📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ.

ཨངྒུཏྟརནིཀཱཡེ

ཨཊྛཀནིཔཱཏ-ཊཱིཀཱ

༡. པཋམཔཎྞཱསཀཾ

༡. མེཏྟཱཝགྒོ

༡. མེཏྟཱསུཏྟཝཎྞནཱ

༡. ཨཊྛཀནིཔཱཏསྶ ¶ ¶ པཋམེ ཝཌྜྷིཏཱཡཱཏི བྷཱཝནཱཔཱརིཔཱུརིཝསེན པརིབྲཱུཧིཏཱཡ. པུནཔྤུནཾ ཀཏཱཡཱཏི བྷཱཝནཱཡ བཧུལཱིཀརཎེན ཨཔརཱཔརཾ པཝཏྟིཏཱཡ. ཡུཏྟཡཱནསདིསཀཏཱཡཱཏི ཡཐཱ ཡུཏྟཨཱཛཉྙཡཱནཾ ཚེཀེན སཱརཐིནཱ ཨདྷིཊྛིཏཾ ཡཐཱརུཙི པཝཏྟཏི, ཨེཝཾ ཡཐཱརུཙི པཝཏྟཱརཧཏཾ གམིཏཱཡ. པཏིཊྛཱནཊྛེནཱཏི སབྦསམྤཏྟིཨདྷིཊྛཱནཊྛེན. པཙྩུཔཊྛིཏཱཡཱཏི བྷཱཝནཱབཧུལཱིཀཱརེཧི པཏི པཏི ཨུཔཊྛིཏཱཡ ཨཝིཛཧིཏཱཡ. སམནྟཏོ ཙིཏཱཡཱཏི སབྦབྷཱགེན བྷཱཝནཱནུརཱུཔཾ ཙཡཾ གམིཏཱཡ. ཏེནཱཧ ‘‘ཨུཔཙིཏཱཡཱ’’ཏི. སུཊྛུ སམཱརདྡྷཱཡཱཏི ཨཏིཝིཡ སམྨདེཝ ནིབྦཏྟིགཏཱཡ.

ཡོ ¶ ཙ མེཏྟཾ བྷཱཝཡཏཱིཏིཨཱདཱིསུ ཡོ ཀོཙི གཧཊྛོ ཝཱ པབྦཛིཏོ ཝཱ. མེཏྟནྟི མེཏྟཱཛྷཱནཾ.

ཨཔྤམཱཎནྟི བྷཱཝནཱཝསེན ཨཱརམྨཎཝསེན ཙ ཨཔྤམཱཎཾ. ཨསུབྷབྷཱཝནཱདཡོ ཝིཡ ཧི ཨཱརམྨཎེ ཨེཀདེསགྒཧཎཾ ཨཀཏྭཱ ཨནཝསེསཕརཎཝསེན ཨནོདྷིསོ ཕརཎཝསེན ཙ, ཨཔྤམཱཎཱརམྨཎཏཱཡ པགུཎབྷཱཝནཱཝསེན ཙ ཨཔྤམཱཎཾ. ཏནཱུ སཾཡོཛནཱ ཧོནྟཱིཏི མེཏྟཾ པཱདཀཾ ཀཏྭཱ སམྨསིཏྭཱ ཧེཊྛིམེ ཨརིཡམགྒེ ཨདྷིགཙྪནྟསྶ སུཁེནེཝ པཊིགྷསཾཡོཛནཱདཡོ པཧཱིཡམཱནཱ ཏནཱུ ཧོནྟཱིཏི ཨེཝམེཏྠ ཨཏྠོ དཊྛབྦོ.

ཨེཝཾ ཀིལེསཔྤཧཱནཉྩ ནིབྦཱནཱདྷིགམཉྩ མེཏྟཱབྷཱཝནཱཡ སིཁཱཔྤཏྟམཱནིསཾསཾ དསྶེཏྭཱ ཨིདཱནི ཨཉྙེཔི ཨཱནིསཾསེ དསྶེཏུཾ ‘‘ཨེཀམྤི ཙེ’’ཏིཨཱདི ཝུཏྟཾ. ཏཏྠ ཨདུཊྛཙིཏྟོཏི མེཏྟཱབལེན སུཊྛུ ཝིཀྑམྦྷིཏབྱཱཔཱདཏཱཡ བྱཱཔཱདེན ཨདཱུསིཏཙིཏྟོ. མེཏྟཱཡཏཱིཏི ཧིཏཕརཎཝསེན མེཏྟཾ ¶ ཀརོཏི. ཀུསལཱིཏི ཨཏིསཡེན ཀུསལཝཱ མཧཱཔུཉྙོ, པཊིགྷཱདིཨནཏྠཝིགམེན ཁེམཱི. སབྦེ ཙ པཱཎེཏི ཙ-སདྡོ བྱཏིརེཀོ. མནསཱནུཀམྤཱིཏི ཙིཏྟེན ཨནུཀམྤནྟོ. ཨིདཾ ཝུཏྟཾ ཧོཏི – ཨེཀསཏྟཝིསཡཱཔི ཏཱཝ མེཏྟཱ མཧཱཀུསལརཱསི, སབྦེ པན པཱཎེ ཨཏྟནོ པུཏྟཾ ཝིཡ ཧིཏཕརཎེན མནསཱ ཨནུཀམྤནྟོ པཧུཀཾ པཧུཾ ཨནཔྤཀཾ ཨཔརིཡནྟཾ ཙཏུསཊྛིམཧཱཀཔྤེཔི ཨཏྟནོ ཝིཔཱཀཔྤབནྡྷཾ པཝཏྟེཏུཾ སམཏྠཾ ཨུལཱ༹རཾ པུཉྙཾ ཨརིཡོ པརིསུདྡྷཙིཏྟོ པུགྒལོཝ ཀརོཏི ནིཔྥཱདེཏཱིཏི. སཏྟབྷརིཏནྟི སཏྟེཧི ཨཝིརལ༹ཾ, ཨཱཀིཎྞམནུསྶནྟི ཨཏྠོ.

སངྒཧཝཏྠཱུནཱིཏི (སཾ. ནི. ཊཱི. ༡.༡.༡༢༠) ལོཀསྶ སངྒཎྷནཀཱརཎཱནི. ནིཔྥནྣསསྶཏོ ནཝ བྷཱགེ ཀསྶཀསྶ དཏྭཱ རཉྙཾ ཨེཀབྷཱགགྒཧཎཾ དསམབྷཱགགྒཧཎཾ. ཨེཝཾ ཀསྶཀཱ ཧཊྛཏུཊྛཱ སསྶཱནི སམྤཱདེནྟཱིཏི ཨཱཧ ‘‘སསྶསམྤཱདནེ མེདྷཱཝིཏཱཏི ཨཏྠོ’’ཏི. ཏཏོ ཨོརབྷཱགེ ཀིར ཚབྷཱགགྒཧཎཾ ཛཱཏཾ. ཚམཱསིཀནྟི ཚནྣཾ ཚནྣཾ མཱསཱནཾ པཧོནཀཾ. པཱསེཏཱིཏི པཱསགཏེ ཝིཡ ཀརོཏི. ཝཱཙཱཡ པིཡཾ ཝཱཙཱཔིཡཾ, ཏསྶ ཀམྨཾ ཝཱཙཱཔེཡྻཾ. སབྦསོ རཊྛསྶ ཨིདྡྷཱདིབྷཱཝཏོ ཁེམཾ. ནིརབྦུདཾ ཙོརིཡཱབྷཱཝཏོ. ཨིདྡྷཉྷི རཊྛཾ ཨཙོརིཡཾ. ‘‘ནིརགྒལ༹’’ནྟི ཝུཙྩཏི ཨཔཱརུཏགྷརབྷཱཝཏོ.

ཨུདྡྷཾམཱུལཀཾ ཀཏྭཱཏི ཨུམྨཱུལཾ ཀཏྭཱ. དྭཱིཧི པརིཡཉྙེཧཱིཏི མཧཱཡཉྙསྶ པུབྦབྷཱགེ པཙྪཱ ཙ པཝཏྟེཏབྦེཧི དྭཱིཧི པརིཝཱརཡཉྙེཧི. སཏྟ…པེ… བྷཱིསནསྶཱཏི སཏྟནཝུཏཱདྷིཀཱནཾ པཉྩནྣཾ པསུསཏཱནཾ མཱརཎེན བྷེརཝསྶ པཱཔབྷཱིརུཀཱནཾ བྷཡཱཝཧསྶ. ཏཐཱ ཧི ཝདནྟི –

‘‘ཚསཏཱནི ¶ ནིཡུཛྫནྟི, པསཱུནཾ མཛ྄ཛྷིམེ ཧནི;

ཨསྶམེདྷསྶ ཡཉྙསྶ, ཨཱུནཱནི པསཱུཧི ཏཱིཧཱི’’ཏི. (སཾ. ནི. ཊཱི. ༡.༡.༡༢༠; ཨ. ནི. ཊཱི. ༢.༤.༣༩);

སམྨནྟི ཡུགཙྪིདྡེ པཀྑིཔིཏབྦདཎྜཀཾ. པཱསནྟཱིཏི ཁིཔནྟི. སཾཧཱརིམེཧཱིཏི སཀཊེཧི ཝཧིཏབྦེཧི. པུབྦེ ཀིར ཨེཀོ རཱཛཱ སམྨཱཔཱསཾ ཡཛནྟོ སརསྶཏིནདིཏཱིརེ པཐཝིཡཱ ཝིཝརེ དིནྣེ ནིམུགྒོཡེཝ ཨཧོསི. ཨནྡྷབཱལབྲཱཧྨཎཱ གཏཱནུགཏིགཏཱ ‘‘ཨཡཾ ཏསྶ སགྒགམནམགྒོ’’ཏི སཉྙཱཡ ཏཏྠ སམྨཱཔཱསཾ ཡཉྙཾ པཊྛཔེནྟི. ཏེན ཝུཏྟཾ ‘‘ནིམུགྒོཀཱསཏོ པབྷུཏཱི’’ཏི ¶ . ཨཡཱུཔོ ཨཔྤཀདིཝསོ ཡཱགོ, སཡཱུཔོ བཧུདིཝསཾ སཱདྷེཡྻོ སཏྲཡཱགོ. མནྟཔདཱབྷིསངྑཏཱནཾ སཔྤིམདྷཱུནཾ ‘‘ཝཱཛ’’མིཏི སམཉྙཱ. ཧིརཉྙསུཝཎྞགོམཧིཾསཱདི སཏྟརསཀདཀྑིཎསྶ. སཱརགབྦྷཀོཊྛཱགཱརཱདཱིསུ ནཏྠི ཨེཏྠ ཨགྒལཱ༹ཏི ནིརགྒལོ༹. ཏཏྠ ཀིར ཡཉྙེ ཨཏྟནོ སཱཔཏེཡྻཾ ཨནཝསེསཏོ ཨནིགཱུཧིཏྭཱ ནིཡྻཱཏཱིཡཏི.

ཙནྡཔྤབྷཱཏི (ཨིཏིཝུ. ཨཊྛ. ༢༧) ཙནྡིམསྶེཝ པབྷཱཡ. ཏཱརཱགཎཱཝ སབྦེཏི ཡཐཱ སབྦེཔི ཏཱརཱགཎཱ ཙནྡིམསོབྷཱཡ སོལ༹སིམྤི ཀལཾ ནཱགྒྷནྟི, ཨེཝཾ ཏེ ཨསྶམེདྷཱདཡོ ཡཉྙཱ མེཏྟསྶ ཙིཏྟསྶ ཝུཏྟལཀྑཎེན སུབྷཱཝིཏསྶ སོལ༹སིམྤི ཀལཾ ནཱནུབྷཝནྟི, ན པཱཔུཎནྟི, ནཱགྒྷནྟཱིཏི ཨཏྠོ.

ཨིདཱནི ཨཔརེཔི དིཊྛདྷམྨིཀསམྤརཱཡིཀེ མེཏྟཱབྷཱཝནཱཡ ཨཱནིསཾསེ དསྶེཏུཾ ‘‘ཡོ ན ཧནྟཱི’’ཏིཨཱདི ཝུཏྟཾ. ཏཏྠ ཡོཏི མེཏྟཱབྲཧྨཝིཧཱརབྷཱཝནཱནུཡུཏྟོ པུགྒལོ. ན ཧནྟཱིཏི ཏེནེཝ མེཏྟཱབྷཱཝནཱནུབྷཱཝེན དཱུརཝིཀྑམྦྷིཏབྱཱཔཱདཏཱཡ ན ཀཉྩི སཏྟཾ ཧིཾསཏི, ལེཌྜུདཎྜཱདཱིཧི ན ཝིབཱདྷཏི ཝཱ. ན གྷཱཏེཏཱིཏི པརཾ སམཱདཔེཏྭཱ ན སཏྟེ མཱརཱཔེཏི ན ཝིབཱདྷཱཔེཏི ཙ. ན ཛིནཱཏཱིཏི སཱརམྦྷཝིགྒཱཧིཀཀཐཱདིཝསེན ན ཀཉྩི ཛིནཱཏི སཱརམྦྷསྶེཝ ཨབྷཱཝཏོ, ཛཱནིཀརཎཝསེན ཝཱ ཨཊྚཀརཎཱདིནཱ ན ཀཉྩི ཛིནཱཏི. ཏེནཱཧ ‘‘ན ཨཏྟནཱ པརསྶ ཛཱནིཾ ཀརོཏཱི’’ཏི. ན ཛཱཔཡེཏི པརེཧི པཡོཛེཏྭཱ པརེསམྤི དྷནཛཱནིཾ ན ཀཱརཱཔེཡྻ. ཏེནཱཧ ‘‘ན པརེན པརསྶ ཛཱནིཾ ཀཱརེཏཱི’’ཏི. མེཏྟཱཡ ཝཱ ཨཾསོ ཨཝིཧེཋནཊྛེན ཨཝཡཝབྷཱུཏོཏི མེཏྟཾསོ.

མེཏྟཱསུཏྟཝཎྞནཱ ནིཊྛིཏཱ.

༢-༤. པཉྙཱསུཏྟཱདིཝཎྞནཱ

༢-༤. དུཏིཡེ ¶ ཨཱདིབྲཧྨཙརིཡིཀཱཡཱཏི ཨཱདིབྲཧྨཙརིཡམེཝ ཨཱདིབྲཧྨཙརིཡིཀཱ. ཏེནཱཧ ‘‘མགྒབྲཧྨཙརིཡསྶ ཨཱདིབྷཱུཏཱཡཱ’’ཏི. ཨརིཡོཏི ནིདྡོསོ པརིསུདྡྷོ. ཏུཎྷཱིབྷཱཝོ ན ཏིཏྠིཡཱནཾ མཱུགབྦཏགཧཎཾ ཝིཡ ཨཔརིསུདྡྷོཏི ཨརིཡོ ཏུཎྷཱིབྷཱཝོ. ཙཏུཏྠཛ྄ཛྷཱནནྟི ཨུཀྐཊྛནིདྡེསེནེཏཾ ཝུཏྟཾ, པཋམཛ྄ཛྷཱནཱདཱིནིཔི ཨརིཡོ ཏུཎྷཱིབྷཱཝོཏྭེཝ སངྑཾ ¶ གཙྪནྟི. ཛཱནནྟི ཨིདཾ ཀམྨསཱདྷནནྟི ཨཱཧ ‘‘ཛཱནིཏབྦཀཾ ཛཱནཱཏཱི’’ཏི. ཡཐཱ ཝཱ ཨེཀཙྩོ ཝིཔརཱིཏཾ གཎྷནྟོ ཛཱནནྟོཔི ན ཛཱནཱཏི, པསྶནྟོཔི ན པསྶཏི, ན ཨེཝམཡཾ. ཨཡཾ པན ཛཱནནྟོ ཛཱནཱཏི, པསྶནྟོ པསྶཏཱིཏི ཨེཝམེཏྠ དཊྛབྦོ. ཏཏིཡཱདཱིནི སུཝིཉྙེཡྻཱནི.

པཉྙཱསུཏྟཱདིཝཎྞནཱ ནིཊྛིཏཱ.

༥. པཋམལོཀདྷམྨསུཏྟཝཎྞནཱ

༥. པཉྩམེ ལོཀསྶ དྷམྨཱཏི སཏྟལོཀསྶ ཨཝསྶཾབྷཱཝིདྷམྨཱ. ཏེནཱཧ ‘‘ཨེཏེཧི མུཏྟཱ ནཱམ ནཏྠི’’ཏིཨཱདི. གྷཱསཙྪཱདནཱདཱིནཾ ལདྡྷི ལཱབྷོ, ཏཱནི ཨེཝ ཝཱ ལདྡྷབྦཏོ ལཱབྷོ, ཏདབྷཱཝོ ཨལཱབྷོ, ལཱབྷགྒཧཎེན ཙེཏྠ ཏབྦིསཡོ ཨནུརོདྷོ གཧིཏོ, ཨལཱབྷགྒཧཎེན ཝིརོདྷོ. ཡསྨཱ ལོཧིཏེ སཏི ཏདུཔགྷཱཏཝསེན པུབྦོ ཝིཡ ཨནུརོདྷོ ལདྡྷཱཝསརོ ཨེཝ ཧོཏི, ཏསྨཱ ཝུཏྟཾ ‘‘ལཱབྷེ ཨཱགཏེ ཨལཱབྷོ ཨཱགཏོཡེཝཱ’’ཏི. ཨེས ནཡོ ཡསཱདཱིསུཔི. སེསཾ སུཝིཉྙེཡྻམེཝ.

པཋམལོཀདྷམྨསུཏྟཝཎྞནཱ ནིཊྛིཏཱ.

༦-༨. དུཏིཡལོཀདྷམྨསུཏྟཱདིཝཎྞནཱ

༦-༨. ཚཊྛེ ཨདྷིཀཾ པཡསཏི པཡུཛྫཏི ཨེཏེནཱཏི ཨདྷིཔྤཡཱསོ, སཝིསེསཾ ཨིཏིཀཏྟབྦཀིརིཡཱ. ཏེནཱཧ ‘‘ཨདྷིཀཔྤཡོགོ’’ཏི. སཏྟམཊྛམེསུ ནཏྠི ཝཏྟབྦཾ.

དུཏིཡལོཀདྷམྨསུཏྟཱདིཝཎྞནཱ ནིཊྛིཏཱ.

༩. ནནྡསུཏྟཝཎྞནཱ

༩. ནཝམེ ¶ དུཝིདྷཱ ཀུལཔུཏྟཱ ཛཱཏིཀུལཔུཏྟཱ ཨཱཙཱརཀུལཔུཏྟཱ ཙ. ཏཏྠ ‘‘ཏེན ཁོ པན སམཡེན རཊྛཔཱལོ ཀུལཔུཏྟོ ཏསྨིཾཡེཝ ཐུལླཀོཊྛིཀེ ¶ ཨགྒཀུལིཀསྶ པུཏྟོ’’ཏི (མ. ནི. ༢.༢༩༤) ཨེཝཾ ཨཱགཏཱ ཨུཙྩཱཀུལཔུཏྟཱ ཛཱཏིཀུལཔུཏྟཱ. ‘‘སདྡྷཱཡེཏེ ཀུལཔུཏྟཱ ཨགཱརསྨཱ ཨནགཱརིཡཾ པབྦཛིཏཱ’’ཏི (མ. ནི. ༣.༧༨) ཨེཝཾ ཨཱགཏཱ པན ཡཏྠ ཀཏྠཙི ཀུལེ པསུཏཱཔི ཨཱཙཱརཀུལཔུཏྟཱ ནཱམ. ཨིདྷ པན ཨུཙྩཱཀུལཔྤསུཏཏཾ སནྡྷཱཡ ‘‘ཀུལཔུཏྟོཏི, བྷིཀྑཝེ, ནནྡཾ སམྨཱ ཝདམཱནོ ཝདེཡྻཱ’’ཏི བྷགཝཏཱ ཝུཏྟནྟི ཨཱཧ ‘‘ཛཱཏིཀུལཔུཏྟོ’’ཏི. ཨུབྷོཧིཔི པན ཀཱརཎེཧི ཏསྶ ཀུལཔུཏྟབྷཱཝོཡེཝ. སེསམེཏྠ ཨུཏྟཱནམེཝ.

ནནྡསུཏྟཝཎྞནཱ ནིཊྛིཏཱ.

༡༠. ཀཱརཎྜཝསུཏྟཝཎྞནཱ

༡༠. དསམེ པཊིཙརཏཱིཏི པཊིཙྪཱདནཝསེན ཙརཏི པཝཏྟཏི. པཊིཙྪཱདནཊྛོ ཨེཝ ཝཱ ཙརཏི-སདྡོ ཨནེཀཏྠཏྟཱ དྷཱཏཱུནནྟི ཨཱཧ ‘‘པཊིཙྪཱདེཏཱི’’ཏི. ཨཉྙེནཱཉྙནྟི པན པཊིཙྪཱདནཱཀཱརདསྶནནྟི ཨཱཧ ‘‘ཨཉྙེན ཀཱརཎེནཱ’’ཏིཨཱདི. ཏཏྠ ཨཉྙཾ ཀཱརཎཾ ཝཙནཾ ཝཱཏི ཡཾ ཙོདཀེན ཙུདིཏཀསྶ དོསཝིབྷཱཝནཾ ཀཱརཎཾ, ཝཙནཾ ཝཱ ཝུཏྟཾ, ཏཾ ཏཏོ ཨཉྙེནེཝ ཀཱརཎེན, ཝཙནེན ཝཱ པཊིཙྪཱདེཏི. ཀཱརཎེནཱཏི ཙོདནཱཡ ཨམཱུལཱཡ ཨམཱུལིཀབྷཱཝདཱིཔནིཡཱ ཡུཏྟིཡཱ ཝཱ. ཝཙནེནཱཏི ཏདཏྠབོདྷཀེན ཝཙནེན. ‘‘ཀོ ཨཱཔནྣོ’’ཏིཨཱདིནཱ ཙོདནཾ ཝིསྶཛྫེཏྭཱཝ ཝིཀྑེཔཱཔཛྫནཾ ཨཉྙེནཱཉྙཾ པཊིཙརཎཾ. བཧིདྡྷཱ ཀཐཱཔནཱམནཱ ནཱམ ‘‘ཨིཏྠནྣཱམཾ ཨཱཔཏྟིཾ ཨཱཔནྣོསཱི’’ཏི ཝུཏྟེ – ‘‘པཱཊལིཔུཏྟཾ གཏོམྷཱི’’ཏིཨཱདིནཱ ཙོདནཾ ཝིསྶཛྫེཏྭཱཏི ཨཡམེཝ ཝིསེསོ. ཡོ ཧི ‘‘ཨཱཔཏྟིཾ ཨཱཔནྣོསཱི’’ཏི ཝུཏྟོ ‘‘ཀོ ཨཱཔནྣོ, ཀིཾ ཨཱཔནྣོ, ཀིསྨིཾ ཨཱཔནྣཱ, ཀཾ བྷཎཐ, ཀིཾ བྷཎཐཱ’’ཏི ཝཱ ཝདཏི, ‘‘ཨེཝརཱུཔཾ ཀིཉྩི ཏཡཱ དིཊྛ’’ནྟི ཝུཏྟེ ‘‘ན སུཎཱམཱི’’ཏི སོཏཾ ཝཱ ཨུཔནེཏི, ཨཡཾ ཨཉྙེནཱཉྙཾ པཊིཙརཏི ནཱམ. ཡོ པན ‘‘ཨིཏྠནྣཱམཾ ནཱམ ཨཱཔཏྟིཾ ཨཱཔནྣོསཱི’’ཏི པུཊྛོ ‘‘པཱཊལིཔུཏྟཾ གཏོམྷཱི’’ཏི ཝཏྭཱ པུན ‘‘ན ཏཝ པཱཊལིཔུཏྟགམནཾ པུཙྪཱམ, ཨཱཔཏྟིཾ པུཙྪཱམཱ’’ཏི ཝུཏྟེ ཏཏོ ‘‘རཱཛགཧཾ གཏོམྷི. རཱཛགཧཾ ཝཱ ཡཱཧི བྲཱཧྨཎགཧཾ ཝཱ, ཨཱཔཏྟིཾ ཨཱཔནྣོསཱིཏི. ཏཾ ཏཏྠ མེ སཱུཀརམཾསཾ ལདྡྷ’’ནྟིཨཱདཱིནི ཝདཏི, ཨཡཾ བཧིདྡྷཱ ཀཐཾ ཨཔནཱམེཏི ནཱམ ¶ . སམཎཀཙཝརོཏི སམཎཝེསདྷཱརཎེན སམཎཔྤཏིརཱུཔཀཏཱཡ སམཎཱནཾ ཀཙཝརབྷཱུཏཾ.

ཀཱརཎྜཝཾ ¶ (སུ. ནི. ཨཊྛ. ༢.༢༨༣-༢༨༤) ནིདྡྷམཐཱཏི ཝིཔནྣསཱིལཏཱཡ ཀཙཝརབྷཱུཏཾ པུགྒལཾ ཀཙཝརམིཝ ཨནཔེཀྑཱ ཨཔནེཐ. ཀསམྦུཾ ཨཔཀསྶཐཱཏི ཀསམྦུབྷཱུཏཉྩ ནཾ ཁཏྟིཡཱདཱིནཾ མཛ྄ཛྷགཏཾ པབྷིནྣཔགྒྷརིཏཀུཊྛཾ ཙཎྜཱལཾ ཝིཡ ཨཔཀཌྜྷཐ. ཀིཾ ཀཱརཎཾ? སངྒྷཱརཱམོ ནཱམ སཱིལཝནྟཱནཾ ཀཏོ, ན དུསྶཱིལཱནཾ. ཡཏོ ཨེཏདེཝ སནྡྷཱཡཱཧ ‘‘ཏཏོ པལཱཔེ ཝཱཧེཐ, ཨསྶམཎེ སམཎམཱནིནེ’’ཏི. ཡཐཱ པལཱཔཱ ཨནྟོསཱརརཧིཏཱ ཨཏཎྜུལཱ བཧི ཐུསེན ཝཱིཧཱི ཝིཡ དིསྶནྟི, ཨེཝཾ པཱཔབྷིཀྑཱུ ཨནྟོ སཱིལརཧིཏཱཔི བཧི ཀཱསཱཝཱདིཔརིཀྑཱརེན བྷིཀྑཱུ ཝིཡ དིསྶནྟི, ཏསྨཱ ‘‘པལཱཔཱ’’ཏི ཝུཙྩནྟི. ཏེ པལཱཔེ ཝཱཧེཐ ཨོཔུནཐ ཝིདྷམཐ, པརམཏྠཏོ ཨསྶམཎེ སམཎཝེསམཏྟེན སམཎམཱནིནེ. ཀཔྤཡཝ྄ཧོཏི ཀཔྤེཐ, ཀརོཐཱཏི ཝུཏྟཾ ཧོཏི. པཏིསྶཏཱཏི སཔྤཏིསྶཱ. ཝཊྚདུཀྑསྶ ཨནྟཾ ཀརིསྶཐ, པརིནིབྦཱནཾ པཱཔུཎིསྶཐཱཏི ཨཏྠོ.

ཀཱརཎྜཝསུཏྟཝཎྞནཱ ནིཊྛིཏཱ.

མེཏྟཱཝགྒཝཎྞནཱ ནིཊྛིཏཱ.

༢. མཧཱཝགྒོ

༡. ཝེརཉྫསུཏྟཝཎྞནཱ

༡༡. དུཏིཡསྶ པཋམེ ཝེརཉྫཱཡཾ ཝིཧརཏཱིཏི (པཱརཱ. ཨཊྛ. ༡.༡) ཨེཏྠ ཝེརཉྫཱཏི ཏསྶ ནགརསྶེཏཾ ཨདྷིཝཙནཾ, ཏསྶཾ ཝེརཉྫཱཡཾ. སམཱིཔཏྠེ བྷུམྨཝཙནཾ. ནལེ༹རུཔུཙིམནྡམཱུལེཏི ཨེཏྠ ནལེ༹རུ ནཱམ ཡཀྑོ. པུཙིམནྡོཏི ནིམྦརུཀྑོ. མཱུལནྟི སམཱིཔཾ. ཨཡཉྷི མཱུལ-སདྡོ ‘‘མཱུལཱནི ཨུདྡྷརེཡྻ ཨནྟམསོ ཨུསཱིརནཱལི༹མཏྟཱནིཔཱི’’ཏིཨཱདཱིསུ (ཨ. ནི. ༤.༡༩༥) མཱུལམཱུལེ དིསྶཏི. ‘‘ལོབྷོ ཨཀུསལམཱུལ’’ནྟིཨཱདཱིསུ (དཱི. ནི. ༣.༣༠༥; པརི. ༣༢༣) ཨསཱདྷཱརཎཧེཏུམྷི. ‘‘ཡཱཝ མཛ྄ཛྷནྷིཀེ ཀཱལེ ཚཱཡཱ ཕརཏི, ནིཝཱཏེ པཎྞཱནི པཏནྟི, ཨེཏྟཱཝཏཱ རུཀྑམཱུལ’’ནྟིཨཱདཱིསུ (པཱརཱ. ༤༩༤) སམཱིཔེ. ཨིདྷ པན སམཱིཔེ ¶ ཨདྷིཔྤེཏོ, ཏསྨཱ ནལེ༹རུཡཀྑེན ཨདྷིགྒཧིཏསྶ པུཙིམནྡསྶ སམཱིཔེཏི ཨེཝམེཏྠ ཨཏྠོ དཊྛབྦོ. སོ ཀིར པུཙིམནྡོ རམཎཱིཡོ པཱསཱདིཀོ ཨནེཀེསཾ རུཀྑཱནཾ ཨཱདྷིཔཙྩཾ ཝིཡ ཀུརུམཱནོ ཏསྶ ནགརསྶ ཨཝིདཱུརེ གམནཱགམནསམྤནྣེ ཋཱནེ ཨཧོསི. ཨཐ བྷགཝཱ ཝེརཉྫཾ གནྟྭཱ པཏིརཱུཔེ ཋཱནེ ཝིཧརནྟོ ¶ ཏསྶ རུཀྑསྶ སམཱིཔེ ཧེཊྛཱབྷཱགེ ཝིཧཱསི. ཏེན ཝུཏྟཾ ‘‘ཝེརཉྫཱཡཾ ཝིཧརཏི ནལེ༹རུཔུཙིམནྡམཱུལེ’’ཏི.

པཙྩུཊྛཱནཾ (སཱརཏྠ. ཊཱི. ༡.༢) ནཱམ ཨཱསནཱ ཝུཊྛཱནནྟི ཨཱཧ ‘‘ནཱསནཱ ཝུཊྛཱཏཱི’’ཏི. ནིསིནྣཱསནཏོ ན ཝུཊྛཧཏཱིཏི ཨཏྠོ. ཨེཏྠ ཙ ཛིཎྞེ…པེ… ཝཡོཨནུཔྤཏྟེཏི ཨུཔཡོགཝཙནཾ ཨཱསནཱ ཝུཊྛཱནཀིརིཡཱཔེཀྑཾ ན ཧོཏི. ཏསྨཱ ‘‘ཛིཎྞེ…པེ… ཝཡོཨནུཔྤཏྟེ དིསྭཱ’’ཏི ཨཛ྄ཛྷཱཧཱརཾ ཀཏྭཱ ཨཏྠོ ཝེདིཏབྦོ. ཨཐ ཝཱ པཙྩུགྒམནཀིརིཡཱཔེཀྑཾ ཨུཔཡོགཝཙནཾ, ཏསྨཱ ན པཙྩུཊྛཱཏཱིཏི ཨུཊྛཱཡ པཙྩུགྒམནཾ ན ཀརོཏཱིཏི ཨཏྠོ ཝེདིཏབྦོ. པཙྩུགྒམནམྤི ཧི པཙྩུཊྛཱནནྟི ཝུཙྩཏི. ཝུཏྟཉྷེཏཾ ‘‘ཨཱཙརིཡཾ པན དཱུརཏོཝ དིསྭཱ པཙྩུཊྛཱཡ པཙྩུགྒམནཀརཎཾ པཙྩུཊྛཱནཾ ནཱམཱ’’ཏི. ནཱསནཱ ཝུཊྛཱཏཱིཏི ཨིམིནཱ པན པཙྩུགྒམནཱབྷཱཝསྶ ཨུཔལཀྑཎམཏྟཾ དསྶིཏནྟི དཊྛབྦཾ. ཝིབྷཱཝནེ ནཱམ ཨཏྠེཏི པཀཏིཝིབྷཱཝནསངྑཱཏེ ཨཏྠེ. ན ཨབྷིཝཱདེཏི ཝཱཏི ན ཨབྷིཝཱདེཏབྦནྟི ཝཱ སལླཀྑེཏཱིཏི ཝུཏྟཾ ཧོཏི.

ཏཾ ཨཉྙཱཎནྟི ‘‘ཨཡཾ མམ ཨབྷིཝཱདནཱདཱིནི ཀཱཏུཾ ཨརཧརཱུཔོ ན ཧོཏཱི’’ཏི ཨཛཱནནཝསེན པཝཏྟཾ ཨཉྙཱཎཾ. ཨོལོཀེནྟོཏི ‘‘དུཀྑཾ ཁོ ཨགཱརཝོ ཝིཧརཏི ཨཔྤཏིསྶོ, ཀིཾ ནུ ཁོ ཨཧཾ སམཎཾ ཝཱ བྲཱཧྨཎཾ ཝཱ སཀྐརེཡྻཾ གརུཾ ཀརེཡྻ’’ནྟིཨཱདིསུཏྟཝསེནེཝ (ཨ. ནི. ༤.༢༡) ཉཱཎཙཀྑུནཱ ཨོལོཀེནྟོ. ནིཔཙྩཀཱརཱརཧནྟི པཎིཔཱཏཱརཧཾ. སམྤཏིཛཱཏོཏི མུཧུཏྟཛཱཏོ, ཛཱཏསམནནྟརམེཝཱཏི ཝུཏྟཾ ཧོཏི. ཨུཏྟརེན མུཁོཏི ཨུཏྟརདིསཱབྷིམུཁོ. ‘‘སཏྟཔདཝཱིཏིཧཱརེན གནྟྭཱ སཀལཾ དསསཧསྶིལོཀདྷཱཏུཾ ཨོལོཀེསི’’ནྟི ཨིདཾ –

‘‘དྷམྨཏཱ ཨེསཱ, བྷིཀྑཝེ, སམྤཏིཛཱཏོ བོདྷིསཏྟོ སམེཧི པཱདེཧི པཏིཊྛཧིཏྭཱ ཨུཏྟརཱབྷིམུཁོ སཏྟཔདཝཱིཏིཧཱརེན གཙྪཏི, སེཏམྷི ཚཏྟེ ཨནུདྷཱརིཡམཱནེ སབྦཱ དིསཱ ཝིལོཀེཏི, ཨཱསབྷིཉྩ ཝཱཙཾ བྷཱསཏཱི’’ཏི (དཱི. ནི. ༢.༣༡) –

ཨེཝཾ ¶ པཱལི༹ཡཾ སཏྟཔདཝཱིཏིཧཱརུཔརི ཋིཏསྶ ཝིཡ སབྦཱདིསཱནུལོཀནསྶ ཀཐིཏཏྟཱ ཝུཏྟཾ, ན པནེཏཾ ཨེཝཾ དཊྛབྦཾ སཏྟཔདཝཱིཏིཧཱརཏོ པགེཝ དིསཱཝིལོཀནསྶ ཀཏཏྟཱ. མཧཱསཏྟོ ཧི མནུསྶཱནཾ ཧཏྠཏོ མུཙྩིཏྭཱ པུརཏྠིམཾ དིསཾ ཨོལོཀེསི, ཨནེཀཱནི ཙཀྐཝཱལ༹སཧསྶཱནི ཨེཀངྒཎཱནི ཨཧེསུཾ. ཏཏྠ དེཝམནུསྶཱ གནྡྷམཱལཱདཱིཧི པཱུཛཡམཱནཱ, ‘‘མཧཱཔུརིས, ཨིདྷ ཏུམྷེཧི སདིསོཔི ནཏྠི, ཀུཏོ ཨུཏྟརིཏརོ’’ཏི ཨཱཧཾསུ. ཨེཝཾ ཙཏསྶོ དིསཱ, ཙཏསྶོ ཨནུདིསཱ, ཧེཊྛཱ, ཨུཔརཱིཏི དསཔི དིསཱ ཨནུཝིལོཀེཏྭཱ ཨཏྟནོ སདིསཾ ཨདིསྭཱ ‘‘ཨཡཾ ཨུཏྟརདིསཱ’’ཏི སཏྟཔདཝཱིཏིཧཱརེན ¶ ཨགམཱསཱིཏི ཝེདིཏབྦཱ. ཨོལོཀེསིནྟི མམ པུཉྙཱནུབྷཱཝེན ལོཀཝིཝརཎཔཱཊིཧཱརིཡེ ཛཱཏེ པཉྙཱཡམཱནཾ དསསཧསྶིལོཀདྷཱཏུཾ མཾསཙཀྑུནཱཝ ཨོལོཀེསིནྟི ཨཏྠོ.

མཧཱཔུརིསོཏི ཛཱཏིགོཏྟཀུལཔྤདེསཱདིཝསེན མཧནྟཔུརིསོ. ཨགྒོཏི གུཎེཧི སབྦཔྤདྷཱནོ. ཛེཊྛོཏི གུཎཝསེནེཝ སབྦེསཾ ཝུདྡྷཏམོ, གུཎེཧི མཧལླཀཏམོཏི ཝུཏྟཾ ཧོཏི. སེཊྛོཏི གུཎཝསེནེཝ སབྦེསཾ པསཏྠཏམོ. ཨཏྠཏོ པན པཙྪིམཱནི དྭེ པུརིམསྶེཝ ཝེཝཙནཱནཱིཏི ཝེདིཏབྦཾ. ཏཡཱཏི ནིསྶཀྐེ ཀརཎཝཙནཾ. ཨུཏྟརིཏརོཏི ཨདྷིཀཏརོ. པཏིམཱནེསཱིཏི པཱུཛེསི. ཨཱསབྷིནྟི ཨུཏྟམཾ. མཡ྄ཧཾ ཨབྷིཝཱདནཱདིརཧོ པུགྒལོཏི མཡ྄ཧཾ ཨབྷིཝཱདནཱདིཀིརིཡཱཡ ཨརཧོ ཨནུཙྪཝིཀོ པུགྒལོ. ནིཙྩསཱཔེཀྑཏཱཡ པནེཏྠ སམཱསོ དཊྛབྦོ. ཏཐཱགཏཱཏི ཏཐཱགཏཏོ, ཏཐཱགཏསྶ སནྟིཀཱཏི ཝུཏྟཾ ཧོཏི. ཨེཝརཱུཔནྟི ཨབྷིཝཱདནཱདིསབྷཱཝཾ. པརིཔཱཀསིཐིལབནྡྷནནྟི པརིཔཱཀེན སིཐིལབནྡྷནཾ.

ཏཾ ཝཙནནྟི ‘‘ནཱཧཾ ཏཾ བྲཱཧྨཎཱ’’ཏིཨཱདིཝཙནཾ. ‘‘ནཱཧཾ ཨརསརཱུཔོ, མཱདིསཱ ཝཱ ཨརསརཱུཔཱ’’ཏི ཝུཏྟེ བྲཱཧྨཎོ ཐདྡྷོ བྷཝེཡྻ. ཏེན ཝུཏྟཾ ‘‘ཙིཏྟམུདུབྷཱཝཛནནཏྠ’’ནྟི.

ཀཏམོ པན སོཏི པརིཡཱཡཱཔེཀྑོ པུལླིངྒནིདྡེསོ, ཀཏམོ སོ པརིཡཱཡོཏི ཨཏྠོ? ཛཱཏིཝསེནཱཏི ཁཏྟིཡཱདིཛཱཏིཝསེན. ཨུཔཔཏྟིཝསེནཱཏི དེཝེསུ ཨུཔཔཏྟིཝསེན. སེཊྛསམྨཏཱནམྤཱིཏི ཨཔི-སདྡེན པགེཝ ཨསེཊྛསམྨཏཱནནྟི དསྶེཏི. ཨབྷིནནྡནྟཱནནྟི སཔྤཱིཏིཀཏཎྷཱཝསེན པམོདམཱནཱནཾ. རཛྫནྟཱནནྟི བལཝརཱགཝསེན རཛྫནྟཱནཾ. རཱུཔཔརིབྷོགེན ཨུཔྤནྣཏཎྷཱསམྤཡུཏྟསོམནསྶཝེདནཱ རཱུཔཏོ ནིབྦཏྟིཏྭཱ ཧདཡཏཔྤནཏོ ¶ ཨམྦརསཱདཡོ ཝིཡ རཱུཔརསཱཏི ཝུཙྩནྟི. ཨཱཝིཉྩནྟཱིཏི ཨཱཀཌྜྷནྟི. ཝཏྠཱརམྨཎཱདིསཱམགྒིཡནྟི ཝཏྠུཨཱརམྨཎཱདིཀཱརཎསཱམགྒིཡཾ. ཨནུཀྑིཔནྟོཏི ཨཏྟུཀྐཾསནཝསེན ཀཐིཏེ བྲཱཧྨཎསྶ ཨསཔྤཱཡབྷཱཝཏོ ཨཏྟཱནཾ ཨནུཀྑིཔནྟོ ཨནུཀྐཾསེནྟོ.

ཨེཏསྨིཾ པནཏྠེ ཀརཎེ སཱམིཝཙནནྟི ‘‘ཛཧིཏཱ’’ཏི ཨེཏསྨིཾ ཨཏྠེ ཏཐཱགཏསྶཱཏི ཀརཎེ སཱམིཝཙནཾ, ཏཐཱགཏེན ཛཧིཏཱཏི ཨཏྠོ. མཱུལནྟི བྷཝམཱུལཾ. ‘‘ཏཱལཝཏྠུཀཏཱ’’ཏི ཝཏྟབྦེ ‘‘ཨོཊྛམུཁོ’’ཏིཨཱདཱིསུ ཝིཡ མཛ྄ཛྷེཔདལོཔཾ ཀཏྭཱ ཨ-ཀཱརཉྩ དཱིགྷཾ ཀཏྭཱ ‘‘ཏཱལཱཝཏྠུཀཏཱ’’ཏི ཝུཏྟནྟི ཨཱཧ ‘‘ཏཱལཝཏྠུ ཝིཡ ནེསཾ ཝཏྠུ ཀཏནྟི ཏཱལཱཝཏྠུཀཏཱ’’ཏི. ཏཏྠ ཏཱལསྶ ཝཏྠུ ཏཱལཝཏྠུ. ཡཐཱ ཨཱརཱམསྶ ཝཏྠུབྷཱུཏཔུབྦོ པདེསོ ཨཱརཱམསྶ ཨབྷཱཝེ ‘‘ཨཱརཱམཝཏྠཱུ’’ཏི ཝུཙྩཏི, ཨེཝཾ ཏཱལསྶ པཏིཊྛིཏོཀཱསོ སམཱུལཾ ཨུདྡྷརིཏེ ཏཱལེ པདེསམཏྟེ ཋིཏེ ¶ ཏཱལསྶ ཝཏྠུབྷཱུཏཔུབྦཏྟཱ ‘‘ཏཱལཝཏྠཱུ’’ཏི ཝུཙྩཏི. ནེསནྟི རཱུཔརསཱདཱིནཾ. ཀཐཾ པན ཏཱལཝཏྠུ ཝིཡ ནེསཾ ཝཏྠུ ཀཏནྟི ཨཱཧ ‘‘ཡཐཱ ཧཱི’’ཏིཨཱདི. རཱུཔཱདིཔརིབྷོགེན ཨུཔྤནྣཏཎྷཱཡུཏྟསོམནསྶཝེདནཱསངྑཱཏརཱུཔརསཱདཱིནཾ ཙིཏྟསནྟཱནསྶ ཨདྷིཊྛཱནབྷཱཝཏོ ཝུཏྟཾ ‘‘ཏེསཾ པུབྦེ ཨུཔྤནྣཔུབྦབྷཱཝེན ཝཏྠུམཏྟེ ཙིཏྟསནྟཱནེ ཀཏེ’’ཏི. ཏཏྠ པུབྦེཏི པུརེ, སརཱགཀཱལེཏི ཝུཏྟཾ ཧོཏི. ཏཱལཱཝཏྠུཀཏཱཏི ཝུཙྩནྟཱིཏི ཏཱལཝཏྠུ ཝིཡ ཨཏྟནོ ཝཏྠུསྶ ཀཏཏྟཱ རཱུཔརསཱདཡོ ‘‘ཏཱལཱཝཏྠུཀཏཱ’’ཏི ཝུཙྩནྟི. ཨེཏེན པཧཱིནཀིལེསཱནཾ པུན ཨུཔྤཏྟིཡཱ ཨབྷཱཝོ དསྶིཏོ.

ཨཝིརུལ༹ྷིདྷམྨཏྟཱཏི ཨཝིརུལ༹ྷིསབྷཱཝཏཱཡ. མཏྠཀཙྪིནྣོ ཏཱལོ པཏྟཕལཱདཱིནཾ ཨཝཏྠུབྷཱུཏོ ཏཱལཱཝཏྠཱུཏི ཨཱཧ ‘‘མཏྠཀཙྪིནྣཏཱལོ ཝིཡ ཀཏཱ’’ཏི. ཨེཏེན ‘‘ཏཱལཱཝཏྠུ ཝིཡ ཀཏཱཏི ཏཱལཱཝཏྠུཀཏཱ’’ཏི ཨཡཾ ཝིགྒཧོ དསྶིཏོ. ཨེཏྠ པན ‘‘ཨཝཏྠུབྷཱུཏོ ཏཱལོ ཝིཡ ཀཏཱཏི ཨཝཏྠུཏཱལཀཏཱ’’ཏི ཝཏྟབྦེ ཝིསེསནསྶ པརནིཔཱཏཾ ཀཏྭཱ ‘‘ཏཱལཱཝཏྠུཀཏཱ’’ཏི ཝུཏྟནྟི དཊྛབྦཾ. ཨིམིནཱ པནཏྠེན ཨིདཾ དསྶེཏི – རཱུཔརསཱདིཝཙནེན ཝིཔཱཀདྷམྨདྷམྨཱ ཧུཏྭཱ པུབྦེ ཨུཔྤནྣཀུསལཱཀུསལཱ དྷམྨཱ གཧིཏཱ, ཏེ ཨུཔྤནྣཱཔི མཏྠཀསདིསཱནཾ ཏཎྷཱཝིཛྫཱནཾ མགྒསཏྠེན ཚིནྣཏྟཱ ཨཱཡཏིཾ ཏཱལཔཏྟསདིསེ ཝིཔཱཀཀྑནྡྷེ ནིབྦཏྟེཏུཾ ཨསམཏྠཱ ཛཱཏཱ, ཏསྨཱ ཏཱལཱཝཏྠུ ཝིཡ ཀཏཱཏི ཏཱལཱཝཏྠུཀཏཱ རཱུཔརསཱདཡོཏི ¶ . ཨིམསྨིཾ ཨཏྠེ ‘‘ཨབྷིནནྡནྟཱན’’ནྟི ཨིམིནཱ པདེན ཀུསལསོམནསྶམྤི སངྒཧིཏནྟི ཝདནྟི. ཨནབྷཱཝཾ ཀཏཱཏི ཨེཏྠ ཨནུ-སདྡོ པཙྪཱསདྡེན སམཱནཏྠོཏི ཨཱཧ ‘‘ཡཐཱ ནེསཾ པཙྪཱབྷཱཝོ ན ཧོཏཱི’’ཏིཨཱདི.

ཡཉྩ ཁོ ཏྭཾ སནྡྷཱཡ ཝདེསི, སོ པརིཡཱཡོ ན ཧོཏཱིཏི ཡཾ ཝནྡནཱདིསཱམགྒིརསཱབྷཱཝསངྑཱཏཾ ཀཱརཎཾ ཨརསརཱུཔཏཱཡ ཝདེསི, ཏཾ ཀཱརཎཾ ན ཧོཏི, ན ཝིཛྫཏཱིཏི ཨཏྠོ. ནནུ ཙཱཡཾ བྲཱཧྨཎོ ཡཾ ཝནྡནཱདིསཱམགྒིརསཱབྷཱཝསངྑཱཏཔརིཡཱཡཾ སནྡྷཱཡ ‘‘ཨརསརཱུཔོ བྷཝཾ གོཏམོ’’ཏི ཨཱཧ, ‘‘སོ པརིཡཱཡོ ནཏྠཱི’’ཏི ཝུཏྟེ ཝནྡནཱདཱིནི བྷགཝཱ ཀརོཏཱིཏི ཨཱཔཛྫཏཱིཏི ཨིམཾ ཨནིཊྛཔྤསངྒཾ དསྶེནྟོ ཨཱཧ ‘‘ནནུ ཙཱ’’ཏིཨཱདི.

སབྦཔརིཡཱཡེསཱུཏི སབྦཝཱརེསུ. སནྡྷཱཡབྷཱསིཏམཏྟནྟི ཡཾ སནྡྷཱཡ བྲཱཧྨཎོ ‘‘ནིབྦྷོགོ བྷཝཾ གོཏམོ’’ཏིཨཱདིམཱཧ. བྷགཝཱ ཙ ཡཾ སནྡྷཱཡ ནིབྦྷོགཏཱདིཾ ཨཏྟནི ཨནུཛཱནཱཏི, ཏཾ སནྡྷཱཡབྷཱསིཏམཏྟཾ. ཚནྡརཱགཔརིབྷོགོཏི ཚནྡརཱགཝསེན པརིབྷོགོ. ཨཔརཾ པརིཡཱཡནྟི ཨཉྙཾ ཀཱརཎཾ.

ཀུལསམུདཱཙཱརཀམྨནྟི ཀུལཱཙཱརསངྑཱཏཾ ཀམྨཾ, ཀུལཙཱརིཏྟནྟི ཨཏྠོ. ཨཀིརིཡནྟི ཨཀརཎབྷཱཝཾ ¶ . ‘‘ཨནེཀཝིཧིཏཱནཾ པཱཔཀཱནཾ ཨཀུསལཱནཾ དྷམྨཱན’’ནྟི སཱམཉྙཝཙནེཔི པཱརིསེསཉཱཡཏོ ཝུཏྟཱཝསེསཱ ཨཀུསལདྷམྨཱ གཧེཏབྦཱཏི ཨཱཧ ‘‘ཋཔེཏྭཱ ཏེ དྷམྨེ’’ཏིཨཱདི, ཏེ ཡཐཱཝུཏྟཀཱཡདུཙྩརིཏཱདིཀེ ཨཀུསལདྷམྨེ ཋཔེཏྭཱཏི ཨཏྠོ. ཨནེཀཝིཧིཏཱཏི ཨནེཀཔྤཀཱརཱ.

ཨཡཾ ལོཀཏནྟཱིཏི ཨཡཾ ཝུཌྜྷཱནཾ ཨབྷིཝཱདནཱདིཀིརིཡལཀྑཎཱ ལོཀཔྤཝེཎཱི. ཨནཱགཱམིབྲཧྨཱནཾ ཨལངྐཱརཱདཱིསུ ཨནཱགཱམིབྷིཀྑཱུནཉྩ ཙཱིཝརཱདཱིསུ ནིཀནྟིཝསེན རཱགུཔྤཏྟི ཧོཏཱིཏི ཨནཱགཱམིམགྒེན པཉྩཀཱམགུཎིཀརཱགསྶེཝ པཧཱནཾ ཝེདིཏབྦནྟི ཨཱཧ ‘‘པཉྩཀཱམགུཎིཀརཱགསྶཱ’’ཏི. རཱུཔཱདཱིསུ པཉྩསུ ཀཱམགུཎེསུ ཝཏྠུཀཱམཀོཊྛཱསེསུ ཨུཔྤཛྫམཱནོ རཱགོ ‘‘པཉྩཀཱམགུཎིཀརཱགོ’’ཏི ཝེདིཏབྦོ. ཀོཊྛཱསཝཙནོ ཧེཏྠ ¶ གུཎ-སདྡོ ‘‘ཝཡོགུཎཱ ཨནུཔུབྦཾ ཛཧནྟཱི’’ཏིཨཱདཱིསུ (སཾ. ནི. ༡.༤) ཝིཡ. ཨཀུསལཙིཏྟདྭཡསམྤཡུཏྟསྶཱཏི དོམནསྶསཧགཏཙིཏྟདྭཡསམྤཡུཏྟསྶ. མོཧསྶ སབྦཱཀུསལསཱདྷཱརཎཏྟཱ ཨཱཧ ‘‘སབྦཱཀུསལསམྦྷཝསྶཱ’’ཏི. ཨཝསེསཱནནྟི སཀྐཱཡདིཊྛིཨཱདཱིནཾ.

ཛིགུཙྪཏི མཉྙེཏི ཨཧམབྷིཛཱཏོ རཱུཔཝཱ པཉྙཝཱ ཀཐཾ ནཱམ ཨཉྙེསཾ ཨབྷིཝཱདནཱདིཾ ཀརེཡྻནྟི ཛིགུཙྪཏི ཝིཡ, ཛིགུཙྪཏཱིཏི ཝཱ སལླཀྑེམི. ཨཀུསལདྷམྨེ ཛིགུཙྪམཱནོ ཏེསཾ སམངྒིབྷཱཝམྤི ཛིགུཙྪཏཱིཏི ཝུཏྟཾ ‘‘ཨཀུསལཱནཾ དྷམྨཱནཾ སམཱཔཏྟིཡཱ ཛིགུཙྪཏཱི’’ཏི. སམཱཔཏྟཱིཏི ཨེཏསྶེཝ ཝེཝཙནཾ སམཱཔཛྫནཱ སམངྒིབྷཱཝོཏི. མཎྜནཛཱཏིཀོཏི མཎྜནཀསབྷཱཝོ, མཎྜནཀསཱིལོཏི ཨཏྠོ. ཛེགུཙྪིཏནྟི ཛིགུཙྪནསཱིལཏཾ.

ལོཀཛེཊྛཀཀམྨནྟི ལོཀཛེཊྛཀཱནཾ ཀཏྟབྦཀམྨཾ, ལོཀེ ཝཱ སེཊྛསམྨཏཾ ཀམྨཾ. ཏཏྲཱཏི ཏེསུ དྭཱིསུཔི ཨཏྠཝིཀཔྤེསུ. པདཱབྷིཧིཏོ ཨཏྠོ པདཏྠོ, བྱཉྫནཏྠོཏི ཝུཏྟཾ ཧོཏི. ཝིནཡཾ ཝཱ ཨརཧཏཱིཏི ཨེཏྠ ཝིནཡནཾ ཝིནཡོ, ནིགྒཎྷནནྟི ཨཏྠོ. ཏེནཱཧ ‘‘ནིགྒཧཾ ཨརཧཏཱིཏི ཝུཏྟཾ ཧོཏཱི’’ཏི. ནནུ ཙ པཋམཾ ཝུཏྟེསུ དྭཱིསུཔི ཨཏྠཝིཀཔྤེསུ སཀཏྠེ ཨརཧཏྠེ ཙ ཏདྡྷིཏཔཙྩཡོ སདྡལཀྑཎཏོ དིསྶཏི, ན པན ‘‘ཝིནཡཱཡ དྷམྨཾ དེསེཏཱི’’ཏི ཨིམསྨིཾ ཨཏྠེ. ཏསྨཱ ཀཐམེཏྠ ཏདྡྷིཏཔཙྩཡོཏི ཨཱཧ ‘‘ཝིཙིཏྲཱ ཧི ཏདྡྷིཏཝུཏྟཱི’’ཏི. ཝིཙིཏྲཏཱ ཙེཏྠ ལོཀཔྤམཱཎཏོ ཝེདིཏབྦཱ. ཏཐཱ ཧི ཡསྨིཾ ཡསྨིཾ ཨཏྠེ ཏདྡྷིཏཔྤཡོགོ ལོཀསྶ, ཏཏྠ ཏཏྠ ཏདྡྷིཏཝུཏྟི ལོཀཏོ སིདྡྷཱཏི ཝིཙིཏྲཱ ཏདྡྷིཏཝུཏྟི, ཏསྨཱ ཡཐཱ ‘‘མཱ སདྡམཀཱསཱི’’ཏི ཝདནྟོ ‘‘མཱསདྡིཀོ’’ཏི ཝུཙྩཏི, ཨེཝཾ ཝིནཡཱཡ དྷམྨཾ དེསེཏཱིཏི ཝེནཡིཀོཏི ཝུཙྩཏཱིཏི ཨདྷིཔྤཱཡོ.

ཀཔཎཔུརིསོཏི གུཎཝིརཧིཏཏཱཡ དཱིནམནུསྶོ. བྱཉྫནཱནི ཨཝིཙཱརེཏྭཱཏི ཏིསྶདཏྟཱདིསདྡེསུ ¶ ཝིཡ ‘‘ཨིམསྨིཾ ཨཏྠེ ཨཡཾ ནཱམ པཙྩཡོ’’ཏི ཨེཝཾ བྱཉྫནཝིཙཱརཾ ཨཀཏྭཱ, ཨནིཔྥནྣཔཱཊིཔདིཀཝསེནཱཏི ཝུཏྟཾ ཧོཏི.

‘‘དེཝལོཀགབྦྷསམྤཏྟིཡཱ’’ཏི ཝཏྭཱཔི ཋཔེཏྭཱ བྷུམྨདེཝེ སེསདེཝེསུ གབྦྷགྒཧཎསྶ ཨབྷཱཝཏོ པཊིསནྡྷིཡེཝེཏྠ གབྦྷསམྤཏྟཱིཏི ཝེདིཏབྦཱཏི ཝུཏྟམེཝཏྠཾ ཝིཝརིཏྭཱ དསྶེནྟོ ཨཱཧ ‘‘དེཝལོཀཔཊིསནྡྷིཔཊིལཱབྷཱཡ སཾཝཏྟཏཱི’’ཏི. ཨསྶཱཏི ཨབྷིཝཱདནཱདིསཱམཱིཙིཀམྨསྶ. མཱཏུཀུཙྪིསྨིཾ ¶ པཊིསནྡྷིགྒཧཎེ དོསཾ དསྶེནྟོཏི མཱཏིཏོ ཨཔརིསུདྡྷབྷཱཝཾ དསྶེནྟོ, ཨཀྐོསིཏུཀཱམསྶ དཱསིཡཱ པུཏྟོཏི དཱསིཀུཙྪིམྷི ནིབྦཏྟབྷཱཝེ དོསཾ དསྶེཏྭཱ ཨཀྐོསནཾ ཝིཡ བྷགཝཏོ མཱཏུཀུཙྪིསྨིཾ པཊིསནྡྷིགྒཧཎེ དོསཾ དསྶེཏྭཱ ཨཀྐོསནྟོཔི ཨེཝམཱཧཱཏི ཨདྷིཔྤཱཡོ. གབྦྷཏོཏི དེཝལོཀཔྤཊིསནྡྷིཏོ. ཏེནེཝཱཧ ‘‘ཨབྷབྦོ དེཝལོཀཱུཔཔཏྟིཾ པཱཔུཎིཏུནྟི ཨདྷིཔྤཱཡོ’’ཏི. ‘‘ཧཱིནོ ཝཱ གབྦྷོ ཨསྶཱཏི ཨཔགབྦྷོ’’ཏི ཨིམསྶ ཝིགྒཧསྶ ཨེཀེན པརིཡཱཡེན ཨདྷིཔྤཱཡཾ དསྶེནྟོ ཨཱཧ ‘‘དེཝལོཀགབྦྷཔརིབཱཧིརཏྟཱ ཨཱཡཏིཾ ཧཱིནགབྦྷཔཊིལཱབྷབྷཱགཱི’’ཏི. ཨིཏི-སདྡོ ཧེཏུཨཏྠོ. ཡསྨཱ ཨཱཡཏིམྤི ཧཱིནགབྦྷཔཊིལཱབྷབྷཱགཱི, ཏསྨཱ ཧཱིནོ ཝཱ གབྦྷོ ཨསྶཱཏི ཨཔགབྦྷོཏི ཨདྷིཔྤཱཡོ. པུན ཏསྶེཝ ཝིགྒཧསྶ ‘‘ཀོདྷཝསེན…པེ… དསྶེནྟོ’’ཏི ཧེཊྛཱ ཝུཏྟནཡསྶ ཨནུརཱུཔཾ ཀཏྭཱ ཨདྷིཔྤཱཡཾ དསྶེནྟོ ཨཱཧ ‘‘ཧཱིནོ ཝཱསྶ མཱཏུཀུཙྪིསྨིཾ གབྦྷཝཱསོ ཨཧོསཱིཏི ཨདྷིཔྤཱཡོ’’ཏི. གབྦྷ-སདྡོ ཨཏྠི མཱཏུཀུཙྪིཔརིཡཱཡོ ‘‘གབྦྷེ ཝསཏི མཱཎཝོ’’ཏིཨཱདཱིསུ (ཛཱ. ༡.༡༥.༣༦༣) ཝིཡ. ཨཏྠི མཱཏུཀུཙྪིསྨིཾ ནིབྦཏྟསཏྟཔརིཡཱཡོ ‘‘ཨནྟམསོ གབྦྷཔཱཏནཾ ཨུཔཱདཱཡཱ’’ཏིཨཱདཱིསུ (མཧཱཝ. ༡༢༩) ཝིཡ. ཏཏྠ མཱཏུཀུཙྪིཔརིཡཱཡཾ གཧེཏྭཱ ཨཏྠཾ དསྶེནྟོ ཨཱཧ ‘‘ཨནཱགཏེ གབྦྷསེཡྻཱ’’ཏི. གབྦྷེ སེཡྻཱ གབྦྷསེཡྻཱ. ཨནུཏྟརེན མགྒེནཱཏི ཨགྒམགྒེན. ཀམྨཀིལེསཱནཾ མགྒེན ཝིཧཏཏྟཱ ཨཱཧ ‘‘ཝིཧཏཀཱརཎཏྟཱ’’ཏི. ཨིཏརཱ ཏིསྶོཔཱིཏི ཨཎྜཛསཾསེདཛཨོཔཔཱཏིཀཱ. ཨེཏྠ ཙ ཡདིཔི ‘‘ཨཔགབྦྷོ’’ཏི ཨིམསྶ ཨནུརཱུཔཏོ གབྦྷསེཡྻཱ ཨེཝ ཝཏྟབྦཱ, པསངྒཏོ པན ལབྦྷམཱནཾ སབྦམྤི ཝཏྟུཾ ཝཊྚཏཱིཏི པུནབྦྷཝཱབྷིནིབྦཏྟིཔི ཝུཏྟཱཏི ཝེདིཏབྦཱ.

ཨིདཱནི སཏྟཔརིཡཱཡསྶ གབྦྷ-སདྡསྶ ཝསེན ཝིགྒཧནཱནཏྟཾ དསྶེནྟོ ཨཱཧ ‘‘ཨཔིཙཱ’’ཏིཨཱདི. ཨིམསྨིཾ པན ཝིཀཔྤེ གབྦྷསེཡྻཱ པུནབྦྷཝཱབྷིནིབྦཏྟཱིཏི ཨུབྷཡམྤི གབྦྷསེཡྻཝསེནེཝ ཝུཏྟནྟིཔི ཝདནྟི. ནནུ ཙ ‘‘ཨཱཡཏིཾ གབྦྷསེཡྻཱ པཧཱིནཱ’’ཏི ཝུཏྟཏྟཱ གབྦྷསྶ སེཡྻཱ ཨེཝ པཧཱིནཱ, ན པན གབྦྷོཏི ཨཱཔཛྫཏཱིཏི ཨཱཧ ‘‘ཡཐཱ ཙཱ’’ཏིཨཱདི. ཨཐ ‘‘ཨབྷིནིབྦཏྟཱི’’ཏི ཨེཏྟཀམེཝ ཨཝཏྭཱ པུནབྦྷཝགྒཧཎཾ ཀིམཏྠནྟི ཨཱཧ ‘‘ཨབྷིནིབྦཏྟི ཙ ནཱམཱ’’ཏིཨཱདི. ཨཔུནབྦྷཝབྷཱུཏཱཏི ཁཎེ ཁཎེ ཨུཔྤཛྫམཱནཱནཾ དྷམྨཱནཾ ཨབྷིནིབྦཏྟི.

དྷམྨདྷཱཏུནྟི ¶ ¶ ཨེཏྠ དྷམྨེ ཨནཝསེསེ དྷཱརེཏི ཡཱཐཱཝཏོ ཨུཔདྷཱརེཏཱིཏི དྷམྨདྷཱཏུ, དྷམྨཱནཾ ཡཐཱསབྷཱཝཏོ ཨཝབུཛ྄ཛྷནསབྷཱཝོ, སབྦཉྙུཏཉྙཱཎསྶེཏཾ ཨདྷིཝཙནཾ. པཊིཝིཛ྄ཛྷིཏྭཱཏི སཙྪིཀཏྭཱ, པཊིལབྷིཏྭཱཏི ཨཏྠོ, པཊིལཱབྷཧེཏཱུཏི ཝུཏྟཾ ཧོཏི. དེསནཱཝིལཱསཔྤཏྟོ ཧོཏཱིཏི རུཙིཝསེན པརིཝཏྟེཏྭཱ དསྶེཏུཾ སམཏྠཏཱ དེསནཱཝིལཱསོ, ཏཾ པཏྟོ ཨདྷིགཏོཏི ཨཏྠོ. ཀརུཎཱཝིཔྥཱརནྟི སབྦསཏྟེསུ མཧཱཀརུཎཱཡ ཕརཎཾ. ཏཱདིལཀྑཎམེཝ པུན ཨུཔམཱཡ ཝིབྷཱཝེཏྭཱ དསྶེནྟོ ཨཱཧ ‘‘པཐཝཱིསམཙིཏྟཏ’’ནྟི. ཡཐཱ པཐཝཱི སུཙིཨསུཙིནིཀྑེཔཙྪེདནབྷེདནཱདཱིསུ ན ཝིཀམྤཏི, ཨནུརོདྷཝིརོདྷཾ ན པཱཔུཎཱཏི, ཨེཝཾ ཨིཊྛཱནིཊྛེསུ ལཱབྷཱལཱབྷཱདཱིསུ ཨནུརོདྷཝིརོདྷཔྤཧཱནཏོ ཨཝིཀམྤིཏཙིཏྟཏཱཡ པཐཝཱིསམཙིཏྟཏནྟི ཨཏྠོ. ཨཀུཔྤདྷམྨཏནྟི ཨེཏྠ ཨཀུཔྤདྷམྨོ ནཱམ ཕལསམཱཔཏྟཱིཏི ཀེཙི ཝདནྟི. ‘‘པརེསུ པན ཨཀྐོསནྟེསུཔི ཨཏྟནོ པཐཝཱིསམཙིཏྟཏཱཡ ཨཀུཔྤནསབྷཱཝཏནྟི ཨེཝམེཏྠ ཨཏྠོ གཧེཏབྦོ’’ཏི ཨམྷཱཀཾ ཁནྟི. ཛརཱཡ ཨནུསཊནྟི ཛརཱཡ པལིཝེཋིཏཾ. བྲཱཧྨཎསྶ ཝུདྡྷཏཱཡ ཨཱསནྣཝུཏྟིམརཎནྟི སམྦྷཱཝནཝསེན ‘‘ཨཛྫ མརིཏྭཱ’’ཏིཨཱདི ཝུཏྟཾ. ‘‘མཧནྟེན ཁོ པན ཨུསྶཱཧེནཱ’’ཏི སཱདྷུ ཁོ པན ཏཐཱརཱུཔཱནཾ ཨརཧཏཾ དསྶནཾ ཧོཏཱི’’ཏི ཨེཝཾ སཉྫཱཏམཧུསྶཱཧེན. ཨཔྤཊིསམཾ པུརེཛཱཏབྷཱཝནྟི ཨནཉྙསཱདྷཱརཎཾ པུརེཛཱཏབྷཱཝཾ. ནཏྠི ཨེཏསྶ པཊིསམོཏི ཨཔྤཊིསམོ, པུརེཛཱཏབྷཱཝོ.

པཀྑེ ཝིདྷུནནྟཱཏི པཏྟེ ཙཱལེནྟཱ. ནིཀྑམནྟཱནནྟི ནིདྡྷཱརཎེ སཱམིཝཙནཾ, ནིཀྑནྟེསཱུཏི ཨཏྠོ.

སོ ཛེཊྛོ ཨིཏི ཨསྶ ཝཙནཱིཡོཏི ཡོ པཋམཏརཾ ཨཎྜཀོསཏོ ནིཀྑནྟོ ཀུཀྐུཊཔོཏཀོ, སོ ཛེཊྛོཏི ཝཙནཱིཡོ ཨསྶ, བྷཝེཡྻཱཏི ཨཏྠོ. སམྤཊིཔཱདེནྟོཏི སཾསནྡེནྟོ. ཏིབྷཱུམཔརིཡཱཔནྣཱཔི སཏྟཱ ཨཝིཛྫཱཀོསསྶ ཨནྟོ པཝིཊྛཱ ཏཏྠ ཏཏྠ ཨཔྤཧཱིནཱཡ ཨཝིཛྫཱཡ ཝེཋིཏཏྟཱཏི ཨཱཧ ‘‘ཨཝིཛྫཱཀོསསྶ ཨནྟོ པཝིཊྛེསུ སཏྟེསཱུ’’ཏི ཨཎྜཀོསནྟི བཱིཛཀཔཱལཾ. ལོཀསནྣིཝཱསེཏི ལོཀོཡེཝ སངྒམྨ སམཱགམྨ ནིཝཱསནཊྛེན ལོཀསནྣིཝཱསོ, སཏྟནིཀཱཡོ. སམྨཱསམྦོདྷིནྟི ཨེཏྠ སམྨཱཏི ཨཝིཔརཱིཏཏྠོ, སཾ-སདྡོ སཱམནྟི ཨིམམཏྠཾ དཱིཔེཏི. ཏསྨཱ སམྨཱ ཨཝིཔརཱིཏེནཱཀཱརེན ¶ སཡམེཝ ཙཏྟཱརི སཙྩཱནི བུཛ྄ཛྷཏི པཊིཝིཛ྄ཛྷཏཱིཏི སམྨཱསམྦོདྷཱིཏི མགྒོ ཝུཙྩཏི. ཏེནཱཧ ‘‘སམྨཱ སཱམཉྩ བོདྷི’’ནྟི, སམྨཱ སཡམེཝ ཙ བུཛ྄ཛྷནཀནྟི ཨཏྠོ. སམྨཱཏི ཝཱ པསཏྠཝཙནོ, སཾ-སདྡོ སུནྡརཝཙནོཏི ཨཱཧ ‘‘ཨཐ ཝཱ པསཏྠཾ སུནྡརཉྩ བོདྷི’’ནྟི.

ཨསབྦགུཎདཱཡཀཏྟཱཏི སབྦགུཎཱནཾ ཨདཱཡཀཏྟཱ. སབྦགུཎེ ན དདཱཏཱིཏི ཧི ཨསབྦགུཎདཱཡཀོ ¶ , ཨསམཏྠསམཱསོཡཾ གམཀཏྟཱ ཡཐཱ ‘‘ཨསཱུརིཡཔསྶཱནི མུཁཱནཱི’’ཏི. ཏིསྶོ ཝིཛྫཱཏི ཨུཔནིསྶཡཝཏོ སཧེཝ ཨརཧཏྟཕལེན ཏིསྶོ ཝིཛྫཱ དེཏི. ནནུ ཙེཏྠ ཏཱིསུ ཝིཛྫཱསུ ཨཱསཝཀྑཡཉཱཎསྶ མགྒཔརིཡཱཔནྣཏྟཱ ཀཐམེཏཾ ཡུཛྫཏི ‘‘མགྒོ ཏིསྶོ ཝིཛྫཱ དེཏཱི’’ཏི? ནཱཡཾ དོསོ. སཏིཔི ཨཱསཝཀྑཡཉཱཎསྶ མགྒཔརིཡཱཔནྣབྷཱཝེ ཨཊྛངྒིཀེ མགྒེ སཏི མགྒཉཱཎེན སདྡྷིཾ ཏིསྶོ ཝིཛྫཱ པརིཔུཎྞཱ ཧོནྟཱིཏི ‘‘མགྒོ ཏིསྶོ ཝིཛྫཱ དེཏཱི’’ཏི ཝུཙྩཏི. ཚ ཨབྷིཉྙཱཏི ཨེཏྠཱཔི ཨེསེཝ ནཡོ. སཱཝཀཔཱརམིཉཱཎནྟི ཨགྒསཱཝཀེཧི པཊིལབྷིཏབྦམེཝ ལོཀིཡལོཀུཏྟརཉཱཎཾ. པཙྩེཀབོདྷིཉཱཎནྟི ཨེཏྠཱཔི ཨིམིནཱཝ ནཡེན ཨཏྠོ ཝེདིཏབྦོ. ཨབྦྷཉྙཱསིནྟི ཛཱནིཾ. ཛཱནནཉྩ ན ཨནུསྶཝཱདིཝསེནཱཏི ཨཱཧ ‘‘པཊིཝིཛ྄ཛྷི’’ནྟི, པཙྩཀྑམཀཱསིནྟི ཨཏྠོ. པཊིཝེདྷོཔི ན དཱུརེ ཋིཏསྶ ལཀྑཎཔྤཊིཝེདྷོ ཝིཡཱཏི ཨཱཧ ‘‘པཏྟོམྷཱི’’ཏི, པཱཔུཎིནྟི ཨཏྠོ. པཱཔུཎནཉྩ ན སཡཾ གནྟྭཱཏི ཨཱཧ ‘‘ཨདྷིགཏོམྷཱི’’ཏི, སནྟཱནེ ཨུཔྤཱདནཝསེན པཊིལབྷིནྟི ཨཏྠོ.

ཨོཔམྨསམྤཊིཔཱདནནྟི ཨོཔམྨཏྠསྶ ཨུཔམེཡྻེན སམྨདེཝ པཊིཔཱདནཾ. ཨཏྠེནཱཏི ཨུཔམེཡྻཏྠེན. ཡཐཱ ཀུཀྐུཊིཡཱ ཨཎྜེསུ ཏིཝིདྷཀིརིཡཱཀརཎཾ ཀུཀྐུཊཙྪཱཔཀཱནཾ ཨཎྜཀོསཏོ ནིཀྑམནསྶ མཱུལཀཱརཎཾ, ཨེཝཾ བོདྷིསཏྟབྷཱུཏསྶ བྷགཝཏོ ཏིཝིདྷཱནུཔསྶནཱཀརཎཾ ཨཝིཛྫཎྜཀོསཏོ ནིཀྑམནསྶ མཱུལཀཱརཎནྟི ཨཱཧ ‘‘ཡཐཱ ཧི ཏསྶཱ ཀུཀྐུཊིཡཱ…པེ… ཏིཝིདྷཱནུཔསྶནཱཀརཎ’’ནྟི. ‘‘སནྟཱནེ’’ཏི ཝུཏྟཏྟཱ ཨཎྜསདིསཏཱ སནྟཱནསྶ, བཧི ནིཀྑནྟཀུཀྐུཊཙྪཱཔཀསདིསཏཱ བུདྡྷགུཎཱནཾ, བུདྡྷགུཎཱཏི ཙ ཨཏྠཏོ བུདྡྷོཡེཝ ‘‘ཏཐཱགཏསྶ ཁོ ཨེཏཾ, ཝཱསེཊྛ, ཨདྷིཝཙནཾ དྷམྨཀཱཡོ ཨིཏིཔཱི’’ཏི ཝཙནཏོ. ཨཝིཛྫཎྜཀོསསྶ ཏནུབྷཱཝོཏི བལཝཝིཔསྶནཱཝསེན ཨཝིཛྫཎྜཀོསསྶ ཏནུབྷཱཝོ, པཊིཙྪཱདནསཱམཉྙེན ཙ ཨཝིཛྫཱཡ ཨཎྜཀོསསདིསཏཱ. མུདུབྷཱུཏསྶཔི ཁརབྷཱཝཱཔཏྟི ཧོཏཱིཏི ¶ ཏནྣིཝཏྟནཏྠཾ ‘‘ཐདྡྷཁརབྷཱཝོ’’ཏི ཝུཏྟཾ. ཏིཀྑཁརཝིཔྤསནྣསཱུརབྷཱཝོཏི ཨེཏྠ པརིགྒཡ྄ཧམཱནེསུ སངྑཱརེསུ ཝིཔསྶནཱཉཱཎསྶ སམཱདྷིནྡྲིཡཝསེན སུཁཱནུཔྤཝེསོ ཏིཀྑཏཱ, ཨནུཔཝིསིཏྭཱཔི སཏིནྡྲིཡཝསེན ཨནཏིཀྐམནཏོ ཨཀུཎྛཏཱ ཁརབྷཱཝོ. ཏིཀྑོཔི ཧི ཨེཀཙྩོ སརོ ལཀྑཾ པཏྭཱ ཀུཎྛོ ཧོཏི, ན ཏཐཱ ཨིདཾ. སཏིཔི ཁརབྷཱཝེ སུཁུམཔྤཝཏྟིཝསེན ཀིལེསསམུདཱཙཱརསངྑོབྷརཧིཏཏཱཡ སདྡྷིནྡྲིཡཝསེན པསནྣབྷཱཝོ, སཏིཔི པསནྣབྷཱཝེ ཨནྟརཱ ཨནོསཀྐིཏྭཱ ཀིལེསཔཙྩཏྠིཀཱནཾ སུཊྛུ ཨབྷིབྷཝནཏོ ཝཱིརིཡིནྡྲིཡཝསེན སཱུརབྷཱཝོ ཝེདིཏབྦོ. ཨེཝམིམེཧི པཀཱརེཧི སངྑཱརུཔེཀྑཱཉཱཎམེཝ གཧིཏནྟི དཊྛབྦཾ. ཝིཔསྶནཱཉཱཎསྶ པརིཎཱམཀཱལོཏི ཝིཔསྶནཱཡ ཝུཊྛཱནགཱམིནིབྷཱཝཱཔཏྟི. ཏདཱ ཙ སཱ མགྒཉཱཎགབྦྷཾ དྷཱརེནྟཱི ཝིཡ ཧོཏཱིཏི ཨཱཧ ‘‘གབྦྷགྒཧཎཀཱལོ’’ཏི. གབྦྷཾ གཎྷཱཔེཏྭཱཏི སངྑཱརུཔེཀྑཱཡ ཨནནྟརཾ སིཁཱཔྤཏྟཨནུལོམཝིཔསྶནཱཝསེན མགྒཝིཛཱཡནཏྠཾ གབྦྷཾ གཎྷཱཔེཏྭཱ. ཨབྷིཉྙཱཔཀྑེཏི ¶ ལོཀིཡཱབྷིཉྙཱཔཀྑེ. ལོཀུཏྟརཱབྷིཉྙཱ ཧི ཨཝིཛྫཎྜཀོསཾ པདཱལིཏཱ. པོཏྠཀེསུ པན ཀཏྠཙི ‘‘ཚཱབྷིཉྙཱཔཀྑེ’’ཏི ལིཁནྟི, སོ ཨཔཱཋོཏི ཝེདིཏབྦོ.

ཛེཊྛོ སེཊྛོཏི ཝུདྡྷཏམཏྟཱ ཛེཊྛོ, སབྦགུཎེཧི ཨུཏྟམཏྟཱ པསཏྠཏམོཏི སེཊྛོ.

ཨིདཱནི ‘‘ཨཱརདྡྷཾ ཁོ པན མེ, བྲཱཧྨཎ, ཝཱིརིཡ’’ནྟིཨཱདིཀཱཡ དེསནཱཡ ཨནུསནྡྷིཾ དསྶེནྟོ ཨཱཧ ‘‘ཨེཝཾ བྷགཝཱ’’ཏིཨཱདི. ཏཏྠ པུབྦབྷཱགཏོ པབྷུཏཱིཏི བྷཱཝནཱཡ པུབྦབྷཱགཱིཡཝཱིརིཡཱརམྦྷཱདིཏོ པཊྛཱཡ. མུཊྛསྶཏིནཱཏི ཝིནཊྛསྶཏིནཱ, སཏིཝིརཧིཏེནཱཏི ཨཏྠོ. སཱརདྡྷཀཱཡེནཱཏི སདརཐཀཱཡེན. བོདྷིམཎྜེཏི བོདྷིསངྑཱཏསྶ ཉཱཎསྶ མཎྜབྷཱཝཔྤཏྟེ ཋཱནེ. བོདྷཱིཏི ཧི པཉྙཱ ཝུཙྩཏི. སཱ ཨེཏྠ མཎྜཱ པསནྣཱ ཛཱཏཱཏི སོ པདེསོ ‘‘བོདྷིམཎྜོ’’ཏི པཉྙཱཏོ. པགྒཧིཏནྟི ཨཱརམྦྷཾ སིཐིལཾ ཨཀཏྭཱ དལ༹ྷཔརཀྐམསངྑཱཏུསྶཧནབྷཱཝེན གཧིཏཾ. ཏེནཱཧ ‘‘ཨསིཐིལཔྤཝཏྟིཏ’’ནྟི. ཨསལླཱིནནྟི ཨསངྐུཙིཏཾ ཀོསཛྫཝསེན སངྐོཙཾ ཨནཱཔནྣཾ. ཨུཔཊྛིཏཱཏི ཨོགཱཧནསངྑཱཏེན ཨཔིལཱཔནབྷཱཝེན ཨཱརམྨཎཾ ཨུཔགནྟྭཱ ཋིཏཱ. ཏེནཱཧ ‘‘ཨཱརམྨཎཱབྷིམུཁཱིབྷཱཝེནཱ’’ཏི. སམྨོསསྶ ཝིདྡྷཾསནཝསེན པཝཏྟིཡཱ ན སམྨུཊྛཱཏི ཨསམྨུཊྛཱ. ཀིཉྩཱཔི ཙིཏྟཔྤསྶདྡྷིཝསེན ཙིཏྟམེཝ པསྶདྡྷཾ, ཀཱཡཔྤསྶདྡྷིཝསེནེཝ ཙ ཀཱཡོ པསྶདྡྷོ ཧོཏི ¶ , ཏཐཱཔི ཡསྨཱ ཀཱཡཔྤསྶདྡྷི ཨུཔྤཛྫམཱནཱ ཙིཏྟཔྤསྶདྡྷིཡཱ སཧེཝ ཨུཔྤཛྫཏི, ན ཝིནཱ, ཏསྨཱ ཝུཏྟཾ ‘‘ཀཱཡཙིཏྟཔྤསྶདྡྷིཝསེནཱ’’ཏི. ཀཱཡཔྤསྶདྡྷིཡཱ ཨུབྷཡེསམྤི ཀཱཡཱནཾ པསྶམྦྷནཱཝཧཏྟཱ ཝུཏྟཾ ‘‘རཱུཔཀཱཡོཔི པསྶདྡྷོཡེཝ ཧོཏཱི’’ཏི.

སོ ཙ ཁོཏི སོ ཙ ཁོ ཀཱཡོ. ཝིགཏདརཐོཏི ཝིགཏཀིལེསདརཐོ. ནཱམཀཱཡེ ཧི ཝིགཏདརཐེ རཱུཔཀཱཡོཔི ཝཱུཔསནྟདརཐཔརིལཱ༹ཧོ ཧོཏི. སམྨཱ ཨཱཧིཏནྟི ནཱནཱརམྨཎེསུ ཝིདྷཱཝནསངྑཱཏཾ ཝིཀྑེཔཾ ཝིཙྪིནྡིཏྭཱ ཨེཀསྨིཾཡེཝ ཨཱརམྨཎེ ཨཝིཀྑིཏྟབྷཱཝཱཔཱདནེན སམྨདེཝ ཨཱཧིཏཾ ཋཔིཏཾ. ཏེནཱཧ ‘‘སུཊྛུ ཋཔིཏ’’ནྟིཨཱདི. ཙིཏྟསྶ ཨནེཀགྒབྷཱཝོ ཝིཀྑེཔཝསེན ཙཉྩལཏཱ, སཱ སཏི ཨེཀགྒཏཱཡ ན ཧོཏཱིཏི ཨཱཧ ‘‘ཨེཀགྒཾ ཨཙལཾ ནིཔྥནྡན’’ནྟི. ཨེཏྟཱཝཏཱཏི ‘‘ཨཱརདྡྷཾ ཁོ པནཱ’’ཏིཨཱདིནཱ ཝཱིརིཡསཏིཔསྶདྡྷིསམཱདྷཱིནཾ ཀིཙྩསིདྡྷིདསྶནེན. ནནུ ཙ སདྡྷཱཔཉྙཱནམྤི ཀིཙྩསིདྡྷི ཛྷཱནསྶ པུབྦབྷཱགཔྤཊིཔདཱཡ ཨིཙྪིཏབྦཱཏི? སཙྩཾ, སཱ པན ནཱནནྟརིཀབྷཱཝེན ཨཝུཏྟསིདྡྷཱཏི ན གཧིཏཱ. ཨསཏི ཧི སདྡྷཱཡ ཝཱིརིཡཱརམྦྷཱདཱིནཾ ཨསམྦྷཝོཡེཝ, པཉྙཱཔརིགྒཧེ ཙ ནེསཾ ཨསཏི ཉཱཡཱརམྦྷཱདིབྷཱཝོ ན སིཡཱ, ཏཐཱ ཨསལླཱིནཱསམྨོསཏཱདཡོ ཝཱིརིཡཱདཱིནནྟི ཨསལླཱིནཏཱདིགྒཧཎེནེཝེཏྠ པཉྙཱཀིཙྩསིདྡྷི ¶ གཧིཏཱཏི དཊྛབྦཾ. ཛྷཱནབྷཱཝནཱཡཾ ཝཱ སམཱདྷིཀིཙྩཾ ཨདྷིཀཾ ཨིཙྪིཏབྦནྟི དསྶེཏུཾ སམཱདྷིཔརིཡོསཱནཱཝ ཛྷཱནསྶ པུབྦབྷཱགཔྤཊིཔདཱ ཀཐིཏཱཏི དཊྛབྦཾ.

ཨཏཱིཏབྷཝེ ཁནྡྷཱ ཏཔྤཊིབདྡྷཱནི ནཱམགོཏྟཱནི ཙ སབྦཾ པུབྦེནིཝཱསཾཏྭེཝ གཧིཏནྟི ཨཱཧ ‘‘ཀིཾ ཝིདིཏཾ ཀརོཏི? པུབྦེནིཝཱས’’ནྟི. མོཧོ པཊིཙྪཱདཀཊྛེན ཏམོ ཝིཡ ཏམོཏི ཨཱཧ ‘‘སྭེཝ མོཧོ’’ཏི. ཨོབྷཱསཀརཎཊྛེནཱཏི ཀཱཏབྦཏོ ཀརཎཾ. ཨོབྷཱསོཝ ཀརཎཾ ཨོབྷཱསཀརཎཾ. ཨཏྟནོ པཙྩཡེཧི ཨོབྷཱསབྷཱཝེན ནིབྦཏྟེཏབྦཊྛེནཱཏི ཨཏྠོ. སེསཾ པསཾསཱཝཙནནྟི པཊིཔཀྑཝིདྷམནཔཝཏྟིཝིསེསཱནཾ བོདྷནཏོ ཝུཏྟཾ. ཨཝིཛྫཱ ཝིཧཏཱཏི ཨེཏེན ཝིཛཱནནཊྛེན ཝིཛྫཱཏི ཨཡམྤི ཨཏྠོ དཱིཔིཏོཏི དཊྛབྦཾ. ‘‘ཀསྨཱ? ཡསྨཱ ཝིཛྫཱ ཨུཔྤནྣཱ’’ཏི ཨེཏེན ཝིཛྫཱཔཊིཔཀྑཱ ཨཝིཛྫཱ. པཊིཔཀྑཏཱ ཙསྶཱ པཧཱཏབྦབྷཱཝེན ཝིཛྫཱཡ ཙ པཧཱཡཀབྷཱཝེནཱཏི དསྶེཏི. ཨེས ནཡོ ཨིཏརསྨིམྤི པདདྭཡེཏི ཨིམིནཱ ‘‘ཏམོ ཝིཧཏོ ཝིནཊྛོ. ཀསྨཱ? ཡསྨཱ ཨཱལོཀོ ཨུཔྤནྣོ’’ཏི ཨིམམཏྠཾ ཨཏིདིསཏི. ཀིལེསཱནཾ ཨཱཏཱཔནཔརིཏཱཔནཊྛེན ¶ ཝཱིརིཡཾ ཨཱཏཱཔོཏི ཨཱཧ ‘‘ཝཱིརིཡཱཏཱཔེན ཨཱཏཱཔིནོ’’ཏི, ཝཱིརིཡཝཏོཏི ཨཏྠོ. པེསིཏཏྟསྶཱཏི ཡཐཱདྷིཔྤེཏཏྠསིདྡྷིཾ པཏི ཝིསྶཊྛཙིཏྟསྶ. ཡཐཱ ཨཔྤམཏྟསྶ ཨཱཏཱཔིནོ པཧིཏཏྟསྶ ཝིཧརཏོཏི ཨཉྙསྶཔི ཀསྶཙི མཱདིསསྶཱཏི ཨདྷིཔྤཱཡོ. པདྷཱནཱནུཡོགསྶཱཏི སམྨཔྤདྷཱནམནུཡུཏྟསྶ.

པཙྩཝེཀྑཎཉཱཎཔརིགྒཧིཏནྟི ན པཋམདུཏིཡཉཱཎདྭཡཱདྷིགམཾ ཝིཡ ཀེཝལནྟི ཨདྷིཔྤཱཡོ. དསྶེནྟོཏི ནིགམནཝསེན དསྶེནྟོ. སརཱུཔཏོ ཧི པུབྦེ དསྶིཏམེཝཱཏི.

ཏིཀྑཏྟུཾ ཛཱཏོཏི ཨིམིནཱ པན ཨིདཾ དསྶེཏི – ‘‘ཨཧཾ, བྲཱཧྨཎ, པཋམཝིཛྫཱཡ ཛཱཏོཡེཝ པུརེཛཱཏསྶ སཧཛཱཏསྶ ཝཱ ཨབྷཱཝཏོ སབྦེསཾ ཝུདྡྷོ མཧལླཀོ, ཀིམངྒཾ པན ཏཱིཧི ཝིཛྫཱཧི ཏིཀྑཏྟུཾ ཛཱཏོ’’ཏི. པུབྦེནིཝཱསཉཱཎེན ཨཏཱིཏཾསཉཱཎནྟི ཨཏཱིཏཱརམྨཎསབྷཱགཏཱཡ ཏབྦྷཱཝིབྷཱཝཏོ ཙ པུབྦེནིཝཱསཉཱཎེན ཨཏཱིཏཾསཉཱཎཾ པཀཱསེཏྭཱཏི ཡོཛེཏབྦཾ. ཏཏྠ ཨཏཱིཏཾསཉཱཎནྟི ཨཏཱིཏཀྑནྡྷཱཡཏནདྷཱཏུསངྑཱཏེ ཨཏཱིཏེ ཀོཊྛཱསེ ཨཔྤཊིཧཏཉཱཎཾ. དིབྦཙཀྑུཉཱཎསྶ པཙྩུཔྤནྣཱརམྨཎཏྟཱ ཡཐཱཀམྨཱུཔགཉཱཎསྶ ཨནཱགཏཾསཉཱཎསྶ ཙ དིབྦཙཀྑུཝསེནེཝ ཨིཛ྄ཛྷནཏོ དིབྦཙཀྑུནོ པརིབྷཎྜཉཱཎཏྟཱ དིབྦཙཀྑུམྷིཡེཝ ཙ ཋིཏསྶ ཙེཏོཔརིཡཉཱཎསིདྡྷིཏོ ཝུཏྟཾ ‘‘དིབྦཙཀྑུནཱ པཙྩུཔྤནྣཱནཱགཏཾསཉཱཎ’’ནྟི. ཏཏྠ དིབྦཙཀྑུནཱཏི སཔརིབྷཎྜེན དིབྦཙཀྑུཉཱཎེན. པཙྩུཔྤནྣཾསོ ཙ ཨནཱགཏཾསོ ཙ པཙྩུཔྤནྣཱནཱགཏཾསཾ, ཏཏྠ ཉཱཎཾ པཙྩུཔྤནྣཱནཱགཏཾསཉཱཎཾ. ཨཱསཝཀྑཡཉཱཎཱདྷིགམེནེཝ སབྦཉྙུཏཉྙཱཎསྶ ཝིཡ སེསཱསཱདྷཱརཎཚཉཱཎདསབལཉཱཎཨཱཝེཎིཀབུདྡྷདྷམྨཱདཱིནམྤི ¶ ཨནཉྙསཱདྷཱརཎཱནཾ བུདྡྷགུཎཱནཾ ཨིཛ྄ཛྷནཏོ ཝུཏྟཾ ‘‘ཨཱསཝཀྑཡེན སཀལལོཀིཡལོཀུཏྟརགུཎ’’ནྟི. ཏེནཱཧ ‘‘སབྦེཔི སབྦཉྙུགུཎེ པཀཱསེཏྭཱ’’ཏི.

པཱིཏིཝིཔྥཱརཔརིཔུཎྞགཏྟཙིཏྟོཏི པཱིཏིཕརཎེན པརིཔུཎྞཀཱཡཙིཏྟོ. ཨཉྙཱཎནྟི ཨཉྙཱཎསྶཱཏི ཨཏྠོ. དྷི-སདྡཡོགཏོ ཧི སཱམིཨཏྠེ ཨེཏཾ ཨུཔཡོགཝཙནཾ. སེསམེཏྠ སུཝིཉྙེཡྻམེཝ.

ཝེརཉྫསུཏྟཝཎྞནཱ ནིཊྛིཏཱ.

༢. སཱིཧསུཏྟཝཎྞནཱ

༡༢. དུཏིཡེ ¶ སནྠཱགཱརཾ (མ. ནི. ཨཊྛ. ༡.༢༢; སཾ. ནི. ཨཊྛ. ༣.༤.༢༤༣) ནཱམ ཨེཀཱ མཧཱསཱལཱཝ. ཨུཡྻོགཀཱལཱདཱིསུ ཧི རཱཛཱནོ ཏཏྠ ཋཏྭཱ ‘‘ཨེཏྟཀཱ པུརཏོ གཙྪནྟུ, ཨེཏྟཀཱ པཙྪཱ’’ཏིཨཱདིནཱ ཏཏྠ ནིསཱིདིཏྭཱ སནྠཾ ཀརོནྟི, མརིཡཱདཾ བནྡྷནྟི, ཏསྨཱ ཏཾ ཋཱནཾ ‘‘སནྠཱགཱར’’ནྟི ཝུཙྩཏི. ཨུཡྻོགཊྛཱནཏོ ཙ ཨཱགནྟྭཱ ཡཱཝ གེཧེ གོམཡཔརིབྷཎྜཱདིཝསེན པཊིཛགྒནཾ ཀརོནྟི, ཏཱཝ ཨེཀཾ དྭེ དིཝསེ ཏེ རཱཛཱནོ ཏཏྠ སནྠམྦྷནྟཱིཏིཔི སནྠཱགཱརཾ. ཏེསཾ རཱཛཱུནཾ སཧ ཨཏྠཱནུསཱསནཾ ཨགཱརནྟིཔི སནྠཱགཱརཾ. གཎརཱཛཱནོ ཧི ཏེ, ཏསྨཱ ཨུཔྤནྣཾ ཀིཙྩཾ ཨེཀསྶ ཝསེན ན སིཛ྄ཛྷཏི, སབྦེསཾ ཚནྡོ ལདྡྷུཾ ཝཊྚཏི, ཏསྨཱ སབྦེ ཏཏྠ སནྣིཔཏིཏྭཱ ཨནུསཱསནྟི. ཏེན ཝུཏྟཾ ‘‘སཧ ཨཏྠཱནུསཱསནཾ ཨགཱར’’ནྟི. ཡསྨཱ ཝཱ ཏཏྠ སནྣིཔཏིཏྭཱ ‘‘ཨིམསྨིཾ ཀཱལེ ཀསིཏུཾ ཝཊྚཏི, ཨིམསྨིཾ ཀཱལེ ཝཔིཏུ’’ནྟིཨཱདིནཱ ནཡེན གྷརཱཝཱསཀིཙྩཱནི སམྨནྟཡནྟི, ཏསྨཱ ཚིདྡཱཝཚིདྡཾ གྷརཱཝཱསཾ སནྠརནྟཱིཏིཔི སནྠཱགཱརཾ.

པུཏྟདཱརདྷནཱདིཨུཔཀརཎཔརིཙྩཱགོ པཱརམིཡོ. ཨཏྟནོ ཨངྒཔརིཙྩཱགོ ཨུཔཔཱརམིཡོ. ཨཏྟནོཝ ཛཱིཝིཏཔརིཙྩཱགོ པརམཏྠཔཱརམིཡོ. ཉཱཏཱིནཾ ཨཏྠཙརིཡཱ ཉཱཏཏྠཙརིཡཱ. ལོཀསྶ ཨཏྠཙརིཡཱ ལོཀཏྠཙརིཡཱ. ཀམྨསྶཀཏཉཱཎཝསེན ཨནཝཛྫཀམྨཱཡཏནསིཔྤཱཡཏནཝིཛྫཱཊྛཱནཔརིཙཡཝསེན ཁནྡྷཱཡཏནཱདིཔརིཙཡཝསེན ལཀྑཎཏྟཡཏཱིརཎཝསེན ཙ ཉཱཎཙཱརོ བུདྡྷཙརིཡཱ. ཨངྒནཡནདྷནརཛྫཔུཏྟདཱརཔརིཛྫཱགཝསེན པཉྩ མཧཱཔརིཙྩཱགེ པརིཙྩཛནྟེན. སཏིཔི མཧཱཔརིཙྩཱགཱནཾ དཱནཔཱརམིབྷཱཝེ པརིཙྩཱགཝིསེསསབྷཱཝདསྶནཏྠཉྩེཝ སུདུཀྐརབྷཱཝདསྶནཏྠཉྩ པཉྩམཧཱཔརིཙྩཱགཱནཾ ཝིསུཾ གཧཎཾ, ཏཏོཡེཝ ཙ ཨངྒཔརིཙྩཱགཏོ ཝིསུཾ ནཡནཔརིཙྩཱགགྒཧཎཾ. པརིཙྩཱགབྷཱཝསཱམཉྙེཔི ¶ དྷནརཛྫཔརིཙྩཱགཏོ པུཏྟདཱརཔརིཙྩཱགགྒཧཎཉྩ ཝིསུཾ ཀཏཾ. པབྦཛྫཱཝ སངྑེཔོ.

སཏྟསུ ཨནུཔསྶནཱསཱུཏི ཨནིཙྩཱནུཔསྶནཱ, དུཀྑཱནུཔསྶནཱ, ཨནཏྟཱནུཔསྶནཱ, ནིབྦིདཱནུཔསྶནཱ, ཝིརཱགཱནུཔསྶནཱ, ནིརོདྷཱནུཔསྶནཱ, པཊིནིསྶགྒཱནུཔསྶནཱཏི ཨིམཱསུ སཏྟསུ ཨནུཔསྶནཱསུ.

ཨནུཝིཙྩཀཱརནྟི ¶ ཨཝེཙྩཀརཎཾ. དྭཱིཧི ཀཱརཎེཧི ཨནིཡྻཱནིཀསཱསནེ ཋིཏཱ ཨཏྟནོ སཱཝཀཏྟཾ ཨུཔགཏེ པགྒཎྷནྟི, ཏཱནི དསྶེཏུཾ ‘‘ཀསྨཱ’’ཏིཨཱདི ཝུཏྟཾ.

ཨནུཔུབྦིཾ ཀཐནྟི (དཱི. ནི. ཊཱི. ༢.༧༥-༧༦) ཨནུཔུབྦཾ ཀཐེཏབྦཀཐཾ. ཀཱ པན སཱཏི? དཱནཱདིཀཐཱ. ཏཏྠ དཱནཀཐཱ ཏཱཝ པཙུརཛནེསུཔི པཝཏྟིཡཱ སབྦསཏྟསཱདྷཱརཎཏྟཱ སུཀརཏྟཱ སཱིལེ པཏིཊྛཱནསྶ ཨུཔཱཡབྷཱཝཏོ ཙ ཨཱདིཏོ ཀཐིཏཱ. པརིཙྩཱགསཱིལོ ཧི པུགྒལོ པརིགྒཧཝཏྠཱུསུ ནིསྶངྒབྷཱཝཏོ སུཁེནེཝ སཱིལཱནི སམཱདིཡཏི, ཏཏྠ ཙ སུཔྤཏིཊྛིཏོ ཧོཏི. སཱིལེན དཱཡཀཔྤཊིགྒཱཧཀཝིསུདྡྷིཏོ པརཱནུགྒཧཾ ཝཏྭཱ པརཔཱིལཱ༹ནིཝཏྟིཝཙནཏོ ཀིརིཡཱདྷམྨཾ ཝཏྭཱ ཨཀིརིཡཱདྷམྨཝཙནཏོ, བྷོགསམྤཏྟིཧེཏུཾ ཝཏྭཱ བྷཝསམྤཏྟིཧེཏུཝཙནཏོ ཙ དཱནཀཐཱནནྟརཾ སཱིལཀཐཱ ཀཐིཏཱ. ‘‘ཏཉྩ སཱིལཾ ཝཊྚནིསྶིཏཾ, ཨཡཾ བྷཝསམྤཏྟི ཏསྶ ཕལ’’ནྟི དསྶནཏྠཾ. ‘‘ཨིམེཧི ཙ དཱནསཱིལམཡེཧི པཎཱིཏཔཎཱིཏཏརཱདིབྷེདབྷིནྣེཧི པུཉྙཀིརིཡཝཏྠཱུཧི ཨེཏཱ ཙཱཏུམཧཱརཱཛིཀཱདཱིསུ པཎཱིཏཔཎཱིཏཏརཱདིབྷེདབྷིནྣཱ ཨཔརིམེཡྻཱ དིབྦབྷོགསམྤཏྟིཡོ ལདྡྷབྦཱ’’ཏི དསྶནཏྠཾ ཏདནནྟརཾ སགྒཀཐཱ. ‘‘སྭཱཡཾ སགྒོ རཱགཱདཱིཧི ཨུཔཀྐིལིཊྛོ, སབྦཐཱནུཔཀྐིལིཊྛོ ཨརིཡམགྒོ’’ཏི དསྶནཏྠཾ སགྒཱནནྟརཾ མགྒོ, མགྒཉྩ ཀཐེནྟེན ཏདདྷིགམཱུཔཱཡསནྡསྶནཏྠཾ སགྒཔརིཡཱཔནྣཱཔི པགེཝ ཨིཏརེ སབྦེཔི ཀཱམཱ ནཱམ བཧྭཱདཱིནཝཱ ཨནིཙྩཱ ཨདྡྷུཝཱ ཝིཔརིཎཱམདྷམྨཱཏི ཀཱམཱནཾ ཨཱདཱིནཝོ. ‘‘ཧཱིནཱ གམྨཱ པོཐུཛྫནིཀཱ ཨནརིཡཱ ཨནཏྠསཾཧིཏཱ’’ཏི ཏེསཾ ཨོཀཱརོ ལཱམཀབྷཱཝོ. སབྦེཔི བྷཝཱ ཀིལེསཱནཾ ཝཏྠུབྷཱུཏཱཏི ཏཏྠ སཾཀིལེསོ. སབྦསོ སཾཀིལེསཝིཔྤམུཏྟཾ ནིབྦཱནནྟི ནེཀྑམྨེ ཨཱནིསཾསོ ཙ ཀཐེཏབྦོཏི ཨཡམཏྠོ མགྒནྟཱིཏི ཨེཏྠ ཨིཏི-སདྡེན ཨཱདི-ཨཏྠེན དཱིཔིཏོཏི ཝེདིཏབྦཾ.

སུཁཱནཾ ནིདཱནནྟི དིཊྛདྷམྨིཀཱནཾ སམྤརཱཡིཀཱནཾ ནིབྦཱནུཔསཾཧིཏཱནཉྩཱཏི སབྦེསམྤི སུཁཱནཾ ཀཱརཎཾ. ཡཉྷི ཀིཉྩི ལོཀེ བྷོགསུཁཾ ནཱམ, ཏཾ སབྦཾ དཱནཱདྷཱིནནྟི པཱཀཊོཡམཏྠོ. ཡཾ པན ཛྷཱནཝིཔསྶནཱམགྒཕལནིབྦཱནཔྤཊིསཾཡུཏྟཾ སུཁཾ, ཏསྶཔི དཱནཾ ཨུཔནིསྶཡཔཙྩཡོ ཧོཏིཡེཝ ¶ . སམྤཏྟཱིནཾ མཱུལནྟི ཡཱ ཨིམཱ ལོཀེ པདེསརཛྫསིརིསྶརིཡསཏྟརཏནསམུཛྫལཙཀྐཝཏྟིསམྤདཱཏི ཨེཝཾཔབྷེདཱ མཱནུསིཀཱ སམྤཏྟིཡོ, ཡཱ ཙ ཙཱཏུམཧཱརཱཛིཀཱདིགཏཱ དིབྦསམྤཏྟིཡོ, ཡཱ ཝཱ པནཉྙཱཔི སམྤཏྟིཡོ ¶ , ཏཱསཾ སབྦཱསཾ ཨིདཾ མཱུལཀཱརཎཾ. བྷོགཱནནྟི བྷུཉྫིཏབྦཊྛེན ‘‘བྷོགོ’’ཏི ལདྡྷནཱམཱནཾ པིཡམནཱཔིཡརཱུཔཱདཱིནཾ ཏནྣིསྶཡཱནཾ ཝཱ ཨུཔབྷོགསུཁཱནཾ པཏིཊྛཱ ནིཙྩལཱདྷིཊྛཱནཏཱཡ. ཝིསམགཏསྶཱཏི བྱསནཔྤཏྟསྶ. ཏཱཎནྟི རཀྑཱ, ཏཏོ པརིཔཱལནཏོ. ལེཎནྟི བྱསནེཧི པརིཔཱཏིཡམཱནསྶ ཨོལཱིཡནཔྤདེསོ. གཏཱིཏི གནྟབྦཊྛཱནཾ. པརཱཡཎནྟི པཊིསརཎཾ. ཨཝསྶཡོཏི ཝིནིཔཏིཏུཾ ཨདེནྟོ ནིསྶཡོ. ཨཱརམྨཎནྟི ཨོལུབྦྷཱརམྨཎཾ.

རཏནམཡསཱིཧཱསནསདིསནྟི སབྦརཏནམཡསཏྟངྒམཧཱསཱིཧཱསནསདིསཾ. ཨེཝཾ ཧིསྶ མཧགྒྷཾ ཧུཏྭཱ སབྦསོ ཝིནིཔཏིཏུཾ ཨཔྤདཱནཊྛོ དཱིཔིཏོ ཧོཏི. མཧཱཔཐཝཱིསདིསཾ གཏགཏཊྛཱནེ པཏིཊྛཱནསྶ ལབྷཱཔནཏོ. ཡཐཱ དུབྦལསྶ པུརིསསྶ ཨཱལམྦནརཛྫུ ཨུཏྟིཊྛཏོ ཏིཊྛཏོ ཙ ཨུཔཏྠམྦྷོ, ཨེཝཾ དཱནཾ སཏྟཱནཾ སམྤཏྟིབྷཝེ ཨུཔཔཏྟིཡཱ ཋིཏིཡཱ ཙ པཙྩཡོཏི ཨཱཧ ‘‘ཨཱལམྦནཊྛེན ཨཱལམྦནརཛྫུསདིས’’ནྟི. དུཀྑནིཏྠརཎཊྛེནཱཏི དུགྒཏིདུཀྑཊྛཱནནིཏྠརཎཊྛེན. སམསྶཱསནཊྛེནཱཏི ལོབྷམཙྪརིཡཱདིཔཊིསཏྟུཔདྡཝཏོ སམསྶཱསནཊྛེན. བྷཡཔརིཏྟཱཎཊྛེནཱཏི དཱལིདྡིཡབྷཡཏོ པརིཔཱལནཊྛེན. མཙྪེརམལཱདཱིཧཱིཏི མཙྪེརལོབྷདོསམདཨིསྶཱམིཙྪཱདིཊྛིཝིཙིཀིཙྪཱདིཙིཏྟམལེཧི. ཨནུཔལིཏྟཊྛེནཱཏི ཨནུཔཀྐིལིཊྛཏཱཡ. ཏེསནྟི མཙྪེརམལཱདཱིནཾ. ཏེསཾ ཨེཝ དུརཱསདཊྛེན. ཨསནྟཱསནཊྛེནཱཏི སནྟཱསཧེཏུཨབྷཱཝེན. ཡོ ཧི དཱཡཀོ དཱནཔཏི, སོ སམྤཏིཔི ན ཀུཏོཙི སནྟསཏི, པགེཝ ཨཱཡཏིཾ. བལཝནྟཊྛེནཱཏི མཧཱབལཝཏཱཡ. དཱཡཀོ ཧི དཱནཔཏི སམྤཏི པཀྑབལེན བལཝཱ ཧོཏི, ཨཱཡཏིཾ པན ཀཱཡབལཱདཱིཧིཔི. ཨབྷིམངྒལསམྨཏཊྛེནཱཏི ‘‘ཝཌྜྷིཀཱརཎ’’ནྟི ཨབྷིསམྨཏབྷཱཝེན. ཝིཔཏྟིབྷཝཏོ སམྤཏྟིབྷཝཱུཔནཡནཾ ཁེམནྟབྷཱུམིསམྤཱཔནཾ.

ཨིདཱནི མཧཱབོདྷིཙརིཡབྷཱཝེནཔི དཱནགུཎཾ དསྶེཏུཾ ‘‘དཱནཾ ནཱམེཏ’’ནྟིཨཱདི ཝུཏྟཾ. ཏཏྠ ཨཏྟཱནཾ ནིཡྻཱཏེནྟེནཱཏི ཨེཏེན ‘‘དཱནཕལཾ སམྨདེཝ པསྶནྟཱ མཧཱཔུརིསཱ ཨཏྟནོ ཛཱིཝིཏམྤི པརིཙྩཛནྟི, ཏསྨཱ ཀོ ནཱམ ཝིཉྙུཛཱཏིཀོ བཱཧིརེ ཝཏྠུསྨིཾ པགེཝ སངྒཾ ཀརེཡྻཱ’’ཏི ཨོཝཱདཾ དེཏི. ཨིདཱནི ཡཱ ལོཀིཡཱ ལོཀུཏྟརཱ ཙ ཨུཀྐཾསགཏཱ སམྤཏྟིཡོ, ཏཱ སབྦཱ དཱནཏོཡེཝ པཝཏྟནྟཱིཏི དསྶེནྟོ ‘‘དཱནཉྷཱི’’ཏིཨཱདིམཱཧ. ཏཏྠ ¶ སཀྐམཱརབྲཧྨསམྤཏྟིཡོ ཨཏྟཧིཏཱཡ ཨེཝ, ཙཀྐཝཏྟིསམྤཏྟི པན ཨཏྟཧིཏཱཡ པརཧིཏཱཡ ཙཱཏི དསྶེཏུཾ སཱ ཏཱསཾ པརཏོ ཙཀྐཝཏྟིསམྤཏྟི ཝུཏྟཱ. ཨེཏཱ ལོཀིཡཱ, ཨིམཱ པན ལོཀུཏྟརཱཏི དསྶེཏུཾ ‘‘སཱཝཀཔཱརམིཉཱཎ’’ནྟིཨཱདི ¶ ཝུཏྟཾ. ཏཱསུཔི ཨུཀྐཊྛུཀྐཊྛཏརུཀྐཊྛཏམཏཾ དསྶེཏུཾ ཀམེན ཉཱཎཏྟཡཾ ཝུཏྟཾ. ཏེསཾ པན དཱནསྶ པཙྩཡབྷཱཝོ ཧེཊྛཱ ཝུཏྟོཡེཝ. ཨེཏེནེཝ ཏསྶ བྲཧྨསམྤཏྟིཡཱཔི པཙྩཡབྷཱཝོ དཱིཔིཏོཏི ཝེདིཏབྦོ.

དཱནཉྩ ནཱམ དཀྑིཎེཡྻེསུ ཧིཏཛ྄ཛྷཱསཡེན པཱུཛནཛ྄ཛྷཱསཡེན ཝཱ ཨཏྟནོ སནྟཀསྶ པརེསཾ པརིཙྩཛནཾ, ཏསྨཱ དཱཡཀོ པུརིསཔུགྒལོ པརེ ཧནྟི, པརེསཾ ཝཱ སནྟཀཾ ཧརཏཱིཏི ཨཊྛཱནམེཏནྟི ཨཱཧ ‘‘དཱནཾ དེནྟོ སཱིལཾ སམཱདཱཏུཾ སཀྐོཏཱི’’ཏི. སཱིལཱལངྐཱརསདིསོ ཨལངྐཱརོ ནཏྠི སོབྷཱཝིསེསཱཝཧཏྟཱ སཱིལསྶ. སཱིལཔུཔྥསདིསཾ པུཔྥཾ ནཏྠཱིཏི ཨེཏྠཱཔི ཨེསེཝ ནཡོ. སཱིལགནྡྷསདིསོ གནྡྷོ ནཏྠཱིཏི ཨེཏྠ ‘‘ཙནྡནཾ ཏགརཾ ཝཱཔཱི’’ཏིཨཱདིཀཱ (དྷ. པ. ༥༥) གཱཐཱ – ‘‘གནྡྷོ ཨིསཱིནཾ ཙིརདིཀྑིཏཱནཾ, ཀཱཡཱ ཙུཏོ གཙྪཏི མཱལུཏེནཱ’’ཏིཨཱདིཀཱ (ཛཱ. ༢.༡༧.༥༥) ཛཱཏཀགཱཐཱཡོ ཙ ཨཱཧརིཏྭཱ ཝཏྟབྦཱ. སཱིལཉྷི སཏྟཱནཾ ཨཱབྷརཎཉྩེཝ ཨལངྐཱརོ ཙ གནྡྷཝིལེཔནཉྩ པརསྶ དསྶནཱིཡབྷཱཝཱཝཧཉྩ. ཏེནཱཧ ‘‘སཱིལཱལངྐཱརེན ཧཱི’’ཏིཨཱདི.

ཨཡཾ སགྒོ ལབྦྷཏཱིཏི ཨིདཾ མཛ྄ཛྷིམེཧི ཨཱརདྡྷཾ སཱིལཾ སནྡྷཱཡཱཧ. ཏེནེཝཱཧ སཀྐོ དེཝརཱཛཱ –

‘‘ཧཱིནེན བྲཧྨཙརིཡེན, ཁཏྟིཡེ ཨུཔཔཛྫཏི;

མཛ྄ཛྷིམེན ཙ དེཝཏྟཾ, ཨུཏྟམེན ཝིསུཛ྄ཛྷཏཱི’’ཏི. (ཛཱ. ༡.༨.༧༥);

ཨིཊྛོཏི སུཁོ. ཀནྟོཏི ཀམནཱིཡོ. མནཱཔོཏི མནཝཌྜྷནཀོ. ཏཾ པན ཏསྶ ཨིཊྛཱདིབྷཱཝཾ དསྶེཏུཾ ‘‘ནིཙྩམེཏྠ ཀཱིལཱ༹’’ཏིཨཱདི ཝུཏྟཾ.

དོསོཏི ཨནིཙྩཏཱདིནཱ ཨཔྤསྶཱདཱདིནཱ ཙ དཱུསིཏབྷཱཝོ, ཡཏོ ཏེ ཝིཉྙཱུནཾ ཙིཏྟཾ ནཱརཱདྷེནྟི. ཨཐ ཝཱ ཨཱདཱིནཾ ཝཱཏི པཝཏྟཏཱིཏི ཨཱདཱིནཝོ, པརམཀཔཎཏཱ. ཏཐཱ ཙ ཀཱམཱ ཡཐཱཏཐཾ པཙྩཝེཀྑནྟཱནཾ པཙྩུཔཏིཊྛནྟི. ལཱམཀབྷཱཝོཏི ཨསེཊྛེཧི སེཝིཏབྦོ, སེཊྛེཧི ན སེཝིཏབྦོ ནིཧཱིནབྷཱཝོ. སཾཀིལིསྶནནྟི ཝིབཱདྷཀཏཱ ཨུཔཏཱཔཀཏཱ ཙ.

ནེཀྑམྨེ ¶ ཨཱནིསཾསནྟི ཨེཏྠ ‘‘ཡཏྟཀཱ ཀཱམེསུ ཨཱདཱིནཝཱ, ཏཔྤཊིཔཀྑཏོ ཏཏྟཀཱ ནེཀྑམྨེ ཨཱནིསཾསཱ. ཨཔིཙ ནེཀྑམྨཾ ནཱམེཏཾ ཨསམྦཱདྷཾ ཨསཾཀིལིཊྛཾ, ནིཀྑནྟཾ ཀཱམེཧི, ནིཀྑནྟཾ ¶ ཀཱམསཉྙཱཡ, ནིཀྑནྟཾ ཀཱམཝིཏཀྐེཧི, ནིཀྑནྟཾ ཀཱམཔརིལཱ༹ཧེཧི, ནིཀྑནྟཾ བྱཱཔཱདསཉྙཱཡཱ’’ཏིཨཱདིནཱ ནཡེན ནེཀྑམྨེ ཨཱནིསཾསེ པཀཱསེསི. པབྦཛྫཱཡཾ ཛྷཱནཱདཱིསུ ཙ གུཎེ ཝིབྷཱཝེསི ཝཎྞེསི. ཀལླཙིཏྟནྟི ཀམྨནིཡཙིཏྟཾ ཧེཊྛཱ པཝཏྟིཏདེསནཱཡ ཨསྶདྡྷིཡཱདཱིནཾ ཙིཏྟདོསཱནཾ ཝིགཏཏྟཱ ཨུཔརི དེསནཱཡ བྷཱཛནབྷཱཝཱུཔགམེན ཀམྨཀྑམཙིཏྟཾ. ཨཊྛཀཐཱཡཾ པན ཡསྨཱ ཨསྶདྡྷིཡཱདཡོ ཙིཏྟསྶ རོགབྷཱུཏཱ, ཏདཱ ཏེ ཝིགཏཱ, ཏསྨཱ ཨཱཧ ‘‘ཨརོགཙིཏྟ’’ནྟི. དིཊྛིམཱནཱདིཀིལེསཝིགམེན མུདུཙིཏྟཾ. ཀཱམཙྪནྡཱདིཝིགམེན ཝིནཱིཝརཎཙིཏྟཾ. སམྨཱཔཊིཔཏྟིཡཾ ཨུལཱ༹རཔཱིཏིཔཱམོཛྫཡོགེན ཨུདགྒཙིཏྟཾ. ཏཏྠ སདྡྷཱསམྤཏྟིཡཱ པསནྣཙིཏྟཾ. ཡདཱ བྷགཝཱ ཨཉྙཱསཱིཏི སམྦནྡྷོ. ཨཐ ཝཱ ཀལླཙིཏྟནྟི ཀཱམཙྪནྡཝིགམེན ཨརོགཙིཏྟཾ. མུདུཙིཏྟནྟི བྱཱཔཱདཝིགམེན མེཏྟཱཝསེན ཨཀཋིནཙིཏྟཾ. ཝིནཱིཝརཎཙིཏྟནྟི ཨུདྡྷཙྩཀུཀྐུཙྩཝིགམེན ཨཝིཀྑེཔཏོ ཏེན ཨཔིཧིཏཙིཏྟཾ. ཨུདགྒཙིཏྟནྟི ཐིནམིདྡྷཝིགམེན སམྤགྒཧིཏཝསེན ཨལཱིནཙིཏྟཾ. པསནྣཙིཏྟནྟི ཝིཙིཀིཙྪཱཝིགམེན སམྨཱཔཊིཔཏྟིཡཾ ཨདྷིམུཏྟཙིཏྟནྟི ཨེཝམེཏྠ སེསཔདཱནཾ ཨཏྠོ ཝེདིཏབྦོ.

སེཡྻཐཱཔཱིཏིཨཱདིནཱ ཨུཔམཱཝསེན སཱིཧསྶ ཀིལེསཔྤཧཱནཾ ཨརིཡམགྒུཔྤཱདནཉྩ དསྶེཏི. ཨཔགཏཀཱལ༹ཀནྟི ཝིགཏཀཱལ༹ཀཾ. སམྨདེཝཱཏི སུཊྛུདེཝ. རཛནནྟི ནཱིལཔཱིཏལོཧིཏཱདིརངྒཛཱཏཾ. པཊིགྒཎྷེཡྻཱཏི གཎྷེཡྻ, པབྷསྶརཾ བྷཝེཡྻ. ཏསྨིཾཡེཝ ཨཱསནེཏི ཏསྶཾཡེཝ ནིསཛྫཱཡཾ. ཨེཏེནསྶ ལཧུཝིཔསྶཀཏཱ ཏིཀྑཔཉྙཏཱ སུཁཔྤཊིཔདཁིཔྤཱབྷིཉྙཏཱ ཙ དསྶིཏཱ ཧོཏི. ཝིརཛནྟི ཨཔཱཡགམནཱིཡརཱགརཛཱདཱིནཾ ཝིགམེན ཝིརཛཾ. ཨནཝསེསདིཊྛིཝིཙིཀིཙྪཱམལཱཔགམེན ཝཱིཏམལཾ. པཋམམགྒཝཛ྄ཛྷཀིལེསརཛཱབྷཱཝེན ཝཱ ཝིརཛཾ. པཉྩཝིདྷདུསྶཱིལྱམལཝིགམེན ཝཱིཏམལཾ. ཏསྶ ཨུཔྤཏྟིཨཱཀཱརདསྶནཏྠནྟི ཀསྨཱ ཝུཏྟཾ? ནནུ མགྒཉཱཎཾ ཨསངྑཏདྷམྨཱརམྨཎནྟི ཙོདནཾ སནྡྷཱཡཱཧ ‘‘ཏཉྷཱི’’ཏིཨཱདི. ཏཏྠ པཊིཝིཛ྄ཛྷནྟནྟི ཨསམྨོཧཔྤཊིཝེདྷཝསེན པཊིཝིཛ྄ཛྷནྟཾ. ཏེནཱཧ ‘‘ཀིཙྩཝསེནཱ’’ཏི. ཏཏྲིདཾ ཨུཔམཱསཾསནྡནཾ – ཝཏྠཾ ཝིཡ ཙིཏྟཾ, ཝཏྠསྶ ཨཱགནྟུཀམལེཧི ཀིལིཊྛབྷཱཝོ ཝིཡ ཙིཏྟསྶ རཱགཱདིམལེཧི སཾཀིལིཊྛབྷཱཝོ, དྷོཝནསིལཱཏལཾ ཝིཡ ཨནུཔུབྦཱིཀཐཱ, ཨུདཀཾ ཝིཡ སདྡྷཱ, ཨུདཀེན ¶ ཏེམེཏྭཱ ཨཱུསགོམཡཚཱརིཀཁཱརེཧི ཀཱལ༹ཀེ སམྨདྡིཏྭཱ ཝཏྠསྶ དྷོཝནཔྤཡོགོ ཝིཡ སདྡྷཱསིནེཧེན ཏེམེཏྭཱ ཏེམེཏྭཱ སཏིསམཱདྷིཔཉྙཱཧི དོསེ སིཐིལེ ཀཏྭཱ སུཏཱདིཝིདྷིནཱ ཙིཏྟསྶ སོདྷནེ ཝཱིརིཡཱརམྦྷོ. ཏེན པཡོགེན ཝཏྠེ ཀཱལ༹ཀཱཔགམོ ཝིཡ ཝཱིརིཡཱརམྦྷེན ཀིལེསཝིཀྑམྦྷནཾ, རངྒཛཱཏཾ ཝིཡ ཨརིཡམགྒོ, ཏེན སུདྡྷཝཏྠསྶ པབྷསྶརབྷཱཝོ ཝིཡ ཝིཀྑམྦྷིཏཀིལེསསྶ ཙིཏྟསྶ མགྒེན པརིཡོདཔནནྟི.

‘‘དིཊྛདྷམྨོ’’ཏི ཝཏྭཱ དསྶནཾ ནཱམ ཉཱཎདསྶནཏོ ཨཉྙམྤི ཨཏྠཱིཏི ཏནྣིཝཏྟནཏྠཾ ‘‘པཏྟདྷམྨོ’’ཏི ¶ ཝུཏྟཾ. པཏྟི ནཱམ ཉཱཎསམྤཏྟིཏོ ཨཉྙཱཔི ཝིཛྫཏཱིཏི ཏཏོ ཝིསེསནཏྠཾ ‘‘ཝིདིཏདྷམྨོ’’ཏི ཝུཏྟཾ. སཱ པནེསཱ ཝིདིཏདྷམྨཏཱ དྷམྨེསུ ཨེཀདེསེནཔི ཧོཏཱིཏི ནིཔྤདེསཏོ ཝིདིཏབྷཱཝཾ དསྶེཏུཾ. ‘‘པརིཡོགཱལ༹ྷདྷམྨོ’’ཏི ཝུཏྟཾ. ཏེནསྶ སཙྩཱབྷིསམྦོདྷཾཡེཝ དཱིཔེཏི. མགྒཉཱཎཉྷི ཨེཀཱབྷིསམཡཝསེན པརིཉྙཱདིཀིཙྩཾ སཱདྷེནྟཾ ནིཔྤདེསེན ཙཏུསཙྩདྷམྨཾ སམནྟཏོ ཨོགཱལ༹ྷཾ ནཱམ ཧོཏི. ཏེནཱཧ ‘‘དིཊྛོ ཨརིཡསཙྩདྷམྨོ ཨེཏེནཱཏི དིཊྛདྷམྨོ’’ཏི. ཏིཎྞཱ ཝིཙིཀིཙྪཱཏི སཔྤཊིབྷཡཀནྟཱརསདིསཱ སོལ༹སཝཏྠུཀཱ ཨཊྛཝཏྠུཀཱ ཙ ཏིཎྞཱ ནིཏྟིཎྞཱ ཝིཙིཀིཙྪཱ. ཝིགཏཱ ཀཐཾཀཐཱཏི པཝཏྟིཨཱདཱིསུ ‘‘ཨེཝཾ ནུ ཁོ, ན ནུ ཁོ’’ཏི ཨེཝཾ པཝཏྟིཀཱ ཝིགཏཱ སམུཙྪིནྣཱ ཀཐཾཀཐཱ. སཱརཛྫཀརཱནཾ པཱཔདྷམྨཱནཾ པཧཱིནཏྟཱ ཏཔྤཊིཔཀྑེསུ སཱིལཱདིགུཎེསུ པཏིཊྛིཏཏྟཱ ཝེསཱརཛྫཾ ཝིསཱརདབྷཱཝཾ ཝེཡྻཏྟིཡཾ པཏྟོ. ཨཏྟནཱ ཨེཝ པཙྩཀྑཏོ དིཊྛཏྟཱ ན པརཾ པཙྩེཏི, ན ཙསྶ པརོ པཙྩེཏབྦོ ཨཏྠཱིཏི ཨཔརཔྤཙྩཡོ.

ཨུདྡིསིཏྭཱ ཀཏནྟི ཨཏྟཱནཾ ཨུདྡིསིཏྭཱ མཱརཎཝསེན ཀཏཾ ནིབྦཏྟིཏཾ མཾསཾ. པཊིཙྩཀམྨནྟི ཨེཏྠ ཀམྨ-སདྡོ ཀམྨསཱདྷནོ ཨཏཱིཏཀཱལིཀོ ཙཱཏི ཨཱཧ ‘‘ཨཏྟཱནཾ པཊིཙྩཀཏ’’ནྟི. ནིམིཏྟཀམྨསྶེཏཾ ཨདྷིཝཙནཾ ‘‘པཊིཙྩ ཀམྨཾ ཕུསཏཱི’’ཏིཨཱདཱིསུ (ཛཱ. ༡.༤.༧༥) ཝིཡ. ནིམིཏྟཀམྨསྶཱཏི ནིམིཏྟབྷཱཝེན ལདྡྷབྦཀམྨསྶ. ཀརཎཝསེན པཊིཙྩཀམྨཾ ཨེཏྠ ཨཏྠཱིཏི མཾསཾ པཊིཙྩཀམྨཾ ཡཐཱ བུདྡྷི བུདྡྷཾ. ཏཾ ཨེཏསྶ ཨཏྠཱིཏི བུདྡྷོ. སེསམེཏྠ ཨུཏྟཱནམེཝ.

སཱིཧསུཏྟཝཎྞནཱ ནིཊྛིཏཱ.

༣-༤. ཨསྶཱཛཱནཱིཡསུཏྟཱདིཝཎྞནཱ

༡༣-༡༤. ཏཏིཡེ ¶ སཱཋེཡྻཱནཱིཏི སཋཏྟཱནི. སེསཔདེསུཔི ཨེསེཝ ནཡོ. ཏཱནི པནསྶ སཱཋེཡྻཱདཱིནི ཀཱཡཙིཏྟུཛུཀཏཱཔཊིཔཀྑབྷཱུཏཱ ལོབྷསཧགཏཙིཏྟུཔྤཱདསྶ པཝཏྟིཨཱཀཱརཝིསེསཱ. ཏཏྠ ཡསྶ ཀིསྨིཉྩིདེཝ ཋཱནེ ཋཱཏུཀཱམསྶ སཏོ ཡཾ ཋཱནཾ མནུསྶཱནཾ སཔྤཊིབྷཡཾ, པུརཏོ གནྟྭཱ ཏཐེཝ སཔྤཊིབྷཡཊྛཱནེཝ ཋསྶཱམཱིཏི ན ཧོཏི, ཝཉྩནཱདྷིཔྤཱཡབྷཱཝཏོ ཋཱཏུཀཱམཊྛཱནེཡེཝ ནིཁཱཏཏྠམྦྷོ ཝིཡ ཙཏྟཱརོ པཱདེ ནིཙྩཱལེཏྭཱ ཏིཊྛཏི, ཨཡཾ སཋོ ནཱམ, ཨིམསྶ སཱཋེཡྻསྶ པཱཀཊཀརཎཾ. ཏཐཱ ཡསྶ ཀིསྨིཉྩིདེཝ ཋཱནེ ནིཝཏྟིཏྭཱ ཁནྡྷགཏཾ པཱཏེཏུཀཱམསྶ སཏོ ཡཾ ཋཱནཾ མནུསྶཱནཾ སཔྤཊིབྷཡཾ, པུརཏོ གནྟྭཱ ཏཐེཝ པཱཏེསྶཱམཱིཏི ན ཧོཏི, པཱཏེཏུཀཱམཊྛཱནེཡེཝ ནིཝཏྟིཏྭཱ པཱཏེཏི, ཨཡཾ ཀཱུཊོ ནཱམ. ཡསྶ ཀཱལེན ཝཱམཏོ, ཀཱལེན དཀྑིཎཏོ, ཀཱལེན ཨུཛུམགྒེནེཝ ཙ གནྟུཀཱམསྶ སཏོ ཡཾ ཋཱནཾ མནུསྶཱནཾ སཔྤཊིབྷཡཾ, པུརཏོ གནྟྭཱ ཏཐེཝ ཨེཝཾ ཀརིསྶཱམཱིཏི ¶ ན ཧོཏི, ཡདིཙྪཀཾ གནྟུཀཱམཊྛཱནེཡེཝ ཀཱལེན ཝཱམཏོ, ཀཱལེན དཀྑིཎཏོ, ཀཱལེན ཨུཛུམགྒཾ གཙྪཏི, ཏཐཱ ལེཎྜཾ ཝཱ པསྶཱཝཾ ཝཱ ཝིསྶཛྫེཏུཀཱམསྶ ཨིདཾ ཋཱནཾ སུསམྨཊྛཾ ཨཱཀིཎྞམནུསྶཾ རམཎཱིཡཾ. ཨིམསྨིཾ ཋཱནེ ཨེཝརཱུཔཾ ཀཱཏུཾ ན ཡུཏྟཾ, པུརཏོ གནྟྭཱ པཊིཙྪནྣཊྛཱནེ ཀརིསྶཱམཱིཏི ན ཧོཏི, ཏཏྠེཝ ཀརོཏི, ཨཡཾ ཛིམྷོ ནཱམ. ཡསྶ པན ཀིསྨིཉྩི ཋཱནེ མགྒཱ ཨུཀྐམྨ ནིཝཏྟིཏྭཱ པཊིམགྒཾ ཨཱརོཧིཏུཀཱམསྶ སཏོ ཡཾ ཋཱནཾ མནུསྶཱནཾ སཔྤཊིབྷཡཾ, པུརཏོ གནྟྭཱ ཏཏྠེཝ ཨེཝཾ ཀརིསྶཱམཱིཏི ན ཧོཏི, པཊིམགྒཾ ཨཱརོཧིཏུཀཱམཊྛཱནེཡེཝ མགྒཱ ཨུཀྐམྨ ནིཝཏྟིཏྭཱ པཊིམགྒཾ ཨཱརོཧཏི, ཨཡཾ ཝངྐོ ནཱམ. ཨིཏི ཨིམཾ ཙཏུབྦིདྷམྤི ཀིརིཡཾ སནྡྷཱཡེཏཾ ཝུཏྟཾ ‘‘ཡཱནི ཁོ པནསྶ ཏཱནི སཱཋེཡྻཱནི…པེ… ཨཱཝིཀཏྟཱ ཧོཏཱི’’ཏི. ཙཏུཏྠེ ནཏྠི ཝཏྟབྦཾ.

ཨསྶཱཛཱནཱིཡསུཏྟཱདིཝཎྞནཱ ནིཊྛིཏཱ.

༥-༨. མལསུཏྟཱདིཝཎྞནཱ

༡༥-༡༨. པཉྩམེ (དྷ. པ. ཨཊྛ. ༢.༢༤༡) ཡཱ ཀཱཙི པརིཡཏྟི ཝཱ སིཔྤཾ ཝཱ ཡསྨཱ ཨསཛ྄ཛྷཱཡནྟསྶ ཨནནུཡུཉྫནྟསྶ ཝིནསྶཏི, ནིརནྟརཾ ཝཱ ན ཨུཔཊྛཱཏི, ཏསྨཱ ‘‘ཨསཛ྄ཛྷཱཡམལཱ མནྟཱ’’ཏི ¶ ཝུཏྟཾ. ཡསྨཱ པན གྷརཱཝཱསཾ ཝསནྟསྶ ཨུཊྛཱཡུཊྛཱཡ ཛིཎྞཔྤཊིསངྑརཎཱདཱིནི ཨཀརོནྟསྶ གྷརཾ ནཱམ ཝིནསྶཏི, ཏསྨཱ ‘‘ཨནུཊྛཱནམལཱ གྷརཱ’’ཏི ཝུཏྟཾ. ཡསྨཱ གིཧིསྶ ཝཱ པབྦཛིཏསྶ ཝཱ ཀོསཛྫཝསེན སརཱིརཔྤཛགྒནཾ ཝཱ པརིཀྑཱརཔྤཊིཛགྒནཾ ཝཱ ཨཀརོནྟསྶ ཀཱཡོ དུབྦཎྞོ ཧོཏི, ཏསྨཱ ‘‘མལཾ ཝཎྞསྶ ཀོསཛྫ’’ནྟི ཝུཏྟཾ. ཡསྨཱ པན གཱཝོ རཀྑནྟསྶ པམཱདཝསེན ནིདྡཱཡནྟསྶ ཝཱ ཀཱིལ༹ནྟསྶ ཝཱ ཏཱ གཱཝོ ཨཏིཏྠཔཀྑནྡནཱདཱིཧི ཝཱ ཝཱལ༹མིགཙོརཱདིཨུཔདྡཝེན ཝཱ པརེསཾ སཱལིཀྑེཏྟཱདཱིནི ཨོཏརིཏྭཱ ཁཱདནཝསེན ཝཱ ཝིནཱསམཱཔཛྫནྟི, སཡམྤི དཎྜཾ ཝཱ པརིབྷཱསཾ ཝཱ པཱཔུཎཱཏི, པབྦཛིཏཾ ཝཱ པན ཚདྭཱརཱདཱིནི ཨརཀྑནྟཾ པམཱདཝསེན ཀིལེསཱ ཨོཏརིཏྭཱ སཱསནཱ ཙཱཝེནྟི, ཏསྨཱ ‘‘པམཱདོ རཀྑཏོ མལ’’ནྟི ཝུཏྟཾ. སོ ཧིསྶ ཝིནཱསཱཝཧེན མལཊྛཱནིཡཏྟཱ མལཾ.

དུཙྩརིཏནྟི ཨཏིཙཱརོ. ཨཏིཙཱརིནིཉྷི ཨིཏྠིཾ སཱམིཀོཔི གེཧཱ ནཱིཧརཏི, མཱཏཱཔིཏཱུནཾ སནྟིཀཾ གཏམྤི ‘‘ཏྭཾ ཀུལསྶ ཨངྒཱརབྷཱུཏཱ, ཨཀྑཱིཧིཔི ན དཊྛབྦཱ’’ཏི ཏཾ མཱཏཱཔིཏརོཔི ནཱིཧརནྟི, སཱ ཨནཱཐཱ ཝིཙརནྟཱི མཧཱདུཀྑཾ པཱཔུཎཱཏི. ཏེནསྶཱ དུཙྩརིཏཾ ‘‘མལ’’ནྟི ཝུཏྟཾ. དདཏོཏི དཱཡཀསྶ. ཡསྶ ཧི ཁེཏྟཀསནཀཱལེ ‘‘ཨིམསྨིཾ ཁེཏྟེ སམྤནྣེ སལཱཀབྷཏྟཱདཱིནི དསྶཱམཱི’’ཏི ¶ ཙིནྟེཏྭཱཔི ནིཔྥནྣེ སསྶེ མཙྪེརཾ ཨུཔྤཛྫིཏྭཱ ཙཱགཙིཏྟཾ ནིཝཱརེཏི, སོ མཙྪེརཝསེན ཙཱགཙིཏྟེ ཨཝིརུཧནྟེ མནུསྶསམྤཏྟི, དིབྦསམྤཏྟི, ནིབྦཱནསམྤཏྟཱིཏི ཏིསྶོ སམྤཏྟིཡོ ན ལབྷཏི. ཏེན ཝུཏྟཾ ‘‘མཙྪེརཾ དདཏོ མལ’’ནྟི. ཨཉྙེསུཔི ཨེཝརཱུཔེསུ ཨེསེཝ ནཡོ. པཱཔཀཱ དྷམྨཱཏི ཨཀུསལཱ དྷམྨཱ. ཏེ པན ཨིདྷལོཀེ པརལོཀེ ཙ མལམེཝ. ཏཏོཏི ཧེཊྛཱ ཝུཏྟམལཏོ. མལཏརནྟི ཨཏིརེཀམལཾ. ཚཊྛཱདཱིནི ཨུཏྟཱནཏྠཱནེཝ.

མལསུཏྟཱདིཝཎྞནཱ ནིཊྛིཏཱ.

༩. པཧཱརཱདསུཏྟཝཎྞནཱ

༡༩. ནཝམེ (ཨུདཱ. ཨཊྛ. ༤༥; སཱརཏྠ. ཊཱི. ཙཱུལ༹ཝགྒ ༣.༣༨༤) ཨསུརཱཏི དེཝཱ ཝིཡ ན སུརནྟི ན ཀཱིལ༹ནྟི ན ཝིརོཙནྟཱིཏི ཨསུརཱ. སུརཱ ནཱམ དེཝཱ, ཏེསཾ པཊིཔཀྑཱཏི ཝཱ ཨསུརཱ, ཝེཔཙིཏྟིཔཧཱརཱདཱདཡོ ¶ . ཏེསཾ བྷཝནཾ སིནེརུསྶ ཧེཊྛཱབྷཱགེ. ཏེ ཏཏྠ པཝིསནྟཱ ནིཀྑམནྟཱ སིནེརུཔཱདེ མཎྜཔཱདཱིནི ནིམྨིནིཏྭཱ ཀཱིལ༹ནྟཱ ཨབྷིརམནྟི. སཱ ཏཏྠ ཏེསཾ ཨབྷིརཏི. ཨིམེ གུཎེ དིསྭཱཏི ཨཱཧ ‘‘ཡེ དིསྭཱ དིསྭཱ ཨསུརཱ མཧཱསམུདྡེ ཨབྷིརམནྟཱི’’ཏི.

ཡསྨཱ ལོཀིཡཱ ཛམྦུདཱིཔོ, ཧིམཝཱ ཏཏྠ པཏིཊྛིཏསམུདྡདཧཔབྦཏཱ ཏཔྤབྷཝཱ ནདིཡོཏི ཨེཏེསུ ཡཾ ཡཾ ན མནུསྶགོཙརཾ, ཏཏྠ སཡཾ སམྨཱུལ༹ྷཱ ཨཉྙེཔི སམྨོཧཡནྟི, ཏསྨཱ ཏཏྠ སམྨོཧཝིདྷམནཏྠཾ ‘‘ཨཡཾ ཏཱཝ ཛམྦུདཱིཔོ’’ཏིཨཱདི ཨཱརདྡྷཾ. དསསཧསྶཡོཛནཔརིམཱཎོ ཨཱཡཱམཏོ ཝིཏྠཱརཏོ ཙཱཏི ཨདྷིཔྤཱཡོ. ཏེནཱཧ ‘‘ཏཏྠཱ’’ཏིཨཱདི. ཨུདཀེན ཨཛ྄ཛྷོཏྠཊོ ཏདུཔབྷོགིསཏྟཱནཾ པུཉྙཀྑཡེན. སུནྡརདསྶནཾ ཀཱུཊནྟི སུདསྶནཀཱུཊཾ, ཡཾ ལོཀེ ‘‘ཧེམཀཱུཊ’’ནྟི ཝུཙྩཏི. མཱུལགནྡྷོ ཀཱལཱནུསཱརིཡཱདི. སཱརགནྡྷོ ཙནྡནཱདི. ཕེགྒུགནྡྷོ སལལཱདི. ཏཙགནྡྷོ ལཝངྒཱདི. པཔཊིཀཱགནྡྷོ ཀཔིཏྠཱདི. རསགནྡྷོ སཛྫུལསཱདི. པཏྟགནྡྷོ ཏམཱལཧིརིཝེརཱདི. པུཔྥགནྡྷོ ནཱགཀུསུམཱདི. ཕལགནྡྷོ ཛཱཏིཕལཱདི. གནྡྷགནྡྷོ སབྦེསཾ གནྡྷཱནཾ གནྡྷོ. ‘‘སབྦཱནི པུཐུལཏོ པཉྙཱས ཡོཛནཱནི, ཨཱཡཱམཏོ པན ཨུབྦེདྷཏོ ཝིཡ དྭིཡོཛནསཏཱནེཝཱ’’ཏི ཝདནྟི.

མནོཧརསིལཱཏལཱནཱིཏི རཏནམཡཏྟཱ མནུཉྙསོཔཱནསིལཱཏལཱནི. སུཔཊིཡཏྟཱནཱིཏི ཏདུཔབྷོགིསཏྟཱནཾ སཱདྷཱརཎཀམྨུནཱཝ སུཊྛུ པཊིཡཏྟཱནི སུསཎྛིཏཱནི ཧོནྟི. མཙྪཀཙྪཔཱདཱིནི ཨུདཀཾ མལཾ ཀརོནྟི, ཏདབྷཱཝཏོ ཕལིཀསདིསནིམྨལོདཀཱནི. ཏིརིཡཏོ དཱིགྷཾ ཨུགྒཏཀཱུཊནྟི ‘‘ཏིརཙྪཱནཔབྦཏ’’ནྟི ¶ ཨཱཧ. པུརིམཱནི ནཱམགོཏྟཱནཱིཏི ཨེཏྠ ནདཱི ནིནྣགཱཏིཨཱདིཀཾ གོཏྟཾ, གངྒཱ ཡམུནཱཏིཨཱདིཀཾ ནཱམཾ.

སཝམཱནཱཏི སནྡམཱནཱ. པཱུརཏྟནྟི པུཎྞབྷཱཝོ. མསཱརགལླཾ ‘‘ཙིཏྟཕལིཀ’’ནྟིཔི ཝདནྟི. མཧཏཾ བྷཱུཏཱནནྟི མཧནྟཱནཾ སཏྟཱནཾ. ཏིམཱི ཏིམིངྒལཱ ཏིམིཏིམིངྒལཱཏི ཏིསྶོ མཙྪཛཱཏིཡོ. ཏིམིཾ གིལནསམཏྠཱ ཏིམིངྒལཱ. ཏིམིཉྩ ཏིམིངྒལཉྩ གིལནསམཏྠཱ ཏིམིཏིམིངྒལཱཏི ཝདནྟི.

མམ ¶ སཱཝཀཱཏི སོཏཱཔནྣཱདིཀེ ཨརིཡཔུགྒལེ སནྡྷཱཡ ཝདཏི. ན སཾཝསཏཱིཏི ཨུཔོསཐཀམྨཱདིཝསེན སཾཝཱསཾ ན ཀརོཏི. ཨུཀྑིཔཏཱིཏི ཨཔནེཏི. ཝིམུཏྟིརསོཏི ཀིལེསེཧི ཝིམུཙྩནརསོ. སབྦཱ ཧི སཱསནསམྤཏྟི ཡཱཝདེཝ ཨནུཔཱདཱཡ ཨཱསཝེཧི ཙིཏྟསྶ ཝིམུཏྟིཨཏྠཱ.

རཏནཱནཱིཏི རཏིཛནནཊྛེན རཏནཱནི. སཏིཔཊྛཱནཱདཡོ ཧི བྷཱཝིཡམཱནཱ པུབྦབྷཱགེཔི ཨནཔྤཀཾ པཱིཏིཔཱམོཛྫཾ ནིབྦཏྟེནྟི, པགེཝ ཨཔརབྷཱགེ. ཝུཏྟཉྷེཏཾ –

‘‘ཡཏོ ཡཏོ སམྨསཏི, ཁནྡྷཱནཾ ཨུདཡབྦཡཾ;

ལབྷཏཱི པཱིཏིཔཱམོཛྫཾ, ཨམཏཾ ཏཾ ཝིཛཱནཏ’’ནྟི. (དྷ. པ. ༣༧༤) –

ལོཀིཡརཏནནིབྦཏྟཾ པན པཱིཏིཔཱམོཛྫཾ ན ཏསྶ ཀལབྷཱགམྤི ཨགྒྷཏི. ཨཔིཙ –

‘‘ཙིཏྟཱིཀཏཾ མཧགྒྷཉྩ, ཨཏུལཾ དུལླབྷདསྶནཾ;

ཨནོམསཏྟཔརིབྷོགཾ, རཏནནྟི པཝུཙྩཏི’’. (དཱི. ནི. ཨཊྛ. ༢.༣༣; སཾ. ནི. ཨཊྛ. ༣.༥.༢༢༣; ཁུ. པཱ. ཨཊྛ. ༦.༣; སུ. ནི. ཨཊྛ. ༡.༢༢༦; མཧཱནི. ཨཊྛ. ༥༠);

ཡདི ཙ ཙིཏྟཱིཀཏཱདིབྷཱཝེན རཏནཾ ནཱམ ཧོཏི, སཏིཔཊྛཱནཱདཱིནཾཡེཝ བྷཱུཏཏོ རཏནབྷཱཝོ. བོདྷིཔཀྑིཡདྷམྨཱནཉྷི སོ ཨཱནུབྷཱཝོ, ཡཾ སཱཝཀཱ སཱཝཀཔཱརམིཉཱཎཾ, པཙྩེཀབུདྡྷཱ པཙྩེཀབོདྷིཉཱཎཾ, སམྨཱསམྦུདྡྷཱ སམྨཱསམྦོདྷིཾ ཨདྷིགཙྪནྟི ཨཱསནྣཀཱརཎཏྟཱ. ཨཱསནྣཀཱརཎཉྷི དཱནཱདིཨུཔནིསྶཡོཏི ཨེཝཾ རཏིཛནནཊྛེན ཙིཏྟཱིཀཏཱདིཨཏྠེན ཙ རཏནབྷཱཝོ བོདྷིཔཀྑིཡདྷམྨཱནཾ ¶ སཱཏིསཡོ. ཏེན ཝུཏྟཾ ‘‘ཏཏྲིམཱནི རཏནཱནི, སེཡྻཐིདཾ. ཙཏྟཱརོ སཏིཔཊྛཱནཱ’’ཏིཨཱདི.

ཏཏྠ ཨཱརམྨཎེ ཨོཀྐནྟིཏྭཱ ཨུཔཊྛཱནཊྛེན ཨུཔཊྛཱནཾ, སཏིཡེཝ ཨུཔཊྛཱནནྟི སཏིཔཊྛཱནཾ. ཨཱརམྨཎསྶ པན ཀཱཡཱདིཝསེན ཙཏུབྦིདྷཏྟཱ ཝུཏྟཾ ‘‘ཙཏྟཱརོ སཏིཔཊྛཱནཱ’’ཏི. ཏཐཱ ཧི ཀཱཡཝེདནཱཙིཏྟདྷམྨེསུ སུབྷསུཁནིཙྩཨཏྟསཉྙཱནཾ པཧཱནཏོ ཨསུབྷདུཀྑཱནིཙྩཱནཏྟབྷཱཝགྒཧཎཏོ ཙ ནེསཾ ཀཱཡཱནུཔསྶནཱདིབྷཱཝོ ཝིབྷཏྟོ.

སམྨཱ པདཧནྟི ཨེཏེན, སཡཾ ཝཱ སམྨཱ པདཧཏི, པསཏྠཾ སུནྡརཾ ཝཱ པདཧནྟཱིཏི སམྨཔྤདྷཱནཾ, པུགྒལསྶ ཝཱ སམྨདེཝ པདྷཱནབྷཱཝཀརཎཏོ སམྨཔྤདྷཱནཾ ¶ ཝཱིརིཡསྶེཏཾ ཨདྷིཝཙནཾ. ཏམྤི ཨནུཔྤནྣུཔྤནྣཱནཾ ཨཀུསལཱནཾ ཨནུཔྤཱདནཔྤཧཱནཝསེན ཨནུཔྤནྣུཔྤནྣཱནཾ ཀུསལཱནཾ དྷམྨཱནཾ ཨུཔྤཱདནཊྛཱཔནཝསེན ཙ ཙཏུཀིཙྩསཱདྷཀཏྟཱ ཝུཏྟཾ ‘‘ཙཏྟཱརོ སམྨཔྤདྷཱནཱ’’ཏི.

ཨིཛ྄ཛྷཏཱིཏི ཨིདྡྷི, སམིཛ྄ཛྷཏི ནིཔྥཛྫཏཱིཏི ཨཏྠོ. ཨིཛ྄ཛྷནྟི ཝཱ ཏཱཡ སཏྟཱ ཨིདྡྷཱ ཝུདྡྷཱ ཨུཀྐཾསགཏཱ ཧོནྟཱིཏི ཨིདྡྷི. ཨིཏི པཋམེན ཨཏྠེན ཨིདྡྷི ཨེཝ པཱདོཏི ཨིདྡྷིཔཱདོ, ཨིདྡྷིཀོཊྛཱསོཏི ཨཏྠོ. དུཏིཡེན ཨཏྠེན ཨིདྡྷིཡཱ པཱདོ པཏིཊྛཱ ཨདྷིགམུཔཱཡོཏི ཨིདྡྷིཔཱདོ. ཏེན ཧི ཨུཔརཱུཔརིཝིསེསསངྑཱཏཾ ཨིདྡྷིཾ པཛྫནྟི པཱཔུཎནྟི. སྭཱཡཾ ཨིདྡྷིཔཱདོ ཡསྨཱ ཚནྡཱདིཀེ ཙཏྟཱརོ ཨདྷིཔཏིདྷམྨེ དྷུརེ ཛེཊྛཀེ ཀཏྭཱ ནིབྦཏྟཱིཡཏི, ཏསྨཱ ཝུཏྟཾ ‘‘ཙཏྟཱརོ ཨིདྡྷིཔཱདཱ’’ཏི.

པཉྩིནྡྲིཡཱནཱིཏི སདྡྷཱདཱིནི པཉྩ ཨིནྡྲིཡཱནི. ཏཏྠ ཨསྶདྡྷིཡཾ ཨབྷིབྷཝིཏྭཱ ཨདྷིམོཀྑལཀྑཎེ ཨིནྡཊྛཾ ཀཱརེཏཱིཏི སདྡྷིནྡྲིཡཾ. ཀོསཛྫཾ ཨབྷིབྷཝིཏྭཱ པགྒཧལཀྑཎེ, པམཱདཾ ཨབྷིབྷཝིཏྭཱ ཨུཔཊྛཱནལཀྑཎེ, ཝིཀྑེཔཾ ཨབྷིབྷཝིཏྭཱ ཨཝིཀྑེཔལཀྑཎེ, ཨཉྙཱཎཾ ཨབྷིབྷཝིཏྭཱ དསྶནལཀྑཎེ ཨིནྡཊྛཾ ཀཱརེཏཱིཏི པཉྙིནྡྲིཡཾ.

ཏཱནིཡེཝ ཨསྶདྡྷིཡཱདཱིཧི ཨནབྷིབྷཝནཱིཡཏོ ཨཀམྤིཡཊྛེན སམྤཡུཏྟདྷམྨེསུ ཐིརབྷཱཝེན ཙ བལཱནི ཝེདིཏབྦཱནི.

སཏྟ བོཛ྄ཛྷངྒཱཏི བོདྷིཡཱ, བོདྷིསྶ ཝཱ ཨངྒཱཏི བོཛ྄ཛྷངྒཱ. ཡཱ ཧི ཨེསཱ དྷམྨསཱམགྒཱི ཡཱཡ ལོཀུཏྟརམགྒཀྑཎེ ཨུཔྤཛྫམཱནཱཡ ལཱིནུདྡྷཙྩཔཏིཊྛཱནཱཡཱུཧནཀཱམསུཁཏྟཀིལམཐཱནུཡོགཨུཙྪེདསསྶཏཱབྷིནིཝེསཱདཱིནཾ ཨནེཀེསཾ ཨུཔདྡཝཱནཾ པཊིཔཀྑབྷཱུཏཱཡ སཏིདྷམྨཝིཙཡཝཱིརིཡཔཱིཏིཔསྶདྡྷིསམཱདྷིཨུཔེཀྑཱསངྑཱཏཱཡ ¶ དྷམྨསཱམགྒིཡཱ ཨརིཡསཱཝཀོ བུཛ྄ཛྷཏི, ཀིལེསནིདྡཱཡ ཝུཊྛཧཏི, ཙཏྟཱརི ཨརིཡསཙྩཱནི པཊིཝིཛ྄ཛྷཏི, ནིབྦཱནམེཝ ཝཱ སཙྪིཀརོཏཱིཏི ‘‘བོདྷཱི’’ཏི ཝུཙྩཏི. ཏསྶཱ དྷམྨསཱམགྒིསངྑཱཏཱཡ བོདྷིཡཱ ཨངྒཱཏིཔི བོཛ྄ཛྷངྒཱ ཛྷཱནངྒམགྒངྒཱདཡོ ཝིཡ. ཡོཔེས ཝུཏྟཔྤཀཱརཱཡ དྷམྨསཱམགྒིཡཱ བུཛ྄ཛྷཏཱིཏི ཀཏྭཱ ཨརིཡསཱཝཀོ ‘‘བོདྷཱི’’ཏི ཝུཙྩཏི. ཏསྶ བོདྷིསྶ ཨངྒཱཏིཔི བོཛ྄ཛྷངྒཱ སེནངྒརཐངྒཱདཡོ ཝིཡ. ཏེནཱཧུ པོརཱཎཱ ‘‘བུཛ྄ཛྷནཀསྶ པུགྒལསྶ ཨངྒཱཏི བོཛ྄ཛྷངྒཱ’’ཏི (ཝིབྷ. ཨཊྛ. ༤༦༦; སཾ. ནི. ཨཊྛ. ༣.༥.༡༨༢; པཊི. མ. ཨཊྛ. ༢.༢.༡༧). ‘‘བོདྷཱཡ སཾཝཏྟནྟཱིཏི བོཛ྄ཛྷངྒཱ’’ཏིཨཱདིནཱ (པཊི. མ. ༢.༡༧) ནཡེནཔི བོཛ྄ཛྷངྒཏྠོ ཝེདིཏབྦོ.

ཨརིཡོ ¶ ཨཊྛངྒིཀོ མགྒོཏི ཏཾཏཾམགྒཝཛ྄ཛྷེཧི ཀིལེསེཧི ཨཱརཀཏྟཱ, ཨརིཡབྷཱཝཀརཏྟཱ, ཨརིཡཕལཔྤཊིལཱབྷཀརཏྟཱ ཙ ཨརིཡོ. སམྨཱདིཊྛིཨཱདཱིནི ཨཊྛངྒཱནི ཨསྶ ཨཏྠི, ཨཊྛ ཨངྒཱནིཡེཝ ཝཱ ཨཊྛངྒིཀོ. མཱརེནྟོ ཀིལེསེ གཙྪཏི ནིབྦཱནཏྠིཀེཧི ཝཱ མགྒཱིཡཏི, སཡཾ ཝཱ ནིབྦཱནཾ མགྒཏཱིཏི མགྒོཏི ཨེཝམེཏེསཾ སཏིཔཊྛཱནཱདཱིནཾ ཨཏྠཝིབྷཱགོ ཝེདིཏབྦོ.

སོཏཱཔནྣོཏི མགྒསངྑཱཏཾ སོཏཾ ཨཱཔཛྫིཏྭཱ པཱཔུཎིཏྭཱ ཋིཏོ, སོཏཱཔཏྟིཕལཊྛོཏི ཨཏྠོ. སོཏཱཔཏྟིཕལསཙྪིཀིརིཡཱཡ པཊིཔནྣོཏི སོཏཱཔཏྟིཕལསྶ ཨཏྟཔཙྩཀྑཀརཎཱཡ པཊིཔཛྫམཱནོ པཋམམགྒཊྛོ, ཡོ ཨཊྛམཀོཏིཔི ཝུཙྩཏི. སཀདཱགཱམཱིཏི སཀིདེཝ ཨིམཾ ལོཀཾ པཊིསནྡྷིགྒཧཎཝསེན ཨཱགམནསཱིལོ དུཏིཡཕལཊྛོ. ཨནཱགཱམཱིཏི པཊིསནྡྷིགྒཧཎཝསེན ཀཱམལོཀཾ ཨནཱགམནསཱིལོ ཏཏིཡཕལཊྛོ. ཡོ པན སདྡྷཱནུསཱརཱི དྷམྨཱནུསཱརཱི ཨེཀབཱིཛཱིཏིཨེཝམཱདིཀོ ཨརིཡཔུགྒལཝིབྷཱགོ, སོ ཨེཏེསཾཡེཝ པབྷེདོཏི. སེསཾ ཝུཏྟནཡསདིསམེཝ.

པཧཱརཱདསུཏྟཝཎྞནཱ ནིཊྛིཏཱ.

༡༠. ཨུཔོསཐསུཏྟཝཎྞནཱ

༢༠. དསམེ ཏདཧུཔོསཐེཏི (ཨུདཱ. ཨཊྛ. ༤༥; སཱརཏྠ. ཊཱི. ཙཱུལ༹ཝགྒ ༣.༣༨༣) ཏསྨིཾ ཨུཔོསཐདིཝསབྷཱུཏེ ཨཧནི. ཨུཔོསཐཀརཎཏྠཱཡཱཏི ཨོཝཱདཔཱཏིམོཀྑཾ ཨུདྡིསིཏུཾ. ཨུདྡྷསྟཾ ཨརུཎནྟི ཨརུཎུགྒམནཾ. ཨུདྡིསཏུ, བྷནྟེ, བྷགཝཱ བྷིཀྑཱུནཾ པཱཏིམོཀྑནྟི ཐེརོ བྷགཝནྟཾ པཱཏིམོཀྑུདྡེསཾ ཡཱཙི. ཏསྨིཾ ཀཱལེ ‘‘ན, བྷིཀྑཝེ, ཨནུཔོསཐེ ཨུཔོསཐོ ཀཱཏབྦོ’’ཏི (མཧཱཝ. ༡༣༦) སིཀྑཱཔདསྶ ཨཔཉྙཏྟཏྟཱ. ཀསྨཱ པན བྷགཝཱ ཏིཡཱམརཏྟིཾ ཝཱིཏིནཱམེསི ¶ ? ཏཏོ པཊྛཱཡ ཨོཝཱདཔཱཏིམོཀྑཾ ཨནུདྡིསིཏུཀཱམོ ཏསྶ ཝཏྠུཾ པཱཀཊཾ ཀཱཏུཾ. ཨདྡསཱཏི ཀཐཾ ཨདྡས? ཨཏྟནོ ཙེཏོཔརིཡཉཱཎེན ཏསྶཾ པརིསཏི བྷིཀྑཱུནཾ ཙིཏྟཱནི པརིཛཱནནྟོ ཏསྶ དུསྶཱིལསྶ ཙིཏྟཾ པསྶི. ཡསྨཱ པན ཙིཏྟེ དིཊྛེ ཏཾསམངྒཱིཔུགྒལོ དིཊྛོ ནཱམ ཧོཏི, ཏསྨཱ ‘‘ཨདྡསཱ ཁོ ཨཱཡསྨཱ མཧཱམོགྒལླཱནོ ¶ ཏཾ པུགྒལཾ དུསྶཱིལ’’ནྟིཨཱདི ཝུཏྟཾ. ཡཐེཝ ཧི ཨནཱགཏེ སཏྟསུ དིཝསེསུ པཝཏྟཾ པརེསཾ ཙིཏྟཾ ཙེཏོཔརིཡཉཱཎལཱབྷཱི ཛཱནཱཏི, ཨེཝཾ ཨཏཱིཏེཔཱིཏི. མཛ྄ཛྷེ བྷིཀྑུསངྒྷསྶ ནིསིནྣནྟི སངྒྷཔརིཡཱཔནྣོ ཝིཡ བྷིཀྑུསངྒྷསྶ ཨནྟོ ནིསིནྣཾ. དིཊྛོསཱིཏི ཨཡཾ ན པཀཏཏྟོཏི བྷགཝཏཱ དིཊྛོ ཨསི. ཡསྨཱ ཙ ཨེཝཾ དིཊྛོ, ཏསྨཱ ནཏྠི ཏེ ཏཝ བྷིཀྑཱུཧི སདྡྷིཾ ཨེཀཀམྨཱདིསཾཝཱསོ. ཡསྨཱ པན སོ སཾཝཱསོ ཏཝ ནཏྠི, ཏསྨཱ ཨུཊྛེཧི, ཨཱཝུསོཏི ཨེཝམེཏྠ པདཡོཛནཱ ཝེདིཏབྦཱ.

ཏཏིཡམྤི ཁོ སོ པུགྒལོ ཏུཎྷཱི ཨཧོསཱིཏི ཨནེཀཝཱརཾ ཝཏྭཱཔི ‘‘ཐེརོ སཡམེཝ ནིབྦིནྣོ ཨོརམིསྶཏཱི’’ཏི ཝཱ, ‘‘ཨིདཱནི ཨིམེསཾ པཊིཔཏྟིཾ ཛཱནིསྶཱམཱི’’ཏི ཝཱ ཨདྷིཔྤཱཡེན ཏུཎྷཱི ཨཧོསི. བཱཧཱཡཾ གཧེཏྭཱཏི ‘‘བྷགཝཏཱ མཡཱ ཙ ཡཱཐཱཝཏོ དིཊྛོ, ཡཱཝཏཏིཡཾ ‘ཨུཊྛེཧི, ཨཱཝུསོ’ཏི ཙ ཝུཏྟོ ན ཝུཊྛཱཏི, ཨིདཱནིསྶ ནིཀྐཌྜྷནཀཱལོ, མཱ སངྒྷསྶ ཨུཔོསཐནྟརཱཡོ ཨཧོསཱི’’ཏི ཏཾ བཱཧཱཡཾ ཨགྒཧེསི, ཏཐཱ གཧེཏྭཱ. བཧི དྭཱརཀོཊྛཀཱ ནིཀྑཱམེཏྭཱཏི དྭཱརཀོཊྛཀཱ དྭཱརསཱལཱཏོ ནིཀྑཱམེཏྭཱ. བཧཱིཏི པན ནིཀྑཱམིཏཊྛཱནདསྶནཾ. ཨཐ ཝཱ བཧིདྭཱརཀོཊྛཀཱཏི བཧིདྭཱརཀོཊྛཀཏོཔི ནིཀྑཱམེཏྭཱ, ན ཨནྟོདྭཱརཀོཊྛཀཏོ ཨེཝ. ཨུབྷཡཏྠཱཔི ཝིཧཱརཏོ བཧིཀཏྭཱཏི ཨཏྠོ. སཱུཙིགྷཊིཀཾ དཏྭཱཏི ཨགྒལ༹སཱུཙིཉྩ ཨུཔརིགྷཊིཀཉྩ ཨཱདཧིཏྭཱ, སུཊྛུཏརཾ ཀཝཱཊཾ ཐཀེཏྭཱཏི ཨཏྠོ. ཡཱཝ བཱཧཱགཧཎཱཔི ནཱམཱཏི ཨིམིནཱ ‘‘ཨཔརིསུདྡྷཱ, ཨཱནནྡ, པརིསཱ’’ཏི ཝཙནཾ སུཏྭཱ ཨེཝ ཧི ཏེན པཀྐམིཏབྦཾ སིཡཱ, ཨེཝཾ ཨཔཀྐམིཏྭཱ ཡཱཝ བཱཧཱགཧཎཱཔི ནཱམ སོ མོགྷཔུརིསོ ཨཱགམེསྶཏི, ཨཙྪརིཡམིདནྟི དསྶེཏི. ཨིདཉྩ གརཧནཙྪརིཡམེཝཱཏི ཝེདིཏབྦཾ.

ཨཐ བྷགཝཱ ཙིནྟེསི – ‘‘ཨིདཱནི བྷིཀྑུསངྒྷེ ཨབྦུདོ ཛཱཏོ, ཨཔརིསུདྡྷཱ པུགྒལཱ ཨུཔོསཐཾ ཨཱགཙྪནྟི, ན ཙ ཏཐཱགཏཱ ཨཔརིསུདྡྷཱཡ པརིསཱཡ ཨུཔོསཐཾ ཀརོནྟི, པཱཏིམོཀྑཾ ཨུདྡིསནྟི. ཨནུདྡིསནྟེ ཙ བྷིཀྑུསངྒྷསྶ ཨུཔོསཐོ པཙྪིཛྫཏི. ཡཾནཱུནཱཧཾ ཨིཏོ པཊྛཱཡ བྷིཀྑཱུནཾཡེཝ པཱཏིམོཀྑུདྡེསཾ ཨནུཛཱནེཡྻ’’ནྟི. ཨེཝཾ པན ཙིནྟེཏྭཱ བྷིཀྑཱུནཾཡེཝ པཱཏིམོཀྑུདྡེསཾ ཨནུཛཱནི. ཏེན ཝུཏྟཾ ‘‘ཨཐ ཁོ བྷགཝཱ…པེ… པཱཏིམོཀྑཾ ཨུདྡིསེཡྻཱཐཱ’’ཏི. ཏཏྠ ན དཱནཱཧནྟི ཨིདཱནི ཨཧཾ ཨུཔོསཐཾ ན ¶ ཀརིསྶཱམི, པཱཏིམོཀྑཾ ན ཨུདྡིསིསྶཱམཱིཏི པཙྩེཀཾ ན-ཀཱརེན སམྦནྡྷོ. དུཝིདྷཉྷི པཱཏིམོཀྑཾ – ཨཱཎཱཔཱཏིམོཀྑཾ, ཨོཝཱདཔཱཏིམོཀྑནྟི ¶ . ཏེསུ ‘‘སུཎཱཏུ མེ, བྷནྟེ’’ཏིཨཱདིཀཾ (མཧཱཝ. ༡༣༤) ཨཱཎཱཔཱཏིམོཀྑཾ. ཏཾ སཱཝཀཱཝ ཨུདྡིསནྟི, ན བུདྡྷཱ, ཡཾ ཨནྭདྡྷམཱསཾ ཨུདྡིསཱིཡཏི. ‘‘ཁནྟཱི པརམཾ…པེ… སབྦཔཱཔསྶ ཨཀརཎཾ…པེ… ཨནུཔཝཱདོ ཨནུཔགྷཱཏོ…པེ… ཨེཏཾ བུདྡྷཱན སཱསན’’ནྟི (དཱི. ནི. ༢.༩༠; དྷ. པ. ༡༨༣-༡༨༥; ཨུདཱ. ༣༦; ནེཏྟི. ༣༠) ཨིམཱ པན ཏིསྶོ གཱཐཱ ཨོཝཱདཔཱཏིམོཀྑཾ ནཱམ. ཏཾ བུདྡྷཱཝ ཨུདྡིསནྟི, ན སཱཝཀཱ, ཚནྣམྤི ཝསྶཱནཾ ཨཙྩཡེན ཨུདྡིསནྟི. དཱིགྷཱཡུཀབུདྡྷཱནཉྷི དྷརམཱནཀཱལེ ཨཡམེཝ པཱཏིམོཀྑུདྡེསོ, ཨཔྤཱཡུཀབུདྡྷཱནཾ པན པཋམབོདྷིཡཾཡེཝ. ཏཏོ པརཾ ཨིཏརོ. ཏཉྩ ཁོ བྷིཀྑཱུཡེཝ ཨུདྡིསནྟི, ན བུདྡྷཱ, ཏསྨཱ ཨམྷཱཀམྤི བྷགཝཱ ཝཱིསཏིཝསྶམཏྟཾ ཨིམཾ ཨོཝཱདཔཱཏིམོཀྑཾ ཨུདྡིསིཏྭཱ ཨིམཾ ཨནྟརཱཡཾ དིསྭཱ ཏཏོ པརཾ ན ཨུདྡིསི. ཨཊྛཱནནྟི ཨཀཱརཎཾ. ཨནཝཀཱསོཏི ཏསྶེཝ ཝེཝཙནཾ. ཀཱརཎཉྷི ཡཐཱ ཏིཊྛཏི ཨེཏྠ ཕལཾ ཏདཱཡཏྟཝུཏྟིཏཱཡཱཏི ‘‘ཋཱན’’ནྟི ཝུཙྩཏི, ཨེཝཾ ‘‘ཨཝཀཱསོ’’ཏིཔི ཝུཙྩཏི. ཡནྟི ཀིརིཡཱཔརཱམསནཾ.

ཨཊྛིམེ, བྷིཀྑཝེ, མཧཱསམུདྡེཏི ཀོ ཨནུསནྡྷི? ཡྭཱཡཾ ཨཔརིསུདྡྷཱཡ པརིསཱཡ པཱཏིམོཀྑསྶ ཨནུདྡེསོ ཝུཏྟོ, སོ ཨིམསྨིཾ དྷམྨཝིནཡེ ཨཙྪརིཡོ ཨབྦྷུཏོ དྷམྨོཏི ཏཾ ཨཔརེཧིཔི སཏྟཧི ཨཙྪརིཡབྦྷུཏདྷམྨེཧི སདྡྷིཾ ཝིབྷཛིཏྭཱ དསྶེཏུཀཱམོ པཋམཾ ཏཱཝ ཏེསཾ ཨུཔམཱབྷཱཝེན མཧཱསམུདྡེ ཨཊྛ ཨཙྪརིཡབྦྷུཏདྷམྨེ དསྶེནྟོ སཏྠཱ ‘‘ཨཊྛིམེ, བྷིཀྑཝེ, མཧཱསམུདྡེ’’ཏིཨཱདིམཱཧ.

ཨུཔོསཐསུཏྟཝཎྞནཱ ནིཊྛིཏཱ.

མཧཱཝགྒཝཎྞནཱ ནིཊྛིཏཱ.

༣. གཧཔཏིཝགྒོ

༡-༧. པཋམཨུགྒསུཏྟཱདིཝཎྞནཱ

༢༡-༢༧. ཏཏིཡསྶ པཋམདུཏིཡེསུ ནཏྠི ཝཏྟབྦཾ. ཏཏིཡེ ‘‘ཧཏྠགོ’’ཏི ཝཏྟབྦེ ‘‘ཧཏྠཀོ’’ཏི ཝུཏྟཾ. སོ ཧི རཱཛཔུརིསཱནཾ ཧཏྠཏོ ¶ ཡཀྑསྶ ཧཏྠཾ, ཡཀྑསྶ ཧཏྠཏོ བྷགཝཏོ ཧཏྠཾ ¶ , བྷགཝཏོ ཧཏྠཏོ པུན རཱཛཔུརིསཱནཾ ཧཏྠཾ གཏཏྟཱ ནཱམཏོ ཧཏྠཀོ ཨཱལ༹ཝཀོཏི ཛཱཏོ. ཏེནཱཧ ‘‘ཨཱལ༹ཝཀཡཀྑསྶ ཧཏྠཏོ ཧཏྠེཧི སམྤཊིཙྪིཏཏྟཱ ཧཏྠཀོཏི ལདྡྷནཱམོ རཱཛཀུམཱརོ’’ཏི. ཙཏུཏྠཱདཱིནི ཨུཏྟཱནཏྠཱནེཝ.

པཋམཨུགྒསུཏྟཱདིཝཎྞནཱ ནིཊྛིཏཱ.

༨. དུཏིཡབལསུཏྟཝཎྞནཱ

༢༨. ཨཊྛམེ ཁཱིཎཱསཝསྶ སབྦེསཾ སངྑཱརཱནཾ ཨནིཙྩཏཱ ཨསམྨོཧཝསེན ཀིཙྩཏོ མགྒཔཉྙཱཡ སུཔྤཊིཝིདྡྷཱ, ཝིཔསྶནཱཡ ཨཱརམྨཎཀརཎཝསེནཔཱིཏི དསྶེནྟོ ཨཱཧ ‘‘སཧཝིཔསྶནཱཡ མགྒཔཉྙཱཡཱ’’ཏི. ཨིམེ ཀཱམཱཏི དྭེཔི ཀཱམེ ཝདཏི. ཀིལེསཝསེན ཨུཔྤཛྫམཱནོ ཧི པརིལཱ༹ཧོ ཝཏྠུཀཱམསནྣིསྶཡོ ཝཏྠུཀཱམཝིསཡོ ཝཱཏི དྭེཔི སཔརིལཱ༹ཧཊྛེན ཨངྒཱརཀཱསུ ཝིཡཱཏི ‘‘ཨངྒཱརཀཱསཱུཔམཱ’’ཏི ཝུཏྟཱ. ཨནྟོ ཝུཙྩཏི ལཱམཀཊྛེན ཏཎྷཱ, བྱནྟཾ ཝིགཏནྟཾ བྷཱུཏནྟི བྱནྟིབྷཱུཏནྟི ཨཱཧ ‘‘ཝིགཏནྟབྷཱུཏ’’ནྟི, ནིཏྟཎྷནྟི ཨཏྠོ.

དུཏིཡབལསུཏྟཝཎྞནཱ ནིཊྛིཏཱ.

༩. ཨཀྑཎསུཏྟཝཎྞནཱ

༢༩. ནཝམེ ཡསྨཱ མཧིདྡྷིཀཔེཏཱ དེཝཱསུརཱནཾ ཨཱཝཱཧཾ གཙྪནྟི, ཝིཝཱཧཾ ན གཙྪནྟི, ཏསྨཱ པེཏྟིཝིསཡེནེཝ ཨསུརཀཱཡོ གཧིཏོཏི ཝེདིཏབྦོ. པེཏཱསུརཱ པན པེཏཱ ཨེཝཱཏི ཏེསཾ པེཏེཧི སངྒཧོ ཨཝུཏྟསིདྡྷོཝ.

ཨཀྑཎསུཏྟཝཎྞནཱ ནིཊྛིཏཱ.

༡༠. ཨནུརུདྡྷམཧཱཝིཏཀྐསུཏྟཝཎྞནཱ

༣༠. དསམེ ¶ ཨཔྤིཙྪསྶཱཏི ན ཨིཙྪསྶ. ཨབྷཱཝཏྠོ ཧེཏྠ ཨཔྤསདྡོ ‘‘ཨཔྤཌཾསམཀསཝཱཏཱཏཔཱ’’ཏིཨཱདཱིསུ (ཨ. ནི. ༡༠.༡༡) ཝིཡ. པཙྩཡེསུ ཨཔྤིཙྪོ པཙྩཡཔྤིཙྪོ, ཙཱིཝརཱདིཔཙྩཡེསུ ཨིཙྪཱརཧིཏོ. ཨདྷིགམཔྤིཙྪོཏི ཛྷཱནཱདིཨདྷིགམཝིབྷཱཝནེ ཨིཙྪཱརཧིཏོ ¶ . པརིཡཏྟིཨཔྤིཙྪོཏི པརིཡཏྟིཡཾ བཱཧུསཙྩཝིབྷཱཝནེ ཨིཙྪཱརཧིཏོ. དྷུཏངྒཔྤིཙྪོཏི དྷུཏངྒེསུ ཨཔྤིཙྪོ དྷུཏངྒབྷཱཝཝིབྷཱཝནེ ཨིཙྪཱརཧིཏོ. སནྟགུཎནིགུཧནེནཱཏི ཨཏྟནི སཾཝིཛྫམཱནཱནཾ ཛྷཱནཱདིགུཎཱནཉྩེཝ བཱཧུསཙྩགུཎསྶ དྷུཏངྒགུཎསྶ ཙ ནིགུཧནེན ཚཱདནེན. སམྤཛྫཏཱིཏི ནིཔྥཛྫཏི སིཛ྄ཛྷཏི. ནོ མཧིཙྪསྶཱཏི མཧཏིཡཱ ཨིཙྪཱཡ སམནྣཱགཏསྶ ནོ སམྤཛྫཏི ཨནུདྷམྨསྶཔི ཨནིཔྥཛྫནཏོ. པཝིཝིཏྟསྶཱཏི པཀཱརེཧི ཝིཝིཏྟསྶ. ཏེནཱཧ ‘‘ཀཱཡཙིཏྟཨུཔདྷིཝིཝེཀེཧི ཝིཝིཏྟསྶཱ’’ཏི. ཨཱརམྦྷཝཏྠུཝསེནཱཏི བྷཱཝནཱབྷིཡོགཝསེན ཨེཀཱིབྷཱཝོཝ ཀཱཡཝིཝེཀོཏི ཨདྷིཔྤེཏོ, ན གཎསངྒཎིཀཱབྷཱཝམཏྟནྟི དསྶེཏི. ཀམྨནྟི ཡོགཀམྨཾ.

སཏྟེཧི ཀིལེསེཧི ཙ སངྒཎནཾ སམོདྷཱནཾ སངྒཎིཀཱ, སཱ ཨཱརམིཏབྦཊྛེན ཨཱརཱམོ ཨེཏསྶཱཏི སངྒཎིཀཱརཱམོ, ཏསྶ. ཏེནཱཧ ‘‘གཎསངྒཎིཀཱཡ ཙེཝཱ’’ཏིཨཱདི. ཨཱརདྡྷཝཱིརིཡསྶཱཏི པགྒཧིཏཝཱིརིཡསྶ. ཏཉྩ ཁོ ཨུཔདྷིཝིཝེཀེ ནིནྣཏཱཝསེན ‘‘ཨཡཾ དྷམྨོ’’ཏི ཝཙནཏོ. ཨེས ནཡོ ཨིཏརེསུཔི. ཝིཝཊྚནིསྶིཏཾཡེཝ ཧི སམཱདྷཱནཾ ཨིདྷཱདྷིཔྤེཏཾ, ཏཐཱ པཉྙཱཔི. ཀམྨསྶ-ཀཏཔཉྙཱཡ ཧི ཋིཏོ ཀམྨཝསེན བྷཝེསུ ནཱནཔྤཀཱརོ ཨནཏྠོཏི ཛཱནནྟོ ཀམྨཀྑཡཀརཾ ཉཱཎཾ ཨབྷིཔཏྠེཏི, ཏདཏྠཉྩ ཨུསྶཱཧཾ ཀརོཏི. མཱནཱདཡོ སཏྟསནྟཱནཾ སཾསཱརེ པཔཉྩེནྟི ཝིཏྠཱརེནྟཱིཏི པཔཉྩཱཏི ཨཱཧ ‘‘ཏཎྷཱམཱནདིཊྛིཔཔཉྩརཧིཏཏྟཱ’’ཏིཨཱདི. སེསམེཏྠ སུཝིཉྙེཡྻམེཝ.

ཨནུརུདྡྷམཧཱཝིཏཀྐསུཏྟཝཎྞནཱ ནིཊྛིཏཱ.

གཧཔཏིཝགྒཝཎྞནཱ ནིཊྛིཏཱ.

༤. དཱནཝགྒོ

༡-༤. པཋམདཱནསུཏྟཱདིཝཎྞནཱ

༣༡-༣༤. ཙཏུཏྠསྶ ¶ པཋམེ ཨཱསཛྫཱཏི ཡསྶ དེཏི, ཏསྶ ཨཱགམནཧེཏུ ཏེན སམཱགམནིམིཏྟཾ. བྷཡཱཏི བྷཡཧེཏུ. ནནུ བྷཡཾ ནཱམ ལདྡྷཀཱམཏཱརཱགཱདཡོ ཝིཡ ཙེཏནཱཡ ཨཝིསུདྡྷིཀརཾ, ཏཾ ཀསྨཱ ཨིདྷ གཧིཏནྟི? ནཡིདཾ ཏཱདིསཾ ཝོཧཱརབྷཡཱདིཾ སནྡྷཱཡ ཝུཏྟནྟི དསྶེཏུཾ ‘‘ཨཡཾ ཨདཱཡཀོ ཨཀཱརཀོ’’ཏིཨཱདི ཝུཏྟཾ. ཨདཱསི མེཏི ཡཾ པུབྦེ ཀཏཾ ཨུཔཀཱརཾ ཙིནྟེཏྭཱ ¶ དཱིཡཏི, ཏཾ སནྡྷཱཡ ཝུཏྟཾ. དསྶཏི མེཏི པཙྩུཔཀཱརཱསཱིསཱཡ ཡཾ དཱིཡཏི, ཏཾ སནྡྷཱཡ ཝདཏི. སཱཧུ དཱནནྟི དཱནཾ ནཱམེཏཾ པཎྜིཏཔཉྙཏྟནྟི སཱདྷུསམཱཙཱརེ ཋཏྭཱ དེཏི. ཨལངྐཱརཏྠནྟི ཨུཔསོབྷནཏྠཾ. དཱནཉྷི དཏྭཱ ཏཾ པཙྩཝེཀྑནྟསྶ པཱམོཛྫཔཱིཏིསོམནསྶཱདཡོ ཨུཔྤཛྫནྟི, ལོབྷདོསཨིསྶཱམཙྪེརཱདཡོཔི ཝིདཱུརཱི བྷཝནྟི. ཨིདཱནི དཱནཾ ཨནུཀཱུལདྷམྨཔརིབྲཱུཧནེན པཙྩནཱིཀདྷམྨཝིདཱུརཱིཀརཎེན ཙ བྷཱཝནཱཙིཏྟསྶ ཨུཔསོབྷནཱཡ ཙ པརིཀྑཱརཱཡ ཙ ཧོཏཱིཏི ‘‘ཨལངྐཱརཏྠཉྩེཝ པརིཀྑཱརཏྠཉྩ དེཏཱི’’ཏི ཝུཏྟཾ. ཏེནཱཧ ‘‘དཱནཉྷི ཙིཏྟཾ མུདུཾ ཀརོཏཱི’’ཏིཨཱདི. མུདུཙིཏྟོ ཧོཏི ལདྡྷཱ དཱཡཀེ ‘‘ཨིམིནཱ མཡ྄ཧཾ སངྒཧོ ཀཏོ’’ཏི, དཱཏཱཔི ལདྡྷརི. ཏེན ཝུཏྟཾ ‘‘ཨུབྷིནྣམྤི ཙིཏྟཾ མུདུཾ ཀརོཏཱི’’ཏི.

ཨདནྟདམནནྟི ཨདནྟཱ ཨནསྶཝཱཔིསྶ དཱནེན དནྟཱ ཨསྶཝཱ ཧོནྟི, ཝསེ ཝཏྟནྟི. ཨདཱནཾ དནྟདཱུསཀནྟི ཨདཱནཾ པུབྦེ དནྟཱནཾ ཨསྶཝཱནམྤི ཝིགྷཱཏུཔྤཱདནེན ཙིཏྟཾ དཱུསེཏི. ཨུནྣམནྟི དཱཡཀཱ པིཡཾཝདཱ ཙ པརེསཾ གརུཙིཏྟཱིཀཱརཊྛཱནཏཱཡ. ནམནྟིཔཊིགྒཱཧཀཱ དཱནེན པིཡཝཱཙཱཡ ཙ ལདྡྷསངྒཧཱསངྒཱཧཀཱནཾ.

ཙིཏྟཱལངྐཱརདཱནམེཝ ཨུཏྟམཾ ཨནུཔཀྐིལིཊྛཏཱཡ སུཔརིསུདྡྷཏཱཡ གུཎཝིསེསཔཙྩཡཏཱཡ ཙ. དུཏིཡཱདཱིནི ཨུཏྟཱནཏྠཱནེཝ.

པཋམདཱནསུཏྟཱདིཝཎྞནཱ ནིཊྛིཏཱ.

༥. དཱནཱུཔཔཏྟིསུཏྟཝཎྞནཱ

༣༥. པཉྩམེ ¶ དཱནཔཙྩཡཱཏི དཱནཀཱརཎཱ, དཱནམཡཔུཉྙསྶ ཀཏཏྟཱ ཨུཔཙིཏཏྟཱཏི ཨཏྠོ. ཨུཔཔཏྟིཡོཏི མནུསྶེསུ དེཝེསུ ཙ ནིབྦཏྟིཡོ. ཋཔེཏཱིཏི ཨེཀཝཱརམེཝ ཨནུཔྤཛྫིཏྭཱ ཡཐཱ ཨུཔརི ཏེནེཝཱཀཱརེན པཝཏྟཏི, ཨེཝཾ ཋཔེཏི. ཏདེཝ ཙསྶ ཨདྷིཊྛཱནནྟི ཨཱཧ ‘‘ཏསྶེཝ ཝེཝཙན’’ནྟི. ཝཌྜྷེཏཱིཏི བྲཱུཧེཏི ན ཧཱཔེཏི. ཝིམུཏྟནྟི ཨདྷིམུཏྟཾ, ནིནྣཾ པོཎཾ པབྦྷཱརནྟི ཨཏྠོ. ཝིམུཏྟནྟི ཝཱ ཝིསྶཊྛཾ. ནིཔྤརིཡཱཡཏོ ཨུཏྟརི ནཱམ པཎཱིཏཾ མཛ྄ཛྷེཔི ཧཱིནམཛ྄ཛྷིམཝིབྷཱགསྶ ལབྦྷནཏོཏི ཝུཏྟཾ ‘‘ཨུཏྟརི ཨབྷཱཝིཏནྟི ཏཏོ ཨུཔརིམགྒཕལཏྠཱཡ ཨབྷཱཝིཏ’’ནྟི. སཾཝཏྟཏི ཏཐཱཔཎིཧིཏཾ དཱནམཡཾ ཙིཏྟཾ. ཡཾ པན པཱལི༹ཡཾ ‘‘ཏཉྩ ཁོ’’ཏིཨཱདི ཝུཏྟཾ, ཏཾ ཏཏྲུཔཔཏྟིཡཱ ཝིབནྡྷཀརདུསྶཱིལྱཱབྷཱཝདསྶནཔརཾ དཊྛབྦཾ, ན དཱནམཡསྶ པུཉྙསྶ ཀེཝལསྶ ཏཾསཾཝཏྟནཏཱདསྶནཔརནྟི དཊྛབྦཾ. སམུཙྪིནྣརཱགསྶཱཏི སམུཙྪིནྣཀཱམརཱགསྶ. ཏསྶ ཧི ¶ སིཡཱ བྲཧྨལོཀེ ཨུཔཔཏྟི, ན སམུཙྪིནྣབྷཝརཱགསྶ. ཝཱིཏརཱགགྒཧཎེན ཙེཏྠ ཀཱམེསུ ཝཱིཏརཱགཏཱ ཨདྷིཔྤེཏཱ, ཡཱཡ བྲཧྨལོཀཱུཔཔཏྟི སིཡཱ. ཏེནཱཧ ‘‘དཱནམཏྟེནེཝཱ’’ཏིཨཱདི. ཡདི ཨེཝཾ དཱནཾ ཏཏྠ ཀིམཏྠིཡནྟི ཨཱཧ ‘‘དཱནཾ པནཱ’’ཏིཨཱདི. དཱནེན མུདུཙིཏྟོཏི བདྡྷཱགྷཱཏེ ཝེརིཔུགྒལེཔི ཨཏྟནོ དཱནསམྤཊིཙྪནེན མུདུབྷཱུཏཙིཏྟོ.

དཱནཱུཔཔཏྟིསུཏྟཝཎྞནཱ ནིཊྛིཏཱ.

༦. པུཉྙཀིརིཡཝཏྠུསུཏྟཝཎྞནཱ

༣༦. ཚཊྛེ པུཛྫབྷཝཕལཾ ནིབྦཏྟེནྟི, ཨཏྟནོ སནྟཱནཾ པུནནྟཱིཏི ཝཱ པུཉྙཱནི ཙ ཏཱནི ཧེཏུཔཙྩཡེཧི ཀཏྟབྦཏོ ཀིརིཡཱ ཙཱཏི པུཉྙཀིརིཡཱ, ཏཱཡེཝ ཙ ཏེསཾ ཏེསཾ པིཡམནཱཔཏཱདིཨཱནིསཾསཱནཾ ཝཏྠུབྷཱཝཏོ པུཉྙཀིརིཡཝཏྠཱུནི.

ཨནུཙྪིནྣབྷཝམཱུལསྶ ཨནུགྒཧཝསེན, པཱུཛཱཝསེན ཝཱ ཨཏྟནོ དེཡྻདྷམྨསྶ པརསྶ པརིཙྩཱགཙེཏནཱ དཱིཡཏི ཨེཏེནཱཏི དཱནཾ, དཱནམེཝ དཱནམཡཾ. པདཔཱུརཎམཏྟཾ མཡ-སདྡོ. ཙཱིཝརཱདཱིསུ ཙཏཱུསུ པཙྩཡེསུ (དཱི. ནི. ཨཊྛ. ༣.༣༠༥), ཨནྣཱདཱིསུ ཝཱ ¶ དསསུ དཱནཝཏྠཱུསུ, རཱུཔཱདཱིསུ ཝཱ ཚསུ ཨཱརམྨཎེསུ ཏཾ ཏཾ དེནྟསྶ ཏེསཾ ཨུཔྤཱདནཏོ པཊྛཱཡ པུབྦབྷཱགེ པརིཙྩཱགཀཱལེ པཙྪཱ སོམནསྶཙིཏྟེན ཨནུསྶརཎེ ཙཱཏི ཏཱིསུ ཀཱལེསུ པཝཏྟཙེཏནཱ དཱནམཡཾ པུཉྙཀིརིཡཝཏྠུ ནཱམ.

ནིཙྩསཱིལཨུཔོསཐསཱིལཱདིཝསེན པཉྩ ཨཊྛ དས ཝཱ སཱིལཱནི སམཱདིཡནྟསྶ ‘‘སཱིལཔཱུརཎཏྠཾ པབྦཛིསྶཱམཱི’’ཏི ཝིཧཱརཾ གཙྪནྟསྶ པབྦཛནྟསྶ, མནོརཐཾ མཏྠཀཾ པཱཔེཏྭཱ ‘‘པབྦཛིཏོ ཝཏམྷི སཱདྷུ སུཊྛཱུ’’ཏི ཨཱཝཛྫེནྟསྶ, སདྡྷཱཡ པཱཏིམོཀྑཾ པརིཔཱུརེནྟསྶ, པཉྙཱཡ ཙཱིཝརཱདིཀེ པཙྩཡེ པཙྩཝེཀྑནྟསྶ, སཏིཡཱ ཨཱཔཱཐགཏེསུ རཱུཔཱདཱིསུ ཙཀྑུདྭཱརཱདཱིནི སཾཝརནྟསྶ, ཝཱིརིཡེན ཨཱཛཱིཝཾ སོདྷེནྟསྶ ཙ པཝཏྟཙེཏནཱ སཱིལཏི, སཱིལེཏཱིཏི ཝཱ སཱིལམཡཾ པུཉྙཀིརིཡཝཏྠུ ནཱམ.

པཊིསམྦྷིདཱཡཾ (པཊི. མ. ༡.༤༨) ཝུཏྟེན ཝིཔསྶནཱམགྒེན ཙཀྑུཾ ཨནིཙྩཏོ དུཀྑཏོ ཨནཏྟཏོ ཝིཔསྶནྟསྶ, སོཏཾ…པེ… གྷཱནཾ…པེ… ཛིཝ྄ཧཾ…པེ… ཀཱཡཾ…པེ… རཱུཔེ…པེ… དྷམྨེ…པེ… ཙཀྑུཝིཉྙཱཎཾ…པེ… མནོཝིཉྙཱཎཾ…པེ… ཙཀྑུསམྥསྶཾ ¶ …པེ… མནོསམྥསྶཾ…པེ… ཙཀྑུསམྥསྶཛཾ ཝེདནཾ…པེ… མནོསམྥསྶཛཾ ཝེདནཾ…པེ… ཛརཱམརཎཾ ཨནིཙྩཏོ དུཀྑཏོ ཨནཏྟཏོ ཝིཔསྶནྟསྶ ཡཱ ཙེཏནཱ, ཡཱ ཙ པཐཝཱིཀསིཎཱདཱིསུ སབྦཱསུ ཨཊྛཏྟིཾསཱཡ ཨཱརམྨཎེསུ པཝཏྟཱ ཛྷཱནཙེཏནཱ, ཡཱ ཙ ཨནཝཛྫེསུ ཀམྨཱཡཏནསིཔྤཱཡཏནཝིཛྫཱཊྛཱནེསུ པརིཙཡམནསིཀཱརཱདིཝསེན པཝཏྟཱ ཙེཏནཱ, སབྦཱ སཱ བྷཱཝེཏི ཨེཏཱཡཱཏི བྷཱཝནཱམཡཾ ཝུཏྟནཡེན པུཉྙཀིརིཡཝཏྠུ ཙཱཏི བྷཱཝནཱམཡཾ པུཉྙཀིརིཡཝཏྠུ.

ཨེཀམེཀཉྩེཏྠ ཡཐཱརཧཾ པུབྦབྷཱགཏོ པཊྛཱཡ ཀརོནྟསྶ ཀཱཡཀམྨཾ ཧོཏི. ཏདཏྠཾ ཝཱཙཾ ནིཙྪཱརེནྟསྶ ཝཙཱིཀམྨཾ. ཀཱཡངྒཾ ཝཱཙངྒཉྩ ཨཙོཔེཏྭཱ མནསཱ ཙིནྟཡནྟསྶ མནོཀམྨཾ. ཨནྣཱདཱིནི དེནྟསྶ ཙཱཔི ‘‘ཨནྣདཱནཱདཱིནི དེམཱི’’ཏི ཝཱ, དཱནཔཱརམིཾ ཨཱཝཛྫེཏྭཱ ཝཱ དཱནཀཱལེ དཱནམཡཾ པུཉྙཀིརིཡཝཏྠུ ཧོཏི. ཡཐཱ ཧི ཀེཝལཾ ‘‘ཨནྣདཱནཱདཱིནི དེམཱི’’ཏི དཱནཀཱལེ དཱནམཡཾ པུཉྙཀིརིཡཝཏྠུ ཧོཏི, ཨེཝཾ ‘‘ཨིདཾ དཱནམཡཾ སམྨཱསམྦོདྷིཡཱ པཙྩཡོ ཧོཏཱུ’’ཏི དཱནཔཱརམིཾ ཨཱཝཛྫེཏྭཱ དཱནཀཱལེཔི དཱནསཱིསེནེཝ པཝཏྟིཏཏྟཱ. ཝཏྟསཱིསེ ཋཏྭཱ དདནྟོ ‘‘ཨེཏཾ དཱནཾ ནཱམ མཡ྄ཧཾ ¶ ཀུལཝཾསཧེཏུ པཝེཎིཙཱརིཏྟ’’ནྟི ཙཱརིཏྟསཱིསེན ཝཱ དེནྟོ ཙཱརིཏྟསཱིལཏྟཱ སཱིལམཡཾ. ཁཡཏོ ཝཡཏོ སམྨསནཾ པཊྛཔེཏྭཱ དདཏོ བྷཱཝནཱམཡཾ པུཉྙཀིརིཡཝཏྠུ ཧོཏི. ཡཐཱ ཧི དེཡྻདྷམྨཔརིཙྩཱགཝསེན ཝཏྟམཱནཱཔི དཱནཙེཏནཱ ཝཏྟསཱིསེ ཋཏྭཱ དདཏོ སཱིལམཡཾ པུཉྙཀིརིཡཝཏྠུ ཧོཏི པུབྦཱབྷིསངྑཱརསྶ ཨཔརབྷཱགེ ཙེཏནཱཡ ཙ ཏཐཱཔཝཏྟཏྟཱ.

པུཉྙཀིརིཡཝཏྠུསུཏྟཝཎྞནཱ ནིཊྛིཏཱ.

༧-༨. སཔྤུརིསདཱནསུཏྟཱདིཝཎྞནཱ

༣༧-༣༨. སཏྟམེ ཝིཙེཡྻ དེཏཱིཏི ཨེཏྠ དྭེ ཝིཙིནནཱནི དཀྑིཎེཡྻཝིཙིནནཾ, དཀྑིཎཱཝིཙིནནཉྩ. ཏེསུ ཝིཔནྣསཱིལེ ཨིཏོ བཧིདྡྷཱ པཉྩནཝུཏི པཱསཎྜབྷེདེ ཙ དཀྑིཎེཡྻེ པཧཱཡ སཱིལཱདིགུཎསམྤནྣཱནཾ སཱསནེ པབྦཛིཏཱནཾ དཱནཾ དཀྑིཎེཡྻཝིཙིནནཾ ནཱམ. ལཱམཀལཱམཀེ པཙྩཡེ ཨཔནེཏྭཱ པཎཱིཏཔཎཱིཏེ ཝིཙིནིཏྭཱ ཏེསཾ དཱནཾ དཀྑིཎཱཝིཙིནནཾ ནཱམ. ཏེནཱཧ ‘‘ཨིམསྶ དིནྣཾ མཧཔྥལཾ བྷཝིསྶཏཱི’’ཏིཨཱདི. ཨཊྛམེ ནཏྠི ཝཏྟབྦཾ.

སཔྤུརིསདཱནསུཏྟཱདིཝཎྞནཱ ནིཊྛིཏཱ.

༩-༡༠. ཨབྷིསནྡསུཏྟཱདིཝཎྞནཱ

༣༩-༤༠. ནཝམེ ¶ པུཉྙཱབྷིསནྡཱཏི པུཉྙནདིཡོ. ཀུསལཱབྷིསནྡཱཏི ཀུསལཱནཾ པཝཱཧཱ. སུཁསྶཱཧཱརཱཏི སུཁཔཙྩཡཱ. ཨགྒཱནཱིཏི ཉཱཏཏྟཱ ཨགྒཉྙཱནི. ཙིརརཏྟཾ ཉཱཏཏྟཱ རཏྟཉྙཱནི. ཨརིཡཱནཾ སཱདྷཱུནཾ ཝཾསཱནཱིཏི ཉཱཏཏྟཱ ཝཾསཉྙཱནི. པོརཱཎཱནཾ ཨཱདིཔུརིསཱནཾ ཨེཏཱནཱིཏི པོརཱཎཱནི. སབྦསོ ཀེནཙིཔི པཀཱརེན སཱདྷཱུཧི ན ཀིཎྞཱནི ན ཁིཏྟཱནི ཚཌྜིཏཱནཱིཏི ཨསཾཀིཎྞཱནི. ཨཡཉྩ ནཡོ ནེསཾ ཡཐཱ ཨཏཱིཏེ, ཨེཝཾ ཨེཏརཧི ཨནཱགཏེ ཙཱཏི ཨཱཧ ‘‘ཨསཾཀིཎྞཔུབྦཱནི ན སཾཀིཡནྟི ན སཾཀིཡིསྶནྟཱི’’ཏི. ཏཏོ ཨེཝ ཨཔྤཊིཀུཊྛཱནི. ན ཧི ཀདཱཙི ཝིཉྙཱུ སམཎབྲཱཧྨཎཱ ཧིཾསཱདིཔཱཔདྷམྨཾ ཨནུཛཱནནྟི. ཨཔརིམཱཎཱནཾ སཏྟཱནཾ ཨབྷཡཾ དེཏཱིཏི སབྦེསུ ¶ བྷཱུཏེསུ ནིཧིཏདཎྜཏྟཱ སཀལསྶཔི སཏྟཀཱཡསྶ བྷཡཱབྷཱཝཾ དེཏི. ཨཝེརནྟི ཝེརཱབྷཱཝཾ. ཨབྱཱབཛ྄ཛྷནྟི ནིདྡུཀྑཏཾ. ཨེཝམེཏྠ སངྑེཔཏོ པཱལི༹ཝཎྞནཱ ཝེདིཏབྦཱ. དསམེ ནཏྠི ཝཏྟབྦཾ.

ཨབྷིསནྡསུཏྟཱདིཝཎྞནཱ ནིཊྛིཏཱ.

དཱནཝགྒཝཎྞནཱ ནིཊྛིཏཱ.

༥. ཨུཔོསཐཝགྒོ

༡-༨. སཾཁིཏྟཱུཔོསཐསུཏྟཱདིཝཎྞནཱ

༤༡-༤༨. པཉྩམསྶ པཋམཱདཱིསུ ནཏྠི ཝཏྟབྦཾ. ཚཊྛེ (སཾ. ནི. ཊཱི. ༡.༡.༡༦༥) པཉྩ ཨངྒཱནི ཨེཏསྶཱཏི པཉྩངྒཾ, པཉྩངྒམེཝ པཉྩངྒིཀཾ, ཏསྶ པཉྩངྒིཀསྶ. མཧཏཱི དདྡརཱི ཝཱིཎཱཝིསེསོཔི ཨཱཏཏམེཝཱཏི ‘‘ཙམྨཔརིཡོནདྡྷེསཱུ’’ཏི ཝིསེསནཾ ཀཏཾ. ཨེཀཏལཏཱུརིཡཾ ཀུམྦྷཐུནདདྡརིཀཱདི. ཨུབྷཡཏལཾ བྷེརིམུདིངྒཱདི. ཙམྨཔརིཡོནདྡྷཾ ཧུཏྭཱ ཝིནིབདྡྷཾ ཨཱཏཏཝིཏཏཾ. སབྦསོ པརིཡོནདྡྷཾ ནཱམ ཙཏུརསྶཨམྦཎཾ པཎཝཱདི ཙ. གོམུཁཱིཨཱདཱིནམྤི ཨེཏྠེཝ སངྒཧོ དཊྛབྦོ. ཝཾསཱདཱིཏི ཨཱདི-སདྡེན སངྑཱདཱིནཾ སངྒཧོ. སམྨཱདཱིཏི སམྨཏཱལ༹ཀཾསཏཱལ༹སིལཱསལཱཀཏཱལཱ༹དི. ཏཏྠ སམྨཏཱལ༹ཾ ནཱམ དནྟམཡཏཱལ༹ཾ. ཀཾསཏཱལ༹ཾ ལོཧམཡཾ. སིལཱམཡཾ ཨཡོཔཏྟེན ཙ ཝཱདནཏཱལ༹ཾ སིལཱསལཱཀཏཱལ༹ཾ. སུམུཙྪིཏསྶཱཏི སུཊྛུ པཊིཡཏྟསྶ. པམཱཎེཏི ¶ ནཱཏིདལ༹ྷནཱཏིསིཐིལསངྑཱཏེ མཛ྄ཛྷིམེ མུཙྪནཱཔམཱཎེ. ཚེཀོཏི པཊུ པཊྛོ. སོ ཙསྶ པཊུབྷཱཝོ མནོཧརོཏི ཨཱཧ ‘‘སུནྡརོ’’ཏི. རཉྫེཏུནྟི རཱགཾ ཨུཔྤཱདེཏུཾ. ཁམཏེཝཱཏི རོཙཏེཝ. ན ནིབྦིནྡཏཱིཏི ན ཏཛྫེཏི, སོཏསུཁབྷཱཝཏོ པིཡཱཡིཏབྦོཝ ཧོཏི.

བྷཏྟཱརཾ ནཱཏིམཉྙཏཱིཏི སཱམིཀཾ མུཉྩིཏྭཱ ཨཉྙཾ མནསཱཔི ན པཏྠེཏི. ཨུཊྛཱཧིཀཱཏི ཨུཊྛཱནཝཱིརིཡསམྤནྣཱ. ཨནལསཱཏི ནིཀྐོསཛྫཱ. སངྒཧིཏཔརིཛྫནཱཏི སམྨཱནནཱདཱིཧི ཙེཝ ཚཎཱདཱིསུ པེསེཏབྦ-པིཡབྷཎྜཱདིཔཎྞཱཀཱརཔེསནཱདཱིཧི ཙ སངྒཧིཏཔརིཛནཱ. ཨིདྷ པརིཛནོ ནཱམ སཱམིཀསྶ ཙེཝ ¶ ཨཏྟནོ ཙ ཉཱཏིཛནོ. སམྦྷཏནྟི ཀསིཝཎིཛྫཱདཱིནི ཀཏྭཱ ཨཱབྷཏདྷནཾ. སཏྟམཊྛམཱནི ཨུཏྟཱནཏྠཱནི.

སཾཁིཏྟཱུཔོསཐསུཏྟཱདིཝཎྞནཱ ནིཊྛིཏཱ.

༩-༡༠. པཋམཨིདྷལོཀིཀསུཏྟཱདིཝཎྞནཱ

༤༩-༥༠. ནཝམེ ཨིདྷལོཀཝིཛཡཱཡཱཏི ཨིདྷལོཀཝིཛིནནཏྠཱཡ ཨབྷིབྷཝཏྠཱཡ. ཡོ ཧི དིཊྛདྷམྨིཀཾ ཨནཏྠཾ པརིཝཛྫནཝསེན ཨབྷིབྷཝཏི, ཏཏོ ཨེཝ ཏདཏྠཾ སམྤཱདེཏི, སོ ཨིདྷལོཀཝིཛཡཱཡ པཊིཔནྣོ ནཱམ ཧོཏི པཙྩཏྠིཀནིགྒཎྷནཏོ སདཏྠསམྤཱདནཏོ ཙ. ཏེནཱཧ ‘‘ཨཡཾས ལོཀོ ཨཱརདྡྷོ ཧོཏཱི’’ཏི. (པསཾསཱཝཧཏོ ཏཡིདཾ པསཾསཱཝཧནཾ ཀིཏྟིསདྡེན ཨིདྷལོཀེ སདྡཱནཾ ཙིཏྟཏོསནཝིདྡྷེཡྻབྷཱཝཱཔཱདནེན ཙ ཧོཏཱིཏི དཊྛབྦཾ.) སུསཾཝིཧིཏཀམྨནྟོཏི ཡཱགུབྷཏྟཔཙནཀཱལཱདཱིནི ཨནཏིཀྐམིཏྭཱ ཏསྶ ཏསྶ སཱདྷུཀཾ ཀརཎེན སུཊྛུ སཾཝིཧིཏཀམྨནྟོ. པརལོཀཝིཛཡཱཡཱཏི པརལོཀསྶ ཝིཛིནནཏྠཱཡ ཨབྷིབྷཝཏྠཱཡ. ཡོ ཧི སམྤརཱཡིཀཾ ཨནཏྠཾ པརིཝཛྫནཝསེན ཨབྷིབྷཝཏི, ཏཏོ ཨེཝ ཏདཏྠཾ སམྤཱདེཏི, སོ པརལོཀཝིཛཡཱཡ པཊིཔནྣོ ནཱམ ཧོཏི. སེསཾ སབྦཏྠ ཨུཏྟཱནམེཝ.

པཋམཨིདྷལོཀིཀསུཏྟཱདིཝཎྞནཱ ནིཊྛིཏཱ.

ཨུཔོསཐཝགྒཝཎྞནཱ ནིཊྛིཏཱ.

པཋམཔཎྞཱསཀཾ ནིཊྛིཏཾ.

༢. དུཏིཡཔཎྞཱསཀཾ

(༦) ༡. གོཏམཱིཝགྒོ

༡-༣. གོཏམཱིསུཏྟཱདིཝཎྞནཱ

༥༡-༥༣. ཚཊྛསྶ ¶ ¶ པཋམེ (སཱརཏྠ. ཊཱི. ཙཱུལ༹ཝགྒ ༣.༤༠༢) གོཏམཱིཏི གོཏྟཾ. ནཱམཀརཎདིཝསེ པནསྶཱ ལདྡྷསཀྐཱརཱ བྲཱཧྨཎཱ ལཀྑཎསམྤཏྟིཾ དིསྭཱ ‘‘སཙེ ཨཡཾ དྷཱིཏརཾ ལབྷིསྶཏི, ཙཀྐཝཏྟིརཉྙོ མཧེསཱི བྷཝིསྶཏི. སཙེ པུཏྟཾ ལབྷིསྶཏི, ཙཀྐཝཏྟིརཱཛཱ བྷཝིསྶཏཱིཏི ཨུབྷཡཐཱཔི མཧཏཱིཡེཝསྶཱ པཛཱ བྷཝིསྶཏཱི’’ཏི བྱཱཀརིཾསུ. ཨཐསྶཱ ‘‘མཧཱཔཛཱཔཏཱི’’ཏི ནཱམཾ ཨཀཾསུ. ཏེནཱཧ ‘‘པུཏྟཔཛཱཡ ཙེཝ དྷཱིཏུཔཛཱཡ ཙ མཧནྟཏྟཱ ཨེཝཾལདྡྷནཱམཱ’’ཏི.

‘‘ཨཏྟདཎྜཱ བྷཡཾ ཛཱཏཾ, ཛནཾ པསྶཐ མེདྷགཾ;

སཾཝེགཾ ཀིཏྟཡིསྶཱམི, ཡཐཱ སཾཝིཛིཏཾ མཡཱ’’ཏི. (སུ. ནི. ༩༤༡; མཧཱནི. ༡༧༠) –

ཨཱདིནཱ ཨཏྟདཎྜསུཏྟཾ ཀཐེསི. ཏཾཏཾཔལོབྷནཀིརིཡཱ ཀཱཡཝཱཙཱཧི པརཀྐམནྟིཡོ ཨུཀྐཎྛནྟཱུཏི སཱསནཾ པེསེནྟི ནཱམཱཏི ཀཏྭཱ ཝུཏྟཾ ‘‘སཱསནཾ པེསེཏྭཱ’’ཏི. ཀུཎཱལདཧནྟི ཀུཎཱལདཧཏཱིརཾ. ཨནབྷིརཏིཾ ཝིནོདེཏྭཱཏི ཨིཏྠཱིནཾ དོསདསྶནམུཁེན ཀཱམཱནཾ ཝོཀཱརསཾཀིལེསཝིབྷཱཝནེན ཨནབྷིརཏིཾ ཝིནོདེཏྭཱ.

ཨཱཔཱདིཀཱཏི སཾཝདྡྷཀཱ, ཏུམྷཱཀཾ ཧཏྠཔཱདེསུ ཀིཙྩཾ ཨསཱདྷེནྟེསུ ཧཏྠེ ཙ པཱདེ ཙ ཝཌྜྷེཏྭཱ པཊིཛགྒིཏཱཏི ཨཏྠོ. པོསིཀཱཏི དིཝསསྶ དྭེ ཏཡོ ཝཱརེ ནཧཱཔེཏྭཱ བྷོཛེཏྭཱ པཱཡེཏྭཱ ཏུམྷེ པོསེསི. ཐཉྙཾ པཱཡེསཱིཏི ནནྡཀུམཱརོ ཀིར བོདྷིསཏྟཏོ ཀཏིཔཱཧེནེཝ དཧརོ, ཏསྨིཾ ཛཱཏེ མཧཱཔཛཱཔཏཱི ཨཏྟནོ པུཏྟཾ དྷཱཏཱིནཾ དཏྭཱ སཡཾ བོདྷིསཏྟསྶ དྷཱཏིཀིཙྩཾ སཱདྷཡམཱནཱ ཨཏྟནོ ཐཉྙཾ པཱཡེསི. ཏཾ སནྡྷཱཡ ཐེརོ ཨེཝམཱཧ. དཧརོཏི ཏརུཎོ. ཡུཝཱཏི ཡོབྦཉྙེ ¶ ཋིཏོ. མཎྜནཀཛཱཏིཀོཏི ཨལངྐཱརསབྷཱཝོ. ཏཏྠ ཀོཙི ཏརུཎོཔི ཡུཝཱ ན ཧོཏི ཡཐཱ ཨཏིཏརུཎོ. ཀོཙི ཡུཝཱཔི མཎྜནཀཛཱཏིཀོ ན ཧོཏི ཡཐཱ ཨུཔསནྟསབྷཱཝོ, ཨཱལསིཡབྱསནཱདཱིཧི ཝཱ ཨབྷིབྷཱུཏོ. ཨིདྷ པན དཧརོ ¶ ཙེཝ ཡུཝཱ ཙ མཎྜནཀཛཱཏིཀོ ཙ ཨདྷིཔྤེཏོ, ཏསྨཱ ཨེཝམཱཧ. ཨུཔྤལཱདཱིནི མཎྜནཀཛཱཏིཀོ ཙ ལོཀསམྨཏཏྟཱ ཝུཏྟཱནི.

མཱཏུགཱམསྶ པབྦཛིཏཏྟཱཏི ཨིདཾ པཉྩཝསྶསཏཏོ ཨུདྡྷཾ ཨཊྛཏྭཱ པཉྩསུཡེཝ ཝསྶསཏེསུ སདྡྷམྨཊྛིཏིཡཱ ཀཱརཎནིདསྶནཾ. པཊིསམྦྷིདཱཔབྷེདཔྤཏྟཁཱིཎཱསཝཝསེནེཝ ཝུཏྟནྟི ཨེཏྠ པཊིསམྦྷིདཱཔྤཏྟཁཱིཎཱསཝགྒཧཎེན ཛྷཱནཱནིཔི གཧིཏཱནེཝ ཧོནྟི. ན ཧི ནིཛ྄ཛྷཱནཀཱནཾ སབྦཔྤཀཱརསམྤཏྟི ཨིཛ྄ཛྷཏཱིཏི ཝདནྟི. སུཀྑཝིཔསྶཀཁཱིཎཱསཝཝསེན ཝསྶསཧསྶནྟིཨཱདིནཱ ཙ ཡཾ ཝུཏྟཾ, ཏཾ ཁནྡྷཀབྷཱཎཀཱནཾ མཏེན ཝུཏྟནྟི ཝེདིཏབྦཾ. ཝིནཡཊྛཀཐཱཡམྤི (ཙཱུལ༹ཝ. ཨཊྛ. ༤༠༣) ཨིམིནཱཝ ནཡེན ཝུཏྟཾ.

དཱིགྷནིཀཱཡཊྛཀཐཱཡཾ (དཱི. ནི. ཨཊྛ. ༣.༡༦༡) པན ‘‘པཊིསམྦྷིདཱཔྤཏྟེཧི ཝསྶསཧསྶཾ ཨཊྛཱསི, ཚལ༹བྷིཉྙེཧི ཝསྶསཧསྶཾ, ཏེཝིཛྫེཧི ཝསྶསཧསྶཾ, སུཀྑཝིཔསྶཀེཧི ཝསྶསཧསྶཾ, པཱཏིམོཀྑེན ཝསྶསཧསྶཾ ཨཊྛཱསཱི’’ཏི ཝུཏྟཾ. ཨིདྷཱཔི སཱསནནྟརདྷཱནཀཐཱཡཾ (ཨ. ནི. ཨཊྛ. ༡.༡.༡༣༠) ‘‘བུདྡྷཱནཉྷི པརིནིབྦཱནཏོ ཝསྶསཧསྶམེཝ པཊིསམྦྷིདཱ ནིབྦཏྟེཏུཾ སཀྐོནྟི, ཏཏོ པརཾ ཚ ཨབྷིཉྙཱ, ཏཏོ ཏཱཔི ནིབྦཏྟེཏུཾ ཨསཀྐོནྟཱ ཏིསྶོ ཝིཛྫཱ ནིབྦཏྟེནྟི, གཙྪནྟེ གཙྪནྟེ ཀཱལེ ཏཱཔི ནིབྦཏྟེཏུཾ ཨསཀྐོནྟཱ སུཀྑཝིཔསྶཀཱ ཧོནྟི. ཨེཏེནེཝ ཨུཔཱཡེན ཨནཱགཱམིནོ, སཀདཱགཱམིནོ, སོཏཱཔནྣཱ’’ཏི ཝུཏྟཾ.

སཾཡུཏྟནིཀཱཡཊྛཀཐཱཡཾ (སཾ. ནི. ཨཊྛ. ༢.༢.༡༥༦) པན ‘‘པཋམབོདྷིཡཉྷི བྷིཀྑཱུ པཊིསམྦྷིདཱཔྤཏྟཱ ཨཧེསུཾ. ཨཐ ཀཱལེ གཙྪནྟེ པཊིསམྦྷིདཱ པཱཔུཎིཏུཾ ན སཀྑིཾསུ, ཚལ༹བྷིཉྙཱ ཨཧེསུཾ. ཏཏོ ཚ ཨབྷིཉྙཱ པཏྟུཾ ཨསཀྐོནྟཱ ཏིསྶོ ཝིཛྫཱ པཱཔུཎིཾསུ. ཨིདཱནི ཀཱལེ གཙྪནྟེ ཏིསྶོ ཝིཛྫཱ པཱཔུཎིཏུཾ ཨསཀྐོནྟཱ ཨཱསཝཀྑཡམཏྟཾ པཱཔུཎིསྶནྟི, ཏམྤི ཨསཀྐོནྟཱ ཨནཱགཱམིཕལཾ, ཏམྤི ཨསཀྐོནྟཱ སཀདཱགཱམིཕལཾ, ཏམྤི ཨསཀྐོནྟཱ སོཏཱཔཏྟིཕལཾ, གཙྪནྟེ ཀཱལེ སོཏཱཔཏྟིཕལམྤི པཏྟུཾ ན སཀྑིསྶནྟཱི’’ཏི ཝུཏྟཾ. ཡསྨཱ ཙེཏཾ སབྦཾ ཨཉྙམཉྙཔྤཊིཝིརུདྡྷཾ, ཏསྨཱ ཏེསཾ ཏེསཾ བྷཱཎཀཱནཾ མཏམེཝ ཨཱཙརིཡེན ཏཏྠ ཏཏྠ དསྶིཏནྟི གཧེཏབྦཾ. ཨཉྙཐཱ ཧི ཨཱཙརིཡསྶེཝ པུབྦཱཔརཝིརོདྷཔྤསངྒོ སིཡཱཏི.

ཏཱནིཡེཝཱཏི ¶ ཏཱནིཡེཝ པཉྩཝསྶསཧསྶཱནི. པརིཡཏྟིམཱུལཀཾ སཱསནནྟི ཨཱཧ ‘‘ན ཧི པརིཡཏྟིཡཱ ¶ ཨསཏི པཊིཝེདྷོ ཨཏྠཱི’’ཏིཨཱདི. པརིཡཏྟིཡཱ ཧི ཨནྟརཧིཏཱཡ པཊིཔཏྟིཨནྟརདྷཱཡཏི, པཊིཔཏྟིཡཱ ཨནྟརཧིཏཱཡ ཨདྷིགམོ ཨནྟརདྷཱཡཏི. ཀིཾཀཱརཎཱ? ཨཡཉྷི པརིཡཏྟི པཊིཔཏྟིཡཱ པཙྩཡོ ཧོཏི, པཊིཔཏྟི ཨདྷིགམསྶ. ཨིཏི པཊིཔཏྟིཏོཔི པརིཡཏྟིཡེཝ པམཱཎཾ. དུཏིཡཏཏིཡེསུ ནཏྠི ཝཏྟབྦཾ.

གོཏམཱིསུཏྟཱདིཝཎྞནཱ ནིཊྛིཏཱ.

༤-༥. དཱིགྷཛཱཎུསུཏྟཱདིཝཎྞནཱ

༥༤-༥༥. ཙཏུཏྠེ (དཱི. ནི. ཨཊྛ. ༣.༢༦༥) ཨེཀེན བྷོགེ བྷུཉྫེཡྻཱཏི ཨེཀེན ཀོཊྛཱསེན བྷོགེ བྷུཉྫེཡྻ, ཝིནིབྷུཉྫེཡྻ ཝཱཏི ཨཏྠོ. དྭཱིཧི ཀམྨནྟི དྭཱིཧི ཀོཊྛཱསེཧི ཀསིཝཎིཛྫཱདིཀམྨཾ པཡོཛེཡྻ. ནིདྷཱཔེཡྻཱཏི ཙཏུཏྠཀོཊྛཱསཾ ནིདྷེཏྭཱ ཋཔེཡྻ, ནིདཧིཏྭཱ བྷཱུམིགཏཾ ཀཏྭཱ ཋཔེཡྻཱཏི ཨཏྠོ. ཨཱཔདཱསུ བྷཝིསྶཏཱིཏི ཀུལཱནཉྷི ན སབྦཀཱལཾ ཨེཀསདིསཾ ཝཏྟཏི, ཀདཱཙི རཱཛཨགྒིཙོརདུབྦྷིཀྑཱདིཝསེན ཨཱཔདཱ ཨུཔྤཛྫནྟི, ཏསྨཱ ཨེཝཾ ཨཱཔདཱསུ ཨུཔྤནྣཱསུ བྷཝིསྶཏཱིཏི ཨེཀཾ ཀོཊྛཱསཾ ནིདྷཱཔེཡྻཱཏི ཝུཏྟཾ. ཨིམེསུ པན ཙཏཱུསུ ཀོཊྛཱསེསུ ཀཏརཾ ཀོཊྛཱསཾ གཧེཏྭཱ ཀུསལཾ ཀཱཏབྦནྟི? ‘‘བྷོགེ བྷུཉྫེཡྻཱ’’ཏི ཝུཏྟཀོཊྛཱསཾ. ཏཏོ གཎྷིཏྭཱ ཧི བྷིཀྑཱུནམྤི ཀཔཎདྡྷིཀཱནམྤི དཱནཾ དཱཏབྦཾ, པེསཀཱརནྷཱཔིཏཱདཱིནམྤི ཝེཏནཾ དཱཏབྦཾ. སམཎབྲཱཧྨཎཀཔཎདྡྷིཀཱདཱིནཾ དཱནཝསེན ཙེཝ, ཨདྷིཝཏྠདེཝཏཱདཱིནཾ པེཏབལིཝསེན, ནྷཱཔིཏཱདཱིནཾ ཝེཏནཝསེན ཙ ཝིནིཡོགོཔི ཨུཔཡོགོ ཨེཝ.

ཨཔེནྟི གཙྪནྟི, ཨཔེནྟཱ ཝཱ ཨེཏེཧཱིཏི ཨཔཱཡཱ, ཨཔཱཡཱ ཨེཝ མུཁཱནི དྭཱརཱནཱིཏི ཨཔཱཡམུཁཱནི. ཝིནཱསདྭཱརཱནཱིཏི ཨེཏྠཱཔི ཨེསེཝ ནཡོ. པཉྩམེ ནཏྠི ཝཏྟབྦཾ.

དཱིགྷཛཱཎུསུཏྟཱདིཝཎྞནཱ ནིཊྛིཏཱ.

༦-༨. བྷཡསུཏྟཱདིཝཎྞནཱ

༥༦-༥༨. ཚཊྛེ ¶ གབྦྷཝཱསོ ཨིདྷ ཨུཏྟརཔདལོཔེན གབྦྷོ ཝུཏྟོཏི ཨཱཧ ‘‘གབྦྷོཏི གབྦྷཝཱསོ’’ཏི. སཏྟམཊྛམཱནི ཨུཏྟཱནཏྠཱནི.

བྷཡསུཏྟཱདིཝཎྞནཱ ནིཊྛིཏཱ.

༦-༡༠. པུགྒལསུཏྟཱདིཝཎྞནཱ

༥༩-༦༠. ནཝམེ ¶ དཱནཾ དདནྟཱནནྟི དཀྑིཎེཡྻཾ ཨུདྡིསྶ དཱནཾ དེནྟཱནཾ. ཨུཔདྷཱི ཝིཔཙྩནྟི ཨེཏེན, ཨུཔདྷཱིསུ ཝཱ ཝིཔཙྩཏི, ཨུཔདྷཡོ ཝཱ ཝིཔཱཀཱ ཨེཏསྶཱཏི ཨུཔདྷིཝིཔཱཀཾ. སངྒྷེ དིནྣཾ མཧཔྥལནྟི ཨརིཡསངྒྷེ དིནྣཾ ཝིཔྥཱརཊྛཱནཾ ཧོཏི, ཝིཔུལཕལནྟི ཨཏྠོ. དསམེ ནཏྠི ཝཏྟབྦཾ.

པུགྒལསུཏྟཱདིཝཎྞནཱ ནིཊྛིཏཱ.

གོཏམཱིཝགྒཝཎྞནཱ ནིཊྛིཏཱ.

(༧) ༢. བྷཱུམིཙཱལཝགྒོ

༡-༥. ཨིཙྪཱསུཏྟཱདིཝཎྞནཱ

༦༡-༦༥. སཏྟམསྶ པཋམཱདཱིནི སུཝིཉྙེཡྻཱནི. པཉྩམེ (དཱི.ནི.ཊཱི. ༢.༡༧༣) ཨབྷིབྷཝཏཱིཏི ཨབྷིབྷུ, པརིཀམྨཾ, ཉཱཎཾ ཝཱ. ཨབྷིབྷུ ཨཱཡཏནཾ ཨེཏསྶཱཏི ཨབྷིབྷཱཡཏནཾ, ཛྷཱནཾ. ཨབྷིབྷཝིཏབྦཾ ཝཱ ཨཱརམྨཎསངྑཱཏཾ ཨཱཡཏནཾ ཨེཏསྶཱཏི ཨབྷིབྷཱཡཏནཾ. ཨཐ ཝཱ ཨཱརམྨཎཱབྷིབྷཝནཏོ ཨབྷིཏུ ཙ ཏཾ ཨཱཡཏནཉྩ ཡོགིནོ སུཁཝིསེསཱནཾ ཨདྷིཊྛཱནབྷཱཝཏོ མནཱཡཏནདྷམྨཱཡཏནབྷཱཝཏོ ཙཱཏིཔི སསམྤཡུཏྟཛ྄ཛྷཱནཾ ཨབྷིབྷཱཡཏནཾ. ཏེནཱཧ ‘‘ཨབྷིབྷཝནཀཱརཎཱནཱི’’ཏིཨཱདི. ཏཱནི ཧཱིཏི ཨབྷིབྷཱཡཏནསཉྙིཏཱནི ཛྷཱནཱནི. ‘‘པུགྒལསྶ ཉཱཎུཏྟརིཡཏཱཡཱ’’ཏི ཨིདཾ ཨུབྷཡཏྠཱཔི ཡོཛེཏབྦཾ. ཀཐཾ? པཊིཔཀྑབྷཱཝེན པཙྩནཱིཀདྷམྨེ ཨབྷིབྷཝནྟི པུགྒལསྶ ཉཱཎུཏྟརིཡཏཱཡ ཨཱརམྨཎཱནི ཨབྷིབྷཝནྟི. ཉཱཎབལེནེཝ ཧི ཨཱརམྨཎཱབྷིབྷཝནཾ ཝིཡ པཊིཔཀྑཱབྷིབྷཝོཔཱིཏི.

པརིཀམྨཝསེན ¶ ཨཛ྄ཛྷཏྟཾ རཱུཔསཉྙཱི, ན ཨཔྤནཱཝསེན. ན ཧི པཊིབྷཱགནིམིཏྟཱརམྨཎཱ ཨཔྤནཱ ཨཛ྄ཛྷཏྟཝིསཡཱ སམྦྷཝཏི. ཏཾ པན ཨཛ྄ཛྷཏྟཔརིཀམྨཝསེན ལདྡྷཾ ཀསིཎནིམིཏྟཾ ཨཝིསུདྡྷམེཝ ཧོཏི, ན བཧིདྡྷཱཔརིཀམྨཝསེན ལདྡྷཾ ཝིཡ ཝིསུདྡྷཾ.

པརིཏྟཱནཱིཏི ¶ ཡཐཱལདྡྷཱནི སུཔྤསརཱཝམཏྟཱནི. ཏེནཱཧ ‘‘ཨཝཌྜྷིཏཱནཱི’’ཏི. པརིཏྟཝསེནེཝཱཏི ཝཎྞཝསེན ཨཱབྷོགེ ཝིཛྫམཱནེཔི པརིཏྟཝསེནེཝ ཨིདཾ ཨབྷིབྷཱཡཏནཾ ཝུཏྟཾ. པརིཏྟཏཱ ཧེཏྠ ཨབྷིབྷཝནསྶ ཀཱརཎཾ. ཝཎྞཱབྷོགེ སཏིཔི ཨསཏིཔི ཨབྷིབྷཱཡཏནབྷཱཝནཱ ནཱམ ཏིཀྑཔཉྙསྶེཝ སམྦྷཝཏི, ན ཨིཏརསྶཱཏི ཨཱཧ ‘‘ཉཱཎུཏྟརིཀོ པུགྒལོ’’ཏི. ཨབྷིབྷཝིཏྭཱ སམཱཔཛྫཏཱིཏི ཨེཏྠ ཨབྷིབྷཝནཾ སམཱཔཛྫནཉྩ ཨུཔཙཱརཛ྄ཛྷཱནཱདྷིགམསམནནྟརམེཝ ཨཔྤནཱཛྷཱནུཔྤཱདནནྟི ཨཱཧ ‘‘སཧ ནིམིཏྟུཔྤཱདེནེཝེཏྠ ཨཔྤནཾ པཱཔེཏཱི’’ཏི. སཧ ནིམིཏྟུཔྤཱདེནཱཏི ཙ ཨཔྤནཱཔརིཝཱསཱབྷཱཝསྶ ལཀྑཎཝཙནམེཏཾ. ཡོ ‘‘ཁིཔྤཱབྷིཉྙོ’’ཏི ཝུཙྩཏི, ཏཏོཔི ཉཱཎུཏྟརསྶེཝ ཨབྷིབྷཱཡཏནབྷཱཝནཱ. ཨེཏྠཱཏི ཨེཏསྨིཾ ནིམིཏྟེ. ཨཔྤནཾ པཱཔེཏཱིཏི བྷཱཝནཾ ཨཔྤནཾ ནེཏི.

ཨེཏྠ ཙ ཀེཙི ‘‘ཨུཔྤནྣེ ཨུཔཙཱརཛ྄ཛྷཱནེ ཏཾ ཨཱརབྦྷ ཡེ ཧེཊྛིམནྟེན དྭེ ཏཡོ ཛཝནཝཱརཱ པཝཏྟནྟི, ཏེ ཨུཔཙཱརཛ྄ཛྷཱནཔཀྑིཀཱ ཨེཝ, ཏདནནྟརཉྩ བྷཝངྒཔརིཝཱསེན ཨུཔཙཱརཱསེཝནཱཡ ཙ ཝིནཱ ཨཔྤནཱ ཧོཏི, སཧ ནིམིཏྟུཔྤཱདེནེཝ ཨཔྤནཾ པཱཔེཏཱི’’ཏི ཝདནྟི, ཏཾ ཏེསཾ མཏིམཏྟཾ. ན ཧི པཱརིཝཱསིཀཀམྨེན ཨཔྤནཱཝཱརོ ཨིཙྪིཏོ, ནཱཔི མཧགྒཏཔྤམཱཎཛ྄ཛྷཱནེསུ ཝིཡ ཨུཔཙཱརཛ྄ཛྷཱནེ ཨེཀནྟཏོ པཙྩཝེཀྑཎཱ ཨིཙྪིཏབྦཱ, ཏསྨཱ ཨུཔཙཱརཛ྄ཛྷཱནཱདྷིགམཏོ པརཾ ཀཏིཔཡབྷཝངྒཙིཏྟཱཝསཱནེ ཨཔྤནཾ པཱཔུཎནྟོ ‘‘སཧ ནིམིཏྟུཔྤཱདེནེཝེཏྠ ཨཔྤནཾ པཱཔེཏཱི’’ཏི ཝུཏྟོ. ‘‘སཧ ནིམིཏྟུཔྤཱདེནཱ’’ཏི ཙ ཨདྷིཔྤཱཡིཀམིདཾ ཝཙནཾ, ན ནཱིཏཏྠཾ. ཨདྷིཔྤཱཡོ ཝུཏྟནཡེནེཝ ཝེདིཏབྦོ.

ན ཨནྟོསམཱཔཏྟིཡཾ ཏདཱ ཏཐཱརཱུཔསྶ ཨཱབྷོགསྶ ཨསམྦྷཝཏོ, སམཱཔཏྟིཏོ ཝུཊྛིཏསྶ ཨཱབྷོགོ པུབྦབྷཱགབྷཱཝནཱཡ ཝསེན ཛྷཱནཀྑཎེ པཝཏྟཾ ཨབྷིབྷཝནཱཀཱརཾ གཧེཏྭཱ པཝཏྟོཏི དཊྛབྦཾ. ཨབྷིདྷམྨཊྛཀཐཱཡཾ (དྷ. ས. ཨཊྛ. ༢༠༤) པན ‘‘ཨིམིནཱ པནསྶ པུབྦབྷོགོ ཀཐིཏོ’’ཏི ཝུཏྟཾ. ཨནྟོསམཱཔཏྟིཡཾ ¶ ཏཐཱ ཨཱབྷོགཱབྷཱཝེ ཀསྨཱ ‘‘ཛྷཱནསཉྙཱཡཔཱི’’ཏི ཝུཏྟནྟི ཨཱཧ ‘‘ཨབྷིབྷཝན…པེ… ཨཏྠཱི’’ཏི.

ཝཌྜྷིཏཔྤམཱཎཱནཱིཏི ཝིཔུལཔྤམཱཎཱནཱིཏི ཨཏྠོ, ན ཨེཀངྒུལདྭངྒུལཱདིཝསེན ཝཌྜྷིཾ པཱཔིཏཱནཱིཏི ཏཐཱཝཌྜྷནསྶེཝེཏྠ ཨསམྦྷཝཏོ. ཏེནཱཧ ‘‘མཧནྟཱནཱི’’ཏི. བྷཏྟཝཌྜྷིཏཀནྟི བྷུཉྫནབྷཱཛནེ ཝཌྜྷིཏྭཱ དིནྣཾ བྷཏྟཾ, ཨེཀཱསནེ པུརིསེན བྷུཉྫིཏབྦབྷཏྟཏོ ཨུཔཌྜྷབྷཏྟནྟི ཨཏྠོ.

རཱུཔེ སཉྙཱ རཱུཔསཉྙཱ, སཱ ཨསྶ ཨཏྠཱིཏི རཱུཔསཉྙཱི, ན རཱུཔསཉྙཱི ཨརཱུཔསཉྙཱི. སཉྙཱསཱིསེན ¶ ཛྷཱནཾ ཝདཏི. རཱུཔསཉྙཱཡ ཨནུཔྤཱདནམེཝེཏྠ ཨལཱབྷིཏཱ. བཧིདྡྷཱཝ ཨུཔྤནྣནྟི བཧིདྡྷཱཝཏྠུསྨིཾཡེཝ ཨུཔྤནྣཾ. ཨབྷིདྷམྨེ (དྷ. ས. ༢༠༤-༢༠༩) པན ‘‘ཨཛ྄ཛྷཏྟཾ ཨརཱུཔསཉྙཱི བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི, ཨཔྤམཱཎཱནི སུཝཎྞདུབྦཎྞཱནཱི’’ཏི ཨེཝཾ ཙཏུནྣཾ ཨབྷིབྷཱཡཏནཱནཾ ཨཱགཏཏྟཱ ཨབྷིདྷམྨཊྛཀཐཱཡཾ ‘‘ཀསྨཱ པན ཡཐཱ སུཏྟནྟེ ཨཛ྄ཛྷཏྟཾ རཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པརིཏྟཱནཱིཏིཨཱདི ཝུཏྟཾ, ཨེཝཾ ཨཝཏྭཱ ཨིདྷ ཙཏཱུསུཔི ཨབྷིབྷཱཡཏནེསུ ཨཛ྄ཛྷཏྟཾ ཨརཱུཔསཉྙིཏཱཝ ཝུཏྟཱ’’ཏི ཙོདནཾ ཀཏྭཱ ‘‘ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏོ’’ཏི ཀཱརཎཾ ཝཏྭཱ ‘‘ཏཏྠ ཝཱ ཨིདྷ ཝཱ བཧིདྡྷཱ རཱུཔཱནེཝ ཨབྷིབྷཝིཏབྦཱནི, ཏསྨཱ ཏཱནི ནིཡམཏོཝ ཝཏྟབྦཱནཱིཏི ཏཏྲཱཔི ཨིདྷཱཔི ཝུཏྟཱནི, ‘ཨཛ྄ཛྷཏྟཾ རཱུཔསཉྙཱི’ཏི ཨིདཾ པན སཏྠུ དེསནཱཝིལཱསམཏྟམེཝཱ’’ཏི ཝུཏྟཾ.

ཨེཏྠ ཙ ཝཎྞཱབྷོགརཧིཏཱནི སཧིཏཱནི ཙ སབྦཱནི ‘‘པརིཏྟཱནི སུཝཎྞདུབྦཎྞཱནཱི’’ཏི ཝུཏྟཱནི, ཏཐཱ ‘‘ཨཔྤམཱཎཱནི སུཝཎྞདུབྦཎྞཱནཱི’’ཏི. ཨཏྠི ཧི སོ པརིཡཱཡོ ‘‘པརིཏྟཱནི ཨབྷིབྷུཡྻ, ཏཱནི ཙེ ཀདཱཙི ཝཎྞཝསེན ཨཱབྷུཛིཏཱནི ཧོནྟི སུཝཎྞདུབྦཎྞཱནི ཨབྷིབྷུཡྻཱ’’ཏི. པརིཡཱཡཀཐཱ ཧི སུཏྟནྟདེསནཱཏི. ཨབྷིདྷམྨེ པན ནིཔྤརིཡཱཡདེསནཏྟཱ ཝཎྞཱབྷོགརཧིཏཱནི ཝིསུཾ ཝུཏྟཱནི, ཏཐཱ སཧིཏཱནི. ཨཏྠི ཧི ཨུབྷཡཏྠ ཨབྷིབྷཝནཝིསེསོཏི, ཏཐཱ ཨིདྷ པརིཡཱཡདེསནཏྟཱ ཝིམོཀྑཱནམྤི ཨབྷིབྷཝནཔརིཡཱཡོ ཨཏྠཱིཏི ‘‘ཨཛ྄ཛྷཏྟཾ རཱུཔསཉྙཱི’’ཏིཨཱདིནཱ པཋམདུཏིཡཨབྷིབྷཱཡཏནེསུ པཋམཝིམོཀྑོ, ཏཏིཡཙཏུཏྠཨབྷིབྷཱཡཏནེསུ དུཏིཡཝིམོཀྑོ, ཝཎྞཱབྷིབྷཱཡཏནེསུ ཏཏིཡཝིམོཀྑོ ཙ ཨབྷིབྷཝནཔྤཝཏྟིཏོ སངྒཧིཏོ. ཨབྷིདྷམྨེ (དྷ. ས. ༢༠༤-༢༠༩, ༢༤༧-༢༤༩) པན ནིཔྤརིཡཱཡདེསནཏྟཱ ཝིམོཀྑཱབྷིབྷཱཡཏནཱནི ¶ ཨསངྐརཏོ དསྶེཏུཾ ཝིམོཀྑེ ཝཛྫེཏྭཱ ཨབྷིབྷཱཡཏནཱནི ཀཐིཏཱནི. སབྦཱནི ཙ ཝིམོཀྑཀིཙྩཱནི ཛྷཱནཱནི ཝིམོཀྑདེསནཱཡཾ ཝུཏྟཱནི. ཏདེཏཾ ‘‘ཨཛ྄ཛྷཏྟཾ རཱུཔསཉྙཱི’’ཏི ཨཱགཏསྶ ཨབྷིབྷཱཡཏནདྭཡསྶ ཨབྷིདྷམྨེ ཨབྷིབྷཱཡཏནེསུ ཨཝཙནཏོ ‘‘རཱུཔཱི རཱུཔཱནི པསྶཏཱི’’ཏིཨཱདཱིནཉྩ སབྦཝིམོཀྑཀིཙྩསཱདྷཱརཎཝཙནབྷཱཝཏོ ཝཝཏྠཱནཾ ཀཏནྟི ཝིཉྙཱཡཏི. ‘‘ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏོ’’ཏི ཨིདཾ ཨབྷིདྷམྨེ ཀཏྠཙིཔི ‘‘ཨཛ྄ཛྷཏྟཾ རཱུཔཱནི པསྶཏཱི’’ཏི ཨཝཏྭཱ སབྦཏྠ ཡཾ ཝུཏྟཾ ‘‘བཧིདྡྷཱ རཱུཔཱནི པསྶཏཱི’’ཏི, ཏསྶ ཀཱརཎཝཙནཾ. ཏེན ཡཾ ཨཉྙཧེཏུཀཾ, ཏཾ ཏེན ཧེཏུནཱ ཝུཏྟཾ. ཡཾ པན དེསནཱཝིལཱསཧེཏུཀཾ ཨཛ྄ཛྷཏྟཾ ཨརཱུཔསཉྙིཏཱཡ ཨེཝ ཨབྷིདྷམྨེ ཝཙནཾ, ན ཏསྶ ཨཉྙཾ ཀཱརཎཾ མགྒིཏབྦནྟི དསྶེཏི.

ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏཱ ཙ ཏེསཾ བཧིདྡྷཱརཱུཔཱནཾ ཝིཡ ཨཝིབྷཱུཏཏྟཱ དེསནཱཝིལཱསོ ¶ ཙ ཡཐཱཝུཏྟཝཝཏྠཱནཝསེན ཝེདིཏབྦོ ཝེནེཡྻཛ྄ཛྷཱསཡཝསེན ཝིཛྫམཱནཔརིཡཱཡཀཐཱབྷཱཝཏོ. ‘‘སུཝཎྞདུབྦཎྞཱནཱི’’ཏི ཨེཏེནེཝ སིདྡྷཏྟཱ ན ནཱིལཱདིཨབྷིབྷཱཡཏནཱནི ཝཏྟབྦཱནཱིཏི ཙེ? ཏཾ ན. ནཱིལཱདཱིསུ ཀཏཱདྷིཀཱརཱནཾ ནཱིལཱདིབྷཱཝསྶེཝ ཨབྷིབྷཝནཀཱརཎཏྟཱ. ན ཧི ཏེསཾ པརིསུདྡྷཱཔརིསུདྡྷཝཎྞཱནཾ པརིཏྟཏཱ ཝཱ ཨཔྤམཱཎཏཱ ཝཱ ཨབྷིབྷཝནཀཱརཎཾ, ཨཐ ཁོ ནཱིལཱདིབྷཱཝོ ཨེཝཱཏི. ཨེཏེསུ ཙ པརིཏྟཱདིཀསིཎརཱུཔེསུ ཡཾ ཡཾ ཙརིཏསྶ ཨིམཱནི ཨབྷིབྷཱཡཏནཱནི ཨིཛ྄ཛྷནྟི, ཏཾ དསྶེཏུཾ ‘‘ཨིམེསུ པནཱ’’ཏིཨཱདི ཝུཏྟཾ. སབྦསངྒཱཧིཀཝསེནཱཏི ནཱིལཝཎྞནཱིལནིདསྶནནཱིལནིབྷཱསཱནཾ སཱདྷཱརཎཝསེན. ཝཎྞཝསེནཱཏི སབྷཱཝཝཎྞཝསེན. ནིདསྶནཝསེནཱཏི པསྶིཏབྦཏཱཝསེན ཙཀྑུཝིཉྙཱཎཱདིཝིཉྙཱཎཝཱིཐིཡཱ གཧེཏབྦཏཱཝསེན. ཨོབྷཱསཝསེནཱཏི སཔྤབྷཱསཏཱཡ ཨཝབྷཱསནཝསེན.

ཨིཙྪཱསུཏྟཱདིཝཎྞནཱ ནིཊྛིཏཱ.

༦. ཝིམོཀྑསུཏྟཝཎྞནཱ

༦༦. ཚཊྛེ (དཱི. ནི. ཊཱི. ༢.༡༢༩) ཀེནཊྛེནཱཏི ཀེན སབྷཱཝེན. སབྷཱཝོ ཧི ཉཱཎེན ཡཱཐཱཝཏོ ཨརཎཱིཡཏོ ཉཱཏབྦཏོ ‘‘ཨཏྠོ’’ཏི ཝུཙྩཏི, སོ ཨེཝ ¶ ཏྠ-ཀཱརསྶ ཊྛ-ཀཱརཾ ཀཏྭཱ ‘‘ཨཊྛོ’’ཏི ཝུཏྟོ. ཨདྷིམུཙྩནཊྛེནཱཏི ཨདྷིཀཾ སཝིསེསཾ མུཙྩནཊྛེན. ཨེཏེན སཏིཔི སབྦསྶཔི རཱུཔཱཝཙརཛ྄ཛྷཱནསྶ ཝིཀྑམྦྷནཝསེན པཊིཔཀྑཏོ ཝིམུཏྟབྷཱཝེ ཡེན བྷཱཝནཱཝིསེསེན ཏཾ ཛྷཱནཾ སཱཏིསཡཾ པཊིཔཀྑཏོ ཝིམུཙྩིཏྭཱ པཝཏྟཏི, སོ བྷཱཝནཱཝིསེསོ དཱིཔིཏོ. བྷཝཏི ཧི སམཱནཛཱཏིཡུཏྟོཔི བྷཱཝནཱཝིསེསེན པཝཏྟིཨཱཀཱརཝིསེསོ. ཡཐཱ ཏཾ སདྡྷཱཝིམུཏྟཏོ དིཊྛིཔྤཏྟསྶ, ཏཐཱ པཙྩནཱིཀདྷམྨེཧི སུཊྛུ ཝིམུཏྟཏཱཡ ཨེཝ ཨནིགྒཧིཏབྷཱཝེན ནིརཱསངྐཏཱཡ ཨབྷིརཏིཝསེན སུཊྛུ ཨདྷིམུཙྩནཊྛེནཔི ཝིམོཀྑོ. ཏེནཱཧ ‘‘ཨཱརམྨཎེ ཙཱ’’ཏིཨཱདི. ཨཡཾ པནཏྠོཏི ཨཡཾ ཨདྷིམུཙྩནཊྛོ པཙྪིམེ ཝིམོཀྑེ ནིརོདྷེ ནཏྠི. ཀེཝལོ ཝིམུཏྟཊྛོ ཨེཝ ཏཏྠ ལབྦྷཏི, ཏཾ སཡམེཝ པརཏོ ཝཀྑཏི.

རཱུཔཱིཏི ཡེནཱཡཾ སསནྟཏིཔརིཡཱཔནྣེན རཱུཔེན སམནྣཱགཏོ, ཏཾ ཡསྶ ཛྷཱནསྶ ཧེཏུབྷཱཝེན ཝིསིཊྛརཱུཔཾ ཧོཏི, ཡེན ཝིསིཊྛེན རཱུཔེན ‘‘རཱུཔཱི’’ཏི ཝུཙྩེཡྻ རཱུཔཱིསདྡསྶ ཨཏིསཡཏྠདཱིཔནཏོ, ཏདེཝ སསནྟཏིཔརིཡཱཔནྣརཱུཔསྶ ཝསེན པཊིལདྡྷཛ྄ཛྷཱནཾ ཨིདྷ པརམཏྠཏོ རཱུཔིབྷཱཝསཱདྷཀནྟི དཊྛབྦཾ. ཏེནཱཧ ‘‘ཨཛ྄ཛྷཏྟ’’ནྟིཨཱདི. རཱུཔཛ྄ཛྷཱནཾ རཱུཔཾ ཨུཏྟརཔདལོཔེན. རཱུཔཱནཱིཏི པནེཏྠ པུརིམཔདལོཔོ དཊྛབྦོ. ཏེན ཝུཏྟཾ ‘‘ནཱིལཀསིཎཱདཱིནི རཱུཔཱནཱི’’ཏི. རཱུཔེ ཀསིཎརཱུཔེ སཉྙཱ རཱུཔསཉྙཱ ¶ , སཱ ཨེཏསྶ ཨཏྠཱིཏི རཱུཔསཉྙཱི, སཉྙཱསཱིསེན ཛྷཱནཾ ཝདཏི. ཏཔྤཊིཔཀྑེན ཨརཱུཔསཉྙཱི. ཏེནཱཧ ‘‘ཨཛ྄ཛྷཏྟཾ ན རཱུཔསཉྙཱི’’ཏིཨཱདི.

ཨནྟོ ཨཔྤནཱཡཾ ‘‘སུབྷ’’ནྟི ཨཱབྷོགོ ནཏྠཱིཏི ཨིམིནཱ པུབྦཱབྷོགཝསེན ཏཐཱ ཨདྷིམུཏྟི སིཡཱཏི དསྶེཏི. ཨེཝཉྷེཏྠ ཏཐཱཝཏྟབྦཏཱཔཏྟིཙོདནཱ ཨནཝཊྛཱནཱ ཧོཏི. ཡསྨཱ སུཝིསུདྡྷེསུ ནཱིལཱདཱིསུ ཝཎྞཀསིཎེསུ ཏཏྠ ཀཏཱདྷིཀཱརཱནཾ ཨབྷིརཏིཝསེན སུཊྛུ ཨདྷིམུཙྩནཊྛོ སམྦྷཝཏི, ཏསྨཱ ཨཊྛཀཐཱཡཾ ཏཐཱ ཏཏིཡོ ཝིམོཀྑོ སཾཝཎྞིཏོ. ཡསྨཱ པན མེཏྟཱདིཝསེན པཝཏྟམཱནཱ བྷཱཝནཱ སཏྟེ ཨཔྤཊིཀཱུལཏོ དཧནྟི, ཏེ སུབྷཏོ ཨདྷིམུཙྩིཏྭཱ པཝཏྟཏི, ཏསྨཱ པཊིསམྦྷིདཱམགྒེ (པཊི. མ. ༡.༢༡༢-༢༡༣) བྲཧྨཝིཧཱརབྷཱཝནཱ ‘‘སུབྷཝིམོཀྑོ’’ཏི ཝུཏྟཱ. ཏཡིདཾ ཨུབྷཡམྤི ཏེན ཏེན པརིཡཱཡེན ཝུཏྟཏྟཱ ན ཝིརུཛ྄ཛྷཏཱིཏི དཊྛབྦཾ.

སབྦསོཏི ¶ ཨནཝསེསཏོ. ན ཧི ཙཏུནྣཾ ཨརཱུཔཀྑནྡྷཱནཾ ཨེཀདེསོཔི ཏཏྠ ཨཝསིསྶཏི. ཝིསྶཊྛཏྟཱཏི ཡཐཱཔརིཙྪིནྣཀཱལེ ནིརོདྷིཏཏྟཱ. ཨུཏྟམོ ཝིམོཀྑོ ནཱམ ཨརིཡེཧེཝ སམཱཔཛྫིཏབྦཏོ ཨརིཡཕལཔརིཡོསཱནཏྟཱ དིཊྛེཝ དྷམྨེ ནིབྦཱནཔྤཏྟིབྷཱཝཏོ ཙ.

ཝིམོཀྑསུཏྟཝཎྞནཱ ནིཊྛིཏཱ.

༧. ཨནརིཡཝོཧཱརསུཏྟཝཎྞནཱ

༦༧. སཏྟམེ ཨནརིཡཱནཾ ལཱམཀཱནཾ ཝོཧཱརོ ཨནརིཡཝོཧཱརོ. དིཊྛཝཱདིཏཱཏི དིཊྛཾ མཡཱཏི ཨེཝཾ ཝཱདིཏཱ. ཨེཝཾ སེསེསུཔི. ཨེཏྠ ཙ ཏཾཏཾསམུཊྛཱཔཀཙེཏནཱཝསེན ཨཏྠོ ཝེདིཏབྦོ. ཏེནཱཧ ‘‘ཡཱཧི ཙེཏནཱཧཱི’’ཏིཨཱདི.

ཨནརིཡཝོཧཱརསུཏྟཝཎྞནཱ ནིཊྛིཏཱ.

༩. པརིསཱསུཏྟཝཎྞནཱ

༦༩. ནཝམེ (དཱི. ནི. ཊཱི. ༢.༡༧༢) སམཱགནྟབྦཏོ, སམཱགཙྪཏཱིཏི ཝཱ སམཱགམོ, པརིསཱ. བིམྦིསཱརཔྤམུཁོ སམཱགམོ བིམྦིསཱརསམཱགམོ. སེསདྭཡེཔི ཨེསེཝ ནཡོ. བིམྦིསཱར…པེ… སམཱགམསདིསཾ ཁཏྟིཡཔརིསནྟི ཡོཛནཱ. ཨཉྙེསུ ཙཀྐཝཱལེ༹སུཔི ལབྦྷཏེཝ སཏྠུ ¶ ཁཏྟིཡཔརིསཱདིཨུཔསངྐམནཾ. ཨཱདིཏོ ཏེཧི སདྡྷིཾ སཏྠུ བྷཱསནཾ ཨཱལཱཔོ, ཀཐནཔྤཊིཀཐནཾ སལླཱཔོ. དྷམྨཱུཔསཾཧིཏཱ པུཙྪཱཔཊིཔུཙྪཱ དྷམྨསཱཀཙྪཱ. སཎྛཱནཾ པཊིཙྩ ཀཐིཏཾ སཎྛཱནཔརིཡཱཡཏྟཱ ཝཎྞ-སདྡསྶ ‘‘མཧནྟཾ ཧཏྠིརཱཛཝཎྞཾ ཨབྷིནིམྨིནིཏྭཱ’’ཏིཨཱདཱིསུ (སཾ. ནི. ༡.༡༣༨) ཝིཡ. ཏེསནྟི པདཾ ཨུབྷཡཔདཱཔེཀྑཾ ‘‘ཏེསམྤི ལཀྑཎསཎྛཱནཾ ཝིཡ སཏྠུ སརཱིརསཎྛཱནཾ ཏེསཾ ཀེཝལཾ པཉྙཱཡཏི ཨེཝཱ’’ཏི. ནཱཔི ཨཱམུཏྟམཎིཀུཎྜལོ བྷགཝཱ ཧོཏཱིཏི ཡོཛནཱ. ཚིནྣསྶརཱཏི དྭིདྷཱ བྷིནྣསྶརཱ. གགྒརསྶརཱཏི ཛཛྫརིཏསྶརཱ. བྷཱསནྟརནྟི ཏེསཾ སཏྟཱནཾ བྷཱསཱཏོ ཨཉྙཾ བྷཱསཾ. ཝཱིམཾསཱཏི ཙིནྟནཱ. ཀིམཏྠཾ…པེ… དེསེཏཱིཏི ཨིདཾ ནནུ ཨཏྟཱནཾ ཛཱནཱཔེཏྭཱ དྷམྨེ ཀཐིཏེ ཏེསཾ སཱཏིསཡོ ¶ པསཱདོ ཧོཏཱིཏི ཨིམིནཱ ཨདྷིཔྤཱཡེན ཝུཏྟཾ? ཡེསཾ ཨཏྟཱནཾ ཨཛཱནཱཔེཏྭཱཝ དྷམྨེ ཀཐིཏེ པསཱདོ ཧོཏི, ན ཛཱནཱཔེཏྭཱ, ཏཱདིསེ སནྡྷཱཡ སཏྠཱ ཏཐཱ ཀརོཏི. ཏཏྠ པཡོཛནམཱཧ ‘‘ཝཱསནཏྠཱཡཱ’’ཏི. ཨེཝཾ སུཏོཔཱིཏི ཨེཝཾ ཨཝིཉྙཱཏདེསཀོ ཨཝིཉྙཱཏཱགམནོཔི སུཏོ དྷམྨོ ཨཏྟནོ དྷམྨསུདྷམྨཏཱཡེཝ ཨནཱགཏེ པཙྩཡོ ཧོཏི སུཎནྟསྶ.

པརིསཱསུཏྟཝཎྞནཱ ནིཊྛིཏཱ.

༡༠. བྷཱུམིཙཱལསུཏྟཝཎྞནཱ

༧༠. དསམེ (དཱི. ནི. ཊཱི. ༢.༡༦༧; སཾ. ནི. ཊཱི. ༢.༥.༨༢༢) ཨུདེནཡཀྑསྶ ཙེཏིཡཊྛཱནེཏི ཨུདེནསྶ ནཱམ ཡཀྑསྶ ཨཱཡཏནབྷཱཝེན ཨིཊྛཀཱཧི ཀཏེ མཧཱཛནསྶ ཙིཏྟཱིཀཏཊྛཱནེ. ཀཏཝིཧཱརོཏི བྷགཝནྟཾ ཨུདྡིསྶ ཀཏཝིཧཱརོ. ཝུཙྩཏཱིཏི པུརིམཝོཧཱརེན ‘‘ཨུདེནཾ ཙེཏིཡ’’ནྟི ཝུཙྩཏི. གོཏམཀཱདཱིསུཔཱིཏི ‘‘གོཏམཀཾ ཙེཏིཡ’’ནྟིཨཱདཱིསུཔི. ཨེསེཝ ནཡོཏི ཙེཏིཡཊྛཱནེ ཀཏཝིཧཱརབྷཱཝཾ ཨཏིདིསཏི. ཏཐཱ ཧི སཏྟམྦནྟི ཀིཀིསྶ རཉྙོ དྷཱིཏརོ སཏྟ ཀུམཱརིཡོ སཾཝེགཛཱཏཱ གེཧཏོ ནིཀྑམིཏྭཱ ཏཏྠ པདྷཱནཾ པདཧིཾསུ, ཏཾ ཋཱནཾ ‘‘སཏྟམྦཾ ཙེཏིཡ’’ནྟི ཝདནྟི. བཧུཔུཏྟཀནྟི ཙ བཧུཔཱརོཧོ ཨེཀོ ནིགྲོདྷརུཀྑོ, ཏསྨིཾ ཨདྷིཝཏྠཾ དེཝཏཾ བཧཱུ མནུསྶཱ པུཏྟེ པཏྠེནྟི, ཏདུཔཱདཱཡ ཏཾ ཋཱནཾ ‘‘བཧུཔུཏྟཀཾ ཙེཏིཡ’’ནྟི པཉྙཱཡིཏྠ. སཱརནྡདསྶ ནཱམ ཡཀྑསྶ ཝསིཏཊྛཱནཾ, ཙཱཔཱལསྶ ནཱམ ཡཀྑསྶ ཝསིཏཊྛཱནཾ, ཨིཏི སབྦཱནེཝེཏཱནི བུདྡྷུཔྤཱདཏོ པུབྦདེཝཏཱ པརིགྒཧེཏྭཱ ཙེཏིཡཝོཧཱརེན ཝོཧརིཏཱནི, བྷགཝཏོ ཝིཧཱརེ ཀཏེཔི ཏཐེཝ སཉྫཱནནྟི. རམཎཱིཡཱཏི ཨེཏྠ ཝེསཱལིཡཱ ཏཱཝ བྷཱུམིབྷཱགསམྤཏྟིཡཱ སུལབྷཔིཎྜཏཱཡ རམཎཱིཡབྷཱཝོ ཝེདིཏབྦོ. ཝིཧཱརཱནཾ པན ནགརཏོ ནཱཏིདཱུརཏཱཡ ནཙྩཱསནྣཏཱཡ གམནཱགམནསམྤཏྟིཡཱ ཨནཱཀིཎྞཝིཧཱརཊྛཱནཏཱཡ ཚཱཡུདཀསམྤཏྟིཡཱ པཝིཝེཀཔཏིརཱུཔཏཱཡ ཙ རམཎཱིཡཏཱ དཊྛབྦཱ.

ཝཌྜྷིཏཱཏི ¶ བྷཱཝནཱཔཱརིཔཱུརིཝསེན པརིབྲཱུཧིཏཱ. པུནཔྤུནཾ ཀཏཱཏི བྷཱཝནཱཡ བཧུལཱིཀརཎེན ཨཔརཱཔརཾ པཝཏྟིཏཱ. ཡུཏྟཡཱནཾ ཝིཡ ཀཏཱཏི ཡཐཱ ¶ ཡུཏྟམཱཛཉྙཡཱནཾ ཚེཀེན སཱརཐིནཱ ཨདྷིཊྛིཏཾ ཡཐཱརུཙི པཝཏྟཏི, ཨེཝཾ ཡཐཱརུཙི པཝཏྟིརཧཏཾ གམིཏཱ. པཏིཊྛཱནཊྛེནཱཏི ཨདྷིཊྛཱནཊྛེན. ཝཏྠུ ཝིཡ ཀཏཱཏི སབྦསོ ཨུཔཀྐིལེསཝིསོདྷནེན ཨིདྡྷིཝིསཡཏཱཡ པཏིཊྛཱནབྷཱཝཏོ སུཝིསོདྷིཏཔརིསྶཡཝཏྠུ ཝིཡ ཀཏཱ. ཨདྷིཊྛིཏཱཏི པཊིཔཀྑདཱུརཱིབྷཱཝཏོ སུབྷཱཝིཏབྷཱཝེན ཏཾཏཾཨདྷིཊྛཱནཡོགྱཏཱཡ ཋཔིཏཱ. སམནྟཏོ ཙིཏཱཏི སབྦབྷཱགེན བྷཱཝནུཔཙཡཾ གམིཏཱ. ཏེནཱཧ ‘‘སུཝཌྜྷིཏཱ’’ཏི. སུཊྛུ སམཱརདྡྷཱཏི ཨིདྡྷིབྷཱཝནཱཡ སིཁཱཔྤཏྟིཡཱ སམྨདེཝ སཾསེཝིཏཱ.

ཨནིཡམེནཱཏི ‘‘ཡསྶ ཀསྶཙཱི’’ཏི ཨནིཡམཝཙནེན. ནིཡམེཏྭཱཏི ‘‘ཏཐཱགཏསྶཱ’’ཏི སརཱུཔདསྶནེན ནིཡམེཏྭཱ. ཨཱཡུཔྤམཱཎནྟི (དཱི. ནི. ཊཱི. ༡.༤༠; དཱི. ནི. ཨབྷི. ཊཱི. ༡.༤༠) པརམཱཡུཔྤམཱཎཾ ཝདཏི. ཀིཾ པནེཏྠ པརམཱཡུ ནཱམ, ཀཐཾ ཝཱ ཏཾ པརིཙྪིནྣཔྤམཱཎནྟི? ཝུཙྩཏེ – ཡོ ཏེསཾ ཏེསཾ སཏྟཱནཾ ཏསྨིཾ ཏསྨིཾ བྷཝཝིསེསེ པུརིམསིདྡྷབྷཝཔཏྠནཱུཔནིསྶཡཝསེན སརཱིརཱཝཡཝཝཎྞསཎྛཱནཔྤམཱཎཱདིཝིསེསཱ ཝིཡ ཏཾཏཾགཏིནིཀཱཡཱདཱིསུ ཡེབྷུཡྻེན ནིཡཏཔརིཙྪེདོ གབྦྷསེཡྻཀཀཱམཱཝཙརདེཝརཱུཔཱཝཙརསཏྟཱནཾ སུཀྐསོཎིཏཨུཏུབྷོཛནཱདིཨུཏུཨཱདིཔཙྩུཔྤནྣཔཙྩཡཱུཔཏྠམྦྷིཏོ ཝིཔཱཀཔྤབནྡྷསྶ ཋིཏིཀཱལནིཡམོ. སོ ཡཐཱསཀཾ ཁཎམཏྟཱཝཊྛཱཡཱིནམྤི ཨཏྟནོ སཧཛཱཏཱནཾ རཱུཔཱརཱུཔདྷམྨཱནཾ ཋཔནཱཀཱརཝུཏྟིཏཱཡ པཝཏྟནཀཱནི རཱུཔཱརཱུཔཛཱིཝིཏིནྡྲིཡཱནི ཡསྨཱ ན ཀེཝལཾ ཏེསཾ ཁཎཋིཏིཡཱ ཨེཝ ཀཱརཎབྷཱཝེན ཨནུཔཱལཀཱནི, ཨཐ ཁོ ཡཱཝ བྷཝངྒུཔཙྪེདཱ ཨནུཔབནྡྷསྶ ཨཝིཙྪེདཧེཏུབྷཱཝེནཔི, ཏསྨཱ ཨཱཡུཧེཏུཀཏྟཱ ཀཱརཎཱུཔཙཱརེན ཨཱཡུ, ཨུཀྐཾསཔརིཙྪེདཝསེན པརམཱཡཱུཏི ཙ ཝུཙྩཏི. ཏཾ པན དེཝཱནཾ ནེརཡིཀཱནཾ ཨུཏྟརཀུརུཀཱནཉྩ ནིཡཏཔརིཙྪེདཾ. ཨུཏྟརཀུརུཀཱནཾ པན ཨེཀནྟནིཡཏཔརིཙྪེདམེཝ, ཨཝསིཊྛམནུསྶཔེཏཏིརཙྪཱནཱནཾ པན ཙིརཊྛིཏིསཾཝཏྟནིཀཀམྨབཧུལེ ཀཱལེ ཏཾཀམྨསཧིཏསནྟཱནཛནིཏསུཀྐསོཎིཏཔཙྩཡཱནཾ ཏཾམཱུལཀཱནཉྩ ཙནྡསཱུརིཡསམཝིསམཔརིཝཏྟནཱདིཛནིཏཨུཏུཨཱཧཱརཱདིསམཝིསམཔཙྩཡཱནཉྩ ཝསེན ཙིརཱཙིརཀཱལཏོ ཨནིཡཏཔརིཙྪེདཾ, ཏསྶ ཙ ཡཐཱ པུརིམསིདྡྷབྷཝཔཏྠནཱཝསེན ཏཾཏཾགཏིནིཀཱཡཱདཱིསུ ཝཎྞསཎྛཱནཱདིཝིསེསནིཡམོ སིདྡྷོ དསྶནཱནུསྶཝཱདཱིཧི, ཏཐཱ ཨཱདིཏོ གཧཎསིདྡྷིཡཱ. ཨེཝཾ ཏཱསུ ཏཱསུ ཨུཔཔཏྟཱིསུ ནིབྦཏྟསཏྟཱནཾ ཡེབྷུཡྻེན སམཔྤམཱཎཊྛིཏིཀཱལཾ ¶ དསྶནཱནུསྶཝེཧི ལབྷིཏྭཱ ཏཾཔརམཏཾ ཨཛ྄ཛྷོསཱཡ པཝཏྟིཏབྷཝཔཏྠནཱཝསེན ཨཱདིཏོ པརིཙྪེདནིཡམོ ཝེདིཏབྦོ. ཡསྨཱ པན ཀམྨཾ ཏཱསུ ཏཱསུ ཨུཔཔཏྟཱིསུ ཡཐཱ ཏཾཏཾཨུཔཔཏྟིནིཡཏཝཎྞཱདིནིབྦཏྟནེ སམཏྠཾ, ཨེཝཾ ནིཡཏཱཡུཔརིཙྪེདཱསུ ཨུཔཔཏྟཱིསུ པརིཙྪེདཱཏིཀྐམེན ¶ ཝིཔཱཀནིབྦཏྟནེ སམཏྠཾ ན ཧོཏི, ཏསྨཱ ཝུཏྟཾ ‘‘ཏསྨིཾ ཏསྨིཾ ཀཱལེ ཡཾ མནུསྶཱནཾ ཨཱཡུཔྤམཱཎཾ, ཏཾ པརིཔུཎྞཾ ཀརོནྟོ ཏིཊྛེཡྻཱ’’ཏི.

མཧཱསཱིཝཏྠེརོ པན ‘‘མཧཱབོདྷིསཏྟཱནཾ ཙརིམབྷཝེ པཊིསནྡྷིདཱཡིནོ ཀམྨསྶ ཨསངྑྱེཡྻཱཡུཀཏཱསཾཝཏྟནསམཏྠཏཾ ཧདཡེ ཋཔེཏྭཱ བུདྡྷཱནཉྩ ཨཱཡུསངྑཱརསྶ པརིསྶཡཝིཀྑམྦྷནསམཏྠཏཱ པཱལི༹ཡཾ ཨཱགཏཱ ཨེཝཱཏི ཨིམཾ བྷདྡཀཔྤམེཝ ཏིཊྛེཡྻཱ’’ཏི ཨཝོཙ. ཁཎྜིཙྩཱདཱིཧི ཨབྷིབྷུཡྻཏཱིཏི ཨེཏེན ཡཐཱ ཨིདྡྷིབལེན ཛརཱཡ ན པཊིགྷཱཏོ, ཨེཝཾ ཏེན མརཎསྶཔི ན པཊིགྷཱཏོཏི ཨཏྠཏོ ཨཱཔནྣམེཝཱཏི. ‘‘ཀྭ སརོ ཁིཏྟོ, ཀྭ ཙ ནིཔཏིཏོ’’ཏི ཨཉྙཐཱ ཝུཊྛིཏེནཔི ཐེརཝཱདེན ཨཊྛཀཐཱཝཙནམེཝ སམཏྠིཏནྟི དཊྛབྦཾ. ཏེནཱཧ ‘‘ཡོ པན ཝུཙྩཏི…པེ… ནིཡཱམིཏ’’ནྟི.

ཨོལཱ༹རིཀེ ནིམིཏྟེཏི ཐཱུལེ སཉྙུཔྤཱདནེ. ཐཱུལསཉྙུཔྤཱདནཉྷེཏཾ ‘‘ཏིཊྛཏུ བྷགཝཱ ཀཔྤ’’ནྟི སཀལཾ ཀཔྤཾ ཨཝཊྛཱནཡཱཙནཱཡ, ཡདིདཾ ‘‘ཡསྶ ཀསྶཙི, ཨཱནནྡ, ཙཏྟཱརོ ཨིདྡྷིཔཱདཱ བྷཱཝིཏཱ’’ཏིཨཱདིནཱ ཨཉྙཱཔདེསེན ཨཏྟནོ ཙཏུརིདྡྷིཔཱདབྷཱཝནཱནུབྷཱཝེན ཀཔྤཾ ཨཝཊྛཱནསམཏྠཏཱཝིབྷཱཝནཾ. ཨོབྷཱསེཏི པཱཀཊཝཙནེ. པཱཀཊཝཙནཉྷེཏཾ, ཡདིདཾ པརིཡཱཡཾ མུཉྩིཏྭཱ ཨུཛུཀམེཝ ཨཏྟནོ ཨདྷིཔྤཱཡཝིབྷཱཝནཾ. པརིཡུཊྛིཏཙིཏྟོཏི ཡཐཱ ཀིཉྩི ཨཏྠཱནཏྠཾ སལླཀྑེཏུཾ ན སཀྐཱ, ཨེཝཾ ཨབྷིབྷཱུཏཙིཏྟོ. སོ པན ཨབྷིབྷཝོ མཧཏཱ ཨུདཀོགྷེན ཨཔྤཀསྶ ཨུདཀསྶ ཨཛ྄ཛྷོཏྠརཎཾ ཝིཡ ཨཧོསཱིཏི ཝུཏྟཾ ‘‘ཨཛ྄ཛྷོཏྠཊཙིཏྟོ’’ཏི. ཨཉྙོཏི ཐེརཏོ, ཨརིཡེཧི ཝཱ ཨཉྙོཔི ཡོ ཀོཙི པུཐུཛྫནོ. པུཐུཛྫནགྒཧཎཉྩེཏྠ ཡཐཱ སབྦེན སབྦཾ ཨཔྤཧཱིནཝིཔལླཱསོ མཱརེན པརིཡུཊྛིཏཙིཏྟོ ཀིཉྩི ཨཏྠཱནཏྠཾ སལླཀྑེཏུཾ ན སཀྐོཏི, ཨེཝཾ ཐེརོ བྷགཝཏཱ ཀཏནིམིཏྟོབྷཱསཾ སབྦསོ ན སལླཀྑེསཱིཏི དསྶནཏྠཾ. ཏེནཱཧ ‘‘མཱརོ ཧཱི’’ཏིཨཱདི.

ཙཏྟཱརོ ¶ ཝིཔལླཱསཱཏི ཨསུབྷེ ‘‘སུབྷ’’ནྟི སཉྙཱཝིཔལླཱསོ, ཙིཏྟཝིཔལླཱསོ, དུཀྑེ ‘‘སུཁ’’ནྟི སཉྙཱཝིཔལླཱསོ, ཙིཏྟཝིཔལླཱསོཏི ཨིམེ ཙཏྟཱརོ ཝིཔལླཱསཱ. ཏེནཱཏི ཡདིཔི ཨིཏརེ ཨཊྛ ཝིཔལླཱསཱ པཧཱིནཱ, ཏཐཱཔི ཡཐཱཝུཏྟཱནཾ ཙཏུནྣཾ ཝིཔལླཱསཱནཾ ཨཔྤཧཱིནབྷཱཝེན. ཨསྶཱཏི ཐེརསྶ. མདྡཏཱིཏི ཕུསནམཏྟེན མདྡནྟོ ཝིཡ ཧོཏི, ཨཉྙཐཱ ཏེན མདྡིཏེ སཏྟཱནཾ མརཎམེཝ སིཡཱ. ཀིཾ སཀྑིསྶཏི, ན སཀྑིསྶཏཱིཏི ཨདྷིཔྤཱཡོ. ཀསྨཱ ན སཀྑིསྶཏི, ནནུ ཨེས ཨགྒསཱཝཀསྶ ཀུཙྪིཾ པཝིཊྛོཏི? སཙྩཾ པཝིཊྛོ, ཏཉྩ ཁོ ཨཏྟནོ ཨཱནུབྷཱཝདསྶནཏྠཾ, ན ཝིབཱདྷནཱདྷིཔྤཱཡེན. ཝིབཱདྷནཱདྷིཔྤཱཡེན པན ཨིདྷ ‘‘ཀིཾ སཀྑིསྶཏཱི’’ཏི ཝུཏྟཾ ཧདཡམདྡནསྶ ཨདྷིཀཏཏྟཱ. ནིམིཏྟོབྷཱསནྟི ཨེཏྠ ‘‘ཏིཊྛཏུ བྷགཝཱ ཀཔྤ’’ནྟི སཀལཀཔྤཾ ཨཝཊྛཱནཡཱཙནཱཡ ¶ ‘‘ཡསྶ ཀསྶཙི, ཨཱནནྡ, ཙཏྟཱརོ ཨིདྡྷིཔཱདཱ བྷཱཝིཏཱ’’ཏིཨཱདིནཱ ཨཉྙཱཔདེསེན ཨཏྟནོ ཙཏུརིདྡྷིཔཱདབྷཱཝནཱནུབྷཱཝེན ཀཔྤཾ ཨཝཊྛཱནསམཏྠཏཱཝསེན སཉྙུཔྤཱདནཾ ནིམིཏྟཾ. ཏཐཱ པན པརིཡཱཡཾ མུཉྩིཏྭཱ ཨུཛུཀམེཝ ཨཏྟནོ ཨདྷིཔྤཱཡཝིབྷཱཝནཾ ཨོབྷཱསོ. ཛཱནནྟོཡེཝཱཏི མཱརེན པརིཡུཊྛིཏབྷཱཝཾ ཛཱནནྟོཡེཝ. ཨཏྟནོ ཨཔརཱདྷཧེཏུཏོ སཏྟཱནཾ སོཀོ ཏནུཀོ ཧོཏི, ན བལཝཱཏི ཨཱཧ ‘‘དོསཱརོཔནེན སོཀཏནུཀརཎཏྠ’’ནྟི. ཀིཾ པན ཐེརོ མཱརེན པརིཡུཊྛིཏཙིཏྟཀཱལེ པཝཏྟིཾ པཙྪཱ ཛཱནཱཏཱིཏི? ན ཛཱནཱཏི སབྷཱཝེན, བུདྡྷཱནུབྷཱཝེན པན ཛཱནཱཏི.

གཙྪ ཏྭཾ, ཨཱནནྡཱཏི ཡསྨཱ དིཝཱཝིཧཱརཏྠཱཡ ཨིདྷཱགཏོ, ཏསྨཱ, ཨཱནནྡ, གཙྪ ཏྭཾ ཡཐཱརུཙིཏཊྛཱནཾ དིཝཱཝིཧཱརཱཡ. ཏེནཱཧ ‘‘ཡསྶདཱནི ཀཱལཾ མཉྙསཱི’’ཏི. ཨནཏྠེ ནིཡོཛེནྟོ གུཎམཱརཎེན མཱརེཏི, ཝིརཱགཝིབནྡྷནེན ཝཱ ཛཱཏིནིམིཏྟཏཱཡ ཏཏྠ ཏཏྠ ཛཱཏཾ མཱརེནྟོ ཝིཡ ཧོཏཱིཏི ‘‘མཱརེཏཱིཏི མཱརོ’’ཏི ཝུཏྟཾ. ཨཏི ཝིཡ པཱཔཏཱཡ པཱཔིམཱ. ཀཎྷདྷམྨེཧི སམནྣཱགཏོ ཀཎྷོ. ཝིརཱགཱདིགུཎཱནཾ ཨནྟཀརཎཏོ ཨནྟཀོ. སཏྟཱནཾ ཨནཏྠཱཝཧཾ པཊིཔཏྟིཾ ན མུཉྩཏཱིཏི ནམུཙི. ཨཏྟནོ མཱརཔཱསེན པམཏྟེ བནྡྷཏི, པམཏྟཱ ཝཱ བནྡྷཱུ ཨེཏསྶཱཏི པམཏྟབནྡྷུ. སཏྟམསཏྟཱཧཏོ པརཾ སཏྟ ཨཧཱནི སནྡྷཱཡཱཧ ‘‘ཨཊྛམེ སཏྟཱཧེ’’ཏི ན པན པལླངྐསཏྟཱཧཱདི ཝིཡ ནིཡཏཀིཙྩསྶ ཨཊྛམསཏྟཱཧསྶ ནཱམ ལབྦྷནཏོ. སཏྟམསཏྟཱཧསྶ ཧི པརཏོ ཨཛཔཱལནིགྲོདྷམཱུལེ ¶ མཧཱབྲཧྨུནོ སཀྐསྶ ཙ དེཝརཉྙོ པཊིཉྙཱཏདྷམྨདེསནཾ བྷགཝནྟཾ ཉཏྭཱ ‘‘ཨིདཱནི སཏྟེ དྷམྨདེསནཱཡ མམ ཝིསཡཾ སམཏིཀྐམཱཔེསྶཏཱི’’ཏི སཉྫཱཏདོམནསྶོ ཧུཏྭཱ ཋིཏོ ཙིནྟེསི – ‘‘ཧནྡ དཱནཱཧཾ ནཾ ཨུཔཱཡེན པརིནིབྦཱཔེསྶཱམི, ཨེཝམསྶ མནོརཐོ ཨཉྙཐཏྟཾ གམིསྶཏི, མམ ཙ མནོརཐོ ཨིཛ྄ཛྷིསྶཏཱི’’ཏི. ཨེཝཾ པན ཙིནྟེཏྭཱ བྷགཝནྟཾ ཨུཔསངྐམིཏྭཱ ཨེཀམནྟཾ ཋིཏོ ‘‘པརིནིབྦཱཏུ དཱནི, བྷནྟེ, བྷགཝཱ’’ཏིཨཱདིནཱ པརིནིབྦཱནཾ ཡཱཙི. ཏཾ སནྡྷཱཡ ཝུཏྟཾ ‘‘ཨཊྛམེ སཏྟཱཧེ’’ཏིཨཱདི. ཏཏྠ ཨཛྫཱཏི ཨཱཡུསངྑཱརོསྶཛྫནདིཝསཾ སནྡྷཱཡཱཧ. བྷགཝཱ ཙསྶ ཨཏིབནྡྷནཱདྷིཔྤཱཡཾ ཛཱནནྟོཔི ཏཾ ཨནཱཝིཀཏྭཱ པརིནིབྦཱནསྶ ཨཀཱལབྷཱཝམེཝ པཀཱསེནྟོ ཡཱཙནཾ པཊིཀྑིཔི. ཏེནཱཧ ‘‘ན ཏཱཝཱཧ’’ནྟིཨཱདི.

མགྒཝསེན བྱཏྟཱཏི སཙྩསམྤཊིཝེདྷཝེཡྻཏྟིཡེན བྱཏྟཱ. ཏཐེཝ ཝིནཱིཏཱཏི མགྒཝསེནེཝ ཀིལེསཱནཾ སམུཙྪེདཝིནཡེན ཝིནཱིཏཱ. ཏཐཱ ཝིསཱརདཱཏི ཨརིཡམགྒཱདྷིགམེནེཝ སཏྠུསཱསནེ ཝེསཱརཛྫཔྤཏྟིཡཱ ཝིསཱརདཱ, སཱརཛྫཀརཱནཾ དིཊྛིཝིཙིཀིཙྪཱདིཔཱཔདྷམྨཱནཾ ཝིགམེན ཝིསཱརདབྷཱཝཾ པཏྟཱཏི ཨཏྠོ. ཡསྶ སུཏསྶ ཝསེན ཝཊྚདུཀྑཏོ ནིསྶརཎཾ སམྦྷཝཏི, ཏཾ ཨིདྷ ཨུཀྐཊྛནིདྡེསེན སུཏནྟི ཨདྷིཔྤེཏནྟི ཨཱཧ ‘‘ཏེཔིཊཀཝསེནཱ’’ཏི. ཏིཎྞཾ པིཊཀཱནཾ སམཱུཧོ ཏེཔིཊཀཾ ¶ , ཏཱིཎི ཝཱ པིཊཀཱནི ཏིཔིཊཀཾ, ཏིཔིཊཀམེཝ ཏེཔིཊཀཾ, ཏསྶ ཝསེན. ཏམེཝཱཏི ཡཾ ཏཾ ཏེཔིཊཀཾ སོཏབྦབྷཱཝེན ‘‘སུཏ’’ནྟི ཝུཏྟཾ, ཏམེཝ. དྷམྨནྟི པརིཡཏྟིདྷམྨཾ. དྷཱརེནྟཱིཏི སུཝཎྞབྷཱཛནེ པཀྑིཏྟསཱིཧཝསཾ ཝིཡ ཨཝིནསྶནྟཾ ཀཏྭཱ སུཔྤགུཎསུཔྤཝཏྟིབྷཱཝེན དྷཱརེནྟི ཧདཡེ ཋཔེནྟི. ཨིཏི པརིཡཏྟིདྷམྨཝསེན བཧུསྶུཏདྷམྨདྷརབྷཱཝཾ དསྶེཏྭཱ ཨིདཱནི པཊིཝེདྷདྷམྨཝསེནཔི ཏཾ དསྶེཏུཾ ‘‘ཨཐ ཝཱ’’ཏིཨཱདི ཝུཏྟཾ. ཨརིཡདྷམྨསྶཱཏི མགྒཕལདྷམྨསྶ, ནཝཝིདྷསྶཔི ཝཱ ལོཀུཏྟརདྷམྨསྶ. ཨནུདྷམྨབྷཱུཏནྟི ཨདྷིགམཱཡ ཨནུརཱུཔདྷམྨབྷཱུཏཾ. ཨནུཙྪཝིཀཔྤཊིཔདནྟི ཙ ཏམེཝ ཝིཔསྶནཱདྷམྨམཱཧ, ཚབྦིདྷཱ ཝིསུདྡྷིཡོ ཝཱ. ཨནུདྷམྨནྟི ཏསྶཱ ཡཐཱཝུཏྟཔྤཊིཔདཱཡ ཨནུརཱུཔཾ ཨབྷིསལླེཁིཏཾ ཨཔྤིཚཏཱདིདྷམྨཾ. ཙརཎསཱིལཱཏི སམཱདཱཡ ཝཏྟནསཱིལཱ. ཨནུམགྒཕལདྷམྨོ ཨེཏིསྶཱཏི ཝཱ ཨནུདྷམྨཱ, ཝུཊྛཱནགཱམིནཱི ཝིཔསྶནཱ. ཏསྶཱ ཙརཎསཱིལཱ. ཨཏྟནོ ཨཱཙརིཡཝཱདནྟི ཨཏྟནོ ཨཱཙརིཡསྶ སམྨཱསམྦུདྡྷསྶ ཝཱདཾ. སདེཝཀསྶ ལོཀསྶ ཨཱཙཱརསིཀྑཱཔནེན ཨཱཙརིཡོ, བྷགཝཱ, ཏསྶ ཝཱདོ, ཙཏུསཙྩདེསནཱ.

ཨཱཙིཀྑིསྶནྟཱིཏི ¶ ཨཱདིཏོ ཀཐེསྶནྟི, ཨཏྟནཱ ཨུགྒཧིཏནིཡཱམེན པརེ ཨུགྒཎྷཱཔེསྶནྟཱིཏི ཨཏྠོ. དེསེསྶནྟཱིཏི ཝཱཙེསྶནྟི, པཱལི༹ཾ སམྨཱ པབོདྷེསྶནྟཱིཏི ཨཏྠོ. པཉྙཔེསྶནྟཱིཏི པཛཱནཱཔེསྶནྟི, སངྐཱསེསྶནྟཱིཏི ཨཏྠོ. པཊྛཔེསྶནྟཱིཏི པཀཱརེཧི ཋཔེསྶནྟི, པཀཱསེསྶནྟཱིཏི ཨཏྠོ. ཝིཝརིསྶནྟཱིཏི ཝིཝཊཾ ཀརིསྶནྟི. ཝིབྷཛིསྶནྟཱིཏི ཝིབྷཏྟཾ ཀརིསྶནྟི. ཨུཏྟཱནཱིཀརིསྶནྟཱིཏི ཨནུཏྟཱནཾ གམྦྷཱིརཾ ཨུཏྟཱནཾ པཱཀཊཾ ཀརིསྶནྟི. སཧདྷམྨེནཱཏི ཨེཏྠ དྷམྨ-སདྡོ ཀཱརཎཔརིཡཱཡོ ‘‘ཧེཏུམྷི ཉཱཎཾ དྷམྨཔཊིསམྦྷིདཱ’’ཏིཨཱདཱིསུ (ཝིབྷ. ༧༢༠) ཝིཡཱཏི ཨཱཧ ‘‘སཧེཏུཀེན སཀཱརཎེན ཝཙནེནཱ’’ཏི. སཔྤཱཊིཧཱརིཡནྟི སནིསྶརཎཾ. ཡཐཱ པརཝཱདཾ བྷཉྫིཏྭཱ སཀཝཱདོ པཏིཊྛཧཏི, ཨེཝཾ ཧེཏུདཱཧརཎེཧི ཡཐཱདྷིགཏམཏྠཾ སམྤཱདེཏྭཱ དྷམྨཾ ཀཐེསྶནྟི. ཏེནཱཧ ‘‘ནིཡྻཱནིཀཾ ཀཏྭཱ དྷམྨཾ དེསེསྶནྟཱི’’ཏི, ནཝཝིདྷཾ ལོཀུཏྟརདྷམྨཾ པབོདྷེསྶནྟཱིཏི ཨཏྠོ. ཨེཏྠ ཙ ‘‘པཉྙཔེསྶནྟཱི’’ཏིཨཱདཱིཧི ཚཧི པདེཧི ཚ ཨཏྠཔདཱནི དསྶིཏཱནི, ཨཱདིཏོ པན དྭཱིཧི པདེཧི ཚ བྱཉྫནཔདཱནི. ཨེཏྟཱཝཏཱ ཏེཔིཊཀཾ བུདྡྷཝཙནཾ སཾཝཎྞནཱནཡེན སངྒཧེཏྭཱ དསྶིཏཾ ཧོཏི. ཝུཏྟཉྷེཏཾ ནེཏྟིཡཾ (ནེཏྟི. སངྒཧཝཱརོ) ‘‘དྭཱདས པདཱནི སུཏྟཾ, ཏཾ སབྦཾ བྱཉྫནཉྩ ཨཏྠོ ཙཱ’’ཏི.

སིཀྑཱཏྟཡསངྒཧིཏནྟི ཨདྷིསཱིལསིཀྑཱདིསིཀྑཱཏྟཡསངྒཧཾ. སཀལཾ སཱསནབྲཧྨཙརིཡནྟི ཨནཝསེསཾ སཏྠུསཱསནབྷཱུཏཾ སེཊྛཙརིཡཾ. སམིདྡྷནྟི སམྨདེཝ ཝཌྜྷིཏཾ. ཛྷཱནསྶཱདཝསེནཱཏི ཏེཧི ཏེཧི བྷིཀྑཱུཧི སམདྷིགཏཛ྄ཛྷཱནསུཁཝསེན. ཝུདྡྷིཔྤཏྟནྟི ཨུལཱ༹རཔཎཱིཏབྷཱཝཱུཔགམེན སབྦསོ པརིཝུདྡྷིམུཔགཏཾ. སབྦཔཱལིཕུལླཾ ཝིཡ ཨབྷིཉྙཱསམྤཏྟིཝསེན ཨབྷིཉྙཱསམྤདཱཧི སཱསནཱབྷིཝུདྡྷིཡཱ ¶ མཏྠཀཔྤཏྟིཏོ. པཏིཊྛིཏཝསེནཱཏི པཏིཊྛཱནཝསེན, པཏིཊྛཔྤཏྟིཡཱཏི ཨཏྠོ. པཊིཝེདྷཝསེན བཧུནོ ཛནསྶ ཧིཏནྟི བཱཧུཛཉྙཾ. ཏེནཱཧ ‘‘མཧཱཛནཱབྷིསམཡཝསེནཱ’’ཏི. པུཐུ པུཐུལཾ བྷཱུཏཾ ཛཱཏཾ, པུཐུ ཝཱ པུཐུཏྟཾ པཏྟནྟི པུཐུབྷཱུཏཾ. ཏེནཱཧ ‘‘སབྦཱ…པེ... པཏྟ’’ནྟི. སུཊྛུ པཀཱསིཏནྟི སུཊྛུ སམྨདེཝ ཨཱདིཀལྱཱཎཱདིབྷཱཝེན པཝེདིཏཾ.

སཏིཾ སཱུཔཊྛིཏཾ ཀཏྭཱཏི ཨཡཾ ཀཱཡཱདིཝིབྷཱགོ ཨཏྟབྷཱཝསཉྙིཏོ དུཀྑབྷཱརོ མཡཱ ཨེཏྟཀཾ ཀཱལཾ ཝཧིཏོ, ཨིདཱནི པན ན ཝཧིཏབྦོ, ཨེཏསྶ ཨཝཧནཏྠཉྷི ཙིརཏརཾ ཀཱལཾ ཨརིཡམགྒསམྦྷཱརོ སམྦྷཏོ, སྭཱཡཾ ཨརིཡམགྒོ པཊིཝིདྡྷོ. ཡཏོ ཨིམེ ཀཱཡཱདཡོ ཨསུབྷཱདིཏོ ¶ སབྷཱཝཱདིཏོ སམྨདེཝ པརིཉྙཱཏཱཏི ཙཏུབྦིདྷམྤི སམྨཱསཏིཾ ཡཏཱཏཐཾ ཝིསཡེ སུཊྛུ ཨུཔཊྛིཏཾ ཀཏྭཱ. ཉཱཎེན པརིཙྪིནྡིཏྭཱཏི ཨིམསྶ ཨཏྟབྷཱཝསཉྙིཏསྶ དུཀྑབྷཱརསྶ ཝཧནེ པཡོཛནབྷཱུཏཾ ཨཏྟཧིཏཾ ཏཱཝ བོདྷིམཱུལེ ཨེཝ པརིསམཱཔིཏཾ, པརཧིཏཾ པན བུདྡྷཝེནེཡྻཝིནཡཾ པརིསམཱཔིཏབྦཾ, ཏཾ ཨིདཱནི མཱསཏྟཡེནེཝ པརིསམཱཔནཾ པཱཔུཎིསྶཏི, ཨཧམྤི ཝིསཱཁཱཔུཎྞམཱཡཾ པརིནིབྦཱཡིསྶཱམཱིཏི ཨེཝཾ བུདྡྷཉཱཎེན པརིཙྪིནྡིཏྭཱ སབྦབྷཱགེན ནིཙྪཡཾ ཀཏྭཱ. ཨཱཡུསངྑཱརཾ ཝིསྶཛྫཱིཏི ཨཱཡུནོ ཛཱིཝིཏསྶ ཨབྷིསངྑཱརཀཾ ཕལསམཱཔཏྟིདྷམྨཾ ན སམཱཔཛྫིསྶཱམཱིཏི ཝིསྶཛྫི. ཏཾཝིསྶཛྫནེནེཝ ཏེན ཨབྷིསངྑརིཡམཱནཾ ཛཱིཝིཏསངྑཱརཾ ‘‘ན པཝཏྟེསྶཱམཱི’’ཏི ཝིསྶཛྫི. ཏེནཱཧ ‘‘ཏཏྠཱ’’ཏིཨཱདི.

ཋཱནམཧནྟཏཱཡཔི པཝཏྟིཨཱཀཱརམཧནྟཏཱཡཔི མཧནྟོ པཐཝཱིཀམྤོ. ཏཏྠ ཋཱནམཧནྟཏཱཡ བྷཱུམིཙཱལསྶ མཧནྟཏྟཾ དསྶེཏུཾ ‘‘ཏདཱ ཀིར…པེ… ཀམྤིཏྠཱ’’ཏི ཝུཏྟཾ. སཱ པན ཛཱབྷིཀྑེཏྟབྷཱུཏཱ དསསཧསྶཱི ལོཀདྷཱཏུ ཨེཝ, ན ཡཱ ཀཱཙི. ཡཱ མཧཱབྷིནཱིཧཱརམཧཱབྷིཛཱཏིཨཱདཱིསུཔི ཀམྤིཏྠ, ཏདཱཔི ཏཏྟིཀཱཡ ཨེཝ ཀམྤནེ ཀིཾ ཀཱརཎཾ? ཛཱཏིཀྑེཏྟབྷཱཝེན ཏསྶེཝ ཨཱདིཏོ པརིགྒཧསྶ ཀཏཏྟཱ, པརིགྒཧཀརཎཾ ཙསྶ དྷམྨཏཱཝསེན ཝེདིཏབྦཾ. ཏཐཱ ཧི པུརིམབུདྡྷཱནམྤི ཏཱཝཏྟཀམེཝ ཛཱཏིཀྑེཏྟཾ ཨཧོསི. ཏཐཱ ཧི ཝུཏྟཾ ‘‘དསསཧསྶཱི ལོཀདྷཱཏུ, ནིསྶདྡཱ ཧོཏི ནིརཱཀུལཱ…པེ… མཧཱསམུདྡོ ཨཱབྷུཛཏི, དསསཧསྶཱི པཀམྤཏཱི’’ཏི (བུ. ཝཾ. ༢.༨༤-༩༡) ཙ ཨཱདི. ཨུདཀཔརིཡནྟཾ ཀཏྭཱ ཚཔྤཀཱརཔཝེདྷནེན ཨཝཱིཏརཱགེ བྷིཾསེཏཱིཏི བྷིཾསནོ, སོ ཨེཝ བྷིཾསནཀོཏི ཨཱཧ ‘‘བྷཡཛནཀོ’’ཏི. དེཝབྷེརིཡོཏི དེཝདུནྡུབྷིསདྡསྶ པརིཡཱཡཝཙནམཏྟཾ. ན ཙེཏྠ ཀཱཙི བྷེརཱི ‘‘དུནྡུབྷཱི’’ཏི ཨདྷིཔྤེཏཱ, ཨཐ ཁོ ཨུཔྤཱཏབྷཱཝེན ལབྦྷམཱནོ ཨཱཀཱསགཏོ ནིགྒྷོསསདྡོ. ཏེནཱཧ ‘‘དེཝོ’’ཏིཨཱདི. དེཝོཏི མེགྷོ. ཏསྶ ཧི གཛྫབྷཱཝེན ཨཱཀཱསསྶ ཝསྶཱབྷཱཝེན སུཀྑགཛྫིཏསཉྙིཏེ སདྡེ ནིཙྪརནྟེ དེཝདུནྡུབྷིསམཉྙཱ. ཏེནཱཧ ‘‘དེཝོ སུཀྑགཛྫིཏཾ གཛྫཱི’’ཏི.

པཱིཏིཝེགཝིསྶཊྛནྟི ¶ ‘‘ཨེཝཾ ཙིརཏརཾ ཀཱལཾ ཝཧིཏོ ཨཡཾ ཨཏྟབྷཱཝསཉྙིཏོ དུཀྑབྷཱརོ, ཨིདཱནི ན ཙིརསྶེཝ ནིཀྑིཔིསྶཱམཱི’’ཏི སཉྫཱཏསོམནསྶོ བྷགཝཱ སབྷཱཝེནེཝ པཱིཏིཝེགཝིསྶཊྛཾ ཨུདཱནཾ ཨུདཱནེསི. ཨེཝཾ ¶ པན ཨུདཱནེནྟེན ཨཡམྤི ཨཏྠོ སཱདྷིཏོ ཧོཏཱིཏི དསྶནཏྠཾ ཨཊྛཀཐཱཡཾ ‘‘ཀསྨཱ’’ཏིཨཱདི ཝུཏྟཾ.

ཏུལཱིཡཏཱིཏི ཏུལནྟི ཏུལ-སདྡོ ཀམྨསཱདྷནོཏི དསྶེཏུཾ ‘‘ཏུལིཏ’’ནྟིཨཱདི ཝུཏྟཾ. ཨཔྤཱནུབྷཱཝཏཱཡ པརིཙྪིནྣཾ. ཏཐཱ ཧི ཏཾ པརིཏོ ཁཎྜིཏབྷཱཝེན ‘‘པརིཏྟ’’ནྟི ཝུཙྩཏི. པཊིཔཀྑཝིཀྑམྦྷནཏོ དཱིགྷསནྟཱནཏཱཡ ཝིཔུལཕལཏཱཡ ཙ ན ཏུལཾ ན པརིཙྪིནྣཾ. ཡེཧི ཀཱརཎེཧི པུབྦེ ཨཝིསེསཏོ མཧགྒཏཾ ‘‘ཨཏུལ’’ནྟི ཝུཏྟཾ, ཏཱནི ཀཱརཎཱནི རཱུཔཱཝཙརཏོ ཨརཱུཔསྶ སཱཏིསཡཱནི ཝིཛྫནྟཱིཏི ཨརཱུཔཱཝཙརཾ ‘‘ཨཏུལ’’ནྟི ཝུཏྟཾ ཨིཏརཉྩ ‘‘ཏུལ’’ནྟི. ཨཔྤཝིཔཱཀནྟི ཏཱིསུཔི ཀམྨེསུ ཡཾ ཏནུཝིཔཱཀཾ ཧཱིནཾ, ཏཾ ཏུལཾ. བཧུཝིཔཱཀནྟི ཡཾ མཧཱཝིཔཱཀཾ པཎཱིཏཾ, ཏཾ ཨཏུལཾ. ཡཾ པནེཏྠ མཛ྄ཛྷིམཾ, ཏཾ ཧཱིནཾ ཨུཀྐཊྛནྟི དྭིདྷཱ བྷིནྡིཏྭཱ དྭཱིསུཔི བྷཱགེསུ པཀྑིཔིཏབྦཾ. ཧཱིནཏྟིཀཝཎྞནཱཡཾ (དྷ. ས. ཨཊྛ. ༡༤) ཝུཏྟནཡེན ཝཱ ཨཔྤབཧུཝིཔཱཀཏཾ ནིདྡྷཱརེཏྭཱ ཏསྶ ཝསེན ཏུལཱཏུལབྷཱཝོ ཝེདིཏབྦོ. སམྦྷཝཏི ཨེཏསྨཱཏི སམྦྷཝོཏི ཨཱཧ ‘‘སམྦྷཝཧེཏུབྷཱུཏ’’ནྟི. ནིཡཀཛ྄ཛྷཏྟརཏོཏི སསནྟཱནདྷམྨེསུ ཝིཔསྶནཱཝསེན གོཙརཱསེཝནཱཡ ཙ ནིརཏོ. སཝིཔཱཀམྤི སམཱནཾ པཝཏྟིཝིཔཱཀམཏྟདཱཡིཀམྨཾ སཝིཔཱཀཊྛེན སམྦྷཝཾ, ན ཙ ཏཾ ཀཱམཱདིབྷཝཱབྷིསངྑཱརཀནྟི ཏཏོ ཝིསེསནཏྠཾ ‘‘སམྦྷཝ’’ནྟི ཝཏྭཱ ‘‘བྷཝསངྑཱར’’ནྟི ཝུཏྟཾ. ཨོསྶཛཱིཏི ཨརིཡམགྒེན ཨཝསྶཛི. ཀཝཙཾ ཝིཡ ཨཏྟབྷཱཝཾ པརིཡོནནྡྷིཏྭཱ ཋིཏཾ ཨཏྟནི སམྦྷཱུཏཏྟཱ ཨཏྟསམྦྷཝཾ ཀིལེསཉྩ ཨབྷིནྡཱིཏི ཀིལེསབྷེདསཧབྷཱཝིཀམྨོསྶཛྫནཾ དསྶེནྟོ ཏདུབྷཡསྶ ཀཱརཎམཝོཙ ‘‘ཨཛ྄ཛྷཏྟརཏོ སམཱཧིཏོ’’ཏི.

པཋམཝིཀཔྤེ ཨཝསཛྫནམེཝ ཝུཏྟཾ, ཨེཏྠ ཨཝསཛྫནཱཀཱརོཏི ཏཾ དསྶེནྟོ ‘‘ཨཐ ཝཱ’’ཏིཨཱདིམཱཧ. ཏཏྠ ཏཱིརེནྟོཏི ‘‘ཨུཔྤཱདོ བྷཡཾ, ཨནུཔྤཱདོ ཁེམ’’ནྟིཨཱདིནཱ (པཊི. མ. ༡.༡༠) ཝཱིམཾསནྟོ. ‘‘ཏུལེནྟོ ཏཱིརེནྟོ’’ཏིཨཱདིནཱ སངྑེཔཏོ ཝུཏྟམཏྠཾ ཝིཏྠཱརཏོ དསྶེཏུཾ ‘‘པཉྩཀྑནྡྷཱ’’ཏིཨཱདིཾ ཝཏྭཱ བྷཝསངྑཱརསྶ ཨཝསཛྫནཱཀཱརཾ སརཱུཔཏོ དསྶེཏི. ཨེཝནྟིཨཱདིནཱ པན ཨུདཱནགཱཐཱཝཎྞནཱཡཾ ཨཱདིཏོ ཝུཏྟམཏྠཾ ནིགམཝསེན དསྶེཏི.

ཡནྟི (དཱི. ནི. ཊཱི. ༢.༡༧༡) ཀརཎེ, ཨདྷིཀརཎེ ཝཱ པཙྩཏྟཝཙནནྟི ཨཱཧ ‘‘ཡེན སམཡེན, ཡསྨིཾ ཝཱ སམཡེ’’ཏི. ཨུཀྑེཔཀཝཱཏཱཏི ཨུདཀསནྡྷཱརཀཝཱཏཾ ཨུཔཙྪིནྡིཏྭཱ ཋིཏཊྛཱནཏོ ¶ ཁེཔཀཝཱཏཱ. སཊྛི…པེ… བཧལནྟི ཨིདཾ ཏསྶ ཝཱཏསྶ ཨུབྦེདྷཔྤམཱཎམེཝ གཧེཏྭཱ ཝུཏྟཾ ¶ , ཨཱཡཱམཝིཏྠཱརཏོ པན དསསཧསྶཙཀྐཝཱལ༹པྤམཱཎཾ ཀོཊིསཏསཧསྶཙཀྐཝཱལ༹པྤམཱཎམྤི ཨུདཀསནྡྷཱརཀཝཱཏཾ ཨུཔཙྪིནྡཏིཡེཝ. ཨཱཀཱསེཏི པུབྦེ ཝཱཏེན པཏིཊྛིཏཱཀཱསེ. པུན ཝཱཏོཏི ཨུཀྑེཔཀཝཱཏེ ཏཐཱ ཀཏྭཱ ཝིགཏེ ཨུདཀསནྡྷཱརཀཝཱཏོ པུན ཨཱབནྡྷིཏྭཱ གཎྷཱཏི. ཡཐཱ ཏཾ ཨུདཀཾ ན བྷསྶཏི, ཨེཝཾ ཨུཔཏྠམྦྷེནྟཾ ཨཱབནྡྷནཝིཏཱནཝསེན བནྡྷིཏྭཱ གཎྷཱཏི. ཏཏོ ཨུདཀཾ ཨུགྒཙྪཏཱིཏི ཏཏོ ཨཱབནྡྷིཏྭཱ གཧཎཏོ ཏེན ཝཱཏེན ཨུཊྛཱཔིཏཾ ཨུདཀཾ ཨུགྒཙྪཏི ཨུཔརི གཙྪཏི. ཧོཏིཡེཝཱཏི ཨནྟརནྟརཱ ཧོཏིཡེཝ. བཧུབྷཱཝེནཱཏི མཧཱཔཐཝིཡཱ མཧནྟབྷཱཝེན. སཀལཱ ཧི མཧཱཔཐཝཱི ཏདཱ ཨོགྒཙྪཏི ཙ ཨུགྒཙྪཏི ཙ, ཏསྨཱ ཀམྤནཾ ན པཉྙཱཡཏི.

ཨིཛ྄ཛྷནསྶཱཏི ཨིཙྪིཏཏྠསིཛ྄ཛྷནསྶ ཨནུབྷཝིཏབྦསྶ ཨིསྶརིཡསམྤཏྟིཨཱདིཀསྶ. པརིཏྟཱཏི པཊིལདྡྷམཏྟཱ ནཱཏིསུབྷཱཝིཏཱ. ཏཐཱ ཙ བྷཱཝནཱ བལཝཏཱི ན ཧོཏཱིཏི ཨཱཧ ‘‘དུབྦལཱ’’ཏི. སཉྙཱསཱིསེན ཧི བྷཱཝནཱ ཝུཏྟཱ. ཨཔྤམཱཎཱཏི པགུཎཱ སུབྷཱཝིཏཱ. སཱ ཧི ཐིརཱ དལ༹ྷཏརཱ ཧོཏཱིཏི ཨཱཧ ‘‘བལཝཱ’’ཏི. ‘‘པརིཏྟཱ པཐཝཱིསཉྙཱ, ཨཔྤམཱཎཱ ཨཱཔོསཉྙཱ’’ཏི དེསནཱམཏྟམེཏཾ, ཨཱཔོསཉྙཱཡ པན སུབྷཱཝིཏཱཡ པཐཝཱིཀམྤོ སུཁེནེཝ ཨིཛ྄ཛྷཏཱིཏི ཨཡམེཏྠ ཨདྷིཔྤཱཡོ ཝེདིཏབྦོ. སཾཝེཛེནྟོ ཝཱ དིབྦསམྤཏྟིཡཱ པམཏྟཾ སཀྐཾ དེཝརཱཛཱནཾ, ཝཱིམཾསནྟོ ཝཱ ཏཱཝདེཝ སམདྷིགཏཾ ཨཏྟནོ ཨིདྡྷིབལཾ. སོ ཀིརཱཡསྨཱ (དཱི. ནི. ཨཊྛ. ༢.༡༧༡) ཁུརགྒེ ཨརཧཏྟཾ པཏྭཱ ཙིནྟེསི – ‘‘ཨཏྠི ནུ ཁོ ཀོཙི བྷིཀྑུ ཡེན པབྦཛིཏདིཝསེཡེཝ ཨརཧཏྟཾ པཏྭཱ ཝེཛཡནྟོ པཱསཱདོ ཀམྤིཏཔུབྦོ’’ཏི. ཏཏོ ‘‘ནཏྠི ཀོཙཱི’’ཏི ཉཏྭཱ ‘‘ཨཧཾ ཀམྤེསྶཱམཱི’’ཏི ཨབྷིཉྙཱབལེན ཝེཛཡནྟམཏྠཀེ ཋཏྭཱ པཱདེན པཧརིཏྭཱ ཀམྤེཏུཾ ནཱསཀྑི. ཨཐ ནཾ སཀྐསྶ ནཱཊཀིཏྠིཡོ ཨཱཧཾསུ – ‘‘པུཏྟ སངྒྷརཀྑིཏ, ཏྭཾ པཱུཏིགནྡྷེནེཝ སཱིསེན ཝེཛཡནྟཾ ཀམྤེཏུཾ ཨིཙྪསི, སུཔྤཏིཊྛིཏོ, ཏཱཏ, པཱསཱདོ, ཀཐཾ ཀམྤེཏུཾ སཀྑིསྶསཱི’’ཏི.

སཱམཎེརོ ‘‘ཨིམཱ དེཝཏཱ མཡཱ སདྡྷིཾ ཀེལི༹ཾ ཀརོནྟི, ཨཧཾ ཁོ པན ཨཱཙརིཡཾ ནཱལཏྠཾ, ཀཧཾ ནུ ཁོ མེ ཨཱཙརིཡོ སཱམུདྡིཀམཧཱནཱགཏྠེརོ’’ཏི ཨཱཝཛྫེཏྭཱ ‘‘མཧཱསམུདྡེ ཨུདཀལེཎཾ མཱཔེཏྭཱ དིཝཱཝིཧཱརཾ ¶ ནིསིནྣོ’’ཏི ཉཏྭཱ ཏཏྠ གནྟྭཱ ཐེརཾ ཝནྡིཏྭཱ ཨཊྛཱསི. ཏཏོ ནཾ ཐེརོ, ‘‘ཏཱཏ སངྒྷརཀྑིཏ, ཨསིཀྑིཏྭཱཝ ཡུདྡྷཾ པཝིཊྛོསཱི’’ཏི ཝཏྭཱ ‘‘ནཱསཀྑི, ཏཱཏ, ཝེཛཡནྟཾ ཀམྤེཏུ’’ནྟི པུཙྪི. ཨཱཙརིཡཾ, བྷནྟེ, ནཱལཏྠནྟི. ཨཐ ནཾ ཐེརོ, ‘‘ཏཱཏ, ཏུམྷཱདིསེ ཨཀམྤེནྟེ ཨཉྙོ ཀོ ཀམྤེསྶཏི, དིཊྛཔུབྦཾ ཏེ, ཏཱཏ, ཨུདཀཔིཊྛེ གོམཡཁཎྜཾ པིལཝནྟཾ, ཏཱཏ, ཀཔལླཔཱུཝཾ པཙྩནྟཾ ཨནྟནྟེན པརིཙྪིནྣནྟི ཨིམིནཱ ཨོཔམྨེན ཛཱནཱཧཱི’’ཏི ཨཱཧ. སོ ‘‘ཝཊྚིསྶཏི, བྷནྟེ, ཨེཏྟཀེནཱ’’ཏི ཝཏྭཱ ‘‘པཱསཱདེན པཏིཊྛིཏོཀཱསཾ ཨུདཀཾ ཧོཏཱུ’’ཏི ཨདྷིཊྛཱཡ ¶ ཝེཛཡནྟཱབྷིམུཁོ ཨགམཱསི. དེཝདྷཱིཏརོ ཏཾ དིསྭཱ ‘‘ཨེཀཝཱརཾ ལཛྫིཏྭཱ གཏོ, པུནཔི སཱམཎེརོ ཨེཏི, པུནཔི ཨེཏཱི’’ཏི ཝདིཾསུ. སཀྐོ དེཝརཱཛཱ ‘‘མཱ མཡ྄ཧཾ པུཏྟེན སདྡྷིཾ ཀཐཡིཏྠ, ཨིདཱནི ཏེན ཨཱཙརིཡོ ལདྡྷོ ཁཎེན པཱསཱདཾ ཀམྤེསྶཏཱི’’ཏི ཨཱཧ. སཱམཎེརོཔི པཱདངྒུཊྛེན པཱསཱདཐཱུཔིཀཾ པཧརི, པཱསཱདོ ཙཏཱུཧི དིསཱཧི ཨོཎམཏི. དེཝཏཱ ‘‘པཏིཊྛཱཏུཾ དེཧི, ཏཱཏ, པཱསཱདསྶ, པཏིཊྛཱཏུཾ དེཧི, ཏཱཏ, པཱསཱདསྶཱ’’ཏི ཝིརཝིཾསུ. སཱམཎེརོ པཱསཱདཾ ཡཐཱཋཱནེ ཋཔེཏྭཱ པཱསཱདམཏྠཀེ ཋཏྭཱ ཨུདཱནཾ ཨུདཱནེསི –

‘‘ཨཛྫེཝཱཧཾ པབྦཛིཏོ, ཨཛྫ པཏྟཱསཝཀྑཡཾ;

ཨཛྫ ཀམྤེམི པཱསཱདཾ, ཨཧོ བུདྡྷསྶུལཱ༹རཏཱ.

‘‘ཨཛྫེཝཱཧཾ པབྦཛིཏོ, ཨཛྫ པཏྟཱསཝཀྑཡཾ;

ཨཛྫ ཀམྤེམི པཱསཱདཾ, ཨཧོ དྷམྨསྶུལཱ༹རཏཱ.

‘‘ཨཛྫེཝཱཧཾ པབྦཛིཏོ, ཨཛྫ པཏྟཱསཝཀྑཡཾ;

ཨཛྫ ཀམྤེམི པཱསཱདཾ, ཨཧོ སངྒྷསྶུལཱ༹རཏཱ’’ཏི.

‘‘དྷམྨཏཱ ཨེསཱ, བྷིཀྑཝེ, ཡདཱ བོདྷིསཏྟོ ཏུསིཏཀཱཡཱ ཙཝིཏྭཱ མཱཏུཀུཙྪིཾ ཨོཀྐམཏཱི’’ཏི (དཱི. ནི. ༢.༡༨) ཝཏྭཱ ‘‘ཨཡཉྩ དསསཧསྶཱི ལོཀདྷཱཏུ སངྐམྤི སམྤཀམྤི སམྤཝེདྷཱི’’ཏི (དཱི. ནི. ༢.༡༨), ཏཐཱ ‘‘དྷམྨཏཱ ཨེསཱ, བྷིཀྑཝེ, ཡདཱ བོདྷིསཏྟོ མཱཏུཀུཙྪིམྷཱ ནིཀྑམཏཱི’’ཏི (དཱི. ནི. ༢.༣༢) ཝཏྭཱ ‘‘ཨཡཉྩ དསསཧསྶཱི ལོཀདྷཱཏུ སངྐམྤི སམྤཀམྤི སམྤཝེདྷཱི’’ཏི (དཱི. ནི. ༢.༣༢) ཙ མཧཱསཏྟསྶ གབྦྷོཀྐནྟིཡཾ ཨབྷིཛཱཏིཉྩ དྷམྨཏཱཝསེན མཧཱཔདཱནེ པཐཝཱིཀམྤསྶ ཝུཏྟཏྟཱ ཨིཏརེསུཔི ཙཏཱུསུ ཋཱནེསུ པཐཝཱིཀམྤོ དྷམྨཏཱཝསེནེཝཱཏི ཨཏྠཏོ ཝུཏྟམེཏནྟི དཊྛབྦཾ.

ཨིདཱནི ¶ ནེསཾ པཐཝཱིཀམྤཱནཾ ཀཱརཎཏོ པཝཏྟིཨཱཀཱརཏོ ཙ ཝིབྷཱགཾ དསྶེཏུཾ ‘‘ཨིཏི ཨིམེསཱུ’’ཏིཨཱདི ཝུཏྟཾ. དྷཱཏུཀོཔེནཱཏི ཨུཀྑེཔཀཝཱཏསངྑཱཏཱཡ ཝཱཡོདྷཱཏུཡཱ པཀོཔེན. ཨིདྡྷཱནུབྷཱཝེནཱཏི ཉཱཎིདྡྷིཡཱ, ཀམྨཝིཔཱཀཛིདྡྷིཡཱ ཝཱ སབྷཱཝེན, ཏེཛེནཱཏི ཨཏྠོ. པུཉྙཏེཛེནཱཏི པུཉྙཱནུབྷཱཝེན, མཧཱབོདྷིསཏྟསྶ པུཉྙབལེནཱཏི ཨཏྠོ. ཉཱཎཏེཛེནཱཏི ཨནཉྙསཱདྷཱརཎེན པཊིཝེདྷཉཱཎཱནུབྷཱཝེན. སཱདྷུཀཱརདཱནཝསེནཱཏི ཡཐཱ ཨནཉྙསཱདྷཱརཎཔྤཊིཝེདྷཉཱཎཱནུབྷཱཝེན ཨབྷིཧཏཱ མཧཱཔཐཝཱི ཨབྷིསམྦོདྷིཡཾ ཀམྤིཏྠ, ཨེཝཾ ཨནཉྙསཱདྷཱརཎེན དེསནཱཉཱཎཱནུབྷཱཝེན ¶ ཨབྷིཧཏཱ མཧཱཔཐཝཱི ཀམྤིཏྠ, ཏཾ པནསྶཱ སཱདྷུཀཱརདཱནཾ ཝིཡ ཧོཏཱིཏི ‘‘སཱདྷུཀཱརདཱནཝསེནཱ’’ཏི ཝུཏྟཾ.

ཡེན པན བྷགཝཱ ཨསཱིཏིཨནུབྱཉྫནཔྤཊིམཎྜིཏདྭཏྟིཾསམཧཱཔུརིསལཀྑཎཝིཙིཏྲརཱུཔཀཱཡོ སབྦཱཀཱརཔརིསུདྡྷསཱིལཀྑནྡྷཱདིགུཎརཏནསམིདྡྷིདྷམྨཀཱཡོ པུཉྙམཧཏྟཐཱམམཧཏྟཨིདྡྷིམཧཏྟཡསམཧཏྟཔཉྙཱམཧཏྟཱནཾ པརམུཀྐཾསགཏོ ཨསམོ ཨསམསམོ ཨཔྤཊིཔུགྒལོ ཨརཧཾ སམྨཱསམྦུདྡྷོ ཨཏྟནོ ཨཏྟབྷཱཝསཉྙིཏཾ ཁནྡྷཔཉྩཀཾ ཀཔྤཾ ཝཱ ཀཔྤཱཝསེསཾ ཝཱ ཋཔེཏུཾ སམཏྠོཔི སངྑཏདྷམྨཔརིཛིགུཙྪནཱཀཱརཔྤཝཏྟེན ཉཱཎཝིསེསེན ཏིཎཱཡཔི ཨམཉྙམཱནོ ཨཱཡུསངྑཱརོསྶཛྫནཝིདྷིནཱ ནིརཔེཀྑོ ཨོསྶཛྫི. ཏདནུབྷཱཝཱབྷིཧཏཱ མཧཱཔཐཝཱི ཨཱཡུསངྑརོསྶཛྫནེ ཨཀམྤིཏྠ. ཏཾ པནསྶཱ ཀཱརུཉྙསབྷཱཝསཎྛིཏཱ ཝིཡ ཧོཏཱིཏི ཝུཏྟཾ ‘‘ཀཱརུཉྙབྷཱཝེནཱ’’ཏི.

ཡསྨཱ བྷགཝཱ པརིནིབྦཱནསམཡེ ཙཏུཝཱིསཏིཀོཊིསཏསཧསྶསངྑཱ སམཱཔཏྟིཡོ སམཱཔཛྫི, ཨནྟརནྟརཱ ཕལསམཱཔཏྟིསམཱཔཛྫནེན ཏསྶ པུབྦབྷཱགེ སཱཏིསཡཾ ཏིཀྑཾ སཱུརཾ ཝིཔསྶནཱཉཱཎཉྩ པཝཏྟེསི. ‘‘ཡདཏྠཉྩ མཡཱ ཨེཝཾ སུཙིརཀཱལཾ ཨནཉྙསཱདྷཱརཎོ པརམུཀྐཾསགཏོ ཉཱཎསམྦྷཱརོ སམྦྷཏོ, ཨནུཏྟརོ ཙ ཝིམོཀྑོ སམདྷིགཏོ, ཏསྶ ཝཏ མེ སིཁཱཔྤཏྟཕལབྷཱུཏཱ ཨཙྩནྟནིཊྛཱ ཨནུཔཱདིསེསཔརིནིབྦཱནདྷཱཏུ ཨཛྫ སམིཛ྄ཛྷཏཱི’’ཏི བྷིཡྻོ ཨཏིཝིཡ སོམནསྶཔྤཏྟསྶ བྷགཝཏོ པཱིཏིཝིཔྥཱརཱདིགུཎཝིཔུལཏརཱནུབྷཱཝོ པརེཧི ཨསཱདྷཱརཎཉཱཎཱཏིསཡོ ཨུདཔཱདི, ཡསྶ སམཱཔཏྟིབལསམུཔབྲཱུཧིཏསྶ ཉཱཎཱཏིསཡསྶ ཨཱནུབྷཱཝཾ སནྡྷཱཡ ཨིདཾ ཝུཏྟཾ ‘‘དྭེམེ པིཎྜཔཱཏཱ སམསམཕལཱ སམསམཝིཔཱཀཱ’’ཏིཨཱདི ¶ (ཨུདཱ. ༧༥), ཏསྨཱ ཏསྶཱནུབྷཱཝེན སམབྷིཧཏཱ མཧཱཔཐཝཱི ཨཀམྤིཏྠ, ཏཾ པནསྶཱ ཏསྶཾ ཝེལཱཡཾ ཨཱརོདནཱཀཱརཔྤཏྟི ཝིཡ ཧོཏཱིཏི ‘‘ཨཊྛམོ ཨཱརོདནེནཱ’’ཏི ཝུཏྟཾ.

ཨིདཱནི སངྑེཔཏོ ཝུཏྟམཏྠཾ ཝིཝརནྟོ ‘‘མཱཏུཀུཙྪིཾ ཨོཀྐམནྟེ’’ཏིཨཱདིམཱཧ. ཨཡཾ པནཏྠོཏི ‘‘སཱདྷུཀཱརདཱནཝསེནཱ’’ཏིཨཱདིནཱ ཝུཏྟ ཨཏྠོ. པཐཝཱིདེཝཏཱཡ ཝསེནཱཏི ཨེཏྠ སམུདྡདེཝཏཱ ཝིཡ མཧཱཔཐཝིཡཱ ཨདྷིདེཝཏཱ ཀིར ནཱམ ཨཏྠི, ཏཱདིསེ ཀཱརཎེ སཏི ཏསྶཱ ཙིཏྟཝསེན ཨཡཾ མཧཱཔཐཝཱི སངྐམྤཏི སམྤཀམྤཏི སམྤཝེདྷཏི. ཡཐཱ ཝཱཏཝལཱཧཀདེཝཏཱནཾ ཙིཏྟཝསེན ཝཱཏཱ ཝཱཡནྟི, སཱིཏུཎྷཨབྦྷཝསྶཝལཱཧཀདེཝཏཱནཾ ཙིཏྟཝསེན སཱིཏཱདཡོ བྷཝནྟི, ཏཐཱ ཧི ཝིསཱཁཔུཎྞམཱཡཾ ཨབྷིསམྦོདྷིཨཏྠཾ བོདྷིརུཀྑམཱུལེ ནིསིནྣསྶ ལོཀནཱཐསྶ ཨནྟརཱཡཀརཎཏྠཾ ཨུཔཊྛིཏཾ མཱརབལཾ ཝིདྷམིཏུཾ –

‘‘ཨཙེཏནཱཡཾ ¶ པཐཝཱི, ཨཝིཉྙཱཡ སུཁཾ དུཁཾ;

སཱཔི དཱནབལཱ མཡ྄ཧཾ, སཏྟཀྑཏྟུཾ པཀམྤཐཱ’’ཏི. (ཙརིཡཱ. ༡.༡༢༤) –

ཝཙནསམནནྟརཾ མཧཱཔཐཝཱི བྷིཛྫིཏྭཱ སཔརིསཾ མཱརཾ པརིཝཏྟེསི. ཨེཏནྟི སཱདྷུཀཱརདཱནཱདི. ཡདིཔི ནཏྠི ཨཙེཏནཏྟཱ, དྷམྨཏཱཝསེན པན ཝུཏྟནཡེན སིཡཱཏི སཀྐཱ ཝཏྟུཾ. དྷམྨཏཱ པན ཨཏྠཏོ དྷམྨབྷཱཝོ, སོ པུཉྙདྷམྨསྶ ཝཱ ཉཱཎདྷམྨསྶ ཝཱ ཨཱནུབྷཱཝསབྷཱཝོཏི. ཏཡིདཾ སབྦཾ ཝིཙཱརིཏམེཝ. ཨེཝཉྩ ཀཏྭཱ –

‘‘ཨིམེ དྷམྨེ སམྨསཏོ, སབྷཱཝསརསལཀྑཎེ;

དྷམྨཏེཛེན ཝསུདྷཱ, དསསཧསྶཱི པཀམྤཐཱ’’ཏི. (བུ. ཝཾ. ༢.༡༦༦) –

ཨཱདིཝཙནཉྩ སམཏྠིཏཾ ཧོཏི.

ཨཡཾ པན (དཱི. ནི. ཨཊྛ. ༡.༡༤༩) མཧཱཔཐཝཱི ཨཔརེསུཔི ཨཊྛསུ ཋཱནེསུ ཨཀམྤིཏྠ མཧཱབྷིནིཀྑམནེ བོདྷིམཎྜཱུཔསངྐམནེ པཾསུཀཱུལགྒཧཎེ པཾསུཀཱུལདྷོཝནེ ཀཱལ༹ཀཱརཱམསུཏྟེ གོཏམཀསུཏྟེ ཝེསྶནྟརཛཱཏཀེ བྲཧྨཛཱལེཏི. ཏཏྠ མཧཱབྷིནིཀྑམནབོདྷིམཎྜཱུཔསངྐམནེསུ ཝཱིརིཡབལེན ཨཀམྤིཏྠ. པཾསུཀཱུལགྒཧཎེ ‘‘དྭིསཧསྶདཱིཔཔརིཝཱརེ ནཱམ ཙཏྟཱརོ མཧཱདཱིཔེ པཧཱཡ པབྦཛིཏྭཱ སུསཱནཾ གནྟྭཱ པཾསུཀཱུལཾ གཎྷནྟེན དུཀྐརཾ བྷགཝཏཱ ¶ ཀཏ’’ནྟི ཨཙྪརིཡཝེགཱབྷིཧཏཱ ཨཀམྤིཏྠ. པཾསུཀཱུལདྷོཝནཝེསྶནྟརཛཱཏཀེསུ ཨཀཱལཀམྤནེན ཨཀམྤིཏྠ. ཀཱལ༹ཀཱརཱམགོཏམཀསུཏྟེསུ (ཨ. ནི. ༤.༢༤; ༣.༡༢༦) ‘‘ཨཧཾ སཀྑཱི བྷགཝཱ’’ཏི སཀྑིབྷཱཝེན ཨཀམྤིཏྠ. བྲཧྨཛཱལེ (དཱི. ནི. ༡.༡༤༧) པན དྭཱསཊྛིཡཱ དིཊྛིགཏེསུ ཝིཛཊེཏྭཱ ནིགྒུམྦཾ ཀཏྭཱ དེསིཡམཱནེསུ སཱདྷུཀཱརདཱནཝསེན ཨཀམྤིཏྠཱཏི ཝེདིཏབྦཱ.

ན ཀེཝལཉྩ ཨེཏེསུཡེཝ ཋཱནེསུ པཐཝཱི ཨཀམྤིཏྠ, ཨཐ ཁོ ཏཱིསུ སངྒཧེསུཔི མཧཱམཧིནྡཏྠེརསྶ ཨིམཾ དཱིཔཾ ཨཱགནྟྭཱ ཛོཏིཝནེ ནིསཱིདིཏྭཱ དྷམྨཾ དེསིཏདིཝསེཔི ཨཀམྤིཏྠ. ཀལྱཱཎིཡམཧཱཝིཧཱརེ ཙ པིཎྜཔཱཏིཡཏྠེརསྶ ཙེཏིཡངྒཎཾ སམྨཛྫིཏྭཱ ཏཏྠེཝ ནིསཱིདིཏྭཱ བུདྡྷཱརམྨཎཾ པཱིཏིཾ གཧེཏྭཱ ཨིམཾ སུཏྟནྟཾ ཨཱརདྡྷསྶ སུཏྟཔརིཡོསཱནེ ཨུདཀཔརིཡནྟཾ ཀཏྭཱ ཨཀམྤིཏྠ. ལོཧཔཱསཱདསྶ པཱཙཱིནཨམྦལཊྛིཀཊྛཱནཾ ནཱམ ཨཧོསི, ཏཏྠ ནིསཱིདིཏྭཱ དཱིགྷབྷཱཎཀཏྠེརཱ བྲཧྨཛཱལསུཏྟཾ ཨཱརབྷིཾསུ. ཏེསཾ སཛ྄ཛྷཱཡཔརིཡོསཱནེཔི ཨུདཀཔརིཡནྟམེཝ ཀཏྭཱ པཐཝཱི ཨཀམྤིཏྠ.

ཡདི ¶ ཨེཝཾ ‘‘ཨཊྛིམེ, ཨཱནནྡ, ཧེཏཱུ ཨཊྛ པཙྩཡཱ མཧཏོ བྷཱུམིཙཱལསྶ པཱཏུབྷཱཝཱཡཱ’’ཏི ཀསྨཱ ཨཊྛེཝ ཧེཏཱུ ཝུཏྟཱཏི? ནིཡམཧེཏུབྷཱཝཏོ. ཨིམེཡེཝ ཧི ཨཊྛ ཧེཏཱུ ནིཡམནྟི, ནཱཉྙེ. ཏེ ཧི ཀདཱཙི སམྦྷཝནྟཱིཏི ཨནིཡམབྷཱཝཏོ ན གཎིཏཱ. ཝུཏྟཉྷེཏཾ ནཱགསེནཏྠེརེན མིལིནྡཔཉྷེ (མི. པ. ༤.༡.༤) –

‘‘ཨཊྛིམེ, བྷིཀྑཝེ, ཧེཏཱུ ཨཊྛ པཙྩཡཱ མཧཏོ བྷཱུམིཙཱལསྶ པཱཏུབྷཱཝཱཡཱཏི. ཡཾ ཝེསྶནྟརེན རཉྙཱ མཧཱདཱནེ དཱིཡམཱནེ སཏྟཀྑཏྟུཾ མཧཱཔཐཝཱི ཀམྤིཏཱ, ཏཉྩ པན ཨཀཱལིཀཾ ཀདཱཙུཔྤཏྟིཀཾ ཨཊྛཧི ཧེཏཱུཧི ཝིཔྤམུཏྟཾ, ཏསྨཱ ཨགཎིཏཾ ཨཊྛཧི ཧེཏཱུཧི.

‘‘ཡཐཱ, མཧཱརཱཛ, ལོཀེ ཏཡོཡེཝ མེགྷཱ གཎཱིཡནྟི ཝསྶིཀོ, ཧེམནྟིཀོ, པཱཝུསཀོཏི. ཡདི ཏེ མུཉྩིཏྭཱ ཨཉྙོ མེགྷོ པཝསྶཏི, ན སོ མེགྷོ གཎཱིཡཏི སམྨཏེཧི མེགྷེཧི, ཨཀཱལམེགྷོཏྭེཝ སངྑཾ གཙྪཏི, ཨེཝམེཝ ཁོ, མཧཱརཱཛ, ཝེསྶནྟརེན རཉྙཱ མཧཱདཱནེ དཱིཡམཱནེ ¶ ཡཾ སཏྟཀྑཏྟུཾ མཧཱཔཐཝཱི ཀམྤིཏཱ, ཨཀཱལིཀཾ ཨེཏཾ ཀདཱཙུཔྤཏྟིཀཾ ཨཊྛཧི ཧེཏཱུཧི ཝིཔྤམུཏྟཾ, ན ཏཾ གཎཱིཡཏི ཨཊྛཧི ཧེཏཱུཧི.

‘‘ཡཐཱ ཝཱ པན, མཧཱརཱཛ, ཧིམཝནྟཱ པབྦཏཱ པཉྩ ནདིསཏཱནི སནྡནྟི, ཏེསཾ, མཧཱརཱཛ, པཉྩནྣཾ ནདིསཏཱནཾ དསེཝ ནདིཡོ ནདིགཎནཱཡ གཎཱིཡནྟི. སེཡྻཐིདཾ – གངྒཱ, ཡམུནཱ, ཨཙིརཝཏཱི, སརབྷཱུ, མཧཱི, སིནྡྷུ, སརསྶཏཱི, ཝེཏྲཝཏཱི, ཝཱིཏཾསཱ, ཙནྡབྷཱགཱཏི. ཨཝསེསཱ ནདིཡོ ནདིགཎནཱཡ ཨགཎིཏཱ. ཀིཾཀཱརཎཱ? ན ཏཱ ནདིཡོ དྷུཝསལིལཱ, ཨེཝམེཝ ཁོ, མཧཱརཱཛ, ཝེསྶནྟརེན རཉྙཱ མཧཱདཱནེ དཱིཡམཱནེ ཡཾ སཏྟཀྑཏྟུཾ མཧཱཔཐཝཱི ཀམྤིཏཱ, ཨཀཱལིཀཾ ཨེཏཾ ཀདཱཙུཔྤཏྟིཀཾ ཨཊྛཧི ཧེཏཱུཧི ཝིཔྤམུཏྟཾ, ན ཏཾ གཎཱིཡཏི ཨཊྛཧི ཧེཏཱུཧི.

‘‘ཡཐཱ ཝཱ པན, མཧཱརཱཛ, རཉྙོ སཏམྤི དྭིསཏམྤི ཏིསཏམྤི ཨམཙྩཱ ཧོནྟི, ཏེསཾ ཚཡེཝ ཛནཱ ཨམཙྩགཎནཱཡ གཎཱིཡནྟི. སེཡྻཐིདཾ – སེནཱཔཏི, པུརོཧིཏོ, ཨཀྑདསྶོ, བྷཎྜཱགཱརིཀོ, ཚཏྟགྒཱཧཀོ, ཁགྒགྒཱཧཀོ, ཨེཏེཡེཝ ཨམཙྩགཎནཱཡ གཎཱིཡནྟི. ཀིཾཀཱརཎཱ? ཡུཏྟཏྟཱ རཱཛགུཎེཧི. ཨཝསེསཱ ཨགཎིཏཱ, སབྦེ ཨམཙྩཱཏྭེཝ སངྑཾ གཙྪནྟི, ཨེཝམེཝ ཁོ, མཧཱརཱཛ, ཝེསྶནྟརེན རཉྙཱ མཧཱདཱནེ དཱིཡམཱནེ ¶ ཡཾ སཏྟཀྑཏྟུཾ མཧཱཔཐཝཱི ཀམྤིཏཱ, ཨཀཱལིཀཾ ཨེཏཾ ཀདཱཙུཔྤཏྟིཀཾ ཨཊྛཧི ཧེཏཱུཧི ཝིཔྤམུཏྟཾ, ན ཏཾ གཎཱིཡཏི ཨཊྛཧི ཧེཏཱུཧཱི’’ཏི.

བྷཱུམིཙཱལསུཏྟཝཎྞནཱ ནིཊྛིཏཱ.

ཙཱཔཱལཝགྒཝཎྞནཱ ནིཊྛིཏཱ.

(༨) ༣. ཡམཀཝགྒོ

༡-༡༠. སདྡྷཱསུཏྟཱདིཝཎྞནཱ

༧༡-༨༠. ཨཊྛམསྶ པཋམཱདཱིནི ཨུཏྟཱནཏྠཱནེཝ. དསམེ ཀུཙྪིཏཾ སཱིདཏཱིཏི ཀུསཱིཏོ ད-ཀཱརསྶ ཏ-ཀཱརཾ ཀཏྭཱ. ཡསྶ དྷམྨསྶ ཝསེན ¶ པུགྒལོ ‘‘ཀུསཱིཏོ’’ཏི ཝུཙྩཏི, སོ ཀུསིཏབྷཱཝོ ཨིདྷ ཀུསིཏ-སདྡེན ཝུཏྟོ. ཝིནཱཔི ཧི བྷཱཝཛོཏནསདྡཾ བྷཱཝཏྠོ ཝིཉྙཱཡཏི ཡཐཱ ‘‘པཊསྶ སུཀྐ’’ནྟི, ཏསྨཱ ཀུསཱིཏབྷཱཝཝཏྠཱུནཱིཏི ཨཏྠོ. ཏེནཱཧ ‘‘ཀོསཛྫཀཱརཎཱནཱིཏི ཨཏྠོ’’ཏི. ཀམྨཾ ནཱམ སམཎསཱརུཔྤཾ ཨཱིདིསནྟི ཨཱཧ ‘‘ཙཱིཝརཝིཙཱརཎཱདཱི’’ཏི. ཝཱིརིཡནྟི པདྷཱནཝཱིརིཡཾ. ཏཾ པན ཙངྐམནཝསེན ཀརཎེ ཀཱཡིཀནྟིཔི ཝཏྟབྦཏཾ ལབྷཏཱིཏི ཨཱཧ ‘‘དུཝིདྷམྤཱི’’ཏི. པཏྟིཡཱཏི པཱཔུཎནཏྠཾ. ཨོསཱིདནནྟི བྷཱཝནཱནུཡོགེ སངྐོཙོ. མཱསེཧི ཨཱཙིཏཾ ནིཙིཏཾ ཝིཡཱཏི མཱསཱཙིཏཾ, ཏཾ མཉྙེ. ཡསྨཱ མཱསཱ ཏིནྟཱ ཝིསེསེན གརུཀཱ ཧོནྟི, ཏསྨཱ ‘‘ཡཐཱ ཏིནྟམཱསོ’’ཏིཨཱདི ཝུཏྟཾ. ཝུཊྛིཏོ ཧོཏི གིལཱནབྷཱཝཱཏི ཨདྷིཔྤཱཡོ.

ཏེསནྟི ཨཱརམྦྷཝཏྠཱུནཾ. ཨིམིནཱཝ ནཡེནཱཏི ཨིམིནཱ ཀུསཱིཏཝཏྠཱུསུ ཝུཏྟེནེཝ ནཡེན ‘‘དུཝིདྷམྤི ཝཱིརིཡཾ ཨཱརབྷཏཱི’’ཏིཨཱདིནཱ. ཨིདཾ པཋམནྟི ‘‘ཨིདཾ, ཧནྡཱཧཾ, ཝཱིརིཡཾ ཨཱརབྷཱམཱི’’ཏི, ‘‘ཨེཝཾ བྷཱཝནཱཡ ཨབྦྷུསྶཧནཾ པཋམཾ ཨཱརམྦྷཝཏྠཱུ’’ཏིཨཱདིནཱ ཙ ཨཏྠོ ཝེདིཏབྦོ. ཡཐཱ ཏཐཱ པཋམཾ པཝཏྟཾ ཨབྦྷུསྶཧནཉྷི ཨུཔརི ཝཱིརིཡཱརམྦྷསྶ ཀཱརཎཾ ཧོཏི. ཨནུརཱུཔཔཙྩཝེཀྑཎསཧིཏཱནི ¶ ཧི ཨབྦྷུསྶཧནཱནི ཏམྨཱུལཀཱནི ཝཱ པཙྩཝེཀྑཎཱནི ཨཊྛ ཨཱརམྦྷཝཏྠཱུནཱིཏི ཝེདིཏབྦཱནི.

སདྡྷཱསུཏྟཱདིཝཎྞནཱ ནིཊྛིཏཱ.

ཡམཀཝགྒཝཎྞནཱ ནིཊྛིཏཱ.

༨༡-༦༢༦. སེསཾ ཨུཏྟཱནམེཝ.

ཨིཏི མནོརཐཔཱུརཎིཡཱ ཨངྒུཏྟརནིཀཱཡ-ཨཊྛཀཐཱཡ

ཨཊྛཀནིཔཱཏཝཎྞནཱཡ ཨནུཏྟཱནཏྠདཱིཔནཱ སམཏྟཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ.

ཨངྒུཏྟརནིཀཱཡེ

ནཝཀནིཔཱཏ-ཊཱིཀཱ

༡. པཋམཔཎྞཱསཀཾ

༡. སམྦོདྷིཝགྒོ

༡-༢. སམྦོདྷིསུཏྟཱདིཝཎྞནཱ

༡-༢. ནཝཀནིཔཱཏསྶ ¶ ¶ པཋམདུཏིཡེསུ ནཏྠི ཝཏྟབྦཾ.

༣. མེགྷིཡསུཏྟཝཎྞནཱ

༣. ཏཏིཡེ (ཨུདཱ. ཨཊྛ. ༣༡) མེགྷིཡོཏི ཏསྶ ཐེརསྶ ནཱམཾ. ཨུཔཊྛཱཀོ ཧོཏཱིཏི པརིཙཱརཀོ ཧོཏི. བྷགཝཏོ ཧི པཋམབོདྷིཡཾ ཨུཔཊྛཱཀཱ ཨནིབདྡྷཱ ཨཧེསུཾ. ཨེཀདཱ ནཱགསམལོ, ཨེཀདཱ ནཱགིཏོ, ཨེཀདཱ ཨུཔཝཱཎོ, ཨེཀདཱ སུནཀྑཏྟོ, ཨེཀདཱ ཙུནྡོ སམཎུདྡེསོ ¶ , ཨེཀདཱ སཱགཏོ, ཨེཀདཱ མེགྷིཡོ, ཏདཱཔི མེགྷིཡཏྠེརོཝ ཨུཔཊྛཱཀོ ཧོཏི. ཏེནཱཧ ‘‘ཏེན ཁོ པན སམཡེན ཨཱཡསྨཱ མེགྷིཡོ བྷགཝཏོ ཨུཔཊྛཱཀོ ཧོཏཱི’’ཏི.

ཀིམིཀཱལཱ༹ཡཱཏི ཀཱལ༹ཀིམཱིནཾ བཧུལཏཱཡ ‘‘ཀིམིཀཱལཱ༹’’ཏི ལདྡྷནཱམཱཡ ནདིཡཱ. ཛངྒྷཱཝིཧཱརནྟི ཙིརནིསཛྫཱཡ ཛངྒྷཱསུ ཨུཔྤནྣཀིལམཐཝིནོདནཏྠཾ ཝིཙརཎཾ. པཱསཱདིཀནྟི ཨཝིརལ༹རུཀྑཏཱཡ སིནིདྡྷཔཏྟཏཱཡ ཙ པསྶནྟཱནཾ པསཱདཾ ཨཱཝཧཏཱིཏི པཱསཱདིཀཾ. སནྡཙྪཱཡཏཱཡ མནུཉྙབྷཱུམིབྷཱགཏཱཡ ཙ ཨནྟོ པཝིཊྛཱནཾ པཱིཏིསོམནསྶཛནནཊྛེན ཙིཏྟཾ རམེཏཱིཏི རམཎཱིཡཾ. ཨལནྟི པརིཡཏྟཾ, ཡུཏྟནྟིཔི ཨཏྠོ. པདྷཱནཏྠིཀསྶཱཏི པདྷཱནེན བྷཱཝནཱནུཡོགེན ཨཏྠིཀསྶ. ཡསྨཱ སོ པདྷཱནཀམྨེ ཡུཏྟོ པདྷཱནཀམྨིཀོ ནཱམ ཧོཏི, ཏསྨཱ ཝུཏྟཾ ‘‘པདྷཱནཀམྨིཀསྶཱ’’ཏི. ཨཱགཙྪེཡྻཱཧནྟི ཨཱགཙྪེཡྻཾ ཨཧཾ. ཐེརེན ཀིར པུབྦེ ཏཾ ཋཱནཾ ཨནུཔྤཊིཔཱཊིཡཱ པཉྩ ཛཱཏིསཏཱནི རཉྙཱ ཨེཝ སཏཱ ཨནུབྷཱུཏཔུབྦཾ ཨུཡྻཱནཾ ཨཧོསི, ཏེནསྶ དིཊྛམཏྟེཡེཝ ཏཏྠ ཝིཧརིཏུཾ ཙིཏྟཾ ནམི.

ཡཱཝ ¶ ཨཉྙོཔི ཀོཙི བྷིཀྑུ ཨཱགཙྪཏཱིཏི ཨཉྙོ ཀོཙིཔི བྷིཀྑུ མམ སནྟིཀཾ ཡཱཝ ཨཱགཙྪཏི, ཏཱཝ ཨཱགམེཧཱིཏི ཨཏྠོ. ‘‘ཀོཙི བྷིཀྑུ དིསྶཏཱི’’ཏིཔི པཱཋོ, ‘‘ཨཱགཙྪཏཱུ’’ཏིཔི པཋནྟི, ཏཐཱ ‘‘དིསྶཏཱུ’’ཏིཔི. ནཏྠི ཀིཉྩི ཨུཏྟརི ཀརཎཱིཡནྟི ཙཏཱུསུ སཙྩེསུ ཙཏཱུཧི མགྒེཧི པརིཉྙཱདཱིནཾ སོལ༹སནྣཾ ཀིཙྩཱནཾ ཀཏཏྟཱ ཨབྷིསམྦོདྷིཡཱ ཝཱ ཨདྷིགཏཏྟཱ ཏཏོ ཨཉྙཾ ཨུཏྟརི ཀརཎཱིཡཾ ནཱམ ནཏྠི. ཙཏཱུསུ སཙྩེསུ ཙཏུནྣཾ ཀིཙྩཱནཾ ཀཏཏྟཱཏི ཨིདཾ པན མགྒཝསེན ལབྦྷབྷཱནཾ བྷེདཾ ཨནུཔེཀྑིཏྭཱ ཝུཏྟཾ. ཨཏྠི ཀཏསྶ པཊིཙཡོཏི མཡ྄ཧཾ སནྟཱནེ ནིཔྥཱདིཏསྶ སཱིལཱདིདྷམྨསྶ ཨརིཡམགྒསྶ ཨནདྷིགཏཏྟཱ ཏདཏྠཾ པུན ཝཌྜྷནསངྑཱཏོ པཊིཙཡོ ཨཏྠི, ཨིཙྪིཏབྦོཏི ཨཏྠོ.

ཏིཝིདྷནཱཊཀཔརིཝཱརོཏི མཧནྟིཏྠིཡོ མཛ྄ཛྷིམིཏྠིཡོ ཨཏིཏརུཎིཏྠིཡོཏི ཨེཝཾ ཝདྷཱུཀུམཱརིཀཀཉྙཱཝཏྠཱཧི ཏིཝིདྷཱཧི ནཱཊཀིཏྠཱིཧི པརིཝུཏོ. ཨཀུསལཝིཏཀྐེཧཱིཏི ཡཐཱཝུཏྟེཧི ཀཱམཝིཏཀྐཱདཱིཧི. ཨཔརེ པན ‘‘ཏསྨིཾ ཝནསཎྜེ པུཔྥཕལཔལླཝཱདཱིསུ ལོབྷཝསེན ཀཱམཝིཏཀྐོ, ཁརསྶརཱནཾ པཀྑིཨཱདཱིནཾ སདྡསྶཝནེན བྱཱཔཱདཝིཏཀྐོ, ལེཌྜུཨཱདཱིཧི ཏེསཾ ཝིཧེཋནཱདྷིཔྤཱཡེན ཝིཧིཾསཱཝིཏཀྐོ. ‘ཨིདྷེཝཱཧཾ ཝསེཡྻ’ནྟི ཏཏྠ སཱཔེཀྑཏཱཝསེན ཝཱ ཀཱམཝིཏཀྐོ, ཝནཙརཀེ ཏཏྠ ཏཏྠ དིསྭཱ ཏེསུ ཙིཏྟདུབྦྷནེན བྱཱཔཱདཝིཏཀྐོ, ཏེསཾ ཝིཧེཋནཱདྷིཔྤཱཡེན ཝིཧིཾསཱཝིཏཀྐོ ཏསྶ ཨུཔྤཛྫཏཱི’’ཏི ཝདནྟི. ཡཐཱ ཏཐཱ ཝཱ ཏསྶ མིཙྪཱཝིཏཀྐཔྤཝཏྟིཡེཝ ཨཙྪརིཡཀཱརཎཾ. ཨཙྪརིཡཾ ཝཏ, བྷོཏི གརཧཎཙྪརིཡཾ ནཱམ ཀིརེཏཾ ¶ . ཡཐཱ ཨཱཡསྨཱ ཨཱནནྡོ བྷགཝཏོ ཝལིཡགཏྟཾ དིསྭཱ ཨཝོཙ ‘‘ཨཙྪརིཡཾ, བྷནྟེ, ཨབྦྷུཏཾ, བྷནྟེ’’ཏི (སཾ. ནི. ༥.༥༡༡). སམྤརིཝཱརིཏཱཏི ཝོཀིཎྞཱ. ཨཏྟནི གརུམྷི ཙ ཨེཀཏྟེཔི བཧུཝཙནཾ དིསྶཏི. ‘‘ཨནྭཱསཏྟོ’’ཏིཔི པཱཋོ. ཀསྨཱ པནསྶ བྷགཝཱ ཏཏྠ གམནཾ ཨནུཛཱནི? ‘‘ཨནནུཉྙཱཏོཔི ཙཱཡཾ མཾ ཨོཧཱཡ གཙྪིསྶཏེཝ, པརིཙཱརཀཱམཏཱཡ མཉྙེ བྷགཝཱ གནྟུཾ ན དེཏཱིཏི ཙསྶ སིཡཱ ཨཉྙཐཏྟཾ, ཏདསྶ དཱིགྷརཏྟཾ ཨཧིཏཱཡ དུཀྑཱཡ སཾཝཏྟེཡྻཱ’’ཏི ཨནུཛཱནི.

ཨེཝཾ ཏསྨིཾ ཨཏྟནོ པཝཏྟིཾ ཨཱརོཙེཏྭཱ ནིསིནྣེ ཨཐསྶ བྷགཝཱ སཔྤཱཡདྷམྨཾ དེསེནྟོ ‘‘ཨཔརིཔཀྐཱཡ, མེགྷིཡ, ཙེཏོཝིམུཏྟིཡཱ’’ཏིཨཱདིམཱཧ. ཏཏྠ ‘‘ཨཔརིཔཀྐཱཡཱ’’ཏི པརིཔཱཀཾ ཨཔྤཏྟཱཡ. ཙེཏོཝིམུཏྟིཡཱཏི ¶ ཀིལེསེཧི ཙེཏསོ ཝིམུཏྟིཡཱ. པུབྦབྷཱགེ ཧི ཏདངྒཝསེན ཙེཝ ཝིཀྑམྦྷནཝསེན ཙ ཙེཏསོ ཝིམུཏྟི ཧོཏི, ཨཔརབྷཱགེ སམུཙྪེདཝསེན ཙེཝ པཊིཔྤསྶདྡྷིཝསེན ཙ. སཱཡཾ ཝིམུཏྟི ཧེཊྛཱ ཝིཏྠཱརཏོ ཀཐིཏཱཝ, ཏསྨཱ ཏཏྠ ཝུཏྟནཡེན ཝེདིཏབྦཱ. ཏཏྠ ཝིམུཏྟིཔརིཔཱཙནཱིཡེཧི དྷམྨེཧི ཨཱསཡེ པརིཔཱཙིཏེ སོདྷིཏེ ཝིཔསྶནཱཡ མགྒགབྦྷཾ གཎྷནྟིཡཱ པརིཔཱཀཾ གཙྪནྟིཡཱ ཙེཏོཝིམུཏྟི པརིཔཀྐཱ ནཱམ ཧོཏི, ཏདབྷཱཝེ ཨཔརིཔཀྐཱ.

ཀཏམེ པན ཝིམུཏྟིཔརིཔཱཙནཱིཡཱ དྷམྨཱ? སདྡྷིནྡྲིཡཱདཱིནཾ ཝིསུདྡྷིཀརཎཝསེན པནྣརས དྷམྨཱ ཝེདིཏབྦཱ. ཝུཏྟཉྷེཏཾ –

‘‘ཨསྶདྡྷེ པུགྒལེ པརིཝཛྫཡཏོ, སདྡྷེ པུགྒལེ སེཝཏོ བྷཛཏོ པཡིརུཔཱསཏོ, པསཱདནཱིཡེ སུཏྟནྟེ པཙྩཝེཀྑཏོ ཨིམེཧི ཏཱིཧཱཀཱརེཧི སདྡྷིནྡྲིཡཾ ཝིསུཛ྄ཛྷཏི.

‘‘ཀུསཱིཏེ པུགྒལེ པརིཝཛྫཡཏོ, ཨཱརདྡྷཝཱིརིཡེ པུགྒལེ སེཝཏོ བྷཛཏོ པཡིརུཔཱསཏོ, སམྨཔྤདྷཱནེ པཙྩཝེཀྑཏོ ཨིམེཧི ཏཱིཧཱཀཱརེཧི ཝཱིརིཡིནྡྲིཡཾ ཝིསུཛ྄ཛྷཏི.

‘‘མུཊྛསྶཏཱི པུགྒལེ པརིཝཛྫཡཏོ, ཨུཔཊྛིཏསྶཏཱི པུགྒལེ སེཝཏོ བྷཛཏོ པཡིརུཔཱསཏོ, སཏིཔཊྛཱནེ པཙྩཝེཀྑཏོ ཨིམེཧི ཏཱིཧཱཀཱརེཧི སཏིནྡྲིཡཾ ཝིསུཛ྄ཛྷཏི.

‘‘ཨསམཱཧིཏེ པུགྒལེ པརིཝཛྫཡཏོ, སམཱཧིཏེ པུགྒལེ སེཝཏོ བྷཛཏོ པཡིརུཔཱསཏོ, ཛྷཱནཝིམོཀྑེ པཙྩཝེཀྑཏོ ཨིམེཧི ཏཱིཧཱཀཱརེཧི སམཱདྷིནྡྲིཡཾ ཝིསུཛ྄ཛྷཏི.

‘‘དུཔྤཉྙེ ¶ པུགྒལེ པརིཝཛྫཡཏོ, པཉྙཝནྟེ པུགྒལེ སེཝཏོ བྷཛཏོ པཡིརུཔཱསཏོ, གམྦྷཱིརཉཱཎཙརིཡཾ པཙྩཝེཀྑཏོ ཨིམེཧི ཏཱིཧཱཀཱརེཧི པཉྙིནྡྲིཡཾ ཝིསུཛ྄ཛྷཏི.

‘‘ཨིཏི ཨིམེ པཉྩ པུགྒལེ པརིཝཛྫཡཏོ, པཉྩ པུགྒལེ སེཝཏོ བྷཛཏོ པཡིརུཔཱསཏོ, པཉྩ སུཏྟནྟེ པཙྩཝེཀྑཏོ ཨིམེཧི པནྣརསཧི ཨཱཀཱརེཧི ཨིམཱནི པཉྩིནྡྲིཡཱནི ཝིསུཛ྄ཛྷནྟཱི’’ཏི (པཊི. མ. ༡.༡༨༥).

ཨཔརེཧིཔི ¶ པནྣརསཧི ཨཱཀཱརེཧི ཨིམཱནི པཉྩིནྡྲིཡཱནི ཝིསུཛ྄ཛྷནྟི. ཨཔརེཔི པནྣརས དྷམྨཱ ཝིམུཏྟིཔརིཔཱཙནཱིཡཱ. སདྡྷཱཔཉྩམཱནི ཨིནྡྲིཡཱནི, ཨནིཙྩསཉྙཱ ཨནིཙྩེ, དུཀྑསཉྙཱ དུཀྑེ, ཨནཏྟསཉྙཱ, པཧཱནསཉྙཱ, ཝིརཱགསཉྙཱཏི ཨིམཱ པཉྩ ནིབྦེདྷབྷཱགིཡཱ སཉྙཱ, ཀལྱཱཎམིཏྟཏཱ, སཱིལསཾཝརོ, ཨབྷིསལླེཁཏཱ, ཝཱིརིཡཱརམྦྷོ, ནིབྦེདྷིཀཔཉྙཱཏི. ཏེསུ ཝེནེཡྻདམནཀུསལོ སཏྠཱ ཝེནེཡྻསྶ མེགྷིཡཏྠེརསྶ ཨཛ྄ཛྷཱསཡཝསེན ཨིདྷ ཀལྱཱཎམིཏྟཏཱདཡོ ཝིམུཏྟིཔརིཔཱཙནཱིཡེ དྷམྨེ དསྶེནྟོ ‘‘པཉྩ དྷམྨཱ པརིཔཀྐཱཡ སཾཝཏྟནྟཱི’’ཏི ཝཏྭཱ ཏེ ཝིཏྠཱརེནྟོ ‘‘ཨིདྷ, མེགྷིཡ, བྷིཀྑུ ཀལྱཱཎམིཏྟོ ཧོཏཱི’’ཏིཨཱདིམཱཧ.

ཏཏྠ ཀལྱཱཎམིཏྟོཏི ཀལྱཱཎོ བྷདྡོ སུནྡརོ མིཏྟོ ཨེཏསྶཱཏི ཀལྱཱཎམིཏྟོ. ཡསྶ སཱིལཱདིགུཎསམྤནྣོ ‘‘ཨགྷསྶ ཏཱཏཱ ཧིཏསྶ ཝིདྷཱཏཱ’’ཏི ཨེཝཾ སབྦཱཀཱརེན ཨུཔཀཱརོ མིཏྟོ ཧོཏི, སོ པུགྒལོ ཀལྱཱཎམིཏྟོཝ. ཡཐཱཝུཏྟེཧི ཀལྱཱཎཔུགྒལེཧེཝ སབྦིརིཡཱཔཐེསུ སཧ ཨཡཏི པཝཏྟཏི, ན ཝིནཱ ཏེཧཱིཏི ཀལྱཱཎསཧཱཡོ. ཀལྱཱཎཔུགྒལེསུ ཨེཝ ཙིཏྟེན ཙེཝ ཀཱཡེན ཙ ནིནྣཔོཎཔབྦྷཱརབྷཱཝེན པཝཏྟཏཱིཏི ཀལྱཱཎསམྤཝངྐོ. པདཏྟཡེན ཀལྱཱཎམིཏྟསཾསགྒེ ཨཱདརཾ ཨུཔྤཱདེཏི. ཨཡཾ ཀལྱཱཎམིཏྟཏཱསངྑཱཏོ བྲཧྨཙརིཡཝཱསསྶ ཨཱདིབྷཱཝཏོ སབྦེསཉྩ ཀུསལདྷམྨཱནཾ བཧུཀཱརཏཱཡ པདྷཱནབྷཱཝཏོ ཙ ཨིམེསུ པཉྩསུ དྷམྨེསུ ཨཱདིཏོ ཝུཏྟཏྟཱ པཋམོ ཨནཝཛྫདྷམྨོ ཨཝིསུདྡྷཱནཾ སདྡྷཱདཱིནཾ ཝིསུདྡྷིཀརཎཝསེན ཙེཏོཝིམུཏྟིཡཱ པརིཔཀྐཱཡ སཾཝཏྟཏི. ཨེཏྠ ཙ ཀལྱཱཎམིཏྟསྶ བཧུཀཱརཏཱ པདྷཱནཏཱ ཙ ‘‘ཨུཔཌྜྷམིདཾ, བྷནྟེ, བྲཧྨཙརིཡསྶ ཡདིདཾ ཀལྱཱཎམིཏྟཏཱ’’ཏི ཝདནྟཾ དྷམྨབྷཎྜཱགཱརིཀཾ ‘‘མཱ ཧེཝཾ, ཨཱནནྡཱ’’ཏི དྭིཀྑཏུཾ པཊིསེདྷེཏྭཱ ‘‘སཀལམེཝ ཧིདཾ, ཨཱནནྡ, བྲཧྨཙརིཡཾ ཡདིདཾ ཀལྱཱཎམིཏྟཏཱ ཀལྱཱཎསཧཱཡཏཱ’’ཏི – ཨཱདིསུཏྟཔདེཧི (སཾ. ནི. ༡.༡༢༩; ༥.༢) ཝེདིཏབྦཱ.

པུན ཙཔརནྟི པུན ཙ ཨཔརཾ དྷམྨཛཱཏཾ. སཱིལཝཱཏི ཨེཏྠ ཀེནཊྛེན སཱིལཾ? སཱིལནཊྛེན སཱིལཾ ¶ . ཀིམིདཾ སཱིལནཾ ནཱམ? སམཱདྷཱནཾ, ཀཱཡཀམྨཱདཱིནཾ སུསཱིལྱཝསེན ཨཝིཔྤཀིཎྞཏཱཏི ཨཏྠོ. ཨཐ ཝཱ ཨུཔདྷཱརཎཾ, ཛྷཱནཱདིཀུསལདྷམྨཱནཾ པཏིཊྛཱནཝསེན ཨཱདྷཱརབྷཱཝོཏི ཨཏྠོ. ཏསྨཱ སཱིལེཏི, སཱིལཏཱིཏི ཝཱ སཱིལཾ. ཨཡཾ ཏཱཝ སདྡལཀྑཎནཡེན སཱིལཊྛོ. ཨཔརེ ¶ པན ‘‘སིརཊྛོ སཱིལཊྛོ, སཱིཏལཊྛོ, སཱིལཊྛོ’’ཏི ནིརུཏྟིནཡེན ཨཏྠཾ ཝཎྞེནྟི. ཏཡིདཾ པཱརིཔཱུརིཏོ ཨཏིསཡཏོ ཝཱ སཱིལཾ ཨསྶ ཨཏྠཱིཏི སཱིལཝཱ, སཱིལསམྤནྣོཏི ཨཏྠོ.

ཡཐཱ ཙ སཱིལཝཱ ཧོཏི སཱིལསམྤནྣོ, ཏཾ དསྶེཏུཾ ‘‘པཱཏིམོཀྑསཾཝརསཾཝུཏོ’’ཏིཨཱདི ཝུཏྟཾ. ཏཏྠ པཱཏིམོཀྑནྟི སིཀྑཱཔདསཱིལཾ. ཏཉྷི ཡོ ནཾ པཱཏི རཀྑཏི, ཏཾ མོཀྑེཏི མོཙེཏི ཨཱཔཱཡིཀཱདཱིཧི དུཀྑེཧཱིཏི པཱཏིམོཀྑཾ. སཾཝརཎཾ སཾཝརོ, ཀཱཡཝཱཙཱཧི ཨཝཱིཏིཀྐམོ. པཱཏིམོཀྑམེཝ སཾཝརོ པཱཏིམོཀྑསཾཝརོ, ཏེན སཾཝུཏོ པིཧིཏཀཱཡཝཱཙོཏི པཱཏིམོཀྑསཾཝརསཾཝུཏོ. ཨིདམསྶ ཏསྨིཾ སཱིལེ པཏིཊྛིཏབྷཱཝཔརིདཱིཔནཾ. ཝིཧརཏཱིཏི ཏདནུརཱུཔཝིཧཱརསམངྒིབྷཱཝཔརིདཱིཔནཾ. ཨཱཙཱརགོཙརསམྤནྣོཏི ཧེཊྛཱ པཱཏིམོཀྑསཾཝརསྶ ཨུཔརི ཝིསེསཱནཾ ཡོགསྶ ཙ ཨུཔཀཱརདྷམྨཔརིདཱིཔནཾ. ཨཎུམཏྟེསུ ཝཛྫེསུ བྷཡདསྶཱཝཱིཏི པཱཏིམོཀྑསཱིལཏོ ཨཙཝནདྷམྨཏཱཔརིདཱིཔནཾ. སམཱདཱཡཱཏི སིཀྑཱཔདཱནཾ ཨནཝསེསཏོ ཨཱདཱནཔརིདཱིཔནཾ. སིཀྑཏཱིཏི སིཀྑཱཡ སམངྒིབྷཱཝཔརིདཱིཔནཾ. སིཀྑཱཔདེསཱུཏི སིཀྑིཏབྦདྷམྨཔརིདཱིཔནཾ.

ཨཔརོ ནཡོ – ཀིལེསཱནཾ བལཝབྷཱཝཏོ པཱཔཀིརིཡཱཡ སུཀརབྷཱཝཏོ པུཉྙཀིརིཡཱཡ ཙ དུཀྐརབྷཱཝཏོ བཧུཀྑཏྟུཾ ཨཔཱཡེསུ པཏནསཱིལོཏི པཱཏཱི, པུཐུཛྫནོ. ཨནིཙྩཏཱཡ ཝཱ བྷཝཱདཱིསུ ཀམྨཝེགུཀྑིཏྟོ གྷཊིཡནྟཾ ཝིཡ ཨནཝཊྛཱནེན པརིབྦྷམནཏོ གམནསཱིལོཏི པཱཏཱི. མརཎཝསེན ཝཱ ཏམྷི ཏམྷི སཏྟནིཀཱཡེ ཨཏྟབྷཱཝསྶ པཏནསཱིལོ ཝཱ པཱཏཱི, སཏྟསནྟཱནོ, ཙིཏྟམེཝ ཝཱ. ཏཾ པཱཏིནཾ སཾསཱརདུཀྑཏོ མོཀྑེཏཱིཏི པཱཏིམོཀྑཾ. ཙིཏྟསྶ ཧི ཝིམོཀྑེན སཏྟོ ‘‘ཝིམུཏྟོ’’ཏི ཝུཙྩཏི. ཝུཏྟཉྷི ‘‘ཙིཏྟཝོདཱནཱ ཝིསུཛ྄ཛྷནྟཱི’’ཏི (སཾ. ནི. ༣.༡༠༠), ‘‘ཨནུཔཱདཱཡ ཨཱསཝེཧི ཙིཏྟཾ ཝིམུཏྟ’’ནྟི (མཧཱཝ. ༢༨) ཙ.

ཨཐ ཝཱ ཨཝིཛྫཱདིཧེཏུནཱ སཾསཱརེ པཏཏི གཙྪཏི པཝཏྟཏཱིཏི པཱཏི. ‘‘ཨཝིཛྫཱནཱིཝརཎཱནཾ སཏྟཱནཾ ཏཎྷཱསཾཡོཛནཱནཾ སནྡྷཱཝཏཾ སཾསརཏ’’ནྟི (སཾ. ནི. ༢.༡༢༤) ཧི ཝུཏྟཾ. ཏསྶ པཱཏིནོ སཏྟསྶ ཏཎྷཱདིསཾཀིལེསཏྟཡཏོ མོཀྑོ ཨེཏེནཱཏི པཱཏིམོཀྑཾ.

ཨཐ ¶ ¶ ཝཱ པཱཏེཏི ཝིནིཔཱཏེཏི དུཀྑེཏི པཱཏི, ཙིཏྟཾ. ཝུཏྟཉྷི ‘‘ཙིཏྟེན ནཱིཡཏཱི ལོཀོ, ཙིཏྟེན པརིཀསྶཏཱི’’ཏི (སཾ. ནི. ༡.༦༢). ཏསྶ པཱཏིནོ མོཀྑོ ཨེཏེནཱཏི པཱཏིམོཀྑཾ. པཏཏི ཝཱ ཨེཏེན ཨཔཱཡདུཀྑེ སཾསཱརདུཀྑེ ཙཱཏི པཱཏི, ཏཎྷཱདིསཾཀིལེསོ. ཝུཏྟཉྷི ‘‘ཏཎྷཱ ཛནེཏི པུརིསཾ (སཾ. ནི. ༡.༥༥). ཏཎྷཱདུཏིཡོ པུརིསོ’’ཏི (ཨ. ནི. ༤.༩; ཨིཏིཝུ. ༡༥, ༡༠༥) ཙ ཨཱདི. ཏཏོ པཱཏིཏོ མོཀྑོཏི པཱཏིམོཀྑཾ.

ཨཐ ཝཱ པཏཏི ཨེཏྠཱཏི པཱཏི, ཚ ཨཛ྄ཛྷཏྟིཀབཱཧིརཱནི ཨཱཡཏནཱནི. ཝུཏྟཉྷི ‘‘ཚསུ ལོཀོ སམུཔྤནྣོ, ཚསུ ཀུབྦཏི སནྠཝ’’ནྟི (སུ. ནི. ༡༧༡). ཏཏོ ཚཨཛ྄ཛྷཏྟིཀབཱཧིརཱཡཏནསངྑཱཏཏོ པཱཏིཏོ མོཀྑོཏི པཱཏིམོཀྑཾ. ཨཐ ཝཱ པཱཏོ ཝིནིཔཱཏོ ཨསྶ ཨཏྠཱིཏི པཱཏཱི, སཾསཱརོ. ཏཏོ མོཀྑོཏི པཱཏིམོཀྑཾ. ཨཐ ཝཱ སབྦལོཀཱདྷིཔཏིབྷཱཝཏོ དྷམྨིསྶརོ བྷགཝཱ པཏཱིཏི ཝུཙྩཏི, མུཙྩཏི ཨེཏེནཱཏི མོཀྑོ, པཏིནོ མོཀྑོ ཏེན པཉྙཏྟཏྟཱཏི པཏིམོཀྑོ, པཏིམོཀྑོ ཨེཝ པཱཏིམོཀྑཾ. སབྦགུཎཱནཾ ཝཱ མཱུལབྷཱཝཏོ ཨུཏྟམཊྛེན པཏི ཙ སོ ཡཐཱཝུཏྟེནཏྠེན མོཀྑོ ཙཱཏི པཏིམོཀྑོ, པཏིམོཀྑོ ཨེཝ པཱཏིམོཀྑཾ. ཏཐཱ ཧི ཝུཏྟཾ ‘‘པཱཏིམོཀྑནྟི ཨཱདིམེཏཾ མུཁམེཏཾ པམུཁམེཏ’’ནྟི (མཧཱཝ. ༡༣༥) ཝིཏྠཱརོ.

ཨཐ ཝཱ པ-ཨིཏི པཀཱརེ, ཨཏཱིཏི ཨཙྩནྟཏྠེ ནིཔཱཏོ, ཏསྨཱ པཀཱརེཧི ཨཙྩནྟཾ མོཀྑེཏཱིཏི པཱཏིམོཀྑཾ. ཨིདཉྷི སཱིལཾ སཡཾ ཏདངྒཝསེན, སམཱདྷིསཧིཏཾ པཉྙཱསཧིཏཉྩ ཝིཀྑམྦྷནཝསེན སམུཙྪེདཝསེན ཨཙྩནྟཾ མོཀྑེཏི མོཙེཏཱིཏི པཱཏིམོཀྑཾ. པཏི པཏི མོཀྑོཏི ཝཱ པཏིམོཀྑོ, ཏམྷཱ ཏམྷཱ ཝཱིཏིཀྐམདོསཏོ པཙྩེཀཾ མོཀྑོཏི ཨཏྠོ. པཏིམོཀྑོ ཨེཝ པཱཏིམོཀྑཾ. མོཀྑོཏི ཝཱ ནིབྦཱནཾ, ཏསྶ མོཀྑསྶ པཊིབིམྦབྷཱུཏོཏི པཏིམོཀྑོ. སཱིལསཾཝརོ ཧི སཱུརིཡསྶ ཨརུཎུགྒམནཾ ཝིཡ ནིབྦཱནསྶ ཨུདཡབྷཱུཏོ ཏཔྤཊིབྷཱགོཝ ཡཐཱརཧཾ ཀིལེསནིབྦཱཔནཏོ. པཏིམོཀྑོཡེཝ པཱཏིམོཀྑཾ. ཨཐ ཝཱ མོཀྑཾ པཏི ཝཏྟཏི, མོཀྑཱབྷིམུཁནྟི ཝཱ པཏིམོཀྑཾ, པཏིམོཀྑམེཝ པཱཏིམོཀྑནྟི ཨེཝཾ ཏཱཝ ཨེཏྠ པཱཏིམོཀྑསདྡསྶ ཨཏྠོ ཝེདིཏབྦོ.

སཾཝརཏི ¶ པིདཧཏི ཨེཏེནཱཏི སཾཝརོ, པཱཏིམོཀྑམེཝ སཾཝརོཏི པཱཏིམོཀྑསཾཝརོ. ཨཏྠཏོ པན ཏཏོ ཏཏོ ཝཱིཏིཀྐམིཏབྦཏོ ཝིརཏིཡོ ཙེཏནཱ ཙ, ཏེན པཱཏིམོཀྑསཾཝརེན ཨུཔེཏོ སམནྣཱགཏོ པཱཏིམོཀྑསཾཝརསཾཝུཏོ. ཝུཏྟཉྷེཏཾ བྷགཝཏཱ – ‘‘ཨིམིནཱ པཱཏིམོཀྑསཾཝརེན ཨུཔེཏོ ¶ ཧོཏི སམུཔེཏོ ཨུཔགཏོ སམྤནྣོ སམནྣཱགཏོ, ཏེན ཝུཙྩཏི པཱཏིམོཀྑསཾཝརསཾཝུཏོ’’ཏི (ཝིབྷ. ༥༡༡).

ཝིཧརཏཱིཏི ཨིརིཡཱཔཐཝིཧཱརེན ཝིཧརཏི ཨིརིཡཏི ཝཏྟཏི. ཨཱཙཱརགོཙརསམྤནྣོཏི ཝེལུ༹དཱནཱདིམིཙྪཱཛཱིཝསྶ ཀཱཡཔཱགབྦྷིཡཱདཱིནཉྩ ཨཀརཎེན སབྦསོ ཨནཱཙཱརཾ ཝཛྫེཏྭཱ ཀཱཡིཀོ ཨཝཱིཏིཀྐམོ, ཝཱཙསིཀོ ཨཝཱིཏིཀྐམོ, ཀཱཡིཀཝཱཙསིཀོ ཨཝཱིཏིཀྐམོཏི ཨེཝཾ ཝུཏྟབྷིཀྑུ སཱརུཔྤཨཱཙཱརསམྤཏྟིཡཱ ཝེསིཡཱདིཨགོཙརཾ ཝཛྫེཏྭཱ པིཎྜཔཱཏཱདིཨཏྠཾ ཨུཔསངྐམིཏུཾ ཡུཏྟཊྛཱནསངྑཱཏགོཙརཙརཎེན ཙ སམྤནྣཏྟཱ ཨཱཙཱརགོཙརསམྤནྣོ.

ཨཔིཙ ཡོ བྷིཀྑུ སཏྠརི སགཱརཝོ སཔྤཏིསྶོ སབྲཧྨཙཱརཱིསུ སགཱརཝོ སཔྤཏིསྶོ ཧིརོཏྟཔྤསམྤནྣོ སུནིཝཏྠོ སུཔཱརུཏོ པཱསཱདིཀེན ཨབྷིཀྐནྟེན པཊིཀྐནྟེན ཨཱལོཀིཏེན ཝིལོཀིཏེན སམིཉྫིཏེན པསཱརིཏེན ཨིརིཡཱཔཐསམྤནྣོ ཨིནྡྲིཡེསུ གུཏྟདྭཱརོ བྷོཛནེ མཏྟཉྙཱུ ཛཱགརིཡཾ ཨནུཡུཏྟོ སཏིསམྤཛཉྙེན སམནྣཱགཏོ ཨཔྤིཙྪོ སནྟུཊྛོ པཝིཝིཏྟོ ཨསཾསཊྛོ ཨཱབྷིསམཱཙཱརིཀེསུ སཀྐཙྩཀཱརཱི གརུཙིཏྟཱིཀཱརབཧུལོ ཝིཧརཏི, ཨཡཾ ཝུཙྩཏི ཨཱཙཱརསམྤནྣོ.

གོཙརོ པན ཨུཔནིསྶཡགོཙརོ, ཨཱརཀྑགོཙརོ, ཨུཔནིབནྡྷགོཙརོཏི ཏིཝིདྷོ. ཏཏྠ ཡོ དསཀཐཱཝཏྠུགུཎསམནྣཱགཏོ ཝུཏྟལཀྑཎོ ཀལྱཱཎམིཏྟོ, ཡཾ ནིསྶཱཡ ཨསྶུཏཾ སུཎཱཏི, སུཏཾ པརིཡོདཱཔེཏི, ཀངྑཾ ཝིཏརཏི, དིཊྛིཾ ཨུཛུཾ ཀརོཏི, ཙིཏྟཾ པསཱདེཏི, ཡསྶ ཙ ཨནུསིཀྑནྟོ སདྡྷཱཡ ཝཌྜྷཏི, སཱིལེན, སུཏེན, ཙཱགེན, པཉྙཱཡ ཝཌྜྷཏི, ཨཡཾ ཝུཙྩཏི ཨུཔནིསྶཡགོཙརོ.

ཡོ བྷིཀྑུ ཨནྟརགྷརཾ པཝིཊྛོ ཝཱིཐིཾ པཊིཔནྣོ ཨོཀྑིཏྟཙཀྑུ ཡུགམཏྟདསྶཱི སཾཝུཏོ གཙྪཏི, ན ཧཏྠིཾ ཨོལོཀེནྟོ, ན ཨསྶཾ, ན རཐཾ ¶ , ན པཏྟིཾ, ན ཨིཏྠིཾ, ན པུརིསཾ ཨོལོཀེནྟོ, ན ཨུདྡྷཾ ཨུལློཀེནྟོ, ན ཨདྷོ ཨོལོཀེནྟོ, ན དིསཱཝིདིསཾ པེཀྑམཱནོ གཙྪཏི, ཨཡཾ ཨཱརཀྑགོཙརོ.

ཨུཔནིབནྡྷགོཙརོ པན ཙཏྟཱརོ སཏིཔཊྛཱནཱ, ཡཏྠ བྷིཀྑུ ཨཏྟནོ ཙིཏྟཾ ཨུཔནིབནྡྷཏི. ཝུཏྟཉྷེཏཾ བྷགཝཏཱ – ‘‘ཀོ ཙ, བྷིཀྑཝེ, བྷིཀྑུནོ གོཙརོ སཀོ པེཏྟིཀོ ཝིསཡོ, ཡདིདཾ ཙཏྟཱརོ སཏིཔཊྛཱནཱ’’ཏི (སཾ. ནི. ༥.༣༧༢). ཏཏྠ ཨུཔནིསྶཡགོཙརསྶ པུབྦེ ཝུཏྟཏྟཱ ཨིཏརེསཾ ¶ ཝསེནེཏྠ གོཙརོ ཝེདིཏབྦོ. ཨིཏི ཡཐཱཝུཏྟཱཡ ཨཱཙཱརསམྤཏྟིཡཱ ཨིམཱཡ ཙ གོཙརསམྤཏྟིཡཱ སམནྣཱགཏཏྟཱ ཨཱཙཱརགོཙརསམྤནྣོ.

ཨཎུམཏྟེསུ ཝཛྫེསུ བྷཡདསྶཱཝཱིཏི ཨཔྤམཏྟཀཏྟཱ ཨཎུཔྤམཱཎེསུ ཨསྶཏིཡཱ ཨསཉྩིཙྩ ཨཱཔནྣསེཁིཡཨཀུསལཙིཏྟུཔྤཱདཱདིབྷེདེསུ ཝཛྫེསུ བྷཡདསྶནསཱིལོ. ཡོ ཧི བྷིཀྑུ པརམཱཎུམཏྟཾ ཝཛྫཾ ཨཊྛསཊྛིཡོཛནསཏསཧསྶུབྦེདྷསིནེརུཔབྦཏརཱཛསདིསཾ ཀཏྭཱ པསྶཏི, ཡོཔི སབྦལཧུཀཾ དུབྦྷཱསིཏམཏྟཾ པཱརཱཛིཀསདིསཾ ཀཏྭཱ པསྶཏི, ཨཡམྤི ཨཎུམཏྟེསུ ཝཛྫེསུ བྷཡདསྶཱཝཱི ནཱམ. སམཱདཱཡ སིཀྑཏི སིཀྑཱཔདེསཱུཏི ཡཾཀིཉྩི སིཀྑཱཔདེསུ སིཀྑིཏབྦཾ, ཏཾ སབྦེན སབྦཾ སབྦཐཱ སབྦཾ ཨནཝསེསཾ སམཱདིཡིཏྭཱ སིཀྑཏི, ཝཏྟཏི པཱུརེཏཱིཏི ཨཏྠོ.

ཨབྷིསལླེཁིཀཱཏི ཨཏིཝིཡ ཀིལེསཱནཾ སལླེཁནཱིཡཱ, ཏེསཾ ཏནུབྷཱཝཱཡ པཧཱནཱཡ ཡུཏྟརཱུཔཱ. ཙེཏོཝིཝརཎསཔྤཱཡཱཏི ཙེཏསོ པཊིཙྪཱདཀཱནཾ ནཱིཝརཎཱནཾ དཱུརཱིབྷཱཝཀརཎེན ཙེཏོཝིཝརཎསངྑཱཏཱནཾ སམཐཝིཔསྶནཱནཾ སཔྤཱཡཱ, སམཐཝིཔསྶནཱཙིཏྟསྶེཝ ཝཱ ཝིཝརཎཱཡ པཱཀཊཱིཀརཎཱཡ ཝཱ སཔྤཱཡཱ ཨུཔཀཱརིཀཱཏི ཙེཏོཝིཝརཎསཔྤཱཡཱ.

ཨིདཱནི ཡེན ནིབྦིདཱདིཨཱཝཧཎེན ཨཡཾ ཀཐཱ ཨབྷིསལླེཁིཀཱ ཙེཏོཝིཝརཎསཔྤཱཡཱ ཙ ནཱམ ཧོཏི, ཏཾ དསྶེཏུཾ ‘‘ཨེཀནྟནིབྦིདཱཡཱ’’ཏིཨཱདི ཝུཏྟཾ. ཏཏྠ ཨེཀནྟནིབྦིདཱཡཱཏི ཨེཀཾསེནེཝ ཝཊྚདུཀྑཏོ ནིབྦིནྡནཏྠཱཡ. ཝིརཱགཱཡ ནིརོདྷཱཡཱཏི ཏསྶེཝ ཝིརཛྫནཏྠཱཡ ཙ ནིརུཛ྄ཛྷནཏྠཱཡ ཙ. ཨུཔསམཱཡཱཏི སབྦཀིལེསཝཱུཔསམཱཡ. ཨབྷིཉྙཱཡཱཏི སབྦསྶཔི ¶ ཨབྷིཉྙེཡྻསྶ ཨབྷིཛཱནནཱཡ. སམྦོདྷཱཡཱཏི ཙཏུམགྒསམྦོདྷཱཡ. ནིབྦཱནཱཡཱཏི ཨནུཔཱདིསེསནིབྦཱནཱཡ. ཨེཏེསུ ཧི ཨཱདིཏོ ཏཱིཧི པདེཧི ཝིཔསྶནཱ ཝུཏྟཱ, དྭཱིཧི ནིབྦཱནཾ ཝུཏྟཾ. སམཐཝིཔསྶནཱ ཨཱདིཾ ཀཏྭཱ ནིབྦཱནཔརིཡོསཱནོ ཨཡཾ སབྦོ ཨུཏྟརིམནུསྶདྷམྨོ དསཀཐཱཝཏྠུལཱབྷིནོ སིཛ྄ཛྷཏཱིཏི དསྶེཏི.

ཨིདཱནི ཏཾ ཀཐཾ ཝིབྷཛིཏྭཱ དསྶེནྟོ ‘‘ཨཔྤིཙྪཀཐཱ’’ཏིཨཱདིམཱཧ. ཏཏྠ ཨཔྤིཙྪོཏི ནིཨིཙྪོ, ཏསྶ ཀཐཱ ཨཔྤིཙྪཀཐཱ, ཨཔྤིཙྪབྷཱཝཔྤཊིསཾཡུཏྟཀཐཱ ཝཱ ཨཔྤིཙྪཀཐཱ. ཨེཏྠ ཙ ཨཏྲིཙྪོ, པཱཔིཙྪོ, མཧིཙྪོ, ཨཔྤིཙྪོཏི ཨིཙྪཱཝསེན ཙཏྟཱརོ པུགྒལཱ. ཏེསུ ཨཏྟནཱ ཡཐཱལདྡྷེན ལཱབྷེན ཨཏིཏྟོ ཨུཔརཱུཔརི ལཱབྷཾ ཨིཙྪནྟོ ཨཏྲིཙྪོ ནཱམ. ཡཾ སནྡྷཱཡ –

‘‘ཙཏུབྦྷི ¶ ཨཊྛཛ྄ཛྷགམཱ, ཨཊྛཱཧིཔི ཙ སོལ༹ས;

སོལ༹སཱཧི ཙ བཱཏྟིཾས, ཨཏྲིཙྪཾ ཙཀྐམཱསདོ;

ཨིཙྪཱཧཏསྶ པོསསྶ, ཙཀྐཾ བྷམཏི མཏྠཀེ’’ཏི. (ཛཱ. ༡.༥.༡༠༣) ཙ;

‘‘ཨཏྲིཙྪཾ ཨཏིལོབྷེན, ཨཏིལོབྷམདེན ཙཱ’’ཏི. ཙ ཝུཏྟཾ;

ལཱབྷསཀྐཱརསིལོཀནིཀཱམཡམཱནཱཡ ཨསནྟགུཎསམྦྷཱཝནཱདྷིཔྤཱཡོ པཱཔིཙྪོ. ཡཾ སནྡྷཱཡ ཝུཏྟཾ ‘‘ཨིདྷེཀཙྩོ ཨསྶདྡྷོ སམཱནོ ‘སདྡྷོཏི མཾ ཛནོ ཛཱནཱཏཱུ’ཏི ཨིཙྪཏི, དུསྶཱིལོ སམཱནོ ‘སཱིལཝཱཏི མཾ ཛནོ ཛཱནཱཏཱུ’ཏི ཨིཙྪཏཱི’’ཏིཨཱདི (ཝིབྷ. ༨༥༡).

སནྟགུཎསམྦྷཱཝནཱདྷིཔྤཱཡོ པཊིགྒཧཎེ ཨམཏྟཉྙཱུ མཧིཙྪོ, ཡཾ སནྡྷཱཡ ཝུཏྟཾ ‘‘ཨིདྷེཀཙྩོ སདྡྷོ སམཱནོ ‘སདྡྷོཏི མཾ ཛནོ ཛཱནཱཏཱུ’ཏི ཨིཙྪཏི, སཱིལཝཱ སམཱནོ ‘སཱིལཝཱཏི མཾ ཛནོ ཛཱནཱཏཱུ’ཏི ཨིཙྪཏཱི’’ཏིཨཱདི. དུཏྟཔྤིཡཏཱཡ ཧིསྶ ཝིཛཱཏམཱཏཱཔི ཙིཏྟཾ གཧེཏུཾ ན སཀྐོཏི. ཏེནེཏཾ ཝུཙྩཏི –

‘‘ཨགྒིཀྑནྡྷོ སམུདྡོ ཙ, མཧིཙྪོ ཙཱཔི པུགྒལོ;

སཀཊེན པཙྩཡེ དེནྟུ, ཏཡོཔེཏེ ཨཏཔྤཡཱ’’ཏི.

ཨེཏེ པན ཨཏྲིཙྪཏཱདཡོ དོསེ ཨཱརཀཱ ཝིཝཛྫེཏྭཱ སནྟགུཎནིགུཧནཱདྷིཔྤཱཡོ པཊིགྒཧཎེ ཙ མཏྟཉྙཱུ ཨཔྤིཙྪོ. ཨཏྟནི ཝིཛྫམཱནམྤི གུཎཾ ¶ པཊིཙྪཱདེཏུཀཱམཏཱཡ སདྡྷོ སམཱནོ ‘‘སདྡྷོཏི མཾ ཛནོ ཛཱནཱཏཱུ’’ཏི ན ཨིཙྪཏི, སཱིལཝཱ, བཧུསྶུཏོ, པཝིཝིཏྟོ, ཨཱརདྡྷཝཱིརིཡོ, ཨུཔཊྛིཏསྶཏི, སམཱཧིཏོ, པཉྙཝཱ སམཱནོ ‘‘པཉྙཝཱཏི མཾ ཛནོ ཛཱནཱཏཱུ’’ཏི ན ཨིཙྪཏི. སྭཱཡཾ པཙྩཡཔྤིཙྪོ, དྷུཏངྒཔྤིཙྪོ, པརིཡཏྟིཨཔྤིཙྪོ ཨདྷིགམཔྤིཙྪོཏི ཙཏུབྦིདྷོ. ཏཏྠ ཙཏཱུསུ པཙྩཡེསུ ཨཔྤིཙྪོ པཙྩཡདཱཡཀཾ དེཡྻདྷམྨཾ ཨཏྟནོ ཐཱམཉྩ ཨོལོཀེཏྭཱ སཙེཔི ཧི དེཡྻདྷམྨོ བཧུ ཧོཏི, དཱཡཀོ ཨཔྤཾ དཱཏུཀཱམོ, དཱཡཀསྶ ཝསེན ཨཔྤམེཝ གཎྷཱཏི. དེཡྻདྷམྨོ ཙེ ཨཔྤོ, དཱཡཀོ བཧུཾ དཱཏུཀཱམོ, དེཡྻདྷམྨསྶ ཝསེན ཨཔྤམེཝ གཎྷཱཏི. དེཡྻདྷམྨོཔི ཙེ བཧུ, དཱཡཀོཔི བཧུཾ དཱཏུཀཱམོ, ཨཏྟནོ ཐཱམཾ ཉཏྭཱ པམཱཎཡུཏྟམེཝ གཎྷཱཏི. ཨེཝརཱུཔོ ཧི བྷིཀྑུ ཨནུཔྤནྣཾ ལཱབྷཾ ཨུཔྤཱདེཏི, ཨུཔྤནྣཾ ལཱབྷཾ ཐཱཝརཾ ཀརོཏི, དཱཡཀཱནཾ ཙིཏྟཾ ཨཱརཱདྷེཏི. དྷུཏངྒསམཱདཱནསྶ པན ཨཏྟནི ཨཏྠིབྷཱཝཾ ན ཛཱནཱཔེཏུཀཱམོ དྷུཏངྒཔྤིཙྪོ. ཡོ ཨཏྟནོ བཧུསྶུཏབྷཱཝཾ ཛཱནཱཔེཏུཾ ན ཨིཙྪཏི, ཨཡཾ པརིཡཏྟིཨཔྤིཙྪོ ¶ . ཡོ པན སོཏཱཔནྣཱདཱིསུ ཨཉྙཏརོ ཧུཏྭཱ སབྲཧྨཙཱརཱིནམྤི ཨཏྟནོ སོཏཱཔནྣཱདིབྷཱཝཾ ཛཱནཱཔེཏུཾ ན ཨིཙྪཏི, ཨཡཾ ཨདྷིགམཔྤིཙྪོ. ཨེཝམེཏེསཾ ཨཔྤིཙྪཱནཾ ཡཱ ཨཔྤིཙྪཏཱ, ཏསྶཱ སདྡྷིཾ སནྡསྶནཱདིཝིདྷིནཱ ཨནེཀཱཀཱརཝོཀཱརཱནིསཾསཝིབྷཱཝནཝསེན སཔྤཊིཔཀྑསྶ ཨཏྲིཙྪཏཱདིབྷེདསྶ ཨིཙྪཱཙཱརསྶ ཨཱདཱིནཝཝིབྷཱཝནཝསེན ཙ པཝཏྟཱ ཀཐཱ ཨཔྤིཙྪཀཐཱ.

སནྟུཊྛིཀཐཱཏི ཨེཏྠ སནྟུཊྛཱིཏི སཀེན ཨཏྟནཱ ལདྡྷེན ཏུཊྛི སནྟུཊྛི. ཨཐ ཝཱ ཝིསམཾ པཙྩཡིཙྪཾ པཧཱཡ སམཾ ཏུཊྛི སནྟུཊྛི, སནྟེན ཝཱ ཝིཛྫམཱནེན ཏུཊྛི སནྟུཊྛི. ཝུཏྟཉྩེཏཾ –

‘‘ཨཏཱིཏཾ ནཱནུབདྡྷོ སོ, ནཔྤཛཔྤམནཱགཏཾ;

པཙྩུཔྤནྣེན ཡཱཔེནྟོ, སནྟུཊྛོཏི པཝུཙྩཏཱི’’ཏི.

སམྨཱ ཝཱ ཉཱཡེན བྷགཝཏཱ ཨནུཉྙཱཏཝིདྷིནཱ པཙྩཡེཧི ཏུཊྛི སནྟུཊྛི, ཨཏྠཏོ ཨིཏརཱིཏརཔཙྩཡསནྟོསོ, སོ དྭཱདསཝིདྷོ ཧོཏི. ཀཐཾ? ཙཱིཝརེ ཡཐཱལཱབྷསནྟོསོ, ཡཐཱབལསནྟོསོ, ཡཐཱསཱརུཔྤསནྟོསོཏི ཏིཝིདྷོ. ཨེཝཾ པིཎྜཔཱཏཱདཱིསུ.

ཏཏྲཱཡཾ ¶ པབྷེདཝཎྞནཱ – ཨིདྷ བྷིཀྑུ ཙཱིཝརཾ ལབྷཏི སུནྡརཾ ཝཱ ཨསུནྡརཾ ཝཱ, སོ ཏེནེཝ ཡཱཔེཏི, ཨཉྙཾ ན པཏྠེཏི, ལབྷནྟོཔི ན གཎྷཱཏི, ཨཡམསྶ ཙཱིཝརེ ཡཐཱལཱབྷསནྟོསོ. ཨཐ པན པཀཏིདུབྦལོ ཝཱ ཧོཏི ཨཱབཱདྷཛརཱབྷིབྷཱུཏོ ཝཱ, གརུཙཱིཝརཾ པཱརུཔནྟོ ཀིལམཏི, སོ སབྷཱགེན བྷིཀྑུནཱ སདྡྷིཾ ཏཾ པརིཝཏྟེཏྭཱ ལཧུཀེན ཡཱཔེནྟོཔི སནྟུཊྛོཝ ཧོཏི, ཨཡམསྶ ཙཱིཝརེ ཡཐཱབལསནྟོསོ. ཨཔརོ པཎཱིཏཔཙྩཡལཱབྷཱི ཧོཏི, སོ པཊྚཙཱིཝརཱདཱིནཾ ཨཉྙཏརཾ མཧགྒྷཙཱིཝརཾ བཧཱུནི ཝཱ ལབྷིཏྭཱ ‘‘ཨིདཾ ཐེརཱནཾ ཙིརཔབྦཛིཏཱནཾ བཧུསྶུཏཱནཾ ཨནུརཱུཔཾ, ཨིདཾ གིལཱནཱནཾ དུབྦལཱནཾ ཨཔྤལཱབྷཱིནཾ ཧོཏཱུ’’ཏི ཏེསཾ དཏྭཱ ཨཏྟནཱ སངྐཱརཀཱུཊཱདིཏོ ཝཱ ནནྟཀཱནི ཨུཙྩིནིཏྭཱ སངྒྷཱཊིཾ ཀཏྭཱ ཏེསཾ ཝཱ པུརཱཎཙཱིཝརཱནི གཧེཏྭཱ དྷཱརེནྟོཔི སནྟུཊྛོཝ ཧོཏི, ཨཡམསྶ ཙཱིཝརེ ཡཐཱསཱརུཔྤསནྟོསོ.

ཨིདྷ པན བྷིཀྑུ པིཎྜཔཱཏཾ ལབྷཏི ལཱུཁཾ ཝཱ པཎཱིཏཾ ཝཱ, སོ ཏེནེཝ ཡཱཔེཏི, ཨཉྙཾ ན པཏྠེཏི, ལབྷནྟོཔི ན གཎྷཱཏི, ཨཡམསྶ པིཎྜཔཱཏེ ཡཐཱལཱབྷསནྟོསོ. ཨཐ པན ཨཱབཱདྷིཀོ ཧོཏི, ལཱུཁཾ པཎཱིཏཾ པཀཏིཝིརུདྡྷཾ བྱཱདྷིཝིརུདྡྷཾ ཝཱ པིཎྜཔཱཏཾ བྷུཉྫིཏྭཱ གཱལ༹ྷཾ ཝཱ རོགཱབཱདྷཾ པཱཔུཎཱཏི, སོ སབྷཱགསྶ བྷིཀྑུནོ དཏྭཱ ཏསྶ ཧཏྠཏོ སཔྤཱཡབྷོཛནཾ བྷུཉྫིཏྭཱ ¶ སམཎདྷམྨཾ ཀརོནྟོཔི སནྟུཊྛོཝ ཧོཏི, ཨཡམསྶ པིཎྜཔཱཏེ ཡཐཱབལསནྟོསོ. ཨཔརོ བཧུཾ པཎཱིཏཾ པིཎྜཔཱཏཾ ལབྷཏི, སོ ‘‘ཨཡཾ པིཎྜཔཱཏོ ཙིརཔབྦཛིཏཱནཾ ཨནུརཱུཔོ’’ཏི ཙཱིཝརཾ ཝིཡ ཏེསཾ དཏྭཱ ཏེསཾ ཝཱ སེསཀཾ ཨཏྟནཱ པིཎྜཱཡ ཙརིཏྭཱ མིསྶཀཱཧཱརཾ ཝཱ བྷུཉྫནྟོཔི སནྟུཊྛོཝ ཧོཏི, ཨཡམསྶ པིཎྜཔཱཏེ ཡཐཱསཱརུཔྤསནྟོསོ.

ཨིདྷ པན བྷིཀྑུནོ སེནཱསནཾ པཱཔུཎཱཏི མནཱཔཾ ཝཱ ཨཱམནཱཔཾ ཝཱ ཨནྟམསོ ཏིཎསནྠཱརཀམྤི, སོ ཏེནེཝ སནྟུསྶཏི, པུན ཨཉྙཾ སུནྡརཏརཾ པཱཔུཎཱཏི, ཏཾ ན གཎྷཱཏི, ཨཡམསྶ སེནཱསནེ ཡཐཱལཱབྷསནྟོསོ. ཨཐ པན ཨཱབཱདྷིཀོ ཧོཏི དུབྦལོ ཝཱ, པཀཏིཝིརུདྡྷཾ ཝཱ སོ བྱཱདྷིཝིརུདྡྷཾ ཝཱ སེནཱསནཾ ལབྷཏི, ཡཏྠསྶ ཝསཏོ ཨཕཱསུ ཧོཏི, སོ ཏཾ སབྷཱགསྶ བྷིཀྑུནོ དཏྭཱ ཏསྶ སནྟཀེ སཔྤཱཡསེནཱསནེ ཝསིཏྭཱ སམཎདྷམྨཾ ཀརོནྟོཔི སནྟུཊྛོཝ ཧོཏི, ཨཡམསྶ ¶ སེནཱསནེ ཡཐཱབལསནྟོསོ. ཨཔརོ སུནྡརཾ སེནཱསནཾ པཏྟམྤི ན སམྤཊིཙྪཏི ‘‘པཎཱིཏསེནཱསནཾ ནཱམ པམཱདཊྛཱན’’ནྟི, མཧཱཔུཉྙཏཱཡ ཝཱ ལེཎམཎྜཔཀཱུཊཱགཱརཱདཱིནི བཧཱུནི པཎཱིཏསེནཱསནཱནི ལབྷཏི, སོ ཏཱནི ཙཱིཝརཱདཱིནི ཝིཡ ཙིརཔབྦཛིཏཱདཱིནཾ དཏྭཱ ཡཏྠ ཀཏྠཙི ཝསནྟོཔི སནྟུཊྛོཝ ཧོཏི, ཨཡམསྶ སེནཱསནེ ཡཐཱསཱརུཔྤསནྟོསོ.

ཨིདྷ པན བྷིཀྑུ བྷེསཛྫཾ ལབྷཏི ལཱུཁཾ ཝཱ པཎཱིཏཾ ཝཱ, སོ ཏེནེཝ ཏུསྶཏི, ཨཉྙཾ ན པཏྠེཏི, ལབྷནྟོཔི ན གཎྷཱཏི, ཨཡཾ གིལཱནཔཙྩཡེ ཡཐཱལཱབྷསནྟོསོ. ཨཐ པན ཏེལེན ཨཏྠིཀོ ཕཱཎིཏཾ ལབྷཏི, སོ ཡཾ ལབྷཏི, སོ ཏཾ སབྷཱགསྶ བྷིཀྑུནོ དཏྭཱ ཏསྶ ཧཏྠཏོ ཏེལེན བྷེསཛྫཾ ཀཏྭཱ སམཎདྷམྨཾ ཀརོནྟོཔི སནྟུཊྛོཝ ཧོཏི, ཨཡམསྶ གིལཱནཔཙྩཡེ ཡཐཱབལསནྟོསོ. ཨཔརོ མཧཱཔུཉྙོ བཧུཾ ཏེལམདྷུཕཱཎིཏཱདིཔཎཱིཏབྷེསཛྫཾ ལབྷཏི, སོ ཏཾ ཙཱིཝརཱདཱིནི ཝིཡ ཙིརཔབྦཛིཏཱདཱིནཾ དཏྭཱ ཏེསཾ ཨཱབྷཏཀེན ཡེན ཀེནཙི བྷེསཛྫཾ ཀརོནྟོཔི སནྟུཊྛོཝ ཧོཏི. ཡོ པན ཨེཀསྨིཾ བྷཱཛནེ མུཏྟཧརཱིཏཀཾ, ཨེཀསྨིཾ ཙཏུམདྷུརཾ ཋཔེཏྭཱ ‘‘གཎྷཐ, བྷནྟེ, ཡདིཙྪསཱི’’ཏི ཝུཙྩམཱནོ ‘‘སཙསྶ ཏེསུ ཨཉྙཏརེནཔི རོགོ ཝཱུཔསམྨཏི, ཨིདཾ མུཏྟཧརཱིཏཀཾ ནཱམ བུདྡྷཱདཱིཧི ཝཎྞིཏ’’ནྟི, ‘‘པཱུཏིམུཏྟབྷེསཛྫཾ ནིསྶཱཡ པབྦཛྫཱ, ཏཏྠ ཏེ ཡཱཝཛཱིཝཾ ཨུསྶཱཧོ ཀརཎཱིཡོ’’ཏི (མཧཱཝ. ༡༢༨) ཝཙནཾ ཨནུསྶརནྟོ ཙཏུམདྷུརཾ པཊིཀྑིཔིཏྭཱ མུཏྟཧརཱིཏཀེན བྷེསཛྫཾ ཀརོནྟོ པརམསནྟུཊྛོཝ ཧོཏི, ཨཡམསྶ གིལཱནཔཙྩཡེ ཡཐཱསཱརུཔྤསནྟོསོ.

སོ ཨེཝཾཔབྷེདོ སབྦོཔི སནྟོསོ སནྟུཊྛཱིཏི པཝུཙྩཏི. ཏེན ཝུཏྟཾ ‘‘ཨཏྠཏོ ཨིཏརཱིཏརཔཙྩཡསནྟོསོ’’ཏི. ཏསྶཱ སནྟུཊྛིཡཱ སདྡྷིཾ སནྡསྶནཱདིཝིདྷིནཱ ཨཱནིསཾསཝིབྷཱཝནཝསེན ¶ ཏཔྤཊིཔཀྑསྶ ཨཏྲིཙྪཏཱདིབྷེདསྶ ཨིཙྪཱཙཱརསྶ ཨཱདཱིནཝཝིབྷཱཝནཝསེན ཙ པཝཏྟཱ ཀཐཱ སནྟུཊྛིཀཐཱ. ཨིཏོ པརཱསུཔི ཀཐཱསུ ཨེསེཝ ནཡོ. ཝིསེསམཏྟམེཝ ཝཀྑཱམ.

པཝིཝེཀཀཐཱཏི ཨེཏྠ ཀཱཡཝིཝེཀོ, ཙིཏྟཝིཝེཀོ, ཨུཔདྷིཝིཝེཀོཏི ཏཡོ ཝིཝེཀཱ. ཏེསུ ཨེཀོ གཙྪཏི, ཨེཀོ ཏིཊྛཏི, ཨེཀོ ནིསཱིདཏི ¶ , ཨེཀོ སེཡྻཾ ཀཔྤེཏི, ཨེཀོ གཱམཾ པིཎྜཱཡ པཝིསཏི, ཨེཀོ པཊིཀྐམཏི, ཨེཀོ ཨབྷིཀྐམཏི, ཨེཀོ ཙངྐམཾ ཨདྷིཊྛཱཏི, ཨེཀོ ཙརཏི, ཨེཀོ ཝིཧརཏི, ཨེཝཾ སབྦིརིཡཱཔཐེསུ སབྦཀིཙྩེསུ གཎསངྒཎིཀཾ པཧཱཡ ཝིཝིཏྟཝཱསོ ཀཱཡཝིཝེཀོ ནཱམ. ཨཊྛ སམཱཔཏྟིཡོ པན ཙིཏྟཝིཝེཀོ ནཱམ. ནིབྦཱནཾ ཨུཔདྷིཝིཝེཀོ ནཱམ. ཝུཏྟཉྷེཏཾ ‘‘ཀཱཡཝིཝེཀོ ཙ ཝིཝེཀཊྛཀཱཡཱནཾ ནེཀྑམྨཱབྷིརཏཱནཾ, ཙིཏྟཝིཝེཀོ ཙ པརིསུདྡྷཙིཏྟཱནཾ པརམཝོདཱནཔྤཏྟཱནཾ, ཨུཔདྷིཝིཝེཀོ ཙ ནིརུཔདྷཱིནཾ པུགྒལཱནཾ ཝིསངྑཱརགཏཱན’’ནྟི (མཧཱནི. ༥༧). ཝིཝེཀོཡེཝ པཝིཝེཀོ, པཝིཝེཀེ པཊིསཾཡུཏྟཱ ཀཐཱ པཝིཝེཀཀཐཱ.

ཨསཾསགྒཀཐཱཏི ཨེཏྠ སཝནསཾསགྒོ, དསྶནསཾསགྒོ, སམུལླཔནསཾསགྒོ, སམྦྷོགསཾསགྒོ, ཀཱཡསཾསགྒོཏི པཉྩ སཾསགྒཱ. ཏེསུ ཨིདྷེཀཙྩོ བྷིཀྑུ སུཎཱཏི ‘‘ཨམུཀསྨིཾ ཋཱནེ གཱམེ ཝཱ ནིགམེ ཝཱ ཨིཏྠཱི ཨབྷིརཱུཔཱ དསྶནཱིཡཱ པཱསཱདིཀཱ པརམཱཡ ཝཎྞཔོཀྑརཏཱཡ སམནྣཱགཏཱ’’ཏི, སོ ཏཾ སུཏྭཱ སཾསཱིདཏི ཝིསཱིདཏི, ན སཀྐོཏི བྲཧྨཙརིཡཾ སནྡྷཱརེཏུཾ, སིཀྑཾ པཙྩཀྑཱཡ ཧཱིནཱཡཱཝཏྟཏི, ཨེཝཾ ཝིསབྷཱགཱརམྨཎསྶཝནེན ཨུཔྤནྣཀིལེསསནྠཝོ སཝནསཾསགྒོ ནཱམ. ན ཧེཝ ཁོ བྷིཀྑུ སུཎཱཏི, ཨཔིཙ ཁོ སཱམཾ པསྶཏི ཨིཏྠིཾ ཨབྷིརཱུཔཾ དསྶནཱིཡཾ པཱསཱདིཀཾ པརམཱཡ ཝཎྞཔོཀྑརཏཱཡ སམནྣཱགཏཾ, སོ ཏཾ དིསྭཱ སཾསཱིདཏི ཝིསཱིདཏི, ན སཀྐོཏི བྲཧྨཙརིཡཾ སནྡྷཱརེཏུཾ, སིཀྑཾ པཙྩཀྑཱཡ ཧཱིནཱཡཱཝཏྟཏི, ཨེཝཾ ཝིསབྷཱགཱརམྨཎདསྶནེན ཨུཔྤནྣཀིལེསསནྠཝོ དསྶནསཾསགྒོ ནཱམ. དིསྭཱ པན ཨཉྙམཉྙཾ ཨཱལཱཔསལླཱཔཝསེན ཨུཔྤནྣོ ཀིལེསསནྠཝོ སམུལླཔནསཾསགྒོ ནཱམ. སཉྫགྒྷནཱདིཔི ཨེཏེནེཝ སངྒཡ྄ཧཏི. ཨཏྟནོ པན སནྟཀཾ ཡཾ ཀིཉྩི མཱཏུགཱམསྶ དཏྭཱ ཨདཏྭཱ ཝཱ ཏེན དིནྣསྶ ཝནབྷངྒིནིཡཱདིནོ པརིབྷོགཝསེན ཨུཔྤནྣོ ཀིལེསསནྠཝོ སམྦྷོགསཾསགྒོ ནཱམ. མཱཏུགཱམསྶ ཧཏྠགྒཱཧཱདིཝསེན ཨུཔྤནྣཀིལེསསནྠཝོ ཀཱཡསཾསགྒོ ནཱམ.

ཡོཔི ཙེས ‘‘གིཧཱིཧི སཾསཊྛོ ཝིཧརཏི ཨནནུལོམིཀེན སཾསགྒེན སཧསོཀཱི སཧནནྡཱི སུཁིཏེསུ སུཁིཏོ དུཀྑིཏེསུ དུཀྑིཏོ ཨུཔྤནྣེསུ ཀིཙྩཀརཎཱིཡེསུ ཨཏྟནཱ ཝོ ཡོགཾ ཨཱཔཛྫཏཱི’’ཏི (སཾ. ནི. ༣.༣; མཧཱནི. ༡༦༤) ཨེཝཾ ¶ ཝུཏྟོ ཨནནུལོམིཀོ གིཧིསཾསགྒོ ནཱམ, ཡོ ཙ སབྲཧྨཙཱརཱིཧིཔི ཀིལེསུཔྤཏྟིཧེཏུབྷཱུཏོ སཾསགྒོ, ཏཾ སབྦཾ པཧཱཡ ཡྭཱཡཾ ¶ སཾསཱརེ ཐིརཏརཾ སཾཝེགསངྑཱརེསུ ཏིབྦཾ བྷཡསཉྙཾ སརཱིརེ པཊིཀྐཱུལསཉྙཾ སབྦཱཀུསལེསུ ཛིགུཙྪཱཔུབྦངྒམཾ ཧིརོཏྟཔྤཾ སབྦཀིརིཡཱསུ སཏིསམྤཛཉྙནྟི སབྦཾ པཙྩུཔཊྛཔེཏྭཱ ཀམལདལེ ཛལབིནྡུ ཝིཡ སབྦཏྠ ཨལགྒབྷཱཝོ, ཨཡཾ སབྦསཾསགྒཔྤཊིཔཀྑཏཱཡ ཨསཾསགྒོ, ཏཔྤཊིསཾཡུཏྟཱ ཀཐཱ ཨསཾསགྒཀཐཱ.

ཝཱིརིཡཱརམྦྷཀཐཱཏི ཨེཏྠ ཝཱིརསྶ བྷཱཝོ, ཀམྨནྟི ཝཱ ཝཱིརིཡཾ, ཝིདྷིནཱ ཨཱིརེཏབྦཾ པཝཏྟེཏབྦནྟི ཝཱ ཝཱིརིཡཾ, ཝཱིརིཡཉྩ ཏཾ ཨཀུསལཱནཾ དྷམྨཱནཾ པཧཱནཱཡ, ཀུསལཱནཾ དྷམྨཱནཾ ཨུཔསམྤདཱཡ ཨཱརབྷནཾ ཝཱིརིཡཱརམྦྷོ. སྭཱཡཾ ཀཱཡིཀོ, ཙེཏསིཀོ ཙཱཏི དུཝིདྷོ, ཨཱརམྦྷདྷཱཏུ, ནིཀྐམདྷཱཏུ, པརཀྐམདྷཱཏུ, ཙཱཏི ཏིཝིདྷོ, སམྨཔྤདྷཱནཝསེན ཙཏུབྦིདྷོ. སོ སབྦོཔི ཡོ བྷིཀྑུ གམནེ ཨུཔྤནྣཀིལེསཾ ཋཱནཾ པཱཔུཎིཏུཾ ན དེཏི, ཋཱནེ ཨུཔྤནྣཾ ནིསཛྫཾ, ནིསཛྫཱཡ ཨུཔྤནྣཾ སཡནཾ པཱཔུཎིཏུཾ ན དེཏི, ཏཏྠ ཏཏྠེཝ ཨཛཔདེན དཎྜེན ཀཎྷསཔྤཾ ཨུཔྤཱིལེ༹ཏྭཱ གཎྷནྟོ ཝིཡ ཏིཁིཎེན ཨསིནཱ ཨམིཏྟཾ གཱིཝཱཡ པཧརནྟོ ཝིཡ སཱིསཾ ཨུཀྑིཔིཏུཾ ཨདཏྭཱ ཝཱིརིཡབལེན ནིགྒཎྷཱཏི, ཏསྶེཝཾ ཝཱིརིཡཱརམྦྷོ ཨཱརདྡྷཝཱིརིཡསྶ ཝསེན ཝེདིཏབྦོ, ཏཔྤཊིསཾཡུཏྟཱ ཀཐཱ ཝཱིརིཡཱརམྦྷཀཐཱ.

སཱིལཀཐཱཏིཨཱདཱིསུ དུཝིདྷཾ སཱིལཾ ལོཀིཡཾ ལོཀུཏྟརཉྩ. ཏཏྠ ལོཀིཡཾ པཱཏིམོཀྑསཾཝརཱདི ཙཏུཔཱརིསུདྡྷིསཱིལཾ. ལོཀུཏྟརཾ མགྒསཱིལཾ ཕལསཱིལཉྩ. ཏཐཱ སམཱདྷིཔི. ཝིཔསྶནཱཡ པཱདཀབྷཱུཏཱ སཧ ཨུཔཙཱརེན ཨཊྛ སམཱཔཏྟིཡོ ལོཀིཡོ སམཱདྷི, མགྒསམྤཡུཏྟོ པནེཏྠ ལོཀུཏྟརོ སམཱདྷི ནཱམ. ཏཐཱ པཉྙཱཔི. ལོཀིཡཱ སུཏམཡཱ, ཙིནྟཱམཡཱ, ཛྷཱནསམྤཡུཏྟཱ, ཝིཔསྶནཱཉཱཎཉྩ. ཝིསེསཏོ པནེཏྠ ཝིཔསྶནཱཔཉྙཱ གཧེཏབྦཱ. ལོཀུཏྟརཱ མགྒཔཉྙཱ ཕལཔཉྙཱ ཙ. ཝིམུཏྟི ཨརིཡཕལཝིམུཏྟི ནིབྦཱནཉྩ. ཨཔརེ པན ཏདངྒཝིཀྑམྦྷནསམུཙྪེདཝིམུཏྟཱིནམྤི ཝསེནེཏྠ ཨཏྠཾ སཾཝཎྞེནྟི. ཝིམུཏྟིཉཱཎདསྶནམྤི ཨེཀཱུནཝཱིསཏིཝིདྷཾ པཙྩཝེཀྑཎཉཱཎཾ. ཨིཏི ཨིམེསཾ སཱིལཱདཱིནཾ སདྡྷིཾ སནྡསྶནཱདིཝིདྷིནཱ ཨནེཀཱཀཱརཝོཀཱརཨཱནིསཾསཝིབྷཱཝནཝསེན ཙེཝ ཏཔྤཊིཔཀྑཱནཾ དུསྶཱིལྱཱདཱིནཾ ཨཱདཱིནཝཝིབྷཱཝནཝསེན ཙ པཝཏྟཱ ཀཐཱ, ཏཔྤཊིསཾཡུཏྟཱ ཀཐཱ ཝཱ སཱིལཱདིཀཐཱ ནཱམ.

ཨེཏྠ ¶ ཙ ‘‘ཨཏྟནཱ ཙ ཨཔྤིཙྪོ ཧོཏི, ཨཔྤིཙྪ ཀཐཉྩ པརེསཾ ཀཏྟཱ’’ཏི (མ. ནི. ༡.༢༥༢; ཨ. ནི. ༡༠.༧༠) ‘‘སནྟུཊྛོ ཧོཏི ཨིཏརཱིཏརེན ཙཱིཝརེན, ཨིཏརཱིཏརཙཱིཝརསནྟུཊྛིཡཱ ཙ ཝཎྞཝཱདཱི’’ཏི (སཾ. ནི. ༢.༡༤༤; ཙཱུལ༹ནི. ཁགྒཝིསཱཎཔུཙྪཱནིདྡེསོ ༡༢༨) ཙ ཨཱདིཝཙནཏོ སཡཉྩ ཨཔྤིཙྪཏཱདིགུཎསམནྣཱགཏེན པརེསམྤི ཏདཏྠཱཡ ཧིཏཛ྄ཛྷཱསཡེན ¶ པཝཏྟེཏབྦཱ ཏཐཱརཱུཔཱི ཀཐཱ. ཡཱ ཨིདྷ ཨབྷིསལླེཁིཀཱདིབྷཱཝེན ཝིསེསེཏྭཱ ཝུཏྟཱ ཨཔྤིཙྪཀཐཱདཱིཏི ཝེདིཏབྦཱ. ཀཱརཀསྶེཝ ཧི ཀཐཱ ཝིསེསཏོ ཨདྷིཔྤེཏཏྠསཱདྷིནཱི. ཏཐཱ ཧི ཝཀྑཏི – ‘‘ཀལྱཱཎམིཏྟསྶེཏཾ, མེགྷིཡ, བྷིཀྑུནོ པཱཊིཀངྑཾ…པེ… ཨཀསིརལཱབྷཱི’’ཏི (ཨ. ནི. ༩.༣).

ཨེཝརཱུཔིཡཱཏི ཨཱིདིསཱཡ ཡཐཱཝུཏྟཱཡ. ནིཀཱམལཱབྷཱིཏི ཡཐིཙྪིཏལཱབྷཱི ཡཐཱརུཙིལཱབྷཱི, སབྦཀཱལཾ ཨིམཾ ཀཐཾ སོཏུཾ ཝིཙཱརེཏུཉྩ ཡཐཱསུཁཾ ལབྷནྟོ. ཨཀིཙྪལཱབྷཱིཏི ནིདུཀྑལཱབྷཱི. ཨཀསིརལཱབྷཱིཏི ཝིཔུལལཱབྷཱི.

ཨཱརདྡྷཝཱིརིཡོཏི པགྒཧིཏཝཱིརིཡོ. ཨཀུསལཱནཾ དྷམྨཱནཾ པཧཱནཱཡཱཏི ཨཀོསལླསམྦྷཱུཏཊྛེན ཨཀུསལཱནཾ པཱཔདྷམྨཱནཾ པཛཧནཏྠཱཡ. ཀུསལཱནཾ དྷམྨཱནནྟི ཀུཙྪིཏཱནཾ སལནཱདིཨཏྠེན ཨནཝཛྫཊྛེན ཙ ཀུསལཱནཾ སཧཝིཔསྶནཱནཾ མགྒཕལདྷམྨཱནཾ. ཨུཔསམྤདཱཡཱཏི སམྤཱདནཱཡ ཨཏྟནོ སནྟཱནེ ཨུཔྤཱདནཱཡ. ཐཱམཝཱཏི ཨུསྶོལ༹ྷིསངྑཱཏེན ཝཱིརིཡཐཱམེན སམནྣཱགཏོ. དལ༹ྷཔརཀྐམོཏི ཐིརཔརཀྐམོ ཨསིཐིལཝཱིརིཡོ. ཨནིཀྑིཏྟདྷུརོཏི ཨནོརོཧིཏདྷུརོ ཨནོསཀྐཝཱིརིཡོ.

པཉྙཝཱཏི ཝིཔསྶནཱཔཉྙཱཡ པཉྙཝཱ. ཨུདཡཏྠགཱམིནིཡཱཏི པཉྩནྣཾ ཁནྡྷཱནཾ ཨུདཡཉྩ ཝཡཉྩ པཊིཝིཛ྄ཛྷནྟིཡཱ. ཨརིཡཱཡཱཏི ཝིཀྑམྦྷནཝསེན ཀིལེསེཧི ཨཱརཀཱ དཱུརེ ཋིཏཱཡ ནིདྡོསཱཡ. ནིབྦེདྷིཀཱཡཱཏི ནིབྦེདྷབྷཱགིཡཱཡ. སམྨཱ དུཀྑཀྑཡགཱམིནིཡཱཏི ཝཊྚདུཀྑསྶ ཁེཔནཏོ ‘‘དུཀྑཀྑཡོ’’ཏི ལདྡྷནཱམཾ ཨརིཡམགྒཾ སམྨཱ ཧེཏུནཱ ནཡེན གཙྪནྟིཡཱ. ཨིམེསུ ཙ པན པཉྩསུ དྷམྨེསུ སཱིལཾ ཝཱིརིཡཾ པཉྙཱ ཙ ཡོགིནོ ཨཛ྄ཛྷཏྟིཀཾ ཨངྒཾ, ཨིཏརདྭཡཾ བཱཧིརཾ ཨངྒཾ. ཏཏྠཱཔི ཀལྱཱཎམིཏྟསནྣིསྶཡེནེཝ སེསཾ ཙཏུབྦིདྷཾ ཨིཛ྄ཛྷཏི, ཀལྱཱཎམིཏྟསྶེཝེཏྠ བཧུཀཱརཏཾ དསྶེནྟོ སཏྠཱ ‘‘ཀལྱཱཎམིཏྟསྶེཏཾ, མེགྷིཡ, བྷིཀྑུནོ པཱཊིཀངྑ’’ནྟིཨཱདིནཱ དེསནཾ ཝཌྜྷེསི. ཏཏྠ པཱཊིཀངྑནྟི ཨེཀཾསེན ཨིཙྪིཏབྦཾ, ཨཝསྶཾབྷཱཝཱིཏི ཨཏྠོ. ཡནྟི ཀིརིཡཱཔརཱམསནཾ ¶ . ཨིདཾ ཝུཏྟཾ ཧོཏི – ‘‘སཱིལཝཱ བྷཝིསྶཏཱི’’ཏི ཨེཏྠ ཡདེཏཾ ཀལྱཱཎམིཏྟསྶ བྷིཀྑུནོ སཱིལཝནྟཏཱཡ བྷཝནཾ སཱིལསམྤནྣཏྟཾ, ཏསྶ བྷིཀྑུནོ སཱིལསམྤནྣཏྟཱ ཨེཏཾ ཏསྶ པཱཊིཀངྑཾ, ཨཝསྶཾབྷཱཝཱི ཨེཀཾསེནེཝ ཏསྶ ཏཏྠ ནིཡོཛནཏོཏི ཨདྷིཔྤཱཡོ. པཱཏིམོཀྑསཾཝརསཾཝུཏོ ཝིཧརཏཱིཏིཨཱདཱིསུཔི ཨེསེཝ ནཡོ.

ཨེཝཾ བྷགཝཱ སདེཝཀེ ལོཀེ ཨུཏྟམཀལྱཱཎམིཏྟསངྑཱཏསྶ ཨཏྟནོ ཝཙནཾ ཨནཱདིཡིཏྭཱ ཏཾ ¶ ཝནསཎྜཾ པཝིསིཏྭཱ ཏཱདིསཾ ཝིཔྤཀཱརཾ པཏྟསྶ ཨཱཡསྨཏོ མེགྷིཡསྶ ཀལྱཱཎམིཏྟཏཱདིནཱ སཀལཾ སཱསནསམྤདཾ དསྶེཏྭཱ ཨིདཱནིསྶ ཏཏྠ ཨཱདརཛཱཏསྶ པུབྦེ ཡེཧི ཀཱམཝིཏཀྐཱདཱིཧི ཨུཔདྡུཏཏྟཱ ཀམྨཊྛཱནཾ ན སམྤཛྫཏི, ཏསྶ ཏེསཾ ཨུཛུཝིཔཙྩནཱིཀབྷཱུཏཏྟཱ ཙ བྷཱཝནཱནཡཾ པཀཱསེཏྭཱ ཏཏོ པརཾ ཨརཧཏྟསྶ ཀམྨཊྛཱནཾ ཨཱཙིཀྑནྟོ ‘‘ཏེན ཙ པན, མེགྷིཡ, བྷིཀྑུནཱ ཨིམེསུ པཉྩསུ དྷམྨེསུ པཏིཊྛཱཡ ཙཏྟཱརོ དྷམྨཱ ཨུཏྟརི བྷཱཝེཏབྦཱ’’ཏིཨཱདིམཱཧ. ཏཏྠ ཏེནཱཏི ཨེཝཾ ཀལྱཱཎམིཏྟསནྣིསྶཡེན ཡཐཱཝུཏྟསཱིལཱདིགུཎསམནྣཱགཏེན. ཏེནེཝཱཧ ‘‘ཨིམེསུ པཉྩསུ དྷམྨེསུ པཏིཊྛཱཡཱ’’ཏི. ཨུཏྟརཱིཏི ཨཱརདྡྷཏརུཎཝིཔསྶནསྶ རཱགཱདིཔརིསྶཡཱ ཙེ ཨུཔྤཛྫེཡྻུཾ, ཏེསཾ ཝིསོདྷནཏྠཾ ཏཏོ ཨུདྡྷཾ ཙཏྟཱརོ དྷམྨཱ བྷཱཝེཏབྦཱ ཨུཔྤཱདེཏབྦཱ ཝཌྜྷེཏབྦཱ ཙ.

ཨསུབྷཱཏི ཨེཀཱདསསུ ཨསུབྷཀམྨཊྛཱནེསུ ཡཐཱརཧཾ ཡཏྠ ཀཏྠཙི ཨསུབྷབྷཱཝནཱ. རཱགསྶ པཧཱནཱཡཱཏི ཀཱམརཱགསྶ པཛཧནཏྠཱཡ. ཨཡམཏྠོ སཱལིལཱཝཀོཔམཱཡ ཝིབྷཱཝེཏབྦོ. ཨེཝཾབྷཱུཏཾ བྷཱཝནཱཝིདྷིཾ སནྡྷཱཡ ཝུཏྟཾ – ‘‘ཨསུབྷཱ བྷཱཝེཏབྦཱ རཱགསྶ པཧཱནཱཡཱ’’ཏི. མེཏྟཱཏི མེཏྟཱཀམྨཊྛཱནཾ. བྱཱཔཱདསྶ པཧཱནཱཡཱཏི ཝུཏྟནཡེནེཝ ཨུཔྤནྣསྶ ཀོཔསྶ པཛཧནཏྠཱཡ. ཨཱནཱཔཱནསྶཏཱིཏི སོལ༹སཝཏྠུཀཱ ཨཱནཱཔཱནསྶཏི. ཝིཏཀྐུཔཙྪེདཱཡཱཏི ཝུཏྟནཡེནེཝ ཨུཔྤནྣཱནཾ ཝིཏཀྐཱནཾ པཙྪེདནཏྠཱཡ. ཨསྨིམཱནསམུགྒྷཱཏཱཡཱཏི ‘‘ཨསྨཱི’’ཏི ཨུཔྤཛྫནཀསྶ ནཝཝིདྷསྶ མཱནསྶ སམུཙྪེདནཏྠཱཡ.

ཨནིཙྩསཉྙིནོཏི ཧུཏྭཱ ཨབྷཱཝཏོ ཨུདཡབྦཡཝནྟཏོ པབྷངྒུཏོ ཏཱཝཀཱལིཀཏོ ནིཙྩཔྤཊིཀྑེཔཏོ ཙ ‘‘སབྦེ སངྑཱརཱ ཨནིཙྩཱ’’ཏི (དྷ. པ. ༢༧༧; ཙཱུལ༹ནི. ཧེམཀམཱཎཝཔུཙྪཱནིདྡེསོ ༥༦) པཝཏྟཨནིཙྩཱནུཔསྶནཱཝསེན ¶ ཨནིཙྩསཉྙིནོ. ཨནཏྟསཉྙཱ སཎྛཱཏཱིཏི ཨསཱརཀཏོ ཨཝསཝཏྟནཏོ པརཏོ རིཏྟཏོ ཏུཙྪཏོ སུཉྙཏོ ཙ ‘‘སབྦེ དྷམྨཱ ཨནཏྟཱ’’ཏི (དྷ. པ. ༢༧༩; ཙཱུལ༹ནི. ཧེམཀམཱཎཝཔུཙྪཱནིདྡེསོ ༥༦) ཨེཝཾ པཝཏྟཨནཏྟཱནུཔསྶནཱསངྑཱཏཱ ཨནཏྟསཉྙཱ ཙིཏྟེ སཎྛཧཏི ཨཏིདལ༹ྷཾ པཏིཊྛཧཏི. ཨནིཙྩལཀྑཎེ ཧི དིཊྛེ ཨནཏྟལཀྑཎཾ དིཊྛམེཝ ཧོཏི. ཏཱིསུ ལཀྑཎེསུ ཧི ཨེཀསྨིཾ དིཊྛེ ཨིཏརདྭཡཾ དིཊྛམེཝ ཧོཏི. ཏེན ཝུཏྟཾ ‘‘ཨནིཙྩསཉྙིནོ, མེགྷིཡ, ཨནཏྟསཉྙཱ སཎྛཱཏཱི’’ཏི. ཨནཏྟལཀྑཎེ སུདིཊྛེ ‘‘ཨསྨཱི’’ཏི ཨུཔྤཛྫནཀམཱནོ སུཔྤཛཧོཝ ཧོཏཱིཏི ཨཱཧ ‘‘ཨནཏྟསཉྙཱི ཨསྨིམཱནསམུགྒྷཱཏཾ པཱཔུཎཱཏཱི’’ཏི. དིཊྛེཝ དྷམྨེ ནིབྦཱནནྟི དིཊྛེཝ དྷམྨེ ཨིམསྨིཾཡེཝ ཨཏྟབྷཱཝེ ཨཔཙྩཡཔརིནིབྦཱནཾ པཱཔུཎཱཏི. ཨཡམེཏྠ སངྑེཔོ, ཝིཏྠཱརཏོ པན ཨསུབྷཱདིབྷཱཝནཱནཡོ ཝིསུདྡྷིམགྒེ ཝུཏྟནཡེན ཝེདིཏབྦོ.

མེགྷིཡསུཏྟཝཎྞནཱ ནིཊྛིཏཱ.

༤-༥. ནནྡཀསུཏྟཱདིཝཎྞནཱ

༤-༥. ཙཏུཏྠེ ¶ ཨཱགམཡམཱནོཏི ཨོལོཀཡམཱནོ, བུདྡྷོ སཧསཱ ཨཔཝིསིཏྭཱ ཡཱཝ སཱ ཀཐཱ ནིཊྛཱཏི, ཏཱཝ ཨཊྛཱསཱིཏི ཨཏྠོ. ཏེནཱཧ ‘‘ཨིདམཝོཙཱཏི ཨིདཾ ཀཐཱཝསཱནཾ ཨུདིཀྑམཱནོ’’ཏི. ཨནིཙྩདུཀྑཱདིཝསེན སབྦདྷམྨསནྟཱིརཎཾ ཨདྷིཔཉྙཱཝིཔསྶནཱཏི ཨཱཧ ‘‘སངྑཱརཔརིགྒཧཝིཔསྶནཱཉཱཎསྶཱ’’ཏི. མཱནསནྟི རཱགོཔི ཙིཏྟམྤི ཨརཧཏྟམྤི. ‘‘ཨནྟལིཀྑཙརོ པཱསོ, ཡྭཱཡཾ ཙརཏི མཱནསོ’’ཏི (སཾ. ནི. ༡.༡༥༡; མཧཱཝ. ༣༣) ཨེཏྠ རཱགོ མཱནསཾ. ‘‘ཙིཏྟཾ མནོ མཱནས’’ནྟི (དྷ. ས. ༦) ཨེཏྠ ཙིཏྟཾ. ‘‘ཨཔྤཏྟམཱནསོ སེཁོ, ཀཱལཾ ཀཡིརཱ ཛནེ སུཏཱ’’ཏི (སཾ. ནི. ༡.༡༥༩) ཨེཏྠ ཨརཧཏྟཾ. ཨིདྷཱཔི ཨརཧཏྟམེཝ ཨདྷིཔྤེཏཾ. ཏེནཱཧ ‘‘ཨཔྤཏྟམཱནསཱཏི ཨཔྤཏྟཨརཧཏྟཱ’’ཏི. ཨཔྤཏྟཾ མཱནསཾ ཨརཧཏྟཾ ཨེཏེཧཱིཏི ཨཔྤཏྟམཱནསཱ. ཨིདཱནི ཙིཏྟཔརིཡཱཡམེཝ མཱནསསདྡཾ སནྡྷཱཡཱཧ ‘‘ཨརཧཏྟཾ ཝཱ’’ཏིཨཱདི. པཉྩམཾ སུཝིཉྙེཡྻམེཝ.

ནནྡཀསུཏྟཱདིཝཎྞནཱ ནིཊྛིཏཱ.

༦. སེཝནཱསུཏྟཝཎྞནཱ

༦. ཚཊྛེ ¶ ཛཱིཝིཏསམྦྷཱརཱཏི ཛཱིཝིཏཔྤཝཏྟིཡཱ སམྦྷཱརཱ པཙྩཡཱ. སམུདཱནེཏབྦཱཏི སམྨཱ ཉཱཡེན ཨནཝཛྫཨུཉྪཱཙརིཡཱདིནཱ ཨུདྡྷམུདྡྷམཱནེཏབྦཱ པཱཔུཎིཏབྦཱ. ཏེ པན སམུདཱནིཏཱ སམཱཧཏཱ ནཱམ ཧོནྟཱིཏི ཨཱཧ ‘‘སམཱཧརིཏབྦཱ’’ཏི. དུཀྑེན ཨུཔྤཛྫནྟཱིཏི སུལབྷུཔྤཱདཱ ན ཧོནྟི. ཨེཏེན གོཙརཨསཔྤཱཡཱདིབྷཱཝཾ དསྶེཏི. རཏྟིབྷཱགཾ ཝཱ དིཝསབྷཱགཾ ཝཱཏི བྷུམྨཏྠེ ཨུཔཡོགཝཙནནྟི ཨཱཧ ‘‘རཏྟིཀོཊྛཱསེ ཝཱ དིཝསཀོཊྛཱསེ ཝཱ’’ཏི. རཏྟིཾཡེཝ པཀྐམིཏབྦཾ སམཎདྷམྨསྶ ཏཏྠ ཨནིཔྥཛྫནཏོ. སངྑཱཔཱིཏི ‘‘ཡདཏྠམཧཾ པབྦཛིཏོ, ན མེཏཾ ཨིདྷ ནིཔྥཛྫཏི, ཙཱིཝརཱདི པན སམུདཱགཙྪཏི, ནཱཧཾ ཏདཏྠཾ པབྦཛིཏོ, ཀིཾ མེ ཨིདྷ ཝཱསེནཱ’’ཏི པཊིསངྑཱཡཔི. ཏེནཱཧ ‘‘སཱམཉྙཏྠསྶ བྷཱཝནཱཔཱརིཔཱུརིཨགམནཾ ཛཱནིཏྭཱ’’ཏི. ཨནནྟརཝཱརེ སངྑཱཔཱིཏི སམཎདྷམྨསྶ ནིཔྥཛྫནབྷཱཝཾ ཛཱནིཏྭཱ. སོ པུགྒལོ ཨནཱཔུཙྪཱ པཀྐམིཏབྦཾ, ནཱནུབནྡྷིཏབྦོཏི ‘‘སོ པུགྒལོ’’ཏི པདསྶ ‘‘ནཱནུབནྡྷིཏབྦོ’’ཏི ཨིམིནཱ སམྦནྡྷོ. ཡསྶ ཡེན ཧི སམྦནྡྷོ, དཱུརཊྛེནཔི སོ བྷཝཏི. ཏཾ པུགྒལནྟི སོ པུགྒལོཏི པཙྩཏྟཝཙནཾ ཨུཔཡོགཝསེན པརིཎཱམེཏྭཱ ཏཾ པུགྒལཾ ཨནཱཔུཙྪཱ པཀྐམིཏབྦནྟི ཨཏྠོ. ཨཏྠཝསེན ཧི ཝིབྷཏྟིཔརིཎཱམོཏི. ཨཱཔུཙྪཱ པཀྐམིཏབྦནྟི ཙ ཀཏཉྙུཀཏཝེདིཏཱཡ ནིཡོཛནཾ. ཨེཝརཱུཔོཏི ཡཾ ¶ ནིསྶཱཡ བྷིཀྑུནོ གུཎེཧི ཝུདྡྷིཡེཝ པཱཊིཀངྑཱ, པཙྩཡེཧི ན པརིསྶཡོ, ཨེཝརཱུཔོ དཎྜཀམྨཱདཱིཧི ནིགྒཎྷཱཏི ཙེཔི, ན པརིཙྩཛིཏབྦོཏི དསྶེཏི ‘‘སཙེཔཱི’’ཏིཨཱདིནཱ.

སེཝནཱསུཏྟཝཎྞནཱ ནིཊྛིཏཱ.

༧-༡༠. སུཏཝཱསུཏྟཱདིཝཎྞནཱ

༧-༡༠. སཏྟམེ ཨབྷབྦོ ཁཱིཎཱསཝོ བྷིཀྑུ སཉྩིཙྩ པཱཎནྟིཨཱདི དེསནཱསཱིསམེཝ, སོཏཱཔནྣཱདཡོཔི པན ཨབྷབྦཱཝ, པུཐུཛྫནཁཱིཎཱསཝཱནཾ ནིནྡཱཔསཾསཏྠམྤི ཨེཝཾ ཝུཏྟཾ. པུཐུཛྫནོ ནཱམ གཱརཡ྄ཧོ མཱཏུགྷཱཏཱདཱིནི ཀརོཏི, ཁཱིཎཱསཝོ པན པཱསཾསོ ཀུནྠཀིཔིལླིཀགྷཱཏཱདཱིནིཔི ན ཀརོཏཱིཏི. སནྣིདྷིཀཱརཀཾ ཀཱམེ པརིབྷུཉྫིཏུནྟི ཡཐཱ གིཧིབྷཱུཏོ སནྣིདྷིཾ ཀཏྭཱ ཝཏྠུཀཱམེ པརིབྷུཉྫཏི, ཨེཝཾ ཏིལཏཎྜུལསཔྤིནཝནཱིཏཱདཱིནི སནྣིདྷིཾ ¶ ཀཏྭཱ ཨིདཱནི པརིབྷུཉྫིཏུཾ ཨབྷབྦོཏི ཨཏྠོ. ཝཏྠུཀཱམེ པན ནིདཧིཏྭཱ པརིབྷུཉྫནྟཱ ཏནྣིསྶིཏཾ ཀིལེསཀཱམམྤི ནིདཧིཏྭཱ པརིབྷུཉྫནྟི ནཱམཱཏི ཨཱཧ ‘‘ཝཏྠུཀཱམཀིལེསཀཱམེ’’ཏི. ནནུ ཙ ཁཱིཎཱསཝསྶེཝ ཝསནཊྛཱནེ ཏིལཏཎྜུལཱདཡོ པཉྙཱཡནྟཱིཏི? ན པན ཏེ ཨཏྟནོ ཨཏྠཱཡ ནིདྷེནྟི, ཨཕཱསུཀཔབྦཛིཏཱདཱིནཾ ཨཏྠཱཡ ནིདྷེནྟི. ཨནཱགཱམིསྶ ཀཐནྟི? ཏསྶཔི པཉྩ ཀཱམགུཎཱ སབྦསོཝ པཧཱིནཱ, དྷམྨེན པན ལདྡྷཾ ཝིཙཱརེཏྭཱ པརིབྷུཉྫཏི. ཨཀཔྤིཡཀཱམགུཎེ སནྡྷཱཡེཏཾ ཝུཏྟཾ, ན མཉྩཔཱིཋཨཏྠརཎཔཱཝུརཎཱདིསནྣིསྶིཏཾ. སེཡྻཱཐཱཔི པུབྦེ ཨགཱརིཡབྷཱུཏོཏི ཡཐཱ པུབྦེ གིཧིབྷཱུཏོ པརིབྷུཉྫཏི, ཨེཝཾ པརིབྷུཉྫིཏུཾ ཨབྷབྦོ. ཨགཱརམཛ྄ཛྷེ ཝསནྟཱ ཧི སོཏཱཔནྣཱདཡོ ཡཱཝཛཱིཝཾ གིཧིབྱཉྫནེན ཏིཊྛནྟི. ཁཱིཎཱསཝོ པན ཨརཧཏྟཾ པཏྭཱཝ མནུསྶབྷཱུཏོ པརིནིབྦཱཏི ཝཱ པབྦཛཏི ཝཱ. ཙཱཏུམཧཱརཱཛིཀཱདཱིསུ ཀཱམཱཝཙརདེཝེསུ མུཧུཏྟམྤི ན ཏིཊྛཏི. ཀསྨཱ? ཝིཝེཀཊྛཱནསྶ ཨབྷཱཝཱ. བྷུམྨདེཝཏྟབྷཱཝེ པན ཋིཏོ ཨརཧཏྟཾ པཏྭཱཔི ཏིཊྛཏི ཝིཝེཀཊྛཱནསམྦྷཝཱ. ཨཊྛམཱདཱིནི ཨུཏྟཱནཏྠཱནེཝ.

སུཏཝཱསུཏྟཱདིཝཎྞནཱ ནིཊྛིཏཱ.

སམྦོདྷིཝགྒཝཎྞནཱ ནིཊྛིཏཱ.

༢. སཱིཧནཱདཝགྒོ

༡. སཱིཧནཱདསུཏྟཝཎྞནཱ

༡༡. དུཏིཡསྶ ¶ པཋམེ ཨཝཱཔུརེནྟི ཝིཝརནྟི དྭཱརཾ ཨེཏེནཱཏི ཨཝཱཔུརཎཾ. རཛཾ ཧརནྟི ཨེཏེནཱཏི རཛོཧརཎཾ. ཀལོ༹པིཧཏྠོཏི ཝིལཱིཝམཡབྷཱཛནཧཏྠོ, ‘‘ཙམྨམཡབྷཱཛནཧཏྠོ’’ཏི ཙ ཝདནྟི. ཚིནྣཱནི ཝིསཱཎཱནི ཨེཏསྶཱཏི ཚིནྣཝིསཱཎོ, ཨུསབྷོ ཙ སོ ཚིནྣཝིསཱཎོ ཙཱཏི ཨུསབྷཚིནྣཝིསཱཎོ. ཝིསེསནཔརོཡཾ སམཱསོ. ཨཧིཀུཎཔེན ཝཱཏིཨཱདི ཨཏིཛེགུཙྪཔྤཊིཀཱུལཀུཎཔདསྶནཏྠཾ ཝུཏྟཾ. ཀཎྛེ ཨཱསཏྟེནཱཏི ཀེནཙིདེཝ པཙྩཏྠིཀེན ཨཱནེཏྭཱ ཀཎྛེ བདྡྷེན, ཨོམུཀྐེནཱཏི ཨཏྠོ. ཨཊྚོ ཨཱཏུརོ དུགྒནྡྷཔཱིལཱ༹ཡ པཱིལི༹ཏོ. ཨཙྩཡསྶ པཊིགྒཎྷནཾ ཝཱ ཨདྷིཝཱསནཾ. ཨེཝཉྷི སོ ཀཱརཎེ དེསིཡམཱནེ ཏཏོ ¶ ཝིགཏོ ནཱམ ཧོཏི. ཏེནཱཧ ‘‘པཊིགྒཎྷཏཱུཏི ཁམཏཱུ’’ཏི. སེསམེཏྠ སུཝིཉྙེཡྻམེཝ.

སཱིཧནཱདསུཏྟཝཎྞནཱ ནིཊྛིཏཱ.

༢. སཨུཔཱདིསེསསུཏྟཝཎྞནཱ

༡༢. དུཏིཡེ བྷཝསྶ ཨཔྤམཏྟཀཏཱ ནཱམ ཨིཏྟརཀཱལཏཱཡཱཏི ཨཱཧ ‘‘ཨཙྪརཱསངྒྷཱཏམཏྟམྤཱི’’ཏི.

སཨུཔཱདིསེསསུཏྟཝཎྞནཱ ནིཊྛིཏཱ.

༣. ཀོཊྛིཀསུཏྟཝཎྞནཱ

༡༣. ཏཏིཡེ དིཊྛདྷམྨོ ཝུཙྩཏི པཙྩཀྑབྷཱུཏོ ཨཏྟབྷཱཝོ, ཏསྨིཾ ཝེདིཏབྦཾ ཕལཾ དིཊྛདྷམྨཝེདནཱིཡཾ. ཏེནཱཧ ‘‘ཨིམསྨིཾཡེཝ ཨཏྟབྷཱཝེ’’ཏི. ཙཏུཔྤཉྩཀྑནྡྷཕལཏཱཡ སཉྙཱབྷཝཱུཔགཾ ཀམྨཾ བཧུཝེདནཱིཡཾ. ཨེཀཀྑནྡྷཕལཏྟཱ ཨསཉྙཱབྷཝཱུཔགཾ ཀམྨཾ ‘‘ཨཔྤཝེདནཱིཡ’’ནྟི ཝུཏྟཾ. ཀེཙི པན ‘‘ཨརཱུཔཱཝཙརཀམྨཾ བཧུཀཱལཾ ཝེདིཏབྦཕལཏྟཱ བཧུཝེདནཱིཡཾ, ཨིཏརཾ ཨཔྤཝེདནཱིཡཾ. རཱུཔཱརཱུཔཱཝཙརཀམྨཾ ཝཱ བཧུཝེདནཱིཡཾ, པརིཏྟཾ ཀམྨཾ ཨཔྤཝེདནཱིཡ’’ནྟི ཝདནྟི. ཝེདནཱིཡནྟི པཙྩཡནྟརསམཝཱཡེ ¶ ཝིཔཱཀུཔྤཱདནསམཏྠཾ, ན ཨཱརདྡྷཝིཔཱཀམེཝ. ཨཝེདནཱིཡནྟི པཙྩཡཝེཀལླེན ཝིཔཙྩིཏུཾ ཨསམཏྠཾ ཨཧོསིཀམྨཱདིབྷེདཾ.

ཀོཊྛིཀསུཏྟཝཎྞནཱ ནིཊྛིཏཱ.

༤. སམིདྡྷིསུཏྟཝཎྞནཱ

༡༤. ཙཏུཏྠེ སམིདྡྷཱིཏི ཐེརསྶ ཀིར ཨཏྟབྷཱཝོ སམིདྡྷོ ཨབྷིརཱུཔོ པཱསཱདིཀོ, ཏསྨཱ སམིདྡྷཱིཏྭེཝ སངྑཱཏོ. ཏེནཱཧ ‘‘ཨཏྟབྷཱཝསམིདྡྷཏཱཡཱ’’ཏིཨཱདི. རཱུཔདྷཱཏུཨཱདཱིསཱུཏི ཨཱདི-སདྡེན སདྡདྷཱཏུཨཱདིཾ སངྒཎྷཱཏི.

སམིདྡྷིསུཏྟཝཎྞནཱ ནིཊྛིཏཱ.

༥-༩. གཎྜསུཏྟཱདིཝཎྞནཱ

༡༥-༡༩. པཉྩམེ ¶ མཱཏཱཔེཏྟིཀསམྦྷཝསྶཱཏི མཱཏིཏོ ཙ པིཏིཏོ ཙ ནིབྦཏྟེན མཱཏཱཔེཏྟིཀེན སུཀྐསོཎིཏེན སམྦྷཱུཏསྶ. ཨུཙྪཱདནདྷམྨསྶཱཏི ཨུཙྪཱདེཏབྦསབྷཱཝསྶ. པརིམདྡནདྷམྨསྶཱཏི པརིམདྡིཏབྦསབྷཱཝསྶ. ཨེཏྠ ཙ ཨོདནཀུམྨཱསཱུཔཙཡཨུཙྪཱདནཔདེཧི ཝཌྜྷི ཀཐིཏཱ, ཨནིཙྩབྷེདནཝིདྡྷཾསནཔདེཧི ཧཱནི. པུརིམེཧི ཝཱ སམུདཡོ, པཙྪིམེཧི ཨཏྠངྒམོཏི ཨེཝཾ ཙཱཏུམཧཱབྷཱུཏིཀསྶ ཀཱཡསྶ ཝཌྜྷིཔརིཧཱནིནིབྦཏྟིབྷེདཱ དསྶིཏཱ. སེསཾ སུཝིཉྙེཡྻམེཝ. ཚཊྛཱདཱིནི ཨུཏྟཱནཏྠཱནི.

གཎྜསུཏྟཱདིཝཎྞནཱ ནིཊྛིཏཱ.

༡༠. ཝེལཱམསུཏྟཝཎྞནཱ

༢༠. དསམེ སཀུཎྜཀབྷཏྟནྟི སཀུཎྜཀཾ ཨུཏྟཎྜུལབྷཏྟཾ. པརིཏྟེཧི སཀུཎྜེཧི ཏཎྜུལེཧིཔི སདྡྷིཾ ཝིཔཀྐབྷཏྟཾ ཨུཏྟཎྜུལམེཝ ཧོཏི. བིལ༹ངྒཾ ཝུཙྩཏི ཨཱརནཱལ༹ཾ, བིལ༹ངྒཏོ ནིབྦཏྟནཏོ ཏདེཝ ཀཉྫིཡཏོ ཛཱཏནྟི ཀཉྫིཡཾ, ཏཾ དུཏིཡཾ ཨེཏསྶཱཏི བིལ༹ངྒདུཏིཡཾ, ཏཾ ཀཉྫིཡདུཏིཡནྟི ཝུཏྟཾ. ཨསཀྐརིཏྭཱཏི དེཡྻདྷམྨམྤི པུགྒལམྤི ཨསཀྐརིཏྭཱ. དེཡྻདྷམྨསྶ ཨསཀྐརཎཾ ཨསམྤནྣཀཱརོ, པུགྒལསྶ ཨསཀྐརཎཾ ཨགརུཀརཎཾ. དེཡྻདྷམྨཾ ཨསཀྐརོནྟོ ཧི ཨུཏྟཎྜུལཱདིདོསསམནྣཱགཏཾ ཨཱཧཱརཾ དེཏི, ན སམྤནྣཾ ཀརོཏི. པུགྒལཾ ཨསཀྐརོནྟོ ནིསཱིདནཊྛཱནཾ ¶ ཨསམྨཛྫིཏྭཱ ཡཏྠ ཏཏྠ ཝཱ ནིསཱིདཱཔེཏྭཱ ཡཾ ཝཱ ཏཾ ཝཱ དཱརཀཾ པེསེཏྭཱ དེཏི. ཨཙིཏྟཱིཀཏྭཱཏི ན ཙིཏྟིཾ ཀཏྭཱ, ན པཱུཛེཏྭཱཏི ཨཏྠོ. པཱུཛེནྟོ ཧི པཱུཛེཏབྦཝཏྠུཾ ཙིཏྟེ ཋཔེཏི, ན ཏཏོ བཧི ཀརོཏི. ཙིཏྟཾ ཝཱ ཨཙྪརིཡཾ ཀཏྭཱ པཊིཔཏྟི ཙིཏྟཱིཀརཎཾ སམྦྷཱཝནཀིརིཡཱ, ཏཔྤཊིཀྑེཔཏོ ཨཙིཏྟཱིཀརཎཾ ཨསམྦྷཱཝནཀིརིཡཱ. ཨཔཝིདྡྷནྟི ཨུཙྪིཊྛཱདིཚཌྜནཱིཡདྷམྨཾ ཝིཡ ཨཝཁིཏྟཀཾ. ཡོ ཧི ཚཌྜེཏུཀཱམོ ཧུཏྭཱ རོགིནོ སརཱིརེ ཨོདནཱདཱིནི མཛྫིཏྭཱ ཝམྨིཀེ རོགཾ པཀྑིཔནྟོ ཝིཡ དེཏི, ཨཡཾ ཨཔཝིདྡྷཾ དེཏི ནཱམ. ཨནཱགམནདིཊྛིཀོཏི ‘‘ཨདྡྷཱ ཨིམསྶ དཱནསྶ ཕལཾ མམ ཨཱགཙྪཏཱི’’ཏི ཨེཝཾ ཡསྶ ཀམྨསྶཀཏདིཊྛི ཨཏྠི, སོ ཨཱགམནདིཊྛིཀོ. ཨཡཾ པན ན ཏཱདིསོཏི ཨནཱགམནདིཊྛིཀོ, ཕལཾ པཱཊིཀངྑཾ ཧུཏྭཱ ན དེཏཱིཏི ཨཏྠོ. ཏེནཱཧ ‘‘ན ཀམྨཉྩ ཕལཉྩ སདྡཧིཏྭཱ དེཏཱི’’ཏི.

ཝེལཱམོཏི ¶ ཨེཏྠ མཱ-སདྡོ པཊིསེདྷཝཙནོ. ཛཱཏིགོཏྟརཱུཔབྷོགཱདིགུཎཱནཾ ཝེལཱ མརིཡཱདཱ ནཏྠི ཨེཏསྨིནྟི ཝེལཱམོ. ཨཐ ཝཱ ཡཐཱཝུཏྟགུཎཱནཾ ཝེལཱ མརིཡཱདཱ ཨམཏི ཨོསཱནཾ གཙྪཏི ཨེཏསྨིནྟི ཝེལཱམོ, ཝེལཾ ཝཱ མརིཡཱདཾ ཨམཏི གཙྪཏི ཨཏིཀྐམཏཱིཏི ཝེལཱམོ. ཏེནཱཧ ‘‘ཛཱཏིགོཏྟ…པེ… ཨེཝཾལདྡྷནཱམོ’’ཏི. དཱིཡཏཱིཏི དཱནཾ, དཱནཝཏྠུ. ཏཾ ཨགྒཱིཡཏི ནིསྶཛྫཱིཡཏི ཨེཏྠཱཏི དཱནགྒཾ. དཱནཾ ཝཱ གཎྷནྟི ཨེཏྠཱཏི དཱནགྒཾ, ཨེཝཾ བྷཏྟགྒཾ, པརིཝེསནཊྛཱནཾ. དུཀཱུལསནྡནཱནཱིཏི རཛཏབྷཱཛནཱདིནིསྶིཏེ དུཀཱུལེ ཁཱིརསྶ སནྡནཾ ཨེཏེསནྟི དུཀཱུལསནྡནཱནི. ཀཾསཱུཔདྷཱརཎཱནཱིཏི རཛཏམཡདོཧབྷཱཛནཱནི. ཏེནཱཧ ‘‘རཛཏམཡཁཱིརཔཊིཙྪཀཱནཱི’’ཏི. རཛཏམཡཱནི ཁཱིརཔཊིཙྪཀཱནི ཁཱིརཔཊིགྒཧབྷཱཛནཱནི ཨེཏེསནྟི རཛཏམཡཁཱིརཔཊིཙྪཀཱནི. སོདྷེཡྻཱཏི མཧཔྥལབྷཱཝཀརཎེན ཝིསོདྷེཡྻ. མཧཔྥལབྷཱཝཔྤཏྟིཡཱ ཧི དཀྑིཎཱ ཝིསུཛ྄ཛྷཏི ནཱམ.

མགྒེནཱགཏཾ ཨནིཝཏྟནསརཎནྟི ཨིམིནཱ ལོཀུཏྟརསརཎགམནཾ དཱིཔེཏི. ཨཔརེཏིཨཱདིནཱ ལོཀིཡསརཎགམནཾ ཝུཏྟཾ. སརཎཾ ནཱམ ཏིཎྞཾ རཏནཱནཾ ཛཱིཝིཏཔརིཙྩཱགམཡཾ པུཉྙཾ སབྦསམྤཏྟིཾ དེཏི, ཏསྨཱ མཧཔྥལཏརནྟི ཨདྷིཔྤཱཡོ. ཨིདཉྩ – ‘‘སཙེ ཏྭཾ ཡཐཱ གཧིཏཾ སརཎཾ ན བྷིནྡིསྶསི, ཨེཝཱཧཾ ཏཾ མཱརེམཱི’’ཏི ཡདིཔི ཀོཙི ཏིཎྷེན སཏྠེན ཛཱིཝིཏཱ ཝོརོཔེཡྻ, ཏཐཱཔི ‘‘ནེཝཱཧཾ བུདྡྷཾ ན བུདྡྷོཏི, དྷམྨཾ ན དྷམྨོཏི, སངྒྷཾ ན སངྒྷོཏི ཝདཱམཱི’’ཏི དལ༹ྷཏརཾ ཀཏྭཱ གཧིཏསྶ ཝསེན ཝུཏྟཾ. མགྒེནཱགཏནྟི ལོཀུཏྟརསཱིལཾ སནྡྷཱཡ ཝདཏི. ཨཔརེཏིཨཱདིནཱ པན ལོཀིཡསཱིལཾ ཝུཏྟཾ. སབྦེསཾ སཏྟཱནཾ ཛཱིཝིཏདཱནཱདིནིཧིཏདཎྜཏཱཡ སཀལལོཀིཡལོཀུཏྟརགུཎཱདྷིཊྛཱནཏོ ཙསྶ མཧཔྥལམཧཱནིསཾསཏཱ ཝེདིཏབྦཱ.

ཨུཔསིངྒྷནམཏྟནྟི ¶ གྷཱཡནམཏྟཾ. གདྡོཧནམཏྟནྟི པཱཋནྟརེ གོདོཧནམཏྟཾ ཀཱལནྟི ཨཏྠོ. སོ ཙ ན སཀལོ གོདོཧནཀྑཎོ ཨདྷིཔྤེཏོཏི དསྶེཏུཾ ‘‘གཱཝིཡཱ ཨེཀཝཱརཾ ཐནཨཉྪནམཏྟ’’ནྟི ཨཏྠོ ཝུཏྟོ. ཨཉྪནམཏྟནྟི ཨཱཀཌྜྷནམཏྟཾ. གཱཝིཡཱ ཐནཾ གཧེཏྭཱ ཨེཀཁཱིརབིནྡུདུཧནཀཱལམཏྟམྤི གདྡུཧནམཏྟནྟི ཝདནྟི. ཨེཏྟཀམྤི ཧི ཀཱལཾ ཡོ ཝསནགབྦྷཔརིཝེཎཝིཧཱརཱུཔཙཱརཔརིཙྪེདེན ཝཱ ཨཔརིམཱཎཱསུ ལོཀདྷཱཏཱུསུ ¶ སབྦསཏྟེ ཧིཏཕརཎཾ མེཏྟཙིཏྟཾ བྷཱཝེཏུཾ སཀྐོཏི. ཨིདཾ ཏཏོ ཡཐཱཝུཏྟདཱནཱདིཏོ མཧཔྥལཏརཾ.

ཝེལཱམསུཏྟཝཎྞནཱ ནིཊྛིཏཱ.

སཱིཧནཱདཝགྒཝཎྞནཱ ནིཊྛིཏཱ.

༣. སཏྟཱཝཱསཝགྒོ

༡. ཏིཋཱནསུཏྟཝཎྞནཱ

༢༡. ཏཏིཡསྶ པཋམེ ཨམམཱཏི ཝཏྠཱབྷརཎཔཱནབྷོཛནཱདཱིསུཔི མམཏྟཝིརཧིཏཱ. ཨཔརིགྒཧཱཏི ཨིཏྠིཔརིགྒཧེན ཨཔརིགྒཧཱ. ཏེསཾ ཀིར ‘‘ཨཡཾ མཡ྄ཧཾ བྷརིཡཱ’’ཏི མམཏྟཾ ན ཧོཏི, མཱཏརཾ ཝཱ བྷགིནིཾ ཝཱ དིསྭཱ ཚནྡརཱགོ ན ཨུཔྤཛྫཏི. དྷམྨཏཱསིདྡྷསྶ སཱིལསྶ ཨཱནུབྷཱཝེན པུཏྟེ དིཊྛམཏྟེ ཨེཝ མཱཏུཐནཏོ ཐཉྙཾ པགྒྷརཏི, ཏེན སཉྙཱཎེན ནེསཾ མཱཏརི པུཏྟསྶ མཱཏུསཉྙཱ, མཱཏུ ཙ པུཏྟེ པུཏྟསཉྙཱ པཙྩུཔཊྛིཏཱཏི ཀེཙི.

ཨཔིཙེཏྠ (སཱརཏྠ. ཊཱི. ༡.༡ ཝེརཉྫཀཎྜཝཎྞནཱ) ཨུཏྟརཀུརུཀཱནཾ པུཉྙཱནུབྷཱཝསིདྡྷོ ཨཡམྤི ཝིསེསོ ཝེདིཏབྦོ. ཏཏྠ ཀིར ཏེསུ ཏེསུ པདེསེསུ གྷནནིཙིཏཔཏྟསཉྪནྣསཱཁཱཔསཱཁཱ ཀཱུཊཱགཱརསམཱ མནོརམཱ རུཀྑཱ ཏེསཾ མནུསྶཱནཾ ནིཝེསནཀིཙྩཾ སཱདྷེནྟི. ཡཏྠ སུཁཾ ནིཝསནྟི, ཨཉྙེཔི ཏཏྠ རུཀྑཱ སུཛཱཏཱ སབྦདཱཔི པུཔྥིཏགྒཱ ཏིཊྛནྟི. ཛལཱསཡཱཔི ཝིཀསིཏཀམལཀུཝལཡཔུཎྜརཱིཀསོགནྡྷིཀཱདིཔུཔྥསཉྪནྣཱ སབྦཀཱལཾ པརམསུགནྡྷཾ སམནྟཏོ པཝཱཡནྟཱ ཏིཊྛནྟི. སརཱིརམྤི ཏེསཾ ཨཏིདཱིགྷཱདིདོསརཧིཏཾ ཨཱརོཧཔརིཎཱཧསམྤནྣཾ ཛརཱཡ ཨནབྷིབྷཱུཏཏྟཱ ཝལིཏཔལིཏཱདིདོསཝིརཧིཏཾ ཡཱཝཏཱཡུཀཾ ཨཔརིཀྑཱིཎཛཝབལཔརཀྐམསོབྷམེཝ ཧུཏྭཱ ¶ ཏིཊྛཏི. ཨནུཊྛཱནཕལཱུཔཛཱིཝིཏཱཡ ན ཙ ནེསཾ ཀསིཝཎིཛྫཱདིཝསེན ཨཱཧཱརཔརིཡེཊྛིཝསེན དུཀྑཾ ཨཏྠི, ཏཏོ ཨེཝ ན དཱསདཱསིཀམྨཀརཱདིཔརིགྒཧོ ཨཏྠི, ན ཙ ཏཏྠ སཱིཏུཎྷཌཾསམཀསཝཱཏཱཏཔསརཱིསཔཝཱལཱ༹དིཔརིསྶཡོ ཨཏྠི. ཡཐཱ ནཱམེཏྠ གིམྷཱནཾ པཙྪིམེ མཱསེ པཙྩཱུསཝེལཱཡཾ སམསཱིཏུཎྷོ ཨུཏུ ¶ ཧོཏི, ཨེཝམེཝ སབྦཀཱལཾ ཏཏྠ སམསཱིཏུཎྷོཝ ཨུཏུ ཧོཏི, ན ཙ ནེསཾ ཀོཙི ཨུཔགྷཱཏོ ཝིཧེསཱ ཝཱ ཨུཔྤཛྫཏི. ཨཀཊྛཔཱཀིམེཝ སཱལིཾ ཨཀཎཾ ཨཐུསཾ སུདྡྷཾ སུགནྡྷཾ ཏཎྜུལཔྥལཾ པརིབྷུཉྫནྟི. ཏཾ བྷུཉྫནྟཱནཾ ནེསཾ ཀུཊྛཾ, གཎྜོ, ཀིལཱསོ, སོསོ, ཀཱསོ, སཱསོ, ཨཔམཱརོ, ཛརོཏི ཨེཝམཱདིཀོ ན ཀོཙི རོགོ ཨུཔྤཛྫཏི, ན ཙ ཏེ ཁུཛྫཱ ཝཱ ཝཱམནཱ ཝཱ ཀཱཎཱ ཝཱ ཀུཎཱི ཝཱ ཁཉྫཱ ཝཱ པཀྑཧཏཱ ཝཱ ཝིཀལངྒཱ ཝཱ ཝིཀལིནྡྲིཡཱ ཝཱ ཧོནྟི.

ཨིཏྠིཡོཔི ཏཏྠ ནཱཏིདཱིགྷཱ, ནཱཏིརསྶཱ, ནཱཏིཀིསཱ, ནཱཏིཐཱུལཱ, ནཱཏིཀཱལཱ༹, ནཙྩོདཱཏཱ, སོབྷགྒཔྤཏྟརཱུཔཱ ཧོནྟི. ཏཐཱ ཧི དཱིགྷངྒུལཱི, ཏམྦནཁཱ, ཨལམྦཐནཱ, ཏནུམཛ྄ཛྷཱ, པུཎྞཙནྡམུཁཱི, ཝིསཱལཀྑཱི, མུདུགཏྟཱ, སཧིཏོརཱུ, ཨོདཱཏདནྟཱ, གམྦྷཱིརནཱབྷཱི, ཏནུཛངྒྷཱ, དཱིགྷནཱིལཝེལླིཏཀེསཱི, པུཐུལསུསྶོཎཱི, ནཱཏིལོམཱ, ནཱལོམཱ, སུབྷགཱ, ཨུཏུསུཁསམྥསྶཱ, སཎྷཱ, སཁིལཱ, སུཁསམྦྷཱསཱ, ནཱནཱབྷརཎཝིབྷཱུསིཏཱ ཝིཙརནྟི. སབྦདཱཔི སོལ༹སཝསྶུདྡེསིཀཱ ཝིཡ ཧོནྟི, པུརིསཱ ཙ པཉྩཝཱིསཏིཝསྶུདྡེསིཀཱ ཝིཡ. ན པུཏྟདཱརེསུ རཛྫནྟི. ཨཡཾ ཏཏྠ དྷམྨཏཱ.

སཏྟཱཧིཀམེཝ ཙ ཏཏྠ ཨིཏྠིཔུརིསཱ ཀཱམརཏིཡཱ ཝིཧརནྟི. ཏཏོ ཝཱིཏརཱགཱ ཝིཡ ཡཐཱསཀཾ གཙྪནྟི, ན ཏཏྠ ཨིདྷ ཝིཡ གབྦྷོཀྐནྟིམཱུལཀཾ, གབྦྷཔརིཧརཎམཱུལཀཾ, ཝིཛཱཡནམཱུལཀཾ ཝཱ དུཀྑཾ ཧོཏི. རཏྟཀཉྩུཀཏོ ཀཉྩནཔཊིམཱ ཝིཡ དཱརཀཱ མཱཏུཀུཙྪིཏོ ཨམཀྑིཏཱ ཨེཝ སེམྷཱདིནཱ སུཁེནེཝ ནིཀྑམནྟི. ཨཡཾ ཏཏྠ དྷམྨཏཱ.

མཱཏཱ པན པུཏྟཾ ཝཱ དྷཱིཏརཾ ཝཱ ཝིཛཱཡིཏྭཱ ཏེ ཝིཙརཎཀཔྤདེསེ ཋཔེཏྭཱ ཨནཔེཀྑཱ ཡཐཱརུཙི གཙྪཏི. ཏེསཾ ཏཏྠ སཡིཏཱནཾ ཡེ པསྶནྟི པུརིསཱ ཝཱ ཨིཏྠིཡོ ཝཱ, ཏེ ཨཏྟནོ ཨངྒུལིཡོ ཨུཔནཱམེནྟི. ཏེསཾ ཀམྨབལེན ཏཏོ ཁཱིརཾ པཝཏྟཏི, ཏེན ཏེ དཱརཀཱ ཡཱཔེནྟི. ཨེཝཾ པན ཝཌྜྷེནྟཱ ཀཏིཔཡདིཝསེཧེཝ ལདྡྷབལཱ ཧུཏྭཱ དཱརིཀཱ ཨིཏྠིཡོ ཨུཔགཙྪནྟི, དཱརཀཱ པུརིསེ. ཀཔྤརུཀྑཏོ ཨེཝ ཙ ཏེསཾ ཏཏྠ ཝཏྠཱབྷརཎཱནི ནིཔྥཛྫནྟི. ནཱནཱཝིརཱགཝཎྞཝིཙིཏྟཱནི ཧི སུཁུམཱནི མུདུསུཁསམྥསྶཱནི ཝཏྠཱནི ཏཏྠ ཏཏྠ ཀཔྤརུཀྑེསུ ཨོལམྦནྟཱནི ཏིཊྛནྟི. ནཱནཱཝིདྷརསྨིཛཱལསམུཛྫལཝིཝིདྷཝཎྞརཏནཝིནདྡྷཱནི ¶ ཨནེཀཝིདྷམཱལཱཀམྨལཏཱཀམྨབྷིཏྟིཀམྨཝིཙིཏྟཱནི ¶ སཱིསཱུཔགགཱིཝཱུཔགཧཏྠཱུཔགཀཊཱུཔགཔཱདཱུཔགཱནི སོཝཎྞམཡཱནི ཨཱབྷརཎཱནི ཀཔྤརུཀྑཏོ ཨོལམྦནྟི. ཏཐཱ ཝཱིཎཱམུདིངྒཔཎཝསམྨཏཱལ༹སངྑཝཾསཝེཏཱལ༹པརིཝཱདིནཱིཝལླཀཱིཔབྷུཏིཀཱ ཏཱུརིཡབྷཎྜཱཔི ཏཏོ ཏཏོ ཨོལམྦནྟི. ཏཏྠ བཧཱུ ཕལརུཀྑཱ ཀུམྦྷམཏྟཱནི ཕལཱནི ཕལནྟི མདྷུརརསཱནི, ཡཱནི པརིབྷུཉྫིཏྭཱ ཏེ སཏྟཱཧམྤི ཁུཔྤིཔཱསཱཧི ན བཱདྷཱིཡནྟི.

ནཛྫོཔི ཏཏྠ སུཝིསུདྡྷཛལཱ སུཔྤཏིཏྠཱ རམཎཱིཡཱ ཨཀདྡམཱ ཝཱལུཀཏལཱ ནཱཏིསཱིཏཱ ནཙྩུཎྷཱ སུརབྷིགནྡྷཱིཧི ཛལཛཔུཔྥེཧི སཉྪནྣཱ སབྦཀཱལཾ སུརབྷཱི ཝཱཡནྟིཡོ སནྡནྟི, ན ཏཏྠ ཀཎྚཀིཀཱ ཀཀྑལ༹གཙྪལཏཱ ཧོནྟི, ཨཀཎྚཀཱ པུཔྥཕལསམྤནྣཱ ཨེཝ ཧོནྟི, ཙནྡནནཱགརུཀྑཱ སཡམེཝ རསཾ པགྒྷརནྟི, ནཧཱཡིཏུཀཱམཱ ཙ ནདིཏིཏྠེ ཨེཀཛ྄ཛྷཾ ཝཏྠཱབྷརཎཱནི ཋཔེཏྭཱ ནདིཾ ཨོཏརིཏྭཱ ནྷཏྭཱ ཨུཏྟིཎྞུཏྟིཎྞཱ ཨུཔརིཊྛིམཾ ཨུཔརིཊྛིམཾ ཝཏྠཱབྷརཎཾ གཎྷནྟི, ན ཏེསཾ ཨེཝཾ ཧོཏི ‘‘ཨིདཾ མམ, ཨིདཾ པརསྶཱ’’ཏི. ཏཏོ ཨེཝ ན ཏེསཾ ཀོཙི ཝིགྒཧོ ཝཱ ཝིཝཱདོ ཝཱ. སཏྟཱཧིཀཱ ཨེཝ ཙ ནེསཾ ཀཱམརཏིཀཱིལཱ༹ ཧོཏི, ཏཏོ ཝཱིཏརཱགཱ ཝིཡ ཝིཙརནྟི. ཡཏྠ ཙ རུཀྑེ སཡིཏུཀཱམཱ ཧོནྟི, ཏཏྠེཝ སཡནཾ ཨུཔལབྦྷཏི. མཏེ ཙ སཏྟེ དིསྭཱ ན རོདནྟི ན སོཙནྟི. ཏཉྩ མཎྜཡིཏྭཱ ནིཀྑིཔནྟི. ཏཱཝདེཝ ཙ ནེསཾ ཏཐཱརཱུཔཱ སཀུཎཱ ཨུཔགནྟྭཱ མཏཾ དཱིཔནྟརཾ ནེནྟི, ཏསྨཱ སུསཱནཾ ཝཱ ཨསུཙིཊྛཱནཾ ཝཱ ཏཏྠ ནཏྠི, ན ཙ ཏཏོ མཏཱ ནིརཡཾ ཝཱ ཏིརཙྪཱནཡོནིཾ ཝཱ པེཏྟིཝིསཡཾ ཝཱ ཨུཔཔཛྫནྟི. དྷམྨཏཱསིདྡྷསྶ པཉྩསཱིལསྶ ཨཱནུབྷཱཝེན ཏེ དེཝལོཀེ ནིབྦཏྟནྟཱིཏི ཝདནྟི. ཝསྶསཧསྶམེཝ ཙ ནེསཾ སབྦཀཱལཾ ཨཱཡུཔྤམཱཎཾ, སབྦམེཏཾ ཏེསཾ པཉྩསཱིལཾ ཝིཡ དྷམྨཏཱསིདྡྷམེཝཱཏི.

ཏིཋཱནསུཏྟཝཎྞནཱ ནིཊྛིཏཱ.

༣. ཏཎྷཱམཱུལཀསུཏྟཝཎྞནཱ

༢༣. ཏཏིཡེ (དཱི. ནི. ཊཱི. ༢.༡༠༣) ཨེསནཏཎྷཱཏི བྷོགཱནཾ པརིཡེསནཝསེན པཝཏྟཱ ཏཎྷཱ. ཨེསིཏཏཎྷཱཏི པརིཡིཊྛེསུ བྷོགེསུ ཨུཔྤཛྫམཱནཏཎྷཱ. པརིཏསྶནཝསེན ¶ པརིཡེསཏི ཨེཏཱཡཱཏི པརིཡེསནཱ, ཨཱསཡཏོ པཡོགཏོ ཙ པརིཡེསནཱ ཏཐཱཔཝཏྟོ ཙིཏྟུཔྤཱདོ. ཏེནཱཧ ‘‘ཏཎྷཱཡ སཏི ཧོཏཱི’’ཏི. རཱུཔཱདིཨཱརམྨཎཔྤཊིལཱབྷོཏི སཝཏྠུཀཱནཾ རཱུཔཱདིཨཱརམྨཎཱནཾ གཝེསནཝསེན པཊིལཱབྷོ. ཡཾ པན ཨཔརིཡིཊྛཾཡེཝ ལབྦྷཏི, ཏམྤི ཨཏྠཏོ པརིཡེསནཱཡ ལདྡྷམེཝ ནཱམ ཏཐཱརཱུཔསྶ ཀམྨསྶ པུབྦེཀཏཏྟཱ ཨེཝ ལབྦྷནཏོ. ཏེནཱཧ ‘‘སོ ཧི པརིཡེསནཱཡ སཏི ཧོཏཱི’’ཏི.

སུཁཝིནིཙྪཡནྟི ¶ སུཁཾ ཝིསེསཏོ ནིཙྪིནོཏཱིཏི སུཁཝིནིཙྪཡོ. སུཁཾ སབྷཱཝཏོ སམུདཡཏོ ཨཏྠངྒམཏོ ཨཱདཱིནཝཏོ ནིསྶརཎཏོ ཙ ཡཱཐཱཝཏོ ཛཱནིཏྭཱ པཝཏྟཉཱཎཾཝ སུཁཝིནིཙྪཡཾ. ཛཉྙཱཏི ཛཱནེཡྻ. ‘‘སུབྷཾ སུཁ’’ནྟིཨཱདིཀཾ ཨཱརམྨཎེ ཨབྷཱུཏཱཀཱརཾ ཝིཝིདྷཾ ནིནྣབྷཱཝེན ཙིནོཏི ཨཱརོཔེཏཱིཏི ཝིནིཙྪཡོ, ཨསྶཱདཱནུཔསྶནཱ ཏཎྷཱ. དིཊྛིཡཱཔི ཨེཝམེཝ ཝིནིཙྪཡབྷཱཝོ ཝེདིཏབྦོ. ཨིམསྨིཾ པན སུཏྟེ ཝིཏཀྐོཡེཝ ཨཱགཏོཏི ཡོཛནཱ. ཨིམསྨིཾ པན སུཏྟེཏི སཀྐཔཉྷསུཏྟེ (དཱི. ནི. ༢.༣༥༨). ཏཏྠ ཧི ‘‘ཚནྡོ ཁོ, དེཝཱནམིནྡ, ཝིཏཀྐནིདཱནོ’’ཏི ཨཱགཏཾ. ཨིདྷཱཏི ཨིམསྨིཾ སུཏྟེ. ཝིཏཀྐེནེཝ ཝིནིཙྪིནནྟཱིཏི ཨེཏེན ‘‘ཝིནིཙྪིནཏི ཨེཏེནཱཏི ཝིནིཙྪཡོ’’ཏི ཝིནིཙྪཡསདྡསྶ ཀརཎསཱདྷནམཱཧ. ཨེཏྟཀནྟིཨཱདི ཝིནིཙྪཡནཱཀཱརདསྶནཾ.

ཚནྡནཊྛེན ཚནྡོ, ཨེཝཾ རཉྫནཊྛེན རཱགོཏི ཚནྡརཱགོ. སྭཱཡཾ ཨནཱསེཝནཏཱཡ མནྡོ ཧུཏྭཱ པཝཏྟོ ཨིདྷཱདྷིཔྤེཏོཏི ཨཱཧ ‘‘དུབྦལརཱགསྶཱདྷིཝཙན’’ནྟི. ཨཛ྄ཛྷོསཱནནྟི ཏཎྷཱདིཊྛིཝསེན ཨབྷིནིཝེསནཾ. ‘‘མཡ྄ཧཾ ཨིད’’ནྟི ཧི ཏཎྷཱགཱཧོ ཡེབྷུཡྻེན ཨཏྟགྒཱཧསནྣིསྶཡོཝ ཧོཏི. ཏེནཱཧ ‘‘ཨཧཾ མམནྟཱི’’ཏི. བལཝསནྣིཊྛཱནནྟི ཙ ཏེསཾ གཱཧཱནཾ ཐིརབྷཱཝཔྤཏྟིམཱཧ. ཏཎྷཱདིཊྛིཝསེན པརིགྒཧཀརཎནྟི ཨཧཾ མམནྟི བལཝསནྣིཊྛཱནཝསེན ཨབྷིནིཝིཊྛསྶ ཨཏྟཏྟནིཡགྒཱཧཝཏྠུནོ ཨཉྙཱསཱདྷཱརཎཾ ཝིཡ ཀཏྭཱ པརིགྒཧེཏྭཱ ཋཱནཾ, ཏཐཱཔཝཏྟོ ལོབྷསཧགཏཙིཏྟུཔྤཱདོ. ཨཏྟནཱ པརིགྒཧིཏསྶ ཝཏྠུནོ ཡསྶ ཝསེན པརེཧི སཱདྷཱརཎབྷཱཝསྶ ཨསཧམཱནོ ཧོཏི པུགྒལོ, སོ དྷམྨོ ཨསཧནཏཱ. ཨེཝཾ ཝཙནཏྠཾ ཝདནྟི ནིརུཏྟིནཡེན. སདྡལཀྑཎེན པན ཡསྶ དྷམྨསྶ ཝསེན མཙྪརིཡཡོགཏོ པུགྒལོ མཙྪརོ ¶ , ཏསྶ བྷཱཝོ, ཀམྨཾ ཝཱ མཙྪརིཡཾ, མཙྪརོ དྷམྨོ. མཙྪརིཡསྶ བལཝབྷཱཝཏོ ཨཱདརེན རཀྑཎཾ ཨཱརཀྑོཏི ཨཱཧ ‘‘དྭཱར…པེ… སུཊྛུ རཀྑཎ’’ནྟི.

ཨཏྟནོ ཕལཾ ཀརོཏཱིཏི ཀརཎཾ, ཡཾ ཀིཉྩི ཀཱརཎཾ. ཨདྷིཀཾ ཀརཎནྟི ཨདྷིཀརཎཾ, ཝིསེསཀཱརཎཾ. ཝིསེསཀཱརཎཉྩ བྷོགཱནཾ ཨཱརཀྑདཎྜཱདཱནཱདིཨནཏྠསམྦྷཝསྶཱཏི ཝུཏྟཾ ‘‘ཨཱརཀྑཱདྷིཀརཎ’’ནྟིཨཱདི. པརནིསེདྷནཏྠནྟི མཱརཎཱདིནཱ པརེསཾ ཝིབཱདྷནཏྠཾ. ཨཱདིཡནྟི ཨེཏེནཱཏི ཨཱདཱནཾ, དཎྜསྶ ཨཱདཱནཾ དཎྜཱདཱནཾ, དཎྜཾ ཨཱཧརིཏྭཱ པརཝིཧེཋནཙིཏྟུཔྤཱདོ. སཏྠཱདཱནེཔི ཨེསེཝ ནཡོ. ཧཏྠཔརཱམཱསཱདིཝསེན ཀཱཡེན ཀཱཏབྦོ ཀལཧོ ཀཱཡཀལཧོ. མམྨགྷཊྚནཱདིཝསེན ཝཱཙཱཡ ཀཱཏབྦོ ཀལཧོ ཝཱཙཱཀལཧོ. ཝིརུཛ྄ཛྷནཝསེན ཝིརཱུཔཾ གཎྷཱཏི ཨེཏེནཱཏི ཝིགྒཧོ. ཝིརུདྡྷཾ ཝདཏི ཨེཏེནཱཏི ཝིཝཱདོ. ‘‘ཏུཝཾ ཏུཝ’’ནྟི ཨགཱརཝཝཙནསཧཙརཎཏོ ¶ ཏུཝཾཏུཝཾ. སབྦེཔི ཏེ ཏཐཱཔཝཏྟདོསསཧགཏཱ ཙིཏྟུཔྤཱདཱ ཝེདིཏབྦཱ. ཏེནཱཧ བྷགཝཱ ‘‘ཨནེཀེ པཱཔཀཱ ཨཀུསལཱ དྷམྨཱ སམྦྷཝནྟཱི’’ཏི.

ཏཎྷཱམཱུལཀསུཏྟཝཎྞནཱ ནིཊྛིཏཱ.

༤-༥. སཏྟཱཝཱསསུཏྟཱདིཝཎྞནཱ

༢༤-༢༥. ཙཏུཏྠེ སཏྟཱ ཨཱཝསནྟི ཨེཏེསཱུཏི སཏྟཱཝཱསཱ, ནཱནཏྟསཉྙིཨཱདིབྷེདཱ སཏྟནིཀཱཡཱ. ཡསྨཱ ཏེ ཏེ སཏྟནིཝཱསཱ ཏཔྤརིཡཱཔནྣཱནཾ སཏྟཱནཾ ཏཱཡ ཨེཝ ཏཔྤརིཡཱཔནྣཏཱཡ ཨཱདྷཱརོ ཝིཡ ཝཏྟབྦཏཾ ཨརཧནྟི. སམུདཱཡཱཙཱརོ ཧི ཨཝཡཝསྶ ཡཐཱ ‘‘རུཀྑེ སཱཁཱ’’ཏི, ཏསྨཱ ‘‘སཏྟཱནཾ ཨཱཝཱསཱ, ཝསནཊྛཱནཱནཱིཏི ཨཏྠོ’’ཏི ཝུཏྟཾ. སུདྡྷཱཝཱསཱཔི སཏྟཱཝཱསོཝ ‘‘ན སོ, བྷིཀྑཝེ, སཏྟཱཝཱསོ སུལབྷརཱུཔོ, ཡོ མཡཱ ཨནཱཝུཏྠཔུབྦོ ཨིམིནཱ དཱིགྷེན ཨདྡྷུནཱ ཨཉྙཏྲ སུདྡྷཱཝཱསེཧི དེཝེཧཱི’’ཏི (དཱི. ནི. ༢.༩༡) ཝཙནཏོ. ཡདི ཨེཝཾ ཏེ ཀསྨཱ ཨིདྷ ན གཧིཏཱཏི ཏཏྠ ཀཱརཎམཱཧ ‘‘ཨསབྦཀཱལིཀཏྟཱ’’ཏིཨཱདི. ཝེཧཔྥལཱ པན ཙཏུཏྠེཡེཝ སཏྟཱཝཱསེ བྷཛནྟཱིཏི དཊྛབྦཾ. པཉྩམཾ ཨུཏྟཱནམེཝ.

སཏྟཱཝཱསསུཏྟཱདིཝཎྞནཱ ནིཊྛིཏཱ.

༦. སིལཱཡཱུཔསུཏྟཝཎྞནཱ

༢༦. ཚཊྛེ ¶ པམཱཎམཛ྄ཛྷིམསྶ པུརིསསྶ ཙཏུཝཱིསཏངྒུལིཀོ ཧཏྠོ ཀུཀྐུ, ‘‘ཀཀྐཱུ’’ཏིཔི ཏསྶེཝ ནཱམཾ. ཨཊྛ ཀུཀྐཱུ ཨུཔརི ནེམསྶཱཏི ཨཊྛ ཧཏྠཱ ཨཱཝཱཊསྶ ཨུཔརི ཨུགྒནྟྭཱ ཋིཏཱ བྷཝེཡྻུཾ. སེསམེཏྠ ཨུཏྟཱནམེཝ.

སིལཱཡཱུཔསུཏྟཝཎྞནཱ ནིཊྛིཏཱ.

༧. པཋམཝེརསུཏྟཝཎྞནཱ

༢༧. སཏྟམེ (སཾ. ནི. ཊཱི. ༢.༢༤༡) ཡཏོཏི ཡསྨིཾ ཀཱལེ. ཨཡཉྷི ཏོ-སདྡོ དཱ-སདྡོ ཝིཡ ཨིདྷ ཀཱལཝིསཡོ, ཡདཱཏི ཝུཏྟཾ ཧོཏི. བྷཡཱནི ཝེརཱནཱིཏི བྷཱིཡཏེ བྷཡཾ, བྷཡེན ཡོགཱ, བྷཱཡིཏབྦེན ཝཱ བྷཡཾ ཨེཝ ཝེརཔྤསཝཊྛེན ཝེརནྟི ཙ ལདྡྷནཱམཱ ཙེཏནཱདཡོ. པཱཎཱཏིཔཱཏཱདཡོ ¶ ཧི ཡསྶ པཝཏྟནྟི, ཡཉྩ ཨུདྡིསྶ པཝཏྟཱིཡནྟི, ཨུབྷཡེསཉྩ ཝེརཱཝཧཱ, ཏཏོ ཨེཝ ཙེཏེ བྷཱཡིཏབྦཱ ཝེརསཉྫནཀཱ ནཱམཱཏི. སོཏསྶ ཨརིཡམགྒསྶ ཨཱདིཏོ པཛྫནཾ པཊིཔཏྟི ཨདྷིགམོ སོཏཱཔཏྟི. ཏདཏྠཱཡ ཏཏྠ པཏིཊྛིཏསྶ ཙ ཨངྒཱནི སོཏཱཔཏྟིཡངྒཱནི. དུཝིདྷཉྷི (སཾ. ནི. ཨཊྛ. ༢.༢.༤༡) སོཏཱཔཏྟིཡངྒཾ སོཏཱཔཏྟིཨཏྠཱཡ ཙ ཨངྒཾ ཀཱརཎཾ, ཡཾ སོཏཱཔཏྟིམགྒཔྤཊིལཱབྷཏོ པུབྦབྷཱགེ སོཏཱཔཏྟིཔྤཊིལཱབྷཱཡ སཾཝཏྟཏི, ‘‘སཔྤུརིསསཾསེཝོ སདྡྷམྨསྶཝནཾ ཡོནིསོམནསིཀཱརོ དྷམྨཱནུདྷམྨཔཊིཔཏྟཱི’’ཏི (དཱི. ནི. ༣.༣༡༡) ཨེཝཾ ཨཱགཏཾ. པཊིལདྡྷགུཎསྶ ཙ སོཏཱཔཏྟིཾ པཏྭཱ ཋིཏསྶ ཨངྒཾ, ཡཾ ‘‘སོཏཱཔནྣསྶ ཨངྒ’’ནྟིཔི ཝུཙྩཏི ‘‘སོཏཱཔནྣོ ཨངྒཱིཡཏི ཉཱཡཏི ཨེཏེནཱ’’ཏི ཀཏྭཱ, བུདྡྷེ ཨཝེཙྩཔྤསཱདཱདཱིནཾ ཨེཏཾ ཨདྷིཝཙནཾ. ཨིདམིདྷཱདྷིཔྤེཏཾ.

ཁཱིཎནིརཡོཏིཨཱདཱིསུ ཨཱཡཏིཾ ཏཏྠ ཨནུཔྤཛྫནཏཱཡ ཁཱིཎོ ནིརཡོ མཡ྄ཧཏི, སོ ཨཧཾ ཁཱིཎནིརཡོ. ཨེས ནཡོ སབྦཏྠ. སོཏཱཔནྣོཏི མགྒསོཏཾ ཨཱཔནྣོ. ཨཝིནིཔཱཏདྷམྨོཏི ན ཝིནིཔཱཏསབྷཱཝོ. ནིཡཏོཏི པཋམམགྒསངྑཱཏེན སམྨཏྟནིཡཱམེན ནིཡཏོ. སམྦོདྷིཔརཱཡཎོཏི ཨུཔརིམགྒཏྟཡསངྑཱཏོ སམྦོདྷི པརཾ ཨཡནཾ ¶ མཡ྄ཧནྟི སོཧཾ སམྦོདྷིཔརཱཡཎོ, སམྦོདྷིཾ ཨཝསྶཾ ཨབྷིསམྦུཛ྄ཛྷནཀོཏི ཨཏྠོ.

པཱཎཱཏིཔཱཏཔཙྩཡཱཏི པཱཎཱཏིཔཱཏཀམྨསྶ ཀརཎཧེཏུ. བྷཡཾ ཝེརནྟི ཨཏྠཏོ ཨེཀཾ. ཝེརཾ ཝུཙྩཏི ཝིརོདྷོ, ཏདེཝ བྷཱཡིཏབྦཏོ ‘‘བྷཡ’’ནྟི ཝུཙྩཏི. ཏཉྩ པནེཏཾ དུཝིདྷཾ ཧོཏི – བཱཧིརཾ, ཨཛ྄ཛྷཏྟིཀནྟི. ཨེཀེན ཧི ཨེཀསྶ པིཏཱ མཱརིཏོ ཧོཏི. སོ ཙིནྟེཏི ‘‘ཨེཏེན ཀིར མེ པིཏཱ མཱརིཏོ, ཨཧམྤི ཏཾཡེཝ མཱརེསྶཱམཱི’’ཏི ནིསིཏཾ སཏྠཾ ཨཱདཱཡ ཙརཏི. ཡཱ ཏསྶ ཨབྦྷནྟརེ ཨུཔྤནྣཱ ཝེརཙེཏནཱ, ཨིདཾ བཱཧིརཾ ཝེརཾ ནཱམ ཏསྶ ཝེརསྶ མཱུལབྷཱུཏཏོ ཝེརཀཱརཀཔུགྒལཏོ བཧིབྷཱཝཏྟཱ. ཡཱ པན ཨིཏརསྶ ‘‘ཨཡཾ ཀིར མཾ མཱརེསྶཱམཱིཏི ཙརཏི, ཨཧམེཝ ནཾ པཋམཏརཾ མཱརེསྶཱམཱི’’ཏི ཙེཏནཱ ཨུཔྤཛྫཏི, ཨིདཾ ཨཛ྄ཛྷཏྟིཀཾ ཝེརཾ ནཱམ. ཨིདཾ ཏཱཝ ཨུབྷཡམྤི དིཊྛདྷམྨིཀམེཝ. ཡཱ པན ཏཾ ནིརཡེ ཨུཔྤནྣཾ དིསྭཱ ‘‘ཨེཏཾ པཧརིསྶཱམཱི’’ཏི ཛལིཏཾ ཨཡམུགྒརཾ གཎྷནྟསྶ ནིརཡཔཱལསྶ ཙེཏནཱ ཨུཔྤཛྫཏི, ཨིདམསྶ སམྤརཱཡིཀཾ བཱཧིརཾ ཝེརཾ. ཡཱ ཙསྶ ‘‘ཨཡཾ ནིདྡོསཾ མཾ པཧརིསྶཱམཱིཏི ཨཱགཙྪཏི, ཨཧམེཝ ནཾ པཋམཏརཾ པཧརིསྶཱམཱི’’ཏི ཙེཏནཱ ཨུཔྤཛྫཏི, ཨིདམསྶ སམྤརཱཡིཀཾ ཨཛ྄ཛྷཏྟཾ ཝེརཾ. ཡཾ པནེཏཾ བཱཧིརཾ ཝེརཾ, ཏཾ ཨཊྛཀཐཱསུ ‘‘པུགྒལཝེར’’ནྟི ཝུཙྩཏི. དུཀྑཾ དོམནསྶནྟི ཨཏྠཏོ ཨེཀམེཝ. ཡཐཱ ཙེཏྠ, ཨེཝཾ སེསེསུཔི ‘‘ཨིམིནཱ མམ བྷཎྜཾ ཧཊཾ, མཡ྄ཧཾ དཱརེསུ ཙཱརིཏྟཾ ཨཱཔནྣཾ, མུསཱ ཝཏྭཱ ཨཏྠོ བྷགྒོ, སུརཱམདམཏྟེན ཨིདཾ ནཱམ ཀཏ’’ནྟིཨཱདིནཱ ནཡེན ཝེརཔྤཝཏྟི ཝེདིཏབྦཱ.

ཨཝེཙྩཔྤསཱདེནཱཏི ¶ ཨདྷིགཏེན ཨཙལཔྤསཱདེན. ཨརིཡཀནྟེཧཱིཏི པཉྩཧི སཱིལེཧི. ཏཱནི ཧི ཨརིཡཱནཾ ཀནྟཱནི པིཡཱནི བྷཝནྟི, བྷཝནྟརགཏཱཔི ཨརིཡཱ ཏཱནི ན ཝིཛཧནྟི, ཏསྨཱ ‘‘ཨརིཡཀནྟཱནཱི’’ཏི ཝུཙྩནྟི. སེསམེཏྠ ཡཾ ཝཏྟབྦཾ སིཡཱ, ཏཾ སབྦཾ ཝིསུདྡྷིམགྒེ ཨནུསྶཏིནིདྡེསེ ཝུཏྟནྟི ཝེདིཏབྦཾ.

པཋམཝེརསུཏྟཝཎྞནཱ ནིཊྛིཏཱ.

༩. ཨཱགྷཱཏཝཏྠུསུཏྟཝཎྞནཱ

༢༩. ནཝམེ ¶ ཝསཏི ཨེཏྠ ཕལཾ ཏནྣིམིཏྟཏཱཡ པཝཏྟཏཱིཏི ཝཏྠུ, ཀཱརཎནྟི ཨཱཧ ‘‘ཨཱགྷཱཏཝཏྠཱུནཱི’’ཏི. ཀོཔོ ནཱམཱཡཾ ཡསྨིཾ ཝཏྠུསྨིཾ ཨུཔྤཛྫཏི, ན ཏཏྠ ཨེཀཝཱརམེཝ ཨུཔྤཛྫཏི, ཨཐ ཁོ པུནཔི ཨུཔྤཛྫཏེཝཱཏི ཝུཏྟཾ ‘‘བནྡྷཏཱི’’ཏི. ཨཐ ཝཱ ཡོ པཙྩཡཝིསེསེན ཨུཔྤཛྫམཱནོ ཨཱགྷཱཏོ སཝིསཡེ བདྡྷོ ཝིཡ ན ཝིགཙྪཏི, པུནཔི ཨུཔྤཛྫཏེཝ. ཏཾ སནྡྷཱཡཱཧ ‘‘ཨཱགྷཱཏཾ བནྡྷཏཱི’’ཏི. ཏཾ པནསྶ པཙྩཡཝསེན ནིབྦཏྟནཾ ཨུཔྤཱདནམེཝཱཏི ཝུཏྟཾ ‘‘ཨུཔྤཱདེཏཱི’’ཏི.

ཨཱགྷཱཏཝཏྠུསུཏྟཝཎྞནཱ ནིཊྛིཏཱ.

༡༠. ཨཱགྷཱཏཔཊིཝིནཡསུཏྟཝཎྞནཱ

༣༠. དསམེ ཏཾ ཀུཏེཏྠ ལབྦྷཱཏི ཨེཏྠ ཏནྟི ཀིརིཡཱཔརཱམསནཾ. པདཛ྄ཛྷཱཧཱརེན ཙ ཨཏྠོ ཝེདིཏབྦོཏི ‘‘ཏཾ ཨནཏྠཙརཎཾ མཱ ཨཧོསཱི’’ཏིཨཱདིམཱཧ. ཀེན ཀཱརཎེན ལདྡྷབྦཾ ནིརཏྠཀབྷཱཝཏོ. ཀམྨསྶཀཱ ཧི སཏྟཱ. ཏེ ཀསྶ རུཙིཡཱ དུཀྑིཏཱ སུཁིཏཱ ཝཱ བྷཝནྟི, ཏསྨཱ ཀེཝལཾ ཏསྨིཾ མཡ྄ཧཾ ཨནཏྠཙརཎཾ, ཏཾ ཀུཏེཏྠ ལབྦྷཱཏི ཨདྷིཔྤཱཡོ. ཨཐ ཝཱ ཏཾ ཀོཔཀཱརཎཾ ཨེཏྠ པུགྒལེ ཀུཏོ ལབྦྷཱ པརམཏྠཏོ ཀུཛ྄ཛྷིཏབྦསྶ ཀུཛ྄ཛྷནཀསྶ ཙ ཨབྷཱཝཏོ. སངྑཱརམཏྟཉྷེཏཾ, ཡདིདཾ ཁནྡྷཔཉྩཀཾ ཡཾ ‘‘སཏྟོ’’ཏི ཝུཙྩཏི, ཏེ སངྑཱརཱ ཨིཏྟརཁཎིཀཱ, ཀསྶ ཀོ ཀུཛ྄ཛྷཏཱིཏི ཨཏྠོ. ལཱབྷཱ ནཱམ ཀེ སིཡུཾ ཨཉྙཏྲ ཨནཏྠུཔྤཏྟིཏོ.

ཨཱགྷཱཏཔཊིཝིནཡསུཏྟཝཎྞནཱ ནིཊྛིཏཱ.

༡༡. ཨནུཔུབྦནིརོདྷསུཏྟཝཎྞནཱ

༣༡. ཨེཀཱདསམེ ¶ ཨནུཔུབྦནིརོདྷཱཏི ཨནུཔུབྦེན ཨནུཀྐམེན པཝཏྟེཏབྦནིརོདྷཱ. ཏེནཱཧ ‘‘ཨནུཔཊིཔཱཊིནིརོདྷཱ’’ཏི.

ཨནུཔུབྦནིརོདྷསུཏྟཝཎྞནཱ ནིཊྛིཏཱ.

སཏྟཱཝཱསཝགྒཝཎྞནཱ ནིཊྛིཏཱ.

༤. མཧཱཝགྒོ

༡. ཨནུཔུབྦཝིཧཱརསུཏྟཝཎྞནཱ

༣༢. ཙཏུཏྠསྶ ¶ པཋམེ ཨནུཔུབྦཏོ ཝིཧརིཏབྦཱཏི ཨནུཔུབྦཝིཧཱརཱ. ཨནུཔཊིཔཱཊིཡཱཏི ཨནུཀྐམེན. སམཱཔཛྫིཏབྦཝིཧཱརཱཏི སམཱཔཛྫིཏྭཱ སམངྒིནོ ཧུཏྭཱ ཝིཧརིཏབྦཝིཧཱརཱ.

ཨནུཔུབྦཝིཧཱརསུཏྟཝཎྞནཱ ནིཊྛིཏཱ.

༢-༣. ཨནུཔུབྦཝིཧཱརསམཱཔཏྟིསུཏྟཱདིཝཎྞནཱ

༣༣-༣༤. དུཏིཡེ ཚཱཏཾ ཝུཙྩཏི ཏཎྷཱདིཊྛིཡོ ཀཱམཱནཾ པཱཏབྦཏོ ཏཱསཾ ཝསེན ཝཏྟནཏོ, ཏནྣིནྣཏྟཱ ནཏྠི ཨེཏེསུ ཚཱཏནྟི ནིཙྪཱཏཱ. ཏེནཱཧ ‘‘ཏཎྷཱདིཊྛིཙྪཱཏཱན’’ནྟིཨཱདི. ཏཏིཡེ ནཏྠི ཝཏྟབྦཾ.

ཨནུཔུབྦཝིཧཱརསམཱཔཏྟིསུཏྟཱདིཝཎྞནཱ ནིཊྛིཏཱ.

༤. གཱཝཱིཨུཔམཱསུཏྟཝཎྞནཱ

༣༥. ཙཏུཏྠེ ¶ པབྦཏཙཱརིནཱིཏི པཀཏིཡཱ པབྦཏེ བཧུལཙཱརིནཱི. ཨཁེཏྟཉྙཱུཏི (ཝིསུདྡྷི. མཧཱཊཱི. ༡.༧༧) ཨགོཙརཉྙཱུ. སམཱདྷིཔརིཔནྟཱནཾ ཝིསོདྷནཱནབྷིཉྙཏཱཡ བཱལོ. ཛྷཱནསྶ པགུཎབྷཱཝཱཔཱདནཝེཡྻཏྟིཡསྶ ཨབྷཱཝེན ཨབྱཏྟོ. ཨུཔརིཛྷཱནསྶ པདཊྛཱནབྷཱཝཱནཝབོདྷེན ཨཁེཏྟཉྙཱུ. སབྦཐཱཔི སམཱཔཏྟིཀོསལླཱབྷཱཝེན ཨཀུསལོ. སམཱདྷིནིམིཏྟསྶ ཝཱ ཨནཱསེཝནཱཡ བཱལོ. ཨབྷཱཝནཱཡ ཨབྱཏྟོ. ཨབཧུལཱིཀཱརེན ཨཁེཏྟཉྙཱུ. སམྨདེཝ ཨནདྷིཊྛཱནཏོ ཨཀུསལོཏི ཡོཛེཏབྦཾ. ཨུབྷཏོ བྷཊྛོཏི ཨུབྷཡཏོ ཛྷཱནཏོ བྷཊྛོ. སོ ཧི ཨཔྤགུཎཏཱཡ ན སུཔྤཏིཊྛིཏཏཱཡ སཨུསྶཱཧོཔི ཝིནཱསཏོ ཨསཱམཏྠིཡཏོ ཙ ཛྷཱནདྭཡཏོ པརིཧཱིནོ.

གཱཝཱིཨུཔམཱསུཏྟཝཎྞནཱ ནིཊྛིཏཱ.

༥. ཛྷཱནསུཏྟཝཎྞནཱ

༣༦. པཉྩམེ ¶ ཨནིཙྩཏོཏི ཨིམིནཱ ནིཙྩཔྤཊིཀྑེཔཏོ ཏེསཾ ཨནིཙྩཏམཱཧ. ཏཏོ ཨེཝ ཨུདཡཝཡཝནྟཏོ ཝིཔརིཎཱམཏོ ཏཱཝཀཱལིཀཏོ ཙ ཏེ ཨནིཙྩཱཏི ཛོཏིཏཾ ཧོཏི. ཡཉྷི ནིཙྩཾ ན ཧོཏི, ཏཾ ཨུདཡཝཡཔརིཙྪིནྣཛརཱཡ མརཎེན ཙཱཏི དྭེདྷཱ ཝིཔརིཎཏཾ ཨིཏྟརཀྑཎམེཝ ཙ ཧོཏི. དུཀྑཏོཏི ན སུཁཏོ. ཨིམིནཱ སུཁཔྤཊིཀྑེཔཏོ ཏེསཾ དུཀྑཏམཱཧ. ཏཏོ ཨེཝ ཙ ཨབྷིཎྷཔྤཊིཔཱིལ༹ནཏོ དུཀྑཝཏྠུཏོ ཙ ཏེ དུཀྑཱཏི ཛོཏིཏཾ ཧོཏི. ཨུདཡཝཡཝནྟཏཱཡ ཧི ཏེ ཨབྷིཎྷཔྤཊིཔཱིལ༹ནཏོ ནིརནྟརདུཀྑཏཱཡ དུཀྑསྶེཝ ཙ ཨདྷིཊྛཱནབྷཱུཏོ. པཙྩཡཡཱཔནཱིཡཏཱཡ རོགམཱུལཏཱཡ ཙ རོགཏོ. དུཀྑཏཱསཱུལཡོགཏོ ཀིལེསཱསུཙིཔགྒྷརཏོ ཨུཔྤཱདཛརཱབྷངྒེཧི ཨུདྡྷུམཱཏཔཀྐབྷིཛྫནཏོ ཙ གཎྜཏོ. པཱིལཱ༹ཛནནཏོ ཨནྟོཏུདནཏོ དུནྣཱིཧརཎཏོ ཙ སལླཏོ. ཨཝཌྜྷིཨཱཝཧནཏོ ཨགྷཝཏྠུཏོ ཙ ཨགྷཏོ. ཨསེརིབྷཱཝཛནནཏོ ཨཱབཱདྷཔྤཏིཊྛཱནཏཱཡ ཙ ཨཱབཱདྷཏོ. ཨཝསཝཏྟནཏོ ཨཝིདྷེཡྻཏཱཡ ཙ པརཏོ. བྱཱདྷིཛརཱམརཎེཧི པལུཛྫནཱིཡཏཱཡ པལོཀཏོ. སཱམིནིཝཱསཱིཀཱརཀཝེདཀཨདྷིཊྛཱཡཀཝིརཧཏོ སུཉྙཏོ. ཨཏྟཔྤཊིཀྑེཔཊྛེན ཨནཏྟཏོ. རཱུཔཱདིདྷམྨཱཔི ཡཐཱ ན ཨེཏྠ ཨཏྟཱ ཨཏྠཱིཏི ཨནཏྟཱ, ཨེཝཾ སཡམྤི ཨཏྟཱ ན ཧོནྟཱིཏི ཨནཏྟཱ. ཏེན ཨབྱཱཔཱརཏོ ནིརཱིཧཏོ ཏུཙྪཏོ ཨནཏྟཱཏི དཱིཔིཏཾ ཧོཏི.

ལཀྑཎཏྟཡམེཝ སུཁཱཝབོདྷནཏྠཾ ཨེཀཱདསཧི པདེཧི ཝིབྷཛིཏྭཱ གཧིཏནྟི དསྶེཏུཾ ‘‘ཡསྨཱ ཨནིཙྩཏོ’’ཏིཨཱདི ཝུཏྟཾ. ཨནྟོསམཱཔཏྟིཡནྟི སམཱཔཏྟཱིནཾ སཧཛཱཏཏཱཡ སམཱཔཏྟཱིནཾ ཨབྦྷནྟརེ ¶ ཙིཏྟཾ པཊིསཾཧརཏཱིཏི ཏཔྤཊིབདྡྷཚནྡརཱགཱདིཀིལེསཝིཀྑམྦྷནེན ཝིཔསྶནཱཙིཏྟཾ པཊིསཾཧརཏི. ཏེནཱཧ ‘‘མོཙེཏི ཨཔནེཏཱི’’ཏི. སཝནཝསེནཱཏི ‘‘སབྦསངྑཱརསམཐོ’’ཏིཨཱདིནཱ སཝནཝསེན. ཐུཏིཝསེནཱཏི ཏཐེཝ ཐོམནཱཝསེན གུཎཏོ སཾཀིཏྟནཝསེན. པརིཡཏྟིཝསེནཱཏི ཏསྶ དྷམྨསྶ པརིཡཱཔུཎནཝསེན. པཉྙཏྟིཝསེནཱཏི ཏདཏྠསྶ པཉྙཱཔནཝསེན. ཨཱརམྨཎཀརཎཝསེནེཝ ཨུཔསཾཧརཏི མགྒཙིཏྟཾ, ‘‘ཨེཏཾ སནྟ’’ནྟིཨཱདི པན ཨཝདྷཱརཎནིཝཏྟིཏཏྠདསྶནཾ. ཡཐཱ ཝིཔསྶནཱ ‘‘ཨེཏཾ སནྟཾ ཨེཏཾ པཎཱིཏ’’ནྟིཨཱདིནཱ ཨསངྑཏཱཡ དྷཱཏུཡཱ ཙིཏྟཾ ཨུཔསཾཧརཏི, ཨེཝཾ མགྒོ ནིབྦཱནཾ སཙྪིཀིརིཡཱབྷིསམཡཝསེན ཨབྷིསམེནྟོ ཏཏྠ ལབྦྷམཱནེ སབྦེཔི ཝིསེསེ ¶ ཨསམྨོཧཏོ པཊིཝིཛ྄ཛྷནྟོ ཏཏྠ ཙིཏྟཾ ཨུཔསཾཧརཏི. ཏེནཱཧ ‘‘ཨིམིནཱ པན ཨཱཀཱརེནཱ’’ཏིཨཱདི.

སོ ཏཏྠ ཋིཏོཏི སོ ཨདནྡྷཝིཔསྶཀོ ཡོགཱི ཏཏྠ ཏཱཡ ཨནིཙྩཱདིལཀྑཎཏྟཡཱརམྨཎཱཡ ཝིཔསྶནཱཡ ཋིཏོ. སབྦསོཏི སབྦཏྠ ཏསྶ ཏསྶ མགྒསྶ ཨདྷིགམཱཡ ནིབྦཏྟིཏསམཐཝིཔསྶནཱསུ. ཨསཀྐོནྟོ ཨནཱགཱམཱི ཧོཏཱིཏི ཧེཊྛིམམགྒཱཝཧཱསུ ཨེཝ སམཐཝིཔསྶནཱཡ ཚནྡརཱགཾ པཧཱཡ ཨགྒམགྒཱཝཧཱསུ ནིཀནྟིཾ པརིཡཱདཱཏུཾ ཨསཀྐོནྟོ ཨནཱགཱམིཏཱཡམེཝ སཎྛཱཏི.

སམཏིཀྐནྟཏྟཱཏི སམཐཝསེན ཝིཔསྶནཱཝསེན ཙཱཏི སབྦཐཱཔི རཱུཔསྶ སམཏིཀྐནྟཏྟཱ. ཏེནཱཧ ‘‘ཨཡཾ ཧཱི’’ཏིཨཱདི. ཨནེནཱཏི ཡོགིནཱ. ཏཾ ཨཏིཀྐམྨཱཏི ཨིདཾ ཡོ པཋམཾ པཉྩཝོཀཱརཨེཀཝོཀཱརཔརིཡཱཔནྣེ དྷམྨེ སམྨདེཝ སམྨསིཏྭཱ ཏེ ཝིསྶཛྫེཏྭཱ ཏཏོ ཨརཱུཔསམཱཔཏྟིཾ སམཱཔཛྫིཏྭཱ ཨརཱུཔདྷམྨེ སམྨསཏི, ཏཾ སནྡྷཱཡ ཝུཏྟཾ. ཏེནཱཧ ‘‘ཨིདཱནི ཨརཱུཔཾ སམྨསཏཱི’’ཏི.

ཛྷཱནསུཏྟཝཎྞནཱ ནིཊྛིཏཱ.

༦. ཨཱནནྡསུཏྟཝཎྞནཱ

༣༧. ཚཊྛེ ཨོཀཱསཾ ཨཝསརཾ ཨདྷིགཙྪཏི ཨེཏེནཱཏི ཨོཀཱསཱདྷིགམོ, མགྒཕལསུཁཱདྷིགམཱཡ ཨོཀཱསབྷཱཝཏོ ཝཱ ཨོཀཱསོ, ཏསྶ ཨདྷིགམོ ཨོཀཱསཱདྷིགམོ. ཨེཏྠ ཙ དཱིགྷནིཀཱཡེནེཝ (དཱི. ནི. ༢.༢༨༨) པན སུཏྟནྟདེསནཱཡཾ པཋམཛ྄ཛྷཱནཾ, ཙཏུཏྠཛ྄ཛྷཱནཾ, ཨརཧཏྟམགྒོཏི ཏཡོ ཨོཀཱསཱདྷིགམཱ ཨཱགཏཱ. ཏཏྠ (དཱི. ནི. ཨཊྛ. ༢.༢༨༨) པཋམཾ ཛྷཱནཾ པཉྩ ནཱིཝརཎཱནི ཝིཀྑམྦྷེཏྭཱ ཨཏྟནོ ཨོཀཱསཾ གཧེཏྭཱ ཏིཊྛཏཱིཏི ‘‘པཋམོ ཨོཀཱསཱདྷིགམོ’’ཏི ¶ ཝུཏྟཾ. ཙཏུཏྠཛ྄ཛྷཱནཾ པན སུཁདུཀྑཾ ཝིཀྑམྦྷེཏྭཱ ཨཏྟནོ ཨོཀཱསཾ གཧེཏྭཱ ཏིཊྛཏཱིཏི དུཏིཡོ ཨོཀཱསཱདྷིགམོ. ཨརཧཏྟམགྒོ སབྦཀིལེསེ ཝིཀྑམྦྷེཏྭཱ ཨཏྟནོ ཨོཀཱསཾ གཧེཏྭཱ ཏིཊྛཏཱིཏི ‘‘ཏཏིཡོ ཨོཀཱསཱདྷིགམོ’’ཏི ཝུཏྟོ. ཨིདྷ པན ཝཀྑམཱནཱནི ཏཱིཎི ཨརཱུཔཛ྄ཛྷཱནཱནི སནྡྷཱཡ ‘‘ཨོཀཱསཱདྷིགམོ’’ཏི ཝུཏྟཾ. ཏེསཾཡེཝ ཙ གཧཎེ ཀཱརཎཾ སཡམེཝ ཝཀྑཏི.

སཏྟཱནཾ ¶ ཝིསུདྡྷིཾ པཱཔནཏྠཱཡཱཏི རཱགཱདཱིཧི མལེཧི ཨབྷིཛ྄ཛྷཱཝིསམལོབྷཱདཱིཧི ཙ ཨུཔཀྐིལེསེཧི ཀིལིཊྛཙིཏྟཱནཾ སཏྟཱནཾ ཝིསུདྡྷིཔཱཔནཏྠཱཡ སམཏིཀྐམནཏྠཱཡ. ཨཱཡཏིཾ ཨནུཔྤཛྫནཉྷི ཨིདྷ ‘‘སམཏིཀྐམོ’’ཏི ཝུཏྟཾ. ཨཏྠཾ གམནཏྠཱཡཱཏི ཀཱཡིཀདུཀྑསྶ ཙ ཙེཏསིཀདོམནསྶསྶ ཙཱཏི ཨིམེསཾ དྭིནྣཾ ཨཏྠངྒམཱཡ, ནིརོདྷཱཡཱཏི ཨཏྠོ. ཉཱཡཏི ནིཙྪཡེན ཀམཏི ནིབྦཱནཾ, ཏཾ ཝཱ ཉཱཡཏི པཊིཝིཛ྄ཛྷཱིཡཏི ཨེཏེནཱཏི ཉཱཡོ, སམུཙྪེདབྷཱཝོ ཨརིཡམགྒོཏི ཨཱཧ ‘‘སཧཝིཔསྶནཀསྶ མགྒསྶཱ’’ཏི. པཙྩཀྑཀརཎཏྠཱཡཱཏི ཨཏྟཔཙྩཀྑཏཱཡ. པརཔཙྩཡེན ཝིནཱ པཙྩཀྑཀརཎཉྷི ‘‘སཙྪིཀིརིཡཱ’’ཏི ཝུཙྩཏི. ཨསམྦྷིནྣནྟི པིཏྟསེམྷཱདཱིཧི ཨཔལིབུདྡྷཾ ཨནུཔཧཏཾ.

རཱགཱནུགཏོ སམཱདྷི ཨབྷིནཏོ ནཱམ ཧོཏི ཨཱརམྨཎེ ཨབྷིམུཁཱབྷཱཝེན པཝཏྟིཡཱ, དོསཱནུགཏོ པན ཨཔནཏོ ཨཔགམནཝསེན པཝཏྟིཡཱ, ཏདུབྷཡཔྤཊིཀྑེཔེན ‘‘ན ཙཱབྷིནཏོ ན ཙཱཔནཏོ’’ཏི ཝུཏྟནྟི ཨཱཧ ‘‘རཱགཝསེནཱ’’ཏིཨཱདི. ན སསངྑཱརནིགྒཡ྄ཧཝཱརིཏགཏོཏི ལོཀིཡཛ྄ཛྷཱནཙིཏྟཱནི ཝིཡ ན སསངྑཱརེན སཔྤཡོགེན ཏདངྒཔྤཧཱནཝིཀྑམྦྷནཔྤཧཱནཝསེན ཙ ནིགྒཧེཏྭཱ ཝཱརེཏྭཱ ཋིཏོ. ཀིཉྩརཧི ཀིལེསཱནཾ ཚིནྣནྟེ ཨུཔྤནྣོ. ཏཐཱབྷཱུཏཾ ཕལསམཱདྷིཾ སནྡྷཱཡེཏཾ ཝུཏྟཾ. ཏེནཱཧ ‘‘ན སསངྑཱརེན…པེ… ཚིནྣནྟེ ཨུཔྤནྣོ’’ཏི.

ཨཱནནྡསུཏྟཝཎྞནཱ ནིཊྛིཏཱ.

༧. ལོཀཱཡཏིཀསུཏྟཝཎྞནཱ

༣༨. སཏྟམེ ལོཀཱཡཏཝཱདཀཱཏི ཨཱཡཏིཾ ཧིཏཾ ལོཀོ ན ཡཏཏི ན ཝིརུཧཏི ཨེཏེནཱཏི ལོཀཱཡཏཾ, ཝིཏཎྜསཏྠཾ. ཏཉྷི གནྠཾ ནིསྶཱཡ སཏྟཱ པུཉྙཀིརིཡཱཡ ཙིཏྟམྤི ན ཨུཔྤཱདེནྟི, ཏཾ ཝདནྟཱིཏི ལོཀཱཡཏཝཱདཀཱ.

དལ༹ྷཾ ¶ ཐིརཾ དྷནུ ཨེཏསྶཱཏི དལ༹ྷདྷནྭཱ (ཨ. ནི. ཊཱི. ༢.༤.༤༥-༤༦; སཾ. ནི. ཊཱི. ༡.༡.༡༠༧), སོ ཨེཝ ‘‘དལ༹ྷདྷམྨཱ’’ཏི ཝུཏྟོ. པཊིསཏྟུཝིདྷམནཏྠཾ དྷནུཾ གཎྷཱཏཱིཏི དྷནུགྒཧོ. སོ ཨེཝ ཨུསུཾ སརཾ ཨསཏི ཁིཔཏཱིཏི ཨིསྶཱསོ. དྭིསཧསྶཐཱམནྟི ལོཧཱདིབྷཱརཾ ཝཧིཏུཾ སམཏྠཾ དྭིསཧསྶཐཱམཾ. ཏེནཱཧ ‘‘དྭིསཧསྶཐཱམཾ ནཱམཱ’’ཏིཨཱདི. དཎྜེཏི དྷནུདཎྜེ. ཡཱཝ ཀཎྜཔྤམཱཎཱཏི དཱིགྷཏོ ཡཏྟཀཾ ཀཎྜསྶ པམཱཎཾ, ཏཏྟཀེ ¶ དྷནུདཎྜེ ཨུཀྑིཏྟམཏྟེ ཨཱརོཔིཏེསུཡེཝ ཛིཡཱདཎྜེསུ སོ ཙེ བྷཱརོ པཐཝིཏོ མུཙྩཏི, ཨེཝཾ ཨིདཾ དྭིསཧསྶཐཱམཾ ནཱམ དྷནཱུཏི དཊྛབྦཾ. ཨུགྒཧིཏསིཔྤོཏི ཨུགྒཧིཏདྷནུསིཔྤོ. ཀཏཧཏྠོཏི ཐིརཏརཾ ལཀྑེསུ ཨཝིརཛ྄ཛྷནསརཀྑེཔོ. ཨཱིདིསོ པན ཏཏྠ ཝསིབྷཱུཏོ ཀཏཧཏྠོ ནཱམ ཧོཏཱིཏི ཨཱཧ ‘‘ཙིཎྞཝསིབྷཱཝོ’’ཏི. ཀཏཾ རཱཛཀུལཱདཱིསུ ཨུཔེཙྩ ཨསནཾ ཨེཏེན སོ ཀཏཱུཔཱསནོཏི ཨཱཧ ‘‘རཱཛཀུལཱདཱིསུ དསྶིཏསིཔྤོ’’ཏི. ཨེཝཾ ཀཏནྟི ཨེཝཾ ཨནྟོསུསིརཀརཎཱདིནཱ སལླཧུཀཾ ཀཏཾ.

ལོཀཱཡཏིཀསུཏྟཝཎྞནཱ ནིཊྛིཏཱ.

༨-༩. དེཝཱསུརསངྒཱམསུཏྟཱདིཝཎྞནཱ

༣༩-༤༠. ཨཊྛམེ ཨབྷིཡིཾསཱུཏི ཀདཱ ཨབྷིཡིཾསུ? ཡདཱ བལཝནྟོ ཨཧེསུཾ, ཏདཱ. ཏཏྲཱཡམནུཔུབྦིཀཐཱ (སཾ. ནི. ཨཊྛ. ༡.༡.༢༤༧; སཱརཏྠ. ཊཱི. ༡.ཝེརཉྫཀཎྜཝཎྞནཱ) – སཀྐོ ཀིར མགདྷརཊྛེ མཙལགཱམཀེ མགྷོ ནཱམ མཱཎཝོ ཧུཏྭཱ ཏེཏྟིཾས པུརིསེ གཧེཏྭཱ ཀལྱཱཎཀམྨཾ ཀརོནྟོ སཏྟ ཝཏཔདཱནི པཱུརེཏྭཱ ཏཏྠ ཀཱལངྐཏོ དེཝལོཀེ ནིབྦཏྟི. ཏཾ བལཝཀམྨཱནུབྷཱཝེན སཔརིསཾ སེསདེཝཏཱ དསཧི ཋཱནེཧི ཨདྷིགཎྷནྟཾ དིསྭཱ ‘‘ཨཱགནྟུཀདེཝཔུཏྟཱ ཨཱགཏཱ’’ཏི ནེཝཱསིཀཱ གནྡྷཔཱནཾ སཛྫཡིཾསུ. སཀྐོ སཀཔརིསཱཡ སཉྙཾ ཨདཱསི ‘‘མཱརིསཱ མཱ གནྡྷཔཱནཾ པིཝིཏྠ, པིཝནཱཀཱརམཏྟམེཝ དསྶེཐཱ’’ཏི. ཏེ ཏཐཱ ཨཀཾསུ. ནེཝཱསིཀདེཝཏཱ སུཝཎྞསརཀེཧི ཨུཔནཱིཏཾ གནྡྷཔཱནཾ ཡཱཝདཏྠཾ པིཝིཏྭཱ མཏྟཱ ཏཏྠ ཏཏྠ སུཝཎྞཔཐཝིཡཾ པཏིཏྭཱ སཡིཾསུ. སཀྐོ ‘‘གཎྷཐ པུཏྟཧཏཱཡ པུཏྟེ’’ཏི ཏེ པཱདེསུ གཧེཏྭཱ སིནེརུཔཱདེ ཁིཔཱཔེསི. སཀྐསྶ པུཉྙཏེཛེན ཏདནུཝཏྟཀཱཔི སབྦེ ཏཏྠེཝ པཏིཾསུ. ཏེ སིནེརུཝེམཛ྄ཛྷཀཱལེ སཉྙཾ ལབྷིཏྭཱ, ‘‘ཏཱཏཱ, སུརཾ ན པིཝིམྷ, སུརཾ ན པིཝིམྷཱ’’ཏི ཨཱཧཾསུ. ཏཏོ པཊྛཱཡ ཨསུརཱ ནཱམ ཛཱཏཱ. ཨཐ ནེསཾ ཀམྨཔཙྩཡཨུཏུསམུཊྛཱནཾ སིནེརུསྶ ཧེཊྛིམཏལེ དསཡོཛནསཧསྶཾ ཨསུརབྷཝནཾ ནིབྦཏྟི. སཀྐོ ཏེསཾ ནིཝཏྟིཏྭཱ ཨནཱགམནཏྠཱཡ ཨཱརཀྑཾ ཋཔེསི. ཡཾ སནྡྷཱཡ ཝུཏྟཾ –

‘‘ཨནྟརཱ ¶ ¶ དྭིནྣཾ ཨཡུཛ྄ཛྷཔུརཱནཾ,

པཉྩཝིདྷཱ ཋཔིཏཱ ཨབྷིརཀྑཱ;

ཨུརག-ཀརོཊི-པཡསྶ ཙ ཧཱརཱི,

མདནཡུཏཱ ཙཏུརོ ཙ མཧཏྠཱ’’ཏི. (སཾ. ནི. ཨཊྛ. ༡.༡.༢༤༧; སཱརཏྠ. ཊཱི. ༡.༡ ཝེརཉྫཀཎྜཝཎྞནཱ);

དྭེ ནགརཱནི ཧི ཡུདྡྷེན གཧེཏུཾ ཨསཀྐུཎེཡྻཏཱཡ ཨཡུཛ྄ཛྷཔུརཱནི ནཱམ ཛཱཏཱནི དེཝནགརཉྩ ཨསུརནགརཉྩ. ཡདཱ ཧི ཨསུརཱ བལཝནྟོ ཧོནྟི, ཨཐ དེཝེཧི པལཱཡིཏྭཱ དེཝནགརཾ པཝིསིཏྭཱ དྭཱརེ པིདཧིཏེ ཨསུརཱནཾ སཏསཧསྶམྤི ཀིཉྩི ཀཱཏུཾ ན སཀྐོཏི. ཡདཱ དེཝཱ བལཝནྟོ ཧོནྟི, ཨཐཱསུརེཧི པལཱཡིཏྭཱ ཨསུརནགརསྶ དྭཱརེ པིདཧིཏེ སཀྐཱནཾ སཏསཧསྶམྤི ཀིཉྩི ཀཱཏུཾ ན སཀྐོཏི. ཨིཏི ཨིམཱནི དྭེ ནགརཱནི ཨཡུཛ྄ཛྷཔུརཱནི ནཱམ. ཏེསཾ ཨནྟརཱ ཨེཏེསུ ཨུརགཱདཱིསུ པཉྩསུ ཋཱནེསུ སཀྐེན ཨཱརཀྑཱ ཋཔིཏཱ. ཏཏྠ ཨུརགསདྡེན ནཱགཱ གཧིཏཱ. ཏེ ཧི ཨུདཀེ བལཝནྟོ ཧོནྟི, ཏསྨཱ སིནེརུསྶ པཋམཱལིནྡེ ཨེཏེསཾ ཨཱརཀྑཱ. ཀརོཊིསདྡེན སུཔཎྞཱ གཧིཏཱ. ཏེསཾ ཀིར ཀརོཊི ནཱམ པཱནབྷོཛནཾ, ཏེན ཏཾ ནཱམཾ ལབྷིཾསུ, དུཏིཡཱལིནྡེ ཏེསཾ ཨཱརཀྑཱ. པཡསྶཧཱརིསདྡེན ཀུམྦྷཎྜཱ གཧིཏཱ, དཱནཝརཀྑསཱ ཀིར ཏེ, ཏཏིཡཱལིནྡེ ཏེསཾ ཨཱརཀྑཱ. མདནཡུཏསདྡེན ཡཀྑཱ གཧིཏཱ. ཝིསམཙཱརིནོ ཀིར ཏེ ཡུཛ྄ཛྷསོཎྜཱ, ཙཏུཏྠཱལིནྡེ ཏེསཾ ཨཱརཀྑཱ. ཙཏུརོ ཙ མཧཏྟཱཏི ཙཏྟཱརོ མཧཱརཱཛཱནོ ཝུཏྟཱ, པཉྩམཱལིནྡེ ཏེསཾ ཨཱརཀྑཱ, ཏསྨཱ ཡདི ཨསུརཱ ཀུཔིཏཱཝིལཙིཏྟཱ དེཝཔུརཾ ཨུཔཡནྟི ཡུཛ྄ཛྷིཏུཾ. ཡཾ གིརིནོ པཋམཾ པརིབྷཎྜཾ, ཏཾ ཨུརགཱ པཊིབཱཧཡནྟི. ཨེཝཾ སེསེསུ སེསཱ.

ཏེ པན ཨསུརཱ ཨཱཡུཝཎྞཡསཨིསྶརིཡསམྤཏྟཱིཧི ཏཱཝཏིཾསསདིསཱཝ, ཏསྨཱ ཨནྟརཱ ཨཏྟཱནཾ ཨཛཱནིཏྭཱ པཱཊལིཡཱ པུཔྥིཏཱཡ ‘‘ན ཨིདཾ དེཝནགརཾ, ཏཏྠ པཱརིཙྪཏྟཀོ པུཔྥཏི, ཨིདྷ པན ཙིཏྟཔཱཊལཱི, ཛརསཀྐེནཱམྷཱཀཾ སུརཾ པཱཡེཏྭཱ ཝཉྩིཏཱ, དེཝནགརཉྩ ནོ གཧིཏཾ, གཙྪཱམ, ཏེན སདྡྷིཾ ཡུཛ྄ཛྷིསྶཱམཱ’’ཏི ཧཏྠིཨསྶརཐེ ཨཱརུཡ྄ཧ སུཝཎྞརཛཏམཎིཕལཀཱནི གཧེཏྭཱ ཡུདྡྷསཛྫཱ ཧུཏྭཱ ཨསུརབྷེརིཡོ ཝཱདེནྟཱ མཧཱསམུདྡེ ཨུདཀཾ དྭིདྷཱ བྷེཏྭཱ ཨུཊྛཧནྟི. ཏེ དེཝེ ཝུཊྛེ ཝམྨིཀམཀྑིཀཱ ¶ ཝམྨིཀཾ ཝིཡ སིནེརུཾ ཨཱརུཧིཏུཾ ཨཱརབྷནྟི. ཨཐ ནེསཾ པཋམཾ ནཱགེཧི སདྡྷིཾ ཡུདྡྷཾ ཧོཏི. ཏསྨིཾ ཁོ པན ཡུདྡྷེ ན ཀསྶཙི ཚཝི ཝཱ ཙམྨཾ ཝཱ ཚིཛྫཏི, ན ལོཧིཏཾ ཨུཔྤཛྫཏི, ཀེཝལཾ ཀུམཱརཀཱནཾ དཱརུམེཎྜཀཡུདྡྷཾ ཝིཡ ཨཉྙམཉྙསནྟཱསནམཏྟམེཝ ཧོཏི. ཀོཊིསཏཱཔི ཀོཊིསཧསྶཱཔི ནཱགཱ ཏེཧི སདྡྷིཾ ཡུཛ྄ཛྷིཏྭཱ ཏེ ཨསུརཔུརཾཡེཝ པཝེསེཏྭཱ ནིཝཏྟནྟི. ཡདཱ པན ཨསུརཱ བལཝནྟོ ཧོནྟི, ཨཐ ནཱགཱ ཨོསཀྐིཏྭཱ དུཏིཡེ ཨཱལིནྡེ སུཔཎྞེཧི ¶ སདྡྷིཾ ཨེཀཏོཝ ཧུཏྭཱ ཡུཛ྄ཛྷནྟི. ཨེས ནཡོ སུཔཎྞཱདཱིསུཔི. ཡདཱ པན ཏཱནི པཉྩཔི ཋཱནཱནི ཨསུརཱ མདྡནྟི, ཏདཱ ཨེཀཏོ སམྤིཎྜིཏཱནིཔི ཏཱནི པཉྩ བལཱནི ཨོསཀྐནྟི. ཨཐ ཙཏྟཱརོ མཧཱརཱཛཱནོ གནྟྭཱ སཀྐསྶ ཏཾ པཝཏྟིཾ ཨཱརོཙེནྟི. སཀྐོ ཏེསཾ ཝཙནཾ སུཏྭཱ དིཡཌྜྷཡོཛནསཏིཀཾ ཝེཛཡནྟརཐཾ ཨཱརུཡ྄ཧ སཡཾ ཝཱ ནིཀྑམཏི, ཨེཀཾ པུཏྟཾ ཝཱ པེསེཏི. ཡདཱ དེཝཱ པུན ཨཔཙྩཱགམནཱཡ ཨསུརེ ཛིནིཾསུ, ཏདཱ སཀྐོ ཨསུརེ པལཱཔེཏྭཱ པཉྩསུ ཋཱནེསུ ཨཱརཀྑཾ དཏྭཱ ཝེདིཡཔཱདེ ཝཛིརཧཏྠཱ ཨིནྡཔཊིམཱཡོ ཋཔེསི. ཨསུརཱ ཀཱལེན ཀཱལཾ ཨུཊྛཧིཏྭཱ པཊིམཱཡོ དིསྭཱ ‘‘སཀྐོ ཨཔྤམཏྟོ ཏིཊྛཏཱི’’ཏི ཏཏོཝ ནིཝཏྟནྟི. ཨིདྷ པན ཡདཱ ཨསུརཱནཾ ཛཡོ ཨཧོསི, དེཝཱནཾ པརཱཛཡོ, ཏཾ སནྡྷཱཡེཏཾ ཝུཏྟཾ – ‘‘པརཱཛིཏཱ ཙ, བྷིཀྑཝེ, དེཝཱ ཨཔཡིཾསུཡེཝ ཨུཏྟརེནཱབྷིམུཁཱ, ཨབྷིཡིཾསུ ཨསུརཱ’’ཏི.

དཀྑིཎཱབྷིམུཁཱ ཧུཏྭཱཏི ཙཀྐཝཱལ༹པབྦཏཱབྷིམུཁཱ ཧུཏྭཱ. ཨསུརཱ ཀིར དེཝེཧི པརཱཛིཏཱ པལཱཡནྟཱ ཙཀྐཝཱལ༹པབྦཏཱབྷིམུཁཾ གནྟྭཱ ཙཀྐཝཱལ༹མཧཱསམུདྡཔིཊྛིཡཾ རཛཏཔཊྚཝཎྞེ ཝཱལིཀཱཔུལིནེ ཡཏྠ པཎྞཀུཊིཡོ མཱཔེཏྭཱ ཨིསཡོ ཝསནྟི, ཏཏྠ གནྟྭཱ ཨིསཱིནཾ ཨསྶམཔདེན གཙྪནྟཱ ‘‘སཀྐོ ཨིམེཧི སདྡྷིཾ མནྟེཏྭཱ ཨམྷེ ནཱསེཏི, གཎྷཐ པུཏྟཧཏཱཡ པུཏྟེ’’ཏི ཀུཔིཏཱ ཨསྶམཔདེ པཱནཱིཡགྷཊཙངྐམནཔཎྞསཱལཱདཱིནི ཝིདྡྷཾསེནྟི. ཨིསཡོ ཨརཉྙཏོ ཕལཱཕལཾ ཨཱདཱཡ ཨཱགཏཱ དིསྭཱ པུན དུཀྑེན པཊིཔཱཀཏིཀཾ ཀརོནྟི, ཏེཔི པུནཔྤུནཾ ཏཐེཝ པརཱཛིཏཱ གནྟྭཱ ཝིནཱསེནྟི. ཏེན ཝུཏྟཾ – ‘‘པརཱཛིཏཱ ཙ ཁོ, བྷིཀྑཝེ, ཨསུརཱ ཨཔཡིཾསུཡེཝ དཀྑིཎེནཱབྷིམུཁཱ’’ཏི. ནཝམཾ ཨུཏྟཱནཏྠམེཝ.

དེཝཱསུརསངྒཱམསུཏྟཱདིཝཎྞནཱ ནིཊྛིཏཱ.

༡༠. ཏཔུསྶསུཏྟཝཎྞནཱ

༤༡. དསམེ ¶ པཀྑནྡཏཱིཏི པཝིསཏི. པསཱིདཏཱིཏི པསཱདཾ ཨབྷིརུཙིཾ ཨཱཔཛྫཏི, པཏིཊྛཱཏི ཝིམུཙྩཏཱིཏི ཨཏྠོ. ཀཐཱཔཱབྷཏནྟི ཀཐཱཡ མཱུལཾ. མཱུལཉྷི ‘‘པཱབྷཏ’’ནྟི ཝུཙྩཏི. ཡཐཱཧ –

‘‘ཨཔྤཀེནཔི མེདྷཱཝཱི, པཱབྷཏེན ཝིཙཀྑཎོ;

སམུཊྛཱཔེཏི ཨཏྟཱནཾ, ཨཎུཾ ཨགྒིཾཝ སནྡྷམ’’ནྟི. (ཛཱ. ༡.༡.༤);

ཏེནེཝཱཧ ¶ ‘‘ཀཐཱཔཱབྷཏནྟི ཀཐཱམཱུལ’’ནྟི. ཝིཏཀྐགྒཧཎེནེཝ ཏཾསཧཙརིཏོ ཝིཙཱརོཔི གཧིཏོ. ཏེནེཝེཏྠ བཧུཝཙནནིདྡེསོ ཀཏོཏི ཨཱཧ ‘‘ཝིཏཀྐེསཱུཏི ཝིཏཀྐཝིཙཱརེསཱུ’’ཏི.

ཏཔུསྶསུཏྟཝཎྞནཱ ནིཊྛིཏཱ.

མཧཱཝགྒཝཎྞནཱ ནིཊྛིཏཱ.

༥. སཱམཉྙཝགྒོ

༡-༡༠. སམྦཱདྷསུཏྟཱདིཝཎྞནཱ

༤༢-༥༡. པཉྩམསྶ པཋམེ ཨུདཱཡཱིཏི ཏཡོ ཐེརཱ ཨུདཱཡཱི ནཱམ ཀཱལུ༹དཱཡཱི, ལཱལུ༹དཱཡཱི, མཧཱཨུདཱཡཱིཏི, ཨིདྷ ཀཱལུ༹དཱཡཱི ཨདྷིཔྤེཏོཏི ཨཱཧ ‘‘ཨུདཱཡཱིཏི ཀཱལུ༹དཱཡིཏྠེརོ’’ཏི. སམྦཱདྷེཏི སམྤཱིལི༹ཏཏཎྷཱསཾཀིལེསཱདིནཱ སཨུཔྤཱིལ༹ནཏཱཡ པརམསམྦཱདྷེ. ཨཏིཝིཡ སངྐརཊྛཱནབྷཱུཏོ ཧི ནཱིཝརཎསམྦཱདྷོ ཨདྷིཔྤེཏོ. ཨོཀཱསོཏི ཛྷཱནསྶེཏཾ ནཱམཾ. ནཱིཝརཎསམྦཱདྷཱབྷཱཝེན ཧི ཛྷཱནཾ ཨིདྷ ‘‘ཨོཀཱསོ’’ཏི ཝུཏྟཾ. པཊིལཱིནནིསབྷོཏི ཝཱ པཊིལཱིནོ ཧུཏྭཱ སེཊྛོ, པཊིལཱིནཱནཾ ཝཱ སེཊྛོཏི པཊིལཱིནནིསབྷོ. པཊིལཱིནཱ ནཱམ པཧཱིནམཱནཱ ཝུཙྩནྟི མཱནུསྶཡཝསེན ཨུཎྞཏཱབྷཱཝཏོ. ཡཐཱཧ ‘‘ཀཐཉྩ, བྷིཀྑཝེ, བྷིཀྑུ པཊིལཱིནོ ཧོཏི? ཨིདྷ, བྷིཀྑཝེ, བྷིཀྑུནོ ཨསྨིམཱནོ པཧཱིནོ ཧོཏི ཨུཙྪིནྣམཱུལོ ཏཱལཱཝཏྠུཀཏོ ཨནབྷཱཝཾགཏོ ཨཱཡཏིཾ ཨནུཔྤཱདདྷམྨོ’’ཏི (ཨ. ནི. ༤.༣༨; མཧཱནི. ༨༧). སེསཾ སབྦཏྠ ཨུཏྟཱནམེཝ.

སམྦཱདྷསུཏྟཱདིཝཎྞནཱ ནིཊྛིཏཱ.

ཨིཏི མནོརཐཔཱུརཎིཡཱ ཨངྒུཏྟརནིཀཱཡ-ཨཊྛཀཐཱཡ

ནཝཀནིཔཱཏཝཎྞནཱཡ ཨནུཏྟཱནཏྠདཱིཔནཱ སམཏྟཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ.

ཨངྒུཏྟརནིཀཱཡེ

དསཀནིཔཱཏ-ཊཱིཀཱ

༡. པཋམཔཎྞཱསཀཾ

༡. ཨཱནིསཾསཝགྒོ

༡. ཀིམཏྠིཡསུཏྟཝཎྞནཱ

༡. དསཀནིཔཱཏསྶ ¶ ¶ པཋམེ ཨཝིཔྤཊིསཱརཏྠཱནཱིཏི ཨཝིཔྤཊིསཱརཔྤཡོཛནཱནི. ཨཝིཔྤཊིསཱརཱནིསཾསཱནཱིཏི ཨཝིཔྤཊིསཱརུདཡཱནི. ཨེཏེན ཨཝིཔྤཊིསཱརོ ནཱམ སཱིལསྶ ཨུདཡམཏྟཾ, སཾཝདྡྷིཏསྶ རུཀྑསྶ ཚཱཡཱཔུཔྥསདིསཾ, ཨཉྙོ ཨེཝ པནཱནེན ནིཔྥཱདེཏབྦོ སམཱདྷིཨཱདིགུཎོཏི དསྶེཏི. ‘‘ཡཱཝ མགྒཱམགྒཉཱཎདསྶནཝིསུདྡྷི, ཏཱཝ ཏརུཎཝིཔསྶནཱ’’ཏི ཧི ཝཙནཏོ ཨུཔཀྐིལེསཝིམུཏྟཨུདཡབྦཡཉཱཎཏོ པརཾ ཨཡཉྩ ཝིཔསྶནཱ ཝིརཛྫཏི ཡོགཱཝཙརོ ཝིརཏྟོ པུརིསོ ཝིཡ བྷརིཡཱཡ སངྑཱརཏོ ཨེཏེནཱཏི ཝིརཱགོ.

ཀིམཏྠིཡསུཏྟཝཎྞནཱ ནིཊྛིཏཱ.

༢-༥. ཙེཏནཱཀརཎཱིཡསུཏྟཱདིཝཎྞནཱ

༢-༥. དུཏིཡེ ¶ སཾསཱརམཧོགྷསྶ པརཏཱིརབྷཱཝཏོ ཡོ ནཾ ཨདྷིགཙྪཏི, ཏཾ པཱརེཏི གམེཏཱིཏི པཱརཾ, ནིབྦཱནཾ. ཏབྦིདཱུརཏཱཡ ནཏྠི ཨེཏྠ པཱརནྟི ཨཔཱརཾ, སཾསཱརོ. ཏེནཱཧ ‘‘ཨོརིམཏཱིརབྷཱུཏཱ ཏེབྷཱུམཀཝཊྚཱ’’ཏིཨཱདི. ཏཏིཡཱདཱིསུ ནཏྠི ཝཏྟབྦཾ.

ཙེཏནཱཀརཎཱིཡསུཏྟཱདིཝཎྞནཱ ནིཊྛིཏཱ.

༦. སམཱདྷིསུཏྟཝཎྞནཱ

༦. ཚཊྛེ སནྟཾ སནྟནྟི ཨཔྤེཏྭཱ ནིསིནྣསྶཱཏིཨཱདཱིསུ སནྟཾ སནྟཾ པཎཱིཏཾ པཎཱིཏནྟིཨཱདཱིནི ཝདཏི. ཨིམིནཱ པན ཨཱཀཱརེན ཏཾ པཊིཝིཛ྄ཛྷིཏྭཱ ཏཏྠ ¶ ཙིཏྟཾ ཨུཔསཾཧརཏོ ཕལསམཱཔཏྟིསངྑཱཏོ ཙིཏྟུཔྤཱདོ ཏཐཱ པཝཏྟཏཱིཏི ཝེདིཏབྦོ. སེསཾ སབྦཏྠ ཨུཏྟཱནམེཝ.

སམཱདྷིསུཏྟཝཎྞནཱ ནིཊྛིཏཱ.

ཨཱནིསཾསཝགྒཝཎྞནཱ ནིཊྛིཏཱ.

༢. ནཱཐཝགྒོ

༡-༤. སེནཱསནསུཏྟཱདིཝཎྞནཱ

༡༡-༡༤. དུཏིཡསྶ པཋམེ ནཱཏིདཱུརནྟི གོཙརཊྛཱནཏོ ཨཌྜྷགཱཝུཏཏོ ཨོརབྷཱགཏཱཡ ནཱཏིདཱུརཾ. ནཱཙྩཱསནྣནྟི པཙྪིམེན པམཱཎེན གོཙརཊྛཱནཏོ པཉྩདྷནུསཏིཀཏཱཡ ན ཨཏིཨཱསནྣཾ. ཏཱཡ ཙ པན ནཱཏིདཱུརནཱཙྩཱསནྣཏཱཡ གོཙརཊྛཱནཔཊིཔརིསྶཡཱདིརཧིཏམགྒཏཱཡ ཙ གམནསྶ ཙ ཨཱགམནསྶ ཙ ཡུཏྟརཱུཔཏྟཱ གམནཱགམནསམྤནྣཾ. དིཝསབྷཱགེ མཧཱཛནསཾཀིཎྞཏཱབྷཱཝེན དིཝཱ ཨཔྤཱཀིཎྞཾ. ཨབྷཱཝཏྠོ ཧི ཨཡཾ ཨཔྤ-སདྡོ ‘‘ཨཔྤིཙྪོ’’ཏིཨཱདཱིསུ ཝིཡ. རཏྟིཡཾ མནུསྶསདྡཱབྷཱཝེན རཏྟིཾ ཨཔྤསདྡཾ. སབྦདཱཔི ཛནསནྣིཔཱཏནིགྒྷོསཱབྷཱཝེན ཨཔྤནིགྒྷོསཾ.

ཨཔྤཀསིརེནཱཏི ¶ ཨཀསིརེན སུཁེནེཝ. སཱིལཱདིགུཎཱནཾ ཐིརབྷཱཝཔྤཏྟིཡཱ ཐེརཱ. སུཏྟགེཡྻཱདི བཧུ སུཏཾ ཨེཏེསནྟི བཧུསྶུཏཱ. ཏམུགྒཧདྷཱརཎེན སམྨདེཝ གརཱུནཾ སནྟིཀེ ཨཱགམིཏབྷཱཝེན ཙ ཨཱགཏོ པརིཡཏྟིདྷམྨསངྑཱཏོ ཨཱགམོ ཨེཏེསནྟི ཨཱགཏཱགམཱ. སུཏྟཱབྷིདྷམྨསངྑཱཏསྶ དྷམྨསྶ དྷཱརཎེན དྷམྨདྷརཱ. ཝིནཡསྶ དྷཱརཎེན ཝིནཡདྷརཱ. ཏེསཾ དྷམྨཝིནཡཱནཾ མཱཏིཀཱཡ དྷཱརཎེན མཱཏིཀཱདྷརཱ. ཏཏྠ ཏཏྠ དྷམྨཔརིཔུཙྪཱཡ པརིཔུཙྪཏི. ཨཏྠཔརིཔུཙྪཱཡ པརིཔཉྷཏི ཝཱིམཾསཏི ཝིཙཱརེཏི. ཨིདཾ, བྷནྟེ, ཀཐཾ, ཨིམསྶ ཀོ ཨཏྠོཏི པརིཔུཙྪཱཔརིཔཉྷཱཀཱརདསྶནཾ. ཨཝིཝཊཉྩེཝ པཱལི༹ཡཱ ཨཏྠཾ པདེསནྟརཔཱལི༹དསྶནེན ཨཱགམཏོ ཝིཝརནྟི. ཨནུཏྟཱནཱིཀཏཉྩ ཡུཏྟིཝིབྷཱཝནེན ཨུཏྟཱནིཾ ཀརོནྟི. ཀངྑཱཋཱནིཡེསུ དྷམྨེསུ སཾསཡུཔྤཏྟིཡཱ ཧེཏུཏཱཡ གཎྛིཊྛཱནབྷཱུཏེསུ པཱལི༹པྤདེསེསུ ཡཱཐཱཝཏོ ཝིནིཙྪཡཔྤདཱནེན ཀངྑཾ པཊིཝིནོདེནྟི.

ཨེཏྠ ¶ ཙ ནཱཏིདཱུརཾ ནཱཙྩཱསནྣཾ གམནཱགམནསམྤནྣནྟི ཨེཀཾ ཨངྒཾ, དིཝཱ ཨཔྤཱཀིཎྞཾ, རཏྟིཾ ཨཔྤསདྡཾ, ཨཔྤནིགྒྷོསནྟི ཨེཀཾ, ཨཔྤཌཾསམཀསཝཱཏཱཏཔསརཱིསཔསམྥསྶནྟི ཨེཀཾ, ཏསྨིཾ ཁོ པན སེནཱསནེ ཝིཧརནྟསྶ…པེ… པརིཀྑཱརཱཏི ཨེཀཾ, ཏསྨིཾ ཁོ པན སེནཱསནེ ཐེརཱ…པེ… ཀངྑཾ པཊིཝིནོདེནྟཱིཏི ཨེཀཾ. ཨེཝཾ པཉྩ ཨངྒཱནི ཝེདིཏབྦཱནི. དུཏིཡཱདཱིནི ཨུཏྟཱནཏྠཱནི.

སེནཱསནསུཏྟཱདིཝཎྞནཱ ནིཊྛིཏཱ.

༥-༦. ཨཔྤམཱདསུཏྟཱདིཝཎྞནཱ

༡༥-༡༦. པཉྩམེ ཀཱརཱཔཀཨཔྤམཱདོ ནཱམ ‘‘ཨིམེ ཨཀུསལཱ དྷམྨཱ པཧཱཏབྦཱ, ཨིམེ ཀུསལཱ དྷམྨཱ ཨུཔསམྤཱདེཏབྦཱ’’ཏི ཏཾཏཾཔརིཝཛྫེཏབྦཝཛྫནསམྤཱདེཏབྦསམྤཱདནཝསེན པཝཏྟོ ཨཔྤམཱདོ. ཨེསཱཏི ཨཔྤམཱདོ. ལོཀིཡོཝ ན ལོཀུཏྟརོ. ཨཡཉྩཱཏི ཙ ཨེསཱཏི ཙ ཨཔྤམཱདམེཝ ཝདཏི. ཏེསནྟི ཙཱཏུབྷཱུམཀདྷམྨཱནཾ. པཊིལཱབྷཀཏྟེནཱཏི པཊིལཱབྷཱཔནཀཏྟེན.

ཛངྒལཱནནྟི ཛངྒལཙཱརཱིནཾ. ཛངྒལ-སདྡོ ཙེཏྠ ཁརབྷཱཝསཱམཉྙེན པཐཝཱིཔརིཡཱཡོ, ན ཨནུཔཊྛཱནཝིདཱུརདེསཝཱཙཱི. ཏེནཱཧ ‘‘པཐཝཱིཏལཙཱརཱིན’’ནྟི. པདཱནཾ ཝུཙྩམཱནཏྟཱ ‘‘སཔཱདཀཔཱཎཱན’’ནྟི ཝིསེསེཏྭཱ ཝུཏྟཾ. སམོདྷཱནནྟི ཨནྟོགདྷབྷཱཝཾ. ཏེནཱཧ ‘‘ཨོདྷཱནཾ པཀྑེཔ’’ནྟི. ‘‘ཨུཔཀྑེཔ’’ནྟིཔི པཋནྟི, ཨུཔནེཏྭཱ པཀྑིཔིཏབྦནྟི ཨཏྠོ. ཝསྶིཀཱཡ པུཔྥཾ ཝསྶིཀཾ ཡཐཱ ‘‘ཨཱམལཀིཡཱ ཕལཾ ཨཱམལཀ’’ནྟི. མཧཱཏལསྨིནྟི ཨུཔརིཔཱསཱདེ. ཚཊྛཾ ཨུཏྟཱནམེཝ.

ཨཔྤམཱདསུཏྟཱདིཝཎྞནཱ ནིཊྛིཏཱ.

༧-༨. པཋམནཱཐསུཏྟཱདིཝཎྞནཱ

༡༧-༡༨. སཏྟམེ ¶ ཡེཧི སཱིལཱདཱིཧི སམནྣཱགཏོ བྷིཀྑུ དྷམྨསརཎཏཱཡ དྷམྨེནེཝ ནཱཐཏི ཨཱསཱིསཏི ཨབྷིབྷཝཏཱིཏི ནཱཐོ ཝུཙྩཏི, ཏེ ¶ ཏསྶ ནཱཐབྷཱཝཀརཱ དྷམྨཱ ནཱཐཀརཎཱཏི ཝུཏྟཱཏི ཨཱཧ ‘‘ཨཏྟནོ སནཱཐབྷཱཝཀརཱ པཏིཊྛཀརཱཏི ཨཏྠོ’’ཏི. ཏཏྠ ཨཏྟནོ པཏིཊྛཀརཱཏི ཡསྶ ནཱཐབྷཱཝཀརཱ, ཏསྶ ཨཏྟནོ པཏིཊྛཱཝིདྷཱཡིནོ. ཨཔྤཏིཊྛོ ཨནཱཐོ, སཔྤཏིཊྛོ སནཱཐོཏི པཏིཊྛཏྠོ ནཱཐ-སདྡོ. ཀལྱཱཎགུཎཡོགཏོ ཀལྱཱཎཱཏི དསྶེནྟོ ‘‘སཱིལཱདིགུཎསམྤནྣཱ’’ཏི ཨཱཧ. མིཛྫནལཀྑཎཱ མེཏྟཱ ཨེཏསྶ ཨཏྠཱིཏི མིཏྟོ. སོ ཝུཏྟནཡེན ཀལྱཱཎོ ཨསྶ ཨཏྠཱིཏི ཏསྶ ཨཏྠིཏཱམཏྟཾ ཀལྱཱཎམིཏྟཔདེན ཝུཏྟཾ. ཨསྶ ཏེན སབྦཀཱལཾ ཨཝིཛཧིཏཝཱསོཏི ཏཾ དསྶེཏུཾ ‘‘ཀལྱཱཎསཧཱཡོ’’ཏི ཝུཏྟནྟི ཨཱཧ ‘‘ཏེཝསྶཱ’’ཏི. ཏེ ཨེཝ ཀལྱཱཎམིཏྟཱ ཨསྶ བྷིཀྑུནོ. སཧ ཨཡནཏོཏི སཧ པཝཏྟནཏོ. ཨསམོདྷཱནེ ཙིཏྟེན, སམོདྷཱནེ པན ཙིཏྟེན ཙེཝ ཀཱཡེན ཙ སམྤཝངྐོ. སུཁཾ ཝཙོ ཨེཏསྨིཾ ཨནུཀཱུལགཱཧིམྷི ཨཱདརགཱརཝཝཏི པུགྒལེཏི སུཝཙོ. ཏེནཱཧ ‘‘སུཁེན ཝཏྟབྦོ’’ཏིཨཱདི. ཁམོཏི ཁནྟོ. ཏམེཝསྶ ཁམབྷཱཝཾ དསྶེཏུཾ ‘‘གཱལ༹ྷེནཱ’’ཏིཨཱདི ཝུཏྟཾ. ཝཱམཏོཏི མིཙྪཱ, ཨཡོནིསོ ཝཱ གཎྷཱཏི. པཊིཔྥརཏཱིཏི པཊཱཎིཀབྷཱཝེན ཏིཊྛཏི. པདཀྑིཎཾ གཎྷཱཏཱིཏི སམྨཱ, ཡོནིསོ ཝཱ གཎྷཱཏི.

ཨུཙྩཱཝཙཱནཱིཏི ཝིཔུལཁུདྡཀཱནི. ཏཏྲུཔགམནིཡཱཡཱཏི ཏཏྲ ཏཏྲ མཧནྟེ ཁུདྡཀེ ཙ ཀམྨེ སཱདྷནཝསེན ཨུཔཱཡེན ཨུཔགཙྪནྟིཡཱ, ཏསྶ ཏསྶ ཀམྨསྶ ནིཔྥཱདནེ སམཏྠཱཡཱཏི ཨཏྠོ. ཏཏྲུཔཱཡཱཡཱཏི ཝཱ ཏཏྲ ཏཏྲ ཀམྨེ སཱདྷེཏབྦེ ཨུཔཱཡབྷཱུཏཱཡ.

དྷམྨེ ཨསྶ ཀཱམོཏི དྷམྨཀཱམོཏི བྱདྷིཀརཎཱནམྤི བཱཧིརཏྠོ སམཱསོ ཧོཏཱིཏི ཀཏྭཱ ཝུཏྟཾ. ཀཱམེཏབྦཏོ ཝཱ པིཡཱཡིཏབྦཏོ ཀཱམོ, དྷམྨོ. དྷམྨོ ཀཱམོ ཨསྶཱཏི དྷམྨཀཱམོ. དྷམྨོཏི པརིཡཏྟིདྷམྨོ ཨདྷིཔྤེཏོཏི ཨཱཧ ‘‘ཏེཔིཊཀཾ བུདྡྷཝཙནཾ པིཡཱཡཏཱིཏི ཨཏྠོ’’ཏི. སམུདཱཧརཎཾ ཀཐནཾ སམུདཱཧཱརོ, པིཡོ སམུདཱཧཱརོ ཨེཏསྶཱཏི པིཡསམུདཱཧཱརོ. སཡཉྩཱཏི ཨེཏྠ ཙ-སདྡེན ‘‘སཀྐཙྩ’’ནྟི པདཾ ཨནུཀཌྜྷཏི. ཏེན སཡཉྩ སཀྐཙྩཾ དེསེཏུཀཱམོ ཧོཏཱིཏི ཡོཛནཱ. ཨབྷིདྷམྨོ སཏྟ པཀརཎཱནི ‘‘ཨདྷིཀོ ཨབྷིཝིསིཊྛོ ཙ པརིཡཏྟིདྷམྨོ’’ཏི ཀཏྭཱ. ཝིནཡོ ཨུབྷཏོཝིབྷངྒཱ ¶ ཝིནཡནཏོ ཀཱཡཝཱཙཱནཾ. ཨབྷིཝིནཡོ ཁནྡྷཀཔརིཝཱརཱ ཝིསེསཏོ ཨཱབྷིསམཱཙཱརིཀདྷམྨཀིཏྟནཏོ. ཨཱབྷིསམཱཙཱརིཀདྷམྨཔཱརིཔཱུརིཝསེནེཝ ཧི ཨཱདིབྲཧྨཙརིཡཀདྷམྨཔཱརིཔཱུརཱི. དྷམྨོ ཨེཝ པིཊཀདྭཡསྶཔི པརིཡཏྟིདྷམྨབྷཱཝཏོ. མགྒཕལཱནི ཨབྷིདྷམྨོ ‘‘ནིབྦཱནདྷམྨསྶ ¶ ཨབྷིམུཁོ’’ཏི ཀཏྭཱ. ཀིལེསཝཱུཔསམཀརཎཾ པུབྦབྷཱགིཡཱ ཏིསྶོ སིཀྑཱ སངྑེཔཏོ ཝིཝཊྚནིསྶིཏོ སམཐོ ཝིཔསྶནཱ ཙ. ཨུལཱ༹རཔཱམོཛྫོཏི བལཝཔཱམོཛྫོ. ཀཱརཎཏྠེཏི ནིམིཏྟཏྠེ. ཀུསལདྷམྨནིམིཏྟཾ ཧིསྶ ཝཱིརིཡཱརམྦྷོ. ཏེནཱཧ ‘‘ཏེསཾ ཨདྷིགམཏྠཱཡཱ’’ཏི. ཀུསལེསུ དྷམྨེསཱུཏི ཝཱ ནིཔྥཱདེཏབྦེ བྷུམྨཾ ཡཐཱ ‘‘ཙེཏསོ ཨཝཱུཔསམེ ཨཡོནིསོམནསིཀཱརཔདཊྛཱན’’ནྟི. ཨཊྛམེ ནཏྠི ཝཏྟབྦཾ.

པཋམནཱཐསུཏྟཱདིཝཎྞནཱ ནིཊྛིཏཱ.

༩. པཋམཨརིཡཱཝཱསསུཏྟཝཎྞནཱ

༡༩. ནཝམེ ཨརིཡཱནཾ ཨེཝ ཨཱཝཱསཱཏི ཨརིཡཱཝཱསཱ ཨནརིཡཱནཾ ཏཱདིསཱནཾ ཨསམྦྷཝཏོ. ཨརིཡཱཏི ཙེཏྠ ཨུཀྐཊྛནིདྡེསེན ཁཱིཎཱསཝཱ གཧིཏཱ. ཏེ ཙ ཡསྨཱ ཏེཧི སབྦཀཱལཾ ཨཝིཛཧིཏཝཱསཱ ཨེཝ, ཏསྨཱ ཝུཏྟཾ ‘‘ཏེ ཨཱཝསིཾསུ ཨཱཝསནྟི ཨཱཝསིསྶནྟཱི’’ཏི. ཏཏྠ ཨཱཝསིཾསཱུཏི ནིསྶཱཡ ཨཱཝསིཾསུ. པཉྩངྒཝིཔྤཧཱིནཏཱདཡོ ཧི ཨརིཡཱནཾ ཨཔསྶཡཱ. ཏེསུ པཉྩངྒཝིཔྤཧཱནཔཙྩེཀསཙྩཔནོདནཨེསནཱཨོསཊྛཱནི, ‘‘སངྑཱཡེཀཾ པཊིསེཝཏི, ཨདྷིཝཱསེཏི པརིཝཛྫེཏི ཝིནོདེཏཱི’’ཏི (དཱི. ནི. ༣.༣༠༨; མ. ནི. ༢.༡༦༨; ཨ. ནི. ༡༠.༢༠) ཝུཏྟེསུ ཨཔསྶེནེསུ ཝིནོདནཉྩ མགྒཀིཙྩཱནེཝ, ཨིཏརེ མགྒེན ཙ སམིཛ྄ཛྷནྟཱིཏི.

པཋམཨརིཡཱཝཱསསུཏྟཝཎྞནཱ ནིཊྛིཏཱ.

༡༠. དུཏིཡཨརིཡཱཝཱསསུཏྟཝཎྞནཱ

༢༠. དསམེ ཀསྨཱ པན བྷགཝཱ ཀུརུསུ ཝིཧརནྟོ ཨིམཾ སུཏྟཾ ཨབྷཱསཱིཏི ཨཱཧ ‘‘ཡསྨཱ’’ཏིཨཱདི. ཀུརུརཊྛཾ ཀིར ཏདཱ ཏནྣིཝཱསིསཏྟཱནཾ ཡོནིསོམནསིཀཱརཝནྟཏཱདིནཱ ¶ ཡེབྷུཡྻེན སུཔྤཊིཔནྣཏཱཡ པུབྦེ ཙ ཀཏཔུཉྙཏཱབལེན ཝཱ ཏདཱ ཨུཏུཨཱདིསམྤཏྟིཡུཏྟམེཝ ཨཧོསི. ཀེཙི པན ‘‘པུབྦེ པཝཏྟཀུརུཝཏྟདྷམྨཱནུཊྛཱནཝཱསནཱཡ ཨུཏྟརཀུརུ ཝིཡ ཡེབྷུཡྻེན ཨུཏུཨཱདིསམྤནྣམེཝ ཧོཏི. བྷགཝཏོ ཀཱལེ སཱཏིསཡཾ ཨུཏུསཔྤཱཡཱདིཡུཏྟཾ རཊྛཾ ཨཧོསཱི’’ཏི ཝདནྟི. ཏཏྠ བྷིཀྑཱུ བྷིཀྑུནིཡོ ཨུཔཱསཀཱ ཨུཔཱསིཀཱཡོ ཨུཏུཔཙྩཡཱདིསམྤནྣཏྟཱ ཏསྶ རཊྛསྶ སཔྤཱཡཨུཏུཔཙྩཡསེཝནེན ནིཙྩཾ ཀལླསརཱིརཱ ཀལླཙིཏྟཱ ཙ ཧོནྟི. ཏེ ཙིཏྟསརཱིརཀལླཏཱཡ ཨནུགྒཧིཏཔཉྙཱབལཱ གམྦྷཱིརཀཐཾ པཊིགྒཧེཏུཾ སམཏྠཱ པཊིཙྩསམུཔྤཱདནིསྶིཏཱནཾ ¶ གམྦྷཱིརཔཉྙཱནཉྩ ཀཱརཀཱ ཧོནྟི. ཏེནཱཧ ‘‘ཀུརུརཊྛཝཱསིནོ བྷིཀྑཱུ གམྦྷཱིརཔཉྙཱཀཱརཀཱ’’ཏིཨཱདི.

ཡུཏྟཔྤཡུཏྟཱཏི སཏིཔཊྛཱནབྷཱཝནཱཡ ཡུཏྟཱ ཙེཝ པཡུཏྟཱ ཙ. ཏསྨིཉྷི (དཱི. ནི. ཨཊྛ. ༢.༣༧༣; མ. ནི. ཨཊྛ. ༡.༡༠༦) ཛནཔདེ ཙཏསྶོ པརིསཱ པཀཏིཡཱཝ སཏིཔཊྛཱནབྷཱཝནཱནུཡོགམནུཡུཏྟཱ ཝིཧརནྟི, ཨནྟམསོ དཱསཀམྨཀརཔརིཛནཱཔི སཏིཔཊྛཱནཔྤཊིསཾཡུཏྟམེཝ ཀཐཾ ཀཐེནྟི. ཨུདཀཏིཏྠསུཏྟཀནྟནཊྛཱནཱདཱིསུཔི ནིརཏྠཀཀཐཱ ནཱམ ནཔྤཝཏྟཏི. སཙེ ཀཱཙི ཨིཏྠཱི, ‘‘ཨམྨ, ཏྭཾ ཀཏརཾ སཏིཔཊྛཱནབྷཱཝནཾ མནསི ཀརོསཱི’’ཏི པུཙྪིཏཱ ‘‘ན ཀིཉྩཱི’’ཏི ཝདཏི, ཏཾ གརཧནྟི ‘‘དྷཱིརཏྠུ ཏཝ ཛཱིཝིཏཾ, ཛཱིཝམཱནཱཔི ཏྭཾ མཏསདིསཱ’’ཏི. ཨཐ ནཾ ‘‘མཱ དཱནི པུན ཨེཝམཀཱསཱི’’ཏི ཨོཝདིཏྭཱ ཨཉྙཏརཾ སཏིཔཊྛཱནཾ ཨུགྒཎྷཱཔེནྟི. ཡཱ པན ‘‘ཨཧཾ ཨསུཀཾ སཏིཔཊྛཱནཾ ནཱམ མནསི ཀརོམཱི’’ཏི ཝདཏི, ཏསྶཱ ‘‘སཱདྷུ སཱདྷཱུ’’ཏི སཱདྷུཀཱརཾ དཏྭཱ ‘‘ཏཝ ཛཱིཝིཏཾ སུཛཱིཝིཏཾ, ཏྭཾ ནཱམ མནུསྶཏྟཾ པཏྟཱ, ཏཝཏྠཱཡ སམྨཱསམྦུདྡྷོ ཨུཔྤནྣོ’’ཏིཨཱདཱིཧི པསཾསནྟི. ན ཀེཝལཉྩེཏྠ མནུསྶཛཱཏིཀཱཡེཝ སཏིཔཊྛཱནམནསིཀཱརཡུཏྟཱ, ཏེ ནིསྶཱཡ ཝིཧརནྟཱ ཏིརཙྪཱནགཏཱཔི.

ཏཏྲིདཾ ཝཏྠུ – ཨེཀོ ཀིར ནཊཀོ སུཝཔོཏཀཾ གཧེཏྭཱ སིཀྑཱཔེནྟོ ཝིཙརཏི. སོ བྷིཀྑུནིཨུཔསྶཡཾ ཨུཔནིསྶཱཡ ཝསིཏྭཱ གམནཀཱལེ སུཝཔོཏཀཾ པམུསྶིཏྭཱ གཏོ. ཏཾ སཱམཎེརིཡོ གཧེཏྭཱ པཊིཛགྒིཾསུ, ‘‘བུདྡྷརཀྑིཏོ’’ཏི ཙསྶ ནཱམཾ ཨཀཾསུ. ཏཾ ཨེཀདིཝསཾ པུརཏོ ནིསིནྣཾ དིསྭཱ མཧཱཐེརཱི ཨཱཧ ‘‘བུདྡྷརཀྑིཏཱ’’ཏི. ཀིཾ, ཨཡྻོཏི. ཨཏྠི ཏེ ཀོཙི བྷཱཝནཱམནསིཀཱརོཏི? ནཏྠཡྻེཏི. ཨཱཝུསོ ¶ , པབྦཛིཏཱནཾ སནྟིཀེ ཝསནྟེན ནཱམ ཝིསྶཊྛཨཏྟབྷཱཝེན བྷཝིཏུཾ ན ཝཊྚཏི, ཀོཙིདེཝ མནསིཀཱརོ ཨིཙྪིཏབྦོ, ཏྭཾ པན ཨཉྙཾ ན སཀྑིསྶསི, ‘‘ཨཊྛི ཨཊྛཱི’’ཏི སཛ྄ཛྷཱཡཾ ཀརོཧཱིཏི. སོ ཐེརིཡཱ ཨོཝཱདེ ཋཏྭཱ ‘‘ཨཊྛི ཨཊྛཱི’’ཏི སཛ྄ཛྷཱཡནྟོ ཙརཏི.

ཏཾ ཨེཀདིཝསཾ པཱཏོཝ ཏོརཎགྒེ ནིསཱིདིཏྭཱ བཱལཱཏཔཾ ཏཔམཱནཾ ཨེཀོ སཀུཎོ ནཁཔཉྫརེན ཨགྒཧེསི. སོ ‘‘ཀིརི ཀིརཱི’’ཏི སདྡམཀཱསི. སཱམཎེརིཡོ སུཏྭཱ, ‘‘ཨཡྻེ, བུདྡྷརཀྑིཏོ སཀུཎེན གཧིཏོ, མོཙེམ ན’’ནྟི ལེཌྜུཨཱདཱིནི གཧེཏྭཱ ཨནུབནྡྷིཏྭཱ མོཙེསུཾ. ཏཾ ཨཱནེཏྭཱ པུརཏོ ཋཔིཏཾ ཐེརཱི ཨཱཧ, ‘‘བུདྡྷརཀྑིཏ, སཀུཎེན གཧིཏཀཱལེ ཀིཾ ཙིནྟེསཱི’’ཏི. ཨཡྻེ, ན ཨཉྙཾ ཙིནྟེསིཾ, ‘‘ཨཊྛིཔུཉྫོཝ ཨཊྛིཔུཉྫཾ གཧེཏྭཱ གཙྪཏི, ཀཏརསྨིཾ ཋཱནེ ཝིཔྤཀིརིསྶཏཱི’’ཏི ཨེཝཾ, ཨཡྻེ, ཨཊྛིཔུཉྫམེཝ ཙིནྟེསིནྟི. སཱདྷུ སཱདྷུ, བུདྡྷརཀྑིཏ ¶ , ཨནཱགཏེ བྷཝཀྑཡསྶ ཏེ པཙྩཡོ བྷཝིསྶཏཱིཏི. ཨེཝཾ ཏཏྠ ཏིརཙྪཱནགཏཱཔི སཏིཔཊྛཱནམནསིཀཱརཡུཏྟཱ.

དཱིགྷནིཀཱཡཱདཱིསུ མཧཱནིདཱནཱདཱིནཱིཏི དཱིགྷནིཀཱཡེ མཧཱནིདཱནཾ (དཱི. ནི. ༢.༩༥ ཨཱདཡོ) སཏིཔཊྛཱནཾ (དཱི. ནི. ༢.༣༧༢ ཨཱདཡོ) མཛ྄ཛྷིམནིཀཱཡེ སཏིཔཊྛཱནཾ (མ. ནི. ༡.༡༠༥ ཨཱདཡོ) སཱརོཔམཾ (མ. ནི. ༡.༣༠༧ ཨཱདཡོ) རུཀྑོཔམཾ རཊྛཔཱལཾ མཱགཎྜིཡཾ ཨཱནེཉྫསཔྤཱཡནྟི (མ. ནི. ༣.༦༦ ཨཱདཡོ) ཨེཝམཱདཱིནི.

ཉཱཎཱདཡོཏི ཉཱཎཉྩེཝ ཏཾསམྤཡུཏྟདྷམྨཱ ཙ. ཏེནཱཧ ‘‘ཉཱཎནྟི ཝུཏྟེ’’ཏིཨཱདི. ཉཱཎསམྤཡུཏྟཙིཏྟཱནི ལབྦྷནྟི ཏེཧི ཝིནཱ སམྤཛཱནཏཱཡ ཨསམྦྷཝཏོ. མཧཱཙིཏྟཱནཱིཏི ཨཊྛཔི མཧཱཀིརིཡཙིཏྟཱནི ལབྦྷནྟི ‘‘སཏཏཝིཧཱརཱ’’ཏི ཝཙནཏོ ཉཱཎུཔྤཏྟིཔཙྩཡརཧིཏཀཱལེཔི པཝཏྟིཛོཏནཏོ. དས ཙིཏྟཱནཱིཏི ཨཊྛ མཧཱཀིརིཡཙིཏྟཱནི ཧསིཏུཔྤཱདཝོཊྛབྦནཙིཏྟེཧི སདྡྷིཾ དས ཙིཏྟཱནི ལབྦྷནྟི. ཨརཛྫནཱདུསྶནཝསེན པཝཏྟི ཏེསམྤི སཱདྷཱརཎཱཏི. ‘‘ཨུཔེཀྑཀོ ཝིཧརཏཱི’’ཏི ཝཙནཏོ ཚལ༹ངྒུཔེཀྑཱཝསེན ཨཱགཏཱནཾ ཨིམེསཾ སཏཏཝིཧཱརཱནཾ སོམནསྶཾ ཀཐཾ ལབྦྷཏཱིཏི ཨཱཧ ‘‘ཨཱསེཝནཝསེན ལབྦྷཏཱི’’ཏི. ཀིཉྩཱཔི ཁཱིཎཱསཝོ ཨིཊྛཱནིཊྛེཔི ཨཱརམྨཎེ མཛ྄ཛྷཏྟོ ཝིཡ བཧུལཾ ཨུཔེཀྑཀོ ཝིཧརཏི ཨཏྟནོ པརིསུདྡྷཔཀཏིབྷཱཝཱཝིཛཧནཏོ. ཀདཱཙི པན ཏཐཱ ཙེཏོབྷིསངྑཱརཱབྷཱཝེ ཡཾ ཏཾ སབྷཱཝཏོ ཨིཊྛཾ ཨཱརམྨཎཾ ¶ , ཏཏྠ ཡཱཐཱཝསབྷཱཝགྒཧཎཝསེནཔི ཨརཧཏོ ཙིཏྟཾ སོམནསྶསཧགཏཾ ཧུཏྭཱ པཝཏྟཏེཝ, ཏཉྩ ཁོ པུབྦཱསེཝནཝསེན. ཏེན ཝུཏྟཾ ‘‘ཨཱསེཝནཝསེན ལབྦྷཏཱི’’ཏི. ཨཱརཀྑཀིཙྩཾ སཱདྷེཏི སཏིཝེཔུལླཔྤཏྟཏྟཱ. ཙརཏོཏིཨཱདིནཱ ནིཙྩསམཱདཱནཾ དསྶེཏི, ཏཾ ཝིཀྑེཔཱབྷཱཝེན དཊྛབྦཾ.

པབྦཛྫཱུཔགཏཱཏི ཡཾ ཀིཉྩི པབྦཛྫཾ ཨུཔགཏཱ, ན སམིཏཔཱཔཱ. བྷོཝཱདིནོཏི ཛཱཏིམཏྟབྲཱཧྨཎེ ཝདཏི. པཱཊེཀྐསཙྩཱནཱིཏི ཏེཧི ཏེཧི དིཊྛིགཏིཀེཧི པཱཊིཡེཀྐཾ གཧིཏཱནི ‘‘ཨིདམེཝ སཙྩ’’ནྟི ཨབྷིནིཝིཊྛཱནི དིཊྛིསཙྩཱདཱིནི. ཏཱནིཔི ཧི ‘‘ཨིདམེཝ སཙྩ’’ནྟི གཧཎཾ ཨུཔཱདཱཡ ‘‘སཙྩཱནཱི’’ཏི ཝོཧརཱིཡནྟི. ཏེནཱཧ ‘‘ཨིདམེཝཱ’’ཏིཨཱདི. ནཱིཧཊཱནཱིཏི ཨཏྟནོ སནྟཱནཏོ ནཱིཧརིཏཱནི ཨཔནཱིཏཱནི. གཧིཏགྒཧཎསྶཱཏི ཨརིཡམགྒཱདྷིགམཏོ པུབྦེ གཧིཏསྶ དིཊྛིགྒཱཧསྶ. ཝིསྶཊྛབྷཱཝཝེཝཙནཱནཱིཏི ཨརིཡམགྒེན སབྦསོ པརིཙྩཱགབྷཱཝསྶ ཨདྷིཝཙནཱནི.

ནཏྠི ཨེཏཱསཾ ཝཡོ ཝེཀལླནྟི ཨཝཡཱཏི ཨཱཧ ‘‘ཨནཱུནཱ’’ཏི, ཨནཝསེསོཏི ཨཏྠོ. ཨེསནཱཏི ¶ ཀཱམེསནཱདཡོ. མགྒསྶ ཀིཙྩནིཔྥཏྟི ཀཐིཏཱ རཱགཱདཱིནཾ པཧཱིནབྷཱཝདཱིཔནཏོ. པཙྩཝེཀྑཎཕལཾ ཀཐིཏནྟི པཙྩཝེཀྑཎམུཁེན ཨརིཡཕལཾ ཀཐིཏཾ. ཨདྷིགཏེ ཧི ཨགྒཕལེ སབྦསོ རཱགཱདཱིནཾ ཨནུཔྤཱདདྷམྨཏཾ པཛཱནཱཏི, ཏཉྩ པཛཱནནཾ པཙྩཝེཀྑཎཉཱཎནྟི.

དུཏིཡཨརིཡཱཝཱསསུཏྟཝཎྞནཱ ནིཊྛིཏཱ.

ནཱཐཝགྒཝཎྞནཱ ནིཊྛིཏཱ.

༣. མཧཱཝགྒོ

༡. སཱིཧནཱདསུཏྟཝཎྞནཱ

༢༡. ཏཏིཡསྶ པཋམེ ཝིསམཊྛཱནེསཱུཏི པཔཱཏཱདཱིསུ ཝིསམཊྛཱནེསུ. ‘‘ཨཉྙེཧི ཨསཱདྷཱརཎཱནཱི’’ཏི ཀསྨཱ ཝུཏྟཾ, ནནུ ཙེཏཱནི སཱཝཀཱནམྤི ཨེཀཙྩཱནཾ ཨུཔྤཛྫནྟཱིཏི? ཀཱམཾ ཨུཔྤཛྫནྟི, ཡཱདིསཱནི པན བུདྡྷཱནཾ ཋཱནཱཊྛཱནཉཱཎཱདཱིནི, ན ཏཱདིསཱནི ཏདཉྙེསཾ ཀདཱཙིཔི ཨུཔྤཛྫནྟཱིཏི ཨཉྙེཧི ཨསཱདྷཱརཎཱནཱིཏི ¶ . ཏེནཱཧ ‘‘ཏཐཱགཏསྶེཝ བལཱནཱི’’ཏི. ཨིམམེཝ ཧི ཡཐཱཝུཏྟལེསཾ ཨཔེཀྑིཏྭཱ ཏདབྷཱཝཏོ ཨཱསཡཱནུསཡཉཱཎཱདཱིསུ ཨེཝ ཨསཱདྷཱརཎསམཉྙཱ ནིརུལ༹ྷཱ. ཀཱམཾ ཉཱཎབལཱནཾ ཉཱཎསམྦྷཱརོ ཝིསེསཔཙྩཡོ, པུཉྙསམྦྷཱརོཔི པན ནེསཾ པཙྩཡོ ཨེཝ. ཉཱཎསམྦྷཱརསྶཔི ཝཱ པུཉྙསམྦྷཱརབྷཱཝཏོ ‘‘པུཉྙུསྶཡསམྤཏྟིཡཱ ཨཱགཏཱནཱི’’ཏི ཝུཏྟཾ.

པཀཏིཧཏྠིཀུལནྟི (སཾ. ནི. ཊཱི. ༢.༢.༢༢) གིརིཙརནདིཙརཝནཙརཱདིཔྤབྷེདཱ གོཙརིཡཀཱལཱཝཀནཱམཱ སབྦཱཔི བལེན པཱཀཏིཀཱ ཧཏྠིཛཱཏི. དསནྣཾ པུརིསཱནནྟི ཐཱམམཛ྄ཛྷིམཱནཾ དསནྣཾ པུརིསཱནཾ. ཨེཀསྶ ཏཐཱགཏསྶ ཀཱཡབལནྟི ཨཱནེཏྭཱ སམྦནྡྷོ. ཨེཀསྶཱཏི ཙ ཏཐཱ ཧེཊྛཱ ཀཐཱཡཾ ཨཱགཏཏྟཱ དེསནཱསོཏེན ཝུཏྟཾ. ནཱརཱཡནསངྒྷཱཏབལནྟི ཨེཏྠ ནཱརཱ ཝུཙྩནྟི རསྨིཡོ. ཏཱ བཧཱུ ནཱནཱཝིདྷཱ ཨིཏོ ཨུཔྤཛྫནྟཱིཏི ནཱརཱཡནཾ, ཝཛིརཾ, ཏསྨཱ ནཱརཱཡནསངྒྷཱཏབལནྟི ཝཛིརསངྒྷཱཏབལནྟི ཨཏྠོ. ཉཱཎབལཾ པན པཱལི༹ཡཾ ཨཱགཏམེཝ, ན ཀཱཡབལཾ ཝིཡ ཨཊྛཀཐཱརུལ༹ྷམེཝཱཏི ཨདྷིཔྤཱཡོ.

སཾཡུཏྟཀེ ¶ (སཾ. ནི. ༢.༣༣) ཨཱགཏཱནི ཏེསཏྟཏི ཉཱཎཱནི, སཏྟསཏྟཏི ཉཱཎཱནཱིཏི ཝུཏྟཾ, ཏཏྠ (ཝིབྷ. མཱུལཊཱི. ༧༦༠) པན ནིདཱནཝགྒེ སཏྟསཏྟཏི ཨཱགཏཱནི ཙཏུཙཏྟཱརཱིསཉྩ. ཏེསཏྟཏི པན པཊིསམྦྷིདཱམགྒེ (པཊི. མ. ༡.༡) སུཏམཡཱདཱིནི ཨཱགཏཱནི དིསྶནྟི, ན སཾཡུཏྟཀེ. ཨཉྙཱནིཔཱིཏི ཨེཏེན ཉཱཎཝཏྠུཝིབྷངྒེ (ཝིབྷ. ༧༥༡ ཨཱདཡོ) ཨེཀཀཱདིཝསེན ཝུཏྟཱནི, ཨཉྙཏྠ ཙ ‘‘པུབྦནྟེ ཉཱཎ’’ནྟིཨཱདིནཱ (དྷ. ས. ༡༠༦༣) བྲཧྨཛཱལཱདཱིསུ ཙ ‘‘ཏཡིདཾ ཏཐཱགཏོ པཛཱནཱཏི ‘ཨིམཱནི དིཊྛིཊྛཱནཱནི ཨེཝཾ གཧིཏཱནཱི’ཏི’’ཨཱདིནཱ (དཱི. ནི. ༡.༣༦) ཝུཏྟཱནི ཨནེཀཱནི ཉཱཎཔྤབྷེདཱནི སངྒཎྷཱཏི. ཡཱཐཱཝཔྤཊིཝེདྷཏོ སཡཉྩ ཨཀམྤིཡཾ པུགྒལཉྩ ཏཾསམངྒིནཾ ནེཡྻེསུ ཨདྷིབལཾ ཀརོཏཱིཏི ཨཱཧ ‘‘ཨཀམྤིཡཊྛེན ཨུཔཏྠམྦྷནཊྛེན ཙཱ’’ཏི.

ཨུསབྷསྶ ཨིདནྟི ཨཱསབྷཾ, སེཊྛཊྛཱནཾ. སབྦཉྙུཏཱཔཊིཛཱནནཝསེན ཨབྷིམུཁཾ གཙྪནྟི, ཨཊྛ ཝཱ པརིསཱ ཨུཔསངྐམནྟཱིཏི ཨཱསབྷཱ, པུབྦབུདྡྷཱ. ཨིདཾ པནཱཏི བུདྡྷཱནཾ ཋཱནཾ སབྦཉྙུཏམེཝ ཝདཏི. ཏིཊྛམཱནོཝཱཏི ཨཝདནྟོཔི ཏིཊྛམཱནོཝ པཊིཛཱནཱཏི ནཱམཱཏི ཨཏྠོ. ཨུཔགཙྪཏཱིཏི ཨནུཛཱནཱཏི.

ཨཊྛསུ ¶ པརིསཱསཱུཏི ‘‘ཨབྷིཛཱནཱམི ཁོ པནཱཧཾ, སཱརིཔུཏྟ, ཨནེཀསཏཾ ཁཏྟིཡཔརིསཾ…པེ… ཏཏྲ ཝཏ མཾ བྷཡཾ ཝཱ སཱརཛྫཾ ཝཱ ཨོཀྐམིསྶཏཱིཏི ནིམིཏྟམེཏཾ, སཱརིཔུཏྟ, ན སམནུཔསྶཱམཱི’’ཏི (མ. ནི. ༡.༡༥༡) ཝུཏྟཱསུ ཨཊྛསུ པརིསཱསུ. ཨབྷཱིཏནཱདཾ ནདཏཱིཏི པརཏོ དསྶིཏཉཱཎཡོགེན དསབལོཧནྟི ཨབྷཱིཏནཱདཾ ནདཏི.

པཊིཝེདྷནིཊྛཏྟཱ ཨརཧཏྟམགྒཉཱཎཾ པཊིཝེདྷོཏི ‘‘ཕལཀྑཎེ ཨུཔྤནྣཾ ནཱམཱ’’ཏི ཝུཏྟཾ. ཏེན པཊིལདྡྷསྶཔི དེསནཱཉཱཎསྶ ཀིཙྩནིཔྥཏྟི པརསྶ ཨཝབུཛ྄ཛྷནམཏྟེན ཧོཏཱིཏི ‘‘ཨཉྙཱསིཀོཎྜཉྙསྶ སོཏཱཔཏྟིཕལཀྑཎེ པཝཏྟཾ ནཱམཱ’’ཏི ཝུཏྟཾ. ཏཏོ པརཾ པན ཡཱཝ པརིནིབྦཱནཱ དེསནཱཉཱཎཔཝཏྟི ཏསྶེཝ པཝཏྟིཏསྶ དྷམྨཙཀྐསྶ ཋཱནནྟི ཝེདིཏབྦཾ པཝཏྟིཏཙཀྐསྶ ཙཀྐཝཏྟིནོ ཙཀྐརཏནསྶ ཋཱནཾ ཝིཡ.

ཏིཊྛཏཱིཏི ཝུཏྟཾ, ཀིཾ བྷཱུམིཡཾ པུརིསོ ཝིཡ, ནོཏི ཨཱཧ ‘‘ཏདཱཡཏྟཝུཏྟིཏཱཡཱ’’ཏི. ཋཱནནྟི ཙེཏྠ ཨཏྟལཱབྷོ དྷརམཱནཏཱ ཙ, ན གཏིནིཝཏྟཱིཏི ཨཱཧ ‘‘ཨུཔྤཛྫཏི ཙེཝ པཝཏྟཏི ཙཱ’’ཏི. ཡཏྠ པནེཏཾ དསབལཉཱཎཾ ཝིཏྠཱརིཏཾ, ཏཾ དསྶེནྟོ ‘‘ཨབྷིདྷམྨེ པནཱ’’ཏིཨཱདིམཱཧ. སེསེསུཔི ཨེསེཝ ནཡོ.

སམཱདིཡནྟཱིཏི ¶ སམཱདཱནཱནི, ཏཱནི པན སམཱདིཡིཏྭཱ ཀཏཱནི ཧོནྟཱིཏི ཨཱཧ ‘‘སམཱདིཡིཏྭཱ ཀཏཱན’’ནྟི. ཀམྨམེཝ ཝཱ ཀམྨསམཱདཱནནྟི ཨེཏེན སམཱདཱནསདྡསྶ ཨཔུབྦཏྠཱབྷཱཝཾ དསྶེཏི མུཏྟགཏསདྡེ གཏསདྡསྶ ཝིཡ. གཏཱིཏི ནིརཡཱདིགཏིཡོ. ཨུཔདྷཱིཏི ཨཏྟབྷཱཝོ. ཀཱལོཏི ཀམྨསྶ ཝིཔཙྩནཱརཧཀཱལོ. པཡོགོཏི ཝིཔཱཀུཔྤཏྟིཡཱ པཙྩཡབྷཱུཏཱ ཀིརིཡཱ.

ཨགཏིགཱམིནིནྟི ནིབྦཱནགཱམིནིཾ. ཝུཏྟཉྷི ‘‘ནིབྦཱནཉྩཱཧཾ, སཱརིཔུཏྟ, པཛཱནཱམི ནིབྦཱནགཱམིནིཉྩ པཊིཔད’’ནྟི (མ. ནི. ༡.༡༥༣). བཧཱུསུཔི མནུསྶེསུ ཨེཀམེཝ པཱཎཾ གྷཱཏེནྟེསུ ཀཱམཾ སབྦེསམྤི ཙེཏནཱ ཏསྶེཝེཀསྶ ཛཱིཝིཏིནྡྲིཡཱརམྨཎཱ, ཏཾ པན ཀམྨཾ ཏེསཾ ནཱནཱཀཱརཾ. ཏེསུ (ཝིབྷ. ཨཊྛ. ༨༡༡) ཧི ཨེཀོ ཨཱདརེན ཚནྡཛཱཏོ ཀརོཏི, ཨེཀོ ‘‘ཨེཧི ཏྭམྤི ཀརོཧཱི’’ཏི པརེཧི ནིཔྤཱིལི༹ཏོ ཀརོཏི, ཨེཀོ སམཱནཙྪནྡོ ཝིཡ ཧུཏྭཱ ཨཔྤཊིབཱཧམཱནོ ཝིཙརཏི. ཏེསུ ཨེཀོ ཏེནེཝ ཀམྨེན ནིརཡེ ནིབྦཏྟཏི, ཨེཀོ ཏིརཙྪཱནཡོནིཡཾ, ཨེཀོ ¶ པེཏྟིཝིསཡེ. ཏཾ ཏཐཱགཏོ ཨཱཡཱུཧནཀྑཎེཡེཝ ‘‘ཨིམིནཱ ནཱིཧཱརེན ཨཱཡཱུཧིཏཏྟཱ ཨེས ནིརཡེ ནིབྦཏྟིསྶཏི, ཨེས ཏིརཙྪཱནཡོནིཡཾ, ཨེས པེཏྟིཝིསཡེ’’ཏི ཛཱནཱཏི. ནིརཡེ ནིབྦཏྟམཱནམྤི ‘‘ཨེས མཧཱནིརཡེ ནིབྦཏྟིསྶཏི, ཨེས ཨུསྶདནིརཡེ’’ཏི ཛཱནཱཏི. ཏིརཙྪཱནཡོནིཡཾ ནིབྦཏྟམཱནམྤི ‘‘ཨེས ཨཔཱདཀོ བྷཝིསྶཏི, ཨེས དྭིཔཱདཀོ, ཨེས ཙཏུཔྤདོ, ཨེས བཧུཔྤདོ’’ཏི ཛཱནཱཏི. པེཏྟིཝིསཡེ ནིབྦཏྟམཱནམྤི ‘‘ཨེས ནིཛ྄ཛྷཱམཏཎྷིཀོ བྷཝིསྶཏི, ཨེས ཁུཔྤིཔཱསིཀོ, ཨེས པརདཏྟཱུཔཛཱིཝཱི’’ཏི ཛཱནཱཏི. ཏེསུ ཙ ཀམྨེསུ ‘‘ཨིདཾ ཀམྨཾ པཊིསནྡྷིཾ ཨཱཀཌྜྷིསྶཏི, ཨིདཾ ཨཉྙེན དིནྣཱཡ པཊིསནྡྷིཡཱ ཨུཔདྷིཝེཔཀྐཾ བྷཝིསྶཏཱི’’ཏི ཛཱནཱཏི.

ཏཐཱ སཀལགཱམཝཱསིཀེསུ ཨེཀཏོ པིཎྜཔཱཏཾ དདམཱནེསུ ཀཱམཾ སབྦེསམྤི ཙེཏནཱ པིཎྜཔཱཏཱརམྨཎཱཝ, ཏཾ པན ཀམྨཾ ཏེསཾ ནཱནཱཀཱརཾ. ཏེསུ ཧི ཨེཀོ ཨཱདརེན ཀརོཏཱིཏི སབྦཾ པུརིམསདིསཾ, ཏསྨཱ ཏེསུ ཀེཙི དེཝལོཀེ ནིབྦཏྟནྟི, ཀེཙི མནུསྶལོཀེ. ཏཾ ཏཐཱགཏོ ཨཱཡཱུཧནཀྑཎེཡེཝ ཛཱནཱཏི. ‘‘ཨིམིནཱ ནཱིཧཱརེན ཨཱཡཱུཧིཏཏྟཱ ཨེས མནུསྶལོཀེ ནིབྦཏྟིསྶཏི, ཨེས དེཝལོཀེ. ཏཏྠཱཔི ཨེས ཁཏྟིཡཀུལེ, ཨེས བྲཱཧྨཎཀུལེ, ཨེས ཝེསྶཀུལེ, ཨེས སུདྡཀུལེ, ཨེས པརནིམྨིཏཝསཝཏྟཱིསུ, ཨེས ནིམྨཱནརཏཱིསུ, ཨེས ཏུསིཏེསུ, ཨེས ཡཱམེསུ, ཨེས ཏཱཝཏིཾསེསུ, ཨེས ཙཱཏུམཧཱརཱཛིཀེསུ, ཨེས བྷུམྨདེཝེསཱུ’’ཏིཨཱདིནཱ ཏཏྠ ཏཏྠ ཧཱིནཔཎཱིཏསུཝཎྞདུབྦཎྞཨཔྤཔརིཝཱརམཧཱཔརིཝཱརཏཱདིབྷེདཾ ཏཾ ཏཾ ཝིསེསཾ ཨཱཡཱུཧནཀྑཎེཡེཝ ཛཱནཱཏི.

ཏཐཱ ¶ ཝིཔསྶནཾ པཊྛཔེནྟེསུཡེཝ ‘‘ཨིམིནཱ ནཱིཧཱརེན ཨེས ཀིཉྩི སལླཀྑེཏུཾ ན སཀྑིསྶཏི, ཨེས མཧཱབྷཱུཏམཏྟམེཝ ཝཝཏྠཔེསྶཏི, ཨེས རཱུཔཔརིགྒཧེཡེཝ ཋསྶཏི, ཨེས ཨརཱུཔཔརིགྒཧེཡེཝ, ཨེས ནཱམརཱུཔཔརིགྒཧེཡེཝ, ཨེས པཙྩཡཔརིགྒཧེཡེཝ, ཨེས ལཀྑཎཱརམྨཎིཀཝིཔསྶནཱཡམེཝ, ཨེས པཋམཕལེཡེཝ, ཨེས དུཏིཡཕལེཡེཝ, ཨེས ཏཏིཡཕལེཡེཝ, ཨེས ཨརཧཏྟཾ པཱཔུཎིསྶཏཱི’’ཏི ཛཱནཱཏི. ཀསིཎཔརིཀམྨཾ ཀརོནྟེསུཔི ‘‘ཨིམསྶ པརིཀམྨམཏྟམེཝ བྷཝིསྶཏི, ཨེས ནིམིཏྟཾ ཨུཔྤཱདེསྶཏི, ཨེས ཨཔྤནཾ ཨེཝ པཱཔུཎིསྶཏི, ཨེས ཛྷཱནཾ པཱདཀཾ ཀཏྭཱ ཝིཔསྶནཾ པཊྛཔེཏྭཱ ཨརཧཏྟཾ གཎྷིསྶཏཱི’’ཏི ཛཱནཱཏི. ཏེནཱཧ ‘‘ཨིམསྶ ཙེཏནཱ’’ཏིཨཱདི.

ཀཱམནཏོ ¶ ཀཱམེཏབྦཏོ ཀཱམཔྤཊིསཾཡུཏྟཏོ ཙ དྷཱཏུ ཀཱམདྷཱཏུ. ཨཱདི-སདྡེན བྱཱཔཱདདྷཱཏུརཱུཔདྷཱཏུཨཱདཱིནཾ སངྒཧོ. ཝིལཀྑཎཏཱཡཱཏི ཝིསདིསསབྷཱཝཏཱཡ. ཁནྡྷཱཡཏནདྷཱཏུལོཀནྟི ཨནེཀདྷཱཏུཾ ནཱནཱདྷཱཏུཾ ཁནྡྷལོཀཾ ཨཱཡཏནལོཀཾ དྷཱཏུལོཀཾ ཡཐཱབྷཱུཏཾ པཛཱནཱཏཱིཏི ཡོཛནཱ. ‘‘ཨཡཾ རཱུཔཀྑནྡྷོ ནཱམ…པེ… ཨཡཾ ཝིཉྙཱཎཀྑནྡྷོ ནཱམ. ཏེསུཔི ཨེཀཝིདྷེན རཱུཔཀྑནྡྷོ, ཨེཀཱདསཝིདྷེན རཱུཔཀྑནྡྷོ. ཨེཀཝིདྷེན ཝེདནཱཀྑནྡྷོ, བཧུཝིདྷེན ཝེདནཱཀྑནྡྷོ. ཨེཀཝིདྷེན སཉྙཱཀྑནྡྷོ…པེ… སངྑཱརཀྑནྡྷོ…པེ… ཝིཉྙཱཎཀྑནྡྷོ, བཧུཝིདྷེན ཝིཉྙཱཎཀྑནྡྷོ’’ཏི ཨེཝཾ ཏཱཝ ཁནྡྷལོཀསྶ, ‘‘ཨིདཾ ཙཀྑཱཡཏནཾ ནཱམ…པེ… ཨིདཾ དྷམྨཱཡཏནཾ ནཱམ. ཏཏྠ དསཱཡཏནཱ ཀཱམཱཝཙརཱ, དྭེ ཙཱཏུབྷཱུམཀཱ’’ཏིཨཱདིནཱ ཨཱཡཏནལོཀསྶ, ‘‘ཨཡཾ ཙཀྑུདྷཱཏུ ནཱམ…པེ… ཨཡཾ མནོཝིཉྙཱཎདྷཱཏུ ནཱམ. ཏཏྠ སོལ༹ས དྷཱཏུཡོ ཀཱམཱཝཙརཱ, དྭེ ཙཱཏུབྷཱུམཀཱ’’ཏིཨཱདིནཱ དྷཱཏུལོཀསྶ ཨནེཀསབྷཱཝཾ ནཱནཱསབྷཱཝཉྩ པཛཱནཱཏི. ན ཀེཝལཾ ཨུཔཱདིནྣསངྑཱརལོཀསྶེཝ, ཨཐ ཁོ ཨནུཔཱདིནྣཀསངྑཱརལོཀསྶཔི ‘‘ཨིམཱཡ ནཱམ དྷཱཏུཡཱ ཨུསྶནྣཏྟཱ ཨིམསྶ རུཀྑསྶ ཁནྡྷོ སེཏོ, ཨིམསྶ ཀཱལོ༹, ཨིམསྶ མཊྛོ, ཨིམསྶ སཀཎྚཀོ, ཨིམསྶ བཧལཏྟཙོ, ཨིམསྶ ཏནུཏྟཙོ, ཨིམསྶ པཏྟཾ ཝཎྞསཎྛཱནཱདིཝསེན ཨེཝརཱུཔཾ, ཨིམསྶ པུཔྥཾ ནཱིལཾ པཱིཏཾ ལོཧིཏཾ ཨོདཱཏཾ སུགནྡྷཾ དུགྒནྡྷཾ, ཨིམསྶ ཕལཾ ཁུདྡཀཾ མཧནྟཾ དཱིགྷཾ ཝཊྚཾ སུསཎྛཱནཾ དུསྶཎྛཱནཾ མཊྛཾ ཕརུསཾ སུགནྡྷཾ དུགྒནྡྷཾ མདྷུརཾ ཏིཏྟཀཾ ཀཊུཀཾ ཨམྦིལཾ ཀསཱཝཾ, ཨིམསྶ ཀཎྚཀོ ཏིཁིཎོ ཀུཎྛོ ཨུཛུཀོ ཀུཊིལོ ཏམྦོ ཀཱལོ༹ ཨོདཱཏོ ཧོཏཱི’’ཏིཨཱདིནཱ པཛཱནཱཏི. སབྦཉྙུབུདྡྷཱནཾ ཨེཝ ཧི ཨེཏཾ བལཾ, ན ཨཉྙེསཾ.

ནཱནཱདྷིམུཏྟིཀཏནྟི ནཱནཛ྄ཛྷཱསཡཏཾ. ཨདྷིམུཏྟི ནཱམ ཨཛ྄ཛྷཱསཡདྷཱཏུ ཨཛ྄ཛྷཱསཡསབྷཱཝོ. སོ པན ཧཱིནཔཎཱིཏཏཱསཱམཉྙེན པཱལི༹ཡཾ དྭིདྷཱཝ ཝུཏྟོཔི ཧཱིནཔཎཱིཏཱདིབྷེདེན ཨནེཀཝིདྷོཏི ཨཱཧ ‘‘ཧཱིནཱདཱིཧི ཨདྷིམུཏྟཱིཧི ནཱནཱདྷིམུཏྟིཀབྷཱཝ’’ནྟི. ཏཏྠ ཡེ ཡེ སཏྟཱ ཡཾཡཾཨདྷིམུཏྟིཀཱ, ཏེ ¶ ཏེ ཏཾཏདདྷིམུཏྟིཀེ ཨེཝ སེཝནྟི བྷཛནྟི པཡིརུཔཱསནྟི དྷཱཏུསབྷཱགཏོ. ཡཐཱ གཱུཐཱདཱིནཾ དྷཱཏཱུནཾ སབྷཱཝོ ཨེསོ, ཡཾ གཱུཐཱདཱིཧི ཨེཝ སཾསནྡནྟི སམེནྟི, ཨེཝཾ ཧཱིནཛ྄ཛྷཱསཡཱ དུསྶཱིལཱདཱིཧེཝ སཾསནྡནྟི སམེནྟི, སམྤནྣསཱིལཱདཡོ ཙ སམྤནྣསཱིལཱདཱིཧེཝ. ཏཾ ནེསཾ ནཱནཱདྷིམུཏྟིཀཏཾ བྷགཝཱ ཡཐཱབྷཱུཏཾ པཛཱནཱཏཱིཏི.

ཝུདྡྷིཾ ¶ ཧཱནིཉྩཱཏི པཙྩཡཝིསེསེན སཱམཏྠིཡཏོ ཨདྷིཀཏཾ ཨནདྷིཀཏཉྩ. ཨིནྡྲིཡཔརོཔརིཡཏྟཉཱཎནིདྡེསེ (ཝིབྷ. ༨༡༤; པཊི. མ. ༡༡༣) ‘‘ཨཱསཡཾ ཛཱནཱཏི, ཨནུསཡཾ ཛཱནཱཏཱི’’ཏི ཨཱསཡཱདིཛཱནནཾ ཀསྨཱ ནིདྡིཊྛནྟི? ཨཱསཡཛཱནནཱདིནཱ ཡེཧི ཨིནྡྲིཡེཧི པརོཔརེཧི སཏྟཱ ཀལྱཱཎཔཱཔཱསཡཱདིཀཱ ཧོནྟི, ཏེསཾ ཛཱནནསྶ ཝིབྷཱཝནཏོ. ཨེཝཉྩ ཀཏྭཱ ཨིནྡྲིཡཔརོཔརིཡཏྟཨཱསཡཱནུསཡཉཱཎཱནཾ ཝིསུཾ ཨསཱདྷཱརཎཏཱ, ཨིནྡྲིཡཔརོཔརིཡཏྟནཱནཱདྷིམུཏྟིཀཏཱཉཱཎཱནཾ ཝིསུཾ བལཝཏཱ ཙ སིདྡྷཱ ཧོཏི. ཏཏྠ ཨཱསཡནྟི ཡཏྠ སཏྟཱ ནིཝསནྟི, ཏཾ ཏེསཾ ནིཝཱསཊྛཱནཾ, དིཊྛིགཏཾ ཝཱ ཡཐཱབྷཱུཏཉཱཎཾ ཝཱ ཨཱསཡོ, ཨནུསཡོ ཨཔྤཧཱིནབྷཱཝེན ཐཱམགཏོ ཀིལེསོ. ཏཾ པན བྷགཝཱ སཏྟཱནཾ ཨཱསཡཾ ཛཱནནྟོ ཏེསཾ ཏེསཾ དིཊྛིགཏཱནཾ ཝིཔསྶནཱམགྒཉཱཎཱནཉྩ ཨཔྤཝཏྟིཀྑཎེཔི ཛཱནཱཏི. ཝུཏྟཉྷེཏཾ –

‘‘ཀཱམཾ སེཝནྟཾཡེཝ བྷགཝཱ ཛཱནཱཏི – ‘ཨཡཾ པུགྒལོ ཀཱམགརུཀོ ཀཱམཱསཡོ ཀཱམཱདྷིམུཏྟོ’ཏི. ཀཱམཾ སེཝནྟཾཡེཝ ཛཱནཱཏི – ‘ཨཡཾ པུགྒལོ ནེཀྑམྨགརུཀོ ནེཀྑམྨཱསཡོ ནེཀྑམྨཱདྷིམུཏྟོ’ཏི. ནེཀྑམྨཾ སེཝནྟཾཡེཝ ཛཱནཱཏི. བྱཱཔཱདཾ, ཨབྱཱཔཱདཾ, ཐིནམིདྡྷཾ, ཨཱལོཀསཉྙཾ སེཝནྟཾཡེཝ ཛཱནཱཏི – ‘ཨཡཾ པུགྒལོ ཐིནམིདྡྷགརུཀོ ཐིནམིདྡྷཱསཡོ ཐིནམིདྡྷཱདྷིམུཏྟོ’’’ཏི (པཊི. མ. ༡.༡༡༣).

པཋམཱདཱིནཾ ཙཏུནྣཾ ཛྷཱནཱནནྟི རཱུཔཱཝཙརཱནཾ པཋམཱདཱིནཾ པཙྩནཱིཀཛ྄ཛྷཱཔནཊྛེན ཨཱརམྨཎཱུཔནིཛ྄ཛྷཱཔནཊྛེན ཙ ཛྷཱནཱནཾ. ཙཏུཀྐནཡེན ཧེཏཾ ཝུཏྟཾ. ཨཊྛནྣཾ ཝིམོཀྑཱནནྟི ཨེཏྠ པཊིཔཱཊིཡཱ སཏྟ ཨཔྤིཏཔྤིཏཀྑཎེ པཙྩནཱིཀདྷམྨེཧི ཝིམུཙྩནཏོ ཨཱརམྨཎེ ཙ ཨདྷིམུཙྩནཏོ ཝིམོཀྑཱ ནཱམ. ཨཊྛམོ པན སབྦསོ སཉྙཱཝེདཡིཏེཧི ཝིམུཏྟཏྟཱ ཨཔགམཝིམོཀྑོ ནཱམ. ཙཏུཀྐནཡཔཉྩཀནཡེསུ པཋམཛ྄ཛྷཱནསམཱདྷི སཝིཏཀྐསཝིཙཱརོ ནཱམ. པཉྩཀནཡེ དུཏིཡཛ྄ཛྷཱནསམཱདྷི ཨཝིཏཀྐཝིཙཱརམཏྟོ. ནཡདྭཡེཔི ཨུཔརི ཏཱིསུ ཛྷཱནེསུ སམཱདྷི ཨཝིཏཀྐཨཝིཙཱརོ. སམཱཔཏྟཱིསུ པཊིཔཱཊིཡཱ ཨཊྛནྣཾ སམཱདྷཱིཏིཔི ནཱམཾ, སམཱཔཏྟཱིཏིཔི ཙིཏྟེཀགྒཏཱསབྦྷཱཝཏོ, ནིརོདྷསམཱཔཏྟིཡཱ ཏདབྷཱཝཏོ ན སམཱདྷཱིཏི ནཱམཾ. ཧཱནབྷཱགིཡདྷམྨནྟི ཨཔྤགུཎེཧི པཋམཛ྄ཛྷཱནཱདཱིཧི ཝུཊྛིཏསྶ སཉྙཱམནསིཀཱརཱནཾ ཀཱམཱདིཨནུཔཀྑནྡནཾ ¶ . ཝིསེསབྷཱགིཡདྷམྨནྟི པགུཎེཧི པཋམཛ྄ཛྷཱནཱདཱིཧི ཝུཊྛིཏསྶ སཉྙཱམནསིཀཱརཱནཾ ¶ དུཏིཡཛ྄ཛྷཱནཱདིཔཀྑནྡནཾ. ཨིཏི སཉྙཱམནསིཀཱརཱནཾ ཀཱམཱདིདུཏིཡཛ྄ཛྷཱནཱདིཔཀྑནྡནཱནི ཧཱནབྷཱགིཡཝིསེསབྷཱགིཡཱ དྷམྨཱཏི དསྶིཏཱནི. ཏེཧི པན ཛྷཱནཱནཾ ཏཾསབྷཱཝཏཱ ཙ དྷམྨསདྡེན ཝུཏྟཱ. ཏསྨཱཏི ཝུཏྟམེཝཏྠཾ ཧེཏུབྷཱཝེན པཙྩཱམསཏི. ཝོདཱནནྟི པགུཎཏཱསངྑཱཏཾ ཝོདཱནཾ. ཏཉྷི པཋམཛ྄ཛྷཱནཱདཱིཧི ཝུཊྛཧིཏྭཱ དུཏིཡཛ྄ཛྷཱནཱདིཨདྷིགམསྶ པཙྩཡཏྟཱ ‘‘ཝུཊྛཱན’’ནྟི ཝུཏྟཾ. ཀེཙི པན ‘‘ནིརོདྷཏོ ཕལསམཱཔཏྟིཡཱ ཝུཊྛཱནནྟི པཱལི༹ ནཏྠཱི’’ཏི ཝདནྟི. ཏེ ‘‘ནིརོདྷཱ ཝུཊྛཧནྟསྶ ནེཝསཉྙཱནཱསཉྙཱཡཏནཾ ཕལསམཱཔཏྟིཡཱ ཨནནྟརཔཙྩཡེན པཙྩཡོ’’ཏི ཨིམཱཡ པཱལི༹ཡཱ (པཊྛཱ. ༡.༡.༤༡༧) པཊིསེདྷེཏབྦཱ. ཡོ སམཱཔཏྟིལཱབྷཱི སམཱནོ ཨེཝ ‘‘ན ལཱབྷཱིམྷཱི’’ཏི, ཀམྨཊྛཱནཾ སམཱནཾ ཨེཝ ‘‘ན ཀམྨཊྛཱན’’ནྟི སཉྙཱི ཧོཏི, སོ སམྤཏྟིཾཡེཝ སམཱནཾ ‘‘ཝིཔཏྟཱི’’ཏི པཙྩེཏཱིཏི ཝེདིཏབྦོ.

ན ཏཐཱ དཊྛབྦནྟི ཡཐཱ པརཝཱདིནཱ ཝུཏྟཾ, ཏཐཱ ན དཊྛབྦཾ. སཀསཀཀིཙྩམེཝ ཛཱནཱཏཱིཏི ཋཱནཱཊྛཱནཛཱནནཱདིསཀསཀམེཝ ཀིཙྩཾ ཀཱཏུཾ ཛཱནཱཏི, ཡཐཱསཀམེཝ ཝིསཡཾ པཊིཝིཛ྄ཛྷཏཱིཏི ཨཏྠོ. ཏམྤཱིཏི ཏེཧི དསབལཉཱཎེཧི ཛཱནིཏབྦམྤི. ཀམྨཝིཔཱཀནྟརམེཝཱཏི ཀམྨནྟརསྶ ཝིཔཱཀནྟརམེཝ ཛཱནཱཏི. ཙེཏནཱཙེཏནཱསམྤཡུཏྟདྷམྨེ ནིརཡཱདིནིབྦཱནགཱམིནིཔྤཊིཔདཱབྷཱུཏེ ཀམྨནྟི གཧེཏྭཱ ཨཱཧ ‘‘ཀམྨཔརིཙྪེདམེཝཱ’’ཏི. དྷཱཏུནཱནཏྟཉྩ དྷཱཏུནཱནཏྟཀཱརཎཉྩ དྷཱཏུནཱནཏྟཀཱརཎནྟི ཨེཀདེསསརཱུཔེཀསེསོ དཊྛབྦོ. ཏཉྷི ཉཱཎཾ ཏདུབྷཡམྤི ཛཱནཱཏི. ‘‘ཨིམཱཡ ནཱམ དྷཱཏུཡཱ ཨུསྶནྣཏྟཱ’’ཏིཨཱདིནཱ (ཝིབྷ. ཨཊྛ. ༨༡༢) ཏཐཱ ཙེཝ སཾཝཎྞིཏཾ. སཙྩཔརིཙྪེདམེཝཱཏི པརིཉྙཱབྷིསམཡཱདིཝསེན སཙྩཱནཾ པརིཙྪིནྣམེཝ. ཨཔྤེཏུཾ ན སཀྐོཏི ཨཊྛམནཝམབལཱནི ཝིཡ ཏཾསདིསཾ, ཨིདྡྷིཝིདྷཉཱཎམིཝ ཝིཀུབྦིཏུཾ. ཨེཏེནསྶ བལསདིསཏཉྩ ནིཝཱརེཏི. ཛྷཱནཱདིཉཱཎཾ ཝིཡ ཝཱ ཨཔྤེཏུཾ ཝིཀུབྦིཏུཉྩ. ཡདིཔི ཧི ཛྷཱནཱདིཔཙྩཝེཀྑཎཉཱཎཾ སཏྟམབལནྟི ཏསྶ སཝིཏཀྐསཝིཙཱརཏཱ ཝུཏྟཱ, ཏཐཱཔི ཛྷཱནཱདཱིཧི ཝིནཱ པཙྩཝེཀྑཎཱ ནཏྠཱིཏི ཛྷཱནཱདིསཧགཏཾ ཉཱཎཾ ཏདནྟོགདྷཾ ཀཏྭཱ ཨེཝཾ ཝུཏྟནྟི ཝེདིཏབྦཾ. ཨཐ ཝཱ སབྦཉྙུཏཉྙཱཎཾ ཛྷཱནཱདིཀིཙྩཾ ཝིཡ ན སབྦཾ བལཀིཙྩཾ ཀཱཏུཾ སཀྐོཏཱིཏི དསྶེཏུཾ ‘‘ཛྷཱནཾ ཧུཏྭཱ ཨཔྤེཏུཾ, ཨིདྡྷི ཧུཏྭཱ ཝིཀུབྦིཏུཉྩ ན སཀྐོཏཱི’’ཏི ཝུཏྟཾ, ན པན ཀསྶཙི བལསྶ ཛྷཱནཨིདྡྷིབྷཱཝཏོཏི དཊྛབྦཾ.

ཨེཝཾ ¶ ཀིཙྩཝིསེསཝསེནཔི དསབལཉཱཎསབྦཉྙུཏཉྙཱཎཝིསེསཾ དསྶེཏྭཱ ཨིདཱནི ཝིཏཀྐཏྟིཀབྷཱུམནྟརཝསེནཔི ཏཾ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. པཊིཔཱཊིཡཱཏིཨཱདིཏོ པཊྛཱཡ པཊིཔཱཊིཡཱ.

ཨནུཔདཝཎྞནཾ ¶ ཉཏྭཱ ཝེདིཏབྦཱནཱིཏི སམྦནྡྷོ. ཀིལེསཱཝརཎཾ ནིཡཏམིཙྪཱདིཊྛི. ཀིལེསཱཝརཎསྶ ཨབྷཱཝོ ཨཱསཝཀྑཡཉཱཎཱདྷིགམསྶ ཋཱནཾ, ཏབྦྷཱཝོ ཨཊྛཱནཾ. ཨནདྷིགམསྶ པན ཏདུབྷཡམྤི ཡཐཱཀྐམཾ ཨཊྛཱནཾ ཋཱནཉྩཱཏི ཏཏྠ ཀཱརཎཾ དསྶེནྟོ ‘‘ལོཀིཡ…པེ… དསྶནཏོ ཙཱ’’ཏི ཨཱཧ. ཏཏྠ ལོཀིཡསམྨཱདིཊྛིཡཱ ཋིཏི ཨཱསཝཀྑཡཱདྷིགམསྶ ཋཱནཾ ཀིལེསཱཝརཎཱབྷཱཝསྶ ཀཱརཎཏྟཱ. སཱ ཧི ཏསྨིཾ སཏི ན ཧོཏི, ཨསཏི ཙ ཧོཏི. ཨེཏེན ཏསྶཱ ཨཊྛིཏིཡཱ ཏསྶ ཨཊྛཱནཏཱ ཝུཏྟཱ ཨེཝ. ནེསཾ ཝེནེཡྻསཏྟཱནཾ. དྷཱཏུཝེམཏྟདསྶནཏོཏི ཀཱམདྷཱཏུཨཱདཱིནཾ པཝཏྟིབྷེདདསྶནཏོ, ཡདགྒེན དྷཱཏུཝེམཏྟཾ ཛཱནཱཏི, ཏདགྒེན ཙརིཡཱདིཝིསེསམྤི ཛཱནཱཏི. དྷཱཏུཝེམཏྟདསྶནཏོཏི ཝཱ དྷམྨདྷཱཏུཝེམཏྟདསྶནཏོ. སབྦཱཔི ཧི ཙརིཡཱ དྷམྨདྷཱཏུཔརིཡཱཔནྣཱ ཨེཝཱཏི. པཡོགཾ ཨནཱདིཡིཏྭཱཔི སནྟཏིམཧཱམཏྟཱདཱིནཾ ཝིཡ. དིབྦཙཀྑཱནུབྷཱཝཏོ པཏྟབྦེནཱཏི ཨེཏྠ དིབྦཙཀྑུནཱ པརསྶ ཧདཡཝཏྠུསནྣིསྶཡལོཧིཏཝཎྞདསྶནམུཁེན ཏདཱ པཝཏྟམཱནཙིཏྟཛཱནནཏྠཾ པརིཀམྨཀརཎཾ ནཱམ སཱཝཀཱནཾ, ཏཉྩ ཁོ ཨཱདིཀམྨིཀཱནཾ, ཡཏོ དིབྦཙཀྑུཨཱནུབྷཱཝཏོ ཙེཏོཔརིཡཉཱཎསྶ པཏྟབྦཏཱ སིཡཱ. བུདྡྷཱནཾ པན ཡདིཔི ཨཱསཝཀྑཡཉཱཎཱདྷིགམཏོ པགེཝ དིབྦཙཀྑུཉཱཎཱདྷིགམོ, ཏཐཱཔི ཏཐཱཔརིཀམྨཀརཎཾ ནཏྠི ཝིཛྫཱཏྟཡསིདྡྷིཡཱ སིཛ྄ཛྷནཏོ. སེསཱབྷིཉྙཱཏྟཡེ ཙེཏོཔརིཡཉཱཎཾ དིབྦཙཀྑུཉཱཎཱདྷིགམེན པཏྟནྟི ཙ ཝཏྟབྦཏཾ ལབྷཏཱིཏི ཏཐཱ ཝུཏྟནྟི དཊྛབྦཾ.

སཱིཧནཱདསུཏྟཝཎྞནཱ ནིཊྛིཏཱ.

༢-༤. ཨདྷིཝུཏྟིཔདསུཏྟཱདིཝཎྞནཱ

༢༢-༢༤. དུཏིཡེ ཨདྷིཝཙནཔདཱནནྟི པཉྙཏྟིཔདཱནཾ. དཱསཱདཱིསུ སིརིཝཌྜྷཀཱདིསདྡཱ ཝིཡ ཝཙནམཏྟམེཝ ཨདྷིཀཱརཾ ཀཏྭཱ པཝཏྟིཡཱ ཨདྷིཝཙནཾ པཉྙཏྟི. ཨཐ ཝཱ ཨདྷིསདྡོ ཨུཔརིབྷཱགེ. ཝུཙྩཏཱིཏི ཝཙནཾ, ཨུཔརི ཝཙནཾ ཨདྷིཝཙནཾ, ཨུཔཱདཱབྷཱུཏརཱུཔཱདཱིནཾ ¶ ཨུཔརི པཉྙཔིཡམཱནཱ ཨུཔཱདཱཔཉྙཏྟཱིཏི ཨཏྠོ, ཏསྨཱ པཉྙཏྟིདཱིཔཀཔདཱནཱིཏི ཨཏྠོ དཊྛབྦོ. ཏསྶ པདཱནི པདཊྛཱནཱནི ཨདྷིཝཙནཔདཱནི. ཏེནཱཧ ‘‘ཏེསཾ ཡེ’’ཏིཨཱདི. ཏེསནྟི ཨདྷིཝཙནཱནཾ. ཡེཏི ཁནྡྷཱདཡོ. ཨདྷིཝུཏྟིཏཱཡ ཨདྷིཝུཏྟིཡོཏི དིཊྛིཡོ ཝུཙྩནྟི. ཨདྷིཀཉྷི སབྷཱཝདྷམྨེསུ སསྶཏཱདིཾ, པཀཏིཨཱདིཾ, དྲབྱཱདིཾ, ཛཱིཝཱདིཾ, ཀཱཡཱདིཉྩ, ཨབྷཱུཏཾ ཨཏྠཾ ཨཛ྄ཛྷཱརོཔེཏྭཱ དིཊྛིཡོ པཝཏྟནྟཱིཏི. ཏེནཱཧ ‘‘ཨཐ ཝཱ’’ཏིཨཱདི. ཏཏིཡཙཏུཏྠཱནི སུཝིཉྙེཡྻཱནི.

ཨདྷིཝུཏྟིཔདསུཏྟཱདིཝཎྞནཱ ནིཊྛིཏཱ.

༥. ཀསིཎསུཏྟཝཎྞནཱ

༢༥. པཉྩམེ ¶ སཀལཊྛེནཱཏི ནིསྶེསཊྛེན. ཨནཝསེསཕརཎཝསེན ཙེཏྠ སཀལཊྛོ ཝེདིཏབྦོ, ཨསུབྷནིམིཏྟཱདཱིསུ ཝིཡ ཨེཀདེསེ ཨཊྛཏྭཱ ཨནཝསེསཏོ གཧེཏབྦཊྛེནཱཏི ཨཏྠོ. ཏདཱརམྨཎཱནཾ དྷམྨཱནནྟི ཏཾ ཀསིཎཾ ཨཱརབྦྷ པཝཏྟནཀདྷམྨཱནཾ. ཁེཏྟཊྛེནཱཏི ཨུཔྤཏྟིཊྛཱནཊྛེན. ཨདྷིཊྛཱནཊྛེནཱཏི པཝཏྟིཊྛཱནབྷཱཝེན. ཡཐཱ ཁེཏྟཾ སསྶཱནཾ ཨུཔྤཏྟིཊྛཱནཾ ཝཌྜྷནཊྛཱནཉྩ, ཨེཝམེཝ ཏཾ ཏ ཛྷཱནཾ སམྤཡུཏྟདྷམྨཱནནྟི. ཡོགིནོ ཝཱ སུཁཝིསེསཱནཾ ཀཱརཎབྷཱཝེན. པརིཙྪིནྡིཏྭཱཏི ཨིདཾ ‘‘ཨུདྡྷཾ ཨདྷོ ཏིརིཡ’’ནྟི ཨེཏྠཱཔི ཡོཛེཏབྦཾ. པརིཙྪིནྡིཏྭཱ ཨེཝ ཧི སབྦཏྠ ཀསིཎཾ ཝཌྜྷེཏབྦཾ. ཏེན ཏེན ཝཱ ཀཱརཎེནཱཏི ཏེན ཏེན ཨུཔརིཨཱདཱིསུ ཀསིཎཝཌྜྷནཀཱརཎེན. ཡཐཱ ཀིནྟི ཨཱཧ ‘‘ཨཱལོཀམིཝ རཱུཔདསྶནཀཱམོ’’ཏི. ཡཐཱ དིབྦཙཀྑུནཱ ཨུདྡྷཾ ཙེ རཱུཔཾ དཊྛུཀཱམོ, ཨུདྡྷཾ ཨཱལོཀཾ པསཱརེཏི. ཨདྷོ ཙེ, ཨདྷོ. སམནྟཏོ ཙེ རཱུཔཾ དཊྛུཀཱམོ, སམནྟཏོ ཨཱལོཀཾ པསཱརེཏི, ཨེཝཾ སབྦཀསིཎནྟི ཨཏྠོ. ཨེཀསྶཱཏི པཐཝཱིཀསིཎཱདཱིསུ ཨེཀེཀསྶ. ཨཉྙབྷཱཝཱནུཔགམནཏྠནྟི ཨཉྙཀསིཎབྷཱཝཱནུཔགམནདཱིཔནཏྠཾ, ཨཉྙསྶ ཝཱ ཀསིཎབྷཱཝཱནུཔགམནདཱིཔནཏྠཾ. ན ཧི ཨཉྙེན པསཱརིཏཀསིཎཾ ཏཏོ ཨཉྙེན པསཱརིཏཀསིཎབྷཱཝཾ ཨུཔགཙྪཏི, ཨེཝམྤི ནེསཾ ཨཉྙཀསིཎསམྦྷེདཱབྷཱཝོ ཝེདིཏབྦོ. ན ཨཉྙཾ པཐཝཱིཨཱདི. ན ཧི ཨུདཀེན ཋིཏཊྛཱནེ སསམྦྷཱརཔཐཝཱི ཨཏྠི. ཨཉྙཀསིཎསམྦྷེདོཏི ཨཱཔོཀསིཎཱདིནཱ སངྐརོ. སབྦཏྠཱཏི སབྦེསུ སེསཀསིཎེསུ.

ཨེཀདེསེ ¶ ཨཊྛཏྭཱ ཨནཝསེསཕརཎཾ པམཱཎསྶ ཨགྒཧཎཏོ ཨཔྤམཱཎཾ. ཏེནེཝ ཧི ནེསཾ ཀསིཎསམཉྙཱ. ཏཐཱ ཙཱཧ ‘‘ཏཉྷཱི’’ཏིཨཱདི. ཏཏྠ ཙེཏསཱ ཕརནྟོཏི བྷཱཝནཱཙིཏྟེན ཨཱརམྨཎཾ ཀརོནྟོ. བྷཱཝནཱཙིཏྟཉྷི ཀསིཎཾ པརིཏྟཾ ཝཱ ཝིཔུལཾ ཝཱ སཀལམེཝ མནསི ཀརོཏི, ན ཨེཀདེསཾ. ཀསིཎུགྒྷཱཊིམཱཀཱསེ པཝཏྟཝིཉྙཱཎཾ ཕརཎཨཔྤམཱཎཝསེན ཝིཉྙཱཎཀསིཎནྟི ཝུཏྟཾ. ཏཐཱ ཧི ཏཾ ཝིཉྙཱཎནྟི ཝུཙྩཏི. ཀསིཎཝསེནཱཏི ཨུགྒྷཱཊིཏཀསིཎཝསེན ཀསིཎུགྒྷཱཊིམཱཀཱསེ ཨུདྡྷཾཨདྷོཏིརིཡཏཱ ཝེདིཏབྦཱ. ཡཏྟཀཉྷི ཋཱནཾ ཀསིཎཾ པསཱརིཏཾ, ཏཏྟཀཾ ཨཱཀཱསབྷཱཝནཱཝསེན ཨཱཀཱསཾ ཧོཏཱིཏི. ཨེཝཾ ཡཏྟཀཾ ཋཱནཾ ཨཱཀཱསཾ ཧུཏྭཱ ཨུཔཊྛིཏཾ, ཏཏྟཀཾ སཀལམེཝ ཕརིཏྭཱ ཝིཉྙཱཎསྶ པཝཏྟནཏོ ཨཱགམནཝསེན ཝིཉྙཱཎཀསིཎེཔི ཨུདྡྷཾཨདྷོཏིརིཡཏཱ ཝུཏྟཱཏི ཨཱཧ ‘‘ཀསིཎུགྒྷཱཊིམཱཀཱསཝསེན ཏཏྠ པཝཏྟཝིཉྙཱཎེ ཨུདྡྷཾཨདྷོཏིརིཡཏཱ ཝེདིཏབྦཱ’’ཏི.

ཀསིཎསུཏྟཝཎྞནཱ ནིཊྛིཏཱ.

༦. ཀཱལཱི༹སུཏྟཝཎྞནཱ

༢༦. ཚཊྛེ ¶ ཨཏྠསྶ པཏྟིནྟི ཨེཀནྟཏོ ཧིཏཱནུཔྤཏྟིཾ. ཧདཡསྶ སནྟིནྟི པརམཙིཏྟཱུཔསམཾ. ཀིལེསསེནནྟི ཀཱམགུཎསངྑཱཏཾ པཋམཾ ཀིལེསསེནཾ. སཱ ཧི ཀིལེསསེནཱ ཨཙྪརཱསངྒྷཱཏསབྷཱཝཱཔི པཊིཔཏྠཡམཱནཱ པིཡཱཡིཏབྦཨིཙྪིཏབྦརཱུཔསབྷཱཝཏོ པིཡརཱུཔསཱཏརཱུཔཱ ནཱམ ཨཏྟནོ ཀིཙྩཝསེན. ཨཧཾ ཨེཀོཝ ཛྷཱཡནྟོཏི ཨཧཾ གཎསངྒཎིཀཱཡ ཀིལེསསངྒཎིཀཱཡ ཙ ཨབྷཱཝཏོ ཨེཀོ ཨསཧཱཡོ ལཀྑཎཱུཔནིཛ྄ཛྷཱནེན ཛྷཱཡནྟོ. ཨནུབུཛ྄ཛྷིནྟི ཨནུཀྐམེན མགྒཔཊིཔཱཊིཡཱ བུཛ྄ཛྷིཾ པཊིཝིཛ྄ཛྷིཾ. ཨིདཾ ཝུཏྟཾ ཧོཏི – པིཡརཱུཔཾ སཱཏརཱུཔཾ སེནཾ ཛིནིཏྭཱ ཨཧཾ ཨེཀོཝ ཛྷཱཡནྟོ ‘‘ཨཏྠསྶ པཏྟིཾ ཧདཡསྶ སནྟི’’ནྟི སངྑཾ གཏཾ ཨརཧཏྟསུཁཾ པཊིཝིཛ྄ཛྷིཾ, ཏསྨཱ ཛནེན མིཏྟསནྠཝཾ ན ཀརོམི, ཏེནེཝ ཙ མེ ཀཱརཎེན ཀེནཙི སདྡྷིཾ སཀྑཱི ན སམྤཛྫཏཱིཏི. ཨཏྠཱབྷིནིབྦཏྟེསུནྟི ཨིཏིསདྡལོཔེནཱཡཾ ནིདྡེསོཏི ཨཱཧ ‘‘ཨཏྠོཏི གཧེཏྭཱ’’ཏི.

ཀཱལཱི༹སུཏྟཝཎྞནཱ ནིཊྛིཏཱ.

༧. པཋམམཧཱཔཉྷསུཏྟཝཎྞནཱ

༢༧. སཏྟམེ ¶ ཝུཙྩེཐཱཏི ཝུཙྩེཡྻ. དུཏིཡཔདེཔཱིཏི ‘‘ཨནུསཱསནིཡཱ ཝཱ ཨནུསཱསནི’’ནྟི ཨེཝཾ དུཏིཡཝཱཀྱེཔི. ཏེ ཀིར བྷིཀྑཱུ. ན ཙེཝ སམྤཱཡིསྶནྟཱིཏི ན ཙེཝ སམྨདེཝ པཀཱརེཧི གཧེསྶནྟི ཉཱཔེསྶནྟི. ཏེནཱཧ ‘‘སམྤཱདེཏྭཱ ཀཐེཏུཾ ན སཀྑིསྶནྟཱི’’ཏི. ཡསྨཱ ཨཝིསཡེ པཉྷཾ པུཙྪིཏཱ ཧོནྟི, ཏསྨཱ ཝིགྷཱཏཾ ཨཱཔཛྫིསྶནྟཱིཏི ཡོཛནཱ. ཨཉྙཐཱ ཨཱརཱདྷནཾ ནཱམ ནཏྠཱིཏི ཨིམིནཱ སཔཙྩཡནཱམརཱུཔཱནཾ ཡཱཐཱཝཏོ ཨཝབོདྷོ ཨེཝ ཨིཏོ བཱཧིརཀཱནཾ ནཏྠི, ཀུཏོ པཝེདནཱཏི དསྶེཏི. ཨཱརཱདྷནནྟི ཡཱཐཱཝཔཝེདནེན ཙིཏྟསྶ པརིཏོསནཾ.

ཨེཀོ པཉྷོཏི ཨེཀོ པཉྷམགྒོ, ཨེཀཾ པཉྷགཝེསནནྟི ཨཏྠོ. ཨེཀོ ཨུདྡེསོཏི ཨེཀཾ ཨུདྡིསནཾ ཨཏྠསྶ སཾཁིཏྟཝཙནཾ. ཝེཡྻཱཀརཎནྟི ནིདྡིསནཾ ཨཏྠསྶ ཝིཝརིཏྭཱ ཀཐནཾ. ཧེཏུནཱཏི ‘‘ཨནྟཝནྟཏོ ཨནཙྩནྟིཀཏོ ཏཱཝཀཱལིཀཏོ ནིཙྩཔྤཊིཀྑེཔཏོ’’ཏི ཨེཝམཱདིནཱ ནཡེན ཡཐཱ ཨིམེ སངྑཱརཱ ཨེཏརཧི, ཨེཝཾ ཨཏཱིཏེ ཨནཱགཏེ ཙ ཨནིཙྩཱ སངྑཏཱ པཊིཙྩསམུཔྤནྣཱ ཁཡདྷམྨཱ ཝཡདྷམྨཱ ཝིརཱགདྷམྨཱཏི ཨཏཱིཏཱནཱགཏེསུ ནཡེན.

སབྦེ སཏྟཱཏི ཨནཝསེསཱ སཏྟཱ. ཏེ པན བྷཝབྷེདཏོ སངྑེཔེནེཝ བྷིནྡིཏྭཱ དསྶེནྟོ ‘‘ཀཱམབྷཝཱདཱིསཱུ’’ཏིཨཱདིམཱཧ ¶ . བྱདྷིཀརཎཱནམྤི བཱཧིརཏྠསམཱསོ ཧོཏི ཡཐཱ ‘‘ཨུརསིལོམོ’’ཏི ཨཱཧ ‘‘ཨཱཧཱརཏོ ཋིཏི ཨེཏེསནྟི ཨཱཧཱརཊྛིཏིཀཱ’’ཏི. ཏིཊྛཏི ཨེཏེནཱཏི ཝཱ ཋིཏི, ཨཱཧཱརོ ཋིཏི ཨེཏེསནྟི ཨཱཧཱརཊྛིཏིཀཱཏི ཨེཝཾ ཝཱ ཨེཏྠ སམཱསཝིགྒཧོ དཊྛབྦོ. ཨཱཧཱརཊྛིཏིཀཱཏི པཙྩཡཊྛིཏིཀཱ, པཙྩཡཱཡཏྟཝུཏྟིཀཱཏི ཨཏྠོ. པཙྩཡཏྠོ ཧེཏྠ ཨཱཧཱརསདྡོ ‘‘ཨཡམཱཧཱརོ ཨནུཔྤནྣསྶ ཝཱ ཀཱམཙྪནྡསྶ ཨུཔྤཱདཱཡཱ’’ཏིཨཱདཱིསུ (སཾ. ནི. ༤.༢༣༢) ཝིཡ. ཨེཝཉྷི ‘‘སབྦེ སཏྟཱ’’ཏི ཨིམིནཱ ཨསཉྙསཏྟཱ པརིགྒཧིཏཱ ཧོནྟི. སཱ པནཱཡཾ ཨཱཧཱརཊྛིཏིཀཏཱ ནིཔྤརིཡཱཡཏོ སངྑཱརདྷམྨོ. ཏེནཱཧུ ཨཊྛཀཐཱཙརིཡཱ ‘‘ཨཱཧཱརཊྛིཏིཀཱཏི ཨཱགཏཊྛཱནེ སངྑཱརལོཀོ ཝེདིཏབྦོ’’ཏི (པཱརཱ. ཨཊྛ. ༡.༡ ཝེརཉྫཀཎྜཝཎྞནཱ; ཝིསུདྡྷི. ༡.༡༣༦). ཡདི ཨེཝཾ ‘‘སབྦེ སཏྟཱ’’ཏི ཨིདཾ ཀཐནྟི? པུགྒལཱདྷིཊྛཱནདེསནཱཏི ནཱཡཾ དོསོ. ཏེནེཝཱཧ – ‘‘ཨེཀདྷམྨེ, བྷིཀྑཝེ, བྷིཀྑུ སམྨཱ ནིབྦིནྡམཱནོ སམྨཱ ཝིརཛྫམཱནོ སམྨཱ ཝིམུཙྩམཱནོ སམྨཱ ¶ པརིཡནྟདསྶཱཝཱི སམྨདཏྠཾ ཨབྷིསམེཙྩ དིཊྛེཝ དྷམྨེ དུཀྑསྶནྟཀརོ ཧོཏི. ཀཏམསྨིཾ ཨེཀདྷམྨེ? སབྦེ སཏྟཱ ཨཱཧཱརཊྛིཏིཀཱ’’ཏི. ཡྭཱཡཾ པུགྒལཱདྷིཊྛཱནཱཡ ཀཐཱཡ སབྦེསཾ སངྑཱརཱནཾ པཙྩཡཱཡཏྟཝུཏྟིཏཱཡ ཨཱཧཱརཔརིཡཱཡེན སཱམཉྙཏོ པཙྩཡདྷམྨོ ཝུཏྟོ, ཨཡཾ ཨཱཧཱརོ ནཱམ ཨེཀོ དྷམྨོ.

ཙོདཀོ ཝུཏྟམྤི ཨཏྠཾ ཡཱཐཱཝཏོ ཨཔྤཊིཝིཛ྄ཛྷམཱནོ ནེཡྻཏྠཾ སུཏྟཔདཾ ནཱིཏཏྠཏོ དཧནྟོ ‘‘སབྦེ སཏྟཱ’’ཏི ཝཙནམཏྟེ ཋཏྭཱ ‘‘ནནུ ཙཱ’’ཏིཨཱདིནཱ ཙོདེཏི. ཨཱཙརིཡོ ཨཝིཔརཱིཏཾ ཏཏྠ ཡཐཱདྷིཔྤེཏམཏྠཾ པཝེདེནྟོ ‘‘ན ཝིརུཛ྄ཛྷཏཱི’’ཏི ཝཏྭཱ ‘‘ཏེསཉྷི ཛྷཱནཾ ཨཱཧཱརོ ཧོཏཱི’’ཏི ཨཱཧ. ཛྷཱནནྟི ཨེཀཝོཀཱརབྷཝཱཝཧཾ སཉྙཱཡ ཝིརཛྫནཝསེན པཝཏྟརཱུཔཱཝཙརཙཏུཏྠཛ྄ཛྷཱནཾ. པཱལི༹ཡཾ པན ‘‘ཨནཱཧཱརཱ’’ཏི ཝཙནཾ ཨསཉྙབྷཝེ ཙཏུནྣཾ ཨཱཧཱརཱནཾ ཨབྷཱཝཾ སནྡྷཱཡ ཝུཏྟཾ, ན པཙྩཡཱཧཱརསྶ ཨབྷཱཝཏོ. ཨེཝཾ སནྟེཔཱིཏི ཨིདཾ སཱསནེ ཡེསུ དྷམྨེསུ ཝིསེསཏོ ཨཱཧཱརསདྡོ ནིརུལ༹ྷོ, ‘‘ཨཱཧཱརཊྛིཏིཀཱ’’ཏི ཨེཏྠ ཡདི ཏེཡེཝ གཡ྄ཧནྟི, ཨབྱཱཔིཏདོསམཱཔནྣོ. ཨཐ སབྦོཔི པཙྩཡདྷམྨོ ཨཱཧཱརོཏི ཨདྷིཔྤེཏོ, ཨིམཱཡ ཨཱཧཱརཔཱལི༹ཡཱ ཝིརོདྷོ ཨཱཔནྣོཏི དསྶེཏུཾ ཨཱརདྡྷཾ. ‘‘ན ཝིརུཛ྄ཛྷཏཱི’’ཏི ཡེནཱདྷིཔྤཱཡེན ཝུཏྟཾ, ཏཾ ཝིཝརནྟོ ‘‘ཨེཏསྨིཉྷི སུཏྟེ’’ཏིཨཱདིམཱཧ. ཀབལཱི༹ཀཱརཱཧཱརཱདཱིནཾ ཨོཛཊྛམཀརཱུཔཱཧརཎཱདི ནིཔྤརིཡཱཡེན ཨཱཧཱརབྷཱཝོ. ཡཐཱ ཧི ཀབལཱི༹ཀཱརཱཧཱརོ ཨོཛཊྛམཀརཱུཔཱཧརཎེན རཱུཔཀཱཡཾ ཨུཔཏྠམྦྷེནྟི, ཨེཝཾ ཕསྶཱདཡོ ཝེདནཱདིཨཱཧརཎེན ནཱམཀཱཡཾ ཨུཔཏྠམྦྷེཏི, ཏསྨཱ སཏིཔི ཛནཀབྷཱཝེ ཨུཔཏྠམྦྷཀབྷཱཝོ ཨོཛཱདཱིསུ སཱཏིསཡོ ལབྦྷམཱནོ མུཁྱོ ཨཱཧཱརཊྛོཏི ཏེ ཨེཝ ནིཔྤརིཡཱཡེན ཨཱཧཱརལཀྑཎཱ དྷམྨཱ ཝུཏྟཱ.

ཨིདྷཱཏི ཨིམསྨིཾ སུཏྟེ པརིཡཱཡེན པཙྩཡོ ཨཱཧཱརོཏི ཝུཏྟོ, སབྦོ པཙྩཡདྷམྨོ ཨཏྟནོ ཕལཾ ¶ ཨཱཧརཏཱིཏི ཨིམཾ པརིཡཱཡཾ ལབྷཏཱིཏི. ཏེནཱཧ ‘‘སབྦདྷམྨཱནཉྷཱི’’ཏིཨཱདི. ཏཏྠ སབྦདྷམྨཱནནྟི སབྦེསཾ སངྑཏདྷམྨཱནཾ. ཨིདཱནི ཡཐཱཝུཏྟམཏྠཾ སུཏྟེན སམཏྠེཏུཾ ‘‘ཏེནེཝཱཧཱ’’ཏིཨཱདི ཝུཏྟཾ. ཨཡནྟི པཙྩཡཱཧཱརོ. ནིཔྤརིཡཱཡཱཧཱརོཔི གཧིཏོཝ ཧོཏཱིཏི ཡཱཝཏཱ སོཔི པཙྩཡབྷཱཝེནེཝ ཛནཀོ ཨུཔཏྠམྦྷཀོ ཙ ཧུཏྭཱ ཏཾ ཏཾ ཕལཾ ཨཱཧརཏཱིཏི ཝཏྟབྦཏཾ ལབྷཏཱིཏི.

ཏཏྠཱཏི ¶ པརིཡཱཡཱཧཱརོ, ནིཔྤརིཡཱཡཱཧཱརོཏི དྭཱིསུ ཨཱཧཱརེསུ ཨསཉྙབྷཝེ ཡདིཔི ནིཔྤརིཡཱཡཱཧཱརོ ན ལབྦྷཏི, པརིཡཱཡཱཧཱརོ པན ལབྦྷཏེཝ. ཨིདཱནི ཏམེཝཏྠཾ ཝིཏྠཱརཏོ དསྶེཏུཾ ‘‘ཨནུཔྤནྣེ ཧི བུདྡྷེ’’ཏིཨཱདི ཝུཏྟཾ. ཨུཔྤནྣེ བུདྡྷེ ཏིཏྠཀརམཏནིསྶིཏཱནཾ ཛྷཱནབྷཱཝནཱཡ ཨསིཛ྄ཛྷནཏོ ‘‘ཨནུཔྤནྣེ བུདྡྷེ’’ཏི ཝུཏྟཾ. སཱསནིཀཱ ཏཱདིསཾ ཛྷཱནཾ ན ནིབྦཏྟེནྟཱིཏི ‘‘ཏིཏྠཱཡཏནེ པབྦཛིཏཱ’’ཏི ཝུཏྟཾ. ཏིཏྠིཡཱ ཧི ཨུཔཔཏྟིཝིསེསེ ཝིམུཏྟིསཉྙིནོ སཉྙཱཝིརཱགཱཝིརཱགེསུ ཨཱདཱིནཝཱནིསཾསདསྶིནོཝ ཧུཏྭཱ ཨསཉྙསམཱཔཏྟིཾ ནིབྦཏྟེཏྭཱ ཨཀྑཎབྷཱུམིཡཾ ཨུཔྤཛྫནྟི, ན སཱསནིཀཱ. ཝཱཡོཀསིཎེ པརིཀྐམྨཾ ཀཏྭཱཏི ཝཱཡོཀསིཎེ པཋམཱདཱིནི ཏཱིཎི ཛྷཱནཱནི ནིབྦཏྟེཏྭཱ ཏཏིཡཛ྄ཛྷཱནེ ཙིཎྞཝསཱི ཧུཏྭཱ ཏཏོ ཝུཊྛཱཡ ཙཏུཏྠཛ྄ཛྷཱནཱདྷིགམཱཡ པརིཀམྨཾ ཀཏྭཱ. ཏེནེཝཱཧ ‘‘ཙཏུཏྠཛ྄ཛྷཱནཾ ནིབྦཏྟེཏྭཱ’’ཏི.

ཀསྨཱ (དཱི. ནི. ཊཱི. ༡.༦༨-༧༣; དཱི. ནི. ཨབྷི. ཊཱི. ༡.༦༨-༧༣) པནེཏྠ ཝཱཡོཀསིཎེཡེཝ པརིཀམྨཾ ཝུཏྟནྟི? ཝུཙྩཏེ, ཡཐེཝ ཧི རཱུཔཔཊིབྷཱགབྷཱུཏེསུ ཀསིཎཝིསེསེསུ རཱུཔཝིབྷཱཝནེན རཱུཔཝིརཱགབྷཱཝནཱསངྑཱཏོ ཨརཱུཔསམཱཔཏྟིཝིསེསོ སཙྪིཀརཱིཡཏི, ཨེཝཾ ཨཔརིབྱཏྟཝིགྒཧཏཱཡ ཨརཱུཔཔཊིབྷཱགབྷཱུཏེ ཀསིཎཝིསེསེ ཨརཱུཔཝིབྷཱཝནེན ཨརཱུཔཝིརཱགབྷཱཝནཱ སངྑཱཏོ རཱུཔསམཱཔཏྟིཝིསེསོ ཨདྷིགམཱིཡཏཱིཏི. ཨེཏྠ ཙ ‘‘སཉྙཱ རོགོ, སཉྙཱ གཎྜོ’’ཏིཨཱདིནཱ (མ. ནི. ༣.༢༤), ‘‘དྷི ཙིཏྟཾ, དྷི ཝཏེཏཾ ཙིཏྟ’’ནྟིཨཱདིནཱ ཙ ནཡེན ཨརཱུཔཔྤཝཏྟིཡཱ ཨཱདཱིནཝདསྶནེན ཏདབྷཱཝེ ཙ སནྟཔཎཱིཏབྷཱཝསནྣིཊྛཱནེན རཱུཔསམཱཔཏྟིཡཱ ཨབྷིསངྑརཎཾ ཨརཱུཔཝིརཱགབྷཱཝནཱ. རཱུཔཝིརཱགབྷཱཝནཱ པན སདྡྷིཾ ཨུཔཙཱརེན ཨརཱུཔསམཱཔཏྟིཡོ, ཏཏྠཱཔི ཝིསེསེན པཋམཱརུཔྤཛ྄ཛྷཱནཾ. ཡདི ཨེཝཾ ‘‘པརིཙྪིནྣཱཀཱསཀསིཎེཔཱི’’ཏི ཝཏྟབྦཾ, ཏསྶཱཔི ཨརཱུཔཔཊིབྷཱགཏཱ ལབྦྷཏཱིཏི? ཨིཙྪིཏམེཝེཏཾ, ཀེསཉྩི ཨཝཙནཾ པནེཏྠ པུབྦཱཙརིཡེཧི ཨགྒཧིཏབྷཱཝེན. ཡཐཱ ཧི རཱུཔཝིརཱགབྷཱཝནཱ ཝིརཛྫནཱིཡདྷམྨཱབྷཱཝམཏྟེན པརིནིཔྥནྣཱ, ཝིརཛྫནཱིཡདྷམྨཔརིབྷཱསབྷཱུཏེ ཙ ཝིསཡཝིསེསེ པཱཏུབྷཝཏི, ཨེཝཾ ཨརཱུཔཝིརཱགབྷཱཝནཱཔཱིཏི ཝུཙྩམཱནེ ན ཀོཙི ཝིརོདྷོ. ཏིཏྠིཡེཧེཝ པན ཏསྶཱ སམཱཔཏྟིཡཱ པཊིཔཛྫིཏབྦཏཱཡ ཏེསཉྩ ཝིསཡཔཐེ སཱུཔནིབནྡྷནསྶེཝ ཏསྶ ཛྷཱནསྶ པཊིཔཏྟིཏོ དིཊྛིཝནྟེཧི པུབྦཱཙརིཡེཧི ཙཏུཏྠེཡེཝ བྷཱུཏཀསིཎེ ཨརཱུཔཝིརཱགབྷཱཝནཱཔརིཀམྨཾ ཝུཏྟནྟི དཊྛབྦཾ. ཀིཉྩ ¶ ཝཎྞཀསིཎེསུ ཝིཡ པུརིམབྷཱུཏཀསིཎཏྟཡེཔི ¶ ཝཎྞཔྤཊིཙྪཱཡཱཝ པཎྞཏྟི ཨཱརམྨཎཾ ཛྷཱནསྶ ལོཀཝོཧཱརཱནུརོདྷེནེཝ པཝཏྟིཏོ. ཨེཝཉྩ ཀཏྭཱ ཝིསུདྡྷིམགྒེ (ཝིསུདྡྷི. ༡.༥༧) པཐཝཱིཀསིཎསྶ ཨཱདཱསཙནྡམཎྜལཱུཔམཝཙནཉྩ སམཏྠིཏཾ ཧོཏི, ཙཏུཏྠཾ པན བྷཱུཏཀསིཎཾ བྷཱུཏཔྤཊིཙྪཱཡམེཝ ཛྷཱནསྶ གོཙརབྷཱཝཾ གཙྪཏཱིཏི ཏསྶེཝཾ ཨརཱུཔཔཊིབྷཱགཏཱ ཡུཏྟཱཏི ཝཱཡོཀསིཎེཡེཝ པརིཀམྨཾ ཝུཏྟནྟི ཝེདིཏབྦཾ.

དྷཱིཏི ཛིགུཙྪནཏྠེ ནིཔཱཏོ, ཏསྨཱ དྷི ཙིཏྟནྟི ཙིཏྟཾ ཛིགུཙྪཱམི. དྷི ཝཏེཏཾ ཙིཏྟནྟི ཨེཏཾ མམ ཙིཏྟཾ ཛིགུཙྪིཏཾ ཝཏ ཧོཏུ. ཝཏཱཏི སམྦྷཱཝནེ. ཏེན ཛིགུཙྪནཾ སམྦྷཱཝེནྟོ ཝདཏི. ནཱམཱཏི ཙ སམྦྷཱཝནེ ཨེཝ. ཏེན ཙིཏྟསྶ ཨབྷཱཝཾ སམྦྷཱཝེཏི. ཙིཏྟསྶ བྷཱཝཱབྷཱཝེསུ ཨཱདཱིནཝཱནིསཾསེ དསྶེཏུཾ ‘‘ཙིཏྟཉྷཱི’’ཏིཨཱདི ཝུཏྟཾ. ཁནྟིཾ རུཙིཾ ཨུཔྤཱདེཏྭཱཏི ཙིཏྟསྶ ཨབྷཱཝོ ཨེཝ སཱདྷུ སུཊྛཱུཏི ཨིམཾ དིཊྛིནིཛ྄ཛྷཱནཀྑནྟིཾ ཏཏྠ ཙ ཨབྷིརུཙིཾ ཨུཔྤཱདེཏྭཱ. ཏཐཱ བྷཱཝིཏསྶ ཛྷཱནསྶ ཋིཏིབྷཱགིཡབྷཱཝཔྤཏྟིཡཱ ཨཔརིཧཱིནཛ྄ཛྷཱནཱ. ཏིཏྠཱཡཏནེ པབྦཛིཏསྶེཝ ཏཐཱ ཛྷཱནབྷཱཝནཱ ཧོཏཱིཏི ཨཱཧ ‘‘མནུསྶལོཀེ’’ཏི. པཎིཧིཏོ ཨཧོསཱིཏི མརཎསྶ ཨཱསནྣཀཱལེ ཋཔིཏོ ཨཧོསི. ཡདི ཋཱནཱདིནཱ ཨཱཀཱརེན ནིབྦཏྟེཡྻ ཀམྨབལེན, ཡཱཝ བྷེདཱ ཏེནེཝཱཀཱརེན ཏིཊྛེཡྻཱཏི ཨཱཧ ‘‘ཏེན ཨིརིཡཱཔཐེནཱ’’ཏིཨཱདི. ཨེཝརཱུཔཱནམྤཱིཏི ཨེཝཾ ཨཙེཏནཱནམྤི. པི-སདྡེན པགེཝ སཙེཏནཱནནྟི དསྶེཏི. ཀཐཾ པན ཨཙེཏནཱནཾ ནེསཾ པཙྩཡཱཧཱརསྶ ཨུཔཀཔྤནནྟི ཙོདནཾ སནྡྷཱཡ ཏཏྠ ནིདསྶནཾ དསྶེནྟོ ‘‘ཡཐཱ’’ཏིཨཱདིམཱཧ. ཏེན ན ཀེཝལམཱགམོཡེཝ, ཨཡམེཏྠ ཡུཏྟཱིཏི དསྶེཏི. ཏཱཝ ཏིཊྛནྟཱིཏི ཨུཀྐཾསཏོ པཉྩ མཧཱཀཔྤསཏཱནི ཏིཊྛནྟི.

ཡེ ཨུཊྛཱནཝཱིརིཡེན དིཝསཾ ཝཱིཏིནཱམེཏྭཱ ཏསྶ ནིསྶནྡཕལམཏྟཾ ཀིཉྩིདེཝ ལབྷིཏྭཱ ཛཱིཝིཀཾ ཀཔྤེནྟི, ཏེ ཨུཊྛཱནཕལཱུཔཛཱིཝིནོ. ཡེ པན ཨཏྟནོ པུཉྙཕལམེཝ ཨུཔཛཱིཝནྟི, ཏེ པུཉྙཕལཱུཔཛཱིཝིནོ. ནེརཡིཀཱནཾ པན ནེཝ ཨུཊྛཱནཝཱིརིཡཝསེན ཛཱིཝིཀཀཔྤནཾ, པུཉྙཕལསྶ པན ལེསོཔི ནཏྠཱིཏི ཝུཏྟཾ ‘‘ཡེ པན ནེརཡིཀཱ…པེ… ཛཱིཝཱིཏི ཝུཏྟཱ’’ཏི. པཊིསནྡྷིཝིཉྙཱཎསྶ ཨཱཧརཎེན མནོསཉྩེཏནཱ ཨཱཧཱརོཏི ཝུཏྟཱ, ན ཡསྶ ཀསྶཙི ཕལསྶཱཏི ¶ ཨདྷིཔྤཱཡེན ‘‘ཀིཾ པཉྩ ཨཱཧཱརཱ ཨཏྠཱི’’ཏི ཙོདེཏི. ཨཱཙརིཡོ ནིཔྤརིཡཱཡཱཧཱརེ ཨདྷིཔྤེཏེ ‘‘སིཡཱ ཏཝ ཙོདནཱ ཨཝསརཱ, སཱ པན ཨེཏྠ ཨནཝསརཱ’’ཏི ཙ དསྶེནྟོ ‘‘པཉྩ, ན པཉྩཱཏི ཨིདཾ ན ཝཏྟབྦ’’ནྟི ཝཏྭཱ པརིཡཱཡཱཧཱརསྶེཝ པནེཏྠ ཨདྷིཔྤེཏབྷཱཝཾ དསྶེནྟོ ‘‘ནནུ པཙྩཡོ ཨཱཧཱརོ’ཏི ཝུཏྟམེཏ’’ནྟི ཨཱཧ. ཏསྨཱཏི ཡསྶ ཀསྶཙི པཙྩཡསྶ ཨཱཧཱརོཏི ཨིཙྪིཏཏྟཱ. ཨིདཱནི ཝུཏྟམེཝཏྠཾ པཱལི༹ཡཱ སམཏྠེནྟོ ‘‘ཡཾ སནྡྷཱཡཱ’’ཏིཨཱདིམཱཧ.

མུཁྱཱཧཱརཝསེནཔི ¶ ནེརཡིཀཱནཾ ཨཱཧཱརཊྛིཏིཀཏཾ དསྶེཏུཾ ‘‘ཀབལཱི༹ཀཱརཱཧཱརཾ…པེ… སཱདྷེཏཱི’’ཏི ཝུཏྟཾ. ཡདི ཨེཝཾ ནེརཡིཀཱ སུཁཔྤཊིསཾཝེདིནོཔི ཧོནྟཱིཏི? ནོཏི དསྶེཏུཾ ‘‘ཁེལོ༹ ཧཱི’’ཏིཨཱདི ཝུཏྟཾ. ཏཡོཏི ཏཡོ ཨརཱུཔཱཧཱརཱ ཀབལཱི༹ཀཱརཱཧཱརསྶ ཨབྷཱཝཏོ. ཨཝསེསཱནནྟི ཨསཉྙསཏྟེཧི ཨཝསེསཱནཾ ཀཱམབྷཝཱདཱིསུ ནིབྦཏྟསཏྟཱནཾ. པཙྩཡཱཧཱརོ ཧི སབྦེསཾ སཱདྷཱརཎོཏི.

པཋམམཧཱཔཉྷསུཏྟཝཎྞནཱ ནིཊྛིཏཱ.

༨-༩. དུཏིཡམཧཱཔཉྷསུཏྟཱདིཝཎྞནཱ

༢༨-༢༩. ཨཊྛམེ ཨེཝཾནཱམཀེཏི ཀཛངྒལཱཏི ཨེཝཾ ཨིཏྠིལིངྒཝསེན ལདྡྷནཱམཀེ མཛ྄ཛྷིམཔྤདེསསྶ མརིཡཱདབྷཱུཏེ ནགརེ. ‘‘ནིགམེ’’ཏིཔི ཝདནྟི, ‘‘ནིཙུལཝནེ’’ཏིཔི ཝདནྟི. ནིཙུལཾ ནཱམ ཨེཀཱ རུཀྑཛཱཏི, ‘‘ནཱིཔརུཀྑོ’’ཏིཔི ཝདནྟི. ཏེན སཉྪནྣོ མཧཱཝནསཎྜོ, ཏཏྠ ཝིཧརཏཱིཏི ཨཏྠོ. ཧེཏུནཱ ནཡེནཱཏི ཙ ཧེཊྛཱ ཝུཏྟམེཝ. ནནུ ཙ ‘‘ཨེསོ ཙེཝ ཏསྶ ཨཏྠོ’’ཏི ཀསྨཱ ཝུཏྟཾ. བྷགཝཏཱ ཧི ཙཏྟཱརོཏིཨཱདིཔཉྷབྱཱཀརཎཱ ཙཏྟཱརོ ཨཱཧཱརཱ, པཉྩུཔཱདཱནཀྑནྡྷཱ, ཚ ཨཛ྄ཛྷཏྟིཀཱནི ཨཱཡཏནཱནི, སཏྟ ཝིཉྙཱཎཊྛིཏིཡོ, ཨཊྛ ལོཀདྷམྨཱ དསྶིཏཱ. བྷིཀྑུནིཡཱ པན ཙཏྟཱརོ སཏིཔཊྛཱནཱ, པཉྩིནྡྲིཡཱནི, ཚ ནིསྶཱརཎཱིཡཱ དྷཱཏུཡོ, སཏྟ བོཛ྄ཛྷངྒཱ, ཨརིཡོ ཨཊྛངྒིཀོ མགྒོཏི དསྶིཏདྷམྨཱ ཨཉྙོཡེཝཏྠོ བྷིཀྑུནིཡཱ དསྶིཏོཏི ཙོདནཾ སནྡྷཱཡཱཧ ‘‘ཀིཉྩཱཔཱི’’ཏིཨཱདི. ནཝམེ ནཏྠི ཝཏྟབྦཾ.

དུཏིཡམཧཱཔཉྷསུཏྟཱདིཝཎྞནཱ ནིཊྛིཏཱ.

༡༠. དུཏིཡཀོསལསུཏྟཝཎྞནཱ

༣༠. དསམེ ¶ ཨུགྒནྟྭཱ ཡུཛ྄ཛྷཏི ཨེཏཱཡཱཏི ཨུཡྻོདྷིཀཱ, སཏྠཔྤཧཱརེཧི ཡུཛ྄ཛྷིཏསྶེཏཾ ཨདྷིཝཙནཾ. ཨུགྒནྟྭཱ ཡུཛ྄ཛྷནཾ ཝཱ ཨུཡྻོདྷིཀོ, སཏྠཔྤཧཱརོ. ཏེནཱཧ ‘‘ཡུདྡྷཏོ ནིཝཏྟོ’’ཏི. ཨུཔསྶུཏིཝསེན ཡུཛ྄ཛྷིཏབྦཱཀཱརཾ ཉཏྭཱཏི ཛེཏཝནེ ཀིར དཏྟཏྠེརོ དྷནུགྒཧཏིསྶཏྠེརོཏི དྭེ མཧལླཀཏྠེརཱ ཝིཧཱརཔཙྩནྟེ པཎྞསཱལཱཡ ཝསནྟི. ཏེསུ དྷནུགྒཧཏིསྶཏྠེརོ པཙྪིམཡཱམེ པབུཛ྄ཛྷིཏྭཱ ཨུཊྛཱཡ ནིསིནྣོ དཏྟཏྠེརཾ ཨཱམནྟེཏྭཱ ‘‘ཨཡཾ ཏེ མཧོདརོ ཀོསལོ བྷུཏྟབྷཏྟམེཝ པཱུཏིཾ ཀརོཏི, ཡུདྡྷཝིཙཱརཎཾ པན ཀིཉྩི ན ཛཱནཱཏི, པརཱཛིཏོཏྭེཝ ཝདཱཔེཏཱི’’ཏི ཝཏྭཱ ཏེན ¶ ‘‘ཀིཾ པན ཀཱཏུཾ ཝཊྚཏཱི’’ཏི ཝུཏྟེ – ‘‘བྷནྟེ, ཡུདྡྷོ ནཱམ པདུམབྱཱུཧོ ཙཀྐབྱཱུཧོ སཀཊབྱཱུཧོཏི ཏཡོ བྱཱུཧཱ ཧོནྟི, ཨཛཱཏསཏྟུཾ གཎྷིཏུཀཱམེན ཨསུཀསྨིཾ ནཱམ པབྦཏཀུཙྪིསྨིཾ དྭཱིསུ པབྦཏབྷིཏྟཱིསུ མནུསྶེ ཋཔེཏྭཱ པུརཏོ དུབྦལཾ དསྶེཏྭཱ པབྦཏནྟརཾ པཝིཊྛབྷཱཝཾ ཛཱནིཏྭཱ པཝིཊྛམགྒཾ རུནྡྷིཏྭཱ པུརཏོ ཙ པཙྪཏོ ཙ ཨུབྷོསུ པབྦཏབྷིཏྟཱིསུ ཝགྒིཏྭཱ ནདིཏྭཱ ཛཱལཔཀྑིཏྟམཙྪཾ ཝིཡ ཀཏྭཱ སཀྐཱ གཧེཏུ’’ནྟི. ཏསྨིཾ ཁཎེ ‘‘བྷིཀྑཱུནཾ ཀཐཱསལླཱཔཾ སུཎཱཐཱ’’ཏི རཉྙོ པེསིཏཙརཔུརིསཱ ཏཾ སུཏྭཱ རཉྙོ ཨཱརོཙེསུཾ. ཏཾ སུཏྭཱ རཱཛཱ སངྒཱམབྷེརིཾ པཧརཱཔེཏྭཱ གནྟྭཱ སཀཊབྱཱུཧཾ ཀཏྭཱ ཨཛཱཏསཏྟུཾ ཛཱིཝགྒཱཧཾ གཎྷི. ཏེན ཝུཏྟཾ ‘‘ཨུཔསྶུཏིཝསེ…པེ... ཨཛཱཏསཏྟུཾ གཎྷཱི’’ཏི.

དོཎཔཱཀནྟི དོཎཏཎྜུལཱནཾ པཀྐབྷཏྟཾ. དོཎནྟི ཙཏུནཱལི༹ཀཱནམེཏམདྷིཝཙནཾ. མནུཛསྶཱཏི སཏྟསྶ. ཏནུཀསྶཱཏི ཏནུཀཱ ཨཔྤིཀཱ ཨསྶ པུགྒལསྶ, བྷུཏྟཔཙྩཡཱ ཝིསབྷཱགཝེདནཱ ན ཧོནྟི. སཎིཀནྟི མནྡཾ མུདུཀཾ, ཨཔརིསྶཡམེཝཱཏི ཨཏྠོ. ཛཱིརཏཱིཏི པརིབྷུཏྟཱཧཱརོ པཙྩཏི. ཨཱཡུ པཱལཡནྟི ནིརོགོ ཨཝེདནོ ཛཱིཝིཏཾ རཀྑནྟོ. ཨཐ ཝཱ སཎིཀཾ ཛཱིརཏཱིཏི སོ བྷོཛནེ མཏྟཉྙཱུ པུགྒལོ པརིམིཏཱཧཱརཏཱཡ སཎིཀཾ ཙིརེན ཛཱིརཏི ཛརཾ པཱཔུཎཱཏི ཛཱིཝིཏཾ པཱལཡནྟོ.

ཨིམཾ ཨོཝཱདཾ ཨདཱསཱིཏི ཨེཀསྨིཾ ཀིར (དྷ. པ. ཨཊྛ. ༢.༢༠༣ པསེནདིཀོསལཝཏྠུ) སམཡེ རཱཛཱ ཏཎྜུལདོཎསྶ ཨོདནཾ ཏདུཔིཡེན སཱུཔབྱཉྫནེན བྷུཉྫཏི. སོ ཨེཀདིཝསཾ བྷུཏྟཔཱཏརཱསོ ¶ བྷཏྟསམྨདཾ ཨཝིནོདེཏྭཱ སཏྠུ སནྟིཀཾ གནྟྭཱ ཀིལནྟརཱུཔོ ཨིཏོ ཙིཏོ ཙ སམྤརིཝཏྟཏི, ནིདྡཱཡ ཨབྷིབྷུཡྻམཱནོཔི ལཧུཀཾ ནིཔཛྫིཏུཾ ཨསཀྐོནྟོ ཨེཀམནྟཾ ནིསཱིདི. ཨཐ ནཾ སཏྠཱ ཨཱཧ ‘‘ཀིཾ, མཧཱརཱཛ, ཨཝིསྶམིཏྭཱཝ ཨཱགཏོསཱི’’ཏི. ཨཱམ, བྷནྟེ, བྷུཏྟཀཱལཏོ པཊྛཱཡ མེ མཧཱདུཀྑཾ ཧོཏཱིཏི. ཨཐ ནཾ སཏྠཱ, ‘‘མཧཱརཱཛ, ཨཏིབཧུབྷོཛཱིནཾ ཨེཏཾ དུཀྑཾ ཧོཏཱི’’ཏི ཝཏྭཱ –

‘‘མིདྡྷཱི ཡདཱ ཧོཏི མཧགྒྷསོ ཙ,

ནིདྡཱཡིཏཱ སམྤརིཝཏྟསཱཡཱི;

མཧཱཝརཱཧོཝ ནིཝཱཔཔུཊྛོ,

པུནཔྤུནཾ གབྦྷམུཔེཏི མནྡོ’’ཏི. (དྷ. པ. ༣༢༥; ནེཏྟི. ༢༦, ༩༠) –

ཨིམཱཡ ¶ གཱཐཱཡ ཨོཝདིཏྭཱ, ‘‘མཧཱརཱཛ, བྷོཛནཾ ནཱམ མཏྟཱཡ བྷུཉྫིཏུཾ ཝཊྚཏི, མཏྟབྷོཛིནོ ཧི སུཁཾ ཧོཏཱི’’ཏི ཨུཏྟརིཔི པུན ཨོཝདནྟོ ‘‘མནུཛསྶ སདཱ སཏཱིམཏོ’’ཏི (སཾ. ནི. ༡.༡༢༤) ཨིམཾ གཱཐམཱཧ.

རཱཛཱ པན གཱཐཾ ཨུགྒཎྷིཏུཾ ནཱསཀྑི, སམཱིཔེ ཋིཏཾ པན བྷཱགིནེཡྻཾ སུདསྶནཾ ནཱམ མཱཎཝཾ ‘‘ཨིམཾ གཱཐཾ ཨུགྒཎྷ ཏཱཏཱ’’ཏི ཨཱཧ. སོ ཏཾ གཱཐཾ ཨུགྒཎྷིཏྭཱ ‘‘ཀིཾ ཀརོམི, བྷནྟེ’’ཏི སཏྠཱརཾ པུཙྪི. ཨཐ ནཾ སཏྠཱ ཨཱཧ, ‘‘མཱཎཝ, ཨིམཾ གཱཐཾ ནཊོ ཝིཡ པཏྟཔཏྟཊྛཱནེ མཱ ཨཝཙ, རཉྙོ པཱཏརཱསཾ བྷུཉྫནཊྛཱནེ ཋཏྭཱ པཋམཔིཎྜཱདཱིསུཔི ཨཝཏྭཱ ཨཝསཱནེ པིཎྜེ གཧིཏེ ཝདེཡྻཱསི, རཱཛཱ སུཏྭཱ བྷཏྟཔིཎྜཾ ཚཌྜེསྶཏི. ཨཐ རཉྙོ ཧཏྠེསུ དྷོཏེསུ པཱཏིཾ ཨཔནེཏྭཱ སིཏྠཱནི གཎེཏྭཱ ཏདུཔིཡཾ བྱཉྫནཾ ཉཏྭཱ པུནདིཝསེ ཏཱཝཏཀེ ཏཎྜུལེ ཧཱརེཡྻཱསི. པཱཏརཱསེ ཙ ཝཏྭཱ སཱཡམཱསེ མཱ ཝདེཡྻཱསཱི’’ཏི. སོ ‘‘སཱདྷཱུ’’ཏི པཊིསྶུཎིཏྭཱ ཏཾ དིཝསཾ རཉྙོ པཱཏརཱསཾ བྷུཏྭཱ གཏཏྟཱ སཱཡམཱསེ བྷགཝཏོ ཨནུསིཊྛིནིཡཱམེན གཱཐཾ ཨབྷཱསི. རཱཛཱ དསབལསྶ ཝཙནཾ སརིཏྭཱ བྷཏྟཔིཎྜཾ པཱཏིཡཾཡེཝ ཚཌྜེསི. རཉྙོ ཧཏྠེསུ དྷོཏེསུ པཱཏིཾ ཨཔནེཏྭཱ སིཏྠཱནི གཎེཏྭཱ པུནདིཝསེ ཏཏྟཀེ ཏཎྜུལེ ཧརིཾསུ, སོཔི མཱཎཝོ དིཝསེ དིཝསེ ཏཐཱགཏསྶ སནྟིཀཾ གཙྪཏི. དསབལསྶ ཝིསྶཱསིཀོ ཨཧོསི. ཨཐ ནཾ ཨེཀདིཝསཾ པུཙྪི ‘‘རཱཛཱ ཀིཏྟཀཾ བྷུཉྫཏཱི’’ཏི? སོ ‘‘ནཱལི༹ཀོདན’’ནྟི ཨཱཧ. ཝཊྚིསྶཏི ཨེཏྟཱཝཏཱ ¶ པུརིསབྷཱགོ ཨེས, ཨིཏོ པཊྛཱཡ གཱཐཾ མཱ ཝདཱིཏི. རཱཛཱ ཏཐེཝ སཎྛཱསི. ཏེན ཝུཏྟཾ ‘‘ནཱལི༹ཀོདནཔརམཏཱཡ སཎྛཱསཱི’’ཏི. རཏྟཉྙུཏཱཡ ཝཌྜྷིཏཾ སཱིལཾ ཨསྶ ཨཏྠཱིཏི ཝཌྜྷིཏསཱིལོ. ཨཔོཐུཛྫནིཀེཧི སཱིལེཧཱིཏི ཙཏུཔཱརིསུདྡྷིསཱིལེཧི སཱིལཾ ཨརིཡཾ སུདྡྷཾ. ཏེན ཝུཏྟཾ ‘‘ཨརིཡསཱིལོ’’ཏི. ཏདེཀཾ ཨནཝཛྫཊྛེན ཀུསལཾ. ཏེན ཝུཏྟཾ ‘‘ཀུསལསཱིལོ’’ཏི.

དུཏིཡཀོསལསུཏྟཝཎྞནཱ ནིཊྛིཏཱ.

མཧཱཝགྒཝཎྞནཱ ནིཊྛིཏཱ.

༤. ཨུཔཱལིཝགྒོ

༡. ཨུཔཱལིསུཏྟཝཎྞནཱ

༣༡. ཙཏུཏྠསྶ ¶ པཋམེ ཨཏྠཝསེཏི ཝུདྡྷིཝིསེསེ, སིཀྑཱཔདཔཉྙཏྟིཧེཏུ ཨདྷིགམནཱིཡེ ཧིཏཝིསེསེཏི ཨཏྠོ. ཨཏྠོཡེཝ ཝཱ ཨཏྠཝསོ, དས ཨཏྠེ དས ཀཱརཎཱནཱིཏི ཝུཏྟཾ ཧོཏི. ཨཐ ཝཱ ཨཏྠོ ཕལཾ ཏདདྷཱིནཝུཏྟིཏཱཡ ཝསོ ཨེཏསྶཱཏི ཨཏྠཝསོ, ཧེཏཱུཏི ཨེཝམྤེཏྠ ཨཏྠོ དཊྛབྦོ. ‘‘ཡེ མམ སོཏབྦཾ སདྡཧཱཏབྦཾ མཉྙིསྶནྟི, ཏེསཾ ཏཾ ཨསྶ དཱིགྷརཏྟཾ ཧིཏཱཡ སུཁཱཡཱ’’ཏི ཝུཏྟཏྟཱ ‘‘ཡོ ཙ ཏཐཱགཏསྶ ཝཙནཾ སམྤཊིཙྪཏི, ཏསྶ ཏཾ དཱིགྷརཏྟཾ ཧིཏཱཡ སུཁཱཡ སཾཝཏྟཏཱི’’ཏི ཝུཏྟཾ. ཨསམྤཊིཙྪནེ ཨཱདཱིནཝནྟི བྷདྡཱལིསུཏྟེ ཝིཡ ཨསམྤཊིཙྪནེ ཨཱདཱིནཝཾ དསྶེཏྭཱ. སུཁཝིཧཱརཱབྷཱཝེ སཧཛཱིཝམཱནསྶ ཨབྷཱཝཏོ སཧཛཱིཝིཏཱཔི སུཁཝིཧཱརོཝ ཝུཏྟོ. སུཁཝིཧཱརོ ནཱམ ཙཏུནྣཾ ཨིརིཡཱཔཐཝིཧཱརཱནཾ ཕཱསུཏཱ.

མངྐུཏནྟི ནིཏྟེཛཏཾ. དྷམྨེནཱཏིཨཱདཱིསུ དྷམྨོཏི བྷཱུཏཾ ཝཏྠུ. ཝིནཡོཏི ཙོདནཱ ཙེཝ སཱརཎཱ ཙ. སཏྠུསཱསནནྟི ཉཏྟིསམྤདཱ ཙེཝ ཨནུསྶཱཝནསམྤདཱ ཙ.

པིཡསཱིལཱནནྟི སིཀྑཱཀཱམཱནཾ. ཏེསཉྷི སཱིལཾ པིཡཾ ཧོཏི. ཏེནེཝཱཧ ‘‘སིཀྑཱཏྟཡཔཱརིཔཱུརིཡཱ གྷཊམཱནཱ’’ཏི. སནྡིདྡྷམནཱཏི སཾསཡཾ ཨཱཔཛྫམནཱ ¶ . ཨུབྦལ༹ྷཱ ཧོནྟཱིཏི པཱིལི༹ཏཱ ཧོནྟི. སངྒྷཀམྨཱནཱིཏི སཏིཔི ཨུཔོསཐཔཝཱརཎཱནཾ སངྒྷཀམྨབྷཱཝེ གོབལཱིབདྡཉཱཡེན ཨུཔོསཐཾ པཝཱརཎཉྩ ཋཔེཏྭཱ ཨུཔསམྤདཱདིསེསསངྒྷཀམྨཱནཾ གཧཎཾ ཝེདིཏབྦཾ. སམགྒཱནཾ བྷཱཝོ སཱམགྒཱི.

‘‘ནཱཧཾ, ཙུནྡ, དིཊྛདྷམྨིཀཱནཾཡེཝ ཨཱསཝཱནཾ སཾཝརཱཡ དྷམྨཾ དེསེམཱི’’ཏི (དཱི. ནི. ༣.༡༨༢) ཨེཏྠ ཝིཝཱདམཱུལབྷཱུཏཱ ཀིལེསཱ ཨཱསཝཱཏི ཨཱགཏཱ.

‘‘ཡེན དེཝཱུཔཔཏྱསྶ, གནྡྷབྦོ ཝཱ ཝིཧངྒམོ;

ཡཀྑཏྟཾ ཡེན གཙྪེཡྻཾ, མནུསྶཏྟཉྩ ཨབྦཛེ;

ཏེ མཡ྄ཧཾ ཨཱསཝཱ ཁཱིཎཱ, ཝིདྡྷསྟཱ ཝིནལཱི༹ཀཏཱ’’ཏི. (ཨ. ནི. ༤.༣༦) –

ཨེཏྠ ¶ ཏེབྷཱུམཀཾ ཀམྨཾ ཨཝསེསཱ ཙ ཨཀུསལཱ དྷམྨཱ. ཨིདྷ པན པརཱུཔཝཱདཝིཔྤཊིསཱརཝདྷབནྡྷཱདཡོ ཙེཝ ཨཔཱཡདུཀྑབྷཱུཏཱ ཙ ནཱནཔྤཀཱརཱ ཨུཔདྡཝཱ ཨཱསཝཱཏི ཨཱཧ ‘‘ཨསཾཝརེ ཋིཏེན ཏསྨིཾཡེཝ ཨཏྟབྷཱཝེ པཏྟབྦཱ’’ཏིཨཱདི. ཡདི ཧི བྷགཝཱ སིཀྑཱཔདཾ ན ཙ པཉྙཔེཡྻ, ཏཏོ ཨསདྡྷམྨཔྤཊིསེཝནཨདིནྣཱདཱནཔཱཎཱཏིཔཱཏཱདིཧེཏུ ཡེ ཨུཔྤཛྫེཡྻུཾ པརཱུཔཝཱདཱདཡོ དིཊྛདྷམྨིཀཱ ནཱནཔྤཀཱརཱ ཨནཏྠཱ, ཡེ ཙ ཏནྣིམིཏྟམེཝ ནིརཡཱདཱིསུ ནིབྦཏྟསྶ པཉྩཝིདྷབནྡྷནཀམྨཀཱརཎཱདིཝསེན མཧཱདུཀྑཱནུབྷཝནཔྤཀཱརཱ ཨནཏྠཱ, ཏེ སནྡྷཱཡ ཨིདཾ ཝུཏྟཾ ‘‘དིཊྛདྷམྨིཀཱནཾ ཨཱསཝཱནཾ སཾཝརཱཡ སམྤརཱཡིཀཱནཾ ཨཱསཝཱནཾ པཊིགྷཱཏཱཡཱ’’ཏི. དིཊྛདྷམྨོ ཝུཙྩཏི པཙྩཀྑོ ཨཏྟབྷཱཝོ, ཏཏྠ བྷཝཱ དིཊྛདྷམྨིཀཱ. ཏེན ཝུཏྟཾ ‘‘ཏསྨིཾཡེཝ ཨཏྟབྷཱཝེ པཏྟབྦཱ’’ཏི. སམྨུཁཱ གརཧནཾ ཨཀིཏྟི, པརམྨུཁཱ གརཧནཾ ཨཡསོ. ཨཐ ཝཱ སམྨུཁཱ པརམྨུཁཱ གརཧནཾ ཨཀིཏྟི, པརིཝཱརཧཱནི ཨཡསོཏི ཝེདིཏབྦཾ. ཨཱགམནམགྒཐཀནཱཡཱཏི ཨཱགམནདྭཱརཔིདཧནཏྠཱཡ. སམྤརེཏབྦཏོ པེཙྩ གནྟབྦཏོ སམྤརཱཡོ, པརལོཀོཏི ཨཱཧ ‘‘སམྤརཱཡེ ནརཀཱདཱིསཱུ’’ཏི.

མེཐུནཱདཱིནི རཛྫནཊྛཱནཱནི. པཱཎཱཏིཔཱཏཱདཱིནི དུསྶནཊྛཱནཱནི.

སཾཝརཝིནཡོཏི སཱིལསཾཝརོ, སཏིསཾཝརོ, ཉཱཎསཾཝརོ, ཁནྟིསཾཝརོ, ཝཱིརིཡསཾཝརོཏི པཉྩཝིདྷོ སཾཝརོ. ཡཐཱསཀཾ སཾཝརིཏབྦཱནཾ ཝིནེཏབྦཱནཉྩ ཀཱཡདུཙྩརིཏཱདཱིནཾ སཾཝརཎཏོ སཾཝརོ, ཝིནཡནཏོ ཝིནཡོཏི ཝུཙྩཏི ¶ . པཧཱནཝིནཡོཏི ཏདངྒཔྤཧཱནཾ ཝིཀྑམྦྷནཔྤཧཱནཾ, སམུཙྪེདཔྤཧཱནཾ, པཊིཔསྶདྡྷིཔྤཧཱནཾ, ནིསྶརཎཔྤཧཱནནྟི པཉྩཝིདྷཾ པཧཱནཾ ཡསྨཱ ཙཱགཊྛེན པཧཱནཾ, ཝིནཡཊྛེན ཝིནཡོ, ཏསྨཱ ‘‘པཧཱནཝིནཡོ’’ཏི ཝུཙྩཏི. སམཐཝིནཡོཏི སཏྟ ཨདྷིཀརཎསམཐཱ. པཉྙཏྟིཝིནཡོཏི སིཀྑཱཔདམེཝ. སིཀྑཱཔདཔཉྙཏྟིཡཱ ཧི ཝིཛྫམཱནཱཡ ཨེཝ སིཀྑཱཔདསམྦྷཝཏོ པཉྙཏྟིཝིནཡོཔི སིཀྑཱཔདཔཉྙཏྟིཡཱ ཨནུགྒཧིཏོ ཧོཏི. སེསམེཏྠ ཝུཏྟཏྠམེཝ.

ཨུཔཱལིསུཏྟཝཎྞནཱ ནིཊྛིཏཱ.

ཨུཔཱལིཝགྒཝཎྞནཱ ནིཊྛིཏཱ.

༥. ཨཀྐོསཝགྒོ

༡-༨. ཝིཝཱདསུཏྟཱདིཝཎྞནཱ

༤༡-༤༨. པཉྩམསྶ ¶ པཋམཱདཱིནི ཨུཏྟཱནཏྠཱནི. ཚཊྛེ ཁཎབྷངྒུརཏཱཡ ན ནིཙྩཱ ན དྷུཝཱཏི ཨནིཙྩཱ. ཏཏོ ཨེཝ པཎྜིཏེཧི ན ཨིཙྩཱ ན ཨུཔགནྟབྦཱཏིཔི ཨནིཙྩཱ. སྭཱཡཾ ནེསཾ ཨནིཙྩཊྛོ ཨུདཡཝཡཔརིཙྪིནྣཏཱཡ ཝེདིཏབྦོཏི ཨཱཧ ‘‘ཧུཏྭཱ ཨབྷཱཝིནོ’’ཏི, ཨུཔྤཛྫིཏྭཱ ཝིནསྶཀཱཏི ཨཏྠོ. སཱརརཧིཏཱཏི ནིཙྩསཱརདྷུཝསཱརཨཏྟསཱརཝིརཧིཏཱ. མུསཱཏི ཝིསཾཝཱདནཊྛེན མུསཱ, ཨེཀཾསེན ཨསུབྷཱདིསབྷཱཝཱ ཏེ བཱལཱནཾ སུབྷཱདིབྷཱཝེན ཨུཔཊྛཧནྟི, སུབྷཱདིགྒཧཎསྶ པཙྩཡབྷཱཝེན སཏྟེ ཝིསཾཝཱདེནྟི. ཏེནཱཧ ‘‘ནིཙྩསུབྷསུཁཱ ཝིཡཱ’’ཏིཨཱདི. ན པསྶནསབྷཱཝཱཏི ཁཎཔབྷངྒུརཏཱཨིཏྟརཔཙྩུཔཊྛཱནཏཱཡ དིསྶམཱནཱ ཝིཡ ཧུཏྭཱ ཨདསྶནཔཀཏིཀཱ. ཨེཏེ ཧི ཁེཏྟཾ ཝིཡ ཝཏྠུ ཝིཡ ཧིརཉྙསུཝཎྞཾ ཝིཡ ཙ པཉྙཱཡིཏྭཱཔི ཀཏིཔཱཧེནེཝ སུཔིནཀེ དིཊྛཱ ཝིཡ ན པཉྙཱཡནྟི. སཏྟམཊྛམཱནི སུཝིཉྙེཡྻཱནི.

ཝིཝཱདསུཏྟཱདིཝཎྞནཱ ནིཊྛིཏཱ.

༩-༡༠. སརཱིརཊྛདྷམྨསུཏྟཱདིཝཎྞནཱ

༤༩-༥༠. ནཝམེ ¶ པུནབྦྷཝདཱནཾ པུནབྦྷཝོ ཨུཏྟརཔདལོཔེན, པུནབྦྷཝོ སཱིལམསྶཱཏི པོནོབྷཝིཀོ, པུནབྦྷཝདཱཡཀོཏི ཨཏྠོ. ཏེནཱཧ ‘‘པུནབྦྷཝནིབྦཏྟཀོ’’ཏི. བྷཝསངྑརཎཀམྨནྟི པུནབྦྷཝནིབྦཏྟནཀཀམྨཾ. དསམེ ནཏྠི ཝཏྟབྦཾ.

སརཱིརཊྛདྷམྨསུཏྟཱདིཝཎྞནཱ ནིཊྛིཏཱ.

ཨཀྐོསཝགྒཝཎྞནཱ ནིཊྛིཏཱ.

པཋམཔཎྞཱསཀཾ ནིཊྛིཏཾ.

༢. དུཏིཡཔཎྞཱསཀཾ

(༦) ༡. སཙིཏྟཝགྒོ

༡-༡༠. སཙིཏྟསུཏྟཱདིཝཎྞནཱ

༥༡-༦༠. དུཏིཡསྶ ¶ ¶ པཋམཱདཱིནི ཨུཏྟཱནཏྠཱནི. དསམེ པིཏྟཾ སམུཊྛཱནམེཏེསནྟི པིཏྟསམུཊྛཱནཱ, པིཏྟཔཙྩཡཱཔིཏྟཧེཏུཀཱཏི ཨཏྠོ. སེམྷསམུཊྛཱནཱདཱིསུཔི ཨེསེཝ ནཡོ. སནྣིཔཱཏིཀཱཏི ཏིཎྞམྤི པིཏྟཱདཱིནཾ ཀོཔེན སམུཊྛིཏཱ. ཨུཏུཔརིཎཱམཛཱཏི ཝིསབྷཱགཨུཏུཏོ ཛཱཏཱ. ཛངྒལདེསཝཱསཱིནཉྷི ཨནཱུཔདེསེ ཝསནྟཱནཾ ཝིསབྷཱགོ ཙ ཨུཏུ ཨུཔྤཛྫཏི, ཨནཱུཔདེསཝཱསཱིནཉྩ ཛངྒལདེསེཏི ཨེཝཾ པརསམུདྡཏཱིརཱདིཝསེནཔི ཨུཏུཝིསབྷཱགཏཱ ཨུཔྤཛྫཏིཡེཝ. ཏཏོ ཛཱཏཱཏི ཨུཏུཔརིཎཱམཛཱ. ཨཏྟནོ པཀཏིཙརིཡཱནཾ ཝིསཡཱནཾ ཝིསམཾ ཀཱཡཔརིཧརཎཝསེན ཛཱཏཱ ཝིསམཔརིཧཱརཛཱ. ཏེནཱཧ ‘‘ཨཏིཙིརཊྛཱནནིསཛྫཱདིནཱ ཝིསམཔརིཧཱརེན ཛཱཏཱ’’ཏི. ཨཱདི-སདྡེན མཧཱབྷཱརཝཧནསུདྷཱཀོཊྚནཱདཱིནཾ སངྒཧོ. པརསྶ ཨུཔཀྐམཏོ ནིབྦཏྟཱ ཨོཔཀྐམིཀཱ. བཱཧིརཾ པཙྩཡཾ ཨནཔེཀྑིཏྭཱ ཀེཝལཾ ཀམྨཝིཔཱཀཏོཝ ཛཱཏཱ ཀམྨཝིཔཱཀཛཱ. ཏཏྠ པུརིམེཧི སཏྟཧི ཀཱརཎེཧི ཨུཔྤནྣཱ སཱརཱིརིཀཱ ཝེདནཱ སཀྐཱ པཊིབཱཧིཏུཾ, ཀམྨཝིཔཱཀཛཱནཾ པན སབྦབྷེསཛྫཱནིཔི སབྦཔརིཏྟཱནིཔི ནཱལཾ པཊིགྷཱཏཱཡ.

སཙིཏྟསུཏྟཱདིཝཎྞནཱ ནིཊྛིཏཱ.

སཙིཏྟཝགྒཝཎྞནཱ ནིཊྛིཏཱ.

(༧) ༢. ཡམཀཝགྒོ

༡-༧. ཨཝིཛྫཱསུཏྟཱདིཝཎྞནཱ

༦༡-༦༧. དུཏིཡསྶ ¶ པཋམཱདཱིནི ཨུཏྟཱནཏྠཱནི. སཏྟམེ ནལ༹ཀཔཱནཀེཏི ཨེཝཾནཱམཀེ ནིགམེ. པུབྦེ ཀིར (ཛཱ. ཨཊྛ. ༡.༡.༡༩ ཨཱདཡོ) ཨམྷཱཀཾ བོདྷིསཏྟོ ཀཔིཡོནིཡཾ ནིབྦཏྟོ ¶ མཧཱཀཱཡོ ཀཔིརཱཛཱ ཧུཏྭཱ ཨནེཀསཏཝཱནརསཧསྶཔརིཝུཏོ པབྦཏཔཱདེ ཝིཙརི, པཉྙཝཱ ཁོ པན ཧོཏི མཧཱཔཉྙོ. སོ པརིསཾ ཨེཝཾ ཨོཝདཏི, ‘‘ཏཱཏཱ, ཨིམསྨིཾ པབྦཏཔཱདེ ཝིསཕལཱནི ཧོནྟི, ཨམནུསྶཔརིགྒཧིཏཱ པོཀྑརཎིཀཱ ནཱམ ཧོནྟི, ཏུམྷེ པུབྦེ ཁཱདིཏཔུབྦཱནེཝ ཕལཱནི ཁཱདཐ, པཱིཏཔུབྦཱནེཝ པཱནཱིཡཱནི པིཝཐ, ཨེཏྠ ཝོ པཊིཔུཙྪིཏཀིཙྩཾ ནཏྠཱི’’ཏི. ཏེ ཨཔཱིཏཔུབྦཾ དིསྭཱ སཧསཱཝ ཨཔིཝིཏྭཱ སམནྟཱ པརིདྷཱཝིཏྭཱ མཧཱསཏྟསྶ ཨཱགམནཾ ཨོལོཀཡམཱནཱ ནིསཱིདིཾསུ. མཧཱསཏྟོ ཨཱགནྟྭཱ ‘‘ཀིཾ, ཏཱཏཱ, པཱནཱིཡཾ ན པིཝཐཱ’’ཏི ཨཱཧ. ཏུམྷཱཀཾ ཨཱགམནཾ ཨོལོཀེམཱཏི. ‘‘སཱདྷུ, ཏཱཏཱ’’ཏི སམནྟཱ པདཾ པརིཡེསམཱནོ ཨོཏིཎྞཔདཾཡེཝ ཨདྡས, ན ཨུཏྟིཎྞཔདཾ. ཨདིསྭཱ ‘‘སཔརིསྶཡཱ’’ཏི ཨཉྙཱསི. ཏཱཝདེཝ ཙ ཏཏྠ ཨབྷིནིབྦཏྟཨམནུསྶོ ཨུདཀཾ དྭེདྷཱ ཀཏྭཱ ཨུཊྛཱསི – སེཏམུཁོ, ནཱིལཀུཙྪི, རཏྟཧཏྠཔཱདོ, མཧཱདཱཋིཀོ, ཝནྟདཱཋོ, ཝིརཱུཔོ, བཱིབྷཙྪོ, ཨུདཀརཀྑསོ. སོ ཨེཝམཱཧ – ‘‘ཀསྨཱ པཱནཱིཡཾ ན པིཝཐ, མདྷུརཾ ཨུདཀཾ པིཝཐ, ཀིཾ ཏུམྷེ ཨེཏསྶ ཝཙནཾ སུཎཱཐཱ’’ཏི. མཧཱསཏྟོ ཨཱཧ ‘‘ཏྭཾ ཨདྷིཝཏྠོ ཨམནུསྶོ’’ཏི? ཨཱམཱཧནྟི. ‘‘ཏྭཾ ཨིདྷ ཨོཏིཎྞེ ལབྷསཱི’’ཏི ཨཱཧ. ཨཱམ, ཏུམྷེ པན སབྦེ ཁཱདིསྶཱམཱིཏི. ན སཀྑིསྶསི ཡཀྑཱཏི. པཱནཱིཡཾ པན པིཝིསྶཐཱཏི. ཨཱམ, པིཝིསྶཱམཱཏི. ཨེཝཾ སནྟེ ཨེཀམྤི ཝཱནརཾ ན མུཉྩིསྶནྟི. ‘‘པཱནཱིཡཉྩ པིཝིསྶཱམ, ན ཙ ཏེ ཝསཾ གམིསྶཱམཱ’’ཏི ནལ༹ཾ ཨཱཧརཱཔེཏྭཱ ཀོཊིཡཾ གཧེཏྭཱ དྷམི. སབྦོ ཨེཀཙྪིདྡོ ཨཧོསི. ཏཱིརེ ནིསཱིདིཏྭཱཝ པཱནཱིཡཾ པིཝི. སེསཝཱནརཱནམྤི པཱཊིཡེཀྐཾ ནལ༹ཾ ཨཱཧརཱཔེཏྭཱ དྷམིཏྭཱ ཨདཱསི. སབྦེ ཏེ པསྶནྟསྶེཝ པཱནཱིཡཾ པིཝིཾསུ. ཝུཏྟམྤི ཙེཏཾ –

‘‘དིསྭཱ པདམནུཏྟིཎྞཾ, དིསྭཱནོཏརིཏཾ པདཾ;

ནལེ༹ན ཝཱརིཾ པིསྶཱམ, ནེཝ མཾ ཏྭཾ ཝདྷིསྶསཱི’’ཏི. (ཛཱ. ༡.༡.༢༠);

ཏཏོ ¶ པཊྛཱཡ ཡཱཝ ཨཛྫདིཝསཱ ཏསྨིཾ ཋཱནེ ནལཱ༹ ཨེཀཙྪིདྡཱཝ ཧོནྟི. ཨིམསྨིཉྷི ཀཔྤེ ཀཔྤཊྛིཡཔཱཊིཧཱརིཡཱནི ནཱམ ཙནྡེ སསལཀྑཎཾ (ཛཱ. ༡.༤.༦༡ ཨཱདཡོ), ཝཊྚཛཱཏཀེ (ཛཱ. ༡.༡.༣༥) སཙྩཀིརིཡཊྛཱནེ ཨགྒིཛཱལསྶ ཨཱགམནུཔཙྪེདོ, གྷཊཱིཀཱརསྶ མཱཏཱཔིཏཱུནཾ ཝསནཊྛཱནེ ཨནོཝསྶནཾ (མ. ནི. ༢.༢༩༡), པོཀྑརཎིཡཱ ཏཱིརེ ནལཱ༹ནཾ ཨེཀཙྪིདྡབྷཱཝོཏི. ཨིཏི སཱ པོཀྑརཎཱི ནལེ༹ན པཱནཱིཡསྶ པིཝིཏཏྟཱ ‘‘ནལ༹ཀཔཱནཀཱ’’ཏི ནཱམཾ ལབྷི. ཨཔརབྷཱགེ ཏཾ པོཀྑརཎིཾ ནིསྶཱཡ ¶ ནིགམོ པཏིཊྛཱསི, ཏསྶཔི ‘‘ནལ༹ཀཔཱན’’ནྟྭེཝ ནཱམཾ ཛཱཏཾ. ཏཾ པན སནྡྷཱཡ ཝུཏྟཾ ‘‘ནལ༹ཀཔཱནེ’’ཏི. པལཱསཝནེཏི ཀིཾསུཀཝནེ.

ཏུཎྷཱིབྷཱུཏཾ ཏུཎྷཱིབྷཱུཏནྟི བྱཱཔནིཙྪཱཡཾ ཨིདཾ ཨཱམེཌིཏཝཙནནྟི དསྶེཏུཾ ‘‘ཡཾ ཡཾ དིས’’ནྟིཨཱདི ཝུཏྟཾ. ཨནུཝིལོཀེཏྭཱཏི ཨེཏྠ ཨནུ-སདྡོ ‘‘པརཱི’’ཏི ཨིམིནཱ སམཱནཏྠོཏི ཨཱཧ ‘‘ཏཏོ ཏཏོ ཝིལོཀེཏྭཱ’’ཏི. ཀསྨཱ ཨཱགིལཱཡཏི ཀོཊིསཧསྶཧཏྠིནཱགཱནཾ བལཾ དྷཱརེནྟསྶཱཏི ཙོདཀསྶ ཨདྷིཔྤཱཡོ. ཨཱཙརིཡོ པནསྶ ‘‘ཨེས སངྑཱརཱནཾ སབྷཱཝོ, ཡདིདཾ ཨནིཙྩཏཱ. ཡེ པན ཨནིཙྩཱ, ཏེ ཨེཀནྟེནེཝ ཨུདཡཝཡཔྤཊིཔཱིལི༹ཏཏཱཡ དུཀྑཱ ཨེཝ. དུཀྑསབྷཱཝེསུ ཏེསུ སཏྠུཀཱཡེ དུཀྑུཔྤཏྟིཡཱ ཨཡཾ པཙྩཡོ’’ཏི དསྶེཏུཾ ‘‘བྷགཝཏོ’’ཏིཨཱདི ཝུཏྟཾ. པིཊྛིཝཱཏོ ཨུཔྤཛྫི, སོ ཙ ཁོ པུབྦེཀཏཀམྨཔཙྩཡཱ. ཨེཏྠཱཧ ‘‘ཀིཾ པན ཏཾ ཀམྨཾ, ཡེན ཨཔརིམཱཎཀཱལཾ སཀྐཙྩཾ ཨུཔཙིཏཝིཔུལཔུཉྙསམྦྷཱརོ སཏྠཱ ཨེཝརཱུཔཾ དུཀྑཝིཔཱཀམནུབྷཝཏཱི’’ཏི? ཝུཙྩཏེ – ཨཡམེཝ བྷགཝཱ བོདྷིསཏྟབྷཱུཏོ ཨཏཱིཏཛཱཏིཡཾ མལླཔུཏྟོ ཧུཏྭཱ པཱཔཛནསེཝཱི ཨཡོནིསོམནསིཀཱརབཧུལོ ཙརཏི. སོ ཨེཀདིཝསཾ ནིབྦུདྡྷེ ཝཏྟམཱནེ ཨེཀཾ མལླཔུཏྟཾ གཧེཏྭཱ གཱལ༹ྷཏརཾ ནིཔྤཱིལེ༹སི. ཏེན ཀམྨེན ཨིདཱནི བུདྡྷོ ཧུཏྭཱཔི དུཀྑམནུབྷཝི. ཡཐཱ ཙེཏཾ, ཨེཝཾ ཙིཉྩམཱཎཝིཀཱདཱིནམིཏྠཱིནཾ ཡཱནི བྷགཝཏོ ཨབྦྷཀྑཱནཱདཱིནི དུཀྑཱནི, སབྦཱནི པུབྦེཀཏསྶ ཝིཔཱཀཱཝསེསཱནི, ཡཱནི ཀམྨཔིལོཏིཀཱནཱིཏི ཝུཙྩནྟི. ཝུཏྟཉྷེཏཾ ཨཔདཱནེ (ཨཔ. ཐེར ༡.༣༩.༦༤-༩༦) –

‘‘ཨནོཏཏྟསརཱསནྣེ, རམཎཱིཡེ སིལཱཏལེ;

ནཱནཱརཏནཔཛྫོཏེ, ནཱནཱགནྡྷཝནནྟརེ.

‘‘མཧཏཱ བྷིཀྑུསངྒྷེན, པརེཏོ ལོཀནཱཡཀོ;

ཨཱསཱིནོ བྱཱཀརཱི ཏཏྠ, པུབྦཀམྨཱནི ཨཏྟནོ.

‘‘སུཎཱཐ ¶ བྷིཀྑཝོ མཡ྄ཧཾ, ཡཾ ཀམྨཾ པཀཏཾ མཡཱ;

པིལོཏིཀསྶ ཀམྨསྶ, བུདྡྷཏྟེཔི ཝིཔཙྩཏི.

༡.

‘‘མུནཱལི༹ ནཱམཧཾ དྷུཏྟོ, པུབྦེ ཨཉྙཱསུ ཛཱཏིསུ;

པཙྩེཀབུདྡྷཾ སུརབྷིཾ, ཨབྦྷཱཙིཀྑིཾ ཨདཱུསཀཾ.

‘‘ཏེན ¶ ཀམྨཝིཔཱཀེན, ནིརཡེ སཾསརིཾ ཙིརཾ;

བཧཱུ ཝསྶསཧསྶཱནི, དུཀྑཾ ཝེདེསི ཝེདནཾ.

‘‘ཏེན ཀམྨཱཝསེསེན, ཨིདྷ པཙྪིམཀེ བྷཝེ;

ཨབྦྷཀྑཱནཾ མཡཱ ལདྡྷཾ, སུནྡརིཀཱཡ ཀཱརཎཱ.

༢.

‘‘སབྦཱབྷིབྷུསྶ བུདྡྷསྶ, ནནྡོ ནཱམཱསི སཱཝཀོ;

ཏཾ ཨབྦྷཀྑཱཡ ནིརཡེ, ཙིརཾ སཾསརིཏཾ མཡཱ.

‘‘དས ཝསྶསཧསྶཱནི, ནིརཡེ སཾསརིཾ ཙིརཾ;

མནུསྶབྷཱཝཾ ལདྡྷཱཧཾ, ཨབྦྷཀྑཱནཾ བཧུཾ ལབྷིཾ.

‘‘ཏེན ཀམྨཱཝསེསེན, ཙིཉྩམཱཎཝིཀཱ མམཾ;

ཨབྦྷཱཙིཀྑི ཨབྷཱུཏེན, ཛནཀཱཡསྶ ཨགྒཏོ.

༣.

‘‘བྲཱཧྨཎོ སུཏཝཱ ཨཱསིཾ, ཨཧཾ སཀྐཏཔཱུཛིཏོ;

མཧཱཝནེ པཉྩསཏེ, མནྟེ ཝཱཙེསི མཱཎཝེ.

‘‘ཏཏྠཱགཏོ ཨིསི བྷཱིམོ, པཉྩཱབྷིཉྙོ མཧིདྡྷིཀོ;

ཏཉྩཱཧཾ ཨཱགཏཾ དིསྭཱ, ཨབྦྷཱཙིཀྑིཾ ཨདཱུསཀཾ.

‘‘ཏཏོཧཾ ཨཝཙཾ སིསྶེ, ཀཱམབྷོགཱི ཨཡཾ ཨིསི;

མཡ྄ཧམྤི བྷཱསམཱནསྶ, ཨནུམོདིཾསུ མཱཎཝཱ.

‘‘ཏཏོ ¶ མཱཎཝཀཱ སབྦེ, བྷིཀྑམཱནཾ ཀུལེ ཀུལེ;

མཧཱཛནསྶ ཨཱཧཾསུ, ཀཱམབྷོགཱི ཨཡཾ ཨིསི.

‘‘ཏེན ཀམྨཝིཔཱཀེན, པཉྩ བྷིཀྑུསཏཱ ཨིམེ;

ཨབྦྷཀྑཱནཾ ལབྷུཾ སབྦེ, སུནྡརིཀཱཡ ཀཱརཎཱ.

༤.

‘‘ཝེམཱཏུབྷཱཏརཾ པུབྦེ, དྷནཧེཏུ ཧནིཾ ཨཧཾ;

པཀྑིཔིཾ གིརིདུགྒསྨིཾ, སིལཱཡ ཙ ཨཔིཾསཡིཾ.

‘‘ཏེན ཀམྨཝིཔཱཀེན, དེཝདཏྟོ སིལཾ ཁིཔི;

ཨངྒུཊྛཾ པིཾསཡཱི པཱདེ, མམ པཱསཱཎསཀྑརཱ.

༥.

‘‘པུརེཧཾ དཱརཀོ ཧུཏྭཱ, ཀཱིལ༹མཱནོ མཧཱཔཐེ;

པཙྩེཀབུདྡྷཾ དིསྭཱན, མགྒེ སཀལིཀཾ ཁིཔིཾ.

‘‘ཏེན ¶ ཀམྨཝིཔཱཀེན, ཨིདྷ པཙྪིམཀེ བྷཝེ;

ཝདྷཏྠཾ མཾ དེཝདཏྟོ, ཨབྷིམཱརེ པཡོཛཡི.

༦.

‘‘ཧཏྠཱརོཧོ པུརེ ཨཱསིཾ, པཙྩེཀམུནིམུཏྟམཾ;

པིཎྜཱཡ ཝིཙརནྟཾ ཏཾ, ཨཱསཱདེསིཾ གཛེནཧཾ.

‘‘ཏེན ཀམྨཝིཔཱཀེན, བྷནྟོ ནཱལཱ༹གིརཱི གཛོ;

གིརིབྦཛེ པུརཝརེ, དཱརུཎོ སམུཔཱགམི.

༧.

‘‘རཱཛཱཧཾ པཏྠིཝོ ཨཱསིཾ, སཏྟིཡཱ པུརིསཾ ཧནིཾ;

ཏེན ཀམྨཝིཔཱཀེན, ནིརཡེ པཙྩིསཾ བྷུསཾ.

‘‘ཀམྨུནོ ཏསྶ སེསེན, ཨིདཱནི སཀལཾ མམ;

པཱདེ ཚཝིཾ པཀཔྤེསི, ན ཧི ཀམྨཾ ཝིནསྶཏི.

༨.

‘‘ཨཧཾ ¶ ཀེཝཊྚགཱམསྨིཾ, ཨཧུཾ ཀེཝཊྚདཱརཀོ;

མཙྪཀེ གྷཱཏིཏེ དིསྭཱ, ཛནཡིཾ སོམནསྶཀཾ.

‘‘ཏེན ཀམྨཝིཔཱཀེན, སཱིསདུཀྑཾ ཨཧཱུ མམ;

སབྦེ སཀྐཱ ཙ ཧཉྙིཾསུ, ཡདཱ ཧནི ཝིཊཊཱུབྷོ.

༩.

‘‘ཕུསྶསྶཱཧཾ པཱཝཙནེ, སཱཝཀེ པརིབྷཱསཡིཾ;

ཡཝཾ ཁཱདཐ བྷུཉྫཐ, མཱ ཙ བྷུཉྫཐ སཱལཡོ.

‘‘ཏེན ཀམྨཝིཔཱཀེན, ཏེམཱསཾ ཁཱདིཏཾ ཡཝཾ;

ནིམནྟིཏོ བྲཱཧྨཎེན, ཝེརཉྫཱཡཾ ཝསིཾ ཏདཱ.

༡༠.

‘‘ནིབྦུདྡྷེ ཝཏྟམཱནམྷི, མལླཔུཏྟཾ ནིཧེཋཡིཾ;

ཏེན ཀམྨཝིཔཱཀེན, པིཊྛིདུཀྑཾ ཨཧཱུ མམ.

༡༡.

‘‘ཏིཀིཙྪཀོ ཨཧཾ ཨཱསིཾ, སེཊྛིཔུཏྟཾ ཝིརེཙཡིཾ;

ཏེན ཀམྨཝིཔཱཀེན, ཧོཏི པཀྑནྡིཀཱ མམ.

༡༢.

‘‘ཨཝཙཱཧཾ ཛོཏིཔཱལོ, སུགཏཾ ཀསྶཔཾ ཏདཱ;

ཀུཏོ ནུ བོདྷི མུཎྜསྶ, བོདྷི པརམདུལླབྷཱ.

‘‘ཏེན ཀམྨཝིཔཱཀེན, ཨཙརིཾ དུཀྐརཾ བཧུཾ;

ཚབྦསྶཱནུརུཝེལཱཡཾ, ཏཏོ བོདྷིམཔཱཔུཎིཾ.

‘‘ནཱཧཾ ¶ ཨེཏེན མགྒེན, པཱཔུཎིཾ བོདྷིམུཏྟམཾ;

ཀུམྨགྒེན གཝེསིསྶཾ, པུབྦཀམྨེན ཝཱརིཏོ.

‘‘པུཉྙཔཱཔཔརིཀྑཱིཎོ, སབྦསནྟཱཔཝཛྫིཏོ;

ཨསོཀོ ཨནུཔཱཡཱསོ, ནིབྦཱཡིསྶམནཱསཝོ.

‘‘ཨེཝཾ ¶ ཛིནོ ཝིཡཱཀཱསི, བྷིཀྑུསངྒྷསྶ ཨགྒཏོ;

སབྦཱབྷིཉྙཱབལཔྤཏྟོ, ཨནོཏཏྟེ མཧཱསརེ’’ཏི. (ཨཔ. ཐེར ༡.༣༩.༦༤-༩༦);

ཨཝིཛྫཱསུཏྟཱདིཝཎྞནཱ ནིཊྛིཏཱ.

༩-༡༠. པཋམཀཐཱཝཏྠུསུཏྟཱདིཝཎྞནཱ

༦༩-༧༠. ནཝམེ (དཱི. ནི. ཊཱི. ༡.༡༧; དཱི. ནི. ཨབྷི. ཊཱི. ༡.༡༧; སཾ. ནི. ཊཱི. ༢.༥.༡༠༨༠) དུགྒཏིཏོ སཾསཱརཏོ ཙ ནིཡྻཱཏི ཨེཏེནཱཏི ནིཡྻཱནཾ, སགྒམགྒོ, མོཀྑམགྒོ ཙ. ཏཾ ནིཡྻཱནཾ ཨརཧཏི, ནིཡྻཱནེ ཝཱ ནིཡུཏྟཱ, ནིཡྻཱནཾ ཝཱ ཕལབྷཱུཏཾ ཨེཏིསྶཱ ཨཏྠཱིཏི ནིཡྻཱནིཀཱ. ཝཙཱིདུཙྩརིཏསཾཀིལེསཏོ ནིཡྻཱཏཱིཏི ཝཱ ཨཱིཀཱརསྶ རསྶཏྟཾ, ཡཀཱརསྶ ཙ ཀཀཱརཾ ཀཏྭཱ ནིཡྻཱནིཀཱ, ཙེཏནཱཡ སདྡྷིཾ སམྥཔྤལཱཔཱ ཝེརམཎི. ཏཔྤཊིཔཀྑཏོ ཨནིཡྻཱནིཀཱ, ཏསྶཱ བྷཱཝོ ཨནིཡྻཱནིཀཏྟཾ, ཏསྨཱ ཨནིཡྻཱནིཀཏྟཱ. ཏིརཙྪཱནབྷཱུཏནྟི ཏིརོཀརཎབྷཱུཏཾ. གེཧསྶིཏཀཐཱཏི གེཧཔྤཊིསཾཡུཏྟཱ. ཀམྨཊྛཱནབྷཱཝེཏི ཨནིཙྩཏཱཔཊིསཾཡུཏྟཙཏུསཙྩཀམྨཊྛཱནབྷཱཝེ.

སཧ ཨཏྠེནཱཏི སཱཏྠཀཾ, ཧིཏཔྤཊིསཾཡུཏྟནྟི ཨཏྠོ. ‘‘སུརཱཀཐཱ’’ཏིཔི པཱཋོཏི ཨཱཧ ‘‘སུརཱཀཐནྟི པཱལི༹ཡཾ པནཱ’’ཏི. སཱ པནེསཱ ཀཐཱ ‘‘ཨེཝརཱུཔཱ ནཝསུརཱ པཱིཏཱ རཏིཛནནཱི ཧོཏཱི’’ཏི ཨསྶཱདཝསེན ན ཝཊྚཏི, ཨཱདཱིནཝཝསེན པན ‘‘ཨུམྨཏྟཀསཾཝཏྟནིཀཱ’’ཏིཨཱདིནཱ ནཡེན ཝཊྚཏི. ཏེནཱཧ ‘‘ཨནེཀཝིདྷཾ…པེ… ཨཱདཱིནཝཝསེན ཝཊྚཏཱི’’ཏི. ཝིསིཁཱཏི གྷརསནྣིཝེསོ. ཝིསིཁཱགཧཎེན ཙ ཏནྣིཝཱསིནོ གཧིཏཱ ‘‘གཱམོ ཨཱགཏོ’’ཏིཨཱདཱིསུ ཝིཡ. ཏེནེཝཱཧ ‘‘སཱུརཱ སམཏྠཱ’’ཏི ཙ ‘‘སདྡྷཱ པསནྣཱ’’ཏི ཙ. ཀུམྦྷཊྛཱནཔྤདེསེན ཀུམྦྷདཱསིཡོ ཝུཏྟཱཏི ཨཱཧ ‘‘ཀུམྦྷདཱསིཀཐཱ ཝཱ’’ཏི.

རཱཛཀཐཱདིཔུརིམཀཐཱཡ ¶ , ལོཀཀྑཱཡིཀཱདིཔཙྪིམཀཐཱཡ ཝཱ ཝིནིམུཏྟཱ པུརིམཔཙྪིམཀཐཱ ཝིམུཏྟཱ. ཨུཔྤཏྟིཋིཏིསཾཧཱརཱདིཝསེན ལོཀཾ ཨཀྑཱཡཏཱིཏི ལོཀཀྑཱཡིཀཱ. ཨསུཀེན ནཱམཱཏི པཛཱཔཏིནཱ བྲཧྨུནཱ, ཨིསྶརེན ཝཱ. ཝིཏཎྜསལླཱཔཀཐཱཏི ‘‘ཨཊྛཱིནཾ སེཏཏྟཱ སེཏོཏི ན ཝཏྟབྦོ, པཏྟཱནཾ ཀཱལ༹ཏྟཱ ཀཱལོ༹ཏི པན ཝཏྟབྦོ’’ཏི ཨེཝམཱདིཀཱ. ཨཱདི-སདྡེན ‘‘སེལཔུཔྥལཀཱནི ཝིཡ ཛཱིཝིདཱཝིརཔཱརཡཏྟིཝིསཱལཱ ནཏྠི, ཡཾ ཡོ ཀོཙི ཏིརིཡཱམཱནཱ ཀཏཏྟཱ’’ཏི ¶ ཨེཝམཱདཱིནཾ སངྒཧོ དཊྛབྦོ. སཱགརདེཝེནཱཏི སཱགརཔུཏྟརཱཛཱུཧི. ཁཏོཏི ཨེཏཾ ཨེཀཝཙནཾ ཏེཧི པཙྩེཀཾ ཁཏཏྟཱ ‘‘སཱགརདེཝེན ཁཏཏྟཱ’’ཏི ཝུཏྟཾ. སཧམུདྡཱ སམུདྡོཏི ཝུཏྟོ. བྷཝཏི ཝདྡྷཏི ཨེཏེནཱཏི བྷཝོ. བྷཝཱབྷཝཱ ཧོནྟཱིཏི ཨིཏིབྷཝཱབྷཝཀཐཱ. ཨེཏྠ ཙ བྷཝོཏི སསྶཏཾ, ཨབྷཝོཏི ཨུཙྪེདཾ. བྷཝོཏི ཝུདྡྷི, ཨབྷཝོཏི ཧཱནི. བྷཝོཏི ཀཱམསུཁཾ, ཨབྷཝོཏི ཨཏྟཀིལམཐོཏི ཨིཏི ཨིམཱཡ ཚབྦིདྷཱཡ ཨིཏིབྷཝཱབྷཝཀཐཱཡ སདྡྷིཾ བཱཏྟིཾས ཏིརཙྪཱནཀཐཱ ནཱམ ཧོནྟི. ཨཐ ཝཱ པཱལི༹ཡཾ སརཱུཔཏོ ཨནཱགཏཱཔི ཨརཉྙཔབྦཏནདཱིདཱིཔཀཐཱ ཨིཏིསདྡེན སངྒཎྷིཏྭཱ བཱཏྟིཾས ཏིརཙྪཱནཀཐཱ ཝུཏྟཱ. དསམེ ནཏྠི ཝཏྟབྦཾ.

པཋམཀཐཱཝཏྠུསུཏྟཱདིཝཎྞནཱ ནིཊྛིཏཱ.

ཡམཀཝགྒཝཎྞནཱ ནིཊྛིཏཱ.

(༨) ༣. ཨཱཀངྑཝགྒོ

༡-༤. ཨཱཀངྑསུཏྟཱདིཝཎྞནཱ

༧༡-༧༤. ཏཏིཡསྶ པཋམེ སཱིལསྶ ཨནཝསེསསམཱདཱནེན ཨཁཎྜཱདིབྷཱཝཱཔཏྟིཡཱ ཙ པརིཔུཎྞསཱིལཱ. སམཱདཱནཏོ པཊྛཱཡ ཨཝིཙྪིནྡནཏོ སཱིལསམངྒིནོ. ཨེཏྟཱཝཏཱ ཀིརཱཏི (ཨ. ནི. ༢.༣༧) ཀིར-སདྡོ ཨརུཙིསཱུཙནཏྠོ. ཏེནེཏྠ ཨཱཙརིཡཝཱདསྶ ཨཏྟནོ ཨརུཙྩནབྷཱཝཾ དཱིཔེཏི. སམྤནྣསཱིལཱཏི ཨནཱམཊྛཝིསེསཾ སཱམཉྙཏོ སཱིལསངྑེཔེན གཧིཏཾ. ཏཉྩ ཙཏུབྦིདྷནྟི ཨཱཙརིཡཏྠེརོ ‘‘ཙཏུཔཱརིསུདྡྷིསཱིལཾ ཨུདྡིསིཏྭཱ’’ཏི ཨཱཧ. ཏཏྠཱཏི ¶ ཙཏུཔཱརིསུདྡྷིསཱིལེ. ཛེཊྛཀསཱིལནྟི (སཾ. ནི. ༥.༤༡༢) པདྷཱནསཱིལཾ. ཨུབྷཡཏྠཱཏི ཨུདྡེསནིདྡེསེ. ཨིདྷ ནིདྡེསེ ཝིཡ ཨུདྡེསེཔི པཱཏིམོཀྑསཾཝརོ བྷགཝཏཱ ཝུཏྟོ ‘‘སམྤནྣསཱིལཱ’’ཏི ཝུཏྟཏྟཱཏི ཨདྷིཔྤཱཡོ. སཱིལགྒཧཎཉྷི པཱལི༹ཡཾ པཱཏིམོཀྑསཾཝརཝསེན ཨཱགཏཾ. ཏེནཱཧ ‘‘པཱཏིམོཀྑསཾཝརོཡེཝཱ’’ཏིཨཱདི. ཏཏྠ ཨཝདྷཱརཎེན ཨིཏརེསཾ ཏིཎྞཾ ཨེཀདེསེན པཱཏིམོཀྑནྟོགདྷཏཾ དཱིཔེཏི. ཏཐཱ ཧི ཨནོལོཀིཡོལོཀནེ ཨཱཛཱིཝཧེཏུ ཚསིཀྑཱཔདཝཱིཏིཀྐམེ གིལཱནཔཙྩཡསྶ ཨཔཙྩཝེཀྑིཏཔརིབྷོགེ ཙ ཨཱཔཏྟི ཝིཧིཏཱཏི. ཏཱིཎཱིཏི ཨིནྡྲིཡསཾཝརསཱིལཱདཱིནི. སཱིལནྟི ཝུཏྟཊྛཱནཾ ནཱམ ཨཏྠཱིཏི སཱིལཔརིཡཱཡེན ཏེསཾ ཀཏྠཙི སུཏྟེ གཧིཏཊྛཱནཾ ནཱམ ཀིཾ ཨཏྠི ཡཐཱ པཱཏིམོཀྑསཾཝརོཏི ¶ ཨཱཙརིཡསྶ སམྨུཁཏྟཱ ཨཔྤཊིཀྑིཔནྟོཝ ཨུཔཙཱརེན པུཙྪནྟོ ཝིཡ ཝདཏི. ཏེནཱཧ ‘‘ཨནནུཛཱནནྟོ’’ཏི. ཚདྭཱརརཀྑཱམཏྟཀམེཝཱཏི ཏསྶ སལླཧུཀབྷཱཝམཱཧ ཙིཏྟཱདྷིཊྛཱནམཏྟེན པཊིཔཱཀཏིཀབྷཱཝཱཔཏྟིཏོ. ཨིཏརེསུཔི ཨེསེཝ ནཡོ. པཙྩཡུཔྤཏྟིམཏྟཀནྟི ཕལེན ཧེཏུཾ དསྶེཏི. ཨུཔྤཱདནཧེཏུཀཱ ཧི པཙྩཡཱནཾ ཨུཔྤཏྟི. ཨིདམཏྠནྟི ཨིདཾ པཡོཛནཾ ཨིམསྶ པཙྩཡསྶ པརིབྷུཉྫནེཏི ཨདྷིཔྤཱཡོ. ནིཔྤརིཡཱཡེནཱཏི ཨིམིནཱ ཨིནྡྲིཡསཾཝརཱདཱིནི ཏཱིཎི པདྷཱནསྶ སཱིལསྶ པརིཝཱརཝསེན པཝཏྟིཡཱ པརིཡཱཡསཱིལཱནི ནཱམཱཏི དསྶེཏི.

ཨིདཱནི པཱཏིམོཀྑསཾཝརསྶེཝ པདྷཱནབྷཱཝཾ བྱཏིརེཀཏོ ཨནྭཡཏོ ཙ ཨུཔམཱཡ ཝིབྷཱཝེཏུཾ ‘‘ཡསྶཱ’’ཏིཨཱདིམཱཧ. ཏཏྠ སོཏི པཱཏིམོཀྑསཾཝརོ. སེསཱནཱིཏི ཨིནྡྲིཡསཾཝརཱདཱིནི. ཏསྶེ ཝཱཏི ‘‘སམྤནྣསཱིལཱ’’ཏི ཨེཏྠ ཡཾ སཱིལཾ ཝུཏྟཾ, ཏསྶེཝ. སམྤནྣཔཱཏིམོཀྑཱཏི ཨེཏྠ པཱཏིམོཀྑགྒཧཎེན ཝེཝཙནཾ ཝཏྭཱ ཏཾ ཝིཏྠཱརེཏྭཱ…པེ… ཨཱདིམཱཧ. ཡཐཱ ཨཉྙཏྠཱཔི ‘‘ཨིདྷ བྷིཀྑུ སཱིལཝཱ ཧོཏཱི’’ཏི པུགྒལཱདྷིཊྛཱནཱཡ དེསནཱཡ ཨུདྡིཊྛཾ སཱིལཾ ‘‘པཱཏིམོཀྑསཾཝརསཾཝུཏོ ཝིཧརཏཱི’’ཏི (ཝིབྷ. ༥༠༨) ནིདྡིཊྛཾ. ཀསྨཱ ཨཱརདྡྷནྟི དེསནཱཡ ཀཱརཎཔུཙྪཱ. སཱིལཱནིསཾསདསྶནཏྠནྟི པཡོཛནནིདྡེསོ. ‘‘སཱིལཱནིསཾསདསྶནཏྠ’’ནྟི ཧི ཨེཏྠ བྱཏིརེཀཏོ ཡཾ སཱིལཱནིསཾསསྶ ཨདསྶནཾ, ཏཾ ཨིམིསྶཱ དེསནཱཡ ཀཱརཎནྟི ཀསྨཱ ཨཱརདྡྷནྟི? ཝེནེཡྻཱནཾ སཱིལཱནིསཾསསྶ ཨདསྶནཏོཏི ཨཏྠཏོ ཨཱཔནྣོ ¶ ཨེཝ ཧོཏི. ཏེནཱཧ ‘‘སཙེཔཱི’’ཏིཨཱདི. སཱིལཱནིསཾསདསྶནཏྠནྟི པན ཨིམསྶ ཨཏྠཾ ཝིཝརིཏུཾ ‘‘ཏེས’’ནྟིཨཱདི ཝུཏྟཾ. ཨཱནིསཾསོཏི ཨུདཡོ. ‘‘སཱིལཝཱ སཱིལསམྤནྣོ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫཏཱི’’ཏིཨཱདཱིསུ (དཱི. ནི. ༣.༣༡༦; ཨ. ནི. ༥.༢༡༣; མཧཱཝ. ༢༨༥) པན ཝིཔཱཀཕལམྤི ‘‘ཨཱནིསཾསོ’’ཏི ཝུཏྟཾ. ཀོ ཝིསེསོཏི ཀོ ཕལཝིསེསོ. ཀཱ ཝཌྜྷཱིཏི ཀོ ཨབྦྷུདཡོ. ཝིཛྫམཱནོཔི གུཎོ ཡཱཐཱཝཏོ ཝིབྷཱཝིཏོ ཨེཝ ཨབྷིརུཙིཾ ཨུཔྤཱདེཏི, ན ཨཝིབྷཱཝིཏོ, ཏསྨཱ ཨེཀནྟཏོ ཨཱནིསཾསཀིཏྟནཾ ཨིཙྪིཏབྦམེཝཱཏི དསྶེཏུཾ ‘‘ཨཔྤེཝ ནཱམཱ’’ཏིཨཱདིམཱཧ.

པིཡོཏི པིཡཱཡིཏབྦོ. པིཡསྶ ནཱམ དསྶནཾ ཨེཀནྟཏོ ཨབྷིནནྡིཏབྦཾ ཧོཏཱིཏི ཨཱཧ ‘‘པིཡཙཀྑཱུཧི སམྤསྶིཏབྦོ’’ཏི. པཱིཏིསམུཊྛཱནཔྤསནྣསོམྨརཱུཔཔརིགྒཧཉྷི ཙཀྑུ ‘‘པིཡཙཀྑཱུ’’ཏི ཝུཙྩཏི. ཏེསནྟི སབྲཧྨཙཱརཱིནཾ. མནཝཌྜྷནཀོཏི པཱིཏིམནསྶ པརིབྲཱུཧནཏོ ཨུཔརཱུཔརི པཱིཏིཙིཏྟསྶེཝ ཨུཔྤཱདནཀོ. གརུཊྛཱནིཡོཏི གརུཀརཎསྶ ཋཱནབྷཱུཏོ. ཛཱནཾ ཛཱནཱཏཱིཏི ཉཱཎེན ཛཱནིཏབྦཾ ཛཱནཱཏི. ཡཐཱ ཝཱ ཨཉྙེ ཨཛཱནནྟཱཔི ཛཱནནྟཱ ཝིཡ པཝཏྟནྟི, ན ཨེཝམཡཾ, ཨཡཾ པན ཛཱནནྟོ ཨེཝ ཛཱནཱཏི. པསྶཾ པསྶཏཱིཏི དསྶནབྷཱུཏེན པཉྙཱཙཀྑུནཱ ¶ པསྶིཏབྦཾ པསྶཏི, པསྶནྟོ ཨེཝ ཝཱ པསྶཏི. ཨེཝཾ སམྦྷཱཝནཱིཡོཏི ཨེཝཾ ཝིཉྙུཏཱཡ པཎྜིཏབྷཱཝེན སམྦྷཱཝེཏབྦོ. སཱིལེསྭེཝསྶ པརིཔཱུརཀཱརཱིཏི སཱིལེསུ པརིཔཱུརཀཱརཱི ཨེཝ བྷཝེཡྻཱཏི. ཨེཝཾ ཨུཏྟརཔདཱཝདྷཱརཎཾ དཊྛབྦཾ. ཨེཝཉྷི ཨིམིནཱ པདེན ཨུཔརིསིཀྑཱདྭཡཾ ཨནིཝཏྟིཏམེཝ ཧོཏི. ཡཐཱ པན སཱིལེསུ པརིཔཱུརཀཱརཱི ནཱམ ཧོཏི, ཏཾ ཕལེན དསྶེཏུཾ ‘‘ཨཛ྄ཛྷཏྟ’’ནྟིཨཱདི ཝུཏྟཾ. ཝིཔསྶནཱདྷིཊྛཱནསམཱདྷིསཾཝཏྟནིཀཏཱཡ ཧི ཨིདྷ སཱིལསྶ པཱརིཔཱུརཱི, ན ཀེཝལཾ ཨཁཎྜཱདིབྷཱཝམཏྟཾ. ཝུཏྟཉྷེཏཾ ‘‘ཡཱནི ཁོ པན ཏཱནི ཨཁཎྜཱནི…པེ… སམཱདྷིསཾཝཏྟནིཀཱནཱི’’ཏི. ཨེཝཉྩ ཀཏྭཱ ཨུཔརིསིཀྑཱདྭཡཾ སཱིལསྶ སམྦྷཱརབྷཱཝེན གཧིཏནྟི སཱིལསྶེཝེཏྠ པདྷཱནགྒཧཎཾ སིདྡྷཾ ཧོཏི. སཱིལཱནུརཀྑཀཱ ཧི ཙིཏྟེཀགྒཏཱསངྑཱརཔརིགྒཧཱ. ཨནཱུནེནཱཏི ཨཁཎྜཱདིབྷཱཝེན, ཀསྶཙི ཝཱ ཨཧཱཔནེན ཨུཔཔནྣེན. ཨཱཀཱརེནཱཏི ཀརཎེན སམྤཱདནེན.

ཨཛ྄ཛྷཏྟནྟི ¶ ཝཱ ཨཏྟནོཏི ཝཱ ཨེཀཾ ཨེཀཏྠཾ, བྱཉྫནམེཝ ནཱནཾ. བྷུམྨཏྠེ ཙེཏཾ, ‘‘སམཐ’’ནྟི ཨུཔཡོགཝཙནཾ ‘‘ཨནཱུ’’ཏི ཨིམིནཱ ཨུཔསགྒེན ཡོགེ སིདྡྷནྟི ཨཱཧ ‘‘ཨཏྟནོ ཙིཏྟསམཐེ ཡུཏྟོ’’ཏི. ཏཏྠ ཙིཏྟསམཐེཏི ཙིཏྟསྶ སམཱདྷཱནེ. ཡུཏྟོཏི ཨཝིཡུཏྟོ པསུཏོ. ཡོ སབྦེན སབྦཾ ཛྷཱནབྷཱཝནཱཡ ཨནནུཡུཏྟོ, སོ ཏཾ བཧི ནཱིཧརཏི ནཱམ. ཡོ ཨཱརབྷིཏྭཱ ཨནྟརཱ སངྐོཙཾ ཨཱཔཛྫཏི, སོ ཏཾ ཝིནཱསེཏི ནཱམ. ཡོ པན ཨཱིདིསོ ཨཧུཏྭཱ ཛྷཱནཾ ཨུཔསམྤཛྫ ཝིཧརཏི, སོ ཨནིརཱཀཏཛ྄ཛྷཱནོཏི དསྶེནྟོ ‘‘བཧི ཨནཱིཧཊཛ྄ཛྷཱནོ’’ཏིཨཱདིམཱཧ. ནཱིཧརཎཝིནཱསཏྠཉྷི ཨིདཾ ནིརཱཀརཎཾ ནཱམ. ‘‘ཐམྦྷཾ ནིརཾཀཏྭཱ ནིཝཱཏཝུཏྟཱི’’ཏིཨཱདཱིསུ (སུ. ནི. ༣༢༨) ཙསྶ པཡོགོ དཊྛབྦོ.

སཏྟཝིདྷཱཡ ཨནུཔསྶནཱཡཱཏི ཨེཏྠ ཨནིཙྩཱནུཔསྶནཱ, དུཀྑཱནུཔསྶནཱ, ཨནཏྟཱནུཔསྶནཱ, ནིབྦིདཱནུཔསྶནཱ, ཝིརཱགཱནུཔསྶནཱ, ནིརོདྷཱནུཔསྶནཱ, པཊིནིསྶགྒཱནུཔསྶནཱཏི ཨིམཱ སཏྟཝིདྷཱ ཨནུཔསྶནཱ. སུཉྙཱགཱརགཏོ བྷིཀྑུ ཏཏྠ ལདྡྷཀཱཡཝིཝེཀཏཱཡ སམཐཝིཔསྶནཱཝསེན ཙིཏྟཝིཝེཀཾ པརིབྲཱུཧེནྟོ ཡཐཱནུསིཊྛཔཊིཔཏྟིཡཱ ལོཀཾ སཱསནཉྩ ཨཏྟནོ ཝིསེསཱདྷིགམཊྛཱནབྷཱུཏཾ སུཉྙཱགཱརཉྩ ཨུཔསོབྷཡམཱནོ གུཎཝིསེསཱདྷིཊྛཱནབྷཱཝཱཔཱདནེན ཝིཉྙཱུནཾ ཨཏྠཏོ ཏཾ བྲཱུཧེནྟོ ནཱམ ཧོཏཱིཏི ཝུཏྟཾ ‘‘བྲཱུཧེཏཱ སུཉྙཱགཱརཱན’’ནྟི. ཏེནཱཧ ‘‘ཨེཏྠ ཙཱ’’ཏིཨཱདི. ཨེཀབྷཱུམཀཱདིཔཱསཱདེ ཀུརུམཱནོཔི པན ནེཝ སུཉྙཱགཱརཱནཾ བྲཱུཧེཏཱཏི དཊྛབྦོ. སུཉྙཱགཱརགྒཧཎེན ཙེཏྠ ཨརཉྙརུཀྑམཱུལཱདི སབྦཾ པདྷཱནཱནུཡོགཀྑམཾ སེནཱསནཾ གཧིཏནྟི དཊྛབྦཾ.

ཨེཏྟཱཝཏཱ ཡཐཱ ཏཎྷཱཝིཙརིཏདེསནཱ པཋམཾ ཏཎྷཱཝསེན ཨཱརདྡྷཱཔི ཏཎྷཱཔདཊྛཱནཏྟཱ མཱནདིཊྛཱིནཾ ¶ མཱནདིཊྛིཡོ ཨོསརིཏྭཱ ཀམེན པཔཉྩཏྟཡདེསནཱ ཛཱཏཱ, ཨེཝམཡཾ དེསནཱ པཋམཾ ཨདྷིསཱིལསིཀྑཱཝསེན ཨཱརདྡྷཱཔི སཱིལཔདཊྛཱནཏྟཱ སམཐཝིཔསྶནཱནཾ སམཐཝིཔསྶནཱཡོ ཨོསརིཏྭཱ ཀམེན སིཀྑཱཏྟཡདེསནཱ ཛཱཏཱཏི ཝེདིཏབྦཱ. ཨེཏྠ ཧི ‘‘སཱིལེསྭེཝསྶ པརིཔཱུརཀཱརཱི’’ཏི ཨེཏྟཱཝཏཱ ཨདྷིསཱིལསིཀྑཱ ཝུཏྟཱ, ‘‘ཨཛ྄ཛྷཏྟཾ ཙེཏོསམཐམནུཡུཏྟོ ཨནིརཱཀཏཛ྄ཛྷཱནོ’’ཏི ཨེཏྟཱཝཏཱ ཨདྷིཙིཏྟསིཀྑཱ, ‘‘ཝིཔསྶནཱཡ སམནྣཱགཏོ’’ཏི ཨེཏྟཱཝཏཱ ཨདྷིཔཉྙཱསིཀྑཱ. ‘‘བྲཱུཧེཏཱ སུཉྙཱགཱརཱན’’ནྟི ཨིམིནཱ པན སམཐཝསེན སུཉྙཱགཱརཝཌྜྷནེ ¶ ཨདྷིཙིཏྟསིཀྑཱ, ཝིཔསྶནཱཝསེན ཨདྷིཔཉྙཱསིཀྑཱཏི ཨེཝཾ དྭེཔི སིཀྑཱ སངྒཧེཏྭཱ ཝུཏྟཱ. ཨེཏྠ ཙ ‘‘ཨཛ྄ཛྷཏྟཾ ཙེཏོསམཐམནུཡུཏྟོ ཨནིརཱཀཏཛ྄ཛྷཱནོ’’ཏི ཨིམེཧི པདེཧི སཱིལཱནུརཀྑིཀཱ ཨེཝ ཙིཏྟེཀགྒཏཱ ཀཐིཏཱ, ‘‘ཝིཔསྶནཱཡཱ’’ཏི ཨིམིནཱ པདེན སཱིལཱནུརཀྑིཀོ སངྑཱརཔརིགྒཧོ.

ཀཐཾ ཙིཏྟེཀགྒཏཱ སཱིལམནུརཀྑཏི? ཡསྶ ཧི ཙིཏྟེཀགྒཏཱ ནཏྠི, སོ བྱཱདྷིམྷི ཨུཔྤནྣེ ཝིཧཉྙཏི, སོ བྱཱདྷིཝིཧཏོ ཝིཀྑིཏྟཙིཏྟོ སཱིལཾ ཝིནཱསེཏྭཱཔི བྱཱདྷིཝཱུཔསམཾ ཀཏྟཱ ཧོཏི. ཡསྶ པན ཙིཏྟེཀགྒཏཱ ཨཏྠི, སོ ཏཾ བྱཱདྷིདུཀྑཾ ཝིཀྑམྦྷེཏྭཱ སམཱཔཏྟིཾ སམཱཔཛྫཏི, སམཱཔནྣཀྑཎེ དུཀྑཾ དཱུརགཏཾ ཧོཏི, བལཝཏརཾ སུཁམུཔྤཛྫཏི. ཨེཝཾ ཙིཏྟེཀགྒཏཱ སཱིལམནུརཀྑཏི. ཀཐཾ སངྑཱརཔརིགྒཧོ སཱིལམནུརཀྑཏི? ཡསྶ ཧི སངྑཱརཔརིགྒཧོ ནཏྠི, ཏསྶ ‘‘མམ རཱུཔཾ མམ ཝིཉྙཱཎ’’ནྟི ཨཏྟབྷཱཝེ བལཝམམཏྟཾ ཧོཏི, སོ ཏཐཱརཱུཔེསུ དུབྦྷིཀྑབྱཱདྷིབྷཡཱདཱིསུ སམྤཏྟེསུ སཱིལཾ ནཱསེཏྭཱཔི ཨཏྟབྷཱཝཾ པོསེཏཱ ཧོཏི. ཡསྶ པན སངྑཱརཔརིགྒཧོ ཨཏྠི, ཏསྶ ཨཏྟབྷཱཝེ བལཝམམཏྟཾ ཝཱ སིནེཧོ ཝཱ ན ཧོཏི, སོ ཏཐཱརཱུཔེསུ དུབྦྷིཀྑབྱཱདྷིབྷཡཱདཱིསུ སམྤཏྟེསུ སཙེཔིསྶ ཨནྟཱནི བཧི ནིཀྑམནྟི, སཙེཔི ཨུསྶུསྶཏི ཝིསུསྶཏི, ཁཎྜཱཁཎྜིཀོ ཝཱ ཧོཏི སཏདྷཱཔི སཧསྶདྷཱཔི, ནེཝ སཱིལཾ ཝིནཱསེཏྭཱ ཨཏྟབྷཱཝཾ པོསེཏཱ ཧོཏི. ཨེཝཾ སངྑཱརཔརིགྒཧོ སཱིལཾ ཨནུརཀྑཏི.

‘‘བྲཱུཧེཏཱ སུཉྙཱགཱརཱན’’ནྟི ཨིམིནཱ པན ཏསྶེཝ ཨུབྷཡསྶ བྲཱུཧནཱ ཝཌྜྷནཱ སཱཏཙྩཀིརིཡཱ དསྶིཏཱ. ཨེཝཾ བྷགཝཱ ཡསྨཱ ‘‘སབྲཧྨཙཱརཱིནཾ པིཡོ ཙསྶཾ…པེ… བྷཱཝནཱིཡོ ཙཱ’’ཏི ཨིམེ ཙཏྟཱརོ དྷམྨེ ཨཱཀངྑནྟེན ནཏྠཉྙཾ ཀིཉྩི ཀཱཏབྦཾ, ཨཉྙདཏྠུ སཱིལཱདིགུཎསམནྣཱགཏེནེཝ བྷཝིཏབྦཾ. ཨཱིདིསོ ཧི སབྲཧྨཙཱརཱིནཾ པིཡོ ཧོཏི མནཱཔོ གརུ བྷཱཝནཱིཡོ. ཝུཏྟམྤི ཧེཏཾ –

‘‘སཱིལདསྶནསམྤནྣཾ ¶ , དྷམྨཊྛཾ སཙྩཝེདིནཾ;

ཨཏྟནོ ཀམྨ ཀུབྦཱནཾ, ཏཾ ཛནོ ཀུརུཏེ པིཡ’’ནྟི. (དྷ. པ. ༢༡༧);

ཏསྨཱ ‘‘ཨཱཀངྑེཡྻ ཙེ, བྷིཀྑཝེ, བྷིཀྑུ སབྲཧྨཙཱརཱིནཾ པིཡོ ཙསྶཾ…པེ… སཱིལེསྭེཝསྶ པརིཔཱུརཀཱརཱི…པེ… སུཉྙཱགཱརཱན’’ནྟི ཝཏྭཱ ཨིདཱནི ཡསྨཱ པཙྩཡལཱབྷཱདིཾ ¶ པཏྠཡནྟེནཔི ཨིདམེཝ ཀརཎཱིཡཾ, ན ཨཉྙཾ ཀིཉྩི, ཏསྨཱ ‘‘ཨཱཀངྑེཡྻ ཙེ, བྷིཀྑཝེ, བྷིཀྑུ ལཱབྷཱི ཨསྶ’’ནྟིཨཱདིམཱཧ. ལཱབྷཱི ཨསྶནྟི ལཱབྷཱསཱཡ སཾཝརསཱིལཔརིཔཱུརཎཾ པཱལི༹ཡཾ ཨཱགཏཾ. ཀིམཱིདིསཾ བྷགཝཱ ཨནུཛཱནཱཏཱིཏི? ན བྷགཝཱ སབྷཱཝེན ཨཱིདིསཾ ཨནུཛཱནཱཏི, མཧཱཀཱརུཎིཀཏཱཡ པན པུགྒལཛ྄ཛྷཱསཡེན ཨེཝཾ ཝུཏྟནྟི དསྶེནྟོ ‘‘ན བྷགཝཱ’’ཏིཨཱདིམཱཧ. ཏཏྠ གྷཱསེསནཾ ཚིནྣཀཐོ, ན ཝཱཙཾ པཡུཏྟཾ བྷཎེཏི ཚིནྣཀཐོ མཱུགོ ཝིཡ ཧུཏྭཱ ཨོབྷཱསཔརིཀཐཱནིམིཏྟཝིཉྙཏྟིཔཡུཏྟཾ གྷཱསེསནཾ ཝཱཙཾ ན བྷཎེ, ན ཀཐེཡྻཱཏི ཨཏྠོ. པུགྒལཛ྄ཛྷཱསཡཝསེནཱཏི སངྑེཔཏོ ཝུཏྟམཏྠཾ ཝིཝརནྟོ ‘‘ཡེསཾ ཧཱི’’ཏིཨཱདིམཱཧ. རསོ སབྷཱཝབྷཱུཏོ ཨཱནིསཾསོ རསཱནིསཾསོ.

པཙྩཡདཱནཀཱརཱཏི ཙཱིཝརཱདིཔཙྩཡདཱནཝསེན པཝཏྟཀཱརཱ. མཧཔྥལཱ མཧཱནིསཾསཱཏི ཨུབྷཡམེཏཾ ཨཏྠཏོ ཨེཀཾ, བྱཉྫནམེཝ ནཱནཾ. ‘‘པཉྩིམེ, གཧཔཏཡོ, ཨཱནིསཾསཱ’’ཏིཨཱདཱིསུ (མཧཱཝ. ༢༨༥) ཧི ཨཱནིསཾསསདྡོ ཕལཔརིཡཱཡོཔི ཧོཏི. མཧནྟཾ ཝཱ ལོཀིཡསུཁཾ ཕལནྟི པསཝནྟཱིཏི མཧཔྥལཱ, མཧཏོ ལོཀུཏྟརསུཁསྶ པཙྩཡཱ ཧོནྟཱིཏི མཧཱནིསཾསཱ. ཏེནཱཧ ‘‘ལོཀིཡསུཁེན ཕལབྷཱུཏེནཱ’’ཏིཨཱདི.

པེཙྩབྷཝཾ གཏཱཏི པེཏཱུཔཔཏྟིཝསེན ནིབྦཏྟིཾ ཨུཔགཏཱ. ཏེ པན ཡསྨཱ ཨིདྷ ཀཏཀཱལཀིརིཡཱ ཀཱལེན ཀཏཛཱིཝིཏུཔཙྪེདཱ ཧོནྟི, ཏསྨཱ ཝུཏྟཾ ‘‘ཀཱལཀཏཱ’’ཏི. སསྶུསསུརཱ ཙ ཏཔྤཀྑིཀཱ ཙ སསྶུསསུརཔཀྑིཀཱ. ཏེ ཉཱཏིཡོནིསམྦནྡྷེན ཨཱཝཱཧཝིཝཱཧསམྦནྡྷཝསེན སམྦདྡྷཱ ཉཱཏཱི. སཱལོཧིཏཱཏི ཡོནིསམྦནྡྷཝསེན. ཨེཀལོཧིཏབདྡྷཱཏི ཨེཀེན སམཱནེན ལོཧིཏསམྦནྡྷེན སམྦདྡྷཱ. པསནྣཙིཏྟོཏི པསནྣཙིཏྟཀོ. ཀཱལཀཏོ པིཏཱ ཝཱ མཱཏཱ ཝཱ པེཏཡོནིཡཾ ཨུཔྤནྣོཏི ཨདྷིཀཱརཏོ ཝིཉྙཱཡཏཱིཏི ཝུཏྟཾ. མཧཱནིསཾསམེཝ ཧོཏཱིཏི ཏསྶ ཏཐཱསཱིལསམྤནྣཏྟཱཏི ཨདྷིཔྤཱཡོ.

ཨཛ྄ཛྷོཏྠརིཏཱཏི ¶ མདྡིཏཱ. ན ཙ མཾ ཨརཏི སཧེཡྻཱཏི མཾ ཙ ཨརཏི ན ཨབྷིབྷཝེཡྻ ན མདྡེཡྻ ན ཨཛ྄ཛྷོཏྠརེཡྻ. ཨུཔྤནྣནྟི ཛཱཏཾ ནིབྦཏྟཾ. སཱིལཱདིགུཎཡུཏྟོ ཧི ཨརཏིཉྩ རཏིཉྩ སཧཏི ཨཛ྄ཛྷོཏྠརཏི, མདྡིཏྭཱ ཏིཊྛཏི, ཏསྨཱ ཨཱིདིསམཏྟཱནཾ ཨིཙྪནྟེནཔི སཱིལཱདིགུཎཡུཏྟེནེཝ བྷཝིཏབྦནྟི ¶ དསྶེཏི. ཙིཏྟུཏྲཱསོ བྷཱཡཏཱིཏི བྷཡཾ, ཨཱརམྨཎཾ བྷཱཡཏི ཨེཏསྨཱཏི བྷཡཾ. ཏཾ དུཝིདྷམྤི བྷཡཾ བྷེརཝཉྩ སཧཏི ཨབྷིབྷཝཏཱིཏི བྷཡབྷེརཝསཧོ. སཱིལཱདིགུཎཡུཏྟོ ཧི བྷཡབྷེརཝཾ སཧཏི ཨཛ྄ཛྷོཏྠརཏི, མདྡིཏྭཱ ཏིཊྛཏི ཨརིཡཀོཊིཡཝཱསཱི མཧཱདཏྟཏྠེརོ ཝིཡ.

ཐེརོ ཀིར མགྒཾ པཊིཔནྣོ ཨཉྙཏརཾ པཱསཱདིཀཾ ཨརཉྙཾ དིསྭཱ ‘‘ཨིདྷེཝཛྫ སམཎདྷམྨཾ ཀཏྭཱ གམིསྶཱམཱི’’ཏི མགྒཱ ཨོཀྐམྨ ཨཉྙཏརསྨིཾ རུཀྑམཱུལེ སངྒྷཱཊིཾ པཉྙཔེཏྭཱ པལླངྐཾ ཨཱབྷུཛིཏྭཱ ནིསཱིདི. རུཀྑདེཝཏཱཡ དཱརཀཱ ཐེརསྶ སཱིལཏེཛེན སཀབྷཱཝེན སཎྛཱཏུཾ ཨསཀྐོནྟཱ ཝིསྶརམཀཾསུ. དེཝཏཱཔི སཀལརུཀྑཾ ཙཱལེསི. ཐེརོ ཨཙལོཝ ནིསཱིདི. སཱ དེཝཏཱ དྷཱུམཱཡི པཛྫལི. ནེཝ སཀྑི ཐེརཾ ཙཱལེཏུཾ. ཏཏོ ཨུཔཱསཀཝཎྞེནཱགནྟྭཱ ཝནྡིཏྭཱ ཨཊྛཱསི. ‘‘ཀོ ཨེསོ’’ཏི ཝུཏྟཱ ‘‘ཨཧཾ, བྷནྟེ, ཏསྨིཾ རུཀྑེ ཨདྷིཝཏྠཱ དེཝཏཱ’’ཏི ཨཝོཙ. ཏྭཾ ཨེཏེ ཝིཀཱརེ ཨཀཱསཱིཏི. ཨཱམ, བྷནྟེཏི. ‘‘ཀསྨཱ’’ཏི ཙ ཝུཏྟཱ ཨཱཧ ‘‘ཏུམྷཱཀཾ, བྷནྟེ, སཱིལཏེཛེན དཱརཀཱ སཀབྷཱཝེན སཎྛཱཏུཾ ཨསཀྐོནྟཱ ཝིསྶརམཀཾསུ, སཱཧཾ ཏུམྷེ པལཱཔེཏུཾ ཨེཝམཀཱསི’’ནྟི. ཐེརོ ཨཱཧ ‘‘ཨཐ ཀསྨཱ ‘ཨིདྷ, བྷནྟེ, མཱ ཝསཐ, མཡ྄ཧཾ ཨཕཱསུཀ’ནྟི པཊིཀཙྩེཝ ནཱཝཙཱསི, ཨིདཱནི པན མཱ མཾ ཀིཉྩི ཨཝཙ, ‘ཨརིཡཀོཊིཡམཧཱདཏྟོ ཨམནུསྶབྷཡེན གཏོ’ཏི ཝཙནཏོ ལཛྫཱམི, ཏེནཱཧཾ ཨིདྷེཝ ཝསིསྶཾ, ཏྭཾ པན ཨཛྫེཀདིཝསཾ ཡཏྠ ཀཏྠཙི ཝསཱཧཱི’’ཏི. ཨེཝཾ སཱིལཱདིགུཎཡུཏྟོ བྷཡབྷེརཝསཧོ ཧོཏི, ཏསྨཱ ཨཱིདིསམཏྟཱནཾ ཨིཙྪནྟེནཔི སཱིལཱདིགུཎཡུཏྟེནེཝ བྷཝིཏབྦནྟི དསྶེཏི. དུཏིཡཱདཱིནི ཨུཏྟཱནཏྠཱནི.

ཨཱཀངྑསུཏྟཱདིཝཎྞནཱ ནིཊྛིཏཱ.

༥-༡༠. མིགསཱལཱསུཏྟཱདིཝཎྞནཱ

༧༥-༨༠. པཉྩམེ ཨིམསྶ ཧི པུགྒལསྶ སཱིལཝིརཧིཏསྶ པཉྙཱ སཱིལཾ པརིདྷོཝཏཱིཏི ཨཁཎྜཱདིབྷཱཝཱཔཱདནེན སཱིལཾ ཨཱདིམཛ྄ཛྷཔརིཡོསཱནེསུ པཉྙཱཡ ¶ སུཝིསོདྷིཏཾ ཀརོཏི. ཡསྶ ཧི ཨབྦྷནྟརེ སཱིལསཾཝརོ ནཏྠི, ཨུགྒྷཊིཏཉྙུཏཱཡ པན ཙཱཏུཔྤདིཀགཱཐཱཔརིཡོསཱནེ པཉྙཱཡ སཱིལཾ ¶ དྷོཝིཏྭཱ སཧ པཊིསམྦྷིདཱཧི ཨརཧཏྟཾ པཱཔུཎཱཏི, ཨཡཾ པཉྙཱཡ སཱིལཾ དྷོཝཏི ནཱམ སེཡྻཐཱཔི སནྟཏིམཧཱམཏྟོ.

སཱིལཝཱ པན པཉྙཾ དྷོཝཏི. ཡསྶ (དཱི. ནི. ཨཊྛ. ༡.༣༡༧) ཧི པུཐུཛྫནསྶ སཱིལཾ སཊྛིཨསཱིཏིཝསྶཱནི ཨཁཎྜཾ ཧོཏི, སོ མརཎཀཱལེཔི སབྦཀིལེསེ གྷཱཏེཏྭཱ སཱིལེན པཉྙཾ དྷོཝིཏྭཱ ཨརཧཏྟཾ གཎྷཱཏི ཀནྡརསཱལཔརིཝེཎེ མཧཱསཊྛིཝསྶཏྠེརོ ཝིཡ. ཐེརེ ཀིར མརཎམཉྩེ ནིཔཛྫིཏྭཱ བལཝཝེདནཱཡ ནིཏྠུནནྟེ ཏིསྶམཧཱརཱཛཱ ‘‘ཐེརཾ པསྶིསྶཱམཱི’’ཏི གནྟྭཱ པརིཝེཎདྭཱརེ ཋིཏོ ཏཾ སདྡཾ སུཏྭཱ པུཙྪི ‘‘ཀསྶ སདྡོ ཨཡ’’ནྟི. ཐེརསྶ ནིཏྠུནནསདྡོཏི. ‘‘པབྦཛྫཱཡ སཊྛིཝསྶེན ཝེདནཱཔརིགྒཧམཏྟམྤི ན ཀཏཾ, ཨིདཱནི ན ཏཾ ཝནྡིསྶཱམཱི’’ཏི ནིཝཏྟིཏྭཱ མཧཱབོདྷིཾ ཝནྡིཏུཾ གཏོ. ཏཏོ ཨུཔཊྛཱཀདཧརོ ཐེརཾ ཨཱཧ ‘‘ཀིཾ ནོ, བྷནྟེ, ལཛྫཱཔེཐ, སདྡྷོཔི རཱཛཱ ཝིཔྤཊིསཱརཱི ཧུཏྭཱ ‘ན ཝནྡིསྶཱམཱི’ཏི གཏོ’’ཏི. ཀསྨཱ, ཨཱཝུསོཏི? ཏུམྷཱཀཾ ནིཏྠུནནསདྡཾ སུཏྭཱཏི. ‘‘ཏེན ཧི མེ ཨོཀཱསཾ ཀརོཐཱ’’ཏི ཝཏྭཱ ཝེདནཾ ཝིཀྑམྦྷེཏྭཱ ཨརཧཏྟཾ པཏྭཱ དཧརསྶ སཉྙཾ ཨདཱསི ‘‘གཙྪཱཝུསོ, ཨིདཱནི རཱཛཱནཾ ཨམྷེ ཝནྡཱཔེཧཱི’’ཏི. དཧརོ གནྟྭཱ ‘‘ཨིདཱནི ཀིར ཐེརཾ ཝནྡཐཱ’’ཏི ཨཱཧ. རཱཛཱ སུསུམཱརཔཏིཏེན ཐེརཾ ཝནྡནྟོ ‘‘ནཱཧཾ ཨཡྻསྶ ཨརཧཏྟཾ ཝནྡཱམི, པུཐུཛྫནབྷཱུམིཡཾ པན ཋཏྭཱ རཀྑིཏསཱིལམེཝ ཝནྡཱམཱི’’ཏི ཨཱཧ. ཨེཝཾ སཱིལེན པཉྙཾ དྷོཝཏི ནཱམ. སེསཾ ཝུཏྟམེཝ. ཚཊྛཱདཱིསུ ནཏྠི ཝཏྟབྦཾ.

མིགསཱལཱསུཏྟཱདིཝཎྞནཱ ནིཊྛིཏཱ.

ཨཱཀངྑཝགྒཝཎྞནཱ ནིཊྛིཏཱ.

(༩) ༤. ཐེརཝགྒོ

༡-༨. ཝཱཧནསུཏྟཱདིཝཎྞནཱ

༨༡-༨༨. ཙཏུཏྠསྶ པཋམེ ཝིམརིཡཱདཱིཀཏེནཱཏི ནིམྨརིཡཱདཱིཀཏེན. ཙེཏསཱཏི ཨེཝཾཝིདྷེན ཙིཏྟེན ཝིཧརཏི. ཏཏྠ དྭེ མརིཡཱདཱ ཀིལེསམརིཡཱདཱ ཙ ཨཱརམྨཎམརིཡཱདཱ ཙ. སཙེ ཧིསྶ རཱུཔཱདིཀེ ཨཱརབྦྷ རཱགཱདཡོ ¶ ཨུཔྤཛྫེཡྻུཾ, ཀིལེསམརིཡཱདཱ ཏེན ཀཏཱ བྷཝེཡྻ. ཏེསུ པནསྶ ཨེཀོཔི ¶ ན ཨུཔྤནྣོཏི ཀིལེསམརིཡཱདཱ ནཏྠི. སཙེ པནསྶ རཱུཔཱདིདྷམྨེ ཨཱཝཛྫེནྟསྶ ཨེཀཙྩེ ཨཱཔཱཐཾ ནཱགཙྪེཡྻུཾ, ཨེཝམསྶ ཨཱརམྨཎམརིཡཱདཱ བྷཝེཡྻ. ཏེ པནསྶ དྷམྨེ ཨཱཝཛྫེནྟསྶ ཨཱཔཱཐཾ ཨནཱགཏདྷམྨོ ནཱམ ནཏྠཱིཏི ཨཱརམྨཎམརིཡཱདཱཔི ནཏྠི. ཨིདྷ པན ཀིལེསམརིཡཱདཱ ཨདྷིཔྤེཏཱཏི ཨཱཧ ‘‘ཀིལེསམརིཡཱདཾ བྷིནྡིཏྭཱ’’ཏིཨཱདི. ཏཏིཡཱདཱིསུ ནཏྠི ཝཏྟབྦཾ.

ཝཱཧནསུཏྟཱདིཝཎྞནཱ ནིཊྛིཏཱ.

༩-༡༠. ཀོཀཱལིཀསུཏྟཱདིཝཎྞནཱ

༨༩-༩༠. ནཝམེ (སཾ. ནི. ཊཱི. ༡.༡.༡༨༡) ཀོཀཱལིཀནཱམཀཱ དྭེ བྷིཀྑཱུ. ཏཏོ ཨིདྷཱདྷིཔྤེཏཾ ནིདྡྷཱརེཏྭཱ དསྶེཏུཾ ‘‘ཀོཡཾ ཀོཀཱལིཀོ’’ཏི པུཙྪཱ. སུཏྟསྶ ཨཊྛུཔྤཏྟིཾ དསྶེཏུཾ ‘‘ཀསྨཱ ཙ ཨུཔསངྐམཱི’’ཏི པུཙྪཱ. ཨཡཾ ཀིརཱཏིཨཱདི ཡཐཱཀྐམཾ ཏཱསཾ ཝིསྶཛྫནཾ. ཝིཝེཀཝཱསཾ ཝསིཏུཀཱམཏྟཱ ཨཔྤིཙྪཏཱཡ ཙ མཱ ནོ ཀསྶཙི…པེ… ཝསིཾསུ. ཨཱགྷཱཏཾ ཨུཔྤཱདེསི ཨཏྟནོ ཨིཙྪཱཝིགྷཱཏནཏོ. ཐེརཱ བྷིཀྑུསངྒྷསྶ ནིཡྻཱདཡིཾསུ པཡུཏྟཝཱཙཱཡ ཨཀཏཏྟཱ ཐེརེཧི ཙ ཨདཱཔིཏཏྟཱ. པུབྦེཔི…པེ… མཉྙེཏི ཨིམིནཱ ཐེརཱནཾ ཀོཧཉྙེ ཋིཏབྷཱཝཾ ཨཱསངྐཏི ཨཝཎེ ཝཎཾ པསྶནྟོ ཝིཡ, སུཔརིསུདྡྷེ ཨཱདཱསཏལེ ཛལླཾ ཨུཊྛཱཔེནྟོ ཝིཡ ཙ.

ཨཔརཛ྄ཛྷིཏྭཱཏི བྷགཝཏོ སམྨུཁཱ ‘‘པཱཔབྷིཀྑཱུ ཛཱཏཱ’’ཏི ཝཏྭཱ. མཧཱསཱཝཛྫདསྶནཏྠནྟི མཧཱསཱཝཛྫབྷཱཝདསྶནཏྠཾ, ཨཡམེཝ ཝཱ པཱཋོ. མཱཧེཝནྟི མཱ ཨེཝམཱཧ, མཱ ཨེཝཾ བྷཎི. སདྡྷཱཡ ཨཡོ ཨུཔྤཱདོ སདྡྷཱཡོ, ཏཾ ཨཱཝཧཏཱིཏི སདྡྷཱཡིཀོཏི ཨཱཧ ‘‘སདྡྷཱཡ ཨཱགམཀརོ’’ཏི. སདྡྷཱཡིཀོཏི ཝཱ སདྡྷཱཡ ཨཡིཏབྦོ, སདྡྷེཡྻོཏི ཨཏྠོ. ཏེནཱཧ ‘‘སདྡྷཱཏབྦཝཙནོ ཝཱ’’ཏི.

པཱིལ༹ཀཱ ནཱམ བཱཧིརཏོ པཊྛཱཡ ཨཊྛཱིནི བྷིནྡནྟི, ཨིམཱ པན པཋམཾཡེཝ ཨཊྛཱིནི བྷིནྡིཏྭཱ ཨུགྒཏཱ. ཏེནཱཧ ‘‘ཨཊྛཱིནི བྷིནྡིཏྭཱ ཨུགྒཏཱཧི པིལ༹ཀཱཧཱི’’ཏི. ཏརུཎབེལུཝམཏྟིཡོཏི ཏརུཎབིལླཕལམཏྟིཡོ. ཝིསགིལིཏོཏི ཁིཏྟཔཧརཎོ ¶ . ཏཉྩ བལི༹སཾ ཝིསསམཉྙཱ ལོཀེ. ཨཱརཀྑདེཝཏཱནཾ སདྡཾ སུཏྭཱཏི པདཾ ཨཱནེཏྭཱ སམྦནྡྷོ.

བྲཧྨལོཀེཏི སུདྡྷཱཝཱསལོཀེ. ཝརཱཀོཏི ཨནུགྒཧཝཙནམེཏཾ. ཧཱིནཔརིཡཱཡོཏི ཀེཙི. པིཡསཱིལཱཏི ཨིམིནཱ ཨེཏསྨིཾ ཨཏྠེ ནིརུཏྟིནཡེན པེསལཱཏི པདསིདྡྷཱིཏི དསྶེཏི. ཀབརཀྑཱིནཱིཏི ¶ བྱཱདྷིབལེན པརིབྷིནྣཝཎྞཏཱཡ ཀབརབྷཱུཏཱནི ཨཀྑཱིནི. ཡཏྟཀནྟི བྷགཝཏོ ཝཙནཾ ཨཉྙཐཱ ཀརོནྟེན ཡཏྟཀཾ ཏཡཱ ཨཔརདྡྷཾ, ཏསྶ པམཱཎཾ ནཏྠཱིཏི ཨཏྠོ. ཡསྨཱ ཨནཱགཱམིནོ ནཱམ པཧཱིནཀཱམཙྪནྡབྱཱཔཱདཱ ཧོནྟི, ཏྭཉྩ དིཊྛིཀཱམཙྪནྡབྱཱཔཱདཝསེན ཨིདྷཱགཏོ, ཏསྨཱ ཡཱཝཉྩ ཏེ ཨིདཾ ཨཔརདྡྷནྟི ཨེཝམེཏྠ ཨཏྠོ དཊྛབྦོ.

ཨདིཊྛིཔྤཏྟོཏི ཨཔྤཏྟདིཊྛིཀོ. གིལིཏཝིསོ ཝིཡ ཝིསཾ གིལིཏྭཱ ཋིཏོ ཝིཡ. ཀུཋཱརིསདིསཱ མཱུལཔཙྪིནྡནཊྛེན. ཨུཏྟམཏྠེཏི ཨརཧཏྟེ. ཁཱིཎཱསཝོཏི ཝདཏི སུནཀྑཏྟོ ཝིཡ ཨཙེལཾ ཀོརཀྑཏྟིཡཾ. ཡོ ཨགྒསཱཝཀོ ཝིཡ པསཾསིཏབྦོ ཁཱིཎཱསཝོ, ཏཾ ‘‘དུསྶཱིལོ ཨཡ’’ནྟི ཝདཏི. ཝིཙིནཱཏཱིཏི ཨཱཙིནོཏི པསཝཏི. པསཾསིཡནིནྡཱ ཏཱཝ སམྤནྣགུཎཔརིདྷཾསནཝསེན པཝཏྟིཡཱ སཱཝཛྫཏཱཡ ཀཊུཀཝིཔཱཀཱ, ནིནྡིཡཔྤསཾསཱ པན ཀཐཾ ཏཱཡ སམཝིཔཱཀཱཏི? ཏཏྠ ཨཝིཛྫམཱནགུཎསམཱརོཔནེན ཨཏྟནོ པརེསཉྩ མིཙྪཱཔཊིཔཏྟིཧེཏུབྷཱཝཏོ པསཾསིཡེན ཏསྶ སམབྷཱཝཀརཎཏོ ཙ. ལོཀེཔི ཧི ཨསཱུརཾ སཱུརེན སམཾ ཀརོནྟོ གཱརཡ྄ཧོ ཧོཏི, པགེཝ དུཔྤཊིཔནྣཾ སུཔྤཊིཔནྣེན སམཾ ཀརོནྟོཏི.

སཀེན དྷནེནཱཏི ཨཏྟནོ སཱཔཏེཡྻེན. ཨཡཾ ཨཔྤམཏྟཀོ ཨཔརཱདྷོ དིཊྛདྷམྨིཀཏྟཱ སཔྤཏིཀཱརཏྟཱ ཙ ཏསྶ. ཨཡཾ མཧནྟཏརོ ཀལི ཀཏཱུཔཙིཏསྶ སམྤརཱཡིཀཏྟཱ ཨཔྤཏིཀཱརཏྟཱ ཙ.

ནིརབྦུདོཏི གཎནཱཝིསེསོ ཨེསོཏི ཨཱཧ ‘‘ནིརབྦུདགཎནཱཡཱ’’ཏི, སཏསཧསྶཾ ནིརབྦུདཱནནྟི ཨཏྠོ. ཡམརིཡགརཧཱི ནིརཡཾ ཨུཔེཏཱིཏི ཨེཏྠ ཡཐཱཝུཏྟཨཱཡུཔྤམཱཎཾ པཱཀཏིཀཝསེན ཨརིཡཱུཔཝཱདིནཱ ཝུཏྟནྟི ཝེདིཏབྦཾ. ཨགྒསཱཝཀཱནཾ པན གུཎམཧནྟཏཱཡ ཏཏོཔི ཨཏིཝིཡ མཧནྟཏརམེཝཱཏི ཝདནྟི.

ཨཐ ¶ ཁོ བྲཧྨཱ སཧམྤཏཱིཏི ཀོ ཨཡཾ བྲཧྨཱ, ཀསྨཱ ཙ པན བྷགཝནྟཾ ཨུཔསངྐམིཏྭཱ ཨེཏདཝོཙཱཏི? ཨཡཾ ཀསྶཔསྶ བྷགཝཏོ སཱསནེ སཧཀོ ནཱམ བྷིཀྑུ ཨནཱགཱམཱི ཧུཏྭཱ སུདྡྷཱཝཱསེསུ ཨུཔྤནྣོ, ཏཏྠ སཧམྤཏི བྲཧྨཱཏི སཉྫཱནནྟི. སོ པནཱཧཾ བྷགཝནྟཾ ཨུཔསངྐམིཏྭཱ ‘‘པདུམནིརཡཾ ཀིཏྟེསྶཱམི, ཏཏོ བྷགཝཱ བྷིཀྑཱུནཾ ཨཱརོཙེསྶཏི, ཨཐཱནུསནྡྷིཀུསལཱ བྷིཀྑཱུ ཏཏྠཱཡུཔྤམཱཎཾ པུཙྪིསྶནྟི, བྷགཝཱ ཨཱཙིཀྑནྟོ ཨརིཡཱུཔཝཱདེ ཨཱདཱིནཝཾ པཀཱསེསྶཏཱི’’ཏི ཨིམིནཱ ཀཱརཎེན བྷགཝནྟཾ ཨུཔསངྐམིཏྭཱ ཨེཏདཝོཙ.

མགདྷརཊྛེ ¶ སཾཝོཧཱརཏོ མཱགདྷཀོ པཏྠོ, ཏེན. པཙྩིཏབྦཊྛཱནསྶཱཏི ནིརཡདུཀྑེན པཙྩིཏབྦཔྤདེསསྶ ཨེཏཾ ཨབྦུདོཏི ནཱམཾ. ཝསྶགཎནཱཏི ཨེཀཏོ པཊྛཱཡ དསགུཎིཏཾ ཨབྦུདཨཱཡུམྷི ཏཏོ ཨཔརཾ ཝཱིསཏིགུཎིཏཾ ནིརབྦུདཱདཱིསུ ཝསྶགཎནཱ ཝེདིཏབྦཱ. ཨཡཉྩ གཎནཱ ཨཔརིཙིཏཱནཾ དུཀྐརཱཏི ཝུཏྟཾ ‘‘ན ཏཾ སུཀརཾ སངྑཱཏུ’’ནྟི. ཀེཙི པན ‘‘ཏཏྠ ཏཏྠ པརིདེཝནཱནཏྟེན ཀམྨཀཱརཎནཱནཏྟེནཔི ཨིམཱནི ནཱམཱནི ལདྡྷཱནཱི’’ཏི ཝདནྟི, ཨཔརེ ‘‘སཱིཏནརཀཱ ཨེཏེ’’ཏི. སབྦཏྠཱཏི ཨབབཱདཱིསུ པདུམཔརིཡོསཱནེསུ སབྦེསུ ནིརཡེསུ. ཨེས ནཡོཏི ཧེཊྛིམཏོ ཨུཔརིམསྶ ཝཱིསཏིགུཎཏཾ ཨཏིདིསཏི. དསམེ ནཏྠི ཝཏྟབྦཾ.

ཀོཀཱལིཀསུཏྟཱདིཝཎྞནཱ ནིཊྛིཏཱ.

ཐེརཝགྒཝཎྞནཱ ནིཊྛིཏཱ.

(༡༠) ༥. ཨུཔཱལིཝགྒོ

༡-༤. ཀཱམབྷོགཱིསུཏྟཱདིཝཎྞནཱ

༩༡-༩༤. པཉྩམསྶ པཋམཱདཱིནི ཨུཏྟཱནཏྠཱནི. ཙཏུཏྠེ ཏཔནཾ སནྟཔནཾ ཀཱཡསྶ ཁེདནཾ ཏཔོ, སོ ཨེཏསྶ ཨཏྠཱིཏི ཏཔསྶཱི, ཏཾ ཏཔསྶིཾ. ཡསྨཱ ཏཐཱབྷཱུཏོ ཏཔནིསྶིཏོ, ཏཔོ ཝཱ ཏནྣིསྶིཏོ, ཏསྨཱ ཨཱཧ ‘‘ཏཔནིསྶིཏཀ’’ནྟི. ལཱུཁཾ ཕརུསཾ སཱདྷུསམྨཏཱཙཱརཝིརཧཏོ ན པསཱདནཱིཡཾ ཨཱཛཱིཝཏི ཝཏྟཏཱིཏི ལཱུཁཱཛཱིཝཱི, ཏཾ ལཱུཁཱཛཱིཝིཾ. ཨུཔཀྐོསཏཱིཏི ཨུཔྤཎྜེཏི ¶ , ཨུཔཧསནཝསེན པརིབྷཱསཏི. ཨུཔཝདཏཱིཏི ཨཝཉྙཱཔུབྦཀཾ ཨཔཝདཏི. ཏེནཱཧ ‘‘ཧཱིལེ༹ཏི ཝམྦྷེཏཱི’’ཏི.

ཀཱམབྷོགཱིསུཏྟཱདིཝཎྞནཱ ནིཊྛིཏཱ.

༥. ཨུཏྟིཡསུཏྟཝཎྞནཱ

༩༥. པཉྩམེ པཙྩནྟེ བྷཝཾ པཙྩནྟིམཾ. པཱཀཱརསྶ ཐིརབྷཱཝཾ ཨུདྡྷམུདྡྷཾ པཱཔེཏཱིཏི ཨུདྡྷཱཔཾ, པཱཀཱརམཱུལཾ. ཨཱདི-སདྡེན པཱཀཱརདྭཱརབནྡྷཔརིཁཱདཱིནཾ སངྒཧོ ཝེདིཏབྦོ. པཎྜིཏདོཝཱརིཀཊྛཱནིཡཾ ¶ ཀཏྭཱ བྷགཝཱ ཨཏྟཱནཾ དསྶེསཱིཏི དསྶེནྟོ ‘‘ཨེཀདྭཱརནྟི ཀསྨཱ ཨཱཧཱ’’ཏི ཙོདནཾ སམུཊྛཱཔེསི. ཡསྶཱ པཉྙཱཡ ཝསེན པུརིསོ པཎྜིཏོཏི ཝུཙྩཏི, ཏཾ པཎྜིཙྩནྟི ཨཱཧ ‘‘པཎྜིཙྩེན སམནྣཱགཏོ’’ཏི. ཏཾཏཾཨིཏིཀཏྟབྦཏཱསུ ཚེཀབྷཱཝོ བྱཏྟབྷཱཝོ ཝེཡྻཏྟིཡཾ. མེདྷཏི སམྨོཧཾ ཧིཾསཏི ཝིདྷམཏཱིཏི མེདྷཱ, སཱ ཨེཏསྶ ཨཏྠཱིཏི མེདྷཱཝཱི. ཋཱནེ ཋཱནེ ཨུཔྤཏྟི ཨེཏིསྶཱ ཨཏྠཱིཏི ཋཱནུཔྤཏྟིཀཱ, ཋཱནསོ ཨུཔྤཛྫནཔཉྙཱ. ཨནུཔརིཡཱཡནྟི ཨེཏེནཱཏི ཨནུཔརིཡཱཡོ, སོ ཨེཝ པཐོཏི ཨནུཔརིཡཱཡཔཐོ, པརིཏོ པཱཀཱརསྶ ཨནུསཾཡཱཡནམགྒོ. པཱཀཱརབྷཱགཱ སནྡྷཱཏབྦཱ ཨེཏྠཱཏི པཱཀཱརསནྡྷི, པཱཀཱརསྶ ཕུལླིཏཔྤདེསོ. སོ པན ཧེཊྛིམནྟེན དྭིནྣམྤི ཨིཊྛཀཱནཾ ཝིགམེན ཨེཝཾ ཝུཙྩཏཱིཏི ཨཱཧ ‘‘དྭིནྣཾ ཨིཊྛཀཱནཾ ཨཔགཏཊྛཱན’’ནྟི. ཚིནྣཊྛཱནནྟི ཚིནྣབྷིནྣཔྤདེསོ, ཚིདྡཊྛཱནཾ ཝཱ. ཏཉྷི ཝིཝརནྟི ཝུཙྩཏི.

ཨུཏྟིཡསུཏྟཝཎྞནཱ ནིཊྛིཏཱ.

༦-༨. ཀོཀནུདསུཏྟཱདིཝཎྞནཱ

༩༦-༩༨. ཚཊྛེ ཁནྡྷཱཔི དིཊྛིཊྛཱནཾ ཨཱརམྨཎཊྛེན ‘‘རཱུཔཾ ཨཏྟཏོ སམནུཔསྶཏཱི’’ཏིཨཱདིཝཙནཏོ. ཨཝིཛྫཱཔི དིཊྛིཊྛཱནཾ ཨུཔནིསྶཡཱདིབྷཱཝེན པཝཏྟནཏོ. ཡཐཱཧ ‘‘ཨསྶུཏཝཱ, བྷིཀྑཝེ, པུཐུཛྫནོ ཨརིཡཱནཾ ཨདསྶཱཝཱི ཨརིཡདྷམྨསྶ ཨཀོཝིདོ’’ཏིཨཱདི (དྷ. ས. ༡༠༠༧). ཕསྶོཔི དིཊྛིཊྛཱནཾ. ཡཐཱ ¶ ཙཱཧ ‘‘ཏདཔི ཕསྶཔཙྩཡཱ (དཱི. ནི. ༡.༡༡༨-༡༣༠) ཕུསྶ ཕུསྶ པཊིསཾཝེདིཡནྟཱི’’ཏི (དཱི. ནི. ༡.༡༤༤) ཙ. སཉྙཱཔི དིཊྛིཊྛཱནཾ. ཝུཏྟཉྷེཏཾ ‘‘སཉྙཱནིདཱནཱ ཧི པཔཉྩསངྑཱ (སུ. ནི. ༨༨༠; མཧཱནི. ༡༠༩), པཐཝིཏོ སཉྙཏྭཱ’’ཏི (མ. ནི. ༡.༢) ཙ ཨཱདི. ཝིཏཀྐོཔི དིཊྛིཊྛཱནཾ. ཝུཏྟམྤི ཙེཏཾ ‘‘ཏཀྐཉྩ དིཊྛཱིསུ པཀཔྤཡིཏྭཱ, སཙྩཾ མུསཱཏི དྭཡདྷམྨམཱཧཱུ’’ཏི (སུ. ནི. ༨༩༢; མཧཱནི. ༡༢༡), ‘‘ཏཀྐཱི ཧོཏི ཝཱིམཾསཱི’’ཏི (དཱི. ནི. ༡.༣༤) ཙ ཨཱདི. ཨཡོནིསོམནསིཀཱརོཔི དིཊྛིཊྛཱནཾ. ཏེནཱཧ བྷགཝཱ – ‘‘ཏསྶེཝཾ ཨཡོནིསོ མནསིཀརོཏོ ཚནྣཾ དིཊྛཱིནཾ ཨཉྙཏརཱ དིཊྛི ཨུཔྤཛྫཏི, ཨཏྠི མེ ཨཏྟཱཏི ཏསྶ སཙྩཏོ ཐེཏཏོ དིཊྛི ཨུཔྤཛྫཏཱི’’ཏིཨཱདི (མ. ནི. ༡.༡༩).

ཡཱ དིཊྛཱིཏི ཨིདཱནི ཝུཙྩམཱནཱནཾ ཨཊྛཱརསནྣཾ པདཱནཾ སཱདྷཱརཎཾ མཱུལཔདཾ. དིཊྛིཡེཝ དིཊྛིགཏཾ གཱུཐགཏཾ ཝིཡ, དིཊྛཱིསུ ཝཱ གཏཾ ཨིདཾ དསྶནཾ དྭཱསཊྛིདིཊྛཱིསུ ཨནྟོགདྷཏྟཱཏིཔི དིཊྛིགཏཾ, དིཊྛིཡཱ ཝཱ གཏཾ དིཊྛིགཏཾ. ཨིདཉྷི ‘‘ཨཏྠི མེ ཨཏྟཱ’’ཏིཨཱདི དིཊྛིཡཱ གམནམཏྟམེཝ ¶ , ནཏྠེཏྠ ཨཏྟཱ ཝཱ ནིཙྩོ ཝཱ ཀོཙཱིཏི ཝུཏྟཾ ཧོཏི. སཱ ཙཱཡཾ དིཊྛི དུནྣིགྒམནཊྛེན གཧནཾ. དུརཏིཀྐམཊྛེན སཔྤཊིབྷཡཊྛེན ཙ ཀནྟཱརོ དུབྦྷིཀྑཀནྟཱརཝཱལ༹ཀནྟཱརཱདཡོ ཝིཡ. སམྨཱདིཊྛིཡཱ ཝིནིཝིཛ྄ཛྷནཊྛེན, ཝིལོམནཊྛེན ཝཱ ཝིསཱུཀཾ. ཀདཱཙི སསྶཏསྶ, ཀདཱཙི ཨུཙྪེདསྶ ཝཱ གཧཎཏོ ཝིརཱུཔཾ ཕནྡིཏནྟི ཝིཔྥནྡིཏཾ. བནྡྷནཊྛེན སཾཡོཛནཾ. དིཊྛིཡེཝ ཨནྟོ ཏུདནཊྛེན དུནྣཱིཧརཎཱིཡཊྛེན ཙ སལླནྟི དིཊྛིསལླཾ. དིཊྛིཡེཝ པཱིལཱ༹ཀརཎཊྛེན སམྦཱདྷོཏི དིཊྛིསམྦཱདྷོ. དིཊྛིཡེཝ མོཀྑཱཝརཎཊྛེན པལིབོདྷོཏི དིཊྛིཔལིབོདྷོ. དིཊྛིཡེཝ དུམྨོཙནཱིཡཊྛེན བནྡྷནནྟི དིཊྛིབནྡྷནཾ. དིཊྛིཡེཝ དུརུཏྟརཎཊྛེན པཔཱཏོཏི དིཊྛིཔཔཱཏོ. དིཊྛིཡེཝ ཐཱམགཏཊྛེན ཨནུསཡོཏི དིཊྛཱནུསཡོ. དིཊྛིཡེཝ ཨཏྟཱནཾ སནྟཱཔེཏཱིཏི དིཊྛིསནྟཱཔོ. དིཊྛིཡེཝ ཨཏྟཱནཾ ཨནུདཧཏཱིཏི དིཊྛིཔརིལཱ༹ཧོ. དིཊྛིཡེཝ ཀིལེསཀཱཡཾ གནྠེཏཱིཏི དིཊྛིགནྠོ. དིཊྛིཡེཝ བྷུསཾ ཨཱདིཡཏཱིཏི དིཊྛུཔཱདཱནཾ. དིཊྛིཡེཝ ‘‘སཙྩ’’ནྟིཨཱདིཝསེན ཨབྷིནིཝིསཏཱིཏི དིཊྛཱབྷིནིཝེསོ. དིཊྛིཡེཝ ‘‘ཨིདཾ པར’’ནྟི ཨཱམསཏི, པརཏོ ཝཱ ཨཱམསཏཱིཏི དིཊྛིཔརཱམཱསོ, སམུཊྛཱཏི ཨེཏེནཱཏི སམུཊྛཱནཾ, ཀཱརཎཾ. སམུཊྛཱནསྶ བྷཱཝོ སམུཊྛཱནཊྛོ, ཏེན སམུཊྛཱནཊྛེན, ཀཱརཎབྷཱཝེནཱཏི ཨཏྠོ. སཏྟམཊྛམེསུ ནཏྠི ཝཏྟབྦཾ.

ཀོཀནུདསུཏྟཱདིཝཎྞནཱ ནིཊྛིཏཱ.

༩-༡༠. ཨུཔཱལིསུཏྟཱདིཝཎྞནཱ

༩༩-༡༠༠. ནཝམེ ¶ ཨཛ྄ཛྷོགཱཧེཏྭཱ ཨདྷིཔྤེཏམཏྠཾ སམྦྷཝིཏུཾ སཱདྷེཏུཾ དུཀྑཱནི དུརབྷིསམྦྷཝཱནི. ཨཊྛཀཐཱཡཾ པན ཏཏྠ ནིཝཱསོཡེཝ དུཀྑོཏི དསྶེཏུཾ ‘‘སམྦྷཝིཏུཾ དུཀྑཱནི དུསྶཧཱནཱི’’ཏི ཝུཏྟཾ. ཨརཉྙཝནཔཏྠཱནཱིཏི ཨརཉྙལཀྑཎཔྤཏྟཱནི ཝནསཎྜཱནི. ཝནཔཏྠསདྡོ ཧི སཎྜབྷཱུཏེ རུཀྑསམཱུཧེཔི ཝཏྟཏཱིཏི ཨརཉྙགྒཧཎཾ. པཝིཝེཀནྟི པཀཱརཏོ, པཀཱརེཧི ཝཱ ཝིཝེཙནཾ, རཱུཔཱདིཔུཐུཏྟཱརམྨཎེ པཀཱརཏོ གམནཱདིཨིརིཡཱཔཐཔྤཀཱརེཧི ཨཏྟནོ ཀཱཡསྶ ཝིཝེཙནཾ, གཙྪཏོཔི ཏིཊྛཏོཔི ནིསཛྫཏོཔི ནིཔཛྫཏོཔི ཨེཀསྶེཝ པཝཏྟི. ཏེནེཝ ཧི ཝིཝེཙེཏབྦཱནཾ ཝིཝེཙནཱཀཱརསྶ ཙ བྷེདཏོ བཧུཝིདྷཏྟཱ ཏེ ཨེཀཏྟེན གཧེཏྭཱ ‘‘པཝིཝེཀ’’ནྟི ཨེཀཝཙནེན ཝུཏྟཾ. དུཀྐརཾ པཝིཝེཀནྟི ཝཱ པཝིཝེཀཾ ཀཏྟུཾ ན སུཁནྟི ཨཏྠོ. ཨེཀཱིབྷཱཝེཏི ཨེཀཏྟབྷཱཝེ. དྭཡཾདྭཡཱརཱམོཏི དྭིནྣཾ དྭིནྣཾ བྷཱཝཱབྷིརཏོ. ཧརནྟི ཝིཡཱཏི སཾཧརནྟི ཝིཡ ཝིགྷཱཏུཔྤཱདནེན. ཏེནཱཧ ‘‘གྷསནྟི ཝིཡཱ’’ཏི. བྷཡསནྟཱསུཔྤཱདནེན ཁཱདིཏུཾ ཨཱགཏཱ ཡཀྑརཀྑསཔིསཱཙཱདཡོ ཝིཡཱཏི ཨདྷིཔྤཱཡོ. ཨཱིདིསསྶཱཏི ཨལདྡྷསམཱདྷིནོ. ཏིཎཔཎྞམིགཱདིསདྡེཧཱིཏི ཝཱཏེརིཏཱནཾ ཏིཎཔཎྞཱདཱིནཾ མིགཔཀྑིཨཱདཱིནཉྩ བྷཱིསནཀེཧི བྷེརཝེཧི སདྡེཧི. ཝིཝིདྷེཧི ཙ ཨཉྙེཧི ཁཱཎུཨཱདཱིཧི ¶ ཡཀྑཱདིཨཱཀཱརེཧི ཨུཔཊྛིཏེཧི བྷཱིསནཀེཧི. གྷཊེན ཀཱིལཱ༹ གྷཊིཀཱཏི ཨེཀེ. དསམཾ ཨུཏྟཱནམེཝ.

ཨུཔཱལིསུཏྟཱདིཝཎྞནཱ ནིཊྛིཏཱ.

ཨུཔཱལིཝགྒཝཎྞནཱ ནིཊྛིཏཱ.

དུཏིཡཔཎྞཱསཀཾ ནིཊྛིཏཾ.

༣. ཏཏིཡཔཎྞཱསཀཾ

(༡༡) ༡. སམཎསཉྙཱཝགྒོ

༡-༡༢. སམཎསཉྙཱསུཏྟཱདིཝཎྞནཱ

༡༠༡-༡༡༢. ཏཏིཡསྶ ¶ ¶ པཋམཱདཱིནི ཨུཏྟཱནཱནི. ཚཊྛེ ནིཛྫརཀཱརཎཱནཱིཏི པཛཧནཀཱརཎཱནི. ཨིམསྨིཾ མགྒོ ཀཐཱིཡཏཱིཏི ཀཏྭཱ ‘‘ཨཡཾ ཧེཊྛཱ…པེ… པུན གཧིཏཱ’’ཏི ཝུཏྟཾ. ཀིཉྩཱཔི ནིཛྫིཎྞཱ མིཙྪཱདིཊྛཱིཏི ཨཱནེཏྭཱ སམྦནྡྷིཏབྦཾ. ཡཐཱ མིཙྪཱདིཊྛི ཝིཔསྶནཱཡ ནིཛྫིཎྞཱཔི ན སམུཙྪིནྣཱཏི སམུཙྪེདཔྤཧཱནདསྶནཏྠཾ པུན གཧིཏཱ, ཨེཝཾ མིཙྪཱསངྐཔྤཱདཡོཔི ཝིཔསྶནཱཡ པཧཱིནཱཔི ཨསམུཙྪིནྣཏཱཡ ཨིདྷ པུན གཧིཏཱཏི ཨཡམཏྠོ ‘‘མིཙྪཱསངྐཔྤསྶཱ’’ཏིཨཱདཱིསུ སབྦཔདེསུ ཝཏྟབྦོཏི དསྶེཏི ‘‘ཨེཝཾ སབྦཔདེསུ ཡོཛེཏབྦོ’’ཏི ཨིམིནཱ. ཨེཏྠ ཙཱཏི ‘‘སམྨཱཝིམུཏྟིཔཙྩཡཱ ཙ ཨནེཀེ ཀུསལཱ དྷམྨཱ བྷཱཝནཱཔཱརིཔཱུརིཾ གཙྪནྟཱི’’ཏི ཨེཏསྨིཾ པཱལི༹པདེ. ཨེཏྠ ཙ སམུཙྪེདཝསེན ཙ པཊིཔྤསྶདྡྷིཝསེན ཙ པཊིཔཀྑདྷམྨཱནཾ སམྨདེཝ ཝིམུཙྩནཾ སམྨཱཝིམུཏྟི. ཏཔྤཙྩཡཱ ཙ མགྒཕལེསུ ཨཊྛ ཨིནྡྲིཡཱནི བྷཱཝནཱཔཱརིཔཱུརིཾ ཨུཔགཙྪནྟཱིཏི མགྒསམྤཡུཏྟཱནིཔི སདྡྷཱདཱིནི ཨིནྡྲིཡཱནི ཨུདྡྷཊཱནི. མགྒཝསེན ཧི ཕལེསུ བྷཱཝནཱཔཱརིཔཱུརཱི ནཱམཱཏི. ཨབྷིནནྡནཊྛེནཱཏི ཨཏིཝིཡ སིནེཧནཊྛེན. ཨིདཉྷི སོམནསྶིནྡྲིཡཾ ཨུཀྐཾསགཏསཱཏསབྷཱཝཏོ སམྤཡུཏྟདྷམྨེ སིནེཧནྟཾ ཏེམེནྟཾ ཝིཡ པཝཏྟཏི. པཝཏྟསནྟཏིཨཱདྷིཔཏེཡྻཊྛེནཱཏི ཝིཔཱཀསནྟཱནསྶ ཛཱིཝནེ ཨདྷིཔཏིབྷཱཝེན. ཨེཝནྟིཨཱདི ཝུཏྟསྶེཝ ཨཏྠསྶ ནིགམནཾ. སཏྟམཱདཱིནི ཨུཏྟཱནཏྠཱནི.

སམཎསཉྙཱསུཏྟཱདིཝཎྞནཱ ནིཊྛིཏཱ.

སམཎསཉྙཱཝགྒཝཎྞནཱ ནིཊྛིཏཱ.

(༡༢) ༢. པཙྩོརོཧཎིཝགྒོ

༡-༤. པཋམཨདྷམྨསུཏྟཱདིཝཎྞནཱ

༡༡༣-༦. དུཏིཡསྶ ¶ པཋམདུཏིཡཱནི ཨུཏྟཱནཏྠཱནི. ཏཏིཡེ ཛཱནཾ ཛཱནཱཏཱིཏི སབྦཉྙུཏཉྙཱཎེན ཛཱནིཏབྦཾ སབྦཾ ཛཱནཱཏི ཨེཝ. ན ཧི པདེསཉཱཎེ ¶ ཋིཏོ ཛཱནིཏབྦཾ སབྦཾ ཛཱནཱཏི. ཨུཀྐཊྛནིདྡེསེན ཧི ཨཝིསེསགྒཧཎེན ཙ ‘‘ཛཱན’’ནྟི ཨིམིནཱ ནིརཝསེསཾ ཉེཡྻཛཱཏཾ པརིགྒཡ྄ཧཏཱིཏི ཏབྦིསཡཱཡ ཛཱནནཀིརིཡཱཡ སབྦཉྙུཏཉྙཱཎམེཝ ཀརཎཾ བྷཝིཏུཾ ཡུཏྟཾ, པཀརཎཝསེན ‘‘བྷགཝཱ’’ཏི སདྡནྟརསནྣིདྷཱནེན ཙ ཨཡམཏྠོ ཝིབྷཱཝེཏབྦོ. པསྶིཏབྦམེཝ པསྶཏཱིཏི དིབྦཙཀྑུཔཉྙཱཙཀྑུདྷམྨཙཀྑུབུདྡྷཙཀྑུསམནྟཙཀྑུསངྑཱཏེཧི ཉཱཎཙཀྑཱུཧི པསྶིཏབྦཾ པསྶཏི ཨེཝ. ཨཐ ཝཱ ཛཱནཾ ཛཱནཱཏཱིཏི ཡཐཱ ཨཉྙེ སཝིཔལླཱསཱ ཀཱམརཱུཔཔརིཉྙཱཝཱདིནོ ཛཱནནྟཱཔི ཝིཔལླཱསཝསེན ཛཱནནྟི, ན ཨེཝཾ བྷགཝཱ. བྷགཝཱ པན པཧཱིནཝིཔལླཱསཏྟཱ ཛཱནནྟོ ཛཱནཱཏི ཨེཝ, དིཊྛིདསྶནསྶ ཨབྷཱཝཱ པསྶནྟོ པསྶཏིཡེཝཱཏི ཨཏྠོ. ཙཀྑུ ཝིཡ བྷཱུཏོཏི དསྶནཔརིཎཱཡཀཊྛེན ཙཀྑུ ཝིཡ བྷཱུཏོ. ཡཐཱ ཧི ཙཀྑུ སཏྟཱནཾ དསྶནཏྠཾ པརིཎེཏི སཱདྷེཏི, ཨེཝཾ ལོཀསྶ ཡཱཐཱཝདསྶནསཱདྷནཏོཔི དསྶནཀིཙྩཔརིཎཱཡཀཊྛེན ཙཀྑུ ཝིཡ བྷཱུཏོ, པཉྙཱཙཀྑུམཡཏྟཱ ཝཱ སཡམྦྷུཉཱཎེན པཉྙཱཙཀྑུཾ བྷཱུཏོ པཏྟོཏི ཝཱ ཙཀྑུབྷཱུཏོ.

ཉཱཎསབྷཱཝོཏི ཝིདིཏཀརཎཊྛེན ཉཱཎསབྷཱཝོ. ཨཝིཔརཱིཏསབྷཱཝཊྛེན པརིཡཏྟིདྷམྨཔྤཝཏྟནཏོ ཝཱ ཧདཡེན ཙིནྟེཏྭཱ ཝཱཙཱཡ ནིཙྪཱརིཏདྷམྨམཡོཏི དྷམྨབྷཱུཏོ. ཏེནཱཧ ‘‘དྷམྨསབྷཱཝོ’’ཏི. དྷམྨཱ ཝཱ བོདྷིཔཀྑིཡཱ ཏེཧི ཨུཔྤནྣཏྟཱ ལོཀསྶ ཙ ཏདུཔྤཱདནཏོ, ཨནཉྙསཱདྷཱརཎཾ ཝཱ དྷམྨཾ པཏྟོ ཨདྷིགཏོཏི དྷམྨབྷཱུཏོ. སེཊྛཊྛེན བྲཧྨབྷཱུཏོཏི ཨཱཧ ‘‘སེཊྛསབྷཱཝོ’’ཏི. ཨཐ ཝཱ བྲཧྨཱ ཝུཙྩཏི མགྒོ, ཏེན ཨུཔྤནྣཏྟཱ ལོཀསྶ ཙ ཏདུཔྤཱདནཏོ, ཏཉྩ སཡམྦྷུཉཱཎེན པཏྟོཏི བྲཧྨབྷཱུཏོ. ཙཏུསཙྩདྷམྨཾ ཝདཏཱིཏི ཝཏྟཱ. ཙིརཾ སཙྩཔྤཊིཝེདྷཾ པཝཏྟེནྟོ ཝདཏཱིཏི པཝཏྟཱ. ཨཏྠཾ ནཱིཧརིཏྭཱཏི དུཀྑཱདིཨཏྠཾ ཏཏྠཱཔི པཱིལ༹ནཱདིཨཏྠཾ ཨུདྡྷརིཏྭཱ. པརམཏྠཾ ཝཱ ནིབྦཱནཾ པཱཔཡིཏཱ ནིནྣེཏཱ. ཨམཏཱདྷིགམཔཊིཔཏྟིདེསནཱཡ ཨམཏསཙྪིཀིརིཡཾ སཏྟེསུ ཨུཔྤཱདེནྟོ ཨམཏཾ དདཱཏཱིཏི ཨམཏསྶ དཱཏཱ. བོདྷིཔཀྑིཡདྷམྨཱནཾ ཏདཱཡཏྟབྷཱཝཏོ དྷམྨསཱམཱི. ཙཏུཏྠེ ནཏྠི ཝཏྟབྦཾ.

པཋམཨདྷམྨསུཏྟཱདིཝཎྞནཱ ནིཊྛིཏཱ.

༥-༤༢. སངྒཱརཝསུཏྟཱདིཝཎྞནཱ

༡༡༧-༡༥༤. པཉྩམེ ¶ ¶ ཨཔྤཀཱཏི ཐོཀཱ, ན བཧཱུ. ཨཐཱཡཾ ཨིཏརཱ པཛཱཏི ཡཱ པནཱཡཾ ཨཝསེསཱ པཛཱ སཀྐཱཡདིཊྛིཏཱིརམེཝ ཨནུདྷཱཝཏི, ཨཡམེཝ བཧུཏརཱཏི ཨཏྠོ. སམྨདཀྑཱཏེཏི སམྨཱ ཨཀྑཱཏེ སུཀཐིཏེ. དྷམྨེཏི ཏཝ དེསནཱདྷམྨེ. དྷམྨཱནུཝཏྟིནོཏི ཏཾ དྷམྨཾ སུཏྭཱ ཏདནུཙྪཝིཀཾ པཊིཔདཾ པཱུརེཏྭཱ མགྒཕལསཙྪིཀརཎེན དྷམྨཱནུཝཏྟིནོ. མཙྩུནོ ཋཱནབྷཱུཏནྟི ཀིལེསམཱརསངྑཱཏསྶ མཙྩུནོ ནིཝཱསཊྛཱནབྷཱུཏཾ. སུདུཏྟརཾ ཏརིཏྭཱ པཱརམེསྶནྟཱིཏི ཡེ ཛནཱ དྷམྨཱནུཝཏྟིནོ, ཏེ ཨེཏཾ སུདུཏྟརཾ དུརཏིཀྐམཾ མཱརདྷེཡྻཾ ཏརིཏྭཱ ཨཏིཀྐམིཏྭཱ ནིབྦཱནཔཱརཾ གམིསྶནྟི.

ཀཎྷཾ དྷམྨཾ ཝིཔྤཧཱཡཱཏི ཀཱཡདུཙྩརིཏཱདིབྷེདཾ ཨཀུསལཾ དྷམྨཾ ཛཧིཏྭཱ. སུཀྐཾ བྷཱཝེཐཱཏི པཎྜིཏོ བྷིཀྑུ ཨབྷིནིཀྑམནཏོ པཊྛཱཡ ཡཱཝ ཨརཧཏྟམགྒཱ ཀཱཡསུཙརིཏཱདིབྷེདཾ སུཀྐཾ དྷམྨཾ བྷཱཝེཡྻ. ཨོཀཱ ཨནོཀམཱགམྨཱཏི ཨོཀཾ ཝུཙྩཏི ཨཱལཡོ, ཨནོཀཾ ཝུཙྩཏི ཨནཱལཡོ. ཨཱལཡཏོ ནིཀྑམིཏྭཱ ཨནཱལཡསངྑཱཏཾ ནིབྦཱནཾ པཊིཙྩ ཨཱརབྦྷ.

ཏཏྲཱབྷིརཏིམིཙྪེཡྻཱཏི ཡསྨིཾ ཨནཱལཡསངྑཱཏེ ཝིཝེཀེ ནིབྦཱནེ ཨིམེཧི སཏྟེཧི དུརབྷིརམཾ, ཏཏྲཱབྷིརཏིམིཙྪེཡྻ. དུཝིདྷེཔི ཀཱམེཏི ཝཏྠུཀཱམཀིལེསཀཱམེ. ཙིཏྟཀླེསེཧཱིཏི པཉྩཧི ནཱིཝརཎེཧི ཨཏྟཱནཾ པརིཡོདཔེཡྻ ཝོདཱཔེཡྻ, པརིསོདྷེཡྻཱཏི ཨཏྠོ.

སམྦོདྷིཡངྒེསཱུཏི སམྦོཛ྄ཛྷངྒེསུ. སམྨཱ ཙིཏྟཾ སུབྷཱཝིཏནྟི སམྨཱ ཧེཏུནཱ ནཡེན ཙིཏྟཾ སུཊྛུ བྷཱཝིཏཾ ཝཌྜྷིཏཾ. ཛུཏིམནྟོཏི ཨཱནུབྷཱཝཝནྟོ, ཨརཧཏྟམགྒཉཱཎཛུཏིཡཱ ཁནྡྷཱདིབྷེདེ དྷམྨེ ཛོཏེཏྭཱ ཋིཏཱཏི ཨཏྠོ. ཏེ ལོཀེ པརིནིབྦུཏཱཏི ཏེ ཨིམསྨིཾ ཁནྡྷཱདིལོཀེ པརིནིབྦུཏཱ ནཱམ ཨརཧཏྟཔྤཏྟིཏོ པཊྛཱཡ ཀིལེསཝཊྚསྶ ཁེཔིཏཏྟཱ སཨུཔཱདིསེསེན, ཙརིམཙིཏྟནིརོདྷེན ཁནྡྷཝཊྚསྶ ཁེཔིཏཏྟཱ ཨནུཔཱདིསེསེན ཙཱཏི དྭཱིཧི པརིནིབྦཱནེཧི པརིནིབྦུཏཱ, ཨནུཔཱདཱནོ ཝིཡ པདཱིཔོ ཨཔཎྞཏྟིཀབྷཱཝཾ གཏཱཏི ཨཏྠོ.

ཨིཏོ པརཾ ཡཱཝ ཏཏིཡོ པཎྞཱསཀོ, ཏཱཝ ཨུཏྟཱནཏྠམེཝ.

སངྒཱརཝསུཏྟཱདིཝཎྞནཱ ནིཊྛིཏཱ.

ཏཏིཡཔཎྞཱསཀཾ ནིཊྛིཏཾ.

༤. ཙཏུཏྠཔཎྞཱསཀཾ

༡༥༥-༡༦༦. ཙཏུཏྠསྶ ¶ ¶ པཋམཝགྒོ ཨུཏྟཱནཏྠོཡེཝ.

༡-༤༤. བྲཱཧྨཎཔཙྩོརོཧཎཱིསུཏྟཱདིཝཎྞནཱ

༡༦༧-༢༡༠. དུཏིཡེ ཙ པཋམཱདཱིནི ཨུཏྟཱནཏྠཱནི. དསམེ པཙྪཱབྷཱུམིཝཱསིནོཏི པཙྩནྟདེསཝཱསིནོ. སེཝཱལམཱལིཀཱཏི པཱཏོཝ ཨུདཀཾ ཨོརོཧིཏྭཱ སེཝཱལཉྩེཝ ཨུཔྤལཱདཱིནི ཙ གཧེཏྭཱ ཨཏྟནོ ཨུདཀསུདྡྷིཀབྷཱཝཛཱནནཏྠཉྩེཝ ‘‘ལོཀསྶ ཙ ཨུདཀེན སུདྡྷི ཧོཏཱི’’ཏི ཨིམསྶ ཨཏྠསྶ ཛཱནནཏྠཉྩ མཱལཾ ཀཏྭཱ པིལནྡྷནཀཱ. ཨུདཀོརོཧཀཱཏི པཱཏོ མཛ྄ཛྷནྷེ སཱཡནྷེ ཙ ཨུདཀཨོརོཧཎཀཱ. ཏེནཱཧ ‘‘སཱཡཏཏིཡཀཾ ཨུདཀོརོཧཎཱནུཡོགམནུཡུཏྟཱ’’ཏི. ཨེཀཱདསམཱདཱིནི ཨུཏྟཱནཏྠཱནི. ཙཏུཏྠེ པཎྞཱསཀེ ནཏྠི ཝཏྟབྦཾ.

བྲཱཧྨཎཔཙྩོརོཧཎཱིསུཏྟཱདིཝཎྞནཱ ནིཊྛིཏཱ.

ཙཏུཏྠཔཎྞཱསཀཾ ནིཊྛིཏཾ.

(༢༡) ༡. ཀརཛཀཱཡཝགྒོ

༡-༥༣༦. པཋམནིརཡསགྒསུཏྟཱདིཝཎྞནཱ

༢༡༡-༧༤༦. པཉྩམསྶ པཋམཱདཱིནི ཨུཏྟཱནཏྠཱནི. ནཝམེ ཡསྨིཾ སནྟཱནེ ཀཱམཱཝཙརཀམྨཾ མཧགྒཏཀམྨཉྩ ཀཏཱུཔཙིཏཾ ཝིཔཱཀདཱནེ ལདྡྷཱཝསརཾ ཧུཏྭཱ ཋིཏཾ, ཏེསུ ཀཱམཱཝཙརཀམྨཾ ཨིཏརཾ ནཱིཧརིཏྭཱ སཡཾ ཏཏྠ ཋཏྭཱ ཨཏྟནོ ཝིཔཱཀཾ དཱཏུཾ ན སཀྐོཏི, མཧགྒཏཀམྨམེཝ ¶ པན ཨིཏརཾ པཊིབཱཧིཏྭཱ ཨཏྟནོ ཝིཔཱཀཾ དཱཏུཾ སཀྐོཏི གརུབྷཱཝཏོ. ཏེནཱཧ ‘‘ཏཾ མཧོགྷོ པརིཏྟཾ ཨུདཀཾ ཝིཡཱ’’ཏིཨཱདི. ཨིཏོ པརཾ སབྦཏྠ ཨུཏྟཱནམེཝ.

པཋམནིརཡསགྒསུཏྟཱདིཝཎྞནཱ ནིཊྛིཏཱ.

ཨིཏི མནོརཐཔཱུརཎིཡཱ ཨངྒུཏྟརནིཀཱཡ-ཨཊྛཀཐཱཡ

དསཀནིཔཱཏཝཎྞནཱཡ ཨནུཏྟཱནཏྠདཱིཔནཱ སམཏྟཱ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ.

ཨངྒུཏྟརནིཀཱཡེ

ཨེཀཱདསཀནིཔཱཏ-ཊཱིཀཱ

༡. ནིསྶཡཝགྒོ

༡-༡༠. ཀིམཏྠིཡསུཏྟཱདིཝཎྞནཱ

༡-༡༠. ཨེཀཱདསཀནིཔཱཏསྶ ¶ ¶ པཋམཱདཱིནི ཨུཏྟཱནཏྠཱནེཝ. དསམེ ཛནིཏསྨིནྟི ཀམྨཀིལེསེཧི ནིབྦཏྟེ, ཛནེ ཨེཏསྨིནྟི ཝཱ ཛནེཏསྨིཾ, མནུསྶེསཱུཏི ཨཏྠོ. ཏེནཱཧ ‘‘ཡེ གོཏྟཔཊིསཱརིནོ’’ཏི. ཛནིཏསྨིཾ-སདྡོ ཨེཝ ཝཱ ཨི-ཀཱརསྶ ཨེ-ཀཱརཾ ཀཏྭཱ ‘‘ཛནེཏསྨི’’ནྟི ཝུཏྟོ. ཛནིཏསྨིནྟི ཙ ཛནསྨིནྟི ཨཏྠོ ཝེདིཏབྦོ. ཛནིཏསྨིནྟི སཱམཉྙགྒཧཎེཔི ཡཏྠ ཙཏུཝཎྞསམཉྙཱ, ཏཏྠེཝ མནུསྶལོཀེ. ཁཏྟིཡོ སེཊྛོཏི ཨཡཾ ལོཀསམཉྙཱཔི མནུསྶལོཀེཡེཝ, ན དེཝཀཱཡེ བྲཧྨཀཱཡེ ཝཱཏི དསྶེཏུཾ ‘‘ཡེ གོཏྟཔཊིསཱརིནོ’’ཏི ཝུཏྟཾ. པཊིསརནྟཱིཏི ‘‘ཨཧཾ གོཏམོ, ཨཧཾ ཀསྶཔོ’’ཏི པཊི པཊི ཨཏྟནོ གོཏྟཾ ཨནུསྶརནྟི པཊིཛཱནནྟི ཝཱཏི ཨཏྠོ.

ཀིམཏྠིཡསུཏྟཱདིཝཎྞནཱ ནིཊྛིཏཱ.

ནིསྶཡཝགྒཝཎྞནཱ ནིཊྛིཏཱ.

༢. ཨནུསྶཏིཝགྒོ

༡-༤. པཋམམཧཱནཱམསུཏྟཱདིཝཎྞནཱ

༡༡-༡༤. དུཏིཡསྶ ¶ པཋམཱདཱིནི ཨུཏྟཱནཏྠཱནི. ཏཏིཡེ ཀབལཱི༹ཀཱརཱཧཱརབྷཀྑཱནནྟི ཀབལཱི༹ཀཱརཱཧཱརཱུཔཛཱིཝཱིནཾ. ཀོ པན དེཝཱནཾ ཨཱཧཱརོ, ཀཱ ཨཱཧཱརཝེལཱཏི? སབྦེསམྤི ཀཱམཱཝཙརདེཝཱནཾ སུདྷཱ ཨཱཧཱརོ. སཱ ཧེཊྛིམེཧི ཧེཊྛིམེཧི ཨུཔརིམཱནཾ ཨུཔརིམཱནཾ པཎཱིཏཏམཱ ཧོཏི, ཏཾ ཡཐཱསཀཾ དིཝསཝསེནེཝ དིཝསེ དིཝསེ བྷུཉྫནྟི. ཀེཙི པན ‘‘བིལཱ༹རཔདཔྤམཱཎཾ སུདྷཱཧཱརཾ བྷུཉྫནྟི, སོ ཛིཝ྄ཧཱཡ ཋཔིཏམཏྟོ ཡཱཝ ཀེསགྒནཁགྒཱ ཀཱཡཾ ཕརཏི, ཏེསཾཡེཝ དིཝསཝསེན ¶ སཏྟ དིཝསེ ཡཱཔནསམཏྠོ ཧོཏཱི’’ཏི ཝདནྟི. ཨསམཡཝིམུཏྟིཡཱ ཝིམུཏྟོཏི མགྒཝིམོཀྑེན ཝིམུཏྟོ. ཨཊྛནྣཉྷི སམཱཔཏྟཱིནཾ སམཱཔཛྫནསྶ སམཡོཔི ཨཏྠི ཏསྶ ཨསམཡོཔི, མགྒཝིམོཀྑེན པན ཝིམུཙྩནསྶ སམཡོ ཝཱ ཨསམཡོ ཝཱ ནཏྠི. ཡསྶ སདྡྷཱ བལཝཏཱི, ཝིཔསྶནཱ ཙ ཨཱརདྡྷཱ, ཏསྶ གཙྪནྟསྶ ཏིཊྛནྟསྶ ནིསཱིདནྟསྶ ནིཔཛྫནྟསྶ ཁཱདནྟསྶ བྷུཉྫནྟསྶ ཙ མགྒཕལཔྤཊིཝེདྷོ ནཱམ ན ཧོཏཱིཏི ན ཝཏྟབྦཾ. ཨིཏི མགྒཝིམོཀྑེན ཝིམུཙྩནྟསྶ སམཡོ ཝཱ ཨསམཡོ ཝཱ ནཏྠཱིཏི མགྒཝིམོཀྑོ ཨསམཡཝིམུཏྟི ནཱམ. ཙཏུཏྠེ ནཏྠི ཝཏྟབྦཾ.

པཋམམཧཱནཱམསུཏྟཱདིཝཎྞནཱ ནིཊྛིཏཱ.

༥. མེཏྟཱསུཏྟཝཎྞནཱ

༡༥. པཉྩམེ སེསཛནཱཏི མེཏྟཱཡ ཙེཏོཝིམུཏྟིཡཱ ཨལཱབྷིནོ. སམྤརིཝཏྟམཱནཱཏི དཀྑིཎེནེཝ པསྶེན ཨསཡིཏྭཱ སབྦསོ པརིཝཏྟམཱནཱ. ཀཱཀཙྪམཱནཱཏི གྷུརུགྷུརུཔསྶཱསཝསེན ཝིསྶརཾ ཀརོནྟཱ. སུཁཾ སུཔཏཱིཏི ཨེཏྠ དུཝིདྷཱ སུཔནཱ སཡནེ པིཊྛིཔྤསཱརཎལཀྑཎཱ ཀིརིཡཱམཡཙིཏྟེཧི ཨཝོཀིཎྞབྷཝངྒཔྤཝཏྟིལཀྑཎཱ ཙ. ཏཏྠཱཡཾ ཨུབྷཡཏྠཱཔི སུཁམེཝ སུཔཏི. ཡསྨཱ སཎིཀཾ ནིཔཛྫིཏྭཱ ཨངྒཔཙྩངྒཱནི སམོདྷཱཡ པཱསཱདིཀེན ཨཱཀཱརེན སཡཏི, ནིདྡོཀྐམནེཔི ཛྷཱནཾ སམཱཔནྣོ ཝིཡ ཧོཏི. ཏེནཱཧ ‘‘ཨེཝཾ ཨསུཔིཏྭཱ’’ཏིཨཱདི.

ནིདྡཱཀཱལེ སུཁཾ ཨལབྷིཏྭཱ དུཀྑེན སུཏྟཏྟཱ ཨེཝ པཊིབུཛ྄ཛྷནཀཱལེ སརཱིརཁེདེན ནིཏྠུནནཾ ¶ ཝིཛམྦྷནཾ ཨིཏོ ཙིཏོ ཙ ཝིཔརིཝཏྟནཉྩ ཧོཏཱིཏི ཨཱཧ ‘‘ནིཏྠུནནྟཱ ཝིཛམྦྷནྟཱ སམྤརིཝཏྟནྟཱ དུཀྑཾ པཊིབུཛ྄ཛྷནྟཱི’’ཏི. ཨཡཾ པན སུཁེན སུཏྟཏྟཱ སརཱིརཁེདཱབྷཱཝཏོ ནིཏྠུནནཱདིཝིརཧིཏོཝ པཊིབུཛ྄ཛྷཏི. ཏེན ཝུཏྟཾ ‘‘ཨེཝཾ ཨཔྤཊིབུཛ྄ཛྷིཏྭཱ’’ཏིཨཱདི. སུཁཔྤཊིབོདྷོ ཙ སརཱིརཝིཀཱརཱབྷཱཝེནཱཏི ཨཱཧ ‘‘སུཁཾ ནིབྦིཀཱར’’ནྟི.

བྷདྡཀམེཝ སུཔིནཾ པསྶཏཱིཏི ཨིདཾ ཨནུབྷཱུཏཔུབྦཝསེན དེཝཏཱུཔསཾཧཱརཝསེན ཙསྶ བྷདྡཀམེཝ སུཔིནཾ ཧོཏི, ན པཱཔཀནྟི ཀཏྭཱ ཝུཏྟཾ. ཏེནཱཧ ‘‘ཙེཏིཡཾ ཝནྡནྟོ ཝིཡཱ’’ཏིཨཱདི. དྷཱཏུཀྑོབྷཧེཏུཀམྤི ཙསྶ བཧུལཾ བྷདྡཀམེཝ སིཡཱ ཡེབྷུཡྻེན ཙིཏྟཛརཱུཔཱནུགུཎཏཱཡ ཨུཏུཨཱཧཱརཛརཱུཔཱནཾ.

ཨུརེ ¶ ཨཱམུཀྐམུཏྟཱཧཱརོ ཝིཡཱཏི གཱིཝཱཡ བནྡྷིཏྭཱ ཨུརེ ལམྦིཏམུཏྟཱཧཱརོ ཝིཡཱཏི ཀེཧིཙི ཏཾ ཨེཀཱཝལིཝསེན ཝུཏྟཾ སིཡཱ, ཨནེཀརཏནཱཝལིསམཱུཧབྷཱུཏོ པན མུཏྟཱཧཱརོ ཨཾསཔྤདེསཏོ པཊྛཱཡ ཡཱཝ ཀཊིཔྤདེསསྶ ཧེཊྛཱབྷཱགཱ པལམྦནྟོ ཨུརེ ཨཱམུཀྐོཡེཝ ནཱམ ཧོཏི.

ཝིསཱཁཏྠེརོ ཝིཡཱཏི (ཝིསུདྡྷི. ༡.༢༥༨) སོ ཀིར པཱཊལིཔུཏྟེ ཀུཊུམྦིཡོ ཨཧོསི. སོ ཏཏྠེཝ ཝསམཱནོ ཨསྶོསི ‘‘ཏམྦཔཎྞིདཱིཔོ ཀིར ཙེཏིཡམཱལཱལངྐཏོ ཀཱསཱཝཔཛྫོཏོ, ཨིཙྪིཏིཙྪིཏཊྛཱནེཡེཝེཏྠ སཀྐཱ ནིསཱིདིཏུཾ ཝཱ ནིཔཛྫིཏུཾ ཝཱ, ཨུཏུསཔྤཱཡཾ སེནཱསནསཔྤཱཡཾ པུགྒལསཔྤཱཡཾ དྷམྨསྶཝནསཔྤཱཡནྟི སབྦམེཏྠ སུལབྷ’’ནྟི. སོ ཨཏྟནོ བྷོགཀྑནྡྷཾ པུཏྟདཱརསྶ ནིཡྻཱཏེཏྭཱ དུསྶནྟེ བདྡྷེན ཨེཀཀཧཱཔཎེནེཝ གྷརཱ ནིཀྑམིཏྭཱ སམུདྡཏཱིརེ ནཱཝཾ ཨུདིཀྑམཱནོ ཨེཀཾ མཱསཾ ཝསི. སོ ཝོཧཱརཀུསལཏཱཡ ཨིམསྨིཾ ཋཱནེ བྷཎྜཾ ཀིཎིཏྭཱ ཨསུཀསྨིཾ ཝིཀྐིཎནྟོ དྷམྨིཀཱཡ ཝཎིཛྫཱཡ ཏེནེཝནྟརམཱསེན སཧསྶཾ ཨབྷིསཾཧརི. ཨིཏི ཨནུཔུབྦེན མཧཱཝིཧཱརཾ གནྟྭཱ པབྦཛྫཾ ཡཱཙཏི. སོ པབྦཱཛནཏྠཱཡ སཱིམཾ ནཱིཏོ ཏཾ སཧསྶཏྠཝིཀཾ ཨོཝཊྚིཀནྟརེན བྷཱུམིཡཾ པཱཏེསི. ‘‘ཀིམེཏ’’ནྟི ཙ ཝུཏྟེ ‘‘ཀཧཱཔཎསཧསྶཾ, བྷནྟེ’’ཏི ཝཏྭཱ, ‘‘ཨུཔཱསཀ, པབྦཛིཏཀཱལཏོ པཊྛཱཡ ན སཀྐཱ ཝིཙཱརེཏུཾ, ཨིདཱནེཝ ནཾ ཝིཙཱརེཧཱི’’ཏི ཝུཏྟེ ‘‘ཝིསཱཁསྶ པབྦཛྫཊྛཱནཾ ཨཱགཏཱ མཱ རིཏྟཧཏྠཱ གམིཾསཱུ’’ཏི མུཉྩིཏྭཱ སཱིམཱམཱལ༹ཀེ ཝིཀྐིརིཏྭཱ པབྦཛིཏྭཱ ཨུཔསམྤནྣོ. སོ པཉྩཝསྶོ ཧུཏྭཱ དྭེམཱཏིཀཱ པགུཎཱ ཀཏྭཱ ཨཏྟནོ སཔྤཱཡཾ ཀམྨཊྛཱནཾ གཧེཏྭཱ ཨེཀེཀསྨིཾ ཝིཧཱརེ ཙཏྟཱརོ ཙཏྟཱརོ མཱསེ སམཔཝཏྟཝཱསཾ ཝསམཱནོ ཙརི. ཨེཝཾ ཙརམཱནོ –

‘‘ཝནནྟརེ ¶ ཋིཏོ ཐེརོ, ཝིསཱཁོ གཛྫམཱནཀོ;

ཨཏྟནོ གུཎམེསནྟོ, ཨིམམཏྠཾ ཨབྷཱསཐ.

‘‘ཡཱཝཏཱ ཨུཔསམྤནྣོ, ཡཱཝཏཱ ཨིདྷ མཱགཏོ;

ཨེཏྠནྟརེ ཁལིཏཾ ནཏྠི, ཨཧོ ལཱབྷོ ཏེ མཱརིསཱ’’ཏི. (ཝིསུདྡྷི. ༡.༢༥༨);

སོ ཙིཏྟལཔབྦཏཝིཧཱརཾ གཙྪནྟོ དྭེདྷཱཔཐཾ པཏྭཱ ‘‘ཨཡཾ ནུ ཁོ མགྒོ, ཨུདཱཧུ ཨཡ’’ནྟི ཙིནྟཡནྟོ ཨཊྛཱསི. ཨཐསྶ པབྦཏེ ཨདྷིཝཏྠཱ དེཝཏཱ ¶ ཧཏྠཾ པསཱརེཏྭཱ ‘‘ཨེསོ མགྒོ’’ཏི དསྶེཏི. སོ ཙིཏྟལཔབྦཏཝིཧཱརཾ གནྟྭཱ ཏཏྠ ཙཏྟཱརོ མཱསེ ཝསིཏྭཱ ‘‘པཙྩཱུསེ གམིསྶཱམཱི’’ཏི ཙིནྟེཏྭཱ ནིཔཛྫི. ཙངྐམསཱིསེ མཎིལརུཀྑེ ཨདྷིཝཏྠཱ དེཝཏཱ སོཔཱནཕལཀེ ནིསཱིདིཏྭཱ པརོདི. ཐེརོ ‘‘ཀོ ཨེསོ’’ཏི ཨཱཧ. ཨཧཾ, བྷནྟེ, མཎིལིཡཱཏི. ཀིསྶ རོདསཱིཏི? ཏུམྷཱཀཾ གམནཾ པཊིཙྩཱཏི. མཡི ཨིདྷ ཝསནྟེ ཏུམྷཱཀཾ ཀོ གུཎོཏི? ཏུམྷེསུ, བྷནྟེ, ཨིདྷ ཝསནྟེསུ ཨམནུསྶཱ ཨཉྙམཉྙཾ མེཏྟཾ པཊིལབྷནྟི, ཏེ དཱནི ཏུམྷེསུ གཏེསུ ཀལཧཾ ཀརིསྶནྟི, དུཊྛུལླམྤི ཀཐཡིསྶནྟཱིཏི. ཐེརོ ‘‘སཙེ མཡི ཨིདྷ ཝསནྟེ ཏུམྷཱཀཾ ཕཱསུཝིཧཱརོ ཧོཏི, སུནྡར’’ནྟི ཝཏྭཱ ཨཉྙེཔི ཙཏྟཱརོ མཱསེ ཏཏྠེཝ ཝསིཏྭཱ པུན ཏཐེཝ གམནཙིཏྟཾ ཨུཔྤཱདེསི. དེཝཏཱཔི པུན ཏཐེཝ པརོདི. ཨེཏེནེཝ ཨུཔཱཡེན ཐེརོ ཏཏྠེཝ ཝསིཏྭཱ ཏཏྠེཝ པརིནིབྦཱཡཱིཏི. ཨེཝཾ དྷམཏྟཱཝིཧཱརཱི བྷིཀྑུ ཨམནུསྶཱནཾ པིཡོ ཧོཏི.

བལཝཔིཡཙིཏྟཏཱཡཱཏི ཨིམིནཱ བལཝཔིཡཙིཏྟཏཱམཏྟེནཔི སཏྠཾ ན ཀམཏི, པགེཝ མེཏྟཱཡ ཙེཏོཝིམུཏྟིཡཱཏི དསྶེཏི. ཁིཔྤམེཝ ཙིཏྟཾ སམཱདྷིཡཏི, ཀེནཙི པརིཔནྠེན པརིཧཱིནཛ྄ཛྷཱནསྶ བྱཱཔཱདསྶ དཱུརསམུསྶཱརིཏབྷཱཝཏོ ཁིཔྤམེཝ སམཱདྷིཡཏི, ‘‘ཨཱསཝཱནཾ ཁཡཱཡཱ’’ཏི ཀེཙི. སེསཾ སུཝིཉྙེཡྻམེཝ. ཨེཏྠ ཙ ཀིཉྩཱཔི ཨིཏོ ཨཉྙཀམྨཊྛཱནཝསེན ཨདྷིགཏཛ྄ཛྷཱནཱནམྤི སུཁསུཔནཱདཡོ ཨཱནིསཾསཱ ལབྦྷནྟི. ཡཐཱཧ –

‘‘སུཁཾ སུཔནྟི མུནཡོ, ཨཛ྄ཛྷཏྟཾ སུསམཱཧིཏཱ;

སུཔྤབུདྡྷཾ པབུཛ྄ཛྷནྟི, སདཱ གོཏམསཱཝཀཱ’’ཏི. (ཝིསུདྡྷི. མཧཱཊཱི. ༡.༢༥༨); ཙ ཨཱདི –

ཏཐཱཔིམེ ཨཱནིསཾསཱ བྲཧྨཝིཧཱརལཱབྷིནོ ཨནཝསེསཱ ལབྦྷནྟི བྱཱཔཱདཱདཱིནཾ ཨུཛུཝིཔཙྩནཱིཀབྷཱཝཏོ བྲཧྨཝིཧཱརཱནཾ. ཏེནེཝཱཧ ‘‘ནིསྶརཎཾ ཧེཏཾ, ཨཱཝུསོ, བྱཱཔཱདསྶ, ཡདིདཾ མེཏྟཱཙེཏོཝིམུཏྟཱི’’ཏིཨཱདི ¶ (དཱི. ནི. ༣.༣༢༦; ཨ. ནི. ༦.༡༣). བྱཱཔཱདཱདིཝསེན ཙ སཏྟཱནཾ དུཀྑསུཔནཱདཡོཏི ཏཔྤཊིཔཀྑབྷཱུཏེསུ བྲཧྨཝིཧཱརེསུ སིདྡྷེསུ སུཁསུཔནཱདཡོ ཧཏྠགཏཱ ཨེཝ ཧོནྟཱིཏི.

མེཏྟཱསུཏྟཝཎྞནཱ ནིཊྛིཏཱ.

༦. ཨཊྛཀནཱགརསུཏྟཝཎྞནཱ

༡༦. ཚཊྛེ ¶ བེལུཝགཱམཀེཏི ཝེསཱལིཡཱ དཀྑིཎཔསྶེ ཨཝིདཱུརེ བེལུཝགཱམཀོ ནཱམ ཨཏྠི, ཏཾ གོཙརགཱམཾ ཀཏྭཱཏི ཨཏྠོ. སཱརཔྤཏྟཀུལགཎནཱཡཱཏི མཧཱསཱརམཧཔྤཏྟཀུལགཎནཱཡ. དསམེ ཋཱནེཏི ཨཉྙེ ཨཉྙེཏི དསགཎནཊྛཱནེ. ཨཊྛཀནགརེ ཛཱཏོ བྷཝོཏི ཨཊྛཀནཱགརོ. ཀུཀྐུཊཱརཱམོཏི པཱཊལིཔུཏྟེ ཀུཀྐུཊཱརཱམོ, ན ཀོསམྦིཡཾ.

པཀཏཏྠཔྤཊིནིདྡེསོ ཏ-སདྡོཏི ཏསྶ ‘‘བྷགཝཏཱ’’ཏིཨཱདཱིཧི པདེཧི སམཱནཱདྷིཀརཎབྷཱཝེན ཝུཏྟསྶ ཡེན ཨབྷིསམྦུདྡྷབྷཱཝེན བྷགཝཱ པཀཏོ ཨདྷིགཏོ སུཔཱཀཊོ ཙ, ཏཾ ཨབྷིསམྦུདྡྷབྷཱཝཾ སདྡྷིཾ ཨཱགམནཱིཡཔཊིཔདཱཡ ཨཏྠབྷཱཝེནེཝ དསྶེནྟོ ‘‘ཡོ སོ…པེ… ཨབྷིསམྦུདྡྷོ’’ཏི ཨཱཧ. སཏིཔི ཉཱཎདསྶནསདྡཱནཾ ཨིདྷ པཉྙཱཝེཝཙནབྷཱཝེ ཏེན ཏེན ཝིསེསེན ནེསཾ ཝིསཡཝིསེསེ པཝཏྟིདསྶནཏྠཾ ཨསཱདྷཱརཎཉཱཎཝིསེསཝསེན, ཝིཛྫཱཏྟཡཝསེན, ཝིཛྫཱབྷིཉྙཱནཱཝརཎཝསེན, སབྦཉྙུཏཉྙཱཎམཾསཙཀྑུཝསེན པཊིཝེདྷདེསནཱཉཱཎཝསེན ཙ ཏདཏྠཾ ཡོཛེཏྭཱ དསྶེནྟོ ‘‘ཏེསཾ ཏེས’’ནྟིཨཱདིམཱཧ. ཏཏྠ ཨཱསཡཱནུསཡཾ ཛཱནཏཱ ཨཱསཡཱནུསཡཉཱཎེན, སབྦཉེཡྻདྷམྨཾ པསྶཏཱ སབྦཉྙུཏཱནཱཝརཎཉཱཎེཧི. པུབྦེནིཝཱསཱདཱིཧཱིཏི པུབྦེནིཝཱསཱསཝཀྑཡཉཱཎེཧི. པཊིཝེདྷཔཉྙཱཡཱཏི ཨརིཡམགྒཔཉྙཱཡ. དེསནཱཔཉྙཱཡ པསྶཏཱཏི དེསེཏབྦདྷམྨཱནཾ དེསེཏབྦཔྤཀཱརཾ བོདྷནེཡྻཔུགྒལཱནཉྩ ཨཱསཡཱནུསཡཙརིཏཱདྷིམུཏྟིཨཱདིབྷེདཾ དྷམྨཾ དེསནཱཔཉྙཱཡ ཡཱཐཱཝཏོ པསྶཏཱ. ཨརཱིནནྟི ཀིལེསཱརཱིནཾ, པཉྩཝིདྷམཱརཱནཾ ཝཱ སཱསནསྶ ཝཱ པཙྩཏྠིཀཱནཾ ཨཉྙཏིཏྠིཡཱནཾ. ཏེསཾ པན ཧནནཾ པཱཊིཧཱརིཡེཧི ཨབྷིབྷཝནཾ ཨཔྤཊིབྷཱནཏཱཀརཎཾ ཨཛ྄ཛྷུཔེཀྑཎཉྩ. ཀེསིཝིནཡསུཏྟཉྩེཏྠ ནིདསྶནཾ. ཏཐཱ ཋཱནཱཊྛཱནཱདཱིནི ཛཱནཏཱ. ཡཐཱཀམྨཱུཔགེ སཏྟེ པསྶཏཱ. སཝཱསནཱནམཱསཝཱནཾ ཁཱིཎཏྟཱ ཨརཧཏཱ. ཨབྷིཉྙེཡྻཱདིབྷེདེ དྷམྨེ ཨབྷིཉྙེཡྻཱདིཏོ ཨཝིཔརཱིཏཱཝབོདྷཏོ སམྨཱསམྦུདྡྷེན.

ཨཐ ཝཱ ཏཱིསུ ཀཱལེསུ ཨཔྤཊིཧཏཉཱཎཏཱཡ ཛཱནཏཱ. ཀཱཡཀམྨཱདིཝསེན ཏིཎྞམྤི ཀམྨཱནཾ ¶ ཉཱཎཱནུཔརིཝཏྟིཏོ ནིསམྨཀཱརིཏཱཡ པསྶཏཱ. དཝཱདཱིནམྤི ཨབྷཱཝསཱདྷིཀཱཡ པཧཱནསམྤདཱཡ ཨརཧཏཱ. ཚནྡཱདཱིནཾ ¶ ཨཧཱནིཧེཏུབྷཱུཏཱཡ ཨཀྑཡཔཊིབྷཱནསཱདྷིཀཱཡ སབྦཉྙུཏཱཡ སམྨཱསམྦུདྡྷེནཱཏི ཨེཝཾ དསབལཨཊྛཱརསཨཱཝེཎིཀབུདྡྷདྷམྨཝསེནཔི ཡོཛནཱ ཀཱཏབྦཱ.

ཨབྷིསངྑཏནྟི ཨཏྟནོ པཙྩཡེཧི ཨབྷིསམྨུཁབྷཱཝེན སམེཙྩ སམྦྷུཡྻ ཀཏཾ. སྭཱསྶ ཀཏབྷཱཝོ ཨུཔྤཱདནེན ཝེདིཏབྦོ, ན ཨུཔྤནྣསྶ པཊིསངྑརཎེནཱཏི ཨཱཧ ‘‘ཨུཔྤཱདིཏ’’ནྟི. ཏེ ཙསྶ པཙྩཡཱ ཙེཏནཱཔདྷཱནཱཏི དསྶེཏུཾ པཱལི༹ཡཾ ‘‘ཨབྷིསངྑཏཾ ཨབྷིསཉྩེཏཡིཏ’’ནྟི ཝུཏྟནྟི ‘‘ཙེཏཡིཏཾ ཀཔྤཡིཏ’’ནྟི ཨཏྠམཱཧ. ཨབྷིསངྑཏཾ ཨབྷིསཉྩེཏཡིཏནྟི ཙ ཛྷཱནསྶ པཱཏུབྷཱཝདསྶནམུཁེན ཝིདྡྷཾསནབྷཱཝཾ ཨུལླིངྒེཏི. ཡཉྷི ཨཧུཏྭཱ སམྦྷཝཏི, ཏཾ ཧུཏྭཱ པཊིཝེཏི. ཏེནཱཧ པཱལི༹ཡཾ ‘‘ཡཾ ཁོ པནཱ’’ཏིཨཱདི. སམཐཝིཔསྶནཱདྷམྨེ ཋིཏོཏི ཨེཏྠ སམཐདྷམྨེ ཋིཏཏྟཱ སམཱཧིཏོ ཝིཔསྶནཾ པཊྛཔེཏྭཱ ཨནིཙྩཱནུཔསྶནཱདཱིཧི ནིཙྩསཉྙཱདཡོ པཛཧནྟོ ཨནུཀྐམེན ཏཾ ཨནུལོམཉཱཎཾ པཱཔེཏཱ ཧུཏྭཱ ཝིཔསྶནྣཱདྷམྨེ ཋིཏོ. སམཐཝིཔསྶནཱསངྑཱཏེསུ དྷམྨེསུ རཉྫནཊྛེན རཱགོ. ནནྡནཊྛེན ནནྡཱི. ཏཏྠ སུཁུམཱ ཨཔེཀྑཱ ཝུཏྟཱ. ཡཱ ནིཀནྟཱིཏི ཝུཙྩཏི.

ཨེཝཾ སནྟེཏི ཨེཝཾ ཡཐཱརུཏཝསེནེཝ ཨིམསྶ སུཏྟཔདསྶ ཨཏྠེ གཧེཏབྦེ སཏི. སམཐཝིཔསྶནཱསུ ཚནྡརཱགོ ཀཏྟབྦོཏི ཨནཱགཱམིཕལཾ ཨནིབྦཏྟེཏྭཱ ཏདཏྠཱཡ སམཐཝིཔསྶནཱཔི ཨནིབྦཏྟེཏྭཱ ཀེཝལཾ ཏཏྠ ཚནྡརཱགོ ཀཏྟབྦོ བྷཝིསྶཏི. ཀསྨཱ? ཏེསུ སམཐཝིཔསྶནཱསངྑཱཏེསུ དྷམྨེསུ ཚནྡརཱགམཏྟེན ཨནཱགཱམིནཱ ལདྡྷབྦསྶ ཨལདྡྷཨནཱགཱམིཕལེནཔི ལདྡྷབྦཏྟཱ. ཏཐཱ སཏི ཏེན ཨནཱགཱམིཕལམྤི ལདྡྷབྦམེཝ ཧོཏི. ཏེནཱཧ ‘‘ཨནཱགཱམིཕལཾ པཊིལདྡྷཾ བྷཝིསྶཏཱི’’ཏི. སབྷཱཝཏོ རསིཏབྦཏྟཱ ཨཝིཔརཱིཏོ ཨཏྠོ ཨེཝ ཨཏྠརསོ.

ཨཉྙཱཔི ཀཱཙི སུགཏིཡོཏི ཝིནིཔཱཏིཀེ སནྡྷཱཡཱཧ. ཨཉྙཱཔི ཀཱཙི དུགྒཏིཡོཏི ཨསུརཀཱཡམཱཧ.

ཨཔྤཾ ཡཱཙིཏེན བཧུཾ དེནྟེན ཨུལཱ༹རཔུརིསེན ཝིཡ ཨེཀཾ དྷམྨཾ པུཙྪིཏེན ‘‘ཨཡམྤི ཨེཀདྷམྨོ’’ཏི ཀཐིཏཏྟཱ ཨེཀཱདསཔི དྷམྨཱ པུཙྪཱཝསེན ཨེཀདྷམྨོ ནཱམ ཛཱཏོ པཙྩེཀཾ ཝཱཀྱཔརིསམཱཔནཉཱཡེན. པུཙྪཱཝསེནཱཏི ‘‘ཨཏྠི ནུ ཁོ, བྷནྟེ ཨཱནནྡ, ཏེན…པེ… སམྨཱསམྦུདྡྷེན ཨེཀདྷམྨོ སམྨདཀྑཱཏོ’’ཏི ཨེཝཾ ¶ པཝཏྟཔུཙྪཱཝསེན. ཨམཏུཔྤཏྟིཨཏྠེནཱཏི ཨམཏབྷཱཝསྶ ཨུཔྤཏྟིཧེཏུཏཱཡ, སབྦཱནིཔི ཀམྨཊྛཱནཱནི ཨེཀརསཱཔི ཨམཏཱདྷིགམསྶ པཊིཔཏྟིཡཱཏི ¶ ཨཏྠོ. ཨེཝམེཏྠ ཨགྒཕལབྷཱུམི ཨནཱགཱམིཕལབྷཱུམཱིཏི དྭེཝ བྷཱུམིཡོ སརཱུཔཏོ ཨཱགཏཱ, ནཱནནྟརིཡཏཱཡ པན ཧེཊྛིམཱཔི དྭེ བྷཱུམིཡོ ཨཏྠཏོ ཨཱགཏཱ ཨེཝཱཏི དཊྛབྦཱཏི. པཉྩ སཏཱནི ཨགྒྷོ ཨེཏསྶཱཏི པཉྩསཏཾ. སེསམེཏྠ ཨུཏྟཱནམེཝ.

ཨཊྛཀནཱགརསུཏྟཝཎྞནཱ ནིཊྛིཏཱ.

༧. གོཔཱལསུཏྟཝཎྞནཱ

༡༧. སཏྟམེ ཏིསྶོ ཀཐཱཏི ཏིསྶོ ཨཊྛཀཐཱ, ཏིཝིདྷཱ སུཏྟསྶ ཨཏྠཝཎྞནཱཏི ཨཏྠོ. ཨེཀེཀཾ པདཾ ནཱལ༹ཾ མཱུལཾ ཨེཏིསྶཱཏི ཨེཝཾསཉྙིཏཱ ཨེཀནཱལི༹ཀཱ. ཨེཀེཀཾ ཝཱ པདཾ ནཱལ༹ཾ ཨཏྠནིགྒམནམགྒོ ཨེཏིསྶཱཏི ཨེཀནཱལི༹ཀཱ. ཏེནཱཧ ‘‘ཨེཀེཀསྶ པདསྶ ཨཏྠཀཐན’’ནྟི. ཙཏྟཱརོ ཨཾསཱ བྷཱགཱ ཨཏྠསལླཀྑཎཱུཔཱཡཱ ཨེཏིསྶཱཏི ཙཏུརསྶཱ. ཏེནཱཧ ‘‘ཙཏུཀྐཾ བནྡྷིཏྭཱ ཀཐན’’ནྟི. ནིཡམཏོ ནིསིནྣསྶ ཨཱརདྡྷསྶ ཝཏྟོ སཾཝཏྟོ ཨེཏིསྶཱ ཨཏྠཱིཏི ནིསིནྣཝཏྟིཀཱ, ཡཐཱརདྡྷསྶ ཨཏྠསྶ ཝིསུཾ ཝིསུཾ པརིཡོསཱཔིཀཱཏི ཨཏྠོ. ཏེནཱཧ ‘‘པཎྜིཏགོཔཱལཀཾ དསྶེཏྭཱ’’ཏིཨཱདི. ཨེཀེཀསྶཔི པདསྶ པིཎྜཏྠདསྶནཝསེན བཧཱུནཾ པདཱནཾ ཨེཀཛ྄ཛྷཾ ཨཏྠཾ ཨཀཐེཏྭཱ ཨེཀམེཀསྶ པདསྶ ཨཏྠཝཎྞནཱ ཨཡཾ སབྦཏྠ ལབྦྷཏི. ཙཏུཀྐཾ བནྡྷིཏྭཱཏི ཀཎྷཔཀྑེ ཨུཔམོཔམེཡྻདྭཡཾ, ཏཐཱ སུཀྐཔཀྑེཏི ཨིདཾ ཙཏུཀྐཾ ཡོཛེཏྭཱ. ཨཡཾ ཨེདིསེསུ ཨེཝ སུཏྟེསུ ལབྦྷཏི. པརིཡོསཱནགམནནྟི ཀེཙི ཏཱཝ ཨཱཧུ ‘‘ཀཎྷཔཀྑེ ཨུཔམཾ དསྶེཏྭཱ ཨུཔམཱ ཙ ནཱམ ཡཱཝདེཝ ཨུཔམེཡྻསམྤཊིཔཱདནཏྠཱཏི ཨུཔམེཡྻཏྠཾ ཨཱཧརིཏྭཱ སཾཀིལེསཔཀྑནིདྡེསོ ཙ ཝོདཱནཔཀྑཝིབྷཱཝནཏྠཱཡཱཏི སུཀྐཔཀྑམྤི ཨུཔམོཔམེཡྻཝིབྷཱགེན ཨཱཧརིཏྭཱ སུཏྟཏྠསྶ པརིཡོསཱཔནཾ. ཀཎྷཔཀྑེ ཨུཔམེཡྻཾ དསྶེཏྭཱ པརིཡོསཱནགམནཱདཱིསུཔི ཨེསེཝ ནཡོ’’ཏི. ཨཔརེ པན ‘‘ཀཎྷཔཀྑེ, སུཀྐཔཀྑེ ཙ ཏཾཏཾཨུཔམཱུཔམེཡྻཏྠཱནཾ ཝིསུཾ ཝིསུཾ པརིཡོསཱཔེཏྭཱཝ ཀཐནཾ པརིཡོསཱནགམན’’ནྟི ཝདནྟི. ཨཡནྟི ནིསིནྣཝཏྟིཀཱ. ཨིདྷཱཏི ཨིམསྨིཾ གོཔཱལཀསུཏྟེ. སབྦཱཙརིཡཱནཾ ཨཱཙིཎྞཱཏི སབྦེཧིཔི པུབྦཱཙརིཡེཧི ཨཱཙརིཏཱ སཾཝཎྞིཏཱ, ཏཐཱ ཙེཝ པཱལི༹ པཝཏྟཱཏི.

ཨངྒཱིཡནྟི ¶ ཨཝཡཝབྷཱཝེན ཉཱཡནྟཱིཏི ཨངྒཱནི, ཀོཊྛཱསཱ. ཏཱནི པནེཏྠ ཡསྨཱ སཱཝཛྫསབྷཱཝཱནི, ཏསྨཱ ཨཱཧ ‘‘ཨངྒེཧཱིཏི ཨགུཎཀོཊྛཱསེཧཱི’’ཏི. གོམཎྜལནྟི གོསམཱུཧཾ. པརིཧརིཏུནྟི རཀྑིཏུཾ. ཏཾ པན པརིཧརཎཾ པརིགྒཧེཏྭཱ ཝིཙརཎནྟི ཨཱཧ ‘‘པརིགྒཧེཏྭཱ ཝིཙརིཏུ’’ནྟི. ཝཌྜྷིནྟི གུནྣཾ བཧུབྷཱཝཾ བཧུགོརསཏཱསངྑཱཏཾ པརིཝུདྡྷིཾ. ‘‘ཨེཏྟཀམིད’’ནྟི རཱུཔཱིཡཏཱིཏི ¶ རཱུཔཾ, པརིམཱཎཔརིཙྪེདོཔི སརཱིརརཱུཔམྤཱིཏི ཨཱཧ ‘‘གཎནཏོ ཝཱ ཝཎྞཏོ ཝཱ’’ཏི. ན པརིཡེསཏི ཝིནཊྛབྷཱཝསྶེཝ ཨཛཱནནཏོ. ནཱིལཱཏི ཨེཏྠ ཨིཏི-སདྡོ ཨཱདིཨཏྠོ. ཏེན སེཏསབལཱདིཝཎྞཾ སངྒཎྷཱཏི.

དྷནུསཏྟིསཱུལཱདཱིཏི ཨེཏྠ ཨིསྶཱསཱཙརིཡཱནཾ གཱཝཱིསུ ཀཏཾ དྷནུལཀྑཎཾ. ཀུམཱརབྷཏྟིགཎཱནཾ གཱཝཱིསུ ཀཏཾ སཏྟིལཀྑཎཾ. ཨིསྶརབྷཏྟིགཎཱནཾ གཱཝཱིསུ ཀཏཾ སཱུལལཀྑཎནྟི ཡོཛནཱ. ཨཱདི-སདྡེན རཱམཝཱསུདེཝགཎཱདཱིནཾ གཱཝཱིསུ ཀཏཾ ཕརསུཙཀྐཱདིལཀྑཎཾ སངྒཎྷཱཏི.

ནཱིལམཀྑིཀཱཏི པིངྒལམཀྑིཀཱ, ཁུདྡཀམཀྑིཀཱ ཨེཝ ཝཱ. སཊཏི རུཛཏི ཨེཏཱཡཱཏི སཱཊིཀཱ, སཾཝཌྜྷཱ སཱཊིཀཱ ཨཱསཱཊིཀཱ. ཏེནཱཧ ‘‘ཝཌྜྷནྟཱི’’ཏིཨཱདི. ཧཱརེཏཱཏི ཨཔནེཏཱ.

ཝཱཀེནཱཏི ཝཱཀཔཊྚེན. ཙཱིརཀེནཱཏི པིལོཏིཀེན. ཨནྟོཝསྶེཏི ཝསྶཀཱལསྶ ཨབྦྷནྟརེ. ནིགྒཱཧནྟི སུསུམཱརཱདིགྒཱཧརཧིཏཾ. པཱིཏནྟི པཱནཱིཡསྶ པཱིཏབྷཱཝཾ. སཱིཧབྱགྒྷཱདིཔརིསྶཡེན སཱསངྐོ སཔྤཊིབྷཡོ.

པཉྩ ཨཧཱནི ཨེཀསྶཱཏི པཉྩཱཧིཀོ, སོ ཨེཝ ཝཱརོཏི, པཉྩཱཧིཀཝཱརོ. ཨེཝཾ སཏྟཱཧིཀཝཱརོཔི ཝེདིཏབྦོ. ཙིཎྞཊྛཱནནྟི ཙརིཏཊྛཱནཾ གོཙརགྒཧིཏཊྛཱནཾ.

པིཏིཊྛཱནནྟི པིཏརཱ ཀཱཏབྦཊྛཱནཾ, པིཏརཱ ཀཱཏབྦཀིཙྩནྟི ཨཏྠོ. ཡཐཱརུཙིཾ གཧེཏྭཱ གཙྪནྟཱིཏི གུནྣཾ རུཙིཨནུརཱུཔཾ གོཙརབྷཱུམིཾ ཝཱ ནདིཔཱརཾ ཝཱ གཧེཏྭཱ གཙྪནྟི. གོབྷཏྟནྟི ཀཔྤཱསཊྛིཀཱདིམིསྶཾ གོབྷུཉྫིཏབྦཾ བྷཏྟཾ. བྷཏྟགྒཧཎེནེཝ ཡཱགུཔི སངྒཧིཏཱ.

དྭཱིཧཱཀཱརེཧཱིཏི ཝུཏྟཾ ཨཱཀཱརདྭཡཾ དསྶེཏུཾ ‘‘གཎནཏོ ཝཱ སམུཊྛཱནཏོ ཝཱ’’ཏི ཝུཏྟཾ. ཨེཝཾ པཱལི༹ཡཾ ཨཱགཏཱཏི ‘‘ཨུཔཙཡོ སནྟཏཱི’’ཏི ཛཱཏིཾ དྭིདྷཱ བྷིནྡིཏྭཱ ཧདཡཝཏྠུཾ ཨགྒཧེཏྭཱ དསཱཡཏནཱནི པཉྩདས ¶ སུཁུམརཱུཔཱནཱིཏི ཨེཝཾ རཱུཔཀཎྜཔཱལི༹ཡཾ (དྷ. ས. ༦༦༦) ཨཱགཏཱ. པཉྩཝཱིསཏི རཱུཔཀོཊྛཱསཱཏི སལཀྑཎཏོ ཨཉྙམཉྙསངྐརཱབྷཱཝཏོ རཱུཔབྷཱགཱ. རཱུཔཀོཊྛཱསཱཏི ཝཱ ཝིསུཾ ཝིསུཾ ཨཔྤཝཏྟིཏྭཱ ཀལཱཔབྷཱཝེནེཝ པཝཏྟནཏོ རཱུཔཀལཱཔཱ. ཀོཊྛཱསཱཏི ཙ ཨཾསཱ ཨཝཡཝཱཏི ཨཏྠོ. ཀོཊྛནྟི ཝཱ སརཱིརཾ, ཏསྶ ཨཾསཱ ཀེསཱདཡོ ཀོཊྛཱསཱཏི ཨཉྙེཔི ཨཝཡཝཱ ཀོཊྛཱསཱ ཝིཡ ཀོཊྛཱསཱ.

སེཡྻཐཱཔཱིཏིཨཱདི ¶ ཨུཔམཱསཾསནྡནཾ. ཏཏྠ རཱུཔཾ པརིགྒཧེཏྭཱཏི ཡཐཱཝུཏྟཾ རཱུཔཾ སལཀྑཎཏོ ཉཱཎེན པརིགྒཎྷིཏྭཱ. ཨརཱུཔཾ ཝཝཏྠཔེཏྭཱཏི ཏཾ རཱུཔཾ ནིསྶཱཡ ཨཱརམྨཎཉྩ ཀཏྭཱ པཝཏྟམཱནེ ཝེདནཱདིཀེ ཙཏྟཱརོ ཁནྡྷེ ཨརཱུཔནྟི ཝཝཏྠཔེཏྭཱ. རཱུཔཱརཱུཔཾ པརིགྒཧེཏྭཱཏི པུན ཏཏྠ ཡཾ རཱུཔྤནལཀྑཎཾ, ཏཾ རཱུཔཾ. ཏདཉྙཾ ཨརཱུཔཾ. ཨུབྷཡཝིནིམུཏྟཾ ཀིཉྩི ནཏྠི ཨཏྟཱ ཝཱ ཨཏྟནིཡཾ ཝཱཏི ཨེཝཾ རཱུཔཱརཱུཔཾ པརིགྒཧེཏྭཱ. ཏདུབྷཡཉྩ ཨཝིཛྫཱདིནཱ པཙྩཡེན སཔཙྩཡནྟི པཙྩཡཾ སལླཀྑེཏྭཱ, ཨནིཙྩཏཱདིལཀྑཎཾ ཨཱརོཔེཏྭཱ ཡོ ཀལཱཔསམྨསནཱདིཀྐམེན ཀམྨཊྛཱནཾ མཏྠཀཾ པཱཔེཏུཾ ན སཀྐོཏི, སོ ན ཝཌྜྷཏཱིཏི ཡོཛནཱ.

ཨེཏྟཀཾ རཱུཔཾ ཨེཀསམུཊྛཱནནྟི ཙཀྑཱཡཏནཾ, སོཏཱཡཏནཾ, གྷཱནཱཡཏནཾ, ཛིཝ྄ཧཱཡཏནཾ, ཀཱཡཱཡཏནཾ, ཨིཏྠིནྡྲིཡཾ, པུརིསིནྡྲིཡཾ, ཛཱིཝིཏིནྡྲིཡནྟི ཨཊྛཝིདྷཾ ཀམྨཝསེན; ཀཱཡཝིཉྙཏྟི, ཝཙཱིཝིཉྙཏྟཱིཏི ཨིདཾ དྭཡཾ ཙིཏྟཝསེནཱཏི ཨེཏྟཀཾ རཱུཔཾ ཨེཀསམུཊྛཱནཾ. སདྡཱཡཏནམེཀཾ ཨུཏུཙིཏྟཝསེན དྭིསམུཊྛཱནཾ. རཱུཔསྶ ལཧུཏཱ, མུདུཏཱ, ཀམྨཉྙཏཱཏི ཨེཏྟཀཾ རཱུཔཾ ཨུཏུཙིཏྟཱཧཱརཝསེན ཏིསམུཊྛཱནཾ. རཱུཔཱཡཏནཾ, གནྡྷཱཡཏནཾ, རསཱཡཏནཾ, ཕོཊྛབྦཱཡཏནཾ, ཨཱཀཱསདྷཱཏུ, ཨཱཔོདྷཱཏུ, ཀབལཱི༹ཀཱརོ ཨཱཧཱརོཏི ཨེཏྟཀཾ རཱུཔཾ ཨུཏུཙིཏྟཱཧཱརཀམྨཝསེན ཙཏུསམུཊྛཱནཾ. ཨུཔཙཡོ, སནྟཏི, ཛརཏཱ, རཱུཔསྶ ཨནིཙྩཏཱཏི ཨེཏྟཀཾ རཱུཔཾ ན ཀུཏོཙི སམུཊྛཱཏཱིཏི ན ཛཱནཱཏི. སམུཊྛཱནཏོ རཱུཔཾ ཨཛཱནནྟོཏིཨཱདཱིསུ ཝཏྟབྦཾ ‘‘གཎནཏོ རཱུཔཾ ཨཛཱནནྟོ’’ཏིཨཱདཱིསུ ཝུཏྟནཡེནེཝ ཝེདིཏབྦཾ.

ཀམྨལཀྑཎོཏི ཨཏྟནཱ ཀཏཾ དུཙྩརིཏཀམྨཾ ལཀྑཎཾ ཨེཏསྶཱཏི ཀམྨལཀྑཎོ, བཱལོ. ཝུཏྟཉྷེཏཾ – ‘‘ཏཱིཎིམཱནི, བྷིཀྑཝེ, བཱལསྶ བཱལལཀྑཎཱནི. ཀཏམཱནི ཏཱིཎི? དུཙྩིནྟིཏཙིནྟཱི ཧོཏི, དུབྦྷཱསིཏབྷཱསཱི, དུཀྐཊཀམྨཀཱརཱི ¶ . ཨིམཱནི ཁོ…པེ… ལཀྑཎཱནཱི’’ཏི (མ. ནི. ༣.༢༤༦; ཨ. ནི. ༣.༣). ཨཏྟནཱ ཀཏཾ སུཙརིཏཀམྨཾ ལཀྑཎཾ ཨེཏསྶཱཏི ཀམྨལཀྑཎོ, པཎྜིཏོ. ཝུཏྟམྤི ཙེཏཾ ‘‘ཏཱིཎིམཱནི, བྷིཀྑཝེ, པཎྜིཏསྶ པཎྜིཏལཀྑཎཱནི. ཀཏམཱནི ཏཱིཎི? སུཙིནྟིཏཙིནྟཱི ཧོཏི, སུབྷཱསིཏབྷཱསཱི, སུཀཏཀམྨཀཱརཱི. ཨིམཱནི ཁོ…པེ… པཎྜིཏལཀྑཎཱནཱི’’ཏི (མ. ནི. ༣.༢༥༣; ཨ. ནི. ༣.༣). ཏེནཱཧ ‘‘ཀུསལཱཀུསལཀམྨཾ པཎྜིཏབཱལལཀྑཎ’’ནྟི.

བཱལེ ཝཛྫེཏྭཱ པཎྜིཏེ ན སེཝཏཱིཏི ཡཾ བཱལཔུགྒལེ ཝཛྫེཏྭཱ པཎྜིཏསེཝནཾ ཨཏྠཀཱམེན ཀཱཏབྦཾ, ཏཾ ན ཀརོཏི. ཏཐཱབྷཱུཏསྶ ཙ ཨཡམཱདཱིནཝོཏི དསྶེཏུཾ པུན ‘‘བཱལེ ཝཛྫེཏྭཱ’’ཏིཨཱདི ཝུཏྟཾ. ཏཏྠ ཡཾ བྷགཝཏཱ ‘‘ཨིདཾ ཝོ ཀཔྤཏཱི’’ཏི ཨནུཉྙཱཏཾ, ཏདནུལོམཉྩེ, ཏཾ ¶ ཀཔྤིཡཾ. ཡཾ ‘‘ཨིདཾ ཝོ ན ཀཔྤཏཱི’’ཏི པཊིཀྑིཏྟཾ, ཏདནུལོམཉྩེ, ཏཾ ཨཀཔྤིཡཾ. ཡཾ ཀོསལླསམྦྷཱུཏཾ, ཏཾ ཀུསལཾ, ཏཔྤཊིཔཀྑཾ ཨཀུསལཾ. ཏདེཝ སཱཝཛྫཾ, ཀུསལཾ ཨནཝཛྫཾ. ཨཱཔཏྟིཏོ ཨཱདིཏོ དྭེ ཨཱཔཏྟིཀྑནྡྷཱ གརུཀཾ, ཏདཉྙཾ ལཧུཀཾ. དྷམྨཏོ མཧཱསཱཝཛྫཾ གརུཀཾ, ཨཔྤསཱཝཛྫཾ ལཧུཀཾ. སཔྤཊིཀཱརཾ སཏེཀིཙྪཾ, ཨཔྤཊིཀཱརཾ ཨཏེཀིཙྪཾ. དྷམྨཏཱནུགཏཾ ཀཱརཎཾ, ཨིཏརཾ ཨཀཱརཎཾ. ཏཾ ཨཛཱནནྟོཏི ཀཔྤིཡཱཀཔྤིཡཾ, གརུཀ-ལཧུཀཾ, སཏེཀིཙྪཱཏེཀིཙྪཾ ཨཛཱནནྟོ སུཝིསུདྡྷཾ ཀཏྭཱ སཱིལཾ རཀྑིཏུཾ ན སཀྐོཏི. ཀུསལཱཀུསལཾ, སཱཝཛྫཱནཝཛྫཾ, ཀཱརཎཱཀཱརཎཾ ཨཛཱནནྟོ ཁནྡྷཱདཱིསུ ཨཀུསལཏཱཡ རཱུཔཱརཱུཔཔརིགྒཧམྤི ཀཱཏུཾ ན སཀྐོཏི, ཀུཏོ ཏསྶ ཀམྨཊྛཱནཾ གཧེཏྭཱ ཝཌྜྷནཱ. ཏེནཱཧ ‘‘ཀམྨཊྛཱནཾ གཧེཏྭཱ ཝཌྜྷེཏུཾ ན སཀྐོཏཱི’’ཏི.

གོཝཎསདིསེ ཨཏྟབྷཱཝེ ཨུཔྤཛྫིཏྭཱ ཏཏྠ དུཀྑུཔྤཏྟིཧེཏུཏོ མིཙྪཱཝིཏཀྐཱ ཨཱསཱཊིཀཱ ཝིཡཱཏི ཨཱསཱཊིཀཱཏི ཨཱཧ ‘‘ཨཀུསལཝིཏཀྐཾ ཨཱསཱཊིཀཾ ཨཧཱརེཏྭཱ’’ཏི.

‘‘གཎྜོཏི ཁོ, བྷིཀྑཝེ, པཉྩནྣེཏཾ ཨུཔཱདཱནཀྑནྡྷཱནཾ ཨདྷིཝཙན’’ནྟི (སཾ. ནི. ༤.༡༠༣; ཨ. ནི. ༨.༥༦; ༩.༡༥) ཝཙནཏོ ཚཧི ཝཎམུཁེཧི ཝིསྶནྡམཱནཡཱུསོ གཎྜོ ཝིཡ པིལོཏིཀཱཁཎྜེན ཚདྭཱརེཧི ཝིསྶནྡམཱནཀིལེསཱསུཙི ཨཏྟབྷཱཝཝཎོ སཏིསཾཝརེན པིདཧིཏབྦོ, ཨཡཾ པན ཨེཝཾ ན ཀརོཏཱིཏི ཨཱཧ ‘‘ཡཐཱ སོ གོཔཱལཀོ ཝཎཾ ན པཊིཙྪཱདེཏི, ཨེཝཾ སཾཝརཾ ན སམྤཱདེཏཱི’’ཏི.

ཡཐཱ ¶ དྷཱུམོ ཨིནྡྷནཾ ནིསྶཱཡ ཨུཔྤཛྫམཱནོ སཎྷོ སུཁུམོ, ཏཾ ཏཾ ཝིཝརཾ ཨནུཔཝིསྶ བྱཱཔེནྟོ སཏྟཱནཾ ཌཾསམཀསཱདིཔརིསྶཡཾ ཝིནོདེཏི, ཨགྒིཛཱལཱསམུཊྛཱནསྶ པུབྦངྒམོ ཧོཏི, ཨེཝཾ དྷམྨདེསནཱཉཱཎསྶ ཨིནྡྷནབྷཱུཏཾ རཱུཔཱརཱུཔདྷམྨཛཱཏཾ ནིསྶཱཡ ཨུཔྤཛྫམཱནཱ སཎྷཱ སུཁུམཱ ཏཾ ཏཾ ཁནྡྷནྟརཾ ཨཱཡཏནནྟརཉྩ ཨནུཔཝིསྶ བྱཱཔེཏི, སཏྟཱནཾ མིཙྪཱཝིཏཀྐཱདིཔརིསྶཡཾ ཝིནོདེཏི, ཉཱཎགྒིཛཱལཱསམུཊྛཱཔནསྶ པུབྦངྒམོ ཧོཏི, ཏསྨཱ དྷཱུམོ ཝིཡཱཏི དྷཱུམོཏི ཨཱཧ ‘‘གོཔཱལཀོ དྷཱུམཾ ཝིཡ དྷམྨདེསནཱདྷཱུམཾ ན ཀརོཏཱི’’ཏི. ཨཏྟནོ སནྟིཀཾ ཨུཔགནྟྭཱ ནིསིནྣསྶ ཀཱཏབྦཱ ཏདནུཙྪཝིཀཱ དྷམྨཀཐཱ ཨུཔནིསིནྣཀཀཐཱ. ཀཏསྶ དཱནཱདིཔུཉྙསྶ ཨནུམོདནཀཐཱ ཨནུམོདནཱ. ཏཏོཏི དྷམྨཀཐཱདཱིནཾ ཨཀརཎཏོ. ‘‘བཧུསྶུཏོ གུཎཝཱཏི ན ཛཱནནྟཱི’’ཏི ཀསྨཱ ཝུཏྟཾ? ནནུ ཨཏྟནོ ཛཱནཱཔནཏྠཾ དྷམྨཀཐཱདི ན ཀཱཏབྦམེཝཱཏི? སཙྩཾ ན ཀཱཏབྦམེཝ, སུདྡྷཱསཡེན པན དྷམྨེ ཀཐིཏེ ཏསྶ གུཎཛཱནནཾ སནྡྷཱཡེཏཾ ཝུཏྟཾ. ཏེནཱཧ བྷགཝཱ –

‘‘ནཱབྷཱསམཱནཾ ¶ ཛཱནནྟི, མིསྶཾ བཱལེཧི པཎྜིཏཾ;

བྷཱསཡེ ཛོཏཡེ དྷམྨཾ, པགྒཎྷེ ཨིསིནཾ དྷཛ’’ནྟི.

ཏརནྟི ཨོཏརནྟི ཨེཏྠཱཏི ཏིཏྠཾ, ནདིཏལཱ༹ཀཱདཱིནཾ ནཧཱནཔཱནཱདིཨཏྠཾ ཨོཏརཎཊྛཱནཾ. ཡཐཱ པན ཏཾ ཨུདཀེན ཨོཏིཎྞསཏྟཱནཾ སརཱིརམལཾ པཝཱཧེཏི, པརིསྶམཾ ཝིནོདེཏི, ཝིསུདྡྷིཾ ཨུཔྤཱདེཏི, ཨེཝཾ བཧུསྶུཏཱ ཨཏྟནོ སམཱིཔཾ ཨོཏིཎྞསཏྟཱནཾ དྷམྨོདཀེན ཙིཏྟམལཾ པཝཱཧེནྟི, པརིསྶམཾ ཝིནོདེནྟི, ཝིསུདྡྷིཾ ཨུཔྤཱདེནྟི, ཏསྨཱ ཏེ ཏིཏྠཾ ཝིཡཱཏི ཏིཏྠཾ. ཏེནཱཧ ‘‘ཏིཏྠབྷཱུཏེ བཧུསྶུཏབྷིཀྑཱུ’’ཏི. བྱཉྫནཾ ཀཐཾ རོཔེཏབྦནྟི, བྷནྟེ, ཨིདཾ བྱཉྫནཾ ཨཡཾ སདྡོ ཀཐཾ ཨིམསྨིཾ ཨཏྠེ རོཔེཏབྦོ, ཀེན པཀཱརེན ཨིམསྶ ཨཏྠསྶ ཝཱཙཀོ ཛཱཏོ. ‘‘ནིརཱུཔེཏབྦ’’ནྟི ཝཱ པཱཋོ, ནིརཱུཔེཏབྦཾ ཨཡཾ སབྷཱཝནིརུཏྟི ཀཐམེཏྠ ནིརཱུལ༹ྷཱཏི ཨདྷིཔྤཱཡོ. ཨིམསྶ བྷཱསིཏསྶ ཀོ ཨཏྠོཏི སདྡཏྠཾ པུཙྪཏི. ཨིམསྨིཾ ཋཱནེཏི ཨིམསྨིཾ པཱལི༹པྤདེསེ. པཱལི༹ ཀིཾ ཝདཏཱིཏི བྷཱཝཏྠཾ པུཙྪཏི. ཨཏྠོ ཀིཾ དཱིཔེཏཱིཏི བྷཱཝཏྠཾ ཝཱ? སངྐེཏཏྠཾ ཝཱ. ན པརིཔུཙྪཏཱིཏི ཝིམཏིཙྪེདནཔུཙྪཱཝསེན སབྦསོ པུཙྪཾ ན ཀརོཏི. ན པརིཔཉྷཏཱིཏི པརི པརི ཨཏྟནོ ཉཱཏུཾ ཨིཙྪཾ ན ཨཱཙིཀྑཏི, ན ཝིབྷཱཝེཏི. ཏེནཱཧ ‘‘ན ཛཱནཱཔེཏཱི’’ཏི. ཏེཏི བཧུསྶུཏབྷིཀྑཱུ. ཝིཝརཎཾ ནཱམ ཨཏྠསྶ ཝིབྷཛིཏྭཱ ¶ ཀཐནནྟི ཨཱཧ ‘‘བྷཱཛེཏྭཱ ན དེསེནྟཱི’’ཏི. ཨནུཏྟཱནཱིཀཏནྟི ཉཱཎེན ཨཔཱཀཊཱིཀཏཾ གུཡ྄ཧཾ པཊིཙྪནྣཾ. ན ཨུཏྟཱནིཾ ཀརོནྟཱིཏི སིནེརུཔཱདམཱུལེ ཝཱལིཀཾ ཨུདྡྷརནྟོ ཝིཡ པཐཝཱིསནྡྷཱརོདཀཾ ཝིཝརིཏྭཱ དསྶེནྟོ ཝིཡ ཙ ཨུཏྟཱནཾ ན ཀརོནྟི.

ཨེཝཾ ཡསྶ དྷམྨསྶ ཝསེན བཧུསྶུཏཱ ‘‘ཏིཏྠ’’ནྟི ཝུཏྟཱ པརིཡཱཡཏོ. ཨིདཱནི ཏམེཝ དྷམྨཾ ནིཔྤརིཡཱཡཏོ ‘‘ཏིཏྠ’’ནྟི དསྶེཏུཾ ‘‘ཡཐཱ ཝཱ’’ཏིཨཱདི ཝུཏྟཾ. དྷམྨོ ཧི ཏརནྟི ཨོཏརནྟི ཨེཏེན ནིབྦཱནཾ ནཱམ ཏལཱ༹ཀནྟི ‘‘ཏིཏྠ’’ནྟི ཝུཙྩཏི. ཏེནཱཧ བྷགཝཱ སུམེདྷབྷཱུཏོ –

‘‘ཨེཝཾ ཀིལེསམལདྷོཝཾ, ཝིཛྫནྟེ ཨམཏནྟལེ༹;

ན གཝེསཏི ཏཾ ཏལཱ༹ཀཾ, ན དོསོ ཨམཏནྟལེ༹’’ཏི. (བུ. ཝཾ. ༢.༡༤) –

དྷམྨསྶེཝ ནིབྦཱནསྶོཏརཎཏིཏྠབྷཱུཏསྶ ཨོཏརཎཱཀཱརཾ ཨཛཱནནྟོ ‘‘དྷམྨཏིཏྠཾ ན ཛཱནཱཏཱི’’ཏི ཝུཏྟོ.

པཱིཏཱཔཱིཏནྟི ¶ གོགཎེ པཱིཏཾ ཨཔཱིཏཉྩ གོརཱུཔཾ ན ཛཱནཱཏི, ན ཝིནྡཏི. ཨཝིནྡནྟོ ཧི ‘‘ན ལབྷཏཱི’’ཏི ཝུཏྟོ. ‘‘ཨཱནིསཾསཾ ན ཝིནྡཏཱི’’ཏི ཝཏྭཱ ཏསྶ ཨཝིནྡནཱཀཱརཾ དསྶེནྟོ ‘‘དྷམྨསྶཝནགྒཾ གནྟྭཱ’’ཏིཨཱདིམཱཧ.

ཨཡཾ ལོཀུཏྟརོཏི པདཾ སནྡྷཱཡཱཧ ‘‘ཨརིཡ’’ནྟི. པཙྩཱསཏྟིཉཱཡེན ཨནནྟརསྶ ཧི ཝིཔྤཊིསེདྷོ ཝཱ. ཨརིཡསདྡོ ཝཱ ནིདྡོསཔརིཡཱཡོ དཊྛབྦོ. ཨཊྛངྒིཀནྟི ཙ ཝིསུཾ ཨེཀཛ྄ཛྷཉྩ ཨཊྛངྒིཀཾ ཨུཔཱདཱཡ གཧེཏབྦཾ, ཨཊྛངྒཏཱ བཱཧུལླཏོ ཙ. ཨེཝཉྩ ཀཏྭཱ སཏྟངྒསྶཔི ཨརིཡམགྒསྶ སངྒཧོ སིདྡྷོ ཧོཏི.

ཙཏྟཱརོ སཏིཔཊྛཱནེཏིཨཱདཱིསུ ཨཝིསེསེན སཏིཔཊྛཱནཱ ཝུཏྟཱ. ཏཏྠ ཀཱཡཝེདནཱཙིཏྟདྷམྨཱརམྨཎཱ སཏིཔཊྛཱནཱ ལོཀིཡཱ, ཏཏྠ སམྨོཧཝིདྡྷཾསནཝསེན པཝཏྟཱ ནིབྦཱནཱརམྨཎཱ ལོཀུཏྟརཱཏི ཨེཝཾ ‘‘ཨིམེ ལོཀིཡཱ, ཨིམེ ལོཀུཏྟརཱ’’ཏི ཡཐཱབྷཱུཏཾ ནཔྤཛཱནཱཏི.

ཨནཝསེསཾ དུཧཏཱིཏི པཊིགྒཧཎེ མཏྟཾ ཨཛཱནནྟོ ཀིསྨིཉྩི དཱཡཀེ སདྡྷཱཧཱནིཡཱ, ཀིསྨིཉྩི པཙྩཡཧཱནིཡཱ ཨནཝསེསཾ དུཧཏི. ཝཱཙཱཡ ཨབྷིཧཱརོ ཝཱཙཱབྷིཧཱརོ. པཙྩཡཱནཾ ཨབྷིཧཱརོ པཙྩཡཱབྷིཧཱརོ.

‘‘ཨིམེ ¶ ཨམྷེསུ གརུཙིཏྟཱིཀཱརཾ ན ཀརོནྟཱི’’ཏི ཨིམིནཱ ནཝཀཱནཾ བྷིཀྑཱུནཾ སམྨཱཔཊིཔཏྟིཡཱ ཨབྷཱཝཾ དསྶེཏི ཨཱཙརིཡུཔཛ྄ཛྷཱཡེསུ པིཏུཔེམསྶ ཨནུཔཊྛཱཔནཏོ, ཏེན ཙ སིཀྑཱགཱརཝཏཱབྷཱཝདཱིཔནེན སངྒཧསྶ ཨབྷཱཛནབྷཱཝཾ, ཏེན ཐེརཱནཾ ཏེསུ ཨནུགྒཧཱབྷཱཝཾ. ན ཧི སཱིལཱདིགུཎེཧི སཱསནེ ཐིརབྷཱཝཔྤཏྟཱ ཨནནུགྒཧེཏབྦེ སབྲཧྨཙཱརཱི ཨནུགྒཎྷནྟི, ནིརཏྠཀཾ ཝཱ ཨནུགྒཧཾ ཀརོནྟི. ཏེནཱཧ ‘‘ནཝཀེ བྷིཀྑཱུ’’ཏིཨཱདི. དྷམྨཀཐཱབནྡྷནྟི པཝེཎིཨཱགཏཾ པཀིཎྞཀདྷམྨཀཐཱམགྒཾ. སཙྩསཏྟཔྤཊིསནྡྷིཔཙྩཡཱཀཱརཔྤཊིསཾཡུཏྟཾ སུཉྙཏཱདཱིཔནཾ གུལ༹ྷགནྠཾ. ཝུཏྟཝིཔལླཱསཝསེནཱཏི ‘‘ན རཱུཔཉྙཱུ’’ཏིཨཱདཱིསུ ཝུཏྟསྶ པཊིསེདྷསྶ པཊིཀྑེཔཝསེན ཨགྒཧཎཝསེན. ཡོཛེཏྭཱཏི ‘‘རཱུཔཉྙཱུ ཧོཏཱིཏི གཎནཏོ ཝཱ ཝཎྞཏོ ཝཱ རཱུཔཾ ཛཱནཱཏཱི’’ཏིཨཱདིནཱ, ‘‘ཏསྶ གོགཎོཔི ན པརིཧཱཡཏི, པཉྩགོརསཔརིབྷོགཏོཔི ན པརིབཱཧིརོ ཧོཏཱི’’ཏིཨཱདིནཱ ཙ ཨཏྠཾ ཡོཛེཏྭཱ. ཝེདིཏབྦོཏི ཏསྨིཾ ཏསྨིཾ པདེ ཡཐཱརཧཾ ཨཏྠོ ཝེདིཏབྦོ. སེསཾ སབྦཏྠ ཨུཏྟཱནམེཝཱཏི.

གོཔཱལསུཏྟཝཎྞནཱ ནིཊྛིཏཱ.

ཨིཏི ¶ མནོརཐཔཱུརཎིཡཱ ཨངྒུཏྟརནིཀཱཡ-ཨཊྛཀཐཱཡ

ཨེཀཱདསཀནིཔཱཏཝཎྞནཱཡ ཨནུཏྟཱནཏྠདཱིཔནཱ སམཏྟཱ.

ནིཊྛིཏཱ ཙ མནོརཐཔཱུརཎིཡཱ ཨངྒུཏྟརནིཀཱཡ-ཨཊྛཀཐཱཡ

ཨནུཏྟཱནཏྠཔདཝཎྞནཱ.

ནིགམནཀཐཱཝཎྞནཱ

མཧཱཨཊྛཀཐཱཡ ¶ སཱརནྟི ཨངྒུཏྟརམཧཱཨཊྛཀཐཱཡ སཱརཾ. ཨེཀཱུནསཊྛིམཏྟོཏི ཐོཀཾ ཨཱུནབྷཱཝཏོ མཏྟསདྡགྒཧཎཾ. མཱུལཊྛཀཐཱསཱརནྟི པུབྦེ ཝུཏྟཨངྒུཏྟརམཧཱཨཊྛཀཐཱཡ སཱརམེཝ ཨནུནིགམཝསེན ཝདཏི. ཨཐ ཝཱ མཱུལཊྛཀཐཱསཱརནྟི པོརཱཎཊྛཀཐཱསུ ཨཏྠསཱརཾ. ཏེནེདཾ དསྶེཏི – ཨངྒུཏྟརམཧཱཨཊྛཀཐཱཡ ཨཏྠསཱརཾ ཨཱདཱཡ ཨིམཾ མནོརཐཔཱུརཎིཾ ཀརོནྟོ སེསམཧཱནིཀཱཡཱནམྤི མཱུལཊྛཀཐཱསུ ཨིདྷ ཝིནིཡོགཀྑམཾ ཨཏྠསཱརཾ ཨཱདཱཡ ཨེཝམཀཱསིནྟི. མཧཱཝིཧཱརཱདྷིཝཱསཱིནནྟི ཙ ཨིདཾ པུརིམཔཙྪིམཔདེཧི སདྡྷིཾ སམྦནྡྷིཏབྦཾ ‘‘མཧཱཝིཧཱརཱདྷིཝཱསཱིནཾ སམཡཾ པཀཱསཡནྟཱི, མཧཱཝིཧཱརཱདྷིཝཱསཱིནཾ མཱུལཊྛཀཐཱསཱརཾ ཨཱདཱཡཱ’’ཏི. ཏེནཱཏི པུཉྙེན. ཧོཏུ སབྦོ སུཁཱི ལོཀོཏི ཀཱམཱཝཙརཱདིཝིབྷཱགོ སབྦོ སཏྟལོཀོ ཡཐཱརཧཾ བོདྷིཏྟཡཱདྷིགམཝསེན སམྤཏྟེན ནིབྦཱནསུཁེན སུཁཱི སུཁིཏོ ཧོཏཱུཏི སདེཝཀསྶ ལོཀསྶ ཨཙྩནྟཾ སུཁཱདྷིགམཱཡ ཨཏྟནོ པུཉྙཾ པརིཎཱམེཏི.

ཨེཏྟཱཝཏཱ སམཏྟཱཝ, སབྦསོ ཝཎྞནཱ ཨཡཾ;

ཝཱིསཏིཡཱ སཧསྶེཧི, གནྠེཧི པརིམཱཎཏོ.

པོརཱཎཱནཾ ཀཐཱམགྒ-སཱརམེཏྠ ཡཏོ ཋིཏཾ;

ཏསྨཱ སཱརཏྠམཉྫཱུསཱ, ཨིཏི ནཱམེན ཝིསྶུཏཱ.

ཨཛ྄ཛྷེསིཏོ ནརིནྡེན, སོཧཾ པརཀྐམབཱཧུནཱ;

སདྡྷམྨཊྛིཏིཀཱམེན, སཱསནུཛྫོཏཀཱརིནཱ.

ཏེནེཝ ཀཱརིཏེ རམྨེ, པཱསཱདསཏམཎྜིཏེ;

ནཱནཱདུམགཎཱཀིཎྞེ, བྷཱཝནཱབྷིརཏཱལཡེ.

སཱིཏལཱུདཀསམྤནྣེ ¶ , ཝསཾ ཛེཏཝནེ ཨིམཾ;

ཨཏྠབྱཉྫནསམྤནྣཾ, ཨཀཱསིཾ སཱདྷུསམྨཏཾ.

ཡཾ སིདྡྷཾ ཨིམིནཱ པུཉྙཾ, ཡཾ ཙཉྙཾ པསུཏཾ མཡཱ;

ཨེཏེན པུཉྙཀམྨེན, དུཏིཡེ ཨཏྟསམྦྷཝེ.

ཏཱཝཏིཾསེ པམོདེནྟོ, སཱིལཱཙཱརགུཎེ རཏོ;

ཨལགྒོ པཉྩཀཱམེསུ, པཏྭཱན པཋམཾ ཕལཾ.

ཨནྟིམེ ¶ ཨཏྟབྷཱཝམྷི, མེཏྟེཡྻཾ མུནིཔུངྒཝཾ;

ལོཀགྒཔུགྒལཾ ནཱཐཾ, སབྦསཏྟཧིཏེ རཏཾ.

དིསྭཱན ཏསྶ དྷཱིརསྶ, སུཏྭཱ སདྡྷམྨདེསནཾ;

ཨདྷིགནྟྭཱ ཕལཾ ཨགྒཾ, སོབྷེཡྻཾ ཛིནསཱསནཾ.

སདཱ རཀྑནྟུ རཱཛཱནོ, དྷམྨེནེཝ ཨིམཾ པཛཾ;

ནིརཏཱ པུཉྙཀམྨེསུ, ཛོཏེནྟུ ཛིནསཱསནཾ.

ཨིམེ ཙ པཱཎིནོ སབྦེ, སབྦདཱ ནིརུཔདྡཝཱ;

ནིཙྩཾ ཀལྱཱཎསངྐཔྤཱ, པཔྤོནྟུ ཨམཏཾ པདནྟི.

ཨངྒུཏྟརཊཱིཀཱ སམཏྟཱ.