📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཁུདྡཀནིཀཱཡེ

ནེཏྟིཝིབྷཱཝིནཱི

གནྠཱརམྦྷཀཐཱ

ཡཛིཏབྦཾ ¶ ¶ ཡཛིཏྭཱན, ནམིཏབྦཾ ནམཱམཧཾ;

ཡཛནཱདྱཱནུབྷཱཝེན, ཨནྟརཱཡེ ཛཧཾ སདཱ.

ཡེན ཡཱ རཙིཏཱ ནེཏྟི, ཡེན སཱ ཨནུམོདིཏཱ;

ཡེཧི སཾཝཎྞནཱ ཀཏཱ, ཏེསཱནུབྷཱཝནིསྶིཏོ.

ཀིཉྩི ཀིཉྩི སརིཏྭཱན, ལཱིནཱལཱིནཱནུསནྡྷྱཱདིཾ;

ཀརིསྶཾ ཛིནསུཏྟཱནཾ, ཧིཏཾ ནེཏྟིཝིབྷཱཝནཾ.

ཨཔྤམེཡྻགུཎོ ¶ མཧཱདྷམྨརཱཛཝ྄ཧཡོ བྷཝེ;

ཨཙྪརིཡོ ཨབྦྷུཏོ ཡོ, བོདྷིསམྦྷཱརཔཱུརཎོ.

ནཱནཱརཊྛིསྶརིསྶརོ, སེཊྛོ སཱསནཔགྒཧོ;

པཱསཾསརཱཛཔཱསཾསོ, ནརཱཙིནྟེཡྻཙིནྟཀོ.

ཙིནྟིཏཀཱརཀོ རཱཛཱ, སིརཊྛིམཱལཔཱལཀོ;

ཨཛེཡྻཛེཡྻཀོ མཧཱཙེཏྱཱདིཀཱརཀོ སདཱ.

ཨསྶཱམཙྩེན བྱཏྟེན, ཛིནཙཀྐཧིཏཏྠིནཱ;

ཨནནྟསུཏིནཱམེན, སཀྐཙྩཾ ཨབྷིཡཱཙིཏོ.

ཀཱམཾ སཾཝཎྞནཱ ཀཏཱ, ཐེརཱསབྷེཧི གམྦྷཱིརཱ;

གམྦྷཱིརཏྟཱ ཏུ ཛཱནིཏུཾ, ཛིནཔུཏྟེཧི དུཀྐརཱ.

ཏསྨཱ ¶ ཡཱཙིཏཱནུརཱུཔེན, ཀརིསྶཾ སཱདརཾ སུཎ;

སིསྶསིཀྑནཡཱནུགཾ, ཡོཏྟཾ ནེཏྟིཝིབྷཱཝནནྟི.

༡. སངྒཧཝཱརཨཏྠཝིབྷཱཝནཱ

ཏཏྠ ཡསྶ སིཀྑཏྟཡསངྒཧསྶ ནཝངྒསྶ སཏྠུསཱསནཝརསྶ ཨཏྠསཾཝཎྞནཾ ཡཾ ནེཏྟིཔྤཀརཎཾ ཀཱཏུཀཱམོ, ཏསྶ ནེཏྟིཔྤཀརཎསྶ ནིསྶཡཾ ཝིསཡབྷཱུཏཾ སཾཝཎྞེཏབྦསཧིཏཾ, སཾཝཎྞེཏབྦཾ ཨེཝ ཝཱ སལོཀཔཱལེན ཏིལོཀེན སདཱ པཱུཛེཏབྦསྶ ཙེཝ ནམསྶིཏབྦསྶ ཙ ནརུཏྟམསྶ སཏྠུནོ སཱསནཝརཾ ཝིདཱུཧེཝ ཉཱཏབྦཾ. ཨེཏཾ སཱསནཝརཾ ཏཱཝ དསྶེནྟོ ཏཾཛནཀེན, ཏཾཝིཛཱནཀཝིདཱུཧི ཙ ནིཡམེཏུཾ, རཏནཏྟཡགུཎཔརིདཱིཔནཉྩ ཀཱཏུཾ –

‘‘ཡཾ ལོཀོ པཱུཛཡཏེ, སལོཀཔཱལོ སདཱ ནམསྶཏི ཙ;

ཏསྶེཏ སཱསནཝརཾ, ཝིདཱུཧི ཉེཡྻཾ ནརཝརསྶཱ’’ཏི. – པཋམགཱཐམཱཧ;

ཨིམཱཡ ¶ ཧི པཋམགཱཐཱཡ ‘‘ཨེཏཾ སཱསནཝརཾ ཉེཡྻ’’ནྟི ཨེཏྟཀམེཝ ཨེཀནྟཏོ ཀརཎཝིསེསབྷཱཝེན ཨདྷིཔྤེཏཾ. ཨེཏེནེཝ ཝིསེསཀརཎེན ཨེཀནྟཱདྷིཔྤེཏནེཏྟིཝིསཡསཱསནཝརསྶ དསྶིཏཏྟཱ. ཨེཀནྟཱདྷིཔྤེཏསཱསནཝརམེཝ ནེཏྟིསཾཝཎྞནཱཡ སཾཝཎྞེཏབྦཏྟཱ ཝིསཡཾ ཏེནེཝ ཝཀྑཏི ཨཊྛཀཐཱཙརིཡོ –

‘‘ཨེཏཾ ཨིདཱནི ཨམྷེཧི ཝིབྷཛིཏབྦཧཱརནཡཔཊྛཱནཝིཙཱརཎཝིསཡབྷཱུཏཾ སཱསནཾ ཨཱདིཀལྱཱཎཏཱདིགུཎསམྤཏྟིཡཱ ཝརཾ ཨགྒཾ ཨུཏྟམཾ ནིཔུཎཉཱཎགོཙརཏཱཡ པཎྜིཏཝེདནཱིཡམེཝཱ’’ཏི (ནེཏྟི. ཨཊྛ. སངྒཧཝཱརཝཎྞནཱ) ཙ,

‘‘ཨེཏཾ ཏིཝིདྷམྤི ‘སཱསནཝར’ནྟི པདེན སངྒཎྷིཏྭཱ ཏཏྠ ཡཾ པཋམཾ, ཏཾ ཨིཏརེསཾ ཨདྷིགམཱུཔཱཡོཏི སབྦསཱསནམཱུལབྷཱུཏཾ, ཨཏྟནོ པཀརཎསྶ ཙ ཝིསཡབྷཱུཏཾ པརིཡཏྟིསཱསནམེཝཱ’’ཏི (ནེཏྟི. ཨཊྛ. སངྒཧཝཱརཝཎྞནཱ) ཙ,

‘‘ཨིདཱནི ¶ ཡཾ ཝུཏྟཾ ‘སཱསནཝརཾ ཝིདཱུཧི ཉེཡྻ’ནྟི, ཏཏྠ ནེཏྟིསཾཝཎྞནཱཡ ཝིསཡབྷཱུཏཾ པརིཡཏྟིདྷམྨམེཝ པཀཱརནྟརེན ནིཡམེཏྭཱ དསྶེཏུ’’ནྟི (ནེཏྟི. ཨཊྛ. སངྒཧཝཱརཝཎྞནཱ) ཙ.

ཏཏྠ པརིཡཏྟིསཱསནསྶཱཔི མཱུལཾ ཧོཏཱིཏི ཝུཏྟཾ ‘‘སབྦསཱསནམཱུལབྷཱུཏ’’ནྟི. ཨེཏེན ཀམྨསཱདྷནེནཔི ཨདྷིཔྤེཏཏྠེ སིདྡྷེ ནཱནཱཝིདྷསཱདྷཀཝཙནཾ ནཱནཱཝཱདཱནཾ ཨནོཀཱསཀརཎཏྠཱཡ ཀཏཾ. སྭཱཀྑཱཏཏཱདིདྷམྨགུཎཱ པན སཱསནསྶ ཝིསེསདེསཀནརཝརསདྡེན ཝཱ པརིདཱིཔཀཏྠབྷཱཝེན ཝཱ དཱིཔིཏཱ ཨཝིནཱབྷཱཝཏོ. སཱསནཝརསྶ པན ཛནཀསམྦནྡྷིཔེཀྑཏྟཱ ‘‘ནརཝརསྶཱ’’ཏི ཝུཏྟཾ. ཏེན ཙ ཨགྒཔུགྒལོ སཱསནཝརཛནཀོ ཝཱཙཀཏྠསམྦནྡྷིབྷཱཝེན ཝུཏྟོ. ཨནཉྙསཱདྷཱརཎམཧཱཀརུཎཱསབྦཉྙུཏཉྙཱཎཱདིགུཎཝིསེསཱ པན ཛནཀསམྦནྡྷིབྷཱུཏསྶ ནརསྶ ཝིསེསཀེནཝརསདྡེན ཝཱ པརིདཱིཔཀཏྠབྷཱཝེན ཝཱ དཱིཔིཏོ.

ཀིཾ ནུ སོ སཱསནཝརཛནཀོ ནརཝརོ པརམཏྠོཝ, ཨུདཱཧུ པཱུཛནཱིཡོ ཙེཝ ནམསྶནཱིཡོ ཙཱཏི ཝུཏྟཾ ‘‘ཡཾ ལོཀོ…པེ… ནམསྶཏི ཙཱ’’ཏི, ཏེན སཱསནཝརཛནཀོ ནརཝརོ པརམཏྠོཝ ན ཧོཏི, ཨཐ ཁོ སལོཀཔཱལེན ལོཀེན སདཱ སབྦཀཱལེསུ པཱུཛནཱིཡོ ཙེཝ ནམསྶནཱིཡོ ཙཱཏི ཝིསེསིཏོ ཐོམིཏོཏི.

ཨེཏྠ ¶ ཙ པཱུཛནནམསྶནཙེཏནཱཝཱཙཀེན ཝཱ པཱུཛནནམསྶནསདྡེན ཕལཱུཔཙཱརཏྠོ པུཉྙམཧཏྟསངྑཱཏོ པཱུཛནཱིཡབྷཱཝོ ཙེཝ ཨཱསཝཀྑཡཉཱཎཔདཊྛཱནསབྦཉྙུཏཉྙཱཎཱདིགུཎསངྑཱཏོ ནམསྶནཱིཡབྷཱཝོ ཙ དཱིཔཀཏྠབྷཱཝེན པརིགྒཧེཏྭཱ དཱིཔིཏོ. ཏེནཱཧ ཨཊྛཀཐཱཙརིཡོ ‘‘བྷགཝཏོ སདེཝཀསྶ ལོཀསྶ པཱུཛནཱིཡཝནྡནཱིཡབྷཱཝོ, ཨགྒཔུགྒལབྷཱཝོ ཙ ཝུཙྩམཱནོ གུཎཝིསིཊྛཏཾ དཱིཔེཏཱི’’ཏིཨཱདི (ནེཏྟི. ཨཊྛ. སངྒཧཝཱརཝཎྞནཱ).

ཏཱདིསསྶ ནརཝརསྶ ཏཱདིསཾ སཱསནཝརཾ ཀིཾ ཡེན ཀེནཙི ཝིཉྙེཡྻནྟི ཝུཏྟཾ ‘‘ཝིདཱུཧཱི’’ཏི. ཏེན ཏིཔིཊཀདྷརཱ ཨརིཡབྷཱུཏཱ པཎྜིཏཱ ཝཱཙཀཏྠབྷཱཝེན གཧིཏཱ, སུཔྤཊིཔནྣཏཱདིསངྒྷགུཎཱ པན ཝནྡདྷཱཏུཝཙནེན ཝཱ དཱིཔཀཏྠབྷཱཝེན ཝཱ དཱིཔིཏཱཏི. ཨེཝཾ པརིགྒཧེཏྭཱ དཱིཔིཏེ རཏནཏྟཡགུཎེ སནྡྷཱཡ ‘‘ཨེཝཾ པཋམགཱཐཱཡ སཱཏིསཡཾ རཏནཏྟཡགུཎཔརིདཱིཔནཾ ཀཏྭཱ’’ཏི (ནེཏྟི. ཨཊྛ. སངྒཧཝཱརཝཎྞནཱ) ཝཀྑཏི, ན གཱཐཱཡ ནིརཝསེསཏྠེ. ཏཏྠ ¶ ཨེཝནྟི ཨེཝཾ སཱསནཝརདསྶནབྷཱུཏཱཡ པཋམགཱཐཱཡཱཏི ཨཏྠོཝ དཊྛབྦོ. ཨཔརེ པནཱཙརིཡཱ ‘‘ཨིམཱཡ པཋམགཱཐཱཡ ཨེཀནྟཏོ ཨདྷིཔྤེཏཱནཱདྷིཔྤེཏཝཙནཱནི ཙེཝ ཝཱཙཀཏྠདཱིཔཀཏྠཝིསེསཱནི ཙ སུཊྛུ ཨཝིཙཱརེཏྭཱ ‘ཨེཝཾ པཋམགཱཐཱཡ སཱཏིསཡཾ རཏནཏྟཡགུཎཔརིདཱིཔནཾ ཀཏྭཱ’ཏི ཝཙནཙྪཱཡཾ ནིསྶཱཡ སཱཏིསཡཾ རཏནཏྟཡགུཎཔརིདཱིཔནཾ ཀཱཏུཾ ‘ཡཾ ལོཀོཏྱཱདིམཱཧཱ’ཏི ཙ སཱཏིསཡརཏནཏྟཡགུཎེ དསྶེནྟོ ‘ཡཾ ལོཀོཏྱཱདིམཱཧཱ’ཏི’’ ཙ ཝདནྟི. ཏེསཾ ཝཱདོ ཨམྷཱཀཾ ནཀྑམཏི. ཀཱརཎཾ པན མཡཱ ཧེཊྛཱ ཝུཏྟཱནུསཱརེན ཉཱཏབྦནྟི ཨཡཾ པདཱནུཀྐམཱནུརཱུཔཱནུསནྡྷྱཏྠོ.

ཨཐ ཝཱ ཨེཀཾ སམཡཾ ཛམྦུཝནསཎྜེ ནིསཱིདིཏྭཱ སིསྶཱནཾ ཧིཏཾ ཙིནྟེནྟོ, ཨཏྟནོ ཨབྷིནཱིཧཱརསམྤཏྟིཾ པསྶནྟོ, སམྨཱསམྦུདྡྷེན པསཾསིཏོ, མཧཱཀཙྩཱཡནོ སཏྠཱརཱ ཨནུམོདིཏཾ སཱསནཱཡཏྟཾ ནཝངྒསྶཏྠཝཎྞནཾ སོལ༹སཧཱརཱདིཨནེཀཏྠཝིདྷཾ ནེཏྟིཔྤཀརཎཾ ཨཱརབྷནྟོ, ‘‘ཡཾ ལོཀོ’’ཏྱཱདིམཱཧ. ཡདི ཨེཝཾ ཡཐཱཝུཏྟཔྤཀཱརཾ ནེཏྟིཔྤཀརཎབྷཱུཏཾ སོལ༹སཧཱརཱཏྱཱདིཀཾ ཨཱརབྷིཏབྦཾ, ཏཾ ཨནཱརབྷིཏྭཱ ཀསྨཱ ནེཏྟིཔྤཀརཎཏོ བཧིབྷཱུཏཾ ‘‘ཡཾ ལོཀོ’’ཏྱཱདིཀཾ ཨཱརབྷིཏབྦཾ, སེཡྻཐཱཔི ཨམྦཾ པུཊྛོ ལབུཛཾ བྱཱཀརེཡྻ, ལབུཛཾ པུཊྛོ ཨམྦཾ བྱཱཀརེཡྻ, ཨེཝམེཝ ནེཏྟིཔྤཀརཎམཱརབྷནྟོ ཨཉྙཾ ཨཱརབྷཏཱིཏི? ཏཐཱཔི ཡསྶ ཡཐཱཝུཏྟསྶ སཱསནཝརསྶ ཨཏྠསཾཝཎྞནཾ ཡཾ ནེཏྟིཔྤཀརཎཾ ཀཱཏུཀཱམོ ཡསྶ ནེཏྟིཔྤཀརཎསྶ ཝིསཡབྷཱུཏཾ སཾཝཎྞེཏབྦསཧིཏཾ, སཾཝཎྞེཏབྦཾ ཨེཝ ཝཱ ཏཾ སཱསནཝརཾ ཏཱཝ དསྶེནྟོ ཏཾཛནཀེན, ཏཾཝིཛཱནཀཝིདཱུཧི ཙ ནིཡམེཏུཾ, རཏནཏྟཡགུཎཔརིདཱིཔནཉྩ ཀཱཏུཾ ‘‘ཡཾ ལོཀོ’’ཏྱཱདིམཱཧ. ཨཡཾ ལཱིནནྟརཙོདནཱསཧིཏོ ཨནུསནྡྷྱཏྠོ.

‘‘ཡཾ ¶ ལོཀོ པཱུཛཡཏེ, སལོཀཔཱལོ སདཱ ནམསྶཏི ཙ;

ཏསྶེཏ སཱསནཝརཾ, ཝིདཱུཧི ཉེཡྻཾ ནརཝརསྶཱ’’ཏི. –

ནིགྒཧིཏལོཔཾ ཀཏྭཱ རཙིཏཱ གཱཐཱ ཨརིཡཱསཱམཉྙལཀྑཎེན སམྤནྣཱ. ཀཐཾ? པུབྦཌྜྷེ ཏིཾས མཏྟཱ, ཨཔརཌྜྷེ སཏྟཝཱིས མཏྟཱ. སམྤིཎྜིཏཱ སཏྟཔཉྙཱས མཏྟཱཝ བྷཝནྟི. ཨཀྑརཱནཾ པན ཨིམིསྶཾ གཱཐཱཡཾ སཏྟཏིཾས. ཏེསུ གརུཀྑརཱ ཝཱིསཏི, ལཧུཀྑརཱ སཏྟརས བྷཝནྟི. ‘‘ཏསྶེཏཾ སཱསནཝར’’ནྟི པན སཱནུནཱསིཀཾ ཝིརུཛ྄ཛྷཏི.

ཏཏྠ ¶ ནིདྡེསཏྠོ ཨཊྛཀཐཱནུསཱརེན ཝིཛཱནིཏབྦོ. སལོཀཔཱལོ སབྦོ སཏྟལོཀོ སཀྐཙྩཾ སབྦཉྙུཏཉྙཱཎཱདིཨནེཀགུཎཱནུསྶརཎེན ཝཱ པཱུཛེཏབྦཔཱུཛནེན ཝཱ པཊིཔཏྟིཔཱུཛནེན ཝཱ སདཱ སབྦཀཱལེསུ སཀྐཙྩཾ ཡཾ ནརཝརཾ པཱུཛཡཏེ ཙེཝ ནམསྶཏི ཙ, ཏསྶ པཱུཛེཏབྦསྶ ཙེཝ ནམསྶིཏབྦསྶ ཙ སཏྠུནོ ནརཝརསྶ ཏིལོཀགྒསྶ མཡཱ སཾཝཎྞེཏབྦསཧིཏཾ, སཾཝཎྞེཏབྦཾ ཨེཝ ཝཱ ཝིདཱུཧེཝ ཉེཡྻཾ ཉཱཏབྦཾ. ནིཔུཎཉཱཎགོཙརཾ ཨེཏཾ མཡཱ བུདྡྷིཡཾ ཋཔིཏཾ སཱསནཝརཾ མཡཱ ཨཱརབྷིཏབྦསྶ ནེཏྟིཔྤཀརཎསྶ ཝིསཡནྟི པཋམཾ ཛཱནིཏབྦཾ དསྶེཏྭཱ ཏསྶ ཨཏྠསཾཝཎྞནཱབྷཱུཏཾ ནེཏྟིཔྤཀརཎཾ ཨཧཾ ཨཱརབྷིསྶཱམི, ཏཾ ཏུམྷེ སཱདྷཝོ སུཎཱཐ མནསི ཀརོཐཱཏི སམུདཱཡཡོཛནཱ, ཨཝཡཝཡོཛནཱཔི ཀཱཏབྦཱ.

ཀཐཾ? ‘‘སལོཀཔཱལོ ལོཀོ’’ཏི ཝིསེསནཝིསེསིཏབྦབྷཱཝེན ཡོཛནཱ. ལོཀཔཱལོ ཝཛྫེཏྭཱ ཨཝསེསོ ལོཀོ ཙ ན ཧོཏི, ཨཐ ཁོ ལོཀཔཱལསཧིཏོ ལོཀོཏི ཝིསེསེཏི. ‘‘ལོཀོ པཱུཛཡཏེ ཙེཝ ནམསྶཏི ཙཱ’’ཏི ཀཏྟུཀཱརཀཨཱཁྱཱཏཀིརིཡཱབྷཱཝེན ཡོཛནཱ ‘‘ཡོ ཀརོཏི, ས ཀཏྟཱ’’ཏི ཝུཏྟཏྟཱ. ཡོ ལོཀོ ཀཱརཀོ, སོ ཀཏྟཱ ཧོཏུ. ཡོ ལོཀོ པཱུཛཡཏེ ཙེཝ ནམསྶཏི ཙ, ཀཐཾ སོ ཀཏྟཱཏི? ‘‘ཡོ ཀརོཏི, ས ཀཏྟཱ’’ཏི སུཏྟསྶ ‘‘ཡོ ཀརོཏི ཀིརིཡཾ ནིཔྥཱདེཏི, སོ ཀིརིཡཱནིཔྥཱདཀོ ཀཏྟཱ’’ཏི ཨཏྠསམྦྷཝཏོ སཡནབྷུཉྫནཱདིསབྦཀིརིཡཱནིཔྥཱདཀོ ཀཏྟཱཡེཝ ཧོཏི. ཨཡཉྩ ལོཀོ པཱུཛནནམསྶནཀིརིཡཱནིཔྥཱདཀོཡེཝཱཏི. ཀཐཾ ཨཡཾ ལོཀོ ཀིརིཡཱནིཔྥཱདཀོཏི? ‘‘ལོཀོ’’ཏི སཏྟཔཉྙཏྟིཡཱ པརམཏྠཏོ ཨཝིཛྫམཱནཱཡཔི པཉྙཱཔེཏབྦོ སནྟཱནེ པཝཏྟམཱནོ ཧདཡཝཏྠུནིསྶིཏོ ཙིཏྟུཔྤཱདོ གཧེཏབྦོ, སོ ཡཐཱརཧཾ ཧེཏཱདྷིཔཏིསཧཛཱཏཱདིཔཙྩཡེན པཙྩཡོ ནིཔྥཱདཀོ བྷཝེ. ཨེཝཾ ལོཀསྶ ཀཏྟུཀཱརཀབྷཱཝོ ཝིཛཱནིཏབྦོཏི པཙྩཡཔཙྩཡུཔྤནྣབྷཱཝེན ཡོཛནཱ. ཨེས ནཡོ ཏཱིསུ པིཊཀེསུཔི ཨེཝརཱུཔེསུ ཋཱནེསུ.

‘‘ཡཾ ¶ ནརཝརཾ པཱུཛཡཏེ ཙེཝ ནམསྶཏི ཙཱ’’ཏི ཀམྨཀཱརཀཨཱཁྱཱཏཀིརིཡཱབྷཱཝེན ཡོཛནཱ ‘‘ཡཾ ཀརོཏི, ཏཾ ཀམྨ’’ནྟི ཝུཏྟཏྟཱ. ཡཾ ཀཱཏབྦཾ, ཏཾ ཀམྨཾ ཧོཏུ. ཡཾ པཱུཛཡཏི ཙེཝ ནམསྶཏི ཙ, ཀཐཾ ཏཾ ཀམྨནྟི? ‘‘ཡཾ ¶ ཀརོཏི, ཏཾ ཀམྨ’’ནྟི སུཏྟསྶ ‘‘ཡཾ ཀརོཏི ཀིརིཡཱཡ སམྦཛ྄ཛྷཏི, ཀིརིཡཱཡ སམྦཛ྄ཛྷིཏབྦཾ ཀམྨ’’ནྟི ཨཏྠསམྦྷཝཏོ ཀརཎཝཱཙཀཝཙནཱིཡཱདིསབྦཀིརིཡཱཡ སམྦཛ྄ཛྷིཏབྦཾ ཀམྨཾ ཧོཏྭེཝ. ཨཡཉྩ ནརཝརོ པཱུཛནནམསྶནཀིརིཡཱཡ ཝཱཙཀཝཙནཱིཡབྷཱཝེན སམྦཛ྄ཛྷིཏབྦོཡེཝཱཏི. ཀཐཾ ཨཡཾ ནརཝརོ ཝཙནཱིཡོཏི? པཱུཛནནམསྶནཙེཏནཱཡ ཨཱརམྨཎཀརཎཝསེན ནརཝརོ ཝཙནཱིཡོ, ཙེཏནཱ ཝཱཙཀཱ, ཨེཝཾ ཝཱཙཀཝཙིཏབྦབྷཱཝོ ཧོཏྭེཝ. ‘‘ཡཾ ནརཝར’’ནྟི པཉྙཏྟིཡཱ པརམཏྠཏོ ཨཝིཛྫམཱནཱཡཔི པཉྙཱཔེཏབྦོ སནྟཱནཝསེན པཝཏྟམཱནོ ལོཀིཡལོཀུཏྟརགུཎསཧིཏོ ཁནྡྷཔཉྩཀོ ཝུཏྟོ, སོ ཨཱརམྨཎཔཙྩཡེན པཙྩཡོ, ཙེཏནཱ པཙྩཡུཔྤནྣཱཏི པཙྩཡཔཙྩཡུཔྤནྣབྷཱཝེན ཡོཛནཱ. ཨེས ནཡོ ཏཱིསུ པིཊཀེསུ ཨེཝརཱུཔེསུ ཋཱནེསུ.

‘‘ཏསྶ ནརཝརསྶཱ’’ཏི ཝིསེསནཝིསེསིཏབྦབྷཱཝེན ཡོཛནཱ. ནརཝརོ ནཱམ ནིམནྟིཏབྦཱདིཀོ ན ཧོཏི, ཨཐ ཁོ པཱུཛེཏབྦོ ནམསྶིཏབྦོ ཨེཝཱཏི ཝིསེསེཏི. ཏསྶ པཱུཛེཏབྦསྶ ཙེཝ ནམསྶིཏབྦསྶ ཙ ནརཝརསྶ སཱསནཝརནྟི ཛཉྙཛནཀབྷཱཝེན ཡོཛནཱ. སཱསནཝརཾ ནཱམ པཙྩེཀབུདྡྷསཱཝཀབུདྡྷརཱཛརཱཛཱདཱིནཾ སཱསནཝརཾ ན ཧོཏི, པཱུཛེཏབྦསྶ ཙེཝ ནམསྶིཏབྦསྶ ཙ ནརཝརསྶ ཏིལོཀསྶེཝ སཱསནཝརནྟི ནིཡམེཏི.

‘‘ཝིདཱུཧི ཉེཡྻ’’ནྟི ཀཏྟུཀཱརཀཀིཏཀིརིཡཱབྷཱཝེན ཡོཛནཱ. ཀཏྟུབྷཱཝོ ཧེཊྛཱ ཝུཏྟོཝ. ‘‘ཝིདཱུཧཱི’’ཏི སཏྟཔཉྙཏྟིཡཱ པརམཏྠཏོ ཨཝིཛྫམཱནཱཡཔི པཉྙཱཔེཏབྦོ སནྟཱནེ པཝཏྟམཱནོ སཱསནཝརེ སམྨོཧདྷཾསཀཉཱཎསཧིཏོ ཧདཡཝཏྠུནིསྶིཏོ ཙིཏྟུཔྤཱདོ ཝུཏྟོ, སོ ཡཐཱརཧཾ ཧེཏཱདྷིཔཏིསཧཛཱཏཱདིཔཙྩཡེན པཙྩཡོ ནིཔྥཱདཀོ བྷཝེ. ཉཱ-ཨིཏིདྷཱཏུཡཱ ཨཏྠབྷཱུཏཾ ཉཱཎཾ པཙྩཡུཔྤནྣཾ ནིཔྥཱདེཡྻཾ བྷཝེ, ཨེཝཾ པཙྩཡཔཙྩཡུཔྤནྣབྷཱཝེན ཡོཛནཱ.

‘‘ཉེཡྻཾ སཱསནཝར’’ནྟི ཝིསེསནཝིསེསྱབྷཱཝེན ཡོཛནཱ. སཱསནཝརཾ ནཱམ ན ཡེན ཀེནཙི ཉེཡྻཾ, ཨཐ ཁོ ཝིདཱུཧེཝ སཎྷསུཁུམཉཱཎེན ཉེཡྻཾ སཱསནཝརནྟི ཝིསེསེཏི.

‘‘ཨེཏཾ སཱསནཝར’’ནྟི ཝིསེསནཝིསེསྱབྷཱཝེན ཡོཛནཱ. སཱསནཝརཾ ནཱམ མཡཱ བུདྡྷིཡཾ ཨཊྛཔིཏཾ ཨཔྤཝཏྟེཏབྦཾ ཧོཏི, མཡཱ ཨིདཱནི ནེཏྟིཔྤཀརཎསྶ ཝིསཡབྷཱཝེན བུདྡྷིཡཾ ཝིཔརིཝཏྟམཱནཾ ཋཔེཏབྦཾ པཝཏྟེཏབྦཾ སཱསནཝརནྟི ¶ ཝིསེསེཏི. ཨེཏཾ སཱསནཝརཾ ནེཏྟིཔྤཀརཎསྶ ¶ ཝིསཡནྟི ཡོཛནཱ ཀཱཏབྦཱ. ཏེནཱཧ ‘‘ཨེཏཾ ཨིདཱནི ཨམྷེཧི ཝིབྷཛིཏབྦཧཱརནཡཔཊྛཱནཝིཙཱརཎཝིསཡབྷཱུཏཾ སཱསན’’ནྟི (ནེཏྟི. ཨཊྛ. སངྒཧཝཱརཝཎྞནཱ). ཨིཙྩེཝཾ ནེཏྟིཡཱ པཋམགཱཐཱཡ སངྑེཔེན ཡོཛནཏྠོ སམཏྟོ.

ཏཏྠ ཡནྟི ཨནིཡམནརཝརསྶ སཏྠུནོ ཝཱཙཀཾ པཡོགཝནྟསབྦནཱམཾ. ཨནིཡམོ ཙ པཱུཛནནམསྶནཀིརིཡཱཡ ཨནིཡམིཏཏྟཱ ཝུཏྟོ, ན ནརཝརཏོ ཨཉྙསཏྟསྶ སམྦྷཝཏོཏི. ཨེས ནཡོ སེསཱནིཡཏེསུཔི ཏཱིསུ པིཊཀེསུ. ལོཀིཡནྟི ཨེཏྠ པུཉྙཱཔུཉྙཱནི, ཏབྦིཔཱཀོ ཙཱཏི ལོཀོ.ཨེཏྠ སཏྟནིཀཱཡེ པུཉྙཱཔུཉྙཱནི ལོཀིཡནྟི པཝཏྟནྟི, ཏབྦིཔཱཀོ ཙ ལོཀིཡཏི པཝཏྟཏི, ཨིཏི སཏྟནིཀཱཡསྶ པུཉྙཱཔུཉྙཱནཾ, ཏབྦིཔཱཀསྶ ཙ པཝཏྟནསྶ ཨཱདྷཱརབྷཱཝཏོ ‘‘ཨེཏྠཱ’’ཏིཔདེན ནིདྡིཊྛོ སཏྟནིཀཱཡོ ལོཀོནཱམ. པཱུཛཡཏེཏི ཝིགྒཧཝིརཧིཏཾ ཨཱཁྱཱཏཔདཾ, སཀྐཙྩཾ པཱུཛནཾ ཀརོཏི.

ལོཀཾ པཱལེནྟཱིཏི ལོཀཔཱལཱ, པུཉྙཱཔུཉྙཱནཉྩེཝ ཏབྦིཔཱཀསྶ ཙ པཝཏྟནཱདྷཱརཏྟཱ ལོཀཱ ཙ. ཀེ ཏེ? ཙཏྟཱརོ མཧཱརཱཛཱནོ, ཨིནྡཡམཝརུཎཀུཝེརཱ ཝཱ, ཁཏྟིཡཙཏུམཧཱརཱཛསཀྐསུཡཱམསནྟུསིཏསུནིམྨིཏཔརནིམྨིཏཝསཝཏྟིམཧཱབྲཧྨཱདཡོ ཝཱ. པཱལནཉྩེཏྠ ཨིསྶརིཡཱདྷིཔཙྩེན ཏཾཏཾསཏྟལོཀསྶ ཨཉྙམཉྙཝིཧེསནནིཝཱརཎཱདིཨཱཎཱཔཝཏྟཱཔནཡསཔརིཝཱརཊྛཱནནྟརཱདིནིཡྻཱདནཱ, སཧ ལོཀཔཱལེཧི ཡོ ཝཏྟཏཱིཏི སལོཀཔཱལོ. ཨཐ ཝཱ ཡེ ཧིརོཏྟཔྤཱ ལོཀཾ པཱལེནྟི, ཨིཏི པཱལནཏོ ཏེ ཧིརོཏྟཔྤཱ ལོཀཔཱལཱ. ཏེནཱཧ བྷགཝཱ ‘‘དྭེམེ, བྷིཀྑཝེ, སུཀྐཱ དྷམྨཱ ལོཀཾ པཱལེནྟཱི’’ཏི (ཨ. ནི. ༢.༩; ཨིཏིཝུ. ༤༢). ལོཀཔཱལེཧི ཧིརོཏྟཔྤེཧི སམནྣཱགཏོ ལོཀོ སལོཀཔཱལོ ནཱམ. ཧིརོཏྟཔྤསམྤནྣོ ཧི སཔྤུརིསོ ལོཀོ སཀྐཙྩཾ སདཱ སབྦཀཱལེསུ པཱུཛཡཏི ཙེཝ ནམསྶཏི ཙ པཱཔཧིརིཛིགུཙྪནཏོ, དྷམྨཙྪནྡཝནྟཏཱཡ ཙ.

ཨཉྙེ པན པཱུཛེནྟཱ ནམསྶནྟཱཔི ཀདཱཙིཡེཝ པཱུཛེནྟི ནམསྶནྟི, ན སབྦདཱཏི. སདཱཏི པཱུཛནནམསྶནཀཱལཝཱཙཀཝིགྒཧཝིརཧིཏཾ ཝིཀཔྤནཱམཾ, སབྦནཱམཾ ཝཱ. ནམསྶཏཱིཏི ཝིགྒཧཝིརཧིཏཾ ཨཱཁྱཱཏཔདཾ, སཀྐཙྩཾ ནམསྶནཾ ཀརོཏི. ཏསྶེཏཱཏི ¶ ཨེཏྠ ཏསྶཱཏི ནིཡམཝཱཙཀཾ པཡོགཝནྟསབྦནཱམཾ ཝིགྒཧཝིརཧིཏམེཝ. ནིཡམོ ཙ པཱུཛནནམསྶནཀིརིཡཱཡ ཝིསེསིཏོ. ཏསྨཱ ཏསྶ པཱུཛནནམསྶནཀིརིཡཱཡ ནིཡམིཏབྦསྶ པཱུཛེཏབྦསྶ ནམསྶིཏབྦསྶ ནརཝརསྶཱཏི ཨཏྠོ ཡུཏྟོཝ. སེསནིཡམེསུ ཨཉྙེསུཔི ཨེསེཝ ནཡོ. ཨེཏནྟི ཨཱཙརིཡེན ཝིབྷཛིཏབྦཧཱརནཡཔཊྛཱནཝིཙཱརཎཝིསཡབྷཱུཏསྶ ¶ སཱསནཝརཔརཱམསནཾ པཡོགཝནྟསབྦནཱམཾ ཝིགྒཧཝིརཧིཏཾ.

སཱསཏི ཨེཏེནཱཏི སཱསནཾ, ཨེཏེན ནཝཝིདྷསུཏྟནྟེན, ནཝཝིདྷསུཏྟནྟསཧིཏེན ཝཱ ཝརེན སབྦེན སམཏྠེ ཝེནེཡྻེ དིཊྛདྷམྨིཀསམྤརཱཡིཀཔརམཏྠེཧི ཏིཝིདྷཡཱནམུཁེན ཡཐཱརཧཾ སཏྟེ སཱསཏི ཨནུསཱསཏི ཝིནེཏི. ཨིཏི སཱསནཱནུསཱསནཀིརིཡཱནུསཱརེན ཝེནེཡྻསཏྟཱནཾ ཛཱནནཔཊིཔཛྫནཱདྷིགམསྶ ཀཱརཎཀརཎཏྟཱ ‘‘ཨེཏེནཱ’’ཏི པདེན ནིདྡིཊྛཾ ནཝཝིདྷསུཏྟནྟཾ, ནཝཝིདྷསུཏྟནྟསཧིཏཾ ཝཱ ཝརཾ སབྦཾ སཱསནཾ ནཱམ. ནཝཝིདྷསུཏྟནྟདེསནཱཡ ཧི ཝེནེཡྻཱནཾ ཛཱནནཾ པུརིམཛཱནནེན པཙྪིམཛཱནནཾ, ཛཱནནེན པཊིཔཛྫནེན པཙྪིམཔཊིཔཛྫནེན ཨདྷིགམོ, པུརིམཱདྷིགམེན པཙྪིམཱདྷིགམོ ཧོཏི. ཏེན ཝུཏྟཾ ‘‘སདྡྷཱ སཱིལཾ སུཏཾ ཙཱགོ པཉྙཱ སདྡྷཱཡ སཱིལསྶ སུཏསྶ ཙཱགསྶ པཉྙཱཡཱ’’ཏི (པཊྛཱ. ༡.༡.༤༢༣) ཙ ‘‘པཋམསྶ ཛྷཱནསྶ པརིཀམྨཾ པཋམསྶ ཛྷཱནསྶ’’ཏྱཱདི (པཊྛཱ. ༡.༡.༤༢༣) ཙ. སཱསདྷཱཏུཡཱ དེསནཱསདྡོ ཙ ཏཾཛནཀོ དེསནཱཉཱཎསམྤཡུཏྟཙིཏྟུཔྤཱདོ ཙ མུཁྱཏྠོ, ཏཾཨུཔནིསྶཡཔཙྩཡཱ ཝེནེཡྻཱནཾ ཨཏྠཛཱནནཔཊིཔཛྫནཨདྷིགམནཱདི ཀཱརཎཱུཔཙཱརཏྠོ, ‘‘ཨེཏེནཱ’’ཏི པདེན ཝུཏྟཱཡ སཱསནབྷཱུཏཱཡ ནཱམཔཉྙཏྟིཡཱ ཀརཎསཏྟིསངྑཱཏཱ ཨུཔནིསྶཡཔཙྩཡསཏྟི ཕལཱུཔཙཱརཏྠོ. ཨིཏི-སདྡོཔི ཏམེཝ ནཱམཔཉྙཏྟིཡཱ ཨུཔནིསྶཡཔཙྩཡསཏྟིཾ ཧེཏུབྷཱཝེན པརཱམསཏི, ཏསྶཱ སཏྟིཡཱ ཨཱདྷཱརབྷཱུཏཱ ནཱམཔཉྙཏྟི ཡུ-པཙྩཡཏྠོ. ཨེསེཝ ནཡོ ཏཱིསུ པིཊཀེསུ ཨེཝརཱུཔེསུ ཋཱནེསུ.

ཨེཀནྟནིཡྻཱནཊྛེན, ཨནཉྙསཱདྷཱརཎགུཎཏཱཡ ཙ ཨུཏྟམཊྛེན ཝརཾ ཨུཏྟམཾ, པརིཡཏྟིསཱསནམྷི ཕལནིཡྻཱདནཏོ, མགྒནིཡྻཱནཧེཏུབྷཱཝཏོ ཙ ནིཡྻཱནཊྛེན, སཱཝཀཱདཱིཧི ཨཛནིཡཏྟཱ ཨསཱདྷཱརཎཊྛེན ཙ ཨུཏྟམཊྛེན ཝརཾ, ཝརིཏབྦནྟི ཝཱ ཝརཾ. ཡཐཱཝུཏྟསྶ སཱསནསྶ པཎྜིཏེཧི ཨབྷིཔཏྠིཏསམིདྡྷིཧེཏུཏཱཡ ཝརིཏབྦཏྟཱ པཏྠེཏབྦཏྟཱ སཱསནཝརཾ ནཱམ, ཡཐཱཝུཏྟཊྛེན ཝཱ སཱསནཉྩ ཏཾ ཝརཉྩཱཏི སཱསནཝརཾ. ཙ-སདྡེན སཏྟིབྷེདཾ, ཏཾ-སདྡེན ཨཏྠཱབྷེདཾ དེསྶེཏི.

ཝིདནྟཱིཏི ¶ ཝིདཱུ. ཡེ པཎྜིཏཱ ཡཐཱསབྷཱཝཏོ ཀམྨཀམྨཕལཱནི, ཀུསལཱདིབྷེདེ ཙ དྷམྨེ ཝིདནྟི, ཨིཏི ཝིདནཏོ ཏེ པཎྜིཏཱ ཝིདཱུ ནཱམ, ཏེཧི. ཉཱཏབྦནྟི ཉེཡྻཾ. ཉཱ-དྷཱཏུཡཱ ནིཔྤརིཡཱཡཏོ ཨཱརམྨཎིཀཾ ཉཱཎཾ ཝུཏྟཾ, ཋཱནཱུཔཙཱརཏོ སཱསནཝརསྶ ཨཱརམྨཎཔཙྩཡབྷཱཝོ དསྶིཏོ, ཨིཏི-སདྡེན ཨཱརམྨཎཔཙྩཡབྷཱཝོ པརཱམསིཏོ. ཏསྶ ཨིཏི-སདྡེན པརཱམསིཏབྦསྶ ཨཱརམྨཎཔཙྩཡབྷཱཝསྶ ཨཱདྷཱརཾ སཱསནཝརཾ ཎྱ-པཙྩཡཏྠོཏི དཊྛབྦཾ. ཉཱཎཾ ཨརཧཏཱིཏི ཝཱ ཉེཡྻཾ, ཝིདཱུནཾ ཉཱཎཾ ཛཱནནཾ ཨཱརམྨཎབྷཱཝེན ཨརཧཏཱིཏི ཨཏྠོ. ཨིམསྨིཾ ནཡེ ཏདྡྷིཏཔདཾ དཊྛབྦཾ.

ནརཏི ¶ ནེཏཱིཏི ནརོ. ཡོ པུརིསོ ཨཏྟཱནཾ ཨིཏྠཱིནཾ ཨུཙྩཊྛཱནཾ ནརཏི ནེཏི, ཨིཏི ནརནཏོ ནཡནཏོ སོ པུརིསོ ནརོ ནཱམ. སོ ཧི པུཏྟབྷཱུཏོཔི མཱཏུཡཱ པིཏུཊྛཱནེ ཏིཊྛཏི, ཀནིཊྛབྷཱཏུབྷཱུཏོཔི ཛེཊྛབྷགིནཱིནཾ པིཏུཊྛཱནེ ཏིཊྛཏི. ཨཐ ཝཱ ནརིཏབྦོ ནེཏབྦོཏི ནརོ. སོ ཧི ཛཱཏཀཱལཏོ པཊྛཱཡ ཡཱཝ ཨཏྟནོ སབྷཱཝེན ཨཏྟཱནཾ དྷཱརེཏུཾ སམཏྠོ ན ཧོཏི, ཏཱཝ པརེཧི ནེཏབྦོ, ན ཏཐཱ ཨཉྙོ ཏིརཙྪཱནཱདིཀོཏི. ཨེཏྠ པན སཏྠུཝིསཡཏཱཡ ནརཏི ཝེནེཡྻསཏྟེཏི ནརོཏི ཨཏྠོ ཨདྷིཔྤེཏོ. སཏྠཱ ཧི སཏྟེ ཨཔཱཡཱདིཏོ སུགཏིཾ ཝཱ མགྒཕལནིབྦཱནཾ ཝཱ ནེཏཱིཏི. སབྦཉྙུཏཉྙཱཎཱདིཨནེཀགུཎསམནྣཱགཏཏྟཱ ཝརོ ཨུཏྟམོ, ཝརིཏབྦོ པཏྠེཏབྦོཏི ཝཱ ཝརོ, ཏིལོཀགྒོ. པཀཏིཡཱ ཨུཙྩཊྛཱནཊྛོ ནརོ གུཎུཏྟམེན སམནྣཱགཏོ ཝརོ, ནརོ ཙ སོ ཝརོ ཙཱཏི ནརཝརོ. ཙ-ཏ-སདྡཱནཾ ཨཏྠབྷེདོ ཝུཏྟོཝ, ཝིསེསནཔརཔདསམཱསོཡཾ. ཡེན ཝུཏྟཾ ‘‘ཨགྒཔུགྒལསྶཱཏི ཨཏྠོ’’ཏི (ནེཏྟི. ཨཊྛ. སངྒཧཝཱརཝཎྞནཱ). ཨཉྙེ པན ‘‘ནརཱནཾ, ནརེསུ ཝཱ ཝརོཏི ནརཝརོ’’ཏི ཝདནྟི, ཏཾ ཝཙནཾ ‘‘ཨགྒཔུགྒལསྶཱཏི ཨཏྠོ’’ཏི (ནེཏྟི. ཨཊྛ. སངྒཧཝཱརཝཎྞནཱ) ཨཊྛཀཐཱཝཙནེན ཝིརུཛ྄ཛྷཏི མཉྙེ. ཏསྶ ནརཝརསྶཱཏི. ཨིཙྩེཝཾ ནེཏྟིཔྤཀརཎསྶ ཨཱདིགཱཐཱཡ སམཱསེན ཙ ཝཙནཏྠོ སམཏྟོ.

སརཱུཔཏྠོ ཡོཛནཏྠཝཙནཏྠཱནུསཱརེན ཝིཛཱནིཏབྦོ. ཏཐཱཔི ཝིསུཾ སུཊྛུ ཛཱནནཏྠཱཡ པུན ཝཏྟབྦོ. ‘‘ཡ’’ནྟི པདསྶ ཨནཉྙསཱདྷཱརཎསབྦཉྙུཏཉྙཱཎཱདིཨནེཀགུཎསམྤནྣོ སལོཀཔཱལེན ལོཀེན པཱུཛེཏབྦོ ཙེཝ ནམསྶིཏབྦོ ཙ སཱསནཝརདེསཀོ ཏིལོཀགྒོ སརཱུཔཏྠོ. ‘‘ལོཀོ’’ཏི པདསྶ ཡཐཱཝུཏྟལོཀཔཱལསཧིཏོ སདྡྷཱཙཱགཱདིསམྤནྣོ ¶ སབྦསཏྟལོཀོ སརཱུཔཏྠོ. ལོཀསདྡོ ཨེཀཝཙནཡུཏྟོཔི ཛཱཏིསདྡཏྟཱ ནིརཝསེསཏོ སཏྟེ སངྒཎྷཱཏི ཡཐཱ ‘‘མཧཱཛནོ’’ཏི. ཀཱམཉྩེཏྠ ལོཀསདྡོ ‘‘ལོཀཝིདཱུ’’ཏྱཱདཱིསུ སངྑཱརབྷཱཛནེསུཔི པཝཏྟོ, པཱུཛནནམསྶནཀིརིཡཱསཱདྷནཏྟཱ པན སཏྟལོཀེཝ ཝཱཙཀབྷཱཝེན པཝཏྟོཏི. ཏེནཱཧ ‘‘པཱུཛནཀིརིཡཱཡོགྱབྷཱུཏཏཱཝསེནཱ’’ཏི (ནེཏྟི. ཨཊྛ. སངྒཧཝཱརཝཎྞནཱ).

པཱུཛཡཏེཏི ཨེཏྠ པཱུཛནཀིརིཡཱཡ མུཁྱཏོ པཱུཛནསངྑཱཏོ པཱུཛེནྟཱནཾ ཙིཏྟུཔྤཱདོ སརཱུཔཏྠོ, ཕལཱུཔཙཱརེན ཏཾཙིཏྟུཔྤཱདསྶ ཨཱརམྨཎཔཀཏཱུཔནིསྶཡབྷཱུཏཱ ཝུཏྟཔྤཀཱརཱ སབྦེ བུདྡྷགུཎཱ སརཱུཔཏྠཱ. ཏེ-ཝིབྷཏྟིཔཙྩཡསྶ པཱུཛནཀིརིཡཱསཱདྷཀོ ཝུཏྟཔྤཀཱརོ ལོཀོ ཙ སརཱུཔཏྠོ, ཨེཝཾ སཏི ཨཏྠབྷེདཱབྷཱཝཏོ དྭཱིསུ ཝཱཙཀེསུ ཨེཀོཝ ཝཱཙཀོ ཝཏྟབྦོ, ཀསྨཱ ཨེཀསྨིཾ ཨཏྠེ དྭེ ཝཱཙཀཱ ཝུཏྟཱཏི? ནཱཡཾ དོསོ དྭིནྣཾ ཝཱཙཀཱནཾ སཱམཉྙཝིསེསཝཱཙཀཏྟཱ. ལོཀསདྡོ ཧི པཱུཛནཀིརིཡཱསཱདྷཀོ, ཨཉྙཀིརིཡཱསཱདྷཀོ ཙ ཝདཏཱིཏི སཱམཉྙཝཱཙཀོ ཙ ཧོཏི. པཱུཛཡཏེ-སདྡོ ལོཀཔཱུཛནཨིཏྠིཔཱུཛནཔུརིསཔཱུཛནཏིརཙྪཱནཔཱུཛནཱདིཀིརིཡཱསཱདྷཀཉྩ ཝདཏཱིཏི སཱམཉྙཝཱཙཀོ ¶ . ཏསྨཱ པཱུཛཡཏེ-སདྡོ ལོཀསདྡསྶ སརཱུཔཏྠོ, པཱུཛནཀིརིཡཱསཱདྷཀོ ཙ ན ཨཉྙཀིརིཡཱསཱདྷཀོཏི ནིཡམེཏི. ལོཀསདྡོ ཙ པཱུཛཡཏེསདྡསྶ སརཱུཔཏྠོ པཱུཛནཀིརིཡཱསཱདྷཀོ. ལོཀོ པན པཱུཛནཀིརིཡཱསཱདྷཀོ ཨིཏྠིཔུརིསཏིརཙྪཱནཱདིཀོཏི ནིཡམེཏི. ཏཱིསུ པིཊཀེསུ ཨཉྙེསུཔི ཨེཝརཱུཔེསུ ཋཱནེསུ ཨེསེཝ ནཡོ.

‘‘སལོཀཔཱལོ’’ཏི པདསྶ ཡཐཱཝུཏྟསེཊྛལོཀཔཱལསཧགཏོ, པཱུཛནནམསྶནཀིརིཡཱསཱདྷཀོ ཙ སཏྟནིཀཱཡོ སརཱུཔཏྠོ. ‘‘སདཱ’’ཏི པདསྶ རཏྟིདིཝསཀཱལོ ཨཏཱིཏབྷགཝཏོ དྷརམཱནཀཱལོ ཏཏོ པརཀཱལོ ཨབྷིནཱིཧཱརཏོ ཡཱཝ སཱསནནྟརདྷཱནཱ ཀཱལོ ཏཏོ པརཀཱལོ སརཱུཔཏྠོ. སོ པན ཨནཱགཏབུདྡྷུཔྤཛྫནཀཱལོ ཨཏཱིཏསམྨཱསམྦུདྡྷེ ཨིདཱནི པཱུཛཡནྟི ནམསྶནྟི ཝིཡ པཱུཛཡིསྶཏི ཙེཝ ནམསྶིསྶཏི ཙ. ནམསྶཏཱིཏི ཨེཏྠ ནམསྶནཀིརིཡཱཡ མུཁྱཏོ ནམསྶནསངྑཱཏོ ཙིཏྟུཔྤཱདོ སརཱུཔཏྠོ, ཕལཱུཔཙཱརེན ཏཾཙིཏྟུཔྤཱདསྶ ཨཱརམྨཎཔཀཏཱུཔནིསྶཡབྷཱུཏཱ ཝུཏྟཔྤཀཱརཱ སབྦེ བུདྡྷགུཎཱ སརཱུཔཏྠོ. ཏི-ཝིབྷཏྟིཔཙྩཡསྶ ¶ ནམསྶནཀིརིཡཱསཱདྷཀོ ཡཐཱཝུཏྟསཏྟནིཀཱཡོ ལོཀོ ཙ སརཱུཔཏྠོ, ཨཏྠབྷེདཱབྷཱཝེཔི དྭིནྣཾ ཝཱཙཀཱནཾ པཝཏྟབྷཱཝོ ཧེཊྛཱ ཝུཏྟོཝ. ‘‘ཙཱ’’ཏི པདསྶ ཨིདྷེཀཙྩོ པཱུཛེནྟོཔི ན ནམསྶཏི, ནམསྶནྟོཔི ན པཱུཛེཏི ཙ, ཨཡཾ པན སཏྟནིཀཱཡོ ལོཀོ པཱུཛཡཏི ཙེཝ ནམསྶཏི ཙཱཏི སམུཙྩཡཏྠོ སརཱུཔཏྠོ.

ཏསྶཱཏི ཨེཏྠ ཏཾ-སདྡསྶ སབྦཉྙུཏཉྙཱཎཱདིཨནེཀགུཎསམནྣཱགཏོ པཱུཛེཏབྦོ ནམསྶིཏབྦོ ཏིལོཀགྒོ སཏྠཱ སརཱུཔཏྠོ, ཚཊྛཱིཝིབྷཏྟིཡཱ ཛནཀསྶ ནརཝརསྶ ཛཉྙེན སཱསནཝརེན སམྦནྡྷོ པདྷཱནསརཱུཔཏྠོ, ཛཉྙསཱསནཝརསྶ ཛནཀེན ནརཝརེན སམྦནྡྷོ ཨཔདྷཱནསརཱུཔཏྠོ. ཏཱིསུ པིཊཀེསུ ཨེཝརཱུཔེསུ ཨཉྙེསུཔི ཨེསེཝ ནཡོ.

‘‘ཨེཏ’’ནྟི པདསྶ ཨཱཙརིཡེན ཝིབྷཛིཏབྦཧཱརནཡཔཊྛཱནཝིཙཱརཎཝིསཡབྷཱུཏཾ སཱསནཾ སརཱུཔཏྠོ. ‘‘སཱསནཝར’’ནྟི པདསྶཱཔི ཏམེཝ སརཱུཔཏྠོ, ཨེཏཾ སཱསནཝརཾ པརིཡཏྟིཔཊིཔཏྟིཔཊིཝེདྷབྷེདེན ཏིཝིདྷམྤི པརིཡཏྟིསཱསནམེཝ སབྦསཱསནམཱུལབྷཱུཏཏྟཱ, ནེཏྟིཔྤཀརཎསྶ ཝིསཡབྷཱུཏཏྟཱ ཙ ཝིསེསཏོ ཨདྷིཔྤེཏཾ ཏསྶ མཱུལབྷཱུཏབྷཱཝཏོ ཝིནཡསཾཝཎྞནཱདཱིསུ བཧཱུཔཀཱརེན དསྶིཏོཏི ཨམྷེཧི ན ཝཏྟབྦོ. ཝདནྟོཔི ཨཉྙཾ རཙིཏབྦཾ རཙིཏུཾ ཨསམཏྠོཝ ཧུཏྭཱ ཝདཏཱིཏི གཧིཏབྦོ ཝདེཡྻ.

ཏཾ པན པརིཡཏྟིསཱསནཾ ཝིམུཏྟིརསཝསེན ཨེཀཝིདྷཾ, དྷམྨཝིནཡཝསེན དུཝིདྷཾ, ཝིནཡཔིཊཀསུཏྟནྟཔིཊཀཨབྷིདྷམྨཔིཊཀཝསེན ཏིཝིདྷཾ ¶ , ཨཱཎཱདེསནཱཝོཧཱརདེསནཱཔརམཏྠདེསནཱཝསེན ཏིཝིདྷཾ, ཡཐཱཔརཱདྷསཱསནཱཡཐཱནུལོམསཱསནཱཡཐཱདྷམྨསཱསནཱབྷེདེནཔི ཏིཝིདྷཾ, སཾཝརཱསཾཝརཀཐཱདིཊྛིཝིནིཝེཋནཀཐཱནཱམརཱུཔཔརིཙྪེདཀཐཱབྷེདེནཔི ཏིཝིདྷཾ. ཨེཏྠ ཙ དེསནཱ དེསཀཱདྷཱིནཱ, སཱསནཾ སཱསིཏབྦཱཡཏྟཾ, ཀཐཱ ཀཐེཏབྦཏྠཱཔེཀྑཱཏི ཝིསེསོ. དཱིགྷནིཀཱཡོ, མཛ྄ཛྷིམནིཀཱཡོ, སཾཡུཏྟནིཀཱཡོ, ཨངྒུཏྟརནིཀཱཡོ, ཁུདྡཀནིཀཱཡོཏི ནིཀཱཡབྷེདེན པན པཉྩཝིདྷཾ; སུཏྟགེཡྻཝེཡྻཱཀརཎགཱཐཱཨུདཱནཨིཏིཝུཏྟཀཛཱཏཀཨབྦྷུཏདྷམྨཝེདལླབྷེདེན པན ནཝཝིདྷཾ; དྷམྨཀྑནྡྷབྷེདེན པན ཙཏུརཱསཱིཏིདྷམྨཀྑནྡྷསཧསྶཝིདྷཾ; ‘‘སཾཀིལེསབྷཱགིཡཝཱསནཱབྷཱགིཡནིབྦེདྷབྷཱགིཡཨསེཀྑབྷཱགིཡཱཏི ཨམིསྶཱནི ཙཏྟཱརི; སཾཀིལེསབྷཱགིཡཝཱསནཱབྷཱགིཡསཾཀིལེསབྷཱགིཡནིབྦེདྷ བྷཱགིཡསཾཀིལེསབྷཱགིཡཨསེཀྑབྷཱགིཡཝཱསནཱབྷཱགིཡནིབྦེདྷབྷཱགིཡཱཏི མིསྶཀདུཀཱནི ཙཏྟཱརི; སཾཀིལེསབྷཱགིཡཝཱསནཱབྷཱགིཡཨསེཀྑབྷཱགིཡསཾཀིལེསབྷཱགིཡཝཱསནཱ བྷཱགིཡནིབྦེདྷབྷཱགིཡཱཏི ¶ མིསྶཀཏིཀཱནི དྭེ; ཏཎྷཱསཾཀིལེསདིཊྛིསཾཀིལེསདུཙྩརིཏསཾཀིལེསཏཎྷཱཝོདཱནབྷཱགིཡདིཊྛིཝ- ཨུདཱནབྷཱགིཡདུཙྩརིཏཝོདཱནབྷཱགིཡཱཏིཚཱ’’ཏི (ནེཏྟི. ༨༩) སོལ༹སནྣཾ སུཏྟཱནཾ བྷེདེན སོལ༹སཝིདྷཾ; ‘‘ལོཀིཡལོཀུཏྟརལོཀིཡལོཀུཏྟརསཏྟཱདྷིཊྛཱནདྷམྨཱདྷིཊྛཱནསཏྟདྷམྨཱདྷིཊྛཱནཉཱཎཉེཡྻ- ཉཱཎཉེཡྻདསྶནབྷཱཝནཱདསྶནབྷཱཝནཱསཀཝཙནཔརཝཙནསཀཝཙནཔརཝཙན ཝིསྶཛྫནཱིཡཨཝིསྶཛྫནཱིཡཝིསྶཛྫནཱིཡཨཝིསྶཛྫནཱིཡཀམྨཝིཔཱཀཀམྨཝིཔཱཀཀུསལ ཨཀུསལཀུསལཱཀུསལཨནུཉྙཱཏཔཊིཀྑིཏྟཨནུཉྙཱཏཔཊིཀྑིཏྟཐཝསྶ བྷེདེན ཨཊྛཝཱིསཏིཝིདྷ’’ནྟི (ནེཏྟི. ༡༡༢) ཨེཝམཱདིབཧུཝིདྷཾ པརིཡཏྟིསཱསནཾ ནེཏྟིཔྤཀརཎསྶ ཝིསེསཏོ ཝིསཡཾ. ཏསྶ ཝིསཡབྷཱཝེ སཏི པཊིཔཏྟིཔཊིཝེདྷསངྑཱཏཾ སཱསནདྭཡམྤི ཏམྨཱུལཀཏྟཱ ཝིསཡཾ ཧོཏི པརིཡཱཡཏོཏི དཊྛབྦཾ.

‘‘ཝིདཱུཧཱི’’ཏི པདསྶ ཡཐཱཝུཏྟསཱསནཝརསྶ སཔརསནྟཱནཔཝཏྟནཔཝཏྟཱཔནཱདིཝསེན ཝིཛཱནནསམཏྠོ སཎྷསུཁུམཉཱཎཱདིགུཎསམྤནྣོ ཀལྱཱཎཔུཐུཛྫནསོཏཱཔནྣཱདིཀོ པུགྒལོ སརཱུཔཏྠོ. ‘‘ཉེཡྻ’’ནྟི པདསྶ ཏཱདིསེཧི ཝིདཱུཧི སཎྷསུཁུམཉཱཎཱདིནཱ ཝིཛཱནིཏབྦཾ སཱསནཝརཾ སརཱུཔཏྠོ. ‘‘ནརཝརསྶཱ’’ཏི པདསྶ ཨེཀཝིདྷཱདིབྷེདསྶ སཱསནཝརསྶ ཛནཀོ ཨནེཀགུཎསམྤནྣོ ཏིལོཀགྒོ སརཱུཔཏྠོ. ཨིཙྩེཝཾ ནེཏྟིཡཱ ཨཱདིགཱཐཱཡ སརཱུཔཏྠོ སངྑེཔེན ཝིཛཱནིཏབྦོ.

ཨེཝཾ ཏསྶཱ ཨནུསནྡྷྱཱདཱིནཾ ཛཱནིཏབྦབྷཱཝེ སཏིཔི ཨཛཱནནྟོ ཝིཡ པུཙྪིཏྭཱ དོསཾ ཨཱརོཔེཏྭཱ པརིཧཱརཝསེནཱཔི གམྦྷཱིརཱདྷིཔྤཱཡསྶ ཨནཱཀུལསྶ ཝིསེསཛཱནནཾ བྷཝིསྶཏི. ཏསྨཱ པུཙྪིཏྭཱ དོསཾ རོཔེཏྭཱ པརིཧཱརཝསེན གམྦྷཱིརཱདྷིཔྤཱཡཾ སམྤིཎྜེཏྭཱ ཀཐཡིསྶཾ. ཨམྷཱཀཱཙརིཡ ཀིམཏྠཾ ‘‘ཡཾ ལོཀོ’’ཏྱཱདིམཱཧ? ནེཏྟིཔྤཀརཎཾ ཀཱཏུཾ. ཨེཝཾ སཏི ནེཏྟིཔྤཀརཎབྷཱུཏཾ ‘‘སོལ༹སཧཱརཱ ནེཏྟི’’ཏྱཱདིཀཾ ཨེཝ ཝཏྟབྦཾ, ཀསྨཱ ཏཾ ཨཝཏྭཱ ཏཏོ ནེཏྟིཔྤཀརཎཏོ ཨཉྙཾ ‘‘ཡཾ ལོཀོ པཱུཛཡཏེ’’ཏྱཱདིམཱཧ. སེཡྻཐཱཔི སམུདྡཾ གཙྪནྟོ ཧིམཝནྟཾ གཙྪཏི, ཧིམཝནྟཾ གཙྪནྟོ ¶ སམུདྡཾ གཙྪཏི, ཨེཝམེཝ ནེཏྟིཔྤཀརཎཾ ཀརོནྟོ ¶ སཱསནཝརདསྶནཾ ཀརོཏཱིཏི? སཙྩཾ, ཏཐཱཔི ཡསྶ སཾཝཎྞནཾ ནེཏྟིཔྤཀརཎཾ ཀཱཏུཀཱམོ ཏཾ སཱསནཝརཾ པཋམཾ དསྶེཏུཾ ‘‘ཡཾ ལོཀོ’’ཏྱཱདིམཱཧ. ཨེཝཾ སཏི ‘‘ཨེཏཾ སཱསནཝར’’ནྟི ཨེཏྟཀམེཝ ཝཏྟབྦཾ, ཀསྨཱ ‘‘ཡཾ ལོཀོ’’ཏྱཱདི ཝུཏྟནྟི? ཏཾ སཱསནཝརཾ ཛནཀེན ནརཝརེན ནིཡམེཏྭཱ ཐོམེཏུཾ ཝུཏྟཾ. ཏཐཱཔི ‘‘ཏསྶ ནརཝརསྶཱ’’ཏི ཨེཏྟཀམེཝ ཝཏྟབྦཾ, ཀསྨཱ ‘‘ཡཾ ལོཀོ’’ཏྱཱདི ཝུཏྟནྟི? ཏཾ ཛནཀཾ ནརཝརཾ ལོཀཔཱལེན ལོཀསེཊྛེན སདྡྷིཾ སབྦེན ལོཀེན པཱུཛནཱིཡནམསྶནཱིཡབྷཱཝེན ཐོམེཏུཾ ‘‘ཡཾ ལོཀོ’’ཏྱཱདི ཝུཏྟཾ. པཱུཛེནྟཱཔི ཝནྡིཏྭཱ པཱུཛེནྟི, ཏསྨཱ ‘‘པཱུཛཡཏེ’’ཏི ཨེཏྟཀམེཝ ཝཏྟབྦནྟི? ཏཐཱཔི ཀེཙི ཀེསཉྩི པཱུཛཱསཀྐཱརཱདཱིནི ཀརོནྟཱཔི ཏེསཾ ཨཔཱཀཊགུཎཏཱཡ ནམཀྐཱརཾ ན ཀརོནྟི. ཨེཝཾ བྷགཝཏོ ཡཐཱབྷཱུཏཨབྦྷུགྒཏསདྡཏཱཡ པན བྷགཝནྟཾ པཱུཛེཏྭཱཔི ཝནྡཏིཡེཝཱཏི དསྶེཏུཾ ‘‘ནམསྶཏི ཙཱ’’ཏི ཝུཏྟཾ. པཱུཛེནྟོ, ནམསྶནྟོ ཙ ན ཀདཱཙིཡེཝ, ཨཐ ཁོ སབྦཀཱལནྟི དསྶེཏུཾ ‘‘སདཱ’’ཏི ཝུཏྟཾ. ཏཱདིསསྶ ནརཝརསྶ ཏཱདིསཾ སཱསནཝརཾ སཎྷསུཁུམཉཱཎསམྤནྣེཧི ཝིདཱུཧེཝ སུཁུམཉཱཎེནེཝ ཉེཡྻནྟི སཱསནཝརཾ ཐོམེཏུཾ ‘‘ཝིདཱུཧི ཉེཡྻ’’ནྟི ཝུཏྟཾ.

ཨེཏྠ ཙ ‘‘པཱུཛཡཏེ, ནམསྶཏཱི’’ཏི ཨེཏེཧི པཱུཛནནམསྶནཀིརིཡཱཡ ཧེཏུབྷཱུཏཱ སབྦཉྙུཏཉྙཱཎཱདཡོ ཨནེཀེ ལོཀིཡལོཀུཏྟརགུཎཱ པཀཱསིཏཱ ཧོནྟི ཏེ གུཎེ ཨཱགམྨ སབྦལོཀསྶ པཱུཛནནམསྶནཙེཏནཱཡ པཝཏྟནཏོ. ཏེསུ ཧི ཀིཉྩི སརཱུཔཏོ, ཀིཉྩི ཨནུམཱནཏོ སཱརིཔུཏྟཏྠེརཱདཡོ ཨནུསྶརནྟི, པཱུཛེནྟི, ནམསྶནྟི. ཏེན ཝུཏྟཾ ‘‘ཨནུསྶརེཐ སམྦུདྡྷ’’ནྟི (སཾ. ནི. ༡.༢༤༩). ཨེཀདེསགུཎཱཔི པཱུཛཱརཧཱ ནམསྶནཱརཧཱ, ཀསྨཱ སབྦེཔི གུཎཱ པཀཱསིཏཱཏི? སབྦགུཎདསྶནེན བོདྷིསམྦྷཱརསམྦྷརཎམཧཱཀརུཎཱཡོགསངྑཱཏཧེཏུཉཱཎཔཧཱན- ཨཱནུབྷཱཝརཱུཔཀཱཡསམྤཏྟིསངྑཱཏཕལཧིཏཛ྄ཛྷཱསཡིནྡྲིཡ- པཱཀཀཱལཱགམནདེསནཱཉཱཎསངྑཱཏསཏྟུ- པཀཱརསམྤདཱཝསེན ཐོམནཱ དསྶིཏཱ. ཏེན ཨཏྟཧིཏཔཊིཔཏྟི, པརཧིཏཔཊིཔཏྟི ཙ ནིརུཔཀྐིལེསཱུཔགམནཱཔགམནཉྩ ལོཀསམཉྙཱནུཔཔཝཏྟི, ཏདནཏིདྷཱཝནཉྩ ཙརཎསམྤཏྟི, ཝིཛྫཱསམྤཏྟི ཙ ཨཏྟཱདྷིཔཏིཏཱ, དྷམྨཱདྷིཔཏིཏཱ ཙ ལོཀནཱཐཨཏྟནཱཐཏཱ ཙ པུབྦཀཱརིཀཏཉྙུཏཱ ཙ ཨཔརནྟཔཏཱ, ཨནཏྟནྟཔཏཱ ཙ བུདྡྷཀརཎདྷམྨབུདྡྷབྷཱཝསིདྡྷི ཙ པརཏཱརཎཨཏྟཏཱརཎཉྩ ¶ སཏྟཱནུགྒཧཙིཏྟཏཱ, དྷམྨཝིརཏྟཙིཏྟཏཱ ཙ པཀཱསིཏཱ བྷཝནྟི. ཏེན སབྦཔྤཀཱརེན ཨནུཏྟརདཀྑིཎེཡྻཏཱཨུཏྟམཔཱུཛནཱིཡནམསྶནཱིཡབྷཱཝཔཱུཛནནམསྶནཀིརིཡཱཡ ཙ ཁེཏྟངྒཏབྷཱཝཾ པཀཱསེཏི. ཏེན པཱུཛནཀནམསྶནཀཱནཾ ཡཐིཙྪིཏབྦཔཡོཛནསམྤཏྟི པཀཱསིཏཱཏི སབྦགུཎཱ པཀཱསིཏཱཏི.

ཨཱདིཀལྱཱཎཏཱདིགུཎསམྤཏྟིཡཱ ¶ ཝརཾ ཨགྒཾ ཨུཏྟམཾ, ནིཔུཎཉཱཎགོཙརཏཱཡ པཎྜིཏཝེདནཱིཡཉྩ, ཏསྨཱ ‘‘ཝརཾ ཉེཡྻ’’ནྟི ཝཙནེཧི སྭཱཀྑཱཏཏཱདཡོ སབྦེ དྷམྨགུཎཱ པཀཱསིཏཱ. ཨརིཡསཙྩཔཊིཝེདྷེན སམུགྒྷཱཏཀིལེསསམྨོཧཱཡེཝ པརམཏྠཏོ པཎྜིཏཱ བཱལྱཱདིསམཏིཀྐམནཏོ, ཏསྨཱ བྷཱཝིཏལོཀུཏྟརམགྒཱ, སཙྪིཀཏསཱམཉྙཕལཱ ཙ པུགྒལཱ ཝིསེསཏོ ‘‘ཝིདཱུ’’ཏི ཝུཙྩནྟི. ཏེ ཧི ཡཐཱཝུཏྟསཱསནཝརཾ ཨཝིཔརཱིཏཏོ ཉཱཏུཾ, ནེཏུཉྩ སཔརསནྟཱནེ སཀྐུཎནྟི. ཏསྨཱ ཡེ སུཔྤཊིཔནྣཏཱདཡོ ཨནེཀེཧི སུཏྟཔདེཧི སཾཝཎྞིཏཱ, ཏེ ཨརིཡསངྒྷགུཎཱཔི ནིརཝསེསཏོ ‘‘ཝིདཱུཧཱི’’ཏི པདེན པཀཱསིཏཱཏི. ཨེཝཾ ནེཏྟིཡཱ པཋམགཱཐཱཡ ‘‘ཨེཏཾ སཱསནཝར’’ནྟི པདེན སཱསནཏྟཡཾ སངྒཎྷིཏྭཱ ཏཏྠ ཨིཏརེསཾ དྭིནྣཾ ཨདྷིགམཱུཔཱཡབྷཱཝཏོ སབྦསཱསནམཱུལབྷཱུཏསྶ, ཨཏྟནོ ནེཏྟིཔྤཀརཎསྶ ཙ ཝིསཡབྷཱུཏསྶ པརིཡཏྟིསཱསནཝརསྶ དསྶནམུཁེན སབྦེ རཏནཏྟཡགུཎཱཔི ཐོམནཱཝསེན ནཡཏོཝ པཀཱསིཏཱ ཧོནྟི. ནཡཏོ ཧི དསྶིཏཱ སབྦེ གུཎཱ ནིརཝསེསཱ གཧིཏཱ བྷཝནྟི, ན སརཱུཔཏོ. ཏེནཱཧ བྷགཝནྟཾ ཋཔེཏྭཱ པཉྙཝནྟཱནཾ ཨགྒབྷཱུཏོ དྷམྨསེནཱཔཏིསཱརིཔུཏྟཏྠེརོཔི བུདྡྷགུཎཔརིཙྪེདནམནུཡུཏྟོ ‘‘ཨཔིཙ མེ དྷམྨནྭཡོ ཝིདིཏོ’’ཏི (དཱི. ནི. ༢.༡༤༦) བྷགཝཏཱཔི –

‘‘ཨེཝཾ ཨཙིནྟིཡཱ བུདྡྷཱ, བུདྡྷདྷམྨཱ ཨཙིནྟིཡཱ;

ཨཙིནྟིཡེ པསནྣཱནཾ, ཝིཔཱཀོ ཧོཏི ཨཙིནྟིཡོ’’ཏི. (ཨཔ. ཐེར ༡.༡.༨༢; ནེཏྟི. ༩༥) –

གཱཐཱ ཝུཏྟཱ. ཏཏྠ བུདྡྷདྷམྨཱཏི བུདྡྷགུཎཱ. ཨམྷཱཀཾ པན ཡཱཝཛཱིཝཾ རཏནཏྟཡགུཎཔརིདཱིཔནེ ཨཏིཨུསྶཱཧནྟཱནམྤི སརཱུཔཏོ ནཱིཧརིཏྭཱ དསྶེཏུཾ ཨསམཏྠབྷཱཝོ པགེཝ པཎྜིཏེཧི ཝེདིཏབྦོཏི.

ཨིཙྩེཝཾ ¶ –

‘‘ཡཾ ལོཀོ པཱུཛཡཏེ, སལོཀཔཱལོ སདཱ ནམསྶཏི ཙ;

ཏསྶེཏ སཱསནཝརཾ, ཝིདཱུཧི ཉེཡྻཾ ནརཝརསྶཱ’’ཏི. –

ནིགྒཧིཏལོཔཝསེན ཝུཏྟཱཡ གཱཐཱཡ སངྑེཔེན ཀཐིཏོ ཨནུསནྡྷྱཱདིཀོ སམཏྟོཏི.

‘‘ཡཾ ལོཀོ པཱུཛཡཏེ, ས ལོཀཔཱལོ སདཱ ནམསྶཏི ཙ;

ཏཾ ཏསྶ སཱསནཝརཾ, ཝིདཱུཧི ཉེཡྻཾ ནརཝརསྶཱ’’ཏི. –

གཱཐཾ ¶ ཨཔརེ པཋནྟི. ཏསྶཱཔི ཨནུསནྡྷྱཏྠོ ཝུཏྟནཡོཝ. ཡོཛནཏྠོ པན ཝིསེསོ. ཏཏྠ ཧི སལོཀཔཱལོ ལོཀོ ཡསྶ སཏྠུནོ ནརཝརསྶ ཡཾ སཱསནཝརཾ སཾཝཎྞེཏབྦསཧིཏཾ, སཾཝཎྞེཏབྦཾ ཨེཝ ཝཱ པཱུཛཡཏེ ཙེཝ ནམསྶཏི ཙ, ཏསྶ ལོཀཔཱལསྶ སཏྠུནོ ཏཾ པཱུཛེཏབྦཾ, ནམསྶིཏབྦཉྩ ཝིདཱུཧེཝ ཝིཉྙཱཏབྦཾ, ཨེཏཾ སཱསནཝརཾ ནེཏྟིཔྤཀརཎསྶ ཝིསཡནྟི གཧེཏབྦནྟི ཡོཛནཱ. ཡོཛནཱཀཱརོཔི ཧེཊྛཱ ཝུཏྟནཡོཝ.

ཝིགྒཧཏྠོཔི ཝིསེསོ. ཨིམསྨིཉྷི ནཡེ ལོཀཾ པཱལེནྟཱིཏི ལོཀཔཱལཱ, ཡཐཱཝུཏྟཙཏུམཧཱརཱཛཱདཡོ. ཏེཧི ལོཀཔཱལེཧི སཧིཏཾ སབྦལོཀཾ པཱལེཏི ལོཀགྒནཱཡཀཏྟཱཏི ལོཀཔཱལོཏི བྷགཝཱཔི ལོཀཔཱལསདྡེན ཝུཏྟོ. སོ ཧི ‘‘ཏསྶཱ’’ཏི ཨེཏྠ ཏཾ-སདྡེན པརཱམསཱིཡཏི, ཏསྨཱ ཏསྶ ལོཀཔཱལསྶ སཏྠུནོ ནརཝརསྶཱཏི ཨཏྠོ གཧིཏོ. ཡདི ཨེཝཾ ལོཀཔཱལོ གུཎཱིབྷཱུཏོ ཨཔདྷཱནོ པདྷཱནབྷཱུཏཾ ལོཀཾ ཝིསེསེཏྭཱ ཝིནིཝཏྟོ, ཀཐཾ ཏཾ-སདྡེན པརཱམསཱིཡཏཱིཏི? ལོཀཝིསེསཀོ སམཱནོཔི སཱསནཝརཱཔེཀྑཏཱཡ ཛནཀསཱམིབྷཱཝེན སམྦནྡྷིཝིསེསབྷཱུཏཏྟཱ པདྷཱནབྷཱུཏོ ཝིཡ པརཱམསཱིཡཏཱིཏི. བྷགཝཱ སཱསནཝརསྶ སཱམིབྷཱཝེན གཧིཏོ. ཀཐཾ སཱསནཝརསྶ སཱམཱི བྷགཝཱ སཱསནཝརཾ པཱུཛཡཏཱིཏི? ན ཙཱཡཾ ཝིརོདྷོ. བུདྡྷཱ ཧི བྷགཝནྟོ དྷམྨགརུནོ, ཏེ སབྦཀཱལཾ དྷམྨམཔཙཡམཱནཱཝ ཝིཧརནྟཱིཏི. བུདྡྷཱནཉྷི དྷམྨགརུདྷམྨཱཔཙཡམཱནབྷཱཝོ ‘‘ཡཾནཱུནཱཧཾ…པེ… ཏམེཝ དྷམྨཾ སཀྐཏྭཱ གརུཾ ཀཏྭཱ མཱནེཏྭཱ པཱུཛེཏྭཱ ཨུཔནིསྶཱཡ ཝིཧརེཡྻ’’ནྟི (ཨ. ནི. ༤.༢༡) ཝུཏྟོ, ཏསྨཱ ལོཀཔཱལོ བྷགཝཱ སཱསནཝརཾ ¶ པཱུཛཡཏཱིཏི དཊྛབྦོ. ཨེཝཾ སཏི ལོཀཔཱལོ བྷགཝཱ སཱསནཝརཾ པཱུཛཡཏཱིཏི ཨཏྠོ ཡུཏྟོ ཧོཏུ, ཀཐཾ ལོཀཔཱལོ བྷགཝཱ སཱསནཝརཾ ནམསྶཏཱིཏི ཡུཏྟོཏི? ཡུཏྟོཝ ‘‘ནམསྶཏཱི’’ཏི པདསྶ གརུཀརཎེན ཏནྣིནྣཔོཎཔབྦྷཱརོཏི ཨཏྠསྶཱཔི ལབྦྷནཏོ. བྷགཝཱ ཧི དྷམྨགརུཏཱཡ སབྦཀཱལཾ དྷམྨནིནྣཔོཎཔབྦྷཱརབྷཱཝེན ཝིཧརཏཱིཏི. ཝུཏྟཉྷེཏཾ ‘‘ཡེན སུདཾ ནིཙྩཀཔྤཾ ཝིཧརཱམཱི’’ཏིཨཱདི. སེསམེཏྠ ཧེཊྛཱ ཝུཏྟནཡེན ཝཱ སཾཝཎྞནཱསུ ཝུཏྟནཡེན ཝཱ ཉཱཏབྦནྟི ཨམྷེཧི ན ཝིཏྠཱརཱིཡཏི.

ཨེཝཾ པཋམགཱཐཱཡ ‘‘སཱསནཝར’’ནྟི པདེན ཏིཝིདྷམྤི སཱསནཾ སངྒཎྷིཏྭཱ ཏཏྠ པརིཡཏྟིསཱསནམེཝ ཨཏྟནོ ནེཏྟིཔྤཀརཎསྶ ཝིསཡཾ ནིཡམེཏྭཱ དསྶེནྟོ ‘‘དྭཱདས པདཱནི’’ཏྱཱདིམཱཧ. ཨཐ ཝཱ པཋམགཱཐཱཡ རཏནཏྟཡཐོམནེན སཧ ནེཏྟིཔྤཀརཎཏཱཝིསཡཾ སཱསནཝརཾ ཨཱཙརིཡེན དསྶིཏཾ, ‘‘ཏསྶ སཱསནཝརཾ ཀིཾ སབྦཾཡེཝ ནེཏྟིཔྤཀརཎསྶ ཝིསཡཾ, ཨུདཱཧུ པརིཡཏྟིསཱསནམེཝཱ’’ཏི པུཙྪིཏབྦཏྟཱ པརིཡཏྟིསཱསནབྷཱུཏཾ སུཏྟམེཝཱཏི དསྶེནྟོ ‘‘དྭཱདས པདཱནི སུཏྟ’’ནྟིཨཱདིམཱཧ. ཏཏྠ ‘‘སཱསནཝར’’ནྟི སཱམཉྙེན ཝུཏྟམྤི པརིཡཏྟིསུཏྟམེཝ སཱསནཝརནྟི ¶ གཧེཏབྦནྟི ཨཏྠོ. ‘‘ཏཾ པན ཀཏིཝིདྷ’’ནྟི ཝཏྟབྦཏྟཱ ‘‘དྭཱདས པདཱནཱི’’ཏི ཝུཏྟཾ, སངྑེཔཏོ པབྷེདེན དྭཱདསཝིདྷནྟི ཨཏྠོ. པབྷེདཏོ དྭཱདསཝིདྷམྤི བྱཉྫནཔདཨཏྠཔདཏོ པན དུཝིདྷམེཝཱཏི དསྶེཏུཾ ‘‘ཏཾ སབྦཾ བྱཉྫནཉྩ ཨཏྠོ ཙཱ’’ཏི ཝུཏྟཾ. ‘‘ཏསྨིཾ དྭཡེ ཨེཀམེཝ སརཱུཔཏོ ནེཏྟིཔྤཀརཎསྶ ཝིསཡནྟི ཝིཉྙེཡྻཾ, ཨུདཱཧུ ཨུབྷཡ’’ནྟི པུཙྪིཏབྦཏྟཱ ཨུབྷཡནྟི དསྶེཏུཾ ‘‘ཏཾ ཝིཉྙེཡྻཾ ཨུབྷཡ’’ནྟི ཝུཏྟཾ. ཝཙནཝཙནཱིཡབྷཱཝེན སམྦནྡྷེ ཡསྨིཾ བྱཉྫནེ, ཨཏྠེ ཙ ‘‘སུཏྟ’’ནྟི ཝོཧཱརོ པཝཏྟོ, ཏཾ ཨུབྷཡཾ སརཱུཔཏོ ནེཏྟིཔྤཀརཎསྶ ཝིསཡནྟི ཝིཉྙེཡྻནྟི ཨཏྠོ. ‘‘ཀིནྟི ཝིཉྙེཡྻ’’ནྟི ཝཏྟབྦཏྟཱ ‘‘ཀོ ཨཏྠོ, བྱཉྫནཾ ཀཏམ’’ནྟི ཝུཏྟཾ. ཨིདཾ ཝུཏྟཾ ཧོཏི – ཚབྱཉྫནཔདཚཨཏྠཔདབྷེདེན དྭཱདསཝིདྷཾ བྱཉྫནཔདཨཏྠཔདཝསེན དུཝིདྷཾ སབྦཔརིཡཏྟིསངྑཱཏཾ སུཏྟཾ མམ ནེཏྟིཔྤཀརཎསྶ ཝིསཡཾ སཱསནཝརནྟི ཉཱཏབྦཾ. སརཱུཔཏོ པུཙྪིཏྭཱ ཨཏྠཔདཾ, བྱཉྫནཔདཉྩ སརཱུཔཏོ ཉཱཏབྦནྟི.

ཨེཝཾ པཋམགཱཐཱཡ ‘‘སཱསནཝར’’ནྟི ཝུཏྟསྶ སུཏྟསྶ པརིཡཏྟིབྷཱཝཉྩེཝ ཨཏྠཔདབྱཉྫནཔདབྷཱཝེན ཝེདིཏབྦཏྟཉྩ དསྶེཏྭཱ ཨིདཱནི ཏསྶ སུཏྟསྶ པཝིཙཡཱུཔཱཡཾ ¶ ནེཏྟིཔྤཀརཎཾ པདཏྠཝིབྷཱགེན དསྶེཏུཾ ‘‘སོལ༹སཧཱརཱ’’ཏྱཱདིམཱཧ. ཨཐ ཝཱ དུཏིཡགཱཐཱཡ ནེཏྟིཔྤཀརཎསྶ ཝིསཡཾ སཱསནཝརཾ ནིཡམེཏྭཱ དསྶིཏཾ, ‘‘ནེཏྟི ནཱམ ཀཏམཱ, ཀཏིཝིདྷཱ’’ཏི པུཙྪིཏབྦཏྟཱ ནེཏྟིནཱམ ཨེཏྟིཀཱཏི སངྑེཔཏོ དསྶེཏུཾ ‘‘སོལ༹སཧཱརཱ’’ཏྱཱདིམཱཧ. ཏཏྠ ཏསྶ སཱསནསྶ སུཏྟསྶ ཨཏྠཔརིཡེཊྛི ནེཏྟིསཾཝཎྞནཱ མཡཱ མཧཱཀཙྩཱཡནེན ནིདྡིཊྛཱ ནེཏྟི ནཱམ སོལ༹སཧཱརསམུདཱཡཱ པཉྩནཡསམུདཱཡཱ ཨཊྛཱརསམཱུལཔདསམུདཱཡཱཏི ཝིཛཱནིཏབྦཱཏི.

ཏེ ཧཱརཱདཡོ ཀེནཊྛེན ནེཏྟི ནཱམ? ཝེནེཡྻསཏྟེ ཨརིཡདྷམྨཾ ནེཏཱིཏི ནེཏྟཱིཏི ཨེཝམཱདི ཨཏྠོ སཾཝཎྞནཱསུ (ནེཏྟི. ཨཊྛ. གནྠཱརམྦྷཀཐཱ) ཝུཏྟོཝ. ཨིམཱཡ ཏཏིཡགཱཐཱཡཔི ‘‘མཧཱཀཙྩཱནེན ནིདྡིཊྛཱ’’ཏི པཱཋོ སུནྡརོ. ‘‘མཧཱཀཙྩཱཡནེན ནིདྡིཊྛཱ’’ཏི ཝཱ པཱཋོ, ན སུནྡརོ. ལཀྑཎཉྷི མཡཱ ཧེཊྛཱ ཝུཏྟནྟི. ‘‘སོལ༹སཧཱརཱདིསམུདཱཡཱ ནེཏྟཱི’’ཏི ཝུཏྟཱ, ཏེ ཧཱརཱ སུཏྟསྶ བྱཉྫནཝིཙཡོ ཝཱ ཧོནྟི, ཨཏྠཝིཙཡོ ཝཱ, ནཡཱ ཙ བྱཉྫནཝིཙཡོ ཝཱ ཧོནྟི, ཨཏྠཝིཙཡོ ཝཱཏི ཝིཙཱརཎཱཡཾ སཏི ‘‘ཨིམེ ཨིམསྶ ཝིཙཡོ’’ཏི ནིཡམེཏྭཱ དསྶེཏུཾ ‘‘ཧཱརཱ བྱཉྫནཝིཙཡོ’’ཏིཨཱདིམཱཧ. ཏཏྠ ཧཱརཱ སུཏྟསྶ བྱཉྫནཝིཙཡོ ཧོནྟི, ན ཨཏྠཝིཙཡོ སོལ༹སཧཱརཱནཾ མཱུལཔདནིདྡྷཱརཎཾ ཝཛྫེཏྭཱ བྱཉྫནམུཁེནེཝ སཾཝཎྞནཱབྷཱཝཏོ. ཏཡོ པན ནཡཱ སུཏྟསྶ ཨཏྠཝིཙཡོ ཧོནྟི, ཏིཎྞཾ ནཡཱནཾ མཱུལཔདསངྑཱཏཨཝིཛྫཱདིསབྷཱཝདྷམྨནིདྡྷཱརཎམུཁེནེཝ སུཏྟསྶ ཨཏྠསཾཝཎྞནཱབྷཱཝཏོཏི.

‘‘ཏཾ ¶ ཨུབྷཡཾ སུཏྟེ སཾཝཎྞནཱབྷཱཝེན ཀེནཙི ཀཏྠཙིཡེཝ ཡོཛེཏབྦཾ, ཨུདཱཧུ སབྦཐཱ སབྦཏྠ ཡོཛིཏ’’ནྟི པུཙྪིཏབྦབྷཱཝཏོ ཏཾ ཨུབྷཡཾ སབྦཏྠ སུཏྟེསུ སབྦཐཱ ཡོཛིཏནྟི དསྶེཏུཾ ‘‘ཨུབྷཡཾ པརིགྒཧཱིཏ’’ནྟི ཝུཏྟཾ. ཧཱརཱ ཙེཝ ནཡཱ ཙ ཨུབྷཡཾ སུཏྟསྶ ཨཏྠནིདྡྷཱརཎཝསེན པརིཏོ སམནྟཏོ གཧིཏཾ སབྦཐཱ སུཏྟེསུ ཡོཛིཏནྟི.

‘‘ཧཱརཱདིསམུདཱཡབྷཱུཏཾ ནེཏྟིསངྑཱཏཾ སུཏྟཾ ཀཐཾ སཾཝཎྞེཏབྦཾ སུཏྟཾ སཾཝཎྞེཏཱི’’ཏི ཝཏྟབྦབྷཱཝཏོ ཝུཏྟཾ ‘‘ཝུཙྩཏི སུཏྟཾ ཡཐཱསུཏྟ’’ནྟི. ནེཏྟིསངྑཱཏཾ སཾཝཎྞནཱསུཏྟཾ སཾཝཎྞེཏབྦསུཏྟཱནུརཱུཔཾ ཡཐཱ ཡེན ཡེན དེསནཱཧཱརེན ཝཱ ཨཉྙེན ཝཱ སཾཝཎྞེཏབྦཾ, ཏེན ཏེན ཝུཙྩཏི སཾཝཎྞེཏཱིཏི ¶ ཨཏྠོ. ཨཐ ཝཱ ‘‘ནེཏྟིསངྑཱཏཾ སུཏྟཾ ཀིཏྟཀཾ སཾཝཎྞེཏབྦཾ སུཏྟཾ སཾཝཎྞེཏཱི’’ཏི ཝཏྟབྦབྷཱཝཏོ ཝུཏྟཾ ‘‘ཝུཙྩཏི སུཏྟཾ ཡཐཱསུཏྟ’’ནྟི. ཏཏྠ ཡཐཱསུཏྟཾ ཡཾ ཡཾ སུཏྟཾ བྷགཝཏཱ ཝུཏྟཾ, ཏཾ ཏཾ སབྦཾ སུཏྟཾ ནེཏྟིསངྑཱཏཾ སུཏྟཾ ཝུཙྩཏི ཝདཏི ཨསྶཱདཱདཱིནཝདསྶནཝསེན སཾཝཎྞེཏཱིཏི. ཏེན ཝུཏྟཾ ‘‘ནེཏྟིནཡེན ཧི སཾཝཎྞེཏུཾ ཨསཀྐུཎེཡྻཾ ནཱམ སུཏྟཾ ནཏྠཱི’’ཏི (ནེཏྟི. ཨཊྛ. སངྒཧཝཱརཝཎྞནཱ).

‘‘ཡཾ ཡཾ བྷགཝཏཱ དེསིཏཾ སུཏྟཾ ནེཏྟིསཾཝཎྞནཱཡ སཾཝཎྞིཏཾ, སཱ སཾཝཎྞེཏབྦཱ དེསནཱ ཙ ཝིཉྙེཡྻཱ, ཨུདཱཧུ དེསིཏབྦཉྩཱ’’ཏི ཝཏྟབྦབྷཱཝཏོ ‘‘ཡཱ ཙེཝ དེསནཱ’’ཏྱཱདིམཱཧ. ཡཱ ཙེཝ དེསནཱ པཱལི༹ སཾཝཎྞིཏཱ, སཱ ཙ, ཏཱཡ དེསནཱཡ དེསིཏཾ ཡཾ དྷམྨཛཱཏཾ, ཏཉྩ ཨུབྷཡཾ ཝིམུཏྟཱཡཏནདེསནཱསཱིསེན པརིཙཡཾ ཀརོནྟེཧི ཨེཀནྟེན ཝིཉྙེཡྻཾ ཨུབྷཡསྶེཝ ཨནུཔཱདིསེསཔརིནིབྦཱནཔརིཡོསཱནཱནཾ སམྤཏྟཱིནཾ ཧེཏུབྷཱཝཏོ. ‘‘ཏསྶ ཨུབྷཡསྶ ཝིཛཱནནེ སཱདྷེཏབྦེ སཱདྷེཏབྦསྶ ཝིཛཱནནསྶ ཧེཏུབྷཱུཏཱ ཀཏམཱ ཨནུཔུབྦཱི’’ཏི པུཙྪིཏབྦབྷཱཝཏོ ཝུཏྟཾ ‘‘ཏཏྲཱ’’ཏྱཱདི. ཏཏྠ ཏཏྲ ཝིཛཱནནེ སཱདྷེཏབྦེ སུཏྟཱདིནཝངྒསྶ སཱསནསྶ ཨཏྠཔརིཡེསནཱ ཨཏྠཝིཙཱརཎཱ ཧཱརནཡཱནཾ ཨཡཾ ཨནུཔུབྦཱི ཝིཛཱནནསྶ སཱདྷེཏབྦསྶ ཧེཏུབྷཱུཏཱ ཨནུཔུབྦཱི ནཱམཱཏི ཨཏྠོ. ཨཐ ཝཱ ཏསྶ ཨུབྷཡསྶ ཝིཛཱནནེ སཱདྷེཏབྦེ སུཏྟཱདིནཝངྒསྶ སཱསནསྶ ཨཏྠཔརིཡེསནཱཡ ཨཏྠཝིཙཱརཎཱཡ ཨཡཾ ཨནུཔུབྦཱི ཝིཛཱནནསྶ སཱདྷེཏབྦསྶ ཧེཏུབྷཱུཏཱ ཨནུཔུབྦཱི ནཱམཱཏི. ཨཐ ཝཱ ཝཀྑམཱནཱཡ ཧཱརནཡཱནུཔུབྦིཡཱ ནཝཝིདྷསུཏྟནྟཔརིཡེསནཱ ཝིཛཱནནསྶ ཧེཏུབྷཱུཏཱཏི ཝེདིཏབྦཱ. ཏེནཱཀཱརེནེཝ ཨཊྛཀཐཱཡཾ ཏིདྷཱ ཝུཏྟཱཏི.

སངྒཧཝཱརསྶ ཨཏྠཝིབྷཱཝནཱ ནིཊྛིཏཱ.

༢. ཨུདྡེསཝཱརཨཏྠཝིབྷཱཝནཱ

༡. ཨེཝཾ ¶ སངྒཧཝཱརེན སངྑེཔཏོ དསྶིཏེ ཧཱརཱདཡོ ཨིདཱནི ཝིབྷཱགེན དསྶེཏུཾ ‘‘ཏཏྠ ཀཏམེ སོལ༹ས ཧཱརཱ’’ཏིཨཱདིདེསནཱ ཨཱརདྡྷཱ ¶ . ཨཐ ཝཱ སོལ༹སཧཱརཱདིསམུདཱཡཱ ནེཏྟི ནཱམ མཡཱ མཧཱཀཙྩཱནེན ནིདྡིཊྛཱཏི ཝུཏྟཱ, ‘‘ཀཏམེ ཏེ སོལ༹ས ཧཱརཱ’’ཏི པུཙྪིཏབྦཏྟཱ ཝུཏྟཾ ‘‘ཏཏྠ སོལ༹ས ཧཱརཱ’’ཏྱཱདི. ཏཏྠ ཏཏྠཱཏི ཏེསུ སོལ༹སཧཱརཱདཱིསུ. དེསནཱ ཧཱརོ, ཝིཙཡོ ཧཱརོ…པེ… སཱམཱརོཔནོ ཧཱརོཏི ཨིམེ སོལ༹ས ཧཱརཱཏི དཊྛབྦཱ.

ཏཏྠ སབྦསཱདྷཱརཎཏྟཱ ཧཱརཔདསྶ ཝཙནཏྠོ པཋམཾ ཝཏྟབྦོ. ཀེནཊྛེན ཧཱརཱཏི? ཧརཱིཡནྟི ཨེཏེཧཱིཏི ཧཱརཱ. ཨེཏེཧི སཾཝཎྞནཱཝིསེསེཧི སཾཝཎྞིཡེསུ སུཏྟགེཡྻཱདཱིསུ ཨཉྙཱཎསཾསཡཝིཔལླཱསཱ ཧརཱིཡནྟི, ཨིཏི ཨཉྙཱཎཱདིཧརཎཀཱརཎཏྟཱ ‘‘ཨེཏེཧཱི’’ཏི པདེན ནིདྡིཊྛཱ སཾཝཎྞནཱཝིསེསཱ ཧཱརཱ ནཱམ, ཧར-དྷཱཏུཡཱ ཨཱཙརིཡསྶ ཝཙཱིབྷེདསདྡོ, ཏཾསམུཊྛཱཔཀོ ཙིཏྟུཔྤཱདོ ཙ མུཁྱཏྠོ, ཝེནེཡྻཱནཾ སཾཝཎྞེཏབྦསུཏྟསྶ ཨཏྠཛཱནནཱདིཉཱཎསམྤཡུཏྟཙིཏྟུཔྤཱདོ ཀཱརཎཱུཔཙཱརཏྠོ, ཏསྶ ཨུཔནིསྶཡཔཙྩཡབྷཱུཏཱནཾ སཾཝཎྞནཱཝིསེསཱནཾ ཨུཔནིསྶཡཔཙྩཡསཏྟི ཕལཱུཔཙཱརཏྠོ, ཨིཏི-སདྡེན སཱ ཨུཔནིསྶཡཔཙྩཡསཏྟིཡེཝ པརཱམསཱིཡཏི. ཏཾསཏྟིསམྤནྣཱ སཾཝཎྞནཱཝིསེསཱ ཎ-པཙྩཡཏྠཱ ཧོནྟི. ཨེས ནཡོ ཨེཝརཱུཔེསུ ཋཱནེསུཔི. ཝིཏྠཱརོ ཨཊྛཀཐཱཡཾ (ནེཏྟི. ཨཊྛ. ༡) ཝུཏྟོ ཨེཝ.

ཨསཱདྷཱརཎཏོ པན དེསཱིཡཏི ཨེཏཱཡཱཏི དེསནཱ. ཨེཏཱཡ སཾཝཎྞནཱཡ སཾཝཎྞེཏབྦསུཏྟཏྠོ དེསཱིཡཏི སཾཝཎྞཱིཡཏི སཾཝཎྞནཱནུསཱརེན ཉཱཔཱིཡཏི, ཨིཏི ཉཱཔནཀཱརཎཏྟཱ ‘‘ཨེཏཱཡཱ’’ཏི པདེན ནིདྡིཊྛཱ ཝིསེསསཾཝཎྞནཱ དེསནཱ ནཱམ, ན པཱལི༹དེསནཱ, པཱལི༹དེསནཱཡ སཾཝཎྞེཏབྦསཾཝཎྞནཱབྷཱཝེན སཧཙརཎཏོ ཝཱ དེསནཱ. ཀིཉྩཱཔི ཨཉྙེ ཧཱརཱ དེསནཱཔཱལི༹སངྑཱཏསྶ སུཏྟསྶ ཨཏྠསཾཝཎྞནཱབྷཱཝཏོ དེསནཱཡ སཧཙཱརིནོ ཧོནྟི, ཨཡཾ པན ཧཱརོ ཡེབྷུཡྻེན ཡཐཱརུཏཝསེནེཝ ཝིཉྙཱཡམཱནཏྟཱ པཱལི༹དེསནཱཡ སཧ ཙརཏཱིཏི ཝཏྟབྦཏཾ ཨརཧཏི, ན ཏཐཱ པརེ. ན ཧི ཨསྶཱདཱདཱིནཝནིསྶརཎཱདིསནྡསྶནལཀྑཎརཧིཏཱ པཱལི༹དེསནཱ ཨཏྠི, ཨཡཉྩ ཧཱརོ ཨསྶཱདཱདིསནྡསྶནལཀྑཎོཏི.

ཝིཙིཡནྟི ཨེཏེནཱཏི ཝིཙཡོ. ཨེཏེན སཾཝཎྞནཱཝིསེསེན སུཏྟེ པདཔཉྷཱདཡོ ཝིཙིཡནྟི, ཨིཏི ¶ ཝིཙཱརཎཀཱརཎཏྟཱ སོ སཾཝཎྞནཱཝིསེསོ ¶ ཝིཙཡོ ནཱམ. ཀཏྭཏྠཱདྷིཀརཎཏྠཱཔི ལབྦྷནྟི. སཾཝཎྞེཏབྦསུཏྟེན པདཔཉྷཱདིཝིཙཡནལཀྑཎོ སཾཝཎྞནཱཝིསེསོ ཝིཙཡོ ཧཱརོ.

ཡུཏྟཱཡུཏྟི ཝིཙཱརཱིཡཏི ཨེཏཱཡཱཏི ཡུཏྟི. ཨེཏཱཡ ཝིསེསསཾཝཎྞནཱཡ སབྦེསཾ ཧཱརཱནཾ བྷཱུམིགོཙརཱནཾ ཡུཏྟཱཡུཏྟི ཝིཙཱརཱིཡཏི, ཨིཏི ཝིཙཱརཎཀཱརཎཏྟཱ ‘‘ཨེཏཱཡཱ’’ཏི པདེན ནིདྡིཊྛཱ ཝིསེསསཾཝཎྞནཱ ཡུཏྟི ནཱམ. ཨིདྷ ཨུཏྟརཔདལོཔོ དཊྛབྦོ, ཡུཏྟིཡཱ ཝིཙཱརཎཱ, ཝིཙཱརཎཱིཡབྷཱཝེན སཧཙརཎཏོ ཝཱ ཡུཏྟི. སབྦཧཱརཱནཾ བྷཱུམིགོཙརཱནཾ ཡུཏྟཱཡུཏྟིཝིཙཱརཎལཀྑཎོ སཾཝཎྞནཱཝིསེསོ ཡུཏྟི ཧཱརོ.

པདཏི པཝཏྟེཏི ཕལཾ ཨེཏེནཱཏི པདཾ, ཀཱརཎཾ. ཋནྟི ཏིཊྛནྟི ཨེཏྠ ཕལཱནི ཏདཱཡཏྟཝུཏྟིཏཱཡཱཏི ཋཱནཾ, ཀཱརཎཾ. པདཉྩ ཏཾ ཋཱནཉྩཱཏི པདཊྛཱནཾ, ཨཱསནྣཀཱརཎཾ. སུཏྟེ ཨཱགཏདྷམྨཱནཾ པདཊྛཱནཾ ཝིཙཱརཱིཡཏི ཨེཏཱཡཱཏི པདཊྛཱནཱ, ཝིསེསསཾཝཎྞནཱ, ཝིཙཱརཎལོཔོཝ, སུཏྟེ ཨཱགཏདྷམྨཱནཾ པདཊྛཱནཱནཾ, ཏེསཉྩ པདཊྛཱནཱནཾ ཝིཙཱརཎལཀྑཎོ སཾཝཎྞནཱཝིསེསོ པདཊྛཱནོ ཧཱརོ.

སུཏྟེ ཨཝུཏྟཱཔི སམཱནལཀྑཎཱ དྷམྨཱ ལཀྑཱིཡནྟི ཨེཏེན སཾཝཎྞནཱཝིསེསེནཱཏི ལཀྑཎོ, སུཏྟེ ཝུཏྟེན དྷམྨེན སམཱནལཀྑཎཱནཾ དྷམྨཱནཾ ཨཝུཏྟཱནམྤི ནིདྡྷཱརཎལཀྑཎོ སཾཝཎྞནཱཝིསེསོ ལཀྑཎོ ཧཱརོ.

སུཏྟེ དསྶིཡམཱནཱ ནིབྦཙནཱདཡོ ཙཏྟཱརོཔི ཝིཡཱུཧཱིཡནྟི ཝིབྷཱགེན སམྤིཎྜཱིཡནྟི ཨེཏྠ, ཨེཏེན ཝཱཏི བྱཱུཧོ, ཙཏུནྣཾ ནིབྦཙནཱདཱིནཾ བྱཱུཧོ ཙཏུབྱཱུཧོ. ནིབྦཙནཱདྷིཔྤཱཡབྱཉྫནཱནཉྩེཝ དེསནཱནིདཱནསྶ ཙ པུབྦཱཔརེན སདྡྷིཾ སནྡསྶནལཀྑཎོ སཾཝཎྞནཱཝིསེསོ ཙཏུབྱཱུཧོ ཧཱརོ.

དེསནཱཡ གཧིཏདྷམྨེན སབྷཱགཱ, ཝིསབྷཱགཱ ཙ དྷམྨཱ ཨཱཝཊྚཱིཡནྟི ཨེཏྠ, ཨེཏེན ཝཱཏི ཨཱཝཊྚོ, དེསནཱཡ གཧིཏདྷམྨཱནཾ སབྷཱགཝིསབྷཱགདྷམྨཝསེན ཨཱཝཊྚནལཀྑཎོ སཾཝཎྞནཱཝིསེསོ ཨཱཝཊྚོ ཧཱརོ.

ཨསཱདྷཱརཎཱསཱདྷཱརཎཱནཾ སཾཀིལེསདྷམྨེ, ཝོདཱནདྷམྨེ ཙ སཱདྷཱརཎཱསཱདྷཱརཎཏོ, པདཊྛཱནཏོ, བྷཱུམིཏོ ཙ ཝིབྷཛནལཀྑཎོ སཾཝཎྞནཱཝིསེསོ ཝིབྷཏྟི ཧཱརོ.

སུཏྟེ ¶ ¶ ནིདྡིཊྛཱ དྷམྨཱ པཊིཔཀྑཝསེན པརིཝཏྟཱིཡནྟི ཨིམིནཱ, ཨེཏྠ ཝཱཏི པརིཝཏྟོ, སུཏྟེ ནིདྡིཊྛཱནཾ དྷམྨཱནཾ པཊིཔཀྑཏོ པརིཝཏྟནལཀྑཎོ སཾཝཎྞནཱཝིསེསོ པརིཝཏྟནོ ཧཱརོ.

སུཏྟེ ཝུཏྟསྶ ཨེཀསྶེཝ ཨཏྠསྶ ཝཱཙཀཾ ཝིཝིདྷཾ ཝཙནཾ ཨེཏྠ སཾཝཎྞནཱཝིསེསེཏི ཝིཝཙནཾ, ཝིཝཙནམེཝ ཝེཝཙནཾ, སུཏྟེ ཝུཏྟེ ཨེཀསྨིཾ ཨཏྠེ ཨནེཀཔརིཡཱཡསདྡཡོཛནཱལཀྑཎོ སཾཝཎྞནཱཝིསེསོ ཝེཝཙནོ ཧཱརོ.

སུཏྟེ ཝུཏྟཱ ཨཏྠཱ པཀཱརེཧི ཉཱཔཱིཡནྟི ཨིམིནཱ, ཨེཏྠ ཝཱཏི པཉྙཏྟི, ཨེཀེཀསྶ དྷམྨསྶ ཨནེཀཱཧི པཉྙཏྟཱིཧི པཉྙཱཔེཏབྦཱཀཱརལཀྑཎོ སཾཝཎྞནཱཝིསེསོ པཉྙཏྟི ཧཱརོ.

སུཏྟཱགཏཱ དྷམྨཱ པཊིཙྩསམུཔྤཱདཱདཱིསུ ཨོཏརཱིཡནྟི ཨནུཔྤཝེསཱིཡནྟི ཨེཏྠ, ཨེཏེན ཝཱཏི ཨོཏརཎོ, པཊིཙྩསམུཔྤཱདཱདིམུཁེཧི སུཏྟཏྠསྶ ཨོཏརཎལཀྑཎོ སཾཝཎྞནཱཝིསེསོ ཨོཏརཎོ ཧཱརོ.

སུཏྟེ པདཔདཏྠཔཉྷཱརམྦྷཱ སོདྷཱིཡནྟི སམཱདྷཱིཡནྟི ཨེཏྠ, ཨེཏེན ཝཱཏི སོདྷནོ, སུཏྟེ པདཔདཏྠཔཉྷཱརམྦྷཱནཾ སོདྷནལཀྑཎོ སཾཝཎྞནཱཝིསེསོ སོདྷནོ ཧཱརོ.

སཱམཉྙཝིསེསབྷཱུཏཱ དྷམྨཱ ཝིནཱ ཝིཀཔྤེན ཨདྷིཊྛཱིཡནྟི ཨནུཔྤཝཏྟཱིཡནྟི ཨེཏྠ, ཨེཏེན ཝཱཏི ཨདྷིཊྛཱནོ, སུཏྟཱགཏཱནཾ དྷམྨཱནཾ ཨཝིཀཔྤནཝསེན སཱམཉྙཝིསེསནིདྡྷཱརཎལཀྑཎོ སཾཝཎྞནཱཝིསེསོ ཨདྷིཊྛཱནོ ཧཱརོ.

ཡོ ཧེཏུ ཙེཝ པཙྩཡོ ཙ ཕལཾ པརིཀརོཏི ཨབྷིསངྑརོཏི, ཨིཏི སོ ཧེཏུ ཙེཝ པཙྩཡོ ཙ པརིཀྑཱརོ, ཡོ སཾཝཎྞནཱཝིསེསོ ཏཾ པརིཀྑཱརཾ ཧེཏུཉྩེཝ པཙྩཡཉྩ ཨཱཙིཀྑཏི, ཨིཏི སོ སཾཝཎྞནཱཝིསེསོ པརིཀྑཱརོ ནཱམ. སུཏྟེ ཨཱགཏདྷམྨཱནཾ པརིཀྑཱརསངྑཱཏེ ཧེཏུཔཙྩཡེ ནིདྡྷཱརེཏྭཱ སཾཝཎྞནཱལཀྑཎོ སཾཝཎྞནཱཝིསེསོ པརིཀྑཱརོ ཧཱརོ.

སུཏྟེ ཨཱགཏདྷམྨཱ པདཊྛཱནཱདིམུཁེན སམཱརོཔཱིཡནྟི ཨེཏྠ, ཨེཏེན ཝཱཏི སམཱརོཔནོ, སུཏྟེ ཨཱགཏདྷམྨཱནཾ པདཊྛཱནཝེཝཙནབྷཱཝཔཧཱནསམཱརོཔནཝིཙཱརཎལཀྑཎོ སཾཝཎྞནཱཝིསེསོ སམཱརོཔནོ ཧཱརོ. བྷཱཝསཱདྷནཝསེནཱཔི སབྦཏྠ ཝཙནཏྠོ ཝཏྟབྦོཏི ཏསྶཱཔི ཝསེན ཡོཛེཏབྦནྟི. སེསཾ སཾཝཎྞནཱནུསཱརེན ཉཱཏབྦནྟི.

‘‘ཏཏྠ ¶ ¶ ཀཏམེ སོལ༹ས ཧཱརཱ དེསནཱ’’ཏྱཱདིནཱ ཧཱརསརཱུཔཾ ཝུཏྟཾ, ཀིམཏྠཾ ‘‘ཏསྶཱནུགཱིཏི’’ཏྱཱདི ཝུཏྟནྟི? ཨནུགཱིཏིགཱཐཱཡ སུཁགྒཧཎཏྠཾ པུན ‘‘ཏསྶཱནུགཱིཏི དེསནཱ ཝིཙཡོ ཡུཏྟི’’ཏྱཱདི ཝུཏྟཾ. ཏཏྠ ཏསྶཱཏི ཧཱརུདྡེསསྶ. ཨནུགཱིཏཱིཏི ཨནུ པཙྪཱ གཱཡནགཱཐཱ. པཉྩདསོཏི པཉྩདསམོ. སོལ༹སོཏི སོལ༹སམོ. ཨཏྠཏོ ཨསཾཀིཎྞཱཏི དེསནཱདིཔདཏྠཏོ ལཀྑཎཏྠཏོ སངྐརཏོ རཧིཏཱ. ཏེན ཝུཏྟཾ ཨཊྛཀཐཱཡཾ ‘‘སོ ཙ ནེསཾ ཨསངྐརོ ལཀྑཎནིདྡེསེ སུཔཱཀཊོ ཧོཏཱི’’ཏི. སེསཾ སཾཝཎྞནཱནུསཱརེན ཉཱཏབྦནྟི. ‘‘ཀེཙི ཧཱརཱ ཀེཧིཙི ཧཱརེཧི སཾཀིཎྞཱ ཝིཡ དིསྶནྟི, ཀསྨཱ ཨསཾཀིཎྞཱཏི ཉཱཏབྦ’’ནྟི ཝཏྟབྦཏྟཱ ཝུཏྟཾ ‘‘ཨེཏེསཉྩེཝཱ’’ཏིཨཱདི. ཏཏྠ ཨེཏེསཉྩེཝ བྷཝཏཱིཏི ཨེཏེསཾ སོལ༹སནྣཾ ཧཱརཱནཾ ཡཐཱ ཡེནཱཀཱརེན ཨསངྐརོ ཧོཏི, ཏཐཱ ཨསངྐརཱཀཱརེན བྷཝཏི. ཨཡཏི པཝཏྟཏི ནཡཝིབྷཏྟཱིཏི ཨཡཱ, ཝིཏྠཱརེན ཨཡཱཏི ཝིཏྠཱརཏཡཱ, ཏ-ཀཱརོ མིསྶཀདོསཱཔགམཏྠཱཡ ཨཱགཏོ, ནཡཝིབྷཏྟིཝིསེསཝཙནཾ. ནཡེན ཉཱཡེན ཝིབྷཏྟི ནཡཝིབྷཏྟི, ན པཉྩནཡཝིབྷཏྟཱཧཱརཱནཾ ཝིཏྠཱརེན པཝཏྟཱ ཉཱཡཝིབྷཏྟི ཏཐཱ ཨསངྐརཱཀཱརེན བྷཝཏི ཏསྨིཾ ཨསཾཀིཎྞཱཏི ཉཱཏབྦཱཏི ཨདྷིཔྤཱཡོ.

༢. སོལ༹ས ཧཱརཱ སརཱུཔཏོ ཝུཏྟཱ, ཨམྷེཧི ཙ ཝིཉྙཱཏཱ, ‘‘ཀཏམེ པཉྩ ནཡཱ’’ཏི ཝཏྟབྦབྷཱཝཏོ ཏཐཱ པུཙྪིཏྭཱ སརཱུཔཏོ ཨུདྡིསིཏུཾ ‘‘ཏཏྠ ཀཏམེ པཉྩ ནཡཱ’’ཏྱཱདི ཝུཏྟཾ. ཨཊྛཀཐཱཡཾ པན ‘‘ཨེཝཾ ཧཱརེ ཨུདྡིསིཏྭཱ ཨིདཱནི ནཡེ ཨུདྡིསིཏུཾ ‘ཏཏྠ ཀཏམེ’ཏིཨཱདི ཝུཏྟ’’ནྟི (ནེཏྟི. ཨཊྛ. ༢) ཝུཏྟཾ. ‘‘ཏཏྠ ནཡནྟི སཾཀིལེསེ, ཝོདཱནེ ཙ ཝིབྷཱགཏོ ཉཱཔེནྟཱིཏི ནཡཱ, ནཱིཡནྟི ཝཱ ཏཱནི ཨེཏྠ, ཨེཏེཧི ཝཱཏི ནཡཱ’’ཏིཨཱདིནཱ (ནེཏྟི. ཨཊྛ. ༢) ཨཊྛཀཐཱཡཾ ཝིཏྠཱརེན ཝཙནཏྠོ ཝུཏྟོ. ནཱི-དྷཱཏུཡཱ ནནྡིཡཱཝཊྚཱདིནཡཱནུསཱརེན སཾཀིལེསེ, ཝོདཱནེ ཙ ཨཱལམྦིཏྭཱ པཝཏྟོ ཉཱཎསམྤཡུཏྟཙིཏྟུཔྤཱདོ མུཁྱཏྠོ, ནནྡིཡཱཝཊྚཱདིནཡཱནཾ ཨུཔནིསྶཡཔཙྩཡསཏྟི ཕལཱུཔཙཱརཏོ གཧིཏཱ, ཨིཏི-སདྡོ ཏཾ ཕལཱུཔཙཱརཏོ གཧིཏསཏྟིཾ པརཱམསི, ཏཾསཏྟིསཧིཏཱ ནནྡིཡཱཝཊྚཱདིནཡཱ ཨ-པཙྩཡཏྠཱ.

ཏཎྷཱཨཝིཛྫཱཧི སཾཀིལེསཔཀྑསྶ སུཏྟསྶ, སམཐཝིཔསྶནཱཧི ཝོདཱནཔཀྑསྶ སུཏྟསྶ ཙཏུསཙྩཡོཛནམུཁེན ནཡནལཀྑཎོ སཾཝཎྞནཱཝིསེསོ ¶ ནནྡིཡཱཝཊྚོ ནཡོ. ཏཏྠ ཙཏུསཙྩནྟི ཏཎྷཱ ཙ ཨཝིཛྫཱ ཙ བྷཝམཱུལཏྟཱ སམུདཡསཙྩཾ, ཨཝསེསཱ ཏེབྷཱུམཀཱ དྷམྨཱ དུཀྑསཙྩཾ, སམཐཝིཔསྶནཱ མགྒསཙྩཾ, ཏེན པཏྟབྦཱ ཨསངྑཏདྷཱཏུ ནིརོདྷསཙྩནྟི.

ཏཱིཧི ཨཝཡཝེཧི ལོབྷཱདཱིཧི སཾཀིལེསཔཀྑེ, ཏཱིཧི ཨཝཡཝེཧི ཨལོབྷཱདཱིཧི ཙ ཝོདཱནཔཀྑེ ¶ པུཀྑལོ སོབྷནོཏི ཏིཔུཀྑལོ, ཨཀུསལམཱུལེཧི སཾཀིལེསཔཀྑསྶ, ཀུསལམཱུལེཧི ཝོདཱནཔཀྑསྶ སུཏྟཏྠསྶ ཙཏུསཙྩཡོཛནམུཁེན ནཡནལཀྑཎོ སཾཝཎྞནཱཝིསེསོ ཏིཔུཀྑལོ.

སཱིཧསྶ བྷགཝཏོ ཝིཀྐཱིལི༹ཏཾ ཨེཏྠ ནཡེཏི སཱིཧཝིཀྐཱིལི༹ཏོ, སུབྷསཉྙཱདཱིཧི ཝིཔལླཱསེཧི སཀལསཾཀིལེསཔཀྑསྶ, སདྡྷིནྡྲིཡཱདཱིཧི ཝོདཱནཔཀྑསྶ སུཏྟཏྠསྶ ཙཏུསཙྩཡོཛནམུཁེན ནཡནལཀྑཎོ སཾཝཎྞནཱཝིསེསོ སཱིཧཝིཀྐཱིལི༹ཏནཡོ.

ཨཏྠནཡཏྟཡདིསཱབྷཱཝེན ཀུསལཱདིདྷམྨཱནཾ ཨཱལོཙནཾ དིསཱལོཙནཾ. ཏསྶ ཏསྶ ཨཏྠནཡསྶ ཡོཛནཏྠཾ ཀཏེསུ སུཏྟསྶ ཨཏྠཝིསྶཛྫནེསུ ཡེ ཝོདཱནཱདཡོ, སཾཀིལེསིཀཱ ཙ ཏསྶ ཏསྶ ནཡསྶ དིསཱབྷཱུཏཱ དྷམྨཱ སུཏྟཏོ ནིདྡྷཱརེཏྭཱ ཀཐིཏཱ, ཏེསཾ ཡཐཱཝུཏྟདྷམྨཱནཾ ཙིཏྟེནེཝ ‘‘ཨཡཾ པཋམཱ དིསཱ, ཨཡཾ དུཏིཡཱ དིསཱ’’ཏིཨཱདིནཱ ཨཱལོཙནཾ དིསཱལོཙནཾ.

ཏཐཱ ཨཱལོཙིཏཱནཾ དྷམྨཱནཾ ཨཏྠནཡཏྟཡཡོཛནེ སམཱནཡནཏོ ཨངྐུསོ ཝིཡཱཏི ཨངྐུསོ, ཏསྶ ཏསྶ ནཡསྶ དིསཱབྷཱུཏཱནཾ ཀུསལཱདིདྷམྨཱནཾ སམཱནཡནཾ ཨངྐུསོ ནཡོ.

ལཉྫེཏཱིཏི ལཉྫཀོ. ཡོ ནཡོ སུཏྟཏྠཾ ལཉྫེཏི པཀཱསེཏི, ཨིཏི ལཉྫནཏོ པཀཱསནཏོ སོ ནཡོ ལཉྫཀོ ནཱམ, ནཡོ ཙ སོ ལཉྫཀོ ཙཱཏི ནཡལཉྫཀོ. ནཡལཉྫཀོ པཋམོ ནནྡིཡཱཝཊྚོ ནཱམ, ནཡལཉྫཀོ དུཏིཡོ ཏིཔུཀྑལོ ནཱམ, ནཡལཉྫཀོ ཏཏིཡོ སཱིཧཝིཀྐཱིལི༹ཏོ ནཱམཱཏི ཡོཛེཏབྦོ.

ཨུགྒཏཱནཾ ཝིསེསེན ཨུགྒཏོཏི ཨུཏྟམོ, ཏཾ ཨུཏྟམཾ. གཏཱཏི ཉཱཏཱ, མཏཱཏི ཨཏྠོ. ‘‘མཏཱ’’ཏི ཝཱ པཱཋོ. སེསམེཏྠ ཝུཏྟནཡཱནུསཱརེནཔི སཾཝཎྞནཱནུསཱརེནཔི ཛཱནིཏབྦནྟི.

ཡཐཱཝུཏྟནཡཝིསེསསཾཝཎྞནཱཡ ¶ ཊཱིཀཱཡཾ –

‘‘སམཱུཧཱདིཾ ཨུཔཱདཱཡ ལོཀསངྐེཏསིདྡྷཱ ཝོཧཱརམཏྟཏཱ སམྨུཏིསབྷཱཝོ, པཐཝཱིཕསྶཱདཱིནཾ ཀཀྑལ༹ཕུསནཱདིལཀྑཎཾ པརམཏྠསབྷཱཝོ. ཨཡཉྷེཏྠ སངྑེཔོ – ཡསྨིཾ བྷིནྣེ, ཨིཏརཱཔོཧེ ཝཱ ཙིཏྟེན ཀཏེ ན ཏཐཱ བུདྡྷི, ཨིདཾ སམྨུཏིསཙྩཾ ཡཐཱ གྷཊེ, སསམྦྷཱརཛལེ ཙ, ཏབྦིཔརིཡཱཡེན པརམཏྠསཙྩ’’ནྟི –

ཝཙནེ ¶ གྷཊཀཐལཨཱཔཛལཀདྡམཱདིསངྑཱཏཾ སམཱུཧཱདིཾ ཨུཔཱདཱཡ ལོཀསྶ པུབྦེ གྷཊཀཐལཨཱཔཛལཀདྡམཱདིསངྐེཏསིདྡྷཱ གྷཊཀཐལཨཱཔཛལཀདྡམཱདིཝོཧཱརམཏྟཏཱ སམྨུཏིསབྷཱཝོ སངྐེཏཝསེན ཨཝིཏཐཏྟཱ. པཐཝཱིཨཱདཱིནཾ ཀཀྑལཱ༹དིལཀྑཎཾ, ཕསྶཱདཱིནཾ ཕུསནཱདིལཀྑཎཾ པརམཏྠསབྷཱཝོ. ‘‘ཡདི ཨེཝཾ གྷཊཱདིཀེ ཨབྷིནྣེ ཝཱ ཨཱཔཱདིཀེ ཝཱ ཨནུརཱུཔེན ཨཱུནབྷཱཝེན ཨཔྤཝཏྟམཱནེ ཝཱ སཏི སམྨུཏིབྷཱཝོ ཧོཏུ, བྷིནྣེ ཝཱ ཨཱུནེ ཝཱ ཀཐཾ སམྨུཏིབྷཱཝོ བྷཝེཡྻ, པཐཝཱིཕསྶཱདཱིནམྤི བྷིཛྫམཱནཏྟཱ, ཀཀྑལ༹ཕུསནཱདཱིནཉྩ པཐཝཱིཕསྶཱདཱིཧི ཨནཉྙཏྟཱ ཀཐཾ པརམཏྠསབྷཱཝོ བྷཝེཡྻ, ཀཏམེན སངྑེཔེན ཨཏྠེན སམྨུཏིསབྷཱཝོ, པརམཏྠསབྷཱཝོ ཙ ཨམྷེཧི ཛཱནིཏབྦོ’’ཏི ཝཏྟབྦབྷཱཝཏོ ‘‘ཨཡཉྷེཏྠ སངྑེཔོ’’ཏིཨཱདིམཱཧ. ཏཏྠ ཨེཏྠཱཏི ཨེཏེསུ སམྨུཏིསབྷཱཝཔརམཏྠསབྷཱཝེསུ ཨཡཾ ནཡོ ཝུཙྩམཱནོ སངྑེཔོ ཨཏྠོ དཊྛབྦོ.

ཡསྨིཾ གྷཊཱདིཀེ བྷིནྣེ སཏི ཏཏོ གྷཊཱདིཏོ ཨིཏརོ ཀཐལཱདིབྷཱཝོ ཙིཏྟེན པུབྦེ ཀཏེན ཡཐཱ ཡེན ཀཐལཱདིཝོཧཱརེན བྷཝཏི, ཡསྨིཾ ཨཱཔཱདིཀེ སམྦྷཱརཛལཱདིཀེ ཨཱུནབྷཱཝེན པཝཏྟམཱནེ སཏི ཝཱ ཏཏོ ཨཱཔཱདིཏོ ཨིཏརོ ཀདྡམཱདིབྷཱཝོ ཙིཏྟེན པུབྦེ ཀཏེན ཡཐཱ ཡེན ཀདྡམཱདིཝོཧཱརེན བྷཝཏི, ཏཐཱ ཏེན ཝོཧཱརེན བུདྡྷི ཀཐལཱདིསབྷཱཝཛཱནནཾ ཀདྡམཱདིསབྷཱཝཛཱནནཾ བྷཝཏི, ཨིདཾ ཨབྷིནྣེ གྷཊཱདིཀཾ ཝཱ བྷིནྣེ ཀཐལཱདིཀཾ ཝཱ ཨནཱུནེ ཨཱཔཱདིཀཾ ཝཱ ཨཱུནེ ཀདྡམཱདིཀཾ ཝཱ སབྦཾ སམྨུཏིསཙྩཾ ཧོཏྭེཝ. ‘‘ཀདྡམསྨིཾ བྷིནྣེ, ཀདྡམསྨིཾ ཨཱུནེ ཝཱ སཏི ཨིཏརོ སམྨུཏིསབྷཱཝོ’’ཏི པུཙྪིཏབྦབྷཱཝཏོ ‘‘གྷཊེ, སམྦྷཱརཛལེ ཙཱ’’ཏི ཝུཏྟཾ.

སམྨུཏིསཙྩསབྷཱཝོ ¶ ཏུམྷེཧི ཝུཏྟོ, ཨམྷེཧི ཙ ཉཱཏོ, ‘‘ཀཏམོ པརམཏྠསཙྩསབྷཱཝོ’’ཏི ཝཏྟབྦབྷཱཝཏོ ‘‘ཏབྦིཔརིཡཱཡེན པརམཏྠསཙྩ’’ནྟི ཝུཏྟཾ. པཐཝཱིཨཱདཱིནཾ ཀཀྑལཱ༹དིལཀྑཎཏོ ཨིཏརསྶ ཕུསནཱདིལཀྑཎསྶ ཨསམྦྷཝཏོ, ཕསྶཱདཱིནཉྩ ཕུསནཱདིལཀྑཎཏོ ཨིཏརསྶ ཀཀྑལཱ༹དིལཀྑཎསྶ ཨསམྦྷཝཏོ པཐཝཱིཕསྶཱདཱིནཾ ལཀྑལ༹ཕུསནཱདིལཀྑཎཾ པརམཏྠསཙྩཾ ཧོཏྭེཝཱཏི ཨིམསྨིཾ སངྑེཔཏྠེ གཧིཏེ ཀོཙི ཝིརོདྷོ ནཏྠཱིཏི ཨདྷིཔྤཱཡོཏི.

༣. པཉྩ ནཡཱ སརཱུཔཏོ ཨཱཙརིཡེན ཨུདྡིཊྛཱ, ཨམྷེཧི ཙ ཝིཉྙཱཏཱ, ‘‘ཡཱནི པདཱནི ཨཊྛཱརས མཱུལཔདཱནི ཨུདྡིཊྛཱནི, ཀཏམཱནི ཏཱནཱི’’ཏི པུཙྪིཏབྦཏྟཱ ཏཱནི སརཱུཔཏོ དསྶེཏུཾ ‘‘ཏཏྠ ཀཏམཱནི ཨཊྛཱརས མཱུལཔདཱནི’’ཏྱཱདིམཱཧ. ཨཊྛཀཐཱཡཾ པན ‘‘ཨེཝཾ ནཡེཔི ཨུདྡིསིཏྭཱ ཨིདཱནི མཱུལཔདཱནི ཨུདྡིསིཏུཾ ‘ཏཏྠ ཀཏམཱནཱི’ཏིཨཱདི ཨཱརདྡྷ’’ནྟི ཝུཏྟཾ. ཏཏྠ ཀུསལཱནི ¶ ནཝ པདཱནི, ཨཀུསལཱནི ནཝ པདཱནི ཨཊྛཱརས མཱུལཔདཱནཱིཏི དཊྛབྦཱནཱིཏི ཡོཛནཱ. མཱུལནྟི པཏིཊྛཧནྟི ཨེཏེཧི ནཡཱ, པཏིཊྛཱནཝིབྷཱགཱ ཙཱཏི མཱུལཱནི, པདནྟི པཏིཊྛཧནྟི ཨེཏྠ ནཡཱ, པཊྛཱནཝིབྷཱགཱ, ཨདྷིགམཱ ཙཱཏི པདཱནི, ཝུཏྟཔྤཀཱརཊྛེན མཱུལཱནི ཙ ཏཱནི པདཱནི ཙཱཏི མཱུལཔདཱནི. ཀུཙྪིཏེ པཱཔདྷམྨེ སལཡནྟཱིཏི ཀུསལཱནི, ཀུསེ རཱགཱདཡོ ལུནནྟཱིཏི ཀུསལཱནི, ཀུསཱ ཝིཡ ལུནནྟཱིཏི ཀུསལཱནི, ཀུསེན ཉཱཎེན ལཱཏབྦཱནི པཝཏྟེཏབྦཱནཱིཏི ཀུསལཱནི. ཀུསལཱནཾ པཊིཔཀྑཱནཱིཏི ཨཀུསལཱནི ཨ-སདྡོ ཙེཏྠ པཊིཔཀྑཏྠོཏི.

ནཝ པདཱནི ཀུསལཱནི, ནཝ པདཱནི ཨཀུསལཱནཱིཏི གཎནཔརིཙྪེདཏོ, ཛཱཏིབྷེདཏོ ཙ ཨུདྡིཊྛཱནི, ‘‘ཀཏམཱནི ཏཱནཱི’’ཏི པུཙྪིཏབྦཏྟཱ ནཝ པདཱནི ཨཀུསལཱནི པཙྩཱསཏྟིནྱཱཡེན སརཱུཔཏོ དསྶེཏུཾ ‘‘ཀཏམཱནི ནཝ པདཱནི ཨཀུསལཱནཱི’’ཏིཨཱདི ཝུཏྟཾ. ཨཊྛཀཐཱཡཾ པན –

‘‘ཨེཝཾ གཎནཔརིཙྪེདཏོ, ཛཱཏིབྷེདཏོ ཙ མཱུལཔདཱནི དསྶེཏྭཱ ཨིདཱནི སརཱུཔཏོ དསྶེནྟོ སཾཀིལེསཔཀྑཾཡེཝ པཋམཾ ཨུདྡིསཏི ‘ཏཎྷཱ’ཏིཨཱདིནཱ’’ཏི (ནེཏྟི. ཨཊྛ. ༣) –

ཝུཏྟཾ. ཏཏྠ རཱུཔཱདིཀེ ཁནྡྷེ ཏསཏི པརིཏསཏཱིཏི ཏཎྷཱ. ཨཝིནྡིཡཾ ཀཱཡདུཙྩརིཏཱདིཾ ཝིནྡཏཱིཏི ཨཝིཛྫཱ ¶ , ཝིནྡིཡཾ ཀཱཡསུཙརིཏཱདིཾ ན ཝིནྡཏཱིཏི ཨཝིཛྫཱ, ཝིཛྫཱཡ པཊིཔཀྑཱཏི ཝཱ ཨཝིཛྫཱ. ལུབྦྷནྟི ཏེནཱཏི ལོབྷོ, ལུབྦྷཏཱིཏི ཝཱ ལོབྷོ, ལུབྦྷནཾ ཝཱ ལོབྷོ. དོསམོཧེསུཔི ཨེསེཝ ནཡོ. ཨསུབྷེ རཱུཔཀྑནྡྷཱདིཀེ ‘‘སུབྷ’’ནྟི པཝཏྟཱ སཉྙཱ སུབྷསཉྙཱ. དུཀྑདུཀྑཱདིཀེ ‘‘སུཁ’’ནྟི པཝཏྟཱ སཉྙཱ སུཁསཉྙཱ. ཨནིཙྩེ སངྑཱརདྷམྨེ ‘‘ནིཙྩ’’ནྟི པཝཏྟཱ སཉྙཱ ནིཙྩསཉྙཱ. ཨནཏྟསབྷཱཝེསུ ཙཀྑཱདཱིསུ ཁནྡྷེསུ ‘‘ཨཏྟཱ’’ཏི པཝཏྟཱ སཉྙཱ ཨཏྟསཉྙཱ. ཡཏྠཱཏི ཡེསུ པདེསུ སབྦོ ཨཀུསལཔཀྑོ སངྒཧཾ སམོསརཎཾ གཙྪཏི, ཏཱནི པདཱནི ཨཀུསལཱནཱིཏི ཡོཛནཱ. སངྒཧཾ གཎནཾ. སམོསརཎཾ སམཱརོཔནཾ.

པཙྩནཱིཀདྷམྨེ ཨུདྡྷཙྩཱདིཀེ ནཱིཝརཎེ སམེཏི ཝཱུཔསམེཏི ཏདངྒཝིཀྑམྦྷནཝསེནཱཏི སམཐོ. སངྑཱརེ ཨནིཙྩཱདཱིཧི ཝིཝིདྷེཧི ཨཱཀཱརེཧི པསྶཏཱིཏི ཝིཔསྶནཱ. ལོབྷསྶ པཊིཔཀྑོ ཨལོབྷོ. དོསསྶ པཊིཔཀྑོ ཨདོསོ. མོཧསྶ པཊིཔཀྑོ ཨམོཧོ. ཨེཏྠཱཔི ཨ-སདྡོ པཊིཔཀྑཏྠོ, ན ཨབྷཱཝཏྠཱདིཀོཏི ཨདྷིཔྤཱཡོ. ཨསུབྷེ རཱུཔཀྑནྡྷཱདིཀེ, ཙཀྑཱདིམྷི ཝཱ ‘‘ཨསུབྷ’’ནྟི པཝཏྟཱ སཉྙཱཔདྷཱནཙིཏྟུཔྤཱདཱ ཨསུབྷསཉྙཱ, ཝིསེསཏོ ཀཱཡཱནུཔསྶནཱསཏིཔཊྛཱནཾ ¶ . དུཀྑདུཀྑཏཱདཱིསུ ‘‘དུཀྑ’’ནྟི པཝཏྟཱ སཉྙཱཔདྷཱནཙིཏྟུཔྤཱདཱ དུཀྑསཉྙཱ, ཝིསེསཏོ ཝེདནཱནུཔསྶནཱསཏིཔཊྛཱནཾ. ཨནིཙྩེ ཁནྡྷཱདིཀེ ཝིཔརིཎཱམདྷམྨེ ‘‘ཨནིཙྩ’’ནྟི པཝཏྟཱ སཉྙཱཔདྷཱནཙིཏྟུཔྤཱདཱ ཨནིཙྩསཉྙཱ, ཝིསེསཏོ ཙིཏྟཱནུཔསྶནཱསཏིཔཊྛཱནཾ. ཨནཏྟསབྷཱཝེ ཁནྡྷེ, ཙཀྑཱདིམྷི ཝཱ ‘‘ཨནཏྟཱ’’ཏི པཝཏྟཱ སཉྙཱཔདྷཱནཙིཏྟུཔྤཱདཱ ཨནཏྟསཉྙཱ, ཝིསེསཏོ དྷམྨཱནུཔསྶནཱསཏིཔདྷཱནཾ. པཉྙཱསཏིསཱིསེན ཧི པཝཏྟཱ ཨཡཾ དེསནཱ. ཏེན ཝུཏྟཾ བྷགཝཏཱ ‘‘ཀཐཉྩ, བྷིཀྑཝེ, སཏིབལཾ དཊྛབྦཾ? ཙཏཱུསུ སཏིཔཊྛཱནེསུ, ཨེཏྠ སཏིབལཾ དཊྛབྦ’’ནྟི. ཡཏྠཱཏི ཡེསུ པདེསུ སབྦོ ཀུསལཔཀྑོ སངྒཧཾ སམོསརཎཾ གཙྪཏི, ཏཱནི པདཱནི ཀུསལཱནཱིཏི ཡོཛནཱ.

ཨུདྡཱནནྟི ཨུདྡྷཾ དཱནཾ རཀྑཎཾ ཨུདྡཱནཾ, སངྒཧཝཙནནྟི ཨཏྠོ. ཨུདྡཱནེ ཨཝུཏྟེ སཏི ཧེཊྛཱ ཝུཏྟསྶ ཨཏྠསྶ ཝིཔྤཀིཎྞབྷཱཝོ དིནྣོ ཝིཡ བྷཝེཡྻ, ཏསྨཱ ཝིཔྤཀིཎྞབྷཱཝསྶ ནིཝཱརཎཏྠཾ ཨུདྡཱནནྟི ཨདྷིཔྤཱཡོ. ཙཏུརོ ཙ ཝིཔལླཱསཱཏི སུབྷསུཁནིཙྩཨཏྟསཉྙཱ. ཀིལེསཱ བྷཝནྟི ཨེཏྠ ནཝཔདེསཱུཏི བྷཱུམཱི, ཀིལེསཱནཾ བྷཱུམཱིཏི ཀིལེསབྷཱུམཱི, ཀིལེསཔཝཏྟནཊྛཱནཱནི ནཝ པདཱནཱིཏི ཝུཏྟཾ ཧོཏི.

ཙཏུརོ ¶ སཏིཔཊྛཱནཱཏི ཨསུབྷདུཀྑཨནིཙྩཨནཏྟསཉྙཱ. ཨིནྡྲིཡབྷཱུམཱིཏི སདྡྷཱདཱིནཾ ཝིམུཏྟིཔརིཔཱཙནིནྡྲིཡཱནཾ བྷཱུམཱི པཝཏྟནཊྛཱནཱནི སམོསརཎཊྛཱནཱནི.

ནཝཧི ཀུསལཔདེཧི ཀུསལཔཀྑཱ ཡུཛྫནྟི ཡོཛཱིཡནྟི, ནཝཧི ཨཀུསལཔདེཧི ཨཀུསལཔཀྑཱ ཡུཛྫནྟི ཡོཛཱིཡནྟི. ནཝཧི ཀུསལཔདེཧི སཧ ཀུསལཔཀྑཱ ཡུཛྫནྟི ཡུཛྫནྟཱ བྷཝནྟི, ནཝཧི ཨཀུསལཔདེཧི སཧ ཨཀུསལཔཀྑཱ ཡུཛྫནྟི ཡུཛྫནྟཱ བྷཝནྟཱིཏི ཨུདྡེསཝཱརེ ཝུཏྟཱཝསེསོ སཾཝཎྞནཱནུསཱརེན ཝིཛཱནིཏབྦོ.

ཨིཏི སཏྟིབལཱནུརཱུཔཱ རཙིཏཱ

ཨུདྡེསཝཱརསྶ ཨཏྠཝིབྷཱཝནཱ ནིཊྛིཏཱ.

༣. ནིདྡེསཝཱརཨཏྠཝིབྷཱཝནཱ

སོལ༹སཧཱརནིདྡེསཝིབྷཱཝནཱ

༤. ཧཱརཱདཱིསུ ¶ སམུདཱཡསྶ ནེཏྟིཔྤཀརཎསྶ ཨུདྡེསོ ཨུདྡིཊྛོ, ཨམྷེཧི ཙ ཉཱཏོ, ‘‘ཀཏམོ ནིདྡེསོ’’ཏི པུཙྪིཏབྦཏྟཱ ཨུདྡིཊྛེ ཧཱརཱདཡོ ནིདྡིསིཏུཾ ‘‘ཏཏྠ སངྑེཔཏོ ནེཏྟཱི’’ཏིཨཱདི ཨཱརདྡྷཾ. ཨཊྛཀཐཱཡཾ པན ‘‘ཨེཝཾ ཨུདྡིཊྛེ ཧཱརཱདཡོ ནིདྡིསིཏུཾ ‘ཏཏྠ སངྑེཔཏོ’ཏིཨཱདི ཨཱརདྡྷ’’ནྟི (ནེཏྟི. ཨཊྛ. ༤) ཝུཏྟཾ. ཏཏྠ ཏཏྠཱཏི ཏསྨིཾ ‘‘ཏཏྠ ཀཏམེ སོལ༹ས ཧཱརཱ? དེསནཱ ཝིཙཡོ’’ཏིཨཱདིཨུདྡེསཔཱཋེ. སངྑེཔཏོཏི སམཱསཏོ. ནེཏྟཱིཏི ནེཏྟིཔྤཀརཎཾ. ཀིཏྟིཏཱཏི ཀཐིཏཱ, ཨིདཱནི ནིདྡེསཏོ ཀཐེསྶཱམཱིཏི ཝུཏྟཾ ཧོཏི.

༡.

‘‘ཨསྶཱདཱདཱིནཝཏཱ, ནིསྶརཎམྤི ཙ ཕལཾ ཨུཔཱཡོ ཙ.

ཨཱཎཏྟཱི ཙ བྷགཝཏོ, ཡོགཱིནཾ དེསནཱཧཱརོ’’ཏི. –

གཱཐཱཡཾ ཡེན སཾཝཎྞནཱཝིསེསེན སུཏྟེ ཨཱགཏཱ ཨསྶཱདོཔི ཨཱདཱིནཝཏཱ ཨཱདཱིནཝོཔི ནིསྶརཎམྤི ཕལམྤི ཨུཔཱཡོཔི ཡོགཱིནཾ ཨཏྠཱཡ བྷགཝཏོ ཨཱཎཏྟིཔི ཨིམེ དྷམྨཱ དསྶིཏཱ སཾཝཎྞིཏཱ སཾཝཎྞནཱཝསེན ཉཱཔིཏཱ, སོ སཾཝཎྞནཱཝིསེསོ དེསནཱཧཱརོ ནཱམཱཏི ཨཏྠཡོཛནཱ.

ཝཙནཏྠཱདཡོ ¶ ཨཊྛཀཐཱཡཾ ཝིཏྠཱརཏོ ཝུཏྟཱཝ, ཏསྨཱ ཀིཉྩིམཏྟམེཝ ཀཐེསྶཱམི. ཨསྶཱདཱིཡཏེཏི ཨསྶཱདོ, ཀོ སོ? སུཁཾ, སོམནསྶཾ, ཨིཊྛཱརམྨཎབྷཱུཏཱ པཉྩུཔཱདཱནཀྑནྡྷཱ ཙ. ཨསྶཱདེཏི ཨེཏཱཡཱཏི ཝཱ ཨསྶཱདོ, ཀོ སོ? ཏཎྷཱ, ཝིཔལླཱསཱ ཙ. ཝིཔལླཱསཝསེན ཧི ཨེཀཙྩེ སཏྟཱ ཨནིཊྛམྤི ཨཱརམྨཎཾ ཨིཊྛཱཀཱརེན ཨསྶཱདེནྟི.

ཨཱབྷུསཾ ཀམྨེན དཱིནཾ དུཀྑཱདི ཧུཏྭཱ ཝཱཏི པཝཏྟཏཱིཏི ཨཱདཱིནཝོ, དུཀྑཱདི. ཨཐ ཝཱ ཨཏིཝིཡ ཨཱདཱིནཾ ཀཔཎཾ ཧུཏྭཱ ཝཱཏི པཝཏྟཏཱིཏི ཨཱདཱིནཝོ, ཀཔཎམནུསྶོ, ཏཐཱབྷཱཝཱ ཙ ཏེབྷཱུམཀཱ དྷམྨཱ ཨནིཙྩཏཱདིཡོགཏོ.

ནིསྶརཏི ཨེཏེནཱཏི ནིསྶརཎཾ, ཨརིཡམགྒོ. ནིསྶརཏཱིཏི ཝཱ ནིསྶརཎཾ, ནིབྦཱནཾ. པི-སདྡོ ¶ སམྤིཎྜནཏྠོ. ནིསྶརཎབྷེདོ ཨཊྛཀཐཱཡཾ (ནེཏྟི. ཨཊྛ. ༤ ཧཱརསངྑེཔ) བཧུདྷཱ ཝུཏྟོཝ.

ཕལཏི པཝཏྟཏཱིཏི ཕལཾ, དེསནཱཡ ཕལཾ. ཡདིཔི དེསནཱ ཕལནིཔྥཱདིཀཱ ན ཧོཏི, ཏཐཱཔི བྷགཝཏོ དྷམྨདེསནཾ སུཏྭཱ པུཉྙསམྦྷཱརཱ སམྦྷཝནྟི, པུཉྙསམྦྷཱརཧེཏུཏོ ཕལཾ པཝཏྟཾ, ཏསྨཱ དེསནཱཡ ཕལཾ ནཱམཱཏི. ཀཏམཾ ཏཾ? དེཝམནུསྶེསུ ཨཱཡུཝཎྞསུཁབལཡསཔརིཝཱརཨདྷིཔཏེཡྻཨུཔདྷིསམྤཏྟིཙཀྐཝཏྟིསིརིདེཝརཛྫ- སིརིཙཏུསམྤཏྟིཙཀྐསཱིལསམཱདྷིསམྤདཱ ཝིཛྫཱབྷིཉྙཱ པཊིསམྦྷིདཱ སཱཝཀབོདྷིཔཙྩེཀབོདྷིསམྨཱསམྦོདྷིཡོ.

པཙྩཡསཱམགྒིཾ ཨུཔགནྟྭཱ ཨཡཏི པཝཏྟཏི ཕལཾ ཨེཏེནཱཏི ཨུཔཱཡོ, ཀོ སོ? ཨརིཡམགྒསྶ པུབྦབྷཱགཔཊིཔདཱ. པུརིམཱ པཊིཔདཱ ཧི པཙྪིམཱཡ པཊིཔདཱཡ ཨདྷིགམཱུཔཱཡོ, པརམྤརཱཡ མགྒནིབྦཱནཱདྷིགམསྶ ཙ ཨུཔཱཡོ. ཀེཙི ‘‘མགྒོཔི ཨུཔཱཡོ’’ཏི ཝདནྟི, ཏེསཾ མཏེན ནིབྦཱནམེཝ ནིསྶརཎནྟི ཝུཏྟཾ སིཡཱ. ‘‘ཏེ པཧཱཡ ཏརེ ཨོགྷནྟི ཨིདཾ ནིསྶརཎ’’ནྟི (ནེཏྟི. ༥) པན ཨརིཡམགྒསྶ ནིསྶརཎབྷཱཝཾ ཝཀྑཏི, ཏསྨཱ ཀེསཉྩི ཝཱདོ ན གཧེཏབྦོ.

ཨཱཎཏྟཱིཏི ཨཱཎཱརཧསྶ བྷགཝཏོ ཝེནེཡྻཱནཾ ཧིཏསིདྡྷིཡཱ ‘‘ཨེཝཾ སམྨཱཔཊིཔཏྟིཾ པཊིཔཛྫཱཧི, མིཙྪཱཔཊིཔཏྟིཾ མཱ པཊིཔཛྫཱཧཱི’’ཏི ཝིདྷཱནཾ ཨཱཎཱཋཔནཾ ཨཱཎཏྟི ནཱམ.

ཡུཛྫནྟི ¶ པཡུཛྫནྟི ཙཏུསཙྩཀམྨཊྛཱནབྷཱཝནཱསཱུཏི ཡོགིནོ, ཝེནེཡྻཱ, ཏེསཾ ཡོགཱིནཾ ཨཏྠཱཡཱཏི ཝཙནསེསཾ ནཱིཧརིཏྭཱ ཡོཛནཱ ཀཱཏབྦཱ. སུཏྟེ ཨཱགཏཱནཾ སབྦེསཾ ཨསྶཱདཱདཱིནཾ ཨེཀདེསཱགཏཱནམྤི ནཱིཧརིཏྭཱ སབྦེསཾ ཝིབྷཛནསཾཝཎྞནཱཝིསེསོ དེསནཱཧཱརོཏི ནིདྡེསཏོ གཧེཏབྦོ, སོ ཙ ཝིབྷཛནཱཀཱརོ དེསནཱཧཱརཝིབྷངྒེ (ནེཏྟི. ༥) ཨཱགམིསྶཏཱིཏི ཨིདྷ ན དསྶིཏོཏི.

དེསནཱཧཱརནིདྡེསོ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ ཝིཙཡཧཱརནིདྡེསོ’’ཏི པུཙྪིཏབྦཏྟཱ –

༢.

‘‘ཡཾ པུཙྪིཏཉྩ ཝིསྶཛྫིཏཉྩ, སུཏྟསྶ ཡཱ ཙ ཨནུགཱིཏི.

སུཏྟསྶ ཡོ པཝིཙཡོ, ཧཱརོ ཝིཙཡོཏི ནིདྡིཊྛོ’’ཏི. –

གཱཐཱ ¶ ཝུཏྟཱ. ཏཏྠ སུཏྟསྶ ཡཾ པུཙྪིཏཉྩ ཡཱ པུཙྪཱ ཝིཙཡམཱནཱ ཙ སུཏྟསྶ ཡཾ ཝིསྶཛྫིཏཉྩ ཡཱ ཝིསྶཛྫནཱ ཝིཙཡམཱནཱ ཙ སུཏྟསྶ ཡོ པདཱདིཝིཙཡོ, ཨསྶཱདཱདིཝིཙཡོ ཙ ཨཏྠི, ཏེ ཝུཏྟཔྤཀཱརཱ ཝིཙཡམཱནཱ པུཙྪཱདཡོ ཡེན སཾཝཎྞནཱཝིསེསེན ཝིཙིཡནྟི, སོ སཾཝཎྞནཱཝིསེསོ ཝིཙཡོ ཧཱརོཏི ནིདྡིཊྛོཏི ཨཏྠཡོཛནཱ ཀཱཏབྦཱ.

པུཙྪཱིཡཏེ པུཙྪིཏཾ. ཝིསྶཛྫཱིཡཏེ ཝིསྶཛྫིཏནྟི བྷཱཝསཱདྷནཏྠོ དཊྛབྦོ, ན ཀམྨསཱདྷནཏྠོ. ཏེན ཝུཏྟཾ ཊཱིཀཱཡཾ ‘‘བྷཱཝཏྠེ ཏོཏི ཨཱཧ – ‘ཝིསྶཛྫིཏནྟི ཝིསྶཛྫནཱ’’’ཏི.

‘‘སུཏྟསྶཱ’’ཏི ནིཡམིཏཏྟཱ སཾཝཎྞནཱཝསེན ཨཊྛཀཐཱཡཾ ཨཱགཏཾ ན གཧེཏབྦནྟི དཊྛབྦཾ. སོ ཝིཙཡོ ཧཱརོ ཨཊྛཀཐཱཡཾ (ནེཏྟི. ཨཊྛ. ༤ ཧཱརསངྑེཔ) ཝུཏྟོཝ. ཀཐཾ? –

‘‘ཨཡཾ པུཙྪཱ ཨདིཊྛཛོཏནཱ དིཊྛསཾསནྡནཱ ཝིམཏིཙྪེདནཱ ཨནུམཏིཔུཙྪཱ ཀཐེཏུཀམྱཏཱཔུཙྪཱ སཏྟཱདྷིཊྛཱནཱ དྷམྨཱདྷིཊྛཱནཱ ཨེཀཱདྷིཊྛཱནཱ ཨནེཀཱདྷིཊྛཱནཱ སམྨུཏིཝིསཡཱ པརམཏྠཝིསཡཱ ཨཏཱིཏཝིསཡཱ ཨནཱགཏཝིསཡཱ པཙྩུཔྤནྣཝིསཡཱ’’ཏིཨཱདིནཱ པུཙྪཱཝིཙཡོ ཝེདིཏབྦོ. ‘‘ཨིདཾ ཝིསྶཛྫནཾ ཨེཀཾསབྱཱཀརཎཾ ཝིབྷཛྫབྱཱཀརཎཾ པཊིཔུཙྪཱབྱཱཀརཎཾ ཋཔནཾ སཱཝསེསཾ ནིརཝསེསཾ སཨུཏྟརཾ ¶ ནིརུཏྟརཾ ལོཀིཡཾ ལོཀུཏྟར’’ནྟིཨཱདིནཱ ཝིསྶཛྫནཝིཙཡོ.

‘‘ཨཡཾ པུཙྪཱ ཨིམིནཱ སམེཏི, ཨེཏེན ན སམེཏཱི’’ཏི པུཙྪིཏཏྠཾ ཨཱནེཏྭཱ, ཝིཙཡོ པུབྦེནཱཔརཾ སཾསནྡིཏྭཱ ཙ ཝིཙཡོ པུབྦཱཔརཝིཙཡོ. ‘‘ཨཡཾ ཨནུགཱིཏི ཝུཏྟཏྠསངྒཧཱ ཨཝུཏྟཏྠསངྒཧཱ ཏདུབྷཡཏྠསངྒཧཱ ཀུསལཏྠསངྒཧཱ ཨཀུསལཏྠསངྒཧཱ’’ཏིཨཱདིནཱ ཨནུགཱིཏིཝིཙཡོ. ཨསྶཱདཱདཱིསུ སུཁཝེདནཱཡ ‘‘ཨིཊྛཱརམྨཎཱནུབྷཝནལཀྑཎཱ’’ཏིཨཱདིནཱ, ཏཎྷཱཡ ‘‘ཨཱརམྨཎགྒཧཎལཀྑཎཱ’’ཏིཨཱདིནཱ, ཝིཔལླཱསཱནཾ ‘‘ཝིཔརཱིཏགྒཧཎལཀྑཎཱ’’ཏིཨཱདིནཱ, ཨཝསིཊྛཱནཾ ཏེབྷཱུམཀདྷམྨཱནཾ ‘‘ཡཐཱསཀལཀྑཎཱ’’ཏིཨཱདིནཱ སབྦེསཉྩ དྭཱཝཱིསཏིཡཱ ཏིཀེསུ, དྭཱཙཏྟཱལཱིསཱདྷིཀེ ཙ དུཀསཏེ ལབྦྷམཱནཔདཝསེན ཏཾཏཾཨསྶཱདཏྠཝིསེསནིདྡྷཱརཎཾ ཨསྶཱདཝིཙཡོ.

དུཀྑཝེདནཱཡ ‘‘ཨནིཊྛཱནུབྷཝནལཀྑཎཱ’’ཏིཨཱདིནཱ, དུཀྑསཙྩཱནཾ ‘‘པཊིསནྡྷིལཀྑཎཱ’’ཏིཨཱདིནཱ, ཨནིཙྩཏཱདཱིནཾ ཨཱདིཨནྟཝནྟཏཱཡ ཨནིཙྩནྟིཀཏཱཡ ཙ ¶ ‘‘ཨནིཙྩཱ’’ཏིཨཱདིནཱ སབྦེསཉྩ ལོཀིཡདྷམྨཱནཾ སཾཀིལེསབྷཱགིཡཧཱནབྷཱགིཡཏཱདིཝསེན ཨཱདཱིནཝཝུཏྟིཡཱ ཨོཀཱརནིདྡྷཱརཎེན ཨཱདཱིནཝཝིཙཡོ. ནིསྶརཎཔདེ ཨརིཡམགྒསྶ ཨཱགམནཏོ ཀཱཡཱནུཔསྶནཱདིཔུབྦབྷཱགཔཊིཔདཱཝིབྷཱགཝིསེསནིདྡྷཱརཎཝསེན, ནིབྦཱནསྶ ཡཐཱཝུཏྟཔརིཡཱཡཝིབྷཱགཝིསེསནིདྡྷཱརཎཝསེནཱཏི ཨེཝཾ ནིསྶརཎཝིཙཡོ. ཕལཱདཱིནཾ ཏཾཏཾསུཏྟདེསནཱཡ སཱདྷེཏབྦཕལསྶ ཏདུཔཱཡསྶ ཏཏྠ ཏཏྠ སུཏྟཝིདྷིཝཙནསྶ ཙ ཝིབྷཱགནིདྡྷཱརཎཝསེན ཝིཙཡོ ཝེདིཏབྦོ. ཨེཝཾ པདཔུཙྪཱཝིསྶཛྫནཔུཙྪཱཔུབྦཱཔརཱནུགཱིཏཱིནཾ, ཨསྶཱདཱདཱིནཉྩ ཝིསེསནིདྡྷཱརཎཝསེནེཝ ཝིཙཡལཀྑཎོ ‘‘ཝིཙཡོ ཧཱརོ’’ཏི ཝེདིཏབྦོཏི –

ཨེཝཾ ཝུཏྟོཝ.

ཝིསྶཛྫནཝིསེསོ པན ཊཱིཀཱཡཾ ཝུཏྟོ. ཀཐཾ? –

‘‘ཙཀྑུ ཨནིཙྩ’’ནྟི པུཊྛེ ‘‘ཨཱམ, ཙཀྑུ ཨནིཙྩམེཝཱ’’ཏི ཨེཀནྟཏོ ཝིསྶཛྫནཾ ཨེཀཾསབྱཱཀརཎཾ, ‘‘ཨཉྙིནྡྲིཡཾ བྷཱཝེཏབྦཾ, སཙྪིཀཱཏབྦཉྩཱ’’ཏི ¶ པུཊྛེ ‘‘མགྒཔརིཡཱཔནྣཾ བྷཱཝེཏབྦཾ, ཕལཔརིཡཱཔནྣཾ སཙྪིཀཱཏབྦ’’ནྟི ཝིབྷཛིཏྭཱ ཝིསྶཛྫནཾ ཝིབྷཛྫབྱཱཀརཎཾ, ‘‘ཨཉྙིནྡྲིཡཾ ཀུསལ’’ནྟི པུཊྛེ ‘‘ཀིཾ ཨནཝཛྫཊྛོ ཀུསལཏྠོ, ཨུདཱཧུ སུཁཝིཔཱཀཊྛོ’’ཏི པཊིཔུཙྪིཏྭཱ ཝིསྶཛྫནཾ པཊིཔུཙྪཱབྱཱཀརཎཾ, ‘‘སསྶཏོ ཨཏྟཱ, ཨསསྶཏོ ཝཱ’’ཏི ཝུཏྟེ ‘‘ཨབྱཱཀཏམེཏ’’ནྟིཨཱདིནཱ ཨཝིསྶཛྫནཾ ཋཔནཾ, ‘‘ཀིཾ པནེཏེ ‘ཀུསལཱ’ཏི ཝཱ ‘དྷམྨཱ’ཏི ཝཱ ཨེཀཏྠཱ, ཨུདཱཧུ ནཱནཏྠཱ’’ཏི ཨིདཾ པུཙྪནཾ སཱཝསེསཾ. ཝིསྶཛྫནསྶ པན སཱཝསེསཏོ ཝེནེཡྻཛ྄ཛྷཱསཡཝསེན དེསནཱཡཾ ཝེདིཏབྦཱ. ཨཔཱཊིཧཱིརཀཾ སཨུཏྟརཾ སཔྤཱཊིཧཱིརཀཾ ནིརུཏྟརཾ, སེསཾ ཝིཙཡཧཱརནིདྡེསེ སུཝིཉྙེཡྻམེཝཱཏི –

ཝུཏྟོཝ. སཾཝཎྞནཱསུ ཝུཏྟོ ཨཏྠོ ཨནཱཀུལོ པཱཀཊོ ཡཏིཔོཏེཧི ཝིཉྙཱཏོ, སོ སབྦཏྠ ཨམྷེཧི ན ཝིབྷཏྟོཏི དཊྛབྦོ.

ཝིཙཡཧཱརནིདྡེསོ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ ཡུཏྟིཧཱརནིདྡེསོ’’ཏི པུཙྪིཏབྦཏྟཱ –

༣.

‘‘སབྦེསཾ ¶ ཧཱརཱནཾ, ཡཱ བྷཱུམཱི ཡོ ཙ གོཙརོ ཏེསཾ.

ཡུཏྟཱཡུཏྟཔརིཀྑཱ, ཧཱརོ ཡུཏྟཱིཏི ནིདྡིཊྛོ’’ཏི. –

གཱཐཱ ཝུཏྟཱ. ཏཏྠ སབྦེསཾ སོལ༹སནྣཾ ཧཱརཱནཾ ཡཱ བྷཱུམི པཝཏྟནཊྛཱནབྷཱུཏཾ བྱཉྫནཾ, ཡོ གོཙརོ སུཏྟཏྠོ ཙ ཨཏྠི, ཏེསཾ བྷཱུམིསངྑཱཏབྱཉྫནགོཙརསངྑཱཏསུཏྟཏྠཱནཾ ཡཱ ཡུཏྟཱཡུཏྟཔརིཀྑཱ ཡུཏྟཱཡུཏྟཱིནཾ ཝིཙཱརཎཱ སཾཝཎྞནཱ ཀཏཱ, སོ ཡུཏྟིཨཡུཏྟིཔརིཀྑཱཝིཙཱརཎསངྑཱཏོ སཾཝཎྞནཱཝིསེསོ ‘‘ཡུཏྟི ཧཱརོ’’ཏི ནིདྡིཊྛོཏི ཨཏྠཡོཛནཱ.

ཏེསཾ ཧཱརཱནཾ བྷཱུམིབྷཱུཏསྶ སུཏྟེ ཨཱགཏསྶ བྱཉྫནསྶ ཡུཏྟིབྷཱཝོ དུཝིདྷོ སབྷཱཝནིརུཏྟིབྷཱཝོ, ཨདྷིཔྤེཏཏྠཝཱཙཀབྷཱཝོ ཙ. གོཙརབྷཱུཏསྶ པན སུཏྟེ ཨཱགཏསྶ ཡུཏྟིབྷཱཝོ སུཏྟཝིནཡདྷམྨཏཱཧི ཨཝིལོམནཾ. ཨཡུཏྟིབྷཱཝོ ཝུཏྟཝིཔརིཡཱཡེན གཧེཏབྦོ.

ཡུཏྟིཧཱརནིདྡེསོ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ པདཊྛཱནཧཱརནིདྡེསོ’’ཏི པུཙྪིཏབྦཏྟཱ –

༤.

‘‘དྷམྨཾ ¶ དེསེཏི ཛིནོ, ཏསྶ ཙ དྷམྨསྶ ཡཾ པདཊྛཱནཾ.

ཨིཏི ཡཱཝ སབྦདྷམྨཱ, ཨེསོ ཧཱརོ པདཊྛཱནོ’’ཏི. –

གཱཐཱ ཝུཏྟཱ. ཏཏྠ དྷམྨནྟི ཡཾ ཀིཉྩི ཀུསལཱདིདྷམྨཾ སུཏྟེ ཛིནོ དེསེཏི, ཏསྶ སུཏྟེ ཛིནེན དེསིཏསྶ ཀུསལཱདིདྷམྨསྶ ཡཉྩ པདཊྛཱནཾ ནིདྡྷཱརེཏབྦཾ, ཏཾ ཏཾ པདཊྛཱནཉྩཱཏི ཨེཝཾ ཝུཏྟནཡེན ཡཱཝ ཡཏྟཀཱ སབྦེ དྷམྨཱ སུཏྟེ ཛིནེན དེསིཏཱ, ཏཏྟཀཱནཾ སབྦེསཾ དྷམྨཱནཾ ཡཉྩ པདཊྛཱནཾ ནིདྡྷཱརེཏབྦཾ, ཏསྶ ཙ པདཊྛཱནསྶ ཡཉྩ པདཊྛཱནཾ ནིདྡྷཱརེཏབྦཾ, ཏཾ ཏཾ པདཊྛཱནཉྩ, ཨིཏི ཨེཝཾ ཝུཏྟནཡེན ཡཱཝ ཡཏྟཀཱ སབྦེ པདཊྛཱནདྷམྨཱ ནིདྡྷཱརེཏབྦཱཝ, ཏཏྟཀཱནི སབྦཱནི དྷམྨཔདཊྛཱནཱནི ཡཐཱནུརཱུཔཾ ནིདྡྷཱརེཏྭཱ ཡེན སཾཝཎྞནཱཝིསེསེན ཀཐིཏཱནི, ཨེསོ སཾཝཎྞནཱཝིསེསོ ‘‘པདཊྛཱནོ ཧཱརོ’’ཏི ནིདྡིཊྛོཏི ཨཏྠཡོཛནཱ.

སུཏྟེ དེསིཏཀུསལདྷམྨསྶ ཡོནིསོམནསིཀཱརསདྡྷམྨསྶཝནསཔྤུརིསཱུཔནིསྶཡཱདི པདཊྛཱནཾ, སུཏྟེ དེསིཏཨཀུསལདྷམྨསྶ ཨཡོནིསོམནསིཀཱརཨསདྡྷམྨསྶཝནཨསཔྤུརིསཱུཔནིསྶཡཱདི པདཊྛཱནཾ, ཨབྱཱཀཏསྶ དྷམྨསྶ ཡཐཱརཧཾ ཀུསལཱཀུསལཱབྱཱཀཏཱ པདཊྛཱནནྟིཨཱདིནཱ ནིདྡྷཱརེཏབྦནྟི.

པདཊྛཱནཧཱརནིདྡེསོ ¶ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ ལཀྑཎཧཱརནིདྡེསོ’’ཏི པུཙྪིཏབྦཏྟཱ –

༥.

‘‘ཝུཏྟམྷི ཨེཀདྷམྨེ, ཡེ དྷམྨཱ ཨེཀལཀྑཎཱ ཀེཙི.

ཝུཏྟཱ བྷཝནྟི སབྦེ, སོ ཧཱརོ ལཀྑཎོ ནཱམཱ’’ཏི. –

གཱཐཱ ཝུཏྟཱ. ཏཏྠ ཨེཀདྷམྨེ སུཏྟེ བྷགཝཏཱ ཝུཏྟམྷི, ཨཊྛཀཐཱཡཾ ནིདྡྷཱརིཏེ ཝཱ སཏི ཏེན དྷམྨེན ཡེ ཀེཙི དྷམྨཱ ཨེཀལཀྑཎཱ བྷཝནྟི, སབྦེ ཏེ དྷམྨཱ སུཏྟེ སརཱུཔཏོ ཨཝུཏྟཱཔི སམཱནལཀྑཎཏཱཡ སཾཝཎྞེཏབྦབྷཱཝེན ཨཱནེཏྭཱ ཡེན སཾཝཎྞནཱཝིསེསེན ཝུཏྟཱ བྷཝནྟི, སོ སཾཝཎྞནཱཝིསེསོ ‘‘ལཀྑཎོ ནཱམ ཧཱརོ’’ཏི ནིདྡིཊྛོཏི ཨཏྠཡོཛནཱ.

ཨེཀཾ སམཱནཾ ལཀྑཎཾ ཨེཏེསནྟི ཨེཀལཀྑཎཱ, སམཱནལཀྑཎཱ, སཧཙཱརིཏཱཡ ཝཱ སམཱནཀིཙྩཏཱཡ ཝཱ སམཱནཧེཏུཏཱཡ ཝཱ སམཱནཕལཏཱཡ ཝཱ སམཱནཱརམྨཎཏཱཡ ཝཱ ཨཝུཏྟཱཔི ནིདྡྷཱརིཏཱཏི. ཀཐཾ ¶ ? – ‘‘ནཱནཏྟཀཱཡཱནཱནཏྟསཉྙིནོ (དཱི. ནི. ༣.༣༤༡, ༣༥༧, ༣༥༩; ཨ. ནི. ༩.༢༤), ནཱནཏྟསཉྙཱནཾ ཨམནསིཀཱརཱ’’ཏིཨཱདཱིསུ སཧཙཱརིཏཱཡ སཉྙཱཡ སཧགཏཱ དྷམྨཱ ནིདྡྷཱརིཏཱ. ‘‘དདཾ མིཏྟཱནི གནྠཏཱི’’ཏིཨཱདཱིསུ (སཾ. ནི. ༡.༢༤༦; སུ. ནི. ༡༨༩) སམཱནཀིཙྩཏཱ, པིཡཝཙནཨཏྠཙརིཡཱ སམཱནཏྠཏཱཔི ནིདྡྷཱརིཏཱ, ‘‘ཕསྶཔཙྩཡཱ ཝེདནཱ’’ཏིཨཱདཱིསུ (མ. ནི. ༣.༡༢༦; སཾ. ནི. ༢.༡; མཧཱཝ. ༡; ཝིབྷ. ༢༢༥; ཨུདཱ. ༡; ནེཏྟི. ༢༤) སམཱནཧེཏུཏཱཡ སཉྙཱདཡོཔི ནིདྡྷཱརིཏཱ, ‘‘ཨཝིཛྫཱཔཙྩཡཱ སངྑཱརཱ’’ཏིཨཱདཱིསུ (མ. ནི. ༣.༡༢༦; སཾ. ནི. ༢.༡; མཧཱཝ. ༡; ཝིབྷ. ༢༢༥; ཨུདཱ. ༡; ནེཏྟི. ༢༤) སམཱནཕལཏཱཡ ཏཎྷུཔཱདཱནཱདཡོཔི ནིདྡྷཱརིཏཱ, ‘‘རཱུཔཾ ཨསྶཱདེཏི ཨབྷིནནྡཏི, ཏཾ ཨཱརབྦྷ རཱགོ ཨུཔྤཛྫཏཱི’’ཏིཨཱདཱིསུ (པཊྛཱ. ༡.༡.༤༢༤) སམཱནཱརམྨཎཏཱཡ ཏཾསམྤཡུཏྟཱ ཝེདནཱདཡོཔི ནིདྡྷཱརིཏཱ, ནིདྡྷཱརེཏྭཱ ཝཏྟབྦཱཏི ཨཏྠོཏི. ཝིཏྠཱརོ ཝིབྷངྒཝཱརེ (ནེཏྟི. ༢༣) ཨཱགམིསྶཏི.

ལཀྑཎོ ཧཱརོ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ ཙཏུབྱཱུཧོ ཧཱརོ’’ཏི པུཙྪིཏབྦཏྟཱ –

༦.

‘‘ནེརུཏྟམདྷིཔྤཱཡོ ¶ , བྱཉྫནམཐ དེསནཱནིདཱནཉྩ;

པུབྦཱཔརཱནུསནྡྷཱི, ཨེསོ ཧཱརོ ཙཏུབྱཱུཧོ’’ཏི. –

གཱཐཱ ཝུཏྟཱ. ཏཏྠ ནེརུཏྟཾ སུཏྟཔདནིབྦཙནཉྩ བུདྡྷཱནཾ ཏསྶ ཏསྶ སུཏྟསྶ དེསཀཱནཾ, སཱཝཀཱནཾ ཝཱ ཨདྷིཔྤཱཡོ ཙ ཨཏྠབྱཉྫནེན བྱཉྫནམུཁེན དེསནཱནིདཱནཉྩ པུབྦཱཔརེན ཨནུསནྡྷི ཙ ཨེཏེ ནིརུཏྟཱདཡོ ཡེན སཾཝཎྞནཱཝིསེསེན ཝིབྷཱཝཱིཡནྟི, ཨེསོ སཾཝཎྞནཱཝིསེསོ ‘‘ཙཏུབྱཱུཧོ ཧཱརོ’’ཏི ནིདྡིཊྛོ. དེསནཱཔཝཏྟིནིམིཏྟཾ དེསཀསྶ ཨཛ྄ཛྷཱསཡཱདི དེསནཱནིདཱནཾ ནཱམ. ཙཏུབྱཱུཧཧཱརསྶ བཧུཝིསཡཏྟཱ ཝིབྷངྒེ (ནེཏྟི. ༢༥ ཨཱདཡོ) ལཀྑཎསམྤཏྟིཾ ཀཏྭཱ ཀཐཡིསྶཱམ.

ཙཏུབྱཱུཧཧཱརནིདྡེསོ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ ཨཱཝཊྚཧཱརནིདྡེསོ’’ཏི པུཙྪིཏབྦཏྟཱ –

༧.

‘‘ཨེཀམྷི པདཊྛཱནེ, པརིཡེསཏི སེསཀཾ པདཊྛཱནཾ;

ཨཱཝཊྚཏི པཊིཔཀྑེ, ཨཱཝཊྚོ ནཱམ སོ ཧཱརོ’’ཏི. –

གཱཐཱ ཝུཏྟཱ. ཏཏྠ པརཀྐམདྷཱཏུཨཱདཱིནཾ པདཊྛཱནེ ཨེཀམྷི ཨཱརམྦྷདྷཱཏུཨཱདིཀེ དེསནཱརུལ༹ྷེ སཏི ཝིསབྷཱགཏཱཡ ཝཱ སེསཀཾ པདཊྛཱནཾ པརིཡེསཏི ¶ , དེསནཱཡ སརཱུཔཏོ ཨགྒཧཎེན ཝཱ སེསཀཾ པདཊྛཱནཾ པརིཡེསཏི, ཡེན སཾཝཎྞནཱཝིསེསེན པརིཡེསིཏྭཱ ཡོཛེནྟོ དེསནཾ པམཱདཱདཱིནཾ པདཊྛཱནབྷཱུཏེ ཀོསཛྫཱདིཀེ པཊིཔཀྑེ ཨཱཝཊྚཏི ཨཱཝཊྚཱཔེཏི, སོ སཾཝཎྞནཱཝིསེསོ ‘‘ཨཱཝཊྚོ ཧཱརོ ནཱམཱ’’ཏི ནིདྡིཊྛོཏི ཨཏྠཡོཛནཱ.

‘‘པཊིཔཀྑེ’’ཏི ཨིདཾ ནིདསྶནམཏྟཾ, སེསེཔི སབྷཱགེ ཨཱཝཊྚནཏོ. ན ཧི ཨཱརམྦྷདྷཱཏུཨཱདིཀེ དེསནཱརུལ༹ྷེ སཏི ཏཔྤཊིཔཀྑེ ཀོསཛྫཱདིཀེཡེཝ དེསནཾ ཨཱཝཊྚེཏི, ཨཐ ཁོ ཨཝསེསཝཱིརིཡཱརམྦྷཱདིཀེཔི དེསནཾ ཨཱཝཊྚེཏཱིཏི.

ཨཱཝཊྚཧཱརནིདྡེསོ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ ཝིབྷཏྟིཧཱརནིདྡེསོ’’ཏི པུཙྪིཏབྦཏྟཱ –

༨.

‘‘དྷམྨཉྩ ¶ པདཊྛཱནཾ, བྷཱུམིཉྩ ཝིབྷཛཏེ ཨཡཾ ཧཱརོ.

སཱདྷཱརཎེ ཨསཱདྷཱརཎེ ཙ ནེཡྻོ ཝིབྷཏྟཱི’’ཏི. –

གཱཐཱ ཝུཏྟཱ. ཏཏྠ ཀུསལཱདིཝསེན ཨནེཀཝིདྷཾ སབྷཱཝདྷམྨཉྩ དཱནསཱིལཱདིཔདཊྛཱནཉྩ ‘‘དསྶནབྷཱུམི བྷཱཝནཱབྷཱུམཱི’’ཏི ཨེཝམཱདིཀཾ བྷཱུམིཉྩ སཱདྷཱརཎེ ཙ ཨསཱདྷཱརཎེ ཙ ཡེན སཾཝཎྞནཱཝིསེསེན ཝིབྷཛཏེ, སོ སཾཝཎྞནཱཝིསེསོ ‘‘ཝིབྷཏྟི ཧཱརོ’’ཏི ནེཡྻོཏི ཨཏྠཡོཛནཱ.

‘‘ཨིམསྨིཾ སུཏྟེ ཝུཏྟཱ ཀུསལཱ ཝཱསནཱབྷཱགིཡཱ, ཨིམསྨིཾ སུཏྟེ ཝུཏྟཱ ཀུསལཱ ནིབྦེདྷབྷཱགིཡཱ’’ཏྱཱདིནཱ, ‘‘ཨིམསྨིཾ སུཏྟེ ཝུཏྟཱ ཨཀུསལཱ ཀིལེསབྷཱགིཡཱ’’ཏྱཱདིནཱ དྷམྨཉྩ, ‘‘ཨིདཾ སཱིལཾ ཨིམསྶ མཧགྒཏཝིསེསསྶ པདཊྛཱནཾ, ཨིདཾ སཱིལཾ ཨིདཾ ཛྷཱནཾ ཨིམསྶ ལོཀུཏྟརསྶ པདཊྛཱན’’ནྟྱཱདིནཱ པདཊྛཱནཉྩ, ‘‘དསྶནཔཧཱཏབྦསྶ པུཐུཛྫནོ བྷཱུམི, བྷཱཝནཱཔཧཱཏབྦསྶ སོཏཱཔནྣཱདཡོ བྷཱུམི’’ཏྱཱདིནཱ བྷཱུམིཉྩ, ‘‘ཀཱམརཱགབྱཱཔཱདཱ པུཐུཛྫནསོཏཱཔནྣཱནཾ སཱདྷཱརཎཱ’’ཏྱཱདིནཱ སཱདྷཱརཎེ ཙ, ‘‘ཀཱམརཱགབྱཱཔཱདཱ ཨནཱགཱམིཨརཧནྟཱནཾ ཨསཱདྷཱརཎཱ’’ཏྱཱདིནཱ ཨསཱདྷཱརཎེ ཙ ཡེན ཝིབྷཛཏི, སོ ཝིབྷཏྟི ཧཱརོ ནཱམཱཏིཨཱདིནཱ (ནེཏྟི. ༣༣-༣༤) ཝིཏྠཱརེཏྭཱ ཝིབྷཛནཱཀཱརོ གཧེཏབྦོ.

ཝིབྷཏྟིཧཱརནིདྡེསོ ¶ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ པརིཝཏྟནཧཱརནིདྡེསོ’’ཏི པུཙྪིཏབྦཏྟཱ –

༩.

‘‘ཀུསལཱཀུསལེ དྷམྨེ, ནིདྡིཊྛེ བྷཱཝིཏེ པཧཱིནེ ཙ.

པརིཝཏྟཏི པཊིཔཀྑེ, ཧཱརོ པརིཝཏྟནོ ནཱམཱ’’ཏི. –

གཱཐཱ ཝུཏྟཱ. ཏཏྠ སུཏྟེ བྷཱཝིཏེ བྷཱཝིཏབྦེ ཀུསལེ ཨནཝཛྫདྷམྨེ ནིདྡིཊྛེ ཀཐིཏེ, སཾཝཎྞིཏེ ཝཱ པཧཱིནེ པཧཱཏབྦེ ཨཀུསལེ སཱཝཛྫདྷམྨེ ནིདྡིཊྛེ ཀཐིཏེ, སཾཝཎྞིཏེ ཝཱ ཏེསཾ དྷམྨཱནཾ པཊིཔཀྑེ ཝིཔརཱིཏདྷམྨེ ཡེན སཾཝཎྞནཱཝིསེསེན པརིཝཏྟཏི པརིཝཏྟེཏི, སོ སཾཝཎྞནཱཝིསེསོ ‘‘པརིཝཏྟནོ ཧཱརོ ནཱམཱ’’ཏི ཝེདིཏབྦོཏི ཨཏྠཡོཛནཱ.

‘‘སམྨཱདིཊྛིསྶ པུརིསཔུགྒལསྶ མིཙྪཱདིཊྛི ནིཛྫིཎྞཱ བྷཝཏཱི’’ཏིཨཱདིནཱ ཙ ‘‘ཡསྶ ཝཱ པཱཎཱཏིཔཱཏཱ པཊིཝིརཏསྶ པཱཎཱཏིཔཱཏོ པཧཱིནོ’’ཏིཨཱདིནཱ ཙ ‘‘བྷུཉྫིཏབྦཱ ཀཱམཱ ¶ …པེ… ཀཱམེཧི ཝེརམཎཱི ཏེསཾ ཨདྷམྨོ’’ཏིཨཱདིནཱ ཙ པཊིཔཀྑེ པརིཝཏྟནབྷཱཝཾ ཝིབྷངྒཝཱརེ (ནེཏྟི. ༣༥ ཨཱདཡོ) ཝཀྑཏཱིཏི ན ཝིཏྠཱརིཏཱ.

པརིཝཏྟནཧཱརནིདྡེསོ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ ཝེཝཙནཧཱརནིདྡེསོ’’ཏི པུཙྪིཏབྦཏྟཱ –

༡༠.

‘‘ཝེཝཙནཱནི བཧཱུནི ཏུ, སུཏྟེ ཝུཏྟཱནི ཨེཀདྷམྨསྶ.

ཡོ ཛཱནཱཏི སུཏྟཝིདཱུ, ཝེཝཙནོ ནཱམ སོ ཧཱརོ’’ཏི. –

གཱཐཱ ཝུཏྟཱ. ཏཏྠ ཨེཀདྷམྨསྶ པདཏྠསྶ སུཏྟེ ཝུཏྟཱནི ཏུ ཝུཏྟཱནི ཨེཝ, བཧཱུནི ཏུ བཧཱུནི ཨེཝ ཝེཝཙནཱནི ཡེན སཾཝཎྞནཱཝིསེསེན ཡོ སུཏྟཝིདཱུ ཛཱནཱཏི, ཛཱནིཏྭཱ ཨེཀསྨིཾཡེཝ པདཏྠེ ཡོཛེཏི, ཏསྶ སུཏྟཝིདུནོ སོ སཾཝཎྞནཱཝིསེསོ ‘‘ཝེཝཙནོ ནཱམ ཧཱརོ’’ཏི ནིདྡིཊྛོཏི ཨཏྠཡོཛནཱ.

ཨེཏྠ ཙ ཡོ སོ-སདྡཱ ཨསམཱནཏྠཱ ཙ ཧོནྟཱིཏི ‘‘ཡོ སུཏྟཝིདཱུ’’ཏི ཝཏྭཱ ‘‘སོ སཾཝཎྞནཱཝིསེསོ’’ཏི ཝུཏྟནྟི. ‘‘བྷགཝཱ’’ཏི པདསྶ ¶ ཨེཀསྨིཾཡེཝ ཨཏྠེ བྷགཝཏི ‘‘ཨརཧཾ སམྨཱསམྦུདྡྷོ ཝིཛྫཱཙརཎསམྤནྣོ སུགཏོ ལོཀཝིདཱུ ཨནུཏྟརོ པུརིསདམྨསཱརཐི སཏྠཱ དེཝམནུསྶཱནཾ བུདྡྷོ བྷགཝཱ, ཕལནིཔྥཏྟིགཏོ ཝེསཱརཛྫཔྤཏྟོ ཨདྷིགཏཔཊིསམྦྷིདོ ཙཏུཡོགཝིཔྤཧཱིནོ ཨགཏིགམནཝཱིཏིཝཏྟོ ཨུདྡྷཊསལློ ནིརུལ༹ྷཝཎོ མདྡིཏཀཎྚཀོ ནིབྦཱཔིཏཔརིཡུཊྛཱནོ བནྡྷནཱཏཱིཏོ གནྠཝིནིཝེཋནོ ཨཛ྄ཛྷཱསཡཝཱིཏིཝཏྟོ བྷིནྣནྡྷཀཱརོ ཙཀྑུམཱ ལོཀདྷམྨསམཏིཀྐནྟོ ཨནུརོདྷཝིརོདྷཝིཔྤཡུཏྟོ ཨིཊྛཱནིཊྛེསུ དྷམྨེསུ ཨསངྑེཔགཏོ བནྡྷནཱཏིཝཏྟོ ཋཔིཏསངྒཱམོ ཨབྷིཀྐནྟཏརོ ཨུཀྐཱདྷརོ ཨཱལོཀཀརོ པཛྫོཏཀརོ ཏམོནུདོ རཎཉྫཧོ ཨཔརིམཱཎཝཎྞོ ཨཔྤམེཡྻཝཎྞོ ཨསངྑེཡྻཝཎྞོ ཨཱབྷངྐརོ པབྷངྐརོ དྷམྨོབྷཱསཔཛྫོཏཀརོ’’ཏི (ནེཏྟི. ༣༨) ཨེཝམཱདཱིནི བཧཱུནི ཝེཝཙནཱནི ཡོཛིཏཱནི. ཝིཏྠཱརོ ཝིབྷངྒཝཱརེ (ནེཏྟི. ༣༧ ཨཱདཡོ) ཨཱགམིསྶཏི.

ཝེཝཙནཧཱརནིདྡེསོ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ པཉྙཏྟིཧཱརནིདྡེསོ’’ཏི པུཙྪིཏབྦཏྟཱ –

༡༡.

‘‘ཨེཀཾ ¶ བྷགཝཱ དྷམྨཾ, པཉྙཏྟཱིཧི ཝིཝིདྷཱཧི དེསེཏི.

སོ ཨཱཀཱརོ ཉེཡྻོ, པཉྙཏྟཱི ནཱམ སོ ཧཱརོ’’ཏི. –

གཱཐཱ ཝུཏྟཱ. ཏཏྠ བྷགཝཱ ཨེཀཾ ཁནྡྷཱདིདྷམྨཾ ཝིཝིདྷཱཧི ནིཀྑེཔཔྤབྷཝཔཉྙཏྟཱདཱིཧི པཉྙཏྟཱིཧི ཡེན པཉྙཱཔེཏབྦཱཀཱརེན དེསེཏི, སོ པཉྙཱཔེཏབྦཱཀཱརོ ཡེན སཾཝཎྞནཱཝིསེསེན ཝིབྷཱཝིཏོ, སོ སཾཝཎྞནཱཝིསེསོ ‘‘པཉྙཏྟི ཧཱརོ ནཱམཱ’’ཏི ཉེཡྻོཏི ཨཏྠཡོཛནཱ.

ཏཏྠ ཝིཝིདྷཱཧི པཉྙཏྟཱིཧི ནིཀྑེཔཔཉྙཏྟིཔབྷཝཔཉྙཏྟིཔརིཉྙཱཔཉྙཏྟིཔཧཱནཔཉྙཏྟི- བྷཱཝནཱཔཉྙཏྟིསཙྪིཀིརིཡཱཔཉྙཏྟིནིརོདྷཔཉྙཏྟིནིབྦིདཱཔཉྙཏྟཱིཏི ཨེཝམཱདིཔཉྙཏྟཱིཧི ཨེཀཔདཏྠསྶེཝ པཉྙཱཔེཏབྦཱཀཱརཝིབྷཱཝནཱལཀྑཎོ སཾཝཎྞནཱཝིསེསོ པཉྙཏྟི ཧཱརོ ནཱམཱཏི.

ཏཏྠ ‘‘ཨིདཾ དུཀྑ’’ནྟི ཨཡཾ པཉྙཏྟི པཉྩནྣཾ ཁནྡྷཱནཾ, ཚནྣཾ དྷཱཏཱུནཾ, ཨཊྛཱརསནྣཾ དྷཱཏཱུནཾ, དྭཱདསནྣཾ ཨཱཡཏནཱནཾ, དསནྣཾ ཨིནྡྲིཡཱནཾ ནིཀྑེཔཔཉྙཏྟི.

‘‘ཀབལཱི༹ཀཱརེ ཙེ, བྷིཀྑཝེ, ཨཱཧཱརེ ཨཏྠི རཱགོ, ཨཏྠི ནནྡཱི, ཨཏྠི ཏཎྷཱ, པཏིཊྛིཏཾ ཏཏྠ ཝིཉྙཱཎཾ ཝིརུལ༹ྷཾ. ཡཏྠ པཏིཊྛིཏཾ ཝིཉྙཱཎཾ ཝིརུལ༹ྷཾ, ཨཏྠི ཏཏྠ ¶ ནཱམརཱུཔསྶ ཨཝཀྐནྟི. ཡཏྠ ཨཏྠི ནཱམརཱུཔསྶ ཨཝཀྐནྟི, ཨཏྠི ཏཏྠ སངྑཱརཱནཾ ཝུདྡྷཱི’’ཏི (སཾ. ནི. ༢.༦༤; ཀཐཱ. ༢༩༦) ཨེཝམཱདི པབྷཝཔཉྙཏྟི དུཀྑསྶ ཙ སམུདཡསྶ ཙཱཏི.

‘‘ཀབལཱི༹ཀཱརེ ཙེ, བྷིཀྑཝེ, ཨཱཧཱརེ ནཏྠི རཱགོ, ནཏྠི ནནྡཱི, ནཏྠི ཏཎྷཱ’’ཏི (སཾ. ནི. ༢.༦༤; ཀཐཱ. ༢༩༦) ཨེཝམཱདི པརིཉྙཱཔཉྙཏྟི དུཀྑསྶ, ‘‘པཧཱནཔཉྙཏྟི སམུདཡསྶ, བྷཱཝནཱཔཉྙཏྟི མགྒསྶ, སཙྪིཀིརིཡཱཔཉྙཏྟི ནིརོདྷསྶཱ’’ཏི ཙ ‘‘ནིཀྑེཔཔཉྙཏྟི སུཏམཡིཡཱ པཉྙཱཡ, སཙྪིཀིརིཡཱཔཉྙཏྟི ཨནཉྙཱཏཉྙསྶཱམཱིཏིནྡྲིཡསྶ, པཝཏྟནཱཔཉྙཏྟི དྷམྨཙཀྐསྶཱ’’ཏི ཨེཝམཱདིཝིཏྠཱརོ ཝིབྷངྒེ (ནེཏྟི. ༣༩ ཨཱདཡོ) ཨཱགམིསྶཏཱིཏི.

པཎྞཏྟིཧཱརནིདྡེསོ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ ཨོཏརཎཧཱརནིདྡེསོ’’ཏི པུཙྪིཏབྦཏྟཱ –

༡༢.

‘‘ཡོ ¶ ཙ པཊིཙྩུཔྤཱདོ, ཨིནྡྲིཡཁནྡྷཱ ཙ དྷཱཏུཨཱཡཏནཱ.

ཨེཏེཧི ཨོཏརཏི ཡོ, ཨོཏརཎོ ནཱམ སོ ཧཱརོ’’ཏི. –

གཱཐཱ ཝུཏྟཱ. ཏཏྠ ཡོ པཊིཙྩསམུཔྤཱདོ ཙ ཡེ ཨིནྡྲིཡཁནྡྷཱ ཙ ཡཱནི དྷཱཏུཨཱཡཏནཱནི ཙ ཡེན སཾཝཎྞནཱཝིསེསེན ནིདྡྷཱརིཏཱནི, ཨེཏེཧི པཊིཙྩསམུཔྤཱདཱདིནྡྲིཡཁནྡྷདྷཱཏཱཡཏནེཧི, སུཏྟེ ཨཱགཏཔདཏྠམུཁེན ནིདྡྷཱརིཡམཱནེཧི ཙ ཡོ སཾཝཎྞནཱཝིསེསོ ཨོཏརཏི ཨོགཱཧཏི པཊིཙྩསམུཔྤཱདཱདིཀེ ཏཏྠ ཝཱཙཀཝསེན, ཏཏྠ ཉཱཔཀཝསེན ཝཱ ཨནུཔཝིསཏི, སོ སཾཝཎྞནཱཝིསེསོ ཨོཏརཎོ ཧཱརོ ནཱམཱཏི ཨཏྠཡོཛནཱ.

ཏཏྠ ཨིནྡྲིཡཁནྡྷཱཏི ཨིནྡྲིཡཱནི ཙ ཁནྡྷཱ ཙཱཏི ཨིནྡྲིཡཁནྡྷཱ. དྷཱཏུཨཱཡཏནཱཏི དྷཱཏུཡོ ཙ ཨཱཡཏནཱནི ཙ དྷཱཏུཨཱཡཏནཱ. ཀཐཾ ཨོཏརཎོ? ‘‘ཨུདྡྷཾ ཨདྷོ སབྦདྷི ཝིཔྤམུཏྟོ’’ཏིཨཱདི (ནེཏྟི. ༤༢) པཱཋོ.

ཨུདྡྷནྟི རཱུཔདྷཱཏུ ཙ ཨརཱུཔདྷཱཏུ ཙ. ཨདྷོཏི ཀཱམདྷཱཏུ. སབྦདྷི ཝིཔྤམུཏྟོཏི ཏེདྷཱཏུཀེ ཨཡཾ ཨསེཀྑཱཝིམུཏྟི. ཏཱནིཡེཝ ཨསེཀྑཱནི པཉྩིནྡྲིཡཱནི, ཨཡཾ ཨིནྡྲིཡེཧི ཨོཏརཎཱ.

ཏཱནིཡེཝ ¶ ཨསེཀྑཱནི པཉྩིནྡྲིཡཱནི ཝིཛྫཱ, ཝིཛྫུཔྤཱདཱ ཨཝིཛྫཱནིརོདྷོ…པེ… དུཀྑཀྑནྡྷསྶ ནིརོདྷོ ཧོཏི, ཨཡཾ པཊིཙྩསམུཔྤཱདེཧི ཨོཏརཎཱ.

ཏཱནིཡེཝ ཨསེཀྑཱནི པཉྩིནྡྲིཡཱནི ཏཱིཧི ཁནྡྷེཧི སངྒཧིཏཱནི སཱིལཀྑནྡྷེན སམཱདྷིཀྑནྡྷེན པཉྙཱཀྑནྡྷེན, ཨཡཾ ཁནྡྷེཧི ཨོཏརཎཱ.

ཏཱནིཡེཝ ཨསེཀྑཱནི པཉྩིནྡྲིཡཱནི སངྑཱརཔརིཡཱཔནྣཱནི ཡེ སངྑཱརཱ ཨནཱསཝཱ, ནོ ཙ བྷཝངྒཱ, ཏེ སངྑཱརཱ དྷམྨདྷཱཏུསངྒཧིཏཱ, ཨཡཾ དྷཱཏཱུཧི ཨོཏརཎཱ.

སཱ དྷམྨདྷཱཏུ དྷམྨཱཡཏནཔརིཡཱཔནྣཱ, ཡཾ ཨཱཡཏནཾ ཨནཱསཝཾ, ནོ ཙ བྷཝངྒཾ, ཨཡཾ ཨཱཡཏནེཧི ཨོཏརཎཱཏི ཨེཝམཱདཱིཧི ཝིབྷངྒེ (ནེཏྟི. ༤༢ ཨཱདཡོ) ཨཱགམིསྶཏཱིཏི.

ཨོཏརཎཧཱརནིདྡེསོ ¶ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ སོདྷནཧཱརནིདྡེསོ’’ཏི པུཙྪིཏབྦཏྟཱ –

༡༣.

‘‘ཝིསྶཛྫིཏམྷི པཉྷེ, གཱཐཱཡཾ པུཙྪིཏཱ ཡམཱརབྦྷ.

སུདྡྷཱསུདྡྷཔརིཀྑཱ, ཧཱརོ སོ སོདྷནོ ནཱམཱ’’ཏི. –

གཱཐཱ ཝུཏྟཱ. ཏཏྠ ཏིསྶཾ གཱཐཱཡཾ ཨཱརུལ༹ྷེ པཉྷེ ཉཱཏུམིཙྪིཏེ ཨཏྠེ བྷགཝཏཱ ཝིསྶཛྫནགཱཐཱཡཾ ཝིསྶཛྫིཏམྷི ཡཾ སུཏྟཏྠཾ ཨཱརབྦྷ ཨདྷིཀིཙྩ སཱ གཱཐཱ པུཙྪིཏཱ པུཙྪནཏྠཱཡ ཋཔིཏཱ, ཏསྶ སུཏྟཏྠསྶ ཡེན སཾཝཎྞནཱཝིསེསེན སུདྡྷཱསུདྡྷཔརིཀྑཱ ཝིཙཱརཎཱ བྷཝེ, སོ སཾཝཎྞནཱཝིསེསོ སོདྷནོ ཧཱརོ ནཱམཱཏི ཨཏྠཡོཛནཱ.

ཀཐཾ? ‘‘ཨཝིཛྫཱཡ ནིཝུཏོ ལོཀོ’’ཏི པདཾ སོདྷིཏཾ, ཨཱརམྦྷོ ན སོདྷིཏོ. ‘‘ཝིཝིཙྪཱ པམཱདཱ ནཔྤཀཱསཏཱི’’ཏི པདཾ སོདྷིཏཾ, ཨཱརམྦྷོ ན སོདྷིཏོ. ‘‘ཛཔྤཱབྷིལེཔནཾ བྲཱུམཱི’’ཏི པདཾ སོདྷིཏཾ, ཨཱརམྦྷོ ན སོདྷིཏོ. ‘‘དུཀྑམསྶ མཧབྦྷཡ’’ནྟི པདཉྩ སོདྷིཏཾ, ཨཱརམྦྷོ ཙ སོདྷིཏོཏི. ཨེཝཾ པདཱདཱིནཾ སོདྷིཏཱསོདྷིཏབྷཱཝཝིཙཱརོ ཧཱརོ སོདྷནོ ནཱམ. ཝིཏྠཱརཏོ པན ཝིབྷངྒེ (ནེཏྟི. ༤༥ ཨཱདཡོ) ཨཱགམིསྶཏཱིཏི.

སོདྷནཧཱརནིདྡེསོ ¶ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ ཨདྷིཊྛཱནཧཱརནིདྡེསོ’’ཏི པུཙྪིཏབྦཏྟཱ –

༡༤.

‘‘ཨེཀཏྟཏཱཡ དྷམྨཱ, ཡེཔི ཙ ཝེམཏྟཏཱཡ ནིདྡིཊྛཱ.

ཏེ ན ཝིཀཔྤཡིཏབྦཱ, ཨེསོ ཧཱརོ ཨདྷིཊྛཱནོ’’ཏི. –

གཱཐཱ ཝུཏྟཱ. ཏཏྠ ཡེ དུཀྑསཙྩཱདཡོ དྷམྨཱ ཨེཀཏྟཏཱཡ སཱམཉྙེནཔི ཙ ཝེམཏྟཏཱཡ ཝིསེསེནཔི ནིདྡིཊྛཱ, ཡེན སཾཝཎྞནཱཝིསེསེན ནིདྡིཊྛཱ དུཀྑསཙྩཱདཡོ དྷམྨཱ ན ཝིཀཔྤཡིཏབྦཱ སཱམཉྙཝིསེསཀཔྤནཱཡ ཝོཧཱརབྷཱཝེན ཨནཝཊྛཱནཏོ, ཀཱལདིསཱཝིསེསཱདཱིནཾ ཝིཡ ཨཔེཀྑཱསིདྡྷིཏོ ཙ, ཨེསོ སཾཝཎྞནཱཝིསེསོ ཨདྷིཊྛཱནོ ཧཱརོཏི ཨཏྠཡོཛནཱ.

ཏཏྠ ¶ ཨེཀཏྟཏཱཡཱཏི ཨེཀསྶ སམཱནསྶ བྷཱཝོ ཨེཀཏྟཾ, ཨེཀཏྟམེཝ ཨེཀཏྟཏཱ, ཏཱཡ. ཨེཀསདྡོ ཙེཏྠ སམཱནཏྠཝཱཙཀོ, ན སངྑྱཱཝཱཙཀོཏི. ཝེམཏྟཏཱཡཱཏི ཝིསིཊྛཱ མཏྟཱ ཝིམཏྟཱ, ཝིམཏྟཱ ཨེཝ ཝེམཏྟཾ, ཝེམཏྟསྶ བྷཱཝོ ཝེམཏྟཏཱ, ཏཱཡ. ཡཐཱ ཧི ‘‘ཨཛྫ སྭེ’’ཏི ཝུཙྩམཱནཱ ཀཱལཝིསེསཱ ཨནཝཊྛིཏཱ བྷཝནྟི, ‘‘པུརིམཱ དིསཱ, པཙྪིམཱ དིསཱ’’ཏི ཝུཙྩམཱནཱ དིསཱཝིསེསཱ, ཨེཝཾ སཱམཉྙཝིསེསཱ ཙ ཨཏྠསྶ སབྷཱཝཱཏི. ཏཐཱ ཧི ‘‘ཨིདཾ དུཀྑ’’ནྟི ཝུཙྩམཱནཾ ཛཱཏིཨཱདིཾ ཨཔེཀྑཱཡ སཱམཉྙཾ སམཱནམྤི སཙྩཱཔེཀྑཱཡ ཝིསེསོ ཧོཏི. ཨེས ནཡོ སམུདཡསཙྩཱདཱིསུཔཱིཏི. ‘‘དུཀྑ’’ནྟི ཨེཀཏྟཏཱ. ‘‘ཛཱཏི དུཀྑཱ, ཛརཱ དུཀྑཱ, མརཎཾ དུཀྑ’’ནྟི ཨེཝམཱདི ཝེམཏྟཏཱ. ‘‘དུཀྑསམུདཡོ’’ཏི ཨེཀཏྟཏཱ, ‘‘ཏཎྷཱ པོནོབྷཝིཀཱ ནནྡཱིརཱགསཧགཏཱ’’ཏི ཨེཝམཱདི ཝེམཏྟཏཱཏི ཨེཝམཱདི ཝིཏྠཱརོ ཝིབྷངྒེ (ནེཏྟི. ༤༦ ཨཱདཡོ) ཨཱགམིསྶཏཱིཏི.

ཨདྷིཊྛཱནཧཱརནིདྡེསོ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ པརིཀྑཱརཧཱརནིདྡེསོ’’ཏི པུཙྪིཏབྦཏྟཱ –

༡༥.

‘‘ཡེ དྷམྨཱ ཡཾ དྷམྨཾ, ཛནཡནྟིཔྤཙྩཡཱ པརམྤརཏོ.

ཧེཏུམཝཀཌྜྷཡིཏྭཱ, ཨེསོ ཧཱརོ པརིཀྑཱརོ’’ཏི. –

གཱཐཱ ཝུཏྟཱ. ཏཏྠ ཨཝིཛྫཱདིཀཱ ཡེ པཙྩཡདྷམྨཱ སངྑཱརཱདིཀཾ ཡཾ ཕལདྷམྨཾ པཙྩཡཱ སཧཛཱཏཔཙྩཡེན པརམྤརཏོ པརམྤརཔཙྩཡབྷཱཝེན ཛནཡནྟི, ཏསྶ སངྑཱརཱདིཕལསྶ པཙྩཡཾ པརིཀྑཱརབྷཱུཏཾ པུརིམུཔྤནྣཾ ཨཝིཛྫཱདིཀཾ ཨསཱདྷཱརཎཾ ¶ ཛནཀཾ ཧེཏུཾ, ཨཡོནིསོམནསིཀཱརཱདིཀཾ སཱདྷཱརཎཾ པཙྩཡཧེཏུཉྩ ཨཝཀཌྜྷཡིཏྭཱ སུཏྟཏོ ནིདྡྷཱརེཏྭཱ ཡོ སཾཝཎྞནཱཝིསེསོ པརིཀྑཱརསཾཝཎྞནཱབྷཱཝེན པཝཏྟོ, ཨེསོ སཾཝཎྞནཱཝིསེསོ པརིཀྑཱརོ ཧཱརོ ནཱམཱཏི ཨཏྠཡོཛནཱ. ཨཝིཛྫཱདཡོ ཧི ཨཝིཛྫཱདཱིནཾ ཨསཱདྷཱརཎཧེཏཱུ བྷཝནྟི, ཨཡོནིསོམནསིཀཱརཱདཡོ སཱདྷཱརཎཔཙྩཡཱ. ཏེནཱཧ – ‘‘ཨསཱདྷཱརཎལཀྑཎོ ཧེཏུ, སཱདྷཱརཎལཀྑཎོ པཙྩཡོ’’ཏི, ‘‘ཨཝིཛྫཱ ཨཝིཛྫཱཡ ཧེཏུ, ཨཡོནིསོམནསིཀཱརོ པཙྩཡོ’’ཏིཨཱདིཀཾ (ནེཏྟི. ༤༩) ཝིབྷངྒཝཙནཉྩ.

པརིཀྑཱརཧཱརནིདྡེསོ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ སམཱརོཔནཧཱརནིདྡེསོ’’ཏི པུཙྪིཏབྦཏྟཱ –

༡༦.

‘‘ཡེ ¶ དྷམྨཱ ཡཾམཱུལཱ, ཡེ ཙེཀཏྠཱ པཀཱསིཏཱ མུནིནཱ.

ཏེ སམཱརོཔཡིཏབྦཱ, ཨེས སམཱརོཔནོ ཧཱརོ’’ཏི. –

གཱཐཱ ཝུཏྟཱ. ཏཏྠ ཡེ སཱིལཱདཡོ དྷམྨཱ ཡཾམཱུལཱ ཡེསཾ སམཱདྷིཨཱདཱིནཾ མཱུལཱ, ཏེ སཱིལཱདཡོ དྷམྨཱ ཏེསཾ སམཱདྷིཨཱདཱིནཾ པདཊྛཱནབྷཱཝེན སཾཝཎྞནཱཝིསེསེན སམཱརོཔཡིཏབྦཱ, ཡེ ཙ རཱགཝིརཱགཙེཏོཝིམུཏྟིསེཀྑཕལཀཱམདྷཱཏུསམཏིཀྐམནཱདིསདྡཱ ཨནཱགཱམིཕལཏྠཏཱཡ ཨེཀཏྠཱ སམཱནཏྠཱཏི བུདྡྷམུནིནཱ པཀཱསིཏཱ, ཏེ རཱག…པེ… ཏིཀྐམནཱདིསདྡཱ ཨཉྙམཉྙཝེཝཙནབྷཱཝེན སམཱརོཔཡིཏབྦཱ, ཨེསོ སཾཝཎྞནཱཝིསེསོ སམཱརོཔནོ ཧཱརོ ནཱམཱཏི ཨཏྠཡོཛནཱ.

ཨེཏྠ ཙ སཱིལཱདིཀྑནྡྷཏྟཡསྶ པརིཡཱཡནྟརཝིབྷཱཝནཱཔཱརིཔཱུརཱི ཀཐིཏཱ, བྷཱཝནཱཔཱརིཔཱུརཱི ཙ པཧཱཏབྦསྶ པཧཱནེན ཧོཏཱིཏི བྷཱཝནཱསམཱརོཔནཔཧཱནསམཱརོཔནཱཔི དསྶིཏཱཏི ཙཏུབྦིདྷོ སམཱརོཔནོ པདཊྛཱནསམཱརོཔནོ, ཝེཝཙནསམཱརོཔནོ, བྷཱཝནཱསམཱརོཔནོ, པཧཱནསམཱརོཔནོཏི.

ཏཏྠ ཀཱཡིཀསུཙརིཏཾ, ཝཱཙསིཀསུཙརིཏཉྩ སཱིལཀྑནྡྷོ, མནོསུཙརིཏེ ཨནབྷིཛ྄ཛྷཱ, ཨབྱཱཔཱདོ ཙ སམཱདྷིཀྑནྡྷོ, སམྨཱདིཊྛི པཉྙཱཀྑནྡྷོ. སཱིལཀྑནྡྷོ སམཱདྷིཀྑནྡྷསྶ པདཊྛཱནཾ, སམཱདྷིཀྑནྡྷོ པཉྙཱཀྑནྡྷསྶ པདཊྛཱནཾ. སཱིལཀྑནྡྷོ, སམཱདྷིཀྑནྡྷོ ཙ སམཐསྶ པདཊྛཱནཾ, པཉྙཱཀྑནྡྷོ ¶ ཝིཔསྶནཱཡ པདཊྛཱནཾ. སམཐོ རཱགཝིརཱགཙེཏོཝིམུཏྟིཡཱ པདཊྛཱནཾ, ཝིཔསྶནཱ ཨཝིཛྫཱཝིརཱགཔཉྙཱཝིམུཏྟིཡཱ པདཊྛཱནནྟི ཨེཝམཱདི པདཊྛཱནསམཱརོཔནོ. རཱགཝིརཱགཱ ཙེཏོཝིམུཏྟི སེཀྑཕལཾ, ཨཝིཛྫཱཝིརཱགཱ པཉྙཱཝིམུཏྟི ཨསེཀྑཕལཾ, ཨིདཾ ཝེཝཙནཾ. རཱགཝིརཱགཱ ཙེཏོཝིམུཏྟི ཨནཱགཱམིཕལཾ, ཨཝིཛྫཱཝིརཱགཱ པཉྙཱཝིམུཏྟི ཨགྒཕལཾ ཨརཧཏྟཾ, ཨིདཾ ཝེཝཙནཾ. རཱགཝིརཱགཱ ཙེཏོཝིམུཏྟི ཀཱམདྷཱཏུསམཏིཀྐམནཾ, ཨཝིཛྫཱཝིརཱགཱ ཙེཏོཝིམུཏྟི ཏེདྷཱཏུསམཏིཀྐམནཾ, ཨིདཾ ཝེཝཙནཾ. པཉྙིནྡྲིཡཾ, པཉྙཱབལཾ, ཨདྷིཔཉྙཱསིཀྑཱ, པཉྙཱཀྑནྡྷོཏི ཨེཝམཱདི ཝེཝཙནནྟི ཨེཝམཱདི ཝེཝཙནསམཱརོཔནོ. ཀཱཡེ ཀཱཡཱནུཔསྶིནོ ཝིཧརཏོ ཙཏྟཱརོ སཏིཔཊྛཱནཱ བྷཱཝནཱཔཱརིཔཱུརིཾ གཙྪནྟི, ཙཏཱུསུ སཏིཔཊྛཱནེསུ བྷཱཝིཡམཱནེསུ ཙཏྟཱརོ སམྨཔྤདྷཱནཱ བྷཱཝནཱཔཱརིཔཱུརིཾ གཙྪནྟི, ཙཏཱུསུ སམྨཔྤདྷཱནེསུ བྷཱཝིཡམཱནེསུ ཙཏྟཱརོ ཨིདྡྷིཔཱདཱ བྷཱཝནཱཔཱརིཔཱུརིཾ གཙྪནྟཱིཏི ཨེཝམཱདི བྷཱཝནཱསམཱརོཔནོ. ཀཱཡེ ཀཱཡཱནུཔསྶཱི ཝིཧརནྟོ ཨསུབྷེ ‘‘སུབྷ’’ནྟི ཝིཔལླཱསཾ པཛཧཏི, ཀབལཱི༹ཀཱརོ ཙསྶ ཨཱཧཱརོ པརིཉྙཾ གཙྪཏི, ཀཱམུཔཱདཱནེན ཙ ཨནུཔཱདཱནོ བྷཝཏི, ཀཱམཡོགེན ཙ ཝིསཾཡུཏྟོ བྷཝཏི, ཨབྷིཛ྄ཛྷཱཀཱཡགནྠེན ཙ ཝིཔྤཡུཛྫཏི, ཀཱམཱསཝེན ཙ ཨནཱསཝོ བྷཝཏི, ཀཱམོགྷཉྩ ཨུཏྟིཎྞོ བྷཝཏི, རཱགསལླེན ཙ ཝིསལློ བྷཝཏི, རཱུཔཱུཔིཀཱ ཙསྶ ཝིཉྙཱཎཊྛིཏི པརིཉྙཾ གཙྪཏི ¶ , རཱུཔདྷཱཏུཡཾ ཙསྶ རཱགོ པཧཱིནོ བྷཝཏི, ན ཙ ཚནྡཱགཏིཾ གཙྪཏི, ཝེདནཱསཱུཏི ཨེཝམཱདི པཧཱནསམཱརོཔནོཏི ཨེཝམཱདི སམཱརོཔནོ ཧཱརོ ནིཡུཏྟོཏི.

ཨིཏི སཏྟིབལཱནུརཱུཔཱ རཙིཏཱ.

སོལ༹སཧཱརནིདྡེསཝིབྷཱཝནཱ ནིཊྛིཏཱ.

ནཡནིདྡེསཝིབྷཱཝནཱ

༡༧. ཧཱརནིདྡེསཱ ནིདྡིཊྛཱ, ཨམྷེཧི ཙ ཉཱཏཱ, ‘‘ཀཏམེ ནཡནིདྡེསཱ’’ཏི པུཙྪིཏབྦཏྟཱ ‘‘ཏཎྷཉྩཱ’’ཏིཨཱདི ཝུཏྟཾ. ཨཐ ཝཱ ཨེཝཾ ཨུདྡེསཀྐམེནེཝ ཧཱརེ ནིདྡིསིཏྭཱ ཨིདཱནི ནཡེ ནིདྡིསིཏུཾ ‘‘ཏཎྷཉྩཱ’’ཏིཨཱདི ཝུཏྟཾ. ཏཏྠ ཡོ སཾཝཎྞནཱཝིསེསོ སུཏྟེ ཨཱགཏཾ ཏཎྷཉྩ ཨཝིཛྫཉྩ ཨཏྠཏོ ནིདྡྷཱརཎཝསེན གཧིཏཾ ཏཎྷཉྩ ཨཝིཛྫཉྩ སཾཀིལེསཔཀྑཾ ནེཏི, སུཏྟེ ཨཱགཏེན ¶ སམཐེན, སུཏྟེ ཨཱགཏཱཡ ཝིཔསྶནཱཡ ཨཏྠཏོ ནིདྡྷཱརཎཝསེན ཝཱ གཧིཏེན སམཐེན, གཧིཏཱཡ ཝིཔསྶནཱཡ ཝོདཱནཔཀྑཾ ནེཏི, ནཡནྟོ ཙ སཙྩེཧི ཡོཛེཏྭཱ ནེཏི, ཨཡཾ སཾཝཎྞནཱཝིསེསོ སོ ནནྡིཡཱཝཊྚོ ནཡོ ནཱམཱཏི ཨཏྠཡོཛནཱ.

ཨེཏྠ ཙ ཨཏྠནཡསྶ བྷཱུམི, སཾཝཎྞནཱ ཙ གཱཐཱཡཾ ‘‘ནཡོ’’ཏི ཝུཏྟཱ, ཏསྨཱ ‘‘སཾཝཎྞནཱཝིསེསོ’’ཏི ཝུཏྟཾ. ན ཧི ཨཏྠནཡོ སཾཝཎྞནཱ, ཙཏུསཙྩཔཊིཝེདྷསྶ ཨནུརཱུཔོ པུབྦབྷཱགེ ཨནུགཱཧཎནཡོ ཨཏྠནཡོཝ. ཏསྶ པན ཨཏྠནཡསྶ ཡཱ སཾཝཎྞནཱ ཨུགྒྷཊིཏཉྙུཨཱདཱིནཾ ཝསེན ཏཎྷཱདིམུཁེན ནཡབྷཱུམིརཙནཱ པཝཏྟཱ, ཏསྶ སཾཝཎྞནཱཝ ནཡཝོཧཱརོ ཀཏོཏི ཝིཏྠཱརཏོ ཧཱརསམྤཱཏེ (ནེཏྟི. ༧༨-༧༩) ཨཱགམིསྶཏི.

ནནྡིཡཱཝཊྚནཡནིདྡེསོ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ ཏིཔུཀྑལནཡནིདྡེསོ’’ཏི པུཙྪིཏབྦཏྟཱ –

༡༨.

‘‘ཡོ ཨཀུསལེ སམཱུལེཧི, ནེཏི ཀུསལེ ཙ ཀུསལམཱུལེཧི.

བྷཱུཏཾ ཏཐཾ ཨཝིཏཐཾ, ཏིཔུཀྑལཾ ཏཾ ནཡཾ ཨཱཧཱུ’’ཏི. –

གཱཐཱ ཝུཏྟཱ. ཏཏྠ ཡོ སཾཝཎྞནཱཝིསེསོ ཨཀུསལེ སམཱུལེཧི ཨཏྟནོ ཨཀུསལསྶ ཏཱིཧི ལོབྷཱདཱིཧི ¶ མཱུལེཧི སཾཀིལེསཔཀྑཾ ནེཏི, ཀུསལེ ཙ ཀུསལམཱུལེཧི ཏཱིཧི ཨལོབྷཱདཱིཧི ཝོདཱནཔཀྑཾ ནེཏི, ནཡནྟོ ཙ བྷཱུཏཾ ཀུསལཱཀུསལཾ ནེཏི, ན ཨབྷཱུཏཾ མཱཡཱམརཱིཙིཨཱདཡོ ཝིཡ, ཏཐཾ ཀུསལཱཀུསལཾ ནེཏི, ན གྷཊཱདཡོ ཝིཡ སམྨུཏིསཙྩམཏྟཾ, ཨཝིཏཐཾ ཀུསལཱཀུསལཾ ནེཏི, ན ཝིཏཐཾ. ཀུསལཱཀུསལཱནཾ སབྷཱཝཏོ ཝིཛྫམཱནཏྟཱ བྷཱུཏཱ པརམཏྠསཙྩཏྟཱ ཏཐཱ, ཨཀུསལསྶ ཨིཊྛཝིཔཱཀཏཱབྷཱཝཏོ, ཀུསལསྶ ཙ ཨནིཊྛཝིཔཱཀཏཱབྷཱཝཏོ ཝིཔཱཀེ སཏི ཨཝིསཾཝཱདཀཏྟཱ ཨཝིཏཐཱ བྷཝནྟི, ཀུསལཱཀུསལཱ ཧི ཨེཏེསཾ ཏིཎྞཾ ‘‘བྷཱུཏཾ, ཏཐཾ, ཨཝིཏཐ’’ནྟི པདཱནཾ ཀུསལཱཀུསལཝིསེསནཏཱ དཊྛབྦཱ.

ཨཐ ཝཱ ཨཀུསལམཱུལེཧི ཨཀུསལཱནི, ཀུསལམཱུལེཧི ཙ ཀུསལཱནི ནཡནྟོ ཨཡཾ ནཡོ བྷཱུཏཾ ཏཐཾ ཨཝིཏཐཾ ནེཏི ཙཏྟཱརི སཙྩཱནི ནིདྡྷཱརེཏྭཱ ¶ ཡོཛེཏི. དུཀྑཱདཱིནི ཧི བཱདྷཀཱདིབྷཱཝཏོ ཨཉྙཐཱབྷཱཝཱབྷཱཝེན བྷཱུཏཱནི, སཙྩསབྷཱཝཏྟཱ ཏཐཱནི, ཨཝིསཾཝཱདནཏོ ཨཝིཏཐཱནི. ཝུཏྟཉྷེཏཾ བྷགཝཏཱ – ‘‘ཙཏྟཱརིམཱནི, བྷིཀྑཝེ, ཏཐཱནི ཨཝིཏཐཱནི ཨནཉྙཐཱནཱི’’ཏི སཾ. ནི. ༥.༡༠༩༠; པཊི. མ. ༢.༨). ཨཀུསལཱདིསུཏྟཏྠསྶ ཙཏུསཙྩཡོཛནམུཁེན ནཡནལཀྑཎཾ ཏཾ སཾཝཎྞནཱཝིསེསཾ ཏིཔུཀྑལཾ ནཡནྟི ཨཱཧཱུཏི ཨཏྠཡོཛནཱ.

ཏཏྠ ཏཱིཧི ཧེཏཱུཧི པུཀྑལོ སོབྷནོཏི ཏིཔུཀྑལོ ཨཀུསལཱདིཀོ ཨཏྠནཡོ སཾཝཎྞནཱཝིསེསོཏི ཋཱནཱུཔཙཱརཏོ ཏིཔུཀྑལནཡོ ནཱམཱཏི. ཝིཏྠཱརོ པན ཧཱརསམྤཱཏེ (ནེཏྟི. ༨༧-༨༨) ཨཱགམིསྶཏི.

ཏིཔུཀྑལནཡནིདྡེསོ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ སཱིཧཝིཀྐཱིལི༹ཏནཡནིདྡེསོ’’ཏི པུཙྪིཏབྦཏྟཱ –

༡༩.

‘‘ཡོ ནེཏི ཝིཔལླཱསེཧི, ཀིལེསེ ཨིནྡྲིཡེཧི སདྡྷམྨེ.

ཨེཏཾ ནཡཾ ནཡཝིདཱུ, སཱིཧཝིཀྐཱིལི༹ཏཾ ཨཱཧཱུ’’ཏི. –

གཱཐཱ ཝུཏྟཱ. ཏཏྠ ཡོ སཾཝཎྞནཱཝིསེསོ སུཏྟེ ཝུཏྟེཧི ཝིཔལླཱསེཧི ཀིལེསེ སཾཀིལེསཔཀྑཾ ནེཏི, སུཏྟེ ཝུཏྟེཧི ཨིནྡྲིཡེཧི སདྡྷམྨེ ཝོདཱནཔཀྑཾ ནེཏི, ཨེཏཾ སཾཝཎྞནཱཝིསེསཾ ནཡཝིདཱུ སདྡྷམྨནཡཀོཝིདཱ, ཨཏྠནཡཀུསལཱ ཨེཝ ཝཱ སཱིཧཝིཀྐཱིལི༹ཏཾ ནཡནྟི ཨཱཧཱུཏི ཨཏྠཡོཛནཱ.

ཏཏྠ ཝིཔལླཱསེཧཱིཏི ཨསུབྷེ སུབྷཾ, དུཀྑེ སུཁཾ, ཨནིཙྩེ ནིཙྩཾ, ཨནཏྟནི ཨཏྟཱཏི ཙཏཱུཧི ¶ ཝིཔལླཱསེཧི. ཨིནྡྲིཡེཧཱིཏི སདྡྷཱདཱིཧི ཨིནྡྲིཡེཧི. སདྡྷམྨེཏི པཊིཔཏྟིཔཊིཝེདྷསདྡྷམྨེ. སེསམེཏྠ ཝུཏྟནཡམེཝ. ཝིཏྠཱརོ པན ཧཱརསམྤཱཏེ (ནེཏྟི. ༨༦-༨༧) ཨཱགམིསྶཏཱིཏི.

སཱིཧཝིཀྐཱིལི༹ཏནཡནིདྡེསོ ནིདྡིཊྛོ, ཨམྷེཧི ཙ ཉཱཏོ, ‘‘ཀཏམོ དིསཱལོཙནནཡནིདྡེསོ’’ཏི པུཙྪིཏབྦཏྟཱ –

༢༠.

‘‘ཝེཡྻཱཀརཎེསུ ¶ ཧི ཡེ, ཀུསལཱཀུསལཱ ཏཧིཾ ཏཧིཾ ཝུཏྟཱ.

མནསཱ ཝོལོཀཡཏེ, ཏཾ ཁུ དིསཱལོཙནཾ ཨཱཧཱུ’’ཏི. –

གཱཐཱ ཝུཏྟཱ. ‘‘སཱིཧལོཙནཾ ཨཱཧཱུ’’ཏི པཱཋོ ལིཁིཏོ, སོ པན ན ཐེརསྶ པཱཋོཏི དཊྛབྦོ བྷིནྣལཀྑཎཏྟཱ. ཏཏྠ ཏཧིཾ ཏཧིཾ ཝེཡྻཱཀརཎེསུ ཡེ ཀུསལཱཀུསལཱ ནཡསྶ དིསཱབྷཱུཏཱ དྷམྨཱ ཝུཏྟཱ, ཏེ ཀུསལཱཀུསལེ ནཡསྶ དིསཱབྷཱུཏདྷམྨེ ཨབཧི ཨབྦྷནྟརཾ ཙིཏྟེ ཨེཝ ཡཾ ཨོལོཀནཾ ཀརོཏི, ཏཾ ཨོལོཀནཾ ཁུ ཨོལོཀནཾ ཨེཝ དིསཱལོཙནནྟི ཨཱཧཱུཏི ཨཏྠཡོཛནཱ.

ཏཏྠ ཝེཡྻཱཀརཎེསཱུཏི ཏསྶ ཏསྶ ཨཏྠནཡསྶ ཡོཛནཏྠཾ ཀཏེསུ སུཏྟསྶ ཨཏྠཝིསྶཛྫནེསུ. ཀུསལཱཏི ཝོདཱནིཡཱ. ཨཀུསལཱཏི སཾཀིལེསིཀཱ. ཝུཏྟཱཏི སུཏྟཏོ ནིདྡྷཱརེཏྭཱ ཀཐིཏཱ. ཨོལོཀཡཏེཏི ཏེ ཀུསལཱདིདྷམྨེ ཙིཏྟེནེཝ ‘‘ཨཡཾ པཋམཱ དིསཱ, ཨཡཾ དུཏིཡཱ དིསཱ’’ཏིཨཱདིནཱ ཏསྶ ཏསྶ ནཡསྶ དིསཱབྷཱཝེན ཨུཔཔརིཀྑཏི, ཝིཙཱརེཏཱིཏི ཨཏྠོ. ཁཱུཏི ཨཝདྷཱརཎཏྠེ ནིཔཱཏོ, ཏེན དིསཱལོཙནནཡོ ཀོཙི ཨཏྠཝིསེསོ ན ཧོཏཱིཏི དསྶེཏཱིཏི.

༢༡. དིསཱལོཙནནཡནིདྡེསོ ནིདྡིཊྛོ. ཨམྷེཧི ཙ ཉཱཏོ. ‘‘ཀཏམོ ཨངྐུསནཡནིདྡེསོ’’ཏི པུཙྪིཏབྦཏྟཱ ‘‘ཨོལོཀེཏྭཱ’’ཏིཨཱདིགཱཐཱ ཝུཏྟཱ. ཏཏྠ ཏཾཏཾནཡདིསཱབྷཱུཏེ སབྦེ ཀུསལཱཀུསལེ དིསཱལོཙནེན ཨོལོཀེཏྭཱ ཨུཀྑིཔིཡ སུཏྟཏོ ཨུདྡྷརིཏྭཱ ཡཾ སམཱནེཏི ཡཾ སམཱནཡནཾ ཀརོཏི, ཨཡཾ སམཱནཡནསངྑཱཏོ ནཡོ ཨངྐུསོ ནཡོ ནཱམཱཏི ཨཏྠཡོཛནཱ.

ཨེཏྠ ཙ ཨངྐུསོ ནཱམ ཧཏྠཱིནཾ ཨིཙྪིཏཊྛཱནཾ ཨཱནཡནཀཱརཎབྷཱུཏོ ཝཛིརཱདིམཡོ ཏིཀྑགྒོ ཨུཛུཝངྐབྷཱུཏོ དབྦསམྦྷཱརཝིསེསོ, ཨཡམྤི ནཡོ ཨངྐུསོ ཝིཡཱཏི ཨཏྠེན ཨངྐུསོ. ཨེཏེན ཧི ནཡེན ཨིཙྪིཏཾ སུཏྟཏྠཾ ནཡཏཱིཏི. མུཁྱཏོ པན ཨངྐེ ཝིཛ྄ཛྷནཊྛཱནེ ཨུདྡྷཊོ ཨསཏི ཨནྟོ པཝིསཏཱིཏི ཨངྐུསོ. ཨངྐསདྡཱུཔཔདཨུཔུབྦཨསདྷཱཏུ ཨཔཙྩཡོཏི. ཨཡམྤི ནཡོ ཀོཙིཔི ཨཏྠཝིསེསོ ན ཧོཏཱིཏི.

སོལ༹ས ¶ ¶ ཧཱརནིདྡེསཱ ཙེཝ པཉྩ ནཡནིདྡེསཱ ཙ ཨཱཙརིཡེན ནིདྡིཊྛཱ. ཨམྷེཧི ཙ ཉཱཏཱ, ‘‘སཾཝཎྞེཏབྦསུཏྟེ ཀིཾ སོལ༹ས ཧཱརཱ པཋམཾ ཡོཛེཏབྦཱ, ཨུདཱཧུ ནཡཱ’’ཏི པུཙྪིཏབྦཏྟཱ –

༢༢.

‘‘སོལ༹ས ཧཱརཱ པཋམཾ, དིསཱལོཙནཏོ དིསཱ ཝིལོཀེཏྭཱ.

སངྑིཔིཡ ཨངྐུསེན ཧི, ནཡེཧི ཏིཧི ནིདྡིསེ སུཏྟ’’ནྟི. –

གཱཐམཱཧ. ཨཊྛཀཐཱཡཾ པན ‘‘ཨེཝཾ ཧཱརེ, ནཡེ ཙ ནིདྡིསིཏྭཱ ཨིདཱནི ནེསཾ ཡོཛནཀྐམཾ དསྶེནྟོ ‘སོལ༹ས ཧཱརཱ པཋམ’ནྟིཨཱདིམཱཧཱ’’ཏི (ནེཏྟི. ཨཊྛ. ༢༢) ཝུཏྟཾ. ཏཏྠ སོལ༹ས ཧཱརཱ བྱཉྫནཔརིཡེཊྛིབྷཱཝཏོ སཾཝཎྞེཏབྦསུཏྟེ སཾཝཎྞནཱབྷཱཝེན པཋམཾ ཡོཛེཏབྦཱ, ཡོཛེནྟེན ནིདྡིཊྛཱ ཧཱརཱནུཀྐམེནེཝ ཡོཛེཏབྦཱ, ན ཨུཔྤཊིཔཱཊིཡཱ. ཧཱརསཾཝཎྞནཱནུཀྐམེན སཾཝཎྞེཏབྦཾ པཋམཾ སཾཝཎྞེཏྭཱ པཙྪཱ དིསཱལོཙནེན ཨོལོཀེཏྭཱ ཨངྐུསནཡེན ནེཏྭཱ ཏཱིཧི ཨཏྠནཡེཧི ནིདྡིསེཏི ཨདྷིཔྤཱཡོ.

ཨིཏི སཏྟིབལཱནུརཱུཔཱ རཙིཏཱ

ནཡནིདྡེསཝིབྷཱཝནཱ ནིཊྛིཏཱ.

དྭཱདསཔདཝིབྷཱཝནཱ

ནེཏྟིཝིསཡཾ སཱསནཝརསངྑཱཏཾ སཾཝཎྞེཏབྦསུཏྟཾ ཡེསཾ བྱཉྫནཔདཱནཾ, ཨཏྠཔདཱནཉྩ ཝསེན ‘‘དྭཱདས པདཱནི སུཏྟ’’ནྟི སངྒཧཝཱརེ ཝུཏྟཾ, ‘‘ཀཏམཱནི ཏཱནཱི’’ཏི པུཙྪིཏབྦཏྟཱ སརཱུཔཏོ ནིདྡིསིཏུཾ –

༢༣.

‘‘ཨཀྑརཾ པདཾ བྱཉྫནཾ, ནིརུཏྟི ཏཐེཝ ནིདྡེསོ.

ཨཱཀཱརཚཊྛཝཙནཾ, ཨེཏྟཱཝ བྱཉྫནཾ སབྦཾ.

༢༤.

སངྐཱསནཱ པཀཱསནཱ, ཝིཝརཎཱ ཝིབྷཛནུཏྟཱནཱིཀམྨཔཉྙཏྟི.

ཨེཏེཧི ཚཧི པདེཧི, ཨཏྠོ ཀམྨཉྩ ནིདྡིཊྛ’’ནྟི. –

གཱཐཱདྭཡཾ ¶ ¶ ཝུཏྟཾ. ཨཊྛཀཐཱཡཾ པན ‘‘ཨིདཱནི ཡེསཾ བྱཉྫནཔདཱནཾ, ཨཏྠཔདཱནཉྩ ཝསེན ‘དྭཱདས པདཱནི ‘སུཏྟ’ནྟི ཝུཏྟཾ, ཏཱནི པདཱནི ནིདྡིསིཏུཾ ‘ཨཀྑརཔད’ནྟིཨཱདིམཱཧཱ’’ཏི (ནེཏྟི. ཨཊྛ. ༢༣) ཝུཏྟཾ.

ཏཏྠ ཀེནཊྛེན ཨཀྑརནྟི? ཨཀྑརཊྛེན ཨསཉྩརཎཊྛེན. ཨཀཱརཱདིཝཎྞོ ཧི ཨཀཱརཱདིཏོ ཨིཀཱརཱདིཔརིཡཱཡཾ ནཀྑརཏི, ན སཉྩརཏི, ན སངྐམཏི. ཏེནཱཧ ཨཊྛཀཐཱཡཾ ‘‘ཨཔརིཡོསིཏེ པདེ ཝཎྞོ ཨཀྑརཾ པརིཡཱཡཝསེན ཨཀྑརཎཏོ ཨསཉྩརཎཏོ’’ཏི (ནེཏྟི. ཨཊྛ. ༢༣). ཨཔརིཡོསིཏེ པདེཏི ཙ ཝིབྷཏྱནྟབྷཱཝཾ ཨཔྤཏྟེ དྭིཏིཙཏུཀྑརཝནྟེསུ པདེསུ ཨེཀདྭིཏིཀྑརམཏྟེཡེཝ ཨཀྑརཾ ནཱམ, པརིཡོསིཏེ པདཾཡེཝ, ན ཨཀྑརནྟི ཨདྷིཔྤཱཡོ. པདཾ པན པཝེསནཏོ ཨཏྠཝསེན པརིཡཱཡཾ སཉྩརནྟཾ ཝིཡ ཧོཏི, ན ཨེཝཾ ཨཀཱརཱདིཝཎྞོ ཨཝེཝཙནཏྟཱ. ‘‘མཱ ཨེཝཾ མཉྙསཱི’’ཏིཨཱདཱིསུ ཝཱ ཨེཀཀྑརཔདཱ མཱ-ཀཱརཱདི ཨཀྑརཾ ནཱམ, ཝིབྷཏྱནྟཾ པདཾ པན པདམེཝ ཧོཏི.

པཛྫཏི ཨཏྠོ ཨེཏེནཱཏི པདཾ. ཏཾ ནཱམཱཁྱཱཏོཔསགྒནིཔཱཏཔྤབྷེདེན ཙཏུབྦིདྷཾ. ཏཏྠ དབྦཔདྷཱནཾ ‘‘ཕསྶོ ཝེདནཱ ཙིཏྟ’’ནྟི ཨེཝམཱདིཀཾ ནཱམཔདཾ. ཏཏྠ ཧི དབྦམཱཝིབྷཱུཏརཱུཔཾ, ཀིརིཡཱ ཨནཱཝིབྷཱུཏརཱུཔཱ. ཀིརིཡཱཔདྷཱནཾ ‘‘ཕུསཏི ཝེདཡཏི ཝིཛཱནཱཏཱི’’ཏི ཨེཝམཱདིཀཾ ཨཱཁྱཱཏཔདཾ ནཱམ. ཏཏྠ ཧི ཕུསནཱདིཀིརིཡཱ ཨཱཝིབྷཱུཏརཱུཔཱ, དབྦམནཱཝིབྷཱུཏརཱུཔཾ. ཀིརིཡཱཝིསེསབོདྷཧེཏུབྷཱུཏཾ པ-ཨུཔ-ཨིཏིཨེཝམཱདིཀཾ ཨུཔསགྒཔདཾ ནཱམ. ‘‘ཙིརཔྤཝཱསིཾ (དྷ. པ. ༢༡༩) ཨུཔཝུཏྠ’’ནྟི (ཨ. ནི. ༣.༧༡; སུ. ནི. ༤༠༥) ཨེཝམཱདཱིསུ ཧི པ-ཨུཔཱདིསདྡཱ ཝསནཱདིཀིརིཡཱཡ ཝིཡོགཱདིཝིསིཊྛཏཾ དཱིཔེནྟི. ཝཙནཏྠོ པན ནཱམཔདཨཱཁྱཱཏཔདདྭཡཾ ཨུཔགནྟྭཱ ཏསྶ པདདྭཡསྶ ཨཏྠཾ སཛྫནྟཱིཏི ཨུཔསགྒཱཏི དཊྛབྦོ. ཀིརིཡཱཡ ཙེཝ དབྦསྶ ཙ སརཱུཔཝིསེསཔཀཱསནཧེཏུབྷཱུཏཾ ‘‘ཨེཝཾ, ཨིཏཱི’’ཏི ཨེཝམཱདིཀཾ ནིཔཱཏཔདཾ ཨསྶཔི སཾཝཎྞནཱཡཔི ཨིཙྪིཏཏྟཱ, ཨཀྑརེན པན ཀཐཾ གཧིཏོཏི ཙེ? ཨཀྑརེཧི སུཡྻམཱནེཧི སུཎནྟཱནཾ ཝིསེསཝིདྷཱནསྶ ཀཏཏྟཱ པདཔརིཡོསཱནེ པདཏྠསམྤཊིཔཏྟི ཧོཏི. ཏསྨཱ ཨཀྑརེནཔི ཨཏྠཱཀཱརོ གཧིཏོཝཱཏི ཝེདིཏབྦོ. ཏེན ཝུཏྟཾ – ‘‘ཨཀྑརེཧི སངྐཱསེཏི, པདེཧི པཀཱསེཏི, ཨཀྑརེཧི ཙ པདེཧི ཙ ཨུགྒྷཊེཏཱི’’ཏི (ནེཏྟི. ༩) ཙ.

ཝིཝརཎཱ ¶ ཝིཏྠཱརཎཱ. ཝིབྷཛནཱ ཙ ཨུཏྟཱནཱིཀམྨཉྩ པཉྙཏྟི ཙ ཝིབྷཛནུཏྟཱནཱིཀམྨཔཉྙཏྟཱིཏི སམཱཧཱརེ ཨཡཾ དྭནྡསམཱསོ. ཏཏྠ ཝིབྷཱགཀརཎཾ ཝིབྷཛནཾ ནཱམ. བྱཉྫནཱཀཱརེཧི ཡོ ཨཏྠཱཀཱརོ ནིདྡིསིཡམཱནོ, སོ ཨཏྠཱཀཱརོ ཝིཝརཎཝིབྷཛནཱཏི དྭཱིཧི ཨཏྠཔདེཧི ¶ ནིདྡིསིཏོ. པཱཀཊཀརཎཾ ཨུཏྟཱནཱིཀམྨཾ ནཱམ. པཀཱརེཧི ཉཱཔནཾ པཉྙཏྟི. ནིརུཏྟིནིདྡེསསངྑཱཏེཧི བྱཉྫནཔདེཧི པཀཱསིཡམཱནོ ཡོ ཨཏྠཱཀཱརོ ཨཏྠི, སོ ཨཏྠཱཀཱརོ ཨུཏྟཱནཱིཀམྨཔཉྙཏྟཱིཧི པཊིནིདྡིསིཏོ. ཨེཏེཧི སངྐཱསནཱདཱིཧི ཚཧི ཨཏྠཔདེཧི ཨཏྠོ སུཏྟཏྠོ གཧིཏོ, ཀམྨཉྩ ཨུགྒྷཊནཱདིཀམྨཉྩ ནིདྡིཊྛནྟི ཨཏྠོ. ཡེན སུཏྟཏྠེན ཨུགྒྷཊིཏཉྙུནོ ཙིཏྟསནྟཱནསྶ སམྦོདྷནཀིརིཡཱསངྑཱཏསྶ ཨུགྒྷཊནཀམྨསྶ ནིབྦཏྟི བྷཝེ, སོ སུཏྟཏྠོ སངྐཱསནཱཔཀཱསནཱཀཱརོ ཧོཏི. ཡེན སུཏྟཏྠེན ཝིཔཉྩིཏཉྙུནོ ཙིཏྟསནྟཱནསྶ བོདྷནཀིརིཡཱསངྑཱཏསྶ ཝིཔཉྩནཀམྨསྶ ནིབྦཏྟི, སོ སུཏྟཏྠོ ཝིཝརཎཱཝིབྷཛནཱཀཱརོ ཧོཏི. ཡེན སུཏྟཏྠེན ནེཡྻསྶ ཙིཏྟསནྟཱནསྶ པབོདྷནཀིརིཡཱསངྑཱཏསྶ ནཡཀམྨསྶ ནིབྦཏྟི, སོ སུཏྟཏྠོ ཨུཏྟཱནཱིཀམྨཔཉྙཏྟཱཀཱརོ ཧོཏཱིཏི དཊྛབྦོ. ཏེནཱཧ ཨཊྛཀཐཱཙརིཡོ ‘‘སུཏྟཏྠེན ཧི དེསནཱཡ པཝཏྟིཡམཱནེན ཨུགྒྷཊིཏཉྙུཨཱདིཝེནེཡྻཱནཾ ཙིཏྟསནྟཱནསྶ པབོདྷནཀིརིཡཱནིབྦཏྟི, སོ ཙ སུཏྟཏྠོ སངྐཱསནཱདིཨཱཀཱརོ’’ཏི (ནེཏྟི. ཨཊྛ. ༢༤).

‘‘ཡཐཱཝུཏྟེཧི ཏཱིཧི ཨཏྠནཡེཧི ཙེཝ ཚཧི ཨཏྠཔདེཧི ཙ ཨཡུཏྟོཔི ཨཏྠོ ཀིཾ ཀོཙི ཨཏྠི, ཨུདཱཧུ སབྦོ ཨཏྠོ ཡུཏྟོ ཨེཝཱ’’ཏི པུཙྪིཏབྦཏྟཱ –

༢༥.

‘‘ཏཱིཎི ཙ ནཡཱ ཨནཱུནཱ, ཨཏྠསྶ ཙ ཚཔྤདཱནི གཎིཏཱནི.

ནཝཧི པདེཧི བྷགཝཏོ, ཝཙནསྶཏྠོ སམཱཡུཏྟོ’’ཏི. –

གཱཐམཱཧ. ཏཏྠ ཏཱིཎཱིཏི ལིངྒཝིཔལླཱསནིདྡེསོ, ཏཡོཏི པན པཀཏིལིངྒནིདྡེསོ ཝཏྟབྦོ. གཎིཏཱ ཨནཱུནཱ ཏཡོ ཨཏྠསྶ ནཡཱ ཙ གཎིཏཱནི ཨནཱུནཱནི ཚ ཨཏྠསྶ པདཱནི ཙ ནིདྡིཊྛཱནི, ནིདྡིཊྛེཧི ཙ ཨཏྠཔདེཧི བྷགཝཏོ ཝཙནསྶ སབྦོ ཨཏྠོ སམཱཡུཏྟོཝ ཨཡུཏྟོ ཀོཙི ཨཏྠོ ནཏྠཱིཏི ཡོཛནཱ ཀཱཏབྦཱ. ཨཏྠསྶཱཏི སུཏྟཏྠསྶ. ནཡཱཏི ནེཏྟིཨཏྠནཡཱ. པདཱནཱིཏི ནེཏྟིཨཏྠཔདཱནི.

༢༦. ཡེ ¶ ཧཱརཱདཡོ ནིདྡིཊྛཱ, ཏེ ཧཱརཱདཡོ སམྤིཎྜེཏྭཱ ནེཏྟིཔྤཀརཎསྶ པདཏྠེ སུཁགྒཧཎཏྠཾ གཎནཝསེན པརིཙྪིནྡིཏྭཱ དསྶེནྟོ ‘‘ཨཏྠསྶཱ’’ཏིཨཱདིམཱཧ. ཏཏྠ ཨཏྠསྶ སམཱུཧསྶ ཨཝཡཝབྷཱུཏཱནི ནཝབྷེདཱནི ཨཏྠཔདཱནི སུཏྟབྱཉྫནསྶ ཨཏྠསྶ པརིཡེཊྛིསངྑཱཏཱཡ སཾཝཎྞནཱཡ གཎནཏོ ཙཏུཝཱིསཏི བྱཉྫནཔདཱནི ཧོནྟི, ཨཏྠཔདབྱཉྫནཔདབྷཱུཏཾ ཨུབྷཡཾ སངྑེཔཡཏོ སམྤིཎྜཡཏོ ཏེཏྟིཾསཱ ཏེཏྟིཾསཝིདྷཱ ཨེཏྟིཀཱ ཏེཏྟིཾསཝིདྷཱཝ ནེཏྟཱིཏི ཡོཛནཱ.

ཏཏྠ ¶ ནཝཔྤདཱནཱིཏི ཏཡོ ཨཏྠནཡཱ, ཚ ཨཏྠཔདཱནི ཙ. ཙཏུབྦཱིསཱཏི སོལ༹ས ཧཱརཱ, ཚ བྱཉྫནཔདཱནི, དྭེ དིསཱལོཙནནཡཨངྐུསནཡཱ ཙཱཏི ཨེཝཾ ཏེཏྟིཾསཝིདྷཱ ཙ ནེཏྟི ནཱམ, ཨིཏོ ཝིནིམུཏྟོ ཨཉྙོ ཀོཙི ནེཏྟིཔདཏྠོ ནཏྠཱིཏི ཨཏྠོ དཊྛབྦོ.

‘‘ཨེཝཾ ཏེཏྟིཾསཔདཏྠཱཡ ནེཏྟིཡཱ ཧཱརནཡཱནཾ ཀཏམོ དེསནཱཧཱརཝིཙཡཧཱརོ’’ཏིཨཱདི དེསནཱཀྐམེནེཝ སིདྡྷོ, ཨེཝཾ སིདྡྷེ སཏིཔི ‘‘སོལ༹ས ཧཱརཱ པཋམ’’ནྟི ཨཱརམྦྷོ ‘‘སབྦེཔིམེ ཧཱརཱ ཙེཝ ནཡཱ ཙ ཨིམིནཱ དསྶིཏཀྐམེནེཝ སཾཝཎྞེཏབྦེསུ སུཏྟེསུ སཾཝཎྞནཱཝསེན ཡོཛེཏབྦཱ, ན ཨུཔྤཊིཔཱཊིཡཱ’’ཏི ཨིམམཏྠཾ དཱིཔེཏི. དཱིཔནཝཙནསཝནཱནུསཱརེན ཉཱཔེཏི, ཏསྨཱ ཨེཝཾ ཀམོ དསྶིཏོ, ཨསྶཱདཱདཱིནཝནིསྶརཎཱནི དྷམྨདེསནཱཡ ནིསྶཡཱནི, ཕལཉྩ དྷམྨདེསནཱཡ ཕལཾ, ཨུཔཱཡོ ཙ དྷམྨདེསནཱཡ ཨུཔཱཡོ, ཨཱཎཏྟི ཙ དྷམྨདེསནཱཡ སརཱིརཾ. དེསནཱཧཱརསྶ ཏཱསཾ ཨསྶཱདཱདཱིནཝནིསྶརཎཕལུཔཱཡཱཎཏྟཱིནཾ ཝིབྷཱཝནསབྷཱཝཏྟཱ.

ནིདྡྷཱརཎེན ཝིནཱཔི པཀཏིཡཱ སབྦསཾཝཎྞེཏབྦསུཏྟེསུ ཨནརཱུཔཱཏི སུཝིཉྙེཡྻཏྟཱ, སཾཝཎྞནཱཝིསེསཱནཾ ཝིཙཡཧཱརཱདཱིནཾ ནིསྶཡབྷཱཝཏོ ཙ པཋམཾ དེསནཱཧཱརོ དསྶིཏོ.

པདཔུཙྪཱཝིསྶཛྫནཱཔུཙྪཱཔདཱནུགཱིཏཱིཧི སདྡྷིཾ དེསནཱཧཱརཔདཏྠཱནཾ ཨསྶཱདཱདཱིནཾ པཝིཙཡབྷཱཝཏོ དེསནཱཧཱརཱནནྟརཾ ཝིཙཡོ ཧཱརོ.

ཝིཙཡཧཱརེན པཝིཙིཏཱནཾ ཨཏྠཱནཾ ཡུཏྟཱཡུཏྟིཝིཙཱརཎབྷཱཝཏོ ཝིཙཡཧཱརཱནནྟརཾ ཡུཏྟི ཧཱརོ.

པདཊྛཱནཧཱརསྶ ཡུཏྟཱཡུཏྟཱནཾཡེཝ ཨཏྠཱནཾ ཨུཔཔཏྟིཨནུརཱུཔཾ ཀཱརཎཔརམྤརཱཡ ནིདྡྷཱརཎཏྟཱ ཡུཏྟིཧཱརཱནནྟརཾ པདཊྛཱནཧཱརོ.

ཡུཏྟཱཡུཏྟཱནཾ ¶ ཀཱརཎཔརམྤརཱཡ པརིགྒཧིཏསབྷཱཝཱནཾཡེཝ ཙ དྷམྨཱནཾ ཨཝུཏྟཱནམྤི སམཱནལཀྑཎཏཱཡ གཧཎལཀྑཎཏྟཱཡ པདཊྛཱནཧཱརཱནནྟརཾ ལཀྑཎཧཱརོ.

ལཀྑཎཧཱརེན ཨཏྠཏོ སུཏྟནྟརཏོ ནིདྡྷཱརིཏཱནམྤི དྷམྨཱནཾ ནིབྦཙནཱདཱིནི ཝཏྟབྦཱནི, ན སུཏྟེ སརཱུཔཏོ ཨཱགཏདྷམྨཱནཾཡེཝཱཏི དསྶནཏྠཾ ལཀྑཎཧཱརཱནནྟརཾ ཙཏུབྱཱུཧོ ཧཱརོ. ཨེཝཉྷི ནིརཝསེསཏོ ཨཏྠཱཝབོདྷོ ཧོཏི.

ཙཏུབྱཱུཧེན ¶ ཧཱརེན ཝུཏྟེཧི ནིབྦཙནཱདྷིཔྤཱཡནིདཱནེཧི སདྡྷིཾ སུཏྟེ པདཏྠཱནཾ སུཏྟནྟརསཾསནྡནསངྑཱཏེ པུབྦཱཔརཝིཙཱརེ དསྶིཏེ ཏེསཾ སུཏྟཔདཏྠཱནཾ སབྷཱགཝིསབྷཱགདྷམྨནྟརཱཝཊྚནཾ སུཁེན སཀྐཱ དསྶེཏུནྟི ཙཏུབྱཱུཧཧཱརཱནནྟརཾ ཨཱཝཊྚོ ཧཱརོ. སུཏྟནྟརསཾསནྡནསྶ ཧི སབྷཱགཝིསབྷཱགདྷམྨནྟརཱཝཊྚནཡསྶ ཨུཔཱཡབྷཱཝཏོ ‘‘ཨཱརམྦྷཐ ནིཀྐམཐཱ’’ཏིཨཱདིགཱཐཱཡ (སཾ. ནི. ༡.༡༨༥; ནེཏྟི. ༢༩; པེཊཀོ. ༣༨) ཨཱརམྦྷནནིཀྐམནབུདྡྷསཱསནཡོགདྷུནནེཧི ཝཱིརིཡསམཱདྷིཔཉྙིནྡྲིཡཱནི ནིདྡྷཱརེཏྭཱ ཏེསུ ཨཱརམྦྷནནིཀྐམནབུདྡྷསཱསནཡོགདྷུནནེསུ ཨནནུཡོགསྶ མཱུལཾ པམཱདོཏི སུཏྟནྟརེ དསྶིཏོ པམཱདོ ཨཱཝཊྚིཏོཏི.

ཨཱཝཊྚེན ཧཱརེན སབྷཱགཝིསབྷཱགདྷམྨཱཝཊྚནེན པཡོཛིཏེ སཱདྷཱརཎཱསཱདྷཱརཎཝསེན སཾཀིལེསཝོདཱནདྷམྨཱནཾ པདཊྛཱནཏོ ཙེཝ བྷཱུམིཏོ ཙ ཝིབྷཱགོ སཀྐཱ སུཁེན ཡོཛེཏུནྟི ཨཱཝཊྚཧཱརཱནནྟརཾ ཝིབྷཏྟི ཧཱརོ.

ཝིབྷཏྟིཧཱརེན སཾཀིལེསཝོདཱནདྷམྨཱནཾ ཝིབྷཱགེ ཀཏེ སཾཝཎྞེཏབྦསུཏྟེ ཨཱགཏཱ དྷམྨཱ ཨཀསིརེན པཊིཔཀྑཏོ པརིཝཏྟེཏུཾ སཀྐཱཏི ཝིབྷཏྟིཧཱརཱནནྟརཾ པརིཝཏྟནཧཱརོ. ཝིབྷཏྟིཧཱརེན ཧི ‘‘སམྨཱདིཊྛིསྶ པུརིསཔུགྒལསྶ མིཙྪཱདིཊྛི ནིཛྫིཎྞཱ ཧོཏཱི’’ཏི (ནེཏྟི. ༣༥) པཊིཝིབྷཏྟསབྷཱཝེ ཨེཝ དྷམྨེ པརིཝཏྟནཧཱརཝིབྷངྒེ ཨུདཱཧརཱིཡིསྶཏི.

པརིཝཏྟནཧཱརེན པཊིཔཀྑཏོ པརིཝཏྟིཏཱཔི དྷམྨཱ པརིཡཱཡཝཙནེཧི བོདྷེཏབྦཱ, ན སཾཝཎྞེཏབྦསུཏྟེ ཨཱགཏདྷམྨཱཡེཝཱཏི དསྶནཏྠཾ པརིཝཏྟནཧཱརཱནནྟརཾ ཝེཝཙནཧཱརོ.

ཝེཝཙནཧཱརེན ¶ པརིཡཱཡཏོ པཀཱསིཏཱནཾ དྷམྨཱནཾ པབྷེདཏོ པཉྙཏྟིཝསེན ཝིབྷཛནཾ སུཁེན སཀྐཱ ཉཱཏུནྟི ཝེཝཙནཧཱརཱནནྟརཾ པཉྙཏྟི ཧཱརོ.

པཉྙཏྟིཧཱརེན པབྷཝཔརིཉྙཱདིཔཉྙཏྟིཝིབྷཱགམུཁེན པཊིཙྩསམུཔྤཱདསཙྩཱདིདྷམྨཝིབྷཱགེ ཀཏེ སུཏྟེ ཨཱགཏདྷམྨཱནཾ པཊིཙྩསམུཔྤཱདཱདིམུཁེན ཨཝཏརཎཾ སཀྐཱ དསྶེཏུནྟི པཉྙཏྟིཧཱརཱནནྟརཾ ཨོཏརཎོ ཧཱརོ.

ཨོཏརཎེན ཧཱརེན དྷཱཏཱཡཏནཱདཱིསུ ཨོཏཱརིཏཱནཾ སཾཝཎྞེཏབྦསུཏྟེ པདཏྠཱནཾ པུཙྪཱརམྦྷསོདྷནཾ སཀྐཱ སུཁེན སམྤཱདེཏུནྟི ཨོཏརཎཧཱརཱནནྟརཾ སོདྷནོ ཧཱརོ.

སོདྷནེན ¶ ཧཱརེན སཾཝཎྞེཏབྦསུཏྟེ པདཔདཏྠེསུ ཝིསོདྷིཏེསུ ཏཏྠ ཏཏྠ ཨེཀཏྟཏཱཡ ཝཱ ཝེམཏྟཏཱཡ ཝཱ ལབྦྷམཱནསཱམཉྙཝིསེསབྷཱཝོ སུཀརོ ཧོཏཱིཏི དསྶེཏུཾ སོདྷནཧཱརཱནནྟརཾ ཨདྷིཊྛཱནོ ཧཱརོ.

སཱམཉྙཝིསེསབྷཱུཏེསུ སཱདྷཱརཎཱསཱདྷཱརཎེསུ དྷམྨེསུ ཨདྷིཊྛཱནེན ཧཱརེན པཝེདིཏེསུ པརིཀྑཱརསངྑཱཏསྶ སཱདྷཱརཎཱསཱདྷཱརཎརཱུཔསྶ པཙྩཡཧེཏུརཱསིསྶ པབྷེདོ སུཝིཉྙེཡྻོཏི ཨདྷིཊྛཱནཧཱརཱནནྟརཾ པརིཀྑཱརོ ཧཱརོ.

ཨསཱདྷཱརཎེ, སཱདྷཱརཎེ ཙ ཀཱརཎེ པརིཀྑཱརེན ཧཱརེན དསྶིཏེ ཏསྶ ཨཏྟནོ ཕལེསུ ཀཱརཎཱཀཱརོ, ཏེསཾ ཧེཏུཕལཱནཾ པབྷེདཏོ དེསནཱཀཱརོ, བྷཱཝེཏབྦཔཧཱཏབྦདྷམྨཱནཾ བྷཱཝནཱཔཧཱནཱནི ཙ ནིདྡྷཱརེཏྭཱ ཝུཙྩམཱནཱནི སམྨཱ སཾཝཎྞེཏབྦསུཏྟསྶ ཨཏྠཾ ཏཐཏྟཱཝབོདྷཱཡ སཾཝཏྟནྟཱིཏི པརིཀྑཱརཧཱརཱནནྟརཾ སམཱརོཔནོ ཧཱརོ དསྶིཏོ ཧོཏི. ཨིདཾ ཧཱརཱནཾ དསྶནཱནུཀྐམཀཱརཎཾ དཊྛབྦཾ.

ཨུདྡེསོ ཨུགྒྷཊིཏཉྙུནོ ཨུཔཀཱརཱཡ སཾཝཏྟཏི ཡཐཱ, ཨེཝཾ ནནྡིཡཱཝཊྚནཡོ ཨུགྒྷཊིཏཉྙུནོ ཨུཔཀཱརཱཡ སཾཝཏྟཏི, ཏསྨཱ པཋམཾ ནནྡིཡཱཝཊྚནཡོ དསྶིཏོ. ནིདྡེསོ ཝིཔཉྩིཏཉྙུནོ ཨུཔཀཱརཱཡ སཾཝཏྟཏི ཡཐཱ, ཨེཝཾ ཏིཔུཀྑལནཡོ ཝིཔཉྩིཏཉྙུནོ ཨུཔཀཱརཱཡ སཾཝཏྟཏི, ཏསྨཱ ནནྡིཡཱཝཊྚནཡཱནནྟརཾ ཏིཔུཀྑལནཡོ. པཊིནིདྡེསོ ནེཡྻསྶ ཨུཔཀཱརཱཡ སཾཝཏྟཏི ཡཐཱ, ཨེཝཾ སཱིཧཝིཀྐཱིལི༹ཏནཡོ ནེཡྻསྶ ཨུཔཀཱརཱཡ སཾཝཏྟཏི ¶ . ཏསྨཱ ཏིཔུཀྑལཱནནྟརཾ སཱིཧཝིཀྐཱིལི༹ཏནཡོ དསྶིཏོཏི ཏིཎྞཾ ཨཏྠནཡཱནཾ དསྶནཱནུཀྐམོ ཝེདིཏབྦོ. ཨཏྠནཡཱནཾ དིསཱབྷཱུཏཱཡ བྷཱུམིཡཱ ཨཱལོཀེཏྭཱ ཏེསཾ ཏསྶཱ དིསཱཡ བྷཱུམིཡཱ སམཱནཡནཾ ཧོཏི. ན ཧི སཀྐཱ ཨནོལོཀེཏྭཱ སམཱནེཏུནྟི དིསཱལོཙནནཡཾ དསྶེཏྭཱ ཨངྐུསནཡོ དསྶིཏོ. པོཏྠཀཱརུལ༹ྷཱཝཚེཀཱ སབྦཱསུ དིསཱསུ ཧཏྠིགམནཊྛཱནཾ ཨོལོཀེཏྭཱ ཨངྐུསེན ཨིཙྪིཏཊྛཱནཾ སམཱནཡནྟི. ཀེཙི ཨཙྪེཀཱ ཨནོལོཀེཏྭཱ ཝིནཡནྟི. ཏེསཾ ནཡནམཏྟམེཝ, ན སམཱནཡནཾ. ཨེཝམེཝ པཎྜིཏཱ སུཏྟཏྠཾ ཝཎྞེནྟཱ མནསཱཝ ཨོལོཀེཏྭཱཝ ནཡཱ ནེཏབྦཱཏི དཊྛབྦཱ.

སམུཊྛཱནསཾཝཎྞནཱ ཨདྷིཔྤཱཡསཾཝཎྞནཱ པདཏྠསཾཝཎྞནཱ ཝིདྷིཨནུཝཱདསཾཝཎྞནཱ ནིགམནསཾཝཎྞནཱཏི ཝཱ, པཡོཛནསཾཝཎྞནཱ པིཎྜཏྠསཾཝཎྞནཱ ཨནུསནྡྷིསཾཝཎྞནཱ ཙོདནཱསཾཝཎྞནཱ པརིཧཱརསཾཝཎྞནཱཏི ཝཱ, ཨུཔོགྒྷཱཊསཾཝཎྞནཱ པདཝིགྒཧསཾཝཎྞནཱ པདཏྠཙཱལནསཾཝཎྞནཱ ¶ པཙྩུཔཊྛཱནསཾཝཎྞནཱཏི ཝཱ, ཏཐཱ ཨེཀནཱལི༹ཀཱཀཐཱ ཙཏུརསྶཀཐཱ ནིསིནྣཝཏྟིཀཱཀཐཱཏི ཝཱ ཨཱགཏཱ.

ཏཏྠ སམུཊྛཱནཾ ནིདཱནམེཝ. ཝིདྷིཨནུཝཱདོ ཝིསེསཝཙནམེཝ. ཨུཔོགྒྷཱཊོ ནིདཱནམེཝ. ཙཱལནཱ ཙོདནཱཡེཝ. པཙྩུཔཊྛཱནཾ པརིཧཱརོཝ.

པཱལི༹ཾ ཝཏྭཱ ཨེཀེཀཔདསྶ ཨཏྠཀཐནསངྑཱཏཱ སཾཝཎྞནཱ ཨེཀནཱལི༹ཀཱཀཐཱ ནཱམ.

པཊིཔཀྑཾ དསྶེཏྭཱ པཊིཔཀྑསྶ ཨུཔམཾ དསྶེཏྭཱ སཔཀྑཾ དསྶེཏྭཱ སཔཀྑསྶ ཨུཔམཾ དསྶེཏྭཱ ཀཐནསངྑཱཏཱ སཾཝཎྞནཱ ཙཏུརསྶཀཐཱ ནཱམ.

ཝིསབྷཱགདྷམྨཝསེནེཝ པརིཡོསཱནཾ གནྟྭཱ པུན སབྷཱགདྷམྨཝསེནེཝ པརིཡོསཱནགམནསངྑཱཏཱ སཾཝཎྞནཱ ནིསིནྣཝཏྟིཀཱཀཐཱ ནཱམ.

ཏཱ སབྦཱ སཾཝཎྞནཱཡོཔི དེསནཱཧཱརཱདཱིསུ ནེཏྟིསཾཝཎྞནཱསུ ཨནྟོགདྷཱཡེཝ. ཏེནཱཧ ‘‘ཡཏྟཀཱ ཧི སུཏྟསྶ སཾཝཎྞནཱཝིསེསཱ, སབྦེ ཏེ ནེཏྟིཨུཔདེསཱཡཏྟཱ’’ཏི. ཨེཝཾ ཨེཏྟཱཝཏཱ ཨེཏཔརམཏཱ དཊྛབྦཱ ¶ . ཧེཏུཕལབྷཱུམིཨུཔནིསཱསབྷཱགཝིསབྷཱགལཀྑཎནཡཱདཡོ པན ཨཊྛཀཐཱཡཾ (ནེཏྟི. ཨཊྛ. ༤ དྭཱདསཔད) ཝིཏྠཱརཏོ ཝུཏྟཱཏི ན ཝིཏྠཱརཡིསྶཱམཱིཏི.

ཨིཏི སཏྟིབལཱནུརཱུཔཱ རཙིཏཱ

ནིདྡེསཝཱརཨཏྠཝིབྷཱཝནཱ ནིཊྛིཏཱ.

༤. པཊིནིདྡེསཝཱརཨཏྠཝིབྷཱཝནཱ

༡. དེསནཱཧཱརཝིབྷངྒཝིབྷཱཝནཱ

༥. ཨེཝཾ ¶ ཧཱརཱདཡོ སརཱུཔཏོ ཨཱཙརིཡེན ཨུདྡེསཏོ ཨུདྡིཊྛཱ, ནིདྡེསཏོ ཙ ནིདྡིཊྛཱ, ཨམྷེཧི ཙ ཉཱཏཱ, ཨཐ ཀསྨཱ པུན ‘‘ཏཏྠ ཀཏམོ དེསནཱཧཱརོ’’ཏིཨཱདིཀོ ཨཱརདྡྷོཏི ཙེ? ཝེནེཡྻཱནཾ ཏིཝིདྷཏྟཱ. ཝེནེཡྻཱ ཧི ཨཏིཏིཀྑཔཉྙོ ནཱཏིཏིཀྑཔཉྙོ མནྡཔཉྙོཏི ཏིཝིདྷཱ ཧོནྟི. ཏེསཉྷི ཨཏིཏིཀྑཔཉྙསྶཱནུརཱུཔཾ ཧཱརཱདཡོ ཨུདྡེསཏོ ཨུདྡིཊྛཱ, ནཱཏིཏིཀྑཔཉྙསྶ ཨནུརཱུཔཾ ནིདྡེསཏོ ནིདྡིཊྛཱ, ཨིདཱནི མནྡཔཉྙསྶཱནུརཱུཔཾ ཧཱརཱདཡོ ཝིབྷཛིཏྭཱ དསྶེཏུཾ ‘‘ཏཏྠ ཀཏམོ དེསནཱཧཱརོ’’ཏིཨཱདིཀོ ཝིབྷངྒཝཱརོ ཨཱརདྡྷོ. ཨཊྛཀཐཱཡཾ པན ‘‘ཨེཝཾ ཧཱརཱདཡོསུཁགྒཧཎཏྠཾ གཱཐཱབནྡྷཝསེན སརཱུཔཏོ ནིདྡིསིཏྭཱ ཨིདཱནི ཏེསུ ཧཱརེ ཏཱཝ པཊིནིདྡེསཝསེན ཝིབྷཛིཏུཾ ‘ཏཏྠ ཀཏམོ དེསནཱཧཱརོ’ཏིཨཱདི ཨཱརདྡྷ’’ནྟི (ནེཏྟི. ཨཊྛ. ༥) ཝུཏྟཾ.

ཏཏྠ ཡེ ཧཱརཱདཡོ ཨུདྡེསནིདྡེསེསུ ནིདྡིཊྛཱ, ཏཏྠ ཧཱརཱདཱིསུ ཀཏམོ དེསནཱཧཱརོཏི ཙེ? ཡཱ ‘‘ཨསྶཱདཱདཱིནཝཏཱ’’ཏིཨཱདིགཱཐཱ (ནེཏྟི. ༤) ཝུཏྟཱ, སཱ ཨཡཾ གཱཐཱ ནིདྡེསཝསེན དེསནཱཧཱརོ ནཱམ, ཏསྶ ‘‘ཨསྶཱདཱདཱིནཝཏཱ’’ཏིཨཱདི (ནེཏྟི. ༤) ནིདྡེསསྶ ཨིདཱནི མཡཱ ཝུཙྩམཱནོ ‘‘ཨཡཾ དེསནཱཧཱརོ ཀིཾ དེསཡཏཱི’’ཏིཨཱདིཀོ ཝིཏྠཱརསཾཝཎྞནཱཝིསེསོ དེསནཱཧཱརཝིབྷངྒོ ནཱམཱཏི ཡོཛནཱ. ‘‘ཨཡཾ དེསནཱཧཱརོ ཀིཾ དེསཡཏཱི’’ཏི པུཙྪིཏབྦཏྟཱ པུཙྪཾ ཋཔེཏྭཱ ‘‘ཨིམཾ དེསཡཏཱི’’ཏི ནིཡམེཏྭཱ དསྶེཏུཾ ‘‘ཨཡཾ དེསནཱཧཱརོ ཀིཾ དེསཡཏི? ཨསྶཱདཾ ཨཱདཱིནཝ’’ནྟིཨཱདི ཝུཏྟཾ. ཏཏྠ ཨཡཾ དེསནཱཧཱརོ ཀིཾ དེསཡཏཱིཏི ཙེ ¶ ? ཨསྶཱདཾ དེསཡཏི སཾཝཎྞེཏི ཝིཏྠཱརེཏི, ཨཱདཱིནཝཾ དེསཡཏི…པེ… ཝིཏྠཱརེཏི, ནིསྶརཎཾ དེསཡཏི…པེ… ཝིཏྠཱརེཏི, ཕལཾ དེསཡཏི…པེ… ཝིཏྠཱརེཏི, ཨུཔཱཡཾ དེསཡཏི…པེ… ཝིཏྠཱརེཏི, ཨཱཎཏྟིཾ དེསཡཏི སཾཝཎྞེཏི ཝིཏྠཱརེཏཱིཏི ཡོཛནོ.

ཨེཏྠ ཙ ‘‘ཨཡཾ དེསནཱཧཱརོ’’ཏི སདྡོ པུབྦཱཔརཱཔེཀྑོཏི དཊྛབྦོ. ‘‘‘ཨསྶཱདཱདཱིནཝཏཱ’ཏིཨཱདིགཱཐཱཡཾ (ནེཏྟི. ༤) དསྶིཏཱ ཨིམེ ཨསྶཱདཱདཡོ ཀཏྠ སཾཝཎྞེཏབྦེ པཱལི༹དྷམྨེ ཨཱགཏཱ’’ཏི པུཙྪིཏབྦཏྟཱ ‘‘དྷམྨཾ ཝོ, བྷིཀྑཝེ, དེསེསྶཱམཱི’’ཏིཨཱདི ཝུཏྟཾ. ‘‘‘ཨསྶཱདཱདཱིནཝཏཱ’ཏིཨཱདིགཱཐཱཡཾ (ནེཏྟི. ༤) དསྶིཏཱ ཨིམེ ཨསྶཱདཱདཡོ ཀཏྠ སཾཝཎྞེཏབྦེ པཱལི༹དྷམྨེ ཨཱགཏཱ’’ཏི པུཙྪིཏབྦཏྟཱ ‘‘དྷམྨཾ ཝོ, བྷིཀྑཝེ, དེསེསྶཱམི ཨཱདིཀལྱཱཎཾ ¶ མཛ྄ཛྷེཀལྱཱཎཾ པརིཡོསཱནཀལྱཱཎཾ སཱཏྠཾ སབྱཉྫནཾ ཀེཝལཔརིཔུཎྞཾ པརིསུདྡྷཾ བྲཧྨཙརིཡཾ པཀཱསེསྶཱམཱི’’ཏི པཊིཉྙཱཏབྦེ པཱལི༹དྷམྨེ སཾཝཎྞེཏབྦེ ཡེ ཨསྶཱདཱདཡོ ཨཱགཏཱ, ཏེ ཨཡཾ དེསནཱཧཱརོ དེསཡཏཱིཏི ཨདྷིཔྤཱཡོ.

ཏཏྠ དྷམྨསདྡོ པརིཡཏྟིསཙྩསམཱདྷིཔཉྙཱཔཀཏིཔུཉྙཱཔཏྟིཉེཡྻཱདཱིསུ བཧཱུསུ ཨཏྠེསུ པཝཏྟོ, ཏཐཱཔི ཨིདྷ པརིཡཏྟིདྷམྨེཡེཝ པཝཏྟོཏི དཊྛབྦོ. ཨཏྠུདྡེསོ པན ཨཊྛཀཐཱཡཾ (ནེཏྟི. ཨཊྛ. ༥) ཝུཏྟོ, ཏསྨཱ ཨིདྷ མཡཱ ན ཝུཏྟོ. ཝོ-ཀཱརོཔི ཨུཔཡོགཀརཎཔདཔཱུརཎསམྤདཱནཏྠེསུ དིསྶཏི ཙ, ཏཐཱཔི ཨིདྷ སམྤདཱནཏྠེཝཱཏི དཊྛབྦོ. བྷིཀྑནྟི ཡཱཙནྟི སཱིལཀྑནྡྷཱདཡོ, པཙྩཡེ ཝཱ ཀཱཡཝིཉྙཏྟིཡཱཏི བྷིཀྑཱུ, སཾསཱརེ བྷཡཾ ཨིཀྑནྟི པཙྩཝེཀྑནྟཱིཏི ཝཱ བྷིཀྑཱུ. བྷིཀྑཝེཏི ཏེ བྷིཀྑཱུ ཨཱལཔཏི, ཀིམཏྠཱཡཱཏི ཨཏྟནོ མུཁཱབྷིམུཁཾ ཀཏྭཱ དྷམྨསྶཝནེ ཨཏིཨུསྶཱཧནེ ནིཡོཛེཏུཾ ཨཱལཔཏཱིཏི ཝེདིཏབྦོ.

དྷམྨཾ དེསེསྶཱམཱིཏི ནཱཧཾ ཨིསྶརཏཱཡ ཏུམྷེ ཨཉྙཾ ཀིཉྩི ཀཱརེཡྻཱམི, དྷམྨཾཡེཝ དེསེསྶཱམི, དེསེནྟོ ཙ ན ཨཉྙེསཾ དྷམྨཾ སུཏྭཱ སུཏམཡཉཱཎཱནུསཱརེན དེསེསྶཱམི, ཨནཱཝརཎཉཱཎེན སབྦཉེཡྻདྷམྨེསུ པཙྩཀྑཀཱརིཏཱཡ ཨིདཱནི མཡཱཡེཝ པཝཏྟིཡམཱནཾ དྷམྨཾ ཨཧཾ དེསེསྶཱམཱིཏི པཊིཛཱནཱཏི. ཨཱདིམྷི ཀལྱཱཎཾ ཨཱདིཀལྱཱཎཾ, ཨཱདི ཀལྱཱཎམེཏསྶཱཏི ཝཱ ཨཱདིཀལྱཱཎཾ. སེསེསུཔི ཨེསེཝ ནཡོ. ཨཱདིཀལྱཱཎཱདཡོ ཙེཏྠ ཨཏྠཀལྱཱཎཱདིཝསེན ཝུཏྟཱཏི དཊྛབྦཱ. ཏེནཱཧ – ‘‘སཱིལེན ¶ ཨཱདིཀལྱཱཎཾ, སམཱདྷིནཱ མཛ྄ཛྷེཀལྱཱཎཾ, པཉྙཱཡ པརིཡོསཱནཀལྱཱཎཾ. བུདྡྷསུབུདྡྷཏཱཡ ཝཱ ཨཱདིཀལྱཱཎཾ, དྷམྨསུདྷམྨཏཱཡ མཛ྄ཛྷེཀལྱཱཎཾ, སངྒྷསུཔྤཊིཔཏྟིཡཱ པརིཡོསཱནཀལྱཱཎཾ. ཨཐ ཝཱ ཨུགྒྷཊིཏཉྙུཝིནཡནེན ཨཱདིཀལྱཱཎཾ, ཝིཔཉྩིཏཉྙུཝིནཡནེན མཛ྄ཛྷེཀལྱཱཎཾ, ནེཡྻཔུགྒལཝིནཡནེན པརིཡོསཱནཀལྱཱཎཾ. ཨཡམེཝཏྠོ ཨིདྷཱདྷིཔྤེཏོ’’ཏི (ནེཏྟི. ཨཊྛ. ༥).

ཨརཱིཡཏི ཉཱཡཏཱིཏི ཨཏྠོ, ཨར-དྷཱཏུཡཱ ནིཔྤརིཡཱཡཏོ ཉཱཎཔྤདྷཱནོ ཨཱརམྨཎིཀཙིཏྟུཔྤཱདོ ཨཏྠོ, ཋཱནཱུཔཙཱརཏོ ཨཏྠསྶ ཉཱཏབྦསྶ ཨཱརམྨཎཔཙྩཡསཏྟི ཨཏྠོ, ཨིཏི-སདྡེན སཱཡེཝ སཏྟི པརཱམསཱིཡཏི, ཨཱརམྨཎཔཙྩཡསཏྟིསཧིཏོ ཨཱརམྨཎཔཙྩཡསངྑཱཏོ ཉཱཏབྦོ ཨཏྠོ ཏ-པཙྩཡསྶ ཨཏྠོཏི དྷཱཏུཔཙྩཡཱནཾ ཨཏྠཝིསེསོ དཊྛབྦོ. ཨསཏི བྷཝཏཱིཏི ཝཱ ཨཏྠོ, སཧ ཨཏྠེན ཡོ དྷམྨོ ཝཏྟཏཱིཏི སོ དྷམྨོ སཱཏྠོ, ཨཏྠེན སམནྣཱགཏོ ཝཱ དྷམྨོ སཱཏྠོ, སངྐཱསནཱདིཚཨཏྠཔདསམཱཡོགཏོ ཝཱ སཱཏྠོ. ཨཡམེཝཏྠོ ཨིདྷཱདྷིཔྤེཏོ ནེཏྟིཝིསཡཏྟཱ. སམྤནྣཾ བྱཉྫནཾ ཡསྶ དྷམྨསྶཱཏི སབྱཉྫནོ. སིཐིལདྷནིཏདཱིགྷརསྶགརུལཧུསམྦནྡྷཝཝཏྠིཏཝིམུཏྟནིགྒཧིཏསམྤནྣཏྟཱ ¶ , ཨཀཱརནྟཱདིཨིཏྠིལིངྒཱདིཨེཀཝཙནཱདིསམྤནྣཏྟཱ, པམཱདལེཁཱདིརཧིཏཏྟཱ ཙ ཨཝཡཝོ སམྤནྣོ ཏཾསམཱུཧཏྟཱ དྷམྨོ སམྤནྣབྱཉྫནོ ནཱམ, ཨཀྑརཱདིཚབྱཉྫནཔདསམཱཡོགཱ ཝཱ སབྱཉྫནོ. ཨཡམེཝཏྠོ ཨིདྷཱདྷིཔྤེཏོ. ཨིམསྨིཾ ཨཡཾ ཨཱུནོ, སོ ནེཏབྦོ པཀྑིཔིཏབྦོཏི ཨུཔནེཏབྦཱབྷཱཝཏོ ཀེཝལཔརིཔུཎྞོ, སཱིལཀྑནྡྷསམཱདྷིཀྑནྡྷཔཉྙཱཀྑནྡྷ- ཝིམུཏྟིཀྑནྡྷཝིམུཏྟིཉཱཎདསྶནཀྑནྡྷཔཱརིཔཱུརིཡཱ ཝཱ ཀེཝལཔརིཔུཎྞོ. ཨིདྷཱཡཾ ཨཏིརེཀོ, སོ ཨཔནེཏབྦོཏི ཝཏྭཱ ཨཔནེཏབྦཱབྷཱཝཏོ པརིསུདྡྷོ, ཙཏུརོགྷནིཏྠརཎཏྠཱཡ, ལོཀཱམིསནིརཔེཀྑཏཱཡ པཝཏྟིཡམཱནཏྟཱ ཝཱ པརིསུདྡྷོ. སེཊྛཏྟཱ བྲཧྨཙརིཡཾ, བྲཧྨཱནཾ ཝཱ སེཊྛཱནཾ ཨརིཡཱནཾ ཙརིཡཾ བྲཧྨཙརིཡཾ, པབྦཛྫབྲཧྨཙརིཡམགྒབྲཧྨཙརིཡསཱསནབྲཧྨཙརིཡཱདཱིསུ སཱསནབྲཧྨཙརིཡཾ པཀཱསཡིསྶཱམི, པརིདཱིཔཡིསྶཱམཱིཏི ཨཏྠོ.

‘‘དྷམྨཾ ཝོ, བྷིཀྑཝེ, དེསེསྶཱམི…པེ… པཀཱསེསྶཱམཱི’’ཏི པཊིཉྙཱཏབྦེ པཱལི༹དྷམྨེ ཨཱགཏེ ཨསྶཱདཱདཡོ དེསནཱཧཱརོ དེསཡཏི སཾཝཎྞེཏི ¶ ཝིཏྠཱརེཏཱིཏི ཨཱཙརིཡེན སཱམཉྙཝསེནེཝ ཝུཏྟཾ, ཏསྨཱ དེསནཱཧཱརོ ཨིདྷ པཱལི༹ཡཾ ཨཱགཏཾ ཨིམཾ ཨསྶཱདཾ དེསཡཏི, ཨིདྷ པཱལི༹ཡཾ ཨཱགཏཾ ཨིམཾ ཨཱདཱིནཝཾ དེསཡཏཱིཏིཨཱདི ཝིསེསོ ན ཝིཉྙཱཏབྦོ, ‘‘ཀཐཾ ཝིཉྙཱཏབྦོ’’ཏི པུཙྪིཏབྦཏྟཱ ‘‘ཨིདྷ པཱལི༹ཡཾ ཨཱགཏོ ཨཡཾ ཨསྶཱདོ, ཨིདྷ པཱལི༹ཡཾ ཨཱགཏོ ཨཡཾ ཨཱདཱིནཝོ’’ཏི ཝིསེསཾ ནིཡམེཏྭཱ ཨུཔལཀྑཎནཡེན དསྶེཏུཾ ‘‘ཏཏྠ ཀཏམོ ཨསྶཱདོ? ཀཱམཾ ཀཱམཡམཱནསྶཱ’’ཏིཨཱདི ཨཱརདྡྷཾ. ཏཏྠ ཏཏྠཱཏི ཏསྶཾ ‘‘ཨསྶཱདཱདཱིནཝཏཱ’’ཏིཨཱདིགཱཐཱཡཾ ནིདྡིཊྛེསུ ཝིསཡཝིསཡིབྷེདེསུ ཨསྶཱདེསུ ཀཏམོ ཨསྶཱདོ ཏཏྠ ཏེསུ པཱལི༹དྷམྨེསུ ཀཏྠ པཱལི༹ཡཾ ཨཱགཏོཏི པུཙྪིཏྭཱ –

‘‘ཀཱམཾ ཀཱམཡམཱནསྶ, ཏསྶ ཙེཏཾ སམིཛ྄ཛྷཏི;

ཨདྡྷཱ པཱིཏིམནོ ཧོཏི, ལདྡྷཱ མཙྩོ ཡདིཙྪཏཱི’’ཏི. (སུ. ནི. ༧༧༢; མཧཱནི. ༡) –

ཨིདྷ པཱལི༹གཱཐཱཡཾ ཡོ ཝིསཡབྷཱུཏོ ཨསྶཱདོ ཨཱགཏོ, སོ ཨཡཾ ཨསྶཱདེཏབྦོ ཨསྶཱདོ དེསནཱཧཱརསྶ ཝིསཡོཏི. ཨཊྛཀཐཱཡཾ པན –

‘‘ཨེཝཾ བྷགཝཏཱ དེསིཏོ, པཀཱསིཏོ ཙ སཱསནདྷམྨོ ཡེསཾ ཨསྶཱདཱདཱིནཾ དསྶནཝསེན པཝཏྟོ, ཏེ ཨསྶཱདཱདཡོ དེསནཱཧཱརསྶ ཝིསཡབྷཱུཏཱ ཡཏྠ ཡཏྠ པཱཋེ སཝིསེསཾ ¶ ཝུཏྟཱ, ཏཏོ ཏཏོ ནིདྡྷཱརེཏྭཱ ཨུདཱཧརཎཝསེན ཨིདྷཱནེཏྭཱ དསྶེཏུཾ ‘ཏཏྠ ཀཏམོ ཨསྶཱདོ’ཏིཨཱདི ཨཱརདྡྷ’’ནྟི (ནེཏྟི. ཨཊྛ. ༥) ཝུཏྟཾ.

ཏཏྠ ཨསྶཱདཱིཡཏེཏི ཨསྶཱདོ, ཨསྶཱདེཏབྦོ ཝཏྠུཀཱམོ. ཀཱམཱིཡཏེཏི ཀཱམོ, ཝཏྠུཀཱམོ ཙ. ཏཾ ཀཱམཡཏཱིཏི ཀཱམཡམཱནོ, སཏྟོ. ཏསྶ པཱིཏིཡཱ ཡུཏྟཾ མནོ ཨེཏསྶཱཏི པཱིཏིམནོ. མནཏི ཛཱནཱཏཱིཏིཨཱདིཝཙནཏྠེན མཙྩོ. ཀཱམཾ ཀཱམིཏབྦཾ ཝཏྠུ ཀཱམཡམཱནསྶ ཏསྶ སཏྟསྶ ཨེཏཾ ཀཱམིཏབྦཾ ཝཏྠུ སཙེ སམིཛ྄ཛྷཏི, ཨེཝཾ སཏི སོ སཏྟོ ཨདྡྷཱ པཱིཏིམནོ ཧོཏི. ཡོ མཙྩོ ཡཾ ཝཏྠུཾ ཨིཙྪཏི, ཏཾ ཝཏྠུཾ སོ མཙྩོ ལདྡྷཱ ཨདྡྷཱ པཱིཏིམནོ ཧོཏཱིཏི གཱཐཱཡཏྠོ དཊྛབྦོ.

‘‘ཀཱམཾ ¶ …པེ… པཱིཏིམནོ ཧོཏཱི’’ཏི ཨེཏྟཀམེཝ ཨཝཏྭཱ ‘‘ལདྡྷཱ མཙྩོ ཡདིཙྪཏཱི’’ཏི ཝུཏྟཏྟཱ ལོབྷནཱིཡཾ ཝཏྠུཾཡེཝ ལདྡྷཱ པཱིཏིམནོ ན ཧོཏི, ཨཐ ཁོ པཏྠེཏབྦཾ པཱུཛེཏབྦནྟི སབྦཾ ལདྡྷཱ མཙྩོ པཱིཏིམནོ ཙ ཧོཏཱིཏི ཨཏིརེཀཏྠོ དཊྛབྦོ.

ཝིསཡབྷཱུཏོ ཨསྶཱདེཏབྦོ ཨསྶཱདོ ཨིདྷ པཱལི༹ཡཾ གཱཐཱཡཾ ཨཱགཏོཏི ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘དུཀྑདོམནསྶཱདིབྷེདེསུ ཨཱདཱིནཝེསུ ཀཏམོ ཨཱདཱིནཝོ ཀཏྠ པཱལི༹དྷམྨེ ཨཱགཏོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཨཱདཱིནཝོ? ཏསྶ ཙེ ཀཱམཡཱནསྶཱ’’ཏིཨཱདི ཨཱརདྡྷཾ. ཏཏྠ ཏཏྠཱཏི ཏསྶཾ ‘‘ཨསྶཱདཱདཱིནཝཏཱ’’ཏིཨཱདིགཱཐཱཡཾ ནིདྡིཊྛེསུ དུཀྑདོམནསྶཱདཱིསུ ཨཱདཱིནཝེསུ ཀཏམོ ཨཱདཱིནཝོ ཏཏྠ ཏེསུ པཱལི༹དྷམྨེསུ ཀཏྠ པཱལི༹ཡཾ ཨཱགཏོཏི པུཙྪིཏྭཱ –

‘‘ཏསྶ ཙེ ཀཱམཡཱནསྶ, ཚནྡཛཱཏསྶ ཛནྟུནོ;

ཏེ ཀཱམཱ པརིཧཱཡནྟི, སལླཝིདྡྷོཝ རུཔྤཏཱི’’ཏི. (སུ. ནི. ༧༧༣; མཧཱནི. ༢) –

ཨིདྷ པཱལི༹གཱཐཱཡཾ ཡོ དོམནསྶསངྑཱཏོ ཨཱདཱིནཝོ ཨཱགཏོ, སོ ཨཡཾ དོམནསྶསངྑཱཏོ ཨཱདཱིནཝོ དེསནཱཧཱརསྶ ཝིསཡོཏི.

གཱཐཱཡཾ པན ཀཱམཡཏི ཨིཙྪཏཱིཏི ཀཱམཡཱནོ. ཨཐ ཝཱ ཡཱཡཏི གཙྪཏཱིཏི ཡཱནོ, ཀཱམེན ཡཱནོ ཀཱམཡཱནོ, ཏསྶ. ཚནྡོ ཛཱཏོ ཡསྶ སོ ཚནྡཛཱཏོ, ཏསྶ. ཝིཛ྄ཛྷཱིཡཏེཏི ཝིདྡྷོ ¶ , སལླཏི པཝིསཏཱིཏི སལློ, སལླེན ཝིདྡྷོ སལླཝིདྡྷོ. ཀཱམཾ ཀཱམཡཱནསྶ ཚནྡཛཱཏསྶ ཛནྟུནོ ཡེ ཀཱམཱ ལབྷིཏབྦཱ, ཏེ ཀཱམཱ ཀེནཙི ཨནྟརཱཡེན ཡདཱ པརིཧཱཡནྟི, ཏདཱ སོ ཛནྟུ རུཔྤཏི. ཀཱིདིསོཝ རུཔྤཏི? ཨཡོམཡསལླཝིདྡྷོ མིགོ རུཔྤཏི ཨིཝ, པརིཧཱིནཀཱམོ ཛནྟུ རུཔྤཏཱིཏི དཊྛབྦོ. ཨེཏྠ ཙ ‘‘རུཔྤཏཱི’’ཏིཝཙནེན དོམནསྶུཔྤཏྟི དསྶིཏཱཏི དཊྛབྦཱ.

དོམནསྶབྷཱུཏོ ཨཱདཱིནཝོ ཨིདྷ པཱལི༹ཡཾ ཨཱགཏོཏི ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘མགྒནིབྦཱནཝསེན དུཝིདྷེསུ ནིསྶརཎེསུ ཀཏམཾ ནིསྶརཎཾ ཀཏྠ པཱལི༹ཡཾ ཨཱགཏ’’ནྟི པུཙྪིཏབྦཏྟཱ ‘‘ཏཏྠ ཀཏམཾ ནིསྶརཎཾ? ཡོ ཀཱམེ པརིཝཛྫེཏཱི’’ཏིཨཱདི ཨཱརདྡྷཾ. ཏཏྠ ཏཏྠཱཏི ཏསྶཾ ¶ ‘‘ཨསྶཱདཱདཱིནཝཏཱ’’ཏིཨཱདིགཱཐཱཡཾ ནིདྡིཊྛེསུ མགྒནིབྦཱནཝསེན དུཝིདྷེསུ ནིསྶརཎེསུ ཀཏམཾ ནིསྶརཎཾ ཏཏྠ ཏེསུ པཱལི༹དྷམྨེསུ ཀཏྠ པཱལི༹དྷམྨེ ཨཱགཏནྟི པུཙྪིཏྭཱ –

‘‘ཡོ ཀཱམེ པརིཝཛྫེཏི, སཔྤསྶེཝ པདཱ སིརོ;

སོམཾ ཝིསཏྟིཀཾ ལོཀེ, སཏོ སམཏིཝཏྟཏཱི’’ཏི. (སུ. ནི. ༧༧༤; མཧཱནི. ༣) –

ཨིདྷ པཱལི༹གཱཐཱཡཾ ཡཾ སམཏིཝཏྟནཀརཎཾ མགྒསངྑཱཏཾ ནིསྶརཎཾ ཨཱགཏཾ, ཏཾ ཨིདཾ མགྒསངྑཱཏཾ སམཏིཝཏྟནཀརཎཾ ནིསྶརཎཾ དེསནཱཧཱརསྶ ཝིསཡནྟི.

གཱཐཱཡཾ ཡོཏི ཛྷཱནལཱབྷཱི ཝཱ ཨརིཡོ ཝཱ. ཀཱམེཏི ཝུཏྟཔྤཀཱརོ ཝཏྠུཀཱམོ. ཏེསུ པཝཏྟཚནྡརཱགསྶ ཝིཀྑམྦྷནེན ཝཱ སམུཙྪིནྡནེན ཝཱ པརིཝཛྫེཏི. ཀིཾ པརིཝཛྫེཏི ཨིཝ ཝཛྫེཏི? སཔྤསྶ སིརོ སིརཾ ཙཀྑུམཱ པུརིསོ དིསྭཱ པདཱ པཱདེན པརིཝཛྫེཏི ཨིཝ, ཨེཝཾ པརིཝཛྫེཏི. སཏོ སཏིསམྤནྣོ སོ པུགྒལོ ལོཀེ རཱུཔཱདཱིསུ ཝིསཏྟིཀཾ ཨིམཾ ཏཎྷཾ ཡེན མགྒེན སམཏིཝཏྟཏི སཾ སུཊྛུ ཨཏིཀྐམིཏྭཱ ཝཏྟཏི, ཨིདཾ མགྒསངྑཱཏཾ སམཏིཝཏྟནཀརཎཾ ཨེཀདེསཾ ནིསྶརཎཾ ནཱམཱཏི ཡོཛེཏབྦཾ. ‘‘པཱདཱ’’ཏི ཝཏྟབྦེ ཨཱཀཱརསྶ རསྶཾ ཀཏྭཱ ‘‘པདཱ’’ཏི ཝུཏྟཾ. པཱདཱཏི ཙ པཱདེན ཡཐཱ ‘‘ཨམོཧབྷཱཝཱ ཨམོཧབྷཱཝེནཱ’’ཏི. ཏེན ཝུཏྟཾ ‘‘ཨཏྟནོ པཱདེནཱ’’ཏི (ནེཏྟི. ཨཊྛ. ༥).

ཨེཀདེསོ ཝིསཡསངྑཱཏོ ཨསྶཱདོ ཨིདྷ པཱལི༹ཡཾ ཨཱགཏོཏི ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཨེཀདེསོ ཝིསཡིསངྑཱཏོ ཨསྶཱདོ ཀཏྠ པཱལི༹ཡཾ ཨཱགཏོ’’ཏི པུཙྪིཏབྦཏྟཱ ‘‘ཏཏྠ ¶ ཀཏམོ ཨསྶཱདོ? ཁེཏྟཾ ཝཏྠུ’’ནྟིཨཱདི ཨཱརདྡྷཾ. ཨཐ ཝཱ ‘‘ཏཏྠ ཀཏམོ ཨསྶཱདོ? ཁེཏྟཾ ཝཏྠུ’’ནྟིཨཱདི ཀསྨཱ ཨེཝཾ ཨཱརདྡྷཾ, ནནུ ‘‘ཏཏྠ ཀཏམོ ཨསྶཱདོ? ཀཱམཾ ཀཱམཡམཱནསྶཱ’’ཏིཨཱདིནཱ ཨསྶཱདོ ཝིབྷཏྟོ? སཙྩཾ, ཨསྶཱདོ པན དུཝིདྷོ ཝིསཡཝིསཡིཝསེན, ཏསྨིཾ ཝིསཡསངྑཱཏོ ཨསྶཱདོ པུབྦེ ཝིབྷཏྟོ, ཨིདཱནི ཝིསཡིསངྑཱཏཾ ཨསྶཱདཾ ཝིབྷཛིཏུཾ ‘‘ཏཏྠ ཀཏམོ ཨསྶཱདོ? ཁེཏྟཾ ཝཏྠུ’’ནྟིཨཱདི ཨཱརདྡྷཾ. ཏཏྠ ཏཏྠཱཏི ཏསྶཾ ‘‘ཨསྶཱདཱདཱིནཝཏཱ’’ཏིཨཱདིགཱཐཱཡཾ ནིདྡིཊྛེསུ ཝིསཡཝིསཡིབྷེདེསུ ཨསྶཱདེསུ ཀཏམོ ཨསྶཱདོ ཏཏྠ ཏེསུ པཱལི༹དྷམྨེསུ ཀཏྠ པཱལི༹ཡཾ ཨཱགཏོཏི པུཙྪིཏྭཱ –

‘‘ཁེཏྟཾ ཝཏྠུཾ ¶ ཧིརཉྙཾ ཝཱ, གཝཱསྶཾ དཱསཔོརིསཾ;

ཐིཡོ བནྡྷཱུ པུཐཱུ ཀཱམེ, ཡོ ནརོ ཨནུགིཛ྄ཛྷཏཱི’’ཏི. (སུ. ནི. ༧༧༥; མཧཱནི. ༤) –

ཨིདྷ པཱལི༹གཱཐཱཡཾ ཡོ ཨནུགིཛ྄ཛྷནསངྑཱཏོ ཨསྶཱདོ ཨཱགཏོ, སོ ཨཡཾ ཨནུགིཛ྄ཛྷནསངྑཱཏོ ཝིསཡིཨསྶཱདོ དེསནཱཧཱརསྶ ཝིསཡོཏི.

གཱཐཱཡཾ ཁེཏྟནྟི ཁིཔཱིཡནྟི བཱིཛཱནི ཨེཏྠ ཋཱནེཏི ཁེཏྟཾ. ཁིཔནྟཱནཾ ཛནཱནཾ ཁིཔནཀིརིཡཱ ཁིཔ-དྷཱཏུཡཱ མུཁྱཏྠོ, ཁིཔནཀིརིཡཱཛནཀོ ཙིཏྟུཔྤཱདོ ཕལཱུཔཙཱརཏྠོ, ཏསྶ ཙིཏྟུཔྤཱདསྶ ཨུཔནིསྶཡཔཙྩཡབྷཱུཏསྶ ཀེདཱརསྶ ཝིརུལ༹ྷཱཔནསཏྟི ཕལཱུཔཙཱརཏྠོ, ཨིཏི-སདྡེན སཱ ཝིརུལ༹ྷཱཔནསཏྟིཡེཝ པརཱམསཱིཡཏི, ཏསྶཱ སཏྟིཡཱ པཏིཊྛཾ ཀེདཱརསངྑཱཏཾ ཋཱནཾ ཏ-པཙྩཡཏྠོ. ཨེས ནཡོ ཏཱིསུ པིཊཀེསུ ཨེཝརཱུཔེསུ ཙ ཝཙནཏྠེསུ ཡཐཱརཧཾ ནཱིཧརིཏྭཱ གཧེཏབྦོ. ཝཔནྟི པཏིཊྛཧནྟི ཨེཏྠཱཏི ཝཏྠུ. ཨཔརཎྞཱདཱིནཾ པཏིཊྛཧནཾ ཝཔ-དྷཱཏུཡཱ མུཁྱཏྠོ, ཋཱནསྶ པཏིཊྛཱཔནསཏྟི ཕལཱུཔཙཱརཏྠོ, ཨིཏི-སདྡེན སཱ པཏིཊྛཱཔནསཏྟི པརཱམསཱིཡཏི. ཏསྶཱ སཏྟིཡཱ པཏིཊྛཊྛཱནཾ ཏ-པཙྩཡཏྠོ. ཁེཏྟཾ པན པུབྦཎྞཝིརཱུཧནཊྛཱནཾ, ཝཏྠུ ཨཔརཎྞཝིརཱུཧནཊྛཱནཾ.

ཧིནོཏི པཝཏྟཏི པཱིཏིསོམནསྶནྟི ཧི, ཀིཾ ཏཾ? པཱིཏིསོམནསྶཾ, རཱཏི པཝཏྟེཏི ཛཱཏརཱུཔནྟི རཾ, ཀིཾ ཏཾ? ཛཱཏརཱུཔཾ, ཧིཾ རནྟི ཧིརཾ, དུཏིཡཱཏཔྤུརིསསམཱསོ. ཉཱཔེཏི ཏོསེཏཱིཏི ཉཾ, ཀིཾ ཏཾ? ཛཱཏརཱུཔཾ. ཧིརཾ ཧུཏྭཱ ཉཾ ཧིརཉྙཾ, པཝཏྟམཱནཾ པཱིཏིསོམནསྶཾ པཝཏྟེཏྭཱ ཛནེ ཝིསེསེན ཏོསེཏཱིཏི ཨཏྠོ གཧེཏབྦོ. ཝཱ-སདྡོ ཝུཏྟཱཝུཏྟཏྠསམུཙྩཡཏྠོ. གཙྪནྟི ཝིསེསེནཱཏི གཱཝོ, རཏྟིནྡིཝཾ ཨསནྟི བྷཀྑནྟི ཝིསེསེནཱཏི ཨསྶཱ, གཱཝོ ཙ ཨསྶཱ ཙ གཝཱསྶཾ. དཱཏབྦཾ པཋམཾ དེནྟཱིཏི དཱ, ཨསནྟི བྷཀྑནྟཱིཏི ཨསཱ, དཏྭཱ ཨསཱ དཱསཱ ¶ , སཱམིཀཱནཾ དཱཏབྦཾ པཋམཾ དཏྭཱ པཙྪཱ ཨསནྟི བྷཀྑནྟཱིཏི ཨཏྠོ. སཱམིཀེཧི ཝཱ དིནྣཾ ཨསནྟི བྷཀྑནྟཱིཏི དཱསཱ, དུཀྑེན ཀསིརེན ཨསནྟི པཝཏྟནྟཱིཏི ཝཱ དཱསཱ,. མཱཏཱཔིཏཱུནཾ ཧདཡཾ པུརེནྟཱིཏི པུརིསཱ, པུརཾ ཧིཏཾ ཝཱ ཨིསནྟི གཝེསནྟཱིཏི པུརིསཱ. བུདྡྷཔཙྩེཀབུདྡྷཙཀྐཝཏྟིབྷཱཝཾ པུརེཏི ཀམྨནྟི པུརཾ, ཀིཾ ཏཾ? བལཝཀམྨཾ, པུརཾ ཨིསནྟི སཱིལེནཱཏི ཝཱ པུརིསཱ. པུརིསཱ ཨེཝ ཧི སམྨཱསམྦུདྡྷཔཙྩེཀབུདྡྷཙཀྐཝཏྟིབྷཱཝཾ གཙྪནྟི. ‘‘པུརི ཨུཙྩཊྛཱནེ སེནྟཱིཏི ཝཱ པུརིསཱ. པུརིསཱ ¶ ཧི མཱཏཱུནཾ པིཏུཊྛཱནེ ཋིཏཱ’’ཏི ཨིམེ ཝཙནཏྠཱ ཝུཏྟཔྤཀཱརཱ ཡུཏྟཱཡེཝ ཨཏྠསམྦྷཝཏོ. དཱསཱ ཙ པུརིསཱ ཙ དཱསཔོརིསཾ, མཛ྄ཛྷེ ཝུདྡྷི. ཨེཏྠ ཙ དཱསགྒཧཎེན དཱསཱིཔི གཧིཏཱ. དཱསཱ དུཀྐཊཛནཱ, པུརིསཱ སུཁིཏཛནཱཏི ཝིསེསོ དཊྛབྦོ. ཋནྟི པཏིཊྛཧནྟི ཨེཏྠ མཱཏུགཱམེ པུཏྟདྷཱིཏཱཏི ཐིཡོ. ནརསདྡསྶ ཝིགྒཧཏྠོ ཧེཊྛཱ ཝུཏྟོཝ.

ཨེཀདེསོ དོམནསྶསངྑཱཏོ ཨཱདཱིནཝོ ཨིདྷ པཱལི༹གཱཐཱཡཾ ཨཱགཏོཏི ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘དུཀྑསངྑཱཏོ ཨཱདཱིནཝོ ཀཏྠ པཱལི༹ཡཾ ཨཱགཏོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཨཱདཱིནཝོ? ཨབལཱ ནཾ བལཱིཡནྟཱི’’ཏིཨཱདི ཨཱརདྡྷཾ. ཨཐ ཝཱ ‘‘ཏཏྠ ཀཏམོ ཨཱདཱིནཝོ? ཨབལཱ ནཾ བལཱིཡནྟཱི’’ཏིཨཱདི ཀསྨཱ ཨེཝཾ ཨཱརདྡྷཾ, ནནུ ‘‘ཏཏྠ ཀཏམོ ཨཱདཱིནཝོ? ཏསྶ ཙེ ཀཱམཡཱནསྶཱ’’ཏིཨཱདིནཱ ཨཱདཱིནཝོ ཝིབྷཏྟོཏི? སཙྩཾ, ཨཱདཱིནཝོ པན བཧུཝིདྷོ དུཀྑདོམནསྶཱདིཝསེན, ཏསྨིཾ བཧུཝིདྷེ ཨཱདཱིནཝེ ཨེཀདེསོ དོམནསྶསངྑཱཏོ ཨཱདཱིནཝོ པུབྦེ ཝིབྷཏྟོ, ཨིདཱནི དུཀྑསངྑཱཏཾ ཨཱདཱིནཝཾ ཝིབྷཛིཏུཾ ‘‘ཏཏྠ ཀཏམོ ཨཱདཱིནཝོ? ཨབལཱ ནཾ བལཱིཡནྟཱི’’ཏིཨཱདི ཨཱརདྡྷཾ. ཏཏྠ ཏཏྠཱཏི ཏསྶཾ ‘‘ཨསྶཱདཱདཱིནཝཏཱ’’ཏིཨཱདིགཱཐཱཡཾ ནིདྡིཊྛེསུ དུཀྑདོམནསྶཱདཱིསུ ཨཱདཱིནཝེསུ ཀཏམོ ཨཱདཱིནཝོ ཏཏྠ ཏེསུ པཱལི༹དྷམྨེསུ ཀཏྠ པཱལི༹དྷམྨེ ཨཱགཏོཏི པུཙྪིཏྭཱ –

‘‘ཨབལཱ ནཾ བལཱིཡནྟི, མདྡནྟེནཾ པརིསྶཡཱ;

ཏཏོ ནཾ དུཀྑམནྭེཏི, ནཱཝཾ བྷིནྣམིཝོདཀ’’ནྟི. (སུ. ནི. ༧༧༦; མཧཱནི. ༥) –

ཨིདྷ པཱལི༹གཱཐཱཡཾ ཡོ དུཀྑསངྑཱཏོ ཨེཀདེསོ ཨཱདཱིནཝོ ཨཱགཏོ, སོ ཨཡཾ དུཀྑསངྑཱཏོ ཨེཀདེསོ ཨཱདཱིནཝོ དེསནཱཧཱརསྶ ཝིསཡོཏི.

གཱཐཱཡཾ ནཏྠི བལཾ ཨེཏེསཾ ཀིལེསཱནནྟི ཨབལཱ. ཀསྨཱ ཀིལེསཱ ཨབལཱ ཧོནྟཱིཏི? ཀུསལེཧི པཧཱཏབྦཏྟཱ. ནརནྟི ཁེཏྟཱདིཀཱམེ ཨནུགིཛ྄ཛྷནྟཾ ནརཾ, སདྡྷཱབལཱདིཝིརཧཏོ ཝཱ ཨབལཾ ¶ ཏཾ ནརཾ བལཱིཡནྟི ཨབྷིབྷཝནྟི. ཀིཉྩཱཔི ཀིལེསཱ ཀུསལེཧི པཧཱཏབྦཏྟཱ ཨབལཱ ཧོནྟི, ཏཐཱཔི ཀཱམམནུགིཛ྄ཛྷནྟཾ སདྡྷཱབལཱདིཝིརཧིཏཾ ཨབྷིབྷཝིཏུཾ སམཏྠཱ བྷཝནྟི. མདྡནྟེནཾ པརིསྶཡཱཏི ཀཱམགིདྡྷཾ ཀཱམེ པརིཡེསནྟཾ, ཀཱམཾ རཀྑནྟཉྩ ¶ ཨེནཾ ནརཾ པརི སམནྟཏོ པརིཔཱིལེ༹ཏྭཱ ཨཡནྟི པཝཏྟནྟཱིཏི པརིསྶཡཱ, སཱིཧབྱགྒྷཱདཡོ ཙེཝ ཀཱཡདུཙྩརིཏཱདཡོ ཙ མདྡནྟི. ཏཏོ ཏེཧི པརིསྶཡེཧི ཨབྷིབྷཱུཏཾ ནཾ ནརཾ ཛཱཏིཨཱདིདུཀྑཾ ཨནྭེཏི ཨནུགཙྪཏི. ཀིམིཝ ཨནྭེཏི? ཨུདཀཾ བྷིནྣནཱཝཾ ཨནྭེཏི ཨིཝ, ཨེཝཾ ཨནྭེཏཱིཏི ཨཏྠོ.

ཨེཀདེསཾ མགྒསངྑཱཏཾ ནིསྶརཎཾ ཨིདྷ པཱལི༹གཱཐཱཡཾ ཨཱགཏནྟི ཨཱཙརིཡེན ཝིབྷཏྟཾ, ཨམྷེཏི ཙ ཝིཉྙཱཏཾ, ‘‘ནིབྦཱནསངྑཱཏཾ ཨེཀདེསཾ ནིསྶརཎཾ ཀཏྠ པཱལི༹དྷམྨེ ཨཱགཏ’’ནྟི པུཙྪིཏབྦཏྟཱ ‘‘ཏཏྠ ཀཏམཾ ནིསྶརཎཾ? ཏསྨཱ ཛནྟུ སདཱ སཏོ’’ཏིཨཱདི ཨཱརདྡྷཾ. ཨཐ ཝཱ ‘‘ཏཏྠ ཀཏམཾ ནིསྶརཎཾ? ཏསྨཱ ཛནྟུ སདཱ སཏོ’’ཏིཨཱདི ཀསྨཱ ཨེཝཾ ཨཱརདྡྷཾ, ནནུ ‘‘ཏཏྠ ཀཏམཾ ནིསྶརཎཾ? ཡོ ཀཱམེ པརིཝཛྫེཏཱི’’ཏིཨཱདིནཱ ནིསྶརཎཾ ཝིབྷཏྟནྟི? སཙྩཾ, ནིསྶརཎཾ པན དུཝིདྷཾ མགྒནིབྦཱནཝསེན, ཏཏྠ དུཝིདྷེ ནིསྶརཎེ མགྒསངྑཱཏཾ ནིསྶརཎཾ པུབྦེ ཝིབྷཏྟཾ, ཨིདཱནི ནིབྦཱནསངྑཱཏཾ ནིསྶརཎཾ ཝིབྷཛིཏུཾ ‘‘ཏཏྠ ཀཏམཾ ནིསྶརཎཾ? ཏསྨཱ ཛནྟུ སདཱ སཏོ’’ཏིཨཱདི ཨཱརདྡྷཾ. ཏཏྠ ཏཏྠཱཏི ཏསྶཾ ‘‘ཨསྶཱདཱདཱིནཝཏཱ’’ཏིཨཱདིགཱཐཱཡཾ ནིདྡིཊྛེསུ མགྒནིབྦཱནེསུ ནིསྶརཎེསུ ཨེཀདེསཾ ནིབྦཱནསངྑཱཏཾ ནིསྶརཎཾ ཏཏྠ ཏེསུ པཱལི༹དྷམྨེསུ ཀཏྠ པཱལི༹དྷམྨེ ཨཱགཏནྟི པུཙྪིཏྭཱ –

‘‘ཏསྨཱ ཛནྟུ སདཱ སཏོ, ཀཱམཱནི པརིཝཛྫཡེ;

ཏེ པཧཱཡ ཏརེ ཨོགྷཾ, ནཱཝཾ སིཏྭཱཝ པཱརགཱུ’’ཏི. –

ཨིདྷ པཱལི༹གཱཐཱཡཾ ཡཾ ནིབྦཱནསངྑཱཏཾ ནིསྶརཎཾ ཨཱགཏཾ, ཨིདཾ ནིསྶརཎཾ དེསནཱཧཱརསྶ ཝིསཡནྟི.

གཱཐཱཡཾ ཏསྨཱཏི ཡསྨཱ ཀཱམགིདྡྷཾ ནརཾ དུཀྑཾ ཨནྭེཏི, ཏསྨཱ ཛནྟུ སདཱ སབྦཀཱལེ པུབྦརཏྟཱཔརརཏྟེ ཛཱགརིཡཱནུཡོགེན སཏོ སཏིསམྤནྣོ ཧུཏྭཱ ཀཱམཱནི ཀིལེསཀཱམེ ཝིཀྑམྦྷནཝསེན ཝཱ སམུཙྪེདཝསེན ཝཱ པརིཝཛྫཡེ པརིཛཧེཡྻ. ཏེ ཀཱམེ ཨརིཡམགྒེན པཧཱཡ ཙཏུབྦིདྷཾ ཨོགྷཾ ཏརེཡྻ ཏརིཏུཾ སཀྐུཎེཡྻ. ཀོ ཏརཏི ཨིཝ ཏརེཡྻ? ནཱཝཱསཱམིཀོ ནཱཝཾ ཡཾ པཝིསནྟཾ ཨུདཀཾ སིཏྭཱ བཧི སིཉྩིཏྭཱ ལཧུཀཱཡ ནཱཝཱཡ ཨཔྤཀསིརེན ཏརིཏྭཱ པཱརགཱུ པཱརཾ གཙྪཏི ཨིཝ, ཨེཝཾ ཨཏྟནི པཝཏྟཾ ཀིལེསཱུདཀཾ སིཉྩིཏྭཱ ཨརིཡམགྒེན ནཱིཧརིཏྭཱ ལཧུཀེན ཨཏྟབྷཱཝེན ཨནུཔཱདིསེསཱཡ ¶ ནིབྦཱནདྷཱཏུཡཱ ནིབྦཱནེན པཱརཾ ནིབྦཱནཾ སནྟིཾ ¶ གཙྪེཡྻཱཏི ཨཏྠོ. ཨིདཾ ནིབྦཱནཾ ཀསྨཱ ནིསྶརཎཾ ཧོཏི? སབྦསངྑཏནིསྶརཎཏོ ནིསྶརཎཾ ནཱམ.

ཨིདཾ ནིསྶརཎཾ ཨིདྷ པཱལི༹དྷམྨེ ཨཱགཏནྟི ཨཱཙརིཡེན ཝིབྷཏྟཾ, ཨམྷེཧི ཙ ཝིཉྙཱཏཾ, ‘‘ཀཏམཾ ཕལཾ ཀཏྠ པཱལི༹དྷམྨེ ཨཱགཏ’’ནྟི པུཙྪིཏབྦཏྟཱ ‘‘ཏཏྠ ཀཏམཾ ཕལཾ? དྷམྨོ ཧཝེ རཀྑཏི དྷམྨཙཱརི’’ནྟིཨཱདི ཨཱརདྡྷཾ. ཏཏྠ ཏཏྠཱཏི ཏསྶཾ ‘‘ཨསྶཱདཱདཱིནཝཏཱ’’ཏིཨཱདིགཱཐཱཡཾ ནིདྡིཊྛེསུ རཀྑནནིཔྥཱདནམཙྩུཏརཎཱདཱིསུ ཕལེསུ ཀཏམཾ ཕལཾ ཏཏྠ ཏེསུ པཱལི༹དྷམྨེསུ ཀཏྠ པཱལི༹དྷམྨེ ཨཱགཏནྟི པུཙྪིཏྭཱ –

‘‘དྷམྨོ ཧཝེ རཀྑཏི དྷམྨཙཱརིཾ, ཚཏྟཾ མཧནྟཾ ཡཐ ཝསྶཀཱལེ;

ཨེསཱནིསཾསོ དྷམྨེ སུཙིཎྞེ, ན དུགྒཏིཾ གཙྪཏི དྷམྨཙཱརཱི’’ཏི. (སུ. ནི. ༡༠༢, ༡༠༣) –

ཨིདྷ པཱལི༹གཱཐཱཡཾ ཡཾ ཨནཏྠེཧི དྷམྨསྶ རཀྑནཕལཾ ཨཱགཏཾ, རཀྑཱཝཧནསྶ ཨབྦྷུདཡསྶ ཡཉྩ ནིཔྥཱདནཾ ཕལཾ ཨཱགཏཾ, ཨིདཾ རཀྑནནིཔྥཱདནཾ ཕལཾ དེསནཱཧཱརསྶ ཝིསཡནྟི.

གཱཐཱཡཾ དྷམྨོཏི ཡེན པུགྒལེན ཡོ དཱནཱདིཔྤབྷེདོ པུཉྙདྷམྨོ ནིབྦཏྟིཏོ, སོ དྷམྨོ. དྷམྨཙཱརིཾ དྷམྨནིབྦཏྟཀཾ ཏཾ པུགྒལཾ ཨནཏྠེཧི རཀྑཏི. ཀིམིཝ? ཝསྶཀཱལེ དེཝེ ཝསྶནྟེ སཏི མཧནྟཾ ཀུསལེན དྷཱརེཏབྦཾ ཚཏྟཾ དྷཱརེནྟཾ ཀུསལཾ ཏཾ ཛནཾ ཝསྶཏེམནཏོ རཀྑཏི ཡཐཱ, ཨེཝཾ རཀྑིཏབྦོ དྷམྨོཔི ཨཏྟསམྨཱཔཎིདྷཱནེན ཨཔྤམཏྟོ ཧུཏྭཱ སུཊྛུ དྷམྨཾ རཀྑནྟཾཡེཝ རཀྑཏི, ཏཱདིསོ དྷམྨཙཱརཱིཡེཝ དུགྒཏིཾ ན གཙྪཏི. ཨེསོ ཨཱནིསཾསོ སུཙིཎྞེ སུཙིཎྞསྶ དྷམྨེ དྷམྨསྶ ཨཱནིསཾསོཏི ཨཏྠོ.

ཨེཀདེསཾ ཕལཾ ཨིདྷ པཱལི༹དྷམྨེ ཨཱགཏནྟི ཨཱཙརིཡེན ཝིབྷཏྟཾ, ཨམྷེཧི ཙ ཉཱཏཾ, ‘‘ཀཏམོ ཨུཔཱཡོ ཀཏྠ པཱལི༹ཡཾ ཨཱགཏོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཨུཔཱཡོ? སབྦེ སངྑཱརཱ ཨནིཙྩཱ’’ཏིཨཱདི ཨཱརདྡྷཾ. ཏཏྠ ཏཏྠཱཏི ཏསྶཾ ‘‘ཨསྶཱདཱདཱིནཝཏཱ’’ཏིཨཱདིགཱཐཱཡཾ ནིདྡིཊྛེསུ ཝིཔསྶནཱཔུབྦངྒམནིབྦིདཱདཱིསུ ཨུཔཱཡེསུ ཀཏམོ ཨུཔཱཡོ ཏཏྠ ཏེསུ པཱལི༹དྷམྨེསུ ཀཏྠ པཱལི༹དྷམྨེ ཨཱགཏོཏི པུཙྪིཏྭཱ –

‘‘སབྦེ ¶ ¶ སངྑཱརཱ ‘ཨནིཙྩཱ’ཏི…པེ…;

སབྦེ དྷམྨཱ ‘ཨནཏྟཱ’ཏི, ཡདཱ པཉྙཱཡ པསྶཏཱི’’ཏི. (དྷ. པ. ༢༧༧-༢༧༩) –

ཨིདྷ པཱལི༹གཱཐཱསུ ཡོ ཝིཔསྶནཱཔུབྦངྒམནིབྦིདཱཉཱཎསངྑཱཏོ ཝིསུདྡྷིཡཱ ཨདྷིགམཧེཏུབྷཱཝཏོ མགྒོ ཨཱགཏོ, ཨཡཾ ཨུཔཱཡོ དེསནཱཧཱརསྶ ཝིསཡོཏི.

གཱཐཱསུ སབྦེ ནིརཝསེསཱ ཀམྨཙིཏྟོཏུཨཱཧཱརེཧི སངྑརིཏཱ སངྑཏསངྑཱརཱ ཧུཏྭཱ ཨབྷཱཝཊྛེན ཨནིཙྩཱ ཨིཏི ཡདཱ པཉྙཱཡ པསྶཏི, ཨཐ ཨནིཙྩེ དུཀྑསབྷཱཝེ ནིབྦིནྡཏི, ཨེསོ ཝིཔསྶནཱཔུབྦངྒམོ ནིབྦིནྡནཉཱཎསངྑཱཏོ དྷམྨོ ཝིསུདྡྷིཡཱ མགྒོཏི. ‘‘སབྦེ སངྑཱརཱ ཨནིཙྩཱ’’ཏིཨཱདཱིསུ སངྑཱརཱནཾ སངྑཏདྷམྨབྷཱཝོ པཙྩཡཱཀཱརཝིབྷངྒཊྛཀཐཱཡཾ (ཝིབྷ. ཨཊྛ. ༢༢༦ སངྑཱརཔདནིདྡེས) ཝུཏྟོཝ, ཏཾ ཝིབྷངྒཊྛཀཐཾ ཨནོལོཀེཏྭཱ ཨེཀཙྩེ ཨཱཙརིཡཱ ‘‘ཝིཔསྶནཱཉཱཎཱརམྨཎཏྟཱ ཏེབྷཱུམཀདྷམྨཱཡེཝཱ’’ཏི ཝདནྟི, ཨེཝཾ སཏི མགྒཕལདྷམྨཱནཾ ནིཙྩཱདིབྷཱཝོ བྷཝེཡྻ, ཏསྨཱ ཝིབྷངྒཊྛཀཐཱནུརཱུཔོཝ ཨཏྠོ དཊྛབྦོ. དུཀྑཱཏི དུཀྑདུཀྑཝིཔརིཎཱམདུཀྑསངྑཱརདུཀྑབྷཱཝེན དུཀྑཱ. ཨནཏྟཱཏི ནིཙྩསཱརསུཁསཱརཨཏྟསཱརརཧིཏཏྟཱ ཨསཱརཀཊྛེན ཨནཏྟཱ, ཨཝསཝཏྟནཊྛེན ཝཱ ཨནཏྟཱ.

ཨེཀདེསོ ཨུཔཱཡོ ཨིདྷ པཱལི༹དྷམྨེ ཨཱགཏོཏི ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཀཏམཱ ཨཱཎཏྟི ཀཏྠ པཱལི༹དྷམྨེ ཨཱགཏཱ’’ཏི པུཙྪིཏབྦཏྟཱ ‘‘ཏཏྠ ཀཏམཱ ཨཱཎཏྟི? ཙཀྑུམཱ ཝིསམཱནཱིཝཱ’’ཏིཨཱདི ཨཱརདྡྷཾ. ཏཏྠ ཏཏྠཱཏི ཏསྶཾ ‘‘ཨསྶཱདཱདཱིནཝཏཱ’’ཏིཨཱདིགཱཐཱཡཾ ནིདྡིཊྛཱསུ པཱཔདུཙྩརིཏཔརིཝཛྫནཱཎཏྟིཀལྱཱཎསུཙརིཏཙརཎཱཎཏྟིཨཱདཱིསུ ཀཏམཱཎཏྟི ཏཏྠ ཏེསུ པཱལི༹དྷམྨེསུ ཀཏྠ པཱལི༹དྷམྨེ ཨཱགཏཱཏི པུཙྪིཏྭཱ –

‘‘ཙཀྑུམཱ ཝིསམཱནཱིཝ, ཝིཛྫམཱནེ པརཀྐམེ;

པཎྜིཏོ ཛཱིཝལོཀསྨིཾ, པཱཔཱནི པརིཝཛྫཡེ’’ཏི. (ཨུདཱ. ༤༣) –

ཨིདྷ པཱལི༹དྷམྨེ ཡཱ པཱཔདུཙྩརིཏཔརིཝཛྫནཱཎཏྟི ཨཱགཏཱ, ཨཡཾ པཱཔདུཙྩརིཏཔརིཝཛྫནཱཎཏྟི དེསནཱཧཱརསྶ ཝིསཡཱཏི.

གཱཐཱཡཾ ཙཀྑུམཱ པུརིསོ ཝིཛྫམཱནེ པརཀྐམེ ཨཱཝཧིཏཾ སརཱིརཾ ཨཱཝཧནྟོཝ ཧུཏྭཱ ཝིསམཱནི ¶ བྷཱུམིཔྤདེསཱནི ཝཱ ཝིསམེ ཧཏྠིཨཱདཡོ ཝཱ ¶ པརིཝཛྫེཏི ཨིཝ, ཨེཝཾ ཛཱིཝལོཀསྨིཾ པཎྜིཏོ པཱཔཱནི ལཱམཀཱནི དུཙྩརིཏཱནི པརིཝཛྫེཏི. ཨཱཎཏྟི ནཱམ ཨཱཎཱརཧསྶ དྷམྨརཱཛསྶ བྷགཝཏོ ཨཱཎཱ, སཱ བཧུཝིདྷཱ, ཏསྨཱ ‘‘ཀརེཡྻ ཀལྱཱཎ’’ནྟིཨཱདིགཱཐཱཡཾ སུཙརིཏཙརཎཱ ཨཱཎཏྟི.

‘‘ཨུཔེཐ སརཎཾ བུདྡྷཾ, དྷམྨཾ སངྒྷཉྩ ཏཱདིནཾ;

སམཱདིཡཐ སཱིལཱནི, ཏཾ ཝོ ཨཏྠཱཡ ཧེཧིཏཱི’’ཏི. (ཐེརཱིགཱ. ༢༤༩-༢༥༠, ༢༨༩-༢༩༠) –

ཨཱདཱིསུ གཱཐཱསུ སརཎགམནཱཎཏྟིསཱིལསམཱདཱནཱཎཏྟིཨཱདི ཨཱགཏཱཏི.

‘‘སུཉྙཏོ ལོཀཾ ཨཝེཀྑསྶཱུ’’ཏིཨཱདི ཀསྨཱ ཨེཝཾ ཨཱརདྡྷཾ, ནནུ ‘‘ཏཏྠ ཀཏམཾ ཕལཾ? དྷམྨོ ཧཝེ’’ཏིཨཱདིནཱ, ‘‘ཏཏྠ ཀཏམོ ཨུཔཱཡོ? སབྦེ སངྑཱརཱ’’ཏིཨཱདིནཱ, ‘‘ཏཏྠ ཀཏམཱ ཨཱཎཏྟི? ཙཀྑུམཱ’’ཏིཨཱདིནཱ ཙ ཕལཱུཔཱཡཱཎཏྟིཡོ ཝིབྷཏྟཱཏི? སཙྩཾ, ཝིསུཾ ཝིསུཾ པན སུཏྟེསུ ཨཱགཏཱ ཕལཱུཔཱཡཱཎཏྟིཡོ ཝིབྷཏྟཱ, ཨིདཱནི ཨེཀཏོ ཨཱགཏཱ ཕལཱུཔཱཡཱཎཏྟིཡོ ཝིབྷཛིཏུཾ ‘‘སུཉྙཏོ ལོཀཾ ཨཝེཀྑསྶཱུ’’ཏིཨཱདི ཨཱརདྡྷཾ.

ཏཏྠ སུཉྙཏོ ལོཀཾ ཨཝེཀྑསྶཱུཏི སབྦམྤི སངྑཱརལོཀཾ ཨཏྟཏོ སུཉྙོཏི ཨཝསཝཏྟིཏཱསལླཀྑཎཝསེན ཝཱ ཏུཙྪབྷཱཝསམནུཔསྶནཝསེན ཝཱ པསྶཱཏི ཨིདཾ བྷགཝཏོ ཝཙནཾ ཝིདྷཱནབྷཱཝཏོ ཨཱཎཏྟི ནཱམ. ནིཙྩསཱརསུཁསཱརཨཏྟསཱརཱདིརཧིཏཏྟཱ ‘‘མོགྷརཱཛཱ’’ཏི ཨཱལཔཏི, སདྡྷཱསཱིལསུཏཙཱགཱདིརཧིཏཏྟཱ ཝཱ མོགྷོ.

‘‘སདཱ སཏོ’’ཏི པུགྒལཝསེན ཝུཏྟཱཡ སཏིཡཱ སུཉྙཏཱདསྶནསྶ སམྤཛཱནཧེཏུབྷཱཝཏོ སཏིཡེཝ ཨུཔཱཡོ, ན སཏིམཱཏི ཨེཏྠ སཏཱིཏི ཨདྷིཔྤཱཡོ.

ཨཏྟཱནུདིཊྛིཾ ཨཱུཧཙྩཱཏི ཨེཏྠ ཨཏྟཱནུདིཊྛི ནཱམ ‘‘རཱུཔཾ ཨཏྟཱ, རཱུཔཝཱ ཨཏྟཱ, རཱུཔསྨིཾ ཨཏྟཱ, ཨཏྟནི རཱུཔ’’ནྟིཨཱདིཔྤཀཱརཱ ཝཱིསཏིཝཏྠུཀཱ དིཊྛི. མགྒེན ཨཱུཧཙྩ སམུཙྪིནྡིཏྭཱ ཨེཝཾ ཝུཏྟཝིདྷིནཱ མཙྩུཏརོ མཙྩུནོ ཝིསཡཱཏིཀྐནྟོ སིཡཱ བྷཝེཡྻ. ཨེཏྠ ཡཾ མཙྩུཝིསཡཾ ཏརཎཾ ཨཏིཀྐམནཾ, ཏསྶ ཨཏིཀྐམནསྶ ཡཉྩ པུབྦབྷཱགཔཊིཔདཱསམྤཛྫནཾ, ཨིདཾ བྷགཝཏོ དེསནཱཡ ¶ ཕལཾ དེསནཱཧཱརསྶ ཝིསཡནྟི ཨདྷིཔྤཱཡོ. པུབྦེ ཝིསུཾ ཝིསུཾ ཕལཱུཔཱཡཱཎཏྟིཡོ ཝིབྷཏྟཱཔི –

‘‘སུཉྙཏོ ¶ ལོཀཾ ཨཝེཀྑསྶུ, མོགྷརཱཛ སདཱ སཏོ;

ཨཏྟཱནུདིཊྛིཾ ཨཱུཧཙྩ, ཨེཝཾ མཙྩུཏརོ སིཡཱ’’ཏི. (སུ. ནི. ༡༡༢༥; མཧཱནི. ༡༨༦; ཙཱུལ༹ནི. པིངྒིཡམཱཎཝཔུཙྪཱ ༡༤༤, མོགྷརཱཛམཱཎཝཔུཙྪཱནིདྡེས ༨༨) –

ཨེཀགཱཐཱཡཾ པུན ཨེཀཏོ ཝིབྷཛནཏོ ཕལཱདཱིསུ ཨེཀཏོ དསྶིཏེསུ སབྦཏྠ སུཏྟེསུ ཝཱ སབྦཏྠ གཱཐཱསུ ཝཱ ཕལཱདཡོ དསྶེཏབྦཱ ཨསྶཱདཱདཡོ ཝིཡ ཀཏྠཙི ནིདྡྷཱརེཏྭཱཏི ཝིསེསོ ཝིཛཱནིཏབྦོ. ཏེནཱཧ ཨཊྛཀཐཱཙརིཡོ ‘‘ཡཐཱ པན…པེ… ཨེཀཏོ ཨུདཱཧརཎཾ ཀཏནྟི དཊྛབྦ’’ནྟི (ནེཏྟི. ཨཊྛ. ༥).

༦. དེསནཱཧཱརསྶ ཝིསཡབྷཱུཏཱ ཨསྶཱདཱདཡོ ‘‘ཨིདྷ པཱལི༹དྷམྨེ ཨཡཾ ཨསྶཱདོ ཨཱགཏོ, ཨིདྷ པཱལི༹དྷམྨེ ཨཡཾ ཨཱདཱིནཝོ ཨཱགཏོ’’ཏིཨཱདིནཱ ཝིསེསཏོ ནིདསྶནཝསེན སརཱུཔཏོ ཨཱཙརིཡེན ཝིབྷཏྟཱ, ཏེ ཨསྶཱདཱདཡོ ཏིཎྞཾ ཨུགྒྷཊིཏཉྙུཨཱདཱིནཾ པུགྒལཱནཾ སཱམཉྙཏོ བྷགཝཱ ཀིཾ ནུ ཁོ དེསེཏི, ཨུདཱཧུ ཨེཀསྶ པུགྒལསྶ ཡཐཱལཱབྷཾ ཀིཾ ནུ དེསེཏཱིཏི ཨནུཡོགསྶ སམྦྷཝཏོ ཨིམསྶ པུགྒལསྶ ཨིམཾ དེསེཏི, ཨིམསྶ པུགྒལསྶ ཨིམཾ དེསེཏཱིཏི པུགྒལབྷེདེན ཨསྶཱདཱདཡོ ཝིབྷཛིཏྭཱ དསྶེཏུཾ ‘‘ཏཏྠ བྷགཝཱ ཨུགྒྷཊིཏཉྙུསྶཱ’’ཏིཨཱདི ཨཱརདྡྷཾ. ཏཏྠ ཏཏྠཱཏི ཏེསུ ཨསྶཱདཱདཱིསུ. ནིསྶརཎཾ ཨུགྒྷཊིཏཉྙུསྶ པུགྒལསྶ བྷགཝཱ དེསེཏི, ཨཱདཱིནཝཉྩ ནིསྶརཎཉྩ ཨིམེ དྭེ ཝིཔཉྩིཏཉྙུསྶ པུགྒལསྶ བྷགཝཱ དེསེཏི, ཨསྶཱདཉྩ ཨཱདཱིནཝཉྩ ནིསྶརཎཉྩ ཨིམེ ཏཡོ ནེཡྻསྶ པུགྒལསྶ བྷགཝཱ དེསེཏཱིཏི ཡོཛནཏྠོ དཊྛབྦོ.

ཨཊྛཀཐཱཡཾ པན ‘‘ཨེཝཾ ཨསྶཱདཱདཡོ ཨུདཱཧརཎཝསེན སརཱུཔཏོ དསྶེཏྭཱ ཨིདཱནི ཏཏྠ པུགྒལཝིབྷཱགེན དེསནཱཝིབྷཱགཾ དསྶེཏུཾ ‘ཏཏྠ བྷགཝཱ’ཏིཨཱདི ཝུཏྟ’’ནྟི ཝུཏྟཾ.

ཏཏྠ ཨུགྒྷཊིཏཉྙུསྶཱཏི ཨུགྒྷཊཱིཡཏེ པཊིཝིཛ྄ཛྷཱིཡཏེ, ཋཔཱིཡཏེ ཝཱ སཔྤབྷེདོ ཝིཏྠཱརོ ཨཏྠོཏི ཨུགྒྷཊིཏོ, ཛཱནཱཏཱིཏི ཉཱུ, ཨུགྒྷཊིཏཾ ཨཏྠཾ ཉཱུ ཨུགྒྷཊིཏཉྙཱུ, ཨུདྡེསམཏྟེནེཝ སཔྤབྷེདཾ སཝིཏྠཱརཾ ¶ པཊིཝིཛ྄ཛྷིཏབྦཾ ཨཏྠཾ པཊིཝིཛ྄ཛྷཏཱིཏི ཨཏྠོ. ཡོ པུགྒལོ ཨུདྡེསེནེཝ ཨུདྡིཊྛམཏྟེནེཝ ཨཏྠཾ ཉཏྭཱ ཨཏྠསིདྡྷིཔྤཏྟོ ཧོཏི, སོ ཨུགྒྷཊིཏཉྙཱུ ནཱམ.

ཝིཔཉྩཱིཡཏེ ¶ ཝིཏྠརཱིཡཏེ ཨཏྠོཏི ཝིཔཉྩིཏོ, ཏཾ ཛཱནཱཏཱིཏི ཝིཔཉྩིཏཉྙཱུ. ཡོ པུགྒལོ ནིདྡེསེན ནིདྡིཊྛམཏྟམེཝ ཨཏྠཾ ཉཏྭཱ ཨཏྠསིདྡྷིཔྤཏྟོ, སོ ཝིཔཉྩིཏཉྙཱུ ནཱམ.

པཊིནིདྡེསེན ཨཏྠོ ནེཏབྦོ པཱཔེཏབྦོཏི ནེཡྻོ. ཡོ པུགྒལོ པཊིནིདྡེསེན ཝཱ པཊིལོམེན ཝཱ ཝིབྷཏྟཾ ཨེཝ ཨཏྠཾ ཉཏྭཱ ཨཏྠསིདྡྷིཔྤཏྟོ, སོ ནེཡྻོ ནཱམ. ནིསྶརཎདེསནཱཡེཝ ཨུགྒྷཊིཏཉྙུསྶ པཊིཝེདྷཱབྷིསམཡོ སིདྡྷོ ཧོཏི, ཨཱདཱིནཝདེསནཱཡ ཙེཝ ནིསྶརཎདེསནཱཡ ཙ ཝིཔཉྩིཏཉྙུསྶ པཊིཝེདྷཱབྷིསམཡོ སིདྡྷོ ཧོཏི, ཨསྶཱདདེསནཱཡ ཙ ཨཱདཱིནཝདེསནཱཡ ཙ ནིསྶརཎདེསནཱཡ ཙ ནེཡྻསྶ པཊིཝེདྷཱབྷིསམཡོ སིདྡྷོ ཧོཏཱིཏི ཨདྷིཔྤཱཡོ ཨིདྷ གཧེཏབྦོ.

པདཔརམོ པནེཏྠ པཊིཝེདྷཱབྷིསམཡབྷཛནཱབྷཱཝཏོ ན གཧིཏོ. ཏསྨིཉྩ ཨགྒཧིཏེ ཨསྶཱདོ, ཨཱདཱིནཝོ, ནིསྶརཎཾ, ཨསྶཱདཱདཱིནཝཱ, ཨསྶཱདནིསྶརཎཱནི, ཨཱདཱིནཝནིསྶརཎཱནི, ཨསྶཱདཱདཱིནཝནིསྶརཎཱནི ཙཱཏི སཏྟསུ པཊྛཱནནཡེསུ ཏཏིཡཚཊྛསཏྟམཱཝ གཧིཏཱ, ཨཝསེསཱ ཙཏྟཱརོ ནཡཱ ན གཧིཏཱ. ཝེནེཡྻཝིནཡནཱབྷཱཝཏོ ཧི གཧཎཱགཧཎཾ དཊྛབྦཾ. ཝེནེཡྻཝིནཡཉྩ ཝེནེཡྻཱནཾ སནྟཱནེ ཨརིཡམགྒསྶུཔྤཱདནཾ, ན སཱསནཝིནཡནམཏྟཾ, ཨརིཡམགྒུཔྤཱདནཉྩ ཡཐཱཝུཏྟེཧི ཨེཝ ཏཱིཧི པདཊྛཱནནཡེཧི སིཛ྄ཛྷཏཱིཏི ཨིཏརེ ནཡཱ ཨིདྷ ན ཝུཏྟཱ.

ཡསྨཱ པན པེཊཀེ (པེཊཀོ. ༢༣) –

‘‘ཏཏྠ ཀཏམོ ཨསྶཱདོ ཙ ཨཱདཱིནཝོ ཙ?

‘ཡཱནི ཀརོཏི པུརིསོ, ཏཱནི པསྶཏི ཨཏྟནི;

ཀལྱཱཎཀཱརཱི ཀལྱཱཎཾ, པཱཔཀཱརཱི ཙ པཱཔཀ’ནྟི.

‘‘ཏཏྠ ཡཾ ཀལྱཱཎཀཱརཱི ཀལྱཱཎཾ པཙྩནུབྷོཏི, ཨཡཾ ཨསྶཱདོ. ཡཾ པཱཔཀཱརཱི པཱཔཾ པཙྩནུབྷོཏི, ཨཡཾ ཨཱདཱིནཝོ.

‘‘ཨཊྛིམེ, བྷིཀྑཝེ, ལོཀདྷམྨཱ. ཀཏམེ ཨཊྛ? ‘ལཱབྷོ’ཏིཨཱདི (ཨ. ནི. ༨.༦). ཏཏྠ ལཱབྷོ ཡསོ སུཁཾ པསཾསཱ, ཨཡཾ ཨསྶཱདོ. ཨལཱབྷོ ཨཡསོ དུཀྑཾ ནིནྡཱ, ཨཡཾ ཨཱདཱིནཝོ.

‘‘ཏཏྠ ¶ ཀཏམོ ཨསྶཱདོ ཙ ནིསྶརཎཉྩ?

‘སུཁོ ¶ ཝིཔཱཀོ པུཉྙཱནཾ, ཨདྷིཔྤཱཡོ ཙ ཨིཛ྄ཛྷཏི;

ཁིཔྤཉྩ པརམཾ སནྟིཾ, ནིབྦཱནམདྷིགཙྪཏཱི’ཏི. –

ཨཡཾ ཨསྶཱདོ ཙ ནིསྶརཎཉྩ.

‘‘དྭཏྟིཾསིམཱནི, བྷིཀྑཝེ, མཧཱཔུརིསསྶ མཧཱཔུརིསལཀྑཎཱནི, ཡེཧི སམནྣཱགཏསྶ མཧཱཔུརིསསྶ དྭེཡེཝ གཏིཡོ བྷཝནྟི…པེ… ཝིཝཊཙྪདོཏི སབྦཾ ལཀྑཎསུཏྟཾ (དཱི. ནི. ༣.༡༩༩) ཨཡཾ ཨསྶཱདོ ཙ ནིསྶརཎཉྩ.

‘‘ཏཏྠ ཀཏམོ ཨཱདཱིནཝོ ཙ ནིསྶརཎཉྩ?

‘བྷཱརཱ ཧཝེ པཉྩཀྑནྡྷཱ, བྷཱརཧཱརོ ཙ པུགྒལོ;

བྷཱརཱདཱནཾ དུཁཾ ལོཀེ, བྷཱརནིཀྑེཔནཾ སུཁཾ.

‘ནིཀྑིཔིཏྭཱ གརུཾ བྷཱརཾ, ཨཉྙཾ བྷཱརཾ ཨནཱདིཡ;

སམཱུལཾ ཏཎྷམབྦུཡ྄ཧ, ནིཙྪཱཏོ པརིནིབྦུཏོ’ཏི. (སཾ. ནི. ༣.༢༢) –

ཨཡཾ ཨཱདཱིནཝོ ཙ ནིསྶརཎཉྩ.

‘‘ཏཏྠ ཀཏམོ ཨསྶཱདོ ཙ ཨཱདཱིནཝོ ཙ ནིསྶརཎཉྩ?

‘ཀཱམཱ ཧི ཙིཏྲཱ མདྷུརཱ མནོརམཱ, ཝིརཱུཔརཱུཔེན མཐེནྟི ཙིཏྟཾ;

ཏསྨཱ ཨཧཾ པབྦཛིཏོམྷི རཱཛ, ཨཔཎྞཀཾ སཱམཉྙམེཝ སེཡྻོ’ཏི. (མ. ནི. ༢.༣༠༧; ཐེརགཱ. ༧༨༧; པེཊཀོ. ༢༣) –

ཨཡཾ ཨསྶཱདོ ཙ ཨཱདཱིནཝོ ཙ ནིསྶརཎཉྩཱ’’ཏི ཝུཏྟཾ, ཏསྨཱ ཏེཔི ནཡཱ ཨིདྷ ནིདྡྷཱརེཏྭཱ ཝེདིཏབྦཱ. ཕལཱདཱིསུཔི ཨཡཾ ནཡོ ལབྦྷཏིཡེཝ.

ཡསྨཱ ¶ པེཊཀེ (སཾ. ནི. ༡.༢༣, ༡༩༢; པེཊཀོ. ༢༢; མི. པ. ༢.༡.༩) – ‘‘ཏཏྠ ཀཏམཾ ཕལཉྩ ཨུཔཱཡོ ཙ? ‘སཱིལེ པཏིཊྛཱཡ ནརོ སཔྤཉྙོ’ཏི གཱཐཱ, ཨིདཾ ཕལཉྩ ཨུཔཱཡོ ཙ.

‘‘ཏཏྠ ཀཏམཾ ཕལཉྩ ཨཱཎཏྟི ཙ?

‘སཙེ བྷཱཡཐ དུཀྑསྶ, སཙེ ཝོ དུཀྑམཔྤིཡཾ;

མཱཀཏྠ པཱཔཀཾ ཀམྨཾ, ཨཱཝི ཝཱ ཡདི ཝཱ རཧོ’ཏི. (ཨུདཱ. ༤༤) –

ཨིདཾ ¶ ཕལཉྩ ཨཱཎཏྟི ཙ.

‘‘ཏཏྠ ཀཏམོ ཨུཔཱཡོ ཙ ཨཱཎཏྟི ཙ?

‘ཀུམྦྷཱུཔམཾ ཀཱཡམིམཾ ཝིདིཏྭཱ, ནགརཱུཔམཾ ཙིཏྟམིདཾ ཋཔེཏྭཱ;

ཡོདྷེཐ མཱརཾ པཉྙཱཝུདྷེན, ཛིཏཉྩ རཀྑེ ཨནིཝེསནོ སིཡཱ’ཏི. (དྷ. པ. ༤༠) –

ཨཡཾ ཨུཔཱཡོ ཙ ཨཱཎཏྟི ཙཱ’’ཏི ཝུཏྟཾ, ཏསྨཱ ཨེཝཾ ཕལཱདཱིནཾ དུཀྑཝསེནཱཔི ཨུདཱཧརཎཾ ཝེདིཏབྦཾ.

‘‘ཨུགྒྷཊིཏཉྙུཨཱདཱིནཾ ཏིཎྞཾ པུགྒལཱནཾ ཨིམསྶ པུགྒལསྶ ཨིམཾ དེསེཏི, ཨིམསྶ པུགྒལསྶ ཨིམཾ དེསེཏཱི’’ཏི ཡེཧི པུགྒལེཧི ཨསྶཱདཱདཡོ ཡཐཱརཧཾ ཨཱཙརིཡེན ཝིབྷཏྟཱ, ཏེ པུགྒལཱ ཡཱཧི པཊིཔདཱཧི བྷིནྣཱ, ཏཱ པཊིཔདཱ ཀིཏྟིཀཱ བྷཝནྟི, ཏཱཧི བྷིནྣཱ པུགྒལཱ ཙ ཀིཏྟིཀཱཏི ཝིཙཱརཎཱཡ སམྦྷཝཏོ ཏཱ པཊིཔདཱ, ཏེ ཙ པུགྒལཱ ཨེཏྟཀཱཏི གཎནཏོ དསྶེཏུཾ ‘‘ཏཏྠ ཙཏསྶོ པཊིཔདཱ’’ཏིཨཱདི ཨཱརདྡྷཾ.

ཏཏྠ ཏཏྠཱཏི ཏེསུ ཨུགྒྷཊིཏཉྙུཨཱདཱིསུ པུགྒལེསུ. ཡེ པུགྒལཱ ཡཱཧི པཊིཔདཱཧི བྷིནྣཱ, ཏཱ པཊིཔདཱ ཙཏསྶོ བྷཝནྟི, ཏེ ཙ པུགྒལཱ ཙཏྟཱརོཏི ཡོཛནཱ ཀཱཏབྦཱ. ཀཏམཱ ཙཏསྶོ? དུཀྑཱཔཊིཔདཱ དནྡྷཱབྷིཉྙཱ, དུཀྑཱཔཊིཔདཱ ཁིཔྤཱབྷིཉྙཱ, སུཁཱཔཊིཔདཱ དནྡྷཱབྷིཉྙཱ, སུཁཱཔཊིཔདཱ ཁིཔྤཱབྷིཉྙཱ ཙཱཏི ཙཏསྶོ. ཀཏམེ ཙཏྟཱརོ? ཏཎྷཱཙརིཏོ མནྡོ ¶ པུགྒལོ, ཏཎྷཱཙརིཏོ ཨུདཏྟོ པུགྒལོ, དིཊྛིཙརིཏོ མནྡོ པུགྒལོ, དིཊྛིཙརིཏོ ཨུདཏྟོ པུགྒལོ ཙཱཏི ཙཏྟཱརོ.

པཊིཔདཱབྷིཉྙཱཧི ཀཏོ ཝིབྷཱགོཔི པཊིཔདཱཧི ཀཏོ ཝིབྷཱགོ ནཱམ ཧོཏི ཨཝིནཱབྷཱཝཏོཏི མནསི ཀཏྭཱ ‘‘ཙཏསྶོ པཊིཔདཱབྷིཉྙཱ’’ཏི ཨཝཏྭཱ ‘‘ཙཏསྶོ པཊིཔདཱ’’ཏི ཝུཏྟཱ. ཏཱ པནེཏཱ སམཐཝསེནཱཔི བྷིནྣཱ, ཝིཔསྶནཱཝསེནཱཔི བྷིནྣཱ. ཀཐཾ སམཐཝསེན? པཐཝཱིཀསིཎཱདཱིསུ སབྦཔཋམཾ ‘‘པཐཝཱི པཐཝཱི’’ཏིཨཱདིནཱ པཝཏྟམནསིཀཱརཏོ པཊྛཱཡ ཡཱཝ ཛྷཱནསྶ ཨུཔཙཱརཾ ཨུཔྤཛྫཏི, ཏཱཝ པཝཏྟཱ པཉྙཱ སམཐབྷཱཝནཱ ‘‘པཊིཔདཱ’’ཏི ཝུཙྩཏི. ཨུཔཙཱརཏོ པན པཊྛཱཡ ཡཱཝ ཨཔྤནཱ, ཏཱཝ ¶ པཝཏྟཱ པཉྙཱ ‘‘ཨབྷིཉྙཱ’’ཏི ཝུཙྩཏི ཧེཊྛིམཔཉྙཱཏོ ཨདྷིགཏཔཉྙཱབྷཱཝཏོ.

སཱ ཙ པཊིཔདཱ ཀསྶཙི དུཀྑཱ ཀིཙྪཱ ཧོཏི ནཱིཝརཎཱདིཔཙྩནཱིཀདྷམྨསམུདཱཙཱརགྒཧཎཏཱཡ, ཀསྶཙི ཏདབྷཱཝཏོ སུཁཱ ཨཀིཙྪཱ ཧོཏི, ཨབྷིཉྙཱཔི ཀསྶཙི དནྡྷཱ ཨསཱིགྷཔྤཝཏྟི ཧོཏི ཨཝིསདཉཱཎཏཱཡ, ཀསྶཙི ཁིཔྤཱ སཱིགྷཔྤཝཏྟི ཧོཏི ཝིསདཉཱཎཏཱཡཱཏི.

ཀཐཾ ཝིཔསྶནཱཝསེན? ཡོ རཱུཔཱརཱུཔམུཁེན ཝིཔསྶནཾ ཨབྷིནིཝིསནྟོ ཙཏྟཱརི མཧཱབྷཱུཏཱནི པརིགྒཧེཏྭཱ ཨུཔཱདཱརཱུཔཾ པརིགྒཎྷཱཏི, ཨརཱུཔཾ པརིགྒཎྷཱཏི, རཱུཔཱརཱུཔཾ པན པརིགྒཎྷནྟོ དུཀྑེན ཀསིརེན ཀིལམནྟོ པརིགྒཧཨེཏཨུཾ སཀྐོཏི, ཏསྶ དུཀྑཱཔཊིཔདཱ ནཱམ ཧོཏི. པརིགྒཧིཏརཱུཔཱརཱུཔསྶ ཝིཔསྶནཱཔརིཝཱསེ མགྒཔཱཏུབྷཱཝདནྡྷཏཱཡ དནྡྷཱབྷིཉྙཱ ནཱམ ཧོཏི. ཏབྦིཔརིཡཱཡེན ཨིཏརཱ དྭེ ཧོནྟི. ཝིཔསྶནཱཝསེན པན བྷིནྣཱཡེཝ པཊིཔདཱབྷིཉྙཱཡོ ཨིདྷ དཊྛབྦཱ ཨབྷིསམཡཱདྷིཀཱརཏྟཱ, ཨཊྛཀཐཱཡཾ པན ‘‘ཨེཝཾ ཡེསཾ པུགྒལཱནཾ ཝསེན དེསནཱཝིབྷཱགོ དསྶིཏོ, ཏེ པུགྒལེ པཊིཔདཱཝིབྷཱགེན ཝིབྷཛིཏྭཱ དསྶེཏུཾ ‘ཙཏསྶོ པཊིཔདཱ’ཏིཨཱདི ཝུཏྟ’’ནྟི (ནེཏྟི. ཨཊྛ. ༦) ཝུཏྟཾ. ཡོཛནཱནཡོ ཝུཏྟནཡཱནུསཱརེནེཝ ཝེདིཏབྦོ.

ཙཏཱུཧི པཊིཔདཱབྷིཉྙཱཧི ཙཏྟཱརོ པུགྒལཱ སབྦེཝ ཨནིཡམཏོ ཝཊྚདུཀྑཏོ ཀིཾ ནུ ཁོ ནིཡྻནྟི, ཨུདཱཧུ ‘‘ཨིམཱཡ པཊིཔདཱབྷིཉྙཱཡ ཨཡཾ པུགྒལོ ནིཡྻཱཏི, ཨིམཱཡ པཊིཔདཱབྷིཉྙཱཡ ཨཡཾ པུགྒལོ ནིཡྻཱཏཱི’’ཏི ནིཡམཏོ ཙ ནིཡྻཱཏཱིཏི ཝིཙཱརཎཱཡ སམྦྷཝཏོ ‘‘ཨཡཾ པུགྒལོ ཨིམེཧི ནིསྶཡེཧི ཨུཔནིསྶཡཔཙྩཡཾ ལབྷིཏྭཱ ཨིམཱཡ པཊིཔདཱབྷིཉྙཱཡ ཝཊྚདུཀྑཏོ ནིཡྻཱཏཱི’’ཏི ནིཡམེཏྭཱ དསྶེཏུཾ ‘‘ཏཎྷཱཙརིཏོ མནྡོ’’ཏིཨཱདི ཝུཏྟཾ.

ཏཏྠ ¶ ཏཎྷཱཙརིཏོ མནྡོ པུགྒལོ སཏིཔཊྛཱནེཧི ནིསྶཡེཧི ཨུཔནིསྶཡཔཙྩཡཾ ལབྷིཏྭཱ སཏིནྡྲིཡེན སཏིནྡྲིཡཱདྷིཀེན ཨརིཡམགྒེན དུཀྑཱཔཊིཔདཱདནྡྷཱབྷིཉྙཱཡ ཝཊྚདུཀྑཏོ ནིཡྻཱཏི, ཏཎྷཱཙརིཏོ ཨུདཏྟོ པུགྒལོ ཛྷཱནེཧི ནིསྶཡེཧི ཨུཔནིསྶཡཔཙྩཡཾ ལབྷིཏྭཱ སམཱདྷིནྡྲིཡེན སམཱདྷིནྡྲིཡཱདྷིཀེན ཨརིཡམགྒེན དུཀྑཱཔཊིཔདཱཁིཔྤཱབྷིཉྙཱཡ ཝཊྚདུཀྑཏོ ནིཡྻཱཏི ¶ , དིཊྛིཙརིཏོ མནྡོ པུགྒལོ སམྨཔྤདྷཱནེཧི ནིསྶཡེཧི ཨུཔནིསྶཡཔཙྩཡཾ ལབྷིཏྭཱ ཝཱིརིཡིནྡྲིཡེན ཝཱིརིཡིནྡྲིཡཱདྷིཀེན ཨརིཡམགྒེན སུཁཱཔཊིཔདཱདནྡྷཱབྷིཉྙཱཡ ཝཊྚདུཀྑཏོ ནིཡྻཱཏི, དིཊྛིཙརིཏོ ཨུདཏྟོ པུགྒལོ སཙྩེཧི ནིསྶཡེཧི ཨུཔནིསྶཡཔཙྩཡཾ ལབྷིཏྭཱ པཉྙིནྡྲིཡེན པཉྙིནྡྲིཡཱདྷིཀེན ཨརིཡམགྒེན སུཁཱཔཊིཔདཱཁིཔྤཱབྷིཉྙཱཡ ཝཊྚདུཀྑཏོ ནིཡྻཱཏཱིཏི ཡོཛནཱ ཀཱཏབྦཱ. ཨཊྛཀཐཱཡཾ པན –

‘‘ཙཏྟཱརོ པུགྒལཱཏི ཡཐཱཝུཏྟཔཊིཔདཱཝིབྷཱགེནེཝ ཙཏྟཱརོ པཊིཔནྣཀཔུགྒལཱ, ཏཾ པན པཊིཔདཱཝིབྷཱགཾ སདྡྷིཾ ཧེཏུཔཱཡཕལེཧི དསྶེཏུཾ ‘ཏཎྷཱཙརིཏོ’ཏིཨཱདི ཝུཏྟ’’ནྟི (ནེཏྟི. ཨཊྛ. ༦) –

ཝུཏྟཾ. ཏཏྠ ཏཎྷཱཙརིཏོཏི ཏཎྷཱཡ ནིབྦཏྟིཏཾ ཙརིཏཾ ཨེཏསྶ པུགྒལསྶཱཏི ཏཎྷཱཙརིཏོ. མནྡོཏི མནྡིཡཱཡ ཨཝིཛྫཱཡ སམནྣཱགཏོཏི མནྡོ, མོཧཱདྷིཀཔུགྒལོ. ཨུདཏྟོཏི ཨུདཨཏྟོ, ཨུལཱ༹རཔཉྙོཏི ཨཏྠོ. ཨུལཱ༹རཾ ཕལཾ དེཏཱིཏི ཨུདོ, ཀོ སོ? པཝིཙཡོ, ཨཏྟནི ནིབྦཏྟོཏི ཨཏྟོ, ཨུདོ ཨཏྟོ ཡསྶ པུགྒལསྶཱཏི ཨུདཏྟོཏི ཝཙནཏྠོ ཀཱཏབྦོ.

པཋམཱཡ པཊིཔདཱཡ ཧེཏུ ནཱམ ཏཎྷཱཙརིཏཏཱ, མནྡཔཉྙཏཱ ཙ, ཨུཔཱཡོ སཏིནྡྲིཡཾ, སབྦཱསམྤི ཕལཾ ནིཡྻཱནམེཝ. དུཏིཡཱཡ པཊིཔདཱཡ ཧེཏུ ནཱམ ཏཎྷཱཙརིཏཏཱ, ཨུདཏྟཔཉྙཏཱ ཙ, ཨུཔཱཡོ ཝཱིརིཡིནྡྲིཡཾ. ཏཏིཡཱཡ པཊིཔདཱཡ ཧེཏུ ནཱམ དིཊྛིཙརིཏཏཱ, མནྡཔཉྙཏཱ ཙ, ཨུཔཱཡོ སམཱདྷིནྡྲིཡཾ. ཙཏུཏྠིཡཱ པཊིཔདཱཡ ཧེཏུ ནཱམ དིཊྛིཙརིཏཏཱ, ཨུདཏྟཔཉྙཏཱ ཙ, ཨུཔཱཡོ པཉྙིནྡྲིཡནྟི ཧེཏུཔཱཡཕལཱནི དཊྛབྦཱནི.

ཨེཏྠ ཙ དིཊྛིཙརིཏོ ཨུདཏྟོ པུགྒལོ ཨུགྒྷཊིཏཉྙཱུ ནཱམ, དིཊྛིཙརིཏོ མནྡོ ཙེཝ ཏཎྷཱཙརིཏོ ཨུདཏྟོ ཙ ཝིཔཉྩིཏཉྙཱུ ནཱམ, ཏཎྷཱཙརིཏོ མནྡོ པུགྒལོ ནེཡྻོ ནཱམ, ཏསྨཱ ‘‘ཏཏྠ བྷགཝཱ ཨུགྒྷཊིཏཉྙུསྶ པུགྒལསྶ ནིསྶརཎཾ དེསཡཏཱི’’ཏིཨཱདིནཱ ནཡེན ཨུགྒྷཊིཏཉྙུཨཱདིཝེནེཡྻཏྟཡསྶ བྷེདདསྶནེན ནིསྶརཎཾ དེསཡཏི, ‘‘ཨཱདཱིནཝཉྩ ནིསྶརཎཉྩ དེསཡཏི, ཨསྶཱདཉྩ ཨཱདཱིནཝཉྩ ནིསྶརཎཉྩ དེསཡཏཱི’’ཏི དེསནཱཝིབྷཱགོ དསྶིཏོ. ‘‘ཏཏྠ ཙཏསྶོ ¶ པཊིཔདཱ’’ཏིཨཱདིནཱ པཊིཔདཱབྷེདདསྶནེན ‘‘ཏཎྷཱཙརིཏོ མནྡོ པུགྒལོ, ཏཎྷཱཙརིཏོ ཨུདཏྟོ ¶ པུགྒལོ, དིཊྛིཙརིཏོ མནྡོ པུགྒལོ, དིཊྛིཙརིཏོ ཨུདཏྟོ པུགྒལོ’’ཏི ཙཏུདྷཱ བྷིནྣཾ ཏཎྷཱཙརིཏམནྡཱདིཀཾ པུགྒལཙཏུཀྐཾ དསྶིཏནྟི དཊྛབྦཾ.

ཨིདཱནི ཙཏཱུཧི པཊིཔདཱབྷིཉྙཱཧི ཙཏུདྷཱ བྷིནྣཾ ཏཎྷཱཙརིཏམནྡཙཏུཀྐཾ ཨཏྠནཡཡོཛནཱཡ དུཏིཡཱཡ ཝིསཡཾ ཀཏྭཱ དསྶེཏུཾ ‘‘ཨུབྷོ ཏཎྷཱཙརིཏཱ’’ཏིཨཱདི ཝུཏྟཾ. ཏཏྠ ཏཎྷཱཡ སམཱདྷིཔཊིཔཀྑཏྟཱ ཏཎྷཱཙརིཏཱ མནྡཨུདཏྟཱ ཨུབྷོ པུགྒལཱ སམཐཔུབྦངྒམཱཡ ཝིཔསྶནཱཡ ཨུཔནིསྶཡཾ ལབྷིཏྭཱ རཱགཝིརཱགཱཡ མགྒཔཉྙཱཡ ནིཡྻནྟི ཙེཏོཝིམུཏྟིཡཱ སེཀྑཕལབྷཱཝཱཡ. སམྨཱདིཊྛིསཧིཏེནེཝ སམྨཱསམཱདྷིནཱ ནིཡྻཱནཾ བྷཝཏི, ན སམྨཱསམཱདྷིནཱ ཨེཝ, ཏསྨཱ དིཊྛིཙརིཏཱ མནྡཨུདཏྟཱ ཨུབྷོ པུགྒལཱ ཝིཔསྶནཱཔུབྦངྒམེན སམཐེན ཨཝིཛྫཱཝིརཱགཱཡ མགྒཔཉྙཱཡ ནིཡྻནྟི པཉྙཱཝིམུཏྟིཡཱ ཨསེཀྑཕལབྷཱཝཱཡཱཏི ཙཏྟཱརོཔི པུགྒལཱ དུཝིདྷཱཡེཝ བྷཝནྟཱིཏི ཝུཏྟཾ ཧོཏི.

རཱགཝིརཱགཱཡཱཏི རཉྫཏཱིཏི རཱགོ, སོ ཝིརཛྫཏི ཨེཏཱཡཱཏི ཝིརཱགཱ, རཱགསྶ ཝིརཱགཱ རཱགཝིརཱགཱ, ཏཱཡ རཱགཝིརཱགཱཡ. ཙེཏོཏི ཙིཏྟཔྤབྷེདེན ཙ སམཱདྷི ཝུཙྩཏི ཡཐཱ ‘‘ཙིཏྟཾ པཉྙཉྩ བྷཱཝཡ’’ནྟི (སཾ. ནི. ༡.༢༣, ༡༩༢; མི. པ. ༢.༡.༩.). པཊིཔྤསྶདྡྷིཝསེན པཊིཔཀྑཏོ ཝིམུཙྩཏཱིཏི ཝིམུཏྟི, ཙེཏསཱ ཙིཏྟེན སམཱདྷིནཱ ཝིམུཙྩཏཱིཏི ཙེཏོཝིམུཏྟི, ཙེཏོ ཨེཝ ཝཱ ཝིམུཏྟི ཙེཏོཝིམུཏྟི, ཨནཱགཱམིཕལསམཱདྷི. ཨནཱགཱམིཔུགྒལོ ཧི སམཱདྷིསྨིཾ པརིཔཱུརཀཱརིཏཱཡ ཙེཏོཝིམུཏྟིཡཱ ནིཡྻཱཏི. ཨཝིཛྫཱཝིརཱགཱཡཱཏི ཨཝིནྡིཡཾ ཀཱཡདུཙྩརིཏཱདིཾ ཝིནྡཏཱིཏི ཨཝིཛྫཱ, ཝིནྡིཡཾ ཝཱ ཀཱཡསུཙརིཏཱདིཾ ན ཝིནྡཏཱིཏི ཨཝིཛྫཱ ནིརུཏྟིནཡེན. ཝིརཛྫཏི ཨེཏཱཡཱཏི ཝིརཱགཱ, ཨཝིཛྫཱཡ ཝིརཱགཱ ཨཝིཛྫཱཝིརཱགཱ, ཏཱཡ ཨཝིཛྫཱཝིརཱགཱཡ. པཀཱརེཧི ཛཱནཱཏཱིཏི པཉྙཱ, ཝིམུཙྩཏཱིཏི ཝིམུཏྟི, པཉྙཱཡ ཝིམུཙྩཏཱིཏི པཉྙཱཝིམུཏྟི, པཉྙཱ ཨེཝ ཝཱ ཝིམུཏྟི པཉྙཱཝིམུཏྟི, ཨརཧཏྟཕལཔཉྙཱ, ཏཱཡ པཉྙཱཝིམུཏྟིཡཱ.

‘‘ཏེསུ ཀཏམེ པུགྒལཱ ཀེན ཨཏྠནཡེན ཧཱཏབྦཱ’’ཏི ཝཏྟབྦཏོ ‘‘ཏཏྠ ཡེ སམཐཔུབྦངྒམཱཧཱི’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ‘‘ཨུབྷོ ཏཎྷཱཙརིཏཱ’’ཏིཨཱདིནཱ ཝིབྷཏྟེསུ པུགྒལེསུ ཡེ ཨུབྷོ ཏཎྷཱཙརིཏཱ མནྡཨུདཏྟཱ པུགྒལཱ སམཐ…པེ… ནིཡྻནྟི, ཏེ ཨུབྷོ ཏཎྷཱཙརིཏཱ ¶ མནྡཨུདཏྟཱ པུགྒལཱ ནནྡིཡཱཝཊྚེན ནཡེན ཧཱཏབྦཱ གམེཏབྦཱ ནེཏབྦཱ. ཡེ ཨུབྷོ དིཊྛིཙརིཏཱ མནྡཨུདཏྟཱ པུགྒལཱ ཝིཔསྶནཱ…པེ… སམཐེན ནིཡྻནྟི, ཏེ ཨུབྷོ དིཊྛིཙརིཏཱ ¶ མནྡཨུདཏྟཱ པུགྒལཱ སཱིཧཝིཀྐཱིལི༹ཏེན ནཡེན ཧཱཏབྦཱ གམེཏབྦཱ ནེཏབྦཱཏི ཨཏྠོ.

༧. ‘‘ཏཏྠ ཙཏསྶོ པཊིཔདཱ’’ཏིཨཱདིནཱ དེསནཱཧཱརེན དུཀྑཱཔཊིཔདཱབྷེདེན ཏཎྷཱཙརིཏམནྡཱདིབྷེདོ པུགྒལོ ཝིབྷཏྟོ, ཨམྷེཧི ཙ ཉཱཏོ, ‘‘ཏསྶ ཝིབྷཏྟཱནནྟརཾ སྭཱཡཾ དེསནཱཧཱརོ ཀཏྠ སཾཝཎྞེཏབྦེ དྷམྨེ ཀེནཙི ཨཱཀཱརེན སམྦྷཝཏཱི’’ཏི པུཙྪིཏབྦབྷཱཝཏོ ‘‘སྭཱཡཾ ཧཱརོ ཀཏྠ སམྦྷཝཏཱི’’ཏིཨཱདིམཱཧ. ནཝམཀྑཎསམྤནྣསྶ སཏྠཱ ཡཾ དྷམྨཾ དེསེཏི, ཏསྨིཾ སཾཝཎྞེཏབྦེ དྷམྨེ ཡཱ ཝཱིམཾསཱདིཀཱ སུཏམཡཱདིཀཱ ཏིསྶོ པཉྙཱ ཝིབྷཏྟཱ, ཏཱཧི པཉྙཱཧི ཡེ ཨུགྒྷཊིཏཉྙུཨཱདཡོ ཏཡོ པུགྒལཱ ཝིབྷཏྟཱ, ཨིཏི ཝིབྷཏྟཱཀཱརེན ཨཡཾ དེསནཱཧཱརོ སཏྠཱརཱ དེསེཏབྦེ དྷམྨེ སམྦྷཝཏཱིཏི དཊྛབྦོ.

ཏཏྠ སྭཱཡཾ ཧཱརོཏི དེསནཱཧཱརེན པཊིཔདཱཝིབྷཱགེན ཝེནེཡྻཔུགྒལཝིབྷཱགོ དསྶིཏོ, སོ ཨཡཾ དེསནཱཧཱརོ. ཀཏྠ སམྦྷཝཏཱིཏི ཀཏྠ སཾཝཎྞེཏབྦེ དྷམྨེ སཾཝཎྞནཱབྷཱཝེན སམྦྷཝཏཱིཏི. ཡསྶཱཏི ཡོ སོ ཝེནེཡྻོ པཙྩནྟཛཱདཱིཧི ཨཊྛཧི ཨཀྑཎེཧི ཝིམུཏྟོ, སཝནདྷཱརཎཱདཱིཧི ཙ སམྤཏྟཱིཧི སམནྣཱགཏོ, ཏསྶ ཝེནེཡྻསྶ. སཏྠཱཏི སདེཝཀཾ ལོཀཾ སཱསཏི ཨནུསཱསཏཱིཏི སཏྠཱ. དྷམྨནྟི དེསིཏཾ སཾཝཎྞེཏབྦཾ དྷམྨཾ. དེསཡཏཱིཏི སངྑེཔནཡཝིཏྠཱརནཡེཧི བྷཱསཏི. ཨཉྙཏརོཏི བྷགཝཏོ སཱཝཀེསུ ཨེཝཾ དྷམྨཾ དེསེཏུཾ སམཏྠོ སཱཝཀོ. གརུཊྛཱནིཡོཏི གཱརཝསྶ ཋཱནབྷཱུཏེཧི སཱིལསུཏཙཱགཱདིགུཎཝིསེསེཧི ཡུཏྟོ མཱནིཏོ སདྡཧིཏབྦཝཙནོ. སབྲཧྨཙཱརཱིཏི སམཾ, སཧ ཝཱ བྲཧྨཾ སཏྠུསཱསནཾ ཙརཏི པཊིཔཛྫཏཱིཏི སབྲཧྨཙཱརཱི. སདྡྷཾ ལབྷཏི ‘‘ཡོ སཏྠཱ དྷམྨཾ དེསེཏི, སོ སཏྠཱ སམྨཱསམྦུདྡྷོ ཧོཏཱི’’ཏི སཏྠརི, ‘‘སྭཱཀྑཱཏོ ཝཏཱཡཾ དྷམྨོ སཱཏྠོ སབྱཉྫནོ ཨེཀནྟཔརིཔུཎྞོ ཨེཀནྟཔརིསུདྡྷོ ཨཏྠཱཝཧོ ཧིཏཱཝཧོ སུཁཱཝཧོ ཛྷཱནམགྒཕལནིབྦཏྟཀོ, ཨམྷེཧི ཙ སདྡཧིཏབྦོ’’ཏི དེསིཏེ དྷམྨེ ཙ ཨཙལསདྡྷཾ ལབྷཏི, སདྡཧནཾ ཨཏྟནོ སནྟཱནེ པུནཔྤུནཾ ཨུཔྤཱདེཏི. ཏཐཱ ¶ ‘‘ཡོ སཱཝཀོ དྷམྨཾ དེསེཏི, སོ སཱཝཀོ སངྑེཔཏོ ཝཱ ཝིཏྠཱརཏོ ཝཱ དྷམྨཾ དེསེཏུཾ སམཏྠོ ཝཏ གརུཊྛཱནིཡོ སབྲཧྨཙཱརཱི མཱནིཏོ སདྡཧིཏབྦཝཙནོ’’ཏི དེསཀེ སཱཝཀེ ཙ ‘‘ཏཱདིསེན སཱཝཀེན དེསིཏོ ཡོ དྷམྨོ, སོ དྷམྨོ སཱཏྠོ སབྱཉྫནོ ཨེཀནྟཔརིཔུཎྞོ ཨེཀནྟཔརིསུདྡྷོ ཨཏྠཱཝཧོ ཧིཏཱཝཧོ སུཁཱཝཧོ ཛྷཱནམགྒཕལནིབྦཏྟཀོ, ཨམྷེཧི ཙ སདྡཧིཏབྦོ’’ཏི སཱཝཀེན དེསིཏདྷམྨེ ཙ སདྡྷཾ སདྡཧནཾ ཨཏྟནོ སནྟཱནེ པུནཔྤུནཾ ཨུཔྤཱདེཏཱིཏི ཨཏྠོ.

ཏཏྠཱཏི ཏསྨིཾ སདྡཧིཏབྦེ སཏྠཱརཱ དེསིཏདྷམྨེ ཙེཝ སཱཝཀེན དེསིཏདྷམྨེ ཙ སདྡཧནྟསྶ ཝེནེཡྻསྶ ¶ ཡཱ ཝཱིམཾསཱ, ཝཱིམཾསནྟསྶ ཡཱ ཨུསྶཱཧནཱ, ཨུསྶཧནྟསྶ ཡཱ ཏུལནཱ, ཏུལཡནྟསྶ ཡཱ ཨུཔཔརིཀྑཱ, སཱ ཨཡཾ ཝཱིམཾསཱདིཀཱ པཉྙཱ སདྡྷཱནུསཱརེན པཝཏྟནཏོ སུཏམཡཱི པཉྙཱ ནཱམ. ཏཏྠ ཝཱིམཾསནཾ ཝིམཾསཱ, པཱལི༹ཡཱ, པཱལི༹ཨཏྠསྶ ཙ ཝཱིམཾསཱ. ཝཱིམཾསཏཱིཏི ཝཱ ཝཱིམཾསཱ, པདཾ པདནྟརེན, པདཏྠཾ པདཏྠནྟརེན ཝིཙཱརཎཀཱ པཉྙཱ. ཡཐཱ ཙེཏྠ, ཨེཝཾ ཨུསྶཱཧནཱདཱིསུཔི བྷཱཝསཱདྷནཀཏྟུསཱདྷནཱནི ཀཱཏབྦཱནི. ཨུསྶཱཧནཱ ཙ ཨུསྶཱཧེན ཨུཔཏྠམྦྷིཀཱ དྷམྨསྶ དྷཱརཎཔརིཙཡསཱདྷིཀཱ པཉྙཱ ཙ, ན ཝཱིརིཡཾ, ཨེཏྠ ཙ ཡཱ སུཏམཏྟེཡེཝ པཝཏྟཱ, ཝཱིམཾསཱདིབྷཱཝཾ ཨཔྤཏྟཱ ནིཝཏྟཱ, སཱ སུཏམཡཱི པཉྙཱ ན ཧོཏི. ཡཱ ཙ སུཏྭཱ ཝཱིམཾསིཏྭཱ ཨུསྶཱཧནཱདིབྷཱཝཾ ཨཔྤཏྟཱ ནིཝཏྟཱ, ཡཱ ཙ སུཏྭཱ ཝཱིམཾསིཏྭཱ ཨུསྶཧིཏྭཱ ཏུལནཱདིབྷཱཝཾ ཨཔྤཏྟཱ ནིཝཏྟཱ, ཡཱ ཙ སུཏྭཱ ཝཱིམཾསིཏྭཱ ཨུསྶཧིཏྭཱ ཏུལཡིཏྭཱ ཨུཔཔརིཀྑནབྷཱཝཾ ཨཔྤཏྟཱ ནིཝཏྟཱ, སཱཔི པཉྙཱ ན སུཏམཡཱི པཉྙཱ ཧོཏཱིཏི དཊྛབྦཱ. ཡཱ པན སུཏྭཱ སདྡཧནྟསྶ ཝཱིམཾསཱ, ཝཱིམཾསནྟསྶ ཨུསྶཱཧནཱ, ཨུསྶཧནྟསྶ ཏུལནཱ, ཏུལཡནྟསྶ ཨུཔཔརིཀྑཱ ཧོཏི, ཨཡཾ སུཏམཡཱི པཉྙཱ ནཱམ ཧོཏཱིཏི དཊྛབྦཱ.

སུཏམཡཱི པཉྙཱ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, ‘‘ཀཏམཱ ཙིནྟཱམཡཱི པཉྙཱ’’ཏི ཝཏྟབྦབྷཱཝཏོ སུཏམཡིཡཱ པཉྙཱཡ ཝིབྷཛནཱནནྟརཾ ཙིནྟཱམཡིཾ པཉྙཾ ཝིབྷཛིཏུཾ ‘‘ཏཐཱ སུཏེན ནིསྶཡེནཱ’’ཏིཨཱདིམཱཧ. ཏཏྠ སུཏནྟི སུཡྻཏེ པརིཡཏྟིདྷམྨོཏི སུཏོ, སཝནཾ པརིཡཏྟིདྷམྨསྶཱཏི ཝཱ སུཏཾ, དུཝིདྷམྤི སུཏཾ. ནིསྶཡེན ཨུཔནིསྶཱཡཱཏི ཨཏྠོ. ཨིཏྠམྦྷཱུཏལཀྑཎེ ཙེཏཾ ‘‘སུཏེན ནིསྶཡེནཱ’’ཏི ཀརཎཝཙནཾ. ཨེཏྠ པན ‘‘ཨིདཾ པཱཎཱཏིཔཱཏཱདིཝིརམནཾ སཱིལནཊྛེན སཱིལཾ, ཨཡཾ ཨེཀགྒཏཱ སམཱདཧནཊྛེན སམཱདྷི ¶ , ཨིམཱནི བྷཱུཏུཔཱདཱནི རུཔྤནཊྛེན རཱུཔཱནི, ཨིམེ ཕསྶཱདཡོ ནམནཊྛེན ནཱམཱནི, ཨིམེ རཱུཔཱདཡོ པཉྩ དྷམྨཱ རཱསཊྛེན ཁནྡྷཱ’’ཏི ཏེསཾ ཏེསཾ དྷམྨཱནཾ པཱིལ༹ནཱདིསབྷཱཝསྶ ཝཱིམཾསནཱབྷཱུཏཱ པཉྙཱ ཝཱིམཾསཱ ནཱམ. ཏེསཾཡེཝ སཱིལསམཱདྷིཨཱདཱིནཾ སཱིལཏི པཏིཊྛཧཏི ཨེཏྠཱཏི སཱིལནྟིཨཱདིཝཙནཏྠཾ པུཙྪིཏྭཱ སབྷཱགལཀྑཎརསཔཙྩུཔཊྛཱནཔདཊྛཱནཱནཾ ཏུལེཏྭཱ ཝིཡ གཧཎཔཉྙཱ ཏུལནཾ ནཱམ. ཏེསཾཡེཝ སཱིལསམཱདྷིཨཱདཱིནཾ དྷམྨཱནཾ སབྷཱཝལཀྑཎཾ ཨཝིཛཧིཏྭཱ ཨནིཙྩཏཱདུཀྑཏཱདིནམནརུཔྤནཱདིསཔྤཙྩཡསངྑཏཱདིཨཱཀཱརེ ཝིཏཀྐེཏྭཱ ཨུཔཔརིཀྑཎཔཉྙཱ ཨེཝ ཨུཔཔརིཀྑཱ ནཱམཱཏི ཝིསེསཏོ དཊྛབྦོ. སུཏདྷམྨསྶ དྷཱརཎཔརིཙཡཝསེན པཝཏྟནཏོ སུཏམཡཱི པཉྙཱ ཨུསྶཱཧནཱ ཛཱཏཱ ཝིཡ ན ཙིནྟཱམཡཱི པཉྙཱ ཙིནྟིཏསྶ དྷཱརཎཔརིཙཡཝསེན ཨཔྤཝཏྟནཏོཏི ‘‘ཨུསྶཱཧནཱ’’ཏི ན ཝུཏྟཾ.

སུཏམཡཱི པཉྙཱ ཙེཝ ཙིནྟཱམཡཱི པཉྙཱ ཙ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, ‘‘ཀཏམཱ བྷཱཝནཱམཡཱི པཉྙཱ’’ཏི ཝཏྟབྦབྷཱཝཏོ ཀཱརཎབྷཱུཏཱནཾ དྭིནྣཾ སུཏམཡིཙིནྟཱམཡིཔཉྙཱནཾ དསྶནཱནནྟརཾ ¶ ཕལབྷཱུཏཾ བྷཱཝནཱམཡིཾ པཉྙཾ ཝིབྷཛནྟོ ‘‘ཨིམཱཧི དྭཱིཧཱི’’ཏིཨཱདིམཱཧ. ཏཏྠ ཨིམཱཧི དྭཱིཧི པཉྙཱཧཱིཏི སུཏམཡིཙིནྟཱམཡིཔཉྙཱཧི ཀཱརཎབྷཱུཏཱཧི. སུཏམཡིཔཉྙཱཡ ཝཱ ཙིནྟཱམཡིཔཉྙཱཡ ཝཱ ཨུབྷཡཏྠ ཝཱ ཋིཏོཡེཝ ཡོགཱཝཙརོ ཝིཔསྶནཾ ཨཱརབྷཏཱིཏི. མནསིཀཱརསམྤཡུཏྟསྶཱཏི རཱུཔཱརཱུཔེསུ པརིགྒཧཱདིཝསེན སངྑཱརེསུ ཨནིཙྩཏཱདིཝསེན མནསིཀཱརེན སམྨཱ པཀཱརེཧི ཡུཏྟཔྤཡུཏྟསྶ. དིཊྛིཝིསུདྡྷིཀངྑཱཝིཏརཎཝིསུདྡྷིམགྒཱམགྒཉཱཎདསྶནཝིསུདྡྷི- པཊིཔདཱཉཱཎདསྶནཝིསུདྡྷིསམྤཱདནེན ཝིཔསྶནཾ ཨུསྶུཀྐནྟསྶ ཡོགཱཝཙརསྶ སནྟཱནེ ཉཱཎདསྶནཝིསུདྡྷིསངྑཱཏཾ ཡཾ ཨརིཡམགྒཉཱཎཾ ནིབྦཱནཱརམྨཎདསྶནབྷཱུམིཡཾ ཝཱ བྷཱཝནཱབྷཱུམིཡཾ ཝཱ ཨུཔྤཛྫཏི, ཨཡཾ བྷཱཝནཱམཡཱི པཉྙཱཏི ཨཏྠོ དཊྛབྦོ. ཡདིཔི པཋམམགྒཉཱཎཾ པཋམཾ ནིབྦཱནདསྶནཏོ ‘‘དསྶན’’ནྟི ཝུཏྟཾ, བྷཱཝནཱཝསེན པན པཝཏྟནཏོ ‘‘བྷཱཝནཱམཡཱི པཉྙཱ’’ཏི ཝེདིཏབྦཾ. དསྶནབྷཱུམཱིཏི པཋམམགྒཕལཱནི, སེསཱནི ‘‘བྷཱཝནཱབྷཱུམཱི’’ཏི ཝུཙྩནྟི.

༨. ཨམྷཱཀཱཙརིཡ ཏུམྷེཧི ‘‘ཡསྶ སཏྠཱ ཝཱ’’ཏིཨཱདིནཱ སུཏམཡིཔཉྙཱདིཀཱ ཝིབྷཏྟཱ, ཨེཝཾ སཏི སུཏེན ཝིནཱ ཙིནྟཱམཡཱི པཉྙཱ ནཱམ ན བྷཝེཡྻ, མཧཱབོདྷིསཏྟཱནཾ པན སུཏེན ཝིནཱ ཙིནྟཱམཡཱི པཉྙཱ ཧོཏྭེཝཱཏི ཙོདནཾ མནསི ཀཏྭཱ ཏསྨིཾ སངྒཧེཏྭཱ པཀཱརནྟརེན ཝིབྷཛིཏུཾ ‘‘པརཏོགྷོསཱ’’ཏིཨཱདིམཱཧ.

ཏཏྠ ¶ པརཏོགྷོསཱཏི པརཏོ པཝཏྟོ དེསནཱགྷོསོ པཙྩཡོ ཨེཏིསྶཱཏི པརཏོགྷོསཱ. པཙྩཏྟསམུཊྛིཏཱཏི པཏི ཝིསུཾ ཨཏྟནིཡེཝ སམུཊྛིཏཱ. ཡོནིསོམནསིཀཱརཱཏི ཏེསཾ ཏེསཾ ཙིནྟེཏབྦཱནཾ རཱུཔཱདཱིནཾ དྷམྨཱནཾ རུཔྤནནམནཱདིསབྷཱཝཔརིགྒཎྷནཱདིནཱ ཨུཔཱཡེན པཝཏྟམནསིཀཱརཱ ཙིནྟཱམཡཱི པཉྙཱ ནཱམ, ཨིམིནཱ སཱཝཀཱཔི སཱམཉྙཏོ གཧིཏཱ, ཏཐཱཔི ཨུགྒྷཊིཏཉྙུཨཱདཱིནཾཡེཝ ཝུཏྟཏྟཱ སཱཝཀཱ ཨིདྷ གཧིཏཱ, ཏསྨཱ པུརིམནཡོ ཡུཏྟཏརོ. པརཏོཏི དྷམྨདེསཀཏོ པཝཏྟེན དྷམྨདེསནཱགྷོསེན ཧེཏུནཱ ཡཾ ཉཱཎཾ ཨུཔྤཛྫཏི, པཙྩཏྟསམུཊྛིཏེན, ཡོནིསོམནསིཀཱརེན ཙ ཧེཏུནཱ ཡཾ ཉཱཎཾ ཨུཔྤཛྫཏི, ཨཡཾ བྷཱཝནཱཝསེན པཝཏྟནཏོ བྷཱཝནཱམཡཱི པཉྙཱ ནཱམ, ཨིམིནཱ སཱཝཀཱཔི སཱམཉྙཏོ གཧིཏཱ, ཏཐཱཔི ཨུགྒྷཊིཏཉྙུཨཱདཱིནཾཡེཝ ཝུཏྟཏྟཱ སཱཝཀཱ ཨིདྷ གཧིཏཱ, ཏསྨཱ པུརིམནཡོ ཡུཏྟཏརོ. པརཏོཏི དྷམྨདེསཀཏོ པཝཏྟེན དྷམྨདེསནཱགྷོསེན ཧེཏུནཱ ཡཾ ཉཱཎཾ ཨུཔྤཛྫཏི, པཙྩཏྟསམུཊྛིཏེན, ཡོནིསོམནསིཀཱརེན ཙ ཧེཏུནཱ ཡཾ ཉཱཎཾ ཨུཔྤཛྫཏི, ཨཡཾ བྷཱཝནཱཝསེན པཝཏྟནཏོ བྷཱཝནཱམཡཱི པཉྙཱ ནཱམཱཏི ཝིབྷཛིཏྭཱ པཎྜིཏེཧི ཉེཡྻཱཏི ཝིཏྠཱརེན གམྦྷཱིརཏྠཾ ཉཱཏུཾ ཨིཙྪནྟེཧི ‘‘ཨེཝཾ པཊིཔདཱཝིབྷཱགེནཱ’’ཏིཨཱདིནཱ (ནེཏྟི. ཨཊྛ. ༩) ཨཊྛཀཐཱཝཙནེན ཛཱནིཏབྦོ.

སུཏམཡིཔཉྙཱདིཀཱ ¶ ཏིསྶོ པཉྙཱ ཨཱཙརིཡེན ནཱནཱནཡེཧི ཝིབྷཏྟཱ, ཨམྷེཧི ཙ ཉཱཏཱ, ‘‘ཏཱསུ ཡསྶ ཨེཀཱ ཝཱ དྭེ ཝཱ པཉྙཱ ཨཏྠི, སོ པུགྒལོ ཀོནཱམོ, ཡསྶ ཨེཀཱཔི ནཏྠི, སོ པུགྒལོ ཀོནཱམོ’’ཏི པུཙྪིཏབྦབྷཱཝཏོ ཡསྶ ཨཡཾ པཉྙཱ, ཨིམཱ ཝཱ ཨཏྠི, སོ པུགྒལོ ཨིཏྠནྣཱམོ, ཡསྶ ནཏྠི, སོ པུགྒལོ ཨིཏྠནྣཱམོཏི པཊིཔདཱཔཉྙཱཔྤབྷེདེན པུགྒལཾ ཝིབྷཛིཏུཾ ‘‘ཡསྶ ཨིམཱ’’ཏིཨཱདི ཝུཏྟཾ.

ཏཏྠ ཡསྶ ཨཏིཏིཀྑཔཉྙསྶ སུཏམཡཱི པཉྙཱ ཙེཝ ཙིནྟཱམཡཱི པཉྙཱ ཙ ཨིམཱ དྭེ པཉྙཱ ཨཏྠི, ཨཡཾ ཨཏིཏིཀྑཔཉྙོ ཨུདྡེསམཏྟེནེཝ ཛཱནནཏོ ཨུགྒྷཊིཏཉྙཱུ ནཱམ. ཡསྶ ནཱཏིཏིཀྑཔཉྙསྶ ཨུདྡེསནིདྡེསེཧི སུཏམཡཱི པཉྙཱ ཨཏྠི, ཙིནྟཱམཡཱི པཉྙཱ ནཏྠི, ཨཡཾ ནཱཏིཏིཀྑཔཉྙོ ཨུདྡེསནིདྡེསེཧི ཛཱནནཏོ ཝིཔཉྩིཏཉྙཱུ ནཱམ. ཡསྶ མནྡཔཉྙསྶ ཨུདྡེསནིདྡེསེཧི ནེཝ སུཏམཡཱི པཉྙཱ ཨཏྠི, ན ཙིནྟཱམཡཱི པཉྙཱ ཙ, ཨཡཾ མནྡཔཉྙོ ¶ ཨུདྡེསནིདྡེསཔཊིནིདྡེསེཧི ཛཱནནཏོ ནིརཝསེསཝིཏྠཱརདེསནཱཡ ནེཏབྦཏོ ནེཡྻོ ནཱམཱཏི. ཨཊྛཀཐཱཡཾ པན ‘‘ཨིདཱནི ཡདཏྠཾ ཨིམཱ པཉྙཱ ཨུདྡྷཊཱ, ཏམེཝ ཝེནེཡྻཔུགྒལཝིབྷཱགཾ ཡོཛེཏྭཱ དསྶེཏུཾ ‘ཡསྶཱ’ཏིཨཱདི ཝུཏྟ’’ནྟིཨཱདི (ནེཏྟི. ཨཊྛ. ༨) ཝུཏྟཾ.

༩. ‘‘ཏཏྠ བྷགཝཱ ཨུགྒྷཊིཏཉྙུསྶཱ’’ཏིཨཱདིནཱ དེསནཾ ཝིབྷཱཝེཏི, ‘‘ཏཏྠ ཙཏསྶོ པཊིཔདཱ’’ཏིཨཱདིནཱ པཊིཔདཱཝིབྷཱགེཧི, ‘‘སྭཱཡཾ ཧཱརོ’’ཏིཨཱདིནཱ ཉཱཎཝིབྷཱགེཧི ཙ དེསནཱབྷཱཛནཾ ཝེནེཡྻཏྟཡཾ ཨཱཙརིཡེན ཝིབྷཏྟཾ, ཨམྷེཧི ཙ ཉཱཏཾ, ‘‘ཡཱཡ དེསནཱཔཱལི༹ཡཱ དེསནཱཧཱརཾ ཡོཛེཏུཾ པུབྦེ ‘དྷམྨཾ ཝོ, བྷིཀྑཝེ, དེསེསྶཱམཱི’ཏིཨཱདིནཱ དེསནཱཧཱརསྶ ཝིསཡབྷཱཝེན ཡཱ པཱལི༹དེསནཱ ནིཀྑིཏྟཱ, སཱ པཱལི༹དེསནཱ དེསནཱཧཱརེན ནིདྡྷཱརིཏེསུ ཨསྶཱདཱདཱིསུ ཨཏྠེསུ ཀིམཏྠཾ དེསཡཏཱི’’ཏི པུཙྪིཏབྦཏྟཱ ‘‘ཨིམཾ ཨཏྠཾ དེསཡཏཱི’’ཏི ནིཡམེཏྭཱ དསྶེཏུཾ ‘‘སཱཡཾ དྷམྨདེསནཱ’’ཏིཨཱདི ཨཱརདྡྷཾ.

ཏཏྠ སཱཡཾ དྷམྨདེསནཱཏི ཡཱ དྷམྨདེསནཱ ཨཱདིཀལྱཱཎཱདིཀཱ པུབྦེ དེསནཱཧཱརསྶ ཝིསཡབྷཱཝེན ནིཀྑིཏྟཱ, སཱཡཾ དྷམྨདེསནཱ ཨསྶཱདཱདཱིསུ ཀིམཏྠཾ དེསཡཏཱིཏི ཀཐེཏུཀཱམཏཱཡ པུཙྪཏི, པུཙྪིཏྭཱ ‘‘ཙཏྟཱརི སཙྩཱནི དེསཡཏཱི’’ཏི ཝིསྶཛྫེཏི, ཏཱནི སརཱུཔཏོ དསྶེཏུཾ ‘‘དུཀྑཾ སམུདཡཾ ནིརོདྷཾ མགྒ’’ནྟི ཝུཏྟཾ. པཝཏྟིཔཝཏྟཀནིཝཏྟིནིཝཏྟནུཔཱཡབྷཱཝེན ཨཝིཔརཱིཏབྷཱཝཏོ ‘‘སཙྩཱནཱི’’ཏི ཝུཏྟཱནི.

ཡསྶཾ དེསནཱཡཾ སཙྩཱནི དེསནཱཧཱརེན ནིདྡྷཱརིཏཱནི, སཱ དེསནཱ ཙཏྟཱརི སཙྩཱནི དེསཡཏཱིཏི ¶ ཡུཏྟཾ ཧོཏུ. ཡསྶཾ དེསནཱཡཾ ཨསྶཱདཱདཡོ ནིདྡྷཱརིཏཱ, སཱ དེསནཱ ཙཏྟཱརི སཙྩཱནི དེསཡཏཱིཏི ན སཀྐཱ ཝཏྟུཾ. ཧེཊྛཱ ཙ ཨསྶཱདཱདཡོ ནིདྡྷཱརིཏཱ, ཏསྨཱ ‘‘ཨསྶཱདཱདཡོ’’ཏིཔི ཝཏྟབྦནྟི ཙོདནཾ མནསི ཀཏྭཱ ‘‘ཨཱདཱིནཝོ ཕལཉྩ དུཀྑ’’ནྟིཨཱདི ཝུཏྟཾ. དེསནཱཧཱརེན སཾཝཎྞནཱནཡེན དེསནཱཡཾ ནིདྡྷཱརིཏོ ཨཱདཱིནཝོ ཙེཝ ཕལཉྩ དུཀྑསཙྩཾ ཧོཏི, ཨསྶཱདོ སམུདཡསཙྩཾ, ནིསྶརཎཾ ནིརོདྷསཙྩཾ, ཨུཔཱཡོ ཙེཝ ཨཱཎཏྟི ཙ མགྒསཙྩཾ ཧོཏི, ཏསྨཱ ‘‘ཙཏྟཱརི སཙྩཱནི དེསཡཏཱི’’ཏི ཝཏྟབྦམེཝཱཏི.

ཏཎྷཱཝཛྫཱ ¶ ཏེབྷཱུམཀདྷམྨཱ དུཀྑཾ, ཏེ ཙ ཨནིཙྩཱདཱིཧི པཱིལི༹ཏཏྟཱ ཨཱདཱིནཝཱཡེཝ. ཕལནྟི དེསནཱཡ ཕལཾ ལོཀིཡཾ, ན ལོཀུཏྟརཾ, ཏསྨཱ དུཀྑནྟི ཝཏྟབྦམེཝ. ཨསྶཱདོཏི ཏཎྷཱསྶཱདསྶ གཧིཏཏྟཱ ‘‘ཨསྶཱདོ སམུདཡོ’’ཏི ཙ ཝཏྟབྦཾ. ཨསྶཱདེཀདེསོ དུཀྑམེཝ, ཨསྶཱདེཀདེསོ དུཀྑཉྩེཝ སམུདཡོ ཙ. སཧ ཝིཔསྶནཱཡ ཨརིཡམགྒོ ཙ བྷགཝཏོ ཨཱཎཏྟི ཙ དེསནཱཡ ཕལཱདྷིགམསྶ ཨུཔཱཡབྷཱཝཏོ ‘‘ཨུཔཱཡོ, ཨཱཎཏྟི ཙ མགྒོ’’ཏི ཝུཏྟཾ, ནིསྶརཎེཀདེསོཔི མགྒོཏི དཊྛབྦོ. ‘‘ཨིམཱནི ཙཏྟཱརི སཙྩཱནི ཡཱ དེསནཱ ཝིསེསཏོ དེསཡཏི, ཀཏམཱ སཱ’’ཏི པུཙྪིཏབྦཏྟཱ ཝིསེསཾ ནིཡམེཏྭཱ དསྶེཏུཾ ‘‘ཨིམཱནི ཙཏྟཱརི སཙྩཱནི ཨིདཾ དྷམྨཙཀྐ’’ནྟི ཝུཏྟཾ. ཨིདཾ ཝུཙྩམཱནཾ དྷམྨཙཀྐཾ ཨིམཱནི ཙཏྟཱརི སཙྩཱནི ཝིསེསཏོ དེསཡཏཱིཏི ཡོཛནཱ ཀཱཏབྦཱ.

‘‘ཡཱ དེསནཱ ཨིམཱནི ཙཏྟཱརི སཙྩཱནི ཝིསེསཏོ དེསཡཏི, ཏསྶཱ དེསནཱཡ དྷམྨཙཀྐབྷཱཝཾ ཀིཾ བྷགཝཱ ཨཱཧཱ’’ཏི ཝཏྟབྦབྷཱཝཏོ ‘‘ཡཐཱཧ བྷགཝཱ’’ཏིཨཱདི ཝུཏྟཾ. ཏཏྠ ‘‘ཛཱཏིཔི དུཀྑཱ’’ཏིཨཱདིཝཙནཏོ (མཧཱཝ. ༡༤) ཏཎྷཱཝཛྫཾ ཛཱཏིཨཱདིཀཾ ཏེབྷཱུམཀདྷམྨཛཱཏཾ དུཀྑསྶ ཨདྷིཊྛཱནབྷཱཝེན, དུཀྑདུཀྑཱདིབྷཱཝེན ཙ ‘‘དུཀྑ’’ནྟི ཝུཏྟཾ. མེཏི མཡཱ པཝཏྟིཏནྟི ཡོཛནཱ. བྷིཀྑཝེཏི སཝནེ ཨུསྶཱཧཾ ཛནེཏུཾ ཨཱལཔཏི. བཱརཱཎསིཡནྟི བཱརཱཎསཱིནགརསྶ ཨཝིདཱུརེ. ཨིསིཔཏནེཏི སཱིལཀྑནྡྷཱདཱིནཾ ཨིསནཏོ གཝེསནཏོ ‘‘ཨིསཱི’’ཏི ཝོཧརིཏཱནཾ པཙྩེཀབུདྡྷཱནཾ པཏནཊྛཱནེ. མིགདཱཡེཏི མིགཱནཾ ཨབྷཡདཱནཊྛཱནེ ཀཱརིཏེ ཨསྶམེཝ.

ཨནུཏྟརནྟི ཨུཏྟརིཏརཱབྷཱཝེན ཨནུཏྟརཾ ཨནཏིསཡཾ. དྷམྨཙཀྐནྟི སཏིཔཊྛཱནཱདིཀེ སབྷཱཝདྷཱརཎཱདིནཱ ཨཏྠེན དྷམྨོ ཙེཝ པཝཏྟནཊྛེན ཙཀྐཉྩཱཏི དྷམྨཙཀྐཾ. ཨཔྤཊིཝཏྟིཡནྟི ཨཔྤཊིསེདྷནཱིཡཾ. ཀསྨཱ? ཛནཀསྶ བྷགཝཏོ དྷམྨིསྶརཏྟཱ སམྨཱསམྦུདྡྷཏྟཱ, ཛཉྙསྶ ཙ ཨནུཏྟརཏྟཱ ཀོཎྜཉྙཱདཱིནཉྩེཝ ཨཊྛཱརསབྲཧྨཀོཊིཡཱ ཙ ཙཏུསཙྩཔཊིཝེདྷསཱདྷནཏོ ཙ. ‘‘ཀེན ཨཔྤཊིཝཏྟིཡ’’ནྟི པུཙྪིཏབྦཏྟཱ ‘‘སམཎེན ཝཱ’’ཏིཨཱདིམཱཧ. ཏཏྠ སམཎེནཱཏི པབྦཛྫམཏྟཱུཔགཏེན ¶ . བྲཱཧྨཎེནཱཏི ཛཱཏིབྲཱཧྨཎེན. པརམཏྠཱནཉྷི སམཎབྲཱཧྨཎཱནཾ པཊིསེདྷནེ ཙིཏྟུཔྤཱདཱནུཔྤཛྫནམྤི ནཏྠི. དེཝེནཱཏི ཚཀཱམཱཝཙརདེཝེན. བྲཧྨུནཱཏི རཱུཔབྲཧྨཱ གཧིཏཱ. ‘‘སམཎེན ཝཱ ¶ …པེ… བྲཧྨུནཱ’’ཏི ཨེཏྟཀམེཝ ཨཝཏྭཱ‘‘ཀེནཙཱི’’ཏི ཝུཏྟཝཙནེན ཨཝསེསཁཏྟིཡགཧཔཏིཔརིསཛནཱ སངྒཧིཏཱ. ཏསྨཱ ཁཏྟིཡབྲཱཧྨཎགཧཔཏིསམཎཙཱཏུམཧཱརཱཛིཀཏཱཝཏིཾསམཱརབྲཧྨཔརིསཱ ཨཊྛཝིདྷཱཔི པཊིསེདྷེཏུཾ ཨསམཏྠཱཡེཝཱཏི ཝེདིཏབྦཱ. ལོཀསྨིནྟི སཏྟསམཱུཧེ དྷམྨཙཀྐཱདྷཱརེ.

‘‘དྭཱདས པདཱནི སུཏྟ’’ནྟི གཱཐཱནུརཱུཔཾ དྷམྨཙཀྐསུཏྟེ པདཱནི ཝིབྷཛནྟོ ‘‘ཏཏྠ ཨཔརིམཱཎཱ’’ཏིཨཱདིམཱཧ. ཏཏྠ ཏཏྠཱཏི དྷམྨཙཀྐདེསནཱཡཾ (སཾ. ནི. ༥.༡༠༨༡; མཧཱཝ. ༡༣ ཨཱདཡོ; པཊི. མ. ༢.༣༠). ‘‘ཨཔརིམཱཎཱ ཨཀྑརཱ ཨཔརིམཱཎཱ པདཱ’’ཏི ཨཝཏྭཱ ‘‘ཨཔརིམཱཎཱ པདཱ ཨཔརིམཱཎཱ ཨཀྑརཱ’’ཏི ཨུཔྤཊིཔཱཊིཝཙནེཧི ཡེབྷུཡྻེན པདསངྒཧིཏཱནཱིཏི དསྶེཏི. པདཱ, ཨཀྑརཱ, བྱཉྫནཱཏི ཙ ལིངྒཝིཔལླཱསཱནཱིཏི དཊྛབྦཱནི. ཨེཏསྶེཝ ཨཏྠསྶཱཏི ཝཏྟབྦཱཀཱརསྶ ཙཏུསཙྩསངྑཱཏསྶ ཨཏྠསྶེཝ སངྐཱསནཱ པཀཱསནཱ པཀཱསནཱཀཱརོ པཉྙཏྟཱཀཱརོཏི ཨཱཀཱརཝནྟཨཱཀཱརསམྦནྡྷེ སཱམིཝཙནཾ. སངྐཱསནཱཀཱརོཏི ཙ སངྐཱསནཱིཡསྶ ཨཏྠསྶ ཨཱཀཱརོ. ཨེས ནཡོ སེསེསུཔི. ཨིཏིཔཱིཏི ཨིཏི ཨིམིནཱ པཀཱརེནཔི, ཨིམིནཱ པཀཱརེནཔི ཨིདཾ ཛཱཏིཨཱདིཀཾ དུཀྑཾ ཨརིཡསཙྩནྟི ཝེདིཏབྦཾ.

ཨཡནྟི ཀཱམཏཎྷཱདིབྷེདཱ ཨཡཾ ཏཎྷཱ. དུཀྑསམུདཡོཏི དུཀྑནིབྦཏྟནསྶ ཧེཏུབྷཱཝཏོ དུཀྑསམུདཡོ. ཨཡནྟི སབྦསངྑཏཏོ ནིསྶཊཱ ཨཡཾ ཨསངྑཏཱ དྷཱཏུ. དུཀྑནིརོདྷོཏི ཛཱཏིཨཱདིཔྤབྷེདསྶ དུཀྑསྶ ཨནུཔྤཱདནནིརོདྷཔཙྩཡཏྟཱ དུཀྑནིརོདྷོ. ཨཡནྟི སམྨཱདིཊྛཱདིཀོ ཨཊྛངྒིཀོ ཨརིཡོ མགྒོ. དུཀྑནིརོདྷབྷཱུཏཾ ནིབྦཱནཾ ཨཱརམྨཎཀརཎཝསེན གཏཏྟཱ, དུཀྑནིརོདྷཔྤཏྟིཡཱ པཊིཔདཱབྷཱཝཏོ ཙ དུཀྑནིརོདྷགཱམིནཱི པཊིཔདཱ. སེསཾ ཝུཏྟནཡམེཝ.

‘‘ཏཏྠ ཨཔརིམཱཎཱ’’ཏིཨཱདིནཱ བྱཉྫནཔདཨཏྠཔདཱནི ཝིབྷཛིཏྭཱ ཏེསཾ ཨཉྙམཉྙཾ ཝིསཡིཝིསཡབྷཱཝེན སམྦནྡྷབྷཱཝཾ དསྶེཏུཾ ‘‘ཏཏྠ བྷགཝཱ ཨཀྑརེཧི སངྐཱསེཏཱི’’ཏིཨཱདི ཝུཏྟཾ. ཨཐ ཝཱ བྷགཝཱ ཀིཾ སཱམཉྙེཧི ཨཀྑརཱདཱིཧི སངྐཱསེཏི ཝཱ པཀཱསེཏི ཝཱ, ཨུདཱཧུ ཡཐཱརཧཾ སངྐཱསེཏི པཀཱསེཏཱིཏིཨཱདིཝིཙཱརཎཱཡ སམྦྷཝཏོ ཝིསཡཝིསཡིབྷཱཝེན སམྦནྡྷབྷཱཝཾ ནིཡམེཏྭཱ དསྶེཏུཾ ‘‘ཏཏྠ བྷགཝཱ ཨཀྑརེཧི སངྐཱསེཏཱི’’ཏིཨཱདི ཝུཏྟཾ. ཏཏྠ ‘‘ཨཀྑརེཧི སངྐཱསེཏཱི’’ཏི ཀསྨཱ ཨེཝཾ ཝུཏྟཾ, ནནུ ‘‘དུཀྑསཙྩ’’ནྟིཨཱདཱིསུ ¶ པདེནེཝ དུཀྑསཙྩཏྠཏྟཱདིཀོ སངྐཱསིཏབྦོཏི? སཙྩཾ, པདཱཝཡཝསྶ པན ཨཀྑརསྶ གཧཎམུཁེནེཝ ཨཀྑརསམུདཱཡསྶཔི པདསྶ ¶ གཧཎཾ ཧོཏི, པདེ གཧིཏེ ཙ དུཀྑསཙྩཏྠཱདིཀཱཝབོདྷོ ཧོཏྭེཝ, ཨེཝཾ སཏི པདེནེཝ སིཛ྄ཛྷནཏོ ཨཀྑརོ ཝིསུཾ ན གཧེཏབྦོཏི? ན, དུཀྑསཙྩཏྠཱདིཀཱཝབོདྷསྶ ཝིསེསུཔྤཏྟིབྷཱཝཏོ. དུ-ཨིཏི ཨཀྑརེན ཧི ཨནེཀུཔདྡཝཱདྷིཊྛཱནབྷཱཝེན ཀུཙྪིཏཏྠོ གཧིཏོ, ཁ-ཨིཏི ཨཀྑརེན དྷུཝསུབྷསུཁཏྟབྷཱཝཝིརཧེན ཏུཙྪཏྠོཏི ཨེཝམཱདིཀཱཝབོདྷསྶ ཝིསེསུཔྤཏྟི བྷཝཏི. ཏེན ཝུཏྟཾ ‘‘པདཏྠགཧཎསྶ ཝིསེསཱདྷཱནཾ ཛཱཡཏཱི’’ཏི (ནེཏྟི. ཨཊྛ. ༩). པདཔརིཡོསཱནེ ཝཱཀྱཔརིཡོསཱནཱབྷཱཝཏོ ཨཀྑརེཧི སཾཁིཏྟེན དཱིཔིཡམཱནོ ཨཏྠོ པདེཧི པཀཱསིཏོཝཱཏི ཝུཏྟཾ ‘‘པདེཧི པཀཱསེཏཱི’’ཏི. ཝཱཀྱཔརིཡོསཱནེ པན སངྐཱསིཏོ པཀཱསིཏོ ཨཏྠོ ཝིཝརིཏོ ཝིཝཊོ ཀཏོཝཱཏི ཝུཏྟཾ. ‘‘བྱཉྫནེཧི ཝིཝརཏཱི’’ཏི. པཀཱརེཧི ཙ ཝཱཀྱབྷེདེ ཀཏེ སོ ཨཏྠོ ཝིབྷཏྟོ ནཱམཱཏི ཝུཏྟཾ ‘‘ཨཱཀཱརེཧི ཝིབྷཛཏཱི’’ཏི. ཝཱཀྱཱཝཡཝཱནཾ པདཱནཾ པཙྩེཀཾ ནིབྦཙནཝིབྷཱགེ ཀཏེ སོ ཨཏྠོ པཱཀཊོ ཀཏོཝཱཏི ཝུཏྟཾ ‘‘ནིརུཏྟཱིཧི ཨུཏྟཱནཱིཀརོཏཱི’’ཏི. ཀཏནིབྦཙནེཧི ཝཱཀྱཱཝཡཝེཧི ཝིཏྠཱརཝསེན ནིརཝསེསཏོ དེསིཏེཧི ཝེནེཡྻསཏྟཱནཾ ཙིཏྟེ པརིསམནྟཏོ ཏོསནཾ ཧོཏི, པཉྙཱཏེཛནཉྩཱཏི ཨཱཧ ‘‘ནིདྡེསེཧི པཉྙཔེཏཱི’’ཏི.

‘‘བྷགཝཱ ཨཀྑརེཧི སངྐཱསེཏཱི’’ཏིཨཱདཱིསུ ‘‘བྷགཝཱ ཨེཝཱ’’ཏི ཝཱ ‘‘ཨཀྑརེཧི ཨེཝཱ’’ཏི ཝཱ ཨཝདྷཱརཎེ ཡོཛིཏེ ‘‘སཱཝཀོ ན སངྐཱསེཏི, པདཱདཱིཧི ན སངྐཱསེཏཱི’’ཏི ཨཏྠོ བྷཝེཡྻ, སཱཝཀོ ཙ སངྐཱསེཏི, པདཱདཱིཧི ཙ སངྐཱསེཏི. ཀཏྠ ཨཝདྷཱརཎཾ ཡོཛེཏབྦནྟི ཙེ? ‘‘བྷགཝཱ ཨཀྑརེཧི སངྐཱསེཏིཡེཝཱ’’ཏི ཨཝདྷཱརཎཾ ཡོཛེཏབྦཾ. ཨེཝཉྷི སཏི སཱཝཀེན སངྐཱསིཏོ ཝཱ པདཱདཱིཧི སངྐཱསིཏོ ཝཱ ཨཏྠོ སངྒཧིཏོ ཧོཏི. ཨཏྠཔདཱནཉྩ ཨཀྑརཱདིནཱནཱཝིསཡཏཱ སིདྡྷཱ ཧོཏི. ཏེན ཨེཀཱནུསནྡྷིཀེ སུཏྟེ ཚལེ༹ཝ ཨཏྠཔདཱནི ནིདྡྷཱརེཏབྦཱནི, ཨནེཀཱནུསནྡྷིཀེ སུཏྟེ ཨནུསནྡྷིབྷེདེན ཝིསུཾ ཝིསུཾ ཚ ཚ ཨཏྠཔདཱནི ནིདྡྷཱརེཏབྦཱནི.

‘‘ཚསུ ¶ བྱཉྫནཔདེསུ ཀཏམེན བྱཉྫནཔདེན ཀཏམཾ ཀིཙྩཾ སཱདྷེཏཱི’’ཏི པུཙྪིཏབྦཏྟཱ ‘‘ཨིམིནཱ ཨིདཾ ཀིཙྩཾ, ཨིམིནཱ ཨིདཾ ཀིཙྩཾ སཱདྷེཏཱི’’ཏི ནིཡམེཏྭཱ དསྶེཏུཾ ‘‘ཏཏྠ བྷགཝཱ ཨཀྑརེཧི ཙ པདེཧི ཙ ཨུགྒྷཊེཏཱི’’ཏིཨཱདིམཱཧ. ཏཏྠ ཏཏྠཱཏི ཨཀྑརཱདཱིསུ བྱཉྫནཔདེསུ. ཨུགྒྷཊེཏཱིཏི ཨུགྒྷཊནཀིཙྩཾ སཱདྷེཏཱིཏི ཨཏྠོ. ཀིཉྩཱཔི དེསནཱཝ ཨུགྒྷཊནཀིཙྩཾ སཱདྷེཏི, བྷགཝཱ པན དེསནཱཛནཀཏྟཱ ཨུགྒྷཊནཀིཙྩཾ སཱདྷེཏཱིཏི ཝུཙྩཏི. སེསེསུཔི ཨེཝམཏྠོ དཊྛབྦོ.

‘‘ཨུགྒྷཊནཀིཙྩསཱདྷིཀཱ དེསནཱཡེཝ ཀིཾ ཝིཔཉྩནཝིཏྠཱརཎཀིཙྩསཱདྷིཀཱ དེསནཱཛནཀཏྟཱ, ཨུདཱཧུ ཝིསུཾ ཝིསུཾ ཀིཙྩསཱདྷིཀཱ ཨཉྙཱ’’ཏི པུཙྪིཏབྦབྷཱཝཏོ ཝིསུཾ ཝིསུཾ ཀིཙྩསཱདྷིཀཱ ཨཉྙཱ ¶ དེསནཱཏི ནིཡམེཏྭཱ དསྶེཏུཾ ‘‘ཏཏྠ ཨུགྒྷཊནཱ ཨཱདཱི’’ཏིཨཱདིམཱཧ. ཨཐ ཝཱ ‘‘ཀཏམཱ ཨུགྒྷཊནཱ, ཀཏམཱ ཝིཔཉྩནཱ, ཀཏམཱ ཝིཏྠཱརཎཱ’’ཏི པུཙྪིཏབྦཏྟཱ ཝུཏྟཾ ‘‘ཏཏྠ ཨུགྒྷཊནཱ ཨཱདཱི’’ཏིཨཱདི. ཏཏྠ ཏཏྠཱཏི ཨུགྒྷཊནཱདིཀིཙྩསཱདྷིཀཱསུ དེསནཱསུ. ཨུགྒྷཊནཱཏི ཨུགྒྷཊནཀིཙྩསཱདྷིཀཱ དེསནཱ ཨཱདིདེསནཱ ཧོཏི. ཝིཔཉྩནཱཏི ཝིཔཉྩནཀིཙྩསཱདྷིཀཱ དེསནཱ མཛ྄ཛྷེདེསནཱ ཧོཏི. ཝིཏྠཱརཎཱཏི ཝིཏྠཱརཎཀིཙྩསཱདྷིཀཱ དེསནཱ པརིཡོསཱནདེསནཱ ཧོཏཱིཏི ཨཏྠོ དཊྛབྦོ.

‘‘ཨུགྒྷཊིཡནྟོ ཨུདྡིསིཡམཱནོ པརིཡཏྟིཨཏྠབྷཱུཏོ དྷམྨཝིནཡོ ཀཏམཾ པུགྒལཾ ཝིནེཏི, ཝིཔཉྩིཡནྟོ ནིདྡིསིཡམཱནོ པརིཡཏྟིཨཏྠབྷཱུཏོ དྷམྨཝིནཡོ ཀཏམཾ པུགྒལཾ ཝིནེཏི, ཝིཏྠཱརིཡནྟོ པཊིནིདྡིསིཡམཱནོ པརིཡཏྟིཨཏྠབྷཱུཏོ དྷམྨཝིནཡོ ཀཏམཾ པུགྒལཾ ཝིནེཏཱི’’ཏི པུཙྪིཏབྦཏྟཱ ‘‘སོཡཾ དྷམྨཝིནཡོ’’ཏིཨཱདིམཱཧ. ཨཊྛཀཐཱཡཾ པན ‘‘ཨེཝཾ ‘ཨཀྑརེཧི སངྐཱསེཏཱི’ཏིཨཱདཱིནཾ ཚནྣཾ བྱཉྫནཔདཱནཾ བྱཱཔཱརཾ དསྶེཏྭཱ ཨིདཱནི ཨཏྠཔདཱནཾ བྱཱཔཱརཾ དསྶེཏུཾ ‘སོཡཾ དྷམྨཝིནཡོ’ཏིཨཱདི ཝུཏྟ’’ནྟི (ནེཏྟི. ཨཊྛ. ༩) ཝུཏྟཾ.

ཏཏྠ ཨུགྒྷཊིཡནྟོ ཨུདྡིསིཡམཱནོ ཨུདྡེསཔརིཡཏྟིཨཏྠབྷཱུཏོ སོ ཨཡཾ དྷམྨཝིནཡོ ཨུགྒྷཊིཏཉྙུཔུགྒལཾ ཝིནེཏི, ཏེན ཨུགྒྷཊིཏཉྙུནོ པུགྒལསྶ ཝིནཡནེན ནཾ ཨུགྒྷཊིཡནྟཾ ཨུདྡིསིཡམཱནཾ ཨུདྡེསཔརིཡཏྟིཨཏྠབྷཱུཏཾ ཝིནཡཾ ‘‘ཨཱདིཀལྱཱཎོ’’ཏི ཨཱཧུ. ཝིཔཉྩིཡནྟོ ནིདྡིསིཡམཱནོ ནིདྡེསཔརིཡཏྟིཨཏྠབྷཱུཏོ སོ ཨཡཾ དྷམྨཝིནཡོ ཝིཔཉྩིཏཉྙུཔུགྒལཾ ཝིནེཏི, ཏེན ¶ ཝིཔཉྩིཏཉྙུཔུགྒལསྶ ཝིནཡནེན ནཾ ཝིཔཉྩིཡནྟཾ ནིདྡིསིཡམཱནཾ ནིདྡེསཔརིཡཏྟིཨཏྠབྷཱུཏཾ ཝིནཡཾ ‘‘མཛ྄ཛྷེཀལྱཱཎོ’’ཏི ཨཱཧུ. ཝིཏྠཱརིཡནྟོ པཊིནིདྡིསིཡམཱནོ པཊིནིདྡེསཔརིཡཏྟིཨཏྠབྷཱུཏོ སོ ཨཡཾ དྷམྨཝིནཡོ ནེཡྻཾ པུགྒལཾ ཝིནེཏི ཝིནཡནཾ ཛནེཏི, ཏེན ནེཡྻསྶ པུགྒལསྶ ཝིནཡནེན ནཾ ཝིཏྠཱརིཡནྟཾ པཊིནིདྡིསིཡམཱནཾ པཊིནིདྡེསཔརིཡཏྟིཨཏྠབྷཱུཏཾ ཝིནཡཾ ‘‘པརིཡོསཱནཀལྱཱཎོ’’ཏི ཨཱཧཱུཏི ཡོཛནཏྠོཏི དཊྛབྦོ.

ཨཐ ཝཱ ‘‘ཨཀྑརེཧི སངྐཱསེཏཱི’’ཏིཨཱདིནཱ ཚནྣཾ པདཱནཾ བྱཱཔཱརོ དསྶིཏོ, ཨེཝཾ སཏི ཨཏྠོ ནིབྱཱཔཱརོ སིཡཱ, ཨཏྠོ ཙ ནིཔྤརིཡཱཡཏོ སབྱཱཔཱརོཡེཝཱཏི ཙོདནཾ མནསི ཀཏྭཱ ཨཱཧ ‘‘སོཡཾ དྷམྨཝིནཡོ’’ཏིཨཱདི. ཨེཏེན ཨཏྠོཡེཝ མུཁྱཏོ ཝེནེཡྻཏྟཡསྶ ཝིནཡནཀིཙྩཾ སཱདྷེཏི, ཨཏྠཝཱཙཀོ པན སདྡོ ཋཱནཱུཔཙཱརཏོ ཝེནེཡྻཏྟཡསྶ ཝིནཡནཀིཙྩཾ སཱདྷེཏཱིཏི དསྶེཏི. པདཔརམསྶ པན སཙྩཔྤཊིཝེདྷསྶ པཏིཊྛཱནཱབྷཱཝཏོ སོ ཨིདྷ ན ཝུཏྟོ. སེཀྑགྒཧཎེན ཝཱ ཀལྱཱཎཔུཐུཛྫནསྶ ཝིཡ ནེཡྻགྒཧཎེན པདཔརམསྶ པུགྒལསྶཱཔི གཧཎཾ དཊྛབྦཾ ¶ . ཨཀྑརེཧཱིཏིཨཱདཱིསུ ཀརཎཏྠེ ཀརཎཝཙནཾ, ན ཧེཏྭཏྠེ. ཨཀྑརཱདཱིནཉྷི ཨུགྒྷཊནཱདཱིནི པཡོཛནཱནིཡེཝ ཧོནྟི, ན ཨུགྒྷཊནཱདཱིནཾ ཨཀྑརཱདཱིནི པཡོཛནཱནཱིཏི ‘‘ཨནྣེན ཝསཏཱི’’ཏིཨཱདཱིསུ ཝིཡ ན ཧེཏུཨཏྠོ གཧེཏབྦོ. ཏཏྠ ཧི ཨནྣེན ཧེཏུནཱ ཝསཏི, ཝསནེན ཧེཏུནཱ ཨནྣཾ ལདྡྷནྟི ཝསནཀིརིཡཱཡ ཕལཾ ཝསནཀིརིཡཱཡ ཧེཏུབྷཱཝེན གཧིཏཾ. ‘‘ཨཛ྄ཛྷེསནེན ཝསཏཱི’’ཏིཨཱདཱིསུཔི ཨེསེཝ ནཡོ. ཏེནཱཧ ‘‘ཡདཏྠཱ ཙ ཀིརིཡཱ, སོ ཧེཏཱུ’’ཏི (ནེཏྟི. ཨཊྛ. ༩). ཏཏྠ ཡདཏྠཱཏི སོ ཨནྣཱདིཀོ ཨཏྠོ ཡསྶཱ ཝསནཱདིཀིརིཡཱཡཱཏི ཡདཏྠཱ, ཝསནཱདིཀིརིཡཱ, སོ ཨནྣཱདིཀོ ཨཏྠོ ཏསྶཱ ཝསནཱདིཀིརིཡཱཡ ཧེཏཱུཏི ཨཏྠོ ཝེདིཏབྦོ.

༡༠. ‘‘ཏཏྠ ཨཔརིམཱཎཱ པདཱ’’ཏིཨཱདིནཱ ‘‘དྷམྨཾ ཝོ བྷིཀྑཝེ དེསེསྶཱམཱི’’ཏི ཨུདྡིཊྛཱཡ པཱལི༹ཡཱ དྭཱདསཔདསམྤཏྟིསངྑཱཏཾ ཏིཝིདྷཀལྱཱཎཏཾ དསྶེཏྭཱ ཨིདཱནི ཚཨཏྠཔདཚབྱཉྫནཔདབྷེདེན སམྤཏྟིསངྑཱཏཾ ཨཏྠཔདབྱཉྫནཔདཀལྱཱཎཏཾ དསྶེནྟོ ‘‘ཏཏྠ ཚཔྤདཱནི ཨཏྠོ’’ཏིཨཱདིམཱཧ. ཨཐ ཝཱ ‘‘དྭཱདས པདཱནི སུཏྟ’’ནྟི ཝུཏྟཱནུརཱུཔཾ ‘‘ཏཏྠ ཨཔརིམཱཎཱ’’ཏིཨཱདིནཱ ‘‘དྷམྨཾ ཝོ བྷིཀྑཝེ དེསེསྶཱམཱི’’ཏི ཨུདྡིཊྛཱཡ པཱལི༹ཡཱ དྭཱདསཔདཏཱ ¶ དསྶེཏྭཱ ‘‘ཨཱདིཀལྱཱཎཾ མཛ྄ཛྷེཀལྱཱཎཾ པརིཡོསཱནཀལྱཱཎ’’ནྟི ཝུཏྟཱནུརཱུཔཾ ‘‘ཏཏྠ བྷགཝཱ ཨཀྑརེཧི ཙཱ’’ཏིཨཱདིནཱ ཏསྶཱ པཱལི༹ཡཱ ཏིཝིདྷཀལྱཱཎཏཱ དསྶིཏཱ, དསྶེཏྭཱ ཨིདཱནི ‘‘སཱཏྠཾ སབྱཉྫནཾ ཀེཝལཔརིཔུཎྞཾ པརིསུདྡྷ’’ནྟི ཝུཏྟཱནུརཱུཔཾ ཏསྶཱ པཱལི༹ཡཱ ཚཨཏྠཔདབྱཉྫནཔདསམྤནྣཏཾ དསྶེཏུཾ ‘‘ཏཏྠ ཚཔྤདཱནི ཨཏྠོ’’ཏིཨཱདི ཝུཏྟཾ. ཏཏྠ ཏཏྠཱཏི ཏིསྶཾ དེསནཱཧཱརཝིསཡསངྑཱཏཱཡཾ པཱལི༹ཡཾ ཚཔྤདཱནི ཨཏྠོ. ཀཏམཱནི ཚཔྤདཱནི? སངྐཱསནཱ, པཀཱསནཱ, ཝིཝརཎཱ, ཝིབྷཛནཱ, ཨུཏྟཱནཱིཀམྨཾ, པཉྙཏྟི ཨིམཱནི ཚཔྤདཱནི. ཨཏྠོ ཡསྶ ཨཏྠི ཏསྨཱ སཱཏྠཾ. ཏཏྠཱཏི ཏིསྶཾ དེསནཱཧཱརཝིསཡསངྑཱཏཱཡཾ པཱལི༹ཡཾ ཚཔྤདཱནི བྱཉྫནཾ. ཀཏམཱནི ཚཔྤདཱནི? ཨཀྑརཾ, པདཾ, བྱཉྫནཾ, ཨཱཀཱརོ, ནིརུཏྟི, ནིདྡེསོ ཨིམཱནི ཚཔྤདཱནི. བྱཉྫནཾ ཡསྶ ཨཏྠཱིཏི སབྱཉྫནནྟི ཡོཛནཱ ཀཱཏབྦཱ. ཏེནཱཏི ཏསྶཱ པཱལི༹ཡཱ ཏིཝིདྷཀལྱཱཎཚཨཏྠཔདསམྤནྣཚབྱཉྫནཔདསམྤནྣཊྛེན, ‘‘དྷམྨཾ ཝོ, བྷིཀྑཝེ…པེ… སུདྡྷ’’ནྟི བྷགཝཱ ཨཱཧཱཏི ཨཏྠོ.

ཀེཝལསདྡསྶ སཀལཱདིཨཏྠཝཱཙཀཏྟཱ ཨདྷིཔྤེཏཏྠཾ ནིཡམེཏྭཱ དསྶེཏུཾ ‘‘ཀེཝལནྟི ལོཀུཏྟརཾ ན མིསྶཾ ལོཀིཡེཧི དྷམྨེཧཱི’’ཏི ཝུཏྟཾ. པརིཔུཎྞནྟི ཨདྷིཔྤེཏཏྠེ ཨེཀོཔི ཨཏྠོ ཨཱུནོ ནཏྠི, ཝཱཙཀསདྡེསུཔི ཨནཏྠཀོ ཨེཀོཔི སདྡོ ཨདྷིཀོ ནཏྠཱིཏི པརིཔུཎྞཾ ཨནཱུནཾ ཨནཏིརེཀཾ. པརིསུདྡྷནྟི སདྡདོསཨཏྠདོསཱདིཝིརཧཏོ ཝཱ པརིསུདྡྷཾ, རཱགཱདིམལཝིརཧཏོ ཝཱ པརིཡོདཱཏཱནཾ ཨུཏྟརིམནུསྶདྷམྨཝིསེསཱནཾ ཨུཔཊྛིཏཊྛཱནཏྟཱ པརིསུདྡྷཾ པརིཡོདཱཏཾ. ནིགྒཏཾ མལཾ ཨེཏསྶ དྷམྨསྶཱཏི ¶ ནིམྨལཾ. སདྡདོསཱདིཝིརཧཏོ ཝཱ རཱགཱདིཝིརཧཏོ ཝཱ སབྦམལེཧི ཨཔགཏཾ པརི སམནྟཏོ ཨོདཱཏནྟི པརིཡོདཱཏཾ. ཨུཔཊྛིཏནྟི ཨུཔཏིཊྛནྟི ཨེཏྠ སབྦཝིསེསཱཏི ཨུཔཊྛིཏཾ ཡཐཱ ‘‘པདཀྐནྟ’’ནྟི. པདཀྐནྟཾ པདཀྐནྟཊྛཱནཾ. ཝིསིསནྟི མནུསྶདྷམྨེཧཱིཏི ཝིསེསཱ, སབྦེ ཝིསེསཱ སབྦཝིསེསཱ, སབྦཏོ ཝཱ ཝིསེསཱཏི སབྦཝིསེསཱ, ཨུཏྟརིམནུསྶདྷམྨཱ. ཏེསཾ སབྦཝིསེསཱནཾ ཨུཔཊྛིཏནྟི ཡོཛནཱ. ཨིདནྟི སིཀྑཏྟཡསངྒཧཾ སཱསནབྲཧྨཙརིཡཾ. ཏཐཱགཏསྶ སམྨཱསམྦུདྡྷསྶ པདནྟི ཏཐཱགཏཔདཾ. པདནྟི ཙ པཊིཔཏྟིགམནེན ཝཱ དེསནཱགམནེན ཝཱ ཀིལེསགྒཧཎཾ. ཨོཏྠརིཏྭཱ གམནཊྛཱནཾ ཨིཏིཔི ཝུཙྩཏི པཝུཙྩཏི, ཏཐཱགཏེན གོཙརཱསེཝནེན ཝཱ བྷཱཝནཱསེཝནེན ཝཱ ནིསེཝིཏཾ བྷཛིཏཾ ཨིཏིཔི ཝུཙྩཏི, ཏཐཱགཏསྶ མཧཱཝཛིརཉཱཎསབྦཉྙུཏཉྙཱཎདནྟེཧི ¶ ཨཱརཉྫིཏཾ ཨཱརཉྫིཏཊྛཱནཾ ཨིཏིཔི ཝུཙྩཏི, ཨཏོ ཏཐཱགཏཔདཱདིབྷཱཝེན ཝཏྟབྦབྷཱཝཏོ ཨེཏཾ སཱསནབྲཧྨཙརིཡཾ ཨིཏི པཉྙཱཡཏི. བྲཧྨཙརིཡནྟི བྲཧྨུནོ སབྦསཏྟུཏྟམསྶ བྷགཝཏོ ཙརིཡཾ, བྲཧྨཾ ཝཱ སབྦསེཊྛཾ ཙརིཡཾ བྲཧྨཙརིཡཾ. པཉྙཱཡཏཱིཏི ཡཐཱཝུཏྟེཧི པཀཱརེཧི ཉཱཡཏཱིཏི ཨཏྠོ ཝེདིཏབྦོ.

‘‘ཨིམསྶ སིཀྑཏྟཡསྶ སངྒཧསྶ སཱསནསྶ པརིཔུཎྞབྷཱཝཔརིསུདྡྷབྷཱཝསངྑཱཏཾ ཏཐཱགཏཔདབྷཱཝཾ!ཏཐཱགཏཔདབྷཱཝཾ, ཏཐཱགཏནིསེཝིཏབྷཱཝཾ, ཏཐཱགཏཨཱརཉྫིཏབྷཱཝཾ, ཏེཧི པཀཱརེཧི ཉཱཔིཏབྷཱཝཾ ཀཐཾ མཡཾ ནིཀྐངྑཱ ཛཱནིསྶཱམཱ’’ཏི ཝཏྟབྦཏོ ‘‘ཏེནཱཧ བྷགཝཱ’’ཏིཨཱདི ཝུཏྟཾ, ཏབྦྷཱཝདཱིཔཀེན བྷགཝཏཱ ཝུཏྟེན ཝཙནེན ཏུམྷེཧི ནིཀྐངྑེཧི ཛཱནིཏབྦོཏི ཝུཏྟཾ ཧོཏི.

ཡདི བྷགཝཱ ཨཀྑརེཧི ཙ པདེཧི ཙ ཨུགྒྷཊེཏི, བྱཉྫནེཧི ཙ ཨཱཀཱརེཧི ཙ ཝིཔཉྩཡཏི, ནིརུཏྟཱིཧི ཙ ནིདྡེསེཧི ཙ ཝིཏྠཱརེཏི, ཨེཝཾ སཏི ཨཱཙརིཡེན རཙིཏེན དེསནཱཧཱརེན པཡོཛནཾ ན བྷཝཏི, དེསནཱཧཱརེན ན ཝིནཱ བྷགཝཏོ དེསནཱཡམེཝ ཨཏྠསིཛ྄ཛྷནཏོཏི ཙོདནཾ མནསི ཀཏྭཱ ‘‘ཀེསཾ ཨཡཾ དྷམྨདེསནཱ’’ཏི པུཙྪིཏྭཱ ‘‘ཡོགཱིན’’ནྟི ཨཱཧ. ཏཏྠ ཡོགཱིནནྟི ཡུཛྫནྟི ཙཏུསཙྩཀམྨཊྛཱནབྷཱཝནཱཡནྟི ཡོགིནོ, ཏེསཾ ཡོགཱིནཾ. ཏེན མཡཱ རཙིཏེན དེསནཱཧཱརེན སཾཝཎྞིཏཱ ཨཡཾ ཝུཏྟཔྤཀཱརཱ བྷགཝཏོ དེསནཱ ཨུགྒྷཊནཱདིཀིཙྩཾ སཱདྷེཏཱིཏི དེསནཱཧཱརོ ཡོགཱིནཾ སཱཏྠཀོཡེཝཱཏི དཊྛབྦོ. ‘‘དེསནཱཧཱརསྶ ཨསྶཱདཱདིདེསནཱཧཱརབྷཱཝོ ཀེན ཨམྷེཧི ཛཱནིཏབྦོ སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧ ཨཱཡསྨཱ…པེ… དེསནཱཧཱརོ’’ཏི ཝུཏྟཾ. ཏཏྠ ཏེན ཨསྶཱདཱདིདེསནཱཧཱརབྷཱཝེན ཨཱཡསྨཱ མཧཱཀཙྩཱནོ ‘‘ཨསྶཱདཱདཱིནཝཏཱ…པེ… དེསནཱཧཱརོ’’ཏི ཡཾ ཝཙནཾ ཨཱཧ, ཏེན ཝཙནེན ཏུམྷེཧི དེསནཱཧཱརསྶ ཡོགཱིནཾ ཨསྶཱདཱདིདེསནཱཧཱརབྷཱཝོ ཛཱནིཏབྦོ སདྡཧིཏབྦོཏི ཝུཏྟཾ ཧོཏི.

‘‘ཀིཾ ¶ པན ཨེཏྟཱཝཏཱ དེསནཱཧཱརོ པརིཔུཎྞོ, ཨཉྙོ ནིཡུཏྟོ ནཏྠཱི’’ཏི པུཙྪིཏབྦཏྟཱ ‘‘ནིཡུཏྟོ དེསནཱཧཱརོ’’ཏི ཝུཏྟཾ. ཏཏྠ ཡསྶཾ དེསནཱཡཾ ཨསྶཱདཱདཡོ ཡེན དེསནཱཧཱརེན ནིདྡྷཱརིཏཱ, ཏསྶཾ དེསནཱཡཾ ¶ སོ དེསནཱཧཱརོ ནིདྡྷཱརེཏྭཱ ཡོཛིཏོཏི ཨཏྠོ དཊྛབྦོཏི.

ཨིཏི དེསནཱཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

༢. ཝིཙཡཧཱརཝིབྷངྒཝིབྷཱཝནཱ

༡༡. ཡེན ཡེན སཾཝཎྞནཱཝིསེསབྷཱུཏེན དེསནཱཧཱརཝིབྷངྒེན ཨསྶཱདཱདཡོ སུཏྟཏྠཱ ཨཱཙརིཡེན ཝིབྷཏྟཱ, སོ སཾཝཎྞནཱཝིསེསབྷཱུཏོ དེསནཱཧཱརཝིབྷངྒོ པརིཔུཎྞོ, ‘‘ཀཏམོ ཝིཙཡོ ཧཱརོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཝིཙཡོ ཧཱརོ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ནིདྡིཊྛེསུ སོལ༹སསུ དེསནཱཧཱརཱདཱིསུ ཧཱརེསུ ཀཏམོ སཾཝཎྞནཱཝིསེསོ ཝིཙཡོ ཧཱརོ ཝིཙཡཧཱརཝིབྷངྒོ ནཱམཱཏི པུཙྪཏི. ‘‘ཡཾ པུཙྪིཏཉྩ ཝིསྶཛྫིཏཉྩཱ’’ཏིཨཱདིནིདྡེསགཱཐཱཡ ཨིདཱནི མཡཱ ཝུཙྩམཱནོ ‘‘ཨཡཾ ཝིཙཡོ ཧཱརོ ཀིཾ ཝིཙིནཏཱི’’ཏིཨཱདིཀོ སཾཝཎྞནཱཝིསེསོ ཝིཙཡཧཱརཝིབྷངྒོ ནཱམཱཏི ཡོཛནཱ.

‘‘ཨཡཾ ཝིཙཡོ ཧཱརོ ཀིཾ ཝིཙིནཏཱི’’ཏི ཨིམིནཱ ཡོ ཝིཙཡོ ཝིཙིནིཏབྦོ, ཏཾ ཝིཙཡཾ ཝིཙིནིཏབྦཾ པུཙྪཏི, ཏསྨཱ ཝིཙིནིཏབྦཾ ཝིསཡཾ ཝིསུཾ ཝིསུཾ ནིཡམེཏྭཱ དསྶེཏུཾ ‘‘པདཾ ཝིཙིནཏི, པཉྷཾ ཝིཙིནཏཱི’’ཏིཨཱདི ཝུཏྟཾ. ‘‘ཀིཾ ཝིཙཡོ པདཝིཙཡོ’’ཏིཨཱདིཾ ཨཝཏྭཱ ‘‘ཀིཾ ཝིཙིནཏི, པདཾ ཝིཙིནཏཱི’’ཏིཨཱདིཝཙནེན ཝིཙཡསདྡསྶ ཀཏྟུསཱདྷནཏྠཾ དསྶེཏི. ཏཏྠ པདཾ ཝིཙིནཏཱིཏི ནཝཝིདྷསྶ སུཏྟནྟསྶ སབྦཾ པདཾ ཡཱཝ ནིགམནཱ ནཱམཔདཱདིཛཱཏིསདྡཱདིཨིཏྠིལིངྒཱདིཨཱཀཱརནྟཱདིཔཋམཝིབྷཏྱནྟཱདིཨེཀཝཙནཱདིཝསེན ཝིཙིནཏི. པཉྷཾ ཝིཙིནཏཱིཏི ཨདིཊྛཛོཏནཱདིསཏྟཱདྷིཊྛཱནཱདིསམྨུཏིཝིསཡཱདིཨཏཱིཏཝིསཡཱདིཝསེན ཝིཙིནཏི. ཝིསྶཛྫནཾ ཝིཙིནཏཱིཏི ཨེཀཾསབྱཱཀརཎཝིསྶཛྫནཱདིསཱཝསེསབྱཱཀརཎཝིསྶཛྫནཱདི སཨུཏྟརབྱཱཀརཎ ཝིསྶཛྫནཱདི ལོཀིཡབྱཱཀརཎཝིསྶཛྫནཱདིཝསེན ཝིཙིནཏི. པུབྦཱཔརཾ ཝིཙིནཏཱིཏི ¶ པུབྦེན ཨཔརཾ སཾསནྡིཏྭཱ ¶ ཝིཙིནཏི. ཨསྶཱདཾ ཝིཙིནཏཱིཏི ཨསྶཱདཀཏཎྷཱདིཨསྶཱདེཏབྦསུཁཱདིཝསེན ཝིཙིནཏི. ཨཱདཱིནཝཾ ཝིཙིནཏཱིཏི དུཀྑདུཀྑཝིཔརིཎཱམདུཀྑསངྑཱརདུཀྑཝསེན ཝཱ ཨནིཊྛཱནུབྷཝནཱདིཨཱདིཨནྟཝནྟཏཱདིསཾཀིལེསབྷཱགིཡཱདིཝསེན ཝཱ ཝིཙིནཏི. ནིསྶརཎཾ ཝིཙིནཏཱིཏི མགྒཝསེན ཝཱ ནིབྦཱནཝསེན ཝཱ མགྒསྶ ཝཱ ཨཱགམཝསེན, ནིབྦཱནསྶ ཨསངྑཏདྷཱཏུཨཱདིཔརིཡཱཡཝསེན ཝཱ ཝིཙིནཏི. ཕལཾ ཝིཙིནཏཱིཏི དྷམྨཙརཎསྶ དུགྒཏིགམནཱབྷཱཝེན ཝཱ མཙྩུཏརཎཱདིནཱ ཝཱ དེསནཱཡ ཕལཾ, དེསནཱནུསཱརེན ཙརཎསྶ ཕལཾ ཝིཙིནཏི. ཨུཔཱཡཾ ཝིཙིནཏཱིཏི ཨནིཙྩཱནུཔསྶནཱདིཝསེན པཝཏྟནནིབྦིདཱཉཱཎཱདིཝསེན ཝཱ སདྡྷཱསཏིཝསེན ཝཱ ཝིསུདྡྷིཡཱ ཨུཔཱཡཾ ཝིཙིནཏི. ཨཱཎཏྟིཾ ཝིཙིནཏཱིཏི པཱཔཔརིཝཛྫནཱཎཏྟིཝསེན ཝཱ ལོཀསྶ སུཉྙཏཱཔེཀྑནཱཎཏྟིཝསེན ཝཱ ཝིཙིནཏི. ཨནུགཱིཏིཾ ཝིཙིནཏཱིཏི ཝུཏྟཱནུགཱིཏིཝསེན ཝཱ ཝུཙྩམཱནཱནུགཱིཏིཝསེན ཝཱ ཨནུརཱུཔཾ གཱིཏིཾ ཝིཙིནཏི. སབྦེ ནཝ སུཏྟནྟེ ཝིཙིནཏཱིཏི སུཏྟགེཡྻཱདིཀེ ནཝ སུཏྟེ ཨཱཧཙྩཝཙནཝསེན ཝཱ ཨནུསནྡྷིཝཙནཝསེན ཝཱ ནཱིཏཏྠཝཙནཝསེན ཝཱ ནེཡྻཏྠཝཙནཝསེན ཝཱ སཾཀིལེསབྷཱགིཡཱདིཝསེན ཝཱ ཝིཙིནཏི.

ཀིཉྩཱཔི པདཝིཙཡོ པཋམཾ ཝིབྷཏྟོ, སུཏྟསྶ པན ཨནུཔདཾ ཝིཙིནིཏབྦཏཱཡ ཨཏིབྷཱརིཡོ, ན སུཀརོ པདཝིཙཡོཏི ཏཾ ཨགྒཧེཏྭཱ པཉྷཱཝིཙཡཝིསྶཛྫནཝིཙཡེ ཏཱཝ ཝིབྷཛནྟོ ‘‘ཡཐཱ ཀིཾ བྷཝེ’’ཏིཨཱདིམཱཧ. ཏཏྠ ཡཐཱ ཀིཾ བྷཝེཏི ཡེན པཀཱརེན སོ པཉྷཱཝིཙཡོ པཝཏྟེཏབྦོ, ཏཾ པཀཱརཛཱཏཾ ཀཱིདིསཾ བྷཝེཡྻཱཏི ཨཏྠོ དཊྛབྦོ. ཨཱཡསྨཱ ཨཛིཏོ པཱརཱཡནེ བྷགཝནྟཾ པཉྷཾ ཡཐཱ ཡེན པཀཱརེན པུཙྪཏི, ཏཐཱ ཏེན པཀཱརེན པཉྷཱཝིཙཡོ པཝཏྟེཏབྦོཏི ཨཏྠོ. ཏཏྠ ཨཱཡསྨཱཏི པིཡཝཙནཾ. ཨཛིཏོཏི བཱཝརཱིབྲཱཧྨཎསྶ པརིཙཱརཀབྷཱུཏཱནཾ སོལ༹སནྣཾ ཨཉྙཏརོ ཨཛིཏོ. པཱརཱཡནེཏི པཱརཾ ནིབྦཱནཾ ཨཡཏི གཙྪཏི ཨེཏེནཱཏི པཱརཱཡནཾ, ཨཛིཏསུཏྟཱདིསོལ༹སསུཏྟསྶེཏཾ ཨདྷིཝཙནཾ.

‘‘ཀེནསྶུ ནིཝུཏོ ལོཀོ, (ཨིཙྩཱཡསྨཱ ཨཛིཏོ,)

ཀེནསྶུ ནཔྤཀཱསཏི;

ཀིསྶཱབྷིལེཔནཾ བྲཱུསི, ཀིཾ སུ ཏསྶ མཧབྦྷཡ’’ནྟི. (སུ. ནི. ༡༠༣༨; ཙཱུལ༹ནི. ཝཏྠུགཱཐཱ ༥༧, ཨཛིཏམཱཎཝཔུཙྪཱནིདྡེས ༡) –

གཱཐཱཡ ¶ ‘‘ཀེན དྷམྨེན ལོཀོ ཨརིཡཝཛྫོ སཏྟོ ནིཝུཏོ པཊིཙྪཱདིཏོ, ཨིཏི ཨཱཡསྨཱ ཨཛིཏོ ¶ པུཙྪཏི. ཀེན ཧེཏུནཱ ཡཐཱཝུཏྟལོཀོ ནཔྤཀཱསཏི, ཨསྶ ཡཐཱཝུཏྟལོཀསྶ ཀིཾ ཨབྷིལེཔནཾ ཨིཏི ཏྭཾ བྲཱུསི, ཏསྶ ཡཐཱཝུཏྟལོཀསྶ ཀིཾ མཧབྦྷཡནྟི ཏྭཾ བྲཱུསཱིཏི པུཙྪཏཱི’’ཏི ཨཏྠོ.

ཨིཏི ཨིམིནཱ པབྷེདེན ཙཏྟཱརི ཨིམཱནི གཱཐཱཔཱདཔདཱནི པུཙྪིཏཱནི པུཙྪཱཝསེན ཝུཏྟཱནི, པུཙྪིཏཏྠདཱིཔཀཱནི ཝཱ, པདྷཱནཝསེན པན སོ ‘‘ཨེཀོ པཉྷོ’’ཏི མཏོ, ཡདིཔི ཙཏུནྣཾ པདཱནཾ པུཙྪནཝསེན པཝཏྟཏྟཱ ཙཏུབྦིདྷོཏི ཝཏྟབྦོ, ཉཱཏུཾ པན ཨིཙྪིཏསྶ ཨེཀསྶེཝ ཨཏྠསྶ སམྦྷཝཏོ ‘‘ཨེཀོ པཉྷོ’’ཏི ཝུཏྟཾ. ‘‘ཀཱརཎཾ ཝདེཧཱི’’ཏི ཝཏྟབྦཏྟཱ ཀཱརཎམཱཧ ‘‘ཨེཀཝཏྠུཔརིགྒཧཱ’’ཏི. ཨིདཾ ཝུཏྟཾ ཧོཏི – ‘‘ཡདིཔི ནིཝཱརཎཱཔཀཱསནཱབྷིལེཔནམཧབྦྷཡསངྑཱཏཱ ཙཏྟཱརོ ཨཏྠཱ པུཙྪཱཡཾ གཧིཏཱ, ཨེཀསྶ པན ཨབྷིདྷེཡྻཏྠསྶ གཧཎཏོ ‘ཨེཀོ པཉྷོ’ཏི པདྷཱནཝསེན གཧིཏོཏི དཊྛབྦོ’’ཏི. ‘‘ཨེཀཝཏྠུཔརིགྒཧཎཾ ཀཐཾ ཨམྷེཧི སདྡཧིཏབྦ’’ནྟི ཝཏྟབྦབྷཱཝཏོ ‘‘ཨེཝཉྷི ཨཱཧཱ’’ཏི ཝུཏྟཾ. ཨེཝཾ ཨེཀཝཏྠུཔརིགྒཧཎེནེཝ བྷགཝཱ ཧི ཡསྨཱ ཨཱཧ, ཨིཏི ཏསྨཱ ཨེཀཝཏྠུཔརིགྒཧཎཾ ཏུམྷེཧི སདྡཧིཏབྦནྟི ཝུཏྟཾ ཧོཏི.

‘‘ཀེནསྶུ ནིཝུཏོ ལོཀོ’’ཏི ཨིམིནཱ ལོཀཱདྷིཊྛཱནཾ པཊིཙྪཱདནཾ པུཙྪཏི, ན ནཱནཱདྷམྨཱདྷིཊྛཱནཾ. ‘‘ཀེནསྶུ ནཔྤཀཱསཏཱི’’ཏི ཨིམིནཱ ལོཀསྶེཝ ཨཔྤཀཱསནཾ པུཙྪཏི, ན ནཱནཱསབྷཱཝདྷམྨསྶ. ‘‘ཀིསྶཱབྷིལེཔནཾ བྲཱུསཱི’’ཏི ཨིམིནཱ ལོཀསྶེཝ ཨབྷིལེཔནཾ པུཙྪཏི, ན ནཱནཱསབྷཱཝདྷམྨསྶ. ‘‘ཀིཾ སུ ཏསྶ མཧབྦྷཡ’’ནྟི ཨིམིནཱ ཏསྶེཝ ལོཀསྶ མཧབྦྷཡཾ པུཙྪཏི, ན ནཱནཱསབྷཱཝདྷམྨསྶ. ཏསྨཱ ‘‘ཀེནསྶུ ནིཝུཏོ ལོཀོ’’ཏིཨཱདིཔཉྷོ ཨེཀཱདྷིཊྛཱནནཱནཱདྷིཊྛཱནེསུ ཨེཀཱདྷིཊྛཱནོ, དྷམྨཱདྷིཊྛཱནསཏྟཱདྷིཊྛཱནེསུ སཏྟཱདྷིཊྛཱནོ, ཨདིཊྛཛོཏནཱདཱིསུ ཨདིཊྛཛོཏནཱཔཉྷོཏིཨཱདིནཱ ཡཐཱསམྦྷཝཾ ཝིཙིནིཏབྦོཏི ཨདྷིཔྤཱཡོ.

‘‘པཉྷསྶ ཡོ ལོཀོ ‘ཨདྷིཊྛཱནོ’ཏི གཧིཏོ, སོ ལོཀོ ཏིཝིདྷོ’’ཏི ཝཏྟབྦབྷཱཝཏོ ‘‘ལོཀོ ཏིཝིདྷོ’’ཏིཨཱདི ཝུཏྟཾ. ཏཏྠ ཏཡོ ཝིདྷཱ ཨེཏསྶ ལོཀསྶཱཏི ཏིཝིདྷོ. ཀིལིསྶཏི རཱགཱདིཝསེན ཀཱམཱཝཙརསཏྟོཏི ཀིལེསོ, ཀིལེསོ ཙ སོ ལོཀོ ¶ ཙཱཏི ཀིལེསལོཀོ, ཀཱམཱཝཙརསཏྟོ. སོ ཧི རཱགཱདིཀིལེསབཧུལཏཱཡ ཀིལེསལོཀོཏི. བྷཝཏི ཛྷཱནཱབྷིཉྙཱཧི བུདྡྷཱིཧཱིཏི བྷཝོ, བྷཝོ ཙ སོ ལོཀོ ཙཱཏི བྷཝལོཀོ, རཱུཔཱཝཙརསཏྟོ. སོ ཧི ཛྷཱནཱདིབུདྡྷཱིཧི བྷཝཏཱིཏི. ཨིནྡྲིཡེན སམནྣཱགཏོཏི ཨིནྡྲིཡོ, ཨིནྡྲིཡོ ཙ སོ ལོཀོ ཙཱཏི ཨིནྡྲིཡལོཀོ, ཨརཱུཔཱཝཙརསཏྟོ. སོ ཧི ཨཱནེཉྫསམཱདྷིབཧུལཏཱཡ ཝིསུདྡྷིནྡྲིཡོ ཧོཏཱིཏི ལོཀསམཉྙཱ པརིཡཱཔནྣདྷམྨཝསེན པཝཏྟཱ, ཏསྨཱ ཨརིཡཱ ན གཧིཏཱཏི.

‘‘ཀེནསྶུ ¶ ནིཝུཏོ ལོཀོ’’ཏིཨཱདིགཱཐཱཡ པུཙྪཱཝིཙཡོ ཧཱརོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཝིསྶཛྫནཱཝིཙཡོ ཧཱརོ ཀཏྠ ཝིསྶཛྫནཱཡ ཝིབྷཏྟོ’’ཏི པུཙྪིཏབྦཏྟཱ ‘‘ཏཏྠ ཝིསྶཛྫནཱ’’ཏིཨཱདི ཝུཏྟཾ. ཏཏྠ ཏཏྠཱཏི ཏསྶཾ ‘‘ཀེནསྶུ ནིཝུཏོ ལོཀོ’’ཏིཨཱདིཔུཙྪཱཡཾ –

‘‘ཨཝིཛྫཱཡ ནིཝུཏོ ལོཀོ, (ཨཛིཏཱཏི བྷགཝཱ,)

ཝིཝིཙྪཱ པམཱདཱ ནཔྤཀཱསཏི;

ཛཔྤཱབྷིལེཔནཾ བྲཱུམི, དུཀྑམསྶ མཧབྦྷཡ’’ནྟི. (སུ. ནི. ༡༠༣༩; ཙཱུལ༹ནི. ཝཏྠུགཱཐཱ ༥༨, ཨཛིཏམཱཎཝཔུཙྪཱནིདྡེས) –

ཨཡཾ གཱཐཱ ཝིསྶཛྫནཱཏི དཊྛབྦཱ. ཏཏྠ ཨཝིཛྫཱཡ ནིཝུཏོ ལོཀོཏི ཀཱལ༹པཀྑཙཏུདྡསཱི, གྷནཝནསཎྜ, མེགྷཔཊལཙྪཱདན, ཨཌྜྷརཏྟཱིནཾ ཝསེན ཙཏུརངྒསམནྣཱགཏེན ཨནྡྷཀཱརེན རཐགྷཊཱདི པཊིཙྪཱདིཏོ ཝིཡ དྷམྨསབྷཱཝཔཊིཙྪཱདནལཀྑཎཱཡ ཨཝིཛྫཱཡ སཏྟལོཀོ ནིཝུཏོ པཊིཙྪཱདིཏོ. ‘‘ཨཛིཏཱ’’ཏི ཙ ཨཱལཔནཾ ཀཏྭཱ བྷགཝཱ ཨཱཧ. ཝིཝིཙྪཱཏི ཝིཙིཀིཙྪཱཡ པམཱདཧེཏུ ཡཐཱཝུཏྟལོཀོ ནཔྤཀཱསཏི. ཛཔྤཾ ཏཎྷཾ ཡཐཱཝུཏྟལོཀསྶ ‘‘ཨབྷིལེཔན’’ནྟི ཨཧཾ བྲཱུམཱིཏི བྷགཝཱ ཨཱཧ, དུཀྑཾ ཛཱཏིཨཱདིཝཊྚདུཀྑཾ ཨསྶ ཡཐཱཝུཏྟལོཀསྶ ‘‘མཧབྦྷཡ’’ནྟི ཨཧཾ བྲཱུམཱིཏི བྷགཝཱ ཨཛིཏཾ ཨཱཧཱཏི ཨཏྠོ.

‘‘ཨིམཱཡ ཝིསྶཛྫནཱཡ ཀཐཾ ཝིཙིནེཡྻཱ’’ཏི པུཙྪིཏབྦཏྟཱ ‘‘ཨིམཱནི ཙཏྟཱརི པདཱནཱི’’ཏིཨཱདི ཝུཏྟཾ. ཏཏྠ ཨིམཱནི ཙཏྟཱརི པདཱནཱིཏི ‘‘ཀེནསྶུ ནིཝུཏོ ལོཀོ’’ཏིཨཱདིཔུཙྪཱགཱཐཱཡཾ ཝུཏྟཱནི གཱཐཱཔདཱནི. ཨིམེཧི ཙཏཱུཧི པདེཧཱིཏི ‘‘ཨཝིཛྫཱཡ ནིཝུཏོ ལོཀོ’’ཏི ཝིསྶཛྫནཱགཱཐཱཡཾ ཝུཏྟེཧི གཱཐཱཔདེཧི ཝིསྶཛྫིཏཱནི. ཀཐཾ? པཋམཾ པདཾ པཋམེན པདེན, དུཏིཡཾ པདཾ ¶ དུཏིཡེན པདེན, ཏཏིཡཾ པདཾ ཏཏིཡེན པདེན, ཙཏུཏྠཾ པདཾ ཙཏུཏྠེན པདེན ཝིསྶཛྫིཏཾ.

‘‘ཀེནསྶུ ནིཝུཏོ ལོཀོ’’ཏི པཋམཔཉྷེ ‘‘ཨཝིཛྫཱཡ ནིཝུཏོ ལོཀོ’’ཏི པཋམཱ ཝིསྶཛྫནཱ ཀཏཱ, ན ཨུཔྤཊིཔཱཊིཡཱ. ཝིཛྫཱཡ པཊིཔཀྑཱ ཨཝིཛྫཱ, ཏསྨཱ ཨཝིཛྫཱཡ ཨཛཱནཀོ ལོཀོ བྷཝེཡྻ. ཀཐཾ ནིཝུཏོ སདྡཧིཏབྦོཏི ཨཱཧ ‘‘ནཱིཝརཎེཧི ནིཝུཏོ ལོཀོ’’ཏི. ཡདི ཨེཝཾ ‘‘ནཱིཝརཎེན ནིཝུཏོ ལོཀོ’’ཏི ཝིསྶཛྫནཱ ཀཱཏབྦཱཏི ཙོདནཾ མནསི ¶ ཀཏྭཱ ཝུཏྟཾ ‘‘ཨཝིཛྫཱནཱིཝརཎཱ ཧི སབྦེ སཏྟཱ’’ཏི. ‘‘སབྦསཏྟཱནཾ ཨཝིཛྫཱནཱིཝརཎབྷཱཝོ ཀེན ཝཙནེན སདྡཧིཏབྦོ’’ཏི ཝཏྟབྦཏྟཱ ‘‘ཡཐཱཧ བྷགཝཱ’’ཏིཨཱདི ཝུཏྟཾ.

‘‘སབྦསཏྟཱནཾ, བྷིཀྑཝེ, སབྦཔཱཎཱནཾ སབྦབྷཱུཏཱནཾ, པརིཡཱཡཏོ ཨེཀམེཝ ནཱིཝརཎཾ ཝདཱམི, ཡདིདཾ ཨཝིཛྫཱ. ཨཝིཛྫཱནཱིཝརཎཱ ཧི སབྦེ སཏྟཱ. སབྦསོཝ བྷིཀྑཝེ ཨཝིཛྫཱཡ ནིརོདྷཱ ཙཱགཱ པཊིནིསྶགྒཱ ནཏྠི སཏྟཱནཾ ནཱིཝརཎནྟི ཝདཱམཱི’’ཏི ཡཾ ཝཙནཾ ཡཐཱ ཡེན པཀཱརེན བྷགཝཱ ཨཱཧ, ཏཐཱ ཏེན པཀཱརེན ཝུཏྟེན ཏེན ཝཙནེན ཏུམྷེཧི སབྦསཏྟཱནཾ ཨཝིཛྫཱནཱིཝརཎབྷཱཝོ སདྡཧིཏབྦོཏི.

‘‘ཨཝིཛྫཱཡ ནིཝུཏོ ལོཀོ’’ཏི པདེན ‘‘ཀེནསྶུ ནིཝུཏོ ལོཀོ’’ཏི པཋམསྶེཝ པདསྶ ཝིསྶཛྫནཱ ན སིཡཱ, ‘‘ཀེནསྶུ ནཔྤཀཱསཏཱི’’ཏི དུཏིཡཔདསྶཱཔི ཝིསྶཛྫནཱ སིཡཱཏི ཙོདནཾ མནསི ཀཏྭཱ ‘‘ཏེན ཙཱ’’ཏིཨཱདི ཝུཏྟཾ. ཏཏྠ ཏེན ‘‘ཨཝིཛྫཱཡ ནིཝུཏོ ལོཀོ’’ཏི པདེན ‘‘ཀེནསྶུ ནིཝུཏོ ལོཀོ’’ཏི པཋམསྶ པདསྶ ཝིསྶཛྫནཱ ཡུཏྟཱ ཡུཏྟཏརཱ ཧོཏི, ཡུཏྟཏརཏྟཱ ‘‘ཀེནསྶུ ནིཝུཏོ ལོཀོ’’ཏི པཉྷེ ‘‘ཨཝིཛྫཱཡ ནིཝུཏོ ལོཀོ’’ཏི ཝིསྶཛྫནཱཏི མཡཱ ཝཏྟབྦཱཡེཝཱཏི ཨདྷིཔྤཱཡོ.

‘‘ཀེནསྶུ ནཔྤཀཱསཏཱི’’ཏི ཨིམསྨིཾ པཉྷེ ‘‘ཝིཝིཙྪཱ པམཱདཱ ནཔྤཀཱསཏཱི’’ཏི ཨཡཾ ཝིསྶཛྫནཱ ཀཱཏབྦཱ, ཝིཝིཙྪཱཡ པཝཏྟཏྟཱ, པམཱདཱ ཙ ལོཀོ ནཔྤཀཱསཏཱིཏི ཨཏྠོ. ཨཝིཛྫཱནཱིཝརཎཱཡ ནིཝུཏོ ལོཀོ ནཔྤཀཱསཏཱིཏི ཝིསྶཛྫནཱ ཀཱཏབྦཱ, ‘‘ཀཐཾ ཝིཝིཙྪཱ པམཱདཱ ལོཀོ ནཔྤཀཱསཏཱིཏི ཝིསྶཛྫནཱ ཀཏཱ’’ཏི ཝཏྟབྦཏྟཱ ‘‘ཡོ པུགྒལོ’’ཏིཨཱདི ཝུཏྟཾ. ཏཏྠ ཡོ པུཐུཛྫནབྷཱུཏོ པུགྒལོ ཨཝིཛྫཱནཱིཝརཎེཧི ¶ ནིཝུཏོ, སོ པུཐུཛྫནབྷཱུཏོ པུགྒལོ ཝིཝིཙྪཱཡ ཝིཝིཙྪཏི. ‘‘ཡཱཡ ཝིཝིཙྪཱཡ ཝིཝིཙྪཏི, སཱ ཝིཝིཙྪཱ ཀཏམཱ ནཱམཱ’’ཏི པུཙྪིཏབྦཏྟཱ ‘‘ཝིཝིཙྪཱ ནཱམ ཝུཙྩཏི ཝིཙིཀིཙྪཱ’’ཏི ཝུཏྟཾ. ‘‘ཏཱཡ ཀསྨཱ ནཔྤཀཱསཏཱི’’ཏི ཝཏྟབྦཏྟཱ ‘‘སོ ཝིཙིཀིཙྪནྟོ’’ཏིཨཱདི ཝུཏྟཾ. ཏཱཡ ཝིཙིཀིཙྪནྟོ སོ པུཐུཛྫནབྷཱུཏོ པུགྒལོ སདྡཧིཏབྦེསུ ནཱབྷིསདྡཧཏི; སདྡཧིཏབྦེསུ ན ཨབྷིསདྡཧནྟོ ཨཀུསལཱནཾ དྷམྨཱནཾ པཧཱནཱཡ, ཀུསལཱནཾ དྷམྨཱནཾ སཙྪིཀིརིཡཱཡ ཨཱརབྷིཏབྦཾ ཝཱིརིཡཾ ནཱརབྷཏི; ཨནཱརབྷནྟོ སོ པུགྒལོ ཨིདྷ ལོཀེ པམཱདམནུཡུཏྟོ ཝིཧརཏཱིཏི, པམཱདེན ཝིཧརནྟོ པམཏྟོ པུགྒལོ སུཀྐེ དྷམྨེ ན ཨུཔྤཱདིཡཏི; ཨནུཔྤཱདཡནྟསྶ ཏསྶ པུགྒལསྶ ཏེ སུཀྐཱ དྷམྨཱ ཨནུཔྤཱདིཡམཱནཱ ཧུཏྭཱ ནཔྤཀཱསནྟི པཀཱསནཝསེན ན པཝཏྟནྟི; ཏསྨཱ ‘‘ཝིཝིཙྪཱ པམཱདཱ ལོཀོ ནཔྤཀཱསཏཱི’’ཏི ཝིསྶཛྫནཱ ཀཱཏབྦཱཏི ཨདྷིཔྤཱཡོ.

‘‘ཏཱདིསསྶ ¶ སུཀྐདྷམྨཱནཾ ཨཔྤཀཱསནབྷཱཝོ ཨམྷེཧི ཀེན ཝཙནེན སདྡཧིཏབྦོ’’ཏི ཝཏྟབྦབྷཱཝཏོ ‘‘ཡཐཱཧ བྷགཝཱ’’ཏིཨཱདི ཝུཏྟཾ. ཏཏྠ –

‘‘དཱུརེ སནྟོ པཀཱསནྟི, ཧིམཝནྟོཝ པབྦཏོ;

ཨསནྟེཏྠ ན དིསྶནྟི, རཏྟིཾ ཁིཏྟཱ ཡཐཱ སརཱ;

ཏེ གུཎེཧི པཀཱསནྟི, ཀིཏྟིཡཱ ཙ ཡསེན ཙཱ’’ཏི. –

ཡཾ གཱཐཱཔཱཋཾ བྷགཝཱ ཡཐཱ ཡེན ཨཔྤཀཱསནཱཀཱརེན ཨཱཧ, ཏཐཱ ཏེན ཨཔྤཀཱསནཱཀཱརེན ཝུཏྟེན ཏེན གཱཐཱཔཱཋེན ཏཱདིསསྶ པུགྒལསྶ སུཀྐདྷམྨཱནཾ ཨཔྤཀཱསནབྷཱཝོ ཏུམྷེཧི སདྡཧིཏབྦོཡེཝ, ཏསྨཱ ‘‘ཝིཝིཙྪཱ པམཱདཱ ལོཀོ ནཔྤཀཱསཏཱི’’ཏི ཝིསྶཛྫནཱ ཀཱཏབྦཱཝཱཏི ཨདྷིཔྤཱཡོ.

གཱཐཱཏྠོ པན – ཧིམཝནྟོ པབྦཏོ དཱུརེ ཋིཏོ དཱུརེ ཋིཏཱནམྤི སཙཀྑུཀཱནཾ པུགྒལཱནཾ པཀཱསཏི ཨིཝ, ཨེཝཾ སནྟོ སཔྤུརིསཱ དཱུརེ ཋིཏཱནམྤི གུཎཝསེན པཝཏྟཱཡ ཀིཏྟིཡཱ ཙ གུཎཝསེན པཝཏྟེཧི ཡསཔརིབྷོགཔརིཝཱརེཧི ཙ དཱུརེ ཋིཏཱནཾ པཎྜིཏཱནཾ པཀཱསནྟི, རཏྟིཀཱལེ ཁིཏྟཱ སརཱ ཨུསཱུ ན དིསྶནྟི ཡཐཱ, ཨེཏྠ སཏྟལོཀེ ཝིཝིཙྪཱཔམཱདཱནཾ ཝསེན ཝིཧརནྟོ ཨསནྟོ ན དིསྶནྟི. ཡེ སནྟོ པཀཱསནྟི, ཏེ སནྟོ གུཎེཧི པཀཱསནྟཱིཏི དསྶེཏུཾ ‘‘ཏེ གུཎེཧི པཀཱསནྟཱི’’ཏི ཝུཏྟཾ ¶ . གུཎཱ ནཱམ ཨབྦྷནྟརེ ཛཱཏཱ, ‘‘ཀཐཾ གུཎེཧི པཀཱསནྟཱི’’ཏི ཝཏྟབྦཏྟཱ ‘‘ཀིཏྟིཡཱ ཙ ཡསེན ཙཱ’’ཏི ཝུཏྟཾ. གུཎཱནུབྷཱཝེན པཝཏྟཱཡ ཀིཏྟིཡཱ ཙ གུཎཱནུབྷཱཝེན པཝཏྟེན ཡསེན ཙ པཀཱསནྟཱ པུགྒལཱ གུཎེཧི པཀཱསནྟཱིཏི ཝཏྟབྦཱཝཱཏི.

ཡདི ཝིཝིཙྪཱཔམཱདཱནཾ ཝསེན ནཔྤཀཱསཏི, ཨེཝཾ སཏི ལོཀོ ནིཝུཏོ ཧོཏི, ཏསྨཱ པཋམསྶ པདསྶཱཔི ཝིསྶཛྫནཱ ཀཱཏབྦཱཏི ཙོདནཾ མནསི ཀཏྭཱ ‘‘ཏེན ཙཱ’’ཏིཨཱདི ཝུཏྟཾ. ཏཏྠ ཏེནཱཏི ‘‘ཝིཝིཙྪཱ པམཱདཱ ནཔྤཀཱསཏཱི’’ཏི པདེན ‘‘ཀེནསྶུ ནཔྤཀཱསཏཱི’’ཏི དུཏིཡསྶ པདསྶ ཝིསྶཛྫནཱ ཡུཏྟཱ ཡུཏྟཏརཱཏི ཨཏྠོ. པདེནཱཏི ཙ པདཏྠཊྛེན ཝིསྶཛྫནཱཏི ཨཏྠོ. པདསྶཱཏི པདཏྠསྶ པུཙྪིཏབྦསྶཱཏི ཨཏྠོ དཊྛབྦོ. ཨེས ནཡོ ཧེཊྛཱ, ཨུཔརི ཙ.

‘‘ཀིསྶཱབྷིལེཔནཾ བྲཱུསཱི’’ཏི པཉྷེ ‘‘ཛཔྤཱབྷིལེཔནཾ བྲཱུམཱི’’ཏི ཝིསྶཛྫནཱ ཏསྶཱ ཨཛིཏེན དཊྛབྦཱ. ‘‘ཀཏམཱ ཛཔྤཱ ནཱམཱ’’ཏི པུཙྪིཏབྦཏྟཱ ‘‘ཛཔྤཱ ནཱམ ཝུཙྩཏི ཏཎྷཱ’’ཏི ཝུཏྟཾ. སཱ ཏཎྷཱ ལོཀཾ ཨབྷིལིམྤཏཱིཏི ཀཐཾ ཝིཉྙཱཡཏཱིཏི ཡོཛནཱ. ཏེན ཝུཏྟཾ ‘‘ཡཐཱཧ བྷགཝཱ’’ཏིཨཱདི. ཏཏྠ ཡཐཱ ཡེན ཏཎྷཱཡ ཨབྷིལེཔནབྷཱཝེན –

‘‘རཏྟོ ¶ ཨཏྠཾ ན ཛཱནཱཏི, རཏྟོ དྷམྨཾ ན པསྶཏི;

ཨནྡྷཾ ཏམཾ ཏདཱ ཧོཏི, ཡཾ རཱགོ སཧཏེ ནར’’ནྟི. –

ཡཾ གཱཐཾ བྷགཝཱ ཨཱཧ, ཏཐཱ ཏེན ཨབྷིལེཔནབྷཱཝེན ཝུཏྟཱཡ ཏཱཡ གཱཐཱཡ སཱ ཏཎྷཱ ལོཀཾ ཨབྷིལིམྤཏཱིཏི ཝིཉྙཱཡཏཱིཏི ཨདྷིཔྤཱཡོ.

གཱཐཱཡཾ པན – རཛྫཏི སཏྟོཏི རཏྟོ, རཱགསམངྒཱིསཏྟོ. ཀཱརཎཾ པཊིཙྩ ཨསཏི པཝཏྟཏི ཕལནྟི ཨཏྠཾ, ཕལཾ. ཀཱརཎཾ ཕལཾ དྷཱརེཏི, ཏཾ ཀཱརཎཾ དྷམྨཾ ནཱམ. ཨནྡྷཀཱརཾ ཨནྡྷཾ. ཡནྟི ཡམྷི ཀཱལེ. ཡནྟི ཧི བྷུམྨཏྠེ པཙྩཏྟཝཙནཾ. ཡམྷི ཀཱལེ རཱགོ ནརཾ རཱགསམངྒིཾ སཧཏེ ཨབྷིབྷཝཏི, ཏདཱ ཀཱལེ ཨནྡྷཾ ཨནྡྷཀཱརཾ ཏམཾ ཧོཏཱིཏི ཡོཛནཱ. རཱགོ ནརཾ ཡཾ ཡསྨཱ སཧཏེ, ཏསྨཱ ཨནྡྷཾ ཏམཾ ཏདཱ ཧོཏཱིཏི ཝཱ, རཱགོ ཡཾ ནརཾ སཧཏེ, ཏསྶ ནརསྶ ཨནྡྷཾ ཏམཾ ཏདཱ ཧོཏཱིཏི ཝཱ, རཱགོ ནརཾ ཡཾ སཧཏེ ཨབྷིབྷཱུཡཏེ ཡཾ སཧནཾ ཨབྷིབྷཝནཾ ནིཔྥཱདེཏི, ཏཾ སཧནཾ ཨབྷིབྷཝནཾ ཨནྡྷཾ ཨནྡྷཀཱརཾ ཏམཾ ཧོཏཱིཏི ཝཱ ཡོཛནཱ.

‘‘ཡདི ¶ རཏྟོ ཨཏྠཱདིཀཾ ན ཛཱནཱཏི, ཨེཝཾ སཏི ཀཐཾ ཛཔྤཱབྷིལེཔནཾ བྷཝཏཱི’’ཏི ཝཏྟབྦཏྟཱ ‘‘སཱཡཾ ཏཎྷཱ’’ཏིཨཱདི ཝུཏྟཾ. ཏཏྠ ཨཱརམྨཎེསུ ཨཱསཏྟིབཧུལསྶ ཨཱསངྒབཧུལསྶ ཏཎྷཱསམངྒིསྶ པུགྒལསྶ སཱ ཨཡཾ ཏཎྷཱ ཨེཝཾ བཧུཨཱསངྒཝསེན ཨབྷིཛཔྤཱ པརིཡུཊྛཱནཊྛཱཡིནཱི ཧོཏི. ཨིཏི ཀརིཏྭཱ ཨིམིནཱ ཀཱརཎེན ཏཏྠ ཏཎྷཱཡ སཏྟལོཀོ ཀེནཙི སིལེསེན ཨབྷིལིཏྟོ མཀྑིཏོ ཝིཡ ཛཔྤཱབྷིལེཔེན ཨབྷིལིཏྟོ ནཱམ བྷཝཏཱིཏི ཡོཛནཱ. ‘‘ཛཔྤཱབྷིལེཔནཾ ཨཔྤཀཱསནསྶཔི ཀཱརཎཾ བྷཝཏི, ཏསྨཱ ‘ཀེནསྶུ ནཔྤཀཱསཏཱི’ཏི དུཏིཡཔདཏྠསྶཔི ཝིསྶཛྫནཱ སིཡཱ’’ཏི ཝཏྟབྦཏྟཱ ‘‘ཏེན ཙཱ’’ཏིཨཱདི ཝུཏྟཾ.

‘‘ཏསྶ ལོཀསྶ མཧབྦྷཡཾ ཀི’’ནྟི ཨིམསྨིཾ ཙཏུཏྠཔཉྷེ ‘‘ཨསྶ ལོཀསྶ དུཀྑཾ མཧབྦྷཡཾ བྷཝེ’’ཏི ཨཡཾ ཝིསྶཛྫནཱ ཏསྶཱ ཨཛིཏེན དཊྛབྦཱ. བྷཱཡཏི ལོཀོ ཨེཏསྨཱཏི བྷཡཾ, མཧནྟཾ བྷཡཾ མཧབྦྷཡཾ. ‘‘ཀཏིཝིདྷཾ དུཀྑ’’ནྟི པུཙྪིཏབྦཏྟཱ ‘‘དུཝིདྷཾ དུཀྑ’’ནྟིཨཱདི ཝུཏྟཾ. དྭེ ཝིདྷཱ ཨསྶ དུཀྑསྶཱཏི དུཝིདྷཾ. ‘‘ཀཏམཾ དུཝིདྷཾ དུཀྑ’’ནྟི པུཙྪིཏབྦཏྟཱ ‘‘ཀཱཡིཀཉྩ ཙེཏསིཀཉྩཱ’’ཏི ཝུཏྟཾ. ‘‘ཀཏམཾ ཀཱཡིཀཾ, ཀཏམཾ ཙེཏསིཀ’’ནྟི པུཙྪིཏབྦཏྟཱ ‘‘ཡཾ ཀཱཡིཀཾ, ཨིདཾ དུཀྑཾ ཡཾ ཙེཏསིཀཾ, ཨིདཾ དོམནསྶ’’ནྟི ཝུཏྟཾ.

རོགཱདིསཏྠཱདིཨནིཊྛརཱུཔཾ སཏྟལོཀསྶ མཧབྦྷཡཾ བྷཝེཡྻ, ‘‘ཀཐཾ དུཀྑཾ མཧབྦྷཡཾ བྷཝེཏི སདྡཧེཏབྦ’’ནྟི ¶ ཝཏྟབྦབྷཱཝཏོ ‘‘སབྦེ སཏྟཱ ཧཱི’’ཏིཨཱདི ཝུཏྟཾ. ཏཏྠ སབྦེ སཏྟཱ ཡཐཱཝུཏྟསྶ དུཀྑསྶ ཨུབྦིཛྫནྟི, དུཀྑེན སམསམཾ ཨཉྙཾ བྷཡཾ སཏྟཱནཾ ནཏྠི, དུཀྑཏོ ཨུཏྟརིཏརཾ ཝཱ པན བྷཡཾ ཀུཏོ ཨཏྠི. ཧི ཡསྨཱ ནཏྠི, ཏསྨཱ དུཀྑཏོ ཨཉྙསྶ བྷཡསྶ ཨབྷཱཝཏོ ‘‘དུཀྑཾ ལོཀསྶ མཧབྦྷཡ’’ནྟི ཝཙནཾ སདྡཧིཏབྦནྟི ཨདྷིཔྤཱཡོ.

‘‘སབྦེ སཏྟཱ’’ཏིཨཱདིཝཙནེན རོགཱདིསཏྠཱདིཨནིཊྛརཱུཔཾ དུཀྑམཱུལམེཝཱཏི དསྶེཏི. ‘‘ཀཱཡིཀཙེཏསིཀཝསེན དུཝིདྷཾ དུཀྑཾ དུཀྑཝེདནཱཡེཝ, ཨེཝཾ སཏི སངྑཱརདུཀྑཝིཔརིཎཱམདུཀྑཱནཾ མཧབྦྷཡབྷཱཝོ ན ཨཱཔཛྫེཡྻཱ’’ཏི ཝཏྟབྦབྷཱཝཏོ ‘‘ཏིསྶོ དུཀྑཏཱ’’ཏིཨཱདི ཝུཏྟཾ.

‘‘ཏིསྶོ དུཀྑཏཱ སབྦེསཾ སཏྟཱནཾ སབྦཀཱལེསུ ཨུཔྤཛྫནྟི, ཀདཱཙི ཀསྶཙི ན ཨུཔྤཛྫནྟཱི’’ཏི པུཙྪིཏབྦཏྟཱ ‘‘ཏཏྠ ལོཀོ’’ཏིཨཱདི ཝུཏྟཾ. ཏཏྠ ཏཏྠཱཏི ཏཱསུ ཏཱིསུ དུཀྑཏཱསུ. ལོཀོཏི བྷོགསམྤནྣོ ཙེཝ ཨཔྤཱབཱདྷོ ¶ ཙ སཏྟལོཀོ. ཨོདྷསོ ཨོདྷིསོ ཀདཱཙི ཀརཧཙི ཨཏྟཱུཔཀྐམམཱུལཱཡ དུཀྑདུཀྑཏཱཡ མུཙྩཏི, ཀདཱཙི པརཱུཔཀྐམམཱུལཱཡ དུཀྑདུཀྑཏཱཡ མུཙྩཏི, ཏཐཱ ཨོདྷསོ ཨོདྷིསོ ཀདཱཙི ཀརཧཙི དཱིགྷཱཡུཀོ ལོཀོ ཝིཔརིཎཱམདུཀྑཏཱཡ མུཙྩཏི, ‘‘ཀེན ཧེཏུནཱ མུཙྩཏཱི’’ཏི པུཙྪིཏབྦཏྟཱ པུཙྪཾ ཋཔེཏྭཱ ཧེཏུཾ དསྶེཏུཾ ‘‘ཏཾ ཀིསྶ ཧེཏཱུ’’ཏིཨཱདི ཝུཏྟཾ. སཏྟལོཀེ ཨཔྤེཀཙྩེ ཨཔྤཱབཱདྷཱ ཧོནྟི, ཏེ བྷོགསམྤནྣཏྟཱ ཙེཝ ཨཔྤཱབཱདྷཏྟཱ ཙ དུཀྑདུཀྑཏཱཡ མུཙྩནྟི, ཝིསེསཏོ རཱུཔཱཝཙརསཏྟཱ མུཙྩནྟི. ཨཔྤེཀཙྩེ དཱིགྷཱཡུཀཱཔི ཧོནྟི, ཏེ དཱིགྷཱཡུཀཏྟཱ ཝིཔརིཎཱམདུཀྑཏཱཡ མུཙྩནྟི; ཝིསེསཏོ ཨརཱུཔཱཝཙརསཏྟཱ མུཙྩནྟི ཨརཱུཔཱཝཙརསཏྟཱནཾ ཨུཔེཀྑཱསམཱཔཏྟིབཧུལཏྟཱ.

ཏེསཾ ཏཱཧི དུཀྑཏཱཧི མུཙྩནཾ ཨནེཀནྟིཀཾ ཧོཏི, ཏསྨཱ ཏཱཧི ཨནཏིཀྐནྟཏྟཱ ཨནེཀནྟིཀཾ མུཙྩནཾ ཏུམྷེཧི ཝུཏྟཾ, ཨམྷེཧི ཙ ཉཱཏཾ, ‘‘ཀཏམཾ ཨེཀནྟིཀམུཙྩན’’ནྟི པུཙྪིཏབྦཏྟཱ ‘‘སངྑཱརདུཀྑཏཱཡ པནཱ’’ཏིཨཱདི ཝུཏྟཾ. ཏཏྠ སངྑཱརདུཀྑཏཱཡཱཏི དུཀྑཝེདནཱཔི སངྑཏཏྟཱ སངྑཱརཔརིཡཱཔནྣཱ, ཏཱདིསཱཡ སངྑཱརདུཀྑཏཱཡཱཏི ཨཏྠོ གཧེཏབྦོ. ལོཀོཏི ཨརཧཱ. ཨུཔཱདཱིཡཏི ཝིཔཱཀཀྑནྡྷཙཏུཀྐཀཊཏྟཱརཱུཔསངྑཱཏཾ ཁནྡྷཔཉྩཀནྟི ཨུཔཱདི, ཨུཔཱདིཡེཝ སེསཾ ཨུཔཱདིསེསཾ, ཁནྡྷཔཉྩཀཾ, ཏཾ ནཏྠི ཨེཏིསྶཱ ནིབྦཱནདྷཱཏུཡཱཏི ཨནུཔཱདིསེསཱ. ཨནུཔཱདིསེསཱཡ ནིབྦཱནདྷཱཏུཡཱ ཨནུཔཱདིསེསནིབྦཱནདྷཱཏུ ཧུཏྭཱ མུཙྩཏི, ཨིཏྠམྦྷཱུཏལཀྑཎེ ཙཱཡཾ ཀརཎནིདྡེསོ. ནིབྦཱནདྷཱཏཱུཏི ཙ ཁནྡྷཔཉྩཀསྶ ནིབྦཱཡནམཏྟཾ ཨདྷིཔྤེཏཾ, ན ཨསངྑཏདྷཱཏུ. ཏསྨཱཏི སངྑཱརདུཀྑཏཱཡ སཀལལོཀབྱཱཔཀབྷཱཝེན སབྦལོཀསངྒཱཧཀཏྟཱ ཝུཏྟཔྤཀཱརསངྑཱརདུཀྑཏཱཡ སབྦལོཀསྶ ¶ དུཀྑཾ ཧོཏི, ཨིཏི ཀཏྭཱ སངྑཱརདུཀྑཏཱཡ སབྦལོཀསྶ དུཀྑབྷཱཝཏོ ‘‘དུཀྑམསྶ མཧབྦྷཡ’’ནྟི བྷགཝཏཱ ཝུཏྟཾ.

‘‘ཝེདནཱཔཙྩཡཱ ཏཎྷཱ’’ཏི (མ. ནི. ༣.༡༢༦; སཾ. ནི. ༢.༡, ༣, ༣༦; མཧཱཝ. ༡; ཝིབྷ. ༢༢༥) ཝཙནཏོ ‘‘དུཀྑམསྶ མཧབྦྷཡ’’ནྟི པདེན ‘‘ཀིསྶཱབྷིལེཔནཾ བྲཱུསཱི’’ཏི ཏཏིཡཔདསྶཱཔི ཝིསྶཛྫནཱ སིཡཱཏི ཨཱསངྐབྷཱཝཏོ ‘‘ཏེན ཙ ཙཏུཏྠསྶ པདསྶ ཝིསྶཛྫནཱ ཡུཏྟཱ’’ཏི ཝུཏྟཾ. ‘‘ཀེན ཡཐཱཀྐམཾ པུཙྪཱཝིསྶཛྫནཱནཾ ཡུཏྟཏརབྷཱཝོ ཛཱནིཏབྦོ’’ཏི ཝཏྟབྦཏྟཱ ‘‘ཏེནཱཧ བྷགཝཱ’’ཏིཨཱདི ཝུཏྟཾ. ཏེན ཡཐཱཀྐམཾ པུཙྪཱཝིསྶཛྫནཱནཾ ཡུཏྟཏརཏྟཱ ཡུཏྟཏརཛཱནནཀོ བྷགཝཱ ‘‘ཨཝིཛྫཱཡ ནིཝུཏོ ¶ ལོཀོ’’ཏིཨཱདིམཱཧ, ཏསྨཱ ཡུཏྟཏརབྷཱཝོ ཏུམྷེཧི ཛཱནིཏབྦོཏི.

ཨེཏྠ ཙ ལོཀསྶ ནཱིཝརཎཱདཱིནི ཨཛཱནནྟེན ཙ ཏིཏྠིཡཝཱདེསུ སམཡནྟརེསུ པརིཙཡེན ཙ ཏེསུ སམཡནྟརེསུ ཙེཝ ནཱིཝརཎཱདཱིསུ ཙ སཾསཡཔཀྑནྡེན ཨེཀཾསེནེཝ སཏྟཱདྷིཊྛཱནེན པུཙྪིཏབྦཏྟཱ, ཨེཀཾསེནེཝ སཏྟཱདྷིཊྛཱནེན བྱཱཀཱཏབྦཏྟཱ ཙ སཏྟཱདྷིཊྛཱནཱ པུཙྪཱ ཀཏཱཏི ཝེདིཏབྦཱ. སཱ ཙཱཡཾ པུཙྪཱ ཨཛཱནནྟསྶ ཛཱནནཏྠཱཡ, ཛཱཏསཾསཡསྶ ཙ སཾསཡཝིནོདནཏྠཱཡ ཝིསྶཛྫེཏབྦསྶ ནཱིཝརཎཱདིཝིསཡསྶ ཙཏུབྦིདྷཏྟཱ ཙཏུབྦིདྷཱ. ནཱིཝརཎཱདཱིནཾ པན ཝིསཡཱནཾ ལོཀོ ཙ ཨཱདྷཱརབྷཱཝེན གཱཐཱཡཾ ཝུཏྟོཏི ‘‘ཨེཀོ པཉྷོ དསྶིཏོ’’ཏི ཨཡམེཏྠ པུཙྪཱཝིཙཡོ, ཝིསྶཛྫནཱཝིཙཡོ པན ‘‘ཨདིཊྛཛོཏནཱ ཝིསྶཛྫནཱ, ཝིམཏིཙྪེདནཱ ཝིསྶཛྫནཱ’’ཏིཨཱདིནཱ པུཙྪཱཝིཙཡེ ཝུཏྟནཡཱནུསཱརེན ཝེདིཏབྦོ.

ཨེཀཱདྷཱརེ པུཙྪཱཝིསྶཛྫནེ ཝིཙཡོ ཨཱཙརིཡེཧི ཝིབྷཏྟོ, ཨམྷེཧི ཙ ཉཱཏོ, ‘‘ཨནེཀཱདྷཱརེ པུཙྪཱཝིསྶཛྫནེ ཡོ ཝིཙཡོ ཝིབྷཛནཱརཧོ, སོ ཝིཙཡོ ཀཐཾ ཨམྷེཧི ཝིཉྙཱཡཏི, ཨམྷཱཀཾ ཝིཉྙཱཔནཏྠཱཡ ཏསྨིཾ ཝིཙཡཾ ཝིབྷཛཐཱ’’ཏི ཝཏྟབྦབྷཱཝཏོ ཨནེཀཱདྷཱརཾ པུཙྪཾ ཏཱཝ ནཱིཧརིཏྭཱ དསྶེཏུཾ –

‘‘སཝནྟི སབྦདྷི སོཏཱ, (ཨིཙྩཱཡསྨཱ ཨཛིཏོ,)

སོཏཱནཾ ཀིཾ ནིཝཱརཎཾ;

སོཏཱནཾ སཾཝརཾ བྲཱུཧི, ཀེན སོཏཱ པིདྷཱིཡརེ’’ཏི. (སུ. ནི. ༡༠༤༠; ཙཱུལ༹ནི. ཝཏྠུགཱཐཱ ༥༩, ཨཛིཏམཱཎཝཔུཙྪཱནིདྡེས ༣) –

གཱཐམཱཧ ¶ . གཱཐཱཏྠོ ཏཱཝ དཊྛབྦོ. སཝནྟཱིཏི སནྡནྟི, པཝཏྟནྟཱིཏི ཨཏྠོ. སབྦདྷཱིཏི ཏཎྷཱདཱིནཾ ཨཱརམྨཎབྷཱུཏེསུ སབྦེསུ རཱུཔཱདཱིསུ ཨཱཡཏནེསུ. སོཏཱཏི ཏཎྷཱབྷིཛ྄ཛྷཱབྱཱཔཱདཱདཡོ སོཏཱ. ཨིཙྩཱཡསྨཱཏི ཨིཏི ཨེཝཾ ཨཱཡསྨཱ ཨཛིཏོ ཨཱཧ. སོཏཱནནྟི ཏཎྷཱབྷིཛ྄ཛྷཱབྱཱཔཱདཱདཱིནཾ སོཏཱནཾ. ཀིཾ ནིཝཱརཎནྟི ཀིཾ ཀཏམཾ དྷམྨཛཱཏཾ ཨཱཝརཎཾ བྷཝེ, ཀཱ ཀཏམཱ དྷམྨཛཱཏི རཀྑཱ བྷཝེ. སོཏཱནཾ སཾཝརཾ བྲཱུཧཱིཏི སོཏཱནཾ ཏཎྷཱབྷིཛ྄ཛྷཱབྱཱཔཱདཱདཱིནཾ སཾཝརཎཾ ཨཱཝརཎཾ ཨིདཾ དྷམྨཛཱཏཾ བྷཝེཏི སབྦསཏྟཧིཏཏྠཾ ཨམྷཱཀཾ ཏྭཾ ཀཐེཧི. ཀེན སོཏཱ ¶ པིདྷཱིཡརེཏི ཀེན པཧཱཡཀདྷམྨེན ཏཎྷཱབྷིཛ྄ཛྷཱབྱཱཔཱདཱདཡོ སོཏཱ པཎྜིཏེཧི པིདྷཱིཡརེཏི པུཙྪཏཱིཏི པུཙྪིཏཱནི.

‘‘པུཙྪཱཝསེན ཀཐིཏཱཡ ‘སཝནྟི…པེ… པིདྷཱིཡརེ’ཏི ཨིམཱཡ གཱཐཱཡ ཀིཏྟཀཱནི པདཱནི པུཙྪིཏཱནི, ཀིཏྟཀཱ པཉྷཱ’’ཏི པུཙྪིཏབྦཏྟཱ ‘‘ཨིམཱནི ཙཏྟཱརི པདཱནི པུཙྪིཏཱནི, ཏེ དྭེ པཉྷཱ’’ཏི ཝུཏྟཾ. ‘‘པུཙྪཱཝསེན པཝཏྟཱཡ ཨིམིསྶཱ གཱཐཱཡ ཡདི ཙཏྟཱརི པདཱནི སིཡུཾ, ཨེཝཾ སནྟེསུ པཉྷཱཔི ཙཏུབྦིདྷཱ སིཡུཾ, ཀསྨཱ ‘དྭེ’ཏི ཝུཏྟཱ’’ཏི ཝཏྟབྦཏྟཱ ‘‘ཀསྨཱ? ཨིམེ ཧི བཧྭཱདྷིཝཙནེན པུཙྪིཏཱ’’ཏི ཝུཏྟཾ. ཨིམེ ཨེཏཱཡ གཱཐཱཡ གཧིཏཱ ཨཏྠཱ བཧྭཱདྷིཝཙནེན པུཙྪིཏཱ. ཨིདཾ ཝུཏྟཾ ཧོཏི – ‘‘སཝནྟི…པེ… པིདྷཱིཡརེཏི བཧཱུནི ཝཙནཱནི ཨདྷིཀིཙྩ པཝཏྟཱ སཾཝརསངྑཱཏཱ སཏི ཙེཝ པིདཧནཧེཏུབྷཱུཏཱ པཉྙཱ ཙཱཏི ཨིམེ དྭེ ཨཏྠཱཝ པུཙྪིཏཱ, ཏསྨཱ ཨཏྠཝསེན དྭེ པཉྷཱ ཝུཏྟཱ ཝཱ’’ཏི. ‘‘པུཙྪཱཡ དུཝིདྷཏྠཝིསཡཏཱ ཀཐཾ ཝུཏྟཱ’’ཏི ཝཏྟབྦཏྟཱ པུཙྪཱཡ དུཝིདྷཏྠཝིསཡཏཾ ཝིཝརིཏུཾ ‘‘ཨེཝཾ སམཱཔནྣསྶཱ’’ཏིཨཱདི ཝུཏྟཾ. ཏཏྠ ཨེཝཾ སམཱཔནྣསྶཱཏི ཨིམཱཧི དུགྒཏིཧེཏུབྷཱུཏཱཧི ཉཱཏིབྱསནཱདིསངྑཱཏཱཧི ཨཱཔདཱཧི ཝཱ, པཱཎཝདྷཱདཱིཧི ཨཱཔདཱཧི ཝཱ, སམཾ སཧ, སབྦཐཱ ཝཱ ཨཡཾ སཏྟལོཀོ ཨཱཔནྣོ ཨཛ྄ཛྷོཏྠཊོ, ཨེཝཾ ཨཛ྄ཛྷོཏྠཊསྶ ཝཱ སམཱཔནྣསྶ. ཨེཝཾ སཾཀིལིཊྛསྶཱཏི ཉཱཏིབྱསནཱདཡོ ཝཱ པཱཎཝདྷཱདཱིནི ཨཱགམྨ པཝཏྟེཧི དསཧི ཀིལེསཝཏྠཱུཧི ཙ ཨཡཾ སཏྟལོཀོ སཾཀིལིཊྛོ, ཨེཝཾ སཾཀིལིཊྛསྶ ཙ ལོཀསྶཱཏི སམཱཔནྣསྶ ཨཛ྄ཛྷོཏྠཊསྶ ལོཀསྶ ཝོདཱནཾ ཝུཊྛཱནཾ ཀིཾ ཀཏམཾ དྷམྨཛཱཏཾ བྷཝེ. ཨིཏི ཨེཝཉྷི སཙྩཾ ཨཛིཏསུཏྟེ ཨཱཧཱཏི ཝིཏྠཱརཏྠོ, པུཙྪཱཡ དུཝིདྷཏྠཝིསཡཏཱ ཉཱཏབྦཱཏི ཨདྷིཔྤཱཡོ.

‘‘ཀིཾ ནུ སོཏཱ སབྦསྶ ལོཀསྶ སབྦདྷི སཝནྟི, ཨུདཱཧུ, ཨེཀཙྩསྶེཝཱ’’ཏི པུཙྪིཏབྦཏྟཱ ‘‘སཝནྟི སབྦདྷི སོཏཱཏི, ཨསམཱཧིཏསྶ སཝནྟི ཨབྷིཛ྄ཛྷཱབྱཱཔཱདཔྤམཱདབཧུལསྶཱ’’ཏི ཝུཏྟཾ. ཏཏྠ ཨབྷིཛ྄ཛྷཱབྱཱཔཱདཔྤམཱདབཧུལཏྟཱ རཱུཔཱདཱིསུ ནཱནཱརམྨཎེསུ ཝིཀྑིཏྟཙིཏྟསྶེཝ སོཏཱ སཝནྟི པཝཏྟནྟི, ན སམཱཧིཏསྶ ཨབྷིཛ྄ཛྷཱབྱཱཔཱདཔྤམཱདཝིརཧིཏསྶཱཏི ¶ ཨདྷིཔྤཱཡོ དཊྛབྦོ. ‘‘ཀཏམཱ ཨབྷིཛ྄ཛྷཱ, ཀཏམོ བྱཱཔཱདོ, ཀཏམོ པམཱདོ’’ཏི ཝཏྟབྦཏྟཱ ‘‘ཏཏྠ ཡཱ ཨབྷིཛ྄ཛྷཱ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ཨབྷིཛ྄ཛྷཱབྱཱཔཱདཔྤམཱདེསུ. ཡཱ ཨབྷིཛ྄ཛྷཱ, ཨཡཾ ལོབྷོ, ན ཨབྷིཛ྄ཛྷཱཡནམཏྟཾ. ལོབྷོ ཙ ཨཀུསལམཱུལཾ, ན ལུབྦྷནམཏྟཾ. ཡོ བྱཱཔཱདོ ¶ , ཨཡཾ དོསོ, ན བྱཱཔཛྫནམཏྟཾ. དོསོ ཙ ཨཀུསལམཱུལཾ, ན དཱུསནམཏྟཾ. ཡོ པམཱདོ, ཨཡཾ མོཧོ, ན སཏིཝིཔྤཝཱསམཏྟཾ. མོཧོ ཙ ཨཀུསལམཱུལཾ, ན མཱུཧནམཏྟཾ. ཨེཝཾ ཨིམིནཱ ཝུཏྟཔྤཀཱརེན ཨབྷིཛ྄ཛྷཱདཱིནཾ ཨཀུསལམཱུལཏྟཱ ཡསྶ ཨབྷིཛ྄ཛྷཱབྱཱཔཱདཔྤམཱདབཧུལསྶ ཨསམཱཧིཏསྶ ཚསུ རཱུཔཱདཱིསུ ཨཱཡཏནེསུ ཏཎྷཱ སཝནྟི.

‘‘ཀཏིཝིདྷཱ སཱ ཏཎྷཱ’’ཏི ཝཏྟབྦཏྟཱ ‘‘རཱུཔཏཎྷཱ…པེ… དྷམྨཏཎྷཱ’’ཏི ཝུཏྟཾ. ‘‘ཚནྣཾ རཱུཔཏཎྷཱདཱིནཾ ཚསུ རཱུཔཱདིཨཱཡཏནེསུ སཝནཾ ཀེན ཙ ཝཙནེན ཨམྷེཧི སདྡཧིཏབྦ’’ནྟི ཝཏྟབྦཏྟཱ ‘‘ཡཐཱཧ བྷགཝཱ’’ཏིཨཱདི ཝུཏྟཾ. ‘‘སཝཏཱིཏི ཙ ཁོ, བྷིཀྑཝེ…པེ… པཊིཧཉྙཏཱི’’ཏི ཡཾ ཝཙནཾ བྷགཝཱ ཡཐཱ ཡེན པཀཱརེན ཨཱཧ, ཏཐཱ ཏེན པཀཱརེན ཝུཏྟནཡེན ཝཙནེན ཏུམྷེཧི སདྡཧིཏབྦནྟི ཨདྷིཔྤཱཡོ. ཨེཏྠ ཙ ཙཀྑཱདཱིནཾ རཱུཔཏཎྷཱདཱིནཾ ཚནྣཾ སོཏཱནཾ དྭཱརབྷཱཝེན པཝཏྟཏྟཱ ཙཀྑཱདཡོ ནིསྶིཏཱུཔཙཱརཝསེན སཡཾ སཝནྟོ ཝིཡ བྷགཝཏཱ ཝུཏྟཱ. ཨིཏཱིཏི ཨེཝཾ ཝུཏྟཔྤཀཱརེན སབྦཱ སབྦསྨཱ ཙཀྑཱདིདྭཱརཏོ ཙ སཝཏི པཝཏྟཏི. སབྦཐཱ སབྦཔྤཀཱརེན ཏཎྷཱཡནམིཙྪཱབྷིནིཝེསནཨུནྣམནཱདིཔྤཀཱརེན སཝཏི པཝཏྟཏཱིཏི ཨཏྠོ. ‘‘ཀསྨཱ སབྦསྨཱ ཙཀྑཱདིདྭཱརཏོ ཙ སཝཏི པཝཏྟཏི, སབྦཔྤཀཱརེན ཏཎྷཱཡནམིཙྪཱབྷིནིཝེསནཨུནྣམནཱདིཔྤཀཱརེན སཝནབྷཱཝོ ཝིཛཱནིཏབྦོ’’ཏི ཝཏྟབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ. ཏཏྠ ཏེནཱཏི ཨསམཱཧིཏསྶ ཨབྷིཛ྄ཛྷཱབྱཱཔཱདཱདཱིནཾ ཙཀྑཱདིདྭཱརཏོ ཙ ཏཎྷཱཡནམིཙྪཱབྷིནིཝེསཨུནྣམནཱཀཱརེན ཏཎྷཱདིཝསེན པཝཏྟནཏོ པཝཏྟཛཱནནཀོ བྷགཝཱ ‘‘སཝནྟི སབྦདྷི སོཏཱ’’ཏི ཨཱཧ.

‘‘སོཏཱནཾ ‘ཀིཾ ནིཝཱརཎ’ནྟི ཨིམིནཱ ཀིཾ པུཙྪཏི? སོཏཱནཾ ཨནུསཡཔྤཧཱནཾ པུཙྪཏི ཀིཾ? ཨུདཱཧུ ཝཱིཏིཀྐམཔྤཧཱནཾ པུཙྪཏཱི’’ཏི ཝཏྟབྦཏྟཱ ‘‘སོཏཱནཾ ཀིཾ ནིཝཱརཎནྟི པརིཡུཊྛཱནཝིགྷཱཏཾ པུཙྪཏཱི’’ཏི ཝུཏྟཾ. ‘‘ཨིདཾ པརིཡུཊྛཱནཝིགྷཱཏཾ ཝོདཱནཾ, ཨུདཱཧུ ཝུཊྛཱནཾ ཀི’’ནྟི ཝཏྟབྦཏྟཱ ‘‘ཨིདཾ ཝོདཱན’’ནྟི ཝུཏྟཾ. ‘‘སོཏཱནཾ སཾཝརཾ བྲཱུཧི, ‘ཀེན སོཏཱ པིདྷཱིཡརེ’ཏི ཨིམིནཱ ཀིཾ པུཙྪཏི? སོཏཱནཾ པརིཡུཊྛཱནཾ པུཙྪཏི ཀིཾ? ཨུདཱཧུ ཝཱིཏིཀྐམནཾ, སམུགྒྷཱཊཾ ཝཱ པུཙྪཏི ཀི’’ནྟི ཝཏྟབྦཏྟཱ སོཏཱནཾ…པེ… པིདྷཱིཡརེཏི ཨནུསཡསམུགྒྷཱཊཾ པུཙྪཏཱི’’ཏི ཝུཏྟཾ. ‘‘ཨིདཾ ཨནུསཡསམུགྒྷཱཊཾ ཝོདཱནཾ ཀིཾ, ཨུདཱཧུ ཝུཊྛཱནཾ ཀི’’ནྟི ཝཏྟབྦཏྟཱ ‘‘ཨིདཾ ཝུཊྛཱན’’ནྟི ཝུཏྟཾ.

‘‘སཝནྟི ¶ ¶ སབྦདྷི སོཏཱ’’ཏིཨཱདིཔུཙྪཱཝིཙཡོ ཨཱཙརིཡེན ཝུཏྟོ, ཨམྷེཧི ཙ ཉཱཏོ; ཏཱཡ པུཙྪཱཡ ‘‘ཀཏམོ ཝིསྶཛྫནཝིཙཡོ’’ཏི ཝཏྟབྦཏྟཱ ‘‘ཏཏྠ ཝིསྶཛྫནཱ’’ཏིཨཱདི ཝུཏྟཾ. ཏཏྠ པུཙྪཱཡཾ –

‘‘ཡཱནི སོཏཱནི ལོཀསྨིཾ, (ཨཛིཏཱཏི བྷགཝཱ,)

སཏི ཏེསཾ ནིཝཱརཎཾ;

སོཏཱནཾ སཾཝརཾ བྲཱུམི, པཉྙཱཡེཏེ པིདྷཱིཡརེ’’ཏི. (སུ. ནི. ༡༠༤༡ ཙཱུལ༹ནི. ཝཏྠུགཱཐཱ ༦༠, ཨཛིཏམཱཎཝཔུཙྪཱནིདྡེས ༤) –

གཱཐཱ ཝིསྶཛྫནཱཏི དཊྛབྦཱ. ཏསྶཾ གཱཐཱཡཾ ཨཛིཏ ལོཀསྨིཾ ཡཱནི སོཏཱནི སཝནྟི, ཏེསཾ སོཏཱནཾ ཡཾ ནིཝཱརཎཾ, སཱ སཏི ཧོཏི; ཏཾ སཏིཾ སོཏཱནཾ སཾཝརནྟི ཨཧཾ བྲཱུམི; ཨེཏེ སོཏཱ པཉྙཱཡ པིདྷཱིཡརེཏི ཡོཛནཱ ཀཱཏབྦཱ. ཏཏྠ སཏཱིཏི ཝིཔསྶནཱཔཉྙཱཡ སམྤཡུཏྟཱ སཏི. པཉྙཱཡཱཏི མགྒཔཉྙཱཡ. པིདྷཱིཡརེཏི ཨུཔྤཛྫིཏུཾ ཨཔྤདཱནཝསེན པིདྷཱིཡནྟི པཙྪིཛྫནྟི.

‘‘སཏི ཏེསཾ ནིཝཱརཎཾ སོཏཱནཾ སཾཝརཾ བྲཱུམཱི’’ཏི བྷགཝཱ ཨཱཧ – ‘‘ཡཱཡ ཀཱཡཙི སཏིཡཱ སོཏཱནཾ སཾཝརཎཀིཙྩཾ སིདྡྷཾ ཀིཾ, ཝིསིཊྛཱཡ སཏིཡཱ སོཏཱནཾ སཾཝརཎཀིཙྩཾ སིདྡྷཾ ཀིཾ, ཀཏམཱཡ སཏིཡཱ སོཏཱནཾ སཾཝརཎཀིཙྩཾ སིདྡྷ’’ནྟི པུཙྪིཏབྦཏྟཱ ‘‘ཀཱཡགཏཱཡ སཏིཡཱ’’ཏིཨཱདི ཝུཏྟཾ. ཏཏྠ ཀཱཡགཏཱཡ སཏིཡཱཏི རཱུཔཀཱཡེ གཏཾ ཀེསཱདིཀཾ ཨནིཙྩཱདིཏོ ཝིཔསྶིཏྭཱ པཝཏྟཱཡ ཝིཔསྶནཱཉཱཎསམྤཡུཏྟཱཡ སཏིཡཱ. བྷཱཝིཏཱཡཱཏི ཀཱཡགཏཾ ཨནིཙྩཏོ དུཀྑཏོ ཨནཏྟཏོ ནིབྦིནྡནཏོ ཝིརཛྫནཏོ ནིརོདྷནཏོ པཊིནིསྶཛྫནཏོ ཨནུཔསྶནཱཝསེན བྷཱཝིཏཱཡ. ཨེཝཉྷི ཨནིཙྩཏོ ཨནུཔསྶནྟོ ནིཙྩསཉྙཾ པཛཧཏི; དུཀྑཏོ ཨནུཔསྶནྟོ སུཁསཉྙཾ པཛཧཏི; ཨནཏྟཏོ ཨནུཔསྶནྟོ ཨཏྟསཉྙཾ པཛཧཏི; ནིབྦིནྡནྟོ ནནྡིཾ པཛཧཏི; ཝིརཛྫནྟོ རཱགཾ པཛཧཏི; ནིརོདྷེནྟོ སམུདཡཾ པཛཧཏི; པཊིནིསྶཛྫནྟོ ཨཱདཱནཾ པཛཧཏཱིཏི. བཧུལཱིཀཏཱཡཱཏི ཡཐཱཝུཏྟཔྤཀཱརེན དིཝསམྤི མཱསམྤི སཾཝཙྪརམྤི སཏྟསཾཝཙྪརམྤི བཧུལཱིཀཏཱཡ. ཙཀྑུནྟི ཨབྷིཛ྄ཛྷཱདིཔཝཏྟིདྭཱརབྷཱཝེན ཋིཏཾ ཙཀྑུཾ, ནིགྒཧིཏཱགམཾ དཊྛབྦཾ. ནཱཝིཉྪཏཱིཏི ཙཀྑུདྭཱརེ པཝཏྟཾ ཨབྷིཛ྄ཛྷཱདིསཧིཏཾ ཙིཏྟསནྟཱནཾ, ཏཾསམངྒཱིཔུགྒལཾ ཝཱ ནཱཀཌྜྷཏི, མནཱཔིཀེསུ རཱུཔེསུ ནཱཝིཉྪཏཱིཏི ཡོཛནཱ. ཨམནཱཔིཀེསུ རཱུཔེསུ ན པཊིཧཉྙཏི ¶ . ཀཱཡགཏཱཡ སཏིཡཱ ¶ བྷཱཝིཏཱཡ བཧུལཱིཀཏཱཡ སོཏཾ ནཱཝིཉྪཏི. མནཱཔིཀེསུ སདྡེསུ…པེ… ཨམནཱཔིཀེསུ སདྡེསུ ན པཊིཧཉྙཏཱིཏི ཡོཛནཱ ཡཐཱསམྦྷཝཏོ ཀཱཏབྦཱ.

‘‘ཀེན ཀཱརཎེན ནཱཝིཉྪཏི པཊིཧཉྙཏཱི’’ཏི པུཙྪཏི, ཨིནྡྲིཡཱནཾ སཾཝུཏནིཝཱརིཏཏྟཱ ནཱཝིཉྪཏི ན པཊིཧཉྙཏཱིཏི ཝིསྶཛྫེཏི. ‘‘ཀེནཱརཀྑེན ཏེ སཾཝུཏནིཝཱརིཏཱ’’ཏི པུཙྪཏི, སཏིཨཱརཀྑེན ཏེ སཾཝུཏནིཝཱརིཏཱཏི ཝིསྶཛྫེཏི. ‘‘སཏིཨཱརཀྑེན སཾཝུཏནིཝཱརིཏབྷཱཝོ ཀེན ཨམྷེཧི སདྡཧིཏབྦོ’’ཏི ཝཏྟབྦཏྟཱ ཏེནཱཧཱ’’ཏིཨཱདི ཝུཏྟཾ. ཏཏྠ ཏེནཱཏི ཏསྨཱ སཏིཨཱརཀྑེན སཾཝུཏནིཝཱརིཏཏྟཱ སཾཝུཏནིཝཱརིཏཛཱནནཀོ བྷགཝཱ ‘‘སཏི ཏེསཾ ནིཝཱརཎ’’ནྟི ཡཾ ཝཙནཾ ཨཱཧ, ཏེན ཝཙནེན ཏུམྷེཧི སཏིཨཱརཀྑེན སཾཝུཏནིཝཱརིཏབྷཱཝོ སདྡཧིཏབྦོཏི པུབྦབྷཱགེ པཉྙཱ སཏྱཱནུགཱཏི ཀིཙྩམེཝེཏྠ ཨདྷིཀནྟི དཊྛབྦཾ.

‘‘སཏི ཏེསཾ ནིཝཱརཎ’’ནྟི ཝིསྶཛྫནསྶ ཝིཏྠཱརཏྠོ ཨཱཙརིཡེན ཝུཏྟོ, ཨམྷེཧི ཙ ཉཱཏོ, ‘‘པཉྙཱཡེཏེ པིདྷཱིཡརེ’’ཏི ཝིསྶཛྫནསྶ ཝིཏྠཱརཏྠོ ‘‘ཀཐཾ ཨམྷེཧི ཛཱནིཏབྦོ’’ཏི ཝཏྟབྦཏྟཱ ‘‘པཉྙཱཡེཏེ པིདྷཱིཡརེ’’ཏི ཝིསྶཛྫནསྶ ཝིཏྠཱརཏྠཾ དསྶེནྟོ ‘‘པཉྙཱཡ ཨནུསཡཱ པཧཱིཡནྟཱི’’ཏིཨཱདིམཱཧ. ཏཏྠ པཉྙཱཡཱཏི མགྒཔཉྙཱཡ. ཨནུསཡཱཏི ཨནུརཱུཔཾ ཀཱརཎཾ ལབྷིཏྭཱ ཨུཔྤཛྫནཱརཧཱ ཀཱམརཱགཱནུསཡཱདཡོ. པཧཱིཡནྟི སམུཙྪེདཝསེན ཨནུསཡེསུ པཉྙཱཡ པཧཱིནེསུ པརིཡུཊྛཱནཱཔི ཨཏྠཏོ པཧཱིཡནྟི. ཀིསྶ པཧཱིནཏྟཱ ‘‘པཧཱིཡནྟཱི’’ཏི ཝུཙྩཏི? ཨནུསཡསྶ པཧཱིནཏྟཱ པརིཡུཊྛཱནཱ པཧཱིཡནྟཱིཏི ཝིསྶཛྫེཏི.

‘‘ཏཾ ཨནུསཡཔྤཧཱནེན པརིཡུཊྛཱནཔྤཧཱནཾ ཀིཾ ཝིཡ བྷཝཏཱི’’ཏི པུཙྪིཏབྦཏྟཱ ‘‘ཏཾ ཡཐཱ ཁནྡྷཝནྟསྶཱ’’ཏིཨཱདི ཝུཏྟཾ. ཏཏྠ ཁནྡྷཝནྟསྶ རུཀྑསྶ ཀུདཱལཱདིནཱ བྷཱུམིཾ ཁཎིཏྭཱ ཨནཝསེསམཱུལུདྡྷརཎེ ཀཏེ ཏསྶ རུཀྑསྶ པུཔྥཕལཔལླཝངྐུརསནྟཏིཔི ཀུདཱལཱདིནཱ སམུཙྪིནྣཱཝ བྷཝཏི ཡཐཱ, ཨེཝཾ ཨརཧཏྟམགྒཉཱཎེན ཨནུསཡེསུ པཧཱིནེསུ ཨནུསཡཱནཾ པརིཡུཊྛཱནསནྟཏི སམུཙྪིནྣཱ པིདཧིཏཱ པཊིཙྪནྣཱ བྷཝཏི. ཀེན སམུཙྪིནྣཱ བྷཝཏི? པཉྙཱཡ མགྒཔཉྙཱཡ སམུཙྪིནྣཱ བྷཝཏཱིཏི ཨཏྠཡོཛནཱ དཊྛབྦཱ. ‘‘པཉྙཱཡ པརིཙྪིནྣབྷཱཝོ ཀཐཾ སདྡཧིཏབྦོ’’ཏི ཝཏྟབྦཏྟཱ ‘‘ཏེནཱ’’ཏིཨཱདི ཝུཏྟཾ. ‘‘པཉྙཱཡེཏེ པིདྷཱིཡརེ’’ཏི ཝཙནཏོ ཨནུསཡཱནཾ པརིཡུཊྛཱནསནྟཏིཡཱ པཉྙཱཡ པརིཙྪིནྣབྷཱཝོ པཎྜིཏེཧི སདྡཧིཏབྦོཏི ཨདྷིཔྤཱཡོ.

ཨིམེསུ ¶ པཉྷཱཝིསྶཛྫནེསུ སོཏཱནཾ སཾཝརཾ, པིདྷཱནཉྩ ཨཛཱནནྟེན ཝཱ སཾསཡིཏེན ཝཱ སཾཝརཔིདྷཱནཱནཾ པུཙྪིཏབྦཏྟཱ དྷམྨཱདྷིཊྛཱནཱ པུཙྪཱཏི པུཙྪཱཝིཙཡོ ཙེཝ སཏིཔཉྙཱནཾ ཝིསྶཛྫེཏབྦཏྟཱ ¶ དྷམྨཱདྷིཊྛཱནཾ ཝིསྶཛྫནནྟི ཝིསྶཛྫནཝིཙཡོ ཙ ཝེདིཏབྦོ. ཨེཏེསུ ཙ ‘‘ཀེནསྶུ ནིཝུཏོ ལོཀོ’’ཏིཨཱདིཀོ པཉྷོ ནཱིཝརཎཝིཙིཀིཙྪཱཔམཱདཛཔྤཱནཾ ཝསེན ཙཏུབྦིདྷོཔི ལོཀཱདྷིཊྛཱནཝསེན ཨེཀོ པཉྷོཏི ཝུཏྟོ, ཨེཝཾ སཏི ‘‘སཝནྟི སབྦདྷི སོཏཱ’’ཏིཨཱདིཀོཔི པཉྷོ སཾཝརཔིདྷཱནཱནཾ ཝསེན དུཝིདྷོཔི ཨེཀཏྠཝསེན གཧེཏྭཱ ཨེཀཱདྷིཊྛཱནཝསེན ‘‘ཨེཀོ པཉྷོ’’ཏི ཝཏྟབྦོ, སོཏཱནཾ བཧུབྷཱཝཏོ ཝཱ ‘‘བཧུཔཉྷོ’’ཏི ཝཏྟབྦོ; ཏཐཱ པན ཨཝཏྭཱ སོཏེ ཨནཱམསིཏྭཱ སཾཝརཔིདྷཱནཱནཾ ཝསེན ‘‘སཝནྟི སབྦདྷི སོཏཱ’’ཏིཨཱདིམྷི ‘‘དྭེ པཉྷཱ’’ཏི ཝུཏྟཱ. ཏདནུསཱརེན ‘‘ཀེནསྶུ ནིཝུཏོ ལོཀོ’’ཏིཨཱདིམྷིཔི ལོཀཾ ཨནཱམསིཏྭཱ ནཱིཝརཎཱདཱིནཾ ཙཏུནྣཾ ཝསེན ‘‘ཙཏྟཱརོ པཉྷཱ’’ཏིཔི ཝཏྟབྦཱཏི ཨཡཾ ནཡོ དསྶིཏོཏི ནཡདསྶནཾ དཊྛབྦཾ.

དེསནཱཀཱལེ ཝུཏྟདྷམྨསྶ ཨནུསནྡྷིམགྒཧེཏྭཱ ཨཏྟནཱ རཙིཏནིཡཱམེནེཝ པུཙྪིཏཔཉྷསྶ ཙེཝ པཉྷཾ ཨཊྛཔེཏྭཱ, པཊིཉྙཉྩ ཨཀཏྭཱ ཝིསྶཛྫནསྶ ཙ ཝིཙཡཧཱརོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘དེསནཱཀཱལེ ཝུཏྟདྷམྨསྶ ཨནུསནྡྷིཾ གཧེཏྭཱ པུཙྪིཏཔཉྷསྶ ཙེཝ ཏཾ པཉྷཾ ཋཔེཏྭཱ, པཊིཉྙཉྩ ཀཏྭཱ ཝིསྶཛྫནསྶ ཙ ཡོ ཝིཙཡོ ཧཱརོ ཝིབྷཏྟོ, སོ ཝིཙཡཧཱརོ ཀཐཾ ཨམྷེཧི ཝིཉྙཱཡཏི, ཨམྷཱཀཾ ཝིཉྙཱཔནཏྠཱཡ ཏསྨིཾ ཝིཙཡཾ ཝིབྷཛེཐཱ’’ཏི ཝཏྟབྦབྷཱཝཏོ ཏེསུ ཝིཙེཏབྦཱཀཱརཾ དསྶེནྟོ ‘‘ཡཱནི སོཏཱནཱི’’ཏིཨཱདིགཱཐཱཡ ཝིཙཡཱཀཱརདསྶནཱནནྟརཾ ‘‘པཉྙཱ ཙེཝ སཏི ཙཱ’’ཏིཨཱདིམཱཧ.

ཏཏྠ གཱཐཱཏྠོ ཏཱཝ ཝིཉྙཱཏབྦོ – ཡཱཡ པཉྙཱཡ ཨནུསཡཔྤཧཱནེན སོཏནིརུཛ྄ཛྷནཾ ཝུཏྟཾ, ཡཱཡ སཏིཡཱ ཙ པརིཡུཊྛཱནཔྤཧཱནེན སོཏནིརུཛ྄ཛྷནཾ ཝུཏྟཾ, སཱཡཾ པཉྙཱ ཙེཝ སཱཡཾ སཏི ཙ ཏཱཧི པཉྙཱསཏཱིཧི ཨསེསཾ སཧུཔྤནྣཾ ནཱམཉྩེཝ རཱུཔཉྩ, ཨེཏཾ སབྦཾ ཀཏྠ ནིརུཛ྄ཛྷམཱནེ ཨསེསཾ ཨུཔརུཛ྄ཛྷཏཱིཏི མཱརིས མེ མཡཱ པུཊྛོ ཏྭཾ བྷགཝཱ མཡ྄ཧཾ ཨེཏཾ ནིརུཛ྄ཛྷནཾ པབྲཱུཧི, ཨིཏི ཨཱཡསྨཱ ཨཛིཏོ བྷགཝནྟཾ པུཙྪཏི.

ཨཛིཏ ཏྭཾ ཡམེཏཾ པཉྷཾ པུཙྪིཏཾ ནིརུཛ྄ཛྷནཾ མཾ ཨཔུཙྪི, ཨཧཾ ཏེ ཏཝ ཏཾ ནིརུཛ྄ཛྷནཾ ཝདཱམི. ཡཏྠ ཝིཉྙཱཎནིརོདྷེ པཉྙཱསཏིསཧིཏཾ ནཱམཉྩ རཱུཔཉྩ ཝིཉྙཱཎསྶ ¶ ནིརོདྷེན སཧ ཨེཀཏོ ཨསེསཾ ཨུཔརུཛ྄ཛྷཏི, ཨེཏྠ ཝིཉྙཱཎནིརོདྷེ ཨེཏཾ སབྦཾ ཝིཉྙཱཎནིརོདྷེན ཨེཀཏོ ཨེཀཀྑཎེ ཨཔུབྦཾ ཨཙརིམཾ ཨུཔརུཛ྄ཛྷཏི, ཨེཏཾ ཝིཉྙཱཎནིརོདྷཾ ཏསྶ ནཱམརཱུཔསྶ ནིརོདྷོ ནཱཏིཝཏྟཏི, ཏཾ ཏཾ ནཱམརཱུཔནིརོདྷཾ སོ སོ ཝིཉྙཱཎནིརོདྷོ ནཱཏིཝཏྟཏཱིཏི.

‘‘ཏསྨིཾ ¶ པཉྷེ ཨཡཾ ཨཛིཏོ ཀིཾ པུཙྪཏི? ཨུཔརུཛ྄ཛྷནམེཝ པུཙྪཏི, ཨུདཱཧུ ཨཉྙཾ པུཙྪཏཱི’’ཏི ཝཏྟབྦཏོ ‘‘ཨཡཾ པཉྷེ ཨནུསནྡྷིཾ པུཙྪཏཱི’’ཏིཨཱདི ཝུཏྟཾ. ཏཏྠ ཨཡནྟི ཡོ ཨཱཡསྨཱ ཨཛིཏོ པཉྷཾ ཨཔུཙྪཱིཏི ཨཡཾ ཨཛིཏོ. པཉྷེཏི ‘‘པཉྙཱ ཙེཝ སཏི ཙཱ’’ཏིཨཱདིཔཉྷེ. ཡདི ཨནུསནྡྷིཾ པུཙྪཏི, ཨེཝཾ སཏི ‘‘ཀཏྠེཏཾ ཨུཔརུཛ྄ཛྷཏཱི’’ཏི པུཙྪནཾ ཨཡུཏྟཾ བྷཝེཡྻཱཏི? ན, ཨནུསནྡྷཱིཡཏི ཨེཏེན ཨུཔནིརུཛ྄ཛྷནེནཱཏི ཨནུསནྡྷཱིཏི ཨཏྠསམྦྷཝཏོ. ཏེན ཝུཏྟཾ ‘‘ཨནུསནྡྷིཾ པུཙྪནྟོ ཀིཾ…པེ… ནིབྦཱནདྷཱཏུ’’ནྟི. ཨནུསནྡྷིཔུཙྪནེན ཨནུཔཱདིསེསནིབྦཱནདྷཱཏུཡཱཔི པུཙྪནཏོ ‘‘ཀཏྠེཏཾ ཨུཔརུཛ྄ཛྷཏཱི’’ཏི པུཙྪནཾ ཡུཏྟམེཝ.

‘‘ཡཱ ཨནུཔཱདིསེསནིབྦཱནདྷཱཏུ པུཙྪིཏཱ, ཏཾ ཀཏམཱཡ པཊིཔདཱཡ ཨདྷིགཙྪཏཱི’’ཏི པུཙྪིཏབྦཏྟཱ ཙཏུསཙྩཀམྨཊྛཱནབྷཱཝནཱསངྑཱཏཾ པཊིཔདཾ ཝིསཡེན སཧ དསྶེཏུཾ ‘‘ཏཱིཎཱི སཙྩཱནཱི’’ཏིཨཱདི ཝུཏྟཾ. ཏཏྠ སངྑཏཱནཱིཏི ཀམྨཱདིཔཙྩཡེཧི སམེཙྩ སམྦྷཱུཡ དུཀྑཱདཱིནི ཀརཱིཡནྟཱིཏི སངྑཏཱནི. ནིརོདྷདྷམྨཱནཱིཏི ནིརུཛ྄ཛྷནཾ ནིརོདྷོ, དྷམྨོཔི ནིརོདྷདྷམྨོཝ, ཏསྨཱ ནིརོདྷོ དྷམྨོ སབྷཱཝོ ཡེསཾ དུཀྑཱདཱིནནྟི ནིརོདྷདྷམྨཱནཱིཏི ཨཏྠོཝ གཧེཏབྦོ. ཏཱནི ཏཱིཎི སཙྩཱནི སརཱུཔཏོ དསྶེཏུཾ ‘‘དུཀྑཾ སམུདཡོ མགྒོ’’ཏི ཝུཏྟཾ. ཏཱིཎི དུཀྑསམུདཡམགྒསཙྩཱནི སངྑཏཱནཱིཏི ཝུཏྟཱནི, ‘‘ཀིཾ ནིརོདྷསཙྩ’’ནྟི པུཙྪིཏབྦཏྟཱ ‘‘ནིརོདྷོ ཨསངྑཏོ’’ཏི ཝུཏྟཾ. ཨིདྷ ‘‘ནིརོདྷདྷམྨོ’’ཏིཔི ཝཏྟབྦཾ. ཀམྨཱདིཔཙྩཡེཧི ཨསངྑཏཏྟཱ ཨསངྑཏོ. ཨུཔྤཱདནིརོདྷཱབྷཱཝཏོ ཨནིརོདྷདྷམྨོ. ‘‘པཧཱཡཀཔཧཱཏབྦེསུ སཙྩེསུ ཀཏམེན པཧཱཡཀེན ཀཏམོ པཧཱཏབྦོ, ཀཏམཱཡ བྷཱུམིཡཱ པཧཱིནོ’’ཏི པུཙྪིཏབྦཏྟཱ ‘‘ཏཏྠ སམུདཡོ དྭཱིསུ བྷཱུམཱིསཱུ’’ཏིཨཱདི ཝུཏྟཾ. ཏཏྠ དྭཱིསུ བྷཱུམཱིསཱུཏི དསྶནབྷཱཝནཱབྷཱུམཱིསུ. ཀཱམཙྪནྡོཏི ཀཱམབྷཝརཱགོ. རཱུཔརཱགོཏི རཱུཔབྷཝརཱགོ. ཨརཱུཔརཱགོཏི ཨརཱུཔབྷཝརཱགོ. སཾཡོཛནབྷེདཏོ དས སཾཡོཛནཱནི པཧཱིཡནྟཱིཏི ཡོཛནཱ.

༡༢. པཧཱཏབྦསཾཡོཛནཱནི ¶ དསྶནབྷཱུམིབྷཱཝནཱབྷཱུམིབྷེདེན ཝིབྷཏྟཱནི, ཨམྷེཧིཔི ཉཱཏཱནི, ‘‘ཨིནྡྲིཡབྷེདཏོ ཀཐཾ ཝིབྷཏྟཱནཱི’’ཏི ཝཏྟབྦབྷཱཝཏོ ‘‘ཏཏྠ ཏཱིཎཱི’’ཏིཨཱདི ཝུཏྟཾ. ཨཐ ཝཱ ‘‘པཧཱཏབྦསཾཡོཛནེསུ ཀཏམཱནི སཾཡོཛནཱནི ཀཏམཾ ཨིནྡྲིཡཾ ཨཏྟནོ པཧཱཡཀཾ ཀཏྭཱ ནིརུཛ྄ཛྷནྟཱི’’ཏི པུཙྪིཏབྦཏྟཱ ‘‘ཏཏྠ ཏཱིཎཱི’’ཏིཨཱདི ཝུཏྟཾ. ཨདྷིཊྛཱཡ ཨཏྟནོ པཧཱཡཀཾ ཀཏྭཱ ནིརུཛ྄ཛྷནྟི ཨནུཔྤཱདཝསེན. ‘‘ཨནཉྙཱཏཉྙསྶཱམཱིཏིནྡྲིཡཉྩ ཨཉྙིནྡྲིཡཉྩ སཾཡོཛནཱནཾ ནིརུཛ྄ཛྷནཧེཏུ ཧོཏུ, ཨཉྙཱཏཱཝིནྡྲིཡཾ ཀིསྶ ཧེཏཱུ’’ཏི པུཙྪིཏབྦཏྟཱ ‘‘ཡཾ པནཱ’’ཏིཨཱདི ཝུཏྟཾ. ཏཏྠ ཡཾ ཡེན ཨཉྙཱཏཱཝིནྡྲིཡེན ཨརཧཱ ‘‘མེ ཛཱཏི ཁཱིཎཱ’’ཏི ཨེཝཾ ཛཱནཱཏི, ཨིདཾ ཛཱནནཧེཏུ ཨཉྙཱཏཱཝིནྡྲིཡཾ ཁཡེ ཛཱཏིཀྑཡེ ཨརཧཏྟཕལེ པཝཏྟཾ ཉཱཎཾ. ཡཾ ཡེན ཨཉྙཱཏཱཝིནྡྲིཡེན ཨརཧཱ ‘‘ཨིཏྠཏྟཱཡ ཨཔརཾ ན བྷཝིསྶཱམཱི’’ཏི པཛཱནཱཏི, ཨིདཾ པཛཱནནཧེཏུ ¶ ཨཉྙཱཏཱཝིནྡྲིཡཾ. ཨནུཔྤཱདེ པན ཨནུཔྤཛྫནེ ཨརཧཏྟཕལེ པཝཏྟཾ ཉཱཎཾ ཨཉྙཱཏཱཝིནྡྲིཡཾ ཛཱནནཧེཏུ ཧོཏཱིཏི ཝུཏྟཾ ཧོཏི. ཨིནྡྲིཡཉཱཎཱནི པཧཱཡཀཱནི ཀཏྭཱ སཾཡོཛནཱནི ནིརུཛ྄ཛྷནྟི, ‘‘ཏཱནི ཉཱཎཱནི ཀདཱ ནིརུཛ྄ཛྷནྟཱི’’ཏི ཝཏྟབྦབྷཱཝཏོ ‘‘ཏཏྠ ཡཉྩཱ’’ཏིཨཱདི ཝུཏྟཾ.

‘‘ཨནཉྙཱཏཉྙསྶཱམཱིཏིནྡྲིཡཾ ཨཉྙིནྡྲིཡཾ པཱཔུཎནྟསྶ ནིརུཛ྄ཛྷཏུ, ཨཉྙིནྡྲིཡཾ ཨརཧཏྟཾ པཱཔུཎནྟསྶ ནིརུཛ྄ཛྷཏུ, ཨཉྙཱཏཱཝིནྡྲིཡཾ ཀདཱ ནིརུཛ྄ཛྷཏཱི’’ཏི པུཙྪིཏབྦཏྟཱ ‘‘ཏཏྠ ཡཉྩ ཁཡེ’’ཏིཨཱདི ཝུཏྟཾ. ཏཏྠ དྭེཏི ཀིཙྩབྷེདེན དྭེ, སབྷཱཝཏོ པན ཨེཀཱཝ.

‘‘པཛཱནནཀིཙྩམྤི ཨེཀམེཝ, ཀཐཾ དྭེ སིཡུ’’ནྟི ཝཏྟབྦཏྟཱ ‘‘ཨཔིཙཱ’’ཏིཨཱདི ཝུཏྟཾ. ཨཱརམྨཎཔཉྙཱབྷེདེན དྭེ ནཱམཱནི ལབྦྷནྟཱིཏི ཝུཏྟཾ ཧོཏི. སཱཏི ཡཱ པཉྙཱ པུབྦགཱཐཱཡཾ སོཏཔིདྷཱནཀིཙྩེན ཝུཏྟཱ, སཱ པཉྙཱ པཀཱརེཧི ཛཱནནསབྷཱཝེན པཉྙཱ ནཱམ. ཡཐཱདིཊྛཾ ཨཱརམྨཎཾ ཨཔིལཱཔནཊྛེན ཨོགཱཧནཊྛེན སཏི ནཱམ.

༡༣. ‘‘པཉྙཱ ཙེཝ སཏི ཙཱ’’ཏི པདསྶ ཨཏྠོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ནཱམརཱུཔཉྩཱ’ཏི པདསྶ ཨཏྠོ ཀཐཾ ཨམྷེཧི ཉཱཏབྦོ’’ཏི ཝཏྟབྦཏྟཱ ནཱམརཱུཔཾ ཝིབྷཛནྟོ ‘‘ཏཏྠ ཡེ པཉྩུཔཱདཱནཀྑནྡྷཱ’’ཏིཨཱདིམཱཧ. ཏཏྠ ཏཏྠཱཏི ཀམྨཝིཔཱཀཝཊྚབྷེདེ བྷཝཏྟཡེ. ཏཏྠཱཏི པཉྩུཔཱདཱནཀྑནྡྷསངྑཱཏནཱམརཱུཔསམུདཱཡེ. པཉྩིནྡྲིཡཱནཱིཏི ཙཀྑཱདིཔཉྩིནྡྲིཡཱནི ¶ . ཝིཉྙཱཎསམྤཡུཏྟནྟི སམྤཡུཏྟཔཙྩཡཏྟཾ སནྡྷཱཡ ན ཝུཏྟཾ, པཙུརཛནསྶ པན ཨཝིབྷཛིཏྭཱ གཧཎཱིཡསབྷཱཝམཏྟཾ སནྡྷཱཡ ཝུཏྟཾ. ཝིབྷཱགཾ ཛཱནནྟེཧི པན ‘‘ནཱམཾ ཝིཉྙཱཎསམྤཡུཏྟཾ, རཱུཔཾ པན ན ཝིཉྙཱཎསམྤཡུཏྟཾ, སཧཛཱཏ’’ནྟི ཝིབྷཛིཏྭཱ གཧེཏབྦཾ. ཏསྶཱཏི པཉྙཱསཏིསཧིཏསྶ ནཱམརཱུཔསྶ. ནིརོདྷནྟི ཨནུཔཱདིསེསནིབྦཱནདྷཱཏུཾ.

བྷགཝནྟཾ པུཙྪནྟོ ཨཱཡསྨཱ ཨཛིཏོ ‘‘པཉྙཱ ཙེཝ…པེ… ཀཏྠེཏཾ ཨུཔརུཛ྄ཛྷཏཱི’’ཏི ཨེཝཾ པཱརཱཡནེ ཨཱཧ. ‘‘པཉྙཱ ཙེཝཱཏིཨཱདིགཱཐཱཡ ཡཱ ཨནུཔཱདིསེསནིབྦཱནདྷཱཏུ པུཙྪིཏཱ, སཱ ཨནུཔཱདིསེསནིབྦཱནདྷཱཏུ ཀཏམེན ཨདྷིགམེན པཏྟབྦཱ’’ཏི པུཙྪིཏབྦཏྟཱ ཙཏུརིདྡྷིཔཱདམུཁེན ཨརིཡམགྒཱདྷིགམམུཁེན པཏྟབྦཱ, ཙཏུརིདྡྷིཔཱདབྷཱཝནཱཡ ཙ ཙཏྟཱརིནྡྲིཡཱནི མཱུལབྷཱུཏཱནི, ཏསྨཱ མཱུལབྷཱུཏཱནི ཏཱནི ཙཏྟཱརིནྡྲིཡཱནི ནིདྡྷཱརེཏྭཱ དསྶེནྟོ ‘‘ཏཏྠ སཏི ཙ པཉྙཱ ཙཱ’’ཏིཨཱདིམཱཧ. ཀུསལཱཀུསལདྷམྨགཏིཡོ སམནྭེསམཱནཱཡ སཏིཡཱ སིཛ྄ཛྷམཱནཱཡ ཨེཀནྟེན སམཱདྷི ནིཔྥཱདེཏབྦོ, སཏིགྒཧཎེན ཙ པརིཡུཊྛཱནཔྤཧཱནཾ གཱཐཱཡཾ ཨདྷིཔྤེཏཾ, པརིཡུཊྛཱནཔྤཧཱནེན ཙ ¶ སམཱདྷིཀིཙྩཾ པཱཀཊནྟི ཨཱཧ ‘‘སཏི དྭེ ཨིནྡྲིཡཱནི སཏིནྡྲིཡཉྩ སམཱདྷིནྡྲིཡཉྩཱ’’ཏི. པཉྙཱཡ ཨནུསཡསམུགྒྷཱཏཾ ཙཏུབྦིདྷསམྨཔྤདྷཱནསངྑཱཏེན ཝཱིརིཡེན སིཛ྄ཛྷཏི, ན ཝིནཱ ཏེནཱཏི ཝུཏྟཾ ‘‘པཉྙཱ དྭེ ཨིནྡྲིཡཱནི པཉྙིནྡྲིཡཉྩ ཝཱིརིཡིནྡྲིཡཉྩཱ’’ཏི.

ཨིམེསུ ཡཐཱཝུཏྟེསུ ཙཏཱུསུ ཨིནྡྲིཡེསུ པུབྦབྷཱགེ ཝཱ མགྒཀྑཎེ ཝཱ སིཛ྄ཛྷནྟེསུ ཏཾསམྤཡུཏྟཱ ཡཱ སདྡཧནཱ ཨོཀཔྤནཱ སིདྡྷཱ, ཨིདཾ སདྡཧནཨོཀཔྤནསངྑཱཏཾ དྷམྨཛཱཏཾ སདྡྷིནྡྲིཡཾ སིདྡྷཾ, ‘‘ཏེསུ མཱུལབྷཱུཏེསུ ཨིནྡྲིཡེསུ སིདྡྷེསུ ཀཏམེན ཨིནྡྲིཡེན ཀཏམོ དྷམྨོ སིདྡྷོ’’ཏི པུཙྪིཏབྦཏྟཱ ཨིམིནཱ ཨཡཾ སིདྡྷོཏི དསྶེནྟོ ‘‘ཏཏྠ ཡཱ སདྡྷཱདྷིཔཏེཡྻཱ’’ཏིཨཱདིམཱཧ. ཏཏྠ ཏཏྠཱཏི སཏྱཱདཱིསུ. སདྡྷཱདྷིཔཏེཡྻཱཏི པཙྩཡབྷཱུཏཱཡ སདྡྷཱཡ སིདྡྷོ ཚནྡོ ཨདྷིཔཏཱིཏི སདྡྷཱདྷིཔཏི, སདྡྷཱདྷིཔཏིནཱ པཝཏྟེཏབྦཱ ཙིཏྟེཀགྒཏཱཏི སདྡྷཱདྷིཔཏེཡྻཱ. ཚནྡསམཱདྷཱིཏི ཚནྡཾ ཛེཊྛཀཾ ཀཏྭཱ པཝཏྟིཏོ སམཱདྷི ཝཱ ཚནྡཱདྷིཔཏིནཱ སམྤཡུཏྟོ པུབྦབྷཱགེ པཝཏྟོ སམཱདྷི ཝཱ ཚནྡསམཱདྷི, པཧཱནཾ པཧཱནཧེཏུ ཧོཏཱིཏི ཡོཛནཱ ཀཱཏབྦཱ. པཧཱནནྟི ཙ པཛཧཏི ཝིཀྑམྦྷིཏཀིལེསེ ཨེཏེན ཚནྡསམཱདྷིནཱཏི པཧཱནནྟི ཀརཎསཱདྷནཏྠོ གཧེཏབྦོ. པཊིསངྑཱནབལེནཱཏི པརིཀམྨབལེན. བྷཱཝནཱབལེནཱཏི མཧགྒཏབྷཱཝནཱབལེན.

‘‘སོ ¶ ཚནྡསམཱདྷི སཡཾ ཀེཝལོཝ པཧཱན’’ནྟི ཝཏྟབྦཏྟཱ ‘‘ཏཏྠ ཡེ ཨསྶཱསཔསྶཱསཱ’’ཏིཨཱདི ཝུཏྟཾ. ཏཏྠ ཏཏྠཱཏི ཏསྨིཾ སམཱཧིཏེ ཙིཏྟེ ཙིཏྟུཔྤཱདེ. ‘‘ཏསྨིཾ སམཱཧིཏེ ཙིཏྟུཔྤཱདེ ཨསྶཱསཱ’’ཏིཨཱདིནཱ ཨསྶཱསཱདིསཱིསེན ཨསྶཱསཱདིཛནཀཱ ཝཱིརིཡསངྑཱརཱ གཧིཏཱ, ཏེ ཙ ཡཱཝ བྷཱཝནཱཔཱརིཔཱུརཱི, ཏཱཝ པུནཔྤུནཾ སརཎཏོ ཙ སརཱ, པུནཔྤུནཾ སངྐཔྤཏོ ཙ སངྐཔྤཱ. ཡོ པན ‘‘སརསངྐཔྤཱ, ཨིམེ སངྑཱརཱ ཙཱ’’ཏི ཨེཝཾ ཝུཏྟཔྤཀཱརོ པུརིམཀོ ཚནྡསམཱདྷི ཝཱ ཀིལེསཝིཀྑམྦྷནཏཱཡ ཙ ཏདངྒཔྤཧཱནཏཱཡ ཙ པཧཱནཾ པཧཱནཧེཏུཔདྷཱནཾ ཝཱ, ‘‘ཨིམེ ཝུཏྟཔྤཀཱརཱ སངྑཱརཱདཡོ ཀིཾ བྷཱཝེནྟཱི’’ཏི པུཙྪིཏབྦཏྟཱ ‘‘ཨིམེ ཙ སངྑཱརཱ’’ཏིཨཱདི ཝུཏྟཾ. ཏཏྠ ཨིམེ སངྑཱརཱ ཙ ཏདུབྷཡཉྩ ཚནྡསམཱདྷིཔྤདྷཱནསངྑཱརསམནྣཱགཏཾ ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ ཨིདྡྷིཔཱདཾ བྷཱཝེཏཱིཏི ཡོཛནཱ.

ཚནྡསམཱདྷིཔྤདྷཱནསངྑཱརསམནྣཱགཏནྟི ཚནྡོ ཨེཝ ཨདྷིཔཏི ཚནྡཱདྷིཔཏི, ཚནྡཱདྷིཔཏིསམཱདྷི. ཏེན ཝུཏྟཾ བྷགཝཏཱ – ‘‘ཚནྡཾ ཙེ, བྷིཀྑཝེ, བྷིཀྑུ ཨདྷིཔཏིཾ ཀརིཏྭཱ ལབྷཏི སམཱདྷི’’ནྟི (ཝིབྷ. ༤༣༢). ཚནྡཧེཏུཀོ ཝཱ སམཱདྷི, ཚནྡཱདིཀོ ཝཱ སམཱདྷི ཚནྡསམཱདྷི, ཚནྡཱདྷིཔཏིསྶ པཙྩཡུཔྤནྣོ སམཱདྷཱིཏི ཝུཏྟཾ ཧོཏི. པདྷཱནབྷཱུཏཱ སངྑཱརཱ པདྷཱནསངྑཱརཱ, པདྷཱནསདྡེན སངྑཏསངྑཱརཱདཡོ ནིཝཏྟཱཔིཏཱ, ཚནྡསམཱདྷི ཙ པདྷཱནསངྑཱརཱ ཙཱཏི ཚནྡསམཱདྷིཔྤདྷཱནསངྑཱརཱ ¶ , ཏེཧི སམནྣཱགཏོ ཚནྡ…པེ… སམནྣཱགཏོ, ཏཾ…པེ… གཏཾ. ཨིཛ྄ཛྷཏི སམིཛ྄ཛྷཏི ནིཔྤཛྫཏཱིཏི ཨིདྡྷི, ཀོཊྛཱསོ, ཨིདྡྷི ཨེཝ པཱདོ ཀོཊྛཱསོཏི ཨིདྡྷིཔཱདོ, ཨིདྡྷིཔཱདཙཏུཏྠོ. ཨིཛ྄ཛྷནྟི ཝཱ ཏཱཡ སཏྟཱ ཨིདྡྷཱ ཝུདྡྷཱ ཨུཀྐཾསགཏཱ ཧོནྟཱིཏི ཨིདྡྷི, པཛྫཏི ཨེཏེནཱཏི པཱདོ, ཨིདྡྷིཡཱ པཱདོཏི ཨིདྡྷིཔཱདོ. ཨིདྡྷིཔཱདོཏི སཱམཉྙཏྠཝསེན ཝུཏྟོཔི ‘‘ཚནྡསམཱདྷིཔྤདྷཱནསངྑཱརསམནྣཱགཏ’’ནྟི ཝུཏྟཏྟཱ ཚནྡིདྡྷིཔཱདོཝ གཧེཏབྦོ, ཏཾ ཨིདྡྷིཔཱདཾ ཏཾ ཚནྡིདྡྷིཔཱདཾ བྷཱཝེཏི ཝཌྜྷེཏཱིཏི ཨཏྠོ.

ཝིཝེཀནིསྶིཏཾ ཝིརཱགནིསྶིཏནྟི ཝིཔསྶནཱཀྑཎེ ཀིཙྩཏོ ཏདངྒཝིཝེཀནིསྶིཏཾ, ཨཛ྄ཛྷཱསཡཏོ ནིསྶརཎཝིཝེཀནིསྶིཏཾ, མགྒཀྑཎེ པན ཀིཙྩཏོ སམུཙྪེདཝིཝེཀནིསྶིཏཾ, ཨཱརམྨཎཏོ ནིསྶརཎཝིཝེཀནིསྶིཏཾ. ཝིརཱགནིསྶིཏནྟི ཝིཔསྶནཱཀྑཎེ ཀིཙྩཏོ ཏདངྒཝིརཱགནིསྶིཏཾ, ཨཛ྄ཛྷཱསཡཏོ ནིསྶརཎཝིཝེཀནིསྶིཏཾ, མགྒཀྑཎེ པན ཀིཙྩཏོ སམུཙྪེདཝིརཱགནིསྶིཏཾ ¶ , ཨཱརམྨཎཏོ ནིསྶརཎཝིརཱགནིསྶིཏཾ. ནིརོདྷནིསྶིཏནྟི ཝིཔསྶནཱཀྑཎེ ཀིཙྩཏོ ཏདངྒནིརོདྷནིསྶིཏཾ, ཨཛ྄ཛྷཱསཡཏོ ནིསྶརཎནིརོདྷནིསྶིཏཾ, མགྒཀྑཎེ ཀིཙྩཏོ སམུཙྪེདནིརོདྷནིསྶིཏཾ, ཨཱརམྨཎཏོ ནིསྶརཎནིརོདྷནིསྶིཏཾ. ཝོསྶགྒཔརིཎཱམིནྟི ཨེཏྠ པརིཙྩཱགཝོསྶགྒཔཀྑནྡནཝོསྶགྒཝསེན ཝོསྶགྒོ དུཝིདྷོ. ཏཏྠཔི ཝིཔསྶནཱཀྑཎེ ཏདངྒཝསེན པརིཙྩཱགཝོསྶགྒོ, ནིབྦཱནནིནྣབྷཱཝེན པཀྑནྡནཝོསྶགྒོ, མགྒཀྑཎེ སམུཙྪེདཝསེན པརིཙྩཱགཝོསྶགྒོ, ཨཱརམྨཎཀརཎེན ནིབྦཱནཔཀྑནྡནཝོསྶགྒོཏི ཝིབྷཛིཏྭཱ གཧེཏབྦོ. ཡཐཱཝུཏྟཝོསྶགྒཏྠཾ པརིཎམཏི, པརིཎཏཾ ཝཱ པརིཔཙཏི པརིཔཙནཾ ཀརོཏཱིཏི ཝོསྶགྒཔརིཎཱམཱི, ཏཾ ཝོསྶགྒཔརིཎཱམིཾ.

ཚནྡིདྡྷིཔཱདབྷཱཝནཱཀཱརོ ཨཱཙརིཡེན ཝུཏྟོ, ཨམྷེཧི ཙ ཉཱཏོ, ‘‘ཀཐཾ ཝཱིརིཡིདྡྷིཔཱདབྷཱཝནཱཀཱརོ ཨམྷེཧི ཝིཛཱནིཏབྦོ’’ཏི ཝཏྟབྦབྷཱཝཏོ ‘‘ཏཏྠ ཡཱ ཝཱིརིཡཱདྷིཔཏེཡྻཱ’’ཏིཨཱདི ཝུཏྟཾ. ཏསྶཏྠོ ཧེཊྛཱ ཝུཏྟནཡཱནུསཱརེནེཝ ཝིཉྙེཡྻོ. སཾཁིཏྟཝསེན པན ཋཔིཏཾ པཱཋཾ ཝིཏྠཱརཏོ ཋཔེསྶཱམི. ཀཐཾ? –

‘‘ཏཏྠ ཡཱ ཝཱིརིཡཱདྷིཔཏེཡྻཱ ཙིཏྟེཀགྒཏཱ, ཨཡཾ ཝཱིརིཡསམཱདྷི. སམཱཧིཏེ ཙིཏྟེ ཀིལེསཱནཾ ཝིཀྑམྦྷནཏཱཡ པཊིསངྑཱནབལེན ཝཱ བྷཱཝནཱབལེན ཝཱ, ཨིདཾ པཧཱནཾ. ཏཏྠ ཡེ ཨསྶཱསཔསྶཱསཱ ཝིཏཀྐཝིཙཱརཱ སཉྙཱཝེདཡིཏཱ སརསངྐཔྤཱ, ཨིམེ སངྑཱརཱ. ཨིཏི པུརིམཀོ ཙ ཝཱིརིཡསམཱདྷི, ཀིལེསཝིཀྑམྦྷནཏཱཡ ཙ པཧཱནཾ ཨིམེ ཙ སངྑཱརཱ, ཏདུབྷཡཾ ཝཱིརིཡསམཱདྷིཔྤདྷཱནསངྑཱརསམནྣཱགཏཾ ¶ ཨིདྡྷིཔཱདཾ བྷཱཝེཏི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ.

‘‘ཏཏྠ ཡཱ ཙིཏྟཱདྷིཔཏེཡྻཱ ཙིཏྟེཀགྒཏཱ, ཨཡཾ ཙིཏྟསམཱདྷི. སམཱཧིཏེ ཙིཏྟེ ཀིལེསཱནཾ ཝིཀྑམྦྷནཏཱཡ པཊིསངྑཱནབལེན ཝཱ བྷཱཝནཱབལེན ཝཱ, ཨིདཾ པཧཱནཾ. ཏཏྠ ཡེ ཨསྶཱསཔསྶཱསཱ ཝིཏཀྐཝིཙཱརཱ སཉྙཱཝེདཡིཏཱ སརསངྐཔྤཱ, ཨིམེ སངྑཱརཱ. ཨིཏི པུརིམཀོ ཙ ཙིཏྟསམཱདྷི, ཀིལེསཝིཀྑམྦྷནཏཱཡ ཙ པཧཱནཾ ཨིམེ ཙ སངྑཱརཱ, ཏདུབྷཡཾ ཙིཏྟསམཱདྷིཔྤདྷཱནསངྑཱརསམནྣཱགཏཾ ཨིདྡྷིཔཱདཾ བྷཱཝེཏི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ.

‘‘ཏཏྠ ¶ ཡཱ ཝཱིམཾསཱདྷིཔཏེཡྻཱ ཙིཏྟེཀགྒཏཱ, ཨཡཾ ཝཱིམཾསཱསམཱདྷི, སམཱཧིཏེ ཙིཏྟེ ཀིལེསཱནཾ ཝིཀྑམྦྷནཏཱཡ པཊིསངྑཱནབལེན ཝཱ བྷཱཝནཱབལེན ཝཱ, ཨིདཾ པཧཱནཾ. ཏཏྠ ཡེ ཨསྶཱསཔསྶཱསཱ ཝིཏཀྐཝིཙཱརཱ སཉྙཱཝེདཡིཏཱ སརསངྐཔྤཱ, ཨིམེ སངྑཱརཱ. ཨིཏི པུརིམཀོ ཙ ཝཱིམཾསཱསམཱདྷི ཀིལེསཝིཀྑམྦྷནཏཱཡ ཙ པཧཱནཾ ཨིམེ ཙ སངྑཱརཱ, ཏདུབྷཡཾ ཝཱིམཾསཱསམཱདྷིཔྤདྷཱནསངྑཱརསམནྣཱགཏཾ ཨིདྡྷིཔཱདཾ བྷཱཝེཏི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམི’’ནྟི.

ཨཡཾ པན ཝིསེསོ – ཝཱིརིཡསམཱདྷཱིཏི ཝཱིརིཡཾ ཛེཊྛཀཾ ཀཏྭཱ པཝཏྟིཏོ སམཱདྷི ཝཱ ཝཱིརིཡཱདྷིཔཏིནཱ སམྤཡུཏྟོ པུབྦབྷཱགེ པཝཏྟོ སམཱདྷི ཝཱ ཝཱིརིཡསམཱདྷི. ཙིཏྟསམཱདྷཱིཏི ཙིཏྟཾ ཛེཊྛཀཾ ཀཏྭཱ པཝཏྟིཏོ སམཱདྷི ཝཱ ཙིཏྟཱདྷིཔཏིནཱ སམྤཡུཏྟོ པུབྦབྷཱགེ པཝཏྟོ སམཱདྷི ཝཱ ཙིཏྟསམཱདྷི. ཝཱིམཾསཱསམཱདྷཱིཏི ཝཱིམཾསཾ ཛེཊྛཀཾ ཀཏྭཱ པཝཏྟིཏོ སམཱདྷི ཝཱ ཝཱིམཾསཱདྷིཔཏིནཱ སམྤཡུཏྟོ པུབྦབྷཱགེ པཝཏྟོ སམཱདྷི ཝཱ ཝཱིམཾསཱསམཱདྷཱིཏི.

སཏྟིབལཱནུརཱུཔེནེཏྠ སངྑེཔཝཎྞནཱ ཀཏཱ, གམྦྷཱིརཉཱཎེཧི པན ཨཊྛཀཐཱཊཱིཀཱནུརཱུཔེན ཝིཏྠཱརཏོ ཝཱ གམྦྷཱིརཏོ ཝཱ ཝིབྷཛིཏྭཱ གཧེཏབྦཱ.

༡༤. ‘‘ཚནྡསམཱདྷི ཝཱིརིཡསམཱདྷི ཙིཏྟསམཱདྷི ཝཱིམཾསཱསམཱདྷཱི’’ཏི ཝུཏྟོ, ‘‘ཨེཝཾ སཏི ཝཱིམཾསཱསམཱདྷིཡེཝ ཉཱཎམཱུལཀོ ཉཱཎཔུབྦངྒམོ ཉཱཎཱནུཔརིཝཏྟི བྷཝེཡྻ, ཨཉྙེ ཏཡོ སམཱདྷཡོ ཨཉྙཱཎམཱུལཀཱ ཨཉྙཱཎཔུབྦངྒམཱ ཨཉྙཱཎཔཝཏྟིཡོ བྷཝེཡྻུ’’ནྟི ཝཏྟབྦཏྟཱ སབྦེ སམཱདྷཡོ ཉཱཎམཱུལཀཱདཡོཡེཝཱཏི དསྶེཏུཾ ‘‘སབྦོ སམཱདྷི ཉཱཎམཱུལཀོ’’ཏིཨཱདི ཝུཏྟཾ. ཏཏྠ སབྦོ སམཱདྷཱིཏི ¶ ཚནྡསམཱདྷི, ཝཱིརིཡསམཱདྷི, ཙིཏྟསམཱདྷི, ཝཱིམཾསཱསམཱདྷཱིཏི ཙཏུབྦིདྷོ སམཱདྷི. ཉཱཎམཱུལཀོཏི ཨེཀཱཝཛྫནཝཱིཐིནཱནཱཝཛྫནཝཱིཐཱིསུ པཝཏྟཾ ཨུཔཙཱརཉཱཎམཱུལཀོ. ཉཱཎཔུབྦངྒམོཏི ཨདྷིགམཉཱཎཾ པུབྦངྒམཾ ཨསྶཱཏི ཉཱཎཔུབྦངྒམོ. ཉཱཎཱནུཔརིཝཏྟཱིཏི པཙྩཝེཀྑཎཉཱཎཾ ཨནུཔརིཝཏྟི ཨསྶཱཏི ཉཱཎཱནུཔརིཝཏྟི. ཨཐ ཝཱ ནཱནཱཝཛྫནཱུཔཙཱརཉཱཎཾ ཝཱ པཊིསནྡྷིཉཱཎཾ ཝཱ མཱུལཾ ཨསྶཱཏི ཉཱཎམཱུལཀོ, ཨུཔཙཱརཉཱཎཾ པུབྦངྒམཾ ཨསྶཱཏི ཉཱཎཔུབྦངྒམོ, ཨཔྤནཱཉཱཎཾ ཨནུཔརིཝཏྟི ཨསྶཱཏི ཉཱཎཱནུཔརིཝཏྟི ¶ . སབྦཾ ཝཱ ཨུཔཙཱརཉཱཎཾ མཱུལཾ ཨསྶཱཏི ཉཱཎམཱུལཀོ. ཨཔྤནཱཉཱཎཾ པུབྦངྒམཾ ཨསྶཱཏི ཉཱཎཔུབྦངྒམོ. ཨབྷིཉྙཱཉཱཎཾ ཨནུཔརིཝཏྟི ཨསྶཱཏི ཉཱཎཱནུཔརིཝཏྟི, ཨནུཔརིཝཏྟནཾ ཝཱ ཨནུཔརིཝཏྟི, ཉཱཎསྶ ཨནུཔརིཝཏྟི ཉཱཎཱནུཔརིཝཏྟི, ཉཱཎཱནུཔརིཝཏྟི ཨསྶཱཏི ཉཱཎཱནུཔརིཝཏྟི. ཉཱཎཾ པན པུབྦེ ཝུཏྟཔྤཀཱརམེཝ.

ཡཐཱ པུརེ ཏཐཱ པཙྪཱཏི ཡཐཱ ཚནྡསམཱདྷིཨཱདིཙཏུབྦིདྷསམཱདྷིསྶ པུབྦེནིཝཱསཱནུསྶཏིཉཱཎཱནུཔརིཝཏྟིབྷཱཝེན པུརེ ཨཏཱིཏཱསུ ཛཱཏཱིསུ ཨསངྑྱེཡྻེསུཔི སཾཝཊྚཝིཝཊྚེསུ ཨཏྟནོ ཁནྡྷཔཊིབདྡྷསྶ, པརེསཾ ཁནྡྷཔཊིབདྡྷསྶ ཙ སུཊྛུ པཊིཝིཛ྄ཛྷནམེཝ, ན དུཔྤཊིཝིཛ྄ཛྷནཾ ཏཐཱ ཏཐཱཝུཏྟསམཱདྷིསྶ ཨནཱགཏཾསཉཱཎཱནུཔརིཝཏྟིབྷཱཝེན པཙྪཱ ཨནཱགཏཱསུ ཛཱཏཱིསུ ཨསངྑྱེཡྻེསུཔི སཾཝཊྚཝིཝཊྚེསུ ཨཏྟནོ ཁནྡྷཔཊིབདྡྷསྶ, པརེསཾ ཁནྡྷཔཊིབདྡྷསྶ ཙ སུཊྛུ པཊིཝིཛ྄ཛྷནམེཝ, ན དུཔྤཊིཝིཛ྄ཛྷནནྟི ཨཏྠོ དཊྛབྦོ. ཡཐཱ པཙྪཱ ཏཐཱ པུརེཏི ཡཐཱ ཡཐཱཝུཏྟསམཱདྷིསྶ ཙེཏོཔརིཡཉཱཎཱནུཔརིཝཏྟིབྷཱཝེན ཨནཱགཏེསུ སཏྟསུཡེཝ དིཝསེསུ པརསཏྟཱནཾཡེཝ ཙིཏྟསྶ སུཊྛུ པཊིཝིཛ྄ཛྷནམེཝ, ན དུཔྤཊིཝིཛ྄ཛྷནཾ, ཏཐཱ ཏཐཱཝུཏྟསམཱདྷིསྶ པུརེ ཨཏཱིཏེསུ སཏྟསུཡེཝ དིཝསེསུ པརསཏྟཱནཾཡེཝ ཙིཏྟསྶ སུཊྛུ པཊིཝིཛ྄ཛྷནམེཝ, ན དུཔྤཊིཝིཛ྄ཛྷནནྟི ཨཏྠོ.

ཡཐཱ དིཝཱ ཏཐཱ རཏྟིནྟི ཡཐཱ ཙཀྑུམནྟཱནཾ སཏྟཱནཾ དིཝསབྷཱགེ སཱུརིཡཱལོཀེན ཨནྡྷཀཱརསྶ ཝིདྡྷཾསིཏཏྟཱ ཨཱཔཱཐགཏཾ ཙཀྑུཝིཉྙེཡྻཾ རཱུཔཾ མནོཝིཉྙཱཎེནཔི སུཝིཉྙེཡྻཾ, ཏཐཱ རཏྟིབྷཱགེ ཙཏུརངྒསམནྣཱགཏེཔི ཨནྡྷཀཱརེ ཝཏྟམཱནེ ཡཐཱཝུཏྟསམཱདྷིསྶ དིབྦཙཀྑུཉཱཎཱནུཔརིཝཏྟིབྷཱཝེན རཱུཔཱཡཏནསྶ སུཊྛུ པཊིཝིཛ྄ཛྷནམེཝ, ན དུཔྤཊིཝིཛ྄ཛྷནཾ. ཡཐཱ རཏྟིཾ ཏཐཱ དིཝཱཏི ཡཐཱ རཏྟིབྷཱགེ ཙཏུརངྒསམནྣཱགཏེཔི ཨནྡྷཀཱརེ ཡཐཱཝུཏྟསམཱདྷིསྶ དིབྦཙཀྑུཉཱཎཱནུཔརིཝཏྟིབྷཱཝེན རཱུཔཱཡཏནསྶ སུཊྛུ པཊིཝིཛ྄ཛྷནམེཝ, ན དུཔྤཊིཝིཛ྄ཛྷནཾ, ཏཐཱ དིཝསབྷཱགེ སུཁུམསྶ རཱུཔཱཡཏནསྶ ཝཱ ཀེནཙི པཱཀཱརཱདིནཱ ཏིརོཧིཏསྶ རཱུཔཱཡཏནསྶ ཝཱ ཨཏིདཱུརཊྛཱནེ པཝཏྟསྶ རཱུཔཱཡཏནསྶ ཝཱ ཡཐཱཝུཏྟསམཱདྷིསྶ དིབྦཙཀྑུཉཱཎཱནུཔརིཝཏྟིབྷཱཝེན སུཊྛུ པཊིཝིཛ྄ཛྷནམེཝ, ན དུཔྤཊིཝིཛ྄ཛྷནནྟི ཨཏྠོ དཊྛབྦོ.

ཡཐཱ ¶ ཡཐཱཝུཏྟསམཱདྷིསྶ དིཝསབྷཱགེ དིབྦསོཏཉཱཎཱནུཔརིཝཏྟིབྷཱཝེན སུཁུམསྶ སདྡཱཡཏནསྶ ཝཱ ཀེནཙི པཱཀཱརཱདིནཱ ཏིརོཧིཏསྶ སདྡཱཡཏནསྶ ¶ ཝཱ ཨཏིདཱུརཊྛཱནེ པཝཏྟསྶ སདྡཱཡཏནསྶ ཝཱ སུཊྛུ པཊིཝིཛ྄ཛྷནམེཝ, ན དུཔྤཊིཝིཛ྄ཛྷནཾ, ཏཐཱ རཏྟིབྷཱགེཔི ཡཐཱཝུཏྟསམཱདྷིསྶ དིབྦསོཏཉཱཎཱནུཔརིཝཏྟིབྷཱཝེན སུཁུམསྶ སདྡཱཡཏནསྶ ཝཱ ཀེནཙི པཱཀཱརཱདིནཱ ཏིརོཧིཏསྶ སདྡཱཡཏནསྶ ཝཱ ཨཏིདཱུརཊྛཱནེ པཝཏྟསྶ སདྡཱཡཏནསྶ ཝཱ སུཊྛུ པཊིཝིཛ྄ཛྷནམེཝ, ན དུཔྤཊིཝིཛ྄ཛྷནནྟི ཨཡཾ ནཡོཔི ནེཏབྦོ. ཏེན ཝུཏྟཾ ཨཊྛཀཐཱཡཾ –

‘‘ཡཐཱ པུརེཏི ཡཐཱ སམཱདྷིསྶ པུབྦེནིཝཱསཱནུསྶཏིཉཱཎཱནུཔརིཝཏྟིབྷཱཝེནཱ’’ཏིཨཱདིཾ ཝཏྭཱ ‘‘ཡཐཱ ཙ རཱུཔཱཡཏནེ ཝུཏྟཾ, ཏཐཱ སམཱདྷིསྶ དིབྦསོཏཉཱཎཱནུཔརིཝཏྟིཏཱཡ སདྡཱཡཏནེ ཙ ནེཏབྦ’’ནྟི (ནེཏྟི. ཨཊྛ. ༡༤).

‘‘ཉཱཎམཱུལཀཱདིསམཱདྷིནཱ པུབྦེནིཝཱསཱནུསྶཏིཉཱཎཱནུཔརིཝཏྟིབྷཱཝཱདིསཧིཏེན ཀིཾ བྷཱཝེཏཱི’’ཏི པུཙྪིཏབྦཏྟཱ ‘‘ཨིཏི ཝིཝཊེནཱ’’ཏིཨཱདི ཝུཏྟཾ. ཏཏྠ ཨིཏཱིཏི ཨེཝཾ ཝུཏྟཔྤཀཱརེན. ཨཔརིཡོནདྡྷེནཱཏི ནཱིཝརཎཱདིཝིགམནེན. སཔྤབྷཱསཾ ཙིཏྟནྟི ཨིདྡྷིཔཱདསམྤཡུཏྟཾ མགྒཙིཏྟཾ བྷཱཝེཏི. ཨིདྡྷིཔཱདསམྤཡུཏྟེ མགྒཙིཏྟེ ཨུཔྤཛྫམཱནེ ཧི མགྒཙིཏྟསཧབྷཱུནི ཀུསལཱནི སདྡྷིནྡྲིཡཝཱིརིཡིནྡྲིཡསཏིནྡྲིཡསམཱདྷིནྡྲིཡཔཉྙིནྡྲིཡབྷཱུཏཱནི པཉྩིནྡྲིཡཱནི ཨུཔྤཛྫནྟི. མགྒཙིཏྟེ ནིརུཛ྄ཛྷམཱནེ ཨནུཔྤཛྫནབྷཱཝེན ནིརུཛ྄ཛྷནྟི ཨེཀཙིཏྟཀྑཎིཀཏྟཱ. ཨེཝཾ མགྒཝིཉྙཱཎསྶ ནིརོདྷཱ པཉྙཱ ཙ སཏི ཙ ནིརུཛ྄ཛྷཏཱིཏི ཡོཛནཱ.

‘‘ཀསྶ ཝིཉྙཱཎསྶ ནིརོདྷཱ ནཱམརཱུཔཾ ནིརུཛ྄ཛྷཏཱི’’ཏི ཝཏྟབྦཏྟཱ ‘‘ནཱམརཱུཔཉྩཱ’’ཏིཨཱདི ཝུཏྟཾ, པཊིསནྡྷིཝིཉྙཱཎསྶ ནིརོདྷཱ ནཱམརཱུཔཉྩ ནིརུཛ྄ཛྷཏཱིཏི ཝུཏྟཾ ཧོཏི. ཨཐ ཝཱ ‘‘ཝིཉྙཱཎསྶ ནིརོདྷཱ པཉྙཱ ཙ སཏི ཙཱཏི ཝུཏྟཱནི པཉྩིནྡྲིཡཱནི ཨེཝཾ ནིརུཛ྄ཛྷནྟཱི’’ཏི ཝཏྟབྦཏྟཱ ནཱམརཱུཔཉྩ ནིརུཛ྄ཛྷཏི, ནིརུཛ྄ཛྷམཱནཾ པན ནཱམརཱུཔཾ པཊིསནྡྷིཝིཉྙཱཎསྶ ནིརོདྷཱ ནིརུཛ྄ཛྷཏཱིཏི དསྶེཏུཾ ‘‘ནཱམརཱུཔཉྩཱ’’ཏིཨཱདི ཝུཏྟཾ. ཏཏྠ ནཱམརཱུཔཉྩཱཏི མགྒེན ཏཎྷཱཨཝིཛྫཱདིཀེ ཨནུཔཙྪིནྣེ ཨུཔྤཛྫནཱརཧཾ ཝེདནཱདིཀྑནྡྷཏྟཡཾ, བྷཱུཏུཔཱདཱརཱུཔཉྩ. ཝིཉྙཱཎཧེཏུཀནྟི ཨུཔྤཛྫནཱརཧཾ པཊིསནྡྷིཝིཉྙཱཎཾ ཧེཏུ ཨསྶ ནཱམརཱུཔསྶཱཏི ཝིཉྙཱཎཧེཏུཀཾ. ཝིཉྙཱཎཔཙྩཡཱ ནིབྦཏྟནྟི ཝིཉྙཱཎེན པཙྩཡེན ནིབྦཏྟཾ. ཏསྶཱཏི ཨུཔྤཛྫནཱརཧསྶ པཊིསནྡྷིཝིཉྙཱཎསྶ. ཧེཏཱུཏི ཏཎྷཱཨཝིཛྫཱདིཀོ ཀིལེསོ. ཝིཉྙཱཎནྟི ཨུཔྤཛྫནཱརཧཾ པཊིསནྡྷིཝིཉྙཱཎཾ. ཨནཱཧཱརནྟི ཨཔྤཙྩཡཾ. ཨནབྷིནནྡིཏནྟི ཀཱམཏཎྷཱདཱིཧི ¶ ཨནབྷིནནྡིཏབྦཾ. ཨཔྤཊིསནྡྷིཀནྟི པུནབྦྷཝཱབྷིསནྡཧནརཧིཏཾ. ནྟི ཏཱདིསཾ ཝིཉྙཱཎཾ. ཨཧེཏཱུཏི ¶ ནཏྠི ཧེཏུསངྑཱཏཾ པཊིསནྡྷིཝིཉྙཱཎཾ ཨིམསྶ ནཱམརཱུཔསྶཱཏི ཨཧེཏུ. ཨཔྤཙྩཡནྟི སཧཱཡཝིརཧེན ནཏྠི པཙྩཡཱ སངྑཱརཱ ཨིམསྶཱཏི ཨཔྤཙྩཡཾ. ཨེཝཾ པཊིསནྡྷིཝིཉྙཱཎསྶ ནིརོདྷཱ ནཱམརཱུཔཉྩ ནིརུཛ྄ཛྷཏཱིཏི.

‘‘པཉྙཱསཏཱིནཉྩེཝ ནཱམརཱུཔསྶ ཙ ཝུཏྟཔྤཀཱརེན ནིརུཛ྄ཛྷནབྷཱཝོ ཀཐཾ ཨམྷེཧི སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧ བྷགཝཱ’’ཏིཨཱདི ཝུཏྟཾ. ཝཏྟབྦཱཀཱརེན པཉྙཱསཏཱིནཉྩེཝ ནཱམརཱུཔསྶ ཙ ནིརུཛ྄ཛྷནབྷཱཝཛཱནནཀོ བྷགཝཱ ཡཐཱནིརུཛ྄ཛྷནབྷཱཝདཱིཔཀཾ ‘‘ཡམེཏཾ…པེ… ཨེཏྠེཏཾ ཨུཔརུཛ྄ཛྷཏཱི’’ཏི གཱཐཱཝཙནཾ ཨཱཧ. ཏེན གཱཐཱཝཙནེན ཏུམྷེཧི མཡཱ ཝུཏྟོ ནིརུཛ྄ཛྷནབྷཱཝོ སདྡཧིཏབྦོཡེཝཱཏི. ཨེཏྠཱཔི པཉྙཱསཏིནཱམརཱུཔཱནཾ ནིརུཛ྄ཛྷནཾ ཨཛཱནནྟེན ཏཏྠ ཝཱ སཾསཡནྟེན ཨཛིཏེན པུཙྪིཏབྦཏྟཱ ‘‘ཨདིཊྛཛོཏནཱ པུཙྪཱཏི ཝཱ དིཊྛསཾསནྡནཱ པུཙྪཱཏི ཝཱ པཉྙཱདཱིནཾ ཨནེཀཏྠཏྟཱ དྷམྨཏོ ཝཱ ཨནེཀཱདྷིཊྛཱནཱ པུཙྪཱཏི ཝཱ དྷམྨཱདྷིཊྛཱནཱ པུཙྪཱ’’ཏི ཝཱ ཨིཙྩེཝམཱདིཔུཙྪཱཝིཙཡོ ནིདྡྷཱརེཏབྦོ. ‘‘སརཱུཔདསྶནཝིསྶཛྫནནྟི ཝཱ ཨནེཀཱདྷིཊྛཱནཝིསྶཛྫནནྟི ཝཱ དྷམྨཱདྷིཊྛཱནཝིསྶཛྫན’’ནྟི ཝཱ ཨིཙྩེཝམཱདིཝིསྶཛྫནཝིཙཡོ ནིདྡྷཱརེཏབྦོ.

ཨེཝཾ སཏྟཱདྷིཊྛཱནཱདིཔུཙྪཱཝིསྶཛྫནཱནི ཙེཝ དྷམྨཱདྷིཊྛཱནཱདིཔུཙྪཱཝིསྶཛྫནཱནི ཙ ཝིསུཾ ཝིསུཾ དསྶེཏྭཱ པུཙྪཱཝིཙཡོ ཙེཝ ཝིསྶཛྫནཝིཙཡོ ཙ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘སཏྟཱདྷིཊྛཱནདྷམྨཱདྷིཊྛཱནེསུ ཨེཀཏོ དསྶིཏེསུ པུཙྪཱཝིསྶཛྫནེསུ ཀཐཾ པུཙྪཱཝིཙཡོ ཙེཝ ཝིསྶཛྫནཝིཙཡོ ཙ ཨམྷེཧི ཝིཉྙཱཏབྦོ’’ཏི པུཙྪིཏབྦཏྟཱ སཏྟཱདྷིཊྛཱནདྷམྨཱདྷིཊྛཱནཾ པུཙྪཾ ནཱིཧརིཏྭཱ ཏཏྠ ཝིཙཡཾ ཝིབྷཛནྟོ ‘‘ཡེ ཙ སངྑཏདྷམྨཱསེ’’ཏིཨཱདིམཱཧ. ཨཊྛཀཐཱཡཾ པན –

‘‘ཨེཝཾ ཨནུསནྡྷིཔུཙྪམྤི དསྶེཏྭཱ ཧེཊྛཱ སཏྟཱདྷིཊྛཱནཱ, དྷམྨཱདྷིཊྛཱནཱ ཙ པུཙྪཱ ཝིསུཾ ཝིསུཾ དསྶིཏཱཏི ཨིདཱནི ཏཱ སཧ དསྶེཏུཾ ‘‘ཡེ ཙ སངྑཏདྷམྨཱསེ’ཏིཨཱདི ཨཱརདྡྷ’’ནྟི (ནེཏྟི. ཨཊྛ. ༡༤) –

ཝུཏྟཾ. ཏསྶཱཡཾ ཨཏྠོ – ཨིདྷ སཱསནེ ཡེ ཨརཧནྟོ སངྑཏདྷམྨཱ ཧོནྟི, པུཐཱུ བཧཱུཡེཝ སཏྟ ཛནཱ སེཀྑཱ སཱིལཱདིསིཀྑམཱནཱ ཧོནྟི, ཏེསཾ ¶ ཨརཧནྟཱཝཉྩེཝ སེཀྑཱནཉྩ ཨིརིཡཾ པཊིཔཏྟིཾ མེཾ མཧཱ པུཊྛོ ནིཔཀོ ཏྭཾ བྷགཝཱ པབྲཱུཧི མཱརིས ཨིཏི ཨཱཡསྨཱ ཨཛིཏོ པུཙྪནྟོ ཨཱཧཱཏི.

༡༥. ཏསྶཾ གཱཐཱཡཾ ‘‘ཀིཏྟཀཱནི པུཙྪིཏཱནཱི’’ཏི ཝཏྟབྦཏྟཱ ‘‘ཨིམཱནཱི’’ཏིཨཱདི ཝུཏྟཾ. པདཏྠཱནུརཱུཔཾ པུཙྪིཏབྦཏྟཱ ‘‘ཨིམཱནི ཏཱིཎི པདཱནི པུཙྪིཏཱནཱི’’ཏི ཝུཏྟཾ. ‘‘ཡེ ཙ ¶ …པེ… མཱརིསཱ’’ཏི གཱཐཱཡཾ ཡེ པཉྷཱ པུཙྪིཏཱ, ཏེ པཉྷཱ ཏཡོ ཧོནྟི, ‘‘ཀིསྶ ཀེན ཀཱརཎེན ཏཡོ ཧོནྟཱི’’ཏི པུཙྪིཏབྦཏྟཱ ‘‘ཀིསྶ…པེ… ཡོགེནཱ’’ཏི ཝུཏྟཾ. སེཀྑཱ ཨརིཡཱ ཙ ཨསེཀྑཱ ཨརིཡཱ ཙ ཝིཔསྶནཱཔུབྦངྒམཾ པཧཱནཉྩཱཏི སེཁཱསེཁཝིཔསྶནཱཔུབྦངྒམཔྤཧཱནཱནི, ཏེསཾ ཡོགོཏི སེཁཱ…པེ… ཡོགོ, ཏེན སེཁཱ…པེ… ཡོགེན. ཨེཝཾ པུཙྪཱཝིདྷིནཱ ཧི ཡསྨཱ ‘‘ཡེ ཙ སངྑཏདྷམྨཱསེ…པེ… མཱརིསཱ’’ཏི གཱཐམཱཧ, ཏསྨཱ ཏཡོ པཉྷཱ ཧོནྟཱིཏི དཊྛབྦཱ.

‘‘ཡེ ཙ སངྑཏདྷམྨཱསེ’’ཏི ཨིམིནཱ ཨསེཀྑཱནཾ ཨརཧཏྟཾ པུཙྪཏི, ‘‘ཡེ ཙ སེཀྑཱ པུཐཱུ ཨིདྷཱ’’ཏི ཨིམིནཱ སེཀྑཱསེཀྑཱནཾ སེཀྑསིཀྑནཾ པུཙྪཏི, ‘‘ཏེསཾ མེ ནིཔཀོ ཨིརིཡཾ, པུཊྛོ པབྲཱུཧི མཱརིསཱ’’ཏི ཨིམིནཱ སེཀྑཱསེཀྑཱནཾ ཝིཔསྶནཱ པུབྦབྷཱགེ ཏདངྒཔྤཧཱནཾ པུཙྪཏི. ‘‘ཨདིཊྛཛོཏནཱ པུཙྪཱཏི ཝཱ དིཊྛསཾསནྡནཱ པུཙྪཱཏི ཝཱ སཏྟཱདྷིཊྛཱནཱ པུཙྪཱཏི ཝཱ ཨནེཀཱདྷིཊྛཱནཱ པུཙྪཱ’’ཏི ཝཱ ཨིཙྩེཝམཱདིཔུཙྪཱཝིཙཡོ ནིདྡྷཱརེཏབྦོ.

སཏྟདྷམྨཱདྷིཊྛཱནཾ པུཙྪཾ ནཱིཧརིཏྭཱ པུཙྪཱཝིཙཡོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཏསྶཾ པུཙྪཱཡཾ ཀཏམཱ ཝིསྶཛྫནཱགཱཐཱ’’ཏི པུཙྪིཏབྦཏྟཱ ‘‘ཏཏྠ ཝིསྶཛྫནཱ’’ཏིཨཱདི ཨཱརདྡྷཾ. ཏཏྠཱཏི ཏསྶཾ གཱཐཱཡཾ. ‘‘ཀཱམེསུ…པེ… པརིབྦཛེ’’ཏི ཝིསྶཛྫནཱགཱཐཱ བྷགཝཏཱ ཝུཏྟཱ. ཀཱམེསཱུཏི ཀཱམཱིཡནྟཱིཏི ཀཱམཱ, ཏེསུ ཀཱམེསུ. ཝཏྠུཀཱམེསུ ཀིལེསཀཱམེན པཎྜིཏེཧི ནཱབྷིགིཛ྄ཛྷེཡྻ. མནསཱ ནཱཝིལོསིཡཱཏི ཨཱཝིལབྷཱཝཀརེ བྱཱཔཱདཝིཏཀྐཱདཡོ ཙེཝ ཀཱཡདུཙྩརིཏཱདཡོ ཙ དྷམྨེ པཛཧནྟོ པཎྜིཏོ མནསཱ ཨནཱཝིལོ སུཔྤསནྣོ བྷཝེཡྻ. ཀུསལོ སབྦདྷམྨཱནནྟི སབྦདྷམྨཱནཾ ཨནིཙྩཏཱདིནཱ པརིཏུལིཏཏྟཱ ཨནིཙྩཏཱདཱིསུ པཉྩསུ ཁནྡྷེསུ ཀུསལོ ཚེཀོ. སཏོཏི ཀེསཱདཱིསུ སརཏཱིཏི སཏོ. བྷིཀྑཱུཏི སངྑཏདྷམྨེ བྷཡཱདིཏོ ཨིཀྑཏཱིཏི བྷིཀྑུ. པརིབྦཛེཏི ¶ ཏདངྒཝིཀྑམྦྷནསམུཙྪེདཔྤཧཱནབྷཱཝེན ཀིལེསཀཱམཝཏྠུཀཱམེ པརི སམནྟཏོ ཝཛྫེཡྻ.

པུཙྪཱགཱཐཱཡཾ ‘‘ནིཔཀོ’’ཏི པདེན པསཾསིཏེན བྷགཝཏཱ ཝིསྶཛྫནཱགཱཐཱ ཝུཏྟཱ, ཏསྶ བྷགཝཏོ ཡེན ཨནཱཝརཎཉཱཎེན ཨུཀྐཾསགཏེན པཀྐབྷཱཝོ དསྶིཏོ, ཏཾ ཨནཱཝརཎཉཱཎཾ ཏཱཝ ཀཱཡཀམྨཱདིབྷེདེཧི ཝིབྷཛིཏྭཱ དསྶེནྟོ ‘‘བྷགཝཏོ སབྦཾ ཀཱཡཀམྨ’’ནྟིཨཱདིམཱཧ. ཏཏྠ ཨནཱཝརཎཉཱཎེན ཛཱནིཏྭཱ ཀཏཾ སབྦཾ ཀཱཡཀམྨཾ ཉཱཎཔུབྦངྒམཾ ཉཱཎཱནུཔརིཝཏྟི. ཨེས ནཡོ སེསེསུཔི. ཨཏཱིཏེ ཨཾསེཏི ཨཏཱིཏབྷཝེ སཔརཀྑནྡྷཱདིཀེ ཀོཊྛཱསེ ཨཉྙཱཎེན ཨཔྤཊིཧཏཾ བྷགཝཏོ ¶ ཉཱཎདསྶནཾ. ཨནཱགཏེ ཨཾསེཏི ཨནཱགཏབྷཝེ སཔརཀྑནྡྷཱདིཀེ ཀོཊྛཱསེ. པཙྩུཔྤནྣེ ཨཾསེཏི པཙྩུཔྤནྣེ བྷཝེ སཔརཀྑནྡྷཱདིཀེ ཀོཊྛཱསེ.

‘‘ཉཱཎདསྶནསྶ ཀཏརསྨིཾ པཊིགྷཱཏོ’’ཏི པུཙྪིཏབྦཏྟཱ པུཙྪཾ ཋཔེཏྭཱ པཊིགྷཱཏཝིསཡཾ དསྶེཏུཾ ‘‘ཀོ ཙཱ’’ཏིཨཱདི ཝུཏྟཾ. ཨཐ ཝཱ ‘‘པཙྩུཔྤནྣབྷཝེ སཔརཀྑནྡྷཱདིཀེ ཀོཊྛཱསེ ཨཉྙེསམྤི ཉཱཎདསྶནཾ བྷཝེཡྻ, ཏདནུསཱརེན ཨཏཱིཏཱནཱགཏཀོཊྛཱསེསུཔི ཀཏརསྨིཾ ཨཉྙེསཾ ཉཱཎདསྶནསྶ པཊིགྷཱཏོ བྷཝེཡྻཱ’’ཏི པུཙྪིཏབྦཏྟཱ པུཙྪཾ ཋཔེཏྭཱ པཊིགྷཱཏཝིསཡཾ ནིཡམེཏྭཱ དསྶེཏུཾ ‘‘ཀོ ཙཱ’’ཏི ཝུཏྟཾ. ཏཏྠ ཀོ ཙཱཏི ཀྭ ཀཏརསྨིཾ སམཡེ ཨཉྙེསཾ ཉཱཎདསྶནསྶ པཊིགྷཱཏོ བྷཝེཡྻཱཏི པུཙྪི.

ཨནིཙྩེ, དུཀྑེ, ཨནཏྟནིཡེ ཙ ཨཉྙེསཾ ཨཉྙཱཎཾ ཡཾ ཨདསྶནཾ ཨཏྠི, ཨཉྙཱཎཱདསྶནསངྑཱཏོ སབྷཱཝོ ཉཱཎདསྶནསྶ པཊིགྷཱཏོ བྷཝཏི, ན སཔརཀྑནྡྷཱདིདསྶནམཏྟཔཊིགྷཱཏོ. ཨེཏེན ཨནིཙྩཏོ ལཀྑཎཏྟཡེ པཝཏྟསྶ ཉཱཎདསྶནསྶ ཨཉྙེསཾ དུརབྷིསམྦྷཝཾ, བྷགཝཏོ ཙ ཉཱཎདསྶནསྶ ཨཉྙེཧི ཨསཱདྷཱརཎཏཾ དསྶེཏི. བྷགཝཏོ ཧི ལཀྑཎཏྟཡཝིབྷཱཝནེན ཝེནེཡྻཱ ཙཏུསཙྩཔྤཊིཝེདྷཾ ལབྷནྟི. ‘‘བྷགཝཏོ ཉཱཎདསྶནཔཊིགྷཱཏཱབྷཱཝེན ཨཉྙེསཉྩ ཉཱཎདསྶནསྶ པཊིགྷཱཏབྷཱཝོ ཀཏམཱཡ ཨུཔམཱཡ ཨམྷཱཀཾ པཱཀཊོ’’ཏི ཝཏྟབྦབྷཱཝཏོ ཨུཔམཱཡ པཱཀཊཾ ཀཱཏུཾ ‘‘ཡཐཱ ཨིདྷཱ’’ཏིཨཱདི ཝུཏྟཾ. ཏཏྠ ཨིདྷ སཏྟལོཀེ ཙཀྑུམཱ པུརིསོ ཨཱཀཱསེ ཏཱརཀཱནི པསྶེཡྻ, གཎནསངྐེཏེན ¶ ‘‘ཨེཏྟཀཱནཱི’’ཏི ནོ ཙ ཛཱནེཡྻ ཡཐཱ, ཨེཝཾ ཨཉྙེསཾ ཉཱཎདསྶནསྶ པཊིགྷཱཏོ ཨཡཾ ཨཉྙཱཎདསྶནསབྷཱཝོ བྷཝཏི.

བྷགཝཏོ པན ཏཐཱ ཨབྷཱཝཏོ ཀེནཙི ཨཉྙཱཎེན ཨདསྶནེན ཨཔྤཊིཧཏཾ ཉཱཎདསྶནཾ བྷཝཏཱིཏི ཨཏྠོ དཊྛབྦོ. ‘‘བྷགཝཏོ ཉཱཎདསྶནསྶ ཨཔྤཊིཧཏབྷཱཝོ ཀསྨཱ ཨམྷེཧི སདྡཧིཏབྦོ’’ཏི པུཙྪིཏབྦཏྟཱ ‘‘ཨནཱཝརཎཉཱཎདསྶནཱ ཧི བུདྡྷཱ བྷགཝནྟོ’’ཏི ཝུཏྟཾ. ‘‘ནིཔཀསྶ…པེ… བྷགཝཏོ ཨནཱཝརཎཉཱཎཾ ཀཱཡཀམྨཱདིབྷེདེཧི ཨཱཙརིཡེན ཝིབྷཛིཏྭཱ དསྶིཏཾ, ཨམྷེཧི ཙ ཉཱཏཾ, པཙྪཱ གཱཐཱཡ ‘ཨིརིཡ’ནྟི པདེན པུཙྪིཏཱ སེཀྑཱསེཀྑཔཊིཔདཱ ཀཐཾ ཝིཛཱནིཏབྦཱ’’ཏི ཝཏྟབྦཏྟཱ སེཀྑཱསེཀྑཔཊིཔདཾ དསྶེཏུཾ ‘‘ཏཏྠ སེཁེནཱ’’ཏིཨཱདི ཝུཏྟཾ. ཏཏྠ ཏཏྠཱཏི ཏསྨིཾ ཝིསྶཛྫནེ. སེཁེནཱཏི སིཀྑནསཱིལེན པུགྒལེན རཛནཱིཡེསུ རཱུཔཱརམྨཎཱདཱིསུ དྷམྨེསུ གེདྷཱ ཙིཏྟཾ རཀྑིཏབྦཾ, པརིཡུཊྛཱནཱིཡེསུ ཨཱགྷཱཏཝཏྠཱུསུ དོསཱ ཙིཏྟཾ རཀྑིཏབྦཾ.

‘‘ཏེསུ ¶ གེདྷདོསེསུ ཀཏམཾ ནིཝཱརེནྟོ བྷགཝཱ ཝིསྶཛྫནགཱཐཱཡཾ ཀཏམཾ པདམཱཧཱ’’ཏི པུཙྪིཏབྦཏྟཱ ‘‘ཏཏྠ ཡཱ ཨིཙྪཱ’’ཏིཨཱདི ཝུཏྟཾ. ཏཏྠ ཏཏྠཱཏི གེདྷདོསེསུ. ཨིཙྪཱཏི རཱགིཙྪཱ. མུཙྪཱཏི ལོབྷམོཧསཧགཏམོཧམུཙྪཱ. པཏྠནཱཏི རཱགཔཏྠནཱ. པིཡཱཡནཱཏི ཏཎྷཱཔིཡཱཡནཱཝ, ན མེཏྟཱཔིཡཱཡནཱ. ཀཱིལ༹ནཱཏི གེདྷཀཱིལ༹ནཱ. ཨེཏཱནི ཧི གེདྷཔརིཡཱཡཝཙནཱནི. ཏཾ གེདྷསངྑཱཏཾ ཨིཙྪཱདིཀཾ ནིཝཱརེནྟོ བྷགཝཱ ‘‘ཀཱམེསུ ནཱབྷིགིཛ྄ཛྷེཡྻཱ’’ཏི ཨེཝཾ ཝིསུཾ ཝིསུཾ པཀཱརེན ཨཱཧ.

པརིཡུཊྛཱནཝིགྷཱཏཾ དོསཾ ནིཝཱརེནྟོ བྷགཝཱ ‘‘མནསཱནཱཝིལོ སིཡཱ’’ཏི ཨེཝཾ ཝིསུཾ ཝིསུཾ པཀཱརེན ཨཱཧཱཏི ཡོཛནཱ. གེདྷདོསཱནཾ ཝིསུཾ ཝིསུཾ ནིཝཱརེནྟོ བྷགཝཱ དྭེ པདཱནི ཨཱཧཱཏི ཝུཏྟཾ, ‘‘ཏཾ ཀེན ཨཏྠེན སདྡཧིཏབྦ’’ནྟི ཝཏྟབྦཏྟཱ ‘‘ཏཐཱ ཧི སེཁོ’’ཏིཨཱདི ཝུཏྟཾ. རཛནཱིཡེསུ ཨབྷིགིཛ྄ཛྷནྟོ སེཁོ ཨནུཔྤནྣཾ ལོབྷཔདྷཱནཾ ཀིལེསཉྩ ཨུཔྤཱདེཏི, ཨུཔྤནྣཾ ཀིལེསཉྩ ཕཱཏིཾ ཨབྷིཝཌྜྷནཾ ཀརོཏི, པརིཡུཊྛཱནཱིཡེསུ ཨཱཝིལོ སེཁོ ཨནུཔྤནྣཾ དོསཔདྷཱནཾ ཀིལེསཉྩ ཨུཔྤཱདེཏི, ཨུཔྤནྣཾ ཀིལེསཉྩ ཕཱཏིཾ ཝཌྜྷནཾ ཀརོཏི, ཨིཏི ཨིམིནཱ པཊིཀྑེཔཨཏྠེན ཏཾ མམ ཝཙནཾ སདྡཧིཏབྦནྟི ཨདྷིཔྤཱཡོ.

‘‘ཀིཾ ¶ པན ཨནབྷིགིཛ྄ཛྷནྟོ, ཨནཱཝིལོ ཙ སེཀྑོ ཨགེདྷདོསནིཝཱརཎམེཝ ཀརོཏི, ཨུདཱཧུ ཨུཏྟརིཔི པཊིཔདཾ པཱུརེཏཱི’’ཏི པུཙྪིཏབྦཏྟཱ ཨུཏྟརིཔི པཊིཔདཾ པཱུརེཏིཡེཝཱཏི དསྶེནྟོ ‘‘ཡོ པན ཨནཱཝིལསངྐཔྤོ’’ཏིཨཱདིམཱཧ. ཏཏྠ ཨནཱཝིལསངྐཔྤོཏི ནཏྠི ཨཱཝིལཀརཱ སངྐཔྤཱ བྱཱཔཱདསངྐཔྤཝིཧིཾསཱསངྐཔྤཱ ཨེཏསྶཱཏི ཨནཱཝིལསངྐཔྤོ, ཨིཙྪཱདིགེདྷསྶ ཨབྷཱཝེན ཨནབྷིགིཛ྄ཛྷནྟོ ཝཱཡམཏི ཀུསལཝཱཡཱམཾ པཝཏྟེཏི. ‘‘ཀཐཾ ཝཱཡམཏཱི’’ཏི པུཙྪིཏབྦཏྟཱ ‘‘སོ ཨནུཔྤནྣཱན’’ནྟིཨཱདི ཝུཏྟཾ. ཏཏྠ སོཏི ཨུཔརིབྷཱཝནཱམགྒབྷཱཝཏྠཱཡ པཊིཔཛྫམཱནོ སེཀྑོ. ཨནུཔྤནྣཱནནྟིཨཱདཱིནཾ ཨཏྠོ སཀྐཱ ཨཊྛཀཐཱཝཙནེནེཝ (ནེཏྟི. ཨཊྛ. ༡༥-༡༦) ཛཱནིཏུནྟི ན ཝིབྷཏྟོ.

༡༦. ཡེནཱཏི ཨསུབྷཱདཱིནཾ ཨནུསྶརཎལཀྑཎེན ཨིནྡྲིཡེན ཏཎྷཱམཡིཏཝཏྠཱུསུ ཀཱམཏཎྷཱཡ སཧཛཱཏཾ ཝིཏཀྐཾ ཝཱརེཏི, ཨིདཾ ཨསུབྷཱདིཨནུསྶརཎལཀྑཎཾ ཨིནྡྲིཡཾ སཏིནྡྲིཡཾ. ཡེན མཧགྒཏབྷཱཝཔྤཏྟེན ཨཝིཀྑེཔེན བྱཱཔཱདཝིཏཀྐཾ ཝཱརེཏི, ཨིདཾ ཨཝིཀྑེཔསངྑཱཏཾ ཨིནྡྲིཡཾ སམཱདྷིནྡྲིཡཾ. ཡེན སམྨཔྤདྷཱནེན ཝིཧིཾསཱཝིཏཀྐཾ ཝཱརེཏི, ཨིདཾ སམྨཔྤདྷཱནསངྑཱཏཾ ཨིནྡྲིཡཾ ཝཱིརིཡིནྡྲིཡཾ. ཡེན སམྨཱདིཊྛིསངྑཱཏེན ཨིནྡྲིཡེན ཨུཔྤནྣུཔྤནྣེ…པེ… ནཱདྷིཝཱསེཏི, ཨིདཾ སམྨཱདིཊྛིསངྑཱཏཾ ཨིནྡྲིཡཾ པཉྙིནྡྲིཡཾ. ཨིམེསུ ཙཏཱུསུ ཨིནྡྲིཡེསུ སཧ ཨུཔྤཛྫམཱནཱ ཡཱ སདྡཧནཱ ཨོཀཔྤནཱ ¶ ཨུཔྤཛྫཏི, ཨནཱཝིལབྷཱཝཏོ ཨིདཾ སདྡཧནསངྑཱཏཾ ཨིནྡྲིཡཾ སདྡྷིནྡྲིཡཾ. ཨིམཱནི སེཀྑསྶ པཉྩིནྡྲིཡཱནི.

ཨེཀསྨིཾཡེཝ ཝིསཡེ ཛེཊྛཀབྷཱཝཾ ན པཱཔུཎེཡྻུཾ, ཨཏྟནོ ཝིསཡེ ཛེཊྛཀབྷཱཝཾ པཱཔུཎིཏུཾ ཨརཧནྟི, ‘‘ཀཏམཾ ཨིནྡྲིཡཾ ཀཏྠ ཝིསཡེ ཛེཊྛཀབྷཱཝཾ པཝཏྟ’’ནྟི པུཙྪིཏབྦབྷཱཝཏོ ཨིདཾ ཨིནྡྲིཡཾ ཨིམསྨིཾ ཝིསཡེ པཝཏྟནྟི དསྶེནྟོ ‘‘ཏཏྠ སདྡྷིནྡྲིཡཾ ཀཏྠ དཊྛབྦ’’ནྟིཨཱདིམཱཧ. ཏཏྠ ཏཏྠཱཏི ཏེསུ ཨིནྡྲིཡེསུ ཙཏཱུསུ སོཏཱཔཏྟིཡངྒེསུ སདྡྷིནྡྲིཡཾ ཛེཊྛཀབྷཱཝཾ པཝཏྟནྟི དཊྛབྦཾ. ཨེཝཾ སེསེསུཔི ཡོཛེཏབྦཾ. ཀིཾ ནུ སེཀྑོ པཉྙིནྡྲིཡེཝ ཨཔྤམཏྟོ’ཏི བྷགཝཏཱ ཝུཏྟོ ཐོམིཏོ, ཨུདཱཧུ སབྦེཧི ཀུསལེཧི དྷམྨེཧཱིཏི པུཙྪིཏབྦཏྟཱ སབྦེཧི ཀུསལེཧི དྷམྨེཧི པཉྩིནྡྲིཡཔམུཁེཧི ཝུཏྟོ ཐོམིཏོ ཧོཏཱིཏི དསྶེཏུཾ ‘‘ཨེཝཾ སེཁོ’’ཏིཨཱདི ཝུཏྟཾ. ཏཏྠ ཨེཝཾ པཉྩིནྡྲིཡཱནཾ ནིབྦཏྟིདསྶནེན སེཁོ པུགྒལོ ¶ སབྦེཧི ཀུསལེཧི དྷམྨེཧི ཨཔྤམཏྟོཏི བྷགཝཏཱ ཝུཏྟོ ཐོམིཏོ ཨནཱཝིལཏཱཡ མནསཱཏི ཡོཛནཱ. ‘‘སེཀྑསྶ ཨནཱཝིལཏཱ ཀེན སདྡཧིཏབྦཱ’’ཏི ཝཏྟབྦཏྟཱ ‘‘ཏེནཱཧ བྷགཝཱ མནསཱནཱཝིལོ སིཡཱ’’ཏི ཝུཏྟཾ. བྷགཝཏཱ ‘‘མནསཱནཱཝིལོ སིཡཱ’’ཏི ཝུཏྟཏྟཱ སེཀྑསྶ ཨནཱཝིལཏཱ ཏུམྷེཧི སདྡཧིཏབྦཱཏི.

༡༧. སེཀྑསྶ མཏྠཀཔྤཏྟཱ པཊིཔདཱ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, ‘‘ཀཐཾ ཨསེཀྑསྶ མཏྠཀཔྤཏྟཱ པཊིཔདཱ ཉཱཏབྦཱ’’ཏི ཝཏྟབྦཏྟཱ ཨསེཀྑསྶ མཏྠཀཔྤཏྟཾ པཊིཔདཾ ཝིབྷཛིཏྭཱ དསྶེཏུཾ ‘‘ཀུསལོ སབྦདྷམྨཱན’’ནྟིཨཱདིམཱཧ. ཏཏྠ སབྦདྷམྨཱནནྟི སབྦེསུ དྷམྨེསུ མཏྠཀཔྤཏྟཱཡ པཊིཔདཱཡ ཨསེཀྑོ ཀུསལོ ཚེཀཏརོཏི བྷགཝཏཱ ཝུཏྟོ ཐོམིཏོ ཨནཱཝིལཏཱཡ མནསཱཏི. ཨསེཀྑསྶ སབྦདྷམྨེསུ ཡཾ ཀོསལླཾ དསྶེཏུཀཱམོ, ཏསྶ ཀོསལླསྶ ཝིསཡབྷཱུཏེ སབྦདྷམྨེ ཏཱཝ པུགྒལཱདྷིཊྛཱནེན ཝིབྷཛིཏྭཱ དསྶེཏུཾ ‘‘ལོཀོ ནཱམཱ’’ཏིཨཱདིམཱཧ. ཏཏྠ ‘‘སབྦདྷམྨཱན’’ནྟི ཨིམིནཱ ཝུཏྟདྷམྨསངྑཱཏོ ལོཀོ ནཱམ ཀིལེསལོཀོ, བྷཝལོཀོ, ཨིནྡྲིཡལོཀོཏི ཏིཝིདྷོ ཧོཏཱིཏི ཡོཛནཱ. ཏཏྠ པརིཏྟདྷམྨཊྛོ ཀིལེསཛནནཊྛེན ཀིལེསོ, ཀུསལཱདིཔཝཏྟནཊྛེན ལོཀོ ཙཱཏི ཀིལེསལོཀོ. མཧགྒཏདྷམྨཊྛོ བྷཝནཊྛེན བྷཝོ, ཝུཏྟནཡེན ལོཀོ ཙཱཏི བྷཝལོཀོ. སདྡྷིནྡྲིཡཱདིདྷམྨཊྛོ ཨཱདྷིཔཙྩཊྛཡོགཝསེན ཨིནྡྲིཡབྷཱུཏོ ཧུཏྭཱ སདྡྷིནྡྲིཡཱདིཔཏྟནཊྛེན ལོཀོ ཙཱཏི ཨིནྡྲིཡལོཀོ.

‘‘ཏཱིསུ ལོཀེསུ ཀཏམེན ཀཏམོ སམུདཱགཙྪཏཱི’’ཏི པུཙྪིཏབྦཏྟཱ ‘‘ཏཏྠཱ’’ཏིཨཱདི ཝུཏྟཾ. ‘‘སདྡྷཱདིཨིནྡྲིཡཱནི ཀོ ནིབྦཏྟེཏཱི’’ཏི པུཙྪིཏབྦཏྟཱ ‘‘སོ ཨིནྡྲིཡཱནི ནིབྦཏྟེཏཱི’’ཏི ཝུཏྟཾ ¶ . ཏཏྠ སོཏི ཡོ པུགྒལོ ཀིལེསལོཀསངྑཱཏེ པརིཏྟདྷམྨེ, བྷཝལོཀསངྑཱཏེ མཧགྒཏདྷམྨེ ཙ ཏཾཏཾསམྤཱདནཝསེན ཋིཏོ, སོ པུགྒལོ སདྡྷིནྡྲིཡཱདཱིནི ཨིནྡྲིཡཱནི ཨཏྟསནྟཱནེ ནིབྦཏྟེཏི.

‘‘ཨིནྡྲིཡེསུ ཨཏྟསནྟཱནེསུ པུནཔྤུནཾ ནིབྦཏྟཱཔནཝསེན ཝུཌྜྷཱཔིཡམཱནེསུ ཀཱ པཉྙཱ བྷཝཏཱི’’ཏི པུཙྪིཏབྦཏྟཱ ‘‘ཨིནྡྲིཡེསཱུ’’ཏིཨཱདི ཝུཏྟཾ. ཏཏྠ ནེཡྻསྶཱཏི ཨབྷིཉྙེཡྻསྶ. པརིཉྙཱཏི རཱུཔཱརཱུཔདྷམྨེ སལཀྑཎཏོ, པཙྩཡཏོ ¶ ཙ པརིགྒཧཱདིཝསེན པཝཏྟཔཉྙཱ. ‘‘སཱ པརིཉྙཱ ཀཏིཝིདྷེན ཨུཔཔརིཀྑིཏབྦཱ’’ཏི པུཙྪིཏབྦཏྟཱ ‘‘སཱ དུཝིདྷེནཱ’’ཏིཨཱདི ཝུཏྟཾ. ཏཏྠ སཱ པརིཉྙཱ དསྶནཔརིཉྙཱཡ ཙ བྷཱཝནཱཔརིཉྙཱཡ ཙ དུཝིདྷེན ཝིཉྙཱུཧི ཨུཔཔརིཀྑིཏྭཱ གཧེཏབྦཱཏི. དསྶནཔརིཉྙཱཡཱཏི ཙ དསྶནམགྒཔཉྙཱཛནིཀཱཡ ཉཱཏཔརིཉྙཱཡཱཏི ཨཏྠོ གཧེཏབྦོ. ཏེན ཨཊྛཀཐཱཡཾ ཝུཏྟཾ ‘‘དསྶནཔརིཉྙཱཏི ཉཱཏཔརིཉྙཱ’’ཏི (ནེཏྟི. ཨཊྛ. ༡༧). བྷཱཝནཱཔརིཉྙཱཡཱཏི བྷཱཝནཱམགྒཔཉྙཱཛནིཀཱཡ ཏཱིརཎཔརིཉྙཱཡ སདྡྷིཾ པཧཱནཔརིཉྙཱཡཱཏི ཨཏྠོ.

‘‘སཱ དུཝིདྷེནཱ’ཏིཨཱདིནཱ ཝུཏྟོ ཨཏྠོ ཨཏིསངྑེཔོ ན སཀྐཱ ཝིཉྙཱཏུཾ, ཝིཏྠཱརེཏྭཱ ཀཐེཧཱི’’ཏི ཝཏྟབྦཏྟཱ ‘‘ཡདཱ ཧཱི’’ཏིཨཱདི ཝུཏྟཾ. ཏཏྠ ཡདཱཏི བལཝཝིཔསྶནུཔྤཛྫནཀཱལེ. སེཁོཏི སིཀྑནསཱིལཏཱཡ ཀལྱཱཎཔུཐུཛྫནོ ཙེཝ སོཏཱཔནྣཱདིཀོ ཙ. ཉེཡྻནྟི ཉཱཏབྦཾ རཱུཔཱདིཀཾ སངྑཱརཾ. པརིཛཱནཱཏཱིཏི པརིགྒཧཱདིཉཱཎེན པརིགྒཧེཏྭཱ ཛཱནཱཏི ནིབྦིདཱཉཱཎསཧགཏེན. ཏསྶཱཏི ཀལྱཱཎཔུཐུཛྫནསྶ ཙེཝ སོཏཱཔནྣཱདིཀསྶ ཙ. དྭེ དྷམྨཱཏི ཀལྱཱཎཔུཐུཛྫནསྶ བལཝཝིཔསྶནཱདྷམྨོ ཙེཝ སོཏཱཔནྣཱདིཀསྶ ཙ བལཝཝིཔསྶནཱདྷམྨོ ཙ. ཡཐཱཀྐམཾ དསྶནཀོསལླཾ སོཏཱཔཏྟིམགྒཉཱཎཉྩེཝ བྷཱཝནཱཀོསལླཾ སཀདཱགཱམིམགྒཱདིཀཉྩ སནྟཱནེ པཝཏྟཱཔནཝསེན གཙྪནྟི.

‘‘པུབྦེ ཡཾ ཉཱཎཾ ‘ནེཡྻསྶ པརིཉྙཱ’ཏི ཝུཏྟཾ, ཏཾ ཉཱཎཾ ཀཏིཝིདྷེན ཝེདིཏབྦ’’ནྟི པུཙྪིཏབྦཏྟཱ ‘‘ཏཾ ཉཱཎཾ པཉྩཝིདྷེན ཝེདིཏབྦཾ…པེ... སཙྪིཀིརིཡཱ’’ཏི ཝུཏྟཾ. ‘‘ཏཱསུ ཝིཔསྶནཱབྷེདེན བྷིནྣཱསུ པཉྩསུ ཨབྷིཉྙཱདཱིསུ ཀཏམཱ ཨབྷིཉྙཱ, ཀཏམཱ པརིཉྙཱ, ཀཏམཾ པཧཱནཾ, ཀཏམཱ བྷཱཝནཱ, ཀཏམཱ སཙྪིཀིརིཡཱ’’ཏི པུཙྪིཏབྦཏྟཱ ‘‘ཏཏྠ ཀཏམཱ’’ཏིཨཱདི ཝུཏྟཾ. ཏཏྠ ཏཏྠཱཏི ཨབྷིཉྙཱདཱིསུ. ཡཾ དྷམྨཱནཾ སལཀྑཎེ ཉཱཎནྟི རཱུཔདྷམྨཱནཾ ཀཀྑལཱ༹དིསལཀྑཎེ, ཨརཱུཔདྷམྨཱནཾ ཕུསནཱདིསལཀྑཎེ ཨཱརམྨཎཀརཎཝསེན པཝཏྟཾ ཡཾ ཉཱཎཾ ཧེཏུཕལཛཱནནཧེཏུཛཱནནསངྑཱཏཱ དྷམྨཔཊིསམྦྷིདཱ ཙེཝ ཧེཏུཕལཛཱནནསངྑཱཏཱ ཨཏྠཔཊིསམྦྷིདཱ ཙ བྷཝཏི. ཨཡཾ སལཀྑཎེན སདྡྷིཾ ཧེཏུཕལཛཱནནཱ པཉྙཱ ཨབྷིཉྙཱ ནཱམ.

ཨེཝནྟི ¶ ¶ ཝུཏྟཔྤཀཱརེན. ཨབྷིཉྙཱཉཱཎེན ཨབྷིཛཱནིཏྭཱ. ཡཱ པརིཛཱནནཱཏིཨཱདཱིསུ ‘‘ཨིདཾ ཨནཝཛྫཾ ཀུསལཾ, ཨིདཾ སཱཝཛྫཾ ཨཀུསལཾ, ཨིདཾ ཨཀུསལཝིཔཱཀཛནཀཾ སཱཝཛྫཾ, ཨིདཾ ཀུསལཝིཔཱཀཛནཀཾ ཨནཝཛྫཾ, ཨིདཾ སཾཀིལིཊྛཾ ཀཎྷཾ, ཨིདཾ ཨསཾཀིལིཊྛཾ སུཀྐཾ, ཨིདཾ ཀུསལཾ ཨནཝཛྫཱདིཀཾ སེཝིཏབྦཾ, ཨིདཾ ཨཀུསལཾ སཱཝཛྫཱདིཀཾ ན སེཝིཏབྦ’’ནྟི ཨེཝཾ ཨནིཙྩཱདིཏོ ཀལཱཔསམྨསནཱདིཝསེན གཧིཏཱ སམྨསིཏཱ ཨིམེ ཝིཔསྶནཱཡ ཨཱརམྨཎབྷཱུཏཱ སངྑཏདྷམྨཱ ཨིདཾ ཨུདཡབྦཡཉཱཎཱདིཕལཾ ཨཱནིསཾསཾ ཨནུཀྐམེན ནིབྦཏྟཱཔེནྟི. ཏནྣིབྦཏྟཝིཔསྶནཱཡ ཨུཔྤཛྫནཏོ ཨུཔཙཱརཾ ཨུཔྤཱདེནྟི, ཨེཝཾ ཨནུཀྐམེན གཧིཏཱནཾ པཝཏྟིཏཱནཾ ཏེསཾ ཨུདཡབྦཡཉཱཎཱདཱིནཾ ཨཡཾ སཙྩཱནུབོདྷཔཊིཝེདྷོ ཨཏྠོཏི པརིཙྪིནྡིཏྭཱ ཡཱ པརིཛཱནནཱ པཝཏྟཱ, སཱ ཨཡཾ པརིཛཱནནཱ པརིཉྙཱ ནཱམཱཏི ཡོཛེཏྭཱ, ཨེཝཾ ཝུཏྟཔྤཀཱརཱཡ པརིཉྙཱཔཉྙཱཡ པརིཛཱནིཏྭཱ པཧཱཏབྦཱ, བྷཱཝེཏབྦཱ, སཙྪིཀཱཏབྦཱ ཙ ཏཡོ དྷམྨཱ ཨཝསིཊྛཱ བྷཝནྟི. ‘‘ཡེ ཨཀུསལཱ, ཏེ པཧཱཏབྦཱ’’ཏི ཡཱ པརིཛཱནནཱ པཉྙཱ པཝཏྟཱ, ཨིདཾ པཧཱནཾ པཧཱནཉཱཎཾ. ‘‘ཡེ ཀུསལཱ, ཏེ བྷཱཝེཏབྦཱ’’ཏི ཡཱ པརིཛཱནནཱ པཉྙཱ པཝཏྟཱ, སཱ བྷཱཝནཱཔཉྙཱ. ‘‘ཡཾ ཨསངྑཏཾ, ཨིདཾ སཙྪིཀིརིཡ’’ནྟི ཡཱ པརིཛཱནནཱ པཉྙཱ པཝཏྟཱ, སཱ སཙྪིཀིརིཡཱཔཉྙཱཏི ཡོཛེཏྭཱ ཨཊྛཀཐཱདྷིཔྤཱཡེན ཨཝིརུདྡྷོ ཨཏྠོ གཧེཏབྦོ.

ཨབྷིཉྙཱདཡོ པཉྩཝིདྷཱ པཉྙཱ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, ‘‘ཏཱཧི པརིཉྙཱཧི ཛཱནནྟོ པུགྒལོ ‘ཀི’ནྟི ཝུཙྩཏི ཐོམཱིཡཏཱི’’ཏི ཝཏྟབྦཏྟཱ ‘‘ཡོ ཨེཝ’’ནྟིཨཱདི ཝུཏྟཾ. ཏཏྠ ཡོ པུགྒལོ ཨེཝཾ ཝུཏྟཔྤཀཱརེན ཛཱནཱཏི, ཨཡཾ ཛཱནནྟོ པུགྒལོ པཙྩཡུཔྤནྣེསུ དྷམྨེསུ ཀུསལཏྟཱ ཚེཀཏྟཱ ‘‘ཨཏྠཀུསལོ’’ཏི ཝུཙྩཏི ཐོམཱིཡཏི, པཙྩཡདྷམྨེསུ ཀུསལཏྟཱ ‘‘དྷམྨཀུསལོ’’ཏི ཙ ཙཏུནྣཾ ཨེཀཏྟཱདཱིནཾ ནཡཱནཾ ཡུཏྟཏཱཡ ཀོཝིདཏྟཱ ‘‘ཀལྱཱཎཏཱཀུསལོ’’ཏི ཙ ཕལསམཱཔཏྟཱིསུ ཀོཝིདཏྟཱ ‘‘ཕལཏཱཀུསལོ’’ཏི ཙ ཝཌྜྷཱིསུ ཀོཝིདཏྟཱ ‘‘ཨཱཡཀུསལོ’’ཏི ཙ ཨཝཌྜྷཱིསུ ཀོཝིདཏྟཱ ‘‘ཨཔཱཡཀུསལོ’’ཏི ཙ ཨཙྩཱཡིཀེ ཀིཙྩེ ཝཱ བྷཡེ ཝཱ ཨུཔྤནྣེ སཏི ཏསྶ ཀིཙྩསྶ, བྷཡསྶ ཝཱ ཏིཀིཙྪནསམཏྠེ ཋཱནུཔྤཏྟིཡཀཱརཎེ ཀོཝིདཏྟཱ ‘‘ཨུཔཱཡཀུསལོ’’ཏི ཙ མཧནྟེསུ ཨབྷིཀྐམཱདཱིསུ སཏིསམྤཛཉྙཱཡ སམྤནྣཏྟཱ ‘‘མཧཏཱ ཀོསལླེན སམནྣཱགཏོ’’ཏི ཙ ཝུཙྩཏི ཐོམཱིཡཏི. ‘‘ཏསྶ ¶ ཨསེཀྑསྶ ཨཏྠཱདཱིསུ ཀུསལབྷཱཝོ ཀཐཾ སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ. ‘‘ཀུསལོ སབྦདྷམྨཱན’’ནྟི ཝུཏྟཏྟཱ སདྡཧིཏབྦོཏི ཨདྷིཔྤཱཡོ.

‘‘ཀུསལོ ¶ སབྦདྷམྨཱན’’ནྟི པདསྶ ཨཏྠོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘སཏོ བྷིཀྑུ པརིབྦཛེ’’ཏི པདསྶ ཨཏྠོ ཀཐཾ ཨམྷེཧི ཝིཏྠཱརཏོ ཝིཉྙཱཏོ’’ཏི ཝཏྟབྦཏྟཱ ‘‘སཏོ བྷིཀྑུ པརིབྦཛེ’’ཏིཨཱདི ཝུཏྟཾ. ཨཐ ཝཱ ‘‘སཏོ བྷིཀྑུ པརིབྦཛེ’’ཏི བྷགཝཏཱ ཝུཏྟཾ, ‘‘ཀཏྠ པཝཏྟེན སཏིསཧིཏེན ཉཱཎེན སམྤནྣོ སཏོ ཀིམཏྠཾ པརིབྦཛེ’’ཏི པུཙྪིཏབྦཏྟཱ ‘‘ཨིམེསུ པཝཏྟེན སཏིསཧིཏཉཱཎེན སམྤནྣོ སཏོ ཨིམམཏྠཾ པརིབྦཛེ’’ཏི ནིཡམེཏྭཱ དསྶེནྟོ ‘‘སཏོ བྷིཀྑུ པརིབྦཛེ’’ཏིཨཱདིམཱཧ. ཏཏྠ ཏེནཱཏི ཡོ ཨབྷིཀྐམཱདཱིསུ པཝཏྟེན སཏིསཧིཏཉཱཎེན སམནྣཱགཏོ སཏོ ཨསེཀྑབྷིཀྑུ, ཏེན ཨསེཀྑབྷིཀྑུནཱ པརིནིཊྛིཏསིཀྑཏྟཱ ཨཉྙཔཡོཛནཱབྷཱཝཏོ དིཊྛདྷམྨསུཁཝིཧཱརཏྠཾ ཨབྷིཀྐནྟེ…པེ… ཏུཎྷཱིབྷཱཝེན སཏེན སཏིསཧིཏེན སམྤཛཱནེན ཉཱཎེན ཝིཧཱཏབྦཾ ཙཏུཨིརིཡཱཔཐཔརིཝཏྟནསངྑཱཏཾ ཝིཧརཎཾ པཝཏྟེཏབྦཾ.

‘‘ཡཱ སེཀྑཱསེཀྑཔཊིཔདཱ ནིདྡིཊྛཱ, ཨིམཱ སེཀྑཱསེཀྑཔཊིཔདཱ སངྑེཔཏོ ཀཏིཝིདྷཱ’’ཏི པུཙྪིཏབྦཏྟཱ ཨིམཱ པཊིཔདཱསངྑཱཏཱ ཙརིཡཱ སངྑེཔཏོ པུགྒལཝསེན དྭེཏི དསྶེཏུཾ ‘‘ཨིམཱ དྭེ ཙརིཡཱ’’ཏིཨཱདིམཱཧ. ཏཏྠ ཡཱ ཙརིཡཱ བྷཱཝེཏབྦཀུསལཱདིབྷེདེན ཝཱ ཨཏྠཀོསལླཱདིབྷེདེན ཝཱ ཨབྷིཀྐམཱདཱིསུ སཏིསམྤཛཉྙབྷེདེན ཝཱ ནིདྡིཊྛཱ, ཨིམཱ ཙརིཡཱ དྭེཏི བྷགཝཏཱ ཨནུཉྙཱཏཱ ཨནུཛཱནནཝསེན དེསིཏཱ, ཝིསུདྡྷཱནཾ ཨརཧནྟཱནཾ ཨེཀཱ ཙརིཡཱ, ཝིསུཛ྄ཛྷནྟཱནཾ སེཀྑཱནཾ ཨེཀཱ ཙརིཡཱཏི པུགྒལཝསེན དྭེཏི དཊྛབྦཱ.

‘‘ཨསེཀྑོཡེཝ ཀསྨཱ ‘སཏོ ཨབྷིཀྐམཏཱི’ཏིཨཱདིནཱ ཝུཙྩཏི ཐོམཱིཡཏི, ཀལྱཱཎཔུཐུཛྫནོཔི ‘སཏོ ཨབྷིཀྐམཏཱི’ཏིཨཱདིནཱ ཝུཙྩཏི ཐོམཱིཡཏཱི’’ཏི ཝཏྟབྦཏྟཱ ‘‘ཀཏཀིཙྩཱནི ཧཱི’’ཏིཨཱདི ཝུཏྟཾ. ཨརཧཏོ ཨིནྡྲིཡཱནི ཀཏཀིཙྩཱནི, ཨིནྡྲིཡཱནཾ ཀཏཀིཙྩཏྟཱ ཡཾ པུཙྪཾ པུཙྪིཏབྦཾ, ཏཾ སབྦཾ ཙཏུབྦིདྷཾ དུཀྑསྶ པརིཉྙཱབྷིསམཡེན བོཛ྄ཛྷིཏབྦཾ…པེ… ནིརོདྷསྶ སཙྪིཀིརིཡཱབྷིསམཡེན བོཛ྄ཛྷིཏབྦཾ བྷཝེ. ཙཏུབྦིདྷཾ ཨིདཾ བོཛ྄ཛྷཾ བོཛ྄ཛྷིཏབྦཾ ཡོ ཨསེཀྑོ སཏིཝེཔུལླཔྤཏྟཏྟཱ ཨེཝཾ པརིཉྙཱབྷིསམཡཱདིནཱ ཛཱནཱཏི, ཨཡཾ ¶ ཨསེཀྑོ ནིཔྤརིཡཱཡེན ‘‘རཱགསྶ ཁཡཱཡ, དོསསྶ ཁཡཱཡ, མོཧསྶ ཁཡཱཡ སཏོ ཨབྷིཀྐམཏི, སཏོ པཊིཀྐམཏཱི’’ཏི ཝུཙྩཏི ཐོམཱིཡཏི. སེཀྑོཔི ཡཐཱཝུཏྟཾ བོཛ྄ཛྷཾ བོཛ྄ཛྷིཏབྦཾ ཨཏྟནོ པརིཉྙཱབྷིསམཡཱདིནཱ ཛཱནཱཏི, ཏསྨཱ ‘‘སཏོ…པེ… མོཧསྶཱ’’ཏི ཝུཙྩཏི ཐོམཱིཡཏཱིཏི ཝེདིཏབྦོ. ཏེན ཝུཏྟཾ ‘‘ཀེ ཝིསུཛ྄ཛྷནྟཱ? སེཀྑཱ’’ཏི.

‘‘ཀསྨཱ སེཀྑཱསེཀྑཱནཾ སཏིསམྤཛཉྙེན ཨབྷིཀྐམནཱདིབྷཱཝོ, རཱགཱདཱིནཉྩ ཁཡབྷཱཝོ ¶ སདྡཧིཏབྦོ’’ཏི ཝཏྟབྦཏྟཱ ཝུཏྟཾ ‘‘ཏེནཱཧ བྷགཝཱ སཏོ བྷིཀྑུ པརིབྦཛེ’’ཏི. ‘‘བྷགཝཏོ སབྦཾ ཀཱཡཀམྨཾ ཉཱཎཔུབྦངྒམ’ནྟིཨཱདིནཱ (ནེཏྟི. ༡༥) མནཱཔིཀེསུ ཀཱམེསུ ནཱབྷིགིཛ྄ཛྷནབྷཱཝོ, ཨམནཱཔིཀེསུ ཀཱམེསུ མནསཱ ཨནཱཝིལབྷཱཝོ, སབྦདྷམྨེསུ ཀུསལབྷཱཝོ, སཏིསམྤཛཉྙེན སམནྣཱགཏསྶ པརིབྦཛནབྷཱཝོ ཨཱཙརིཡེན ནིདྡིཊྛོ, སོ ནཱབྷིགིཛ྄ཛྷནབྷཱཝཱདིཀོ ཀསྨཱ ཨམྷེཧི སདྡཧིཏབྦོ’’ཏི པུཙྪིཏབྦཏྟཱ ཝུཏྟཾ ‘‘ཏེནཱཧ ཀཱམེསུ…པེ… པརིབྦཛེ’’ཏི. ཨིམིསྶཱ གཱཐཱཡཔི པུཙྪཱཝིསྶཛྫནཝིཙཡོ པུབྦེ ཨེཀཱདྷིཊྛཱནཱདིདྷམྨཱདྷིཊྛཱནཱདིཝསེན ཝུཏྟནཡཱནུསཱརེན ཝེདིཏབྦོ.

ཝིཙཡཧཱརཝིབྷངྒེ ཨཛིཏསུཏྟཾ ནཱིཧརིཏྭཱ པུཙྪཱཝིསྶཛྫནཝིཙཡོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཀཏམོ སུཏྟནྟརེསུ པུཙྪཱཝིསྶཛྫནཝིཙཡོ’’ཏི པུཙྪིཏབྦཏྟཱ ཨཛིཏསུཏྟེ པུཙྪཱཝིསྶཛྫནཝིཙཡནཡཱནུསཱརེན སུཏྟནྟརེསུཔི པུཙྪཱཝིསྶཛྫནཱནི ནཱིཧརིཏྭཱ པུཙྪཱཝིཙཡཝིསྶཛྫནཝིཙཡཱ ཡོཛེཏབྦཱཏི དསྶེཏུཾ ‘‘ཨེཝཾ པུཙྪིཏབྦཾ, ཨེཝཾ ཝིསྶཛྫིཏབྦ’’ནྟི ཝུཏྟཾ. ཨཊྛཀཐཱཡཾ པན –

ཨེཏྟཱཝཏཱ ཙ མཧཱཐེརོ ཝིཙཡཧཱརཾ ཝིབྷཛནྟོ ཨཛིཏསུཏྟཝསེན པུཙྪཱཝིཙཡཾ, ཝིསྶཛྫནཝིཙཡཉྩ དསྶེཏྭཱ ཨིདཱནི སུཏྟནྟརེསུཔི པུཙྪཱཝིསྶཛྫནཝིཙཡཱནཾ ནཡཾ དསྶེནྟོ ཨེཝཾ པུཙྪིཏབྦཾ, ཨེཝཾ ཝིསྶཛྫིཏབྦ’ནྟི ཨཱཧཱ’’ཏི (ནེཏྟི. ཨཊྛ. ༡༧) –

ཝུཏྟཾ. ཏཏྠ ཨེཝནྟི ཨཛིཏསུཏྟེ (སུ. ནི. ༡༠༣༨ ཨཱདཡོ; ཙཱུལ༹ནི. ཝཏྠུགཱཐཱ ༥༧, ཨཛིཏམཱཎཝཔུཙྪཱནིདྡེས ༡ ཨཱདཡོ) ཝུཏྟཔུཙྪཱཝིཙཡཱནུསཱརེན པུཙྪཱཝསེན པཝཏྟསུཏྟཾ ནཱིཧརིཏྭཱ པུཙྪཱཝིཙཡོ ཝིབྷཛེཏབྦོ, ཨེཝཾ ཨཛིཏསུཏྟེ (སུ. ནི. ༡༠༣༨ ཨཱདཡོ; ཙཱུལ༹ནི. ཝཏྠུགཱཐཱ ༥༧ ཨཱདཡོ, ཨཛིཏམཱཎཝཔུཙྪཱནིདྡེས ༡ ཨཱདཡོ) ཝུཏྟཝིསྶཛྫནཝིཙཡཱནུསཱརེན སུཏྟནྟརེསུཔི ཝིསྶཛྫནཝསེན པཝཏྟསུཏྟཾ ནཱིཧརིཏྭཱ ཝིསྶཛྫནཝིཙཡོ ཝིབྷཛེཏབྦོ.

པུཙྪཱཝིསྶཛྫནཝིཙཡཱ ¶ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, ‘‘ཀཏམོ སུཏྟཨནུགཱིཏིཝིཙཡོ’’ཏི པུཙྪིཏབྦཏྟཱ ‘‘སུཏྟསྶ ཙ ཨནུགཱིཏཱི’’ཏིཨཱདི ཝུཏྟཾ. ཏཏྠ སུཏྟསྶཱཏི ནཱིཧརིཏསུཏྟསྶ. ཨནུགཱིཏཱིཏི སུཏྟནྟརདེསནཱསངྑཱཏཱ ཨནུགཱིཏི. ཨཏྠཏོ ཙ བྱཉྫནཏོ ཙ སམཱནེཏབྦཱཏི ཏསྶཱ ཨནུགཱིཏིཡཱ ཨཏྠཏོ, བྱཉྫནཏོ ཙ སཾཝཎྞེཏབྦསུཏྟེན སམཱནཱ སདིསཱི ཀཱཏབྦཱ, ཏསྨིཾ ཝཱ སཾཝཎྞིཡམཱནསུཏྟེ ཨནུགཱིཏི སུཏྟཏྠཏོ, བྱཉྫནཏོ ཙ སམཱནེཏབྦཱ ¶ . ‘‘ཨཏྠཏོ ཨསམཱནེ ཀོ ནཱམ དོསོ ཨཱཔཛྫེཡྻཱ’’ཏི པུཙྪིཏབྦཏྟཱ ཨཏྠཱཔགཏཾ ཧི བྱཉྫནཾ སམྥཔྤལཱཔཾ བྷཝཏཱི’’ཏི ཝུཏྟཾ. ‘‘ཨཏྠཏོ ཨསམཱནེ དོསོ ཝུཏྟོ, ཨམྷེཧི ཙ ཉཱཏོ, བྱཉྫནཏོ ཨསམཱནེ པན ཀོ ནཱམ དོསོ ཨཱཔཛྫཏཱི’’ཏི པུཙྪིཏབྦཏྟཱ ‘‘དུནྣིཀྑིཏྟསྶ པདབྱཉྫནསྶ ཨཏྠོཔི དུནྣཡོ བྷཝཏཱི’’ཏི ཝུཏྟཾ. ཏསྨཱ སདོསཏྟཱ ཨནུགཱིཏིཡཱ ཝཱ སུཏྟེན ཨཏྠབྱཉྫནཱུཔེཏཾ སངྒཱཡིཏབྦཾ.

ཨནུགཱིཏིཝིཙཡོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཀཏམོ སུཏྟསྶ ཝིཙཡོ’’ཏི པུཙྪིཏབྦཏྟཱ སུཏྟཉྩཱ’’ཏིཨཱདི ཝུཏྟཾ. ཏཏྠ སུཏྟཉྩཱཏི ནིདྡྷཱརིཏསུཏྟཉྩ. ‘‘ཨིདཾ ནིདྡྷཱརིཏསུཏྟཾ ནཱམ བྷགཝཏཱ ཝུཏྟཾ ཨཱཧཙྩཝཙནཾ ཀིཾ, ཨུདཱཧུ སངྒཱཡནྟེཧི ཝུཏྟཾ ཨནུསནྡྷིཝཙནཾ ཀི’’ནྟི པཝིཙིནིཏབྦཾ, ‘‘ཨིདཾ ནིདྡྷཱརིཏསུཏྟཾ ནཱིཏཏྠཾ ཀིཾ, ཨུདཱཧུ ནེཡྻཏྠཾ ཀི’’ནྟི པཝིཙིནིཏབྦཾ, ‘‘ཨིདཾ ནིདྡྷཱརིཏསུཏྟཾ སཾཀིལེསབྷཱགིཡཾ ཀིཾ, ཨུདཱཧུ ཝཱསནཱབྷཱགིཡཾ ཀི’’ནྟི པཝིཙིནིཏབྦཾ, ‘‘ཨིདཾ ནིདྡྷཱརིཏསུཏྟཾ ནིབྦེདྷབྷཱགིཡཾ ཀིཾ, ཨུདཱཧུ ཨསེཀྑབྷཱགིཡཾ ཀི’’ནྟི པཝིཙིནིཏབྦཾ. ཨེཝཾ པཝིཙིནིཏྭཱ ཡདི ཨཱཧཙྩཝཙནཾ བྷཝེ, ཨེཝཾ སཏི ‘‘ཨཱཧཙྩཝཙན’’ནྟི ནིདྡྷཱརེཏྭཱ གཧེཏབྦཾ. ཡདི ཨསེཀྑསུཏྟཾ བྷཝེ, ཨེཝཾ སཏི ‘‘ཨསེཀྑསུཏྟ’’ནྟི ནིདྡྷཱརེཏྭཱ གཧེཏབྦཾ, ཉཱཏནྟི ཨཏྠོ.

‘‘སུཏྟཾ པཝིཙིནིཏྭཱ སུཏྟསྶ ཨཏྠབྷཱུཏཱནི སབྦཱནི སཙྩཱནི ནིདྡྷཱརེཏྭཱ ཀཏྠ པདེསེ པསྶིཏབྦཱནཱི’’ཏི པུཙྪིཏབྦཏྟཱ པུཙྪཾ ཋཔེཏྭཱ ཨིམསྨིཾ པདེསེ པསྶིཏབྦཱནཱིཏི དསྶེཏུཾ ‘‘ཀུཧིཾ ཨིམསྶ སུཏྟསྶ སབྦཱནི…པེ… པརིཡོསཱནེ’’ཏི ཝུཏྟཾ. ཏཏྠ ཨིམསྶ སུཏྟསྶཱཏི ཡཾ སུཏྟཾ ཝིཙིནིཏུཾ ནིདྡྷཱརིཏཾ, ཨིམསྶ སུཏྟསྶ ཙཏུསཙྩཝིནིམུཏྟསྶ སུཏྟཏྠསྶ ཨབྷཱཝཏོ སབྦཱནི སཙྩཱནི ཏསྶེཝ སུཏྟསྶ ཨཱདིམཛ྄ཛྷཔརིཡོསཱནེ པསྶིཏབྦཱནཱིཏི ཨཏྠོ.

ཡཐཱཝུཏྟཾ ¶ སུཏྟཝིཙཡཾ ནིགམེནྟོ ‘‘ཨེཝཾ སུཏྟཾ པཝིཙེཏབྦ’’ནྟི ཨཱཧ. ‘‘ན ཡཐཱཝུཏྟཔུཙྪཱདཱིནཾ པཝིཙེཏབྦབྷཱཝོ ཨམྷེཧི ཛཱནིཏབྦོ སདྡཧིཏབྦོ’’ཏི ཝཏྟབྦབྷཱཝཏོ ‘‘ཏེནཱཧ…པེ… ཨནུགཱིཏཱི’’ཏི ཝུཏྟཾ. ཏཏྠ ཏེན ཡཐཱཝུཏྟཔུཙྪཱདཱིནཾ ཝིཙེཏབྦབྷཱཝེན ཨཱཡསྨཱ མཧཱཀཙྩཱནོ ‘‘ཡཾ པུཙྪིཏཉྩ…པེ… ཨནུགཱིཏཱི’’ཏིཨཱདིཀཾ ཡཾ ཝཙནཾ ཨཱཧ, ཏེན ཝཙནེན ཝིཙེཏབྦབྷཱཝོ ཏུམྷེཧི ཛཱནིཏབྦོ སདྡཧིཏབྦོཝཱཏི ཝུཏྟཾ ཧོཏི.

‘‘ཡཐཱཝུཏྟཔྤཀཱརོ ཙ ཝིཙཡོ ཧཱརོ པརིཔུཎྞོ ཀིཾ, ཨུདཱཧུ ཨཉྙོཔི ནིདྡྷཱརེཏྭཱ ཡོཛེཏབྦོ ཨཏྠི ཀི’’ནྟི པུཙྪིཏབྦཏྟཱ ‘‘ནིཡུཏྟོ ཝིཙཡོ ཧཱརོ’’ཏི ཝུཏྟཾ. ཏཏྠ པུཙྪཱཝིཙཡཝིསྶཛྫནཝིཙཡཔུབྦཱཔརཝིཙཡཨནུགཱིཏིཝིཙཡསུཏྟཝིཙཡཱ ¶ སརཱུཔཏོ ཝིབྷཏྟཱ, ཏེཧི ཨཝསེསོ ཨསྶཱདཱདིཝིཙཡོཔི ཡཐཱརཧཾ ནིདྡྷཱརེཏྭཱ ཡུཏྟོ ཡུཉྫིཏབྦོཏི ཨདྷིཔྤཱཡོ.

ཨིཏི ཝིཙཡཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

༣. ཡུཏྟིཧཱརཝིབྷངྒཝིབྷཱཝནཱ

༡༨. ཡེན ཡེན སཾཝཎྞནཱཝིསེསབྷཱུཏེན ཝིཙཡཧཱརཝིབྷངྒེན པདཔཉྷཱདཡོ ཝིཙིཏཱ, སོ སཾཝཎྞནཱཝིསེསབྷཱུཏོ ཝིཙཡཧཱརཝིབྷངྒོ པརིཔུཎྞོ, ‘‘ཀཏམོ ཡུཏྟིཧཱརཝིབྷངྒོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཡུཏྟིཧཱརོ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ནིདྡིཊྛེསུ སོལ༹སསུ ཧཱརེསུ ཀཏམོ སཾཝཎྞནཱཝིསེསོ ཡུཏྟིཧཱརོ ཡུཏྟིཧཱརཝིབྷངྒོཏི པུཙྪི. ‘‘སབྦེསཾ ཧཱརཱན’’ནྟིཨཱདིནིདྡེསསྶ ཨིདཱནི ཝུཙྩམཱནོ ‘‘ཨཡཾ ཡུཏྟིཧཱརོ’’ཏིཨཱདིཀོ ཝིཏྠཱརསཾཝཎྞནཱཝིསེསོ ཡུཏྟིཧཱརཝིབྷངྒོ ནཱམཱཏི ཝིཉྙེཡྻོ. ཏེན ཝུཏྟཾ ‘‘ཏཏྠ ཀཏམོ ཡུཏྟིཧཱརོཏིཨཱདི ཡུཏྟིཧཱརཝིབྷངྒོ’’ཏི (ནེཏྟི. ཨཊྛ. ༡༨). ཨཡཾ ཡུཏྟིཧཱརོ ཀིཾ ནཱམ སུཏྟཏྠཾ ཡུཏྟཱཡུཏྟིཝསེན ཡོཛཡཏཱིཏི ཡུཉྫིཏབྦཾ སུཏྟཏྠཾ ¶ པུཙྪཏི. སུཏྟཏྠོ པན དུཝིདྷོ ཨཏཐཱཀཱརེན གཡ྄ཧམཱནོ, ཏཐཱཀཱརེན གཡ྄ཧམཱནོ ཨཏྠོཏི. ཏཏྠ ཨཏཐཱཀཱརེན གཡ྄ཧམཱནོཝ ཨཏྠོ ཡཱཐཱཝཏོ ཡུཏྟིནིདྡྷཱརཎེན ཡོཛེཏབྦོ, ཨིཏརོ པན བྷཱུཏཀཐནམཏྟེན ཡོཛེཏབྦོ. ཡསྨཱ པནཱཡཾ ཡུཏྟིགཝེསནཱ ནཱམ སཾཝཎྞནཱ མཧཱཔདེསེཧི ཝིནཱ ན སམྦྷཝཏི, ཏསྨཱ ཡུཏྟིཧཱརཾ ཝིབྷཛནྟོ ཏསྶ ཡུཏྟིཧཱརསྶ ལཀྑཎཾ པཋམཾ ཨུཔདིསིཏུཾ ‘‘ཙཏྟཱརོ མཧཱཔདེསཱ’’ཏིཨཱདིམཱཧ. ཏཏྠ མཧཱཔདེསཱཏི མཧནྟེ བུདྡྷཱདཡོ ཨཔདིསིཏྭཱ ཝུཏྟཱནི ཀཱརཎཱནི, མཧནྟཱནི ཝཱ དྷམྨསྶ ཨཔདེསཱནི པཏིཊྛཱནཱནི. ཨཔདིསཱིཡཏེཏི ཨཔདེསོ, བུདྡྷོ ཨཔདེསོ ཨེཏསྶ ཀཱརཎསྶཱཏི བུདྡྷཱཔདེསོ. སེསེསུཔི ཨེསེཝ ནཡོ ནེཏབྦོ. ‘‘བུདྡྷསྶ སམྨུཁཱ ཨེཏཾ སུཏྟཾ མཡཱ སུཏ’’ནྟི ཝཏྭཱ ཨཱབྷཏསྶ གནྠསྶ སུཏྟཝིནཡེཧི སཾསནྡནཾ དྷམྨོ, ཨསཾསནྡནཾ ཨདྷམྨོཏི ཝིནིཙྪཡཀཱརཎཾ ¶ མཧཱཔདེསོཏི ཨདྷིཔྤཱཡོ. ‘‘བུདྡྷསྶ སམྨུཁཱ མཡཱ ཨཱབྷཏཾ, སངྒྷསྶ སམྨུཁཱ མཡཱ ཨཱབྷཏཾ, སམྦཧུལཏྠེརཱནཾ སམྨུཁཱ མཡཱ ཨཱབྷཏཾ, ཨེཀཏྠེརསྶ སམྨུཁཱ མཡཱ ཨཱབྷཏ’’ནྟི ཝཏྭཱ ཨཱབྷཏསྶ གནྠསྶ ཡཱནི བྱཉྫནཔདཨཏྠཔདཱནི སནྟི, ཏཱནི པདབྱཉྫནཱནི བྷགཝཏཱ དེསིཏེ སུཏྟེ ཨོཏརཡིཏབྦཱནི ཨནུཔྤཝེསིཏཱནི, ཝིནཡེ རཱགཱདིཝིནཡེ སནྡསྶཡིཏབྦཱནི སཾསནྡེཏབྦཱནི. དྷམྨཏཱཡཾ ཨུཔནིཀྑིཔིཏབྦཱནི པཀྑིཔིཏབྦཱནི. ཡདི སུཏྟཏྠེན, ཝིནཡཏྠེན, དྷམྨཏཱཡ ཙ ཨཝིརུདྡྷཱནི ཧོནྟི, ཨེཝཾ སཏི ཏཝ ཨཱབྷཏཔདབྱཉྫནཱནི ཡུཏྟཱནཱིཏི ཝིནིཙྪཡནྟེཧི ཝཏྭཱ གཧེཏབྦཱནཱིཏི ཨདྷིཔྤཱཡོ.

སུཏྟཝིནཡདྷམྨཏཱསུ ཨོཏརཡིཏབྦཱནི སནྡསྶཡིཏབྦཱནི ཨུཔནིཀྑིཔིཏབྦཱནཱིཏི ཨཱཙརིཡེན ཝུཏྟཱནི, ‘‘ཀཏྠ སུཏྟེ, ཀཏྠ ཝིནཡེ, ཀཏྠ དྷམྨཏཱཡ’’ནྟི ཝཏྟབྦཏྟཱ ‘‘ཀཏམསྨིཾ སུཏྟེ’’ཏིཨཱདི ཝུཏྟཾ. ཏཏྠ ཙཏཱུསུ ཨརིཡསཙྩེསཱུཏི ཙཏུནྣཾ ཨརིཡསཙྩཱནཾ དསྶནཀེསུ སུཏྟེསུ. རཱགོ ཝིནསྶཏི ཝཱུཔསམཏི ཨེཏེན ཨསུབྷཱདིནཱཏི རཱགཝིནཡཾ, ཀིཾ ཏཾ? ཨསུབྷཱདིནིམིཏྟཾ, ཏཾ ཨསྶ ཨཏྠཱིཏི རཱགཝིནཡོ, ཀོ སོ? ཨསུབྷཱདིནིམིཏྟདསྶནཀོ སུཏྟནྟཝིསེསོ. ཨེས ནཡོ དོསཝིནཡོཏིཨཱདཱིསུཔི. པཊིཙྩསམུཔྤཱདོ ནཱམ སསྶཏདིཊྛིཨུཙྪེདདིཊྛིཾ ཝིཝཛྫེཏྭཱ ཨེཀཏྟནཡཱདཱིནཾ དཱིཔནེན ཨཝིཛྫཱདིསངྑཱརཱདིསབྷཱཝདྷམྨཱནཾ པཙྩཡཔཙྩཡུཔྤནྣབྷཱཝདཱིཔཀོཏི ཝུཏྟཾ ‘‘ཀཏམིསྶཾ དྷམྨཏཱཡཾ ཨུཔནིཀྑིཔིཏབྦཱནི? པཊིཙྩསམུཔྤཱདེ’’ཏི.

‘‘སུཏྟཱདཱིསུ ¶ ཨཝཏརནྟེ སནྡིསྶནྟེ ཨཝིལོམེནྟེ ཀིཾ ན ཛནེཏཱི’’ཏི ཝཏྟབྦཏོ ‘‘ཙཏཱུསཱུ’’ཏིཨཱདི ཝུཏྟཾ. ཏཏྠ ‘‘བུདྡྷཱདཱིནཾ སམྨུཁཱ མཡཱ ཨཱབྷཏ’’ནྟི ཝཏྭཱ ཨཱབྷཏགནྠོ ཙཏཱུསུ ཨརིཡསཙྩེསུ ཡདི ཨཝཏརཏི, ཨེཝཾ སཏི ཨཱབྷཏགནྠོ ཨཱསཝེ ན ཛནེཏི. རཱགཱདིཀིལེསཝིནཡེ ཡདི སནྡིསྶཏི, ཨེཝཾ སཏི ཨཱབྷཏགནྠོ ཨཱསཝེ ན ཛནེཏི. དྷམྨཏཉྩ ཡདི ན ཝིལོམེཏི, ཨེཝཾ སཏི ཨཱབྷཏགནྠོ ཨཱསཝེ ན ཛནེཏཱིཏི ཨཏྠོ དཊྛབྦོ.

‘‘ཀིམཏྠཾ ཡུཏྟིཧཱརཝིབྷངྒེ ཙཏྟཱརོ མཧཱཔདེསཱ ཨཱབྷཏཱ’’ཏི ཝཏྟབྦཏྟཱ ‘‘ཙཏཱུཧི མཧཱཔདེསེཧཱི’’ཏིཨཱདིམཱཧ. ཏཏྠ ཨཱབྷཏགནྠེ ཡཾ ཡཾ ཨཏྠཛཱཏཾ, ཡཾ ཡཾ དྷམྨཛཱཏཾ ཝཱ ཙཏཱུཧི མཧཱཔདེསེཧི ཡུཛྫཏི, ཏཾ ཏཾ ཨཏྠཛཱཏཾ ཝཱ ཏཾ ཏཾ དྷམྨཛཱཏཾ ཝཱ སཾཝཎྞེཏབྦསུཏྟེ གཧེཏབྦཾ. ཡེན ཡེན ཀཱརཎེན ཙ ཙཏཱུཧི མཧཱཔདེསེཧི ཡུཛྫཏི, ཏཾ ཏཾ ཀཱརཎཾ སཾཝཎྞནཱཝསེན སཾཝཎྞེཏབྦསུཏྟེ གཧེཏབྦཾ. ཡཐཱ ཡཐཱ པཀཱརེན ཙཏཱུཧི མཧཱཔདེསེཧི ཡུཛྫཏི, སོ སོ པཀཱརོ སཾཝཎྞནཱཝསེན སཾཝཎྞེཏབྦསུཏྟེ གཧེཏབྦོ. ཨེཝཾ གཱཧཎཏྠཾ ཙཏྟཱརོ མཧཱཔདེསཱ ཨཱབྷཏཱཏི ཨཏྠོ.

༡༩. ཙཏཱུཧི ¶ མཧཱཔདེསེཧི ཡུཏྟཾ ཨཝིརུདྡྷཾ ཏཾ ཏཾ ཨཏྠཛཱཏཾ གཧེཏབྦནྟི ཨཱཙརིཡེན ཝུཏྟཾ, ‘‘ཀཏྠ ཀེན ཡུཏྟིནིདྡྷཱརཎཾ ཀཱཏབྦ’’ནྟི ཝཏྟབྦཏྟཱ ‘‘པཉྷཾ པུཙྪིཏེནཱ’’ཏིཨཱདི ཝུཏྟཾ. པཉྷེ པཉྷཾ པུཙྪིཏེན པུགྒལེན ཡུཏྟིནིདྡྷཱརཎཾ ཀཱཏབྦནྟི. ཏཏྠ པཉྷནྟི པཉྷིཏབྦཾ སབྷཱཝདྷམྨཾ. པུཙྪིཏེནཱཏི ཝིསྶཛྫེཏུཾ སམཏྠེན པཎྜིཏཔུགྒལེན. པཉྷེཏི པུཙྪཱཝསེན པཝཏྟཔཱཋེ. པདཱནི ཀཏི ཀིཏྟཀཱནི ཧོནྟཱིཏི པདསོ པཋམཾ པརིཡོགཱཧིཏབྦཾ ཡུཏྟིཧཱརེན ཝིཙེཏབྦཾ ཝཱིམཾསིཏབྦཾ. ‘‘ཀཐཾ ཝིཙེཏབྦ’’ནྟི པུཙྪིཏབྦཏྟཱ ‘‘ཡདི སབྦཱནཱི’’ཏིཨཱདི ཝུཏྟཾ. ཏཏྠ སབྦཱནི པདཱནཱིཏི པུཙྪིཏཔཱཋེ ནིརཝསེསཱནི པདཱནི ཨེཀཾ སམཱནཾ ཨཏྠཾ ཡདི ཨབྷིཝདནྟི, ཨེཝཾ སཏི ཨཏྠཝསེན ཨེཀོ པཉྷོ. ཨེས ནཡོ སེསེསུཔི. ཏེན ཝུཏྟཾ ‘‘ཏདཏྠསྶེཀསྶ ཉཱཏུཾ ཨིཙྪིཏཏྟཱ’’ཏི (ནེཏྟི. ཨཊྛ. ༡༩).

ཨེཀནྟི ཨཏྠཝསེན ཨེཀཝིདྷཾ པཉྷཾ. ཨུཔཔརིཀྑམཱནེན པུགྒལེན ཨཉྙཱཏབྦཾ དལ༹ྷཾ ཛཱནིཏབྦཾ. ‘‘ཀོ ཨཱཛཱནནཱཀཱརོ’’ཏི པུཙྪིཏབྦཏྟཱ ཨཱཛཱནནཱཀཱརཾ དསྶེནྟོ ‘‘ཀིཾ ཨིམེ དྷམྨཱ’’ཏིཨཱདིམཱཧ. ཏཏྠ ‘‘ཡེ ཧི པརིཡཏྟིདྷམྨཱ ¶ སཾཝཎྞེཏབྦཱ, ཨིམེ པརིཡཏྟིདྷམྨཱ ནཱནཏྠཱ ཧོནྟི ཀིཾ, ནཱནཱབྱཉྫནཱ ཧོནྟི ཀིཾ, ཨུདཱཧུ ཨིམེསཾ པརིཡཏྟིདྷམྨཱནཾ ཨེཀོ ཨཏྠོ ཧོཏི, བྱཉྫནམེཝ ནཱནཾ ཧོཏི ཀི’’ནྟི ཡུཏྟིཏོ ཝིཙེཏྭཱ ཨཉྙཱཏབྦནྟི ཡོཛནཱ. ‘‘ཡཐཱཝུཏྟོ པཉྷོ ཀིཾ བྷཝེ’’ཏི པུཙྪིཏབྦཏྟཱ ཡཐཱཝུཏྟཾ པཉྷཾ ཨེཀདེསཾ དསྶེཏུཾ ‘‘ཡཐཱ ཀིཾ བྷཝེ’’ཏི པུཙྪིཏྭཱ ‘‘ཡཐཱ སཱ’’ཏིཨཱདིམཱཧ.

ཏསྶཾ པུཙྪཱགཱཐཱཡཾ – ཙོརགྷཱཏཀེན མནུསྶེན ཙོརོ ཨབྦྷཱཧཏོ ཝིཡ ཀེན དྷམྨེན སཏྟལོཀོ སདཱ ཨབྦྷཱཧཏོ, མཱལུཝལཏཱཡ ཨཏྟནོ ནིསྶིཏརུཀྑོ པརིཝཱརིཏོ ཨཛ྄ཛྷོཏྠཊོ ཝིཡ ཀེན དྷམྨེན སཏྟལོཀོ སདཱ པརིཝཱརིཏོ ཨཛ྄ཛྷོཏྠཊོ, ཝིསཔྤཱིཏཁུརཔྤེན སལླེན ཨོཏིཎྞོ ཨནུཔཝིཊྛོ ཝིཡ ཀེན སལླེན སཏྟལོཀོ སདཱ ཨོཏིཎྞོ ཨནུཔཝིཊྛོ, ཀིསྶ ཀེན ཀཱརཎེན སཏྟལོཀོ སདཱ དྷཱུཔཱཡིཏོ སནྟཱཔིཏོཏི ཡོཛནཱ.

‘‘ཨིམཱཡ པུཙྪཱགཱཐཱཡ ཀིཏྟཀཱནི པདཱནཱི’’ཏི པུཙྪིཏབྦཏྟཱ ‘‘ཨིམཱནཱི’’ཏིཨཱདི ཝུཏྟཾ. ཏཏྠ པུཙྪིཏཱནཱིཏི པུཙྪིཏཏྠཱནི པདཱནི ཙཏྟཱརི ཧོནྟི. ‘‘ཀིཏྟཀཱ པཉྷཱ’’ཏི པུཙྪིཏབྦཏྟཱ ‘‘ཏེ ཏཡོ པཉྷཱ’’ཏི ཝུཏྟཾ.

བྷགཝཱ དེཝཏཱཡ ཧི ཡསྨཱ ཝིསྶཛྫེཏི, ཨིཏི ཏསྨཱ ཝིསྶཛྫནཏོ ‘‘ཏཡོཔཉྷཱ’’ཏི ཝིཉྙཱཡཏི. ‘‘ཀཏམཱ ཝིསྶཛྫནགཱཐཱ’’ཏི པུཙྪིཏབྦཏྟཱ –

‘‘མཙྩུནཱབྦྷཱཧཏོ ¶ ལོཀོ, ཛརཱཡ པརིཝཱརིཏོ;

ཏཎྷཱསལླེན ཨོཏིཎྞོ, ཨིཙྪཱདྷཱུཔཱཡིཏོ སདཱ’’ཏི. –

ཝུཏྟཾ. ཏསྶཾ ཝིསྶཛྫནགཱཐཱཡཾ – ཙོརགྷཱཏཀེན མནུསྶེན ཙོརོ ཨབྦྷཱཧཏོ ཝིཡ མཙྩུནཱ སཏྟལོཀོ སདཱ ཨབྦྷཱཧཏོ, མཱལུཝལཏཱཡ ཨཏྟནོ ནིསྶིཏརུཀྑོ པརིཝཱརིཏོ ཨཛ྄ཛྷོཏྠཊོ ཝིཡ ཛརཱཡ སཏྟལོཀོ སདཱ པརིཝཱརིཏོ ཨཛ྄ཛྷོཏྠཊོ, ཝིསཔྤཱིཏཁུརཔྤེན སལླེན ཨོཏིཎྞོ ཨནུཔཝིཊྛོ ཝིཡ ཏཎྷཱསལླེན སཏྟལོཀོ སདཱ ཨོཏིཎྞོ ཨནུཔཝིཊྛོ, ཨིཙྪཱཡ སཏྟལོཀོ སདཱ དྷཱུཔཱཡིཏོ སནྟཱཔིཏོཏི ཡོཛནཱ.

༢༠. ‘‘ཀཏམཾ མཙྩུ, ཀཏམཱ ཛརཱ’’ཏི པུཙྪིཏབྦཏྟཱ ‘‘ཏཏྠ ཛརཱ’’ཏིཨཱདི ཝུཏྟཾ. ཏཏྠ ཏཏྠཱཏི ཏིསྶཾ ཝིསྶཛྫནགཱཐཱཡཾ. དུཏིཡཔདེ ཝུཏྟཱ ཛརཱ ཙ པཋམཔདེ ¶ ཝུཏྟཾ མརཎཉྩ ཨིམཱནི དྭེ སངྑཏསྶ ཁནྡྷཔཉྩཀསྶ སངྑཏལཀྑཎཱནི ཧོནྟི, སངྑཏཾ ཁནྡྷཔཉྩཀཾ མུཉྩིཏྭཱ ཝིསུཾ ན ཨུཔལབྦྷཏཱིཏི ཨཏྠོ. ‘‘སངྑཏལཀྑཎཱནཾ ཛརཱམརཎཱནཾ ཀཐཾ བྷེདོ ཛཱནིཏབྦོ’’ཏི ཝཏྟབྦཏྟཱ ‘‘ཛརཱཡཾ ཋིཏསྶཱ’’ཏིཨཱདི ཝུཏྟཾ. ཏཏྠ ཛརཱཡཾ ཋིཏསྶ ཨཉྙཐཏྟནྟི ཋིཏསྶ ཁནྡྷཔྤབནྡྷསྶ ཡཾ ཨཉྙཐཏྟཾ, ཨཡཾ པཱཀཊཛརཱ ནཱམ, ན ཁཎཊྛིཏིཛརཱ. མརཎཾ ཝཡོཏི སམྨུཏིམརཎཾ ཙུཏིཡེཝ ཧོཏི, ན ཁཎིཀམརཎཾ, ན སམུཙྪེདམརཎཾ. ཏེན ཝུཏྟཾ ‘‘ཨུཔྤཱདོ པཉྙཱཡཏི, ཝཡོ པཉྙཱཡཏི, ཋིཏསྶ ཨཉྙཐཏྟཾ པཉྙཱཡཏཱི’’ཏི (སཾ. ནི. ༣.༣༨; ཨ. ནི. ༣.༤༧; ཀཐཱ. ༢༡༤).

ཡདི ཋིཏསྶེཝ མརཎཾ སིཡཱ, ཨེཝཾ སཏི ཛརཱམརཎཱནཾ ནཱནཏྟཾ ཡུཏྟཾ ན སིཡཱ, ཨཡུཏྟེ སཏི ‘‘ཏེ ཏཡོ པཉྷཱ’’ཏི ཝཙནམྤི ཨཡུཏྟམེཝཱཏི ཝཏྟབྦཏོ ‘‘ཏཏྠ ཛརཱཡ ཙཱ’’ཏིཨཱདི ཝུཏྟཾ. ཏཏྠ ཏཏྠཱཏི ཏིསྶཾ ཝིསྶཛྫནགཱཐཱཡཾ ཝུཏྟཱཡ ཛརཱཡ ཙ ཝུཏྟསྶ མརཎསྶ ཙ ཨཏྠཏོ ནཱནཏྟཾ ཡུཏྟཾ.

‘‘ཀེན ཀཱརཎེན ཡུཏྟཾ, ཀཐཾ ཀཱརཎེན ནཱནཏྟཾ སམྤཊིཙྪིཏབྦ’’ནྟི ཝཏྟབྦཏྟཱ ‘‘གབྦྷགཏཱཔི ཧི མཱིཡནྟཱི’’ཏི ཝུཏྟཾ. ཛརཾ ཨཔྤཏྟཱ གབྦྷགཏཱཔི སཏྟཱ ཧི ཡསྨཱ མཱིཡནྟི, ཏསྨཱ ནཱནཏྟཾ སམྤཊིཙྪིཏབྦཾ. ‘‘གབྦྷགཏཱཔི ཛརཔྤཏྟཱ བྷཝེཡྻུ’’ནྟི ཝཏྟབྦཏྟཱ ‘‘ན ཙ ཏེ ཛིཎྞཱ བྷཝནྟཱི’’ཏི ཝུཏྟཾ. ཛརཔྤཏྟཱཔི ཨཛིཎྞཏྟཱ ཛིཎྞཛརཾ ཨཔྤཏྟཱཝ མཱིཡནྟི, ཨེཝཾ ཨིདྷཱདྷིཔྤེཏསྶ ཛིཎྞཛརཱཝིརཧིཏསྶ མརཎསྶ སམྦྷཝཏོ ཨཉྙཱ ཛརཱ, ཨཉྙཾ མརཎནྟི ཉཱཏབྦནྟི ཝུཏྟཾ ཧོཏི. ‘‘ན གབྦྷགཏཱནཾཡེཝ ཛིཎྞཛརཾ ཨཔྤཏྟཾ མརཎཾ ཨཏྠི, ཨཉྙེསམྤི ཨཏྠཱི’’ཏི ཝཏྟབྦབྷཱཝཏོ ¶ ‘‘ཨཏྠི ཙ དེཝཱནཾ མརཎ’’ནྟི ཝུཏྟཾ. ‘‘དེཝཱཔི ཙིརཀཱལསམྦྷཝཏོ ཛརཾ པཏྟཱ བྷཝེཡྻུ’’ནྟི ཝཏྟབྦཏྟཱ ‘‘ན ཙ ཏེསཾ སརཱིརཱནི ཛཱིརནྟཱི’’ཏི ཝུཏྟཾ. ‘‘ཛརཱམརཎཱནཾ ནཱནཏྟེ ཀཱརཎཾ ཨེཏྟཀམེཝཱ’’ཏི ཝཏྟབྦཏྟཱ ཨཉྙམྤི ཨཏྠཱིཏི དསྶེཏུཾ ‘‘སཀྐཏེ ཝཱ’’ཏིཨཱདི ཝུཏྟཾ. ཏཏྠ ཛིཎྞཛརཱཡ པཊིཀམྨཾ ཀཱཏུཾ སཀྐཏེཝ, མརཎསྶ པན པཊིཀམྨསྶ ཀཱཏུཾ ན སཀྐཏེཝ, ཨིམིནཱཔི ཀཱརཎེན ཛརཱམརཎཱནཾ ནཱནཏྟཾ སམྤཊིཙྪིཏབྦམེཝཱཏི ཨཏྠོ. ‘‘ན སཀྐཏེ མརཎསྶ པཊིཀམྨཾ ཀཱཏུ’’ནྟི ཀསྨཱ ཝུཏྟཾ, ནནུ ཨིདྡྷིཔཱདབྷཱཝནཱཡ ཝསཱིབྷཱཝེ སཏི སཀྐཱ མརཎསྶཱཔི པཊིཀམྨཾ ཀཱཏུནྟི ཙོདནཾ མནསི ཀཏྭཱ ‘‘ཨཉྙཏྲེཝ ཨིདྡྷིམནྟཱནཾ ཨིདྡྷིཝིསཡཱ’’ཏི ཝུཏྟཾ.

ཛརཱམརཎཱནཾ ¶ ཨཉྙམཉྙཾ ནཱནཱབྷཱཝོ ཨཱཙརིཡེན དསྶིཏོ, ཨམྷེཧི ཙ ཉཱཏོ, ‘‘ཀཐཾ པན ཏཎྷཱཡ ཛརཱམརཎེཧི ནཱནཱབྷཱཝོ’’ཏི ཝཏྟབྦཏོ ཏེཧི ཏཎྷཱཡ ནཱནཏྟཾ དསྶེཏུཾ ‘‘ཡཾ པནཱཧཱ’’ཏིཨཱདི ཝུཏྟཾ. ཏཎྷཱཡ ཨཝིཛྫམཱནཱཡཔི ཛཱིརནྟཱཔི མཱིཡནྟཱཔི ཝཱིཏརཱགཱ ཡསྨཱ དིསྶནྟི, ཏསྨཱ ཏཎྷཱཡ ཛརཱམརཎེཧི ནཱནཱབྷཱཝོ སམྤཊིཙྪིཏབྦོ.

‘‘ཏཎྷཱཡ ཛཱིརཎབྷིཛྫནལཀྑཎཾ ཨཏྠཱིཏི ཏེཧི ཏཎྷཱཡ ཨནཉྙཏྟེ ཀོ ནཱམ དོསོ སིཡཱ’’ཏི ཝཏྟབྦཏོ དོསཾ དསྶེཏུཾ ‘‘ཡདི ཙཱ’’ཏིཨཱདི ཝུཏྟཾ. ཛརཱམརཎཾ ཡཐཱ ཡེན ཛཱིརཎབྷིཛྫནལཀྑཎེན པཱཀཊཾ, ཨེཝཾ ཛཱིརཎབྷིཛྫནལཀྑཎེན ཏཎྷཱཔི པཱཀཊཱ. ཡདི ཙ སིཡཱ; ཨེཝཾ སནྟེ ཡོབྦནཊྛཱཔི སབྦེ མཱཎཝཱ ཝིགཏཏཎྷཱ སིཡུཾ, ན ཙ ཝིགཏཏཎྷཱ, ཏསྨཱ ནཱནཱབྷཱཝོ སམྤཊིཙྪིཏབྦོ. ཏཏོ ཨཉྙོཔི དོསོ ཨཱཔཛྫེཡྻཱཏི དསྶེཏུཾ ‘‘ཡཐཱ ཙ ཏཎྷཱ དུཀྑསྶཱ’’ཏིཨཱདི ཝུཏྟཾ. ཏཏྠ ཛརཱམརཎཱནཾ ཏཎྷཱཡ ཨནཉྙཏྟེ སཏི ཏཎྷཱཡ བྷཝཏཎྷཱཡ དུཀྑསམུདཡོ ཧོཏི, ཨེཝཾ ཛརཱམརཎམྤི དུཀྑསམུདཡོ སིཡཱ. ཡསྨཱ ན ཛརཱམརཎཾ དུཀྑསམུདཡོ, ཏསྨཱ ཛརཱམརཎེཧི ཏཎྷཱཡ ནཱནཏྟཾ ཝེདིཏབྦཾ.

ཏེཧི ཏཱཡ ཨནཉྙཏྟེ སཏི ཨེཝམྤི དོསོ ཨཱཔཛྫེཡྻཱཏི དསྶེཏུཾ ‘‘ཡཐཱ ཙ ཏཎྷཱ མགྒཝཛ྄ཛྷཱ’’ཏིཨཱདི ཝུཏྟཾ. ཏཏྠ ཏེཧི ཏཱཡ ཨནཉྙཏྟེ སཏི ཡཐཱ ཏཎྷཱ མགྒཝཛ྄ཛྷཱ ཧོཏི, ཨེཝཾ ཛརཱམརཎམྤི མགྒཝཛ྄ཛྷཾ སིཡཱ. ཡཐཱ ཛརཱམརཎཾ མགྒཝཛ྄ཛྷཾ ན ཧོཏི, ཨེཝཾ ཏཎྷཱཔི མགྒཝཛ྄ཛྷཱ ན སིཡཱ, ཏཐཱ ཙ ན ཧོཏི པཧཱཏབྦཱཔཧཱཏབྦབྷཱཝཏོ, ཏསྨཱཔི ཛརཱམརཎེཧི ཏཎྷཱཡ ནཱནཏྟཾ ཝེདིཏབྦཾ.

‘‘ཡདི ¶ ཙཱཏིཨཱདིནཱ ཝུཏྟཱཡ ཡུཏྟིཡཱ ཨུཔཔཏྟིཡཱ ཨེཝ ཛརཱམརཎེཧི ཏཎྷཱཡ ཨཉྙཏྟཾ གཝེསིཏབྦ’’ནྟི ཝཏྟབྦཏྟཱ ཨཉྙེཧིཔི ཀཱརཎེཧི གཝེསིཏབྦནྟི དསྶེཏུཾ ‘‘ཨིམཱཡ ཡུཏྟིཡཱ’’ཏིཨཱདི ཝུཏྟཾ. ཏཏྠ ཨིམཱཡ ཡུཏྟིཡཱཏི ཡཱ ཡུཏྟི ‘‘ཡདི ཙཱ’’ཏིཨཱདིནཱ ཝུཏྟཱཡ ཨིམཱཡ ཡུཏྟིཡཱ ཨུཔཔཏྟིཡཱ. ཨཉྙམཉྙེཧི ཀཱརཎེཧི ཨཉྙེཧི ཨཉྙེཧི ཀཱརཎབྷཱུཏེཧི ཨུཔཔཏྟཱིཧི ཛརཱམརཎེཧི ཏཎྷཱཡ ཨཉྙཏྟཾ གཝེསིཏབྦནྟི ཨཏྠོ. ‘‘ཨཉྙམཉྙེཧི ཀཱརཎེཧི གཝེསིཏབྦ’’ནྟི ཀསྨཱ ཝུཏྟཾ, ནནུ ཡུཏྟིཡཱ, ཨཏྠཏོ ཙ ཨཉྙཏྟཾ སནྡིསྶཏཱིཏི ཙོདནཾ མནསི ཀཏྭཱ ‘‘ཡདི ཙ སནྡིསྶཏཱི’’ཏིཨཱདིམཱཧ. ཏཏྠ ཡུཏྟིསམཱརུལ༹ྷཾ ཨཏྠཏོ ཙ མརཎེཧི ¶ ཏཎྷཱཡ ཙ ཨཉྙཏྟཾ ཡདི ཙ སནྡིསྶཏི, བྱཉྫནཏོཔི ཨཉྙཏྟཾ གཝེསིཏབྦམེཝཱཏི ཨཏྠོ.

‘‘ཀཐཾ བྱཉྫནཏོ ཨཉྙཏྟཾ གཝེསིཏབྦ’’ནྟི ཝཏྟབྦཏྟཱ ‘‘སལློཏི ཝཱ’’ཏིཨཱདི ཝུཏྟཾ. ཏཏྠ ‘‘སལློ’’ཏི ཝཱ ‘‘དྷཱུཔཱཡན’’ནྟི ཝཱ དྭཱིཧི བྱཉྫནེཧི ཝུཙྩམཱནཱནཾ ཨིམེསཾ ཨིཙྪཱཏཎྷཱསངྑཱཏཱནཾ དྷམྨཱནཾ ཨཏྠཏོ ཨེཀཏྟཾ སམཱནཏྟཾ ཡུཛྫཏི, ན ཨཉྙཏྟཾ. ‘‘སལློ’’ཏི ཝཱ ‘‘དྷཱུཔཱཡན’’ནྟི ཝཱ དྭཱིཧི བྱཉྫནེཧི ཨཝུཙྩམཱནཱནཾ ཛརཱམརཎཱནཾ ཏཎྷཱཡ ཨེཀཏྟཾ ན ཡུཛྫཏི. ཏམེཝཏྠཾ ཝིཝརིཏུཾ ‘‘ན ཧཱི’’ཏིཨཱདི ཝུཏྟཾ. ཏཏྠ ཨིཙྪཱཡ ཙ ཏཎྷཱཡ ཙ ཨཏྠཏོ ཨཉྙཏྟཾ ན ཡུཛྫཏི, ཨེཀཏྟམེཝ ཡུཛྫཏཱིཏི ཡོཛནཱ. ཨིཙྪཱཡ ཙ ཏཎྷཱཡ ཙ ཛཱིརཎབྷིཛྫནསམྦྷཝཏོ ཛརཱམརཎེཧི ཏཎྷཱཡ ཨེཀཏྟཾ སིཡཱ, ‘‘ཀསྨཱ ཨཉྙཏྟཾ ཡུཏྟ’’ནྟི ཝཏྟབྦཏོ ‘‘ཏཎྷཱཡ ཨདྷིཔྤཱཡེ’’ཏིཨཱདི ཝུཏྟཾ. ཏཏྠ ཏཎྷཱཡ ཨདྷིཔྤཱཡེ ཨཔརིཔཱུརམཱནེ ནཝསུ ཨཱགྷཱཏཝཏྠཱུསུ ཀོདྷོ ཙ ཨུཔྤཛྫཏི, ཨུཔནཱཧོ ཙ ཨུཔྤཛྫཏི. ཛརཱམརཎེསུ ཨཔརིཔཱུརམཱནེསུ ནཝསུ ཨཱགྷཱཏཝཏྠཱུསུ ཀོདྷོ ཙ ན ཨུཔྤཛྫཏི, ཨུཔནཱཧོ ཙ ན ཨུཔྤཛྫཏི. ཨིཏི ཨིམཱཡ ཡུཏྟིཡཱ ཛརཱཡ ཙ མརཎསྶ ཙ ཏཎྷཱཡ ཙ ཨཏྠཏོ ཨཉྙཏྟཾ ཡུཛྫཏིཡེཝཱཏི དཊྛབྦཾ.

ཡདི ཨིཙྪཱ ཏཎྷཱཡ ཨཏྠཏོ ཨེཀཏྟཾ ཡུཏྟཾ, ཨེཝཾ སཏི ཀསྨཱ བྷགཝཏཱ ‘‘མཙྩུནཱབྦྷཱཧཏོ ལོཀོ’’ཏིཨཱདིགཱཐཱཡཾ ‘‘ཏཎྷཱསལླེན ཨོཏིཎྞོ, ཨིཙྪཱདྷཱུཔཱཡིཏོ སདཱ’’ཏི དྭིདྷཱ ཝུཏྟཱཏི ཙོདནཾ པརིཧརནྟོ ‘‘ཡཾ པནིདཾ བྷགཝཏཱ’’ཏིཨཱདིམཱཧ. ཏཏྠ ‘‘ཨིཙྪཱ’’ཏིཔི ‘‘ཏཎྷཱ’’ཏིཔི དྭཱིཧི ནཱམེཧི ཡཾ པནིདཾ ཨབྷིལཔིཏཾ ཡཾ པནིདཾ ཨབྷིལཔནཾ ཀཏཾ, ཨིདཾ ཨབྷིལཔནཾ བྷགཝཏཱ བཱཧིརཱནཾ ཨིཙྪིཏབྦཏསིཏབྦཱནཾ ཝཏྠཱུནཾ རཱུཔཱདིཨཱརམྨཎཱནཾ བྷེདཱནཾ ཝསེན ‘‘ཨིཙྪཱ’’ཏིཔི ‘‘ཏཎྷཱ’’ཏིཔི དྭཱིཧི ནཱམེཧི ཨབྷིལཔིཏཾ ཨབྷིལཔནཝསེན ཀཏནྟི ཨེཀཏྟཾ ཡུཏྟམེཝ, ན ནཱནཏྟནྟི ཨཏྠོ དཊྛབྦོ.

‘‘ནཱམཝསེན ¶ དྭིདྷཱ ཝུཏྟཱནཾ ཨིཙྪཱཏཎྷཱདཱིནཾ ཀེན ཨེཀཏྟཾ ཡུཏྟནྟི སདྡཧིཏབྦ’’ནྟི ཝཏྟབྦཏྟཱ ‘‘སབྦཱཧཱི’’ཏིཨཱདི ཝུཏྟཾ. ཏཏྠ ནཱནཱནཱམཝསེན པབྷེདཱ སབྦཱ ཨིཙྪཱདིཀཱ ཏཎྷཱ ཨཛ྄ཛྷོསཱནལཀྑཎེན ཨེཀལཀྑཎཱ ཧི ཡསྨཱ ཡུཏྟཱ, ཏསྨཱ ནཱམཝསེན བྷིནྣཱནམྤི ཨེཀལཀྑཎེན ཨེཀཏྟཾ ཡུཏྟནྟི སདྡཧིཏབྦནྟི དཊྛབྦཾ. ‘‘ཀིམིཝ ཡུཏྟ’’ནྟི པུཙྪིཏབྦཏྟཱ ‘‘ཡཐཱ སབྦོ’’ཏིཨཱདི ཝུཏྟཾ. ཏཏྠ ཀཊྛགྒིཨཱདིཝསེན ཨནེཀོ སབྦོ ཨགྒི ¶ ཨུཎྷཏྟལཀྑཎེན ཨེཀལཀྑཎོ ཡཐཱ, ཨེཝཾ ཨཛ྄ཛྷོསཱནལཀྑཎེན ཨེཀལཀྑཎཱཏི ཡོཛནཱ. སབྦསྶ ཨགྒིནོ ཨུཔཱདཱནཝསེན ཨནེཀཱནི ནཱམཱནི སརཱུཔཏོ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ. ཏསྶཏྠོ པཱཀཊོ. ཨཱརམྨཎཝསེན ཏཎྷཱ ཨཉྙེཧི ཨཉྙེཧི ནཱམེཧི བྷགཝཏཱ ཨབྷིལཔིཏཱ, ཨུཔཱདཱནཝསེན ཨགྒི ཨཉྙེཧི ཨཉྙེཧི ནཱམེཧི ཨབྷིལཔིཏོཏི ཡོཛནཱ ཀཱཏབྦཱ.

‘‘ཝིསྶཛྫནགཱཐཱཡཾ ཨཱགཏནཱམེཧི ཨེཝ ཏཎྷཱ ཨབྷིལཔིཏཱ’’ཏི པུཙྪིཏབྦཏྟཱ ཨནེཀེཧི ནཱམེཧི ཨབྷིལཔིཏཱཏི དསྶེཏུཾ ‘‘ཨིཙྪཱཨིཏིཔཱི’’ཏིཨཱདི ཝུཏྟཾ. ཏཏྠ ཨིཙྪིཏབྦཱནི ཨཏྠཱནི རཱུཔཱདཱིནི ཨཱརམྨཎཱནི སཏྟཱ ཨིཙྪནྟི ཨེཏཱཡཱཏི ཨིཙྪཱ. ཏསནྟི ཨེཏཱཡཱཏི ཏཎྷཱ. སལླཏི པཝིསཏི ཝིསཔྤཱིཏཾ སལླཾ ཝིཡཱཏི སལླཱ, སནྟཱཔཾ ལཱཏི ཨཱདདཱཏཱིཏི ཝཱ སལླཱ, སནྟཱཔཾ ལཱཏི པཝཏྟེཏཱིཏི ཝཱ སལླཱ. དྷཱུཔཱཡཏི སནྟཱཔེཏི པརིདཧཏཱིཏི དྷཱུཔཱཡནཱ. སརཏི ཨཱཀཌྜྷཏི ཨཝཧརཏི སཱིགྷསོཏཱ སརིཏཱ ཝིཡཱཏི སརིཏཱ, སརཏི སལླཏཱིཏི ཝཱ སརིཏཱ. ཝིསརཏཱིཏི ཝིསཏྟིཀཱ. པཱིཏིཝསེན སིནེཧཏཱིཏི སིནེཧོ. ཏཱསུ ཏཱསུ གཏཱིསུ ཀིལམཐཾ ཨུཔྤཱདེཏཱིཏི ཀིལམཐོ. སཏྟཱ རཱུཔཱདིཨཱརམྨཎཱནི མཉྙནྟི ཨེཏཱཡཱཏི མཉྙནཱ. བྷཝཾ བནྡྷཏཱིཏི བནྡྷོ. ཨཱསཱིཡཏེ པཏྠཱིཡཏེཏི ཨཱསཱ. ཨཱསིཡཏི པཏྠེཏཱིཏི ཝཱ ཨཱསཱ. པིཔཱསཱིཡཏེཏི པིཔཱསཱ, ཨཱརམྨཎརསཾ པིཔཱསཏཱིཏི ཝཱ པིཔཱསཱ. ཨབྷིནནྡཱིཡཏེཏི ཨབྷིནནྡནཱ, ཨབྷིནནྡཏཱིཏི ཝཱ ཨབྷིནནྡནཱ. ཝིཏྠཱརཏོ ཨཊྛཀཐཱཝསེན (ནེཏྟི. ཨཊྛ. ༢༠) ཝེདིཏབྦོ.

‘‘ཏཎྷཱཡ ཨིཙྪཱདིཔྤཀཱརཝསེན ཨཱལཔིཏབྷཱཝོ ཀེན སདྡཧིཏབྦོ’’ཏི ཝཏྟབྦཏྟཱ ‘‘ཡཐཱ ཙ ཝེཝཙནེ’’ཏིཨཱདི ཝུཏྟཾ. ཝེཝཙནཧཱརཝིབྷངྒེ ‘‘ཨཱསཱ ཙ པཱིཧཱ…པེ… ཝེཝཙན’’ནྟི (ནེཏྟི. ༣༧) ཡཱ ཏཎྷཱ ཡཐཱ ཡེན པཀཱརེན ཝུཏྟཱ, ཏཐཱ ཏེན པཀཱརེན ཝུཏྟཱཡ ཏཎྷཱཡ ཨིཙྪཱདིཔྤཀཱརཝསེན ཨཱལཔིཏབྷཱཝོ སདྡཧིཏབྦོ. ‘‘ཝེཝཙནཝིབྷངྒེ ཨཱཙརིཡེན ཝུཏྟོཔི བྷགཝཏཱ ཨཝུཏྟེ ཀེན སདྡཧིཏབྦོ’’ཏི ཝཏྟབྦཏྟཱ ‘‘ཡཐཱཧ བྷགཝཱ’’ཏིཨཱདི ཝུཏྟཾ. ཡཐཱ ཡེན པཀཱརེན བྷགཝཱ ‘‘རཱུཔེ ཏིསྶཱ’’ཏིཨཱདིཀཾ ཡཾ ཝཙནམཱཧ, ཏཐཱ ཏེན པཀཱརེན ཝུཏྟེན ཏེན ཝཙནེན སདྡཧིཏབྦོ ཝཱཏི. ཨེཝཾ ཡུཛྫཏཱིཏི ཨེཝཾ ཝུཏྟནཡེན ཨིཙྪཱཏཎྷཱནཾ ཨཏྠཏོ ཨེཀཏྟཱ ¶ , ཛརཱཡ ¶ ཙ མརཎསྶ ཙ ཏཎྷཱཡ ཙ ཨཏྠཏོ ཨཉྙཏྟཱ ཙ ‘‘ཏཡོ པཉྷཱ’’ཏི ཡཾ ཝཙནཾ ཝུཏྟཾ, ཏཾ ཝཙནཾ ཡུཛྫཏཱིཏི ཨཏྠོ གཧེཏབྦོ.

༢༡. ‘‘ཀེནསྶུབྦྷཱཧཏོ ལོཀོཏིཨཱདིགཱཐཱཡ ཏཡོ པཉྷཱ ཝུཏྟཱ’’ཏི པཉྷཏྟཡབྷཱཝེ ཡུཏྟི ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ. ‘‘ཏཏོ ཨཉྙེཧི པཀཱརེཧི ཡུཏྟི ཀཐཾ ཉཱཏབྦཱ’’ཏི ཝཏྟབྦབྷཱཝཏོ ཨཉྙེཧི པཀཱརེཧིཔི ཡུཏྟིགཝེསནཾ དསྶེནྟོ ‘‘སབྦོ དུཀྑཱུཔཙཱརོ’’ཏིཨཱདིམཱཧ. ཏཏྠ སབྦོ དུཀྑཱུཔཙཱརོ ཀཱམཏཎྷཱསངྑཱརམཱུལཀོཏི ཡུཛྫཏི, སབྦོ ནིབྦིདཱུཔཙཱརོ ཀཱམཏཎྷཱཔརིཀྑཱརམཱུལཀོཏི ན ཡུཛྫཏི. ཝཙནཏྠཏོ པན དུཀྑསྶ ཨུཔཙཱརོ པཝཏྟཱིཏི དུཀྑཱུཔཙཱརོ. ཀཱམཏཎྷཱཔཙྩཡཱ པཝཏྟོ སངྑཱརོ མཱུལཾ ཨེཏསྶཱཏི ཀཱམཏཎྷཱསངྑཱརམཱུལཀོ. ནིབྦིདཱཡ ཨུཔཙཱརོ པཝཏྟཱིཏི ནིབྦིདཱུཔཙཱརོ. ཀཱམཏཎྷཱཡ པརིཀྑཱརབྷཱུཏོ ཝཏྠུཀཱམོ མཱུལཾ ཨེཏསྶཱཏི ཀཱམཏཎྷཱཔརིཀྑཱརམཱུལཀོཏི. ཏཏྠ ཨནབྷིརཏིསངྑཱཏཱ ཨུཀྐཎྛཱ ནིབྦིདཱ ཀཱམཏཎྷཱཔརིཀྑཱརམཱུལིཀཱ ཡུཛྫཏི, ཉཱཎནིབྦིདཱ ཀཱམཏཎྷཱཔརིཀྑཱརམཱུལིཀཱ ན ཡུཛྫཏི, ཏསྨཱ སབྦོ ནིབྦིདཱུཔཙཱརོ ཀཱམཏཎྷཱཔརིཀྑཱརམཱུལཀོཏི ན པན ཡུཛྫཏཱིཏི ཝུཏྟཾ.

‘‘པཉྷཏྟཡབྷཱཝེ ཙེཝ དུཀྑཱུཔཙཱརནིབྦིདཱུཔཙཱརེ ཙ ཡཱ ཡུཏྟི ཨཱཙརིཡེན ཝིབྷཏྟཱ, སཱཝ ཡུཏྟི སལླཀྑེཏབྦཱ ཀིཾ, ཨུདཱཧུ ཨིམཱཡ ཡུཏྟིཡཱ ཨཉྙཱཔི ཡུཏྟི གཝེསིཏབྦཱ ཀི’’ནྟི ཝཏྟབྦཏོ ནཡཾ དསྶེཏུཾ ‘‘ཨིམཱཡཱ’’ཏིཨཱདིམཱཧ. ཨིདཾ ཝུཏྟཾ ཧོཏི – པཉྷཏྟཡབྷཱཝེ ཙེཝ དུཀྑཱུཔཙཱརནིབྦིདཱུཔཙཱརེ ཙ ཡཱ ཡུཏྟི མཡཱ ཝིབྷཏྟཱ, ཨིམཱཡ ཡུཏྟིཡཱ ཨནུསཱརེན ཨཉྙམཉྙེཧི ཀཱརཎེཧི ཏེསུ ཏེསུ པཱལི༹པྤདེསེསུ ཡུཏྟིཔི གཝེསིཏབྦཱཏི.

‘‘ཨིདཾ ནཡདསྶནཾ སཾཁིཏྟཾ, ན སཀྐཱ ཝིཏྠཱརཏོ གཝེསིཏུ’’ནྟི ཝཏྟབྦཏོ ཏཾ ནཡདསྶནཾ ཝིཏྠཱརཏོ ཝིབྷཛིཏྭཱ དསྶེཏུཾ ‘‘ཡཐཱ ཧི བྷགཝཱ’’ཏིཨཱདི ཨཱརདྡྷཾ. ཨསུབྷསྶ ཛིགུཙྪནཱིཡབྷཱཝཏོ རཱགུཔྤཱདོ ན ཡུཏྟོ, ཏསྨཱ རཱགཙརིཏསྶ པུགྒལསྶ ཨསུབྷདེསནཱ རཱགཝིནཡཱཡ ཡུཏྟཱ. མེཏྟཱཡ དོསཔཊིཔཀྑཏྟཱ དོསཙརིཏསྶ པུགྒལསྶ མེཏྟཱདེསནཱ དོསཝིནཡཱཡ ཡུཏྟཱ. པཊིཙྩསམུཔྤཱདསྶ པཉྙཱཝིསཡཏྟཱ མོཧཙརིཏསྶ པུགྒལསྶ པཊིཙྩསམུཔྤཱདདེསནཱ མོཧཝིནཡཱཡ ཡུཏྟཱ. ‘‘རཱགཙརིཏསྶཱཔི མེཏྟཱདིདེསནཱ ཡུཛྫེཡྻ སབྦསཏྟསཱདྷཱརཎཏྟཱ’’ཏི ཝཏྟབྦཏྟཱ ‘‘ཡདི ¶ ཧི བྷགཝཱ’’ཏིཨཱདི ཝུཏྟཾ. ཏིབྦཀིལེསསྶ རཱགཙརིཏསྶ ཨདྷིཔྤེཏཏྟཱ ཏཱདིསསྶ པུགྒལསྶ མེཏྟཾ ཙེཏོཝིམུཏྟིཾ ཡདི དེསེཡྻ, ཨེཝཾ སཏི མེཏྟཱཝསེནཔི རཱགུཔྤཛྫནཏོ དེསནཱ ན ཡུཛྫཏི. སུཁཾ པཊིཔདཾ ཝཱ ཡདི དེསེཡྻ, ཨེཝཾ སཏི རཱགཙརིཏསྶ ¶ དུཀྑཱཔཊིཔདཱཡུཛྫནཏོ དེསནཱ ན ཡུཛྫཏི. ཝིཔསྶནཱཔུབྦངྒམཾ པཧཱནཾ ཝཱ ཡདིཔི དེསེཡྻ, ཨེཝཾ སཏི རཱགཙརིཏསྶ ཨསུབྷཱནུཔསྶནཾ ཝཛྫེཏྭཱ ཝིཔསྶནཱཔུབྦངྒམསྶ པཧཱནསྶ དུཀྐརཏོ དེསནཱ ན ཡུཛྫཏཱིཏི ཡོཛནཱ.

‘‘བྷགཝཱ རཱགཙརིཏསྶཱ’’ཏིཨཱདིནཱ ནིརཝསེསཝསེན ཡུཏྟི ན ཝིབྷཏྟཱ, ནཡདསྶནམེཝཱཏི ཡོ ནཡོ དསྶིཏོ, ཏེན ནཡེན ཨཉྙཱཔི གཝེསིཏབྦཱཏི དསྶེཏུཾ ‘‘ཨེཝཾ ཡཾ ཀིཉྩཱི’’ཏིཨཱདི ཝུཏྟཾ. རཱགསྶ ཡཾ ཀིཉྩི ཨནུལོམཔྤཧཱནཾ, དོསསྶ ཡཾ ཀིཉྩི ཨནུལོམཔྤཧཱནཾ, མོཧསྶ ཡཾ ཀིཉྩི ཨནུལོམཔྤཧཱནཾ དེསིཏཾ, ཏཾ སབྦཾ ཨནུལོམཔྤཧཱནཾ ཡཏྟཀཱ པཱལི༹པྤདེསཱ ཉཱཎསྶ བྷཱུམི, ཏཏྟཀེསུ ཝིཙཡེན ཧཱརེན ཝིཙིནིཏྭཱ ཡུཏྟིཧཱརེན ཡོཛེཏབྦནྟི ཡོཛནཱ.

‘‘རཱགཱདིཔྤཧཱནཝསེན ཡུཏྟི གཝེསིཏབྦཱ’’ཏི ཝཏྟབྦབྷཱཝཏོ ཨཉྙེཧིཔི མེཏྟཱདིབྲཧྨཝིཧཱརཕལསམཱཔཏྟིནཝཱནུཔུབྦསམཱཔཏྟིཝསཱིབྷཱཝེཧི ཝིབྷཛིཏྭཱ ཡུཏྟིགཝེསནཾ དསྶེཏུཾ ‘‘མེཏྟཱཝིཧཱརིསྶཱ’’ཏིཨཱདི ཨཱརདྡྷཾ. ཏཏྠ མེཏྟཱཝིཧཱརིསྶ མེཏྟཱཝིཧཱརལཱབྷིནོ སཏོ སཾཝིཛྫམཱནསྶ པུགྒལསྶ མེཏྟཱཡ བྱཱཔཱདཔཊིཔཀྑཏྟཱ བྱཱཔཱདོ ཙིཏྟཾ པརིཡཱདཱཡ ཋསྶཏཱིཏི དེསནཱ ན ཡུཛྫཏཱིཏི ཙ, མེཏྟཱཝིཧཱརིསྶ སཏོ བྱཱཔཱདོ པཧཱནཾ ཨབྦྷཏྠཾ གཙྪཏཱིཏི དེསནཱ ཡུཛྫཏི. ཀརུཎཱཝིཧཱརིསྶ ཀརུཎཱཝིཧཱརལཱབྷིནོ སཏོ སཾཝིཛྫམཱནསྶ པུགྒལསྶ ཀརུཎཱཡ ཝིཧེསཱཡ པཊིཔཀྑཏྟཱ ཝིཧེསཱ ཙིཏྟཾ པརིཡཱདཱཡ ཋསྶཏཱིཏི དེསནཱ ན ཡུཛྫཏི, ཀརུཎཱཝིཧཱརིསྶ སཏོ ཝིཧེསཱ པཧཱནཾ ཨབྦྷཏྠཾ གཙྪཏཱིཏི དེསནཱ ཡུཛྫཏི. མུདིཏཱཝིཧཱརིསྶ མུདིཏཱཝིཧཱརལཱབྷིནོ སཏོ སཾཝིཛྫམཱནསྶ པུགྒལསྶ མུདིཏཱཡ ཨརཏིཡཱ པཊིཔཀྑཏྟཱ ཨརཏི ཙིཏྟཾ པརིཡཱདཱཡ ཋསྶཏཱིཏི དེསནཱ ན ཡུཛྫཏི, མུདིཏཱཝིཧཱརིསྶ སཏོ ཨརཏི པཧཱནཾ ཨབྦྷཏྠཾ གཙྪཏཱིཏི དེསནཱ ཡུཛྫཏི. ཨུཔེཀྑཱཝིཧཱརིསྶ ཨུཔེཀྑཱཝིཧཱརལཱབྷིནོ སཏོ སཾཝིཛྫམཱནསྶ པུགྒལསྶ ཨུཔེཀྑཱཡ རཱགསྶ པཊིཔཀྑཏྟཱ རཱགོ ཙིཏྟཾ པརིཡཱདཱཡ ཋསྶཏཱིཏི དེསནཱ ན ཡུཛྫཏི, ཨུཔེཀྑཱཝིཧཱརིསྶ སཏོ རཱགོ པཧཱནཾ ཨབྦྷཏྠཾ གཙྪཏཱིཏི དེསནཱ ཡུཛྫཏི.

ཨནིམིཏྟཝིཧཱརིསྶ ¶ ཨནིཙྩཱནུཔསྶནཱམུཁེན པཊིལདྡྷཕལསམཱཔཏྟིཝིཧཱརལཱབྷིནོ སཏོ སཾཝིཛྫམཱནསྶ པུགྒལསྶ ནིམིཏྟཱནུསཱརི ཏེན ཏེནེཝ སངྑཱརནིམིཏྟཱནུསཱརེནེཝ ནིཙྩཱདཱིསུ པཧཱིནེན ནིམིཏྟེན ཝིཉྙཱཎཾ པཝཏྟཏཱིཏི དེསནཱ ན ཡུཛྫཏི, ཨནིམིཏྟཱནུཔསྶནཱཡ ནིཙྩཱདིཝིཔལླཱསཔཊིཔཀྑཏྟཱ ཨནིམིཏྟཝིཧཱརིསྶ སཏོ ནིམིཏྟཾ པཧཱནཾ ཨབྦྷཏྠཾ གཙྪཏཱིཏི དེསནཱ ¶ ཡུཛྫཏི. ‘‘ཨསྨཱི’’ཏི མཉྙིཏཾ ཁནྡྷཔཉྩཀཾ ཨཏྟཝིགཏཾ ‘‘ཨཡཾ ཁནྡྷཔཉྩཀོ ཨཧཾ ཨསྨཱི’’ཏི ན སམནུཔསྶཱམི, ཨཐ ཙ པན ཨསམནུཔསྶནེ སཏིཔི ‘‘མེ ཀིཾ ཨསྨཱི’’ཏི ‘‘ཀཐཾ ཨསྨཱི’’ཏི ཝིཙིཀིཙྪཱ ཀཐཾཀཐཱསལླཾ ཙིཏྟཾ པརིཡཱདཱཡ ཋསྶཏཱིཏི དེསནཱ ན ཡུཛྫཏི, ཝིཙིཀིཙྪཱཡ པཧཱནེཀཊྛབྷཱཝཏོ ‘‘ཨཡཾ ཁནྡྷཔཉྩཀོ ཨཧཾ ཨསྨཱི’’ཏི ཨསམནུཔསྶནྟསྶ ཝིཙིཀིཙྪཱ ཀཐཾཀཐཱསལླཾ པཧཱནཾ ཨབྦྷཏྠཾ གཙྪཏཱིཏི དེསནཱ ཡུཛྫཏི.

‘‘ཕལསམཱཔཏྟིཝསེནེཝ ཡུཏྟི གཝེསིཏབྦཱ ཀི’’ནྟི ཝཏྟབྦཏྟཱ ཛྷཱནསམཱཔཏྟིཝསེནཔི ཡུཏྟི གཝེསིཏབྦཱཏི དསྶེཏུཾ ‘‘ཡཐཱ ཝཱ པན པཋམཾ ཛྷཱན’’ནྟིཨཱདི ཨཱརདྡྷཾ. ཨཐ ཝཱ ‘‘ཕལསམཱཔཏྟིཝིཧཱརིསྶེཝ ཡུཏྟི གཝེསིཏབྦཱ ཀི’’ནྟི ཝཏྟབྦཏྟཱ ཛྷཱནསམཱཔཏྟིཝསེནཔི ཡུཏྟི གཝེསིཏབྦཱཏི དསྶེཏུཾ ‘‘ཡཐཱ ཝཱ པན པཋམཾ ཛྷཱན’’ནྟིཨཱདི ཨཱརདྡྷཾ. ཏཏྠ ཡཐཱ པཋམཾ ཛྷཱནཾ སམཱཔནྣསྶ ཕལསམཱཔཏྟིཝིཧཱརིསྶ ཡུཏྟི གཝེསིཏབྦཱ, ཨེཝཾ ཛྷཱནསམཱཔཏྟིཝིཧཱརིསྶཔི ཡུཏྟི གཝེསིཏབྦཱ. ཀཐཾ? པཋམཾ ཛྷཱནཾ སམཱཔནྣསྶ པཋམཛ྄ཛྷཱནསམངྒིནོ སཏོ སཾཝིཛྫམཱནསྶ པུགྒལསྶ ནཱིཝརཎཝིཀྑམྦྷནཏོ ཀཱམརཱགབྱཱཔཱདཱ ཝིསེསཱཡ དུཏིཡཛ྄ཛྷཱནཱཡ སཾཝཏྟནྟཱིཏི དེསནཱ ན ཡུཛྫཏི, ཀཱམརཱགབྱཱཔཱདཱ ཛྷཱནསྶ ཧཱནཱཡ སཾཝཏྟནྟཱིཏི དེསནཱ ཡུཛྫཏི. ཝིཏཀྐསཧགཏཱ སཉྙཱམནསིཀཱརཱ ཨུཔཙཱརདྷམྨེན སཧ དུཏིཡཛ྄ཛྷཱནདྷམྨཱ ཛྷཱནསྶ ཧཱནཱཡ སཾཝཏྟནྟཱིཏི དེསནཱ ན ཡུཛྫཏི, ཝིཏཀྐསཧགཏཱ སཉྙཱམནསིཀཱརཱ ཝིསེསཱཡ ཨུཔརིཛྷཱནཏྠཱཡ སཾཝཏྟནྟཱིཏི དེསནཱ ཡུཛྫཏི.

དུཏིཡཾ ཛྷཱནཾ སམཱཔནྣསྶ སཏོ སཾཝིཛྫམཱནསྶ པུགྒལསྶ ཝིཏཀྐཝིཙཱརསཧགཏཱ ཝཱ སཉྙཱམནསིཀཱརཱ ཨུཔཙཱརདྷམྨེན སཧ པཋམཛ྄ཛྷཱནདྷམྨཱ ཝིསེསཱཡ ཨུཔརིཛྷཱནཏྠཱཡ སཾཝཏྟནྟཱིཏི དེསནཱ ན ཡུཛྫཏི, ཝིཏཀྐཝིཙཱརསཧགཏཱ སཉྙཱམནསིཀཱརཱ ཨཝིཏཀྐཛྷཱནསྶ ཧཱནཱཡ སཾཝཏྟནྟཱིཏི དེསནཱ ཡུཛྫཏི. ཨུཔེཀྑཱསཧགཏཱ ཝཱ སཉྙཱམནསིཀཱརཱ ཨུཔཙཱརདྷམྨེན སཧ ཙཏུཏྠཛ྄ཛྷཱནདྷམྨཱ ཛྷཱནསྶ ཧཱནཱཡ སཾཝཏྟནྟཱིཏི དེསནཱ ན ཡུཛྫཏི, ཨུཔེཀྑཱསཧགཏཱ ¶ སཉྙཱམནསིཀཱརཱ ཝིསེསཱཡ ཨུཔརིཛྷཱནཏྠཱཡ སཾཝཏྟནྟཱིཏི དེསནཱ ཡུཛྫཏི. སེསེསུཔི ཨཏྠཱནུརཱུཔཾ ཡོཛནཱ ཀཱཏབྦཱ. ཡཐཱཝུཏྟསམཱཔཏྟཱིསུ ཝསཱིབྷཱཝེན པརིཙིཏཾ ཀལླཏཱཔརིཙིཏཾ ཙིཏྟཾ ནཱམ.

ཨེཏྟཀམེཝ ཡུཏྟིགཝེསནཾ ན ཀཱཏབྦཾ, ནཝཝིདྷསུཏྟནྟེསུ ཡཐཱལདྡྷཡུཏྟིགཝེསནམྤི ཀཱཏབྦནྟི དསྶེཏུཾ ‘‘ཨེཝཾ སབྦེ’’ཏིཨཱདི ཝུཏྟཾ. ‘‘སབྦེསཾ ཧཱརཱནཾ ཡཐཱཝུཏྟབྷཱུམིགོཙརཱནཾ ཝིཙཡཧཱརེན ཝིཙིནིཏྭཱ ཡུཏྟིཧཱརེན ཡོཛེཏབྦབྷཱཝོ ཀེན སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧཱ’’ཏིཨཱདི ¶ ཝུཏྟཾ. ཏཏྠ ཏེན ཡོཛེཏབྦབྷཱཝེན ཨཱཡསྨཱ མཧཱཀཙྩཱནོ ‘‘སབྦེས’’ནྟིཨཱདིཀཾ ཡཾ ཝཙནཾ ཨཱཧ, ཏེན ཝཙནེན སདྡཧིཏབྦོཏི ཝུཏྟཾ ཧོཏི.

ཨིཏི ཡུཏྟིཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

༤. པདཊྛཱནཧཱརཝིབྷངྒཝིབྷཱཝནཱ

༢༢. ཡེན ཡེན སཾཝཎྞནཱཝིསེསབྷཱུཏེན ཡུཏྟིཧཱརཝིབྷངྒབྷཱུཏེན པཉྷཱཝིསྶཛྫནཱདཱིནཾ ཡུཏྟཱཡུཏྟབྷཱཝོ ཝིབྷཏྟོ, སོ སཾཝཎྞནཱཝིསེསབྷཱུཏོ ཡུཏྟིཧཱརཝིབྷངྒོ པརིཔུཎྞོ, ‘‘ཀཏམོ པདཊྛཱནཧཱརཝིབྷངྒོ’’ཏི པུཙྪིཏབྦཏྟཱ ‘‘ཏཏྠ ཀཏམོ པདཊྛཱནོ ཧཱརོ’’ཏིཨཱདི ཨཱརདྡྷཾ. ཏཏྠ ཏཏྠཱཏི ཏེསུ ནིདྡིཊྛེསུ སོལ༹སསུ དེསནཱཧཱརཱདཱིསུ ཧཱརེསུ ཀཏམོ སཾཝཎྞནཱཝིསེསོ པདཊྛཱནོ ཧཱརོ པདཊྛཱནཧཱརཝིབྷངྒོཏི པུཙྪཏི. ‘‘དྷམྨཾ དེསེསི ཛིནོ’’ཏིཨཱདིནིདྡེསསྶ ཨིདཱནི མཡཱ ཝུཙྩམཱནོ ‘‘ཨཡཾ པདཊྛཱནོ ཧཱརོ’’ཏིཨཱདིཀོ ཝིཏྠཱརསཾཝཎྞནཱཝིསེསོ པདཊྛཱནཧཱརཝིབྷངྒོཏི ཝིཉྙེཡྻོ. ཏེན ཝུཏྟཾ – ‘‘ཏཏྠ ཀཏམོ པདཊྛཱནོ ཧཱརོཏིཨཱདི པདཊྛཱནཧཱརཝིབྷངྒོ’’ཏི (ནེཏྟི. ཨཊྛ. ༢༢). ‘‘ཨཡཾ ཨིདཱནི ཝུཙྩམཱནོ ཝིཏྠཱརབྷཱུཏོ པདཊྛཱནོ ཧཱརོ པིཊཀཏྟཡེ དེསིཏེསུ དྷམྨེསུ ¶ ཀིཾ ནཱམ དྷམྨཾ དེསཡཏི སཾཝཎྞེཏཱི’’ཏི པུཙྪཾ ཋཔེཏྭཱ ‘‘ཨིདཾ ཨཱསནྣཀཱརཎཾ ཨིམསྶ ཨཱསནྣཕལསྶ པདཊྛཱན’’ནྟི ནིཡམེཏྭཱ ཝིབྷཛིཏུཾ ‘‘ཨཡཾ པདཊྛཱནོ’’ཏིཨཱདི ཝུཏྟཾ. ཏསྶཏྠོ – སབྦེསུ ཝིཉྙེཡྻདྷམྨེསུ ཡཱཐཱཝཏོ ཨསམྤཊིཝེདྷོ ལཀྑཎཾ ཨེཏིསྶཱ ཨཝིཛྫཱཡཱཏི སབྦདྷམྨཡཱཐཱཝཨསམྤཊིཝེདྷལཀྑཎཱ, ཨཝིཛྫཱ, ཏསྶཱ ཨཝིཛྫཱཡ ཨསུབྷེ ‘‘སུབྷ’’ནྟིཨཱདིཝིཔལླཱསཱ པདཊྛཱནཾ ཨཱསནྣཀཱརཎཾ. ཝིཔལླཱསེ སཏི ཨཝིཛྫཱ ཝཏྟཏི ཨུཔརཱུཔརི ཛཱཡཏི ན ཧཱཡཏི, ཏསྨཱ ཝིཔལླཱསཱ ཨཝིཛྫཱཡ པདཊྛཱནཾ ཨཱསནྣཀཱརཎཾ བྷཝནྟི. ཨཝིཛྫཱཡ ཝཊྚམཱུལཀཏྟཱ ཏཾ ཨཱདིཾ ཀཏྭཱ པདཊྛཱནཾ ཝིབྷཏྟནྟི དཊྛབྦཾ.

ཏཎྷཱཡཔི ཝཊྚམཱུལཀཏྟཱ ཏདནནྟརཾ ཏཎྷཱཡ པདཊྛཱནཾ ཝིབྷཛིཏུཾ ‘‘ཨཛ྄ཛྷོསཱནལཀྑཎཱ’’ཏིཨཱདི ¶ ཝུཏྟཾ. ཏཏྠ པིཡརཱུཔཾ སཱཏརཱུཔནྟི པིཡསབྷཱཝཾ སཱཏསབྷཱཝཾ ཙཀྑཱདིདྷམྨཛཱཏཾ. པིཡནཱིཡསཱཏནཱིཡེ ཙཀྑཱདིཀེ སཏི ཏཎྷཱ ཝཏྟཏི ཨུཔརཱུཔརི ཛཱཡཏི, ཏསྨཱ པིཡརཱུཔཾ སཱཏརཱུཔཾ ཏཎྷཱཡ པདཊྛཱནཾ ཨཱསནྣཀཱརཎཾ བྷཝཏི.

ཨདིནྣཱདཱནེ སཏི ལོབྷོ ཝཏྟཏི, ཏསྨཱ ཨདིནྣཱདཱནཾ ལོབྷསྶ པདཊྛཱནཾ བྷཝཏི. ཨདིནྣཱདཱནཉྷི ཨེཀཝཱརཾ ཨུཔྤནྣམྤི ཨནཱདཱིནཝདསྶནཏོ ལོབྷསྶ ཨཱསནྣཀཱརཎཾ བྷཝཏྭེཝ.

ཀེསཱདཱིསུ ཨསུབྷེསུ པཝཏྟཱཡཔི སུབྷསཉྙཱཡ ནཱིལཱདིཝཎྞདཱིགྷཱདིསཎྛཱནཧསནཱདིབྱཉྫནགྒཧཎལཀྑཎཏྟཱ ཙཀྑུནྡྲིཡཱདཱིནཾ ཨསཾཝརོ སུབྷསཉྙཱཡ པདཊྛཱནཾ བྷཝཏི.

དུཀྑདུཀྑཱདཱིསུ པཝཏྟཱཡཔི སུཁསཉྙཱཡ སཱསཝཕསྶཱུཔགམནལཀྑཎཏྟཱ རཱུཔཱདཱིསུ ཨསྶཱདོ སུཁསཉྙཱཡ པདཊྛཱནཾ.

རཱུཔཀྑནྡྷཱདཱིསུ ཨནིཙྩེསུ པཝཏྟཱཡཔི ནིཙྩསཉྙཱཡ སངྑཏལཀྑཎཱནཾ དྷམྨཱནཾ ཨསམནུཔསྶནལཀྑཎཏྟཱ རཱུཔཀྑནྡྷཱདཱིསུ ནིཙྩགྒཧཎཾ ཝིཉྙཱཎཾ ནིཙྩསཉྙཱཡ པདཊྛཱནཾ.

ཨནིཙྩདུཀྑཱནཏྟསངྑཱཏེསུ ཁནྡྷཱདཱིསུ པཝཏྟཱཡཔི ཨཏྟསཉྙཱཡ ཨནིཙྩསཉྙཱདུཀྑསཉྙཱནཾ ཨསམནུཔསྶནལཀྑཎཏྟཱ ཨཧཾམམཱདིཝསེན པཝཏྟོ ནཱམཀཱཡོ ཨཏྟསཉྙཱཡ པདཊྛཱནཾ.

ཨེཝཾ ¶ ཨཝིཛྫཱདཱིནཾ ཨཀུསལཔཀྑཱནཾ དྷམྨཱནཾ པདཊྛཱནཾ དསྶེཏྭཱ ཨིདཱནི ཏཔྤཊིཔཀྑཱནཾ ཝིཛྫཱདཱིནཾ དྷམྨཱནཾ པདཊྛཱནཾ དསྶེཏུཾ ‘‘སབྦདྷམྨསམྤཊིཝེདྷལཀྑཎཱ’’ཏིཨཱདི ཝུཏྟཾ. སབྦེསུ ཉེཡྻདྷམྨེསུ པཝཏྟཱཡ ཝིཛྫཱཡ སབྦདྷམྨསམྤཊིཝེདྷལཀྑཎཏྟཱ སབྦཾ ནེཡྻཾ ཝིཛྫཱཡ པདཊྛཱནཾ.

སམཐསྶ ཙིཏྟཝིཀྑེཔསངྑཱཏཨུདྡྷཙྩཔཊིསཾཧརཎསངྑཱཏཝིཀྑམྦྷནལཀྑཎཏྟཱ པཊིབྷཱགནིམིཏྟབྷཱུཏཱ ཨསུབྷཱ སམཐསྶ པདཊྛཱནཾ. ཨསུབྷཱཡ ཧི ཏཎྷཱཔཊིཔཀྑཏྟཱ, ཏཎྷཱཡ ཙ ཨབྷཱཝེ སམཐོ ཏིཊྛཏཱིཏི.

ཨདིནྣཱདཱནཱ ཝེརམཎིཝསེན པཝཏྟསྶ ཨལོབྷསྶ ཨིཙྪཱཝཙརཔཊིསཾཧརཎལཀྑཎཏྟཱ ཨདིནྣཱདཱནཱ ཝེརམཎཱི ཨལོབྷསྶ པདཊྛཱནཾ.

པཱཎཱཏིཔཱཏཱ ¶ ཝེརམཎིཝསེན པཝཏྟསྶ ཨདོསསྶ ཨབྱཱཔཛྫལཀྑཎཏྟཱ པཱཎཱཏིཔཱཏཱ ཝེརམཎཱི ཨདོསསྶ པདཊྛཱནཾ.

སམྨཱཔཊིཔཏྟིཝསེན པཝཏྟསྶ ཨམོཧསྶ ཝཏྠུཨཝིཔྤཊིཔཏྟིལཀྑཎཏྟཱ སམྨཱཔཊིཔཏྟི ཨམོཧསྶ པདཊྛཱནཾ.

ནིབྦིདཱཝསེན པཝཏྟཱཡ ཨསུབྷསཉྙཱཡ ཝིནཱིལཀཝིཔུབྦཀགཧཎལཀྑཎཏྟཱ ནིབྦིདཱ ཨསུབྷསཉྙཱཡ པདཊྛཱནཾ. ནིབྦིདཱཉཱཎེན ཧི ཨནབྷིརཏི པཝཏྟཏི, ཨནབྷིརཏིཡཱ ཙ ཨསུབྷསཉྙཱ ཋིཏཱཏི.

དུཀྑཝེདནཱཝསེན པཝཏྟཱཡ དུཀྑསཉྙཱཡ སཱསཝཕསྶཔརིཛཱནནལཀྑཎཏྟཱ ཝེདནཱ དུཀྑསཉྙཱཡ པདཊྛཱནཾ.

ཨུཔྤཱདཝཡཝསེན པཝཏྟཱཡ ཨནིཙྩསཉྙཱཡ སངྑཏལཀྑཎཱནཾ དྷམྨཱནཾ སམནུཔསྶནལཀྑཎཏྟཱ ཨུཔྤཱདཝཡཱ ཨནིཙྩསཉྙཱཡ པདཊྛཱནཾ. ཨུཔྤཱདཝཡཉྷི སམནུཔསྶིཏྭཱ ཨནིཙྩསཉྙཱ པཝཏྟཱ.

དྷམྨམཏྟསཉྙཱཝསེན པཝཏྟཱཡ ཨནཏྟསཉྙཱཡ སབྦདྷམྨཨབྷིནིཝེསལཀྑཎཏྟཱ དྷམྨསཉྙཱ ཨནཏྟསཉྙཱཡ པདཊྛཱནཾ.

ཀཱམརཱགསྶ རཱུཔཱདིཔཉྩཀཱམགུཎཱརམྨཎཏྟཱ པཉྩ ཀཱམགུཎཱ ཀཱམརཱགསྶ པདཊྛཱནཾ.

རཱུཔསངྑཱཏེ ཀཱཡེ ཨཱརབྦྷ པཝཏྟསྶ རཱུཔརཱགསྶ ཙཀྑཱདིཔཉྩིནྡྲིཡཱནཾ ཨནུསཱརེན པཝཏྟནཏོ པཉྩིནྡྲིཡཱནི རཱུཔཱནི རཱུཔརཱགསྶ པདཊྛཱནཾ.

བྷཝནིཀནྟིཝསེན པཝཏྟསྶ བྷཝརཱགསྶ ཚལཱ༹ཡཏནཾ པདཊྛཱནཾ. ནིབྦཏྟབྷཝཱནུཔསྶིཏཱཏི ‘‘ཨེདིསཾ ཨནིཊྛཾ རཱུཔཾ མཱ ནིབྦཏྟཏུ, ཨེདིསཾ ཨིཊྛཾ རཱུཔཾ ནིབྦཏྟཏུ ཨེདིསཱི ¶ དུཀྑཱ ཝེདནཱ མཱ ནིབྦཏྟཏུ, ཨེདིསཱི སུཁཱ ཝེདནཱ ནིབྦཏྟཏཱུ’’ཏི ཨེཝམཱདིནཱ པཀཱརེན པཝཏྟཱ རཱུཔཱབྷིནནྡནཱ, སཱ པཉྩནྣཾ ཨུཔཱདཱནཀྑནྡྷཱནཾ པདཊྛཱནཾ.

ཀམྨསྶཀཏཉྙཱཎསྶ ¶ པུབྦེནིཝཱསཱནུསྶཏིཉཱཎཱནུགཏཏྟཱ པུབྦེནིཝཱསཱནུསྶཏིཉཱཎདསྶནཾ ཀམྨསྶཀཏཉྙཱཎསྶ པདཊྛཱནཾ.

ཨོཀཔྤནཾ ལཀྑཎཾ ཡསྶཱ སདྡྷཱཡཱཏི ཨོཀཔྤནལཀྑཎཱ སདྡྷཱ. ཨདྷིམུཏྟི པཙྩུཔཊྛཱནཾ ཡསྶཱ སདྡྷཱཡཱཏི ཨདྷིམུཏྟིཔཙྩུཔཊྛཱནཱ ཙ སདྡྷཱ. ཨནཱཝིལཾ ལཀྑཎཾ ཡསྶ པསཱདསྶཱཏི ཨནཱཝིལལཀྑཎོཏི པསཱདོ. སམྤསཱིདནཾ པཙྩུཔཊྛཱནཾ ཡསྶ པསཱདསྶཱཏི སམྤསཱིདནཔཙྩུཔཊྛཱནོ ཙ པསཱདོ. སོ པན པསཱདོ སདྡྷཱཡ ཨེཝ ཨཝཏྠཱཝིསེསོཏི ཝེདིཏབྦོ. ཨཝེཙྩཔསཱདོ ཨབྷིཔཏྠིཡནལཀྑཎཱཡ སདྡྷཱཡ པདཊྛཱནཾ, ཨོཀཔྤནལཀྑཎཱ སདྡྷཱ ཨནཱཝིལལཀྑཎསྶ པསཱདསྶ པདཊྛཱནཾ, ཙཏུབྦིདྷཾ སམྨཔྤདྷཱནཾ ཝཱིརིཡཾ ཨཱརམྦྷལཀྑཎསྶ ཝཱིརིཡསྶ པདཊྛཱནཾ, ཀཱཡཱདིསཏིཔཊྛཱནཾ ཨཔིལཱཔནལཀྑཎཱཡ སཏིཡཱ པདཊྛཱནཾ, ཛྷཱནསཧིཏསྶ སམཱདྷིསྶ ཨེཀགྒལཀྑཎཏྟཱ ཝིཏཀྐཱདིཛྷཱནཱནི སམཱདྷིསྶ པདཊྛཱནཾ, པཉྙཱཡ ཀིཙྩཔཛཱནནཨཱརམྨཎཔཛཱནནལཀྑཎཏྟཱ སཙྩཱནི པཉྙཱཡ པདཊྛཱནཾ.

‘‘ཡེསཾ ཨཝིཛྫཱདཱིནཾ པདཊྛཱནཱནི ཨཱཙརིཡེན ཝིབྷཏྟཱནི, ཏེ ཨཝིཛྫཱདཡོ ཀཏམེསཾ དྷམྨཱནཾ པདཊྛཱནཱནཱི’’ཏི པུཙྪིཏབྦཏྟཱ ཏེ ཨཝིཛྫཱདཡོཔི ཨིམེསཾ དྷམྨཱནཾ པདཊྛཱནཱཏི དསྶེཏུཾ ‘‘ཨཔརོ ནཡོ’’ཏིཨཱདི ཝུཏྟཾ. ཨཝིཛྫཱ ཨསྶཱདམནསིཀཱརལཀྑཎསྶ ཨཡོནིསོམནསིཀཱརསྶ པདཊྛཱནཾ. ཨཝིཛྫཱཡ ཧི ཨཱདཱིནཝཙྪཱདནཏོ ཨཡོནིསོམནསིཀཱརོ ཛཱཏོཏི. སཙྩསམྨོཧནལཀྑཎཱ ཨཝིཛྫཱ པུཉྙཱཔུཉྙཱནེཉྫཱབྷིསངྑཱརཱནཾ པདཊྛཱནཾ, པུནབྦྷཝཝིརོཧནལཀྑཎཱ ཏེབྷཱུམཀཙེཏནཱ སངྑཱརཱ ཝིཔཱཀཝིཉྙཱཎསྶ པདཊྛཱནཾ, ཨོཔཔཙྩཡིཀསངྑཱཏེན ཨུཔཔཏྟིབྷཝབྷཱཝེན ནིབྦཏྟིལཀྑཎཾ པཊིསནྡྷིཝིཉྙཱཎཾ ནཱམརཱུཔསྶ པདཊྛཱནཾ, ནཱམཀཱཡརཱུཔཀཱཡསངྒྷཱཏལཀྑཎཾ ནཱམརཱུཔཾ ཚལཱ༹ཡཏནསྶ པདཊྛཱནཾ སཧཛཱཏཱདིཔཙྩཡབྷཱཝཏོ, ཙཀྑཱདཱིནཾ ཚནྣཾ ཨིནྡྲིཡཱནཾ པཝཏྟཱནཾ ལཀྑཎཾ ཚལཱ༹ཡཏནཾ ཚབྦིདྷསྶ ཕསྶསྶ ཡཐཱཀྐམཾ པདཊྛཱནཾ ནིསྶཡཱདིཔཙྩཡབྷཱཝཏོ, ཙཀྑུཔསཱདརཱུཔཱརམྨཎཾ ཙཀྑུཝིཉྙཱཎཱདིསནྣིཔཱཏལཀྑཎོ ཚབྦིདྷོ ཕསྶོ, ཏཾ ཝེདནཱཡ ཏེན ཚབྦིདྷེན ཕསྶེན སཧཛཱཏཱཡ ཚབྦིདྷཱཡ ཝེདནཱཡ ཡཐཱཀྐམཾ པདཊྛཱནཾ སཧཛཱཏཱདིཔཙྩཡབྷཱཝཏོ, ཨིཊྛཱནུབྷཝནཨནིཊྛཱནུབྷཝནཨིཊྛཱནིཊྛཱནུབྷཝནལཀྑཎཱ ཏིཝིདྷཱ ཝེདནཱ, ཏཾ ཏཎྷཱཡ ཏཱཡ ཏིཝིདྷཱཡ ཝེདནཱཡ ཝསེན པཝཏྟཱཡ ¶ ཏཎྷཱཡ པདཊྛཱནཾ ཨུཔནིསྶཡཱདིཔཙྩཡབྷཱཝཏོ, སཔརསནྟཱནེསུ ཨཛ྄ཛྷོསཱནལཀྑཎཱ ཏཎྷཱ, ཏཾ ཨུཔཱདཱནསྶ ཏཱཡ ཏཎྷཱཡ ཝསེན པཝཏྟསྶ ཙཏུབྦིདྷསྶ ཨུཔཱདཱནསྶ པདཊྛཱནཾ ཨུཔནིསྶཡཱདིཔཙྩཡབྷཱཝཏོ. ‘‘སོ ཝེདནཱཡཱ’’ཏི ཙ ‘‘སཱ ཏཎྷཱཡཱ’’ཏི ཙ ‘‘སཱ ཨུཔཱདཱནསྶཱ’’ཏི ཙ པཱཋེན བྷཝིཏབྦཾ, ལིངྒཝིཔལླཱསནིདྡེསོ ཝཱ སིཡཱ.

ཡཾ ¶ ཨུཔཱདཱནཾ ཨོཔཔཙྩཡིཀཾ ཨུཔཔཏྟིཀྑནྡྷནིབྦཏྟཀཾ, ཏཾ ཨུཔཱདཱནཾ དུཝིདྷསྶ བྷཝསྶ པདཊྛཱནཾ. ཡོ ཀམྨབྷཝོ ནཱམཀཱཡརཱུཔཀཱཡསམྦྷཝནལཀྑཎོ, སོ ཀམྨབྷཝོ ཛཱཏིཡཱ པདཊྛཱནཾ. ཡཱ ཨུཔཔཏྟིབྷཱུཏཱ ཛཱཏི ཁནྡྷཔཱཏུབྷཱཝལཀྑཎཱ, ཏཾ སཱ ཛཱཏི ཛརཱཡ པདཊྛཱནཾ. ཡཱ ཛིཎྞཛརཱ ཨུཔདྷིཀྑནྡྷཔརིཔཱཀལཀྑཎཱ, ཏཾ སཱ ཛིཎྞཛརཱ མརཎསྶ པདཊྛཱནཾ. ཡམྤི ཡསྶ སམྨུཏིམརཎཾ ཛཱིཝིཏིནྡྲིཡུཔཙྪེདལཀྑཎཾ, ཏམྤི ཏསྶ སམྨུཏིམརཎཾ སོཀསྶ པདཊྛཱནཾ. པིཡསྶ མརཎཾ ཙིནྟེནྟསྶ ཡེབྷུཡྻེན སོཀུཔྤཛྫནཏོ ཡོ སོཀོ ཉཱཏིཨཱདིཔིཡེསུ ཨུསྶུཀྐཀཱརཀོ, ཏཾ སོ སོཀོ པརིདེཝསྶ པདཊྛཱནཾ. ཡོ པརིདེཝོ ལཱལཔྤཀཱརཀོ, ཏཾ སོ པརིདེཝོ ཀཱཡིཀདུཀྑསྶ པདཊྛཱནཾ. ཡཾ ཀཱཡིཀཾ དུཀྑཾ ཀཱཡསམྤཱིལ༹ནལཀྑཎཾ, ཏཾ ཀཱཡིཀཾ དུཀྑཾ དོམནསྶསྶ པདཊྛཱནཾ. ཡཾ དོམནསྶཾ ཙིཏྟསམྤཱིལ༹ནལཀྑཎཾ, ཏཾ དོམནསྶཾ ཨུཔཱཡཱསསྶ པདཊྛཱནཾ. ཡོ ཨུཔཱཡཱསོ ཨོདཧནཀཱརཀོ ཨཝདཧནཀཱརཀོ, ཏཾ སོ ཨུཔཱཡཱསོ བྷཝསྶ ཨུཔཱཡཱསསྶ ནིསྶཡསནྟཱནབྷཝསྶ པདཊྛཱནཾ.

བྷཝསྶཱཏི ཝུཏྟབྷཝཾ དསྶེཏུཾ ‘‘ཨིམཱནཱི’’ཏིཨཱདི ཝུཏྟཾ. ཏཏྠ བྷཝངྒཱནི ཀིལེསོ བྷཝསྶ ཨངྒཾ ཀཱརཎཾ ཀམྨཝཊྚཝིཔཱཀཝཊྚཱནི བྷཝསངྑཱཏཱནི ཨངྒཱནི ཨཝཡཝཱནི. ཡདཱ པཙྩུཔྤནྣཱདིཀཱལེ སམགྒཱནི ནིབྦཏྟཱནི བྷཝནྟི, ཏདཱ སོ ཀིལེསཝཊྚཀམྨཝཊྚཝིཔཱཀཝཊྚསངྑཱཏོ དྷམྨསམཱུཧོ ‘‘བྷཝསྶཱ’’ཏི ཨེཏྠ བྷཝོཏི དཊྛབྦོ. ཏཾ བྷཝསངྑཱཏཾ ཀིལེསཝཊྚཀམྨཝཊྚཝིཔཱཀཝཊྚཏྟཡཾ སཾསཱརསྶ པདཊྛཱནཾ པུརིམཾ པུརིམཾ ཛཱཏིནིཔྥནྣཀིལེསཱདིཝཊྚེན སཾསཱརསྶ ཨབྦོཙྪིནྣུཔྤཛྫནཏོ, ཡོ ཨརིཡམགྒོ ནིཡྻཱནིཀལཀྑཎོ, ཏཾ སོ ཨརིཡམགྒོ ནིརོདྷསྶ ནིབྦཱནསྶ པདཊྛཱནཾ སམྤཱཔཀཧེཏུབྷཱཝཏོ.

བཧུསྶུཏོ སབྦསིསྶཱདཱིནཾ པཏིཊྛཱནཏྟཱ ཏིཏྠཾ ཝིཡཱཏི ཏིཏྠཾ, ཛཱནཱཏཱིཏི ཉཱུ, ཏིཏྠཾ ཉཱུཏི ཏིཏྠཉྙཱུ, ཏིཏྠཉྙུནོ བྷཱཝོ ཏིཏྠཉྙུཏཱ, སམྨཱཔཡིརུཔཱསནཱ, སཱ པཱིཏཉྙུཏཱཡ པདཊྛཱནཾ. བཧུསྶུཏསྶ ཧི སམྨཱཔཡིརུཔཱསནཱཡ ¶ དྷམྨཱུཔསཉྷིཏཾ པཱམོཛྫཾ ཛཱཡཏི, པཱམོཛྫེན ཙ ཀམྨཊྛཱནབྲཱུཧནཱ ཛཱཡཏཱིཏི སཔྤཱཡདྷམྨསྶཝནེན པཱིཏིཾ ཛཱནཱཏཱིཏི པཱིཏཉྙཱུ, པཱིཏཉྙུནོ བྷཱཝོ པཱིཏཉྙུཏཱ, ཀམྨཊྛཱནསྶ བྲཱུཧནཱ, སཱ པཏྟཉྙུཏཱཡ པདཊྛཱནཾ. ཀམྨཊྛཱནབྲཱུཧནཱཡ ཧི བྷཱཝནཱཔཏྟཛཱནནཏཱ ཛཱཡཏཱིཏི པཏྟཉྙུཏཱ. བྷཱཝནཱཔཏྟཛཱནནཏཱ ཨཏྟཉྙུཏཱཡ པདཊྛཱནཾ. བྷཱཝནཱཔཏྟཛཱནནཏཱཡ ཧི པཉྩཧི པདྷཱནིཡངྒེཧི སམནྣཱགཏསྶ ཨཏྟནོ ཛཱནནཏཱ ཛཱཡཏཱིཏི ཨཏྟཉྙུཏཱ པུབྦེཀཏཔུཉྙཏཱཡ པདཊྛཱནཾ.

པདྷཱནིཡངྒེསུ སམནྣཱགཏཏྟཛཱནནཏཱཡ ཧི པུབྦེ པུཉྙཀརཎཾ ཛཱཏཾ, པུབྦེཀཏཔུཉྙཏཱ པཏིརཱུཔདེསཝཱསསྶ པདཊྛཱནཾ. པུབྦེ ཧི ཀཏེན པུཉྙེན པཏིརཱུཔདེསཝཱསོ ལདྡྷོ, པཏིརཱུཔདེསཝཱསོ སཔྤུརིསཱུཔནིསྶཡསྶ ¶ པདཊྛཱནཾ. པཏིརཱུཔདེསཝཱསེན ཧི སཔྤུརིསཱུཔནིསྶཡོ ལདྡྷོ, སཔྤུརིསཱུཔནིསྶཡོ ཨཏྟསམྨཱཔཎིདྷཱནསྶ པདཊྛཱནཾ. སཔྤུརིསཱུཔནིསྶཡེན ཧི ཨཏྟསམྨཱཔཎིདྷཱནཾ ཛཱཏཾ, ཨཏྟསམྨཱཔཎིདྷཱནཾ སཱིལཱནཾ པདཊྛཱནཾ. ཨཏྟསམྨཱཔཎིདྷཱནེན ཧི སཱིལཱནི སམྤཏིཊྛིཏཱནི, སཱིལཱནི ཨཝིཔྤཊིསཱརསྶ པདཊྛཱནཾ. ཨཏྟནི ཧི སམྤཏིཊྛིཏཾ སཱིལཾ པཙྩཝེཀྑནྟསྶ ཝིཔྤཊིསཱརོ ནཏྠེཝཱཏི, ཨཝིཔྤཊིསཱརེན པཱམོཛྫཾ ཛཱཡཏི, ཏསྨཱ ཨཝིཔྤཊིསཱརོ པཱམོཛྫསྶ པདཊྛཱནཾ. པཱམོཛྫེན པཱིཏི ཛཱཡཏི, ཏསྨཱ པཱམོཛྫཾ པཱིཏིཡཱ པདཊྛཱནཾ. པཱིཏིཡཱ པསྶདྡྷི ཛཱཡཏི, ཏསྨཱ པཱིཏི པསྶདྡྷིཡཱ པདཊྛཱནཾ. པསྶདྡྷིཡཱ སུཁཾ ཛཱཡཏི, ཏསྨཱ པསྶདྡྷི སུཁསྶ པདཊྛཱནཾ. སུཁེན སམཱདྷི ཛཱཡཏི, ཏསྨཱ སུཁཾ སམཱདྷིསྶ པདཊྛཱནཾ. སམཱདྷིནཱ ཡཐཱབྷཱུཏཉཱཎདསྶནཾ ཛཱཡཏི, ཏསྨཱ སམཱདྷི ཡཐཱབྷཱུཏཉཱཎསྶ པདཊྛཱནཾ. ཡཐཱབྷཱུཏཉཱཎདསྶནེན ནིབྦིདཱཉཱཎཾ ཛཱཡཏི, ཏསྨཱ ཡཐཱབྷཱུཏཉཱཎདསྶནཾ ནིབྦིདཱཡ པདཊྛཱནཾ. ནིབྦིདཱཡ ཝིརཱགོ ཛཱཡཏི, ཏསྨཱ ནིབྦིདཱ ཝིརཱགསྶ པདཊྛཱནཾ. ཝིརཱགེན ཝིམུཏྟི ཛཱཡཏི, ཏསྨཱ ཝིརཱགོ ཝིམུཏྟིཡཱ པདཊྛཱནཾ. ཝིམུཏྟིཡཱ ཝིམུཏྟིཉཱཎདསྶནཾ ཛཱཡཏི, ཏསྨཱ ཝིམུཏྟི ཝིམུཏྟིཉཱཎདསྶནསྶ པདཊྛཱནཾ. ཨེཝཾ ཡཐཱཝུཏྟནཡེན ཡོ ཀོཙི དྷམྨོ ཨུཔནིསྶཡོ ཧོཏི, ཡོ ཀོཙི དྷམྨོ པཙྩཡོ ཧོཏི, སབྦོ སོ དྷམྨོ ཨཏྟནོ པཙྩཡུཔྤནྣསྶ དྷམྨསྶ པདཊྛཱནནྟི དཊྛབྦོ.

‘‘ཨུཔནིསྶཡདྷམྨསྶ, པཙྩཡདྷམྨསྶ ཝཱ པཙྩཡུཔྤནྣདྷམྨསྶ པདཊྛཱནབྷཱཝོ ཀེན སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ. ཏཏྠ ཏེནཱཏི ཡསྶ ཀསྶཙི ཨུཔནིསྶཡདྷམྨསྶ, པཙྩཡདྷམྨསྶ ཙ པཙྩཡུཔྤནྣདྷམྨསྶ པདཊྛཱནབྷཱཝེན ¶ ཨཱཡསྨཱ མཧཱཀཙྩཱནོ ‘‘དྷམྨཾ དེསེཏི ཛིནོ’’ཏིཨཱདིཀཾ ཡཾ ཝཙནཾ ཨཱཧ, ཏེན ཝཙནེན ཏེསཾ ཨུཔནིསྶཡདྷམྨཔཙྩཡདྷམྨཱནཾ པདཊྛཱནབྷཱཝོ སདྡཧིཏབྦོཏི. ‘‘ཡཐཱཝུཏྟོ པདཊྛཱནོ ཧཱརོ པརིཔུཎྞོ ཀིཾ, ཨུདཱཧུ ཨཉྙོ ནིདྡྷཱརེཏྭཱ ཡོཛེཏབྦོ ཨཏྠི ཀི’’ནྟི ཝཏྟབྦཏྟཱ ‘‘ནིཡུཏྟོ པདཊྛཱནོ ཧཱརོ’’ཏི ཝུཏྟཾ. ཨིདྷ པཱལི༹ཡཾ ཨཝིབྷཏྟམྤི ཡཐཱལཱབྷཝསེན པདཊྛཱནོ ཧཱརོ ནཱིཧརིཏྭཱ ཡུཏྟོ ཡུཛྫིཏབྦོ, ཝིབྷཛིཏབྦནྟི ཝུཏྟཾ ཧོཏི.

ཨིཏི པདཊྛཱནཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

༥. ལཀྑཎཧཱརཝིབྷངྒཝིབྷཱཝནཱ

༢༣. ཡེན ¶ ཡེན སཾཝཎྞནཱཝིསེསབྷཱུཏེན པདཊྛཱནཝིབྷངྒེན ཨཝིཛྫཱདཱིནཾ པདཊྛཱནཱནི ཝིབྷཏྟཱནི, སོ སཾཝཎྞནཱཝིསེསབྷཱུཏོ པདཊྛཱནཧཱརཝིབྷངྒོ པརིཔུཎྞོ, ‘‘ཀཏམོ ལཀྑཎཧཱརཝིབྷངྒོ’’ཏི པུཙྪིཏབྦཏྟཱ ‘‘ཏཏྠ ཀཏམོ ལཀྑཎོ ཧཱརོ’’ཏིཨཱདི ཝུཏྟཾ. ཏཏྠ ཏཏྠ-སདྡསྶ ཨཏྠོ ཝུཏྟོཝ. ཀཏམོ སཾཝཎྞནཱཝིསེསོ ལཀྑཎོ ཧཱརོ ལཀྑཎཧཱརཝིབྷངྒོཏི པུཙྪཏི. ‘‘ཝུཏྟམྷི ཨེཀདྷམྨེ’’ཏིཨཱདིནིདྡེསསྶ ཨིདཱནི མཡཱ ཝུཙྩམཱནོ ‘‘ཡེ དྷམྨཱ’’ཏིཨཱདིཀོ ཝིཏྠཱརསཾཝཎྞནཱཝིསེསོ ལཀྑཎོ ཧཱརོ ལཀྑཎཧཱརཝིབྷངྒོ ནཱམཱཏི ཝིཉྙེཡྻོཏི. ཏེན ཝུཏྟཾ –‘‘ཏཏྠ ཀཏམོ ལཀྑཎོ ཧཱརོཏིཨཱདི ལཀྑཎཧཱརཝིབྷངྒོ ནཱམཱ’’ཏི (ནེཏྟི. ཨཊྛ. ༢༣). ཨཡཾ ཨིདཱནི ཝུཙྩམཱནོ ཝིཏྠཱརབྷཱུཏོ ལཀྑཎོ ཧཱརོ པིཊཀཏྟཡེ དེསིཏེསུ དྷམྨེསུ ཀིཾ ནཱམ ལཀྑིཏབྦཾ དྷམྨཾ ལཀྑཱིཡཏཱིཏི པུཙྪིཏྭཱ པུཙྪིཏེ ལཀྑཎཧཱརཝིཙཡེ དྷམྨེ སངྑེཔེན དསྶེཏུཾ ‘‘ཡེ དྷམྨཱ’’ཏིཨཱདི ཝུཏྟཾ. ཏཏྠ ཡེ དྷམྨཱཏི ཡེ སམཱུཧཱ དྷམྨཱ. ཨེཀལཀྑཎཱཏི སམཱནལཀྑཎཱ. ཏེསཾ དྷམྨཱནནྟི སམཱནལཀྑཎཱནཾ ཏེསཾ སམཱུཧདྷམྨཱནཾ, ནིདྡྷཱརཎེ ཙེཏཾ. ཨེཀསྨིཾ དྷམྨེཏི སམཱནལཀྑཎེ ¶ ཨེཀསྨིཾ དྷམྨེ, པཱལི༹ཡཾ བྷགཝཏཱ ཝུཏྟེ སཏི ཝུཏྟདྷམྨཏོ ཨཝསིཊྛསམཱནལཀྑཎཱ དྷམྨཱ སམཱནལཀྑཎེན ཝུཏྟཱ བྷཝནྟཱིཏི ཨཏྠོ.

ལཀྑཎཧཱརཝིསཡེ དྷམྨེ ཝིཏྠཱརཏོ ཨིམསྨིཾ དྷམྨེ ཝུཏྟེ ཨིམེ སམཱནལཀྑཎཱ དྷམྨཱཔི ཝུཏྟཱ བྷཝནྟཱིཏི ནིཡམེཏྭཱ དསྶེཏུཾ ‘‘ཡཐཱ ཀིཾ བྷཝེ’’ཏིཨཱདིམཱཧ. ཏསྶཏྠོ – ཡཐཱ ཡེན པཀཱརེན ཝུཏྟཱ བྷཝནྟི, སོ པཀཱརོ ཀིཾ བྷཝེཏི པུཙྪཏི. ཡཐཱ ཡེན པཀཱརེན ཝུཏྟཱ བྷཝནྟི, སོ པཀཱརོ སམཱནལཀྑཎཱཏི བྷཱཝོ བྷཝེཏི ཨཏྠོ. ཀིནྟི བྷགཝཱ ཨཱཧ? ‘‘ཙཀྑུཾ བྷིཀྑཝེ’’ཏིཨཱདིཾ བྷགཝཱ ཨཱཧ. ‘‘ཙཀྑུཾ, བྷིཀྑཝེ, ཨནཝཊྛིཏ’’ནྟིཨཱདིམྷི ཝུཏྟེ ‘‘སོཏཾ, བྷིཀྑཝེ, ཨནཝཊྛིཏ’’ནྟིཨཱདིཝཙནམྤི ཝུཏྟམེཝ བྷཝཏི.

‘‘ཨནཝཊྛིཏཱདིལཀྑཎེན སམཱནལཀྑཎཏྟཱ ཝཱ ཨཛ྄ཛྷཏྟིཀཱཡཏནབྷཱཝེན སམཱནལཀྑཎཏྟཱ ཝཱཏི ཨཱཡཏནཝསེནེཝ ཨེཀལཀྑཎཾ ཝཏྟབྦ’’ནྟི ཝཏྟབྦཏྟཱ ཁནྡྷཝསེནཔི ཨེཀལཀྑཎཾ དསྶེཏུཾ ‘‘ཡཐཱ ཙཱཧཱ’’ཏིཨཱདི ཝུཏྟཾ. ‘‘ཨཏཱིཏེ, རཱདྷ, རཱུཔེ ཨནཔེཀྑོ ཧོཏི, ཨནཱགཏཾ རཱུཔཾ མཱ ཨབྷིནནྡི ¶ , པཙྩུཔྤནྣསྶ རཱུཔསྶ ནིབྦིདཱཡ ཝིརཱགཱཡ ནིརོདྷཱཡ ཙཱགཱཡ པཊིནིསྶགྒཱཡ པཊིཔཛྫཱ’’ཏི ཝུཏྟེ ‘‘ཨཏཱིཏཱཡ, རཱདྷ, ཝེདནཱཡ ཨནཔེཀྑོ ཧོཏི, ཨནཱགཏཾ ཝེདནཾ མཱ ཨབྷིནནྡི, པཙྩུཔྤནྣཱཡ ཝེདནཱཡ ནིབྦིདཱཡ ཝིརཱགཱཡ ནིརོདྷཱཡ ཙཱགཱཡ པཊིནིསྶགྒཱཡ པཊིཔཛྫཱ’’ཏིཨཱདི ཝུཏྟཾ བྷཝེ.

‘‘ཨནཔེཀྑནཱིཡལཀྑཎེན སམཱནལཀྑཎཏྟཱ ཝཱ ཁནྡྷལཀྑཎེན སམཱནལཀྑཎཏྟཱ ཝཱཏི ཁནྡྷཱཡཏནཝསེནེཝ ཨེཀལཀྑཎདྷམྨཱ ཝཏྟབྦཱ’’ཏི ཝཏྟབྦཏྟཱ སཏིཔཊྛཱནཝསེནཱཔི ཝཏྟབྦཱཏི དསྶེཏུཾ ‘‘ཡཐཱཧཱ’’ཏིཨཱདི ཝུཏྟཾ. ཏཏྠ ཡཐཱ ཡེན ཨེཀལཀྑཎཏྟེན ཙ བྷགཝཱ ཨཱཧ, ཏཐཱ ཙ ཏེན ཨེཀལཀྑཎཏྟེན ཙ ཨཝུཏྟཱཔི དྷམྨཱ ཝུཏྟཱ བྷཝནྟཱིཏི ཨཏྠོ. ཡེ ཝིཔསྶཀཱ པུགྒལཱ པཉྩསུ ཁནྡྷེསུ ནིཙྩཾ སུསམཱརདྡྷཱ ནིཙྩཾ ཀཱཡགཏཱསཏིཾ བྷཱཝེནྟི, ཏེ ཝིཔསྶཀཱ ཨཀིཙྩཾ སུབྷསུཁཱདིཀཾ, ཀསིཝཱཎིཛྫཱདིཀམྨཾ ཝཱ ན སེཝནྟི, ཀིཙྩེ ཨསུབྷཱསུཁཱདིཀེ, ཀཱཡཱདིཀེ ཝཱ སཱཏཙྩཀཱརིནོ ཧོནྟཱིཏི བྷགཝཱ ཨཱཧཱཏི ཡོཛནཱ.

ཨིཏིསདྡསྶ ཙེཏྠ ཨེཀསྶ ལོཔོ. ཨིཏི ཨེཝཾ ‘‘ཡེསཉྩཱ’’ཏིཨཱདིགཱཐཱཡ ཀེསཱདིཀེ ཀཱཡེ གཏཱཡ པཝཏྟཱཡ སཏིཡཱ བྷགཝཏཱ སརཱུཔེན ¶ ཝུཏྟཱཡ ཝིཛྫམཱནཱཡ ཏདཝསེསཱ ཝེདནཱགཏཱ སཏི ཙ ཙིཏྟགཏཱ སཏི ཙ དྷམྨགཏཱ སཏི ཙ སཏིཔཊྛཱནབྷཱཝེན ཨེཀལཀྑཎཏྟེན ཝུཏྟཱ བྷཝནྟཱིཏི སངྑེཔཏོ ནིཙྩཾ སུསམཱརདྡྷཱ ནིཙྩཾ ཝེདནཱགཏཱ སཏི ཙ…པེ… ནིཙྩཾ ཙིཏྟགཏཱ སཏི ཙ…པེ… ནིཙྩཾ དྷམྨགཏཱ སཏཱིཏི ཝཏྟབྦཱཏི.

‘‘སཏིཔཊྛཱནཝསེནེཝ ཨེཀལཀྑཎཱ དྷམྨཱ ཝཏྟབྦཱ’’ཏི ཝཏྟབྦཏྟཱ ‘‘ཏཐཱ ཡཾ ཀིཉྩཱི’’ཏིཨཱདི ཝུཏྟཾ. ཏཏྠ ཡཾ ཀིཉྩི རཱུཔཱཡཏནཾ ཙཀྑུཝིཉྙཱཎེན དིཊྛཾ, ཡཾ ཀིཉྩི སདྡཱཡཏནཾ སོཏཝིཉྙཱཎེན སུཏཾ, ཡཾ ཀིཉྩི གནྡྷརསཕོཊྛབྦཱཡཏནཾ གྷཱནཝིཉྙཱཎཱདིཏྟཡེན ཝིཉྙཱཎེན མུཏཾ, ཨིཏི ཨེཝཾ དིཊྛཱདིཏྟཡེ བྷགཝཏཱ སརཱུཔེན ཝུཏྟེ སཏི ཏདཝསེསཾ ཡཾ ཀིཉྩི ཝིཉྙཱཏཾ དྷམྨཱརམྨཎཔརིཡཱཔནྣཾ རཱུཔཾ བྷགཝཏཱ ཨཱལམྦིཏབྦབྷཱཝེན ཨེཀལཀྑཎཏྟཱ ཝུཏྟཾ བྷཝཏཱིཏི ཨཏྠོ. ཨཐ ཝཱ ཡཾ ཀིཉྩི རཱུཔཱཡཏནཾ དིཊྛཾ བྷགཝཏཱ ཝུཏྟཾ, ཏསྨིཾ ཝུཏྟེ སཏི ཏདཝསེསཾ སུཏཱདིཀམྤི ཝུཏྟཾ ཧོཏཱིཏི ཨཱདིཨཏྠོ ཝིསུཾ ཝིསུཾ ཡོཛེཏབྦོ. ཏེན ཝུཏྟཾ – ‘‘དིཊྛཾ ཝཱ སུཏཾ ཝཱ མུཏཾ ཝཱ’’ཏི.

‘‘ཀཱཡགཏཱཡ སཏིཡཱ ཝུཏྟཱཡ ཏདཝསེསཱ ཝེདནཱགཏཱསཏིཨཱདཡོཡེཝ ཝཏྟབྦཱ’’ཏི པུཙྪིཏབྦཏྟཱ སཏྟཏིཾསབོདྷིཔཀྑིཡདྷམྨཱཔི ཝུཏྟཱ བྷཝནྟཱིཏི དསྶེཏུཾ ‘‘ཡཐཱ ཙཱཧ བྷགཝཱ’’ཏིཨཱདི ཝུཏྟཾ. ཏཏྠ ཡཐཱ ཡེན ནིཡྻཱནིཀལཀྑཎེན ཨེཀལཀྑཎཏྟེན ཙ བྷགཝཱ ཨཱཧ, ཏཐཱ ཏེན ཨེཀལཀྑཎཏྟེན ཙ བྷགཝཱ ཨཱཧ, ཏཐཱ ཏེན ཨེཀལཀྑཎཏྟེན ཙ ཝུཏྟཱ བྷཝནྟཱིཏི ¶ ཨཏྠོ. ‘‘ཏསྨཱ ཨབྷིཛ྄ཛྷཱདོམནསྶེན ཨབྷིབྷཱུཏཏྟཱ ཨིཧ མམ སཱསནེ, བྷིཀྑུ, ཏྭཾ ཨཱཏཱཔཱི སམྤཛཱནོ སཏིམཱ ཧུཏྭཱ ལོཀེ ཨབྷིཛ྄ཛྷཱདོམནསྶཾ ཏདངྒཔྤཧཱནེན ཝཱ ཝིཀྑམྦྷནཔྤཧཱནེན ཝཱ ཝིནེཡྻ ཝིནཡིཏྭཱ ཀཱཡེ ཀེསཱདིརཱུཔཀཱཡེ ཀཱཡཱནུཔསྶཱི ཀེསཱདིརཱུཔཀཱཡཱནུཔསྶཱི ཧུཏྭཱ ཝིཧརཱཧཱི’’ཏི བྷགཝཏཱ ཝུཏྟེ སཏི ‘‘ཏསྨཱཏིཧ, ཏྭཾ བྷིཀྑུ, ཝེདནཱསུ ཝེདནཱནུཔསྶཱི ཝིཧརཱཧི ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶཾ, ཏསྨཱཏིཧ, ཏྭཾ བྷིཀྑུ, ཙིཏྟེ ཙིཏྟཱནུཔསྶཱི ཝིཧརཱཧི…པེ… དོམནསྶཾ, ཏསྨཱཏིཧ, ཏྭཾ བྷིཀྑུ, དྷམྨེསུ དྷམྨཱནུཔསྶཱི ཝིཧརཱཧི…པེ… དོམནསྶ’’ནྟི ཝུཏྟཾ བྷཝཏཱིཏི སངྑེཔཏྠོ ཝེདིཏབྦོ. ཝིཏྠཱརཏྠོ པན ཨཊྛཀཐཱཡཾ (ནེཏྟི. ཨཊྛ. ༢༣) བཧུདྷཱ ཝུཏྟོཏི ཨམྷེཧི ན ཝིཏྠཱརིཏོ.

‘‘ཨེཀསྨིཾ ¶ སཏིཔཊྛཱནེ ཝུཏྟེ ཀསྨཱ ཙཏྟཱརོ སཏིཔཊྛཱནཱ ཝུཏྟཱ བྷཝེཡྻུ’’ནྟི ཝཏྟབྦཏྟཱ ‘‘ཨཱཏཱཔཱིཏི ཝཱིརིཡིནྡྲིཡ’’ནྟིཨཱདི ཝུཏྟཾ. ཏཏྠ ‘‘ཨཱཏཱཔཱི’’ཏི ཨིམིནཱ པདེན ཀཱཡཝེདནཱཙིཏྟདྷམྨེསུ པཝཏྟཾ ཝཱིརིཡིནྡྲིཡཾ ཝུཏྟཾ. ‘‘སམྤཛཱནོ’’ཏི པདེན ཀཱཡཝེདནཱཙིཏྟདྷམྨེསུ པཝཏྟཾ པཉྙིནྡྲིཡཾ ཝུཏྟཾ. ‘‘སཏིམཱ’’ཏི པདེན ཀཱཡཝེདནཱཙིཏྟདྷམྨེསུ པཝཏྟཾ སཏིནྡྲིཡཾ ཝུཏྟཾ. ‘‘ཝིནེཡྻ ལོཀེ ཨབྷིཛ྄ཛྷཱདོམནསྶ’’ནྟི པདེན ཀཱཡཝེདནཱཙིཏྟདྷམྨེསུ པཝཏྟཾ སམཱདྷིནྡྲིཡཾ ཝུཏྟཾ, ན ཀཱཡེཡེཝ པཝཏྟཾ. ཨེཝཾ པཀཱརེན ཀཱཡེ ཀཱཡཱནུཔསྶིནོ ཡོགཱཝཙརསྶ ཙཏྟཱརོ སཏིཔཊྛཱནཱ བྷཱཝནཱཔཱརིཔཱུརིཾ གཙྪནྟཱིཏི ཙེ ཝདེཡྻ, ཨེཝཾ སཏི ཙཏུནྣཾ ཝཱིརིཡཔཉྙཱསཏིསམཱདྷཱིནཾ ཨིནྡྲིཡཱནཾ ཙཏུནྣཾ སཏིཔཊྛཱནཱནཾ སཱདྷཀབྷཱཝེན ཨེཀལཀྑཎཏྟཱ སམཱནལཀྑཎཏྟཱ པཱརིཔཱུརིཾ གཙྪནྟཱིཏི ཡོཛནཱ. ཏེན ཝུཏྟཾ ཨཊྛཀཐཱཡཾ – ‘‘ཙཏུསཏིཔཊྛཱནསཱདྷནེ ཨིམེསཾ ཨིནྡྲིཡཱནཾ སབྷཱཝབྷེདཱབྷཱཝཏོ སམཱནལཀྑཎཏྟཱ’’ཏི (ནེཏྟི. ཨཊྛ. ༢༣).

༢༤. ‘‘ཨེཝཾ ཝུཏྟེཔི ཙཏྟཱརོ སཏིཔཊྛཱནཱཡེཝ ཝཏྟབྦཱ བྷཝེཡྻུཾ, ཀཐཾ སཏྟཏིཾསབོདྷིཔཀྑིཡདྷམྨཱ ཝཏྟབྦཱ’’ཏི ཝཏྟབྦཏྟཱ ‘‘ཙཏཱུསུ སཏིཔཊྛཱནེསཱུ’’ཏིཨཱདི ཝུཏྟཾ. ཏཏྠ ཙཏཱུསུ སཏིཔཊྛཱནེསུ ཡེན ཡོགཱཝཙརེན བྷཱཝིཡམཱནེསུ ཏསྶ ཡོགཱཝཙརསྶ ཙཏྟཱརོ སམྨཔྤདྷཱནཱ བྷཱཝནཱཔཱརིཔཱུརིཾ གཙྪནྟི. ཨེཝཾ སེསེསུཔི ཡོཛནཱ ཀཱཏབྦཱ. ཙཏུནྣཾ སཙྩཱནཾ བུཛ྄ཛྷནཾ བོདྷཾ, ཨརིཡམགྒཉཱཎཾ, བོདྷཾ གཙྪནྟཱིཏི བོདྷངྒམཱ. བོདྷསྶ ཨརིཡམགྒཉཱཎསྶ པཀྑེ བྷཝཱཏི བོདྷིཔཀྑིཡཱ.

‘‘ཀུསལཱཡེཝ དྷམྨཱ ཨེཀལཀྑཎབྷཱཝེན ནཱིཧརིཏཱ ཀིཾ, ཨུདཱཧུ ཨཀུསལཱཔི དྷམྨཱ’’ཏི པུཙྪིཏབྦཏྟཱ ‘‘ཨེཝཾ ཨཀུསལཱཔཱི’’ཏིཨཱདི ཝུཏྟཾ. ཏཏྠ ཀུསལཱ དྷམྨཱ ཨེཀལཀྑཎཏྟེན ནིདྡྷཱརིཏཱ ¶ ཡཐཱ, ཨེཝཾ ཨཀུསལཱཔི དྷམྨཱ ཨེཀལཀྑཎཏྟེན ནིདྡྷཱརིཏབྦཱཡེཝཱཏི ཨཏྠོ. ‘‘ཀཐཾ ནིདྡྷཱརེཏབྦཱ’’ཏི པུཙྪིཏབྦཏྟཱ པཧཱནེཀཊྛབྷཱཝེན ནིདྡྷཱརེཏབྦཱཏི དསྶེནྟོ ‘‘ཨེཀལཀྑཎཏྟཱ པཧཱནཾ ཨབྦྷཏྠཾ གཙྪནྟཱི’’ཏི ཨཱཧ. ཏཏྠ ཨེཀལཀྑཎཏྟཱཏི པཧཱནེཀཊྛབྷཱཝེན སམཱནལཀྑཎཏྟཱ. ‘‘ཀཏམཾ པཧཱནཾ ཨབྦྷཏྠཾ གཙྪནྟཱི’’ཏི པུཙྪིཏབྦཏྟཱ ‘‘ཙཏཱུསུ སཏིཔཊྛཱནེསཱུ’’ཏིཨཱདི ཝུཏྟཾ.

ཏཏྠ ¶ ཙཏཱུསུ…པེ… པརིཉྙཾ གཙྪནྟཱིཏི ཀཱཡཱགཏཱསཏིཔཊྛཱནེ ཡོགཱཝཙརེན བྷཱཝིཡམཱནེ སཏི ཏེན ཡོགཱཝཙརེན ཨསུབྷེ ཀེསཱདིཀེ རཱུཔཀཱཡེ ‘‘སུབྷ’’ནྟི ཝིཔལླཱསོ པཧཱིཡཏི, ཨསྶ ཡོགཱཝཙརསྶ ཀབལཱི༹ཀཱརཱཧཱརོ པརིཉྙཾ གཙྪཏི, ‘‘ཨཱཧཱརསམུདཡཱ རཱུཔསམུདཡོ’’ཏི (སཾ. ནི. ༣.༥༦) ཝུཏྟཏྟཱ རཱུཔཀཱཡེ ཚནྡརཱགཾ པཛཧནྟསྶ ཏསྶ སམུདཡེ ཀབལཱི༹ཀཱརཱཧཱརེཔི ཚནྡརཱགོ པཧཱིཡཏཱིཏི ཨཏྠོ. ཝེདནཱགཏཱསཏིཔཊྛཱནེ བྷཱཝིཡམཱནེ སཏི དུཀྑེ ‘‘སུཁ’’ནྟི ཝིཔལླཱསོ པཧཱིཡཏི, ཨསྶ ཡོགཱཝཙརསྶ ཕསྶཱཧཱརོ པརིཉྙཾ གཙྪཏི, ‘‘ཕསྶཔཙྩཡཱ ཝེདནཱ’’ཏི (མ. ནི. ༣.༡༢༦; སཾ. ནི. ༢.༡, ༣༩; མཧཱཝ. ༡; ཨུདཱ. ༡; ཝིབྷ. ༢༢༥) ཝུཏྟཏྟཱ ཝེདནཱཡ ཚནྡརཱགཾ པཛཧནྟསྶ ཏསྶ པཙྩཡེ ཕསྶཱཧཱརེ ཚནྡརཱགོ པཧཱིཡཏི. ཙིཏྟགཏཱསཏིཔཊྛཱནེ བྷཱཝིཡམཱནེ ཨནིཙྩེ ‘‘ནིཙྩ’’ནྟི ཝིཔལླཱསོ པཧཱིཡཏི, ཨསྶ ཡོགཱཝཙརསྶ ཝིཉྙཱཎཱཧཱརོ པརིཉྙཾ གཙྪཏི. དྷམྨགཏཱསཏིཔཊྛཱནེ བྷཱཝིཡམཱནེ ཨནཏྟནི ‘‘ཨཏྟཱ’’ཏི ཝིཔལླཱསོ པཧཱིཡཏི, ཨསྶ ཡོགཱཝཙརསྶ མནོསཉྩེཏནཱཧཱརོ པརིཉྙཾ གཙྪཏཱིཏི ཝིསུཾ ཝིསུཾ ཡོཛེཏྭཱ ཨེཀེཀསྨིཾ པཧཱཏབྦེ ཝུཏྟེ ཏདཝསེསཱ པཧཱཏབྦཱ ཝུཏྟཱ བྷཝནྟི པཧཱཏབྦབྷཱཝེན ཨེཀལཀྑཎཏྟཱཏི ཨཏྠོ གཧེཏབྦོ.

‘‘ཨཱཧཱརཱ ཙསྶ པརིཉྙཾ གཙྪནྟཱི’’ཏི ཝཙནེ ཨཱཧཱརེསུ པཝཏྟཱ ཀཱམརཱགདོསམོཧཱ བྱནྟཱིཀཏཱ ཧོནྟཱིཏི ཨཏྠོ གཧིཏོ. ཀབལཱི༹ཀཱརཱཧཱརཉྷི ཨཱརབྦྷ པཝཏྟེ ཀཱམརཱགེ ཝིཛྫམཱནེ ཀབལཱི༹ཀཱརཱཧཱརསྶ ཝིཛཱནནཱ ནཏྠེཝ, ཏསྨིཾ ཀཱམརཱགེ པན པཧཱིནེ པརིཛཱནནཱ བྷཝཏཱིཏི. སེསཱཧཱརཛཱནནམྤི ཨེསེཝ ནཡོ. ཡསྶ ཡོགཱཝཙརསྶ སཏིཔཊྛཱནཱ བྷཱཝིཏཱ, ཝིཔལླཱསཱ པཧཱིནཱ, ཨཱཧཱརཔརིཛཱནནཱ ཨུཔྤནྣཱ, སོ ཡོགཱཝཙརོ ཨུཔཱདཱནེཧི ཨནུཔཱདཱནོ བྷཝཏི. སུབྷསཉྙིཏེ ཧི ཀཱཡེ ཀཱམུཔཱདཱནཾ ཝིསེསེན བྷཝཏཱིཏི སུབྷསཉྙིཏོ ཀཱཡོ ཀཱམུཔཱདཱནསྶ ཝཏྠུ, ཀཱཡགཏཱཡ སཏིཡཱ ཨནུསརིཏབྦོ ཨསུབྷསཉྙིཏོ ཀེསཱདི ཀཱམུཔཱདཱནསྶ ཝཏྠུ ན ཧོཏྭེཝ. སུཁཝེདནཱཡ ཨསྶཱདཝསེན དིཊྛུཔཱདཱནཾ བྷཝཏཱིཏི སུཁསཉྙིཏཱ ཝེདནཱ དིཊྛུཔཱདཱནསྶ ཝཏྠུ, ཝེདནཱགཏཱཡ པན སཏིཡཱ ཨནུཔསྶིཏབྦཱ ཝེདནཱ དིཊྛུཔཱདཱནསྶ ཝཏྠུ ན ཧོཏྭེཝ. ‘‘ཙིཏྟཾ ནིཙྩ’’ནྟི དིཊྛིགཧཎཝསེན ཏསྶ ཏསྶ ཨཏྟནོ སཱིལཝཏཝསེན པརིསུདྡྷཱིཏི པརཱམསནཾ ཧོཏཱིཏི ཙིཏྟཾ སཱིལབྦཏུཔཱདཱནསྶ ¶ ཝཏྠུ, ཙིཏྟགཏཱཡ པན སཏིཡཱ ཨནུཔསྶིཏབྦཾ ཙིཏྟཾ སཱིལབྦཏུཔཱདཱནསྶ ¶ ཝཏྠུ ན ཧོཏྭེཝ. དྷམྨེ ནཱམརཱུཔཔརིཙྪེདེན ཡཐཱབྷཱུཏཾ ཨཔསྶནྟསྶ དྷམྨེསུ ཨཏྟཱབྷིནིཝེསོ ཧོཏཱིཏི དྷམྨཱ ཨཏྟཝཱདུཔཱདཱནསྶ ཝཏྠུ, དྷམྨགཏཱཡ པན སཏིཡཱ ཨནུཔསྶིཏབྦཱ དྷམྨཱ ཨཏྟཝཱདུཔཱདཱནསྶ ཝཏྠུ ན ཧོནྟི ཨེཝ. ཏསྨཱ ཙཏཱུསུ སཏིཔཊྛཱནེསུ བྷཱཝིཡམཱནེསུ ཨུཔཱདཱནེཧི ཨནུཔཱདཱནོ བྷཝཏཱིཏི ཝུཏྟནྟི ཨདྷིཔྤཱཡོ གཧེཏབྦོ.

‘‘ཡེན ཡོགཱཝཙརེན སཏིཔཊྛཱནཱ བྷཱཝིཏཱ, སོ ཡོགཱཝཙརོ ཨུཔཱདཱནེཧིཡེཝ ཨནུཔཱདཱནོ བྷཝཏཱི’’ཏི པུཙྪིཏབྦཏྟཱ ཡོགཱདཱིཧིཔི ཝིསཾཡུཏྟོ བྷཝཏཱིཏི དསྶེཏུཾ ‘‘ཡོགེཧི ཙ ཝིསཾཡུཏྟོ’’ཏིཨཱདི ཝུཏྟཾ. ཏཏྠ ཡོགེཧི ཙཱཏི ཀཱམཡོགབྷཝཡོགདིཊྛིཡོགཨཝིཛྫཱཡོགེཧི ཙ. ཝིསཾཡུཏྟོཏི ཏདངྒཔྤཧཱནཝིཀྑམྦྷནཔྤཧཱནསམུཙྪེདཔྤཧཱནཝསེན ཝིགཏོ, ཝིམུཏྟོ ཙ བྷཝཏཱིཏི ཨཏྠོ. སུབྷསཉྙིཏོ ཧི རཱུཔཀཱཡོ ཀཱམརཱགསྶ ཝཏྠུ ཧོཏི, ཀཱཡགཏཱཡ པན སཏིཡཱ ཨནུཔསྶིཏབྦོ ཀཱཡོ ཀཱམརཱགསྶ ཝཏྠུ ན ཧོཏྭེཝ. ‘‘སུཁོ’’ཏི ཝཱ ‘‘སུཁཧེཏཱུ’’ཏི ཝཱ གཧཎཱིཡོ བྷཝོ བྷཝརཱགསྶ ཝཏྠུ ཧོཏི, ཝེདནཱགཏཱཡ པན སཏིཡཱ ཨནུཔསྶིཏབྦོ བྷཝོ བྷཝརཱགསྶ ཝཏྠུ ན ཧོཏི. ‘‘ཨཏྟཱ’’ཏི ཨབྷིནིཝིསིཏབྦཾ ཙིཏྟཾ དིཊྛིཡོགསྶ ཝཏྠུ ཧོཏི, ཙིཏྟགཏཱཡ པན སཏིཡཱ ཨནུཔསྶིཏབྦཾ ཙིཏྟཾ དིཊྛིཡོགསྶ ཝཏྠུ ན ཧོཏི. ཝིནིབྦྷོགསྶ དུཀྐརཏྟཱ, དྷམྨཱནཾ དྷམྨམཏྟཏཱཡ ཙ དུཔྤཊིཝིཛ྄ཛྷཏྟཱ ཨཝིནིབྦྷུཛིཏབྦཱ, དྷམྨམཏྟཏཱཡ ཨཔྤཊིཝིཛ྄ཛྷིཏབྦཱ དྷམྨཱ ཨཝིཛྫཱཡོགསྶ ཝཏྠུ ཧོནྟི, དྷམྨགཏཱཡ པན སཏིཡཱ ཨནུཔསྶིཏབྦཱ དྷམྨཱ ཨཝིཛྫཱཡོགསྶ ཝཏྠུ ན ཧོནྟི. ཏསྨཱ ཙཏུསཏིཔཊྛཱནཱནུཔསྶཀོ ‘‘ཡོགེཧི ཙ ཝིསཾཡུཏྟོ’’ཏི ཝུཏྟོ. ཨཡཾ ནཡོ ཨཱསཝེཧི ཙ ཨནཱསཝོ བྷཝཏི, ཨོགྷེཧི ཙ ནིཏྠིཎྞོ བྷཝཏཱིཏི ཨེཏྠཱཔི ཡོཛེཏབྦོ.

གནྠེཧི ཙ ཝིཔྤཡུཏྟོ བྷཝཏཱིཏི ཨེཏྠ པན སུབྷསཉྙིཏོ རཱུཔཀཱཡོ ཨབྷིཛ྄ཛྷཱཀཱཡགནྠསྶ ཝཏྠུ, ཀཱཡགཏཱཡ པན སཏིཡཱ ཨནུཔསྶིཏབྦོ རཱུཔཀཱཡོ ཨབྷིཛ྄ཛྷཱཀཱཡགནྠསྶ ཝཏྠུ ན ཧོཏི. དུཀྑདུཀྑཝིཔརིཎཱམདུཀྑསངྑཱརདུཀྑབྷཱུཏཱ ཝེདནཱ བྱཱཔཱདཀཱཡགནྠསྶ ཝཏྠུ ཧོནྟི, ཏེན ཝུཏྟཾ – ‘‘དུཀྑཱཡ ཝེདནཱཡ པཊིགྷཱནུསཡོ ཨནུསེཏཱི’’ཏི (མ. ནི. ༡.༤༦༥). ཝེདནཱགཏཱཡ ¶ པན སཏིཡཱ ཨནུཔསྶིཏབྦཱ ཝེདནཱ བྱཱཔཱདཀཱཡགནྠསྶ ཝཏྠུ ན ཧོཏི. ‘‘ཙིཏྟཾ ནིཙྩ’’ནྟི ཨབྷིནིཝེསཝསེན སསྶཏསྶ ‘‘ཨཏྟནོ སཱིལེན སུདྡྷི, ཝཏེན སུདྡྷཱི’’ཏི པརཱམསནཾ ཧོཏི, ཏསྨཱ ‘‘ནིཙྩ’’ནྟི གཧིཏཾ ཙིཏྟཾ སཱིལབྦཏཔརཱམཱསཀཱཡགནྠསྶ ཝཏྠུ, ཙིཏྟགཏཱཡ པན སཏིཡཱ ཨནུཔསྶིཏབྦཾ ཙིཏྟཾ སཱིལབྦཏཔརཱམཱསསྶ ཝཏྠུ ན ཧོཏི. དྷམྨཱནཾ སཔྤཙྩཡནཱམརཱུཔསབྷཱཝསྶ ཨདསྶནཏོ བྷཝདིཊྛིཝིབྷཝདིཊྛི ཧོཏི, ཏསྨཱ ‘‘ཨིདཾ སཙྩ’’ནྟི ཨབྷིནིཝིསིཏབྦཱ དྷམྨཱ ཨིདཾསཙྩཱབྷིནིཝེསཀཱཡགནྠསྶ ཝཏྠུ, དྷམྨགཏཱཡ པན སཏིཡཱ ཨནུཔསྶིཏབྦཱ ¶ དྷམྨཱ ཨིདཾསཙྩཱབྷིནིཝེསཀཱཡགནྠསྶ ཝཏྠུ ན ཧོནྟི, ཏསྨཱ ཙཏུསཏིཔཊྛཱནཱནུཔསྶཀོ ‘‘གནྠེཧི ཙ ཝིཔྤཡུཏྟོ’’ཏི ཝུཏྟོ.

སུབྷསཉྙིཏོ ཙ ཀཱཡོ རཱགསལླསྶ ཝཏྠུ, ཀཱཡགཏཱཡ པན སཏིཡཱ ཨནུཔསྶིཏབྦོ ཀཱཡོ རཱགསལླསྶ ཝཏྠུ ན ཧོཏི. སུཁསཉྙིཏཱཡ ཝེདནཱཡ དོསོ ཧོཏི, ཏསྨཱ ཝེདནཱ དོསསལླསྶ ཝཏྠུ, ཝེདནཱགཏཱཡ པན སཏིཡཱ ཨནུཔསྶིཏབྦཱ ཝེདནཱ དོསསལླསྶ ཝཏྠུ ན ཧོཏི. ‘‘ཙིཏྟཾ ཨཏྟཱ’’ཏི གཧེཏྭཱ ‘‘ཨཏྟཱ སེཡྻོ’’ཏིཨཱདིཝསེན པཝཏྟསྶ མཱནསལླསྶ ཙིཏྟཾ ཝཏྠུ, ཙིཏྟགཏཱཡ པན སཏིཡཱ ཨནུཔསྶིཏབྦཾ ཙིཏྟཾ མཱནསལླསྶ ཝཏྠུ ན ཧོཏི. དྷམྨཱནཾ སཔྤཙྩཡནཱམརཱུཔསབྷཱཝསྶ ཨཛཱནནཏོ དྷམྨཱ མོཧསལླསྶ ཝཏྠུ, དྷམྨགཏཱཡ པན སཏིཡཱ ཨནུཔསྶིཏབྦཱ དྷམྨཱ མོཧསལླསྶ ཝཏྠུ ན ཧོནྟི, ཏསྨཱ ཙཏུསཏིཔཊྛཱནཱནུཔསྶཀོ ‘‘སལླེཧི ཙ ཝིསལློ བྷཝཏཱི’’ཏི ཝུཏྟོ.

‘‘ཨཱཧཱརཱ ཙསྶ པརིཉྙཾ གཙྪནྟཱི’’ཏི ཨཱཙརིཡེན ཝུཏྟཾ, ‘‘ཀིཾ པན ཨཱཧཱརཱཝ ཨསྶ ཡོགཱཝཙརསྶ པརིཉྙཾ གཙྪནྟི, ཨུདཱཧུ ཨཉྙེཔཱི’’ཏི པུཙྪིཏབྦཏྟཱ ཝིཉྙཱཎཊྛིཏིཡོ ཙ ཨསྶ ཡོགཱཝཙརསྶ པརིཉྙཾ གཙྪནྟཱིཏི དསྶེཏུཾ ‘‘ཝིཉྙཱཎཊྛིཏིཡོ ཙསྶ པརིཉྙཾ གཙྪནྟཱི’’ཏི ཝུཏྟཾ. ཡེན ཡོགཱཝཙརེན ཙཏྟཱརོ སཏིཔཊྛཱནཱ བྷཱཝིཏཱ, ཏསྶ ཡོགཱཝཙརསྶ ཀཱཡཝེདནཱཙིཏྟདྷམྨཱཝ པརིཉྙཾ གཙྪེཡྻུཾ, ན ཝིཉྙཱཎཊྛིཏིཡོཏི ཙེ ཝདེཡྻ ཀཱཡཱནུཔསྶནཱདཱིཧི ཙ ཀཱཡཝེདནཱཙིཏྟདྷམྨེསུ པརིཉྙཱཏེསུ སཉྙཱཡཔི པརིཉྙཱཏབྦབྷཱཝཏོ. སཱ ཧི ཝེདནཱཙིཏྟསངྑཱཏེན དྷམྨེསུ པརིཉྙཱཏེསུ ཨཝིནཱབྷཱཝཏོ པརིཉྙཱཏཱཝཱཏི.

ཡེན ¶ ཙཏྟཱརོ སཏིཔཊྛཱནཱ བྷཱཝིཏཱ, སོ ཡོགཱཝཙརོ ཨུཔཱདཱནེཧི ཨནུཔཱདཱནོ ཙ, ཡོགེཧི ཝིསཾཡུཏྟོ ཙ, ཁནྡྷེཧི ཝིཔྤཡུཏྟོ ཙ, ཨཱསཝེཧི ཨནཱསཝོ ཙ, ཨོགྷེཧི ནིཏྠིཎྞོ ཙ, སལླེཧི ཝིསལློ ཙ བྷཝཏཱིཏི ཝུཏྟོ, ‘‘ཀིཾ པན ཏཐཱཝིདྷོཝ ཧོཏི, ཨུདཱཧུ ཨཉྙཐཱཔཱི’’ཏི པུཙྪིཏབྦཏྟཱ ཨགཏིམྤི ན གཙྪཏཱིཏི དསྶེནྟོ ‘‘ཨགཏིགམནེཧི ཙ ན ཨགཏིཾ གཙྪཏཱི’’ཏི ཨཱཧ. སུབྷཱདིསཉྙིཏེ རཱུཔཀཱཡེ ཨཔེཀྑམཱནོ པུགྒལོ ཚནྡཱགཏིཾ གཙྪཏཱིཏི སུབྷཱདིསཉྙིཏོ རཱུཔཀཱཡོ ཝིསེསཏོ ཚནྡཱགཏིཡཱ ཝཏྠུ ཧོཏི, ཀཱཡཱནུཔསྶནཱསཏིཔཊྛཱནེན པན ཨནུཔསྶིཏབྦོ ཨསྶཱསཔསྶཱསཱདིཀོ ཀཱཡོ ཚནྡཱགཏིཡཱ ཝཏྠུ ན ཧོཏི, ཏསྨཱ ཀཱཡཱནུཔསྶནཱསཏིཔཊྛཱནབྷཱཝནཾ བྷཱཝེནྟོ པུགྒལོ ཚནྡཱགཏིཾ ན གཙྪཏི. སུཁཝེདནསྶཱདཝསེན ཝེདཡམཱནོ ཏདབྷཱཝེན བྱཱཔཱདཾ ཨཱགཙྪཏཱིཏི སུཁཝེདནཱ དོསཱགཏིཡཱ ཝཏྠུ ཧོཏི, ཝེདནཱནུཔསྶནཱསཏིཔཊྛཱནེན པན ཨནུཔསྶིཏབྦཱ ཝེདནཱ དོསཱགཏིཡཱ ཝཏྠུ ན ཧོཏི ¶ , ཏསྨཱ ཝེདནཱསཏིཔཊྛཱནབྷཱཝནཾ བྷཱཝེནྟོ པུགྒལོ དོསཱགཏིཾ ན གཙྪཏི. སནྟཏིགྷནཝསེན ‘‘ནིཙྩཾ, དྷུཝ’’ནྟི གཧིཏཾ ཙིཏྟཾ མོཧསྶ ཝཏྠུ ཧོཏི, ཙིཏྟཱནུཔསྶནཱསཏིཔཊྛཱནེན པན ཨནུཔསྶིཏབྦཾ ཙིཏྟཾ མོཧསྶ ཝཏྠུ ན ཧོཏི, ཏསྨཱ ཙིཏྟཱནུཔསྶནཱསཏིཔཊྛཱནབྷཱཝནཾ བྷཱཝེནྟོ པུགྒལོ དོསཱགཏིཾ ན གཙྪཏི. ཝིབྷཛིཏྭཱ དྷམྨསབྷཱཝཾ ཨཛཱནནྟསྶ བྷཡཾ ཛཱཡཏཱིཏི ཝིབྷཛིཏྭཱ ཨཛཱནིཡསབྷཱཝཱ དྷམྨཱ བྷཡསྶ ཝཏྠུ ཧོནྟི, དྷམྨཱནུཔསྶནཱསཏིཔཊྛཱནེན པན ཨནུཔསྶིཏབྦཱ ཝིབྷཛིཏྭཱ ཛཱནིཏབྦཱ དྷམྨཱ རཱགསྶ ཝཏྠུ ན ཧོནྟི, ཏསྨཱ དྷམྨཱནུཔསྶནཱསཏིཔཊྛཱནབྷཱཝནཾ བྷཱཝེནྟོ པུགྒལོ བྷཡཱགཏིཾ ན གཙྪཏི. ཨེཝཾ པཧཱཏབྦབྷཱཝེན ཨེཀལཀྑཎེ ཨཀུསལེཔི དྷམྨེ ནཱིཧརིཏྭཱ ཨིདཱནི ནིགམེཏུཾ ‘‘ཨེཝཾ ཨཀུསལཱཔི དྷམྨཱ ཨེཀལཀྑཎཏྟཱ པཧཱནཾ ཨབྦྷཏྠཾ གཙྪནྟཱི’’ཏི པུན ཝུཏྟཾ.

བྷཱཝེཏབྦེསུ དྷམྨེསུ ཨེཀདེསེསུ ཝུཏྟེ ཏདཝསེསཱཔི བྷཱཝེཏབྦཱ དྷམྨཱ ཨེཀལཀྑཎཏྟཱ ནཱིཧརིཏྭཱ ཝཏྟབྦཱ, པཧཱཏབྦེསུཔི དྷམྨེསུ ཨེཀདེསེ ཝུཏྟེ ཏདཝསེསཱཔི དྷམྨཱ པཧཱཏབྦཱ ཨེཀལཀྑཎཏྟཱ ནཱིཧརིཏྭཱ ཝཏྟབྦཱཏི ཨཱཙརིཡེན ཝུཏྟཱ, ཨམྷེཧི ཙ ཉཱཏཱ, ‘‘ཨཉྙཐཱཔི ཡདི ཝཏྟབྦཱ སིཡུཾ, ཏེཔི ཝདཐཱ’’ཏི ཝཏྟབྦབྷཱཝཏོ ཨཉྙེནཔི པརིཡཱཡེན ལཀྑཎཧཱརསྶ ཨུདཱཧརཎཱནི དསྶེཏུཾ ‘‘ཡཏྠ ཝཱ པནཱ’’ཏིཨཱདི ཝུཏྟཾ ¶ . ཏཏྠ ཡཏྠ ཡསྶཾ རཱུཔེཀདེསདེསནཱཡཾ རཱུཔིནྡྲིཡཾ རུཔྤནལཀྑཎཾ ཙཀྑུནྡྲིཡཱདིཛཱིཝིཏིནྡྲིཡཔརིཡོསཱནཾ ཨཊྛཝིདྷཾ ཨིནྡྲིཡཾ རཱུཔེཀདེསཾ བྷགཝཏཱ དེསིཏཾ. ཏཏྠེཝ ཏསྶཾ རཱུཔེཀདེསདེསནཱཡཾ རཱུཔདྷཱཏུ རུཔྤནལཀྑཎཱ ཙཀྑུདྷཱཏཱདིཕོཊྛབྦདྷཱཏུཔརིཡོསཱནཱ དསཝིདྷཱ རཱུཔདྷཱཏུ རུཔྤནལཀྑཎེན ཨེཀལཀྑཎཏྟཱ དེསིཏཱ. སབྦོ རཱུཔཀྑནྡྷོ ཙ དེསིཏོ. རཱུཔཱཡཏནཾ རུཔྤནལཀྑཎཾ ཙཀྑཱཡཏནཱདིཕོཊྛབྦཱཡཏནཔརིཡོསཱནཾ དསཝིདྷཾ ཨཱཡཏནཾ རུཔྤནལཀྑཎེན ཨེཀལཀྑཎཏྟཱ བྷགཝཏཱ དེསིཏཾ.

ཡཏྠ ཝཱ པན ཡསྶཾ ཝེདནེཀདེསདེསནཱཡཾ སུཁཱ ཝེདནཱ བྷགཝཏཱ དེསིཏཱ, ཏཏྠ ཏསྶཾ ཝེདནེཀདེསདེསནཱཡཾ སུཁིནྡྲིཡཉྩ དེསིཏཾ, སོམནསྶིནྡྲིཡཉྩ དེསིཏཾ, དུཀྑསམུདཡོ ཨརིཡསཙྩཉྩ དེསིཏཾ སུཁཝེདནཱབྷཱཝེན ཨེཀལཀྑཎཏྟཱ. ཡཏྠ ཝཱ པན ཡསྶཾ ཝེདནེཀདེསདེསནཱཡཾ དུཀྑཱ ཝེདནཱ བྷགཝཏཱ དེསིཏཱ, ཏཏྠ ཏསྶཾ ཝེདནེཀདེསདེསནཱཡཾ དུཀྑིནྡྲིཡཉྩ དེསིཏཾ དོམནསྶིནྡྲིཡཉྩ དེསིཏཾ, དུཀྑཾ ཨརིཡསཙྩཉྩ དེསིཏཾ དུཀྑཝེདནཱབྷཱཝེན ཨེཀལཀྑཎཏྟཱ. ཡཏྠ ཝཱ པན ཡསྶཾ ཝེདནེཀདེསདེསནཱཡཾ ཨདུཀྑམསུཁཱ ཝེདནཱ བྷགཝཏཱ དེསིཏཱ, ཏཏྠ ཏསྶཾ ཝེདནེཀདེསདེསནཱཡཾ ཨུཔེཀྑིནྡྲིཡཉྩ དེསིཏཾ, སབྦོ པཊིཙྩསམུཔྤཱདོ ཙ དེསིཏོཏི ཡོཛནཱ ཀཱཏབྦཱ.

ཡསྶཾ ¶ དེསནཱཡཾ ཨདུཀྑམསུཁཱ ཝེདནཱ དེསིཏཱ, ཏསྶཾ དེསནཱཡཾ ཨུཔེཀྑིནྡྲིཡཾ དེསིཏཾ ཧོཏུ སམཱནལཀྑཎཏྟཱ, ‘‘ཀེན པཊིཙྩསམུཔྤཱདོ དེསིཏོ བྷཝེཡྻཱ’’ཏི ཝཏྟབྦབྷཱཝཏོ ‘‘ཀེན ཀཱརཎེནཱ’’ཏི པུཙྪིཏྭཱ ཀཱརཎཾ དསྶེཏུཾ ‘‘ཨདུཀྑམསུཁཱཡཱ’’ཏིཨཱདི ཝུཏྟཾ. ཏཏྠ ཨདུཀྑམསུཁཱཡ ཝེདནཱཡ ཧི ཡསྨཱ ཨཝིཛྫཱ ཨནུསེཏི, ཏསྨཱ ཨཝིཛྫཱ དེསིཏཱ ཧོཏི. ཨཝིཛྫཱཡ ཙ དེསིཏཱཡ ཨཝིཛྫཱམཱུལཀོ སབྦོཔི པཊིཙྩསམུཔྤཱདོ ‘‘ཨཝིཛྫཱཔཙྩཡཱ སངྑཱརཱ…པེ… དུཀྑཀྑནྡྷསྶ སམུདཡོ ཧོཏཱི’’ཏི དེསིཏོཝ ཧོཏཱིཏི ཨདྷིཔྤཱཡོ དཊྛབྦོ.

‘‘ཨཝིཛྫཱཔཙྩཡཱ སངྑཱརཱ…པེ… སམུདཡོ ཧོཏཱི’’ཏི ཨནུལོམཝསེན པཝཏྟོ ཡོ པཊིཙྩསམུཔྤཱདོ དེསིཏོཏི ཨཱཙརིཡེན ཝུཏྟོ, ‘‘ཡདི ཏཐཱ པཝཏྟོ སོ ཙ པཊིཙྩསམུཔྤཱདོ དེསིཏོ, ཨེཝཾ སཏི སབྦོ ཙ པཊིཙྩསམུཔྤཱདོ དེསིཏོ’’ཏི ན ཝཏྟབྦོཏི ཙོདནཾ མནསི ཀཏྭཱ ‘‘སོ ཙཱ’’ཏིཨཱདི ཝུཏྟཾ. ཏཏྠ ཡོ ཙ ཨནུལོམཝསེན པཝཏྟོ, སོ ཙ སརཱགསདོསསམོཧསཾཀིལེསཔཀྑེན ཧཱཏབྦོ. ཡོ ཙ ¶ པཊིལོམཝསེན ‘‘ཨཝིཛྫཱཡ ཏྭེཝ ཨསེསཝིརཱགནིརོདྷཱ སངྑཱརནིརོདྷོ’’ཏིཨཱདིཀོ པཝཏྟོ, སོ ཙ ཝཱིཏརཱགཝཱིཏདོསཝཱིཏམོཧཨརིཡདྷམྨེཧི ཧཱཏབྦོ. ཡོ ཙ ཨནུལོམཔཊིལོམཝསེན པཝཏྟོ, སོ ཙ ཏདུབྷཡེཧི ཧཱཏབྦོ. ཏསྨཱ ‘‘སབྦོ ཙ པཊིཙྩསམུཔྤཱདོ དེསིཏོ’’ཏི ཝཏྟབྦོཝཱཏི ཨདྷིཔྤཱཡོ གཧེཏབྦོ.

‘‘ཡེ དྷམྨཱ ཨེཀལཀྑཎཱ, ཏེསཾ དྷམྨཱནཾ ཨེཀསྨིཾ དྷམྨེ ཝུཏྟེ ཨཝསིཊྛཱ དྷམྨཱ ཝུཏྟཱ བྷཝནྟཱིཏིཨཱདིནཱ (ནེཏྟི. ༢༣) ཨཱཙརིཡེན ཡཱ ལཀྑཎཧཱརཡོཛནཱ ཝུཏྟཱ, སཱཝ ཀཱཏབྦཱ, ན ཨཉྙཐཱ ཀཱཏབྦཱ’’ཏི པུཙྪིཏབྦབྷཱཝཏོ ཨཉྙཐཱཔི ལཀྑཎཧཱརཡོཛནཱ ཀཱཏབྦཱཡེཝཱཏི དསྶེཏུཾ ‘‘ཨེཝཾ ཡེ དྷམྨཱ’’ཏིཨཱདི ཝུཏྟཾ. ཏཏྠ ཡེ པཐཝཱིཨཱདཡོ རཱུཔདྷམྨཱ, ཡེ ཕསྶཱདཡོ ཨརཱུཔདྷམྨཱ སནྡྷཱརཎཱདིཀིཙྩཏོ སངྒྷཊྚནཱདིཀིཙྩཏོ ཨེཀལཀྑཎཱ, ཏེསཾ རཱུཔཱརཱུཔདྷམྨཱནཾ ཨེཀསྨིཾ དྷམྨེ ཝུཏྟེ ཨཝསིཊྛཱ རཱུཔཱརཱུཔདྷམྨཱ ཝུཏྟཱ བྷཝནྟི. ཡེ པཐཝཱིཨཱདཡོ རཱུཔདྷམྨཱ, ཡེ ཕསྶཱདཡོ ཨརཱུཔདྷམྨཱ ཀཀྑལཱ༹དིལཀྑཎཏོ ཕུསནཱདིལཀྑཎཏོ ཨེཀལཀྑཎཱ, ཏེསཾ རཱུཔཱརཱུཔདྷམྨཱནཾ ཨེཀསྨིཾ དྷམྨེ ཝུཏྟེ ཨཝསིཊྛཱ རཱུཔཱརཱུཔདྷམྨཱ ཝུཏྟཱ བྷཝནྟི. ཡེ དྷམྨཱ རུཔྤནསཱམཉྙཏོ ནམནསཱམཉྙཏོ ཨནིཙྩཱདིསཱམཉྙཏོ ཝཱ ཁནྡྷཱཡཏནཱདིསཱམཉྙཏོ ཝཱ ཨེཀལཀྑཎཱ, ཏེསཾ སངྑཏདྷམྨཱནཾ ཨེཀསྨིཾ སངྑཏདྷམྨེ ཝུཏྟེ ཨཝསིཊྛཱ དྷམྨཱ ཝུཏྟཱ བྷཝནྟི. ཡེ སངྑཏདྷམྨཱ བྷངྒུཔྤཱདཏོ སངྑཏོ ཙུཏཱུཔཔཱཏཏོ སམཱནནིརོདྷུཔྤཱདསངྑཏཏོ ཝཱ ཙུཏཱུཔཔཱཏཏོ ཨེཀལཀྑཎཱ, ཏེསཾ སངྑཏདྷམྨཱནཾ ཨེཀསྨིཾ སངྑཏདྷམྨེ ཝུཏྟེ ཨཝསིཊྛཱ སངྑཏདྷམྨཱ ཝུཏྟཱ བྷཝནྟཱིཏི ཨཏྠཡོཛནཱ ཀཱཏབྦཱ.

ཀིཙྩཏོ ཙ ལཀྑཎཏོ ཙཱཏིཨཱདཱིསུ ཙ-སདྡེན སཧཙརཎསམཱནཧེཏུཏཱདཡོ སངྒཧིཏཱཏི དཊྛབྦཱ ¶ . སཧཙརཎཱདཱིསུ ཙ ཡཾ ཝཏྟབྦཾ, ཏཾ ‘‘ནཱནཏྟཀཱཡནཱནཏྟསཉྙིནོ (དཱི. ནི. ༣.༣༤༡, ༣༥༧, ༣༥༩; ཨ. ནི. ༩.༢༤), ནཱནཏྟསཉྙཱནཾ ཨམནསིཀཱརཱ’’ཏིཨཱདཱིསུ སཧཙཱརིཏཱཡ སཉྙཱསཧགཏཱ དྷམྨཱ ནིདྡྷཱརིཏཱཏིཨཱདིནཱ ཝུཏྟམེཝ.

‘‘ཨེཀསྨིཾ དྷམྨེ སརཱུཔཏོ ཝུཏྟེ ཨེཀལཀྑཎཱདིཏོ ཨཝསིཊྛདྷམྨཱནམྤི ཝུཏྟབྷཱཝོ ཀེན ཨམྷེཧི ཛཱནིཏབྦོ སདྡཧིཏབྦོ’’ཏི ཝཏྟབྦབྷཱཝཏོ ‘‘ཏེནཱ’’ཏིཨཱདི ¶ ཝུཏྟཾ. ཏཏྠ ཏེན ཨཝསིཊྛདྷམྨཱནམྤི ཝུཏྟབྷཱཝེན ‘‘ཝུཏྟམྷི ཨེཀདྷམྨེ’’ཏིཨཱདིཀཾ ཡཾ ཝཙནཾ ཨཱཡསྨཱ མཧཱཀཙྩཱནོ ཨཱཧ, ཏེན ཝཙནེན ཏུམྷེཧི ཨཝསིཊྛཱནམྤི ཝུཏྟབྷཱཝོ ཛཱནིཏབྦོ སདྡཧིཏབྦོཏི ཝུཏྟཾ ཧོཏི.

‘‘ཨེཏྟཱཝཏཱ ཙ ལཀྑཎཧཱརོ པརིཔུཎྞོ, ཨཉྙོ ནིཡུཏྟོ ནཏྠཱི’’ཏི ཝཏྟབྦཏྟཱ ‘‘ནིཡུཏྟོ ལཀྑཎོ ཧཱརོ’’ཏི ཝུཏྟཾ. ཏཏྠ ཡསྶཾ པཱལི༹ཡཾ ཨེཀསྨིཾ དྷམྨེ ཝུཏྟེ ཨཝསིཊྛདྷམྨཱཔི ཡེན ལཀྑཎཧཱརེན ནིདྡྷཱརིཏཱ, ཏསྶཾ པཱལི༹ཡཾ སོ ལཀྑཎོ ཧཱརོ ནིཡུཏྟོ ནིདྡྷཱརེཏྭཱ ཡོཛིཏོཏི ཨཏྠོ དཊྛབྦོཏི.

ཨིཏི ལཀྑཎཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

༦. ཙཏུབྱཱུཧཧཱརཝིབྷངྒཝིབྷཱཝནཱ

༢༥. ཡེན ཡེན སཾཝཎྞནཱཝིསེསབྷཱུཏེན ལཀྑཎཧཱརཝིབྷངྒེན སུཏྟཏྠེཧི སམཱནཏྠཱ ཝིབྷཏྟཱ, སོ སཾཝཎྞནཱཝིསེསབྷཱུཏོ ལཀྑཎཧཱརཝིབྷངྒོ པརིཔུཎྞོ, ‘‘ཀཏམོ ཙཏུབྱཱུཧཧཱརཝིབྷངྒོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཙཏུབྱཱུཧོ ཧཱརོ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ནིདྡིཊྛེསུ སོལ༹སསུ དེསནཱཧཱརཱདཱིསུ. ཀཏམོཏི ཀཏམོ སཾཝཎྞནཱཝིསེསོ ཙཏུབྱཱུཧོ ཧཱརོ ཙཏུབྱཱུཧཧཱརཝིབྷངྒོ ནཱམཱཏི ཝིཉྙེཡྻོ. ཏེན ཝུཏྟཾ – ‘‘ཏཏྠ ཀཏམོ ཙཏུབྱཱུཧོ ཧཱརོཏི ཙཏུབྱཱུཧཧཱརཝིབྷངྒོ’’ཏི (ནེཏྟི. ཨཊྛ. ༢༥). ‘‘ཨིམིནཱ ཙཏུབྱཱུཧཧཱརེན ཀཏམསྶ ¶ ནེརུཏྟཱདཡོ གཝེསིཏབྦཱ’’ཏི པུཙྪིཏབྦཏྟཱ ‘‘བྱཉྫནེནཱ’’ཏིཨཱདི ཝུཏྟཾ. ཏཏྠ བྱཉྫནེནཱཏི ཙཏུབྱཱུཧཧཱརསྶ སུཏྟསྶ ཝིསེསཏོ བྱཉྫནཝིཙཡབྷཱཝཏོ ‘‘བྱཉྫནཱ’’ཏི ཝོཧཱརིཏེན ཨིམིནཱ ཙཏུབྱཱུཧཧཱརེན སུཏྟསྶ ནེརུཏྟཉྩ, སུཏྟསྶ ཨདྷིཔྤཱཡོ ཙ, སུཏྟསྶ ནིདཱནཉྩ, སུཏྟསྶ པུབྦཱཔརསནྡྷི ཙ སཾཝཎྞེནྟེཧི གཝེསིཏབྦོཏི ཨཏྠོ.

‘‘ཙཏུབྱཱུཧཧཱརེན ¶ གཝེསིཏབྦེསུ ནེརུཏྟཱདཱིསུ ཀཏམཾ སུཏྟསྶ གཝེསིཏབྦཾ ནེརུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ ནེརུཏྟ’’ནྟིཨཱདི ཝུཏྟཾ. ཏསྶཏྠོ – ཏཏྠ ཏེསུ ཨིམིནཱ ཙཏུབྱཱུཧཧཱརེན གཝེསིཏབྦེསུ ནེརུཏྟཱདཱིསུ ཀཏམཾ སུཏྟསྶ ནེརུཏྟཾ ནིབྦཙནཾ ནཱམཱཏི ཙེ པུཙྪེཡྻ? སུཏྟསྶ ཡཱ ནིརུཏྟི ནིདྡྷཱརེཏྭཱ ཝུཏྟཱ སབྷཱཝཔཉྙཏྟི གཝེསིཏབྦཱ, ཨིདཾ སབྷཱཝནིརུཏྟིབྷཱུཏཾ ནིབྦཙནཾ ནེརུཏྟཾ ནཱམཱཏི. ‘‘ཡཱ ནིརུཏྟི ནེརུཏྟཾ ནཱམཱཏི ཝུཏྟཱ, ཀཱ པན སཱ ནིརུཏྟཱི’’ཏི པུཙྪིཏབྦཏྟཱ ‘‘པདསཾཧིཏཱ’’ཏི ཝུཏྟཾ. པདེསུ སཾཧིཏཱ ཡུཏྟཱ པདསཾཧིཏཱ. ཡཐཱ ཡཐཱ སུཏྟཏྠོ ཝཏྟབྦོ, ཏཐཱ ཏཐཱ ཡཱ སབྷཱཝནིརུཏྟི པཝཏྟཱ, སཱ པཝཏྟཱ སབྷཱཝནིརུཏྟིཡེཝ ནིརུཏྟི ནཱམཱཏི ཡོཛནཱ. ‘‘ཀཱ པན སཱ སབྷཱཝནིརུཏྟཱི’’ཏི པུཙྪིཏབྦཏྟཱ ཙ ‘‘ཡཾ དྷམྨཱནཾ ནཱམསོ ཉཱཎ’’ནྟི ཝུཏྟཾ. ཡཾ ཡཱཡ ཀཱརཎབྷཱུཏཱཡ ནཱམཔཉྙཏྟིཡཱ དྷམྨཱནཾ ནེཡྻཱནཾ ནཱམསོ པཐཝཱིནཱམཱདིནཱ ཝཱ ཕསྶནཱམཱདིནཱ ཝཱ ཁནྡྷནཱམཱདིནཱ ཝཱ ཝིཝིདྷེན ནཱམེན ཨཏྠདྷམྨཱདཱིསུ ཀུསལསྶ པུགྒལསྶ ཉཱཎཾ པཝཏྟཏི, སཱ ཀཱརཎབྷཱུཏཱ ནཱམཔཉྙཏྟི སབྷཱཝནིརུཏྟི ནཱམཱཏི ཨཏྠོ. ཡནྟི ཙ ལིངྒཝིཔལླཱསོ, ཡཱཡཱཏི ཨཏྠོ. ‘‘ལིངྒཔཀཏིདྷམྨཱནཾ ནཱམསོ པཝཏྟམཱནཾ ཉཱཎཾ ཝིཝརིཏྭཱ ཀཐེཧཱི’’ཏི ཝཏྟབྦཏྟཱ ‘‘ཡདཱ ཧཱི’’ཏིཨཱདི ཝུཏྟཾ. ཨཊྛཀཐཱཡཾ པན ‘‘ཡདཱ ཧི བྷིཀྑཱུཏིཨཱདིནཱ ‘དྷམྨཱནཾ ནཱམསོ ཉཱཎ’ནྟི པདསྶ ཨཏྠཾ ཝིཝརཏཱི’’ཏི (ནེཏྟི. ཨཊྛ. ༢༥) ཝུཏྟཾ. ཏསྶཏྠོ ཨཊྛཀཐཱཡཾ ཝིབྷཛིཏྭཱ ཝུཏྟོཝཱཏི ན ཝིཙཱརིཏོ.

༢༦. ནེརུཏྟཾ ཨཱཙརིཡེན ཝིབྷཏྟཾ, ཨམྷེཧི ཙ ཉཱཏཾ ‘‘ཀཏམོ སུཏྟེ གཝེསིཏབྦོ བྷགཝཏོ ཨདྷིཔྤཱཡོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཨདྷིཔྤཱཡོ’’ཏིཨཱདི ཝུཏྟཾ. ཏསྶཏྠོ པཱཀཊོ. ཨཔིཙ ‘‘དྷམྨོ ཧཝེ རཀྑཏཱི’’ཏིཨཱདཱིསུ ཡེན པུགྒལེན ཨཏྟནཱ རཀྑིཏེན དྷམྨེན རཀྑིཏབྦབྷཱཝོ ཨིཙྪིཏོ, སོ དྷམྨཾ རཀྑིསྶཏཱིཏི བྷགཝཏོ ཨདྷིཔྤཱཡོ. ཡོ པུགྒལོ དུགྒཏིཏོ མུཙྩིཏུཀཱམོ, སོ དྷམྨཾ རཀྑིསྶཏཱིཏི བྷགཝཏོ ཨདྷིཔྤཱཡོ.

ཙོརོ ཡཐཱ སནྡྷིམུཁེ གཧིཏོཏིཨཱདཱིསུ ཡོ ཙོརོ གྷཱཏནཏོ མུཙྩིཏུཀཱམོ, སོ ཙོརཀམྨཾ ན ཀརིསྶཏཱིཏི བྷགཝཏོ ཨདྷིཔྤཱཡོ. ཡོ པུགྒལོ ཨཔཱཡཱདིདུཀྑཏོ མུཙྩིཏུཀཱམོ, སོ པཱཔཀམྨཾ ན ཀརིསྶཏཱིཏི བྷགཝཏོ ཨདྷིཔྤཱཡོ.

སུཁཀཱམཱནཱིཏིཨཱདཱིསུ ¶ ¶ ཡེ པུགྒལཱ སུཁཾ ཨིཙྪནྟི, ཏེ པརཧིཾསནཏོ ཝིཝཛྫིསྶནྟཱིཏི བྷགཝཏོ ཨདྷིཔྤཱཡོ.

མིདྡྷཱི ཡདཱ ཧོཏི མཧགྒྷསོ ཙཱཏིཨཱདཱིསུ ཡེ པུགྒལཱ པུནཔྤུནཾ པཝཏྟམཱནཛཱཏིཛརཱམརཎཏོ མུཙྩིཏུཀཱམཱ, ཏེ བྷོཛནེ མཏྟཉྙུནོ བྷཝིསྶནྟི, སནྟུཊྛཱ བྷཝིསྶནྟི, སུདྡྷཱཛཱིཝཱ བྷཝིསྶནྟི, པཱཏིམོཀྑསཾཝརསཱིལསམྤནྣཱ བྷཝིསྶནྟི, ཨཏནྡིནོ བྷཝིསྶནྟི, ཝིཔསྶཀཱ བྷཝིསྶནྟི, སགཱརཝཱ སཔྤཏིསྶཱ བྷཝིསྶནྟཱིཏི བྷགཝཏོ ཨདྷིཔྤཱཡོ.

ཨཔྤམཱདོ ཨམཏཔདནྟིཨཱདཱིསུ ཡེ པུགྒལཱ མཙྩུནོ བྷཱཡནྟི, ནིབྦཱནམིཙྪནྟི, ཏེ པུགྒལཱ དཱནསཱིལབྷཱཝནཱཀམྨེསུ ཨཔྤམཏྟཱ བྷཝིསྶནྟཱིཏི བྷགཝཏོ ཨདྷིཔྤཱཡོ.

༢༧. སུཏྟེ གཝེསིཏབྦོ ཨདྷིཔྤཱཡོ ཨཱཙརིཡེན ཝིབྷཏྟོ, ཨམྷེཧི ཙ ཝིཉྙཱཏོ, ‘‘ཀཏམཾ སུཏྟསྶ གཝེསིཏབྦཾ ནིདཱན’’ནྟི པུཙྪིཏབྦཏྟཱ ‘‘ཏཏྠ ཀཏམཾ ནིདཱན’’ནྟིཨཱདི ཝུཏྟཾ. ཏཏྠ ནིདཱནནྟི ཕལཾ ནཱིཧརིཏྭཱ དེཏཱིཏི ནིདཱནཾ. ཀིཾ ཏཾ? ཀཱརཎཾ. དྷནིཡོཏི དྷནཝཌྜྷནཀཱརཎེ ནིཡུཏྟོཏི དྷནིཡོ. གོཔཱལཀོཏི གཱཝོ ཨིསྶརབྷཱཝེན པཱལེཏི རཀྑཏཱིཏི གོཔཱལཀོ. ཨུཔདྷཱིཧཱིཏི པུཏྟགོཎཱདཱིཧི (སུ. ནི. ཨཊྛ. ༡.༣༣). ནརསྶཱཏི པུཏྟིམནྟསྶ ཝཱ གོཔཱལཀསྶ ཝཱ ནརསྶཱཏི ཙ པདཊྛཱནཝསེན ཝཱ ཡེབྷུཡྻཝསེན ཝཱ གཱཐཱཡཾ ཨཱགཏཝསེན ཝཱ ཝུཏྟཾ, ནཱརིཡཱཔི ཨུཔདྷཱིཧི ནནྡནཱ ཨཏྠེཝཱཏི དཊྛབྦཱ.

ཨིམིནཱ ཝཏྠུནཱཏི ཨུཔདྷིསངྑཱཏེན ཨིམིནཱཝ པུཏྟགཝཱདིནཱ ཝཏྠུནཱ. ཝསཏི པཝཏྟཏི ནནྡནཱ ཨེཏྠ པུཏྟགོཎཱདིཀེཏི ཝཏྠུ. ནནྡནཾ ནཱིཧརིཏྭཱ དེཏི པུཏྟགོཎཱདིཀནྟི ནིདཱནནྟི ཨཏྠཾ གཧེཏྭཱ དྷནིཡོ ‘‘ཨུཔདྷཱིཧི ནརསྶ ནནྡནཱ’’ཏི ཨཱཧ. བྷགཝཱ པན ‘‘ཝསཏི པཝཏྟཏི སོཙནཱ ཨེཏྠ པུཏྟགོཎཱདིཀེཧི ཝཏྠུ, སོཙནཾ ནཱིཧརིཏྭཱ དེཏི པུཏྟགོཎཱདིཀནྟི ནིདཱན’’ནྟི ཨཏྠཾ གཧེཏྭཱ ‘‘ཨུཔདྷཱིཧི ནརསྶ སོཙནཱ’’ཏི ཨཱཧ. པརིགྒཧཱིཡཏེཏི པརིགྒཧཾ. ཀིཾ ཏཾ? པུཏྟགོཎཱདིཀཾ, ཏཾ པརིགྒཧཾ ‘‘ཨུཔདྷཱི’’ཏི ཨཱཧ, ན ཀིལེསཱུཔདྷིཀཱཡཁནྡྷཱུཔདྷིནྟི.

ཨུཔདྷཱིསཱུཏི ཁནྡྷསངྑཱཏེསུ ཀཱཡེསུ. ཀཱཡཾ ‘‘ཨུཔདྷཱི’’ཏི ཨཱཧ, ན པུཏྟགཝཱདིཀཾ, ན པརིགྒཧཾ.

བཱཧིརེསུ ¶ ཝཏྠཱུསཱུཏི མཎིཀུཎྜལཔུཏྟདཱརཱདཱིསུ ཝཏྠཱུསུ.

ཀཱམསུཁནྟི ¶ ཀཱམནཱིཡེསུ ཨསྶཱདསུཁཝསེན པཝཏྟཱ ཏཎྷཱ. བཱཧིརཝཏྠུཀཱཡ ཏཎྷཱཡཱཏི ཀཱམནཱིཡེསུ བཱཧིརཝཏྠཱུསུ ཨསྶཱདསུཁཝསེན པཝཏྟཱཡ ཏཎྷཱཡ.

ཨཛ྄ཛྷཏྟིཀཝཏྠུཀཱཡཱཏི རཱུཔཀཱཡསངྑཱཏེ ཨཛ྄ཛྷཏྟིཀཝཏྠུམྷི ཨབྷིནནྡནཝསེན པཝཏྟཱཡ.

པུན ཨཛ྄ཛྷཏྟིཀཝཏྠུཀཱཡཱཏི པཉྩཀྑནྡྷསངྑཱཏེ ཨཛ྄ཛྷཏྟིཀཝཏྠུམྷི སིནེཧཝསེན པཝཏྟཱཡ.

གཝེསིཏབྦཾ ནིདཱནཾ ཝིབྷཏྟཾ, ཨམྷེཧི ཙ ཉཱཏཾ, ‘‘ཀཏམོ གཝེསིཏབྦོ པུབྦཱཔརསནྡྷཱི’’ཏི པུཙྪིཏབྦཏྟཱ ཏཏྠ ཀཏམོ པུབྦཱཔརསནྡྷཱི’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ནེརུཏྟཱདྷིཔྤཱཡནིདཱནཔུབྦཱཔརསནྡྷཱིསུ. ཡཐཱཏི ཡེན ཨནྡྷཀཱརཱདིནཱ སབྷཱཝེན ‘‘ཀཱམནྡྷཱ…པེ… མཱཏར’’ནྟི ཡཾ ཀཱམཏཎྷཾ བྷགཝཱ ཨཱཧ, ཨཡཾ ཀཱམཏཎྷཱ ཏཐཱ ཏེན ཨནྡྷཀཱརཱདིནཱ སབྷཱཝེན ‘‘ཀཱམནྡྷཱ…པེ… མཱཏར’’ནྟི གཱཐཱ ཝུཏྟཱཏི ཡོཛནཱ.

གཱཐཱཏྠོ པན – ཀཱམེཏཱིཏི ཀཱམོ, ཀཱམཏཎྷཱ, ཀཱམེན ཨཏྠསྶ ཨཛཱནནཏཱཡ དྷམྨསྶ, ཨཔསྶནཏཱཡ ཙ ཨནྡྷཱཏི ཀཱམནྡྷཱ. ཀཱམཏཎྷཱསངྑཱཏེན ཛཱལེན ཨཏྠདྷམྨཱནཾ ཨཛཱནནཱཔསྶནེན སཉྪནྣཱ པལིགུཎྛིཏཱཏི ཛཱལསཉྪནྣཱ. ཏཎྷཱསངྑཱཏེན ཚདནེན ཏེསཾཡེཝ ཨཏྠདྷམྨཱནཾ ཨཛཱནནཱཔསྶནེན ཚཱདིཏཱ པིཧིཏཱཏི ཏཎྷཱཚདནཚཱདིཏཱ. ཨཏྠདྷམྨེསུ པམཏྟསངྑཱཏེན པམཱདེན བནྡྷནེན བདྡྷཱ བནྡྷིཏབྦཱ པུགྒལཱ ཛརཱམརཎཾ ཨནྭེནྟི, ཀུམིནཱམུཁེ པཝཏྟཱ མཙྪཱ མརཎཾ ཨནྭེནྟི ཨིཝ ཙ, ཁཱིརཔཀོ ཝཙྪོ མཱཏརཾ ཨནྭེཏི ཨིཝ ཙ, ཏཐཱ ཛརཱམརཎཾ ཨནྭེནྟཱིཏི གཧེཏབྦོ.

‘‘ཀཱམནྡྷཱ…པེ… མཱཏར’ནྟི ཡཱཡ དེསནཱཡ, གཱཐཱཡ ཝཱ ཀཱམཏཎྷཱ ཝུཏྟཱ, སཱ དེསནཱ, གཱཐཱ ཝཱ ཀཏམེན དེསནཱབྷཱུཏེན ཨཔརེན ཡུཛྫཏཱི’’ཏི པུཙྪིཏབྦཏྟཱ ཏཐཱ པུཙྪིཏྭཱ ཨིམཱཡ དེསནཱཡ, གཱཐཱཡ ཝཱ ཡུཛྫཏཱིཏི དསྶེཏུཾ ‘‘སཱ ཀཏམེནཱ’’ཏིཨཱདི ཝུཏྟཾ. ཏཏྠ སཱཏི ‘‘ཀཱམནྡྷཱ…པེ… ཨནྭེནྟཱི’’ཏི དེསནཱ, གཱཐཱ ཝཱ. པུབྦཱཔརེནཱཏི ཏཏོ དེསནཱཏོ པུབྦེན དེསནཱཝཙནེན, གཱཐཱཝཙནེན ཝཱ ཨཔརེན དེསནཱཝཙནེན, གཱཐཱཝཙནེན ཝཱ. ཡུཛྫཏི ཡུཛྫནཾ ཨེཏི སམེཏཱིཏི པུཙྪཏི.

ཡཐཱཏི ¶ ཡེན ཨནྡྷཀརཎཱདིནཱ. ‘‘རཏྟོ…པེ… ནར’’ནྟི ཡཾ གཱཐཱཝཙནཾ བྷགཝཱ ཨཱཧ, ཏེན གཱཐཱཝཙནེན ཏཐཱ ཨནྡྷཀརཎཱདིནཱ ཡུཛྫཏཱིཏི ཡོཛནཱ. གཱཐཱཏྠོ པན – རཏྟོ རཉྫནྟོ པུགྒལོ ཨཏྠཾ ཨཏྟཧིཏཔཡོཛནཾ པརཧིཏཔཡོཛནཾ ན ཛཱནཱཏི. རཏྟོ རཉྫནྟོ དྷམྨཾ ཡཐཱཝུཏྟསྶ ཨཏྠསྶ ¶ ཧེཏུཾ པཉྙཱཙཀྑུནཱ ན པསྶཏི. རཱགོ ཡཾ ནརཾ ཡདཱ སཧཏེ, ཏདཱ ཏསྶ ནརསྶ ཨནྡྷཾ ཨནྡྷཀཱརཾ ཏམཾ ཨཉྙཱཎཾ ཧོཏཱིཏི གཧེཏབྦོ.

ཨིཏཱིཏི ཨེཝཾ. ཨནྡྷཏཱཡ ཨནྡྷཀརཎཏཱཡ སཉྪནྣཏཱཡ སཉྪནྣཀརཎཏཱཡ. སཱཡེཝ ཏཎྷཱཏི ‘‘ཀཱམནྡྷཱ…པེ… མཱཏར’’ནྟི གཱཐཱཝཙནེན ཡཱ ཀཱམཏཎྷཱ ཝུཏྟཱ, སཱཡེཝ ཀཱམཏཎྷཱ. ཨབྷིལཔིཏཱཏི ‘‘རཏྟོ…པེ… ནར’’ནྟི ཨཔརེན གཱཐཱཝཙནེན བྷགཝཏཱ ཝོཧཱརིཏཱ ཝོཧརཎེན ཉཱཔིཏཱ, ཨབྷིལཔིཏསྶ ཨཏྠསྶ སམཱནཏཱ པུབྦདེསནཱ ཨཔརདེསནཱཡ ཡུཛྫཏཱིཏི ཝུཏྟཾ ཧོཏི.

‘‘དྭཱིསུ གཱཐཱསུ ཀཏམེཧི པདེཧི སཱཡེཝ ཏཎྷཱ ཨབྷིལཔིཏཱ’’ཏི པུཙྪིཏབྦཏྟཱ ཨིམེཧི ཨབྷིལཔིཏཱཏི ནིཡམེཏྭཱ དསྶེཏུཾ ‘‘ཡཉྩཱཧཱ’’ཏིཨཱདི ཝུཏྟཾ. ཏཏྠ པཋམགཱཐཱཡཾ ‘‘ཀཱམནྡྷཱ…པེ… ཚཱདིཏཱ’’ཏི ཡཉྩ པདཾ ཨཱཧ, དུཏིཡགཱཐཱཡཉྩ ‘‘རཏྟོ…པེ… ན པསྶཏཱི’’ཏི ཡཉྩ པདཾ ཨཱཧ. པརིཡུཊྛཱནེཧི པརིཡུཊྛཱནདཱིཔཀེཧི ཨིམེཧི ‘‘ཀཱམནྡྷཱ…པེ… པསྶཏཱི’’ཏི པདེཧི སཱཡེཝ པཋམགཱཐཱཡ ཝུཏྟཱ ཀཱམཏཎྷཱ ཙ བྷགཝཏཱ ཨབྷིལཔིཏཱ.

‘‘ཡཾ ཨནྡྷཀཱརཾ ཝུཏྟཾ, ཀཏམཾ ཏཾ? ཡཱ ཏཎྷཱ པོནོབྷཝིཀཱ ཝུཏྟཱ, ཀཏམཱ སཱ’’ཏི པུཙྪིཏབྦཏྟཱ ‘‘ཡཾ ཨནྡྷཀཱར’’ནྟིཨཱདི ཝུཏྟཾ. ཏཏྠ ཨནྡྷཀཱརཾ ཡཾ ཨཉྙཱཎཾ ཝུཏྟཾ, ཨཡཾ དུཀྑསམུདཡོ བྷཝེ. ཡཱ ཙ ཏཎྷཱ པོནོབྷཝིཀཱ ཝུཏྟཱ, ཨཡཉྩ དུཀྑསམུདཡོ བྷཝེཏི ཡོཛནཱ.

‘‘ཀཱམཱ’’ཏི ཡཉྩ པདཾ བྷགཝཱ ཨཱཧ, ཏེན པདེན ཨིམེ ཀིལེསཀཱམཱ ཝུཏྟཱ. ‘‘ཛཱལསཉྪནྣཱ’’ཏི ཡཉྩ པདཾ བྷགཝཱ ཨཱཧ, ཏེན པདེན ཏེསཾཡེཝ ཀིལེསཀཱམཱནཾ པཡོགེན སམུདཱཙཱརེན པརིཡུཊྛཱནཾ བྷགཝཱ དསྶེཏི. ཏསྨཱཏི ཡསྨཱ ཡསྨིཾ སནྟཱནེ ཏཎྷཱ ཨུཔྤནྣཱ, ཏཾ སནྟཱནཾ སཾསཱརཏོ ནིསྶརིཏུཾ ཨདཏྭཱ རཱུཔཱརམྨཎཱདཱིཧི པལོབྷཡམཱནཱ ཧུཏྭཱ ཙིཏྟཾ ཀིལེསེཧི པརིཡཱདཱཡ ཏིཊྛཏི, ཏསྨཱ ཏཎྷཱཡ ཙིཏྟཾ པརིཡཱདཱཡ སནྟཱནེ ཏིཊྛམཱནཏྟཱ. ཀིལེསཝསེནཱཏི ཝཱིཏིཀྐམཀིལེསཝསེན. པརིཡུཊྛཱནཝསེནཱཏི ¶ ཝཱིཏིཀྐམནཾ ཨཔྤཏྭཱ ཨུཔྤཛྫམཱནཝསེན. ཡེཏི ཝུཏྟཔྤཀཱརཏཎྷཱསཧིཏཔུགྒལསདིསཱ. ཏེཏི ཏེ ཏཎྷཱབནྡྷནབདྡྷཱ ཙ ཨེདིསཀཱ ཙ པུགྒལཱ. ཛརཱམརཎཾ ཨནྭེནྟི ཛརཱམརཎཾ ཨཏིཀྐམིཏུཾ ན སཀྐུཎནྟི. ཨཡནྟི ཛརཱམརཎཱནུཔྤཝཏྟི ‘‘ཛརཱམརཎམནྭེནྟཱི’’ཏི ཨིམིནཱ ཝཙནེན བྷགཝཏཱ དསྶིཏཱཏི ཡོཛནཱ.

‘‘ཀཱམནྡྷཱ’’ཏིཨཱདིགཱཐཱཡ ཙེཝ ‘‘རཏྟོ’’ཏིཨཱདིགཱཐཱཡ ཙ པུབྦཱཔརསནྡྷི ཨཱཙརིཡེན ཝིབྷཏྟོ ¶ , ཨམྷེཧི ཙ ཉཱཏོ, ‘‘ཀཐཾ ‘ཡསྶ པཔཉྩཱ ཋིཏཱི ཙཱ’ཏིཨཱདིགཱཐཱསུ པུབྦཱཔརསནྡྷི ཨམྷེཧི ཝིཉྙཱཏབྦོ’’ཏི ཝཏྟབྦཏྟཱ ཡསྶ པཔཉྩཱ’’ཏིཨཱདི ཝུཏྟཾ. ཏསྶཱ གཱཐཱཡ – ཡསྶ མུནིནོ པཔཉྩཱ ཏཎྷཱམཱནདིཊྛཱི ཙ ནཏྠི, ཏཎྷཱམཱནདིཊྛཱིཧི ཨབྷིསངྑཏཱ སངྑཱརཱ ཙ ནཏྠི, ཋིཏཱི ཨནུསཡཱ ཏཎྷཱ ཙ ནཏྠི, སནྡཱནསདིསཾ ཏཎྷཱཔརིཡུཊྛཱནཾ ནཏྠི, པལིགྷསདིསོ མོཧོ ཙ ནཏྠི, སོ མུནི པཔཉྩཱདིཀཾ སབྦཾ ཝཱིཏིཝཏྟོ ཨཏིཀྐནྟོཏི ཝུཙྩཏི. ནིཏྟཎྷཾ ནིམཱནཾ ནིདིཊྛིཾ ནིསནྡཱནཾ ནིཔལིགྷཾ ལོཀེ ཙརནྟཾ ཏཾ མུནིཾ སདེཝཀོ ཏཎྷཱསཧིཏོ ལོཀོ ན ཝིཛཱནཱཏཱིཏི ཨཏྠོ.

གཱཐཱཡཾ པཔཉྩཱདཡོ བྷགཝཏཱ ཝུཏྟཱ, ‘‘ཀཏམེ ཏེ’’ཏི པུཙྪིཏབྦཏྟཱ ‘‘པཔཉྩཱ ནཱམཱ’’ཏིཨཱདི ཝུཏྟཾ. ཨཏྟནོ ཨཱདྷཱརཔུགྒལཾ སཾསཱརེ ཙིརཾ པཔཉྩནྟཱཔེནྟཱི ཏཎྷཱམཱནདིཊྛིཡོ ཙ, ཏཱཧི ཏཎྷཱམཱནདིཊྛཱིཧི སཧཛཱཏཝསེན ཝཱ ཨུཔཏྠམྦྷནཝསེན ཝཱ ཨབྷིསངྑཏཱ སངྑཱརཱ ཙ པཔཉྩཱ ནཱམ. སནྟཱནེ ཨཔྤཧཱིནཊྛེན ཨནུསཡཱ ཏཎྷཱ སཏྟཱནཾ ཏིཊྛནཧེཏུཏྟཱ ཋིཏཱི ནཱམ. པཝཏྟམཱནཱཡ ཏཎྷཱཡ ཡཾ པརིཡུཊྛཱནཉྩ ཚཏྟིཾསཏཎྷཱཡ ཛཱལིནིཡཱ ཡཱནི ཝིཙརིཏཱནི ཙ ཝུཏྟཱནི, ཨིདཾ སབྦཾ ཨཏྟནོ ཨཱདྷཱརཾ པུགྒལཾ བནྡྷནཊྛེན སནྡཱནསདིསཏྟཱ སནྡཱནཾ ནཱམ. མོཧོ ཨཏྟནོ ཨཱདྷཱརསྶ པུགྒལསྶ ནིབྦཱནནགརཔྤཝེསནསྶ པཊིསེདྷཀཏྟཱ པལིགྷསདིསཏྟཱ པལིགྷོ ནཱམ. ‘‘ཡསྶ པཔཉྩཱདཡོ ནཏྠི, སོ ཀིཾ ཝཱིཏིཝཏྟོ’’ཏི པུཙྪིཏབྦཏྟཱ ‘‘ཡེ ཙཱ’’ཏིཨཱདི ཝུཏྟཾ. ཡེ ཝུཏྟཔྤཀཱརཱ པཔཉྩཱ སངྑཱརཱ, ཡཱ ཙ ཝུཏྟཔྤཀཱརཱ ཋིཏི, ཡཾ ཝུཏྟཔྤཀཱརཾ སནྡཱནཉྩ, ཡཾ ཝུཏྟཔྤཀཱརཾ པལིགྷཉྩ ནཏྠཱིཏི ཝུཏྟཱ, སབྦཾ ཨེཏཾ པཔཉྩཱདིཀཾ ཡོ མུནི སམཏིཀྐནྟོ, ཨཡཾ མུནི ‘‘ནིཏྟཎྷོ’’ཏི ཝུཙྩཏཱིཏི དཊྛབྦོ.

༢༨. ‘‘ཡསྶ པཔཉྩཱཏིཨཱདིགཱཐཱཡཾ ཡེ པཔཉྩཱདཡོ ཝུཏྟཱ, ཏེསུ ཏཎྷཱམཱནདིཊྛིཧེཏུཀཱ སངྑཱརཱ ཀདཱ ཀཏིཝིདྷཾ ཕལཾ དེནྟི, ཏཾསངྑཱརསམྤཡུཏྟཱ ¶ ཏཎྷཱ ཀདཱ ཀཏིཝིདྷཾ ཕལཾ དེཏཱི’’ཏི པུཙྪིཏབྦཏྟཱ ‘‘ཏཏྠ པརིཡུཊྛཱནསངྑཱརཱ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ པཔཉྩསངྑཱརཱདཱིསུ. པརིཡུཊྛཱནསངྑཱརཱཏི ཝཱིཏིཀྐམཝསེན པཝཏྟཱ པརིཡུཊྛཱནཱ ཨཀུསལསངྑཱརཱ ཙེཏནཱ. དིཊྛདྷམྨཝེདནཱིཡཱདཱིཏི དིཊྛེ པསྶིཏབྦེ དྷམྨེ ཨཏྟབྷཱཝེ ཝེདནཱིཡཾ ཕལཾ དེཏཱིཏི དིཊྛདྷམྨཝེདནཱིཡཱ, དིཊྛེ དྷམྨེ ཕལཾ ཝེདེཏཱིཏི ཝཱ དིཊྛདྷམྨཝེདནཱིཡཱ. ཀཱ སཱ? ཨཔདུསྶནཱིཡཱདཱིསུ ཨཏིདུསྶནཱདིཝསེན པཝཏྟཱ པཋམཛཝནཙེཏནཱ. ཨུཔཔཛྫེ ཕལཾ ཝེདེཏཱིཏི ཨུཔཔཛྫཝེདནཱིཡཱ, སཏྟམཛཝནཙེཏནཱ. ཨཔརཱཔརིཡཱཡེ ཨཏྟབྷཱཝེ ཕལཾ ཝེདེཏཱིཏི ཨཔརཱཔརིཡཱཡཝེདནཱིཡཱ, མཛ྄ཛྷེ པཝཏྟཱ པཉྩ ཛཝནཙེཏནཱ. ཏིཕལདཱནཝསེན ཏིཝིདྷཱ སངྑཱརཱ. ཨེཝཾ ཨིམཱཡ ཏིཝིདྷཱཡ སངྑཱརཙེཏནཱཡ སམྤཡུཏྟཱ ཏིཝིདྷཱ ཏཎྷཱ ཏིཝིདྷཾ ཕལཾ དིཊྛེ ཝཱ དྷམྨེ ཨཏྟབྷཱཝེ ¶ , ཨུཔཔཛྫེ ཝཱ ཨནནྟརབྷཝེ, ཨཔརེ ཝཱ པརིཡཱཡེ བྷཝེ དེཏི ནིབྦཏྟེཏཱིཏི ཨེཝཾ ཕལནིབྦཏྟཀསངྑཱརཾ ཝཱ ཏཾསམྤཡུཏྟཾ ཏཎྷཾ ཝཱ བྷགཝཱ ཨཱཧ.

‘‘ཡཱཡ དེསནཱཡ, གཱཐཱཡ ཝཱ ཕལནིབྦཏྟཀཾ སངྑཱརཾ ཨཱཧ, སཱ དེསནཱ, གཱཐཱ ཝཱ ཀཏམེན དེསནཱབྷཱུཏེན ཝཱ ཨཔརེན ཡུཛྫཏཱི’’ཏི པུཙྪིཏབྦཏྟཱ ‘‘ཡཾ ལོབྷཔཀཏཾ ཀམྨཾ ཀརོཏཱི’’ཏིཨཱདི ཝུཏྟཾ. ཡཱ ‘‘ཡསྶ…པེ… ལོཀོ’’ཏི དེསནཱ ཙ ཡཱ ‘‘ཡཾ ལོབྷཔཀཏཾ ཀམྨཾ…པེ… ཨཔརེ ཝཱ པརིཡཱཡེ’’ཏི དེསནཱ ཙ ཝུཏྟཱ, བྷགཝཏོ ཨིདཾ དེསནཱདྭཡཾ ཨཉྙམཉྙཾ པུབྦཱཔརེན པུབྦཾ ཨཔརེན ཨཔརཾ པུབྦེན ཡུཛྫཏི ཡུཛྫནཾ ཨེཏི སམེཏི, ཡཐཱ གངྒོདཀཾ ཡམུནོདཀེན, ཡམུནོདཀམྤི གངྒོདཀེན སཾསནྡཏི སམེཏི. ‘‘ཡསྶ…པེ… ལོཀོ’’ཏི དེསནཱ ‘‘ཡཾ ལོབྷཔཀཏཾ…པེ… པརིཡཱཡེ’’ཏི དེསནཱཡ སཾསནྡཏི སམེཏི, ‘‘ཡཾ ལོབྷཔཀཏཾ…པེ… པརིཡཱཡེ’’ཏི དེསནཱཔི ‘‘ཡསྶ…པེ… ལོཀོ’’ཏི དེསནཱཡ སཾསནྡཏི སམེཏཱིཏི ཨཏྠོ གཧེཏབྦོ. ‘‘ཀཐཾ ཡུཛྫཏཱི’’ཏི པུཙྪིཏབྦཏྟཱ ‘‘ཏཏྠ པརིཡུཊྛཱན’’ནྟིཨཱདི ཝུཏྟཾ, དིཊྛདྷམྨཝེདནཱིཡཱདིཕལཏྟཡནིབྦཏྟཀཊྛེན ཡུཛྫཏཱིཏི ཝུཏྟཾ ཧོཏི.

ཡཾ ཡཾ སུཏྟཾ བྷགཝཏཱ དེསིཏཾ པུབྦཱཔརེན ཡུཛྫཏི, ཏཾ ཏཾ སུཏྟམྤི ནཱིཧརིཏྭཱ པུབྦཱཔརསཾསནྡནཾ དསྶེཏུཾ ‘‘ཡཐཱཧཱ’’ཏིཨཱདི ཝུཏྟཾ. སཾསནྡནཱཀཱརོ ཝུཏྟནཡཱནུསཱརེན གཧེཏབྦོ. ཏཏྠཱཏི ཏེསུ པརིཡུཊྛཱནསངྑཱརཏཎྷཱཝིཙརིཏེསུ. པརིཡུཊྛཱནནྟི རཱུཔཱརམྨཎཱདཱིནི ཨཡོནིསོམནསིཀཱརེན ཨཱརབྦྷ སཏྟསནྟཱནེ པཝཏྟཾ ཏཎྷཱཙརིཏཾ. པཊིསངྑཱནབལེནཱཏི ¶ ཨསུབྷཱནིཙྩཱདིདསྶནབལེན ཏདངྒཔྤཧཱནཝསེན པཧཱཏབྦཾ. སངྑཱརཱཏི དསྶནཔཧཱཏབྦཱ སངྑཱརཱ. དསྶནབལེནཱཏི དསྶནསངྑཱཏཔཋམམགྒཉཱཎབལེན པཧཱཏབྦཱ. ཚཏྟིཾས ཏཎྷཱཝིཙརིཏཱནཱིཏི དསྶནེན པཧཱཏབྦཏཎྷཱཝིཙརིཏེཧི ཨཝསེསཱནི ཚཏྟིཾས ཏཎྷཱཝིཙརིཏཱནི. ནིགྒཏཱ ཏཎྷཱ ཡསྶ སོ ནིཏྟཎྷོ, ནིཏྟཎྷསྶ བྷཱཝོ ནིཏྟཎྷཏཱ, ཀཱ སཱ? སཨུཔཱདིསེསཱ ནིབྦཱནདྷཱཏུ.

པཔཉྩསངྑཱརཱབྷིནནྡནཏྟཡཾ ཡདིཔི ཨཏྠཏོ ཨེཀཾ སམཱནཾ, དེསནཱཡ པན པདཀྑརཱདཱིཧི ཝིསེསོ ཨཏྠཱིཏི དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ.

‘‘ཡོཡཾ པུབྦཱཔརསནྡྷི ཨཱཙརིཡེན ཝིབྷཏྟོ, སོཡཾ ཀཏིཝིདྷོ’’ཏི པུཙྪིཏབྦཏྟཱ ‘‘སོ ཙཱཡཾ པུབྦཱཔརོ སནྡྷཱི’’ཏིཨཱདི ཝུཏྟཾ. ཨཊྛཀཐཱཡཾ པན ཝུཏྟཾ – ‘‘ན ཀེཝལཾ སུཏྟནྟརསཾསནྡནམེཝ པུབྦཱཔརསནྡྷི, ཨཐ ཁོ ཨཉྙོཔི ཨཏྠཱིཏི དསྶེཏུཾ ‘སོ ཙཱཡ’ནྟིཨཱདི ཝུཏྟ’’ནྟི (ནེཏྟི. ཨཊྛ. ༢༨). ཏཏྠ ཨཏྠསནྡྷཱིཏི ཀིརིཡཱཀཱརཀཱདིཝསེན ཨཏྠསྶ ཨཏྠེན སནྡྷི. པདསནྡྷཱིཏི ནཱམཔདཱདིཀསྶ ¶ ནཱམཔདཱདིཀནྟརེན སནྡྷི. དེསནཱསནྡྷཱིཏི ཝུཏྟཔྤཀཱརསྶ དེསནནྟརསྶ ཝུཏྟཔྤཀཱརེན དེསནནྟརེན སནྡྷི. ནིདྡེསསནྡྷཱིཏི ནིདྡེསནྟརསྶ ནིདྡེསནྟརེན སནྡྷི.

སནྡྷི ཙ ནཱམ ཨཏྠཱདཡོ མུཉྩིཏྭཱ ཨཉྙོ སབྷཱཝདྷམྨོ ནཱམ ནཏྠི, ཨཏྠཱདཱིནཉྩ ཚཨཏྠཔདཱདཱིསུ ཨཝརོདྷནཏོ ‘‘ཨཏྠསནྡྷི ཚཔྤདཱནཱི’’ཏིཨཱདི ཝུཏྟཾ.

ཨཏྠསནྡྷིབྱཉྫནསནྡྷཡོ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, ‘‘ཀཏམཱ དེསནཱསནྡྷཱི’’ཏི པུཙྪིཏབྦཏྟཱ ‘‘དེསནཱསནྡྷི ན ཙ པཐཝི’’ནྟིཨཱདི ཝུཏྟཾ. ཏཏྠ ན ཙ པཐཝིཾ ནིསྶཱཡ ཛྷཱཡཏི ཛྷཱཡཱི ཛྷཱཡཏི ཙཱཏི ཨེཏྠ ཛྷཱཡཱི ཛྷཱནསམངྒཱི པུགྒལོ པཐཝིཾ ནིསྶཱཡ ཨཱལམྦིཏྭཱ ན ཙ ཛྷཱཡཏི, སབྦསངྑཱརནིསྶཊཾ པན ནིབྦཱནཾ ནིསྶཱཡ ཨཱལམྦིཏྭཱ ཕལསམཱཔཏྟིཾ ཛྷཱཡཏི སམཱཔཛྫཏི ཨེཝཱཏི ཨཏྠོ དཊྛབྦོ. ན ཙ ཨཱཔནྟིཨཱདཱིསུཔི ཨེས ནཡོ ཡོཛེཏབྦོ. ཕལསམཱཔཏྟིསམངྒཱི པུགྒལོ ཧི པཐཝཱིཨཱདཡོ མུཉྩིཏྭཱ ནིབྦཱནམེཝ ཨཱརབྦྷ ཕལསམཱཔཏྟིཾ སམཱཔཛྫཏཱིཏི. ཨེཏྠ ཙ པཐཝཱིཨཱདཱིཧི མཧཱབྷཱུཏེཧི ཀཱམབྷཝརཱུཔབྷཝཱ གཧིཏཱ རཱུཔཔཊིབདྡྷཝུཏྟིཏཱཡ. ཨཱཀཱསཱནཉྩཱཡཏནཱདཱིཧིཔི ཨརཱུཔབྷཝོ གཧིཏོ, བྷཝཏྟཡཾ ཝཛྫེཏྭཱ ཙ ¶ ཛྷཱཡཏཱིཏི ཨདྷིཔྤཱཡོ. ཡདི པཐཝཱིཨཱདཡོ ནིསྶཱཡ ན ཛྷཱཡཱི ཛྷཱཡཏི ཙ, ཨེཝཾ སཏི ཨིདྷལོཀསངྑཱཏཾ སཏྟསནྟཱནཾ ཝཱ པརལོཀསངྑཱཏཾ སཏྟསནྟཱནཾ ཝཱ ཨནིནྡྲིཡསནྟཱནཾ ཝཱ ནིསྶཱཡ ཛྷཱཡཱི ཛྷཱཡཏཱིཏི ཨཱསངྐནཱིཡཏྟཱ ཏཾ པརིཧརནྟོ ‘‘ན ཙ ཨིམཾ ལོཀ’’ནྟིཨཱདིམཱཧ. ཏཏྠ ཨིམཾ ལོཀནྟི ཨིདྷལོཀསངྑཱཏོ དིཊྛོ ཨཏྟབྷཱཝོ སཏྟསནྟཱནོ ཝུཏྟོ, ཏསྨིཾ ནིསྶཱཡ ན ཛྷཱཡཏི ཛྷཱཡཱི ཛྷཱཡཏི ཙ. པརལོཀནྟི ཨིདྷལོཀཏོ ཨཉྙོ བྷཝནྟརསངྑཱཏོ སཏྟསནྟཱནོ ཝུཏྟོ, ཏསྨིཾ ནིསྶཱཡ ན ཙ ཛྷཱཡཏི ཛྷཱཡཱི ཛྷཱཡཏི ཙ.

ཡམིདཾ ཨུབྷཡནྟིཨཱདཱིསུ ཨིདཾ ཨུབྷཡཾ ཨིདྷལོཀཔརལོཀདྭཡཾ ཨནྟརེན ཝཛྫེཏྭཱ ཡཾ རཱུཔཱཡཏནཾ དིཊྛཾ, ཏཾ རཱུཔཱཡཏནམྤི. ཡཾ སདྡཱཡཏནཾ སུཏཾ, ཏཾ སདྡཱཡཏནམྤི. ཡཾ གནྡྷཱཡཏནརསཱཡཏནཕོཊྛབྦཱཡཏནཾ མུཏཾ, ཏཾ གནྡྷཱཡཏནརསཱཡཏནཕོཊྛབྦཱཡཏནམྤི. ཡཾ ཨཱཔོདྷཱཏུ ཨཱཀཱསདྷཱཏུ ལཀྑཎརཱུཔཾ ཨོཛཱསངྑཱཏཾ དྷམྨཱཡཏནེཀདེསརཱུཔཾ ཝིཉྙཱཏཾ, ཏཾ ཨཱཔོདྷཱཏཱདིཀཾ དྷམྨཱཡཏནེཀདེསརཱུཔམྤི. ཡཾ ཝཏྠུ པརིཡེསིཏཾ ཝཱ ཨཔརིཡེསིཏཾ ཝཱ སནྟིཀེ པཏྟཾ, ཏཾ ཝཏྠུམྤི. ཡཾ ཝཏྠུ པཏྟཾ ཝཱ ཨཔྤཏྟཾ ཝཱ པརིཡེསིཏཾ པརིཡེསནཱརཧཾ སུནྡརཾ, ཏཾ ཝཏྠུམྤི. ཡཾ ཝཏྠུ ཝིཏཀྐིཏཾ ཝིཏཀྐནཝསེན ཨཱལམྦིཏབྦཾ, ཏཾ ཝཏྠུམྤི. ཡཾ ཝཏྠུ ཝིཙཱརིཏཾ ཨནུམཛྫནཝསེན ཨཱལམྦིཏབྦཾ, ཏཾ ཝཏྠུམྤི. ཡཾ ཝཏྠུ མནསཱ ཙིཏྟེནེཝ ཨནུཙིནྟིཏཾ ཨནུཙིནྟནཝསེན ཨཱལམྦིཏབྦཾ, ཏཾ ཝཏྠུམྤི ནིསྶཱཡ ན ཛྷཱཡཏི ཛྷཱཡཱི ཛྷཱཡཏི ཙཱཏི ཡོཛནཱ ཀཱཏབྦཱ.

ཨེཏྠ ¶ དིཊྛཱདིཀཾ བཧིདྡྷཱརཱུཔམེཝ གཧེཏབྦཾ ཨནིནྡྲིཡབདྡྷརཱུཔསྶ ཨདྷིཔྤེཏཏྟཱ. ཏེནཱཧ ཨཊྛཀཐཱཙརིཡོ – ‘‘ཏདུབྷཡཝིནིམུཏྟོ ཨནིནྡྲིཡབདྡྷོ རཱུཔསནྟཱནོ’’ཏི (ནེཏྟི. ཨཊྛ. ༢༨). ‘‘ཡདི ཛྷཱཡཱི པུགྒལོ ཡཐཱཝུཏྟེ པཐཝཱིཨཱདཡོ ནིསྶཱཡ ན ཛྷཱཡཏི ཛྷཱཡཱི ཛྷཱཡཏི ཙ, ཨེཝཾ སཏི ཨཡཾ ཛྷཱཡཱི པུགྒལོ ཨིདཾ ནཱམ ནིསྶཱཡ ཛྷཱཡཏཱིཏི ལོཀེ ཀེནཙི ཉཱཡཏི ཀིཾ, ཨུདཱཧུ ན ཉཱཡཏཱི’’ཏི པུཙྪིཏབྦཏྟཱ ན ཉཱཡཏཱིཏི དསྶེཏུཾ ‘‘ཨཡཾ སདེཝཀེ ལོཀེ’’ཏིཨཱདིམཱཧ. ཏཏྠ ཕལསམཱཔཏྟིཛྷཱནེན ཛྷཱཡནྟོ ཨཡཾ ཁཱིཎཱསཝཔུགྒལོ སདེཝཀེ ལོཀེ…པེ… སདེཝམནུསྶཱཡ པཛཱཡ ཡཏྠ ཀཏྠཙིཔི ཨནིསྶིཏེན ཙིཏྟེན ཛྷཱཡཏཱིཏི སདེཝཀེ ལོཀེ…པེ… སདེཝམནུསྶཱཡ ¶ པཛཱཡ ཀེནཙི ན ཉཱཡཏཱིཏི ཨཏྠོ གཧེཏབྦོ. ཏེན ཝུཏྟཾ –

‘‘ནམོ ཏེ པུརིསཱཛཉྙ, ནམོ ཏེ པུརིསུཏྟམ;

ཡསྶ ཏེ ནཱབྷིཛཱནཱམ, ཀིཾ ཏྭཾ ནིསྶཱཡ ཛྷཱཡསཱི’’ཏི. (སཾ. ནི. ༣.༧༩; ནེཏྟི. ༡༠༤);

‘‘ཀེནཙི ཨཝིཉྙཱཡབྷཱཝོ ཀེན སུཏྟེན ཝིབྷཱཝེཏབྦོ’’ཏི པུཙྪིཏབྦཏྟཱ ཨིམིནཱ གོདྷིཀསུཏྟེན (སཾ. ནི. ༡.༡༥༩) ཝིབྷཱཝེཏབྦོཏི དསྶེཏུཾ ‘‘ཡཐཱ མཱརོ པཱཔིམཱ’’ཏིཨཱདི ཝུཏྟཾ. ཨཊྛཀཐཱཡཾ པན ‘‘ཨིདཱནི ཁཱིཎཱསཝཙིཏྟསྶ ཀཏྠཙིཔི ཨནིསྶིཏབྷཱཝཾ གོདྷིཀསུཏྟེན (སཾ. ནི. ༡.༡༥༩) ཝཀྐལིསུཏྟེན (སཾ. ནི. ༣.༨༧) ཙ ཝིབྷཱཝེཏུཾ ‘ཡཐཱ མཱརོ’ཏིཨཱདི ཝུཏྟ’’ནྟི (ནེཏྟི. ཨཊྛ. ༢༨) ཝུཏྟཾ. ཏཏྠ དཱནཱདིཔུཉྙཀཱརཀེ, པུཉྙེ ཝཱ མཱརེཏི ནིཝཱརེཏཱིཏི མཱརོ, ཨཏྟཧིཏཔརཧིཏེ མཱརེཏཱིཏི ཝཱ མཱརོ. པཱཔཙིཏྟུཔྤཱདཝནྟཏཱཡ པཱཔིམཱ. པུབྦཏྟབྷཱཝེ གོདྷསྶ གྷཱཏཀཏྟཱ ‘‘གོདྷིཀོ’’ཏི ལདྡྷནཱམསྶ པརིནིབྦཱཡནྟསྶ ཀུལཔུཏྟསྶ པརིནིབྦཱནཏོ ཨུདྡྷཾ པཊིསནྡྷཱདི ཝིཉྙཱཎཾ སམནྭེསནྟོ ན ཛཱནཱཏི ན པསྶཏི. ‘‘པརཙིཏྟཛཱནནཀོ མཱརོ ཀསྨཱ ན ཛཱནཱཏཱི’’ཏི ཝཏྟབྦཏྟཱ ‘‘སོ ཧཱི’’ཏིཨཱདི ཝུཏྟཾ. སོ གོདྷིཀོ ཧི ཡསྨཱ པཔཉྩཱཏཱིཏོ, ཏསྨཱ ཏཎྷཱཔཧཱནེན དིཊྛིནིསྶཡོཔི ཨསྶ གོདྷིཀསྶ ཡསྨཱ ནཏྠི, ཏསྨཱ ཙ ན ཛཱནཱཏཱིཏི.

‘‘གོདྷིཀསུཏྟེནེཝ ཝིབྷཱཝེཏབྦོ’’ཏི པུཙྪིཏབྦཏྟཱ ‘‘ཡཐཱ ཙཱ’’ཏིཨཱདི ཝུཏྟཾ. ‘‘གོདྷིཀསུཏྟཝཀྐལིསུཏྟེཧི ཨནུཔཱདིསེསཱཡ ནིབྦཱནདྷཱཏུཡཱ ཨནིསྶིཏབྷཱཝོ ཝིབྷཱཝིཏོ, ཨེཝཾ སཏི སཨུཔཱདིསེསནིབྦཱནདྷཱཏུཡཱ ཨནིསྶིཏབྷཱཝོ ཀེན ཝིཉྙཱཡཏཱིཏི ཨཏྠོ བྷཝེཡྻཱ’’ཏི ཝཏྟབྦཏྟཱ ཏདཱཔི ན ཝིཉྙཱཡཏིཡེཝཱཏི དསྶེཏུཾ ‘‘སདེཝཀེན ལོཀེནཱ’’ཏིཨཱདི ཝུཏྟཾ. ཏཏྠ སཨུཔཱདིསེསཱཡ ནིབྦཱནདྷཱཏུཡཱ ཕལསམཱཔཏྟིཛྷཱནེན ཛྷཱཡམཱནཱ ཨིམེ ཁཱིཎཱསཝཱ ཀཏྠཙི ཨནིསྶིཏཙིཏྟཱ ¶ ཛྷཱཡནྟཱིཏི སདེཝཀེན ལོཀེན ན ཉཱཡནྟི སམཱརཀེན…པེ… སདེཝམནུསྶཱཡ ན ཉཱཡནྟཱིཏི ཡོཛནཱ ཀཱཏབྦཱ. ཨནིསྶིཏཙིཏྟཱ ན ཉཱཡནྟཱིཏི ཨེཏྠ ཧི ན-ཀཱརོ ཙ ‘‘ཛྷཱཡམཱནཱ’’ཏི པདེ ན སམྦནྡྷིཏབྦོ ‘‘ན ཛྷཱཡམཱནཱ’’ཏི ཨཏྠསྶ སམྦྷཝཏོ. ‘‘ན ཉཱཡནྟཱི’’ཏི པན སམྦནྡྷིཏབྦོ ¶ ཧེཊྛཱ ཨཊྛཀཐཱཡཾ ཨེཝ ‘‘ལོཀེ ཀེནཙིཔི ན ཉཱཡཏཱི’’ཏི ཝུཏྟཏྟཱ. ཨཡཾ དེསནཱསནྡྷཱིཏི གོདྷིཀསུཏྟཝཀྐལིསུཏྟཱནཾ ཨཉྙམཉྙཾ ཨཏྠཝསེན སཾསནྡནཱ ནིདྡྷཱརིཏཱ ཝིཡ ‘‘ན ཙ པཐཝིཾ ནིསྶཱཡཱ’’ཏིཨཱདིདེསནཱཡ ཙ ‘‘ན ཙ ཨིམཾ ལོཀ’’ནྟིཨཱདིདེསནཱཡ ཙ ཡཱཡ དེསནཱཡ ཨཏྠཝསེན སཾསནྡནཱ ནིདྡྷཱརིཏཱ, ཏཱཡ དེསནཱཡ ཡཏྠ ཀཏྠཙི ཡཾ ཀིཉྩི ནིསྶཱཡ ཛྷཱཡཱི ན ཛྷཱཡཏི, ནིབྦཱནཾ ནིསྶཱཡ ཛྷཱཡཱི ཛྷཱཡཏཱིཏི ཨཏྠཝསེན ནིདྡྷཱརིཏཱ, ཨཡཾ སཾསནྡནཱ དེསནཱསནྡྷི ནཱམཱཏི ཨཏྠོ གཧེཏབྦོ.

དེསནཱསནྡྷི ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, ‘‘ཀཏམཱ ནིདྡེསསནྡྷཱི’’ཏི པུཙྪིཏབྦཏྟཱ ‘‘ཏཏྠ ཀཏམཱ ནིདྡེསསནྡྷཱིཏི ནིསྶིཏཙིཏྟཱ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ཙཏཱུསུ ཨཏྠསནྡྷིབྱཉྫནསནྡྷིདེསནཱསནྡྷིནིདྡེསསནྡྷཱིསུ ཡཱ སནྡྷི ‘‘ནིདྡེསསནྡྷཱི’’ཏི ཨུདྡིཊྛཱ, སཱ ནིདྡེསཏོ ཀཏམཱཏི པུཙྪཏཱིཏི ཨཏྠོ. ནིསྶིཏཙིཏྟཱཏི ཏཎྷཱདིཊྛིསཧཛཱཏཝསེན ཝཱ ཨུཔནིསྶཡཝསེན ཝཱ ནིསྶིཏཾ ཙིཏྟཾ ཡེསཾ པུཐུཛྫནཱནནྟི ནིསྶིཏཙིཏྟཱ, པུཐུཛྫནཱ པུགྒལཱ ནིདྡིསིཏབྦཱ ཨིམཱཡ དེསནཱཡ པུགྒལཱདྷིཊྛཱནཏྟཱ. ཡདི དེསནཱ དྷམྨཱདྷིཊྛཱནཱ, ཨེཝཾ སཏི ནིསྶིཏཾ ཙིཏྟཾ ཨེཏྠ སུཏྟཔྤདེསེསུ དེསིཏནྟི ནིསྶིཏཙིཏྟཱ ནིསྶིཏཙིཏྟཛཱནནཏྠཱཡ དེསིཏཱ སུཏྟཔྤདེསཱ. ཨནིསྶིཏཾ ཙིཏྟཾ ཡེསཾ ཨརིཡཔུགྒལཱནནྟི ཨནིསྶིཏཙིཏྟཱ, ཨརིཡཔུགྒལཱ ནིདྡིསིཏབྦཱ ཨིམཱཡ དེསནཱཡ པུགྒལཱདྷིཊྛཱནཏྟཱ. དྷམྨཱདྷིཊྛཱནཱཡ པན ཨནིསྶིཏཾ ཙིཏྟཾ ཡཏྠ སུཏྟཔྤདེསེསུ དེསིཏནྟི ཨནིསྶིཏཙིཏྟཱ, ཨནིསྶིཏཙིཏྟཛཱནནཏྠཱཡ དེསིཏཱ སུཏྟཔྤདེསཱ.

‘‘ནིསྶིཏཙིཏྟཱ ཀེན ནིདྡེསེན ནིདྡིསིཏབྦཱ, ཨནིསྶིཏཙིཏྟཱ ཀེན ནིདྡེསེན ནིདྡིསིཏབྦཱ’’ཏི པུཙྪིཏབྦཏྟཱ ‘‘ནིསྶིཏཙིཏྟཱ ཨཀུསལཔཀྑེན ནིདྡིསིཏབྦཱ’’ཏིཨཱདི ཝུཏྟཾ. ཨཀུསལཔཀྑེན ནིདྡེསེན ནིདྡིསིཏབྦཱ. ཀུསལཔཀྑེནཱཏིཨཱདཱིསུཔི ཨེས ནཡོ ཡོཛེཏབྦོ. ཨཀུསལཔཀྑསཱམཉྙཀུསལཔཀྑསཱམཉྙེཧི དསྶེཏྭཱ ཨཀུསལཝིསེསཀུསལཝིསེསེཧི དསྶེཏུཾ ‘‘ནིསྶིཏཙིཏྟཱ སཾཀིལེསེནཱ’’ཏིཨཱདི ཝུཏྟཾ. ཨཡཾ ནིདྡེསསནྡྷཱིཏི ཨཀུསལཔཀྑཱདིཀསྶ པུརིམནིདྡེསསྶ སཾཀིལེསཱདིཀེན པཙྪིམེན ནིདྡེསེན ནིསྶིཏཙིཏྟཝསེན ཨཡཾ སཾསནྡནཱ ཙ ནིདྡེསསནྡྷི ནཱམ. ཀུསལཔཀྑཱདིཀསྶ པུརིམསྶ ནིདྡེསསྶ ཝོདཱནཱདིཀེན པཙྪིམེན ནིདྡེསེན ཨནིསྶིཏཙིཏྟཝསེན ཨཡཾ སཾསནྡནཱ ཙ ནིདྡེསསནྡྷི ནཱམཱཏི ཝིབྷཛིཏྭཱ ཝེདིཏབྦཱ.

‘‘ཙཏུབྱཱུཧཧཱརསྶ ¶ ¶ ནེརུཏྟམདྷིཔྤཱཡནིདཱནཔུབྦཱཔརསནྡྷིཔྤབྷེདེན ཙེཝ ཨཏྠབྱཉྫནསནྡྷིནིདྡེསསནྡྷིདེསནཱསནྡྷིཔྤབྷེདེན ཙ ཝིབྷཛིཏབྦབྷཱཝོ ཀེན ཨམྷེཧི ཛཱནིཏབྦོ སདྡཧིཏབྦོ’’ཏི ཝཏྟབྦབྷཱཝཏོ ‘‘ཏེནཱཧཱ’’ཏིཨཱདི ཝུཏྟཾ. ཏཏྠ ཏེན ཏཐཱ ཝིབྷཛིཏབྦབྷཱཝེན ཨཱཡསྨཱ མཧཱཀཙྩཱནོ ‘‘ནེརུཏྟམདྷིཔྤཱཡོ’’ཏིཨཱདིཀཾ (ནེཏྟི. ༤ ཧཱརསངྑེཔ) ཡཾ ཝཙནཾ ཨཱཧ, ཏེན ཝཙནེན ཏུམྷེཧི ཙཏུབྱཱུཧཧཱརསྶ ཏཐཱ ཝིབྷཛིཏབྦབྷཱཝོ ཛཱནིཏབྦོ སདྡཧིཏབྦོཏི ཝུཏྟཾ ཧོཏི.

‘‘ཨེཏྟཱཝཏཱ ཙ ཙཏུབྱཱུཧཧཱརོ པརིཔུཎྞོ, ཨཉྙོ ནིཡུཏྟོ ནཏྠཱི’’ཏི ཝཏྟབྦཏྟཱ ‘‘ནིཡུཏྟོ ཙཏུབྱཱུཧོ ཧཱརོ’’ཏི ཝུཏྟཾ. ཏཏྠ ཡསྶཾ ཡསྶཾ པཱལི༹ཡཾ ཡོ ཡོ ཙཏུབྦིདྷོ, སོ སོ ཙཏུབྱཱུཧཧཱརོ ཙ ཡཐཱལཱབྷཝསེན ཡོཛིཏོ, ཏསྶཾ ཏསྶཾ པཱལི༹ཡཾ སོ སོ ཙཏུབྦིདྷོ ཙཏུབྱཱུཧཧཱརོ ཏཐཱ ནིདྡྷཱརེཏྭཱ ཡུཏྟོ ཡོཛིཏོཏི ཨཏྠོ དཊྛབྦོ.

ཨིཏི ཙཏུབྱཱུཧཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

༧. ཨཱཝཊྚཧཱརཝིབྷངྒཝིབྷཱཝནཱ

༢༩. ཡེན ཡེན སཾཝཎྞནཱཝིསེསབྷཱུཏེན ཙཏུབྱཱུཧཧཱརཝིབྷངྒེན ནེརུཏྟཱདཡོ ཝིབྷཏྟཱ, སོ…པེ… ཙཏུབྱཱུཧཧཱརཝིབྷངྒོ པརིཔུཎྞོ, ‘‘ཀཏམོ ཨཱཝཊྚོ ཧཱརཝིབྷངྒོ’’ཏི པུཙྪིཏབྦཏྟཱ ཏཏྠ ཀཏམོ ཨཱཝཊྚོ ཧཱརོ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ནིདྡིཊྛེསུ སོལ༹སསུ དེསནཱཧཱརཱདཱིསུ ཀཏམོ སཾཝཎྞནཱཝིསེསོ ཨཱཝཊྚོ ཧཱརོ ཨཱཝཊྚཧཱརཝིབྷངྒོ ནཱམཱཏི པུཙྪཏི. ‘‘ཨེཀམྷི པདཊྛཱནེ’’ནྟིཨཱདིནིདྡེསསྶ ཨིདཱནི མཡཱ ཝུཙྩམཱནོ ‘‘ཨཱརམྦྷཐཱ’’ཏིཨཱདིཀོ ཝིཏྠཱརསཾཝཎྞནཱཝིསེསོ ཨཱཝཊྚཧཱརཝིབྷངྒོ ནཱམཱཏི གཧིཏོ. ‘‘ཏཏྠ དེསནཱཡཾ ¶ ཨེཀསྨིཾ པདཊྛཱནེ ¶ དེསནཱརུལ༹ྷེ སེསཀཾ པདཊྛཱནཾ པརིཡེསཏི, པརིཡེསིཏྭཱ ཀཐཾ པཊིཔཀྑེ ཨཱཝཊྚེཏཱི’’ཏི ཝཏྟབྦཏྟཱ –

‘‘ཨཱརམྦྷཐ ནིཀྐམཐ, ཡུཉྫཐ བུདྡྷསཱསནེ;

དྷུནཱཐ མཙྩུནོ སེནཾ, ནལཱ༹གཱརཾཝ ཀུཉྫརོ’’ཏི. –

གཱཐཱ ཝུཏྟཱ. ཨིདྷ གཱཐཱཡཾ ཨེཀསྨིཾ པདཊྛཱནེ དེསནཱརུལ༹ྷེ སེསཀཾ པདཊྛཱནཾ པརིཡེསཏཱིཏི ཝུཏྟཾ ཧོཏི. གཱཐཱཏྠོ པན ཨཊྛཀཐཱཡཾ (ནེཏྟི. ཨཊྛ. ༢༩) ཝུཏྟོ.

‘‘ཨཱརམྦྷཐཱ’ཏིཨཱདིགཱཐཱཡཾ ཀཏརསྨིཾ པདཊྛཱནེ དེསནཱརུལ༹ྷེ ཀཏམཾ སེསཀཾ པདཊྛཱནཾ པརིཡེསཏཱི’’ཏི ཝཏྟབྦཏྟཱ ‘‘ཨཱརམྦྷཐ ནིཀྐམཐཱཏི ཝཱིརིཡསྶ པདཊྛཱན’’ནྟིཨཱདི ཝུཏྟཾ. ཏཏྠ ‘‘ཝཱིརིཡསྶ པདཊྛཱན’’ནྟི སཱམཉྙཝསེན ཝུཏྟམྤི ཨཱརམྦྷདྷཱཏུསངྑཱཏཾ ཝཱིརིཡཾ ནིཀྐམདྷཱཏུསངྑཱཏསྶ ཝཱིརིཡསྶ པདཊྛཱནཾ, ནིཀྐམདྷཱཏུསངྑཱཏཾ ཝཱིརིཡཾ པརཀྐམདྷཱཏུསངྑཱཏསྶ ཝཱིརིཡསྶ པདཊྛཱནཾ, པརཀྐམདྷཱཏུསངྑཱཏཾ ཝཱིརིཡཾ སམཐབྷཱཝནཱསཧིཏསྶ ཝཱིརིཡསྶ པདཊྛཱནནྟིཨཱདིནཱ པརིཡེསིཏབྦནྟི གཧེཏབྦཾ. ‘‘ཡུཉྫཐཱ’’ཏི ཨིམིནཱ ཝུཏྟཾ སམཐབྷཱཝནཱསཧིཏཾ ཝཱིརིཡཾ ‘‘བུདྡྷསཱསནེ’’ཏི ཨིམིནཱ ཝུཏྟསྶ མཧགྒཏསམཱདྷིསྶ པདཊྛཱནཾ, དེསནཱརུལ༹ྷཾ སུཁཱདིཀཾ སེསཀམྤི པདཊྛཱནཾ པརིཡེསིཏབྦཾ. ‘‘དྷུནཱཐ མཙྩུནོ སེན’’ནྟི པདེན གཧིཏཾ ཝིཔསྶནཱསཧིཏཾ ཝཱིརིཡཾ ཀིལེསདྷུནནེ སམཏྠཱཡ པཉྙཱཡ པདཊྛཱནཾ, དེསནཱརུལ༹ྷཾ སམཱདྷིཨཱདིཀཾ སེསཀམྤི པདཊྛཱནཾ པརིཡེསིཏབྦཾ.

‘‘ཡདི ‘ཨཱརམྦྷཐཱ’ཏིཨཱདིཀཾ ཝུཏྟཾ ཝཱིརིཡཾ སཱམཉྙབྷཱུཏཱནཾ ཝཱིརིཡསམཱདྷིཔཉྙཱནཾཡེཝ པདཊྛཱནཾ སིཡཱ, ཨེཝཾ སཏི ཀཐཾ ཝཊྚམཱུལཾ ཚིནྡིཏྭཱ ཝིཝཊྚཾ པཱཔེསྶནྟཱི’’ཏི ཝཏྟབྦཏྟཱ པུན ‘‘ཨཱརམྦྷཐ ནིཀྐམཐཱཏི ཝཱིརིཡིནྡྲིཡསྶ པདཊྛཱན’’ནྟིཨཱདི ཝུཏྟཾ. ཨཱདྷིཔཙྩཀིཙྩཏཱཡ ཡུཏྟསྶཱཔི ཝཱིརིཡཱདྷིཀསྶ པདཊྛཱནཏྟཱ ཨཱརབྷནྟཱ ཡོགཱཝཙརཔུགྒལཱ ཝཊྚམཱུལཾ ཚིནྡིཏྭཱ ཝིཝཊྚཾ པཱཔེནྟཱིཏི ཝུཏྟཾ ཧོཏི. ‘‘ཨཱརམྦྷཐཱ’’ཏིཨཱདིཀཱ པན ཡསྨཱ ཝཱིརིཡཱརམྦྷཝཏྠུཨཱདིདེསནཱ ཧོཏི, ཏསྨཱ ཨཱརམྦྷཝཏྠུཨཱདཱིནིཡེཝ སཾཝཎྞིཏཱནི པདཊྛཱནནྟི ཙོདནཾ མནསི ཀཏྭཱ ཨཱཧ ‘‘ཨིམཱནི པདཊྛཱནཱནི དེསནཱ’’ཏི. ‘‘ཨཱརམྦྷཐཱ’’ཏིཨཱདིཀཱ ཡཐཱཝུཏྟཔདཊྛཱནཱནི དེསནཱ ཧོཏི, ན ཝཱིརིཡཱརམྦྷཝཏྠུཨཱདཱིནི, ཏསྨཱ པདཊྛཱནཾཡེཝ སཾཝཎྞིཏནྟི དཊྛབྦཾ.

ཨེཝཾ ¶ ‘‘ཨཱརམྦྷཐཱ’’ཏིཨཱདིདེསནཱཡ པདཊྛཱནཝསེན ཨཏྠོ ཝིབྷཏྟོ, ཨམྷེཧི ཙ ཉཱཏོ, ‘‘ཀཐཾ ཏསྶཱཡེཝ དེསནཱཡ པཊིཔཀྑཝསེན ཨཏྠོ ཝིབྷཛིཏབྦོ’’ཏི ཝཏྟབྦཏྟཱ ‘‘ཨཡུཉྫནྟཱནཾ ཝཱ’’ཏིཨཱདི ¶ ཝུཏྟཾ. ཏཏྠ ཡོགེ བྷཱཝནཱཡཾ ཨཡུཉྫནྟཱནཾ སཏྟཱནཾ ཨཔརིཔཀྐཉཱཎཱནཾ ཡོགེ ཡོགཧེཏུ ཝཱསནཱབྷཱགིཡཝསེན ཨཱཡཏིཾ ཛཱནནཏྠཱཡ ‘‘ཨཱརམྦྷཐཱ’’ཏིཨཱདིདེསནཱ ཨཱརདྡྷཱ. ཡུཉྫནྟཱནཾ པརིཔཀྐཉཱཎཱནཾ སཏྟཱནཾ ཨཱརམྦྷེ ཨཱརམྦྷཧེཏུ དིཊྛེཝ དྷམྨེ པརིཛཱནནཏྠཱཡ ‘‘ཨཱརམྦྷཐཱ’’ཏིཨཱདིདེསནཱ ཨཱརདྡྷཱ.

ཏཏྠ ཏེསུ ཡུཉྫནྟཱཡུཉྫནྟེསུ པརིཔཀྐཱཔརིཔཀྐཉཱཎེསུ ཡེ ཨཔརིཔཀྐཉཱཎཱ སཏྟཱ ན ཡུཉྫནྟི, ཏེ ཨཔརིཔཀྐཉཱཎཱ སཏྟཱ པམཱདམཱུལཀཱ ཧུཏྭཱ ཡོགེ བྷཱཝནཱཡཾ ཡེན པམཱདེན ན ཡུཉྫནྟི, སོ པམཱདོ ཏཎྷཱམཱུལཀོ པམཱདོ, ཨཝིཛྫཱམཱུལཀོ པམཱདོཏི དུབྦིདྷོ ཧོཏི. ཏཏྠ ཏསྨིཾ དུབྦིདྷེ པམཱདེ ཨཉྙཱཎེན ནིཝུཏོ ཨཝིཛྫཱམཱུལཀོ སཏྟོ ཡེན པམཱདེན ཉེཡྻཊྛཱནཾ ‘‘ཨིམེ ཨུཔྤཱདཝཡདྷམྨཱ པཉྩཀྑནྡྷཱ ཉེཡྻཊྛཱནཾ ནཱམཱ’’ཏི ནཔྤཛཱནཱཏི, ཨཡཾ ཨཉྙཱཎཧེཏུཀོ པམཱདོ ཨཝིཛྫཱམཱུལཀོ པམཱདཱ ནཱམ. ཡོ པམཱདོ ཏཎྷཱམཱུལཀོ, སོ པམཱདོ ཏིཝིདྷོ ཨནུཔྤནྣཱནཾ བྷོགཱནཾ ཨུཔྤཱདཱཡ པརིཡེསནྟོ ཏཎྷིཀོ སཏྟོ ཡཾ པམཱདཾ ཨཱཔཛྫཏི, ཨཡཾ པམཱདོ ཙ, ཨུཔྤནྣཱནཾ བྷོགཱནཾ ཋིཏཏྠཱཡ རཀྑནྟོ ཏཎྷིཀོ སཏྟོ ཨཱརཀྑནིམིཏྟཾ ཡཾ པམཱདཾ ཨཱཔཛྫཏི, ཨཡཾ པམཱདོ ཙ, ཋིཏཾ བྷོགཾ པརིབྷུཉྫནྟོ ཏཎྷིཀོ སཏྟོ པརིབྷོགནིམིཏྟཾ ཡཾ པམཱདཾ ཨཱཔཛྫཏི, ཨཡཾ པམཱདོ ཙཱཏི ཏིཝིདྷོ ཧོཏི. ཨིཏི ལོཀེ ཨཡཾ པམཱདོ ཙཏུབྦིདྷོ ཨཝིཛྫཱཔདཊྛཱནོ ཨེཀཝིདྷོ པམཱདོ, ཏཎྷཱཔདཊྛཱནོ ཏིཝིདྷོ པམཱདོཏི ཙཏུབྦིདྷོ ཧོཏི. ཏཏྠ ཏཱསུ ཨཝིཛྫཱཏཎྷཱསུ ནཱམཀཱཡོ ཕསྶཱདིནཱམསམཱུཧོ ཨཝིཛྫཱཡ པདཊྛཱནཾ, རཱུཔཀཱཡོ པཐཝཱིཨཱདིརཱུཔསམཱུཧོ ཏཎྷཱཡ པདཊྛཱནཾ ཧོཏི. ཨིདཾ ཝུཏྟཾ ཧོཏི – ཨཱརམྦྷདྷཱཏུནིཀྐམདྷཱཏུསངྑཱཏསྶ ཝཱིརིཡསྶ པཊིཔཀྑོ ཙཏུབྦིདྷོ པམཱདོ ནིདྡྷཱརེཏབྦོ, ནིདྡྷཱརེཏྭཱ ཨེཀཝིདྷསྶ པམཱདསྶ ཨཝིཛྫཱ པདཊྛཱནཾ, ཏིཝིདྷསྶ པམཱདསྶ ཏཎྷཱ པདཊྛཱནཾ. ཨཝིཛྫཱཡ ནཱམཀཱཡོ པདཊྛཱནཾ, ཏཎྷཱཡ རཱུཔཀཱཡོ པདཊྛཱནནྟི པཊིཔཀྑེ ཨཱཝཊྚེཏྭཱ པདཊྛཱནཾ པརིཡེསིཏབྦནྟི.

‘‘ཀསྨཱ ¶ ནཱམཀཱཡོ ཨཝིཛྫཱཡ པདཊྛཱནཾ བྷཝཏི, རཱུཔཀཱཡོ ཏཎྷཱཡ པདཊྛཱནཾ བྷཝཏཱི’’ཏི པུཙྪིཏབྦཏྟཱ ‘‘ཏཾ ཀིསྶ ཧེཏཱུ’’ཏི པུཙྪིཏྭཱ ‘‘རཱུཔཱིསུ བྷཝེསུ ཨཛ྄ཛྷོསཱནཾ, ཨརཱུཔཱིསུ སམྨོཧོ’’ཏི ཝུཏྟཾ. རཱུཔཱིསུ བྷཝེསུ རཱུཔདྷམྨེསུ ཨཧཾམམཱདིཝསེན ཨཛ྄ཛྷོསཱནཾ ཏཎྷཱབྷིནིཝེསོ སཏྟེསུ པཏིཊྛིཏོ ཡསྨཱ ཧོཏི, ཏསྨཱ རཱུཔཀཱཡོ ཏཎྷཱཡ པདཊྛཱནཾ བྷཝཏི. ཨནམཏགྒེ ཧི སཾསཱརེ ཨིཏྠིཔུརིསཱ ཨཉྙམཉྙརཱུཔཱབྷིརཱམཱ བྷཝནྟི. ཨརཱུཔཱིསུ ཕསྶཱདཱིསུ སུཁུམབྷཱཝཏོ སམྨོཧོ སཏྟེསུ པཏིཊྛིཏོ ཡསྨཱ ཧོཏི, ཏསྨཱ ནཱམཀཱཡོ ཨཝིཛྫཱཡ པདཊྛཱནཾ བྷཝཏཱིཏི ཡོཛནཱ ཀཱཏབྦཱ. ཨིདཾ ཝུཏྟཾ ཧོཏི – རཱུཔཀཱཡནཱམཀཱཡེསུ ཨཱརམྨཎཀརཎཝསེན ཏཎྷཱཡ ¶ ཙ ཨཝིཛྫཱཡ ཙ ཨུཔྤཛྫནཏོ རཱུཔཀཱཡོ ཏཎྷཱཡ པདཊྛཱནཾ, ནཱམཀཱཡོ ཨཝིཛྫཱཡ པདཊྛཱནནྟི ནཱིཧརིཏབྦཱཝཱཏི.

‘‘ཀཏམོ རཱུཔཀཱཡོ, ཀཏམོ ནཱམཀཱཡོ’’ཏི པུཙྪིཏབྦཏྟཱ ‘‘ཏཏྠ རཱུཔཀཱཡོ རཱུཔཀྑནྡྷོ, ནཱམཀཱཡོ ཙཏྟཱརོ ཨརཱུཔིནོ ཁནྡྷཱ’’ཏི ཝུཏྟཾ. ཏཏྠ ཏེསུ རཱུཔཀཱཡནཱམཀཱཡེསུ རཱུཔཀཱཡོ རཱུཔསམཱུཧོ ནཱམ རཱུཔཀྑནྡྷོ ཧོཏི, ནཱམཀཱཡོ ནཱམསམཱུཧོ ནཱམ ཙཏྟཱརོ ཨརཱུཔིནོ ཁནྡྷཱཏི. ཨིམེ པཉྩཀྑནྡྷཱ ཨཝིཛྫཱཏཎྷཱནཾ ཨཱརམྨཎཏྟཱ སཨུཔཱདཱནཱ བྷཝེཡྻུཾ, ‘‘ཀཏམེན ཨུཔཱདཱནེན སཨུཔཱདཱནཱ བྷཝནྟཱི’’ཏི པུཙྪིཏབྦཏྟཱ ཏཐེཝ པུཙྪིཏྭཱ ཝིསྶཛྫེཏུཾ ‘‘ཨིམེ པཉྩཀྑནྡྷཱ ཀཏམེན ཨུཔཱདཱནེན སཨུཔཱདཱནཱ? ཏཎྷཱཡ ཙ ཨཝིཛྫཱཡ ཙཱ’’ཏི ཝུཏྟཾ. ཏཏྠ ཨུཔཱདཱནབྷཱུཏཱཡ ཏཎྷཱཡ ཙ ཨུཔཱདཱནབྷཱུཏཱཡ ཨཝིཛྫཱཡ ཙ ཨིམེ པཉྩཀྑནྡྷཱ སཨུཔཱདཱནཱ ནཱམ བྷཝནྟཱིཏི ཡོཛནཱ ཀཱཏབྦཱ.

‘‘ཀིཏྟཀཱནི ཨུཔཱདཱནཱནི ཏཎྷཱ ནཱམ བྷཝནྟི, ཀིཏྟཀཱནི ཨུཔཱདཱནཱནི ཨཝིཛྫཱ ནཱམ བྷཝནྟཱི’’ཏི པུཙྪིཏབྦཏྟཱ ‘‘ཏཏྠ ཏཎྷཱ དྭེ’’ཏིཨཱདི ཝུཏྟཾ. ཏཏྠཱཏི ཏཱསུ ཏཎྷཱཨཝིཛྫཱསུ. ཀཱམུཔཱདཱནཉྩ སཱིལབྦཏུཔཱདཱནཉྩ དྭེ ཨུཔཱདཱནཱནི ཏཎྷཱ ནཱམ བྷཝནྟི. ཏཎྷཱཝསེན ཧི ‘‘མམ སཱིལཾ, མམ ཝཏ’’ནྟི པརཱམསནཾ བྷཝཏི. དིཊྛུཔཱདཱནཉྩ ཨཏྟཝཱདུཔཱདཱནཉྩ དྭེ ཨུཔཱདཱནཱནི ཨཝིཛྫཱ ནཱམ བྷཝནྟི. ཨཝིཛྫཱཝསེན ཧི སསྶཏདིཊྛི ཙེཝ ཨཧཾམམཱདིདིཊྛི ཙ བྷཝནྟི. ‘‘ཨིམེཧི ཙཏཱུཧི ཨུཔཱདཱནེཧི སཨུཔཱདཱནཀྑནྡྷཱ ཙཏཱུསུ སཙྩེསུ ཀིཏྟཀཾ སཙྩཾ ནཱམཱ’’ཏི པུཙྪིཏབྦཏྟཱ ‘‘ཨིམེཧཱི’’ཏིཨཱདི ཝུཏྟཾ. ཡེ ལོཀིཡཀྑནྡྷཱ སཨུཔཱདཱནཱ ཁནྡྷཱ བྷཝནྟི, ཨུཔཱདཱནེན ཧི ¶ ཨུཔཱདཱནཱནིཔི བྷཝནྟི, ཨིདཾ སཨུཔཱདཱནཀྑནྡྷཔཉྩཀཾ དུཀྑཾ དུཀྑསཙྩཾ ནཱམ. ཡཱནི ཙཏྟཱརི ཨུཔཱདཱནཱནི དུཀྑཀཱརཎཱནི བྷཝནྟི, ཨཡཾ ཨུཔཱདཱནཙཏུཀྐོ སམུདཡོ སམུདཡསཙྩཾ ནཱམ བྷཝཏི. པཉྩཀྑནྡྷཱཏི སཨུཔཱདཱནཱ པཉྩཀྑནྡྷཱ དུཀྑཝཏྠུབྷཱཝཏོ དུཀྑཾ. ཏེསནྟི སཨུཔཱདཱནཱནཾ པཉྩཀྑནྡྷཱནཾ. དྷམྨཾ དེསེཏཱིཏི ‘‘ཨཱརམྦྷཐཱ’’ཏིཨཱདིཀཾ དྷམྨཾ ཝེནེཡྻཱནུརཱུཔཾ བྷགཝཱ དེསེཏི. སཱམཉྙེན པུབྦེ ཝུཏྟམྤི ཨཏྠཝསེན ཝིསེསཾ དསྶེཏུཾ པུན ‘‘དུཀྑསྶ པརིཉྙཱཡ, སམུདཡསྶ པཧཱནཱཡཱ’’ཏི ཝུཏྟཾ.

༣༠. ཨཱརམྦྷཔཊིཔཀྑབྷཱུཏཔམཱདཝསེན པུརིམསཙྩདྭཡཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཨིཏརསཙྩདྭཡཾ ཀཐཾ ནིདྡྷཱརིཏབྦ’’ནྟི ཝཏྟབྦཏྟཱ ཏཾ དྭཡམྤི པམཱདམུཁེནེཝ ནིདྡྷཱརིཏབྦནྟི དསྶེཏུཾ ‘‘ཏཏྠ ཡོ ཏིཝིདྷོ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ཏཎྷཱམཱུལཀཨཝིཛྫཱམཱུལཀེསུ པམཱདེསུ. ཏསྶཱཏི ཏིཝིདྷསྶ ཏཎྷཱམཱུལཀསྶ པམཱདསྶ. སམྤཊིཝེདྷེནཱཏི ཨསྶཱདཱདཱིནཾ པརིཛཱནནེན. རཀྑཎཱཏི ཨཏྟཙིཏྟསྶ རཀྑཎསངྑཱཏཱ. པཊིསཾཧརཎཱཏི ‘‘ཏསྶཱ’’ཏི ¶ ཨིམིནཱ ཝུཏྟསྶ པམཱདསྶ པཊིཔཀྑབྷཱུཏེན ཨཔྤམཱདཱནནུཡོགེན སཾཧརཎཱ ཡཱ ཁེཔནཱ ཨཏྠི, ཨཡཾ པམཱདསྶ པཊིཔཀྑབྷཱུཏེན ཨཔྤམཱདཱནུཡོགེན པཝཏྟཱ ཁེཔནསངྑཱཏཱ བྷཱཝནཱ སམཐོ ནཱམཱཏི པམཱདསྶ པཊིཔཀྑམུཁེན པུན ཨཱཝཊྚེཏྭཱ སམཐོ ནིདྡྷཱརིཏོཏི.

‘‘སོ སམཐོ ཀཐཾ ཀེན ཨུཔཱཡེན བྷཝཏཱི’’ཏི པུཙྪིཏབྦཏྟཱ ཏཐཱ པུཙྪིཏྭཱ ཨུཔཱཡཾ དསྶེཏུཾ ‘‘སོ ཀཐ’’ནྟིཨཱདི ཝུཏྟཾ. ཏཏྠ ཀཐནྟི ཀེན ཨུཔཱཡེན. ‘‘ཀཱམེནྟཱིཏི ཀཱམཱ, ཀཱམཱིཡནྟཱིཏི ཝཱ ཀཱམཱ’’ཏི ཝུཏྟཱནཾ དྭིནྣཾ ཀཱམཱནཾ པཊིཙྩ ཨུཔྤཛྫམཱནཾ ཨསྶཱདཉྩ, ‘‘ཨཔྤསྶཱདཱ ཀཱམཱ བཧུདུཀྑཱ’’ཏིཨཱདི (མ. ནི. ༡.༢༣༥) ཝཙནཏོ ཨཔྤསྶཱདནཱིཡཱནཾ ཀཱམཱནཾ པཊིཙྩ ཨུཔྤཛྫམཱནཾ ཨཱདཱིནཝཉྩ. ཀཱམཱནནྟི ཙ ཀམྨཏྠེ སཱམིཝཙནཾ. ཏེན ཝུཏྟཾ –‘‘ཀཱམེ པཊིཙྩཱ’’ཏི (ནེཏྟི. ཨཊྛ. ༣༠). ‘‘ཀཱམཱནམེཏཾ ནིསྶརཎཾ, ཡདིདཾ ནེཀྑམྨ’’ནྟི (ཨིཏིཝུ. ༧༢) ཝཙནཏོ ནིསྶརཎནྟི ཨིདྷ པཋམཛ྄ཛྷཱནཾ ཨདྷིཔྤེཏཾ. ཝོཀཱརནྟི ཨེཏྠ ཝ-ཀཱརོ ཨཱགམོ, ཨོ-ཀཱརཾ ལཱམཀབྷཱཝཾ. ཨཱནིསཾསནྟི ཙཏུཔཱརིསུདྡྷིསཱིལཱདིཀཾ. ཡདཱ ཛཱནཱཏི, ཏདཱ ཏེན ཨུཔཱཡེན སམཐོ བྷཝཏཱིཏི ཨཏྠོ.

སམཐོ ¶ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཀཏམཱ ཝིཔསྶནཱ’’ཏི པུཙྪིཏབྦཏྟཱ ཝིཔསྶནཾ ཝིབྷཛིཏུཾ ‘‘ཏཏྠ ཡཱ ཝཱིམཾསཱ’’ཏིཨཱདི ཝུཏྟཾ. ཨཐ ཝཱ ཀཱམཱནཾ ཨསྶཱདཱདཡོ ཡདཱ ཛཱནཱཏི, ཏདཱ སམཐོ བྷཝཏཱིཏི ཝུཏྟོ, ‘‘ཏསྨིཾ སམཐེ བྷཝམཱནེ སཏི ཀཏམཱ བྷཝཏཱི’’ཏི པུཙྪིཏབྦཏྟཱ ‘‘ཏཏྠ ཡཱ ཝཱིམཾསཱ’’ཏིཨཱདི ཝུཏྟཾ. ཏཏྠ ཏཏྠཱཏི ཏསྨིཾ སམཐེ བྷཝམཱནེ སཏི ཨསྶཱདཱདཱིནཾ ཡཱ ཨནིཙྩཱདིཝཱིམཾསཱ ཨུཔཔརིཀྑཱ པཉྙཱ བྷཝཏི, ཨཡཾ ཝཱིམཾསཱ ཨུཔཔརིཀྑཱ པཉྙཱ ཝིསེསེན པསྶནཏོ ཝིཔསྶནཱ ནཱམ. ཨཐ ཝཱ ཏིཝིདྷསྶ ཏཎྷཱམཱུལཀསྶ པམཱདསྶ སམྤཊིཝེདྷེན རཀྑཎཱ པཊིསཾཧརཎཱ, ཨཡཾ སམཐོཏི ཨཱཙརིཡེན ཝུཏྟོ, ‘‘ཀཏམཱ ཝིཔསྶནཱ’’ཏི པུཙྪིཏབྦཏྟཱ ‘‘ཏཏྠ ཡཱ ཝཱིམཾསཱ’’ཏིཨཱདི ཝུཏྟཾ. ཏཏྠ ཏཏྠཱཏི ཏསྨིཾ ཡཐཱཝུཏྟེ སམཐེ སཏི ཡཐཱཝུཏྟསྶ པམཱདསྶ ཨནིཙྩཱདིཝསེན ཡཱ ཝཱིམཾསཱ ཨུཔཔརིཀྑཱ པཉྙཱ ཨུཔྤནྣཱ, ཨཡཾ ཝཱིམཾསཱ ཨུཔཔརིཀྑཱ པཉྙཱ ཝིསེསེན པསྶནཏོ ཝིཔསྶནཱ ནཱམ. ཝཱིམཾསཱཝ དུབྦལཱ, ཨུཔཔརིཀྑཱ བལཝཏཱིཏི ཝིསེསོ.

སམཐོ ཙེཝ ཝིཔསྶནཱ ཙ དྭེ དྷམྨཱ ཨཱཙརིཡེན ནིདྡྷཱརིཏཱ, ‘‘ཨིམེ ནིདྡྷཱརིཏཱ དྭེ དྷམྨཱ ཀིཾ གཙྪནྟཱི’’ཏི ཝཏྟབྦཏྟཱ ‘‘ཨིམེ དྭེ’’ཏིཨཱདི ཝུཏྟཾ. སམཐོ སམཐབྷཱཝནཱཔཱརིཔཱུརིཾ གཙྪཏི, ཝིཔསྶནཱ ཝིཔསྶནཱབྷཱཝནཱཔཱརིཔཱུརིཾ གཙྪཏི. ‘‘ཨིམེསུ དྭཱིསུ དྷམྨེསུ བྷཱཝིཡམཱནེསུ ཀཏམེ ཡོགཱཝཙརེན པཧཱིཡནྟཱི’’ཏི ཝཏྟབྦཏྟཱ ‘‘ཨིམེསཱུ’’ཏིཨཱདི ཝུཏྟཾ. སམཐེ དྷམྨེ བྷཱཝིཡམཱནེ ཏཎྷཱ ¶ ཡོགཱཝཙརེན པཧཱིཡཏི, ཝིཔསྶནཱཡ བྷཱཝིཡམཱནཱཡ ཨཝིཛྫཱ ཡོགཱཝཙརེན པཧཱིཡཏཱིཏི ཨིམེ དྭེ པཧཱཏབྦཱ དྷམྨཱ པཧཱིཡནྟི ཏཎྷཱ ཙེཝ ཨཝིཛྫཱ ཙ. ‘‘ཨིམེསུ དྭཱིསུ དྷམྨེསུ པཧཱིཡམཱནེསུ ཀཏམེ དྷམྨཱ ནིརུཛ྄ཛྷནྟཱི’’ཏི པུཙྪིཏབྦཏྟཱ ཨུཔཱདཱནཱདཡོཔི ནིརུཛ྄ཛྷནྟཱིཏི སཀལཝཊྚདུཀྑནིརོདྷཾ དསྶེནྟོ ‘‘ཨིམེསུ དྭཱིསུ དྷམྨེསུ པཧཱིནེསཱུ’’ཏིཨཱདིམཱཧ. ཏཏྠ ཏཎྷཱཡ སམཐབྷཱཝནཱཡ པཧཱིཡམཱནཱཡ, ཨཝིཛྫཱཡ ཝིཔསྶནཱབྷཱཝནཱཡ པཧཱིཡམཱནཱཡ ཨིམེསུ དྭཱིསུ དྷམྨེསུ དྭཱིཧི བྷཱཝནཱཧི པཧཱིནེསུ ཀཱམུཔཱདཱནཱདཱིནི ཙཏྟཱརི ཨུཔཱདཱནཱནི ཝིཀྑམྦྷནསམུཙྪེདཝསེན ནིརུཛ྄ཛྷནྟི, ན བྷངྒཀྑཎཝསེན.

ཨེཏྠཱཧ – ‘‘ཏཎྷཱནིརོདྷཱ ཨུཔཱདཱནནིརོདྷོ’’ཏི ཝུཏྟཏྟཱ ‘‘ཏཎྷཱཡ པཧཱིཡམཱནཱཡ ཨུཔཱདཱནཱནི ནིརུཛ྄ཛྷནྟཱི’’ཏི ཝཙནཾ ཡུཏྟཾ ཧོཏུ, ཀཐཾ ཨཝིཛྫཱཡ པཧཱིཡམཱནཱཡ ཨུཔཱདཱནཱནི ནིརུཛ྄ཛྷནྟཱིཏི? ‘‘ཏཎྷཱནིརོདྷཱ ཨུཔཱདཱནནིརོདྷོ’’ཏི ¶ པཱཋེ ཨཝིཛྫཱསཧིཏཏཎྷཱནིརོདྷཱ ཨུཔཱདཱནནིརོདྷོཏི ཨཏྠསམྦྷཝཏོ. ཡཐཱ ཧི ཏཎྷཱསཧིཏཱཝ ཨཝིཛྫཱ སངྑཱརཱནཾ པཙྩཡོ, ཨེཝཾ ཨཝིཛྫཱསཧིཏཱཝ ཏཎྷཱ ཨུཔཱདཱནཱནཾ པཙྩཡོ ཧོཏཱིཏི ཨཝིཛྫཱསཧིཏཏཎྷཱནིརོདྷཱ ཨུཔཱདཱནནིརོདྷོཏི ཨཏྠོ སམྦྷཝཏཱིཏི གཧེཏབྦོ. ཝིཀྑམྦྷནསམུཙྪེདཝསེན ཨུཔཱདཱནནིརོདྷཱ ཏཐེཝ བྷཝནིརོདྷོཏི ཨེས ནཡོ སེསེསུཔི. ཨེཝམེཏསྶ ཀེཝལསྶ དུཀྑཀྑནྡྷསྶ ནིརོདྷོཏི ཨེཏྠཱཔི ཏཎྷཱསཧིཏཨཝིཛྫཱནིརོདྷཱ སངྑཱརནིརོདྷོཏིཨཱདིཀོ གཧིཏོཏི དཊྛབྦོ. ཨིཏཱིཏི ཨེཝཾ ཝིསབྷཱགསབྷཱགདྷམྨཱནཾ ཨཱཝཊྚནཝསེན ནིདྡྷཱརིཏཱནི ཙ པུརིམཀཱནི དྭེ སཙྩཱནི ཙ, སམཐོ ཙ ཝིཔསྶནཱ ཙ ཨིམེ དྭེ དྷམྨཱ མགྒོ ཙ མགྒསཙྩཉྩ, ཝཊྚནིརོདྷོ ཝཊྚནིརོདྷསཙྩཉྩ ནིབྦཱནནྟི ཙཏྟཱརི སཙྩཱནི ནིདྡྷཱརིཏཱནི.

‘‘ཝཱིརིཡཔཊིཔཀྑབྷཱུཏསྶ པམཱདཱདིདྷམྨསྶ ཝསེན ཝཱ སབྷཱགབྷཱུཏསྶ པམཱདཱདིདྷམྨསྶ ཝསེན ཝཱ ཨཱཝཊྚེཏྭཱ ཙཏུནྣཾ སཙྩཱནཾ ནིདྡྷཱརིཏབྦབྷཱཝོ ཨམྷེཧི ཀེན སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ. ཏེན ཏཐཱ ནིདྡྷཱརིཏབྦབྷཱཝེན བྷགཝཱ ‘‘ཨཱརམྦྷཐ ནིཀྐམཐཱ’’ཏིཨཱདིགཱཐཱཝཙནཾ ཨཱཧ, ཏེན ‘‘ཨཱརམྦྷཐ ནིཀྐམཐཱ’’ཏིཨཱདིགཱཐཱཝཙནེན ཏཐཱ ཙཏུནྣཾ སཙྩཱནཾ ནིདྡྷཱརིཏབྦབྷཱཝོ ཏུམྷེཧི སདྡཧིཏབྦོཏི ཝུཏྟཾ ཧོཏི.

‘‘ཨཱརམྦྷཐ ནིཀྐམཐཱ’ཏིཨཱདིནཱ ཝོདཱནཔཀྑཾཡེཝ ནིཀྑིཔིཏྭཱ ཏསྶེཝ ཝོདཱནཔཀྑསྶ ཝིསབྷཱགདྷམྨསབྷཱགདྷམྨཝསེནེཝ ཨཱཝཊྚེཏྭཱ ཙཏུསཙྩནིདྡྷཱརཎཾ ཀཱཏབྦ’’ནྟི པུཙྪིཏབྦཏྟཱ སཾཀིལེསཔཀྑམྤི ནིཀྑིཔིཏྭཱ ཏསྶེཝ སཾཀིལེསསྶ ཝིསབྷཱགདྷམྨསབྷཱགདྷམྨཝསེནཔི ཨཱཝཊྚེཏྭཱ ཙཏུསཙྩནིདྡྷཱརཎཾ དསྶེནྟོ ‘‘ཡཐཱཔི མཱུལེ’’ཏིཨཱདིགཱཐཱཝཙནམཱཧ. ཨཊྛཀཐཱཡཾ པན –

‘‘ཨེཝཾ ¶ ཝོདཱནཔཀྑཾ ནིཀྑིཔིཏྭཱ ཏསྶ ཝིསབྷཱགདྷམྨཝསེན, སབྷཱགདྷམྨཝསེན ཙ ཨཱཝཊྚནཾ དསྶེཏྭཱ ཨིདཱནི སཾཀིལེསཔཀྑཾ ནིཀྑིཔིཏྭཱ ཏསྶ ཝིསབྷཱགདྷམྨཝསེན, སབྷཱགདྷམྨཝསེན ཙ ཨཱཝཊྚནཾ དསྶེཏུཾ ‘ཡཐཱཔི མཱུལེ’ཏི གཱཐམཱཧཱ’’ཏི (ནེཏྟི. ཨཊྛ. ༣༠) –

ཝུཏྟཾ. གཱཐཱཏྠོཔི ཨཊྛཀཐཱཡཾ ཝུཏྟོ. ཏཐཱཔི ཡཏིཔོཏཱནཾ ཨཏྠཱཡ ཨཊྛཀཐཱནུསཱརེནེཝ ཀཐཡིསྶཱམ.

སམཱུཧོ ¶ རུཀྑོ མཱུལཏི པཏིཊྛཱཏི ཨེཏེན ཨཝཡཝེན བྷཱུམིབྷཱགེ ཋིཏེནཱཏི མཱུལཾ, ཀིཾ ཏཾ? བྷཱུམིབྷཱགེ ཋིཏོ མཱུལསངྑཱཏོ རུཀྑཱཝཡཝོ, ཏསྨིཾ མཱུལེ. ནཏྠི ཨུཔདྡཝོ ཕརསུཚེདཱདིཨནྟརཱཡོ ཨསྶ མཱུལསྶཱཏི ཨནུཔདྡཝོ. དལ༹ྷེཏི ཨུཔདྡཝཱབྷཱཝེན སབྷཱཝཏོ ཐིརེ སཏི. ཚིནྡཱིཡཏཱིཏི ཚིནྣོ, ཀོ སོ? བྷཱུམིཡཾ པཏིཊྛིཏམཱུལསཧིཏོ རུཀྑཱཝཡཝོ, ན ཚིནྡིཏྭཱ གཧིཏོ རུཀྑཱཝཡཝོ. རུཧཏི ཝཌྜྷཏཱིཏི རུཀྑོ. སོ ཙ བྷཱུམིཡཾ པཏིཊྛིཏམཱུལསཧིཏོ རུཀྑཱཝཡཝོ རུཀྑོཏི ཝུཏྟོ ཡཐཱ ‘‘སམུདྡོ དིཊྛོ’’ཏི. པུནརེཝ རཱུཧཏཱིཏི པུན ཨངྐུརུཔྤཱདནཾ སནྡྷཱཡ ཝུཏྟཾ. ཏཎྷཱནུསཡེཏི ཨཏྟབྷཱཝསངྑཱཏསྶ རུཀྑསྶ མཱུལེ. ཨནཱུཧཏེཏི ཨརཧཏྟམགྒཉཱཎེན ཨནུཔཙྪིནྣེ སཏི ཨིདཾ ཨཏྟབྷཱཝསངྑཱཏཾ དུཀྑཾ དུཀྑཧེཏུ པུནཔྤུནཾ ཨབྦོཙྪིནྣཾ ནིབྦཏྟཏི ན ནིརུཛ྄ཛྷཏིཡེཝཱཏི གཱཐཱཏྠོ.

‘‘ཨིདྷ གཱཐཱཡཾ ཡོ ཏཎྷཱནུསཡོ ཨནཱུཧཏབྷཱཝེན དུཀྑསྶ ནིབྦཏྟནསྶ མཱུལནྟི ཝུཏྟོ, ཨཡཾ ཏཎྷཱནུསཡོ ཀཏམསྶཱ ཏཎྷཱཡ ཨནུསཡོ’’ཏི པུཙྪཏི, ‘‘ཏཎྷཱཡ ཀཱམཏཎྷཱདིཝསེན བཧུཝིདྷཏྟཱ བྷཝཏཎྷཱཡ ཨནུསཡོ’’ཏི ཝིསྶཛྫེཏི བྷཝསྶཱདཏཎྷཱབྷཱཝཏོ. ཡོ ཨནུསཡོ ཨེཏསྶ བྷཝཏཎྷཱསངྑཱཏསྶ དྷམྨསྶ པཙྩཡོ ཧོཏི, ཨཡཾ ཨནུསཡོ ཨཝིཛྫཱནུསཡོ ཧོཏི. ‘‘ཨནུསཡོ བཧུཝིདྷོ, ཀསྨཱ ཨཝིཛྫཱནུསཡོཏི སདྡཧིཏབྦོ’’ཏི ཝཏྟབྦཏྟཱ ‘‘ཨཝིཛྫཱཔཙྩཡཱ ཧི བྷཝཏཎྷཱ’’ཏི ཝུཏྟཾ. ཨཝིཛྫཱཡ བྷཝཏཎྷཱཡ པཙྩཡཏྟཱ ཨཝིཛྫཱནུསཡོ སདྡཧིཏབྦོ. ཨཝིཛྫཱཡ ཧི བྷཝེསུ ཨཱདཱིནཝསྶ ཨདསྶནཝསེན བྷཝསྶཱདཏཎྷཱ བྷཝཏཱིཏི. ཨིམེ དྭེ ཀིལེསཱཏིཨཱདིམྷི ཧེཊྛཱ ཝུཏྟནཡཱནུསཱརེན ཙཏྟཱརི སཙྩཱནི ནིདྡྷཱརེཏྭཱ ཝིསབྷཱགསབྷཱགདྷམྨཱཝཊྚནཾ ཝིཉྙཱཏབྦཾ, སམཐཝིཔསྶནཱ པན མགྒསམྤཡུཏྟཱཝ གཧེཏབྦཱ.

‘‘སབྦཔཱཔསྶཱ’’ཏིཨཱདིཀསྶ ཨནུསནྡྷྱཏྠོ ཨཊྛཀཐཱཡཾ (ནེཏྟི. ཨཊྛ. ༣༠) ཝུཏྟོ. སབྦཔཱཔསྶཱཏི ཀམྨཔཐབྷཱཝཔྤཏྟཱཔཏྟསྶ ནིརཝསེསསྶ ཨཀུསལསྶ. ཨཀརཎནྟི སཔརསནྟཱནེསུ ཨནུཔྤཱདནཾ ¶ . ཀུསལསྶཱཏི ཀམྨཔཐབྷཱཝཔྤཏྟཱཔཏྟསྶ ཏེབྷཱུམཀཀུསལསྶ ཙེཝ ལོཀུཏྟརཀུསལསྶ ཙ. ཨུཔསམྤདཱཏི སནྟཱནེ ཨུཔྤཱདནཝསེན སམྤདཱ. སསྶ ཨཏྟནོ ཙིཏྟནྟི སཙིཏྟཾ, སཙིཏྟསྶ པརིཡོདཱཔནཾ ཝོདཱནཾ ཨརཧཏྟཕལུཔྤཏྟིཡཱཏི སཙིཏྟཔརིཡོདཱཔནཾ ¶ . ཨརཧཏྟམགྒུཔྤཱདོ པན ‘‘ཀུསལསྶ ཨུཔསམྤདཱ’’ཏི པདེན གཧིཏོ. ཨེཏཾ ཨཀརཎཱདིཏྟཡདཱིཔནཾ བུདྡྷཱནཾ སམྨཱསམྦུདྡྷཱནཾ སཱསནཾ ཨོཝཱདོཏི གཱཐཱཏྠོ.

གཱཐཱཡཾ ཡསྶ པཱཔསྶ ཨཀརཎཾ ཝུཏྟཾ, ཏཾ པཱཔཾ དུཙྩརིཏཀམྨཔཐཝསེན ཝིབྷཛིཏུཾ ‘‘སབྦཔཱཔཾ ནཱམཱ’’ཏིཨཱདི ཝུཏྟཾ. དོསསམུཊྛཱནནྟི ཡེབྷུཡྻཝསེན ཝུཏྟཾ, ལོབྷསམུཊྛཱནམྤི བྷཝཏི. ལོབྷསམུཊྛཱནནྟིཔི ཡེབྷུཡྻཝསེན ཝུཏྟཾ, དོསསམུཊྛཱནམྤི བྷཝཏི. མོཧསམུཊྛཱནམྤི ཏཐེཝ ཝུཏྟཾ. ལོབྷསམུཊྛཱནདོསསམུཊྛཱནམྤི སམྦྷཝཏཱིཏི དཊྛབྦཾ. སབྦཔཱཔོ དུཙྩརིཏཀམྨཔཐཔྤབྷེདེན ཝིབྷཏྟོ, ‘‘ཨེཏྟཀེནེཝ ཝིབྷཛིཏབྦོ, ཨུདཱཧུ ཨཉྙེན ཝིབྷཛིཏབྦོ’’ཏི པུཙྪིཏབྦཏྟཱ ཨཉྙེན ཨཀུསལམཱུལཨགཏིགམནབྷེདེནཔི ཝིབྷཛིཏུཾ ‘‘ཡཱ ཨབྷིཛ྄ཛྷཱ’’ཏིཨཱདི ཝུཏྟཾ. ཨཊྛཀཐཱཡཾ པན ‘‘ཨེཝཾ དུཙྩརིཏཨཀུསལཀམྨཔཐཀམྨཝིབྷཱགེན ‘སབྦཔཱཔ’ནྟི ཨེཏྠ ཝུཏྟཔཱཔཾ ཝིབྷཛིཏྭཱ ཨིདཱནིསྶ ཨཀུསལམཱུལཝསེན ཨགཏིགམནཝིབྷཱགམྤི དསྶེཏུཾ ‘ཨཀུསལམཱུལ’ནྟིཨཱདི ཝུཏྟ’’ནྟི (ནེཏྟི. ཨཊྛ. ༣༠) ཨནུསནྡྷྱཏྠོ ཝུཏྟོ. མོཧཝསེན སབྷཱཝཾ ཨཛཱནནྟསྶ བྷཡསམྦྷཝཏོ ཡཾ བྷཡཱ ཙ མོཧཱ ཙ ཨགཏིཾ གཙྪཏི, ཨིདཾ མོཧསམུཊྛཱནནྟི ཝུཏྟཾ.

སབྦཔཱཔོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཀཏམཾ སབྦཔཱཔསྶ ཨཀརཎ’’ནྟི པུཙྪིཏབྦཏྟཱ ཏཏྠ ལོབྷོ ཨསུབྷཱཡཱ’’ཏིཨཱདི ཝུཏྟཾ. ཨཊྛཀཐཱཡཾ པན –

‘‘ཨེཏྟཱཝཏཱ ‘སབྦཔཱཔསྶ ཨཀརཎ’ནྟི ཨེཏྠ པཱཔཾ དསྶེཏྭཱ ཨིདཱནི ཏསྶ ཨཀརཎཾ དསྶེནྟོ ‘ལོབྷོ…པེ… པཉྙཱཡཱ’ཏི ཏཱིཧི ཀུསལམཱུལེཧི ཏིཎྞཾ ཨཀུསལམཱུལཱནཾ པཧཱནཝསེན སབྦཔཱཔསྶ ཨཀརཎཾ ཨནུཔྤཱདནམཱཧཱ’’ཏི (ནེཏྟི. ཨཊྛ. ༣༠) –

ཝུཏྟཾ. སུབྷཱདྷིམུཏྟཝསེན པཝཏྟོ ལོབྷོ ཨསུབྷཱཡ ཨསུབྷབྷཱཝནཱཡ ཏཐཱཔཝཏྟེན ཨལོབྷེན ཏདངྒཝིཀྑམྦྷནཔྤཧཱནེན པཧཱིཡཏི, སཏྟེསུ ཀུཛ྄ཛྷནདུསྶནཝསེན པཝཏྟོ དོསོ མེཏྟཱཡ མེཏྟཱབྷཱཝནཱཡ ཏཐཱཔཝཏྟེན ཨདོསེན ཙ ཏདངྒཝིཀྑམྦྷནཔྤཧཱནེན པཧཱིཡཏི, སཏྟེསུ ཙེཝ སངྑཱརེསུ ཙ མུཡ྄ཧནཝསེན པཝཏྟོ མོཧོ པཉྙཱཡ ¶ ཝིཙཱརཎཔཉྙཱཡ ཙ བྷཱཝནཱམགྒཔཉྙཱཡ ཙ ཏདངྒཝིཀྑམྦྷནསམུཙྪེདཔྤཧཱནེན པཧཱིཡཏི.

‘‘ཡདི ¶ ཏཱིཧི ཀུསལམཱུལེཧེཝ ཨཀུསལམཱུལཱནི པཧཱིཡནྟི, ཨེཝཾ སཏི ཨུཔེཀྑཱཀརུཎཱམུདིཏཱ ནིརཏྠཀཱ བྷཝེཡྻུ’’ནྟི ཝཏྟབྦཏྟཱ ‘‘ཏཐཱ ལོབྷོ ཨུཔེཀྑཱཡཱ’’ཏིཨཱདི ཝུཏྟཾ. ཨུཔེཀྑཱཡཱཏི ‘‘སབྦེ སཏྟཱ ཀམྨསྶཀཱ’’ཏིཨཱདིནཱ བྷཱཝིཏཱཡ ཨུཔེཀྑཱཡ. མུདིཏཱ ཨརཏིཾ ཝཱུཔསམེཏྭཱ ཨརཏིཡཱ མཱུལབྷཱུཏཾ མོཧམྤི པཛཧཏཱིཏི མནསི ཀཏྭཱ ‘‘མོཧོ མུདིཏཱཡ པཧཱནཾ ཨབྦྷཏྠཾ གཙྪཏཱི’’ཏི ཝུཏྟཾ. ‘‘ཨཀུསལམཱུལཱནཾ ཀུསལམཱུལཱདཱིཧི པཧཱཏབྦཏྟཾ ཀེན ཨམྷེཧི སདྡཧིཏབྦ’’ནྟི ཝཏྟབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ. ཏེན ཏཐཱ པཧཱཏབྦཏྟེན བྷགཝཱ ‘‘སབྦཔཱཔསྶ ཨཀརཎ’’ནྟི ཝཙནཾ ཨཱཧ, ཏེན ‘‘སབྦཔཱཔསྶ ཨཀརཎ’’ནྟི ཝཙནེན ཏཐཱ པཧཱཏབྦཏྟཾ ཏུམྷེཧི སདྡཧིཏབྦནྟི ཝུཏྟཾ ཧོཏི.

༣༡. ‘‘ཨེཏྟཱཝཏཱ ཙ སབྦཔཱཔོ ཝིབྷཏྟོ, ཏསྶ ཨཀརཎཉྩ ཝིབྷཏྟཾ སིཡཱ, ཨེཝཾ སཏི ཨཊྛམིཙྪཏྟཱནཾ ཨཀརཎཾ ཨནིཝཱརིཏཾ སིཡཱ’’ཏི ཝཏྟབྦཏྟཱ ‘‘སབྦཔཱཔཾ ནཱམ ཨཊྛ མིཙྪཏྟཱནཱི’’ཏིཨཱདི ཝུཏྟཾ. མིཙྪཱསཏཱིཏི ཨནིཙྩཱདཱིསུ ‘‘ནིཙྩ’’ནྟི ཨནུསྶརཎཙིནྟནཱདིཝསེན པཝཏྟཨཀུསལཔྤཝཏྟི.

སབྦཔཱཔསྶ ཨཀརཎཾ བཧུདྷཱ ཨཱཙརིཡེན ཝིབྷཏྟཾ, ཨམྷེཧི ཙ ཝིཉྙཱཏཾ, ‘‘ཀཐཾ ཀུསལསྶ སམྤདཱ ཝིབྷཛིཏབྦཱ ཝིཉྙཱཏབྦཱ’’ཏི ཝཏྟབྦཏྟཱ ཀུསལསྶ སམྤདཾ ཝིབྷཛིཏྭཱ དསྶེནྟོ ‘‘ཨཊྛསུ མིཙྪཏྟེསུ པཧཱིནེསཱུ’’ཏིཨཱདིམཱཧ. ཨཊྛ སམྨཏྟཱནཱིཏི སམྨཱདིཊྛི སམྨཱསངྐཔྤོ སམྨཱཝཱཙཱ སམྨཱཀམྨནྟོ སམྨཱཨཱཛཱིཝོ སམྨཱཝཱཡཱམོ སམྨཱསཏི སམྨཱསམཱདྷཱིཏི ཨཊྛསམྨཏྟཱནི ཝིསབྷཱགཔརིཝཏྟནདྷམྨཝསེན སམྤཛྫནྟི. ཨཏཱིཏསྶཱཏི ཨཏཱིཏེན སམྨཱསམྦུདྡྷེན དེསིཏསྶ. ཝིཔསྶིནོ ཧི བྷགཝཏོ ཨཡཾ པཱཏིམོཀྑུདྡེསགཱཐཱ. ཙིཏྟེ པརིཡོདཱཔིཏེཏི ཙིཏྟཔཊིབདྡྷཱ པཉྩཀྑནྡྷཱཔི པརིཡོདཱཔིཏཱ བྷཝནྟི. ‘‘ཙིཏྟཔརིཡོདཱཔིཏེན པཉྩནྣཾ ཁནྡྷཱནཾ པརིཡོདཱཔིཏབྷཱཝོ ཀཐཾ ཨམྷེཧི སདྡཧིཏབྦོ’’ཏི ཝཏྟབྦཏྟཱ ‘‘ཨེཝཉྷཱི’’ཏིཨཱདི ཝུཏྟཾ. ཨེཝཾ ཝུཏྟཔྤཀཱརེན བྷགཝཱ ཡཾ ‘‘ཙེཏོཝིསུདྡྷཏྠཾ བྷིཀྑཝེ ཏཐཱགཏེ བྲཧྨཙརིཡཾ ཝུསྶཏཱི’’ཏི ཝཙནཾ ཨཱཧ, ཏེན ‘‘ཙེཏོ…པེ… ཝུསྶཏཱི’’ཏི ཝཙནེན ཏུམྷེཧི སདྡཧིཏབྦོཏི ཝུཏྟཾ ཧོཏི. ‘‘པརིཡོདཱཔནཱ ཀཏིཝིདྷཱ བྷཝནྟཱི’’ཏི ཝཏྟབྦཏྟཱ ‘‘དུཝིདྷཱ ཧཱི’’ཏིཨཱདི ཝུཏྟཾ. སམཐཝིཔསྶནཱཡ ¶ ནཱིཝརཎཔྤཧཱནཉྩ ཨརིཡམགྒབྷཱཝནཱཡ ཨནུསཡསམུགྒྷཱཏོ ཙཱཏི པརིཡོདཱཔནསྶ དུཝིདྷཏྟཱ པཉྩཀྑནྡྷཱ པརིཡོདཱཔིཏཱ བྷཝནྟཱིཏི ཨཏྠོ. པཧཱིནནཱིཝརཎཱནུསཡཱ ཧི པུགྒལཱ པསཱདནཱིཡཝཎྞཱ ཧོནྟི.

‘‘པརིཡོདཱཔནསྶ ཀིཏྟིཀཱ བྷཱུམིཡོ’’ཏི པུཙྪིཏབྦཏྟཱ ‘‘དྭེ པརིཡོདཱཔནབྷཱུམིཡོ’’ཏིཨཱདི ཝུཏྟཾ. ‘‘‘སབྦཔཱཔསྶ ཨཀརཎ’ནྟིཨཱདིགཱཐཱཡ དེསིཏེསུ དྷམྨེསུ ཀཏམཾ དུཀྑསཙྩཾ, ཀཏམཾ སམུདཡསཙྩཾ ¶ , ཀཏམཾ མགྒསཙྩཾ, ཀཏམཾ ནིརོདྷསཙྩ’’ནྟི པུཙྪིཏབྦཏྟཱ ‘‘ཏཏྠ ཡཾ པཊིཝེདྷེནཱ’’ཏིཨཱདི ཝུཏྟཾ. ཏཏྠཱཏི གཱཐཱཡ དེསིཏེསུ དྷམྨེསུ ཡཾ ཁནྡྷཔཉྩཀཾ པཊིཝེདྷེན པརིཉྙཱབྷིསམཡེན པརིཡོདཱཔེཏི, ཨིདཾ ཁནྡྷཔཉྩཀཾ དུཀྑཾ དུཀྑསཙྩཾ བྷཝེ. ཡཏོ ཏཎྷཱསཾཀིལེསཏོ ཁནྡྷཔཉྩཀཾ པརིཡོདཱཔེཏི, ཨཡཾ ཏཎྷཱསཾཀིལེསོ སམུདཡོ སམུདཡསཙྩཾ. ཡེན ཨརིཡམགྒངྒེན པརིཡོདཱཔེཏི, ཨཡཾ ཨརིཡམགྒོ མགྒསཙྩཾ. ཡཾ ཨསངྑཏདྷཱཏུཾ ཨདྷིགཏེན པུགྒལེན པརིཡོདཱཔིཏཾ, ཨཡཾ ཨསངྑཏདྷཱཏུདྷམྨོ ནིརོདྷོ ནིརོདྷསཙྩཾ བྷཝེ. ཨིམཱནི ཙཏྟཱརི སཙྩཱནི གཱཐཱཡ དེསིཏདྷམྨཱནཾ སབྷཱགཝིསབྷཱགདྷམྨཱཝཊྚནཝསེན ནིདྡྷཱརིཏཱནི. ‘‘ཏེནཱཧཱ’’ཏིཨཱདིཀསྶ ཨཏྠོ ཧེཊྛཱ ཝུཏྟནཡེན ཝེདིཏབྦོ.

‘‘སབྦཔཱཔསྶ ཨཀརཎ’’ནྟིཨཱདིགཱཐཱཡ དེསིཏཱནཾ དྷམྨཱནཾ སབྷཱགཝིསབྷཱགདྷམྨཱཝཊྚནཝསེན ཙཏྟཱརི སཙྩཱནི ཨཱཙརིཡེན ནིདྡྷཱརིཏཱནི, ཨམྷེཧི ཙ ཝིཉྙཱཏཱནི.

‘‘‘དྷམྨོ ཧཝེ རཀྑཏི དྷམྨཙཱརིཾ, ཚཏྟཾ མཧནྟཾ ཡཐ ཝསྶཀཱལེ;

ཨེསཱནིསཾསོ དྷམྨེ སུཙིཎྞེ, ན དུགྒཏིཾ གཙྪཏི དྷམྨཙཱརཱི’ཏི –

གཱཐཱཡ དེསིཏཱནཾ དྷམྨཱནཾ ཝིསབྷཱགསབྷཱགདྷམྨཱནཾ ཨཱཝཊྚནཝསེན ཀཐཾ ཙཏྟཱརི སཙྩཱནི ནིདྡྷཱརིཏཱནཱི’’ཏི ཝཏྟབྦཏྟཱ ‘‘དྷམྨོ ཧཝེ’’ཏིཨཱདིམཱཧ. ཏཱཡ གཱཐཱཡ དེསིཏེ དྷམྨེ ཝིབྷཛིཏྭཱ དསྶེནྟོ ‘‘དྷམྨོ ནཱམཱ’’ཏིཨཱདིམཱཧ. ཏཏྠ དྷམྨོ ནཱམཱཏི པུཉྙདྷམྨོ ནཱམ. ཨིནྡྲིཡསཾཝརོཏི མནཙྪཊྛིནྡྲིཡསཾཝརསཱིལཱདིཀོ སབྦོ སཾཝརོ. ཏེན ཝུཏྟཾ –‘‘ཨིནྡྲིཡསཾཝརསཱིསེན ¶ ཙེཏྠ སབྦམྤི སཱིལཾ གཧིཏནྟི དཊྛབྦ’’ནྟི (ནེཏྟི. ཨཊྛ. ༣༡). ཙཏྟཱརོ ཨཔཱཡཱ དུཀྐཊཀམྨཀཱརཱིནཾ གཏིབྷཱུཏཏྟཱ དུགྒཏི. སབྦཱ ཨུཔཔཏྟིཡོ པན དུཀྑདུཀྑསངྑཱརདུཀྑཝིཔརིཎཱམདུཀྑསམངྒཱིནཾ གཏིབྷཱུཏཏྟཱ དུགྒཏི ནཱམ.

‘‘ཏསྨིཾ དུཝིདྷེ དྷམྨེ ཨིནྡྲིཡསཾཝརདྷམྨོ ཀཏྠ ཋིཏོ, ཀཐཾ སུཙིཎྞོ, ཀུཏོ རཀྑཏཱི’’ཏི པུཙྪིཏབྦཏྟཱ ‘‘ཏཏྠ ཡཱ སཾཝརསཱིལེ’’ཏིཨཱདི ཝུཏྟཾ. ཏཏྠཱཏི ཏསྨིཾ དུཝིདྷེ དྷམྨེ. སཾཝརསཱིལེ ཋིཏཱ ཡཱ ཨཁཎྜཀཱརིཏཱ ཧོཏི, ཨཡཾ ཨཁཎྜཝསེན ཀཱཏབྦོ སཾཝརསཱིལེ ཋིཏོ སུཊྛུ ཨཱཙིཎྞཔརིཙིཎྞོ པུཉྙདྷམྨོ ཙཏཱུཧི ཨཔཱཡེཧི ཨཏྟནོ ཨཱདྷཱརཾ ཨཏྟཱནཾ རཀྑནྟཾ པུགྒལཾ ཨེཀནྟིཀབྷཱཝེན རཀྑཏི, ཨནེཀནྟིཀབྷཱཝེན པན རཀྑིཏམཏྟོ པུཉྙདྷམྨོཔི རཀྑཏཱིཏི ཨཏྠོ གཧེཏབྦོ. ཨཔཱཡེཧཱིཏི ཙ པདྷཱནཝསེན ཝུཏྟཾ, རོགཱདིཨནྟརཱཡཏོཔི རཀྑཏི. རོགཱདིཨནྟརཱཡོ ཝཱ ཨཡཏོ ཨཔགཏཏྟཱ ཨཔཱཡནྟོགདྷོཏི དཊྛབྦོ.

‘‘ཏཐཱ ¶ རཀྑཏཱིཏི ཀེན ཨམྷེཧི སདྡཧིཏབྦོ’’ཏི ཝཏྟབྦཏྟཱ ‘‘ཨེཝཾ བྷགཝཱ’’ཏིཨཱདི ཝུཏྟཾ. ཨེཝཾ ཝུཏྟཔྤཀཱརེན ལཀྑཎཔཀཱརདསྶནཾ བྷགཝཱ ‘‘དྭེམཱ, བྷིཀྑཝེ, སཱིལཝཏོ གཏིཡོ དེཝཱ ཙ མནུསྶཱ ཙཱ’’ཏི ཡཾ ཝཙནཾ ཨཱཧ, ཏེན ‘‘དྭེམཱ…པེ… མནུསྶཱ ཙཱ’’ཏི ཝཙནེན ཏུམྷེཧི སདྡཧིཏབྦོཏི ཝུཏྟཾ ཧོཏི. ‘‘སཾཝརསཱིལེ ཋིཏསྶ ཨཁཎྜཀཱཏབྦསྶ སུཙིཎྞསྶ པུཉྙདྷམྨསྶ ཨཔཱཡེཧི རཀྑཎེ ཨེཀནྟིཀབྷཱཝོ ཀེན སུཏྟེན དཱིཔེཏབྦོ’’ཏི ཝཏྟབྦཏྟཱ ‘‘ཨེཝཉྩ ནཱལ༹ནྡཱཡ’’ནྟིཨཱདི ཝུཏྟཾ. ཏཏྠ ཨེཝཉྩཱཏི ཨིམིནཱ ཨིདཱནི ཝུཙྩམཱནེན པཀཱརེནཔི ཝུཏྟཔྤཀཱརོ ཨཏྠོ ཝེདིཏབྦོ. ནཱལ༹ནྡཱཡནྟི ནཱལ༹ནྡནཱམཀེ ནིགམེ ནིསིནྣོ ཨསིབནྡྷཀནཱམསྶ པུཏྟོ གཱམཎི གཱམཛེཊྛཀོ བྷགཝནྟཾ ཨེཏཾ ཝུཙྩམཱནཾ ‘‘བྲཱཧྨཎཱ, བྷནྟེ’’ཏིཨཱདིཝཙནཾ ཨཝོཙ.

བྲཱཧྨཎཱཏི བཱཧིརཀཱ བྲཱཧྨཎཱ. བྷནྟེཏི བྷགཝནྟཾ གཱམཎི ཨཱལཔཏི. པཙྪཱབྷཱུམཀཱཏི པཙྪིམདིསཱཡ ནིསིནྣཀཱ. ཨུཡྻཱཔེནྟཱིཏི མནུསྶལོཀཏོ ཨུདྡྷཾ དེཝལོཀཾ ཡཱཔེནྟི པཱཔེནྟི.

ཨིདྷསྶཱཏི ཨིདྷལོཀེ ཨསྶ བྷཝེཡྻ. པུརིསོ པཱཎཱཏིཔཱཏཱི…པེ… མིཙྪཱདིཊྛིཀོ ཨསྶ བྷཝེཡྻཱཏི ཡོཛནཱ. སེསཾ པཱལི༹ཏོ ཙེཝ ཝུཏྟཱནུསཱརེན ཙ ཉེཡྻཾ.

༣༢. ‘‘ཝིསབྷཱགདྷམྨསབྷཱགདྷམྨཱཝཊྚནཝསེན ¶ ཙཏུནྣཾ སཙྩཱནཾ ནིདྡྷཱརིཏབྷཱཝོ ཀེན ཨམྷེཧི སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧ མཧཱཀཙྩཱནོ ཨེཀམྷི པདཊྛཱནེ’’ཏི ཝུཏྟཾ.

‘‘ཨེཏྟཱཝཏཱ ཙ ཨཱཝཊྚོ ཧཱརོ པརིཔུཎྞོ, ཨཉྙོ ནིཡུཏྟོ ནཏྠཱི’’ཏི ཝཏྟབྦཏྟཱ ‘‘ནིཡུཏྟོ ཨཱཝཊྚོ ཧཱརོ’’ཏི ཝུཏྟཾ. ཡསྶཾ ཡསྶཾ པཱལི༹ཡཾ ཡོ ཡོ ཨཱཝཊྚོ ཧཱརོ ཡཐཱལཱབྷཝསེན ཡོཛིཏོ, ཏསྶཾ ཏསྶཾ པཱལི༹ཡཾ སོ སོ ཨཱཝཊྚོ ཧཱརོ ཏཐཱ ནིདྡྷཱརེཏྭཱ ཡུཏྟོ ཡོཛིཏོཏི ཨཏྠོ དཊྛབྦོ.

ཨིཏི ཨཱཝཊྚཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེནེཝ གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

༨. ཝིབྷཏྟིཧཱརཝིབྷངྒཝིབྷཱཝནཱ

༣༣. ཡེན ¶ ཡེན སཾཝཎྞནཱཝིསེསབྷཱུཏེན ཨཱཝཊྚཧཱརཝིབྷངྒེན ཨཱཝཊྚེཏབྦཱ པདཊྛཱནཱདཡོ ཝིབྷཏྟཱ, སོ སཾཝཎྞནཱཝིསེསབྷཱུཏོ ཨཱཝཊྚཧཱརཝིབྷངྒོ པརིཔུཎྞོ, ‘‘ཏཏྠ ཀཏམོ ཝིབྷཏྟིཧཱརཝིབྷངྒོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཝིབྷཏྟིཧཱརོ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ནིདྡིཊྛེསུ སོལ༹སསུ དེསནཱཧཱརཱདཱིསུ ཀཏམོ སཾཝཎྞནཱཝིསེསོ ཝིབྷཏྟིཧཱརོ ཝིབྷཏྟིཧཱརཝིབྷངྒོ ནཱམཱཏི པུཙྪཏི. ‘‘དྷམྨཉྩ པདཊྛཱནཾ བྷཱུམིཉྩཱ’’ཏིཨཱདིནིདྡེསསྶ ཨིདཱནི མཡཱ ཝུཙྩམཱནོ ‘‘དྭེ སུཏྟཱནཱི’’ཏིཨཱདིཀོ ཝིཏྠཱརབྷཱུཏོ སཾཝཎྞནཱཝིསེསོ ཝིབྷཏྟིཧཱརོ ཝིབྷཏྟིཧཱརཝིབྷངྒོ ནཱམཱཏི ཨཏྠོ གཧེཏབྦོ.

‘‘ཡེསུ སུཏྟེསུ ཝུཏྟཱ དྷམྨཔདཊྛཱནབྷཱུམིཡོ ཨིམིནཱ ཝིབྷཏྟིཧཱརེན ཝིབྷཏྟཱ, ཏཱནི སུཏྟཱནི ཀིཏྟཀཱནཱི’’ཏི པུཙྪིཏབྦཏྟཱ ཏཱནི སུཏྟཱནི པཋམཾ དསྶེཏུཾ ‘‘དྭེ སུཏྟཱནི ཝཱསནཱབྷཱགིཡཉྩ ནིབྦེདྷབྷཱགིཡཉྩཱ’’ཏི ཝུཏྟཾ. ཏཏྠ ཝཱསནཱབྷཱགིཡནྟི པུཉྙབྷཱཝནཱ ཝཱསནཱ ནཱམ, ཝཱསནཱཡ བྷཱགོ ཀོཊྛཱསོ ཝཱསནཱབྷཱགོ, ཝཱསནཱབྷཱགེ ཝཱཙཀབྷཱཝེན ནིཡུཏྟཾ ¶ སུཏྟནྟི ཝཱསནཱབྷཱགིཡཾ, ཀཏམཾ ཏཾ? ཡསྨིཾ སུཏྟེ ཏཱིཎི པུཉྙཀིརིཡཝཏྠཱུནི བྷགཝཏཱ དེསིཏཱནི, ཏཾ སུཏྟཾ ཝཱསནཱབྷཱགིཡཾ. ནིབྦེདྷབྷཱགིཡནྟི ལོབྷཀྑནྡྷཱདཱིནཾ ནིབྦིཛ྄ཛྷནཾ པདཱལནཾ ནིབྦེདྷོ, ནིབྦེདྷསྶ བྷཱགོ ཀོཊྛཱསོ ནིབྦེདྷབྷཱགོ, ནིབྦེདྷབྷཱགེ ཝཱཙཀབྷཱཝེན ནིཡུཏྟཾ སུཏྟནྟི ནིབྦེདྷབྷཱགིཡཾ, ཀཏམཾ ཏཾ? ཡསྨིཾ སུཏྟེ སེཀྑཱསེཀྑདྷམྨཱ བྷགཝཏཱ དེསིཏཱ, ཏཾ སུཏྟཾ ནིབྦེདྷབྷཱགིཡཾ.

‘‘ཏེསཾ སུཏྟཱནཾ པཊིགྒཱཧཀཱ པུགྒལཱ ཡཱཧི པཊིཔདཱཧི སམྤཛྫནྟི, ཏཱ པཊིཔདཱ ཀིཏྟིཀཱ’’ཏི པུཙྪིཏབྦཏྟཱ ‘‘དྭེ པཊིཔདཱ’’ཏིཨཱདི ཝུཏྟཾ. དཱནསཱིལབྷཱཝནཱམཡཔུཉྙབྷཱགེ བྷཝཱ པཊིཔདཱཏི པུཉྙབྷཱགིཡཱ. ཕལབྷཱགེ བྷཝཱ པཊིཔདཱཏི ཕལབྷཱགིཡཱ. ‘‘ཡེསུ སཱིལེསུ ཋིཏཱ པཊིགྒཱཧཀཱ པཊིཔཛྫནྟི, ཏཱནི སཱིལཱནི ཀིཏྟཀཱནཱི’’ཏི པུཙྪིཏབྦཏྟཱ ‘‘དྭེ སཱིལཱནཱི’’ཏིཨཱདི ཝུཏྟཾ. སཾཝརཏི ཨེཏེན སཾཝརེནཱཏི སཾཝརོ, སོ སཾཝརོ པཱཏིམོཀྑསཾཝརོ, སཏིསཾཝརོ, ཉཱཎསཾཝརོ, ཁནྟིསཾཝརོ, ཝཱིརིཡསཾཝརོཏི པཉྩཝིདྷོ. སབྦོཔི པཱཔསཾཝརཎཏོ སཾཝརོ, ལོཀིཡལོཀུཏྟརསམྤཏྟིཊྛཱནཏྟཱ སཱིལཾ ནཱམ. པཛཧཏི ཨེཏེན པཧཱཏབྦེཏི པཧཱནཾ, པཛཧནཾ ཝཱ པཧཱནཾ, ཏཉྩ པཧཱནཾ ཏདངྒཔྤཧཱནཾ, ཝིཀྑམྦྷནཔྤཧཱནཾ, སམུཙྪེདཔྤཧཱནཾ, པཊིཔསྶདྡྷིཔྤཧཱནཾ, ནིསྶརཎཔྤཧཱནནྟི པཉྩཝིདྷཾ. ཏཏྠ ནིསྶརཎཔྤཧཱནཾ ཝཛྫེཏྭཱ ཙཏུབྦིདྷཾ པཧཱནཾ ཝུཏྟནཡེན སཱིལཾ ནཱམ.

‘‘ཏེསུ ¶ སུཏྟཱདཱིསུ བྷགཝཱ ཀཏམཾ སུཏྟཾ ཀཏམཱཡ པཊིཔདཱཡ དེསཡཏི, ཀཏརསྨིཾ སཱིལེ ཋིཏོ པུགྒལོ ཀཏམེན སཱིལེན བྲཧྨཙཱརཱི བྷཝཏཱི’’ཏི པུཙྪིཏབྦཏྟཱ ཏཐཱ ཝིབྷཛིཏྭཱ དསྶེཏུཾ ‘‘ཏཏྠ བྷགཝཱ’’ཏིཨཱདི ཝུཏྟཾ. ཏཏྠ ཏེསུ ཝཱསནཱབྷཱགིཡཱདཱིསུ སུཏྟེསུ ཝཱསནཱབྷཱགིཡཾ སུཏྟཾ ཏཏྠ ཏཱསུ པུཉྙབྷཱགིཡཱདིཔཊིཔདཱསུ པུཉྙབྷཱགིཡཱཡ པཊིཔདཱཡ བྷགཝཱ ཡསྶ པུགྒལསྶ དེསཡཏི, སོ ཝཱསནཱབྷཱགིཡསུཏྟཔཊིགྒཱཧཀོ པུགྒལོ ཏཏྠ སཾཝརསཱིལཱདཱིསུ སཾཝརསཱིལེ ཋིཏོ ཧུཏྭཱ ཏེན སཾཝརསཱིལསངྑཱཏེན བྲཧྨཙརིཡེན སེཊྛཙརིཡེན བྲཧྨཙཱརཱི སེཊྛཱཙཱརཔཱུརཀོ བྷཝཏི. ཏཏྠ ཏེསུ ཝཱསནཱབྷཱགིཡཱདཱིསུ སུཏྟེསུ ནིབྦེདྷབྷཱགིཡཾ སུཏྟཾ ཏཏྠ ཏཱསུ པུཉྙབྷཱགིཡཱདིཔཊིཔདཱསུ ཕལབྷཱགིཡཱཡ པཊིཔདཱཡ ཡསྶ པུགྒལསྶ བྷགཝཱ དེསཡཏི, སོ ནིབྦེདྷབྷཱགིཡསུཏྟཔཊིགྒཱཧཀོ པུགྒལོ ཏཏྠ སཾཝརསཱིལཱདཱིསུ པཧཱནསཱིལེ སམུཙྪེདཔྤསྶདྡྷིཔྤཧཱནཝསེན ¶ ཋིཏོ ཧུཏྭཱ ཏེན པཧཱནསཱིལསངྑཱཏེན ཝིསེསབྷཱུཏེན མགྒསངྑཱཏེན བྲཧྨཙརིཡེན བྲཧྨཙཱརཱི བྷཝཏཱིཏི ཡོཛནཱ ཀཱཏབྦཱ.

‘‘ཝཱསནཱབྷཱགིཡསུཏྟཱདཱིསུ ཀཏམཾ ཝཱསནཱབྷཱགིཡཾ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམ’’ནྟིཨཱདི ཝུཏྟཾ. ཏཏྠ ཏཏྠཱཏི ཏེསུ ཝཱསནཱབྷཱགིཡསུཏྟཱདཱིསུ. དཱནཀཐཱཏི སཔྤུརིསདཱནདཱནཕལཨསཔྤུརིསདཱནདཱནཕལཀཐཱ. སཱིལཀཐཱཏི པཉྩསཱིལཱདིསཱིལཕལཀཐཱ. སགྒཀཐཱཏི སགྒསམྤཏྟིསུཁཀཐཱ ཙེཝ སགྒེ ནིབྦཏྟཱཔཀཔུཉྙཀཐཱ ཙ. ཨཱདཱིནཝོཏི ཨཱདཱིནཝདསྶཀོ སུཏྟནྟོ. ཨཱནིསཾསོཏི ཨཱནིསཾསདསྶཀོ སུཏྟནྟོ. ཝཱསནཱབྷཱགིཡཾ སུཏྟཾ ནཱམཱཏི ཡོཛནཱ.

‘‘ཏཏྠ ཀཏམ’’ནྟིཨཱདཱིསུ ཨནུསནྡྷྱཏྠོ ཝུཏྟནཡོཝ. ཡཱ དེསནཱ ཙཏུསཙྩཔྤཀཱསནཱ, སཱ དེསནཱ ནིབྦེདྷབྷཱགིཡཾ སུཏྟཾ ནཱམཱཏི ཡོཛནཱ. ཨེཝཉྩ སཏི ཝཱསནཱབྷཱགིཡསུཏྟསྶཔི ནིབྦེདྷབྷཱགིཡསུཏྟབྷཱཝོ ཨཱཔཛྫེཡྻ ཙཏུསཙྩཔྤཀཱསནཏོཏི ཙོདནཾ མནསི ཀཏྭཱ ‘‘ཝཱསནཱབྷཱགིཡེ སུཏྟེ’’ཏིཨཱདི ཝུཏྟཾ. ཝཱསནཱབྷཱགིཡེ སུཏྟེ པཛཱནནཱ ཝུཊྛཱནགཱམིནིཝིཔསྶནཱ ཨརིཡམགྒཔདཊྛཱནབྷཱུཏཱ པཉྙཱ ནཏྠི, མགྒོ ཨརིཡམགྒོ ནཏྠི, ཕལཾ ཨརིཡཕལཾ ནཏྠི. ནིབྦེདྷབྷཱགིཡེ སུཏྟེ པན པཛཱནནཱདཡོ ཨཏྠི, ཝཱསནཱབྷཱགིཡེ སུཏྟེ ནཏྠི. ‘‘པཛཱནནཱ’’ཏིཨཱདིནཱ ཙཏུསཙྩཔྤཀཱསནཱ དཱནཀཐཱདིཀཱ ནིབྦེདྷབྷཱགིཡེ སུཏྟེ ཨནྟོགདྷཱ, ཨིཏརཾཡེཝ ཝཱསནཱབྷཱགིཡསུཏྟནྟི ནཱམཱཏི དསྶེཏི. ཡེསུ སུཏྟེསུ ཝུཏྟཱ དྷམྨཔདཊྛཱནབྷཱུམིཡོ ཝིབྷཏྟཱ, ཏཱནི སུཏྟཱནི དྭེཡེཝ ན ཧོནྟི, ཀསྨཱ ‘‘དྭེཡེཝ སུཏྟཱནི ནིདྡྷཱརིཏཱནཱི’’ཏི ཙེ ཝདེཡྻུཾ? ཨསངྐརཏོ སུཏྟེ ཝུཏྟཱནཾ དྷམྨཔདཊྛཱནབྷཱུམཱིནཾ ཝིབྷཛིཏབྦཱནཾ སུཝིཉྙེཡྻཏྟཱ. ‘‘ཡདི ཨེཝཾ སཾཀིལེསབྷཱགིཡཨསེཀྑབྷཱགིཡསུཏྟཱནིཔི ནིདྡྷཱརིཏཱནི ཨསངྐརཏྟཱ’’ཏི ཙེ ཝདེཡྻུཾ? ནོ ནིདྡྷཱརིཏཱནི, ཝཱསནཱབྷཱགིཡསུཏྟེ ནིདྡྷཱརིཏེ སཾཀིལེསབྷཱགིཡསུཏྟམྤི ནིདྡྷཱརིཏཾ, སཾཀིལེསདྷམྨཏོ ནིསྶཊྛདྷམྨཱནཾཡེཝ ཝཱསནཱབྷཱགིཡདྷམྨཏྟཱ ནིབྦེདྷབྷཱགིཡསུཏྟེ ཙ ནིདྡྷཱརིཏེ ཨསེཀྑབྷཱགིཡསུཏྟམྤི ནིདྡྷཱརིཏཾ ཨནཉྙཏྟཱ.

‘‘ཡེསུ ¶ སུཏྟེསུ ཝུཏྟཱ དྷམྨཔདཊྛཱནབྷཱུམིཡོ ཝིབྷཏྟིཧཱརེན ཝིབྷཏྟཱ, ཏཱནི སུཏྟཱནི ཀཏམེན ཕལེན ཡོཛཡིཏབྦཱནཱི’’ཏི པུཙྪིཏབྦཏྟཱ ‘‘ཨིམཱནི ཙཏྟཱརི སུཏྟཱནཱི’’ཏིཨཱདི ཝུཏྟཾ. ཏཏྠ ཨིམཱནི ཙཏྟཱརི སུཏྟཱནཱིཏི ¶ ཡཐཱནིདྡྷཱརིཏཱནི ཝཱསནཱབྷཱགིཡནིབྦེདྷབྷཱགིཡསུཏྟཱནི ཙེཝ ཏཾནིདྡྷཱརཎེན ནིདྡྷཱརིཏཱནི སཾཀིལེསབྷཱགིཡཨསེཀྑབྷཱགིཡསུཏྟཱནི ཙཱཏི ཙཏྟཱརི སུཏྟཱནི ཨིམེསཾཡེཝ ཙཏུནྣཾ སུཏྟཱནཾ དེསནཱཡ ནཡེན ནཱིཏེན ཕལེན སབྦཏོ སབྦབྷཱགེན སཾཝརསཱིལཔྤཧཱནསཱིལེན བྲཧྨཙརིཡེན ཡོཛཡིཏབྦཱནི. ཡོཛེནྟེན ཙ སབྦཏོ སབྦབྷཱགེན ཙ པདཱདིཝིཙཡེན ཧཱརེན སཾཝརསཱིལཱདིཀཾ ཕལཾ ཝིཙིནིཏྭཱ ཡུཏྟིཧཱརེན ཡུཏྟཾ ཕལཾ གཝེསིཏྭཱ ‘‘ཨིདཾ ཕལཾ ཨིམསྶ པུགྒལསྶ ཕལཾ, ཨིདཾ ཕལཾ ཨིམསྶ སུཏྟསྶ ཕལ’’ནྟི སུཏྟཱནི ཝིསུཾ ཝིསུཾ ཕལེན ཡོཛཡིཏབྦཱནཱིཏི ཨཏྠོ གཧེཏབྦོ.

‘‘ཀིཏྟཀེན ཕལེན བྲཧྨཙརིཡེན ཡོཛེཏབྦཱནཱི’’ཏི པུཙྪིཏབྦཏྟཱ ‘‘ཡཱཝཏིཀཱ ཉཱཎསྶ བྷཱུམཱི’’ཏི ཝུཏྟཾ. བྷགཝཏཱ དེསིཏེན ཝཱསནཱབྷཱགིཡསུཏྟེན སིདྡྷཱ ཡཱཝཏིཀཱ པུཉྙབྷཱགིཡཱ པཊིཔདཱདཡོ ཝིབྷཛནཉཱཎསྶ བྷཱུམི ཨཱརམྨཎཱ བྷཝིཏུམརཧནྟི, ཏཱཝཏིཀཱཧི བྷཱུམཱིཧི ཝཱསནཱབྷཱགིཡསུཏྟཾ ཡོཛཡིཏབྦཾ. ནིབྦེདྷབྷཱགིཡསུཏྟེན སིདྡྷཱ ཡཱཝཏིཀཱ ཕལབྷཱགིཡཱ པཊིཔདཱདཡོ ཝིབྷཛནཉཱཎསྶ བྷཱུམི ཨཱརམྨཎཱ བྷཝིཏུམརཧནྟི, ཏཱཝཏིཀཱཧི བྷཱུམཱིཧི ནིབྦེདྷབྷཱགིཡསུཏྟཾ ཡོཛེཏབྦཾ. ཨིཏརདྭཡམྤི སུཏྟཾ ཡཐཱསམྦྷཝཾ ཡོཛེཏབྦཾ. ཨེཏེན ཉཱཎསྶ བྷཱུམཱིནཾ སུཏྟཏྠཱནཾ བཧུཝིདྷཏྟཾ དསྶེཏི.

༣༤. ཝཱསནཱབྷཱགིཡསུཏྟཱདཱིསུ ཝུཏྟཱ དྷམྨཱ ཝཱསནཱབྷཱགིཡནིབྦེདྷབྷཱགིཡབྷཱཝེཧི ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, ‘‘ཀཐཾ སཾཀིལེསབྷཱགིཡཨསེཀྑཱབྷཱགིཡབྷཱཝེཧི ཨསཱདྷཱརཎཱསཱདྷཱརཎབྷཱཝེཧི ཝིབྷཛིཏབྦཱ’’ཏི པུཙྪིཏབྦཏྟཱ ‘‘ཏཏྠ ཀཏམེ དྷམྨཱ སཱདྷཱརཎཱ’’ཏིཨཱདི ཨཱརདྡྷཾ. ཨཊྛཀཐཱཡ པན –

‘‘ཨེཝཾ ཝཱསནཱབྷཱགིཡནིབྦེདྷབྷཱགིཡབྷཱཝེཧི དྷམྨེ ཨེཀདེསེན ཝིབྷཛིཏྭཱ ཨིདཱནི ཏེསཾ ཀིལེསབྷཱགིཡཨསེཀྑབྷཱགིཡབྷཱཝེཧི སཱདྷཱརཎཱསཱདྷཱརཎབྷཱཝེཧི ཝིབྷཛིཏུཾ ‘ཏཏྠ ཀཏམེ དྷམྨཱ སཱདྷཱརཎཱ’ཏིཨཱདི ཨཱརདྡྷ’’ནྟི (ནེཏྟི. ཨཊྛ. ༣༤) –

ཝུཏྟཾ. ཏཏྠ ཏཏྠཱཏི ཡེ དྷམྨཱ སུཏྟེ ཝུཏྟཱ ཝིབྷཏྟིཧཱརེན ཝིབྷཛིཏབྦཱ, ཏེསུ དྷམྨེསུ ཀཏམེ དྷམྨཱ སཱདྷཱརཎཱཏི པུཙྪཏི, དྭེ དྷམྨཱ སཱདྷཱརཎཱཏི ¶ ཝིསྶཛྫེཏི. ཏེ དྭེ དྷམྨེ སརཱུཔཏོ དསྶེཏུཾ ‘‘ནཱམསཱདྷཱརཎཱ, ཝཏྠུསཱདྷཱརཎཱ ཙཱ’’ཏི ཝུཏྟཾ. ཏཏྠ ནཱམསཱདྷཱརཎཱཏི ནཱམེན ནཱམཔཉྙཏྟིཡཱ ¶ སཱདྷཱརཎཱ སམཱནཱ, ‘‘ཀུསལཱ’’ཏི ནཱམེན ཨེཀཝཱིསཏི ཙིཏྟུཔྤཱདཱ སམཱནཱ, ‘‘ཨཀུསལཱ’’ཏྱཱདིནཱམེན དྭཱདས ཙིཏྟུཔྤཱདཱ སམཱནཱ, ཀུསལཱདིནཱམཔཉྙཏྟིཝཙནེན ཝཙནཱིཡཱ ཨཏྠཱ ཀུསལཱདིནཱམསཱདྷཱརཎཱཏི ཝུཏྟཱ. ཏེན ཊཱིཀཱཡཾ –

‘‘ནཱམཾ ནཱམཔཉྙཏྟི, ཏཾམུཁེནེཝ སདྡཏོ ཏདཏྠཱཝགམོ. སདྡེན ཙ སཱམཉྙརཱུཔེནེཝ ཏཐཱརཱུཔསྶ ཨཏྠསྶ གཧཎཾ, ན ཝིསེསརཱུཔེན. ཏསྨཱ སདྡཝཙནཱིཡཱ ཨཏྠཱ སཱདྷཱརཎརཱུཔནཱམཱཡཏྟགཧཎཱིཡཏཱཡ ནཱམསཱདྷཱརཎཱ ཝུཏྟཱ’’ཏི –

ཝུཏྟཾ. ཝཏྠུསཱདྷཱརཎཱཏི པཏིཊྛཱནབྷཱུཏེན ཝཏྠུནཱ སཱདྷཱརཎཱ. ཡསྨིཾ པཏིཊྛཱནབྷཱུཏེ སནྟཱནེ ཝཱ ཙིཏྟུཔྤཱདཱདིམྷི ཝཱ ཡེ དྷམྨཱ པཝཏྟནྟི, ཏེ དྷམྨཱ ཏེན སནྟཱནེན ཝཱ ཝཏྠུནཱ ཏེན ཙིཏྟུཔྤཱདཱདིནཱ ཝཱ སཱདྷཱརཎཱ སམཱནཱཏི ཨཏྠོ. ཨེཀསནྟཱནེ པཏིཏཏྟཱ ཕུསནཱདིསབྷཱཝཏོ བྷིནྣཱཔི ཝཏྠུསཱདྷཱརཎཱ སམཱནཝཏྠུཀཱཡེཝ བྷཝནྟཱིཏི ཝིབྷཏྟིཧཱརེན ཝིབྷཛིཏྭཱཏི ཝུཏྟཾ ཧོཏི.

‘‘ཀིཾ ནཱམསཱདྷཱརཎཝཏྠུསཱདྷཱརཎཱཡེཝ ཝིབྷཛིཏབྦཱ, ཨཉྙཾ ཝིབྷཛིཏབྦཾ ནཏྠཱི’’ཏི པུཙྪིཏབྦཏྟཱ ‘‘ཡཾ ཝཱ པནཱ’’ཏིཨཱདི ཝུཏྟཾ. ནཱམསཱདྷཱརཎཝཏྠུསཱདྷཱརཎེཧི ཨཉྙཾ ཡཾ ཝཱ པན ཀིཙྩསཱདྷཱརཎཔཙྩཡསཱདྷཱརཎཔཊིཔཀྑཱདིསཱདྷཱརཎམྤི དྷམྨཛཱཏཾ ཨེཝཾཛཱཏིཡཾ སཱདྷཱརཎཛཱཏིཡཾ, ཏམྤི སབྦཾ ཝིཙཡཧཱརེན ཝིཙིནིཏྭཱ ཡུཏྟིཧཱརེན གཝེསིཏྭཱ ཡུཏྟཾ སཱདྷཱརཎཾ ཝིབྷཏྟིཧཱརེན ཝིབྷཛིཏབྦནྟི ཨདྷིཔྤཱཡོ. ‘‘ཏེསུ ནཱམསཱདྷཱརཎཱདཱིསུ ཀཏམེ ནཱམསཱདྷཱརཎཱ, ཀཏམེ ཝཏྠུསཱདྷཱརཎཱ’’ཏི པུཙྪིཏབྦཏྟཱ ‘‘མིཙྪཏྟནིཡཏཱནཾ སཏྟཱན’’ནྟིཨཱདི ཝུཏྟཾ. མཱཏུགྷཱཏཀཱདཱིནཾ ཚནྣཾ མིཙྪཏྟནིཡཏཀམྨཀརཱནཾ སཏྟཱནཉྩ དུགྒཏིཨཧེཏུཀསུགཏིཨཧེཏུཀདུཧེཏུཀཏིཧེཏུཀཱནཾ ཙཏུནྣཾ པུཐུཛྫནཱནཾ ཨནིཡཏཀམྨཀརཱནཾ སཏྟཱནཉྩ སནྟཱནེ པཝཏྟཱ དསྶནཔཧཱཏབྦཱ ཀིལེསཱ དསྶནཔཧཱཏབྦནཱམསཱདྷཱརཎཱ སམཱནཱ བྷཝནྟི སཀྐཱཡདིཊྛིཝིཙིཀིཙྪཱསཱིལབྦཏཔརཱམསནཝསེན བྷིནྣསབྷཱཝཱནམྤི དསྶནཔཧཱཏབྦནཱམནཱཏིཝཏྟནཏོ. ཝུཏྟཔྤཀཱརཱནཾ ནིཡཏཱནིཡཏསཏྟཱནཾ ¶ དསྶནཔཧཱཏབྦཱནཾ ཀིལེསཱནཾ པཏིཊྛཱནཝཏྠུབྷཱཝཏོ ཝཏྠུསཱདྷཱརཎཱ ཙ སམཱནཝཏྠུཀཱཏི ཨཏྠོ. པུཐུཛྫནསྶ དུགྒཏིཨཧེཏུཀཱདིཙཏུབྦིདྷསཏྟསྶ, སོཏཱཔནྣསྶ ཙ སནྟཱནེ པཝཏྟཱ ཀཱམརཱགབྱཱཔཱདཱ ཀིལེསཱ ཀཱམརཱགབྱཱཔཱདནཱམསཱདྷཱརཎཱ སམཱནཱ བྷཝནྟི སཀདཱགཱམིམགྒཔྤཧཱཏབྦཨནཱགཱམིམགྒཔྤཧཱཏབྦཝསེན བྷིནྣསབྷཱཝཱནམྤི ཀཱམརཱགབྱཱཔཱདནཱམནཱཏིཝཏྟནཏོ. ཝུཏྟཔྤཀཱརསྶ པུཐུཛྫནསྶ, སོཏཱཔནྣསྶ ཙ ཀཱམརཱགབྱཱཔཱདཱནཾ པཏིཊྛཱནཝཏྠུབྷཱཝཏོ ཝཏྠུསཱདྷཱརཎཱ སམཱནཝཏྠུཀཱཏི ཨཏྠོ ཙ གཧེཏབྦོ. པུཐུཛྫནསྶ, ཨནཱགཱམིསྶ ཙ སནྟཱནེ པཝཏྟཱ ཨུདྡྷཾབྷཱགིཡཱ སཾཡོཛནཱ ཨུདྡྷམྦྷཱགིཡནཱམསཱདྷཱརཎཱ སམཱནཱ བྷཝནྟི རཱུཔརཱགཱདིཝསེན བྷིནྣསབྷཱཝཱནམྤི ¶ ཨུདྡྷཾབྷཱགིཡནཱམནཱཏིཝཏྟནཏོ. པུཐུཛྫནསྶ, ཨནཱགཱམིསྶ ཙ ཨུདྡྷཾབྷཱགིཡཱནཾ པཏིཊྛཱནཝཏྠུབྷཱཝཏོ ཝཏྠུསཱདྷཱརཎཱ སམཱནཝཏྠུཀཱཏི ཨཏྠོ ཙ གཧེཏབྦོ. ཏེན ཝུཏྟཾ ཊཱིཀཱཡཾ – ‘‘དསྶནཔཧཱཏབྦཱནཉྷི ཡཐཱ མིཙྪཏྟནིཡཏསཏྟཱ པཝཏྟིཊྛཱནཾ, ཨེཝཾ ཨནིཡཏཱཔཱི’’ཏི ཝུཏྟཾ. སངྑེཔཏོ པན སཾཀིལེསཔཀྑེ པཧཱནེཀཊྛཱ ཀིལེསཱ ནཱམསཱདྷཱརཎཱ ཧོནྟི, སཧཛེཀཊྛཱ ཀིལེསཱ ཝཏྠུསཱདྷཱརཎཱཏི དཊྛབྦཱ.

སཾཀིལེསཔཀྑེ སཱདྷཱརཎཱ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, ‘‘ཀཐཾ ཝོདཱནཔཀྑེ སཱདྷཱརཎཱ ཝིབྷཏྟཱ’’ཏི པུཙྪིཏབྦཏྟཱ ‘‘ཡཾ ཀིཉྩི ཨརིཡསཱཝཀོ’’ཏིཨཱདི ཝུཏྟཾ. ཏཏྠ ཡཾ ཀིཉྩཱིཏི སཱམཉྙཝསེན ཝུཏྟཱ པཋམཛ྄ཛྷཱནསམཱཔཏྟིཨཱདིཀཱ ལོཀིཡཱ སམཱཔཏྟིཡེཝ གཧིཏཱ. ཨརིཡསཱཝཀོཏི ཨརིཡསྶ བྷགཝཏོ སཱཝཀོ ཨརིཡསཱཝཀོཏི ཝཏྟབྦོ, ཛྷཱནལཱབྷཱི ཙ ཕལཊྛོ ཙ པུགྒལོ, ན མགྒཊྛོ. མགྒཊྛོ ཧི ལོཀིཡཾ ཡཾ ཀིཉྩི སམཱཔཏྟིཾ ན སམཱཔཛྫཏི. སབྦཱ སཱ ལོཀིཡསམཱཔཏྟི རཱུཔཱཝཙརཱ ཨརཱུཔཱཝཙརཱ དིབྦཝིཧཱརོ བྲཧྨཝིཧཱརོ པཋམཛ྄ཛྷཱནསམཱཔཏྟཱིཏི ཨེཝམཱདཱིཧི པརིཡཱཡེཧི སཱདྷཱརཎཱ ཏཾསམངྒཱིཧི ཝཱིཏརཱགཱཝཱིཏརཱགེཧི སཱདྷཱརཎཱ ལོཀིཡསམཱཔཏྟིནཱམནཱཏིཝཏྟནཏོ ཙ ཝཱིཏརཱགཱཝཱིཏརཱགེཧི སམཱཔཛྫིཏབྦཏོ ཙ. ‘‘ཨརིཡསཱཝཀོ ཙ ལོཀིཡཾ སམཱཔཏྟིཾ སམཱཔཛྫནྟོ ཨོདྷིསོ ཨོདྷིསོ སམཱཔཛྫཏི, ཨེཝཾ སཏི ཀཐཾ ཝཱིཏརཱགེཧི སཱདྷཱརཎཱཏི སདྡཧིཏབྦཱ’’ཏི ཝཏྟབྦཏྟཱ ‘‘སཱདྷཱརཎཱ ཧི དྷམྨཱ’’ཏིཨཱདི ཝུཏྟཾ. ཨཊྛཀཐཱཡཾ པན – ‘‘ཀཐཾ ཏེ ཨོདྷིསོ གཧིཏཱ, ཨཐ ¶ ཨོདྷིསོ གཧེཏབྦཱ, ཀཐཾ སཱདྷཱརཎཱཏི ཨནུཡོགཾ མནསི ཀཏྭཱ ཏཾ ཝིསོདྷེནྟོ ཨཱཧ – ‘སཱདྷཱརཎཱ ཧི དྷམྨཱ ཨེཝཾ ཨཉྙམཉྙ’ནྟིཨཱདཱི’’ཏི ཝུཏྟཾ.

ཏཏྠ ཨེཝཾ ཝཱིཏརཱགཱཝཱིཏརཱགེཧི ཨོདྷིསོ ཨོདྷིསོ སམཱཔཛྫིཏབྦཱ དྷམྨཱ པརཾ པརཾ པཙྪཱ པཙྪཱ པཝཏྟིཡམཱནཾ དྷམྨཛཱཏཾ སཀཾ སཀཾ པུབྦེ པུབྦེ ཛཱཏཾ ‘‘ལོཀིཡསམཱཔཏྟཱི’’ཏི ནཱམཾ ནིཡཏཝིསཡཾ ཨཉྙམཉྙཾ ཧུཏྭཱ ཧི ཡསྨཱ ནཱཏིཝཏྟནྟི, ཏསྨཱ སཱདྷཱརཎཱཏི སདྡཧིཏབྦཱ གཧེཏབྦཱཏི ཨཏྠོ. ‘‘པརཾ པརཾ སམཱཔཛྫནྟོ ཀཐཾ ནཱཏིཝཏྟཏཱི’’ཏི ཝཏྟབྦཏྟཱ ནཱཏིཝཏྟནཾ པཱཀཊཾ ཀཱཏུཾ ‘‘ཡོཔཱི’’ཏིཨཱདི ཝུཏྟཾ. ཡོ ཨརིཡསཱཝཀོ ཝཱ ཨཝཱིཏརཱགོ ཝཱ. ཨིམེཧི ལོཀིཡསམཱཔཏྟིདྷམྨེཧི སམནྣཱགཏོ, སོ ཨརིཡསཱཝཀོ ཝཱ ཨཝཱིཏརཱགོ ཝཱ པརཾ པརཾ སམཱཔཛྫནྟོཔི ཏཾ དྷམྨཾ ལོཀིཡཾ སམཱཔཏྟིདྷམྨཾ ནཱཏིཝཏྟཏི, ཨཉྙཾ ཨུཔགནྟྭཱ ནཱཏིཀྐམཏཱིཏི ཨཏྠོ. ཡེཧི ལོཀིཡསམཱཔཏྟིདྷམྨེཧི སམནྣཱགཏོ, ཨིམེ ལོཀིཡསམཱཔཏྟི དྷམྨཱ སཱདྷཱརཎཱཝཱཏི དཊྛབྦཱ.

‘‘ཝཱསནཱབྷཱགིཡཱདིསུཏྟེསུ ཝུཏྟཱ ཡེ དྷམྨཱ ཨིམིནཱ ཝིབྷཏྟིཧཱརེན ཝིབྷཏྟཱ, ཡེསུ དྷམྨེསུ ཀཏམེ དྷམྨཱ ཨསཱདྷཱརཎཱ’’ཏི པུཙྪིཏབྦཏྟཱ ‘‘ཏཏྠ ཀཏམེ དྷམྨཱ ཨསཱདྷཱརཎཱ’’ཏིཨཱདི ཝུཏྟཾ. ཏཏྠ ¶ ཏེསུ ཝིབྷཛིཏབྦེསུ དྷམྨེསུ ཀཏམེ དྷམྨཱ ཨསཱདྷཱརཎཱཏི པུཙྪཏི, པུཙྪིཏྭཱ ཡཱཝ དེསནཾ ཨུཔཱདཱཡ ཨསཱདྷཱརཎཱ དྷམྨཱ གཝེསིཏབྦཱ, ‘‘སེཀྑཱསེཀྑཱ’’ཏི ཝཱ གཝེསིཏབྦཱ, ‘‘བྷབྦཱབྷབྦཱ’’ཏི ཝཱ གཝེསིཏབྦཱ. ཨཐ ཝཱ ཡཱཝ ‘‘སེཀྑཱསེཀྑཱ བྷབྦཱབྷབྦཱ’’ཏི དེསནཱ ཝུཏྟཱ, ཏཱཝ དེསནཾ ཨུཔཱདཱཡ ཨསཱདྷཱརཎཱ གཝེསིཏབྦཱ. ཀཐཾ གཝེསིཏབྦཱ? ཨརིཡེསུ སེཀྑཱསེཀྑདྷམྨཝསེན ‘‘སེཀྑཱ’’ཏི ནཱམཾ ཨསེཀྑེན ཨསཱདྷཱརཎཾ, ‘‘ཨསེཀྑཱ’’ཏི ནཱམཾ སེཀྑེན ཨསཱདྷཱརཎནྟི ཝཱ, ཨནརིཡེསུ ‘‘བྷབྦཱ’’ཏི ནཱམཾ ཨབྷབྦེན ཨསཱདྷཱརཎཾ, ‘‘ཨབྷབྦཱ’’ཏི ནཱམཾ བྷབྦེན ཨསཱདྷཱརཎནྟི ཝཱ གཝེསིཏབྦཱ. ཀཱམརཱགབྱཱཔཱདཱ སཾཡོཛནཱ ཨཔྤཧཱིནཏྟཱ ཨནུསཡབྷཱཝེན ཨུཔྤཛྫནཱརཧཏྟཱ ཨཊྛམཀསྶ སོཏཱཔཏྟིམགྒཊྛསྶ ཙ སོཏཱཔནྣསྶ ཕལཊྛསྶ ཙ སཱདྷཱརཎཱ བྷཝནྟི, དྷམྨཏཱ དྷམྨསབྷཱཝོ ཨསཱདྷཱརཎོ. ཨིདཾ ཝུཏྟཾ ཧོཏི – ‘‘ཨཊྛམཀསྶ སོཏཱཔཏྟིམགྒཊྛཏཱ སོཏཱཔནྣསྶ ཨསཱདྷཱརཎཱ, སོཏཱཔནྣསྶ ¶ སོཏཱཔནྣཕལཊྛཏཱ ཙ ཨཊྛམཀསྶ སོཏཱཔཏྟིམགྒཊྛསྶ ཨསཱདྷཱརཎཱ. ཨཊྛམཀསྶ ཝཱ པཧཱིཡམཱནཀིལེསཏཱ སོཏཱཔནྣསྶ ཨསཱདྷཱརཎཱ, སོཏཱཔནྣསྶ པཧཱིནཀིལེསཏཱ ཙ ཨཊྛམཀསྶ ཨསཱདྷཱརཎཱ’’ཏི.

ཨུདྡྷམྦྷཱགིཡཱ སཾཡོཛནཱ ཨཔྤཧཱིནཏྟཱ ཨནུསཡབྷཱཝེན ཨུཔྤཛྫནཱརཧཏྟཱ ཨཊྛམཀསྶ མགྒཊྛབྷཱཝེན ཨཊྛམཀསདིསསྶ ཨནཱགཱམིམགྒཊྛསྶ ཙ ཨནཱགཱམིསྶ ཕལཊྛསྶ ཙ སཱདྷཱརཎཱ, དྷམྨཏཱ དྷམྨསབྷཱཝོ ཨསཱདྷཱརཎཱ. ཨིདཾ ཝུཏྟཾ ཧོཏི – ‘‘ཨཊྛམཀསྶ ཨནཱགཱམིམགྒཊྛཏཱ ཨནཱགཱམིསྶ ཕལཊྛསྶ ཨསཱདྷཱརཎཱ, ཨནཱགཱམིསྶ ཨནཱགཱམིཕལཊྛཏཱ ཙ ཨཊྛམཀསྶ ཨསཱདྷཱརཎཱ. ཨཊྛམཀསྶ ཝཱ པཧཱིཡམཱནཀིལེསཏཱ ཨནཱགཱམིསྶ ཨསཱདྷཱརཎཱ, ཨནཱགཱམིསྶ ཕལཊྛསྶ པཧཱིནཀིལེསཏཱ ཙ ཨཊྛམཀསྶ ཨསཱདྷཱརཎཱ’’ཏི. ‘‘མགྒཊྛཏཱ ཕལཊྛཏཱཡ ཨསཱདྷཱརཎཱ, ཕལཊྛཏཱ ཙ མགྒཊྛཏཱཡ ཨསཱདྷཱརཎཱ’’ཏིཔི ཝཏྟུཾ ཝཊྚཏི. སབྦེསཾ སཏྟནྣཾ སེཀྑཱནཾ པུགྒལཱནཾ ནཱམཾ ‘‘སེཀྑཱ’’ཏི ནཱམཾ སཱདྷཱརཎཾ. དྷམྨཏཱ ཨསཱདྷཱརཎཱཏི ཙཏུནྣཾ མགྒཊྛཱནཾ ཏཾཏཾམགྒཊྛཏཱ ཨཉྙམཉྙཾ མགྒཊྛཱནཾ ཨསཱདྷཱརཎཱ. ཧེཊྛིམཕལཏྟཡཊྛཱནཉྩ ཨསཱདྷཱརཎཱ, ཧེཊྛིམཕལཏྟཡཊྛཱནཾ ཏཾཏཾཕལཊྛཏཱ ཙ ཨཉྙམཉྙཾ ཕལཊྛཱནཾ ཨསཱདྷཱརཎཱ, ཙཏུནྣཾ མགྒཊྛཱནཉྩ ཨསཱདྷཱརཎཱཏི ཨཏྠོ. ‘‘སེཀྑཱནཾ ཏཾཏཾམགྒཊྛཏཱ ཏཾཏཾཕལཊྛཏཱཡ ཨསཱདྷཱརཎཱ, ཏཾཏཾཕལཊྛཏཱ ཙ ཏཾཏཾམགྒཊྛཏཱཡ ཨསཱདྷཱརཎཱ’’ཏི ཝཏྟུམྤི ཝཊྚཏི. སབྦེསཾ པཊིཔནྣཀཱནནྟི ཕལཏྠཱཡ པཊིཔཛྫནྟཱིཏི པཊིཔནྣཀཱ, ཏེསཾ མགྒསམངྒཱིནཾ ཙཏུནྣཾ པུགྒལཱནཾ ནཱམཾ ‘‘པཊིཔནྣཀཱ’’ཏི ནཱམཾ སཱདྷཱརཎཾ, དྷམྨཏཱ ཏཾཏཾམགྒཊྛཏཱ ཨསཱདྷཱརཎཱ. སབྦེསཾ སེཀྑཱནཾ སཏྟནྣཾ པུགྒལཱནཾ སེཀྑཱནཾ སཱིལཾ སཱདྷཱརཎཾ, དྷམྨཏཱ ཏཾཏཾམགྒཊྛཕལཊྛཏཱ ཨསཱདྷཱརཎཱཏི. ཝཱསནཱབྷཱགིཡསཾཀིལེསབྷཱགིཡསུཏྟེསུ ཝུཏྟཱ དསྶནེནཔཧཱཏབྦཱདཡོ ཙེཝ ནིབྦེདྷབྷཱགིཡཨསེཀྑབྷཱགིཡསུཏྟེསུ ཝུཏྟཱ སེཀྑཱདཡོ ཙ དྷམྨཱ སཱདྷཱརཎཱསཱདྷཱརཎབྷེདེན ཝིབྷཏྟིཧཱརེན ཝིབྷཛིཏབྦཱཏི ཨདྷིཔྤཱཡོ ཝེདིཏབྦོ.

‘‘ཨཊྛམཀསྶཱ’’ཏིཨཱདིནཱ ¶ ཨརིཡེསུ པུགྒལེསུ ཨསཱདྷཱརཎཱ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, ‘‘ཀཐཾ ཨནརིཡེསུ ཨསཱདྷཱརཎཱ ཝིབྷཏྟཱ’’ཏི པུཙྪིཏབྦཏྟཱ ཨརིཡེསུ ཝུཏྟནཡཱནུསཱརེན ཨནརིཡེསུཔི ཝིབྷཛིཏྭཱ གཝེསིཏབྦཱཏི དསྶེཏུཾ ‘‘ཨེཝཾ ཝིསེསཱནུཔསྶིནཱ’’ཏིཨཱདི ཝུཏྟཾ ¶ . ཨཊྛཀཐཱཡཾ པན – ‘‘ཨེཝཾ ‘ཨཊྛམཀསྶཱ’ཏིཨཱདིནཱ ཨརིཡཔུགྒལེསུ ཨསཱདྷཱརཎདྷམྨཾ དསྶེཏྭཱ ཨིཏརེསུ ནཡདསྶནཏྠཾ ‘ཨེཝཾ ཝིསེསཱནུཔསྶིནཱ’ཏིཨཱདི ཝུཏྟ’’ནྟི ཝུཏྟཾ. ཨེཝཾ ཨརིཡེསུ ཝུཏྟནཡཱནུསཱརེན བྷབྦཱབྷབྦེསུ ཨནརིཡེསུ ཝིསེསཱནུཔསྶིནཱ ཨསཱདྷཱརཎཏོ ཝིསེསཾ ཨསཱདྷཱརཎཾ ཨནུཔསྶིནཱ གཝེསཀེན པཎྜིཏེན བྷབྦཱབྷབྦེསུཔི ཧཱིནུཀྐཊྛམཛ྄ཛྷིམཾ ཨུཔཱདཱཡ གཝེསིཏབྦཾ. ཀཐཾ? མཱཏུགྷཱཏཱདིཝསེན པཝཏྟཱནཾ པཊིགྷསམྤཡུཏྟདིཊྛིསམྤཡུཏྟསཏྟམཛཝནཙིཏྟུཔྤཱདཱནཾ མིཙྪཏྟནིཡཏཱནཾ ཏཾསམངྒཱིནཾ ཝཱ ཏཐཱཔཝཏྟཱ པཋམཛཝནཙིཏྟུཔཱདཱདཡོ ཨནིཡཏཱ དྷམྨཱ པཊིགྷསམྤཡུཏྟཱདིབྷཱཝེན སཱདྷཱརཎཱ, མིཙྪཏྟནིཡཏཱ དྷམྨཱ ཨེཀཙིཏྟུཔྤཱདཏྟཱ ཨསཱདྷཱརཎཱ. ཡཐཱ ཧི ཙིཏྟཾ ‘‘ཙིཏྟསཾསཊྛ’’ནྟི ན ཝཏྟབྦཾ, ཨེཝཾ མིཙྪཏྟནིཡཏཱཔི ‘‘མིཙྪཏྟནིཡཏསཱདྷཱརཎཱ’’ཏི ན ཝཏྟབྦཱ. མིཙྪཏྟནིཡཏེསུཔི ནིཡཏམིཙྪཱདིཊྛིཀཱནཾ དིཊྛིསམྤཡུཏྟསཏྟམཛཝནཙིཏྟུཔྤཱདསམངྒཱིནཾ ཨནིཡཏཱ དིཊྛིསམྤཡུཏྟཔཋམཛཝནཙིཏྟུཔྤཱདཱདཡོ དྷམྨཱ དིཊྛིསམྤཡུཏྟཱདིབྷཱཝེན སཱདྷཱརཎཱ, ནིཡཏམིཙྪཱདིཊྛི ཨེཀཙིཏྟུཔྤཱདསམངྒཱིབྷཱཝཏོ ཨསཱདྷཱརཎཱ. ཏེནཱཧ ཨཊྛཀཐཱཙརིཡོ –

‘‘མིཙྪཏྟནིཡཏཱནཾ ཨནིཡཏཱ དྷམྨཱ སཱདྷཱརཎ, མིཙྪཏྟནིཡཏཱ དྷམྨཱ ཨསཱདྷཱརཎཱ. མིཙྪཏྟནིཡཏེསུཔི ནིཡཏམིཙྪཱདིཊྛིཀཱནཾ ཨནིཡཏཱ དྷམྨཱ སཱདྷཱརཎཱ, ནིཡཏམིཙྪཱདིཊྛི ཨསཱདྷཱརཎཱཏི ཨིམིནཱ ནཡེན ཝིསེསཱནུཔསྶིནཱ ཝེདིཏབྦཱ’’ཏི (ནེཏྟི. ཨཊྛ. ༣༤).

ཏཏྠ ‘‘ཨིམིནཱ ནཡེནཱ’’ཏི ཨིམིནཱ མིཙྪཏྟནིཡཏཱནཾ ཨུཔྤཛྫིཏུཾ བྷབྦཱ ཨནིཡཏཱ དྷམྨཱ སཱདྷཱརཎཱ, ཨུཔྤཛྫིཏུཾ ཨབྷབྦཱ ཨནིཡཏཱ དྷམྨཱ ཨསཱདྷཱརཎཱཏི གཧིཏཱ. ཏེན ཝུཏྟཾ ‘‘བྷབྦཱབྷབྦཱ’’ཏི. ཏཐཱ ཧཱིནསྶ ཧཱིནོ ཧཱིནབྷཱཝེན སཱདྷཱརཎོ, མཛ྄ཛྷིམུཀྐཊྛཱ ཨསཱདྷཱརཎཱ. མཛ྄ཛྷིམསྶ མཛ྄ཛྷིམོ སཱདྷཱརཎོ, ཧཱིནུཀྐཊྛཱ ཨསཱདྷཱརཎཱ. ཨུཀྐཊྛསྶ ཨུཀྐཊྛོ ཨུཀྐཊྛབྷཱཝེན སཱདྷཱརཎོ, ཧཱིནམཛ྄ཛྷིམཱ ཨསཱདྷཱརཎཱཏིཔི གཝེསིཏབྦཱ. ཏེནཱཧ – ‘‘ཧཱིནུཀྐཊྛམཛ྄ཛྷིམཾ ཨུཔཱདཱཡ གཝེསིཏབྦ’’ནྟི.

‘‘ཏཏྠ ཀཏམེ དྷམྨཱ སཱདྷཱརཎཱ’’ཏིཨཱདིནཱ ནཱནཱཝིདྷེན ཝིབྷཏྟིཧཱརནཡེན དྷམྨཱ ཝིབྷཛིཏྭཱ དསྶིཏཱ, ཨམྷེཧི ཙ ཉཱཏཱ, ‘‘ཀཐཾ བྷཱུམིཔདཊྛཱནཱནི ཝིབྷཏྟིཧཱརནཡེན ཝིབྷཛིཏྭཱ དསྶིཏཱནཱི’’ཏི པུཙྪིཏབྦབྷཱཝཏོ དྷམྨཝིབྷཛནཱནནྟརཾ ¶ བྷཱུམིཔདཊྛཱནཱནི ཝིབྷཛིཏྭཱ དསྶེནྟོ ‘‘དསྶནབྷཱུམཱི’’ཏིཨཱདིམཱཧ. ཏཏྠ དསྶནབྷཱུམཱིཏི དསྶནཾ བྷཝཏི ཨེཏྠ པཋམམགྒེཏི དསྶནབྷཱུམི, སོཏཱཔཏྟིམགྒོ ¶ . ནིཡཱམཱཝཀྐནྟིཡཱཏི ནིཡམནཾ ནིཡཱམོ, ཀོ སོ? སམྤཏྟནིཡཱམོ, ཨཝཀྐནཾ ཨཝཀྐནྟི, སོཏཱཔཏྟིཕལཾ, ནིཡཱམསྶ ཨཝཀྐནྟི ནིཡཱམཱཝཀྐནྟི, ཏཱཡ. དསྶནབྷཱུམིནཱམཀོ སོཏཱཔཏྟིམགྒོ ནིཡཱམཱཝཀྐནྟིནཱམཀསྶ སོཏཱཔཏྟིཕལསྶ པཏྟིཡཱ པདཊྛཱནཾ. པཋམམགྒསམངྒཱི པུགྒལོ ཧི ནིཡཱམཾ ཨོཀྐམནྟོ ནཱམ, ཕལསམངྒཱི པན ནིཡཱམཾ ཨོཀྐནྟོ ནཱམ ཧོཏི, ཏསྨཱ ནིཡཱམཱཝཀྐནྟིསདྡེན པཋམཕལུཔྤཏྟི གཧིཏཱ. བྷཱཝནཱབྷཱུམཱིཏི ཨུཔརིམགྒཏྟཡཾ. ཨུཏྟརིཀཱནནྟི ཏསྶ ཏསྶ མགྒསྶ ཨུཔརིཔཝཏྟཱནཾ ཏཾཏཾཕལཱནཾ པཏྟིཡཱ པདཊྛཱནནྟི པཙྩེཀཾ ཡོཛེཏབྦཾ.

དུཀྑཱ པཊིཔདཱ དནྡྷཱབྷིཉྙཱ མནྡཔཉྙསྶ ཨུཔྤཛྫནཏོ སམཐཾ ཨཱཝཧནྟཱི ཧུཏྭཱ སམཐསྶ པདཊྛཱནཾ ཧོཏི, སུཁཱཔཊིཔདཱ ཁིཔྤཱབྷིཉྙཱ ཉཱཎཱདྷིཀསྶ ཨུཔྤཛྫནཏོ ཝིཔསྶནཱཝཧནྟཱི ཧུཏྭཱ ཝིཔསྶནཱཡ པདཊྛཱནཾ, ཨཝསེསཱ དྭེ པཊིཔདཱཔི ནཱཏིཔཉྙསྶ ཨུཔྤཛྫནཏོ སམཐསྶ པདཊྛཱནནྟི གཧེཏབྦཱ. ཏེན ཨཊྛཀཐཱཡཾ ཝུཏྟཾ – ‘‘ཨིཏརཱ པན ཏིསྶོཔི པཊིཔདཱ སམཐཾ ཨཱཝཧནྟཱི’’ཏིཨཱདི (ནེཏྟི. ཨཊྛ. ༣༤). དཱནམཡཾ པུཉྙཀིརིཡཝཏྠུ སཡམེཝ ཨེཀནྟེན དྷམྨསྶཝནསྶ པདཊྛཱནཾ ན ཧོཏི, ཝནྡནཡཱཙནཔཉྷཱཔུཙྪནཱདཡོཔི པདཊྛཱནཾ ཧོནྟི, ཏསྨཱ ཏེཧི ཀཱརཎེཧི སཱདྷཱརཎཾ ཧུཏྭཱ པརཏོགྷོསསྶ པདཊྛཱནཾ ཧོཏི, པརཏོགྷོསོ ཙ དྷམྨསྶཝནཔཉྷཱཝིསྶཛྫནཱདིཝསེན པཝཏྟོ. དཱཏབྦཝཏྠུཔརིཙྩཛནཝནྡནཡཱཙནཀཱལེསུ ཧི ཡེབྷུཡྻེན དྷམྨཾ དེསེནྟི, པཉྷཱཔུཙྪནཱདིཀཱལེསུ ཙ ཝིསྶཛྫེནྟི, པཊིཔུཙྪསཱཀཙྪཱདཱིནི ཝཱ ཀརོནྟི. སཱིལམཡཾ པུཉྙཀིརིཡཝཏྠུ པཱམོཛྫཔཱིཏིཔསྶདྡྷིསུཁསམཱདྷཱིཧི པདཊྛཱནབྷཱཝེན སཱདྷཱརཎཾ ཧུཏྭཱ ཙིནྟཱམཡིཡཱ པཉྙཱཡ པདཊྛཱནཾ ཧོཏི. སཱིལཝནྟསྶ ཧི སཱིལཾ པཙྩཝེཀྑནྟསྶ པཱམོཛྫཱདཡོ ཧོནྟི, སམཱཧིཏོ ཙ དྷམྨཙིནྟནེ སམཏྠོ ཧོཏི.

བྷཱཝནཱམཡཾ པུཉྙཀིརིཡཝཏྠཱུཏི པུརིམཱ པུརིམཱ སམཐབྷཱཝནཱ ཙེཝ ཝིཔསྶནཱབྷཱཝནཱ ཙ པུཉྙཀིརིཡཝཏྠུདཱནསཱིལཱདཱིཧི ཀཱརཎེཧི སཱདྷཱརཎཾ ཧུཏྭཱ བྷཱཝནཱམཡིཡཱ པཉྙཱཡ པཙྪིམཱཡ པཙྪིམཱཡ སམཐབྷཱཝནཱཡ ཙེཝ ཝིཔསྶནཱབྷཱཝནཱཡ ཙ པདཊྛཱནཾ. ཏེན ཝུཏྟཾ ཨཊྛཀཐཱཡཾ – ‘‘སཱདྷཱརཎནྟི ན བཱིཛཾ ཝིཡ ཨངྐུརསྶ, དསྶནབྷཱུམིཨཱདཡོ ཝིཡ ནིཡཱམཱཝཀྐནྟིཨཱདཱིནཾ ཨཱཝེཎིཀཾ ¶ , ཨཐ ཁོ སཱདྷཱརཎཾ ཏདཉྙཀཱརཎེཧིཔཱི’’ཏི. ‘‘དཱནམཡསཱིལམཡབྷཱཝནཱམཡཔུཉྙཀིརིཡཝཏྠཱུནཾ པརཏོགྷོསཙིནྟཱམཡིབྷཱཝནཱམཡིཔཉྙཱནཾ པདཊྛཱནབྷཱཝོ ཨཱཙརིཡེན ཝིབྷཏྟོ, ཨེཝཾ སཏི ཏེསཾ དཱནམཡཱདཱིནཾ ཡཐཱཀྐམཾ པརིཡཏྟིབཱཧུསཙྩཀམྨཊྛཱནཱནུཡོགམགྒསམྨཱདིཊྛཱིནཾ པདཊྛཱནབྷཱཝོ ན བྷཝེཡྻཱ’’ཏི ཝཏྟབྦཏྟཱ ཏཐཱཔཝཏྟཾ པདཊྛཱནབྷཱཝམྤི དསྶེཏུཾ ‘‘དཱནམཡཾ པུཉྙཀིརིཡཝཏྠུ པརཏོ ཙ གྷོསསྶ སུཏམཡིཡཱ ཙ པཉྙཱཡཱ’’ཏིཨཱདི ཝུཏྟཾ. ཨཊྛཀཐཱཡཾ པན –

‘‘ཨིདཱནི ¶ ཡསྨཱ དཱནཾ, སཱིལཾ, ལོཀིཡབྷཱཝནཱ ཙ ན ཀེཝལཾ ཡཐཱཝུཏྟཔརཏོགྷོསཱདཱིནཾཡེཝ, ཨཐ ཁོ ཡཐཱཀྐམཾ པརིཡཏྟིབཱཧུསཙྩཀམྨཊྛཱནཱནུཡོགམགྒསམྨཱདིཊྛཱིནམྤི པཙྩཡཱ ཧོནྟི, ཏསྨཱ ཏམྤི ནཡཾ དསྶེཏུཾ པུན ‘དཱནམཡ’ནྟིཨཱདིནཱ དེསནཾ ཝཌྜྷེསཱི’’ཏི (ནེཏྟི. ཨཊྛ. ༣༤) –

ཝུཏྟཾ. ཏཏྠ དཱནམཡཔུཉྙཀིརིཡཝཏྠུནོ པརཏོགྷོསསྶ སཱདྷཱརཎཔདཊྛཱནབྷཱཝོ ཧེཊྛཱ ཝུཏྟནཡེན ཉཱཏབྦོ. དཱནཾ པན དཏྭཱ དེསནཾ སུཏྭཱ སུཏཱནུསཱརེན ཝིཏྠཱརེཏྭཱ ཙིནྟེནྟསྶ པཝཏྟམཱནཱཡ སུཏམཡིཡཱ པཉྙཱཡ ཝནྡནཡཱཙནཱདཱིཧི སཱདྷཱརཎཾ ཧུཏྭཱ པདཊྛཱནཾ ཧོཏི. སཱིལམཡཔུཉྙཀིརིཡཝཏྠུནོཔི ཙིནྟཱམཡིཡཱ པཉྙཱཡ སཱདྷཱརཎཔདཊྛཱནབྷཱཝོ ཝུཏྟོཡེཝ. པརིསུདྡྷསཱིལཾ པན ནིསྶཱཡ ‘‘ཛྷཱནཾ ནིབྦཏྟེསྶཱམི, མགྒཕལཾ ནིབྦཏྟེསྶཱམཱི’’ཏིཨཱདིནཱ པཙྩཝེཀྑནྟསྶ པཝཏྟམཱནསྶ ཡོནིསོམནསིཀཱརསྶ པཱམོཛྫཱདཱིཧི སཱདྷཱརཎཾ ཧུཏྭཱ པདཊྛཱནཾ ཧོཏི. བྷཱཝནཱམཡཔུཉྙཀིརིཡཝཏྠུནོ བྷཱཝནཱམཡིཡཱ པཉྙཱཡ སཱདྷཱརཎཔདཊྛཱནབྷཱཝོཔི ཝུཏྟོཡེཝ. སམཐབྷཱཝནཱསངྑཱཏཾ པན ཛྷཱནཾ པཱདཀཾ ཀཏྭཱ ཝཱ པརིཔཱཀཾ ཝིཔསྶནཱབྷཱཝཾཡེཝ ཝཱ ནིསྶཱཡ པཝཏྟམཱནཱཡ སམྨཱདིཊྛིཡཱ པརིསུདྡྷསཱིལཱདཱིཧི སཱདྷཱརཎཾ ཧུཏྭཱ པདཊྛཱནཾ ཧོཏི.

དཱནམཡཔུཉྙཀིརིཡཝཏྠུཨཱདཱིནཾ པརཏོགྷོསཱདཱིནཾ པདཊྛཱནབྷཱཝོ པུནཔྤུནཾ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘པཏིརཱུཔདེསཝཱསཱདཡོཔི ཨིམེསཾ དྷམྨཱནཾ པདཊྛཱནཱནཱིཏི ཡཐཱ ཝིབྷཛིཏབྦཱ, ཨམྷེཧི ཙ ཝིཉྙཱཏབྦཱ, ཏཐཱ ཝིབྷཛིཏྭཱ དསྶེཐཱ’’ཏི ཝཏྟབྦཏྟཱ ཏེཔི ཝིབྷཛིཏྭཱ དསྶེཏུཾ ‘‘པཏིརཱུཔདེསཝཱསོ’’ཏིཨཱདིམཱཧ. ཨཊྛཀཐཱཡཾ པན ‘‘ཏཐཱ ¶ པཏིརཱུཔདེསཝཱསཱདཡོ ཀཱཡཝིཝེཀཙིཏྟཝིཝེཀཱདཱིནཾ ཀཱརཎཾ ཧོནྟཱིཏི ཨིམཾ ནཡཾ དསྶེཏུཾ ‘པཏིརཱུཔདེསཝཱསོ’ཏིཨཱདིམཱཧཱ’’ཏི (ནེཏྟི. ཨཊྛ. ༣༤) ཝུཏྟཾ. པཏིརཱུཔདེསཾ ནིསྶཱཡ ཝསནྟསྶ ཀཱཡཝིཝེཀཙིཏྟཝིཝེཀཝཌྜྷནཏོ, སམཱདྷིཝཌྜྷནཏོ ཙ པཏིརཱུཔདེསཝཱསོ ཀཱཡཙིཏྟཝིཝེཀསྶ ཙ ཨུཔཙཱརསམཱདྷིཨཔྤནཱསམཱདྷིསྶ ཙ སཱིལཱདཱིཧི སཱདྷཱརཎཾ ཧུཏྭཱ པདཊྛཱནཾ. སཔྤུརིསཱུཔནིསྶཡོཏི སཔྤུརིསསནྟཱནེ པཝཏྟོ པཡིརུཔཱསཏོ ཨཱལམྦིཏབྦོ པསཱདོ, ཏཏོ ཝཱ ཨུཔནིསྶཡཾ ལབྷིཏྭཱ པཡིརུཔཱསནྟཱནཾ སནྟཱནེ པཝཏྟོ པུབྦཔསཱདོ ཡཐཱཝིདྷོ སཔྤུརིསཱུཔནིསྶཡོ པཡིརུཔཱསནྟསྶ སདྡྷཱསམྤནྣསྶ རཏནཏྟཡེ ཏིཎྞཾ ཨཝེཙྩཔྤསཱདཱནཾ རཏནཏྟཡགུཎཱདཱིཧི སཱདྷཱརཎཾ ཧུཏྭཱ པདཊྛཱནཾ, སམཐསྶ ལབྷནནིམིཏྟདཱཡཀཾ སཔྤུརིསཾ པཡིརུཔཱསིཏྭཱ ཏེན དིནྣནཡེ ཋཏྭཱ པཝཏྟེཏབྦསྶ སམཐསྶ སཔྤུརིསཱུཔནིསྶཡོ སཱིལཔཱམོཛྫཔཱིཏཱདཱིཧི ¶ སཱདྷཱརཎཾ ཧུཏྭཱ པདཊྛཱནཾ. ཨཏྟསམྨཱཔཎིཧིཏསྶ པཱཔཛིགུཙྪཱདཱིནཾ སམྦྷཝཏོ ཨཏྟསམྨཱཔཎིདྷཱནཾ ཛཱཏིཝཡཱདིཔཙྩཝེཀྑཎེན སཱདྷཱརཎཾ ཧུཏྭཱ ཧིརིཡཱ ཙ པདཊྛཱནཾ, ཨཏྟསམྨཱཔཎིཧིཏསྶ ནིབྦིདཱདཱིནཾ སམྦྷཝཏོ སཱིལཱདཱིཧི སཱདྷཱརཎཾ ཧུཏྭཱ ཝིཔསྶནཱཡ ཙ པདཊྛཱནཾ.

ཏདངྒཱདིཝསེན ཨཀུསལཔརིཙྩཱགོ ནིབྦིདཱཉཱཎཱདཱིཧི སཱདྷཱརཎཾ ཧུཏྭཱ ཀུསལཝཱིམཾསཱཡ པཊིསངྑཱནུཔསྶནཱཡ པཉྙཱཡ ཙ ཨརིཡམགྒསམཱདྷིནྡྲིཡསྶ ཙ པདཊྛཱནཾ. དྷམྨསྭཱཀྑཱཏཏཱ སྭཱཀྑཱཏདྷམྨསྶཝནཱནུསཱརེན པཝཏྟཀུསལམཱུལཀཱ ལོཀིཡལོཀུཏྟརསམྤཏྟི ཀུསལམཱུལརོཔནཱ ནཱམ, ཏཱཡ ཙ ཏཐཱཝིདྷཀུསལམཱུལཀཱཡ ཕལསམཱཔཏྟིཡཱ ཙ པདཊྛཱནཾ. སངྒྷསུཔྤཊིཔནྣཏཱ སངྒྷསུཊྛུཏཱཡ སངྒྷསྶ ཨུཔཊྛཱཀཱནཾ སུཊྛུབྷཱཝཱཡ སཔྤཏིསྶཝཱཡ ཝཙནསམྤཊིཙྪནབྷཱཝཱཡ པདཊྛཱནཾ. སཏྠུསམྤདཱ སཏྠརི ཙེཝ དྷམྨཱདཱིསུ ཙ གུཎཨཛཱནནཏཱཡ ཨཔྤསནྣཱནཉྩ པསཱདཱཡ པསནྣཱནཉྩ ཨཔྤམཏྟཀཔསཱདཱནཉྩ བྷིཡྻོབྷཱཝཱཡ ཝཌྜྷནཱཡ པདཊྛཱནཾ. ཨཔྤཊིཧཏཔཱཏིམོཀྑཏཱ སངྒྷམཛ྄ཛྷེ ཝཱ པརིསམཛ྄ཛྷེ ཝཱ དུམྨངྐཱུནཾ དུམྨུཁཱནཾ དུསྶཱིལཱནཾ པུགྒལཱནཾ ནིགྒཧཱཡ, པེསལཱནཾ པཱཏིམོཀྑསཾཝརཱདིསཱིལསམྤནྣཱནཾ པུགྒལཱནཾ ཕཱསུཝིཧཱརཱཡ ཙ པདཊྛཱནཾ ཧོཏི. ཧོནྟོ པན ཡཐཱནུརཱུཔེཧི ཨཉྙེཧི ཀཱརཎེཧི སཱདྷཱརཎཾ ཧུཏྭཱ ཧོཏཱིཏི ཝེདིཏབྦོ.

‘‘ཝཱསནཱབྷཱགིཡསུཏྟཱདཱིསུ ¶ ཝུཏྟདྷམྨབྷཱུམིཔདཊྛཱནཱནཾ ཝིབྷཏྟིཧཱརེན ཝིབྷཛིཏབྦབྷཱཝོ ཨམྷེཧི ཀེན ཛཱནིཏབྦོ སདྡཧིཏབྦོ’’ཏི པུཙྪིཏབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ. ཏསྶཏྠོ ཝུཏྟནཡཱནུསཱརེན ཝེདིཏབྦོ.

‘‘ཨེཏྟཱཝཏཱ ཙ ཝིབྷཏྟིཧཱརོ པརིཔུཎྞོ, ཨཉྙོ ནིཡུཏྟོ ནཏྠཱི’’ཏི ཝཏྟབྦཏྟཱ ‘‘ནིཡུཏྟོ ཝིབྷཏྟིཧཱརོ’’ཏི ཝུཏྟཾ. ཡཏྠ ཡཏྠ སུཏྟེ ཡེ ཡེ དྷམྨཱདཡོ ཝུཏྟཱ, ཏཏྠ ཏཏྠ སུཏྟེ ཝུཏྟེསུ ཏེསུ ཏེསུ དྷམྨཱདཱིསུ ཡཐཱལཱབྷཝསེན ཡོ ཡོ ཝིབྷཏྟིཧཱརོ ཡོཛིཏོ, སོ སོ ཝིབྷཏྟིཧཱརོ ནིདྡྷཱརེཏྭཱ ཡུཏྟོ ཡོཛིཏོཏི ཨཏྠོ དཊྛབྦོ.

ཨིཏི ཝིབྷཏྟིཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེནེཝ གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

༩. པརིཝཏྟནཧཱརཝིབྷངྒཝིབྷཱཝནཱ

༣༥. ཡེན ¶ ཡེན སཾཝཎྞཱཝིསེསབྷཱུཏེན ཝིབྷཏྟིཧཱརཝིབྷངྒེན སུཏྟེ ཝུཏྟཱ དྷམྨཱདཡོ ཝིབྷཏྟཱ, སོ སཾཝཎྞཱཝིསེསབྷཱུཏོ ཝིབྷངྒོ པརིཔུཎྞོ, ‘‘ཀཏམོ པརིཝཏྟནཧཱརཝིབྷངྒོ’’ཏི པུཙྪིཏབྦཏྟཱ ‘‘ཏཏྠ ཀཏམོ པརིཝཏྟནོ ཧཱརོ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ནིདྡིཊྛེསུ སོལ༹སསུ དེསནཱཧཱརཱདཱིསུ ཀཏམོ སཾཝཎྞནཱཝིསེསོ པརིཝཏྟནོ ཧཱརོ པརིཝཏྟནཧཱརཝིབྷངྒོ ནཱམཱཏི པུཙྪཏི. ‘‘ཀུསལཱཀུསལེ དྷམྨེ’’ཏིཨཱདིནིདྡེསསྶ ཨིདཱནི མཡཱ ཝུཙྩམཱནོ ‘‘སམྨཱདིཊྛིསྶ པུརིསཔུགྒལསྶཱ’’ཏིཨཱདིཀོ ཝིཏྠཱརསཾཝཎྞནཱཝིསེསོ པརིཝཏྟནོ ཧཱརོ པརིཝཏྟནཧཱརཝིབྷངྒོ ནཱམཱཏི ཨཏྠོ གཧེཏབྦོ.

‘‘སཾཝཎྞིཡམཱནེ སུཏྟེ ནིདྡིཊྛསྶ ཀཏམསྶ བྷཱཝིཏབྦསྶ ཀུསལསྶ ཀཏམོ པཊིཔཀྑོ, ཀཐཾ པརིཝཏྟེཏབྦོ’’ཏི པུཙྪིཏབྦཏྟཱ ཨིམསྶ བྷཱཝིཏབྦསྶ ཀུསལསྶ ཨཡཾ པཊིཔཀྑོ, ཨེཝཾ པཧཱཏབྦབྷཱཝཝསེན པརིཝཏྟེཏབྦོཏི ¶ དསྶེནྟོ ‘‘སམྨཱདིཊྛིསྶ པུརིསཔུགྒལསྶཱ’’ཏིཨཱདིམཱཧ. ཨཊྛཀཐཱཡཾ པན –

‘‘ཏཏྠ ཡསྨཱ སཾཝཎྞིཡམཱནེ སུཏྟེ ཡཐཱནིདྡིཊྛཱནཾ ཀུསལཱཀུསལདྷམྨཱནཾ པཊིཔཀྑབྷཱུཏེ ཨཀུསལཀུསལདྷམྨེ པཧཱཏབྦབྷཱཝཱདིཝསེན ནིདྡྷཱརཎཾ པཊིཔཀྑཏོ པརིཝཏྟནཾ, ཏསྨཱ ‘སམྨཱདིཊྛིསྶ པུརིསཔུགྒལསྶ མིཙྪཱདིཊྛི ནིཛྫིཎྞཱ བྷཝཏཱི’ཏིཨཱདི ཨཱརདྡྷ’’ནྟི (ནེཏྟི. ཨཊྛ. ༣༥) –

ཝུཏྟཾ. པཧཱཡཀསྶ ཧི དྷམྨསྶ པཧཱཏབྦབྷཱཝཝསེན ནིདྡྷཱརཎཾ, པཧཱཏབྦསྶ ཙ དྷམྨསྶ པཧཱཡཀབྷཱཝཝསེན ནིདྡྷཱརཎཾ པཊིཔཀྑཏོ པརིཝཏྟནཾ ནཱམ ཧོཏི. ཏཏྠ སམྨཱདིཊྛིསྶཱཏི སམྨཱ སུནྡརཱ པསཏྠཱ དིཊྛི ཡསྶ པུགྒལསྶཱཏི སམྨཱདིཊྛི. པུགྒལཔདཊྛཱནཱ ཧི ཨཡཾ དེསནཱ. ཏེན ཝུཏྟཾ ‘‘པུརིསཔུགྒལསྶཱ’’ཏི. སཱ པན སམྨཱདིཊྛི ཀམྨཀམྨཕལཱདིསདྡཧནཝསེན ཝཱ ཨནིཙྩཱདིཝིཔསྶནཱཝསེན ཝཱ མགྒསམྨཱདསྶནཝསེན ཝཱ པཝཏྟཱ ནིརཝསེསཱཝ གཧིཏཱ. ‘‘ཡཱཡ བྷཱཝིཏཱཡ སམྨཱདིཊྛིཡཱ པཧཱཏབྦཱ མིཙྪཱདིཊྛི ནིཛྫིཎྞཱ བྷཝཏི, ཡདི ཀེཝལཱ མིཙྪཱདིཊྛིཡེཝ ནིཛྫིཎྞཱ བྷཝཏི, ཨེཝཾ སཏི ཏདཝསེསཱ ཨཀུསལཱ དྷམྨཱ ཨཛིཎྞཱ

བྷཝེཡྻུ’’ནྟི ¶ ཝཏྟབྦཏྟཱ ‘‘ཡེ ཙསྶ མིཙྪཱདིཊྛིཔཙྩཡཱ’’ཏིཨཱདི ཝུཏྟཾ. མིཙྪཱདིཊྛིཔཙྩཡཱ ཨནེཀེ པཱཔཀཱ ཨཀུསལཱཡེཝ དྷམྨཱ ཙ ཨུཔྤཛྫེཡྻུཾ ཨུཔྤཛྫནཱརཧཱ བྷཝེཡྻུཾ, ཏེ ཙ ཨཀུསལཱ དྷམྨཱ ཨསྶ སམྨཱདིཊྛིསམྤནྣསྶ པུརིསཔུགྒལསྶ ནིཛྫིཎྞཱ པཧཱཏབྦཱརཧཱ ཨནུཔྤཛྫནསབྷཱཝཱ ཧོནྟི. ཏེནཱཧ བྷགཝཱ – ‘‘ཨུཔཱདཱནནིརོདྷཱ བྷཝནིརོདྷོ’’ཏི (ཨུདཱ. ༢; མཧཱཝ. ༡).

‘‘ཡདི སམྨཱདིཊྛིསྶ པུརིསཔུགྒལསྶ མིཙྪཱདིཊྛི, ཏཔྤཙྩཡཱ ཨཀུསལདྷམྨཱཡེཝ ནིཛྫིཎྞཱ བྷཝནྟི, ཨེཝཾ སཏི སམྨཱདིཊྛིཔཙྩཡཱ ཀུསལཱ དྷམྨཱ ན སམྦྷཝེཡྻུ’’ནྟི ཝཏྟབྦཏྟཱ ‘‘སམྨཱདིཊྛིཔཙྩཡཱ ཙཱ’’ཏིཨཱདི ཝུཏྟཾ. ཨསྶ སམྨཱདིཊྛིསམྤནྣསྶ པུརིསཔུགྒལསྶ ཨུཔྤཛྫནཱརཧཱ སམྨཱདིཊྛིཔཙྩཡཱ ཨནེཀེ ཀུསལཱ སམཐཝིཔསྶནཱ ཝཱ བོདྷིཔཀྑིཡཱ ཝཱ དྷམྨཱ སམྦྷཝནྟི, ཨུཔྤནྣཱ ཙ ཏེ དྷམྨཱ ཨསྶ སམྨཱདིཊྛིསམྤནྣསྶ པུརིསཔུགྒལསྶ སནྟཱནེ པུནཔྤུནཾ པཝཏྟནཝསེན བྷཱཝནཱཔཱརིཔཱུརིཾ གཙྪནྟི.

སམྨཱདིཊྛིཡཱ ¶ པཊིཔཀྑཱནཾ མིཙྪཱདིཊྛིཡཱ, ཏཔྤཙྩཡཱནཾ ཨཀུསལཱནཾ དྷམྨཱནཾ པརིཝཏྟནབྷཱཝོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘སམྨཱསངྐཔྤསྶ དྷམྨསྶ པཊིཔཀྑོ དྷམྨོ ཀཐཾ པརིཝཏྟེཏབྦོ’’ཏི ཝཏྟབྦཏྟཱ ‘‘སམྨཱསངྐཔྤསྶ པུརིསཔུགྒལསྶཱ’’ཏིཨཱདི ཝུཏྟཾ. ཡོཛནཏྠ ཨཱདཡོ ཝུཏྟནཡཱནུསཱརེན ཝེདིཏབྦཱ. སམྨཱ སུནྡརཱ པསཏྠཱ ཝཱཙཱ ཡསྶ པུགྒལསྶཱཏི སམྨཱཝཱཙོ, ཏསྶ སམྨཱཝཱཙསྶ. ‘‘པུརིསཔུགྒལསྶཱ’’ཏིཨཱདཱིནཾ ཨཏྠོཔི ཝུཏྟནཡེན ཝེདིཏབྦོ. ཨཡཾ པན ཝིསེསཏྠོསམྨཱ ཨཝིཔརཱིཏཏོ ཝིམུཏྟིཉཱཎདསྶནཾ ཡསྶ པུགྒལསྶཱཏི སམྨཱཝིམུཏྟིཉཱཎདསྶནོ, ཏསྶ སམྨཱཝིམུཏྟིཉཱཎདསྶནསྶ པཙྩཝེཀྑཎཉཱཎདསྶནསམྤནྣསྶ པུརིསཔུགྒལསྶ ‘‘ཨཝིམུཏྟཱཝ སམཱནཱ ཝིམུཏྟཱ མཡ’’ནྟི མིཙྪཱབྷིནིཝེསཝསེན པཝཏྟཾ མིཙྪཱཝིམུཏྟིཉཱཎདསྶནཾ ནིཛྫིཎྞཾ ཝིགཏཾ བྷཝཏི. ‘‘ཡེ ཙསྶཱ’’ཏིཨཱདཱིནཾ ཨནུསནྡྷྱཱདིཀོ ཝུཏྟནཡཱནུསཱརེན ཝེདིཏབྦོ.

༣༦. ‘‘སམྨཱདིཊྛིསྶཱཏིཨཱདིནཱ སམྨཱདིཊྛིཨཱདཱིནཾ ཀུསལཱནཾ པཊིཔཀྑཱ མིཙྪཱདིཊྛཱདིཀཱཡེཝ ཨཀུསལཱ པཧཱཏབྦབྷཱཝེན པརིཝཏྟེཏབྦཱ’’ཏི པུཙྪིཏབྦཏྟཱ པཱཎཱཏིཔཱཏཱཝེརམཎིཨཱདཱིནཾ ཀུསལཱནཾ པཊིཔཀྑཱ པཱཎཱཏིཔཱཏཱདིཀཱཔི ཨཀུསལཱ པཧཱཏབྦབྷཱཝེན པརིཝཏྟེཏབྦཱཏི དསྶེཏུཾ ‘‘ཡསྶ ཝཱ པཱཎཱཏིཔཱཏཱ པཊིཝིརཏསྶཱ’’ཏིཨཱདི ཝུཏྟཾ. ཨཊྛཀཐཱཡཾ པན ‘‘ཨེཝཾ སམྨཱདིཊྛིཨཱདིམུཁེན མིཙྪཱདིཊྛིཨཱདིཾ དསྶེཏྭཱ པུན པཱཎཱཏིཔཱཏཨདིནྣཱདཱནཀཱམེསུམིཙྪཱཙཱརཱདིཏོ ཝེརམཎིཡཱདཱིཧི པཱཎཱཏིཔཱཏཱདཱིནཾ པརིཝཏྟནཾ དསྶེཏུཾ ‘ཡསྶཱ’ཏིཨཱདི ཨཱརདྡྷ’’ནྟི (ནེཏྟི. ཨཊྛ. ༣༦) ཝུཏྟཾ. ཏདངྒཱདིཝསེནཔཧཱིནོ ཧོཏི. ཀཱལཝཱདིསྶཱཏི ཝདིཏབྦཀཱལེ ཝདིཏབྦཾ ཝདཏི སཱིལེནཱཏི ཀཱལཝཱདཱི, ཏསྶ.

‘‘ཡཐཱཝུཏྟཔྤཀཱརེནེཝ ¶ པརིཝཏྟེཏབྦཱ’’ཏི པུཙྪིཏབྦཏྟཱ ཨཉྙེན པཀཱརེནཔི པརིཝཏྟེཏབྦཱཏི དསྶེཏུཾ ‘‘ཡེ ཙ ཁོ ཀེཙཱི’’ཏིཨཱདི ཝུཏྟཾ. ཨཊྛཀཐཱཡཾ པན ‘‘ཡེ ཙ ཁོ ཀེཙཱིཏིཨཱདིནཱ སམྨཱདིཊྛིཨཱདིམུཁེནེཝ མིཙྪཱདིཊྛིཨཱདཱིཧི ཨེཝ པརིཝཏྟནཾ པཀཱརནྟརེན དསྶེཏཱི’’ཏི (ནེཏྟི. ཨཊྛ. ༣༦) ཝུཏྟཾ. ཏཏྠ ཀེཙི མིཙྪཱདིཊྛིཀམིཙྪཱསངྐཔྤཱདིཀཱཡེཝ པུགྒལཱ པརེསཾ ཨརིཡཱནཾ ཨརིཡཾ ཨཊྛངྒིཀཾ མགྒཾ གརཧནྟི. སནྡིཊྛིཀཱ སནྡིཊྛེ ནིཡུཏྟཱ, སཧདྷམྨིཀཱ སཧ དྷམྨེན ཀཱརཎེན ཡེ ཝཏྟནྟི སཧདྷམྨིཀཱ. གཱརཡ྄ཧཱ གརཧིཏབྦཱཀཱརེ ཡུཏྟཱ ¶ . ཝཱདཱ ཙ ཨནུཝཱདཱ ཙ ཝཱདཱནུཝཱདཱ, ཏེ བྷཝནྟོ སམྨཱདིཊྛིཉྩ དྷམྨཾ གརཧནྟི. ཏེན གརཧཎེན. པུཛྫཱ པཱུཛིཏབྦཱ ཙ ན བྷཝནྟི, པཱསཾསཱ པསཾསིཏབྦཱ ཙ ན བྷཝནྟི. ཨེཝནྟིཨཱདཱིསུ སམྨཱསངྐཔྤཾ ཝཱ སམྨཱཝཱཙཱདིཀཾ ཝཱ ཝིསུཾ ཝིསུཾ སམྨཱསངྐཔྤཉྩ ཏེ བྷཝནྟོ དྷམྨཾ གརཧནྟི. ཏེན ཧི ཡེ མིཙྪཱསངྐཔྤིཀཱ, ཏེ བྷཝནྟོ ན པུཛྫཱ ཙ པཱསཾསཱ ཙ…པེ… སམྨཱཝིམུཏྟིཉྩ ཏེ བྷཝནྟོ དྷམྨཾ གརཧནྟི. ཏེན ཧི ཡེ མིཙྪཱདིཊྛིཝཱཙིཀཱ, ཏེ བྷཝནྟོ ན པུཛྫཱ ཙ པཱསཾསཱ ཙ. སམྨཱཝིམུཏྟིཉཱཎདསྶནཉྩ ཏེ བྷཝནྟོ དྷམྨཾ གརཧནྟི. ཏེན ཧི ཡེ མིཙྪཱཝིམུཏྟིཀཱ, ཏེ བྷཝནྟོ ན པུཛྫཱ ཙ པཱསཾསཱ ཙ. སམྨཱཝིམུཏྟིཉཱཎདསྶནཉྩ ཏེ བྷཝནྟོ དྷམྨཾ གརཧནྟི. ཏེན ཧི ཡེ མིཙྪཱཝིམུཏྟིཉཱཎདསྶནིཀཱ, ཏེ བྷཝནྟོ ན པུཛྫཱ ཙ པཱསཾསཱ ཙཱཏི ཡོཛནཱ ཀཱཏབྦཱ. ‘‘མིཙྪཱཝིམུཏྟིཉཱཎདསྶནཱ’’ཏིཔི པཱཋོ ཨཏྠི.

‘‘ཨརིཡམགྒསམྨཱདིཊྛཱདཱིནཾ གརཧཝསེནེཝ མིཙྪཱདིཊྛཱདཡོ ཙ པརིཝཏྟེཏབྦཱ, ནཱཝསེསཱནཾ པསཾསཱཝསེནཱ’’ཏི ཝཏྟབྦཏྟཱ ཀཱམཱདཱིནཾ པསཾསཱཝསེནཔི ཀཱམཱནཾ པཊིཔཀྑཱ ཝེརམཎིཡཱདཡོཔི པརིཝཏྟེཏབྦཱཏི དསྶེཏུཾ ‘‘ཡེ ཙ ཁོ ཀེཙི ཨེཝམཱཧཾསཱུ’’ཏིཨཱདི ཝུཏྟཾ. ཏཏྠ བྷུཉྫིཏབྦཱ ཀཱམཱ, པརིབྷུཉྫིཏབྦཱ ཀཱམཱ, ཨཱསེཝིཏབྦཱ ཀཱམཱ, ནིསེཝིཏབྦཱ ཀཱམཱཏི ཨེཏྠ ཀཱམཱིཡནྟེཏི ཀཱམཱཏི ཀམྨསཱདྷནཝསེན ཝཏྠུཀཱམཱ གཧིཏཱ, ནཱཏིཔཎཱིཏཱ ཀཱམཱ བྷུཉྫིཏབྦཱ, ཨཏིཔཎཱིཏཱ ཀཱམཱ པརི སམནྟཏོ བྷུཉྫིཏབྦཱ. ཨཏིཔཎཱིཏཏརཱ ཀཱམཱ ཨཱ བྷུསོ སེཝིཏབྦཱ, ནིཡཏཱ སེཝིཏབྦཱ. བྷཱཝཡིཏབྦཱ ཀཱམཱ, བཧུལཱིཀཱཏབྦཱ ཀཱམཱཏི ཨེཏྠ པན ཀཱམེནྟཱིཏི ཀཱམཱཏི ཀཏྟུསཱདྷནཝསེན ཀིལེསཀཱམཱ གཧིཏཱ, པུནཔྤུནཾ ཨུཔྤཱདནཝསེན བྷཱཝཡིཏབྦཱ ཝཌྜྷཱཔེཏབྦཱ པཝཏྟེཏབྦཱ ཀིལེསཀཱམཱ, བཧཱུནཾ པུནཔྤུནཾ ཨུཔྤཱདནཝསེན ཀཱཏབྦཱ ཝཌྜྷཱཔེཏབྦཱ ཀིལེསཀཱམཱཏི ཡེ ཙ ཀཱམཝསིཀཱ པུཐུཛྫནཱ ཀེཙི ཨེཝམཱཧཾསུ ཏེསཾ ཀཱམཝསིཀཱནཾ པུཐུཛྫནཱནཾ ཀེསཉྩི ཏཱདིསེཧི ཀཱམེཧི ཝེརམཎཱི ཀུསལཙེཏནཱ པཊིཔཀྑཝསེན ཨདྷམྨོ ཨསེཝིཏབྦོ ནཱམ ཨཱཔཛྫེཡྻཱཏི ཨདྷིཔྤཱཡོ གཧེཏབྦོ.

ཨནྟདྭཡཝསེན ¶ པརིཝཏྟནཾ དསྶེཏུཾ ‘‘ཡེ ཝཱ པན ཀེཙཱི’’ཏིཨཱདི ཝུཏྟཾ. ཨཏྟཀིལམཐཱནུཡོགོ དྷམྨོཏི ནིཡྻཱནིཀོཏི ཡེ ཝཱ པན པཉྩཱཏཔཱདིཔཊིཔནྣཀཱ ཏཏྠིཡཱ ཨེཝམཱཧཾསུ, ཏེསཾ པཉྩཱཏཔཱདིཔཊིཔནྣཀཱནཾ ནིཡྻཱནིཀོ དྷམྨོ མཛ྄ཛྷིམཱཔཊིཔདཱསངྑཱཏོ ཝིཔསྶནཱསཧིཏོ ཨརིཡམགྒོ ¶ ཨདྷམྨོ ཨནིཡྻཱནིཀོ ཨབྷཱཝེཏབྦོ ནཱམ ཨཱཔཛྫེཡྻཱཏི. སུཁདུཀྑཝསེནཔི པརིཝཏྟནཾ དསྶེཏུཾ ‘‘ཡེ ཙ ཁོ’’ཏིཨཱདི ཝུཏྟཾ. ‘‘པཱཔཾ ནིཛྫརཱཔེསྶཱམཱ’’ཏི ཨཏྟཧིཾསནཱདིཝསེན པཊིཔནྣཀཱནཾ པཝཏྟོ སརཱིརཏཱཔནོ དུཀྑོ དྷམྨོ ནིཡྻཱནིཀོཏི.

ཡེ ཙ ཏཐཱཔཊིཔནྣཀཱ ཀེཙི ཨེཝམཱཧཾསུ, ཏེསཾ ཏཐཱཔཊིཔནྣཀཱནཾ ཨནཝཛྫཔཙྩཡཔརིབྷོགཝསེན པཝཏྟོ སརཱིརདུཀྑཱུཔསམོ སུཁོ དྷམྨོ ཨདྷམྨོ ཨཔྤཝཏྟེཏབྦོ ཨཱཔཛྫེཡྻཱཏི.

ཨནྟདྭཡཱདིཝསེན པརིཝཏྟནཾ ཨཱཙརིཡེན ཝིབྷཏྟཾ, ཨམྷེཧི ཙ ཉཱཏཾ, ‘‘ཀཐཾ ཨསུབྷསཉྙཱདིཝསེན པརིཝཏྟེཏབྦོ’’ཏི པུཙྪིཏབྦཏྟཱ ཨེཝཾ ཨསུབྷསཉྙཱདིཝསེན སུབྷསཉྙཱདིཀཱ པརིཝཏྟེཏབྦཱཏི དསྶེཏུཾ ‘‘ཡཐཱ ཝཱ པནཱ’’ཏིཨཱདི ཝུཏྟཾ. ཨཊྛཀཐཱཡཾ པན ‘‘ཨིདཱནི ཨསུབྷསཉྙཱདིམུཁེན སུབྷསཉྙཱདིཔརིཝཏྟནཾ དསྶེཏུཾ ‘ཡཐཱ ཝཱ པནཱ’ཏིཨཱདི ཝུཏྟ’’ནྟི (ནེཏྟི. ཨཊྛ. ༣༦) ཝུཏྟཾ. སབྦསངྑཱརེསཱུཏི ཏེབྷཱུམཀསངྑཱརེསུ. ཨཱརདྡྷཝིཔསྶཀསྶ ཧི ཏེབྷཱུམཀཱ དྷམྨཱ ཀིལེསཱསུཙིཔགྒྷརཎཀཏྟཱ ཨསུབྷཏོ ཨུཔཊྛཧནྟི.

‘‘ཡདི སརཱུཔཏོཡེཝ ཨིམེསཾ ཨིམེ པཊིཔཀྑཱཏི ཨཔརིཝཏྟེཏབྦཱ སིཡུཾ, ཨེཝཾ སཏི ནིརཝསེསཱ ཙ པཊིཔཀྑཱ ན སཀྐཱ པརིཝཏྟེཏུཾ, ཀཐཾ སཀྐཱ པརིཝཏྟེཏུ’’ནྟི ཝཏྟབྦཏྟཱ པརིཝཏྟནལཀྑཎཾ དསྶེནྟོ ‘‘ཡཾ ཡཾ ཝཱ པནཱ’’ཏིཨཱདིམཱཧ. ཏཏྠ ཀུསལཾ ཝཱ ཨཀུསལཾ ཝཱ ཡཾ ཡཾ དྷམྨཾ པརིཝཏྟེཏུཀཱམོ ཨཱཙརིཡོ ཙིཏྟེན རོཙཡཏི དིཊྛིཡཱ ཨུཔགཙྪཏི, ཀུསལསྶ ཝཱ ཨཀུསལསྶ ཝཱ ཏསྶ ཏསྶ རུཙིཀསྶ ཨུཔགཏསྶ དྷམྨསྶ ཡོ པཊིཔཀྑོ, སོ པཊིཔཀྑདྷམྨོ ཨསདྡྷམྨོ ཨསྶ དྷམྨསྶ ཨནིཊྛཏོ པཙྩནཱིཀཏོ ཨཛ྄ཛྷཱཔནྣོ པརིཉྙཱཏོ. ཨིཊྛཾ ཝཱ ཨནིཊྛཾ ཝཱ ཡཾ ཡཾ དྷམྨཾ པརིཝཏྟེཏུཀཱམོ ཨཱཙརིཡོ ཙིཏྟེན རོཙཡཏི དིཊྛིཡཱ ཨུཔགཙྪཏི, ཨིཊྛསྶ ཝཱ ཨནིཊྛསྶ ཝཱ ཏསྶ ཏསྶ རུཙིཀསྶ དྷམྨསྶ ཡོ པཊིཔཀྑོ, སོ པཊིཔཀྑདྷམྨོ ཨསྶ དྷམྨསྶ ཨནིཊྛཏོ པཙྩནཱིཀདྷམྨཏོ ཨཛ྄ཛྷཱཔནྣོ པརིཉྙཱཏོ བྷཝཏཱིཏི པརིཝཏྟེཏུཀཱམེན ཨིཙྪིཏབྦདྷམྨཱནུརཱུཔཔཊིཔཀྑཝསེན པརིཝཏྟནཾ ཀཱཏབྦནྟི པརིཝཏྟནེ པཊིཔཀྑལཀྑཎཾ ཝུཏྟཾ. ཏེན ཨཊྛཀཐཱཡཾ ཝུཏྟཾ – ‘‘པཊིཔཀྑསྶ ལཀྑཎཾ ཝིབྷཱཝེཏཱི’’ཏི.

‘‘ཨེཝཾ ¶ ¶ ཝུཏྟཔྤཀཱརཾ པརིཝཏྟནཾ ཨམྷེཧི ཀཐཾ སདྡཧིཏབྦ’’ནྟི ཝཏྟབྦཏཱ ‘‘ཏེནཱཧཱ’’ཏིཨཱདི ཝུཏྟཾ.

‘‘ཨེཏྟཱཝཏཱ པརིཝཏྟོ ཧཱརོ པརིཔུཎྞོ, ཨཉྙོ ནིཡུཏྟོ ནཏྠཱི’’ཏི ཝཏྟབྦཏྟཱ ‘‘ནིཡུཏྟོ པརིཝཏྟནོ ཧཱརོ’’ཏི ཝུཏྟཾ. ཡསྨིཾ སུཏྟེ ཀུསལཱཀུསལེ ནིདྡིཊྛེ པཊིཔཀྑཝསེན ནཱིཧརིཏྭཱ ཡཐཱསམྦྷཝཾ ཡོ ཡོ པརིཝཏྟནོ ཧཱརོ ནིཡུཏྟོ, ཏསྨིཾ སུཏྟེ ནིདྡིཊྛེ པཊིཔཀྑཝསེན ནཱིཧརིཏྭཱ སོ སོ པརིཝཏྟནོ ཧཱརོ ནིཡུཏྟོ ནིདྡྷཱརེཏྭཱ ཡུཏྟོ ཡོཛིཏོཏི ཨཏྠོ གཧེཏབྦོཏི.

ཨིཏི པརིཝཏྟནཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

༡༠. ཝེཝཙནཧཱརཝིབྷངྒཝིབྷཱཝནཱ

༣༧. ཡེན ཡེན སཾཝཎྞནཱཝིསེསབྷཱུཏེན པཝཏྟནཧཱརཝིབྷངྒེན པརིཝཏྟེཏབྦཱ སུཏྟཏྠཱ ཝིབྷཏྟཱ, སོ སཾཝཎྞནཱཝིསེསབྷཱུཏོ པརིཝཏྟནཧཱརཝིབྷངྒོ པརིཔུཎྞོ, ‘‘ཀཏམོ ཝེཝཙནཧཱརཝིབྷངྒོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཝེཝཙནོ ཧཱརོ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ནིདྡིཊྛེསུ སོལ༹སསུ དེསནཱཧཱརཱདཱིསུ ཀཏམོ སཾཝཎྞནཱཝིསེསོ ཝེཝཙནོ ཧཱརོ ཝེཝཙནཧཱརཝིབྷངྒོ ནཱམཱཏི པུཙྪཏི. ‘‘ཝེཝཙནཱནི བཧཱུནཱི’’ཏིཨཱདིནིདྡེསསྶ ཨིདཱནི མཡཱ ཝུཙྩམཱནོ ‘‘ཨེཀཾ བྷགཝཱ དྷམྨ’’ནྟིཨཱདིཀོ ཝིཏྠཱརསཾཝཎྞནཱཝིསེསོ ཝེཝཙནོ ཧཱརོ ཝེཝཙནཧཱརཝིབྷངྒོ ནཱམཱཏི ཨཏྠོ གཧེཏབྦོ. ‘‘ཡཱནི ཝེཝཙནཱནི ནིདྡྷཱརིཏཱནི, ཀཏམཱནི ཏཱནི ཝེཝཙནཱནཱི’’ཏི པུཙྪིཏབྦཏྟཱ ‘‘ཡཐཱ ཨེཀ’’ནྟིཨཱདི ཝུཏྟཾ. ཨེཀཾ ཝིཉྙཱཏབྦཾ དྷམྨཾ སབྷཱཝདྷམྨཾ པཉྙཱཔེཏབྦཾ ཝཱ དྷམྨཾ ཨཉྙམཉྙེཧི ཡཐཱ ཡེཧི པཀཱརེཧི ཙེཝ ཝེཝཙནེཧི ཙ བྷགཝཱ ནིདྡིསཏི, ཏཐཱཔཀཱརཱནི ཝེཝཙནཱནི ཝིཉྙཱཏབྦཱནཱིཏི ཨཏྠོ. ‘‘ཏཱནི ཝེཝཙནཱནི ཀིནྟི ¶ བྷགཝཱ ཨཱཧཱ’’ཏི ཝཏྟབྦཏྟཱ ‘‘ཡཐཱཧ བྷགཝཱ’’ཏིཨཱདི ཝུཏྟཾ. ཡཐཱ ཡཾཡཾཔཀཱརཱནི ཝེཝཙནཱནི –

‘‘ཨཱསཱ ¶ ཙ པིཧཱ ཙ ཨབྷིནནྡནཱ ཙ, ཨནེཀདྷཱཏཱུསུ སརཱ པཏིཊྛིཏཱ;

ཨཉྙཱཎམཱུལཔྤབྷཝཱ པཛཔྤིཏཱ, སབྦཱ མཡཱ བྱནྟིཀཏཱ སམཱུལིཀཱ’’ཏི. –

བྷགཝཱ ཨཱཧ, ཏཾཏཾཔཀཱརཱནི ཝེཝཙནཱནི ཝིཉྙཱཏབྦཱནཱིཏི ཨཏྠོ.

ཨེཀསྶེཝ དྷམྨསྶ ཨནེཀེཧི པརིཡཱཡབྷཱུཏེཧི ཝེཝཙནེཧི ནིདྡིསནེ ཕལཾ ཨཊྛཀཐཱཡཾ (ནེཏྟི. ཨཊྛ. ༣༧) བཧུདྷཱ ཝུཏྟཾ, ཏསྨཱ ཨམྷེཧི ན དསྶིཏཾ. ‘‘ཀཏམཱ ཨཱསཱ, ཀཏམཱ པིཧཱདཱི’’ཏི པུཙྪིཏབྦཏྟཱ ‘‘ཨཱསཱ ནཱམ ཝུཙྩཏཱི’’ཏིཨཱདི ཝུཏྟཾ. ཡཱ བྷཝིསྶསྶ ཨཏྠསྶ ཨཱསཱིསནཱ ཨཝསྶཾ ཨཱགམིསྶཏཱིཏི ཡཱ ཨཱསཱ ཨསྶ ཨཱསཱིསནྟསྶ པུགྒལསྶ ཨུཔྤཛྫཏི, ཏསྶ ཨཱསཱིསནཱ ‘‘ཨཱསཱ ནཱམཱ’’ཏི ཝུཙྩཏི. ཝཏྟམཱནསྶ ཡཱ པཏྠནཱ ཨསྶ པཏྠཡནྟསྶ ཨུཔྤཛྫཏི, སེཡྻཏརཾ ཝཱ ཨཉྙཾ དིསྭཱ ‘‘ཨེདིསོ ཨཧཾ བྷཝེཡྻ’’ནྟི ཡཱ པིཧཱ ཨསྶ པིཧཡནྟསྶ ཨུཔྤཛྫཏི, སཱ པཏྠནཱ ‘‘པིཧཱ ནཱམཱ’’ཏི ཝུཙྩཏི. ཨནཱགཏཏྠཾ ཨཱརབྦྷ པཝཏྟཱ ཏཎྷཱ ‘‘ཨཱསཱ’’ཏི ཝུཙྩཏི, ཨནཱགཏཔཙྩུཔྤནྣཏྠཾ ཨཱརབྦྷ པཝཏྟཱ ཏཎྷཱ ‘‘པིཧཱ’’ཏི ཝུཙྩཏི, ཏཐཱཔི ཏཎྷཱབྷཱཝེན ཨེཀཏྟཱ ཨེཀོ དྷམྨོཝ ཨཏྠསྶ ཨིཙྪིཏསྶ ནིཔྥཏྟི ཨཏྠནིཔྥཏྟི, པཊིཔཱལེཏི ཨེཏཱཡ ཏཎྷཱཡཱཏི པཊིཔཱལནཱ, ཨཏྠནིཔྥཏྟིཡཱ པཊིཔཱལནཱཏི ཨཏྠནིཔྥཏྟིཔཊིཔཱལནཱ. ཡཱ ཏཎྷཱ ཨསྶ པཱལཡནྟསྶ པུགྒལསྶ ཨུཔྤཛྫཏི, སཱ ཏཎྷཱ ‘‘ཨབྷིནནྡནཱ’’ཏི ཝུཙྩཏི.

‘‘ཡཱ ཨཏྠནིཔྥཏྟི ཏཎྷཱཡ པཊིཔཱལེཏབྦཱ, ཀཏམཱ སཱ ཨཏྠནིཔྥཏྟཱི’’ཏི པུཙྪིཏབྦཏྟཱ ཏཾ ཨཏྠནིཔྥཏྟིཾ སཏྟཏོ ཝཱ སངྑཱརཏོ ཝཱ ཝིབྷཛིཏྭཱ དསྶེནྟོ ‘‘པིཡཾ ཝཱ ཉཱཏིཾ, པིཡཾ ཝཱ དྷམྨ’’ནྟིཨཱདིམཱཧ. ཏཏྠ ‘‘ཉཱཏི’’ནྟི ཨིམིནཱ མིཏྟབནྡྷཝཱདཡོཔི གཧིཏཱ. དྷམྨཾ པན པིཡརཱུཔཱརམྨཎཱདིཀཾ ཚབྦིདྷམྤི ཡཱཡ ཏཎྷཱཡ ཏཎྷིཀོ ཨབྷིནནྡཏི, སཱ ཏཎྷཱ ‘‘ཨབྷིནནྡནཱ ནཱམཱ’’ཏི ཝུཙྩཏི. པཊིཀྐཱུལཾ ཉཱཏིཾ ཝཱ དྷམྨཾ ཝཱ ཝིཔལླཱསཝསེན ཨཔྤཊིཀྐཱུལཾ ཉཱཏིཾ ཝཱ དྷམྨཾ ཝཱ སབྷཱཝཝསེན ཨཔྤཊིཀྐཱུལཏོ ཡཱཡ ཏཎྷཱཡ ཏཎྷིཀོ ཨབྷིནནྡཏི ¶ , སཱ ཏཎྷཱ ཝཱ ‘‘ཨབྷིནནྡནཱ ནཱམཱ’’ཏི ཝུཙྩཏཱིཏི ཡོཛེཏྭཱ ཨཏྠོ གཧེཏབྦོ.

‘‘ཡཱསུ ཨནེཀཱསུ དྷཱཏཱུསུ ཝུཏྟཔྤཀཱརཱ ཏཎྷཱ ‘སརཱ’ཏི བྷགཝཏཱ ཝུཏྟཱ, ཀཏམཱ ཏཱ དྷཱཏུཡོ’’ཏི པུཙྪིཏབྦཏྟཱ ཏཱ དྷཱཏུཡོ སརཱུཔཏོ དསྶེཏུཾ ‘‘ཙཀྑུདྷཱཏཱུ’’ཏིཨཱདི ཝུཏྟཾ.

‘‘ཏཱསུ དྷཱཏཱུསུ ཀཏམཱཡ དྷཱཏུཡཱ ཀཏམཱ སརཱ པཏིཊྛིཏཱ པཝཏྟཱ’’ཏི པུཙྪིཏབྦཏྟཱ ཨིམཱཡ དྷཱཏུཡཱ ཨཡཾ སརཱ པཏིཊྛིཏཱ པཝཏྟཱཏི ནིཡམེཏྭཱ དསྶེཏུཾ ‘‘སརཱཏི ཀེཙི རཱུཔཱདྷིམུཏྟཱ’’ཏིཨཱདི ¶ ཝུཏྟཾ. ཏཏྠ ཀེཙཱིཏི སརཱསངྑཱཏཱཡ རཱུཔཏཎྷཱཡ ཏཎྷིཀཱ པུགྒལཱ. རཱུཔཱདྷིམུཏྟཱཏི རཱུཔདྷཱཏུསངྑཱཏེ ཨཱརམྨཎེ ཨདྷིམུཏྟཱ ཨཛ྄ཛྷོསིཏཱ. ཨིམིནཱ པདེན རཱུཔཏཎྷཱསངྑཱཏཱ སརཱ རཱུཔདྷཱཏུཡཱ པཏིཊྛིཏཱ པཝཏྟཱཏི གཧིཏཱ, ‘‘ཀེཙི སདྡཱདྷིམུཏྟཱ’’ཏིཨཱདཱིཧིཔི སདྡཏཎྷཱསངྑཱཏཱདཡོ སརཱ སདྡདྷཱཏུཡཱདཱིསུ པཏིཊྛིཏཱ པཝཏྟཱ སརཱཝ གཧིཏཱ. ཀེཙི དྷམྨཱདྷིམུཏྟཱཏི ཨེཏྠ དྷམྨགྒཧཎེན ཙཀྑུདྷཱཏུསོཏདྷཱཏུགྷཱནདྷཱཏུཛིཝ྄ཧཱདྷཱཏུཀཱཡདྷཱཏུསཏྟཝིཉྙཱཎདྷཱཏུདྷམྨདྷཱཏུཡོ གཧིཏཱ, ཏསྨཱ ཨཊྛཱརས དྷཱཏུཡོ པཏིཊྛཱནབྷཱཝེན གཧིཏཱཔི ཚབྦིདྷཱཝ གཧིཏཱཏི དཊྛབྦཱ. ‘‘རཱུཔཱདྷིམུཏྟཱདཱིསུ ཀིཏྟཀཱནི པདཱནི ཏཎྷཱཔཀྑེ ཏཎྷཱཡ ཝེཝཙནཱ’’ཏི པུཙྪིཏབྦཏྟཱ ཨེཏཱདིསཱནི ཨེཏྟཀཱནི པདཱནི ཏཎྷཱཔཀྑེ ཏཎྷཱཝེཝཙནཱནཱིཏི ནིཡམེཏྭཱ དསྶེཏུཾ ‘‘ཏཏྠ ཡཱནི ཚ གེཧསིཏཱནཱི’’ཏིཨཱདི ཝུཏྟཾ. ཏཏྠཱཏི ཏེསུ ཚསུ རཱུཔཱདཱིསུ. ཚ གེཧསིཏཱནི དོམནསྶཱནཱིཏི ཚསུ རཱུཔཱདཱིསུ པཝཏྟཾ ཏཎྷཱཔེམཾ ནིསྶཱཡ པཝཏྟཱནི ཚ དོམནསྶཱནི. ཨེས ནཡོ སེསེསུཔི. ‘‘ཚ ཨུཔེཀྑཱ གེཧསིཏཱཔི བྷགཝཏཱ ཝུཏྟཱ, ཀསྨཱ ན གཧིཏཱ’’ཏི ཝཏྟབྦཏྟཱ ‘‘ཡཱ ཚ ཨུཔེཀྑཱ གེཧསིཏཱ, ཨཡཾ དིཊྛིཔཀྑོ’’ཏི ཝུཏྟཾ, དིཊྛིཔཀྑཏྟཱ ན གཧིཏཱཏི ཨཏྠོ.

༣༨. ‘‘ཀཐཾ ཝུཏྟཔྤཀཱརཱ ཏཎྷཱ ཨེཝ གཧིཏཱ’’ཏི ཝཏྟབྦཏྟཱ ‘‘སཱཡེཝ པཏྠནཱཀཱརེནཱ’’ཏིཨཱདི ཝུཏྟཾ. སཱ ཝུཏྟཔྤཀཱརཱ ཨེཝ ཏཎྷཱ པཏྠནཱཀཱརེན པཝཏྟནཏོ ཨཱསཱདིཔརིཡཱཡེན ཝུཏྟཱ, རཱུཔཱདིཨཱརམྨཎདྷམྨེསུ ནནྡནཏོ ‘‘དྷམྨནནྡཱི’’ཏི པརིཡཱཡེན ཝུཏྟཱ, རཱུཔཱདིཨཱརམྨཎདྷམྨེསུ གིལིཏྭཱ པརིནིཊྛཔེཏི ཝིཡ ཨཛ྄ཛྷོསཱཡ ཏིཊྛནཏོ ‘‘དྷམྨཛ྄ཛྷོསཱན’’ནྟི པརིཡཱཡེན ཝུཏྟཱ, ཏསྨཱ ཏཎྷཱཡ ཝེཝཙནཱནི ཧོནྟི.

ཏཎྷཱཡ ¶ ཝེཝཙནཱནི ཨཱཙརིཡེན ནིདྡིཊྛཱནི, ཨམྷེཧི ཙ ཉཱཏཱནི, ‘‘ཀཏམཱནི ཙིཏྟསྶ ཝེཝཙནཱནཱི’’ཏི པུཙྪིཏབྦཏྟཱ ‘‘ཙིཏྟཾ མནོ’’ཏིཨཱདི ཝུཏྟཾ. ‘‘ཨཱརམྨཎཾ ཙིནྟེཏཱིཏི ཙིཏྟཾ. མནཏི ཛཱནཱཏཱིཏི མནོ. ཝིཛཱནཱཏཱིཏི ཝིཉྙཱཎ’’ནྟིཨཱདིནཱ ཨཏྠོ པཀརཎེསུ (དྷ. ས. ཨཊྛ. ༥) ཝུཏྟོཝ, ཏསྨཱ ཨམྷེཧི ན ཝིཏྠཱརིཏོ. ཝེཝཙནཱནིཡེཝ ཨིམཱནི ཨིམསྶ ཝེཝཙནཱནཱིཏི ཨེཏྟཀཱནིཡེཝ ཀཐཡིསྶཱམ. ‘‘པཉྙིནྡྲིཡཾ པཉྙཱབལ’’ནྟིཨཱདཱིནི པཉྙཱཝེཝཙནཱནི.

‘‘ཨརཧཾ སམྨཱསམྦུདྡྷོ’’ཏིཨཱདཱིནི བུདྡྷསྶ ཝེཝཙནཱནི. ‘‘ཏཱནི ཀཏྠ དེསིཏཱནཱི’’ཏི པུཙྪིཏབྦཏྟཱ ‘‘ཡཐཱ ཙ བུདྡྷཱནུསྶཏིཡཾ ཝུཏྟ’’ནྟིཨཱདི ཝུཏྟཾ. བུདྡྷཱནུསྶཏིདེསནཱཡཾ ཡཐཱ ཙ ཡཾཡཾཔཀཱརཾ ¶ ཝེཝཙནཾ བྷགཝཏཱ ‘‘ཨིཏིཔི སོ བྷགཝཱ ཨརཧཾ…པེ… བྷགཝཏོ’’ཏི ཝུཏྟཾ, ཨེཏཾཔཀཱརཾ ཝེཝཙནཾ བུདྡྷཱནུསྶཏིཡཱ ཝེཝཙནཾ བུདྡྷསྶ ཝེཝཙནནྟི དཊྛབྦཾ. ‘‘ཡཐཱ ཙ དྷམྨཱནུསྶཏིཡཾ ཝུཏྟ’’ནྟིཨཱདཱིསུཔི ཨེཝམེཝ ཡོཛནཱ ཀཱཏབྦཱ.

‘‘ཏེནཱཧཱ’’ཏིཨཱདྱཱནུསནྡྷྱཱདིཨཏྠོ ཙེཝ ‘‘ནིཡུཏྟོ ཝེཝཙནོ ཧཱརོ’’ཏིཨཱནུསནྡྷྱཱདིཨཏྠོ ཙ ཝུཏྟནཡཱནུསཱརེན ཝེདིཏབྦོ.

ཨིཏི ཝེཝཙནཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

༡༡. པཉྙཏྟིཧཱརཝིབྷངྒཝིབྷཱཝནཱ

༣༩. ཡེན ཡེན སཾཝཎྞནཱཝིསེསབྷཱུཏེན ཝིབྷངྒེན ཝེཝཙནཱནི ཝིབྷཏྟཱནི, སོ སཾཝཎྞནཱཝིསེསབྷཱུཏོ ཝིབྷངྒོ པརིཔུཎྞོ, ‘‘ཀཏམོ པཉྙཏྟིཧཱརཝིབྷངྒོ’’ཏི པུཙྪིཏབྦཏྟཱ ‘‘ཏཏྠ ཀཏམོ པཉྙཏྟིཧཱརོ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ནིདྡིཊྛེསུ སོལ༹སསུ དེསནཱཧཱརཱདཱིསུ ཀཏམོ སཾཝཎྞནཱཝིསེསོ པཉྙཏྟིཧཱརོ པཉྙཏྟིཧཱརཝིབྷངྒོ ནཱམཱཏི པུཙྪཏི. ‘‘ཨེཀཾ བྷགཝཱ དྷམྨཾ པཉྙཏྟཱིཧི ཝིཝིདྷཱཧི དེསེཏཱི’’ཏིཨཱདིནིདྡེསསྶ ཨིདཱནི མཡཱ ཝུཙྩམཱནོ ‘‘ཡཱ པཀཏིཀཐཱཡ དེསནཱ’’ཏིཨཱདིཀོ ཝིཏྠཱརསཾཝཎྞནཱཝིསེསོ པཉྙཏྟིཧཱརོ པཉྙཏྟིཧཱརཝིབྷངྒོ ནཱམཱཏི གཧེཏབྦོ.

‘‘ཡཱཧི ¶ ཝིཝིདྷཱཧི པཉྙཏྟཱིཧི ཨེཀཾ དྷམྨཾ བྷགཝཱ དེསེཏི, ཀཏམཱ ཏཱ ཝིཝིདྷཱ པཉྙཏྟིཡོ’’ཏི པུཙྪིཏབྦཏྟཱ ‘‘ཡཱ པཀཏིཀཐཱཡཱ’’ཏིཨཱདི ཝུཏྟཾ. ཏཏྠ པཀཏིཀཐཱཡཱཏི ཨསྶཱདཱདིཔདཏྠཝིསེསཾ ཨནིདྡྷཱརེཏྭཱ ཨཏྠསབྷཱཝེན པཝཏྟཱཡ ཀཐཱཡ སཱདྷུཀཾ མནསིཀཱརདྷམྨཀཐཱཡ ཡཱ དེསནཱ ཡཐཱདྷིཔྤེཏམཏྠཾ ཝེནེཡྻསནྟཱནེ ནིཀྑིཔཏི པཏིཊྛཔེཏི པཀཱརེན ཉཱཔེཏི, ཏསྨཱ ནིཀྑེཔཔཉྙཏྟི, ཏཱཡ པཉྙཏྟིཡཱ དྷམྨཾ དེསེཏཱིཏི ཨཏྠོ. ‘‘ཡཱ པཉྙཏྟི ‘པཀཏིཀཐཱཡ ¶ དེསནཱ’ཏི ཝུཏྟཱ, ཀཏམཱ སཱ’’ཏི པུཙྪིཏབྦཏྟཱ ཏཐཱ པུཙྪིཏྭཱ ཝིཏྠཱརཏོ དསྶེཏུཾ ‘‘ཀཱ ཙ པཀཏིཀཐཱཡ དེསནཱ’’ཏིཨཱདི ཝུཏྟཾ. ཨཊྛཀཐཱཡཾ པན –‘‘ཨིཏི ‘པཀཏིཀཐཱཡ དེསནཱ’ཏི སངྑེཔེན ཝུཏྟམཏྠཾ ཝིཏྠཱརེན ཝིབྷཛིཏུཾ ‘ཀཱ ཙ པཀཏིཀཐཱཡ དེསནཱ’ཏི པུཙྪིཏྭཱ ‘ཙཏྟཱརི སཙྩཱནཱི’ཏིཨཱདིམཱཧཱ’’ཏི (ནེཏྟི. ཨཊྛ. ༣༩) ཝུཏྟཾ. ཏཏྠ དེསནཱདེསེཏབྦསྶ བྷེདབྷཱཝེཔི ཨབྷེདོཔཙཱརེན ‘‘དེསནཱ ཙཏྟཱརི སཙྩཱནཱི’’ཏི ཝུཏྟཾ, ཙཏུནྣཾ སཙྩཱནཾ པཉྙཏྟི དེསནཱ ནཱམཱཏི ཨཏྠོ.

‘‘ཀཐཾ ཏཾ སཙྩཔཉྙཏྟིཾ བྷགཝཱ ཨཱཧཱ’’ཏི པུཙྪིཏབྦཏྟཱ ‘‘ཡཐཱ བྷགཝཱ ཨཱཧཱ’’ཏི ཝུཏྟཾ. ཡཐཱ ཡེན པཀཱརེན བྷགཝཱ ཡཾ ཡཾ པཉྙཏྟིཾ ཨཱཧ, ཏཐཱ ཏེན པཀཱརེན སཱ པཉྙཏྟི ཛཱནིཏབྦཱ. ‘‘ཨིདཾ དུཀྑ’’ནྟི ཡཾ པཉྙཏྟིཾ བྷགཝཱ ཨཱཧ, ཨཡཾ ‘‘ཨིདཾ དུཀྑ’’ནྟི པཉྙཏྟི པཉྩནྣཾ ཁནྡྷཱནཾ ནིཀྑེཔཔཉྙཏྟི, ཚནྣཾ དྷཱཏཱུནཾ ནིཀྑེཔཔཉྙཏྟི, ཨཊྛཱརསནྣཾ དྷཱཏཱུནཾ ནིཀྑེཔཔཉྙཏྟི, དྭཱདསནྣཾ ཨཱཡཏནཱནཾ ནིཀྑེཔཔཉྙཏྟི, དསནྣཾ ཨིནྡྲིཡཱནཾ ནིཀྑེཔཔཉྙཏྟཱིཏི ཡོཛནཱ ཀཱཏབྦཱ. ཁནྡྷདྷཱཏུཨཱཡཏནིནྡྲིཡཱནི ཙ ལོཀིཡཱནེཝ. པཱིལ༹ནསངྑཏསནྟཱཔཝིཔརིཎཱམཏྠཏཱསཱམཉྙེན ཨེཀཏྟཾ ཨུཔནེཏྭཱ ‘‘ཨིདཾ དུཀྑ’’ནྟི ཝུཏྟཱ. དསནྣཾ ཨིནྡྲིཡཱནནྟི ཙཀྑུསོཏགྷཱནཛིཝ྄ཧཱཀཱཡཨིཏྠིཔུརིསཛཱིཝིཏམནཝེདནིནྡྲིཡཱནཾ དསནྣཾ. ཨནུབྷཝནལཀྑཎེན ཨེཀལཀྑཎཏྟཱ ཝེདནིནྡྲིཡཾ ཨེཀནྟི གཧིཏཾ, སདྡྷིནྡྲིཡཱདཱིནི པན མགྒཔརིཡཱཔནྣཏྟཱ ན གཧིཏཱནི.

ཀབལཱི༹ཀཱརེཏི ཋཱནཱུཔཙཱརེན ཝོཧརིཏེ ཨོཛཱསངྑཱཏེ ཨཱཧཱརེ, རཱགོ ཨརིཡམགྒེན ཨཔྤཧཱཏབྦཏྟཱ ཨནུསཡཝསེན, ཨཱསཱཝསེན ཝཱ པཏྠནཱཝསེན ཝཱ ཨཏྠི ནནྡཱི. ཨཏྠི ཏཎྷཱཏི ཨེཏྠཱཔི ཨེསེཝ ནཡོ. པཏིཊྛིཏཾ ཝིརུལ༹ྷནྟི པཊིསནྡྷིཨཱཀཌྜྷནསམཏྠཏཱཔཏྟིཡཱ པཏིཊྛིཏཏྟཱ པཏིཊྛིཏཉྩེཝ ཝིརུལ༹ྷཉྩཱཏི གཧེཏབྦཾ. སངྑཱརཱནནྟི པུནབྦྷཝནིབྦཏྟཀསྶ བྷཝསྶ ཨབྷིནིབྦཏྟིཧེཏུཀཱནཾ ¶ སངྑཱརཱནཾ. ཛཱཏིཛརཱམརཎནྟི ཨབྷིནིབྦཏྟནལཀྑཎཱ ཛཱཏི, ན ཨུཔྤཱདོཝ, པརིཔཱཀལཀྑཎཱ ཛརཱ, ན ཋིཏིཡེཝ, བྷེདནལཀྑཎཾ མརཎཾ, ན བྷངྒམེཝ. ཏེན ཝུཏྟཾ ‘‘སསོཀཾ སདརཾ སཨུཔཱཡཱས’’ནྟི.

‘‘ཕསྶེ ཙེ, བྷིཀྑཝེ, ཨཱཧཱརེ…པེ… མནོསཉྩེཏནཱཡ ཙེ, བྷིཀྑཝེ, ཨཱཧཱརེ…པེ… ཝིཉྙཱཎེ ཙེ, བྷིཀྑཝེ, ཨཱཧཱརེ ཨཏྠི རཱགོ…པེ… ཝདཱམཱི’’ཏི ཨཡཾ པཉྙཏྟི དུཀྑསྶ ཙ སམུདཡསྶ ཙ པབྷཝསྶ པཉྙཱཔནཏོ པབྷཝཔཉྙཏྟི ནཱམ.

ཝཊྚཝསེན པཉྙཏྟིབྷེདོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཀཐཾ ཝིཝཊྚཝསེན པཉྙཏྟིབྷེདོ ¶ ཝིབྷཏྟོ’’ཏི ཝཏྟབྦཏྟཱ ‘‘ཀབལཱི༹ཀཱརེ ཙེ, བྷིཀྑཝེ, ཨཱཧཱརེ ནཏྠི རཱགོ’’ཏིཨཱདི ཝུཏྟཾ. ‘‘ཀབལཱི༹ཀཱརེ…པེ… ཨནུཔཱཡཱསནྟི ཝདཱམཱི’’ཏི ཨཡཾ པཉྙཏྟི དུཀྑསྶ པརིཉྙཱཡ ཙ པཉྙཱཔནཏོ པརིཉྙཱཔཉྙཏྟི ནཱམ, སམུདཡསྶ པཧཱནསྶ ཙ པཉྙཱཔནཏོ པཧཱནཔཉྙཏྟི ནཱམ, མགྒསྶ བྷཱཝནཱཡ ཙ པཉྙཱཔནཏོ བྷཱཝནཱཔཉྙཏྟི ནཱམ, ནིརོདྷསྶ སཙྪིཀིརིཡཱཡ ཙ པཉྙཱཔནཏོ སཙྪིཀིརིཡཱཔཉྙཏྟི ནཱམ.

༤༠. ཝིཝཊྚཝསེན པཉྙཏྟིབྷེདོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཀཐཾ སམྨསནཝསེན པཉྙཏྟིབྷེདོ ཝིབྷཏྟོ’’ཏི ཝཏྟབྦཏྟཱ ‘‘སམཱདྷིཾ, བྷིཀྑཝེ, བྷཱཝེཐཱ’’ཏིཨཱདི ཝུཏྟཾ. ‘‘སམཱདྷིཾ, བྷིཀྑཝེ, བྷཱཝེཐ…པེ… ཡཐཱབྷཱུཏཾ པཛཱནཱཏཱི’’ཏི ཨཡཾ པཉྙཏྟི མགྒསྶ བྷཱཝནཱཡ ཙ པཉྙཱཔནཏོ བྷཱཝནཱཔཉྙཏྟི ནཱམ, དུཀྑསྶ པརིཉྙཱཡ ཙ པཉྙཱཔནཏོ པརིཉྙཱཔཉྙཏྟི ནཱམ, སམུདཡསྶ པཧཱནསྶ ཙ པཉྙཱཔནཏོ པཧཱནཔཉྙཏྟི ནཱམ, ནིརོདྷསྶ སཙྪིཀིརིཡཱཡ ཙ པཉྙཱཔནཏོ སཙྪིཀིརིཡཱཔཉྙཏྟི ནཱམ.

སམྨསནཝསེན པཉྙཏྟིབྷེདོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཀཐཾ ཨུཔཱདཱནཀྑནྡྷཝསེན པཉྙཏྟིབྷེདོ ཝིབྷཏྟོ’’ཏི ཝཏྟབྦཏྟཱ ‘‘རཱུཔཾ, རཱདྷ, ཝིཀིརཐཱ’’ཏིཨཱདི ཝུཏྟཾ. ‘‘རཱུཔཾ, རཱདྷ, ཝིཀིརཐ…པེ… ནིབྦཱན’’ནྟི ཨཡཾ པཉྙཏྟི ཏཎྷཱསངྑཱཏསྶ རོདྷསྶ ནིརོདྷསྶ ཙ པཉྙཱཔནཏོ ནིརོདྷཔཉྙཏྟི ནཱམ, ཨསྶཱདསྶ ནིབྦིདཱཡ ཙ པཉྙཱཔནཏོ ནིབྦིདཱཔཉྙཏྟི ནཱམ, དུཀྑསྶ པརིཉྙཱཡ ཙ པཉྙཱཔནཏོ པརིཉྙཱཔཉྙཏྟི ནཱམ, སམུདཡསྶ པཧཱནསྶ ཙ པཉྙཱཔནཏོ པཧཱནཔཉྙཏྟི ནཱམ, མགྒསྶ བྷཱཝནཱཡ ཙ པཉྙཱཔནཏོ བྷཱཝནཱཔཉྙཏྟི ནཱམ, ནིརོདྷསྶ སཙྪིཀིརིཡཱཡ ཙ པཉྙཱཔནཏོ སཙྪིཀིརིཡཱཔཉྙཏྟི ནཱམ.

‘‘རཱུཔཝེདནཱསཉྙཱསངྑཱརཝིཉྙཱཎཱནི ¶ ཝིཀིརནྟོ ཝིདྡྷཾསེནྟོ ཝིཀཱིལ༹ནིཡཾ ཀརོནྟོ པཉྙཱཡ ཏཎྷཱཀྑཡཱཡ པཊིཔཛྫནྟོ ཀིཾ པཛཱནཱཏཱི’’ཏི པུཙྪིཏབྦཏྟཱ ‘‘སོ ‘ཨིདཾ དུཀྑ’ནྟི ཡཐཱབྷཱུཏཾ པཛཱནཱཏཱི’’ཏིཨཱདི ཝུཏྟཾ. ‘‘སོ ‘ཨིདཾ དུཀྑ’ནྟི ཡཐཱབྷཱུཏཾ པཛཱནཱཏཱིཏི…པེ… ནིརོདྷགཱམིནིཔཊིཔདཱཏི ཡཐཱབྷཱུཏཾ པཛཱནཱཏཱི’’ཏི ཨཡཾ པཉྙཏྟི སཙྩཱནཾ པཊིཝེདྷསྶ པཉྙཱཔནཏོ པཊིཝེདྷཔཉྙཏྟི ནཱམ, དསྶནབྷཱུམིཡཱ ནིཀྑེཔསྶ ཙ པཉྙཱཔནཏོ ནིཀྑེཔཔཉྙཏྟི ནཱམ, མགྒསྶ བྷཱཝནཱཡ ཙ པཉྙཱཔནཏོ བྷཱཝནཱཔཉྙཏྟི ནཱམ, སོཏཱཔཏྟིཕལསྶ སཙྪིཀིརིཡཱཡ ཙ པཉྙཱཔནཏོ སཙྪིཀིརིཡཱཔཉྙཏྟི ནཱམ. ‘‘སོ ‘ཨིམེ ཨཱསཝཱ’ཏི ཡཐཱབྷཱུཏཾ པཛཱནཱཏི…པེ… ‘ཨཱསཝཱ ཨསེསཾ ནིརུཛ྄ཛྷནྟཱི’ཏི ཡཐཱབྷཱུཏཾ པཛཱནཱཏཱི’’ཏི ཨཡཾ པཉྙཏྟི ཁཡེཉཱཎསྶ ཨུཔྤཱདསྶ ཙ པཉྙཱཔནཏོ ཨུཔྤཱདཔཉྙཏྟི ནཱམ, ཨནུཔྤཱདེཉཱཎསྶ ཨོཀཱསསྶ ཙ ¶ པཉྙཱཔནཏོ ཨོཀཱསཔཉྙཏྟི ནཱམ, མགྒསྶ བྷཱཝནཱཡ ཙ པཉྙཱཔནཏོ བྷཱཝནཱཔཉྙཏྟི ནཱམ, དུཀྑསྶ པརིཉྙཱཡ ཙ པཉྙཱཔནཏོ པརིཉྙཱཔཉྙཏྟི ནཱམ, སམུདཡསྶ པཧཱནསྶ ཙ པཉྙཱཔནཏོ པཧཱནཔཉྙཏྟི ནཱམ, ཝཱིརིཡིནྡྲིཡསྶ ཨཱརམྦྷསྶ ཙ པཉྙཱཔནཏོ ཨཱརམྦྷཔཉྙཏྟི ནཱམ, ཨཱསཱཊིཀཱནཾ ཨཱཧཊནཱཡ ཙ པཉྙཱཔནཏོ ཨཱཧཊནཱཔཉྙཏྟི ནཱམ, བྷཱཝནཱབྷཱུམིཡཱ ནིཀྑེཔསྶ ཙ པཉྙཱཔནཏོ ནིཀྑེཔཔཉྙཏྟི ནཱམ, པཱཔཀཱནཾ ཨཀུསལཱནཾ དྷམྨཱནཾ ཨབྷིནིགྷཱཏསྶ ཙ པཉྙཱཔནཏོ ཨབྷིནིགྷཱཏཔཉྙཏྟི ནཱམ.

༤༡. ཝཊྚཝསེན ཝཱ ཝིཝཊྚཝསེན ཝཱ དྷམྨསམྨསནཝསེན ཝཱ ཨུཔཱདཱནཀྑནྡྷཝསེན ཝཱ པཛཱནནཝསེན ཝཱ སཙྩེསུ ནཱནཱཝིདྷོ པཉྙཏྟིབྷེདོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཀཐཾ ཏེཔརིཝཊྚཝསེན སཙྩེསུ པཉྙཏྟིབྷེདོ ཝིབྷཏྟོ’’ཏི ཝཏྟབྦཏྟཱ ཏེཔརིཝཊྚཝསེན སཙྩེསུ པཉྙཏྟིབྷེདཾ དསྶེཏུཾ ‘‘ཨིདཾ དུཀྑནྟི མེ, བྷིཀྑཝེ’’ཏིཨཱདི ཨཱརདྡྷཾ. ཨཊྛཀཐཱཡཾ པན – ‘‘ཨེཝཾ ཝཊྚཝིཝཊྚམུཁེན སམྨསནཨུཔཱདཱནཀྑནྡྷམུཁེནེཝ སཙྩེསུ པཉྙཏྟིཝིབྷཱགཾ དསྶེཏྭཱ ཨིདཱནི ཏེཔརིཝཊྚཝསེན དསྶེཏུཾ ‘ཨིདཾ དུཀྑནྟི མེ བྷིཀྑཝེ’ཏིཨཱདི ཨཱརདྡྷ’’ནྟི (ནེཏྟི. ཨཊྛ. ༤༡) ཝུཏྟཾ. ཏཏྠ པུབྦེ པརིཛཱནནཏོ པཊྛཱཡ. ཨནནུསྶུཏེསཱུཏི པརིཛཱནནཝསེན ཨནནུསྶུཏེསུ ཙཏཱུསུ སཙྩདྷམྨེསུ. ཙཀྑུནྟི པཋམཾ ནིབྦཱནདསྶནཊྛེན ཙཀྑུ ནཱམ. ཡཐཱསབྷཱཝཏོ ཀིཙྩཔརིཛཱནནཊྛེན སཙྪིཀིརིཡཔརིཛཱནནཊྛེན ཉཱཎཾ ནཱམ. ཡཐཱསབྷཱཝཏོ ¶ ཀིཙྩཔརིཛཱནནཱདཱིནཾ པཊིཝིཛ྄ཛྷིཏྭཱ པཛཱནནཊྛེན པཉྙཱ ནཱམ. ཏཐཱ ཝིདིཏཀརཎཊྛེན ཝིཛྫཱ ནཱམ. ཨཱལོཀོབྷཱསཀརཎཊྛེན ཨཱལོཀོ ནཱམ. ཨིདཾ ཙཀྑཱདིཀཾ སབྦཾ པཉྙཱཝེཝཙནམེཝ. ‘‘ཨིདཾ དུཀྑནྟི མེ བྷིཀྑཝེ…པེ… ཨུདཔཱདཱི’’ཏི ཨཡཾ པཉྙཏྟི སཙྩཱནཾ དེསནཱཡ པཉྙཱཔནཏོ དེསནཱཔཉྙཏྟི ནཱམ, སུཏམཡིཡཱ པཉྙཱཡ ནིཀྑེཔསྶ ཙ པཉྙཱཔནཏོ ནིཀྑེཔཔཉྙཏྟི ནཱམ, ཨནཉྙཱཏཉྙསྶཱམཱིཏིནྡྲིཡསྶ སཙྪིཀིརིཡཱཡ ཙ པཉྙཱཔནཏོ སཙྪིཀིརིཡཱཔཉྙཏྟི ནཱམ, དྷམྨཙཀྐསྶ པཝཏྟནཱཡ ཙ པཉྙཱཔནཏོ པཝཏྟནཱཔཉྙཏྟི ནཱམ.

‘‘ཏཾ ཁོ པནིདཾ དུཀྑཾ པརིཉྙེཡྻཾ…པེ… ཨུདཔཱདཱི’’ཏི ཨཡཾ པཉྙཏྟི མགྒསྶ བྷཱཝནཱཡ པཉྙཱཔནཏོ བྷཱཝནཱཔཉྙཏྟི ནཱམ, ཙིནྟཱམཡིཡཱ པཉྙཱཡ ནིཀྑེཔསྶ ཙ པཉྙཱཔནཏོ ནིཀྑེཔཔཉྙཏྟི ནཱམ, ཨཉྙིནྡྲིཡསྶ སཙྪིཀིརིཡཱཡ ཙ པཉྙཱཔནཏོ སཙྪིཀིརིཡཱཔཉྙཏྟི ནཱམ.

‘‘ཏཾ ཁོ པནིདཾ དུཀྑཾ པརིཉྙཱཏཾ…པེ… ཨུདཔཱདཱི’’ཏི ཨཡཾ པཉྙཏྟི མགྒསྶ བྷཱཝནཱཡ པཉྙཱཔནཏོ བྷཱཝནཱཔཉྙཏྟི ནཱམ, བྷཱཝནཱམཡིཡཱ པཉྙཱཡ ནིཀྑེཔསྶ ཙ པཉྙཱཔནཏོ ¶ ནིཀྑེཔཔཉྙཏྟི ནཱམ, ཨཉྙཱཏཱཝིནོ ཨིནྡྲིཡསྶ སཙྪིཀིརིཡཱཡ ཙ པཉྙཱཔནཏོ སཙྪིཀིརིཡཱཔཉྙཏྟི ནཱམ, དྷམྨཙཀྐསྶ པཝཏྟནཱཡ ཙ པཉྙཱཔནཏོ པཝཏྟནཱཔཉྙཏྟི ནཱམ.

ཏེཔརིཝཊྚཝསེན སཙྩེསུ ནཱནཱཝིདྷོ པཉྙཏྟིབྷེདོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཀཐཾ ཀུསལཱཀུསལཱདིཝསེན དེསིཏདྷམྨསྶ པཉྙཏྟིབྷེདོ ཝིབྷཏྟོ’’ཏི ཝཏྟབྦཏྟཱ ‘‘ཏུལམཏུལཉྩ སམྦྷཝ’’ནྟིཨཱདི ཝུཏྟཾ. ཨཐ ཝཱ དྷམྨཙཀྐསུཏྟེ པཉྙཏྟིབྷེདོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཏུལམཏུལཉྩཱཏིཨཱདིགཱཐཱཡ ཀཐཾ པཉྙཏྟིབྷེདོ ཝིབྷཏྟོ’’ཏི ཝཏྟབྦཏྟཱ ‘‘ཏུལམཏུལཉྩཱ’’ཏིཨཱདི ཝུཏྟཾ. ཏུལཱིཡཏི པརིཙྪིཛྫཱིཡཏཱིཏི ཏུལཾ, ཀཱམཱཝཙརཀམྨཾ, ནཏྠི ཏུལཾ སདིསཾ ཨཉྙཾ ལོཀིཡཀམྨཾ ཨསྶ མཧགྒཏཀམྨསྶཱཏི ཨཏུལཾ, རཱུཔཱརཱུཔཱཝཙརཀམྨཾ. པུནབྦྷཝཾ སམྦྷཝཏི ཨེཏེན སངྑཱརེནཱཏི སམྦྷཝོ, ཏཾ སམྦྷཝཾ. པུནབྦྷཝཾ སངྑརོཏཱིཏི བྷཝསངྑཱརོ. ཨཛ྄ཛྷཏྟེ ཝིཔསྶནཱཝསེན རམཏཱིཏི ཨཛ྄ཛྷཏྟརཏོ. སམཐཝསེན སམཱདྷིཡཏཱིཏི སམཱཧིཏོ. ཨཏྟནི སམྦྷཝཏཱིཏི ཨཏྟསམྦྷཝོ, ཏཾ ཨཏྟསམྦྷཝཾ. མུནི སམྦུདྡྷོ སམྦྷཝཾ བྷཝསངྑཱརཾ ཏུལཉྩ ཨཏུལཉྩ ཨཝསྶཛི, ཨཛ྄ཛྷཏྟརཏོ སམཱཧིཏོ ཀཝཙཾ ཨབྷིནྡི ཨིཝ, ཨེཝཾ ཨཏྟསམྦྷཝཾ ཨབྷིནྡི པདཱལཡཱིཏི ཡོཛནཱ ཀཱཏབྦཱ. ཨཐ ཝཱ མུནི སམྦུདྡྷོ ‘‘པཉྩཀྑནྡྷཱ ཨནིཙྩཱ ¶ དུཀྑཱ ཨནཏྟཱ ཝིཔརིཎཱམདྷམྨཱ, ནིབྦཱནཾ པན ནིཙྩཾ སུཁཾ ཨསངྑཏཾ ཨཝིཔརིཎཱམདྷམྨ’’ནྟི ཏུལཾ ཏུལཡནྟོ ཨཏུལཾ ནིབྦཱནཾ དིསྭཱ སམྦྷཝཾ བྷཝསངྑཱརཾ ཨརིཡམགྒེན ཨཝསྶཛི. ཀཐཾ ཨཝསྶཛི? སོ ཧི མུནི ཝིཔསྶནཱཝསེན ཨཛ྄ཛྷཏྟརཏོ ཙ ཧུཏྭཱ, སམཐཝསེན ཨུཔཙཱརཔྤནཱསུ སམཱཧིཏོ ཙ ཧུཏྭཱ ཀཝཙཾ ཨབྷིནྡི ཨིཝ, ཨེཝཾ ཨཏྟསམྦྷཝཾ ཨཏྟནི སཉྫཱཏཾ ཀིལེསཾ ཨབྷིནྡི པདཱལཡི, ཀིལེསཱབྷཱཝེན ཀམྨཉྩ ཛཧཱིཏི གཱཐཱཏྠོ གཧེཏབྦོ.

‘‘ཏུལམཏུལཉྩ སམྦྷཝ’’ནྟི པཉྙཏྟི སབྦདྷམྨཱནཾ ཨབྷིཉྙཱཡ པཉྙཱཔནཏོ ཨབྷིཉྙཱཔཉྙཏྟི ནཱམ, དྷམྨཔཊིསམྦྷིདཱཡ ནིཀྑེཔསྶ ཙ པཉྙཱཔནཏོ ནིཀྑེཔཔཉྙཏྟི ནཱམ, ‘‘བྷཝསངྑཱརམཝསྶཛི མུནཱི’’ཏི པཉྙཏྟི སམུདཡསྶ པརིཙྩཱགསྶ ཙ པཉྙཱཔནཏོ པརིཙྩཱགཔཉྙཏྟི ནཱམ, དུཀྑསྶ པརིཉྙཱཡ ཙ པཉྙཱཔནཏོ པརིཉྙཱཔཉྙཏྟི ནཱམ, ‘‘ཨཛ྄ཛྷཏྟརཏོ སམཱཧིཏོ’’ཏི པཉྙཏྟི ཀཱཡགཏཱཡ སཏིཡཱ བྷཱཝནཱཡ ཙ པཉྙཱཔནཏོ བྷཱཝནཱཔཉྙཏྟི ནཱམ, ཙིཏྟེཀགྒཏཱཡ ཋིཏིཡཱ ཙ པཉྙཱཔནཏོ ཋིཏིཔཉྙཏྟི ནཱམ, ‘‘ཨབྷིནྡི ཀཝཙམིཝཏྟསམྦྷཝ’’ནྟི པཉྙཏྟི ཙིཏྟསྶ ཨབྷིནིབྦིདཱཡ ཙ པཉྙཱཔནཏོ ཨབྷིནིབྦིདཱཔཉྙཏྟི ནཱམ, སབྦཉྙུཏཱཡ ཨུཔཱདཱནསྶ ཙ པཉྙཱཔནཏོ ཨུཔཱདཱནཔཉྙཏྟི ནཱམ, ཨཝིཛྫཱཎྜཀོསཱནཾ པདཱལནཱཡ ཙ པཉྙཱཔནཏོ པདཱལཔཉྙཏྟི ནཱམ, ‘‘ཡཐཱཝུཏྟོ པཉྙཏྟིཔྤབྷེདོ ཀེན སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ. ཏཐཱཝུཏྟསྶ པཉྙཏྟིཔྤབྷེདསྶ ¶ སམྦྷཝཏོ བྷགཝཱ ཡཾ ‘‘ཏུལམཏུལ’’ནྟིཨཱདིགཱཐམཱཧ, ཏཐཱསམྦྷཝཏོ ཡཐཱཝུཏྟཱཡ གཱཐཱཡ ཡཐཱཝུཏྟོ པཉྙཏྟིཔྤབྷེདོ སདྡཧིཏབྦོཏི.

‘‘ཏུལམཏུལཉྩཱ’’ཏིཨཱདིགཱཐཱཡཾ པཉྙཏྟིཔྤབྷེདོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ.

‘ཡོ དུཀྑམདྡཀྑི ཡཏོནིདཱནཾ, ཀཱམེསུ སོ ཛནྟུ ཀཐཾ ནམེཡྻ;

ཀཱམཱ ཧི ལོཀེ སངྒོཏི ཉཏྭཱ, ཏེསཾ སཏཱིམཱ ཝིནཡཱཡ སིཀྑེ’ཏི. –

གཱཐཱཡཾ པན ཀཐཾ པཉྙཏྟིབྷེདོ ཝིབྷཏྟོ’’ཏི ཝཏྟབྦཏྟཱ ‘‘ཡོ དུཀྑམདྡཀྑཱི’’ཏིཨཱདི ཝུཏྟཾ. ཡོ ཨཱརདྡྷཝིཔསྶཀོ ཛནྟུ ཡཏོནིདཱནཾ སབྦཾ ཏེབྷཱུམཀཾ ¶ ཧེཏུཕལཾ དུཀྑཾ ཨདྡཀྑི, སོ ཨཱརདྡྷཝིཔསྶཀོ ཛནྟུ ཀཱམེསུ ཀཐཾ ནམེཡྻ ནམེཏུཾ ནཱརཧཏི. ཀཱམཱ ལོཀེ ‘‘སངྒོ’’ཏི ཧི ཡསྨཱ པསྶིཏབྦཱ, ཏསྨཱ ནམེཏུཾ ནཱརཧཏི, ཨིཏི ཨེཏཾ དུཀྑབྷཱཝཾ དུཀྑཧེཏུབྷཱཝཾ ཉཏྭཱ ཏེསཾ ཀཱམཱནཾ ཝིནཡཱཡ ཝཱུཔསམཱཡ སཏིམཱ ཀཱཡགཏཱསཏིསམྤནྣོ ཏཱིཎི སིཀྑཱནི སིཀྑེ སིཀྑེཡྻཱཏི གཱཐཱཏྠོ སངྑེཔེན ཝིཉྙཱཏབྦོ. ཨཊྛཀཐཱཡཾ (ནེཏྟི. ཨཊྛ. ༤༡) པན ཝིཏྠཱརེན སཾཝཎྞིཏོ.

‘‘ཡོ དུཀྑ’’ནྟི པཉྙཏྟི དུཀྑསྶ ཝེཝཙནསྶ ཙ པརིཉྙཱཡ ཙ པཉྙཱཔནཏོ ཝེཝཙནཔཉྙཏྟི, པརིཉྙཱཔཉྙཏྟི ཙ ཧོཏི. ‘‘ཡཏོནིདཱན’’ནྟི པཉྙཏྟི སམུདཡསྶ པབྷཝསྶ ཙ པཧཱནསྶ ཙ པཉྙཱཔནཏོ པབྷཝཔཉྙཏྟི ཙེཝ པཧཱནཔཉྙཏྟི ཙ ཧོཏི. ‘‘ཨདྡཀྑཱི’’ཏི པཉྙཏྟི ཉཱཎཙཀྑུསྶ ཝེཝཙནསྶ ཙ པཊིཝེདྷསྶ ཙ པཉྙཱཔནཏོ ཝེཝཙནཔཉྙཏྟི ཙེཝ པཊིཝེདྷཔཉྙཏྟི ཙ ཧོཏི. ‘‘ཀཱམེསུ སོ ཛནྟུ ཀཐཾ ནམེཡྻཱ’’ཏི པཉྙཏྟི ཀཱམཏཎྷཱཡ ཝེཝཙནསྶ ཙ ཨནབྷིནིཝིསསྶ ཙ པཉྙཱཔནཏོ ཝེཝཙནཔཉྙཏྟི ཙེཝ ཨནབྷིནིཝེསཔཉྙཏྟི ཙ ཧོཏི. ‘‘ཀཱམཱ ཧི ལོཀེ སངྒོཏི ཉཏྭཱ’’ཏི པཉྙཏྟི ཀཱམཱནཾ པཙྩཏྠིཀཏོ དསྶནསྶ ཙ པཉྙཱཔནཏོ དསྶནཔཉྙཏྟི ནཱམ. ཀཱམཱ ཧི ཨནཏྠཛཱནནཏོ པཙྩཏྠིཀསདིསཱ.

‘‘ཀཱིདིསཱ ཧུཏྭཱ ཨནཏྠཛནཀཱ’’ཏི པུཙྪིཏབྦཏྟཱ ‘‘ཀཱམཱ ཧཱི’’ཏིཨཱདི ཝུཏྟཾ. ཀཱམཱ རཱགགྒིཨཱདཱིཧི ཨནྟོདཡ྄ཧནཏོ ཨངྒཱརཀཱསཱུཔམཱ ཙ, པཱུཏིབྷཱཝཱཔཛྫནཏོ མཾསཔེསཱུཔམཱ ཙ, བཧི ཨཉྙེན དཡ྄ཧནཏོ པཱཝཀཀཔྤཱ ཛལིཏགྒིཀྑནྡྷཱུཔམཱ ཙ, པཏིཊྛཱནཱབྷཱཝཏོ པཔཱཏཱུཔམཱ ཙ, ཝིསསདིསེཧི དོསཱདཱིཧི པརཧིཾསནཏོ ཨུརགོཔམཱ ཙ. ‘‘ཏེསཾ སཏཱིམཱ’’ཏི པཉྙཏྟི པཧཱནཱཡ ཨཔཙཡསྶ ཙ པཉྙཱཔནཏོ ཨཔཙཡཔཉྙཏྟི ནཱམ, ཀཱཡགཏཱཡ སཏིཡཱ ནིཀྑེཔསྶ ཙ པཉྙཱཔནཏོ ¶ ནིཀྑེཔཔཉྙཏྟི ནཱམ, མགྒསྶ བྷཱཝནཱཡ ཙ པཉྙཱཔནཏོ བྷཱཝནཱཔཉྙཏྟི ནཱམ. ‘‘ཝིནཡཱཡ སིཀྑེ’’ཏི པཉྙཏྟིརཱགཝིནཡསྶ དོསཝིནཡསྶ མོཧཝིནཡསྶ པཊིཝེདྷསྶ ཙ པཉྙཱཔནཏོ པཊིཝེདྷཔཉྙཏྟི ནཱམ. ‘‘ཛནྟཱུ’’ཏི པཉྙཏྟི ཡོགིསྶ ཝེཝཙནསྶ ཙ པཉྙཱཔནཏོ ཝེཝཙནཔཉྙཏྟི ནཱམ.

‘‘ཛནྟཱུཏི སཱམཉྙསཏྟཝཱཙཀོ སདྡོ ཀསྨཱ ཡོགིཝཱཙཀོཏི ཝིཉྙཱཏབྦོ’’ཏི ཝཏྟབྦཏྟཱ ‘‘ཡདཱ ཧཱི’’ཏིཨཱདི ཝུཏྟཾ. ཡོགཱི ཡདཱ ཡསྨིཾ ཀཱལེ ¶ ཀཱམཱ སངྒོཏི པཛཱནཱཏི, ཏདཱ ཏསྨིཾ ཀཱལེ སོ ཡོགཱི ཀཱམཱནཾ ཨནུཔྤཱདཱཡ ཀུསལེ དྷམྨེ ཀཱཡགཏཱསཏིཨཱདཱིཧི ཨུཔྤཱདཡཏི, སོ ཀུསལེ དྷམྨེ ཨུཔྤཱདེནྟོ ཡོགཱི ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ ཝཱཡམཏི ཀུསལཝཱིརིཡཾ ཀརོཏི, ཏསྨཱ ཡོགཱིཝཱཙཀོ ཛནྟུསདྡོཏི ཝིཉྙཱཏབྦོ. ‘‘ཛནྟཱུ’’ཏི ཨཡཾ པཉྙཏྟི ཨཔྤཏྟསྶ ཀུསལསྶ ཛྷཱནདྷམྨཱདིཀསྶ པཏྟིཡཱ ཝཱཡཱམསྶ ཙ པཉྙཱཔནཏོ ཝཱཡཱམཔཉྙཏྟི ནཱམ, ཨོརམཏྟིཀཱཡ ཨསནྟུཊྛིཡཱ ནིཀྑེཔསྶ ཙ པཉྙཱཔནཏོ ནིཀྑེཔཔཉྙཏྟི ནཱམ. ‘‘སོ ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ ཝཱཡམཏཱི’’ཏི ཨཡཾ པཉྙཏྟི ཝཱཡཱམཔཉྙཏྟི, ‘‘ཧེཏུསོ ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཝཱཡམཏཱིཏི པཉྙཏྟི ཀཏམཱ པཉྙཏྟཱི’’ཏི པུཙྪིཏབྦཏྟཱ ‘‘ཏཏྠ སོ ཨུཔྤནྣཱན’’ནྟིཨཱདི ཝུཏྟཾ. ཏཏྠ ཏསྨིཾ ‘‘ཨནུཔྤནྣཱན’’ནྟིཨཱདིམྷི. ‘‘སོ ཨུཔྤནྣཱནཾ ཀུསལཱནཾ དྷམྨཱནཾ ཋིཏིཡཱ ཝཱཡམཏཱི’’ཏི ཨཡཾ པཉྙཏྟི བྷཱཝནཱཡ ཨཔྤམཱདསྶ ཙ པཉྙཱཔནཏོ ཨཔྤམཱདཔཉྙཏྟི ནཱམ, ཝཱིརིཡིནྡྲིཡསྶ ནིཀྑེཔསྶ ཙ པཉྙཱཔནཏོ ནིཀྑེཔཔཉྙཏྟི ནཱམ, ཀུསལཱནཾ དྷམྨཱནཾ ཨཱརཀྑསྶ ཙ པཉྙཱཔནཏོ ཨཱརཀྑཔཉྙཏྟི ནཱམ, ཨདྷིཙིཏྟསིཀྑཱཡ ཋིཏིཡཱ ཙ པཉྙཱཔནཏོ ཋིཏིཔཉྙཏྟི ནཱམ. ‘‘ཀེན ཡཐཱཝུཏྟཔྤཀཱརོ པཉྙཏྟིཔྤབྷེདོ སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ.

‘‘ཡོ དུཀྑམདྡཀྑི ཡཏོནིདཱན’’ནྟིཨཱདིགཱཐཱཡ པཉྙཏྟིཔྤབྷེདོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ.

‘‘མོཧསམྦནྡྷནོ ལོཀོ, བྷབྦརཱུཔོཝ དིསྶཏི;

ཨུཔདྷིབནྡྷནོ བཱལོ, ཏམསཱ པརིཝཱརིཏོ;

ཨསྶིརཱི ཝིཡ ཁཱཡཏི, པསྶཏོ ནཏྠི ཀིཉྩནནྟི. –

གཱཐཱཡཾ པན ཀཐཾ པཉྙཏྟིཔྤབྷེདོ ཝིབྷཏྟོ’’ཏི ཝཏྟབྦཏྟཱ ‘‘མོཧསམྦནྡྷནོ’’ཏིཨཱདི ཝུཏྟཾ. ཏཏྠ མོཧསམྦནྡྷནོཏི མོཧཧེཏུཀེཧི སཾཡོཛནེཧི སམྦནྡྷོ. ལོཀོཏི ཨཔྤཧཱིནསཾཡོཛནོ སཏྟལོཀོ. བྷབྦརཱུཔོཝ ¶ དིསྶཏཱིཏི ཨབྷབྦོཔི ཨཏྟཱ བྷབྦརཱུཔོཝ བྷབྦཛཱཏིཀོ ཝིཡ བཱལཱནཾ ཨཝིཔསྶཀཱནཾ དིསྶཏི. ཨུཔདྷིབནྡྷནོཏི ཀིལེསཱུཔདྷཱིཧི བནྡྷིཏབྦོ. ཡུ-པཙྩཡོ ཧི ཀམྨཏྠེ ཝིཧིཏོ. ཨུཔདྷཱིསུ ཝཱ ཀིལེསཱནཾ བནྡྷནཾ ཡསྶ བཱལསྶཱཏི ཨུཔདྷིབནྡྷནོ. དྭེ ཨཝཌྜྷིཡོ ལཱཏི གཎྷཱཏཱིཏི བཱལོ. ཏམསཱ སམྨོཧེན པརིཝཱརིཏོ པཊིཙྪཱདིཏོ པཎྜིཏཱནཾ ཝིཔསྶཀཱནཾ ཨསྶིརཱི ཝིཡ སིརཱིཝིརཧིཏོ ཝིཡ ཁཱཡཏི ¶ ཨུཔཊྛཱཏི. པསྶཏོ པཉྙཱཙཀྑུནཱ པསྶནྟསྶ པཎྜིཏསྶ ཀིཉྩནཾ ནཏྠཱིཏི སངྑེཔཏྠོ དཊྛབྦོ.

‘‘མོཧསམྦནྡྷནོ ལོཀོ’’ཏི པཉྙཏྟི མོཧསཱིསེན གཧིཏཱནཾ ཝིཔལླཱསཱནཾ དེསནཱཡ པཉྙཱཔནཏོ དེསནཱཔཉྙཏྟི ནཱམ. ‘‘བྷབྦརཱུཔོཝ དིསྶཏཱི’’ཏི པཉྙཏྟི ལོཀསྶ ཝིཔརཱིཏསྶ ཝིཔརཱིཏཱཀཱརེན ཨུཔཊྛཧནྟསྶ པཉྙཱཔནཏོ ཝིཔརཱིཏཔཉྙཏྟི ནཱམ. ‘‘ཨུཔདྷིབནྡྷནོ བཱལོ’’ཏི པཉྙཏྟི པཱཔཀཱནཾ ཨིཙྪཱཝཙརཱནཾ པབྷཝསྶ པཉྙཱཔནཏོ པབྷཝཔཉྙཏྟི ནཱམ. ‘‘ཨུཔདྷིབནྡྷནོ བཱལོ’’ཏི པཉྙཏྟི པརིཡུཊྛཱནཱནཾ ཨཀུསལཱནཾ དྷམྨཱནཾ བནྡྷནཀིཙྩསྶ པཉྙཱཔནཏོ ཀིཙྩཔཉྙཏྟི ནཱམ. ‘‘ཨུཔདྷིབནྡྷནོ བཱལོ’’ཏི པཉྙཏྟི ཀིལེསཱནཾ བནྡྷནབལམཱུཧནབལཱནཾ པཉྙཱཔནཏོ བལཔཉྙཏྟི ནཱམ. ‘‘ཨུཔདྷིབནྡྷནོ བཱལོ’’ཏི པཉྙཏྟི སངྑཱརཱནཾ ཝིརུཧནཱཡ པཉྙཱཔནཏོ ཝིརུཧནཱཔཉྙཏྟི ནཱམ. ‘‘ཏམསཱ པརིཝཱརིཏོ’’ཏི པཉྙཏྟི ཨཝིཛྫནྡྷཀཱརསྶ དེསནཱཡ པཉྙཱཔནཏོ དེསནཱཔཉྙཏྟི ནཱམ, ཨཝིཛྫནྡྷཀཱརསྶ ཝེཝཙནསྶ ཙ པཉྙཱཔནཏོ ཝེཝཙནཔཉྙཏྟི ནཱམ. ‘‘ཨསྶིརཱི ཝིཡ ཁཱཡཏཱི’’ཏི པཉྙཏྟི དིབྦཙཀྑུསྶ དསྶནཀིརིཡཱཡ པཉྙཱཔནཏོ དསྶནཔཉྙཏྟི ནཱམ. ‘‘ཨསྶིརཱི ཝིཡ ཁཱཡཏཱི’’ཏི པཉྙཏྟི པཉྙཱཙཀྑུསྶ ནིཀྑེཔསྶ པཉྙཱཔནཏོ ནིཀྑེཔཔཉྙཏྟི ནཱམ. ‘‘པསྶཏོ ནཏྠི ཀིཉྩན’’ནྟི པཉྙཏྟི སཏྟཱནཾ ཨརིཡཱནཾ པཊིཝེདྷསྶ པཉྙཱཔནཏོ པཊིཝེདྷཔཉྙཏྟི ནཱམ.

‘‘ཀཏམཾ ཀིཉྩན’’ནྟི པུཙྪིཏབྦཏྟཱ ‘‘རཱགོ ཀིཉྩན’’ནྟིཨཱདི ཝུཏྟཾ. ‘‘ཡཐཱཝུཏྟོ པཉྙཏྟིཔྤབྷེདོ ཀཐཾ ཨམྷེཧི སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ. ཡཐཱཝུཏྟསྶ པཉྙཏྟིཔྤབྷེདསྶ སམྦྷཝཏོ བྷགཝཱ ཡཾ ‘‘མོཧསམྦནྡྷནོ’’ཏིཨཱདིམཱཧ, ཏཐཱསམྦྷཝཏོ ཏཱཡ གཱཐཱཡ ཡཐཱཝུཏྟོ པཉྙཏྟིཔྤབྷེདོ གཱཐཱནུསཱརེན སདྡཧིཏབྦོ.

‘‘མོཧསམྦནྡྷནོ ལོཀོ’’ཏིཨཱདིགཱཐཱཡ པཉྙཏྟིཔྤབྷེདོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཨཏྠི, བྷིཀྑཝེ, ཨཛཱཏ’ནྟིཨཱདིཔཱཋསྶ པཉྙཏྟིཔྤབྷེདོ ཀཐཾ ཝིབྷཏྟོ’’ཏི པུཙྪིཏབྦཏྟཱ ‘‘ཨཏྠི བྷིཀྑཝེ’’ཏིཨཱདིཔཱལི༹མཱཧ. ‘‘སཱ པན པཱལི༹ ཀིམཏྠཾ བྷགཝཏཱ ཝུཏྟཱ’’ཏི ཙེ པུཙྪེཡྻ? པརམཏྠཏོ ཨཝིཛྫམཱནཏྟཱ ནིབྦཱནཾ ནཏྠི, ཏསྨཱ ‘‘ཨཏྠི ནིབྦཱན’’ནྟི ¶ ཝཙནཾ སསཝིསཱཎཝཙནཾ ཝིཡ ཨནཏྠཾ, ཝོཧཱརམཏྟམེཏནྟི ཝདནྟཱནཾ མིཙྪཱཝཱདཾ བྷཉྫིཏུཾ བྷགཝཏཱ ཝུཏྟཱཏི དཊྛབྦཱ.

ཀུཏོཙིཔི ¶ ཨཛཱཏཏྟཱ ཨབྷཱུཏཏྟཱ ཨཛཱཏཾ ཨབྷཱུཏཾ. པཙྩཡེཧི ཨཀཏཏྟཱ ཨཀཏཾ. སངྑཏཱབྷཱཝཏོ ཨསངྑཏཾ ནིབྦཱནཾ ཨཏྠི. ཨེཏཾ ཨཛཱཏཱདིཀཾ ནིབྦཱནཾ ནོ ཙེ ཨབྷཝིསྶ, ཨེཝཾ སཏི ནིསྶརཎཾ ན པཉྙཱཡེཐ, ནིབྦཱནསྶ ཙ ཨརིཡམགྒཕལཱནཾ ཨཱརམྨཎཏྟཱ, མགྒཕལཱནཉྩ ཀིལེསཱནཾ སམུཙྪིནྡནཏོ པཊིཔྤསྶམྦྷནཏོ, སམུཙྪིནྡནེན ཙ ཏིཝིདྷསྶ ཝཊྚསྶ ཨཔཝཊྚནཏོ ཨཛཱཏཱདིཀཾ ནིབྦཱནཾ ཨཏྠིཡེཝཱཏི དཊྛབྦཾ.

‘‘ཨཏྠི, བྷིཀྑཝེ, ཨཛཱཏཾ…པེ… ཨསངྑཏ’’ནྟི ཨཡཾ པཉྙཏྟི ནིབྦཱནསྶ དེསནཱཔཉྙཏྟི ཙ ནིབྦཱནསྶ ཝེཝཙནཔཉྙཏྟི ཙ ཧོཏི. ‘‘ནཡིདྷ ཛཱཏསྶ…པེ… པཉྙཱཡེཐཱ’’ཏི ཨཡཾ པཉྙཏྟི སངྑཏསྶ ཝེཝཙནཔཉྙཏྟི ཙ སངྑཏསྶ ཨུཔནཡནཔཉྙཏྟི ཙ ཧོཏི. ‘‘ཡསྨཱ ཙ…པེ… ཨསངྑཏ’’ནྟི ཨཡཾ པཉྙཏྟི ནིབྦཱནསྶ ཝེཝཙནཔཉྙཏྟི ཙ ནིབྦཱནསྶ ཛོཏནཱཔཉྙཏྟི ཙ ཧོཏི. ‘‘ཡསྨཱ ཛཱཏསྶ…པེ… པཉྙཱཡཏཱི’’ཏི ཨཡཾ པཉྙཏྟི ནིབྦཱནསྶ ཝེཝཙནཔཉྙཏྟི ཙ མགྒསྶ སཾསཱརཏོ ནིཡྻཱནིཀཔཉྙཏྟི ཙ ནིསྶརཎཔཉྙཏྟི ཙ ཧོཏཱིཏི པཉྙཏྟིཝིསེསོ པཎྜིཏེཧི ནིདྡྷཱརེཏྭཱ གཧེཏབྦོ.

‘‘ཡཐཱཝུཏྟོ ནིབྦཱནསྶ པཉྙཏྟིཔྤབྷེདོ ཀེན སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧ བྷགཝཱ’’ཏིཨཱདི ཝུཏྟཾ. ‘‘ཏེནཱཧ ཨཱཡསྨཱ’’ཏིཨཱདྱཱནུསནྡྷྱཱདིཨཏྠོ ཙེཝ ‘‘ནིཡུཏྟོ པཉྙཏྟིཧཱརོ’’ཏི ཨནུསནྡྷྱཱདིཨཏྠོ ཙ ཝུཏྟནཡཱནུསཱརེན ཝེདིཏབྦོ.

ཨིཏི པཉྙཏྟིཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

༡༢. ཨོཏརཎཧཱརཝིབྷངྒཝིབྷཱཝནཱ

༤༢. ཡེན ¶ ཡེན སཾཝཎྞནཱཝིསེསབྷཱུཏེན པཉྙཏྟིཧཱརཝིབྷངྒེན པཉྙཏྟིཡོ ཝིབྷཏྟཱ, སོ སཾཝཎྞནཱཝིསེསབྷཱུཏོ ཝིབྷངྒོ པརིཔུཎྞོ, ‘‘ཀཏམོ ཨོཏརཎོ ཧཱརཝིབྷངྒོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཨོཏརཎོ ཧཱརོ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ནིདྡིཊྛེསུ སོལ༹སསུ དེསནཱཧཱརཱདཱིསུ ¶ ཀཏམོ སཾཝཎྞནཱཝིསེསོ ཨོཏརཎོ ཧཱརོ ཨོཏརཎཧཱརཝིབྷངྒོ ནཱམཱཏི པུཙྪཏི. ‘‘ཡོ ཙ པཊིཙྩུཔྤཱདོ’’ཏིཨཱདིནིདྡེསསྶ ཨིདཱནི མཡཱ ཝུཙྩམཱནོ ‘‘ཨུདྡྷཾ ཨདྷོ སབྦདྷི ཝིཔྤམུཏྟོ’’ཏིཨཱདིཀོ ཝིཏྠཱརསཾཝཎྞནཱཝིསེསོ ཨོཏརཎོ ཧཱརོ ཨོཏརཎཧཱརཝིབྷངྒོ ནཱམཱཏི གཧེཏབྦོ.

ཏཏྠ པཱཋེ ‘‘ཀཏམེ པཊིཙྩསམུཔྤཱདཱདཡོ ནིདྡྷཱརེཏྭཱ ཀཏམེཧི ནིདྡྷཱརིཏེཧི དྷམྨེཧི ཨོཏརཏཱི’’ཏི པུཙྪིཏབྦཏྟཱ ཨིམསྨིཾ པཱཋེ ཨིམེ པཊིཙྩསམུཔྤཱདཱདཡོ ནིདྡྷཱརེཏྭཱ ཨིམེཧི ནིདྡྷཱརིཏེཧི དྷམྨེཧི ཨོཏརཏཱིཏི དསྶེཏུཾ ‘‘ཨུདྡྷཾ ཨདྷོ སབྦདྷི ཝིཔྤམུཏྟོ’’ཏིཨཱདི ཝུཏྟཾ. ཏཏྠ ཨུདྡྷནྟི ཀཱམདྷཱཏུཏོ ཨུདྡྷཾ ཨུཔརིབྷཱགེ པཝཏྟཱཡ རཱུཔདྷཱཏུཨརཱུཔདྷཱཏུཡཱ. ཨདྷོཏི རཱུཔདྷཱཏུཏོ ཧེཊྛཱབྷཱགེ པཝཏྟཱཡ ཀཱམདྷཱཏུཡཱ. སབྦདྷཱིཏི སབྦསྨིཾ ཀཱམརཱུཔཨརཱུཔདྷཱཏུམྷི. ཝིཔྤམུཏྟོཏི པཊིསནྡྷིཝསེན ཨཔྤཝཏྟནཏོ ཝིཔྤམུཏྟོ ཨསེཀྑོ. ཨཡཾ སེཀྑོ དསྶནམགྒེན སཀྐཱཡདིཊྛིཡཱ སམུགྒྷཱཏཏྟཱ ‘‘ཨཧཾ ཨསྨཱི’’ཏི ཨནཱནུཔསྶཱི ཝིཧརཏི. ཨེཝཾ སེཀྑཱཡ ཝིམུཏྟིཡཱ ཙེཝ ཨསེཀྑཱཡ ཝིམུཏྟིཡཱ ཙ སེཀྑོ ཙེཝ ཨསེཀྑོ ཙ ཨཏིཎྞཔུབྦཾ ཨོགྷཾ ཨཔུནབྦྷཝཱཡ ཝིམུཏྟོ ཨུདཏཱརཱིཏི གཱཐཱཏྠོ གཧེཏབྦོ.

ཏསྨིཾ གཱཐཱཔཱཋེ ‘‘ཀཏམེ ནིདྡྷཱརེཏྭཱ ཀཏམེཧི ཨོཏརཏཱི’’ཏི པུཙྪིཏབྦཏྟཱ ‘‘ཨུདྡྷནྟི རཱུཔདྷཱཏཱུ’’ཏིཨཱདི ཝུཏྟཾ. ཨུདྡྷནྟི མནུསྶལོཀཏོ ཨུདྡྷཾ ཙཱཏུམཧཱརཱཛིཀཱདཡོཔི གཧིཏཱཏི ཨཏྠསམྦྷཝཏོ ཏཾ ནིཝཏྟེཏུཾ ‘‘རཱུཔདྷཱཏུ ཨརཱུཔདྷཱཏཱུ’’ཏི ཝུཏྟཾ. ཨདྷོཏི མནུསྶབྷཝཏོ ཨདྷོ ཙཏྟཱརོ ཨཔཱཡབྷཱུམིཡོ ཙ གཧིཏཱཏི ཨཏྠསམྦྷཝཏོ ཏཾ ནིཝཏྟེཏུཾ ‘‘ཀཱམདྷཱཏཱུ’’ཏི ཝུཏྟཾ. སབྦདྷཱིཏི ཙཏུབྷཱུམིཀེཏི ཨཏྠསམྦྷཝཏོ ‘‘ཏེདྷཱཏུཀེ’’ཏི ཝུཏྟཾ. ཨཡཾ ཨསེཀྑཱ ཝིམུཏྟཱིཏི ཝིམུཏྟསྶ ཨསེཀྑསྶ ཡཱ ཝིརཱགཏཱ ཨཏྠི, ཨཡམྤི ཝིརཱགཏཱ ཨསེཀྑཕལཝིམུཏྟི. ‘‘ཨུདྡྷཾ ཨདྷོ སབྦདྷི ཝིཔྤམུཏྟོ’’ཏི པཱཋེ ཝུཏྟཔྤཀཱརཱ ཨཡཾ ཨསེཀྑཱ ཝིམུཏྟི ནིདྡྷཱརིཏཱཏི ཨཏྠོ. ནིདྡྷཱརིཏཱཡ ཨསེཀྑཱཡ ཝིམུཏྟིཡཱ ཡཱནི སདྡྷཱདིཔཉྩིནྡྲིཡཱནི ནིདྡྷཱརིཏཱནི, ཏཱནིཡེཝ ཨསེཀྑཱནི ¶ པཉྩིནྡྲིཡཱནི བྷཝནྟི. ཨཡཾ ཝུཏྟཔྤཀཱརཱ ཨོཏརཎཱ ཨིནྡྲིཡེཧི ཝིམུཏྟིཡཱ ཨོཏརཎཱ ནཱམ པཝེསནཱ ནཱམ.

ཏཱནིཡེཝ ཨསེཀྑཱནི པཉྩིནྡྲིཡཱནི ཝིཛྫཱཡ ཨུཔཀཱརཀཏྟཱ, པཉྙཱཔདཊྛཱནཏྟཱ ཝཱ ཝིཛྫཱ བྷཝནྟི. ཝིཛྫུཔྤཱདཱ ཏཱདིསཱཡ ཝིཛྫཱཡ ཨུཔྤཱདཱ ཨུཔྤཱདཧེཏུཏོ ¶ ཨཝིཛྫཱནིརོདྷོ ཨཝིཛྫཱཡ ནིརོདྷོ ཧོཏི…པེ… དུཀྑཀྑནྡྷསྶ ནིརོདྷོ ཧོཏི, ཨཡཾ ཝུཏྟཔྤཀཱརཱ ཨོཏརཎཱ པཊིཙྩསམུཔྤཱདེཧི ཨོཏརཎཱ ནཱམ.

ཏཱནིཡེཝ ཨསེཀྑཱནི པཉྩིནྡྲིཡཱནི ཏཱིཧི ཁནྡྷེཧི སངྒཧིཏཱནི སདྡྷཱཝཱིརིཡེཧི སཱིལསམྦྷཝཏོ, སཏིཡཱ ཙ པཉྙཱནུཝཏྟཀཏྟཱ. སེསཱ ཝུཏྟནཡཱནུསཱརེན ཝེདིཏབྦཱ.

‘‘ཨུདྡྷཾ ཨདྷོ སབྦདྷི ཝིཔྤམུཏྟོ’’ཏི པཱཋེ ནིདྡྷཱརེཏྭཱ ཨོཏརཎཱ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, ‘‘ཨཡཾ ཨཧསྨཱིཏི ཨནཱནུཔསྶཱི’’ཏི པཱཋེ ‘‘ཀཏམེ ནིདྡྷཱརེཏྭཱ ཀཏམེཧི ཨོཏརཎེཧི ཨོཏརཏཱི’’ཏི ཝཏྟབྦཏྟཱ ‘‘ཨཡཾ ཨཧསྨཱིཏི ཨནཱནུཔསྶཱིཏི ཨཡཾ སཀྐཱཡདིཊྛིཡཱ’’ཏིཨཱདི ཝུཏྟཾ. ཡོ ཨཡཾ སེཀྑོ ‘‘ཨཧམསྨཱི’’ཏི ནཱནུཔསྶཱི, ཏསྶ སེཀྑསྶ སཀྐཱཡདིཊྛིཡཱ ཡོ སམུགྒྷཱཏོ ཨཏྠི, ཡཱ སམུགྒྷཱཏསངྑཱཏཱ སམུགྒྷཱཏཝིམུཏྟི སེཀྑཱ ཝིམུཏྟི ཧོཏི, ཏསྶཱ སེཀྑཱཡ ཝིམུཏྟིཡཱ ཡཱནི སདྡྷཱདིཔཉྩིནྡྲིཡཱནི ནིདྡྷཱརིཏཱནི, ཏཱནིཡེཝ སེཀྑཱནི པཉྩིནྡྲིཡཱནི བྷཝནྟི. ཨཡཾ ཝུཏྟཔྤཀཱརཱ ཨོཏརཎཱ ཨིནྡྲིཡེཧི ཨོཏརཎཱ ནཱམ. སེསཱ ཝུཏྟནཡཱནུསཱརེན ཝེདིཏབྦཱ.

༤༣. ‘‘ཨུདྡྷཾ ཨདྷོ’’ཏིཨཱདིགཱཐཱཡཾ ཨོཏརཎཱ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, ‘‘ནིསྶིཏསྶ ཙལིཏ’’ནྟིཨཱདིཔཱཋེ ‘‘ཀཏམེ ནིདྡྷཱརེཏྭཱ ཀཏམེཧི ཨོཏརཏཱི’’ཏི པུཙྪིཏབྦཏྟཱ ‘‘ནིསྶིཏསྶ ཙལིཏཾ, ཨནིསྶིཏསྶ ཙལིཏཾ ནཏྠཱི’’ཏིཨཱདི ཝུཏྟཾ. ནིསྶིཏསྶ པུགྒལསྶ ཙལིཏཾ ཙལནཾ ཨཏྠི, ཨནིསྶིཏསྶ པུགྒལསྶ ཙལིཏཾ ཙལནཾ ནཏྠི. ཙལིཏེ ཙལནེ ཨསཏི པསྶདྡྷི བྷཝཏི, པསྶདྡྷིཡཱ སཏི ཝིཛྫམཱནཱཡ ནཏི ན ཧོཏི, ནཏིཡཱ ཨསཏི ཨཝིཛྫམཱནཱཡ ཨཱགཏིགཏི ན ཧོཏི, ཨཱགཏིགཏིཡཱ ཨསཏི ཨཝིཛྫམཱནཱཡ ཙུཏཱུཔཔཱཏོ ན ཧོཏི, ཙུཏཱུཔཔཱཏེ ཨསཏི ཨཝིཛྫམཱནེ ཨིདྷ ཚསུ ཨཛ྄ཛྷཏྟིཀཱཡཏནེསུ ཨཏྟཱནཾ ནེཝ པསྶཏི, ཧུརཾ ཝཱ ཚསུ བཱཧིརཱཡཏནེསུ ཨཏྟཱནཾ ན པསྶཏི, ཨུབྷཡཾ ཨནྟརེན ཝཛྫེཏྭཱ ཕསྶཱདིསམུདཱཡེསུ དྷམྨེསུ ཨཏྟཱནཾ ན པསྶཏི, ཨེསོཝ པཊིཙྩསམུཔྤཱདོ ‘‘ཨཝིཛྫཱནིརོདྷཱ’’ཏིཨཱདིཀོ དུཀྑསྶ ཨནྟོ ཨཝསཱནཾ ཀརོཏཱིཏི ཨཏྠོ.

ནིསྶིཏསྶ ¶ ཙལིཏནྟི ཨེཏྠ ‘‘ནིསྶཡོ ཀཏིཝིདྷོ’’ཏི པུཙྪིཏབྦཏྟཱ ‘‘ནིསྶིཏསྶ ཙལིཏནྟི ནིསྶཡོ ནཱམཱ’’ཏིཨཱདི ཝུཏྟཾ. ཏཏྠཱཏི ཏེསུ དུཝིདྷེསུ ཏཎྷཱནིསྶཡདིཊྛིནིསྶཡེསུ ¶ ཡཱ ཙེཏནཱ རཏྟསྶ པུགྒལསྶ ནིདྡྷཱརིཏཱ, ཨཡཾ ཙེཏནཱདྷམྨོ ཏཎྷཱནིསྶཡོ ནཱམ. ཡཱ ཙེཏནཱ མཱུལ༹ྷསྶ པུགྒལསྶ ནིདྡྷཱརིཏཱ. ཨཡཾ ཙེཏནཱདྷམྨོ དིཊྛིནིསྶཡོ ནཱམ. སཱ དུཝིདྷཱ ཙེཏནཱ པན སངྑཱརཱ ནཱམ. སངྑཱརཔཙྩཡཱ ཝིཉྙཱཎཾ…པེ… སབྦོ པཊིཙྩསམུཔྤཱདོ ནིདྡྷཱརིཏོ. ཨཡཾ ཝུཏྟཔྤཀཱརཱ ཨོཏརཎཱ པཊིཙྩསམུཔྤཱདེཧི ཨོཏརཎཱ ནཱམ.

ཏཏྠཱཏི ཏསྨིཾ ཏཎྷཱནིསྶཡདིཊྛིནིསྶཡེ ཡཱ ཝེདནཱ རཏྟསྶ པུགྒལསྶ ནིདྡྷཱརིཏཱ, ཨཡཾ སུཁཱ ཝེདནཱ. ཡཱ ཙེཏནཱ སམྨཱུལ༹ྷསྶ པུགྒལསྶ ནིདྡྷཱརིཏཱ, ཨཡཾ ཨདུཀྑམསུཁཱ ཝེདནཱ. ཡེབྷུཡྻེན སེསཱ ཝུཏྟནཡཱནུསཱརེན ཝེདིཏབྦཱ.

༤༤. ‘‘ནིསྶིཏསྶ ཙལིཏ’’ནྟིཨཱདིཔཱཋེ ཨོཏརཎཱ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ.

‘‘ཡེ ཀེཙི སོཀཱ པརིདེཝིཏཱ ཝཱ…པེ…

པིཡཾ ན ཀཡིརཱཐ ཀུཧིཉྩི ལོཀེ’’ཏི. –

གཱཐཱཔཱཋེ ‘‘ཀཏམེ ནིདྡྷཱརེཏྭཱ ཀཏམེཧི ཨོཏརཏཱི’’ཏི པུཙྪིཏབྦཏྟཱ ‘‘ཡེ ཀེཙི སོཀཱ’’ཏིཨཱདི ཝུཏྟཾ. ཡེ ཀེཙི སོཀཱ ཝཱ ཡཱ ཀཱཙི པརིདེཝིཏཱ ཝཱ ཨནེཀརཱུཔཱ ཡཱ ཀཱཙི དུཀྑཱ ཝཱ ལོཀསྨིཾ སམྦྷཝནྟི. ཨེཏེ སོཀཱདཡོ པིཡཾ པཊིཙྩ པབྷཝནྟི, པིཡེ ཨསནྟེ ཨེཏེ སོཀཱདཡོ ན བྷཝནྟི. ཏསྨཱ པིཡེ ཨསནྟེ སོཀཱདཱིནཾ ཨབྷཱཝཏོ ཡེསཾ ཝཱིཏསོཀཱནཾ ཀུཧིཉྩི ལོཀེཔི ནཏྠི, ཏེ ཝཱིཏསོཀཱ སུཁིནོ བྷཝནྟི. ཏསྨཱ ཝཱིཏསོཀཱནཾ སུཁསམྤནྣཏྟཱ ཨསོཀཾ ཝིརཛཾ པཏྠཡཱནོ སཔྤུརིསོ ཀུཧིཉྩི ལོཀེ པིཡཾ ན ཀཡིརཱཐཱཏི གཱཐཱཏྠོ.

‘‘ཡེ ཀེཙི སོཀཱ པརིདེཝིཏཱ ཝཱ, དུཀྑཱ ཙ ལོཀསྨིམནེཀརཱུཔཱ པིཡཾ པཊིཙྩ པབྷཝནྟི ཨེཏེ’’ཏི ཨེཏྠ པཱཋེ ཡཱ ཝེདནཱ ནིདྡྷཱརིཏཱ, ཨཡཾ དུཀྑཱ ཝེདནཱ. སེསཱ ཝུཏྟནཡཱནུསཱརེན ཝེདིཏབྦཱ.

‘‘ཡེ ཀེཙི སོཀཱ’’ཏིཨཱདིགཱཐཱཔཱཋེ ཨོཏརཎཱ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ ¶ , ‘‘ཀཱམཾ ཀཱམཡམཱནསྶཱ’’ཏིཨཱདིགཱཐཱཔཱཋེ ‘‘ཀཏམེ ¶ ནིདྡྷཱརེཏྭཱ ཀཏམེཧི ཨོཏརཏཱི’’ཏི ཝཏྟབྦཏྟཱ ‘‘ཀཱམཾ ཀཱམཡམཱནསྶཱ’’ཏིཨཱདི ཝུཏྟཾ. ཏསྶཾ གཱཐཱཡཾ ཨཏྠོ ཧེཊྛཱ ཝུཏྟོཝ.

ཏཏྠཱཏི ཏསྨིཾ ‘‘པཱིཏིམནོ ཧོཏཱི’’ཏི པཱཋེ ཡཱ པཱིཏིམནཏཱ ཝུཏྟཱ ནིདྡྷཱརིཏཱ, ཨཡཾ པཱིཏིམནཏཱ ཨནུནཡོ ཧོཏི. ‘‘སལླཝིདྡྷོཝ རུཔྤཏཱི’’ཏི པཱཋེ ཡཾ རུཔྤནཾ ཨཱཧ, ཨིདཾ རུཔྤནཾ པཊིགྷཾ ཧོཏི, ཨནུནཡོ ཙ པཊིགྷཉྩ ནིདྡྷཱརིཏཱཏི ཨཏྠོ.

‘‘ཨནུནཡེ ཙ པཊིགྷེ ཙ ནིདྡྷཱརིཏེ ཀཏམོ དྷམྨོ ནིདྡྷཱརིཏོ’’ཏི ཝཏྟབྦཏྟཱ ‘‘ཨནུནཡོ པཊིགྷཉྩ པན ཏཎྷཱཔཀྑོ’’ཏི ཝུཏྟཾ. ཏཎྷཱཔཀྑོཏི ཏཎྷཱཔཀྑཏྟཱ ཏཎྷཱ ནིདྡྷཱརིཏཱ. ‘‘ཨནུནཡོ ཏཎྷཱཔཀྑོ ཧོཏུ, པཊིགྷཾ པན ཏཎྷཱཔཀྑཾ ན སིཡཱ’’ཏི ཙེ ཝདེཡྻ? པཊིགྷསྶ ཨཏྟསིནེཧཝསེན པཝཏྟནཏོ པཊིགྷམྤི ཏཎྷཱཔཀྑཾ ཧོཏི. ‘‘ཏཎྷཱཡ ནིདྡྷཱརིཏཱཡ ཀཏམོ ནིདྡྷཱརིཏོ’’ཏི ཝཏྟབྦཏྟཱ ‘‘ཏཎྷཱཡ ཙ པནཱ’’ཏིཨཱདི ཝུཏྟཾ. དསནྣཾ རཱུཔཱཡཏནཱནཾ ཏཎྷཱཡ པདཊྛཱནཏྟཱ དས རཱུཔཱནི ཨཱཡཏནཱནི ནིདྡྷཱརིཏཱནི. ཨཡཾ ཝུཏྟཔྤཀཱརཱ ཨོཏརཎཱ ཨཱཡཏནེཧི ཨོཏརཎཱ ནཱམ. སུཏྟེ ཨཱགཏཱ པཊིཙྩསམུཔྤཱདཱདཡོ ཏེན སཾཝཎྞནཱཝིསེསེན ནཡེན ནིདྡྷཱརིཏཱ, སུཏྟཏྠམུཁེན ཝཱ ནིདྡྷཱརིཏཱ, ཏེན…པེ… ནཡེན ནིདྡྷཱརིཏེསུ པཊིཙྩསམུཔྤཱདཱདཱིསུ ཡོ སཾཝཎྞནཱནཡཝིསེསོ ཏདཏྠཝཱཙཀཝསེན ཝཱ ཏདཏྠཉཱཔཀཝསེན ཝཱ ཨོཏརཏི པཝིསཏི སམོསརཏི, སོ སཾཝཎྞནཱནཡཝིསེསོ ཨོཏརཎོ ཧཱརོ ནཱམཱཏི ཨདྷིཔྤཱཡོ དཊྛབྦོ. སེསེསུཔི ཝུཏྟནཡཱནུསཱརེན ཨོཏརཎཱ གཧེཏབྦཱ. ‘‘ཏེནཱཧ ཨཱཡསྨཱ’’ཏིཨཱདྱཱནུསནྡྷྱཱདིཨཏྠོ ཙེཝ ‘‘ནིཡུཏྟོ ཨོཏརཎོ ཧཱརོ’’ཏི ཨནུསནྡྷྱཱདིཨཏྠོ ཙ ཝུཏྟནཡཱནུསཱརེན ཝེདིཏབྦོ.

ཨིཏི ཨོཏརཎཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

༡༣. སོདྷནཧཱརཝིབྷངྒཝིབྷཱཝནཱ

༤༥. ཡེན ¶ ¶ ཡེན སཾཝཎྞནཱཝིསེསབྷཱུཏེན ཨོཏརཎཧཱརཝིབྷངྒེན ཨོཏརེཏབྦཱ སུཏྟཏྠཱ ཝིབྷཏྟཱ, སོ སཾཝཎྞནཱཝིསེསབྷཱུཏོ ཝིབྷངྒོ པརིཔུཎྞོ, ‘‘ཀཏམོ སོདྷནཧཱརཝིབྷངྒོ’’ཏི པུཙྪིཏབྦཏྟཱ ‘‘ཏཏྠ ཀཏམོ སོདྷནོ ཧཱརོ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ནིདྡིཊྛེསུ སོལ༹སསུ དེསནཱཧཱརཱདཱིསུ ཀཏམོ སཾཝཎྞནཱཝིསེསོ སོདྷནོ ཧཱརོ སོདྷནཧཱརཝིབྷངྒོ ནཱམཱཏི པུཙྪཏི. ‘‘ཝིསྶཛྫིཏམྷི པཉྷེ’’ཏིཨཱདིནིདྡེསསྶ ཨིདཱནི མཡཱ ཝུཙྩམཱནོ ‘‘ཡཐཱ ཨཱཡསྨཱ ཨཛིཏོ’’ཏིཨཱདིཀོ ཝིཏྠཱརསཾཝཎྞནཱཝིསེསོ སོདྷནཧཱརཝིབྷངྒོ ནཱམཱཏི གཧེཏབྦོ. ‘‘ཀཐཾ ཏཏྠ པཉྷེ སོདྷནོ ཧཱརོ ཝིཉྙཱཏབྦོ’’ཏི ཝཏྟབྦཏྟཱ ‘‘ཡཐཱ ཨཱཡསྨཱ’’ཏིཨཱདི ཝུཏྟཾ. ཡཐཱ ཡེན པཀཱརེན ཨཱཡསྨཱ ཨཛིཏོ པཱརཱཡནེ བྷགཝནྟཾ པཉྷཾ པུཙྪཏི, ཏཐཱ ཏེན པཀཱརེན ཝིསྶཛྫིཏམྷི པཉྷེ ཨཡཾ སོདྷནོ ཧཱརོ ཝིཉྙཱཏབྦོཏི. ‘‘ནིཡམེཏྭཱ ཝིབྷཛེཧཱི’’ཏི ཝཏྟབྦཏྟཱ ནིཡམེཏྭཱ ཝིབྷཛིཏུཾ ‘‘ཀེནསྶཱུ’’ཏིཨཱདི ཝུཏྟཾ. གཱཐཱཏྠོ ཝུཏྟོཝ.

‘‘ཀེནསྶུ ནིཝུཏོ ལོཀོ, ཀེནསྶུ ནཔྤཀཱསཏི;

ཀིསྶཱབྷིལེཔནཾ བྲཱུསི, ཀིཾསུ ཏསྶ མཧབྦྷཡ’’ནྟི. –

པུཙྪཱཝསེན པཝཏྟགཱཐཱཡཉྩ –

‘‘ཨཝིཛྫཱཡ ནིཝུཏོ ལོཀོ, (ཨཛིཏཱཏི བྷགཝཱ,)

ཝིཝིཙྪཱ པམཱདཱ ནཔྤཀཱསཏི;

ཛཔྤཱབྷིལེཔནཾ བྲཱུམི, དུཀྑམསྶ མཧབྦྷཡ’’ནྟི. –

ཝིསྶཛྫནཝསེན པཝཏྟགཱཐཱཡཉྩཱཏི ཨིམཱསུ དྭཱིསུ གཱཐཱསུ ‘‘ཀེནསྶུ ནིཝུཏོ ལོཀོ’’ཏི ཨིམིནཱ པདེན པཉྷེ པུཙྪིཏེ ‘‘ཨཝིཛྫཱཡ ནིཝུཏོ ལོཀོ’’ཏི ཨིམིནཱ པདེན བྷགཝཱ ‘‘ཀེནསྶུ ནིཝུཏོ ལོཀོ’’ཏི པདཾ ཏདཏྠེ ཨཉྙཱཎསཾསཡཱདིམལཱནཾ ཨཔནཡནེན སོདྷེཏི. ཏདཏྠེ ཧི ཝིསྶཛྫིཏེ ཨཉྙཱཎསཾསཡཱདཱིནཾ ཨབྷཱཝཏོ ཨཏྠོ སོདྷིཏོ ནཱམ, ཨཏྠེ ཙ སོདྷིཏེ པདམྤི སོདྷིཏཾཡེཝ. ཏེནཱཧ ཨཊྛཀཐཱཡཾ – ‘‘ཏདཏྠསྶ ཝིསྶཛྫནཏོ’’ཏི (ནེཏྟི. ཨཊྛ. ༤༥), ཊཱིཀཱཡཉྩ ‘‘ཏབྦིསཡཨཉྙཱཎསཾསཡཱདིམལཱཔནཡནེན སོདྷེཏཱི’’ཏི ཝུཏྟཾ. ནོ ཙ ཨཱརམྦྷནྟི པུཙྪིཏུཾ ཨཱརབྷིཏབྦཾ ¶ སབྦགཱཐཱཔདཾ, གཱཐཱཏྠཾ ཝཱ, ཉཱཏུཾ ཨིཙྪིཏསྶ སབྦསྶ ཨཏྠསྶ ཝིསྶཛྫནཝསེན ཨཔརིཡོསིཏཏྟཱ ¶ བྷགཝཱ ‘‘ཨཝིཛྫཱཡ ནིཝུཏོ ལོཀོ’’ཏི ཨེཏྟཀེནེཝ པདེན སོདྷེཏི. སེསེསུཔི ཨེས ནཡོ.

‘‘ཀིཾསུ ཏསྶ མཧབྦྷཡ’’ནྟི ཨིམིནཱ པདེན པཉྷེ པུཙྪིཏེ ‘‘དུཀྑམསྶ མཧབྦྷཡ’’ནྟི པདེན བྷགཝཏཱ ཨཱརམྦྷོ ཉཱཏུཾ ཨིཙྪིཏོ ཨཏྠོ སུདྡྷོ སོདྷིཏོ ཧོཏི. སེསགཱཐཱསུཔི ཨེསེཝ ནཡོ.

ཡཏྠ པཉྷེ ཨེཝཾ ནིརཝསེསཝིསྶཛྫནཝསེན ཨཱརམྦྷོ སུདྡྷོ སོདྷིཏོ བྷཝཏི, སོ པཉྷོ ཝིསྶཛྫིཏོ སོདྷིཏོ བྷཝཏི. ཡཏྠ པཉྷེ ཨེཝཾ ནིརཝསེསཝིསྶཛྫནཝསེན ཨཱརམྦྷོ ཡཱཝ ཨསུདྡྷོ ཨསོདྷིཏོ བྷཝཏི, ཏཱཝ སོ པཉྷོ ཝིསྶཛྫིཏོ སོདྷིཏོ ན བྷཝཏཱིཏི ཡོཛནཱ. ‘‘ཏེནཱཧཱ’’ཏིཨཱདྱཱནུསནྡྷྱཱདྱཏྠོ ཙེཝ ‘‘ནིཡུཏྟོ སོདྷནོ ཧཱརོ’’ཏི ཨནུསནྡྷྱཱདྱཏྠོ ཙ ཝུཏྟནཡཱནུསཱརེན ཝེདིཏབྦོ.

ཨིཏི སོདྷནཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

༡༤. ཨདྷིཊྛཱནཧཱརཝིབྷངྒཝིབྷཱཝནཱ

༤༦. ཡེན ཡེན སཾཝཎྞནཱཝིསེསབྷཱུཏེན ཝིབྷངྒེན པཉྷཱདཡོ སོདྷིཏཱ, སོ སཾཝཎྞནཱཝིསེསབྷཱུཏོ པརིཔུཎྞོ, ‘‘ཀཏམོ ཨདྷིཊྛཱནཧཱརཝིབྷངྒོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཨདྷིཊྛཱནོ ཧཱརོ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ནིདྡིཊྛེསུ སོལ༹སསུ དེསནཱཧཱརཱདཱིསུ ཀཏམོ སཾཝཎྞནཱཝིསེསོ པཊིནིདྡེསཏོ ཨདྷིཊྛཱནོ ཧཱརོ ཨདྷིཊྛཱནཧཱརཝིབྷངྒོ ནཱམཱཏི པུཙྪཏི. ‘‘ཨེཀཏྟཏཱཡ དྷམྨཱ, ཡེཔི ཙ ཝེམཏྟཏཱཡ ནིདྡིཊྛཱ’’ཏིཨཱདིནིདྡེསསྶ ཨིདཱནི མཡཱ ཝུཙྩམཱནོ ‘‘ཡེ ཏཏྠ ནིདྡིཊྛཱ, ཏཐཱ ཏེ དྷཱརཡིཏབྦཱ’’ཏིཨཱདིཀོ ཝིཏྠཱརསཾཝཎྞནཱཝིསེསོ ཨདྷིཊྛཱནཧཱརཝིབྷངྒོ ནཱམཱཏི གཧེཏབྦོ.

‘‘ཡེ ¶ དྷམྨཱ སུཏྟེསུ ཨེཀཏྟཏཱཡ ཙ ཝེམཏྟཏཱཡ ཙ ནིདྡིཊྛཱ, ཏེ དྷམྨཱ ཀིཾ པན ཏཐེཝ དྷཱརཡིཏབྦཱ ¶ , ཨུདཱཧུ ཨཉྙཐཱཔི ཝིཀཔྤཡིཏབྦཱ’’ཏི པུཙྪིཏབྦཏྟཱ ‘‘ཡེ ཏཏྠཱ’’ཏིཨཱདི ཝུཏྟཾ. ཏཏྠ ཏེསུ སུཏྟནྟེསུ ཡེ དུཀྑསཙྩཱདཡོ དྷམྨཱ ཨེཀཏྟཏཱཡ ཙ ཝེམཏྟཏཱཡ ཙ ནིདྡིཊྛཱ, ཏེ དུཀྑསཙྩཱདཡོ དྷམྨཱ ཏཐཱ ཨེཀཏྟཏཱཡ ཙ ཝེམཏྟཏཱཡ ཙ དྷཱརཡིཏབྦཱ ཨུཔལཀྑིཏབྦཱ, ན ཨཉྙཐཱ ཝིཀཔྤཡིཏབྦཱ.

‘‘སཱམཉྙཀཔྤནཱཡ ཝོཧཱརབྷཱཝེན ཨནཝཊྛཱནཏོ ཀཏམཱ ཨེཀཏྟཏཱ, ཀཏམཱ ཝེམཏྟཏཱ’’ཏི པུཙྪིཏབྦཏྟཱ ‘‘དུཀྑནྟི ཨེཀཏྟཏཱ’’ཏིཨཱདི ཝུཏྟཾ. དུཀྑནྟི ཛཱཏིཨཱདིཝིསེསམནཔེཀྑིཏྭཱ ཡཱ དུཀྑསཱམཉྙཏཱ ཝུཏྟཱ, སཱ ཨཡཾ དུཀྑསཱམཉྙཏཱ དུཀྑསྶ ཨེཀཏྟཏཱ ནཱམ. ‘‘ཏཏྠ ཀཏམཾ དུཀྑ’’ནྟི པུཙྪིཏཱ ‘‘ཛཱཏི དུཀྑཱ, ཛརཱ དུཀྑཱ…པེ... ཝིཉྙཱཎཾ དུཀྑ’’ནྟི ཛཱཏིཨཱདིཝིསེསམཔེཀྑིཏྭཱ ཡཱ དུཀྑཝིསེསཏཱ ཝུཏྟཱ, སཱ ཨཡཾ དུཀྑཝིསེསཏཱ དུཀྑསྶ ཝེམཏྟཏཱ ནཱམ. ཏཏྠཱཏི ཡེ དུཀྑཱདཡོ དྷམྨཱ སུཏྟེ ཝུཏྟཱ, ཏཏྠ ཏེསུ དུཀྑཱདཱིསུ ཨཏྠེསུ.

དུཀྑསམུདཡོཏི ‘‘ཏཎྷཱ པོནོབྷཝིཀཱ’’ཏི ཝིསེསམནཔེཀྑིཏྭཱ ཡཱ སམུདཡསཱམཉྙཏཱ ཝུཏྟཱ, སཱ ཨཡཾ སམུདཡསཱམཉྙཏཱ སམུདཡསྶ ཨེཀཏྟཏཱ ནཱམ. ‘‘ཏཏྠ ཀཏམོ སམུདཡོ’’ཏི པུཙྪིཏྭཱ ‘‘ཡཱཡཾ ཏཎྷཱ…པེ… ཝིབྷཝཏཎྷཱ’’ཏི ཝིསེསཾ ཨཔེཀྑིཏྭཱ ཡཱ སམུདཡཝིསེསཏཱ ཝུཏྟཱ, སཱ ཨཡཾ སམུདཡཝིསེསཏཱ སམུདཡསྶ ཝེམཏྟཏཱ ནཱམ.

དུཀྑནིརོདྷོཏི ‘‘ཏསྶཱཡེཝ ཏཎྷཱཡ ཨསེསཝིརཱགནིརོདྷོ’’ཏི ཝིསེསམནཔེཀྑིཏྭཱ ཡཱ ནིརོདྷསཱམཉྙཏཱ ཝུཏྟཱ, སཱ ཨཡཾ ནིརོདྷསཱམཉྙཏཱ ནིརོདྷསྶ ཨེཀཏྟཏཱ ནཱམ. ‘‘ཏཏྠ ཀཏམོ དུཀྑནིརོདྷོ’’ཏི པུཙྪིཏྭཱ ‘‘ཡོ ཏསྶཱཡེཝ ཏཎྷཱཡ ཨསེསཝིརཱགནིརོདྷོ ཙཱགོ པཊིནིསྶགྒོ མུཏྟི ཨནཱལཡོ’’ཏི ཝིསེསམཔེཀྑིཏྭཱ ཡཱ ནིརོདྷཝིསེསཏཱ ཝུཏྟཱ, སཱ ཨཡཾ ནིརོདྷཝིསེསཏཱ ནིརོདྷསྶ ཝེམཏྟཏཱ ནཱམ.

དུཀྑནིརོདྷགཱམིནཱི པཊིཔདཱཏི? པཊིཔདཱཏི སམྨཱདིཊྛིཨཱདིཝིསེསམནཔེཀྑིཏྭཱ ཡཱ ནིརོདྷགཱམིནིཔཊིཔདཱསཱམཉྙཏཱ ཝུཏྟཱ, སཱ ཨཡཾ ནིརོདྷགཱམིནིཔཊིཔདཱསཱམཉྙཏཱ མགྒསྶ ཨེཀཏྟཏཱ ནཱམ. ‘‘ཏཏྠ ཀཏམཱ དུཀྑནིརོདྷགཱམིནཱི པཊིཔདཱ’’ཏི ¶ པུཙྪིཏྭཱ ‘‘ཨཡམེཝ ཨརིཡོ…པེ… སམྨཱསམཱདྷཱི’’ཏི སམྨཱདིཊྛིཨཱདིཝིསེསམཔེཀྑིཏྭཱ ཡཱ ཝིསེསདུཀྑནིརོདྷགཱམིནིཔཊིཔདཏཱ ཝུཏྟཱ, སཱ ཨཡཾ ཝིསེསདུཀྑནིརོདྷགཱམིནིཔཊིཔདཏཱ མགྒསྶ ཝེམཏྟཏཱ ནཱམ.

མགྒོཏི ནིརཡགཱམིམགྒཱདིཝིསེསམནཔེཀྑིཏྭཱ ཡཱ སཱམཉྙམགྒཏཱ ཝུཏྟཱ, སཱ ཨཡཾ སཱམཉྙམགྒཏཱ ¶ མགྒསྶ ཨེཀཏྟཏཱ ནཱམ. ‘‘ཏཏྠ ཀཏམོ མགྒོ’’ཏི པུཙྪིཏྭཱ ‘‘ནིརཡགཱམཱི མགྒོ…པེ… ནིབྦཱནགཱམཱི མགྒོ’’ཏི ནིརཡགཱམིམགྒཱདིཝིསེསཾ ཨཔེཀྑིཏྭཱ ཡཱ ཝིསེསམགྒཏཱ ཝུཏྟཱ, སཱ ཨཡཾ ཝིསེསམགྒཏཱ མགྒསྶ ཝེམཏྟཏཱ ནཱམ.

ནིརོདྷོཏི པཊིསངྑཱནིརོདྷཱདིཝིསེསཾ ཨནཔེཀྑིཏྭཱ ཡཱ སཱམཉྙནིརོདྷཏཱ ཝུཏྟཱ, སཱ ཨཡཾ སཱམཉྙནིརོདྷཏཱ ནིརོདྷསྶ ཨེཀཏྟཏཱ ནཱམ. ‘‘ཏཏྠ ཀཏམོ ནིརོདྷོ’’ཏི པུཙྪིཏྭཱ ‘‘པཊིསངྑཱནིརོདྷོ…པེ… སབྦཀིལེསནིརོདྷོ’’ཏི པཊིསངྑཱནིརོདྷཱདིཝིསེསཾ ཨཔེཀྑིཏྭཱ ཡཱ ཝིསེསནིརོདྷཏཱ ཝུཏྟཱ, སཱ ཨཡཾ ཝིསེསནིརོདྷཏཱ ནིརོདྷསྶ ཝེམཏྟཏཱ ནཱམ.

རཱུཔནྟི ཙཱཏུམཧཱབྷཱུཏིཀཱདིཝིསེསམནཔེཀྑིཏྭཱ ཡཱ སཱམཉྙརཱུཔཏཱ ཝུཏྟཱ, སཱ ཨཡཾ སཱམཉྙརཱུཔཏཱ རཱུཔསྶ ཨེཀཏྟཏཱ ནཱམ. ‘‘ཏཏྠ ཀཏམཾ རཱུཔ’’ནྟི པུཙྪིཏྭཱ ‘‘ཙཱཏུམཧཱབྷཱུཏིཀཾ…པེ… ཝཱཡོདྷཱཏུཡཱ ཙིཏྟཾ ཝིརཱཛེཏཱི’’ཏི ཙཱཏུམཧཱབྷཱུཏིཀཱདིཝིསེསམཔེཀྑིཏྭཱ ཡཱ ཝིསེསརཱུཔཏཱ ཝུཏྟཱ, སཱ ཨཡཾ ཝིསེསརཱུཔཏཱ རཱུཔསྶ ཝེམཏྟཏཱ ནཱམ.

༤༨. ཨཝིཛྫཱཏི དུཀྑེཨཉྙཱཎཱདིཝིསེསམནཔེཀྑིཏྭཱ ཡཱ ཨཝིཛྫཱསཱམཉྙཏཱ ཝུཏྟཱ, སཱ ཨཡཾ ཨཝིཛྫཱསཱམཉྙཏཱ ཨཝིཛྫཱཡ ཨེཀཏྟཏཱ ནཱམ. ‘‘ཏཏྠ ཀཏམཱ ཨཝིཛྫཱ’’ཏི པུཙྪིཏྭཱ ‘‘དུཀྑེ ཨཉྙཱཎཾ, དུཀྑསམུདཡེ ཨཉྙཱཎཾ…པེ… ཨཝིཛྫཱལངྒྷཱི མོཧོ ཨཀུསལམཱུལ’’ནྟི དུཀྑེཨཉྙཱཎཱདིཝིསེསམཔེཀྑིཏྭཱ ཡཱ ཨཝིཛྫཱཝིསེསཏཱ ཝུཏྟཱ, སཱ ཨཡཾ ཨཝིཛྫཱཝིསེསཏཱ ཨཝིཛྫཱཡ ཝེམཏྟཏཱ ནཱམ.

ཝིཛྫཱཏི དུཀྑེཉཱཎཱདིཝིསེསམནཔེཀྑིཏྭཱ ཡཱ ཝིཛྫཱསཱམཉྙཏཱ ཝུཏྟཱ, སཱ ཨཡཾ ཝིཛྫཱསཱམཉྙཏཱ ཝིཛྫཱཡ ཨེཀཏྟཏཱ ནཱམ. ‘‘ཏཏྠ ཀཏམཱ ཝིཛྫཱ’’ཏི པུཙྪིཏྭཱ ‘‘དུཀྑེ ཉཱཎཾ, དུཀྑསམུདཡེ ཉཱཎཾ…པེ… དྷམྨཝིཙཡསམྦོཛ྄ཛྷངྒོ མགྒངྒཾ མགྒཔརིཡཱཔནྣ’’ནྟི དུཀྑེཉཱཎཱདིཝིསེསམཔེཀྑིཏྭཱ ཡཱ ¶ ཝིཛྫཱཝིསེསཏཱ ཝུཏྟཱ, སཱ ཨཡཾ ཝིཛྫཱཝིསེསཏཱ ཝིཛྫཱཡ ཝེམཏྟཏཱ ནཱམ.

སམཱཔཏྟཱིཏི སཉྙཱསམཱཔཏྱཱདིཝིསེསཾ ཨནཔེཀྑིཏྭཱ ཡཱ སཱམཉྙསམཱཔཏྟིཏཱ ཝུཏྟཱ, སཱ སཱམཉྙསམཱཔཏྟིཏཱ སམཱཔཏྟིཡཱ ཨེཀཏྟཏཱ ནཱམ. ‘‘ཏཏྠ ཀཏམཱ སམཱཔཏྟཱི’’ཏི པུཙྪིཏྭཱ ‘‘སཉྙཱསམཱཔཏྟི ཨསཉྙཱསམཱཔཏྟི…པེ… ནིརོདྷསམཱཔཏྟཱི’’ཏི སཉྙཱསམཱཔཏྱཱདིཝིསེསཾ ཨཔེཀྑིཏྭཱ ཡཱ ཝིསེསསམཱཔཏྟིཏཱ ཝུཏྟཱ, སཱ ཨཡཾ ཝིསེསསམཱཔཏྟིཏཱ སམཱཔཏྟིཡཱ ཝེམཏྟཏཱ ནཱམ.

ཛྷཱཡཱིཏི ¶ སེཀྑཛྷཱཡཱིཨཱདིཝིསེསཾ ཨནཔེཀྑིཏྭཱ ཡཱ ཛྷཱཡཱིསཱམཉྙཏཱ ཝུཏྟཱ, སཱ ཛྷཱཡཱིསཱམཉྙཏཱ ཛྷཱཡིནོ ཨེཀཏྟཏཱ ནཱམ. ‘‘ཏཏྠ ཀཏམོ ཛྷཱཡཱི’’ཏི པུཙྪིཏྭཱ ‘‘ཨཏྠི སེཀྑོ ཛྷཱཡཱི, ཨཏྠི ཨསེཀྑོ ཛྷཱཡཱི…པེ… པཉྙུཏྟརོ ཛྷཱཡཱི’’ཏི སེཀྑཛྷཱཡཱིཨསེཀྑཛྷཱཡཱིཨཱདིཝིསེསམཔེཀྑིཏྭཱ ཡཱ ཛྷཱཡཱིཝིསེསཏཱ ཝུཏྟཱ, སཱ ཨཡཾ ཛྷཱཡཱིཝིསེསཏཱ ཛྷཱཡིནོ ཝེམཏྟཏཱ ནཱམ.

སམཱདྷཱིཏི སརཎསམཱདྷྱཱདིཝིསེསམནཔེཀྑིཏྭཱ ཡཱ སམཱདྷིསཱམཉྙཏཱ ཝུཏྟཱ, སཱ ཨཡཾ སམཱདྷིསཱམཉྙཏཱ སམཱདྷིནོ ཨེཀཏྟཏཱ ནཱམ. ‘‘ཏཏྠ ཀཏམོ སམཱདྷཱི’’ཏི པུཙྪིཏྭཱ ‘‘སརཎོ སམཱདྷི, ཨརཎོ སམཱདྷི…པེ… མིཙྪཱསམཱདྷི, སམྨཱསམཱདྷཱི’’ཏི སརཎསམཱདྷྱཱདིཝིསེསམཔེཀྑིཏྭཱ ཡཱ སམཱདྷིཝིསེསཏཱ ཝུཏྟཱ, སཱ ཨཡཾ སམཱདྷིཝིསེསཏཱ སམཱདྷིནོ ཝེམཏྟཏཱ ནཱམ.

པཊིཔདཱཏི ཨཱགཱལ༹ྷཔཊིཔདཱདིཝིསེསམནཔེཀྑིཏྭཱ ཡཱ པཊིཔདཱསཱམཉྙཏཱ ཝུཏྟཱ, ཨཡཾ པཊིཔདཱསཱམཉྙཏཱ པཊིཔདཱཡ ཨེཀཏྟཏཱ ནཱམ. ‘‘ཏཏྠ ཀཏམཱ པཊིཔདཱ’’ཏི པུཙྪིཏྭཱ ‘‘ཨཱགཱལ༹ྷཔཊིཔདཱ, ནིཛ྄ཛྷཱམཔཊིཔདཱ…པེ… སུཁཱ པཊིཔདཱ ཁིཔྤཱབྷིཉྙཱ’’ཏི ཨཱགཱལ༹ྷཔཊིཔདཱདིཝིསེསམཔེཀྑིཏྭཱ ཡཱ པཊིཔདཱཝིསེསཏཱ ཝུཏྟཱ, སཱ ཨཡཾ པཊིཔདཱཝིསེསཏཱ པཊིཔདཱཡ ཝེམཏྟཏཱ ནཱམ.

ཀཱཡོཏི ནཱམཀཱཡཱདིཝིསེསམནཔེཀྑིཏྭཱ ཡཱ ཀཱཡསཱམཉྙཏཱ ཝུཏྟཱ, སཱ ཨཡཾ ཀཱཡསཱམཉྙཏཱ ཀཱཡསྶ ཨེཀཏྟཏཱ ནཱམ. ‘‘ཏཏྠ ཀཏམོ ཀཱཡོ’’ཏི པུཙྪིཏྭཱ ‘‘ནཱམཀཱཡོ རཱུཔཀཱཡོ…པེ… ཨཡཾ ནཱམཀཱཡོ’’ཏི ནཱམཀཱཡཱདིཝིསེསམཔེཀྑིཏྭཱ ཡཱ ཀཱཡཝིསེསཏཱ ¶ ཝུཏྟཱ, སཱ ཨཡཾ ཀཱཡཝིསེསཏཱ ཀཱཡསྶ ཝེམཏྟཏཱ ནཱམཱཏི ཡོཛནཱ ཀཱཏབྦཱ. པདཏྠཱདིཀོ ཝིསེསོ ཨཊྛཀཐཱཡཾ (ནེཏྟི. ཨཊྛ. ༤༧) ཝིཏྠཱརཏོ ཝུཏྟོ.

ཝུཏྟཔྤཀཱརསྶ དུཀྑསམུདཡཱདིཀསྶ དྷམྨསྶ ཨེཀཏྟཏཱདིལཀྑཎཾ ནིགམནཝསེན དསྶེཏུཾ ‘‘ཨེཝཾ ཡོ དྷམྨོ’’ཏིཨཱདི ཝུཏྟཾ. ཏཏྠ ཨེཝནྟི ཨིམིནཱ མཡཱ ཝུཏྟེན ‘‘དུཀྑནྟི ཨེཀཏྟཏཱ. ཏཏྠ ཀཏམཾ དུཀྑཾ? ཛཱཏི དུཀྑཱ, ཛརཱ དུཀྑཱ’’ཏིཨཱདིཝཙནེན. ཡོ དྷམྨོཏི ཡོ ཀོཙི ཛཱཏིཛརཱབྱཱདྷྱཱདིཝིསེསདྷམྨོ. ཡསྶ དྷམྨསྶཱཏི ཏཏོ ཛཱཏིཨཱདིཝིསེསདྷམྨཏོ ཨཉྙསྶ ཛརཱདིཝིསེསདྷམྨསྶ. སམཱནབྷཱཝོཏི ཛཱཏིཨཱདིཝིསེསདྷམྨེན ཛརཱདིཝིསེསདྷམྨསྶ དུཀྑབྷཱཝེན སམཱནབྷཱཝོ. ཏསྶ དྷམྨསྶཱཏི ཛརཱདིཝིསེསདྷམྨསྶ. ཨེཀཏྟཏཱཡཱཏི དུཀྑསམུདཡཏཱདིསམཱནཏཱཡ ¶ དུཀྑསམུདཡཱདིབྷཱཝཱནཾ ཨེཀཱིབྷཱཝེན. ཨེཀཱིབྷཝཏཱིཏི ཛཱཏིཨཱདིཝིསེསབྷེདེན ཨནེཀོཔི ‘‘དུཀྑསམུདཡོ’’ཏིཨཱདིནཱ ཨེཀསདྡཱབྷིདྷེཡྻཏཱཡ ཨེཀཱིབྷཝཏི. ཡེན ཡེན ཝཱ པན ཝིལཀྑཎོ, ཏེན ཏེན ཝེམཏྟཾ གཙྪཏི. ཡསྶ ཛཱཏིཨཱདིདྷམྨསྶ ཡེན ཡེན ཨབྷིནིབྦཏྟནཔརིཔཱཙནཱདིསབྷཱཝེན ཡོ ཛཱཏིཨཱདིདྷམྨོ ཛརཱདིདྷམྨེན ཝིལཀྑཎོ ཝིསདིསོ ཧོཏི, ཏསྶ ཛཱཏིཨཱདིདྷམྨསྶ ཏེན ཏེན ཨབྷིནིབྦཏྟནཔརིཔཱཙནཱདིསབྷཱཝེན སོ ཛཱཏིཨཱདིདྷམྨོ ཛརཱདིདྷམྨེན ཝེམཏྟཏཾ ཝིསདིསཏྟཾ གཙྪཏི, དུཀྑསམུདཡཱདིབྷཱཝེན སམཱནོཔི ཛཱཏིཨཱདིདྷམྨོ ཛརཱདིདྷམྨསྶ ཝིསིཊྛཏཾ གཙྪཏཱིཏི ཨཏྠོ དཊྛབྦོ.

དུཀྑསམུདཡཱདིདྷམྨསྶ ཨེཀཏྟཝེམཏྟཏཱ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, ‘‘ཏཱཡ ཨེཀཏྟཝེམཏྟཏཱཡ ཀཏྠ པུཙྪིཏེ སཏི ཨདྷིཊྛཱནཾ ཝཱིམཾསིཏབྦ’’ནྟི པུཙྪིཏབྦཏྟཱ སུཏྟཱདིཀེ པུཙྪིཏེ སཏི ཝཱིམཾསིཏབྦནྟི དསྶེཏུཾ ‘‘ཨེཝཾ སུཏྟེ ཝཱ’’ཏིཨཱདི ཝུཏྟཾ. ཏཏྠ ཨེཝཾ ཨིམིནཱ ཝུཏྟཔྤཀཱརེན སུཏྟེ ཝཱ པུཙྪིཏེ, ཝེཡྻཱཀརཎེ ཝཱ པུཙྪིཏེ, གཱཐཱཡཾ ཝཱ པུཙྪིཏཱཡཾ སཏི ཨདྷིཊྛཱནཾ ཝཱིམཾསིཏབྦཾ. ‘‘ཀིཾ ཝཱིམཾསིཏབྦ’’ནྟི པུཙྪེཡྻ ‘‘ཨེཀཏྟཏཱཡ པུཙྪཏི ཀིཾ, ཨུདཱཧུ ཝེམཏྟཏཱཡ པུཙྪཏི ཀི’’ནྟི ཝཱིམཾསིཏབྦནྟི ཡོཛནཱ. ཨཊྛཀཐཱཡཾ པན – ‘‘ཨིདཱནི ཏཱཝ ཨེཀཏྟཝེམཏྟཏཱཝིསཡེ ནིཡོཛེཏྭཱ དསྶེཏུཾ ‘སུཏྟེ ཝཱ ཝེཡྻཱཀརཎེ ཝཱ’ཏིཨཱདི ཝུཏྟ’’ནྟི (ནེཏྟི. ཨཊྛ. ༤༨) ཝུཏྟཾ. ‘‘ཀཐཾ པུཙྪིཏཾ, ཀཐཾ ཝིསྶཛྫིཏབྦ’’ནྟི ཝཏྟབྦཏྟཱ ‘‘ཡདི ཨེཀཏྟཏཱཡཱ’’ཏིཨཱདི ¶ ཝུཏྟཾ. ‘‘ཏེནཱཧཱ’’ཏིཨཱདྱཱནུསནྡྷྱཱདིཀོ ཙ ‘‘ནིཡུཏྟོ ཨདྷིཊྛཱནོ ཧཱརོ’’ཏི ཨིམསྶ ཨནུསནྡྷྱཱདིཀོ ཙ ཝུཏྟནཡཱནུསཱརེན ཝེདིཏབྦོ.

ཨིཏི ཨདྷིཊྛཱནཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

༡༥. པརིཀྑཱརཧཱརཝིབྷངྒཝིབྷཱཝནཱ

༤༩. ཡེན ¶ ཡེན སཾཝཎྞནཱཝིསེསབྷཱུཏེན ཝིབྷངྒེན དུཀྑསཙྩཱདཱིནཾ ཨེཀཏྟཏཱདཡོ ཝིབྷཏྟཱ, སོ སཾཝཎྞནཱཝིསེསབྷཱུཏོ པརིཔུཎྞོ, ‘‘ཀཏམོ པརིཀྑཱརཧཱརཝིབྷངྒོ ནཱམཱ’’ཏི པུཙྪིཏབྦཏྟཱ ‘‘ཏཏྠ ཀཏམོ པརིཀྑཱརོ ཧཱརོ’’ཏིཨཱདི ཝུཏྟཾ. ཏཏྠ ཏཏྠཱཏི ཏེསུ ནིདྡིཊྛེསུ སོལ༹སསུ དེསནཱཧཱརཱདཱིསུ ཀཏམོ སཾཝཎྞནཱཝིསེསོ པརིཀྑཱརོ ཧཱརོ པརིཀྑཱརཧཱརཝིབྷངྒོ ནཱམཱཏི པུཙྪཏི. ‘‘ཡེ དྷམྨཱ ཡཾ དྷམྨཾ ཛནཡནྟཱི’’ཏིཨཱདིནིདྡེསསྶ ཨིདཱནི མཡཱ ཝུཙྩམཱནོ ‘‘ཡོ དྷམྨོ ཡཾ དྷམྨཾ ཛནཡཏི, ཏསྶ སོ པརིཀྑཱརོ’’ཏིཨཱདིཀོ པརིཀྑཱརབྷཱུཏསྶ ཧེཏུནོ ཙེཝ པཙྩཡསྶ ཙ ཝིཏྠཱརསཾཝཎྞནཱཝིསེསོ པརིཀྑཱརཝིབྷངྒོ ནཱམ.

‘‘ཀཏམོ སཾཝཎྞེཏབྦོ པརིཀྑཱརོ’’ཏི པུཙྪིཏབྦཏྟཱ ‘‘ཡོ དྷམྨོ’’ཏིཨཱདི ཝུཏྟཾ. ཏཏྠ ཡོ ཧེཏུཔཙྩཡཔྤཀཱརོ དྷམྨོ ཡཾ ཕལབྷཱུཏཾ དྷམྨཾ ཛནཡཏི ཛནེཏི, ཏསྶ ཕལདྷམྨསྶ སོ ཧེཏུཔཙྩཡཔྤཀཱརོ དྷམྨོ པརིཀྑཱརོ ནཱམ. ‘‘ཀིཾལཀྑཎོ པརིཀྑཱརོ’’ཏི པུཙྪིཏབྦཏྟཱ ཏཐཱ པུཙྪིཏྭཱ ལཀྑཎཝིསེསཾ དསྶེཏུཾ ‘‘ཀིཾལཀྑཎོ’’ཏིཨཱདི ཝུཏྟཾ. ཨཊྛཀཐཱཡཾ པན – ‘‘ཏཏྠ ‘ཡོ དྷམྨོ ཡཾ དྷམྨཾ ཛནཡཏི, ཏསྶ སོ པརིཀྑཱརོ’ཏི སངྑེཔཏོ པརིཀྑཱརལཀྑཎཾ ཝཏྭཱ ཏཾ ཝིབྷཱགེན དསྶེཏུཾ ‘ཀིཾལཀྑཎོ’ཏིཨཱདི ཝུཏྟ’’ནྟི (ནེཏྟི. ཨཊྛ. ༤༩) ཝུཏྟཾ. ‘‘ཀིཏྟཀཱ དྷམྨཱ ཛནཡནྟཱི’’ཏི པུཙྪིཏབྦཏྟཱ ‘‘དྭེ དྷམྨཱ ཛནཡནྟི ཧེཏུ ཙ པཙྩཡོ ཙཱ’’ཏི ཝུཏྟཾ. ‘‘ཧེཏུཔི ཀཱརཎཾ, པཙྩཡོཔི ཀཱརཎཾ ¶ , ཏསྨཱ ཀཱརཎཱཡེཝ ཀེན ལཀྑཎེན དྭིདྷཱ ཝུཏྟཱ’’ཏི ཝཏྟབྦཏྟཱ ‘‘ཏཏྠ ཀིཾལཀྑཎོ’’ཏིཨཱདི ཝུཏྟཾ. ཛནིཏབྦཕལཏོ ཨཉྙེཧི ཕལེཧི ཨསཱདྷཱརཎལཀྑཎོ ཧེཏུ, སབྦཕལེཧི སཱདྷཱརཎལཀྑཎོ པཙྩཡོ, ཨིམིནཱ ཝིསེསལཀྑཎེན དྭིདྷཱ ཝཏྟབྦཱཏི ཨཏྠོ. ‘‘སཱདྷཱརཎཱསཱདྷཱརཎཝིསེསོ ཀཱིདིསོ བྷཝེ’’ཏི པུཙྪིཏབྦཏྟཱ ‘‘ཡཐཱ ཀིཾ བྷཝེ’’ཏི པུཙྪིཏྭཱ ‘‘ཡཐཱ ཨངྐུརསྶཱ’’ཏིཨཱདི ཝུཏྟཾ. ཡཐཱ ཡོ སཱདྷཱརཎཱསཱདྷཱརཎཝིསེསོ ཨཏྠི, ཏཐཱ སོ སཱདྷཱརཎཱསཱདྷཱརཎཝིསེསོ ཀིཾ ཝིཡ བྷཝེཏི ཨཏྠོ. ཨངྐུརསྶ ནིབྦཏྟིཡཱ བཱིཛཾ ཨསཱདྷཱརཎཾ ཡཐཱ, ཏཐཱ ཧེཏུ ཕལསྶ ནིབྦཏྟིཡཱ ཨསཱདྷཱརཎོ བྷཝེ. པཐཝཱི ཙ ཨཱཔོ ཙ ཨངྐུརསྶ ནིབྦཏྟིཡཱ སཱདྷཱརཎཱ བྷཝནྟི ཡཐཱ, ཏཐཱ པཙྩཡོ ཕལསྶ ནིབྦཏྟིཡཱ སཱདྷཱརཎོ བྷཝེ. སབྦཕལསྶ པཙྩཡཏྟཱ ཨངྐུརསྶ བཱིཛཾ ཨསཱདྷཱརཎཾ ཛནཀཾ ཧེཏུ. ‘‘ཀཐཾ པཐཝཱི, ཨཱཔོ ཙ སཱདྷཱརཎཱ ཛནཀཱཏི སདྡཧིཏབྦཱ’’ཏི པུཙྪིཏབྦཏྟཱ ‘‘ཨངྐུརསྶ ཧཱི’’ཏིཨཱདི ཝུཏྟཾ. སམཾ སམཱནཾ ཕལཾ བྷཝཱཔེཏཱིཏི སབྷཱཝོ, ཀོ སོ? བཱིཛཾ ཧེཏུཡེཝ. ‘‘ཀིཾ ཧེཏུཔཙྩཡཱནཾ ཝིསེསོ བཱིཛངྐུརོཔམཱཡེཝ དསྶེཏབྦོ, ཨུདཱཧུ ཨཉྙཱུཔམཱཡཔི དསྶེཏབྦོ’’ཏི ཝཏྟབྦཏྟཱ ཨཉྙཱཡ ཨུཔམཱཡཔི ¶ ཝིསེསཾ དསྶེཏུཾ ‘‘ཡཐཱ ཝཱ པནཱ’’ཏིཨཱདི ཝུཏྟཾ. ཨིམཱཡ ཨུཔམཱཡཔི ཧེཏུཔཙྩཡཱནཾ ཝིསེསོ ཝིཛཱནིཏབྦོཏི ཨདྷིཔྤཱཡོ.

བཱིཛངྐུརཱདཱིསུ བཱཧིརེསུ པརིཀྑཱརབྷཱུཏཱནཾ ཧེཏུཔཙྩཡཱནཾ ཝིསེསོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཀཐཾ ཨཛ྄ཛྷཏྟིཀེསུ ཝིབྷཏྟོ’’ཏི པུཙྪིཏབྦཏྟཱ ‘‘ཨཡཉྷི སཾསཱརོ’’ཏིཨཱདི ཝུཏྟཾ. ཨཐ ཝཱ ‘‘བཱཧིརེསུ པརིཀྑཱརབྷཱུཏོ ཧེཏུཔཙྩཡོ ཡུཏྟོ ཧོཏུ, ཀཐཾ ཨཛ྄ཛྷཏྟིཀེསུ ཡུཏྟོ’’ཏི ཝཏྟབྦཏྟཱ ‘‘ཨཡཉྷི སཾསཱརོ’’ཏིཨཱདི ཝུཏྟཾ. ཨཊྛཀཐཱཡཾ པན – ‘‘ཨེཝཾ བཱཧིརཾ ཧེཏུཔཙྩཡཝིབྷཱགཾ དསྶེཏྭཱ ཨིདཱནི ཨཛ྄ཛྷཏྟིཀཾ དསྶེཏུཾ ‘ཨཡཉྷི སཾསཱརོ’ཏིཨཱདི ཝུཏྟ’’ནྟི (ནེཏྟི. ཨཊྛ. ༤༩) ཝུཏྟཾ. ཧེཏུཔཙྩཡེཧི སཧ སཾསཱརོ བྷཝཏཱིཏི སཧེཏུཔཙྩཡོ. ཨཡཾ སཾསཱརོ ཧི ཡསྨཱ སཧེཏུཔཙྩཡོ ཧུཏྭཱ ནིབྦཏྟོ, ཏསྨཱ ཨཛ྄ཛྷཏྟིཀེཔི པརིཀྑཱརབྷཱུཏོ ཧེཏུཔཙྩཡོ ཡུཏྟོཡེཝཱཏི དཊྛབྦོཏི ཨདྷིཔྤཱཡོ.

སོ ¶ ཨིམསྶ སཾསཱརསྶ སཧེཏུཔཙྩཡཏྟཾ ཡདི བྷགཝཏཱ ཝུཏྟཾ, ཨེཝཾ སཏི ཨམྷེཧི སདྡཧིཏབྦཾ, ‘‘ཀཐཾ སདྡཧིཏབྦ’’ནྟི ཝཏྟབྦཏྟཱ ‘‘ཨེཝཉྷཱི’’ཏིཨཱདི ཝུཏྟཾ. ཨེཝནྟི ཨིམིནཱ ཨཝིཛྫཱདིནཱ ཧེཏུཔཙྩཡེན སབྦོ པཊིཙྩསམུཔྤཱདོ སཾསཱརོཏི ནིབྦཏྟོཏི བྷགཝཏཱ སཾསཱརསྶ སཧེཏུཔཙྩཡཏྟཾ ཝུཏྟཾ, ཏསྨཱ སདྡཧིཏབྦཾ. ཨཝིཛྫཱདཡོ སངྑཱརཱདཱིནཾ པཙྩཡོ ཧོཏུ, ‘‘ཀཏམོ ཨཝིཛྫཱཡ ཧེཏཱུ’’ཏི པུཙྪིཏབྦཏྟཱ ‘‘ཨིཏི ཨཝིཛྫཱ ཨཝིཛྫཱཡ ཧེཏཱུ’’ཏི ཝུཏྟཾ. ‘‘ཀཏམོ ཨཝིཛྫཱཡ པཙྩཡོ’’ཏི པུཙྪིཏབྦཏྟཱ ‘‘ཨཡོནིསོ མནསིཀཱརོ པཙྩཡོ’’ཏི ཝུཏྟཾ. ‘‘ཀཏམཱ ཨཝིཛྫཱ ཀཏམཱཡ ཨཝིཛྫཱཡ ཧེཏཱུ’’ཏི པུཙྪིཏབྦཏྟཱ ‘‘པུརིམིཀཱ ཨཝིཛྫཱ པཙྪིམིཀཱཡ ཨཝིཛྫཱཡ ཧེཏཱུ’’ཏི ཝུཏྟཾ. ‘‘ཀཏམཱ པུརིམིཀཱ ཨཝིཛྫཱ ཀཏམཱ པཙྪིམིཀཱ ཨཝིཛྫཱ’’ཏི པུཙྪིཏབྦཏྟཱ ‘‘ཏཏྠཱ’’ཏིཨཱདི ཝུཏྟཾ. ‘‘ཨཝིཛྫཱཔརིཡུཊྛཱནསྶ ཧེཏུབྷཱུཏོ པུརིམོ ཨཝིཛྫཱནུསཡོ སམནནྟརོཝ ཀིཾ, ཨུདཱཧུ པརམྤརཧེཏུཔི ཧོཏཱི’’ཏི པུཙྪིཏབྦཏྟཱ ‘‘བཱིཛངྐུརོ ཝིཡཱ’’ཏིཨཱདི ཝུཏྟཾ. བཱིཛངྐུརོཏི བཱིཛཱནཾ ཨངྐུརོཏི བཱིཛངྐུརོ, བཱིཛཱནཾ སམནནྟརཧེཏུཏཱཡ ཨངྐུརོ ནིབྦཏྟཏི ཝིཡ. ཡཏྠ རུཀྑཱདིཀེ ཡཾ ཕལཾ ནིབྦཏྟཏི, ཏསྨིཾ རུཀྑཱདིཀེ ནིབྦཏྟསྶ ཨསྶ ཕལསྶ ཨིདཾ བཱིཛཾ པན པརམྤརཧེཏུཏཱཡ ཧེཏུབྷཱུཏཾ བྷཝཏི.

‘‘བཱིཛཾ པན ཨེཀཾཡེཝ ཧོཏི, ཀཐཾ དྭིདྷཱ ཝཏྟབྦ’’ནྟི ཝཏྟབྦཏྟཱ ‘‘དུཝིདྷོ ཧཱི’’ཏིཨཱདི ཝུཏྟཾ, སམནནྟརཀཱལཔརམྤརཀཱལབྷེདེན ཧེཏུཔི དུཝིདྷོ ཧོཏིཡེཝཱཏི ཨཏྠོ. བཱིཛབྷཱུཏོ ཧེཏུ དུཝིདྷོ ཡཐཱ, ཨེཝཾ ཨཝིཛྫཱཡ ཧེཏུབྷཱུཏོ ཨཝིཛྫཱནུསཡོཔི སམནནྟརཧེཏུ ཙ པརམྤརཧེཏུ ཙཱཏི ཀཱལབྷེདེན དུཝིདྷོ བྷཝཏི, སམནནྟརོ ཨཝིཛྫཱནུསཡོ སམནནྟརསྶ ཨཝིཛྫཱཔརིཡུཊྛཱནསྶ སམནནྟརཧེཏུ ¶ ཧོཏི. པུརིམཏརོ ཨཝིཛྫཱནུསཡོ པཙྪིམཏརསྶ ཨཝིཛྫཱཔརིཡུཊྛཱནསྶ པརམྤརཧེཏུ ཧོཏི. ཨིཏི བཱིཛབྷཱུཏོ ཨསཱདྷཱརཎོ ཧེཏུ, པཐཝཱིཨཱཔཱདིཀོ སཱདྷཱརཎོ པཙྩཡོཏི ཝིསེསོ པཱཀཊོ ཡཐཱ, ཨེཝཾ ཨཝིཛྫཱནུསཡོ ཨསཱདྷཱརཎོ ཧེཏུ, ཨཡོནིསོམནསིཀཱརོ སཱདྷཱརཎོ པཙྩཡོཏི ཝིསེསོ དཊྛབྦོ.

‘‘ཨེཏྟཀེནེཝ ཧེཏུཔཙྩཡཱནཾ ཝིསེསོ ཝཏྟབྦོ’’ཏི ཝཏྟབྦཏྟཱ ‘‘ཡཐཱ ཝཱ པན ཐཱལཀཉྩཱ’’ཏིཨཱདི ཝུཏྟཾ. ཨཊྛཀཐཱཡཾ པན – ‘‘ཡཐཱ ཝཱ པནཱཏིཨཱདིནཱཔི ¶ ཧེཏུཔཙྩཡཝིབྷཱགམེཝ དསྶེཏཱི’’ཏི ཝུཏྟཾ. ཏཏྠ པདཱིཔསྶ པཙྩཡབྷཱུཏཾ ཐཱལཀཉྩ ཝཊྚི ཙ ཏེལཉྩ པདཱིཔསྶ སབྷཱཝཧེཏུ སམཱནཧེཏུ ན ཧོཏཱིཏི ཡོཛནཱ. ‘‘པདཱིཔསྶ པཙྩཡབྷཱུཏམྤི ཐཱལཀཱདིཀཾ སབྷཱཝཧེཏུ ན ཧོཏཱིཏི ཀསྨཱ སདྡཧིཏབྦ’’ནྟི ཝཏྟབྦཏྟཱ ‘‘ན ཧི སཀྐཱ’’ཏིཨཱདི ཝུཏྟཾ. པདཱིཔསྶ པཙྩཡབྷཱུཏཾ ཨནགྒིཀཾ ཨགྒིརཧིཏཾ ཐཱལཀཉྩ ཝཊྚིཉྩ ཏེལཉྩ དཱིཔེཏུཾ ཛཱལེཏུཾ ཧི ཡསྨཱ ན སཀྐཱ, ཏསྨཱ པུརིམོ པདཱིཔོ པཙྪིམསྶ པདཱིཔསྶ སབྷཱཝཧེཏུ ཧོཏི ཝིཡ, ཨེཝཾ ཐཱལཀཱདིཀཾ སབྷཱཝཧེཏུ ན ཧོཏི. ཨིཏི ཨེཝཾཔཀཱརོ སབྷཱཝོ སམཱནོ པདཱིཔོ ཧེཏུ ཧོཏི ཡཐཱ, པརབྷཱཝོ ཨསམཱནོ ཐཱལཀཱདིཀོ པཙྩཡོ ཧོཏི ཡཐཱ ཙ, ཏཐཱ ཨཛ྄ཛྷཏྟིཀོ སབྷཱཝོ ཧེཏུ ཧོཏི, བཱཧིརོ ཨསམཱནོ པཙྩཡོ ཧོཏི. ཛནཀོ ཨཝིཛྫཱནུསཡོ ཨཝིཛྫཱཔརིཡུཊྛཱནསྶ ཧེཏུ ཧོཏི, པརིགྒཱཧཀོ ཨུཔཏྠམྦྷཀོ པཙྩཡོ ཧོཏི. ཨཉྙེཧི ཕལེཧི ཨསཱདྷཱརཎོ ཧེཏུ ཧོཏི, སབྦེཧི ཕལེཧི སཱདྷཱརཎོ པཙྩཡོ ཧོཏཱིཏི ཡོཛེཏྭཱ པདཱིཔོཔམཱཡཔི ཧེཏུཔཙྩཡཱནཾ པཱཀཊོ ཝིསེསོ དཊྛབྦོཏི ཨདྷིཔྤཱཡོ.

ཧེཏུཔཙྩཡཔྤབྷེདཾ ཀཱརཎཾ པརིཀྑཱརོཏི ཨཱཙརིཡེན ཝུཏྟཾ, ཏསྶ ཀཱརཎསྶ ཀཱརཎབྷཱཝོ ཙ ཕལཱཔེཀྑོ ཧོཏི, ཏསྨཱ ‘‘ཡོ ཀཱརཎབྷཱཝོ ཡེནཱཀཱརེན ཧོཏི, ཀཏམོ སོ ཀཱརཎབྷཱཝོ, ཀཏམོ སོ ཨཱཀཱརོ’’ཏི པུཙྪིཏབྦཏྟཱ ཙ ‘‘ཡཾ ཕལཾ ཡེན ཝིསེསེན ཧོཏི, ཀཏམཾ ཏཾ ཕལཾ, ཀཏམོ སོ ཝིསེསོ’’ཏི པུཙྪིཏབྦཏྟཱ ཙ ‘‘ཀཱརཎཕལཱནཾ ཡོ སམྦནྡྷོ ཧོཏི, ཀཏམོ སོ སམྦནྡྷོ’’ཏི པུཙྪིཏབྦཏྟཱ ཙ ཏཾ སབྦཾ ཝིབྷཱཝེཏུཾ ‘‘ཨཝུཔཙྪེདཏྠོ’’ཏིཨཱདི ཝུཏྟཾ. ཨཡམནུསནྡྷྱཏྠོ ཙ ཨཊྛཀཐཱཡཾ ‘‘ཨིདཱནི ཡསྨཱ ཀཱརཎཾ ‘པརིཀྑཱརོ’ཏི ཝུཏྟཾ, ཀཱརཎབྷཱཝོ ཙ ཕལཱཔེཀྑཱཡ, ཏསྨཱ ཀཱརཎསྶ ཡོ ཀཱརཎབྷཱཝོ ཡཐཱ ཙ སོ ཧོཏི, ཡཉྩ ཕལཾ, ཡོ ཙ ཏསྶ ཝིསེསོ, ཡོ ཙ ཀཱརཎཕལཱནཾ སམྦནྡྷོ, ཏཾ སབྦཾ ཝིབྷཱཝེཏུཾ ‘ཨཝུཔཙྪེདཏྠོ’ཏིཨཱདི ཝུཏྟ’’ནྟི (ནེཏྟི. ཨཊྛ. ༤༩) ཨིམིནཱ ཝུཏྟོཏི དཊྛབྦོ.

ཏཏྠ ཨཝུཔཙྪིནྣསྶ ཧེཏུཔཙྩཡསངྑཱཏསྶ ཀཱརཎསྶ ཡོ ཨནུཔཙྪེདཏྠོ ཨཏྠི, སོ ཨནུཔཙྪེདཏྠོ ¶ སནྟཏིཨཏྠོ ཧོཏི ཕལེན སམྦནྡྷཏྟཱ ¶ , ཡཉྩ ཀཱརཎཾ ཨཏྟནོ ཕལསྶ ཛནཀཾ ཨུཔཏྠམྦྷཀཾ ཧུཏྭཱ ནིརུཛ྄ཛྷཏི, སོ ཨནུཔཙྪིནྣོ ཨེཝ ནཱམ ཧོཏཱིཏི. ཡཉྩ ཕལཾ ཨཉྙསྶ ཀཱརཎཾ ཧུཏྭཱ ནིརུཛ྄ཛྷཏི, ཏསྨིཾ ཨནུཔཙྪིནྣེ ཏསྶ ཙ སནྟཏིཨཏྠོ ཧོཏི. ཡཾ པན ཕལཾ ཨཉྙསྶ ཕལསྶ ཀཱརཎཾ ཨཧུཏྭཱ ནིརུཛ྄ཛྷཏི, ཏཾ ཨུཔཙྪིནྣཾ ཧོཏི, ཡཐཱ ཏཾ ཨརཧཏོ ཙུཏིཙིཏྟནྟི. ཀཱརཎཏོ ནིབྦཏྟསྶ ཕལསྶ ཡོ ནིབྦཏྟིཨཏྠོ ཨཏྠི, སོ ནིབྦཏྟིཨཏྠོ ཕལཏྠོ ཧོཏི. པཊིསནྡྷིཀྑནྡྷཱནཾ ཡོ པཊིསནྡྷིཨཏྠོ པཊིསནྡཧནཏྠོ ཨཏྠི, སོ པཊིསནྡྷིཨཏྠོ པུནབྦྷཝཏྠོ པུནབྦྷཝནཏྠོ ཧོཏི. ཀིལེསཱནཾ ཡོ པལིབོདྷཏྠོ སནྟཱནེ ཨུཔྤཛྫནཏྠོ ཨཏྠི, སོ པལིབོདྷཏྠོ པརིཡུཊྛཱནཏྠོ ཧོཏི. ཀིལེསཱནཾ མགྒེན ཡོ ཨསམུགྒྷཱཏཏྠོ ཨཏྠི, སོ ཨསམུགྒྷཱཏཏྠོ ཨནུསཡཏྠོ ཧོཏི. ཨཝིཛྫཱཡ ཙཏུནྣཾ སཙྩཱནཾ ཡོ ཨསམྤཊིཝེདྷཏྠོ ཨཏྠི, སོ ཨསམྤཊིཝེདྷཏྠོ ཨཝིཛྫཏྠོ ཧོཏི. ཨརཧཏྟམགྒེན ཡོ ཨཔརིཉྙཱཏཏྠོ ཨཏྠི, སོ ཨཔརིཉྙཱཏཏྠོ ཝིཉྙཱཎསྶ པཊིསནྡྷིཝིཉྙཱཎསྶ བཱིཛཏྠོ ཧོཏི.

ཨེཏྟཱཝཏཱ ཀཱརཎབྷཱཝོ ཙ ཀཱརཎཱཀཱརོ ཙ ཕལཉྩ ཕལཝིསེསོ ཙ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཀཏམོ པརམྤརཧེཏུཔཙྩཡཏྠོ, ཀཏམོ ཙ སམྦནྡྷཏྠོ’’ཏི པུཙྪིཏབྦཏྟཱ ‘‘ཡཏྠ ཨཝུཔཙྪེདོ’’ཏིཨཱདི ཝུཏྟཾ. ཡཏྠ ཡསྶཾ རཱུཔཱརཱུཔཔཝཏྟིཡཾ ཨཝུཔཙྪིནྣསྶ ཧེཏུཔཙྩཡཔྤབྷེདསྶ ཀཱརཎསྶ ཡོ ཨཝུཔཙྪེདོ ཨཏྠི, སོ ཨཝུཔཙྪེདོ ཏཏྠ ཏིསྶཾ རཱུཔཱརཱུཔཔཝཏྟིཡཾ སནྟཏི ཧོཏི. ཡཏྠ ཡསྶཾ རཱུཔཱརཱུཔཔཝཏྟིཡཾ ཡཱ སནྟཏི ཨཏྠི, སཱ སནྟཏིཏཏྠ རཱུཔཱརཱུཔཔཝཏྟིཡཾ ནིབྦཏྟི ཧོཏཱིཏིཨཱདིནཱ ཡོཛེཏྭཱ པརམྤརཧེཏུཨཱདིཀོ ཝིཉྙཱཏབྦོ.

སཱིལཀྑནྡྷོཏི པརིསུདྡྷསཱིལཀྑནྡྷོ. སམཱདྷིཀྑནྡྷསྶཱཏི མཧགྒཏཀྑནྡྷསྶ, སམཱདྷིཔཊྛཱནོ ཧི མཧགྒཏདྷམྨོ. པཉྙཱཀྑནྡྷོཏི མགྒཕལཔཉྙཱཔདྷཱནཀྑནྡྷོ. སོ ཧི ཝིམུཏྟིཉཱཎདསྶནསངྑཱཏསྶ པཙྩཝེཀྑཎཉཱཎཀྑནྡྷསྶ པཙྩཡོ ཧོཏི. ཏིཏྠཉྙུཏཱདཱིནཾ ཨཏྠོ པདཊྛཱནཧཱརཝིབྷངྒཝཎྞནཱཡཾ ཝུཏྟོཝ.

སབྷཱཝོ ཧེཏཱུཏི ཨཱཙརིཡེན ཝུཏྟོ, ‘‘ཀཱིདིསོ སོ སབྷཱཝོ ཧེཏཱུ’’ཏི པུཙྪིཏབྦཏྟཱ ‘‘ཡཐཱ ཝཱ པན ཙཀྑུཉྩ པཊིཙྩཱ’’ཏིཨཱདི ཝུཏྟཾ ¶ . ཙཀྑུཝིཉྙཱཎཾ ཙཀྑུཉྩ ཙཀྑུནྡྲིཡཉྩ པཊིཙྩ ནིསྶཡཾ ཀཏྭཱ རཱུཔེ པཊིཙྩ ཨཱརམྨཎཾ ཀཏྭཱ ཨུཔྤཛྫཏི. ཏཏྠ ཙཀྑཱདཱིསུ ཙཀྑུནྡྲིཡཾ ཨཱདྷིཔཏེཡྻཔཙྩཡཏཱཡ ཨིནྡྲིཡཔཙྩཡཏཱཡ ཙཀྑུཝིཉྙཱཎསྶ པཙྩཡོ, རཱུཔཱརམྨཎཾ པུརེཛཱཏཱརམྨཎཔཙྩཡཏཱཡ ¶ པཙྩཡོ, ཨཱལོཀོ སནྣིསྶཡཏཱཡ ཨུཔནིསྶཡཏཱཡ པཙྩཡོ ཧོཏི. སོ པཙྩཡོ ཧོནྟོ ཕལེན ཙཀྑུཝིཉྙཱཎེན ཨསམཱནཏྟཱ སབྷཱཝོ ཧེཏུ ན ཧོཏི, པཙྩཡོ ཙ ཧོཏི མནསིཀཱརོ. ཀིརིཡམནོདྷཱཏུ པན ཕལེན ཙཀྑུཝིཉྙཱཎེན ཝིཉྙཱཎབྷཱཝེན སམཱནཏྟཱ སབྷཱཝོ ཧེཏུ ཧོཏི ཡཐཱ, ཨེཝཾ སངྑཱརཱ ནཱམཀྑནྡྷབྷཱཝེན སམཱནཏྟཱ ཝིཉྙཱཎསྶ པཙྩཡཱ ཧོནྟཱ སབྷཱཝོ ཧེཏུ ཧོནྟི. ཝིཉྙཱཎཾ ནཱམརཱུཔེན ཨེཀསནྟཏིཝསེན སམཱནཏྟཱ ནཱམརཱུཔསྶ པཙྩཡོ ཧོནྟཾ སབྷཱཝོ ཧེཏུ ཧོཏི. ཨིམིནཱ ནཡེན ‘‘ནཱམརཱུཔཾ སལཱ༹ཡཏནསྶཱ’’ཏིཨཱདཱིསུཔི ཨཏྠོ ཝེདིཏབྦོ. ཨེཝཾ ཝུཏྟཔྤཀཱརོ ཧེཏུ, པཙྩཡོ ཛནཀོ, ཨུཔཏྠམྦྷཀོ ཙ ཡོ ཀོཙི ཨུཔནིསྶཡོ བལཝཔཙྩཡོ ཧོཏི, སབྦོ སོ ཧེཏུཔཙྩཡོ ཛནཀཨུཔཏྠམྦྷཀོ ཛནིཏབྦུཔཏྠམྦྷིཡསྶ ཕལསྶ པརིཀྑརཎཏོ ཨབྷིསངྑརཎཏོ ནིཔྤརིཡཱཡཏོ པརིཀྑཱརོ ནཱམ.

‘‘ཝུཏྟཔྤཀཱརོ ཧེཏུཔཙྩཡོ པརིཀྑཱརོ ནཱམཱཏི ཀེན ཨམྷེཧི སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ. ཏེན ཀཱརཎབྷཱུཏེན སབྦསྶ ཧེཏུཔཙྩཡསྶ པརིཀྑཱརབྷཱཝེན ཨཱཡསྨཱ མཧཱཀཙྩཱནོ ‘‘ཡེ དྷམྨཱ ཡཾ དྷམྨཾ ཛནཡནྟཱི’’ཏི ཡཾ ཝཙནཾ ཨཱཧ, ཏེན ཝཙནེན སདྡཧིཏབྦོ, ‘‘ཡེ དྷམྨཱ ཡཾ དྷམྨཾ ཛནཡནྟཱི’’ཏི ཝཙནཾ ནིསྶཱཡ ཏུམྷེཧི སལླཀྑེཏབྦོཏི ཨདྷིཔྤཱཡོ.

‘‘ཨེཏྟཀོཝ པརིཀྑཱརོ ཧཱརོ ཡུཉྫིཏབྦོ’’ཏི ཝཏྟབྦཏྟཱ ‘‘ནིཡུཏྟོ པརིཀྑཱརོ ཧཱརོ’’ཏི ཝུཏྟཾ, ཡོ ཡོ པརིཀྑཱརོ ཧཱརོ ཡུཉྫིཏབྦོ, སོ སོ པརིཀྑཱརོ ཧཱརོ ནཱིཧརིཏྭཱ ཡུཏྟོ ཡུཉྫིཏབྦོཏི.

ཨིཏི པརིཀྑཱརཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

༡༦. སམཱརོཔནཧཱརཝིབྷངྒཝིབྷཱཝནཱ

༥༠. ཡེན ¶ ¶ ཡེན སཾཝཎྞནཱཝིསེསབྷཱུཏེན པརིཀྑཱརཧཱརཝིབྷངྒེན སུཏྟཏྠཱནཾ ཧེཏུཔཙྩཡོ ཝིབྷཏྟོ, སོ…པེ… ཝིབྷངྒོ པརིཔུཎྞོ, ‘‘ཀཏམོ སམཱརོཔནཧཱརཝིབྷངྒོ’’ཏི པུཙྪིཏབྦཏྟཱ ‘‘ཏཏྠ ཀཏམོ སམཱརོཔནོ ཧཱརོ’’ཏིཨཱདི ཝུཏྟཾ. ཏཏྠ ཏེསུ ནིདྡིཊྛེསུ སོལ༹སསུ དེསནཱཧཱརཱདཱིསུ ཀཏམོ སཾཝཎྞནཱཝིསེསོ སམཱརོཔནོ ཧཱརོ སམཱརོཔནཧཱརཝིབྷངྒོ ནཱམཱཏི པུཙྪཏི. ‘‘ཡེ དྷམྨཱ ཡཾམཱུལཱ’’ཏིཨཱདིནིདྡེསསྶ ཨིདཱནི མཡཱ ཝུཙྩམཱནོ ‘‘ཨེཀསྨིཾ པདཊྛཱནེ ཡཏྟཀཱནི པདཊྛཱནཱནི ཨོཏརནྟཱི’’ཏིཨཱདིཀོ ཝིཏྠཱརསཾཝཎྞནཱཝིསེསོ སམཱརོཔནཧཱརཝིབྷངྒོ ནཱམ.

‘‘ཀིཏྟཀེ པདཊྛཱནེ སུཏྟེ ཝུཏྟེ ཀིཏྟཀཱནི པདཊྛཱནཱནི སམཱརོཔཡིཏབྦཱནཱི’’ཏི པུཙྪིཏབྦཏྟཱ ‘‘ཨེཀསྨིཾ པདཊྛཱནེ’’ཏིཨཱདི ཝུཏྟཾ. ཨེཀསྨིཾ པདཊྛཱནེ སུཏྟེ ཝུཏྟེ སཏི ཨཝུཏྟཱནི ཡཏྟཀཱནི པདཊྛཱནཱནི ཨོཏརནྟི སམོསརནྟི, སབྦཱནི ཏཱནི ཨཝུཏྟཱནི པདཊྛཱནཱནི སུཏྟེ ཝུཏྟཱནི ཝིཡ ནིདྡྷཱརཎཝསེན ཨཱནེཏྭཱ དེསནཱཡ ཨཱརོཔཡིཏབྦཱནི. ‘‘ཀཱནི ཝིཡ སམཱརོཔཡིཏབྦཱནཱི’’ཏི ཝཏྟབྦཏྟཱ ‘‘ཡཐཱ ཨཱཝཊྚེ’’ཏིཨཱདི ཝུཏྟཾ. ཨཱཝཊྚེ ཧཱརེ ཨེཀསྨིཾ པདཊྛཱནེ སུཏྟེ ཝུཏྟེ སཏི སུཏྟེ ཨཝུཏྟཱནི བཧུཀཱནི པདཊྛཱནཱནི ཨོཏརནྟི, ཏཱནི བཧུཀཱནི པདཊྛཱནཱནི པརིཡེསིཏབྦཱནི ཡཐཱ, ཨེཝཾ སམཱརོཔནེ ཧཱརེཔི བཧུཀཱནི པདཊྛཱནཱནི དེསནཱཡ སམཱརོཔཡིཏབྦཱནཱིཏི ཨཏྠོ.

‘‘ཀེཝལཾ པན པདཊྛཱནཝསེནེཝ སམཱརོཔནཱ ཀཱཏབྦཱ ཀིཾ, ཨུདཱཧུ ཨཉྙཝསེནཱཔི སམཱརོཔནཱ ཀཱཏབྦཱ ཀི’’ནྟི ཝཏྟབྦཏྟཱ ཨཉྙཝསེནཱཔི སམཱརོཔནཱ ཀཱཏབྦཱ; ཏསྨཱ སམཱརོཔནཱ ཙཏུབྦིདྷཱ ཀཱཏབྦཱཏི དསྶེནྟོ ‘‘ཏཏྠ སམཱརོཔནཱ ཙཏུབྦིདྷཱ’’ཏིཨཱདིམཱཧ. ཏཏྠ ཏཏྠཱཏི ཏཱསུ སམཱརོཔཡིཏབྦསམཱརོཔནཱསུ པདཊྛཱནཾ པདཊྛཱནསམཱརོཔནཱ, ཝེཝཙནཾ ཝེཝཙནསམཱརོཔནཱ, བྷཱཝནཱ བྷཱཝནཱསམཱརོཔནཱ, པཧཱནཾ པཧཱནསམཱརོཔནཱ, ཨིཏི ཨིམིནཱ པབྷེདེན སམཱརོཔནཱ ཙཏུབྦིདྷཱ ཀཱཏབྦཱ.

‘‘ཏཱསུ ཙཏུབྦིདྷཱསུ སམཱརོཔནཱསུ ཀཏམཱ པདཊྛཱནསམཱརོཔནཱ’’ཏི པུཙྪིཏབྦཏྟཱ ཏཐཱ པུཙྪིཏྭཱ པདཊྛཱནསམཱརོཔནཾ དསྶེཏུཾ ‘‘ཏཏྠ ¶ ཀཏམཱ’’ཏིཨཱདི ཝུཏྟཾ. སུཏྟེ ཝུཏྟེན པདཊྛཱནེན སུཏྟེ ཨཝུཏྟཱནཾ པདཊྛཱནཱནཾ སམཱརོཔནཱ ཀཏམཱཏི པུཙྪཏི.

སབྦཔཱཔསྶ ¶ ཨཀུསལསྶ ཡཾ ཨཀརཎཾ ཨཀརཎཧེཏུ སཱསནཾ ཨཏྠི, ཨེཏཾ སཱསནཾ བུདྡྷཱནཾ སཱསནཾ ཨོཝཱདོ ཧོཏི, ཨཐ ཝཱ ཨཀརཎཾ ཨཀརཎཏྠཱཡ ཡཾ སཱསནཾ ཨཏྠི, ཨེཏཾ བུདྡྷཱནཾ སཱསནཾ ཨོཝཱདོ ཧོཏི, ན ཡསྶ ཀསྶཙི སཱསནནྟི ཨཏྠོ. ཨཀརཎནྟི ཧི སམྤདཱནཏྠེ པཝཏྟཾ པཙྩཏྟཝཙནཾ ཡཐཱ ‘‘ཀིསྶ ཨཏྠཱཡ ཀིམཏྠ’’ནྟི. ཀུསལསྶ སམྤདཱ སམྤདཱཡ ཡཾ སཱསནཾ ཨཏྠི, ཨེཏཾ བུདྡྷཱནཾ སཱསནཾ. སཙིཏྟཔརིཡོདཱཔནཾ སཙིཏྟཔརིཡོདཱཔནཏྠཾ ཡཾ སཱསནཾ ཨཏྠི, ཨེཏཾ བུདྡྷཱནཾ སཱསནཾ ཧོཏི.

ཨིཏི ཨེཝཾཔཀཱརེན ཝུཏྟསྶ ཏསྶ སཱསནསྶ ཀིཾ པདཊྛཱནནྟི ཝིསེསསྶ ཝིསེསཔདཊྛཱནཾ པུན པུཙྪཏི. ཨིདཾ སུཙརིཏཏྟཡཾ སཱསནསྶ ཨོཝཱདསྶ པདཊྛཱནཾ སུཙརིཏཏྟཡེན ཧེཏུནཱ སཱསནཏྟཱཏི དཊྛབྦཾ ཡཐཱ ‘‘ཨནྣེན ཝསཏཱི’’ཏིཨཱདི. ‘‘སུཙརིཏཏྟཡེ པདཊྛཱནེ ཝུཏྟེ ཀཏམཾ པདཊྛཱནཾ སམཱརོཔཡིཏབྦ’’ནྟི པུཙྪིཏབྦཏྟཱ ‘‘ཏཏྠ ཡཾ ཀཱཡིཀཉྩཱ’’ཏིཨཱདི ཝུཏྟཾ. ཨིདཾ ཁནྡྷཏྟཡཾ སཱསནསྶ པདཊྛཱནཾ སམཱརོཔཡིཏབྦཾ, ‘‘ཁནྡྷཏྟཡེ པདཊྛཱནེ སམཱརོཔཡིཏེ ཀཏམཾ སམཱརོཔཡིཏབྦ’’ནྟི པུཙྪིཏབྦཏྟཱ ‘‘ཏཏྠ སཱིལཀྑནྡྷོ ཙཱ’’ཏིཨཱདི ཝུཏྟཾ. ཨིདཾ སམཐཝིཔསྶནཱདྭཡཾ སཱསནསྶ པདཊྛཱནཾ སམཱརོཔཡིཏབྦཾ. ‘‘སམཐཝིཔསྶནཱདྭཡེ པདཊྛཱནེ སམཱརོཔཡིཏེ ཀཏམཾ པདཊྛཱནཾ སམཱརོཔཡིཏབྦ’’ནྟི པུཙྪིཏབྦཏྟཱ ‘‘ཏཏྠ སམཐསྶ ཕལ’’ནྟིཨཱདི ཝུཏྟཾ. ཨིདཾ ཕལདྭཡཾ སཱསནསྶ པདཊྛཱནཾ སམཱརོཔཡིཏབྦཾ.

སཱསནསྶ པདཊྛཱནཱནི སམཱརོཔཡིཏབྦཱནཱིཏི ཨཱཙརིཡེན ནིདྡྷཱརེཏྭཱ ཝིབྷཏྟཱནི, ཨམྷེཧི ཙ ཉཱཏཱནི, ‘‘ཨིདཱནི ཀཏམསྶ ཀཏམཾ པདཊྛཱནཾ སམཱརོཔཡིཏབྦ’’ནྟི པུཙྪིཏབྦཏྟཱ ‘‘ཝནཾ ཝནཐསྶཱ’’ཏིཨཱདི ཝུཏྟཾ. ཨིདཾ ཀཱམགུཎཔཉྩཀཾ ཝནཾ ཏཎྷཱབྷཱུཏསྶ ཝནཐསྶ པདཊྛཱནཾ ཏཎྷཱཝཏྠུབྷཱཝཏོ, ‘‘ཨིཏྠཱི’’ཏི ཝཱ ‘‘པུརིསོ’’ཏི ཝཱ ནིམིཏྟགྒཱཧསངྑཱཏཾ ཨིདཾ ཝནཾ ‘‘ཨཧོ ཙཀྑུ, ཨཧོ སོཏཾ, ཨཧོ གྷཱནཾ, ཨཧོ ཛིཝ྄ཧཱ, ཨཧོ ཀཱཡོ’’ཏི ཏེསཾ ཏེསཾ ཨངྒཔཙྩངྒཱནཾ ཨནུབྱཉྫནགྒཱཧསངྑཱཏསྶ ཝནཐསྶ པདཊྛཱནཾ སམཱརོཔཡིཏབྦཾ. ཨཔརིཉྙཱཏཾ དྭཱདསཱཡཏནསངྑཱཏཾ ཨིདཾ ཝནཾ སཾཡོཛནསངྑཱཏསྶ ཝནཐསྶ པདཊྛཱནཾ སམཱརོཔཡིཏབྦཾ, ཨཱཡཏནཾ པཊིཙྩ སཾཡོཛནུཔྤཛྫནཏོ ¶ ཨནུསཡསངྑཱཏཾ ཨིདཾ ཝནཾ པརིཡུཊྛཱནསངྑཱཏསྶ ཝནཐསྶ པདཊྛཱནཾ སམཱརོཔཡིཏབྦཾ. ‘‘པཉྩཀཱམགུཎཱདཱིནཾ ཝནབྷཱཝོ ཙ ཏཎྷཱདཱིནཾ ཝནཐབྷཱཝོ ཙ ཀེན ཨམྷེཧི སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧ བྷགཝཱ’’ཏིཨཱདི ཝུཏྟཾ. ཏེན པཉྩཀཱམགུཎཱདཱིནཾ ཝནབྷཱཝེན ཙ ཏཎྷཱདཱིནཾ ཝནཐབྷཱཝེན ཙ བྷགཝཱ ‘‘ཚེཏྭཱ ཝནཉྩ ཝནཐཉྩཱ’’ཏི ཡཾ ཝཙནཾ ཨཱཧ, ཏེན བྷགཝཏོ ཝཙནེན ཝཙནཱནུསཱརེན སདྡཧིཏབྦོཏི. ཨཡནྟི ཨཡཾ ‘‘ཨེཀསྨིཾ པདཊྛཱནེ’’ཏིཨཱདིསཾཝཎྞནཱ. པདཊྛཱནེནཱཏི ཨེཀེཀེན པདཊྛཱནེན. སམཱརོཔནཱཏི ཏདཉྙཔདཊྛཱནཱནཾ སམཱརོཔནཱ ¶ . སམཱརོཔེནྟི སམཱརོཔཡིཏབྦཱནི ཨེཏཱཡ སཾཝཎྞནཱཡཱཏི སམཱརོཔནཱཏི ཝིགྒཧོཏི. (༡)

༥༡. པདཊྛཱནེན སམཱརོཔནཱ ཨཱཙརིཡེན ནིདྡིཊྛཱ, ཨམྷེཧི ཙ ཉཱཏཱ, ‘‘ཀཏམཱ ཝེཝཙནེན སམཱརོཔནཱ’’ཏི པུཙྪིཏབྦཏྟཱ ‘‘ཏཏྠ ཀཏམཱ ཝེཝཙནེནཱ’’ཏིཨཱདི ཝུཏྟཾ. ཏཏྠཱཏི ཏཱསུ ཙཏཱུསུ པདཊྛཱནསམཱརོཔནཱདཱིསུ སམཱརོཔནཱསུ ཝེཝཙནེན ཨེཀེཀེན རོཏདཉྙཝེཝཙནཱནཾ སམཱརོཔནཱ ཀཏམཱཏི པུཙྪཏི. ‘‘རཱགཝིརཱགཱ’’ཏི ཙ ‘‘ཙེཏོཝིམུཏྟཱི’’ཏི ཙ ‘‘སེཀྑཕལ’’ནྟི ཙ ཨིདཾ ཝཙནཏྟཡཾ ཨནཱགཱམིཕལཏྠཏྟཱ ཨནཱགཱམིཕལསྶ ཝེཝཙནཾ. ‘‘ཨཝིཛྫཱཝིརཱགཱ’’ཏི ཙ ‘‘པཉྙཱཝིམུཏྟཱི’’ཏི ཙ ‘‘ཨསེཀྑཕལ’’ནྟི ཙ ཨིདཾ ཝཙནཏྟཡཾ ཨརཧཏྟཕལཏྠཏྟཱ ཨརཧཏྟཕལསྶ ཝེཝཙནཾ. ཨིམིནཱ ནཡེན སེསེསུ ཡོཛནཱ ཀཱཏབྦཱ. (༢)

ཝེཝཙནེན སམཱརོཔནཱ ཨཱཙརིཡེན ནིདྡིཊྛཱ, ཨམྷེཧི ཙ ཉཱཏཱ, ‘‘ཀཏམཱ བྷཱཝནཱཡ སམཱརོཔནཱ’’ཏི པུཙྪིཏབྦཏྟཱ ‘‘ཏཏྠ ཀཏམཱ བྷཱཝནཱཡཱ’’ཏིཨཱདི ཝུཏྟཾ. ཏཏྠཱཏི ཏཱསུ ཙཏཱུསུ པདཊྛཱནསམཱརོཔནཱདཱིསུ ཀཏམཱཡ དེསིཏཱཡ བྷཱཝནཱཡ ཀཏམེསཱནཾ ཨདེསིཏཱནཾ བྷཱཝནཱརོཔནཱ ཀཏམཱཏི པུཙྪཏི. ཡཐཱ ཡེན པཀཱརེན ཡཾ བྷཱཝནཾ བྷགཝཱ ‘‘ཏསྨཱཏིཧ, ཏྭཾ བྷིཀྑུ, ཀཱཡེ ཀཱཡཱནུཔསྶཱི ཝིཧརཏི, ཨཱཏཱཔཱི སམྤཛཱནོ སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶ’’ནྟི (སཾ. ནི. ༥.༣༦༩, ༣༧༡, ༣༩༥, ༤༡༥) ཨཱཧ, ཏཐཱ ཏེན པཀཱརེན ཏཱཡ བྷཱཝནཱཡ ཏདཉྙབྷཱཝནཱཔི སམཱརོཔཡིཏབྦཱཏི ཨཏྠོ.

‘‘ཏསྨཱཏིཧཱ’’ཏིཨཱདིཔཱཋེ ¶ ‘‘ཀིཾ བྷཱཝནཾ བྷགཝཱ ཨཱཧཱ’’ཏི པུཙྪིཏབྦཏྟཱ ‘‘ཨཱཏཱཔཱི’’ཏིཨཱདི ཝུཏྟཾ. ‘‘ཨཱཏཱཔཱི’’ཏི ཝཙནེན ཝཱིརིཡིནྡྲིཡཾ བྷགཝཱ ཨཱཧ. ‘‘སམྤཛཱནོ’’ཏི ཝཙནེན པཉྙིནྡྲིཡཾ བྷགཝཱ ཨཱཧ. ‘‘སཏིམཱ’’ཏི ཝཙནེན སཏིནྡྲིཡཾ ཨཱཧ. ‘‘ཝིནེཡྻ ལོཀེ ཨབྷིཛ྄ཛྷཱདོམནསྶ’’ནྟི ཝཙནེན སམཱདྷིནྡྲིཡཾ ཨཱཧ. ‘‘ཨེཝཾ ཝུཏྟེ ཀཏམཱ བྷཱཝནཱ སམཱརོཔཡིཏབྦཱ’’ཏི པུཙྪིཏབྦཏྟཱ ‘‘ཨེཝཾ ཀཱཡེ ཀཱཡཱནུཔསྶིནོ ཝིཧརཏོ ཙཏྟཱརོ སཏིཔཊྛཱནཱ བྷཱཝནཱཔཱརིཔཱུརིཾ གཙྪནྟཱི’’ཏི ཝུཏྟཾ. ཨེཝཾ ཝུཏྟཱཡ ཝཱིརིཡིནྡྲིཡཱདིབྷཱཝནཱཡ ཙཏྟཱརོ སཏིཔཊྛཱནཱ སམཱརོཔཡིཏབྦཱཏི ཨཏྠོ. ཀེན ཀཱརཎེན བྷཱཝནཱཔཱརིཔཱུརིཾ གཙྪནྟཱིཏི པུཙྪཏི. ཙཏུནྣཾ ཨིནྡྲིཡཱནཾ ཨིནྡྲིཡབྷཱཝེན, བྷཱཝེཏབྦབྷཱཝེན ཝཱ ཨེཀལཀྑཎཏྟཱ བྷཱཝནཱཔཱརིཔཱུརིཾ གཙྪནྟཱིཏི ཝིསྶཛྫེཏི. ‘‘ཏེསུ སམཱརོཔིཏེསུ ཀཏམེ སམཱརོཔཡིཏབྦཱ’’ཏི པུཙྪིཏབྦཏྟཱ ‘‘ཙཏཱུསཱུ’’ཏིཨཱདི ཝུཏྟཾ. ཙཏཱུསུ སཏིཔཊྛཱནེསུ བྷཱཝིཡམཱནེསུ སམཱརོཔཡིཏབྦེསུ ཙཏྟཱརོ སམྨཔྤདྷཱནཱ བྷཱཝནཱཔཱརིཔཱུརིཾ གཙྪནྟཱིཏི སམཱརོཔཡིཏབྦཱཏི ཨཏྠོ. སེསེསུཔི ཨེཝམེཝ སམཱརོཔཡིཏབྦཱ.

བྷཱཝནཱཡ ¶ སམཱརོཔནཱ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, ‘‘ཀཏམཱ པཧཱནེན སམཱརོཔནཱ’’ཏི པུཙྪིཏབྦཏྟཱ ‘‘ཏཏྠ ཀཏམཱ’’ཏིཨཱདི ཝུཏྟཾ. ཏཏྠཱཏི ཏཱསུ ཙཏཱུསུ པདཊྛཱནསམཱརོཔནཱདཱིསུ ཀཏམེན དེསིཏེན པཧཱནེན ཀཏམེསཾ ཨདེསིཏཱནཾ པཧཱནཱནཾ ཀཏམཱ སམཱརོཔནཱཏི པུཙྪཏི. ‘‘ཀཱཡེ ཀཱཡཱནུཔསྶཱི ཝིཧརནྟོ ཨསུབྷེ ‘སུབྷ’ནྟི ཝིཔལླཱསཾ པཛཧཏཱི’’ཏི དེསིཏེན ‘‘སུབྷ’’ནྟི ཝིཔལླཱསཔྤཧཱནེན ཀབལཱི༹ཀཱརཱཧཱརཔརིཉྙཱཡ པརིབནྡྷཀིལེསཀཱམུཔཱདཱནཔྤཧཱནཱདཡོཔི སམཱརོཔཡིཏབྦཱ.

‘‘ཝེདནཱསུ ཝེདནཱནུཔསྶཱི ཝིཧརནྟོ དུཀྑེ ‘སུཁ’ནྟི ཝིཔལླཱསཾ པཛཧཏཱི’’ཏི དེསིཏེན ‘‘སུཁ’’ནྟི ཝིཔལླཱསཔྤཧཱནེན ཕསྶཱཧཱརཔརིཉྙཱཡ པརིབནྡྷཀིལེསབྷཝུཔཱདཱནཔྤཧཱནཱདཡོཔི སམཱརོཔཡིཏབྦཱ.

‘‘ཙིཏྟེ ཙིཏྟཱནུཔསྶཱི ཝིཧརནྟོ ཨནིཙྩེ ‘ནིཙྩ’ནྟི ཝིཔལླཱསཾ པཛཧཏཱི’’ཏི དེསིཏེན ‘‘ནིཙྩ’’ནྟི ཝིཔལླཱསཔྤཧཱནེན ཝིཉྙཱཎཱཧཱརཔརིཉྙཱཡ པརིབནྡྷཀིལེསདིཊྛུཔཱདཱནཔྤཧཱནཱདཡོཔི སམཱརོཔཡིཏབྦཱ.

‘‘དྷམྨེསུ ¶ དྷམྨཱནུཔསྶཱི ཝིཧརནྟོ ཨནཏྟནི ‘ཨཏྟཱ’ཏི ཝིཔལླཱསཾ པཛཧཏཱི’’ཏི དེསིཏེན ‘‘ཨཏྟཱ’’ཏི ཝིཔལླཱསཔྤཧཱནེན མནོསཉྩེཏནཱཧཱརཔརིཉྙཱཡ? མནོསཉྩེཏནཱཧཱརཔརིཉྙཱཡ པརིབནྡྷཀིལེསཨཏྟཝཱདུཔཱདཱནཔྤཧཱནཱདཡོཔི སམཱརོཔཡིཏབྦཱཏི ཨདྷིཔྤཱཡོ. (༤)

པཧཱནཧཱརོ པན ལཀྑཎཧཱརཝིབྷངྒཝཎྞནཱཡཾ ཝུཏྟོཡེཝཱཏི ཨིདྷ ན ཝདཱམ.

‘‘སུཏྟེ དེསིཏེན ཨེཀེཀེན པདཊྛཱནཱདིཀེན ཨདེསིཏཱནཾ པདཊྛཱནཱདཱིནཾ སམཱརོཔནབྷཱཝོ ཀེན ཨམྷེཧི ཝིཛཱནིཏབྦོ སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧ ཨཱཡསྨཱ’’ཏིཨཱདིམཱཧ. ཏེན ཏཐཱ སམཱརོཔནབྷཱཝེན ཨཱཡསྨཱ མཧཱཀཙྩཱནོ –

‘‘ཡེ དྷམྨཱ ཡཾམཱུལཱ, ཡེ ཙེཀཏྠཱ པཀཱསིཏཱ མུནིནཱ;

ཏེ སམཱརོཔཡིཏབྦཱ, ཨེས སམཱརོཔནོ ཧཱརོ’’ཏི –

ཡཾ ཝཙནཾ ཨཱཧ, ཏེན ཝཙནེན ཝཙནཱནུསཱརེན ཏཐཱ སམཱརོཔནབྷཱཝོ ཏུམྷེཧི ཝིཛཱནིཏབྦོ སདྡཧིཏབྦོཏི ཝུཏྟཾ ཧོཏི.

‘‘ཀིཾ ¶ པན ཨེཏྟཱཝཏཱ སམཱརོཔནོ ཧཱརོ པརིཔུཎྞོ, ཨཉྙོ ནིཡུཏྟོ ནཏྠཱི’’ཏི ཝཏྟབྦཏྟཱ ‘‘ནིཡུཏྟོ སམཱརོཔནོ ཧཱརོ’’ཏི ཝུཏྟཾ. སུཏྟེ དེསིཏེན ནཡེན པདཊྛཱནཱདིཀེན ཨདེསིཏཱནི པདཊྛཱནཱནི སམཱརོཔཡིཏབྦཱནི བྷཝནྟི, ཏེན ཏེན པདཊྛཱནཱདིཀེན ཨདེསིཏཱནཾ པདཊྛཱནཱདཱིནཾ སམཱརོཔནོ ཧཱརོ ནིཡུཏྟོ ནིདྡྷཱརེཏྭཱ ཡུཉྫིཏབྦོཏི ཨཏྠོ དཊྛབྦོ.

ཨིཏི སམཱརོཔནཧཱརཝིབྷངྒེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོ.

ཨིམེ ཡཐཱཝུཏྟཱ སོལ༹ས སཾཝཎྞནཱཝིསེསཱ སཾཝཎྞེཏབྦཏྠེསུ ཨཉྙཱཎསཾསཡཱནཾ ཧརཎཏོ ཨཔནཡནཏོ ཧཱརཱ ནཱམཱཏི.

ནིཊྛིཏཱ ཧཱརཝིབྷངྒཝཱརཝིབྷཱཝནཱ.

༡. དེསནཱཧཱརསམྤཱཏཝིབྷཱཝནཱ

༥༢. ཡེན ¶ ཡེན སཾཝཎྞནཱཝིསེསབྷཱུཏེན དེསནཱཧཱརཝིབྷངྒཱདིཧཱརཝིབྷངྒེན ཨསྶཱདཱདཡོ ནཱནཱསུཏྟཏྠཱ ཝིབྷཏྟཱ, སོ སཾཝཎྞནཱཝིསེསབྷཱུཏོ དེསནཱཧཱརཝིབྷངྒཱདིཧཱརཝིབྷངྒོ པརིཔུཎྞོ.

‘‘སོལ༹ས ཧཱརཱ པཋམཾ, དིསཱལོཙནཏོ དིསཱ ཝིལོཀེཏྭཱ;

སངྑིཔིཡ ཨངྐུསེན ཧི, ནཡེཧི ཏཱིཧི ནིདྡིསེ སུཏྟ’’ནྟི. (ནེཏྟི. ༤ ནཡསངྑེཔ) –

གཱཐཱ ནིདྡེསཝཱརེ ཨཱཙརིཡེན ཝུཏྟཱ, ཏསྶཱ གཱཐཱཡ ནིདྡེསོ ཧཱརཝིབྷངྒཝཱརསྶ ཨཱདིམྷི ན ཝིབྷཏྟོ, ‘‘ཀུཧིཉྩི ཝིབྷཏྟོ, ཧཱརསམྤཱཏེ ཝཱ ཝིབྷཏྟོ ཀིཾ, ཨུདཱཧུ ནཡསམུཊྛཱནཧཱརེ ཝཱ ཝིབྷཏྟོ ¶ ཀི’’ནྟི པུཙྪིཏབྦཏྟཱ ‘‘ཧཱརསམྤཱཏེ ཝིབྷཏྟོ’’ཏི ཏུམྷེཧི དཊྛབྦོཏི ཝིཉྙཱཔནཏྠཾ ‘‘སོལ༹ས ཧཱརཱ པཋམ’’ནྟིཨཱདི ཝུཏྟཾ.

ཨཐ ཝཱ སུཔརིཀམྨཀཏབྷཱུམིསདིསེསུ སཾཝཎྞེཏབྦེསུ ནཱནཱསུཏྟཔྤདེསེསུ ནཱནཱཝཎྞསུགནྡྷཔུཔྥསདིསེ སོལ༹ས ཧཱརེ སཾཝཎྞནཱབྷཱཝེན ཡོཛེཏྭཱ སོལ༹ས ཧཱརཱ ཨཱཙརིཡེན ཝིབྷཏྟཱ, ཏཐཱ སུསིཀྑིཏསིཔྤཱཙརིཡསུཝིཙཱརིཏཛམྦུནདཱབྷརཎསདིསེསུ སཾཝཎྞེཏབྦེསུ ནཱནཱསུཏྟཔྤདེསེསུ ནཱནཱཝིདྷརཾསིཛཱལཝིཝིདྷམཎིརཏནསདིསེ སོལ༹ས ཧཱརེ སཾཝཎྞནཱབྷཱཝེན ཡོཛེཏྭཱཝ སོལ༹ས ཧཱརཱ ཝིབྷཏྟཱ, མཧཱཔཐཝིཾ པརིཝཏྟེཏྭཱ པཔྤཊཀོཛསྶ ཁཱདཱཔནཾ ཨཏིདུཀྐརཾ ཝིཡ, ནཱནཱཝིདྷེསུ སཾཝཎྞེཏབྦེསུ སུཏྟཔྤདེསེསུ པརམཏྠོཛཱཡ སོལ༹སཧི ཧཱརེཧི ཨཏིདུཀྐརཁཱདཱཔནསདིསཾ ཝིཉྙཱཔནཾ ཀརོནྟེན ཙ ཡོཛནིཀམདྷུགཎྜཾ པཱིལེ༹ཏྭཱ སུམདྷུརསསྶ པཱཡཱཔནཾ ཨཏིདུཀྐརཾ ཝིཡ ནཱནཱཝིདྷེསུ སཾཝཎྞེཏབྦེསུ སུཏྟཔྤདེསེསུ པརམཏྠམདྷུརསསྶ སོལ༹སཧི ཧཱརེཧི ཨཏིདུཀྐརཾ པཱཡཱཔནསདིསཾ ཝིཉྙཱཔནཾ ཀརོནྟེན ཙ ཨཱཙརིཡེན ཨནེཀེསུ སཾཝཎྞེཏབྦསུཏྟཔྤདེསེསུ སོལ༹ས ཧཱརེ སཾཝཎྞནཱབྷཱཝེན ཡོཛེཏྭཱ སོལ༹ས ཧཱརཱ ཝིབྷཏྟཱ, ཨམྷེཧི ཙ ཉཱཏཱ, ‘‘ནཱནཱཝིདྷསུཏྟཔྤདེསེསུ ཏེ སཾཝཎྞནཱབྷཱཝེན ཡོཛེཏྭཱ སོལ༹ས ཧཱརཱ ཝིབྷཏྟཱ ཀིཾ ¶ , ཨུདཱཧུ ཨེཀསྨིམྤི སཾཝཎྞེཏབྦསུཏྟཔྤདེསེ སཾཝཎྞནཱབྷཱཝེན ཡོཛེཏྭཱ སོལ༹ས ཧཱརཱ ཝིབྷཏྟཱ ཀི’’ནྟི ཝཏྟབྦཏྟཱ ཨེཀསྨིམྤི སཾཝཎྞེཏབྦསུཏྟཔྤདེསེ སཾཝཎྞནཱབྷཱཝེན ཡོཛེཏྭཱ སོལ༹ས ཧཱརཱ ཝིབྷཏྟཱཡེཝཱཏི ཏཐཱ ཝིབྷཛནྟོ ‘‘སོལ༹ས ཧཱརཱ པཋམ’’ནྟིཨཱདིཀཾ ཧཱརསམྤཱཏཝཱརཾ ཨཱཧ.

ནནུ ཧཱརསམྤཱཏཝཱརཾ ཀཐེཏུཀཱམེན ཨཱཙརིཡེན ‘‘ཏཏྠ ཀཏམོ དེསནཱཧཱརསམྤཱཏོ’’ཏིཨཱདིཝཙནཾ ཝཏྟབྦཾ, ཨཐ ཀསྨཱ ‘‘སོལ༹ས ཧཱརཱ པཋམ’’ནྟིཨཱདི ཝཏྟབྦནྟི ཙེ? ནིདྡེསེ ཝུཏྟཾ ‘‘སོལ༹ས ཧཱརཱ པཋམ’’ནྟིཨཱདིཀཾ གཱཐཾ ཧཱརཝིབྷངྒཝཱརོ ནཔྤཡོཛེཏི ཝིཔྤཀིཎྞཝིསཡཏྟཱ ཙ ནཡཝིཙཱརསྶ ཙ ཨནྟརིཏཏྟཱ. ཧཱརསམྤཱཏཝཱརོ པན ཏཾ གཱཐཾ པཡོཛེཏི ཨཝིཀིཎྞཝིསཡཏྟཱ. ཏསྨཱ ཏཾ གཱཐཾ པཙྩཱམསིཏྭཱ ཧཱརསམྤཱཏཝཱརེ ཏསྶཱ གཱཐཱཡ ནིདྡེསོ དཊྛབྦོཏི ཝིཉྙཱཔནཏྠཾ ‘‘སོལ༹ས ཧཱརཱ པཋམ’’ནྟིཨཱདི ཝཏྟབྦཾཡེཝཱཏི. ཨཊྛཀཐཱཡཾ པན –

ཨེཝཾ སུཔརིཀམྨཀཏཱཡ བྷཱུམིཡཱ ནཱནཱཝཎྞཱནི མུཏྟཔུཔྥཱནི པཀིརནྟོ ཝིཡ, སུསིཀྑིཏསིཔྤཱཙརིཡཝིཙཱརིཏེསུ སུརཏྟསུཝཎྞཱལངྐཱརེསུ ནཱནཱཝིདྷརཾསིཛཱལསམུཛྫལཱནི ཝིཝིདྷཱནི མཎིརཏནཱནི བནྡྷནྟོ ཝིཡ, མཧཱཔཐཝིཾ པརིཝཏྟེཏྭཱ པཔྤཊཀོཛཾ ཁཱདཱཔེནྟོ ཝིཡ ¶ , ཡོཛནིཀམདྷུགཎྜཾ པཱིལེ༹ཏྭཱ སུམདྷུརསཾ པཱཡེནྟོ ཝིཡ ཙ ཨཱཡསྨཱ མཧཱཀཙྩཱནོ ནཱནཱསུཏྟཔྤདེསེ ཨུདཱཧརནྟོ སོལ༹ས ཧཱརེ ཝིབྷཛིཏྭཱ ཨིདཱནི ཏེ ཨེཀསྨིཾཡེཝ སུཏྟེ ཡོཛེཏྭཱ དསྶེནྟོ ཧཱརསམྤཱཏཝཱརཾ ཨཱརབྷི. ཨཱརབྷནྟོ ཙ ཡཱཡཾ ནིདྡེསཝཱརེ –

‘‘སོལ༹ས ཧཱརཱ པཋམཾ, དིསཱལོཙནཏོ དིསཱ ཝིལོཀེཏྭཱ;

སངྑིཔིཡ ཨངྐུསེན ཧི, ནཡེཧི ཏཱིཧི ནིདྡིསེ སུཏྟ’’ནྟི. –

གཱཐཱ ཝུཏྟཱ. ཡསྨཱ ཏཾ ཧཱརཝིབྷངྒཝཱརོ ནཔྤཡོཛེཏི ཝིཔྤཀིཎྞཝིསཡཏྟཱ, ནཡཝིཙཱརསྶ ཙ ཨནྟརིཏཏྟཱ. ཨནེཀེཧི སུཏྟཔྤདེསེཧི ཧཱརཱནཾ ཝིབྷཱགདསྶནམེཝ ཧི ཧཱརཝིབྷངྒཝཱརོ. ཧཱརསམྤཱཏཝཱརོ པན ཏཾ པཡོཛེཏི ཨེཀསྨིཾཡེཝ སུཏྟཔྤདེསེ ¶ སོལ༹ས ཧཱརེ ཡོཛེཏྭཱཝ ཏདནནྟརཾ ནཡསམུཊྛཱནསྶ ཀཐིཏཏྟཱ. ཏསྨཱ ‘‘སོལ༹ས ཧཱརཱ པཋམ’’ནྟི གཱཐཾ པཙྩཱམསིཏྭཱ ‘‘ཏསྶཱ ནིདྡེསོ ཀུཧིཾ དཊྛབྦོ? ཧཱརསམྤཱཏེཏི ཨཱཧཱ’’ཏི –

ཝུཏྟཾ. གཱཐཱཏྠོ ནིདྡེསཝིབྷཱཝནཱཡཾ ཝུཏྟོཝ. ‘‘སོལ༹ས…པེ… སུཏྟ’’ནྟི ཡཱ གཱཐཱ ནིདྡེསེ ཨཱཙརིཡེན ཝུཏྟཱ, ཏསྶཱ གཱཐཱཡ ནིདྡེསོ ཀུཧིཾ དཊྛབྦོ, ཧཱརཝིབྷངྒསྶ ཨཱདིམྷི ཨཱཙརིཡེན ན ཝིབྷཏྟོ, ཧཱརསམྤཱཏེ ཝཱ པཙྩཱམསིཏྭཱ ཝིབྷཏྟོཏི དཊྛབྦོ ཀིཾ, ཨུདཱཧུ ནཡསམུཊྛཱནེ ཝཱ པཙྩཱམསིཏྭཱ ཝིབྷཏྟོཏི དཊྛབྦོ ཀིནྟི པུཙྪཏི. ཧཱརསམྤཱཏེ པཙྩཱམསིཏྭཱ ཝིབྷཏྟོཏི དཊྛབྦོཏི ཝིསྶཛྫནཱ.

ཧཱརསམྤཱཏེ ཏསྶཱ གཱཐཱཡ ནིདྡེསོ དཊྛབྦོཏི ཨཱཙརིཡེན ཝུཏྟོ, སོ ཧཱརསམྤཱཏོ དེསནཱཧཱརསམྤཱཏབྷེདེན སོལ༹སཝིདྷོ, ‘‘ཏཏྠ ཀཏམོ ཧཱརསམྤཱཏོ དེསནཱཧཱརསམྤཱཏོ’’ཏི པུཙྪིཏབྦཏྟཱ ཨིམསྨིཾ སུཏྟེ སཾཝཎྞེཏབྦེ སཾཝཎྞནཱབྷཱཝེན མཡཱ ཝིབྷཛིཡམཱནོ ཧཱརསམྤཱཏབྷཱུཏོ སཾཝཎྞནཱཝིསེསོ དེསནཱཧཱརསམྤཱཏོ ནཱམཱཏི ཏཐཱ ཝིབྷཛིཏུཾ ‘‘ཏཏྠ ཀཏམོ དེསནཱཧཱརསམྤཱཏོ’’ཏིཨཱདི ཝུཏྟཾ. ཏཏྠཱཏི ཏསྨིཾ སོལ༹སཝིདྷེ དེསནཱཧཱརསམྤཱཏཱདིཀེ ཧཱརསམྤཱཏེ. ཀཏམོ ཧཱརསམྤཱཏབྷཱུཏོ སཾཝཎྞནཱཝིསེསོ དེསནཱཧཱརསམྤཱཏོ ནཱམཱཏི པུཙྪཏི.

‘‘ཨརཀྑིཏེན ཙིཏྟེན, མིཙྪཱདིཊྛིཧཏེན ཙ;

ཐིནམིདྡྷཱབྷིབྷཱུཏེན, ཝསཾ མཱརསྶ གཙྪཏཱི’’ཏི. –

སུཏྟེ ‘‘ཨརཀྑིཏེན ཙིཏྟེནཱཏི ཀིཾདེསཡཏཱི’’ཏི པུཙྪིཏྭཱ ‘‘པམཱདཾ དེསཡཏཱི’’ཏིཨཱདིསཾཝཎྞནཱཝིསེསོ ¶ དེསནཱཧཱརསམྤཱཏོ ནཱམཱཏི ཝུཏྟཾ ཧོཏི. གཱཐཱཏྠོ ཨཊྛཀཐཱཡཾ (ནེཏྟི. ཨཊྛ. ༥༢) ཝིབྷཏྟོ. ཡོཛནཏྠོ པན ཨརཀྑིཏེན ཙིཏྟེན ཨརཀྑིཏཙིཏྟསམངྒཱི པུགྒལོ མཱརསྶ མཙྩུནོ ཝསཾ གཙྪཏི. མིཙྪཱདིཊྛིཧཏེན ཝིཔལླཱསེན ཝིཔལླཱསསམངྒཱི པུགྒལོ མཱརསྶ ཝསཾ གཙྪཏི. ཐིནམིདྡྷཱབྷིབྷཱུཏེན སསངྑཱརིཀཙིཏྟེན ཀུསཱིཏཙིཏྟེན ཏཾཙིཏྟསམངྒཱི པུགྒལོ མཱརསྶ ཀིལེསཱདིམཱརསྶ ཝསཾ གཙྪཏཱིཏི.

‘‘ཨརཀྑིཏེན ¶ ཙིཏྟེནཱ’ཏི པདེན དེསིཏཾ ཏཾ པམཱདདྷམྨཛཱཏཾ ཀསྶ པད’’ནྟི ཝཏྟབྦཏྟཱ ‘‘ཏཾ མཙྩུནོ པད’’ནྟི ཝུཏྟཾ. ‘‘ཨརཀྑིཏེན ཙིཏྟེནཱ’’ཏི ཨིམིནཱ སུཏྟཔྤདེསེན དེསིཏོ ཨཏྠོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘མིཙྪཱདིཊྛིཧཏེན ཙཱཏི སུཏྟཔྤདེསེན དེསིཏོ ཨཏྠོ ཀཐཾ ཝིབྷཏྟོ’’ཏི ཝཏྟབྦཏྟཱ ‘‘མིཙྪཱདིཊྛིཧཏེན ཙཱ’’ཏིཨཱདི ཝུཏྟཾ. ཡེན ཝིཔལླཱསེན ཡདཱ ཨནིཙྩེ ‘‘ནིཙྩ’’ནྟི པསྶཏི, ཏདཱ པཝཏྟོ སོ ཝིཔལླཱསོ ‘‘མིཙྪཱདིཊྛིཧཏཾ ནཱམཱ’’ཏི ཝུཙྩཏི. ‘‘སོ པན ཝིཔལླཱསོ ཀིཾལཀྑཎོ’’ཏི པུཙྪིཏབྦཏྟཱ ཏཐཱ པུཙྪིཏྭཱ ‘‘ཝིཔརཱིཏགྒཱཧལཀྑཎོ ཝིཔལླཱསོ’’ཏི ཝུཏྟཾ.

ཝིཔརཱིཏགྒཱཧལཀྑཎོཏི ཨསུབྷཱདཱིནཾཡེཝ སུབྷཱདིཝིཔརཱིཏགྒཱཧལཀྑཎོ ཝིཔལླཱསོ ‘‘ཝིཔལླཱསཡཏཱི’’ཏི ཀཱརིཏཏྠསམྦྷཝཏོ. ཀིཾ ཝིཔལླཱསོ ཝིཔརཱིཏགྒཱཧལཀྑཎོ? སོ ཝིཔལླཱསོ སཉྙཾ ཝིཔལླཱསཡཏི, ཙིཏྟམྤི ཝིཔལླཱསཡཏི, དིཊྛིམྤི ཝིཔལླཱསཡཏི. ཨིཏི ཏཡོ དྷམྨེ ཝིཔལླཱསཡཏཱིཏི ཝིཔལླཱསེཏབྦཱནཾ ཏིཝིདྷཏྟཱ ཝིཔལླཱསཱཔི ཏིཝིདྷཱ ཧོནྟི. ཏེསུ སཉྙཱཝིཔལླཱསོ མུདུཀོ དུབྦལོ སུབྷཱདིཝསེན ཨུཔཊྛིཏཱཀཱརགྒཧཎམཏྟཏྟཱ, ཙིཏྟཝིཔལླཱསོ སཉྙཱཝིཔལླཱསཏོ བལཝཱ སུབྷཱདིཝསེན ཨུཔཊྛཧནྟཱནཾ རཱུཔཀྑནྡྷཱདཱིནཾ སུབྷཱདིཝསེན སནྣིཊྛཱནཾ ཀཏྭཱ གཧཎཏོ. དིཊྛིཝིཔལླཱསོ སཉྙཱཝིཔལླཱསཙིཏྟཝིཔལླཱསེཧི བལཝཏརོ, ཡཾ ཡཾ ཨཱརམྨཎཾ སུབྷཱདིཨཱཀཱརེན ཨུཔཊྛཱཏི. ཏཾ ཏཾ ཨཱརམྨཎཾ སསྶཏཱདིཝསེན ཨབྷིནིཝིསིཏྭཱ གཧཎཏོ. ཏསྨཱ སཉྙཱཝིཔལླཱསོ པཋམཾ ཝུཏྟོ, ཏདནནྟརཾ ཙིཏྟཝིཔལླཱསོ, ཏདནནྟརཾ དིཊྛིཝིཔལླཱསོ ཝུཏྟོ. ཝིཏྠཱརཏོ པན ཨེཀེཀསྶ སུབྷསུཁཨཏྟནིཙྩགྒཧཎཝསེན ཙཏུབྦིདྷཏྟཱ དྭཱདསཝིདྷཱ ཧོནྟི.

ཝིཔལླཱསཱ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, ‘‘ཀཏམེ ཝིཔལླཱསཔཝཏྟིཊྛཱནཝིསཡཱ’’ཏི པུཙྪིཏབྦཏྟཱ ཨིམཱནི ཨཏྟབྷཱཝཝཏྠཱུནི ཝིཔལླཱསཔཝཏྟིཊྛཱནཝིསཡཱནཱིཏི དསྶེཏུཾ ‘‘སོ ཀུཧིཾ ཝིཔལླཱསཡཏི ཙཏཱུསུ ཨཏྟབྷཱཝཝཏྠཱུསཱུ’’ཏི ཝུཏྟཾ. ཙཏཱུསུ རཱུཔཀཱཡཝེདནཱཙིཏྟདྷམྨསངྑཱཏེསུ ཨཏྟབྷཱཝཝཏྠཱུསུ སོ སབྦོ ཝིཔལླཱསོ སཉྙཱཙིཏྟདིཊྛིཡོ ཝིཔལླཱསཡཏི. ‘‘ཀཐཾ སམནུཔསྶནྟསྶ ཝིཔལླཱསཡཏཱི’’ཏི པུཙྪིཏབྦཏྟཱ ‘‘རཱུཔཾ ཨཏྟཏོ སམནུཔསྶཏཱི’’ཏིཨཱདི ¶ ཝུཏྟཾ. ཡོ པུགྒལོ རཱུཔཾ ཝཱ ཨཏྟཏོ སམནུཔསྶཏི, རཱུཔཝནྟཾ ཨཏྟཱནཾ ཝཱ ཨཏྟཏོ སམནུཔསྶཏི ¶ , ཨཏྟནི རཱུཔཾ ཝཱ ཨཏྟཏོ སམནུཔསྶཏི. རཱུཔསྨིཾ ཨཏྟཱནཾ ཝཱ ཨཏྟཏོ སམནུཔསྶཏི, ཨེཝཾ ཏསྶ སམནུཔསྶནྟསྶ པུགྒལསྶ ཝིཔལླཱསོ རཱུཔཀཱཡེ སཉྙཱཙིཏྟདིཊྛིཡོ ཝིཔལླཱསཡཏི. ཨེསེཝ ནཡོ ཝེདནཱདཱིསུཔི.

‘‘ཏེསུ རཱུཔཀཱཡཱདཱིསུ ཀཏམཾ ཀཏམསྶ ཝིཔལླཱསསྶ ཝཏྠཱུ’’ཏི པུཙྪིཏབྦཏྟཱ ཨེཝཾ པཝཏྟམཱནསྶ ཝིཔལླཱསསྶ ཨིདཾ ཨིམསྶ ཝཏྠཱུཏི ཝིབྷཛིཏུཾ ‘‘ཏཏྠ རཱུཔ’’ནྟིཨཱདི ཝུཏྟཾ. ཏཏྠཱཏི ཏེསུ རཱུཔཱདཱིསུ ཙཏཱུསུ པཋམཾ ཝིཔལླཱསཝཏྠུ རཱུཔཾ ‘‘ཨསུབྷེ སུབྷ’’ནྟི ཨེཝཾ པཝཏྟམཱནསྶ ཝིཔལླཱསསྶ ཝཏྠུ ཧོཏཱིཏི ཝིབྷཛིཏྭཱ གཧེཏབྦཾ. ཨེས ནཡོ སེསེསུཔི. ཨེཝཾ ‘‘ཨསུབྷེ སུབྷ’’ནྟིཨཱདིཔྤཀཱརེན ཝིཔལླཱསཱ ཙཏུབྦིདྷཱ བྷཝནྟི.

ཨིདཾ ཨིམསྶ ཝཏྠཱུཏི ཨཱཙརིཡེན ཝིབྷཛིཏྭཱ དསྶིཏཱ, ཨམྷེཧི ཙ ཉཱཏཱ, ‘‘ཏེསཾ ཝིཔལླཱསཱནཾ ཀཏམེ མཱུལཀཱརཎདྷམྨཱ’’ཏི པུཙྪིཏབྦཏྟཱ ‘‘དྭེ དྷམྨཱ’’ཏིཨཱདི ཝུཏྟཾ. ཙིཏྟསྶ སཾཀིལེསཱ, ཏཎྷཱ ཙ ཨཝིཛྫཱ ཙ – ཨིམེ དྭེ དྷམྨཱ ཝིཔལླཱསཱནཾ མཱུལཀཱརཎབྷཱུཏཱ བྷཝནྟི.

‘‘ཨིམེ དྭེ དྷམྨཱ ཨེཀཏོ ཝིཔལླཱསཱནཾ མཱུལཀཱརཎཾ ཀིཾ ཧོནྟི, ཨུདཱཧུ ཝིསུཾ ཝིསུ’’ནྟི ཝཏྟབྦཏྟཱ ཝིསུཾ ཝིསུཾ ཝིབྷཛིཏུཾ ‘‘ཏཎྷཱནིཝུཏ’’ནྟིཨཱདི ཝུཏྟཾ. ཨཝིཛྫཱརཧིཏཱ ཏཎྷཱ ནཱམ ནཏྠི, ཏསྨཱ ‘‘ཏཎྷཱཨཝིཛྫཱནིཝུཏ’’ནྟི ཝཏྟབྦནྟི? ན, ཏཎྷཱཡ སཱཏིསཡཔཙྩཡཏྟཱ. སཱཏིསཡཱཡ ཧི ཏཎྷཱཡ ཨསུབྷེཔི ‘‘སུབྷ’’ནྟི, དུཀྑེཔི ‘‘སུཁ’’ནྟི སམནུཔསྶནྟི. ‘‘ཏཎྷཱ ཙ ཨཝིཛྫཱ ཙཱ’’ཏི ཝུཏྟཏྟཱ ‘‘ཨཝིཛྫཱནིཝུཏ’’ནྟི ཝཏྟབྦཾ, ཀསྨཱ ‘‘དིཊྛིནིཝུཏ’’ནྟི ཝུཏྟནྟི? ཨཝིཛྫཱཡ དིཊྛི བྷཝཏཱིཏི དིཊྛིསཱིསེན ཨཝིཛྫཾ གཧེཏྭཱ ‘‘དིཊྛིནིཝུཏ’’ནྟི ཝུཏྟཾ, ཨཝིཛྫཱནིཝུཏནྟི ཨཏྠོ གཧེཏབྦོ. ‘‘ཨཝིཛྫཱནིཝུཏ’’ནྟི ཝུཏྟེ པན དིཊྛིརཧིཏཱ ཨཝིཛྫཱཔི གཧིཏཱ སིཡཱ, དིཊྛིསཧིཏཱཡ ཧི ཨཝིཛྫཱཡ ཨནིཙྩེཔི ‘‘ནིཙྩ’’ནྟི, ཨནཏྟནིཡེཔི ‘‘ཨཏྟཱ’’ཏི སམནུཔསྶནྟི.

‘‘ཀཐཾ ཏཎྷཱམཱུལཀོ ཝིཔལླཱསོ པཝཏྟོ, ཀཐཾ དིཊྛིསཧིཏཱཝིཛྫཱམཱུལཀོ ཝིཔལླཱསོ པཝཏྟོ’’ཏི ཝཏྟབྦཏྟཱ ‘‘ཏཏྠ ཡོ དིཊྛིཝིཔལླཱསོ’’ཏིཨཱདི ཝུཏྟཾ. ཏཏྠཱཏི ཏེསུ ཏཎྷཱམཱུལཀདིཊྛིསཧིཏཱཝིཛྫཱམཱུལཀེསུ. དིཊྛིཝིཔལླཱསོཏི དིཊྛིསཧིཏཱཝིཛྫཱམཱུལཀཝིཔལླཱསོ. ཨཏཱིཏཾ རཱུཔཾ ཨཏྟཏོ སམནུཔསྶཏཱིཏི ཨདབྦབྷཱུཏོཔི དབྦབྷཱུཏོ ཝིཡ ཝུཏྟོ. ཏཎྷཱཝིཔལླཱསོཏི དིཊྛིསཧིཏཏཎྷཱམཱུལཀོ ཝིཔལླཱསོ ཨནཱགཏཾ ¶ རཱུཔཾ དིཊྛིབྷིནནྡནཝསེན ཨབྷིནནྡཏཱིཏི. ཨེཝཾ ཨཏཱིཏསམནུཔསྶནཨནཱགཏཱབྷིནནྡནབྷེདེན ¶ པཝཏྟིཝིསེསོ དཊྛབྦོ. ‘‘ཙིཏྟསྶ སཾཀིལེསོ ཏཎྷཱཨཝིཛྫཱཡེཝ དྭེ དྷམྨཱ ན ཧོནྟི, ཨཐ ཁོ དས ཀིལེསཱཔི, ཀསྨཱ དྭེཡེཝ ཝུཏྟཱ’’ཏི ཝཏྟབྦཏྟཱ ‘‘དྭེ དྷམྨཱ ཙིཏྟསྶ ཨུཔཀྐིལེསཱ’’ཏིཨཱདི ཝུཏྟཾ. ཏཎྷཱ ཙ ཨཝིཛྫཱ ཙ – ཨིམེ དྭེཡེཝ དྷམྨཱ པརམསཱཝཛྫསྶ ཝིཔལླཱསསྶ མཱུལཀཱརཎཏྟཱ. ཏཱཧི ཏཎྷཱཨཝིཛྫཱཧི ཝིསུཛ྄ཛྷནྟཾ ཙིཏྟཾ སབྦེཧི ཀིལེསེཧི ཝིསུཛ྄ཛྷཏི, ཏསྨཱ ཙ ཝིསེསཏོ ཙིཏྟསྶ ཨུཔཀྐིལེསཱ ཧོནྟཱིཏི དྭེ དྷམྨཱ ཝུཏྟཱ. ན ཧི ཏཱསུ ཏཎྷཱཨཝིཛྫཱསུ ཨརཧཏྟམགྒེན པཧཱིནཱསུ ཀོཙི སཾཀིལེསོ ཨཔྤཧཱིནོ ནཱམ ནཏྠཱིཏི.

‘‘ཝུཏྟཔྤཀཱརཱ ཏཎྷཱཨཝིཛྫཱ ཝུཏྟཔྤཀཱརཱནཾ ཝིཔལླཱསཱནཾཡེཝ མཱུལཀཱརཎཾ ཧོནྟི ཀིཾ, ཨུདཱཧུ སཀལསྶ ཝཊྚསྶཱཔི མཱུལཀཱརཎཾ ཧོནྟི ཀི’’ནྟི ཝཏྟབྦཏྟཱ ཝུཏྟཔྤཀཱརཱ ཏཎྷཱཨཝིཛྫཱ ཝུཏྟཔྤཀཱརཱནཾ མཱུལཀཱརཎཾ ཧོནྟི ཡཐཱ, ཨེཝཾ སཀལསྶ ཝཊྚསྶཱཔི མཱུལཀཱརཎཾ ཧོནྟཱིཏི དསྶེཏུཾ ‘‘ཏེས’’ནྟིཨཱདི ཝུཏྟཾ. ཏཏྠ ཡེསཾ པུགྒལཱནཾ ཙིཏྟཾ ཨརཀྑིཏཾ, མིཙྪཱདིཊྛིཧཏཉྩ ཧོཏི, ཏེསཾ པུགྒལཱནཾ. ཡེསཾ ཨཝིཛྫཱནཱིཝརཎཱནཾ ཏཎྷཱསཾཡོཛནཱནཾ པུབྦཀོཊི ན པཉྙཱཡཏི, ཏེཧི ཨཝིཛྫཱནཱིཝརཎེཧི ཏཎྷཱསཾཡོཛནེཧི སཾསཱརེ སནྡྷཱཝནྟཱནཾ སཾསརནྟཱནཾ པུགྒལཱནཾ སཀིཾ ནིརཡཾ མཱརཝསགམནེན སནྡྷཱཝནཾ སཾསརཎཾ ཧོཏི, སཀིཾ ཏིརཙྪཱནཡོནིཾ སནྡྷཱཝནཾ སཾསརཎཾ ཧོཏི, སཀིཾ པེཏྟིཝིསཡཾ སནྡྷཱཝནཾ སཾསརཎཾ ཧོཏི, སཀིཾ ཨསུརཀཱཡཾ སནྡྷཱཝནཾ སཾསརཎཾ ཧོཏི, སཀིཾ དེཝེ སནྡྷཱཝནཾ སཾསརཎཾ ཧོཏི, སཀིཾ མནུསྶེ སནྡྷཱཝནཾ སཾསརཎཾ ཧོཏཱིཏི ཨཏྠོ.

‘‘མིཙྪཱདིཊྛིཧཏེན ཙཱ’’ཏི སུཏྟཔྤདེསེན དེསིཏོ ཨཏྠོ ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཐིནམིདྡྷཱབྷིབྷཱུཏེནཱཏི སུཏྟཔྤདེསེན དེསིཏོ ཨཏྠོ ཀཐཾ ཝིབྷཏྟོ’’ཏི ཝཏྟབྦཏྟཱ ‘‘ཐིནམིདྡྷཱབྷིབྷཱུཏེནཱ’’ཏིཨཱདི ཝུཏྟཾ. ཙིཏྟསྶ ཝིཉྙཱཎཀྑནྡྷསྶ ཡཱ ཨཀལླཏཱ ཨཀམྨནིཡཏཱ ཨཏྠི, ཨིདཾ ཨཀལླཏྟཾ ཨཀམྨནིཡཏྟཾ ཐིནཾ ནཱམ. ཡཾ ཀཱཡསྶ ལཱིནཏྟཾ ཝེདནཱདིཀྑནྡྷཏྟཡལཱིནཏྟཾ ཨཏྠི, ཨིདཾ ཀཱཡསྶ ལཱིནཏྟཾ མིདྡྷཾ ནཱམཱཏི ཐིནམིདྡྷསརཱུཔམེཝ ཝུཏྟཾ. ཏེཧི ཐིནམིདྡྷེཧི ཙིཏྟསྶ ཨབྷིབྷཱུཏབྷཱཝཱདིཀོ པན སུཝིཉྙེཡྻཏྟཱ ན ཝུཏྟོ, ཨཝུཏྟེཔི ཡེསཾ པུགྒལཱནཾ ཙིཏྟཾ ¶ ཐིནམིདྡྷེཧི ཨབྷིབྷཱུཏཾ, ཏེསཾ པུགྒལཱནཾ ཏེན ཙིཏྟེན ཙིཏྟསཱིསེན སཾཡོཛནེན སཾསཱརེ མཱརཝསགམནེན སནྡྷཱཝནཾ སཾསརཎཾ པརིཡོསཱནསབྷཱཝོ ཝིཏྠཱརེཏྭཱ གཧེཏབྦོ.

‘‘ཝསཾ མཱརསྶ གཙྪཏཱིཏི སུཏྟཔྤདེསེན དེསིཏོ ཨཏྠོ ཀཐཾ ཝིབྷཏྟོ’’ཏི ཝཏྟབྦཏྟཱ ‘‘ཝསཾ མཱརསྶ གཙྪཏཱི’’ཏི ཝུཏྟཾ. ཏཏྠ ཀིལེསམཱརསྶཱཏི ཀིལེསོ དཱནཱདིཔུཉྙེ མཱརེཏི ནིཝཱརེཏཱིཏི ཨཏྠེན མཱརོཏི ཀིལེསམཱརོ. ཨིམིནཱ ཀིལེསམཱརཾ ནིསྶཱཡ པཝཏྟཏྟཱ ཨབྷིསངྑཱརམཱརཁནྡྷམཱརམཙྩུམཱརཱ ¶ ཙ གཧིཏཱ, ཙ-སདྡེན ཝཱ གཧིཏཱཏི ཝེདིཏབྦཱ. སཏྟམཱརསྶཱཏི དེཝཔུཏྟམཱརསྶ. ཨཐ ཝཱ ‘‘དེཝཔུཏྟམཱརསྶཱ’’ཏི ཨཝཏྭཱ ‘‘སཏྟམཱརསྶཱ’’ཏི ཝུཏྟཏྟཱ ཡོ ཡོ རཱཛཙོརཱདིཀོ དཱནཱདཱིནི ཝཱ ཨིསྶརིཡབྷོགཱདཱིནི ཝཱ མཱརེཏི, སོ སོ རཱཛཙོརཱདིཀོཔི གཧིཏོ, ཏསྨཱ ཡསྶ ཀསྶཙི སཏྟམཱརསྶཱཏི ཨཏྠོ. ཝསནྟི ཨིཙྪཾ ལོབྷཾ ཨདྷིཔྤཱཡཾ རུཙིཾ ཨཱཀངྑཾ ཨཱཎཾ ཨཱཎཏྟིཾ. གཙྪཏཱིཏི ཨུཔགཙྪཏི ཨུཔེཏི ཨནུཝཏྟཏི ཨནུགཙྪཏི ནཱཏིཀྐམཏཱིཏི ཨཏྠོ. ‘‘ཀསྨཱ ཝསཾ གཙྪཏཱི’’ཏི ཝཏྟབྦཏྟཱ ‘‘སོ ཧཱི’’ཏིཨཱདི ཝུཏྟཾ. ཡོ སཏྟོ ཨརཀྑིཏཙིཏྟེན ཙ མིཙྪཱདིཊྛིཧཏཙིཏྟེན ཙ ཐིནམིདྡྷཱབྷིབྷཱུཏཙིཏྟེན ཙ སམནྣཱགཏོ ཧོཏི, སོ སཏྟོ ཨཝིཛྫཱནཱིཝརཎཱདཱིཧི ནིཝུཏོ ཧུཏྭཱ སཾསཱརཱབྷིམུཁོ ཧི ཡསྨཱ ཧོཏི, ན ཝིསངྑཱརཱབྷིམུཁོ, ཏསྨཱ མཱརསྶ ཝསཾ གཙྪཏཱིཏི ཨཏྠོ.

‘‘ཨརཀྑིཏེནཱཏིཨཱདིཀསྶ ཡསྶ སུཏྟསྶ ཨཏྠོ ཝིབྷཏྟོ, ཏེན ‘ཨརཀྑིཏེནཱ’ཏིཨཱདིཀེན སུཏྟེན ཀིཏྟཀཱནི སཙྩཱནི དེསིཏཱནཱི’’ཏིཝཏྟབྦཏྟཱ ‘‘ཨིམཱནི བྷགཝཏཱ’’ཏིཨཱདི ཝུཏྟཾ. ‘‘ཨརཀྑིཏེནཱ’’ཏིཨཱདིསུཏྟེན བྷགཝཏཱ ཨིམཱནི དྭེ སཙྩཱནི དེསིཏཱནི དུཀྑཾ, སམུདཡོ ཙཱཏི. ཀཐཾ དེསིཏཱནི? ཨབྷིདྷམྨནིསྶིཏཱཡ ཀཐཱཡ ཙེཝ སུཏྟནྟནིསྶིཏཱཡ ཀཐཱཡ ཙ དེསིཏཱནི. ཏཱསུ ཀཐཱསུ ཨབྷིདྷམྨནིསྶིཏཱཡ ཀཐཱཡ དེསིཏེ སཏི ‘‘ཨརཀྑིཏེན ཙིཏྟེནཱ’’ཏི ཨིམིནཱ པདེན ཨརཀྑིཏཾ རཏྟམྤི ཙིཏྟཾ, ཨརཀྑིཏཾ དུཊྛམྤི ཙིཏྟཾ, ཨརཀྑིཏཾ མཱུལ༹ྷམྤི ཙིཏྟཾ བྷགཝཏཱ དེསིཏཾ ཉཱཔིཏཾ. ཏཏྠ རཏྟཙིཏྟཾ ལོབྷསཧགཏཙིཏྟུཔྤཱདཝསེན ཨཊྛཝིདྷཾ, དུཊྛཙིཏྟཾ པཊིགྷསམྤཡུཏྟཙིཏྟུཔྤཱདཝསེན དུབྦིདྷཾ, མཱུལ༹ྷཙིཏྟཾ མོམཱུཧཙིཏྟུཔྤཱདཝསེན དུབྦིདྷནྟི ཝེདིཏབྦཾ. ཨིམེསཉྷི ཙིཏྟུཔྤཱདཱནཾ ཝསེན ཡཱ ཙཀྑུནྡྲིཡཱདཱིནཾ ཨགུཏྟི ཨནཱརཀྑཱ ཨུཔྤནྣཱ, ཏཱཡ ཨགུཏྟིཡཱ ཨནཱརཀྑཱཡ ཙིཏྟཾ ཨརཀྑིཏཾ ཧོཏི ཕལཱུཔཙཱརེནཱཏི.

‘‘མིཙྪཱདིཊྛིཧཏེནཱ’’ཏི ¶ ཨིམིནཱ པདེན མིཙྪཱདིཊྛིསཾསཊྛཾ ཙིཏྟཾ དེསིཏཾ, ཏཾ དིཊྛིསམྤཡུཏྟཙིཏྟུཔྤཱདཝསེན ཙཏུབྦིདྷནྟི ཝེདིཏབྦཾ. ཏཉྷི མིཙྪཱདིཊྛིཡཱ སཾསཊྛབྷཱཝེན མིཙྪཱདིཊྛིཝསཱནུགཏཏྟཱ མིཙྪཱདིཊྛིཧཏཾ ནཱམཱཏི. ‘‘ཐིནམིདྡྷཱབྷིབྷཱུཏེནཱ’’ཏི ཨིམིནཱ པདེན ཐིནམིདྡྷེན སཾསཊྛཾ ཙིཏྟཾ དེསིཏཾ, ཏཾ སསངྑཱརིཀཙིཏྟུཔྤཱདཝསེན པཉྩཝིདྷནྟི ཝེདིཏབྦཾ. ཏཉྷི ཐིནམིདྡྷེན སཾསཊྛབྷཱཝེན ཐིནམིདྡྷཝསཱནུགཏཏྟཱ ཐིནམིདྡྷཱབྷིབྷཱུཏཾ ནཱམཱཏི ཨེཝཾ ཡེ དྭཱདསཱཀུསལཱ ཙིཏྟུཔྤཱདཀཎྜེ ‘‘ཀཏམེ དྷམྨཱ ཨཀུསལཱ? ཡསྨིཾ སམཡེ ཨཀུསལཾ ཙིཏྟཾ ཨུཔྤནྣཾ ཧོཏཱི’’ཏིཨཱདིནཱ (དྷ. ས. ༣༦༥) ཝིཏྠཱརཏོ ཝཏྟབྦཱ, ཏེ དྭཱདསཱཀུསལཙིཏྟུཔྤཱདཱ ཏཱིཧི པདེཧི བྷགཝཏཱ དེསིཏཱཏི ཝེདིཏབྦཱ. ‘‘མཱརསྶཱ’’ཏི པདེན པཉྩ མཱརཱ གཧིཏཱ. ཏེསུ ཀིལེསམཱརོ ¶ ‘‘ཙཏྟཱརོ ཨཱསཝཱ, ཙཏྟཱརོ ཨོགྷཱ, ཙཏྟཱརོ ཡོགཱ, ཙཏྟཱརོ གནྠཱ, ཙཏྟཱརི ཨུཔཱདཱནཱནི, ཨཊྛ ནཱིཝརཎཱ, དས ཀིལེསཱ’’ཏི (དྷ. ས. ༡༡༠༢ ཨཱདཡོ) དེསིཏོ. ཨབྷིསངྑཱརམཱརོ པན ‘‘ཀུསལཱ ཙེཏནཱ (ཝིབྷ. ༢༢༦) ཨཀུསལཱ ཙེཏནཱ (ཝིབྷ. ༢༢༦) ཀུསལཾ ཀམྨཾ ཨཀུསལཾ ཀམྨ’’ནྟིཨཱདིནཱ དེསིཏོ. ཁནྡྷམཱརོ པན ‘‘ཨཏྟབྷཱཝོ པཉྩཀྑནྡྷཱ’’ཏིཨཱདིནཱ དེསིཏོ. མཙྩུམཱརོ པན ‘‘ཙུཏི ཙཝནཏཱ’’ཏིཨཱདིནཱ (ཝིབྷ. ༡༩༣) དེསིཏོ. ཨེཝཾ ཏཱཝེཏྠ ཨབྷིདྷམྨནིསྶིཏཱཡ ཀཐཱཡ དེསིཏོ ཨཏྠོ དཊྛབྦོ.

སུཏྟནྟནིསྶིཏཱཡ པན ཀཐཱཡ དེསིཏེ སཏི ‘‘ཙཀྑུནཱ རཱུཔཾ དིསྭཱ ནིམིཏྟགྒཱཧཱི ཧོཏི ཨནུབྱཉྫནགྒཱཧཱི, ཡཏྭཱདྷིཀརཎམེནཾ ཙཀྑུནྡྲིཡཾ ཨསཾཝུཏཾ ཝིཧརནྟཾ ཨབྷིཛ྄ཛྷཱདོམནསྶཱ པཱཔཀཱ ཨཀུསལཱ དྷམྨཱ ཨནྭཱསྶཝེཡྻུཾ, ཏསྶ སཾཝརཱཡ ན པཊིཔཛྫཏི, ན རཀྑཏི ཙཀྑུནྡྲིཡཾ, ཙཀྑུནྡྲིཡེ ན སཾཝརཾ ཨཱཔཛྫཏི…པེ… སོཏིནྡྲིཡེ ན སཾཝརཾ ཨཱཔཛྫཏི… གྷཱནིནྡྲིཡེ ན སཾཝརཾ ཨཱཔཛྫཏི… ཛིཝ྄ཧིནྡྲིཡེ ན སཾཝརཾ ཨཱཔཛྫཏི… ཀཱཡིནྡྲིཡེ ན སཾཝརཾ ཨཱཔཛྫཏི… མནིནྡྲིཡེ ན སཾཝརཾ ཨཱཔཛྫཏཱི’’ཏི (མ. ནི. ༡.༣༤༧) ཨེཝཾ པུགྒལཱདྷིཊྛཱནེན ཡཾ ཚདྭཱརིཀཙིཏྟཾ ཝུཏྟཾ, ཏཾ ཚདྭཱརིཀཙིཏྟཾ ‘‘ཨརཀྑིཏེན ཙིཏྟེནཱ’’ཏི ཨིམིནཱ པདེན དེསིཏཾ. ཡཱ མིཙྪཱདིཊྛིཡོ པུབྦནྟཀཔྤནཝསེན ཝཱ ཨཔརནྟཀཔྤནཝསེན ཝཱ པུབྦནྟཱཔརནྟཀཔྤནཝསེན ཝཱ མིཙྪཱ ཨབྷིནིཝིསནྟསྶ ཨཡོནིསོ ཨུམྨུཛྫནྟསྶ ‘‘སསྶཏོ ལོཀོ’’ཏི ཝཱ ‘‘ཨསསྶཏོ ལོཀོ’’ཏི ཝཱ ‘‘ན ཧོཏི ཏཐཱགཏོ པརཾ མརཎཱ’’ཏི ཝཱ ཨུཔྤནྣཱ, ཏཱཧི ¶ དིཊྛཱིཧི ཝཱ, ཡཱ ཙ དིཊྛིཡོ ‘‘ཨིམཱ ཙཏྟཱརོ སསྶཏཝཱདཱ…པེ… པརམདིཊྛདྷམྨནིབྦཱནཝཱདཱ’’ཏི བྲཧྨཛཱལསུཏྟཱདཱིསུ (དཱི. ནི. ༡.༣༠ ཨཱདཡོ) ཝུཏྟཱ, ཏཱཧི དིཊྛཱིཧི ཝཱ སམྤཡུཏྟཾ ཡཾ ཙིཏྟཾ ‘‘མིཙྪཱདིཊྛིཧཏེན ཙཱ’’ཏི ཨིམིནཱ པདེན དེསིཏཾ.

‘‘ཐིནཾ ནཱམ ཙིཏྟསྶ ཨཀམྨཉྙཏཱ, མིདྡྷཾ ནཱམ ཝེདནཱདིཀྑནྡྷཏྟཡསྶ ཨཀམྨཉྙཏཱ’’ཏི ཝཱ ‘‘ཐིནཾ ཨནུསྶཱཧསཾསཱིདནཾ, མིདྡྷཾ ཨུསྶཱཧསཏྟིཝིགྷཱཏོ’’ཏི ཝཱ ཡཱནི ཐིནམིདྡྷཱནི ཝུཏྟཱནི, ཏེཧི ཐིནམིདྡྷེཧི ཡཾ ཙིཏྟཾ ཨབྷིབྷཱུཏཾ ཨཛ྄ཛྷོཏྠཊཾ, ཏཾ ཙིཏྟཾ ‘‘ཐིནམིདྡྷཱབྷིབྷཱུཏེནཱ’’ཏི ཨིམིནཱ པདེན དེསིཏཾ.

‘‘ཝསོ ནཱམ ཨིཙྪཱ ལོབྷོ ཨདྷིཔྤཱཡོ རུཙི ཨཱཀངྑཱ ཨཱཎཱ ཨཱཎཏྟཱི’’ཏི ཡོ ཝསོ ཝུཏྟོ, སོ ཝསོ ‘‘ཝས’’ནྟི ཨིམིནཱ པདེན དེསིཏོ. ‘‘པཉྩ མཱརཱ – ཁནྡྷམཱརོ ཨབྷིསངྑཱརམཱརོ མཙྩུམཱརོ དེཝཔུཏྟམཱརོ ཀིལེསམཱརོ’’ཏི ཡོ མཱརོ ཝུཏྟོ, སོ མཱརོ ‘‘མཱརསྶཱ’’ཏི ཨིམིནཱ དེསིཏོ. ‘‘གཙྪཏི, ཨུཔགཙྪཏི, ཨུཔེཏི, ཨནུཝཏྟཏི, ཨནུགཙྪཏི, ནཱཏིཀྐམཏཱི’’ཏི ¶ ཡོ པུགྒལོ ཝུཏྟོ, སོ པུགྒལོ ‘‘གཙྪཏཱི’’ཏི ཨིམིནཱ དེསིཏོཏི. ཨེཝཾ དེསིཏེསུ དྷམྨེསུ ཨཀུསལཱ སམུདཡསཙྩཾ, ‘‘ཝསཾ མཱརསྶ གཙྪཏཱི’’ཏི ཨིམིནཱ པདེན ཡེ པཉྩུཔཱདཱནཀྑནྡྷེ ཨུཔཱདཱཡ པཉྙཏྟོ པུགྒལོ ཝུཏྟོ, ཏེ པཉྩུཔཱདཱནཀྑནྡྷཱ དུཀྑསཙྩནྟི དྭེ སཙྩཱནི དེསིཏཱནི. ‘‘ཀིམཏྠཱཡ དྭེ སཙྩཱནི དེསིཏཱནཱི’’ཏི པུཙྪིཏབྦཏྟཱ ‘‘ཏེསཾ བྷགཝཱ’’ཏིཨཱདི ཝུཏྟཾ. ཏེསཾ དྭིནྣཾ སཙྩཱནཾ པརིཉྙཱཡ ཙ པཧཱནཱཡ ཙ ‘‘ཨརཀྑིཏེནཱ’’ཏིཨཱདི དྷམྨཾ བྷགཝཱ དེསེཏི, ཏཱནི དྭེ སཙྩཱནི ‘‘ཨརཀྑིཏེནཱ’’ཏིཨཱདིཀེན ཉཱཔེཏཱིཏི ཨཏྠོ.

‘‘ཏེསུ དྭཱིསུ སཙྩེསུ ཀསྶ སཙྩསྶ པརིཉྙཱཡ, ཀསྶ སཙྩསྶ པཧཱནཱཡ དེསེཏཱི’’ཏི པུཙྪིཏབྦཏྟཱ ‘‘དུཀྑསྶ པརིཉྙཱཡ, སམུདཡསྶ པཧཱནཱཡཱ’’ཏི ཝུཏྟཾ. ‘‘པརིཉྙཱཔཧཱནེཧི ཀཏམཱནི སཙྩཱནི དེསིཏཱནཱི’’ཏི ཝཏྟབྦཏྟཱ ‘‘ཡེན ཙཱ’’ཏིཨཱདི ཝུཏྟཾ. ཡེན ཨརཧཏྟམགྒེན པརིཛཱནཱཏི, ཡེན ཨརཧཏྟམགྒེན པཛཧཏི ཙ, ཨཡཾ ཨརཧཏྟམགྒོ མགྒསཙྩཾ ནཱམ. ཡཾ ནིབྦཱནདྷམྨཾ ཨཱརབྦྷ ཏཎྷཱཡ, ཨཝིཛྫཱཡ ཙ པཧཱནཾ ཛཱཏཾ, ཨཡཾ ནིབྦཱནདྷམྨོ ནིརོདྷོ ནིརོདྷསཙྩཾ ནཱམཱཏི. ཨེཝཾ ཙཏྟཱརི སཙྩཱནི བྷགཝཏཱ དེསིཏཱནི.

‘‘ཙཏུནྣཾ ¶ སཙྩཱནཾ དེསིཏབྷཱཝོ ཀེན ཝིཉྙཱཏབྦོ’’ཏི ཝཏྟབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ. ཏེསུ ཙཏཱུསུ སཙྩེསུ སམུདཡསཙྩེན ཨསྶཱདོ གཧིཏོ, དུཀྑསཙྩེན ཨཱདཱིནཝོ གཧིཏོ, མགྒསཙྩནིརོདྷསཙྩེཧི ནིསྶརཎཾ གཧིཏཾ, སམུདཡཔྤཧཱནཝསེན སབྦགཏིཔཛཧནཾ ཛཱཏཾ, སབྦགཏིཔཛཧནཾ ཕལནྟི གཧིཏཾ. ཡེན རཀྑིཏཙིཏྟཏཱདིཀེན སབྦགཏིཔཛཧནཾ ཛཱཏཾ, སོ རཀྑིཏཙིཏྟཏཱདིཀོ ཨུཔཱཡོཏི གཧིཏོ, ཨརཀྑིཏཙིཏྟཏཱདིཀསྶ པཊིསེདྷནམུཁེན རཀྑིཏཙིཏྟཏཱདིཀསྶ ནིཡོཛནཾ བྷགཝཏོ ཨཱཎཏྟཱིཏི གཧིཏནྟི དེསནཱཧཱརེན ནཱནཱསུཏྟེསུ དསྶིཏཱ ཨསྶཱདཱདཡོ ‘‘ཨརཀྑིཏེནཱ’’ཏིཨཱདིཀེ ཨེཀསྨིཾཡེཝ སུཏྟེ ནཱིཧརིཏྭཱ དསྶིཏཱ.

‘‘ཨསྶཱདཱདཱིནཾ ནཱིཧརིཏྭཱ དསྶིཏབྷཱཝོ ཀེན ཝིཉྙཱཏབྦོ སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ. ཨེཏྠ ཙ ཡེན སཾཝཎྞནཱཝིསེསེན ནཱནཱསུཏྟེསུ ཨསྶཱདཱདཡོ ནཱིཧརིཏྭཱ དསྶིཏཱ, སོ སཾཝཎྞནཱཝིསེསོ དེསནཱཧཱརཝིབྷངྒོ ནཱམ. ཡེན སཾཝཎྞནཱཝིསེསེན ཨེཀསྨིཾཡེཝ སུཏྟེ ཨསྶཱདཱདཡོ ནཱིཧརིཏྭཱ དསྶིཏཱ, སོ སཾཝཎྞནཱཝིསེསོ དེསནཱཧཱརསམྤཱཏོ ནཱམཱཏི ཝིསེསོ དཊྛབྦོ.

‘‘ཨེཏྟཀོཝ དེསནཱཧཱརསམྤཱཏོ པརིཔུཎྞོ’’ཏི ཝཏྟབྦཏྟཱ ‘‘ནིཡུཏྟོ དེསནཱཧཱརསམྤཱཏོ’’ཏི ཝུཏྟཾ. ཨེཀེཀསྨིཾཡེཝ སུཏྟེ ཨསྶཱདཱདཡོ ཡེན ཡེན སཾཝཎྞནཱཝིསེསབྷཱུཏེན དེསནཱཧཱརསམྤཱཏེན ནཱིཧརིཏྭཱ ¶ ཡཐཱརཧཾ དསྶིཏཱ, སོ སོ སཾཝཎྞནཱཝིསེསབྷཱུཏོ དེསནཱཧཱརསམྤཱཏོ ནིཡུཏྟོ ཡཐཱརཧཾ ནིདྡྷཱརེཏྭཱ ཡུཛྫིཏབྦོཏི ཨཏྠོ གཧིཏོ.

ཨིཏི དེསནཱཧཱརསམྤཱཏེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན…པེ… གཧེཏབྦོཏི.

༢. ཝིཙཡཧཱརསམྤཱཏཝིབྷཱཝནཱ

༥༣. ཡེན ¶ དེསནཱཧཱརསམྤཱཏེན ཨསྶཱདཱདཡོ ཨཱཙརིཡེན ཝིབྷཏྟཱ, ཨམྷེཧི ཙ ཉཱཏཱ, སོ དེསནཱཧཱརསམྤཱཏོ པརིཔུཎྞོ, ‘‘ཀཏམོ ཝིཙཡཧཱརསམྤཱཏོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཝིཙཡོ ཧཱརསམྤཱཏོ’’ཏིཨཱདི ཝུཏྟཾ. ཏཏྠཱཏི ཏེསུ དེསནཱཧཱརསམྤཱཏཱདཱིསུ སོལ༹སསུ ཧཱརསམྤཱཏེསུ ཀཏམོ སཾཝཎྞནཱཝིསེསོ ཝིཙཡཧཱརསམྤཱཏོ ནཱམཱཏི པུཙྪཏི. ཨིམེསུ དྷམྨེསུ ཨཡཾ དྷམྨོ ཡེན སཾཝཎྞནཱཝིསེསེན ཝིཙཡིཏབྦོ, སོ སཾཝཎྞནཱཝིསེསོ ཝིཙཡཧཱརསམྤཱཏོ ནཱམཱཏི ནིཡམེཏྭཱ ཝིབྷཛིཏུཾ ‘‘ཏཏྠ ཏཎྷཱ’’ཏིཨཱདི ཝུཏྟཾ. ཨཊྛཀཐཱཡཾ པན –

‘‘ཨེཝཾ དེསནཱཧཱརསམྤཱཏཾ དསྶེཏྭཱ ཨིདཱནི ཝིཙཡཧཱརསམྤཱཏཾ དསྶེནྟོ ཡསྨཱ དེསནཱཧཱརཔདཏྠཝིཙཡོ ཝིཙཡཧཱརོ, ཏསྨཱ དེསནཱཧཱརེ ཝིཔལླཱསཧེཏུབྷཱཝེན ནིདྡྷཱརིཏཱཡ ཏཎྷཱཡ ཀུསལཱདིཝིབྷཱགཔཝིཙཡམུཁེན ཝིཙཡཧཱརསམྤཱཏཾ དསྶེཏུཾ ‘ཏཏྠ ཏཎྷཱ དུཝིདྷཱ’ཏིཨཱདི ཨཱརདྡྷ’’ནྟི (ནེཏྟི. ཨཊྛ. ༥༣) –

ཝུཏྟཾ. ཏཏྠ ཏཏྠཱཏི ཏསྨིཾ ‘‘ཨརཀྑིཏེན ཙིཏྟེནཱ’’ཏིཨཱདིསུཏྟཏྠེ དེསནཱཧཱརསམྤཱཏེན སཾཝཎྞིཏེ ཨཀུསལདྷམྨེ ‘‘ཏཎྷཱ’’ཏི ནིདྡྷཱརིཏཱ སབྦཏཎྷཱ. ཀུསལཱཔཱིཏི ཙཏུབྷཱུམཀེ ཀུསལེ ཨུདྡིསྶ པཝཏྟཱ ཏཎྷཱཔི. ཨཀུསལཱཔཱིཏི ཨཀུསལདྷམྨེ ཨུདྡིསྶ པཝཏྟཱ ཏཎྷཱཔཱིཏི དུཝིདྷཱ ཧོཏཱིཏི ཝིཙཡིཏབྦཱ. ཏེན ཝུཏྟཾ ཊཱིཀཱཡཾ – ‘‘ཀུསལདྷམྨཱརམྨཎཱཏི ཀུསལདྷམྨེ ཨུདྡིསྶ པཝཏྟམཏྟཾ སནྡྷཱཡ ཝུཏྟཾ, ན ཏེསཾ ཨཱརམྨཎཔཙྩཡཏཾ, ཨིདྷ ‘ཀུསལཱ དྷམྨཱ’ཏི ལོཀུཏྟརདྷམྨཱནམྤི ཨདྷིཔྤེཏཏྟཱ’’ཏི.

‘‘ཀུསལཱ ¶ ཏཎྷཱ ཀིཾགཱམིནཱི, ཨཀུསལཱ ཏཎྷཱ ཀིཾ གཱམིནཱི’’ཏི པུཙྪིཏབྦཏྟཱ ‘‘ཨཀུསལཱ སཾསཱརགཱམིནཱི’’ཏིཨཱདི ཝུཏྟཾ. ཨཐ ཝཱ ‘‘ཀཏམོ ཀུསལཱཀུསལཏཎྷཱནཾ ཝིསེསོ’’ཏི པུཙྪིཏབྦཏྟཱ ‘‘ཨཀུསལཱ སཾསཱརགཱམིནཱི’’ཏིཨཱདི ཝུཏྟཾ. ‘‘ཏཎྷཱ ནཱམ སཾསཱརགཱམིནཱི ཧོཏུ, ཀཐཾ ཨཔཙཡགཱམིནཱི’’ཏི ཝཏྟབྦཏྟཱ ‘‘པཧཱནཏཎྷཱ’’ཏི ཝུཏྟཾ, པཧཱནསྶ ཧེཏུབྷཱུཏཱ ཏཎྷཱ པཧཱནཏཎྷཱཏི ཨཏྠོ, པཧཱཏབྦཏཎྷཾ ཨཱགམྨ ཡཾ པཧཱནཾ པཝཏྟེཏབྦཾ, ཏེན པཝཏྟེཏབྦེན པཧཱནེན ཨཔཙཡཾ གཙྪཏཱིཏི ཝུཏྟཾ ཧོཏི.

‘‘ཀིཾ ¶ པན ཏཎྷཱཡེཝ ཀུསལཱཀུསལཱཏི དུབྦིདྷཱ, ཨུདཱཧུ ཨཉྙོཔི ཀུསལཱཀུསལཱཏི དུབྦིདྷོ’’ཏི ཝཏྟབྦཏྟཱ ‘‘མཱནོཔཱི’’ཏིཨཱདི ཝུཏྟཾ. ‘‘ཀཏམོ མཱནོ ཀུསལོ, ཀཏམོ མཱནོ ཨཀུསལོ’’ཏི པུཙྪིཏབྦཏྟཱ ‘‘ཡཾ མཱནཾ ནིསྶཱཡ མཱནཾ པཛཧཏི, ཨཡཾ མཱནོ ཀུསལོ. ཡོ པན མཱནོ དུཀྑཾ ནིབྦཏྟཡཏི, ཨཡཾ མཱནོ ཨཀུསལོ’’ཏི ཝུཏྟཾ. ཏཏྠ ཡཾ མཱནཾ…པེ… ཀུསལོཏི ཡཾ མཱནཾ ནིསྶཱཡ ཨུཔནིསྶཱཡ པཧཱནཾ པཝཏྟིཏཾ, ཏེན པཧཱནེན སནྟཱནེ ཨུཔྤཛྫནཱརཧཾ མཱནཾ པཛཧཏི, ཨཡཾ ཨུཔནིསྶཡཔཙྩཡབྷཱུཏོ མཱནོ ཕལཱུཔཙཱརེན ཀུསལོ. ཡོ པན…པེ… ཨཀུསལོཏི ཡོ པན མཱནོ པརཧིཾསནཱདིཝསེན པཝཏྟམཱནོ ཧུཏྭཱ ཨཏྟནོ ཙ པརསྶ ཙ དུཀྑཾ ནིབྦཏྟཡཏི, ཨཡཾ མཱནོ ཨཀུསལོཏི ཝིཙཡིཏྭཱ ཝེདིཏབྦོ.

‘‘སཾསཱརཱཔཙཡགཱམིནཱིསུ ཏཱསུ ཏཎྷཱསུ ཀཏམཱ ཨཔཙཡགཱམིནཱི ཏཎྷཱ ཀུསལཱ’’ཏི པུཙྪིཏབྦཏྟཱ ‘‘ཀུསལཱ’’ཏི ཝུཏྟཱཡ ཏཎྷཱཡ སརཱུཔཾ དསྶེཏུཾ ‘‘ཏཏྠ ཡཾ ནེཀྑམྨསིཏ’’ནྟིཨཱདི ཝུཏྟཾ. ཏཏྠཱཏི ཏཱསུ སཾསཱརཱཔཙཡགཱམིནཱིསུ ཏཎྷཱབྷཱུཏཱསུ ཀུསལཱཀུསལཱསུ. ཨཡཾ ཏཎྷཱ ཀུསལཱཏི སམྦནྡྷོ. ‘‘ཨརིཡཱ པུགྒལཱ སནྟཾ ཨཱཡཏནཾ ཡཾ ཨརིཡཕལདྷམྨཾ སཙྪིཀཏྭཱ ཨུཔསམྤཛྫ ཝིཧརནྟི, ཏཾ ཨཱཡཏནཾ ཨརིཡཕལདྷམྨཾ ཨཧཾ ཀུདཱསྶུ སཙྪིཀཏྭཱ ཝིཧརིསྶ’’ནྟི པཏྠཡནྟསྶ ཏསྶ ཀུལཔུཏྟསྶ ཏསྨིཾ ཨརིཡཕལེ པིཧཱ ཨུཔྤཛྫཏི, པིཧཱཔཙྩཡཱ ཡཾ དོམནསྶཾ ཨུཔྤཛྫཏི, ཨིདཾ དོམནསྶཾ ‘‘ནེཀྑམྨསིཏ’’ནྟི ཝུཙྩཏི. ཨཡཾ ཨརིཡཕལེ པིཧཱསངྑཱཏཱ ཏཎྷཱ ཀུསལཱ ཨནཝཛྫཱ ཨནཝཛྫཨརིཡཕལདྷམྨཾ ཨུདྡིསྶ པཝཏྟཏྟཱཏི ཝིཙཡིཏབྦཾ.

‘‘ཀཐཾ པཝཏྟཱ’’ཏི ཝཏྟབྦཏྟཱ ‘‘རཱགཝིརཱགཱ’’ཏིཨཱདི ཝུཏྟཾ. ཡཱ རཱགཝིརཱགཱ ཙེཏོཝིམུཏྟི པཏྟབྦཱ. ཏདཱརམྨཎཱ ཏཾ ཙེཏོཝིམུཏྟིཾ ཨཱགམྨ པཝཏྟཱ ཏཎྷཱ ཀུསལཱ ཨནཝཛྫཱ, ཡཱ ཨཝིཛྫཱཝིརཱགཱ པཉྙཱཝིམུཏྟི པཏྟབྦཱ, ཏདཱརམྨཎཱ ཏཾ པཉྙཱཝིམུཏྟིཾ ཨཱགམྨ པཝཏྟཱ ཏཎྷཱ ཀུསལཱ ཨནཝཛྫཱཏི ཝིཙཡིཏབྦཱ. ཏཱཡ པཉྙཱཝིམུཏྟིཡཱ ཝསེན བྷགཝཏཱ –

‘‘ཏསྨཱ ¶ རཀྑིཏཙིཏྟསྶ, སམྨཱསངྐཔྤགོཙརོ;

སམྨཱདིཊྛིཔུརེཀྑཱརོ, ཉཏྭཱན ཨུདཡབྦཡཾ;

ཐིནམིདྡྷཱབྷིབྷཱུ བྷིཀྑུ, སབྦཱ དུགྒཏིཡོ ཛཧེ’’ཏི. (ཨུདཱ. ༣༢; ནེཏྟི. ༣༡, ༦༥, ༧༨) –

གཱཐཱཡཾ ¶ ‘‘སབྦཱ དུགྒཏིཡོ ཛཧེ’’ཏི པདཾ ཝུཏྟཾ, ‘‘ཏསྶཱ པཉྙཱཝིམུཏྟིཡཱ ཡོ པཝིཙཡོ ཀཱཏབྦོ, ཀཏམོ སོ པཝིཙཡོ’’ཏི པུཙྪིཏབྦཏྟཱ ‘‘ཏསྶཱ ཀོ པཝིཙཡོ’’ཏིཨཱདི ཝུཏྟཾ. ཏསྶཱ པཉྙཱཝིམུཏྟིཡཱ ཀོ པཝིཙཡོཏི ཙེ པུཙྪེཡྻ ‘‘ཨཊྛ མགྒངྒཱནི – སམྨཱདིཊྛི སམྨཱསངྐཔྤོ སམྨཱཝཱཙཱ སམྨཱཀམྨནྟོ སམྨཱཨཱཛཱིཝོ སམྨཱཝཱཡཱམོ སམྨཱསཏི སམྨཱསམཱདྷཱི’’ཏི པཝིཙཡོ ཝེདིཏབྦོ. ‘‘སོ པཝིཙཡོ ཀཏྠ དཊྛབྦོ’’ཏི པུཙྪིཏབྦཏྟཱ ‘‘སོ ཀཏྠཱ’’ཏིཨཱདི ཝུཏྟཾ. སོ པཉྙཱཝིམུཏྟིཡཱ པཝིཙཡོ ཀཏྠ ཀསྨིཾ དྷམྨེ དཊྛབྦོཏི པུཙྪཏི. ཙཏུཏྠེ ཛྷཱནེ པཱརམིཏཱཡ ཨུཀྐཾསགཏཱཡ ཙཏུཏྠཛ྄ཛྷཱནབྷཱཝནཱཡ སོ པཝིཙཡོ དཊྛབྦོ.

‘‘ཙཏུཏྠེ ཛྷཱནེ པཱརམིཏཱཡཱ’’ཏི ཝུཏྟམཏྠཾ ཝིཝརིཏུཾ ‘‘ཙཏུཏྠེ ཧི ཛྷཱནེ’’ཏིཨཱདི ཝུཏྟཾ. ཡོ སོ ཙཏུཏྠཛ྄ཛྷཱནལཱབྷཱི པུགྒལོ ཙཏུཏྠེ ཛྷཱནེ པརིསུདྡྷཾ པརིཡོདཱཏཾ ཨནངྒཎཾ ཝིགཏཱུཔཀྐིལེསཾ མུདུ ཀམྨནིཡཾ ཋིཏཾ ཨཱནེཉྫཔྤཏྟཾ, ཨིཏི ཨཊྛངྒསམནྣཱགཏཾ ཙིཏྟཾ བྷཱཝཡཏི, སོ ཙཏུཏྠཛ྄ཛྷཱནལཱབྷཱི པུགྒལོ ཏཏྠ ཙཏུཏྠེ ཛྷཱནེ ཨཊྛཝིདྷཾ ཝིཛྫཱཙརཎཾ ཨདྷིགཙྪཏི. ཀཏམཾ ཨཊྛཝིདྷཾ? ཚ ཨབྷིཉྙཱ, དྭེ ཙ ཝིསེསེ ཝཱ ཨདྷིགཙྪཏཱིཏི ཡོཛནཱ. ཨིདྡྷིཝིདྷཱདཡོ པཉྩ, ལོཀིཡཱབྷིཉྙཱ ཙེཝ ཨརཧཏྟམགྒཔཉྙཱ ཙཱཏི ཚ ཨབྷིཉྙཱ. མནོམཡིདྡྷི ཙེཝ ཝིཔསྶནཱཉཱཎཉྩཱཏི དྭེ ཙ ཝིསེསཱ ཧོནྟི.

‘‘ཏཾ ཙཏུཏྠཛ྄ཛྷཱནཙིཏྟཾ ཀུཏོ པརིསུདྡྷཾ…པེ… ཀུཏོ ཨཱནེཉྫཔྤཏྟ’’ནྟི པུཙྪིཏབྦཏྟཱ ‘‘ཏཾ ཙིཏྟཾ ཡཏོ པརིསུདྡྷ’’ནྟིཨཱདི ཝུཏྟཾ. ཏཾ ཙིཏྟཾ ཡཏོ ཨུཔེཀྑཱསཏིཔཱརིསུདྡྷིབྷཱཝཏོ པརིསུདྡྷཾ, ཏཏོ ཨུཔེཀྑཱསཏིཔཱརིསུདྡྷིབྷཱཝཏོ པརིཡོདཱཏཾ ཧོཏི. སུཁཱདཱིནཾ པཙྩཡགྷཱཏེན ཡཏོ ཝཱིཏརཱགཱདིཨནངྒཎབྷཱཝཏོ ཨནངྒཎཾ, ཏཏོ ཝཱིཏརཱགཱདིཨནངྒཎབྷཱཝཏོ ཝིགཏཱུཔཀྐིལེསཾ. ཡཏོ སུབྷཱཝིཏབྷཱཝཏོ མུདུ, ཏཏོ སུབྷཱཝིཏབྷཱཝཏོ ཀམྨནིཡཾ. ཡཏོ པརིསུདྡྷཱདཱིསུ ཋིཏབྷཱཝཏོ ཋིཏཾ, ཏཏོ པརིསུདྡྷཱདཱིསུ ཋིཏབྷཱཝཏོ ཨཱནེཉྫཔྤཏྟཾ ཧོཏཱིཏིཔི ཡོཛནཱ ཡུཏྟཱ ཨཊྛཀཐཱཡཾ (ནེཏྟི. ཨཊྛ. ༥༣) ཡུགལ༹ཏོ ཨཱགཏཏྟཱ. སདྡྷཱཝཱིརིཡསཏིསམཱདྷིཔཉྙཱཨོབྷཱསེཧི པརིགྒཧིཏབྷཱཝཏོ ཨཱནེཉྫཔྤཏྟཾ. སདྡྷཱཡ ཧི པརིགྒཧིཏཾ ཙིཏྟཾ པཊིཔཀྑེ ཨསྶདྡྷིཡེ ན ཨིཉྫཏི ན ཙལཏི, ཝཱིརིཡེན པརིགྒཧིཏཾ ¶ ཙིཏྟཾ པཊིཔཀྑེ ཀོསཛྫེ ན ཨིཉྫཏི, སཏིཡཱ པརིགྒཧིཏཾ ¶ ཙིཏྟཾ པཊིཔཀྑེ པམཱདེ ན ཨིཉྫཏི, སམཱདྷིནཱ པརིགྒཧིཏཾ ཙིཏྟཾ པཊིཔཀྑེ ཨུདྡྷཙྩེ ན ཨིཉྫཏི, པཉྙཱཡ པརིགྒཧིཏཾ ཙིཏྟཾ པཊིཔཀྑཱཡ ཨཝིཛྫཱཡ ན ཨིཉྫཏི, ཨོབྷཱསགཏཾ ཙིཏྟཾ ཀིལེསནྡྷཀཱརེ ན ཨིཉྫཏི. ཨིཏི ཨིམེཧི ཚཧི དྷམྨེཧི པརིགྒཧིཏཾ ཙཏུཏྠཛ྄ཛྷཱནཙིཏྟཾ ཨཱནེཉྫཔྤཏྟཾ ཧོཏི. ཨེཝཾ ཨཊྛངྒསམནྣཱགཏཏྟཱ ཙཏུཏྠཛ྄ཛྷཱནཙིཏྟཾ ཚནྣཾ ཨབྷིཉྙཱཉཱཎཱནཉྩ མནོམཡིདྡྷིཝིཔསྶནཱཉཱཎཱནཉྩ ཨདྷིགམཱུཔཱཡོ ཧོཏི, ཏསྨཱ སོ པཉྙཱཝིམུཏྟིཔརིཙཡོ ཙཏུཏྠཛ྄ཛྷཱནེ དཊྛབྦོཡེཝཱཏི སངྑེཔཏྠོ. ཝིཏྠཱརཏོ པན ཨཊྛཀཐཱཡཾ (ནེཏྟི. ཨཊྛ. ༥༣) ‘‘ཏཏྠ ཨུཔེཀྑཱསཏིཔཱརིསུདྡྷིབྷཱཝེནཱ’’ཏིཨཱདིནཱ ཝཱ ‘‘ཨཔརོ ནཡོ’’ཏིཨཱདིནཱ ཝཱ ཝུཏྟོཡེཝཱཏི ཨམྷེཧི ན ཝུཏྟོ.

‘‘ཡེསཾ རཱགཱདིཨངྒཎཱནཾ ཨབྷཱཝེན ཨནངྒཎཾ, ཡེསཾ ཨབྷིཛ྄ཛྷཱདིཨུཔཀྐིལེསཱནཾ ཨབྷཱཝེན ཝིགཏཱུཔཀྐིལེསཾ, ཡཱཡ ཙིཏྟསྶ ཋིཏིཡཱ ཨབྷཱཝེན ཋིཏཾ, ཨིཉྫནཱཡ ཨབྷཱཝེན ཨཱནེཉྫཔྤཏྟཾ, ཏེ རཱགཱདིཨངྒཎཱདཡོ ཀཏམཱཡ པཀྑཱ’’ཏི པུཙྪིཏབྦཏྟཱ ‘‘ཏཏྠ ཨངྒཎཱ’’ཏིཨཱདི ཝུཏྟཾ. ཏཏྠཱཏི ཏེསུ རཱགཱདིཨངྒཎཱདཱིསུ ཨངྒཎཱ ཙ རཱགཱདིཨངྒཎཱ ཙ ཨུཔཀྐིལེསཱ ཨབྷིཛ྄ཛྷཱདིཨུཔཀྐིལེསཱ ཙ སནྟི, ཏདུབྷཡཾ རཱགཱདིཨངྒཎཨབྷིཛ྄ཛྷཱདིཨུཔཀྐིལེསདྭཡཾ ཏཎྷཱཔཀྑོ རཱགཱདིཨངྒཎཱནཾ ཏཎྷཱསབྷཱཝཏྟཱ, ཨབྷིཛ྄ཛྷཱདིཨུཔཀྐིལེསཱནཉྩ ཏཎྷཱཡ ཨནུལོམཏྟཱ. ཡཱ ཨིཉྫནཱ ཕནྡནཱ ཡཱ ཙ ཙིཏྟསྶ ཨཊྛིཏི ཨནཝཊྛཱནཾ ཨཏྠི, ཨཡཾ ཨིཉྫནཱ ཨཊྛིཏི དིཊྛིཔཀྑོ ཨིཉྫནཱཡ ཙ ཨཊྛིཏིཡཱ ཙ མིཙྪཱབྷིནིཝེསཧེཏུབྷཱཝཏོཏི པཝིཙཡོ ཀཱཏབྦོ.

‘‘ཀིཾ པན ཙཏུཏྠཛ྄ཛྷཱནཙིཏྟཾ ཨཊྛངྒསམནྣཱགཏཏྟཱཡེཝ ཚནྣཾ ཨབྷིཉྙཱཉཱཎཱནཉྩ མནོམཡིདྡྷིཝིཔསྶནཱཉཱཎཱནཉྩ ཨདྷིགམཱུཔཱཡོ ཧོཏཱི’’ཏི པུཙྪིཏབྦཏྟཱ ‘‘ཙཏྟཱརི ཨིནྡྲིཡཱནཱི’’ཏི ཝུཏྟཾ. ‘‘ཏསྶ ཙཏུཏྠཛ྄ཛྷཱནལཱབྷིནོ, དུཀྑིནྡྲིཡཾ དོམནསྶིནྡྲིཡཾ སུཁིནྡྲིཡཾ སོམནསྶིནྡྲིཡཾ ཨིཏི ཙཏྟཱརིནྡྲིཡཱནི ཙཏུཏྠཛ྄ཛྷཱནེ ནིརུཛ྄ཛྷནྟི, ཏསྶ ཙཏུཏྠཛ྄ཛྷཱནལཱབྷིནོ ཨུཔེཀྑིནྡྲིཡཾ ཨཝསིཊྛཾ བྷཝཏི, ཏསྨཱཔི ཙཏུཏྠཛ྄ཛྷཱནཙིཏྟཾ ཝུཏྟཔྤཀཱརཱནཾ ཨཊྛནྣཾ ཉཱཎཱནཾ ཨདྷིགམཱུཔཱཡོ ཧོཏི, སོ ཙ ཨདྷིགམཱུཔཱཡབྷཱཝོ ཙིཎྞཝསཱིབྷཱཝསྶེཝ བྷཝེཡྻ, ཀཐཾ ཙཏུཏྠཛ྄ཛྷཱནམཏྟལཱབྷིནོ ཙིཎྞཝསཱིབྷཱཝོ སིཡཱ’’ཏི ཝཏྟབྦཏྟཱ སོ ཙཏུཏྠཛ྄ཛྷཱནལཱབྷཱི ཙཏུཏྠཛ྄ཛྷཱནེཡེཝ ཨཊྛཏྭཱ ཨརཱུཔསམཱཔཏྟིཡོཔི ¶ ཨེཝཾ ཀཏྭཱ ནིབྦཏྟེཏི བྷཱཝེཏི, ཏསྨཱ ཙིཎྞཝསཱིབྷཱཝོ ཧོཏཱིཏི དསྶེཏུཾ ‘‘སོ ཨུཔརིམཾ སམཱཔཏྟི’’ནྟིཨཱདི ཝུཏྟཾ. ཏསྶཏྠོ ཨཊྛཀཐཱཡཾ (ནེཏྟི. ཨཊྛ. ༥༣) ཝིཏྠཱརཏོ ཝུཏྟོ, ཏསྨཱ ཡོཛནམཏྟཾ ཀརིསྶཱམ.

སོ རཱུཔཱཝཙརཙཏུཏྠཛ྄ཛྷཱནལཱབྷཱི ཡོགཱཝཙརོ རཱུཔཱཝཙརཙཏུཏྠཛ྄ཛྷཱནསམཱཔཏྟིཏོ ཨུཔརིམཾ ཨཱཀཱསཱནཉྩཱཡཏནསམཱཔཏྟིཾ ¶ སནྟཏོ སནྟཏརཏོ མནསི ཀརོཏི. ཡཐཱཝུཏྟཾ ཨུཔརིམཾ སམཱཔཏྟིཾ སནྟཏོ མནསི ཀརོཏོ ཏསྶ ཙཏུཏྠཛ྄ཛྷཱནལཱབྷིནོ ཡོགཱཝཙརསྶ ཙཏུཏྠཛ྄ཛྷཱནེ སཉྙཱ སཉྙཱཔདྷཱནཱ སམཱཔཏྟི ཨོལཱ༹རིཀཱ ཝིཡ ཧུཏྭཱ སཎྛཧཏི, པཊིགྷསཉྙཱ ཙ ཨུཀྐཎྛཱ ཨནབྷིརཏི ཧུཏྭཱ སཎྛཧཏི, སོ ཡཐཱཝུཏྟེན ཝིདྷིནཱ མནསི ཀརོནྟོ ཡོགཱཝཙརོ སབྦསོ ནིརཝསེསཏོ རཱུཔསཉྙཱནཾ སམཏིཀྐམཱ པཊིགྷསཉྙཱནཾ ཨཏྠངྒམཱ ནཱནཏྟསཉྙཱནཾ ཨམནསིཀཱརཱ ‘‘ཨཱཀཱསཾ ཨནནྟ’’ནྟི མནསི ཀཏྭཱ པཝཏྟམཱནཾ ཨཱཀཱསཱནཉྩཱཡཏནསམཱཔཏྟིཾ སཙྪིཀཏྭཱ ཨུཔསམྤཛྫ ཝིཧརཏི. རཱུཔསཉྙཱ རཱུཔཱཝཙརསཉྙཱ པཉྩཝིདྷཨབྷིཉྙཱབྷིནཱིཧཱརོ ཧོཏི. ནཱནཏྟསཉྙཱ ནཱནཱརམྨཎེསུ ཝོཀཱརོ ཨཀུསལོ པཝཏྟཏི. ཨེཝཾ རཱུཔཱཝཙརཛ྄ཛྷཱནེ ཨཱདཱིནཝདསྶཱི ཧུཏྭཱ ཏཱ རཱུཔསཉྙཱནཱནཏྟསཉྙཱཡོ ཨཱརམྨཎེ སམཏིཀྐམཏི, ཨསྶ ཡོགཱཝཙརསྶ པཊིགྷསཉྙཱ ཙ ཨབྦྷཏྠཾ གཙྪཏི. ཨེཝཾ ཨིམིནཱ ཝུཏྟནཡེན སམཏིཀྐམེན སམཱཧིཏསྶ, སནྟཝུཏྟིནཱ ཨརཱུཔཱཝཙརསམཱདྷིནཱ སམཱཧིཏསྶ ཡོགཱཝཙརསྶ ཨོབྷཱསོ རཱུཔཱཝཙརཛ྄ཛྷཱནོབྷཱསོ ཨནྟརདྷཱཡཏི. རཱུཔཱནཾ ཀསིཎརཱུཔཱནཾ ཛྷཱནཙཀྑུནཱ དསྶནཉྩ ཨནྟརདྷཱཡཏཱིཏི ཡོཛནཱ.

‘‘ཡེན སམཱདྷིནཱ སམཱཧིཏསྶ, སམཱཧིཏསྶ ཨོབྷཱསོ ཙ རཱུཔཱནཾ དསྶནཉྩ ཨནྟརདྷཱཡཏི, སོ སམཱདྷི ཀིཏྟཀེཧི ཨངྒེཧི སམནྣཱགཏོ, ཀཐཾ པཙྩཝེཀྑིཏབྦོ’’ཏི པུཙྪིཏབྦཏྟཱ ‘‘སོ སམཱདྷཱི’’ཏིཨཱདི ཝུཏྟཾ. སོ སམཱདྷཱིཏི ཡེན རཱུཔཱརཱུཔཱཝཙརསམཱདྷིནཱ སམཱཧིཏོ, སོ དུཝིདྷོཔི སམཱདྷི ཨནབྷིཛ྄ཛྷཱབྱཱཔཱདཝཱིརིཡཱརམྦྷེཧི ཏཱིཧི ཨུཔཀཱརཀངྒེཧི ཙ པསྶདྡྷིསཏཱིཧི དྭཱིཧི པརིཀྑཱརངྒེཧི ཙ ཨཝིཀྑིཏྟེན ཨེཀེན སབྷཱཝངྒེན ཙ ཚཧི ཨངྒེཧི སམནྣཱགཏོཏི པཙྩཝེཀྑིཏབྦོ པུནཔྤུནཾ ཙིནྟེཏབྦོ སལླཀྑེཏབྦོ ¶ . ‘‘ཀཐཾ ཀཏྠ པཙྩཝེཀྑིཏབྦོ’’ཏི པུཙྪིཏབྦཏྟཱ ‘‘ཨནབྷིཛ྄ཛྷཱསཧགཏཾ མེ མཱནསཾ སབྦལོཀེ’’ཏིཨཱདི ཝུཏྟཾ. ‘‘ཏེསུ ཚསུ ཨངྒེསུ ཀིཏྟཀོ སམཐོ, ཀིཏྟཀཱ ཝིཔསྶནཱ’’ཏི པུཙྪིཏབྦཏྟཱ ཨེཏྟཀོ སམཐོ, ཨེཏྟཀཱ ཝིཔསྶནཱཏི ཝིབྷཛིཏུཾ ‘‘ཏཏྠ ཡཉྩཱ’’ཏིཨཱདི ཝུཏྟཾ.

༥༤. ‘‘པཉྙཱཝིམུཏྟཱི’’ཏི ཝུཏྟསྶ ཨརཧཏྟཕལསྶ སམཱདྷིསྶ སམཐཝིཔསྶནཱསངྑཱཏཱ པུབྦབྷཱགཔཊིཔདཱ སམཱདྷིམུཁེན ཨཱཙརིཡེན ཝིབྷཏྟཱ, ‘‘ཏཱཡ པཊིཔདཱཡ ལབྷིཏབྦོ ཨརཧཏྟཕལསམཱདྷི ཀིཏྟཀེན ཝེདིཏབྦོ’’ཏི པུཙྪིཏབྦཏྟཱ ‘‘སོ སམཱདྷི པཉྩཝིདྷེན ཝེདིཏབྦོ’’ཏི ཝུཏྟཾ. ཡོ ཨརཧཏྟཕལསམཱདྷི སམཐཝིཔསྶནཱཔཊིཔདཱཡ ལབྷིཏབྦོ, སོ ཨརཧཏྟཕལསམཱདྷི པཉྩཝིདྷེན ཉཱཎདསྶནེན ཝེདིཏབྦོ.

‘‘ཀཐཾ པཉྩཝིདྷཉཱཎདསྶནཾ པཙྩུཔཊྛིཏཾ བྷཝཏཱི’’ཏི ཝཏྟབྦཏྟཱ ‘‘ཨཡཾ སམཱདྷཱི’’ཏིཨཱདི ¶ ཝུཏྟཾ. ཨཡཾ ཨརཧཏྟཕལསམཱདྷི ཨཔྤིཏཔྤིཏཀྑཎེ ཕལསམཱཔཏྟིསུཁཏྟཱ པཙྩུཔྤནྣསུཁོ ཧོཏི, ཨིཏི པཙྩཝེཀྑནྟསྶ ཨསྶ ཨརཧཏོ པཙྩཏྟམེཝ ཉཱཎདསྶནཾ པཙྩུཔཊྛིཏཾ བྷཝཏི. ཨཡཾ ཨརཧཏྟཕལསམཱདྷི ཨཱཡཏིཾ སམཱཔཛྫིཏབྦསྶ ཨརཧཏྟཕལསམཱདྷིསྶ ཨུཔནིསྶཡཔཙྩཡཏྟཱ ཨཱཡཏིཾ སུཁཝིཔཱཀོ ཧོཏི, ཨིཏི པཙྩཝེཀྑནྟསྶ…པེ… བྷཝཏི. ཨཡཾ ཨརཧཏྟཕལསམཱདྷི ཀིལེསཨརཱིཧི ཨཱརཀཏྟཱ ཨརིཡོ, ཀཱམཱམིསཝཊྚཱམིསལོཀཱམིསཱནཾ ཨབྷཱཝཏོ ནིརཱམིསོ ཙ ཧོཏི, ཨིཏི པཙྩཝེཀྑནྟསྶ…པེ… བྷཝཏི. ཨཡཾ ཨརཧཏྟཕལསམཱདྷི ཨཀཱཔུརིསེཧི སམྨཱསམྦུདྡྷཔཙྩེཀབུདྡྷསཱཝཀབུདྡྷེཧི སེཝིཏབྦཏྟཱ ཨཀཱཔུརིསསེཝིཏོ ཧོཏི, ཨིཏི པཙྩཝེཀྑནྟསྶ…པེ… བྷཝཏི. ཨཡཾ ཨརཧཏྟཕལསམཱདྷི ཨངྒསནྟཀིལེསདརཐསནྟཏྟཱ སནྟོ ཙེཝ དིཝསམྤི སམཱཔཛྫནྟསྶ ཨཏིཏྟིཀརཎཏོ པཎཱིཏོ ཙ པཊིཔྤསྶདྡྷཀིལེསེན ཨརཧཏཱ པུགྒལེན ལདྡྷཏྟཱ པཊིཔྤསྶདྡྷིལདྡྷོ ཙ ཨརཧཏྟམགྒསམཱདྷིསངྑཱཏེན ཨེཀོདིབྷཱཝེན ཨདྷིགཏཏྟཱ ཨེཀོདིབྷཱཝཱདྷིགཏོ ཙ སསངྑཱརེན སཔཡོགེན ཨདྷིགཏཏྟཱ, ནཱིཝརཎཱདིཔཙྩནཱིཀདྷམྨེ ནིགྒཡ྄ཧ ཨནདྷིགཏཏྟཱ, ཨཉྙེ ཀིལེསེ ཝཱརེཏྭཱ ཨནདྷིགཏཏྟཱ, ཨརཧཏྟམགྒཕལབྷཱཝེནེཝ པཝཏྟཏྟཱ ནསསངྑཱརནིགྒཡ྄ཧཝཱརིཏགཏོ ཧོཏི, ཨིཏི པཙྩཝེཀྑནྟསྶ ཨསྶ ཨརཧཏོ པཙྩཏྟམེཝ ཉཱཎདསྶནཾ པཙྩུཔཊྛིཏཾ བྷཝཏཱིཏི པཉྩཝིདྷེན ཉཱཎདསྶནེན སོ ཨརཧཏྟཕལསམཱདྷི ཝིཙཡིཏྭཱ ཝེདིཏབྦོཏི.

‘‘པཙྩུཔྤནྣསུཁཱདཱིསུ ¶ སམཱདྷཱིསུ ཀིཏྟཀོ སམཐོ, ཀིཏྟཀཱ ཝིཔསྶནཱ’’ཏི པུཙྪིཏབྦཏྟཱ ‘‘ཏཏྠ ཡོ ཙ སམཱདྷི པཙྩུཔྤནྣསུཁོ’’ཏིཨཱདི ཝུཏྟཾ. སམཐོ, ཝིཔསྶནཱཏི ཙ ཨརཧཏྟཕལསམཐཝིཔསྶནཱཝ ཨདྷིཔྤེཏཱ, ན པུབྦབྷཱགསམཐཝིཔསྶནཱཏི. ཨརཧཏྟཕལསམཱདྷི པཉྩཝིདྷེན ཝེདིཏབྦོཏི ཨཱཙརིཡེན ཝུཏྟོ, ‘‘ཏསྶ ཨརཧཏྟཕལསམཱདྷིསྶ པུབྦབྷཱགཔཊིཔདཱཡཾ ཝུཏྟོ སམཱདྷི ཀིཏྟཀེན ཝེདིཏབྦོ’’ཏི པུཙྪིཏབྦཏྟཱ ‘‘སོ སམཱདྷི པཉྩཝིདྷེན ཝེདིཏབྦོ’’ཏི ཝུཏྟཾ. ཡོ རཱུཔཱཝཙརཙཏུཏྠཛ྄ཛྷཱནསམཱདྷི པུབྦབྷཱགཔཊིཔདཱཡཾ ཝུཏྟོ, སོ རཱུཔཱཝཙརཙཏུཏྠཛ྄ཛྷཱནསམཱདྷི པཉྩཝིདྷེན པཀཱརེན ཝེདིཏབྦོ. ‘‘ཀཏམེནཱ’’ཏི པུཙྪིཏབྦཏྟཱ ‘‘པཱིཏིཕརཎཏཱ’’ཏིཨཱདི ཝུཏྟཾ. པཋམདུཏིཡཛ྄ཛྷཱནེསུ པཉྙཱ པཱིཏིཕརཎཏཱ ཧོཏི. པཋམདུཏིཡཏཏིཡཛ྄ཛྷཱནེསུ པཉྙཱ སུཁཕརཎཏཱ ཧོཏི. ཙཏུཏྠཛ྄ཛྷཱནེ ཙེཏོཔརིཡཔཉྙཱ ཙེཏོཕརཎཏཱ ཧོཏི. དིབྦཙཀྑུཔཉྙཱ ཨཱལོཀཕརཎཏཱ ཧོཏི. ཛྷཱནཾ པཙྩཝེཀྑིཏྭཱ པཝཏྟམཱནཔཉྙཱ པཙྩཝེཀྑཎཱནིམིཏྟཾ ཧོཏི. ཨིཏི པཉྩཝིདྷེན པཉྙཱཔཀཱརེན ཝིཙཡིཏྭཱ ཝེདིཏབྦོཏི. ‘‘ཏེསུ པཉྩཝིདྷེསུ པཀཱརེསུ ཀིཏྟཀོ སམཐོ, ཀིཏྟཀཱ ཝིཔསྶནཱ’’ཏི པུཙྪིཏབྦཏྟཱ ‘‘ཏཏྠ ཡོ ཙ པཱིཏིཕརཎོ’’ཏིཨཱདི ཝུཏྟཾ.

༥༥. སམྤཡོགཝསེན སམཱདྷི ཨཱཙརིཡེན ཝིབྷཏྟོ, ཨམྷེཧི ཙ ཉཱཏོ, ‘‘ཀཐཾ ཨཱརམྨཎཝསེན ¶ ཝིབྷཏྟོ’’ཏི པུཙྪིཏབྦཏྟཱ ‘‘དས ཀསིཎཱཡཏནཱནཱི’’ཏིཨཱདི ཝུཏྟཾ. ཨིམེཧི དསཧི ཨཱརམྨཎེཧི ཀསིཎེཧིཔི སམཱདྷི ཝིཙིནིཏྭཱ ཝེདིཏབྦོཏི. ‘‘ཏེསུ དསསུ ཀིཏྟཀོ སམཐོ, ཀིཏྟཀཱ ཝིཔསྶནཱ’’ཏི པུཙྪིཏབྦཏྟཱ ‘‘ཏཏྠ ཡཉྩཱ’’ཏིཨཱདི ཝུཏྟཾ. ཀསིཎནྟི ཙ ཀསིཎམཎྜལམྤི པརིཀམྨམྤི པཊིབྷཱགནིམིཏྟམྤི ཏསྨིཾ པཊིབྷཱགནིམིཏྟེ ཨུཔྤནྣཛ྄ཛྷཱནམྤི ཝུཙྩཏི, ཨིདྷ པན སསམྤཡུཏྟཛ྄ཛྷཱནམེཝ ཨདྷིཔྤེཏཾ.

‘‘ཀིཾ པན ཝུཏྟཔྤཀཱརོ སམཱདྷིཡེཝ སམཐཝིཔསྶནཱཡ ཡོཛེཏབྦོ, ཨུདཱཧུ ཨཉྙོཔི ཡོཛེཏབྦོ’’ཏི ཝཏྟབྦཏྟཱ སཏིཔཊྛཱནཱདིཔུབྦབྷཱགཔཊིཔདཱབྷེདེན ཨནེཀབྷེདབྷིནྣོ ནིརཝསེསོ ཨརིཡམགྒོཔི ཝིཙཡིཏྭཱ ཡོཛེཏབྦོཏི དསྶེཏུཾ ‘‘ཨེཝཾ སབྦོ’’ཏིཨཱདི ཝུཏྟཾ. ཏཏྠ ཨེཝནྟི མཡཱ ཝུཏྟནཡེན ཝུཏྟནཡཱནུསཱརེན སབྦོ ནིརཝསེསོ སཏིཔཊྛཱནཱདིཔུབྦབྷཱགཔཊིཔདཱབྷེདེན ཨནེཀབྷེདབྷིནྣོ ཨརིཡོ མགྒོ ཡོཛེཏབྦོ. ཀཐཾ? ཡེན ཡེན ཨནབྷིཛ྄ཛྷཱདིཨཱཀཱརེན པཙྩུཔྤནྣསུཁཏཱདིཨཱཀཱརེན ¶ སམཱདྷི མཡཱ ཝུཏྟོ, ཏེན ཏེན ཨནབྷིཛ྄ཛྷཱདིཨཱཀཱརེན པཙྩུཔྤནྣསུཁཏཱདིཨཱཀཱརེན ཡོ ཡོ ཨརིཡམགྒོ སམཐེན ཡོཛེཏུཾ སམྦྷཝཏི, སོ སོ ཨརིཡམགྒོ སམཐེན ཝིཙཡིཏྭཱ ཡོཛཡིཏབྦོ. ཡོ ཡོ ཨརིཡམགྒོ ཝིཔསྶནཱཡ ཡོཛེཏུཾ སམྦྷཝཏི, སོ སོ ཨརིཡམགྒོ ཝིཔསྶནཱཡ ཡོཛཡིཏྭཱ ཡོཛཡིཏབྦོཏི ཨཏྠོ གཧེཏབྦོ.

‘‘ཡེཧི སམཐཱདྷིཊྛཱནེཧི ཝིཔསྶནཱདྷམྨེཧི ཡོཛཡིཏབྦོ, ཏེ སམཐཱདྷིཊྛཱནཱ ཝིཔསྶནཱདྷམྨཱ ཀཏམེཧི དྷམྨེཧི སངྒཧིཏཱ’’ཏི པུཙྪིཏབྦཏྟཱ ‘‘ཏེ ཏཱིཧི དྷམྨེཧི སངྒཧིཏཱ ཨནིཙྩཏཱཡ དུཀྑཏཱཡ ཨནཏྟཏཱཡཱ’’ཏི ཝུཏྟཾ, ཏེ སམཐཱདྷིཊྛཱནཱ ཝིཔསྶནཱདྷམྨཱ ‘‘ཨནིཙྩཏཱཡ པཉྙཱཡ དུཀྑཏཱཡ པཉྙཱཡ ཨནཏྟཏཱཡ པཉྙཱཡཱ’’ཏི ཏཱིཧི ཨནུཔསྶནཱདྷམྨེཧི སངྒཧིཏཱ གཎྷིཏཱཏི ཨཏྠོ. ཨནིཙྩཏཱདིནཱ སཧཙརཎཏོ ཨནུཔསྶནཱཔཉྙཱཔི ‘‘ཨནིཙྩཏཱ དུཀྑཏཱ ཨནཏྟཏཱ’’ཏི ཝུཙྩཏི.

‘‘ཡོ ཡོགཱི པུགྒལོ སམཐཱདྷིཊྛཱནཾ ཝིཔསྶནཾ བྷཱཝཡམཱནོ ཧོཏི, སོ ཡོགཱི པུགྒལོ ཀིཾ བྷཱཝཡཏཱི’’ཏི པུཙྪིཏབྦཏྟཱ ‘‘སོ སམཐཝིཔསྶནཾ བྷཱཝཡམཱནོ’’ཏིཨཱདི ཝུཏྟཾ.

སམཐཝིཔསྶནཱདཱིནི བྷཱཝཡམཱནོ པུགྒལོ རཱགཙརིཏོ དོསཙརིཏོ མོཧཙརིཏོཏི ཏིཝིདྷོ, ‘‘ཏཏྠ ཀཏམོ པུགྒལོ ཀཏམེན ཀཏམེན ཝིམོཀྑམུཁེན ནིཡྻཱཏི, ཀཏམཱཡཾ ཀཏམཱཡཾ སིཀྑནྟོ, ཀཏམཾ ཀཏམཾ པཛཧནྟོ, ཀཏམཾ ཀཏམཾ ཨནུཔགཙྪནྟོ, ཀཏམཾ ཀཏམཾ པརིཛཱནནྟོ, ཀཏམཾ ཀཏམཾ པཝཱཧེནྟོ, ཀཏམཾ ཀཏམཾ ནིདྡྷུནནྟོ, ཀཏམཾ ཀཏམཾ ཝམེནྟོ, ཀཏམཾ ཀཏམཾ ནིབྦཱཔེནྟོ, ཀཏམཾ ཀཏམཾ ཨུཔྤཱཊེནྟོ, ཀཏམཾ ཀཏམཾ ཝིཛཊེནྟོ ནིཡྻཱཏཱི’’ཏི པུཙྪིཏབྦཏྟཱ ¶ ‘‘རཱགཙརིཏོ པུགྒལོ’’ཏིཨཱདི ཝུཏྟཾ. ཨཊྛཀཐཱཡཾ པན ‘‘ཨིདཱནི ཡེསཾ པུགྒལཱནཾ ཡཏྠ སིཀྑནྟཱནཾ ཝིསེསཏོ ནིཡྻཱནམུཁཱནི, ཡེསཉྩ ཀིལེསཱནཾ པཊིཔཀྑབྷཱུཏཱནི ཏཱིཎི ཝིམོཀྑམུཁཱནི, ཏེཧི སདྡྷིཾ ཏཱནི དསྶེཏུཾ ‘རཱགཙརིཏོ’ཏིཨཱདི ཝུཏྟ’’ནྟི ཝུཏྟཾ. ཏསྶཏྠོཔི ཨཊྛཀཐཱཡཾ (ནེཏྟི. ཨཊྛ. ༥༥) ཝུཏྟོཡེཝ.

‘‘ཀསྨཱ ¶ ཏཱིཎི ཝིམོཀྑམུཁཱནི བྷཱཝཡནྟོ ཏཡོ ཁནྡྷེ བྷཱཝཡཏཱི’’ཏི ཝཏྟབྦཏྟཱ ‘‘ཏཏྠ སུཉྙཏཝིམོཀྑམུཁ’’ནྟིཨཱདི ཝུཏྟཾ. ཏཏྠཱཏི ཏེསུ ཏཱིསུ ཝིམོཀྑམུཁེསུ. སུཉྙཏཝིམོཀྑམུཁཾ པཉྙཱཀྑནྡྷོ ཨནཏྟཱནུཔསྶནཱཡ པཉྙཱཔདྷཱནཏྟཱ. ཨནིམིཏྟཝིམོཀྑམུཁཾ སམཱདྷིཀྑནྡྷོ ཨནིཙྩཱནུཔསྶནཱཡ སམཱདྷིཔདྷཱནཏྟཱ. ཨཔྤཎིཧིཏཝིམོཀྑམུཁཾ སཱིལཀྑནྡྷོ དུཀྑཱནུཔསྶནཱཡ སཱིལཔདྷཱནཏྟཱ. ཨིཏི ཏཱིཧི ཝིམོཀྑམུཁེཧི ཏིཎྞཾ ཁནྡྷཱནཾ སངྒཧིཏཏྟཱ ཏཱིཎི ཝིམོཀྑམུཁཱནི བྷཱཝཡནྟོ སོ ཡོགཱི པུགྒལོ ཏཡོ ཁནྡྷེ བྷཱཝཡཏིཡེཝཱཏི པཉྙཱཔདྷཱནཱདིབྷཱཝོ ཨཊྛཀཐཱཡཾ (ནེཏྟི. ཨཊྛ. ༥༥) ཝུཏྟོ. ཏཡོ ཁནྡྷེ བྷཱཝཡནྟོ ཨརིཡཾ ཨཊྛངྒིཀཾ མགྒཾ བྷཱཝཡཏི. ‘‘ཀསྨཱ བྷཱཝཡཏཱི’’ཏི ཝཏྟབྦཏྟཱ ཀཱརཎཾ དསྶེཏུཾ ‘‘ཏཏྠ ཡཱ’’ཏིཨཱདི ཝུཏྟཾ.

ཏིཎྞཾ ཁནྡྷཱནཾ ཨརིཡཨཊྛངྒིཀམགྒབྷཱཝོ ཝིབྷཏྟོ, ཨམྷེཧི ཙ ཛཱནིཏོ, ‘‘ཀཐཾ སམཐཝིཔསྶནཱབྷཱཝོ ཛཱནིཏབྦོ’’ཏི ཝཏྟབྦཏྟཱ ཏིཎྞཾ ཁནྡྷཱནཾ སམཐཝིཔསྶནཱབྷཱཝཾ དསྶེཏུཾ ‘‘ཏཏྠ སཱིལཀྑནྡྷོ ཙཱ’’ཏིཨཱདི ཝུཏྟཾ. ‘‘ཡོ ཡོགཱི པུགྒལོ སམཐཝིཔསྶནཾ བྷཱཝེཏི, ཏསྶ ཡོགིནོ པུགྒལསྶ བྷཝངྒཱནི ཀཏམཾ བྷཱཝནཾ གཙྪནྟཱི’’ཏི པུཙྪིཏབྦཏྟཱ ‘‘ཡོ སམཐཝིཔསྶནཾ བྷཱཝེཏི, ཏསྶཱ’’ཏིཨཱདི ཝུཏྟཾ. ཀཱཡོ ཙ ཙིཏྟཉྩ དྭེ བྷཝངྒཱནི ཨུཔཔཏྟིབྷཝསྶ ཨངྒཱནི བྷཱཝནཾ ཝཌྜྷནཾ གཙྪནྟི. སཱིལཉྩ སམཱདྷི ཙ དྭེ པདཱནི དྭེ པཱདཱ བྷཝནིརོདྷགཱམིནཱི པཊིཔདཱ བྷཱཝནཾ ཝཌྜྷནཾ གཙྪནྟི.

‘‘ཀཐཾ གཙྪནྟཱི’’ཏི ཝཏྟབྦཏྟཱ ‘‘སོ ཧོཏི བྷིཀྑཱུ’’ཏིཨཱདི ཝུཏྟཾ. བྷཱཝིཏཀཱཡོཏི བྷཱཝིཏོ ཀཱཡོ ཀཱཡཨཱབྷིསམཱཙཱརིཀོ, ཀཱཡསཾཝརོ ཝཱ ཡེན བྷིཀྑུནཱཏི བྷཱཝིཏཀཱཡོ. སེསེསུཔི ཨེས ནཡོ. ཀཱཡེ ཀཱཡཨཱབྷིསམཱཙཱརིཀེ, ཀཱཡསཾཝརེ ཝཱ བྷཱཝིཡམཱནེ སཏི སམྨཱཀམྨནྟོ, སམྨཱཝཱཡཱམོ ཙ དྭེ དྷམྨཱ བྷཱཝནཾ གཙྪནྟི ཀཱཡསམཱཙཱརསཱིལཏྟཱ. སཱིལེ ཝཱཙཱསཾཝརཨཱཛཱིཝསཾཝརཝསེན པཝཏྟེ སཱིལེ བྷཱཝིཡམཱནེ སཏི སམྨཱཝཱཙཱ ཙ སམྨཱཨཱཛཱིཝོ ཙ དྭེ དྷམྨཱ བྷཱཝནཾ གཙྪནྟི ཝཱཙཱདིསཾཝརསཱིལཏྟཱ. ཙིཏྟེ ཙིཏྟསཾཝརཝསེན པཝཏྟེ ཙིཏྟེ བྷཱཝིཡམཱནེ སཏི སམྨཱསཏི ཙ སམྨཱསམཱདྷི ཙ དྭེ དྷམྨཱ བྷཱཝནཾ གཙྪནྟི ཙིཏྟསཾཝརསཱིལཏྟཱ. པཉྙཱཡ བྷཱཝིཡམཱནཱཡ སཏི ¶ སམྨཱདིཊྛི ཙ སམྨཱསངྐཔྤོ ¶ ཙ དྭེ དྷམྨཱ བྷཱཝནཾ གཙྪནྟི སམཱནཏྟཱ, ཨུཔཀཱརཀཏྟཱ ཙ. སམྨཱསངྐཔྤེན ཧི པུནཔྤུནཾ སངྐཔྤནྟསྶ པཉྙཱ ཝཌྜྷཏཱིཏི.

‘‘སམྨཱཀམྨནྟོ ཙ སམྨཱཝཱཡཱམོ ཙ དྭེ དྷམྨཱ ཀཱཡཝསེནེཝ ཝིབྷཏྟཱ ཝིཙེཏབྦཱ ཀིཾ, ཨུདཱཧུ ཙིཏྟཝསེན ཝིབྷཏྟཱ ཝིཙེཏབྦཱ ཀི’’ནྟི པུཙྪིཏབྦཏྟཱ ‘‘ཏཏྠ ཡོ ཙ སམྨཱཀམྨནྟོ’’ཏིཨཱདི ཝུཏྟཾ. ཀཱཡསུཙརིཏཙེཏནཱབྷཱུཏོ ཡོ ཙ སམྨཱཀམྨནྟོ, ཏཾསཧིཏོ ཡོ ཙ སམྨཱཝཱཡཱམོ སིཡཱ ཀཱཡིཀོ, ཝིརཏིབྷཱུཏོ ཡོ ཙ སམྨཱཀམྨནྟོ, ཏཾསཧིཏོ ཡོ ཙ སམྨཱཝཱཡཱམོ སིཡཱ ཙེཏསིཀོ, ཏཏྠ ཏེསུ ཀཱཡིཀཙེཏསིཀབྷཱུཏེསུ སམྨཱཀམྨནྟསམྨཱཝཱཡཱམེསུ ཡོ སམྨཱཀམྨནྟསམྨཱཝཱཡཱམོ ཀཱཡསངྒཧོ, སོ སམྨཱཀམྨནྟསམྨཱཝཱཡཱམོ ཀཱཡེ ཀཱཡཨཱབྷིསམཱཙཱརིཀེ, ཀཱཡསཾཝརེ ཝཱ བྷཱཝིཏེ སཏི བྷཱཝནཾ གཙྪཏི. ཡོ སམྨཱཀམྨནྟསམྨཱཝཱཡཱམོ ཙིཏྟསངྒཧོ, སོ སམྨཱཀམྨནྟསམྨཱཝཱཡཱམོ ཙིཏྟེ ཙིཏྟསཾཝརེ བྷཱཝིཏེ སཏི བྷཱཝནཾ གཙྪཏཱིཏི ཡོཛནཱ.

‘‘སམཐཝིཔསྶནཾ བྷཱཝཡནྟོ སོ ཡོགཱི པུགྒལོ ཀིཏྟཀཾ ཨདྷིགམཾ གཙྪཏཱི’’ཏི ཝིཙཡིཏབྦཏྟཱ ‘‘སོ སམཐཝིཔསྶནཾ བྷཱཝཡནྟོ’’ཏིཨཱདི ཝུཏྟཾ. པཉྩཝིདྷཾ ཨརིཡམགྒཱདྷིགམཾ དསྶེཏུཾ ‘‘ཁིཔྤཱདྷིགམོ ཙཱ’’ཏིཨཱདི ཝུཏྟཾ. ཏསྶཏྠོ ཨཊྛཀཐཱཡཾ (ནེཏྟི. ཨཊྛ. ༥༥) ཝིབྷཏྟོ. ‘‘ཀེན ཀཏམོ ཨདྷིགམོ ཧོཏཱི’’ཏི པུཙྪིཏབྦཏྟཱ ‘‘ཏཏྠ སམཐེནཱ’’ཏིཨཱདི ཝུཏྟཾ.

༥༦. ‘‘ཨརཀྑིཏེན ཙིཏྟེནཱ’’ཏིཨཱདིསུཏྟཏྠོ ཝེནེཡྻཱནཾ ཨརཧཏྟཕལཝིམུཏྟིམུཁེན ཨཱཙརིཡེན ཝིཙཡིཏོ ཝིབྷཏྟོ, ཨམྷེཧི ཙ ཉཱཏོ, ‘‘དེསཀསྶ དསབལསམནྣཱགཏསྶ དས བལཱནི ཀཐཾ ཝིཙཡིཏབྦཱནཱི’’ཏི པུཙྪིཏབྦཏྟཱ ‘‘ཏཏྠ ཡོ དེསཡཏི, སོ དསབལསམནྣཱགཏོ’’ཏིཨཱདི ཝུཏྟཾ. ཨཊྛཀཐཱཡཾ པན –

‘‘ཨིཏི མཧཱཐེརོ ‘ཏསྨཱ རཀྑིཏཙིཏྟསྶཱ’ཏི གཱཐཱཡ ཝསེན ཨརཧཏྟཕལཝིམུཏྟིམུཁེན ཝིཙཡཧཱརསམྤཱཏཾ ནིདྡིསནྟོ, དེསནཱཀུསལཏཱཡ ཨནེཀེཧི སུཏྟཔྤདེསེཧི ཏསྶཱ པུབྦབྷཱགཔཊིཔདཱཡ བྷཱཝནཱཝིསེསཱནཾ བྷཱཝནཱནིསཾསཱནཉྩ ཝིབྷཛནཝསེན ནཱནཔྤཀཱརཏོ ཝིཙཡཧཱརཾ དསྶེཏྭཱ, ཨིདཱནི དསནྣཾ ¶ ཏཐཱགཏབལཱནམྤི ཝསེན ཏཾ དསྶེཏུཾ ‘ཏཏྠ ཡོ དེསཡཏཱི’ཏིཨཱདིམཱཧཱ’’ཏི –

ཝུཏྟཾ. ཏཏྠ ཏཏྠཱཏི ཏེསུ སམཐཝིཔསྶནཾ བྷཱཝཡནྟེསུ སཱསིཏབྦསཱསཀེསུ. དསབལསམནྣཱགཏོ ཡོ ¶ དེསཀོ སཏྠཱ ‘‘ཨརཀྑིཏེན ཙིཏྟེནཱ’’ཏིཨཱདིདྷམྨཾ དེསེཏི, ཨོཝཱདེན སཱཝཀེ ན ཝིསཾཝཱདཡཏི, ཏསྶ དེསཀསྶ སཏྠུནོ དས བལཱནི ཝིཙཡིཏབྦཱནཱིཏི ཡོཛནཱ.

‘‘ཀིནྟི དེསེཏཱི’’ཏི པུཙྪིཏབྦཏྟཱ ‘‘སོ ཏིཝིདྷ’’ནྟིཨཱདི ཝུཏྟཾ. ཏེསུ དསསུ ཏཐཱགཏབལེསུ ཋཱནཱཊྛཱནཉཱཎཾ པཋམཾ ཏཐཱགཏབལཾ ནཱམ, ‘‘ཏཾ བལཾ ཀཐཾ ཝིཙཡིཏབྦ’’ནྟི པུཙྪིཏབྦཏྟཱ ‘‘སོ ཏཐཱ ཨོཝདིཏོ’’ཏིཨཱདི ཝུཏྟཾ. ཨཏྠོ ཨཊྛཀཐཱཡཾ (ནེཏྟི. ཨཊྛ. ༥༦) ཝུཏྟོ, པཱལི༹ཝསེནཔི པཱཀཊོ. ‘‘ཨེཏཾ ཋཱནཾ ན ཝིཛྫཏཱི’’ཏི ཛཱནནཾ ཨཊྛཱནཉཱཎཾ ནཱམ, ‘‘ཨེཏཾ ཋཱནཾ ཝིཛྫཏཱི’’ཏི ཛཱནནཾ ཋཱནཉཱཎཾ ནཱམཱཏི ཋཱནཱཊྛཱནཱནཾ ཛཱནནཉཱཎཾ པཋམཾ ཏཐཱགཏབལཾ ཝིཙཡིཏབྦནྟི ཨདྷིཔྤཱཡོ ཝེདིཏབྦོ. (༡)

༥༧. ཋཱནཱཊྛཱནཉཱཎཾ པཋམཾ ཏཐཱགཏབལཾ ཨཱཙརིཡེན ཝིཙཡིཏཾ ཝིབྷཏྟཾ ཨམྷེཧི ཙ ཉཱཏཾ, ‘‘ཀཐཾ སབྦཏྠགཱམིནིཔཊིཔདཱཉཱཎཾ དུཏིཡཏཐཱགཏབལཾ ཝིཙཡིཏབྦ’’ནྟི པུཙྪིཏབྦཏྟཱ ‘‘ཨིཏི ཋཱནཱཊྛཱནཏཱ’’ཏི ཝུཏྟཾ. ‘‘ཨཡཾ པཊིཔདཱ ཨིམསྨིཾ བྷཝེ གཱམིནཱི, ཨཡཾ པཊིཔདཱ ཨིམསྨིཾ བྷཝེ གཱམིནཱི’’ཏི སབྦཏྠ གཱམིནིཡཱ པཊིཔདཱཡ ཛཱནནཉཱཎཾ སབྦཏྠགཱམིནིཔཊིཔདཱཉཱཎཾ ནཱམཱཏི སབྦཏྠགཱམིནིཔཊིཔདཱཉཱཎཾ དུཏིཡཾ ཏཐཱགཏབལཾ ཝིཙཡིཏབྦནྟི ཨདྷིཔྤཱཡོ. (༢)

༥༩. སབྦཏྠགཱམིནིཔཊིཔདཱཉཱཎཾ དུཏིཡཾ ཏཐཱགཏབལཾ ཨཱཙརིཡེན ཝིཙཡིཏཾ, ཨམྷེཧི ཙ ཉཱཏཾ, ‘‘ཀཐཾ ཨནེཀདྷཱཏུནཱནཱདྷཱཏུཉཱཎཾ ཏཏིཡཾ ཏཐཱགཏབལཾ ཝིཙཡིཏབྦ’’ནྟི པུཙྪིཏབྦཏྟཱ ‘‘ཨིཏི སབྦཏྠགཱམིནཱི པཊིཔདཱ’’ཏིཨཱདི ཝུཏྟཾ. ‘‘ཨཡཾ དྷཱཏུ ཙ ཨཡཾ དྷཱཏུ ཙ ཨནེཀདྷཱཏུ ནཱམ, ཨཡཾ དྷཱཏུ ཙ ཨཡཾ དྷཱཏུ ཙ ནཱནཱདྷཱཏུ ནཱམཱ’’ཏི ཨནེཀདྷཱཏུནཱནཱདྷཱཏཱུནཾ ཛཱནནཉཱཎཾ ཨནེཀདྷཱཏུནཱནཱདྷཱཏུཉཱཎཾ ནཱམཱཏི ཨནེཀདྷཱཏུནཱནཱདྷཱཏུཉཱཎཾ ཏཏིཡཾ ཏཐཱགཏབལཾ ཝིཙཡིཏབྦནྟི. (༣)

༦༠. ཨནེཀདྷཱཏུནཱནཱདྷཱཏུཉཱཎཾ ¶ ཏཏིཡཾ ཏཐཱགཏབལཾ ཨཱཙརིཡེན ཝིཙཡིཏཾ ཝིབྷཏྟཾ, ཨམྷེཧི ཙ ཉཱཏཾ, ‘‘ཀཐཾ སཏྟཱནཾ ནཱནཱདྷིམུཏྟིཀཏཱཉཱཎཾ ཙཏུཏྠཾ ཏཐཱགཏབལཾ ཝིཙཡིཏབྦ’’ནྟི པུཙྪིཏབྦཏྟཱ ‘‘ཨིཏི ཨནེཀདྷཱཏུནཱནཱདྷཱཏུཀསྶ ལོཀསྶཱ’’ཏིཨཱདི ཝུཏྟཾ. ‘‘ཨིམེ སཏྟཱ ཨེཝཾ ཨདྷིམུཏྟཱ, ཨིམེ སཏྟཱ ཨེཝཾ ཨདྷིམུཏྟཱ’’ཏི སཏྟཱནཾ ཨདྷིམུཙྩནཱནཾ ཛཱནནཉཱཎཾ སཏྟཱནཾ ནཱནཱདྷིམུཏྟིཀཏཱཉཱཎཾ ནཱམཱཏི སཏྟཱནཾ ནཱནཱདྷིམུཏྟིཀཏཱཉཱཎཾ ཙཏུཏྠཾ ཏཐཱགཏབལཾ ཝིཙཡིཏབྦནྟི. (༤)

སཏྟཱནཾ ¶ ནཱནཱདྷིམུཏྟིཀཏཱཉཱཎཾ ཙཏུཏྠཾ ཏཐཱགཏབལཾ ཨཱཙརིཡེན ཝིབྷཏྟཾ, ཨམྷེཧི ཙ ཉཱཏཾ, ‘‘ཀཐཾ ཝིཔཱཀཝེམཏྟཏཱཉཱཎཾ པཉྩམཾ ཏཐཱགཏབལཾ ཝིཙཡིཏབྦ’’ནྟི པུཙྪིཏབྦཏྟཱ ‘‘ཨིཏི ཏེ ཡཐཱདྷིམུཏྟཱ ཙཱ’’ཏིཨཱདི ཝུཏྟཾ. ‘‘ཨེཝཾ ཨདྷིམུཏྟཱནཾ སཏྟཱནཾ ཨིདཾ ཀམྨཾ ཀཎྷཾ, ཨིམསྶ ཀཎྷཀམྨསྶ ཨཡཾ ཝིཔཱཀོ. ཨིདཾ ཀམྨཾ སུཀྐཾ, ཨིམསྶ སུཀྐཀམྨསྶ ཨཡཾ ཝིཔཱཀོ’’ཏི ཨེཝམཱདཱིཧི ཝིཔཱཀཱནཾ ནཱནཏྟཛཱནནཉཱཎཾ ཝིཔཱཀཝེམཏྟཏཱཉཱཎཾ ནཱམཱཏི ཝིཔཱཀཝེམཏྟཏཱཉཱཎཾ པཉྩམཾ ཏཐཱགཏབལཾ ཝིཙཡིཏབྦནྟི.

༦༢. ཝིཔཱཀཝེམཏྟཏཱཉཱཎཾ པཉྩམཾ ཏཐཱགཏབལཾ ཨཱཙརིཡེན ཝིཙཡིཏཾ, ཨམྷེཧི ཙ ཉཱཏཾ, ‘‘ཀཐཾ ཛྷཱནཱནཾ སཾཀིལེསཝོདཱནཝུཊྛཱནཉཱཎཾ ཚཊྛཾ ཏཐཱགཏབལཾ ཝིཙཡིཏབྦ’’ནྟི པུཙྪིཏབྦཏྟཱ ‘‘ཨིཏི ཏཐཱ སམཱདིནྣཱན’’ནྟིཨཱདི ཝུཏྟཾ. ‘‘ཨེཝཾ སམཱདིནྣཱནཾ ཀམྨཱནཾ ཛྷཱནཱནཾ ཝིམོཀྑཱནཾ སམཱདྷཱིནཾ སམཱཔཏྟཱིནཾ ཨཡཾ སཾཀིལེསོ, ཨིདཾ ཝོདཱནཾ, ཨིདཾ ཝུཊྛཱནཾ, ཨེཝཾ སཾཀིལིསྶཏི, ཨེཝཾ ཝོདཱཡཏི, ཨེཝཾ ཝུཊྛཧཏཱི’’ཏི ཛྷཱནཱནཾ སཾཀིལེསཝོདཱནཝུཊྛཱནཱནཾ ཨནཱཝརཎཉཱཎཾ ཛྷཱནཱནཾ སཾཀིལེསཝོདཱནཝུཊྛཱནཉཱཎཾ ནཱམཱཏི ཛྷཱནཱནཾ སཾཀིལེསཝོདཱནཝུཊྛཱནཉཱཎཾ ཚཊྛཾ ཏཐཱགཏབལཾ ཝིཙཡིཏབྦནྟི. (༥)

༦༣. ཛྷཱནཱནཾ སཾཀིལེསཉཱཎཾ ཚཊྛཾ ཏཐཱགཏབལཾ ཨཱཙརིཡེན ཝིཙཡིཏཾ, ‘‘ཀཐཾ ཨིནྡྲིཡཔརོཔརིཡཏྟཝེམཏྟཏཱཉཱཎཾ སཏྟམཾ ཏཐཱགཏབལཾ ཝིཙཡིཏབྦ’’ནྟི པུཙྪིཏབྦཏྟཱ ‘‘ཨིཏི ཏསྶེཝ སམཱདྷིསྶཱ’’ཏིཨཱདི ཝུཏྟཾ. ‘‘ཨེཝཾ ཨཱདྷིཔཏེཡྻཊྛེན ཨིནྡྲིཡཱནི, ཨེཝཾ ཨཀམྤིཡཊྛེན བལཱནཱི’’ཏི ཛཱནནེན སཧ ‘‘ཨཡཾ མུདིནྡྲིཡོ, ཨཡཾ མཛ྄ཛྷིནྡྲིཡོ, ཨཡཾ ཏིཀྑིནྡྲིཡོ’’ཏི པརསཏྟཱནཾ པརཔུགྒལཱནཾ ཨིནྡྲིཡབལཱནཾ ཨམུདུམཛ྄ཛྷཱདྷིམཏྟཏཱཛཱནནཉཱཎཾཨམུདུམཛ྄ཛྷཱདྷིམཏྟཏཱཛཱནནཉཱཎཾ ཨིནྡྲིཡཔརོཔརིཡཏྟཝེམཏྟཏཱཉཱཎཾ ནཱམཱཏི ཨིནྡྲིཡཔརོཔརིཡཏྟཝེམཏྟཏཱཉཱཎཾ སཏྟམཾ ཏཐཱགཏབལཾ ཝིཙཡིཏབྦནྟི. (༦)

༦༤. ཨིནྡྲིཡཔརོཔརིཡཏྟཉཱཎཾ ¶ སཏྟམཾ ཏཐཱགཏབལཾ ཨཱཙརིཡེན ཝིཙཡིཏཾ, ‘‘ཀཐཾ པུབྦེནིཝཱསཱནུསྶཏིཉཱཎཾ ཨཊྛམཾ ཏཐཱགཏབལཾ ཝིཙཡིཏབྦཾ, ཀཐཾ དིབྦཙཀྑུཉཱཎཾ ནཝམཾ ཏཐཱགཏབལཾ ཝིཙཡིཏབྦ’’ནྟི པུཙྪིཏབྦཏྟཱ ‘‘ཨིཏི ཏཏྠ ཡཾ ཨནེཀཝིཧིཏ’’ནྟིཨཱདི ཝུཏྟཾ. ‘‘ཨེཀཾ ཛཱཏི’’ནྟིཨཱདིནཱ ཛཱཏིཝསེན ཝཱ ‘‘ཨེཝཾནཱམོ’’ཏིཨཱདིནཱ ནཱམགོཏྟཝཎྞཱཧཱརསུཁདུཀྑཔཊིསཾཝེདནཱཡ པརིཡནྟཝསེན ཝཱ སཱཀཱརསྶ སཨུདྡེསསྶ ཨནེཀཝིཧིཏཔུབྦེནིཝཱསསྶ ཏཾཏཾབྷཝསྶ ཨསེསཏོ ཛཱནནཉཱཎཾ པུབྦེནིཝཱསཱནུསྶཏིཉཱཎཾ ནཱམཱཏི པུབྦེནིཝཱསཱནུསྶཏིཉཱཎཾ ཨཊྛམཾ ཏཐཱགཏབལཾ ཝིཙཡིཏབྦནྟི. (༧)

ཙཝམཱནཨུཔཔཛྫམཱནཧཱིནཔཎཱིཏསུཝཎྞདུབྦཎྞསུགཏདུགྒཏཡཐཱཀམྨཱུཔགཱནཾ ¶ སཏྟཱནཾ ཨསེསཏོ ཙུཏཱུཔཔཱཏཱནཾ ཛཱནནཉཱཎཾ དིབྦཙཀྑུཉཱཎཾ ནཱམཱཏི དིབྦཙཀྑུཉཱཎཾ ནཝམཾ ཏཐཱགཏབལཾ ཝིཙཡིཏབྦནྟི. (༨-༩)

པུབྦེནིཝཱསཱདིཨཊྛམནཝམཾ ཏཐཱགཏབལཾ ཨཱཙརིཡེན ཝིཙཡིཏཾ ཝིབྷཏྟཾ, ‘‘ཀཐཾ སབྦཱསཝཀྑཡཉཱཎཾ དསམཾ ཏཐཱགཏབལཾ ཝིཙཡིཏབྦ’’ནྟི པུཙྪིཏབྦཏྟཱ ‘‘ཨིཏི ཏཏྠ ཡ’’ནྟིཨཱདི ཝུཏྟཾ. བོདྷིམཱུལེ སཾཀིལེསམཱརནིཧནཾ ཉཱཎཾ ཨུཔྤནྣཾ, ཨིདཾ ཀིལེསམཱརནིཧནཾ ཉཱཎཾ སབྦཱསཝཀྑཡཉཱཎཾ ནཱམཱཏི སབྦཱསཝཀྑཡཉཱཎཾ དསམཾ ཏཐཱགཏབལཾ ཝིཙཡིཏབྦནྟི ཨཡཾ སངྑེཔཏྠོ. ཝིཏྠཱརཏོ པན པཱལི༹ཏོ ཙ ཨཊྛཀཐཱཏོ ཙ ཡཏིཔོཏཱནམྤི པཱཀཊོ བྷཝེཡྻཱཏི མཉྙིཏྭཱ ན དསྶིཏོ.(༡༠)

‘‘ཨེཏྟཀོཝ ཝིཙཡཧཱརསམྤཱཏོ པརིཔུཎྞོ’’ཏི ཝཏྟབྦཏྟཱ ‘‘ནིཡུཏྟོ ཝིཙཡོ ཧཱརསམྤཱཏོ’’ཏི ཝུཏྟཾ. ཡེ ཡེ སུཏྟཔྤདེསཏྠཱ ཝུཏྟཱ, ཏེ ཏེ སུཏྟཔྤདེསཏྠཱ ཡེན ཡེན སཾཝཎྞནཱཝིསེསབྷཱུཏེན ཝིཙཡཧཱརསམྤཱཏེན ཝིཙཡིཏབྦཱ, སོ སོ སཾཝཎྞནཱཝིསེསབྷཱུཏོ ཝིཙཡཧཱརསམྤཱཏོ ནིཡུཏྟོ ཡཐཱརཧཾ ནཱིཧརིཏྭཱ ཡུཛྫིཏབྦོཏི ཨཏྠོ གཧེཏབྦོཏི.

ཨིཏི ཝིཙཡཧཱརསམྤཱཏེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན…པེ… གཧེཏབྦོཏི.

༣. ཡུཏྟིཧཱརསམྤཱཏཝིབྷཱཝནཱ

༦༥. ཡེན ¶ ཡེན ཝིཙཡཧཱརསམྤཱཏེན སུཏྟཔྤདེསཏྠཱ ཨཱཙརིཡེན ཝིཙཡིཏབྦཱ, ཨམྷེཧི ཙ ཉཱཏཱ, སོ ཝིཙཡཧཱརསམྤཱཏོ པརིཔུཎྞོ, ‘‘ཀཏམོ ཡུཏྟིཧཱརསམྤཱཏོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཡུཏྟིཧཱརསམྤཱཏོ’’ཏིཨཱདི ཝུཏྟཾ. ཨཊྛཀཐཱཡཾ པན – ‘‘ཨེཝཾ ནཱནཱནཡེཧི ཝིཙཡཧཱརསམྤཱཏཾ ཝིཏྠཱརེཏྭཱ ཨིདཱནི ཡུཏྟིཧཱརསམྤཱཏཱདཱིནི དསྶེཏུཾ ‘ཏཏྠ ཀཏམོ ཡུཏྟིཧཱརསམྤཱཏོ’ཏིཨཱདི ཨཱརདྡྷ’’ནྟི (ནེཏྟི. ཨཊྛ. ༦༥) ཝུཏྟཾ. ཏཏྠཱཏི ཏེསུ དེསནཱཧཱརསམྤཱཏཱདཱིསུ ¶ སོལ༹སསུ ཧཱརསམྤཱཏེསུ ཀཏམོ སཾཝཎྞནཱཝིསེསོ ཡུཏྟིཧཱརསམྤཱཏོ ནཱམཱཏི པུཙྪཏི, པུཙྪིཏྭཱ ཡསྨིཾ སུཏྟཔྤདེསེ ཝུཏྟཱནཾ ཨཏྠཱནཾ ཡུཏྟིབྷཱཝོ ཝིཙཱརེཏབྦོ, ཏཾ སུཏྟཔྤདེསཾ ནཱིཧརིཏུཾ –

‘‘ཏསྨཱ རཀྑིཏཙིཏྟསྶ, སམྨཱསངྐཔྤགོཙརོ;

སམྨཱདིཊྛིཔུརེཀྑཱརོ, ཉཏྭཱན ཨུདཡབྦཡཾ;

ཐིནམིདྡྷཱབྷིབྷཱུ བྷིཀྑུ, སབྦཱ དུགྒཏིཡོ ཛཧེ’’ཏི. (ཨུདཱ. ༣༢; ནེཏྟི. ༣༡, ༧༨) –

ཝུཏྟཾ. ཏསྶཾ གཱཐཱཡཾ ཏསྨཱ ཨརཀྑིཏཙིཏྟསྶ མཱརཝསཱནུགཏཏྟཱ སཏིསཾཝརཨིནྡྲིཡསཾཝརཱདིཝསེན བྷིཀྑུ རཀྑིཏཙིཏྟོ ཨསྶ བྷཝེཡྻ, ཏསྨཱ ཀཱམཝིཏཀྐཱདིམིཙྪཱསངྐཔྤགོཙརསྶ མཱརཝསཱནུགཏཏྟཱ ནེཀྑམྨསངྐཔྤཱདིཝསེན བྷིཀྑུ སམྨཱསངྐཔྤགོཙརོ ཨསྶ བྷཝེཡྻ, ཏསྨཱ མིཙྪཱདིཊྛིཧཏཙིཏྟསྶ མཱརཝསཱནུགཏཏྟཱ ཡོནིསོམནསིཀཱརེན བྷིཀྑུ ཨུདཡབྦཡཾ ཉཏྭཱན སམྨཱདིཊྛིཔུརེཀྑཱརོ ཨསྶ བྷཝེཡྻ, ཏསྨཱ ཐིནམིདྡྷེན ཧཏཙིཏྟསྶ མཱརཝསཱནུགཏཏྟཱ ཝཱིརིཡཝསེན བྷིཀྑུ ཐིནམིདྡྷཱབྷིབྷཱུ ཨསྶ བྷཝེཡྻ, ཏཱདིསོ བྷིཀྑུ སབྦཱ དུགྒཏིཡོ ཛཧེ ཛཧིསྶཏཱིཏི ཨཏྠོ ཝེདིཏབྦོ.

‘‘ཏསྶཾ གཱཐཱཡཾ ཀཐཾ ཡུཏྟིབྷཱཝོ ཝིཙཱརེཏབྦོ’’ཏི ཝཏྟབྦཏྟཱ ‘‘ཏསྨཱ རཀྑིཏཙིཏྟསྶཱ’’ཏིཨཱདི ཝུཏྟཾ. རཀྑིཏཙིཏྟསྶ སམྨཱསངྐཔྤགོཙརོ བྷཝིསྶཏཱིཏི ཨཏྠོ ཡུཛྫཏི ཨེཝ, ནོ ན ཡུཛྫཏི. མིཙྪཱསངྐཔྤཱནམྤི ཛཧིཏཏྟཱ སམྨཱདིཊྛིཔུརེཀྑཱརོ ཧུཏྭཱ ཝིཧརནྟོ ཨུདཡབྦཡཾ པཊིཝིཛ྄ཛྷིསྶཏཱིཏི ཨཏྠོ ཡུཛྫཏི སམྨཱདིཊྛིཔུརེཀྑཱརསྶ ཨུདཡབྦཡཱནུཔསྶནཱསམྦྷཝཏོ. ཨུདཡབྦཡཾ པཊིཝིཛ྄ཛྷནྟོ སབྦཱ དུགྒཏིཡོ ཛཧིསྶཏཱིཏི ཨཏྠོ ¶ ཡུཛྫཏི ཨུདཡབྦཡཱནུཔསྶནཱནུཀྐམེན ཨརིཡམགྒསམྦྷཝཏོ. སབྦཱ དུགྒཏིཡོ ཛཧནྟོ སབྦཱནི དུགྒཏིཝིནིཔཱཏབྷཡཱནི སམཏིཀྐམིསྶཏཱིཏི ཨཏྠོ ཡུཛྫཏི སབྦེསཾ དུགྒཏིཝིནིཔཱཏབྷཡཱནཾ ཨནུཔྤཛྫནཏོ.

‘‘ཨེཏྟཀོཝ ཡུཏྟིཧཱརསམྤཱཏོ པརིཔུཎྞོ’’ཏི ཝཏྟབྦཏྟཱ ‘‘ནིཡུཏྟོ ཡུཏྟིཧཱརསམྤཱཏོ’’ཏི ཝུཏྟཾ. ཡེན ཡེན སཾཝཎྞནཱཝིསེསབྷཱུཏེན ཡུཏྟིཧཱརསམྤཱཏེན སུཏྟཔྤདེསཏྠཱནཾ ཡུཏྟིབྷཱཝོ ཝིཙཱརེཏབྦོ ¶ , སོ སོ སཾཝཎྞནཱཝིསེསབྷཱུཏོ ཡུཏྟིཧཱརསམྤཱཏོ ནིཡུཏྟོ ཡཐཱརཧཾ ནིདྡྷཱརེཏྭཱ ཡུཛྫིཏབྦོཏི ཨཏྠོ གཧེཏབྦོཏི.

ཨིཏི ཡུཏྟིཧཱརསམྤཱཏེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན…པེ… གཧེཏབྦོཏི.

༤. པདཊྛཱནཧཱརསམྤཱཏཝིབྷཱཝནཱ

༦༦. ཡེན ཡེན ཡུཏྟིཧཱརསམྤཱཏེན སུཏྟཔྤདེསཏྠཱནཾ ཡུཏྟིབྷཱཝོ ཨཱཙརིཡེན ཝིབྷཱཝིཏོ, ཨམྷེཧི ཙ ཉཱཏོ, སོ ཡུཏྟིཧཱརསམྤཱཏོ པརིཔུཎྞོ, ‘‘ཀཏམོ པདཊྛཱནཧཱརསམྤཱཏོ’’ཏི པུཙྪིཏབྦཏྟཱ ‘‘ཏཏྠ ཀཏམོ པདཊྛཱནོ ཧཱརསམྤཱཏོ’’ཏི པུཙྪཏི.

པུཙྪིཏྭཱ ཡསྨིཾ སུཏྟཔྤདེསེ ཝུཏྟཱནི པདཊྛཱནཱནི ནཱིཧརིཏཱནི, ཏཾ སུཏྟཔྤདེསཾ ནཱིཧརིཏུཾ ‘‘ཏསྨཱ རཀྑིཏཙིཏྟསྶ, སམྨཱསངྐཔྤགོཙརོཏི གཱཐཱ’’ཏི ཝུཏྟཱ. གཱཐཱཏྠོ ཝུཏྟོཝ. ‘‘ཀཏམེ གཱཐཱཏྠཱ ཀཏམེསཾ དྷམྨཱནཾ པདཊྛཱནཱནཱི’’ཏི པུཙྪིཏབྦཏྟཱ ‘‘ཏསྨཱ རཀྑིཏཙིཏྟསྶཱ’’ཏིཨཱདི ཝུཏྟཾ. ‘‘ཏསྨཱ རཀྑིཏཙིཏྟསྶཱ’’ཏི སུཏྟཔྤདེསསྶ ཨཏྠབྷཱུཏཱ ཨིནྡྲིཡེསུ གུཏྟདྭཱརཏཱ ཏིཎྞཾ སུཙརིཏཱནཾ པདཊྛཱནཾ ནཱམ སུཙརིཏཔཱརིཔཱུརིཡཱ ཨཱསནྣཀཱརཎཏྟཱ. ‘‘སམྨཱསངྐཔྤགོཙརོ’’ཏི སུཏྟཔྤདེསསྶ ཨཏྠབྷཱུཏཱ ནེཀྑམྨསངྐཔྤཱདཡོ སམྨཱསངྐཔྤཱ སམཐསྶ པདཊྛཱནཾ ནཱམ ཀཱམཙྪནྡཨཱདིནཱིཝརཎཝིཀྑམྦྷནསྶ ཨཱསནྣཀཱརཎཏྟཱ. ‘‘སམྨཱདིཊྛིཔུརེཀྑཱརོ’’ཏི སུཏྟཔྤདེསསྶ ཨཏྠབྷཱུཏཱ ཀམྨསྶཀཏཱསམྨཱདིཊྛི ཙ སཔྤཙྩཡནཱམརཱུཔདསྶནསམྨཱདིཊྛི ¶ ཙ ཝིཔསྶནཱཡ པདཊྛཱནཾ ནཱམ ཨནིཙྩཱནུཔསྶནཱདཱིནཾ ཝིསེསཀཱརཎཏྟཱ. ‘‘ཉཏྭཱན ཨུདཡབྦཡ’’ནྟི སུཏྟཔྤདེསསྶ ཨཏྠབྷཱུཏཱ ཨུདཡབྦཡཱནུཔསྶནཱཔཉྙཱ དསྶནབྷཱུམིཡཱ པདཊྛཱནཾ ནཱམ པཋམམགྒཱདྷིགམསྶ ཨཱསནྣཀཱརཎཏྟཱ. ‘‘ཐིནམིདྡྷཱབྷིབྷཱུ བྷིཀྑཱུ’’ཏི སུཏྟཔྤདེསསྶ ཨཏྠབྷཱུཏཾ ཐིནམིདྡྷཱབྷིབྷཝནཾ ཝཱིརིཡསྶ པདཊྛཱནཾ ནཱམ ཨཱསནྣཀཱརཎཏྟཱ. ‘‘སབྦཱ དུགྒཏིཡོ ཛཧེ’’ཏི སུཏྟཔྤདེསསྶ ཨཏྠབྷཱུཏཱ པཧཱཏབྦཛཧནབྷཱཝནཱཡ ཨརིཡམགྒབྷཱཝནཱཡ པདཊྛཱནཾ ནཱམ པཧཱཏབྦཔྤཧཱནེན ཨརིཡམགྒབྷཱཝནཱཔཱརིཔཱུརིསམྦྷཝཏོ.

‘‘ཨེཏྟཀོཝ ¶ པདཊྛཱནཧཱརསམྤཱཏོ པརིཔུཎྞོ’’ཏི ཝཏྟབྦཏྟཱ ‘‘ནིཡུཏྟོ པདཊྛཱནོ ཧཱརསམྤཱཏོ’’ཏི ཝུཏྟཾ. ཡེན ཡེན སཾཝཎྞནཱཝིསེསབྷཱུཏེན པདཊྛཱནཧཱརསམྤཱཏབྷཱུཏེན སུཏྟཔྤདེསཏྠཱནི པདཊྛཱནཱནི ནཱིཧརིཏཱནི, སོ སོ སཾཝཎྞནཱཝིསེསབྷཱུཏོ པདཊྛཱནཧཱརསམྤཱཏོ ནིཡུཏྟོ ཡཐཱརཧཾ ནིདྡྷཱརེཏྭཱ ཡུཛྫིཏབྦོཏི ཨཏྠོ གཧེཏབྦོཏི.

ཨིཏི པདཊྛཱནཧཱརསམྤཱཏེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན…པེ… གཧེཏབྦོཏི.

༥. ལཀྑཎཧཱརསམྤཱཏཝིབྷཱཝནཱ

༦༧. ཡེན ཡེན པདཊྛཱནཧཱརསམྤཱཏེན སུཏྟཔྤདེསཏྠཱནི པདཊྛཱནཱནི ཨཱཙརིཡེན ནིདྡྷཱརིཏཱནི, ཨམྷེཧི ཙ ཉཱཏཱནི, སོ པདཊྛཱནཧཱརསམྤཱཏོ པརིཔུཎྞོ, ‘‘ཀཏམོ ལཀྑཎཧཱརསམྤཱཏོ’’ཏི པུཙྪིཏབྦཏྟཱ ‘‘ཏཏྠ ཀཏམོ ལཀྑཎོ ཧཱརསམྤཱཏོ’’ཏིཨཱདི ཝུཏྟཾ. ཏཏྠ ཏེསུ དེསནཱཧཱརསམྤཱཏཱདཱིསུ སོལ༹སསུ ཧཱརསམྤཱཏེསུ ཀཏམོ སཾཝཎྞནཱཝིསེསོ ལཀྑཎཧཱརསམྤཱཏོ ནཱམཱཏི པུཙྪཏི.

‘‘ཀཏམེཧི སུཏྟཏྠེཧི སམཱནལཀྑཎཱ ཀཏམེ དྷམྨཱ གཧིཏཱ’’ཏི པུཙྪིཏབྦཏྟཱ ‘‘ཏསྨཱ’’ཏིཨཱདི ཝུཏྟཾ. ‘‘ཏསྨཱ རཀྑིཏཙིཏྟསྶ, སམྨཱསངྐཔྤགོཙརོ’’ཏི སུཏྟཔྤདེསེན ཝུཏྟཾ ཨིདཾ རཀྑཎཾ སཏིནྡྲིཡཾ གཧིཏཾ, སཏིནྡྲིཡེ ¶ གཧིཏེ སདྡྷཱདིཔཉྩིནྡྲིཡཱནི གཧིཏཱནི བྷཝནྟི ཨིནྡྲིཡཊྛེན སམཱནལཀྑཎཏྟཱ. ‘‘སམྨཱདིཊྛིཔུརེཀྑཱརོ’’ཏི སུཏྟཔྤདེསེན ཝུཏྟཱ སམྨཱདིཊྛི གཧིཏཱ, སམྨཱདིཊྛིཡཱ གཧིཏཱཡ ཨརིཡོ ཨཊྛངྒིཀོ མགྒོ གཧིཏོ བྷཝཏི. ཏཾ ཀིསྶ ཧེཏཱུཏི ཀཱརཎཾ པུཙྪཏི. པུཙྪིཏྭཱ ཀཱརཎམཱཧ ‘‘སམྨཱདིཊྛིཏོ ཧཱི’’ཏིཨཱདིནཱ. སམྨཱདིཊྛིཧེཏུཏོ སམྨཱསངྐཔྤོ ཧི ཡསྨཱ པབྷཝཏི, ཏསྨཱ, སམྨཱསངྐཔྤཏོ སམྨཱཝཱཙཱ ཧི ཡསྨཱ པབྷཝཏི, ཏསྨཱ, སམྨཱཝཱཙཱཏོ སམྨཱཀམྨནྟོ ཧི ཡསྨཱ པབྷཝཏི, ཏསྨཱ, སམྨཱཀམྨནྟཏོ སམྨཱཨཱཛཱིཝོ ཧི ཡསྨཱ པབྷཝཏི, ཏསྨཱ, སམྨཱཨཱཛཱིཝཏོ སམྨཱཝཱཡཱམོ ཧི ཡསྨཱ པབྷཝཏི, ཏསྨཱ, སམྨཱཝཱཡཱམཏོ སམྨཱསཏིཧི ཡསྨཱ པབྷཝཏི, ཏསྨཱ, སམྨཱསཏིཏོ ¶ སམྨཱསམཱདྷི ཧི ཡསྨཱ པབྷཝཏི, ཏསྨཱ, སམྨཱསམཱདྷིཏོ སམྨཱཝིམུཏྟི ཧི ཡསྨཱ པབྷཝཏི, ཏསྨཱ, སམྨཱཝིམུཏྟིཏོ སམྨཱཝིམུཏྟིཉཱཎདསྶནཾ ཧི ཡསྨཱ པབྷཝཏི, ཏསྨཱ, ཨརིཡོ ཨཊྛངྒིཀོ མགྒོ གཧིཏོ བྷཝཏཱིཏི.

‘‘ཨེཏྟཀོཝ ལཀྑཎཧཱརསམྤཱཏོ པརིཔུཎྞོ’’ཏི ཝཏྟབྦཏྟཱ ‘‘ནིཡུཏྟོ ལཀྑཎོ ཧཱརསམྤཱཏོ’’ཏི ཝུཏྟཾ. ཡེན ཡེན སཾཝཎྞནཱཝིསེསབྷཱུཏེན ལཀྑཎཧཱརསམྤཱཏེན སུཏྟཔྤདེསཏྠཱ སམཱནལཀྑཎེན གཧིཏཱ བྷཝནྟི, སོ སོ སཾཝཎྞནཱཝིསེསབྷཱུཏོ ལཀྑཎཧཱརསམྤཱཏོ ནིཡུཏྟོ ཡཐཱརཧཾ ནིདྡྷཱརེཏྭཱ ཡུཛྫིཏབྦོཏི ཨཏྠོ གཧིཏོཏི.

ཨིཏི ལཀྑཎཧཱརསམྤཱཏེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན…པེ… གཧེཏབྦོཏི.

༦. ཙཏུབྱཱུཧཧཱརསམྤཱཏཝིབྷཱཝནཱ

༦༨. ཡེན ཡེན ལཀྑཎཧཱརསམྤཱཏེན སུཏྟཔྤདེསཏྠཱ སམཱནལཀྑཎེན གཧིཏཱ, སོ ལཀྑཎཧཱརསམྤཱཏོ པརིཔུཎྞོ, ‘‘ཀཏམོ ཙཏུབྱཱུཧཧཱརསམྤཱཏོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཙཏུབྱཱུཧོ ཧཱརསམྤཱཏོ’’ཏིཨཱདི ཝུཏྟཾ. ཏཏྠ ཏེསུ དེསནཱཧཱརསམྤཱཏཱདཱིསུ སོལ༹སསུ ཧཱརསམྤཱཏེསུ ཀཏམོ སཾཝཎྞནཱཝིསེསོ ཙཏུབྱཱུཧཧཱརསམྤཱཏོ ནཱམཱཏི པུཙྪཏི.

‘‘ཀཏམསྨིཾ ¶ སུཏྟེ ཀཏམེ ནིརུཏྱཱདྷིཔྤཱཡནིདཱནཔུབྦཱཔརཱནུསནྡྷཡོ ནིདྡྷཱརིཏཱ’’ཏི པུཙྪིཏབྦཏྟཱ ‘‘ཏསྨཱ’’ཏིཨཱདི ཝུཏྟཾ. ‘‘ཏསྨཱ རཀྑིཏཙིཏྟསྶཱ’’ཏི སུཏྟཔྤདེསེ ‘‘རཀྑཱིཡཏེ རཀྑིཏ’’ནྟི ནིརུཏྟིཾ ‘‘པརིཔཱལཱིཡཏཱི’’ཏི ཨིམིནཱ པརིཡཱཡེན དསྶེཏི, ཨིཏིསདྡསྶ ཨཱདྱཏྠཏྟཱ ‘‘ཙིནྟེཏཱིཏི ཙིཏྟཾ, ཨཏྟནོ སནྟཱནཾ ཙིནོཏཱིཏི ཙིཏྟཾ, པཙྩཡེཧི ཙིཏནྟི ཙིཏྟཾ, ཙིཏྟཝིཙིཏྟཊྛེན ཙིཏྟཾ, ཙིཏྟཀརཎཊྛེན ཙིཏྟཾ, རཀྑིཏཾ ཙིཏྟཾ ཡསྶཱཏི རཀྑིཏཙིཏྟོ. སམྨཱ སངྐཔྤེཏཱིཏི སམྨཱསངྐཔྤོ, གཱཝོ ཙརནྟི ཨེཏྠཱཏི གོཙརོ, གོཙརོ ཝིཡཱཏི གོཙརོ, སམྨཱསངྐཔྤོ གོཙརོ ཨསྶཱཏི སམྨཱསངྐཔྤགོཙརོ. སམྨཱ པསྶཏཱིཏི སམྨཱདིཊྛི, སམྨཱདིཊྛི པུརེཀྑཱརོ ¶ ཨསྶཱཏི སམྨཱདིཊྛིཔུརེཀྑཱརོ. ཛཱནཱཏཱིཏི ཉཏྭཱན. ཨུདཡོ ཙ ཝཡོ ཙ ཨུདཡབྦཡཾ. ཐིནཉྩ མིདྡྷཉྩ ཐིནམིདྡྷཾ, ཨབྷིབྷཝཏཱིཏི ཨབྷིབྷཱུ, ཐིནམིདྡྷཾ ཨབྷིབྷཱུཏི ཐིནམིདྡྷཱབྷིབྷཱུ. བྷིཀྑཏཱིཏི བྷིཀྑཱུ’’ཏི ནིརུཏྟིཔི ནཱིཧརིཏཱ. ཏེནཱཧ – ‘‘ཨིཏི-སདྡོ ཨཱདྱཏྠོ’’ཏི (ནེཏྟི. ཨཊྛ. ༦༨). ཨེསཱ ཝུཏྟཔྤཀཱརཱ པཉྙཏྟི ནིརུཏྟི ནཱམཱཏི ནཱིཧརིཏཱ.

ཨིདྷ སུཏྟཔྤདེསེ བྷགཝཏོ ཀོ ཨདྷིཔྤཱཡོཏི ཙེ པུཙྪེཡྻ, ཡེ སཔྤུརིསཱ སབྦཱཧི དུགྒཏཱིཧི པརིམུཙྩིཏུཀཱམཱ བྷཝིསྶནྟི, ཏེ སཔྤུརིསཱ དྷམྨཙཱརིནོ རཀྑིཏཙིཏྟཱ བྷཝིསྶནྟཱིཏི ཨཡཾ ཨདྷིཔྤཱཡོ. ཨེཏྠ ‘‘ཏསྨཱ རཀྑིཏཙིཏྟསྶཱ’’ཏིཨཱདིསུཏྟཔྤདེསེ བྷགཝཏོ ཨདྷིཔྤཱཡོཏི ནཱིཧརིཏབྦོ.

‘‘ཀཏམཾ ནིདཱན’’ནྟི ཙེ པུཙྪེཡྻ, ཀོཀཱལིཀོ སཱརིཔུཏྟམོགྒལླཱནེསུ ཐེརེསུ ཙིཏྟཾ ཨརཀྑིཏྭཱ པདོསཡིཏྭཱ མཧཱཔདུམནིརཡེ ཡསྨཱ ཨུཔཔནྣོ, ཡསྨཱ བྷགཝཱ ཙ སཏིཨཱརཀྑེན སམནྣཱགཏོ སབྦཱ དུགྒཏིཡོ ཛཧཏི, ཏསྨཱ ཙ སབྦཱ དུགྒཏིཡོ ཛཧིཏུཀཱམོ བྷིཀྑུ སཔྤུརིསོ རཀྑིཏཙིཏྟོ ཨསྶ བྷཝེཡྻཱཏི ནིདཱནཾ ནཱིཧརིཏབྦཾ.

‘‘ཀཏམོ པུབྦཱཔརསནྡྷཱི’’ཏི ཙེ པུཙྪེཡྻ, སུཏྟམྷི ‘‘སཏིཡཱ ཙིཏྟཾ རཀྑིཏབྦ’’ནྟི ཡཾ ཝཙནཾ ཝུཏྟཾ, ཏེན པུབྦཝཙནེན ཨཡཾ ‘‘ཏསྨཱ རཀྑིཏཙིཏྟསྶ…པེ… སབྦཱ དུགྒཏིཡོ ཛཧེ’’ཏི སུཏྟཔྤདེསོ ཨནུསནྡྷི སཾསནྡཏི སམེཏཱིཏི པུབྦཔརཱནུསནྡྷི ནིདྡྷཱརིཏབྦོཏི.

‘‘ཨེཏྟཀོཝ ¶ ཙཏུབྱཱུཧཧཱརསམྤཱཏོ པརིཔུཎྞོ’’ཏི ཝཏྟབྦཏྟཱ ‘‘ནིཡུཏྟོ ཙཏུབྱཱུཧོ ཧཱརསམྤཱཏོ’’ཏི ཝུཏྟཾ. ཡེན ཡེན སཾཝཎྞནཱཝིསེསབྷཱུཏེན ཙཏུབྱཱུཧཧཱརསམྤཱཏེན ནིརུཏྱཱདྷིཔྤཱཡནིདཱནཔུབྦཱཔརཱནུསནྡྷི ནིདྡྷཱརིཏབྦོ, སོ སོ སཾཝཎྞནཱཝིསེསབྷཱུཏོ ཙཏུབྱཱུཧཧཱརསམྤཱཏོ ནིཡུཏྟོ ཡཐཱརཧཾ ནིདྡྷཱརེཏྭཱ ཡུཛྫིཏབྦོཏི ཨཏྠོ གཧེཏབྦོཏི.

ཨིཏི ཙཏུབྱཱུཧཧཱརསམྤཱཏེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན…པེ… གཧེཏབྦོཏི.

༧. ཨཱཝཊྚཧཱརསམྤཱཏཝིབྷཱཝནཱ

༦༩. ཡེན ¶ ཡེན ཙཏུབྱཱུཧཧཱརསམྤཱཏེན ནིརུཏྱཱདྷིཔྤཱཡནིདཱནཔུབྦཱཔརཱནུསནྡྷཡོ ཝིབྷཏྟཱ, སོ ཙཏུབྱཱུཧཧཱརསམྤཱཏོ པརིཔུཎྞོ, ‘‘ཀཏམོ ཨཱཝཊྚཧཱརསམྤཱཏོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཨཱཝཊྚོ ཧཱརསམྤཱཏོ’’ཏིཨཱདི ཝུཏྟཾ. ཏཏྠ ཀཏམོ སཾཝཎྞནཱཝིསེསོ ཨཱཝཊྚཧཱརསམྤཱཏོ ནཱམཱཏི པུཙྪཏི.

‘‘ཀཏམེ སུཏྟཏྠཱ ཀཐཾ ཨཱཝཊྚེཏབྦཱ’’ཏི པུཙྪིཏབྦཏྟཱ ‘‘ཏསྨཱ’’ཏིཨཱདི ཝུཏྟཾ. ནེཀྑམྨསངྐཔྤསངྑཱཏསམྨཱསངྐཔྤབཧུལོ ཀསིཎཱདིཝསེན, ཨཝིཧིཾསཱསངྐཔྤསངྑཱཏསམྨཱསངྐཔྤབཧུལོ མེཏྟཱདིཝསེན ཨདྷིགཏཱཡ ཙིཏྟེཀགྒཏཱཡ ཙིཏྟཾ ཋཔེནྟོ སཾཀིལེསཏོ རཀྑིཏཙིཏྟོ ནཱམ ཧོཏི, ‘‘ཏསྨཱ རཀྑིཏཙིཏྟསྶ, སམྨཱསངྐཔྤགོཙརོ’’ཏི ཨིམིནཱ རཀྑིཏཙིཏྟེ ཝུཏྟེ སཏི ཡཱ ཨེཀགྒཏཱ ཨཱཝཊྚེཏབྦཱ, སཱ ཨཡཾ ཨེཀགྒཏཱ སམཐོ. ‘‘སམྨཱདིཊྛིཔུརེཀྑཱརོ’’ཏི ཨིམིནཱ སམྨཱདིཊྛིཔུརེཀྑཱརེ ཝུཏྟེ སཏི ཡཱ པཉྙཱ ཨཱཝཊྚེཏབྦཱ, སཱ ཨཡཾ པཉྙཱ ཝིཔསྶནཱ. ‘‘ཉཏྭཱན ཨུདཡབྦཡ’’ནྟི ཨིམིནཱ ཨུདཡབྦཡཉཱཎསམནྣཱགཏེ ཝུཏྟེ སཏི ཡཱ དུཀྑཔརིཛཱནནཱ ཨཱཝཊྚེཏབྦཱ, སཱ ཨཡཾ དུཀྑཔརིཛཱནནཱ དུཀྑཔརིཉྙཱ. ‘‘ཐིནམིདྡྷཱབྷིབྷཱུ བྷིཀྑཱུ’’ཏི ཨིམིནཱ པུགྒལཱདྷིཊྛཱནེན ཡཾ ཐིནམིདྡྷཱབྷིབྷཝནཾ ཝུཏྟཾ, ཨིདཾ ཐིནམིདྡྷཱབྷིབྷཝནཾ སམུདཡཔྤཧཱནཾ. ‘‘སམྨཱ དུགྒཏིཡོ ཛཧེ’’ཏི ཨིམིནཱ ཡོ སབྦདུགྒཏིཛཧནསངྑཱཏོ ཨནུཔྤཱདོ ཝུཏྟོ, སོ ཨཡཾ ཨནུཔྤཱདོ ¶ ནིརོདྷོ. ཨིཏི དུཀྑཔརིཉྙཱཡ པརིཉྙེཏབྦཾ དུཀྑསཙྩཾ ཨཱཝཊྚེཏབྦཾ, སམུདཡཔྤཧཱནེན པཧཱཏབྦཾ སམུདཡསཙྩཾ ཨཱཝཊྚེཏབྦཾ, ནིརོདྷེན ནིརོདྷསཙྩཾ ཨཱཝཊྚེཏབྦཾ, སམཐཝིཔསྶནཱཧི མགྒསཙྩཾ ཨཱཝཊྚེཏབྦནྟི ཨིམཱནི ཙཏྟཱརི སཙྩཱནི ཨཱཝཊྚེཏབྦཱནཱིཏི.

‘‘ཨེཏྟཀོཝ ཨཱཝཊྚོ ཧཱརསམྤཱཏོ པརིཔུཎྞོ’’ཏི ཝཏྟབྦཏྟཱ ‘‘ནིཡུཏྟོ ཨཱཝཊྚོ ཧཱརསམྤཱཏོ’’ཏི ཝུཏྟཾ. ཡེན ཡེན སཾཝཎྞནཱཝིསེསབྷཱུཏེན ཨཱཝཊྚཧཱརསམྤཱཏེན སམཐཱདཡོ ཨཱཝཊྚེཏབྦཱ ¶ , སོ སོ སཾཝཎྞནཱཝིསེསབྷཱུཏོ ཨཱཝཊྚཧཱརསམྤཱཏོ ནིཡུཏྟོ ཡཐཱརཧཾ ནིདྡྷཱརེཏྭཱ ཡུཛྫིཏབྦོཏི ཨཏྠོ གཧེཏབྦོཏི.

ཨིཏི ཨཱཝཊྚཧཱརསམྤཱཏེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན…པེ… གཧེཏབྦོཏི.

༨. ཝིབྷཏྟིཧཱརསམྤཱཏཝིབྷཱཝནཱ

༧༠. ཡེན ཡེན ཨཱཝཊྚཧཱརསམྤཱཏེན སུཏྟཏྠཱ ཨཱཝཊྚེཏབྦཱ, སོ ཨཱཝཊྚཧཱརསམྤཱཏོ པརིཔུཎྞོ, ‘‘ཀཏམོ ཝིབྷཏྟིཧཱརསམྤཱཏོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཝིབྷཏྟིཧཱརསམྤཱཏོ’’ཏིཨཱདི ཝུཏྟཾ. ཏཏྠ ཀཏམོ སཾཝཎྞནཱཝིསེསོ ཝིབྷཏྟིཧཱརསམྤཱཏོ ནཱམཱཏི པུཙྪཏི.

‘‘ཀཏམེ སུཏྟཏྠཱ ཀཏྠ ཝིབྷཏྟཱ’’ཏི པུཙྪིཏབྦཏྟཱ ‘‘ཏསྨཱ རཀྑིཏཙིཏྟསྶཱ’’ཏིཨཱདི ཝུཏྟཾ. ཡཱ ‘‘ཏསྨཱ…པེ… གོཙརོ’’ཏི གཱཐཱ ཝུཏྟཱ, ཏིསྶཾ གཱཐཱཡཾ ཝུཏྟོ ཀུསལཔཀྑོ དྷམྨོ ཀུསལཔཀྑེན དྷམྨེན སཏིསཾཝརོ དྷམྨོ ནིདྡིསིཏབྦོ ཝིབྷཛིཏབྦོ, ཨཀུསལཔཀྑེན དྷམྨེན ནིདྡིསིཏབྦོ ཝིབྷཛིཏབྦོ.

ཀཐཾ? ‘‘རཀྑིཏཙིཏྟསྶཱ’’ཏི པདེན ཝུཏྟོ ཀུསལཔཀྑོ སཏིསཾཝརོ དྷམྨོ ‘‘ཙཀྑུདྭཱརསཾཝརོ…པེ… མནོདྭཱརསཾཝརོ’’ཏི ཚབྦིདྷེན ཀུསལཔཀྑེན དྷམྨེན ནིདྡིསིཏབྦོ ཝིབྷཛིཏབྦོ. ‘‘སམྨཱསངྐཔྤོ’’ཏི པདེན ཝུཏྟོ ཀུསལཔཀྑོ སམྨཱསངྐཔྤོ དྷམྨོ ‘‘ནེཀྑམྨསངྐཔྤོ ཨབྱཱཔཱད-སངྐཔྤོ ཨཝིཧིཾསཱསངྐཔྤོ’’ཏི ཏིཝིདྷེན ཀུསལཔཀྑེན དྷམྨེན ¶ ཝིབྷཛིཏབྦོ. ‘‘སམྨཱདིཊྛིཔུརེཀྑཱརོ’’ཏི པདེན ཝུཏྟཱ ཀུསལཔཀྑཱ དྷམྨཛཱཏི ‘‘དུཀྑེ ཉཱཎཾ, དུཀྑསམུདཡེ ཉཱཎཾ, དུཀྑནིརོདྷེ ཉཱཎཾ, དུཀྑནིརོདྷགཱམིནིཔཊིཔདཱཡ ཉཱཎཾ, པུབྦནྟེ ཉཱཎཾ, ཨཔརནྟེ ཉཱཎཾ, པུབྦནྟཱཔརནྟེ ཉཱཎཾ, ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསུ ཉཱཎ’’ནྟི (དྷ. ས. ༡༠༦༣) ཨཊྛཝིདྷེན ཀུསལཔཀྑེན དྷམྨེན ཝིབྷཛིཏབྦཱ. ‘‘ཉཏྭཱན ཨུདཡབྦཡ’’ནྟི པདེན ཝུཏྟཾ ཀུསལཔཀྑཨུདཡབྦཡཉཱཎཾ དྷམྨཛཱཏཾ པཉྙཱསཝིདྷེན ཨུདཡབྦཡཉཱཎེན ཀུསལཔཀྑེན ཝིབྷཛིཏབྦཾ. ‘‘ཐིནམིདྡྷཱབྷིབྷཱུ’’ཏི པདེན ཝུཏྟཾ ཐིནམིདྡྷཱབྷིབྷཝནཾ ཀུསལཔཀྑཾ དྷམྨཛཱཏཾ ‘‘སོཏཱཔཏྟིམགྒཱབྷིབྷཝནཾ ¶ སཀདཱགཱམིམགྒཱབྷིབྷཝནཾ ཨནཱགཱམིམགྒཱབྷིབྷཝནཾ ཨརཧཏྟམགྒཱབྷིབྷཝན’’ནྟི ཙཏུབྦིདྷེན ཀུསལཔཀྑེན ཝིབྷཛིཏབྦཾ.

སཏིསཾཝརོ ཀུསལཔཀྑོ ‘‘ལོཀིཡོ སཏིསཾཝརོ, ལོཀུཏྟརོ སཏིསཾཝརོ’’ཏི དུབྦིདྷེན ཝིབྷཛིཏབྦོཏི. ལོཀིཡོ སཏིསཾཝརོ ཀཱམཱཝཙརོཝཱཏི ཨེཀཝིདྷེན ཝིབྷཛིཏབྦོ. ལོཀུཏྟརཱ སཏིསཾཝརོ ‘‘དསྶནབྷཱུམི, བྷཱཝནཱབྷཱུམཱི’’ཏི དུབྦིདྷེན ཝིབྷཛིཏབྦོ. ཀཱམཱཝཙརོ སཏིསཾཝརོ ‘‘ཀཱཡཱནུཔསྶནཱསཏིསཾཝརོ ཝེདནཱནུཔསྶནཱསཏིསཾཝརོ ཙིཏྟཱནུཔསྶནཱསཏིསཾཝརོ དྷམྨཱནུཔསྶནཱསཏིསཾཝརོ’’ཏི ཙཏུབྦིདྷེན ཝིབྷཛིཏབྦོ. ལོཀུཏྟརོ སཏིསཾཝརོཔི ཏཐཱ ཙཏུབྦིདྷེན ཝིབྷཛིཏབྦོ. སམྨཱསངྐཔྤསམྨཱདིཊྛིཡོཔི ལོཀིཡལོཀུཏྟརཝསེན དུབྦིདྷཱདིབྷེདེན ཝིབྷཛིཏབྦཱ. པདཊྛཱནེནཔི པདཊྛཱནཧཱརསམྤཱཏེ ཝུཏྟནཡེན ཝིབྷཛིཏབྦཱ.

ཨཀུསལཔཀྑེན ‘‘ཨརཀྑིཏེན ཙིཏྟེནཱ’’ཏི པདེན ཝུཏྟོ ཨསཾཝརོ ‘‘ཙཀྑུཨསཾཝརོ …པེ… ཀཱཡཨསཾཝརོ, ཙོཔནཀཱཡཨསཾཝརོ, ཝཱཙཱཨསཾཝརོ, མནོཨསཾཝརོ’’ཏི ཨཊྛཝིདྷེན ཝིབྷཛིཏབྦོ. ‘‘མིཙྪཱདིཊྛིཧཏེནཱ’’ཏི པདེན གཧིཏོ མིཙྪཱསངྐཔྤོ ‘‘ཀཱམཝིཏཀྐོ བྱཱཔཱདཝིཏཀྐོ ཝིཧིཾསཱཝིཏཀྐོ’’ཏི ཏིཝིདྷེན ཝིབྷཛིཏབྦོ. ‘‘མིཙྪཱདིཊྛཱི’’ཏི པདེན ཝུཏྟཱ མིཙྪཱདིཊྛི ‘‘དུཀྑེ ཨཉྙཱཎཾ…པེ…ཨིདཔྤཙྩཡཏཱཔཊིཙྩསམུཔྤནྣེསུ དྷམྨེསུ ཨཉྙཱཎ’’ནྟི ཨཊྛཝིདྷེན ཝིབྷཛིཏབྦཱ, དྭཱསཊྛིདིཊྛིཝིདྷེནཔི ཝིབྷཛིཏབྦཱ. ཐིནམིདྡྷཾ པཉྩཝིདྷེན སསངྑཱརིཀཝིདྷེན ཝིབྷཛིཏབྦཾ.

‘‘ཨེཏྟཀོཝ ཝིབྷཏྟིཧཱརསམྤཱཏོ པརིཔུཎྞོ’’ཏི ཝཏྟབྦཏྟཱ ‘‘ནིཡུཏྟོ ཝིབྷཏྟིཧཱརསམྤཱཏོ’’ཏི ཝུཏྟཾ. ཡེན ཡེན སཾཝཎྞནཱཝིསེསབྷཱུཏེན ཝིབྷཏྟིཧཱརསམྤཱཏེན སུཏྟཔྤདེསཏྠཱ ཝིབྷཏྟཱ, སོ སོ ¶ སཾཝཎྞནཱཝིསེསབྷཱུཏོ ཝིབྷཏྟིཧཱརསམྤཱཏོ ནིཡུཏྟོཏི ཡཐཱརཧ ནིདྡྷཱརེཏྭཱ ཡུཛྫིཏབྦོཏི ཨཏྠོ གཧེཏབྦོཏི.

ཨིཏི ཝིབྷཏྟིཧཱརསམྤཱཏེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན…པེ… གཧེཏབྦོཏི.

༩. པརིཝཏྟནཧཱརསམྤཱཏཝིབྷཱཝནཱ

༧༡. ཡེན ¶ ཡེན ཝིབྷཏྟིཧཱརསམྤཱཏེན སུཏྟཔྤདེསཏྠཱ ཝིབྷཏྟཱ, སོ ཝིབྷཏྟིཧཱརསམྤཱཏོ པརིཔུཎྞོ, ‘‘ཀཏམོ པརིཝཏྟནཧཱརསམྤཱཏོ’’ཏི པུཙྪིཏབྦཏྟཱ ‘‘ཏཏྠ ཀཏམོ པརིཝཏྟནོ ཧཱརསམྤཱཏོ’’ཏིཨཱདི ཝུཏྟཾ.

‘‘ཀཏམེ སུཏྟཔྤདེསཏྠཱ ཀཐཾ པརིཝཏྟེཏབྦཱ’’ཏི པུཙྪིཏབྦཏྟཱ ‘‘ཏསྨཱ’’ཏིཨཱདི ཝུཏྟཾ. ཡཱ ‘‘ཏསྨཱ…པེ… གོཙརོ’’ཏི གཱཐཱ ཝུཏྟཱ, ཏཱཡ གཱཐཱཡ ཡཱ སམཐཝིཔསྶནཱ ནིདྡྷཱརིཏཱ, ཏཱཡ སམཐཝིཔསྶནཱཡ བྷཱཝིཏཱཡ ཨཀུསལཱནཾ ནིརོདྷོ ཕལཾ པཡོཛནཾ ཧོཏི, པརིཉྙཱཏཾ དུཀྑཾ ཧོཏི, སམུདཡོ པཧཱིནོ ཧོཏི, མགྒོ བྷཱཝིཏོ ཧོཏཱིཏི པརིཝཏྟེཏབྦོ. པཊིཔཀྑེན པན སམཐཝིཔསྶནཱཡ ཨབྷཱཝིཏཱཡ ཨཀུསལཱནཾ ཨནིརོདྷོ, ཨཔརིཉྙཱཏཾ དུཀྑཾ, སམུདཡོ ཨཔྤཧཱིནོ, མགྒོ ཨབྷཱཝིཏོ ཧོཏཱིཏི པརིཝཏྟེཏབྦོ.

‘‘ཨེཏྟཀོཝ པརིཝཏྟནཧཱརསམྤཱཏོ པརིཔུཎྞོ’’ཏི ཝཏྟབྦཏྟཱ ‘‘ནིཡུཏྟོ པརིཝཏྟནོ ཧཱརསམྤཱཏོ’’ཏི ཝུཏྟཾ. ཡེན ཡེན སཾཝཎྞནཱཝིསེསབྷཱུཏེན པརིཝཏྟནཧཱརསམྤཱཏེན སུཏྟཔྤདེསཏྠཱ པརིཝཏྟེཏབྦཱ, སོ སོ སཾཝཎྞནཱཝིསེསབྷཱུཏོ པརིཝཏྟནཧཱརསམྤཱཏོ ནིཡུཏྟོ ཡཐཱརཧཾ ནཱིཧརིཏྭཱ ཡུཛྫིཏབྦོཏི ཨཏྠོ གཧེཏབྦོཏི.

ཨིཏི པརིཝཏྟནཧཱརསམྤཱཏེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན…པེ… གཧེཏབྦོཏི.

༡༠. ཝེཝཙནཧཱརསམྤཱཏཝིབྷཱཝནཱ

༧༢. ཡེན ¶ ཡེན པརིཝཏྟནཧཱརསམྤཱཏེན སུཏྟཔྤདེསཏྠཱ པརིཝཏྟེཏབྦཱ, སོ པརིཝཏྟནོ ཧཱརསམྤཱཏོཏི པརིཔུཎྞོ, ‘‘ཀཏམོ ཝེཝཙནོ ཧཱརསམྤཱཏོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཝེཝཙནོ ཧཱརསམྤཱཏོ’’ཏིཨཱདི ཝུཏྟཾ.

‘‘ཀཏམེསཾ ¶ སུཏྟཔྤདེསཏྠཱནཾ, སུཏྟཔདཱནཾ ཝཱ ཀཏམཱནི ཝེཝཙནཱནཱི’’ཏི པུཙྪིཏབྦཏྟཱ ‘‘ཏསྨཱ’’ཏིཨཱདི ཝུཏྟཾ. ཡཱ ‘‘ཏསྨཱ…པེ… གོཙརོ’’ཏི གཱཐཱ ཝུཏྟཱ, ཏཱཡ གཱཐཱཡ ‘‘རཀྑིཏཙིཏྟསྶཱ’’ཏི པདེན ཝུཏྟསྶ ཙིཏྟསྶ, ‘‘རཀྑིཏཙིཏྟསྶཱ’’ཏི ཨེཏྠ ཙིཏྟསྶ པདསྶ ཝཱ ‘‘ཙིཏྟཾ…པེ… ཝིཛཱནིཏཏྟ’’ནྟི ཡཾ ཝཙནཾ ཝུཏྟཾ, ཨིདཾ ཝཙནཾ ཝེཝཙནཾ, ‘‘མཱནསཾ ཧདཡ’’ནྟིཨཱདིཝཙནམྤི (དྷ. ས. ༡༧, ༦༣) ཙིཏྟསྶ ཝེཝཙནཾ. ‘‘སམྨཱསངྐཔྤགོཙརོ’’ཏི ཨེཏྠ སམྨཱསངྐཔྤསྶ ‘‘ནེཀྑམྨསངྐཔྤོ ཨབྱཱཔཱདསངྐཔྤོ ཨཝིཧིཾསཱསངྐཔྤོ’’ཏི ཡཾ ཝཙནཾ ཝུཏྟཾ, ཨིདཾ ཝཙནཾ ཝེཝཙནཾ, ‘‘ཏཀྐོ ཝིཏཀྐོ’’ཏིཨཱདི (དྷ. ས. ༧) ཝཙནམྤི སམྨཱསངྐཔྤསྶ ཝེཝཙནཾ. ‘‘སམྨཱདིཊྛིཔུརེཀྑཱརོ’’ཏི ཨེཏྠ སམྨཱདིཊྛིཔདསྶ ‘‘སམྨཱདིཊྛི ནཱམ པཉྙཱསཏྠཾ པཉྙཱཁགྒོ པཉྙཱརཏནཾ པཉྙཱཔཏོདོ པཉྙཱཔཱསཱདོ’’ཏི ཡཾ ཝཙནཾ ཝུཏྟཾ, ཨིདཾ ཝཙནཾ ཝེཝཙནཾ, ‘‘པཉྙཱ པཛཱནནཱ ཝིཙཡོ’’ཏིཨཱདི (དྷ. ས. ༡༦) ཝཙནམྤི སམྨཱདིཊྛིཔདསྶ ཝེཝཙནཾ. ‘‘ཐིནཾ ཐིཡནཱ ཐིཡིཏཏྟཾ ཙིཏྟསྶ, ཙིཏྟསྶ ཨཀལླཏཱ ཨཀམྨཉྙཏཱ ཨོནཱཧོ པརིཡོནཱཧོ ཨནྟོསངྐོཙོ’’ཏི (དྷ. ས. ༡༡༦༢-༡༡༦༣) ཡཾ ཝཙནཾ ཝུཏྟཾ, ཨིདཾ ཝཙནཾ ཐིནསྶ ཝེཝཙནཾ. ‘‘ཀཱཡསྶ ཨཀལླཏཱ ཨཀམྨཉྙཏཱ ཀཱཡཱལསིཡཾ སོཔྤཾ སུཔནཱ སུཔྤིཏཏྟ’’ནྟི (དྷ. ས. ༡༡༦༣) ཡཾ ཝཙནཾ ཝུཏྟཾ, ཨིདཾ ཝཙནཾ མིདྡྷསྶ ཝེཝཙནཾ. ‘‘བྷིཀྑཀོ བྷིཀྑཱུ’’ཏིཨཱདིཀཾ (པཱརཱ. ༤༥; ཝིབྷ. ༥༡༠) ཡཾ ཝཙནཾ ཝུཏྟཾ, ཨིདཾ ཝཙནཾ བྷིཀྑུཔདསྶ ཝེཝཙནཾ. ‘‘དུགྒཏི ཨཔཱཡོ ཝིནིཔཱཏོ ཝཊྚདུཀྑཾ སཾསཱརོ’’ཏིཨཱདིཀཾ ཡཾ ཝཙནཾ ཝུཏྟཾ, ཨིདཾ ཝཙནཾ དུགྒཏིཔདསྶ ཝེཝཙནཾ. ཨིཏི ཝེཝཙནཱནི ནཱིཧརིཏཱནི.

‘‘ཨེཏྟཀོཝ ཝེཝཙནཧཱརསམྤཱཏོ པརིཔུཎྞོ’’ཏི ཝཏྟབྦཏྟཱ ‘‘ནིཡུཏྟོ ཝེཝཙནོ ཧཱརསམྤཱཏོ’’ཏི ཝུཏྟཾ. ཡེན ཡེན སཾཝཎྞནཱཝིསེསབྷཱུཏེན ཝེཝཙནཧཱརསམྤཱཏེན ཝེཝཙནཱནི ནཱིཧརིཏཱནི, སོ སོ ¶ སཾཝཎྞནཱཝིསེསབྷཱུཏོ ཝེཝཙནཧཱརསམྤཱཏོ ནིཡུཏྟོ ཡཐཱསམྦྷཝཾ ནཱིཧརིཏྭཱ ཡུཛྫིཏབྦོཏི ཨཏྠོ གཧིཏོཏི.

ཨིཏི ཝེཝཙནཧཱརསམྤཱཏེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན…པེ… གཧེཏབྦོཏི.

༡༡. པཉྙཏྟིཧཱརསམྤཱཏཝིབྷཱཝནཱ

༧༣. ཡེན ¶ ཡེན ཝེཝཙནཧཱརསམྤཱཏེན ཝེཝཙནཱནི ནིདྡྷཱརིཏཱནི, སོ ཝེཝཙནཧཱརསམྤཱཏོ པརིཔུཎྞོ, ‘‘ཀཏམོ པཉྙཏྟིཧཱརསམྤཱཏོ’’ཏི པུཙྪིཏབྦཏྟཱ ‘‘ཏཏྠ ཀཏམོ པཉྙཏྟིཧཱརསམྤཱཏོ’’ཏིཨཱདི ཝུཏྟཾ.

‘‘ཀཏམཱ སུཏྟཔྤདེསབྷཱུཏཱ པཉྙཏྟི ཀཏམེསཾ དྷམྨཱནཾ པཉྙཏྟཱི’’ཏི པུཙྪིཏབྦཏྟཱ ‘‘ཏསྨཱ’’ཏིཨཱདི ཝུཏྟཾ. ‘‘ཏསྨཱ རཀྑིཏཙིཏྟསྶཱ’’ཏི པཉྙཏྟི སཏིཡཱ པདཊྛཱནསྶ རཀྑིཏབྦསྶ ཙིཏྟསྶ པཉྙཱཔནཏོ སཏིཡཱ པདཊྛཱནཔཉྙཏྟི ནཱམ. སཏིཡཱ ཧི རཀྑིཏབྦཾ ཙིཏྟཾ སཏིཡཱ པདཊྛཱནཾ ཨདྷིཊྛཱནཾ ནཱམ. ཏེནཱཧ ཨཊྛཀཐཱཡཾ – ‘‘ཨདྷིཊྛཧིཏྭཱ རཀྑནྟིཡཱ སཏིཡཱ རཀྑིཡམཱནཾ ཙིཏྟཾ ཏསྶཱ ཨདྷིཊྛཱནཾ ཝིཡ ཧོཏཱི’’ཏི. ‘‘སམྨཱསངྐཔྤགོཙརོ’’ཏི པཉྙཏྟི སམཐསྶ བྷཱཝནཱཡ པཉྙཱཔནཏོ སམཐསྶ བྷཱཝནཱཔཉྙཏྟི ནཱམ. ‘‘སམྨཱདིཊྛིཔུརེཀྑཱརོ, ཉཏྭཱན ཨུདཡབྦཡ’’ནྟི པཉྙཏྟི དསྶནབྷཱུམིཡཱ ནིཀྑེཔསྶ པཉྙཱཔནཏོ ནིཀྑེཔཔཉྙཏྟི ནཱམ. ‘‘ཐིནམིདྡྷཱབྷིབྷཱུ བྷིཀྑཱུ’’ཏི སམུདཡསྶ ཨནཝསེསཔྤཧཱནསྶ པཉྙཱཔནཏོ ཨནཝསེསཔྤཧཱནཔཉྙཏྟི ནཱམ. ‘‘སབྦཱ དུགྒཏིཡོ ཛཧེ’’ཏི པཉྙཏྟི མགྒསྶ ཨརིཡམགྒསྶ བྷཱཝནཱཡ པཉྙཱཔནཏོ བྷཱཝནཱཔཉྙཏྟི ནཱམ.

‘‘ཨེཏྟཀོཝ པཉྙཏྟིཧཱརསམྤཱཏོ པརིཔུཎྞོ’’ཏི ཝཏྟབྦཏྟཱ ‘‘ནིཡུཏྟོ པཉྙཏྟིཧཱརསམྤཱཏོ’’ཏི ཝུཏྟཾ. ཡེན ཡེན སཾཝཎྞནཱཝིསེསབྷཱུཏེན པཉྙཏྟིཧཱརསམྤཱཏེན པཉྙཏྟིཔྤབྷེདཱ ནིདྡྷཱརིཏཱ, སོ སོ ¶ སཾཝཎྞནཱཝིསེསབྷཱུཏོ པཉྙཏྟིཧཱརསམྤཱཏོ ནིཡུཏྟོ ཡཐཱརཧཾ ནིདྡྷཱརེཏྭཱ ཡུཛྫིཏབྦོཏི ཨཏྠོ གཧེཏབྦོཏི.

ཨིཏི པཉྙཏྟིཧཱརསམྤཱཏེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན…པེ… གཧེཏབྦོཏི.

༡༢. ཨོཏརཎཧཱརསམྤཱཏཝིབྷཱཝནཱ

༧༤. ཡེན ¶ ཡེན པཉྙཏྟིཧཱརསམྤཱཏེན པཉྙཏྟིཔྤབྷེདཱ ནིདྡྷཱརིཏཱ, སོ པཉྙཏྟིཧཱརསམྤཱཏོ པརིཔུཎྞོ, ‘‘ཀཏམོ ཨོཏརཎོ ཧཱརསམྤཱཏོ’’ཏི པུཙྪིཏབྦཏྟཱ ‘‘ཏཏྠ ཀཏམོ ཨོཏརཎོ ཧཱརསམྤཱཏོ’’ཏིཨཱདིམཱཧ.

‘‘ཏཏྠ ཏིསྶཾ གཱཐཱཡཾ ཀཏམཱནི ཨིནྡྲིཡཱནི ནིདྡྷཱརེཏྭཱ ཀཏམེཧི ནིདྡྷཱརིཏེཧི དྷམྨེཧི ཨོཏརཏཱི’’ཏི པུཙྪིཏབྦཏྟཱ ‘‘ཏསྨཱ’’ཏིཨཱདི ཝུཏྟཾ. ཡཱ ‘‘ཏསྨཱ རཀྑིཏཙིཏྟསྶཱ’’ཏིཨཱདིགཱཐཱ ཝུཏྟཱ, ཏིསྶཾ གཱཐཱཡཾ ‘‘ཏསྨཱ…པེ… པུརེཀྑཱརོ’’ཏི སུཏྟཔྤདེསེན སམྨཱདིཊྛི གཧིཏཱ, སམྨཱདིཊྛིཡཱ གཧིཏཱཡ པཉྩིནྡྲིཡཱནི སདྡྷཱདིཔཉྩིནྡྲིཡཱནི གཧིཏཱནི བྷཝནྟི.

ཏཱནིཡེཝ སདྡྷཱདིཔཉྩིནྡྲིཡཱནི ཝིཛྫཱཡ ཨུཔཀཱརཏྟཱ ཝཱ པདཊྛཱནཏྟཱ ཝཱ ཝིཛྫཱ བྷཝནྟི, ཝིཛྫུཔྤཱདཱ ཏཱདིསཱཡ ཝིཛྫཱཡ ཨུཔྤཱདཱ ཨུཔྤཱདཧེཏུཏོ ཨཝིཛྫཱནིརོདྷོ སམྦྷཝཏི, ཨཝིཛྫཱནིརོདྷཱ སངྑཱརནིརོདྷོ སམྦྷཝཏི…པེ… ཛཱཏིནིརོདྷཱ ཛརཱམརཎནིརོདྷོ སམྦྷཝཏཱིཏི. ཨཡཾ ཨོཏརཎཱ པཊིཙྩསམུཔྤཱདེན པཉྩིནྡྲིཡཱནཾ ཨོཏརཎཱ ནཱམ.

ཏཱནིཡེཝ པཉྩིནྡྲིཡཱནི སཱིལཀྑནྡྷེན སམཱདྷིཀྑནྡྷེན པཉྙཱཀྑནྡྷེན ཏཱིཧི ཁནྡྷེཧི སངྒཧིཏཱནི བྷཝནྟི སདྡྷཱཝཱིརིཡེཧི སཱིལསམྦྷཝཏོ, སཏིཡཱ ཙ པཉྙཱནུཝཏྟཀཏྟཱ. ཨཡཾ ཨོཏརཎཱ ཁནྡྷེཧི པཉྩིནྡྲིཡཱནཾ ཨོཏརཎཱ ནཱམ.

ཏཱནིཡེཝ པཉྩིནྡྲིཡཱནི སངྑཱརཔརིཡཱཔནྣཱནི བྷཝནྟི. ཡེ སངྑཱརཱ ཨནཱསཝཱ བྷཝནྟི, བྷཝངྒཱ བྷཝཧེཏཱུ ནོ བྷཝནྟི, ཏེ ཨནཱསཝཱ སངྑཱརཱ དྷམྨདྷཱཏུསངྒཧིཏཱ བྷཝནྟི དྷམྨདྷཱཏུཡཱ ཨནྟོགདྷཏྟཱ. ཨཡཾ ཨོཏརཎཱ དྷཱཏཱུཧི པཉྩིནྡྲིཡཱནཾ ཨོཏརཎཱ ནཱམ.

སཱ ¶ ཨནཱསཝཱ དྷམྨདྷཱཏུ དྷམྨཱཡཏནཔརིཡཱཔནྣཱ བྷཝཏི, ཡཾ ཨཱཡཏནཾ ཨནཱསཝཾ བྷཝཏི, བྷཝངྒཾ བྷཝཧེཏུ ནོ བྷཝཏི. ཨཡཾ ཨོཏརཎཱ ཨཱཡཏནེཧི དྷམྨདྷཱཏུཡཱ ཨོཏརཎཱ ནཱམ.

‘‘ཨེཏྟཀོཝ ཨོཏརཎོ ཧཱརསམྤཱཏོ པརིཔུཎྞོ’’ཏི ཝཏྟབྦཏྟཱ ‘‘ནིཡུཏྟོ ཨོཏརཎོ ཧཱརསམྤཱཏོ’’ཏི ¶ ཝུཏྟཾ. ཡེན ཡེན སཾཝཎྞནཱཝིསེསབྷཱུཏེན ཨོཏརཎཧཱརསམྤཱཏེན སུཏྟཔྤདེསཏྠཱ ཨོཏརིཏབྦཱ, སོ སོ སཾཝཎྞནཱཝིསེསབྷཱུཏོ ཨོཏརཎོ ཧཱརསམྤཱཏོ ནིཡུཏྟོ ཡཐཱརཧཾ ནིདྡྷཱརེཏྭཱ ཡུཛྫིཏབྦོཏི ཨཏྠོ གཧེཏབྦོཏི.

ཨིཏི ཨོཏརཎཧཱརསམྤཱཏེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན…པེ… གཧེཏབྦོཏི.

ཨིཏོ པཊྛཱཡ ‘‘ཏཏྠ ཀཏམོ’’ཏིཨཱདིཨནུསནྡྷྱཏྠོ ཙ པརིཡོསཱནེ ‘‘ནིཡུཏྟོ’’ཏིཨཱདིཨནུསནྡྷྱཏྠོ ཙ ཝུཏྟནཡཱནུསཱརེནེཝ ཝིཉྙཱཏབྦོ. ཀཏྠཙི ཀཏྠཙི པཱཋེ ཨཔཱཀཊཾཡེཝ ཡཐཱབལཾ ཀཐཡིསྶཱམ.

༡༣. སོདྷནཧཱརསམྤཱཏཝིབྷཱཝནཱ

༧༥. ཡཏྠཱཏི ཡསྨིཾ པཉྷེ. ཨཱརམྦྷོ ཨཏྠོ སུདྡྷོ པརིཔུཎྞོ, སོ པཉྷོ ནིརཝསེསཏོ ཝིསྶཛྫིཏོ བྷཝཏི. ཡཏྠ པཉྷེ པན ཨཱརམྦྷོ ཨཏྠོ ན སུདྡྷོ ཨཔརིཔུཎྞོ ཀོཙི ཝིསྶཛྫེཏབྦོ ཨཝསིཊྛོ, སོ པཉྷོ ཏཱཝ ཝིསྶཛྫིཏོ ན བྷཝཏི.

༡༥. པརིཀྑཱརཧཱརསམྤཱཏཝིབྷཱཝནཱ

༧༧. ‘‘ཏསྨཱ རཀྑིཏཙིཏྟསྶཱ’’ཏི པདེན ཡོ སཏིསཾཝརོ ཝུཏྟོ, ཨཡཾ སཏིསཾཝརོ སམཐསྶ པརིཀྑཱརོ. ‘‘སམྨཱསངྐཔྤགོཙརོ’’ཏི པདེན ཡོ སམྨཱསངྐཔྤོ ཝུཏྟོ, སོ སམྨཱསངྐཔྤོ ཝིཔསྶནཱཡ པརིཀྑཱརོཏི ཝིབྷཛིཏྭཱ ཡོཛེཏབྦོ.

༡༦. སམཱརོཔནཧཱརསམྤཱཏཝིབྷཱཝནཱ

༧༨. ‘‘ཏསྨཱ ¶ ¶ རཀྑིཏཙིཏྟསྶཱ’’ཏི པདེན ཡཾ རཀྑིཏཙིཏྟཾ ཝུཏྟཾ, ཏཾ རཀྑིཏཙིཏྟཾ ཏིཎྞཾ སུཙརིཏཱནཾ ཀམྨཱནཾ པདཊྛཱནཾ. སམྨཱདིཊྛིཡཱ བྷཱཝིཏཱཡ ཨརིཡོ ཨཊྛངྒིཀོ མགྒོ བྷཱཝིཏོ བྷཝཏི ཨེཀཏོ བྷཱཝིཏབྦཏྟཱ, པདཊྛཱནཀཱརཎཏྟཱ ཙ. ཏེན ཝུཏྟཾ – ‘‘སམྨཱདིཊྛིཏོ ཧཱི’’ཏིཨཱདི. ཡསྶ ཨརཧཏོ སམཱདྷིཝིམུཏྟི བྷཝཏི, ཨཡཾ ཨརཧཱ ཨནུཔཱདིསེསོ པུགྒལོ, ཨཡཾ སམཱདྷིཝིམུཏྟི ཨནུཔཱདིསེསཱ ནིབྦཱནདྷཱཏུ.

‘‘དེསནཱཧཱརསམྤཱཏཱདིཀོ ཧཱརསམྤཱཏོ ཡེན སོལ༹སཔྤབྷེདབྷཱཝེན སུཏྟཔྤདེསཏྠེ ནིདྡྷཱརེཏྭཱ ཡུཛྫིཏོ, སོལ༹སཔྤབྷེདབྷཱཝོ ཀེན ཨམྷེཧི སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ. ཏེན སོལ༹སཔྤབྷེདབྷཱཝེན ཨཱཡསྨཱ མཧཱཀཙྩཱནོ ‘‘སོལ༹ས…པེ… སུཏྟ’’ནྟི ཡཾ ཝཙནཾ ཨཱཧ, ཏེན ཝཙནེན སོལ༹སཔྤབྷེདབྷཱཝོ ཏུམྷེཧི སདྡཧིཏབྦོ.

‘‘ཨེཏྟཀོཝ ཧཱརསམྤཱཏོ པརིཔུཎྞོ’’ཏི ཝཏྟབྦཏྟཱ ‘‘ནིཡུཏྟོ ཧཱརསམྤཱཏོ’’ཏི ཝུཏྟཾ. ཡེན ཡེན སཾཝཎྞནཱཝིསེསབྷཱུཏེན དེསནཱཧཱརསམྤཱཏེན སུཏྟཔྤདེསཏྠཱ ནིདྡྷཱརིཏཱ, སོ སོ སཾཝཎྞནཱཝིསེསབྷཱུཏོ དེསནཱཧཱརསམྤཱཏཱདིཧཱརསམྤཱཏོ ནིཡུཏྟོ ཡཐཱརཧཾ ནིདྡྷཱརེཏྭཱ ཡུཛྫིཏབྦོཏི ཨཏྠོ གཧེཏབྦོ, ཨཊྛཀཐཱཡཉྩ (ནེཏྟི. ཨཊྛ. ༧༣, ༧༦) ཏཐཱ ནིདྡྷཱརེཏྭཱ ཡུཛྫིཏོཏི.

ཨིཏི དེསནཱཧཱརསམྤཱཏཱདིཧཱརསམྤཱཏེ སཏྟིབལཱནུརཱུཔཱ

རཙིཏཱ ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

ནཡསམུཊྛཱནཝིབྷཱཝནཱ

༧༩. ཡེན ཡེན སཾཝཎྞནཱཝིསེསབྷཱུཏེན དེསནཱཧཱརསམྤཱཏཱདིནཱ ཧཱརསམྤཱཏེན ཨེཀསུཏྟཔྤདེསཏྠཱ ནིདྡྷཱརེཏྭཱ ཝིབྷཏྟཱ, སོ ¶ སཾཝཎྞནཱཝིསེསབྷཱུཏོ དེསནཱཧཱརསམྤཱཏཱདིཧཱརསམྤཱཏོ པརིཔུཎྞོ, ‘‘ཀཏམཾ ནཡསམུཊྛཱན’’ནྟི པུཙྪིཏབྦཏྟཱ ‘‘ཏཏྠ ཀཏམཾ ནཡསམུཊྛཱན’’ནྟིཨཱདི ཨཱརདྡྷཾ. ཨཊྛཀཐཱཡཾ པན –‘‘ཨེཝཾ ནཱནཱསུཏྟཝསེན, ཨེཀསུཏྟཝསེན ཙ ¶ ཧཱརཝིཙཱརཾ དསྶེཏྭཱ ཨིདཱནི ནཡཝིཙཱརཾ དསྶེཏུཾ ‘ཏཏྠ ཀཏམཾ ནཡསམུཊྛཱན’ནྟིཨཱདི ཨཱརདྡྷ’’ནྟི (ནེཏྟི. ཨཊྛ. ༧༩) ཝུཏྟཾ. ‘‘ཏཏྠ ཀཏམོ ནནྡིཡཱཝཊྚནཡོ’’ཏིཨཱདིཾ ཨནཱརབྷིཏྭཱ ‘‘ཏཏྠ ཀཏམཾ ནཡསམུཊྛཱན’’ནྟིཨཱདིཨཱརམྦྷནེ ཀཱརཎཾ ཨཊྛཀཐཱཡཾ ཝུཏྟམེཝ. ཏཏྠ ཏཏྠཱཏི ཏེསུ ཧཱརཱདཱིསུ ཡོ ཨཏྠནཡོ སཾཝཎྞནཱནཡེན ནིདྡིཊྛོ, ཏསྶེཝ ཨཏྠནཡསྶ སམུཊྛཱནཾ བྷཱུམིཾ པུཙྪཏི ‘‘ཀཏམཾ ནཡསམུཊྛཱན’’ནྟི.

ཀིཉྩཱཔི སཾཝཎྞནཱནཡཱ ནིདྡིཊྛཱ, ཏཐཱཔི ཨཏྠནཡསཾཝཎྞནཱནཡཱནཾ ཝིསེསསྶ པཱཀཊཾ ཀཱཏུཾ པུན ཀཐཡིསྶཱམ. ཏཎྷཱཨཝིཛྫཱཧི སཾཀིལེསཔཀྑསྶ སུཏྟཏྠསྶ ཙཏུསཙྩཡོཛནམུཁེན ནཡནལཀྑཎོ སཾཝཎྞནཱཝིསེསོ ཙེཝ སམཐཝིཔསྶནཱཧི ཝོདཱནཔཀྑསྶ སུཏྟཏྠསྶ ཙཏུསཙྩཡོཛནམུཁེན ནཡནལཀྑཎོ སཾཝཎྞནཱཝིསེསོ ཙ ནནྡིཡཱཝཊྚོ ནཡོ ནཱམ. ཏཱིཧི ཨཀུསལམཱུལེཧི ལོབྷཱདཱིཧི སཾཀིལེསཔཀྑསྶ སུཏྟཏྠསྶ ཙཏུསཙྩཡོཛནམུཁེན ནཡནལཀྑཎོ སཾཝཎྞནཱཝིསེསོ ཙེཝ ཏཱིཧི ཀུསལམཱུལེཧི ཨལོབྷཱདཱིཧི ཝོདཱནཔཀྑསྶ སུཏྟཏྠསྶ ཙཏུསཙྩཡོཛནམུཁེན ནཡནལཀྑཎོ སཾཝཎྞནཱཝིསེསོ ཙ ཏིཔུཀྑལོ ནཡོ ནཱམ. ཙཏཱུཧི སུབྷསཉྙཱདཱིཧི ཝིཔལླཱསེཧི སཀལསཾཀིལེསཔཀྑསྶ སུཏྟཏྠསྶ ཙཏུསཙྩཡོཛནམུཁེན ནཡནལཀྑཎོ སཾཝཎྞནཱཝིསེསོ ཙེཝ ཙཏཱུཧི ཨསུབྷསཉྙཱདཱིཧི ཨཝིཔལླཱསེཧི སཏིཔཊྛཱནེཧི, སདྡྷིནྡྲིཡེཧི ཝཱ ཝོདཱནཔཀྑསྶ སུཏྟཏྠསྶ ཙཏུསཙྩཡོཛནམུཁེན ནཡནལཀྑཎོ སཾཝཎྞནཱཝིསེསོ ཙ སཱིཧཝིཀྐཱིལི༹ཏོ ནཡོ ནཱམཱཏི ཝུཏྟཱ ནཡཱ སཾཝཎྞནཱནཡཱ ནཱམ. ཏེསཾ སཾཝཎྞནཱནཡཱནཾ སམུཊྛཱནཾ པུཙྪཏི ‘‘ཀཏམཾ ནཡསམུཊྛཱན’’ནྟི.

ནཡཱ པན ནཱནཱསུཏྟཏོ ནིདྡྷཱརིཏེཧི ཏཎྷཱཨཝིཛྫཱདཱིཧི མཱུལཔདེཧི ཙཏུསཙྩཡོཛནཱཡ ནཡཏོ ཨནུབུཛ྄ཛྷིཡམཱནོ དུཀྑཱདིཨཏྠོ. སོ ཧི མགྒཉཱཎཾ ནཡཏི སམྤཱཔེཏཱིཏི ‘‘ནཡོ’’ཏི ཝུཏྟོ, སོ ཨཏྠནཡོ ནཱམ. ཏསྶེཝ ཨཏྠནཡསྶ སམུཊྛཱནཾ པུཙྪཏི ‘‘ཀཏམཾ ནཡསམུཊྛཱན’’ནྟི? ཏསྨཱ ¶ ཙཏུསཙྩཡོཛནཱཡ ནཡགྒཱཧཏོ ནཱིཡཏི ཨནུཔུཙྪཱིཡཏཱིཏི ནཡོ, ཀོ སོ? སུཏྟཏྠབྷཱུཏོ དུཀྑཱདིཀོ ཨཏྠོ. ནཡཏི མགྒཉཱཎཾ པཱཔེཏཱིཏི ཝཱ ནཡོ, དུཀྑཱདིཀོ ཨཏྠོཝ. ཏེནཱཧ – ‘‘ཨནུབུཛ྄ཛྷིཡམཱནོ དུཀྑཱདིཨཏྠོ. སོ ཧི མགྒཉཱཎཾ ནཡཏི སམྤཱཔེཏཱིཏི ནཡོ’’ཏི (ནེཏྟི. ཨཊྛ. ༧༩). སམུཊྛཧནྟི ནཡཱ ཨེཏེནཱཏི སམུཊྛཱནཾ, ཀིཾ ཏཾ? ཨཝིཛྫཱཏཎྷཱདིཀཱརཎཾ, ཏཾདཱིཔནཱ སཾཝཎྞནཱ ཙ. ཨཝིཛྫཱཏཎྷཱདིནཱ ཧི དུཀྑཱདིཨཏྠནཡཱ སམྦྷཝནྟི. ཨཐ ཝཱ ཨཝིཛྫཱཏཎྷཱདཱིཧི ཙཏུསཙྩཡོཛནཱ སམུཊྛཱནཾ ནཱམ. ཏེན ཝུཏྟཾ – ‘‘ཀིཾ པན ཏཾ? ཏཾཏཾམཱུལཔདེཧི ཙཏུསཙྩཡོཛནཱ’’ཏི (ནེཏྟི. ཨཊྛ. ༧༩). ཨེཝཾ ཨཏྠེ གཡ྄ཧམཱནེ སཏི སཾཝཎྞནཱནཡཱཔི གཧིཏཱ ཧོནྟི, ནཡཱནཾ སམུཊྛཱནཾ ནཡསམུཊྛཱནཾ, ཏསྨིཾ ནཡསམུཊྛཱནེ.

‘‘ཀཏམཾ ¶ ནནྡིཡཱཝཊྚནཡསམུཊྛཱན’’ནྟི པུཙྪིཏབྦཏྟཱ པཋམཾ ནནྡིཡཱཝཊྚནཡསམུཊྛཱནཾ དསྶེཏུཾ ‘‘པུབྦཱ ཀོཊི ན པཉྙཱཡཏཱི’’ཏིཨཱདི ཝུཏྟཾ. ནནྡིཡཱཝཊྚནཡསམུཊྛཱནབྷཱུཏཱཡ ཨཝིཛྫཱཡ ཙ ཏཎྷཱཡ ཙ པུབྦཱ ཀོཊི ‘‘ཨསུཀསྶ བུདྡྷསྶ བྷགཝཏོ ཨུཔྤཛྫནཀཱལེ ཨུཔྤནྣཱ, ཨསུཀསྶ ཙཀྐཝཏྟིནོ ཨུཔྤཛྫནཀཱལེ ཨུཔྤནྣཱ’’ཏི ན པཉྙཱཡཏི ཀོཊིཡཱ ཨབྷཱཝཏོཏི ཡོཛནཱ. ‘‘ཨཝིཛྫཱཏཎྷཱསུ ཀཏམཱ ནཱིཝརཎཾ, ཀཏམཱ སཾཡོཛན’’ནྟི པུཙྪིཏབྦཏྟཱ ‘‘ཏཏྠ ཨཝིཛྫཱ ནཱིཝརཎཾ ཏཎྷཱ སཾཡོཛན’’ནྟི ཝུཏྟཾ. ཏཏྠཱཏི ཏཱསུ ཨཝིཛྫཱཏཎྷཱསུ. ཨཱདཱིནཝཔཊིཙྪཱདིཀཏྟཱ ཨཝིཛྫཱ ནཱིཝརཎཾ. བྷཝེསུ སཾཡོཛནཏོ ཏཎྷཱ སཾཡོཛནཾ. ‘‘ཨཝིཛྫཱནཱིཝརཎཱ སཏྟཱ ཀཐཾ ཝིཙརནྟི, ཀཐཾ ཝུཙྩནྟི, ཏཎྷཱསཾཡོཛནཱ སཏྟཱ ཀཐཾ ཝིཙརནྟི ཀཐཾ ཝུཙྩནྟཱི’’ཏི པུཙྪིཏབྦཏྟཱ ‘‘ཨཝིཛྫཱནཱིཝརཎཱ སཏྟཱ’’ཏིཨཱདི ཝུཏྟཾ. ཨཝིཛྫཱནཱིཝརཎམེཏེསམཏྠཱིཏི ཨཝིཛྫཱནཱིཝརཎཱ. ཨཝིཛྫཱཡ སཾཡུཏྟཱ ཝིཡ པཝཏྟཱ ཨཝིཛྫཱཡ ཨབྷིནིཝིསཝཏྠཱུསུ སཾཡུཏྟཱ ཝིཡ པཝཏྟཱ སཏྟཱ ཨཝིཛྫཱཔཀྑེན ཝིཔལླཱསེན ནིཙྩཱདིཨབྷིནིཝེསཝཏྠུབྷཱུཏེ རཱུཔཱདིཨཱརམྨཎེ ཝིཙརནྟི ཝིཝིདྷཱ ཙརནྟི པཝཏྟནྟི, ཏེ ནིཙྩཱདིཨབྷིནིཝིསནྟཱ ཝིཙརནྟཱ སཏྟཱ ‘‘དིཊྛིཙརིཏཱ’’ཏི ཝུཙྩནྟི. ཏཎྷཱསཾཡོཛནམེཏེསནྟི ཏཎྷཱསཾཡོཛནཱ. ཏཎྷཱཡ སཾཡུཏྟཱ ཝིཡ པཝཏྟཱ, ཏཎྷཱཡ ཝཱ ཨཱརམྨཎབྷཱུཏེ ཝཏྠུཀཱམེ སཾཡུཏྟཱ ཝིཡ པཝཏྟཱ སཏྟཱ ཏཎྷཱཔཀྑེན ཨཊྛསཏཏཎྷཱཝིཙརིཏེན ཨཱརམྨཎབྷཱུཏེ ཝཏྠུསྨིཾ ཝིཙརནྟི པཝཏྟནྟཱིཏི ཨཏྠོ.

‘‘དིཊྛིཙརིཏཱ ¶ སཏྟཱ ཀཾ པཊིཔཏྟིཾ ཨནུཡུཏྟཱ ཝིཧརནྟི, ཏཎྷཱཙརིཏཱ སཏྟཱ ཀཾ པཊིཔཏྟིཾ ཨནུཡུཏྟཱ ཝིཧརནྟཱི’’ཏི པུཙྪིཏབྦཏྟཱ ‘‘དིཊྛིཙརིཏཱ’’ཏིཨཱདི ཝུཏྟཾ. དིཊྛིཙརིཏཱ སཏྟཱ ཨིཏོ སཱསནཏོ བཧིདྡྷཱ པབྦཛིཏཱ ཧོནྟཱཔི ‘‘སུཁེན ཨདྷིགནྟབྦཾ སུཁཾ ནཏྠི, དུཀྑེན ཨདྷིགནྟབྦཾ སུཁཾ པན ཨཏྠཱི’’ཏི མནསི ཀརོནྟཱ ཨཏྟཀིལམཐཱནུཡོགཾ པཉྩཱཏཔཱདིཔཊིཔཏྟིཾ ཨནུཡུཏྟཱ ཝིཧརནྟི. ཏཎྷཱཙརིཏཱ སཏྟཱ ཨིཏོ སཱསནཏོ བཧིདྡྷཱ པབྦཛིཏཱ ཧོནྟཱཔི ‘‘ཀཱམེ པཊིསེཝནྟཱ ལོཀཾ ཝཌྜྷཱཔེནྟཱ བཧུཾ པུཉྙཾ ཝཌྜྷཱཔེནྟཱི’’ཏི མནསི ཀརོནྟཱ ཀཱམེསུ ཀཱམསུཁལླིཀཱནུཡོགཾ པཊིཔཏྟིཾ ཨནུཡུཏྟཱ ཝིཧརནྟི.

‘‘ཀསྨཱ དིཊྛིཙརིཏཱ ཏཐཱཝིདྷཾ པཊིཔཏྟིཾ ཨནུཡུཏྟཱ ཝིཧརནྟི, ཀསྨཱ ཏཎྷཱཙརིཏཱ ཏཐཱཝིདྷཾ པཊིཔཏྟིཾ ཨནུཡུཏྟཱ ཝིཧརནྟཱི’’ཏི པུཙྪིཏབྦཏྟཱ ‘‘ཏཏྠ ཀིཾ ཀཱརཎ’’ནྟིཨཱདི ཝུཏྟཾ. ཏཏྠཱཏི ཏཏྠ ཏེསུ དིཊྛིཙརིཏཏཎྷཱཙརིཏེསུ. ཡཾ ཡསྨཱ ཀཱརཎཱ ཝིཧརནྟི, ཏཾ ཀཱརཎཾ ཀིནྟི པུཙྪཏི. ཨིཏོ སཱསནཏོ བཧིདྡྷཱ ཡེསཾ པུགྒལཱནཾ སཙྩཝཝཏྠཱནཾ ནཏྠི, ཙཏུསཙྩཔྤཀཱསནཱ ཀུཏོ ཙ ཨཏྠི, སམཐཝིཔསྶནཱཀོསལླཾ ཝཱ ཨུཔསམསུཁཔྤཏྟི ཝཱ ཀུཏོ ཨཏྠི, ཏེ པུགྒལཱ ཨུཔསམསུཁསྶ ཨནབྷིཉྙཱ ཝིཔརཱིཏཙེཏཱ ཧུཏྭཱ ཨེཝཾ ཨཱཧཾསུ ‘‘སུཁེན ཨདྷིགནྟབྦཾ སུཁཾ ནཏྠི ¶ , དུཀྑེན ཨདྷིགནྟབྦཾ སུཁཾ ནཱམ ཨཏྠཱི’’ཏི. ཏེ ཨེཝཾསཉྙཱི ཨེཝཾདིཊྛཱི དུཀྑེན སུཁཾ པཏྠཡམཱནཱ ཧུཏྭཱ ཨཏྟཀིལམཐཱནུཡོགམནུཡུཏྟཱ ཝིཧརནྟི. ཨིཏོ སཱསནཏོ བཧིདྡྷཱ ཡེསཾ པུགྒལཱནཾ སཙྩཝཝཏྠཱནཾ ནཏྠི, ཙཏུསཙྩཔྤཀཱསནཱ ཀུཏོ ཙ ཨཏྠི, སམཐཝིཔསྶནཱཀོསལླཾ ཝཱ ཨུཔསམསུཁཔྤཏྟི ཝཱ ཀུཏོ ཨཏྠི, ཏེ པུགྒལཱ ཨུཔསམསུཁསྶ ཨནབྷིཉྙཱ ཝིཔརཱིཏཙེཏཱ ཧུཏྭཱ ཨེཝམཱཧཾསུ ‘‘ཡོ ཀཱམེ པཊིསེཝཏི, སོ ལོཀཾ ཝཌྜྷཡཏི, ཡོ ལོཀཾ ཝཌྜྷཡཏི, སོ བཧུཾ པུཉྙཾ པསཝཏཱི’’ཏི. ཏེ ཨེཝཾསཉྙཱི ཨེཝཾདིཊྛཱི ཀཱམེསུ སུཁསཉྙཱི ཧུཏྭཱ ཀཱམསུཁལླིཀཱནུཡོགཾ ཨནུཡུཏྟཱ ཙ ཝིཧརནྟཱིཏི ཡོཛནཱ ཀཱཏབྦཱ.

‘‘ཏཐཱ ཝིཧརནྟཱ ཀིཾ ཝཌྜྷཡནྟཱི’’ཏི པུཙྪིཏབྦཏྟཱ ‘‘ཏེ ཏདབྷིཉྙཱ སནྟཱ རོགམེཝ ཝཌྜྷཡནྟཱི’’ཏི ཝུཏྟཾ. ‘‘ཏཐཱ ཝཌྜྷཡནྟཱ རོགཱདཱིནཾ བྷེསཛྫཾ སམཐཝིཔསྶནཾ ཝཌྜྷཡནྟི ཀི’’ནྟི པུཙྪིཏབྦཏྟཱ ‘‘ཏེ རོགཱབྷིཏུནྣཱ གཎྜཔཊིཔཱིལི༹ཏཱ སལླཱནུཝིདྡྷཱ ནིརཡཏིརཙྪཱནཡོནིཔེཏཱསུརེསུ ཨུམྨུཛྫནིམུཛྫཱནི ཀརོནྟཱ ཨུགྒྷཱཏནིགྒྷཱཏཾ པཙྩནུབྷོནྟཱ རོགགཎྜསལླབྷེསཛྫཾ ན ¶ ཝིནྡནྟཱི’’ཏི ཝུཏྟཾ. ཨཏྠོ པན ཨཊྛཀཐཱཡཾ (ནེཏྟི. ཨཊྛ. ༧༩) ཝུཏྟོ. ‘‘ཀཏམེ སཾཀིལེསཝོདཱནཱ, ཀཏམེ རོགཱདཡོ, ཀཏམཾ བྷེསཛྫ’’ནྟི པུཙྪིཏབྦཏྟཱ ‘‘ཏཏྠ ཨཏྟཀིལམཐཱནུཡོགོ’’ཏིཨཱདི ཝུཏྟཾ. ཏཏྠཱཏི ཏེསུ སཾཀིལེསཝོདཱནརོགབྷེསཛྫཱདཱིསུ. ཨཏྟཀིལམཐཱནུཡོགོ ཙ ཀཱམསུཁལླིཀཱནུཡོགོ ཙ སཾཀིལེསོ ཧོཏི, སམཐཝིཔསྶནཱ ཝོདཱནཾ ཧོཏི, ཨཏྟཀིལམཐཱནུཡོགོ ཙ རོགོ ཧོཏི, སམཐཝིཔསྶནཱ རོགནིགྒྷཱཏཀབྷེསཛྫཾ…པེ... སམཐཝིཔསྶནཱ སལླུདྡྷཱརཎབྷེསཛྫཾ ཧོཏི.

‘‘ཀཏམོ ཀཏམཾ སཙྩ’’ནྟི པུཙྪིཏབྦཏྟཱ ‘‘ཏཏྠ སཾཀིལེསོ དུཀྑ’’ནྟིཨཱདི ཝུཏྟཾ. ཏཏྠཱཏི ཏེསུ སཾཀིལེསཱདཱིསུ སཾཀིལེསོ ཨེཀདེསཝསེན དུཀྑཾ དུཀྑསཙྩཾ ཧོཏི. ཏདབྷིསངྒོཏི ཏསྨིཾ སཾཀིལེསེ ཨབྷིསངྒོ ཝིཡ པཝཏྟོ ལོཀིཡདྷམྨོ ནིརཝསེསཝསེན དུཀྑསཙྩཾ ཧོཏི. ཨཐ ཝཱ ཏསྨིཾ དུཀྑེ ཨབྷིསངྒོ ཝིཡ པཝཏྟཱ ཏཎྷཱ དུཀྑསམུདཡོ སམུདཡསཙྩཾ ཧོཏི. ཏཎྷཱནིརོདྷོ དུཀྑནིརོདྷོ ནིརོདྷསཙྩཾ ཧོཏི. སམཐཝིཔསྶནཱ དུཀྑནིརོདྷགཱམིནཱི པཊིཔདཱ མགྒསཙྩཾ ཧོཏི. ཨིམཱནི ཙཏྟཱརི སཙྩཱནི ནིདྡྷཱརེཏྭཱ ཡོཛེཏབྦཱནི. ‘‘ཏེསུ ཙཏཱུསུ སཙྩེསུ ཀཏམཾ པརིཉྙེཡྻཾ, ཀཏམོ པཧཱཏབྦོ, ཀཏམོ བྷཱཝེཏབྦོ, ཀཏམོ སཙྪིཀཱཏབྦོ’’ཏི པུཙྪིཏབྦཏྟཱ ‘‘དུཀྑཾ པརིཉྙེཡྻ’’ནྟིཨཱདི ཝུཏྟཾ.

༨༠. དིཊྛིཙརིཏཏཎྷཱཙརིཏཱནཾ ཨཏྟཀིལམཐཱནུཡོགཱདིཝསེན ཙཏྟཱརི སཙྩཱནི ནིདྡྷཱརིཏཱནི, ‘‘ཀཐཾ དིཊྛིཙརིཏཏཎྷཱཙརིཏཱནཾ སཀྐཱཡདསྶནེ པཝཏྟིབྷེདཝསེན ཙཏྟཱརི སཙྩཱནི ནིདྡྷཱརིཏཱནཱི’’ཏི པུཙྪིཏབྦཏྟཱ ‘‘ཏཏྠ དིཊྛིཙརིཏཱ’’ཏིཨཱདི ཝུཏྟཾ. ཨཐ ཝཱ ‘‘དིཊྛིཙརིཏཏཎྷཱཙརིཏཱནཾ ¶ སཀྐཱཡདསྶནེ ཀཏམོ པཝཏྟིབྷེདོ’’ཏི པུཙྪིཏབྦཏྟཱ ཨིམེསཾ སཀྐཱཡདསྶནེ ཨཡཾ པཝཏྟིབྷེདོཏི ཝིབྷཛིཏྭཱ དསྶེཏུཾ ‘‘ཏཏྠ དིཊྛིཙརིཏཱ’’ཏིཨཱདི ཝུཏྟཾ. ཏེན ཝུཏྟཾ – ‘‘ཨིདཱནི དིཊྛིཙརིཏཏཎྷཱཙརིཏཱནཾ སཀྐཱཡདིཊྛིདསྶནེ པཝཏྟིབྷེདཾ དསྶེཏུཾ ‘དིཊྛིཙརིཏཱ’ཏིཨཱདི ཝུཏྟ’’ནྟི. ཏཏྠཱཏི ཏེསུ དིཊྛིཙརིཏཏཎྷཱཙརིཏེསུ. དིཊྛིཙརིཏཱ པུགྒལཱ རཱུཔཾ ‘‘ཨཏྟཱ’’ཏི ཨཏྟཏོ ཨུཔགཙྪནྟི…པེ… ཝིཉྙཱཎཾ ‘‘ཨཏྟཱ’’ཏི ཨཏྟཏོ ཨུཔགཙྪནྟི དིཊྛིཙརིཏཱནཾ ཨཏྟཱབྷིནིཝེསསྶ བལཝབྷཱཝཏོ, ཏཎྷཱཙརིཏཱ པན རཱུཔཾ ཝཱ ¶ ‘‘ཨཏྟཱ’’ཏི རཱུཔཝནྟཾ ཨཏྟཱནཾ ཨུཔགཙྪནྟི ཨཏྟནི ཝཱ རཱུཔཾ, རཱུཔསྨིཾ ཝཱ ‘‘ཨཏྟཱ’’ཏི ཨཏྟཱནཾ ཨུཔགཙྪནྟི…པེ… ཝིཉྙཱཎསྨིཾ ཝཱ ‘‘ཨཏྟཱ’’ཏི ཨཏྟཱནཾ ཨུཔགཙྪནྟི ཏཎྷཱཙརིཏཱནཾ ཨཏྟནིཡཱབྷིནིཝེསསྶ བལཝབྷཱཝཏོ. པཉྩསུ ཨུཔཱདཱནཀྑནྡྷེསུ ཨེཀེཀཾ ནིསྶཱཡ ཙཏུབྦིདྷཏྟཱ ཝཱིསཏིཝཏྠུཀཱ ཨཡཾ མིཙྪཱདིཊྛི ‘‘སཀྐཱཡདིཊྛཱི’’ཏི ཝུཙྩཏི. ཨེཝཾ དིཊྛིཙརིཏཏཎྷཱཙརིཏཱནཾ སཀྐཱཡདསྶནེ པཝཏྟིབྷེདོ ཝིཉྙཱཏབྦོཏི ཨཏྠོ.

‘‘སཀྐཱཡདིཊྛིཡཱ ཀཏམོ པཊིཔཀྑོ’’ཏི པུཙྪིཏབྦཏྟཱ ‘‘ཏསྶཱ པཊིཔཀྑོ’’ཏིཨཱདི ཝུཏྟཾ. ཏསྶཱ སཀྐཱཡདིཊྛིཡཱ པཛཧནཝསེན ལོཀུཏྟརཱ སམྨཱདིཊྛི པཊིཔཀྑོ, ཏསྶཱ སམྨཱདིཊྛིཡཱ ཨནྭཱཡིཀཱ ཨནུགུཎབྷཱཝེན པཝཏྟནཀཱ དྷམྨཱ ཙ སཀྐཱཡདིཊྛིཡཱ པཛཧནཝསེན པཊིཔཀྑཱ བྷཝནྟི. ‘‘ཀཏམེ དྷམྨཱ ཨནྭཱཡིཀཱ’’ཏི པུཙྪིཏབྦཏྟཱ ‘‘སམྨཱསངྐཔྤོ’’ཏིཨཱདི ཝུཏྟཾ. སམྨཱསངྐཔྤོ…པེ… སམྨཱསམཱདྷི ཨིམེ དྷམྨཱ ཨནྭཱཡིཀཱ ཧོནྟི. ཨཡཾ སམྨཱདིཊྛིཨཱདིཀོ ཨརིཡོ ཨཊྛངྒིཀོ མགྒོ ཏསྶཱ སཀྐཱཡདིཊྛིཡཱ པཊིཔཀྑོ ཧོཏི པཧཱཡཀཏྟཱ. ‘‘ཏེ སམྨཱདིཊྛིཡཱདཡོ དྷམྨཱ ཁནྡྷཏོ ཀིཏྟཀཱ ཧོནྟཱི’’ཏི པུཙྪིཏབྦཏྟཱ ‘‘ཏེ ཏཡོ ཁནྡྷཱ’’ཏིཨཱདི ཝུཏྟཾ. ‘‘ཀཏམོ ཁནྡྷོ སམཐོ, ཀཏམོ ཁནྡྷོ ཝིཔསྶནཱ’’ཏི པུཙྪིཏབྦཏྟཱ ‘‘སཱིལཀྑནྡྷོ སམཱདྷིཀྑནྡྷོ ཙ སམཐོ, པཉྙཱཀྑནྡྷོ ཝིཔསྶནཱ’’ཏི ཝུཏྟཾ. ‘‘སཀྐཱཡཱདཱིསུ ཀཏམོ ཀཏམཾ སཙྩཾ, ཀཏམོ ཀཏམཾ སཙྩ’’ནྟི པུཙྪིཏབྦཏྟཱ ‘‘ཏཏྠ སཀྐཱཡོ’’ཏིཨཱདི ཝུཏྟཾ.

‘‘དིཊྛིཙརིཏཏཎྷཱཙརིཏཱནཾ སཀྐཱཡདིཊྛིཏཔྤཊིཔཀྑཝསེན ཙཏྟཱརི སཙྩཱནི ནིདྡྷཱརིཏཱནི, ཀཐཾ ཨནྟདྭཡམཛ྄ཛྷིམཔཊིཔདཱ ནིདྡྷཱརིཏཱ’’ཏི ཝཏྟབྦཏྟཱ ‘‘ཏཏྠ ཡེ རཱུཔཾ ཨཏྟཏོ’’ཏིཨཱདི ཝུཏྟཾ. ཏཏྠཱཏི ཏེསུ དིཊྛིཙརིཏཏཎྷཱཙརིཏེསུ ཡེ དིཊྛིཙརིཏཱ པུགྒལཱ རཱུཔཾ ‘‘ཨཏྟཱ’’ཏི ཨཏྟཏོ ཨུཔགཙྪནྟི…པེ… ཝིཉྙཱཎཾ ‘‘ཨཏྟཱ’’ཏི ཨཏྟཏོ ཨུཔགཙྪནྟི. ཨིམེ དིཊྛིཙརིཏཱ པུགྒལཱ ‘‘རཱུཔཱདཡོ ཙ ཨཏྟཱ, རཱུཔཱདཱིནཉྩ ཨནིཙྩཏྟཱ, ཨཏྟསྶཱཔི ཨནིཙྩཏྟཱ ཨཏྟཱ ཨུཙྪིཛྫཏི, ཨཏྟཱ ཝིནསྶཏི, ཨཏྟཱ པརཾ མརཎཱ ན ཧོཏཱི’’ཏི ཨབྷིནིཝིསནཏོ ‘‘ཨུཙྪེདཝཱདིནོ’’ཏི ¶ ཝུཙྩནྟི. ཡེ ཏཎྷཱཙརིཏཱ པུགྒལཱ རཱུཔཾ ཝཱ ‘‘ཨཏྟཱ’’ཏི རཱུཔཝནྟཾ ཨཏྟཱནཾ ཨུཔགཙྪནྟི…པེ… ཝིཉྙཱཎཾ ཝཱ ‘‘ཨཏྟཱ’’ཏི ཝིཉྙཱཎཝནྟཾ ཨཏྟཱནཾ ཨུཔགཙྪནྟི. ཨཏྟནི ཝཱ ཝིཉྙཱཎཾ, ཝིཉྙཱཎསྨིཾ ཝཱ ཨཏྟཱནཾ ཨུཔགཙྪནྟི. ཨིམེ ཏཎྷཱཙརིཏཱ པུགྒལཱ ‘‘རཱུཔཱདཱིཧི ཨཏྟཱ ཨཉྙོ ¶ ཨཉྙཏྟཱ ཨཏྟཱ ནིཙྩོ སསྶཏོ’’ཏི ཨབྷིནིཝིསནཏོ ‘‘སསྶཏཝཱདིནོ’’ཏི ཝུཙྩནྟི.

ཏཏྠ ཏེསུ ཨུཙྪེདཝཱདཱིསསྶཏཝཱདཱིཔུགྒལེསུ པཝཏྟཱ ཨུཙྪེདཝཱདསསྶཏཝཱདཱ ཨུབྷོ ཨནྟཱ ཨནྟདྭཡཔཊིཔདཱ ཧོནྟི. ཨཡཾ ཨནྟདྭཡཔཊིཔདཱ སཾསཱརཔཝཏྟནསྶ ཧེཏུབྷཱཝཏོ སཾསཱརཔཝཏྟི ཧོཏི, ཏསྶ ཨནྟདྭཡསྶ པཊིཔཛྫནསྶ པཛཧནཝསེན མཛ྄ཛྷིམཔཊིཔདཱསངྑཱཏོཝ ཨརིཡོ ཨཊྛངྒིཀོ མགྒོ པཊིཔཀྑོ ཧོཏི པཧཱཡཀཏྟཱ. ཨཡཾ མགྒོ སཾསཱརནིཝཏྟནསྶ ཧེཏུབྷཱཝཏོ སཾསཱརནིཝཏྟི ཧོཏི. ཏཏྠ སཾསཱརཔཝཏྟིསཾསཱརནིཝཏྟཱིསུ པཝཏྟི སཾསཱརཔཝཏྟི དུཀྑཾ དུཀྑསཙྩཾ, ཏདབྷིསངྒོ ཏསྨིཾ དུཀྑེ ཨབྷིསངྒོ ཏཎྷཱ སམུདཡོ སམུདཡསཙྩཾ, ཏཎྷཱནིརོདྷོ དུཀྑནིརོདྷོ ནིརོདྷསཙྩཾ, ཨརིཡོ ཨཊྛངྒིཀོ མགྒོ དུཀྑནིརོདྷགཱམིནཱི པཊིཔདཱ མགྒསཙྩཾ, ཨིཏི ཨིམཱནི ཙཏྟཱརི སཙྩཱནི ནིདྡྷཱརིཏཱནི. ‘‘དུཀྑཾ པརིཉྙེཡྻ’’ནྟིཨཱདིམྷི ཝུཏྟནཡོཝ ཨཏྠོ.

‘‘ཨུཙྪེདསསྶཏསྶ ཀིཏྟཀོ པབྷེདོ, མགྒསྶ ཀིཏྟཀོ’’ཏི པུཙྪིཏབྦཏྟཱ ‘‘ཏཏྠ ཨུཙྪེདསསྶཏ’’ནྟིཨཱདི ཝུཏྟཾ. ཏཏྠ ཨུཙྪེདསསྶཏཨརིཡམགྒེསུ ཨུཙྪེདསསྶཏདསྶནཾ སམཱསཏོ སངྑེཔཏོ ཝཱིསཏིཝཏྠུཀཱ སཀྐཱཡདིཊྛི. ཨུཙྪེདོ པཉྩུཔཱདཱནཀྑནྡྷེ ནིསྶཱཡ པཝཏྟཏྟཱ པཉྩཝིདྷོ, སསྶཏདསྶནཾ ཨེཀེཀསྨིཾ ཏིདྷཱ ཨུཔྤཛྫནཏོ པནྣརསཝིདྷནྟི ཝཱིསཏིཝིདྷཾ ཧོཏི. ཝིཏྠཱརཏོ དྭཱསཊྛི དིཊྛིགཏཱནི. ཀཏམཱནི? ཙཏྟཱརོ སསྶཏཝཱདཱ, ཙཏྟཱརོ ཨེཀཙྩསསྶཏཝཱདཱ, ཙཏྟཱརོ ཨནྟཱནནྟཝཱདཱ, ཙཏྟཱརོ ཨམརཱཝིཀྑེཔཝཱདཱ, དྭེ ཨདྷིཙྩསམུཔྤནྣཝཱདཱ, སོལ༹ས སཉྙཱིཝཱདཱ, ཨཊྛ ཨསཉྙཱིཝཱདཱ, ཨཊྛ ནེཝསཉྙཱིནཱསཉྙཱིཝཱདཱ, སཏྟ ཨུཙྪེདཝཱདཱ, པཉྩ དིཊྛདྷམྨནིབྦཱནཝཱདཱཏི དྭཱསཊྛི དིཊྛིགཏཱནི ཝེདིཏབྦཱནི. ཝིཏྠཱརཏོ པན བྲཧྨཛཱལསུཏྟེ (དཱི. ནི. ༡.༣༠ ཨཱདཡོ) ཨཱགཏཱནི. ཏེསཾ ཨུཙྪེདསསྶཏདསྶནཱནཾ ཏེཙཏྟཱལཱིསཾ བོདྷིཔཀྑིཡདྷམྨཱ པཊིཔཀྑོ མགྒོ. ཀཏམེ ཏེཙཏྟཱལཱིསཾ? ‘‘ཨནིཙྩསཉྙཱ དུཀྑསཉྙཱ ཨནཏྟསཉྙཱ’’ཏི ཏིསྶོ སཉྙཱ ཙ ‘‘པཧཱནསཉྙཱ ཝིརཱགསཉྙཱ ནིརོདྷསཉྙཱ’’ཏི ཏིསྶོ སཉྙཱ ཙཱཏི ཚ སཉྙཱ ཙ ‘‘ཙཏྟཱརོ སཏིཔཊྛཱནཱ, ཙཏྟཱརོ སམྨཔྤདྷཱནཱ, ཙཏྟཱརོ ཨིདྡྷིཔཱདཱ, པཉྩིནྡྲིཡཱནི, པཉྩ བལཱནི, སཏྟ བོཛ྄ཛྷངྒཱ, ཨཊྛ མགྒངྒཱནཱི’’ཏི ཏེཙཏྟཱལཱིསཾ བོདྷིཔཀྑིཡདྷམྨཱ ཝིཔསྶནཱཝསེན པཊིཔཀྑོ མགྒོ ནཱམ.

‘‘སམཐཝསེན ¶ ¶ ཀཏམོ པཊིཔཀྑོ’’ཏི ཝཏྟབྦཏྟཱ ‘‘ཨཊྛ ཝིམོཀྑཱ’’ཏིཨཱདི ཝུཏྟཾ. ཨཊྛ ཝིམོཀྑཱ པཱཀཊཱ. དས ཀསིཎཱཡཏནཱནི སམཐཝསེན པཊིཔཀྑོ མགྒོ ནཱམ. ‘‘ཀཏམཾ ཉཱཎཾ ཀཏམསྶ དྷམྨསྶ པདཱལན’’ནྟི པུཙྪིཏབྦཏྟཱ ‘‘དྭཱསཊྛི དིཊྛིགཏཱནཱི’’ཏིཨཱདི ཝུཏྟཾ. དིཊྛིཙརིཏེ པཝཏྟཱནི དིཊྛིགཏཱནི, མོཧོ. ཏཎྷཱཙརིཏེ པཝཏྟཱནི དིཊྛིགཏཱནི, ཛཱལཾ. ཨནཱདིཝསེན པཝཏྟོ མོཧོ. ཨནིདྷནཝསེན པཝཏྟཾ ཛཱལཾ. ཨཊྛ སམཱཔཏྟིཡོ སམཱཔཛྫིཏྭཱ ཏེཛེཏྭཱ ཏིཀྑཾ ཝིཔསྶནཱཉཱཎཉྩ ཨརིཡམགྒཉཱཎཉྩཉཱཎཝཛིརཾ ནཱམ བོདྷིཔཀྑིཡདྷམྨཱནཾ ཉཱཎཔདཊྛཱནཏྟཱ. མོཧོ ཙ ཛཱལཉྩ མོཧཛཱལཾ. པདཱལེཏཱིཏི པདཱལནཾ, ཀཏྟརི ཡུཔཙྩཡོ, མོཧཛཱལསྶ པདཱལནནྟི མོཧཛཱལཔདཱལནཾ. པདཱལནཉྷི དུཝིདྷཾ ཝིཀྑམྦྷནཔདཱལནཾ སམུཙྪེདཔདཱལནནྟི. པུབྦབྷཱགེ སམཐཝིཔསྶནཱཝསེན ཝིཀྑམྦྷནཔདཱལནཾ, མགྒཀྑཎེ སམུཙྪེདཔདཱལནཾ ཨེཝ དཊྛབྦཾ. ཏཏྠཱཏི ཏསྨིཾ མོཧཛཱལེ ཨཝིཛྫཱ མོཧོ, བྷཝཏཎྷཱ ཛཱལཾ. ཨཏྟནོ ཨཱདྷཱརཾ པུགྒལཾ དུཀྑཱདཱིསུ ཨཊྛསུ ཋཱནེསུ མོཧེཏཱིཏི མོཧོ. པཋམཾ ཛཱལཾ ཛཊཾ ལཱཡིཏྭཱ ཛཊཱཝསེན ལཱཏི པཝཏྟཏཱིཏི ཛཱལཾ, ཨཏྟནི ཛཱཏཾ མཙྪསཀུཎཱདིཀཾ ལཱཏི གཎྷཱཏི, ལཱཔེཏི གཎྷཱཔེཏཱིཏི ཝཱ ཛཱལཾ, ཛཱལཾ ཝིཡཱཏི ཛཱལཾ. ཏེན ཝུཏྟཾ – ‘‘ཨཏཱིཏཱདིབྷེདབྷིནྣེསུ རཱུཔཱདཱིསུ, སཀཨཏྟབྷཱཝཱདཱིསུ ཙ སཾསིབྦནཝསེན པཝཏྟནཏོ ཛཱལཾ བྷཝཏཎྷཱ’’ཏི (ནེཏྟི. ཨཊྛ. ༨༠). ‘‘ཨཝིཛྫཱཏཎྷཱཧི ཨཏྟཀིལམཐཱནུཡོགཱདཱིནཾ ཀིལེསཔཀྑཱནཾ ནིདྡྷཱརཎཾ ཀཏཾ ཀཐཾ ཀེན སདྡཧིཏབྦ’’ནྟི ཝཏྟབྦཏྟཱ ‘‘ཏེན ཝུཙྩཏི ‘པུབྦཱ ཀོཊི ན པཉྙཱཡཏི ཨཝིཛྫཱཡ ཙ བྷཝཏཎྷཱཡ ཙཱ’ཏི’’ ཝུཏྟཾ.

༨༡. ‘‘ཨིཏོ སཱསནཏོ བཧིདྡྷཱ དིཊྛིཙརིཏཏཎྷཱཙརིཏཱནཾ པཊིཔདཱདཡོ ནིདྡྷཱརིཏཱ, སཱསནེ དིཊྛིཙརིཏཏཎྷཱཙརིཏཱནཾ པཊིཔདཱདཡོ ཀཐཾ ནིདྡྷཱརིཏབྦཱ’’ཏི ཝཏྟབྦཏྟཱ ‘‘སཾཀིལེསཔཀྑཱ སུཏྟཏྠཱ ཨཱཙརིཡེན དསྶིཏཱ, ཝོདཱནཔཀྑསུཏྟཏྠཱ ཀཐཾ དསྶིཏབྦཱ’’ཏི ཝཏྟབྦཏྟཱ ཝཱ ‘‘ཏཏྠ དིཊྛིཙརིཏོ ཨསྨིཾ སཱསནེ’’ཏིཨཱདི ཝུཏྟཾ. ཏཏྠཱཏི ཏེསུ དིཊྛིཙརིཏཏཎྷཱཙརིཏེསུ. དིཊྛིཙརིཏོ པུགྒལོ ཨསྨིཾ སཱསནེ པབྦཛིཏོ ཧུཏྭཱ ཙཏཱུསུ པཙྩཡེསུ སལླེཁཱནུསནྟཏཝུཏྟི བྷཝཏི. ཀསྨཱ? ཡསྨཱ སལླེཁེ ཏིབྦགཱརཝོ, ཏསྨཱ སལླེཁེ ཏིབྦགཱརཝཏྟཱ. ཏཎྷཱཙརིཏོ པུགྒལོ ཨསྨིཾ སཱསནེ པབྦཛིཏོ ཧུཏྭཱ སིཀྑཱནུསནྟཏཝུཏྟི བྷཝཏི ¶ . ཀསྨཱ? ཡསྨཱ སིཀྑཱཡ ཏིབྦགཱརཝོ, ཏསྨཱ སིཀྑཱཡ ཏིབྦགཱརཝཏྟཱ. དིཊྛིཙརིཏོ པུགྒལོ སམྨཏྟནིཡཱམཾ ཨོཀྐམནྟོ ཧུཏྭཱ དྷམྨཱནུསཱརཱི པུགྒལོ བྷཝཏི. ཀསྨཱ? དིཊྛིཡཱ དིཊྛིཝིསཡེ པཉྙཱསདིསཔཝཏྟནཏོ. ཏཎྷཱཙརིཏོ པུགྒལོ སམྨཏྟནིཡཱམཾ ཨོཀྐམནྟོ ཧུཏྭཱ སདྡྷཱནུསཱརཱི བྷཝཏི. ཀསྨཱ? ཏཎྷཱཝསེན མིཙྪཱདྷིམོཀྑཏྟཱ. དིཊྛིཙརིཏོ པུགྒལོ སུཁཱཡ པཊིཔདཱཡ, དནྡྷཱབྷིཉྙཱཡ ཙ ནིཡྻཱཏི, སུཁཱཡ ¶ པཊིཔདཱཡ, ཁིཔྤཱབྷིཉྙཱཡ ཙ ནིཡྻཱཏི སུཁེན ཀིལེསེཧི ཝིཀྑམྦྷིཏུཾ སམཏྠཏྟཱ. ཏཎྷཱཙརིཏོ པུགྒལོ དུཀྑཱཡ པཊིཔདཱཡ, དནྡྷཱབྷིཉྙཱཡ ཙ ནིཡྻཱཏི, དུཀྑཱཡ པཊིཔདཱཡ, ཁིཔྤཱབྷིཉྙཱཡ ཙ ནིཡྻཱཏི དུཀྑེན ཀིལེསེཧི ཝིཀྑམྦྷིཏུཾ སམཏྠཏྟཱ.

‘‘ཏཐཱ ཀསྨཱ ནིཡྻཱཏཱི’’ཏི པུཙྪིཏབྦཏྟཱ ‘‘ཏཏྠ ཀིཾ ཀཱརཎཾ ཡ’’ནྟིཨཱདི ཝུཏྟཾ. ཡཾ ཡེན ཀཱརཎེན ནིཡྻཱཏི, ཏཾ ཀཱརཎཾ ཀིནྟི པུཙྪཏི. ཏསྶ ཏཎྷཱཙརིཏསྶ ཀཱམཱ སུཁེན ཨཔརིཙྩཏྟཱ ཧི ཡསྨཱ བྷཝནྟི, ཏསྨཱ ཀཱམཱནཾ སུཁེན ཨཔརིཙྩཏྟཏྟཱ ཏཐཱ ནིཡྻཱཏི. སོ ཏཎྷཱཙརིཏོ ཀཱམེཧི ཝཏྠུཀཱམཀིལེསཀཱམེཧི ཝིཝེཙིཡམཱནོ དུཀྑེན པཊིནིསྶརཏི, དནྡྷཉྩ དྷམྨཾ ཙཏུསཙྩདྷམྨཾ ཨཱཛཱནཱཏི. ཡོ པན ཨཡཾ པུགྒལོ དིཊྛིཙརིཏོ ཧོཏི, སོ ཨཡཾ དིཊྛིཙརིཏོ པུགྒལོ ཨཱདིཏོ ཨཱདིམྷིཡེཝ ཀཱམེཧི ཀིལེསཀཱམཝཏྠུཀཱམེཧི ཨནཏྠིཀོ བྷཝཏི. སོ དིཊྛིཙརིཏོ ཏཏོ ཏེཧི ཀཱམེཧི ཝིཝེཙིཡམཱནོ ཁིཔྤཉྩ སུཁེན པཊིནིསྶརཏི, ཁིཔྤཉྩ དྷམྨཾ ཨཱཛཱནཱཏི.

‘‘ཏཎྷཱཙརིཏོ དུཀྑཱཡ པཊིཔདཱཡ དནྡྷཱབྷིཉྙཱཡ ནིཡྻཱཏི, དིཊྛིཙརིཏོ སུཁཱཡ པཊིཔདཱཡ ཁིཔྤཱབྷིཉྙཱཡ ནིཡྻཱཏཱིཏི ཨེཀེཀཱཡ པཊིཔདཱཡ བྷཝིཏབྦ’’ནྟི ཝཏྟབྦཏྟཱ ‘‘དུཀྑཱཔི པཊིཔདཱ དུཝིདྷཱ དནྡྷཱབྷིཉྙཱ ཙ ཁིཔྤཱབྷིཉྙཱ ཙ, སུཁཱཔི པཊིཔདཱ དུཝིདྷཱ དནྡྷཱབྷིཉྙཱ ཙ ཁིཔྤཱབྷིཉྙཱ ཙཱ’’ཏི ཝུཏྟཾ. ‘‘ཨེཝཾ སཏི ཨེཀོཝ དྭཱིཧི དྭཱིཧི པཊིཔདཱཧི ནིཡྻཱཏཱིཏི ཨཱཔཛྫཏཱི’’ཏི ཝཏྟབྦཏྟཱ ‘‘སཏྟཱཔཱི’’ཏིཨཱདི ཝུཏྟཾ. ཏཎྷཱཙརིཏཱ སཏྟཱཔི དུཝིདྷཱ མུདིནྡྲིཡཱཔི ཏིཀྑིནྡྲིཡཱཔི, དིཊྛིཙརིཏཱ སཏྟཱཔི དུཝིདྷཱ མུདིནྡྲིཡཱཔི ཏིཀྑིནྡྲིཡཱཔཱིཏི ཡོཛནཱ ཀཱཏབྦཱ. ཡེ ཏཎྷཱཙརིཏདིཊྛིཙརིཏཱ མུདིནྡྲིཡཱ བྷཝནྟི, ཏེ ཏཎྷཱཙརིཏདིཊྛིཙརིཏཱ དནྡྷཉྩ པཊིནིསྶརནྟི, དནྡྷཉྩ དྷམྨཾ ཨཱཛཱནནྟི. ཡེ ཏཎྷཱཙརིཏདིཊྛིཙརིཏཱ ཏིཀྑིནྡྲིཡཱ བྷཝནྟི, ཏེ ཏཎྷཱཙརིཏདིཊྛིཙརིཏཱ ཁིཔྤཉྩ པཊིནིསྶརནྟི, ཁིཔྤཉྩ དྷམྨཾ ཨཱཛཱནནྟི, ཏསྨཱ ཨེཀེཀསྶེཝ ཨེཀེཀཱ པཊིཔདཱ ¶ ཡུཏྟཱཝཱཏི. ‘‘ཨིམཱཧི པཊིཔདཱཧི ནིཡྻནྟིཡེཝ, ན ནིཡྻིཾསུ ནིཡྻིསྶནྟཱིཏི ཨཱཔཛྫེཡྻ ཝཏྟམཱནཝིབྷཏྟིཡཱ ནིདྡིཊྛཏྟཱ’’ཏི ཝཏྟབྦཏྟཱ ‘‘ཨིམཱ ཙཏསྶོ’’ཏིཨཱདི ཝུཏྟཾ. ཨཏཱིཏེཔི ཨིམཱཧི ཙཏཱུཧི པཊིཔདཱཧི ནིཡྻིཾསུ, པཙྩུཔྤནྣེསུཔི ནིཡྻནྟི, ཨནཱགཏེཔི ནིཡྻིསྶནྟཱིཏི ཨཏྠོ གཧེཏབྦོ ཡཐཱ ‘‘པབྦཏོ ཏིཊྛཏཱི’’ཏི.

ཨེཝནྟི ཨེཝཾ ཝུཏྟཔྤཀཱརེན. ཨརིཡཔུགྒལཱ ཙཏུཀྐམགྒཾ པཊིཔདཾ པཉྙཱཔེནྟི. ‘‘ཀིམཏྠཾ པཉྙཱཔེནྟཱི’’ཏི ཝཏྟབྦཏྟཱ ‘‘ཨབུདྷཛནསེཝིཏཱཡཱ’’ཏིཨཱདི ཝུཏྟཾ. ཨཡཾ ཝུཙྩཏི ནནྡིཡཱཝཊྚསྶ ནཡསྶ བྷཱུམཱིཏི ཏཎྷཱཨཝིཛྫཱནཾ ཝསེན སཾཀིལེསཔཀྑེ དྭིདིསཱ ཙཏུསཙྩཡོཛནཱཔི སམཐཝིཔསྶནཱནཾ ¶ ཝསེན ཝོདཱནཔཀྑེ དྭིདིསཱ ཙཏུསཙྩཡོཛནཱཔི དསྶིཏཱ. ཨཡཾ ཙཏུབྦིདྷཱ ཙཏུསཙྩཡོཛནཱ ནནྡིཡཱཝཊྚསྶ ནཡསྶ སམུཊྛཱནཾ བྷཱུམི སམུཊྛཱནབྷཱཝཏོཏི. ‘‘ཏཐཱཝིདྷཱཡ ཙཏུསཙྩཡོཛནཱཡ ནནྡིཡཱཝཊྚསྶ ནཡསྶ སམུཊྛཱནབྷཱུམིབྷཱཝོ ཀེན སདྡཧིཏབྦོ’’ཏི ཝཏྟབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ.

༨༢. ‘‘ནནྡིཡཱཝཊྚསྶ ནཡསྶ སམུཊྛཱནབྷཱུཏཱ བྷཱུམི དསྶིཏཱ, ཏསྶ ནནྡིཡཱཝཊྚསྶ ནཡསྶ ཀཏྠ ཀཏམཱ དིསཱ ཀིཏྟཀེན ཨུཔཔརིཀྑིཏབྦཱ’’ཏི ཝཏྟབྦཏྟཱ ‘‘ཝེཡྻཱཀརཎེསུ ཧཱི’’ཏིཨཱདི ཝུཏྟཾ. ཧི-སདྡོ པཀྑནྟརཏྠོ. ཡེ དིསཱབྷཱུཏཱ ཨཱཧཱརཱདཡོ དྷམྨཱ ཝེཡྻཱཀརཎེསུ ‘‘ཀུསལཱཀུསལཱ’’ཏི ཝུཏྟཾ, ཏེ དིསཱབྷཱུཏཱ ཨཱཧཱརཱདཡོ དྷམྨཱ དུཝིདྷེན ‘‘ཨིམེ ཨཀུསལཱ དྷམྨཱ སཾཀིལེསདྷམྨཱ, ཨིམེ ཀུསལཱ ཝོདཱནདྷམྨཱ’’ཏི དུཝིདྷེན ཨུཔཔརིཀྑིཏབྦཱ ཨཱལོཙིཏབྦཱ. ‘‘ཀཏམེན དུཝིདྷེནཱ’’ཏི པུཙྪིཏབྦཏྟཱ ‘‘ལོཀཝཊྚཱནུསཱརཱི ཙ ལོཀཝིཝཊྚཱནུསཱརཱི ཙཱ’’ཏི ཝུཏྟཾ. ‘‘ཀཏམཾ ཝཊྚཾ, ཀཏམཾ ཝིཝཊྚ’’ནྟི པུཙྪིཏབྦཏྟཱ ‘‘ཝཊྚཾ ནཱམ སཾསཱརོ, ཝིཝཊྚཾ ནིབྦཱན’’ནྟི ཝུཏྟཾ. ‘‘སཾསཱརསྶ ཀཏམོ ཧེཏཱུ’’ཏི པུཙྪིཏབྦཏྟཱ ‘‘ཀམྨཀིལེསཱ ཧེཏུ སཾསཱརསྶཱ’’ཏི ཝུཏྟཾ. ‘‘ཀཏམཾ ཀམྨཾ ནཱམ, ཙེཏནཱཡེཝ ཀམྨཾ ནཱམ ཀིཾ, ཨུདཱཧུ ཙེཏསིཀཉྩ ཕལདཱནསམཏྠཱསམཏྠམྤི ཀམྨཾ ཀི’’ནྟི པུཙྪིཏབྦཏྟཱ ‘‘ཏཏྠ ཀམྨ’’ནྟིཨཱདི ཝུཏྟཾ. ཏཏྠཱཏི ཏེསུ ཀམྨཀིལེསེསུ. ‘‘ཏཾ ཀམྨཾ ཀཐཾ ཀེན པཀཱརེན དཊྛབྦ’’ནྟི ཙེ ཝདེཡྻ, ཡཐཱ ཡེན ཨུཔཙཡེན ཀཏཾ ཀམྨཾ ཕལདཱནསམཏྠཾ ཧོཏི, ཏསྨིཾ ཨུཔཙཡེ ཏཾ ཀམྨཾ དཊྛབྦཾ. ‘‘ཏེ ཀིལེསཱ ཀཏམེཧི དྷམྨེཧི ནིདྡིསིཏབྦཱ’’ཏི ཙེ པུཙྪེཡྻ, སབྦེཔི ཀིལེསཱ ཙཏཱུཧི ཝིཔལླཱསེཧི ནིདྡིསིཏབྦཱ. ‘‘ཏེ ཀིལེསཱ ཀཏྠ ¶ དཊྛབྦཱ’’ཏི ཙེ པུཙྪེཡྻ, དསཝཏྠུཀེ ཀིལེསཔུཉྫེ ཏེ ཀིལེསཱ དཊྛབྦཱ.

‘‘ཀཏམཱནི དས ཝཏྠཱུནཱི’’ཏི ཙེ པུཙྪེཡྻ, ཙཏྟཱརོ ཨཱཧཱརཱ, ཙཏྟཱརོ ཝིཔལླཱསཱ, ཙཏྟཱརི ཨུཔཱདཱནཱནི, ཙཏྟཱརོ ཡོགཱ, ཙཏྟཱརོ གནྠཱ, ཙཏྟཱརོ ཨཱསཝཱ, ཙཏྟཱརོ ཨོགྷཱ, ཙཏྟཱརོ སལླཱ, ཙཏསྶོ ཝིཉྙཱཎཊྛིཏིཡོ, ཙཏྟཱརི ཨགཏིགམནཱནཱིཏི དས ཝཏྠཱུནཱིཏི ཝེདིཏབྦཱནི ཙཏུནྣཾ ཀིཙྩཝསེན ཨེཀཏྟཱ. ཨེཏྠ ཙ ཀིལེསཱནཾ པཙྩཡོ ཝཏྠུཀཱམོཔི ཀིལེསོཔི ཀིལེསཝཏྠུ ཧོཏི པུརིམཱནཾ པུརིམཱནཾ ཀིལེསཱནཾ པཙྪིམཱནཾ པཙྪིམཱནཾ ཀིལེསཱནཾ པཙྩཡབྷཱཝཏོ.

‘‘ཀཏམོ ཀཏམོ ཀཏམསྶ ཀཏམསྶ ཝཏྠཱུ’’ཏི པུཙྪིཏབྦཏྟཱ ‘‘པཋམེ ཨཱཧཱརེ’’ཏིཨཱདི ཝུཏྟཾ. ཨཱལམྦིཏབྦེ པཋམེ ཀབལཱི༹ཀཱརཱཧཱརེ པཋམོ ‘‘རཱུཔཾ སུབྷ’’ནྟི ཝིཔལླཱསོ ཨཱརམྨཎཀརཎཝསེན པཝཏྟཏི. ཨཱལམྦིཏབྦེ དུཏིཡེ ཕསྶཱཧཱརེ དུཏིཡོ ‘‘ཕསྶཔཙྩཡཱ ཝེདནཱ སུཁཱ’’ཏི ¶ ཝིཔལླཱསོ པཝཏྟཏི. ཨཱལམྦིཏབྦེ ཏཏིཡེ ཙིཏྟཱཧཱརེ ཏཏིཡོ ‘‘ཙིཏྟཾ ནིཙྩ’’ནྟི ཝིཔལླཱསོ པཝཏྟཏི, ཨཱལམྦིཏབྦེ ཙཏུཏྠེ མནོསཉྩེཏནཱཧཱརེ ‘‘དྷམྨོ ཨཏྟཱ’’ཏི ཝིཔལླཱསོ ཨཱརམྨཎཀརཎཝསེན པཝཏྟཏི. ཨཱལམྦིཏབྦེ པཋམེ ‘‘རཱུཔཾ སུབྷ’’ནྟི ཝིཔལླཱསོ པཋམཾ ཀཱམུཔཱདཱནཾ ཨཱརམྨཎཀརཎཝསེན པཝཏྟཏི. སེསེསུཔི ཡཐཱརཧཾ ནཡཱནུསཱརེན ཡོཛེཏྭཱ ཨཏྠོ ཝེདིཏབྦོ.

༨༣. ‘‘ཏེསུ ཨཱཧཱརཱདཱིསུ ཀཏམོ ཀཏམསྶ པུགྒལསྶ ཨུཔཀྐིལེསོ’’ཏི ཝཏྟབྦཏྟཱ ‘‘ཏཏྠ ཡོ ཙཱ’’ཏིཨཱདི ཝུཏྟཾ. ཏཏྠཱཏི ཏེསུ ཨཱཧཱརཱདཱིསུ, ཏཎྷཱཙརིཏདིཊྛིཙརིཏེསུ ཝཱ. ཏཎྷཱཙརིཏསྶ རཱུཔཝེདནཱསུ ཏིབྦཙྪནྡརཱགསྶ ཨུཔྤཛྫནཏོ ཡོ ཙ ཀབལཱི༹ཀཱརོ ཨཱཧཱརོ, ཡོ ཙ ཕསྶཱཧཱརོ པཝཏྟཏི, ཨིམེ ཀབལཱི༹ཀཱརཱཧཱརཕསྶཱཧཱརཱ ཏཎྷཱཙརིཏསྶ པུགྒལསྶ ཨུཔཀྐིལེསཱ བྷཝནྟི. དིཊྛིཙརིཏསྶ དྷམྨཙིཏྟེསུ བལཝཨཏྟནིཙྩཱབྷིནིཝེསསྶ ཨུཔྤཛྫནཏོ ཡོ ཙ མནོསཉྩེཏནཱཧཱརོ, ཡོ ཙ ཝིཉྙཱཎཱཧཱརོ པཝཏྟཏི, ཨིམེ མནོསཉྩེཏནཱཧཱརཝིཉྙཱཎཱཧཱརཱ དིཊྛིཙརིཏསྶ པུགྒལསྶ ཨུཔཀྐིལེསཱ བྷཝནྟི. ‘‘ཏཏྠ ཡོ ཙ ཨསུབྷེ སུབྷ’’ནྟིཨཱདཱིསུཔི ཝུཏྟནཡཱནུསཱརེན ཨཏྠོ གཧེཏབྦོཏི. པུརིམཱནཾ ¶ དྭིནྣཾ དྭིནྣཾ ཏཎྷཱཔདྷཱནཏྟཱ ཙེཝ ཏཎྷཱསབྷཱཝཏྟཱ ཙ, པཙྪིམཱནཾ དྭིནྣཾ དྭིནྣཾ དིཊྛིཔདྷཱནཏྟཱ ཙེཝ དིཊྛིསབྷཱཝཏྟཱ ཙཱཏི.

༨༤. ‘‘ཀཏམསྨིཾ པཋམཱདིཀེ ཨཱཧཱརེ ཀཏམོ པཋམཱདིཀོ ཝིཔལླཱསོ པཝཏྟཏཱི’’ཏི པུཙྪིཏབྦཏྟཱ ‘‘ཏཏྠ ཀབལཱི༹ཀཱརེ ཨཱཧཱརེ’’ཏིཨཱདིནཱ ནཱམཝསེན ནིཡམེཏྭཱ པུབྦེ ཝུཏྟཏྠམེཝ དསྶེཏི. ‘‘ཀཏམསྨིཾ ཝིཔལླཱསེ ཋིཏོ ཀཏམཾ ཨུཔཱདིཡཏཱི’’ཏི པུཙྪིཏབྦཏྟཱ ‘‘པཋམེ ཝིཔལླཱསེ ཋིཏོ’’ཏིཨཱདི ཝུཏྟཾ. པཋམེ ཝིཔལླཱསེ ཋིཏོ པུགྒལོ ཀཱམེ ཡེན ཨུཔཱདཱནེན ཨུཔཱདིཡཏི, ཨིདཾ ཨུཔཱདཱནཾ ‘‘ཀཱམུཔཱདཱནཾ ནཱམཱ’’ཏི ཝུཙྩཏི. སེསེསུ ཨིམིནཱ ནཡེན ཡོཛནཱ ཀཱཏབྦཱ.

‘‘ཡེན ཀཱམུཔཱདཱནེན ཀཱམེཧི པུགྒལོ སཾཡུཛྫཏི, ཨཡཾ ཀཱམུཔཱདཱནདྷམྨོ ‘ཀཱམཡོགོ’ཏི ཝུཙྩཏཱི’’ཏིཨཱདིནཱ ཡོཛནཱ ཀཱཏབྦཱ. སེསཱནཾ ཡོཛནཏྠཱདཡོ པཱལི༹ཏོ, ཨཊྛཀཐཱཏོ ཙ པཱཀཊཱ.

༨༥. ‘‘ཨཱཧཱརཱདཱིསུ ཀཏམེ ཀཏམཱ དིསཱ’’ཏི པུཙྪིཏབྦཏྟཱ ‘‘ཏཏྠ ཨིམཱ ཙཏསྶོ དིསཱ’’ཏིཨཱདི ཝུཏྟཾ. ཏཏྠ ཏེསུ ཨཱཧཱརཙཏུཀྐཱདཱིསུ དསསུ ཙཏུཀྐེསུ པཋམོ པཋམོ ཀབལཱི༹ཀཱརཱཧཱརཱདིཀོ ¶ པཋམཱ དིསཱ, དུཏིཡོ དུཏིཡོ ཕསྶཱཧཱརཱདིཀོ དུཏིཡཱ དིསཱ, ཏཏིཡོ ཏཏིཡོ ཝིཉྙཱཎཱཧཱརཱདིཀོ ཏཏིཡཱ དིསཱ, ཙཏུཏྠོ ཙཏུཏྠོ མནོསཉྩེཏནཱཧཱརཱདིཀོ ཙཏུཏྠཱ དིསཱཏི ཝེདིཏབྦཱ.

‘‘ཏཱསུ ཙཏཱུསུ དིསཱསུ ཏེསུ ཀབལཱི༹ཀཱརཱཧཱརཱདཱིསུ དྷམྨེསུ ཀཏམེ དྷམྨཱ ཀཏམསྶ ཨུཔཀྐིལེསཱ’’ཏི པུཙྪིཏབྦཏྟཱ ཨིམེ ཨཱཧཱརཱདཡོ དྷམྨཱ ཨིམསྶ པུགྒལསྶ ཨུཔཀྐིལེསཱཏི ཝིབྷཏྟཱཏི དསྶེཏུཾ ‘‘ཏཏྠ ཡོ ཙ ཀབལཱི༹ཀཱརོ ཨཱཧཱརོ…པེ… ཨིམེ དིཊྛིཙརིཏསྶ ཨུདཏྟསྶ ཨུཔཀྐིལེསཱ’’ཏི ཝུཏྟཾ. ཨཊྛཀཐཱཡཾ པན – ‘‘ཀབལཱི༹ཀཱརཱཧཱརོ ཨཱཧཱརོཏིཨཱདི ཨཱཧཱརཱདཱིསུ ཡེ ཡསྶ པུགྒལསྶ ཨུཔཀྐིལེསཱ, ཏཾ ཝིབྷཛིཏྭཱ དསྶེཏུཾ ཨཱརདྡྷ’’ནྟི (ནེཏྟི. ཨཊྛ. ༨༥) ཝུཏྟཾ. དསནྣཾ སུཏྟཱནནྟི ཨེཀདེསབྷཱུཏཱནཾ དསནྣཾ སུཏྟཱནཾ. ཨཏྠོཏི སབྷཱཝདྷམྨོ. སདྡཏྠོ ཧི ཨསམཱནོཏི. ‘‘བྱཉྫནམེཝ ནཱན’’ནྟི ཨེཏེན ཙ སདྡཏྠསྶ ནཱནཏྟཾ དསྶེཏི.

‘‘ཀབལཱི༹ཀཱརཱཧཱརཱདཱིསུ ¶ ཀཏམེ ཨཱཧཱརཱདཡོ ཀཏམེན ཝིམོཀྑམུཁེན པརིཉྙཾ པཧཱནཾ གཙྪནྟཱི’’ཏི པུཙྪིཏབྦཏྟཱ ‘‘ཏཏྠ ཡོ ཙ ཀབལཱི༹ཀཱརོ’’ཏིཨཱདི ཝུཏྟཾ.

ཨིཏཱིཏི ཨེཝཾ ཝུཏྟཔྤཀཱརཱ. སབྦེཏི སབྦེ ཨཱཧཱརཱདཡོ དྷམྨཱ ལོཀཝཊྚཱནུསཱརིནོ བྷཝནྟི. ཏེཏི ཏེ སབྦེ ཨཱཧཱརཱདཡོ དྷམྨཱ. ལོཀཱཏི ལོཀཏོ ཝཊྚཏོ. ཏཱིཧི ཝིམོཀྑམུཁེཧི ཨནིཙྩཱནུཔསྶནཱདཱིཧི ནིཡྻནྟི.

༨༦. སཾཀིལེསཔཀྑེ དིསཱབྷཱུཏཱ ཨཱཧཱརཙཏུཀྐཱདཡོ དས ཙཏུཀྐཱ དྷམྨཱ ཨཱཙརིཡེན ནིདྡྷཱརེཏྭཱ དསྶིཏཱ, ཨམྷེཧི ཙ ཉཱཏཱ, ‘‘ཝོདཱནཔཀྑེ ཀཏམེ དིསཱབྷཱུཏཱ དྷམྨཱ’’ཏི པུཙྪིཏབྦཏྟཱ ཝོདཱནཔཀྑེ དིསཱབྷཱུཏེ དྷམྨེ དསྶེཏུཾ ‘‘ཙཏསྶོ པཊིཔདཱ’’ཏིཨཱདི ཝུཏྟཾ. ཙཏྟཱརོ ཝིཧཱརཱཏི དིབྦཝིཧཱརཱ བྲཧྨཝིཧཱརཱ ཨརིཡཝིཧཱརཱ ཨཱནེཉྫཝིཧཱརཱཏི ཙཏྟཱརོ ཝིཧཱརཱ. ཏེསུ རཱུཔཱཝཙརསམཱཔཏྟིཡོ དིབྦཝིཧཱརཱ, ཙཏསྶོ ཨཔྤམཉྙཱཡོ བྲཧྨཝིཧཱརཱ, ཙཏསྶོ ཕལསམཱཔཏྟིཡོ ཨརིཡཝིཧཱརཱ, ཙཏསྶོ ཨརཱུཔསམཱཔཏྟིཡོ ཨཱནེཉྫཝིཧཱརཱ ཙཏྟཱརོ ཨཙྪརིཡཱ ཨབྦྷུཏཱ དྷམྨཱཏི མཱནཔཧཱནཾ ཨཱལཡསམུགྒྷཱཏོ ཨཝིཛྫཱཔཧཱནཾ བྷཝཱུཔསམོཏི ཙཏྟཱརོ ཨཙྪརིཡཨབྦྷུཏདྷམྨཱ. ཙཏྟཱརི ཨདྷིཊྛཱནཱནཱིཏི སཙྩཱདྷིཊྛཱནཾ ཙཱགཱདྷིཊྛཱནཾ པཉྙཱདྷིཊྛཱནཾ ཨུཔསམཱདྷིཊྛཱནནྟི ཙཏྟཱརི ཨདྷིཊྛཱནཱནི. ཙཏསྶོ སམཱདྷིབྷཱཝནཱཏི ཚནྡསམཱདྷིབྷཱཝནཱ ཝཱིརིཡསམཱདྷིབྷཱཝནཱ ཙིཏྟསམཱདྷིབྷཱཝནཱ ཝཱིམཾསཱསམཱདྷིབྷཱཝནཱཏི ཙཏསྶོ སམཱདྷིབྷཱཝནཱ. ཙཏྟཱརོ ¶ སུཁབྷཱགིཡཱཏི ཨིནྡྲིཡསཾཝརོ ཏཔོ བོཛ྄ཛྷངྒོ སབྦཱུཔདྷིཔཊིནིསྶགྒོཏི ཙཏྟཱརོ སུཁབྷཱགིཡཱ. ཨཝསེསཱ པཱཀཊཱ.

‘‘ཙཏཱུསུ ཙཏཱུསུ པཊིཔདཱདཱིསུ ཀཏམོ པཊིཔདཱདིཀོ པཋམོ སཏིཔཊྛཱནཱདིཀོ བྷཝཏཱི’’ཏི པུཙྪིཏབྦཏྟཱ ‘‘པཋམཱ པཊིཔདཱ པཋམཾ སཏིཔཊྛཱན’’ནྟིཨཱདི ཝུཏྟཾ. ‘‘པཊིཔདཱདཡོ པཉྙཱཔདཊྛཱནཱདིཀཱ, སཏིཔཊྛཱནཱདཡོ པན སཏིཔདཊྛཱནཱདིཀཱ, ཏསྨཱ ‘པཋམཱ པཊིཔདཱ པཋམཾ སཏིཔཊྛཱན’ནྟིཨཱདིཡོཛནཱ ཀཱཏབྦཱ’’ཏི ཝཏྟབྦཏྟཱ ‘‘པཋམཱ པཊིཔདཱ བྷཱཝིཏཱ བཧུལཱིཀཏཱ པཋམཾ སཏིཔཊྛཱནཾ པཱུརེཏཱི’’ཏིཨཱདི ཝུཏྟཾ, པཱུརཀཔཱུརེཏབྦབྷཱཝཏོ ཏཐཱ ཡོཛནཱ ཀཱཏབྦཱཏི ཨདྷིཔྤཱཡོ. ཨཐ ¶ ཝཱ ‘‘བྷཱཝིཏཱ བཧུལཱིཀཏཱ ཀཏམེ པཊིཔདཱདཡོ ཀཏམེ སཏིཔཊྛཱནཱདིཀེ པཱུརེནྟཱི’’ཏི པུཙྪིཏབྦཏྟཱ ‘‘པཋམཱ པཊིཔདཱ བྷཱཝིཏཱ བཧུལཱིཀཏཱ པཋམཾ སཏིཔཊྛཱནཾ པཱུརེཏཱི’’ཏིཨཱདི ཝུཏྟཾ.

༨༧. ‘‘ཏེསུ དསསུ པཊིཔདཱཙཏུཀྐཱདཱིསུ ཀཏམེ དྷམྨཱ ཀཏམཱ དིསཱ, ཀཏམེ དྷམྨཱ ཀཏམཱ དིསཱ’’ཏི པུཙྪིཏབྦཏྟཱ ‘‘ཏཏྠ ཨིམཱ ཙཏསྶོ དིསཱ པཋམཱ པཊིཔདཱ, པཋམོ སཏིཔཊྛཱནོ’’ཏིཨཱདི ཝུཏྟཾ. ཏཏྠཱཏི ཏེསུ དསསུ པཊིཔདཱཙཏུཀྐཱདཱིསུ. ཨིམཱ མཡཱ ཝུཙྩམཱནཱ པཋམཱ པཊིཔདཱདཡོ དིསཱ ཙཏསྶོ དིསཱ བྷཝནྟི.

‘‘ཏེསུ ཙཏཱུསུ དིསཱབྷཱུཏེསུ པཊིཔདཱཙཏུཀྐཱདཱིསུ ཀཏམོ དིསཱབྷཱུཏོ ཨཏྠོ ཀཏམསྶ པུགྒལསྶ བྷེསཛྫ’’ནྟི པུཙྪིཏབྦཏྟཱ ‘‘ཏཏྠ པཋམཱ པཊིཔདཱ…པེ… དིཊྛིཙརིཏསྶ ཨུདཏྟསྶ བྷེསཛྫ’’ནྟི ཝུཏྟཾ.

‘‘ཏེསུ དསསུ པཊིཔདཱདིཙཏུཀྐེསུ དྷམྨེསུ ཀཏམོ ཀཏམོ ཀཏམཾ ཀཏམཾ ཝིམོཀྑམུཁ’’ནྟི པུཙྪིཏབྦཏྟཱ ‘‘ཏཏྠ དུཀྑཱ ཙ པཊིཔདཱ’’ཏིཨཱདི ཝུཏྟཾ. ཨཏྠོ པན ཊཱིཀཱཡཾ ཝིཏྠཱརེན ཝུཏྟོ པཱཀཊོ. སཾཀིལེསཔཀྑེ དིསཱབྷཱུཏཱ ཨཱཧཱརཙཏུཀྐཱདཡོ དས ཙཏུཀྐཱ སམཏིཀྐམིཏབྦཔཧཱཏབྦབྷཱཝེན ནིདྡྷཱརིཏཱ, ཝོདཱནཔཀྑེ པན དིསཱབྷཱུཏཱ པཊིཔདཱཙཏུཀྐཱདཡོ དས ཙཏུཀྐཱ སམཏིཀྐམཔཧཱཡཀབྷཱཝེན ནིདྡྷཱརིཏཱ.

‘‘ཏེསཾ ཨཱཧཱརཙཏུཀྐཱདཱིནཾ དསནྣཾ ཙཏུཀྐཱནཾ སམཏིཀྐམནཔཧཱནསངྑཱཏཾ ཡཾ ཝིཀྐཱིལི༹ཏཉྩ ཏེསཾ པཊིཔདཱཙཏུཀྐཱདཱིནཾ དསནྣཾ ཙཏུཀྐཱནཾ བྷཱཝནཱསངྑཱཏཾ ཡཾ ཝིཀྐཱིལི༹ཏཉྩ སཙྪིཀིརིཡཱསངྑཱཏཾ ཡཾ ཝིཀྐཱིལི༹ཏཉྩ ཨཏྠི, ཏཾ ཏིཝིདྷཾ ཝིཀྐཱིལི༹ཏཾ ཀཏམེསཾ པུགྒལཱནཾ ཝིཀྐཱིལི༹ཏཾ ¶ བྷཝཏཱི’’ཏི པུཙྪིཏབྦཏྟཱ ‘‘ཏེསཾ ཝིཀྐཱིལི༹ཏ’’ནྟི ཝུཏྟཾ. ཨཐ ཝཱ ‘‘ཡཐཱཝུཏྟཔྤཀཱརེཧི ཝིམོཀྑམུཁེཧི ཡེ བུདྡྷཔཙྩེཀབུདྡྷསཱཝཀཱ ཝིམུཙྩིཾསུ, ཏེསུ བུདྡྷསྶེཝ ཝིཀྐཱིལི༹ཏཾ བྷཝཏི ཀིཾ, པཙྩེཀབུདྡྷསྶེཝ ཝིཀྐཱིལི༹ཏཾ བྷཝཏི ཀིཾ, སཱཝཀསྶེཝ ཝིཀྐཱིལི༹ཏཾ བྷཝཏི ཀིཾ, ཨུདཱཧུ སབྦེསཾ བུདྡྷཔཙྩེཀབུདྡྷསཱཝཀཱནཾ ཝིཀྐཱིལི༹ཏཾ བྷཝཏི ཀི’’ནྟི ཝིཙཱརཎཱཡ སམྦྷཝཏོ ‘‘ཏེསཾ ཝིཀྐཱིལི༹ཏ’’ནྟི ཝུཏྟཾ. ཡཐཱཝུཏྟཔྤཀཱརེཧི ཝིམོཀྑམུཁེཧི ཡེ བུདྡྷཔཙྩེཀབུདྡྷསཱཝཀཱ མུཙྩིཾསུ, ཏེསཾ བུདྡྷཔཙྩེཀབུདྡྷསཱཝཀཱནཾ ཝིཀྐཱིལི༹ཏཾ. ཡཾ ཨཱཧཱརཙཏུཀྐཱདཱིནཾ དསནྣཾ ཙཏུཀྐཱནཾ ¶ སཔརསནྟཱནེ སམཏིཀྐམནཔཧཱནཉྩ ཡཱ པཊིཔདཱཙཏུཀྐཱདཱིནཾ དསནྣཾ ཙཏུཀྐཱནཾ སཔརསནྟཱནེ བྷཱཝནཱསམྤཱདནཱ, སཙྪིཀིརིཡཱསམྤཱདནཱ ཙ ཨཏྠི, ཨིདཾ སབྦཾ ཝིཀྐཱིལི༹ཏཾ ནཱམ བྷཝཏཱིཏི ཨཏྠོ.

‘‘སབྦེསཾ ཨཱཧཱརཙཏུཀྐཱདཱིནཾ དསནྣཾ ཙཏུཀྐཱནཾ སབྦེ པཊིཔདཱཙཏུཀྐཱདཡོ དས ཙཏུཀྐཱ པཊིཔཀྑཱ ཧོནྟི ཀིཾ, ཨུདཱཧུ ཡཐཱཀྐམཾ ཙཏུཀྐཱནཾ ཙཏུཀྐཱ པཊིཔཀྑཱ ཧོནྟི ཀི’’ནྟི ཝིཙཱརཎཱཡ སམྦྷཝཏོ ཡཐཱཀྐམཾ ཙཏུཀྐཱནཾ ཙཏུཀྐཱ པཊིཔཀྑཱ ཧོནྟི པཧཱཏབྦཔཧཱཡཀབྷཱཝེནཱཏི དསྶེནྟོ ‘‘ཙཏྟཱརོ ཨཱཧཱརཱ ཏེསཾ པཊིཔཀྑོ ཙཏསྶོ པཊིཔདཱ’’ཏིཨཱདིམཱཧ. ཨཊྛཀཐཱཡཾ པན – ‘‘ཨིདཱནི ཨཱཧཱརཱདཱིནཾ པཊིཔདཱདཱིཧི ཡེན སམཏིཀྐམནཾ, ཏཾ ནེསཾ པཊིཔཀྑབྷཱཝཾ དསྶེནྟོ ‘ཙཏྟཱརོ ཨཱཧཱརཱ ཏེསཾ པཊིཔཀྑོ ཙཏསྶོ པཊིཔདཱ’ཏིཨཱདིམཱཧཱ’’ཏི (ནེཏྟི. ཨཊྛ. ༨༧) ཝུཏྟཾ. ཏཏྠ སཾཀིལེསཔཀྑེ ཙཏྟཱརོ ཡེ ཨཱཧཱརཱ ནིདྡྷཱརིཏཱ, ཏེསཾ ཙཏུནྣཾ ཨཱཧཱརཱནཾ ཝོདཱནཔཀྑེ ཡཱ ཙཏསྶོ པཊིཔདཱ ནིདྡྷཱརིཏཱ, ཏཱ ཙཏསྶོ པཊིཔདཱ པཊིཔཀྑོ ཨཱཧཱརཱནཾ པཧཱཏབྦཏྟཱ, པཊིཔདཱནཾ པན པཧཱཡཀཏྟཱ. སཏིཔི ཨཱཧཱརཱནཾ ཨཔྤཧཱཏབྦབྷཱཝེ ཝིཔསྶནཱརམྨཎཏྟཱ ཨཱཧཱརཔཊིབདྡྷཚནྡརཱགཔྤཧཱནཝསེན པཧཱཏབྦབྷཱཝོ ཝུཏྟོཏི ཨེཝམཱདིཡོཛནཱ ཀཱཏབྦཱ.

སཱིཧཱཏི སཱིཧསདིསཱ བུདྡྷཱ ཙ སཱིཧསདིསཱ པཙྩེཀབུདྡྷཱ ཙ སཱིཧསདིསཱ སཱཝཀཱ ཙཱཏི སཱིཧསདིསཱ ཝིསུཾ ཝིསུཾ ཡོཛེཏབྦཱ. སཱཝཀཱ པན ཨཧཏརཱགདོསམོཧཱཔི སནྟི, ཏེཔི ‘‘སཱིཧཱ’’ཏི མཉྙེཡྻུནྟི ཏཾ ནིཝཏྟཱཔནཏྠཾ ‘‘ཧཏརཱགདོསམོཧཱ’’ཏི ཝུཏྟཾ. ཧནིཏབྦཱཏི ཧཏཱ, རཱགོ ཙ དོསོ ཙ མོཧོ ཙ རཱགདོསམོཧཱ, ཧཏཱ རཱགདོསམོཧཱ ཨེཏེཧི སཱཝཀེཧཱིཏི ཧཏརཱགདོསམོཧཱ, སཱཝཀཱཏི ཡོཛནཱ ཀཱཏབྦཱ སཱཝཀཱནཾཡེཝ བྱབྷིཙཱརསམྦྷཝཏོཏི. ཏེསཾ སཱིཧཱནཾ བུདྡྷཱནཾ, ཏེསཾ སཱིཧཱནཾ པཙྩེཀབུདྡྷཱནཾ, ཏེསཾ སཱིཧཱནཾ སཱཝཀཱནཾ བྷཱཝནཱ ཝོདཱནཔཀྑེ བྷཱཝིཏབྦཱནཾ བོདྷིཔཀྑིཡདྷམྨཱནཾ བྷཱཝནཱ ཝཌྜྷནཱ ཙ, སཙྪིཀིརིཡཱ ཝོདཱནཔཀྑེཡེཝ སཙྪིཀཱཏབྦཱནཾ ¶ ཕལནིབྦཱནཱནཾ སཙྪིཀིརིཡཱ ཙ, བྱནྟཱིཀིརིཡཱ སཾཀིལེསཔཀྑེ པཧཱཏབྦཱནཾ པཧཱནསངྑཱཏཱ བྱནྟཱིཀིརིཡཱ ཙ ཝིཀྐཱིལི༹ཏཾ ནཱམ བྷཝཏི.

ཨིནྡྲིཡཱདྷིཊྛཱནནྟི ¶ སདྡྷིནྡྲིཡཱདཱིནཾ ཨིནྡྲིཡཱནཾ ཨདྷིཊྛཱནཾ པཝཏྟནཾ བྷཱཝནཱ, སཙྪིཀིརིཡཱ ཙ. ཝིཔརིཡཱསཱནདྷིཊྛཱནནྟི ཝིཔལླཱསཱནཾ ཨདྷིཊྛཱནཾ པཧཱནཝསེན ཨཔྤཝཏྟནཾ, ཨནུཔྤཱདནཉྩ སངྑེཔཏོ ཝིཀྐཱིལི༹ཏཾ ནཱམཱཏི གཧིཏཾ. ཨིནྡྲིཡཱནི སདྡྷིནྡྲིཡཱདཱིནི སདྡྷམྨགོཙརོ སདྡྷམྨསྶ ཝོདཱནཔཀྑསྶ གོཙརོ པཝཏྟནཧེཏཱུཏི ཨདྷིཔྤེཏཱནི. ཝིཔརིཡཱསཱ ཝིཔལླཱསཱ ཀིལེསགོཙརོ སཾཀིལེསཔཀྑསྶ གོཙརོ པཝཏྟིཧེཏཱུཏི ཨདྷིཔྤེཏཱ.

‘‘ཙཏྟཱརོ ཨཱཧཱརཱཏིཨཱདིནཱ སཾཀིལེསཔཀྑེ ཨཱཧཱརཙཏུཀྐཱདཱིནཾ དསནྣཾ ཙཏུཀྐཱནཾ ཏཎྷཱཙརིཏཱདཱིནཾ ཙཏུནྣཾ པུགྒལཱནཾ ཨུཔཀྐིལེསཝིབྷཱཝནཱམུཁེན ཡཱ ནིདྡྷཱརཎཱ ཨཱཙརིཡེན ཀཏཱ, ‘ཙཏསྶོ པཊིཔདཱ’ཏིཨཱདིནཱ ཙ ཝོདཱནཔཀྑེ པཊིཔདཱཙཏུཀྐཱདཱིནཾ དསནྣཾ ཙཏུཀྐཱནཾ ཏཎྷཱཙརིཏཱདཱིནཾ ཙཏུནྣཾ པུགྒལཱནཾ ཝོདཱནཝིབྷཱཝནཱམུཁེན ཡཱ ནིདྡྷཱརཎཱ ཨཱཙརིཡེན ཀཏཱ, སཱ ཨཡཾ ནིདྡྷཱརཎཱ ཀཏམསྶ ནཡསྶ སམུཊྛཱནཾ བྷཱུམཱིཏི ཝུཙྩཏཱི’’ཏི པུཙྪིཏབྦཏྟཱ ‘‘ཨཡཾ ཝུཙྩཏི སཱིཧཝིཀྐཱིལི༹ཏསྶ ནཡསྶ བྷཱུམཱི’’ཏི ཝུཏྟཾ. ཏཏྠ ཨཡནྟི ཡཱ ཨཡཾ ཝུཏྟནཡེན དྭིཔྤཀཱརཱ ནིདྡྷཱརཎཱ ཀཏཱ, སཱ ཨཡཾ དྭིཔྤཀཱརཱ ནིདྡྷཱརཎཱ སཱིཧཝིཀྐཱིལི༹ཏསྶ ནཡསྶ བྷཱུམི པཝཏྟིཊྛཱནཾ སམུཊྛཱནནྟི ནཡསམུཊྛཱནཀོསལླེཧི པུགྒལེཧི ཝུཙྩཏཱིཏི ཡོཛནཱ ཀཱཏབྦཱཏི.

‘‘ཝུཏྟཔྤཀཱརཱཡ ནིདྡྷཱརིཏཱཡ ནཡསྶ བྷཱུམིབྷཱཝོ ཀསྨཱ ཝིཉྙཱཡཏཱི’’ཏི ཝཏྟབྦཏྟཱ ‘‘ཏེནཱཧཱ’’ཏིཨཱདི ཝུཏྟཾ. ཏེན ཝུཏྟཔྤཀཱརཱཡ ནིདྡྷཱརཎཱཡ ནཡབྷཱུམིབྷཱཝེན ‘‘ཡོ ནེཏི…པེ… ཀུསལཱཏི ཙཱ’’ཏི ཡཾ ཝཙནཾ ཨཱཙརིཡོ ཨཱཧ, ཏེན ཝཙནེན ཝིཉྙཱཡཏཱིཏི.

སཱིཧཝིཀྐཱིལི༹ཏནཡབྷཱུམི ཨཱཙརིཡེན ཝིབྷཱཝིཏཱ, ཨམྷེཧི ཙ ཉཱཏཱ, ‘‘ཀཏམཱ ཏིཔུཀྑལནཡབྷཱུམཱི’’ཏི པུཙྪིཏབྦཏྟཱ ཏིཔུཀྑལནཡབྷཱུམིཾ ཝིབྷཱཝེཏུཀཱམོ ‘‘ཏཏྠ ཡེ དུཀྑཱཡ པཊིཔདཱཡཱ’’ཏིཨཱདིམཱཧ. ཨེཝཾ སཏི ‘‘ཨཡཾ སཾཀིལེསོ, ཏཱིཎི ཨཀུསལམཱུལཱནཱི’’ཏིཨཱདིཝཙནམེཝ ཨཱཙརིཡེན ཝཏྟབྦཾ, ཀསྨཱ པན ‘‘ཏཏྠ ཡེ དུཀྑཱཡ པཊིཔདཱཡཱ’’ཏིཨཱདིཝཙནཾ ཝཏྟབྦནྟི? སཙྩཾ, ཏིཔུཀྑལནཡབྷཱུམིབྷཱཝནཱ པན ཨུགྒྷཊིཏཉྙུཨཱདིཔུགྒལཏྟཡཝསེན པཝཏྟཱ, ཏསྨཱ ཨུགྒྷཊིཏཉྙུཨཱདིཔུགྒལཏྟཡཾ ཝིབྷཱཝེཏུཾ ‘‘ཏཏྠ ཡེ དུཀྑཱཡ པཊིཔདཱཡཱ’’ཏིཨཱདིཝཙནཾ ཝུཏྟཾ. ཨེཝམཔི ‘‘ཏཏྠ ཡོ སུཁཱཡ པཊིཔདཱཡ ཁིཔྤཱབྷིཉྙཱཡ ¶ ནིཡྻཱཏི, ཨཡཾ ཨུགྒྷཊིཏཉྙཱུ’’ཏིཨཱདིཝཙནམེཝ ཝཏྟབྦཾ ¶ , ཀསྨཱ པན ‘‘ཏཏྠ ཡེ དུཀྑཱཡ པཊིཔདཱཡཱ’’ཏིཨཱདིཝཙནཾ ཝཏྟབྦནྟི? སཙྩཾ, ཨུགྒྷཊིཏཉྙུཨཱདིཔུགྒལཏྟཡཾ པན སཱིཧཝིཀྐཱིལི༹ཏནཡཏོ ཏིཔུཀྑལནཡསྶ ནིགྒཙྪནཏོ ནིཀྑམནཏོ སཱིཧཝིཀྐཱིལི༹ཏནཡབྷཱུམིཝིབྷཱཝནཱཡཾ པཊིཔདཱཝིབྷཱགཏོ ཝིབྷཱཝིཏཔུགྒལཙཏུཀྐཏོ ནིདྡྷཱརིཏཾ, སཱིཧཝིཀྐཱིལི༹ཏནཡབྷཱུམིཝིབྷཱཝནཱཡཾ པཊིཔདཱཝིབྷཱགཏོ ཝིབྷཱཝིཏཾ པུགྒལཙཏུཀྐཾ པཋམཾ ཝིབྷཱཝེཏུཾ ‘‘ཏཏྠ ཡེ དུཀྑཱཡ པཊིཔདཱཡཱ’’ཏིཨཱདི ཝུཏྟཾ. ཏཏྠཱཏི ཡོ པཊིཔདཱཙཏུཀྐོ སཱིཧཝིཀྐཱིལི༹ཏནཡབྷཱུམིཝིབྷཱཝནཱཡཾ ནིདྡྷཱརིཏོ, ཏསྨིཾ པཊིཔདཱཙཏུཀྐེ. ཡེཏི ཡེ དནྡྷཨུདཏྟཱ དིཊྛིཙརིཏཔུགྒལཱ ཡཐཱཀྐམཾ སུཁཱཡ པཊིཔདཱཡ དནྡྷཱབྷིཉྙཱཡ ཙ སུཁཱཡ པཊིཔདཱཡ ཁིཔྤཱབྷིཉྙཱཡ ཙ ནིཡྻནྟི, ཨིཏི ནིཡྻཀཱ དྭེ པུགྒལཱ ཙ ནིདྡྷཱརིཏཱ. ‘‘ཏེསཾ ཙཏུནྣཾ པུགྒལཱནཾ ཀཏམོ སཾཀིལེསོ’’ཏི པུཙྪིཏབྦཏྟཱ ‘‘ཏེསཾ ཙཏུནྣཾ པུགྒལཱནཾ ཨཡཾ སཾཀིལེསོ’’ཏི ཝིསྶཛྫེཏུཾ ‘‘ཏེསཾ ཙཏུནྣཾ པུགྒལཱནཾ ཨཡཾ སཾཀིལེསོ’’ཏིཨཱདི ཝུཏྟཾ. ཙཏྟཱརོ ཨཱཧཱརཱ ནིདྡྷཱརིཏཱ…པེ… ཙཏྟཱརི ཨགཏིགམནཱནི ནིདྡྷཱརིཏཱནི, ཨིཏི ཨཡཾ དསཝིདྷོ ཨཱཧཱརཙཏུཀྐཱདིཙཏུཀྐོ ཏེསཾ ཙཏུནྣཾ པུགྒལཱནཾ སཾཀིལེསོ ཧོཏི. ཏེསཾ ཙཏུནྣཾ པུགྒལཱནཾ སཾཀིལེསོ ཨཱཙརིཡེན ནིདྡྷཱརིཏོ, ‘‘ཀཏམཾ ཝོདཱན’’ནྟི པུཙྪིཏབྦཏྟཱ ‘‘ཏེསཾ ཙཏུནྣཾ པུགྒལཱནཾ ཨིདཾ ཝོདཱན’’ནྟིཨཱདི ཝུཏྟཾ. ཙཏསྶོ པཊིཔདཱ ནིདྡྷཱརིཏཱ, ཙཏསྶོ ཨཔྤམཱཎཱ ནིདྡྷཱརིཏཱ, ཨིཏི ཨིདཾ དསཝིདྷཾ པཊིཔདཱཙཏུཀྐཱདིཙཏུཀྐབྷཱུཏཾ དྷམྨཛཱཏཾ ཏེསཾ ཙཏུནྣཾ པུགྒལཱནཾ ཝོདཱནཾ ཧོཏི.

༨༨. ‘‘ཏེསུ ཙཏཱུསུ པུགྒལེསུ ཀཏམོ པུགྒལོ ཨུགྒྷཊིཏཉྙཱུ, ཀཏམོ པུགྒལོ ཝིཔཉྩིཏཉྙཱུ, ཀཏམོ པུགྒལོ ནེཡྻོ’’ཏི པུཙྪིཏབྦཏྟཱ ‘‘ཏཏྠ ཡེ’’ཏིཨཱདི ཝུཏྟཾ. ‘‘པུབྦེཔི ‘ཏཏྠ ཡེ’ཏིཨཱདིནཱ ཙཏྟཱརོ པུགྒལཱ ནིདྡྷཱརིཏཱ, ཀསྨཱ པན པུན ‘‘ཏཏྠ ཡེ’ཏིཨཱདིནཱ ཙཏྟཱརོ པུགྒལཱ ནིདྡྷཱརིཏཱ’’ཏི ཙེ ཝདེཡྻ? པུབྦེ སཾཀིལེསཝོདཱནཾ སཱམིབྷཱཝེན ནིདྡྷཱརིཏཱ, པཙྪཱ པན ཨུགྒྷཊིཏཉྙུཨཱདཱིནཾ ཨཝཡཝཱནཾ སམཱུཧབྷཱཝེན ནིདྡྷཱརིཏཱཏི ཝིསེསཏྠོ གཧེཏབྦོ. ཏཏྠ ཡེ…པེ… ཨིམེ དྭེ པུགྒལཱཏི ཨེཏྠ ཡོཛནཏྠོ ཧེཊྛཱ ཝུཏྟསདིསོཝ. ཏཏྠཱཏི ཏེསུ ཙཏཱུསུ པུགྒལེསུ. ཡོཏི ཨུདཏྟོ དིཊྛིཙརིཏོ. ཨཡནྟི ཨཡཾ ནིཡཏོ ཨུདཏྟོ དིཊྛིཙརིཏོ. པུན ཡོཏི ཨུདཏྟོཝ ཏཎྷཱཙརིཏོ ཙ མནྡོ དིཊྛིཙརིཏོ ཙ. སཱདྷཱརཎཱཡཱཏི དུཀྑཱཡ པཊིཔདཱཡ ཁིཔྤཱབྷིཉྙཱཡ ཙ སུཁཱཡ པཊིཔདཱཡ དནྡྷཱབྷིཉྙཱཡ ཙ.

‘‘ཨུགྒྷཊིཏཉྙུཨཱདཡོ ¶ ཏཡོ པུགྒལཱ ཨཱཙརིཡེན ནིདྡྷཱརིཏཱ, ཏེསུ ཏཱིསུ པུགྒལེསུ ཀཏམསྶ ཀཏམསྶ ཀཏམཾ ཀཏམཾ བྷགཝཱ ཨུཔདིསཏཱི’’ཏི པུཙྪིཏབྦཏྟཱ ‘‘ཏཏྠ བྷགཝཱ’’ཏིཨཱདི ཝུཏྟཾ. ཨཐ ཝཱ ‘‘པཊིཔདཱབྷེདེན པུགྒལབྷེདོ ཨཱཙརིཡེན ཝིབྷཱཝིཏོ, ཀཐཾ དེསནཱབྷེདེན ¶ པུགྒལབྷེདོ ཝིབྷཱཝིཏོ’’ཏི ཝཏྟབྦཏྟཱ དེསནཱབྷེདེནཔི པུགྒལབྷེདཾ ཝིབྷཱཝེཏུཾ ‘‘ཏཏྠ བྷགཝཱ’’ཏིཨཱདི ཝུཏྟཾ. ཏཏྠཱཏི ཏེསུ ཏཱིསུ ཨུགྒྷཊིཏཉྙུཨཱདཱིསུ པུགྒལེསུ. ‘‘སམཐདེསནཱཝིཔསྶནཱདེསནཱབྷེདེནེཝ པུགྒལབྷེདོ ཝིབྷཱཝིཏོ’’ཏི ཝཏྟབྦཏྟཱ མུདུདྷམྨདེསནཱཏིཀྑདྷམྨདེསནཱབྷེདེནཔི པུགྒལབྷེདཾ ཝིབྷཱཝེཏུཾ ‘‘ཏཏྠ བྷགཝཱ’’ཏིཨཱདི ཝུཏྟཾ. སེསེསུཔི ཨེཝམེཝ ཨནུསནྡྷྱཏྠོ ཝཏྟབྦོ.

ཝིསུཾ ཝིསུཾ པཊིཔདཱབྷེདེན ཙཏྟཱརོ ཧུཏྭཱ ཝིསུཾ ཙ སམྤིཎྜིཏཱ ཙ པཊིཔདཱབྷེདེན ཙེཝ དེསནཱབྷེདེན ཙ ཏཡོ ཧོནྟཱིཏི ཝིབྷཱཝེཏུཾ ‘‘ཏཏྠ ཡེ’’ཏིཨཱདིཾ པུན ཝཏྭཱ ‘‘ཨིཏི ཁོ ཙཏྟཱརི ཧུཏྭཱ ཏཱིཎི བྷཝནྟཱི’’ཏི ཝུཏྟཾ. ཏཏྠ ཙཏྟཱརི ཏཱིཎཱིཏི ལིངྒཝིཔལླཱསནིདྡེསོ, ‘‘ཙཏྟཱརོ ཏཡོ’’ཏི པན པཀཏིལིངྒནིདྡེསོ ཀཱཏབྦོཝ.

‘‘ཏེསཾ ཏིཎྞཾ པུགྒལཱནཾ ཀཏམོ སཾཀིལེསོ’’ཏི པུཙྪིཏབྦཏྟཱ ‘‘ཏེསཾ ཏིཎྞཾ པུགྒལཱནཾ ཨཡཾ སཾཀིལེསོ’’ཏིཨཱདི ཝུཏྟཾ. ཏཏྠ ཨཡཾ སཾཀིལེསོཏི ‘‘ཏཱིཎི ཨཀུསལམཱུལཱནི…པེ… སཱིལཝིཔཏྟི དིཊྛིཝིཔཏྟི ཨཱཙཱརཝིཔཏྟཱི’’ཏི ནིདྡྷཱརིཏཱནཾ ཨཀུསལཱནཾ དྷམྨཱནཾ ཨིཏི ཨཡཾ སམཱུཧོ སཾཀིལེསོ ཧོཏི. ‘‘ཏེསཾ ཏིཎྞཾ པུགྒལཱནཾ སཾཀིལེསོ ཨཱཙརིཡེན ནིདྡྷཱརིཏོ, ཀཐཾ ཝོདཱནཾ ནིདྡྷཱརིཏབྦ’’ནྟི ཝཏྟབྦཏྟཱ ‘‘ཏེསཾ ཏིཎྞཾ པུགྒལཱནཾ ཨིདཾ ཝོདཱན’’ནྟིཨཱདི ཝུཏྟཾ. ཏཏྠ ཨིདཾ ཝོདཱནནྟི ‘‘ཏཱིཎི ཀུསལམཱུལཱནི…པེ… ཏཱིཎི ཝིམོཀྑམུཁཱནི སུཉྙཏཾ ཨནིམིཏྟཾ ཨཔྤཎིཧིཏ’’ནྟི ནིདྡྷཱརིཏཱནཾ ཀུསལདྷམྨཱནཾ སམཱུཧབྷཱུཏཾ ཨིཏི ཨིདཾ དྷམྨཛཱཏཾ ཝོདཱནཾ ཧོཏི.

‘‘ཝུཏྟཔྤཀཱརེན ཙཏྟཱརོ ཧུཏྭཱ ཏཡོ པུགྒལཱ བྷཝནྟཱིཏི ཨཱཙརིཡེན ཝིབྷཱཝིཏཱ, ཏཡོ ཧུཏྭཱ ཀིཏྟཀཱ པུགྒལཱ བྷཝནྟཱི’’ཏི ཝཏྟབྦབྷཱཝཏོ ‘‘ཨིཏི ཁོ ཙཏྟཱརི ཧུཏྭཱ ཏཱིཎི བྷཝནྟི, ཏཱིཎི ཧུཏྭཱ དྭེ བྷཝནྟི ཏཎྷཱཙརིཏོ ཙ དིཊྛིཙརིཏོ ཙཱ’’ཏིཨཱདི ཝུཏྟཾ. ཨིཏཱིཏི ཧེཊྛཱ ཝུཏྟཔྤཀཱརེན ཙཏྟཱརི ཙཏྟཱརོ ཧུཏྭཱ ཏཱིཎི ཏཡོ བྷཝནྟི. ཏཱིཎི ཏཡོ ཧུཏྭཱ ཏཎྷཱཙརིཏོ ཙ དིཊྛིཙརིཏོ ཙཱཏི དྭེ པུགྒལཱ བྷཝནྟི.

‘‘ཏེསཾ ¶ དྭིནྣཾ པུགྒལཱནཾ ཀཏམོ སཾཀིལེསོ’’ཏི ཝཏྟབྦབྷཱཝཏོ ‘‘ཏེསཾ དྭིནྣཾ པུགྒལཱནཾ ཨཡཾ སཾཀིལེསོ’’ཏིཨཱདི ཝུཏྟཾ. ཏཏྠ ཨཡཾ སཾཀིལེསོཏི ‘‘ཏཎྷཱ ཙ ཨཝིཛྫཱ ཙ…པེ… སསྶཏདིཊྛི ཙ ཨུཙྪེདདིཊྛི ཙཱ’’ཏི ནིདྡྷཱརིཏཱནཾ ཨཀུསལདྷམྨཱནཾ ཨིཏི ཨཡཾ སམཱུཧོ སཾཀིལེསོ ཧོཏི.

‘‘ཏེསཾ ¶ དྭིནྣཾ པུགྒལཱནཾ སཾཀིལེསོ ཨཱཙརིཡེན ནིདྡྷཱརིཏོ, ཀཐཾ ཝོདཱན’’ནྟི ཝཏྟབྦབྷཱཝཏོ ‘‘ཏེསཾ དྭིནྣཾ པུགྒལཱནཾ ཨིདཾ ཝོདཱན’’ནྟིཨཱདི ཝུཏྟཾ. ཨིདཾ ཝོདཱནནྟི ‘‘སམཐོ ཙ ཝིཔསྶནཱ ཙ…པེ… སཨུཔཱདིསེསཱ ཙ ནིབྦཱནདྷཱཏུ, ཨནུཔཱདིསེསཱ ཙ ནིབྦཱནདྷཱཏཱུ’’ཏི ནིདྡྷཱརིཏཱནཾ ཀུསལདྷམྨཱནཾ སམཱུཧབྷཱུཏཾ ཨིཏི ཨིདཾ དྷམྨཛཱཏཾ ཝོདཱནཾ ཧོཏི.

‘‘ཏཱིཎི ཨཀུསལམཱུལཱནཱི’’ཏིཨཱདིནཱ སཾཀིལེསཔཀྑེ ཨཀུསལམཱུལཏིཀཱདཱིནཾ དྭིནྣཾ དྭཱདསནྣཾ ཏིཀཱནཾ, ཏིཎྞཾ ཨུགྒྷཊིཏཉྙུཨཱདིཔུགྒལཱནཾ སཾཀིལེསཝིབྷཱཝནཱམུཁེན ཡཱ ནིདྡྷཱརཎཱ ཀཏཱ, ‘‘ཏཱིཎི ཀུསལམཱུལཱནཱི’’ཏིཨཱདིནཱ ཝོདཱནཔཀྑེ ཀུསལམཱུལཏིཀཱདཱིནཾ དྭིནྣཾ དྭཱདསནྣཾ ཏིཀཱནཾ, ཏིཎྞཾ ཨུགྒྷཊིཏཉྙུཨཱདིཔུགྒལཱནཾ ཝོདཱནཝིབྷཱཝནཱམུཁེན ཡཱ ནིདྡྷཱརཎཱ ཀཏཱ, ཨཡཾ ཝུཏྟཔྤཀཱརནིདྡྷཱརཎཱ ཏིཔུཀྑལསྶ ཙ ནཡསྶ, ཨངྐུསསྶ ཙ ནཡསྶ བྷཱུམི སམུཊྛཱནཾ པཝཏྟིཧེཏུ ནཱམཱཏི ཡོཛེཏྭཱ ‘‘ཏཎྷཱ ཙ ཨཝིཛྫཱ ཙཱ’’ཏིཨཱདིནཱ སཾཀིལེསཔཀྑེ ཏཎྷཱཨཝིཛྫཱདུཀཱདཱིནཾ པནྣརསནྣཾ དུཀཱནཾ, དྭིནྣཾ ཏཎྷཱཙརིཏདིཊྛིཙརིཏཱནཾ པུགྒལཱནཾ ཝོདཱནཝིབྷཱཝནཱམུཁེན ཡཱ ནིདྡྷཱརཎཱ ཀཏཱ, ‘‘སམཐོ ཙ ཝིཔསྶནཱ ཙཱ’’ཏིཨཱདིནཱ ཝོདཱནཔཀྑེ སམཐཝིཔསྶནཱདུཀཱདཱིནཾ ཨེཀཱུནཝཱིསཏིདུཀཱནཾ, དྭིནྣཾ ཏཎྷཱཙརིཏདིཊྛིཙརིཏཱནཾ པུགྒལཱནཾ ཝོདཱནཝིབྷཱཝནཱམུཁེན ཡཱ ནིདྡྷཱརཎཱ ཀཏཱ, ཨཡཾ ཝུཏྟཔྤཀཱརཱ ནནྡིཡཱཝཊྚསྶ ནཡསྶ བྷཱུམཱིཏིཔི ནཱིཧརིཏྭཱ ཡོཛེཏབྦཱ. པུགྒལཱདྷིཊྛཱནཝསེན ཧི ནནྡིཡཱཝཊྚནཡཏོ སཱིཧཝིཀྐཱིལི༹ཏནཡསྶ སམྦྷཝོ, སཱིཧཝིཀྐཱིལི༹ཏནཡཏོ ཙ ཏིཔུཀྑལནཡསྶ སམྦྷཝོ ཧོཏི. དྷམྨཱདྷིཊྛཱནཝསེན པན སཱིཧཝིཀྐཱིལི༹ཏནཡཏོ ཏིཔུཀྑལནཡསྶ སམྦྷཝོ, ཏིཔུཀྑལནཡཏོ ཙ ནནྡིཡཱཝཊྚནཡསྶ སམྦྷཝོ ཧོཏི. ཏེནཱཧ ཨཊྛཀཐཱཡཾ ‘‘ཨནྟེ ‘ཏཎྷཱ ཙ ཨཝིཛྫཱ ཙཱ’ཏིཨཱདིནཱ སམཐསྶ ནཡསྶ བྷཱུམི དསྶིཏཱ. ཏེནེཝ ཧི ‘ཙཏྟཱརི ཧུཏྭཱ ཏཱིཎི བྷཝནྟི, ཏཱིཎི ཧུཏྭཱ དྭེ བྷཝནྟཱི’ཏི ཝུཏྟ’’ནྟི (ནེཏྟི. ཨཊྛ. ༨༨).

‘‘ཀསྨཱ ¶ པན ཨཡཾ ཝུཏྟཔྤཀཱརཱཡ ནིདྡྷཱརཎཱཡ ཏིཔུཀྑལསྶ ཙ ནཡསྶ, ཨངྐུསསྶ ཙ ནཡསྶ བྷཱུམིབྷཱཝོ ཝིཉྙཱཡཏཱི’’ཏི ཝཏྟབྦབྷཱཝཏོ ‘‘ཏེནཱཧཱ’’ཏིཨཱདི ཝུཏྟཾ. ཏེན ཡཐཱཝུཏྟསྶ ནིདྡྷཱརཎཱཡ བྷཱུམིབྷཱཝེན ཨཱཙརིཡོ ‘‘ཡོ ཨཀུསལེ…པེ… དིསཱལོཙནེནཱཏི ཙཱ’’ཏི ཡཾ ཝཙནཾ ཨཱཧ, ཏེན ཝཙནེན ཝུཏྟཔྤཀཱརཱཡ ནིདྡྷཱརཎཱཡ ཏིཔུཀྑལ…པེ… ཡསྶ བྷཱུམིབྷཱཝོ ཝིཉྙཱཡཏཱིཏི ཨཏྠོ.

‘‘ཨེཏྟཱཝཏཱ ནཡསམུཊྛཱནཾ པརིཔུཎྞཾ ཧོཏི, ཨཉྙཾ ནཏྠཱི’’ཏི ཝཏྟབྦཏྟཱ ‘‘ནིཡུཏྟཾ ནཡསམུཊྛཱན’’ནྟི ཝུཏྟཾ. ཡེན ཡེན ནཡསམུཊྛཱནེན སཾཀིལེསཔཀྑེ ཝཱ ཨཀུསལཱ དྷམྨཱ ནིདྡྷཱརིཏཱ ¶ , ཝོདཱནཔཀྑེ ཝཱ ཀུསལཱ དྷམྨཱ ནིདྡྷཱརིཏཱ, ཏཾ ཏཾ ནཡསམུཊྛཱནཾ ནིཡུཏྟཾ ཡཐཱརཧཾ ནིདྡྷཱརེཏྭཱ ཡུཛྫིཏབྦནྟི ཨཏྠོ གཧེཏབྦོ.

ནཡཀྐམེན པན སངྑེཔཏོ དསྶཡིསྶཱམི – དྭེ པུགྒལཱ, ཏཡོ པུགྒལཱ, ཙཏྟཱརོ པུགྒལཱཏི པུགྒལཱ ཏིཀོཊྛཱསཱ བྷཝནྟི, ཙཏུདིསཱ, ཚདིསཱ, ཨཊྛདིསཱཏི དིསཱཔི ཏིཀོཊྛཱསཱ བྷཝནྟི. ཏཏྠ དྭེ པུགྒལཱཏི ཏཎྷཱཙརིཏོ པུགྒལོ, དིཊྛིཙརིཏོ པུགྒལོཏི དྭེ པུགྒལཱ བྷཝནྟི. ཏཡོ པུགྒལཱཏི ཨུགྒྷཊིཏཉྙུཔུགྒལོ, ཝིཔཉྩིཏཉྙུཔུགྒལོ, ནེཡྻཔུགྒལོཏི ཏཡོ པུགྒལཱ བྷཝནྟི. ཙཏྟཱརོ པུགྒལཱཏི དུཀྑཱཔཊིཔདཱདནྡྷཱབྷིཉྙཱདིབྷེདེན བྷིནྣཱ མུདིནྡྲིཡོ ཏཎྷཱཙརིཏོ པུགྒལོ, མུདིནྡྲིཡོ དིཊྛིཙརིཏོ པུགྒལོ, ཏིཀྑིནྡྲིཡོ ཏཎྷཱཙརིཏོ པུགྒལོ, ཏིཀྑིནྡྲིཡོ དིཊྛིཙརིཏོ པུགྒལོཏི ཙཏྟཱརོ པུགྒལཱ བྷཝནྟི. ཙཏུདིསཱཏི སཾཀིལེསཔཀྑེ དྭེ དྭེ དིསཱ, ཝོདཱནཔཀྑེ དྭེ དྭེ དིསཱཏི ཙཏུདིསཱ བྷཝནྟི. ཚདིསཱཏི སཾཀིལེསཔཀྑེ ཏིསྶོ ཏིསྶོ དིསཱ, ཝོདཱནཔཀྑེ ཏིསྶོ ཏིསྶོ དིསཱཏི ཚདིསཱ བྷཝནྟི. ཨཊྛདིསཱཏི སཾཀིལེསཔཀྑེ ཙཏསྶོ ཙཏསྶོ དིསཱ, ཝོདཱནཔཀྑེ ཙཏསྶོ ཙཏསྶོ དིསཱཏི ཨཊྛདིསཱ བྷཝནྟི. ཏེསུ དྭེ དྭེ ཏཎྷཱཙརིཏདིཊྛིཙརིཏེ པུགྒལེ, ཙཏུདིསཱ ཙ ནིསྶཱཡ ནནྡིཡཱཝཊྚནཡསམུཊྛཱནཾ བྷཝཏི. ཏཡོ ཨུགྒྷཊིཏཉྙུཝིཔཉྩིཏཉྙུནེཡྻཔུགྒལེ ཙ ཚདིསཱ ཙ ནིསྶཱཡ ཏིཔུཀྑལནཡསམུཊྛཱནཾ བྷཝཏི. དུཀྑཱཔཊིཔདཱདནྡྷཱབྷིཉྙཱདིབྷེདེན བྷིནྣེ ཙཏྟཱརོ མུདིནྡྲིཡཏཎྷཱཙརིཏཏིཀྑིནྡྲིཡཏཎྷཱཙརིཏམུདིནྡྲིཡདིཊྛིཙརིཏཏིཀྑིནྡྲིཡདིཊྛིཙརིཏེ པུགྒལེ ཙ ཨཊྛདིསཱ ཙ ནིསྶཱཡ སཱིཧཝིཀྐཱིལི༹ཏནཡསམུཊྛཱནཾ བྷཝཏི ¶ . ཨེཀེཀསྨིཾ ནཡསམུཊྛཱནེ ཝིབྷཛིཏེ དིསཱལོཙནཨངྐུསནཡསམུཊྛཱནཱནིཔི ཝིབྷཛིཏཱནི བྷཝནྟི.

‘‘ཀཐཾ ནནྡིཡཱཝཊྚནཡསམུཊྛཱནཾ བྷཝཏཱི’’ཏི ཙེ ཝདེཡྻ? ‘‘ཏཎྷཱ ཙ ཨཝིཛྫཱ ཙ ཨཧིརིཀཉྩ ཨནོཏྟཔྤཉྩ ཨསྶཏི ཙ ཨསམྤཛཉྙཉྩ ཨཡོནིསོམནསིཀཱརོ ཙ ཀོསཛྫཉྩ དོཝཙསྶཉྩ ཨཧཾཀཱརོ ཙ མམཾཀཱརོ ཙ ཨསྶདྡྷཱ ཙ པམཱདོ ཙ ཨསདྡྷམྨསྶཝནཉྩ ཨསཾཝརོ ཙ ཨབྷིཛ྄ཛྷཱ ཙ བྱཱཔཱདོ ཙ ནཱིཝརཎཉྩ སཾཡོཛནཉྩ ཀོདྷོ ཙ ཨུཔནཱཧོ ཙ མཀྑོ ཙ པལཱ༹སོ ཙ ཨིསྶཱ ཙ མཙྪེརཉྩ མཱཡཱ ཙ སཱཋེཡྻཉྩ སསྶཏདིཊྛི ཙ ཨུཙྪེདདིཊྛི ཙཱ’’ཏི (ནེཏྟི. ༨༨) དུཀདུཀཝསེན དེསིཏོ ཨཡཾ དིསཱབྷཱུཏོ ཨཀུསལདྷམྨསམཱུཧོ དྭིནྣཾ ཏཎྷཱཙརིཏདིཊྛིཙརིཏཱནཾ པུགྒལཱནཾ སཾཀིལེསོ ཧོཏཱིཏི སཾཀིལེསཔཀྑེ སཾཀིལེསསཱམཉྙབྷཱཝེན ཡོཛེཏྭཱ ‘‘ཨིམེསུ པནྣརསསུ དུཀདུཀཝསེན དེསིཏེསུ དིསཱབྷཱུཏེསུ ཨཀུསལདྷམྨེསུ ཀཏམོ ཨཀུསལདྷམྨོ ཀཏམསྶ པུགྒལསྶ དིསཱ’’ཏི མནསཱཝ དིསཱདྷམྨབྷཱཝེན ཨོལོཀེཏྭཱ ‘‘ཨཡཾ ཨཡཾ པཋམོ པཋམོ ཨཀུསལདྷམྨོ ཏཎྷཱཙརིཏསྶ པུགྒལསྶ སཾཀིལེསཔཀྑེ ¶ པཋམཱ དིསཱ ནཱམ, ཨཡཾ ཨཡཾ དུཏིཡོ དུཏིཡོ ཨཀུསལདྷམྨོ དིཊྛིཙརིཏསྶ པུགྒལསྶ སཾཀིལེསཔཀྑེ དུཏིཡཱ དིསཱ ནཱམཱ’’ཏི ཝིསུཾ ཝིསུཾ ཡོཛེཏྭཱ སམུདཡསཙྩདུཀྑསཙྩཱནི ཡཐཱརཧཾ ནཱིཧརིཏྭཱ ཝིབྷཛིཏབྦདྷམྨསབྷཱཝོ ཙ ཡེན སཾཝཎྞནཱཝིསེསེན དསྶིཏོ, སོ སཾཝཎྞནཱཝིསེསོ ཙ ནནྡིཡཱཝཊྚནཡསམུཊྛཱནཾ བྷཝཏི, ཏསྶ ཨོལོཀནཱ ཙ ཡེན སཾཝཎྞནཱཝིསེསེན དསྶིཏཱ, སོ སཾཝཎྞནཱཝིསེསོ ཙ དིསཱལོཙནནཡསམུཊྛཱནཾ བྷཝཏི, ཏཐཱ ཨོལོཀེཏྭཱ དིསཱཝིསེསབྷཱུཏསྶ དྷམྨཝིསེསསྶ པུགྒལཱནཾ ནཡནཉྩ ཡེན སཾཝཎྞནཱཝིསེསེན ནཡཏི, སོ སཾཝཎྞནཱཝིསེསོ ཙ ཨངྐུསནཡསམུཊྛཱནཾ བྷཝཏི.

‘‘སམཐོ ཙ ཝིཔསྶནཱ ཙ, ཧིརཱི ཙ ཨོཏྟཔྤཉྩ, སཏི ཙ སམྤཛཉྙཉྩ, ཡོནིསོམནསིཀཱརོ ཙ ཝཱིརིཡཱརམྦྷོ ཙ, སོཝཙསྶཉྩ དྷམྨེ ཉཱཎཉྩ ཨནྭཡེ ཉཱཎཉྩ, ཁཡེ ཉཱཎཉྩ ཨནུཔྤཱདེ ཉཱཎཉྩ, སདྡྷཱ ཙ ཨཔྤམཱདོ ཙ, སདྡྷམྨསྶཝནཉྩ སཾཝརོ ཙ, ཨནབྷིཛ྄ཛྷཱ ཙ ཨབྱཱཔཱདོ ཙ, རཱགཝིརཱགཱ ཙ ཙེཏོཝིམུཏྟི, ཨཝིཛྫཱཝིརཱགཱ ཙ པཉྙཱཝིམུཏྟི, ཨབྷིསམཡོ ཙ ཨཔྤིཙྪཏཱ ཙ, སནྟུཊྛི ཙ ཨཀྐོདྷོ ཙ, ཨནུཔནཱཧོ ཙ ཨམཀྑོ ཙ, ཨཔལཱ༹སོ ¶ ཙ ཨིསྶཱཔཧཱནཉྩ མཙྪརིཡཔྤཧཱནཉྩ ཝིཛྫཱ ཙ, ཝིམུཏྟི ཙ སངྑཏཱརམྨཎོ ཙ ཝིམོཀྑོ, ཨསངྑཏཱརམྨཎོ ཙ ཝིམོཀྑོ, སཨུཔཱདིསེསཱ ཙ ནིབྦཱནདྷཱཏུ, ཨནུཔཱདིསེསཱ ཙ ནིབྦཱནདྷཱཏཱུ’’ཏི (ནེཏྟི. ༨༨) ཏིཀདུཀཝསེན དེསིཏཾ ཨིདཾ དིསཱབྷཱུཏཾ ཀུསལསམཱུཧདྷམྨཛཱཏཾ དྭིནྣཾ ཏཎྷཱཙརིཏདིཊྛིཙརིཏཱནཾ པུགྒལཱནཾ ཝོདཱནཾ ཧོཏཱིཏི ཝོདཱནཔཀྑེ ཝོདཱནསཱམཉྙབྷཱཝེན ཡོཛེཏྭཱ ‘‘ཨིམེསུ ཨེཀཱུནཝཱིསཏིཡཱ དུཀདུཀཝསེན ཝཱ དེསིཏེསུ དིསཱབྷཱུཏེསུ དྷམྨེསུ ཀཏམོ ཀཏམོ ཀུསལདྷམྨོ ཀཏམསྶ ཀཏམསྶ པུགྒལསྶ དིསཱ’’ཏི མནསཱཝ དིསཱདྷམྨབྷཱཝེན ཨོལོཀེཏྭཱ ‘‘ཨཡཾ པཋམོ པཋམོ ཀུསལདྷམྨོ ཏཎྷཱཙརིཏསྶ པུགྒལསྶ ཝོདཱནཔཀྑེ པཋམཱ དིསཱ ནཱམ, ཨཡཾ དུཏིཡོ དུཏིཡོ ཀུསལདྷམྨོ དིཊྛིཙརིཏསྶ པུགྒལསྶ ཝོདཱནཔཀྑེ དུཏིཡཱ དིསཱ ནཱམཱ’’ཏི ཝིསུཾ ཝིསུཾ ཡོཛེཏྭཱ མགྒསཙྩནིརོདྷསཙྩཱནི ཡཐཱརཧཾ ནཱིཧརིཏྭཱ ཝིབྷཛིཏབྦདྷམྨབྷཱཝོ ཙ ཡེན སཾཝཎྞནཱཝིསེསེན དསྶིཏོ, སོ སཾཝཎྞནཱཝིསེསོ ཙ ནནྡིཡཱཝཊྚནཡསམུཊྛཱནཾ བྷཝཏི, ཏསྶ ཨོལོཀནཱ ཙ ཡེན སཾཝཎྞནཱཝིསེསེན དསྶིཏཱ, སོ སཾཝཎྞནཱཝིསེསོ ཙ དིསཱལོཙནནཡསམུཊྛཱནཾ བྷཝཏི, ཏཐཱ ཨོལོཀེཏྭཱ དིསཱཝིསེསབྷཱུཏསྶ དྷམྨཝིསེསསྶ པུགྒལཱནཾ ནཡནཉྩ ཡེན སཾཝཎྞནཱཝིསེསེན ནཡཏི, སོ སཾཝཎྞནཱཝིསེསོ ཙ ཨངྐུསནཡསམུཊྛཱནཾ བྷཝཏི.

‘‘ཀཐཾ ཏིཔུཀྑལནཡསམུཊྛཱནཾ བྷཝཏཱི’’ཏི ཙེ པུཙྪེཡྻ, ‘‘ཏཱིཎི ཨཀུསལམཱུལཱནི – ལོབྷོ ཨཀུསལམཱུལཾ, དོསོ ཨཀུསལམཱུལཾ, མོཧོ ཨཀུསལམཱུལཾ. ཏཱིཎི དུཙྩརིཏཱནི – ཀཱཡདུཙྩརིཏཾ ¶ , ཝཙཱིདུཙྩརིཏཾ, མནོདུཙྩརིཏཾ. ཏཡོ ཨཀུསལཝིཏཀྐཱ – ཀཱམཝིཏཀྐོ, བྱཱཔཱདཝིཏཀྐོ, ཝིཧིཾསཱཝིཏཀྐོ. ཏིསྶོ ཨཀུསལསཉྙཱ – ཀཱམསཉྙཱ, བྱཱཔཱདསཉྙཱ, ཝིཧིཾསཱསཉྙཱ. ཏིསྶོ ཝིཔརཱིཏསཉྙཱ – ནིཙྩསཉྙཱ, སུཁསཉྙཱ, ཨཏྟསཉྙཱ. ཏིསྶོ ཝེདནཱ – སུཁཱ ཝེདནཱ, དུཀྑཱ ཝེདནཱ, ཨདུཀྑམསུཁཱ ཝེདནཱ. ཏིསྶོ དུཀྑཏཱ – དུཀྑདུཀྑཏཱ, སངྑཱརདུཀྑཏཱ, ཝིཔརིཎཱམདུཀྑཏཱ. ཏཡོ ཨགྒཱི – རཱགགྒི, དོསགྒི, མོཧགྒི. ཏཡོ སལླཱ – རཱགསལློ, དོསསལློ, མོཧསལློ. ཏིསྶོ ཛཊཱ – རཱགཛཊཱ, དོསཛཊཱ, མོཧཛཊཱ. ཏིསྶོ ཨཀུསལཱུཔཔརིཀྑཱ – ཨཀུསལཾ ཀཱཡཀམྨཾ ¶ , ཨཀུསལཾ ཝཙཱིཀམྨཾ, ཨཀུསལཾ མནོཀམྨཾ. ཏིསྶོ ཝིཔཏྟིཡོ – སཱིལཝིཔཏྟི, དིཊྛིཝིཔཏྟི, ཨཱཙཱརཝིཔཏྟཱི’’ཏི (ནེཏྟི. ༨༨) ཏིཀཝསེན དེསིཏོ ཨཡཾ དིསཱབྷཱུཏོ ཨཀུསལདྷམྨསམཱུཧོ ཏིཎྞཾ ཨུགྒྷཊིཏཉྙུཝིཔཉྩིཏཉྙུནེཡྻཔུགྒལཱནཾ སཾཀིལེསོ ཧོཏཱིཏི སཾཀིལེསཔཀྑེ སཾཀིལེསསཱམཉྙབྷཱཝེན ཡོཛེཏྭཱ ‘‘ཨིམེསུ དྭཱདསསུ ཏིཀཏིཀཝསེན དེསིཏེསུ དིསཱབྷཱུཏེསུ ཨཀུསལདྷམྨེསུ ཀཏམོ ཀཏམོ ཨཀུསལོ དྷམྨོ ཀཏམསྶ ཀཏམསྶ པུགྒལསྶ དིསཱ’’ཏི མནསཱཝ དིསཱདྷམྨབྷཱཝེན ཨོལོཀེཏྭཱ ‘‘ཨཡཾ ཨཡཾ པཋམོ པཋམོ ཨཀུསལདྷམྨོ ཨུགྒྷཊིཏཉྙུཔུགྒལསྶ སཾཀིལེསཔཀྑེ པཋམཱ དིསཱ ནཱམ. ཨཡཾ ཨཡཾ དུཏིཡོ དུཏིཡོ ཨཀུསལདྷམྨོ ཝིཔཉྩིཏཉྙུཔུགྒལསྶ སཾཀིལེསཔཀྑེ དུཏིཡཱ དིསཱ ནཱམ. ཨཡཾ ཨཡཾ ཏཏིཡོ ཏཏིཡོ ཨཀུསལདྷམྨོ ནེཡྻསྶ པུགྒལསྶ སཾཀིལེསཔཀྑེ ཏཏིཡཱ དིསཱ ནཱམཱ’’ཏི ཝིསུཾ ཝིསུཾ ཡོཛེཏྭཱ སམུདཡསཙྩདུཀྑསཙྩཱནི ཡཐཱརཧཾ ནཱིཧརིཏྭཱ ཝིབྷཛིཏབྦདྷམྨསབྷཱཝོ ཙ ཡེན སཾཝཎྞནཱཝིསེསེན དསྶིཏོ. སོ སཾཝཎྞནཱཝིསེསོ ཙ ཏིཔུཀྑལནཡསམུཊྛཱནཾ བྷཝཏི. ཏསྶ ཨོལོཀནཱ ཙ ཡེན སཾཝཎྞནཱཝིསེསེན དསྶིཏཱ, སོ སཾཝཎྞནཱཝིསེསོ ཙ དིསཱལོཙནནཡསམུཊྛཱནཾ བྷཝཏི ཏཐཱ ཨོལོཀེཏྭཱ དིསཱཝིསེསབྷཱུཏསྶ དྷམྨཝིསེསསྶ པུགྒལཱནཾ ནཡནཉྩ ཡེན སཾཝཎྞནཱཝིསེསེན ནཡཏི, སོ སཾཝཎྞནཱཝིསེསོ ཨངྐུསནཡསམུཊྛཱནཾ བྷཝཏི.

‘‘ཏཱིཎི ཀུསལམཱུལཱནི – ཨལོབྷོ ཀུསལམཱུལཾ, ཨདོསོ ཀུསལམཱུལཾ, ཨམོཧོ ཀུསལམཱུལཾ. ཏཱིཎི སུཙརིཏཱནི – ཀཱཡསུཙརིཏཾ, ཝཙཱིསུཙརིཏཾ, མནོསུཙརིཏཾ. ཏཡོ ཀུསལཝིཏཀྐཱ – ནེཀྑམྨཝིཏཀྐོ, ཨབྱཱཔཱདཝིཏཀྐོ, ཨཝིཧིཾསཱཝིཏཀྐོ. ཏཡོ སམཱདྷཱི – སཝིཏཀྐོ སཝིཙཱརོ སམཱདྷི, ཨཝིཏཀྐོ ཝིཙཱརམཏྟོ སམཱདྷི, ཨཝིཏཀྐོ ཨཝིཙཱརོ སམཱདྷི. ཏིསྶོ ཀུསལསཉྙཱ – ནེཀྑམྨསཉྙཱ, ཨབྱཱཔཱདསཉྙཱ, ཨཝིཧིཾསཱསཉྙཱ. ཏིསྶོ ཨཝིཔརཱིཏསཉྙཱ – ཨནིཙྩསཉྙཱ, དུཀྑསཉྙཱ, ཨནཏྟསཉྙཱ. ཏིསྶོ ཀུསལཱུཔཔརིཀྑཱ – ཀུསལཾ ཀཱཡཀམྨཾ, ཀུསལཾ ཝཙཱིཀམྨཾ, ཀུསལཾ མནོཀམྨཾ. ཏཱིཎི སོཙེཡྻཱནི – ཀཱཡསོཙེཡྻཾ, ཝཙཱིསོཙེཡྻཾ, མནོསོཙེཡྻཾ. ཏིསྶོ སམྤཏྟིཡོ – སཱིལསམྤཏྟི, སམཱདྷིསམྤཏྟི, པཉྙཱསམྤཏྟི ¶ . ཏིསྶོ སིཀྑཱ – ཨདྷིསཱིལསིཀྑཱ, ཨདྷིཙིཏྟསིཀྑཱ ¶ , ཨདྷིཔཉྙཱསིཀྑཱ. ཏཡོ ཁནྡྷཱ – སཱིལཀྑནྡྷོ, སམཱདྷིཀྑནྡྷོ, པཉྙཱཀྑནྡྷོ. ཏཱིཎི ཝིམོཀྑམུཁཱནི – སུཉྙཏཾ, ཨནིམིཏྟཾ, ཨཔྤཎིཧིཏ’’ནྟི (ནེཏྟི. ༨༨) ཏིཀཏིཀཝསེན དེསིཏཾ ཨིདཾ དིསཱབྷཱུཏཾ ཀུསལསམཱུཧདྷམྨཛཱཏཾ ཏིཎྞཾ ཨུགྒྷཊིཏཉྙུཝིཔཉྩིཏཉྙུནེཡྻཔུགྒལཱནཾ ཝོདཱནཾ ཧོཏཱིཏི ཝོདཱནཔཀྑེ ཝོདཱནསཱམཉྙབྷཱཝེན ཡོཛེཏྭཱ ‘‘ཨིམེསུ དྭཱིསུ དྭཱདསསུ ཏིཀཏིཀཝསེན དེསིཏེསུ དིསཱབྷཱུཏེསུ ཀུསལདྷམྨེསུ ཀཏམོ ཀཏམོ ཀུསལདྷམྨོ ཀཏམསྶ ཀཏམསྶ པུགྒལསྶ དིསཱ’’ཏི མནསཱཝ དིསཱདྷམྨབྷཱཝེན ཨོལོཀེཏྭཱ ‘‘ཨཡཾ ཨཡཾ པཋམོ པཋམོ ཀུསལདྷམྨོ ཨུགྒྷཊིཏཉྙུཔུགྒལསྶ ཝོདཱནཔཀྑེ པཋམཱ དིསཱ ནཱམ. ཨཡཾ ཨཡཾ དུཏིཡོ དུཏིཡོ ཀུསལོ དྷམྨོ ཝིཔཉྩིཏཉྙུཔུགྒལསྶ ཝོདཱནཔཀྑེ དུཏིཡཱ དིསཱ ནཱམ. ཨཡཾ ཨཡཾ ཏཏིཡོ ཏཏིཡོ ཀུསལདྷམྨོ ནེཡྻཔུགྒལསྶ ཝོདཱནཔཀྑེ ཏཏིཡཱ དིསཱ ནཱམཱ’’ཏི ཝིསུཾ ཝིསུཾ དིསཱབྷཱཝེན ཡོཛེཏྭཱ མགྒསཙྩནིརོདྷསཙྩཱནི ཡཐཱརཧཾ ནཱིཧརིཏྭཱ ཝིབྷཛིཏབྦདྷམྨསབྷཱཝོ ཙ ཡེན སཾཝཎྞནཱཝིསེསེན དསྶིཏོ. སོ སཾཝཎྞནཱཝིསེསོ ཙ ཏིཔུཀྑལནཡསམུཊྛཱནཾ བྷཝཏི. ཏསྶ ཨོལོཀནཱ ཙ ཡེན སཾཝཎྞནཱཝིསེསེན དསྶིཏཱ, སོ སཾཝཎྞནཱཝིསེསོ ཙ དིསཱལོཙནནཡསམུཊྛཱནཾ བྷཝཏི. ཏཐཱ ཨོལོཀེཏྭཱ དིསཱཝིསེསབྷཱུཏསྶ དྷམྨསྶ པུགྒལཱནཾ ནཡནཉྩ ཡེན སཾཝཎྞནཱཝིསེསེན ནཡཏི, སོ སཾཝཎྞནཱཝིསེསོ ཙ ཨངྐུསནཡསམུཊྛཱནཾ བྷཝཏི.

‘‘ཀཐཾ སཱིཧཝིཀྐཱིལི༹ཏནཡསམུཊྛཱན’’ནྟི ཙེ པུཙྪེཡྻ, ‘‘ཙཏྟཱརོ ཨཱཧཱརཱ, ཙཏྟཱརོ ཝིཔལླཱསཱ, ཙཏྟཱརི ཨུཔཱདཱནཱནི, ཙཏྟཱརོ ཡོགཱ, ཙཏྟཱརོ གནྠཱ, ཙཏྟཱརོ ཨཱསཝཱ, ཙཏྟཱརོ ཨོགྷཱ, ཙཏྟཱརོ སལླཱ, ཙཏསྶོ ཝིཉྙཱཎཊྛིཏིཡོ, ཙཏྟཱརི ཨགཏིགམནཱནཱི’’ཏི (ནེཏྟི. ༨༧) ཙཏུཀྐཙཏུཀྐཝསེན དེསིཏོ ཨཡཾ དིསཱབྷཱུཏོ ཙཏུཀྐོ ཙཏུཀྐོ ཨཀུསལདྷམྨོ ‘‘དུཀྑཱཡ པཊིཔདཱཡ དནྡྷཱབྷིཉྙཱཡ ནིཡྻཀསྶ མུདིནྡྲིཡསྶ ཏཎྷཱཙརིཏསྶ ཙ དུཀྑཱཡ པཊིཔདཱཡ ཁིཔྤཱབྷིཉྙཱཡ ནིཡྻཀསྶ ཏིཀྑིནྡྲིཡསྶ ཏཎྷཱཙརིཏསྶ ཙ སུཁཱཡ པཊིཔདཱཡ དནྡྷཱབྷིཉྙཱཡ ནིཡྻཀསྶ མུདིནྡྲིཡསྶ དིཊྛིཙརིཏསྶ ཙ སུཁཱཡ པཊིཔདཱཡ ཁིཔྤཱབྷིཉྙཱཡ ནིཡྻཀསྶ ཏིཀྑིནྡྲིཡསྶ དིཊྛིཙརིཏསྶ ཙཱ’’ཏི ཙཏུནྣཾ པུགྒལཱནཾ སཾཀིལེསོཏི སཾཀིལེསཔཀྑེ སཾཀིལེསསཱམཉྙབྷཱཝེན ཡོཛེཏྭཱ ‘‘ཨིམེསུ ཙཏུཀྐཙཏུཀྐཝསེན དེསིཏེསུ དསསུ ¶ ཙཏུཀྐེསུ དྷམྨེསུ ཀཏམོ ཀཏམོ ཨཀུསལདྷམྨོ ཀཏམསྶ ཀཏམསྶ པུགྒལསྶ དིསཱ’’ཏི མནསཱཝ སཾཀིལེསཔཀྑེ དིསཱདྷམྨབྷཱཝེན ཨོལོཀེཏྭཱ ‘‘ཨཡཾ ཨཡཾ པཋམོ པཋམོ ཨཀུསལདྷམྨོ དུཀྑཱཡ པཊིཔདཱཡ དནྡྷཱབྷིཉྙཱཡ ནིཡྻཀསྶ མུདིནྡྲིཡསྶ ཏཎྷཱཙརིཏསྶ པུགྒལསྶ པཋམཱ དིསཱ ནཱམ. ཨཡཾ ཨཡཾ དུཏིཡོ དུཏིཡོ ཨཀུསལདྷམྨོ དུཀྑཱཡ པཊིཔདཱཡ ཁིཔྤཱབྷིཉྙཱཡ ནིཡྻཀསྶ ཏིཀྑིནྡྲིཡསྶ ཏཎྷཱཙརིཏསྶ པུགྒལསྶ དུཏིཡཱ དིསཱ ནཱམ. ཨཡཾ ¶ ཨཡཾ ཏཏིཡོ ཏཏིཡོ ཨཀུསལདྷམྨོ སུཁཱཡ པཊིཔདཱཡ དནྡྷཱབྷིཉྙཱཡ ནིཡྻཀསྶ མུདིནྡྲིཡསྶ དིཊྛིཙརིཏསྶ པུགྒལསྶ ཏཏིཡཱ དིསཱ ནཱམ. ཨཡཾ ཨཡཾ ཙཏུཏྠོ ཙཏུཏྠོ ཨཀུསལདྷམྨོ སུཁཱཡ པཊིཔདཱཡ ཁིཔྤཱབྷིཉྙཱཡ ནིཡྻཀསྶ ཏིཀྑིནྡྲིཡསྶ དིཊྛིཙརིཏསྶ པུགྒལསྶ ཙཏུཏྠཱ དིསཱ ནཱམཱ’’ཏི ཝིསུཾ ཝིསུཾ དིསཱབྷཱཝེན ཡོཛེཏྭཱ, སམུདཡསཙྩདུཀྑསཙྩཱནི ཡཐཱརཧཾ ནཱིཧརིཏྭཱ, ཝིབྷཛིཏབྦདྷམྨསབྷཱཝོ ཙ ཡེན སཾཝཎྞནཱཝིསེསེན དསྶིཏོ. སོ སཾཝཎྞནཱཝིསེསོ ཙ སཱིཧཝིཀྐཱིལི༹ཏནཡསམུཊྛཱནཾ བྷཝཏི. ཏསྶ ཨོལོཀནཱ ཙ ཡེན སཾཝཎྞནཱཝིསེསེན དསྶིཏཱ, སོ སཾཝཎྞནཱཝིསེསོ ཙ དིསཱལོཙནནཡསམུཊྛཱནཾ བྷཝཏི. ཏཐཱ ཨོལོཀེཏྭཱ དིསཱཝིསེསབྷཱུཏསྶ དྷམྨསྶ པུགྒལཱནཾ ནཡནཉྩ ཡེན སཾཝཎྞནཱཝིསེསེན ནཡཏི, སོ སཾཝཎྞནཱཝིསེསོ ཙ ཨངྐུསནཡསམུཊྛཱནཾ བྷཝཏི.

‘‘ཙཏསྶོ པཊིཔདཱ, ཙཏྟཱརོ སཏིཔཊྛཱནཱ, ཙཏྟཱརི ཛྷཱནཱནི, ཙཏྟཱརོ ཝིཧཱརཱ, ཙཏྟཱརོ སམྨཔྤདྷཱནཱ, ཙཏྟཱརོ ཨཙྪརིཡཱ ཨབྦྷུཏཱ དྷམྨཱ, ཙཏྟཱརི ཨདྷིཊྛཱནཱནི, ཙཏསྶོ སམཱདྷིབྷཱཝནཱ, ཙཏྟཱརོ སུཁབྷཱགིཡཱ དྷམྨཱ, ཙཏསྶོ ཨཔྤམཱཎཱ’’ཏི (ནེཏྟི. ༨༦) ཙཏུཀྐཙཏུཀྐཝསེན དེསིཏཾ ཨིདཾ དིསཱབྷཱུཏཾ ཀུསལསམཱུཧདྷམྨཛཱཏཾ ‘‘དུཀྑཱཡ པཊིཔདཱཡ དནྡྷཱབྷིཉྙཱཡ ནིཡྻཀསྶ མུདིནྡྲིཡསྶ ཏཎྷཱཙརིཏསྶ ཙ དུཀྑཱཡ པཊིཔདཱཡ ཁིཔྤཱབྷིཉྙཱཡ ནིཡྻཀསྶ ཏིཀྑིནྡྲིཡསྶ ཏཎྷཱཙརིཏསྶ ཙ སུཁཱཡ པཊིཔདཱཡ དནྡྷཱབྷིཉྙཱཡ ནིཡྻཀསྶ མུདིནྡྲིཡསྶ དིཊྛིཙརིཏསྶ ས སུཁཱཡ པཊིཔདཱཡ ཁིཔྤཱབྷིཉྙཱཡ ནིཡྻཀསྶ ཏིཀྑིནྡྲིཡསྶ དིཊྛིཙརིཏསྶ ཙཱ’’ཏི ཙཏུནྣཾ པུགྒལཱནཾ ཝོདཱནཾ ཧོཏཱིཏི ཝོདཱནཔཀྑེ ཝོདཱནསཱམཉྙབྷཱཝེན ཡོཛེཏྭཱ ‘‘ཨིམེསུ ཙཏུཀྐཙཏུཀྐཝསེན དེསིཏེསུ དསསུ ཙཏུཀྐེསུ ཀུསལདྷམྨེསུ ཀཏམོ ¶ ཀཏམོ ཀུསལདྷམྨོ ཀཏམསྶ ཀཏམསྶ པུགྒལསྶ དིསཱ’’ཏི མནསཱཝ དིསཱདྷམྨབྷཱཝེན ཨོལོཀེཏྭཱ, ‘‘ཨཡཾ ཨཡཾ པཋམོ པཋམོ ཀུསལདྷམྨོ དུཀྑཱཡ པཊིཔདཱཡ དནྡྷཱབྷིཉྙཱཡ ནིཡྻཀསྶ མུདིནྡྲིཡསྶ ཏཎྷཱཙརིཏསྶ པུགྒལསྶ པཋམཱ དིསཱ ནཱམ. ཨཡཾ ཨཡཾ དུཏིཡོ དུཏིཡོ ཀུསལདྷམྨོ དུཀྑཱཡ པཊིཔདཱཡ ཁིཔྤཱབྷིཉྙཱཡ ནིཡྻཀསྶ ཏིཀྑིནྡྲིཡསྶ ཏཎྷཱཙརིཏསྶ པུགྒལསྶ དུཏིཡཱ དིསཱ ནཱམ. ཨཡཾ ཨཡཾ ཏཏིཡོ ཏཏིཡོ ཀུསལདྷམྨོ སུཁཱཡ པཊིཔདཱཡ དནྡྷཱབྷིཉྙཱཡ ནིཡྻཀསྶ མུདིནྡྲིཡསྶ དིཊྛིཙརིཏསྶ པུགྒལསྶ ཏཏིཡཱ དིསཱ ནཱམ. ཨཡཾ ཨཡཾ ཙཏུཏྠོ ཙཏུཏྠོ ཀུསལདྷམྨོ སུཁཱཡ པཊིཔདཱཡ ཁིཔྤཱབྷིཉྙཱཡ ནིཡྻཀསྶ ཏིཀྑིནྡྲིཡསྶ དིཊྛིཙརིཏསྶ པུགྒལསྶ ཙཏུཏྠཱ དིསཱ ནཱམཱ’’ཏི ཝིསུཾ ཝིསུཾ དིསཱབྷཱཝེན ཡོཛེཏྭཱ, མགྒསཙྩནིརོདྷསཙྩཱནི ཡཐཱརཧཾ ནཱིཧརིཏྭཱ, ཝིབྷཛིཏབྦདྷམྨསབྷཱཝོ ཙ ཡེན སཾཝཎྞནཱཝིསེསེན དསྶིཏོ. སོ སཾཝཎྞནཱཝིསེསོ ཙ སཱིཧཝིཀྐཱིལི༹ཏནཡསམུཊྛཱནཾ བྷཝཏི. ཏསྶ ཨོལོཀནཱ ཙ ཡེན སཾཝཎྞནཱཝིསེསེན དསྶིཏཱ. སོ སཾཝཎྞནཱཝིསེསོ ཙ དིསཱལོཙནནཡསམུཊྛཱནཾ ¶ བྷཝཏི. ཏཐཱ ཨོལོཀེཏྭཱ དིསཱཝིསེསསྶ དྷམྨསྶ པུགྒལཱནཾ ནཡནཉྩ ཡེན སཾཝཎྞནཱཝིསེསེན ནཡཏི, སོ སཾཝཎྞནཱཝིསེསོ ཙ ཨངྐུསནཡསམུཊྛཱནཾ བྷཝཏཱིཏི ནཡཀྐམེན སངྑེཔཏོ ནཡསམུཊྛཱནཾ བྷཝཏཱིཏི ཝིཉྙཱཏབྦནྟི.

ཨིཏི ནཡསམུཊྛཱནེ སཏྟིབལཱནུརཱུཔཱ རཙིཏཱ

ཝིབྷཱཝནཱ ནིཊྛིཏཱ.

པཎྜིཏེཧི པན ཨཊྛཀཐཱཊཱིཀཱནུསཱརེན གམྦྷཱིརཏྠོ ཝིཏྠཱརཏོ ཝིབྷཛིཏྭཱ གཧེཏབྦོཏི.

སཱསནཔཊྛཱནཝིབྷཱཝནཱ

༨༩. ‘‘ཏཏྠ ཀཏམཾ ནཡསམུཊྛཱན’’ནྟིཨཱདིནཱ ཨཱཙརིཡེན སབྦཐཱ ནཡསམུཊྛཱནཾ ཋཔིཏཾ, ཨམྷེཧི ཙ ཉཱཏཾ, ‘‘སོལ༹སཧཱརཔཉྩནཡཨཊྛཱརསམཱུལཔདེསུ ཨཊྛཱརས མཱུལཔདཱ ཀཐཾ ཝིབྷཏྟཱ, ཀུཧིཾ ཨམྷེཧི དཊྛབྦཱ’’ཏི ཝཏྟབྦབྷཱཝཏོ ¶ ‘‘ཏཏྠ ཨཊྛཱརས མཱུལཔདཱ ཀུཧིཾ དཊྛབྦཱ’’ཏིཨཱདི ཝུཏྟཾ. ཏཏྠཱཏི ཏེསུ སོལ༹སཧཱརཔཉྩནཡཨཊྛཱརསམཱུལཔདེསུ ཨཊྛཱརས མཱུལཔདཱ ཀེན པདེན ཨཱཙརིཡེན ཝིབྷཏྟཱ, ཀུཧིཾ ཨམྷེཧི ཝིཏྠཱརཏོ དཊྛབྦཱཏི པུཙྪཏི. ཨཊྛཱརས མཱུལཔདཱ སཱསནཔཊྛཱནེ མཡཱ ཝིབྷཏྟཱ, ཏུམྷེཧི ཙ ཝིཏྠཱརཏོ སཱསནཔཊྛཱནེ དཊྛབྦཱཏི ཝིསྶཛྫེཏི. ཝིབྷཏྟཱཡེཝ ཧི ཨཊྛཱརས མཱུལཔདཱ དཊྛབྦཱ བྷཝནྟི. ཨཊྛཀཐཱཡཾ (ནེཏྟི. ཨཊྛ. ༨༩) པན –

‘‘ཨེཝཾ སབྦཐཱ ནཡསམུཊྛཱནཾ ཝིབྷཛིཏྭཱ ཨིདཱནི སཱསནཔཊྛཱནཾ ཝིབྷཛནྟོ ཡསྨཱ སངྒཧཝཱརཱདཱིསུ མཱུལཔདེཧེཝ པཊྛཱནཾ སངྒཧེཏྭཱ སརཱུཔཏོ ན དསྶིཏཾ, ཏསྨཱ ཡཐཱ མཱུལཔདེཧི པཊྛཱནཾ ནིདྡྷཱརེཏབྦཾ, ཨེཝཾ པཊྛཱནཏོཔི མཱུལཔདཱནི ནིདྡྷཱརེཏབྦཱནཱིཏི དསྶནཏྠཾ ‘ཨཊྛཱརས མཱུལཔདཱ ཀུཧིཾ དཊྛབྦཱ? སཱསནཔཊྛཱནེ’ཏི ཨཱཧཱ’’ཏི –

ཝུཏྟཾ. སཱསནཔཊྛཱནེ ཨཊྛཱརས མཱུལཔདཱ དཊྛབྦཱཏི ཨཱཙརིཡེན ཝུཏྟཱ, ‘‘ཀཏམཾ ཏཾ སཱསནཔཊྛཱན’’ནྟི པུཙྪིཏབྦཏྟཱ ‘‘ཏཏྠ ཀཏམཾ སཱསནཔཊྛཱན’’ནྟིཨཱདི ཝུཏྟཾ. ཏཏྠཱཏི ཏེསུ ཨཊྛཱརསམཱུལཔདསཱསནཔཊྛཱནེསུ ཀཏམཾ ཏཾ སཱསནཔཊྛཱནནྟི ཨིདཱནི མཡཱ ནིདྡྷཱརིཡམཱནཾ བྷགཝཏཱ དེསིཏཾ ¶ སཾཀིལེསབྷཱགིཡཱདིསུཏྟཾ སཱསནཔཊྛཱནཾ ནཱམཱཏི ཝིསྶཛྫེཏི. སཱསནནྟི པརིཡཏྟིསཱསནཾ. པཊྛཱནནྟི ཏསྶ པརིཡཏྟིསཱསནསྶ སཾཀིལེསབྷཱགིཡཏཱདཱིཧི པཀཱརེཧི ཋཱནཾ པཝཏྟནཾ པཊྛཱནཾ, ཏཾདཱིཔནསུཏྟཾ པན ཨིདྷ པཊྛཱནཾ ནཱམ. ཏེན ཝུཏྟཾ – ‘‘སཾཀིལེསབྷཱགིཡཾ སུཏྟ’’ནྟིཨཱདི. ཨཐ ཝཱ སཱསནནྟི ཨདྷིསཱིལཨདྷིཙིཏྟཨདྷིཔཉྙཱསིཀྑཏྟཡཾ སཱསནཾ ནཱམ, ཏཾ སིཀྑཏྟཡཾ པཏིཊྛཧཏི ཨེཏེན སཾཀིལེསཱདིནཱཏི པཊྛཱནཾ, སིཀྑཏྟཡསྶ སཱསནསྶ པཊྛཱནནྟི སཱསནཔཊྛཱནཾ. ཏདཱདྷཱརབྷཱུཏཾ སུཏྟམྤི ཋཱནྱཱུཔཙཱརཏོ སཱསནཔཊྛཱནཾ ནཱམ. ཏཾ སཱསནཔཊྛཱནསུཏྟཾ སརཱུཔཏོ དསྶེཏུཾ –

‘‘སཾཀིལེསབྷཱགིཡཾ སུཏྟཾ, ཝཱསནཱབྷཱགིཡཾ སུཏྟཾ, ནིབྦེདྷབྷཱགིཡཾ སུཏྟཾ, ཨསེཀྑབྷཱགིཡཾ སུཏྟཾ, སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟཾ, སཾཀིལེསབྷཱགིཡཉྩ ནིབྦེདྷབྷཱགིཡཉྩ སུཏྟཾ, སཾཀིལེསབྷཱགིཡཉྩ ཨསེཀྑབྷཱགིཡཉྩ སུཏྟཾ, སཾཀིལེསབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟཾ, སཾཀིལེསབྷཱགིཡཉྩ ཝཱསནཱབྷཱགིཡཉྩ ནིབྦེདྷབྷཱགིཡཉྩ སུཏྟཾ, ཝཱསནཱབྷཱགིཡཉྩ ¶ ནིབྦེདྷབྷཱགིཡཉྩ སུཏྟཾ, ཏཎྷཱསཾཀིལེསབྷཱགིཡཾ སུཏྟཾ, དིཊྛིསཾཀིལེསབྷཱགིཡཾ སུཏྟཾ, དུཙྩརིཏསཾཀིལེསབྷཱགིཡཾ སུཏྟཾ, ཏཎྷཱཝོདཱནབྷཱགིཡཾ སུཏྟཾ, དིཊྛིཝོདཱནབྷཱགིཡཾ སུཏྟཾ, དུཙྩརིཏཝོདཱནབྷཱགིཡཾ སུཏྟ’’ནྟི –

ཝུཏྟཾ. ‘‘ཏེསུ སུཏྟེསུ ཡེ སཾཀིལེསཱདཡོ བྷགཝཏཱ ཝུཏྟཱ, ཏེསུ སཾཀིལེསཱདཱིསུ སཾཀིལེསོ ཀིཏྟཀོ’’ཏི པུཙྪིཏབྦཏྟཱ ‘‘ཏཏྠ སཾཀིལེསོ ཏིཝིདྷོ ཏཎྷཱསཾཀིལེསོ དིཊྛིསཾཀིལེསོ དུཙྩརིཏསཾཀིལེསོ’’ཏི ཝུཏྟཾ. ཏཏྠཱཏི ཏེསུ སུཏྟནྟེསུ སཾཀིལེསཱདཱིསུ དྷམྨེསུ. ‘‘ཏིཝིདྷེ ཏསྨིཾ སཾཀིལེསེ ཏཎྷཱསཾཀིལེསོ ཀཏམེན ཀུསལེན ཝིསུཛ྄ཛྷཏཱི’’ཏི པུཙྪིཏབྦཏྟཱ ‘‘ཏཏྠ ཏཎྷཱསཾཀིལེསོ སམཐེན ཝིསུཛ྄ཛྷཏཱི’’ཏི ཝུཏྟཾ. ཏཏྠཱཏི ཏསྨིཾ ཏིཝིདྷེ ཏཎྷཱསཾཀིལེསཱདིཀེ. ‘‘སོ སམཐོ ཁནྡྷེསུ ཀཏམོ ཁནྡྷོ’’ཏི པུཙྪིཏབྦཏྟཱ ‘‘སོ སམཐོ སམཱདྷིཀྑནྡྷོ’’ཏི ཝུཏྟཾ. ‘‘དིཊྛིསཾཀིལེསོ ཀེན ཝིསུཛ྄ཛྷཏཱི’’ཏི པུཙྪིཏབྦཏྟཱ ‘‘དིཊྛིསཾཀིལེསོ ཝིཔསྶནཱཡ ཝིསུཛ྄ཛྷཏཱི’’ཏི ཝུཏྟཾ. ‘‘སཱ ཝིཔསྶནཱ ཀཏམོ ཁནྡྷོ’’ཏི ཝཏྟབྦཏྟཱ ‘‘སཱ ཝིཔསྶནཱ པཉྙཱཀྑནྡྷོ’’ཏི ཝུཏྟཾ. ‘‘དུཙྩརིཏསཾཀིལེསོ ཀེན ཝིསུཛ྄ཛྷཏཱི’’ཏི ཝཏྟབྦཏྟཱ ‘‘དུཙྩརིཏསཾཀིལེསོ སུཙརིཏེན ཝིསུཛ྄ཛྷཏཱི’’ཏི ཝུཏྟཾ. ‘‘ཏཾ སུཙརིཏཾ ཀཏམོ ཁནྡྷོ’’ཏི ཝཏྟབྦཏྟཱ ‘‘ཏཾ སུཙརིཏཾ སཱིལཀྑནྡྷོ’’ཏི ཝུཏྟཾ. ‘‘ཏསྨིཾ སཱིལེ ཋིཏསྶ པུགྒལསྶ ཀིཾ བྷཝཏཱི’’ཏི ཝཏྟབྦཏྟཱ ‘‘ཏསྶ སཱིལེ པཏིཊྛིཏསྶཱ’’ཏིཨཱདི ཝུཏྟཾ. སཱིལེ སུཙརིཏསངྑཱཏེ སཱིལཀྑནྡྷེ པཏིཊྛིཏསྶ ཏསྶ སཱིལཝནྟསྶ པུགྒལསྶ བྷཝེསུ ཀཱམབྷཝརཱུཔཱརཱུཔབྷཝེསུ ཨཱསཏྟི བྷཝཔཏྠནཱ ཡདི ཨུཔྤཛྫཏི, ཨེཝཾསཱཡནྟི ཨེཝཾ ཨསྶ ཨཡནྟི པདཙྪེདོ. ཨེཝཾ སཏི ཨསྶ སཱིལེ ¶ པཏིཊྛིཏསྶ ཨཡཾ ཨཱསཏྟི བྷཝཔཏྠནཱ སམཐཝིཔསྶནཱབྷཱཝནཱམཡཔུཉྙཀིརིཡཝཏྠུ ཙ བྷཝཏི, ཙ-སདྡེན དཱནམཡསཱིལམཡཔུཉྙཀིརིཡཝཏྠུ ཙ བྷཝཏཱིཏི ཨཏྠོ སངྒཧིཏོ. ཏཏྲཱཏི ཏེསུ ཀཱམབྷཝརཱུཔཱརཱུཔབྷཝེསུ ཨུཔཔཏྟིཡཱ སཾཝཏྟཏཱིཏི.

‘‘སཾཀིལེསཱདཡོ ཡེཧི སུཏྟེཧི དསྶིཏཱ, ཏཱནི སུཏྟཱནི ཀིཏྟཀཱནཱི’’ཏི ཝཏྟབྦཏྟཱ ‘‘ཨིམཱནི ཙཏྟཱརི སུཏྟཱནཱི’’ཏིཨཱདི ཝུཏྟཾ. ཨསཱདྷཱརཎཱནི སཾཀིལེསབྷཱགིཡསུཏྟཝཱསནཱབྷཱགིཡསུཏྟནིབྦེདྷབྷཱགིཡསུཏྟཨསེཀྑབྷཱགིཡསུཏྟཱནི ཙཏྟཱརི སུཏྟཱནི བྷཝནྟི, སཱདྷཱརཎཱནི ¶ སཾཀིལེསབྷཱགིཡཝཱསནཱབྷཱགིཡསུཏྟ, སཾཀིལེསབྷཱགིཡནིབྦེདྷབྷཱགིཡསུཏྟ, སཾཀིལེསབྷཱགིཡཨསེཀྑབྷཱགིཡསུཏྟ, ཝཱསནཱབྷཱགིཡནིབྦེདྷབྷཱགིཡསུཏྟཱནི ཀཏཱནི མིསྶིཏཱནི ཙཏྟཱརི བྷཝནྟི. ཨིཏི ཨཊྛ སུཏྟཱནི བྷཝནྟི. ཏཱནིཡེཝ ཝུཏྟཔྤཀཱརཱནི ཨཊྛ སུཏྟཱནི བྷཝནྟི. སཱདྷཱརཎཱནི ཝཱསནཱབྷཱགིཡཨསེཀྑབྷཱགིཡསུཏྟནིབྦེདྷབྷཱགིཡཨསེཀྑབྷཱགིཡསུཏྟ- སཾཀིལེསབྷཱགིཡཝཱསནཱབྷཱགིཡནིབྦེདྷབྷཱགིཡསུཏྟསཾཀིལེས- བྷཱགིཡཝཱསནཱབྷཱགིཡཨསེཀྑབྷཱགིཡསུཏྟ- སཾཀིལེསབྷཱགིཡནིབྦེདྷབྷཱགིཡཨསེཀྑབྷཱགིཡསུཏྟ- ཝཱསནཱབྷཱགིཡནིབྦེདྷབྷཱགིཡཨསེཀྑབྷཱགིཡསུཏྟ- སཾཀིལེསབྷཱགིཡཝཱསནཱབྷཱགིཡནིབྦེདྷབྷཱགིཡཨསེཀྑབྷཱགིཡསུཏྟ- ནེཝསཾཀིལེསབྷཱགིཡནཝཱསནཱ- བྷཱགིཡནནིབྦེདྷབྷཱགིཡནཨསེཀྑབྷཱགིཡསུཏྟཱནི ཀཏཱནི མིསྶིཏཱནི ཨཊྛ སུཏྟཱནི བྷཝནྟཱིཏི སོལ༹ས སུཏྟཱནི བྷཝནྟི. ཏེསུ སོལ༹སསུཏྟེསུ ཙཏྟཱརི ཨེཀཀཱནི སུཏྟཱནི ཙ ཙཏྟཱརི དུཀཱནི སུཏྟཱནི ཙ དྭེ ཏིཀཱནི ཙ པཱལི༹ཡཾ ཨཱགཏཱནི, དྭེ དུཀཱནི སུཏྟཱནི ཙ དྭེ ཏིཀཱནི ཙ དྭེ ཙཏུཀྐཱནི སུཏྟཱནི ཙ ཨཊྛཀཐཱཡཾ (ནེཏྟི. ཨཊྛ. ༨༩) ཨཱགཏཱནི.

‘‘ཡདི པཊྛཱནནཡེན ཝུཏྟཔྤཀཱརཱནི སོལ༹ས སུཏྟཱནིཡེཝ ཝིབྷཏྟཱནི, ཨེཝཾ སཏི སུཏྟགེཡྻཱདིནཝཝིདྷཾ སཀལཾ པརིཡཏྟིསཱསནཾ པཊྛཱནནཡེན ཨཝིབྷཏྟཾ བྷཝེཡྻཱ’’ཏི ཝཏྟབྦཏྟཱ ‘‘ཨིམེཧི སོལ༹སཧི སུཏྟེཧཱི’’ཏིཨཱདི ཝུཏྟཾ. པཊྛཱནནཡེན ཝིབྷཏྟེཧི སོལ༹སཧི ཨིམེཧི སུཏྟེཧི ནཝཝིདྷཾ སཀལཾ པརིཡཏྟིསུཏྟཾ པཊྛཱནནཡེན ཝིབྷཏྟཾཡེཝ ཧུཏྭཱ བྷིནྣཾ བྷཝཏི. སཾཀིལེསབྷཱགིཡཱདིཔབྷེདཱཡ གཱཐཱཡ གཱཐཱ ཨནུམིནིཏབྦཱ, སཾཀིལེསབྷཱགིཡཱདིཔབྷེདེན ཝེཡྻཱཀརཎེན ཝེཡྻཱཀརཎཾ ཨནུམིནིཏབྦཾ. སཾཀིལེསབྷཱགིཡཱདིཔབྷེདེན སུཏྟེན སུཏྟཾ ཨནུམིནིཏབྦཾ བྷཝཏིཡེཝཱཏི.

༩༠. ‘‘ཏེསུ སོལ༹སསུ སཾཀིལེསབྷཱགིཡཱདཱིསུ སུཏྟེསུ ཀཏམཾ སཾཀིལེསབྷཱགིཡཾ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ སཾཀིལེསབྷཱགིཡཾ སུཏྟ’’ནྟིཨཱདི ཝུཏྟཾ. ཏཏྠཱཏི ཏེསུ སོལ༹སསུ སཾཀིལེསབྷཱགིཡཱདཱིསུ སུཏྟེསུ ཀཏམཾ སུཏྟཾ སཾཀིལེསབྷཱགིཡཾ སུཏྟཾ ནཱམཱཏི པུཙྪཏི.

‘‘ཀཱམནྡྷཱ ¶ ¶ ཛཱལསཉྪནྣཱ, ཏཎྷཱཚདནཚཱདིཏཱ;

པམཏྟབནྡྷནཱབདྡྷཱ, མཙྪཱཝ ཀུམིནཱམུཁེ;

ཛརཱམརཎམནྭེནྟི, ཝཙྪོ ཁཱིརཔཀོཝ མཱཏར’’ནྟི. –

ཨིདཾ སུཏྟཾ སཾཀིལེསབྷཱགེ ཝཱཙཀཉཱཔཀབྷཱཝེན པཝཏྟནཏོ སཾཀིལེསབྷཱགིཡཾ སུཏྟཾ ནཱམ. ཡེ སཏྟཱ ཀཱམནྡྷཱ ཀཱམེན ཨནྡྷཱ ཛཱལསཉྪནྣཱ ཏཎྷཱཚདནེན ཚཱདིཏཱ, པམཏྟབནྡྷནཱཡ བདྡྷཱ བནྡྷིཏབྦཱ, ཏེ སཏྟེ ཛརཱམརཎཾ ཨནྭེཏི, ཡཐཱ ཏཾ ཀུམིནཱམུཁེ ཡེ མཙྪཱ གཧིཏཱ, ཏེ མཙྪེ ཛརཱམརཎཾ ཨནྭེཏི ཨིཝ, ཨེཝཾ ཏེ སཏྟེ ཛརཱམརཎཾ ཨནྭེཏི. ཁཱིརཔཀོ ཝཙྪོ མཱཏརཾ ཨནྭེཏི ཨིཝ, ཨེཝཾ ཏེ སཏྟེ ཛརཱམརཎཾ ཨནྭེཏཱིཏི ཡོཛནཱ ཀཱཏབྦཱ. ཨཐ ཝཱ ཁཱིརཔཀོ ཝཙྪོ མཱཏརཾ ཨནྭེཏི ཨིཝ, ཀུམིནཱམུཁེ གཧིཏཱ མཙྪཱ ཛརཱམརཎཾ ཨནྭེནྟི ཨིཝ ཙ, ཨེཝཾ ཡེ སཏྟཱ ཀཱམནྡྷཱ པམཏྟབནྡྷནཱཡ བནྡྷིཏབྦཱ, ཏེ སཏྟཱ ཛརཱམརཎཾ ཨནྭེནྟཱིཏི ཡོཛནཱ.

‘‘ཨིདཾ སུཏྟཾཡེཝཱ’’ཏི ཝཏྟབྦཏྟཱ –

‘‘ཙཏྟཱརིམཱནི, བྷིཀྑཝེ, ཨགཏིགམནཱནི. ཀཏམཱནི ཙཏྟཱརི? ཚནྡཱགཏིཾ གཙྪཏི, དོསཱགཏིཾ གཙྪཏི, མོཧཱགཏིཾ གཙྪཏི, བྷཡཱགཏིཾ གཙྪཏི, ཨིམཱནི ཁོ, བྷིཀྑཝེ, ཙཏྟཱརི ཨགཏིགམནཱནི. ཨིདམཝོཙ བྷགཝཱ, ཨིདཾ ཝཏྭཱན སུགཏོ, ཨཐཱཔརཾ ཨེཏདཝོཙ སཏྠཱ –

‘‘ཚནྡཱ དོསཱ བྷཡཱ མོཧཱ, ཡོ དྷམྨཾ ཨཏིཝཏྟཏི;

ནིཧཱིཡཏི ཏསྶ ཡསོ, ཀཱལ༹པཀྑེཝ ཙནྡིམཱ’’ཏི. –

ཨིདཾ སཾཀིལེསབྷཱགིཡཾ སུཏྟནྟི –

ཝུཏྟཾ. ཚནྡཱ ཚནྡཧེཏུནཱ དོསཱ དོསཧེཏུནཱ བྷཡཱ བྷཡཧེཏུནཱ མོཧཱ མོཧཧེཏུནཱ ཡོ རཱཛཱདིཀོ ཡོ ཝིནཡདྷརཱདིཀོ ཝཱ དྷམྨཾ སཔྤུརིསདྷམྨཾ ཨཏིཝཏྟཏི ཨཏིཀྐམིཏྭཱ ཝཏྟཏི, ཏསྶ རཱཛཱདིནོ ཝཱ ཏསྶ ཝིནཡདྷརཱདིནོ ཝཱ ཡསོ ཀིཏྟི ཙ པརིཝཱརོ ཙ བྷོགོ ཙ ནིཧཱིཡཏི. ཙནྡིམཱ ཀཱལ༹པཀྑེ པབྷཱཡ ནིཧཱིཡཏི ཨིཝ, ཨེཝཾ ནིཧཱིཡཏཱིཏི ཡོཛནཱ.

‘‘ཨེཏྟཀཾཡེཝཱ’’ཏི ¶ ¶ ཝཏྟབྦཏྟཱ ‘‘མནོཔུབྦངྒམཱ དྷམྨཱ…པེ… ཙཀྐཾཝ ཝཧཏོ པདནྟི ཨིདཾ སཾཀིལེསབྷཱགིཡཾ སུཏྟ’’ནྟི ཝུཏྟཾ. ཨཏྠོ པཱཀཊོ. ཨཊྛཀཐཱཡམྤི ཝིབྷཏྟོ.

‘‘མིདྡྷཱི ཡདཱ ཧོཏི མཧགྒྷསོ ཙ, ནིདྡཱཡིཏཱ སམྤརིཝཏྟསཱཡཱི;

མཧཱཝརཱཧོཝ ནིཝཱཔཔུཊྛོ, པུནཔྤུནཾ གབྦྷམུཔེཏི མནྡོ’’ཏི. –

ཨིདཾ སུཏྟམྤི སཾཀིལེསབྷཱགེ ཝིསཡེ ཝཱཙཀཉཱཔཀབྷཱཝེན པཝཏྟནཏོ སཾཀིལེསབྷཱགིཡཾ སུཏྟཾ ནཱམ. ནིཝཱཔཔུཊྛོ མཧཱཝརཱཧོ གཱམསཱུཀརོ ནིདྡཱཡིཏཱ སུཔནསཱིལོ སམྤརིཝཏྟསཱཡཱི ཧོཏི ཨིཝ, ཨེཝཾ ཡོ མནྡོ སཏྟོ ཡདཱ མཧགྒྷསོ ཧོཏི, སོ མནྡོ སཏྟོ མིདྡྷཱི ཐིནམིདྡྷཱབྷིབྷཱུཏོ ཧུཏྭཱ ནིདྡཱཡིཏཱ མུདུཕསྶསཡནེ མུདུཧཏྠེཧི པརཱམསིཏོ སམྤརིཝཏྟསཱཡཱི པུནཔྤུནཾ གབྦྷཾ ཨུཔེཏཱིཏི ཡོཛནཱ.

‘‘ཨཡསཱཝ མལཾ སམུཊྛིཏཾ, ཏཏུཊྛཱཡ ཏམེཝ ཁཱདཏི;

ཨེཝཾ ཨཏིདྷོནཙཱརིནཾ, སཱནི ཀམྨཱནི ནཡནྟི དུགྒཏི’’ནྟི. –

ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ. ཨཡསཱ ཨཡཏོ སམུཊྛིཏཾ ཛཱཏམལཾ ཏཏུཊྛཱཡ ཏཏོ ཨཡཏོ ཨུཊྛཧིཏྭཱ ཏམེཝ ཨཡཾ ཁཱདཏི ཨིཝ, ཨེཝཾ ཨཏིདྷོནཙཱརིནཾ ཨཏིཀྐམིཏྭཱ དྷོནཙཱརིཔུགྒལཾ སཱནི སཡཾ ཀཏཱནི ཨཀུསལཀམྨཱནི དུགྒཏིཾ ནཡནྟཱིཏི ཡོཛནཱ.

‘‘ཙོརོ ཡཐཱ སནྡྷིམུཁེ གཧཱིཏོ, སཀམྨུནཱ ཧཉྙཏི བཛ྄ཛྷཏེ ཙ;

ཨེཝཾ ཨཡཾ པེཙྩ པཛཱ པརཏྠ, སཀམྨུནཱ ཧཉྙཏི བཛ྄ཛྷཏེ ཙཱ’’ཏི. –

ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ. སནྡྷིམུཁེ རཱཛཔུརིསཱདཱིཧི གཧིཏོ ཙོརོ སཀམྨུནཱ ཨཏྟནཱ ཀཏེན ཙོརཀམྨེན ཧཉྙཏི ཙ བཛ྄ཛྷཏེ ཙ ཡཐཱ, ཨེཝཾ ཨཡཾ པཱཔཀཱརིནཱི པཛཱ པརཏྠ པརལོཀེ པེཙྩ སཀམྨུནཱ སཡཾ ཀཏེན ཨཀུསལཀམྨུནཱ སཏྠཱདཱིཧི ཧཉྙཏི ཙ ཨདྡུབནྡྷནཱདཱིཧི བཛ྄ཛྷཏེ ཙཱཏི ཡོཛནཱ.

‘‘སུཁཀཱམཱནི ¶ བྷཱུཏཱནི, ཡོ དཎྜེན ཝིཧིཾསཏི;

ཨཏྟནོ སུཁམེསཱནོ, པེཙྩ སོ ན ལབྷཏེ སུཁ’’ནྟི. –

ཨིདཾ ¶ སུཏྟམྤི སཾཀིལེསབྷཱགིཡཾ སུཏྟཾ ནཱམ. ཨཏྟནོ སུཁཾ ཨེསཱནོ ཨེསམཱནོ ཡོ སཏྟོ ཨཉྙཱནི སུཁཀཱམཱནི བྷཱུཏཱནི དཎྜེན ཝིཧིཾསཏི, སོ ཧིཾསཀོ སཏྟོ པརལོཀེ པེཙྩ སུཁཾ ན ལབྷཏཱིཏི ཡོཛནཱ.

‘‘གུནྣཾ ཙེ ཏརམཱནཱནཾ, ཛིམྷཾ གཙྪཏི པུངྒཝོ;

སབྦཱ ཏཱ ཛིམྷཾ གཙྪནྟི, ནེཏྟེ ཛིམྷཾ གཏེ སཏི.

‘‘ཨེཝམེཝ མནུསྶེསུ, ཡོ ཧོཏི སེཊྛསམྨཏོ;

སོ ཙེ ཨདྷམྨཾ ཙརཏི, པགེཝ ཨིཏརཱ པཛཱ;

སབྦཾ རཊྛཾ དུཀྑཾ སེཏི, རཱཛཱ ཙེ ཧོཏི ཨདྷམྨིཀོ’’ཏི. –

ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ. ནདིཾ ཏརམཱནཱནཾ གུནྣཾ པུངྒཝོ ཛིམྷཾ ཙེ གཙྪཏི, ཨེཝཾ ནེཏྟེ ཛིམྷཾ གཏེ སཏི སབྦཱ ཏཱ གཱཝིཡོ ཛིམྷཾ གཙྪནྟི ཡཐཱ, ཨེཝམེཝ མནུསྶེསུ ཡོ རཱཛཱ སེཊྛསམྨཏོ, སོ རཱཛཱ ཨདྷམྨཾ ཙརཏི, ཨེཝཾ རཉྙེ ཨདྷམྨཾ ཙརནྟེ སཏི ཨིཏརཱ པཛཱ པགེཝ པཋམམེཝ ཨདྷམྨཾ ཙརཏི. རཱཛཱ ཨདྷམྨིཀོ ཙེ ཧོཏི, ཨེཝཾ རཉྙེ ཨདྷམྨིཀེ སཏི སབྦཾ རཊྛཾ དུཀྑཾ སེཏཱིཏི ཡོཛནཱ.

‘‘སུཀིཙྪརཱུཔཱ ཝཏིམེ མནུསྶཱ, ཀརོནྟི པཱཔཾ ཨུཔདྷཱིསུ རཏྟཱ;

གཙྪནྟི ཏེ བཧུཛནསནྣིཝཱསཾ, ནིརཡཾ ཨཝཱིཙིཾ ཀཊུཀཾ བྷཡཱནཀ’’ནྟི. –

ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ. ཡེ མནུསྶཱ ཨུཔདྷཱིསུ ཀཱམགུཎཱུཔདྷཱིསུ རཏྟཱ རཱགཱབྷིབྷཱུཏཱ ཧུཏྭཱ པཱཔཾ ཨཀུསལཀམྨཾ ཀརོནྟི, ཨིམེ པཱཔཀམྨཀརཱ མནུསྶཱ སུཀིཙྪརཱུཔཱ ཝཏ སུཊྛུ ཀིཙྪཱཔནྣརཱུཔཱ ཝཏ བྷཝནྟི, ཏེ པཱཔཀམྨཀརཱ མནུསྶཱ ཀཊུཀཾ བྷཡཱནཀཾ བཧུཛནསནྣིཝཱསཾ ནིརཡཾ ཨཝཱིཙིཾ གཙྪནྟཱིཏི ཡོཛནཱ.

‘‘ཕལཾ ཝེ ཀདལིཾ ཧནྟི, ཕལཾ ཝེལུ༹ཾ ཕལཾ ནལ༹ཾ;

སཀྐཱརོ ཀཱཔུརིསཾ ཧནྟི, གབྦྷོ ཨསྶཏརིཾ ཡཐཱ’’ཏི. –

ཨིདཾ ¶ སུཏྟམྤི སཾཀིལེསབྷཱགིཡཾ སུཏྟཾ ནཱམ. ཕལཾ ཀདལིཡཱ ཕལཾ ཀདལིཾ ཝེ ཨེཀནྟེན ཧནྟི ཡཐཱ, ཕལཾ ཝེལུ༹ཾ ཝེ ཨེཀནྟེན ཧནྟི ཡཐཱ, ཕལཾ ནལ༹ཾ ཝེ ཨེཀནྟེན ཧནྟི ཡཐཱ, གབྦྷོ ཨསྶཏརིཾ ¶ མཱཏརཾ ཝེ ཨེཀནྟེན ཧནྟི ཡཐཱ, ཨེཝཾ སཀྐཱརོ ཀཱཔུརིསཾ ཝེ ཨེཀནྟེན ཧནྟཱིཏི ཡོཛནཱ.

‘‘ཀོདྷམཀྑགརུ བྷིཀྑུ, ལཱབྷསཀྐཱརགཱརཝོ;

སུཁེཏྟེ པཱུཏིབཱིཛཾཝ, སདྡྷམྨེ ན ཝིརཱུཧཏཱི’’ཏི. –

ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ. སུཁེཏྟེ སུནྡརེ ཁེཏྟེཔི ཁིཏྟཾ པཱུཏིབཱིཛཾ ན རུཧཏི ཨིཝ, ཨེཝཾ ཡོ བྷིཀྑུ ལཱབྷསཀྐཱརགཱརཝོ ཀོདྷཾ ཀུཛ྄ཛྷནལཀྑཎཾ ཀོདྷཾ, མཀྑཾ པརགུཎསཱིལམཀྑནལཀྑཎཾ མཀྑཉྩ གརུཾ ཀཏྭཱ ཙརཏི, སོ ཙརནྟོ བྷིཀྑུ སདྡྷམྨསྨིཾ ན རུཧཏཱིཏི ཡོཛནཱ.

༩༡. ‘‘ཨིདྷཱཧཾ, བྷིཀྑཝེ, ཨེཀཙྩཾ པུགྒལཾ པདུཊྛཙིཏྟཾ ཨེཝཾ ཙེཏསཱ ཙེཏོ པརིཙྩ པཛཱནཱམི…པེ… ཨིཏི མེ སུཏ’’ནྟི ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ. བྷིཀྑཝེ ཨིདྷ སཱསནེ, ལོཀེ ཝཱ ཨཧཾ ཨེཀཙྩཾ པུགྒལཾ པདུཊྛཙིཏྟཾ མམ ཙེཏསཱ ཏསྶ ཙེཏོ ཙིཏྟཾ པརིཙྩ པརིཙྪིནྡིཏྭཱ བུདྡྷཙཀྑུནཱ ཨེཝཾ པཛཱནཱམི. ‘‘ཀཐཾ པཛཱནཱམཱི’’ཏི ཙེ པུཙྪེཡྻ, ཡཉྩ པཊིཔདཾ པཊིཔནྣོ, ཡཉྩ མགྒཾ སམཱརུལ༹ྷོ ཨཡཾ པུགྒལོ ཡཐཱ ཡཱཡ དུཔྤཊིཔདཱཡ ཡེན དུམྨགྒེན ཨིརིཡཏི པཝཏྟཏི, ཏཱཡ དུཔྤཊིཔདཱཡ ཏེན དུམྨགྒེན ཨིམམྷི ཨིམསྨིཾ སམཡེ དུཔྤཊིཔཛྫནཀཱལེ ཨཡཾ དུཔྤཊིཔནྣཾ པཊིཔནྣོ དུམྨགྒསམཱརུལ༹ྷོ པུགྒལོ ཙེ ཀཱལཾ ཀརེཡྻ, ཨེཝཾ སཏི ཨཱབྷཏཾ ཝཏྠུ ནིཀྑིཏྟཾ ཡཐཱ, ཨེཝཾ ནིརཡེ ནིཀྑིཏྟོ. ཏཾ ཀིསྶ ཧེཏུ? བྷིཀྑཝེ ཨསྶ པུགྒལསྶ ཙིཏྟཾ པདུཊྛཾ པདོསིཏཾ ཧི ཡསྨཱ ཧོཏི, ཏསྨཱ ནིཀྑིཏྟོ. ཨེཝཾ ཨིདྷ སཱསནེ, ལོཀེ ཝཱ ཙེཏོཔདོསཧེཏུ ཙ པན ཨེཀཙྩེ སཏྟཱ པུགྒལཱ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ཨུཔཔཛྫནྟཱིཏི པཛཱནཱམཱིཏི. ཨེཏམཏྠཾ བྷགཝཱ ཨཝོཙ. ཏཏྠ ཏསྨིཾ སུཏྟེ ཨེཏཾ ‘‘པདུཊྛཙིཏྟཾ ཉཏྭཱན…པེ… ནིརཡཾ སོ ཨུཔཔཛྫཏཱི’’ཏི གཱཐཱཝཙནཾ ཨིཏི ཨེཝཾ ཝུཙྩཏི.

སཏྠཱ ཨིདྷ སཱསནེ, ལོཀེ ཝཱ པདུཊྛཙིཏྟཾ ཨེཀཙྩཾ པུགྒལཾ ཉཏྭཱན བྷིཀྑཱུནཾ སནྟིཀེ ཨེཏམཏྠཾ བྱཱཀཱསི. ཨིམམྷི ཨིམསྨིཾ སམཡེ ཨཡཾ པུགྒལོ ཙེ ཀཱལཾ ཀཡིརཱཐ, ཨེཝཾ སཏི པདུཊྛཙིཏྟསམངྒཱི ཧི ནིརཡསྨིཾ ཨུཔཔཛྫེཡྻ, པུགྒལསྶ ཙིཏྟཾ པདཱུསིཏཾ ཧི ཡསྨཱ ཧོཏི, ཏསྨཱ ཨུཔཔཛྫེཡྻ, ཙེཏོཔདོསཧེཏུ ¶ སཏྟཱ དུགྒཏིཾ གཙྪནྟི ཨཱབྷཏཾ ཝཏྠུཾ ནིཀྑིཔེཡྻ ཡཐཱ, ཨེཝམེཝཾ ¶ ཏཐཱཝིདྷོ དུཔྤཉྙོ སོ པདོསཙིཏྟོ པུགྒལོ ཀཱཡསྶ བྷེདཱ པརཾ མརཎཱ ནིརཡཾ ཨུཔཔཛྫཏཱིཏི ཨཡམྤི ཨཏྠོ བྷགཝཏཱ ཝུཏྟོ, ཨིཏི མེ མཡཱ སུཏནྟི ཡོཛནཱ.

‘‘སཙེ བྷཱཡཐ དུཀྑསྶ, སཙེ ཝོ དུཀྑམཔྤིཡཾ;

མཱཀཏྠ པཱཔཀཾ ཀམྨཾ, ཨཱཝི ཝཱ ཡདི ཝཱ རཧོ.

‘‘སཙེ ཙ པཱཔཀཾ ཀམྨཾ, ཀརིསྶཐ ཀརོཐ ཝཱ;

ན ཝོ དུཀྑཱ པམུཏྱཏྠི, ཨུཔེཙྩཔི པལཱཡཏ’’ནྟི. –

ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ. སཔྤུརིསཱ ཏུམྷེ དུཀྑསྶ ཛཱཏིདུཀྑཛརཱདུཀྑབྱཱདྷིདུཀྑམརཎདུཀྑཨཔཱཡདུཀྑ- ཨཏཱིཏཝཊྚམཱུལཀདུཀྑཨནཱགཏཝཊྚམཱུལཀདུཀྑཔཙྩུཔྤནྣཱཧཱརམཱུལཀདུཀྑཱཏི ཨཊྛཝིདྷསྶ དུཀྑསྶ སཙེ བྷཱཡཐ, ཝོ ཏུམྷེཧི དུཀྑཾ ཏཐཱ ཨཊྛཝིདྷཾ དུཀྑཾ སཙེ ཨཔྤིཡཾ, ཨེཝཾ སཏི ཨཱཝི ཝཱ ཡདི རཧོ ཝཱ པཱཔཀཾ ཀམྨཾ མཱཀཏྠ མཱ ཨཀཏྠ. སཔྤུརིསཱ ཏུམྷེ ཨཱཝི ཝཱ ཡདི རཧོ ཝཱ པཱཔཀཾ ཀམྨཾ སཙེ ཀརིསྶཐ ཝཱ སཙེ ཀརོཐ ཝཱ, ཨེཝཾ སཏི ཨུཔེཙྩཔི སཉྩིཙྩཱཔི པལཱཡཏཾ པལཱཡནྟཱནཾ ཝོ ཏུམྷཱཀཾ དུཀྑཱ ཨཊྛཝིདྷཱ དུཀྑཏོ པམུཏྟི མུཙྩནཾ ནཏྠེཝཱཏི ཡོཛནཱ.

‘‘ཨདྷམྨེན དྷནཾ ལདྡྷཱ, མུསཱཝཱདེན ཙཱུབྷཡཾ;

མམེཏི བཱལཱ མཉྙནྟི, ཏཾ ཀཐཾ ནུ བྷཝིསྶཏི.

‘‘ཨནྟརཱཡཱ སུ བྷཝིསྶནྟི, སམྦྷཏསྶ ཝིནསྶཏི;

མཏཱ སགྒཾ ན གཙྪནྟི, ནནུ ཨེཏྟཱཝཏཱ ཧཏཱ’’ཏི. –

ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ. ཡེ བཱལཱ ཨདྷམྨེན ཙ མུསཱཝཱདེན ཙ དྷནཾ སཝིཉྙཱཎཱཝིཉྙཱཎཾ སབྦཾ ལབྷིཏབྦཾ དྷནཾ ལདྡྷཱ ཨུབྷཡཾ དྷནཾ ‘‘མམ དྷན’’ནྟི མཉྙནྟི, ཏེསཾ བཱལཱནཾ ཏཾ ཨུབྷཡཾ དྷནཾ ཀཐཾ ཀེན ནུ པཀཱརེན བྷཝིསྶཏི, ཨདྷམྨེན སམྦྷཏཏྟཱ ཙིརཊྛིཏིཀཾ ན ཧོཏི. ཨནྟརཱཡཱ རཱཛནྟརཱཡཱདཡོ ཨནྟརཱཡཱ ཏེསཾ བཱལཱནཾ བྷཝིསྶནྟི. ཡེན ཨདྷམྨཝོཧཱརཱདིཀེན ཡཾ དྷནཾ སམྦྷཏཾ, ཨསྶ ཨདྷམྨཝོཧཱརཱདིཀསྶ ཏཾ སམྦྷཏཾ དྷནཾ ཝིནསྶཏི. མཏཱ མརནྟཱ ཏེ བཱལཱ སགྒཾ སུགཏིཾ ན གཙྪནྟི. སུགཏི ཧི སོབྷནེཧི བྷོགེཧི ཨགྒོཏི ‘‘སགྒོ’’ཏི ¶ ཨདྷིཔྤེཏཱ ¶ . ཨེཏྟཱཝཏཱ ཨེཏྟཀེན དིཊྛདྷམྨིཀསམྤརཱཡིཀཱནཾ ཨཏྟཧིཏཱནཾ ཧཱཡནེན ཏེ བཱལཱ ཧཏཱ ཝིནཊྛཱ བྷཝནྟི ནནཱུཏི ཡོཛནཱ.

‘‘ཀཐཾ ཁཎཏི ཨཏྟཱནཾ, ཀཐཾ མིཏྟེཧི ཛཱིརཏི;

ཀཐཾ ཝིཝཊྚཏེ དྷམྨཱ, ཀཐཾ སགྒཾ ན གཙྪཏི’’.

‘‘ལོབྷཱ ཁཎཏི ཨཏྟཱནཾ, ལུདྡྷོ མིཏྟེཧི ཛཱིརཏི;

ལོབྷཱ ཝིཝཊྚཏེ དྷམྨཱ, ལོབྷཱ སགྒཾ ན གཙྪཏཱི’’ཏི. –

ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ. ཡོཛནཏྠོ པཱཀཊོ.

‘‘ཙརནྟི བཱལཱ དུམྨེདྷཱ, ཨམིཏྟེནེཝ ཨཏྟནཱ;

ཀརོནྟཱ པཱཔཀཾ ཀམྨཾ, ཡཾ ཧོཏི ཀཊུཀཔྥལཾ.

‘‘ན ཏཾ ཀམྨཾ ཀཏཾ སཱདྷུ, ཡཾ ཀཏྭཱ ཨནུཏཔྤཏི;

ཡསྶ ཨསྶུམུཁོ རོདཾ, ཝིཔཱཀཾ པཊིསེཝཏཱི’’ཏི. –

ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ. དུམྨེདྷཱ ནིཔྤཉྙཱ བཱལཱ ཨམིཏྟེན པཱཔཀཾ ཀམྨཾ ཀཏཾ ཨིཝ, ཨེཝཾ ཨཏྟནཱ ཀཊུཀཔྥལཾ ཡཾ ཀམྨཾ ཀཏཾ ཧོཏི, ཏཾ པཱཔཀཾ ཀཏཾ ཀམྨཾ ཀརོནྟཱ ཙརནྟི. ཡཾ ཀམྨཾ ཀཏྭཱ ཀརོནྟོ པཙྪཱ ཨནུཏཔྤཏི, ཏཾ ཀཏཾ ཀམྨཾ ན སཱདྷུ. ཡསྶ ཀམྨསྶ ཝིཔཱཀཾ རོདཾ རུདནྟོ ཨསྶུམུཁོ པཊིསེཝཏི, ཏཾ ཀཏཾ ཀམྨཾ ན སཱདྷཱུཏི ཡོཛནཱ.

‘‘དུཀྐརཾ དུཏྟིཏིཀྑཉྩ…པེ… ཨཝཱིཏརཱགོ’’ཏི ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ. སུཏྟཏྠོ ཨཊྛཀཐཱཡཾ ཝིཏྠཱརཏོ ཝུཏྟོ.

‘‘ཨཔྤམེཡྻཾ པམིནནྟོ, ཀོདྷ ཝིདྭཱ ཝིཀཔྤཡེ;

ཨཔྤམེཡྻཾ པམཱཡིནཾ, ནིཝུཏཾ ཏཾ མཉྙེ ཨཀིསྶཝ’’ནྟི. –

ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ. ཨིདྷ སཱསནེ ཨཔྤམེཡྻཾ ཨཔྤམེཡྻགུཎཾ ཁཱིཎཱསཝཾ པུགྒལཾ ‘‘ཨཡཾ ཁཱིཎཱསཝོ པུགྒལོ ཨེཏྟཀསཱིལོ ཨེཏྟཀསམཱདྷི ཨེཏྟཀཔཉྙོ’’ཏི པམིནནྟོ ཀོ པུཐུཛྫནོ ¶ ཝིཀཔྤཡེ. ཨཔྤམེཡྻཾ ཁཱིཎཱསཝཔུགྒལཾ པམཱཡིནཾ པམཱཡནྟཾ ཏཾ པུཐུཛྫནཾ ཨཡཾ ནིཝུཏཾ ཨཝཀུཛྫཔཉྙཾ ཨཀིསྶཝཾ ཨཔཉྙནྟི མཉྙེ མཉྙཱམཱིཏི ཡོཛནཱ.

‘‘པུརིསསྶ ¶ ཧི ཛཱཏསྶ, ཀུཋཱརཱི ཛཱཡཏེ མུཁེ;

ཡཱཡ ཚིནྡཏི ཨཏྟཱནཾ, བཱལོ དུབྦྷཱསིཏཾ བྷཎཾ.

‘‘ན ཧི སཏྠཾ སུནིསིཏཾ, ཝིསཾ ཧལཱཧལཾ ཨིཝ;

ཨེཝཾ ཝིརདྡྷཾ པཱཏེཏི, ཝཱཙཱ དུབྦྷཱསིཏཱ ཡཐཱ’’ཏི. –

ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ. དུབྦྷཱསིཏཾ ཨརིཡཱུཔཝཱདསངྑཱཏཾ ཕརུསཝཱཙཾ བྷཎཾ བྷཎནྟོ བཱལོ དུཊྛོ པུརིསོ ཡཱཡ ཀུཋཱརཱིསདིསིཡཱ དུབྦྷཱསིཏཝཱཙཱཡ ཨཏྟཱནཾ ཚིནྡཏི, སཱ ཀུཋཱརཱིསདིསཱི དུབྦྷཱསིཏཝཱཙཱ ཛཱཏསྶ པུརིསསྶ མུཁེ ཛཱཡཏེ ཛཱཡཏི, སཱ དུབྦྷཱསིཏཝཱཙཱ མུཁེ ཛཱཡཏི ཨིཝ, ཨེཝཾ སུནིསིཏཾ སཏྠཾ མུཁེ ན ཛཱཡཏི, ཡཐཱ ཧལཱཧལཾ ཝིསཾ མུཁེ ན ཛཱཡཏི, དུབྦྷཱསིཏཱ ཝཱཙཱ ཨཔཱཡེསུ ཝིརདྡྷཾ པུགྒལཾ པཱཏེཏི ཡཐཱ, ཨེཝཾ སུནིསིཏཾ སཏྠཾ ཨཔཱཡེསུ ན པཱཏེཏི, ཧལཱཧལཾ ཝིསཾ ཨཔཱཡེསུ ན པཱཏེཏཱིཏི ཡོཛནཱ.

༩༢.

‘‘ཡོ ནིནྡིཡཾ པསཾསཏི, ཏཾ ཝཱ ནིནྡཏི ཡོ པསཾསིཡོ;

ཝིཙིནཱཏི མུཁེན སོ ཀལིཾ, ཀལིནཱ ཏེན སུཁཾ ན ཝིནྡཏི.

‘‘ཨཔྤམཏྟོ ཨཡཾ ཀལི, ཡོ ཨཀྑེསུ དྷནཔརཱཛཡོ;

སབྦསྶཱཔི སཧཱཔི ཨཏྟནཱ, ཨཡམེཝ མཧནྟཏརོ ཀལི;

ཡོ སུགཏེསུ མནཾ པདོསཡེ.

‘‘སཏཾ སཧསྶཱནཾ ནིརབྦུདཱནཾ, ཚཏྟིཾསཏཱི པཉྩ ཙ ཨབྦུདཱནི;

ཡམརིཡགརཧཱི ནིརཡཾ ཨུཔེཏི, ཝཱཙཾ མནཉྩ པཎིདྷཱཡ པཱཔཀ’’ནྟི. –

ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ. ཡོ པུགྒལོ ནིནྡིཡཾ དུཙྩརཾ དུསྶཱིལཾ པུགྒལཾ པསཾསཏི, སོ པསཾསཀོ པུགྒལོ མུཁེན ཀལིཾ ཝིཙིནཱཏི ཨུཔཙིནཱཏི, ཏེན ཀལིནཱ སུཁཾ ན ཝིནྡཏི. ཡོ སུཙཱརཱི སཱིལཝཱ པུགྒལོ པསཾསིཡོ ཧོཏི, ཏཾ ཝཱ སུཙཱརིཾ ཝཱ སཱིལཝནྟཾ པུགྒལཾ ¶ ཡོ པུགྒལོ ¶ ནིནྡཏི, སོ ནིནྡནྟོ པུགྒལོ མུཁེན ཀལིཾ ཝིཙིནཱཏི ཨུཔཙིནཱཏི, ཏེན ཀལིནཱ སུཁཾ ན ཝིནྡཏི.

ཨཏྟནཱ སཧཱཔི སབྦསྶ དྷནསྶ ཝསེནཔི ཨཀྑེསུ ཡོ དྷནཔརཱཛཡོ བྷཝཏི, ཨཡཾ ཀལི ཨཡཾ དྷནཔརཱཛཡོ ཨཔྤམཏྟོ ཧོཏི. ཡོ པུགྒལོ སུགཏེསུ མནཾ པདོསཡེ, ཏསྶ པུགྒལསྶ ཡོ ཀལི བྷཝཏི, ཨཡམེཝ ཀལི མཧནྟཏརོ ཧོཏི.

ཀསྨཱ? ཝཱཙཉྩ མནཉྩ པཎིདྷཱཡ ཨརིཡགརཧཱི པུགྒལོ ཡཾ ཀཱལཾ པཱཔཀཾ ནིརཡཾ ཨུཔེཏི, སོ ཀཱལོ ‘‘སཏཾ སཧསྶཱནཾ ནིརབྦུདཱནཉྩ ཚཏྟིཾས ནིརབྦུདཱནི ཙ པཉྩ ཨབྦུདཱནི ཙ ཡསྨིཾ ཀཱལེ གཎཱིཡནྟཱི’’ཏི ཏེན ཀཱལེན སམོ ཧོཏི, ཏསྨཱ མཧནྟཏརོ ཧོཏཱིཏི ཡོཛནཱ.

‘‘ཡོ ལོབྷགུཎེ ཨནུཡུཏྟོ…པེ…

གཙྪསི ཁོ པཔཏཾ ཙིརརཏྟ’’ནྟི. –

ཨིདཾ སུཏྟམྤི སཾཀིལེསབྷཱགིཡཾ སུཏྟཾ ནཱམ. ཡོ པུགྒལོ ལོབྷགུཎེ ཨནུཡུཏྟོ ཨནུ པུནཔྤུནཾ ཡུཏྟོ ཧོཏི, སོ པུགྒལོ ཨཉྙེ པུགྒལེ ཝཙསཱ པརིབྷཱསཏི, ཨསྶདྡྷོ ཀདརིཡོ ཨཝདཉྙཱུ བུདྡྷཱནཾ ཨོཝཱདཉྙཱུ ན ཧོཏི, མཙྪརཱི པེསུཎིཡཾ པེསུཎིཡསྨིཾ ཨནུཡུཏྟོ ཧོཏི.

མུཁདུགྒ མུཁཝིསམ ཝིབྷཱུཏ ཝིགཏབྷཱུཏ ཨནརིཡ བྷཱུནཧུ བུདྡྷིཝིནཱསཀ པཱཔཀ དུཀྐཊཀཱརི པུརིསནྟ པུརིསལཱམཀ ཀལི ཨལཀྑི ཨཝཛཱཏཔུཏྟ ཏྭཾ ནེརཡིཀོ ཨསི. ཨིདྷ ཨིདཱནི བཧུབྷཱཎཱི མཱ ཧོཧི.

ཨཧིཏཱཡ རཛཾ ཨཏྟནི མཱ ཨཱཀིརསི མཱ པཀྑིཔསི. ཀིབྦིསཀཱརི ཏྭཾ སནྟེ ཁཱིཎཱསཝེ པུགྒལེ གརཧསི, བཧཱུནི དུཙྩརིཏཱནི ཀམྨཱནི ཙརསི, ཙརིཏྭཱ ཏྭཾ ཙིརརཏྟཾ རཙནཝིརཧིཏཾ པཔཏཾ ནརཀཾ ནིརཡཾ གཙྪསི ཁོ ཨེཀཾསེནཱཏི ཡོཛནཱ.

ནཱནཱཝིདྷཾ སཾཀིལེསབྷཱགིཡཾ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ ཝཱསནཱབྷཱགིཡཾ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ ཝཱསནཱབྷཱགིཡཾ སུཏྟ’’ནྟིཨཱདི ཝུཏྟཾ. ཏཏྠཱཏི ཏེསུ སོལ༹སསུ སཾཀིལེསབྷཱགིཡཱདཱིསུ སུཏྟེསུ ཀཏམཾ སུཏྟཾ ཝཱསནཱབྷཱགིཡཾ སུཏྟཾ ནཱམཱཏི ¶ པུཙྪཏི. ‘‘མནོཔུབྦངྒམཱ དྷམྨཱ…པེ… ཚཱཡཱཝ ཨནཔཱཡིནཱི’’ཏི ཨིདཾ ཝཱསནཱབྷཱགེ པུཉྙབྷཱགེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ཝཱསནཱབྷཱགིཡཾ སུཏྟཾ ནཱམ. ཨཏྠོ པཱཀཊོ.

༩༣. ‘‘མཧཱནཱམོ ¶ སཀྐོ བྷགཝནྟཾ ཨེཏདཝོཙ…པེ… ཨཔཱཔིཀཱ ཀཱལངྐིརིཡཱ’’ཏི ཨིདཾ སུཏྟམྤི ཝཱསནཱབྷཱགེ པུཉྙབྷཱགེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ཝཱསནཱབྷཱགིཡཾ སུཏྟཾ ནཱམ. ཨཏྠོ པཱཀཊོ.

‘‘སུཁཀཱམཱནི བྷཱུཏཱནི, ཡོ དཎྜེན ན ཧིཾསཏི;

ཨཏྟནོ སུཁམེསཱནོ, པེཙྩ སོ ལབྷཏེ སུཁ’’ནྟི. –

ཨིདཾ སུཏྟམྤི ཝཱསནཱབྷཱགིཡཾ སུཏྟཾ ནཱམ. ཨཏྠོ པཱཀཊོ.

‘‘གུནྣཾ ཙེ ཏརམཱནཱནཾ…པེ… རཱཛཱ ཙེ ཧོཏི དྷམྨིཀོ’’ཏི ཨིདཾ སུཏྟམྤི ཝཱསནཱབྷཱགིཡཾ སུཏྟཾ ནཱམ. ཨཏྠོ པཱཀཊོ.

༩༤. ‘‘བྷགཝཱ སཱཝཏྠིཡཾ ཝིཧརཏི…པེ… ཨེཝཾ པཛཱནཱཏཱི’’ཏི ཨིདཾ སུཏྟམྤི ཝཱསནཱ…པེ… སུཏྟཾ ནཱམ. ཨཏྠོ པཱཀཊོ.

‘‘ཀསྨཱ བྷགཝཱ ཛནཔདཙཱརིཀཾ ཙརཏཱི’’ཏི པུཙྪེཡྻ, སཏྟཧི ཀཱརཎེཧི བུདྡྷཱ བྷགཝནྟོ ཛནཔདཙཱརིཀཾ ཙརནྟི. ཀཏམེཧི སཏྟཧི? དེསནྟརགཏཱནཾ ཝེནེཡྻཱནཾ ཝིནཡནཏྠཾ, ཏཏྲ ཋིཏཱནཾ ཨུསྶུཀྐསམུཔྤཱདནཏྠཾ, སཱཝཀཱནཾ ཨེཀསྨིཾ ཋཱནེ ནིབདྡྷཝཱསནིཝཱརཎཏྠཾ, ཨཏྟནོ ཙ ཏཏྠ ནིབདྡྷཝཱསེ ཨནཱསངྒདསྶནཏྠཾ, སམྦུདྡྷཝསིཏཊྛཱནཏཱཡ དེསཱནཾ ཙེཏིཡབྷཱཝསམྤཱདནཏྠཾ, བཧཱུནཾ སཏྟཱནཾ དསྶནཱུཔསངྐམནཱདཱིཧི པུཉྙོགྷཔྤསཝནཏྠཾ, ཨཝུཊྛིཨཱདིཨུཔདྡཝཱུཔསམནཏྠཉྩཱཏི ཨིམེཧི སཏྟཧི ཀཱརཎེཧི བུདྡྷཱ བྷགཝནྟོ ཛནཔདཙཱརིཀཾ ཙརནྟཱིཏི ཛནཔདཙརཎཀཱརཎཾ ཝེདིཏབྦཾ.

‘‘ཨེཀཔུཔྥཾ ཙཛིཏྭཱན, སཧསྶཾ ཀཔྤཀོཊིཡོ;

དེཝེ ཙེཝ མནུསྶེ ཙ, སེསེན པརིནིབྦུཏོ’’ཏི. –

ཨིདཾ སུཏྟམྤི ཝཱསནཱབྷཱགིཡཾ སུཏྟཾ ནཱམ. སཧསྶཾ ཀཔྤཀོཊིཡོཏི སཧསྶཾ ཨཏྟབྷཱཝཏོ ཀོཊིཡོ.

‘‘ཨསྶཏྠེ ¶ ཧརིཏོབྷཱསེ, སཾཝིརཱུལ༹ྷམྷི པཱདཔེ;

ཨེཀཾ བུདྡྷགཏཾ སཉྙཾ, ཨལབྷིཾཧཾ པཏིསྶཏོ.

‘‘ཨཛྫ ཏིཾསཾ ཏཏོ ཀཔྤཱ, ནཱབྷིཛཱནཱམི དུགྒཏིཾ;

ཏིསྶོ ཝིཛྫཱ སཙྪིཀཏཱ, ཏསྶཱ སཉྙཱཡ ཝཱསནཱ’’ཏི. –

ཨིདཾ སུཏྟམྤི ཝཱསནཱབྷཱགིཡཾ སུཏྟཾ ནཱམ. ཧརིཏོབྷཱསེཏི ཧརིཏཨོབྷཱསེ. ཨལབྷིཾཧནྟི ཨཧཾ ཨལབྷིཾ.

‘‘པིཎྜཱཡ ¶ ཀོསལཾ པུརཾ…པེ… ཝིཔཱཀོ ཧོཏི ཨཙིནྟིཡོ’’ཏི ཨིདཾ སུཏྟམྤི ཝཱསནཱབྷཱགིཡཾ སུཏྟཾ ནཱམ. ཨགྒཔུགྒལོ ཨནུཀམྤཀོ ཏཎྷཱནིགྷཱཏཀོ མུནི སམྦུདྡྷོ པུརེབྷཏྟཾ པིཎྜཱཡ པིཎྜཾ པཊིགྒཎྷིཏུཾ ཀོསལཾ པུརཾ པཱཝིསི.

ཡསྶ པུརིསསྶ ཧཏྠེ སབྦཔུཔྥེཧི ཨལངྐཏོ ཝཊཾསཀོ པུཔྥཝཊཾསཀོཝ ཨཏྠི, སོ ཨཡཾ པུརིསོ རཱཛམགྒེན ཀོསལཔུརཾ པཝིསནྟཾ བྷིཀྑུསངྒྷཔུརཀྑཏཾ དེཝམཱནུསཔཱུཛིཏཾ སམྦུདྡྷཾ ཨདྡས, དིསྭཱ ཧཊྛོ ཙིཏྟཾ པསཱདེསི; པསཱདེཏྭཱ སམྦུདྡྷཾ ཨུཔསངྐམི.

ཨུཔསངྐམིཏྭཱ སོ ཨཡཾ པསནྣོ ཧུཏྭཱ སུརབྷིཾ ཝཎྞཝནྟཾ མནོརམཾ ཏཾ ཝཊཾསཀཾ སམྦུདྡྷསྶ སེཧི པཱཎཱིབྷི ཨུཔནཱམེསི.

ཏཏོ བུདྡྷསྶ ལཔནནྟརཱ ལཔནསྶ ཝདནསྶ ཨནྟརཱ ཨགྒིསིཁཱ ཝཎྞཱ སཧསྶརཾསི ཨོཀྐཱ པབྷཱ ནིཀྑམི, ཨབྦྷཱ ཝིཛྫུ ནིཀྑམཏི ཨིཝ, ཨེཝཾ ཨཱནནཱ སཧསྶརཾསི ནིཀྑམིཏྭཱ ཨཱདིཙྩབནྡྷུནོ སཱིསེ ཏིཀྑཏྟུཾ པདཀྑིཎཾ ཀརིཏྭཱན པརིཝཊྚེཏྭཱ མུདྡྷནི ཨནྟརདྷཱཡཐ.

ཨཱནནྡོ ཨཙྪརིཡཾ ཨབྦྷུཏཾ ལོམཧཾསནཾ ཨིདཾ པཱཊིཧཱརིཡཾ དིསྭཱ ཙཱིཝརཾ ཨེཀཾསཾ ཀརིཏྭཱ ཨེཏཾ ཨབྲཝི – ‘‘མཧཱམུནི, སིཏཀམྨསྶ ཧེཏུ ཀོ? ཏཾ ཧེཏུཾ བྱཱཀརོཧི, དྷམྨཱལོཀོ བྷཝིསྶཏཱི’’ཏི.

ཡསྶ བྷགཝཏོ སབྦདྷམྨེསུ ཉཱཎཾ སདཱ པཝཏྟཏི, ཀངྑཱཝིཏརཎོ མུནི སོ བྷགཝཱ ཀངྑིཾ ཝེམཏིཀཾ ¶ ཨཱནནྡཾ ཐེརཾ ཨེཏཾ ཨབྲཝི. ཨཱནནྡ, ཡོ སོཔུརིསོ མཡི ཙིཏྟཾ པསཱདཡི, སོ པུརིསོ ཙཏུརཱསཱིཏིཀཔྤཱནི དུགྒཏིཾ ན གམིསྶཏི, དེཝེསུ དེཝསོབྷགྒཾ དིབྦཾ རཛྫཾ པསཱསིཏྭཱ མནུཛེསུ རཊྛེ སཀལརཊྛེ མནུཛིནྡོ རཱཛཱ བྷཝིསྶཏི. སོ པུརིསོ ཙརིམཾ པབྦཛིཏྭཱ, དྷམྨཏཾ སཙྪིཀཏྭཱ ཙ དྷུཏརཱགོ ཝཊཾསཀོ ནཱམ པཙྩེཀབུདྡྷོ བྷཝིསྶཏི.

ཏཐཱགཏེ ཝཱ སམྨཱསམྦུདྡྷེ ཝཱ པཙྩེཀསམྦུདྡྷེ ཝཱ ཏསྶ ཏཐཱགཏསྶ སཱཝཀེ ཝཱ ཙིཏྟེ པསནྣམྷི དཀྑིཎཱ ཨཔྤཀཱ ནཱམ ནཏྠི.

བུདྡྷཱ ཨེཝཾ ཨེཏྟཀཱཏི ཨཙིནྟིཡཱ བྷཝནྟི. བུདྡྷདྷམྨཱ བུདྡྷགུཎཱ ཨེཝཾ ཨེཏྟཀཱཏི ཨཙིནྟིཡཱ བྷཝནྟི, ཨཙིནྟིཡེ པསནྣཱནཾ ཝིཔཱཀོ པུཉྙཝིཔཱཀོ ཨེཝཾ ཨེཏྟཀོཏི ཨཙིནྟིཡོ ཧོཏཱིཏི ཨེཏཾ ཨབྲཝཱིཏི ཡོཛནཱ.

༩༦. ‘‘ཨིདྷཱཧཾ ¶ , བྷིཀྑཝེ, ཨེཀཙྩཾ པུགྒལཾ…པེ… ཨཡམྤི ཨཏྠོ ཝུཏྟོ བྷགཝཏཱ ཨིཏི མེ སུཏ’’ནྟི ཨིདཾ སུཏྟམྤི ཝཱསནཱབྷཱགིཡཾ སུཏྟཾ ནཱམ. བྷིཀྑཝེ, ཨིདྷ ཨིམསྨིཾ སཱསནེ ཨཧཾ ཨེཀཙྩཾ པུགྒལཾ ཨེཝཾ མམ ཙེཏསཱ ཨེཀཙྩསྶ པུགྒལསྶ ཙེཏོ ཙིཏྟཾ པརིཙྩ བུདྡྷཙཀྑུནཱ ཨེཝཾ པཛཱནཱམི, ཡཐཱ ཡེན པཀཱརེན ཨཡཾ པུགྒལོ ཡཉྩ དཱནཱདིཔཊིཔདཾ པཊིཔནྣོ, ཡཉྩ དསྶནཱདིམགྒཾ སམཱརུལ༹ྷོ ཧུཏྭཱ ཏཾ པཊིཔདཾ, མགྒཉྩ ཨིརིཡཏི པཝཏྟེཏི, ཨིམམྷི ཨིམསྨིཉྩ སམཡེ ཨཡཾ པུགྒལོ ཙེ ཀཱལཾ ཀརེཡྻ, ཨེཝཾ སཏི ཨཱབྷཏཾ ཝཏྠུཾ ནིཀྑིཔཏི ཡཐཱ, ཨེཝཾ ཏཱཡ པཊིཔདཱཡ ཏེན མགྒེན སགྒེ ཨཏྟནིཀྑིཏྟོ བྷཝེ. ཏཾ ཀིསྶ ཧེཏུ? བྷིཀྑཝེ, ཨསྶ པུགྒལསྶ ཙིཏྟཾ ཧི ཡསྨཱ པསནྣཾ པསཱདིཏཾ, ཏསྨཱ ནིཀྑིཏྟོ བྷཝེ. ཨིདྷ སཱསནེ, ལོཀེ ཝཱ ཨེཀཙྩེ སཏྟཱ པུགྒལཱ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཙེཏོཔསཱདཧེཏུ ཁོ པན ཨུཔཔཛྫནྟཱིཏི ཨེཝཾ ཨཧཾ པཛཱནཱམཱིཏི བྷགཝཱ ཨེཏམཏྠཾ ཨཝོཙ. ཏཏྠ ཏསྨིཾ ཨཏྠེ སངྒཧཝསེན པཝཏྟཾ ཨེཏཾ ‘‘པསནྣཙིཏྟཾ ཉཏྭཱན…པེ… སགྒཾ སོ ཨུཔཔཛྫཏཱི’’ཏི གཱཐཱཝཙནཾ ཝུཙྩཏི. ཨཡམྤི ཨཏྠོ བྷགཝཏཱ ཝུཏྟོ, ཨིཏི མེ མཡཱ སུཏནྟི ཡོཛནཱ.

‘‘སུཝཎྞཙྪདནཾ ནཱཝཾ…པེ… ཨེཏཱདིསཾ ཀཏཔུཉྙཱ ལབྷི’’ནྟི ཨིདཾ སུཏྟམྤི ཝཱསནཱབྷཱགིཡཾ སུཏྟཾ ནཱམ. ནཱརི དེཝདྷཱིཏཱ སུཝཎྞཙྪདནཾ སུཝཎྞཱལངྐཱརེཧི ཚཱདིཏཾ ནཱཝཾ ཨཱརུཡ྄ཧ ཏིཊྛསི, པོཀྑརཎིཾ དེཝཔོཀྑརཎིཾ ཨོགཱཧསི, པདུམཾ པཱཎིནཱ ཚིནྡསི.

དེཝཏེ ¶ ཀེན ཀམྨེན ཏེ ཏཝ ཏཱདིསོ ཝཎྞོ ཏཱདིསོ ཨཱནུབྷཱཝོ ཏཱདིསཱི ཛུཏི བྷཝཏི, དེཝཏེ ཏེ ཏཝ ཡེ ཀེཙི བྷོགཱ མནསཱ ཨིཙྪིཏཱ བྷཝནྟི, ཏེ བྷོགཱ ཙ ཀེན ཀམྨེན ཨུཔྤཛྫནྟི. དེཝཏེ མེ པུཙྪིཏཱ ཏྭཾ སཾས སཾསཱཧི ཨིདཾ སབྦཾ ཀིསྶ ཀམྨསྶ ཙ ཕལནྟི སཀྐོ པུཙྪཏི.

དེཝརཱཛེན པུཙྪིཏཱ སཱ དེཝདྷཱིཏཱ ཨཏྟམནཱ ཧུཏྭཱ པཉྷཾ པུཊྛཱ སཀྐསྶ བྱཱཀཱསི. དེཝརཱཛཱ ཨདྡྷཱནཾ དཱིགྷམགྒཾ པཊིཔནྣཱ ཨཧཾ ཡསསྶིནོ ཀསྶཔསྶ བྷགཝཏོ མནོརམཾ ཐཱུཔཾ ཨདྡསྶཾ, དིསྭཱ ཏཏྠ ཐཱུཔེ ཙིཏྟཾ པསཱདེསིཾ. པསནྣཱཧཾ སེཧི པཱཎཱིཧི པདུམཔུཔྥེཧི པཱུཛེསིཾ. ཏསྶེཝ ཀམྨསྶ ཨིདཾ སབྦཾ ཕལཾ ཝིཔཱཀོ བྷཝེ. ཀཏཔུཉྙཱཧཾ ཨེཏཱདིསཾ ཕལཾ ཨལབྷིནྟི སཀྐསྶ བྱཱཀཱསི. ཨིཏི མེ སུཏནྟི མཧཱམོགྒལླཱནོ ཝདཏཱིཏི ཡོཛནཱ.

‘‘ཡཐཱནིདྡྷཱརིཏསུཏྟཱནིཡེཝ ¶ ཝཱསནཱབྷཱགིཡསུཏྟཱནི པརིཔུཎྞཱནཱི’’ཏི ཝཏྟབྦཏྟཱ ‘‘དཱནཀཐཱ སཱིལཀཐཱ སགྒཀཐཱ པུཉྙཀཐཱ པུཉྙཝིཔཱཀཀཐཱཏི ཨིདཾ ཝཱསནཱབྷཱགིཡ’’ནྟིཨཱདི ཝུཏྟཾ. ཏཏྠ ཡཱཡ དེསནཱཡ དཱནཉྩ དཱནཕལཉྩ དསྶིཏཾ, སཱ དེསནཱ དཱནཀཐཱ ནཱམ. ཡཱཡ དེསནཱཡ སཱིལཉྩ སཱིལཕལཉྩ དསྶིཏཾ, སཱ དེསནཱ སཱིལཀཐཱ ནཱམ. ཡཱཡ དེསནཱཡ སགྒཱ ཙ སགྒེསུ ནིབྦཏྟཱཔཀཉྩ ཀམྨཾ དསྶིཏཾ, སཱ སགྒཀཐཱ ནཱམ. ཡཱཡ དེསནཱཡ དཱནསཱིལབྷཱཝནཱདིཝསེན དསཝིདྷཾ པུཉྙཀམྨཾ དསྶིཏཾ, སཱ པུཉྙཀཐཱ ནཱམ. ཡཱཡ དེསནཱཡ ཏཱདིསསྶ པུཉྙཀམྨསྶ ཝིཝིདྷོ ཨཡཾ ཝིཔཱཀོ ཨིམསྶ པུཉྙསྶ ཝིཔཱཀོཏི ནིཡམེཏྭཱ དསྶིཏོ, སཱ པུཉྙཝིཔཱཀཀཐཱ ནཱམ.

དསབལདྷརཱནཾ སམྨཱསམྦུདྡྷཱནཾ ཨུདྡིསྶཀཏེསུ སརཱིརདྷཱཏུཾ ཨབྦྷནྟརེ ཋཔེཏྭཱ པཾསཱུཧི ཀཏེསུ ཐཱུཔེསུ ཡེ ནརཱ པསནྣཱ, ཏེ ནརཱ ཏཏྠ ཐཱུཔེ ཀཱརཾ པུཉྙཾ ཀཏྭཱ སགྒེསུ ཨུཔྤཛྫིཏྭཱ པམོདནྟཱིཏི ཡོཛནཱ. ཨིདཾ སུཏྟཾ ཝཱ…པེ… སུཏྟཾ.

༩༧. དེཝཔུཏྟསརཱིརཝཎྞཱ དེཝཔུཏྟསརཱིརསདིསཝཎྞཱ སུབྷགསཎྛིཏི སོབྷགྒཡུཏྟསཎྛཱནཱ སབྦེ ཛནཱ ཨུདཀེན པཾསུཾ ཏེམེཏྭཱ ཐཱུཔཾ ཝཌྜྷེཐ, སོ ཨཡཾ ཐཱུཔོ ཀསྶ པུགྒལསྶ ཐཱུཔོཏི པུཙྪཏི.

སུགཏྟེ སུནྡརགཏྟེ དེཝཏེ ཏསྨིཾ ཐཱུཔེ པསནྣཱ ཨིམེ དེཝམནུཛཱ ཀཱརཾ པུཉྙཾ ཀརོནྟཱ ཧུཏྭཱ ཛརཱམརཎཏོ ¶ པམུཙྩརེ. སོ ཨཡཾ ཐཱུཔོ མཧེསིནོ དསབལདྷམྨདྷཱརིནོ སུགཏསྶ ཐཱུཔོཏི ཝེདིཏབྦོཏི ཨཱཧཱཏི ཡོཛནཱ. ཨིདཾ སུཏྟཾ ཝཱ…པེ… སུཏྟཾ.

ཡཱཧཾ ཡཱ ཨཧཾ མཧེསིནོ ཐཱུཔཾ ཙཏྟཱརི ཨུཔྤལཱནི ཙ མཱལཉྩ ཨབྷིརོཔཡིཾ, ཏེན མཡཱ ཀཏཾ ཏཾ པུཉྙཾ ཨུལཱ༹རཾ ཝཏ ཨཱསི ཨཧོསི. ཏཏོ ཀཔྤཏོ ཨཛྫ ཀཔྤཱ ཏིཾསཾ དྷརནྟི སཏྠུནོ ཐཱུཔཾ པཱུཛེཏྭཱ ཏཏྟཀཱནི དུགྒཏིཾ ན ཛཱནཱམི, ཝིནིཔཱཏཾ ན གཙྪཱམཱིཏི ཡོཛནཱ. ཨིདཾ སུཏྟཾ ཝཱ…པེ… སུཏྟཾ.

ཨཧཾ བཱཏྟིཾསལཀྑཎདྷརསྶ བཱཏྟིཾསལཀྑཎདྷརེན སམྤནྣསྶ ཝིཛིཏཝིཛཡསྶ ལོཀནཱཐསྶ ཐཱུཔཾ ཨཔཱུཛེསིཾ, པཱུཛེཏྭཱ སཏསཧསྶཾ ཀཔྤེ ཨཱཡུཀཔྤེ པམུདིཏོ ཨཱསིཾ. མཡཱ ཡཾ པུཉྙཾ པསུཏཾ, ཏེན པུཉྙེན ཝིནིཔཱཏཾ ཨནཱགནྟུན ཨནཱགནྟྭཱ དེཝསོབྷགྒཾ སམྤཏྟིཾ ཙ དེཝརཛྫཱནི ཙ ཏཱནི ཨཀཱརིཾ ¶ . ཨཐ ཝཱ དེཝསོབྷགྒཉྩ མཡཱ ཀཱརིཏཾ, རཛྫཱནི ཙ མཡཱ ཀཱརིཏཱནི.

ཨདནྟདམཀསྶ སཱསནེ ཡཾ ཙཀྑུ པཉྙཱཙཀྑུ པཎིཧིཏཾ, ཏཐཱ ཙིཏྟཾ ཡཾ ཝིམུཏྟཙིཏྟཾ པཎིཧིཏཾ, ཏཾ སབྦཾ པཉྙཱཙཀྑུ ཝིམུཏྟཙིཏྟཾ མེ མཡཱ ལདྡྷཾ, ཨཧཾ ཝིདྷུཏལཏཱསངྑཱཏཏཎྷཱ ཧུཏྭཱ ཝིམུཏྟཙིཏྟཱ ཕལཝིམུཏྟཙིཏྟསམྤནྣཱ ཨམྷཱིཏི ཨཝོཙཱཏི ཡོཛནཱ. ཨིདཾ སུཏྟཾ ཝཱ…པེ… སུཏྟཾ.

༩༨. ཝིམུཏྟཙིཏྟེ ཕལཝིམུཏྟཙིཏྟསམྤནྣེ ཨཁིལེ པཉྩཙེཏོཁཱིལརཧིཏེ ཨནཱསཝེ ཨརཎཝིཧཱརིམྷི ཨརཎཝིཧཱརསཱིལེ ཨསངྒམཱནསེ ཨལགྒམཱནསེ པཙྩེཀབུདྡྷསྨིཾ སཱམཱཀཔཏྠོདནམཏྟམེཝ དཀྑིཎཾ ཨདཱསིཾ.

ཏསྨིཾ པཙྩེཀབུདྡྷེ ཨུཏྟམཾ དྷམྨཾ པཙྩེཀབོདྷིདྷམྨཾ ཨོཀཔྤཡིཾ ‘‘སོ ཨུཏྟམོ དྷམྨོ ཨཏྠཱི’’ཏི སདྡཧིཾ. ཨེཝཾ ཨརིཡཝིཧཱརེན ཝིཧཱརཱིཧི པཙྩེཀབུདྡྷེཧི མེ མམ སངྒམོ ཀཏོ སིཡཱ བྷཝེ, ཀུདཱསུཔི ཙ ཨཧཾ ཨཔེཀྑཝཱ མཱ བྷཝེཡྻནྟི མཱནསཾ ཏསྨིཉྩ དྷམྨེ པཎིདྷེསིཾ ‘‘ཨིམིནཱ པཙྩེཀབུདྡྷེན ལདྡྷདྷམྨཾ ཨཧམྤི སཙྪིཀརེཡྻ’’ནྟི ཙིཏྟཾ པཎིདཧིཾ.

ཏསྶེཝ པཙྩེཀབུདྡྷེ ཀཏསྶེཝ ཀམྨསྶ ཝིཔཱཀཏོ ཨཧཾ དཱིགྷཱཡུཀེསུ ཨམམེསུ ‘‘མམ པརིགྒཧོ’’ཏི པརིགྒཧཱབྷཱཝེན ཨཔརིགྒཧེསུ ཝིསེསགཱམཱིསུ ཨཧཱིནགཱམཱིསུ ཀུརཱུསུ ཨུཏྟརཀུརཱུསུ པཱཎཱིསུ སཏྟེསུ སཧསྶཀྑཏྟུཾ ཨུཔཔཛྫཐ ཨུཔཔཛྫིཾ.

ཏསྶེཝ ¶ ཀམྨསྶ ཝིཔཱཀཏོ ཝིཙིཏྲམཱལཱབྷརཎཱནུལེཔཱིསུ ཡསསྶཱིསུ པརིཝཱརཝནྟེསུ ཏིདསོ དེཝོ ཨཧཾ ཝིསིཊྛཀཱཡཱུཔགཏོ ཧུཏྭཱ སཧསྶཀྑཏྟུཾ ཨུཔཔཛྫཐ.

ཏསྶེཝ ཀམྨསྶ ཝིཔཱཀཏོ ཨཧཾ ཝིམུཏྟཙིཏྟོ ཨཁཱིལོ ཨནཱསཝོ ཧུཏྭཱ ཧིཏཱཧིཏཱསཱིཧི ཀུསལཱཀུསལཝཱིཏིཝཏྟེཧི ཨནྟིམདེཧདྷཱརིབྷི ཨིམེཧི པཙྩེཀབུདྡྷེཧི, བུདྡྷསཱཝཀེཧི ཝཱ མེ མམ སམཱགམོ ཨཱསི.

‘‘སཱིལཝཏོ ཡཾ ཨིཙྪིཏཾ, ཏཾ སམིཛ྄ཛྷཏེ’’ཏི ཨིམཾ ཝཙནཾ ཏཐཱགཏོ ཛིནོ པཙྩཀྑཾ ཀཏྭཱ ཨཝཙ ཁོ, ཡཐཱ ཡཐཱ ཡེན ཡེན པཀཱརེན མེ མནསཱ ཝིཙིནྟིཏཾ, ཏཐཱ ཏཐཱ ཏེན ཏེན པཀཱརེན སམིདྡྷཾ བྷཝཏི. ཨཡཾ བྷཝོ ཨནྟིམོ བྷཝོཏི ཡོཛནཱ. ཨིདཾ སུཏྟཾ ཝཱ…པེ… སུཏྟཾ.

ཨེཀཏིཾསམྷི ¶ ཀཔྤམྷི ཛིནོ ཨནེཛོ ཨནནྟདསྶཱི ‘‘སིཁཱི’’ཏི ཨིཏིནཱམཀོ ཨུཔྤཛྫི. ཏསྶཱཔི བྷགཝཏོ རཱཛཱ བྷཱཏཱ སིཁིདྡྷེ ཙ སིཁཱི ཨིཏིནཱམཀེ བུདྡྷེ ཙ ཏསྶ བྷགཝཏོ དྷམྨེ ཙ ཨབྷིཔྤསནྣོ ལོཀཝིནཱཡཀམྷི པརིནིབྦུཏེ སཏི དེཝཱཏིདེཝསྶ ནརུཏྟམསྶ མཧེསིནོ ཝིཔུལཾ མཧནྟཾ སམནྟཏོ གཱཝུཏིཀཾ ཐཱུཔཾ ཨཀཱསིཾ.

ཏསྨིཾ ཐཱུཔེ བལིཾ པཱུཛཱབལིཾ ཨབྷིཧཱརཱི མནུསྶོ ཛཱཏིསུམནཾ པགྒཡ྄ཧ པཧཊྛོ པཱུཛེསི. ཨསྶ མནུསྶསྶ ཨེཀཾ པུཔྥཾ ཝཱཏེན པཧརིཏཾ ཧུཏྭཱ པཏིཏཾ. ཨཧཾ ཏཾ པཏིཏཾ ཨེཀཾ པུཔྥཾ གཧེཏྭཱ ཏསྶེཝ པུཔྥསཱམིཀསྶ ཨདཱསིཾ.

སོ མནུསྶོ པུཔྥསཱམིཀོ ཨབྷིཔྤསནྣཙིཏྟོ ཧུཏྭཱ མཾ ‘‘ཏྭམེཝ ཨེཏཾ ཨེཀཾ པུཔྥཾ པཱུཛཱ’’ཏི ཨདཱསི. དདཱསཱིཏི ཨེཏྠ ད-ཀཱརོ ཨཱགམོ. ཨཧཾ ཏཾ ཨེཀཾ པུཔྥཾ གཧེཏྭཱ བུདྡྷཾ བུདྡྷགུཎཾ པུནཔྤུནཾ ཨནུསྶརནྟོ ཡསྨིཾ ཀཔྤེ ཨབྷིརོཔཡིཾ, ཏཏོ ཀཔྤཏོ ཨཛྫ ཀཔྤཱ ཏིཾསཾ ཨཧེསུཾ. ཏེསུ ཀཔྤེསུ དུགྒཏིཾ ནཱབྷིཛཱནཱམི, ཝིནིཔཱཏཉྩ ན གཙྪཱམི, ཨིདཾ ཕལཾ ཐཱུཔཔཱུཛཱཡ ཕལནྟི ཨཝོཙཱཏི ཡོཛནཱ. ཨིདཾ སུཏྟཾ ཝཱ…པེ… སུཏྟཾ.

བྲཧྨདཏྟསྶ བྲཧྨདཏྟནཱམཀསྶ རཱཛིནོ ཀཔིལཾ ནཱམ ནགརཾ སུཝིབྷཏྟཾ བྷཱགཏོ སུཊྛུ ཝིབྷཏྟཾ, མཧཱཔཐཾ མཧཱཔཐསམྤནྣཾ ཨཱཀིཎྞཾ, ནཱནཱཛཱཏིཀེཧི མནུསྶེཧི པརིཔུཎྞཾ, ཨིདྡྷཾ ཕཱིཏཉྩ ཨཱསི.

པཉྩཱལཱནཾ ¶ ཏཏྠ པུརུཏྟམེ ཨཧཾ ཀུམྨཱསཾ ཝིཀྐིཎིཾ, སོ ཨཧཾ ཡསསྶིནཾ ཨུཔརིཊྛཾ ཨུཔསམཱིཔེ ཋིཏཾ ཨརིཊྛཾ ནཱམ སམྦུདྡྷཾ པཙྩེཀབུདྡྷཾ ཨདྡསིཾ, དིསྭཱ ཧཊྛོ ཙིཏྟཾ པསཱདེཏྭཱ ནརུཏྟམཾ ཨརིཊྛཾ མེ གེཧསྨིཾ ཡཾ དྷུཝབྷཏྟཾ ཝིཛྫཐ ཝིཛྫི, ཏེན དྷུཝབྷཏྟེན ནིམནྟེསིཾ.

ཡཏོ ཙ ཡསྨིཾ ཀཱལེ ཙ ཀཏྟིཀོ ཡསྶཾ པནྣརསཱིཔུཎྞོ, སཱ པུཎྞམཱསཱི པནྣརསཱི ཨུཔཊྛིཏཱ, ཏཏོ ཙ ཏསྨིཾ ཀཱལེ ཙ ཨཧཾ ནཝཾ དུསྶཡུགཾ གཡ྄ཧ ཨརིཊྛསྶ ཨརིཊྛནཱམཀསྶ པཙྩེཀབུདྡྷསྶ ཨུཔནཱམེསིཾ.

ནརུཏྟམོ ཨནུཀམྤཀོ ཀཱརུཎིཀོ ཏཎྷཱནིགྷཱཏཀོ མུནི པཙྩེཀབུདྡྷོ པསནྣཙིཏྟཾ མཾ ཉཏྭཱན པཊིགྒཎྷི.

ཨཧཾ ¶ ཀལྱཱཎཾ བུདྡྷཝཎྞིཏཾ ཀམྨཾ ཀརིཏྭཱན དེཝེ ཙ མནུསྶེ ཙ སནྡྷཱཝིཏྭཱ ཏཏོ ཙུཏོ བཱརཱཎསིཡཾ ནགརེ ཨཌྜྷེ ཀུལསྨིཾ སེཊྛིསྶ ཨེཀཔུཏྟཀོ ཨུཔྤཛྫིཾ, པཱཎེཧི ཙ པིཡཏརོ ཨཱསིཾ.

ཏཏོ ཙ ཏསྨིཾ ཀཱལེ ཝིཉྙུཏཾ པཏྟོ ཧུཏྭཱ དེཝཔུཏྟེན ཙོདིཏོ ཨཧཾ པཱསཱདཱ ཨོརུཧིཏྭཱན སམྦུདྡྷཾ བྷགཝནྟཾ གོཏམཾ ཨུཔསངྐམིཾ.

སོ སམྦུདྡྷོ བྷགཝཱ གོཏམོ ཨནུཀམྤཱཡ མེ དྷམྨཾ ཨདེསེསི. དུཀྑཾ དུཀྑསཙྩཉྩ དུཀྑསམུཔྤཱདཾ སམུདཡསཙྩཉྩ དུཀྑསྶ ཨཏིཀྐམཾ ནིརོདྷསཙྩཉྩ ཨརིཡཾ ཨཊྛངྒིཀཾ དུཀྑཱུཔསམགཱམིནཾ མགྒཾ མགྒསཙྩཉྩ ཨིཏི ཙཏྟཱརི སཙྩཱནི དེསིཏཱནི, ཏདུཔྤཱདཀཾ དྷམྨཾ མུནི བྷགཝཱ གོཏམོ ཨདེསཡི.

ཨཧཾ ཏསྶ བྷགཝཏོ གོཏམསྶ ཝཙནཾ སུཏྭཱ སཱསནེ རཏོ ཧུཏྭཱ ཝིཧརིཾ, ཨཧཾ རཏྟིནྡིཝཾ ཨཏནྡིཏོ ཧུཏྭཱ སམཐཾ པཊིཝིཛ྄ཛྷིཾ.

ཨཛ྄ཛྷཏྟཉྩ ཡེ ཨཱསཝཱ, བཧིདྡྷཱ ཙ ཡེ ཨཱསཝཱ མགྒེན སམུཙྪིནྣཱ ཨཱསུཾ, སབྦེ ཏེ ཨཱསཝཱ མེ མམ ཝིཛྫིཾསུ, པུན ན ཙ ཨུཔྤཛྫརེ.

དུཀྑཾ ‘‘པརིཡནྟཀཏཾ ཡསྶ དུཀྑསྶཱ’’ཏི པརིཡནྟཀཏཾ ཨཱསི, ཨཡཾ སམུསྶཡོ ཛཱཏིམརཎསཾསཱརོ ¶ ཙརིམོ ཨནྟིམོ ཨཱསི, ཨིདཱནི ཨིམསྶ ཨཏྟབྷཱཝསྶ ཨནནྟརཾ པུནབྦྷཝོ མམ ནཏྠཱིཏི ཨཝོཙཱཏི ཡོཛནཱ. ཡཾ ནཱནཱཝིདྷཾ ཝཱསནཱབྷཱགིཡཾ སུཏྟཾ ཨུདཱཧརཎཝསེན ནིདྡྷཱརིཏཾ, ཨིདཾ ནཱནཱཝིདྷཾ སུཏྟཾ ཝཱསནཱབྷཱགེ པུཉྙཀོཊྛཱསེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ཝཱསནཱབྷཱགིཡཾ སུཏྟཾ ནཱམ.

ནཱནཱཝིདྷཾ ཝཱསནཱབྷཱགིཡཾ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ ནིབྦེདྷབྷཱགིཡཾ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ ནིབྦེདྷབྷཱགིཡཾ སུཏྟ’’ནྟིཨཱདི ཝུཏྟཾ. ཏཏྠ ཏེསུ སོལ༹སསུ སཾཀིལེསབྷཱགིཡཱདཱིསུ སུཏྟེསུ ཀཏམཾ སུཏྟཾ ནིབྦེདྷབྷཱགིཡཾ སུཏྟཾ ནཱམཱཏི པུཙྪཏི.

ཨུདྡྷཾ བྲཧྨལོཀེ ཨདྷོ ཀཱམཱཝཙརེ བྷཝེ སབྦདྷི སབྦེསུ བྷཝེསུ ཝིཔྤམུཏྟོ ཨརཧཱ ‘‘ཨཡཾ ནཱམ དྷམྨོ ཨཧཾ ཨསྨཱི’’ཏི ཨནཱནུཔསྶཱི, ཨེཝཾ ཝིམུཏྟོ ཨརཧཱ ཨཏིཎྞཔུབྦཾ ཨོགྷཾ ཨཔུནབྦྷཝཱཡ ཨུདཏཱརི ཨུཏྟིཎྞོཏི ཡོཛནཱ. ཨིདཾ སུཏྟཾ ནིབྦེདྷབྷཱགེ སེཀྑདྷམྨེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ནིབྦེདྷབྷཱགིཡཾ སུཏྟཾ ནཱམ.

‘‘ཨེཏྟཀམེཝཱ’’ཏི ¶ ཝཏྟབྦཏྟཱ ‘‘སཱིལཝཏོ’’ཏིཨཱདི ཝུཏྟཾ. ཨཱནནྡ, སཱིལཝཏོ པུགྒལསྶ ‘‘ཀིནྟི མེ མམ ཨཝིཔྤཊིསཱརོ ཛཱཡེཡྻ པཝཏྟེཡྻཱ’’ཏི ཙེཏནཱ ན ཀརཎཱིཡཱ ན ཀཱཏབྦཱ. ཨཱནནྡ, སཱིལཝཏོ ཨཝིཔྤཊིསཱརོ ཡཾ ཛཱཡེཡྻ པཝཏྟེཡྻ, ཨེསཱ ཨཝིཔྤཊིསཱརསྶ ཛཱཡནཱ པཝཏྟནཱ དྷམྨཏཱ བྷཝཏི. ཨཱནནྡ, ཨཝིཔྤཊིསཱརིནཱ པུགྒལེན ‘‘ཀིནྟི མེ མམ པཱམོཛྫཾ ཛཱཡེཡྻ པཝཏྟེཡྻཱ’’ཏི ཙེཏནཱ ན ཀརཎཱིཡཱ, ཨཱནནྡ, ཨཝིཔྤཊིསཱརིནོ པུགྒལསྶ པཱམོཛྫཾ ཡཾ ཛཱཡེཡྻ པཝཏྟེཡྻ, ཨེསཱ པཱམོཛྫསྶ ཛཱཡནཱ པཝཏྟནཱ དྷམྨཏཱ. སེསེསུཔི ཨིམསྶ ཡོཛནཱནཡཱནུསཱརེན ཡོཛནཱནཡོ གཧེཏབྦོ. ཨིདཾ སུཏྟམྤི ནིབྦེདྷབྷཱགིཡཾ སུཏྟཾ ནཱམ.

ཨཱཏཱཔིནོ ཀིལེསཱནཾ ཨཱཏཱཔེན སམྨཔྤདྷཱནེན སམནྣཱགཏསྶ ཛྷཱཡཏོ ཛྷཱཡནྟསྶ བྲཱཧྨཎསྶ བཱཧིཏཔཱཔསྶ ཁཱིཎཱསཝསྶ དྷམྨཱ ཨནུལོམཔཙྩཡཱཀཱརཔཊིཝེདྷསཱདྷཀཱ བོདྷིཔཀྑིཡདྷམྨཱ ཡདཱ ཡསྨིཾ ཀཱལེ ཧཝེ ཨེཀནྟེན པཱཏུབྷཝནྟི ཨུཔྤཛྫནྟི. ཨཐ ཝཱ དྷམྨཱ ཙཏུཨརིཡསཙྩདྷམྨཱ པཱཏུབྷཝནྟི པཀཱསཡནྟི ཨབྷིསམཡཝསེན པཱཀཊཱ ཧོནྟི. ཨཐ ཝཱ པཱཏུབྷཝནཀཱལེ ཨསྶ ཨཱཏཱཔིནོ ཛྷཱཡཏོ བྲཱཧྨཎསྶ ཁཱིཎཱསཝསྶ སབྦཱ ཀངྑཱ ཝཔཡནྟི ཨཔགཙྪནྟི ནིརུཛ྄ཛྷནྟི. ཀསྨཱ? སཧེཏུདྷམྨཾ ཨཝིཛྫཱདིཀེན ཧེཏུནཱ སཧ པཝཏྟཾ སངྑཱརཱདིཀཾ སུཁེན ཨསམྨིསྶཾ དུཀྑཀྑནྡྷདྷམྨཾ ཡཏོ ཡསྨཱ པཛཱནཱཏི ཨཉྙཱསི པཊིཝིཛ྄ཛྷཏི ¶ , ཏཏོ ཏསྨཱ ཝཔཡནྟི ཨཔགཙྪནྟི ནིརུཛ྄ཛྷནྟཱིཏི ཡོཛནཱ. ཨིདཾ སུཏྟཾ ནིབྦེདྷབྷཱགིཡཾ སུཏྟཾ ནཱམ.

དུཏིཡགཱཐཱཡཾ པན པཙྩཡཱནཾ ཁཡཾ ཁཡསངྑཱཏཾ ནིབྦཱནཾ ཡཏོ ཡསྨཱ ཨཝེདི ཨཉྙཱསི པཊིཝིཛ྄ཛྷི, ཏཏོ ཏསྨཱ སབྦཱཔི ཀངྑཱ ཝཔཡནྟཱིཏི ཡོཛནཱ. ཨིདཾ སུཏྟཾ ནིབྦེདྷབྷཱགིཡཾ སུཏྟཾ.

ཏིསྶ, ཏྭཾ ཀིཾ ནུ ཀུཛ྄ཛྷསི? མཱ ཀུཛ྄ཛྷི, ཏིསྶ, ཏེ ཏཝ ཨཀྐོདྷོ ཨཀུཛ྄ཛྷནཾ ཝརཾ ཨུཏྟམཾ, ཧི སཙྩཾ, ཏིསྶ, ཏཡཱ ཀོདྷམཱནམཀྑཝིནཡཏྠཾ བྲཧྨཙརིཡཾ ཝུསྶཏི ནཱུཏི བྷགཝཱ ཨཝོཙཱཏི ཡོཛནཱ.

ཨཱརཉྙཾ ཨཱརཉྙཀཾ པཾསུཀཱུལིཀཾ ཨཉྙཱཏུཉྪེན ཨཉྙཱཏཨནབྷིལཀྑིཏགྷརཔཊིཔཱཊིཡཱ ཋཏྭཱ ཨུཉྪེན པིཎྜཔཱཏཙརཎཝཱིརིཡེན ལདྡྷེན མིསྶཀབྷོཛནེན ཡཱཔེནྟཾ ནནྡཾ ཀདཱ ཀཱལེ ཨཧཾ པསྶེཡྻནྟི ཨཝོཙཱཏི ཡོཛནཱ. ཨིདཾ སུཏྟཾ ནིབྦེདྷབྷཱགིཡཾ སུཏྟཾ.

གོཏམ ¶ , ཀིཾསུ ཀཏམཾ ཚེཏྭཱ ཝདྷིཏྭཱ ཝདྷནྟོ ཀོདྷཔརིལཱ༹ཧེན ཨཔརིདཡ྄ཧམཱནོ ཧུཏྭཱ སུཁཾ སེཏི སཡཏི, ཀིཾསུ ཀཏམཾ ཚེཏྭཱ ཝདྷིཏྭཱ ཝདྷནྟོ ཀོདྷཝིནཱསེན ཝིནཊྛདོམནསྶོ ཧུཏྭཱ ན སོཙཏི, གོཏམ, ཏྭཾ ཀིསྶ ཨེཀདྷམྨསྶ ཝདྷཾ ཝདྷནཾ རོཙེསཱིཏི བྲཱཧྨཎོ པུཙྪཏི.

བྲཱཧྨཎ, ཀོདྷཾ ཀུཛ྄ཛྷནཾ ཚེཏྭཱ ཝདྷིཏྭཱ ཝདྷནྟོ ཀོདྷཔརིལཱ༹ཧེན ཨཔརིདཡ྄ཧམཱནོ ཧུཏྭཱ སུཁཾ སེཏི སཡཏི, ཀོདྷཾ ཀུཛ྄ཛྷནཾ ཚེཏྭཱ ཝདྷིཏྭཱ ཝདྷནྟོ ཀོདྷཝིནཱསེན ཝིནཊྛདོམནསྶོ ཧུཏྭཱ ན སོཙཏི, ཝིསམཱུལསྶ ཝིསསདིསསྶ དུཀྑསྶ མཱུལབྷཱུཏསྶ མདྷུརགྒསྶ མདྷུརསངྑཱཏསྶ སུཁཔརིཡོསཱནསྶ ཀོདྷསྶ ཀུཛ྄ཛྷནསྶ ཝདྷཾ ཝདྷནཾ ཨརིཡཱ བུདྡྷཱདཡོ པུགྒལཱ པསཾསནྟི. ཧི སཙྩཾ ཏཾ ཀོདྷཾ ཀུཛ྄ཛྷནཾ ཚེཏྭཱ ཝདྷིཏྭཱ ཝདྷནྟོ ཀོདྷཝིནཱསེན ཝིནཊྛདོམནསྶོ ཧུཏྭཱ སེཏི སཡཏཱིཏི ཡོཛནཱ. མདྷུརགྒསྶཱཏི ཙ མདྷུརཾ ཙེཏསིཀསུཁཾ ཨསྶཱདཨགྒཾ པརིཡོསཱནཾ ཨསྶ ཀོདྷསྶཱཏི མདྷུརགྒོཏི སམཱསོ ཝེདིཏབྦོ. ཀུཛ྄ཛྷནྟསྶ ཧི ཨཀྐོསིཏྭཱ པརིབྷཱསིཏྭཱ པཧརིཏྭཱ པརིཡོསཱནེ ཙེཏསིཀསུཁསྶཱདོ ཨུཔྤཛྫཏཱིཏི. ཨིདཾ སུཏྟཾ ནིབྦེདྷབྷཱགིཡཾ སུཏྟཾ.

གོཏམ, ཧནནྟོ དྷཱིརོ ཨུཔྤཏིཏཾ ཀིཾསུ ཀཏམཾ ཧནེ ཧནེཡྻ. ཝིནོདེནྟོ དྷཱིརོ ཛཱཏཾ ཀིཾསུ ¶ ཀཏམཾ ཝིནོདཡེ ཝིནོདཡེཡྻ. པཛཧནྟོ དྷཱིརོ ཀིཾ ཙ ཀཏམཾ པཛཧེ པཛཧེཡྻ. དྷཱིརསྶ ཀིསྶ དྷམྨསྶ ཨབྷིསམཡོ སུཁོཏི དེཝཏཱ པུཙྪཏི.

དེཝཔུཏྟ, ཧནནྟོ དྷཱིརོ ཨུཔྤཏིཏཾ ཀོདྷཾ ཀུཛ྄ཛྷནཾ ཧནེ ཧནེཡྻ. ཝིནོདེནྟོ དྷཱིརོ ཛཱཏཾ རཱགཾ ཝིནོདཡེ ཝིནོདཡེཡྻ. པཛཧནྟོ དྷཱིརོ ཨཝིཛྫཾ པཛཧེ པཛཧེཡྻ. སཙྩདྷམྨསྶ ཨབྷིསམཡོ སུཁོཏི བྷགཝཱ ཨཝོཙཱཏི ཡོཛནཱ. ཨིདཾ སུཏྟཾ ནིབྦེདྷབྷཱགིཡཾ སུཏྟཾ.

༡༠༡. བྷགཝཱ སཏྟིཡཱ ཨོམཊྛོ ཨུཔརིཏོ ཡཱཝ ཧེཊྛཱ ཝིདྡྷོ པུརིསོ སཏྟིཔྤཧཱནཱཡ ཝཱིརིཡཾ ཨཱརབྷཏི ཝིཡ, ཨགྒིནཱ མཏྠཀེ ཌཡ྄ཧམཱནོ ཨཱདིཏྟསིརོ པུརིསོ ཨགྒིནིབྦཱཔནཏྠཱཡ ཝཱིརིཡཾ ཨཱརབྷཏི ཨིཝ, ཨེཝཾ ཀཱམརཱགེན ཌཡ྄ཧམཱནོ བྷིཀྑུ ཀཱམརཱགཔྤཧཱནཱཡ ཀཱམརཱགཝིཀྑམྦྷནཱཡ ཨཔྤམཏྟོ ཝཱཡམམཱནོ སཏོ སཏིསམྤནྣོ ཧུཏྭཱ པརིབྦཛེ ཝིཧརེཡྻཱཏི དེཝཏཱ ཀཐེསི.

བྷགཝཱ ¶ པན ‘‘སམུཙྪེདཔྤཧཱནཱཡ ཝཱིརིཡཾ ཨཱརབྷཱིཡཏཱི’’ཏི དསྶེཏུཾ ‘‘སཏྟིཡཱ ཝིཡ ཨོམཊྛོ’’ཏིཨཱདིམཱཧ. དེཝཔུཏྟ, སཏྟིཡཱ ཨོམཊྛོ པུརིསོ སཏྟིཔྤཧཱནཱཡ ཝཱིརིཡཾ ཨཱརབྷཏི ཝིཡ, ཨགྒིནཱ མཏྠཀེ ཌཡ྄ཧམཱནོ ཨཱདིཏྟསིརོ པུརིསོ ཨགྒིནིབྦཱཔནཏྠཱཡ ཝཱིརིཡཾ ཨཱརབྷཏི ཨིཝ, ཨེཝཾ སཀྐཱཡདིཊྛིཡཱ ཨབྷིབྷཱུཏོ བྷིཀྑུ སཀྐཱཡདིཊྛིཡཱ པཧཱནཱཡ མགྒེན སམུཙྪེདཔྤཧཱནཱཡ ཨཔྤམཏྟོ ཝཱཡམམཱནོ སཏོ སཏིསམྤནྣོ ཧུཏྭཱ པརིབྦཛེ ཝིཧརེཡྻཱཏི བྷགཝཱ ཨཝོཙཱཏི ཡོཛནཱ. ཨིདཾ སུཏྟཾ ནིབྦེདྷབྷཱགིཡཾ སུཏྟཾ ནཱམ.

སབྦེ ནིཙཡཱ བྷོགཱ ཁཡནྟཱ ཁཡཔརིཡོསཱནཱ བྷཝནྟི, སབྦེ སམུསྶཡཱ དྷམྨཱ པཏནནྟཱ པཏནཔརིཡོསཱནཱ བྷཝནྟི, སབྦེསཾ སཏྟཱནཾ མརཎམཱགམྨ སབྦེསཾ སཏྟཱནཾ ཛཱིཝིཏཾ ཨདྡྷུཝཾ བྷཝཏི, ཨིཏི ཨེཏཾ ཝུཏྟཔྤཀཱརཾ བྷཡཾ བྷཡཧེཏུཾ མརཎཾ སམྨུཏིམརཎཾ ཨཔེཀྑམཱནོ པཎྜིཏོ སུཁཱཝཧཱནི དིཊྛདྷམྨིཀསམྤརཱཡིཀསུཁཱཝཧཱནི པུཉྙཱནི དཱནསཱིལབྷཱཝནཱམཡཔུཉྙཱནི ཀཡིརཱཐཱཏི དེཝཏཱ ཨཝོཙ.

དེཝཔུཏྟ, སབྦེ ནིཙཡཱ བྷོགཱ ཁཡནྟཱ ཁཡཔརིཡོསཱནཱ, སབྦེ སམུསྶཡཱ དྷམྨཱ པཏནནྟཱ པཏནཔརིཡོསཱནཱ, སབྦེསཾ སཏྟཱནཾ མརཎམཱགམྨ སབྦེསཾ སཏྟཱནཾ ཛཱིཝིཏཾ ཨདྡྷུཝཾ, ཨིཏི ཨེཏཾ ཝུཏྟཔྤཀཱརཾ བྷཡཾ བྷཡཧེཏུཾ མརཎཾ ཨཔེཀྑམཱནོ སནྟིཔེཀྑོ སབྦསངྑཱརུཔསམཾ ནིབྦཱནཾ ཨཔེཀྑམཱནོ ¶ པཎྜིཏོ ལོཀཱམིསཾ ཀཱམགུཎཾ པཛཧེ པཛཧེཡྻཱཏི བྷགཝཱ ཨཝོཙཱཏི ཡོཛནཱ. ཨིདཾ སུཏྟཾ ནིབྦེདྷབྷཱགིཡཾ སུཏྟཾ ནཱམ.

མཱཝིདྷ ཡེསཾ མུནཱིནཾ ཙིཏྟཾ ཛྷཱནརཏཾ ཛྷཱནེ རཏཾ ཧོཏི, ཏེ མུནཡོ སུཁཾ སཡནྟི ན སོཙནྟི. པཉྙཝཱ མགྒཔཉྙཝཱ སུསམཱཧིཏོ ཨཱརདྡྷཝཱིརིཡོ པཧིཏཏྟོ ནིབྦཱནཾ པེསིཏཙིཏྟོ པུགྒལོ དུཏྟརཾ ཨོགྷཾ སཾསཱརོགྷཾ ཏརཏི.

ཀཱམསཉྙཱཡ ཝིརཏོ ཝིགཏཙིཏྟོ ཡོ ཁཱིཎཱསཝོ སབྦསཾཡོཛནཱཏཱིཏོ ཨརཧཏྟམགྒེན སབྦེ སཾཡོཛནེ ཨཏཱིཏོ ནནྡིབྷཝཔརིཀྑཱིཎོ ཨཧོསི, སོ ཁཱིཎཱསཝོ གམྦྷཱིརེ སཾསཱརཎྞཝེ ན སཱིདཏཱིཏི ཡོཛནཱ. ནནྡིསངྑཱཏཱ ཏཎྷཱ ཙ ཀཱམབྷཝརཱུཔབྷཝཨརཱུཔབྷཝཱ ཙ ནནྡིབྷཝཱ, ནནྡིབྷཝཱ པརིཀྑཱིཎཱ ཡསྶ ཁཱིཎཱསཝསྶཱཏི ནནྡིབྷཝཔརིཀྑཱིཎོཏི སམཱསོ ཝེདིཏབྦོ. ཨིདཾ སུཏྟཾ ནིབྦེདྷབྷཱགིཡཾ སུཏྟཾ ནཱམ.

ཨརཧཏཾ ¶ ཨརཧནྟཱནཾ བུདྡྷཔཙྩེཀབུདྡྷསཱཝཀཱནཾ དྷམྨཾ སུཙརིཏཱདིབྷེདཉྩ སཏྟཏིཾསབོདྷིཔཀྑིཡབྷེདཉྩ དྷམྨཾ ཡོ པཎྜིཏོ སདྡཧཱནོ སདྡཧནྟོ ཧུཏྭཱ ནིབྦཱནཔྤཏྟིཡཱ ཨཔྤམཏྟོ ཝིཙཀྑཎོ ཧུཏྭཱ སུསྶཱུསཾ སུསྶཱུསནྟོ བྷཝེ, སོ པཎྜིཏོ པཉྙཾ ལོཀིཡལོཀུཏྟརཔཉྙཾ ལབྷཏེ ལབྷཏི.

ཡོ ཝཱིརིཡཝཱ པུགྒལོ པཏིརཱུཔདེསཀཱརཱི དེསཀཱལཱདཱིནི ཨཧཱཔེཏྭཱ ལོཀིཡལོཀུཏྟརདྷམྨཔཏིརཱུཔཾ ཨདྷིགམཱུཔཱཡཾ ཀརོཏི, དྷུརཝཱ ཙེཏསིཀཝཱིརིཡེན ཨནིཀྑིཏྟདྷུརོ ཨུཊྛཱཏཱ ཀཱཡིཀཝཱིརིཡཝསེན ཨུཊྛཱནསམྤནྣོ ཧོཏི, སོ ཝཱིརིཡཝཱ པུགྒལོ དྷནཾ ལོཀིཡལོཀུཏྟརདྷནཾ ཝིནྡཏེ ཨདྷིགཙྪཏི. སཙྩེན ཝཙཱིསཙྩེན ཙ པརམཏྠསཙྩེན ཙ བུདྡྷཱདིཀོ སཙྩདྷམྨེ ཋིཏོ སཔྤུརིསོ ཀིཏྟིཾ པཔྤོཏི. དདཾ དདནྟོ ཡཾ ཀིཉྩི ཨིཙྪིཏཾ པཏྠིཏཾ ཙཏུསངྒཧཝཏྠུཾ དདནྟོ སངྒཧནྟོ སཔྤུརིསོ མིཏྟཱནི ཨེཀནྟམིཏྟཱནི གནྠཏི སམྤཱདེཏི, ཨེཝཾ ཙཏཱུཧི སཙྩདྷམྨདྷིཏིཙཱགེཧི སམནྣཱགཏོ སོ སཔྤུརིསོ ཨསྨཱ ལོཀཱ པརཾ ལོཀཾ པེཙྩ གནྟྭཱ ཨེཀནྟེན སོཀཀཱརཎསྶ ཨབྷཱཝཏོ ན སོཙཏཱིཏི ཡོཛནཱ.

གོཏམ, སབྦགནྠཔྤཧཱིནོ ཏཱིཧི བྷཝེཧི ཝིཔྤམུཏྟོ སཏོ སཏིསམྤནྣོ ཏྭཾ, སམཎོ, ཨཉྙཾ དེཝམནུསྶཱདིཀཾ ཡཾ ཨནུསཱསསི ཡཾ ཨནུསཱསནཾ ཀརོསི, ཏཾ ཨནུསཱསནཾ སབྦགནྠཔྤཧཱིནསྶ ¶ ཏཱིཧི བྷཝེཧི ཝིཔྤམུཏྟསྶ སམཎསྶ ཏེ ཏཝ ན སཱདྷཱུཏི སཀྐནཱམཀོ མཱརཔཀྑིཀོ ཡཀྑོ གཱཐཱཡ ཨཛ྄ཛྷབྷཱསི.

‘‘སཀྐ སཀྐནཱམཀ ཡཀྑ ཨནུཀམྤིཏེན པུརིསེན སདྡྷིཾ ཡེན ཀེནཙི ཝཎྞེན ཀཱརཎེན སཾཝཱསོ ཨེཀསྨིཾ ཋཱནེ སཧཝཱསོ ཛཱཡཏི, ཏཾ ཨནུཀམྤིཏབྦཾ སཧཝཱསགཏཾ པུརིསཾ སཔྤཉྙོ མནསཱ ཨནུཀམྤིཏུཾ ན ཨརཧཏི ཨནུཀམྤིཏུཾཡེཝ ཨརཧཏི. ཡཱ ཨནུཀམྤཱ ཀརུཎཱ, ཡཱ ཨནུདྡཡཱ མེཏྟཱ, མུདིཏཱ ཙ ཨུཔྤནྣཱ, ཏཱཡ ཨནུཀམྤཱཡ ཀརུཎཱཡ, ཏཱཡ ཨནུདྡཡཱཡ མེཏྟཱཡ མུདིཏཱཡ ཙ སམུསྶཱཧིཏེན པསནྣེན མནསཱ ཡོ སཔྤཉྙོ སཔྤུརིསོ ཨཉྙཾ དེཝམནུསྶཱདིཀཾ ཡཾ ཨནུསཱསཏི ཡཾ ཨནུསཱསནཾ ཀརོཏི, སོ སཔྤཉྙོ སཔྤུརིསོ ཏེན ཨནུསཱསནེན སཾཡུཏྟོ ཀཱམཙྪནྡཱདཱིནཾ སཾཡོཛནཱནཾ ཝསེན ཨནནུལོམསཾཡོགེན སཾཡུཏྟོ ན ཧོཏཱིཏི བྷགཝཱ ཨཝོཙཱཏི ཡོཛནཱ.

༡༠༢. སམཎ ¶ , རཱགོ ཙ དོསོ ཙ ཨིམེ དྭེ དྷམྨཱ ཀུཏོནིདཱནཱ, ཀིཾནིདཱནཱ, ཀིཾཔཙྩཡཱ བྷཝནྟི, ཨརཏི ཙ རཏི ཙ ལོམཧཾསོ ཙ ཨིམེ ཏཡོ ཀུཏོཛཱ ཀུཏོ བྷཝནྟི? ཀུམཱརཀཱ དྷངྐཾ ཀཱཀཾ གཧེཏྭཱ པཱདེ དཱིགྷསུཏྟཀེན བནྡྷིཏྭཱ སུཏྟཀོཊིཾ ཨངྒུལིཡཾ ཝེཋེཏྭཱ ཨོསཛནྟི ཨིཝ, ཨེཝཾ མནོཝིཏཀྐཱ ཀུཏོ སམུཊྛཱཡ ཙིཏྟཾ ཨོསཛནྟཱིཏི སཱུཙིལོམཡཀྑོ བྷགཝནྟཾ པུཙྪི.

རཱགོ ཙ དོསོ ཙ ཨིམེ དྭེ དྷམྨཱ ཨིཏོནིདཱནཱ ཨིཏོ ཨཏྟབྷཱཝཏོ ནིདཱནཱ ཛཱཡནྟི; ཨརཏི ཙ རཏི ཙ ལོམཧཾསོ ཙ ཨིམེ ཏཡོ ཨིཏོཛཱ ཨིཏོ ཨཏྟཏོ བྷཝནྟི; ཀུམཱརཀཱ དྷངྐཾ ཀཱཀཾ གཧེཏྭཱ པཱདེ དཱིགྷསུཏྟཀེན བནྡྷིཏྭཱ སུཏྟཀོཊིཾ ཨངྒུལིཡཾ ཝེཋེཏྭཱ ཨོསཛནྟི ཨིཝ, ཨེཝཾ མནོཝིཏཀྐཱ ཨིཏོ ཨཏྟབྷཱཝཏོ སམུཊྛཱཡ ཙིཏྟཾ ཨོསཛནྟི.

ནིགྲོདྷསྶ ཁནྡྷཛཱ པཱརོཧཱ སཱཁཱསུ ཛཱཡནྟི ཨིཝ, ཝནེ རུཀྑཾ ནིསྶཱཡ ཛཱཏཱ མཱལུཝཱ ལཏཱ ཏཾ རུཀྑཾ ཨཛ྄ཛྷོཏྠརིཏྭཱ ཝིཏཏཱ ཨོཏཏཝིཏཏཱ ཏིཊྛཏི ཨིཝ, ཨེཝཾ, ཡཀྑ, ཏྭཾ སུཎོཧི སྣེཧཛཱ ཏཎྷཱསྣེཧཏོ ཛཱཏཱ ཨཏྟསམྦྷཱུཏཱ ཨཏྟནི སམྦྷཱུཏཱ པུན ཨནེཀཔྤཀཱརཱ མནོཝིཏཀྐཱ པཱཔམནོཝིཏཀྐཱ ཙེཝ ཏཾསམྤཡུཏྟཀིལེསཱ ཙ ཀཱམེསུ ཝཏྠུཀཱམེསུ ཝིསཏྟཱ ལགྒཱ སཾསིབྦིཏཱ ཋིཏཱ.

ཡེ པཎྜིཏཱ ‘‘ཡཾ ནིདཱནཾ ཨསྶ ཨཏྟབྷཱཝསྶཱ’’ཏི ཡཏོནིདཱནཾ ནཾ ཀིལེསགཧནཾ སམུདཡསཙྩཾ ¶ པཛཱནནྟི, ཏེ པཎྜིཏཱ ཨཏྟབྷཱཝསངྑཱཏསྶ དུཀྑསཙྩསྶ ནིདཱནབྷཱུཏཾ ནཾ ཀིལེསགཧནཾ སམུདཡསཙྩཾ མགྒསཙྩེན ཝིནོདེནྟི. ཨཔུནབྦྷཝཱཡ ཨཔུནབྷཝསངྑཱཏཱཡ ནིརོདྷསཙྩཏྠཱཡ ཨཏིཎྞཔུབྦཾ ཨནམཏགྒེ སཾསཱརེ སུཔིནེནཱཔི ཨཏིཎྞཔུབྦཾ དུཏྟརཾ ཨིམཾ ཨོགྷཾ ཙཏུབྦིདྷཾ སཾཀིལེསོགྷཾ ཏརནྟཱིཏི བྷགཝཱ ཨཝོཙཱཏི ཡོཛནཱ.

‘‘བྷགཝཱ, སམཎདྷམྨསྶ ཀརཎཾ ནཱམ དུཀྐརཾ, བྷགཝཱ, སམཎདྷམྨསྶ ཀརཎཾ ནཱམ སུདུཀྐརཾ སུཊྛུཏརཾ དུཀྐར’’ནྟི ཨེཀོ ཀུལཔུཏྟོ པབྦཛིཏྭཱ སམཎདྷམྨཾ ཀཏྭཱ ཨརིཡབྷཱུམིཾ ཨཔྤཏྭཱ ཀཱལཾ ཀཏྭཱ དེཝལོཀེ ནིབྦཏྟོ, སོ དེཝཔུཏྟོ བྷགཝནྟཾ ཨུཔསངྐམིཏྭཱ ཨཱཧ. ཀཱམད, སཱིལསམཱཧིཏཱ ཋིཏཏྟཱ ཋིཏསབྷཱཝཱ སཏྟ སེཀྑཱ པུགྒལཱ དུཀྐརཾ ཝཱཔི སམཎདྷམྨཾ ཀརོནྟི. ཨནགཱརིཡུཔེཏསྶ ཨནགཱརིཡཾ ནིགྒེཧབྷཱཝཾ ཨུཔགཏསྶ པབྦཛིཏསྶ ¶ ཏུཊྛི ཙཏུཔཙྩཡསནྟོསོ སུཁཱཝཧཱ ཧོཏཱི’’ཏི བྷགཝཱ ཨཝོཙ.

‘‘བྷགཝཱ, ཡདིདཾ ཡཱ ཨེསཱ ཏུཊྛི སུཁཱཝཧཱ, ཨེསཱ ཏུཊྛི དུལླབྷཱ’’ཏི སོ དེཝཔུཏྟོ ཨཱཧ. ‘‘ཀཱམད, ཡེསཾ སེཀྑཱནཾ མནོ དིཝཱ ཙ རཏྟོ ཙ བྷཱཝནཱཡ རཏོ ཙིཏྟཝཱུཔསམེ རཏོ, ཏེ སེཀྑཱ དུལླབྷཾ ཝཱཔི ཏུསྶནཾ ལབྷནྟཱི’’ཏི བྷགཝཱ ཨཝོཙ.

‘‘བྷགཝཱ, ཡདིདཾ ཡཾ ཨིདཾ ཙིཏྟཾ བྷཱཝནཱཡ རཏཾ, ཏཾ ཙིཏྟཾ དུསྶམཱདཧ’’ནྟི སོ དེཝཔུཏྟོ ཨཱཧ. ‘‘ཀཱམད, ཡེ ཨརིཡཱ ཨིནྡྲིཡཱུཔསམེ རཏྟིནྡིཝཾ རཏཱ, ཏེ ཨརིཡཱ དུསྶམཱདཧཾ ཝཱཔི ཙིཏྟཾ སམཱདཧནྟི, ཀཱམད, ཏེ ཨརིཡཱ མཙྩུནོ ཛཱལཾ ཀིལེསཛཱལཾ ཚེཏྭཱ མགྒཾ གཙྪནྟཱི’’ཏི བྷགཝཱ ཨཝོཙ.

‘‘བྷགཝཱ, ཡོ མགྒོ པུབྦབྷཱགཔཊིཔདཱཝསེན ཝིསམོ, སོ མགྒོ དུགྒམོ’’ཏི སོ དེཝཔུཏྟོ ཨཱཧ. ‘‘ཀཱམད, ཨརིཡཱ དུགྒམེ ཝིསམེ ཝཱཔི མགྒཾ གཙྪནྟི, ཨནརིཡཱ ཝིསམེ མགྒེ ཨཝཾསིརཱ པཔཏནྟི, ཨརིཡཱནཾ སོ མགྒོ སམོཝ བྷཝེ, ན ཨསམོ. ཧི སཙྩཾ ཝིསམེ ཝིསཏྟཀཱཡེ ཨརིཡཱ སམཱ བྷཝནྟཱི’’ཏི བྷགཝཱ ཨཝོཙཱཏི ཡོཛནཱ.

༡༠༣. ཡཾ ཛེཏཝནཾ ཨིསིསངྒྷནིསེཝིཏཾ དྷམྨརཱཛེན ཨཱཝུཏྠཾ, ཨིདཾ ཏཾ ཛེཏཝནཾ མམ པཱིཏིསཉྫནནཾ པཱིཏིཡཱ སཉྫནནཾ ཀརཾ ཧི ཀརཾ ཨེཝ.

ཀམྨཾ མགྒཙེཏནཱཀམྨཉྩ ཝིཛྫཱ མགྒཔཉྙཱ ཙ དྷམྨོ སམཱདྷི ཙེཝ སམཱདྷིཔཀྑིཀོ ཙ ¶ དྷམྨོ སཱིལཾ, སཱིལེ ཋིཏསྶ ཛཱིཝིཏཾ ཨུཏྟམཾ, ཨེཏེན ཨཊྛངྒིཀེན མགྒེན སཏྟཱ སུཛ྄ཛྷནྟི, གོཏྟེན ཝཱ དྷནེན ཝཱ སཏྟཱ ན སུཛ྄ཛྷནྟི.

ཏསྨཱ མགྒེནེཝ སཏྟཱནཾ ཝིསུཛ྄ཛྷནཏོ ཨཏྟནོ ཨཏྠཾ སམྤསྶཾ པསྶནྟོ པཎྜིཏོ པོསོ ཡོནིསོ ཨུཔཱཡེན དྷམྨཾ བོདྷིཔཀྑིཡདྷམྨཾ ཝིཙིནེ ཝིཙིནེཡྻ, ཨེཝཾ ཝིཙིནནེ སཏི ཏཏྠ ཨརིཡམགྒེ ཝིཙིནནྟོ པུགྒལོ སུཛ྄ཛྷཏི.

སཱརིཔུཏྟོ སཱིལེན ཙ ཨུཔསམེན ཙ པཱརངྒཏོ ཨིཝ, ཨེཝཾ ཡོཔི བྷིཀྑུ སཱིལེན ཙ ཨུཔསམེན ཙ པཱརངྒཏོ, སོ བྷིཀྑུ ཨེཏཱཝ པརམོ སཱརིཔུཏྟསདིསོཝ སིཡཱཏི ཨནཱཐཔིཎྜིཀནཱམོ དེཝཔུཏྟོ བྷགཝནྟཾ ཨུཔསངྐམིཏྭཱ ཨཱཧཱཏི ཡོཛནཱ. ཨིདཾ སུཏྟཾ ནིབྦེདྷབྷཱགིཡཾ སུཏྟཾ ནཱམ.

ཨཏཱིཏཾ ¶ ཨཏཱིཏཀྑནྡྷཔཉྩཀཾ ཏཎྷཱདིཊྛཱིཧི ནཱནྭཱགམེཡྻ, ཨནཱགཏཾ ཨནཱགཏཀྑནྡྷཔཉྩཀཾ ཏཎྷཱདིཊྛཱིཧི ནཔྤཊིཀངྑེ ན པཏྠེཡྻ. ཡཾ ཡསྨཱ ཨཏཱིཏཾ པཧཱིནཾ ནིརུདྡྷཾ ཨཏྠངྒཏཾ, ཏསྨཱ ཨཏཱིཏསྶ པཧཱིནཏྟཱ ནིརུདྡྷཏྟཱ ཨཏྠངྒཏཏྟཱ ནཱནྭཱགམེཡྻ. ཡཾ ཡསྨཱ ཨནཱགཏཾ ཨཔྤཏྟཾ, ཏསྨཱ ན པཊིཀངྑེ.

པཙྩུཔྤནྣཾ ཁནྡྷཔཉྩཀཾ ཝཡདྷམྨཾ ཡཏྠ ཡཏྠ སནྟཱནེ ཝཱ, ཡཏྠ ཡཏྠ ཨརཉྙཱདཱིསུ ཝཱ ཨུཔྤནྣཾ, ཏཏྠ ཏཏྠ སནྟཱནེ ཝཱ, ཏཏྠ ཏཏྠ ཨརཉྙཱདཱིསུ ཝཱ ནཾ པཙྩུཔྤནྣདྷམྨཾ ཡཱཧི ཨནིཙྩཱནུཔསྶནཱདཱིཧི ཝིཔསྶཏི, ཏཱཧི ཨནིཙྩཱནུཔསྶནཱདཱིཧི ནིབྦཱནཾ རཱགཱདཱིཧི ཨསཾཧཱིརཾ ཨསཾཀུཔྤཾ བྷཝཏི, ཏཾ ནིབྦཱནཾ ཝིཔསྶཀོ པུགྒལོ ཝིདྭཱ ནིབྦཱནཱརམྨཎཾ ཕལསམཱཔཏྟིཾ ཨཔྤེནྟོ ཧུཏྭཱ ཨནུབྲཱུཧཡེ ཝཌྜྷེཡྻ.

ཨཱཏཔྤཾ སཾཀིལེསཱནཾ ཨཱཏཔནྟཾ ཝཱིརིཡཾ ཨཛྫེཝ ཀིཙྩཾ ཀཱཏབྦཾ, སུཝེ ཛཱིཝིཏཾ ཝཱ མརཎཾ ཝཱ ཀོ ཛཉྙཱ ཛཱནེཡྻ, ‘‘སུཝེ ཝཱ དཱནཱདིཔུཉྙཾ ཛཱནིསྶཱམཱི’’ཏི ཙིཏྟཾ ཨནུཔྤཱདེཏྭཱ ‘‘ཨཛྫེཝ ཀརིསྶཱམཱི’’ཏི ཨེཝཾ ཝཱིརིཡཾ ཀཱཏབྦཾ. ཧི སཙྩཾ མརཎཀཱརཎབྷཱཝཏཱཡ ཨཧིཝིཙྪིཀཝིསསཏྠཱདིཨནེཀཱཡ སེནཱཡ ཝསེན མཧཱསེནེན ཏེན མཙྩུནཱ སདྡྷིཾ མིཏྟསནྠཝཱཀཱརེན ཝཱ ལཉྫདཱནེན ཝཱ སངྒརཾ ནཏྠཱིཏི.

ཨེཝཾ ¶ མནསི ཀཏྭཱ ཝིཧཱརིཾ ཝིཧརནྟཾ ཨཱཏཱཔིཾ ཨཧོརཏྟཾ ཨཏནྡིཏཾ ཨནལསཾ ཨུཊྛཱཧཀཾ སཔྤུརིསཾ ‘‘བྷདྡེཀརཏྟོ’’ཏི སནྟོ མུནི ཝེ ཨེཀནྟེན ཨཱཙིཀྑཏེ ཨཱཙིཀྑཏིཡེཝཱཏི ཡོཛནཱ.

‘‘ཙཏྟཱརིམཱནི བྷིཀྑཝེ’’ཏྱཱདིསུཏྟཾ པཱལི༹ཏོ ཙ ཨཊྛཀཐཱཏོ ཙ པཱཀཊཾ.

༡༠༤. ནཱནཱཝིདྷཾ ནིབྦེདྷབྷཱགིཡཾ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ ཨསེཀྑབྷཱགིཡཾ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ ཨསེཀྑབྷཱགིཡཾ སུཏྟ’’ནྟིཨཱདི ཝུཏྟཾ. ཏཏྠཱཏི ཏེསུ སོལ༹སསུ སཾཀིལེསབྷཱགིཡཱདཱིསུ སུཏྟེསུ ཀཏམཾ སུཏྟཾ ཨསེཀྑབྷཱགིཡཾ སུཏྟཾ ནཱམཱཏི པུཙྪཏི.

ཡསྶ ཨུཏྟམཔུརིསསྶ ཙིཏྟཾ སེལཱུཔམཾ ཋིཏཾ ལོཀདྷམྨཝཱཏེཧི ནཱནུཀམྤཏི, རཛནཱིཡེསུ ལཱབྷཱདཱིསུ ཝིརཏྟཾ བྷཝེ, སོ ཨུཏྟམཔུརིསོ ཀོཔནེཡྻེ ¶ ཨལཱབྷཱདིཀེ ན ཀུཔྤཏི, ཏསྶ ཨུཏྟམཔུརིསསྶ ཙིཏྟཾ ཨེཝཾ ཨནིཙྩཏཱདིནཱ བྷཱཝིཏཾ, ནཾ བྷཱཝིཏཙིཏྟཾ ཨུཏྟམཔུརིསཾ ཝཱིཏིཀྐནྟལོཀདྷམྨཧེཏུཀཾ དུཀྑཾ ཀུཏོ ཨེསྶཏཱིཏི ཡོཛནཱ. ཨིདཾ སུཏྟཾ ཨསེཀྑབྷཱགེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ཨསེཀྑབྷཱགིཡཾ སུཏྟཾ ནཱམ. ཨེས ནཡོ ཨིཏོ པརེསུཔི ཝེདིཏབྦོ.

‘‘ཨསེཀྑབྷཱགིཡཾ སུཏྟཾ ཨིདམེཝཱ’’ཏི ཝཏྟབྦབྷཱཝཏོ ‘‘ཨཱཡསྨཏོ ཙཱ’’ཏིཨཱདི ཝུཏྟཾ.

ཡོ བྲཱཧྨཎོ བཱཧིཏཔཱཔདྷམྨཏྟཱ བཱཧིཏཔཱཔདྷམྨོ བྷཝེ, སོ བྲཱཧྨཎོ ནིགྒཏཧུཾཧུཾཀཏྟཱ ནིཧུཾཧུངྐོ བྷཝེ, ནིགྒཏཀིལེསཀསཱཝཏྟཱ ནིཀྐསཱཝོ བྷཝེ, སཱིལསཾཝརེན སཾཡཏཙིཏྟཏཱཡ ཡཏཏྟོ བྷཝེ, ཡོ བྲཱཧྨཎོ ཙཏུམགྒཉཱཎཝེདེཧི ཨནྟཾ ནིབྦཱནཾ གཏཏྟཱ ཝེདནྟགཱུ བྷཝེ, དྷམྨེན ཝུསིཏབྲཧྨཙརིཡཏྟཱ ཝུསིཏབྲཧྨཙརིཡོ བྷཝེ. ཡསྶ བྲཱཧྨཎསྶ ཀུཧིཉྩི ལོཀེ ཨུསྶདཱ རཱགུསྶདོ དོསུསྶདོ མོཧུསྶདོ མཱནུསྶདོ དིཊྛུསྶདོ ནཏྠི, སོ བྲཱཧྨཎོ བྲཧྨཝཱདཾ ‘‘ཨཧཾ བྲཱཧྨཎོམྷཱི’’ཏི ཝཱཙཾ ཝདེཡྻཱཏི བྷགཝཱ ཨཝོཙཱཏི ཡོཛནཱ.

ཡེ བུདྡྷཱ པཱཔཀེ ཨཀུསལེ དྷམྨེ བཱཧིཏྭཱ སདཱ ཙརནྟི སཏཱ སཏིསམྤནྣཱ ཁཱིཎསཾཡོཛནཱ, ཏེ བུདྡྷཱ ལོཀསྨིཾ བྲཱཧྨཎཱཏི ཝེ ཨེཀནྟེན ཀཐཱིཡནྟཱིཏི ཨཝོཙཱཏི ཡོཛནཱ.

ཡཏྠ ནིབྦཱནེ ཨཱཔོ ཙ པཐཝཱི ཙ ཏེཛོ ཙ ཝཱཡོ ཙ ན གཱདྷཏི ན པཏིཊྛཧཏི, ཏཏྠ ¶ ནིབྦཱནེ སུཀྐཱ གཧཱ ཙེཝ ཏཱརཀཱ ཙ ན ཛོཏནྟི, ཏཏྠ ནིབྦཱནེ ཨཱདིཙྩོ ནཔྤཀཱསཏི, ཏཏྠ ནིབྦཱནེ ཙནྡིམཱ ན བྷཱཏི, ཏཏྠ ནིབྦཱནེ ཏམོ ན ཝིཛྫཏི.

ཡོ བྲཱཧྨཎོ ཨཏྟནཱ སཡཾ མུནི མོནེན ཡདཱ ཏཾ ནིབྦཱནཾ ཨཝེདི ཝིནྡཏི པཊིལབྷཏི པཊིཝིཛ྄ཛྷཏི, ཨཐ པཊིཝིཛ྄ཛྷནཀྑཎེ སོ བྲཱཧྨཎོ རཱུཔཱ རཱུཔདྷམྨཏོ ཙ ཨརཱུཔཱ ཨརཱུཔདྷམྨཏོ ཙ སུཁདུཀྑཱ སུཁདུཀྑཏོ ཙ པམུཙྩཏཱིཏི ཨཝོཙཱཏི ཡོཛནཱ.

ཡཀྑ, ཡོ བྲཱཧྨཎོ སཀེསུ སཀཨཏྟབྷཱཝེསུ དྷམྨེསུ ཨུཔཱདཱནཀྑནྡྷེསུ སཙྩེསུ, དྷམྨེསུ ཙ པཱརགཱུ ཧོཏི, ཨཐ པཱརགམནཀྑཎེ སོ བྲཱཧྨཎོ ཨེཏཾ ཨཛཀལཱཔཀཾ ཏཡཱ ཝུཏྟཾ ཨེཏཾ པིསཱཙཾ ཀིལེསཔིསཱཙཉྩ ¶ , ཏཡཱ ཀཏཾ ཨཀྐུལཉྩ ཨཀྐུལཾ, པཀྐུལཀརཎཾ ཨཏིཝཏྟཏཱིཏི ཨཝོཙཱཏི ཡོཛནཱ.

ཡོ བྷིཀྑུ ཨཱཡནྟིཾ ཨཱགཙྪནྟིཾ པུརཱཎདུཏིཡིཀཾ བྷརིཡཾ ཝཱ, ཨཉྙཾ ཨཱགཙྪནྟིཾ ཨིཏྠིཾ ཝཱ ཙིཏྟེན ན ཨབྷིནནྡཏི, པཀྐམནྟིཾ པུརཱཎདུཏིཡིཀཾ བྷརིཡཾ ཝཱ, ཨཉྙཾ པཀྐམནྟིཾ ཨིཏྠིཾ ཝཱ ཙིཏྟེན ན སོཙཏི, སངྒཱ པཉྩཝིདྷཏོཔི སངྒཏོ མུཏྟཾ སངྒཱམཛིཾ ཏཾ བྷིཀྑུཾ ‘‘བྲཱཧྨཎ’’ནྟི ཨཧཾ ཝདཱམཱིཏི ཨཝོཙཱཏི ཡོཛནཱ.

ཨེཏྠ ནདིཡཾ བཧུཛནོ ནྷཱཡཏི, སོ བཧུཛནོ ནྷཱཡཀོ ཨུདཀེན ཨུདཀནྷཱནེན སུཙཱི ན ཧོཏི. ཡམྷི པུགྒལེ སཙྩཾ, སཙྩཏོ སེསདྷམྨོ ཙ ཨཏྠི, སོ པུགྒལོ སུཙཱི ཙ ཧོཏི, སོ པུགྒལོ བྲཱཧྨཎོ ཙ ཧོཏཱིཏི ཨཝོཙཱཏི ཡོཛནཱ; སུཙིཨསུཙིབྷཱཝོ ཊཱིཀཱཡཾ ཝིཏྠཱརཏོ ཝུཏྟོཝ.

ཨཱཏཱཔིནོ ཛྷཱཡཏོ ཡསྶ བྲཱཧྨཎསྶ དྷམྨཱ སཙྩདྷམྨཱ ཡདཱ ཧཝེ ཨེཀནྟེན པཱཏུབྷཝནྟི, ཏདཱ དྷམྨཱནཾ པཱཏུབྷཝནཀྑཎེ སོ བྲཱཧྨཎོ མཱརསེནཾ ཝིདྷཱུཔཡཾ ཝིདྷཱུཔཡནྟོ ཏིཊྛཏི. ‘‘ཀིམིཝཱ’’ཏི ཝཏྟབྦཏྟཱ ‘‘སཱུརིཡོཝ ཨོབྷཱསཡམནྟལིཀྑ’’ནྟི ཝུཏྟཾ. སཱུརིཡོ ཨནྟལིཀྑཾ ཨོབྷཱསཡནྟོ ཏིཊྛཏི ཨིཝ, ཨེཝཾ ཏིཊྛཏཱིཏི ཡོཛནཱ.

ཡོ པཾསུཀཱུལིཀོ བྷིཀྑུ སབྦཱནི ཙཏྟཱརི ཡོགཱནི ཨུཔཱཏིཝཏྟོ སཀིཉྩནེ ལོཀེ ཨཀིཉྩནོ ཨིརིཡཏི ཙཏུབྦིདྷཨིརིཡཱཔཐཾ ཝཏྟེཏི. ཨཔཧཱནདྷམྨཾ ཀེནཙི མགྒེན ཨཔྤཧཱནསབྷཱཝཾ ཨཔྤཏྟཀཱཡེན ཨཔྤཏྟཾ ཏེཝིཛྫཔཏྟཾ, ཨིརིཡམཱནཾ སནྟིནྡྲིཡཾ ཏཾ པཾསུཀཱུལིཀཾ བྷིཀྑུཾ ཏུམྷེ པསྶཐ.

ཨཱཛཱནིཡཾ ¶ པུརིསཨཱཛཱནཱིཡཾ ཛཱཏིབལནིསེདྷཾ ‘‘ཨཧཾ ཛཱཏིབྲཱཧྨཎོ’’ཏི ཛཱཏིམཏྟཀེན པཝཏྟམཱནབལནིསེདྷཀཾ ཏཾ པཾསུཀཱུལིཀཾ བྷིཀྑུཾ སམྦཧུལཱ ཨུལཱ༹རཱ དེཝཏཱ བྲཧྨཾ ཝིམཱནཾ ཨུཔསངྐམིཏྭཱ ཨིདྷ སཱསནེ, བྲཧྨཝིམཱནེ ཝཱ པསནྣཙིཏྟཱ ཧུཏྭཱ ནམསྶནྟི. ནིདྷཱཏི ཙ ཨེཏྠ ན-ཀཱརོ ཨཱགམོ.

པུརིསཱཛཉྙ ཏེ ཏཝ ཨམྷཱཀཾ ནམོ ཨཏྠུ, པུརིསུཏྟམ ཏེ ཏཝ ཨམྷཱཀཾ ནམོ ཨཏྠུ, ཡསྶ ཏེ ཏཝ ནིསྶཡཾ མཡཾ ནཱབྷིཛཱནཱམ, སོ ཏྭཾ ཀིཾ པུགྒལཾ ནིསྶཱཡ ཛྷཱཡསཱིཏི ཨཝོཙུནྟི ཡོཛནཱ.

ཡེ ¶ བྷིཀྑཱུ ཀཱལེན ཀཱལཾ དྷམྨསྶཝནཝསེན ཙིརརཏྟཾ སམེཏིཀཱ བྷཝནྟི, ཨིམེ བྷིཀྑཱུ སཧཱཡཱ ཧོནྟི ཝཏ. ནེསཾ སཧཱཡཱནཾ བྷིཀྑཱུནཾ དྷམྨེ བུདྡྷཔྤཝེདིཏེ དྷམྨེ སདྡྷམྨོ སམེཏི.

ཀཔྤིནེན ཨརིཡཔྤཝེདིཏེ དྷམྨེ སུཝིནཱིཏཱ ཏེ སཧཱཡཀཱ བྷིཀྑཱུ སཝཱཧིནིཾ མཱརཾ ཛེཏྭཱ ཨནྟིམཾ དེཧཾ ཨཏྟབྷཱཝཾ དྷཱརེནྟཱིཏི ཨཝོཙཱཏི ཡོཛནཱ.

སིཐིལཾ ཝཱིརིཡཾ ཨཱརབྦྷ སབྦདུཀྑཔྤམོཙནཾ ཨིདཾ ནིབྦཱནཾ ཡོགཱཝཙརེན ན ཨདྷིགནྟབྦཾ, ཨཔྤེན ཨཔྤཀེན ཐཱམསཱ ཨིདཾ ནིབྦཱནཾ ན ཨདྷིགནྟབྦཾ.

ཨཡཉྩ ཡོགཱཝཙརོ བྷིཀྑུ དཧརོ, ཡོ པུརིསོ སཝཱཧིནིཾ མཱརཾ ཛེཏྭཱ ཨནྟིམཾ དེཧཾ ཨཏྟབྷཱཝཾ དྷཱརེཏི, སོ ཨཡཾ པུརིསོ སོ ཨུཏྟམཔུརིསོཝཱཏི ཨཝོཙཱཏི ཡོཛནཱ. ‘‘པུརིསོ’’ཏི ཝཏྟབྦེ ཚནྡཱནུརཀྑཎཝསེན ‘‘པོརིསོ’’ཏི ཝུཏྟཾ.

མོགྷརཱཛ, དུབྦཎྞཀོ ལཱུཁཙཱིཝརོ སདཱ སཏོ སཏིསམྤནྣོ ཁཱིཎཱསཝོ ཙ ཝིསཾཡུཏྟོ ཙ ཀཏཀིཙྩོ ཙ ཨནཱསཝོ ཙ ཏེཝིཛྫོ ཙ ཨིདྡྷིཔྤཏྟོ ཙ ཙེཏོཔརིཡཱཡཀོཝིདོ ཙ སོ བྷིཀྑུ སཝཱཧིནིཾ མཱརཾ ཛེཏྭཱ ཨནྟིམཾ དེཧཾ དྷཱརེཏཱིཏི ཨཝོཙཱཏི ཡོཛནཱ.

༡༠༥. ‘‘ཏཐཱགཏོ’’ཏིཨཱདཱིསུ ཡོཛནཱ པཱཀཊཱ. ཨིདཾ སུཏྟཾ ཨསེཀྑབྷཱགེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ཨསེཀྑབྷཱགིཡཾ སུཏྟཾ ནཱམ.

༡༠༦. ནཱནཱཝིདྷཾ ¶ ཨསེཀྑབྷཱགིཡཾ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟ’’ནྟི ཝཏྟབྦཏྟཱ ‘‘ཏཏྠ ཀཏམཾ སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟ’’ནྟིཨཱདི ཝུཏྟཾ. ཏཏྠཱཏི ཏེསུ སོལ༹སསུ སཾཀིལེསབྷཱགིཡཱདཱིསུ སུཏྟེསུ ཀཏམཾ སུཏྟཾ སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟཾ ནཱམཱཏི པུཙྪཏི.

ཚནྣཾ ཨཱཔཏྟིཾ ཨཱཔཛྫིཏྭཱ ཚནྣཾ ཚཱདེནྟཾ བྷིཀྑུཾ དུཀྐཊཱདིཝསྶོ ཨཏིཝསྶཏི, ཝིཝཊཾ ཨཱཔཏྟིཾ ཨཱཔཛྫིཏྭཱ ཝིཝཊཾ དེསེནྟཾ ཨཱཙིཀྑནྟཾ བྷིཀྑུཾ དུཀྐཊཱདིཝསྶོ ནཱཏིཝསྶཏི, ཏསྨཱ ཚནྣསྶ ཨཏིཝསྶནཏོ ཙ ཝིཝཊསྶ ནཱཏིཝསྶནཏོ ཙ ཚནྣཾ ཚཱདིཏབྦཾ ཨཱཔཏྟིཾ ཝིཝརེཐ དེསེཐ ཨཱརོཙེཐ ¶ , ཨེཝཾ ཝིཝརཎེ སཏི ཏཾ ཝིཝརནྟཾ བྷིཀྑུཾ དུཀྐཊཱདིཝསྶོ ནཱཏིཝསྶཏཱིཏི ཡོཛནཱ.

‘‘ཨིམསྨིཾ སུཏྟེ ཀིཏྟཀེན སཾཀིལེསོ དསྶིཏོ, ཀིཏྟཀེན ཝཱསནཱ དསྶིཏཱ’’ཏི པུཙྪིཏབྦཏྟཱ ‘‘ཚནྣམཏིཝསྶཏཱི’’ཏི སཾཀིལེསོ, ‘ཝིཝཊཾ ནཱཏིཝསྶཏཱི’ཏི ཝཱསནཱ, ‘ཏསྨཱ ཚནྣཾ ཝིཝརེཐ, ཨེཝཾ ཏཾ ནཱཏིཝསྶཏཱི’ཏི ཨཡཾ སཾཀིལེསོ ཙ ཝཱསནཱ ཙཱ’’ཏི ཝུཏྟཾ. ‘‘ཚནྣམཏིཝསྶཏཱི’’ཏི ཨེཏྟཀེན སཾཀིལེསོ དསྶིཏོ. ‘‘ཝིཝཊཾ ནཱཏིཝསྶཏཱི’’ཏི ཨེཏྟཀེན ཝཱསནཱ དསྶིཏཱ. ‘‘ཏསྨཱ ཚནྣཾ ཝིཝརེཐ, ཨེཝཾ ཏཾ ནཱཏིཝསྶཏཱི’’ཏི ཨེཏྟཀེན ཨཡཾ སཾཀིལེསོ ཙ དསྶིཏོ, ཨཡཾ ཝཱསནཱ ཙ དསྶིཏཱ. ཨིདཾ ‘‘ཚནྣཾ…པེ... ཝསྶཏཱི’’ཏི སུཏྟཾ སཾཀིལེསབྷཱགེ ཝིསཡེ ཙ ཝཱསནཱབྷཱགེ ཝིསཡེ ཙ ཝཱཙཀཉཱཔཀབྷཱཝེན པཝཏྟནཏོ སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟཾ ནཱམ.

‘‘སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟཾ ཨེཏྟཀམེཝཱ’’ཏི ཝཏྟབྦཏྟཱ ‘‘ཙཏྟཱརོམེ མཧཱརཱཛཱ’’ཏིཨཱདི ཝུཏྟཾ. ‘‘ཏེསུ ཙཏཱུསུ པུགྒལེསུ ཀཏམེ པུགྒལཱ སཾཀིལེསབྷཱགིཡཱ, ཀཏམེ པུགྒལཱ ཝཱསནཱབྷཱགིཡཱ’’ཏི པུཙྪིཏབྦཏྟཱ ‘‘ཏཏྠ ཡོ ཙ པུགྒལོ’’ཏིཨཱདི ཝུཏྟཾ. ཏཏྠཱཏི ཏེསུ ཙཏཱུསུ ཏམོཏམཔརཱཡཎཱདཱིསུ པུགྒལེསུ. ཏསྶཏྠོ པཱཀཊོ. ཨིདཾ ‘‘ཙཏྟཱརོམེ’’ཏིཨཱདིཀཾ སུཏྟཾ སཾཀིལེསབྷཱགིཡེསུ དྭཱིསུ པུགྒལེསུ ཙ ཝཱསནཱབྷཱགིཡེསུ དྭཱིསུ པུགྒལེསུ ཙ ཝཱཙཀཉཱཔཀབྷཱཝེན པཝཏྟནཏོ སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟཾ ནཱམ.

ནཱནཱཝིདྷཾ སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ སཾཀིལེསབྷཱགིཡཉྩ ནིབྦེདྷབྷཱགིཡཉྩ སུཏྟཾ ནཱམཱ’’ཏི པུཙྪིཏབྦཏྟཱ ཏཏྠ ཀཏམཾ ¶ སཾཀིལེསབྷཱགིཡཉྩ ནིབྦེདྷབྷཱགིཡཉྩ སུཏྟ’’ནྟིཨཱདི ཝུཏྟཾ. ཏསྶཏྠོ ཝུཏྟནཡེན ཝེདིཏབྦོ.

ཨཡསཾ ཡཾ བནྡྷནཉྩ དཱརུཛཾ ཡཾ བནྡྷནཉྩ པབྦཛཾ ཡཾ བནྡྷནཉྩ ལོཀེ ཨཏྠི, ཏཾ ཨཡསཱདིབནྡྷནཾ ‘‘དལ༹ྷཾ བནྡྷན’’ནྟི དྷཱིརཱ བུདྡྷཱདཡོ པཎྜིཏཔུརིསཱ ན ཨཱཧུ. མཎིཀུཎྜལེསུ ཙ པུཏྟེསུ ཙ དཱརེསུ ཙ ཡཱ སཱརཏྟརཏྟཱ བལཝརཱགརཏྟཱ ཨཔེཀྑཱ ལོཀེ ཝིཛྫཏི, ཏཾ སཱརཏྟརཏྟཨཔེཀྑཱསངྑཱཏཾ རཱགབནྡྷནཾ ‘‘དལ༹ྷཾ བནྡྷན’’ནྟི དྷཱིརཱ པཎྜིཏཔུརིསཱ ཨཱཧུ. ཨིམིནཱ སུཏྟཔྤདེསེན ཨཡཾ སཱརཏྟརཏྟཨཔེཀྑཱསངྑཱཏོ ཨཀུསལདྷམྨོ སཾཀིལེསོ དསྶིཏོ.

‘‘ཀེན ¶ ནིབྦེདྷོ དསྶིཏོ’’ཏི ཝཏྟབྦཏྟཱ ‘‘ཨེཏ’’ནྟིཨཱདི ཝུཏྟཾ. དྷཱིརཱ པཎྜིཏཔུརིསཱ ཨེཏཾ རཱགབནྡྷནཾ ‘‘དལ༹ྷཾ བནྡྷན’’ནྟི ཨཱཧུ. ཨེཏཾ རཱགབནྡྷནཾ ཨོཧཱརིནཾ ཧེཊྛཱ ཨཔཱཡཾ ཨཝཧརཎཾ ཧོཏི, སིཐིལཾ བནྡྷནཊྛཱནེ ཚཝིཨཱདཱིནི ཨཀོཔེཏཏྟཱ སིཐིལཾ ཧོཏི, དུཔྤམུཉྩཾ ལོབྷཝསེན ཨེཀཝཱརམྤི ཨུཔྤནྣསྶ རཱགབནྡྷནསྶ དུམྨོཙཡཏྟཱ དུཔྤམུཉྩཾ ཧོཏི, པཎྜིཏཔུརིསཱ ཨེཏམྤི ཝུཏྟཔྤཀཱརཾ རཱགབནྡྷནམྤི མགྒེན ཚེཏྭཱན ཨནཔེཀྑིནོ ཧུཏྭཱ ཀཱམསུཁཾ པཧཱཡ པརིབྦཛནྟི. ཨིཏི ཨིམིནཱ སུཏྟཔྤདེསེན ཨཡཾ མགྒོ ནིབྦེདྷོ དསྶིཏོ. ཨིདཾ ‘‘ཨཡས’’ནྟིཨཱདིཀཾ སུཏྟཾ རཱགཱདིསཾཀིལེསབྷཱགེ ཝིསཡེ ཙ ཝཱསནཱབྷཱགེ ཝིསཡེ ཙ ཝཱཙཀཉཱཔཀབྷཱཝེན པཝཏྟནཏོ སཾཀིལེསབྷཱགིཡཉྩ ཝཱསནཱབྷཱགིཡཉྩ སུཏྟཾ ནཱམ.

༡༠༧. བྷིཀྑཝེ, ཡཉྩ ཙེཏེཏི ཡཉྩ ཙེཏནཾ ནིབྦཏྟེཏི, ཡཉྩ པཀཔྤེཏི ཡཉྩ པཀཔྤནཾ ཀརོཏི, ཡཉྩ ཨནུསེཏི ཡཉྩ ཨནུསཡནཾ བྷཝཏི, ཨེཏཾ ཙེཏནཾ ཨེཏཾ པཀཔྤནཾ ཨེཏཾ ཨནུསཡནཾ ཝིཉྙཱཎསྶ ཋིཏིཡཱ ཨཱརམྨཎཾ པཙྩཡོ ཧོཏི. ཨཱརམྨཎེ པཙྩཡེ སཏི ཏསྶ ཨབྷིསངྑཱར ཝིཉྙཱཎསྶ པཏིཊྛཱ ཧོཏི. ཏསྨིཾ ཨབྷིསངྑཱརཝིཉྙཱཎེ པཏིཊྛིཏེ ཝིརུལ༹ྷེ སཏི ཨཱཡཏིཾ པུནབྦྷཝཱབྷིནིབྦཏྟི ཝིཉྙཱཎཱདིནིབྦཏྟི ཧོཏི. ཨཱཡཏིཾ པུནབྦྷཝཱབྷིནིབྦཏྟིཡཱ སཏི ཨཱཡཏིཾ ཛཱཏིཛརཱམརཎཾ སམྦྷཝཏི. ཨཱཡཏིཾ སོཀ…པེ… སམུདཡོ ཧོཏི.

བྷིཀྑཝེ, ཙེ ནོ ཙེཏེཏི, ཙེ ནོ པཀཔྤེཏི, ཨཐ ཏཐཱཔི ཙེ ཨནུསེཏི ཨནུསཡནཾ བྷཝཏི, ཨེཝཾ སཏི ཨེཏཾ ཨནུསཡནཾ ཝིཉྙཱཎསྶ ཨབྷིསངྑཱརཝིཉྙཱཎསྶ ཨཱརམྨཎཾ པཙྩཡོ ཧོཏི…པེ… སམུདཡོ ཧོཏི. ཨིཏི ཨིམིནཱ སུཏྟཔྤདེསེན ཨཡཾ ཝུཏྟཔྤཀཱརོ ཙེཏཡནཱདིཀོ ཨཀུསལདྷམྨོ སཾཀིལེསོ དསྶིཏོ.

‘‘ཀེན ¶ ནིབྦེདྷོ དསྶིཏོ’’ཏི ཝཏྟབྦཏྟཱ ‘‘ཡཏོ ཙཱ’’ཏིཨཱདི ཝུཏྟཾ. བྷིཀྑཝེ, ཡཏོ ཙ ཨརིཡམགྒིཀོ ནེཝ ཙེཏེཏི, ནོ ཙ པཀཔྤེཏི, ནོ ཙ ཨནུསེཏི, ཨེཏཾ ཨཙེཏཡནཾ ཨེཏཾ ཨཀཔྤནཾ ཨེཏཾ ཨནནུསཡནཾ ཝིཉྙཱཎསྶ ཨབྷིསངྑཱརཝིཉྙཱཎསྶ ཨཱརམྨཎཾ པཙྩཡོ ན ཧོཏི…པེ… ཨཱཡཏིཾ ཛཱཏིཛརཱམརཎཾ ནིརུཛ྄ཛྷཏི, ཨཱཡཏིཾ སོཀ…པེ… ཡཱསཱ ནིརུཛ྄ཛྷནྟི…པེ… ནིརོདྷོ ཧོཏི. ཨིཏི ཨིམིནཱ སུཏྟཔྤདེསེན ཨཡཾ ཨརིཡམགྒོ ནིབྦེདྷོ དསྶིཏོ. ཨིདཾ ‘‘ཡཉྩ བྷིཀྑཝེ’’ཏིཨཱདིཀཾ སུཏྟཾ ¶ སཾཀིལེསབྷཱགེ ཝིསཡེ ཙ ནིབྦེདྷབྷཱགེ ཝིསཡེ ཙ ཝཱཙཀཉཱཔཀབྷཱཝེན པཝཏྟནཏོ སཾཀིལེསབྷཱགིཡཉྩ ནིབྦེདྷབྷཱགིཡཉྩ སུཏྟཾ ནཱམ.

༡༠༨. ནཱནཱཝིདྷཾ སཾཀིལེསབྷཱགིཡཉྩ ནིབྦེདྷབྷཱགིཡཉྩ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ སཾཀིལེསབྷཱགིཡཉྩ ཨསེཀྑབྷཱགིཡཉྩ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ སཾཀིལེསབྷཱགིཡཉྩ ཨསེཀྑབྷཱགིཡཉྩ སུཏྟ’’ནྟིཨཱདི ཝུཏྟཾ. ཏསྶཏྠོ ཝུཏྟནཡེན ཝེདིཏབྦོ.

བྷིཀྑཝེ, ཨསྶུཏཝཱ པུཐུཛྫནོ སམུདྡོ ཛལསཱགརསམུདྡོ ‘‘སམུདྡོ སམུདྡོ’’ཏི བྷཱསཏི. ཀེནཊྛེན བྷཱསཏི? དུཔྤཱུརཎཊྛེན ཙ སཾསརཎཊྛེན ཙ དུརཏིཀྐམནཊྛེན ཙ སམུདྡོཏི བྷཱསཏི. ཨེཝཾ སཏི, བྷིཀྑཝེ, ཨེསོ ཛལསཱགརསམུདྡོ ཨརིཡསྶ བྷགཝཏོ ཝིནཡེ ཝུཏྟཔྤཀཱརཊྛེན སམུདྡོ ན ཧོཏི. བྷིཀྑཝེ, ཨེསོ ཛལསཱགརསམུདྡོ མཧཱ ཨུདཀརཱསི མཧཱ ཨུདཀཎྞཝོ ཧོཏི. བྷིཀྑཝེ, ཙཀྑུ པུརིསསྶ སམུདྡོ ཧོཏི, ཏསྶ ཙཀྑུསྶ རཱུཔམཡོ རཱུཔཱཡཏནམཡོ ཝེགོ. ཀེནཊྛེན? པཐཝིཏོ ཡཱཝ ཨཀནིཊྛབྲཧྨལོཀཱ ནཱིལཱདིརཱུཔཱརམྨཎཾ སམོསརནྟམྤི དུཔྤཱུརཎཊྛེན ཙ ཨནམཏགྒེ སཾསཱརེ སཾསརཎཊྛེན ཙ དུརཏིཀྐམནཊྛེན ཙ ཙཀྑུམེཝ སམུདྡོ ཧོཏི. ནཱིལཱདིརཱུཔཱཡཏནསྶ ཨཔྤམེཡྻསྶ ཨཔྤམེཡྻེན ཨཱུམིམཡེན ཝེགེན སཾསརཎཊྛེན ནཱིལཱདིརཱུཔམེཝ ཝེགོ ཧོཏི. ཨིཏི ཨིམིནཱ སུཏྟཔྤདེསེན ཨཡཾ ཙཀྑུ སམུདྡོ རཱུཔམཡོ ཝེགོ ཙ སཾཀིལེསོ སཾཀིལེསཧེཏུ དསྶིཏོ.

‘‘ཀེན ཨསེཀྑོ དསྶིཏོ’’ཏི ཝཏྟབྦཏྟཱ ‘‘ཡོ ཏ’’ནྟིཨཱདི ཝུཏྟཾ. ཡསྨིཾ ཨརཧཏྟཕལེ ཋིཏོ ཡོ ཨརཧཱ རཱུཔམཡཾ ཏཾ ཝེགཾ སཧཏི མནཱཔེ རཱུཔེ རཱགཾ, ཨམནཱཔེ རཱུཔེ དོསཾ, ཨསམཔེཀྑནེ མོཧཾ ཨནུཔྤཱདེནྟོ ཧུཏྭཱ ཨུཔེཀྑཀབྷཱཝེན སཧཏི, ཨཡཾ ཨརཧཱ, བྷིཀྑཝེ, སཨཱུམིཾ སཱཝཊྚཾ སགཧཾ སརཀྑསཾ ཙཀྑུསམུདྡཾ ཨཏརཱིཏི ཝུཙྩཏི, ཏིཎྞོ པཱརངྒཏོ ཐལེ ཏིཊྛཏི བྲཱཧྨཎོཏི ཝུཙྩཏི. ཨིཏི ཨིམིནཱ སུཏྟཔྤདེསེན ཨཡཾ ཨརཧཏྟཕལབྷཱུཏོ ཨསེཀྑོ དསྶིཏོ.

‘‘སོཏཾ ¶ ¶ བྷིཀྑཝེ’’ཏིཨཱདཱིསུཔི ཨིམིནཱ ནཡེན ཡཐཱསམྦྷཝཾ ཨཏྠོ ཝེདིཏབྦོ. ཨིདཾ ‘‘སམུདྡོ’’ཏིཨཱདིཀཾ སུཏྟཾ སཾཀིལེསབྷཱགེ ཝིསཡེ ཙ ཨསེཀྑབྷཱགེ ཝིསཡེ ཙ ཝཱཙཀཉཱཔཀབྷཱཝེན པཝཏྟནཏོ སཾཀིལེསབྷཱགིཡཉྩ ཨསེཀྑབྷཱགིཡཉྩ སུཏྟཾ ནཱམ.

‘‘ཨེཏྟཀམེཝཱ’’ཏི ཝཏྟབྦཏྟཱ ‘‘ཚཡིམེ’’ཏིཨཱདི ཝུཏྟཾ. བྷིཀྑཝེ, ལོཀསྨིཾ སཏྟཱནཾ ཨནཡཱཡ ཨནཏྠཱཡ པཱཎཱིནཾ བྱཱབཱདྷཱཡ ཨིམེ མཡཱ ཝུཙྩམཱནཱ བལི༹སཱ ཚ བྷཝནྟི. ཀཏམེ ཚ? བྷིཀྑཝེ, ཙཀྑུཝིཉྙེཡྻཱ ཙཀྑུཝིཉྙཱཎེན ཝིཉྙེཡྻཱ ཨིཊྛཱ ཀནྟཱ ཀཱམནཱིཡཱ མནཱཔཱ མནཝཌྜྷཀཱ པིཡརཱུཔཱ པིཡསབྷཱཝཱ ཀཱམཱུཔསཾཧིཏཱ ཀིལེསཀཱམསཧིཏཱ རཛནཱིཡཱ རཱུཔཱ ནཱིལཱདིརཱུཔཱརམྨཎཱ སནྟི, ཏཾ ཝུཏྟཔྤཀཱརཾ རཱུཔཾ བྷིཀྑུ ཙེ ཨབྷིནནྡཏི སཔྤཱིཏིཀཏཎྷཱཡ ཨབྷིམུཁོ ནནྡཏི, ཙེ ཨབྷིཝདཏི ‘‘ཨཧོ སུཁཾ ཨཧོ སུཁ’’ནྟི ཝདཱཔེནྟིཡཱ ཏཎྷཱཡནཝསེན ཨབྷིཝདཏི, ཙེ ཨཛ྄ཛྷོསཱཡ ཏིཊྛཏི གིལིཏྭཱ ཝིཡ པརིནིཊྛཔེཏྭཱ ཏིཊྛཏི, ཨེཝཾ སཏི, བྷིཀྑཝེ, ཨཡཾ བྷིཀྑུ ‘‘གིལིཏབལི༹སོ…པེ… པཱཔིམཏོ’’ཏི ཝུཙྩཏི. ཨེཏྠ ཙ ནཱིལཱདིབྷེདེན ཨནེཀཝིདྷཏྟཱ ‘‘རཱུཔཱ ཨིཊྛཱ…པེ… རཛནཱིཡཱ’’ཏི བཧུཝཙནནིདྡེསོ ཀཏོཔི རཱུཔཱཡཏནརཱུཔཱརམྨཎབྷཱཝེན ཙ ཙཀྑུཝིཉྙེཡྻབྷཱཝེན ཙ ཨེཀཝིདྷཏཾ ཨནཏིཝཏྟནཏོ ‘‘ཏ’’ནྟི ཨེཀཝཙནནིདྡེསོ ཀཏོཏི ཝེདིཏབྦོ. ‘‘སནྟི, བྷིཀྑཝེ, སོཏཝིཉྙེཡྻཱ’’ཏིཨཱདཱིསུཔི ཨིམིནཱ ནཡེན ཡཐཱསམྦྷཝཾ ཨཏྠོ ཝེདིཏབྦོ. ཨིཏི ཨིམིནཱ སུཏྟཔྤདེསེན ཨཡཾ ཙཀྑུཝིཉྙེཡྻཱདིཀོ ཚབྦིདྷོ བལི༹སོ སཾཀིལེསོ ཀིལེསཧེཏུ དསྶིཏོ.

‘‘ཀེན ཨསེཀྑོ དསྶིཏོ’’ཏི ཝཏྟབྦཏྟཱ ‘‘སནྟི ཙཱ’’ཏིཨཱདི ཝུཏྟཾ.

ཨབྷེདི བྷིནྡི, པརིབྷེདི པརིསམནྟཏོ བྷིནྡི. ཨིཏི ཨིམིནཱ སུཏྟཔྤདེསེན ཨཡཾ ཨརཧཏྟཕལབྷཱུཏོ ཨསེཀྑོ དསྶིཏོ. ཨིདཾ ‘‘ཚཡིམེ’’ཏིཨཱདིཀཾ སུཏྟཾ ཝུཏྟནཡེན སཾཀིལེསབྷཱགིཡཉྩ ཨསེཀྑབྷཱགིཡཉྩ སུཏྟཾ ནཱམ.

༡༠༩. ནཱནཱཝིདྷཾ སཾཀིལེསབྷཱགིཡཉྩ ཨསེཀྑབྷཱགིཡཉྩ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ སཾཀིལེསབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ སཾཀིལེསབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟ’’ནྟིཨཱདི ཝུཏྟཾ.

ཨཡཾ ¶ ལོཀོ སཏྟལོཀོ སནྟཱཔཛཱཏོ ཉཱཏིབྱསནཱདིཝསེན ཛཱཏསོཀསནྟཱཔོ ཙེཝ རཱགཱདིཝསེན ¶ ཛཱཏཔརིལཱ༹ཧསནྟཱཔོ ཙ ཕསྶཔརེཏོ ཨནེཀེཧི དུཀྑསམྥསྶེཧི ཨབྷིབྷཱུཏོ རོདཾ རོདནྟོ ཝདཏི. ཀིནྟི ཝདཏི? ཨཏྟནཱ ཕུཊྛཾ དུཀྑཾ ཨབྷཱཝིཏཀཱཡཏཱཡ ཨདྷིཝཱསེཏུཾ ཨསཀྐོནྟོ ཧུཏྭཱ ‘‘ཨཧོ དུཀྑཾ, ཨཱིདིསཾ དུཀྑཾ མཡ྄ཧཾ སཏྟུནོཔི མཱ ཧོཏཱུ’’ཏིཨཱདིནཱ རོདནྟོ ཝིལཔནྟོ ཝདཏི, ‘‘ཀསྨཱ ཨེཝཾ ཝདཏཱི’’ཏི ཝཏྟབྦཏྟཱ ‘‘ཨཏྟཏོ ཡེན ཡེན ཧི མཉྙནྟཱི’’ཏིཨཱདི ཝུཏྟཾ. ཨེཏེ སཏྟཱ ཡེན ཡེན ཀཱམཛ྄ཛྷོསཱདིནཱ པཀཱརེན ཨཏྟཏོ དུཀྑསྶ པཊིཀཱརཾ མཉྙནྟི, ཏཏོ པཀཱརཏོ ཨཉྙཐཱ ཨཉྙེན པཀཱརེན ཏཾ དུཀྑཾ ཏིཀིཙྪིཏབྦཾ ཧི ཡསྨཱ ཧོཏི.

ཨཉྙཐཱབྷཱཝཱིཏི ཡསྨཱ རོདཾ རོདནྟོ ཝདཏི, ཡེན ཡེན ཝཱ པརཝིཧིཾསཱདིཔཀཱརེན ཨཏྟནོ ཝཌྜྷིཾ མཉྙནྟི ཨཱསཱིསནྟི, ཏཏོ པཀཱརཏོ ཨཉྙཐཱ ཨཝཌྜྷི ཨེཝ ཧོཏི. ཏཾ ཨཱསཱིསིཏབྦཾ ཨཉྙཐཱབྷཱཝི ཨཝཌྜྷིཏབྷཱཝི ཨེཝ ཧི ཡསྨཱ ཧོཏི, ཏསྨཱ མཉྙིཏབྦསྶ ཨཱསཱིསིཏབྦསྶ ཨཉྙཐཱ བྷཝནསཱིལཏྟཱ རོདཾ རོདནྟོ ཝདཏི, ཨཡཾ སཏྟལོཀོ རོདནྟོ ཙ ཧུཏྭཱ ཝདཏི. ‘‘ཀི’’ནྟི པུཙྪིཏབྦཏྟཱ ‘‘བྷཝསཏྟོ’’ཏིཨཱདི ཝུཏྟཾ. བྷཝསཏྟོ ཀཱམབྷཝཱདཱིསུ སཏྟོ ཝིསཏྟོ ལོཀོ བྷཝམེཝ ཀཱམབྷཝཱདིབྷཝམེཝ ཨབྷིནནྡཏི. ཡཾ བྷཝཾ ཨབྷིནནྡཏི, ཏཾ ཛརཱམརཎཱདིཨནེཀབྱསནཱནུབནྡྷཏྟཱ བྷཡཱནཀཊྛེན བྷཡཾ ཧོཏི. ཡསྶ ཡཏོ ཛརཱམརཎཱདིཏོ བྷཱཡཏི, ཏཾ ཛརཱམརཎཱདིདུཀྑསྶ ཨདྷིཊྛཱནབྷཱཝཏོ དུཀྑཾ དུཀྑཱདྷིཊྛཱནཾ ཧོཏི. ཨིཏི ཨིམིནཱ སུཏྟཔྤདེསེན ཨཡཾ སནྟཱཔཱདིཀོ སཾཀིལེསོ སཾཀིལེསཧེཏུ དསྶིཏོ.

སཾཀིལེསོ དསྶིཏོ, ‘‘ཀེན ནིབྦེདྷོ དསྶིཏོ’’ཏི ཝཏྟབྦཏྟཱ ‘‘བྷཝཝིཔྤཧཱནཱཡ ཁོ’’ཏིཨཱདི ཝུཏྟཾ. བྷཝཝིཔྤཧཱནཱཡ ཁོ པན ཀཱམབྷཝཱདིཀསྶ བྷཝསྶ པཛཧནཏྠཱཡ ཨེཝ ཨིདཾ མཡཱ ཨདྷིགཏཾ མགྒབྲཧྨཙརིཡཾ ཝུསྶཏི. ཨིཏི ཨིམིནཱ སུཏྟཔྤདེསེན ཨཡཾ བྲཧྨཙརིཡབྷཱུཏོ མགྒོ ནིབྦེདྷོ དསྶིཏོ.

‘‘བྷཝཝིཔྤཧཱནཱཡཱ’’ཏིཨཱདིནཱ ཨེཀནྟེན ནིཡྻཱནིཀམགྒོ ནིབྦེདྷོ ཨཱཙརིཡེན དསྶིཏོ, ཨམྷེཧི ཙ ཉཱཏོ, ‘‘ཀཏམོ ཨནིཡྻཱནིཀམགྒོ’’ཏི པུཙྪིཏབྦཏྟཱ ‘‘ཡེ ཧི ཀེཙི སམཎཱ ཝཱ’’ཏིཨཱདི ཝུཏྟཾ. ཧི-སདྡོ ཝཱཙཱསིལིཊྛཏྠོ. ཡེ ཀེཙི སམཎཱ ཝཱ ཡེ ཀེཙི བྲཱཧྨཎཱ ཝཱ བྷཝེན ¶ རཱུཔབྷཝེན བྷཝསྶ ཀཱམབྷཝསྶ ཝིཔྤམོཀྑཾ ཨཱཧཾསུ, བྷཝེན ཨརཱུཔབྷཝེན བྷཝསྶ ཀཱམབྷཝསྶ ཙེཝ རཱུཔབྷཝསྶ ཙ ཝིཔྤམོཀྑཾ ཨཱཧཾསུ, སབྦེ ཏེ སམཎཱ ཝཱ སབྦེ ཏེ བྲཱཧྨཎཱ ཝཱ བྷཝསྨཱ ཝུཏྟཔྤཀཱརབྷཝཏོ ཨཝིཔྤམུཏྟཱ བྷཝནྟཱིཏི ཨཧཾ ཝདཱམི.

‘‘རཱུཔབྷཝཱདིནཱ ¶ ཡེ ཙ ཀཱམབྷཝཱདིབྷཝསྶ ཝིཔྤམོཀྑཾ ཨཱཧཾསཱུ’’ཏི ཝཏྟབྦཏྟཱ ཝིབྷཝེན བྷཝསྶ ནིསྶརཎཾ ཨཱཧཾསཱུཏི དསྶེཏུཾ ‘‘ཡེ ཝཱ པནཱ’’ཏིཨཱདི ཝུཏྟཾ. ཡེ ཝཱ པན ཀེཙི སམཎཱ ཝཱ ཡེ ཝཱ པན ཀེཙི བྲཱཧྨཎཱ ཝཱ ཝིབྷཝེན ཨུཙྪེདདིཊྛིཡཱ བྷཝསྶ སཾསཱརབྷཝསྶ ནིསྶརཎཾ ཨཱཧཾསུ, སབྦེ ཏེ སམཎཱ ཝཱ སབྦེ ཏེ བྲཱཧྨཎཱ ཝཱ བྷཝསྨཱ སཾསཱརབྷཝཏོ ཨནིསྶཊཱཝ ཧོནྟཱིཏི ཨཧཾ ཝདཱམི. ‘‘ཀསྨཱ ཨནིསྶཊཱ’’ཏི ཝཏྟབྦཏྟཱ ཨནིསྶཊཀཱརཎཾ དསྶེཏུཾ ‘‘ཨུཔདྷིཾ ཧཱི’’ཏིཨཱདི ཝུཏྟཾ. ཨིདཾ དུཀྑཾ སཾསཱརདུཀྑཾ ཨུཔདྷིཾ ཁནྡྷཱུཔདྷིཀིལེསཱུཔདྷིཨབྷིསངྑཱརཱུཔདྷཡོ པཊིཙྩ ཧི ཡསྨཱ སམྦྷོཏི, ཏསྨཱ ཨནིསྶཊཱ ཧོནྟི. ཨིཏི ཨིམིནཱ སུཏྟཔྤདེསེན ཨཡཾ མིཙྪཱདིཊྛིསངྑཱཏོ སཾཀིལེསོ དསྶིཏོ.

ཡེ ཧི ‘‘ཀེཙཱི’’ཏིཨཱདིནཱ སཾཀིལེསོ དསྶིཏོ, ‘‘ཀེན ནིབྦེདྷོ དསྶིཏོ’’ཏི ཝཏྟབྦཏྟཱ ‘‘སབྦུཔཱདཱནཀྑཡཱ’’ཏིཨཱདི ཝུཏྟཾ. སབྦུཔཱདཱནཀྑཡཱ ཨརིཡམགྒཏོ དུཀྑསྶ སཾསཱརདུཀྑསྶ སམྦྷཝོ ནཏྠི. ཨིཏི ཨིམིནཱ སུཏྟཔྤདེསེན ཨཡཾ ཨརིཡམགྒོ ནིབྦེདྷོ དསྶིཏོ.

‘‘ཝུཏྟཔྤཀཱརཱ ཨཉྙསུཏྟཔྤདེསེནཔི དསྶིཏོ’’ཏི དསྶེཏུཾ ‘‘ལོཀམིམ’’ནྟིཨཱདི ཝུཏྟཾ. པུཐཱུ ཝིསུཾ ཝིསུཾ ཨཝིཛྫཱཡ པརེཏཾ ཨབྷིབྷཱུཏཾ བྷཱུཏརཏཾ བྷཱུཏེསུ ཨིཏྠིཔུརིསེསུ ཨཉྙམཉྙརཏཾ བྷཱུཏཾ ཁནྡྷཔཉྩཀཾ བྷཝེཧི ཨཔརིམུཏྟཾ ཨིམཾ ལོཀཾ མམ ཙིཏྟ ཏྭཾ པསྶ. ཡེ ཀེཙི བྷཝཱ ཨིཏྟརཁཎཱ ཝཱ བྷཝཱ, དཱིགྷཱཡུཀཱ ཝཱ བྷཝཱ, སཱཏཝནྟོ ཝཱ བྷཝཱ, ཨསཱཏཝནྟོ ཝཱ བྷཝཱ པཉྩཀྑནྡྷཱ སབྦདྷི ‘‘ཨུདྡྷཾ ཨདྷོ ཏིརིཡ’’ནྟི ཨིམེསུ སབྦེསུ སབྦཏྠཏཱཡ སབྦཏྠབྷཱཝེན ཨཧེསུཾ, སབྦེ ཏེ ཝུཏྟཔྤཀཱརཱ བྷཝཱ ནིཙྩདྷུཝརཧིཏཏྟཱ ཨནིཙྩཱ སམྤཱིལི༹ཏཏྟཱ དུཀྑཱ ཝིཔརིཎཱམབྷཱཝཏོ ཝིཔརིཎཱམདྷམྨཱ ཨཧེསུཾ. ཨིཏི ཨིམིནཱ སུཏྟཔྤདེསེན ཨཡཾ ཨཝིཛྫཱདིཀོ སཾཀིལེསོ དསྶིཏོ.

‘‘ལོཀམིམ’’ནྟིཨཱདིནཱ སཾཀིལེསོ དསྶིཏོ, ‘‘ཀེན ནིབྦེདྷོ དསྶིཏོ’’ཏི ཝཏྟབྦཏྟཱ ‘‘ཨེཝམེཏ’’ནྟིཨཱདི ཝུཏྟཾ. ཨེཝཾ ཝུཏྟཔྤཀཱརེན ཨེཏཾ ཁནྡྷཔཉྩཀཾ ¶ ཡཐཱབྷཱུཏཾ སམྨཔྤཉྙཱཡ སསྶ ཨཏྟནོ མགྒཔཉྙཱཡ, ཝིཔསྶནཱཔཉྙཱཡ ཝཱ པསྶཏོ པསྶནྟསྶ པུགྒལསྶ བྷཝཏཎྷཱ པཧཱིཡཏི, སམྨཔྤཉྙཱཡ ཡཐཱབྷཱུཏཾ ཁནྡྷཔཉྩཀཾ པསྶནྟོ ཝིབྷཝཾ ཨུཙྪེདདིཊྛིཾ ནཱབྷིནནྡཏི ན པཏྠེཏི. ཏསྶ པུགྒལསྶ སབྦསོ ཏཎྷཱནཾ ཁཡཱ ཨསེསཝིརཱགནིརོདྷོ ཨསེསཝིརཱགསངྑཱཏེན མགྒེན ནིརོདྷོ ནིརུཛ྄ཛྷནཾ ནིབྦཱནཾ ནིབྦུཏི ཧོཏི. ཨིཏི ཨིམིནཱ སུཏྟཔྤདེསེན ཨཡཾ མགྒོ ནིབྦེདྷོ དསྶིཏོ.

‘‘ཨེཝམེཏ’’ནྟིཨཱདིནཱ ¶ ནིབྦེདྷོ དསྶིཏོ, ‘‘ཀེན ཨསེཀྑོ དསྶིཏོ’’ཏི ཝཏྟབྦཏྟཱ ‘‘ཏསྶ ནིབྦུཏསྶཱ’’ཏིཨཱདི ཝུཏྟཾ. ཏཎྷཱདིཊྛིནིབྦུཏསྶ ཏསྶ བྷིཀྑུནོ ཨནུཔཱདཱ ཀིལེསཱབྷིསངྑཱརཱནཾ ཨནུཔྤཱདནཏོ ཨགྒཧཎཏོ པུནབྦྷཝོ ན ཧོཏི, ཨེཝཾབྷཱུཏེན ཨརིཡཔུགྒལེན པུབྦེ ཨཏྟཱནཾ ཨབྷིབྷཱུཏོ པཉྩཝིདྷོ མཱརོ ཝིཛིཏོ ཨཧོསི, ཨནེན ཨརིཡཔུགྒལེན པཉྩཧི མཱརེཧི སངྒཱམོ ཝིཛིཏོ, སངྒཱམེ, ཨིཊྛཱནིཊྛཱདཱིསུ ཝཱ ཏཱདཱི ཏཱདིལཀྑཎཔྤཏྟོ ཨརིཡཔུགྒལོ སབྦབྷཝཱནི ཨུཔཙྩགཱ ཨཏིཀྐནྟོཝ ཛཱཏོ. ཨིཏི ཨིམིནཱ སུཏྟཔྤདེསེན ཨཡཾ ཨསེཀྑོ དསྶིཏོ. ཨིདཾ ཝུཏྟཔྤཀཱརཾ ‘‘ཨཡཾ ལོཀོ’’ཏིཨཱདིཀཾ སུཏྟཾ སཾཀིལེསབྷཱགེ ཝིསཡེ ཙ ནིབྦེདྷབྷཱགེ ཝིསཡེ ཙ ཨསེཀྑབྷཱགེ ཝིསཡེ ཙ ཝཱཙཀཉཱཔཀབྷཱཝེན ཨེཀདེསཝསེན པཝཏྟནཏོ སཾཀིལེསབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟཾ ནཱམ.

‘‘ཨེཏྟཀམེཝཱ’’ཏི ཝཏྟབྦཏྟཱ ‘‘ཙཏྟཱརོམེ’’ཏིཨཱདི ཝུཏྟཾ. ཨནྡྷཔུཐུཛྫནོ སཾསཱརསོཏསྶ ཨནུཀཱུལབྷཱཝེན གཙྪནཏོ ཨནུསོཏགཱམཱི ནཱམ, ཀལྱཱཎཔུཐུཛྫནོ སཾསཱརསོཏསྶ ནིབྦིདཱནུཔསྶནཱདཱིཧི པཊིཀྐཱུལཝསེན པཝཏྟནཏོ པཊིསོཏགཱམཱི ནཱམ, སེཀྑོ ཨཙལཔྤསཱདཱདིསམནྣཱགམེན ཋིཏསབྷཱཝཏྟཱ ཋིཏཏྟོ ནཱམ, ཨསེཀྑོ སཾསཱརཔཱརངྒཏཝསེན ཏིཊྛནཏོ ‘‘ཐལེ ཏིཊྛཏཱི’’ཏི ཝུཙྩཏི.

‘‘ཏེསུ ཙཏཱུསུ པུགྒལེསུ ཀཏམོ པུགྒལོ སཾཀིལེསབྷཱགིཡཱདཱི’’ཏི ཝཏྟབྦབྷཱཝཏོ ‘‘ཏཏྠ ཡོཡ’’ནྟིཨཱདི ཝུཏྟཾ.

༡༡༠. ནཱནཱཝིདྷཾ སཾཀིལེསབྷཱགིཡཉྩ ནིབྦེདྷབྷཱགིཡཉྩ ཨསེཀྑབྷཱགིཡཉྩ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ སཾཀིལེསབྷཱགིཡཉྩ ཝཱསནཱབྷཱགིཡཉྩ ནིབྦེདྷབྷཱགིཡཉྩ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམ’’ནྟིཨཱདི ཝུཏྟཾ.

ཨབྷིཛཱཏིཡོ ¶ པུགྒལཱ ཚ སཾཝིཛྫནྟི ལོཀསྨིཾ, ཀཎྷེ ནཱིཙེ ཀུལེ ནིབྦཏྟོ ཀཎྷཱབྷིཛཱཏིཀོ, ཀཎྷདྷམྨསམནྣཱགཏཏྟཱ ཝཱ ཀཎྷོ ཀཎྷཱབྷིཛཱཏིཀོ ཧུཏྭཱ ཀཎྷཾ ཀཱལ༹ཀཾ དསཝིདྷཾ དུསྶཱིལྱདྷམྨཾ ཨབྷིཛཱཡཏི པསཝཏི, ཨེསོ པུགྒལོ ཨཏྠི. ཝུཏྟཔྤཀཱརེན ཀཎྷོ ཀཎྷཱབྷིཛཱཏིཀོ ཧུཏྭཱ སུཀྐཾ དསཝིདྷཾ ཀུསལདྷམྨཾ ཨབྷིཛཱཡཏི, ཨེསོ པུགྒལོ ཨཏྠི. ཀཎྷོ ཀཎྷཱབྷིཛཱཏིཀོ ཧུཏྭཱ ཨཀཎྷཾ ཨསུཀྐཾ ཨཀཎྷཨསུཀྐཝིཔཱཀཾ ཨཙྩནྟདིཊྛཾ ནིབྦཱནཾ ཨཱརཱདྷེཏི, ཨེསོ པུགྒལོ ཨཏྠི. ཝུཏྟཝིཔརིཡཱཡེན ཏཡོ པུགྒལཱ ཛཱནིཏབྦཱ.

‘‘ཏེསུ ¶ ཀཏམེ པུགྒལཱ སཾཀིལེསབྷཱགིཡཱ’’ཏིཨཱདིནཱ ཝཏྟབྦཏྟཱ ‘‘ཏཏྠ ཡོ ཙཱ’’ཏིཨཱདི ཝུཏྟཾ.

‘‘ཨེཏྟཀམེཝཱ’’ཏི ཝཏྟབྦཏྟཱ ‘‘ཙཏྟཱརིམཱནཱི’’ཏིཨཱདི ཝུཏྟཾ.

༡༡༡. ནཱནཱཝིདྷཾ སཾཀིལེསབྷཱགིཡཉྩ ཝཱསནཱབྷཱགིཡཉྩ ནིབྦེདྷབྷཱགིཡཉྩ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ ཝཱསནཱབྷཱགིཡཉྩ ནིབྦེདྷབྷཱགིཡཉྩ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ ཝཱསནཱབྷཱགིཡཉྩ ནིབྦེདྷབྷཱགིཡཉྩཱ’’ཏིཨཱདི ཝུཏྟཾ.

མཱནུསཏྟཾ མནུསྶབྷཱཝཾ ལདྡྷཱན ཀིཙྩཾ, ཨཀིཙྩཉྩ དྭེ བྷཝནྟི, དྭེ ཀིཙྩཱནིཡེཝ ཀཏྟབྦཱནི. ཏེནཱཧ ཨཊྛཀཐཱཙརིཡོ (ནེཏྟི. ཨཊྛ. ༡༡༡) ‘‘ཀཏྟབྦ’’ནྟི དསྶེཏི. ‘‘ཀཏམཾ ཀཏྟབྦཾ ཀིཙྩ’’ནྟི ཝཏྟབྦཏྟཱ ཀཏྟབྦཀིཙྩཾ དསྶེཏུཾ ‘‘སུཀིཙྩཾ ཙེཝཱ’’ཏིཨཱདི ཝུཏྟཾ. པུཉྙཱནི ཙ ཀཏྟབྦཏྟཱ སུཀིཙྩཾ ཨེཝ, སཾཡོཛནཝིཔྤཧཱནཾ ཝཱ ཀཏྟབྦཏྟཱ སུཀིཙྩཾ ནཱམཱཏི ཡོཛནཱ.

‘‘ཏཏྠ སུཏྟེ ཀཏམེན ཀཏམོ དསྶིཏོ’’ཏི ཝཏྟབྦཏྟཱ ‘‘སུཀིཙྩཾཙེཝ པུཉྙཱནཱིཏི ཝཱསནཱ, སཾཡོཛནཝིཔྤཧཱནཾ ཝཱཏི ནིབྦེདྷོ’’ཏི ཝུཏྟོ.

‘‘ཨེཏྟཀམེཝཱ’’ཏི ཝཏྟབྦཏྟཱ ‘‘པུཉྙཱནི ཀརིཏྭཱནཱ’’ཏིཨཱདི ཝུཏྟཾ. པུཉྙཱནི ཀརིཏྭཱན ཀཏཔུཉྙཱ པུགྒལཱ སགྒཱ སགྒཏོ སགྒཾཡེཝ ཝཛནྟི. སཾཡོཛནཔྤཧཱནཱ ཨརིཡཱ ཛརཱམརཎཱ ཛརཱམརཎཏོ ཝིཔྤམུཙྩནྟི.

‘‘ཏཏྠ སུཏྟེ ཀཏམེན ཀཏམོ དསྶིཏོ’’ཏི ཝཏྟབྦཏྟཱ ‘‘པུཉྙཱནི ཀརིཏྭཱན, སགྒཱ སགྒཾ ཝཛནྟི ཀཏཔུཉྙཱ’ཏི ཝཱསནཱ, ‘སཾཡོཛནཔྤཧཱནཱ, ཛརཱམརཎཱ ཝིཔྤམུཙྩནྟཱི’ཏི ནིབྦེདྷོ’’ཏི ཝུཏྟཾ.

‘‘ཨེཏྟཀམེཝཱ’’ཏི ¶ ཝཏྟབྦཏྟཱ ‘‘དྭེམཱནཱི’’ཏིཨཱདི ཝུཏྟཾ. ‘‘ཀཏམེན ཀཏམོ དསྶིཏོ’’ཏི ཝཏྟབྦཏྟཱ ‘‘ཏཏྠ ཡོ…པེ… ཨཡཾ ནིབྦེདྷོ’’ཏི ཝུཏྟཾ.

ནཱནཱཝིདྷཾ ཝཱསནཱབྷཱགིཡཉྩ ནིབྦེདྷབྷཱགིཡཉྩ སུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ ¶ , ‘‘ཀཏམཾ ཏཎྷཱསཾཀིལེསབྷཱགིཡཾ སུཏྟ’’ནྟི པུཙྪིཏབྦཏྟཱ ‘‘ཏཏྠ ཏཎྷཱསཾཀིལེསབྷཱགིཡ’’ནྟིཨཱདི ཝུཏྟཾ. ཏཏྠཱཏི ཏེསུ སོལ༹སསུ སཾཀིལེསབྷཱགིཡཱདཱིསུ སུཏྟེསུ ཏཎྷཱསཾཀིལེསབྷཱགིཡཾ སུཏྟཾ ཏཎྷཱཔཀྑེནེཝ ནིདྡིསིཏབྦཾ, བཧུཝིསཡཏྟཱ ནིཡམེཏྭཱན ནིདྡྷཱརེསྶཱམཱིཏི ཝུཏྟཾ ཧོཏི. ‘‘ཀེན པཀཱརེན ནིདྡིསིཏབྦ’’ནྟི ཝཏྟབྦཏྟཱ ‘‘ཏཱིཧི ཏཎྷཱཧཱི’’ཏིཨཱདི ཝུཏྟཾ. བྷཝཏཎྷཱཡཱཏི རཱུཔབྷཝཏཎྷཱཡ. ཝིབྷཝཏཎྷཱཡཱཏི ཨརཱུཔབྷཝཏཎྷཱཡ. ཡེན ཡེན ཝཱ པན ཝཏྠུནཱ ཏཎྷཱཔབྷེདཨུཙྪེདཱདིཝཏྠུནཱ ཨཛ྄ཛྷོསིཏཱ བྷཝཏཎྷཱདིཝསེན ཨཛ྄ཛྷོསིཏཱ, ཏེན ཏེན པཀཱརེན ཏཎྷཱདིནཱ ཝཱ ཏཎྷཱཔབྷེདཨུཙྪེདཱདིཝཏྠུནཱ ཝཱ ཏཎྷཱསཾཀིལེསབྷཱགིཡཾ སུཏྟཾ ནིདྡིསིཏབྦཾ.

ཏཎྷཱསཾཀིལེསབྷཱགིཡཾ སུཏྟཾ ཏཎྷཱཔཀྑེནེཝ ནིདྡིསིཏབྦནྟི ཨཱཙརིཡེན ཝུཏྟཾ, ཨམྷེཧི ཙ ལཀྑིཏཾ, ‘‘དིཊྛིསཾཀིལེསབྷཱགིཡཾ སུཏྟཾ ཀེན པཀྑེན ནིདྡིསིཏབྦ’’ནྟི ཝཏྟབྦཏྟཱ ‘‘ཏཏྠ དིཊྛིསཾཀིལེསབྷཱགིཡ’’ནྟིཨཱདི ཝུཏྟཾ. ཡེན ཡེན ཝཱ པན ཝཏྠུནཱཏི དིཊྛིཔྤབྷེདཨམརཱཝིཀྑེཔཱདིཝཏྠུནཱ.

དིཊྛིསཾཀིལེསབྷཱགིཡཾ སུཏྟཾ དིཊྛིཔཀྑེནེཝ ནིདྡིསིཏབྦནྟི ཨཱཙརིཡེན ཝུཏྟཾ, ཨམྷེཧི ཙ ལཀྑིཏཾ, ‘‘དུཙྩརིཏསཾཀིལེསབྷཱགིཡཾ སུཏྟཾ ཀེན པཀཱརེན ནིདྡིསིཏབྦ’’ནྟི ཝཏྟབྦཏྟཱ ‘‘ཏཏྠ དུཙྩརིཏསཾཀིལེསབྷཱགིཡ’’ནྟིཨཱདི ཝུཏྟཾ. ཏཐེཝ ཝཏྟབྦཏྟཱ ‘‘ཏཏྠ ཏཎྷཱཝོདཱནབྷཱགིཡ’’ནྟིཨཱདི ཝུཏྟཾ, ‘‘དིཊྛིཝོདཱནབྷཱགིཡ’’ནྟིཨཱདི ཝུཏྟཾ, ‘‘དུཙྩརིཏཝོདཱནབྷཱགིཡ’’ནྟིཨཱདི ཝུཏྟཾ.

༡༡༢. ཡསྨིཾ སཱསནཔཊྛཱནེ ཨཊྛཱརས མཱུལཔདཱ དཊྛབྦཱ, ཏཾ སཱསནཔཊྛཱནཾ སོལ༹སཧི སཾཀིལེསབྷཱགིཡཱདཱིཧི སུཏྟེཧི ཨེཀདེསནིདྡྷཱརཎཝསེན ཝིབྷཛིཏཾ, ཨམྷེཧི ཙ ཉཱཏཾ, ‘‘ཀིཾ པན ཏཾ སཱསནཔཊྛཱནཾ ཏེཧི སོལ༹སཧི ཨེཝ སཾཀིལེསབྷཱགིཡཱདཱིཧི ཝིབྷཛིཏབྦཾ, ཨུདཱཧུ ཨཉྙེཧི སུཏྟེཧིཔི ཝིབྷཛིཏབྦ’’ནྟི ཝཏྟབྦཏྟཱ ཨཉྙེཧི ཨཊྛཝཱིསསུཏྟེཧིཔི ཝིབྷཛིཏུཾ ‘‘ཏཏྠ ཀཏམེ ཨཊྛཱརས མཱུལཔདཱ? ལོཀིཡཾ ལོཀུཏྟར’’ནྟིཨཱདི ཝུཏྟཾ ¶ . ‘‘ཡདི ཨཉྙེཧིཔི ཨཊྛཝཱིསསུཏྟེཧི ཝིབྷཛིཏབྦཾ, ཨེཝཾ སཏི ‘ལོཀིཡ’ནྟིཨཱདིཝཙནམེཝ ཝཏྟབྦཾ, ཀསྨཱ ‘ཏཏྠ ཀཏམེ ཨཊྛཱརས མཱུལཔདཱ’ཏི ཝུཏྟཱ’’ཏི ཙེ? ཏསྶ སཱསནཔཊྛཱནཝིབྷཱགོ ཨཊྛཱརསཧི མཱུལཔདེཧི སངྒཧིཏོ, ཨཊྛཱརས མཱུལཔདཱཔི ཝིབྷཛིཏེ སཱསནཔཊྛཱནེ དཊྛབྦཱ, ཏསྨཱ མཱུལཔདཱ ཝིབྷཏྟཱཡེཝ. ཏཱནི མཱུལཔདཱནི ཝིབྷཛིཏུཾ ‘‘ཏཏྠ ཀཏམེ ཨཊྛཱརས མཱུལཔདཱ’’ཏི ཝུཏྟཾ. ཨཊྛཀཐཱཡཾ (ནེཏྟི. ཨཊྛ. ༡༡༢) པན –

‘‘ཨེཝཾ ¶ སོལ༹སཝིདྷེན སཱསནཔཊྛཱནཾ ནཱནཱསུཏྟེཧི ཨུདཱཧརཎཝསེན ཝིབྷཛིཏྭཱ ཨིདཱནི ཨཊྛཝཱིསཏིཝིདྷེན སཱསནཔཊྛཱནཾ དསྶེནྟེན ཡསྨཱ ཨཡམྤི པཊྛཱནཝིབྷཱགོ མཱུལཔདེཧི སངྒཧིཏོ, ན ཨིམསྶཱཔི ཏེཧི ཨསངྒཧིཏོ པདེསོ ཨཏྠི, ཏསྨཱ མཱུལཔདཾ, ཝིབྷཛིཏབྦཏཉྩ དསྶེཏུཾ ‘ཏཏྠ ཀཏམེ ཨཊྛཱརས མཱུལཔདཱ’ཏི པུཙྪཱཡ ཝསེན མཱུལཔདཱནི ཨུདྡྷརིཏྭཱ ‘ལོཀིཡཾ ལོཀུཏྟར’ནྟིཨཱདིནཱ ནཝ ཏིཀཱ, ཐཝོ ཙཱཏི ཨཊྛཝཱིསཏིཝིདྷཾ སཱསནཔཊྛཱནཾ ཨུདྡིཊྛ’’ནྟི –

ཝུཏྟཾ. ཏཏྠཱཏི ཏེསུ སོལ༹སཧཱརཔཉྩཀནཡཨཊྛཱརསམཱུལཔདེསུ ཀཏམཱནི པདཱནི མཱུལཔདཱནི ཧོནྟཱིཏི པུཙྪཏི. ལོཀེ ནིཡུཏྟོ སབྷཱཝདྷམྨོཏི ལོཀིཡོ, ལོཀེ ཝཱ ཝིདཱུཧི ཝིདིཏོ སབྷཱཝོཏིཔི ལོཀིཡོ, ལོཀིཡོ སབྷཱཝདྷམྨོ ཨསྶ ཝིསེསསུཏྟསྶ ཨཏྠཱིཏི ཏཾ ཝིསེསསུཏྟཾ ལོཀིཡཾ ནཱམ. ཨེས ནཡོ ‘‘ལོཀུཏྟར’’ནྟིཨཱདཱིསུཔི ཝེདིཏབྦོ. ཛཱནཱཏཱིཏི ཉཱཎཾ, ཉཱཎཾ ཨསྶ ཝིསེསསུཏྟསྶ ཨཏྠཱིཏི ཉཱཎཾ. ཉཱཏབྦཱཏི ཉེཡྻཱ, ཉེཡྻཱ ཨསྶ ཝིསེསསུཏྟསྶ ཨཏྠཱིཏི ཉེཡྻཾ. ཨེསེཝ ནཡོ – ‘‘ཉཱཎཉྩ ཉེཡྻཉྩཱ’’ཏི ཨེཏྠཱཔི ཝེདིཏབྦོ. ནིབྦཱནཾ པཋམཾ པསྶཏཱིཏི དསྶནཾ, པཋམམགྒཉཱཎཾ, དསྶནཾ ཨསྶ ཝིསེསསུཏྟསྶ ཨཏྠཱིཏི དསྶནཾ. བྷཱཝནཱ ཨསྶ ཝིསེསསུཏྟསྶ པཱལི༹ཡཱ ཨཏྠཱིཏི བྷཱཝནཱ. ‘‘དསྶནཉྩ བྷཱཝནཱ ཙཱ’’ཏི ཨེཏྠཱཔི ཨེས ནཡོ ཝེདིཏབྦོ. སསྶ ཨཏྟནོ ཝཙནནྟི སཀཾ, སཀཾ ཝཙནཾ སཀཝཙནཾ, བྷགཝཏོ ཝཙནནྟི ཨཏྠོ. པརསྶ ཝཙནཾ པརཝཙནཾ. ཝིསྶཛྫནཱིཡོ ཨསྶ ཝིསེསསུཏྟསྶ ཨཏྠཱིཏི ཝིསྶཛྫནཱིཡཾ. ནཏྠི ཝིསྶཛྫནཱིཡོ ཨསྶ ཝིསེསསུཏྟསྶཱཏི ཨཝིསྶཛྫནཱིཡཾ. ཀམྨཾ ཨསྶ ཝིསེསསུཏྟསྶ ཨཏྠཱིཏི ཀམྨཾ. ཝིཔཱཀོ ཨསྶ པཱཋསྶ ཨཏྠཱིཏི ཝིཔཱཀོ ¶ . སེསེསུཔི ཨསྶཏྠིཨཏྠོ གཧེཏབྦོ. ཨཐ ཝཱ ལོཀིཡཱདིཨཏྠོ མུཁྱཏྠོ, ཏཾཝཱཙཀསུཏྟམྤི ཋཱནྱཱུཔཙཱརེན ཝུཏྟཾ. བུདྡྷཱདཱིནཾ གུཎེ ཨབྷིཏྠཝཏི ཨེཏེན སུཏྟཔྤདེསེནཱཏི ཐཝོ, སུཏྟཔྤདེསོ.

‘‘ཏེསུ ཨཊྛཝཱིསཏིཝིདྷེསུ ལོཀིཡཱདཱིསུ སཱསནཔཊྛཱནསུཏྟེསུ ཀཏམཾ སུཏྟཾ ལོཀིཡཾ སུཏྟ’’ནྟི པུཙྪིཏབྦཏྟཱ ‘‘ཏཏྠ ཀཏམཾ ལོཀིཡ’’ནྟིཨཱདི ཝུཏྟཾ. ཏཏྠཱཏི ཏེསུ ཨཊྛཝཱིསཏིཝིདྷེསུ ལོཀིཡཱདཱིསུ སཱསནཔཊྛཱནསུཏྟེསུ ཀཏམཾ སུཏྟཾ ལོཀིཡཾ སཱསནཔཊྛཱནཾ སུཏྟནྟི པུཙྪཏི.

བྷིཀྑཝེ, དྷེནུཡཱ ཐནེཧི ནིཀྑནྟཾ སཛྫུཁཱིརཾ ནིཀྑནྟཀྑཎེ ན མུཙྩཏི ན པརིཎམཏི ཁཱིརབྷཱཝཾ པཛཧིཏྭཱ དདྷིབྷཱཝཾ ན པཱཔུཎཱཏི, ཏཀྐཱདིཨམྦིལསམཱཡོགཏོ པཙྪཱ ཁཱིརབྷཱཝཾ པཛཧཏི དདྷིབྷཱཝཾ པཱཔུཎཱཏི ཨིཝ, ཨེཝཾ ཡེན བཱལེན པཱཔཾ ཡཾ ཀམྨཾ ཀཏཾ, ཏཾ ཀམྨཾ ཀརཎཀྑཎེ ¶ ཏསྶ བཱལསྶ ཨཔཱཡདུཀྑཱདིནིབྦཏྟཱཔནཝསེན ན ཝིཔཙྩཏི. དུཏིཡེ པན ཝཱ ཏཏིཡཱདིམྷི ཝཱ ཨཏྟབྷཱཝེ ཝིཔཙྩཏི. བྷསྨཙྪནྣོ ཚཱརིཀཱཡ པཊིཙྪནྣོ པཱཝཀོ ཨགྒི ཨཀྐནྟཾ ཛནཾ ཨཀྐམནཀྑཎེ ན ཌཧཏི. ཚཱརིཀཾ པན ཏཱཔེཏྭཱ ཀཱལནྟརེ ཌཧཏི ཨིཝ, ཨེཝཾ ཡེན བཱལེན པཱཔཾ ཡཾ ཀམྨཾ ཀཏཾ, ཏཾ ཀམྨཾ ཀརཎཀྑཎེ ཏཾ བཱལཾ ཨཔཱཡདུཀྑཱདིནིབྦཏྟཱཔནཝསེན ཌཧཱཔེནྟཾ ཧུཏྭཱ ན ཨནྭེཏི. དུཏིཡེ ཝཱ ཏཏིཡཱདིམྷི ཝཱ ཨཏྟབྷཱཝེ ཨཔཱཡདུཀྑཱདིནིབྦཏྟཱཔནཝསེན ཌཧཱཔེནྟཾ ཧུཏྭཱ ཌཧནྟཾ ཏཾ བཱལཾ ཏཾ ཨནྭེཏཱིཏི ཡོཛནཱ. ཨིདཾ ‘‘ན ཧི…པེ… པཱཝཀོ’’ཏི སུཏྟཾ ལོཀིཡེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ལོཀིཡཾ ནཱམ.

‘‘ཨེཏྟཀམེཝ ལོཀིཡ’’ནྟི ཝཏྟབྦཏྟཱ ‘‘ཙཏྟཱརིམཱནཱི’’ཏིཨཱདི ཝུཏྟཾ. ཨཏྠོ པཱཀཊོ. ཨིདཾ ‘‘ཙཏྟཱརིམཱནི…པེ… ཀཱལ༹པཀྑེཝ ཙནྡིམཱ’’ཏི སུཏྟཾ ལོཀིཡེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ལོཀིཡཾ ནཱམ.

‘‘ཨེཝཾ དུཝིདྷཾཡེཝ ལོཀིཡ’’ནྟི ཝཏྟབྦཏྟཱ ‘‘ཨཊྛིམེ, བྷིཀྑཝེ, ལོཀདྷམྨཱ’’ཏིཨཱདི ཝུཏྟཾ. ཨཏྠོ པཱཀཊོ. ཨིདཾ ‘‘ཨཊྛིམེ’’ཏིཨཱདིཀཾ སུཏྟཾ ལོཀིཡེསུ ཨཊྛཝིདྷེསུ ཨཏྠེསུ ཝཱཙཀཉཱཔཀབྷཱཝེན པཝཏྟནཏོ ལོཀིཡཾ ནཱམ.

ནཱནཱཝིདྷཾ ལོཀིཡཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ སུཏྟཾ ལོཀུཏྟར’’ནྟི ཝཏྟབྦཏྟཱ ‘‘ཏཏྠ ཀཏམཾ ལོཀུཏྟར’’ནྟིཨཱདི ཝུཏྟཾ ¶ . ཨིཏོ པརེསུཔི ཨེས ནཡོ ཝེདིཏབྦོ. ཏཏྠཱཏི ཏེསུ ཨཊྛཝཱིསཏིཝིདྷེསུ ལོཀིཡཱདཱིསུ སུཏྟེསུ.

ཚེཀེན སཱརཐིནཱ སུདནྟཱ ཨསྶཱ སམཐངྒཏཱ ཡཐཱ, ཨེཝཾ པཧཱིནམཱནསྶ པཧཱིནནཝཝིདྷམཱནསྶ ཡསྶ ཨནཱསཝསྶ བྷིཀྑུནོ ཨིནྡྲིཡཱནི ཚབྦིདྷཱནི ཙཀྑུནྡྲིཡཱདཱིནི སམཐངྒཏཱནི. ཏཱདིནོ ཏཱདིལཀྑཎེན སམནྣཱགཏསྶ ཨནཱསཝསྶ ཏསྶ བྷིཀྑུནོ དེཝཱཔི མནུསྶཱཔི པིཧཡནྟཱིཏི ཡོཛནཱ. ཨིདཾ ‘‘ཡསྶིནྡྲིཡཱནཱི’’ཏིཨཱདིཀཾ སུཏྟཾ ལོཀུཏྟརེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ལོཀུཏྟརཾ ནཱམ.

‘‘ཨེཏྟཀམེཝཱ’’ཏི ཝཏྟབྦཏྟཱ ‘‘པཉྩིམཱནི བྷིཀྑཝེ ཨིནྡྲིཡཱནཱི’’ཏིཨཱདི ཝུཏྟཾ. ཨིདཾ ‘‘པཉྩིམཱནཱི’’ཏིཨཱདིཀཾ སུཏྟམྤི ལོཀུཏྟརེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ལོཀུཏྟརཾ ནཱམ. (༡)

‘‘ལདྡྷཱན ¶ མཱནུསཏྟཾ དྭེ, ཀིཙྩཾ ཨཀིཙྩམེཝ ཙཱ’’ཏིཨཱདིཀཱ དྭེ གཱཐཱ ཝུཏྟཱ. ཨིཧ གཱཐཱསུ ‘‘སུཀིཙྩཾ ཙེཝ པུཉྙཱནཱི’’ཏི ཡཾ གཱཐཱཔདཉྩ ‘‘པུཉྙཱནི ཀརིཏྭཱན, སགྒཱ སགྒཾ ཝཛནྟི ཀཏཔུཉྙཱ’’ཏི ཡཾ གཱཐཱཔདཉྩ ཝུཏྟཾ, ཨིདཾ གཱཐཱཔདཾ ལོཀིཡེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ལོཀིཡཾ ནཱམ.

ཨིཧ གཱཐཱསུ ‘‘སཾཡོཛནཝིཔྤཧཱནཾ ཝཱ’’ཏི ཡཾ གཱཐཱཔདཉྩ ‘‘སཾཡོཛནཝིཔྤཧཱནཱ, ཛརཱམརཎཱ ཝིཔྤམུཙྩནྟཱི’’ཏི ཡཾ གཱཐཱཔདཉྩ ཝུཏྟཾ, ཨིདཾ གཱཐཱཔདཾ ཝུཏྟནཡེན ལོཀུཏྟརཾ ནཱམ. ཨིདཾ ‘‘ལདྡྷཱནཱ’’ཏིཨཱདིཀཾ ཝུཏྟཔྤཀཱརེན ལོཀིཡཉྩ ལོཀུཏྟརཉྩ.

བྷིཀྑཝེ, ཝིཉྙཱཎེ ཨཱཧཱརེ ཨཱཧཱརཔཊིབདྡྷེ ཚནྡརཱགེ སཏི ནཱམརཱུཔསྶ ཨཝཀྐནྟི ཧོཏི. ‘‘ཝིཉྙཱཎེ…པེ… ཧོཏཱི’’ཏི ཨིདཾ ཝུཏྟནཡེན ལོཀིཡཾ ནཱམ. ‘‘ཝིཉྙཱཎེ…པེ… ནིརོདྷོ’’ཏི ཨིདཾ སུཏྟཾ ལོཀུཏྟརཾ ནཱམ. ཨིདཾ ‘‘ཝིཉྙཱཎེ ཙེ བྷིཀྑཝེ’’ཏིཨཱདིཀཾ སུཏྟཾ ལོཀིཡེ ཨཏྠེ ཙ ལོཀུཏྟརེ ཨཏྠེ ཙ ཨེཀདེསཝསེན ཝཱཙཀཉཱཔཀཝསེན པཝཏྟནཏོ ལོཀིཡཉྩ ལོཀུཏྟརཉྩ. (༢)

༡༡༣. སཏྟལོཀེ སབྦཱ དིསཱ ཨནུཔརིགམྨ ཀྭཙི དིསཱཡཾ ཙེཏསཱ ཨཏྟནཱ ཨཏྟཏོ པིཡཏརཾ ཨཉྙཾ ནེཝ ཨཛ྄ཛྷགཱ, ཨཏྟཱཝ པིཡཏརོ ཡཐཱ ¶ , ཨེཝཾ པརེསཾ སཏྟཱནཾ པུཐུ ཝིསུཾ ཝིསུཾ ཨཏྟཱཝ པིཡོ པིཡཏརོ, ཏསྨཱ ཨཏྟནོཝ པིཡཏརཏྟཱ ཨཏྟཀཱམོ ཨཏྟནོ ཧིཏཀཱམོ པཎྜིཏོ སཏྟལོཀོ ཨཏྟཱནཾ ཨུཔམཾ ཀཏྭཱ པརཾ ན ཧིཾསེ ན ཧིཾསེཡྻཱཏི ཡོཛནཱ. ཨིདཾ ‘‘སབྦཱ དིསཱ’’ཏིཨཱདིཀཾ སུཏྟཾ སཏྟེསུ ཝཱཙཀཉཱཔཀབྷཱཝེན པཝཏྟནཏོ སཏྟཱདྷིཊྛཱནཾ ནཱམ.

ཡེ ཀེཙི ཁཱིཎཱསཝཱ པུགྒལཱ བྷཱུཏཱཝ ན བྷཝིསྶནྟི, སབྦེ ཏེ ཁཱིཎཱསཝཱ པུགྒལཱ དེཧཾ ཨཏྟབྷཱཝཾ པཧཱཡ ནིབྦཱནཾ གམིསྶནྟི. ཡེ ཙ པུཐུཛྫནཱདཡོ སཏྟཱ པུནབྦྷཝེསུ བྷཝིསྶནྟི, སབྦེ ཏེ པུཐུཛྫནཱདཡོ སཏྟཱ དེཧཾ ཨཏྟབྷཱཝཾ པཧཱཡ པརལོཀཾ གམིསྶནྟི, ཏཾ སབྦཛཱནིཾ སབྦསྶ སཏྟསྶ ཧཱནིཾ མརཎཾ, ཝིནཱསཾ ཝཱ ཀུསལོ ཡོ པུགྒལོ ཝིཛཱནཱཏི, སོ ཀུསལོ པུགྒལོ ཏཾ སབྦཛཱནིཾ ཝིདིཏྭཱ ཨཱཏཱཔིཡོ བྲཧྨཙརིཡཾ ཙརེཡྻཱཏི ཡོཛནཱ. ཨིདཾ ‘‘ཡེ ཀེཙཱི’’ཏིཨཱདིཀཾ ཝུཏྟནཡེན སཏྟཱདྷིཊྛཱནཾ.

སཏྟཧི ཨངྒེཧི སམནྣཱགཏཾ ཀལྱཱཎམིཏྟཾ ཡཱཝཛཱིཝཾ ཀུསལེན པུགྒལེན ན ཝིཛཧིཏབྦཾ. ཀཏམེཧི སཏྟཧི? པརིསུདྡྷསཱིལསམྤཏྟིཔརིསུདྡྷདིཊྛིསམྤཏྟཱིཧི སམནྣཱགཏཏྟཱ པིཡོ ཙ པིཡཱཡིཏབྦོ ¶ ཙ ཧོཏི, པཱསཱཎཚཏྟཾ ཝིཡ གརུ ཙ ཧོཏི, སམྦྷཱཝེཏབྦཏཱཡ བྷཱཝནཱིཡོ ཙ ཧོཏི, ‘‘ཀཱལེན ཝདཱམི, ནོ ཨཀཱལེནཱ’’ཏིཨཱདིཀེ པཉྩདྷམྨེ ཨཏྟནི ཨུཔཊྛཱཔེཏྭཱ སབྲཧྨཙཱརཱིནཾ ཝཱ སིསྶཱནཾ ཝཱ ཝིནིཙྪཡཨུལླུམྤནཨོཝཱདདཱནབྷཱཝེ ཋཏྭཱ ཝཏྟཱ ཙ ཧོཏི, སབྲཧྨཙཱརཱིཧི ཝཱ སིསྶཱདཱིཧི ཝཱ ཝུཙྩམཱནོ སུཝཙོ ཧུཏྭཱ ཏེསཾ ཝཙནཀྑམོ ཙ ཧོཏི, སཙྩཔཊིཙྩསམུཔྤཱདཱདིགམྦྷཱིརཾ ཝཱ ཨཉྙཾ གམྦྷཱིརཾ ཝཱ ཀཐཾ ཀཏྟཱ ཙ ཧོཏི, དྷམྨཝིནཡཱདིཝསེནེཝ དཱིཔནཏོ ཨཊྛཱནེ ཙ ན ནིཡོཛཀོ ཧོཏི. ཨིམེཧི སཏྟཧི ཨངྒེཧི སམནྣཱགཏཾ ཀལྱཱཎམིཏྟཾ ཡཱཝཛཱིཝཾ ན ཝིཛཧིཏབྦཾ. ཨིདཾ ‘‘སཏྟཧཱི’’ཏིཨཱདིཝཙནཾ བྷགཝཱ ཨཝོཙ. ཨིདཾ ‘‘སཏྟཧཱི’’ཏིཨཱདིཀཾ ཝཙནཾ སུགཏོ ཝཏྭཱ ཨཐཱཔརཾ ཨེཏཾ གཱཐཱཝཙནཾ སཏྠཱ ཨཝོཙ. ཀིཾ ཨཝོཙ?

‘‘པིཡོ གརུ བྷཱཝནཱིཡོ, ཝཏྟཱ ཙ ཝཙནཀྑམོ;

གམྦྷཱིརཉྩ ཀཐཾ ཀཏྟཱ, ན ཙཊྛཱནེ ནིཡོཛཀོ;

ཏཾ མིཏྟཾ མིཏྟཀཱམེན, ཡཱཝཛཱིཝམྤི སེཝིཡ’’ནྟི. –

ཨེཏཾ ¶ གཱཐཱཝཙནཾ སཏྠཱ ཨཝོཙཱཏི ཡོཛནཱ. ‘‘ན ཙ ཨཊྛཱནཡོཛཀོ’’ཏི པཱཋོ ཨཏྠི. ཨིདཾ ‘‘སཏྟཧཱི’’ཏིཨཱདིཀཾ ཝཙནཾ སཏྟཱདྷིཊྛཱནཾ.

ལོཀེ ཡཾ ཀཱམསུཁཉྩ ཡཾ ཨིདཾ དིཝིཡཾ སུཁཉྩ ཨཏྠི, ཨེཏེ ཀཱམསུཁདིཝིཡསུཁཱ ཏཎྷཱཀྑཡསུཁསྶ སོལ༹སིཾ ཀལཾ ན ཨགྒྷནྟཱིཏི ཡོཛནཱ. ཨིདཾ ‘‘ཡཉྩཱ’’ཏིཨཱདིཀཾ སུཏྟཾ དྷམྨཱདྷིཊྛཱནཾ.

ཡཏྠ ནིབྦཱནེ དུཀྑཾ ནིརུཛ྄ཛྷཏི, སམྨཱསམྦུདྡྷདེསིཏཾ ཨསོཀཾ ཝིརཛཾ ཁེམཾ ཏཾ ནིབྦཱནཾ སུསུཁཾ ཝཏཱཏི ཡོཛནཱ. ཨིདཾ ‘‘སུསུཁ’’ནྟིཨཱདིཀཾ སུཏྟམྤི དྷམྨཱདྷིཊྛཱནཾ. (༣)

ཏཱིསུ བྷཝེསུ སཏྟཱནཾ ཛནནཏོ ཏཎྷཱསངྑཱཏཾ མཱཏརཉྩ, པིཏརཾ ནིསྶཱཡ མཱནསྶ ཨུཔྤཛྫནཏོ མཱནསངྑཱཏཾ པིཏརཉྩ, རཊྛེ ལོཀོ རཊྛིསྶརཾ རཱཛཱནཾ བྷཛཏི ཝིཡ དྭིནྣཾ སསྶཏུཙྪེདདིཊྛཱིནཾ སབྦདིཊྛིགཏེཧི བྷཛནཱིཡཏྟཱ སསྶཏུཙྪེདདིཊྛིསངྑཱཏེ ཁཏྟིཡེ དྭེ རཱཛཱནོ ཙ, ཨཱཡསཱདྷཀོ པུརིསོ རཊྛེ ཨཏྠཾ ཨནུཙརཏི ཨིཝ ནནྡིརཱགསྶ དྭཱདསཱཡཏནེ ཨནུཙརཎཏོ ནནྡིརཱགསངྑཱཏེན ཨནུཙརཎེན སཧ པཝཏྟནཊྛཱནཾ དྭཱདསཱཡཏནསངྑཱཏཾ རཊྛཉྩ ཁཱིཎཱསཝོ ཡོ བྲཱཧྨཎོ ཧནཏི, སོ བྲཱཧྨཎོ ཧནྟྭཱ ཨནཱིགྷོ ནིདྡུཀྑོ ཧུཏྭཱ ཡཱཏཱིཏི ཡོཛནཱ. ཨིཧ ‘‘མཱཏར’’ནྟིཨཱདིགཱཐཱཡཾ ¶ ‘‘མཱཏརཾ…པེ… ཧནྟྭཱ’’ཏི ཨིདཾ གཱཐཱཝཙནཾ དྷམྨཱདྷིཊྛཱནཾ. ‘‘ཨནཱིགྷོ ཡཱཏི བྲཱཧྨཎོ’’ཏི ཨིདཾ གཱཐཱཝཙནཾ སཏྟཱདྷིཊྛཱནཾ. ཨིདཾ ‘‘མཱཏར’’ནྟིཨཱདིཀཾ སུཏྟཾ སཏྟཱདྷིཊྛཱནཉྩ དྷམྨཱདྷིཊྛཱནཉྩ.

‘‘ཙཏྟཱརོམེ བྷིཀྑཝེ ཨིདྡྷིཔཱདཱ’’ཏི ཨིདཾ སུཏྟཔྤདེསཝཙནཾ དྷམྨཱདྷིཊྛཱནཾ. སོ ཙཏཱུཧི ཨིདྡྷིཔཱདེཧི སམནྣཱགཏོ པུགྒལོ ཀཱཡེཔི ཀརཛཀཱཡེཔི ཙིཏྟཾ པཱདཀཛ྄ཛྷཱནཙིཏྟཾ སམོདཧཏི པཀྑིཔཏི, སོ པུགྒལོ དིསྶམཱནཀཱཡེན གནྟུཀཱམོ ཀརཛཀཱཡགཏིཀཾ པཱདཀཛ྄ཛྷཱནཙིཏྟཾ ཨདྷིཊྛཧཏི. ཙིཏྟེཔི པཱདཀཛ྄ཛྷཱནཙིཏྟེཔི ཀཱཡཾ ཀརཛཀཱཡཾ སམོདཧཏི པཀྑིཔཏི, སོ པུགྒལོ སཱིགྷཾ ཨཉྙཾ གནྟུཀཱམོ པཱདཀཛ྄ཛྷཱནཙིཏྟགཏིཀཾ ཀརཛཀཱཡཾ ཨདྷིཊྛཧཏི. ཀཱཡེ ཀརཛཀཱཡེ སུཁསཉྙཉྩ སུཁཝིཧཱརསཉྙཉྩ ལཧུསཉྙཉྩ ལཧུགམནསཉྙཉྩ ཨོཀྐམིཏྭཱ ཨཉྙཾ གམནེཡྻཾ ཨིཙྪིཏཊྛཱནཾ ཨེཀཙིཏྟཀྑཎེནེཝ ཙ གནྟྭཱ ཨུཔསམྤཛྫ ཝིཧརཏི. ཨིདཾ ‘‘སོ’’ཏིཨཱདིཀཾ སུཏྟཔྤདེསཝཙནཾ སཏྟཱདྷིཊྛཱནཾ. ཨིདཾ ‘‘ཙཏྟཱརོམེ’’ཏིཨཱདིཀཾ སུཏྟཾ སཏྟཱདྷིཊྛཱནཉྩ དྷམྨཱདྷིཊྛཱནཉྩ. (༤)

༡༡༤. ཡཾ ¶ སབྦཉྙུཏཉཱཎཾ ལོཀུཏྟརཾ ལོཀཾ ཨུཏྟརིཏྭཱ ཨབྷིབྷཝིཏྭཱ ཋིཏཾ, ཡེན སབྦཉྙུཏཉྙཱཎེན བྷགཝཱ ‘‘སབྦཉྙཱུ’’ཏི ཝུཙྩཏི, ཏསྶ སབྦཉྙུཏཉྙཱཎསྶ པརིཧཱནཾ ནཏྠི, ཏཾ སབྦཉྙུཏཉྙཱཎཾ སབྦཀཱལེ ཛཱནིཏུཾ ཨཱཝཛྫནཀཱལེ པཝཏྟཏཱིཏི ཡོཛནཱ. ཨིདཾ ‘‘ཡཾ ཏ’’ནྟིཨཱདིཀཾ ཉཱཎེ ཨཏྠེ ཝཱཙཀཉཱཔཀབྷཱཝེནཔི པཝཏྟནཏོ ཉཱཎཾ ནཱམ.

ཡཱཡ ནིབྦཱནགཱམིནིཡཱ མགྒཔཉྙཱཡ ཛཱཏིམརཎསངྑཡཾ པཛཱནཱཏི, སཱ ནིབྦཱནགཱམིནཱི མགྒཔཉྙཱ སབྦཱཧི ལོཀིཡཱཧི པཉྙཱཧི སེཊྛཱ པསཏྠཱཏི ཡོཛནཱ. ཨིདཾ ‘‘པཉྙཱ ཧཱི’’ཏིཨཱདིཀཾ ཝུཏྟནཡེན ཉཱཎཾ ནཱམ.

‘‘དྷོཏཀ, ཝོ ཏུམྷཱཀཾ སནྟིཾ ཨཧཾ ཀིཏྟཡིསྶཱམཱི’’ཏི བྷགཝཱ ཨཝོཙ. ‘‘དིཊྛེ དྷམྨེ དུཀྑཱདིདྷམྨེ ཝཱ ཨཏྟབྷཱཝེ ཝཱ སཏོ ཨནིཙྩཱནུཔསྶནཱདིསཏིསམྤནྣོ ཧུཏྭཱ ཙརཾ ཙརནྟོ ཡོགཱཝཙརོ ཨནཱིཏིཧཾ ཡཾ སནྟིཾ ཡཾ ནིབྦཱནཾ ཨརིཡམགྒེན ཝིདིཏྭཱ ལོཀེ སཾསཱརལོཀེ ཝིསཏྟིཀཾ ཝིསཔྤཀཾ ཏཎྷཾ ཏརེ ཏརེཡྻཱ’’ཏི བྷགཝཱ ཨཝོཙ.

དྷོཏཀོ བྷགཝནྟཾ ཝདཏི ‘‘མཧེསི མཧནྟེ སཱིལཀྑནྡྷཱདཱི ཨེསནསཱིལ, གོཏམ, སཏོ ‘སབྦེ སངྑཱརཱ ཨནིཙྩཱ’ཏིཨཱདིསརཎསམྤནྣོ ཧུཏྭཱ ཙརཾ ཙརནྟོ ཡོགཱཝཙརོ ཨུཏྟམཾ ཡཾ སནྟིཾ ཡཾ ¶ ནིབྦཱནཾ ཨརིཡམགྒེན ཝིདིཏྭཱ ལོཀེ སཾསཱརལོཀེ ཝིསཏྟིཀཾ ཏཎྷཾ ཏརེ ཏརེཡྻཱཏི ཏཉྩ ཝཙནཾ ཏཉྩ སནྟིཾ ནིབྦཱནཾ ཨཧཾ ཨབྷིནནྡཱམི ཨབྷིཔཏྠཡཱམི, མཧེསི ཏྭཾ, ཡཉྩ སམྤཛཱནཱསཱི’’ཏི དྷོཏཀོ བྷགཝནྟཾ ཝདཏི.

‘‘དྷོཏཀཱ’’ཏི ཨཱལཔིཏྭཱ བྷགཝཱ དྷོཏཀཾ ཨཝོཙ. ‘‘ཨུདྡྷཾ ཨནཱགཏཾ ཨུཔརི ཨདྷོ ཨཏཱིཏཾ ཧེཊྛཱ ཙ ཏིརིཡཉྩཱཔི མཛ྄ཛྷེ པཙྩུཔྤནྣཾ པརིཏོ ཙ ལོཀེ སཾསཱརལོཀེ ཨེཏཾ ཏཎྷཾ བྷཝཱབྷཝཱཡ ཁུདྡཀབྷཝམཧནྟབྷཝཏྠཱཡ སངྒོ ལགྒོཏི ཝིདིཏྭཱ ཝིཙརནྟོ ཏྭཾ ཏཎྷཾ མཱཀཱསི མཱ ཨཀཱསཱི’’ཏི བྷགཝཱ དྷོཏཀཾ ཨཝོཙཱཏི ཡོཛནཱ. ཨིདཾ ‘‘ཀིཏྟཡིསྶཱམཱི’’ཏིཨཱདིཀཾ ཉེཡྻེ ཝིསཡེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ཉེཡྻཾ ནཱམ.

‘‘ཨེཏྟཀམེཝཱ’’ཏི ཝཏྟབྦཏྟཱ ‘‘ཙཏུནྣཾ བྷིཀྑཝེ’’ཏིཨཱདི ཝུཏྟཾ. བྷིཀྑཝེ, ཙཏུནྣཾ ཨརིཡསཙྩཱནཾ ཨརིཡབྷཱཝཀརཱནཾ སཙྩཱནཾ ཨནནུབོདྷཱ ཨབུཛ྄ཛྷནེན ཨཔྤཊིཝེདྷཱ ཨཔྤཊིཝིཛ྄ཛྷནེན ཨེཝཾ ཨིམིནཱ ཀཱརཎེན མམཉྩེཝ ཏུམྷཱཀཉྩ དཱིགྷམདྡྷཱནཾ ཨིདཾ སནྡྷཱཝིཏཾ སནྡྷཱཝནཾ, ཨིདཾ སཾསརིཏཾ སཾསརཎཾ ཨཧོསཱིཏི, བྷིཀྑཝེ, ཨཛྫ ¶ ཏཡིདཾ ཏཾ ཨིདཾ དུཀྑཾ ཨརིཡསཙྩཾ མཡཱ ཨནུབུདྡྷཾ པཊིཝིདྡྷཾ…པེ… ཏཡིདཾ ཏཾ ཨིདཾ དུཀྑནིརོདྷགཱམིནཱི པཊིཔདཱ ཨརིཡསཙྩཾ མཡཱ ཨནུབུདྡྷཾ པཊིཝིདྡྷཾ, མམ བྷཝཏཎྷཱ ཨུཙྪིནྣཱ, བྷཝནེཏྟི ཏཎྷཱ ཁཱིཎཱ, ཨིདཱནི མམ པུནབྦྷཝོ ནཏྠི, ཨིཏི ཨིདཾ ‘‘ཙཏུནྣ’’ནྟིཨཱདིཀཾ བྷགཝཱ ཨཝོཙ, སུགཏོ ཨིདཾ ‘‘ཙཏུནྣ’’ནྟིཨཱདིཀཾ ཝཏྭཱ ཨཐཱཔརཾ ཨེཏཾ ‘‘ཙཏུནྣ’’ནྟིཨཱདིགཱཐཱཝཙནཾ སཏྠཱ ཨཝོཙཱཏི ཡོཛེཏྭཱ གཱཐཱཡཉྩ ཏཐེཝ ཡོཛནཱ ཀཱཏབྦཱ. ཨིདཾ ‘‘ཙཏུནྣ’’ནྟིཨཱདིཀཾ ཝུཏྟནཡེན ཉེཡྻཾ ནཱམ. (༥)

‘‘རཱུཔཾ ཨནིཙྩཾ…པེ… ཝིཉྙཱཎཾ ཨནིཙྩ’’ནྟི ཨིདཾ སུཏྟཾ ཉེཡྻེ རཱུཔཱདིདྷམྨེ ཝཱཙཀཉཱཔཀབྷཱཝེན པཝཏྟནཏོ ཉེཡྻཾ ནཱམ.

ཨེཝཾ ‘‘རཱུཔཾ ཨནིཙྩ’’ནྟིཨཱདིནཱ པཀཱརེན ཛཱནཾ ཛཱནནྟོ ཨེཝཾ ‘‘རཱུཔཾ ཨནིཙྩ’’ནྟིཨཱདིནཱ པཀཱརེན པསྶཾ པསྶནྟོ ཨརིཡསཱཝཀོ ཨརིཡསྶ བྷགཝཏོ སཱཝཀོ ‘‘ཨིདཾ རཱུཔཾ ཨནིཙྩ’’ནྟི རཱུཔཾ པསྶཏི, ‘‘ཨཡཾ ཝེདནཱ ཨནིཙྩཱ’’ཏི ཝེདནཾ པསྶཏི, ‘‘ཨཡཾ སཉྙཱ ཨནིཙྩཱ’’ཏི སཉྙཾ པསྶཏི, ‘‘ཨིམེ སངྑཱརཱ ཨནིཙྩཱ’’ཏི སངྑཱརེ པསྶཏི, ‘‘ཨིདཾ ཝིཉྙཱཎཾ ཨནིཙྩ’’ནྟི ཝིཉྙཱཎཾ པསྶཏི. ཨིཏི ཨིདཾ སུཏྟཾ རཱུཔཱདིཔསྶནེ ཉཱཎེ ཝཱཙཀཉཱཔཀབྷཱཝེན པཝཏྟནཏོ ཉཱཎཾ ནཱམ.

སོ ¶ ‘‘རཱུཔཾ ཨནིཙྩ’’ནྟིཨཱདིནཱ པཀཱརེན པསྶནྟོ ཨརིཡསཱཝཀོ རཱུཔེན རཱུཔརཱགེན པརིམུཙྩཏི…པེ… ཝིཉྙཱཎམྷཱ ཝིཉྙཱཎརཱགམྷཱ པརིམུཙྩཏཱིཏི དུཀྑསྨཱ པརིམུཙྩཏཱིཏི ཨཧཾ ཝདཱམཱིཏི ཡོཛནཱ. ཨིདཾ ‘‘སོ པརིམུཙྩཏཱི’’ཏིཨཱདིཀཾ སུཏྟཾ ཉཱཎེ ཙ ཉེཡྻེ ཙ ཝཱཙཀཉཱཔཀབྷཱཝེན པཝཏྟནཏོ ཉཱཎཉྩ ཉེཡྻཉྩ ཧོཏི.

སབྦེ པཉྩཀྑནྡྷཱ པཙྩཡེཧི སངྑརིཏཏྟཱ སངྑཱརཱ ཨཱདིཨནྟཝནྟབྷཱཝཏོ, ཨནིཙྩནྟིཀབྷཱཝཏོ, ཏཱཝཀཱལིཀབྷཱཝཏོ ཙ ཁཎཔརིཏྟབྷཱཝཏོ ཨནིཙྩཱ བྷཝནྟི. ཨིདཾ ‘‘སབྦེ སངྑཱརཱ ཨནིཙྩཱ’’ཏི སུཏྟཔྤདེསཝཙནཾ ཝུཏྟནཡེན ཉེཡྻཾ ནཱམ. ཡདཱ ཝིཔསྶནཱཀརཎཀཱལེ པཉྙཱཡ ཝིཔསྶནཱཔཉྙཱཡ པསྶཏི ཨནིཙྩཏཱདིཀཾ པསྶཏི. ཨིདཾ ‘‘ཡདཱ པཉྙཱཡ པསྶཏཱི’’ཏི སུཏྟཔྤདེསཝཙནཾ ཉཱཎཾ ནཱམ. ཨཐ པསྶནཀྑཎེ དུཀྑེ པཉྩཀྑནྡྷེ ཝིཔསྶཀོ ནིབྦིནྡཏི, ནིབྦིནྡནྟོ པུགྒལོ དུཀྑཱདིཛཱནནཱདིཝསེན ཙཏྟཱརི སཙྩཱནི པཊིཝིཛ྄ཛྷཏི, ཨེསོ ཙཏུསཙྩཔཊིཝེདྷོ ཝིསུདྡྷིཡཱ ཝིསུདྡྷཏྠཱཡ མགྒོཏི. ཨིདཾ ‘‘ཨཐཱ’’ཏིཨཱདིཀཾ སུཏྟཔྤདེསཝཙནཾ ཉཱཎཉྩ ཉེཡྻཉྩ ཧོཏི.

སོཎཱཏི ¶ སོཎཾ ཨཱལཔཏི. སམཎཱ བཱཧིརཀསམཎཱ བྲཱཧྨཎཱ ཛཱཏིབྲཱཧྨཎཱ ཨནིཙྩེན རཱུཔེན, དུཀྑེན རཱུཔེན, ཝིཔརིཎཱམདྷམྨེན རཱུཔེན ‘‘ཨཧཾ པརེཧི སེཡྻོ ཨུཏྟམོ ཨསྨཱི’’ཏི ཝཱ སམནུཔསྶནྟི, ‘‘ཨཧཾ པརེན སདིསོ སམཱནོ ཨསྨཱི’’ཏི ཝཱ སམནུཔསྶནྟི, ‘‘ཨཧཾ པརཏོ ཧཱིནོ ལཱམཀོ ཨསྨཱི’’ཏི ཝཱ སམནུཔསྶནྟི, ཡཐཱབྷཱུཏསྶ ཨདསྶནཱ ཨཉྙཏྲ ཝཛྫེཏྭཱ ཨཉྙཾ ཀིཾ ནཱམ ཀཱརཎཾ སིཡཱ, ཡཐཱབྷཱུཏཾ ཨདསྶནཏོ ཏཱཝ སམནུཔསྶནསྶ ཨཉྙཾ ཀཱརཎཾ ནཏྠི, ཡཐཱབྷཱུཏཾ ཨདསྶནམེཝ ཀཱརཎནྟི ཝེདིཏབྦཾ. ‘‘ཨནིཙྩཱཡ ཝེདནཱཡཱ’’ཏིཨཱདཱིསུཔི ཨིམིནཱ ཝུཏྟནཡེན ཝུཏྟནཡཱནུསཱརེན ཡོཛནཱ ཀཱཏབྦཱ. ཨིདཾ ‘‘ཡེ ཧི ཀེཙཱི’’ཏིཨཱདིཀཾ སུཏྟཔྤདེསཝཙནཾ ཉེཡྻཾ ནཱམ. ‘‘ཡེ ཙ ཁོ ཀེཙཱི’’ཏིཨཱདིཀོ སུཀྐཔཀྑོ པན ཝུཏྟཝིཔརིཡཱཡེན ཝེདིཏབྦོ. ཨིདཾ ‘‘ཡེ ཙ ཁོ’’ཏིཨཱདིཀཾ སུཏྟཔྤདེསཝཙནཾ ཉཱཎཾ ནཱམ. ཨིདཾ ‘‘ཡེ ཧི ཀེཙཱི’’ཏིཨཱདིཀཾ སུཏྟཾ ཉཱཎེ ཙ ཉེཡྻེ ཙ ཨཏྠེ ཝཱཙཀཉཱཔཀབྷཱཝེན པཝཏྟནཏོ ཉཱཎཉྩ ཉེཡྻཉྩ ཧོཏི. (༦)

ནཱནཱཝིདྷཾ ཉཱཎཉྩ ཉེཡྻཉྩ སཱསནཔཊྛཱནསུཏྟཾ ཨཱཙརིཡེན ནིདྡྷཱརིཏཾ, ཨམྷེཧི ཙ ཉཱཏཾ, ‘‘ཀཏམཾ དསྶན’’ནྟི པུཙྪིཏབྦཏྟཱ ‘‘ཏཏྠ ཀཏམཾ དསྶན’’ནྟིཨཱདི ཝུཏྟཾ. ཏཏྠཱཏི ཏེསུ ལོཀིཡཱདཱིསུ ཨཊྛཝཱིསཏིཝིདྷེསུ སཱསནཔཊྛཱནེསུ སུཏྟེསུ ཀཏམཾ སུཏྟཾ དསྶནཾ ནཱམཱཏི པུཙྪཏི.

༡༡༥. གམྦྷཱིརཔཉྙེན ¶ སབྦཉྙུབུདྡྷེན སུདེསིཏཱནི སངྑེཔཝིཏྠཱརཱདཱིཧི ཏེཧི ཏེཧི ནཡེཧི སུཊྛུ དེསིཏཱནི ཨརིཡསཙྩཱནི ཡེ བྷཱཝིཏབྷཱཝནཱ ཨརིཡཔུགྒལཱ པཉྙཱཨོབྷཱསེན ཝིབྷཱཝཡནྟི, ཏེ བྷཱཝིཏབྷཱཝནཱ ཨརིཡཔུགྒལཱ དེཝརཛྫཙཀྐཝཏྟིརཛྫཱདིཔམཱདཊྛཱནཾ ཨཱགམྨ བྷུསཾ པམཏྟཱ ཀིཉྩཱཔི ཧོནྟི, ཏཐཱཔི ཏེ བྷཱཝིཏབྷཱཝནཱ ཨརིཡཔུགྒལཱ སོཏཱཔཏྟིམགྒཉཱཎེན ཨབྷིསངྑཱརཝིཉྙཱཎསྶ ནིརོདྷེན ཨཊྛམབྷཝཱདཱིསུ ཨུཔྤཛྫནཱརཧཱནཾ ནཱམརཱུཔཱནཾ ནིརུདྡྷཏྟཱ ཨཊྛམཀྑཏྟུཝསེན ཨཊྛམཾ བྷཝཾ ན ཨཱདིཡནྟཱིཏི ཡོཛནཱ. ཨིདཾ ‘‘ཡེ ཨརིཡསཙྩཱནཱི’’ཏིཨཱདིཀཾ སུཏྟཾ དསྶནེ པཋམམགྒཉཱཎེ ཝཱཙཀཉཱཔཀབྷཱཝེན པཝཏྟནཏོ དསྶནཾ ནཱམ.

ནགརདྭཱརབཱཧཐིརཀརཎཏྠཾ ཨུམྨཱརབྦྷནྟརེ པཐཝིཡཾ ཨཊྛཧཏྠདསཧཏྠཔྤམཱཎཾ ཨཱཝཱཊཾ ཁཎིཏྭཱ ཏསྨིཾ ཨཱཝཱཊེ ཨུསྶཱཔིཏཏྟཱ པཐཝིསྶིཏོ པཐཝིནིསྶིཏོ ཨནྟོཔཐཝིནིསྶིཏོ ཨིནྡཁཱིལོ སཱརདཱརུམཡོ ཐམྦྷོ ¶ ཙཏུབྦྷི ཙཏཱུཧི དིསཱཧི ཨཱགཏེཧི ཝཱཏེཧི མཧཱཝཱཏེཧི ཨསམྤཀམྤིཡོ སམྤཀམྤིཏུཾ ཨསཀྐུཎེཡྻོ སིཡཱ ཡཐཱ, ཡོ སཔྤུརིསོ ཨརིཡསཙྩཱནི ཨཝེཙྩ པསྶཏི, ཏཾ སཔྤུརིསཾ སབྦཏིཏྠིཡཝཱདཝཱཏེཧི ཨསམྤཀམྤིཡཏྟཱ ཏཐཱུཔམཾ ཨཧཾ ཝདཱམཱིཏི ཡོཛནཱ. ཨིདཾ ‘‘ཡཐིནྡཁཱིལོ’’ཏིཨཱདིཀཾ སུཏྟཾ ཝུཏྟནཡེན དསྶནཾ ནཱམ.

བྷིཀྑཝེ, ཙཏཱུཧི སོཏཱཔཏྟིཡངྒེཧི སམནྣཱགཏོ ཨརིཡསཱཝཀོ ཨརིཡསྶ བྷགཝཏོ སམྨཱསམྦུདྡྷསྶ སཱཝཀོ ཨཱཙིཀྑིཏུཾ ཨཱཀངྑམཱནོ ཧུཏྭཱ ཨཏྟནཱཝ སཡམེཝ ཨཏྟཱནཾ བྱཱཀརེཡྻ ‘‘བྷོ, མམ ཨཏྟ ཨཧཾ ཨིདཱནི ཁཱིཎནིརཡོ ཨམྷི, ཁཱིཎཏིརཙྪཱནཡོནི ཨམྷི…པེ…. དུཀྑསྶནྟཾ ཀརིསྶཱམཱི’’ཏི བྱཱཀརེཡྻ. ཙཏུརངྒསརཱུཔཾ དསྶེཏུཾ ‘‘ཀཏམེཧི ཙཏཱུཧཱི’’ཏིཨཱདི ཝུཏྟཾ. ཨིདཾ ‘‘ཙཏཱུཧཱི’’ཏིཨཱདིཀཾ དསྶནཾ ནཱམ.

ནཱནཱཝིདྷཾ དསྶནཾ ནིདྡྷཱརིཏཾ, ‘‘ཀཏམཱ བྷཱཝནཱ’’ཏི པུཙྪིཏབྦཏྟཱ ‘‘ཏཏྠ ཀཏམཱ བྷཱཝནཱ’’ཏིཨཱདི ཝུཏྟཾ.

ཨིདྷ སཱསནེ ཡསྶ ཨརིཡསཱཝཀསྶ ཨཛ྄ཛྷཏྟཾ ཀཱམབྷཝེ ནིབྦཏྟཱཔཀཱནཾ ཨོརམྦྷཱགིཡསཾཡོཛནཱནཾ པཛཧནཝསེན ཙ བཧིདྡྷཱ རཱུཔཱརཱུཔབྷཝེསུ ནིབྦཏྟཱཔཀཱནཾ ཨུདྡྷམྦྷཱགིཡསཾཡོཛནཱནཾ པཛཧནཝསེན ཙ ཨིནྡྲིཡཱནི སདྡྷིནྡྲིཡཱདཱིནི ཨིནྡྲིཡཱནི སུབྷཱཝིཏཱནི ཨརིཡམགྒབྷཱཝནཱཝསེན སུཊྛུ བྷཱཝིཏཱནི བྷཝནྟི, བྷཱཝིཏོ བྷཱཝིཏམགྒོ ས དནྟོ སོ ཨརིཡསཱཝཀོ ཨིམཾ ལོཀཉྩ པརཾ ལོཀཉྩ ནིབྦིཛ྄ཛྷ ནིབྦིཛ྄ཛྷིཏྭཱ པཊིཝིཛ྄ཛྷིཏྭཱ ཀཱལཾ མརཎཀཱལེ ¶ , ཀཱལཾཀིརིཡཾ ཝཱ ཀངྑཏི པཏྠེཏཱིཏི ཡོཛནཱ. ཨཡཾ ‘‘ཡསྶིནྡྲིཡཱནཱི’’ཏིཨཱདིཀཱ པཱལི༹ བྷཱཝནཱཡ ཝཱཙཀཉཱཔཀབྷཱཝེན པཝཏྟནཏོ བྷཱཝནཱ ནཱམ.

དྷམྨཔདཱནི ཛྷཱནཝིཔསྶནཱམགྒཕལནིབྦཱནདྷམྨཀོཊྛཱསཱནི. ཨནབྷིཛ྄ཛྷཱ དྷམྨཔདཾ ཨནབྷིཛ྄ཛྷཱསཱིསེན ཨདྷིགཏཛྷཱནཝིཔསྶནཱམགྒནིབྦཱནདྷམྨཔདཾ ཀོཊྛཱསཾ. ཨེས ནཡོ སེསེསུཔི. ཨཡཾ ‘‘ཙཏྟཱརིམཱནཱི’’ཏིཨཱདིཀཱ པཱལི༹ ཝུཏྟནཡེན བྷཱཝནཱ ནཱམ. (༧)

དེཝཔུཏྟ ཚིནྡནྟོ པུགྒལོ པཉྩ ཨོརམྦྷཱགིཡསཾཡོཛནཱནི ཧེཊྛཱ མགྒཏྟཡེན ཚིནྡེ ཚིནྡེཡྻ, པཛཧནྟོ པུགྒལོ པཉྩ ཨུདྡྷམྦྷཱགིཡསཾཡོཛནཱནི ཨརཧཏྟམགྒེན ཛཧེ པཛཧེཡྻ, བྷཱཝཡནྟོ པུགྒལོ པཉྩ ¶ སདྡྷིནྡྲིཡཱདཱིནི ཙ ཨུཏྟརི བྷཱཝཡེ བྷཱཝེཡྻ. པཉྩསངྒཱཏིགོ རཱགསངྒདོསསངྒམོཧསངྒམཱནསངྒདིཊྛིསངྒཱཏིགོ བྷིཀྑུ ཨོགྷཏིཎྞོཏི ཀཱམོགྷབྷཝོགྷདིཊྛོགྷཨཝིཛྫོགྷཏིཎྞོཏི ཝུཙྩཏི ཀཐཱིཡཏཱིཏི ཡོཛནཱ. ‘‘པཉྩ ཚིནྡེ པཉྩ ཛཧེ’’ཏི ཨིདཾ ཝཙནཾ དསྶནཾ ནཱམ. ‘‘པཉྩ ཙུཏྟརི…པེ… ཝུཙྩཏཱི’’ཏི ཨཡཾ པཱལི༹ བྷཱཝནཱ ནཱམ. ཨིདཾ ‘‘པཉྩཱ’’ཏིཨཱདིཀཾ སུཏྟཾ དསྶནཉྩ བྷཱཝནཱ ཙ ཧོཏི.

‘‘ཏཱིཎིམཱནི, བྷིཀྑཝེ’’ཏིཨཱདཱིསུ ཡོཛནཱ པཱཀཊཱ. (༨)

༡༡༦. ‘‘སབྦཔཱཔསྶ ཨཀརཎཾ…པེ… བུདྡྷཱན སཱསན’’ནྟི ཨིདཾ སུཏྟཾ སམྨཱསམྦུདྡྷསྶ ཝཙནབྷཱཝཏོ སཀཝཙནཾ ནཱམ. ཨཏྠོ ཧེཊྛཱ ཝུཏྟོཝ.

བྷིཀྑཝེ, བཱལསྶ བཱལལཀྑཎཱནི བཱལཨུཔལཀྑཎཀཱརཎཱནི བཱལནིམིཏྟཱནི ‘‘ཨཡཾ བཱལོ’’ཏི གཧཎཀཱརཎཱནི བཱལཱཔདཱནཱནི བཱལསྶ ཨཔདཱནཱནི པོརཱཎཱནི ཝིརུལ༹ྷཱནི ཀམྨཱནི ཡེཧི བཱལལཀྑཎཱདཱིཧི བཱལཾ ‘‘བཱལོ’’ཏི པརེ པཎྜིཏཱ སཉྫཱནནྟི, ཨིམཱནི བཱལལཀྑཎཱནི མཡཱ ཝུཙྩམཱནཱནི ཏཱིཎི. ཀཏམཱནི ཏཱིཎི? བྷིཀྑཝེ, བཱལོ དུཙྩིནྟིཏཙིནྟཱི ཙ དུཙྩིནྟིཏཾ ཨབྷིཛ྄ཛྷཱབྱཱཔཱདམིཙྪཱདསྶནཾ ཙིནྟཱི ཙ ཧོཏི, དུབྦྷཱསིཏབྷཱསཱི དུབྦྷཱསིཏཾ མུསཱཝཱདཱདིཾ བྷཱསཱི ཙ ཧོཏི. དུཀྐཊཀམྨཀཱརཱི ཙ དུཀྐཊཾ པཱཎཱཏིཔཱཏཱདིཀམྨཾ ཀཱརཱི ཙ ཧོཏི. བྷིཀྑཝེ, བཱལསྶ…པེ… བཱལཱཔདཱནཱནི ཨིམིནཱ མཡཱ ཝུཏྟཱནི ཏཱིཎི ཁོ བྷཝནྟི. སུཀྐཔཀྑོ པན ཝུཏྟཝིཔརིཡཱཡེན ཝེདིཏབྦོ. ཨིདཾ ‘‘ཏཱིཎིམཱནི བྷིཀྑཝེ’’ཏིཨཱདིཀཾ ཝཙནཾ སམྨཱསམྦུདྡྷསྶ ཝཙནབྷཱཝཏོ སཀཝཙནཾ ནཱམ.

པཐཝཱིསམོ ¶ ཝིཏྠཏོ སམྦོདྷོ ནཱམ ནཏྠི. པཱཏཾ ཝུཊྛཾ ཨུདཀཾ ཨཱབྷུསོ ལཱབྷི གཎྷཱཏཱིཏི པཱཏཱལོ, པཱཏཱལེན སམོ པཱཏཱལསམོ ནིནྣོ ན ཝིཛྫཏི. མེརུསམོ ཨུནྣཏོ ནཏྠི, ཙཀྐཝཏྟིསདིསོ པོརིསོ ནཏྠཱིཏི ཡོཛནཱ. ཨིདཾ ‘‘པཐཝཱིསམོ’’ཏིཨཱདིཀཾ ཝཙནཾ པརསྶ དེཝསྶ ཝཙནབྷཱཝཏོ པརཝཙནཾ ཧོཏི.

‘‘དེཝཱནཾ ཨིནྡ, ཏཝ སུབྷཱསིཏེན ཛཡོ ཧོཏཱི’’ཏི ཝཏྭཱ ‘‘ཝེཔཙིཏྟི, ཏཝ སུབྷཱསིཏེན ཛཡོ ཧོཏཱུ’’ཏི ཝཏྭཱ ‘‘ཝེཔཙིཏྟི, ཏྭཾ གཱཐཾ བྷཎ བྷཎཱཧཱི’’ཏི ཨཝོཙ. བྷིཀྑཝེ, ཨཐ ཁོ ཨསུརིནྡོ ཝེཔཙིཏྟི ཨིམཾ ཝུཙྩམཱནཾ གཱཐཾ ཨབྷཱསི ‘‘ཏེ པཊིསེདྷཀོ ནོ ཙེ ཨསྶ ནོ ཙེ བྷཝེཡྻ ¶ , ཨེཝཾ སཏི བཱལཱ བྷིཡྻོ པཀུཛ྄ཛྷེཡྻུཾ, ཏསྨཱ དྷཱིརོ པཎྜིཏོ བྷུསེན དཎྜེན བཱལཾ ནིསེདྷཡེ’’ཏི.

གཱཐཱཡ, བྷིཀྑཝེ, ཨསུརིནྡེན ཝེཔཙིཏྟིནཱ བྷཱསིཏཱཡ ཨསུརཱ ཨནུམོདིཾསུ, དེཝཱ ཏུཎྷཱི ཨཧེསུཾ. བྷིཀྑཝེ, ཨཐ ཁོ ཨསུརིནྡོ ཝེཔཙིཏྟི དེཝཱནཾ ཨིནྡཾ སཀྐཾ ཨེཏཾ ཝཙནཾ ཨཝོཙ ‘‘དེཝཱནམིནྡ, ཏྭཾ གཱཐཾ བྷཎ བྷཎཱཧཱི’’ཏི ཨེཏཾ ཝཙནཾ ཨཝོཙ. བྷིཀྑཝེ, ཨཐ ཁོ དེཝཱནམིནྡོ སཀྐོ ཨིམཾ གཱཐཾ ཨབྷཱསི ‘‘བཱལསྶ པཊིསེདྷནཾ པརཾ པཙྩཏྠིཀཾ སངྐུཔིཏཾ ཉཏྭཱ སཏོ སཏིམཱ ཡོ པཎྜིཏོ ཀོདྷཏོ ཨུཔསམྨཏི, ཏསྶ པཎྜིཏསྶ ཨེཏདེཝ ཨུཔསམཾ ཝརནྟི ཨཧཾ མཉྙེ’’ཏི.

གཱཐཱཡ, བྷིཀྑཝེ, དེཝཱནམིནྡེན སཀྐེན བྷཱསིཏཱཡ དེཝཱ ཨནུམོདིཾསུ, ཨསུརཱ ཏུཎྷཱི ཨཧེསུཾ. བྷིཀྑཝེ, ཨཐ ཁོ དེཝཱནམིནྡོ སཀྐོ ཨསུརིནྡཾ ཝེཔཙིཏྟིཾ ཨེཏཾ ཝཙནཾ ཨཝོཙ ‘‘ཝེཔཙིཏྟི, ཏྭཾ གཱཐཾ བྷཎཱཧཱི’’ཏི ཨེཏཾ ཝཙནཾ ཨཝོཙ. བྷིཀྑཝེ, ཨཐ ཁོ ཨསུརིནྡོ ཝེཔཙིཏྟི ཨིམཾ གཱཐཾ ཨབྷཱསི ‘‘ཝཱསཝ ཡདཱ ཏིཏིཀྑཏི, ཏདཱ ནཾ ཏིཏིཀྑནྟཾ པུགྒལཾ བཱལོ ‘‘ཨཡཾ མེ བྷཡཱ ཏིཏིཀྑཏཱི’’ཏི མཉྙཏི, ཏིཏིཀྑཱཡ ཨེཏདེཝ ཝཛྫཾ ཨཧཾ པསྶཱམི. ཝཱསཝ གོགཎོ པལཱཡིནཾ གཝཾ ཨཛ྄ཛྷོཏྠརཏི ཨིཝ, ཨེཝཾ དུམྨེདྷོ ཁམནྟཾ བྷིཡྻོ ཨཛ྄ཛྷཱརུཧཏི ཨཛ྄ཛྷོཏྠརཏི.

གཱཐཱཡ, བྷིཀྑཝེ, ཨསུརིནྡེན ཝེཔཙིཏྟིནཱ བྷཱསིཏཱཡ ཨསུརཱ ཨནུམོདིཾསུ, དེཝཱ ཏུཎྷཱི ཨཧེསུཾ. ཛཱཡམཱནེ ཙ གོཡུདྡྷེ པཋམཾ དྭེཡེཝ གོཎཱ ཡུཛ྄ཛྷནྟི, གོགཎོ པན ཡཱཝ ཨེཀོ གོཎོ ན པལཱཡཏི, ཏཱཝ ཨོལོཀེནྟོཝ ཏིཊྛཏི. ཡདཱ ཙ ཨེཀོ གོཎོ པལཱཡཏི ¶ , ཏདཱ སབྦོ གོཎོ ཏཾ པལཱཡིནཾ གཝཾ བྷིཡྻོ ཨཛ྄ཛྷོཏྠརཏཱིཏི གོཡུདྡྷསབྷཱཝོ ཝེདིཏབྦོ. ‘‘ཨཐ ཁོ’’ཏིཨཱདཱིནཾ ཡོཛནཏྠོ པཱཀཊོ.

ཝེཔཙིཏྟི, ཡོ པུགྒལོ ཏིཏིཀྑཏི, ཏཾ ཁམནྟཾ པུགྒལཾ ‘‘ཨཡཾ མེ བྷཡཱ ཏིཏིཀྑཏཱི’’ཏི ཀཱམཾ མཉྙཏུ ཝཱ, མཱ མཉྙཏུ ཝཱ, ཏཾ མཉྙནཾ ནིཔྥལམེཝ. ཨཏྠཱ སདཏྠཔརམཱ བྷཝནྟི. ཁནྟྱཱ ཁནྟིཏོ བྷིཡྻོ སདཏྠོ ནཱམ ན ཝིཛྫཏི.

ཡོ བལཝཱ སནྟོ དུབྦལསྶ ཧཝེ ཏིཏིཀྑཏཱིཏི ཏསྶ བལཝནྟསྶ ཏཾ ཏིཏིཀྑནཾ པརམཾ ཁནྟིནྟི སཔྤུརིསཱ ཨཱཧུ, དུབྦལོ ནིཙྩཾ ཁམཏི ཨེཝ.

ཡསྶ ¶ བཱལསྶ བཱལབལཾ ཨཏྠི, ཏསྶ བཱལསྶ བཱལབལཾ ‘‘ཨབལ’’ནྟི སཔྤུརིསཱ ཨཱཧུ, ཡསྶ དྷམྨགུཏྟསྶ ཡཾ བལཾ ཨཏྠི, ཏསྶ དྷམྨགུཏྟསྶ ཏསྶ བལསྶ པཊིཝཏྟཱ པཊིཔྥརིཏྭཱ ཝཏྟཱ ན ཝིཛྫཏི.

ཝེཔཙིཏྟི, ཡོ པུགྒལོ ཀུདྡྷཾ པཋམཾ ཀུཛ྄ཛྷནྟསྶ པཊིཀུཛ྄ཛྷཏི, སོ པཊིཀུཛ྄ཛྷནྟོ པུགྒལོ ཏེན པཊིཀུཛ྄ཛྷནེན ཏསྶ པཋམཾ ཀུཛ྄ཛྷནྟསྶ པཱཔཔུགྒལསྶ པཱཔཔུགྒལཏོ པཱཔིཡོ ཨེཝ པཱཔཏརོ ཧཱིནཏརོ ཨེཝ བྷཝེ.

ཝེཔཙིཏྟི, ཡོ སཔྤུརིསོ སཏོ སཏིམཱ པརཾ སངྐུཔིཏཾ ཉཏྭཱ པཋམཾ ཀུཛ྄ཛྷནྟསྶ ཨཔྤཊིཀུཛ྄ཛྷནྟོཝ བྷཝེ, སོ སཔྤུརིསོ དུཛྫཡཾ སངྒཱམཾ ཛེཏི ནཱམ, ཨཏྟནོ ཙ པརསྶ ཙ ཨུབྷིནྣཾ ཨཏྠཾ ཙརཏི ནཱམ.

ཨཏྟནོ ཙ པརསྶ ཙ ཏིཀིཙྪནྟཱནཾ ཨུབྷིནྣཾ ཀོདྷོ ཨུཔསམྨཏི, ཡེ ཛནཱ དྷམྨསྶ ཁནྟིདྷམྨསྶ ཨཏྠེ, ཙཏུསཙྩདྷམྨེ ཝཱ ཨཀོཝིདཱ བྷཝནྟི, ཏེ ཛནཱ ཁམནྟཾ སཔྤུརིསཾ ‘‘ཨཡཾ བཱལོ’’ཏི མཉྙནྟི, ཏེསཾ ཨཀོཝིདཱནཾ ཛནཱནཾ ཏཾ མཉྙནཾ ནིཔྥལནྟི.

གཱཐཱསུ, བྷིཀྑཝེ, དེཝཱནམིནྡེན སཀྐེན བྷཱསིཏཱསུ དེཝཱ ཨནུམོདིཾསུ, ཨསུརཱ ཏུཎྷཱི ཨཧེསུནྟི ཡོཛནཱ. ཨིདཾ ‘‘བྷིཡྻོ བཱལཱ’’ཏིཨཱདིཀཾ ཝཙནཾ སཀྐཝེཔཙིཏྟཱིནཾ ཝཙནབྷཱཝཏོ པརཝཙནཾ ནཱམ. (༩)

༡༡༧. པཏྟཾ ¶ ཨེཏརཧི ཨདྷིགཏཾ ཡཉྩ ཀཱམཱུཔཀརཎཾ, ཨཱཡཏིཾ པཏྟབྦཾ ཨདྷིགཏཾ ཡཉྩ ཀཱམཱུཔཀརཎཾ ཨཏྠི, ཨེཏཾ ཨུབྷཡཾ རཛཱནུཀིཎྞཾ རཱགརཛཱདིཀིཎྞཾ ཨིཏི ཨཱཏུརསྶ ཨཱཏུརཱནཾཡེཝ པུགྒལཱནཾ སནྟིཀེ ཨནུསིཀྑཏོ ཨནུསིཀྑནྟསྶ སིཀྑཱསཱརཱ ཧུཏྭཱ ཨུཔཊྛཧནྟི, སཱིལཾ ཝཏཾ ཛཱིཝིཏཾ བྲཧྨཙརིཡཾ ཨིམེ སིཀྑཱསཱརཱ ཧུཏྭཱ ཨུཔཊྛཧནྟཱིཏི ཡེ ཨུཔཊྛཱནསཱརཱ པུགྒལཱ སཱརཏོ གཧེཏྭཱ ཋིཏཱ. ཨེཏྠ སཱིལཾ ནཱམ ‘‘ན ཀརོམཱི’’ཏི ཨོརམཎཾ. ཝཏཾ ནཱམ བྷོཛནཀིཙྩཀརཎཱདི. ཛཱིཝིཏཾ ནཱམ ཨཱཛཱིཝོ. བྲཧྨཙརིཡཾ ནཱམ མེཐུནཝིརཏིཝིསེསབྷཱཝོ ཝེདིཏབྦོ. ཏེསཾ ཨུཔཊྛཱནསཱརཱནཾ པུགྒལཱནཾ ཨཡཾ ཝཱདོ ཨེཀོ པཋམོ ཨནྟོ ལཱམཀོ. ཡེ ཙ པུགྒལཱ ‘‘ཀཱམེསུ དོསོ ནཏྠཱི’’ཏི ཨེཝཾཝཱདིནོ ཨེཝཾདིཊྛིནོ ཧུཏྭཱ ཋིཏཱ, ཏེསཾ པུགྒལཱནཾ ཨཡཾ ཝཱདོ ཨེཀོ དུཏིཡོ ཨནྟོ ¶ ལཱམཀོ. ཨིཙྩེཏེ ཨུབྷོ ཨནྟཱ ཨནྟཝཱདཱ པུགྒལཱ ཀཊསིཝཌྜྷནཱ ཀཊསིཡོ དིཊྛིཾ ཝཌྜྷེནྟི. ཨེཏེ ཨུབྷོ ཨནྟེ ཨཏྟཀིལམཐཱནུཡོགེ ཀཱམསུཁལླིཀཱནུཡོགེ ཨེཀེ པུགྒལཱ ཨནབྷིཉྙཱཡ ཨོལཱིཡནྟི, ཨེཀེ པུགྒལཱ ཨཏིདྷཱཝནྟཱིཏི ཡོཛནཱ. ཨིདཾ ‘‘ཡཉྩ པཏྟ’’ནྟིཨཱདིཀཾ ཝཙནཾ པརེསཾ པུགྒལཱནཾ ཝཙནབྷཱཝཏོ པརཝཙནཾ ནཱམ.

ཡེ ཙ སམྨཱདིཊྛིཔུགྒལཱ ཏེ ཨུབྷོ ཨནྟེ ཨཏྟཀིལམཐཱནུཡོགཀཱམསུཁལླིཀཱནུཡོགེ ཨབྷིཉྙཱཡ ཏཏྲ ཙ ཨནྟེ ན ཨཧེསུཾ. ཏེན ཙ ཨབྷིཛཱནནེན ཏེ ཨུབྷོ ཨནྟེ ན ཨམཉྙིཾསུ, ཏེསཾ སམྨཱདིཊྛིཔུགྒལཱནཾ ཝཊྚཾ ཏིཝིདྷཾ ཝཊྚཾ པཉྙཱཔནཱཡ ནཏྠི. ཨིཏི ཨེཝཾ ཨིདཾ ‘‘ཡེ ཙཱ’’ཏིཨཱདིཀཾ ཝཙནཾ བྷགཝཏོ ཝཙནབྷཱཝཏོ སཀཝཙནཾ ནཱམ. ཨཡཾ ཨུདཱནོ ‘‘ཡཉྩ པཏྟཾ…པེ… པཉྙཱཔནཱཡཱ’’ཏི ཨཡཾ ཨུདཱནོ ཝུཏྟནཡེན སཀཝཙནཉྩ པརཝཙནཉྩ ཧོཏི.

པསེནདི ནཱམ ཀོསལོ ཀོསལིསྶརོ རཱཛཱ བྷགཝནྟཾ ཨེཏཾ ‘‘ཨིདྷ མཡ྄ཧཾ…པེ… ཏེསཾ པིཡོ ཨཏྟཱ’’ཏི ཝཙནཾ ཨཝོཙ. བྷནྟེ, ཨིདྷ རཧོགཏསྶ པཊིསལླཱིནསྶ མཡ྄ཧཾ མམ ཙེཏསོ ཙིཏྟསྶ ཨེཝཾ པརིཝིཏཀྐོ ཨུདཔཱདི, ཀེསཾ སཏྟཱནཾ ཨཏྟཱ པིཡོ ནུ ཁོ, ཀེསཾ སཏྟཱནཾ ཨཏྟཱ ཨཔྤིཡོ ནུ ཁོ ཨིཏི ཨེཏཾ པརིཝིཏཀྐནཾ ཨུདཔཱདི. བྷནྟེ, ཏསྶ མཡ྄ཧཾ ཨེཏཾ པརིཝིཏཀྐནཾ ཨཧོསི, ཡེ ཙ ཀེཙི སཏྟཱ ཀཱཡེན དུཙྩརིཏཾ ཙརནྟི ཁོ…པེ… མནསཱ དུཙྩརིཏཾ ཙརནྟི ཁོ, ཏེསཾ སཏྟཱནཾ ཨཏྟཱ ཨཔྤིཡོ ཁོ. ཏེ དུཙྩརིཏཾ ཙརནྟཱ སཏྟཱ ‘‘ནོ ཨཏྟཱ པིཡོ’’ཏི ཨེཝཾ ཀིཉྩཱཔི ཝདེཡྻུཾ, ཨཐ ཁོ ཏེསཾ དུཙྩརིཏཾ ཙརནྟཱནཾ སཏྟཱནཾ ཨཏྟཱ ཨཔྤིཡོཝ. ཏཾ ཀིསྶ ཧེཏུ? ཨཔྤིཡོ ཨཔྤིཡསྶ ཨནཏྠཱཡ ཡཾ དུཙྩརིཏཾ ཀརེཡྻ, ཏཾ དུཙྩརིཏཾ ཏེ དུཙྩརིཏཾ ཙརནྟཱ སཏྟཱ ཨཏྟནཱཝ. སཡམེཝ. ཨཏྟནོ ཨནཏྠཱཡ ཧི ཡསྨཱ ཀརོནྟི, ཏསྨཱ ཏེསཾ དུཙྩརིཏཾ ཙརནྟཱནཾ སཏྟཱནཾ ཨཏྟཱ ཨཔྤིཡོཝཱཏི ཨེཏཾ པརིཝིཏཀྐནཾ ཨཧོསི.

བྷནྟེ ¶ , ཡེ ཙ ཀེཙི སཏྟཱ ཀཱཡེན སུཙརིཏཾ ཙརནྟི ཁོ…པེ… མནསཱ སུཙརིཏཾ ཙརནྟི ཁོ, ཏེསཾ སུཙརིཏཾ ཙརནྟཱནཾ སཏྟཱནཾ ཨཏྟཱ པིཡོ ཁོ, ཏེ སུཙརིཏཾ ཙརནྟཱ སཏྟཱ ‘‘ནོ ཨཏྟཱ ཨཔྤིཡོ’’ཏི ཨེཝཾ ཀིཉྩཱཔི ཝདེཡྻུཾ, ཨཐ ཁོ ཏེསཾ སུཙརིཏཾ ཙརནྟཱནཾ སཏྟཱནཾ ཨཏྟཱ པིཡོཝ. ཏཾ ཀིསྶ ཧེཏུ? པིཡོ པིཡསྶ ཨཏྠཱཡ ཡཾ སུཙརིཏཾ ཙརེཡྻ, ཏཾ སུཙརིཏཾ ཏེ སུཙརིཏཾ ཙརནྟཱ སཏྟཱ ཨཏྟནཱཝ སཡམེཝ ཨཏྟནོ ཨཏྠཱཡ ཧི ཡསྨཱ ཀརོནྟི ¶ , ཏསྨཱ ཏེསཾ སུཙརིཏཾ ཙརནྟཱནཾ སཏྟཱནཾ ཨཏྟཱ པིཡོཝཱཏི ཨེཏཾ པརིཝིཏཀྐནཾ ཨཧོསི. ཨེཏཾ ཝཙནཾ ཨཝོཙཱཏི ཡོཛནཱ.

‘‘ཨེཝམེཏཾ མཧཱརཱཛཱ’’ཏི ཝཙནཾ པཋམཾ ཝཏྭཱ ‘‘ཡེ ཧི ཀེཙཱི’’ཏིཨཱདིཀེ བྷགཝཏོ ཝུཏྟཝཙནེཔི ཡོཛནཱ ཏཐེཝ ཀཱཏབྦཱ.

གཱཐཱསུ པན ཡོ པཎྜིཏོ ཨཏྟཱནཾ ‘‘པིཡ’’ནྟི ཙེ ཛཉྙཱ, ཨེཝཾ སཏི སོ པཎྜིཏོ ནཾ ཨཏྟཱནཾ པཱཔེན ཀམྨེན ན སཾཡུཛེ ན སཾཡོཛེཡྻ, ཏཾ ཝཙནཾ ཧི སཙྩཾ པིཡཾ ཨཏྟཱནཾ སུལབྷཾ ན ཧོཏི, དུཀྐཊཀཱརིནཱ སུཁཾ སུལབྷཾ ན ཧོཏི.

ཨནྟཀེན མཙྩུནཱ ཨདྷིཔནྣསྶ མཱནུསཾ བྷཝཾ ཛཧཏོ པཛཧནྟསྶ ཏསྶ མརཎམུཁེ ཋིཏསྶ སཏྟསྶ ཀིཾ སཀཾ ཧོཏི, མརཎམུཁེ ཋིཏོ སོ སཏྟོ ཀིཉྩ ཨཱདཱཡ པརལོཀཾ གཙྪཏི, ཚཱཡཱ གཙྪནྟཾ སཏྟཾ ཨནཔཱཡིནཱི ཨིཝ, ཨེཝཾ ཨསྶ པརལོཀགཏསྶ སཏྟསྶ ཀིཉྩ ཨནུགཾ ཧོཏི.

ཨིཏི བྷགཝཱ ཨེཝཾ པུཙྪཏི, པུཙྪིཏྭཱ ‘‘ཨུབྷོ’’ཏིཨཱདིཝིསྶཛྫནཝཙནཉྩ ཨཱཧ. ཨིདྷ ལོཀེ ཡོ མཙྩོ ཡཾ པུཉྙཉྩ ཡཾ པཱཔཉྩ ཨུབྷོ ཀམྨེ ཀུརུཏེ ཀརོཏི, ཏསྶ པརལོཀགཏསྶ མཙྩསྶ ཏཾ པུཉྙཔཱཔདྭཡཾ སཀཾ ཧོཏི. པརལོཀཾ གཏོ མཙྩོ ཏཾཝ པུཉྙཔཱཔདྭཡཾ ཨཱདཱཡ པརལོཀཾ གཙྪཏི, ཚཱཡཱ གཙྪནྟཾ སཏྟཾ ཨནཔཱཡིནཱི ཨིཝ, ཨེཝཾ ཨསྶ པརལོཀགཏསྶ མཙྩསྶ ཏཾཝ པུཉྙཔཱཔདྭཡཾ ཨནུགཾ ཧོཏི.

ཏསྨཱ པཎྜིཏོ སམྤརཱཡིཀཾ སམྤརཱཡེ ཕལནིབྦཏྟཱཔཀཾ ཀལྱཱཎཾ ནིཙཡཾ ནིཙཡནྟོ ཧུཏྭཱ ཀརེཡྻ. པཱཎིནཾ པརལོཀསྨིཾ པུཉྙཱནི པཏིཊྛཱ ཧོནྟི, ཨིཏི བྷགཝཱ ཨཱཧཱཏི ཡོཛནཱ ཀཱཏབྦཱ. ཨིདཾ ‘‘རཱཛཱ པསེནདཱི’’ཏིཨཱདིཀཾ སུཏྟཾ ཀོསལརཉྙོ ཝཙནབྷཱཝཏོ པརཝཙནཾ ཧོཏི. ‘‘ཨེཝམེཏཾ ¶ , མཧཱརཱཛ, ཨེཝམེཏཾ མཧཱརཱཛཱ’’ཏིཨཱདིཀཱ ཨནུགཱིཏི བྷགཝཏོ ཝཙནབྷཱཝཏོ སཀཝཙནཾ ཧོཏི. ཨིདཾ དྭཡཾ ཝཙནཾ སཀཝཙནཉྩ པརཝཙནཉྩ ཧོཏི. (༡༠)

༡༡༨. པཉྷེ པུཙྪིཏེ ཨིདཾ དུཀྑསཙྩཾ ཨབྷིཉྙེཡྻཾ, ཨིདཾ སམུདཡསཙྩཾ པཧཱཏབྦཾ, ཨིདཾ མགྒསཙྩཾ བྷཱཝེཏབྦཾ, ཨིདཾ ནིརོདྷསཙྩཾ, ཕལཾ ཝཱ སཙྪིཀཱཏབྦཾ, ཨིམེ ཀུསལཱཀུསལཱ དྷམྨཱ ཨེཝཾ ཀུསལཱཀུསལབྷཱཝེན གཧིཏཱ ཨནཝཛྫསཱཝཛྫབྷཱཝེན ཝཱ གཧིཏཱ སུཁཝིཔཱཀདུཀྑཝིཔཱཀབྷཱཝེན ཝཱ གཧིཏཱ ¶ , ཨིདཾ ཨིཊྛཝིཔཱཀཾ ཨིདཾ ཨནིཊྛཝིཔཱཀཾ ཕལཾ ནིབྦཏྟཡཨིཏི ཨེཝཾགཧིཏཱནཾ ཏེསཾ ཀུསལཱཀུསལདྷམྨཱནཾ ཨཡཾ ཝུཌྜྷི ཨཏྠོ, ཨཡཾ ཧཱནི ཨཏྠོཏི. ཨིཏི ཨིདཾ ‘‘པཉྷེ པུཙྪིཏེ’’ཏིཨཱདིཀཾ སུཏྟཾ ཝིསྶཛྫནཱིཡེ ཨཏྠེ ཝཱཙཀཉཱཔཀབྷཱཝེན པཝཏྟནཏོ ཝིསྶཛྫནཱིཡཾ ནཱམ.

‘‘ཨུལཱ༹རོ བུདྡྷོ བྷགཝཱ’’ཏི ཨིམིནཱ པདེན བུདྡྷཨུལཱ༹རཏཾ ཨེཀཾསེནེཝ ཨེཀཀོཊྛཱསེནེཝ ནིདྡིསེ. ‘‘སྭཱཀྑཱཏོ དྷམྨོ’’ཏི ཨིམིནཱ པདེན དྷམྨསྭཱཀྑཱཏཏཾ ཨེཀཾསེནེཝ ཨེཀཀོཊྛཱསེནེཝ ནིདྡིསེ. ‘‘སུཔྤཊིཔནྣོ སངྒྷོ’’ཏི ཨིམིནཱ པདེན སངྒྷསུཔྤཊིཔཏྟིཾ ཨེཀཾསེནེཝ ཨེཀཀོཊྛཱསེནེཝ ནིདྡིསེ ‘‘སབྦེ སངྑཱརཱ ཨནིཙྩཱ’’ཏི ཨིམིནཱ པདེན སངྑཱརཱནིཙྩཏཾ ཨེཀཾསེནེཝ ནིདྡིསེ. ‘‘སབྦེ སངྑཱརཱ དུཀྑཱ’’ཏི ཨིམིནཱ པདེན སངྑཱརདུཀྑཏཾ ཨེཀཾསེནེཝ ནིདྡིསེ. ‘‘སབྦེ དྷམྨཱ ཨནཏྟཱ’’ཏི ཨིམིནཱ པདེན དྷམྨཱནཏྟཏཾ ཨེཀཾསེནེཝ ནིདྡིསེ. ‘‘སབྦེ སངྑཱརཱ ཨནཏྟཱ’’ཏི ཨཝཏྭཱ ‘‘སབྦེ དྷམྨཱ ཨནཏྟཱ’’ཏི ཝུཏྟེན ཨིམིནཱ པདེན སངྑཱརེཧི ཨཉྙཾ ཡཾ ཝཱ པན མགྒཕལནིརོདྷསམཱཔཏྟིདྷམྨཛཱཏཾ ཨཏྠི, ཏཾ མགྒཕལནིརོདྷསམཱཔཏྟིདྷམྨཛཱཏམྤི ཨེཝཾཛཱཏིཡཾ ཨེཝཾ ཨེཀཾསབྱཱཀརཎཱིཡནྟི མགྒཕལནིརོདྷསམཱཔཏྟིདྷམྨཛཱཏསྶཱཔི ཨནཏྟཏཾ ཨེཀཾསེནེཝ ནིདྡིསེཏི ཡོཛནཱ. ཨིདཾ ‘‘ཨུལཱ༹རོ’’ཏིཨཱདིཀཾ སུཏྟཾ ཝིསྶཛྫནཱིཡེ བུདྡྷཨུལཱ༹རཏཱདིཀེ ཝཱཙཀཉཱཔཀབྷཱཝེན པཝཏྟནཏོ ཝིསྶཛྫནཱིཡཾ ནཱམ.

ནརདམྨསཱརཐི ཨཱཀངྑཏོ ཏེ བྷགཝཏོ མནསཱ སབྦཉྙུཏཉྙཱཎསཧིཏཱདིམནསཱ ཝིཙིནྟིཏཾ ཉེཡྻདྷམྨཾ དེཝཱ མནུསྶཱ སབྦེ པཱཎིནོ ན ཛཉྙཱ ན ཛཱནེཡྻུཾ. སནྟཾ ཨརཎཾ སམཱདྷིཾ ནིསེཝཏོ ཏེ བྷགཝཏོ མནསཱ ཝིཙིནྟིཏཱ ཀསིཎཱཔི སབྦེ པཱཎིནོ ན ཛཉྙཱ ན ཛཱནེཡྻུཾ. ཀསིཎཱཔི ཝཱ ཀསིཎཱརམྨཎཱཡ པཉྙཱཡཔི ན ཛཉྙཱ ན ཛཱནེཡྻུཾ. ཀསིཎཱཔཱིཏི ཨེཏྠ ཙ ‘‘ཀསིཎཱཡཔཱི’’ཏི ཝཏྟབྦེཔི ཡ-ཀཱར ལོཔཝསེན ‘‘ཀསིཎཱཔཱི’’ཏི ཝུཏྟཾ. ཨཐ ཝཱ ‘‘ཡཾ ཨཱཀངྑཏི ཡཾ ཨཱཀངྑནཾ ཀརོཏི, ཏཾ ཨཱཀངྑནཾ ཀིཾ ཀཏམ’’ནྟི པུཙྪིཏཾ པཉྷཾ ཨཉྙེསཾ ཨཝིསཡཏྟཱ ¶ ཨཝིསྶཛྫནཱིཡཾ ཧོཏཱིཏི ཡོཛནཱ. ཨིདཾ ‘‘ཨཱཀངྑཏོ’’ཏིཨཱདིཀཾ སུཏྟཾ ཨཝིསྶཛྫནཱིཡེ ཝིསཡེ ཝཱཙཀཉཱཔཀབྷཱཝེན པཝཏྟནཏོ ཨཝིསྶཛྫནཱིཡཾ ནཱམ.