོཀུཏྟརདྷམྨཱ ཨཔཱཡམགྒསྶ པརིཔནྠབྷཱཝཏོ པརིཔནྠོ ནཱམཱཏི ཨཱཧ ‘‘ལོཀུཏྟརཔརིཔནྠསྶ ཚིནྣཏྟཱ’’ཏི, ལོཀུཏྟརསངྑཱཏསྶ ཨཔཱཡམགྒཔརིཔནྠསྶ ཚིནྣཏྟཱཏི ཨཏྠོ. དུཏིཡེ ནཏྠི ཝཏྟབྦཾ.

༢༡༣-༢༢༠. ཏཏིཡེ (དཱི. ནི. ཊཱི. ༢.༡༤༩) དུསྶཱིལོཏི ཨེཏྠ དུ-སདྡོ ཨབྷཱཝཏྠོ ‘‘དུཔྤཉྙོ’’ཏིཨཱདཱིསུ (མ. ནི. ༡.༤༤༩) ཝིཡ, ན གརཧཎཏྠོཏི ཨཱཧ ‘‘ཨསཱིལོ ནིསྶཱིལོ’’ཏི. བྷིནྣསཾཝརོཏི ཨེཏྠ སམཱདིནྣསཱིལོ ཀེནཙི ཀཱརཎེན སཱིལབྷེདཾ པཏྟོ, སོ ཏཱཝ བྷིནྣསཾཝརོ ཧོཏུ. ཡོ པན སབྦེན སབྦཾ ཨསམཱདིནྣསཱིལོ ཨཱཙཱརཧཱིནོ, སོ ཀཐཾ བྷིནྣསཾཝརོ ནཱམ ཧོཏཱིཏི ¶ ? སོཔི སཱདྷུསམཱཙཱརསྶ པརིཧརཎཱིཡསྶ བྷེདིཏཏྟཱ བྷིནྣསཾཝརོ ཨེཝ ནཱམ. ཝིནཊྛསཾཝརོ སཾཝརརཧིཏོཏི ཧི ཝུཏྟཾ ཧོཏི. ཏཾ ཏཾ སིཔྤཊྛཱནཾ. མཱགྷཱཏཀཱལེཏི ‘‘མཱ གྷཱཏེཐ པཱཎཱིན’’ནྟི ¶ ཨེཝཾ མཱགྷཱཏགྷོསནཾ གྷོསིཏདིཝསེ. ཨབྦྷུགྒཙྪཏི པཱཔཀོ ཀིཏྟིསདྡོ. ཨཛ྄ཛྷཱསཡེན མངྐུ ཧོཏིཡེཝ ཝིཔྤཊིསཱརིབྷཱཝཏོ.

ཏསྶཱཏི དུསྶཱིལསྶ. སམཱདཱཡ ཝཏྟིཏཊྛཱནནྟི ཨུཊྛཱཡ སམུཊྛཱཡ ཀཏཀཱརཎཾ. ཨཱཔཱཐཾ ཨཱགཙྪཏཱིཏི ཏཾ མནསོ ཨུཔཊྛཱཏི. ཨུམྨཱིལེཏྭཱ ཨིདྷལོཀནྟི ཨུམྨཱིལནཀཱལེ ཨཏྟནོ པུཏྟདཱརཱདིཝསེན ཨིདྷལོཀཾ པསྶཏི. ནིམཱིལེཏྭཱ པརལོཀནྟི ནིམཱིལནཀཱལེ གཏིནིམིཏྟུཔཊྛཱནཝསེན པརལོཀཾ པསྶཏི. ཏེནཱཧ ‘‘ཙཏྟཱརོ ཨཔཱཡཱ’’ཏིཨཱདི. པཉྩམཔདནྟི ‘‘ཀཱཡསྶ བྷེདཱ’’ཏིཨཱདིནཱ ཝུཏྟོ པཉྩམོ ཨཱདཱིནཝཀོཊྛཱསོ. ཝུཏྟཝིཔརིཡཱཡེནཱཏི ཝུཏྟཏྠཱཡ ཨཱདཱིནཝཀཐཱཡ ཝིཔརིཡཱཡེན ‘‘ཨཔྤམཏྟོ ཏཾ ཏཾ ཀསིཝཎིཛྫཱདིཾ ཡཐཱཀཱལཾ སམྤཱདེཏུཾ སཀྐོཏཱི’’ཏིཨཱདིནཱ. པཱསཾསཾ སཱིལམསྶ ཨཏྠཱིཏི སཱིལཝཱ. སཱིལསམྤནྣོཏི སཱིལེན སམནྣཱགཏོ སམྤནྣསཱིལོཏི ཨེཝམཱདིཀཾ པན ཨཏྠཝཙནཾ སུཀརནྟི ཨནཱམཊྛཾ. ཙཏུཏྠཱདཱིནི ཨུཏྟཱནཏྠཱནེཝ.

༡-༡༠. པཋམདཱིགྷཙཱརིཀསུཏྟཱདིཝཎྞནཱ

༢༢༡-༢༣༠. ཏཏིཡསྶ པཋམཱདཱིནི སུཝིཉྙེཡྻཱནི. པཉྩམེ རཧོ ནིསཛྫཱཡ ཨཱཔཛྫཏཱིཏི ‘‘ཡོ པན བྷིཀྑུ མཱཏུགཱམེན སདྡྷིཾ ཨེཀོ ཨེཀཱཡ རཧོ ནིསཛྫཾ ཀཔྤེཡྻ, པཱཙིཏྟིཡ’’ནྟི ཨིམསྨིཾ སིཀྑཱཔདེ (པཱཙི. ༢༩༠) ཝུཏྟཾ ཨཱཔཏྟིཾ ཨཱཔཛྫཏི. པཊིཙྪནྣེ ཨཱསནེ ཨཱཔཛྫཏཱིཏི ‘‘ཡོ པན བྷིཀྑུ མཱཏུགཱམེན རཧོ པཊིཙྪནྣེ ཨཱསནེ ནིསཛྫཾ ཀཔྤེཡྻ, པཱཙིཏྟིཡ’’ནྟི ཨིམསྨིཾ ཝུཏྟཾ ཨཱཔཏྟིཾ ཨཱཔཛྫཏི. མཱཏུགཱམསྶ ཨུཏྟརི ཚཔྤཉྩཝཱཙཱཧི དྷམྨཾ དེསེནྟོ ¶ ཨཱཔཛྫཏཱིཏི ‘ཡོ པན བྷིཀྑུ མཱཏུགཱམསྶ ཨུཏྟརི ཚཔྤཉྩཝཱཙཱཧི དྷམྨཾ དེསེཡྻ ཨཉྙཏྲ ¶ ཝིཉྙུནཱ པུརིསཝིགྒཧེནཱ’’ཏི (པཱཙི. ༦༣) ཨེཝཾ ཝུཏྟཾ ཨཱཔཏྟིཾ ཨཱཔཛྫཏི. ཏེནཱཧ ‘‘ཏེསཾ ཏེསཾ སིཀྑཱཔདཱནཾ ཝསེན ཝེདིཏབྦཱནཱི’’ཏི. ཚཊྛཱདཱིནི ཨུཏྟཱནཏྠཱནི.

པཋམདཱིགྷཙཱརིཀསུཏྟཱདིཝཎྞནཱ ནིཊྛིཏཱ.

༢༣༡-༣༠༢. ཙཏུཏྠཝགྒཱདཱིནི ཨུཏྟཱནཏྠཱནི.

ཨིཏི མནོརཐཔཱུརཎིཡཱ ཨངྒུཏྟརནིཀཱཡ-ཨཊྛཀཐཱཡ

པཉྩཀནིཔཱཏཝཎྞནཱཡ ཨནུཏྟཱནཏྠདཱིཔནཱ སམཏྟཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ.

༡. ཚཀྐནིཔཱཏསྶ ¶ ¶ པཋམེ ཙཀྑུནཱ རཱུཔཾ དིསྭཱཏི ནིསྶཡཝོཧཱརེན ཝུཏྟཾ. སསམྦྷཱརཀནིདྡེསོཡཾ ཡཐཱ ‘‘དྷནུནཱ ཝིཛ྄ཛྷཏཱི’’ཏི, ཏསྨཱ ནིསྶཡསཱིསེན ནིསྶིཏསྶ གཧཎཾ དཊྛབྦཾ. ཏེནཱཡམཏྠོ ‘‘ཙཀྑུདྭཱརེ རཱུཔཱརམྨཎེ ཨཱཔཱཐགཏེ ཏཾ རཱུཔཾ ཙཀྑུཝིཉྙཱཎེན དིསྭཱ’’ཏི. ནེཝ སུམནོ ཧོཏཱིཏི ཛཝནཀྑཎེ ཨིཊྛེ ཨཱརམྨཎེ རཱགཾ ཨནུཔྤཱདེནྟོ ནེཝ སུམནོ ཧོཏི གེཧསྶིཏཔེམཝསེནཔི མགྒེན སབྦསོ རཱགསྶ སམུཙྪིནྣཏྟཱ. ན དུམྨནོཏི ཨནིཊྛེ ཨདུསྶནྟོ ན དུམྨནོ. པསཱདཉྙཐཏྟཝསེནཔི ཨིཊྛེཔི ཨནིཊྛེཔི མཛ྄ཛྷཏྟེཔི ཨཱརམྨཎེ ན སམཾ སམྨཱ ཨཡོནིསོ གཧཎཾ ཨསམཔེཀྑནཾ. ཨཡཉྩསྶ པཊིཔཏྟི སཏིཝེཔུལླཔྤཏྟིཡཱ པཉྙཱཝེཔུལླཔྤཏྟིཡཱ ¶ ཙཱཏི ཨཱཧ ‘‘སཏོ སམྤཛཱནོ ཧུཏྭཱ’’ཏི. སཏིཡཱ ཡུཏྟཏྟཱ སཏོ. སམྤཛཉྙེན ཡུཏྟཏྟཱ སམྤཛཱནོ. ཉཱཎུཔྤཏྟིཔཙྩཡརཧིཏཀཱལེཔི པཝཏྟིབྷེདནཏོ ‘‘སཏཏཝིཧཱརོ ཀཐིཏོ’’ཏི ཝུཏྟཾ. སཏཏཝིཧཱརོཏི ཁཱིཎཱསཝསྶ ནིཙྩཝིཧཱརོ སབྦདཱ པཝཏྟནཀཝིཧཱརོ. ཋཔེཏྭཱ ཧི སམཱཔཏྟིཝེལཾ བྷཝངྒཝེལཉྩ ཁཱིཎཱསཝཱ ཨིམིནཱཝ ཚལ༹ངྒུཔེཀྑཱཝིཧཱརེན ཝིཧརནྟི.

ཨེཏྠ ཙ ‘‘ཚསུ དྭཱརེསུཔི ཨུཔེཀྑཀོ ཝིཧརཏཱི’’ཏི ཨིམིནཱ ཚལ༹ངྒུཔེཀྑཱ ཀཐིཏཱ. ‘‘སམྤཛཱནོ’’ཏི ཝཙནཏོ པན ཙཏྟཱརི ཉཱཎསམྤཡུཏྟཙིཏྟཱནི ལབྦྷནྟི ཏེཧི ཝིནཱ སམྤཛཱནཏཱཡ ཨསམྦྷཝཏོ. སཏཏཝིཧཱརབྷཱཝཏོ ཨཊྛ མཧཱཀིརིཡཙིཏྟཱནི ལབྦྷནྟི. ‘‘ནེཝ སུམནོ ན དུམྨནོ’’ཏི ཝཙནཏོ ཨཊྛ མཧཱཀིརིཡཙིཏྟཱནི, ཧསིཏུཔྤཱདོ, ཝོཊྛབྦནཉྩཱཏི དས ཙིཏྟཱནི ལབྦྷནྟི. རཱགདོསསཧཛཱཏཱནཾ སོམནསྶདོམནསྶཱནཾ ཨབྷཱཝོ ཏེསམྤི སཱདྷཱརཎོཏི ཚལ༹ངྒུཔེཀྑཱཝསེན ཨཱགཏཱནཾ ཨིམེསཾ སཏཏཝིཧཱརཱནཾ སོམནསྶཾ ཀཐཾ ལབྦྷཏཱིཏི ཙེ? ཨཱསེཝནཏོ. ཀིཉྩཱཔི ¶ ཁཱིཎཱསཝོ ཨིཊྛཱནིཊྛེཔི ཨཱརམྨཎེ མཛ྄ཛྷཏྟོ ཝིཡ བཧུལཾ ཨུཔེཀྑཀོ ཝིཧརཏི ཨཏྟནོ པརིསུདྡྷཔཀཏིབྷཱཝཱཝིཛཧནཏོ, ཀདཱཙི པན ཏཐཱ ཙེཏོབྷིསངྑཱརཱབྷཱཝེ ཡཾ ཏཾ སབྷཱཝཏོ ཨིཊྛཾ ཨཱརམྨཎཾ, ཏསྶ ཡཱཐཱཝསབྷཱཝགྒཧཎཝསེནཔི ཨརཧཏོ ཙིཏྟཾ པུབྦཱསེཝནཝསེན སོམནསྶསཧགཏཾ ཧུཏྭཱ པཝཏྟཏེཝ.

པཋམཨཱཧུནེཡྻསུཏྟཝཎྞནཱ ནིཊྛིཏཱ.

༢-༧. དུཏིཡཨཱཧུནེཡྻསུཏྟཱདིཝཎྞནཱ

༢-༧. དུཏིཡེ (ཝིསུདྡྷི. ༢.༣༨༠) ཨནེཀཝིཧིཏནྟི ཨནེཀཝིདྷཾ ནཱནཔྤཀཱརཾ. ཨིདྡྷིཝིདྷནྟི ཨིདྡྷིཀོཊྛཱསཾ. པཙྩནུབྷོཏཱིཏི པཙྩནུབྷཝཏི, ཕུསཏི སཙྪིཀརོཏི པཱཔུཎཱཏཱིཏི ཨཏྠོ. ཨིདཱནིསྶ ཨནེཀཝིཧིཏབྷཱཝཾ དསྶེནྟོ ‘‘ཨེཀོཔི ཧུཏྭཱ’’ཏིཨཱདིམཱཧ. ཏཏྠ ‘‘ཨེཀོཔི ཧུཏྭཱ’’ཏི ཨིམིནཱ ཀརཎཏོ པུབྦེཝ པཀཏིཡཱ ཨེཀོཔི ཧུཏྭཱ. བཧུདྷཱ ཧོཏཱིཏི བཧཱུནཾ སནྟིཀེ ཙངྐམིཏུཀཱམོ ཝཱ སཛ྄ཛྷཱཡཾ ཀཱཏུཀཱམོ ཝཱ པཉྷཾ པུཙྪིཏུཀཱམོ ཝཱ ཧུཏྭཱ སཏམྤི སཧསྶམྤི ཧོཏི. ཨཱཝིབྷཱཝཾ ཏིརོབྷཱཝནྟི ཨེཏྠ ཨཱཝིབྷཱཝཾ ཀརོཏི, ཏིརོབྷཱཝཾ ཀརོཏཱིཏི ཨཡམཏྠོ. ཨིདམེཝ ཧི སནྡྷཱཡ པཊིསམྦྷིདཱཡཾ (པཊི. མ. ༣.༡༡) ཝུཏྟཾ – ‘‘ཨཱཝིབྷཱཝནྟི ཀེནཙི ཨནཱཝུཊཾ ཧོཏི ཨཔྤཊིཙྪནྣཾ ཝིཝཊཾ, ཏིརོབྷཱཝནྟི ཀེནཙི ཨཱཝུཊཾ ཧོཏི པཊིཙྪནྣཾ པིཧིཏཾ པཊིཀུཛྫིཏ’’ནྟི. ཏིརོཀུཊྚཾ ཏིརོཔཱཀཱརཾ ཏིརོཔབྦཏཾ ཨསཛྫམཱནོ གཙྪཏི སེཡྻཐཱཔི ཨཱཀཱསེཏི ཨེཏྠ ཏིརོཀུཊྚནྟི པརཀུཊྚཾ, ཀུཊྚསྶ པརབྷཱགནྟི ཝུཏྟཾ ཧོཏི. ཨེས ནཡོ ཨིཏརེསུ. ཀུཊྚོཏི ཙ གེཧབྷིཏྟིཡཱ ¶ ཨེཏཾ ཨདྷིཝཙནཾ. པཱཀཱརོཏི གེཧཝིཧཱརགཱམཱདཱིནཾ པརིཀྑེཔཔཱཀཱརོ. པབྦཏོཏི པཾསུཔབྦཏོ ཝཱ པཱསཱཎཔབྦཏོ ཝཱ. ཨསཛྫམཱནོཏི ཨལགྒམཱནོ སེཡྻཐཱཔི ཨཱཀཱསེ ཝིཡ.

ཨུམྨུཛྫནིམུཛྫནྟི ཨེཏྠ ཨུམྨུཛྫནྟི ཨུཊྛཱནཾ ཝུཙྩཏི. ནིམུཛྫནྟི སཾསཱིདནཾ. ཨུམྨུཛྫཉྩ ནིམུཛྫཉྩ ཨུམྨུཛྫནིམུཛྫཾ. ཨུདཀེཔི ཨབྷིཛྫམཱནེཏི ཨེཏྠ ཡཾ ཨུདཀཾ ཨཀྐམིཏྭཱ སཾསཱིདཏི, ཏཾ བྷིཛྫམཱནནྟི ཝུཙྩཏི, ཝིཔརཱིཏཾ ཨབྷིཛྫམཱནཾ. པལླངྐེན གཙྪཏི. པཀྑཱི ¶ སཀུཎོཏི པཀྑེཧི ཡུཏྟསཀུཎོ. ཨིམེཔི ཙནྡིམསཱུརིཡེ ཨེཝཾམཧིདྡྷིཀེ ཨེཝཾམཧཱནུབྷཱཝེ པཱཎིནཱ པརཱམསཏཱིཏི ཨེཏྠ ཙནྡིམསཱུརིཡཱནཾ དྭཱཙཏྟཱལཱིསཡོཛནསཧསྶསྶ ཨུཔརི ཙརཎེན མཧིདྡྷིཀཏཱ, ཏཱིསུ དཱིཔེསུ ཨེཀཀྑཎེ ཨཱལོཀཀརཎེན མཧཱནུབྷཱཝཏཱ ཝེདིཏབྦཱ. ཨེཝཾ ཨུཔརིཙརཎཨཱལོཀཀརཎེཧི མཧིདྡྷིཀེ མཧཱནུབྷཱཝེ. པརཱམསཏཱིཏི གཎྷཱཏི, ཨེཀདེསེ ཝཱ ཚུཔཏི. པརིམཛྫཏཱིཏི སམནྟཏོ ཨཱདཱསཏལཱ ཝིཡ པརིམཛྫཏི. ཡཱཝ བྲཧྨལོཀཱཔཱིཏི བྲཧྨལོཀམྤི པརིཙྪེདཾ ཀཏྭཱ. ཀཱཡེན ཝསཾ ཝཏྟེཏཱིཏི ཏཏྲ བྲཧྨལོཀེ ཀཱཡེན ཨཏྟནོ ཝསཾ ཝཏྟེཏི.

དིབྦཱཡ སོཏདྷཱཏུཡཱཏི ཨེཏྠ དིབྦསདིསཏྟཱ དིབྦཱ. དེཝཏཱནཉྷི སུཙརིཏཀམྨནིབྦཏྟཱ པིཏྟསེམྷརུཧིརཱདཱིཧི ཨཔལིབུདྡྷཱ ཨུཔཀྐིལེསཝིམུཏྟཏཱཡ དཱུརེཔི ཨཱརམྨཎསམྤཊིཙྪནསམཏྠཱ དིབྦཱ པསཱདསོཏདྷཱཏུ ཧོཏི. ཨཡཉྩཱཔི ཨིམསྶ བྷིཀྑུནོ ཝཱིརིཡབྷཱཝནཱབལེན ནིབྦཏྟཱ ཉཱཎསོཏདྷཱཏུ ཏཱདིསཱཡེཝཱཏི དིབྦསདིསཏྟཱ དིབྦཱ. ཨཔིཙ དིབྦཝིཧཱརཝསེན པཊིལདྡྷཏྟཱ ཨཏྟནཱ ཙ དིབྦཝིཧཱརསནྣིསྶིཏཏྟཱཔི དིབྦཱ. སཝནཊྛེན ནིཛྫཱིཝཊྛེན ཙ སོཏདྷཱཏུ. སོཏདྷཱཏུཀིཙྩཀརཎེན སོཏདྷཱཏུ ཝིཡཱཏིཔི སོཏདྷཱཏུ. ཏཱཡ སོཏདྷཱཏུཡཱ. ཝིསུདྡྷཱཡཱཏི སུདྡྷཱཡ ནིརུཔཀྐིལེསཱཡ. ཨཏིཀྐནྟམཱནུསིཀཱཡཱཏི མནུསྶཱུཔཙཱརཾ ཨཏིཀྐམིཏྭཱ སདྡསཝནེ མཱནུསིཀཾ མཾསསོཏདྷཱཏུཾ ཨཏིཀྐནྟཱཡ ཝཱིཏིཝཏྟེཏྭཱ ཋིཏཱཡ. ཨུབྷོ སདྡེ སུཎཱཏཱིཏི དྭེ སདྡེ སུཎཱཏི. ཀཏམེ དྭེ? དིབྦེ ཙ མཱནུསེ ཙ, དེཝཱནཉྩ མནུསྶཱནཉྩ སདྡེཏི ཝུཏྟཾ ཧོཏི. ཨེཏེན པདེསཔརིཡཱདཱནཾ ཝེདིཏབྦཾ. ཡེ དཱུརེ སནྟིཀེ ཙཱཏི ཡེ སདྡཱ དཱུརེ པརཙཀྐཝཱལེ༹པི, ཡེ ཙ སནྟིཀེ ཨནྟམསོ སདེཧསནྣིསྶིཏཔཱཎཀསདྡཱཔི, ཏེ སུཎཱཏཱིཏི ཝུཏྟཾ ཧོཏི. ཨེཏེན ནིཔྤདེསཔརིཡཱདཱནཾ ཝེདིཏབྦཾ.

པརསཏྟཱནནྟི ཨཏྟཱནཾ ཋཔེཏྭཱ སེསསཏྟཱནཾ. པརཔུགྒལཱནནྟི ཨིདམྤི ཨིམིནཱ ཨེཀཏྠམེཝ. ཝེནེཡྻཝསེན པན དེསནཱཝིལཱསེན ཙ བྱཉྫནནཱནཏྟཾ ཀཏཾ. ཙེཏསཱ ཙེཏོཏི ཨཏྟནོ ཙིཏྟེན ཏེསཾ ཙིཏྟཾ. པརིཙྩཱཏི པརིཙྪིནྡིཏྭཱ. པཛཱནཱཏཱིཏི སརཱགཱདིཝསེན ནཱནཔྤཀཱརཏོ ཛཱནཱཏི. སརཱགཾ ཝཱ ཙིཏྟནྟིཨཱདཱིསུ པན ཨཊྛལོབྷསཧགཏཙིཏྟཾ སརཱགཾ ཙིཏྟནྟི ཝེདིཏབྦཾ. ཨཝསེསཾ ཙཱཏུབྷཱུམཀཾ ¶ ཀུསལཱབྱཱཀཏཙིཏྟཾ ཝཱིཏརཱགཾ. དྭེ ¶ དོམནསྶཙིཏྟཱནི, དྭེ ཝིཙིཀིཙྪུདྡྷཙྩཙིཏྟཱནཱིཏི ཨིམཱནི པན ཙཏྟཱརི ཙིཏྟཱནི ཨིམསྨིཾ དུཀེ སངྒཧཾ ན གཙྪནྟི. ཀེཙི པན ཐེརཱ ཏཱནིཔི སངྒཎྷནྟི. དུཝིདྷཾ པན དོམནསྶཙིཏྟཾ སདོསཾ ཙིཏྟཾ ནཱམ. སབྦམྤི ཙཱཏུབྷཱུམཀཾ ཀུསལཱབྱཱཀཏཙིཏྟཾ ཝཱིཏདོསཾ. སེསཱནི དས ཨཀུསལཙིཏྟཱནི ཨིམསྨིཾ དུཀེ སངྒཧཾ ན གཙྪནྟི. ཀེཙི པན ཐེརཱ ཏཱནིཔི སངྒཎྷནྟི. སམོཧཾ ཝཱིཏམོཧནྟི ཨེཏྠ པན པཱཊིཔུགྒལིཀནཡེན ཝིཙིཀིཙྪུདྡྷཙྩསཧགཏདྭཡམེཝ སམོཧཾ. མོཧསྶ པན སབྦཱཀུསལེསུ སམྦྷཝཏོ དྭཱདསཝིདྷམྤི ཨཀུསལཙིཏྟཾ སམོཧཾ ཙིཏྟནྟི ཝེདིཏབྦཾ. ཨཝསེསཾ ཝཱིཏམོཧཾ. ཐིནམིདྡྷཱནུགཏཾ པན སཾཁིཏྟཾ, ཨུདྡྷཙྩཱནུགཏཾ ཝིཀྑིཏྟཾ. རཱུཔཱཝཙརཱརཱུཔཱཝཙརཾ མཧགྒཏཾ, ཨཝསེསཾ ཨམཧགྒཏཾ. སབྦམྤི ཏེབྷཱུམཀཾ སཨུཏྟརཾ, ལོཀུཏྟརཾ ཨནུཏྟརཾ. ཨུཔཙཱརཔྤཏྟཾ ཨཔྤནཱཔྤཏྟཉྩ སམཱཧིཏཾ, ཨུབྷཡམཔྤཏྟཾ ཨསམཱཧིཏཾ. ཏདངྒཝིཀྑམྦྷནསམུཙྪེདཔྤཊིཔྤསྶདྡྷིནིསྶརཎཝིམུཏྟིཾ པཏྟཾ པཉྩཝིདྷམྤི ཨེཏཾ ཝིམུཏྟཾ, ཝིམུཏྟིམཔྤཏྟཾ ཝཱ ཨཝིམུཏྟནྟི ཝེདིཏབྦཾ.

ཨནེཀཝིཧིཏནྟི (པཱརཱ. ཨཊྛ. ༡.༡༢) ཨནེཀཝིདྷཾ, ཨནེཀེཧི ཝཱ པཀཱརེཧི པཝཏྟིཏཾ སཾཝཎྞིཏནྟི ཨཏྠོ. པུབྦེནིཝཱསནྟི སམནནྟརཱཏཱིཏབྷཝཾ ཨཱདིཾ ཀཏྭཱ ཏཏྠ ཏཏྠ ནིཝུཏྠསནྟཱནཾ. ཨནུསྶརཏཱིཏི ཁནྡྷཔཊིཔཱཊིཝསེན, ཙུཏིཔཊིསནྡྷིཝསེན ཝཱ ཨནུགནྟྭཱ ཨནུགནྟྭཱ སརཏི. སེཡྻཐིདཾ – ཨེཀམྤི ཛཱཏིཾ…པེ… པུབྦེནིཝཱསཾ ཨནུསྶརཏཱིཏི. ཏཏྠ ཨེཀམྤི ཛཱཏིནྟི ཨེཀམྤི པཊིསནྡྷིམཱུལཾ ཙུཏིཔརིཡོསཱནཾ ཨེཀབྷཝཔརིཡཱཔནྣཾ ཁནྡྷསནྟཱནཾ. ཨེས ནཡོ དྭེཔི ཛཱཏིཡོཏིཨཱདཱིསུཔི. ཨནེཀེཔི སཾཝཊྚཀཔྤེཏིཨཱདཱིསུ པན པརིཧཱཡམཱནོ ཀཔྤོ སཾཝཊྚཀཔྤོ, ཝཌྜྷམཱནོ ཝིཝཊྚཀཔྤོཏི ཝེདིཏབྦོ. ཏཏྠ སཾཝཊྚེན སཾཝཊྚཊྛཱཡཱི གཧིཏོ ཧོཏི ཏཾམཱུལཀཏྟཱ, ཝིཝཊྚེན ཝིཝཊྚཊྛཱཡཱི. ཨེཝཉྷི སཏི ཡཱནི ཏཱནི ‘‘ཙཏྟཱརིམཱནི, བྷིཀྑཝེ, ཀཔྤསྶ ཨསངྑྱེཡྻཱནི. ཀཏམཱནི ཙཏྟཱརི? སཾཝཊྚོ སཾཝཊྚཊྛཱཡཱི ཝིཝཊྚོ ཝིཝཊྚཊྛཱཡཱི’’ཏི (ཨ. ནི. ༤.༡༥༦) ཝུཏྟཱནི, ཏཱནི པརིགྒཧིཏཱནི ཧོནྟི.

ཨམུཏྲཱསིནྟི ཨམུམྷི སཾཝཊྚཀཔྤེ ཨཧཾ ཨམུམྷི བྷཝེ ཝཱ ཡོནིཡཱ ཝཱ གཧིཡཱ ཝཱ ཝིཉྙཱཎཊྛིཏིཡཱ ཝཱ སཏྟཱཝཱསེ ཝཱ སཏྟནིཀཱཡེ ཝཱ ཨཱསིཾ. ཨེཝཾནཱམོཏི ཏིསྶོ ཝཱ ཕུསྶོ ཝཱ. ཨེཝཾགོཏྟོཏི གོཏམོ ཝཱ ཀཙྩཱཡནོ ཝཱ ཀསྶཔོ ཝཱ. ཨིདམསྶ ཨཏཱིཏབྷཝེ ཨཏྟནོ ནཱམགོཏྟཱནུསྶརཎཝསེན ཝུཏྟཾ. སཙེ པན ཏསྨིཾ ཀཱལེ ཨཏྟནོ ཝཎྞསམྤཏྟིལཱུཁཔཎཱིཏཛཱིཝིཀབྷཱཝཾ ¶ སུཁདུཀྑབཧུལཏཾ ཨཔྤཱཡུཀདཱིགྷཱཡུཀབྷཱཝཾ ཝཱ ཨནུསྶརིཏུཀཱམོ ཧོཏི, ཏམྤི ཨནུསྶརཏིཡེཝ. ཏེནཱཧ ‘‘ཨེཝཾཝཎྞོ…པེ… ཨེཝམཱཡུཔརིཡནྟོ’’ཏི. ཏཏྠ ཨེཝཾཝཎྞོཏི ཨོདཱཏོ ཝཱ སཱམོ ཝཱ. ཨེཝམཱཧཱརོཏི སཱལིམཾསོདནཱཧཱརོ ཝཱ པཝཏྟཕལབྷོཛནོ ཝཱ. ཨེཝཾསུཁདུཀྑཔྤཊིསཾཝེདཱིཏི ¶ ཨནེན པཀཱརེན ཀཱཡིཀཙེཏསིཀཱནཾ སཱམིསནིརཱམིསཱདིཔྤབྷེདཱནཾ སུཁདུཀྑཱནཾ པཊིསཾཝེདཱི. ཨེཝམཱཡུཔརིཡནྟོཏི ཨེཝཾ ཝསྶསཏཔརིམཱཎཱཡུཔརིཡནྟོ ཝཱ ཙཏུརཱསཱིཏིཀཔྤསཧསྶཱཡུཔརིཡནྟོ ཝཱ. སོ ཏཏོ ཙུཏོ ཨམུཏྲ ཨུདཔཱདིནྟི སོ ཨཧཾ ཏཏོ བྷཝཏོ ཡོནིཏོ གཧིཏོ ཝིཉྙཱཎཊྛིཏིཏོ སཏྟཱཝཱསཏོ སཏྟནིཀཱཡཏོ ཝཱ ཙུཏོ པུནཨམུཀསྨིཾ ནཱམ བྷཝེ ཡོནིཡཱ གཏིཡཱ ཝིཉྙཱཎཊྛིཏིཡཱ སཏྟཱཝཱསེ སཀྐནིཀཱཡེ ཝཱ ཨུདཔཱདིཾ. ཏཏྲཱཔཱསིནྟི ཏཏྲཱཔི བྷཝེ ཡོནིཡཱ གཏིཡཱ ཝིཉྙཱཎཊྛིཏིཡཱ སཏྟཱཝཱསེ སཏྟནིཀཱཡེ ཝཱ པུན ཨཧོསིཾ. ཨེཝཾནཱམོཏིཨཱདི ཝུཏྟནཡམེཝ.

ཨཔིཙ ཨམུཏྲཱསིནྟི ཨིདཾ ཨནུཔུབྦེན ཨཱརོཧནྟསྶ ཡཱཝདིཙྪཀཾ ཨནུསྶརཎཾ. སོ ཏཏོཏི པཊིནིཝཏྟནྟསྶ པཙྩཝེཀྑཎཾ, ཏསྨཱ ‘‘ཨིདྷཱུཔཔནྣོ’’ཏི ཨིམིསྶཱ ཨིདྷཱུཔཔཏྟིཡཱ ཨནནྟརམེཝ ཨུཔྤཏྟིཊྛཱནཾ སནྡྷཱཡ ‘‘ཨམུཏྲ ཨུདཔཱདི’’ནྟི ཨིདཾ ཝུཏྟནྟི ཝེདིཏབྦཾ. ཏཏྲཱཔཱསིནྟི ཨེཝམཱདི པནསྶ ཏཏྲཱཔི ཨིམིསྶཱ ཨུཔཔཏྟིཡཱ ཨནྟརེ ཨུཔཔཏྟིཊྛཱནེ ནཱམགོཏྟཱདཱིནཾ ཨནུསྶརཎདསྶནཏྠཾ ཝུཏྟཾ. སོ ཏཏོ ཙུཏོ ཨིདྷཱུཔཔནྣོཏི སྭཱཧཾ ཏཏོ ཨནནྟརུཔྤཏྟིཊྛཱནཏོ ཙུཏོ ཨིདྷ ཨམུཀསྨིཾ ནཱམ ཁཏྟིཡཀུལེ ཝཱ བྲཱཧྨཎཀུལེ ཝཱ ནིབྦཏྟོཏི. ཨིཏཱིཏི ཨེཝཾ. སཱཀཱརཾ སཨུདྡེསནྟི ནཱམགོཏྟཝསེན སཨུདྡེསཾ, ཝཎྞཱདིཝསེན སཱཀཱརཾ. ནཱམགོཏྟེན ཧི སཏྟོ ‘‘ཏིསྶོ ཀསྶཔོ’’ཏི ཨུདྡིསཱིཡཏི, ཝཎྞཱདཱིཧི ‘‘སཱམོ ཨོདཱཏོ’’ཏི ནཱནཏྟཏོ པཉྙཱཡཏི, ཏསྨཱ ནཱམགོཏྟཾ ཨུདྡེསོ, ཨིཏརེ ཨཱཀཱརཱ.

དིབྦེནཱཏིཨཱདཱིསུ དིབྦསདིསཏྟཱ དིབྦཾ. དེཝཏཱནཉྷི སུཙརིཏཀམྨནིབྦཏྟཾ པིཏྟསེམྷརུཧིརཱདཱིཧི ཨཔལིབུདྡྷཾ ཨུཔཀྐིལེསཝིམུཏྟཏཱཡ དཱུརེཔི ཨཱརམྨཎསམྤཊིཙྪནསམཏྠཾ དིབྦཾ པསཱདཙཀྑུ ཧོཏི. ཨིདཉྩཱཔི ཝཱིརིཡབྷཱཝནཱབལེན ནིབྦཏྟཾ ཉཱཎཙཀྑུ ཏཱདིསམེཝཱཏི དིབྦསདིསཏྟཱ དིབྦཾ. དིབྦཝིཧཱརཝསེན པཊིལདྡྷཏྟཱ ཨཏྟནོ ཙ དིབྦཝིཧཱརསནྣིསྶིཏཏྟཱཔི དིབྦཾ. ཨཱལོཀཔརིགྒཧེན མཧཱཛུཏིཀཏྟཱཔི ¶ དིབྦཾ. ཏིརོཀུཊྚཱདིགཏརཱུཔདསྶནེན མཧཱགཏིཀཏྟཱཔི དིབྦཾ. ཏཾ སབྦཾ སདྡསཏྠཱནུསཱརེན ཝེདིཏབྦཾ. དསྶནཊྛེན ཙཀྑུ. ཙཀྑུཀིཙྩཀརཎེན ཙཀྑུམིཝཱཏིཔི ཙཀྑུ. ཙུཏཱུཔཔཱཏདསྶནེན དིཊྛིཝིསུདྡྷིཧེཏུཏྟཱ ཝིསུདྡྷཾ. ཡོ ཧི ཙུཏིམེཝ པསྶཏི, ན ཨུཔཔཱཏཾ, སོ ཨུཙྪེདདིཊྛིཾ གཎྷཱཏི. ཡོ ཨུཔཔཱཏམེཝ པསྶཏི, ན ཙུཏིཾ, སོ ནཝསཏྟཔཱཏུབྷཱཝདིཊྛིཾ གཎྷཱཏི. ཡོ པན ཏདུབྷཡཾ པསྶཏི, སོ ཡསྨཱ དུཝིདྷམྤི ཏཾ དིཊྛིགཏཾ ཨཏིཝཏྟཏི, ཏསྨཱ ཏཾ དསྶནཾ དིཊྛིཝིསུདྡྷིཧེཏུ ཧོཏི. ཨུབྷཡམྤི ཙེཏཾ བུདྡྷཔུཏྟཱ པསྶནྟི. ཏེན ཝུཏྟཾ ‘‘ཙུཏཱུཔཔཱཏདསྶནེན དིཊྛིཝིསུདྡྷིཧེཏུཏྟཱ ཝིསུདྡྷ’’ནྟི. མནུསྶཱུཔཙཱརཾ ཨཏིཀྐམིཏྭཱ རཱུཔདསྶནེན ཨཏིཀྐནྟམཱནུསཀཾ, མཱནུསཾ ཝཱ མཾསཙཀྑུཾ ཨཏིཀྐནྟཏྟཱ ¶ ཨཏིཀྐནྟམཱནུསཀནྟི ཝེདིཏབྦཾ. ཏེན དིབྦེན ཙཀྑུནཱ ཝིསུདྡྷེན ཨཏིཀྐནྟམཱནུསཀེན.

སཏྟེ པསྶཏཱིཏི མནུསྶཱནཾ མཾསཙཀྑུནཱ ཝིཡ སཏྟེ ཨོལོཀེཏི. ཙཝམཱནེ ཨུཔཔཛྫམཱནེཏི ཨེཏྠ ཙུཏིཀྑཎེ ཝཱ ཨུཔཔཏྟིཀྑཎེ ཝཱ དིབྦཙཀྑུནཱ དཊྛུཾ ན སཀྐཱ. ཡེ པན ཨཱསནྣཙུཏིཀཱ ཨིདཱནི ཙཝིསྶནྟི, ཏེ ཙཝམཱནཱཏི, ཡེ ཙ གཧིཏཔྤཊིསནྡྷིཀཱ སམྤཏིནིབྦཏྟཱ ཙ, ཏེ ཨུཔཔཛྫམཱནཱཏི ཨདྷིཔྤེཏཱ. ཏེ ཨེཝརཱུཔེ ཙཝམཱནེ ཨུཔཔཛྫམཱནེ ཙ པསྶཏཱིཏི དསྶེཏི. ཧཱིནེཏི མོཧནིསྶནྡཡུཏྟཏྟཱ ཧཱིནཱནཾ ཛཱཏིཀུལབྷོགཱདཱིནཾ ཝསེན ཧཱིལི༹ཏེ ཨུཉྙཱཏེ. པཎཱིཏེཏི ཨམོཧནིསྶནྡཡུཏྟཏྟཱ ཏབྦིཔརཱིཏེ. སུཝཎྞེཏི ཨདོསནིསྶནྡཡུཏྟཏྟཱ ཨིཊྛཀནྟམནཱཔཝཎྞཡུཏྟེ. དུབྦཎྞེཏི དོསནིསྶནྡཡུཏྟཏྟཱ ཨནིཊྛཱཀནྟཱམནཱཔཝཎྞཡུཏྟེ, ཝིརཱུཔཝིརཱུཔེཏིཔི ཨཏྠོ. སུགཏེཏི སུགཏིགཏེ, ཨལོབྷནིསྶནྡཡུཏྟཏྟཱ ཝཱ ཨཌྜྷེ མཧདྡྷནེ. དུགྒཏེཏི དུགྒཏིགཏེ, ལོབྷནིསྶནྡཡུཏྟཏྟཱ ཝཱ དལིདྡེ ཨཔྤནྣཔཱནེ.

ཡཐཱཀམྨཱུཔགེཏི ཡཾ ཡཾ ཀམྨཾ ཨུཔཙིཏཾ, ཏེན ཏེན ཨུཔགཏེ. ཀཱཡདུཙྩརིཏེནཱཏིཨཱདཱིསུ དུཊྛུ ཙརིཏཾ ཀིལེསཔཱུཏིཀཏྟཱཏི དུཙྩརིཏཾ. ཀཱཡེན དུཙྩརིཏཾ, ཀཱཡཏོ ཝཱ ཨུཔྤནྣཾ དུཙྩརིཏནྟི ཀཱཡདུཙྩརིཏཾ. ཨིཏརེསུཔི ཨེསེཝ ནཡོ. སམནྣཱགཏཱཏི སམངྒིབྷཱུཏཱ. ཨརིཡཱནཾ ཨུཔཝཱདཀཱཏི བུདྡྷཔཙྩེཀབུདྡྷསཱཝཀཱནཾ ཨརིཡཱནཾ ཨནྟམསོ གིཧིསོཏཱཔནྣཱནམྤི ཨནཏྠཀཱམཱ ཧུཏྭཱ ཨནྟིམཝཏྠུནཱ ཝཱ གུཎཔརིདྷཾསནེན ཝཱ ཨུཔཝཱདཀཱ, ཨཀྐོསཀཱ གརཧཀཱཏི ཝུཏྟཾ ཧོཏི. མིཙྪཱདིཊྛིཀཱཏི ཝིཔརཱིཏདསྶནཱ ¶ . མིཙྪཱདིཊྛིཀམྨསམཱདཱནཱཏི མིཙྪཱདིཊྛིཝསེན སམཱདིནྣནཱནཱཝིདྷཀམྨཱ, ཡེཔི མིཙྪཱདིཊྛིམཱུལཀེསུ ཀཱཡཀམྨཱདཱིསུ ཨཉྙེཔི སམཱདཱཔེནྟི.

ཀཱཡསྶ བྷེདཱཏི ཨུཔཱདིནྣཀྑནྡྷཔརིཙྩཱགཱ. པརཾ མརཎཱཏི ཏདནནྟརཾ ཨབྷིནིབྦཏྟཀྑནྡྷགྒཧཎཱ. ཨཐ ཝཱ ཀཱཡསྶ བྷེདཱཏི ཛཱིཝིཏིནྡྲིཡསྶཱུཔཙྪེདཱ. པརཾ མརཎཱཏི ཙུཏིཙིཏྟཏོ ཨུདྡྷཾ. ཨཔཱཡནྟི ཨེཝམཱདི སབྦཾ ནིརཡཝེཝཙནམེཝ. ནིརཡོ ཧི སགྒམོཀྑཧེཏུབྷཱུཏཱ པུཉྙསམྨཏཱ ཨཡཱ ཨཔེཏཏྟཱ, སུཁཱནཾ ཝཱ ཨཱཡསྶ ཨབྷཱཝཱ ཨཔཱཡོ. དུཀྑསྶ གཏི པཊིསརཎནྟི དུགྒཏི, དོསབཧུལཏཱཡ ཝཱ དུཊྛེན ཀམྨེན ནིབྦཏྟཱ གཏཱིཏི དུགྒཏི. ཝིཝསཱ ནིཔཏནྟི ཏཏྠ དུཀྐཊྚཀཱརིནོཏི ཝིནིཔཱཏོ, ཝིནསྶནྟཱ ཝཱ ཨེཏྠ པཏནྟི སམྦྷིཛྫམཱནངྒཔཙྩངྒཱཏི ཝིནིཔཱཏོ. ནཏྠི ཨེཏྠ ཨསྶཱདསཉྙིཏོ ཨཡོཏི ནིརཡོ.

ཨཐ ཝཱ ཨཔཱཡགྒཧཎེན ཏིརཙྪཱནཡོནིཾ དཱིཔེཏི. ཏིརཙྪཱནཡོནི ཧི ཨཔཱཡོ སུགཏིཏོ ཨཔེཏཏྟཱ ¶ , ན དུགྒཏི མཧེསཀྑཱནཾ ནཱགརཱཛཱདཱིནཾ སམྦྷཝཏོ. དུགྒཏིགྒཧཎེན པེཏྟིཝིསཡཉྩ. སོ ཧི ཨཔཱཡོ ཙེཝ དུགྒཏི ཙ སུགཏིཏོ ཨཔེཏཏྟཱ དུཀྑསྶ ཙ གཏིབྷཱུཏཏྟཱ, ན ཏུ ཝིནིཔཱཏོ ཨསུརསདིསཾ ཨཝིནིཔཏིཏཏྟཱ. ཝིནིཔཱཏགྒཧཎེན ཨསུརཀཱཡཾ. སོ ཧི ཡཐཱཝུཏྟེན ཨཏྠེན ཨཔཱཡོ ཙེཝ དུགྒཏི ཙ སབྦསམུསྶཡེཧི ཝིནིཔཏིཏཏྟཱ ཝིནིཔཱཏོཏི ཝུཙྩཏི. ནིརཡགྒཧཎེན ཨཝཱིཙིཨཱདིཀམནེཀཔྤཀཱརཾ ནིརཡམེཝཱཏི. ཨུཔཔནྣཱཏི ཨུཔགཏཱ, ཏཏྠ ཨབྷིནིབྦཏྟཱཏི ཨདྷིཔྤཱཡོ. ཝུཏྟཝིཔརིཡཱཡེན སུཀྐཔཀྑོ ཝེདིཏབྦོ. ཨཡཾ པན ཝིསེསོ – ཏཏྠ སུགཏིགྒཧཎེན མནུསྶཱགཏིཔི སངྒཡ྄ཧཏི, སགྒགྒཧཎེན དེཝགཏིཡེཝ. ཏཏྠ སུནྡརཱ གཏཱིཏི སུགཏི. རཱུཔཱདཱིཧི ཝིསཡེཧི སུཊྛུ ཨགྒོཏི སགྒོ. སོ སབྦོཔི ལུཛྫནཔྤལུཛྫནཊྛེན ལོཀོཏི ཨཡམེཏྠ སངྑེཔོ. ཝིཏྠཱརོ པན སབྦཱཀཱརེན ཝིསུདྡྷིམགྒསཾཝཎྞནཱཏོ གཧེཏབྦོ. ཏཏིཡཱདཱིནི ཨུཏྟཱནཏྠཱནི.

དུཏིཡཨཱཧུནེཡྻསུཏྟཱདིཝཎྞནཱ ནིཊྛིཏཱ.

༨. ཨཊྛམེ ¶ ནཏྠི ཨེཏེསཾ ཨུཏྟརཱནི ཝིསིཊྛཱནཱིཏི ཨནུཏྟརཱནི, ཨནུཏྟརཱནི ཨེཝ ཨནུཏྟརིཡཱནི ཡཐཱ ‘‘ཨནནྟམེཝ ཨནནྟརིཡ’’ནྟི ཨཱཧ ‘‘ནིརུཏྟརཱནཱི’’ཏི. དསྶནཱནུཏྟརིཡཾ ནཱམ ཕལཝིསེསཱཝཧཏྟཱ. ཨེས ནཡོ སེསེསུཔི. སཏྟཝིདྷཨརིཡདྷནལཱབྷོཏི སཏྟཝིདྷསདྡྷཱདིལོཀུཏྟརདྷནལཱབྷོ. སིཀྑཱཏྟཡསྶ པཱུརཎནྟི ཨདྷིསཱིལསིཀྑཱདཱིནཾ ཏིསྶནྣཾ སིཀྑཱནཾ པཱུརཎཾ. ཏཏྠ པཱུརཎཾ ནིཔྤརིཡཱཡཏོ ཨསེཀྑཱནཾ ཝསེན ཝེདིཏབྦཾ. ཀལྱཱཎཔུཐུཛྫནཏོ པཊྛཱཡ ཧི སཏྟ སེཁཱ ཏིསྶོ སིཀྑཱ པཱུརེནྟི ནཱམ, ཨརཧཱ པརིཔུཎྞསིཀྑོཏི. ཨིཏི ཨིམཱནི ཨནུཏྟརིཡཱནི ལོཀིཡལོཀུཏྟརཱནི ཀཐིཏཱནི.

༩. ནཝམེ ཨནུསྶཏིཡོ ཨེཝ དིཊྛདྷམྨིཀསམྤརཱཡིཀཱདིཧིཏསུཁཱནཾ ཀཱརཎབྷཱཝཏོ ཋཱནཱནཱིཏི ཨནུསྶཏིཊྛཱནཱནི. བུདྡྷགུཎཱརམྨཎཱ སཏཱིཏི ཡཐཱ བུདྡྷཱནུསྶཏི ཝིསེསཱདྷིགམསྶ ཋཱནཾ ཧོཏི, ཨེཝཾ ‘‘ཨིཏིཔི སོ བྷགཝཱ’’ཏིཨཱདིནཱ བུདྡྷགུཎེ ཨཱརབྦྷེ ཨུཔྤནྣཱ སཏི. ཨེཝཾ ཨནུསྶརཏོ ¶ ཧི པཱིཏི ཨུཔྤཛྫཏི, སོ ཏཾ པཱིཏིཾ ཁཡཏོ ཝཡཏོ པཊྛཔེཏྭཱ ཨརཧཏྟཾ པཱཔུཎཱཏི. ཨུཔཙཱརཀམྨཊྛཱནཾ ནཱམེཏཾ གིཧཱིནམྤི ལབྦྷཏི. ཨུཔཙཱརཀམྨཊྛཱནནྟི ཙ པཙྩཀྑཏོ ཨུཔཙཱརཛ྄ཛྷཱནཱཝཧཾ ཀམྨཊྛཱནཔརམྤརཱཡ སམྨསནཾ ཡཱཝ ཨརཧཏྟཱ ལོཀིཡལོཀུཏྟརཝིསེསཱཝཧཾ. ཨེས ནཡོ སབྦཏྠ.

ཨནུསྶཏིཊྛཱནསུཏྟཝཎྞནཱ ནིཊྛིཏཱ.

༡༠. དསམེ ཏསྨིཾ སམཡེཏི བུདྡྷཱགུཎཱནུསྶརཎསམཡེ. རཱགཔརིཡུཊྛིཏནྟི རཱགེན པརིཡུཊྛིཏཾ. པརིཡུཊྛཱནཔྤཏྟིཔི, རཱགེན ཝཱ སཾཧིཏཾ ཙིཏྟཾ ¶ ཨརཉྙམིཝ ཙོརེཧི ཏེན པརིཡུཊྛིཏནྟི ཝུཏྟཾ, ཏསྶ པརིཡུཊྛཱནཊྛཱནབྷཱཝཏོཔི པརིཡུཊྛིཏརཱགནྟི ཨཏྠོ. བྱཉྫནཾ པན ཨནཱདིཡིཏྭཱ ཨཏྠམཏྟཾ དསྶེནྟོ ‘‘ཨུཔྤཛྫམཱནེན རཱགེན ཨུཊྛཧིཏྭཱ གཧིཏ’’ནྟི ཨཱཧ. ཨུཛུཀམེཝཱཏི པགེཝ ཀཱཡཝངྐཱདཱིནཾ ཨཔནཱིཏཏྟཱ ཙིཏྟསྶ ཙ ཨནུཛུབྷཱཝཀརཱནཾ མཱནཱདཱིནཾ ཨབྷཱཝཏོ, རཱགཱདིཔརིཡུཊྛཱནཱབྷཱཝེན ཝཱ ཨོཎཏིཨུཎྞཏིཝིརཧཏོ ཨུཛུབྷཱཝམེཝ གཏཾ. ཨཐ ཝཱ ཨུཛུཀམེཝཱཏི ཀམྨཊྛཱནསྶ ཐིནཾ མིདྡྷཾ ཨོཏིཎྞཏཱཡ ལཱིནུདྡྷཙྩཝིགམཏོ མཛ྄ཛྷིམསམཐནིམིཏྟཔྤཊིཔཏྟིཡཱ ཨུཛུབྷཱཝམེཝ གཏཾ. ཨཊྛཀཐཾ ནིསྶཱཡཱཏི བྷཝཛཱཏིཨཱདཱིནཾ པདཱནཾ ཨཏྠཾ ནིསྶཱཡ. ཨཏྠཝེདནྟི ཝཱ ཧེཏུཕལཾ པཊིཙྩ ཨུཔྤནྣཾ ཏུཊྛིམཱཧ. དྷམྨཝེདནྟི ཧེཏུཾ པཊིཙྩ ཨུཔྤནྣཾ ཏུཊྛིཾ. ‘‘ཨཱརཀཏྟཱ ཨརཧ’’ནྟི ཨནུསྶརནྟསྶ ཧི ཡདིདཾ བྷགཝཏོ ཀིལེསེཧི ཨཱརཀཏྟཾ, སོ ཧེཏུ. ཉཱཔཀོ ཙེཏྠ ཧེཏུ ཨདྷིཔྤེཏོ, ན ཀཱརཀོ སམྤཱཔཀོ. ཏཏོནེན ཉཱཡམཱནོ ཨརཧཏྟཏྠོ ཕལཾ. ཨིམིནཱ ནཡེན སེསཔདེསུཔི ཧེཏུསོ ཕལཝིཔཱཀོ ཝེདིཏབྦོ. དྷམྨཱནུསྶཏིཨཱདཱིསུཔི ཧི ཨཱདིམཛ྄ཛྷཔརིཡོསཱནཀལྱཱཎཏཱདཡོ སུཔྤཊིཔཏྟིཨཱདཡོ ཙ ཏཏྠ ཏཏྠ ཧེཏུབྷཱཝེན ནིདྡིཊྛཱཡེཝ. དྷམྨཱུཔསཾཧིཏནྟི ཡཐཱཝུཏྟཧེཏུཕལསངྑཱཏགུཎཱུཔསཾཧིཏཾ.

༡༡. དུཏིཡསྶ ¶ པཋམེ སརིཏབྦཡུཏྟཀཱཏི ཨནུསྶརཎཱརཧཱ. མིཛྫཏི སིནིཡ྄ཧཏི ཨེཏཱཡཱཏི མེཏྟཱ, མིཏྟབྷཱཝོ. མེཏྟཱ ཨེཏསྶ ཨཏྠཱིཏི མེཏྟཾ, ཀཱཡཀམྨཾ. ཏཾ པན ཡསྨཱ མེཏྟཱསཧགཏཙིཏྟསམུཊྛཱནཾ, ཏསྨཱ ཝུཏྟཾ ‘‘མེཏྟེན ཙིཏྟེན ཀཱཏབྦཾ ཀཱཡཀམྨ’’ནྟི. ཨེས ནཡོ སེསདྭཡེཔི. ཨིམཱནཱིཏི མེཏྟཀཱཡཀམྨཱདཱིནི. བྷིཀྑཱུནཾ ཝསེན ཨཱགཏཱནི ཏེསཾ སེཊྛཔརིསབྷཱཝཏོ. ཡཐཱ པན བྷིཀྑུནཱིསུཔི ལབྦྷནྟི, ཨེཝཾ གིཧཱིསུཔི ལབྦྷནྟི ཙཏུཔརིསསཱདྷཱརཎཏྟཱཏི ཏཾ དསྶེནྟོ ‘‘བྷིཀྑཱུནཉྷཱི’’ཏིཨཱདིམཱཧ. བྷིཀྑུནོ ¶ སབྦམྤི ཨནཝཛྫཀཱཡཀམྨཾ ཨཱབྷིསམཱཙཱརིཀཀམྨནྟོགདྷམེཝཱཏི ཨཱཧ ‘‘མེཏྟེན ཙིཏྟེན…པེ… ཀཱཡཀམྨཾ ནཱམཱ’’ཏི. བྷཏྟིཝསེན པཝཏྟིཡམཱནཱ ཙེཏིཡབོདྷཱིནཾ ཝནྡནཱ མེཏྟཱསིདྡྷཱཏི ཀཏྭཱ ཏདཏྠཱཡ གམནཾ ‘‘མེཏྟཾ ཀཱཡཀམྨ’’ནྟི ཝུཏྟཾ. ཨཱདི-སདྡེན ཙེཏིཡབོདྷིབྷིཀྑཱུསུ ཝུཏྟཱཝསེསཱཔཙཱཡནཱདིཝསེན པཝཏྟམེཏྟཱཝསེན པཝཏྟཾ ཀཱཡིཀཾ ཀིརིཡཾ སངྒཎྷཱཏི.

ཏེཔིཊཀམྤི བུདྡྷཝཙནཾ ཀཐིཡམཱནནྟི ཨདྷིཔྤཱཡོ. ཏེཔིཊཀམྤི བུདྡྷཝཙནཾ པརིཔུཙྪནཨཏྠཀཐནཝསེན པཝཏྟིཡམཱནམེཝ མེཏྟཾ ཝཙཱིཀམྨཾ ནཱམ ཧིཏཛ྄ཛྷཱསཡེན པཝཏྟིཏབྦཏོ. ཏཱིཎི སུཙརིཏཱནཱིཏི ཀཱཡཝཙཱིམནོསུཙརིཏཱནི. ཙིནྟནནྟི ཨེཝཾ ཙིནྟནམཏྟམྤི མནོཀམྨཾ, པགེཝ པཊིཔནྣཱ བྷཱཝནཱཏི དསྶེཏི.

ཨཱཝཱིཏི པཀཱསཾ. པཀཱསབྷཱཝོ ཙེཏྠ ཡཾ ཨུདྡིསྶ ཏཾ ཀཱཡཀམྨཾ ཀརཱིཡཏི, ཏསྶ སམྨུཁབྷཱཝཏོཏི ཨཱཧ ‘‘སམྨུཁཱ’’ཏི. རཧོཏི ཨཔྤཀཱསཾ. ཨཔྤཀཱསཏཱ ཙ ཡཾ ཨུདྡིསྶ ཏཾ ཀཱཡཀམྨཾ ཀརཱིཡཏི, ཏསྶ ཨཔཙྩཀྑབྷཱཝཏོཏི ཨཱཧ ‘‘པརམྨུཁཱ’’ཏི. སཧཱཡབྷཱཝགམནཾ ཏེསཾ པུརཏོ. ཏེསུ ཀརོནྟེསུཡེཝ ཧི སཧཱཡབྷཱཝགམནཾ སམྨུཁཱ ཀཱཡཀམྨཾ ནཱམ ཧོཏི. ཨུབྷཡེཧཱིཏི ནཝཀེཧི ཐེརེཧི ཙ. པགྒཡ྄ཧཱཏི པགྒཎྷིཏྭཱ ཨུདྡྷཾ ཀཏྭཱ ཀེཝལཾ ‘‘དེཝོ’’ཏི ཨཝཏྭཱ གུཎེཧི ཐིརབྷཱཝཛོཏནཾ ‘‘དེཝཏྠེརོ’’ཏི ཝཙནཾ པགྒཡ྄ཧ ཝཙནཾ. མམཏྟབོདྷནཾ ཝཙནཾ མམཱཡནཝཙནཾ. ཨེཀནྟཔརམྨུཁསྶ མནོཀམྨསྶ སམྨུཁཏཱ ནཱམ ཝིཉྙཏྟིསམུཊྛཱཔནཝསེན ཧོཏི, ཏཉྩ ཁོ ལོཀེ ཀཱཡཀམྨནྟི པཱཀཊཾ པཉྙཱཏཾ. ཧཏྠཝིཀཱརཱདཱིནི ཨནཱམསིཏྭཱ ཨེཝ དསྶེནྟོ ‘‘ནཡནཱནི ཨུམྨཱིལེཏྭཱ’’ཏིཨཱདིམཱཧ. ཀཱམཾ མེཏྟཱསིནེཧསིནིདྡྷཱནཾ ནཡནཱནཾ ཨུམྨཱིལནཱ པསནྣེན མུཁེན ཨོལོཀནཉྩ ¶ མེཏྟཾ ཀཱཡཀམྨམེཝ, ཡསྶ པན ཙིཏྟསྶ ཝསེན ནཡནཱནཾ མེཏྟཱསིནེཧསིནིདྡྷཏཱ མུཁསྶ ཙ པསནྣཏཱ, ཏཾ སནྡྷཱཡ ཝུཏྟཾ ‘‘མེཏྟཾ མནོཀམྨཾ ནཱམཱ’’ཏི.

ལཱབྷ-སདྡོ ཀམྨསཱདྷནོ ‘‘ལཱབྷཱ ཝཏ, བྷོ, ལདྡྷོ’’ཏིཨཱདཱིསུ ཝིཡ. སོ ཙེཏྠ ‘‘དྷམྨལདྡྷཱ’’ཏི ཝཙནཏོ ཨཏཱིཏཀཱལིཀོཏི ཨཱཧ ‘‘ཙཱིཝརཱདཡོ ལདྡྷཔཙྩཡཱ’’ཏི. དྷམྨཏོ ཨཱགཏཱཏི དྷམྨིཀཱ, པརིསུདྡྷགམནཱ པཙྩཡཱ. ཏེནཱཧ ‘‘དྷམྨལདྡྷཱ’’ཏི. ཨིམམེཝ ཧི ཨཏྠཾ དསྶེཏུཾ ‘‘ཀུཧནཱདཱི’’ཏིཨཱདི ¶ ཝུཏྟཾ. ན སམྨཱ གཡ྄ཧམཱནཱ ཧི དྷམྨལདྡྷཱ ནཱམ ན ཧོནྟཱིཏི ཏཔྤཊིསེདྷནཏྠཾ པཱལི༹ཡཾ ‘‘དྷམྨལདྡྷཱ’’ཏི ཝུཏྟཾ. དེཡྻཾ དཀྑིཎེཡྻཉྩ ཨཔྤཊིཝིབྷཏྟཾ ཀཏྭཱ བྷུཉྫཏཱིཏི ཨཔྤཊིཝིབྷཏྟབྷོགཱི ནཱམ ཧོཏི. ཏེནཱཧ ‘‘དྭེ པཊིཝིབྷཏྟཱནི ནཱམཱ’’ཏིཨཱདི. ཙིཏྟེན ཝིབྷཛནནྟི ཨེཏེན ཙིཏྟུཔྤཱདམཏྟེནཔི ཝིབྷཛནཾ པཊིཝིབྷཏྟཾ ནཱམ, པགེཝ པཡོགཏོཏི དསྶེཏི. ཙིཏྟེན ཝིབྷཛནཔུབྦཀཾ ཝཱ ཀཱཡེན ཝིབྷཛནནྟི མཱུལམེཝ དསྶེཏུཾ ‘‘ཨེཝཾ ཙིཏྟེན ཝིབྷཛན’’ནྟི ཝུཏྟཾ. ཏེན ཙིཏྟུཔྤཱདམཏྟེན པཊིཝིབྷཱགོ ཀཱཏབྦོཏི དསྶེཏི. ཨཔྤཊིཝིབྷཏྟནྟི བྷཱཝནཔུཾསཀནིདྡེསོ, ཨཔྤཊིཝིབྷཏྟཾ ལཱབྷཾ བྷུཉྫཏཱིཏི ཀམྨནིདྡེསོ ཝཱ. ཏཾ ནེཝ གིཧཱིནཾ དེཏི ཨཏྟནོ ཨཱཛཱིཝསོདྷནཏྠཾ. ན ཨཏྟནཱ པརིབྷུཉྫཏི ‘‘མཡ྄ཧཾ ཨསཱདྷཱརཎབྷོགིཏཱ མཱ ཧོཏཱུ’’ཏི. པཊིགྒཎྷནྟོ ཙ…པེ… པསྶཏཱིཏི ཨིམིནཱ ཨཱགམནཏོ པཊྛཱཡ སཱདྷཱརཎབུདྡྷིཾ ཨུཔཊྛཱཔེཏི. ཨེཝཾ ཧིསྶ སཱདྷཱརཎབྷོགིཏཱ སུཀརཱ, སཱརཎཱིཡདྷམྨོ ཙསྶ པཱུརོ ཧོཏི.

ཨཐ ཝཱ པཊིགྒཎྷནྟོ ཙ…པེ… པསྶཏཱིཏི ཨིམིནཱ ཏསྶ ལཱབྷསྶ ཏཱིསུ ཀཱལེསུ སཱདྷཱརཎཏོ ཋཔནཾ དསྶིཏཾ. པཊིགྒཎྷནྟོ ཙ སངྒྷེན སཱདྷཱརཎཾ ཧོཏཱུཏི ཨིམིནཱ པཊིགྒཧཎཀཱལོ དསྶིཏོ. གཧེཏྭཱ…པེ… པསྶཏཱིཏི ཨིམིནཱ པཊིགྒཧིཏཀཱལོ. ཏདུབྷཡཾ པན ཏཱདིསེན པུབྦབྷཱགེན ཝིནཱ ན ཧོཏཱིཏི ཨཏྠསིདྡྷོ པུརིམཀཱལོ. ཏཡིདཾ པཊིགྒཧཎཏོ པུབྦེཝསྶ ཧོཏི ‘‘སངྒྷེན སཱདྷཱརཎཾ ཧོཏཱུཏི པཊིགྒཎྷིསྶཱམཱི’’ཏི, པཊིགྒཎྷནྟསྶ ཧོཏི ‘‘སངྒྷེན སཱདྷཱརཎཾ ཧོཏཱུཏི པཊིགྒཎྷཱམཱི’’ཏི, པཊིགྒཧེཏྭཱ ཧོཏི ‘‘སངྒྷེན སཱདྷཱརཎཾ ཧོཏཱུཏི ཧི པཊིགྒཧིཏཾ མཡཱ’’ཏི. ཨེཝཾ ཏིལཀྑཎསམྤནྣཾ ཀཏྭཱ ལདྡྷཾ ལཱབྷཾ ཨོསཱརཎལཀྑཎཾ ཨཝིཀོཔེཏྭཱ པརིབྷུཉྫནྟོ སཱདྷཱརཎབྷོགཱི ཨཔྤཊིཝིབྷཏྟབྷོགཱི ཙ ཧོཏི.

ཨིམཾ པན སཱརཎཱིཡདྷམྨནྟི ཨིམཾ ཙཏུཏྠཾ སརིཏབྦཡུཏྟདྷམཾ. ན ཧི…པེ… གཎྷནྟི, ཏསྨཱ སཱདྷཱརཎབྷོགིཏཱ དུསྶཱིལསྶ ནཏྠཱིཏི ཨཱརམྦྷོཔི ཏཱཝ ན སམྦྷཝཏི, ཀུཏོ པཱུརཎནྟི ཨདྷིཔྤཱཡོ. པརིསུདྡྷསཱིལོཏི ཨིམིནཱ ལཱབྷསྶ དྷམྨིཀབྷཱཝཾ དསྶེཏི. ཝཏྟཾ ཨཁཎྜེནྟོཏི ཨིམིནཱ ཨཔྤཊིཝིབྷཏྟབྷོགིཏཾ སཱདྷཱརཎབྷོགིཏཉྩ དསྶེཏི. སཏི པན ཏདུབྷཡེ སཱརཎཱིཡདྷམྨོ པཱུརིཏོ ཨེཝ ¶ ཧོཏཱིཏི ཨཱཧ ‘‘པཱུརེཏཱི’’ཏི. ཨོདིསྶཀཾ ཀཏྭཱཏི ཨེཏེན ཨནོདིསྶཀཾ ཀཏྭཱ པིཏུནོ, ཨཱཙརིཡུཔཛ྄ཛྷཱཡཱདཱིནཾ ཝཱ ¶ ཐེརཱསནཏོ པཊྛཱཡ དེནྟསྶ སཱརཎཱིཡདྷམྨོཡེཝ ཧོཏཱིཏི དསྶེཏི. དཱཏབྦནྟི ཨཝསྶཾ དཱཏབྦཾ. སཱརཎཱིཡདྷམྨོ པནསྶ ན ཧོཏི པཊིཛགྒཊྛཱནེ ཨོདིསྶཀཾ ཀཏྭཱ དིནྣཏྟཱ. ཏེནཱཧ ‘‘པལིབོདྷཛགྒནཾ ནཱམ ཧོཏཱི’’ཏི. མུཏྟཔལིབོདྷསྶ ཝཊྚཏི ཨམུཏྟཔལིབོདྷསྶ པཱུརེཏུཾ ཨསཀྐུཎེཡྻཏྟཱ. ཡདི ཨེཝཾ སབྦེན སབྦཾ སཱརཎཱིཡདྷམྨཾ པཱུརེནྟསྶ ཨོདིསྶཀདཱནཾ ཝཊྚཏི, ན ཝཊྚཏཱིཏི? ནོ ན ཝཊྚཏི ཡུཏྟཊྛཱནེཏི དསྶེནྟོ ‘‘ཏེན པནཱ’’ཏིཨཱདིམཱཧ. ཨིམིནཱ ཨོདིསྶཀདཱནཾ པནསྶ ན སབྦཏྠ ཝཱརིཏནྟི དསྶེཏི. གིལཱནཱདཱིནཉྷི ཨོདིསྶཀཾ ཀཏྭཱ དཱནཾ ཨཔྤཊིཝིབྷཱགཔཀྑིཀཾ ‘‘ཨསུཀསྶ ན དསྶཱམཱི’’ཏི པཊིཀྑེཔསྶ ཨབྷཱཝཏོ. བྱཏིརེཀཔྤདྷཱནོ ཧི པཊིབྷཱགོ. ཏེནཱཧ ‘‘ཨཝསེས’’ནྟིཨཱདི. ཨདཱཏུམྤཱིཏི པི-སདྡེན དཱཏུམྤི ཝཊྚཏཱིཏི དསྶེཏི. ཏཉྩ ཁོ ཀརུཎཱཡནཝསེན, ན ཝཏྟཔརིཔཱུརཎཝསེན, ཏསྨཱ དུསྶཱིལསྶཔི ཨཏྠིཀསྶ སཏི སམྦྷཝེ དཱཏབྦཾ. དཱནཉྷི ནཱམ ན ཀསྶཙི ནིཝཱརིཏཾ.

སུསིཀྑིཏཱཡཱཏི སཱརཎཱིཡཔཱུརཎཝིདྷིམྷི སུསིཀྑིཏཱཡ, སུཀུསལཱཡཱཏི ཨཏྠོ. ཨིདཱནི ཏསྶ ཀོསལླཾ དསྶེཏུཾ ‘‘སུསིཀྑིཏཱཡ ཧཱི’’ཏིཨཱདི ཝུཏྟཾ. དྭཱདསཧི ཝསྶེཧི པཱུརེཧི, ན ཏཏོ ཨོརནྟི ཨིམིནཱ ཏསྶ དུཔྤཱུརཏཾ དསྶེཏི. ཏཐཱ ཧི སོ མཧཔྥལོ མཧཱནིསཾསོ དིཊྛདྷམྨིཀེཧིཔི ཏཱཝགརུཏརེཧི ཕལཱནིསཾསེཧི ཨནུགཏོཏི ཏཾསམངྒཱི ཙ པུགྒལོ ཝིསེསལཱབྷཱི ཨརིཡཔུགྒལོ ཝིཡ ལོཀེ ཨཙྪརིཡབྦྷུཏདྷམྨསམནྣཱགཏོ ཧོཏི. ཏཐཱ ཧི སོ དུཔྤཛཧདཱནམཡསྶ སཱིལམཡསྶ པུཉྙསྶ པཊིཔཀྑདྷམྨཾ སུདཱུརེ ཝིཀྑམྦྷིཏཾ ཀཏྭཱ ཝིསུདྡྷེན ཙེཏསཱ ལོཀེ པཱཀཊོ པཉྙཱཏོ ཧུཏྭཱ ཝིཧརཏི. ཏསྶིམམཏྠཾ བྱཏིརེཀཏོ ཨནྭཡཏོ ཙ ཝིབྷཱཝེཏུཾ ‘‘སཙེ ཧཱི’’ཏིཨཱདི ཝུཏྟཾ. ཏཾ སུཝིཉྙེཡྻམེཝ.

ཨིདཱནིསྶ སམྤརཱཡིཀེ དིཊྛདྷམྨིཀེ ཙ ཨཱནིསཾསེ དསྶེཏུཾ ‘‘ཨེཝཾ པཱུརིཏསཱརཎཱིཡདྷམྨསྶཱ’’ཏིཨཱདི ཝུཏྟཾ. ནེཝ ཨིསྶཱ ན མཙྪརིཡཾ ཧོཏི ཙིརཀཱལབྷཱཝནཱཡ ཝིདྷུཏབྷཱཝཏོ. མནུསྶཱནཾ པིཡོ ཧོཏི པརིཙྩཱགསཱིལཏཱཡ ཝིསྶུཏཏྟཱ. ཏེནཱཧ ‘‘དདཾ པིཡོ ཧོཏི བྷཛནྟི ནཾ བཧཱུ’’ཏིཨཱདི (ཨ. ནི. ༥.༣༤). སུལབྷཔཙྩཡོ ཧོཏི དཱནཝསེན ཨུལཱ༹རཛ྄ཛྷཱསཡཱནཾ པཙྩཡལཱབྷསྶ ཨིདྷཱནིསཾསསབྷཱཝཏོ དཱནསྶ. པཏྟགཏམསྶ དིཡྻམཱནཾ ¶ ན ཁཱིཡཏི པཏྟགཏསྶེཝ དྭཱདསཝསྶིཀསྶ མཧཱཝཏྟསྶ ཨཝིཙྪེདེན པཱུརིཏཏྟཱ. ཨགྒབྷཎྜཾ ལབྷཏི དེཝསིཀཾ དཀྑིཎེཡྻཱནཾ ཨགྒཏོ པཊྛཱཡ དཱནསྶ དིནྣཏྟཱ. བྷཡེ ཝཱ…པེ… ཨཱཔཛྫནྟི དེཡྻཔྤཊིགྒཱཧཀཝིཀཔྤཾ ཨཀཏྭཱ ཨཏྟནི ནིརཔེཀྑཙིཏྟེན ཙིརཀཱལཾ དཱནསྶ པཱུརིཏཏཱཡ པསཱརིཏཙིཏྟཏྟཱ.

ཏཏྲཱཏི ¶ ཏེསུ ཨཱནིསཾསེསུ ཝིབྷཱཝེཏབྦེསུ. ཨིམཱནི ཕལཱནི ཝཏྠཱུནི ཀཱརཎཱནི. མཧཱགིརིགཱམོ ནཱམ ནཱགདཱིཔཔསྶེ ཨེཀོ གཱམོཝ. ཨལབྷནྟཱཔཱིཏི ཨཔྤཔུཉྙཏཱཡ ཨལཱབྷིནོ སམཱནཱཔི. བྷིཀྑཱཙཱརམགྒསབྷཱགནྟི སབྷཱགཾ ཏབྦྷཱགིཡཾ བྷིཀྑཱཙཱརམགྒཾ ཛཱནནྟི. ཨནུཏྟརིམནུསྶདྷམྨཏྟཱ ཐེརཱནཾ སཾསཡཝིནོདནཏྠཉྩ ‘‘སཱརཎཱིཡདྷམྨོ མེ, བྷནྟེ, པཱུརིཏོ’’ཏི ཨཱཧ. ཏཐཱ ཧི དུཏིཡཝཏྠུསྨིམྤི ཐེརེན ཨཏྟཱ པཀཱསིཏོ. དཧརཀཱལེ ཨེཝཾ ཀིར སཱརཎཱིཡདྷམྨཔཱུརཀོ ཨཧོསི. མནུསྶཱནཾ པིཡཏཱཡ སུལབྷཔཙྩཡཏཱཡཔི ཨིདཾ ཝཏྠུམེཝ. པཏྟགཏཱཁཱིཡནསྶ པན ཝིསེསཾ ཝིབྷཱཝནཏོ ‘‘ཨིདཾ ཏཱཝ…པེ… ཨེཏྠ ཝཏྠཱུ’’ཏི ཝུཏྟཾ.

གིརིབྷཎྜམཧཱཔཱུཛཱཡཱཏི ཙེཏིཡགིརིམྷི སཀལལངྐཱདཱིཔེ ཡོཛནཔྤམཱཎེ སམུདྡེ ཙ ནཱཝཱསངྒྷཱཊཱདིཀེ ཋཔེཏྭཱ དཱིཔཔུཔྥགནྡྷཱདཱིཧི ཀརིཡམཱནཱཡ མཧཱཔཱུཛཱཡ. ཏསྶཱ ཙ པཊིཔཏྟིཡཱ ཨཝཉྫྷབྷཱཝཝིབྷཱཝནཏྠཾ ‘‘ཨེཏེ མཡ྄ཧཾ པཱཔུཎིསྶནྟཱི’’ཏི ཨཱཧ. པརིཡཱཡེནཔི ལེསེནཔི. ཨནུཙྪཝིཀནྟི ‘‘སཱརཎཱིཡདྷམྨཔཱུརཀོ’’ཏི ཡཐཱབྷཱུཏཔཝེདནཾ ཏུམྷཱཀཾ ཨནུཙྪཝིཀནྟི ཨཏྠོ.

ཨནཱརོཙེཏྭཱཝ པལཱཡིཾསུ ཙོརབྷཡེན. ‘‘ཨཏྟནོ དུཛྫཱིཝིཀཱཡཱ’’ཏིཔི ཝདནྟི. ཨཧཾ སཱརཎཱིཡདྷམྨཔཱུརིཀཱ, མམ པཏྟཔརིཡཱཔནྣེནཔི སབྦཱཔིམཱ བྷིཀྑུནིཡོ ཡཱཔེསྶནྟཱིཏི ཨཱཧ ‘‘མཱ ཏུམྷེ ཏེསཾ གཏབྷཱཝཾ ཙིནྟཡིཏྠཱ’’ཏི. ཝཊྚིསྶཏཱིཏི ཀཔྤིསྶཏི. ཐེརཱི སཱརཎཱིཡདྷམྨཔཱུརིཀཱ ཨཧོསི, ཐེརསྶ པན སཱིལཏེཛེནེཝ དེཝཏཱ ཨུསྶུཀྐཾ ཨཱཔཛྫི.

ནཏྠི ཨེཏེསཾ ཁཎྜནྟི ཨཁཎྜཱནི. ཏཾ པན ནེསཾ ཁཎྜཾ དསྶེཏུཾ ‘‘ཡསྶཱ’’ཏིཨཱདི ཝུཏྟཾ. ཏཏྠ ཨུཔསམྤནྣསཱིལཱནཾ ཨུདྡེསཀྐམེན ཨཱདིཨནྟཱ ཝེདིཏབྦཱ. ཏེནཱཧ ‘‘སཏྟསཱུ’’ཏིཨཱདི. ན ཧི ཨཉྙོ ཀོཙི ཨཱཔཏྟིཀྑནྡྷཱནཾ ¶ ཨནུཀྐམོ ཨཏྠི, ཨནུཔསམྤནྣསཱིལཱནཾ སམཱདཱནཀྐམེནཔི ཨཱདིཨནྟཱ ལབྦྷནྟི. པརིཡནྟེ ཚིནྣསཱཊཀོ ཝིཡཱཏི ཏཏྲནྟེ དསནྟེ ཝཱ ཚིནྣཝཏྠཾ ཝིཡ. ཝིསདིསུདཱཧརཎཉྩེཏཾ ‘‘ཨཁཎྜཱནཱི’’ཏི ཨིམསྶ ཨདྷིཀཏཏྟཱ. ཨེཝཾ སེསཱནམྤི ཨུདཱཧརཎཱནི. ཁཎྜིཀཏཱ བྷིནྣཏཱ ཁཎྜཾ, ཏཾ ཨེཏསྶ ཨཏྠཱིཏི ཁཎྜཾ, སཱིལཾ. ཚིདྡནྟིཨཱདཱིསུཔི ཨེསེཝ ནཡོ. ཝེམཛ྄ཛྷེ བྷིནྣཾ ཝིནིཝིཛ྄ཛྷནཝསེན. ཝིསབྷཱགཝཎྞེན གཱཝཱི ཝིཡཱཏི སམྦནྡྷོ. ཝིསབྷཱགཝཎྞེན ཨུཔཌྜྷཾ ཏཏིཡབྷཱགགཏཾ སམྦྷིནྣཝཎྞཾ སབལཾ, ཝིསབྷཱགཝཎྞེཧེཝ བིནྡཱུཧི ཨནྟརནྟརཱཧི ཝིམིསྶཾ ཀམྨཱསཾ. ཨཡཾ ཨིམེསཾ ཝིསེསོ. སབལརཧིཏཱནི ཨསབལཱནི, ཏཐཱ ཨཀམྨཱསཱནི. སཱིལསྶ ཏཎྷཱདཱསབྱཏོ མོཙནཾ ཝིཝཊྚཱུཔནིསྶཡབྷཱཝཱཔཱདནཾ, ཏསྨཱ ཏཎྷཱདཱསབྱཏོ མོཙནཝཙནེན ཏེསཾ སཱིལཱནཾ ཝིཝཊྚཱུཔནིསྶཡཏམཱཧ. བྷུཛིསྶབྷཱཝཀརཎཏོཏི ཨིམིནཱ བྷུཛིསྶཀརཱནི བྷུཛིསྶཱནཱིཏི ཨུཏྟརཔདལོཔེནཱཡཾ ¶ ནིདྡེསོཏི དསྶེཏི. ཡསྨཱ ཝཱ ཏཾསམངྒིཔུགྒལོ སེརཱི སཡཾཝསཱི བྷུཛིསྶོ ནཱམ ཧོཏི, ཏསྨཱཔི བྷུཛིསྶཱནི. ཨཝིཉྙཱུནཾ ཨཔྤམཱཎཏཱཡ ‘‘ཝིཉྙུཔྤསཏྠཱནཱི’’ཏི ཝུཏྟཾ. སུཔརིསུདྡྷབྷཱཝེན ཝཱ སམྤནྣཏྟཱ ཝིཉྙཱུཧི པསཏྠཱནཱིཏི ཝིཉྙུཔྤསཏྠཱནི.

ཏཎྷཱདིཊྛཱིཧི ཨཔརཱམཊྛཏྟཱཏི ‘‘ཨིམིནཱཧཾ སཱིལེན དེཝོ ཝཱ བྷཝིསྶཱམི དེཝཉྙཏརོ ཝཱ’’ཏི ཏཎྷཱཔརཱམཱསེན, ‘‘ཨིམིནཱཧཾ སཱིལེན དེཝོ ཧུཏྭཱ ཏཏྠ ནིཙྩོ དྷུཝོ སསྶཏོ བྷཝིསྶཱམཱི’’ཏི དིཊྛིཔརཱམཱསེན ཙ ཨཔརཱམཊྛཏྟཱ. པརཱམཊྛུནྟི ‘‘ཨཡཾ ཏེ སཱིལེསུ དོསོ’’ཏི ཙཏཱུསུ ཝིཔཏྟཱིསུ ཡཱཡ ཀཱཡཙི ཝིཔཏྟིཡཱ དསྶནེན པརཱམཊྛུཾ, ཨནུདྡྷཾསེཏུཾ ཙོདེཏུནྟི ཨཏྠོ. སཱིལཾ ནཱམ ཨཝིཔྤཊིསཱརཱདིཔཱརམྤརིཡེན ཡཱཝདེཝ སམཱདྷིསམྤཱདནཏྠནྟི ཨཱཧ ‘‘སམཱདྷིསཾཝཏྟནིཀཱནཱི’’ཏི. སམཱདྷིསཾཝཏྟནཔྤཡོཛནཱནི སམཱདྷིསཾཝཏྟནིཀཱནི.

སམཱནབྷཱཝོ སཱམཉྙཾ, པརིཔུཎྞཙཏུཔཱརིསུདྡྷིབྷཱཝེན མཛ྄ཛྷེ བྷིནྣསུཝཎྞསྶ ཝིཡ བྷེདཱབྷཱཝཏོ སཱིལེན སཱམཉྙཾ སཱིལསཱམཉྙཾ, ཏཾ གཏོ ཨུཔགཏོཏི སཱིལསཱམཉྙགཏོ. ཏེནཱཧ ‘‘སམཱནབྷཱཝཱུཔགཏསཱིལོ’’ཏི, སཱིལསམྤཏྟིཡཱ སམཱནབྷཱཝཾ ཨུཔགཏསཱིལོ སབྷཱགཝུཏྟིཀོཏི ཨཏྠོ. ཀཱམཾ པུཐུཛྫནཱནམྤི ཙཏུཔཱརིསུདྡྷིསཱིལེ ནཱནཏྟཾ ན སིཡཱ, ཏཾ པན ན ཨེཀནྟིཀཾ, ཨིདཾ ཨེཀནྟིཀཾ ནིཡཏབྷཱཝཏོཏི ཨཱཧ ‘‘ནཏྠི ¶ མགྒསཱིལེ ནཱནཏྟ’’ནྟི. ཏཾ སནྡྷཱཡེཏཾ ཝུཏྟནྟི མགྒསཱིལཾ སནྡྷཱཡ ཏཾ ‘‘ཡཱནི ཏཱནི སཱིལཱནཱི’’ཏིཨཱདི ཝུཏྟཾ.

ཡཱཡནྟི ཡཱ ཨཡཾ མཡ྄ཧཉྩེཝ ཏུམྷཱཀཉྩ པཙྩཀྑབྷཱུཏཱ. དིཊྛཱིཏི མགྒསམྨཱདིཊྛི. ནིདྡོསཱཏི ནིདྡྷུཏདོསཱ, སམུཙྪིནྣརཱགཱདིཔཱཔདྷམྨཱཏི ཨཏྠོ. ནིཡྻཱཏཱིཏི ཝཊྚདུཀྑཏོ ནིསྶརཏི ནིགྒཙྪཏི. སཡཾ ནིཡྻནྟཱིཡེཝ ཧི ཏཾསམངྒིཔུགྒལཾ ཝཊྚདུཀྑཏོ ནིཡྻཱཔེཏཱིཏི ཝུཙྩཏི. ཡཱ སཏྠུ ཨནུསིཊྛི, ཏཾ ཀརོཏཱིཏི ཏཀྐརོ, ཏསྶ, ཡཐཱནུསིཊྛཾ པཊིཔཛྫནྟསྶཱཏི ཨཏྠོ. སམཱནདིཊྛིབྷཱཝནྟི སདིསདིཊྛིབྷཱཝཾ སཙྩསམྤཊིཝེདྷེན ཨབྷིནྣདིཊྛིབྷཱཝཾ.

པཋམསཱརཎཱིཡསུཏྟཝཎྞནཱ ནིཊྛིཏཱ.

༡༢. དུཏིཡེ སབྲཧྨཙཱརཱིནནྟི སཧདྷམྨིཀཱནཾ. པིཡཾ པིཡཱཡིཏབྦཀཾ ཀརོནྟཱིཏི པིཡཀརཎཱ. གརུཾ གརུཊྛཱནིཡཾ ཀརོནྟཱིཏི གརུཀརཎཱ. སངྒཎྷནཏྠཱཡཱཏི སངྒཧཝཏྠུཝིསེསབྷཱཝཏོ སབྲཧྨཙཱརཱིནཾ ¶ སངྒཧཎཱཡ སཾཝཏྟནྟཱིཏི སམྦནྡྷོ. ཨཝིཝདནཏྠཱཡཱཏི སངྒཧཝཏྠུབྷཱཝཏོ ཨེཝ ན ཝིཝདནཏྠཱཡ. སཏི ཙ ཨཝིཝདནཧེཏུབྷཱུཏསངྒཧཀཏྟེ ཏེསཾ ཝསེན སབྲཧྨཙཱརཱིནཾ སམགྒབྷཱཝོ བྷེདཱབྷཱཝོ སིདྡྷོཡེཝཱཏི ཨཱཧ ‘‘སཱམགྒིཡཱ’’ཏིཨཱདི.

དུཏིཡསཱརཎཱིཡསུཏྟཝཎྞནཱ ནིཊྛིཏཱ.

༡༣. ཏཏིཡེ ཝཌྜྷིཏཱཏི བྷཱཝནཱཔཱརིཔཱུརིཝསེན པརིབྲཱུཧིཏཱ. པུནཔྤུནཾ ཀཏཱཏི བྷཱཝནཱཡ བཧུལཱིཀརཎེན ཨཔརཱཔརཾ པཝཏྟིཏཱ. ཡུཏྟཡཱནསདིསཱ ཀཏཱཏི ཡཐཱ ཡུཏྟམཱཛཉྙཡཱནཾ ཚེཀེན སཱརཐིནཱ ཨདྷིཊྛིཏཾ ཡཐཱརུཙི པཝཏྟཏི, ཨེཝཾ ཡཐཱརུཙི པཝཏྟིརཧཾ གཧིཏཱ. ཝཏྠུཀཏཱཏི ཝཱ ཨདྷིཊྛཱནཊྛེན ཝཏྠུ ཝིཡ ཀཏཱ, སབྦསོ ཨུཔཀྐིལེསཝིསོདྷནེན ཨིདྡྷིཝིསེསཏཱཡ པཝཏྟིཊྛཱནབྷཱཝཏོ སུཝིསོདྷིཏཔརིསྶཡཝཏྠུ ཝིཡ ཀཏཱཏི ཝུཏྟཾ ཧོཏི. ཨདྷིཊྛིཏཱཏི པཊིཔཀྑདཱུརཱིབྷཱཝཏོ ¶ སུབྷཱཝིཏབྷཱཝེན ཏཾཏཾཨདྷིཊྛཱནཡོགྱཏཱཡ ཋཔིཏཱ. སམནྟཏོ ཙིཏཱཏི སབྦབྷཱགེན བྷཱཝནཱུཔཙཡཾ གམིཏཱ. ཏེནཱཧ ‘‘ཨུཔཙིཏཱ’ཏི. སུཊྛུ སམཱརདྡྷཱཏི ཨིདྡྷིབྷཱཝནཱསིཁཱཔྤཏྟིཡཱ སམྨདེཝ སམྦྷཱཝིཏཱ. ཨབྷཱུཏབྱཱཀརཎཾ བྱཱཀརོཏཱིཏི ‘‘མེཏྟཱ ཧི ཁོ མེ ཙེཏོཝིམུཏྟི བྷཱཝིཏཱ’’ཏིཨཱདིནཱ ཨཏྟནི ཨཝིཛྫམཱནགུཎཱབྷིབྱཱཧཱརཾ བྱཱཧརཏི. ཙེཏོཝིམུཏྟིསདྡཾ ཨཔེཀྑིཏྭཱ ‘‘ནིསྶཊཱ’’ཏི ཝུཏྟཾ. པུན བྱཱཔཱདོ ནཏྠཱིཏི ཨིདཱནི མམ བྱཱཔཱདོ ནཱམ སབྦསོ ནཏྠཱིཏི ཉཏྭཱ.

བལཝཝིཔསྶནཱཏི བྷཡཏུཔཊྛཱནེ ཉཱཎཾ, ཨཱདཱིནཝཱནུཔསྶནེ ཉཱཎཾ མུཙྩིཏུཀམྱཏཱཉཱཎཾ, བྷངྒཉཱཎནྟི ཙཏུནྣཾ ཉཱཎཱནཾ ཨདྷིཝཙནཾ. ཡེསཾ ནིམིཏྟཱནཾ ཨབྷཱཝེན ཨརཧཏྟཕལསམཱཔཏྟིཡཱ ཨནིམིཏྟཏཱ, ཏཾ དསྶེཏུཾ ‘‘སཱ ཧཱི’’ཏིཨཱདི ཝུཏྟཾ. ཏཏྠ རཱགསྶ ནིམིཏྟཾ, རཱགོ ཨེཝ ཝཱ ནིམིཏྟཾ རཱགནིམིཏྟཾ. ཨཱདི-སདྡེན དོསནིམིཏྟཱདཱིནཾ སངྒཧོ དཊྛབྦོ. རཱུཔཝེདནཱདིསངྑཱརནིམིཏྟཾ རཱུཔནིམིཏྟཱདི. ཏེསཾཡེཝ ནིཙྩཱདིཝསེན ཨུཔཊྛཱནཾ ནིཙྩནིམིཏྟཱདི. ཏཡིདཾ ནིམིཏྟཾ ཡསྨཱ སབྦེན སབྦཾ ཨརཧཏྟཕལེ ནཏྠི, ཏསྨཱ ཝུཏྟཾ ‘‘སཱ ཧི…པེ… ཨནིམིཏྟཱ’’ཏི. ནིམིཏྟཾ ཨནུསྶརཏི ཨནུགཙྪཏི ཨཱརབྦྷ པཝཏྟཏི སཱིལེནཱཏི ནིམིཏྟཱནུསཱརཱི. ཏེནཱཧ ‘‘ཝུཏྟཔྤབྷེདཾ ནིམིཏྟཾ ཨནུསརཎསབྷཱཝ’’ནྟི.

ཨསྨིམཱནོཏི ‘‘ཨསྨཱི’’ཏི པཝཏྟོ ཨཏྟཝིསཡོ མཱནོ. ཨཡཾ ནཱམ ཨཧམསྨཱིཏི རཱུཔལཀྑཎོ ¶ ཝེདནཱདཱིསུ ཝཱ ཨཉྙཏརལཀྑཎོ ཨཡཾ ནཱམ ཨཏྟཱ ཨཧཾ ཨསྨཱིཏི. ཨསྨིམཱནོ སམུགྒྷཱཏཱིཡཏི ཨེཏེནཱཏི ཨསྨིམཱནསམུགྒྷཱཏོ, ཨརཧཏྟམགྒོ. པུན ཨསྨིམཱནོ ནཏྠཱིཏི ཏསྶ ཨནུཔྤཏྟིདྷམྨཏཱཔཱདནཾ ཀིཏྟེནྟོ སམུགྒྷཱཏཏྟམེཝ ཝིབྷཱཝེཏི.

ནིསྶཱརཎཱིཡསུཏྟཝཎྞནཱ ནིཊྛིཏཱ.

༡༤-༡༥. ཙཏུཏྠེ ཨཱརམིཏབྦཊྛེན ཝཱ ཀམྨཾ ཨཱརཱམོ ཨེཏསྶཱཏི ཀམྨཱརཱམོ. ཀམྨེ རཏོ ན གནྠདྷུརེ ཝིཔསྶནཱདྷུརེ ཝཱཏི ཀམྨརཏོ. པུནཔྤུནཾ ཡུཏྟོཏི ཏཔྤརབྷཱཝེན ཨནུ ཨནུ ཡུཏྟོ པསུཏོ. ཨཱལཱཔསལླཱཔོཏི ཨིཏྠིཝཎྞཔུརིསཝཎྞཱདིཝསེན པུནཔྤུནཾ ལཔནཾ. པཉྩམེ ནཏྠི ཝཏྟབྦཾ.

༡༦. ཚཊྛེ ¶ ཝིསབྷཱགཝེདནུཔྤཏྟིཡཱ ཀཀཙེནེཝ ཙཏུཨིརིཡཱཔཐཾ ཚིནྡནྟོ ཨཱབཱདྷཡཏཱིཏི ཨཱབཱདྷོ, སོ ཡསྶ ཨཏྠཱིཏི ཨཱབཱདྷིཀོ. ཏཾསམུཊྛཱནདུཀྑེན དུཀྑིཏོ. ཨདྷིམཏྟགིལཱནོཏི དྷཱཏུསངྑཡེན པརིཀྑཱིཎསརཱིརོ.

སཔྤཊིབྷཡཀནྟཱརསདིསཱ སོལ༹སཝཏྠུཀཱ ཨཊྛཝཏྠུཀཱ ཙ ཝིཙིཀིཙྪཱ ཏིཎྞཱ ཨིམཱཡཱཏི ཏིཎྞཝིཙིཀིཙྪཱ. ཝིགཏཱ སམུཙྪིནྣཱ པཝཏྟིཨཱདཱིསུ ‘‘ཨེཝཾ ནུ ཁོ ན ནུ ཁོ’’ཏི ཨེཝཾ པཝཏྟིཀཱ ཀཐཾཀཐཱ ཨསྶཱཏི ཝིགཏཀཐཾཀཐཱ. སཱརཛྫཀརཱནཾ པཱཔདྷམྨཱནཾ པཧཱིནཏྟཱ རཱགཝིཀྑེཔེསུ སཱིལཱདིགུཎེསུ ཙ ཏིཊྛཀཏྟཱ ཝེསཱརཛྫཾ, ཝིསཱརདབྷཱཝཾ ཝེཡྻཏྟིཡཾ པཏྟཱཏི ཝེསཱརཛྫཔྤཏྟཱ. ཨཏྟནཱ ཨེཝ པཙྩཀྑཏོ དིཊྛཏྟཱ ན པརཾ པཙྩེཏི, ནསྶ པརོ པཙྩེཏབྦོ ཨཏྠཱིཏི ཨཔརཔྤཙྩཡཱ.

གིལཱནཱ ཝུཊྛིཏོཏི གིལཱནབྷཱཝཏོ ཝུཊྛཱཡ ཋིཏོ. བྷཱཝཔྤདྷཱནོ ཧི ཨཡཾ ནིདྡེསོ. གིལཱནོ ཧུཏྭཱ ཝུཊྛིཏོཏི ཨིདཾ པན ཨཏྠམཏྟནིདསྶནཾ.

༡༧. སཏྟམེ ¶ པཊིསལླཱནཱ ཝུཊྛིཏོཏི ཨེཏྠ པཊིསལླཱནནྟི ཏེཧི ཏེཧི སདྡྷིཝིཧཱརིཀཨནྟེཝཱསིཀཨུཔཱསཀཱདིསཏྟེཧི ཙེཝ རཱུཔཱརམྨཎཱདིསངྑཱརེཧི ཙ པཊིནིཝཏྟིཏྭཱ ཨཔསཀྐིཏྭཱ ནིལཱིཡནཾ ཝིཝེཙནཾ. ཀཱཡཙིཏྟེཧི ཏཏོ ཝིཝིཏྟོ ཨེཀཱིབྷཱཝོ པཝིཝེཀོཏི ཨཱཧ ‘‘ཨེཀཱིབྷཱཝཱཡཱ’’ཏིཨཱདི. ཨེཀཱིབྷཱཝཏོཏི ཙ ཨིམིནཱ ཀཱཡཝིཝེཀཏོ ཝུཊྛཱནམཱཧ. དྷམྨནིཛ྄ཛྷཱནཀྑནྟིཏོཏིཨཱདིནཱ ཙིཏྟཝིཝེཀཏོ. ཝུཊྛིཏོཏི ཏཏོ དུཝིདྷཝིཝེཀཏོ བྷཝངྒུཔྤཏྟིཡཱ སབྲཧྨཙཱརཱིཧི སམཱགམེན ཨུཔེཏོ.

༡༨. ཨཊྛམེ ¶ མཙྪགྷཱཏཀནྟི མཙྪབནྡྷཾ ཀེཝཊྚཾ. ཨོརབྦྷིཀཱདཱིསུ ཨུརབྦྷཱ ཝུཙྩནྟི ཨེལ༹ཀཱ, ཨུརབྦྷེ ཧནྟཱིཏི ཨོརབྦྷིཀོ. སཱུཀརིཀཱདཱིསུཔི ཨེསེཝ ནཡོ.

༡༩. ནཝམེ ཨེཝཾནཱམཀེ གཱམེཏི ནཱཏིཀཱནཱམཀཾ གཱམཾ ནིསྶཱཡ. དྭིནྣཾ ཙཱུལ༹པིཏིམཧཱཔིཏིཔུཏྟཱནཾ དྭེ གཱམཱ, ཏེསུ ཨེཀསྨིཾ གཱམེ. ཉཱཏཱིནཉྷི ནིཝཱསཊྛཱནབྷཱུཏོ གཱམོ ཉཱཏིཀོ, ཉཱཏིཀོཡེཝ ནཱཏིཀོ ཉ-ཀཱརསྶ ན-ཀཱརཱདེསོ ‘‘ཨནིམིཏྟཱ ན ནཱཡརེ’’ཏིཨཱདཱིསུ (ཝིསུདྡྷི. ༡.༡༧༤; སཾ. ནི. ཨཊྛ. ༡.༡.༢༠; ཛཱ. ཨཊྛ. ༢.༢.༣༤) ཝིཡ. སོ ཀིར གཱམོ ཡེསཾ ཏདཱ ཏེསཾ པུབྦཔུརིསེན ཨཏྟནོ ཉཱཏཱིནཾ སཱདྷཱརཎབྷཱཝེན ནིཝསིཏོ, ཏེན ཉཱཏིཀོཏི པཉྙཱཡིཏྠ. ཨཐ པཙྪཱ དྭཱིཧི དཱཡཱདེཧི དྭིདྷཱ ཝིབྷཛིཏྭཱ པརིབྷུཏྟོ. གིཉྫཀཱ ཝུཙྩཏི ཨིཊྛཀཱ, གིཉྫཀཱཧིཡེཝ ཀཏོ ཨཱཝསཐོཏི གིཉྫཀཱཝསཐོ. སོ ཧི ཨཱཝཱསོ ཡཐཱ སུདྷཱཔརིཀམྨེན པཡོཛནཾ ནཏྠི, ཨེཝཾ ཨིཊྛཀཱཧི ཨེཝ ཙིནིཏྭཱ ཚཱདེཏྭཱ ཀཏོ. ཏསྨིཾ ཀིར པདེསེ མཏྟིཀཱ སཀྑརམརུམྤཝཱལུཀཱདཱིཧི ཨསམྨིསྶཱ ཀཐིནཱ སཎྷསུཁུམཱ, ཏཱཡ ཀཏཱནི ཀུལཱལབྷཱཛནཱནིཔི སིལཱམཡཱནི ཝིཡ དལ༹ྷཱནི. ཏསྨཱ ཏེ ཨུཔཱསཀཱ ཏཱཡ མཏྟིཀཱཡ དཱིགྷཔུཐཱུ ¶ ཨིཊྛཀཱ ཀཱརེཏྭཱ ཋཔེཏྭཱ ཋཔེཏྭཱ དྭཱརཝཱཏཔཱནཀཝཱཊཏུལཱཡོ སབྦཾ དབྦསམྦྷཱརེན ཝིནཱ ཏཱཧི ཨིཊྛཀཱཧིཡེཝ པཱསཱདཾ ཀཱརེསུཾ. ཏེན ཝུཏྟཾ ‘‘ཨིཊྛཀཱམཡེ པཱསཱདེ’’ཏི.

རཏྟིནྡིཝནྟི ཨེཀརཏྟིདིཝཾ. བྷགཝཏོ སཱསནནྟི ཨརིཡམགྒཔྤཊིཝེདྷཱཝཧཾ སཏྠུ ཨོཝཱདཾ. བཧུ ཝཏ མེ ཀཏཾ ཨསྶཱཏི བཧུ ཝཏ མཡཱ ཨཏྟཧིཏཾ པབྦཛིཏཀིཙྩཾ ཀཏཾ བྷཝེཡྻ.

ཏདནྟརནྟི ཏཏྟཀཾ ཝེལཾ. ཨེཀཔིཎྜཔཱཏནྟི ཨེཀཾ དིཝསཾ ཡཱཔནཔྤཧོནཀཾ པིཎྜཔཱཏཾ. ཡཱཝ ཨནྟོ པཝིཊྛཝཱཏོ བཧི ནིཀྑམཏི, བཧི ནིཀྑནྟཝཱཏོ ¶ ཝཱ ཨནྟོ པཝིསཏཱིཏི ཨེཀསྶེཝ པཝེསནིཀྑམོ ཝིཡ ཝུཏྟཾ, ཏཾ ནཱསིཀཱཝཱཏབྷཱཝསཱམཉྙེནཱཏི དཊྛབྦཾ.

པཋམམརཎསྶཏིསུཏྟཝཎྞནཱ ནིཊྛིཏཱ.

༢༠. དསམེ ནིཀྑནྟེཏི ཝཱིཏིཝཏྟེ. པཏིགཏཱཡཱཏི པཙྩཱགཏཱཡ, སམྤཏྟཱཡཱཏི ཨཏྠོ. ཏེནཱཧ ‘‘པཊིཔནྣཱཡཱ’’ཏི. སོ མམསྶ ཨནྟརཱཡོཏི ཡཐཱཝུཏྟཱ ན ཀེཝལཾ ཀཱལཀིརིཡཱཝ, མམ ཨཏིདུལླབྷཾ ཁཎཾ ལབྷིཏྭཱ ཏསྶ སཏྠུསཱསནམནསིཀཱརསྶ ཙེཝ ཛཱིཝིཏསྶ ཙ སགྒམོཀྑཱནཉྩ ཨནྟརཱཡོ ཨསྶ, བྷཝེཡྻཱཏི ཨཏྠོ. ཏེནཱཧ ‘‘ཏིཝིདྷོ ཨནྟརཱཡོ’’ཏིཨཱདི. ཝིཔཛྫེཡྻཱཏི ཝིཔཏྟིཾ གཙྪེཡྻ. སཏྠཀེན ཝིཡ ཨངྒཔཙྩངྒཱནཾ ཀནྟནཀཱརཀཱ ཀཱཡེ སནྡྷིབནྡྷནཙྪེདཀཝཱཏཱ སཏྠཀཝཱཏཱ. ཀཏྟུཀམྱཏཱཚནྡོཏི ནིཡྻཱནཱཝཧོ ཀཏྟུཀམྱཏཱཀུསལཙྪནྡོ. པཡོགཝཱིརིཡནྟི བྷཱཝནཱནུཡོགཝཱིརིཡཾ. ན པཊིཝཱཏི ན པཊིནིཝཏྟཏཱིཏི ཨཔྤཊིཝཱནཱི, ཨནྟརཱ ཝོསཱནཱནཱཔཛྫནཝཱིརིཡཾ. ཏེནཱཧ ‘‘ཨནུཀྐཎྛནཱ ཨཔྤཊིསངྒྷརཎཱ’’ཏི.

དུཏིཡམརཎསྶཏིསུཏྟཝཎྞནཱ ནིཊྛིཏཱ.

༢༡-༢༢. ཏཏིཡསྶ ¶ པཋམེ ཀེཝལཀཔྤནྟི ཨེཏྠ ཀེཝལ-སདྡོ ཨནཝསེསཏྠོ, ཀཔྤ-སདྡོ སམནྟབྷཱཝཏྠོ. ཏསྨཱ ཀེཝལཀཔྤཾ པོཀྑརཎིཡནྟི ཨེཝམཏྠོ དཊྛབྦོ. ཨནཝསེསཾ ཕརིཏུཾ སམཏྠསྶཔི ཨོབྷཱསསྶ ཀེནཙི ཀཱརཎེན ཨེཀདེསཕརཎམྤི སིཡཱ, ཨཡཾ པན སབྦསོཝ ཕརཏཱིཏི དསྶེཏུཾ སམནྟཏྠོ ཀཔྤ-སདྡོ གཧིཏོ. ཨཏྟནོ ཨོབྷཱསེན ཕརིཏྭཱཏི ཝཏྠཱལངྐཱརསརཱིརསམུཊྛིཏེན ཨོབྷཱསེན ཕརིཏྭཱ, ཙནྡིམཱ ¶ ཝིཡ ཨེཀོབྷཱསཾ ཨེཀཔཛྫོཏཾ ཀརིཏྭཱཏི ཨཏྠོ. སམནུཉྙོཏི སམྨདེཝ ཀཏམནུཉྙོ. ཏེནཱཧ ‘‘སམཱནཙིཏྟོ’’ཏི, སམཱནཛ྄ཛྷཱསཡོཏི ཨཏྠོ. དུཀྑཾ ཝཙོ ཨེཏསྨིནྟི དུབྦཙོ, ཏསྶ ཀམྨཾ དོཝཙསྶཾ, ཏསྶ པུགྒལསྶ ཨནཱདརིཡཝསེན པཝཏྟཱ ཙེཏནཱ, ཏསྶ བྷཱཝོ ཨཏྠིཏཱ དོཝཙསྶཏཱ. ཨཐ ཝཱ དོཝཙསྶམེཝ དོཝཙསྶཏཱ. སཱ ཨཏྠཏོ སངྑཱརཀྑནྡྷོ ཧོཏི. ཙེཏནཱཔདྷཱནོ ཧི སངྑཱརཀྑནྡྷོ. ཙཏུནྣཾ ཝཱ ཁནྡྷཱནཾ ཨཔདཀྑིཎགྒཱཧིཏཱཀཱརེན པཝཏྟཱནཾ ཨེཏཾ ཨདྷིཝཙནནྟི ཝདནྟི. པཱཔཱ ཨསྶདྡྷཱདཡོ པུགྒལཱ ཨེཏསྶ མིཏྟཱཏི པཱཔམིཏྟོ, ཏསྶ བྷཱཝོ པཱཔམིཏྟཏཱ. སཱཔི ཨཏྠཏོ དོཝཙསྶཏཱ ཝིཡ དཊྛབྦཱ. ཡཱཡ ཧི ཙེཏནཱཡ པུགྒལོ པཱཔམིཏྟོ པཱཔསམྤཝངྐོ ནཱམ ཧོཏི, སཱ ཙེཏནཱ པཱཔམིཏྟཏཱ. ཙཏྟཱརོཔི ཝཱ ཨརཱུཔིནོ ཁནྡྷཱ ཏདཱཀཱརཔྤཝཏྟཱ པཱཔམིཏྟཏཱ. དུཏིཡཾ ཨུཏྟཱནམེཝ.

༢༣. ཏཏིཡེ སམྦྷཝཏི ཛཱཏིམརཎཾ ཨེཏེནཱཏི སམྦྷཝོ, ཨུཔཱདཱནནྟི ཨཱཧ ‘‘ཛཱཏིཡཱ ཙ མརཎསྶ ཙ སམྦྷཝེ པཙྩཡབྷཱུཏེ’’ཏི. ཨནུཔཱདཱཏི ཨནུཔཱདཱཡ. ཏེནཱཧ ‘‘ཨནུཔཱདིཡིཏྭཱ’’ཏི. ཛཱཏིམརཎཱནི སམྨཱ ཁཱིཡནྟི ཨེཏྠཱཏི ཛཱཏིམརཎསངྑཡོ, ནིབྦཱནནྟི ཨཱཧ ‘‘ཛཱཏིམརཎཱནཾ སངྑཡསངྑཱཏེ ནིབྦཱནེ’’ཏི. སབྦདུཀྑཾ ཨུཔཙྩགུནྟི སཀལམྤི ཝཊྚདུཀྑཾ ཨཏིཀྐནྟཱ ཙརིམཙིཏྟནིརོདྷེན ཝཊྚདུཀྑལེསསྶཔི ཨསམྦྷཝཏོ.

༢༤. ཙཏུཏྠེ ¶ སམཱཔཏྟིཀུསལོ ཧོཏཱིཏི སམཱཔཛྫནཀུསལོ ཧོཏི. ཏེནཱཧ ‘‘སམཱཔཛྫིཏུཾ ཀུསལོ’’ཏི. ཏཏྠ ཨནྟོགཏཧེཏུཨཏྠོ ཋིཏི-སདྡོ, ཏསྨཱ ཋཔནཀུསལོཏི ཨཏྠོཏི ཨཱཧ ‘‘སམཱདྷིཾ ཋཔེཏུཾ སཀྐོཏཱིཏི ཨཏྠོ’’ཏི. ཏཏྠ ཋཔེཏུཾ སཀྐོཏཱིཏི སཏྟཊྛཨཙྪརཱམཏྟཾ ¶ ཁཎཾ ཛྷཱནཾ ཋཔེཏུཾ སཀྐོཏི ཨདྷིཊྛཱནཝསིབྷཱཝསྶ ནིཔྥཱདིཏཏྟཱ. ཡཐཱཔརིཙྪེདེནཱཏི ཡཐཱཔརིཙྪིནྣཀཱལེན. ཝུཊྛཱཏུཾ སཀྐོཏི ཝུཊྛཱནཝསིབྷཱཝསྶ ནིཔྥཱདིཏཏྟཱ. ཀལླཾ སཉྫཱཏཾ ཨསྶཱཏི ཀལླིཏཾ, ཏསྨིཾ ཀལླིཏེ ཀལླིཏབྷཱཝེ ཀུསལོ ཀལླིཏཀུསལོ. ཧཱསེཏུཾ ཏོསེཏུཾ སམྤཧཾསེཏུཾ. ཀལླཾ ཀཱཏུནྟི སམཱདྷཱནསྶ པཊིཔཀྑདྷམྨཱནཾ དཱུརཱིཀརཎེན སཧཀཱརཱིཀཱརཎཱནཉྩ སམཔྤདྷཱནེན སམཱཔཛྫནེ ཙིཏྟཾ སམཏྠཾ ཀཱཏུཾ. སམཱདྷིསྶ གོཙརཀུསལོཏི སམཱདྷིསྨིཾ ནིཔྥཱདེཏབྦེ ཏསྶ གོཙརེ ཀམྨཊྛཱནསཉྙིཏེ པཝཏྟིཊྛཱནེ བྷིཀྑཱཙཱརགོཙརེ སཏིསམྤཛཉྙཡོགཏོ ཀུསལོ ཚེཀོ. ཏེནཱཧ ‘‘སམཱདྷིསྶ ཨསཔྤཱཡེ ཨནུཔཀཱརཀེ དྷམྨེ ཝཛྫེཏྭཱ’’ཏིཨཱདི. པཋམཛ྄ཛྷཱནཱདིསམཱདྷིཾ ཨབྷིནཱིཧརིཏུནྟི པཋམཛ྄ཛྷཱནཱདིསམཱདྷིཾ ཝིསེསབྷཱགིཡཏཱཡ ཨབྷིནཱིཧརིཏུཾ ཨུཔནེཏུཾ.

༢༥. པཉྩམེ ཨནུསྶཏིཀཱརཎཱནཱིཏི ཨནུསྶཏིཡོ ཨེཝ དིཊྛདྷམྨིཀསམྤརཱཡིཀཱདིཧིཏསུཁཱནཾ ཧེཏུབྷཱཝཏོ ཀཱརཎཱནི. ནིཀྑནྟནྟི ནིསྶཊཾ. མུཏྟནྟི ཝིསྶཊྛཾ. ཝུཊྛིཏནྟི ཨཔེཏཾ. སབྦམེཏཾ ཝིཀྑམྦྷནམེཝ སནྡྷཱཡ ཝདཏི. གེདྷམྷཱཏི པཉྩཀཱམགུཎཏོ. ཨིདམྤཱིཏི བུདྡྷཱནུསྶཏིཝསེན ལདྡྷཾ ཨུཔཙཱརཛ྄ཛྷཱནམཱཧ. ཨཱརམྨཎཾ ཀརིཏྭཱཏི པཙྩཡཾ ཀརིཏྭཱ, པཱདཀཾ ཀཏྭཱཏི ཨཏྠོ.

ཨནུསྶཏིཊྛཱནསུཏྟཝཎྞནཱ ནིཊྛིཏཱ.

༢༦. ཚཊྛེ སམྦཱདྷེཏི ཝཱ ཏཎྷཱསཾཀིལེསཱདཱིནཾ སམྤཱིལེ༹ སངྐརེ གྷརཱཝཱསེ. ཨོཀཱསཱ ཝུཙྩནྟཱིཏི མགྒཕལསུཁཱདྷིགམཱཡ ཨོཀཱསབྷཱཝཏོ ཨོཀཱསཱཏི ཝུཙྩནྟི. ཨོཀཱསཱདྷིགམོཏི ལོཀུཏྟརདྷམྨསྶ ¶ ཨདྷིགམཱཡ ཨདྷིགནྟབྦཨོཀཱསོ. ཝིསུཛ྄ཛྷནཏྠཱཡཱཏི རཱགཱདཱིཧི མལེཧི ཨབྷིཛ྄ཛྷཱཝིསམལོབྷཱདཱིཧི ¶ ཙ ཨུཔཀྐིལིཊྛཙིཏྟཱནཾ ཝིསུདྡྷཏྠཱཡ. སཱ པནཱཡཾ ཙིཏྟསྶ ཝིསུདྡྷི སིཛ྄ཛྷམཱནཱ ཡསྨཱ སོཀཱདཱིནཾ ཨནུཔཱདཱཡ སཾཝཏྟཏི, ཏསྨཱ ཝུཏྟཾ ‘‘སོཀཔརིདེཝཱནཾ སམཏིཀྐམཱཡཱ’’ཏིཨཱདི. ཏཏྠ སོཙནཾ ཉཱཏིབྱསནཱདིནིམིཏྟཾ ཙེཏསོ སནྟཱཔོ ཨནྟོཏཱཔོ ཨནྟོནིཛ྄ཛྷཱནཾ སོཀོ, ཉཱཏིབྱསནཱདིནིམིཏྟམེཝ སོཙིཀཏཱ. ‘‘ཀཧཾ ཨེཀཔུཏྟཀཱ’’ཏིཨཱདིནཱ (མ. ནི. ༢.༣༥༣-༣༥༤; སཾ. ནི. ༢.༦༣) པརིདེཝནཝསེན ལཔནཾ པརིདེཝོ. སམཏིཀྐམནཏྠཱཡཱཏི པཧཱནཱཡ. ཨཱཡཏིཾ ཨནུཔྤཛྫནཉྷི ཨིདྷ སམཏིཀྐམོ. དུཀྑདོམནསྶཱནཾ ཨཏྠངྒམཱཡཱཏི ཀཱཡིཀདུཀྑསྶ ཙ ཙེཏསིཀདོམནསྶསྶ ཙཱཏི ཨིམེསཾ དྭིནྣཾ ཨཏྠངྒམཱཡ, ནིརོདྷཱཡཱཏི ཨཏྠོ. ཉཱཡཏི ནིཙྪཡེན ཀམཏི ནིབྦཱནཾ, ཏཾ ཝཱ ཉཱཡཏི པཊིཝིཛ྄ཛྷཏི ཨེཏེནཱཏི ཉཱཡོ, ཨརིཡམགྒོ. ཨིདྷ པན སཧ པུབྦབྷཱགེན ཨརིཡམགྒོ གཧིཏོཏི ཨཱཧ ‘‘སཧཝིཔསྶནཀསྶ མགྒསྶ ཨདྷིགམནཏྠཱཡཱ’’ཏི. ཨཔཙྩཡཔརིནིབྦཱནསྶཱཏི ཨནུཔཱདིསེསནིབྦཱནཾ སནྡྷཱཡ ཝདཏི. པཙྩཡཝསེན ཨནུཔྤནྣཾ ཨསངྑཏཾ ཨམཏདྷཱཏུམེཝ. སེསམེཏྠ ཨུཏྟཱནམེཝ.

༢༧. སཏྟམེ ཝཌྜྷེཏཱིཏི མནསོ ཝིཝཊྚནིསྶིཏཾ ཝཌྜྷིཾ ཨཱཝཧཏི. མནོབྷཱཝནཱིཡོཏི ཝཱ མནསཱ བྷཱཝིཏོ སམྦྷཱཝིཏོ. ཡཉྩ ཨཱཝཛྫཏོ མནསི ཀརོཏོ ཙིཏྟཾ ཝིནཱིཝརཎཾ ཧོཏི. ཨིམསྨིཾ པཀྑེ ཀམྨསཱདྷནོ སམྦྷཱཝནཏྠོ བྷཱཝནཱིཡ-སདྡོ. ‘‘ཐིནམིདྡྷཝིནོདནཀམྨཊྛཱན’’ནྟི ཝཏྭཱ ཏདེཝ ཝིབྷཱཝེནྟོ ‘‘ཨཱལོཀསཉྙཾ ཝཱ’’ཏིཨཱདིམཱཧ. ཝཱིརིཡཱརམྦྷཝཏྠུཨཱདཱིནཾ ཝཱཏི ཨེཏྠ ཨཱདི-སདྡེན ཨིདྷ ཨཝུཏྟཱནཾ ཨཏིབྷོཛནེ ནིམིཏྟགྒཱཧཱདཱིནཾ སངྒཧོ དཊྛབྦོ. ཝུཏྟཉྷེཏཾ ‘‘ཚ དྷམྨཱ ཐིནམིདྡྷསྶ པཧཱནཱཡ སཾཝཏྟནྟི ཨཏིབྷོཛནེ ནིམིཏྟགྒཱཧོ, ཨིརིཡཱཔཐསམྤརིཝཏྟནཏཱ, ཨཱལོཀསཉྙཱམནསིཀཱརོ, ཨབྦྷོཀཱསཝཱསོ, ཀལྱཱཎམིཏྟཏཱ, སཔྤཱཡཀཐཱ’’ཏི (ཨིཏིཝུ. ཨཊྛ. ༡༡༡). ཨནྟརཱཡསདྡཔརིཡཱཡོ ཨིདྷ ཨནྟརཱ-སདྡོཏི ཨཱཧ ‘‘ཨནནྟརཱཡེནཱ’’ཏི.

༢༨. ཨཊྛམེ ¶ ¶ མཎྜལསཎྛཱནམཱལ༹སངྑེཔེན ཀཏཱ བྷོཛནསཱལཱ མཎྜལམཱལཱ༹ཏི ཨདྷིཔྤེཏཱཏི ཨཱཧ ‘‘བྷོཛནསཱལཱཡཱ’’ཏི. སེསམེཏྠ སུཝིཉྙེཡྻམེཝ.

༢༩. ནཝམེ དིཊྛདྷམྨོ ཝུཙྩཏི པཙྩཀྑོ ཨཏྟབྷཱཝོཏི ཨཱཧ ‘‘ཨིམསྨིཾཡེཝ ཨཏྟབྷཱཝེ’’ཏི. སུཁཝིཧཱརཏྠཱཡཱཏི ནིཀྐིལེསཏཱཡ ནིརཱམིསེན སུཁེན ཝིཧཱརཏྠཱཡ. ཨཱལོཀསཉྙཾ མནསི ཀརོཏཱིཏི སཱུརིཡཙནྡཔཛྫོཏམཎིཨུཀྐཱཝིཛྫུཨཱདཱིནཾ ཨཱལོཀོ དིཝཱ རཏྟིཉྩ ཨུཔལདྡྷོ, ཡཐཱལདྡྷཝསེནེཝ ཨཱལོཀཾ མནསི ཀརོཏི, ཙིཏྟེ ཋཔེཏི. ཏཐཱ ཙ ནཾ མནསི ཀརོཏི, ཡཐཱསྶ སུབྷཱཝིཏཱལོཀཀསིཎསྶ ཝིཡ ཀསིཎཱལོཀོ ཡཐིཙྪཀཾ ཡཱཝདིཙྪཀཉྩ སོ ཨཱལོཀོ རཏྟིཡཾ ཨུཔཏིཊྛཏི. ཡེན ཏཏྠ དིཝཱསཉྙཾ ཋཔེཏི, དིཝཱརིཝ ཝིགཏཐིནམིདྡྷོ ཧོཏི. ཏེནཱཧ ‘‘ཡཐཱ དིཝཱ ཏཐཱ རཏྟི’’ནྟི. དིཝཱཏི སཉྙཾ ཋཔེཏཱིཏི ཝུཏྟནཡེན མནསི ཀཏྭཱ དིཝཱརིཝ སཉྙཾ ཨུཔྤཱདེཏི. ཡཐཱནེན དིཝཱ…པེ… ཏཐེཝ ཏཾ མནསི ཀརོཏཱིཏི ཡཐཱནེན དིཝཱ ཨུཔལདྡྷོ སཱུརིཡཱལོཀོ, ཨེཝཾ རཏྟིམྤི དིཝཱ དིཊྛཱཀཱརེནེཝ ཏཾ ཨཱལོཀཾ མནསི ཀརོཏི. ཡཐཱ ཙནེན རཏྟིཾ…པེ… མནསི ཀརོཏཱིཏི ཡཐཱ རཏྟིཡཾ ཙནྡཱལོཀོ ཨུཔལདྡྷོ, ཨེཝཾ དིཝཱཔི རཏྟིཾ དིཊྛཱཀཱརེནེཝ ཏཾ ཨཱལོཀཾ མནསི ཀརོཏི, ཙིཏྟེ ཋཔེཏི. ཝིཝཊེནཱཏི ཐིནམིདྡྷེན ཨཔིཧིཏཏྟཱ ཝིཝཊེན. ཨནོནདྡྷེནཱཏི ཨསཉྪཱདིཏེན. སཧོབྷཱསཀནྟི སཉྙཱཎོབྷཱསཾ. དིབྦཙཀྑུཉཱཎཾ རཱུཔགཏསྶ དིབྦསྶ ཨིཏརསྶ ཙ དསྶནཊྛེན ཨིདྷ ཉཱཎདསྶནནྟི ཨདྷིཔྤེཏནྟི ཨཱཧ ‘‘དིབྦཙཀྑུསངྑཱཏསྶཱ’’ཏིཨཱདི.

ཨུདྡྷཾ ཛཱིཝིཏཔརིཡཱདཱནཱཏི ཛཱིཝིཏཀྑཡཏོ ཨུཔརི མརཎཏོ པརཾ. སམུགྒཏེནཱཏི ཨུཊྛིཏེན. དྷུམཱཏཏྟཱཏི ཨུདྡྷཾ ཨུདྡྷཾ དྷུམཱཏཏྟཱ སཱུནཏྟཱ ¶ . སེཏརཏྟེཧི ཝིཔརིབྷིནྣཾ ཝིམིསྶིཏཾ ནཱིལཾ, པུརིམཝཎྞཝིཔརིཎཱམབྷཱུཏཾ ཝཱ ནཱིལཾ ཝིནཱིལཾ, ཝིནཱིལམེཝ ཝིནཱིལཀནྟི ཀ-ཀཱརེན པདཝཌྜྷནམཱཧ ཨནཏྠནྟརཏོ ཡཐཱ ‘‘པཱིཏཀཾ ལོཧིཏཀ’’ནྟི. པཊིཀཱུལཏྟཱཏི ཛིགུཙྪནཱིཡཏྟཱ. ཀུཙྪིཏཾ ཝིནཱིལཾ ཝིནཱིལཀནྟི ཀུཙྪནཏྠོ ཝཱ ཨཡཾ ཀ-ཀཱརོཏི དསྶེཏུཾ ཝུཏྟཾ ཡཐཱ ‘‘པཱཔཀོ ཀིཏྟིསདྡོ ཨབྦྷུགྒཙྪཏཱི’’ཏི (དཱི. ནི. ༣.༣༡༦; ཨ. ནི. ༥.༢༡༣). པརིབྷིནྣཊྛཱནེཧི ཀཱཀདྷངྐཱདཱིཧི ¶ . ཝིསྶནྡམཱནཾ པུབྦནྟི ཝིསྶཝནྟཔུབྦཾ, ཏཧཾ ཏཧཾ པགྒྷརནྟཔུབྦནྟི ཨཏྠོ. ཏཐཱབྷཱཝནྟི ཝིསྶནྡམཱནཔུབྦཏཾ.

སོ བྷིཀྑཱུཏི ཡོ ‘‘པསྶེཡྻ སརཱིརཾ སཱིཝཐིཀཱཡ ཚཌྜིཏ’’ནྟི ཝུཏྟོ, སོ བྷིཀྑུ. ཨུཔསཾཧརཏི སདིསཏཾ. ཨཡམྤི ཁོཏིཨཱདི ཨུཔསཾཧརཎཱཀཱརདསྶནཾ. ཨཱཡཱུཏི རཱུཔཛཱིཝིཏིནྡྲིཡཾ. ཨརཱུཔཛཱིཝིཏིནྡྲིཡཾ པནེཏྠ ཝིཉྙཱཎགཏིཀམེཝ. ཨུསྨཱཏི ཀམྨཛཏེཛོ. ཨེཝཾཔཱུཏིཀསབྷཱཝོཏི ཨེཝཾ ཨཏིཝིཡ པཱུཏིསབྷཱཝོ ཨཱཡུཨཱདིཝིགམེ ཝིཡཱཏི ཨདྷིཔྤཱཡོ. ཨེདིསོ བྷཝིསྶཏཱིཏི ཨེཝཾབྷཱཝཱིཏི ཨཱཧ ‘‘ཨེཝམེཝཾ ཨུདྡྷུམཱཏཱདིབྷེདོ བྷཝིསྶཏཱི’’ཏི.

ལུཉྩིཏྭཱ ལུཉྩིཏྭཱཏི ཨུཔྤཱཊེཏྭཱ ཨུཔྤཱཊེཏྭཱ. སེསཱཝསེསམཾསལོཧིཏཡུཏྟནྟི སབྦསོ ཨཀྑཱདིཏཏྟཱ ཏཧཾ ཏཧཾ སེསེན ཨཔྤཱཝསེསེན མཾསལོཧིཏེན ཡུཏྟཾ. ཨཉྙེན ཧཏྠཊྛིཀནྟི ཨཝིསེསེན ཧཏྠཊྛིཀཱནཾ ཝིཔྤཀིཎྞཏཱ ཛོཏིཏཱཏི ཨནཝསེསཏོ ཏེསཾ ཝིཔྤཀིཎྞཏཾ དསྶེནྟོ ‘‘ཙཏུསཊྛིབྷེདམྤཱི’’ཏིཨཱདིམཱཧ. ཏེརོཝསྶིཀཱནཱིཏི ཏིརོཝསྶགཏཱནི. ཏཱནི པན སཾཝཙྪརཾ ཝཱིཏིཝཏྟཱནི ཧོནྟཱིཏི ཨཱཧ ‘‘ཨཏིཀྐནྟསཾཝཙྪརཱནཱི’’ཏི. པུརཱཎཏཱཡ གྷནབྷཱཝཝིགམེན ཝིཙུཎྞཏཱ ཨིདྷ པཱུཏིབྷཱཝོ. སོ ཡཐཱ ཧོཏི, ཏཾ དསྶེནྟོ ‘‘ཨབྦྷོཀཱསེ’’ཏིཨཱདིམཱཧ. ཨནེཀདྷཱཏཱུནནྟི ཙཀྑུདྷཱཏུཨཱདཱིནཾ, ཀཱམདྷཱཏུཨཱདཱིནཾ ཝཱ. སཏིཡཱ ཙ ཉཱཎསྶ ཙ ཨཏྠཱཡཱཏི ‘‘ཨབྷིཀྐནྟེ པཊིཀྐནྟེ སམྤཛཱནཀཱརཱི ཧོཏཱི’’ཏིཨཱདིནཱ (དཱི. ནི. ༡.༢༡༤; ༢.༣༧༦; མ. ནི. ༡.༡༠༩) ཝུཏྟཱཡ སཏྟཊྛཱནིཀཱཡ སཏིཡཱ ཙེཝ ཏཾསམྤཡུཏྟཉཱཎསྶ ཙ ཨཏྠཱཡ.

༣༠. དསམེ ¶ ནིཧཱིནནྟི ལཱམཀཾ, ཀིལིཊྛཾ ཝཱ. གཱམཝཱསིཀཱནནྟི བཱལཱནཾ. པུཐུཛྫནཱནཾ ཨིདནྟི པོཐུཛྫནིཀཾ. ཏེནཱཧ ‘‘པུཐུཛྫནཱནཾ སནྟཀ’’ནྟི, པུཐུཛྫནེཧི སེཝིཏབྦཏྟཱ ཏེསཾ སནྟཀནྟི ཝུཏྟཾ ཧོཏི. ཨནརིཡནྟི ན ནིདྡོསཾ. ནིདྡོསཊྛོ ཧི ཨརིཡཊྛོ. ཏེནཱཧ ‘‘ན ཨུཏྟམཾ ན པརིསུདྡྷ’’ནྟི. ཨརིཡེཧི ཝཱ ན སེཝིཏབྦནྟི ཨནརིཡཾ. ཨནཏྠསཾཧིཏནྟི དིཊྛདྷམྨིཀསམྤརཱཡིཀཱདིཝིཝིདྷཝིཔུལཱནཏྠསཧིཏཾ. ཏཱདིསཉྩ ཨཏྠསནྣིསྶིཏཾ ན ཧོཏཱིཏི ཨཱཧ ‘‘ན ཨཏྠསནྣིསྶིཏ’’ནྟི. ན ཝཊྚེ ནིབྦིནྡནཏྠཱཡཱཏི ཙཏུསཙྩཀམྨཊྛཱནཱབྷཱཝཏོ. ཨསཏི པན ཝཊྚེ ནིབྦིདཱཡ ཝིརཱགཱདཱིནཾ ཨསམྦྷཝོཡེཝཱཏི ཨཱཧ ‘‘ན ཝིརཱགཱཡཱ’’ཏིཨཱདི.

ཨནུཏྟམཾ ¶ ཨནུཏྟརིཡནྟི ཨཱཧ ‘‘ཨེཏཾ ཨནུཏྟར’’ནྟི. ཧཏྠིསྨིནྟི ནིམིཏྟཏྠེ བྷུམྨནྟི ཨཱཧ ‘‘ཧཏྠིནིམིཏྟཾ སིཀྑིཏབྦ’’ནྟི. ཧཏྠིཝིསཡཏྟཱ ཧཏྠིསནྣིསྶིཏཏྟཱ ཙ ཧཏྠིསིཔྤཾ ‘‘ཧཏྠཱི’’ཏི གཧེཏྭཱ ‘‘ཧཏྠིསྨིམྤི སིཀྑཏཱི’’ཏི ཝུཏྟཾ. ཏསྨཱ ཧཏྠིསིཔྤེ སིཀྑཏཱིཏི ཨེཝམེཏྠ ཨཏྠོ དཊྛབྦོ. སེསཔདེསུཔི ཨེསེཝ ནཡོ.

ལིངྒབྱཏྟཡེན ཝིབྷཏྟིབྱཏྟཡེན པཱརིཙརིཡེཏི ཝུཏྟནྟི ཨཱཧ ‘‘པཱརིཙརིཡཱཡ པཙྩུཔཊྛིཏཱ’’ཏི. སེསམེཏྠ སུཝིཉྙེཡྻམེཝ.

༣༡-༣༤. ཙཏུཏྠསྶ པཋམེ སེཁཱནཾ པཊིལདྡྷགུཎསྶ པརིཧཱནི ནཱམ ནཏྠཱིཏི ཨཱཧ ‘‘ཨུཔརཱུཔརིགུཎཔརིཧཱནཱཡཱ’’ཏི, ཨུཔརཱུཔརིལདྡྷབྦཱནཾ མགྒཕལཱནཾ པརིཧཱནཱཡ ཨནུཔྤཱདཱཡཱཏི ཨཏྠོ. ཏཏིཡཱདཱིནི ཨུཏྟཱནཏྠཱནེཝ.

༣༥. པཉྩམེ ¶ སམྤཡོགཝསེན ཝིཛྫཾ བྷཛནྟི, སཧཛཱཏཨཉྙམཉྙནིསྶཡསམྤཡུཏྟཨཏྠིཨཝིགཏཱདིཔཙྩཡཝསེན ཏཱཡ སཧ ཨེཀཱིབྷཱཝཾ གཙྪནྟཱིཏི ཝིཛྫཱབྷཱགིཡཱ. ཨཐ ཝཱ ཝིཛྫཱབྷཱགེ ཝིཛྫཱཀོཊྛཱསེ ཝཏྟནྟི ཝིཛྫཱསབྷཱགཏཱཡ ཏདེཀདེསེ ཝིཛྫཱཀོཊྛཱསེ པཝཏྟནྟཱིཏི ཝིཛྫཱབྷཱགིཡཱ. ཏཏྠ ཝིཔསྶནཱཉཱཎཾ, མནོམཡིདྡྷི, ཚ ཨབྷིཉྙཱཏི ཨཊྛ ཝིཛྫཱ. པུརིམེན ཨཏྠེན ཏཱཧི སམྤཡུཏྟདྷམྨཱ ཝིཛྫཱབྷཱགིཡཱ. པཙྪིམེན ཨཏྠེན ཏཱསུ ཡཱ ཀཱཙི ཨེཀཱཝ ཝིཛྫཱ ¶ ཝིཛྫཱ, སེསཱ ཝིཛྫཱབྷཱགིཡཱ. ཨེཝཾ ཝིཛྫཱཔི ཝིཛྫཱཡ སམྤཡུཏྟདྷམྨཱཔི ‘‘ཝིཛྫཱབྷཱགིཡཱ’’ཏྭེཝ ཝེདིཏབྦཱ. ཨིདྷ པན ཝིཔསྶནཱཉཱཎསམྤཡུཏྟཱ སཉྙཱཝ ཝིཛྫཱབྷཱགིཡཱཏི ཨཱགཏཱ, སཉྙཱསཱིསེན སེསསམྤཡུཏྟདྷམྨཱཔི ཝུཏྟཱ ཨེཝཱཏི དཊྛབྦཾ. ཨནིཙྩཱནུཔསྶནཱཉཱཎེཏི ཨནིཙྩཱནུཔསྶནཱཉཱཎེ ནིསྶཡཔཙྩཡབྷཱུཏེ ཨུཔྤནྣསཉྙཱ, ཏེན སཧགཏཱཏི ཨཏྠོ. སེསེསུཔི ཨེསེཝ ནཡོ.

ཝིཛྫཱབྷཱགིཡསུཏྟཝཎྞནཱ ནིཊྛིཏཱ.

༣༦. ཚཊྛེ ཀོདྷནོཏི ཀུཛ྄ཛྷནསཱིལོ. ཡསྨཱ སོ ཨཔྤཧཱིནཀོདྷཏཱཡ ཨདྷིགཏཀོདྷོ ནཱམ ཧོཏི, ཏསྨཱ ‘‘ཀོདྷེན སམནྣཱགཏོ’’ཏི ཨཱཧ. ཨུཔནཱཧོ ཨེཏསྶ ཨཏྠཱིཏི ཨུཔནཱཧཱི, ཨུཔནཡ྄ཧནསཱིལོཏི ཝཱ ཨུཔནཱཧཱི. ཝིཝཱདོ ནཱམ ཨུཔྤཛྫམཱནོ ཡེབྷུཡྻེན པཋམཾ དྭིནྣཾ ཝསེན ཨུཔྤཛྫཏཱིཏི ཝུཏྟཾ ‘‘དྭིནྣཾ བྷིཀྑཱུནཾ ཝིཝཱདོ’’ཏི. སོ པན ཡཐཱ བཧཱུནཾ ཨནཏྠཱཝཧོ ཧོཏི, ཏཾ ནིདསྶནམུཁེན ནིདསྶེནྟོ ‘‘ཀཐ’’ནྟིཨཱདིམཱཧ. ཨབྦྷནྟརཔརིསཱཡཱཏི པརིསབྦྷནྟརེ.

གུཎམཀྑནཱཡ པཝཏྟོཔི ཨཏྟནོ ཀཱརཀཾ གཱུཐེན པཧརནྟིཾ གཱུཐོ ཝིཡ པཋམཏརཾ མཀྑེཏཱིཏི མཀྑོ, སོ ཨེཏསྶ ཨཏྠཱིཏི མཀྑཱི. པལཱ༹སཏཱིཏི པལཱ༹སོ, པརསྶ གུཎེ ཌཾསིཏྭཱ ཝིཡ ཨཔནེཏཱིཏི ཨཏྠོ. སོ ཨེཏསྶ ཨཏྠཱིཏི པལཱ༹སཱི. པལཱ༹སཱི པུགྒལོ ཧི དུཏིཡསྶ དྷུརཾ ན དེཏི, སམཾ ཧརིཏྭཱ ཨཏིཝདཏི. ཏེནཱཧ ‘‘ཡུགགྒཱཧལཀྑཎེན པལཱ༹སེན སམནྣཱགཏོ’’ཏི. ཨིསྶཏཱིཏི ཨིསྶུཀཱི. མཙྪརཱཡཏཱིཏི མཙྪརཾ, ཏཾ ཨེཏསྶ ཨཏྠཱིཏི ¶ མཙྪརཱི. སཋཡཏི ན སམྨཱ བྷཱསཏཱིཏི སཋོ ཨཉྙཐཱ སནྟཾ ཨཏྟཱནཾ ཨཉྙཐཱ པཝེདནཏོ. མཱཡཱ ཨེཏསྶ ཨཏྠཱི མཱཡཱཝཱི. མིཙྪཱ པཱཔིཀཱ ཝིཉྙུགརཧིཏཱ ཨེཏསྶ དིཊྛཱིཏི མིཙྪཱདིཊྛི, ཀམྨཔཐཔརིཡཱཔནྣཱཡ ‘‘ནཏྠི དིནྣ’’ནྟིཨཱདིཝཏྠུཀཱཡ མིཙྪཏྟཔརིཡཱཔནྣཱཡ ཨནིཡྻཱནིཀཱཡ དིཊྛིཡཱ སམནྣཱགཏོཏི ཨཏྠོ. ཏེནཱཧ ‘‘ནཏྠིཀཝཱདཱི’’ཏིཨཱདི.

སཾ ཨཏྟནོ དིཊྛིཾ, སཡཾ ཝཱ ཨཏྟནཱ ཡཐཱགཧིཏཾ པརཱམསཏི, སབྷཱཝཾ ཨཏིཀྐམིཏྭཱ པརཏོ ཨཱམསཏཱིཏི སནྡིཊྛཱིཔརཱམཱསཱི. ཨཱདྷཱནཾ དལ༹ྷཾ གཎྷཱཏཱིཏི ཨཱདྷཱནགྒཱཧཱི, དལ༹ྷགྒཱཧཱི, ‘‘ཨིདམེཝ སཙྩ’’ནྟི ཐིརགྒཱཧཱིཏི ཨཏྠོ. ཡུཏྟཾ ཀཱརཎཾ དིསྭཱཝ ལདྡྷིཾ པཊིནིསྶཛྫཏཱིཏི པཊིནིསྶགྒཱི, དུཀྑེན ཀིཙྪེན ཀསིརེན བཧུམྤི ཀཱརཎཾ དསྶེཏྭཱ ན སཀྐཱ པཊིནིསྶགྒཾ ཀཱཏུནྟི ¶ དུཔྤཊིནིསྶགྒཱི. ཡོ ཨཏྟནོ ཨུཔྤནྣདིཊྛིཾ ‘‘ཨིདམེཝ སཙྩ’’ནྟི དལ༹ྷཾ གཎྷིཏྭཱ ཨཔི བུདྡྷཱདཱིཧི ཀཱརཎཾ དསྶེཏྭཱ ཝུཙྩམཱནོ ན པཊིནིསྶཛྫཏི. ཏསྶེཏཾ ཨདྷིཝཙནཾ. ཏཱདིསོ ཧི པུགྒལོ ཡཾ ཡདེཝ དྷམྨཾ ཝཱ ཨདྷམྨཾ ཝཱ སུཎཱཏི, ཏཾ སབྦཾ ‘‘ཨེཝཾ ཨམྷཱཀཾ ཨཱཙརིཡེཧི ཀཐིཏཾ, ཨེཝཾ ཨམྷེཧི སུཏ’’ནྟི ཀུམྨོཝ ཨངྒཱནི སཀེ ཀཔཱལེ ཨནྟོཡེཝ སམོདཧཏི. ཡཐཱ ཧི ཀཙྪཔོ ཨཏྟནོ ཧཏྠཔཱདཱདིཀེ ཨངྒེ ཀེནཙི གྷཊིཏེ སབྦཱནི ཨངྒཱནི ཨཏྟནོ ཀཔཱལེཡེཝ སམོདཧཏི, ན བཧི ནཱིཧརཏི, ཨེཝམཡམྤི ‘‘ན སུནྡརོ ཏཝ གཱཧོ, ཚཌྜེཧི ན’’ནྟི ཝུཏྟོ ཏཾ ན ཝིསྶཛྫཏི, ཨནྟོཡེཝ ཨཏྟནོ ཧདཡེ ཨེཝ ཋཔེཏྭཱ ཝིཙརཏི, ཀུམྦྷཱིལགྒཱཧཾ གཎྷཱཏི. ཡཐཱ སུསུམཱརཱ གཧིཏཾ ན པཊིནིསྶཛྫནྟི, ཨེཝཾ གཎྷཱཏི.

༣༧. སཏྟམེ དཀྑནྟི ཝཌྜྷནྟི ཨེཏཱཡཱཏི དཀྑིཎཱ, པརིཙྩཱགམཡཾ པུཉྙཾ, ཏསྶཱུཔཀརཎབྷཱུཏོ དེཡྻདྷམྨོ ཙ. ཨིདྷ པན དེཡྻདྷམྨོ ཨདྷིཔྤེཏོ. ཏེནེཝཱཧ ‘‘དཀྑིཎཾ པཏིཊྛཱཔེཏཱི’’ཏི. ཨིཏོ ཨུཊྛིཏེནཱཏི ཨིཏོ ཁེཏྟཏོ ཨུཔྤནྣེན. རཱགོ ཝིནཡཏི ཨེཏེནཱཏི རཱགཝིནཡོ, རཱགསྶ སམུཙྪེདིཀཱ པཊིཔདཱ. ཏེནཱཧ ‘‘རཱགཝིནཡཔཊིཔདཾ པཊིཔནྣཱ’’ཏི.

‘‘པུབྦེཝ དཱནཱ སུམནོ’’ཏིཨཱདིགཱཐཱཡ པུབྦེཝ དཱནཱ མུཉྩཙེཏནཱཡ པུབྦེ དཱནཱུཔཀརཎསམྦྷརཎཏོ པཊྛཱཡ སུམནོ ‘‘སམྤཏྟཱིནཾ ནིདཱནཾ ཨནུགཱམིཀདཱནཾ ¶ དསྶཱམཱི’’ཏི སོམནསྶིཏོ བྷཝེཡྻ. དདཾ ཙིཏྟཾ པསཱདཡེཏི དདནྟོ དེཡྻདྷམྨཾ དཀྑིཎེཡྻཧཏྠེ པཏིཊྛཱཔེནྟོ ‘‘ཨསཱརཏོ དྷནཏོ སཱརཱདཱནཾ ཀརོམཱི’’ཏི ཨཏྟནོ ཙིཏྟཾ པསཱདེཡྻ. དཏྭཱ ཨཏྟམནོ ཧོཏཱིཏི དཀྑིཎེཡྻཱནཾ དེཡྻདྷམྨཾ པརིཙྩཛིཏྭཱ ‘‘པཎྜིཏཔཉྙཏྟཾ ནཱམ མཡཱ ཨནུཊྛིཏཾ, ཨཧོ སཱདྷུ སུཊྛཱུ’’ཏི ཨཏྟམནོ པམུདིཏོ པཱིཏིསོམནསྶཛཱཏོ ཧོཏི. ཨེསཱཏི ཡཱ ཨཡཾ པུབྦཙེཏནཱ མུཉྩཙེཏནཱ ཨཔརཙེཏནཱཏི ཨིམཱསཾ ཀམྨཕལཱནཾ སདྡྷཱནུགཏཱནཾ སོམནསྶཔརིགྒཧིཏཱནཾ ཏིཝིདྷཱནཾ ཙེཏནཱནཾ པཱརིཔཱུརཱི, ཨེསཱ.

སཱིལསཉྙམེནཱཏི ཀཱཡིཀཝཱཙསིཀསཾཝརེན. ཧཏྠཔཱདེཏི དཀྑིཎེཡྻཱནཾ ཧཏྠཔཱདེ. མུཁཾ ཝིཀྑཱལེཏྭཱཏི ཏེསཾཡེཝ མུཁཾ ཝིཀྑཱལེཏྭཱ, ཨཏྟནཱཝ མུཁོདཀཾ དཏྭཱཏི ཨདྷིཔྤཱཡོ.

༣༨-༤༡. ཨཊྛམེ ¶ ཀུསལཀིརིཡཱཡ ཨཱདིཨཱརམྦྷབྷཱཝེན པཝཏྟཝཱིརིཡཾ ཋིཏསབྷཱཝཏཱཡ སབྷཱཝདྷཱརཎཊྛེན དྷཱཏཱུཏི ཝུཏྟནྟི ཨཱཧ – ‘‘ཨཱརམྦྷདྷཱཏཱུཏི ཨཱརབྷནཝསེན པཝཏྟཝཱིརིཡ’’ནྟི. ལདྡྷཱསེཝནཾ ཝཱིརིཡཾ བལཔྤཏྟཾ ཧུཏྭཱ པཊིཔཀྑེ ཝིདྷམཏཱིཏི ཨཱཧ ‘‘ནིཀྐམདྷཱཏཱུཏི ཀོསཛྫཏོ ནིཀྑམནསབྷཱཝཾ ཝཱིརིཡ’’ནྟི. པརཀྐམནསབྷཱཝོཏི ཨདྷིམཏྟཏརཱནཾ པཊིཔཀྑདྷམྨཱནཾ ཝིདྷམནསམཏྠཏཱཡ པཊུཔཊུཏརབྷཱཝེན པརཾ པརཾ ཋཱནཾ ཨཀྐམནསབྷཱཝོ. ནཝམཱདཱིསུ ནཏྠི ཝཏྟབྦཾ.

ཨཏྟཀཱརཱིསུཏྟཱདིཝཎྞནཱ ནིཊྛིཏཱ.

༤༢. དྭཱདསམེ མཱཧཾ ནཱགིཏ ཡསེན སམཱགམནྟི མཱ ཨཧཾ ཡསེན སམཱགམནཾ པཏྠེམི. མཱ ཙ མཡཱ ཡསོཏི ཡསོ ཙ མཡཱ མཱ སམཱགཙྪཏཱུཏི ¶ ཨཏྠོ. ཨིམིནཱ ཨཏྟནོ ལཱབྷསཀྐཱརེན ཨནཏྠིཀཏཾ ཝིབྷཱཝེཏི. པཉྩཧི ཝིམུཏྟཱིཧཱིཏི ཏདངྒཝིམུཏྟིཨཱདཱིཧི པཉྩཧི ཝིམུཏྟཱིཧི. སེསམེཏྠ ཨུཏྟཱནམེཝ.

༤༣. པཉྩམསྶ པཋམེ པརིསིཉྩིཏུནྟི (མ. ནི. ཨཊྛ. ༡.༢༧༢) ཡོ ཙུཎྞམཏྟིཀཱདཱིཧི གཏྟཱནི ཨུབྦཊྚེནྟོ མལླཀམུཊྛཱདཱིཧི ཝཱ གྷཾསནྟོ ནཧཱཡཏི, སོ ‘‘ནཧཱཡཏཱི’’ཏི ཝུཙྩཏི. ཡོ ཏཐཱ ཨཀཏྭཱ པཀཏིཡཱཝ ནཧཱཡཏི, སོ ‘‘པརིསིཉྩཏཱི’’ཏི ཝུཙྩཏི ¶ . བྷགཝཏོ ཙ སརཱིརེ ཏཐཱ ཧརིཏབྦཾ རཛོཛལླཾ ནཱམ ནུཔལིམྤཏི ཨཙྪཚཝིབྷཱཝཏོ, ཨུཏུགྒཧཎཏྠཾ པན བྷགཝཱ ཀེཝལཾ ཨུདཀེ ཨོཏརཏི. ཏེནཱཧ ‘‘གཏྟཱནི པརིསིཉྩིཏུ’’ནྟི.

པུབྦཀོཊྛཀོཏི པཱཙཱིནཀོཊྛཀོ. སཱཝཏྠིཡཾ ཀིར ཛེཏཝནཝིཧཱརོ ཀདཱཙི མཧཱ, ཀདཱཙི ཁུདྡཀོ. ཏཐཱ ཧི སོ ཝིཔསྶིསྶ བྷགཝཏོ ཀཱལེ ཡོཛནིཀོ ཨཧོསི, སིཁིསྶ ཏིགཱཝུཏོ, ཝེསྶབྷུསྶ ཨཌྜྷཡོཛནིཀོ, ཀཀུསནྡྷསྶ གཱཝུཏཔྤམཱཎོ, ཀོཎཱགམནསྶ ཨཌྜྷགཱཝུཏཔྤམཱཎོ, ཀསྶཔསྶ ཝཱིསཏིཨུསབྷཔྤམཱཎོ, ཨམྷཱཀཾ བྷགཝཏོ ཀཱལེ ཨཊྛཀརཱིསཔྤམཱཎོ ཛཱཏོ. ཏམྤི ནགརཾ ཏསྶ ཝིཧཱརསྶ ཀདཱཙི པཱཙཱིནཏོ ཧོཏི, ཀདཱཙི དཀྑིཎཏོ, ཀདཱཙི པཙྪིམཏོ, ཀདཱཙི ཨུཏྟརཏོ. ཛེཏཝནགནྡྷཀུཊིཡཾ པན ཙཏུནྣཾ མཉྩཔཱདཱནཾ པཏིཊྛིཏཊྛཱནཾ ཨཙལམེཝ. ཙཏྟཱརི ཧི ཨཙལཙེཏིཡཊྛཱནཱནི ནཱམ མཧཱབོདྷིཔལླངྐཊྛཱནཾ, ཨིསིཔཏནེ དྷམྨཙཀྐཔྤཝཏྟནཊྛཱནཾ, སངྐསྶནགརེ དེཝོརོཧནཀཱལེ སོཔཱནསྶ པཏིཊྛཱནཊྛཱནཾ, མཉྩཔཱདཊྛཱནནྟི. ཨཡཾ པན པུབྦཀོཊྛཀོ ཀསྶཔདསབལསྶ ཝཱིསཏིཨུསབྷཝིཧཱརཀཱལེ པཱཙཱིནདྭཱརཀོཊྛཀོ ཨཧོསི. སོ ཨིདཱནི ‘‘པུབྦཀོཊྛཀོ’’ཏྭེཝ པཉྙཱཡཏི.

ཀསྶཔདསབལསྶ ¶ ཀཱལེ ཨཙིརཝཏཱི ནགརཾ པརིཀྑིཔིཏྭཱ སནྡམཱནཱ པུབྦཀོཊྛཀཾ པཏྭཱ ཨུདཀེན བྷིནྡིཏྭཱ མཧནྟཾ ཨུདཀརཧདཾ མཱཔེསི སམཏིཏྟིཀཾ ཨནུཔུབྦགམྦྷཱིརཾ. ཏཏྠ ཨེཀཾ རཉྙོ ནྷཱནཏིཏྠཾ, ཨེཀཾ ནཱགརཱནཾ, ཨེཀཾ བྷིཀྑུསངྒྷསྶ, ཨེཀཾ བུདྡྷཱནནྟི ཨེཝཾ པཱཊིཨེཀྐཱནི ནྷཱནཏིཏྠཱནི ཧོནྟི རམཎཱིཡཱནིཝིཔྤཀིཎྞརཛཏཔཊྚསདིསཝཱལུཀཱནི. ཨིཏི བྷགཝཏཱ ཨཱཡསྨཏཱ ཨཱནནྡེན སདྡྷིཾ ཡེན ཨཡཾ ཨེཝརཱུཔོ པུབྦཀོཊྛཀོ, ཏེནུཔསངྐམི གཏྟཱནི པརིསིཉྩིཏུཾ. ཨཐཱཡསྨཱ ཨཱནནྡོ ཨུདཀསཱཊིཀཾ ཨུཔནཱམེསི. བྷགཝཱ སུརཏྟདུཔཊྚཾ ཨཔནེཏྭཱ ཨུདཀསཱཊིཀཾ ནིཝཱསེསི. ཐེརོ དུཔཊྚེན སདྡྷིཾ མཧཱཙཱིཝརཾ ཨཏྟནོ ཧཏྠགཏཾ ཨཀཱསི. བྷགཝཱ ཨུདཀཾ ཨོཏརི, སཧོཏརཎེནེཝསྶ ཨུདཀེ མཙྪཀཙྪཔཱ སབྦེ སུཝཎྞཝཎྞཱ ཨཧེསུཾ, ཡནྟནཱལི༹ཀཱཧི སུཝཎྞརསདྷཱརཱནི སིཉྩནཀཱལོ ཝིཡ སུཝཎྞཔཊཔྤསཱརཎཀཱལོ ཝིཡ ཙ ཨཧོསི. ཨཐ བྷགཝཏོ ནཧཱནཝཏྟཾ དསྶེཏྭཱ པཙྩུཏྟིཎྞསྶ ཐེརོ སུརཏྟདུཔཊྚཾ ཨུཔནཱམེསི. བྷགཝཱ ཏཾ ནིཝཱསེཏྭཱ ཝིཛྫུལླཏཱསདིསཾ ཀཱཡབནྡྷནཾ བནྡྷིཏྭཱ མཧཱཙཱིཝརཾ ཨནྟནྟེན སཾཧརིཏྭཱ པདུམགབྦྷསདིསཾ ཀཏྭཱ ཨུཔནཱིཏཾ དྭཱིསུ ཀཎྞེསུ གཧེཏྭཱ ཨཊྛཱསི. ཏེན ཝུཏྟཾ ‘‘པུབྦཀོཊྛཀེ གཏྟཱནི པརིསིཉྩིཏྭཱ ཨེཀཙཱིཝརོ ཨཊྛཱསཱི’’ཏི.

ཨེཝཾ ཋིཏསྶ པན བྷགཝཏོ སརཱིརཾ ཝིཀསིཏཔདུམཔུཔྥསདིསཾ སབྦཔཱལིཕུལླཾ པཱརིཙྪཏྟཀཾ, ཏཱརཱམརཱིཙིཝིཀསིཏཉྩ གགནཏལཾ སིརིཡཱ ཨཝཧསམཱནཾ ཝིཡ ཝིརོཙིཏྠ, བྱཱམཔྤབྷཱཔརིཀྑེཔཝིལཱསིནཱི ¶ ཙསྶ དྭཏྟིཾསཝརལཀྑཎམཱལཱ གནྠིཏྭཱ ཋཔིཏཱ དྭཏྟིཾས ཙནྡིམཱ ཝིཡ, དྭཏྟིཾས སཱུརིཡཱ ཝིཡ, པཊིཔཱཊིཡཱ ཋཔིཏདྭཏྟིཾསཙཀྐཝཏྟིདྭཏྟིཾསདེཝརཱཛདྭཏྟིཾསམཧཱབྲཧྨཱནོ ཝིཡ ཙ ཨཏིཝིཡ ཝིརོཙིཏྠ. ཡསྨཱ ཙ བྷགཝཏོ སརཱིརཾ སུདྷནྟཙཱམཱིཀརསམཱནཝཎྞཾ, སུཔརིསོདྷིཏཔཝཱལ༹རུཙིརཏོརཎཾ, སུཝིསུདྡྷནཱིལརཏནཱཝལིསདིསཀེསཏནུརུཧཾ, ཏསྨཱ ཏཧཾ ཏཧཾ ཝིནིགྒཏསུཛཱཏཛཱཏིཧིངྒུལཀརསཱུཔསོབྷིཏཾ ཨུཔརི སཏམེགྷརཏནཱཝལིསུཙྪཱདིཏཾ ཛངྒམམིཝ ཀནཀགིརིསིཁརཾ ཝིརོཙིཏྠ. ཏསྨིཉྩ སམཡེ དསབལསྶ སརཱིརཏོ ནིཀྑམིཏྭཱ ཚབྦཎྞརསྨིཡོ སམནྟཏོ ཨསཱིཏིཧཏྠཔྤམཱཎེ པདེསེ ཨཱདྷཱཝནྟཱི ཝིདྷཱཝནྟཱི རཏནཱཝལིརཏནདཱམརཏནཙུཎྞཝིཔྤཀིཎྞཾ ཝིཡ པསཱརིཏརཏནཙིཏྟཀཉྩནཔཊྚམིཝ ཨཱསིཉྩམཱནལཱཁཱརསདྷཱརཱཙིཏྟམིཝ ཨུཀྐཱསཏནིཔཱཏསམཱཀུལམིཝ ནིརནྟརཝིཔྤཀིཎྞཀཎིཀཱརཀིངྐིཎིཀཔུཔྥམིཝ ཝཱཡུཝེགསམུདྡྷཏཙིནཔིཊྛཙུཎྞརཉྫིཏམིཝ ¶ ཨིནྡདྷནུཝིཛྫུལླཏཱཝིཏཱནསནྠཏམིཝ ཙ གགནཏལཾ, ཏཾ ཋཱནཾ པཝནཉྩ སམྨཱ ཕརནྟི. ཝཎྞབྷཱུམི ནཱམེསཱ. ཨེཝརཱུཔེསུ ཋཱནེསུ བུདྡྷཱནཾ སརཱིརཝཎྞཾ ཝཱ གུཎཝཎྞཾ ཝཱ ཙུཎྞིཡཔདེཧི ཝཱ གཱཐཱཧི ཝཱ ཨཏྠཉྩ ཨུཔམཱཡོ ཙ ཀཱརཎཱནི ཙ ཨཱཧརིཏྭཱ པཊིབལེན དྷམྨཀཐིཀེན པཱུརེཏྭཱ ཀཐེཏུཾ ཝཊྚཏི. ཨེཝརཱུཔེསུ ཧི ཋཱནེསུ དྷམྨཀཐིཀསྶ ཐཱམོ ཝེདིཏབྦོ. པུབྦསདིསཱནི ཀུརུམཱནོཏི ནིརུདཀཱནི ཀུརུམཱནོ, སུཀྑཱཔཡམཱནོཏི ཨཏྠོ. སོདཀེ གཏྟེ ཙཱིཝརཾ པཱརུཔནྟསྶ ཧི ཙཱིཝརེ ཀཎྞིཀཱནི ཨུཊྛཧནྟི, པརིཀྑཱརབྷཎྜཾ དུསྶཏི, བུདྡྷཱནཾ པན སརཱིརེ རཛོཛལླཾ ན ཨུཔལིམྤཏི, པདུམཔཏྟེ ཨུཀྑིཏྟཨུདཀབིནྡུ ཝིཡ ཨུདཀཾ ཝིནིཝཊྚེཏྭཱ གཙྪཏི. ཨེཝཾ སནྟེཔི སིཀྑཱགཱརཝཏཱཡ བྷགཝཱ ‘‘པབྦཛིཏཝཏྟཾ ནཱམེཏ’’ནྟི མཧཱཙཱིཝརཾ ཨུབྷོསུ ཀཎྞེསུ གཧེཏྭཱ པུརཏོ ཀཱཡཾ པཊིཙྪཱདེཏྭཱ ཨཊྛཱསི.

ཏཱལི༹ཏཉྩ ཝཱདིཏཉྩ ཏཱལི༹ཏཝཱདིཏཾ, ཏཱུརིཡཱནཾ ཏཱལི༹ཏཝཱདིཏཾ ཏཱུརིཡཏཱལི༹ཏཝཱདིཏཾ. མཧནྟཉྩ ཏཾ ཏཱུརིཡཏཱལི༹ཏཝཱདིཏཉྩཱཏི མཧཱཏཱུརིཡཏཱལི༹ཏཝཱདིཏཾ. ཏེནཱཧ ‘‘མཧནྟེནཱ’’ཏིཨཱདི. ཨཐ ཝཱ བྷེརིམུདིངྒཔཎཝཱདིཏཱུརིཡཱནཾ ཏཱལི༹ཏཾ ཝཱིཎཱཝེལུ༹གོམུཁིཨཱདཱིནཾ ཝཱདིཏཉྩ ཏཱུརིཡཏཱལི༹ཏཝཱདིཏནྟི ཝཱ ཨེཝམེཏྠ ཨཏྠོ དཊྛབྦོ.

ཨབྷིཉྙཱཔཱརཾ གཏོཏི ཨབྷིཉྙཱཔཱརགཱུ. ཨེཝཾ སེསེསུཔི. སོ ཧི བྷགཝཱ སབྦདྷམྨེ ཨབྷིཛཱནནྟོ གཏོཏི ཨབྷིཉྙཱཔཱརགཱུ. ཏེསུ པཉྩུཔཱདཱནཀྑནྡྷེ པརིཛཱནནྟོ གཏོཏི པརིཉྙཱཔཱརགཱུ. སབྦཀིལེསེ པཛཧནྟོ གཏོཏི པཧཱནཔཱརགཱུ. ཙཏྟཱརོ མགྒེ བྷཱཝེནྟོ གཏོཏི བྷཱཝནཱཔཱརགཱུ. ནིརོདྷཾ སཙྪིཀརོནྟོ གཏོཏི སཙྪིཀིརིཡཱཔཱརགཱུ. སབྦསམཱཔཏྟིཾ སམཱཔཛྫནྟོ གཏོཏི སམཱཔཏྟིཔཱརགཱུ. སུབྲཧྨདེཝཔུཏྟཱདཡོཏི ཨེཏྠ སོ ཀིར དེཝཔུཏྟོ ཨཙྪརཱསངྒྷཔརིཝུཏོ ནནྡནཀཱིལི༹ཏཾ ཀཏྭཱ པཱརིཙྪཏྟཀམཱུལེ པཉྙཏྟཱསནེ ནིསཱིདི. ཏཾ པཉྩསཏཱ པརིཝཱརེཏྭཱ ནིསིནྣཱ ¶ , པཉྩསཏཱ རུཀྑཾ ཨབྷིརུཧིཏྭཱ མདྷུརསྶརེན གཱཡིཏྭཱ པུཔྥཱནི པཱཏེནྟི. ཏཱནི གཧེཏྭཱ ཨིཏརཱ ཨེཀཏོཝཎྚིཀམཱལཱཝ གནྠེནྟི. ཨཐ རུཀྑཾ ཨབྷིརུལ༹ྷཱ ཨུཔཙྪེདཀཝསེན ཨེཀཔྤཧཱརེནེཝ ཀཱལཾ ཀཏྭཱ ཨཝཱིཙིམྷི ནིབྦཏྟཱ མཧཱདུཀྑཾ ཨནུབྷཝནྟི. ཨཐ ཀཱལེ གཙྪནྟེ དེཝཔུཏྟོ ‘‘ཨིམཱསཾ ནེཝ སདྡོ སུཡྻཏི ¶ , ན པུཔྥཱནི པཱཏེནྟི, ཀཧཾ ནུ ཁོ གཏཱ’’ཏི ཨཱཝཛྫེནྟོ ནིརཡེ ནིབྦཏྟབྷཱཝཾ དིསྭཱ པིཡཝཏྠུཀསོཀེན རུཔྤམཱནོ ཙིནྟེསི – ‘‘ཨེཏཱ ཏཱཝ ཡཐཱཀམྨེན གཏཱ, མཡ྄ཧཾ ཨཱཡུསངྑཱརོ ཀིཏྟཀོ’’ཏི. སོ ‘‘སཏྟམེ དིཝསེ མཡཱཔི ཨཝསེསཱཧི པཉྩསཏཱཧི སདྡྷིཾ ཀཱལཾ ཀཏྭཱ ཏཏྠེཝ ནིབྦཏྟིཏབྦ’’ནྟི དིསྭཱ བལཝཏརེན སོཀེན སམཔྤིཏོ. ‘‘ཨིམཾ མཡ྄ཧཾ སོཀཾ སདེཝཀེ ལོཀེ ཨཉྙཏྲ ཏཐཱགཏཱ ནིབྦཱཔེཏུཾ སམཏྠོ ནཏྠཱི’’ཏི ཙིནྟེཏྭཱ སཏྠུ སནྟིཀཾ གནྟྭཱ ཝནྡིཏྭཱ ཨེཀམནྟཾ ཋིཏོ –

‘‘ནིཙྩཾ ཨུཏྲསྟམིདཾ ཙིཏྟཾ, ནིཙྩཾ ཨུབྦིགྒམིདཾ མནོ;

ཨནུཔྤནྣེསུ ཀིཙྪེསུ, ཨཐོ ཨུཔྤཏིཏེསུ ཙ;

སཙེ ཨཏྠི ཨནུཏྲསྟཾ, ཏཾ མེ ཨཀྑཱཧི པུཙྪིཏོ’’ཏི. (སཾ. ནི. ༡.༩༨) –

‘‘ནཱཉྙཏྲ བོཛ྄ཛྷཱ ཏཔསཱ, ནཱཉྙཏྲིནྡྲིཡསཾཝརཱ;

ནཱཉྙཏྲ སབྦནིསྶགྒཱ, སོཏྠིཾ པསྶཱམི པཱཎིན’’ནྟི. (སཾ. ནི. ༡.༩༨) –

དྷམྨཾ དེསེསི. སོ དེསནཱཔརིཡོསཱནེ ཝིགཏསོཀོ པཉྩཧི ཨཙྪརཱསཏེཧི སདྡྷིཾ སོཏཱཔཏྟིཕལེ པཏིཊྛཱཡ བྷགཝནྟཾ ནམསྶམཱནོ ཨཊྛཱསི. ཏཾ སནྡྷཱཡེཏཾ ཝུཏྟཾ ‘‘དུཀྑཔྤཏྟཱ སུབྲཧྨདེཝཔུཏྟཱདཡོ’’ཏི. ཨཱདི-སདྡེན ཙནྡསཱུརིཡདེཝཔུཏྟཱདཡོ སངྒཎྷཱཏི. ཙཏཱུཧི ཀཱརཎེཧཱིཏི ཨཱརཀཏྟཱ, ཨརཱིནཾ ཨརཱནཉྩ ཧཏཏྟཱ, པཙྩཡཱདཱིནཾ ཨརཧཏྟཱ, པཱཔཀརཎེ རཧཱབྷཱཝཱཏི ཨིམེཧི ཙཏཱུཧི ཀཱརཎེཧི.

དསཝིདྷསཾཡོཛནཱནཱིཏི ཨོརམྦྷཱགིཡུདྡྷམྦྷཱགིཡབྷེདཏོ དསཝིདྷསཾཡོཛནཱནི. སབྦེ ཨཙྩརུཙཱིཏི སབྦསཏྟེ ཨཏིཀྐམིཏྭཱ པཝཏྟརུཙི. ཨཊྛམཀནྟི སོཏཱཔཏྟིམགྒཊྛཾ སནྡྷཱཡ ཝདཏི. སོཏཱཔནྣོཏི ཕལཊྛོ གཧིཏོ.

སོརཙྩནྟི ¶ ‘‘ཏཏྠ ཀཏམཾ སོརཙྩཾ? ཡོ ཀཱཡིཀོ ཨཝཱིཏིཀྐམོ, ཝཱཙསིཀོ ཨཝཱིཏིཀྐམོ, ཀཱཡིཀཝཱཙསིཀོ ཨཝཱིཏིཀྐམོ, ཨིདཾ ཝུཙྩཏི སོརཙྩཾ, སབྦཱཔི སཱིལསཾཝརོ སོརཙྩ’’ནྟི (དྷ. ས. ༡༣༤༩) ཝཙནཏོ སུཙིསཱིལཾ ‘‘སོརཙྩ’’ནྟི ཝུཏྟཾ. ཀརཱུཎཱཏི ཀརུཎཱབྲཧྨཝིཧཱརམཱཧ. ཀརུཎཱཔུབྦབྷཱགོཏི ཏསྶ པུབྦབྷཱགཾ ཨུཔཙཱརཛ྄ཛྷཱནཾ ཝདཏི.

དུཝིདྷེན ¶ ཛྷཱནེནཱཏི ཨཱརམྨཎཱུཔནིཛ྄ཛྷཱནལཀྑཎཱུཔནིཛ྄ཛྷཱནབྷེདཏོ དུཝིདྷེན ཛྷཱནམནེན. པཉྩཝིདྷམིཙྪཱཛཱིཝཝསེནཱཏི ཀུཧནཱལཔནཱནེམིཏྟིཀཏཱནིཔྤེསིཀཏཱལཱབྷེནལཱབྷཾནིཛིགཱིསནཏཱསངྑཱཏ- པཉྩཝིདྷམིཙྪཱཛཱིཝཝསེན. ན ལིཔྤཏཱིཏི ན ཨལླཱིཡཏི ཨནུསཡཏོ ཨཱརམྨཎཀརཎཏོ ཝཱ ཏཎྷཱདིཊྛིཨབྷིནིཝེསཱབྷཱཝཏོ. སེསམེཏྠ ཨུཏྟཱནམེཝ.

༤༤. དུཏིཡེ སམསམགཏིཡཱཏི ཀ-ཀཱརསྶ ཡ-ཀཱརཝསེན ནིདྡེསོཏི ཨཱཧ ‘‘སམབྷཱཝེནེཝ སམགཏིཀཱ’’ཏི. བྷཝིསྶནྟཱིཏི ཨཏཱིཏཏྠེ ཨནཱགཏཝཙནཾ ཀཏནྟི ཨཱཧ ‘‘བྷཝིསྶནྟཱིཏི ཛཱཏཱ’’ཏི. པུརཱཎསྶ ཧི ཨིསིདཏྟསྶ ཙ སམགཏིཀཾ སནྡྷཱཡ སཱ ཨེཝམཱཧ.

ཨམྨཀཱཏི མཱཏུགཱམོ. ཨུཔཙཱརཝཙནཉྷེཏཾ. ཨིཏྠཱིསུ ཡདིདཾ ཨམྨཀཱ མཱཏུགཱམོ ཛནནཱི ཛནིཀཱཏི. ཏེནཱཧ ‘‘ཨིཏྠཱི ཧུཏྭཱ ཨིཏྠིསཉྙཱཡ ཨེཝ སམནྣཱགཏཱ’’ཏི.

དིཊྛིཡཱ པཊིཝིཛ྄ཛྷིཏབྦཾ ཨཔྤཊིཝིདྡྷཾ ཧོཏཱིཏི ཨཏྠཏོ ཀཱརཎཏོ ཙ པཉྙཱཡ པཊིཝིཛ྄ཛྷིཏབྦཾ ཨཔྤཊིཝིདྡྷཾ ཧོཏི, ནིཛྫཊཾ ནིགྒུམྦཾ ཀཏྭཱ ཡཱཐཱཝཏོ ཨཝིདིཏཾ ཧོཏི. སམཡེ སམཡེ ཀིལེསེཧི ཝིམུཙྩནཀཾ པཱིཏིཔཱམོཛྫཾ ཨིདྷ སཱམཱཡིཀཾ མ-ཀཱརེ ཨཀཱརསྶ དཱིགྷཾ ཀཏྭཱ. ཏེནཱཧ – ‘‘སཱམཱཡིཀམྤི ཝིམུཏྟིཾ ན ལབྷཏཱིཏི ཀཱལཱནུཀཱལཾ དྷམྨསྶཝནཾ ནིསྶཱཡ པཱིཏིཔཱམོཛྫཾ ན ལབྷཏཱི’’ཏི. པམིཎནྟཱིཏི ཨེཏྠ ཨཱརམྦྷཏྠོ པ-སདྡོཏི ཨཱཧ ‘‘ཏུལེཏུཾ ཨཱརབྷནྟཱི’’ཏི. པཎཱིཏོཏི ཝིསིཊྛོ.

ཏདནྟརནྟི ཝཙནཝིཔལླཱསེན ཨུཔཡོགཏྠེ སཱམིཝཙནཾ ཀཏནྟི ཨཱཧ ‘‘ཏཾ ཨནྟརཾ ཏཾ ཀཱརཎ’’ནྟི ¶ . ལོབྷསྶ ཨཔརཱཔརུཔྤཏྟིཡཱ བཧུཝཙནཝསེན ‘‘ལོབྷདྷམྨཱ’’ཏི ཝུཏྟཱ. སཱིལེན ཝིསེསཱི ཨཧོསི མེཐུནདྷམྨཝིརཏིཡཱ སམནྣཱགཏཏྟཱ.

༤༥-༤༨. ཏཏིཡེ ¶ དལིདྡོ ནཱམ དུགྒཏོ, ཏསྶ བྷཱཝོ དཱལིདྡིཡཾ. ན ཨེཏསྶ སཀཾ སཱཔཏེཡྻནྟི ཨསྶཀོ, ཨསཱཔཏེཡྻོ. ཏེནཱཧ ‘‘ཨཏྟནོ སནྟཀེན རཧིཏོ’’ཏི. ‘‘བུདྡྷོ དྷམྨོ སངྒྷོ’’ཏི ཝུཏྟེ ‘‘སམྨཱསམྦུདྡྷོ བྷགཝཱ, སྭཱཀྑཱཏོ དྷམྨོ, སུཔྤཊིཔནྣོ སངྒྷོ’’ཏི ཀེནཙི ཨཀམྤིཡབྷཱཝེན ཨོཀཔྤནཾ རཏནཏྟཡགུཎེ ཨོགཱཧེཏྭཱ ཀཔྤནཾ ཨོཀཔྤནསདྡྷཱ ནཱམ. ‘‘ཨིདཾ ཨཀུསལཾ ཀམྨཾ ནོ སཀཾ, ཨིདཾ པན ཀམྨཾ སཀ’’ནྟི ཨེཝཾ བྱཏིརེཀཏོ ཨནྭཡཏོ ཙ ཀམྨསྶཀཏཛཱནནཔཉྙཱ ཀམྨསྶཀཏཔཉྙཱ. ཏིཝིདྷཉྷི དུཙྩརིཏཾ ཨཏྟནཱ ཀཏམྤི སཀཀམྨཾ ནཱམ ན ཧོཏི ཨཏྠབྷཉྫནཏོ. སུཙརིཏཾ སཀཀམྨཾ ནཱམ ཨཏྠཛནནཏོ. ཨིཎཱདཱནསྨིནྟི པཙྩཏྟཝཙནཏྠེ ཨེཏཾ བྷུམྨནྟི ཨཱཧ ‘‘ཨིཎགྒཧཎཾ ཝདཱམཱི’’ཏི.

ཀཊགྒཱཧོཏི ཀཏཾ སབྦསོ སིདྡྷམེཝ ཀཏྭཱ གཧཎཾ. སོ པན ཝིཛཡལཱབྷོ ཧོཏཱིཏི ཨཱཧ ‘‘ཛཡགྒཱཧོ’’ཏི. ཧིརིམནོ ཨེཏསྶཱཏི ཧིརིམནོཏི ཨཱཧ ‘‘ཧིརིསམྤཡུཏྟཙིཏྟོ’’ཏི, པཱཔཛིགུཙྪནལཀྑཎཱཡ ཧིརིཡཱ སམྤཡུཏྟཙིཏྟོཏི ཨཏྠོ. ཨོཏྟཔྤཏི ཨུབྦིཛྫཏི བྷཱཡཏི སཱིལེནཱཏི ཨོཏྟཔྤཱི, ཨོཏྟཔྤེན སམནྣཱགཏོ. ནིརཱམིསཾ སུཁནྟི ཏཏིཡཛ྄ཛྷཱནསུཁཾ དཱུརསམུསྶཱརིཏཀཱམཱམིསཏྟཱ. ཨུཔེཀྑནྟི ཙཏུཏྠཛ྄ཛྷཱནུཔེཀྑཾ, ན ཡཾ ཀིཉྩི ཨུཔེཀྑཱཝེདནནྟི ཨཱཧ ‘‘ཙཏུཏྠཛ྄ཛྷཱནུཔེཀྑ’’ནྟི. ཨཱརདྡྷཝཱིརིཡོཏི པགྒཧིཏཔརིཔུཎྞཀཱཡིཀཙེཏསིཀཝཱིརིཡོཏི ཨཏྠོ. ཡོ གཎསངྒཎིཀཾ ཝིནོདེཏྭཱ ཙཏཱུསུ ཨིརིཡཱཔཐེསུ ཨཊྛཨཱརམྦྷཝཏྠུཝསེན ཨེཀཀོ ཧོཏི, ཏསྶ ཀཱཡིཀཾ ཝཱིརིཡཾ ཨཱརདྡྷཾ ནཱམ ཧོཏི. ཙིཏྟསངྒཎིཀཾ ཝིནོདེཏྭཱ ཨཊྛསམཱཔཏྟིཝསེན ཨེཀཀོ ཧོཏི. གམནེ ཨུཔྤནྣཀིལེསསྶ ཋཱནཾ པཱཔུཎིཏུཾ ན དེཏི, ཋཱནེ ཨུཔྤནྣཀིལེསསྶ ནིསཛྫཾ, ནིསཛྫཱཡ ཨུཔྤནྣཀིལེསསྶ སཡནཾ པཱཔུཎིཏུཾ ན དེཏི, ཨུཔྤནྣཊྛཱནེཡེཝ ཀིལེསེ ནིགྒཎྷཱཏི. ཨཡཾ ཙེཏསིཀཾ ཝཱིརིཡཾ ཨཱརདྡྷཾ ནཱམ ཧོཏི. པཊིཔཀྑདཱུརཱིབྷཱཝེན སེཊྛཊྛེན ཙ ཨེཀོ ཨུདེཏཱིཏི ཨེཀོདི, ཨེཀགྒཏཱ. ཏསྶ ཡོགཏོ ཨེཀགྒཙིཏྟོ ཨིདྷ ཨེཀོདི. པཊིཔཀྑཏོ ཨཏྟཱནཾ ནིཔཱཏི, ཏཾ ཝཱ ནིཔཡཏི ཝིསོསེཏཱིཏི ནིཔཀོ. ཨཉྙཏརཾ ཀཱཡཱདིབྷེདཾ ཨཱརམྨཎཾ སཱཏིསཡཱཡ སཏིཡཱ སརཏཱིཏི སཏོ. ཏེནཱཧ ‘‘ཨེཀགྒཙིཏྟོ’’ཏིཨཱདི.

ཨཀུཔྤཱ ¶ མེ ཝིམུཏྟཱིཏི མཡ྄ཧཾ ཨརཧཏྟཕལཝིམུཏྟི ཨཀུཔྤཏཱཡ ཨཀུཔྤཱརམྨཎཏཱཡ ཙ ཨཀུཔྤཱ. སཱ ཧི རཱགཱདཱིཧི ན ཀུཔྤཏཱིཏི ཨཀུཔྤཏཱཡཔི ཨཀུཔྤཱ ¶ . ཨཀུཔྤཾ ནིབྦཱནམསྶཱ ཨཱརམྨཎནྟི ཨཀུཔྤཱརམྨཎཏཱཡཔི ཨཀུཔྤཱ. ཏེནེཝཱཧ ‘‘ཨཀུཔྤཱརམྨཎཏྟཱ’’ཏིཨཱདི. བྷཝསཾཡོཛནཱནནྟི ཀཱམརཱགཔཊིགྷམཱནདིཊྛིཝིཙིཀིཙྪཱསཱིལབྦཏཔརཱམཱསབྷཝརཱགཨིསྶཱམཙྪརིཡ- ཨཝིཛྫཱསངྑཱཏཱནཾ དསནྣཾ སཾཡོཛནཱནཾ. ཨིམཱནི ཧི སཏྟེ བྷཝེསུ སཾཡོཛེནྟི ཨུཔནིབནྡྷནྟི བྷཝཱབྷཝེན སཾཡོཛེནྟི, ཏསྨཱ བྷཝསཾཡོཛནཱནཱིཏི ཝུཙྩནྟི. ཁཱིཎཱསཝོ ཨུཏྟམཨཎཎོ ཀིལེསཨིཎཱནཾ ཨབྷཱཝཏོ. ཨཉྙེ ཧི སཏྟཱ ཡཱཝ ན ཀིལེསཱ པཧཱིཡནྟི, ཏཱཝ སཨིཎཱ ནཱམ ཨསེརིཝིཧཱརབྷཱཝཏོ. ཙཏུཏྠཱདཱིནི ཨུཏྟཱནཏྠཱནི.

༤༩. སཏྟམེ ཝུཏྠབྲཧྨཙརིཡཝཱསོཏི ནིཝུཏྠབྲཧྨཙརིཡཝཱསོ. ཀཏཀརཎཱིཡོཏི ཨེཏྠ ཀརཎཱིཡནྟི པརིཉྙཱཔཧཱནབྷཱཝནཱསཙྪིཀིརིཡམཱཧ. ཏཾ པན ཡསྨཱ ཙཏཱུཧི མགྒེཧི པཙྩེཀཾ ཙཏཱུསུ སཙྩེསུ ཀཏྟབྦཏྟཱ སོལ༹སཝིདྷཾ ཝེདིཏབྦཾ. ཏེནཱཧ ‘‘ཙཏཱུཧི མགྒེཧི ཀཏྟབྦ’’ནྟི. ཁནྡྷཀིལེསཨབྷིསངྑཱརསངྑཱཏཱ ཏཡོ ཨོསཱིདཱཔནཊྛེན བྷཱརཱ ཝིཡཱཏི བྷཱརཱ. ཏེ ཨོཧིཏཱ ཨོརོཔིཏཱ ནིཀྑིཏྟཱ པཱཏིཏཱ ཨེཏེནཱཏི ཨོཧིཏབྷཱརོ. ཏེནཱཧ ‘‘ཁནྡྷབྷཱརཾ…པེ… ཨོཏཱརེཏྭཱ ཋིཏོ’’ཏི. ཨནུཔྤཏྟོ སདཏྠནྟི ཨནུཔྤཏྟསདཏྠོ. སདཏྠོཏི ཙ སཀཏྠམཱཧ ཀ-ཀཱརསྶ ད-ཀཱརཾ ཀཏྭཱ. ཨེཏྠ ཧི ཨརཧཏྟཾ ཨཏྟནོ ཡོནིསོམནསིཀཱརཱཡཏྟཏྟཱ ཨཏྟཱུཔནིབནྡྷཊྛེན སསནྟཱནཔརིཡཱཔནྣཏྟཱ ཨཏྟཱནཾ ཨཝིཛཧནཊྛེན ཨཏྟནོ ཨུཏྟམཏྠེན ཙ ཨཏྟནོ ཨཏྠཏྟཱ ‘‘སཀཏྠོ’’ཏི ཝུཙྩཏི. ཏེནཱཧ ‘‘སདཏྠོ ཝུཙྩཏི ཨརཧཏྟ’’ནྟི. སམྨདཉྙཱ ཝིམུཏྟོཏི སམྨཱ ཨཉྙཱཡ ཝིམུཏྟོ, ཨཙྪིནྣབྷཱུཏཱཡ མགྒཔཉྙཱཡ སམྨཱ ཡཐཱབྷཱུཏཾ དུཀྑཱདཱིསུ ཡོ ཡཐཱ ཛཱནིཏབྦོ, ཏཐཱ ཛཱནིཏྭཱ ཝིམུཏྟོཏི ཨཏྠོ. ཏེནཱཧ ‘‘སམྨཱ ཧེཏུནཱ’’ཏིཨཱདི. ཝིམུཏྟོཏི ཙ དྭེ ཝིམུཏྟིཡོ སབྦསྶ ཙིཏྟསཾཀིལེསསྶ མགྒོ ནིབྦཱནཱདྷིམུཏྟི ཙ. ནིབྦཱནེ ཨདྷིམུཙྩནཾ ཏཏྠ ནིནྣཔོཎཔབྦྷཱརཏཱཡ. ཨརཧཱ སབྦཀིལེསེཧི ཝིམུཏྟཙིཏྟཏྟཱ ཙིཏྟཝིམུཏྟིཡཱ ཝིམུཏྟོ. ནིབྦཱནཾ ཨདྷིམུཏྟཏྟཱ ནིབྦཱནེ ཝིམུཏྟོ. སེསམེཏྠ ཨུཏྟཱནམེཝ.

༥༠. ཨཊྛམེ ¶ ¶ ཨུཔནིསཱིདཏི ཕལཾ ཨེཏྠཱཏི ཀཱརཎཾ ཨུཔནིསཱ. ཡཐཱབྷཱུཏཉཱཎདསྶནནྟི ཡཐཱསབྷཱཝཛཱནནསངྑཱཏཾ དསྶནཾ. ཨེཏེན ཏརུཎཝིཔསྶནཾ དསྶེཏི. ཏརུཎཝིཔསྶནཱ ཧི བལཝཝིཔསྶནཱཡ པཙྩཡོ ཧོཏི. ཏརུཎཝིཔསྶནཱཏི ནཱམརཱུཔཔརིགྒཧེ ཉཱཎཾ, པཙྩཡཔརིགྒཧེ ཉཱཎཾ, སམྨསནེ ཉཱཎཾ, མགྒཱམགྒེ ཝཝཏྠཔེཏྭཱ ཋིཏཉཱཎནྟི ཙཏུནྣཾ ཉཱཎཱནཾ ཨདྷིཝཙནཾ. ནིབྦིནྡཏི ཨེཏཱཡཱཏི ནིབྦིདཱ. བལཝཝིཔསྶནཱཏི བྷཡཏུཔཊྛཱནེ ཉཱཎཾ ཨཱདཱིནཝཱནུཔསྶནེ ཉཱཎཾ མུཙྩིཏུཀམྱཏཱཉཱཎཾ སངྑཱརུཔེཀྑཱཉཱཎནྟི ཙཏུནྣཾ ཉཱཎཱནཾ ཨདྷིཝཙནཾ. པཊིསངྑཱནུཔསྶནཱ པན མུཙྩིཏུཀམྱཏཱཔཀྑིཀཱ ཨེཝ. ‘‘ཡཱཝ མགྒཱམགྒཉཱཎདསྶནཝིསུདྡྷི, ཏཱཝ ཏརུཎཝིཔསྶནཱ’’ཏི ཧི ཝཙནཏོ ཨུཔཀྐིལེསཝིམུཏྟཨུདཡབྦཡཉཱཎཏོ བལཝཝིཔསྶནཱ. ཝིརཛྫཏི ཨརིཡོ སངྑཱརཏོ ཨེཏེནཱཏི ཝིརཱགོ, ཨརིཡམགྒོ. ཨརཧཏྟཕལནྟི ཨུཀྐཊྛནིདྡེསཏོ ཝུཏྟཾ. ཨིནྡྲིཡསཾཝརསྶ སཱིལརཀྑཎཧེཏུཏྟཱ ཝུཏྟཾ ‘‘སཱིལཱནུརཀྑཎཨིནྡྲིཡསཾཝརོ ཀཐིཏོ’’ཏི.

ཨིནྡྲིཡསཾཝརསུཏྟཝཎྞནཱ ནིཊྛིཏཱ.

༥༡. ནཝམེ ཐེརཱ བྷིཀྑཱུ ཝིཧརནྟི བཧུསྶུཏཱ ཨཱགཏཱགམཱཏིཨཱདིཔཱལི༹པདེསུ ཨིམིནཱཝ ནཡེན ཨཏྠོ དཊྛབྦོ – སཱིལཱདིགུཎཱནཾ ཐིརབྷཱཝཔྤཏྟིཡཱ ཐེརཱ. སུཏྟགེཡྻཱདི བཧུ སུཏཾ ཨེཏེསནྟི བཧུསྶུཏཱ. ཝཱཙུགྒཏདྷཱརཎེན སམྨདེཝ གརཱུནཾ སནྟིཀེ ཨཱགམིཏབྷཱཝེན ཨཱགཏོ པརིཡཏྟིདྷམྨསངྑཱཏོ ཨཱགམོ ཨེཏེསནྟི ཨཱགཏཱགམཱ. སུཏྟཱཏིདྷམྨསངྑཱཏསྶ དྷམྨསྶ དྷཱརཎེན དྷམྨདྷརཱ. ཝིནཡདྷཱརཎེན ཝིནཡདྷརཱ. ཏེསཾཡེཝ དྷམྨཝིནཡཱནཾ མཱཏིཀཱཡ དྷཱརཎེན མཱཏིཀཱདྷརཱ. ཏཏྠ ཏཏྠ དྷམྨཔརིཔུཙྪཱཡ པརིཔུཙྪཏི. ཏཾ ཨཏྠཔརིཔུཙྪཱཡ པརིཔཉྷཏི ཝཱིམཾསཏི ཝིཙཱརེཏི. ཨིདཾ, བྷནྟེ, ཀཐཾ, ཨིམསྶ ཀྭཏྠོཏི པརིཔུཙྪནཔཉྷནཱཀཱརདསྶནཾ. ཨཱཝིཝཊཉྩེཝ པཱལི༹ཡཱ ཨཏྠཾ པདེསནྟརཔཱལི༹དསྶནེན ཨཱགམཏོ ཝིཝརནྟི. ཨནུཏྟཱནཱིཀཏཉྩ ཡུཏྟིཝིབྷཱཝནེན ཨུཏྟཱནཱིཀརོནྟི. ཀངྑཱཊྛཱནིཡེསུ དྷམྨེསུ སཾསཡུཔྤཏྟིཡཱ ¶ ཧེཏུཡཱ གཎྛིཊྛཱནབྷཱུཏེསུ པཱལི༹པདེསུ ཡཱཐཱཝཏོ ཝིནིཙྪཡདཱནེན ཀངྑཾ པཊིཝིནོདེནྟི.

༥༢. དསམེ ¶ བྷོགེ ཨདྷིཔྤཱཡོ ཨེཏེསནྟི བྷོགཱདྷིཔྤཱཡཱ. པཉྙཏྠཱཡ ཨེཏེསཾ མནོ ཨུཔཝིཙརཏཱིཏི པཉྙཱུཔཝིཙཱརཱ. པཐཝིཡཱ དཱཡཏྠཱཡ ཝཱ ཙིཏྟཾ ཨབྷིནིཝེསོ ཨེཏེསནྟི པཐཝཱིབྷིནིཝེསཱ. མནྟཱ ཨདྷིཊྛཱནཾ པཏིཊྛཱ ཨེཏེསནྟི མནྟཱདྷིཊྛཱནཱ. ཨིམིནཱ ནཡེན སེསཔདཱནིཔི ཝེདིཏབྦཱནི. སེསཾ ཨུཏྟཱནམེཝ.

༥༣. ཨེཀཱདསམེ ཛངྒལཱནནྟི ཨེཏྠ ཡོ ནིཔིཙྪལོ ན ཨནཱུཔོ ནིརུདཀཏཱཡ ཐདྡྷལཱུཁོ བྷཱུམིཔྤདེསོ, སོ ‘‘ཛངྒལོ’’ཏི ཝུཙྩཏི. ཏབྦཧུལཏཱཡ པན ཨིདྷ སབྦོ བྷཱུམིཔྤདེསོ ཛངྒལོ. ཏསྨིཾ ཛངྒལེ ཛཱཏཱ བྷཝཱཏི ཝཱ ཛངྒལཱ, ཏེསཾ ཛངྒལཱནཾ. ཨེཝཉྷི ནདིཙརཱནམྤི ཧཏྠཱིནཾ སངྒཧོ ཀཏོ ཧོཏི སམོདྷཱཏབྦཱནཾ ཝིཡ སམོདྷཱཡཀཱནམྤི ཨིདྷ ཛངྒལགྒཧཎེན གཧེཏབྦཏོ. པཐཝཱིཏལཙཱརཱིནནྟི ཨིམིནཱ ཛལཙཱརིནོ ཙ ནིཝཏྟེཏི ཨདིསྶམཱནཔཱདཏྟཱ. ‘‘པཱཎཱན’’ནྟི སཱདྷཱརཎཝཙནམྤི ‘‘པདཛཱཏཱནཱི’’ཏི སདྡནྟརསནྣིདྷཱནེན ཝིསེསནིཝིཊྛམེཝ ཧོཏཱིཏི ཨཱཧ ‘‘སཔཱདཀཔཱཎཱན’’ནྟི. ‘‘མུཏྟགཏ’’ནྟིཨཱདཱིསུ (མ. ནི. ༢.༡༡༩; ཨ. ནི. ༩.༡༡) གཏ-སདྡོ ཝིཡ ཨིདྷ ཛཱཏ-སདྡོ ཨནཏྠནྟརོཏི ཨཱཧ ‘‘པདཛཱཏཱནཱིཏི པདཱནཱི’’ཏི. སམོདྷཱནནྟི སམཝརོདྷཾ, ཨནྟོགདྷཾ ཝཱ. ཏེནཱཧ ‘‘ཨོདྷཱནཾ ཨུཔནིཀྑེཔཾ གཙྪནྟཱི’’ཏི. ཀཱུཊངྒམཱཏི པཱརིམནྟེན ཀཱུཊཾ ཨུཔགཙྪནྟི. ཀཱུཊནིནྣཱཏི ཀཱུཊཙྪིདྡམགྒེ པཝིསནཝསེན ཀཱུཊེ ནིནྣཱ. ཀཱུཊསམོསརཎཱཏི ཚིདྡེ ཨནུཔཝིསནཝསེན ཙ ཨཱཧཙྩ ཨཝཏྠཱནེན ཙ ཀཱུཊེ སམོདཧིཏྭཱ ཋིཏཱ. ཝཎྚེ ¶ པཏམཱནེ སབྦཱནི བྷཱུམིཡཾ པཏནྟཱིཏི ཨཱཧ ‘‘ཝཎྚཱནུཝཏྟཀཱནི བྷཝནྟཱི’’ཏི.

༥༤. དྭཱདསམེ ཛཱཏིབྷཱུམིཡནྟི ཨེཏྠ ཛནནཾ ཛཱཏི, ཛཱཏིཡཱ བྷཱུམི ཛཱཏིབྷཱུམི, ཛཱཏཊྛཱནཾ. ཏཾ ཁོ པནེཏཾ ནེཝ ཀོསལམཧཱརཱཛཱདཱིནཾ, ན ཙངྐིབྲཱཧྨཎཱདཱིནཾ, ན སཀྐསུཡཱམསནྟུསིཏཱདཱིནཾ ¶ , ན ཨསཱིཏིམཧཱསཱཝཀཱནཾ, ན ཨཉྙེསཾ སཏྟཱནཾ ‘‘ཛཱཏིབྷཱུམཱི’’ཏི ཝུཙྩཏི. ཡསྶ པན ཛཱཏདིཝསེ དསསཧསྶཱི ལོཀདྷཱཏུ ཨེཀདྡྷཛམཱལཱཝིཔྤཀིཎྞཀུསུམཝཱསཙུཎྞགཎསུགནྡྷཱ སབྦཔཱལིཕུལླམིཝ ནནྡནཝནཾ ཝིརོཙམཱནཱ པདུམིནིཔཎྞེ ཨུདཀབིནྡུ ཝིཡ ཨཀམྤིཏྠ, ཛཙྩནྡྷཱདཱིནཉྩ རཱུཔདསྶནཱདཱིནི ཨནེཀཱནི པཱཊིཧཱརིཡཱནི པཝཏྟིཾསུ. ཏསྶ སབྦཉྙུབོདྷིསཏྟསྶ ཛཱཏཊྛཱནཾ, སཱཏིསཡསྶ པན ཛནཀཀཔིལཝཏྠུསནྣིསྶཡོ ‘‘ཛཱཏིབྷཱུམཱི’’ཏི ཝུཙྩཏི. ཛཱཏིབྷཱུམཀཱ ཨུཔཱསཀཱཏི ཛཱཏིབྷཱུམིཝཱསིནོ ཨུཔཱསཀཱ. སནྟནེཏྭཱ སབྦསོ ཏནེཏྭཱ པཏྠརིཏྭཱ ཋིཏམཱུལཱནི མཱུལསནྟཱནཀཱནི. ཏཱནི པན ཨཏྠཏོ མཱུལཱནིཡེཝཱཏི ཨཱཧ ‘‘མཱུལསནྟཱནཀཱནནྟི མཱུལཱན’’ནྟི.

ཛཱཏདིཝསེ ཨཱཝུདྷཱནཾ ཛོཏིཏཏྟཱ, རཉྙོ ཨཔརིམིཏསྶ ཙ སཏྟཀཱཡསྶ ཨནཏྠཏོ པརིཔཱལནསམཏྠཏཱཡ ཙ ‘‘ཛོཏིཔཱལོ’’ཏི ལདྡྷནཱམཏྟཱ ཝུཏྟཾ ‘‘ནཱམེན ཛོཏིཔཱལོ’’ཏི. གོཝིནྡོཏི གོཝིནྡིཡཱབྷིསེཀེན ཨབྷིསིཏྟོ, གོཝིནྡསྶ ཋཱནེ ཋཔནཱབྷིསེཀེན ཨབྷིསིཏྟོཏི ཨཏྠོ. ཏཾ ཀིར ཏསྶ བྲཱཧྨཎསྶ ཀུལཔརམྤརཱགཏཾ ཋཱནནྟརཾ. ཏེནཱཧ ‘‘ཋཱནེན མཧཱགོཝིནྡོ’’ཏི. གཝཾ པཉྙཉྩ ཝིནྡཏི པཊིལབྷཏཱིཏི གོཝིནྡོ, མཧནྟོ གོཝིནྡོཏི མཧཱགོཝིནྡོ. གོཏི ཧི པཉྙཱཡེཏཾ ཨདྷིཝཙནཾ ‘‘གཙྪཏི ཨཏྠེ བུཛ྄ཛྷཏཱི’’ཏི ཀཏྭཱ. མཧཱགོཝིནྡོ ཙ ཨམྷཱཀཾ བོདྷིསཏྟོཡེཝ. སོ ཀིར དིསམྤཏིསྶ ནཱམ རཉྙོ པུརོཧིཏསྶ གོཝིནྡབྲཱཧྨཎསྶ པུཏྟོ ཧུཏྭཱ ཨཏྟནོ པིཏུསྶ ཙ རཉྙོ ཙ ཨཙྩཡེན ཏསྶ པུཏྟོ རེཎུ, སཧཱཡཱ ¶ ཙསྶ སཏྟབྷཱུ, བྲཧྨདཏྟོ, ཝེསྶབྷཱུ, བྷརཏོ, དྭེ དྷཏརཊྛཱཏི ཨིམེ སཏྟ རཱཛཱནོ ཡཐཱ ཨཉྙམཉྙཾ ན ཝིཝདནྟི. ཨེཝཾ རཛྫེ པཏིཊྛཱཔེཏྭཱ ཏེསཾ ཨཏྠདྷམྨེ ཨནུསཱསནྟེ ཛམྦུདཱིཔཏལེ སབྦེསཾ རཱཛཱཝ རཉྙཾ, བྲཧྨཱཝ བྲཱཧྨཎཱནཾ, དེཝོཝ གཧཔཏིཀཱནཾ སཀྐཏོ གརུཀཏོ མཱནིཏོ པཱུཛིཏོ ཨཔཙིཏོ ཨུཏྟམགཱརཝཊྛཱནཾ ཨཧོསི. ཏེན ཝུཏྟཾ ‘‘རེཎུཨཱདཱིནཾ སཏྟནྣཾ རཱཛཱུནཾ པུརོཧིཏོ’’ཏི. ཨིམེཝ སཏྟ བྷཱརདྷཱརཱ མཧཱརཱཛཱནོ. ཝུཏྟཉྷེཏཾ –

‘‘སཏྟབྷཱུ བྲཧྨདཏྟོ ཙ, ཝེསྶབྷཱུ བྷརཏོ སཧ;

རེཎུ དྭེ ཙ དྷཏརཊྛཱ, ཏདཱསུཾ སཏྟ བྷཱརདྷཱ’’ཏི. (དཱི. ནི. ཨཊྛ. ༢.༣༠༨);

རཉྙོ དིཊྛདྷམྨིཀསམྤརཱཡིཀཏྠཱནཾ པུརོ ཝིདྷཱནཏོ པུརེ སཾཝིདྷཱནཏོ པུརོཧིཏོ. ཀོདྷཱམགནྡྷེནཱཏི ཀོདྷསངྑཱཏེན པཱུཏིགནྡྷེན. ཀརུཎཱ ཨསྶ ཨཏྠཱིཏི ཀརུཎནྟི སཔུབྦབྷཱགཀརུཎཛ྄ཛྷཱནཾ ཝུཏྟནྟི ཨཱཧ ‘‘ཀརུཎཱཡ ཙ ཀརུཎཱཔུབྦབྷཱགེ ཙ ཋིཏཱ’’ཏི. ཡཀཱརོ སནྡྷིཝསེན ཨཱགཏོཏི ཨཱཧ ‘‘ཡེཏེཏི ཨེཏེ’’ཏི. ཨརཧཏྟཏོ པཊྛཱཡ སཏྟམོཏི སཀདཱགཱམཱི. སཀདཱགཱམིཾ ¶ ཨུཔཱདཱཡཱཏི སཀདཱགཱམིབྷཱཝཾ པཊིཙྩ. སཀདཱགཱམིསྶ ཧི པཉྩིནྡྲིཡཱནི སཀདཱགཱམིབྷཱཝཾ པཊིཙྩ མུདཱུནི ནཱམ ཧོནྟི. སེསམེཏྠ སུཝིཉྙེཡྻམེཝ.

༥༥. ཚཊྛསྶ ¶ ¶ པཋམེ ནིསཱིདི བྷགཝཱ པཉྙཏྟེ ཨཱསནེཏི ཨེཏྠ ཀིཾ ཏཾ ཨཱསནཾ པཋམམེཝ པཉྙཏྟཾ, ཨུདཱཧུ བྷགཝནྟཾ དིསྭཱ པཉྙཏྟནྟི ཙེ? བྷགཝཏོ དྷརམཱནཀཱལེ པདྷཱནིཀབྷིཀྑཱུནཾ ཝཏྟམེཏཾ, ཡདིདཾ ཨཏྟནོ ཝསནཊྛཱནེ བུདྡྷཱསནཾ པཉྙཔེཏྭཱཝ ནིསཱིདནནྟི དསྶེནྟོ ཨཱཧ ‘‘པདྷཱནིཀབྷིཀྑཱུ’’ཏིཨཱདི. བུདྡྷཀཱལེ ཀིར ཡཏྠ ཡཏྠ ཨེཀོཔི བྷིཀྑུ ཝིཧརཏི, སབྦཏྠ བུདྡྷཱསནཾ པཉྙཏྟམེཝ ཧོཏི. ཀསྨཱ? བྷགཝཱ ཧི ཨཏྟནོ སནྟིཀེ ཀམྨཊྛཱནཾ གཧེཏྭཱ ཕཱསུཀཊྛཱནེ ཝིཧརནྟེ མནསི ཀརོཏི – ‘‘ཨསུཀོ མཡ྄ཧཾ སནྟིཀེ ཀམྨཊྛཱནཾ གཧེཏྭཱ གཏོ, ཨསཀྑི ནུ ཁོ ཝིསེསཾ ནིབྦཏྟེཏུཾ, ནོ’’ཏི. ཨཐ ནཾ པསྶཏི ཀམྨཊྛཱནཾ ཝིསྶཛྫེཏྭཱ ཨཀུསལཝིཏཀྐཾ ཝིཏཀྐཡམཱནཾ, ཏཏོ ‘‘ཀཐཉྷི ནཱམ མཱདིསསྶ སཏྠུ སནྟིཀེ ཀམྨཊྛཱནཾ གཧེཏྭཱ ཝིཧརནྟཾ ཨིམཾ ཀུལཔུཏྟཾ ཨཀུསལཝིཏཀྐཱ ཨདྷིབྷཝིཏྭཱ ཨནམཏགྒེ ཝཊྚདུཀྑེ སཾསཱརེསྶནྟཱི’’ཏི ཏསྶ ཨནུགྒཧཏྠཾ ཏཏྠེཝ ཨཏྟཱནཾ དསྶེཏྭཱ ཏཾ ཀུལཔུཏྟཾ ཨོཝདིཏྭཱ ཨཱཀཱསཾ ཨུཔྤཏིཏྭཱ པུན ཨཏྟནོ ཝསནཊྛཱནམེཝ གཙྪཏི. ཨཐེཝཾ ཨོཝདིཡམཱནཱ ཏེ བྷིཀྑཱུ ཙིནྟཡིཾསུ ‘‘སཏྠཱ ཨམྷཱཀཾ མནཾ ཛཱནིཏྭཱ ཨཱགནྟྭཱ ཨམྷཱཀཾ སམཱིཔེ ཋིཏཾཡེཝ ཨཏྟཱནཾ དསྶེཏི. ཏསྨིཾ ཁཎེ, ‘བྷནྟེ, ཨིདྷ ནིསཱིདཐ ནིསཱིདཐཱ’ཏི ཨཱསནཔརིཡེསནཾ ནཱམ བྷཱརོ’’ཏི. ཏེ ཨཱསནཾ པཉྙཔེཏྭཱཝ ཝིཧརནྟི. ཡསྶ པཱིཋཾ ཨཏྠི, སོ ཏཾ པཉྙཔེཏི. ཡསྶ ནཏྠི, སོ མཉྩཾ ཝཱ ཕལཀཾ ཝཱ པཱསཱཎཾ ཝཱ ཝཱལིཀཱཔུཉྫཾ ཝཱ པཉྙཔེཏི. ཏཾ ཨལབྷམཱནཱ པུརཱཎཔཎྞཱནིཔི སཾཀཌྜྷིཏྭཱ ཏཏྠ པཾསུཀཱུལཾ པཏྠརིཏྭཱ ཋཔེནྟི.

སཏྟ སརཱཏི – ཚཛྫོ, ཨུསབྷོ, གནྡྷཱརོ, མཛ྄ཛྷིམོ, པཉྩམོ, དྷེཝཏོ, ནིསཱདོཏི ཨེཏེ སཏྟ སརཱ. ཏཡོ གཱམཱཏི – ཚཛྫགཱམོ, མཛ྄ཛྷིམགཱམོ, སཱདྷཱརཎགཱམོཏི ཏཡོ གཱམཱ, སམཱུཧཱཏི ཨཏྠོ. མནུསྶལོཀེ ཝཱིཎཱཝཱདནཱ ཨེཀེཀསྶ སརསྶ ཝསེན ཏཡོ ཏཡོ མུཙྪནཱཏི ཀཏྭཱ ཨེཀཝཱིསཏི མུཙྪནཱ. དེཝལོཀེ ཝཱིཎཱཝཱདནཱ པན སམཔཉྙཱས མུཙྪནཱཏི ཝདནྟི. ཏཏྠ ཧི ¶ ཨེཀེཀསྶ སརསྶ ཝསེན སཏྟ ¶ སཏྟ མུཙྪནཱ, ཨནྟརསྶ སརསྶ ཙ ཨེཀཱཏི སམཔཉྙཱས མུཙྪནཱ. ཏེནེཝ སཀྐཔཉྷསུཏྟསཾཝཎྞནཱཡཾ (དཱི. ནི. ཨཊྛ. ༢.༣༤༥) ‘‘སམཔཉྙཱས མུཙྪནཱ མུཙྪེཏྭཱ’’ཏི པཉྩསིཁསྶ ཝཱིཎཱཝཱདནཾ དསྶེནྟེན ཝུཏྟཾ. ཋཱནཱ ཨེཀཱུནཔཉྙཱསཱཏི ཨེཀེཀསྶེཝ སརསྶ སཏྟ སཏྟ ཋཱནབྷེདཱ, ཡཏོ སརསྶ མཎྜལཏཱཝཝཏྠཱནཾ ཧོཏི. ཨེཀཱུནཔཉྙཱསཊྛཱནཝིསེསོ ཏིསྶོ དུཝེ ཙཏསྶོ ཙཏསྶོ ཏིསྶོ དུཝེ ཙཏསྶོཏི དྭཱཝཱིསཏི སུཏིབྷེདཱ ཙ ཨིཙྪིཏཱ.

ཨཏིགཱལ༹ྷཾ ཨཱརདྡྷནྟི ཐིནམིདྡྷཚམྦྷིཏཏྟཱནཾ ཝཱུཔསམཏྠཾ ཨཏིཝིཡ ཨཱརདྡྷཾ. སབྦཏྠ ནིཡུཏྟཱ སབྦཏྠིཀཱ. སབྦེན ཝཱ ལཱིནུདྡྷཙྩཔཀྑིཡེན ཨཏྠེཏབྦཱ སབྦཏྠིཀཱ. སམཐོཡེཝ སམཐནིམིཏྟཾ. ཨེཝཾ སེསེསུཔི. ཁཡཱ རཱགསྶ ཝཱིཏརཱགཏྟཱཏི ཨེཏྠ ཡསྨཱ བཱཧིརཀོ ཀཱམེསུ ཝཱིཏརཱགོ ན ཁཡཱ རཱགསྶ ཝཱིཏརཱགོ སབྦསོ ཨཝིཔྤཧཱིནརཱགཏྟཱ. ཝིཀྑམྦྷིཏརཱགོ ཧི སོ. ཨརཧཱ པན ཁཡཱ ཨེཝ, ཏསྨཱ ཝུཏྟཾ ‘‘ཁཡཱ རཱགསྶ ཝཱིཏརཱགཏྟཱ’’ཏི. ཨེས ནཡོ དོསམོཧེསུཔི.

ལཱབྷསཀྐཱརསིལོཀཾ ནིཀཱམཡམཱནོཏི ཨེཏྠ ལབྦྷཏི པཱཔུཎཱིཡཏཱིཏི ལཱབྷོ, ཙཏུནྣཾ པཙྩཡཱནམེཏཾ ཨདྷིཝཙནཾ. སཀྐཙྩཾ ཀཱཏབྦོཏི སཀྐཱརོ. པཙྩཡཱ ཨེཝ ཧི པཎཱིཏཔཎཱིཏཱ སུནྡརསུནྡརཱ ཨབྷིསངྑརིཏྭཱ ཀཏཱ ‘‘སཀྐཱརོ’’ཏི ཝུཙྩཏི, ཡཱ ཙ པརེཧི ཨཏྟནོ གཱརཝཀིརིཡཱ, པུཔྥཱདཱིཧི ཝཱ པཱུཛཱ. སིལོཀོཏི ཝཎྞབྷཎནཾ. ཏཾ ལཱབྷཉྩ, སཀྐཱརཉྩ, སིལོཀཉྩ, ནིཀཱམཡམཱནོ, པཝཏྟཡམཱནོཏི ཨཏྠོ. ཏེནེཝཱཧ ‘‘ཙཏུཔཙྩཡལཱབྷཉྩ…པེ… པཏྠཡམཱནོ’’ཏི.

ཐཱུཎནྟི པསཱུནཾ བནྡྷནཏྠཱཡ ནིཁཱཏཏྠམྦྷསངྑཱཏཾ ཐཱུཎཾ. སེསཾ སུཝིཉྙེཡྻམེཝ.

༥༦. དུཏིཡེ སམདྷོསཱིཏི སམནྟཏོ ཨདྷོསི. སབྦབྷཱགེན པརིཕནྡནཙལནཱཀཱརེན ཨཔཙིཏིཾ དསྶེཏི. ཝཏྟཾ ཀིརེཏཾ བཱལ༹ྷགིལཱནེནཔི ཝུཌྜྷཏརཾ ¶ དིསྭཱ ཨུཊྛིཏཱཀཱརེན ཨཔཙིཏི དསྶེཏབྦཱ. ཏེན པན ‘‘མཱ ཙལི མཱ ཙལཱི’’ཏི ཝཏྟབྦོ, ཏཾ པན ཙལནཾ ཨུཊྛཱནཱཀཱརདསྶནཾ ཧོཏཱིཏི ¶ ཨཱཧ ‘‘ཨུཊྛཱནཱཀཱརཾ དསྶེཏཱི’’ཏི. སནྟིམཱནི ཨཱསནཱནཱིཏི པཋམམེཝ པཉྙཏྠཱསནཾ སནྡྷཱཡ ཝདཏི. བུདྡྷཀཱལསྨིཉྷི ཨེཀསྶཔི བྷིཀྑུནོ ཝསནཊྛཱནེ – ‘‘སཙེ སཏྠཱ ཨཱགཙྪིསྶཏི, ཨཱསནཾ པཉྙཏྟམེཝ ཧོཏཱུ’’ཏི ཨནྟམསོ ཕལཀམཏྟམྤི པཎྞསནྠཱརམཏྟམྤི པཉྙཏྟམེཝ. ཁམནཱིཡཾ ཡཱཔནཱིཡནྟི ཀཙྩི དུཀྑཾ ཁམིཏུཾ, ཨིརིཡཱཔཐཾ ཝཱ ཡཱཔེཏུཾ སཀྐཱཏི པུཙྪཏི. སཱིསཝེདནཱཏི ཀུཏོཙི ནིཀྑམིཏུཾ ཨལབྷམཱནེཧི ཝཱཏེཧི སམུཊྛཱཔིཏཱ བལཝཏིཡོ སཱིསཝེདནཱ ཧོནྟི.

༥༧. ཏཏིཡེ ཨབྷིཛཱཏིཡོཏི ཨེཏྠ ཨབྷི-སདྡོ ཨུཔསགྒམཏྟཾ, ན ཨཏྠཝིསེསཛོཏཀོཏི ཨཱཧ ‘‘ཚ ཛཱཏིཡོ’’ཏི. ཨབྷིཛཱཡཏཱིཏི ཨེཏྠཱཔི ཨེསེཝ ནཡོ.

ཨུརབྦྷེ ཧནནྟཱིཏི ཨོརབྦྷིཀཱ. ཨེཝཾ སཱུཀརིཀཱདཡོ ཝེདིཏབྦཱ. རོདེནྟི ཀུརུརཀམྨནྟཏཱཡ སཔྤཊིབདྡྷེ སཏྟེ ཨསྶཱུནི མོཙེནྟཱིཏི རུདྡཱ, ཏེ ཨེཝ ལུདྡཱ ར-ཀཱརསྶ ལ-ཀཱརཾ ཀཏྭཱ. ཨིམིནཱ ཨཉྙེཔི ཡེ ཀེཙི མཱགཝིཀཱ ནེསཱདཱ ཝུཏྟཱ, ཏེ པཱཔཀམྨཔྤསུཏཏཱཡ ‘‘ཀཎྷཱབྷིཛཱཏཱི’’ཏི ཝདཏི.

བྷིཀྑཱུཏི ཙ བུདྡྷསཱསནེ བྷིཀྑཱུ. ཏེ ཀིར སཙྪནྡརཱགེན པརིབྷུཉྫནྟཱིཏི ཨདྷིཔྤཱཡེན ཙཏཱུསུ པཙྩཡེསུ ཀཎྚཀེ པཀྑིཔིཏྭཱ ཁཱདནྟཱིཏི ‘‘ཀཎྚཀཝུཏྟིཀཱ’’ཏི ཝདཏི. ཀསྨཱཏི ཙེ? ཡསྨཱ ཏེ པཎཱིཏེ པཙྩཡེ པཊིསེཝནྟཱིཏི ཏསྶ མིཙྪཱགཱཧོ. ཉཱཡལདྡྷེཔི པཙྩཡེ བྷུཉྫམཱནཱ ཨཱཛཱིཝཀསམཡསྶ ཝིལོམགྒཱཧིཏཱཡ པཙྩཡེསུ ཀཎྚཀེ པཀྑིཔིཏྭཱ ཁཱདནྟི ནཱམཱཏི ཝདཏཱིཏི. ཨཐ ཝཱ ཀཎྚཀཝུཏྟིཀཱ ཨེཝཾནཱམཀཱ ཨེཀེ པབྦཛིཏཱ, ཡེ སཝིསེསཾ ཨཏྟཀིལམཐཱནུཡོགཾ ཨནུཡུཏྟཱ. ཏཐཱ ཧི ཏེ ཀཎྚཀེ ཝཏྟནྟཱ ཝིཡ ཧོནྟཱིཏི ‘‘ཀཎྚཀཝུཏྟིཀཱ’’ཏི ཝུཏྟཱ. ཨིམམེཝ ཙ ཨཏྠཝིཀཔྤཾ སནྡྷཱཡཱཧ ‘‘ཀཎྚཀཝུཏྟིཀཱཏི སམཎཱ ནཱམེཏེ’’ཏི.

ལོཧིཏཱབྷིཛཱཏི ¶ ནཱམ ནིགཎྛཱ ཨེཀསཱཊཀཱཏི ཝུཏྟཱ. ཏེ ཀིར ཋཏྭཱ བྷུཉྫནནཧཱནཔྤཊིཀྑེཔཱདིཝཏསམཱཡོགེན པུརིམེཧི དྭཱིཧི པཎྜརཏརཱ.

ཨཙེལཀསཱཝཀཱཏི ¶ ཨཱཛཱིཝཀསཱཝཀེ ཝདཏི. ཏེ ཀིར ཨཱཛཱིཝཀལདྡྷིཡཱ སུཝིསུདྡྷཙིཏྟཏཱཡ ནིགཎྛེཧིཔི པཎྜརཏརཱ. ཨེཝཉྩ ཀཏྭཱ ཨཏྟནོ པཙྩཡདཱཡཀེ ནིགཎྛེཧིཔི ཛེཊྛཀཏརེ ཀརོཏི.

ཨཱཛཱིཝཀཱ ཨཱཛཱིཝཀིནིཡོ ‘‘སུཀྐཱབྷིཛཱཏཱི’’ཏི ཝུཏྟཱ. ཏེ ཀིར པུརིམེཧི ཙཏཱུཧི པཎྜརཏརཱ. ནནྡཱདཡོ ཧི ཏཐཱརཱུཔཾ ཨཱཛཱིཝཀཔྤཊིཔཏྟིཾ ཨུཀྐཾསཾ པཱཔེཏྭཱ ཋིཏཱ, ཏསྨཱ ནིགཎྛེཧི ཨཱཛཱིཝཀསཱཝཀེཧི ཙ པཎྜརཏརཱཏི ‘‘པརམསུཀྐཱབྷིཛཱཏཱི’’ཏི ཝུཏྟཱ.

བིལཾ ཨོལགྒེཡྻུནྟི མཾསབྷཱགཾ ནྷཱརུནཱ ཝཱ ཀེནཙི ཝཱ གནྠིཏྭཱ པུརིསསྶ ཧཏྠེ ཝཱ ཀེསེ ཝཱ ཨོལམྦནཝསེན བནྡྷེཡྻུཾ. ཨིམིནཱ སཏྠདྷམྨཾ ནཱམ དསྶེཏི. སཏྠཝཱཧོ ཀིར མཧཱཀནྟཱརཾ པཊིཔནྣོ ཨནྟརཱམགྒེ གོཎེ མཏེ མཾསཾ གཧེཏྭཱ སབྦེསཾ སཏྠིཀཱནཾ ‘‘ཨིདཾ ཁཱདིཏྭཱ ཨེཏྟཀཾ མཱུལཾ དཱཏབྦ’’ནྟི ཀོཊྛཱསཾ ཨོལམྦཏི. གོཎམཾསཾ ནཱམ ཁཱདནྟཱཔི ཨཏྠི, ཨཁཱདནྟཱཔི ཨཏྠི, ཁཱདནྟཱཔི མཱུལཾ དཱཏུཾ སཀྐོནྟཱཔི ཨསཀྐོནྟཱཔི. སཏྠཝཱཧོ ཡེན མཱུལེན གོཎོ གཧིཏོ, ཏཾ མཱུལཾ སཏྠིཀེཧི དྷཱརཎཏྠཾ སབྦེསཾ བལཀྐཱརེན ཀོཊྛཱསཾ དཏྭཱ མཱུལཾ གཎྷཱཏི. ཨཡཾ སཏྠདྷམྨོ.

ཀཎྷཱབྷིཛཱཏིཡོ སམཱནོཏི ཀཎྷེ ནཱིཙཀུལེ ཛཱཏོ ཧུཏྭཱ. ཀཎྷདྷམྨནྟི པཙྩཏྟེ ཨུཔཡོགཝཙནནྟི ཨཱཧ ‘‘ཀཎྷསབྷཱཝོ ཧུཏྭཱ ཨབྷིཛཱཡཏཱི’’ཏི, ཏཾ ཨནྟོགདྷཧེཏུཨཏྠཾ པདཾ, ཨུཔྤཱདེཏཱིཏི ཨཏྠོ. ཏསྨཱ ཀཎྷཾ དྷམྨཾ ཨབྷིཛཱཡཏཱིཏི ཀཱལ༹ཀཾ དསདུསྶཱིལྱདྷམྨཾ ཨུཔྤཱདེཏི. སུཀྐཾ དྷམྨཾ ཨབྷིཛཱཡཏཱིཏི ཨེཏྠཱཔི ཨིམིནཱ ནཡེན ཨཏྠོ ཝེདིཏབྦོ. སོ ཧི ‘‘ཨཧཾ པུབྦེཔི པུཉྙཱནཾ ཨཀཏཏྟཱ ནཱིཙཀུལེ ནིབྦཏྟོ, ཨིདཱནི པུཉྙཾ ཀརིསྶཱམཱི’’ཏི པུཉྙསངྑཱཏཾ པཎྜརདྷམྨཾ ཀརོཏི.

ཨཀཎྷཾ ཨསུཀྐཾ ནིབྦཱནནྟི སཙེ ཀཎྷཾ བྷཝེཡྻ, ཀཎྷཝིཔཱཀཾ དདེཡྻ ཡཐཱ དསཝིདྷཾ དུསྶཱིལྱདྷམྨཾ. སཙེ སུཀྐཾ, སུཀྐཝིཔཱཀཾ དདེཡྻ ཡཐཱ དཱནསཱིལཱདིཀུསལཀམྨཾ. དྭིནྣམྤི ཨཔྤདཱནཏོ ‘‘ཨཀཎྷཾ ཨསུཀྐ’’ནྟི ཝུཏྟཾ. ནིབྦཱནཉྩ ནཱམ ཨིམསྨིཾ ཨཏྠེ ཨརཧཏྟཾ ཨདྷིཔྤེཏཾ ‘‘ཨབྷིཛཱཡཏཱི’’ཏི ཝཙནཏོ ¶ . ཏཉྷི ཀིལེསནིབྦཱནནྟེ ཛཱཏཏྟཱ ནིབྦཱནཾ ནཱམ ཡཐཱ ‘‘རཱགཱདཱིནཾ ཁཡནྟེ ཛཱཏཏྟཱ རཱགཀྑཡོ, དོསཀྑཡོ, མོཧཀྑཡོ’’ཏི. པཊིཔྤསྶམྦྷནཝསེན ཝཱ ཀིལེསཱནཾ ནིབྦཱཔནཏོ ནིབྦཱནཾ. ཏཾ ཨེས ཨབྷིཛཱཡཏི པསཝཏི. ཨིདྷཱཔི ཧི ཨནྟོགདྷཧེཏུ ཨཏྠཾ ‘‘ཛཱཡཏཱི’’ཏི པདཾ. ཨཊྛཀཐཱཡཾ པན ‘‘ཛཱཡཏཱི’’ཏི ཨིམསྶ པཱཔུཎཱཏཱིཧི ཨཏྠཾ ¶ གཧེཏྭཱཝ ‘‘ནིབྦཱནཾ པཱཔུཎཱཏཱི’’ཏི ཝུཏྟཾ. སུཀྐཱབྷིཛཱཏིཡོ སམཱནོཏི སུཀྐེ ཨུཙྩཀུལེ ཛཱཏོ ཧུཏྭཱ. སེསམེཏྠ སུཝིཉྙེཡྻམེཝ.

༥༨. ཙཏུཏྠེ སཾཝརེནཱཏི སཾཝརེན ཧེཏུབྷཱུཏེན ཝཱ. ཨིདྷཱཏི ཨཡཾ ཨིདྷ-སདྡོ སབྦཱཀཱརཏོ ཨིནྡིཡསཾཝརསཾཝུཏསྶ པུགྒལསྶ སནྣིསྶཡབྷཱུཏསཱསནཔརིདཱིཔནོ, ཨཉྙསྶ ཏཐཱབྷཱཝཔྤཊིསེདྷནོ ཝཱཏི ཝུཏྟཾ ‘‘ཨིདྷཱཏི ཨིདྷསྨིཾ སཱསནེ’’ཏི. པཊིསངྑཱཏི པཊིསངྑཱཡ. སངྑཱ-སདྡོ ཉཱཎཀོཊྛཱསཔཉྙཏྟིགཎནཱདཱིསུ དིསྶཏི ‘‘སངྑཱཡེཀཾ པཊིསེཝཏཱི’’ཏིཨཱདཱིསུ (མ. ནི. ༢.༡༦༨) ཧི ཉཱཎེ དིསྶཏི. ‘‘པཔཉྩསཉྙཱསངྑཱ སམུདཱཙརནྟཱི’’ཏིཨཱདཱིསུ (མ. ནི. ༡.༢༠༢, ༢༠༤) ཀོཊྛཱསེ. ‘‘ཏེསཾ ཏེསཾ དྷམྨཱནཾ སངྑཱ སམཉྙཱ’’ཏིཨཱདཱིསུ (དྷ. ས. ༡༣༡༣-༡༣༡༥) པཉྙཏྟིཡཾ. ‘‘ན སུཀརཾ སངྑཱཏུ’’ནྟིཨཱདཱིསུ (སཾ. ནི. ༢.༡༢༨) གཎནཱཡ. ཨིདྷ པན ཉཱཎེ དཊྛབྦོ. ཏེནེཝཱཧ ‘‘པཊིསཉྫཱནིཏྭཱ པཙྩཝེཀྑིཏྭཱཏི ཨཏྠོ’’ཏི. ཨཱདཱིནཝཔཙྩཝེཀྑཎཱ ཨཱདཱིནཝཔཊིསངྑཱཏི ཡོཛནཱ. སམྤལིམཊྛནྟི གྷཾསིཏཾ. ཨནུབྱཉྫནསོཏི ཧཏྠཔཱདསིཏཨཱལོཀིཏཝིལོཀིཏཱདིཔྤཀཱརབྷཱགསོ. ཏཉྷི ཨཡོནིསོམནསིཀརོཏོ ཀིལེསཱནཾ ཨནུབྱཉྫནཏོ ‘‘ཨནུབྱཉྫན’’ནྟི ཝུཙྩཏི. ནིམིཏྟགྒཱཧོཏི ཨིཏྠིཔུརིསནིམིཏྟསྶ སུབྷནིམིཏྟཱདིཀསྶ ཝཱ ཀིལེསཝཏྠུབྷཱུཏསྶ ནིམིཏྟསྶ གཱཧོ. ཨཱདིཏྟཔརིཡཱཡེནཱཏི ཨཱདིཏྟཔརིཡཱཡེ (སཾ. ནི. ༤.༢༨; མཧཱཝ. ༥༤) ཨཱགཏནཡེན ཝེདིཏབྦོ.

ཡཐཱ ཨིཏྠིཡཱ ཨིནྡྲིཡཾ ཨིཏྠིནྡྲིཡཾ, ན ཨེཝམིདཾ, ཨིདཾ པན ཙཀྑུམེཝ ཨིནྡྲིཡནྟི ཙཀྑུནྡྲིཡཾ. ཏེནཱཧ ‘‘ཙཀྑུམེཝ ཨིནྡྲིཡ’’ནྟི. ཡཐཱ ཨཱཝཱཊེ ནིཡཏཊྛིཏིཀོ ཀཙྪཔོ ‘‘ཨཱཝཱཊཀཙྪཔོ’’ཏི ཝུཙྩཏི, ཨེཝཾ ཏཔྤཊིབདྡྷཝུཏྟིཏཱཡ ཏཾ ཋཱནོ ¶ སཾཝརོ ཙཀྑུནྡྲིཡསཾཝརོ. ཏེནཱཧ ‘‘ཙཀྑུནྡྲིཡེ སཾཝརོ ཙཀྑུནྡྲིཡསཾཝརོ’’ཏི. ནནུ ཙ ཙཀྑུནྡྲིཡེ སཾཝརོ ཝཱ ཨསཾཝརོ ཝཱ ནཏྠི. ན ཧི ཙཀྑུཔསཱདཾ ནིསྶཱཡ སཏི ཝཱ མུཊྛསྶཙྩཾ ཝཱ ཨུཔྤཛྫཏི. ཨཔིཙ ཡདཱ རཱུཔཱརམྨཎཾ ཙཀྑུསྶ ཨཱཔཱཐཾ ཨཱགཙྪཏི, ཏདཱ བྷཝངྒེ དྭིཀྑཏྟུཾ ཨུཔྤཛྫིཏྭཱ ནིརུདྡྷེ ཀིརིཡམནོདྷཱཏུ ཨཱཝཛྫནཀིཙྩཾ སཱདྷཡམཱནཱ ཨུཔྤཛྫིཏྭཱ ནིརུཛ྄ཛྷཏི. ཏཏོ ཙཀྑུཝིཉྙཱཎཾ དསྶནཀིཙྩཾ, ཏཏོ ཝིཔཱཀམནོདྷཱཏུ སམྤཊིཙྪནཀིཙྩཾ, ཏཏོ ཝིཔཱཀམནོཝིཉྙཱཎདྷཱཏུ སནྟཱིརཎཀིཙྩཾ, ཏཏོ ཀིརིཡཱཧེཏུཀམནོཝིཉྙཱཎདྷཱཏུ ཝོཊྛབྦནཀིཙྩཾ སཱདྷཡམཱནཱ ཨུཔྤཛྫིཏྭཱ ནིརུཛ྄ཛྷཏི ¶ , ཏདནནྟརཾ ཛཝནཾ ཛཝཏི. ཏཏྠཱཔི ནེཝ བྷཝངྒསམཡེ, ན ཨཱཝཛྫནཱདཱིནཾ ཨཉྙཏརསམཡེ ཙ སཾཝརོ ཝཱ ཨསཾཝརོ ཝཱ ཨཏྠི. ཛཝནཀྑཎེ པན སཙེ དུསྶཱིལྱཾ ཝཱ མུཊྛསྶཙྩཾ ཝཱ ཨཉྙཱཎཾ ཝཱ ཨཀྑནྟི ཝཱ ཀོསཛྫཾ ཝཱ ཨུཔྤཛྫཏི, ཨསཾཝརོ ཧོཏི. ཏསྨིཾ པན སཱིལཱདཱིསུ ཨུཔྤནྣེསུ སཾཝརོ ཧོཏི, ཏསྨཱ ‘‘ཙཀྑུནྡྲིཡེ སཾཝརོ’’ཏི ཀསྨཱ ཝུཏྟནྟི ཨཱཧ ‘‘ཛཝནེ ཨུཔྤཛྫམཱནོཔི ཧེས…པེ… ཙཀྑུནྡྲིཡསཾཝརོཏི ཝུཙྩཏཱི’’ཏི.

ཨིདཾ ཝུཏྟཾ ཧོཏི – ཡཐཱ ནགརེ ཙཏཱུསུ དྭཱརེསུ ཨསཾཝུཏེསུ ཀིཉྩཱཔི ཨནྟོགྷརདྭཱརཀོཊྛཀགབྦྷཱདཡོ སུསཾཝུཏཱ, ཏཐཱཔི ཨནྟོནགརེ སབྦཾ བྷཎྜཾ ཨརཀྑིཏཾ ཨགོཔིཏམེཝ ཧོཏི. ནགརདྭཱརེན ཧི པཝིསིཏྭཱ ཙོརཱ ཡདིཙྪཀཾ ཀརེཡྻུཾ, ཨེཝམེཝཾ ཛཝནེ དུསྶཱིལྱཱདཱིསུ ཨུཔྤནྣེསུ ཏསྨིཾ ཨསཾཝརེ སཏི དྭཱརམྤི ཨགུཏྟཾ ཧོཏི བྷཝངྒམྤི ཨཱཝཛྫནཱདཱིནི ཝཱིཐིཙིཏྟཱནིཔི. ཡཐཱ པན ནགརདྭཱརེསུ སཾཝུཏེསུ ཀིཉྩཱཔི ཨནྟོགྷརཱདཡོ ཨསཾཝུཏཱ, ཏཐཱཔི ཨནྟོནགརེ སབྦཾ བྷཎྜཾ སུརཀྑིཏཾ སུགོཔིཏམེཝ ཧོཏི. ནགརདྭཱརེསུ ཧི པིཧིཏེསུ ཙོརཱནཾ པཝེསོ ནཏྠི, ཨེཝམེཝཾ ཛཝནེ སཱིལཱདཱིསུ ཨུཔྤནྣེསུ དྭཱརམྤི སུགུཏྟཾ ཧོཏི བྷཝངྒམྤི ཨཱཝཛྫནཱདཱིནི ཝཱིཐིཙིཏྟཱནིཔི, ཏསྨཱ ཛཝནཀྑཎེ ཨུཔྤཛྫམཱནོཔི ཙཀྑུནྡྲིཡསཾཝརོཏི ཝུཏྟོཏི.

སཾཝརེན སམནྣཱགཏོ པུགྒལོ སཾཝུཏོཏི ཨཱཧ ‘‘ཨུཔེཏོ’’ཏི. ཨཡམེཝེཏྠ ཨཏྠོ སུནྡརཏརོཏི ཨུཔརི པཱལི༹ཡཾ སནྡིསྶནཏོ ཝུཏྟཾ. ཏེནཱཧ ‘‘ཏཐཱ ཧཱི’’ཏིཨཱདི.

ཡནྟི ཨཱདེསོཏི ཨིམིནཱ ལིངྒཝིཔལླཱསེན སདྡྷིཾ ཝཙནཝིཔལླཱསོ ཀཏོཏི དསྶེཏི, ནིཔཱཏཔདཾ ཝཱ ཨེཏཾ པུཐུཝཙནཏྠཾ. ཝིགྷཱཏཀརཱཏི ཙིཏྟཝིགྷཱཏཀརཱ ¶ , ཀཱཡཙིཏྟདུཀྑནིབྦཏྟཀཱ ཝཱ. ཡཐཱཝུཏྟཀིལེསཧེཏུཀཱ དཱཧཱནུབནྡྷཱ ཝིཔཱཀཱ ཨེཝ ཝིཔཱཀཔརིལཱ༹ཧཱ. ཡཐཱ པནེཏྠ ཨཱསཝཱ ཨཉྙེ ཙ ཝིགྷཱཏཀརཱ ཀིལེསཔརིལཱ༹ཧཱ སམྦྷཝནྟི, ཏཾ དསྶེཏུཾ ‘‘ཙཀྑུདྭཱརསྨིཉྷཱི’’ཏིཨཱདི ཝུཏྟཾ. ཏཾ སུཝིཉྙེཡྻམེཝ. ཨེཏྠ ཙ སཾཝརཎཱུཔཱཡོ, སཾཝརིཏབྦཾ, སཾཝརོ, ཡཏོ སོ སཾཝརོ, ཡཏྠ སཾཝརོ, ཡཐཱ སཾཝརོ, ཡཉྩ སཾཝརཕལནྟི ཨཡཾ ཝིབྷཱགོ ཝེདིཏབྦོ. ཀཐཾ? ‘‘པཊིསངྑཱ ཡོནིསོ’’ཏི ཧི སཾཝརཎཱུཔཱཡོ. ཙཀྑུནྡྲིཡཾ སཾཝརིཏབྦཾ. སཾཝརགྒཧཎེན གཧིཏཱ སཏི སཾཝརོ. ‘‘ཨསཾཝུཏསྶཱ’’ཏི སཾཝརཎཱཝདྷི. ཨསཾཝརཏོ ཧི སཾཝརཎཾ. སཾཝརིཏབྦགྒཧཎསིདྡྷོ ཨིདྷ སཾཝརཝིསཡོ. ཙཀྑུནྡྲིཡཉྷི སཾཝརཎཾ ཉཱཎཾ རཱུཔཱརམྨཎེ སཾཝརཡཏཱིཏི ཨཝུཏྟསིདྡྷོཡམཏྠོ. ཨཱསཝཏནྣིམིཏྟཀིལེསཔརིལཱ༹ཧཱབྷཱཝོ ཕལཾ. ཨེཝཾ སོཏདྭཱརཱདཱིསུ ཡོཛེཏབྦཾ. སབྦཏྠེཝཱཏི མནོདྭཱརེ པཉྩདྭཱརེ ཙཱཏི སབྦསྨིཾ དྭཱརེ.

པཊིསངྑཱ ¶ ཡོནིསོ ཙཱིཝརནྟིཨཱདཱིསུ ‘‘སཱིཏསྶ པཊིགྷཱཏཱཡཱ’’ཏིཨཱདིནཱ པཙྩཝེཀྑཎམེཝ ཡོནིསོ པཊིསངྑཱ. ཨཱིདིསནྟི ཨེཝརཱུཔཾ ཨིཊྛཱརམྨཎཾ. བྷཝཔཏྠནཱཡ ཨསྶཱདཡཏོཏི བྷཝཔཏྠནཱམུཁེན བྷཱཝིཏཾ ཨཱརམྨཎཾ ཨསྶཱདེནྟསྶ. ཙཱིཝརནྟི ནིཝཱསནཱདི ཡཾ ཀིཉྩིཙཱིཝརཾ. པཊིསེཝཏཱིཏི ནིཝཱསནཱདིཝསེན པརིབྷུཉྫཏི. ཡཱཝདེཝཱཏི པཡོཛནཔརིམཱཎནིཡམནཾ. སཱིཏཔྤཊིགྷཱཏཱདིཡེཝ ཧི ཡོགིནོ ཙཱིཝརཔྤཊིསེཝནཔྤཡོཛནཾ. སཱིཏསྶཱཏི སཱིཏདྷཱཏུཀྑོབྷཏོ ཝཱ ཨུཏུཔརིཎཱམཏོ ཝཱ ཨུཔྤནྣསྶ སཱིཏསྶ. པཊིགྷཱཏཱཡཱཏི པཊིགྷཱཏནཏྠཾ ཏཔྤཙྩཡསྶ ཝིཀཱརསྶ ཝིནོདནཏྠཾ. ཨུཎྷསྶཱཏི ཨགྒིསནྟཱཔཏོ ཨུཔྤནྣསྶ ཨུཎྷསྶ. ཌཾསཱདཡོ པཱཀཊཱཡེཝ. པུན ཡཱཝདེཝཱཏི ནིཡཏཔྤཡོཛནཔརིམཱཎནིཡམནཾ. ནིཡཏཉྷི པཡོཛནཾ ཙཱིཝརཾ པཊིསེཝནྟསྶ ཧིརིཀོཔཱིནཔྤཊིཙྪཱདནཾ, ཨིཏརཾ ཀདཱཙི. ཧིརིཀོཔཱིནནྟི སམྦཱདྷཊྛཱནཾ. ཡསྨིཉྷི ཨངྒེ ཝིཝཊེ ཧིརཱི ཀུཔྤཏི ཝིནསྶཏི, ཏཾ ཧིརིཡཱ ཀོཔནཏོ ཧིརིཀོཔཱིནཾ, ཏཾཔཊིཙྪཱདནཏྠཾ ཙཱིཝརཾ པཊིསེཝཏི.

པིཎྜཔཱཏནྟི ཡཾ ཀིཉྩི ཨཱཧཱརཾ. སོ ཧི པིཎྜོལྱེན བྷིཀྑུནོ པཏྟེ པཏནཏོ, ཏཏྠ ཏཏྠ ལདྡྷབྷིཀྑཱཔིཎྜཱནཾ པཱཏོ སནྣིཔཱཏོཏི ཝཱ ‘‘པིཎྜཔཱཏོ’’ཏི ཝུཙྩཏི. ནེཝ དཝཱཡཱཏི ན ཀཱིལ༹ནཱཡ. ན མདཱཡཱཏི ན བལམདམཱནམདཔུརིསམདཏྠཾ. ན མཎྜནཱཡཱཏི ན ཨངྒཔཙྩངྒཱནཾ པཱིཎནབྷཱཝཏྠཾ. ན ཝིབྷཱུསནཱཡཱཏི ན ཏེསཾཡེཝ སོབྷཏྠཾ, ཚཝིསམྤཏྟིཨཏྠནྟི ཨཏྠོ ¶ . ཨིམཱནི ཡཐཱཀྐམཾ མོཧདོསསཎྛཱནཝཎྞརཱགཱུཔནིསྶཡཔྤཧཱནཏྠཱནི ཝེདིཏབྦཱནི. པུརིམཾ ཝཱ དྭཡཾ ཨཏྟནོ སཾཀིལེསུཔྤཏྟིནིསེདྷནཏྠཾ, ཨིཏརཾ པརསྶཔི. ཙཏྟཱརིཔི ཀཱམསུཁལླིཀཱནུཡོགསྶ པཧཱནཏྠཾ ཝུཏྟཱནཱིཏི ཝེདིཏབྦཱནི. ཀཱཡསྶཱཏི རཱུཔཀཱཡསྶ. ཋིཏིཡཱ ཡཱཔནཱཡཱཏི པབནྡྷཊྛིཏཏྠཉྩེཝ པཝཏྟིཡཱ ཨཝིཙྪེདནཏྠཉྩ, ཙིརཀཱལཊྛིཏཏྠཾ ཛཱིཝིཏིནྡྲིཡསྶ པཝཏྟཱཔནཏྠཾ. ཝིཧིཾསཱུཔརཏིཡཱཏི ཛིགྷཙྪཱདུཀྑསྶ ཨུཔརམཏྠཾ. བྲཧྨཙརིཡཱནུགྒཧཱཡཱཏི སཱསནམགྒབྲཧྨཙརིཡཱནཾ ཨནུགྒཎྷནཏྠཾ. ཨིཏཱིཏི ཨེཝཾ ཨིམིནཱ ཨུཔཱཡེན. པུརཱཎཉྩ ཝེདནཾ པཊིཧངྑཱམཱིཏི པུརཱཎཾ ཨབྷུཏྟཔཙྩཡཱ ཨུཔྤཛྫནཀཝེདནཾ པཊིཧནིསྶཱམི. ནཝཉྩ ཝེདནཾ ན ཨུཔྤཱདེསྶཱམཱིཏི ནཝཾ བྷུཏྟཔཙྩཡཱ ཨུཔྤཛྫནཀཝེདནཾ ན ཨུཔྤཱདེསྶཱམི. ཏསྶཱ ཧི ཨནུཔྤཛྫནཏྠམེཝ ཨཱཧཱརཾ པརིབྷུཉྫཏི. ཨེཏྠ ཨབྷུཏྟཔཙྩཡཱ ཨུཔྤཛྫནཀཝེདནཱ ནཱམ ཡཐཱཝུཏྟཛིགྷཙྪཱནིམིཏྟཱ ཝེདནཱ. སཱ ཧི ཨབྷུཉྫནྟསྶ བྷིཡྻོ བྷིཡྻོཔཝཌྜྷནཝསེན ཨུཔྤཛྫཏི, བྷུཏྟཔཙྩཡཱ ཨནུཔྤཛྫནཀཝེདནཱཔི ཁུདཱནིམིཏྟཱཝ ཨངྒདཱཧསཱུལཱདིཝེདནཱ ཨཔྤཝཏྟཱ. སཱ ཧི བྷུཏྟཔཙྩཡཱ ཨནུཔྤནྣཱཝ ན ཨུཔྤཛྫིསྶཏི. ཝིཧིཾསཱནིམིཏྟཏཱ ཙེཏཱསཾ ཝིཧིཾསཱཡ ཝིསེསོ.

ཡཱཏྲཱ ཙ མེ བྷཝིསྶཏཱིཏི ཡཱཔནཱ ཙ མེ ཙཏུནྣཾ ཨིརིཡཱཔཐཱནཾ བྷཝིསྶཏི. ‘‘ཡཱཔནཱཡཱ’’ཏི ¶ ཨིམིནཱ ཛཱིཝིཏིནྡྲིཡཡཱཔནཱ ཝུཏྟཱ, ཨིདྷ ཙཏུནྣཾ ཨིརིཡཱཔཐཱནཾ ཨཝིཙྪེདསངྑཱཏཱ ཡཱཔནཱཏི ཨཡམེཏཱསཾ ཝིསེསོ. ཨནཝཛྫཏཱ ཙ ཕཱསུཝིཧཱརོ ཙཱཏི ཨཡུཏྟཔརིཡེསནཔྤཊིགྒཧཎཔརིབྷོགཔརིཝཛྫནེན ཨནཝཛྫཏཱ, པརིམིཏཔརིབྷོགེན ཕཱསུཝིཧཱརོ. ཨསཔྤཱཡཱཔརིམིཏབྷོཛནཔཙྩཡཱ ཨརཏིཏནྡཱིཝིཛམྦྷིཏཱཝིཉྙུགརཧཱདིདོསཱབྷཱཝེན ཝཱ ཨནཝཛྫཏཱ. སཔྤཱཡཔརིམིཏབྷོཛནཔཙྩཡཱ ཀཱཡབལསམྦྷཝེན ཕཱསུཝིཧཱརོ. ཡཱཝདཏྠཾ ཨུདརཱཝདེཧཀབྷོཛནཔརིཝཛྫནེན ཝཱ སེཡྻསུཁཔསྶསུཁམིདྡྷསུཁཱདཱིནཾ ཨབྷཱཝཏོ ཨནཝཛྫཏཱ. ཙཏུཔཉྩཱལོཔམཏྟཨཱུནབྷོཛནེན ཙཏུཨིརིཡཱཔཐཡོགྱཏཱཔཱདནཏོ ཕཱསུཝིཧཱརོ. ཝུཏྟཉྷེཏཾ –

‘‘ཙཏྟཱརོ པཉྩ ཨཱལོཔེ, ཨབྷུཏྭཱ ཨུདཀཾ པིཝེ;

ཨལཾ ཕཱསུཝིཧཱརཱཡ, པཧིཏཏྟསྶ བྷིཀྑུནོ’’ཏི. (ཐེརགཱ. ༩༨༣; མི. པ. ༦.༥.༡༠);

ཨེཏྟཱཝཏཱ ¶ ཙ པཡོཛནཔརིགྒཧོ, མཛ྄ཛྷིམཱ ཙ པཊིཔདཱ དཱིཔིཏཱ ཧོཏི. ཡཱཏྲཱ ཙ མེ བྷཝིསྶཏཱིཏི པཡོཛནཔརིགྒཧདཱིཔནཱ. ཡཱཏྲཱ ཧི ནཾ ཨཱཧཱརཱུཔཡོགཾ པཡོཛེཏི. དྷམྨིཀསུཁཱཔརིཙྩཱགཧེཏུཀོ ཕཱསུཝིཧཱརོ མཛ྄ཛྷིམཱ པཊིཔདཱ ཨནྟདྭཡཔརིཝཛྫནཏོ.

སེནཱསནནྟི སེནཉྩ ཨཱསནཉྩ. ཡཏྠ ཝིཧཱརཱདིཀེ སེཏི ནིཔཛྫཏི ཨཱསཏི ནིསཱིདཏི, ཏཾ སེནཱསནཾ. ཨུཏུཔརིསྶཡཝིནོདནཔྤཊིསལླཱནཱརཱམཏྠནྟི ཨུཏུཡེཝ པརིསཧནཊྛེན པརིསྶཡོ སརཱིརཱབཱདྷཙིཏྟཝིཀྑེཔཀརོ, ཏསྶ ཝིནོདནཏྠཾ, ཨནུཔྤནྣསྶ ཨནུཔྤཱདནཏྠཾ, ཨུཔྤནྣསྶ ཝཱུཔསམནཏྠཉྩཱཏི ཨཏྠོ. ཨཐ ཝཱ ཡཐཱཝུཏྟོ ཨུཏུ ཙ སཱིཧབྱགྒྷཱདིཔཱཀཊཔརིསྶཡོ ཙ རཱགདོསཱདིཔཊིཙྪནྣཔརིསྶཡོ ཙ ཨུཏུཔརིསྶཡོ, ཏསྶ ཝིནོདནཏྠཉྩེཝ ཨེཀཱིབྷཱཝཕཱསུཀཏྠཉྩ. ཙཱིཝརཔྤཊིསེཝནེ ཧིརཱིཀོཔཱིནཔྤཊིཙྪཱདནཾ ཝིཡ ཏཾ ནིཡཏཔཡོཛནནྟི པུན ‘‘ཡཱཝདེཝཱ’’ཏི ཝུཏྟཾ.

གིལཱནཔཙྩཡབྷེསཛྫཔརིཀྑཱརནྟི རོགསྶ པཙྩནཱིཀཔྤཝཏྟིཡཱ གིལཱནཔཙྩཡོ, ཏཏོ ཨེཝ བྷིསཀྐསྶ ཨནུཉྙཱཏཝཏྠུཏཱཡ བྷེསཛྫཾ, ཛཱིཝིཏསྶ པརིཝཱརསམྦྷཱརབྷཱཝེཧི པརིཀྑཱརོ ཙཱཏི གིལཱནཔཙྩཡབྷེསཛྫཔརིཀྑཱརོ, ཏཾ. ཝེཡྻཱབཱདྷིཀཱནནྟི ཝེཡྻཱབཱདྷཏོ དྷཱཏུཀྑོབྷཏོ ཙ ཏཾནིབྦཏྟཀུཊྛགཎྜཔཱིལ༹ཀཱདིརོགཏོ ཨུཔྤནྣཱནཾ. ཝེདནཱནནྟི དུཀྑཝེདནཱནཾ. ཨབྱཱབཛ྄ཛྷཔརམཏཱཡཱཏི ནིདྡུཀྑཔརམབྷཱཝཱཡ. ཡཱཝ ཏཾ དུཀྑཾ སབྦཾ པཧཱིནཾ ཧོཏི, ཏཱཝ པཊིསེཝཱམཱིཏི ཡོཛནཱ. ཨེཝམེཏྠ སངྑེཔེནེཝ པཱལི༹ཝཎྞནཱ ཝེདིཏབྦཱ. ནཝཝེདནུཔྤཱདཏོཔཱིཏི ན ཀེཝལཾ ཨཱཡཏིཾ ཨེཝ ཝིཔཱཀཔརིལཱ༹ཧཱ ¶ , ཨཐ ཁོ ཨཏིབྷོཛནཔཙྩཡཱ ཨལཾསཱཊཀཱདཱིནཾ ཝིཡ ནཝཝེདནུཔྤཱདཏོཔི ཝེདིཏབྦཱ.

ཀམྨཊྛཱནིཀསྶ ཙལནཾ ནཱམ ཀམྨཊྛཱནཔརིཙྩཱགོཏི ཨཱཧ ‘‘ཙལཏི ཀམྤཏི ཀམྨཊྛཱནཾ ཝིཛཧཏཱི’’ཏི. ‘‘ཁམོ ཧོཏི སཱིཏསྶ ཨུཎྷསྶཱ’’ཏི ཨེཏྠ ཙ ལོམསནཱགཏྠེརསྶ ཝཏྠུ ཀཐེཏབྦཾ. ཐེརོ ཀིར ཙེཏིཡཔབྦཏེ པིཡངྒུགུཧཱཡ པདྷཱནགྷརེ ཝིཧརནྟོ ཨནྟརཊྛཀེ ཧིམཔཱཏསམཡེ ལོཀནྟརིཀནིརཡཾ པཙྩཝེཀྑིཏྭཱ ཀམྨཊྛཱནཾ ཨཝིཛཧནྟོཝ ཨབྦྷོཀཱསེ ཝཱིཏིནཱམེསི. གིམྷསམཡེ ཙ པཙྪཱབྷཏྟཾ བཧིཙངྐམེ ཀམྨཊྛཱནཾ མནསིཀརོཏོ སེདཱཔིསྶ ཀཙྪེཧི མུཙྩནྟི. ཨཐ ནཾ ཨནྟེཝཱསིཀོ ཨཱཧ – ‘‘ཨིདྷ, བྷནྟེ, ནིསཱིདཐ, སཱིཏལོ ཨོཀཱསོ’’ཏི. ཐེརོ ‘‘ཨུཎྷབྷཡེནེཝམྷི, ཨཱཝུསོ, ཨིདྷ ནིསིནྣོ’’ཏི ཨཝཱིཙིམཧཱནིརཡཾ པཙྩཝེཀྑིཏྭཱ ¶ ནིསཱིདིཡེཝ. ཨུཎྷནྟི ཙེཏྠ ཨགྒིསནྟཱཔོཝ ཝེདིཏབྦོ སཱུརིཡསནྟཱཔསྶ པརཏོ ཝུཙྩམཱནཏྟཱ. སཱུརིཡསནྟཱཔཝསེན པནེཏཾ ཝཏྠུ ཝུཏྟཾ.

ཡོ ཙ དྭེ ཏཡོ ཝཱརེ བྷཏྟཾ ཝཱ པཱནཱིཡཾ ཝཱ ཨལབྷམཱནོཔི ཨནམཏགྒེ སཾསཱརེ ཨཏྟནོ པེཏྟིཝིསཡཱུཔཔཏྟིཾ པཙྩཝེཀྑིཏྭཱ ཨཝེདྷནྟོ ཀམྨཊྛཱནཾ ན ཝིཛཧཏིཡེཝ. ཌཾསམཀསཝཱཏཱཏཔསམྥསྶེཧི ཕུཊྛོ ཙེཔི ཏིརཙྪཱནཱུཔཔཏྟིཾ པཙྩཝེཀྑིཏྭཱ ཨཝེདྷནྟོ ཀམྨཊྛཱནཾ ན ཝིཛཧཏིཡེཝ. སརཱིསཔསམྥསྶེན ཕུཊྛོ ཙཱཔི ཨནམཏགྒེ སཾསཱརེ སཱིཧབྱགྒྷཱདིམུཁེསུ ཨནེཀཝཱརཾ པརིཝཏྟིཏཔུབྦབྷཱཝཾ པཙྩཝེཀྑིཏྭཱ ཨཝེདྷནྟོ ཀམྨཊྛཱནཾ ན ཝིཛཧཏིཡེཝ པདྷཱནིཡཏྠེརོ ཝིཡ, ཨཡཾ ‘‘ཁམོ ཛིགྷཙྪཱཡ…པེ… སརཱིསཔསམྥསྶཱན’’ནྟི ཝེདིཏབྦོ. ཐེརཾ ཀིར ཁཎྜཙེལཝིཧཱརེ ཀཎིཀཱརཔདྷཱནིཡགྷརེ ཨརིཡཝཾསདྷམྨཾ སུཎནྟཉྙེཝ གྷོརཝིསོ སཔྤོ ཌཾསི. ཐེརོ ཛཱནིཏྭཱཔི པསནྣཙིཏྟོ ནིསིནྣོ དྷམྨཾཡེཝ སུཎཱཏི, ཝིསཝེགོ ཐདྡྷོ ཨཧོསི. ཐེརོ ཨུཔསམྤདམཱལ༹ཾ ཨཱདིཾ ཀཏྭཱ སཱིལཾ པཙྩཝེཀྑིཏྭཱ ‘‘ཝིསུདྡྷསཱིལོམྷཱི’’ཏི པཱིཏིཾ ཨུཔྤཱདེསི, སཧ པཱིཏུཔྤཱདཱ ཝིསཾ ནིཝཏྟིཏྭཱ པཐཝིཾ པཱཝིསི. ཐེརོ ཏཏྠེཝ ཙིཏྟེཀགྒཏཾ ལབྷིཏྭཱ ཝིཔསྶནཾ ཝཌྜྷེཏྭཱ ཨརཧཏྟཾ པཱཔུཎི.

ཡོ པན ཨཀྐོསཝསེན དུརུཏྟེ དུརུཏྟཏྟཱཡེཝ ཙ དུརཱགཏེ ཨཔི ཨནྟིམཝཏྠུསཉྙིཏེ ཝཙནཔཐེ སུཏྭཱ ཁནྟིགུཎཾཡེཝ པཙྩཝེཀྑིཏྭཱ ན ཝེདྷཏི དཱིགྷབྷཱཎཀཨབྷཡཏྠེརོ ཝིཡ, ཨཡཾ ‘‘ཁམོ དུརུཏྟཱནཾ དུརཱགཏཱནཾ ཝཙནཔཐཱན’’ནྟི ཝེདིཏབྦོ. ཐེརོ ཀིར པཙྩཡསནྟོསབྷཱཝནཱརཱམཏཱཡ མཧཱཨརིཡཝཾསཔྤཊིཔདཾ ཀཐེསི, སབྦོ མཧཱགཱམོ ཨཱགཙྪཏི, ཐེརསྶ མཧཱསཀྐཱརོ ཨུཔྤཛྫི. ཏཾ ཨཉྙཏརོ མཧཱཐེརོ ཨདྷིཝཱསེཏུཾ ཨསཀྐོནྟོ ‘‘དཱིགྷབྷཱཎཀོ ¶ ‘ཨརིཡཝཾསཾ ཀཐེམཱི’ཏི སབྦརཏྟིཾ ཀོལཱཧལཾ ཀརོཏཱི’’ཏིཨཱདཱིཧི ཨཀྐོསི. ཨུབྷོཔི ཙ ཨཏྟནོ ཨཏྟནོ ཝིཧཱརཾ གཙྪནྟཱ གཱཝུཏམཏྟཾ ཨེཀཔཐེན ཨགམཾསུ. སཀལགཱཝུཏམྤི སོ ཏཾ ཨཀྐོསིཡེཝ. ཏཏོ ཡཏྠ དྭིནྣཾ ཝིཧཱརཱནཾ མགྒོ བྷིཛྫཏི, ཏཏྠ ཋཏྭཱ དཱིགྷབྷཱཎཀཏྠེརོ ཏཾ ཝནྡིཏྭཱ ‘‘ཨེསོ, བྷནྟེ, ཏུམྷཱཀཾ མགྒོ’’ཏི ཨཱཧ. སོ ཨསྶུཎནྟོ ¶ ཝིཡ ཨགམཱསི. ཐེརོཔི ཝིཧཱརཾ གནྟྭཱ པཱདེ པཀྑཱལེཏྭཱ ནིསཱིདི. ཏམེནཾ ཨནྟེཝཱསིཀོ ‘‘ཀིཾ, བྷནྟེ, སཀལགཱཝུཏཾ པརིབྷཱསནྟཾ ན ཀིཉྩི ཨཝོཙུཏྠཱ’’ཏི ཨཱཧ. ཐེརོ ‘‘ཁནྟིཡེཝཱཝུསོ, མཡ྄ཧཾ བྷཱརོ, ན ཨཀྑནྟི, ཨེཀཔདུདྡྷཱརེཔི ཀམྨཊྛཱནཝིཡོགཾ ན པསྶཱམཱི’’ཏི ཨཱཧ.

ཝཙནམེཝ ཏདཏྠཾ ཉཱཔེཏུཀཱམཱནཉྩ པཐོ ཨུཔཱཡོཏི ཨཱཧ ‘‘ཝཙནམེཝ ཝཙནཔཐོ’’ཏི. ཨསུཁཊྛེན ཝཱ ཏིབྦཱ. ཡཉྷི ན སུཁཾ, ཏཾ ཨནིཊྛཾ ཏིབྦནྟི ཝུཙྩཏི. ཨདྷིཝཱསཀཛཱཏིཀོ ཧོཏཱིཏི ཡཐཱཝུཏྟཝེདནཱནཾ ཨདྷིཝཱསཀསབྷཱཝོ ཧོཏི. ཙིཏྟལཔབྦཏེ པདྷཱནིཡཏྠེརསྶ ཀིར རཏྟིཾ པདྷཱནེན ཝཱིཏིནཱམེཏྭཱ ཋིཏསྶ ཨུདརཝཱཏོ ཨུཔྤཛྫཏི. སོ ཏཾ ཨདྷིཝཱསེཏུཾ ཨསཀྐོནྟོ ཨཱཝཏྟཏི པརིཝཏྟཏི. ཏམེནཾ ཙངྐམནཔསྶེ ཋིཏོ པིཎྜཔཱཏིཡཏྠེརོ ཨཱཧ – ‘‘ཨཱཝུསོ, པབྦཛིཏོ ནཱམ ཨདྷིཝཱསནསཱིལོ ཧོཏཱི’’ཏི. སོ ‘‘སཱདྷུ, བྷནྟེ’’ཏི ཨདྷིཝཱསེཏྭཱ ནིཙྩལོ སཡི. ཝཱཏོ ནཱབྷིཏོ ཡཱཝ ཧདཡཾ ཕཱལེསི. ཐེརོ ཝེདནཾ ཝིཀྑམྦྷེཏྭཱ ཝིཔསྶནྟོ མུཧུཏྟེན ཨནཱགཱམཱི ཧུཏྭཱ པརིནིབྦཱཡི. ཨེཝཾ སབྦཏྠཱཏི ‘‘ཨུཎྷེན ཕུཊྛསྶ སཱིཏཾ པཏྠཡཏོ’’ཏིཨཱདིནཱ སབྦཏྠ ཨུཎྷཱདིནིམིཏྟཾ ཀཱམཱསཝུཔྤཏྟི ཝེདིཏབྦཱ. ནཏྠི སུགཏིབྷཝེ སཱིཏཾ ཝཱ ཨུཎྷཾ ཝཱཏི ཨནིཊྛཾ སཱིཏཾ ཝཱ ཨུཎྷཾ ཝཱ ནཏྠཱིཏི ཨདྷིཔྤཱཡོ. ཨཏྟགྒཱཧེ སཏི ཨཏྟནིཡགྒཱཧོཏི ཨཱཧ ‘‘མཡ྄ཧཾ སཱིཏཾ ཨུཎྷནྟི གཱཧོ དིཊྛཱསཝོ’’ཏི.

ཨཧཾ སམཎོཏི ‘‘ཨཧཾ སམཎོ, ཀིཾ མམ ཛཱིཝིཏེན ཝཱ མརཎེན ཝཱ’’ཏི ཨེཝཾ ཙིནྟེཏྭཱཏི ཨདྷིཔྤཱཡོ. པཙྩཝེཀྑིཏྭཱཏི གཱམཔྤཝེསཔྤཡོཛནཱདིཉྩ པཙྩཝེཀྑིཏྭཱ. པཊིཀྐམཏཱིཏི ཧཏྠིཨཱདཱིནཾ སམཱིཔགམནཏོ ཨཔཀྐམཏི. ཋཱཡནྟི ཨེཏྠཱཏི ཋཱནཾ, ཀཎྚཀཱནཾ ཋཱནཾ ཀཎྚཀཊྛཱནཾ, ཡཏྠ ཀཎྚཀཱནི སནྟི, ཏཾ ཨོཀཱསནྟི ཝུཏྟཾ ཧོཏི. ཨམནུསྶདུཊྛཱནཱིཏི ཨམནུསྶསཉྩཱརེན དཱུསིཏཱནི, སཔརིསྶཡཱནཱིཏི ཨཏྠོ. ཨནིཡཏཝཏྠུབྷཱུཏནྟི ཨནིཡཏསིཀྑཱཔདསྶ ཀཱརཎབྷཱུཏཾ. ཝེསིཡཱདིབྷེདཏོཏི ཝེསིཡཱཝིདྷཝཱཐུལླཀུམཱརིཀཱཔཎྜཀཔཱནཱགཱརབྷིཀྑུནིབྷེདཏོ. སམཱནནྟི སམཾ, ཨཝིསམནྟི ཨཏྠོ. ཨཀཱསི ཝཱཏི ཏཱདིསཾ ཨནཱཙཱརཾ ཨཀཱསི ཝཱ. སཱིལསཾཝརསངྑཱཏེནཱཏི ཀཐཾ པརིཝཛྫནཾ སཱིལཾ? ཨནཱསནཔརིཝཛྫནེན ཧི ¶ ཨནཱཙཱརཔརིཝཛྫནཾ ཝུཏྟཾ. ཨནཱཙཱརཱགོཙརཔརིཝཛྫནཾ ཙཱརིཏྟསཱིལཏཱཡ སཱིལསཾཝརོ. ཏཐཱ ཧི བྷགཝཏཱ ‘‘པཱཏིམོཀྑསཾཝརསཾཝུཏོ ཝིཧརཏཱི’’ཏི (ཝིབྷ. ༥༠༨) སཱིལསཾཝརཝིབྷཛནེ ཨཱཙཱརགོཙརསམྤཏྟིཾ ¶ དསྶེནྟེན ‘‘ཨཏྠི ཨནཱཙཱརོ, ཨཏྠི ཨགོཙརོ’’ཏིཨཱདིནཱ (ཝིབྷ. ༥༡༣-༥༡༤) ཨཱཙཱརགོཙརཱ ཝིབྷཛིཏྭཱ དསྶིཏཱ. ‘‘ཙཎྜཾ ཧཏྠིཾ པརིཝཛྫེཏཱི’’ཏི ཝཙནཏོ ཧཏྠིཨཱདིཔརིཝཛྫནམྤི བྷགཝཏོ ཝཙནཱནུཊྛཱནནྟི ཀཏྭཱ ཨཱཙཱརསཱིལམེཝཱཏི ཝེདིཏབྦཾ.

ཨིཏིཔཱིཏི ཨིམིནཱཔི ཀཱརཎེན ཨཡོནིསོམནསིཀཱརསམུཊྛིཏཏྟཱཔི, ལོབྷཱདིསཧགཏཏྟཱཔི, ཀུསལཔྤཊིཔཀྑཏོཔཱིཏིཨཱདཱིཧི ཀཱརཎེཧི ཨཡཾ ཝིཏཀྐོ ཨཀུསལོཏི ཨཏྠོ. ཨིམིནཱ ནཡེན སཱཝཛྫོཏིཨཱདཱིསུཔི ཨཏྠོ ཝེདིཏབྦོ. ཨེཏྠ ཙ ཨཀུསལོཏིཨཱདིནཱ དིཊྛདྷམྨིཀཾ ཀཱམཝིཏཀྐསྶ ཨཱདཱིནཝཾ དསྶེཏི, དུཀྑཝིཔཱཀོཏི ཨིམིནཱ སམྤརཱཡིཀཾ. ཨཏྟབྱཱབཱདྷཱཡ སཾཝཏྟཏཱིཏིཨཱདཱིསུཔི ཨིམིནཱཝ ནཡེན ཨཱདཱིནཝཝིབྷཱཝནཱ ཝེདིཏབྦཱ. ཨུཔྤནྣསྶ ཀཱམཝིཏཀྐསྶ ཨནདྷིཝཱསནཾ ནཱམ པུན ཏཱདིསསྶ ཨནུཔྤཱདནཾ. ཏཾ པནསྶ པཧཱནཾ ཝིནོདནཾ བྱནྟིཀརཎཾ ཨནབྷཱཝགམནནྟི ཙ ཝཏྟུཾ ཝཊྚཏཱིཏི པཱལི༹ཡཾ – ‘‘ཨུཔྤནྣཾ ཀཱམཝིཏཀྐཾ ནཱདྷིཝཱསེཏཱི’’ཏི ཝཏྭཱ ‘‘པཛཧཏཱི’’ཏིཨཱདི ཝུཏྟནྟི ཏམཏྠཾ དསྶེནྟོ ‘‘ཨནདྷིཝཱསེནྟོ ཀིཾ ཀརོཏཱི’’ཏིཨཱདིམཱཧ. པཧཱནཉྩེཏྠ ཝིཀྑམྦྷནམེཝ, ན སམུཙྪེདོཏི དསྶེཏུཾ ‘‘ཝིནོདེཏཱི’’ཏིཨཱདི ཝུཏྟནྟི ཝིཀྑམྦྷནཝསེནེཝ ཨཏྠོ དསྶིཏོ. ཨུཔྤནྣུཔྤནྣེཏི ཏེསཾ པཱཔཝིཏཀྐཱནཾ ཨུཔྤཱདཱཝཏྠཱགཧཎཾ ཝཱ ཀཏཾ སིཡཱ ཨནཝསེསགྒཧཎཾ ཝཱ. ཏེསུ པཋམཾ སནྡྷཱཡཱཧ ‘‘ཨུཔྤནྣམཏྟེ’’ཏི, སམྤཏིཛཱཏེཏི ཨཏྠོ. ཨནཝསེསགྒཧཎཾ བྱཱཔནིཙྪཱཡཾ ཧོཏཱིཏི དསྶེཏུཾ ‘‘སཏཀྑཏྟུམྤི ཨུཔྤནྣུཔྤནྣེ’’ཏི ཝུཏྟཾ.

ཉཱཏིཝིཏཀྐོཏི ‘‘ཨམྷཱཀཾ ཉཱཏཡོ སུཁཛཱིཝིནོ སམྤཏྟིཡུཏྟཱ’’ཏིཨཱདིནཱ གེཧསྶིཏཔེམཝསེན ཉཱཏཀེ ཨཱརབྦྷ ཨུཔྤནྣཝིཏཀྐོ. ཛནཔདཝིཏཀྐོཏི ‘‘ཨམྷཱཀཾ ཛནཔདོ སུབྷིཀྑོ སམྤནྣསསྶོ རམཎཱིཡོ’’ཏིཨཱདིནཱ གེཧསྶིཏཔེམཝསེན ཛནཔདཾ ཨཱརབྦྷ ཨུཔྤནྣཝིཏཀྐོ. ཨུཀྐུཊིཀཔྤདྷཱནཱདཱིཧི དུཀྑེ ནིཛྫིཎྞེ སམྤརཱཡེ སཏྟཱ སུཁཱི ཧོནྟི ཨམརཱཏི དུཀྐརཀཱརིཀཱཡ པཊིསཾཡུཏྟོ ཨམརཏྠཱཡ ཝིཏཀྐོ. ཏཾ ཝཱ ཨཱརབྦྷ ཨམརཱཝིཀྑེཔདིཊྛིསཧགཏོ ཨམརོ ཙ སོ ཝིཏཀྐོ ཙཱཏི ¶ ཨམརཱཝིཏཀྐོ. པརཱནུདྡཡཏཱཔཊིསཾཡུཏྟོཏི པརེསུ ཨུཔཊྛཱཀཱདཱིསུ སཧནནྡིཏཱདིཝསེན པཝཏྟོ ཨནུདྡཡཏཱཔཏིརཱུཔཀོ གེཧསྶིཏཔེམཔྤཊིསཾཡུཏྟོ ཝིཏཀྐོ. ལཱབྷསཀྐཱརསིལོཀཔྤཊིསཾཡུཏྟོཏི ཙཱིཝརཱདིལཱབྷེན ཙ སཀྐཱརེན ཙ ཀིཏྟིསདྡེན ཙ ཨཱརམྨཎཀརཎཝསེན པཊིསཾཡུཏྟོ. ཨནཝཉྙཏྟིཔྤཊིསཾཡུཏྟོཏི ‘‘ཨཧོ ཝཏ མཾ པརེ ན ཨཝཛཱནེཡྻུཾ, ན ཧེཊྛཱ ཀཏྭཱ མཉྙེཡྻུཾ, པཱསཱཎཙྪཏྟཾ ཝིཡ གརུཾ ཀརེཡྻུ’’ནྟི ཨུཔྤནྣཝིཏཀྐོ.

ཀཱམཝིཏཀྐོ ¶ ཀཱམསངྐཔྤནསབྷཱཝཏོ ཀཱམཱསཝཔྤཏྟིཡཱ སཱཏིསཡཏྟཱ ཙ ཀཱམནཱཀཱརོཏི ཨཱཧ ‘‘ཀཱམཝིཏཀྐོ པནེཏྠ ཀཱམཱསཝོ’’ཏི. ཏབྦིསེསོཏི ཀཱམཱསཝཝིསེསོ བྷཝསབྷཱཝཏྟཱཏི ཨདྷིཔྤཱཡོ. ཀཱམཝིཏཀྐཱདིཀེ ཝིནོདེཏི ཨཏྟནོ སནྟཱནཏོ ནཱིཧརཏི ཨེཏེནཱཏི ཝིནོདནཾ, ཝཱིརིཡནྟི ཨཱཧ ‘‘ཝཱིརིཡསཾཝརསངྑཱཏེན ཝིནོདནེནཱ’’ཏི.

‘‘སཏྟ བོཛ྄ཛྷངྒཱ བྷཱཝིཏཱ བཧུལཱིཀཏཱ ཝིཛྫཱཝིམུཏྟིཡོ པརིཔཱུརེནྟཱི’’ཏི ཝཙནཏོ ཝིཛྫཱཝིམུཏྟཱིནཾ ཨནདྷིགམོ ཏཏོ ཙ སཀལཝཊྚདུཀྑཱནཏིཝཏྟི ཨབྷཱཝནཱཡ ཨཱདཱིནཝོ. ཝུཏྟཝིཔརིཡཱཡེན བྷགཝཏོ ཨོརསཔུཏྟབྷཱཝཱདིཝསེན ཙ བྷཱཝནཱཡ ཨཱནིསཾསོ ཝེདིཏབྦོ. ཐོམེནྟོཏི ཨཱསཝཔཧཱནསྶ དུཀྐརཏྟཱ ཏཱཡ ཨེཝ དུཀྐརཀིརིཡཱཡ ཏཾ ཨབྷིཏྠཝནྟོ. སཾཝརེནེཝ པཧཱིནཱཏི སཾཝརེན པཧཱིནཱ ཨེཝ. ཏེན ཝུཏྟཾ ‘‘ན ཨཔྤཧཱིནེསུཡེཝ པཧཱིནསཉྙཱི’’ཏི.

༥༩. པཉྩམེ པུཏྟསམྦཱདྷསཡནནྟི པུཏྟེཧི སམྦཱདྷསཡནཾ. ཨེཏྠ པུཏྟསཱིསེན དཱརཔརིགྒཧཾ པུཏྟདཱརེསུ ཨུཔྤིལོ ཝིཡ. ཏེན ཏེསཾ རོགཱདིཧེཏུ སོཀཱབྷིབྷཝེན ཙ ཙིཏྟསྶ སཾཀིལིཊྛཏཾ དསྶེཏི. ཀཱམབྷོགིནཱཏི ཨིམིནཱ པན རཱགཱབྷིབྷཝནྟི. ཨུབྷཡེནཔི ཝིཀྑིཏྟཙིཏྟཏཾ དསྶེཏི. ཀཱསིཀཙནྡནནྟི ཨུཛྫལཙནྡནཾ. ཏཾ ཀིར ཝཎྞཝིསེསསམུཛྫལཾ ཧོཏི པབྷསྶརཾ, ཏདཏྠམེཝ ནཾ སཎྷཏརཾ ཀརོནྟི. ཏེནེཝཱཧ ‘‘སཎྷཙནྡན’’ནྟི ¶ , ཀཱསིཀཝཏྠཉྩ ཙནྡནཉྩཱཏི ཨཏྠོ. མཱལཱགནྡྷཝིལེཔནནྟི ཝཎྞསོབྷཏྠཉྩེཝ སུགནྡྷབྷཱཝཏྠཉྩ མཱལཾ, སུགནྡྷབྷཱཝཏྠཱཡ གནྡྷཾ, ཚཝིརཱགཀརཎཏྠཉྩེཝ སུབྷཏྠཉྩ ཝིལེཔནཾ དྷཱརེནྟེན. ཛཱཏརཱུཔརཛཏནྟི སུཝཎྞཉྩེཝ ཨཝསིཊྛདྷནཉྩ སཱདིཡནྟེན. སབྦེནཔི ཀཱམེསུ ཨབྷིགིདྡྷབྷཱཝམེཝ པཀཱསེཏི.

༦༠. ཚཊྛེ ཧཏྠིཾ སཱརེཏཱིཏི ཧཏྠིསཱརཱི, ཏསྶ པུཏྟོཏི ཧཏྠིསཱརིཔུཏྟོ. སོ ཀིར སཱཝཏྠིཡཾ ཧཏྠིཨཱཙརིཡསྶ པུཏྟོ བྷགཝཏོ སནྟིཀེ པབྦཛིཏྭཱ ཏཱིཎི པིཊཀཱནི ཨུགྒཧེཏྭཱ སུཁུམེསུ ¶ ཁནྡྷདྷཱཏུཨཱཡཏནཱདཱིསུ ཨཏྠནྟརེསུ ཀུསལོ ཨཧོསི. ཏེན ཝུཏྟཾ – ‘‘ཐེརཱནཾ བྷིཀྑཱུནཾ ཨབྷིདྷམྨཀཐཾ ཀཐེནྟཱནཾ ཨནྟརནྟརཱ ཀཐཾ ཨོཔཱཏེཏཱི’’ཏི. ཏཏྠ ཨནྟརནྟརཱ ཀཐཾ ཨོཔཱཏེཏཱིཏི ཐེརེཧི ཝུཙྩམཱནསྶ ཀཐཱཔབནྡྷསྶ ཨནྟརེ ཨནྟརེ ཨཏྟནོ ཀཐཾ པཝེསེཏཱིཏི ཨཏྠོ. པཉྩཧི སཾསགྒེཧཱིཏི སཝནསཾསགྒོ, དསྶནསཾསགྒོ, སམུལླཱཔསཾསགྒོ, སམྦྷོགསཾསགྒོ, ཀཱཡསཾསགྒོཏི ཨིམེཧི པཉྩཧི སཾསགྒེཧི. ཀིཊྛཁཱདཀོཏི ཀིཊྛཊྛཱནེ ཨུཔྤནྣསསྶཉྷི ཀིཊྛནྟི ཝུཏྟཾ ཀཱརཎཱུཔཙཱརེན. སིཔྤིཡོ སུཏྟིཡོ. སམྦུཀཱཏི སངྑམཱཧ.

གིཧིབྷཱཝེ ཝཎྞཾ ཀཐེསཱིཏི (དཱི. ནི. ཨཊྛ. ༡.༤༢༢) ཀསྶཔསམྨཱསམྦུདྡྷསྶ ཀིར སཱསནེ དྭེ སཧཱཡཀཱ ཨཧེསུཾ, ཨཉྙམཉྙཾ སམགྒཱ ཨེཀཏོཝ སཛ྄ཛྷཱཡནྟི. ཏེསུ ཨེཀོ ཨནབྷིརཏོ གིཧིབྷཱཝེ ཙིཏྟཾ ཨུཔྤཱདེཏྭཱ ཨིཏརསྶ ཨཱརོཙེསི. སོ གིཧིབྷཱཝེ ཨཱདཱིནཝཾ, པབྦཛྫཱཡ ཨཱནིསཾསཾ དསྶེཏྭཱ ཨོཝདི. སོ ཏཾ སུཏྭཱ ཨབྷིརམིཏྭཱ པུན ཨེཀདིཝསཾ ཏཱདིསེ ཙིཏྟེ ཨུཔྤནྣེ ཏཾ ཨེཏདཝོཙ – ‘‘མཡ྄ཧཾ, ཨཱཝུསོ, ཨེཝརཱུཔཾ ཙིཏྟཾ ཨུཔྤཛྫཏི, ཨིམཱཧཾ པཏྟཙཱིཝརཾ ཏུཡ྄ཧཾ དསྶཱམཱི’’ཏི. སོ པཏྟཙཱིཝརལོབྷེན ཏསྶ གིཧིབྷཱཝེ ཨཱནིསཾསཾ དསྶེཏྭཱ པབྦཛྫཱཡ ཨཱདཱིནཝཾ ཀཐེསི. ཏསྶ ཏཾ སུཏྭཱཝ གིཧིབྷཱཝཏོ ཙིཏྟཾ ནིཝཏྟེཏྭཱ པབྦཛྫཱཡམེཝ ཨབྷིརམི. ཨེཝམེས ཏདཱ སཱིལཝནྟསྶ བྷིཀྑུནོ གིཧིབྷཱཝེ ¶ ཨཱནིསཾསཀཐཱཡ ཀཐིཏཏྟཱ ཨིདཱནི ཚ ཝཱརེ ཝིབྦྷམིཏྭཱ སཏྟམཝཱརེ པབྦཛིཏྭཱ མཧཱམོགྒལླཱནསྶ མཧཱཀོཊྛིཀཏྠེརསྶ ཙ ཨབྷིདྷམྨཀཐཾ ཀཐེནྟཱནཾ ཨནྟརནྟརཱ ཀཐཾ ཨོཔཱཏེསི. ཨཐ ནཾ མཧཱཀོཊྛིཀཏྠེརོ ཨཔསཱདེསི. སོ མཧཱསཱཝཀསྶ ཀཐིཏེ པཏིཊྛཱཏུཾ ཨསཀྐོནྟོ ཝིབྦྷམིཏྭཱ གིཧི ཛཱཏོ. པོཊྛཔཱདསྶ པནཱཡཾ གིཧིསཧཱཡཀོ ཨཧོསི, ཏསྨཱ ཝིབྦྷམིཏྭཱ དྭཱིཧཏཱིཧཙྩཡེན པོཊྛཔཱདསྶ སནྟིཀཾ གཏོ. ཨཐ ནཾ སོ དིསྭཱ – ‘‘སམྨ, ཀིཾ ཏཡཱ ཀཏཾ, ཨེཝརཱུཔསྶ ནཱམ སཏྠུ སཱསནཱ ཨཔསཀྐནྟོསི, ཨེཧི པབྦཛིཏུཾ དཱནི ཏེ ཝཊྚཏཱི’’ཏི ཏཾ གཧེཏྭཱ བྷགཝཏོ སནྟིཀཾ ཨགམཱསི. ཏསྨིཾ ཋཱནེ པབྦཛིཏྭཱ ཨརཧཏྟཾ པཱཔུཎི. ཏེན ཝུཏྟཾ ‘‘སཏྟམེ ཝཱརེ པབྦཛིཏྭཱ ཨརཧཏྟཾ པཱཔུཎཱི’’ཏི.

ཧཏྠིསཱརིཔུཏྟསུཏྟཝཎྞནཱ ནིཊྛིཏཱ.

༦༡. སཏྟམེ མནྟཱཏི ཡ-ཀཱརལོཔེན ནིདྡེསོ, ཀརཎཏྠེ ཝཱ ཨེཏཾ པཙྩཏྟཝཙནཾ. ཏེནཱཧ ‘‘ཏཱཡ ཨུབྷོ ཨནྟེ ཝིདིཏྭཱ’’ཏི. ཕསྶཝསེན ནིབྦཏྟཏྟཱཏི དྭཡདྭཡསམཱཔཏྟིཡཾ ཨཉྙམཉྙཾ སམྥསྶཝསེན ནིབྦཏྟཏྟཱ, ‘‘ཕསྶཔཙྩཡཱ ཏཎྷཱ, ཏཎྷཱཔཙྩཡཱ ཨུཔཱདཱནཾ, ཨུཔཱདཱནཔཙྩཡཱ བྷཝོ ¶ , བྷཝཔཙྩཡཱ ཛཱཏཱི’’ཏི ཨིམིནཱ ཙཱནུཀྐམེན ཕསྶསམུཊྛཱནཏྟཱ ཨིམསྶ ཀཱཡསྶ ཕསྶཝསེན ནིབྦཏྟཏྟཱཏི ཝུཏྟཾ. ཨེཀོ ཨནྟོཏི ཨེཏྠ ཨཡཾ ཨནྟ-སདྡོ ཨནྟཨབྦྷནྟརམརིཡཱདལཱམཀཨབྷཱཝཀོཊྛཱསཔདཔཱུརཎསམཱིཔཱདཱིསུ དིསྶཏི. ‘‘ཨནྟཔཱུརོ ཨུདརཔཱུརོ’’ཏིཨཱདཱིསུ (སུ. ནི. ༡༩༧) ཧི ཨནྟེ ཨནྟསདྡོ. ‘‘ཙརནྟི ལོཀེ པརིཝཱརཚནྣཱ ཨནྟོ ཨསུདྡྷཱ, བཧི སོབྷམཱནཱ’’ཏིཨཱདཱིསུ (སཾ. ནི. ༡.༡༢༢) ཨབྦྷནྟརེ. ‘‘ཀཱཡབནྡྷནསྶ ཨནྟོ ཛཱིརཏི (ཙཱུལ༹ཝ. ༢༧༨) སཱ ཧརིཏནྟཾ ཝཱ པནྠནྟཾ ཝཱ སེལནྟཾ ཝཱ ཨུདཀནྟཾ ཝཱ’’ཏིཨཱདཱིསུ (མ. ནི. ༡.༣༠༤) མརིཡཱདཱཡཾ. ‘‘ཨནྟམིདཾ, བྷིཀྑཝེ, ཛཱིཝིཀཱན’’ནྟིཨཱདཱིསུ (སཾ. ནི. ༣.༨༠; ཨིཏིཝུ. ༩༡) ལཱམཀེ. ‘‘ཨེསེཝནྟོ དུཀྑསྶཱ’’ཏིཨཱདཱིསུ (མ. ནི. ༣.༣༩༣; སཾ. ནི. ༢.༥༡) ཨབྷཱཝེ. སབྦཔཙྩཡསངྑཡོ ཧི དུཀྑསྶ ཨབྷཱཝོ ¶ ཀོཊཱིཏིཔི ཝུཙྩཏི. ‘‘ཏཡོ ཨནྟཱ’’ཏིཨཱདཱིསུ (དཱི. ནི. ༣.༣༠༥) ཀོཊྛཱསེ. ‘‘ཨིངྒྷ ཏཱཝ སུཏྟནྟཾ ཝཱ གཱཐཱཡོ ཝཱ ཨབྷིདྷམྨཾ ཝཱ པརིཡཱཔུཎསྶུ, སུཏྟནྟེ ཨོཀཱསཾ ཀཱརཱཔེཏྭཱ’’ཏི (པཱཙི. ༤༤༢) ཙ ཨཱདཱིསུ པདཔཱུརཎེ. ‘‘གཱམནྟཾ ཝཱ ཨོསཊོ (པཱརཱ. ༤༠༩-༤༡༠; ཙཱུལ༹ཝ. ༣༤༣) གཱམནྟསེནཱསན’’ནྟིཨཱདཱིསུ (པཱརཱ. ཨཊྛ. ༢.༤༡༠) སམཱིཔེ. སྭཱཡམིདྷ ཀོཊྛཱསེ ཝཏྟཏཱིཏི ཨཡམེཀོ ཀོཊྛཱསོཏི.

སནྟོ པརམཏྠཏོ ཝིཛྫམཱནོ དྷམྨསམཱུཧོཏི སཀྐཱཡོ, པཉྩུཔཱདཱནཀྑནྡྷཱ. ཏེནཱཧ ‘‘ཏེབྷཱུམཀཝཊྚ’’ནྟི. སེསམེཏྠ སུཝིཉྙེཡྻམེཝ.

༦༢. ཨཊྛམེ ནིབྦཏྟིཝསེན ཨཔཱཡསཾཝཏྟནིཡེན ཝཱ ཀམྨུནཱ ཨཔཱཡེསུ ནིཡུཏྟོཏི ཨཱཔཱཡིཀོ ནེརཡིཀོཏི ཨེཏྠཱཔི ཨེསེཝ ནཡོ. ཨཝཱིཙིམྷི ཨུཔྤཛྫིཏྭཱ ཏཏྠ ཨཱཡུཀཔྤསཉྙིཏཾ ཨནྟརཀཔྤཾ ཏིཊྛཏཱིཏི ཀཔྤཊྛོ. ནིརཡཱུཔཔཏྟིཔརིཧརཎཝསེན ཏིཀིཙྪིཏུཾ ཨསཀྐུཎེཡྻོཏི ཨཏེཀིཙྪོ. ཨཁཎྜཱནཱིཏི ཨེཀདེསེནཔི ཨཁཎྜིཏཱནི. བྷིནྣཀཱལཏོ པཊྛཱཡ བཱིཛཾ བཱིཛཏྠཱཡ ན ཨུཔཀཔྤཏི. ཨཔཱུཏཱིནཱིཏི ཨུདཀཏེམནེན ཨཔཱུཏིཀཱནི. པཱུཏིཀཉྷི བཱིཛཾ བཱིཛཏྠཱཡ ན ཨུཔཀཔྤཏི. ཨཝཱཏཱཏཔཧཏཱནཱིཏི ཝཱཏེན ཙ ཨཱཏཔེན ཙ ན ཧཏཱནི ནིརོཛཏཾ ན པཱཔིཏཱནི. ནིརོཛཉྷི ཀསཊཾ བཱིཛཾ བཱིཛཏྠཱཡ ན ཨུཔཀཔྤཏི. ‘‘སཱརཱདཱནཱི’’ཏི ཝཏྟབྦེ ཨཱ-ཀཱརསྶ རསྶཏྟཾ ཀཏྭཱ པཱལི༹ཡཾ ‘‘སཱརདཱནཱི’’ཏི ཝུཏྟནྟི ཨཱཧ ‘‘སཱརཱདཱནཱི’’ཏི. ཏཎྜུལསཱརསྶ ཨཱདཱནཏོ ¶ སཱརཱདཱནི, གཧིཏསཱརཱནི པཏིཊྛིཏསཱརཱནི. ནིསྶརཉྷི བཱིཛཾ བཱིཛཏྠཱཡ ན ཨུཔཀཔྤཏི. སུཁསཡིཏཱནཱིཏི ཙཏྟཱརོ མཱསེ ཀོཊྛེ པཀྑིཏྟནིཡཱམེནེཝ སུཁསཡིཏཱནི སུཊྛུ སནྣིཙིཏཱནི. མཎྜཁེཏྟེཏི ཨཱུསཁཱརཱདིདོསེཧི ཨཝིདྡྷསྟེ སཱརཀྑེཏྟེ. ཨབྷིདོཏི ཨབྷི-སདྡེན སམཱནཏྠནིཔཱཏཔདནྟི ཨཱཧ ‘‘ཨབྷིཨཌྜྷརཏྟ’’ནྟི. ནཏྠི ཨེཏསྶ བྷིདཱཏི ཝཱ ཨབྷིདོ. ‘‘ཨབྷིདཾ ཨཌྜྷརཏྟ’’ནྟི ཝཏྟབྦེ ཨུཔཡོགཏྠེ པཙྩཏྟཝཙནཾ. ཨཌྜྷརཏྟནྟི ¶ ཙ ཨཙྩནྟསཾཡོགཝཙནཾ, བྷུམྨཏྠེ ཝཱ. ཏསྨཱ ཨབྷིདོ ཨཌྜྷརཏྟནྟི ཨབྷིནྣེ ཨཌྜྷརཏྟསམཡེཏི ཨཏྠོ. པུཎྞམཱསིཡཉྷི གགནམཛ྄ཛྷསྶ པུརཏོ ཝཱ པཙྪཏོ ཝཱ ཙནྡེ ཋིཏེ ཨཌྜྷརཏྟསམཡོ བྷིནྣོ ནཱམ ཧོཏི, མཛ྄ཛྷེ ཨེཝ པན ཋིཏེ ཨབྷིནྣོ ནཱམ.

སུཔྤབུདྡྷསུནཀྑཏྟཱདཡོཏི ཨེཏྠ (དྷ. པ. ཨཊྛ. ༢.༡༢༧ སུཔྤབུདྡྷསཀྱཝཏྠུ) སུཔྤབུདྡྷོ ཀིར སཱཀིཡོ ‘‘མམ དྷཱིཏརཾ ཚཌྜེཏྭཱ ནིཀྑནྟོ, མམ པུཏྟཾ པབྦཱཛེཏྭཱ ཏསྶ ཝེརིཊྛཱནེ ཋིཏོ ཙཱ’’ཏི ཨིམེཧི དྭཱིཧི ཀཱརཎེཧི སཏྠརི ཨཱགྷཱཏཾ བནྡྷིཏྭཱ ཨེཀདིཝསཾ ‘‘ན དཱནི ནིམནྟིཏཊྛཱནཾ གནྟྭཱ བྷུཉྫིཏུཾ དསྶཱམཱི’’ཏི གམནམགྒཾ པིདཧིཏྭཱ ཨནྟརཝཱིཐིཡཾ སུརཾ པིཝནྟོ ནིསཱིདི. ཨཐསྶ སཏྠརི བྷིཀྑུསངྒྷཔརིཝུཏེ ཏཾ ཋཱནཾ ཨཱགཏེ ‘‘སཏྠཱ ཨཱགཏོ’’ཏི ཨཱརོཙེསུཾ. སོ ཨཱཧ – ‘‘པུརཏོ གཙྪཱཏི ཏསྶ ཝདེཐ, ནཱཡཾ མཡཱ མཧལླཀཏརོ, ནཱསྶ མགྒཾ དསྶཱམཱི’’ཏི. པུནཔྤུནཾ ཝུཙྩམཱནོཔི ཏཐེཝ ནིསཱིདི. སཏྠཱ མཱཏུལསྶ སནྟིཀཱ མགྒཾ ཨལབྷིཏྭཱ ཏཏོཝ ནིཝཏྟི. སོཔི ཙརཔུརིསཾ པེསེསི – ‘‘གཙྪ ཏསྶ ཀཐཾ སུཏྭཱ ཨེཧཱི’’ཏི. སཏྠཱཔི ནིཝཏྟནྟོ སིཏཾ ཀཏྭཱ ཨཱནནྡཏྠེརེན – ‘‘ཀོ ནུ ཁོ, བྷནྟེ, སིཏཔཱཏུཀམྨེ པཙྩཡོ’’ཏི པུཊྛོ ཨཱཧ – ‘‘པསྶསི, ཨཱནནྡ, སུཔྤབུདྡྷ’’ནྟི. པསྶཱམི, བྷནྟེ. བྷཱརིཡཾ ཏེན ཀམྨཾ ཀཏཾ མཱདིསསྶ བུདྡྷསྶ མགྒཾ ཨདེནྟེན, ཨིཏོ སཏྟམེ དིཝསེ ཧེཊྛཱཔཱསཱདེ པཱསཱདམཱུལེ པཐཝིཡཱ པཝིསིསྶཏཱི’’ཏི ཨཱཙིཀྑི.

སུནཀྑཏྟོཔི (མ. ནི. ཨཊྛ. ༡.༡༤༧) པུབྦེ བྷགཝནྟཾ ཨུཔསངྐམིཏྭཱ དིབྦཙཀྑུཔརིཀམྨཾ པུཙྪི. ཨཐསྶ བྷགཝཱ ཀཐེསི. སོ དིབྦཙཀྑུཾ ནིབྦཏྟེཏྭཱ ཨཱལོཀཾ ཝཌྜྷེཏྭཱ ཨོལོཀེནྟོ དེཝལོཀེ ནནྡནཝནཙིཏྟལཏཱཝནཕཱརུསཀཝནམིསྶཀཝནེསུ དིབྦསམྤཏྟིཾ ཨནུབྷཝམཱནེ དེཝཔུཏྟེ ཙ དེཝདྷཱིཏརོ ཙ དིསྭཱ – ‘‘ཨེཏེསཾ ཨེཝརཱུཔཱཡ ཨཏྟབྷཱཝསམྤཏྟིཡཱ ཋིཏཱནཾ ཀིར མདྷུརོ ནུ ཁོ སདྡོ བྷཝིསྶཏཱི’’ཏི སདྡཾ སོཏུཀཱམོ ཧུཏྭཱ དསབལཾ ཨུཔསངྐམིཏྭཱ དིབྦསོཏདྷཱཏུཔརིཀམྨཾ པུཙྪི. བྷགཝཱ པནསྶ – ‘‘དིབྦསོཏདྷཱཏུསྶ ཨུཔནིསྶཡོ ནཏྠཱི’’ཏི ཉཏྭཱ པརིཀམྨཾ ན ཀཐེསི. ན ཧི བུདྡྷཱ ཡཾ ན བྷཝིསྶཏི, ཏསྶ པརིཀམྨཾ ཀཐེནྟི. སོ བྷགཝཏི ཨཱགྷཱཏཾ བནྡྷིཏྭཱ ཙིནྟེསི – ‘‘ཨཧཾ སམཎཾ གོཏམཾ པཋམཾ དིབྦཙཀྑུཔརིཀམྨཾ ¶ པུཙྪིཾ, སོ མཡ྄ཧཾ ‘སམྤཛྫཏུ ཝཱ མཱ ཝཱ སམྤཛྫཏཱུ’ཏི ཀཐེསི. ཨཧཾ པན པཙྩཏྟཔུརིསཀཱརེན ཏཾ ནིབྦཏྟེཏྭཱ དིབྦསོཏདྷཱཏུཔརིཀམྨཾ པུཙྪིཾ, ཏཾ མེ ན ཀཐེསི. ཨདྡྷཱ ཨེཝཾ ¶ ཧོཏི ‘ཨཡཾ རཱཛཔབྦཛིཏོ དིབྦཙཀྑུཉཱཎཾ ནིབྦཏྟེཏྭཱ, དིབྦསོཏཉཱཎཾ ནིབྦཏྟེཏྭཱ, ཙེཏོཔརིཡཀམྨཉཱཎཾ ནིབྦཏྟེཏྭཱ, ཨཱསཝཱནཾ ཁཡེ ཉཱཎཾ ནིབྦཏྟེཏྭཱ, མཡཱ སམསམོ བྷཝིསྶཏཱི’ཏི ཨིསྶཱམཙྪརིཡཝསེན མཡ྄ཧཾ ན ཀཐེཏཱི’’ཏི བྷིཡྻོསོ ཨཱགྷཱཏཾ བནྡྷིཏྭཱ ཀཱསཱཡཱནི ཚཌྜེཏྭཱ གིཧིབྷཱཝཾ པཏྭཱཔི ན ཏུཎྷཱིབྷཱུཏོ ཝིཧཱསི. དསབལཾ པན ཨསཏཱ ཏུཙྪེན ཨབྦྷཱཙིཀྑིཏྭཱ ཨཔཱཡཱུཔགོ ཨཧོསི. ཏམྤི བྷགཝཱ བྱཱཀཱསི. ཝུཏྟཉྷེཏཾ – ‘‘ཨེཝམྤི ཁོ, བྷགྒཝ, སུནཀྑཏྟོ ལིཙྪཝིཔུཏྟོ མཡཱ ཝུཙྩམཱནོ ཨཔཀྐམེཝ ཨིམསྨཱ དྷམྨཝིནཡཱ, ཡཐཱ ཏཾ ཨཱཔཱཡིཀོ’’ཏི (དཱི. ནི. ༣.༦). ཏེན ཝུཏྟཾ ‘‘ཨཔརེཔི སུཔྤབུདྡྷསུནཀྑཏྟཱདཡོ བྷགཝཏཱ ཉཱཏཱཝཱ’’ཏི. ཨཱདི-སདྡེན ཀོཀཱལིཀཱདཱིནཾ སངྒཧོ དཊྛབྦོ.

སུསཱིམོ པརིབྦཱཛཀོཏི (སཾ. ནི. ཨཊྛ. ༢.༢.༧༠) ཨེཝཾནཱམཀོ ཝེདངྒེསུ ཀུསལོ པཎྜིཏོ པརིབྦཱཛཀོ. ཨཉྙཏིཏྠིཡཱ ཧི པརིཧཱིནལཱབྷསཀྐཱརསིལོཀཱ ‘‘སམཎོ གོཏམོ ན ཛཱཏིགོཏྟཱདཱིནི ཨཱརབྦྷ ལཱབྷགྒཔྤཏྟོ ཛཱཏོ, ཀཝིསེཊྛོ པནེས ཨུཏྟམཀཝིཏཱཡ སཱཝཀཱནཾ བནྡྷཾ བནྡྷིཏྭཱ དེཏི. ཏེ ཏཾ ཨུགྒཎྷིཏྭཱ ཨུཔཊྛཱཀཱནཾ ཨུཔནིསིནྣཀཐམྤི ཨནུམོདནམྤི སརབྷཉྙམྤཱིཏི ཨེཝམཱདཱིནི ཀཐེནྟི. ཏེ ཏེསཾ པསནྣཱནཾ ལཱབྷཾ ཨུཔསཾཧརནྟི. སཙེ མཡཾ ཡཾ སམཎོ གོཏམཱ ཛཱནཱཏི, ཏཏོ ཐོཀཾ ཛཱནེཡྻཱམ, ཨཏྟནོ སམཡཾ ཏཏྠ པཀྑིཔིཏྭཱ མཡམྤི ཨུཔཊྛཱཀཱནཾ ཀཐེཡྻཱམ. ཏཏོ ཨེཏེཧི ལཱབྷིཏརཱ བྷཝེཡྻཱམ. ཀོ ནུ ཁོ སམཎསྶ གོཏམསྶ སནྟིཀེ པབྦཛིཏྭཱ ཁིཔྤམེཝ ཨུགྒཎྷིཏུཾ སཀྑིསྶཏཱི’’ཏི ཨེཝཾ ཙིནྟེཏྭཱ ‘‘སུསིམོ པཊིབལོ’’ཏི དིསྭཱ ཨུཔསངྐམིཏྭཱ ཨེཝམཱཧཾསུ ‘‘ཨེཧི ཏྭཾ, ཨཱཝུསོ སུསཱིམ, སམཎེ གོཏམེ བྲཧྨཙརིཡཾ ཙར, ཏྭཾ དྷམྨཾ པརིཡཱཔུཎིཏྭཱ ཨམྷེ ཝཱཙེཡྻཱསི, ཏཾ མཡཾ དྷམྨཾ པརིཡཱཔུཎིཏྭཱ གིཧཱིནཾ བྷཱསིསྶཱམ, ཨེཝཾ མཡམྤི སཀྐཏཱ བྷཝིསྶཱམ གརུཀཏཱ མཱནིཏཱ པཱུཛིཏཱ ལཱབྷིནོ ཙཱིཝརཔིཎྜཔཱཏསེནཱསནགིལཱནཔཙྩཡབྷེསཛྫཔརིཀྑཱརཱན’’ནྟི (སཾ. ནི. ༢.༧༠).

ཨཐ སུསཱིམོ པརིབྦཱཛཀོ ཏེསཾ ཝཙནཾ སམྤཊིཙྪིཏྭཱ ཡེནཱནནྡོ ཏེནུཔསངྐམི, ཨུཔསངྐམིཏྭཱ པབྦཛྫཾ ཡཱཙི. ཐེརོ ཙ ཏཾ ཨཱདཱཡ བྷགཝནྟཾ ¶ ཨུཔསངྐམིཏྭཱ ཨེཏམཏྠཾ ཨཱརོཙེསི. བྷགཝཱ པན ཙིནྟེསི ‘‘ཨཡཾ པརིབྦཱཛཀོ ཏིཏྠིཡསམཡེ ‘ཨཧཾ པཱཊིཨེཀྐོ སཏྠཱ’ཏི པཊིཛཱནམཱནོ ཙརཏི, ‘ཨིདྷེཝ མགྒབྲཧྨཙརིཡཾ ཙརིཏུཾ ཨིཙྪཱམཱི’ཏི ཀིར ཝདཏི, ཀིཾ ནུ ཁོ མཡི པསནྣོ, ཨུདཱཧུ མཡ྄ཧཾ ཝཱ མམ སཱཝཀཱནཾ དྷམྨཀཐཱཡ པསནྣོ’’ཏི. ཨཐསྶ ཨེཀཊྛཱནེཔི པསཱདཱབྷཱཝཾ ཉཏྭཱ ‘‘ཨཡཾ མམ སཱསནེ ‘དྷམྨཾ ཐེནེསྶཱམཱི’ཏི པབྦཛཏི, ཨིཏིསྶ ཨཱགམནཾ ¶ ཨཔརིསུདྡྷཾ, ནིཔྥཏྟི ནུ ཁོ ཀཱིདིསཱ’’ཏི ཨོལོཀེནྟོ ‘‘ཀིཉྩཱཔི ‘དྷམྨཾ ཐེནེསྶཱམཱི’ཏི པབྦཛཏི, ཀཏིཔཱཧེནེཝ པན གྷཊེཏྭཱ ཨརཧཏྟཾ གཎྷིསྶཏཱི’’ཏི ཉཏྭཱ ‘‘ཏེནཧཱནནྡ, སུསཱིམཾ པབྦཱཛེཐཱ’’ཏི ཨཱཧ. ཏཾ སནྡྷཱཡེཏཾ ཝུཏྟཾ ‘‘ཨེཝཾ བྷགཝཏཱ ཀོ ཉཱཏོ? སུསཱིམོ པརིབྦཱཛཀོ’’ཏི.

སནྟཏིམཧཱམཏྟོཏི (དྷ. པ. ཨཊྛ. ༢.༡༤༡ སནྟཏིམཧཱམཏྟཝཏྠུ) སོ ཀིར ཨེཀསྨིཾ ཀཱལེ རཉྙོ པསེནདིསྶ པཙྩནྟཾ ཀུཔིཏཾ ཝཱུཔསམེཏྭཱ ཨཱགཏོ. ཨཐསྶ རཱཛཱ ཏུཊྛོ སཏྟ དིཝསཱནི རཛྫཾ དཏྭཱ ཨེཀཾ ནཙྩགཱིཏཀུསལཾ ཨིཏྠིཾ ཨདཱསི. སོ སཏྟ དིཝསཱནི སུརཱམདམཏྟོ ཧུཏྭཱ སཏྟམེ དིཝསེ སབྦཱལངྐཱརཔྤཊིམཎྜིཏོ ཧཏྠིཀྑནྡྷཝརགཏོ ནཧཱནཏིཏྠཾ གཙྪནྟོ སཏྠཱརཾ པིཎྜཱཡ པཝིསནྟཾ དྭཱརནྟརེ དིསྭཱ ཧཏྠིཀྑནྡྷཝརགཏོཝ སཱིསཾ ཙཱལེཏྭཱ ཝནྡི. སཏྠཱ སིཏཾ ཀཏྭཱ ‘‘ཀོ ནུ ཁོ, བྷནྟེ, སིཏཔཱཏུཀརཎེ ཧེཏཱུ’’ཏི ཨཱནནྡཏྠེརེན པུཊྛོ སིཏཀཱརཎཾ ཨཱཙིཀྑནྟོ ཨཱཧ – ‘‘པསྶསི, ཨཱནནྡ, སནྟཏིམཧཱམཏྟཾ, ཨཛྫེཝ སབྦཱབྷརཎཔྤཊིམཎྜིཏོ མམ སནྟིཀཾ ཨཱགནྟྭཱ ཙཱཏུཔྤདིཀགཱཐཱཝསཱནེ ཨརཧཏྟཾ པཏྭཱ པརིནིབྦཱཡིསྶཏཱི’’ཏི. ཏེན ཝུཏྟཾ ‘‘ཨེཝཾ ཀོ ཉཱཏོ བྷགཝཏཱཏི? སནྟཏིམཧཱམཏྟོ’’ཏི.

པུརིསིནྡྲིཡཉཱཎསུཏྟཝཎྞནཱ ནིཊྛིཏཱ.

༦༣. ནཝམེ པརིཧཱཡཏི ཨཏྟནོ ཕལཾ པརིགྒཧེཏྭཱ ཝཏྟཏི, ཏསྶ ཝཱ ཀཱརཎབྷཱཝཾ ཨུཔགཙྪཏཱིཏི པརིཡཱཡོཏི ཨིདྷ ཀཱརཎཾ ཝུཏྟནྟི ཨཱཧ ‘‘ནིབྦིཛ྄ཛྷནཀཱརཎ’’ནྟི.

‘‘ཨནུཛཱནཱམི ¶ , བྷིཀྑཝེ, ཨཧཏཱནཾ ཝཏྠཱནཾ དིགུཎཾ སངྒྷཱཊི’’ནྟི ཨེཏྠ ཧི པཊལཊྛོ གུཎཊྛོ. ‘‘ཨཙྩེནྟི ཀཱལཱ ཏརཡནྟི རཏྟིཡོ, ཝཡོགུཎཱ ཨནུཔུབྦཾ ཛཧནྟཱི’’ཏི (སཾ. ནི. ༡.༤) ཨེཏྠ རཱསཊྛོ གུཎཊྛོ. ‘‘སཏགུཎཱ དཀྑིཎཱ པཱཊིཀངྑིཏབྦཱ’’ཏི (མ. ནི. ༣.༣༧༩) ཨེཏྠ ཨཱནིསཾསཊྛོ. ‘‘ཨནྟཾ ཨནྟགུཎཾ (དཱི. ནི. ༢.༣༧༧; མ. ནི. ༡.༡༡༠; ཁུ. པཱ. ༣.དྭཏྟིཾསཱཀཱརོ), ཀཡིརཱ མཱལཱགུཎེ བཧཱུ’’ཏི (དྷ. པ. ༥༣) ཨེཏྠ བནྡྷནཊྛོ གུཎཊྛོ. ཨིདྷཱཔི ཨེསོཝ ཨདྷིཔྤེཏོཏི ཨཱཧ ‘‘བནྡྷནཊྛེན གུཎཱ’’ཏི. ཀཱམརཱགསྶ སཾཡོཛནསྶ པཙྩཡབྷཱཝེན ཝཏྠུཀཱམེསུཔི བནྡྷནཊྛོ རཱསཊྛོ ཝཱ གུཎཊྛོ དཊྛབྦོ. ཙཀྑུཝིཉྙེཡྻཱཏི ཝཱ ཙཀྑུཝིཉྙཱཎཏཾདྭཱརིཀཝིཉྙཱཎེཧི ཛཱནིཏབྦཱ. སོཏཝིཉྙེཡྻཱཏིཨཱདཱིསུཔི ཨེསེཝ ནཡོ. ཨིཊྛཱརམྨཎབྷཱུཏཱཏི ¶ སབྷཱཝེནེཝ ཨིཊྛཱརམྨཎཛཱཏིཀཱ, ཨིཊྛཱརམྨཎབྷཱཝཾ ཝཱ པཏྟཱ. ཀམནཱིཡཱཏི ཀཱམེཏབྦཱ. མནཝཌྜྷནཀཱཏི མནོཧརཱ. ཨེཏེན པརིཀཔྤནཏོཔི ཨིཊྛཱརམྨཎབྷཱཝཾ སངྒཎྷཱཏི. པིཡཛཱཏིཀཱཏི པིཡཱཡིཏབྦསབྷཱཝཱ. ཀཱམཱུཔསཉྷིཏཱཏི ཀཱམརཱགེན ཨུཔེཙྩ སམྦནྡྷནཱིཡཱ སམྦནྡྷཱ ཀཱཏབྦཱ. ཏེནཱཧ ‘‘ཨཱརམྨཎཾ ཀཏྭཱ’’ཏིཨཱདི. སངྐཔྤརཱགོཏི ཝཱ སུབྷཱདིཝསེན སངྐཔྤིཏཝུཏྠམྷི ཨུཔྤནྣརཱགོ. ཨེཝམེཏྠ ཝཏྠུཀཱམཾ པཊིཀྑིཔིཏྭཱ ཀིལེསཀཱམོ ཝུཏྟོ ཏསྶེཝ ཝསེན ཏེསམྤི ཀཱམབྷཱཝསིདྡྷིཏོ, ཀིལེསཀཱམསྶཔི ཨིཊྛཝེདནཱ དིཊྛཱདིསམྤཡོགབྷེདེན པཝཏྟིཨཱཀཱརབྷེདེན ཙ ཨཏྠི ཝིཙིཏྟཀཱཏི ཏཏོ ཝིསེསེཏུཾ ‘‘ཙིཏྲཝིཙིཏྲཱརམྨཎཱནཱི’’ཏི ཨཱཧ, ནཱནཔྤཀཱརཱནི རཱུཔཱདིཨཱརམྨཎཱནཱིཏི ཨཏྠོ.

ཨཐེཏྠ དྷཱིརཱ ཝིནཡནྟི ཚནྡནྟི ཨཐ ཨེཏེསུ ཨཱརམྨཎེསུ དྷིཏིསམྤནྣཱ པཎྜིཏཱ ཚནྡརཱགཾ ཝིནཡནྟི.

ཏཛྫཱཏིཀནྟི ཏཾསབྷཱཝཾ, ཨཏྠཏོ པན ཏསྶ ཀཱམསྶ ཨནུརཱུཔནྟི ཝུཏྟཾ ཧོཏི. པུཉྙསྶ བྷཱགོ པུཉྙབྷཱགོ, པུཉྙཀོཊྛཱསོ. ཏེན ནིབྦཏྟོ, ཏཏྠ ཝཱ བྷཝོཏི པུཉྙབྷཱགིཡོ. ཨཔུཉྙབྷཱགིཡོཏི ཨེཏྠཱཔི ཨེསེཝ ནཡོ. ཝིཔཱཀོཡེཝ ཝེཔཀྐནྟི ཨཱཧ ‘‘ཝོཧཱརཝིཔཱཀ’’ནྟི.

སབྦསངྒཱཧིཀཱཏི ཀུསལཱཀུསལསཱདྷཱརཎཱ. སཾཝིདཧནཙེཏནཱཏི སམྤཡུཏྟདྷམྨེསུ སཾཝིདཧནལཀྑཎཱ ཙེཏནཱ. ཨུརཏྟཱལི༹ནྟི ཨུརཾ ཏཱལེ༹ཏྭཱ ¶ . ཨེཀཔདནྟི ཨེཀཔདཙིཏཾ མནྟཾ. ཏེནཱཧ ‘‘ཨེཀཔདམནྟཾ ཝཱ’’ཏིཨཱདི.

༦༤. དསམེ ཏཐཱགཏབལཱནཱིཏི ཨཉྙེཧི ཨསཱདྷཱརཎཱནི ཏཐཱགཏསྶེཝ བལཱནི. ནནུ ཙེཏཱནི སཱཝཀཱནམྤི ཨེཀཙྩཱནི ཨུཔྤཛྫནྟཱིཏི? ཀཱམཾ ཨུཔྤཛྫནྟི, ཡཱདིསཱནི པན བུདྡྷཱནཾ ཋཱནཱཊྛཱནཉཱཎཱདཱིནི, ན ཏཱདིསཱནི ཏདཉྙེསཾ ཀདཱཙི ཨུཔྤཛྫནྟཱིཏི ཨཉྙེཧི ཨསཱདྷཱརཎཱནི. ཨིམམེཝ ཧི ཡཐཱཝུཏྟཾ ལེསཾ ཨཔེཀྑིཏྭཱ སཱདྷཱརཎབྷཱཝཏོ ཨཱསཡཱནུསཡཉཱཎཱདཱིསུ ཨེཝ ཨསཱདྷཱརཎསམཉྙཱ ནིརུལ༹ྷཱ. ཡཐཱ པུབྦབུདྡྷཱནཾ བལཱནི པུཉྙསྶ སམྤཏྟིཡཱ ཨཱགཏཱནི, ཏཐཱ ཨཱགཏབལཱནཱིཏི ཝཱ ཏཐཱགཏབལཱནི. ཨུསབྷསྶ ཨིདཾ ཨཱསབྷཾ, སེཊྛཊྛཱནཾ. པམུཁནཱདནྟི སེཊྛནཱདཾ ¶ . པཊིཝེདྷཉཱཎཉྩེཝ དེསནཱཉཱཎཉྩཱཏི ཨེཏྠ པཉྙཱཡ པབྷཱཝིཏཾ ཨཏྟནོ ཨརིཡཕལཱཝཧཾ པཊིཝེདྷཉཱཎཾ. ཀརུཎཱཡ པབྷཱཝིཏཾ སཱཝཀཱནཾ ཨརིཡཕལཱཝཧཾ དེསནཱཉཱཎཾ. ཏཏྠ པཊིཝེདྷཉཱཎཾ ཨུཔྤཛྫམཱནཾ ཨུཔྤནྣནྟི དུཝིདྷཾ. ཏཉྷི ཨབྷིནིཀྑམནཏོ ཡཱཝ ཨརཧཏྟམགྒཱ ཨུཔྤཛྫམཱནཾ, ཕལཀྑཎེ ཨུཔྤནྣཾ ནཱམ. ཏུསིཏབྷཝནཏོ ཡཱཝ མཧཱབོདྷིཔལླངྐེ ཨརཧཏྟམགྒཱ ཨུཔྤཛྫམཱནཾ, ཕལཀྑཎེ ཨུཔྤནྣཾ ནཱམ. དཱིཔངྐརཏོ པཊྛཱཡ ཡཱཝ ཨརཧཏྟམགྒཱ ཨུཔྤཛྫམཱནཾ, ཕལཀྑཎེ ཨུཔྤནྣཾ ནཱམ. དེསནཱཉཱཎམྤི པཝཏྟམཱནཾ པཝཏྟནྟི དུཝིདྷཾ. ཏཉྷི ཡཱཝ ཨཉྙཱཏཀོཎྜཉྙསྶ སོཏཱཔཏྟིམགྒཱ པཝཏྟམཱནཾ, ཕལཀྑཎེ པཝཏྟཾ ནཱམ. ཏེསུ པཊིཝེདྷཉཱཎཾ ལོཀུཏྟརཾ, དེསནཱཉཱཎཾ ལོཀིཡཾ. ཨུབྷཡམྤི པནེཏཾ ཨཉྙེཧི ཨསཱདྷཱརཎཾ, བུདྡྷཱནཉྙེཝ ཨོརསཉཱཎཾ.

ཋཱནཉྩ ཋཱནཏོ པཛཱནཱཏཱིཏི ཀཱརཎཉྩ ཀཱརཎཏོ པཛཱནཱཏི. ཡསྨཱ ཏཏྠ ཕལཾ ཏིཊྛཏི ཏདཱཡཏྟཝུཏྟིཏཱཡ ཨུཔྤཛྫཏི ཙེཝ པཝཏྟཏི ཙ, ཏསྨཱ ཋཱནནྟི ཝུཙྩཏི. བྷགཝཱ ‘‘ཡེ ཡེ དྷམྨཱ ཡེསཾ ཡེསཾ དྷམྨཱནཾ ཧེཏཱུ པཙྩཡཱ ཨུཔྤཱདཱཡ, ཏཾ ཏཾ ཋཱནཾ, ཡེ ཡེ དྷམྨཱ ཡེཡཾ ཡེཡཾ དྷམྨཱནཾ ན ཧེཏཱུ ན པཙྩཡཱ ཨུཔྤཱདཱཡ, ཏཾ ཏཾ ཨཊྛཱན’’ནྟི པཛཱནནྟོ ཋཱནཏོ ཨཊྛཱནཏོ ཡཐཱབྷཱུཏཾ པཛཱནཱཏི.

སམཱདིཡནྟཱིཏི ¶ སམཱདཱནཱནི, ཏཱནི པན སམཱདིཡིཏྭཱ ཀཏཱནི ཧོནྟཱིཏི ཨཱཧ ‘‘སམཱདིཡིཏྭཱ ཀཏཱན’’ནྟི. ཀམྨམེཝ ཝཱ ཀམྨསམཱདཱནནྟི ཨེཏེན ‘‘སམཱདཱན’’ནྟི སདྡསྶ ཨཔུབྦཏྠཱབྷཱཝཾ དསྶེཏི མུཏྟགཏསདྡེ གཏསདྡསྶ ཝིཡ. གཏཱིཏི ནིརཡཱདིགཏིཡོ. ཨུཔདྷཱིཏི ཨཏྟབྷཱཝོ. ཀཱལོཏི ཀམྨསྶ ཝིཔཙྩནཱརཧཀཱལོ. པཡོགོཏི ཝིཔཱཀུཔྤཏྟིཡཱ པཙྩཡབྷཱུཏཱ ཀིརིཡཱ.

ཙཏུནྣཾ ཛྷཱནཱནནྟི པཙྩནཱིཀཛ྄ཛྷཱཔནཊྛེན ཨཱརམྨཎཱུཔནིཛ྄ཛྷཱནཊྛེན ཙ ཙཏུནྣཾ རཱུཔཱཝཙརཛ྄ཛྷཱནཱནཾ. ཙཏུཀྐནཡེན ཧེཏཾ ཝུཏྟཾ. ཨཊྛནྣཾ ཝིམོཀྑཱནནྟི ‘‘རཱུཔཱི རཱུཔཱནི པསྶཏཱི’’ཏིཨཱདཱིནཾ (མ. ནི. ༢.༢༤༨; ༣.༣༡༢; དྷ. ས. ༢༤༨; པཊི. མ. ༡.༢༠༩) ཨཊྛནྣཾ ཝིམོཀྑཱནཾ. ཏིཎྞཾ སམཱདྷཱིནནྟི སཝིཏཀྐསཝིཙཱརཱདཱིནཾ ཏིཎྞཾ སམཱདྷཱིནཾ. ནཝནྣཾ ཨནུཔུབྦསམཱཔཏྟཱིནནྟི པཋམཛ྄ཛྷཱནསམཱཔཏྟིཨཱདཱིནཾ ནཝནྣཾ ཨནུཔུབྦསམཱཔཏྟཱིནཾ. ཨེཏྠ ཙ པཊིཔཱཊིཡཱ ཨཊྛནྣཾ སམཱདྷཱིཏིཔི ནཱམཾ, སམཱཔཏྟཱིཏིཔི ཙིཏྟེཀགྒཏཱསབྦྷཱཝཏོ, ནིརོདྷསམཱཔཏྟིཡཱ ཏདབྷཱཝཏོ ན སམཱདྷཱིཏི ནཱམཾ. ཧཱནབྷཱགིཡཾ དྷམྨནྟི ཨཔྤགུཎེཧི པཋམཛ྄ཛྷཱནཱདཱིཧི ཝུཊྛིཏསྶ སཉྙཱམནསིཀཱརཱནཾ ཀཱམཱདིཔཀྑནྡནཾ. ཝིསེསབྷཱགིཡཾ དྷམྨནྟི པགུཎེཧི པཋམཛ྄ཛྷཱནཱདཱིཧི ཝུཊྛིཏསྶ སཉྙཱམནསིཀཱརཱནཾ དུཏིཡཛ྄ཛྷཱནཱདིཔཀྑནྡནཾ. ཨིཏི སཉྙཱམནསིཀཱརཱནཾ ¶ ཀཱམཱདིདུཏིཡཛ྄ཛྷཱནཱདིཔཀྑནྡནཱནི ཧཱནབྷཱགིཡཝིསེསབྷཱགིཡདྷམྨཱཏི དསྶིཏཱནི. ཏེཧི པན ཛྷཱནཱནཾ ཏཾསབྷཱཝཏཱ དྷམྨསདྡེན ཝུཏྟཱ. ཏསྨཱཏི ཝུཏྟམེཝཏྠཾ ཧེཏུབྷཱཝེན པཙྩཱམསཏི. ཝོདཱནནྟི པགུཎཏཱསངྑཱཏཾ ཝོདཱནཾ. ཏཉྷི པཋམཛ྄ཛྷཱནཱདཱིཧི ཝུཊྛཧིཏྭཱ དུཏིཡཛ྄ཛྷཱནཱདཱིནཾ ཨདྷིགམསྶ པཙྩཡཏྟཱ ‘‘ཝུཊྛཱན’’ནྟི ཝུཏྟཾ. ཡེ པན ‘‘ནིརོདྷཏོ ཕལསམཱཔཏྟིཡཱ ཝུཊྛཱནནྟི པཱལི༹ ནཏྠཱི’’ཏི ཝདནྟི. ཏེ ‘‘ནིརོདྷཱ ཝུཊྛཧནྟསྶ ནེཝསཉྙཱནཱསཉྙཱཡཏནཾ ཕལསམཱཔཏྟིཡཱ ཨནནྟརཔཙྩཡེན པཙྩཡོ’’ཏི ཨིམཱཡ པཱལི༹ཡཾ (པཊྛཱ. ༡.༡.༤༡༧) པཊིསེདྷེཏབྦཱ.

༦༥-༦༧. སཏྟམསྶ ¶ པཋམཱདཱིནི ཨུཏྟཱནཏྠཱནི. ཏཏིཡེ ཨབྷིསམཱཙཱརེ ཨུཏྟམསམཱཙཱརེ བྷཝཾ ཨཱབྷིསམཱཙཱརིཀཾ, ཝཏྟཔྤཊིཔཏྟིཝཏྟཾ. ཏེནཱཧ ‘‘ཨུཏྟམསམཱཙཱརབྷཱུཏ’’ནྟིཨཱདི. སེཁཔཎྞཏྟིསཱིལནྟི སེཁིཡཝསེན པཉྙཏྟསཱིལཾ.

ཨནཱགཱམིཕལསུཏྟཱདིཝཎྞནཱ ནིཊྛིཏཱ.

༦༨-༦༩. ཙཏུཏྠེ གཎེན སངྒཎཾ སམོདྷཱནཾ གཎསངྒཎིཀཱ, སཱ ཨཱརམིཏབྦཊྛེན ཨཱརཱམོ ཨེཏསྶཱཏི གཎསངྒཎིཀཱརཱམོ. སངྒཎིཀཱཏི ཝཱ སཀཔརིསསམོདྷཱནཾ. གཎོཏི ནཱནཱཛནསམོདྷཱནཾ. སེསམེཏྠ སུཝིཉྙེཡྻམེཝ. པཉྩམཾ ཨུཏྟཱནཏྠམེཝ.

སངྒཎིཀཱརཱམསུཏྟཱདིཝཎྞནཱ ནིཊྛིཏཱ.

༧༠. ཚཊྛེ ¶ པཊིཔྤསྶམྦྷནཾ པཊིཔྤསྶདྡྷཱིཏི ཨཏྠཏོ ཨེཀནྟི ཨཱཧ ‘‘ན པཊིཔྤསྶདྡྷིལདྡྷེནཱཏི ཀིལེསཔྤཊིཔྤསྶདྡྷིཡཱ ཨལདྡྷེནཱ’’ཏི. སུཀྐཔཀྑེ སནྟེནཱཏིཨཱདཱིསུ ཨངྒསནྟཏཱཡ ཨཱརམྨཎསནྟཏཱཡ སབྦཀིལེསསནྟཏཱཡ ཙ སནྟེན, ཨཏཔྤནིཡཊྛེན པཎཱིཏེན, ཀིལེསཔྤཊིཔྤསྶདྡྷིཡཱ ལདྡྷཏྟཱ, ཀིལེསཔྤཊིཔྤསྶདྡྷིབྷཱཝཾ ཝཱ ལདྡྷཏྟཱ པཊིཔྤསྶདྡྷིལདྡྷེན, པསྶདྡྷིཀིལེསེན ཝཱ ཨརཧཏཱ ལདྡྷཏྟཱ པཊིཔྤསྶདྡྷིལདྡྷེན, ཨེཀོདིབྷཱཝེན ཨདྷིགཏཏྟཱ ཨེཀོདིབྷཱཝཱདྷིགཏེནཱཏི ཨེཝམཏྠོ དཊྛབྦོ.

༧༡-༧༤. སཏྟམེ ¶ ཏསྨིཾ ཏསྨིཾ ཝིསེསེཏི ཏསྨིཾ ཏསྨིཾ སཙྪིཀཱཏབྦེ ཝིསེསེ. སཀྑིབྷཱཝཱཡ པཙྩཀྑཀཱརིཏཱཡ བྷབྦོ སཀྑིབྷབྦོ, ཏསྶ བྷཱཝོ སཀྑིབྷབྦཏཱ. ཏཾ སཀྑིབྷབྦཏཾ. སཏི སཏིཨཱཡཏནེཏི སཏི སཏིཀཱརཎེ. ཀིཉྩེཏྠ ཀཱརཎཾ? ཨབྷིཉྙཱ ཝཱ ཨབྷིཉྙཱཔཱདཀཛ྄ཛྷཱནཾ ཝཱ, ཨཝསཱནེ པན ཚཊྛཱབྷིཉྙཱཡ ཨརཧཏྟཾ ཝཱ ཀཱརཎཾ, ཨརཧཏྟསྶ ཝིཔསྶནཱ ཝཱཏི ཝེདིཏབྦཾ. ཡཉྷི ཏཾ ཏཏྲ ཏཏྲ སཀྑིབྷབྦཏཱསངྑཱཏཾ ཨིདྡྷིཝིདྷཔཙྩནུབྷཝནཱདི, ཏསྶ ཨབྷིཉྙཱ ཀཱརཎཾ. ཨཐ ཨིདྡྷིཝིདྷཔཙྩནུབྷཝནཱདི ཨབྷིཉྙཱ, ཨེཝཾ སཏི ཨབྷིཉྙཱཔཱདཀཛ྄ཛྷཱནཾ ཀཱརཎཾ. ཨརཧཏྟམྤི ‘‘ཀུདཱསྶུ ནཱམཱཧཾ ཏདཱཡཏནཾ ཨུཔསམྤཛྫ ཝིཧརིསྶཱམཱི’’ཏི ཨནུཏྟརེསུ ཝིམོཀྑེསུ པིཧཾ ཨུཔཊྛཔེཏྭཱ ཚཊྛཱབྷིཉྙཾ ནིབྦཏྟེནྟསྶ ཀཱརཎཾ. ཨིདཉྩ སབྦསཱདྷཱརཎཾ ན ཧོཏི, སཱདྷཱརཎཝསེན པན ཨརཧཏྟསྶ ཝིཔསྶནཱ ཀཱརཎཾ. ཨཐ ཝཱ སཏི ཨཱཡཏནེཏི ཏསྶ ཏསྶ ཝིསེསཱདྷིགམསྶ ཨུཔནིསྶཡསངྑཱཏེ ཀཱརཎེ སཏཱིཏི ཨེཝམེཏྠ ཨཏྠོ དཊྛབྦོ.

ཧཱནབྷཱགིཡཱདཱིསུ ‘‘པཋམཛ྄ཛྷཱནསྶ ལཱབྷིཾ ཀཱམསཧགཏཱ སཉྙཱམནསིཀཱརཱ སམུདཱཙརནྟི, ཧཱནབྷཱགིཡོ སམཱདྷི. ཏདནུདྷམྨཏཱ སཏི སནྟིཊྛཏི, ཋིཏིབྷཱགིཡོ སམཱདྷི. ཨཝིཏཀྐསཧགཏཱ སཉྙཱམནསིཀཱརཱ སམུདཱཙརནྟི, ཝིསེསབྷཱགིཡོ སམཱདྷི. ནིབྦིདཱསཧགཏཱ སཉྙཱམནསིཀཱརཱ སམུདཱཙརནྟི ཝིརཱགཱུཔསཾཧིཏཱ, ནིབྦེདྷབྷཱགིཡོ སམཱདྷཱི’’ཏི (ཝིབྷ. ༧༩༩) ཨིམིནཱ ནཡེན སབྦསམཱཔཏྟིཡོ ཝིཏྠཱརེཏྭཱ ཧཱནབྷཱགིཡཱདིཨཏྠོ ཝེདིཏབྦོ. ཏཏྠ པཋམཛ྄ཛྷཱནསྶ ལཱབྷིནྟི ¶ ཡྭཱཡཾ ཨཔྤགུཎསྶ པཋམསྶ ཛྷཱནསྶ ལཱབྷཱི, ཏཾ. ཀཱམསཧགཏཱ སཉྙཱམནསིཀཱརཱ སམུདཱཙརནྟཱིཏི ཏཏོ ཝུཊྛིཏཾ ཨཱརམྨཎཝསེན ཀཱམསཧགཏཱ ཧུཏྭཱ སཉྙཱམནསིཀཱརཱ སམུདཱཙརནྟི ཏུདནྟི, ཏསྶ ཀཱམཱནཏཱིཏསྶ ཀཱམཱནུཔཀྑནྡཱནཾ སཉྙཱམནསིཀཱརཱནཾ ཝསེན སོ པཋམཛ྄ཛྷཱནསམཱདྷི ཧཱཡཏི པརིཧཱཡཏི, ཏསྨཱ ཧཱནབྷཱགིཡོ ཝུཏྟོ. ཏདནུདྷམྨཏཱཏི ཏདནུརཱུཔསབྷཱཝོ. སཏི སནྟིཊྛཏཱིཏི ཨིདཾ མིཙྪཱསཏིཾ སནྡྷཱཡ ཝུཏྟཾ. ཡསྶ ཧི པཋམཛ྄ཛྷཱནཱནུརཱུཔསབྷཱཝཱ པཋམཛ྄ཛྷཱནཾ སནྟཏོ པཎཱིཏཏོ དིསྭཱ ཨསྶཱདཡམཱནཱ ཨབྷིནནྡམཱནཱ ནིཀནྟི ཧོཏི, ཏསྶ ནིཀནྟིཝསེན སོ པཋམཛ྄ཛྷཱནསམཱདྷི ནེཝ ཧཱཡཏི ན ཝཌྜྷཏི, ཋིཏིཀོཊྛཱསིཀོ ཧོཏི. ཏེན ཝུཏྟཾ ¶ ‘‘ཋིཏིབྷཱགིཡོ སམཱདྷཱི’’ཏི. ཨཝིཏཀྐསཧགཏཱཏི ཨཝིཏཀྐཾ དུཏིཡཛ྄ཛྷཱནཾ སནྟཏོ པཎཱིཏཏོ མནསིཀརོཏོ ཨཱརམྨཎཝསེན ཨཝིཏཀྐསཧགཏཱ. སཉྙཱམནསིཀཱརཱ སམུདཱཙརནྟཱིཏི པགུཎཔཋམཛ྄ཛྷཱནཏོ ཝུཊྛིཏཾ དུཏིཡཛ྄ཛྷཱནཱདྷིགམཏྠཱཡ ཙོདེནྟི ཏུདནྟི. ཏསྶ ཨུཔརི དུཏིཡཛ྄ཛྷཱནཱནུཔཀྑནྡཱནཾ སཉྙཱམནསིཀཱརཱནཾ ཝསེན སོ པཋམཛ྄ཛྷཱནསམཱདྷི ཝིསེསབྷཱུཏསྶ དུཏིཡཛ྄ཛྷཱནསྶ ཨུཔྤཏྟིཔདཊྛཱནཏཱཡ ‘‘ཝིསེསབྷཱགིཡོ’’ཏི ཝུཏྟོ.

ནིབྦིདཱསཧགཏཱཏི ཏམེཝ པཋམཛ྄ཛྷཱནལཱབྷིཾ ཛྷཱནཏོ ཝུཊྛིཏཾ ནིབྦིདཱསངྑཱཏེན ཝིཔསྶནཱཉཱཎེན སཧགཏཱ. ཝིཔསྶནཱཉཱཎཉྷི ཛྷཱནངྒེསུ པབྷེདེན ཨུཔཊྛཧནྟེསུ ནིབྦིནྡཏི ཨུཀྐཎྛཏི, ཏསྨཱ ‘‘ནིབྦིདཱ’’ཏི ཝུཙྩཏི. སམུདཱཙརནྟཱིཏི ནིབྦཱནསཙྪིཀིརིཡཏྠཱཡ ཙོདེནྟི ཏུདནྟི. ཝིརཱགཱུཔསཾཧིཏཱཏི ཝིརཱགསངྑཱཏེན ནིབྦཱནེན ཨུཔསཾཧིཏཱ. ཝིཔསྶནཱཉཱཎཉྷི སཀྐཱ ཨིམིནཱ མགྒེན ཝིརཱགཾ ནིབྦཱནཾ སཙྪིཀཱཏུནྟི པཝཏྟིཏོ ‘‘ཝིརཱགཱུཔསཾཧིཏ’’ནྟི ཝུཙྩཏི. ཏཾསམྤཡུཏྟཱ སཉྙཱམནསིཀཱརཱ ཝིརཱགཱུཔསཾཧིཏཱ ཨེཝ ནཱམ. ཏསྶ ཏེསཾ སཉྙཱམནསིཀཱརཱནཾ ཝསེན པཋམཛ྄ཛྷཱནསམཱདྷི ཨརིཡམགྒཔྤཊིཝེདྷསྶ པདཊྛཱནཏཱཡ ‘‘ནིབྦེདྷབྷཱགིཡོ’’ཏི ཝུཏྟོ. ཧཱནཾ བྷཛནྟཱིཏི ཧཱནབྷཱགིཡཱ, ཧཱནབྷཱགོ ཝཱ ཨེཏེསཾ ཨཏྠཱིཏི ཧཱནབྷཱགིཡཱ, པརིཧཱནཀོཊྛཱསིཀཱཏི ཨཏྠོ. ཨིམིནཱ ནཡེན ཋིཏིབྷཱགིཡོ ཝེདིཏབྦོ. ཨཊྛམཱདཱིནི ཨུཏྟཱནཏྠཱནེཝ.

སཀྑིབྷབྦསུཏྟཱདིཝཎྞནཱ ནིཊྛིཏཱ.

༧༥-༧༧. ཨཊྛམསྶ ¶ པཋམཱདཱིསུ ནཏྠི ཝཏྟབྦཾ. ཏཏིཡེ ཏིཝིདྷཾ ཀུཧནཝཏྠུནྟི པཙྩཡཔྤཊིསེཝནསཱམནྟཛཔྤནཨིརིཡཱཔཐཔྤཝཏྟནསངྑཱཏཾ ཏིཝིདྷཾ ཀུཧནཝཏྠུཾ. ཨུཀྑིཔིཏྭཱཏི ‘‘མཧཱཀུཊུམྦིཀོ མཧཱནཱཝིཀོ མཧཱདཱནཔཏཱི’’ཏིཨཱདིནཱ པགྒཎྷིཏྭཱ ལཔནཾ. ཨཝཀྑིཔིཏྭཱཏི ‘‘ཀིཾ ཨིམསྶ ཛཱིཝིཏཾ, བཱིཛབྷོཛནོ ནཱམཱཡ’’ནྟི ཧཱིལེ༹ཏྭཱ ལཔནཾ.

༧༨. ཙཏུཏྠེ ¶ ཡཐཱཝུཏྟདྷམྨཱདཱིསུ ཏསྶ ཀིལེསནིམིཏྟཾ དུཀྑཾ ཨནཝསྶནནྟི ‘‘སུཁསོམནསྶབཧུལོ ཝིཧརཏཱི’’ཏི ཝུཏྟཾ. ཀཱཡིཀསུཁཉྩེཝ ཙེཏསིཀསོམནསྶཉྩ བཧུལཾ ཨསྶཱཏི སུཁསོམནསྶབཧུལོ. ཡཝཏི ཏེན ཕལཾ མིསྶིཏཾ ཝིཡ ཧོཏཱིཏི ཡོནི, ཨེཀནྟིཀཾ ཀཱརཎཾ. ཨསྶཱཏི ཡཐཱཝུཏྟསྶ བྷིཀྑུནོ. པརིཔུཎྞནྟི ཨཝིཀལཾ ཨནཝསེསཾ.

༧༩. པཉྩམེ ཨཱགཙྪནྟི ཨེཏེན ཀུསལཱ ཝཱ ཨཀུསལཱ ཝཱཏི ཨཱགམནཾ, ཀུསལཱཀུསལཱནཾ ཨུཔྤཏྟིཀཱརཎཾ. ཏཏྠ ཀུསལོཏི ཨཱགམནཀུསལོ. ཨེཝཾ དྷམྨེ མནསིཀརོཏོ ཀུསལཱ ཝཱ ཨཀུསལཱ ཝཱ དྷམྨཱ ཨབྷིཝཌྜྷནྟཱིཏི ཨེཝཾ ཛཱནནྟོ. ཨཔགཙྪནྟི ཀུསལཱ ཝཱ ཨཀུསལཱ ཝཱ ཨེཏེནཱཏི ཨཔགམནཾ. ཏེསཾ ཨེཝ ཨནུཔྤཏྟིཀཱརཎཾ, ཏཏྠ ཀུསལོཏི ཨཔགམནཀུསལོ. ཨེཝཾ དྷམྨེ མནསིཀརོཏོ ཀུསལཱ ཝཱ ཨཀུསལཱ ཝཱ དྷམྨཱ ནཱབྷིཝཌྜྷནྟཱིཏི ཨེཝཾ ¶ ཛཱནནྟོ. ཨུཔཱཡཀུསལོཏི ཋཱནུཔྤཏྟིཀཔཉྙཱསམནྣཱགཏོ. ཨིདཉྩ ཨཙྩཱཡིཀཀིཙྩེ ཝཱ བྷཡེ ཝཱ ཨུཔྤནྣེ ཏསྶ ཏིཀིཙྪནཏྠཾ ཋཱནུཔྤཏྟིཡཱ ཀཱརཎཛཱནནཝསེན ཝེདིཏབྦཾ.

༨༠-༨༡. ཚཊྛེ སམྤཏྟེཏི ཀིལེསེ སམྤཏྟེ. སཏྟམཾ ཨུཏྟཱནམེཝ.

༨༢-༨༤. ཨཊྛམེ ¶ ཀཱཡཔཱགབྦྷིཡཱདཱིཧཱིཏི ཨཱདི-སདྡེན ཝཙཱིཔཱགབྦྷིཡཾ མནོཔཱགབྦྷིཡཉྩ སངྒཎྷཱཏི. ནཝམཱདཱིནི ཨུཏྟཱནཏྠཱནེཝ.

དུཏིཡནིརཡསུཏྟཱདིཝཎྞནཱ ནིཊྛིཏཱ.

༨༥. ནཝམསྶ པཋམེ སཱིཏིབྷཱཝནྟི ནིབྦཱནཾ, ཀིལེསཝཱུཔསམཾ ཝཱ. ནིགྒཎྷཱཏཱིཏི ཨཙྩཱརདྡྷཝཱིརིཡཏཱདཱིཧི ཨུདྡྷཏཾ ཙིཏྟཾ ཨུདྡྷཙྩཔཀྑཏོ རཀྑཎཝསེན ནིགྒཎྷཱཏི. པགྒཎྷཱཏཱིཏི ཨཏིསིཐིལཝཱིརིཡཏཱདཱིཧི ལཱིནཾ ཙིཏྟཾ ཀོསཛྫཔཱཏཏོ རཀྑཎཝསེན པགྒཎྷཱཏི. སམྤཧཾསེཏཱིཏི སམཔྤཝཏྟཙིཏྟཾ ཏཐཱཔཝཏྟིཡཾ པཉྙཱཡ ཏོསེཏི ཨུཏྟེཛེཏི ཝཱ. ཡདཱ ཝཱ པཉྙཱཔཡོགམནྡཏཱཡ ¶ ཨུཔསམསུཁཱནདྷིགམེན ཝཱ ནིརསྶཱདཾ ཙིཏྟཾ བྷཱཝནཱཡ ན པཀྑནྡཏི, ཏདཱ ཛཱཏིཨཱདཱིནི སཾཝེགཝཏྠཱུནི པཙྩཝེཀྑིཏྭཱ སམྤཧཾསེཏི སམུཏྟེཛེཏི. ཨཛ྄ཛྷུཔེཀྑཏཱིཏི ཡདཱ པན ཙིཏྟཾ ཨལཱིནཾ ཨནུདྡྷཏཾ ཨནིརསྶཱདཾ ཨཱརམྨཎེ སམཔྤཝཏྟཾ སམྨདེཝ བྷཱཝནཱཝཱིཏིཾ ཨོཏིཎྞཾ ཧོཏི, ཏདཱ པགྒཧནིགྒཧསམྤཧཾསནེསུ ཀིཉྩི བྱཱཔཱརཾ ཨཀཏྭཱ སམཔྤཝཏྟེསུ ཨསྶེསུ སཱརཐཱི ཝིཡ ཨཛ྄ཛྷུཔེཀྑཏི, ཨུཔེཀྑཀོཝ ཧོཏི. པཎཱིཏཱདྷིམུཏྟིཀོཏི པཎཱིཏེ ཨུཏྟམེ མགྒཕལེ ཨདྷིམུཏྟོ ནིནྣཔོཎཔབྦྷཱརོ.

༨༦-༩༥. དུཏིཡེ ཨཙྪནྡིཀོཏི ཀཏྟུཀམྱཏཱཀུསལཙྪནྡརཧིཏོ. ཨུཏྟརཀུརུཀཱ མནུསྶཱ ཨཙྪནྡིཀཊྛཱནཾ པཝིཊྛཱ. དུཔྤཉྙོཏི བྷཝངྒཔཉྙཱཡ པརིཧཱིནོ ¶ . བྷཝངྒཔཉྙཱཡ པན པརིཔུཎྞཱཡཔི ཡསྶ བྷཝངྒཾ ལོཀུཏྟརསྶ པཙྩཡོ ན ཧོཏི, སོཔི དུཔྤཉྙོ ཨེཝ ནཱམ. ཨབྷབྦོ ནིཡཱམཾ ཨོཀྐམིཏུཾ ཀུསལེསུ དྷམྨེསུ སམྨཏྟནྟི ཀུསལེསུ དྷམྨེསུ སམྨཏྟནིཡཱམསངྑཱཏཾ ཨརིཡམགྒཾ ཨོཀྐམིཏུཾ ཨདྷིགནྟུཾ ཨབྷབྦོ. ན ཀམྨཱཝརཎཏཱཡཱཏིཨཱདཱིསུ ཨབྷབྦཝིཔརིཡཱཡེན ཨཏྠོ ཝེདིཏབྦོ. ཙཏུཏྠཱདཱིནི ཨུཏྟཱནཏྠཱནི.

༩༦-༡༠༦. དསམསྶ པཋམཱདཱིསུ ནཏྠི ཝཏྟབྦཾ. ཨཊྛམེ མེཏྟཱ ཨེཏསྶ ཨཏྠཱིཏི མེཏྟཱཝཱ, ཏསྶ བྷཱཝོ མེཏྟཱཝཏཱ, མེཏྟཱཔཊིཔཏྟི, ཏཱཡ. སཱ པན མེཏྟཱཝཏཱ མེཏྟཱཝསེན པཱརིཙརིཡཱཏི ¶ ཨཱཧ ‘‘མེཏྟཱཡུཏྟཱཡ པཱརིཙརིཡཱཡཱ’’ཏི. པརིཙརནྟི ཝིཔྤཀཏབྲཧྨཙརིཡཏྟཱ. པརིཙིཎྞསཏྠུཀེན སཱཝཀེན ནཱམ སཏྠུནོ ཡཱཝ དྷམྨེན ཀཱཏབྦཱ པཱརིཙརིཡཱ, ཏཱཡ སམྨདེཝ སམྤཱདིཏཏྟཱ. ནཝམཱདཱིནི ཨུཏྟཱནཏྠཱནི.

པཱཏུབྷཱཝསུཏྟཱདིཝཎྞནཱ ནིཊྛིཏཱ.

༡༠༧-༡༡༦. ཨེཀཱདསམཝགྒོ ཨུཏྟཱནཏྠོཡེཝ.

ཨིཏི མནོརཐཔཱུརཎིཡཱ ཨངྒུཏྟརནིཀཱཡ-ཨཊྛཀཐཱཡ

ཚཀྐནིཔཱཏཝཎྞནཱཡ ཨནུཏྟཱནཏྠདཱིཔནཱ སམཏྟཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ.

༡-༡༠. སཏྟཀནིཔཱཏསྶ ¶ པཋམོ ཝགྒོ ཨུཏྟཱནཏྠོ.

༡༤. དུཏིཡསྶ ¶ ཙཏུཏྠེ ཨུབྷཏོ ཨུབྷཡཐཱ, ཨུབྷཏོ ཨུབྷོཧི བྷཱགེཧི ཝིམུཏྟོཏི ཨུབྷཏོབྷཱགཝིམུཏྟོ ཨེཀདེསསརཱུཔེཀསེསནཡེན. དྭཱིཧི བྷཱགེཧཱིཏི ཀརཎེ ནིསྶཀྐེ ཙེཏཾ བཧུཝཙནཾ ¶ . ཨཱཝུཏྟིཨཱདིཝསེན ཨཡཾ ནིཡམོ ཝེདིཏབྦོཏི ཨཱཧ ‘‘ཨརཱུཔསམཱཔཏྟིཡཱ’’ཏིཨཱདི. ཨེཏེན ‘‘སམཱཔཏྟིཡཱ ཝིཀྑམྦྷནཝིམོཀྑེན, མགྒེན སམུཙྪེདཝིམོཀྑེན ཝིམུཏྟཏྟཱ ཨུབྷཏོབྷཱགཝིམུཏྟོ’’ཏི ཨེཝཾ པཝཏྟོ ཏིཔིཊཀཙཱུལ༹ནཱགཏྠེརཝཱདོ, ‘‘ནཱམཀཱཡཏོ རཱུཔཀཱཡཏོ ཙ ཝིམུཏྟཏྟཱ ཨུབྷཏོབྷཱགཝིམུཏྟོ’’ཏི ཨེཝཾ པཝཏྟོ ཏིཔིཊཀམཧཱརཀྑིཏཏྠེརཝཱདོ, ‘‘སམཱཔཏྟིཡཱ ཝིཀྑམྦྷནཝིམོཀྑེན ཨེཀཝཱརཾ, མགྒེན སམུཙྪེདཝིམོཀྑེན ཨེཀཝཱརཾ ཝིམུཏྟཏྟཱ ཨུབྷཏོབྷཱགཝིམུཏྟོ’’ཏི ཨེཝཾ པཝཏྟོ ཏིཔིཊཀཙཱུལཱ༹བྷཡཏྠེརཝཱདོ ཙཱཏི ཨིམེསཾ ཏིཎྞམྤི ཐེརཝཱདཱནཾ ཨེཀཛ྄ཛྷཾ སངྒཧོ ཀཏོཏི དཊྛབྦཾ. ཨེཏྠ ཙ པཋམཝཱདེ དྭཱིཧི བྷཱགེཧི ཝིམུཏྟོ ཨུབྷཏོབྷཱགཝིམུཏྟོ ཝུཏྟོ, དུཏིཡཝཱདེ ཨུབྷཏོ བྷཱགཏོ ཝིམུཏྟོཏི ཨུབྷཏོབྷཱགཝིམུཏྟོ, ཏཏིཡཝཱདེ དྭཱིཧི བྷཱགེཧི དྭེ ཝཱརེ ཝིམུཏྟོཏི ཨཡམེཏེསཾ ཝིསེསོཏི. ཝིམུཏྟོཏི ཀིལེསེཧི ཝིམུཏྟོ, ཀིལེསཝིཀྑམྦྷནསམུཙྪེདནེཧི ཝཱ ཀཱཡཏོ ཝིམུཏྟོཧི ཨཏྠོ.

སོཏི ཨུབྷཏོབྷཱགཝིམུཏྟོ. ཀཱམཉྩེཏྠ རཱུཔཱཝཙརཙཏུཏྠཛ྄ཛྷཱནམྤི ཨརཱུཔཱཝཙརཛ྄ཛྷཱནཾ ཝིཡ དུཝངྒིཀཾ ཨཱནེཉྫཔྤཏྟནྟི ཝུཙྩཏི. ཏཾ པན པདཊྛཱནཾ ཀཏྭཱ ཨརཧཏྟཾ པཏྟོ ཨུབྷཏོབྷཱགཝིམུཏྟོ ནཱམ ན ཧོཏི རཱུཔཀཱཡཏོ ¶ ཨཝིམུཏྟཏྟཱ. ཏཉྷི ཀིལེསཀཱཡཏོཝ ཝིམུཏྟཾ, ན རཱུཔཀཱཡཏོ, ཏསྨཱ ཏཏོ ཝུཊྛཱཡ ཨརཧཏྟཾ པཏྟོ ཨུབྷཏོབྷཱགཝིམུཏྟོ ན ཧོཏཱིཏི ཨཱཧ ‘‘ཙཏུནྣཾ ཨརཱུཔ…པེ… པཉྩཝིདྷོ ཧོཏཱི’’ཏི. ཨརཱུཔསམཱཔཏྟཱིནནྟི ནིདྡྷཱརཎེ སཱམིཝཙནཾ. ཨརཧཏྟཾ པཏྟཨནཱགཱམིནོཏི བྷཱུཏཔུབྦགཏིཡཱ ཝུཏྟཾ. ན ཧི ཨརཧཏྟཾ པཏྟོ ཨནཱགཱམཱི ནཱམ ཧོཏི. ‘‘རཱུཔཱི རཱུཔཱནི པསྶཏཱི’’ཏིཨཱདིཀེ ནིརོདྷསམཱཔཏྟིཨནྟེ ཨཊྛ ཝིམོཀྑེ ཝཏྭཱ –

‘‘ཡཏོ ཙ ཁོ, ཨཱནནྡ, བྷིཀྑུ ཨིམེ ཨཊྛ ཝིམོཀྑེ ཀཱཡེན ཕུསིཏྭཱ ཝིཧརཏི, པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟི. ཨཡཾ ཝུཙྩཏི, ཨཱནནྡ, བྷིཀྑུ ཨུབྷཏོབྷཱགཝིམུཏྟོ’’ཏི –

ཡདིཔི མཧཱནིདཱནེ (དཱི. ནི. ༢.༡༣༠) ཝུཏྟཾ, ཏཾ པན ཨུབྷཏོབྷཱགཝིམུཏྟསེཊྛཝསེན ཝུཏྟནྟི, ཨིདྷ པན སབྦཨུབྷཏོབྷཱགཝིམུཏྟེ སངྒཧཎཏྠཾ ‘‘པཉྩཝིདྷོ ཧོཏཱི’’ཏི ཝཏྭཱ ‘‘པཱལི༹ པནེཏྠ…པེ… ཨཊྛཝིམོཀྑལཱབྷིནོ ཝསེན ཨཱགཏཱ’’ཏི ཨཱཧ. མཛ྄ཛྷིམནིཀཱཡེ པན ཀཱིཊཱགིརིསུཏྟེ (མ. ནི. ༢.༡༨༢) –

‘‘ཀཏམོ ཙ, བྷིཀྑཝེ, པུགྒལོ ཨུབྷཏོབྷཱགཝིམུཏྟོ? ཨིདྷ, བྷིཀྑཝེ, ཨེཀཙྩོ པུགྒལོ ཡེ ཏེ སནྟཱ ཝིམོཀྑཱ ཨཏིཀྐམྨ རཱུཔེ ཨཱརུཔྤཱ, ཏེ ཀཱཡེན ཕུསིཏྭཱ ཝིཧརཏི ¶ , པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟི. ཨཡཾ ཝུཙྩཏི, བྷིཀྑཝེ, པུགྒལོ ཨུབྷཏོབྷཱགཝིམུཏྟོ’’ཏི –

ཨརཱུཔསམཱཔཏྟིཝསེན ཙཏྟཱརོ ཨུབྷཏོབྷཱགཝིམུཏྟཱ, སེཊྛོ ཙ ཝུཏྟོ ཝུཏྟལཀྑཎཱུཔཔཏྟིཏོ. ཡཐཱཝུཏྟེསུ ཧི པཉྩསུ པུརིམཱ ཙཏྟཱརོ སམཱཔཏྟིསཱིསཾ ནིརོདྷཾ ན སམཱཔཛྫནྟཱིཏི པརིཡཱཡེན ཨུབྷཏོབྷཱགཝིམུཏྟཱ ནཱམ. ཨཊྛསམཱཔཏྟིལཱབྷཱི ཨནཱགཱམཱི ཏཾ སམཱཔཛྫིཏྭཱ ཏཏོ ཝུཊྛཱཡ ཝིཔསྶནཾ ཝཌྜྷེཏྭཱ ཨརཧཏྟཾ པཏྟོཏི ནིཔྤརིཡཱཡེན ཨུབྷཏོབྷཱགཝིམུཏྟསེཊྛོ ནཱམ.

ཀཏམོ ཙ པུགྒལོཏིཨཱདི པུགྒལཔཉྙཏྟིཔཱལི༹. ཏཏྠ ཀཏམོཏི པུཙྪཱཝཙནཾ. པུགྒལོཏི ཨསཱདྷཱརཎཏོ པུཙྪིཏབྦཝཙནཾ. ཨིདྷཱཏི ཨིདྷསྨིཾ སཱསནེ. ཨེཀཙྩོཏི ཨེཀོ. ཨཊྛ ཝིམོཀྑེ ཀཱཡེན ཕུསིཏྭཱ ཝིཧརཏཱིཏི ¶ ཨཊྛ སམཱཔཏྟིཡོ སམཱཔཛྫིཏྭཱ ནཱམཀཱཡཏོ པཊིལབྷིཏྭཱ ཝིཧརཏི. པཉྙཱཡ ཙསྶ དིསྭཱ ཨཱསཝཱ པརིཀྑཱིཎཱ ཧོནྟཱིཏི ཝིཔསྶནཱཔཉྙཱཡ སངྑཱརགཏཾ, མགྒཔཉྙཱཡ ཙཏྟཱརི སཙྩཱནི པསྶིཏྭཱ ཙཏྟཱརོཔི ཨཱསཝཱ པརིཀྑཱིཎཱ ཧོནྟི. དིསྭཱཏི དསྶནཧེཏུ. ན ཧི ཨཱསཝེ པཉྙཱཡ པསྶནྟི, དསྶནཀཱརཎཱ པན པརིཀྑཱིཎཱ དིསྭཱ པརིཀྑཱིཎཱཏི ཝུཏྟཱ དསྶནཱཡཏྟཔརིཀྑཡཏྟཱ. ཨེཝཉྷི དསྶནཾ ཨཱསཝཱནཾ ཁཡསྶ པུརིམཀིརིཡཱབྷཱཝེན ཝུཏྟཾ.

པཉྙཱཝིམུཏྟོཏི ཝིསེསཏོ པཉྙཱཡ ཨེཝ ཝིམུཏྟོ, ན ཏསྶ ཨདྷིཊྛཱནབྷཱུཏེན ཨཊྛཝིམོཀྑསངྑཱཏེན སཱཏིསཡེན སམཱདྷིནཱཏི པཉྙཱཝིམུཏྟོ. ཡོ ཨརིཡོ ཨནདྷིགཏཨཊྛཝིམོཀྑོ སབྦསོ ཨཱསཝེཧི ཝིམུཏྟོ, ཏསྶེཏཾ ཨདྷིཝཙནཾ. ཨདྷིགཏེཔི ཧི རཱུཔཛ྄ཛྷཱནཝིམོཀྑེ ན སོ སཱཏིསཡསམཱདྷིནིསྶིཏོཏི ན ཏསྶ ཝསེན ཨུབྷཏོབྷཱགཝིམུཏྟཏཱ ཧོཏཱིཏི ཝུཏྟོཝཱཡམཏྠོ. ཨརཱུཔཛ྄ཛྷཱནེསུ པན ཨེཀསྨིམྤི སཏི ཨུབྷཏོབྷཱགཝིམུཏྟོཡེཝ ནཱམ ཧོཏི. ཏེན ཧི ཨཊྛཝིམོཀྑེཀདེསེན ཏཾནཱམདཱནསམཏྠེན ཨཊྛཝིམོཀྑལཱབྷཱིཏྭེཝ ཝུཙྩཏི. སམུདཱཡེ ཧི པཝཏྟོ ཝོཧཱརོ ཨཝཡཝེཔི དིསྶཏི ཡཐཱ ཏཾ ‘‘སཏྟིསཡོ’’ཏི ཨནཝསེསཏོ ཨཱསཝཱནཾ པརིཀྑཱིཎཏྟཱ. ཨཊྛཝིམོཀྑཔཊིཀྑེཔཝསེནེཝ ན ཨེཀདེསབྷཱུཏརཱུཔཛ྄ཛྷཱནཔྤཊིཀྑེཔཝསེན. ཨེཝཉྷི ཨརཱུཔཛ྄ཛྷཱནེཀདེསཱབྷཱཝེཔི ཨཊྛཝིམོཀྑཔཊིཀྑེཔོ ན ཧོཏཱིཏི སིདྡྷཾ ཧོཏི. ཨརཱུཔཱཝཙརཛ྄ཛྷཱནེསུ ཧི ཨེཀསྨིམྤི སཏི ཨུབྷཏོབྷཱགཝིམུཏྟོཡེཝ ནཱམ ཧོཏི.

ཕུཊྛནྟཾ སཙྪིཀཏོཏི ཕུཊྛཱནཾ ཨནྟོ ཕུཊྛནྟོ, ཕུཊྛཱནཾ ཨརཱུཔཛ྄ཛྷཱནཱནཾ ཨནནྟརོ ཀཱལོཏི ཨདྷིཔྤཱཡོ. ཨཙྩནྟསཾཡོགེ ཙེཏཾ ཨུཔཡོགཝཙནཾ. ཏཾ ཕུཊྛཱནནྟརཀཱལམེཝ སཙྪིཀཱཏབྦཾ སཙྪིཀཏོ ¶ སཙྪིཀརཎཱུཔཱཡེནཱཏི ཝུཏྟཾ ཧོཏི, བྷཱཝནཔུཾསཀཾ ཝཱ ཨེཏཾ ‘‘ཨེཀམནྟཾ ནིསཱིདཱི’’ཏིཨཱདཱིསུ ཝིཡ. ཡོ ཧི ཨརཱུཔཛ྄ཛྷཱནེན རཱུཔཀཱཡཏོ ནཱམཀཱཡེཀདེསཏོ ཙ ཝིཀྑམྦྷནཝིམོཀྑེན ཝིམུཏྟོ, ཏེན ནིརོདྷསངྑཱཏོ ཝིམོཀྑོ ཨཱལོཙིཏོ པཀཱསིཏོ ཝིཡ ཧོཏི, ན པན ཀཱཡེན སཙྪིཀཏོ. ནིརོདྷཾ པན ཨཱརམྨཎཾ ཀཏྭཱ ཨེཀཙྩེསུ ཨཱསཝེསུ ཁེཔིཏེསུ ཏེན སོ སཙྪིཀཏོ ཧོཏི, ཏསྨཱ སོ སཙྪིཀཱཏབྦཾ ནིརོདྷཾ ཡཐཱཨཱལོཙིཏཾ ནཱམཀཱཡེན སཙྪི ཀརོཏཱིཏི ‘‘ཀཱཡསཀྑཱི’’ཏི ཝུཙྩཏི, ན ¶ ཏུ ‘‘ཝིམུཏྟོ’’ཏི ཨེཀཙྩཱནཾ ཨཱསཝཱནཾ ཨཔརིཀྑཱིཎཏྟཱ. ཏེནཱཧ ‘‘ཛྷཱནཕསྶཾ པཋམཾ ཕུསཏི, པཙྪཱ ནིརོདྷཾ ནིབྦཱནཾ སཙྪིཀརོཏཱི’’ཏི. ཨཡཾ ཙཏུནྣཾ ཨརཱུཔསམཱཔཏྟཱིནཾ ཨེཀེཀཏོ ཝུཊྛཱཡ སངྑཱརེ སམྨསིཏྭཱ ཀཱཡསཀྑིབྷཱཝཾ པཏྟཱནཾ ཙཏུནྣཾ, ནིརོདྷཱ ཝུཊྛཱཡ ཨགྒམགྒཔྤཏྟཨནཱགཱམིནོ ཙ ཝསེན ཨུབྷཏོབྷཱགཝིམུཏྟོ ཝིཡ པཉྩཝིདྷོ ནཱམ ཧོཏཱིཏི ཝུཏྟཾ ཨབྷིདྷམྨཊཱིཀཱཡཾ (པུ. པ. མཱུལཊཱི. ༢༤) ‘‘ཀཱཡསཀྑིམྷིཔི ཨེསེཝ ནཡོ’’ཏི. ཨེཀཙྩེ ཨཱསཝཱཏི ཧེཊྛིམམགྒཝཛ྄ཛྷཱ ཨཱསཝཱ.

དིཊྛནྟཾ པཏྟོཏི དསྶནསངྑཱཏསྶ སོཏཱཔཏྟིམགྒཉཱཎསྶ ཨནནྟརཾ པཏྟོཏི ཝུཏྟཾ ཧོཏི. ‘‘དིཊྛཏྟཱ པཏྟོ’’ཏིཔི པཱཋོ. ཨེཏེན ཙཏུསཙྩདསྶནསངྑཱཏཱཡ དིཊྛིཡཱ ནིརོདྷསྶ པཏྟཏཾ དཱིཔེཏི. ཏེནཱཧ ‘‘དུཀྑཱ སངྑཱརཱ’’ཏིཨཱདི. ཏཏྠ པཉྙཱཡཱཏི མགྒཔཉྙཱཡ. པཋམཕལཊྛཏོ པཊྛཱཡ ཡཱཝ ཨགྒམགྒཊྛཱ དིཊྛིཔྤཏྟོ. ཏེནཱཧ ‘‘སོཔི ཀཱཡསཀྑཱི ཝིཡ ཚབྦིདྷོ ཧོཏཱི’’ཏི. ཡཐཱ པན པཉྙཱཝིམུཏྟོ, ཨེཝཾ ཨཡམྤི སུཀྑཝིཔསྶཀོ ཙཏཱུཧི ཨརཱུཔཛ྄ཛྷཱནེཧི ཝུཊྛཱཡ དིཊྛིཔྤཏྟབྷཱཝཔྤཏྟཱ ཙཏྟཱརོ ཙཱཏི པཉྩཝིདྷོ ཧོཏཱིཏི ཝེདིཏབྦོ. སདྡྷཱཝིམུཏྟེཔི ཨེསེཝ ནཡོ. ཨིདཾ དུཀྑནྟི ཨེཏྟཀཾ དུཀྑཾ, ན ཨིཏོ ཨུདྡྷཾ དུཀྑནྟི. ཡཐཱབྷཱུཏཾ པཛཱནཱཏཱིཏི ཋཔེཏྭཱ ཏཎྷཾ ཨུཔཱདཱནཀྑནྡྷཔཉྩཀཾ དུཀྑསཙྩནྟི ཡཱཐཱཝཏོ པཛཱནཱཏི. ཡསྨཱ པན ཏཎྷཱ དུཀྑཾ ཛནེཏི ནིབྦཏྟེཏི, ཏཏོ ཏཾ དུཀྑཾ སམུདེཏི, ཏསྨཱ ནཾ ‘‘ཨཡཾ དུཀྑསམུདཡོ’’ཏི ཡཐཱབྷཱུཏཾ པཛཱནཱཏི. ཡསྨཱ པན ཨིདཾ དུཀྑཉྩ སམུདཡོ ཙ ནིབྦཱནཾ པཏྭཱ ནིརུཛ྄ཛྷཏི, ཨཔྤཝཏྟིཾ གཙྪཏི, ཏསྨཱ ན ‘‘ཨཡཾ དུཀྑནིརོདྷོ’’ཏི ཡཐཱབྷཱུཏཾ པཛཱནཱཏི. ཨརིཡོ པན ཨཊྛངྒིཀོ མགྒོ ཏཾ དུཀྑནིརོདྷཾ གཙྪཏི, ཏེན ཏཾ ‘‘ཨཡཾ དུཀྑནིརོདྷགཱམིནཱི པཊིཔདཱ’’ཏི ཡཐཱབྷཱུཏཾ པཛཱནཱཏི. ཨེཏྟཱཝཏཱ ནཱནཱཀྑཎེ སཙྩཝཝཏྠཱནཾ དསྶིཏཾ. ཨིདཱནི ཏཾ ཨེཀཀྑཎེ དསྶེཏུཾ ‘‘ཏཐཱགཏཔྤཝེདིཏཱ’’ཏིཨཱདི ཝུཏྟཾ. ཏཐཱགཏཔྤཝེདིཏཱཏི ཏཐཱགཏེན བོདྷིམཎྜེ པཊིཝིདྡྷཱ ཝིདིཏཱ པཱཀཊཱ ཀཏཱ. དྷམྨཱཏི ཙཏུསཙྩདྷམྨཱ. ཝོདིཊྛཱ ཧོནྟཱིཏི སུདིཊྛཱ. ཝོཙརིཏཱཏི སུཙརིཏཱ, པཉྙཱཡ སུཊྛུ ཙརཱཔིཏཱཏི ཨཏྠོ. ཨཡནྟི ཨཡཾ ཨེཝརཱུཔོ པུགྒལོ དིཊྛིཔྤཏྟོཏི.

སདྡྷཱཡ ཝིམུཏྟོཏི སདྡཧནཝསེན ཝིམུཏྟོ. ཨེཏེན སབྦཐཱ ཨཝིམུཏྟསྶཔི སདྡྷཱམཏྟེན ཝིམུཏྟབྷཱཝཾ ¶ དསྶེཏི. སདྡྷཱཝིམུཏྟོཏི ཝཱ སདྡྷཱཡ ཨདྷིམུཏྟོཏི ¶ ཨཏྠོ. ཀིཾ པན ནེསཾ ཀིལེསཔྤཧཱནེ ནཱནཏྟཾ ཨཏྠཱིཏི? ནཏྠི. ཨཐ ཀསྨཱ སདྡྷཱཝིམུཏྟོ དིཊྛིཔྤཏྟཾ ན པཱཔུཎཱཏཱིཏི? ཨཱགམནཱིཡནཱནཏྟེན. དིཊྛིཔྤཏྟོ ཧི ཨཱགམནམྷི ཀིལེསེ ཝིཀྑམྦྷེནྟོ ཨཔྤདུཀྑེན ཨཀསིརེན ཨཀིལམནྟོཝ སཀྐོཏི ཝིཀྑམྦྷིཏུཾ, སདྡྷཱཝིམུཏྟོ པན དུཀྑེན ཀསིརེན ཀིལམནྟོ སཀྐོཏི ཝིཀྑམྦྷིཏུཾ, ཏསྨཱ སདྡྷཱཝིམུཏྟོ དིཊྛིཔྤཏྟཾ ན པཱཔུཎཱཏི. ཏེནཱཧ ‘‘ཨེཏསྶ ཧཱི’’ཏིཨཱདི. སདྡཧནྟསྶཱཏི ‘‘ཨེཀཾསཏོ ཨཡཾ པཊིཔདཱ ཀིལེསཀྑཡཾ ཨཱཝཧཏི སམྨཱསམྦུདྡྷེན བྷཱསིཏཏྟཱ’’ཏི ཨེཝཾ སདྡཧནྟསྶ. ཡསྨཱ པནསྶ ཨནིཙྩཱནུཔསྶནཱདཱིཧི ནིཙྩསཉྙཱཔཧཱནཝསེན བྷཱཝནཱཡ པུབྦེནཱཔརཾ ཝིསེསཾ པསྶཏོ ཏཏྠ ཏཏྠ པཙྩཀྑཏཱཔི ཨཏྠི, ཏསྨཱ ཝུཏྟཾ ‘‘སདྡཧནྟསྶ ཝིཡཱ’’ཏི. སེསཔདདྭཡཾ ཏསྶེཝ ཝེཝཙནཾ. ཨེཏྠ ཙ པུབྦབྷཱགམགྒབྷཱཝནཱཏི ཝཙནེན ཨཱགམནཱིཡནཱནཏྟེན དིཊྛིཔྤཏྟསདྡྷཱཝིམུཏྟཱནཾ པཉྙཱནཱནཏྟཾ ཧོཏཱིཏི དསྶིཏཾ. ཨབྷིདྷམྨཊྛཀཐཱཡམྤི (པུ. པ. ཨཊྛ. ༢༨) ‘‘ནེསཾ ཀིལེསཔྤཧཱནེ ནཱནཏྟཾ ནཏྠི, པཉྙཱཡ ནཱནཏྟཾ ཨཏྠིཡེཝཱ’’ཏི ཝཏྭཱ ‘‘ཨཱགམནཱིཡནཱནཏྟེནེཝ སདྡྷཱཝིམུཏྟོ དིཊྛིཔྤཏྟཾ ན པཱཔུཎཱཏཱིཏི སནྣིཊྛཱནཾ ཀཏ’’ནྟི ཝུཏྟཾ.

ཨཱརམྨཎཾ ཡཱཐཱཝཏོ དྷཱརེཏི ཨཝདྷཱརེཏཱིཏི དྷམྨོ, པཉྙཱ. ཏཾ པཉྙཱསངྑཱཏཾ དྷམྨཾ ཨདྷིམཏྟཏཱཡ པུབྦངྒམཾ ཧུཏྭཱ པཝཏྟཾ ཨནུསྶརཏཱིཏི དྷམྨཱནུསཱརཱི. ཏེནཱཧ ‘‘དྷམྨོ’’ཏིཨཱདི. པཉྙཱཔུབྦངྒམནྟི པཉྙཱཔདྷཱནཾ. ‘‘སདྡྷཾ ཨནུསྶརཏི, སདྡྷཱཔུབྦངྒམཾ མགྒཾ བྷཱཝེཏཱི’’ཏི ཨིམམཏྠཾ ཨེསེཝ ནཡོཏི ཨཏིདིསཏི. པཉྙཾ ཝཱཧེཏཱིཏི པཉྙཱཝཱཧཱི, པཉྙཾ སཱཏིསཡཾ པཝཏྟེཏཱིཏི ཨཏྠོ. ཏེནཱཧ ‘‘པཉྙཱཔུབྦངྒམཾ ཨརིཡམགྒཾ བྷཱཝེཏཱི’’ཏི. པཉྙཱ ཝཱ པུགྒལཾ ཝཱཧེཏི ནིབྦཱནཱབྷིམུཁཾ གམེཏཱིཏི པཉྙཱཝཱཧཱི. སདྡྷཱཝཱཧཱིཏི ཨེཏྠཱཔི ཨིམིནཱ ནཡེནེཝ ཨཏྠོ ཝེདིཏབྦོ. ཨུབྷཏོབྷཱགཝིམུཏྟཱདིཀཐཱཏི ཨུབྷཏོབྷཱགཝིམུཏྟཱདཱིསུ ཨཱགམནཏོ པཊྛཱཡ ཝཏྟབྦཀཐཱ. ཏསྨཱཏི ཝིསུདྡྷིམགྒེ (ཝིསུདྡྷི. ༢.༧༧༣, ༨༨༩) ཝུཏྟཏྟཱ. ཏཏོ ཨེཝ ཝིསུདྡྷིམགྒསཾཝཎྞནཱཡཾ (ཝིསུདྡྷི. མཧཱཊཱི. ༢.༧༧༣) ཝུཏྟནཡེནེཝ ཙེཏྠ ཨཏྠོ ཝེདིཏབྦོ.

༡༥. པཉྩམེ ¶ ཨེཀནྟཀཱལ༹ཀེཧཱིཏི ནཏྠིཀཝཱདཨཧེཏུཀཝཱདཨཀིརིཡཝཱདསངྑཱཏེཧི ནིཡཏམིཙྪཱདིཊྛིདྷམྨེཧི. ཏེནཱཧ ‘‘ནིཡཏམིཙྪཱདིཊྛིཾ སནྡྷཱཡ ཝུཏྟ’’ནྟི. ཨེཝཾ པུགྒལོཏི ཨིམིནཱ ཀཱརཎེན ¶ ཨེཀཝཱརཾ ནིམུགྒོ ནིམུགྒོཡེཝ སོ ཧོཏི. ཨེཏསྶ ཧི པུན བྷཝཏོ ཝུཊྛཱནཾ ནཱམ ནཏྠཱིཏི ཝདནྟི མཀྑལིགོསཱལཱདཡོ ཝིཡ. ཧེཊྛཱ ཧེཊྛཱ ནརཀགྒཱིནཾཡེཝ ཨཱཧཱརོ. སཱདྷུ སདྡྷཱ ཀུསལེསཱུཏི ཀུསལདྷམྨེསུ སདྡྷཱ ནཱམ སཱཧུ ལདྡྷཀཱཏི ཨུམྨུཛྫཏི, སོ ཏཱཝཏྟཀེནེཝ ཀུསལེན ཨུམྨུཛྫཏི ནཱམ. སཱདྷུ ཧིརཱིཏིཨཱདཱིསུཔི ཨེསེཝ ནཡོ. ཙངྐཝཱརེཏི རཛཀཱནཾ ཁཱརཔརིསྶཱཝནེ, སུརཱཔརིསྶཱཝནེ ཝཱ. ཨེཝཾ པུགྒལོཏི ‘‘ཨེཝཾ སཱདྷུ སདྡྷཱ’’ཏི ཨིམེསཾ སདྡྷཱདཱིནཾ ཝསེན ཨེཀཝཱརཾ ཨུམྨུཛྫིཏྭཱ ཏེསཾ པརིཧཱནིཡཱ པུན ནིམུཛྫཏིཡེཝ དེཝདཏྟཱདཡོ ཝིཡ. དེཝདཏྟོ ཧི ཨཊྛ སམཱཔཏྟིཡོ པཉྩ ཙ ཨབྷིཉྙཱཡོ ནིབྦཏྟེཏྭཱཔི པུན བུདྡྷཱནཾ པཊིཔཀྑཏཱཡ ཏེཧི གུཎེཧི པརིཧཱིནོ རུཧིརུཔྤཱདཀམྨཾ སངྒྷབྷེདཀམྨཉྩ ཀཏྭཱ ཀཱཡསྶ བྷེདཱ དུཏིཡཙིཏྟཝཱརེན ཙུཏིཙིཏྟམནནྟརཱ ནིརཡེ ནིབྦཏྟོ. ཀོཀཱལིཀོ དྭེ ཨགྒསཱཝཀེ ཨུཔཝདིཏྭཱ པདུམནིརཡེ ནིབྦཏྟོ.

ནེཝ ཧཱཡཏི ནོ ཝཌྜྷཏཱིཏི ཨཔྤཧོནཀཀཱལེཔི ན ཧཱཡཏི, པཧོནཀཀཱལེཔི ན ཝཌྜྷཏི. ཨུབྷཡམྤི པནེཏཾ ཨགཱརིཀེནཔི ཨནགཱརིཀེནཔི དཱིཔེཏབྦཾ. ཨེཀཙྩོ ཧི ཨགཱརིཀོ ཨཔྤཧོནཀཀཱལེ པཀྑིཀབྷཏྟཾ ཝསྶིཀཾ ཝཱ ཨུཔནིབནྡྷཱཔེསི, སོ པཙྪཱ པཧོནཀཀཱལེཔི པཀྑིཀབྷཏྟཱདིམཏྟམེཝ པཝཏྟེཏི. ཨནགཱརིཀོཔི ཨཱདིམྷི ཨཔྤཧོནཀཀཱལེ ཨུདྡེསཾ དྷུཏངྒཾ ཝཱ གཎྷཱཏི, མེདྷཱཝཱི བལཝཱིརིཡསམྤཏྟིཡཱ པཧོནཀཀཱལེ ཏཏོ ཨུཏྟརིཾ ན ཀརོཏི. ཨེཝཾ པུགྒལོཏི ཨེཝཾ ཨིམཱཡ སདྡྷཱདཱིནཾ ཋིཏིཡཱ པུགྒལོ ཨུམྨུཛྫིཏྭཱ ཋིཏོ ནཱམ ཧོཏི. ཨུམྨུཛྫིཏྭཱ པཏརཏཱིཏི སཀདཱགཱམིཔུགྒལོ ཀིལེསཏནུཏཱཡ ཨུཊྛཧིཏྭཱ གནྟབྦདིསཱབྷིམུཁོ ཏརཏི ནཱམ.

པཊིགཱདྷཔྤཏྟོ ཧོཏཱིཏི ཨནཱགཱམིཔུགྒལཾ སནྡྷཱཡ ཝདཏི. ཨིམེ པན སཏྟ པུགྒལཱ ཨུདཀོཔམེན དཱིཔིཏཱ. སཏྟ ཀིར ཛངྒྷཝཱཎིཛཱ ཨདྡྷཱནམགྒཔྤཊིཔནྣཱ ཨནྟརཱམགྒེ ཨེཀཾ པུཎྞནདིཾ པཱཔུཎིཾསུ. ཏེསུ པཋམཾ ཨོཏིཎྞོ ཨུདཀབྷཱིརུཀོ པུརིསོ ཨོཏིཎྞཊྛཱནེཡེཝ ནིམུཛྫིཏྭཱ པུན སཎྛཱཏུཾ ནཱསཀྑི, ཨཝསྶཾཝ མཙྪཀཙྪཔབྷཏྟཾ ཛཱཏོ. དུཏིཡོ ཨོཏིཎྞཊྛཱནེ ནིམུཛྫིཏྭཱ ¶ སཀིཾ ཨུཊྛཧིཏྭཱ པུན ནིམུགྒོ ཨུཊྛཱཏུཾ ནཱསཀྑི, ཨནྟོཡེཝ མཙྪཀཙྪཔབྷཏྟཾ ཛཱཏོ. ཏཏིཡོ ནིམུཛྫིཏྭཱ ཨུཊྛིཏོ མཛ྄ཛྷེ ནདིཡཱ ཋཏྭཱ ནེཝ ཨོརཏོ ཨཱགནྟུཾ, ན པཱརཾ གནྟུཾ ཨསཀྑི. ཙཏུཏྠོ ཨུཊྛཱཡ ཋིཏོ ཨུཏྟརཎཏིཏྠཾ ཨོལོཀེསི. པཉྩམོ ཨུཏྟརཎཏིཏྠཾ ཨོལོཀེཏྭཱ པཏརཏི. ཚཊྛོ ཏཾ དིསྭཱ པཱརིམཏཱིརཾ གནྟྭཱ ཀཊིཔྤམཱཎེ ཨུདཀེ ཋིཏོ. སཏྟམོ པཱརིམཏཱིརཾ གནྟྭཱ གནྡྷཙུཎྞཱདཱིཧི ནྷཏྭཱ ཝརཝཏྠཱདཱིནི ནིཝཱསེཏྭཱ སུརབྷིཝིལེཔནཾ ཝིལིམྤིཏྭཱ ནཱིལུཔྤལམཱལཱདཱིནི པིལནྡྷིཏྭཱ ནཱནཱལངྐཱརཔྤཊིམཎྜིཏོ མཧཱནགརཾ པཝིསིཏྭཱ པཱསཱདམཱརུཧིཏྭཱ ཨུཏྟམབྷོཛནཾ བྷུཉྫཏི.

ཏཏྠ ¶ ཛངྒྷཝཱཎིཛཱ ཝིཡ ཨིམེ སཏྟ པུགྒལཱ, ནདཱི ཝིཡ ཝཊྚཾ, པཋམསྶ ཨུདཀབྷཱིརུཀསྶ པུརིསསྶ ཨོཏིཎྞཊྛཱནེཡེཝ ནིམུཛྫནཾ ཝིཡ མིཙྪཱདིཊྛིཀསྶ ཝཊྚེ ནིམུཛྫནཾ, ཨུམྨུཛྫིཏྭཱ ནིམུཛྫནཔུརིསོ ཝིཡ སདྡྷཱདཱིནཾ ཨུཔྤཏྟིམཏྠཀེན ཨུམྨུཛྫིཏྭཱ ཏཱསཾ ཧཱནིཡཱ ནིམུགྒཔུགྒལོ, མཛ྄ཛྷེ ནདིཡཱ ཋཏྭཱ ཝིཡ སདྡྷཱདཱིནཾ ཋིཏིཡཱ ཋིཏིཔུགྒལོ, ཨུཏྟརཎཏིཏྠཾ ཨོལོཀེནྟོ ཝིཡ སོཏཱཔནྣོ, པཏརནྟཔུརིསོ ཝིཡ ཀིལེསཀཱམཱཝཊྚཏཱཡ པཏརནྟོ སཀདཱགཱམཱི, ཏརིཏྭཱ ཀཊིམཏྟེ ཨུདཀེ ཋིཏཔུརིསོ ཝིཡ ཨནཱཝཊྚདྷམྨཏྟཱ ཨནཱགཱམཱི, ནྷཏྭཱ པཱརིམཏཱིརཾ ཨུཏྟརིཏྭཱ ཐལེ ཋིཏཔུརིསོ ཝིཡ ཙཏྟཱརོ ཨོགྷེ ཨཏིཀྐམིཏྭཱ ནིབྦཱནཐལེ ཋིཏོ ཁཱིཎཱསཝབྲཱཧྨཎོ, ཐལེ ཋིཏཔུརིསསྶ ནགརཾ པཝིསིཏྭཱ པཱསཱདཾ ཨཱརུཡ྄ཧ ཨུཏྟམབྷོཛནབྷུཉྫནཾ ཝིཡ ཁཱིཎཱསཝསྶ ནིབྦཱནཱརམྨཎསམཱཔཏྟིཾ ཨཔྤེཏྭཱ ཝཱིཏིནཱམནཾ ཝེདིཏབྦཾ.

༦-༩. ཨནིཙྩཱནུཔསྶཱིསུཏྟཱདིཝཎྞནཱ

༡༦-༡༩. ཚཊྛེ ‘‘ཨིདྷ སམསཱིསཱི ཀཐིཏོ’’ཏི ཝཏྭཱ ཨེཝཾ སམསཱིསིཏཾ ཝིབྷཛིཏྭཱ ཨིདྷཱདྷིཔྤེཏཾ དསྶེཏུཾ ‘‘སོ ཙཏུབྦིདྷོ ཧོཏཱི’’ཏིཨཱདིམཱཧ. རོགཝསེན སམསཱིསཱི རོགསམསཱིསཱི. ཨེས ནཡོ སེསེསུཔི. ཨེཀཔྤཧཱརེནེཝཱཏི ཨེཀཝེལཱཡམེཝ. ཡོ ཙཀྑུརོགཱདཱིསུ ཨཉྙཏརསྨིཾ སཏི ‘‘ཨིཏོ ཨནུཊྛིཏོ ཨརཧཏྟཾ པཱཔུཎིསྶཱམཱི’’ཏི ཝིཔསྶནཾ པཊྛཔེསི, ཨཐསྶ ཨརཧཏྟཉྩ རོགཏོ ཝུཊྛཱནཉྩ ཨེཀཀཱལམེཝ ཧོཏི ¶ , ཨཡཾ རོགསམསཱིསཱི ནཱམ. ཨིརིཡཱཔཐསྶ པརིཡོསཱནནྟི ཨིརིཡཱཔཐནྟརསམཱཡོགོ. ཡོ ཋཱནཱདཱིསུ ཨིརིཡཱཔཐེསུ ཨཉྙཏརཾ ཨདྷིཊྛཱཡ ‘‘ཨཝིཀོཔེཏྭཱཝ ཨརཧཏྟཾ པཱཔུཎིསྶཱམཱི’’ཏི ཝིཔསྶནཾ པཊྛཔེསི. ཨཐསྶ ཨརཧཏྟཔྤཏྟི ཙ ཨིརིཡཱཔཐཝིཀོཔནཉྩ ཨེཀཔྤཧཱརེནེཝ ཧོཏི, ཨཡཾ ཨིརིཡཱཔཐསམསཱིསཱི ནཱམ. ཛཱིཝིཏསམསཱིསཱི ནཱམཱཏི ཨེཏྠ ‘‘པལིབོདྷསཱིསཾ མཱནོ, པརཱམཱསསཱིསཾ དིཊྛི, ཝིཀྑེཔསཱིསཾ ཨུདྡྷཙྩཾ, ཀིལེསསཱིསཾ ཨཝིཛྫཱ, ཨདྷིམོཀྑསཱིསཾ སདྡྷཱ, པགྒཧསཱིསཾ ཝཱིརིཡཾ, ཨུཔཊྛཱནསཱིསཾ སཏི, ཨཝིཀྑེཔསཱིསཾ སམཱདྷི, དསྶནསཱིསཾ པཉྙཱ, པཝཏྟསཱིསཾ ཛཱིཝིཏིནྡྲིཡཾ, ཙུཏིསཱིསཾ ཝིམོཀྑོ, སངྑཱརསཱིསཾ ནིརོདྷོ’’ཏི པཊིསམྦྷིདཱཡཾ (པཊི. མ. ༣.༣༣) ཝུཏྟེསུ སཏྟརསསུ སཱིསེསུ པཝཏྟསཱིསཾ ཀིལེསསཱིསནྟི དྭེ སཱིསཱནི ཨིདྷཱདྷིཔྤེཏཱནི – ‘‘ཨཔུབྦཾ ཨཙརིམཾ ཨཱསཝཔརིཡཱདཱནཉྩ ཧོཏི ཛཱིཝིཏཔརིཡཱདཱནཉྩཱ’’ཏི ཝཙནཏོ. ཏེསུ ཀིལེསསཱིསཾ ཨརཧཏྟམགྒོ པརིཡཱདིཡཏི, པཝཏྟསཱིསཾ ཛཱིཝིཏིནྡྲིཡཾ ཙུཏིཙིཏྟཾ པརིཡཱདིཡཏི. ཏཏྠ ཨཝིཛྫཱཔརིཡཱདཱཡཀཾ ཙིཏྟཾ ཛཱིཝིཏིནྡྲིཡཾ པརིཡཱདཱཏུཾ ན སཀྐོཏི, ཛཱིཝིཏིནྡྲིཡཔརིཡཱདཱཡཀཾ ཨཝིཛྫཾ པརིཡཱདཱཏུཾ ན སཀྐོཏི ¶ . ཨཉྙཾ ཨཝིཛྫཱཔརིཡཱདཱཡཀཾ ཙིཏྟཾ, ཨཉྙཾ ཛཱིཝིཏནྡྲིཡཔརིཡཱདཱཡཀཾ. ཡསྶ ཙེཏཾ སཱིསདྭཡཾ སམཾ པརིཡཱདཱནཾ གཙྪཏི, སོ ཛཱིཝིཏསམསཱིསཱི ནཱམ.

ཀཐཾ པནིདཾ སམཾ ཧོཏཱིཏི? ཝཱརསམཏཱཡ. ཡསྨིཉྷི ཝཱརེ མགྒཝུཊྛཱནཾ ཧོཏི, སོཏཱཔཏྟིམགྒེ པཉྩ པཙྩཝེཀྑཎཱནི, སཀདཱགཱམིམགྒེ པཉྩ, ཨནཱགཱམིམགྒེ པཉྩ, ཨརཧཏྟམགྒེ ཙཏྟཱརཱིཏི ཨེཀཱུནཝཱིསཏིམེ པཙྩཝེཀྑཎཉཱཎེ པཏིཊྛཱཡ བྷཝངྒཾ ཨོཏརིཏྭཱ པརིནིབྦཱཡཏོ ཨིམཱཡ ཝཱརསམཏཱཡ ཨིདཾ ཨུབྷཡསཱིསཔརིཡཱདཱནམྤི སམཾ ཧོཏཱིཏི ཨིམཱཡ ཝཱརསམཏཱཡ. ཝཱརསམཝུཏྟིདཱཡཀེན ཧི མགྒཙིཏྟེན ཨཏྟནོ ཨནནྟརཾ ཝིཡ ནིཔྥཱདེཏབྦཱ པཙྩཝེཀྑཎཝཱརཱ ཙ ཀིལེསཔརིཡཱདཱནསྶེཝ ཝཱརཱཏི ཝཏྟབྦཏཾ ཨརཧཏི. ‘‘ཝིམུཏྟསྨིཾ ཝིམུཏྟམིཏི ཉཱཎཾ ཧོཏཱི’’ཏི (མ. ནི. ༡.༧༨; སཾ. ནི. ༣.༡༢, ༡༤) ཝཙནཏོ པཙྩཝེཀྑཎཔརིསམཱཔནེན ཀིལེསཔརིཡཱདཱནཾ སམྤཱཔིཏཾ ནཱམ ཧོཏཱིཏི ཨིམཱཡ ཝཱརཝུཏྟིཡཱ སམཏཱཡ ཀིལེསཔརིཡཱདཱནཛཱིཝིཏཔརིཡཱདཱནཱནཾ སམཏཱ ཝེདིཏབྦཱ. ཏེནེཝཱཧ ‘‘ཡསྨཱ པནསྶ…པེ... ཏསྨཱ ཨེཝཾ ཝུཏྟ’’ནྟི.

ཨཱཡུནོ ཝེམཛ྄ཛྷཾ ཨནཏིཀྐམིཏྭཱ ཨནྟརཱཝ ཀིལེསཔརིནིབྦཱནེན པརིནིབྦཱཡཏཱིཏི ཨནྟརཱཔརིནིབྦཱཡཱི. ཏེནཱཧ ‘‘ཡོ པཉྩསུ སུདྡྷཱཝཱསེསཱུ’’ཏིཨཱདི ¶ . ཝེམཛ྄ཛྷེཏི ཨཝིཧཱདཱིསུ ཡཏྠ ཨུཔྤནྣོ, ཏཏྠ ཨཱཡུནོ ཝེམཛ྄ཛྷེ. ཨཱཡུཝེམཛ྄ཛྷཾ ཨུཔཧཙྩ ཨཏིཀྐམིཏྭཱ ཏཏྠ པརིནིབྦཱཡཏཱིཏི ཨུཔཧཙྩཔརིནིབྦཱཡཱི. ཏེནཱཧ ‘‘ཡོ ཏཏྠེཝཱ’’ཏིཨཱདི. ཨསངྑཱརེན ཨཔྤཡོགེན ཨནུསྶཱཧེན ཨཀིལམནྟོ ཏིཀྑིནྡྲིཡཏཱཡ སུཁེནེཝ པརིནིབྦཱཡཏཱིཏི ཨསངྑཱརཔརིནིབྦཱཡཱི. ཏེནཱཧ ‘‘ཡོ ཏེསཾཡེཝཱ’’ཏིཨཱདི. ཏེསཾཡེཝ པུགྒལཱནནྟི ནིདྡྷཱརཎེ སཱམིཝཙནཾ. ཨཔྤཡོགེནཱཏི ཨདྷིམཏྟཔྤཡོགེན ཝིནཱ ཨཔྤཀསིརེན. སསངྑཱརེན སཔྤཡོགེན ཀིལམནྟོ དུཀྑེན པརིནིབྦཱཡཏཱིཏི སསངྑཱརཔརིནིབྦཱཡཱི. ཨུདྡྷཾཝཱཧིབྷཱཝེན ཨུདྡྷམསྶ ཏཎྷཱསོཏཾ ཝཊྚསོཏཉྩཱཏི, ཨུདྡྷཾ ཝཱ གནྟྭཱ པཊིལབྷིཏབྦཏོ ཨུདྡྷམསྶ མགྒསོཏནྟི ཨུདྡྷཾབྷོཏོ. པཊིསནྡྷིཝསེན ཨཀནིཊྛཾ གཙྪཏཱིཏི ཨཀནིཊྛགཱམཱི.

ཨེཏྠ པན ཙཏུཀྐཾ ཝེདིཏབྦཾ. ཡོ ཧི ཨཝིཧཏོ པཊྛཱཡ ཙཏྟཱརོ དེཝལོཀེ སོདྷེཏྭཱ ཨཀནིཊྛཾ གནྟྭཱ པརིནིབྦཱཡཏི, ཨཡཾ ཨུདྡྷཾསོཏོ ཨཀནིཊྛགཱམཱི ནཱམ. ཨཡཉྷི ཨཝིཧེསུ ཀཔྤསཧསྶཾ ཝསནྟོ ཨརཧཏྟཾ པཏྟུཾ ཨསཀྐུཎིཏྭཱ ཨཏཔྤཾ གཙྪཏི, ཏཏྲཱཔི དྭེ ཀཔྤསཧསྶཱནི ཝསནྟོ ཨརཧཏྟཾ པཏྟུཾ ཨསཀྐུཎིཏྭཱ སུདསྶཾ གཙྪཏི, ཏཏྲཱཔི ཙཏྟཱརི ཀཔྤསཧསྶཱནི ཝསནྟོ ཨརཧཏྟཾ པཏྟུཾ ཨསཀྐུཎིཏྭཱ སུདསྶིཾ གཙྪཏི, ཏཏྲཱཔི ཨཊྛ ཀཔྤསཧསྶཱནི ཝསནྟོ ཨརཧཏྟཾ ¶ པཏྟུཾ ཨསཀྐུཎིཏྭཱ ཨཀནིཊྛཾ གཙྪཏི, ཏཏྠ ཝསནྟོ ཨགྒམགྒཾ ཨདྷིགཙྪཏི. ཏཏྠ ཡོ ཨཝིཧཏོ པཊྛཱཡ དུཏིཡཾ ཝཱ ཙཏུཏྠཾ ཝཱ དེཝལོཀཾ གནྟྭཱ པརིནིབྦཱཡཏི, ཨཡཾ ཨུདྡྷཾསོཏོ ན ཨཀནིཊྛགཱམཱི ནཱམ. ཡོ ཀཱམབྷཝཏོ ཙཝིཏྭཱ ཨཀནིཊྛེསུ པརིནིབྦཱཡཏི, ཨཡཾ ན ཨུདྡྷཾསོཏོ ཨཀནིཊྛགཱམཱི ནཱམ. ཡོ ཧེཊྛཱ ཙཏཱུསུ དེཝལོཀེསུ ཏཏྠ ཏཏྠེཝ ནིབྦཏྟིཏྭཱ པརིནིབྦཱཡཏི, ཨཡཾ ན ཨུདྡྷཾསོཏོ ན ཨཀནིཊྛགཱམཱིཏི.

ཨེཏེ པན ཨཝིཧེསུ ཨུཔྤནྣསམནནྟརཨཱཡུཝེམཛ྄ཛྷཾ ཨཔྤཏྭཱཝ པརིནིབྦཱཡནཝསེན ཏཡོ ཨནྟརཱཔརིནིབྦཱཡིནོ, ཨེཀོ ཨུཔཧཙྩཔརིནིབྦཱཡཱི, ཨེཀོ ཨུདྡྷཾསོཏོཏི པཉྩཝིདྷོ, ཨསངྑཱརསསངྑཱརཔརིནིབྦཱཡིཝིབྷཱགེན དས ཧོནྟི, ཏཐཱ ཨཏཔྤསུདསྶསུདསྶཱིསཱུཏི ཙཏྟཱརོ དསཀཱཏི ཙཏྟཱརཱིསཾ. ཨཀནིཊྛེ པན ཨུདྡྷཾསོཏོ ནཏྠི, ཏཡོ ཨནྟརཱཔརིནིབྦཱཡིནོ, ཨེཀོ ¶ ཨུཔཧཙྩཔརིནིབྦཱཡཱིཏི ཙཏྟཱརོ, ཨསངྑཱརསསངྑཱརཔརིནིབྦཱཡིཝིབྷཱགེན ཨཊྛཱཏི ཨཊྛཙཏྟཱརཱིསཾ ཨནཱགཱམིནོ. སཏྟམཱདཱིསུ ནཏྠི ཝཏྟབྦཾ.

ཨནིཙྩཱནུཔསྶཱིསུཏྟཱདིཝཎྞནཱ ནིཊྛིཏཱ.

༢༠. དསམེ ནིདྡསཝཏྠཱུནཱིཏི ཨཱདིསདྡལོཔེནཱཡཾ ནིདྡེསོཏི ཨཱཧ ‘‘ནིདྡསཱདིཝཏྠཱུནཱི’’ཏི. ནཏྠི ཨིདཱནི ཨིམསྶ དསཱཏི ནིདྡསོ. པཉྷོཏི ཉཱཏུཾ ཨིཙྪིཏོ ཨཏྠོ. པུན དསཝསྶོ ན ཧོཏཱིཏི ཏེསཾ མཏིམཏྟམེཏནྟི དསྶེཏུཾ ‘‘སོ ཀིརཱ’’ཏི ཀིརསདྡགྒཧཎཾ. ནིདྡསོཏི ཙེཏཾ ཝཙནམཏྟཾ. ཏསྶ ནིབྦཱིསཱདིབྷཱཝསྶ ཝིཡ ནིནྣཝཱདིབྷཱཝསྶ ཙ ཨིཙྪིཏཏྟཱཏི དསྶེཏུཾ ‘‘ན ཀེཝལཉྩཱ’’ཏིཨཱདི ཝུཏྟཾ. གཱམེ ཝིཙརནྟོཏི གཱམེ པིཎྜཱཡ ཙརནྟོ. ན ཨིདཾ ཏིཏྠིཡཱནཾ ཨདྷིཝཙནཾ ཏེསུ ཏནྣིམིཏྟསྶ ཨབྷཱཝཱ, སཱསནེཔི སེཁསྶཔི ན ཨིདཾ ཨདྷིཝཙནཾ, ཀིམངྒཾ པན པུཐུཛྫནསྶ. ཡསྶ པནེཏཾ ཨདྷིཝཙནཾ ཡེན ཙ ཀཱརཎེན, ཏཾ དསྶེཏུཾ ‘‘ཁཱིཎཱསཝསྶེཏ’’ནྟིཨཱདི ཝུཏྟཾ. ཨཔྤཊིསནྡྷིཀབྷཱཝོ ཧིསྶ པཙྩཀྑཏོ ཀཱརཎཾ. པརམྤརཱཡ ཨིཏརཱནི ཡཱནི པཱལི༹ཡཾ ཨཱགཏཱནིཾ.

སིཀྑཱཡ སམྨདེཝ ཨཱདཱནཾ སིཀྑཱསམཱདཱནཾ. ཏཾ པནསྶཱ པཱརིཔཱུརིཡཱ ཝེདིཏབྦནྟི ཨཱཧ ‘‘སིཀྑཱཏྟཡཔཱུརཎེ’’ཏི. སིཀྑཱཡ ཝཱ སམྨདེཝ ཨཱདིཏོ པཊྛཱཡ རཀྑཎཾ སིཀྑཱསམཱདཱནཾ. ཏཉྩ ཨཏྠཏོ པཱུརཎེན པརིཙྪིནྣཾ ཨརཀྑཎེ སབྦེན སབྦཾ ཨབྷཱཝཏོ, རཀྑཎེ ¶ ཙ པརིཔཱུརཎཏོ. བལཝཙྪནྡོཏི དལ༹ྷཙྪནྡོ. ཨཱཡཏིནྟི ཨནནྟརཱནཱགཏདིཝསཱདིཀཱལོ ཨདྷིཔྤེཏོ, ན ཨནཱགཏབྷཝོཏི ཨཱཧ ‘‘ཨནཱགཏེ པུནདིཝསཱདཱིསུཔཱི’’ཏི. སིཀྑཾ པརིཔཱུརེནྟསྶ ཏཏྠ ནིབདྡྷབྷཏྟིཏཱ ཨཝིགཏཔེམཏཱ. ཏེབྷཱུམཀདྷམྨཱནཾ ཨནིཙྩཱདིཝསེན སམྨདེཝ ནིཛ྄ཛྷཱནཾ དྷམྨནིསཱམནཱཏི ཨཱཧ ‘‘ཝིཔསྶནཱཡེཏཾ ཨདྷིཝཙན’’ནྟི. ཏཎྷཱཝིནཡེཏི བྷངྒཱནུཔསྶནཱཉཱཎཱནུབྷཱཝསིདྡྷེ ཏཎྷཱཝིཀྑམྦྷནེ. ཨེཀཱིབྷཱཝེཏི གཎསངྒཎིཀཱཀིལེསསངྒཎིཀཱཝིགམསིདྡྷེ ཝིཝེཀཝཱསེ. ཝཱིརིཡཱརམྦྷེཏི སམྨཔྤདྷཱནསྶ པགྒཎྷནེ ¶ . ཏཾ པན སབྦསོ ཝཱིརིཡསྶ པརིབྲཱུཧནཾ ཧོཏཱིཏི ཨཱཧ ‘‘ཀཱཡིཀཙེཏསིཀསྶ ཝཱིརིཡསྶ པཱུརཎེ’’ཏི. སཏིཡཉྩེཝ ནིཔཀབྷཱཝེ ཙཱཏི སཏོཀཱརིཏཱཡ ཙེཝ སམྤཛཱནཀཱརིཏཱཡ ཙ. སཏིསམྤཛཉྙབལེནེཝ ཧི ཝཱིརིཡཱརམྦྷོ ཨིཛ྄ཛྷཏི. དིཊྛིཔཊིཝེདྷེཏི མགྒསམྨཱདིཊྛིཡཱ པཊིཝིཛ྄ཛྷནེ. ཏེནཱཧ ‘‘མགྒདསྶནེ’’ཏི.

༢༡. ཏཏིཡསྶ པཋམེ དེཝཱཡཏནབྷཱཝེན ཙིཏྟཏྟཱ ལོཀསྶ ཙིཏྟཱིཀཱརཊྛཱནཏཱཡ ཙ ཙེཏིཡཾ ཨཧོསི. ཡཱཝཀཱིཝནྟི (དཱི. ནི. ཊཱི. ༢.༡༣༤) ཨེཀམེཝེཏཾ པདཾ ཨནིཡམཏོ པརིམཱཎཝཱཙཱི. ཀཱལོ ཙེཏྠ ཨདྷིཔྤེཏོཏི ཨཱཧ ‘‘ཡཏྟཀཾ ཀཱལ’’ནྟི. ཨབྷིཎྷཾ སནྣིཔཱཏཱཏི ནིཙྩསནྣིཔཱཏཱ. ཏཾ པན ནིཙྩསནྣིཔཱཏཏཾ དསྶེཏུཾ ‘‘དིཝསསྶཱ’’ཏིཨཱདི ཝུཏྟཾ. སནྣིཔཱཏབཧུལཱཏི པཙུརསནྣིཔཱཏཱ. ཝོསཱནནྟི སངྐོཙཾ. ‘‘ཝུདྡྷིཡེཝཱ’’ཏིཨཱདིནཱ ཝུཏྟམཏྠཾ བྱཏིརེཀམུཁེན དསྶེཏུཾ ‘‘ཨབྷིཎྷཾ ཨསནྣིཔཏནྟཱ ཧཱི’’ཏིཨཱདི ཝུཏྟཾ. ཨཱཀུལཱཏི ཁུབྷིཏཱ ན པསནྣཱ. བྷིཛྫིཏྭཱཏི ཝགྒབནྡྷཏོ ཝིབྷཛྫ ཝིསུཾ ཝིསུཾ ཧུཏྭཱ.

སནྣིཔཱཏབྷེརིཡཱཏི སནྣིཔཱཏཱརོཙནབྷེརིཡཱ. ཨདྡྷབྷུཏྟཱ ཝཱཏི སཱམིབྷུཏྟཱ ཝཱ. ཨོསཱིདམཱནེཏི ཧཱཡམཱནེ.

སུངྐནྟི ¶ བྷཎྜཾ གཧེཏྭཱ གཙྪནྟེཧི པབྦཏཁཎྜནཱདིཏིཏྠགཱམདྭཱརཱདཱིསུ རཱཛཔུརིསཱནཾ དཱཏབྦབྷཱགཾ. བལིནྟི ནིཔྥནྣསསྶཱདིཏོ ཚབྷཱགཾ སཏྟབྷཱགནྟིཨཱདིནཱ ལདྡྷབྦཀརཾ. དཎྜནྟི དསཝཱིསཏིཀཧཱཔཎཱདིཀཾ ཨཔརཱདྷཱནུརཱུཔཾ གཧེཏབྦདྷནདཎྜཾ. ཝཛྫིདྷམྨནྟི ཝཛྫིརཱཛདྷམྨཾ. ཨིདཱནི ཨཔཉྙཏྟཔཉྙཱཔནཱདཱིསུ ཏཔྤཊིཀྑེཔེ ཙ ཨཱདཱིནཝཱནིསཾསེ ཙ ཝིཏྠཱརཏོ དསྶེཏུཾ ‘‘ཏེས’’ནྟིཨཱདི ¶ ཝུཏྟཾ. པཱརིཙརིཡཀྑམཱཏི ཨུཔཊྛཱནཀྑམཱ. པོརཱཎཾ ཝཛྫིདྷམྨནྟི ཨེཏྠ པུབྦེ ཀིར ཝཛྫིརཱཛཱནོ ‘‘ཨཡཾ ཙོརོ’’ཏི ཨཱནེཏྭཱ དསྶིཏེ ‘‘གཎྷཐ ནཾ ཙོར’’ནྟི ཨཝཏྭཱ ཝིནིཙྪཡམཧཱམཏྟཱནཾ དེནྟི. ཏེ ཝིནིཙྪིནིཏྭཱ སཙེ ཨཙོརོ ཧོཏི, ཝིསྶཛྫེནྟི. སཙེ ཙོརོ, ཨཏྟནཱ ཀིཉྩི ཨཀཏྭཱ ཝོཧཱརིཀཱནཾ དེནྟི, ཏེཔི ཝིནིཙྪིནིཏྭཱ ཨཙོརོ ཙེ, ཝིསྶཛྫེནྟི. ཙོརོ ཙེ, སུཏྟདྷརཱནཾ དེནྟི. ཏེཔི ཝིནིཙྪིནིཏྭཱ ཨཙོརོ ཙེ, ཝིསྶཛྫེནྟི. ཙོརོ ཙེ, ཨཊྚཀུལིཀཱནཾ དེནྟི, ཏེཔི ཏཐེཝ ཀཏྭཱ སེནཱཔཏིསྶ, སེནཱཔཏི ཨུཔརཱཛསྶ, ཨུཔརཱཛཱ རཉྙོ. རཱཛཱ ཝིནིཙྪིནིཏྭཱ སཙེ ཨཙོརོ ཧོཏི, ཝིསྶཛྫེཏི. སཙེ པན ཙོརོ ཧོཏི, པཝེཎིཔཎྞཀཾ ཝཱཙཱཔེཏི. ཏཏྠ ‘‘ཡེན ཨིདཾ ནཱམ ཀཏཾ, ཏསྶ ཨཡཾ ནཱམདཎྜོ’’ཏི ལིཁིཏཾ. རཱཛཱ ཏསྶ ཀིརིཡཾ ཏེན སམཱནེཏྭཱ ཏདནུཙྪཝིཀཾ དཎྜཾ ཀརོཏི. ཨིཏི ཨེཏཾ པོརཱཎཾ ཝཛྫིདྷམྨཾ སམཱདཱཡ ཝཏྟནྟཱནཾ མནུསྶཱ ན ཨུཛ྄ཛྷཱཡནྟི. པརམྤརཱགཏེསུ ཨཊྚཀུལེསུ ཛཱཏཱ ཨགཏིགམནཝིརཏཱ ཨཊྚམཧལླཀཔུརིསཱ ཨཊྚཀུལིཀཱ.

སཀྐཱརནྟི ཨུཔཀཱརཾ. གརུབྷཱཝཾ པཙྩུཔཊྛཔེཏྭཱཏི ‘‘ཨིམེ ཨམྷཱཀཾ གརུནོ’’ཏི ཏཏྠ གརུབྷཱཝཾ པཊི པཊི ཨུཔཊྛཔེཏྭཱ. མཱནེསྶནྟཱིཏི སམྨཱནེསྶནྟི. ཏཾ པན སམྨཱནནཾ ཏེསུ ནེསཾ ཨཏྟམནཏཱཔུབྦཀནྟི ཨཱཧ ‘‘མནེན པིཡཱཡིསྶནྟཱི’’ཏི. ནིཔཙྩཀཱརཾ པཎིཔཱཏཾ. དསྶེནྟཱིཏི གརུཙིཏྟབྷཱརཾ དསྶེནྟི. སནྡྷཱནེཏུནྟི སམྦནྡྷཾ ཨཝིཙྪིནྣཾ ཀཏྭཱ གྷཊེཏུཾ.

པསཡ྄ཧཀཱརསྶཱཏི བལཀྐཱརསྶ. ཀཱམཾ ཝུདྡྷིཡཱ པཱུཛནཱིཡཏཱཡ ‘‘ཝུདྡྷིཧཱནིཡོ’’ཏི ཝུཏྟཾ, ཨཏྠོ པན ཝུཏྟཱནུཀྐམེནེཝ ཡོཛེཏབྦོ. པཱལི༹ཡཾ ཝཱ ཡསྨཱ ‘‘ཝུདྡྷིཡེཝ པཱཊིཀངྑཱ, ནོ པརིཧཱནཱི’’ཏི ཝུཏྟཾ, ཏསྨཱ ཏདནུཀྐམེན ‘‘ཝུདྡྷིཧཱནིཡོ’’ཏི ཝུཏྟཾ.

ཝིཔཙྩིཏུཾ ཨལདྡྷོཀཱསེ པཱཔཀམྨེ, ཏསྶ ཀམྨསྶ ཝིཔཱཀེ ཝཱ ཨནཝསརོཝ དེཝསོཔསགྒོ. ཏསྨིཾ པན ལདྡྷོཀཱསེ སིཡཱ དེཝཏོཔསགྒསྶ ཨཝསརོཏི ཨཱཧ ‘‘ཨནུཔྤནྣཾ…པེ… ཝཌྜྷེནྟཱི’’ཏི. ཨེཏེནེཝ ཨནུཔྤནྣཾ སུཁནྟི ཨེཏྠཱཔི ཨཏྠོ ཝེདིཏབྦོ. བལཀཱཡསྶ དིགུཎཏིགུཎཏཱདསྶནཾ པཊིབྷཡབྷཱཝདསྶནནྟི ཨེཝམཱདིནཱ དེཝཏཱནཾ སངྒཱམསཱིསེ སཧཱཡཏཱ ཝེདིཏབྦཱ.

ཨནིཙྪིཏནྟི ¶ ¶ ཨནིཊྛཾ. ཨཱཝརཎཏོཏི ནིསེདྷནཏོ. དྷམྨཏོ ཨནཔེཏཱ དྷམྨིཡཱཏི ཨིདྷ ‘‘དྷམྨིཀཱ’’ཏི ཝུཏྟཱ. མིགསཱུཀརཱདིགྷཱཏཱཡ སུནཁཱདཱིནཾ ཀཌྜྷིཏྭཱ ཝནཙརཎཾ ཝཱཛོ, ཏཏྠ ནིཡུཏྟཱ, ཏེ ཝཱ ཝཱཛེནྟཱིཏི ཝཱཛིཀཱ, མིགཝདྷཙཱརིནོ.

༢༢. དུཏིཡེ ཨབྷིཡཱཏུཀཱམོཏི ཨེཏྠ ཨབྷི-སདྡོ ཨབྷིབྷཝནཏྠོ ‘‘ཨནབྷིཝིདིཏུ’’ནྟིཨཱདཱིསུ ཝིཡཱཏི ཨཱཧ ‘‘ཨབྷིབྷཝནཏྠཱཡ ཡཱཏུཀཱམོ’’ཏི. ཝཛྫིརཱཛཱནོཏི ‘‘ཝཛྫེཏབྦཱ ཨིམེ’’ཏི ཨཱདིཏོ པཝཏྟཾ ཝཙནཾ ཨུཔཱདཱཡ ཝཛྫཱིཏི ལདྡྷནཱམཱ རཱཛཱནོ, ཝཛྫིརཊྛསྶ ཝཱ རཱཛཱནོ ཝཛྫིརཱཛཱནོ. རཊྛསྶ པན ཝཛྫིསམཉྙཱ ཏནྣིཝཱསིརཱཛཀུམཱརཝསེན ཝེདིཏབྦཱ. རཱཛིདྡྷིཡཱཏི རཱཛབྷཱཝཱནུགཏེན པབྷཱཝེན. སོ པན པབྷཱཝོ ནེསཾ གཎརཱཛཱནཾ མིཐོ སཱམགྒིཡཱ ལོཀེ པཱཀཊོ. ཙིརཊྛཱཡཱི ཙ ཨཧོསཱིཏི ‘‘སམགྒབྷཱཝཾ ཀཐེཏཱི’’ཏི ཝུཏྟཾ. ཨནུ ཨནུ ཏཾསམངྒིནོ བྷཱཝེཏི ཝཌྜྷེཏཱིཏི ཨནུབྷཱཝོ, ཨནུབྷཱཝོ ཨེཝ ཨཱནུབྷཱཝོ, པཏཱཔོ. སོ པན ནེསཾ པཏཱཔོ ཧཏྠིཨསྶཱདིཝཱཧནསམྤཏྟིཡཱ ཏཏྠ ཙ སུབྷིཀྑིཏབྷཱཝེན ལོཀེ པཱཀཊོ ཛཱཏོཏི ‘‘ཨེཏེན…པེ… ཀཐེཏཱི’’ཏི ཝུཏྟཾ. ཏཱལ༹ཙྪིགྒལེ༹ནཱཏི ཀུཉྩིཀཱཚིདྡེན. ཨསནནྟི སརཾ. ཨཏིཔཱཏཡིསྶནྟཱིཏི ཨཏིཀྐཱམེནྟི. པོངྑཱནུཔོངྑནྟི པོངྑསྶ ཨནུཔོངྑཾ, པུརིམསརསྶ པོངྑཔདཱནུགཏཔོངྑཾ ཨིཏརཾ སརཾ ཀཏྭཱཏི ཨཏྠོ. ཨཝིརཱདྷིཏནྟི ཨཝིརཛ྄ཛྷིཏཾ. ཨུཙྪིནྡིསྶཱམཱིཏི ཨུམྨཱུལནཝསེན ཀུལསནྟཏིཾ ཚིནྡིསྶཱམི. ཨཡནཾ ཝཌྜྷནཾ ཨཡོ, ཏཔྤཊིཔཀྑེན ཨནཡོཏི ཨཱཧ ‘‘ཨཝཌྜྷི’’ནྟི. ཉཱཏཱིནཾ བྱསནཾ ཝིནཱསོ ཉཱཏིབྱསནཾ.

གངྒཱཡཱཏི གངྒཱསམཱིཔེ. པཊྚནགཱམནྟི སཀཊཔཊྚནགཱམཾ. ཏཏྲཱཏི ཏསྨིཾ པཊྚནེ. བལཝཱགྷཱཏཛཱཏོཏི ཨུཔྤནྣབལཝཀོདྷོ. མེཏི མཡ྄ཧཾ. གཏེནཱཏི གམནེན. སཱིཏཾ ཝཱ ཨུཎྷཾ ཝཱ ནཏྠི ཏཱཡ ཝེལཱཡ. ཨབྷིམུཁཾ ཡུདྡྷེནཱཏི ཨབྷིམུཁཾ ཨུཛུཀམེཝ སངྒཱམཀརཎེན. ཨུཔལཱཔནཾ སཱམཾ དཱནཉྩཱཏི དསྶེཏུཾ ‘‘ཨལ’’ནྟིཨཱདི ཝུཏྟཾ. བྷེདོཔི ཨིདྷ ཨུཔཱཡོ ཨེཝཱཏི ¶ ཝུཏྟཾ ‘‘ཨཉྙཏྲ མིཐུབྷེདཱ’’ཏི. ཡུདྡྷསྶ པན ཨནུཔཱཡཏཱ པགེཝ པཀཱསིཏཱ. ཨིདནྟི ‘‘ཨཉྙཏྲ ཨུཔལཱཔནཱཡ ཨཉྙཏྲ མིཐུབྷེདཱ’’ཏི ཨིདཾ ཝཙནཾ. ཀཐཱཡ ནཡཾ ལབྷིཏྭཱཏི ‘‘ཡཱཝཀཱིཝཉྩ ¶ …པེ… པརིཧཱནཱི’’ཏི ཨིམཱཡ བྷགཝཏོ ཀཐཱཡ ཨུཔཱཡཾ ལབྷིཏྭཱ. ཨནུཀམྤཱཡཱཏི ཝཛྫིརཱཛེསུ ཨནུགྒཧེན.

རཱཛཱཔི ཏམེཝ པེསེཏྭཱ སབྦེ…པེ… པཱཔེསཱིཏི རཱཛཱ ཏཾ ཨཏྟནོ སནྟིཀཾ ཨཱགཏཾ ‘‘ཀིཾ, ཨཱཙརིཡ, བྷགཝཱ ཨཝཙཱ’’ཏི པུཙྪི. སོ ‘‘ཡཐཱ བྷོ སམཎསྶ གོཏམསྶ ཝཙནཾ ན སཀྐཱ ཝཛྫཱི ཀེནཙི གཧེཏུཾ, ཨཔིཙ ཨུཔལཱཔནཱཡ ཝཱ མིཐུབྷེདེན ཝཱ སཀྐཱ’’ཏི ཨཱཧ. ཏཏོ ནཾ རཱཛཱ ‘‘ཨུཔལཱཔནཱཡ ཨམྷཱཀཾ ཧཏྠིཨསྶཱདཡོ ནསྶིསྶནྟི, བྷེདེནེཝ ཏེ གཧེསྶཱམི, ཀིཾ ཀརོམཱ’’ཏི པུཙྪི. ཏེན ཧི, མཧཱརཱཛ, ཏུམྷེ ཝཛྫཱི ཨཱརབྦྷ པརིསཏི ཀཐཾ སམུཊྛཱཔེཐ, ཏཏོ ཨཧཾ ‘‘ཀིཾ ཏེ, མཧཱརཱཛ, ཏེཧི, ཨཏྟནོ སནྟཀེན ཀསིཝཎིཛྫཱདཱིནི ཀཏྭཱ ཛཱིཝནྟུ ཨེཏེ རཱཛཱནོ’’ཏི ཝཏྭཱ པཀྐམིསྶཱམི. ཏཏོ ཏུམྷེ ‘‘ཀིཾ ནུ, བྷོ, ཨེས བྲཱཧྨཎོ ཝཛྫཱི ཨཱརབྦྷ པཝཏྟཾ ཀཐཾ པཊིབཱཧཏཱི’’ཏི ཝདེཡྻཱཐ. དིཝསབྷཱགེ ཙཱཧཾ ཏེསཾ པཎྞཱཀཱརཾ པེསེསྶཱམི, ཏམྤི གཱཧཱཔེཏྭཱ ཏུམྷེཔི མམ དོསཾ ཨཱརོཔེཏྭཱ བནྡྷནཏཱལ༹ནཱདཱིནི ཨཀཏྭཱཝ ཀེཝལཾ ཁུརམུཎྜཾ མཾ ཀཏྭཱ ནགརཱ ནཱིཧརཱཔེཐ, ཨཐཱཧཾ ‘‘མཡཱ ཏེ ནགརེ པཱཀཱརོ པརིཁཱ ཙ ཀཱརིཏཱ, ཨཧཾ ཐིརདུབྦལཊྛཱནཉྩ ཨུཏྟཱནགམྦྷཱིརཊྛཱནཉྩ ཛཱནཱམི, ན ཙིརསྶཾ དཱནི ཏཾ ཨུཛུཾ ཀརིསྶཱམཱི’’ཏི ཝཀྑཱམི. ཏཾ སུཏྭཱ ཏུམྷེ ‘‘གཙྪཏཱུ’’ཏི ཝདེཡྻཱཐཱཏི. རཱཛཱ སབྦཾ ཨཀཱསི.

ལིཙྪཝཱི ཏསྶ ནིཀྑམནཾ སུཏྭཱ ‘‘སཋོ བྲཱཧྨཎོ, མཱ ཏསྶ གངྒཾ ཨུཏྟཱརེཏུཾ ཨདཏྠཱ’’ཏི ཨཱཧཾསུ. ཏཏྲ ཨེཀཙྩེཧི ‘‘ཨམྷེ ཨཱརབྦྷ ཀཐིཏཏྟཱ ཀིར སོ ཨེཝཾ ཀརོཏཱི’’ཏི ཝུཏྟེ ‘‘ཏེན ཧི བྷཎེ ཨེཏཱུ’’ཏི ཝདིཾསུ. སོ གནྟྭཱ ལིཙྪཝཱི དིསྭཱ ‘‘ཀིམཱགཏཏྠཱ’’ཏི པུཙྪིཏོ ཏཾ པཝཏྟིཾ ཨཱརོཙེསི. ལིཙྪཝིནོ ‘‘ཨཔྤམཏྟཀེན ནཱམ ཨེཝཾ གརུཾ དཎྜཾ ཀཱཏུཾ ན ཡུཏྟ’’ནྟི ཝཏྭཱ ‘‘ཀིཾ ཏེ ཏཏྲ ཋཱནནྟར’’ནྟི པུཙྪིཾསུ. ཝིནིཙྪཡམཧཱམཙྩོཧམསྨཱིཏི. ཏདེཝ ཏེ ཋཱནནྟརཾ ཧོཏཱུཏི. སོ སུཊྛུཏརཾ ཝིནིཙྪཡཾ ཀརོཏི. རཱཛཀུམཱརཱ ཏསྶ སནྟིཀེ སིཔྤཾ ཨུགྒཎྷནྟི. སོ པཏིཊྛིཏགུཎོ ཧུཏྭཱ ཨེཀདིཝསཾ ཨེཀཾ ལིཙྪཝིཾ གཧེཏྭཱ ཨེཀམནྟཾ གནྟྭཱ ‘‘དཱརཀཱ ¶ ཀསནྟཱི’’ཏི པུཙྪི. ཨཱམ, ཀསནྟི. དྭེ གོཎེ ཡོཛེཏྭཱཏི. ཨཱམ, དྭེ གོཎེ ཡོཛེཏྭཱཏི. ཨེཏྟཀཾ ཝཏྭཱ ནིཝཏྟོ. ཏཏོ ཏམཉྙོ ‘‘ཀིཾ ཨཱཙརིཡོ ཨཱཧཱ’’ཏི པུཙྪིཏྭཱ ཏེན ཝུཏྟཾ – ཨསདྡཧནྟོ ‘‘ན མེསོ ཡཐཱབྷཱུཏཾ ཀཐེཏཱི’’ཏི ཏེན སདྡྷིཾ བྷིཛྫི.

བྲཱཧྨཎོ ཨཔརམྤི ཨེཀདིཝསཾ ཨེཀཾ ལིཙྪཝིཾ ཨེཀམནྟཾ ནེཏྭཱ ‘‘ཀེན བྱཉྫནེན བྷུཏྟོསཱི’’ཏི པུཙྪིཏྭཱ ནིཝཏྟོ. ཏམྤི ཨཉྙོ པུཙྪིཏྭཱ ཨསདྡཧནྟོ ཏཐེཝ བྷིཛྫི. བྲཱཧྨཎོ ཨཔརམྤི དིཝསཾ ཨེཀཾ ལིཙྪཝིཾ ཨེཀམནྟཾ ནེཏྭཱ ‘‘ཨཏིདུགྒཏོསི ཀིརཱ’’ཏི པུཙྪི. ཀོ ཨེཝམཱཧཱཏི ¶ . ཨསུཀོ ནཱམ ལིཙྪཝཱིཏི. ཨཔརམྤི ཨེཀམནྟཾ ནེཏྭཱ ‘‘ཏྭཾ ཀིར བྷཱིརུཛཱཏིཀོ’’ཏི པུཙྪི. ཀོ ཨེཝམཱཧཱཏི? ཨསུཀོ ནཱམ ལིཙྪཝཱིཏི. ཨེཝཾ ཨཉྙེན ཨཀཐིཏམེཝ ཨཉྙསྶ ཀཐེནྟོ ཏཱིཧི སཾཝཙྪརེཧི ཏེ རཱཛཱནོ ཨཉྙམཉྙཾ བྷིནྡིཏྭཱ ཡཐཱ དྭེ ཨེཀམགྒེན ན གཙྪནྟི, ཏཐཱ ཀཏྭཱ སནྣིཔཱཏབྷེརིཾ ཙརཱཔེསི. ལིཙྪཝིནོ ‘‘ཨིསྶརཱ སནྣིཔཏནྟུ, སཱུརཱ སནྣིཔཏནྟཱུ’’ཏི ཝཏྭཱ ན སནྣིཔཏིཾསུ. བྲཱཧྨཎོ ‘‘ཨཡཾ དཱནི ཀཱལོ, སཱིགྷཾ ཨཱགཙྪཏཱུ’’ཏི རཉྙོ སཱསནཾ པེསེཏི. རཱཛཱ སུཏྭཱཝ བལབྷེརིཾ ཙརཱཔེཏྭཱ ནིཀྑམི. ཝེསཱལིཀཱ སུཏྭཱ ‘‘རཉྙོ གངྒཾ ཨུཏྟརིཏུཾ ན དསྶཱམཱ’’ཏི བྷེརིཾ ཙརཱཔེསུཾ. ཏེ སུཏྭཱ ‘‘གཙྪནྟུ སཱུརརཱཛཱནོ’’ཏིཨཱདཱིནི ཝཏྭཱ ན སནྣིཔཏིཾསུ. ‘‘ནགརཔྤཝེསནཾ ན དསྶཱམ, དྭཱརཱནི པིདཧིསྶཱམཱ’’ཏི བྷེརིཾ ཙརཱཔེསུཾ. ཨེཀོཔི ན སནྣིཔཏི. ཡཐཱཝིཝཊེཧི དྭཱརེཧི པཝིསིཏྭཱ སབྦེ ཨནཡབྱསནཾ པཱཔེཏྭཱ གཏོ. ཏཾ སནྡྷཱཡེཏཾ ཝུཏྟཾ – ‘‘རཱཛཱཔི ཏམེཝ པེསེཏྭཱ སབྦེཔི བྷིནྡིཏྭཱ གནྟྭཱ ཨནཡབྱསནཾ པཱཔེསཱི’’ཏི.

༢༣. ཏཏིཡེ ཨཔརིཧཱནཱཡ ཧིཏཱཏི ཨཔརིཧཱནིཡཱ (དཱི. ནི. ཊཱི. ༢.༡༣༦), ན པརིཧཱཡནྟི ཨེཏེཧཱིཏི ཝཱ ཨཔརིཧཱནིཡཱ. ཨེཝཾ སངྑེཔཏོ ཝུཏྟམཏྠཾ ཝིཏྠཱརཏོ དསྶེནྟོ ‘‘ཨིདྷཱཔི ཙཱ’’ཏིཨཱདིམཱཧ. ཏཏྠ ཏཏོཏིཨཱདི དིསཱསུ ཨཱགཏསཱསནེ ཝུཏྟཝཙནཾ ཝུཏྟཀཐནཾ. ཝིཧཱརསཱིམཱ ཨཱཀུལཱ ཡསྨཱ ¶ , ཏསྨཱ ཨུཔོསཐཔཝཱརཎཱ ཋིཏཱ. ཨོལཱིཡམཱནཀོཏི པཱལི༹ཏོ ཨཏྠཏོ ཙ ཝིནསྶམཱནཀོ. ཨུཀྑིཔཱཔེནྟཱཏི པགུཎབྷཱཝཀརཎེན ཨཏྠསཾཝཎྞནཱཝསེན ཙ པགྒཎྷནྟཱ.

སཱཝཏྠིཡཾ བྷིཀྑཱུ ཝིཡ (པཱརཱ. ༥༦༥) པཱཙིཏྟིཡཾ དེསཱཔེཏབྦོཏི པཉྙཱཔེནྟཱ. ཝཛྫིཔུཏྟཀཱ ཝིཡ (ཙཱུལ༹ཝ. ༤༤༦) དསཝཏྠུདཱིཔནེན. ཏཐཱ ཨཀརོནྟཱཏི ནཝཾ ཀཏིཀཝཏྟཾ ཝཱ སིཀྑཱཔདཾ ཝཱ ཨམདྡནྟཱ དྷམྨཝིནཡཏོ སཱསནཾ དཱིཔེནྟཱ ཁུདྡཀམྤི ཙ སིཀྑཱཔདཾ ཨསམཱུཧནནྟཱ. ཨཱཡསྨཱ མཧཱཀསྶཔོ ཝིཡ ཙཱཏི ‘‘སུཎཱཏུ མེ, ཨཱཝུསོ, སངྒྷོ, སནྟཱམྷཱཀཾ སིཀྑཱཔདཱནི གིཧིགཏཱནི. གིཧིནོཔི ཛཱནནྟི ‘ཨིདཾ ཝོ སམཎཱནཾ སཀྱཔུཏྟིཀཱནཾ ཀཔྤཏི, ཨིདཾ ཝོ ན ཀཔྤཏཱི’ཏི. སཙེཔི ཧི མཡཾ ཁུདྡཱནུཁུདྡཀཱནི སིཀྑཱཔདཱནི སམཱུཧནིསྶཱམ, བྷཝིསྶནྟི ཝཏྟཱརོ ‘དྷཱུམཀཱལིཀཾ སམཎེན གོཏམེན སཱཝཀཱནཾ སིཀྑཱཔདཾ པཉྙཏྟཾ, ཡཱཝིམེསཾ སཏྠཱ ཨཊྛཱསི, ཏཱཝིམེ སིཀྑཱཔདེསུ སིཀྑིཾསུ. ཡཏོ ཨིམེསཾ སཏྠཱ པརིནིབྦུཏོ, ན དཱནིམེ སིཀྑཱཔདེསུ ¶ སིཀྑནྟཱི’ཏི. ཡདི སངྒྷསྶ པཏྟཀལླཾ, སངྒྷོ ཨཔཉྙཏྟཾ ན པཉྙཔེཡྻ, པཉྙཏྟཾ ན སམུཙྪིནྡེཡྻ, ཡཐཱཔཉྙཏྟེསུ སིཀྑཱཔདེསུ སམཱདཱཡ ཝཏྟེཡྻཱ’’ཏི ཨིམཾ (ཙཱུལ༹ཝ. ༤༤༢) ཏནྟིཾ ཋཔེནྟོ ཨཱཡསྨཱ མཧཱཀསྶཔོ ཝིཡ ཙ.

ཐིརབྷཱཝཔྤཏྟཱཏི སཱསནེ ཐིརབྷཱཝཾ ཨནིཝཏྟིཏབྷཱཝཾ ཨུཔགཏཱ. ཐེརཀཱརཀེཧཱིཏི ཐེརབྷཱཝསཱདྷཀེཧི སཱིལཱདིགུཎེཧི ཨསེཀྑདྷམྨེཧི. བཧཱུ རཏྟིཡོཏི པབྦཛིཏཱ ཧུཏྭཱ བཧཱུ རཏྟིཡོ ཛཱནནྟི. སཱིལཱདིགུཎེསུ པཏིཊྛཱཔནམེཝ སཱསནེ པརིཎཱཡཀཏཱཏི ཨཱཧ ‘‘ཏཱིསུ སིཀྑཱསུ པཝཏྟེནྟཱི’’ཏི. ཨོཝཱདཾ ན དེནྟི ཨབྷཱཛནབྷཱཝཏོ. པཝེཎིཀཐནྟི ཨཱཙརིཡཔརམྤརཱབྷཏཾ སམྨཱཔཊིཔཏྟིདཱིཔནཾ དྷམྨཀཐཾ. སཱརབྷཱུཏཾ དྷམྨཔརིཡཱཡནྟི སམཐཝིཔསྶནཱམགྒཕལསམྤཱཔནེན སཱསནེ སཱརབྷཱུཏཾ བོཛ྄ཛྷངྒཀོསལླཨནུཏྟརསཱིཏིབྷཱཝ- (ཨ. ནི. ༦.༨༥) ཨདྷིཙིཏྟསུཏྟཱདིདྷམྨཏནྟིཾ. ཨཱདིཀཾ ཨོཝཱདནྟི ཨཱདི-སདྡེན ‘‘ཨེཝཾ ཏེ ཨཱལོཀེཏབྦཾ, ཨེཝཾ ཏེ ཝིལོཀེཏབྦཾ, ཨེཝཾ ཏེ སམིཉྫིཏབྦཾ, ཨེཝཾ ཏེ པསཱརེཏབྦཾ, ཨེཝཾ ཏེ སངྒྷཱཊིཔཏྟཙཱིཝརཾ དྷཱརེཏབྦ’’ནྟི ཨོཝཱདཾ སངྒཎྷཱཏི.

པུནབྦྷཝདཱནཾ པུནབྦྷཝོ ཨུཏྟརཔདལོཔེན. ཨིཏརེཏི ཡེ ན པཙྩཡཝསིཀཱ ན ཨཱམིསཙཀྑུཀཱ, ཏེ ན གཙྪནྟི ཏཎྷཱཡ ཝསཾ.

ཨཱརཉྙཀེསཱུཏི ¶ ཨརཉྙབྷཱགེསུ ཨརཉྙཔརིཡཱཔནྣེསུ. ནནུ ཡཏྠ ཀཏྠཙིཔི ཏཎྷཱ སཱཝཛྫཱ ཨེཝཱཏི ཙོདནཾ སནྡྷཱཡཱཧ ‘‘གཱམནྟསེནཱསནེསུ ཧཱི’’ཏིཨཱདི. ཏེན ‘‘ཨནུཏྟརེསུ ཝིམོཀྑེསུ པིཧཾ ཨུཔཊྛཱཔཡཏོ’’ཏི ཨེཏྠ ཝུཏྟཔིཧཱདཡོ པིཡ ཨཱརཉྙཀསེནཱསནེསུ སཱལཡཏཱ སེཝིཏབྦཔཀྑིཀཱ ཨེཝཱཏི དསྶེཏི.

ཨཏྟནཱཝཱཏི སཡམེཝ. ཏེན པརེཧི ཨནུསྶཱཧིཏཱནཾ སརསེནེཝ ཨནཱགཏཱནཾ པེསལཱནཾ བྷིཀྑཱུནཾ ཨཱགམནཾ, ཨཱགཏཱནཉྩ ཕཱསུཝིཧཱརཾ པཙྩཱསཱིསནྟཱིཏི དསྶེཏི. ཨིམིནཱཝ ནཱིཧཱརེནཱཏི ཨིམཱཡ པཊིཔཏྟིཡཱ. ཨགྒཧིཏདྷམྨགྒཧཎནྟི ཨགྒཧིཏསྶ པརིཡཏྟིདྷམྨསྶ ཨུགྒཧཎཾ. གཧིཏསཛ྄ཛྷཱཡཀརཎནྟི ཨུགྒཧིཏསྶ སུཊྛུ ཨཏྠཙིནྟནཾ. ཙིནྟརཏྠོ ཧི ཨཡཾ སཛ྄ཛྷཱཡསདྡོ. ཨེནྟཱིཏི ཨུཔགཙྪནྟི. ནིསཱིདནྟི ཨཱསནཔཉྙཱཔནཱདིནཱ.

༢༤-༢༦. ཙཏུཏྠེ ¶ ཀརོནྟོཡེཝཱཏི ཡཐཱཝུཏྟཾ ཏིརཙྪཱནཀཐཾ ཀཐེནྟོཡེཝ. ཨཏིརཙྪཱནཀཐཱབྷཱཝེཔི ཏསྶ ཏཏྠ ཏཔྤརབྷཱཝདསྶནཏྠཾ ཨཝདྷཱརཎཝཙནཾ. པརིཡནྟཀཱརཱིཏི སཔརིཡནྟཾ ཀཏྭཱ ཝཏྟཱ. ‘‘པརིཡནྟཝཏིཾ ཝཱཙཾ བྷཱསིཏཱ’’ཏི (དཱི. ནི. ༡.༩, ༡༩༤) ཧི ཝུཏྟཾ. ཨཔྤབྷསྶོཝཱཏི པརིམིཏཀཐོཡེཝ ཨེཀནྟེན ཀཐེཏབྦསྶེཝ ཀཐནཏོ. སམཱཔཏྟིསམཱཔཛྫནཾ ཨརིཡོ ཏུཎྷཱིབྷཱཝོ. ནིདྡཱཡཏིཡེཝཱཏི ནིདྡོཀྐམནེ ཨནཱདཱིནཝདསྶཱི ནིདྡཱཡཏིཡེཝ, ཨིརིཡཱཔཐཔརིཝཏྟནཱདིནཱ ན ནཾ ཝིནོདེཏི. ཨེཝཾ སཾསཊྛོཝཱཏི ཝུཏྟནཡེན གཎསངྒཎིཀཱཡ སཾསཊྛོ ཨེཝ ཝིཧརཏི. དུསྶཱིལཱ པཱཔིཙྪཱ ནཱམཱཏི སཡཾ ནིསྶཱིལཱ ཨསནྟགུཎསམྦྷཱཝནིཙྪཱཡ སམནྣཱགཏཏྟཱ པཱཔཱ ལཱམཀཱ ཨིཙྪཱ ཨེཏེསནྟི པཱཔིཙྪཱ. པཱཔཔུགྒལེཧི མིཏྟིཀརཎཏོ པཱཔམིཏྟཱ. ཏེཧི སདཱ སཧཔཝཏྟནེན པཱཔསཧཱཡཱ. ཏཏྠ ནིནྣཏཱདིནཱ ཏདདྷིམུཏྟཏཱཡ པཱཔསམྤཝངྐཱ. པཉྩམཱདཱིནི ཨུཏྟཱནཏྠཱནིཡེཝ.

དུཏིཡསཏྟཀསུཏྟཱདིཝཎྞནཱ ནིཊྛིཏཱ.

༢༧-༣༡. སཏྟམེ ¶ ཨནིཙྩཱཏི ཨནུཔསྶཏི ཨེཏཱཡཱཏི ཨནིཙྩཱནུཔསྶནཱ. ཏཐཱཔཝཏྟཝིཔསྶནཱ པན ཡསྨཱ ཨཏྟནཱ སཧགཏསཉྙཱཡ བྷཱཝིཏཱཡ བྷཱཝིཏཱ ཨེཝ ཧོཏི, ཏསྨཱ ཝུཏྟཾ ‘‘ཨནིཙྩཱནུཔསྶནཱདཱིཧི སཧགཏསཉྙཱ’’ཏི. ཨིམཱ སཏྟ ལོཀིཡཝིཔསྶནཱཔི ཧོནྟི ‘‘ཨནིཙྩ’’ནྟིཨཱདིནཱ པཝཏྟནཏོ. ‘‘ཨེཏཾ སནྟཾ ཨེཏཾ པཎཱིཏཾ ཡདིདཾ སབྦསངྑཱརསམཐོ’’ཏི ཨཱགཏཝསེན པནེཏྠ དྭེ ལོཀུཏྟརཱ ཧོནྟཱིཏི ཝེདིཏབྦཱ. ‘‘ཝིརཱགོ ནིརོདྷོ’’ཏི ཧི ཏཏྠ ནིབྦཱནཾ ཝུཏྟནྟི ཨིདྷ ཝིརཱགསཉྙཱ, ཏཱ ཝུཏྟསཉྙཱ ནིབྦཱནཱརམྨཎཱཔི སིཡུཾ. སེསམེཏྠ སུཝིཉྙེཡྻམེཝ. ཨཊྛམཱདཱིནི ཨུཏྟཱནཏྠཱནེཝ.

༣༦. ཙཏུཏྠསྶ ¶ པཉྩམེ ཨཏྟནོ གུཡ྄ཧཾ ཏསྶ ཨཱཝིཀརོཏཱིཏི ཨཏྟནོ གུཡ྄ཧཾ ནིགྒུཧིཏུཾ ཡུཏྟཀཐཾ ཨཉྙསྶ ཨཀཐེཏྭཱ ཏསྶེཝ ཨཱཙིཀྑཏི. ཏསྶ གུཡ྄ཧཾ ཨཉྙེསཾ ནཱཙིཀྑཏཱིཏི ཏེན ཀཐིཏགུཡ྄ཧཾ ཡཐཱ ཨཉྙེ ན ཛཱནནྟི, ཨེཝཾ ཨནཱཝིཀརོནྟོ ཚཱདེཏི.

༣༧-༤༢. ཚཊྛེ པིཡོ ཙ ཧོཏི མནཱཔོ ཙཱཏི ཀལྱཱཎམིཏྟལཀྑཎཾ དསྶིཏཾ. ཀལྱཱཎམིཏྟོ ཧི སདྡྷཱསམྤནྣོ ཙ ཧོཏི སཱིལསམྤནྣོ སུཏསམྤནྣོ ཙཱགསམྤནྣོ ཝཱིརིཡསམྤནྣོ སཏིསམྤནྣོ སམཱདྷིསམྤནྣོ པཉྙཱསམྤནྣོ. ཏཏྠ སདྡྷཱསམྤཏྟིཡཱ སདྡཧཏི ཏཐཱགཏསྶ སམྦོདྷིཾ ཀམྨཉྩ ཀམྨཕལཉྩ, ཏེན སམྦོདྷིཡཱ ཧེཏུབྷཱུཏཾ སཏྟེསུ ཧིཏསུཁཾ ན པརིཙྩཛཏི ¶ . སཱིལསམྤཏྟིཡཱ སཏྟཱནཾ པིཡོ ཧོཏི གརུ བྷཱཝནཱིཡོ ཙོདཀོ པཱཔགརཧཱི ཝཏྟཱ ཝཙནཀྑམོ. སུཏསམྤཏྟིཡཱ སཙྩཔཊིཙྩསམུཔྤཱདཱདིཔཊིསཾཡུཏྟཱནཾ གམྦྷཱིརཱནཾ ཀཐཱནཾ ཀཏྟཱ ཧོཏི. ཙཱགསམྤཏྟིཡཱ ཨཔྤིཙྪོ ཧོཏི སནྟུཊྛོ པཝིཝིཏྟོ ཨསཾསཊྛོ. ཝཱིརིཡསམྤཏྟིཡཱ ཨཱརདྡྷཝཱིརིཡོ ཧོཏི ཨཏྟཧིཏཔརཧིཏཔཊིཔཏྟིཡཾ. སཏིསམྤཏྟིཡཱ ཨུཔཊྛིཏསྶཏཱི ཧོཏི. སམཱདྷིསམྤཏྟིཡཱ ཨཝིཀྑིཏྟོ ཧོཏི སམཱཧིཏཙིཏོ. པཉྙཱསམྤཏྟིཡཱ ཨཝིཔརཱིཏཾ པཛཱནཱཏི. སོ སཏིཡཱ ཀུསལཱཀུསལཱནཾ དྷམྨཱནཾ གཏིཡོ སམནྣེསམཱནོ པཉྙཱཡ སཏྟཱནཾ ཧིཏཱཧིཏཾ ཡཐཱབྷཱུཏཾ ཛཱནིཏྭཱ སམཱདྷིནཱ ཏཏྠ ཨེཀགྒཙིཏྟོ ཧུཏྭཱ ཝཱིརིཡེན སཏྟེ ཨཧིཏེ ནིསེདྷེཏྭཱ ཧིཏེ ནིཡོཛེཏི. ཏེན ཝུཏྟཾ ‘‘པིཡོ…པེ… ནིཡོཛེཏཱི’’ཏི. སཏྟམཱདཱིནི ཨུཏྟཱནཏྠཱནི.

དུཏིཡམིཏྟསུཏྟཱདིཝཎྞནཱ ནིཊྛིཏཱ.

༤༤. པཉྩམསྶ ¶ པཋམེ ཡསྨཱ ནིདསྶནཏྠེ ནིཔཱཏོ (དཱི. ནི. ཊཱི. ༢.༡༢༧) ཏསྨཱ སེཡྻཐཱཔི མནུསྶཱཏི ཡཐཱ མནུསྶཱཏི ཝུཏྟཾ ཧོཏི. ཝིསེསོ ཧོཏིཡེཝ སཏིཔི བཱཧིརསྶ ཀཱརཎསྶ ཨབྷེདེ ཨཛ྄ཛྷཏྟིཀསྶ བྷིནྣཏྟཱ. ནཱནཏྟཾ ཀཱཡེ ཨེཏེསཾ, ནཱནཏྟོ ཝཱ ཀཱཡོ ཨེཏེསནྟི ནཱནཏྟཀཱཡཱ. ཨིམིནཱ ནཡེན སེསཔདེསུཔི ཨཏྠོ ཝེདིཏབྦོ. ནེསནྟི མནུསྶཱནཾ. ནཱནཏྟཱ སཉྙཱ ཨེཏེསཾ ཨཏྠཱིཏི ནཱནཏྟསཉྙིནོ. སུཁསམུསྶཡཏོ ཝིནིཔཱཏོ ཨེཏེསཾ ཨཏྠཱིཏི ཝིནིཔཱཏིཀཱ སཏིཔི དེཝབྷཱཝེ དིབྦསམྤཏྟིཡཱ ཨབྷཱཝཏོ. ཨཔཱཡེསུ ཝཱ གཏོ ནཏྠི ནིཔཱཏོ ཨེཏེསནྟི ཝིནིཔཱཏིཀཱ. ཏེནཱཧ ‘‘ཙཏུཨཔཱཡཝིནིམུཏྟཱ’’ཏི. པིཡངྐརམཱཏཱདཱིནཾ ཝིཡཱཏི པིཡངྐརམཱཏཱ ཀིར ཡཀྑིནཱི པཙྩཱུསསམཡེ ཨནུརུདྡྷཏྠེརསྶ དྷམྨཾ སཛ྄ཛྷཱཡཏོ སུཏྭཱ –

‘‘མཱ ¶ སདྡམཀརཱི པིཡངྐར, བྷིཀྑུ དྷམྨཔདཱནི བྷཱསཏི;

ཨཔི དྷམྨཔདཾ ཝིཛཱནིཡ, པཊིཔཛྫེམ ཧིཏཱཡ ནོ སིཡཱ.

‘‘པཱཎེསུ ཙ སཾཡམཱམསེ, སམྤཛཱནམུསཱ ན བྷཎཱམསེ;

སིཀྑེམ སུསཱིལྱམཏྟནོ, ཨཔི མུཙྩེམ པིསཱཙཡོནིཡཱ’’ཏི. (སཾ. ནི. ༡.༢༤༠) –

ཨེཝཾ པུཏྟཀཾ སཉྙཱཔེཏྭཱ ཏཾ དིཝསཾ སོཏཱཔཏྟིཕལཾ པཏྟཱ. ཨུཏྟརམཱཏཱ པན བྷགཝཏོ དྷམྨཾ སུཏྭཱཝ སོཏཱཔནྣཱ ཛཱཏཱ.

བྲཧྨཀཱཡེ པཋམཛ྄ཛྷཱནནིབྦཏྟེ བྲཧྨསམཱུཧེ, བྲཧྨནིཀཱཡེ ཝཱ བྷཝཱཏི བྲཧྨཀཱཡིཀཱ. མཧཱབྲཧྨུནོ པརིསཱཡ བྷཝཱཏི བྲཧྨཔཱརིསཛྫཱ ཏསྶ པརིཙཱརཀཊྛཱནེ ཋིཏཏྟཱ. མཧཱབྲཧྨུནོ པུརོཧིཏཊྛཱནེ ཋིཏཱཏི བྲཧྨཔུརོཧིཏཱ. ཨཱཡུཝཎྞཱདཱིཧི མཧནྟཱ བྲཧྨཱནོཏི མཧཱབྲཧྨཱནོ. སཏིཔི ཏེསཾ ཏིཝིདྷཱནམྤི པཋམེན ཛྷཱནེན གནྟྭཱ ནིབྦཏྟབྷཱཝེ ཛྷཱནསྶ པན པཝཏྟིབྷེདེན ཨཡཾ ཝིསེསོཏི དསྶེཏུཾ ‘‘བྲཧྨཔཱརིསཛྫཱ པནཱ’’ཏིཨཱདི ཝུཏྟཾ. པརིཏྟེནཱཏི ཧཱིནེན. སཱ ཙསྶ ཧཱིནཏཱ ཚནྡཱདཱིནཾ ཧཱིནཏཱཡ ཝེདིཏབྦཱ. པཊིལདྡྷམཏྟཾ ཝཱ ཧཱིནཾ. ཀཔྤསྶཱཏི ཨསངྑྱེཡྻཀཔྤསྶ ¶ . ཧཱིནཔཎཱིཏཱནཾ མཛ྄ཛྷེ བྷཝཏྟཱ མཛ྄ཛྷིམཾ. སཱ ཙསྶ མཛ྄ཛྷིམཏཱ ཚནྡཱདཱིནཾ མཛ྄ཛྷིམཏཱཡ ཝེདིཏབྦཱ. པཊིལབྷིཏྭཱ ནཱཏིསུབྷཱཝིཏཾ ཝཱ མཛ྄ཛྷིམཾ. ཨུཔཌྜྷཀཔྤོཏི ཨསངྑྱེཡྻཀཔྤསྶ ཨུཔཌྜྷཀཔྤོ. ཝིཔྥཱརིཀཏརོཏི བྲཧྨཔཱརིསཛྫེཧི པམཱཎཏོ ཝིཔུལཏརོ སབྷཱཝཏོ ཨུལཱ༹རཏརོ ཙ ཧོཏི. སབྷཱཝེནཔི ཧི ཨུལཱ༹རཏམོཝ. ཏཾ པནེཏྠ ཨཔྤམཱཎཾ. ཏསྶ ཧི པརིཏྟཱབྷཱདཱིནཾ པརིཏྟསུབྷཱདཱིནཉྩ ཀཱཡེ སཏིཔི སབྷཱཝཝེམཏྟེ ཨེཀཏྟཝསེནེཝ ཝཝཏྠཔཱིཡཏཱིཏི ‘‘ཨེཀཏྟཀཱཡཱ’’ཏྭེཝ ཏེ ཝུཙྩནྟི. པཎཱིཏེནཱཏི ཨུཀྐཊྛེན. སཱ ཙསྶ ཨུཀྐཊྛཏཱ ཚནྡཱདཱིནཾ ཨུཀྐཊྛཏཱཡ ཝེདིཏབྦཱ. སུབྷཱཝིཏཾ ཝཱ, སམྨདེཝ, ཝསིབྷཱཝཾ པཱཔིཏཾ པཎཱིཏཾ ‘‘པདྷཱནབྷཱཝཾ ནཱིཏ’’ནྟི ཀཏྭཱ. ཨིདྷཱཔི ཀཔྤོ ཨསངྑྱེཡྻཀཔྤཝསེནེཝ ཝེདིཏབྦོ པརིཔུཎྞམཧཱཀཔྤསྶ ཨསམྦྷཝཏོ. ཨིཏཱིཏི ཨེཝཾ ཝུཏྟཔྤཀཱརེན. ཏེཏི ‘‘བྲཧྨཀཱཡིཀཱ’’ཏི ཝུཏྟཱ ཏིཝིདྷཱཔི བྲཧྨཱནོ. སཉྙཱཡ ཨེཀཏྟཱཏི ཏིཧེཏུཀབྷཱཝེན ཨེཀསབྷཱཝཏྟཱ. ན ཧི ཏསྶཱ སམྤཡུཏྟདྷམྨཝསེན ཨཉྙོཔི ཀོཙི བྷེདོ ཨཏྠི. ཨེཝནྟི ཨིམིནཱ ནཱནཏྟཀཱཡཱ ཨེཀཏྟསཉྙིནོ གཧིཏཱཏི དསྶེཏི.

དཎྜཨུཀྐཱཡཱཏི ¶ དཎྜདཱིཔིཀཱཡ. སརཏི དྷཱཝཏི, ཝིསྶརཏི ཝིཔྤཀིཎྞཱ ཝིཡ དྷཱཝཏི. དྭེ ཀཔྤཱཏི དྭེ མཧཱཀཔྤཱ. ཨིཏོ པརེསུཔི ཨེསེཝ ནཡོ. ཨིདྷཱཏི ཨིམསྨིཾ སུཏྟེ. ཨུཀྐཊྛཔརིཙྪེདཝསེན ཨཱབྷསྶརགྒཧཎེནེཝ སབྦེཔི ཏེ པརིཏྟཱབྷཱཨཔྤམཱཎཱབྷཱཔི གཧིཏཱ.

སུནྡརཱ པབྷཱ སུབྷཱ, ཏཱཡ ཀིཎྞཱ སུབྷཱཀིཎྞཱཏི ཝཏྟབྦེ. བྷཱ-སདྡསྶ རསྶཏྟཾ ཨནྟིམ-ཎ-ཀཱརསྶ ཧ-ཀཱརཉྩ ཀཏྭཱ ‘‘སུབྷཀིཎྷཱ’’ཏི ཝུཏྟཱ. ཨཊྛཀཐཱཡཾ པན ནིཙྩལཱཡ ཨེཀགྒྷནཱཡ པབྷཱཡ སུབྷོཏི པརིཡཱཡཝཙནནྟི ‘‘སུབྷེན ཨོཀིཎྞཱ ཝིཀིཎྞཱ’’ཏི ཨཏྠོ ཝུཏྟོ. ཨེཏྠཱཔི ཨནྟིམ-ཎ-ཀཱརསྶ ཧ-ཀཱརཀརཎཾ ཨིཙྪིཏབྦམེཝ. ན ཚིཛྫིཏྭཱ པབྷཱ གཙྪཏི ཨེཀགྒྷནཏྟཱ. ཙཏུཏྠཝིཉྙཱཎཊྛིཏིམེཝ བྷཛནྟི ཀཱཡསྶ སཉྙཱཡ ཙ ཨེཀརཱུཔཏྟཱ. ཝིཔུལསནྟསུཁཱཡུཝཎྞཱདིཕལཏྟཱ ཝེཧཔྥལཱ. ཨེཏྠཱཏི ཝིཉྙཱཎཊྛིཏིཡཾ.

ཝིཝཊྚཔཀྑེ ཋིཏཱ ཨཔུནརཱཝཏྟནཏོ. ‘‘ན སབྦཀཱལིཀཱ’’ཏི ཝཏྭཱ ཏམེཝ ཨསབྦཀཱལིཀཏྟཾ ཝིབྷཱཝེཏུཾ ‘‘ཀཔྤསཏསཧསྶམྤཱི’’ཏིཨཱདི ཝུཏྟཾ. སོལ༹སཀཔྤསཧསྶཙྩཡེན ཨུཔྤནྣཱནཾ སུདྡྷཱཝཱསབྲཧྨཱནཾ པརིནིབྦཱཡནཏོ ཨཉྙེསཉྩ ཏཏྠ ཨནུཔྤཛྫནཏོ བུདྡྷསུཉྙེ ལོཀེ སུཉྙཾ ཏཾ ཋཱནཾ ཧོཏི, ཏསྨཱ སུདྡྷཱཝཱསཱ ན སབྦཀཱལིཀཱ. ཁནྡྷཱཝཱརཊྛཱནསདིསཱ ཧོནྟི སུདྡྷཱཝཱསབྷཱུམིཡོ. ཨིམིནཱ སུཏྟེན སུདྡྷཱཝཱསཱནཾ སཏྟཱཝཱསབྷཱཝདཱིཔནེནེཝ ཝིཉྙཱཎཊྛིཏིབྷཱཝོཔི དཱིཔིཏོ ཧོཏི, ཏསྨཱ སུདྡྷཱཝཱསཱཔི སཏྟསུ ཝིཉྙཱཎཊྛིཏཱིསུ ཙཏུཏྠཝིཉྙཱཎཊྛིཏིཾ, ནཝསུ སཏྟཱཝཱསེསུ ཙཏུཏྠསཏྟཱཝཱསཉྩ བྷཛནྟི.

སུཁུམཏྟཱཏི ¶ སངྑཱརཱཝསེསསུཁུམབྷཱཝཔྤཏྟཏྟཱ. པརིབྱཏྟཝིཉྙཱཎཀིཙྩཱབྷཱཝཏོ ནེཝ ཝིཉྙཱཎཾ, ན སབྦསོ ཨཝིཉྙཱཎཾ ཧོཏཱིཏི ནཱཝིཉྙཱཎཾ, ཏསྨཱ པརིཔྥུཏཝིཉྙཱཎཀིཙྩཝནྟཱིསུ ཝིཉྙཱཎཊྛིཏཱིསུ ན ཝུཏྟཾ.

སཏྟཝིཉྙཱཎཊྛིཏིསུཏྟཝཎྞནཱ ནིཊྛིཏཱ.

༤༥. དུཏིཡེ སམཱདྷིཔརིཀྑཱརཱཏི ཨེཏྠ ཏཡོ པརིཀྑཱརཱ. ‘‘རཐོ སཱིལཔརིཀྑཱརོ, ཛྷཱནཀྑོ ཙཀྐཝཱིརིཡོ’’ཏི (སཾ. ནི. ༥.༤) ཧི ཨེཏྠ ཨལངྐཱརོ པརིཀྑཱརོ ¶ ནཱམ. ‘‘སཏྟཧི ནགརཔརིཀྑཱརེཧི སུཔརིཀྑཏཾ ཧོཏཱི’’ཏི (ཨ. ནི. ༧.༦༧) ཨེཏྠ པརིཝཱརོ པརིཀྑཱརོ ནཱམ. ‘‘གིལཱནཔཙྩཡ…པེ… ཛཱིཝིཏཔརིཀྑཱརཱ’’ཏི (མ. ནི. ༡.༡༩༡-༡༩༢) ཨེཏྠ སམྦྷཱརོ པརིཀྑཱརོ ནཱམ. སོ ཨིདྷ ཨདྷིཔྤེཏོཏི ཨཱཧ ‘‘མགྒསམཱདྷིསྶ སམྦྷཱརཱ’’ཏི. པརིཝཱརཔརིཀྑཱརོཔི ཝཊྚཏིཡེཝ. པརིཝཱརོ ཧི སམྨཱདིཊྛཱདཡོ མགྒདྷམྨཱ སམྨཱསམཱདྷིསྶ སཧཛཱཏཱདིཔཙྩཡབྷཱཝེན པརིཀརཎཏོ ཨབྷིསངྑརཎཏོ. པརིཀྑཏཱཏི པརིཝཱརིཏཱ. ཨཡཾ ཝུཙྩཏི ཨརིཡོ སམྨཱསམཱདྷཱིཏི ཨཡཾ སཏྟཧི རཏནེཧི པརིཝུཏོ ཙཀྐཝཏྟཱི ཝིཡ སཏྟཧི ཨངྒེཧི པརིཝུཏོ ཨརིཡོ སམྨཱསམཱདྷཱིཏི ཝུཙྩཏི. ཨུཔེཙྩ ནིསྶཱིཡཏཱིཏི ཨུཔནིསཱ, སཧ ཨུཔནིསཱཡཱཏི སཨུཔནིསོ, སཨུཔནིསྶཡོ ཨཏྠོ, སཔརིཝཱརོཡེཝཱཏི ཝུཏྟཾ ཧོཏི. སཧཀཱརིཀཱརཎབྷཱུཏོ ཧི དྷམྨསམཱུཧོ ཨིདྷ ‘‘ཨུཔནིསོ’’ཏི ཨདྷིཔྤེཏོ.

སམཱདྷིཔརིཀྑཱརསུཏྟཝཎྞནཱ ནིཊྛིཏཱ.

༤༦. ཏཏིཡེ ཨནུཌཧནཊྛེནཱཏི ཀཱམཾ ཨཱཧུནེཡྻགྒིཨཱདཡོ ཏཡོ ཨགྒཱི བྲཱཧྨཎེཧིཔི ཨིཙྪིཏཱ སནྟི. ཏེ པན ཏེཧི ཨིཙྪིཏམཏྟཱཝ, ན སཏྟཱནཾ ཏཱདིསཱ ཨཏྠསཱདྷཀཱ. ཡེ པན སཏྟཱནཾ ཨཏྠསཱདྷཀཱ, ཏེ དསྶེཏུཾ ‘‘ཨཱཧུནཾ ཝུཙྩཏཱི’’ཏིཨཱདི ཝུཏྟཾ. ཏཏྠ ཨཱནེཏྭཱ ཧུནནཾ པཱུཛནཾ ‘‘ཨཱཧུན’’ནྟི ཝུཏྟཾ, ཏཾ ཨཱཧུནཾ ཨརཧནྟཱི མཱཏཱཔིཏརོ. ཏེནཱཧ བྷགཝཱ – ‘‘ཨཱཧུནེཡྻཱཏི, བྷིཀྑཝེ, མཱཏཱཔིཏཱུནཾ ཨེཏཾ ཨདྷིཝཙན’’ནྟི (ཨིཏིཝུ. ༡༠༦). ཡདགྒེན ཙ ཏེ པུཏྟཱནཾ བཧཱུཔཀཱརཏཱཡ ¶ ཨཱཧུནེཡྻཱཏི, ཏེསུ སམྨཱཔཊིཔཏྟི ནེསཾ ཧིཏསུཁཱཝཧཱ, ཏདགྒེན ཏེསུ མིཙྪཱཔཊིཔཏྟི ཨཧིཏདུཀྑཱཝཧཱཏི ཨཱཧ ‘‘ཏེསུ…པེ… ནིབྦཏྟནྟཱི’’ཏི.

སྭཱཡམཏྠོ (དཱི. ནི. ཨཊྛ. ༣.༣༠༥) མིཏྟཝིནྡཀཝཏྠུནཱ ཝེདིཏབྦོ. མིཏྟཝིནྡཀོ ཧི མཱཏརཱ, ‘‘ཏཱཏ, ཨཛྫ ཨུཔོསཐིཀོ ཧུཏྭཱ ཝིཧཱརེ སབྦརཏྟིཾ དྷམྨསྶཝནཾ སུཎོཧི, སཧསྶཾ ཏེ དསྶཱམཱི’’ཏི ཝུཏྟོ དྷནལོབྷེན ཨུཔོསཐཾ སམཱདཱཡ ཝིཧཱརཾ གནྟྭཱ ‘‘ཨིདཾ ཋཱནཾ ཨཀུཏོབྷཡ’’ནྟི སལླཀྑེཏྭཱ དྷམྨཱསནསྶ ཧེཊྛཱ ནིཔནྣོ སབྦརཏྟིཾ ནིདྡཱཡིཏྭཱ གྷརཾ ¶ ཨགམཱསི. མཱཏཱ པཱཏོཝ ཡཱགུཾ པཙིཏྭཱ ཨུཔནཱམེསི. སོ སཧསྶཾ གཧེཏྭཱཝ པིཝི. ཨཐསྶ ཨེཏདཧོསི ‘‘དྷནཾ སཾཧརིསྶཱམཱི’’ཏི. སོ ནཱཝཱཡ སམུདྡཾ པཀྑནྡིཏུཀཱམོ ཨཧོསི. ཨཐ ནཾ མཱཏཱ, ‘‘ཏཱཏ, ཨིམསྨིཾ ཀུལེ ཙཏྟཱལཱིསཀོཊིདྷནཾ ཨཏྠི, ཨལཾ གམནེནཱ’’ཏི ནིཝཱརེཏི. སོ ཏསྶཱ ཝཙནཾ ཨནཱདིཡིཏྭཱ གཙྪཏི ཨེཝ. སཱ པུརཏོ ཨཊྛཱསི. ཨཐ ནཾ ཀུཛ྄ཛྷིཏྭཱ ‘‘ཨཡཾ མཡ྄ཧཾ པུརཏོ ཏིཊྛཏཱི’’ཏི པཱདེན པཧརིཏྭཱ པཏིཏཾ ཨནྟརཾ ཀཏྭཱ ཨགམཱསི.

མཱཏཱ ཨུཊྛཧིཏྭཱ ‘‘མཱདིསཱཡ མཱཏརི ཨེཝརཱུཔཾ ཀམྨཾ ཀཏྭཱ གཏསྶ ཏེ གཏཊྛཱནེ སུཁཾ བྷཝིསྶཏཱིཏི ཨེཝཾསཉྙཱི ནཱམ ཏྭཾ པུཏྟཱ’’ཏི ཨཱཧ. ཏསྶ ནཱཝཾ ཨཱརུཡ྄ཧ གཙྪཏོ སཏྟམེ དིཝསེ ནཱཝཱ ཨཊྛཱསི. ཨཐ ཏེ མནུསྶཱ ‘‘ཨདྡྷཱ ཨེཏྠ པཱཔཔུགྒལོ ཨཏྠི, སལཱཀཾ དེཐཱ’’ཏི ཨཱཧཾསུ. སལཱཀཱ དཱིཡམཱནཱ ཏསྶེཝ ཏིཀྑཏྟུཾ པཱཔུཎི. ཏེ ཏསྶ ཨུལུ༹མྤཾ དཏྭཱ ཏཾ སམུདྡེ པཀྑིཔིཾསུ. སོ ཨེཀཾ དཱིཔཾ གནྟྭཱ ཝིམཱནཔེཏཱིཧི སདྡྷིཾ སམྤཏྟིཾ ཨནུབྷཝནྟོ ཏཱཧི ‘‘པུརཏོ པུརཏོ མཱ ཨགམཱསཱི’’ཏི ཝུཙྩམཱནོཔི ཏདྡིགུཎཾ ཏདྡིགུཎཾ སམྤཏྟིཾ པསྶནྟོ ཨནུཔུབྦེན ཁུརཙཀྐདྷརཾ ཨེཀཾ ཨདྡས. ཏཾ ཙཀྐཾ པདུམཔུཔྥཾ ཝིཡ ཨུཔཊྛཱསི. སོ ཏཾ ཨཱཧ, ‘‘ཨམྦྷོ, ཨིདཾ ཏཡཱ པིལ༹ནྡྷིཏཾ པདུམཾ མཡ྄ཧཾ དེཧཱི’’ཏི. ན ཨིདཾ, སཱམི, པདུམཾ, ཁུརཙཀྐཾ ཨེཏནྟི. སོ ‘‘ཝཉྩེསི མཾ ཏྭཾ, ཀིཾ མཡཱ པདུམཾ ན དིཊྛཔུབྦ’’ནྟི ཝཏྭཱ ‘‘ཏྭཾ ལོཧིཏཙནྡནཾ ཝིལིམྤིཏྭཱ པིལ༹ནྡྷནཾ པདུམཔུཔྥཾ མཡ྄ཧཾ ན དཱཏུཀཱམོ’’ཏི ཨཱཧ. སོ ཙིནྟེསི ‘‘ཨཡམྤི མཡཱ ཀཏསདིསཾ ཀམྨཾ ཀཏྭཱ ཏསྶ ཕལཾ ཨནུབྷཝིཏུཀཱམོ’’ཏི. ཨཐ ནཾ ‘‘གཎྷ, རེ’’ཏི ཝཏྭཱ ཏསྶ མཏྠཀེ ཙཀྐཾ ཁིཔི. ཏེན ཝུཏྟཾ –

‘‘ཙཏུབྦྷི ཨཊྛཛ྄ཛྷགམཱ, ཨཊྛཱཧི པིཙ སོལ༹ས;

སོལ༹སཱཧི ཙ བཱཏྟིཾས, ཨཏྲིཙྪཾ ཙཀྐམཱསདོ;

ཨིཙྪཱཧཏསྶ པོསསྶ, ཙཀྐཾ བྷམཏི མཏྠཀེ’’ཏི. (ཛཱ. ༡.༡.༡༠༤; ༡.༥.༡༠༣);

སོཏི ¶ གེཧསཱམིཀོ བྷཏྟཱ. པུརིམནཡེནེཝཱཏི ཨནུཌཧནསྶ པཙྩཡཏཱཡ. ཏཏྲིདཾ ཝཏྠུ – ཀསྶཔབུདྡྷཀཱལེ སོཏཱཔནྣསྶ ཨུཔཱསཀསྶ བྷརིཡཱ ཨཏིཙཱརཾ ཙརཏི. སོ ཏཾ པཙྩཀྑཏོ དིསྭཱ ‘‘ཀསྨཱ ཨེཝཾ ཀརོསཱི’’ཏི ཨཱཧ. སཱ ‘‘སཙཱཧཾ ཨེཝརཱུཔཾ ཀརོམི, ཨཡཾ མེ སུནཁོ ཝིལུཔྤམཱནོ ¶ ཁཱདཏཱུ’’ཏི ཝཏྭཱ ཀཱལཀཏཱ ཀཎྞམུཎྜཀདཧེ ཝེམཱནིཀཔེཏཱི ཧུཏྭཱ ནིབྦཏྟཱ དིཝཱ སམྤཏྟིཾ ཨནུབྷཝཏི, རཏྟིཾ དུཀྑཾ. ཏདཱ བཱརཱཎསིརཱཛཱ མིགཝཾ ཙརནྟོ ཨརཉྙཾ པཝིསིཏྭཱ ཨནུཔུབྦེན ཀཎྞམུཎྜཀདཧཾ སམྤཏྟོ ཏཱཡ སདྡྷིཾ སམྤཏྟིཾ ཨནུབྷཝཏི. སཱ ཏཾ ཝཉྩེཏྭཱ རཏྟིཾ དུཀྑཾ ཨནུབྷཝཏི. སོ ཉཏྭཱ ‘‘ཀཏྠ ནུ ཁོ གཙྪཏཱི’’ཏི པིཊྛིཏོ པིཊྛིཏོ གནྟྭཱ ཨཝིདཱུརེ ཋིཏོ ཀཎྞམུཎྜཀདཧཏོ ནིཀྑམིཏྭཱ ཏཾ ‘‘པཊཔཊ’’ནྟི ཁཱདམཱནཾ ཨེཀཾ སུནཁཾ དིསྭཱ ཨསིནཱ དྭིདྷཱ ཚིནྡི, དྭེ ཨཧེསུཾ. པུན ཚིནྣེ ཙཏྟཱརོ, པུན ཚིནྣེ ཨཊྛ, པུན ཚིནྣེ སོལ༹ས ཨཧེསུཾ. སཱ ‘‘ཀིཾ ཀརོསི, སཱམཱི’’ཏི ཨཱཧ. སོ ‘‘ཀིཾ ཨིད’’ནྟི ཨཱཧ. སཱ ‘‘ཨེཝཾ ཨཀཏྭཱ ཁེལ༹པིཎྜཾ བྷཱུམིཡཾ ནིཊྛུབྷིཏྭཱ པཱདེན གྷཾསཱཧཱི’’ཏི ཨཱཧ. སོ ཏཐཱ ཨཀཱསི. སུནཁཱ ཨནྟརདྷཱཡིཾསུ. མུཊྛིཡོགོ ཀིརཱཡཾ ཏསྶ སུནཁནྟརདྷཱནསྶ, ཡདིདཾ ཁེལ༹པིཎྜཾ བྷཱུམིཡཾ ནིཊྛུབྷིཏྭཱ པཱདེན གྷཾསནཾ, ཏཾ དིཝསཾ ཏསྶཱ ཀམྨཾ ཁཱིཎཾ. རཱཛཱ ཝིཔྤཊིསཱརཱི ཧུཏྭཱ གནྟུཾ ཨཱརདྡྷོ. སཱ ‘‘མཡ྄ཧཾ, སཱམི, ཀམྨཾ ཁཱིཎཾ, མཱ ཨགམཱསཱི’’ཏི ཨཱཧ. རཱཛཱ ཨསྶུཏྭཱཝ གཏོ.

དཀྑིཎཱཏི ཙཏྟཱརོ པཙྩཡཱ དཱིཡམཱནཱ དཀྑནྟི ཨེཏེཧི ཧིཏསུཁཱནཱིཏི, ཏཾ དཀྑིཎཾ ཨརཧཏཱིཏི དཀྑིཎེཡྻོ, བྷིཀྑུསངྒྷོ.

༤༧-༤༨. ཙཏུཏྠེ ཡཉྙཝཱཊཾ སམྤཱདེཏྭཱ མཧཱཡཉྙཾ ཨུདྡིསྶ སཝིཉྙཱཎཀཱནི ཨཝིཉྙཱཎཀཱནི ཙ ཡཉྙཱུཔཀརཎཱནི སཛྫིཏཱནཱིཏི ཨཱཧ པཱལི༹ཡཾ ‘‘མཧཱཡཉྙོ ཨུཔཀྑཊོ’’ཏི. ཏཾ ཨུཔཀརཎཾ ཏེསཾ ཏཐཱསཛྫནནྟི ཨཱཧ ‘‘ཨུཔཀྑཊོཏི པཙྩུཔཊྛིཏོ’’ཏི. ཝཙྪཏརསཏཱནཱིཏི ཡུཝབྷཱཝཔྤཏྟཱནི ནཱཏིབལཝཝཙྪསཏཱནི. ཏེ པན ཝཙྪཱ ཨེཝ ཧོནྟི, ན དམྨཱ, བལཱིབདྡཱ ཝཱ. ཨུརབྦྷཱཏི ཏརུཎམེཎྜཀཱ ཝུཙྩནྟི. ཨུཔནཱིཏཱནཱིཏི ཋཔནཏྠཱཡ ཨུཔནཱིཏཱནི. ཝིཧིཾསཊྛེནཱཏི ཧིཾསནཊྛེན. ཨུཔཝཱཡཏཱུཏི ཨུཔགནྟྭཱ སརཱིརདརཐཾ ནིབྦཱཔེནྟོ སཎྷསཱིཏལཱ ཝཱཏོ ཝཱཡཏུ. སེསཾ སུཝིཉྙེཡྻམེཝ. པཉྩམེ ནཏྠི ཝཏྟབྦཾ.

དུཏིཡཨགྒིསུཏྟཱདིཝཎྞནཱ ནིཊྛིཏཱ.

༤༩. ཚཊྛེ ¶ ¶ ནྷཱརུཝིལེཁནནྟི ཙམྨཾ ལིཁནྟཱནཾ ཙམྨཾ ལིཁིཏྭཱ ཚཌྜིཏཀསཊཾ. ‘‘ཨེསོཧམསྨཱི’’ཏིཨཱདིནཱ ཨཧཾཀརཎཾ ཨཧངྐཱརོ. ‘‘ཨེཏཾ མམཱ’’ཏི མམཾཀརཎཾ མམངྐཱརོ. ཏེནཱཧ ‘‘ཨཧངྐཱརདིཊྛིཏོ’’ཏིཨཱདི. ཏིསྶོ ཝིདྷཱཏི སེཡྻསདིསཧཱིནཝསེན ཏཡོ མཱནཱ. ‘‘ཨེཀཝིདྷེན རཱུཔསངྒཧོ’’ཏིཨཱདཱིསུ (དྷ. ས. ༥༨༤) ཀོཊྛཱསོ ‘‘ཝིདྷཱ’’ཏི ཝུཏྟོ. ‘‘ཀཐཾཝིདྷཾ སཱིལཝནྟཾ ཝདནྟི, ཀཐཾཝིདྷཾ པཉྙཝནྟཾ ཝདནྟཱི’’ཏིཨཱདཱིསུ (སཾ. ནི. ༡.༩༥) པཀཱརོ. ‘‘ཏིསྶོ ཨིམཱ, བྷིཀྑཝེ, ཝིདྷཱ. ཀཏམཱ ཏིསྶོ? སེཡྻོཧམསྨཱིཏི ཝིདྷཱ’’ཏི (ཝིབྷ. ༩༢༠) ཨེཏྠ མཱནོ ‘‘ཝིདྷཱ’’ཏི ཝུཏྟོ. ཨིདྷཱཔི མཱནོཝ ཨདྷིཔྤེཏོ. མཱནོ ཧི ཝིདཧནཏོ ཧཱིནཱདིཝསེན ཏིཝིདྷཱ. ཏེནཱཀཱརེན དཧནཏོ ཨུཔདཧནཏོ ‘‘ཝིདྷཱ’’ཏི ཝུཙྩཏི.

༥༠-༥༡. སཏྟམེ ཨིདྷཱཏི ཨིམསྨིཾ ལོཀེ. ཨེཀཙྩོཏི ཨེཀོ. སམཎོ ཝཱ བྲཱཧྨཎོ ཝཱཏི པབྦཛྫཱམཏྟེན སམཎོ ཝཱ, ཛཱཏིམཏྟེན བྲཱཧྨཎོ ཝཱ. དྭཡཾདྭཡསམཱཔཏྟིནྟི དྭཱིཧི དྭཱིཧི སམཱཔཛྫིཏབྦཾ, མེཐུནནྟི ཨཏྠོ. ན ཧེཝ ཁོ སམཱཔཛྫཏཱིཏི སམྦནྡྷོ. ཨུཙྪཱདནཾ ཨུབྦཊྚནཾ. སམྦཱཧནཾ པརིམདྡནཾ. སཱདིཡཏཱིཏི ཨདྷིཝཱསེཏི. ཏདསྶཱདེཏཱིཏི ཨུཙྪཱདནཱདིཾ ཨབྷིརམཏི. ནིཀཱམེཏཱིཏི ཨིཙྪཏི. ཝིཏྟིནྟི ཏུཊྛིཾ. ཨིདམྤི ཁོཏི ཨེཏྠ ཨིདནྟི ཡཐཱཝུཏྟཾ སཱདིཡནཱདིཾ ཁཎྜཱདིབྷཱཝཝསེན ཨེཀཾ ཀཏྭཱ ཝུཏྟཾ. པི-སདྡོ ཝཀྑམཱནཾ ཨུཔཱདཱཡ སམུཙྩཡཏྠོ, ཁོ-སདྡོ ཨཝདྷཱརཎཏྠོ. ཨིདཾ ཝུཏྟཾ ཧོཏི – ཡདེཏཾ བྲཧྨཙཱརིཔཊིཉྙསྶ ཨསཏིཔི དྭཡཾདྭཡསམཱཔཏྟིཡཾ མཱཏུགཱམསྶ ཨུཙྪཱདནནཧཱཔནསམྦཱཧནསཱདིཡནཱདི. ཨིདམྤི ཨེཀཾསེན ཏསྶ བྲཧྨཙརིཡསྶ ཁཎྜཱདིབྷཱཝཱཔཱདནཏོ ཁཎྜམྤི ཚིདྡམྤི སབལམྤི ཀམྨཱསམྤཱིཏི. ཨེཝཾ པན ཁཎྜཱདིབྷཱཝཱཔཏྟིཡཱ སོ ཨཔརིསུདྡྷཾ བྲཧྨཙརིཡཾ ཙརཏི, ན པརིསུདྡྷཾ, སཾཡུཏྟོ མེཐུནསཾཡོགེན, ན ¶ ཝིསཾཡུཏྟོ. ཏཏོ ཙསྶ ན ཛཱཏིཨཱདཱིཧི པརིམུཏྟཱིཏི དསྶེནྟོ ‘‘ཨཡཾ ཝུཙྩཏཱི’’ཏིཨཱདིམཱཧ.

སཉྫགྒྷཏཱིཏི ཀིལེསཝསེན མཧཱཧསིཏཾ ཧསཏི. སཾཀཱིལ༹ཏཱིཏི ཀཱཡསཾསགྒཝསེན ཀཱིལ༹ཏི. སཾཀེལཱཡཏཱིཏི སབྦསོ མཱཏུགཱམཾ ཀེལཱཡནྟོ ཝིཧརཏི. ཙཀྑུནཱཏི ཨཏྟནོ ཙཀྑུནཱ. ཙཀྑུནྟི ¶ མཱཏུགཱམསྶ ཙཀྑུཾ. ཨུཔནིཛ྄ཛྷཱཡཏཱིཏི ཨུཔེཙྩ ནིཛ྄ཛྷཱཡཏི ཨོལོཀེཏི. ཏིརོཀུཊྚནྟི ཀུཊྚསྶ པརཏོ. ཏཐཱ ཏིརོཔཱཀཱརཾ, ‘‘མཏྟིཀཱམཡཱ བྷིཏྟི ཀུཊྚཾ, ཨིཊྛཀཱམཡཱ པཱཀཱརོ’’ཏི ཝདནྟི. ཡཱ ཀཱཙི ཝཱ བྷིཏྟི པོརིསཀཱ དིཡཌྜྷརཏནཔྤམཱཎཱ ཀུཊྚཾ, ཏཏོ ཨདྷིཀོ པཱཀཱརོ. ཨསྶཱཏི བྲཧྨཙཱརིཔཊིཉྙསྶ. པུབྦེཏི ཝཏསམཱདཱནཏོ པུབྦེ. ཀཱམགུཎེཧཱིཏི ཀཱམཀོཊྛཱསེཧི. སམཔྤིཏནྟི སུཊྛུ ཨཔྤིཏཾ སཧིཏཾ. སམངྒིབྷཱུཏནྟི སམནྣཱགཏཾ. པརིཙཱརཡམཱནནྟི ཀཱིལ༹ནྟཾ, ཨུཔཊྛཧིཡམཱནཾ ཝཱ. པཎིདྷཱཡཱཏི པཏྠེཏྭཱ. སཱིལེནཱཏིཨཱདཱིསུ ཡམནིཡམཱདིསམཱདཱནཝསེན སཱིལཾ, ཨཝཱིཏིཀྐམཝསེན ཝཏཾ. ཨུབྷཡམྤི ཝཱ སཱིལཾ, དུཀྐརཙརིཡཝསེན པཝཏྟིཏཾ ཝཏཾ. ཏཾཏཾཨཀིཙྩསམྨཏཏོ ཝཱ ནིཝཏྟིལཀྑཎཾ སཱིལཾ, ཏཾཏཾསམཱདཱནཝཏོ ཝེསབྷོཛནཀིཙྩཀརཎཱདིཝིསེསཔྤཊིཔཏྟི ཝཏཾ. སབྦཐཱཔི དུཀྐརཙརིཡཱ ཏཔོ. མེཐུནཱ ཝིརཏི བྲཧྨཙརིཡནྟི ཨེཝམྤེཏྠ པཱལི༹ཝཎྞནཱ ཝེདིཏབྦཱ. ཨཊྛམཾ ཨུཏྟཱནམེཝ.

༥༢. ནཝམེ ‘‘སཱཧུ དཱན’’ནྟི དཱནཾ དེཏཱིཏི ‘‘དཱནཾ ནཱམ སཱདྷུ སུནྡར’’ནྟི དཱནཾ དེཏཱིཏི ཨཏྠོ. དཱནཉྷི དཏྭཱ ཏཾ པཙྩཝེཀྑནྟསྶ པཱམོཛྫཔཱིཏིསོམནསྶཱདཡོ ཨུཔྤཛྫནྟི, ལོབྷདོསཨིསྶཱམཙྪེརཱདཡོ ཝིདཱུརཱིབྷཝནྟི. ཨིདཱནི དཱནཾ ཨནུཀཱུལདྷམྨཔརིབྲཱུཧནེན པཙྩནཱིཀདྷམྨཝིདཱུརཱིཀརཎེན ཙ བྷཱཝནཱཙིཏྟསྶ ཨུཔསོབྷནཱཡ ཙ པརིཀྑཱརཱཡ ཙ ཧོཏཱིཏི ‘‘ཨལངྐཱརབྷཱུཏཉྩེཝ པརིཝཱརབྷཱུཏཉྩ དེཏཱི’’ཏི ཝུཏྟཾ. ཛྷཱནཱནཱགཱམཱི ནཱམ ཧོཏི ཛྷཱནཾ ནིབྦཏྟེཏྭཱ ¶ བྲཧྨལོཀཱུཔཔནྣཱནཾ ཨརིཡཱནཾ ཧེཊྛཱ ཨནུཔྤཛྫནཏོ. ཨིམཾ པེཙྩ པརིབྷུཉྫིསྶཱམཱིཏི སཱཔེཀྑསྶ དཱནཾ པརལོཀཕལཱསཱཡ སཱཏིསཡཱཡ ཙ པུབྦཱཙཱརཝསེན ཨུཔྤཛྫམཱནཱཡ ཨནུབྷཝཏྟཱ ཏཎྷུཏྟརཾ ནཱམ ཧོཏཱིཏི ཨཱཧ ‘‘པཋམཾ ཏཎྷུཏྟརིཡདཱན’’ནྟི. དཱནཾ ནཱམ བུདྡྷཱདཱིཧི པསཏྠནྟི གརུཾ ཙིཏྟཱིཀཱརཾ ཨུཔཊྛཔེཏྭཱ དཱཏབྦཏྟཱ ‘‘དུཏིཡཾ ཙིཏྟཱིཀཱརདཱན’’ནྟི ཝུཏྟཾ. པུབྦཀེཧི པིཏུཔིཏཱམཧེཧི དིནྣཔུབྦཾ ཀཏཔུབྦཾ ཛཧཱཔེཏུཾ ནཱམ ནཱནུཙྪཝིཀནྟི ཨཏྟབྷཱཝསབྷཱགཝསེན ཧིརོཏྟཔྤཾ པཙྩུཔཊྛཔེཏྭཱ དཱཏབྦཏོ ‘‘ཏཏིཡཾ ཧིརོཏྟཔྤདཱན’’ནྟི ཝུཏྟཾ. ‘‘ཨཧཾ པཙཱམི, ན ཨིམེ པཙནྟི, ནཱརཧཱམི པཙནྟོ ཨཔཙནྟཱནཾ དཱནཾ ཨདཱཏུ’’ནྟི ཨེཝཾསཉྙཱི ཧུཏྭཱ དེནྟོ ནིརཝསེསཾ ཀཏྭཱ དེཏཱིཏི ཨཱཧ ‘‘ཙཏུཏྠཾ ནིརཝསེསདཱན’’ནྟི. ‘‘ཡཐཱ ཏེསཾ པུབྦཀཱནཾ ཨིསཱིནཾ ཏཱནི མཧཱཡཉྙཀཱནི ཨཧེསུཾ, ཨེཝཾ མེ ཨཡཾ དཱནཔརིབྷོགོ བྷཝིསྶཏཱི’’ཏི ཨེཝཾསཉྙིནོ དཱནཾ དཀྑིཎཾ ཨརཧེསུ དཱཏབྦཏོ ‘‘པཉྩམཾ དཀྑིཎེཡྻདཱན’’ནྟི ཝུཏྟཾ. ‘‘ཨིམཾ མེ དཱནཾ དདཏོ ཙིཏྟཾ པསཱིདཏཱི’’ཏིཨཱདིནཱ ¶ པཱིཏིསོམནསྶཾ ཨུཔྤཱདེཏྭཱ དེནྟསྶ དཱནཾ སོམནསྶབཱཧུལླཔྤཏྟིཡཱ སོམནསྶུཔཙཱརཾ ནཱམ ཧོཏཱིཏི ཨཱཧ ‘‘ཚཊྛཾ སོམནསྶུཔཝིཙཱརདཱན’’ནྟི ཝུཏྟཾ.

༥༣. དསམེ ‘‘ཝུཏྠཝསྶོ པཝཱརེཏྭཱ…པེ… ནིཀྑམཱི’’ཏི ཨངྒུཏྟརབྷཱཎཀཱནཾ མཏེནེཏཾ ཝུཏྟཾ. མཛ྄ཛྷིམབྷཱཎཀཱ པན ཝདནྟི ‘‘བྷགཝཱ ཨུཔཀཊྛཱཡ ཝསྶཱུཔནཱཡིཀཱཡ ཛེཏཝནཏོ བྷིཀྑུསངྒྷཔརིཝུཏོ ཙཱརིཀཾ ནིཀྑམི. ཏེནེཝ ཙ ཨཀཱལེ ནིཀྑནྟཏྟཱ ཀོསལརཱཛཱདཡོ ཝཱརེཏུཾ ཨཱརབྷིཾསུ. པཝཱརེཏྭཱ ཧི ཙརཎཾ བུདྡྷཱཙིཎྞ’’ནྟི. པུཎྞཱཡ སམྨཱཔཊིཔཏྟིཾ པཙྩཱསཱིསནྟོ བྷགཝཱ ‘‘མམ ནིཝཏྟནཔཙྩཡཱ ཏྭཾ ཀིཾ ཀརིསྶསཱི’’ཏི ཨཱཧ. པུཎྞཱཔི…པེ… པབྦཛཱིཏི ཨེཏྠ སེཊྛི ‘‘པུཎྞཱཡ བྷགཝཱ ནིཝཏྟིཏོ’’ཏི སུཏྭཱ ཏཾ བྷུཛིསྶཾ ཀཏྭཱ དྷཱིཏུཊྛཱནེ ཋཔེསི. སཱ པབྦཛྫཾ ཡཱཙིཏྭཱ པབྦཛི, པབྦཛིཏྭཱ ཝིཔསྶནཾ ཨཱརབྷི. ཨཐསྶཱ སཏྠཱ ཨཱརདྡྷཝིཔསྶཀབྷཱཝཾ ཉཏྭཱ ཨིམཾ ཨོབྷཱསགཱཐཾ ཝིསྶཛྫེསི –

‘‘པུཎྞེ ¶ པཱུརསྶུ སདྡྷམྨཾ, ཙནྡོ པནྣརསོ ཡཐཱ;

པརིཔུཎྞཱཡ པཉྙཱཡ, དུཀྑསྶནྟཾ ཀརིསྶསཱི’’ཏི. (ཐེརཱིགཱ. ༣);

སཱ གཱཐཱཔརིཡོསཱནེ ཨརཧཏྟཾ པཏྭཱ ཨབྷིཉྙཱཏཱ སཱཝིཀཱ ཨཧོསི. སེསམེཏྠ སུཝིཉྙེཡྻམེཝ.

༥༤-༥༥. ཚཊྛཝགྒསྶ ¶ པཋམཾ སུཝིཉྙེཡྻམེཝ. དུཏིཡེ ཨཏཱིཏེ ཨཏྟབྷཱཝེ ནིབྦཏྟཀཾ ཀམྨནྟི ‘‘པུརིམཀམྨབྷཝསྨིཾ མོཧོ ཨཝིཛྫཱ, ཨཱཡཱུཧནཱ སངྑཱརཱ, ནིཀནྟི ཏཎྷཱ, ཨུཔགམནཾ ཨུཔཱདཱནཾ, ཙེཏནཱ བྷཝོ’’ཏི ཨེཝམཱགཏཾ སཔརིཀྑཱརཾ པཉྩཝིདྷཾ ཀམྨཝཊྚམཱཧ. ཨེཏརཧི མེ ཨཏྟབྷཱཝོ ན སིཡཱཏི ཝིཉྙཱཎནཱམརཱུཔསལཱ༹ཡཏནཕསྶཝེདནཱསཧིཏཾ པཙྩུཔྤནྣཾ པཉྩཝིདྷཾ ཝིཔཱཀཝཊྚམཱཧ. ཡཾ ཨཏྠིཀནྟི ཡཾ པརམཏྠཏོ ཝིཛྫམཱནཀཾ. ཏེནཱཧ ‘‘བྷཱུཏ’’ནྟི. ཏཉྷི པཙྩཡནིབྦཏྟཏཱཡ ‘‘བྷཱུཏ’’ནྟི ཝུཙྩཏི. ཏཾ པཛཧཱམཱིཏི ཏཔྤཊིབདྡྷཙྪནྡརཱགཔྤཧཱནེན ཏཏོ ཨེཝ ཨཱཡཏིཾ ཨནུཔྤཏྟིདྷམྨཏཱཔཱདནཝསེན པཛཧཱམི པརིཙྩཛཱམི. ཧརིཏནྟནྟི (མ. ནི. ཨཊྛ. ༡.༣༠༣) ཧརིཏམེཝ. ཨནྟ-སདྡེན པདཝཌྜྷནཾ ཀཏཾ ཡཐཱ ‘‘ཝནནྟཾ སུཏྟནྟ’’ནྟི, ཨལླཏིཎཱདཱིནི ཨཱགམྨ ནིབྦཱཡཏཱིཏི ཨཏྠོ. པཐནྟནྟི མཧཱམགྒཾ. སེལནྟནྟི པབྦཏཾ. ཨུདཀནྟནྟི ཨུདཀཾ. རམཎཱིཡཾ ཝཱ བྷཱུམིབྷཱགནྟི ཏིཎགུམྦཱདིརཧིཏཾ ཝིཝིཏྟཾ ཨབྦྷོཀཱསབྷཱུམིབྷཱགཾ. ཨནཱཧཱརཱཏི ཨཔཙྩཡཱ ནིརུཔཱདཱནཱ. སེསམེཏྠ ཨུཏྟཱནམེཝ.

༥༦. ཏཏིཡེ ¶ ཝིཝིཏྟཱནི ཏཱདིསཱནི པན པརིཡནྟཱནི ཨཏིདཱུརཱནི ཧོནྟཱིཏི ཨཱཧ ‘‘ཨནྟིམཔརིཡནྟིམཱནཱི’’ཏི. ཨནྟེ བྷཝཱནི ཨནྟིམཱནི, ཨནྟིམཱནིཡེཝ པརིཡནྟིམཱནི. ཨུབྷཡེནཔི ཨཏིདཱུརཏཾ དསྶེཏི. སམནྣཱཧཱརེ ཋཔཡམཱནོཏི ཨིནྡྲིཡཾ སམཱཀཱརེན ཝཏྟེནྟོ ཨིནྡྲིཡསམཏཾ པཊིཔཱདེནྟོ ནཱམ ཧོཏི. ཝིཔསྶནཱཙིཏྟསམྤཡུཏྟོ སམཱདྷི, སཏིཔི སངྑཱརནིམིཏྟཱཝིརཧེ ནིཙྩནིམིཏྟཱདིཝིརཧཏོ ‘‘ཨནིམིཏྟོ’’ཏི ཝུཙྩཏཱིཏི ཨཱཧ ‘‘ཨནིམིཏྟནྟི བལཝཝིཔསྶནཱསམཱདྷི’’ནྟི.

༥༧-༦༠. ཙཏུཏྠེ ¶ ཀུཙྪིཏོ ཨརིཡོ ཀདརིཡོ. ཐདྡྷམཙྪརིཡསདིསཾ ཧི ཀུཙྪིཏཾ སབྦནིཧཱིནཾ ནཏྠི སབྦཀུསལཱནཾ ཨཱདིབྷཱུཏསྶ ནིསེདྷནཏོ. སེསམེཏྠ པཉྩམཱདཱིནི ཙ ཨུཏྟཱནཏྠཱནེཝ.

སཱིཧསེནཱཔཏིསུཏྟཱདིཝཎྞནཱ ནིཊྛིཏཱ.

༦༡. ཨཊྛམེ ཨཱལོཀསཉྙཾ མནསི ཀརེཡྻཱསཱིཏི དིཝཱ ཝཱ རཏྟིཾ ཝཱ སཱུརིཡཔཛྫོཏཙནྡམཎིཨཱདཱིནཾ ཨཱལོཀཾ ‘‘ཨཱལོཀོ’’ཏི མནསི ཀརེཡྻཱསི. ཨིདཾ ཝུཏྟཾ ཧོཏི – སཱུརིཡཙནྡཱལོཀཱདིཾ དིཝཱ རཏྟིཉྩ ཨུཔལདྡྷཾ ཡཐཱལདྡྷཝསེནེཝ མནསི ཀརེཡྻཱསི, ཙིཏྟེ ཋཔེཡྻཱསི. ཡཐཱ ཏེ སུབྷཱཝིཏཱལོཀཀསིཎསྶ ཝིཡ ཀསིཎཱལོཀོ ཡདིཙྪཀཾ ཡཱཝདིཙྪཀཉྩ སོ ཨཱལོཀོ རཏྟིཡཾ ཨུཔཏིཊྛཏི, ཡེན ཏཏྠ དིཝཱསཉྙཾ ཋཔེཡྻཱསི, དིཝཱ ཝིཡ ཝིགཏཐིནམིདྡྷོཝ བྷཝེཡྻཱསཱིཏི. ཏེནཱཧ ‘‘ཡཐཱ དིཝཱ ཏཐཱ རཏྟི’’ནྟི. ཨིཏི ཝིཝཊེན ཙེཏསཱཏི ཨེཝཾ ཨཔིཧིཏེན ཙིཏྟེན ཐིནམིདྡྷཔིདྷཱནེན ཨཔིཧིཏཏྟཱ. ཨཔརིཡོནདྡྷེནཱཏི སམནྟཏོ ཨནོནདྡྷེན ཨསཉྪཱདིཏེན. སཧོབྷཱསནྟི སཉཱཎོབྷཱསཾ. ཐིནམིདྡྷཝིནོདནཨཱལོཀོཔི ཝཱ ཧོཏུ ཀསིཎཱལོཀོཔི ¶ ཝཱ པརིཀམྨཱལོཀོཔི ཝཱ, ཨུཔཀྐིལེསཱལོཀོ ཝིཡ སབྦོཡཾ ཨཱལོཀོ ཉཱཎསམུཊྛཱནོཝཱཏི. ཡེསཾ ཨཀརཎེ པུགྒལོ མཧཱཛཱནིཡོ ཧོཏི, ཏཱནི ཨཝསྶཾ ཀཱཏབྦཱནི. ཡཱནི ཨཀཱཏུམྤི ཝཊྚནྟི, སཏི སམཝཱཡེ ཀཱཏབྦཏོ ཏཱནི ཀརཎཱིཡཱནཱིཏི ཨཱཧ ‘‘ཨིཏརཱནི ཀརཎཱིཡཱནཱི’’ཏི. ཨཐ ཝཱ ཀཏྟབྦཱནི ཀམྨཱནི ཀརཎཾ ཨརཧནྟཱིཏི ཀརཎཱིཡཱནི. ཨིཏརཱནི ཀིཙྩཱནཱིཏིཔི ཝདནྟི.

ཨཱདིནཡཔྤཝཏྟཱ ཝིགྒཱཧིཀཀཐཱཏི ‘‘ན ཏྭཾ ཨིམཾ དྷམྨཝིནཡཾ ཨཱཛཱནཱསི, ཨཧཾ ཨིམཾ དྷམྨཝིནཡཾ ཨཱཛཱནཱམི, ཀིཾ ཏྭཾ ཨིམཾ དྷམྨཝིནཡཾ ཨཱཛཱནིསྶསི, མིཙྪཱཔཊིཔནྣོ ཏྭམསི, ཨཧམསྨི སམྨཱཔཊིཔནྣོ, སཧིཏཾ མེ, ཨསཧིཏཾ ཏེ, པུརེཝཙནཱིཡཾ པཙྪཱ ཨཝཙ, པཙྪཱཝཙནཱིཡཾ པུརེ ཨཝཙ, ཨདྷིཙིཎྞཾ ཏེ ཝིཔརཱཝཏྟཾ, ཨཱརོཔིཏོ ཏེ ཝཱདོ, ནིགྒཧིཏོ ཏྭམསི. ཙར ཝཱདཔྤམོཀྑཱཡ, ནིབྦེཋེཧི ཝཱ སཙེ པཧོསཱི’’ཏི (དཱི. ནི. ༡.༡༨; མ. ནི. ༣.༤༡) ཨེཝཾཔཝཏྟཱ ཀཐཱ. ཏཏྠ སཧིཏཾ མེཏི (དཱི. ནི. ཨཊྛ. ༡.༡༨) མཡ྄ཧཾ ཝཙནཾ སཧིཏཾ སིལིཊྛཾ, ཨཏྠཡུཏྟཾ ཀཱརཎཡུཏྟནྟི ཨཏྠོ. སཧིཏནྟི ཝཱ པུབྦཱཔརཱཝིརུདྡྷཾ. ཨསཧིཏཾ ཏེཏི ཏུཡ྄ཧཾ ཝཙནཾ ¶ ཨསཧིཏཾ ཨསིལིཊྛཾ. ཨདྷིཙིཎྞཾ ཏེ ཝིཔརཱཝཏྟནྟི ཡཾ ཏུཡ྄ཧཾ དཱིགྷརཏྟཱཙིཎྞཝསེན སུཔྤགུཎཾ, ཏཾ མཡ྄ཧཾ ཨེཀཝཙནེནེཝ ཝིཔརཱཝཏྟཾ པརིཝཏྟིཏྭཱ ཋིཏཾ, ན ཀིཉྩི ཛཱནཱསཱིཏི ཨཏྠོ. ཨཱརོཔིཏོ ཏེ ཝཱདོཏི མཡཱ ཏཝ ཝཱདེ དོསོ ཨཱརོཔིཏོ. ཙར ཝཱདཔྤམོཀྑཱཡཱཏི དོསམོཙནཏྠཾ ཙར ཝིཙར, ཏཏྠ ཏཏྠ གནྟྭཱ སིཀྑཱཏི ཨཏྠོ. ནིབྦེཋེཧི ཝཱ སཙེ པཧོསཱིཏི ཨཐ སཡཾ པཧོསི, ཨིདཱནི ཨེཝ ནིབྦེཋེཧཱིཏི ཨཏྠོ.

ཏཎྷཱ སབྦསོ ཁཱིཡནྟི ཨེཏྠཱཏི ཏཎྷཱསངྑཡོ, ཏསྨིཾ. ཏཎྷཱསངྑཡེཏི ཙ ཨིདཾ ཝིསཡེ བྷུམྨནྟི ཨཱཧ ‘‘ཏཾ ཨཱརམྨཎཾ ཀཏྭཱ’’ཏི. ཝིམུཏྟཙིཏྟཏཱཡཱཏི སབྦསཾཀིལེསེཧི ཝིཔྤཡུཏྟཙིཏྟཏཱཡ. ཨཔརབྷཱགེ པཊིཔདཱ ནཱམ ཨརིཡསཙྩཱབྷིསམཡོ. སཱ སཱསནཙཱརིགོཙརཱ པཙྩཏྟཾ ཝེདིཏབྦཏོཏི ཨཱཧ ‘‘པུབྦབྷཱགཔྤཊིཔདཾ སཾཁིཏྟེན དེསེཐཱཏི པུཙྪཏཱི’’ཏི. ཨཀུཔྤདྷམྨཏཱཡ ཁཡཝཡསངྑཱཏཾ ཨནྟཾ ཨཏཱིཏཱཏི ཨཙྩནྟཱ, སོ ཨེཝ ཨཔརིཧཱཡནསབྷཱཝཏྟཱ ཨཙྩནྟཱ ནིཊྛཱ ཨསྶཱཏི ཨཙྩནྟནིཊྛཱ. ཏེནཱཧ ‘‘ཨེཀནྟནིཊྛོ སཏཏནིཊྛོཏི ཨཏྠོ’’ཏི. ན ཧི པཊིཝིདྡྷསྶ ¶ ལོཀུཏྟརདྷམྨསྶ དསྶནྣཾ ཀུཔྤནྣཾ ནཱམ ཨཏྠི. ཨཙྩནྟམེཝ ཙཏཱུཧི ཡོགེཧི ཁེམོ ཨེཏསྶ ཨཏྠཱིཏི ཨཙྩནྟཡོགཀྑེམཱི. མགྒབྲཧྨཙརིཡསྶ ཝུསིཏཏྟཱ ཏསྶ ཙ ཨཔརིཧཱཡནསབྷཱཝཏྟཱ ཨཙྩནྟཾ བྲཧྨཙཱརཱིཏི ཨཙྩནྟབྲཧྨཙཱརཱི. ཏེནཱཧ ‘‘ནིཙྩབྲཧྨཙཱརཱིཏི ཨཏྠོ’’ཏི. པརིཡོསཱནནྟི མགྒབྲཧྨཙརིཡཔརིཡཔརིཡོསཱནཾ ཝཊྚདུཀྑཔརིཡོསཱནཉྩ.

པཉྩཀྑནྡྷཱཏི པཉྩུཔཱདཱནཀྑནྡྷཱ. སཀྐཱཡསབྦཉྷི སནྡྷཱཡ ཨིདྷ ‘‘སབྦེ དྷམྨཱ’’ཏི ཝུཏྟཾ ཝིཔསྶནཱཝིསཡསྶ ཨདྷིཔྤེཏཏྟཱ. ཏསྨཱ ཨཱཡཏནདྷཱཏུཡོཔི ཏགྒཏིཀཱ ཨེཝ དཊྛབྦཱ. ཏེནཱཧ བྷགཝཱ ‘‘ནཱལཾ ཨབྷིནིཝེསཱཡཱ’’ཏི. ན ཡུཏྟཱ ཨབྷིནིཝེསཱཡ ‘‘ཨེཏཾ མམ, ཨེསོ མེ ཨཏྟཱ’’ཏི ཨཛ྄ཛྷོསཱནཱཡ. ‘‘ཨལམེཝ ནིབྦིནྡིཏུཾ ཨལཾ ཝིརཛྫིཏུ’’ནྟིཨཱདཱིསུ (དཱི. ནི. ༢.༢༧༢; སཾ. ནི. ༢.༡༢༤, ༡༢༨, ༡༣༤, ༡༤༣) ཝིཡ ཨལཾ-སདྡོ ཡུཏྟཏྠོཔི ཧོཏཱིཏི ཨཱཧ ‘‘ན ཡུཏྟཱ’’ཏི. སམྤཛྫནྟཱིཏི བྷཝནྟི. ཡདིཔི ‘‘ཏཏིཡཱ ཙཏུཏྠཱི’’ཏི ཨིདཾ ཝིསུདྡྷིདྭཡཾ ཨབྷིཉྙཱཔཉྙཱ, ཏསྶ པན སཔཙྩཡནཱམརཱུཔདསྶནབྷཱཝཏོ སཏི ཙ པཙྩཡཔརིགྒཧེ སཔཙྩཡཏྟཱ ཨནིཙྩནྟི, ནཱམརཱུཔསྶ ཨནིཙྩཏཱཡ དུཀྑཾ, དུཀྑཉྩ ཨནཏྟཱཏི ཨཏྠཏོ ལཀྑཎཏྟཡཾ སུཔཱཀཊམེཝ ཧོཏཱིཏི ཨཱཧ ‘‘ཨནིཙྩཾ དུཀྑཾ ཨནཏྟཱཏི ཉཱཏཔརིཉྙཱཡ ཨབྷིཛཱནཱཏཱི’’ཏི. ཏཐེཝ ཏཱིརཎཔརིཉྙཱཡཱཏི ཨིམིནཱ ཨནིཙྩཱདིབྷཱཝེན ནཱལཾ ཨབྷིནིཝེསཱཡཱཏི ནཱམརཱུཔསྶ ཨུཔསཾཧརཏི, ན ཨབྷིཉྙཱཔཉྙཱནཾ སམྦྷཱརདྷམྨཱནཾ. པུརིམཱཡ ཧི ཨཏྠཏོ ཨཱཔནྣཾ ལཀྑཎཏྟཡཾ གཎྷཱཏི སལཀྑཎསལླཀྑཎཔརཏྟཱ ཏསྶཱ. དུཏིཡཱཡ སརཱུཔཏོ ཏསྶཱ ལཀྑཎཏྟཡཱརོཔནཝསེན སམྨསནབྷཱཝཏོ. ཨེཀཙིཏྟཀྑཎིཀཏཱཡ ཨབྷིནིཔཱཏམཏྟཏཱཡ ཙ ¶ ཨཔྤམཏྟཀམྤི. རཱུཔཔརིགྒཧསྶ ཨོལཱ༹རིཀབྷཱཝཏོ ཨརཱུཔཔརིགྒཧཾ དསྶེཏི. དསྶེནྟོ ཙ ཝེདནཱཡ ཨཱསནྣབྷཱཝཏོ, ཝིསེསཏོ སུཁསཱརཱགིཏཱཡ, བྷཝསྶཱདགདྷིཏམཱནསཏཱཡ ཙ ཐེརསྶ ཝེདནཱཝསེན ནིབྦཏྟེཏྭཱ དསྶེཏི.

ཁཡཝིརཱགོཏི ཁཡསངྑཱཏོ ཝིརཱགོ སངྑཱརཱནཾ པལུཛྫནཱ. ཡཾ ཨཱགམྨ སབྦསོ སངྑཱརེཧི ཝིརཛྫནཱ ཧོཏི, ཏཾ ནིབྦཱནཾ ཨཙྩནྟཝིརཱགོ. ནིརོདྷཱནུཔསྶིམྷིཔཱིཏི ནིརོདྷཱནུཔསྶིཔདེཔི. ཨེསེཝ ནཡོཏི ཨཏིདིསིཏྭཱ ཏཾ ¶ ཨེཀདེསེན ཝིཝརནྟོ ‘‘ནིརོདྷོཔི ཧི…པེ… དུཝིདྷོཡེཝཱ’’ཏི ཨཱཧ. ཁནྡྷཱནཾ པརིཙྩཛནཾ ཏཔྤཊིབདྡྷཀིལེསཔྤཧཱནཝསེནཱཏི ཡེནཱཀཱརེན ཝིཔསྶནཱ ཀིལེསེ པཛཧཏི, ཏེནཱཀཱརེན ཏཾནིམིཏྟཀྑནྡྷེ ཙ པཛཧཏཱིཏི ཝཏྟབྦཏཾ ཨརཧཏཱིཏི ཨཱཧ ‘‘སཱ ཧི…པེ… ཝོསྶཛྫཏཱི’’ཏི. ཨཱརམྨཎཏོཏི ཀིཙྩསཱདྷནཝསེན ཨཱརམྨཎཀརཎཏོ. ཨེཝཉྷི མགྒཏོ ཨཉྙེསཾ ནིབྦཱནཱརམྨཎཱནཾ པཀྑནྡནཝོསྶགྒཱབྷཱཝོ སིདྡྷོཝ ཧོཏི. པརིཙྩཛནེན པཀྑནྡནེན ཙཱཏི དྭཱིཧིཔི ཝཱ ཀཱརཎེཧི. སོཏི མགྒོ. སབྦེསཾ ཁནྡྷཱནཾ ཝོསྶཛྫནཾ ཏཔྤཊིབདྡྷསཾཀིལེསཔྤཧཱནེན དཊྛབྦཾ. ཡསྨཱ ཝཱ ཝིཔསྶནཱཙིཏྟཾ པཀྑནྡཏཱིཏི མགྒསམྤཡུཏྟཙིཏྟཾ སནྡྷཱཡཱཧ. མགྒོ ཙ སམུཙྪེདཝསེན ཀིལེསེ ཁནྡྷེ ཙ པརིཙྩཛཏི, ཏསྨཱ ཡཐཱཀྐམཾ ཝིཔསྶནཱམགྒཱནཉྩ ཝསེན པཀྑནྡནཔརིཙྩཱགཝོསྶགྒཱཔི ཝེདིཏབྦཱ. ཏདུབྷཡསམངྒཱིཏི ཝིཔསྶནཱསམངྒཱི མགྒསམངྒཱི ཙ. ‘‘ཨནིཙྩཱནུཔསྶནཱཡ ནིཙྩསཉྙཾ པཛཧཏཱི’’ཏིཨཱདིཝཙནཏོ (པཊི. མ. ༡.༥༢) ཧི ཡཐཱ ཝིཔསྶནཱཡ ཀིལེསཱནཾ པརིཙྩཱགཔྤཊིནིསྶགྒོ ལབྦྷཏི, ཨེཝཾ ཨཱཡཏིཾ ཏེཧི ཀིལེསེཧི ཨུཔྤཱདེཏབྦཀྑནྡྷཱནམྤི པརིཙྩཱགཔཊིནིསྶགྒོ ཝཏྟབྦོ. པཀྑནྡནཔཊིནིསྶགྒོ པན མགྒེ ལབྦྷམཱནཱཡ ཨེཀནྟཀཱརཎབྷཱུཏཱཡ ཝུཊྛཱནགཱམིནིཝིཔསྶནཱཡ ཝསེན ཝེདིཏབྦོ. མགྒེ པན ཏདུབྷཡམྤི ཉཱཡཱགཏམེཝ ནིཔྤརིཡཱཡཏོཝ ལབྦྷམཱནཏྟཱ. ཏེནཱཧ ‘‘ཏདུབྷཡསམངྒཱིཔུགྒལོ’’ཏིཨཱདི. པུཙྪནྟསྶ ཨཛ྄ཛྷཱསཡཝསེན ‘‘ན ཀིཉྩི ལོཀེ ཨུཔཱདིཡཏཱི’’ཏི ཨེཏྠ ཀཱམུཔཱདཱནཝསེན ཨུཔཱདིཡནཾ པཊིཀྑིཔཏཱིཏི ཨཱཧ ‘‘ཏཎྷཱཝསེན ན ཨུཔཱདིཡཏཱི’’ཏི. ཏཎྷཱཝསེན ཝཱ ཨསཏི ཨུཔཱདིཡནེ དིཊྛིཝསེན ཨུཔཱདིཡནཾ ཨནཝཀཱསམེཝཱཏི ‘‘ཏཎྷཱཝསེན’’ཨིཙྩེཝ ཝུཏྟཾ. ན པརཱམསཏཱིཏི ནཱདིཡཏི. དིཊྛིཔརཱམཱསཝསེན ཝཱ ‘‘ནིཙྩ’’ནྟིཨཱདིནཱ ན པརཱམསཏི. སཾཁིཏྟེནེཝ ཀཐེསཱིཏི ཏསྶ ཨཛ྄ཛྷཱསཡཝསེན པཔཉྩཾ ཨཀཏྭཱ ཀཐེསི.

༦༢. ནཝམེ ¶ མཱ, བྷིཀྑཝེ, པུཉྙཱནནྟི (ཨིཏིཝུ. ཨཊྛ. ༦༢) ཨེཏྠ མཱཏི པཊིསེདྷེ ནིཔཱཏོ. པུཉྙ-སདྡོ ‘‘ཀུསལཱནཾ, བྷིཀྑཝེ, དྷམྨཱནཾ སམཱདཱནཧེཏུ ཨེཝམིདཾ པུཉྙཾ པཝཌྜྷཏཱི’’ཏིཨཱདཱིསུ ¶ (དཱི. ནི. ༣.༨༠) པུཉྙཕལེ ཨཱགཏོ. ‘‘ཨཝིཛྫཱགཏོཡཾ, བྷིཀྑཝེ, པུརིསཔུགྒལོ པུཉྙཉྩེ སངྑཱརཾ ཨབྷིསངྑརོཏཱི’’ཏིཨཱདཱིསུ (སཾ. ནི. ༢.༥༡) ཀཱམརཱུཔཱཝཙརསུཙརིཏེསུ. ‘‘པུཉྙཱུཔགཾ ཧོཏི ཝིཉྙཱཎ’’ནྟིཨཱདཱིསུ (སཾ. ནི. ༢.༥༡) སུགཏིཝིསེསབྷཱུཏེ ཨུཔཔཏྟིབྷཝེ. ‘‘ཏཱིཎིམཱནི, བྷིཀྑཝེ, པུཉྙཀིརིཡཝཏྠཱུནི དཱནམཡཾ པུཉྙཀིརིཡཝཏྠུ, སཱིལམཡཾ པུཉྙཀིརིཡཝཏྠུ, བྷཱཝནཱམཡཾ པུཉྙཀིརིཡཝཏྠཱུ’’ཏིཨཱདཱིསུ (ཨིཏིཝུ. ༦༠; དཱི. ནི. ༣.༣༠༥; ཨ. ནི. ༨.༣༦) ཀུསལཙེཏནཱཡཾ. ཨིདྷ པན ཏེབྷཱུམཀཀུསལདྷམྨེ ཝེདིཏབྦོ. བྷཱཡིཏྠཱཏི ཨེཏྠ དུཝིདྷཾ བྷཡཾ ཉཱཎབྷཡཾ, སཱརཛྫབྷཡནྟི. ཏཏྠ ‘‘ཡེཔི ཏེ, བྷིཀྑཝེ, དེཝཱ དཱིགྷཱཡུཀཱ ཝཎྞཝནྟོ སུཁབཧུལཱ ཨུཙྩེསུ ཝིམཱནེསུ ཙིརཊྛིཏིཀཱ, ཏེཔི ཏཐཱགཏསྶ དྷམྨདེསནཾ སུཏྭཱ ཡེབྷུཡྻེན བྷཡཾ སཾཝེགཾ སནྟཱསཾ ཨཱཔཛྫནྟཱི’’ཏི (ཨ. ནི. ༤.༣༣) ཨཱགཏཾ ཉཱཎབྷཡཾ. ‘‘ཨཧུདེཝ བྷཡཾ, ཨཧུ ཚམྦྷིཏཏྟཾ, ཨཧུ ལོམཧཾསོ’’ཏིཨཱདཱིསུ (དཱི. ནི. ༢.༣༡༨) ཨཱགཏཾ སཱརཛྫབྷཡཾ. ཨིདྷཱཔི སཱརཛྫབྷཡམེཝ. ཨཡཉྷེཏྠ ཨཏྠོ – བྷིཀྑཝེ, དཱིགྷརཏྟཾ ཀཱཡཝཙཱིསཾཡམོ ཝཏྟཔྤཊིཝཏྟཔཱུརཎཾ ཨེཀཱསནཾ ཨེཀསེཡྻཾ ཨིནྡྲིཡདམོ དྷུཏདྷམྨེཧི ཙིཏྟསྶ ནིགྒཧོ སཏིསམྤཛཉྙཾ ཀམྨཊྛཱནཱནུཡོགཝསེན ཝཱིརིཡཱརམྦྷོཏི ཨེཝམཱདཱིནི ཡཱནི བྷིཀྑུནཱ ནིརནྟརཾ པཝཏྟེཏབྦཱནི པུཉྙཱནི, ཏེཧི མཱ བྷཱཡིཏྠ, མཱ བྷཡཾ སནྟཱསཾ ཨཱཔཛྫིཏྠ. ཨེཀཙྩསྶ དིཊྛདྷམྨསུཁསྶ ཨུཔརོདྷབྷཡེན སམྤརཱཡིཀནིབྦཱནསུཁདཱཡཀེཧི པུཉྙེཧི མཱ བྷཱཡིཏྠཱཏི. ནིསྶཀྐེ ཨིདཾ སཱམིཝཙནཾ.

ཨིདཱནི ཏཏོ ཨབྷཱཡིཏབྦབྷཱཝེ ཀཱརཎཾ དསྶེནྟོ ‘‘སུཁསྶེཏ’’ནྟིཨཱདིམཱཧ. ཏཏྠ སུཁ-སདྡོ ‘‘སུཁོ བུདྡྷཱནམུཔྤཱདོ, སུཁཱ ཝིརཱགཏཱ ལོཀེ’’ཏིཨཱདཱིསུ (དྷ. པ. ༡༩༤) སུཁམཱུལེ ཨཱགཏོ. ‘‘ཡསྨཱ ཙ ཁོ, མཧཱལི, རཱུཔཾ སུཁཾ སུཁཱནུཔཏིཏཾ སུཁཱཝཀྐནྟ’’ནྟིཨཱདཱིསུ (སཾ. ནི. ༣.༦༠) སུཁཱརམྨཎེ. ‘‘ཡཱཝཉྩིདཾ, བྷིཀྑཝེ, ན སུཀརཾ ཨཀྑཱནེན པཱཔུཎིཏུཾ ཡཱཝ སུཁཱ སགྒཱ’’ཏིཨཱདཱིསུ (མ. ནི. ༣.༢༥༥) སུཁཔཙྩཡཊྛཱནེ. ‘‘སུཁོ པུཉྙསྶ ཨུཙྩཡོ’’ཏིཨཱདཱིསུ (དྷ. པ. ༡༡༨) སུཁཧེཏུམྷི. ‘‘དིཊྛདྷམྨསུཁཝིཧཱརཱ ཨེཏེ དྷམྨཱ’’ཏིཨཱདཱིསུ (མ. ནི. ༡.༨༢) ཨབྱཱཔཛྫེ. ‘‘ནིབྦཱནཾ པརམཾ སུཁ’’ནྟིཨཱདཱིསུ (མ. ནི. ༢.༢༡༥; དྷ. པ. ༢༠༣, ༢༠༤) ནིབྦཱནེ. ‘‘སུཁསྶ ཙ པཧཱནཱ’’ཏིཨཱདཱིསུ (དཱི. ནི. ༡.༢༣༢; མ. ནི. ༡.༢༧༡; སཾ. ནི. ༢.༡༥༢) སུཁཝེདནཱཡཾ. ‘‘ཨདུཀྑམསུཁཾ ¶ སནྟཾ, སུཁམིཙྩེཝ བྷཱསིཏ’’ནྟིཨཱདཱིསུ (སཾ. ནི. ༤.༢༥༣; ཨིཏིཝུ. ༥༣) ཨུཔེཀྑཱཝེདནཱཡཾ. ‘‘དྭེཔི ¶ མཡཱ, ཨཱནནྡ, ཝེདནཱ ཝུཏྟཱ པརིཡཱཡེན སུཁཱ ཝེདནཱ དུཀྑཱ ཝེདནཱ’’ཏིཨཱདཱིསུ (མ. ནི. ༢.༨༩) ཨིཊྛསུཁེསུ. ‘‘སུཁོ ཝིཔཱཀོ པུཉྙཱན’’ནྟིཨཱདཱིསུ (པེཊཀོ. ༢༣) ཨིཊྛཝིཔཱཀེ. ཨིདྷཱཔི ཨིཊྛཝིཔཱཀེ ཨེཝ དཊྛབྦོ. ཨིཊྛསྶཱཏིཨཱདཱིསུ ཨིཙྪིཏབྦཏོ ཙེཝ ཨནིཊྛཔྤཊིཔཀྑཏོ ཙ ཨིཊྛསྶ. ཀམནཱིཡཏོ མནསྨིཉྩ ཀམནཏོ པཝིསནཏོ ཀནྟསྶ. པིཡཱཡིཏབྦཏོ སནྟཔྤནཏོ ཙ པིཡསྶ. མནནཱིཡཏོ མནསྶ ཝཌྜྷནཏོ ཙ མནཱཔསྶཱཏི ཨཏྠོ ཝེདིཏབྦོ. ཡདིདཾ པུཉྙཱནཱིཏི པུཉྙཱནཱིཏི ཡདིདཾ ཝཙནཾ, ཨེཏཾ སུཁསྶ ཨིཊྛསྶ ཝིཔཱཀསྶ ཨདྷིཝཙནཾ ནཱམཾ. སུཁསྶེཏཾ ཡདིདཾ པུཉྙཱནཱིཏི ཕལེན ཀཱརཎསྶ ཨབྷེདོཔཙཱརཾ ཝདཏི. ཏེན ཀཏཱུཔཙིཏཱནཾ པུཉྙཱནཾ ཨཝསྶཾབྷཱཝིཕལཾ སུཏྭཱ ཨཔྤམཏྟེན སཀྐཙྩཾ པུཉྙཱནི ཀཏྟབྦཱནཱིཏི པུཉྙཀིརིཡཱཡཾ ནིཡོཛེཏི, ཨཱདརཉྩ ནེསཾ ཏཏྠ ཨུཔྤཱདེཏི.

ཨིདཱནི ཨཏྟནཱ སུནེཏྟཀཱལེ ཀཏེན པུཉྙཀམྨེན དཱིགྷརཏྟཾ པཙྩནུབྷཱུཏཾ བྷཝནྟརཔྤཊིཙྪནྣཾ ཨུལཱ༹རཏརཾ པུཉྙཝིཔཱཀཾ ཨུདཱཧརིཏྭཱ ཏམཏྠཾ པཱཀཊཏརཾ ཀརོནྟོ ‘‘ཨབྷིཛཱནཱམི ཁོ པནཱཧ’’ནྟིཨཱདིམཱཧ. ཏཏྠ ཨབྷིཛཱནཱམཱིཏི ཨབྷིཝིསིཊྛེན ཉཱཎེན ཛཱནཱམི, པཙྩཀྑཏོ བུཛ྄ཛྷཱམི. དཱིགྷརཏྟནྟི ཙིརཀཱལཾ. པུཉྙཱནནྟི དཱནཱདཱིནཾ ཀུསལདྷམྨཱནཾ. སཏྟ ཝསྶཱནཱིཏི སཏྟ སཾཝཙྪརཱནི. མེཏྟཙིཏྟནྟི མིཛྫཏཱིཏི མེཏྟཱ, སིནིཡ྄ཧཏཱིཏི ཨཏྠོ. མིཏྟེ བྷཝཱ, མིཏྟསྶ ཝཱ ཨེསཱ པཝཏྟཱིཏིཔི མེཏྟཱ. ལཀྑཎཱདིཏོ པན ཧིཏཱཀཱརཔྤཝཏྟིལཀྑཎཱ, ཧིཏཱུཔསཾཧཱརརསཱ, ཨཱགྷཱཏཝིནཡཔཙྩུཔཊྛཱནཱ, སཏྟཱནཾ མནཱཔབྷཱཝདསྶནཔདཊྛཱནཱ. བྱཱཔཱདཱུཔསམོ ཨེཏིསྶཱ སམྤཏྟི, སིནེཧསམྦྷཝོ ཝིཔཏྟི. མེཏྟཙིཏྟཾ བྷཱཝེཏྭཱཏི མེཏྟཱསཧགཏཾ ཙིཏྟཾ, ཙིཏྟསཱིསེན སམཱདྷི ཝུཏྟོཏི མེཏྟཱསམཱདྷིཾ མེཏཱབྲཧྨཝིཧཱརཾ ཨུཔྤཱདེཏྭཱ ཙེཝ ཝཌྜྷེཏྭཱ ཙ.

སཏྟ སཾཝཊྚཝིཝཊྚཀཔྤེཏི སཏྟ མཧཱཀཔྤེ. སཾཝཊྚཝིཝཊྚགྒཧཎེནེཝ ཧི སཾཝཊྚཊྛཱཡིཝིཝཊྚཊྛཱཡིནོཔི གཧིཏཱ. ཨིམཾ ལོཀནྟི ཀཱམལོཀཾ. སཾཝཊྚམཱནེ སུདནྟི སཾཝཊྚམཱནེ, སུདནྟི ནིཔཱཏམཏྟཾ, ཝིཔཛྫམཱནེཏི ཨཏྠོ. ‘‘ཝརསཾཝཏྟཊྛཱནེ སུད’’ནྟིཔི པཋནྟི. ཀཔྤེཏི ཀཱལེ. ཀཔྤསཱིསེན ཧི ཀཱལོ ཝུཏྟོ, ཀཱལེ ཁཱིཡམཱནེ སབྦོཔི ཁཱིཡཏེཝ. ཡཐཱཧ – ‘‘ཀཱལོ ¶ གྷསཏི བྷཱུཏཱནི, སབྦཱནེཝ སཧཏྟནཱ’’ཏི (ཛཱ. ༡.༢.༡༩༠). ‘‘ཨཱབྷསྶརཱུཔགོ ཧོམཱི’’ཏི ཝུཏྟཏྟཱ ཏེཛོསཾཝཊྚཝསེནེཏྠ ཀཔྤཝུཊྛཱནཾ ཝེདིཏབྦཾ. ཨཱབྷསྶརཱུཔགོཏི ཏཏྠ པཊིསནྡྷིགྒཧཎཝསེན ཨཱབྷསྶརབྲཧྨལོཀཾ ཨུཔགཙྪཱམཱིཏི ཨཱབྷསྶརཱུཔགོ ཧོམི. ཝིཝཊྚམཱནེཏི སཎྛཧམཱནེཏི ཨཏྠོ. སུཉྙཾ བྲཧྨཝིམཱནཾ ཨུཔཔཛྫཱམཱིཏི ཀསྶཙི སཏྟསྶ ཏཏྠ ནིབྦཏྟསྶ ཨབྷཱཝཏོ སུཉྙཾ ཡཾ པཋམཛ྄ཛྷཱནབྷཱུམིསངྑཱཏཾ ¶ བྲཧྨཝིམཱནཾ ཨཱདིཏོ ནིབྦཏྟཏི, ཏཾ པཊིསནྡྷིགྒཧཎཝསེན ཨུཔཔཛྫཱམི ཨུཔེམི.

བྲཧྨཱཏི ཀཱམཱཝཙརསཏྟེཧི ཝིསིཊྛཊྛེན ཏཐཱ ཏཐཱ བྲཱུཧིཏགུཎཏཱཡ བྲཧྨཝིཧཱརཏོ ནིབྦཏྟནཊྛེན ཙ བྲཧྨཱ. བྲཧྨཔཱརིསཛྫབྲཧྨཔུརོཧིཏེཧི མཧནྟོ བྲཧྨཱཏི མཧཱབྲཧྨཱ, ཏཏོ ཨེཝ ཏེ ཨབྷིབྷཝིཏྭཱ ཋིཏཏྟཱ ཨབྷིབྷཱུ. ཏེཧི ན ཀེནཙིཔི གུཎེན ཨབྷིབྷཱུཏོཏི ཨནབྷིབྷཱུཏོ. ཨཉྙདཏྠཱུཏི ཨེཀཾསཝཙནེ ནིཔཱཏོ. དསྶནཏོ དསོ, ཨཏཱིཏཱནཱགཏཔཙྩུཔྤནྣཱནཾ དསྶནསམཏྠོ ཨབྷིཉྙཱཉཱཎེན པསྶིཏབྦཾ པསྶཱམཱིཏི ཨཏྠོ. སེསབྲཧྨཱནཾ ཨིདྡྷིཔཱདབྷཱཝནཱབལེན ཨཏྟནོ ཙིཏྟཉྩ མམ ཝསེ ཝཏྟེམཱིཏི ཝསཝཏྟཱི ཧོམཱིཏི ཡོཛེཏབྦཾ. ཏདཱ ཀིར བོདྷིསཏྟོ ཨཊྛསམཱཔཏྟིལཱབྷཱིཔི སམཱནོ ཏཐཱ སཏྟཧིཏཾ ཨཏྟནོ པཱརམིཔཱུརཎཉྩ ཨོལོཀེནྟོ ཏཱསུ ཨེཝ དྭཱིསུ ཛྷཱནབྷཱུམཱིསུ ནིཀནྟི ཨུཔྤཱདེཏྭཱ མེཏྟཱབྲཧྨཝིཧཱརཝསེན ཨཔརཱཔརཾ སཾསརི. ཏེན ཝུཏྟཾ ‘‘སཏྟ ཝསྶཱནི…པེ… ཝསཝཏྟཱི’’ཏི.

ཨེཝཾ བྷགཝཱ རཱུཔཱཝཙརཔུཉྙསྶ ཝིཔཱཀམཧནྟཏཾ པཀཱསེཏྭཱ ཨིདཱནི ཀཱམཱཝཙརཔུཉྙསྶཔི ཝིཔཱཀཾ དསྶེནྟོ ‘‘ཚཏྟིཾསཀྑཏྟུ’’ནྟིཨཱདིམཱཧ. ཏཏྠ སཀྐོ ཨཧོསིནྟི ཚཏྟིཾསཀྑཏྟུཾ ཚཏྟིཾསཝཱརེ ཨཉྙཏྠ ཨནུཔཔཛྫིཏྭཱ ནིརནྟརཾ སཀྐོ དེཝཱནམིནྡོ ཏཱཝཏིཾསདེཝརཱཛཱ ཨཧོསིཾ. རཱཛཱ ཨཧོསིནྟིཨཱདཱིསུ ཙཏཱུཧི ཨཙྪརིཡདྷམྨེཧི ཙཏཱུཧི སངྒཧཝཏྠཱུཧི ཙ ལོཀཾ རཉྫེཏཱིཏི རཱཛཱ. ཙཀྐརཏནཾ ཝཏྟེཏི, ཙཏཱུཧི སམྤཏྟིཙཀྐེཧི ཝཏྟཏི, ཏེཧི ཙ པརཾ ཝཏྟེཏི, པརཧིཏཱཡ ཙ ཨིརིཡཱཔཐཙཀྐཱནཾ ཝཏྟོ ཨེཏསྨིཾ ཨཏྠཱིཏི ཙཀྐཝཏྟཱི. ‘‘རཱཛཱ’’ཏི ཙེཏྠ སཱམཉྙཾ, ‘‘ཙཀྐཝཏྟཱི’’ཏི ཝིསེསཾ. དྷམྨེན ཙརཏཱིཏི དྷམྨིཀོ, ཉཱཡེན སམེན ཝཏྟཏཱིཏི ཨཏྠོ. དྷམྨེནེཝ རཛྫཾ ལབྷིཏྭཱ རཱཛཱ ཛཱཏོཏི དྷམྨརཱཛཱ, དསཝིདྷེ ཀུསལདྷམྨེ ཨགརཧིཏེ ཙ རཱཛདྷམྨེ ནིཡུཏྟོཏི དྷམྨིཀོ. ཏེན ཙ དྷམྨེན སཀལཾ ¶ ལོཀཾ རཉྫེཏཱིཏི དྷམྨརཱཛཱ. པརཧིཏདྷམྨཀརཎེན ཝཱ དྷམྨིཀོ, ཨཏྟཧིཏདྷམྨཀརཎེན དྷམྨརཱཛཱ. ཡསྨཱ ཙཀྐཝཏྟཱི དྷམྨེན ཉཱཡེན རཛྫཾ ཨདྷིགཙྪཏི, ན ཨདྷམྨེན, ཏསྨཱ ཝུཏྟཾ ‘‘དྷམྨེན ལདྡྷརཛྫཏྟཱ དྷམྨརཱཛཱ’’ཏི.

ཙཏཱུསུ དིསཱསུ སམུདྡཔརིཡོསཱནཏཱཡ ཙཱཏུརནྟཱ ནཱམ ཏཏྠ ཏཏྠ དཱིཔེ མཧཱཔཐཝཱིཏི ཨཱཧ ‘‘པུརཏྠིམ…པེ… ཨིསྶརོ’’ཏི. ཝིཛིཏཱཝཱིཏི ཝིཛེཏབྦསྶ ཝིཛིཏཝཱ, ཀཱམཀོདྷཱདིཀསྶ ཨབྦྷནྟརསྶ པཊིརཱཛབྷཱུཏསྶ བཱཧིརསྶ ཙ ཨརིགཎསྶ ཝིཛཡཱི ཝིཛིནིཏྭཱ ཋིཏོཏི ཨཏྠོ. ཀཱམཾ ཙཀྐཝཏྟིནོ ཀེནཙི ཡུདྡྷཾ ནཱམ ནཏྠི, ཡུདྡྷེན པན སཱདྷེཏབྦསྶ ཝིཛཡསྶ སིདྡྷིཡཱ ‘‘ཝིཛིཏསངྒཱམོ’’ཏི ཝུཏྟཾ. ཛནཔདོ ཝཱ ཙཏུབྦིདྷཨཙྪརིཡདྷམྨེན སམནྣཱགཏོ ཨསྨིཾ རཱཛིནི ཐཱཝརིཡཾ ¶ ཀེནཙི ཨསཾཧཱརིཡཾ དལ༹ྷབྷཏྟིབྷཱཝཾ པཏྟོ, ཛནཔདེ ཝཱ ཨཏྟནོ དྷམྨིཀཱཡ པཊིཔཏྟིཡཱ ཐཱཝརིཡཾ ཐིརབྷཱཝཾ པཏྟོཏི ཛནཔདཏྠཱཝརིཡཔྤཏྟོ. ཙཎྜསྶ ཧི རཉྙོ བལིདཎྜཱདཱིཧི ལོཀཾ པཱིལ༹ཡཏོ མནུསྶཱ མཛ྄ཛྷིམཛནཔདཾ ཚཌྜེཏྭཱ པབྦཏསམུདྡཏཱིརཀནྡརཱདཱིནི ནིསྶཱཡ པཙྩནྟེ ཝཱསཾ ཀཔྤེནྟི. ཨཏིམུདུཀསྶ རཉྙོ ཙོརེཧི སཱཧསིཀདྷནཝིལོཔཔཱིལི༹ཏཱ མནུསྶཱ པཙྩནྟཾ པཧཱཡ ཛནཔདམཛ྄ཛྷེ ཝཱསཾ ཀཔྤེནྟི. ཨིཏི ཨེཝརཱུཔེ རཱཛིནི ཛནཔདོ ཐིརབྷཱཝཾ ན པཱཔུཎཱཏི.

སཏྟརཏནསམནྣཱགཏོཏི ཙཀྐརཏནཱདཱིཧི སཏྟཧི རཏནེཧི སམུཔེཏོ. ཏེསུ ཧི རཱཛཱ ཙཀྐཝཏྟཱི ཙཀྐརཏནེན ཨཛིཏཾ ཛིནཱཏི, ཧཏྠིཨསྶརཏནེཧི ཝིཛིཏེ སུཁེནེཝ ཨནུཝིཙརཏི, པརིཎཱཡཀརཏནེན ཝིཛིཏམནུརཀྑཏི, ཨཝསེསེཧི ཨུཔབྷོགསུཁམནུབྷཝཏི. པཋམེན ཙསྶ ཨུསྶཱཧསཏྟིཡོགོ, པཙྪིམེན མནྟསཏྟིཡོགོ, ཧཏྠིཨསྶགཧཔཏིརཏནེཧི པབྷུསཏྟིཡོགོ སུཔརིཔུཎྞོ ཧོཏི. ཨིཏྠིམཎིརཏནེཧི ཨུཔབྷོགསུཁམནུབྷཝཏི, སེསེཧི ཨིསྶརིཡསུཁཾ. ཝིསེསཏོ ཙསྶ པུརིམཱནི ཏཱིཎི ཨདོསཀུསལམཱུལཛནིཏཀམྨཱནུབྷཱཝེན སམྤཛྫནྟི, མཛ྄ཛྷིམཱནི ཨལོབྷཀུསལམཱུལཛནིཏཀམྨཱནུབྷཱཝེན, པཙྪིམམེཀཾ ཨམོཧཀུསལམཱུལཛནིཏཀམྨཱནུབྷཱཝེནཱཏི.

སཱུརཱཏི སཏྟིཝནྟོ, ནིབྦྷཡཱཏི ཨཏྠོཏི ཨཱཧ ‘‘ཨབྷཱིརུནོ’’ཏི. ཨངྒནྟི ཀཱརཎཾ. ཡེན ཀཱརཎེན ‘‘ཝཱིརཱ’’ཏི ཝུཙྩེཡྻུཾ, ཏཾ ཝཱིརངྒཾ. ཏེནཱཧ ‘‘ཝཱིརིཡསྶེཏཾ ནཱམ’’ནྟི. ཡཱཝ ཙཀྐཝཱལ༹པབྦཏཱ ཙཀྐསྶ ཝཏྟནཏོ ‘‘ཙཀྐཝཱལ༹པབྦཏཾ སཱིམཾ ཀཏྭཱ ཋིཏསམུདྡཔརིཡནྟ’’ནྟི ཝུཏྟཾ. ཨདཎྜེནཱཏི ཨིམིནཱ དྷནདཎྜསྶ སརཱིརདཎྜསྶ ཙ ཨཀརཎཾ ཝུཏྟཾ. ཨསཏྠེནཱཏི ཨིམིནཱ ¶ པན སེནཱཡ ཡུཛ྄ཛྷནསྶཱཏི ཏདུབྷཡཾ དསྶེཏུཾ ‘‘ན དཎྜེནཱ’’ཏིཨཱདི ཝུཏྟཾ. ཨིདཾ ཝུཏྟཾ ཧོཏི – ཡེ ཀཏཱཔརཱདྷེ སཏྟེ སཏམྤི སཧསྶམྤི གཎྷནྟི, ཏེ དྷནདཎྜེན རཛྫཾ ཀཱརེནྟི. ཡེ ཚེཛྫབྷེཛྫཾ ཨནུསཱསནྟི, ཏེ སཏྠདཎྜེན. ཨཧཾ པན དུཝིདྷམྤི དཎྜཾ པཧཱཡ ཨདཎྜེན ཨཛ྄ཛྷཱཝསིཾ. ཡེ ཨེཀཏོདྷཱརཱདིནཱ སཏྠེན པརཾ ཝིཧེཋེནྟི, ཏེ སཏྠེན རཛྫཾ ཀཱརེནྟི ནཱམ. ཨཧཾ པན སཏྠེན ཁུདྡཀམཀྑིཀཱཡ པིཝནམཏྟམྤི ལོཧིཏཾ ཀསྶཙི ཨནུཔྤཱདེཏྭཱ དྷམྨེནེཝ ‘‘ཨེཧི ཁོ, མཧཱརཱཛཱ’’ཏི ཨེཝཾ པཊིརཱཛཱུཧི སམྤཊིཙྪིཏཱགམནོ ཝུཏྟཔྤཀཱརཾ པཐཝིཾ ཨབྷིཛིནིཏྭཱ ཨཛ྄ཛྷཱཝསིཾ, ཨབྷིཝིཛིནིཏྭཱ སཱམཱི ཧུཏྭཱ ཝསིནྟི.

ཨིཏི བྷགཝཱ ཨཏྟཱནཾ ཀཱཡསཀྑིཾ ཀཏྭཱ པུཉྙཱནཾ ཝིཔཱཀམཧནྟཏཾ པཀཱསེཏྭཱ ཨིདཱནི ཏམེཝཏྠཾ གཱཐཱབནྡྷནེན དསྶེནྟོ ‘‘པསྶ, པུཉྙཱནཾ ཝིཔཱཀ’’ནྟིཨཱདིམཱཧ. སུཁེསིནོཏི ཨཱལཔནཝཙནམེཏཾ, ཏེན སུཁཔརིཡེསཀེ སཏྟེ ཨཱམནྟེཏི. པཱལི༹ཡཾ པན ‘‘པསྶཐཱ’’ཏི ཝཏྟབྦེ ‘‘པསྶཱ’’ཏི ཝཙནབྱཏྟཡོ ཀཏོཏི དཊྛབྦོ. མནུསྶཱནཾ ཨུརེ སཏྠཾ ཋཔེཏྭཱ ཨིཙྪིཏདྷནཧརཎཱདིནཱ ཝཱ ¶ སཱཧསཀཱརིཏཱཡ སཱཧསིཀཱ, ཏེསཾ ཀམྨཾ སཱཧསིཀཀམྨཾ. པཐཝིཡཱ ཨིསྶརོ པཐབྱོཏི ཨཱཧ ‘‘པུཐཝིསཱམིཀོ’’ཏི.

༦༣. དསམེ ཨུཙྩཱསདྡཱ མཧཱསདྡཱ ཨུདྡྷཾ ཨུགྒཏཏྟཱ ཨུཙྩཾ པཏྠཊཏྟཱ མཧནྟཾ ཨཝིནིབྦྷོགཾ ཝིནིབྷུཉྫིཏྭཱ གཧེཏུཾ ཨསཀྐུཎེཡྻཾ སདྡཾ ཀརོནྟཱ ཝདནྟི. ཝཙཱིགྷོསོཔི ཧི བཧཱུཧི ཨེཀཛ྄ཛྷཾ པཝཏྟིཏོ ཨཏྠཏོ ཙ སདྡཏོ ཙ དུརཝབོདྷོ ཀེཝལཾ མཧཱནིགྒྷོསོ ཨེཝ ཧུཏྭཱ སོཏཔཐམཱགཙྪཏི. མཙྪཝིལོཔེཏི མཙྪེ ཝིལུམྤིཏྭཱ ཝིཡ གཧཎེ, མཙྪཱནཾ ཝཱ ཝིལུམྤནེ. ཀེཝཊྚཱནཉྷི མཙྪཔཙྪིཊྛཔིཏཊྛཱནེ མཧཱཛནོ སནྣིཔཏིཏྭཱ ‘‘ཨིདྷ ཨཉྙཾ ཨེཀཾ མཙྪཾ དེཧི, ཨེཀཾ མཙྪཕཱལཾ དེཧི, ཨེཏསྶ ཏེ མཧཱ དིནྣོ, མཡ྄ཧཾ ཁུདྡཀོ’’ཏི ཨེཝཾ ཨུཙྩཱསདྡམཧཱསདྡཾ ཀརོནྟི. ཏཾ སནྡྷཱཡེཏཾ ཝུཏྟཾ ‘‘ཀེཝཊྚཱནཾ མཙྪཔཙྪིཾ ཨོཏཱརེཏྭཱ ཋིཏཊྛཱནེ’’ཏི. མཙྪགྒཧཎཏྠཾ ཛཱལེ པཀྑིཏྟེཔི ཏསྨིཾ ཋཱནེ ཀེཝཊྚཱ ཙེཝ ཨཉྙེ ཙ ‘‘པཝིཊྛོ ན པཝིཊྛོ ¶ , གཧིཏོ ན གཧིཏོ’’ཏི མཧཱསདྡཾ ཀརོནྟི. ཏཾ སནྡྷཱཡེཏཾ ཝུཏྟཾ ‘‘ཛཱལེ ཝཱ…པེ… མཧཱསདྡོ ཧོཏཱི’’ཏི. ཀཏྟབྦཝཏྟནྟི པཱདཔརིཀམྨཱདིཀཏྟབྦཀིཙྩཾ. ཁརཱཏི ཙིཏྟེན ཝཱཙཱཡ ཙ ཀཀྑལཱ༹. སེསམེཏྠ ཨུཏྟཱནམེཝ.

༦༤. ཨེཀཱདསམེ སཔཏྟཀརཎཱཏི ཝཱ སཔཏྟེཧི ཀཱཏབྦཱ. ཀོདྷནནྟི ཀུཛ྄ཛྷནསཱིལཾ. ཀོདྷནོཡནྟི ཀུཛ྄ཛྷནོ ཨཡཾ. ཨཡནྟི ཙ ནིཔཱཏམཏྟཾ. ཀོདྷཔརེཏོཏི ཀོདྷེན ཨནུགཏོ, པརཱབྷིབྷཱུཏོ ཝཱ. དུབྦཎྞོཝ ཧོཏཱིཏི པཀཏིཡཱ ཝཎྞཝཱཔི ཨལངྐཏཔྤཊིཡཏྟོཔི མུཁཝིཀཱརཱདིཝསེན ཝིརཱུཔོ ཨེཝ ཧོཏི. ཨེཏརཧི ཨཱཡཏིཉྩཱཏི ཀོདྷཱབྷིབྷཱུཏསྶ ཨེཀནྟམིདཾ ཕལནྟི དཱིཔེཏུཾ ‘‘དུབྦཎྞོཝཱ’’ཏི ཨཝདྷཱརཎཾ ཀཏྭཱ པུན ‘‘ཀོདྷཱབྷིབྷཱུཏོ’’ཏི ཝུཏྟཾ.

ཨཡསབྷཱཝནྟི ཨཀིཏྟིམབྷཱཝཾ. ཨཏྟནོ པརེསཉྩ ཨནཏྠཾ ཛནེཏཱིཏི ཨནཏྠཛནནོ. ཨནྟརཏོཏི ཨབྦྷནྟརཏོ, ཙིཏྟཏོ ཝཱ. ཏཾ ཛནོ ནཱཝབུཛ྄ཛྷཏཱིཏི ཀོདྷསངྑཱཏཾ ཨནྟརཏོ ཨབྦྷནྟརེ ¶ ཨཏྟནོ ཙིཏྟེཡེཝ ཛཱཏཾ ཨནཏྠཛནནཙིཏྟཔྤཀོཔནཱདིབྷཡཾ བྷཡཧེཏུཾ ཨཡཾ བཱལམཧཱཛནོ ན ཛཱནཱཏི. ཡནྟི ཡཏྠ. བྷུམྨཏྠེ ཧི ཨེཏཾ པཙྩཏྟཝཙནཾ. ཡསྨིཾ ཀཱལེ ཀོདྷོ སཧཏེ ནརཾ, ཨནྡྷཏམཾ ཏདཱ ཧོཏཱིཏི སམྦནྡྷོ. ཡནྟི ཝཱ ཀཱརཎཝཙནཾ, ཡསྨཱ ཀོདྷོ ཨུཔྤཛྫམཱནོ ནརཾ སཧཏེ ཨབྷིབྷཝཏི, ཏསྨཱ ཨནྡྷཏམཾ ཏདཱ ཧོཏི, ཡདཱ ཀུདྡྷོཏི ཨཏྠོ ཡཾ-ཏཾ-སདྡཱནཾ ཨེཀནྟསམྦནྡྷབྷཱཝཏོ. ཨཐ ཝཱ ཡནྟི ཀིརིཡཱཔརཱམསནཾ. སཧཏེཏི ཡདེཏཾ ཀོདྷསྶ སཧནཾ ཨབྷིབྷཝནཾ, ཨེཏཾ ཨནྡྷཏམཾ བྷཝནནྟི ཨཏྠོ. ཨཐ ཝཱ ཡཾ ནརཾ ཀོདྷོ སཧཏེ ཨབྷིབྷཝཏི, ཏསྶ ཨནྡྷཏམཾ ཏདཱ ཧོཏི. ཏཏོ ཙ ཀུདྡྷོ ཨཏྠཾ ན ཛཱནཱཏི, ཀུདྡྷོ དྷམྨཾ ན པསྶཏཱིཏི.

བྷཱུནཾ ཝུཙྩཏི ཝུདྡྷི, ཏསྶ ཧནནཾ གྷཱཏོ ཨེཏེསནྟི བྷཱུནཧཙྩཱནི. ཏེནཱཧ ‘‘ཧཏཝུདྡྷཱིནཱི’’ཏི. དམ-སདྡེན ཝུཏྟམེཝཏྠཾ ཝིབྷཱཝེཏུཾ པཉྙཱཝཱིརིཡེན ¶ དིཊྛིཡཱཏི ཝུཏྟནྟི དསྶེནྟོ ‘‘ཀཏརེན དམེནཱ’’ཏིཨཱདིམཱཧ. ཨནེཀཏྠོ ཧི དམ-སདྡོ. ‘‘སཙྩེན དནྟོ དམསཱ ཨུཔེཏོ, ཝེདནྟགཱུ ཝུསིཏབྲཧྨཙརིཡོ’’ཏི (སཾ. ནི. ༡.༡༩༥; སུ. ནི. ༤༦༧) ཨེཏྠ ཧི ཨིནྡྲིཡསཾཝརོ དམོཏི ཝུཏྟོ ‘‘མནཙྪཊྛཱནི ཨིནྡྲིཡཱནི དམེཏཱི’’ཏི ཀཏྭཱ. ‘‘ཡདི སཙྩཱ དམཱ ཙཱགཱ, ཁནྟྱཱ བྷིཡྻོདྷ ཝིཛྫཏཱི’’ཏི (སཾ. ནི. ༡.༢༤༦; སུ. ནི. ༡༩༡) ཨེཏྠ པཉྙཱ དམོ ‘‘སཾཀིལེསཾ དམེཏི པཛཧཏཱི’’ཏི ཀཏྭཱ. ‘‘དཱནེན དམེན སཾཡམེན སཙྩཝཛྫེན ཨཏྠི པུཉྙཾ, ཨཏྠི པུཉྙསྶ ཨཱགམོ’’ཏི (སཾ. ནི. ༤.༣༦༥) ཨེཏྠ ཨུཔོསཐཀམྨཾ དམོ ‘‘ཨུཔཝསནཝསེན ཀཱཡཀམྨཱདཱིནི དམེཏཱི’’ཏི ཀཏྭཱ. ‘‘སཀྑིསྶསི ཁོ ཏྭཾ, པུཎྞ, ཨིམིནཱ དམཱུཔསམེན སམནྣཱགཏོ སུནཱཔརནྟསྨིཾ ཛནཔདནྟརེ ཝིཧརིཏུ’’ནྟི (མ. ནི. ༣.༣༩༦; སཾ. ནི. ༤.༨༨) ཨེཏྠ ཨདྷིཝཱསནཀྑནྟི དམོ ‘‘ཀོདྷཱུཔནཱཧམཀྑཱདིཀེ དམེཏི ཝིནོདེཏཱི’’ཏི ཀཏྭཱ. ‘‘ན མཱནཀཱམསྶ དམོ ཨིདྷཏྠི, ན མོནམཏྠི ཨསམཱཧིཏསྶཱ’’ཏི (སཾ. ནི. ༡.༩) ཨེཏྠ ཨབྷིསམྦོཛ྄ཛྷངྒཱདིཀོ སམཱདྷིཔཀྑིཀོ དྷམྨོ དམོ ‘‘དམྨཏི ཙིཏྟཾ ཨེཏེནཱ’’ཏི ཀཏྭཱ. ཨིདྷཱཔི ‘‘ཏཾ དམེན སམུཙྪིནྡེ, པཉྙཱཝཱིརིཡེན དིཊྛིཡཱ’’ཏི ཝཙནཏོ དམ-སདྡེན པཉྙཱཝཱིརིཡདིཊྛིཡོ ཝུཏྟཱ.

༦༥-༦༦. སཏྟམསྶ ¶ པཋམཾ ཨུཏྟཱནམེཝ. དུཏིཡེ ཏཡོ སཾཝཊྚཱཏི ཨཱཔོསཾཝཊྚོ, ཏེཛོསཾཝཊྚོ, ཝཱཡོསཾཝཊྚོཏི ཏཡོ སཾཝཊྚཱ. ཏིསྶོ སཾཝཊྚསཱིམཱཏི ཨཱབྷསྶརཱ, སུབྷཀིཎྷཱ, ཝེཧཔྥལཱཏི ཏིསྶོ སཾཝཊྚསཱིམཱ. ཡདཱ ཧི ཀཔྤོ ཏེཛེན སཾཝཊྚཏི ཝིནསྶཏི, ཏདཱ ཨཱབྷསྶརཏོ ཧེཊྛཱ ཨགྒིནཱ ཌཡ྄ཧཏི. ཡདཱ ཨཱཔེན སཾཝཊྚཏི, ཏདཱ སུབྷཀིཎྷཏོ ཧེཊྛཱ ཨུདཀེན ཝིལཱིཡཏི. ཡདཱ ཝཱཡུནཱ སཾཝཊྚཏི, ཏདཱ ཝེཧཔྥལཏོ ཧེཊྛཱ ཝཱཡུནཱ ཝིདྡྷཾསཏི. ཝིཏྠཱརཏོ པན སདཱཔི ཨེཀཾ བུདྡྷཀྑེཏྟཾ ཝིནསྶཏི. བུདྡྷཀྑེཏྟཾ ནཱམ ཏིཝིདྷཾ ཧོཏི ཛཱཏིཀྑེཏྟཾ ཨཱཎཱཀྑེཏྟཾ ¶ ཝིསཡཀྑེཏྟནྟི. ཏཏྠ ཛཱཏིཀྑེཏྟཾ ནཱམ དསསཧསྶཙཀྐཝཱལ༹པརིཡནྟཾ ཧོཏི, ཡཾ ཏཐཱགཏསྶ པཊིསནྡྷིགཧཎཱདཱིསུ ཀམྤཏི. ཨཱཎཱཀྑེཏྟཾ ཀོཊིསཧསྶཙཀྐཝཱལ༹པརིཡནྟཾ, ཡཏྠ རཏནསུཏྟཾ (ཁུ. པཱ. ༦.༡ ཨཱདཡོ; སུ. ནི. ༢༢༤ ཨཱདཡོ) ཁནྡྷཔརིཏྟཾ (ཨ. ནི. ༤.༦༧; ཙཱུལ༹ཝ. ༢༥༡) དྷཛགྒཔརིཏྟཾ (སཾ. ནི. ༡.༢༤༩). ཨཱཊཱནཱཊིཡཔརིཏྟཾ (དཱི. ནི. ༣.༢༧༥ ཨཱདཡོ), མོརཔརིཏྟནྟི (ཛཱ. ༡.༢.༡༧-༡༨) ཨིམེསཾ པརིཏྟཱནཾ ཨཱནུབྷཱཝོ ཝཏྟཏི. ཝིསཡཀྑེཏྟཾ ཨནནྟམཔརིམཱཎཾ, ཡཾ ‘‘ཡཱཝཏཱ ཝཱ པན ཨཱཀངྑེཡྻཱ’’ཏི ཝུཏྟཾ. ཨེཝམེཏེསུ ཏཱིསུ བུདྡྷཀྑེཏྟེསུ ཨེཀཾ ཨཱཎཱཀྑེཏྟཾ ཝིནསྶཏི. ཏསྨིཾ པན ཝིནསྶནྟེ ཛཱཏིཀྑེཏྟཾ ཝིནཊྛམེཝ ཧོཏི. ཝིནསྶནྟཉྩ ཨེཀཏོཝ ཝིནསྶཏི, སཎྛཧནྟམྤི ཨེཀཏོཝ སཎྛཧཏི.

ཏཱིཎི སཾཝཊྚམཱུལཱནཱིཏི རཱགདོསམོཧསངྑཱཏཱནི ཏཱིཎི སཾཝཊྚཀཱརཎཱནི. རཱགཱདཱིསུ ཧི ཨཀུསལམཱུལེསུ ཨུསྶནྣེསུ ལོཀོ ཝིནསྶཏི. ཏཐཱ ཧི རཱགེ ཨུསྶནྣཏརེ ཨགྒིནཱ ཝིནསྶཏི, དོསེ ཨུསྶནྣཏརེ ཨུདཀེན, མོཧེ ཨུསྶནྣཏརེ ཝཱཏེན. ཀེཙི པན ‘‘དོསེ ཨུསྶནྣཏརེ ཨགྒིནཱ, རཱགེ ཨུདཀེནཱ’’ཏི ཝདནྟི.

ཏཱིཎི ཀོལཱཧལཱནཱིཏི ཀཔྤཀོལཱཧལཾ, བུདྡྷཀོལཱཧལཾ, ཙཀྐཝཏྟིཀོལཱཧལནྟི ཏཱིཎི ཀོལཱཧལཱནི. ཏཏྠ ‘‘ཝསྶསཏསཧསྶམཏྠཀེ ཀཔྤུཊྛཱནཾ ནཱམ བྷཝིསྶཏཱི’’ཏིཨཱདིནཱ དེཝཏཱཧི ཨུགྒྷོསིཏསདྡོ ཀཔྤཀོལཱཧལཾ ནཱམ ཧོཏི. ‘‘ཨིཏོ ཝསྶསཏསཧསྶམཏྠཀེ ལོཀོ ཝིནསྶིསྶཏི, མེཏྟཾ, མཱརིསཱ, བྷཱཝེཐ ཀརུཎཾ མུདིཏཾ ཨུཔེཀྑ’’ནྟི མནུསྶཔཐེ དེཝཏཱ གྷོསནྟིཡོ ཙརནྟི. ‘‘ཝསྶསཧསྶམཏྠཀེ ¶ བུདྡྷོ ཨུཔྤཛྫིསྶཏཱི’’ཏི བུདྡྷཀོལཱཧལཾ ནཱམ ཧོཏི. ‘‘ཨིཏོ ཝསྶསཧསྶམཏྠཀེ བུདྡྷོ ཨུཔྤཛྫིཏྭཱ དྷམྨཱནུདྷམྨཔྤཊིཔནྣོ སངྒྷརཏནེན པརིཝཱརིཏོ དྷམྨཾ དེསེནྟོ ཝིཙརིསྶཏཱི’’ཏི དེཝཏཱ ཨུགྒྷོསནྟི. ‘‘ཝསྶསཏམཏྠཀེ པན ཙཀྐཝཏྟཱི ཨུཔྤཛྫིསྶཏཱི’’ཏི ཙཀྐཝཏྟིཀོལཱཧལཾ ནཱམ ཧོཏི. ‘‘ཨིཏོ ཝསྶསཏམཏྠཀེ སཏྟརཏནསམྤནྣོ ཙཱཏུདྡཱིཔིསྶརོ སཧསྶཔརིཝཱརོ ཝེཧཱསངྒམོ ཙཀྐཝཏྟཱི རཱཛཱ ཨུཔྤཛྫིསྶཏཱི’’ཏི དེཝཏཱ ཨུགྒྷོསནྟི.

ཨཙིརཊྛེན ན དྷུཝཱཏི ཨུདཀབུབྦུལཱ༹དཡོ ཝིཡ ན ཙིརཊྛཱཡིཏཱཡ དྷུཝབྷཱཝརཧིཏཱ. ཨསྶཱསརཧིཏཱཏི སུཔིནཀེ པཱིཏཔཱནཱིཡཾ ཝིཡ ཨནུལིཏྟཙནྡནཾ ཝིཡ ཙ ཨསྶཱསཝིརཧིཏཱ.

ཨུཔཀཔྤནམེགྷོཏི ¶ ཀཔྤཝིནཱསཀམེགྷཾ སནྡྷཱཡ ཝདཏི. ཡསྨིཉྷི སམཡེ ཀཔྤོ ཨགྒིནཱ ནསྶཏི, ཨཱདིཏོཝ ཀཔྤཝིནཱསཀམཧཱམེགྷོ ཨུཊྛཧིཏྭཱ ཀོཊིསཏསཧསྶཙཀྐཝཱལེ༹ ཨེཀམཧཱཝསྶཾ ཝསྶཏི. མནུསྶཱ ཏུཊྛཧཊྛཱ སབྦབཱིཛཱནི ནཱིཧརིཏྭཱ ཝཔནྟི. སསྶེསུ པན གོཁཱཡིཏཀམཏྟེསུ ཛཱཏེསུ གདྲབྷརཝཾ རཝནྟོ ཨེཀབིནྡུམྤི ན ཝསྶཏི, ཏདཱ པཙྪིནྣཾ པཙྪིནྣམེཝ ཝསྶཾ ཧོཏི. ཏེནཱཧ ‘‘ཏདཱ ནིཀྑནྟབཱིཛཾ..པེ… ཨེཀབིནྡུམྤི དེཝོ ན ཝསྶཏཱི’’ཏི. ‘‘ཝསྶསཏསཧསྶ ཨཙྩཡེན ཀཔྤཝུཊྛཱནཾ བྷཝིསྶཏཱི’’ཏིཨཱདིནཱ དེཝཏཱཧི ཝུཏྟཝཙནཾ སུཏྭཱ ཡེབྷུཡྻེན མནུསྶཱ ཙ བྷུམྨདེཝཏཱ ཙ སཾཝེགཛཱཏཱ ཨཉྙམཉྙཾ མུདུཙིཏྟཱ ཧུཏྭཱ མེཏྟཱདཱིནི པུཉྙཱནཱི ཀཏྭཱ དེཝལོཀེ ནིབྦཏྟནྟི, ཨཝཱིཙིཏོ པཊྛཱཡ ཏུཙྪོ ཧོཏཱིཏི.

པཉྩ བཱིཛཛཱཏཱནཱིཏི མཱུལབཱིཛཾ ཁནྡྷབཱིཛཾ ཕལུ༹བཱིཛཾ ཨགྒབཱིཛཾ བཱིཛབཱིཛནྟི པཉྩ བཱིཛཱནི ཛཱཏཱནི. ཏཏྠ མཱུལབཱིཛནྟི ཝཙཱ, ཝཙཏྟཾ, ཧལིདྡཾ, སིངྒིཝེརནྟི ཨེཝམཱདི. ཁནྡྷབཱིཛནྟི ཨསྶཏྠོ, ནིགྲོདྷོཏི ཨེཝམཱདི. ཕལུ༹བཱིཛནྟི ཨུཙྪུ, ཝེལུ༹, ནལོ༹ཏི ཨེཝམཱདི. ཨགྒབཱིཛནྟི ཨཛྫུཀཾ, ཕཎིཛྫཀནྟི ཨེཝམཱདི. བཱིཛབཱིཛནྟི ཝཱིཧིཨཱདི པུབྦཎྞཉྩེཝ མུགྒམཱསཱདིཨཔརཎྞཉྩ. པཙྩཡནྟརསམཝཱཡེ ཝིསདིསུཔྤཏྟིཡཱ ཝིསེསཀཱརཎབྷཱཝཏོ རུཧནསམཏྠེ སཱརཕལེ ནིརུལ༹ྷོ བཱིཛ-སདྡོ ཏདཏྠསིདྡྷིཡཱ མཱུལཱདཱིསུཔི ཀེསུཙི པཝཏྟཏཱིཏི མཱུལཱདིཏོ ནིཝཏྟནཏྠཾ ཨེཀེན བཱིཛ-སདྡེན ཝིསེསེཏྭཱ ཝུཏྟཾ ‘‘བཱིཛབཱིཛ’’ནྟི ‘‘རཱུཔརཱུཔཾ (ཝིསུདྡྷི. ༢.༤༤༩) དུཀྑདུཀྑ’’ནྟི (སཾ. ནི. ༤.༣༢༧) ཡཐཱ. ཡཐཱ ཕལཔཱཀཔརིཡནྟཱ ཨོསདྷིརུཀྑཱ ཝེལུ༹ཀདལིཨཱདཡོ.

ཡཾ ཀདཱཙཱིཏིཨཱདཱིསུ ཡནྟི ནིཔཱཏམཏྟཾ. ཀདཱཙཱིཏི ཀིསྨིཉྩི ཀཱལེ. ཀརཧཙཱིཏི ཏསྶེཝ ¶ ཝེཝཙནཾ. དཱིགྷསྶ ཨདྡྷུནོཏི དཱིགྷསྶ ཀཱལསྶ. ཨཙྩཡེནཱཏི ཨཏིཀྐམེན. སེསམེཏྠ ཨུཏྟཱནམེཝ.

ཧིརིཨོཏྟཔྤསུཏྟཱདིཝཎྞནཱ ནིཊྛིཏཱ.

༦༧. ཏཏིཡེ པཙྩནྟེ བྷཝཾ པཙྩནྟིམཾ. ‘‘རཐོ སཱིལཔརིཀྑཱརོ, ཛྷཱནཀྑོ ཙཀྐཝཱིརིཡོ’’ཏིཨཱདཱིསུ (སཾ. ནི. ༥.༤) ཝིཡ ཨལངྐཱརཝཙནོ པརིཀྑཱརསདྡོཏི ཨཱཧ ‘‘ནགརཱལངྐཱརེཧི ཨལངྐཏ’’ནྟི. པརིཝཱརཝཙནོཔི ཝཊྚཏིཡེཝ ‘‘སཏྟ སམཱདྷིཔརིཀྑཱརཱ’’ཏིཨཱདཱིསུ ¶ (དཱི. ནི. ༣.༣༣༠) ཝིཡ. ནེམཾ ཝུཙྩཏི ཐམྦྷཱདཱིཧི ཨནུཔཏབྷཱུམིཔྤདེསོཏི ཨཱཧ ‘‘གམྦྷཱིརཨཱཝཱཊཱ’’ཏི, གམྦྷཱིརཾ བྷཱུམིཾ ཨནུཔྤཝིཊྛཱཏི ཨཏྠོ. སུཊྛུ སནྣིསཱིདཱཔིཏཱཏི བྷཱུམིཾ ནིཁནིཏྭཱ སམྨདེཝ ཋཔིཏཱ.

ཨནུཔརིཡཱཡེཏི ཨེཏེནཱཏི ཨནུཔརིཡཱཡོ, སོཡེཝ པཐོཏི ཨནུཔརིཡཱཡཔཐོ, པརིཏོ པཱཀཱརསྶ ཨནུཡཱཡམགྒོ.

ཧཏྠིཾ ཨཱརོཧནྟི ཨཱརོཧཱཔཡནྟི ཙཱཏི ཧཏྠཱརོཧཱ (དཱི. ནི. ཊཱི. ༡.༡༦༣). ཡེན ཧི པཡོགེན པུརིསོ ཧཏྠིནོ ཨཱརོཧནཡོགྒོ ཧོཏི, ཧཏྠིསྶ ཏཾ པཡོགཾ ཝིདྷཱཡནྟཱནཾ སབྦེསམྤེཏེསཾ གཧཎཾ. ཏེནཱཧ ‘‘སབྦེཔཱི’’ཏིཨཱདི. ཏཏྠ ཧཏྠཱཙརིཡཱ ནཱམ ཡེ ཧཏྠིནོ ཧཏྠཱརོཧཀཱནཉྩ སིཀྑཱཔཀཱ. ཧཏྠིཝེཛྫཱ ནཱམ ཧཏྠིབྷིསཀྐཱ. ཧཏྠིབནྡྷཱ ནཱམ ཧཏྠཱིནཾ པཱདརཀྑཀཱ. ཨཱདི-སདྡེན ཧཏྠཱིནཾ ཡཝཔདཱཡཀཱདིཀེ སངྒཎྷཱཏི. ཨསྶཱརོཧཱ རཐིཀཱཏི ཨེཏྠཱཔི ཨེསེཝ ནཡོ. རཐེ ནིཡུཏྟཱ རཐིཀཱ. རཐརཀྑཱ ནཱམ རཐསྶ ཨཱཎིརཀྑཀཱ. དྷནུཾ གཎྷནྟི གཎྷཱཔེནྟི ཙཱཏི དྷནུགྒཧཱ, ཨིསྶཱསཱ དྷནུསིཔྤསྶ སིཀྑཱཔཀཱ ཙ. ཏེནཱཧ ‘‘དྷནུཨཱཙརིཡཱ ཨིསྶཱསཱ’’ཏི. ཙེལེན ཙེལཔཊཱཀཱཡ ཡུདྡྷེ ཨཀནྟི གཙྪནྟཱིཏི ཙེལཀཱཏི ཨཱཧ – ‘‘ཡེ ཡུདྡྷེ ཛཡདྡྷཛཾ གཧེཏྭཱ པུརཏོ གཙྪནྟཱི’’ཏི. ཡཐཱ ཏཐཱ ཋིཏེ སེནིཀེ བྲཱུཧཀརཎཝསེན ཏཏོ ཏཏོ ཙལཡནྟི ཨུཙྩཱལེནྟཱིཏི ཙལཀཱ. སཀུཎགྒྷིཨཱདཡོ ཝིཡ མཾསཔིཎྜཾ པརསེནཱསམཱུཧཾ སཱཧསིཀམཧཱཡོདྷཏཱཡ ཚེཏྭཱ ཚེཏྭཱ དཡནྟི ཨུཔྤཏིཏྭཱ གཙྪནྟཱིཏི པིཎྜདཱཡཀཱ. དུཏིཡཝིཀཔྤེ པིཎྜེ དཡནྟི ཛནསམྨདྡེ ཨུཔྤཏནྟཱ ཝིཡ གཙྪནྟཱིཏི པིཎྜདཱཡཀཱཏི ཨཏྠོ ཝེདིཏབྦོ. ཨུགྒཏུགྒཏཱཏི ཐཱམཛཝཔརཀྐམཱདིཝསེན ཨཏིཝིཡ ཨུགྒཏཱ, ཨུདགྒཱཏི ཨཏྠོ. པཀྑནྡནྟཱིཏི ཨཏྟནོ ¶ ཝཱིརསཱུརབྷཱཝེན ཨསཛྫམཱནཱ པརསེནཾ ཨནུཔཝིསནྟཱིཏི ཨཏྠོ. ཐཱམཛཝབལཔརཀྐམཱདིསམྤཏྟིཡཱ མཧཱནཱགཱ ཝིཡ མཧཱནཱགཱ. ཨེཀསཱུརཱཏི ཨེཀཱཀིསཱུརཱ ཨཏྟནོ སཱུརབྷཱཝེནེཝ ཨེཀཱཀིནོ ཧུཏྭཱ ཡུཛ྄ཛྷནཀཱ. སཛཱལིཀཱཏི སཝམྨིཀཱ. སརཔརིཏྟཱཎནྟི ཙམྨཔརིསིབྦིཏཾ ཁེཊཀཾ, ཙམྨམཡཾ ཝཱ ཕལཀཾ. གྷརདཱསཡོདྷཱཏི ཨཏྟནོ དཱསཡོདྷཱ.

སམྤཀྑནྡནལཀྑཎཱཏི སདྡྷེཡྻཝཏྠུནོ ཨེཝམེཏནྟི སམྤཀྑནྡནལཀྑཎཱ. སམྤསཱདནལཀྑཎཱཏི པསཱིདིཏབྦེ ཝཏྠུསྨིཾ པསཱིདནལཀྑཎཱ. ཨོཀཔྤནསདྡྷཱཏི ¶ ཨོཀྐནྟིཏྭཱ པཀྑནྡིཏྭཱ ཨདྷིམུཙྩནཾ. པསཱདནཱིཡེ ཝཏྠུསྨིཾ པསཱིདནཾ པསཱདསདྡྷཱ. ཨཡཾ ཨནུདྷམྨོཏི ཨཡཾ ནཝནྣཾ ལོཀུཏྟརདྷམྨཱནཾ ཨནུལོམདྷམྨོ. ནིབྦིདཱབཧུལོཏི ཨུཀྐཎྛནཱབཧུལོ. སདྡྷཱ བནྡྷཏི པཱཐེཡྻནྟི སདྡྷཱ ནཱམཱཡཾ སཏྟསྶ མརཎཝསེན མཧཱཔཐཾ སཾཝཛཏོ མཧཱཀནྟཱརཾ པཊིཔཛྫཏོ མཧཱཝིདུགྒཾ པཀྑནྡཏོ པཱཐེཡྻཔུཊཾ བནྡྷཏི, སམྦལཾ ཝིསྶཛྫེཏཱིཏི ཨཏྠོ. སདྡྷཉྷི ཨུཔྤཱདེཏྭཱ དཱནཾ དེཏི, སཱིལཾ རཀྑཏི, ཨུཔོསཐཀམྨཾ ཀརོཏི. ཏེནེཏཾ ཝུཏྟཾ ‘‘སདྡྷཱ བནྡྷཏི པཱཐེཡྻ’’ནྟི. སིརཱིཏི ཨིསྶརིཡཾ. ཨིསྶརིཡེ ཧི ཨབྷིམུཁཱིབྷཱུཏེ ཐལཏོཔི ཛལཏོཔི བྷོགཱ ཨཱགཙྪནྟིཡེཝ. ཏེནེཏཾ ཝུཏྟཾ ‘‘སིརཱི བྷོགཱནམཱསཡོ’’ཏི. སདྡྷཱ དུཏིཡཱ པུརིསསྶ ཧོཏཱིཏི པུརིསསྶ དེཝལོཀེ, མནུསྶལོཀེ ཙེཝ ནིབྦཱནཉྩ གཙྪནྟསྶ སདྡྷཱ དུཏིཡཱ ཧོཏི, སཧཱཡཀིཙྩཾ སཱདྷེཏི. བྷཏྟཔུཊཱདཱིཏི ཨཱདི-སདྡེན དུཏིཡིཀཱདཱིནཾ སངྒཧོ དཊྛབྦོ. ཨནེཀསརསཏཱཏི ཨནེཀསབྷཱཝཏཱ, ཨནེཀཀིཙྩཏཱ ཝཱ. སེསཾ སུཝིཉྙེཡྻམེཝ.

༦༨. ཙཏུཏྠེ སུཏྟགེཡྻཱདིདྷམྨཾ ཛཱནཱཏཱིཏི དྷམྨཉྙཱུ. ཏསྶ ཏསྶེཝ སུཏྟགེཡྻཱདིནཱ བྷཱསིཏསྶ ཏདཉྙསྶ སུཏྟཔདཏྠསྶ བོདྷཀསྶ སདྡསྶ ཨཏྠཀུསལཏཱཝསེན ཨཏྠཾ ཛཱནཱཏཱིཏི ཨཏྠཉྙཱུ. ‘‘ཨེཏྟཀོམྷི སཱིལེན སམཱདྷིནཱ པཉྙཱཡཱ’’ཏི ཨེཝཾ ཡཐཱ ཨཏྟནོ པམཱཎཛཱནནཝསེན ཨཏྟཱནཾ ཛཱནཱཏཱིཏི ཨཏྟཉྙཱུ. པཊིགྒཧཎཔརིབྷོགཔརིཡེསནཝིསྶཛྫནེསུ མཏྟཾ ཛཱནཱཏཱིཏི མཏྟཉྙཱུ. ནིདྡེསེ པན པཊིགྒཧཎམཏྟཉྙུཏཱཡ ཨེཝ པརིབྷོགཱདིམཏྟཉྙུཏཱ པབོདྷིཏཱ ཧོཏཱིཏི པཊིགྒཧཎམཏྟཉྙུཏཱཝ དསྶིཏཱ. ‘‘ཨཡཾ ཀཱལོ ཨུདྡེསསྶ, ཨཡཾ ཀཱལོ པརིཔུཙྪཱཡ, ཨཡཾ ཀཱལོ ཡོགསྶ ཨདྷིགམཱཡཱ’’ཏི ཨེཝཾ ཀཱལཾ ཛཱནཱཏཱིཏི ཀཱལཉྙཱུ. ཏཏྠ པཉྩ ཝསྶཱནི ཨུདྡེསསྶ ཀཱལོ, དས པརིཔུཙྪཱཡ, ཨིདཾ ཨཏིསམྦཱདྷཾ, ཨཏིཀྑཔཉྙསྶ ཏཱཝཏཱ ཀཱལེན ཏཱིརེཏུཾ ཨསཀྐུཎེཡྻཏྟཱ ¶ དས ཝསྶཱནི ཨུདྡེསསྶ ཀཱལོ, ཝཱིསཏི པརིཔུཙྪཱཡ, ཏཏོ པརཾ ཡོགེ ཀམྨཾ ཀཱཏབྦཾ. ཁཏྟིཡཔརིསཱདིཀཾ ¶ ཨཊྛཝིདྷཾ པརིསཾ ཛཱནཱཏཱིཏི པརིསཉྙཱུ. བྷིཀྑུཔརིསཱདིཀཾ ཙཏུབྦིདྷཾ, ཁཏྟིཡཔརིསཱདིཀཾ མནུསྶཔརིསཾཡེཝ པུན ཙཏུབྦིདྷཾ གཧེཏྭཱ ཨཊྛཝིདྷཾ ཝདནྟི ཨཔརེ. ནིདྡེསེ པནསྶ ཁཏྟིཡཔརིསཱདིཙཏུབྦིདྷཔརིསགྒཧཎཾ ནིདསྶནམཏྟཾ དཊྛབྦཾ. ‘‘ཨིམཾ མེ སེཝནྟསྶ ཨཀུསལཱ དྷམྨཱ པརིཧཱཡནྟི, ཀུསལཱ དྷམྨཱ ཨབྷིཝཌྜྷནྟི, ཏསྨཱ ཨཡཾ པུགྒལོ སེཝིཏབྦོ, ཝིཔརིཡཱཡཏོ ཨཉྙོ ཨསེཝིཏབྦོ’’ཏི སེཝིཏབྦཱསེཝིཏབྦཔུགྒལཾ ཛཱནཱཏཱིཏི པུགྒལཔརོཔརཉྙཱུ. ཨེཝཉྷི ཏེསཾ པུགྒལཱནཾ པརོཔརཾ ཨུཀྐཊྛནིཧཱིནཏཾ ཛཱནཱཏི ནཱམ. ནིདྡེསེཔིསྶ སེཝིཏབྦཱསེཝིཏབྦཔུགྒལེ ཝིབྷཱཝནམེཝ སམཎཀཐཱཀཏནྟི དཊྛབྦཾ.

༦༩-༧༠. པཉྩམེ པཏིཏཔལཱསོཏི པཏིཏཔཏྟོ. ཨེཏྠ པཋམཾ པཎྜུཔལཱསཏཾ, དུཏིཡཾ པནྣཔལཱསཏཉྩ ཝཏྭཱ ཏཏིཡཾ ཛཱལཀཛཱཏཏཱ, ཙཏུཏྠཾ ཁཱརཀཛཱཏཏཱ ཙ པཱལི༹ཡཾ ཝུཏྟཱ. དཱིགྷནིཀཱཡཊྛཀཐཱཡཾ པན མཧཱགོཝིནྡསུཏྟཝཎྞནཱཡཾ (དཱི. ནི. ཨཊྛ. ༢.༢༩༤) ཨིམམེཝ པཱལི༹ཾ ཨཱཧརིཏྭཱ དསྶེནྟེན པཋམཾ པཎྜུཔལཱསཏཾ, དུཏིཡཾ པནྣཔལཱསཏཉྩ ཝཏྭཱ ཏཏིཡཾ ཁཱརཀཛཱཏཏཱ, ཙཏུཏྠཾ ཛཱལཀཛཱཏཏཱ ཙ དསྶིཏཱ. ཨེཝཉྷི ཏཏྠ ཝུཏྟཾ – ‘‘པཱརིཙྪཏྟཀེ པུཔྥམཱནེ ཨེཀཾ ཝསྶཾ ཨུཔཊྛཱནཾ གཙྪནྟི, ཏེ ཏསྶ པཎྜུཔལཱསབྷཱཝཏོ པཊྛཱཡ ཨཏྟམནཱ ཧོནྟི. ཡཐཱཧ –

ཡསྨིཾ, བྷིཀྑཝེ, སམཡེ དེཝཱནཾ ཏཱཝཏིཾསཱནཾ པཱརིཙྪཏྟཀོ ཀོཝིལཱ༹རོ, པཎྜུཔལཱསོ ཧོཏི, ཨཏྟམནཱ, བྷིཀྑཝེ, དེཝཱ ཏཱཝཏིཾསཱ ཏསྨིཾ སམཡེ ཧོནྟི ‘པཎྜུཔལཱསོ དཱནི པཱརིཙྪཏྟཀོ, ཀོཝིལཱ༹རོ, ན ཙིརསྶེཝ པནྣཔལཱསོ བྷཝིསྶཏཱི’ཏི. ཡསྨིཾ སམཡེ དེཝཱནཾ ཏཱཝཏིཾསཱནཾ པཱརིཙྪཏྟཀོ, ཀོཝིལཱ༹རོ, པནྣཔལཱསོ ཧོཏི, ཛཱལཀཛཱཏོ ཧོཏི, ཁཱརཀཛཱཏོ ཧོཏི, ཀུཊུམལཀཛཱཏོ ཧོཏི, ཀོརཀཛཱཏོ ཧོཏི, ཨཏྟམནཱ, བྷིཀྑཝེ ¶ , དེཝཱ ཏཱཝཏིཾསཱ ཏསྨིཾ སམཡེ ཧོནྟི ‘ཀོརཀཛཱཏོ དཱནི པཱརིཙྪཏྟཀོ ཀོཝིལཱ༹རོ, ན ཙིརསྶེཝ སབྦཔཱལིཕུལློ བྷཝིསྶཏཱི’ཏི.

ལཱིནཏྠཔྤཀཱསིནིཡམྤི ¶ (དཱི. ནི. ཊཱི. ༢.༢༩༤) ཨེཏྠ ཨེཝམཏྠོ དསྶིཏོ – པནྣཔལཱསོཏི པཏིཏཔཏྟོ. ཁཱརཀཛཱཏོཏི ཛཱཏཁུདྡཀམཀུལོ༹. ཡེ ཧི ནཱིལཔཏྟཀཱ ཨཏིཝིཡ ཁུདྡཀཱ མཀུལཱ༹, ཏེ ‘‘ཁཱརཀཱ’’ཏི ཝུཙྩནྟི. ཛཱལཀཛཱཏོཏི ཏེཧིཡེཝ ཁུདྡཀམཀུལེ༹ཧི ཛཱཏཛཱལཀོ སབྦསོ ཛཱལོ ཝིཡ ཛཱཏོ. ཀེཙི པན ‘‘ཛཱལཀཛཱཏོཏི ཨེཀཛཱལོ ཝིཡ ཛཱཏོ’’ཏི ཨཏྠཾ ཝདནྟི. པཱརིཙྪཏྟཀོ ཀིར ཁཱརཀགྒཧཎཀཱལེ སབྦཏྠཀམེཝ པལླཝིཀོ ཧོཏི, ཏེ ཙསྶ པལླཝཱ པབྷསྶརཔཝཱལ༹ཝཎྞསམུཛྫལཱ ཧོནྟི. ཏེན སོ སབྦསོ སམུཛྫལནྟོ ཏིཊྛཏི. ཀུཊུམལཛཱཏོཏི སཉྫཱཏམཧཱམཀུལོ༹. ཀོརཀཛཱཏོཏི སཉྫཱཏསཱུཙིབྷེདོ སམྤཏིཝིཀསམཱནཱཝཏྠོ. སབྦཔཱལིཕུལློཏི སབྦསོ ཕུལླིཏཝིཀསིཏོཏི. ཨཡཉྩ ཨནུཀྐམོ དཱིགྷབྷཱཎཀཱནཾ ཝལ༹ཉྫནཱནུཀྐམེན དསྶིཏོ, ན ཨེཏྠ ཨཱཙརིཡསྶ ཝིརོདྷོ ཨཱསངྐིཏབྦོ.

ཀནྟནཀཝཱཏོཏི དེཝཱནཾ པུཉྙཀམྨཔཙྩཡཱ པུཔྥཱནཾ ཚིནྡནཀཝཱཏོ. ཀནྟཏཱིཏི ཚིནྡཏི. སམྤཊིཙྪནཀཝཱཏོཏི ཚིནྣཱནཾ ཚིནྣཱནཾ པུཔྥཱནཾ སམྤཊིགྒཎྷཀཝཱཏོ. ཙིནནྟོཏི ནཱནཱཝིདྷབྷཏྟིསནྣིཝེསཝསེན ནིཙིནཾ ཀརོནྟོ. ཨཉྙཏརདེཝཏཱནནྟི ནཱམགོཏྟཝསེན ཨཔཉྙཱཏདེཝཏཱནཾ. རེཎུཝཊྚཱིཏི རེཎུསངྒྷཱཏོ. ཀཎྞིཀཾ ཨཱཧཙྩཱཏི སུདྷམྨཱཡ ཀཱུཊཾ ཨཱཧནྟྭཱ.

ཨནུཕརཎཱནུབྷཱཝོཏི ཁཱིཎཱསཝསྶ བྷིཀྑུནོ ཀིཏྟིསདྡསྶ ཡཱཝ བྲཧྨལོཀཱ ཨནུཕརཎསངྑཱཏོ ཨཱནུབྷཱཝོ. པབྦཛྫཱནིསྶིཏཾ ཧོཏཱིཏི པབྦཛྫཱཡ ཙཏུཔཱརིསུདྡྷིསཱིལམྤི དསྶིཏམེཝཱཏི ཨདྷིཔྤཱཡོ. པཋམཛ྄ཛྷཱནསནྣིསྶིཏནྟིཨཱདཱིསུཔི ཨིམིནཱཝ ནཡེན ཨཏྠོ ཝེདིཏབྦོ. ཨིདྷ པན ཨུབྷཡཏོ པརིཙྪེདོ ཧེཊྛཱ སཱིལཏོ ཨུཔརི ཨརཧཏྟཏོ ཙ པརིཙྪེདསྶ དསྶིཏཏྟཱ. ཏེནེཏཾ ཝུཏྟནྟི ཏེན ཀཱརཎེན ཨེཏཾ ‘‘ཙཏུཔཱརིསུདྡྷིསཱིལཾ པབྦཛྫཱནིསྶིཏཾ ཧོཏཱི’’ཏིཨཱདིཝཙནཾ ཝུཏྟཾ. ཚཊྛཾ ཨུཏྟཱནམེཝ.

པཱརིཙྪཏྟཀསུཏྟཱདིཝཎྞནཱ ནིཊྛིཏཱ.

༧༡. སཏྟམེ ¶ ཨཏྠསྶ ཨསཱདྷིཀཱ ‘‘བྷཱཝནཾ ཨནནུཡུཏྟསྶཱ’’ཏི ཝུཏྟཏྟཱ. སམྦྷཱཝནཏྠེཏི ‘‘ཨཔི ནཱམ ཨེཝཾ སིཡཱ’’ཏི ཝིཀཔྤནཏྠོ སམྦྷཱཝནཏྠོ. ཨེཝཉྷི ལོཀེ སིལིཊྛཝཙནཾ ཧོཏཱིཏི ཨེཀམེཝ སངྑཾ ཨཝཏྭཱ ཨཔརཱཡ སངྑཱཡ སདྡྷིཾ ཝཙནཾ ལོཀེ སིལིཊྛཝཙནཾ ཧོཏི ཡཐཱ ‘‘དྭེ ཝཱ ¶ ཏཱིཎི ཝཱ ཨུདཀཕུསིཏཱནཱི’’ཏི. སམྨཱ ཨདྷིསཡིཏཱནཱིཏི པཱདཱདཱིཧི ཨཏྟནཱ ནེསཾ ཀིཉྩི ཨུཔགྷཱཏཾ ཨཀརོནྟིཡཱ བཧིཝཱཏཱདིཔརིསྶཡཔརིཧརཎཏྠཾ སམྨདེཝ ཨུཔརི སཡིཏཱནི. ཨུཔརིཨཏྠོ ཧེཏྠ ཨདྷི-སདྡོ. ཨུཏུཾ གཎྷཱཔེནྟིཡཱཏི ཏེསཾ ཨལླསིནེཧཔརིཡཱདཱནཏྠཾ ཨཏྟནོ ཀཱཡུསྨཱཝསེན ཨུཏུཾ གཎྷཱཔེནྟིཡཱ. ཏེནཱཧ ‘‘ཨུསྨཱིཀཏཱནཱི’’ཏི. སམྨཱ པརིབྷཱཝིཏཱནཱིཏི སམྨདེཝ སབྦསོ ཀུཀྐུཊཝཱསནཱཡ ཝཱསིཏཱནི. ཏེནཱཧ ‘‘ཀུཀྐུཊགནྡྷཾ གཱཧཱཔིཏཱནཱི’’ཏི. ཨེཏྠ ཙ སམྨཱཔརིསེདནཾ ཀུཀྐུཊགནྡྷཔརིབྷཱཝནཉྩ སམྨཱཨདྷིསཡནསམྨཱཔརིསེདནནིཔྥཏྟིཡཱ ཨཱནུབྷཱཝནིཔྥཱདིཏནྟི དཊྛབྦཾ. སམྨཱཨདྷིསཡནེནེཝ ཧི ཨིཏརདྭཡཾ ཨིཛ྄ཛྷཏི. ན ཧི སམྨཱཨདྷིསཡནཏོ ཝིསུཾ སམྨཱཔརིསེདནསྶ སམྨཱཔརིབྷཱཝནསྶ ཙ ཀཱརཎཾ ཨཏྠི. ཏེན པན སདྡྷིཾཡེཝ ཨིཏརེསཾ དྭིནྣམྤི ཨིཛ྄ཛྷནཏོ ཝུཏྟཾ.

ཏིཝིདྷཀིརིཡཱཀརཎེནཱཏི སམྨཱཨདྷིསཡནཱདིཏིཝིདྷཀིརིཡཱཀརཎེནཱཏི ཨཏྠོ. ཀིཉྩཱཔི ‘‘ཨེཝཾ ཨཧོ ཝཏ མེ’’ཏིཨཱདིནཱ ན ཨིཙྪཱ ཨུཔྤཛྫེཡྻ ཀཱརཎསྶ པན སམྤཱདིཏཏྟཱ, ཨཐ ཁོ བྷབྦཱཝ ཏེ ཨབྷིནིབྦྷིཛྫིཏུནྟི ཡོཛནཱ. ཀསྨཱ བྷབྦཱཏི ཨཱཧ ‘‘ཏེ ཧི ཡསྨཱ ཏཱཡཱ’’ཏིཨཱདི. སཡམྤཱིཏི ཨཎྜཱནི. པརིཎཱམནྟི པརིཔཱཀཾ བཧིནིཀྑམནཡོགྱཏཾ. ཡཐཱ ཀཔཱལསྶ ཏནུཏཱ ཨཱལོཀསྶ ཨནྟོ པཉྙཱཡམཱནསྶ ཀཱརཎཾ, ཏཐཱ ཀཔཱལསྶ ཏནུཏཱཡ ནཁསིཁཱམུཁཏུཎྜཀཱནཾ ཁརཏཱཡ ཙ ཨལླསིནེཧཔརིཡཱདཱནཾ ཀཱརཎཝཙནནྟི དཊྛབྦཾ. ཏསྨཱཏི ཨཱལོཀསྶ ཨནྟོ པཉྙཱཡམཱནཏོ སཡཉྩ པརིཔཱཀགཏཏྟཱ.

ཨོཔམྨསམྤཊིཔཱདནནྟི ཨོཔམྨཏྠསྶ ཨུཔམེཡྻེན སམྨདེཝ པཊིཔཱདནཾ. ཏནྟི ཨོཔམྨསམྤཊིཔཱདནཾ. ཨེཝནྟི ཨིདཱནི ཝུཙྩམཱནཱཀཱརེན. ཨཏྠེནཱཏི ཨུཔམེཡྻཏྠེན སཾསནྡེཏྭཱ སཧ ཡོཛེཏྭཱ. སམྤཱདནེན སམྤཡུཏྟདྷམྨཝསེན ཉཱཎསྶ ཏིཀྑབྷཱཝོ ཝེདིཏབྦོ. ཉཱཎསྶ ཧི སབྷཱཝཏོ སཏིནེཔཀྐཏོ ཙ ཏིཀྑབྷཱཝོ, སམཱདྷིཝསེན ཁརབྷཱཝོ, སདྡྷཱཝསེན ཝིཔྤསནྣབྷཱཝོ. པརིཎཱམཀཱལོཏི བལཝཝིཔསྶནཱཀཱལོ. ཝཌྜྷིཀཱལོཏི ¶ ཝུཊྛཱནགཱམིནིཝིཔསྶནཱཀཱལོ. ཨནུལོམཊྛཱནིཡཱ ཧི ཝིཔསྶནཱ གཧིཏགབྦྷཱ ནཱམ ཏདཱ མགྒགབྦྷསྶ གཧིཏཏྟཱ. ཏཛྫཱཏིཀནྟི ཏསྶ ཝིཔསྶནཱནུཡོགསྶ ཨནུརཱུཔཾ. སཏྠཱཔི ཨཝིཛྫཎྜཀོསཾ པཧརཏི, དེསནཱཔི ཝིནེཡྻསནྟཱནགཏཾ ཨཝིཛྫཎྜཀོསཾ པཧརཏི, ཡཐཱཋཱནེ ཋཱཏུཾ ན དེཏི.

ཨོལམྦཀསངྑཱཏནྟི ཨོལམྦཀསུཏྟསངྑཱཏཾ. ‘‘པལ’’ནྟི ཧི ཏསྶ སུཏྟསྶ ནཱམཾ. ཙཱརེཏྭཱ དཱརུནོ ཧེཊྛཱ དོསཛཱནནཏྠཾ ཨུསྶཱཔེཏྭཱ. གཎྜཾ ཧརཏཱིཏི པལགཎྜོཏི ཨེཏེན ‘‘པལེན གཎྜཧཱརོ པལགཎྜོཏི པཙྪིམཔདེ ཨུཏྟརཔདལོཔེན ནིདྡེསོ’’ཏི དསྶེཏི. གཧཎཊྛཱནེཏི ཧཏྠེན གཧེཏབྦཊྛཱནེ ¶ . སམྨདེཝ ཁིཔཱིཡནྟི ཨེཏེན ཀཱཡདུཙྩརིཏཱདཱིནཱིཏི སངྑེཔོ, པབྦཛྫཱཝ སངྑེཔོ པབྦཛྫཱསངྑེཔོ. ཏེན ཝིཔསྶནཾ ཨནུཡུཉྫནྟསྶ པུགྒལསྶ ཨཛཱནནྟསྶེཝ ཨཱསཝཱནཾ པརིཀྑཡོ ཨིདྷ ཝིཔསྶནཱནིསཾསོཏི ཨདྷིཔྤེཏོ.

ཧེམནྟིཀེན ཀཱརཎབྷཱུཏེན, བྷུམྨཏྠེ ཝཱ ཨེཏཾ ཀརཎཝཙནཾ, ཧེམནྟིཀེཏི ཨཏྠོ. པཊིཔྤསྶམྦྷནྟཱིཏི པཊིཔྤསྶདྡྷཕལཱནི ཧོནྟི. ཏེནཱཧ ‘‘པཱུཏིཀཱནི བྷཝནྟཱི’’ཏི. མཧཱསམུདྡོ ཝིཡ སཱསནཾ ཨགཱདྷགམྦྷཱིརབྷཱཝཏོ. ནཱཝཱ ཝིཡ ཡོགཱཝཙརོ མཧོགྷུཏྟརཏོ. པརིཡཱཡནཾ ཝིཡཱཏི པརིཏོ ཨཔརཱཔརཾ ཡཱཡནཾ ཝིཡ. ཁཛྫམཱནཱནནྟི ཁཱདནྟེན ཝིཡ ཨུདཀེན ཁེཔིཡམཱནབནྡྷནཱནཾ. ཏནུབྷཱཝོཏི པརིཡུཊྛཱནཔཝཏྟིཡཱ ཨསམཏྠཏཱཡ དུབྦལབྷཱཝོ. ཝིཔསྶནཱཉཱཎཔཱིཏིཔཱམོཛྫེཧཱིཏི ཝིཔསྶནཱཉཱཎསམུཊྛིཏེཧི པཱིཏིཔཱམོཛྫེཧི. ཨོཀྑཱཡམཱནེཏི ཝིཔསྶནཱཀམྨཊྛཱནེ ཝཱིཐིཔྤཊིཔཱཊིཡཱ ཨོཀྑཱཡམཱནེ, པཊིསངྑཱནུཔསྶནཱཡ ཝཱ ཨོཀྑཱཡམཱནེ. སངྑཱརུཔེཀྑཱཡ པཀྑཱཡམཱནེ. དུབྦལཏཱ དཱིཔིཏཱ ‘‘ཨཔྤཀསིརེནེཝ སཾཡོཛནཱནི པཊིཔྤསྶམྦྷནྟི, པཱུཏིཀཱནི བྷཝནྟཱི’’ཏི ཝུཏྟཏྟཱ.

༧༢-༧༣. ཨཊྛམེ པསྶཐ ནཱུཏི ཨཔི པསྶཐ. མཧནྟནྟི ཝིཔུལཾ. ཨགྒིཀྑནྡྷནྟི ཨགྒིསམཱུཧཾ. ཨཱདིཏྟནྟི པདིཏྟཾ. སམྤཛྫལིཏནྟི སམནྟཏོ པཛྫལིཏཾ ཨཙྩིཝིཔྥུལིངྒཱནི ¶ མུཉྩནྟཾ. སཛོཏིབྷཱུཏནྟི སམནྟཏོ ཨུཊྛིཏཱཧི ཛཱལཱཧི ཨེཀཔྤབྷཱསམུདཡབྷཱུཏཾ. ཏཾ ཀིཾ མཉྙཐཱཏི ཏཾ ཨིདཱནི མཡཱ ཝུཙྩམཱནཏྠཾ ཀིཾ མཉྙཐཱཏི ཨནུམཏིགྒཧཎཏྠཾ པུཙྪཏི. ཡདེཏྠ སཏྠཱ ཨགྒིཀྑནྡྷཱལིངྒནཾ ཀཉྙཱལིངྒནཉྩ ཨཱནེསི, ཏམཏྠཾ ཝིབྷཱཝེཏུཾ ‘‘ཨཱརོཙཡཱམཱི’’ཏིཨཱདིམཱཧ.

དུསྶཱིལསྶཱཏི ནིསྶཱིལསྶ སཱིལཝིརཧིཏསྶ. པཱཔདྷམྨསྶཱཏི དུསྶཱིལཏྟཱ ཨེཝ ཧཱིནཛ྄ཛྷཱསཡཏཱཡ ལཱམཀསབྷཱཝསྶ. ཨསུཙིསངྐསྶརསམཱཙཱརསྶཱཏི ཨཔརིསུདྡྷཏཱཡ ཨསུཙི ཧུཏྭཱ སངྐཱཡ སརིཏབྦསམཱཙཱརསྶ. དུསྶཱིལོ ཧི ཀིཉྩིདེཝ ཨསཱརུཔྤཾ དིསྭཱ ‘‘ཨིདཾ ཨསུཀེན ཀཏཾ བྷཝིསྶཏཱི’’ཏི པརེསཾ ཨཱསངྐཱ ཧོཏི. ཀེནཙིདེཝ ཀརཎཱིཡེན མནྟཡནྟེ བྷིཀྑཱུ དིསྭཱ ‘‘ཀཙྩི ནུ ཁོ ཨིམེ མཡཱ ཀཏཀམྨཾ ཛཱནིཏྭཱ མནྟེནྟཱི’’ཏི ཨཏྟནོཡེཝ སངྐཱཡ སརིཏབྦསམཱཙཱརོ ¶ . པཊིཙྪནྣཀམྨནྟསྶཱཏི ལཛྫིཏབྦཏཱཡ པཊིཙྪཱདེཏབྦཀམྨནྟསྶ. ཨསྶམཎསྶཱཏི ན སམཎསྶ. སལཱཀགྒཧཎཱདཱིསུ ‘‘ཨཧམྤི སམཎོ’’ཏི མིཙྪཱཔཊིཉྙཱཡ སམཎཔཊིཉྙསྶ. ཨསེཊྛཙཱརིཏཱཡ ཨབྲཧྨཙཱརིསྶ. ཨུཔོསཐཱདཱིསུ ‘‘ཨཧམྤི བྲཧྨཙཱརཱི’’ཏི མིཙྪཱཔཊིཉྙཱཡ བྲཧྨཙཱརིཔཊིཉྙསྶ. པཱུཏིནཱ ཀམྨེན སཱིལཝིཔཏྟིཡཱ ཨནྟོ ཨནུཔཝིཊྛཏྟཱ ཨནྟོཔཱུཏིཀསྶ. ཚདྭཱརེཧི རཱགཱདིཀིལེསཱནུསྶཝནེན ཏིནྟཏྟཱ ཨཝསྶུཏསྶ. སཉྫཱཏརཱགཱདིཀཙཝརཏྟཱ སཱིལཝནྟེཧི ཚཌྜེཏབྦཏྟཱ ཙ ཀསམྦུཛཱཏསྶ.

ཝཱལརཛྫུཡཱཏི ཝཱལེཧི ཀཏརཛྫུཡཱ. སཱ ཧི ཁརཏརཱ ཧོཏི. གྷཾསེཡྻཱཏི མཐནཝསེན གྷཾསེཡྻ. ཏེལདྷོཏཱཡཱཏི ཏེལེན ནིསིཏཱཡ. པཙྩོརསྨིནྟི པཏིཨུརསྨིཾ, ཨབྷིམུཁེ ཨུརམཛ྄ཛྷེཏི ཨདྷིཔྤཱཡོ. ཨཡོསངྐུནཱཏི སཎྜཱསེན. ཕེཎུདྡེཧཀནྟི ཕེཎཾ ཨུདྡེཧེཏྭཱ ཨུདྡེཧེཏྭཱ, ཨནེཀཝཱརཾ ཕེཎཾ ཨུཊྛཱཔེཏྭཱཏི ཨཏྠོ. ཨེཝམེཏྠ སངྑེཔཏོ པཱལི༹ཝཎྞནཱ ཝེདིཏབྦཱ. ནཝམཾ ཨུཏྟཱནམེཝ.

ཨགྒིཀྑནྡྷོཔམསུཏྟཱདིཝཎྞནཱ ནིཊྛིཏཱ.

༧༤. དསམེ པརིཏྟནྟི ཨིཏྟརཾ. ཏེནཱཧ ‘‘ཨཔྤཾ ཐོཀ’’ནྟི. པབནྡྷཱནུཔཙྪེདསྶ པཙྩཡབྷཱཝོ ཨིདྷ ཛཱིཝིཏསྶ རསོ ཀིཙྩནྟི ཨདྷིཔྤེཏནྟི ཨཱཧ ¶ ‘‘སརསཔརིཏྟཏཱཡཔཱི’’ཏི. ཏདདྷཱིནཝུཏྟིཏཱཡཔི ཧི ‘‘ཡོ, བྷིཀྑཝེ, ཙིརཾ ཛཱིཝཏི, སོ ཝསྶསཏཾ ཨཔྤཾ ཝཱ བྷིཡྻོ’’ཏི ཝཙནཏོ པརིཏྟཾ ཁཎཔརིཏྟཏཱཡཔི. པརམཏྠཏོ ཧི ཨཏིཔརིཏྟོ སཏྟཱནཾ ཛཱིཝིཏཀྑཎོ ཨེཀཙིཏྟཀྑཎཔྤཝཏྟིམཏྟོཡེཝ. ཡཐཱ ནཱམ རཐཙཀྐཾ པཝཏྟམཱནམྤི ཨེཀེནེཝ ནེམིཔྤདེསེན པཝཏྟཏི, ཏིཊྛམཱནམྤི ཨེཀེནེཝ ཏིཊྛཏི, ཨེཝམེཝཾ ཨེཀཙིཏྟཀྑཎིཀཾ སཏྟཱནཾ ཛཱིཝིཏཾ ཏསྨིཾ ཙིཏྟེ ནིརུདྡྷམཏྟེ སཏྟོ ནིརུདྡྷོཏི ཝུཙྩཏི. ཡཐཱཧ ‘‘ཨཏཱིཏེ ཙིཏྟཀྑཎེ ཛཱིཝིཏྠ ན ཛཱིཝཏི ན ཛཱིཝིསྶཏི. ཨནཱགཏེ ཙིཏྟཀྑཎེ ན ཛཱིཝིཏྠ ན ཛཱིཝཏི ཛཱིཝིསྶཏི. པཙྩུཔྤནྣེ ཙིཏྟཀྑཎེ ན ཛཱིཝིཏྠ ཛཱིཝཏི ན ཛཱིཝིསྶཏི.

‘‘ཛཱིཝིཏཾ ཨཏྟབྷཱཝོ ཙ, སུཁདུཀྑཱ ཙ ཀེཝལཱ;

ཨེཀཙིཏྟསམཱཡུཏྟཱ, ལཧུསོ ཝཏྟཏེ ཁཎོ.

‘‘ཡེ ¶ ནིརུདྡྷཱ མརནྟསྶ, ཏིཊྛམཱནསྶ ཝཱ ཨིདྷ;

སབྦེཔི སདིསཱ ཁནྡྷཱ, གཏཱ ཨཔྤཊིསནྡྷིཀཱ.

‘‘ཨནིབྦཏྟེན ན ཛཱཏོ, པཙྩུཔྤནྣེན ཛཱིཝཏི;

ཙིཏྟབྷངྒཱ མཏོ ལོཀོ, པཉྙཏྟི པརམཏྠིཡཱ’’ཏི. (མཧཱནི. ༡༠);

ལཧུསནྟི ལཧུཀཾ. ཏེནཱཧ ‘‘ལཧུཾ ཨུཔྤཛྫིཏྭཱ ནིརུཛ྄ཛྷནཏོ ལཧུས’’ནྟི. པརིཏྟཾ ལཧུསནྟི ཨུབྷཡཾ པནེཏཾ ཨཔྤཀསྶ ཝེཝཙནཾ. ཡཉྷི ཨཔྤཀཾ, ཏཾ པརིཏྟཉྩེཝ ལཧུཀཉྩ ཧོཏི. ཨིདྷ པན ཨཱཡུནོ ཨདྷིཔྤེཏཏྟཱ རསྶནྟི ཝུཏྟཾ ཧོཏི. མནྟཱཡནྟི ཀརཎཏྠེ ཨེཏཾ བྷུམྨཝཙནནྟི ཨཱཧ ‘‘མནྟཱཡ བོདྡྷབྦཾ, པཉྙཱཡ ཛཱནིཏབྦནྟི ཨཏྠོ’’ཏི. མནྟཱཡནྟི ཝཱ མནྟེཡྻནྟི ཝུཏྟཾ ཧོཏི, མནྟེཏབྦཾ མནྟཱཡ ཨུཔཔརིཀྑིཏབྦནྟི ཨཏྠོ. པཉྙཱཡ ཛཱནིཏབྦནྟི ཛཱནིཏབྦཾ ཛཱིཝིཏསྶ པརིཏྟབྷཱཝོ བཧུདུཀྑཱདིབྷཱཝོ. ཛཱནིཏྭཱ ཙ པན སབྦཔལིབོདྷེ ཚིནྡིཏྭཱ ཀཏྟབྦཾ ཀུསལཾ, ཙརིཏབྦཾ བྲཧྨཙརིཡཾ. ཡསྨཱ ཨིཏྠི ཛཱཏསྶ ཨམརཎཾ, ཨཔྤཾ ཝཱ བྷིཡྻོ ཝསྶསཏཏོ ཨུཔརི ཨཔྤཾ ཨཉྙཾ ཝསྶསཏཾ ཨཔྤཏྭཱ ཝཱིསཾ ཝཱ ཏིཾསཾ ཝཱ ཙཏྟཱལཱིསཾ ཝཱ པཎྞཱསཾ ཝཱ སཊྛི ཝཱ ཝསྶཱནི ཛཱིཝཏི, ཨེཝཾདཱིགྷཱཡུཀོ པན ཨཏིདུལླབྷོ. ‘‘ཨསུཀོ ཧི ཨེཝཾ ཙིརཾ ཛཱིཝཏཱི’’ཏི ཏཏྠ ཏཏྠ གནྟྭཱ དཊྛབྦོ ཧོཏི. ཏཏྠ ཝིསཱཁཱ ཨུཔཱསིཀཱ ཝཱིསསཏཾ ཛཱིཝཏི, ཏཐཱ པོཀྑརསཱཏིབྲཱཧྨཎོ, བྲཧྨཱཡུབྲཱཧྨཎོ, བཱཝརིཡབྲཱཧྨཎོ, ཨཱནནྡཏྠེརོ, མཧཱཀསྶཔཏྠེརོཏི ¶ . ཨནུརུདྡྷཏྠེརོ པན ཝསྶསཏཉྩེཝ པཎྞཱསཉྩ ཝསྶཱནི. བཱཀུལཏྠེརོ ཝསྶསཏཉྩེཝ སཊྛི ཙ ཝསྶཱནི, ཨཡཾ སབྦདཱིགྷཱཡུཀོ, སོཔི དྭེ ཝསྶསཏཱནི ན ཛཱིཝི.

༧༥-༨༢. ཨཊྛམསྶ ¶ པཋམཾ དུཏིཡཉྩ ཨུཏྟཱནཏྠམེཝ. ཏཏིཡེ ཝིནཡལཀྑཎེ པཏིཊྛིཏོ ལཛྫིབྷཱཝེན ཝིནཡལཀྑཎེ ཋིཏོ ཧོཏི. ཨལཛྫཱི (པཱརཱ. ཨཊྛ. ༡.༤༥) ཧི བཧུསྶུཏོཔི སམཱནོ ལཱབྷགརུཀཏཱཡ ཏནྟིཾ ཝིསཾཝཱདེཏྭཱ ཨུདྡྷམྨཾ ཨུབྦིནཡཾ སཏྠུསཱསནཾ དཱིཔེཏྭཱ སཱསནེ མཧནྟཾ ཨུཔདྡཝཾ ཀརོཏི, སངྒྷབྷེདམྤི སངྒྷརཱཛིམྤི ཨུཔྤཱདེཏི. ལཛྫཱི པན ཀུཀྐུཙྩཀོ སིཀྑཱཀཱམོ ཛཱིཝིཏཧེཏུཔི ཏནྟིཾ ཨཝིསཾཝཱདེཏྭཱ དྷམྨམེཝ ཝིནཡམེཝ ཙ དཱིཔེཏི, སཏྠུསཱསནཾ གརུཾ ཀཏྭཱ ཋཔེཏི. ཨེཝཾ ཡོ ལཛྫཱི, སོ ཝིནཡཾ ཨཛཧནྟོ ཨཝོཀྐམནྟོཝ ལཛྫིབྷཱཝེན ཝིནཡལཀྑཎེ ཋིཏོ ཧོཏི པཏིཊྛིཏོ.

ཨསཾཧཱིརོཏི ཨེཏྠ སཾཧཱིརོ ནཱམ ཡོ པཱལི༹ཡཾ ཝཱ ཨཊྛཀཐཱཡཾ ཝཱ ཧེཊྛཱ ཝཱ ཨུཔརིཏོ ཝཱ པདཔཊིཔཱཊིཡཱ ཝཱ པུཙྪིཡམཱནོ ཝིཏྠུནཏི ཝིཔྥནྡཏི, སཎྛཱཏུཾ ན སཀྐོཏི, ཡཾ ཡཾ པརེན ཝུཙྩཏི, ཏཾ ཏཾ ཨནུཛཱནཱཏི, སཀཝཱདཾ ཚཌྜེཏྭཱ པརཝཱདཾ གཎྷཱཏི. ཡོ པན པཱལི༹ཡཾ ཝཱ ཨཊྛཀཐཱཡཾ ཝཱ ཧེཊྛུཔརིཡཝསེན ཝཱ པདཔཊིཔཱཊིཡཱ ཝཱ པུཙྪིཡམཱནོ ན ཝིཏྠུནཏི ན ཝིཔྥནྡཏི, ཨེཀེཀལོམཾ སཎྜཱསེན གཎྷནྟོ ཝིཡ ‘‘ཨེཝཾ མཡཾ ཝདཱམ, ཨེཝཾ ནོ ཨཱཙརིཡཱ ཝདནྟཱི’’ཏི ཝིསྶཛྫེཏི. ཡམྷི པཱལི༹ ཙ པཱལི༹ཝིནིཙྪཡོ ཙ སུཝཎྞབྷཱཛནེ པཀྑིཏྟསཱིཧཝསཱ ཝིཡ པརིཀྑཡཾ པརིཡཱདཱནཾ ཨགཙྪནྟོ ཏིཊྛཏི, ཨཡཾ ཝུཙྩཏི ཨསཾཧཱིརོ. ཡསྨཱ པན ཨེཝརཱུཔོ ཡཾ ཡཾ པརེན ཝུཙྩཏི, ཏཾ ཏཾ ནཱནུཛཱནཱཏི, ཨཏྟནཱ སུཝིནིཙྪིནིཏཾ ཀཏྭཱ གཧིཏཾ ཨཝིཔརཱིཏམཏྠཾ ན ¶ ཝིསྶཛྫེཏི, ཏསྨཱ ཝུཏྟཾ ‘‘ན སཀྐོཏི གཧིཏགྒཧཎཾ ཝིསྶཛྫཱཔེཏུ’’ནྟི. ཙཏུཏྠཱདཱིནི སུཝིཉྙེཡྻཱནི.

པཋམཝིནཡདྷརསུཏྟཱདིཝཎྞནཱ ནིཊྛིཏཱ.

༨༣. ནཝམེ ཝིཝེཀཊྛོཏི ཝིཝིཏྟོ. ཏེནཱཧ ‘‘དཱུརཱིབྷཱུཏོ’’ཏི. སཏིཨཝིཔྤཝཱསེ ཋིཏོཏི ཀམྨཊྛཱནེ ¶ སཏིཾ ཨཝིཛཧིཏྭཱ ཋིཏོ. པེསིཏཏྟོཏི ཀཱཡེ ཙ ཛཱིཝིཏེ ཙ ཨནཔེཀྑཏཱཡ ནིབྦཱནཾ པེསིཏཙིཏྟོ ཏནྣིནྣོ ཏཔྤོཎོ ཏཔྤབྦྷཱརོ.

༨༤. དསམེ ཨདྷིཀརཱིཡནྟི ཨེཏྠཱཏི ཨདྷིཀརཎཱནི. ཀེ ཨདྷིཀརཱིཡནྟི? སམཐཱ. ཀཐཾ ཨདྷིཀརཱིཡནྟི? སམནཝསེན. ཏསྨཱ ཏེ ཏེསཾ སམནཝསེན པཝཏྟནྟཱིཏི ཨཱཧ ‘‘ཨདྷིཀརཎཱནི སམེནྟཱི’’ཏིཨཱདི. ཨུཔྤནྣཱནཾ ཨུཔྤནཱནནྟི ཨུཊྛིཏཱནཾ ཨུཊྛིཏཱནཾ. སམཐཏྠནྟི སམནཏྠཾ. དཱིགྷནིཀཱཡེ སངྒཱིཏིསུཏྟཝཎྞནཱཡམྤི (དཱི. ནི. ཨཊྛ. ༣.༣༣༡) ཝིཏྠཱརཏོཡེཝཱཏི ཨེཏྠཱཡཾ ཝིཏྠཱརནཡོ – ཨདྷིཀརཎེསུ ཏཱཝ དྷམྨོཏི ཝཱ ཨདྷམྨོཏི ཝཱ ཨཊྛཱརསཧི ཝཏྠཱུཧི ཝིཝདནྟཱནཾ བྷིཀྑཱུནཾ ཡོ ཝིཝཱདོ, ཨིདཾ ཝིཝཱདཱདྷིཀརཎཾ ནཱམ. སཱིལཝིཔཏྟིཡཱ ཝཱ ཨཱཙཱརདིཊྛིཨཱཛཱིཝཝིཔཏྟིཡཱ ཝཱ ཨནུཝདནྟཱནཾ ཡོ ཨནུཝཱདོ ཨུཔཝདནཱ ཙེཝ ཙོདནཱ ཙ, ཨིདཾ ཨནུཝཱདཱདྷིཀརཎཾ ནཱམ. མཱཏིཀཱཡཾ ཨཱགཏཱ པཉྩ, ཝིབྷངྒེ དྭེཏི སཏྟཔི ཨཱཔཏྟིཀྑནྡྷཱ, ཨིདཾ ཨཱཔཏྟཱདྷིཀརཎཾ ནཱམ. ཡཾ སངྒྷསྶ ཨཔལོཀནཱདཱིནཾ ཙཏུནྣཾ ཀམྨཱནཾ ཀརཎཾ, ཨིདཾ ཀིཙྩཱདྷིཀརཎཾ ནཱམ.

ཏཏྠ ཝིཝཱདཱདྷིཀརཎཾ དྭཱིཧི སམཐེཧི སམྨཏི སམྨུཁཱཝིནཡེན ཙ ཡེབྷུཡྻསིཀཱཡ ཙ. སམྨུཁཱཝིནཡེནེཝ སམྨམཱནཾ ཡསྨིཾ ཝིཧཱརེ ཨུཔྤནྣཾ ཏསྨིཾཡེཝ ¶ ཝཱ, ཨཉྙཏྲ ཝཱུཔསམེཏུཾ གཙྪནྟཱནཾ ཨནྟརཱམགྒེ ཝཱ, ཡཏྠ གནྟྭཱ སངྒྷསྶ ནིཡྻཱཏིཏཾ, ཏཏྠ སངྒྷེན ཝཱ, སངྒྷེ ཝཱུཔསམེཏུཾ ཨསཀྐོནྟེ ཏཏྠེཝ ཨུབྦཱཧིཀཱཡ སམྨཏཔུགྒལེཧི ཝཱ ཝིནིཙྪིཏཾ སམྨཏི. ཨེཝཾ སམྨམཱནེ ཙ པནེཏསྨིཾ ཡཱ སངྒྷསམྨུཁཏོ དྷམྨསམྨུཁཏོ ཝིནཡསམྨུཁཏཱ པུགྒལསམྨུཁཏཱ, ཨཡཾ སམྨུཁཱཝིནཡོ ནཱམ. ཏཏྠ ཙ ཀཱརཀསངྒྷསྶ སངྒྷསཱམགྒིཝསེན སམྨུཁིབྷཱཝོ སངྒྷསམྨུཁཏཱ. སམེཏབྦསྶ ཝཏྠུནོ བྷཱུཏཏྟཱ དྷམྨསམྨུཁཏཱ. ཡཐཱ ཏཾ སམེཏབྦཾ, ཏཐེཝསྶ སམནཾ ཝིནཡསམྨུཁཏཱ. ཡོ ཙ ཝིཝདཏི, ཡེན ཙ ཝིཝདཏི, ཏེསཾ ཨུབྷིནྣཾ ཨཏྠཔཙྩཏྠིཀཱནཾ སམྨུཁཱིབྷཱཝོ པུགྒལསམྨུཁཏཱ. ཨུབྦཱཧིཀཱཡ ཝཱུཔསམེ པནེཏྠ སངྒྷསམྨུཁཏཱ པརིཧཱཡཏི. ཨེཝཾ ཏཱཝ སམྨུཁཱཝིནཡེནེཝ སམྨཏི.

སཙེ པནེཝམྤི ན སམྨཏི, ཨཐ ནཾ ཨུབྦཱཧིཀཱཡ སམྨཏཱ བྷིཀྑཱུ ‘‘ན མཡཾ སཀྐོམ ཝཱུཔསམེཏུ’’ནྟི ¶ སངྒྷསྶེཝ ནིཡྻཱཏེནྟི. ཏཏོ སངྒྷོ པཉྩངྒསམནྣཱགཏཾ བྷིཀྑུཾ སལཱཀགྒཱཧཱཔཀཾ སམྨནྣཏི, ཏེན གུལ༹ྷཀཝིཝཊཀསཀཎྞཛཔྤཀེསུ ཏཱིསུ སལཱཀགྒཱཧཀེསུ ཨཉྙཏརཝསེན སལཱཀཾ གཱཧཱཔེཏྭཱ སནྣིཔཏིཏཱཡ པརིསཱཡ དྷམྨཝཱདཱིནཾ ཡེབྷུཡྻཏཱཡ ཡཐཱ ཏེ དྷམྨཝཱདིནོ ཝདནྟི, ཨེཝཾ ཝཱུཔསནྟཾ ཨདྷིཀརཎཾ སམྨུཁཱཝིནཡེན ཙ ཡེབྷུཡྻསིཀཱཡ ཙ ཝཱུཔསནྟཾ ཧོཏི. ཏཏྠ སམྨུཁཱཝིནཡོ ཝུཏྟནཡོ ཨེཝ. ཡཾ པན ཡེབྷུཡྻསིཀཱཀམྨསྶ ཀརཎཾ, ཨཡཾ ཡེབྷུཡྻསིཀཱ ནཱམ. ཨེཝཾ ཝིཝཱདཱདྷིཀརཎཾ དྭཱིཧི སམཐེཧི སམྨཏི.

ཨནུཝཱདཱདྷིཀརཎཾ ཙཏཱུཧི སམཐེཧི སམྨཏི སམྨུཁཱཝིནཡེན ཙ སཏིཝིནཡེན ཙ ཨམཱུལ༹ྷཝིནཡེན ཙ ཏསྶཔཱཔིཡསིཀཱཡ ཙ. སམྨུཁཱཝིནཡེནེཝ སམྨམཱནཾ ཡོ ཙ ཨནུཝདཏི, ཡཉྩ ཨནུཝདཏི, ཏེསཾ ཝཙནཾ སུཏྭཱ སཙེ ཀཱཙི ཨཱཔཏྟི ནཏྠི, ཨུབྷོ ཁམཱཔེཏྭཱ, སཙེ ཨཏྠི ཨཡཾ ནཱམེཏྠ ཨཱཔཏྟཱིཏི ཨེཝཾ ཝིནིཙྪིཏཾ ཝཱུཔསམྨཏི. ཏཏྠ སམྨུཁཱཝིནཡལཀྑཎཾ ཝུཏྟནཡམེཝ.

ཡདཱ པན ཁཱིཎཱསཝསྶ བྷིཀྑུནོ ཨམཱུལིཀཱཡ སཱིལཝིཔཏྟིཡཱ ཨནུདྡྷཾསིཏསྶ སཏིཝིནཡཾ ཡཱཙམཱནསྶ སངྒྷོ ཉཏྟིཙཏུཏྠེན ཀམྨེན སཏིཝིནཡཾ དེཏི, ཏདཱ སམྨུཁཱཝིནཡེན ཙ སཏིཝིནཡེན ཙ ཝཱུཔསནྟཾ ཧོཏི. དིནྣེ པན སཏིཝིནཡེ པུན ཏསྨིཾ པུགྒལེ ཀསྶཙི ཨནུཝཱདོ ན རུཧཏི. ཡདཱ ཨུམྨཏྟཀོ བྷིཀྑུ ཨུམྨཱདཝསེན ཀཏེ ཨསྶཱམཎཀེ ཨཛ྄ཛྷཱཙཱརེ ‘‘སརཏཱཡསྨཱ ཨེཝརཱུཔིཾ ཨཱཔཏྟི’’ནྟི བྷིཀྑཱུཧི ཙོདིཡམཱནོ ‘‘ཨུམྨཏྟཀེན ¶ མེ, ཨཱཝུསོ, ཨེཏཾ ཀཏཾ, ནཱཧཾ ཏཾ སརཱམཱི’’ཏི བྷཎནྟོཔི བྷིཀྑཱུཧི ཙོདིཡམཱནོཝ པུན ཨཙོདནཏྠཱཡ ཨམཱུལ༹ྷཝིནཡཾ ཡཱཙཏི, སངྒྷོ ཙསྶ ཉཏྟིཙཏུཏྠེན ཀམྨེན ཨམཱུལ༹ྷཝིནཡཾ དེཏི. ཏདཱ སམྨུཁཱཝིནཡེན ཙ ཨམཱུལ༹ྷཝིནཡེན ཙ ཝཱུཔསནྟཾ ཧོཏི. དིནྣེ པན ཨམཱུལ༹ྷཝིནཡེ པུན ཏསྨིཾ པུགྒལེ ཀསྶཙི ཏཔྤཙྩཡཱ ཨནུཝཱདོ ན རུཧཏི. ཡདཱ པན པཱརཱཛིཀེན ཝཱ པཱརཱཛིཀསཱམནྟེན ཝཱ ཙོདིཡམཱནསྶ ཨཉྙེནཉྙཾ པཊིཙརཏོ པཱཔུསྶནྣཏཱཡ པཱཔིཡསྶ པུགྒལསྶ ‘‘སཙཱཡཾ ཨཙྪིནྣམཱུལོ བྷཝིསྶཏི, སམྨཱ ཝཏྟིཏྭཱ ཨོསཱརཎཾ ལབྷིསྶཏི. སཙེ ཚིནྣམཱུལོ, ཨཡམེཝསྶ ནཱསནཱ བྷཝིསྶཏཱི’’ཏི མཉྙམཱནོ སངྒྷོ ཉཏྟིཙཏུཏྠེན ཀམྨེན ཏསྶཔཱཔིཡསིཀཾ ཀརོཏི, ཏདཱ སམྨུཁཱཝིནཡེན ཙ ཏསྶཔཱཔིཡསིཀཱཡ ཙ ཝཱུཔསནྟཾ ཧོཏཱིཏི. ཨེཝཾ ཨནུཝཱདཱདྷིཀརཎཾ ཙཏཱུཧི སམཐེཧི སམྨཏི.

ཨཱཔཏྟཱདྷིཀརཎཾ ཏཱིཧི སམཐེཧི སམྨཏི སམྨུཁཱཝིནཡེན ཙ པཊིཉྙཱཏཀརཎེན ཙ ཏིཎཝཏྠཱརཀེན ཙ. ཏསྶ སམྨུཁཱཝིནཡེནེཝ ཝཱུཔསམོ ནཏྠི. ཡདཱ པན ཨེཀསྶ ཝཱ བྷིཀྑུནོ ¶ སནྟིཀེ སངྒྷགཎམཛ྄ཛྷེསུ ཝཱ བྷིཀྑུ ལཧུཀཾ ཨཱཔཏྟིཾ དེསེཏི, ཏདཱ ཨཱཔཏྟཱདྷིཀརཎཾ སམྨུཁཱཝིནཡེན ཙ པཊིཉྙཱཏཀརཎེན ཙ ཝཱུཔསམྨཏི. ཏཏྠ སམྨུཁཱཝིནཡེ ཏཱཝ ཡོ ཙ དེསེཏི, ཡསྶ ཙ དེསེཏི, ཏེསཾ སམྨུཁཱིབྷཱཝོ པུགྒལསམྨུཁཏོ. སེསཾ ཝུཏྟནཡམེཝ.

པུགྒལསྶ ཙ གཎསྶ ཙ དེསནཱཀཱལེ སངྒྷསམྨུཁཏོ པརིཧཱཡཏི. ཡཾ པནེཏྠ ‘‘ཨཧཾ, བྷནྟེ, ཨིཏྠནྣཱམཾ ཨཱཔཏྟིཾ ཨཱཔནྣོ’’ཏི ཙ ‘‘པསྶསཱི’’ཏི ཙ ‘‘ཨཱམ, པསྶཱམཱི’’ཏི ཙ པཊིཉྙཱཏཱཡ ‘‘ཨཱཡཏིཾ སཾཝརེཡྻཱསཱི’’ཏི ཀརཎཾ, ཏཾ པཊིཉྙཱཏཀརཎཾ ནཱམ. སངྒྷཱདིསེསེ པརིཝཱསཱདིཡཱཙནཱ པཊིཉྙཱ, པརིཝཱསཱདཱིནཾ དཱནཾ པཊིཉྙཱཏཀརཎཾ ནཱམ.

དྭེཔཀྑཛཱཏཱ པན བྷཎྜནཀཱརཀཱ བྷིཀྑཱུ བཧུཾ ཨསྶཱམཎཀཾ ཨཛ྄ཛྷཱཙཱརཾ ཙརིཏྭཱ པུན ལཛྫིདྷམྨེ ཨུཔྤནྣེ ‘‘སཙེ མཡཾ ཨིམཱཧི ཨཱཔཏྟཱིཧི ཨཉྙམཉྙཾ ཀཱརེསྶཱམ, སིཡཱཔི ཏཾ ཨདྷིཀརཎཾ ཀཀྑལ༹ཏྟཱཡ ཝཱལ༹ཏྟཱཡ སཾཝཏྟེཡྻཱ’’ཏི ཨཉྙམཉྙཾ ཨཱཔཏྟིཡཱ ཀཱརཱཔནེ དོསཾ དིསྭཱ ཡདཱ བྷིཀྑཱུ ཏིཎཝཏྠཱརཀཀམྨཾ ཀརོནྟི, ཏདཱ ཨཱཔཏྟཱདྷིཀརཎཾ སམྨུཁཱཝིནཡེན ཙ ཏིཎཝཏྠཱརཀེན ཙ སམྨཏི. ཏཏྲ ཧི ཡཏྟཀཱ ཧཏྠཔཱསཱུཔགཏཱ ‘‘ན མེཏཾ ཁམཏཱི’’ཏི ཨེཝཾ དིཊྛཱཝིཀམྨཾ ཨཀཏྭཱ ‘‘དུཀྐཊཾ ཀམྨཾ པུན ཀཱཏབྦཾ ཀམྨ’’ནྟི ¶ ན ཨུཀྐོཊེནྟི, ནིདྡམྤི ཨོཀྐནྟཱ ཧོནྟི, སབྦེསཾ ཋཔེཏྭཱ ཐུལླཝཛྫཉྩ གིཧིཔཊིསཾཡུཏྟཉྩ སབྦཱཔཏྟིཡོ ཝུཊྛཧནྟི. ཨེཝཾ ཨཱཔཏྟཱདྷིཀརཎཾ ཏཱིཧི སམཐེཧི སམྨཏི.

ཀིཙྩཱདྷིཀརཎཾ ཨེཀེན སམཐེན སམྨཏི སམྨུཁཱཝིནཡེནེཝ. ཨིཏི ཨིམཱནི ཙཏྟཱརི ཨདྷིཀརཎཱནི ཡཐཱནུརཱུཔཾ ཨིམེཧི སཏྟཧི སམཐེཧི སམྨནྟི. ཏེན ཝུཏྟཾ – ‘‘ཨུཔྤནྣུཔྤནྣཱནཾ ཨདྷིཀརཎཱནཾ སམཐཱཡ ཝཱུཔསམཱཡ སམྨུཁཱཝིནཡོ དཱཏབྦོ…པེ… ཏིཎཝཏྠཱརཀོ’’ཏི. སེསཾ སབྦཏྠ ཨུཏྟཱནམེཝ.

ཨིཏི མནོརཐཔཱུརཎིཡཱ ཨངྒུཏྟརནིཀཱཡ-ཨཊྛཀཐཱཡ

སཏྟཀནིཔཱཏཝཎྞནཱཡ ཨནུཏྟཱནཏྠདཱིཔནཱ སམཏྟཱ.