མཱུལ > སུཏྟཔིཊཀ > ཁུདྡཀནིཀཱཡ

༡. ཨེཝཾ ¶ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ. ཨཐ ཁོ ཨཉྙཏརཱ དེཝཏཱ ཨབྷིཀྐནྟཱཡ རཏྟིཡཱ ཨབྷིཀྐནྟཝཎྞཱ ཀེཝལཀཔྤཾ ཛེཏཝནཾ ཨོབྷཱསེཏྭཱ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ཨཊྛཱསི. ཨེཀམནྟཾ ཋིཏཱ ཁོ སཱ དེཝཏཱ བྷགཝནྟཾ གཱཐཱཡ ཨཛ྄ཛྷབྷཱསི –

‘‘བཧཱུ ¶ དེཝཱ མནུསྶཱ ཙ, མངྒལཱནི ཨཙིནྟཡུཾ;

ཨཱཀངྑམཱནཱ སོཏྠཱནཾ, བྲཱུཧི མངྒལམུཏྟམཾ’’.

‘‘ཨསེཝནཱ ཙ བཱལཱནཾ, པཎྜིཏཱནཉྩ སེཝནཱ;

པཱུཛཱ ཙ པཱུཛནེཡྻཱནཾ [པཱུཛནཱིཡཱནཾ (སཱི. སྱཱ. ཀཾ. པཱི.)], ཨེཏཾ མངྒལམུཏྟམཾ.

‘‘པཏིརཱུཔདེསཝཱསོ ¶ ཙ, པུབྦེ ཙ ཀཏཔུཉྙཏཱ;

ཨཏྟསམྨཱཔཎིདྷི ¶ [ཨཏྠསམྨཱཔཎཱིདྷཱི (ཀཏྠཙི)] ཙ, ཨེཏཾ མངྒལམུཏྟམཾ.

‘‘བཱཧུསཙྩཉྩ སིཔྤཉྩ, ཝིནཡོ ཙ སུསིཀྑིཏོ;

སུབྷཱསིཏཱ ཙ ཡཱ ཝཱཙཱ, ཨེཏཾ མངྒལམུཏྟམཾ.

‘‘མཱཏཱཔིཏུ ཨུཔཊྛཱནཾ, པུཏྟདཱརསྶ སངྒཧོ;

ཨནཱཀུལཱ ཙ ཀམྨནྟཱ, ཨེཏཾ མངྒལམུཏྟམཾ.

‘‘དཱནཉྩ དྷམྨཙརིཡཱ ཙ, ཉཱཏཀཱནཉྩ སངྒཧོ;

ཨནཝཛྫཱནི ཀམྨཱནི, ཨེཏཾ མངྒལམུཏྟམཾ.

‘‘ཨཱརཏཱི ཝིརཏཱི པཱཔཱ, མཛྫཔཱནཱ ཙ སཾཡམོ;

ཨཔྤམཱདོ ཙ དྷམྨེསུ, ཨེཏཾ མངྒལམུཏྟམཾ.

‘‘གཱརཝོ ¶ ཙ ནིཝཱཏོ ཙ, སནྟུཊྛི ཙ ཀཏཉྙུཏཱ;

ཀཱལེན དྷམྨསྶཝནཾ [དྷམྨསྶཱཝཎཾ (ཀ. སཱི.), དྷམྨསཝནཾ (ཀ. སཱི.)], ཨེཏཾ མངྒལམུཏྟམཾ.

‘‘ཁནྟཱི ཙ སོཝཙསྶཏཱ, སམཎཱནཉྩ དསྶནཾ;

ཀཱལེན དྷམྨསཱཀཙྪཱ, ཨེཏཾ མངྒལམུཏྟམཾ.

‘‘ཏཔོ ཙ བྲཧྨཙརིཡཉྩ, ཨརིཡསཙྩཱན དསྶནཾ;

ནིབྦཱནསཙྪིཀིརིཡཱ ཙ, ཨེཏཾ མངྒལམུཏྟམཾ.

‘‘ཕུཊྛསྶ ལོཀདྷམྨེཧི, ཙིཏྟཾ ཡསྶ ན ཀམྤཏི;

ཨསོཀཾ ཝིརཛཾ ཁེམཾ, ཨེཏཾ མངྒལམུཏྟམཾ.

‘‘ཨེཏཱདིསཱནི ཀཏྭཱན, སབྦཏྠམཔརཱཛིཏཱ;

སབྦཏྠ སོཏྠིཾ གཙྪནྟི, ཏཾ ཏེསཾ མངྒལམུཏྟམ’’ནྟི.

ཡཱནཱིདྷ ¶ བྷཱུཏཱནི སམཱགཏཱནི, བྷུམྨཱནི [བྷཱུམཱནི (ཀ.)] ཝཱ ཡཱནི ཝ ཨནྟལིཀྑེ;

སབྦེཝ བྷཱུཏཱ སུམནཱ བྷཝནྟུ, ཨཐོཔི སཀྐཙྩ སུཎནྟུ བྷཱསིཏཾ.

ཏསྨཱ ¶ ཧི བྷཱུཏཱ ནིསཱམེཐ སབྦེ, མེཏྟཾ ཀརོཐ མཱནུསིཡཱ པཛཱཡ;

དིཝཱ ཙ རཏྟོ ཙ ཧརནྟི ཡེ བལིཾ, ཏསྨཱ ཧི ནེ རཀྑཐ ཨཔྤམཏྟཱ.

ཡཾ ཀིཉྩི ཝིཏྟཾ ཨིདྷ ཝཱ ཧུརཾ ཝཱ, སགྒེསུ ¶ ཝཱ ཡཾ རཏནཾ པཎཱིཏཾ;

ན ནོ སམཾ ཨཏྠི ཏཐཱགཏེན, ཨིདམྤི བུདྡྷེ རཏནཾ པཎཱིཏཾ;

ཁཡཾ ¶ ཝིརཱགཾ ཨམཏཾ པཎཱིཏཾ, ཡདཛ྄ཛྷགཱ སཀྱམུནཱི སམཱཧིཏོ;

ན ཏེན དྷམྨེན སམཏྠི ཀིཉྩི, ཨིདམྤི དྷམྨེ རཏནཾ པཎཱིཏཾ;

ཡཾ ¶ བུདྡྷསེཊྛོ པརིཝཎྞཡཱི སུཙིཾ, སམཱདྷིམཱནནྟརིཀཉྙམཱཧུ;

སམཱདྷིནཱ ཏེན སམོ ན ཝིཛྫཏི, ཨིདམྤི དྷམྨེ རཏནཾ པཎཱིཏཾ;

ཡེ པུགྒལཱ ཨཊྛ སཏཾ པསཏྠཱ, ཙཏྟཱརི ཨེཏཱནི ཡུགཱནི ཧོནྟི;

ཏེ དཀྑིཎེཡྻཱ སུགཏསྶ སཱཝཀཱ, ཨེཏེསུ དིནྣཱནི མཧཔྥལཱནི;

ཨིདམྤི སངྒྷེ རཏནཾ པཎཱིཏཾ, ཨེཏེན སཙྩེན སུཝཏྠི ཧོཏུ.

ཡེ སུཔྤཡུཏྟཱ མནསཱ དལ༹ྷེན, ནིཀྐཱམིནོ གོཏམསཱསནམྷི;

ཏེ པཏྟིཔཏྟཱ ཨམཏཾ ཝིགཡ྄ཧ, ལདྡྷཱ མུདྷཱ ནིབྦུཏིཾ [ནིབྦུཏི (ཀ.)] བྷུཉྫམཱནཱ;

ཨིདམྤི ¶ སངྒྷེ རཏནཾ པཎཱིཏཾ, ཨེཏེན སཙྩེན སུཝཏྠི ཧོཏུ.

ཡཐིནྡཁཱིལོ པཐཝིསྶིཏོ [པཋཝིསྶིཏོ (ཀ. སཱི.), པཐཝིཾསིཏོ (ཀ. སི. སྱཱ. ཀཾ. པཱི.)] སིཡཱ, ཙཏུབྦྷི ཝཱཏེཧི ཨསམྤཀམྤིཡོ;

ཏཐཱུཔམཾ སཔྤུརིསཾ ཝདཱམི, ཡོ ¶ ཨརིཡསཙྩཱནི ཨཝེཙྩ པསྶཏི;

ཨིདམྤི སངྒྷེ རཏནཾ པཎཱིཏཾ, ཨེཏེན སཙྩེན སུཝཏྠི ཧོཏུ.

ཡེ ཨརིཡསཙྩཱནི ཝིབྷཱཝཡནྟི, གམྦྷཱིརཔཉྙེན སུདེསིཏཱནི;

ཀིཉྩཱཔི ཏེ ཧོནྟི བྷུསཾ པམཏྟཱ, ན ཏེ བྷཝཾ ཨཊྛམམཱདིཡནྟི;

ཨིདམྤི སངྒྷེ རཏནཾ པཎཱིཏཾ, ཨེཏེན སཙྩེན སུཝཏྠི ཧོཏུ.

སཧཱཝསྶ ¶ དསྶནསམྤདཱཡ [སཧཱཝསདྡསྶནསམྤདཱཡ (ཀ.)], ཏཡསྶུ དྷམྨཱ ཛཧིཏཱ བྷཝནྟི;

སཀྐཱཡདིཊྛཱི ཝིཙིཀིཙྪིཏཉྩ, སཱིལབྦཏཾ ཝཱཔི ཡདཏྠི ཀིཉྩི.

ཙཏཱུཧཔཱཡེཧི ཙ ཝིཔྤམུཏྟོ, ཚཙྩཱབྷིཋཱནཱནི [ཚ ཙཱབྷིཋཱནཱནི (སཱི. སྱཱ.)] ཨབྷབྦ ཀཱཏུཾ [ཨབྷབྦོ ཀཱཏུཾ (སཱི.)];

ཨིདམྤི སངྒྷེ རཏནཾ པཎཱིཏཾ, ཨེཏེན སཙྩེན སུཝཏྠི ཧོཏུ.

ཀིཉྩཱཔི ¶ སོ ཀམྨ [ཀམྨཾ (སཱི. སྱཱ. ཀཾ. པཱི.)] ཀརོཏི པཱཔཀཾ, ཀཱཡེན ཝཱཙཱ ཨུད ཙེཏསཱ ཝཱ;

ཨབྷབྦ [ཨབྷབྦོ (བཧཱུསུ)] སོ ཏསྶ པཊིཙྪདཱཡ [པཊིཙྪཱདཱཡ (སཱི.)], ཨབྷབྦཏཱ ¶ དིཊྛཔདསྶ ཝུཏྟཱ;

ཨིདམྤི ¶ སངྒྷེ རཏནཾ པཎཱིཏཾ, ཨེཏེན སཙྩེན སུཝཏྠི ཧོཏུ.

ཝནཔྤགུམྦེ ཡཐ [ཡཐཱ (སཱི. སྱཱ.)] ཕུསྶིཏགྒེ, གིམྷཱནམཱསེ པཋམསྨིཾ [པཋམསྨི (?)] གིམྷེ;

ཏཐཱུཔམཾ དྷམྨཝརཾ ཨདེསཡི [ཨདེསཡཱི (སཱི.)], ནིབྦཱནགཱམིཾ པརམཾ ཧིཏཱཡ;

ཨིདམྤི བུདྡྷེ རཏནཾ པཎཱིཏཾ, ཨེཏེན སཙྩེན སུཝཏྠི ཧོཏུ.

ཝརོ ཝརཉྙཱུ ཝརདོ ཝརཱཧརོ, ཨནུཏྟརོ དྷམྨཝརཾ ཨདེསཡི;

ཨིདམྤི བུདྡྷེ རཏནཾ པཎཱིཏཾ, ཨེཏེན སཙྩེན སུཝཏྠི ཧོཏུ.

ཁཱིཎཾ པུརཱཎཾ ནཝ ནཏྠི སམྦྷཝཾ, ཝིརཏྟཙིཏྟཱཡཏིཀེ བྷཝསྨིཾ;

ཏེ ཁཱིཎབཱིཛཱ ཨཝིརཱུལ༹ྷིཚནྡཱ, ནིབྦནྟི དྷཱིརཱ ཡཐཱཡཾ [ཡཐཡཾ (ཀ.)] པདཱིཔོ;

ཨིདམྤི སངྒྷེ རཏནཾ པཎཱིཏཾ, ཨེཏེན སཙྩེན སུཝཏྠི ཧོཏུ.

ཡཱནཱིདྷ བྷཱུཏཱནི སམཱགཏཱནི, བྷུམྨཱནི ¶ ཝཱ ཡཱནི ཝ ཨནྟལིཀྑེ;

ཏཐཱགཏཾ དེཝམནུསྶཔཱུཛིཏཾ, བུདྡྷཾ ནམསྶཱམ སུཝཏྠི ཧོཏུ.

ཡཱནཱིདྷ བྷཱུཏཱནི སམཱགཏཱནི, བྷུམྨཱནི ཝཱ ཡཱནི ཝ ཨནྟལིཀྑེ;

ཏཐཱགཏཾ དེཝམནུསྶཔཱུཛིཏཾ, དྷམྨཾ ¶ ནམསྶཱམ སུཝཏྠི ཧོཏུ.

ཡཱནཱིདྷ ¶ བྷཱུཏཱནི སམཱགཏཱནི, བྷུམྨཱནི ཝཱ ཡཱནི ཝ ཨནྟལིཀྑེ;

ཏཐཱགཏཾ དེཝམནུསྶཔཱུཛིཏཾ, སངྒྷཾ ནམསྶཱམ སུཝཏྠི ཧོཏཱུཏི.

ཏིརོཀུཊྚེསུ ¶ ཏིཊྛནྟི, སནྡྷིསིངྒྷཱཊཀེསུ ཙ;

དྭཱརབཱཧཱསུ ཏིཊྛནྟི, ཨཱགནྟྭཱན སཀཾ གྷརཾ.

པཧཱུཏེ ཨནྣཔཱནམྷི, ཁཛྫབྷོཛྫེ ཨུཔཊྛིཏེ;

ན ¶ ཏེསཾ ཀོཙི སརཏི, སཏྟཱནཾ ཀམྨཔཙྩཡཱ.

ཨེཝཾ དདནྟི ཉཱཏཱིནཾ, ཡེ ཧོནྟི ཨནུཀམྤཀཱ;

སུཙིཾ པཎཱིཏཾ ཀཱལེན, ཀཔྤིཡཾ པཱནབྷོཛནཾ;

ཨིདཾ ཝོ ཉཱཏཱིནཾ ཧོཏུ, སུཁིཏཱ ཧོནྟུ ཉཱཏཡོ.

ཏེ ཙ ཏཏྠ སམཱགནྟྭཱ, ཉཱཏིཔེཏཱ སམཱགཏཱ;

པཧཱུཏེ ཨནྣཔཱནམྷི, སཀྐཙྩཾ ཨནུམོདརེ.

ཙིརཾ ཛཱིཝནྟུ ནོ ཉཱཏཱི, ཡེསཾ ཧེཏུ ལབྷཱམསེ;

ཨམྷཱཀཉྩ ཀཏཱ པཱུཛཱ, དཱཡཀཱ ཙ ཨནིཔྥལཱ.

ན ཧི ཏཏྠ ཀསི [ཀསཱི (སཱི.)] ཨཏྠི, གོརཀྑེཏྠ ན ཝིཛྫཏི;

ཝཎིཛྫཱ ཏཱདིསཱི ནཏྠི, ཧིརཉྙེན ཀཡོཀཡཾ [ཀཡཱཀྐཡཾ (སཱི.), ཀཡཱ ཀཡཾ (སྱཱ.)];

ཨིཏོ དིནྣེན ཡཱཔེནྟི, པེཏཱ ཀཱལངྐཏཱ [ཀཱལཀཏཱ (སཱི. སྱཱ. ཀཾ.)] ཏཧིཾ.

ཨུནྣམེ ཨུདཀཾ ཝུཊྛཾ, ཡཐཱ ནིནྣཾ པཝཏྟཏི;

ཨེཝམེཝ ཨིཏོ དིནྣཾ, པེཏཱནཾ ཨུཔཀཔྤཏི.

ཡཐཱ ཝཱརིཝཧཱ པཱུརཱ, པརིཔཱུརེནྟི སཱགརཾ;

ཨེཝམེཝ ཨིཏོ དིནྣཾ, པེཏཱནཾ ཨུཔཀཔྤཏི.

ཨདཱསི ¶ ¶ མེ ཨཀཱསི མེ, ཉཱཏིམིཏྟཱ [ཉཱཏི མིཏྟོ (?)] སཁཱ ཙ མེ;

པེཏཱནཾ དཀྑིཎཾ དཛྫཱ, པུབྦེ ཀཏམནུསྶརཾ.

ན ཧི རུཎྞཾ ཝཱ སོཀོ ཝཱ, ཡཱ ཙཉྙཱ པརིདེཝནཱ;

ན ཏཾ པེཏཱནམཏྠཱཡ, ཨེཝཾ ཏིཊྛནྟི ཉཱཏཡོ.

ཨཡཉྩ ཁོ དཀྑིཎཱ དིནྣཱ, སངྒྷམྷི སུཔྤཏིཊྛིཏཱ;

དཱིགྷརཏྟཾ ¶ ཧིཏཱཡསྶ, ཋཱནསོ ཨུཔཀཔྤཏི.

སོ ཉཱཏིདྷམྨོ ཙ ཨཡཾ ནིདསྶིཏོ, པེཏཱན པཱུཛཱ ཙ ཀཏཱ ཨུལཱ༹རཱ;

བལཉྩ བྷིཀྑཱུནམནུཔྤདིནྣཾ [… མནུཔྤདིནྣཝཱ (ཀ.)], ཏུམྷེཧི པུཉྙཾ པསུཏཾ ཨནཔྤཀནྟི.

ནིདྷིཾ ¶ ནིདྷེཏི པུརིསོ, གམྦྷཱིརེ ཨོདཀནྟིཀེ;

ཨཏྠེ ཀིཙྩེ སམུཔྤནྣེ, ཨཏྠཱཡ མེ བྷཝིསྶཏི.

རཱཛཏོ ཝཱ དུརུཏྟསྶ, ཙོརཏོ པཱིལི༹ཏསྶ ཝཱ;

ཨིཎསྶ ཝཱ པམོཀྑཱཡ, དུབྦྷིཀྑེ ཨཱཔདཱསུ ཝཱ;

ཨེཏདཏྠཱཡ ལོཀསྨིཾ, ནིདྷི ནཱམ ནིདྷཱིཡཏི.

ཏཱཝསྶུནིཧིཏོ [ཏཱཝ སུནིཧིཏོ (སཱི.)] སནྟོ, གམྦྷཱིརེ ཨོདཀནྟིཀེ;

ན སབྦོ སབྦདཱ ཨེཝ, ཏསྶ ཏཾ ཨུཔཀཔྤཏི.

ནིདྷི ཝཱ ཋཱནཱ ཙཝཏི, སཉྙཱ ཝཱསྶ ཝིམུཡ྄ཧཏི;

ནཱགཱ ཝཱ ཨཔནཱམེནྟི, ཡཀྑཱ ཝཱཔི ཧརནྟི ནཾ.

ཨཔྤིཡཱ ¶ ཝཱཔི དཱཡཱདཱ, ཨུདྡྷརནྟི ཨཔསྶཏོ;

ཡདཱ པུཉྙཀྑཡོ ཧོཏི, སབྦམེཏཾ ཝིནསྶཏི.

ཡསྶ ¶ དཱནེན སཱིལེན, སཾཡམེན དམེན ཙ;

ནིདྷཱི སུནིཧིཏོ ཧོཏི, ཨིཏྠིཡཱ པུརིསསྶ ཝཱ.

ཙེཏིཡམྷི ¶ ཙ སངྒྷེ ཝཱ, པུགྒལེ ཨཏིཐཱིསུ ཝཱ;

མཱཏརི པིཏརི ཙཱཔི [ཝཱཔི (སྱཱ. ཀཾ.)], ཨཐོ ཛེཊྛམྷི བྷཱཏརི.

ཨེསོ ནིདྷི སུནིཧིཏོ, ཨཛེཡྻོ ཨནུགཱམིཀོ;

པཧཱཡ གམནཱིཡེསུ, ཨེཏཾ ཨཱདཱཡ གཙྪཏི.

ཨསཱདྷཱརཎམཉྙེསཾ, ཨཙོརཱཧརཎོ ནིདྷི;

ཀཡིརཱཐ དྷཱིརོ པུཉྙཱནི, ཡོ ནིདྷི ཨནུགཱམིཀོ.

ཨེས དེཝམནུསྶཱནཾ, སབྦཀཱམདདོ ནིདྷི;

ཡཾ ཡདེཝཱབྷིཔཏྠེནྟི, སབྦམེཏེན ལབྦྷཏི.

སུཝཎྞཏཱ སུསརཏཱ, སུསཎྛཱནཱ སུརཱུཔཏཱ [སུསཎྛཱནསུརཱུཔཏཱ (སཱི.), སུསཎྛཱནཾ སུརཱུཔཏཱ (སྱཱ. ཀཾ.)];

ཨཱདྷིཔཙྩཔརིཝཱརོ, སབྦམེཏེན ལབྦྷཏི.

པདེསརཛྫཾ ཨིསྶརིཡཾ, ཙཀྐཝཏྟིསུཁཾ པིཡཾ;

དེཝརཛྫམྤི དིབྦེསུ, སབྦམེཏེན ལབྦྷཏི.

མཱནུསྶིཀཱ ཙ སམྤཏྟི, དེཝལོཀེ ཙ ཡཱ རཏི;

ཡཱ ཙ ནིབྦཱནསམྤཏྟི, སབྦམེཏེན ལབྦྷཏི.

མིཏྟསམྤདམཱགམྨ, ཡོནིསོཝ [ཡོནིསོ ཝེ (སཱི.), ཡོནིསོ ཙེ (སྱཱ.), ཡོནིསོ ཙ (?)] པཡུཉྫཏོ;

ཝིཛྫཱ ཝིམུཏྟི ཝསཱིབྷཱཝོ, སབྦམེཏེན ལབྦྷཏི.

པཊིསམྦྷིདཱ ¶ ཝིམོཀྑཱ ཙ, ཡཱ ཙ སཱཝཀཔཱརམཱི;

པཙྩེཀབོདྷི བུདྡྷབྷཱུམི, སབྦམེཏེན ལབྦྷཏི.

ཨེཝཾ ¶ མཧཏྠིཀཱ ཨེསཱ, ཡདིདཾ པུཉྙསམྤདཱ;

ཏསྨཱ དྷཱིརཱ པསཾསནྟི, པཎྜིཏཱ ཀཏཔུཉྙཏནྟི.

ཀརཎཱིཡམཏྠཀུསལེན ¶ , ཡནྟསནྟཾ པདཾ ཨབྷིསམེཙྩ;

སཀྐོ ཨུཛཱུ ཙ སུཧུཛཱུ [སཱུཛཱུ (སཱི.)] ཙ, སུཝཙོ ཙསྶ མུདུ ཨནཏིམཱནཱི.

སནྟུསྶཀོ ¶ ཙ སུབྷརོ ཙ, ཨཔྤཀིཙྩོ ཙ སལླཧུཀཝུཏྟི;

སནྟིནྡྲིཡོ ཙ ནིཔཀོ ཙ, ཨཔྤགབྦྷོ ཀུལེསྭནནུགིདྡྷོ.

ན ཙ ཁུདྡམཱཙརེ ཀིཉྩི, ཡེན ཝིཉྙཱུ པརེ ཨུཔཝདེཡྻུཾ;

སུཁིནོཝ ཁེམིནོ ཧོནྟུ, སབྦསཏྟཱ [སབྦེ སཏྟཱ (སཱི. སྱཱ.)] བྷཝནྟུ སུཁིཏཏྟཱ.

ཡེ ཀེཙི པཱཎབྷཱུཏཏྠི, ཏསཱ ཝཱ ཐཱཝརཱ ཝནཝསེསཱ;

དཱིགྷཱ ཝཱ ཡེཝ མཧནྟཱ [མཧནྟ (?)], མཛ྄ཛྷིམཱ རསྶཀཱ ཨཎུཀཐཱུལཱ.

དིཊྛཱ ཝཱ ཡེཝ ཨདིཊྛཱ [ཨདིཊྛ (?)], ཡེ ཝ [ཡེ ཙ (སཱི. སྱཱ. ཀཾ. པཱི.)] དཱུརེ ཝསནྟི ཨཝིདཱུརེ;

བྷཱུཏཱ ཝ [ཝཱ (སྱཱ. ཀཾ. པཱི. ཀ.)] སམྦྷཝེསཱི ཝ [ཝཱ (སཱི. སྱཱ. ཀཾ. པཱི.)], སབྦསཏྟཱ བྷཝནྟུ སུཁིཏཏྟཱ.

ན པརོ པརཾ ནིཀུབྦེཐ, ནཱཏིམཉྙེཐ ཀཏྠཙི ན ཀཉྩི [ནཾ ཀཉྩི (སཱི. པཱི.), ནཾ ཀིཉྩི (སྱཱ.), ན ཀིཉྩི (ཀ.)];

བྱཱརོསནཱ པཊིགྷསཉྙཱ, ནཱཉྙམཉྙསྶ དུཀྑམིཙྪེཡྻ.

མཱཏཱ ¶ ཡཐཱ ནིཡཾ པུཏྟམཱཡུསཱ ཨེཀཔུཏྟམནུརཀྑེ;

ཨེཝམྤི སབྦབྷཱུཏེསུ, མཱནསཾ བྷཱཝཡེ ཨཔརིམཱཎཾ.

མེཏྟཉྩ ¶ སབྦལོཀསྨི, མཱནསཾ བྷཱཝཡེ ཨཔརིམཱཎཾ;

ཨུདྡྷཾ ཨདྷོ ཙ ཏིརིཡཉྩ, ཨསམྦཱདྷཾ ཨཝེརམསཔཏྟཾ.

ཏིཊྛཾ ཙརཾ ནིསིནྣོ ཝ [ཝཱ (སཱི. སྱཱ. ཀཾ. པཱི.)], སཡཱནོ ཡཱཝཏཱསྶ ཝིཏམིདྡྷོ [ཝིགཏམིདྡྷོ (བཧཱུསུ)];

ཨེཏཾ སཏིཾ ཨདྷིཊྛེཡྻ, བྲཧྨམེཏཾ ཝིཧཱརམིདྷམཱཧུ.

དིཊྛིཉྩ ¶ ཨནུཔགྒམྨ, སཱིལཝཱ དསྶནེན སམྤནྣོ;

ཀཱམེསུ ཝིནཡ [ཝིནེཡྻ (སཱི.)] གེདྷཾ, ན ཧི ཛཱཏུགྒབྦྷསེཡྻ པུན རེཏཱིཏི.