📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཁུདྡཀནིཀཱཡེ

དྷམྨཔད-ཨཊྛཀཐཱ

(པཋམོ བྷཱགོ)

གནྠཱརམྦྷཀཐཱ

༡.

མཧཱམོཧཏམོནདྡྷེ, ལོཀེ ལོཀནྟདསྶིནཱ;

ཡེན སདྡྷམྨཔཛྫོཏོ, ཛཱལིཏོ ཛལིཏིདྡྷིནཱ.

༢.

ཏསྶ པཱདེ ནམསྶིཏྭཱ, སམྦུདྡྷསྶ སིརཱིམཏོ;

སདྡྷམྨཉྩསྶ པཱུཛེཏྭཱ, ཀཏྭཱ སངྒྷསྶ ཙཉྫལིཾ.

༣.

ཏཾ ཏཾ ཀཱརཎམཱགམྨ, དྷམྨཱདྷམྨེསུ ཀོཝིདོ;

སམྤཏྟསདྡྷམྨཔདོ, སཏྠཱ དྷམྨཔདཾ སུབྷཾ.

༤.

དེསེསི ཀརུཎཱཝེག-སམུསྶཱཧིཏམཱནསོ;

ཡཾ ཝེ དེཝམནུསྶཱནཾ, པཱིཏིཔཱམོཛྫཝཌྜྷནཾ.

༥.

པརམྤརཱབྷཏཱ ཏསྶ, ནིཔུཎཱ ཨཏྠཝཎྞནཱ;

ཡཱ ཏམྦཔཎྞིདཱིཔམྷི, དཱིཔབྷཱསཱཡ སཎྛིཏཱ.

༦.

ན སཱདྷཡཏི སེསཱནཾ, སཏྟཱནཾ ཧིཏསམྤདཾ;

ཨཔྤེཝ ནཱམ སཱདྷེཡྻ, སབྦལོཀསྶ སཱ ཧིཏཾ.

༧.

ཨིཏི ཨཱསཱིསམཱནེན, དནྟེན སམཙཱརིནཱ;

ཀུམཱརཀསྶཔེནཱཧཾ, ཐེརེན ཐིརཙེཏསཱ.

༨ .

སདྡྷམྨཊྛིཏིཀཱམེན, སཀྐཙྩཾ ཨབྷིཡཱཙིཏོ;

ཏཾ བྷཱསཾ ཨཏིཝིཏྠཱར-གཏཉྩ ཝཙནཀྐམཾ.

༩ .

པཧཱཡཱརོཔཡིཏྭཱན, ཏནྟིབྷཱསཾ མནོརམཾ;

གཱཐཱནཾ བྱཉྫནཔདཾ, ཡཾ ཏཏྠ ན ཝིབྷཱཝིཏཾ.

༡༠.

ཀེཝལཾ ཏཾ ཝིབྷཱཝེཏྭཱ, སེསཾ ཏམེཝ ཨཏྠཏོ;

བྷཱསནྟརེན བྷཱསིསྶཾ, ཨཱཝཧནྟོ ཝིབྷཱཝིནཾ;

མནསོ པཱིཏིཔཱམོཛྫཾ, ཨཏྠདྷམྨཱུཔནིསྶིཏནྟི.

༡. ཡམཀཝགྒོ

༡. ཙཀྑུཔཱལཏྠེརཝཏྠུ

༡.

‘‘མནོཔུབྦངྒམཱ དྷམྨཱ, མནོསེཊྛཱ མནོམཡཱ;

མནསཱ ཙེ པདུཊྛེན, བྷཱསཏི ཝཱ ཀརོཏི ཝཱ;

ཏཏོ ནཾ དུཀྑམནྭེཏི, ཙཀྐཾཝ ཝཧཏོ པད’’ནྟི. –

ཨཡཾ དྷམྨདེསནཱ ཀཏྠ བྷཱསིཏཱཏི? སཱཝཏྠིཡཾ. ཀཾ ཨཱརབྦྷཱཏི? ཙཀྑུཔཱལཏྠེརཾ.

སཱཝཏྠིཡཾ ཀིར མཧཱསུཝཎྞོ ནཱམ ཀུཊུམྦིཀོ ཨཧོསི ཨཌྜྷོ མཧདྡྷནོ མཧཱབྷོགོ ཨཔུཏྟཀོ. སོ ཨེཀདིཝསཾ ནྷཱནཏིཏྠཾ ནྷཏྭཱ ནཏྭཱ ཨཱགཙྪནྟོ ཨནྟརཱམགྒེ སམྤནྣཔཏྟསཱཁཾ ཨེཀཾ ཝནཔྤཏིཾ དིསྭཱ ‘‘ཨཡཾ མཧེསཀྑཱཡ དེཝཏཱཡ པརིགྒཧིཏོ བྷཝིསྶཏཱི’’ཏི ཏསྶ ཧེཊྛཱབྷཱགཾ སོདྷཱཔེཏྭཱ པཱཀཱརཔརིཀྑེཔཾ ཀཱརཱཔེཏྭཱ ཝཱལུཀཾ ཨོཀིརཱཔེཏྭཱ དྷཛཔཊཱཀཾ ཨུསྶཱཔེཏྭཱ ཝནཔྤཏིཾ ཨལངྐརིཏྭཱ ཨཉྫལིཾ ཀརིཏྭཱ ‘‘སཙེ པུཏྟཾ ཝཱ དྷཱིཏརཾ ཝཱ ལབྷེཡྻཾ, ཏུམྷཱཀཾ མཧཱསཀྐཱརཾ ཀརིསྶཱམཱི’’ཏི པཏྠནཾ ཀཏྭཱ པཀྐཱམི.

ཨཐསྶ ན ཙིརསྶེཝ བྷརིཡཱཡ ཀུཙྪིཡཾ གབྦྷོ པཏིཊྛཱསི. སཱ གབྦྷསྶ པཏིཊྛིཏབྷཱཝཾ ཉཏྭཱ ཏསྶ ཨཱརོཙེསི. སོ ཏསྶཱ གབྦྷསྶ པརིཧཱརམདཱསི. སཱ དསམཱསཙྩཡེན པུཏྟཾ ཝིཛཱཡི. ཏཾ ནཱམགྒཧཎདིཝསེ སེཊྛི ཨཏྟནཱ པཱལིཏཾ ཝནཔྤཏིཾ ནིསྶཱཡ ལདྡྷཏྟཱ ཏསྶ པཱལོཏི ནཱམཾ ཨཀཱསི. སཱ ཨཔརབྷཱགེ ཨཉྙམྤི པུཏྟཾ ལབྷི. ཏསྶ ཙཱུལ༹པཱལོཏི ནཱམཾ ཀཏྭཱ ཨིཏརསྶ མཧཱཔཱལོཏི ནཱམཾ ཨཀཱསི. ཏེ ཝཡཔྤཏྟེ གྷརབནྡྷནེན བནྡྷིཾསུ. ཨཔརབྷཱགེ མཱཏཱཔིཏརོ ཀཱལམཀཾསུ. སབྦམྤི ཝིབྷཝཾ ཨིཏརེཡེཝ ཝིཙཱརིཾསུ.

ཏསྨིཾ སམཡེ སཏྠཱ པཝཏྟིཏཝརདྷམྨཙཀྐོ ཨནུཔུབྦེནཱགནྟྭཱ ཨནཱཐཔིཎྜིཀེན མཧཱསེཊྛིནཱ ཙཏུཔཎྞཱསཀོཊིདྷནཾ ཝིསྶཛྫེཏྭཱ ཀཱརིཏེ ཛེཏཝནམཧཱཝིཧཱརེ ཝིཧརཏི མཧཱཛནཾ སགྒམགྒེ ཙ མོཀྑམགྒེ ཙ པཏིཊྛཱཔཡམཱནོ. ཏཐཱགཏོ ཧི མཱཏིཔཀྑཏོ ཨསཱིཏིཡཱ, པིཏིཔཀྑཏོ ཨསཱིཏིཡཱཏི དྭེཨསཱིཏིཉཱཏིཀུལསཧསྶེཧི ཀཱརིཏེ ནིགྲོདྷམཧཱཝིཧཱརེ ཨེཀམེཝ ཝསྶཱཝཱསཾ ཝསི, ཨནཱཐཔིཎྜིཀེན ཀཱརིཏེ ཛེཏཝནམཧཱཝིཧཱརེ ཨེཀཱུནཝཱིསཏིཝསྶཱནི, ཝིསཱཁཱཡ སཏྟཝཱིསཏིཀོཊིདྷནཔརིཙྩཱགེན ཀཱརིཏེ པུབྦཱརཱམེ ཚབྦསྶཱནཱིཏི དྭིནྣཾ ཀུལཱནཾ གུཎམཧཏྟཏཾ པཊིཙྩ སཱཝཏྠིཾ ནིསྶཱཡ པཉྩཝཱིསཏིཝསྶཱནི ཝསྶཱཝཱསཾ ཝསི. ཨནཱཐཔིཎྜིཀོཔི ཝིསཱཁཱཔི མཧཱཨུཔཱསིཀཱ ནིབདྡྷཾ དིཝསསྶ དྭེ ཝཱརེ ཏཐཱགཏསྶ ཨུཔཊྛཱནཾ གཙྪནྟི, གཙྪནྟཱ ཙ ‘‘དཧརསཱམཎེརཱ ནོ ཧཏྠེ ཨོལོཀེསྶནྟཱི’’ཏི ཏུཙྪཧཏྠཱ ན གཏཔུབྦཱ. པུརེབྷཏྟཾ གཙྪནྟཱ ཁཱདནཱིཡབྷོཛནཱིཡཱདཱིནི གཧེཏྭཱཝ གཙྪནྟི, པཙྪཱབྷཏྟཾ གཙྪནྟཱ པཉྩ བྷེསཛྫཱནི ཨཊྛ ཙ པཱནཱནི. ནིཝེསནེསུ པན ཏེསཾ དྭིནྣཾ དྭིནྣཾ བྷིཀྑུསཧསྶཱནཾ ནིཙྩཾ པཉྙཏྟཱསནཱནེཝ ཧོནྟི. ཨནྣཔཱནབྷེསཛྫེསུ ཡོ ཡཾ ཨིཙྪཏི, ཏསྶ ཏཾ ཡཐིཙྪིཏམེཝ སམྤཛྫཏི. ཏེསུ ཨནཱཐཔིཎྜིཀེན ཨེཀདིཝསམྤི སཏྠཱ པཉྷཾ ན པུཙྪིཏཔུབྦོ. སོ ཀིར ‘‘ཏཐཱགཏོ བུདྡྷསུཁུམཱལོ ཁཏྟིཡསུཁུམཱལོ, ‘བཧཱུཔཀཱརོ མེ, གཧཔཏཱི’ཏི མཡ྄ཧཾ དྷམྨཾ དེསེནྟོ ཀིལམེཡྻཱ’’ཏི སཏྠརི ཨདྷིམཏྟསིནེཧེན པཉྷཾ ན པུཙྪཏི. སཏྠཱ པན ཏསྨིཾ ནིསིནྣམཏྟེཡེཝ ‘‘ཨཡཾ སེཊྛི མཾ ཨརཀྑིཏབྦཊྛཱནེ རཀྑཏི. ཨཧཉྷི ཀཔྤསཏསཧསྶཱདྷིཀཱནི ཙཏྟཱརི ཨསངྑྱེཡྻཱནི ཨལངྐཏཔཊིཡཏྟཾ ཨཏྟནོ སཱིསཾ ཚིནྡིཏྭཱ ཨཀྑཱིནི ཨུཔྤཱཊེཏྭཱ ཧདཡམཾསཾ ཨུཔྤཱཊེཏྭཱ པཱཎསམཾ པུཏྟདཱརཾ པརིཙྩཛིཏྭཱ པཱརམིཡོ པཱུརེནྟོ པརེསཾ དྷམྨདེསནཏྠམེཝ པཱུརེསིཾ. ཨེས མཾ ཨརཀྑིཏབྦཊྛཱནེ རཀྑཏཱི’’ཏི ཨེཀཾ དྷམྨདེསནཾ ཀཐེཏིཡེཝ.

ཏདཱ སཱཝཏྠིཡཾ སཏྟ མནུསྶཀོཊིཡོ ཝསནྟི. ཏེསུ སཏྠུ དྷམྨཀཐཾ སུཏྭཱ པཉྩཀོཊིམཏྟཱ མནུསྶཱ ཨརིཡསཱཝཀཱ ཛཱཏཱ, དྭེཀོཊིམཏྟཱ མནུསྶཱ པུཐུཛྫནཱ. ཏེསུ ཨརིཡསཱཝཀཱནཾ དྭེཡེཝ ཀིཙྩཱནི ཨཧེསུཾ – པུརེབྷཏྟཾ དཱནཾ དེནྟི, པཙྪཱབྷཏྟཾ གནྡྷམཱལཱདིཧཏྠཱ ཝཏྠབྷེསཛྫཔཱནཀཱདཱིནི གཱཧཱཔེཏྭཱ དྷམྨསྶཝནཏྠཱཡ གཙྪནྟི. ཨཐེཀདིཝསཾ མཧཱཔཱལོ ཨརིཡསཱཝཀེ གནྡྷམཱལཱདིཧཏྠེ ཝིཧཱརཾ གཙྪནྟེ དིསྭཱ ‘‘ཨཡཾ མཧཱཛནོ ཀུཧིཾ གཙྪཏཱི’’ཏི པུཙྪིཏྭཱ ‘‘དྷམྨསྶཝནཱཡཱ’’ཏི སུཏྭཱ ‘‘ཨཧམྤི གམིསྶཱམཱི’’ཏི གནྟྭཱ སཏྠཱརཾ ཝནྡིཏྭཱ པརིསཔརིཡནྟེ ནིསཱིདི.

བུདྡྷཱ ཙ ནཱམ དྷམྨཾ དེསེནྟཱ སརཎསཱིལཔབྦཛྫཱདཱིནཾ ཨུཔནིསྶཡཾ ཨོལོཀེཏྭཱ ཨཛ྄ཛྷཱསཡཝསེན དྷམྨཾ དེསེནྟི, ཏསྨཱ ཏཾ དིཝསཾ སཏྠཱ ཏསྶ ཨུཔནིསྶཡཾ ཨོལོཀེཏྭཱ དྷམྨཾ དེསེནྟོ ཨནུཔུབྦིཀཐཾ ཀཐེསི. སེཡྻཐིདཾ – དཱནཀཐཾ, སཱིལཀཐཾ, སགྒཀཐཾ, ཀཱམཱནཾ ཨཱདཱིནཝཾ, ཨོཀཱརཾ སཾཀིལེསཾ, ནེཀྑམྨེ ཨཱནིསཾསཾ པཀཱསེསི. ཏཾ སུཏྭཱ མཧཱཔཱལོ ཀུཊུམྦིཀོ ཙིནྟེསི – ‘‘པརལོཀཾ གཙྪནྟཾ པུཏྟདྷཱིཏརོ ཝཱ བྷཱཏརོ ཝཱ བྷོགཱ ཝཱ ནཱནུགཙྪནྟི, སརཱིརམྤི ཨཏྟནཱ སདྡྷིཾ ན གཙྪཏི, ཀིཾ མེ གྷརཱཝཱསེན པབྦཛིསྶཱམཱི’’ཏི. སོ དེསནཱཔརིཡོསཱནེ སཏྠཱརཾ ཨུཔསངྐམིཏྭཱ པབྦཛྫཾ ཡཱཙི. ཨཐ ནཾ སཏྠཱ – ‘‘ཨཏྠི ཏེ ཀོཙི ཨཱཔུཙྪིཏབྦཡུཏྟཀོ ཉཱཏཱི’’ཏི ཨཱཧ. ‘‘ཀནིཊྛབྷཱཏཱ མེ ཨཏྠི, བྷནྟེ’’ཏི. ‘‘ཏེན ཧི ཏཾ ཨཱཔུཙྪཱཧཱི’’ཏི. སོ ‘‘སཱདྷཱུ’’ཏི སམྤཊིཙྪིཏྭཱ སཏྠཱརཾ ཝནྡིཏྭཱ གེཧཾ གནྟྭཱ ཀནིཊྛཾ པཀྐོསཱཔེཏྭཱ – ‘‘ཏཱཏ, ཡཾ མཡ྄ཧཾ ཨིམསྨིཾ གེཧེ སཝིཉྙཱཎཀམྤི ཨཝིཉྙཱཎཀམྤི དྷནཾ ཀིཉྩི ཨཏྠི, སབྦཾ ཏཾ ཏཝ བྷཱརོ, པཊིཔཛྫཱཧི ན’’ནྟི. ‘‘ཏུམྷེ པན ཀིཾ ཀརིསྶཐཱ’’ཏི ཨཱཧ. ‘‘ཨཧཾ སཏྠུ སནྟིཀེ པབྦཛིསྶཱམཱི’’ཏི. ‘‘ཀིཾ ཀཐེསི བྷཱཏིཀ, ཏྭཾ མེ མཱཏརི མཏཱཡ མཱཏཱ ཝིཡ, པིཏརི མཏེ པིཏཱ ཝིཡ ལདྡྷོ, གེཧེ ཏེ མཧཱཝིབྷཝོ, སཀྐཱ གེཧཾ ཨཛ྄ཛྷཱཝསནྟེཧེཝ པུཉྙཱནི ཀཱཏུཾ, མཱ ཨེཝཾ ཀརིཏྠཱ’’ཏི. ‘‘ཏཱཏ, ཨཧཾ སཏྠུ དྷམྨདེསནཾ སུཏྭཱ གྷརཱཝཱསེ ཝསིཏུཾ ན སཀྐོམི. སཏྠཱརཱ ཧི ཨཏིསཎྷསུཁུམཾ ཏིལཀྑཎཾ ཨཱརོཔེཏྭཱ ཨཱདིམཛ྄ཛྷཔརིཡོསཱནཀལྱཱཎོ དྷམྨོ དེསིཏོ, ན སཀྐཱ སོ ཨགཱརམཛ྄ཛྷེ ཝསནྟེན པཱུརེཏུཾ, པབྦཛིསྶཱམི, ཏཱཏཱ’’ཏི. ‘‘བྷཱཏིཀ, ཏརུཎཱཡེཝ ཏཱཝཏྠ, མཧལླཀཀཱལེ པབྦཛིསྶཐཱ’’ཏི. ‘‘ཏཱཏ, མཧལླཀསྶ ཧི ཨཏྟནོ ཧཏྠཔཱདཱཔི ཨནསྶཝཱ ཧོནྟི, ན ཨཏྟནོ ཝསེ ཝཏྟནྟི, ཀིམངྒཾ པན ཉཱཏཀཱ, སྭཱཧཾ ཏཝ ཀཐཾ ན ཀརོམི, སམཎཔཊིཔཏྟིཾཡེཝ པཱུརེསྶཱམི’’.

‘‘ཛརཱཛཛྫརིཏཱ ཧོནྟི, ཧཏྠཔཱདཱ ཨནསྶཝཱ;

ཡསྶ སོ ཝིཧཏཏྠཱམོ, ཀཐཾ དྷམྨཾ ཙརིསྶཏི’’. –

པབྦཛིསྶཱམེཝཱཧཾ, ཏཱཏཱཏི ཏསྶ ཝིརཝནྟསྶེཝ སཏྠུ སནྟིཀཾ གནྟྭཱ པབྦཛྫཾ ཡཱཙིཏྭཱ ལདྡྷཔབྦཛྫཱུཔསམྤདོ ཨཱཙརིཡུཔཛ྄ཛྷཱཡཱནཾ སནྟིཀེ པཉྩ ཝསྶཱནི ཝསིཏྭཱ ཝུཊྛཝསྶོ པཝཱརེཏྭཱ སཏྠཱརམུཔསངྐམིཏྭཱ ཝནྡིཏྭཱ པུཙྪི – ‘‘བྷནྟེ, ཨིམསྨིཾ སཱསནེ ཀཏི དྷུརཱནཱི’’ཏི? ‘‘གནྠདྷུརཾ, ཝིཔསྶནཱདྷུརནྟི དྭེཡེཝ དྷུརཱནི བྷིཀྑཱུ’’ཏི. ‘‘ཀཏམཾ པན, བྷནྟེ, གནྠདྷུརཾ, ཀཏམཾ ཝིཔསྶནཱདྷུར’’ནྟི? ‘‘ཨཏྟནོ པཉྙཱནུརཱུཔེན ཨེཀཾ ཝཱ དྭེ ཝཱ ནིཀཱཡེ སཀལཾ ཝཱ པན ཏེཔིཊཀཾ བུདྡྷཝཙནཾ ཨུགྒཎྷིཏྭཱ ཏསྶ དྷཱརཎཾ, ཀཐནཾ, ཝཱཙནནྟི ཨིདཾ གནྠདྷུརཾ ནཱམ, སལླཧུཀཝུཏྟིནོ པན པནྟསེནཱསནཱབྷིརཏསྶ ཨཏྟབྷཱཝེ ཁཡཝཡཾ པཊྛཔེཏྭཱ སཱཏཙྩཀིརིཡཝསེན ཝིཔསྶནཾ ཝཌྜྷེཏྭཱ ཨརཧཏྟགྒཧཎནྟི ཨིདཾ ཝིཔསྶནཱདྷུརཾ ནཱམཱ’’ཏི. ‘‘བྷནྟེ, ཨཧཾ མཧལླཀཀཱལེ པབྦཛིཏོ གནྠདྷུརཾ པཱུརེཏུཾ ན སཀྑིསྶཱམི, ཝིཔསྶནཱདྷུརཾ པན པཱུརེསྶཱམི, ཀམྨཊྛཱནཾ མེ ཀཐེཐཱ’’ཏི. ཨཐསྶ སཏྠཱ ཡཱཝ ཨརཧཏྟཾ ཀམྨཊྛཱནཾ ཀཐེསི.

སོ སཏྠཱརཾ ཝནྡིཏྭཱ ཨཏྟནཱ སཧགཱམིནོ བྷིཀྑཱུ པརིཡེསནྟོ སཊྛི བྷིཀྑཱུ ལབྷིཏྭཱ ཏེཧི སདྡྷིཾ ནིཀྑམིཏྭཱ ཝཱིསཡོཛནསཏམགྒཾ གནྟྭཱ ཨེཀཾ མཧནྟཾ པཙྩནྟགཱམཾ པཏྭཱ ཏཏྠ སཔརིཝཱརོ པིཎྜཱཡ པཱཝིསི. མནུསྶཱ ཝཏྟསམྤནྣེ བྷིཀྑཱུ དིསྭཱཝ པསནྣཙིཏྟཱ ཨཱསནཱནི པཉྙཱཔེཏྭཱ ནིསཱིདཱཔེཏྭཱ པཎཱིཏེནཱཧཱརེན པརིཝིསིཏྭཱ, ‘‘བྷནྟེ, ཀུཧིཾ ཨཡྻཱ གཙྪནྟཱི’’ཏི པུཙྪིཏྭཱ ‘‘ཡཐཱཕཱསུཀཊྛཱནཾ ཨུཔཱསཀཱ’’ཏི ཝུཏྟེ པཎྜིཏཱ མནུསྶཱ ‘‘ཝསྶཱཝཱསཾ སེནཱསནཾ པརིཡེསནྟི བྷདནྟཱ’’ཏི ཉཏྭཱ, ‘‘བྷནྟེ, སཙེ ཨཡྻཱ ཨིམཾ ཏེམཱསཾ ཨིདྷ ཝསེཡྻུཾ, མཡཾ སརཎེསུ པཏིཊྛཱཡ སཱིལཱནི གཎྷེཡྻཱམཱ’’ཏི ཨཱཧཾསུ. ཏེཔི ‘‘མཡཾ ཨིམཱནི ཀུལཱནི ནིསྶཱཡ བྷཝནིསྶརཎཾ ཀརིསྶཱམཱ’’ཏི ཨདྷིཝཱསེསུཾ.

མནུསྶཱ ཏེསཾ པཊིཉྙཾ གཧེཏྭཱ ཝིཧཱརཾ པཊིཛགྒིཏྭཱ རཏྟིཊྛཱནདིཝཱཊྛཱནཱནི སམྤཱདེཏྭཱ ཨདཾསུ. ཏེ ནིབདྡྷཾ ཏམེཝ གཱམཾ པིཎྜཱཡ པཝིསནྟི. ཨཐ ནེ ཨེཀོ ཝེཛྫོ ཨུཔསངྐམིཏྭཱ, ‘‘བྷནྟེ, བཧཱུནཾ ཝསནཊྛཱནེ ཨཕཱསུཀམྤི ནཱམ ཧོཏི, ཏསྨིཾ ཨུཔྤནྣེ མཡ྄ཧཾ ཀཐེཡྻཱཐ, བྷེསཛྫཾ ཀརིསྶཱམཱི’’ཏི པཝཱརེསི. ཐེརོ ཝསྶཱུཔནཱཡིཀདིཝསེ ཏེ བྷིཀྑཱུ ཨཱམནྟེཏྭཱ པུཙྪི, ‘‘ཨཱཝུསོ, ཨིམཾ ཏེམཱསཾ ཀཏིཧི ཨིརིཡཱཔཐེཧི ཝཱིཏིནཱམེསྶཐཱ’’ཏི? ‘‘ཙཏཱུཧི, བྷནྟེ’’ཏི. ‘‘ཀིཾ པནེཏཾ, ཨཱཝུསོ, པཏིརཱུཔཾ, ནནུ ཨཔྤམཏྟེཧི བྷཝིཏབྦཾ’’? ‘‘མཡཉྷི དྷརམཱནཀསྶ བུདྡྷསྶ སནྟིཀཱ ཀམྨཊྛཱནཾ གཧེཏྭཱ ཨཱགཏཱ, བུདྡྷཱ ཙ ནཱམ ན སཀྐཱ པམཱདེན ཨཱརཱདྷེཏུཾ, ཀལྱཱཎཛ྄ཛྷཱསཡེན ཏེ ཝོ ཨཱརཱདྷེཏབྦཱ. པམཏྟསྶ ཙ ནཱམ ཙཏྟཱརོ ཨཔཱཡཱ སཀགེཧསདིསཱ, ཨཔྤམཏྟཱ ཧོཐཱཝུསོ’’ཏི. ‘‘ཀིཾ ཏུམྷེ པན, བྷནྟེ’’ཏི? ‘‘ཨཧཾ ཏཱིཧི ཨིརིཡཱཔཐེཧི ཝཱིཏིནཱམེསྶཱམི, པིཊྛིཾ ན པསཱརེསྶཱམི, ཨཱཝུསོ’’ཏི. ‘‘སཱདྷུ, བྷནྟེ, ཨཔྤམཏྟཱ ཧོཐཱ’’ཏི.

ཨཐ ཐེརསྶ ནིདྡཾ ཨནོཀྐམནྟསྶ པཋམམཱསེ ཨཏིཀྐནྟེ མཛ྄ཛྷིམམཱསེ སམྤཏྟེ ཨཀྑིརོགོ ཨུཔྤཛྫི. ཚིདྡགྷཊཏོ ཨུདཀདྷཱརཱ ཝིཡ ཨཀྑཱིཧི ཨསྶུདྷཱརཱ པགྒྷརནྟི. སོ སབྦརཏྟིཾ སམཎདྷམྨཾ ཀཏྭཱ ཨརུཎུགྒམནེ གབྦྷཾ པཝིསིཏྭཱ ནིསཱིདི. བྷིཀྑཱུ བྷིཀྑཱཙཱརཝེལཱཡ ཐེརསྶ སནྟིཀཾ གནྟྭཱ, ‘‘བྷིཀྑཱཙཱརཝེལཱ, བྷནྟེ’’ཏི ཨཱཧཾསུ. ‘‘ཏེན ཧི, ཨཱཝུསོ, གཎྷཐ པཏྟཙཱིཝར’’ནྟི. ཨཏྟནོ པཏྟཙཱིཝརཾ གཱཧཱཔེཏྭཱ ནིཀྑམི. བྷིཀྑཱུ ཏསྶ ཨཀྑཱིཧི ཨསྶཱུནི པགྒྷརནྟེ དིསྭཱ, ‘‘ཀིམེཏཾ, བྷནྟེ’’ཏི པུཙྪིཾསུ. ‘‘ཨཀྑཱིནི མེ, ཨཱཝུསོ, ཝཱཏཱ ཝིཛ྄ཛྷནྟཱི’’ཏི. ‘‘ནནུ, བྷནྟེ, ཝེཛྫེན པཝཱརིཏམྷཱ, ཏསྶ ཀཐེམཱ’’ཏི. ‘‘སཱདྷཱཝུསོ’’ཏི ཏེ ཝེཛྫསྶ ཀཐཡིཾསུ. སོ ཏེལཾ པཙིཏྭཱ པེསེསི. ཐེརོ ནཱསཱཡ ཏེལཾ ཨཱསིཉྩནྟོ ནིསིནྣཀོཝ ཨཱསིཉྩིཏྭཱ ཨནྟོགཱམཾ པཱཝིསི. ཝེཛྫོ ཏཾ དིསྭཱ ཨཱཧ – ‘‘བྷནྟེ, ཨཡྻསྶ ཀིར ཨཀྑཱིནི ཝཱཏོ ཝིཛ྄ཛྷཏཱི’’ཏི? ‘‘ཨཱམ, ཨུཔཱསཀཱ’’ཏི. ‘‘བྷནྟེ, མཡཱ ཏེལཾ པཙིཏྭཱ པེསིཏཾ, ནཱསཱཡ ཝོ ཏེལཾ ཨཱསིཏྟ’’ནྟི? ‘‘ཨཱམ, ཨུཔཱསཀཱ’’ཏི. ‘‘ཨིདཱནི ཀཱིདིས’’ནྟི? ‘‘རུཛྫཏེཝ ཨུཔཱསཀཱ’’ཏི. ཝེཛྫོ ‘‘མཡཱ ཨེཀཝཱརེནེཝ ཝཱུཔསམནསམཏྠཾ ཏེལཾ པཧིཏཾ, ཀིཾ ནུ ཁོ རོགོ ན ཝཱུཔསནྟོ’’ཏི ཙིནྟེཏྭཱ, ‘‘བྷནྟེ, ནིསཱིདིཏྭཱ ཝོ ཏེལཾ ཨཱསིཏྟཾ, ནིཔཛྫིཏྭཱ’’ཏི པུཙྪི. ཐེརོ ཏུཎྷཱི ཨཧོསི, པུནཔྤུནཾ པུཙྪིཡམཱནོཔི ན ཀཐེསི. སོ ‘‘ཝིཧཱརཾ གནྟྭཱ ཐེརསྶ ཝསནཊྛཱནཾ ཨོལོཀེསྶཱམཱི’’ཏི ཙིནྟེཏྭཱ – ‘‘ཏེན ཧི, བྷནྟེ, གཙྪཐཱ’’ཏི ཐེརཾ ཝིསྶཛྫེཏྭཱ ཝིཧཱརཾ གནྟྭཱ ཐེརསྶ ཝསནཊྛཱནཾ ཨོལོཀེནྟོ ཙངྐམནནིསཱིདནཊྛཱནམེཝ དིསྭཱ སཡནཊྛཱནཾ ཨདིསྭཱ, ‘‘བྷནྟེ, ནིསིནྣེཧི ཝོ ཨཱསིཏྟཾ, ནིཔནྣེཧཱི’’ཏི པུཙྪི. ཐེརོ ཏུཎྷཱི ཨཧོསི. ‘‘མཱ, བྷནྟེ, ཨེཝཾ ཀརིཏྠ, སམཎདྷམྨོ ནཱམ སརཱིརཾ ཡཱཔེནྟེན སཀྐཱ ཀཱཏུཾ, ནིཔཛྫིཏྭཱ ཨཱསིཉྩཐཱ’’ཏི པུནཔྤུནཾ ཡཱཙི. ‘‘གཙྪ ཏྭཾ ཏཱཝཱཝུསོ, མནྟེཏྭཱ ཛཱནིསྶཱམཱི’’ཏི ཝེཛྫཾ ཨུཡྻོཛེསི. ཐེརསྶ ཙ ཏཏྠ ནེཝ ཉཱཏཱི, ན སཱལོཧིཏཱ ཨཏྠི, ཏེན སདྡྷིཾ མནྟེཡྻ? ཀརཛཀཱཡེན པན སདྡྷིཾ མནྟེནྟོ ‘‘ཝདེཧི ཏཱཝ, ཨཱཝུསོ པཱལིཏ, ཏྭཾ ཀིཾ ཨཀྑཱིནི ཨོལོཀེསྶསི, ཨུདཱཧུ བུདྡྷསཱསནཾ? ཨནམཏགྒསྨིཉྷི སཾསཱརཝཊྚེ ཏཝ ཨཀྑིཀཱཎསྶ གཎནཱ ནཱམ ནཏྠི, ཨནེཀཱནི པན བུདྡྷསཏཱནི བུདྡྷསཧསྶཱནི ཨཏཱིཏཱནི. ཏེསུ ཏེ ཨེཀབུདྡྷོཔི ན པརིཙིཎྞོ, ཨིདཱནི ཨིམཾ ཨནྟོཝསྶཾ ཏཡོ མཱསེ ན ནིཔཛྫིསྶཱམཱིཏི ཏེམཱསཾ ནིབདྡྷཝཱིརིཡཾ ཀརིསྶཱམི. ཏསྨཱ ཏེ ཙཀྑཱུནི ནསྶནྟུ ཝཱ བྷིཛྫནྟུ ཝཱ, བུདྡྷསཱསནམེཝ དྷཱརེཧི, མཱ ཙཀྑཱུནཱི’’ཏི བྷཱུཏཀཱཡཾ ཨོཝདནྟོ ཨིམཱ གཱཐཱཡོ ཨབྷཱསི –

‘‘ཙཀྑཱུནི ཧཱཡནྟུ མམཱཡིཏཱནི,

སོཏཱནི ཧཱཡནྟུ ཏཐེཝ ཀཱཡོ;

སབྦམྤིདཾ ཧཱཡཏུ དེཧནིསྶིཏཾ,

ཀིཾ ཀཱརཎཱ པཱལིཏ ཏྭཾ པམཛྫསི.

‘‘ཙཀྑཱུནི ཛཱིརནྟུ མམཱཡིཏཱནི,

སོཏཱནི ཛཱིརནྟུ ཏཐེཝ ཀཱཡོ;

སབྦམྤིདཾ ཛཱིརཏུ དེཧནིསྶིཏཾ,

ཀིཾ ཀཱརཎཱ པཱལིཏ ཏྭཾ པམཛྫསི.

‘‘ཙཀྑཱུནི བྷིཛྫནྟུ མམཱཡིཏཱནི,

སོཏཱནི བྷིཛྫནྟུ ཏཐེཝ ཀཱཡོ;

སབྦམྤིདཾ བྷིཛྫཏུ དེཧནིསྶིཏཾ,

ཀིཾ ཀཱརཎཱ པཱལིཏ ཏྭཾ པམཛྫསཱི’’ཏི.

ཨེཝཾ ཏཱིཧི གཱཐཱཧི ཨཏྟནོ ཨོཝཱདཾ དཏྭཱ ནིསིནྣཀོཝ ནཏྠུཀམྨཾ ཀཏྭཱ གཱམཾ པིཎྜཱཡ པཱཝིསི. ཝེཛྫོ ཏཾ དིསྭཱ ‘‘ཀིཾ, བྷནྟེ, ནཏྠུཀམྨཾ ཀཏ’’ནྟི པུཙྪི. ‘‘ཨཱམ, ཨུཔཱསཀཱ’’ཏི. ‘‘ཀཱིདིསཾ, བྷནྟེ’’ཏི? ‘‘རུཛྫཏེཝ ཨུཔཱསཀཱ’’ཏི. ‘‘ནིསཱིདིཏྭཱ ཝོ, བྷནྟེ, ནཏྠུཀམྨཾ ཀཏཾ, ནིཔཛྫིཏྭཱ’’ཏི. ཐེརོ ཏུཎྷཱི ཨཧོསི, པུནཔྤུནཾ པུཙྪིཡམཱནོཔི ན ཀིཉྩི ཀཐེསི. ཨཐ ནཾ ཝེཛྫོ, ‘‘བྷནྟེ, ཏུམྷེ སཔྤཱཡཾ ན ཀརོཐ, ཨཛྫཏོ པཊྛཱཡ ‘ཨསུཀེན མེ ཏེལཾ པཀྐ’ནྟི མཱ ཝདིཏྠ, ཨཧམྤི ‘མཡཱ ཝོ ཏེལཾ པཀྐ’ནྟི ན ཝཀྑཱམཱི’’ཏི ཨཱཧ. སོ ཝེཛྫེན པཙྩཀྑཱཏོ ཝིཧཱརཾ གནྟྭཱ ཏྭཾ ཝེཛྫེནཱཔི པཙྩཀྑཱཏོསི, ཨིརིཡཱཔཐཾ མཱ ཝིསྶཛྫི སམཎཱཏི.

‘‘པཊིཀྑིཏྟོ ཏིཀིཙྪཱཡ, ཝེཛྫེནཱཔི ཝིཝཛྫིཏོ;

ནིཡཏོ མཙྩུརཱཛསྶ, ཀིཾ པཱལིཏ པམཛྫསཱི’’ཏི. –

ཨིམཱཡ གཱཐཱཡ ཨཏྟཱནཾ ཨོཝདིཏྭཱ སམཎདྷམྨཾ ཨཀཱསི. ཨཐསྶ མཛ྄ཛྷིམཡཱམེ ཨཏིཀྐནྟེ ཨཔུབྦཾ ཨཙརིམཾ ཨཀྑཱིནི ཙེཝ ཀིལེསཱ ཙ བྷིཛྫིཾསུ. སོ སུཀྑཝིཔསྶཀོ ཨརཧཱ ཧུཏྭཱ གབྦྷཾ པཝིསིཏྭཱ ནིསཱིདི.

བྷིཀྑཱུ བྷིཀྑཱཙཱརཝེལཱཡ ཨཱགནྟྭཱ ‘‘བྷིཀྑཱཙཱརཀཱལོ, བྷནྟེ’’ཏི ཨཱཧཾསུ. ‘‘ཀཱལོ, ཨཱཝུསོ’’ཏི? ‘‘ཨཱམ, བྷནྟེ’’ཏི. ‘‘ཏེན ཧི གཙྪཐཱ’’ཏི. ‘‘ཀིཾ ཏུམྷེ པན, བྷནྟེ’’ཏི? ‘‘ཨཀྑཱིནི མེ, ཨཱཝུསོ, པརིཧཱིནཱནཱི’’ཏི. ཏེ ཏསྶ ཨཀྑཱིནི ཨོལོཀེཏྭཱ ཨསྶུཔུཎྞནེཏྟཱ ཧུཏྭཱ, ‘‘བྷནྟེ, མཱ ཙིནྟཡིཏྠ, མཡཾ ཝོ པཊིཛགྒིསྶཱམཱ’’ཏི ཐེརཾ སམསྶཱསེཏྭཱ ཀཏྟབྦཡུཏྟཀཾ ཝཏྟཔཊིཝཏྟཾ ཀཏྭཱ གཱམཾ པིཎྜཱཡ པཝིསིཾསུ. མནུསྶཱ ཐེརཾ ཨདིསྭཱ, ‘‘བྷནྟེ, ཨམྷཱཀཾ ཨཡྻོ ཀུཧི’’ནྟི པུཙྪིཏྭཱ ཏཾ པཝཏྟིཾ སུཏྭཱ ཡཱགུཾ པེསེཏྭཱ སཡཾ པིཎྜཔཱཏམཱདཱཡ གནྟྭཱ ཐེརཾ ཝནྡིཏྭཱ པཱདམཱུལེ པརིཝཏྟམཱནཱ རོདིཏྭཱ, ‘‘བྷནྟེ, མཡཾ ཝོ པཊིཛགྒིསྶཱམ, ཏུམྷེ མཱ ཙིནྟཡིཏྠཱ’’ཏི སམསྶཱསེཏྭཱ པཀྐམིཾསུ.

ཏཏོ པཊྛཱཡ ནིབདྡྷཾ ཡཱགུབྷཏྟཾ ཝིཧཱརམེཝ པེསེནྟི. ཐེརོཔི ཨིཏརེ སཊྛི བྷིཀྑཱུ ནིརནྟརཾ ཨོཝདཏི. ཏེ ཏསྶོཝཱདེ ཋཏྭཱ ཨུཔཀཊྛཱཡ པཝཱརཎཱཡ སབྦེཝ སཧ པཊིསམྦྷིདཱཧི ཨརཧཏྟཾ པཱཔུཎིཾསུ. ཏེ ཝུཊྛཝསྶཱ ཙ པན སཏྠཱརཾ དཊྛུཀཱམཱ ཧུཏྭཱ ཐེརམཱཧཾསུ, ‘‘བྷནྟེ, སཏྠཱརཾ དཊྛུཀཱམམྷཱ’’ཏི. ཐེརོ ཏེསཾ ཝཙནཾ སུཏྭཱ ཙིནྟེསི – ‘‘ཨཧཾ དུབྦལོ, ཨནྟརཱམགྒེ ཙ ཨམནུསྶཔརིགྒཧིཏཱ ཨཊཝཱི ཨཏྠི, མཡི ཨེཏེཧི སདྡྷིཾ གཙྪནྟེ སབྦེ ཀིལམིསྶནྟི, བྷིཀྑམྤི ལབྷིཏུཾ ན སཀྑིསྶནྟི, ཨིམེ པུརེཏརམེཝ པེསེསྶཱམཱི’’ཏི. ཨཐ ནེ ཨཱཧ – ‘‘ཨཱཝུསོ, ཏུམྷེ པུརཏོ གཙྪཐཱ’’ཏི. ‘‘ཏུམྷེ པན བྷནྟེ’’ཏི? ‘‘ཨཧཾ དུབྦལོ, ཨནྟརཱམགྒེ ཙ ཨམནུསྶཔརིགྒཧིཏཱ ཨཊཝཱི ཨཏྠི, མཡི ཏུམྷེཧི སདྡྷིཾ གཙྪནྟེ སབྦེ ཀིལམིསྶཐ, ཏུམྷེ པུརཏོ གཙྪཐཱ’’ཏི. ‘‘མཱ, བྷནྟེ, ཨེཝཾ ཀརིཏྠ, མཡཾ ཏུམྷེཧི སདྡྷིཾཡེཝ གམིསྶཱམཱ’’ཏི. ‘‘མཱ ཝོ, ཨཱཝུསོ, ཨེཝཾ རུཙྩིཏྠ, ཨེཝཾ སནྟེ མཡ྄ཧཾ ཨཕཱསུཀཾ བྷཝིསྶཏི, མཡ྄ཧཾ ཀནིཊྛོ པན ཏུམྷེ དིསྭཱ པུཙྪིསྶཏི, ཨཐསྶ མམ ཙཀྑཱུནཾ པརིཧཱིནབྷཱཝཾ ཨཱརོཙེཡྻཱཐ, སོ མཡ྄ཧཾ སནྟིཀཾ ཀཉྩིདེཝ པཧིཎིསྶཏི, ཏེན སདྡྷིཾ ཨཱགཙྪིསྶཱམི, ཏུམྷེ མམ ཝཙནེན དསབལཉྩ ཨསཱིཏིམཧཱཐེརེ ཙ ཝནྡཐཱ’’ཏི ཏེ ཨུཡྻོཛེསི.

ཏེ ཐེརཾ ཁམཱཔེཏྭཱ ཨནྟོགཱམཾ པཝིསིཾསུ. མནུསྶཱ ཏེ དིསྭཱ ནིསཱིདཱཔེཏྭཱ བྷིཀྑཾ དཏྭཱ ‘‘ཀིཾ, བྷནྟེ, ཨཡྻཱནཾ གམནཱཀཱརོ པཉྙཱཡཏཱི’’ཏི? ‘‘ཨཱམ, ཨུཔཱསཀཱ, སཏྠཱརཾ དཊྛུཀཱམམྷཱ’’ཏི. ཏེ པུནཔྤུནཾ ཡཱཙིཏྭཱ ཏེསཾ གམནཚནྡམེཝ ཉཏྭཱ ཨནུགནྟྭཱ པརིདེཝིཏྭཱ ནིཝཏྟིཾསུ. ཏེཔི ཨནུཔུབྦེན ཛེཏཝནཾ གནྟྭཱ སཏྠཱརཉྩ ཨསཱིཏིམཧཱཐེརེ ཙ ཐེརསྶ ཝཙནེན ཝནྡིཏྭཱ པུནདིཝསེ ཡཏྠ ཐེརསྶ ཀནིཊྛོ ཝསཏི, ཏཾ ཝཱིཐིཾ པིཎྜཱཡ པཝིསིཾསུ. ཀུཊུམྦིཀོ ཏེ སཉྫཱནིཏྭཱ ནིསཱིདཱཔེཏྭཱ ཀཏཔཊིསནྠཱརོ ‘‘བྷཱཏིཀཏྠེརོ མེ, བྷནྟེ, ཀུཧི’’ནྟི པུཙྪི. ཨཐསྶ ཏེ ཏཾ པཝཏྟིཾ ཨཱརོཙེསུཾ. སོ ཏཾ སུཏྭཱཝ ཏེསཾ པཱདམཱུལེ པརིཝཏྟེནྟོ རོདིཏྭཱ པུཙྪི – ‘‘ཨིདཱནི, བྷནྟེ, ཀིཾ ཀཱཏབྦ’’ནྟི? ‘‘ཐེརོ ཨིཏོ ཀསྶཙི ཨཱགམནཾ པཙྩཱསཱིསཏི, ཏསྶ གཏཀཱལེ ཏེན སདྡྷིཾ ཨཱགམིསྶཏཱི’’ཏི. ‘‘ཨཡཾ མེ, བྷནྟེ, བྷཱགིནེཡྻོ པཱལིཏོ ནཱམ, ཨེཏཾ པེསེཐཱ’’ཏི. ‘‘ཨེཝཾ པེསེཏུཾ ན སཀྐཱ, མགྒེ པརིཔནྠོ ཨཏྠི, ཏཾ པབྦཱཛེཏྭཱ པེསེཏུཾ ཝཊྚཏཱི’’ཏི. ‘‘ཨེཝཾ ཀཏྭཱ པེསེཐ, བྷནྟེ’’ཏི. ཨཐ ནཾ པབྦཱཛེཏྭཱ ཨཌྜྷམཱསམཏྟཾ པཏྟཙཱིཝརགྒཧཎཱདཱིནི སིཀྑཱཔེཏྭཱ མགྒཾ ཨཱཙིཀྑིཏྭཱ པཧིཎིཾསུ.

སོ ཨནུཔུབྦེན ཏཾ གཱམཾ པཏྭཱ གཱམདྭཱརེ ཨེཀཾ མཧལླཀཾ དིསྭཱ, ‘‘ཨིམཾ གཱམཾ ནིསྶཱཡ ཀོཙི ཨཱརཉྙཀོ ཝིཧཱརོ ཨཏྠཱི’’ཏི པུཙྪི. ‘‘ཨཏྠི, བྷནྟེ’’ཏི. ‘‘ཀོ ནཱམ ཏཏྠ ཝསཏཱི’’ཏི? ‘‘པཱལིཏཏྠེརོ ནཱམ, བྷནྟེ’’ཏི. ‘‘མགྒཾ མེ ཨཱཙིཀྑཐཱ’’ཏི. ‘‘ཀོསི ཏྭཾ, བྷནྟེ’’ཏི? ‘‘ཐེརསྶ བྷཱགིནེཡྻོམྷཱི’’ཏི. ཨཐ ནཾ གཧེཏྭཱ ཝིཧཱརཾ ནེསི. སོ ཐེརཾ ཝནྡིཏྭཱ ཨཌྜྷམཱསམཏྟཾ ཝཏྟཔཊིཝཏྟཾ ཀཏྭཱ ཐེརཾ སམྨཱ པཊིཛགྒིཏྭཱ, ‘‘བྷནྟེ, མཱཏུལཀུཊུམྦིཀོ མེ ཏུམྷཱཀཾ ཨཱགམནཾ པཙྩཱསཱིསཏི, ཨེཐ, གཙྪཱམཱ’’ཏི ཨཱཧ. ‘‘ཏེན ཧི ཨིམཾ མེ ཡཊྛིཀོཊིཾ གཎྷཱཧཱི’’ཏི. སོ ཡཊྛིཀོཊིཾ གཧེཏྭཱ ཐེརེན སདྡྷིཾ ཨནྟོགཱམཾ པཱཝིསི. མནུསྶཱ ཐེརཾ ནིསཱིདཱཔེཏྭཱ ‘‘ཀིཾ, བྷནྟེ, གམནཱཀཱརོ ཝོ པཉྙཱཡཏཱི’’ཏི པུཙྪིཾསུ. ‘‘ཨཱམ, ཨུཔཱསཀཱ, གནྟྭཱ སཏྠཱརཾ ཝནྡིསྶཱམཱི’’ཏི. ཏེ ནཱནཔྤཀཱརེན ཡཱཙིཏྭཱ ཨལབྷནྟཱ ཐེརཾ ཨུཡྻོཛེཏྭཱ ཨུཔཌྜྷཔཐཾ གནྟྭཱ རོདིཏྭཱ ནིཝཏྟིཾསུ. སཱམཎེརོ ཐེརཾ ཡཊྛིཀོཊིཡཱ ཨཱདཱཡ གཙྪནྟོ ཨནྟརཱམགྒེ ཨཊཝིཡཾ ཀཊྛནགརཾ ནཱམ ཐེརེན ཨུཔནིསྶཱཡ ཝུཊྛཔུབྦཾ གཱམཾ སམྤཱཔུཎི, སོ གཱམཏོ ནིཀྑམིཏྭཱ ཨརཉྙེ གཱིཏཾ གཱཡིཏྭཱ དཱརཱུནི ཨུདྡྷརནྟིཡཱ ཨེཀིསྶཱ ཨིཏྠིཡཱ གཱིཏསདྡཾ སུཏྭཱ སརེ ནིམིཏྟཾ གཎྷི. ཨིཏྠིསདྡོ ཝིཡ ཧི ཨཉྙོ སདྡོ པུརིསཱནཾ སཀལསརཱིརཾ ཕརིཏྭཱ ཋཱཏུཾ སམཏྠོ ནཱམ ནཏྠི. ཏེནཱཧ བྷགཝཱ –

‘‘ནཱཧཾ, བྷིཀྑཝེ, ཨཉྙཾ ཨེཀསདྡམྤི སམནུཔསྶཱམི, ཡཾ ཨེཝཾ པུརིསསྶ ཙིཏྟཾ པརིཡཱདཱཡ ཏིཊྛཏི, ཡཐཡིདཾ, བྷིཀྑཝེ, ཨིཏྠིསདྡོ’’ཏི (ཨ. ནི. ༡.༢).

སཱམཎེརོ ཏཏྠ ནིམིཏྟཾ གཧེཏྭཱ ཡཊྛིཀོཊིཾ ཝིསྶཛྫེཏྭཱ ‘‘ཏིཊྛཐ ཏཱཝ, བྷནྟེ, ཀིཙྩཾ མེ ཨཏྠཱི’’ཏི ཏསྶཱ སནྟིཀཾ གཏོ. སཱ ཏཾ དིསྭཱ ཏུཎྷཱི ཨཧོསི. སོ ཏཱཡ སདྡྷིཾ སཱིལཝིཔཏྟིཾ པཱཔུཎི. ཐེརོ ཙིནྟེསི – ‘‘ཨིདཱནེཝ ཨེཀོ གཱིཏསདྡོ སུཡྻིཏྠ. སོ ཙ ཁོ ཨིཏྠིཡཱ སདྡོ ཚིཛྫི, སཱམཎེརོཔི ཙིརཱཡཏི, སོ ཏཱཡ སདྡྷིཾ སཱིལཝིཔཏྟིཾ པཏྟོ བྷཝིསྶཏཱི’’ཏི. སོཔི ཨཏྟནོ ཀིཙྩཾ ནིཊྛཱཔེཏྭཱ ཨཱགནྟྭཱ ‘‘གཙྪཱམ, བྷནྟེ’’ཏི ཨཱཧ. ཨཐ ནཾ ཐེརོ པུཙྪི – ‘‘པཱཔོཛཱཏོསི སཱམཎེརཱ’’ཏི. སོ ཏུཎྷཱི ཧུཏྭཱ ཐེརེན པུནཔྤུནཾ པུཊྛོཔི ན ཀིཉྩི ཀཐེསི. ཨཐ ནཾ ཐེརོ ཨཱཧ – ‘‘ཏཱདིསེན པཱཔེན མམ ཡཊྛིཀོཊིགྒཧཎཀིཙྩཾ ནཏྠཱི’’ཏི. སོ སཾཝེགཔྤཏྟོ ཀཱསཱཡཱནི ཨཔནེཏྭཱ གིཧིནིཡཱམེན པརིདཧིཏྭཱ, ‘‘བྷནྟེ, ཨཧཾ པུབྦེ སཱམཎེརོ, ཨིདཱནི པནམྷི གིཧཱི ཛཱཏོ, པབྦཛནྟོཔི ཙ སྭཱཧཾ ན སདྡྷཱཡ པབྦཛིཏོ, མགྒཔརིཔནྠབྷཡེན པབྦཛིཏོ, ཨེཐ གཙྪཱམཱ’’ཏི ཨཱཧ. ‘‘ཨཱཝུསོ, གིཧིཔཱཔོཔི སམཎཔཱཔོཔི པཱཔོཡེཝ, ཏྭཾ སམཎབྷཱཝེ ཋཏྭཱཔི སཱིལམཏྟཾ པཱུརེཏུཾ ནཱསཀྑི, གིཧཱི ཧུཏྭཱ ཀིཾ ནཱམ ཀལྱཱཎཾ ཀརིསྶསི, ཏཱདིསེན པཱཔེན མམ ཡཊྛིཀོཊིགྒཧཎཀིཙྩཾ ནཏྠཱི’’ཏི ཨཱཧ. ‘‘བྷནྟེ, ཨམནུསྶུཔདྡཝོ མགྒོ, ཏུམྷེ ཙ ཨནྡྷཱ ཨཔརིཎཱཡཀཱ, ཀཐཾ ཨིདྷ ཝསིསྶཐཱ’’ཏི? ཨཐ ནཾ ཐེརོ, ‘‘ཨཱཝུསོ, ཏྭཾ མཱ ཨེཝཾ ཙིནྟཡི, ཨིདྷེཝ མེ ནིཔཛྫིཏྭཱ མརནྟསྶཱཔི ཨཔརཱཔརཾ པརིཝཏྟནྟསྶཱཔི ཏཡཱ སདྡྷིཾ གམནཾ ནཱམ ནཏྠཱི’’ཏི ཝཏྭཱ ཨིམཱ གཱཐཱ ཨབྷཱསི –

‘‘ཧནྡཱཧཾ ཧཏཙཀྑུསྨི, ཀནྟཱརདྡྷཱནམཱགཏོ;

སེཡྻམཱནོ ན གཙྪཱམི, ནཏྠི བཱལེ སཧཱཡཏཱ.

‘‘ཧནྡཱཧཾ ཧཏཙཀྑུསྨི, ཀནྟཱརདྡྷཱནམཱགཏོ;

མརིསྶཱམི ནོ གམིསྶཱམི, ནཏྠི བཱལེ སཧཱཡཏཱ’’ཏི.

ཏཾ སུཏྭཱ ཨིཏརོ སཾཝེགཛཱཏོ ‘‘བྷཱརིཡཾ ཝཏ མེ སཱཧསིཀཾ ཨནནུཙྪཝིཀཾ ཀམྨཾ ཀཏ’’ནྟི བཱཧཱ པགྒཡ྄ཧ ཀནྡནྟོ ཝནསཎྜཾ པཀྑནྡིཏྭཱ ཏཐཱ པཀྐནྟོཝ ཨཧོསི. ཐེརསྶཱཔི སཱིལཏེཛེན སཊྛིཡོཛནཱཡཱམཾ པཉྙཱསཡོཛནཝིཏྠཏཾ པནྣརསཡོཛནབཧལཾ ཛཡསུམནཔུཔྥཝཎྞཾ ནིསཱིདནུཊྛཧནཀཱལེསུ ཨོནམནུནྣམནཔཀཏིཀཾ སཀྐསྶ དེཝརཉྙོ པཎྜུཀམྦལསིལཱསནཾ ཨུཎྷཱཀཱརཾ དསྶེསི. སཀྐོ ‘‘ཀོ ནུ ཁོ མཾ ཋཱནཱ ཙཱཝེཏུཀཱམོ’’ཏི ཨོལོཀེནྟོ དིབྦེན ཙཀྑུནཱ ཐེརཾ ཨདྡས. ཏེནཱཧུ པོརཱཎཱ –

‘‘སཧསྶནེཏྟོ དེཝིནྡོ, དིབྦཙཀྑུཾ ཝིསོདྷཡི;

པཱཔགརཧཱི ཨཡཾ པཱལོ, ཨཱཛཱིཝཾ པརིསོདྷཡི.

‘‘སཧསྶནེཏྟོ དེཝིནྡོ, དིབྦཙཀྑུཾ ཝིསོདྷཡི;

དྷམྨགརུཀོ ཨཡཾ པཱལོ, ནིསིནྣོ སཱསནེ རཏོ’’ཏི.

ཨཐསྶ ཨེཏདཧོསི – ‘‘སཙཱཧཾ ཨེཝརཱུཔསྶ པཱཔགརཧིནོ དྷམྨགརུཀསྶ ཨཡྻསྶ སནྟིཀཾ ན གམིསྶཱམི, མུདྡྷཱ མེ སཏྟདྷཱ ཕལེཡྻ, གམིསྶཱམི ཏསྶ སནྟིཀ’’ནྟི. ཏཏོ –

‘‘སཧསྶནེཏྟོ དེཝིནྡོ, དེཝརཛྫསིརིནྡྷརོ;

ཏངྑཎེན ཨཱགནྟྭཱན, ཙཀྑུཔཱལམུཔཱགམི’’. –

ཨུཔགནྟྭཱ ཙ པན ཐེརསྶ ཨཝིདཱུརེ པདསདྡམཀཱསི. ཨཐ ནཾ ཐེརོ པུཙྪི – ‘‘ཀོ ཨེསོ’’ཏི? ‘‘ཨཧཾ, བྷནྟེ, ཨདྡྷིཀོ’’ཏི. ‘‘ཀུཧིཾ ཡཱསི ཨུཔཱསཀཱ’’ཏི? ‘‘སཱཝཏྠིཡཾ, བྷནྟེ’’ཏི. ‘‘ཡཱཧི, ཨཱཝུསོ’’ཏི. ‘‘ཨཡྻོ པན, བྷནྟེ, ཀུཧིཾ གམིསྶཏཱི’’ཏི? ‘‘ཨཧམྤི ཏཏྠེཝ གམིསྶཱམཱི’’ཏི. ‘‘ཏེན ཧི ཨེཀཏོཝ གཙྪཱམ, བྷནྟེ’’ཏི. ‘‘ཨཧཾ, ཨཱཝུསོ, དུབྦལོ, མཡཱ སདྡྷིཾ གཙྪནྟསྶ ཏཝ པཔཉྩོ བྷཝིསྶཏཱི’’ཏི. ‘‘མཡ྄ཧཾ ཨཙྩཱཡིཀཾ ནཏྠི, ཨཧམྤི ཨཡྻེན སདྡྷིཾ གཙྪནྟོ དསསུ པུཉྙཀིརིཡཝཏྠཱུསུ ཨེཀཾ ལབྷིསྶཱམི, ཨེཀཏོཝ གཙྪཱམ, བྷནྟེ’’ཏི. ཐེརོ ‘‘ཨེསོ སཔྤུརིསོ བྷཝིསྶཏཱི’’ཏི ཙིནྟེཏྭཱ – ‘‘ཏེན ཧི སདྡྷིཾ གམིསྶཱམི, ཡཊྛིཀོཊིཾ གཎྷ ཨུཔཱསཀཱ’’ཏི ཨཱཧ. སཀྐོ ཏཐཱ ཀཏྭཱ པཐཝིཾ སངྑིཔནྟོ སཱཡནྷསམཡེ ཛེཏཝནཾ སམྤཱཔེསི. ཐེརོ སངྑཔཎཝཱདིསདྡཾ སུཏྭཱ ‘‘ཀཏྠེསོ སདྡོ’’ཏི པུཙྪི. ‘‘སཱཝཏྠིཡཾ, བྷནྟེ’’ཏི? ‘‘པུབྦེ མཡཾ གམནཀཱལེ ཙིརེན གམིམྷཱ’’ཏི. ‘‘ཨཧཾ ཨུཛུམགྒཾ ཛཱནཱམི, བྷནྟེ’’ཏི. ཏསྨིཾ ཁཎེ ཐེརོ ‘‘ནཱཡཾ མནུསྶོ, དེཝཏཱ བྷཝིསྶཏཱི’’ཏི སལླཀྑེསི.

‘‘སཧསྶནེཏྟོ དེཝིནྡོ, དེཝརཛྫསིརིནྡྷརོ;

སངྑིཔིཏྭཱན ཏཾ མགྒཾ, ཁིཔྤཾ སཱཝཏྠིམཱགམཱི’’ཏི.

སོ ཐེརཾ ནེཏྭཱ ཐེརསྶེཝཏྠཱཡ ཀནིཊྛཀུཊུམྦིཀེན ཀཱརིཏཾ པཎྞསཱལཾ ནེཏྭཱ ཕལཀེ ནིསཱིདཱཔེཏྭཱ པིཡསཧཱཡཀཝཎྞེན ཏསྶ སནྟིཀཾ གནྟྭཱ, ‘‘སམྨ, ཙཱུལ༹པཱལཱ’’ཏི པཀྐོསི. ‘‘ཀིཾ, སམྨཱ’’ཏི? ‘‘ཐེརསྶཱགཏབྷཱཝཾ ཛཱནཱསཱི’’ཏི? ‘‘ན ཛཱནཱམི, ཀིཾ པན ཐེརོ ཨཱགཏོ’’ཏི? ‘‘ཨཱམ, སམྨ, ཨིདཱནི ཨཧཾ ཝིཧཱརཾ གནྟྭཱ ཐེརཾ ཏཡཱ ཀཱརིཏཔཎྞསཱལཱཡ ནིསིནྣཀཾ དིསྭཱ ཨཱགཏོམྷཱི’’ཏི ཝཏྭཱ པཀྐཱམི. ཀུཊུམྦིཀོཔི ཝིཧཱརཾ གནྟྭཱ ཐེརཾ དིསྭཱ པཱདམཱུལེ པརིཝཏྟནྟོ རོདིཏྭཱ ‘‘ཨིདཾ དིསྭཱ ཨཧཾ, བྷནྟེ, ཏུམྷཱཀཾ པབྦཛིཏུཾ ནཱདཱསི’’ནྟིཨཱདཱིནི ཝཏྭཱ དྭེ དཱསདཱརཀེ བྷུཛིསྶེ ཀཏྭཱ ཐེརསྶ སནྟིཀེ པབྦཱཛེཏྭཱ ‘‘ཨནྟོགཱམཏོ ཡཱགུབྷཏྟཱདཱིནི ཨཱཧརིཏྭཱ ཐེརཾ ཨུཔཊྛཧཐཱ’’ཏི པཊིཡཱདེསི. སཱམཎེརཱ ཝཏྟཔཊིཝཏྟཾ ཀཏྭཱ ཐེརཾ ཨུཔཊྛཧིཾསུ.

ཨཐེཀདིཝསཾ དིསཱཝཱསིནོ བྷིཀྑཱུ ‘‘སཏྠཱརཾ པསྶིསྶཱམཱ’’ཏི ཛེཏཝནཾ ཨཱགནྟྭཱ ཏཐཱགཏཾ ཝནྡིཏྭཱ ཨསཱིཏིམཧཱཐེརེ ཙ, ཝནྡིཏྭཱ ཝིཧཱརཙཱརིཀཾ ཙརནྟཱ ཙཀྑུཔཱལཏྠེརསྶ ཝསནཊྛཱནཾ པཏྭཱ ‘‘ཨིདམྤི པསྶིསྶཱམཱ’’ཏི སཱཡཾ ཏདབྷིམུཁཱ ཨཧེསུཾ. ཏསྨིཾ ཁཎེ མཧཱམེགྷོ ཨུཊྛཧི. ཏེ ‘‘ཨིདཱནི ཨཏིསཱཡནྷོ, མེགྷོ ཙ ཨུཊྛིཏོ, པཱཏོཝ གནྟྭཱ པསྶིསྶཱམཱ’’ཏི ནིཝཏྟིཾསུ. དེཝོ པཋམཡཱམཾ ཝསྶིཏྭཱ མཛ྄ཛྷིམཡཱམེ ཝིགཏོ. ཐེརོ ཨཱརདྡྷཝཱིརིཡོ ཨཱཙིཎྞཙངྐམནོ, ཏསྨཱ པཙྪིམཡཱམེ ཙངྐམནཾ ཨོཏརི. ཏདཱ ཙ པན ནཝཝུཊྛཱཡ བྷཱུམིཡཱ བཧཱུ ཨིནྡགོཔཀཱ ཨུཊྛཧིཾསུ. ཏེ ཐེརེ ཙངྐམནྟེ ཡེབྷུཡྻེན ཝིཔཛྫིཾསུ. ཨནྟེཝཱསིཀཱ ཐེརསྶ ཙངྐམནཊྛཱནཾ ཀཱལསྶེཝ ན སམྨཛྫིཾསུ. ཨིཏརེ བྷིཀྑཱུ ‘‘ཐེརསྶ ཝསནཊྛཱནཾ པསྶིསྶཱམཱ’’ཏི ཨཱགནྟྭཱ ཙངྐམནེ མཏཔཱཎཀེ དིསྭཱ ‘‘ཀོ ཨིམསྨིཾ ཙངྐམཏཱི’’ཏི པུཙྪིཾསུ. ‘‘ཨམྷཱཀཾ ཨུཔཛ྄ཛྷཱཡོ, བྷནྟེ’’ཏི. ཏེ ཨུཛ྄ཛྷཱཡིཾསུ ‘‘པསྶཐཱཝུསོ, སམཎསྶ ཀམྨཾ, སཙཀྑུཀཀཱལེ ནིཔཛྫིཏྭཱ ནིདྡཱཡནྟོ ཀིཉྩི ཨཀཏྭཱ ཨིདཱནི ཙཀྑུཝིཀལཀཱལེ ‘ཙངྐམཱམཱི’ཏི ཨེཏྟཀེ པཱཎཀེ མཱརེསི ‘ཨཏྠཾ ཀརིསྶཱམཱི’ཏི ཨནཏྠཾ ཀརོཏཱི’’ཏི.

ཨཐ ཁོ ཏེ གནྟྭཱ ཏཐཱགཏསྶ ཨཱརོཙེསུཾ, ‘‘བྷནྟེ, ཙཀྑུཔཱལཏྠེརོ ‘ཙངྐམཱམཱི’ཏི བཧཱུ པཱཎཀེ མཱརེསཱི’’ཏི. ‘‘ཀིཾ པན སོ ཏུམྷེཧི མཱརེནྟོ དིཊྛོ’’ཏི? ‘‘ན དིཊྛོ, བྷནྟེ’’ཏི. ‘‘ཡཐེཝ ཏུམྷེ ཏཾ ན པསྶཐ, ཏཐེཝ སོཔི ཏེ པཱཎེ ན པསྶཏི. ཁཱིཎཱསཝཱནཾ མརཎཙེཏནཱ ནཱམ ནཏྠི, བྷིཀྑཝེ’’ཏི. ‘‘བྷནྟེ, ཨརཧཏྟསྶ ཨུཔནིསྶཡེ སཏི ཀསྨཱ ཨནྡྷོ ཛཱཏོ’’ཏི? ‘‘ཨཏྟནོ ཀཏཀམྨཝསེན, བྷིཀྑཝེ’’ཏི. ‘‘ཀིཾ པན, བྷནྟེ, ཏེན ཀཏ’’ནྟི? ཏེན ཧི, བྷིཀྑཝེ, སུཎཱཐ –

ཨཏཱིཏེ བཱརཱཎསིཡཾ ཀཱསིརཉྙེ རཛྫཾ ཀཱརེནྟེ ཨེཀོ ཝེཛྫོ གཱམནིགམེསུ ཙརིཏྭཱ ཝེཛྫཀམྨཾ ཀརོནྟོ ཨེཀཾ ཙཀྑུདུབྦལཾ ཨིཏྠིཾ དིསྭཱ པུཙྪི – ‘‘ཀིཾ ཏེ ཨཕཱསུཀ’’ནྟི? ‘‘ཨཀྑཱིཧི ན པསྶཱམཱི’’ཏི. ‘‘བྷེསཛྫཾ ཏེ ཀརིསྶཱམཱི’’ཏི? ‘‘ཀརོཧི, སཱམཱི’’ཏི. ‘‘ཀིཾ མེ དསྶསཱི’’ཏི? ‘‘སཙེ མེ ཨཀྑཱིནི པཱཀཏིཀཱནི ཀཱཏུཾ སཀྑིསྶསི, ཨཧཾ ཏེ སདྡྷིཾ པུཏྟདྷཱིཏཱཧི དཱསཱི བྷཝིསྶཱམཱི’’ཏི. སོ ‘‘སཱདྷཱུ’’ཏི བྷེསཛྫཾ སཾཝིདཧི, ཨེཀབྷེསཛྫེནེཝ ཨཀྑཱིནི པཱཀཏིཀཱནི ཨཧེསུཾ. སཱ ཙིནྟེསི – ‘‘ཨཧམེཏསྶ སཔུཏྟདྷཱིཏཱ དཱསཱི བྷཝིསྶཱམཱི’’ཏི པཊིཛཱནིཾ, ‘‘ན ཁོ པན མཾ སཎྷེན སམྨཱཙཱརེན སམུདཱཙརིསྶཏི, ཝཉྩེསྶཱམི ན’’ནྟི. སཱ ཝེཛྫེནཱགནྟྭཱ ‘‘ཀཱིདིསཾ, བྷདྡེ’’ཏི པུཊྛཱ ‘‘པུབྦེ མེ ཨཀྑཱིནི ཐོཀཾ རུཛྫིཾསུ, ཨིདཱནི པན ཨཏིརེཀཏརཾ རུཛྫནྟཱི’’ཏི ཨཱཧ. ཝེཛྫོ ‘‘ཨཡཾ མཾ ཝཉྩེཏྭཱ ཀིཉྩི ཨདཱཏུཀཱམཱ, ན མེ ཨེཏཱཡ དིནྣཱཡ བྷཏིཡཱ ཨཏྠོ, ཨིདཱནེཝ ནཾ ཨནྡྷཾ ཀརིསྶཱམཱི’’ཏི ཙིནྟེཏྭཱ གེཧཾ གནྟྭཱ བྷརིཡཱཡ ཨེཏམཏྠཾ ཨཱཙིཀྑི. སཱ ཏུཎྷཱི ཨཧོསི. སོ ཨེཀཾ བྷེསཛྫཾ ཡོཛེཏྭཱ ཏསྶཱ སནྟིཀཾ གནྟྭཱ ‘‘བྷདྡེ, ཨིམཾ བྷེསཛྫཾ ཨཉྫེཧཱི’’ཏི ཨཉྫཱཔེསི. ཨཐསྶཱ དྭེ ཨཀྑཱིནི དཱིཔསིཁཱ ཝིཡ ཝིཛ྄ཛྷཱཡིཾསུ. སོ ཝེཛྫོ ཙཀྑུཔཱལོ ཨཧོསི.

བྷིཀྑཝེ, ཏདཱ མམ པུཏྟེན ཀཏཀམྨཾ པཙྪཏོ པཙྪཏོ ཨནུབནྡྷི. པཱཔཀམྨཉྷི ནཱམེཏཾ དྷུརཾ ཝཧཏོ བལིབདྡསྶ པདཾ ཙཀྐཾ ཝིཡ ཨནུགཙྪཏཱིཏི ཨིདཾ ཝཏྠུཾ ཀཐེཏྭཱ ཨནུསནྡྷིཾ གྷཊེཏྭཱ པཏིཊྛཱཔིཏམཏྟིཀཾ སཱསནཾ རཱཛམུདྡཱཡ ལཉྪནྟོ ཝིཡ དྷམྨརཱཛཱ ཨིམཾ གཱཐམཱཧ –

༡.

‘‘མནོཔུབྦངྒམཱ དྷམྨཱ, མནོསེཊྛཱ མནོམཡཱ;

མནསཱ ཙེ པདུཊྛེན, བྷཱསཏི ཝཱ ཀརོཏི ཝཱ;

ཏཏོ ནཾ དུཀྑམནྭེཏི, ཙཀྐཾཝ ཝཧཏོ པད’’ནྟི.

ཏཏྠ མནོཏི ཀཱམཱཝཙརཀུསལཱདིབྷེདཾ སབྦམྤི ཙཏུབྷཱུམིཀཙིཏྟཾ. ཨིམསྨིཾ པན པདེ ཏདཱ ཏསྶ ཝེཛྫསྶ ཨུཔྤནྣཙིཏྟཝསེན ནིཡམིཡམཱནཾ ཝཝཏྠཱཔིཡམཱནཾ པརིཙྪིཛྫིཡམཱནཾ དོམནསྶསཧགཏཾ པཊིགྷསམྤཡུཏྟཙིཏྟམེཝ ལབྦྷཏི. པུབྦངྒམཱཏི ཏེན པཋམགཱམིནཱ ཧུཏྭཱ སམནྣཱགཏཱ. དྷམྨཱཏི གུཎདེསནཱཔརིཡཏྟིནིསྶཏྟནིཛྫཱིཝཝསེན ཙཏྟཱརོ དྷམྨཱ ནཱམ. ཏེསུ –

‘‘ན ཧི དྷམྨོ ཨདྷམྨོ ཙ, ཨུབྷོ སམཝིཔཱཀིནོ;

ཨདྷམྨོ ནིརཡཾ ནེཏི, དྷམྨོ པཱཔེཏི སུགྒཏི’’ནྟི. (ཐེརགཱ. ༣༠༤; ཛཱ. ༡.༡༥.༣༨༦) –

ཨཡཾ གུཎདྷམྨོ ནཱམ. ‘‘དྷམྨཾ ཝོ, བྷིཀྑཝེ, དེསེསྶཱམི ཨཱདིཀལྱཱཎ’’ནྟི (མ. ནི. ༣.༤༢༠) ཨཡཾ དེསནཱདྷམྨོ ནཱམ. ‘‘ཨིདྷ པན, བྷིཀྑཝེ, ཨེཀཙྩེ ཀུལཔུཏྟཱ དྷམྨཾ པརིཡཱཔུཎནྟི སུཏྟཾ གེཡྻ’’ནྟི (མ. ནི. ༡.༢༣༩) ཨཡཾ པརིཡཏྟིདྷམྨོ ནཱམ. ‘‘ཏསྨིཾ ཁོ པན སམཡེ དྷམྨཱ ཧོནྟི, ཁནྡྷཱ ཧོནྟཱི’’ཏི (དྷ. ས. ༡༢༡) ཨཡཾ ནིསྶཏྟདྷམྨོ ནཱམ, ནིཛྫཱིཝདྷམྨོཏིཔི ཨེསོ ཨེཝ. ཏེསུ ཨིམསྨིཾ ཋཱནེ ནིསྶཏྟནིཛྫཱིཝདྷམྨོ ཨདྷིཔྤེཏོ. སོ ཨཏྠཏོ ཏཡོ ཨརཱུཔིནོ ཁནྡྷཱ ཝེདནཱཀྑནྡྷོ སཉྙཱཀྑནྡྷོ སངྑཱརཀྑནྡྷོཏི. ཨེཏེ ཧི མནོ པུབྦངྒམོ ཨེཏེསནྟི མནོཔུབྦངྒམཱ ནཱམ.

ཀཐཾ པནེཏེཧི སདྡྷིཾ ཨེཀཝཏྠུཀོ ཨེཀཱརམྨཎོ ཨཔུབྦཾ ཨཙརིམཾ ཨེཀཀྑཎེ ཨུཔྤཛྫམཱནོ མནོ པུབྦངྒམོ ནཱམ ཧོཏཱིཏི? ཨུཔྤཱདཔཙྩཡཊྛེན. ཡཐཱ ཧི བཧཱུསུ ཨེཀཏོ གཱམགྷཱཏཱདཱིནི ཀམྨཱནི ཀརོནྟེསུ ‘‘ཀོ ཨེཏེསཾ པུབྦངྒམོ’’ཏི ཝུཏྟེ ཡོ ནེསཾ པཙྩཡོ ཧོཏི, ཡཾ ནིསྶཱཡ ཏེ ཏཾ ཀམྨཾ ཀརོནྟི, སོ དཏྟོ ཝཱ མིཏྟོ ཝཱ ཏེསཾ པུབྦངྒམོཏི ཝུཙྩཏི, ཨེཝཾསམྤདམིདཾ ཝེདིཏབྦཾ. ཨིཏི ཨུཔྤཱདཔཙྩཡཊྛེན མནོ པུབྦངྒམོ ཨེཏེསནྟི མནོཔུབྦངྒམཱ. ན ཧི ཏེ མནེ ཨནུཔྤཛྫནྟེ ཨུཔྤཛྫིཏུཾ སཀྐོནྟི, མནོ པན ཨེཀཙྩེསུ ཙེཏསིཀེསུ ཨནུཔཛྫནྟེསུཔི ཨུཔྤཛྫཏིཡེཝ. ཨདྷིཔཏིཝསེན པན མནོ སེཊྛོ ཨེཏེསནྟི མནོསེཊྛོ. ཡཐཱ ཧི ཙོརཱདཱིནཾ ཙོརཛེཊྛཀཱདཡོ ཨདྷིཔཏིནོ སེཊྛཱ. ཏཐཱ ཏེསམྤི མནོ ཨདྷིཔཏི མནོཝ སེཊྛཱ. ཡཐཱ པན དཱརུཨཱདཱིཧི ནིཔྥནྣཱནི ཏཱནི ཏཱནི བྷཎྜཱནི དཱརུམཡཱདཱིནི ནཱམ ཧོནྟི, ཏཐཱ ཏེཔི མནཏོ ནིཔྥནྣཏྟཱ མནོམཡཱ ནཱམ.

པདུཊྛེནཱཏི ཨཱགནྟུཀེཧི ཨབྷིཛ྄ཛྷཱདཱིཧི དོསེཧི པདུཊྛེན. པཀཏིམནོ ཧི བྷཝངྒཙིཏྟཾ, ཏཾ ཨཔདུཊྛཾ. ཡཐཱ ཧི པསནྣཾ ཨུདཀཾ ཨཱགནྟུཀེཧི ནཱིལཱདཱིཧི ཨུཔཀྐིལིཊྛཾ ནཱིལོདཀཱདིབྷེདཾ ཧོཏི, ན ཙ ནཝཾ ཨུདཀཾ, ནཱཔི པུརིམཾ པསནྣཨུདཀམེཝ, ཏཐཱ ཏམྤི ཨཱགནྟུཀེཧི ཨབྷིཛ྄ཛྷཱདཱིཧི དོསེཧི པདུཊྛཾ ཧོཏི, ན ཙ ནཝཾ ཙིཏྟཾ, ནཱཔི པུརིམཾ བྷཝངྒཙིཏྟམེཝ, ཏེནཱཧ བྷགཝཱ – ‘‘པབྷསྶརམིདཾ, བྷིཀྑཝེ, ཙིཏྟཾ, ཏཉྩ ཁོ ཨཱགནྟུཀེཧི ཨུཔཀྐིལེསེཧི ཨུཔཀྐིལིཊྛ’’ནྟི (ཨ. ནི. ༡.༤༩). ཨེཝཾ མནསཱ ཙེ པདུཊྛེན, བྷཱསཏི ཝཱ ཀརོཏི ཝཱ སོ བྷཱསམཱནོ ཙཏུབྦིདྷཾ ཝཙཱིདུཙྩརིཏམེཝ བྷཱསཏི, ཀརོནྟོ ཏིཝིདྷཾ ཀཱཡདུཙྩརིཏམེཝ ཀརོཏི, ཨབྷཱསནྟོ ཨཀརོནྟོ ཏཱཡ ཨབྷིཛ྄ཛྷཱདཱིཧི པདུཊྛམཱནསཏཱཡ ཏིཝིདྷཾ མནོདུཙྩརིཏཾ པཱུརེཏི. ཨེཝམསྶ དས ཨཀུསལཀམྨཔཐཱ པཱརིཔཱུརིཾ གཙྪནྟི.

ཏཏོ ནཾ དུཀྑམནྭེཏཱིཏི ཏཏོ ཏིཝིདྷདུཙྩརིཏཏོ ཏཾ པུགྒལཾ དུཀྑཾ ཨནྭེཏི, དུཙྩརིཏཱནུབྷཱཝེན ཙཏཱུསུ ཨཔཱཡེསུ, མནུསྶེསུ ཝཱ ཏམཏྟབྷཱཝཾ གཙྪནྟཾ ཀཱཡཝཏྠུཀམྤི ཨིཏརམྤཱིཏི ཨིམིནཱ པརིཡཱཡེན ཀཱཡིཀཙེཏསིཀཾ ཝིཔཱཀདུཀྑཾ ཨནུགཙྪཏི. ཡཐཱ ཀིཾ? ཙཀྐཾཝ ཝཧཏོ པདནྟི དྷུརེ ཡུཏྟསྶ དྷུརཾ ཝཧཏོ བལིབདྡསྶ པདཾ ཙཀྐཾ ཝིཡ. ཡཐཱ ཧི སོ ཨེཀམྤི དིཝསཾ དྭེཔི པཉྩཔི དསཔི ཨཌྜྷམཱསམྤི མཱསམྤི ཝཧནྟོ ཙཀྐཾ ནིཝཏྟེཏུཾ ཛཧིཏུཾ ན སཀྐོཏི, ཨཐ ཁྭསྶ པུརཏོ ཨབྷིཀྐམནྟསྶ ཡུགཾ གཱིཝཾ བཱདྷཏི, པཙྪཏོ པཊིཀྐམནྟསྶ ཙཀྐཾ ཨཱུརུམཾསཾ པཊིཧནཏི. ཨིམེཧི དྭཱིཧི ཨཱཀཱརེཧི བཱདྷནྟཾ ཙཀྐཾ ཏསྶ པདཱནུཔདིཀཾ ཧོཏི; ཏཐེཝ མནསཱ པདུཊྛེན ཏཱིཎི དུཙྩརིཏཱནི པཱུརེཏྭཱ ཋིཏཾ པུགྒལཾ ནིརཡཱདཱིསུ ཏཏྠ ཏཏྠ གཏགཏཊྛཱནེ དུཙྩརིཏམཱུལཀཾ ཀཱཡིཀམྤི ཙེཏསིཀམྤི དུཀྑམནུབནྡྷཏཱིཏི.

གཱཐཱཔརིཡོསཱནེ ཏིཾསསཧསྶཱ བྷིཀྑཱུ སཧ པཊིསམྦྷིདཱཧི ཨརཧཏྟཾ པཱཔུཎིཾསུ. སམྤཏྟཔརིབྷཱཡཔི དེསནཱ སཱཏྠིཀཱ སཕལཱ ཨཧོསཱིཏི.

ཙཀྑུཔཱལཏྠེརཝཏྠུ པཋམཾ

༢. མཊྛཀུཎྜལཱིཝཏྠུ

༢. མནོཔུབྦངྒམཱ དྷམྨཱཏི དུཏིཡགཱཐཱཔི སཱཝཏྠིཡཾཡེཝ མཊྛཀུཎྜལིཾ ཨཱརབྦྷ བྷཱསིཏཱ.

སཱཝཏྠིཡཾ ཀིར ཨདིནྣཔུབྦཀོ ནཱམ བྲཱཧྨཎོ ཨཧོསི. ཏེན ཀསྶཙི ཀིཉྩི ན དིནྣཔུབྦཾ, ཏེན ཏཾ ‘‘ཨདིནྣཔུབྦཀོ’’ཏྭེཝ སཉྫཱནིཾསུ. ཏསྶ ཨེཀཔུཏྟཀོ ཨཧོསི པིཡོ མནཱཔོ. ཨཐསྶ པིལནྡྷནཾ ཀཱརེཏུཀཱམོ ‘‘སཙེ སུཝཎྞཀཱརེ ཀཱརེསྶཱམི, བྷཏྟཝེཏནཾ དཱཏབྦཾ བྷཝིསྶཏཱི’’ཏི སཡམེཝ སུཝཎྞཾ ཀོཊྚེཏྭཱ མཊྛཱནི ཀུཎྜལཱནི ཀཏྭཱ ཨདཱསི. ཏེནསྶ པུཏྟོ མཊྛཀུཎྜལཱིཏྭེཝ པཉྙཱཡིཏྠ. ཏསྶ སོལ༹སཝསྶིཀཀཱལེ པཎྜུརོགོ ཨུདཔཱདི. ཏསྶ མཱཏཱ པུཏྟཾ ཨོལོཀེཏྭཱ, ‘‘བྲཱཧྨཎ, པུཏྟསྶ ཏེ རོགོ ཨུཔྤནྣོ, ཏིཀིཙྪཱཔེཧི ན’’ནྟི ཨཱཧ. ‘‘བྷོཏི སཙེ ཝེཛྫཾ ཨཱནེསྶཱམི, བྷཏྟཝེཏནཾ དཱཏབྦཾ བྷཝིསྶཏི; ཀིཾ ཏྭཾ མམ དྷནཙྪེདཾ ན ཨོལོཀེསྶསཱི’’ཏི? ‘‘ཨཐ ནཾ ཀིཾ ཀརིསྶསི, བྲཱཧྨཎཱ’’ཏི? ‘‘ཡཐཱ མེ དྷནཙྪེདོ ན ཧོཏི, ཏཐཱ ཀརིསྶཱམཱི’’ཏི. སོ ཝེཛྫཱནཾ སནྟིཀཾ གནྟྭཱ ‘‘ཨསུཀརོགསྶ ནཱམ ཏུམྷེ ཀིཾ བྷེསཛྫཾ ཀརོཐཱ’’ཏི པུཙྪི. ཨཐསྶ ཏེ ཡཾ ཝཱ ཏཾ ཝཱ རུཀྑཏཙཱདིཾ ཨཱཙིཀྑནྟི. སོ ཏམཱཧརིཏྭཱ པུཏྟསྶ བྷེསཛྫཾ ཀརོཏི. ཏཾ ཀརོནྟསྶེཝསྶ རོགོ བལཝཱ ཨཧོསི, ཨཏེཀིཙྪབྷཱཝཾ ཨུཔཱགམི. བྲཱཧྨཎོ ཏསྶ དུབྦལབྷཱཝཾ ཉཏྭཱ ཨེཀཾ ཝེཛྫཾ པཀྐོསི. སོ ཏཾ ཨོལོཀེཏྭཱཝ ‘‘ཨམྷཱཀཾ ཨེཀཾ ཀིཙྩཾ ཨཏྠི, ཨཉྙཾ ཝེཛྫཾ པཀྐོསིཏྭཱ ཏིཀིཙྪཱཔེཧཱི’’ཏི ཏཾ པཧཱཡ ནིཀྑམི. བྲཱཧྨཎོ ཏསྶ མརཎསམཡཾ ཉཏྭཱ ‘‘ཨིམསྶ དསྶནཏྠཱཡ ཨཱགཏཱ ཨནྟོགེཧེ སཱཔཏེཡྻཾ པསྶིསྶནྟི, བཧི ནཾ ཀརིསྶཱམཱི’’ཏི པུཏྟཾ ནཱིཧརིཏྭཱ བཧིཨཱལི༹ནྡེ ནིཔཛྫཱཔེསི.

ཏཾ དིཝསཾ བྷགཝཱ བལཝཔཙྩཱུསསམཡེ མཧཱཀརུཎཱསམཱཔཏྟིཏོ ཝུཊྛཱཡ པུབྦབུདྡྷེསུ ཀཏཱདྷིཀཱརཱནཾ ཨུསྶནྣཀུསལམཱུལཱནཾ ཝེནེཡྻབནྡྷཝཱནཾ དསྶནཏྠཾ བུདྡྷཙཀྑུནཱ ལོཀཾ ཝོལོཀེནྟོ དསསཧསྶཙཀྐཝཱལེ༹སུ ཉཱཎཛཱལཾ པཏྠརི. མཊྛཀུཎྜལཱི བཧིཨཱལི༹ནྡེ ནིཔནྣཱཀཱརེནེཝ ཏསྶ ཨནྟོ པཉྙཱཡི. སཏྠཱ ཏཾ དིསྭཱ ཏསྶ ཨནྟོགེཧཱ ནཱིཧརིཏྭཱ ཏཏྠ ནིཔཛྫཱཔིཏབྷཱཝཾ ཉཏྭཱ ‘‘ཨཏྠི ནུ ཁོ མཡ྄ཧཾ ཨེཏྠ གཏཔཙྩཡེན ཨཏྠོ’’ཏི ཨུཔདྷཱརེནྟོ ཨིདཾ ཨདྡས – ཨཡཾ མཱཎཝོ མཡི ཙིཏྟཾ པསཱདེཏྭཱ ཀཱལཾ ཀཏྭཱ ཏཱཝཏིཾསདེཝལོཀེ ཏིཾསཡོཛནིཀེ ཀནཀཝིམཱནེ ནིབྦཏྟིསྶཏི, ཨཙྪརཱསཧསྶཔརིཝཱརོ བྷཝིསྶཏི, བྲཱཧྨཎོཔི ཏཾ ཛྷཱཔེཏྭཱ རོདནྟོ ཨཱལཱ༹ཧནེ ཝིཙརིསྶཏི. དེཝཔུཏྟོ ཏིགཱཝུཏཔྤམཱཎཾ སཊྛིསཀཊབྷཱརཱལངྐཱརཔཊིམཎྜིཏཾ ཨཙྪརཱསཧསྶཔརིཝཱརཾ ཨཏྟབྷཱཝཾ ཨོལོཀེཏྭཱ ‘‘ཀེན ནུ ཁོ ཀམྨེན མཡཱ ཨཡཾ སིརིསམྤཏྟི ལདྡྷཱ’’ཏི ཨོལོཀེཏྭཱ མཡི ཙིཏྟཔྤསཱདེན ལདྡྷབྷཱཝཾ ཉཏྭཱ ‘‘ཨཡཾ བྲཱཧྨཎོ དྷནཙྪེདབྷཡེན མམ བྷེསཛྫམཀཏྭཱ ཨིདཱནི ཨཱལཱ༹ཧནཾ གནྟྭཱ རོདཏི, ཝིཔྤཀཱརཔྤཏྟཾ ནཾ ཀརིསྶཱམཱི’’ཏི པིཏརི རོདནྟེ མཊྛཀུཎྜལིཝཎྞེན ཨཱགནྟྭཱ ཨཱལཱ༹ཧནསྶཱཝིདཱུརེ ནིཔཛྫིཏྭཱ རོདིསྶཏི. ཨཐ ནཾ བྲཱཧྨཎོ ‘‘ཀོསི ཏྭ’’ནྟི པུཙྪིསྶཏི. ‘‘ཨཧཾ ཏེ པུཏྟོ མཊྛཀུཎྜལཱི’’ཏི ཨཱཙིཀྑིསྶཏི. ‘‘ཀུཧིཾ ནིབྦཏྟོསཱི’’ཏི? ‘‘ཏཱཝསིཾསབྷཝནེ’’ཏི. ‘‘ཀིཾ ཀམྨཾ ཀཏྭཱ’’ཏི ཝུཏྟེ མཡི ཙིཏྟཔྤསཱདེན ནིབྦཏྟབྷཱཝཾ ཨཱཙིཀྑིསྶཏི. བྲཱཧྨཎོ ‘‘ཏུམྷེསུ ཙིཏྟཾ པསཱདེཏྭཱ སགྒེ ནིབྦཏྟོ ནཱམ ཨཏྠཱི’’ཏི མཾ པུཙྪིསྶཏི. ཨཐསྶཱཧཾ ‘‘ཨེཏྟཀཱནི སཏཱནི ཝཱ སཧསྶཱནི ཝཱ སཏསཧསྶཱནི ཝཱཏི ན སཀྐཱ གཎནཱ པརིཙྪིནྡིཏུ’’ནྟི ཝཏྭཱ དྷམྨཔདེ གཱཐཾ བྷཱསིསྶཱམི. གཱཐཱཔརིཡོསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ བྷཝིསྶཏི, མཊྛ ཀུཎྜལཱི སོཏཱཔནྣོ བྷཝིསྶཏི. ཏཐཱ ཨདིནྣཔུབྦཀོ བྲཱཧྨཎོ. ཨིཏི ཨིམཾ ཀུལཔུཏྟཾ ནིསྶཱཡ མཧཱདྷམྨཱབྷིསམཡོ བྷཝིསྶཏཱིཏི དིསྭཱ པུནདིཝསེ ཀཏསརཱིརཔཊིཛགྒནོ མཧཱབྷིཀྑུསངྒྷཔརིཝུཏོ སཱཝཏྠིཾ པིཎྜཱཡ པཝིསིཏྭཱ ཨནུཔུབྦེན བྲཱཧྨཎསྶ གེཧདྭཱརཾ གཏོ.

ཏསྨིཾ ཁཎེ མཊྛཀུཎྜལཱི ཨནྟོགེཧཱབྷིམུཁོ ནིཔནྣོ ཧོཏི. ཨཐསྶ སཏྠཱ ཨཏྟནོ ཨཔསྶནབྷཱཝཾ ཉཏྭཱ ཨེཀཾ རསྨིཾ ཝིསྶཛྫེསི. མཱཎཝོ ‘‘ཀིཾ ཨོབྷཱསོ ནཱམེསོ’’ཏི པརིཝཏྟེཏྭཱ ནིཔནྣོཝ སཏྠཱརཾ དིསྭཱ, ‘‘ཨནྡྷབཱལཔིཏརཾ ནིསྶཱཡ ཨེཝརཱུཔཾ བུདྡྷཾ ཨུཔསངྐམིཏྭཱ ཀཱཡཝེཡྻཱཝཊིཀཾ ཝཱ ཀཱཏུཾ དཱནཾ ཝཱ དཱཏུཾ དྷམྨཾ ཝཱ སོཏུཾ ནཱལཏྠཾ, ཨིདཱནི མེ ཧཏྠཱཔི ཨནདྷིཔཏེཡྻཱ, ཨཉྙཾ ཀཏྟབྦཾ ནཏྠཱི’’ཏི མནམེཝ པསཱདེསི. སཏྠཱ ‘‘ཨལཾ ཨེཏྟཀེན ཙིཏྟཔྤསཱདེན ཨིམསྶཱ’’ཏི པཀྐཱམི. སོ ཏཐཱགཏེ ཙཀྑུཔཐཾ ཝིཛཧནྟེཡེཝ པསནྣམནོ ཀཱལཾ ཀཏྭཱ སུཏྟཔྤབུདྡྷོ ཝིཡ དེཝལོཀེ ཏིཾསཡོཛནིཀེ ཀནཀཝིམཱནེ ནིབྦཏྟི.

བྲཱཧྨཎོཔིསྶ སརཱིརཾ ཛྷཱཔེཏྭཱ ཨཱལཱ༹ཧནེ རོདནཔརཱཡཎོ ཨཧོསི, དེཝསིཀཾ ཨཱལཱ༹ཧནཾ གནྟྭཱ རོདཏི – ‘‘ཀཧཾ ཨེཀཔུཏྟཀ, ཀཧཾ ཨེཀཔུཏྟཀཱ’’ཏི. དེཝཔུཏྟོཔི ཨཏྟནོ སམྤཏྟིཾ ཨོལོཀེཏྭཱ, ‘‘ཀེན མེ ཀམྨེན ལདྡྷཱ’’ཏི ཨུཔདྷཱརེནྟོ ‘‘སཏྠརི མནོཔསཱདེནཱ’’ཏི ཉཏྭཱ ‘‘ཨཡཾ བྲཱཧྨཎོ མམ ཨཕཱསུཀཀཱལེ བྷེསཛྫམཀཱརེཏྭཱ ཨིདཱནི ཨཱལཱ༹ཧནཾ གནྟྭཱ རོདཏི, ཝིཔྤཀཱརཔྤཏྟམེཝ ནཾ ཀཱཏུཾ ཝཊྚཏཱི’’ཏི མཊྛཀུཎྜལིཝཎྞེན ཨཱགནྟྭཱ ཨཱལཱ༹ཧནསྶཱཝིདཱུརེ བཱཧཱ པགྒཡ྄ཧ རོདནྟོ ཨཊྛཱསི. བྲཱཧྨཎོ ཏཾ དིསྭཱ ‘‘ཨཧཾ ཏཱཝ པུཏྟསོཀེན རོདཱམི, ཨེས ཀིམཏྠཾ རོདཏི, པུཙྪིསྶཱམི ན’’ནྟི པུཙྪནྟོ ཨིམཾ གཱཐམཱཧ –

‘‘ཨལངྐཏོ མཊྛཀུཎྜལཱི,

མཱལདྷཱརཱི ཧརིཙནྡནུསྶདོ;

བཱཧཱ པགྒཡ྄ཧ ཀནྡསི,

ཝནམཛ྄ཛྷེ ཀིཾ དུཀྑིཏོ ཏུཝ’’ནྟི. (ཝི. ཝ. ༡༢༠༧; པེ. ཝ. ༡༨༦);

སོ མཱཎཝོ ཨཱཧ –

‘‘སོཝཎྞམཡོ པབྷསྶརོ,

ཨུཔྤནྣོ རཐཔཉྫརོ མམ;

ཏསྶ ཙཀྐཡུགཾ ན ཝིནྡཱམི,

ཏེན དུཀྑེན ཛཧཱམི ཛཱིཝིཏ’’ནྟི. (ཝ. ༡༢༠༨; པེ. ཝ. ༡༨༧);

ཨཐ ནཾ བྲཱཧྨཎོ ཨཱཧ –

‘‘སོཝཎྞམཡཾ མཎིམཡཾ,

ལོཧིཏཀམཡཾ ཨཐ རཱུཔིཡམཡཾ;

ཨཱཙིཀྑ མེ བྷདྡ མཱཎཝ,

ཙཀྐཡུགཾ པཊིཔཱདཡཱམི ཏེ’’ཏི. (ཝི. ཝ. ༡༢༠༩; པེ. ཝ. ༡༨༨);

ཏཾ སུཏྭཱ མཱཎཝོ ‘‘ཨཡཾ བྲཱཧྨཎོ པུཏྟསྶ བྷེསཛྫམཀཏྭཱ པུཏྟཔཏིརཱུཔཀཾ མཾ དིསྭཱ རོདནྟོ ‘སུཝཎྞཱདིམཡཾ རཐཙཀྐཾ ཀརོམཱི’ཏི ཝདཏི, ཧོཏུ ནིགྒཎྷིསྶཱམི ན’’ནྟི ཙིནྟེཏྭཱ ‘‘ཀཱིཝ མཧནྟཾ མེ ཙཀྐཡུགཾ ཀརིསྶསཱི’’ཏི ཝཏྭཱ ‘‘ཡཱཝ མཧནྟཾ ཨཱཀངྑསི, ཏཱཝ མཧནྟཾ ཀརིསྶཱམཱི’’ཏི ཝུཏྟེ ‘‘ཙནྡིམསཱུརིཡེཧི མེ ཨཏྠོ, ཏེ མེ དེཧཱི’’ཏི ཡཱཙནྟོ ཨཱཧ –

‘‘སོ མཱཎཝོ ཏསྶ པཱཝདི,

ཙནྡསཱུརིཡཱ ཨུབྷཡེཏྠ དིསྶརེ;

སོཝཎྞམཡོ རཐོ མམ,

ཏེན ཙཀྐཡུགེན སོབྷཏཱི’’ཏི. (ཝི. ཝ. ༡༢༡༠; པེ. ཝ. ༡༨༩);

ཨཐ ནཾ བྲཱཧྨཎོ ཨཱཧ –

‘‘བཱལོ ཁོ ཏྭཾ ཨསི མཱཎཝ,

ཡོ ཏྭཾ པཏྠཡསེ ཨཔཏྠིཡཾ;

མཉྙཱམི ཏུཝཾ མརིསྶསི,

ན ཧི ཏྭཾ ལཙྪསི ཙནྡསཱུརིཡེ’’ཏི. (ཝི. ཝ. ༡༢༡༡; པེ. ཝ. ༡༩༠);

ཨཐ ནཾ མཱཎཝོ ཨཱཧ –

‘‘ཀིཾ པན པཉྙཱཡམཱནསྶཏྠཱཡ རོདནྟོ བཱལོ ཧོཏི, ཨུདཱཧུ ཨཔཉྙཱཡམཱནསྶཏྠཱཡཱ’’ཏི ཝཏྭཱ –

‘‘གམནཱགམནམྤི དིསྶཏི,

ཝཎྞདྷཱཏུ ཨུབྷཡཏྠ ཝཱིཐིཡཱ;

པེཏོ ཀཱལཀཏོ ན དིསྶཏི,

ཀོ ནིདྷ ཀནྡཏཾ བཱལྱཏརོ’’ཏི. (ཝི. ཝ. ༡༢༡༢; པེ. ཝ. ༡༩༡);

ཏཾ སུཏྭཱ བྲཱཧྨཎོ ‘‘ཡུཏྟཾ ཨེས ཝདཏཱི’’ཏི སལླཀྑེཏྭཱ –

‘‘སཙྩཾ ཁོ ཝདེསི མཱཎཝ,

ཨཧམེཝ ཀནྡཏཾ བཱལྱཏརོ;

ཙནྡཾ ཝིཡ དཱརཀོ རུདཾ,

པེཏཾ ཀཱལཀཏཱབྷིཔཏྠཡི’’ནྟི. (ཝི. ཝ. ༡༢༡༣; པེ. ཝ. ༡༩༢) –

ཝཏྭཱ ཏསྶ ཀཐཱཡ ནིསྶོཀོ ཧུཏྭཱ མཱཎཝསྶ ཐུཏིཾ ཀརོནྟོ ཨིམཱ གཱཐཱ ཨབྷཱསི –

‘‘ཨཱདིཏྟཾ ཝཏ མཾ སནྟཾ, གྷཏསིཏྟཾཝ པཱཝཀཾ;

ཝཱརིནཱ ཝིཡ ཨོསིཉྩཾ, སབྦཾ ནིབྦཱཔཡེ དརཾ.

‘‘ཨབྦཧཱི ཝཏ མེ སལླཾ, སོཀཾ ཧདཡནིསྶིཏཾ;

ཡོ མེ སོཀཔརེཏསྶ, པུཏྟསོཀཾ ཨཔཱནུདི.

‘‘སྭཱཧཾ ཨབྦཱུལ༹ྷསལློསྨི, སཱིཏིབྷཱུཏོསྨི ནིབྦུཏོ;

ན སོཙཱམི ན རོདཱམི, ཏཝ སུཏྭཱན མཱཎཝཱ’’ཏི. (ཝི. ཝ. ༡༢༡༤-༡༢༡༦; པེ. ཝ. ༡༩༣-༡༩༥);

ཨཐ ནཾ ‘‘ཀོ ནཱམ ཏྭ’’ནྟི པུཙྪནྟོ –

‘‘དེཝཏཱནུསི གནྡྷབྦོ, ཨདུ སཀྐོ པུརིནྡདོ;

ཀོ ཝཱ ཏྭཾ ཀསྶ ཝཱ པུཏྟོ, ཀཐཾ ཛཱནེམུ ཏཾ མཡ’’ནྟི. (ཝི. ཝ. ༡༢༡༧; པེ. ཝ. ༡༩༦) –

ཨཱཧ. ཨཐསྶ མཱཎཝོ –

‘‘ཡཉྩ ཀནྡསི ཡཉྩ རོདསི,

པུཏྟཾ ཨཱལཱ༹ཧནེ སཡཾ དཧིཏྭཱ;

སྭཱཧཾ ཀུསལཾ ཀརིཏྭཱ ཀམྨཾ,

ཏིདསཱནཾ སཧབྱཏཾ གཏོ’’ཏི. (ཝི. ཝ. ༡༢༡༨; པེ. ཝ. ༡༩༧) –

ཨཱཙིཀྑི. ཨཐ ནཾ བྲཱཧྨཎོ ཨཱཧ –

‘‘ཨཔྤཾ ཝཱ བཧུཾ ཝཱ ནཱདྡསཱམ,

དཱནཾ དདནྟསྶ སཀེ ཨགཱརེ;

ཨུཔོསཐཀམྨཾ ཝཱ ཏཱདིསཾ,

ཀེན ཀམྨེན གཏོསི དེཝལོཀ’’ནྟི. (ཝི. ཝ. ༡༢༡༩; པེ. ཝ. ༡༩༨);

མཱཎཝོ ཨཱཧ –

‘‘ཨཱབཱདྷིཀོཧཾ དུཀྑིཏོ གིལཱནོ,

ཨཱཏཱུརརཱུཔོམྷི སཀེ ནིཝེསནེ;

བུདྡྷཾ ཝིགཏརཛཾ ཝིཏིཎྞཀངྑཾ,

ཨདྡཀྑིཾ སུགཏཾ ཨནོམཔཉྙཾ.

‘‘སྭཱཧཾ མུདིཏདྷནོ པསནྣཙིཏྟོ,

ཨཉྫལིཾ ཨཀརིཾ ཏཐཱགཏསྶ;

ཏཱཧཾ ཀུསལཾ ཀརིཏྭཱན ཀམྨཾ,

ཏིདསཱནཾ སཧབྱཏཾ གཏོ’’ཏི. (ཝི. ཝ. ༡༢༢༠-༡༢༢༡; པེ. ཝ. ༡༩༩-༢༠༠);

ཏསྨིཾ ཀཐེནྟེཡེཝ བྲཱཧྨཎསྶ སཀལསརཱིརཾ པཱིཏིཡཱ པརིཔཱུརི. སོ ཏཾ པཱིཏིཾ པཝེདེནྟོ –

‘‘ཨཙྪརིཡཾ ཝཏ ཨབྦྷུཏཾ ཝཏ,

ཨཉྫལིཀམྨསྶ ཨཡམཱིདིསོ ཝིཔཱཀོ;

ཨཧམྤི པམུདིཏམནོ པསནྣཙིཏྟོ,

ཨཛྫེཝ བུདྡྷཾ སརཎཾ ཝཛཱམཱི’’ཏི. (ཝི. ཝ. ༡༢༢༢; པེ. ཝ. ༢༠༡) –

ཨཱཧ. ཨཐ ནཾ མཱཎཝོ –

‘‘ཨཛྫེཝ བུདྡྷཾ སརཎཾ ཝཛཱཧི,

དྷམྨཉྩ སངྒྷཉྩ པསནྣཙིཏྟོ;

ཏཐེཝ སིཀྑཱཔདཱནི པཉྩ,

ཨཁཎྜཕུལླཱནི སམཱདིཡསྶུ.

པཱཎཱཏིཔཱཏཱ ཝིརམསྶུ ཁིཔྤཾ,

ལོཀེ ཨདིནྣཾ པརིཝཛྫཡསྶུ;

ཨམཛྫཔོ མཱ ཙ མུསཱ བྷཎཱཧི,

སཀེན དཱརེན ཙ ཧོཧི ཏུཊྛོ’’ཏི. (ཝི. ཝ. ༡༢༢༣-༡༢༢༤; པེ. ཝ. ༢༠༢-༢༠༣) –

ཨཱཧ. སོ ‘‘སཱདྷཱུ’’ཏི སམྤཊིཙྪིཏྭཱ ཨིམཱ གཱཐཱ ཨབྷཱསི –

‘‘ཨཏྠཀཱམོསི མེ ཡཀྑ, ཧིཏཀཱམོསི དེཝཏེ;

ཀརོམི ཏུཡ྄ཧཾ ཝཙནཾ, ཏྭཾསི ཨཱཙརིཡོ མམ.

‘‘ཨུཔེམི སརཎཾ བུདྡྷཾ, དྷམྨཉྩཱཔི ཨནུཏྟརཾ;

སངྒྷཉྩ ནརདེཝསྶ, གཙྪཱམི སརཎཾ ཨཧཾ.

‘‘པཱཎཱཏིཔཱཏཱ ཝིརམཱམི ཁིཔྤཾ,

ལོཀེ ཨདིནྣཾ པརིཝཛྫཡཱམི;

ཨམཛྫཔོ ནོ ཙ མུསཱ བྷཎཱམི,

སཀེན དཱརེན ཙ ཧོམི ཏུཊྛོ’’ཏི. (ཝི. ཝ. ༡༢༢༥-༡༢༢༧; པེ. ཝ. ༢༠༤-༢༠༦);

ཨཐ ནཾ དེཝཔུཏྟོ, ‘‘བྲཱཧྨཎ, ཏེ གེཧེ བཧུཾ དྷནཾ ཨཏྠི, སཏྠཱརཾ ཨུཔསངྐམིཏྭཱ དཱནཾ དེཧི, དྷམྨཾ སུཎཱཧི, པཉྷཾ པུཙྪཱཧཱི’’ཏི ཝཏྭཱ ཏཏྠེཝ ཨནྟརདྷཱཡི.

བྲཱཧྨཎོཔི གེཧཾ གནྟྭཱ བྲཱཧྨཎིཾ ཨཱམནྟེཏྭཱ, ‘‘བྷདྡེ, ཨཧཾ ཨཛྫ སམཎཾ གོཏམཾ ནིམནྟེཏྭཱ པཉྷཾ པུཙྪིསྶཱམི, སཀྐཱརཾ ཀརོཧཱི’’ཏི ཝཏྭཱ ཝིཧཱརཾ གནྟྭཱ སཏྠཱརཾ ནེཝ ཨབྷིཝཱདེཏྭཱ ན པཊིསནྠཱརཾ ཀཏྭཱ ཨེཀམནྟཾ ཋིཏོ, ‘‘བྷོ གོཏམ, ཨདྷིཝཱསེཧི ཨཛྫཏནཱཡ བྷཏྟཾ སདྡྷིཾ བྷིཀྑུསངྒྷེནཱ’’ཏི ཨཱཧ. སཏྠཱ ཨདྷིཝཱསེསི. སོ སཏྠུ ཨདྷིཝཱསནཾ ཝིདིཏྭཱ ཝེགེནཱགནྟྭཱ སཀེ ནིཝེསནེ པཎཱིཏཾ ཁཱདནཱིཡཾ བྷོཛནཱིཡཉྩ པཊིཡཱདཱཔེསི. སཏྠཱ བྷིཀྑུསངྒྷཔརིཝུཏོ ཏསྶ གེཧཾ གནྟྭཱ པཉྙཏྟཱསནེ ནིསཱིདི. བྲཱཧྨཎོ སཀྐཙྩཾ པརིཝིསི, མཧཱཛནོ སནྣིཔཏི. མིཙྪཱདིཊྛིཀེན ཀིར ཏཐཱགཏེ ནིམནྟིཏེ དྭེ ཛནཀཱཡཱ སནྣིཔཏནྟི མིཙྪཱདིཊྛིཀཱ ‘‘ཨཛྫ སམཎཾ གོཏམཾ པཉྷཾ པུཙྪནཱཡ ཝིཧེཋིཡམཱནཾ པསྶིསྶཱམཱ’’ཏི སནྣིཔཏནྟི, སམྨཱདིཊྛིཀཱ ‘‘ཨཛྫ བུདྡྷཝིསཡཾ བུདྡྷལཱིལ༹ཾ པསྶིསྶཱམཱ’’ཏི སནྣིཔཏནྟི. ཨཐ ཁོ བྲཱཧྨཎོ ཀཏབྷཏྟཀིཙྩཾ ཏཐཱགཏམུཔསངྐམིཏྭཱ ནཱིཙཱསནེ ནིསིནྣོ པཉྷཾ པུཙྪི – ‘‘བྷོ གོཏམ, ཏུམྷཱཀཾ དཱནཾ ཨདཏྭཱ པཱུཛཾ ཨཀཏྭཱ དྷམྨཾ ཨསུཏྭཱ ཨུཔོསཐཝཱསཾ ཨཝསིཏྭཱ ཀེཝལཾ མནོཔསཱདམཏྟེནེཝ སགྒེ ནིབྦཏྟཱ ནཱམ ཧོནྟཱི’’ཏི? ‘‘བྲཱཧྨཎ, ཀསྨཱ མཾ པུཙྪསི, ནནུ ཏེ པུཏྟེན མཊྛཀུཎྜལིནཱ མཡི མནཾ པསཱདེཏྭཱ ཨཏྟནོ སགྒེ ནིབྦཏྟབྷཱཝོ ཀཐིཏོ’’ཏི? ‘‘ཀདཱ, བྷོ གོཏམཱ’’ཏི? ནནུ ཏྭཾ ཨཛྫ སུསཱནཾ གནྟྭཱ ཀནྡནྟོ ཨཝིདཱུརེ བཱཧཱ པགྒཡ྄ཧ ཀནྡནྟཾ ཨེཀཾ མཱཎཝཾ དིསྭཱ ‘‘ཨལངྐཏོ མཊྛཀུཎྜལཱི, མཱལདྷཱརཱི ཧརིཙནྡནུསྶདོ’’ཏི དྭཱིཧི ཛནེཧི ཀཐིཏཀཐཾ པཀཱསེནྟོ སབྦཾ མཊྛཀུཎྜལིཝཏྠུཾ ཀཐེསི. ཏེནེཝེཏཾ བུདྡྷབྷཱསིཏཾ ནཱམ ཛཱཏཾ.

ཏཾ ཀཐེཏྭཱ ཙ པན ‘‘ན ཁོ, བྲཱཧྨཎ, ཨེཀསཏཾ ཝཱ ན དྭེསཏཾ, ཨཐ ཁོ མཡི མནཾ པསཱདེཏྭཱ སགྒེ ནིབྦཏྟཱནཾ གཎནཱ ནཱམ ནཏྠཱི’’ཏི ཨཱཧ. ཨཐ མཧཱཛནོ ན ནིབྦེམཏིཀོ ཧོཏི, ཨཐསྶ ཨནིབྦེམཏིཀབྷཱཝཾ ཝིདིཏྭཱ སཏྠཱ ‘‘མཊྛཀུཎྜལིདེཝཔུཏྟོ ཝིམཱནེནེཝ སདྡྷིཾ ཨཱགཙྪཏཱུ’’ཏི ཨདྷིཊྛཱསི. སོ ཏིགཱཝུཏཔྤམཱཎེནེཝ དིབྦཱབྷརཎཔཊིམཎྜིཏེན ཨཏྟབྷཱཝེན ཨཱགནྟྭཱ ཝིམཱནཏོ ཨོརུཡ྄ཧ སཏྠཱརཾ ཝནྡིཏྭཱ ཨེཀམནྟཾ ཨཊྛཱསི. ཨཐ ནཾ སཏྠཱ ‘‘ཏྭཾ ཨིམཾ སམྤཏྟིཾ ཀིཾ ཀམྨཾ ཀཏྭཱ པཊིལབྷཱི’’ཏི པུཙྪནྟོ –

‘‘ཨབྷིཀྐནྟེན ཝཎྞེན, ཡཱ ཏྭཾ ཏིཊྛསི དེཝཏེ;

ཨོབྷཱསེནྟཱི དིསཱ སབྦཱ, ཨོསདྷཱི ཝིཡ ཏཱརཀཱ;

པུཙྪཱམི ཏཾ དེཝ མཧཱནུབྷཱཝ, མནུསྶབྷཱུཏོ ཀིམཀཱསི པུཉྙ’’ནྟི. –

གཱཐམཱཧ. ‘‘དེཝཔུཏྟོ ཨཡཾ མེ, བྷནྟེ, སམྤཏྟི ཏུམྷེསུ ཙིཏྟཾ པསཱདེཏྭཱ ལདྡྷཱ’’ཏི. ‘‘མཡི ཙིཏྟཾ པསཱདེཏྭཱ ལདྡྷཱ ཏེ’’ཏི? ‘‘ཨཱམ, བྷནྟེ’’ཏི. མཧཱཛནོ དེཝཔུཏྟཾ ཨོལོཀེཏྭཱ ‘‘ཨཙྪརིཡཱ ཝཏ, བྷོ, བུདྡྷགུཎཱ, ཨདིནྣཔུབྦཀབྲཱཧྨཎསྶ ནཱམ པུཏྟོ ཨཉྙཾ ཀིཉྩི པུཉྙཾ ཨཀཏྭཱ སཏྠརི ཙིཏྟཾ པསཱདེཏྭཱ ཨེཝརཱུཔཾ སམྤཏྟིཾ པཊིལབྷཱི’’ཏི ཏུཊྛིཾ པཝེདེསི.

ཨཐ ནེསཾ ཀུསལཱཀུསལཀམྨཀརཎེ མནོཝ པུབྦངྒམོ, མནོཝ སེཊྛོ. པསནྣེན ཧི མནེན ཀཏཾ ཀམྨཾ དེཝལོཀཾ མནུསྶལོཀཾ གཙྪནྟཾ པུགྒལཾ ཚཱཡཱཝ ན ཝིཛཧཏཱིཏི ཨིདཾ ཝཏྠུཾ ཀཐེཏྭཱ ཨནུསནྡྷིཾ གྷཊེཏྭཱ པཏིཊྛཱཔིཏམཏྟིཀཾ སཱསནཾ རཱཛམུདྡཱཡ ལཉྪནྟོ ཝིཡ དྷམྨརཱཛཱ ཨིམཾ གཱཐམཱཧ –

༢. ‘‘མནོཔུབྦངྒམཱ དྷམྨཱ, མནོསེཊྛཱ མནོམཡཱ.

མནསཱ ཙེ པསནྣེན, བྷཱསཏི ཝཱ ཀརོཏི ཝཱ;

ཏཏོ ནཾ སུཁམནྭེཏི, ཚཱཡཱཝ ཨནཔཱཡིནཱི’’ཏི.

ཏཏྠ ཀིཉྩཱཔི མནོཏི ཨཝིསེསེན སབྦམྤི ཙཏུབྷཱུམིཀཙིཏྟཾ ཝུཙྩཏི, ཨིམསྨིཾ པན པདེ ནིཡམིཡམཱནཾ ཝཝཏྠཱཔིཡམཱནཾ པརིཙྪིཛྫིཡམཱནཾ ཨཊྛཝིདྷཾ ཀཱམཱཝཙརཀུསལཙིཏྟཾ ལབྦྷཏི. ཝཏྠུཝསེན པནཱཧརིཡམཱནཾ ཏཏོཔི སོམནསྶསཧགཏཾ ཉཱཎསམྤཡུཏྟཙིཏྟམེཝ ལབྦྷཏི. པུབྦངྒམཱཏི ཏེན པཋམགཱམིནཱ ཧུཏྭཱ སམནྣཱགཏཱ. དྷམྨཱཏི ཝེདནཱདཡོ ཏཡོ ཁནྡྷཱ. ཨེཏེ ཧི ཨུཔྤཱདཔཙྩཡཊྛེན སོམནསྶསམྤཡུཏྟམནོ པུབྦངྒམོ ཨེཏེསནྟི མནོཔུབྦངྒམཱ ནཱམ. ཡཐཱ ཧི བཧཱུསུ ཨེཀཏོ ཧུཏྭཱ མཧཱབྷིཀྑུསངྒྷསྶ ཙཱིཝརདཱནཱདཱིནི ཝཱ ཨུལཱ༹རཔཱུཛཱདྷམྨསྶཝནཱདཱིནི ཝཱ མཱལཱགནྡྷསཀྐཱརཀརཎཱདཱིནི ཝཱ པུཉྙཱནི ཀརོནྟེསུ ‘‘ཀོ ཨེཏེསཾ པུབྦངྒམོ’’ཏི ཝུཏྟེ ཡོ ཏེསཾ པཙྩཡོ ཧོཏི, ཡཾ ནིསྶཱཡ ཏེ ཏཱནི པུཉྙཱནི ཀརོནྟི, སོ ཏིསྶོ ཝཱ ཕུསྶོ ཝཱ ཏེསཾ པུབྦངྒམོཏི ཝུཙྩཏི, ཨེཝཾསམྤདམིདཾ ཝེདིཏབྦཾ. ཨིཏི ཨུཔྤཱདཔཙྩཡཊྛེན མནོ པུབྦངྒམོ ཨེཏེསནྟི མནོཔུབྦངྒམཱ. ན ཧི ཏེ མནེ ཨནུཔྤཛྫནྟེ ཨུཔྤཛྫིཏུཾ སཀྐོནྟི, མནོ པན ཨེཀཙྩེསུ ཙེཏསིཀེསུ ཨནུཔྤཛྫནྟེསུཔི ཨུཔྤཛྫཏིཡེཝ. ཨེཝཾ ཨདྷིཔཏིཝསེན པན མནོ སེཊྛོ ཨེཏེསནྟི མནོསེཊྛཱ. ཡཐཱ ཧི གཎཱདཱིནཾ ཨདྷིཔཏི པུརིསོ གཎསེཊྛོ སེཎིསེཊྛོཏི ཝུཙྩཏི, ཏཐཱ ཏེསམྤི མནོཝ སེཊྛོ. ཡཐཱ པན སུཝཎྞཱདཱིཧི ནིཔྥཱདིཏཱནི བྷཎྜཱནི སུཝཎྞམཡཱདཱིནི ནཱམ ཧོནྟི, ཏཐཱ ཨེཏེཔི མནཏོ ནིཔྥནྣཏྟཱ མནོམཡཱ ནཱམ.

པསནྣེནཱཏི ཨནབྷིཛ྄ཛྷཱདཱིཧི གུཎེཧི པསནྣེན. བྷཱསཏི ཝཱ ཀརོཏི ཝཱཏི ཨེཝརཱུཔེན མནེན བྷཱསནྟོ ཙཏུབྦིདྷཾ ཝཙཱིསུཙརིཏམེཝ བྷཱསཏི, ཀརོནྟོ ཏིཝིདྷཾ ཀཱཡསུཙརིཏམེཝ ཀརོཏི, ཨབྷཱསནྟོ ཨཀརོནྟོ ཏཱཡ ཨནབྷིཛ྄ཛྷཱདཱིཧི པསནྣམཱནསཏཱཡ ཏིཝིདྷཾ མནོསུཙརིཏཾ པཱུརེཏི. ཨེཝམསྶ དས ཀུསལཀམྨཔཐཱ པཱརིཔཱུརིཾ གཙྪནྟི.

ཏཏོ ནཾ སུཁམནྭེཏཱིཏི ཏཏོ ཏིཝིདྷསུཙརིཏཏོ ནཾ པུགྒལཾ སུཁ མནྭེཏི. ཨིདྷ ཏེབྷཱུམིཀམྤི ཀུསལཾ ཨདྷིཔྤེཏཾ, ཏསྨཱ ཏེབྷཱུམིཀསུཙརིཏཱནུབྷཱཝེན སུགཏིབྷཝེ ནིབྦཏྟཾ པུགྒལཾ, དུགྒཏིཡཾ ཝཱ སུཁཱནུབྷཝནཊྛཱནེ ཋིཏཾ ཀཱཡཝཏྠུཀམྤི ཨིཏརཝཏྠུཀམྤི ཨཝཏྠུཀམྤཱིཏི ཀཱཡིཀཙེཏསིཀཾ ཝིཔཱཀསུཁཾ ཨནུགཙྪཏི, ན ཝིཛཧཏཱིཏི ཨཏྠོ ཝེདིཏབྦོ. ཡཐཱ ཀིཾ? ཚཱཡཱཝ ཨནཔཱཡིནཱིཏི ཡཐཱ ཧི ཚཱཡཱ ནཱམ སརཱིརཔྤཊིབདྡྷཱ སརཱིརེ གཙྪནྟེ གཙྪཏི, ཏིཊྛནྟེ ཏིཊྛཏི, ནིསཱིདནྟེ ནིསཱིདཏི, ན སཀྐོཏི, ‘‘སཎྷེན ཝཱ ཕརུསེན ཝཱ ནིཝཏྟཱཧཱི’’ཏི ཝཏྭཱ ཝཱ པོཐེཏྭཱ ཝཱ ནིཝཏྟཱཔེཏུཾ. ཀསྨཱ? སརཱིརཔྤཊིབདྡྷཏྟཱ. ཨེཝམེཝ ཨིམེསཾ དསནྣཾ ཀུསལཀམྨཔཐཱནཾ ཨཱཙིཎྞསམཱཙིཎྞཀུསལམཱུལིཀཾ ཀཱམཱཝཙརཱདིབྷེདཾ ཀཱཡིཀཙེཏསིཀསུཁཾ གཏགཏཊྛཱནེ ཨནཔཱཡིནཱི ཚཱཡཱ ཝིཡ ཧུཏྭཱ ན ཝིཛཧཏཱིཏི.

གཱཐཱཔརིཡོསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི, མཊྛཀུཎྜལིདེཝཔུཏྟོ སོཏཱཔཏྟིཕལེ པཏིཊྛཧི, ཏཐཱ ཨདིནྣཔུབྦཀོ བྲཱཧྨཎོ. སོ ཏཱཝམཧནྟཾ ཝིབྷཝཾ བུདྡྷསཱསནེ ཝིཔྤཀིརཱིཏི.

མཊྛཀུཎྜལཱིཝཏྠུ དུཏིཡཾ.

༣. ཏིསྶཏྠེརཝཏྠུ

ཨཀྐོཙྪི མནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏིསྶཏྠེརཾ ཨཱརབྦྷ ཀཐེསི.

སོ ཀིརཱཡསྨཱ ཏིསྶཏྠེརོ བྷགཝཏོ པིཏུཙྪཱཔུཏྟོ ཨཧོསི, མཧལླཀཀཱལེ པབྦཛིཏྭཱ བུདྡྷཱནཾ ཨུཔྤནྣལཱབྷསཀྐཱརཾ པརིབྷུཉྫནྟོ ཐཱུལསརཱིརོ ཨཱཀོཊིཏཔཙྩཱཀོཊིཏེཧི ཙཱིཝརེཧི ནིཝཱསེཏྭཱ ཡེབྷུཡྻེན ཝིཧཱརམཛ྄ཛྷེ ཨུཔཊྛཱནསཱལཱཡཾ ནིསཱིདཏི. ཏཐཱགཏཾ དསྶནཏྠཱཡ ཨཱགཏཱ ཨཱགནྟུཀབྷིཀྑཱུ ཏཾ དིསྭཱ ‘‘ཨེཀོ མཧཱཐེརོ བྷཝིསྶཏཱི’’ཏི སཉྙཱཡ ཏསྶ སནྟིཀཾ གནྟྭཱ ཝཏྟཾ ཨཱཔུཙྪནྟི, པཱདསམྦཱཧནཱདཱིནི ཨཱཔུཙྪནྟི. སོ ཏུཎྷཱི ཨཧོསི. ཨཐ ནཾ ཨེཀོ དཧརབྷིཀྑུ ‘‘ཀཏིཝསྶཱ ཏུམྷེ’’ཏི པུཙྪིཏྭཱ ‘‘ཝསྶཾ ནཏྠི, མཧལླཀཀཱལེ པབྦཛིཏཱ མཡ’’ནྟི ཝུཏྟེ, ‘‘ཨཱཝུསོ, དུབྦིནཱིཏ, མཧལླཀ, ཨཏྟནོ པམཱཎཾ ན ཛཱནཱསི, ཨེཏྟཀེ མཧཱཐེརེ དིསྭཱ སཱམཱིཙིཀམྨམཏྟམྤི ན ཀརོསི, ཝཏྟེ ཨཱཔུཙྪིཡམཱནེ ཏུཎྷཱི ཧོསི, ཀུཀྐུཙྩམཏྟམྤི ཏེ ནཏྠཱི’’ཏི ཨཙྪརཾ པཧརི. སོ ཁཏྟིཡམཱནཾ ཛནེཏྭཱ ‘‘ཏུམྷེ ཀསྶ སནྟིཀཾ ཨཱགཏཱ’’ཏི པུཙྪིཏྭཱ ‘‘སཏྠུ སནྟིཀ’’ནྟི ཝུཏྟེ ‘‘མཾ པན ‘ཀོ ཨེསོ’ཏི སལླཀྑེཐ, མཱུལམེཝ ཝོ ཚིནྡིསྶཱམཱི’’ཏི ཝཏྭཱ རུདནྟོ དུཀྑཱི དུམྨནོ སཏྠུ སནྟིཀཾ ཨགམཱསི. ཨཐ ནཾ སཏྠཱ ‘‘ཀིཾ ནུ ཏྭཾ ཏིསྶ དུཀྑཱི དུམྨནོ ཨསྶུམུཁོ རོདམཱནོ ཨཱགཏོསཱི’’ཏི པུཙྪི. ཏེཔི བྷིཀྑཱུ ‘‘ཨེས གནྟྭཱ ཀིཉྩི ཨཱལོལ༹ཾ ཀརེཡྻཱ’’ཏི ཏེནེཝ སདྡྷིཾ གནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདིཾསུ. སོ སཏྠཱརཱ པུཙྪིཏོ ‘‘ཨིམེ མཾ, བྷནྟེ, བྷིཀྑཱུ ཨཀྐོསནྟཱི’’ཏི ཨཱཧ. ‘‘ཀཧཾ པན ཏྭཾ ནིསིནྣོསཱི’’ཏི? ‘‘ཝིཧཱརམཛ྄ཛྷེ ཨུཔཊྛཱནསཱལཱཡཾ, བྷནྟེ’’ཏི. ‘‘ཨིམེ ཏེ བྷིཀྑཱུ ཨཱགཙྪནྟཱ དིཊྛཱ’’ཏི? ‘‘ཨཱམ, དིཊྛཱ, བྷནྟེ’’ཏི. ‘‘ཀིཾ ཨུཊྛཱཡ ཏེ པཙྩུགྒམནཾ ཀཏ’’ནྟི? ‘‘ན ཀཏཾ, བྷནྟེ’’ཏི. ‘‘པརིཀྑཱརགྒཧཎཾ ཨཱཔུཙྪིཏ’’ནྟི? ‘‘ནཱཔུཙྪིཏཾ, བྷནྟེ’’ཏི. ‘‘ཝཏྟཾ ཝཱ པཱནཱིཡཾ ཝཱ ཨཱཔུཙྪིཏ’’ནྟི. ‘‘ནཱཔུཙྪིཏཾ བྷནྟེ’’ཏི? ‘‘ཨཱསནཾ ནཱིཧརིཏྭཱ ཨབྷིཝཱདེཏྭཱ པཱདསམྦཱཧནཾ ཀཏ’’ནྟི? ‘‘ན ཀཏཾ, བྷནྟེ’’ཏི. ‘‘ཏིསྶ མཧལླཀབྷིཀྑཱུནཾ སབྦཾ ཨེཏཾ ཝཏྟཾ ཀཱཏབྦཾ, ཨེཏཾ ཝཏྟཾ ཨཀརོནྟེན ཝིཧཱརམཛ྄ཛྷེ ནིསཱིདིཏུཾ ན ཝཊྚཏི, ཏཝེཝ དོསོ, ཨེཏེ བྷིཀྑཱུ ཁམཱཔེཧཱི’’ཏི? ‘‘ཨེཏེ མཾ, བྷནྟེ, ཨཀྐོསིཾསུ, ནཱཧཾ ཨེཏེ ཁམཱཔེམཱི’’ཏི. ‘‘ཏིསྶ མཱ ཨེཝཾ ཀརི, ཏཝེཝ དོསོ, ཁམཱཔེཧི ནེ’’ཏི? ‘‘ན ཁམཱཔེམི, བྷནྟེ’’ཏི. ཨཐ སཏྠཱ ‘‘དུབྦཙོ ཨེས, བྷནྟེ’’ཏི བྷིཀྑཱུཧི ཝུཏྟེ ‘‘ན, བྷིཀྑཝེ, ཨིདཱནེཝ དུབྦཙོ ཨེས, པུབྦེཔི ཨེས དུབྦཙོཡེཝཱ’’ཏི ཝཏྭཱ ‘‘ཨིདཱནི ཏཱཝསྶ, བྷནྟེ, དུབྦཙབྷཱཝོ ཨམྷེཧི ཉཱཏོ, ཨཏཱིཏེ ཨེས ཀིཾ ཨཀཱསཱི’’ཏི ཝུཏྟེ ‘‘ཏེན ཧི, བྷིཀྑཝེ, སུཎཱཐཱ’’ཏི ཝཏྭཱ ཨཏཱིཏམཱཧརི.

ཨཏཱིཏེ བཱརཱཎསིཡཾ བཱརཱཎསིརཉྙེ རཛྫཾ ཀཱརེནྟེ དེཝིལོ ནཱམ ཏཱཔསོ ཨཊྛ མཱསེ ཧིམཝནྟེ ཝསིཏྭཱ ལོཎམྦིལསེཝནཏྠཱཡ ཙཏྟཱརོ མཱསེ ནགརམུཔནིསྶཱཡ ཝསིཏུཀཱམོ ཧིམཝནྟཏོ ཨཱགནྟྭཱ ནགརདྭཱརེ དཱརཀེ དིསྭཱ པུཙྪི – ‘‘ཨིམཾ ནགརཾ སམྤཏྟཔབྦཛིཏཱ ཀཏྠ ཝསནྟཱི’’ཏི? ‘‘ཀུམྦྷཀཱརསཱལཱཡཾ, བྷནྟེ’’ཏི. ཏཱཔསོ ཀུམྦྷཀཱརསཱལཾ གནྟྭཱ དྭཱརེ ཋཏྭཱ ‘‘སཙེ ཏེ བྷགྒཝ ཨགརུ, ཝསེཡྻཱམ ཨེཀརཏྟིཾ སཱལཱཡ’’ནྟི ཨཱཧ. ཀུམྦྷཀཱརོ ‘‘མཡ྄ཧཾ རཏྟིཾ སཱལཱཡཾ ཀིཙྩཾ ནཏྠི, མཧཏཱི སཱལཱ, ཡཐཱསུཁཾ ཝསཐ, བྷནྟེ’’ཏི སཱལཾ ནིཡྻཱདེསི. ཏསྨིཾ པཝིསིཏྭཱ ནིསིནྣེ ཨཔརོཔི ནཱརདོ ནཱམ ཏཱཔསོ ཧིམཝནྟཏོ ཨཱགནྟྭཱ ཀུམྦྷཀཱརཾ ཨེཀརཏྟིཝཱསཾ ཡཱཙི. ཀུམྦྷཀཱརོ ‘‘པཋམཾ ཨཱགཏོ ཨིམིནཱ སདྡྷིཾ ཨེཀཏོ ཝསིཏུཀཱམོ བྷཝེཡྻ ཝཱ ནོ ཝཱ, ཨཏྟཱནཾ པརིམོཙེསྶཱམཱི’’ཏི ཙིནྟེཏྭཱ ‘‘སཙེ, བྷནྟེ, པཋམཾ ཨུཔགཏོ རོཙེསྶཏི, ཏསྶ རུཙིཡཱ ཝསཐཱ’’ཏི ཨཱཧ. སོ ཏམུཔསངྐམིཏྭཱ ‘‘སཙེ ཏེ, ཨཱཙརིཡ ཨགརུ, མཡཉྩེཏྠ ཨེཀརཏྟིཾ ཝསེཡྻཱམཱ’’ཏི ཡཱཙི. ‘‘མཧཏཱི སཱལཱ, པཝིསིཏྭཱ ཨེཀམནྟེ ཝསཱཧཱི’’ཏི ཝུཏྟེ པཝིསིཏྭཱ པུརེཏརཾ པཝིཊྛསྶ དེཝིལསྶ ཨཔརབྷཱགེ ནིསཱིདི. ཨུབྷོཔི སཱརཎཱིཡཀཐཾ ཀཐེཏྭཱ ནིཔཛྫིཾསུ.

སཡནཀཱལེ ནཱརདོ དེཝིལསྶ ནིཔཛྫནཊྛཱནཉྩ དྭཱརཉྩ སལླཀྑེཏྭཱ ནིཔཛྫི. སོ པན དེཝིལོ ནིཔཛྫམཱནོ ཨཏྟནོ ནིཔཛྫནཊྛཱནེ ཨནིཔཛྫིཏྭཱ དྭཱརམཛ྄ཛྷེ ཏིརིཡཾ ནིཔཛྫི. ནཱརདོ རཏྟིཾ ནིཀྑམནྟོ ཏསྶ ཛཊཱསུ ཨཀྐམི. ‘‘ཀོ མཾ ཨཀྐམཱི’’ཏི ཙ ཝུཏྟེ, ‘‘ཨཱཙརིཡ, ཨཧ’’ནྟི ཨཱཧ. ‘‘ཀཱུཊཛཊིལ, ཨརཉྙཏོ ཨཱགནྟྭཱ མམ ཛཊཱསུ ཨཀྐམསཱི’’ཏི. ‘‘ཨཱཙརིཡ, ཏུམྷཱཀཾ ཨིདྷ ནིཔནྣབྷཱཝཾ ན ཛཱནཱམི, ཁམཐ མེ’’ཏི ཝཏྭཱ ཏསྶ ཀནྡནྟསྶེཝ བཧི ནིཀྑམི. ཨིཏརོ ‘‘ཨཡཾ པཝིསནྟོཔི མཾ ཨཀྐམེཡྻཱ’’ཏི པརིཝཏྟེཏྭཱ པཱདཊྛཱནེ སཱིསཾ ཀཏྭཱ ནིཔཛྫི. ནཱརདོཔི པཝིསནྟོ ‘‘པཋམཾཔཱཧཾ ཨཱཙརིཡེ ཨཔརཛ྄ཛྷིཾ, ཨིདཱནིསྶ པཱདཔསྶེན པཝིསིསྶཱམཱི’’ཏི ཙིནྟེཏྭཱ ཨཱགཙྪནྟོ གཱིཝཱཡ ཨཀྐམི. ‘‘ཀོ ཨེསོ’’ཏི ཙ ཝུཏྟེ ‘‘ཨཧཾ, ཨཱཙརིཡཱ’’ཏི ཝཏྭཱ ‘‘ཀཱུཊཛཊིལ, པཋམཾ མམ ཛཊཱསུ ཨཀྐམིཏྭཱ ཨིདཱནི གཱིཝཱཡ ཨཀྐམསི, ཨབྷིསཔིསྶཱམི ཏ’’ནྟི ཝུཏྟེ, ‘‘ཨཱཙརིཡ, མཡ྄ཧཾ དོསོ ནཏྠི, ཨཧཾ ཏུམྷཱཀཾ ཨེཝཾ ནིཔནྣབྷཱཝཾ ན ཛཱནཱམི, ‘པཋམམྤི མེ ཨཔརདྡྷཾ, ཨིདཱནི པཱདཔསྶེན པཝིསིསྶཱམཱི’ཏི པཝིཊྛོམྷི, ཁམཐ མེ’’ཏི ཨཱཧ. ‘‘ཀཱུཊཛཊིལ, ཨབྷིསཔིསྶཱམི ཏ’’ནྟི. ‘‘མཱ ཨེཝཾ ཀརིཏྠ ཨཱཙརིཡཱ’’ཏི. སོ ཏསྶ ཝཙནཾ ཨནཱདིཡིཏྭཱ –

‘‘སཧསྶརཾསཱི སཏཏེཛོ, སཱུརིཡོ ཏམཝིནོདནོ;

པཱཏོདཡནྟེ སཱུརིཡེ, མུདྡྷཱ ཏེ ཕལཏུ སཏྟདྷཱ’’ཏི. –

ཏཾ ཨབྷིསཔི ཨེཝ. ནཱརདོ, ‘‘ཨཱཙརིཡ, མཡ྄ཧཾ དོསོ ནཏྠཱིཏི མམ ཝདནྟསྶེཝ ཏུམྷེ ཨབྷིསཔཐ, ཡསྶ དོསོ ཨཏྠི, ཏསྶ མུདྡྷཱ ཕལཏུ, མཱ ནིདྡོསསྶཱ’’ཏི ཝཏྭཱ –

‘‘སཧསྶརཾསཱི སཏཏེཛོ, སཱུརིཡོ ཏམཝིནོདནོ;

པཱཏོདཡནྟེ སཱུརིཡེ, མུདྡྷཱ ཏེ ཕལཏུ སཏྟདྷཱ’’ཏི. –

ཨབྷིསཔི. སོ པན མཧཱནུབྷཱཝོ ཨཏཱིཏེ ཙཏྟཱལཱིས, ཨནཱགཏེ ཙཏྟཱལཱིསཱཏི ཨསཱིཏིཀཔྤེ ཨནུསྶརཏི. ཏསྨཱ ‘‘ཀསྶ ནུ ཁོ ཨུཔརི ཨབྷིསཔོ པཏིསྶཏཱི’’ཏི ཨུཔདྷཱརེནྟོ ‘‘ཨཱཙརིཡསྶཱ’’ཏི ཉཏྭཱ ཏསྨིཾ ཨནུཀམྤཾ པཊིཙྩ ཨིདྡྷིབལེན ཨརུཎུགྒམནཾ ནིཝཱརེཏི.

ནཱགརཱ ཨརུཎེ ཨནུགྒཙྪནྟེ རཱཛདྭཱརཾ གནྟྭཱ, ‘‘དེཝ, ཏཡི རཛྫཾ ཀཱརེནྟེ ཨརུཎོ ན ཨུཊྛཧཏི, ཨརུཎཾ ནོ ཨུཊྛཱཔེཧཱི’’ཏི ཀནྡིཾསུ. རཱཛཱ ཨཏྟནོ ཀཱཡཀམྨཱདཱིནི ཨོལོཀེནྟོ ཀིཉྩི ཨཡུཏྟཾ ཨདིསྭཱ ‘‘ཀིཾ ནུ ཁོ ཀཱརཎ’’ནྟི ཙིནྟེཏྭཱ ‘‘པབྦཛིཏཱནཾ ཝིཝཱདེན བྷཝིཏབྦ’’ནྟི པརིསངྐམཱནོ ‘‘ཀཙྩི ཨིམསྨིཾ ནགརེ པབྦཛིཏཱ ཨཏྠཱི’’ཏི པུཙྪི. ‘‘ཧིཡྻོ སཱཡཾ ཀུམྦྷཀཱརསཱལཱཡཾ ཨཱགཏཱ ཨཏྠི དེཝཱ’’ཏི ཝུཏྟེ ཏཾཁཎཉྙེཝ རཱཛཱ ཨུཀྐཱཧི དྷཱརིཡམཱནཱཧི ཏཏྠ གནྟྭཱ ནཱརདཾ ཝནྡིཏྭཱ ཨེཀམནྟཾ ནིསིནྣོ ཨཱཧ –

‘‘ཀམྨནྟཱ ནཔྤཝཏྟནྟི, ཛམྦུདཱིཔསྶ ནཱརད;

ཀེན ལོཀོ ཏམོབྷཱུཏོ, ཏཾ མེ ཨཀྑཱཧི པུཙྪིཏོ’’ཏི.

ནཱརདོ སབྦཾ ཏཾ པཝཏྟིཾ ཨཱཙིཀྑིཏྭཱ ཨིམིནཱ ཀཱརཎེན ཨཧཾ ཨིམིནཱ ཨབྷིསཔིཏོ, ཨཐཱཧཾ ‘‘མཡ྄ཧཾ དོསོ ནཏྠི, ཡསྶ དོསོ ཨཏྠི, ཏསྶེཝ ཨུཔརི ཨབྷིསཔོ པཏཏཱུ’’ཏི ཝཏྭཱ ཨབྷིསཔིཾ. ཨབྷིསཔིཏྭཱ ཙ པན ‘‘ཀསྶ ནུ ཁོ ཨུཔརི ཨབྷིསཔོ པཏིསྶཏཱི’’ཏི ཨུཔདྷཱརེནྟོ ‘‘སཱུརིཡུགྒམནཝེལཱཡ ཨཱཙརིཡསྶ མུདྡྷཱ སཏྟདྷཱ ཕལིསྶཏཱི’’ཏི དིསྭཱ ཨེཏསྨིཾ ཨནུཀམྤཾ པཊིཙྩ ཨརུཎསྶ ཨུགྒམནཾ ན དེམཱིཏི. ‘‘ཀཐཾ པན ཨསྶ, བྷནྟེ, ཨནྟརཱཡོ ན བྷཝེཡྻཱ’’ཏི. ‘‘སཙེ མཾ ཁམཱཔེཡྻ, ན བྷཝེཡྻཱ’’ཏི. ‘‘ཏེན ཧི ཁམཱཔེཧཱི’’ཏི ཝུཏྟེ ‘‘ཨེསོ, མཧཱརཱཛ, མཾ ཛཊཱསུ ཙ གཱིཝཱཡ ཙ ཨཀྐམི, ནཱཧཾ ཨེཏཾ ཀཱུཊཛཊིལཾ ཁམཱཔེམཱི’’ཏི. ‘‘ཁམཱཔེཧི, བྷནྟེ, མཱ ཨེཝཾ ཀརིཏྠཱ’’ཏི. ‘‘ན ཁམཱཔེམཱི’’ཏི. ‘‘མུདྡྷཱ ཏེ སཏྟདྷཱ ཕལིསྶཏཱི’’ཏི ཝུཏྟེཔི ན ཁམཱཔེཏིཡེཝ. ཨཐ ནཾ རཱཛཱ ‘‘ན ཏྭཾ ཨཏྟནོ རུཙིཡཱ ཁམཱཔེསྶསཱི’’ཏི ཧཏྠཔཱདཀུཙྪིགཱིཝཱསུ གཱཧཱཔེཏྭཱ ནཱརདསྶ པཱདམཱུལེ ཨོནམཱཔེསི. ནཱརདོཔི ‘‘ཨུཊྛེཧི, ཨཱཙརིཡ, ཁམཱམི ཏེ’’ཏི ཝཏྭཱ, ‘‘མཧཱརཱཛ, ནཱཡཾ ཡཐཱམནེན ཁམཱཔེཏི, ནགརསྶ ཨཝིདཱུརེ ཨེཀོ སརོ ཨཏྠི, ཏཏྠ ནཾ སཱིསེ མཏྟིཀཱཔིཎྜཾ ཀཏྭཱ གལཔྤམཱཎེ ཨུདཀེ ཋཔཱཔེཧཱི’’ཏི ཨཱཧ. རཱཛཱ ཏཐཱ ཀཱརེསི. ནཱརདོ དེཝིལཾ ཨཱམནྟེཏྭཱ, ‘‘ཨཱཙརིཡ, མཡཱ ཨིདྡྷིཡཱ ཝིསྶཊྛཱཡ སཱུརིཡསནྟཱཔེ ཨུཊྛཧནྟེ ཨུདཀེ ནིམུཛྫིཏྭཱ ཨཉྙེན ཋཱནེན ཨུཏྟརིཏྭཱ གཙྪེཡྻཱསཱི’’ཏི ཨཱཧ. ‘‘ཏསྶ སཱུརིཡརཾསཱིཧི སཾཕུཊྛམཏྟོཝ མཏྟིཀཱཔིཎྜོ སཏྟདྷཱ ཕལི, སོ ནིམུཛྫིཏྭཱ ཨཉྙེན ཋཱནེན པལཱཡཱི’’ཏི.

སཏྠཱ ཨིམཾ དྷམྨདེསནཾ ཨཱཧརིཏྭཱ ‘‘ཏདཱ, བྷིཀྑཝེ, རཱཛཱ ཨཱནནྡོ ཨཧོསི, དེཝིལོ ཏིསྶོ, ནཱརདོ ཨཧམེཝཱཏི ཨེཝཾ ཏདཱཔེས དུབྦཙོཡེཝཱ’’ཏི ཝཏྭཱ ཏིསྶཏྠེརཾ ཨཱམནྟེཏྭཱ, ‘‘ཏིསྶ, བྷིཀྑུནོ ནཱམ ‘ཨསུཀེནཱཧཾ ཨཀྐུཊྛོ, ཨསུཀེན པཧཊོ, ཨསུཀེན ཛིཏོ, ཨསུཀོ ཁོ མེ བྷཎྜཾ ཨཧཱསཱི’ཏི ཙིནྟེནྟསྶ ཝེརཾ ནཱམ ན ཝཱུཔསམྨཏི, ཨེཝཾ པན ཨནུཔནཡ྄ཧནྟསྶེཝ ཨུཔསམྨཏཱི’’ཏི ཝཏྭཱ ཨིམཱ གཱཐཱ ཨབྷཱསི –

༣.

‘‘ཨཀྐོཙྪི མཾ ཨཝདྷི མཾ, ཨཛིནི མཾ ཨཧཱསི མེ;

ཡེ ཙ ཏཾ ཨུཔནཡ྄ཧནྟི, ཝེརཾ ཏེསཾ ན སམྨཏི.

༤.

‘‘ཨཀྐོཙྪི མཾ ཨཝདྷི མཾ, ཨཛིནི མཾ ཨཧཱསི མེ;

ཡེ ཙ ཏཾ ནུཔནཡ྄ཧནྟི, ཝེརཾ ཏེསཱུཔསམྨཏཱི’’ཏི.

ཏཏྠ ཨཀྐོཙྪཱིཏི ཨཀྐོསི. ཨཝདྷཱིཏི པཧརི. ཨཛིནཱིཏི ཀཱུཊསཀྑིཨོཏཱརཎེན ཝཱ ཝཱདཔཊིཝཱདེན ཝཱ ཀརཎུཏྟརིཡཀརཎེན ཝཱ ཨཛེསི. ཨཧཱསི མེཏི མམ སནྟཀཾ པཏྟཱདཱིསུ ཀིཉྩིདེཝ ཨཝཧརི. ཡེ ཙ ཏནྟི ཡེ ཀེཙི དེཝཏཱ ཝཱ མནུསྶཱ ཝཱ གཧཊྛཱ ཝཱ པབྦཛིཏཱ ཝཱ ཏཾ ‘‘ཨཀྐོཙྪི མ’’ནྟིཨཱདིཝཏྠུཀཾ ཀོདྷཾ སཀཊདྷུརཾ ཝིཡ ནདྡྷིནཱ པཱུཏིམཙྪཱདཱིནི ཝིཡ ཙ ཀུསཱདཱིཧི པུནཔྤུནཾ ཝེཋེཏྭཱ ཨུཔནཡ྄ཧནྟི, ཏེསཾ སཀིཾ ཨུཔྤནྣཾ ཝེརཾ ན སམྨཏཱིཏི ཝཱུཔསམྨཏི. ཡེ ཙ ཏཾ ནུཔནཡ྄ཧནྟཱིཏི ཨསཏིཡཱ ཨམནསིཀཱརཝསེན ཝཱ ཀམྨཔཙྩཝེཀྑཎཱདིཝསེན ཝཱ ཡེ ཏཾ ཨཀྐོསཱདིཝཏྠུཀཾ ཀོདྷཾ ཏཡཱཔི ཀོཙི ནིདྡོསོ པུརིམབྷཝེ ཨཀྐུཊྛོ བྷཝིསྶཏི, པཧཊོ བྷཝིསྶཏི, ཀཱུཊསཀྑིཾ ཨོཏཱརེཏྭཱ ཛིཏོ བྷཝིསྶཏི, ཀསྶཙི ཏེ པསཡ྄ཧ ཀིཉྩི ཨཙྪིནྣཾ བྷཝིསྶཏི, ཏསྨཱ ནིདྡོསོ ཧུཏྭཱཔི ཨཀྐོསཱདཱིནི པཱཔུཎཱསཱིཏི ཨེཝཾ ན ཨུཔནཡ྄ཧནྟི. ཏེསུ པམཱདེན ཨུཔྤནྣམྤི ཝེརཾ ཨིམིནཱ ཨནུཔནཡ྄ཧནེན ནིརིནྡྷནོ ཝིཡ ཛཱཏཝེདོ ཝཱུཔསམྨཏཱིཏི.

དེསནཱཔརིཡོསཱནེ སཏསཧསྶབྷིཀྑཱུ སོཏཱཔཏྟིཕལཱདཱིནི པཱཔུཎིཾསུ. དྷམྨདེསནཱ མཧཱཛནསྶ སཱཏྠིཀཱ ཨཧོསི. དུབྦཙོཔི སུབྦཙོཡེཝ ཛཱཏོཏི.

ཏིསྶཏྠེརཝཏྠུ ཏཏིཡཾ.

༤. ཀཱལ༹ཡཀྑིནཱིཝཏྠུ

ན ཧི ཝེརེནཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ ཝཉྫྷིཏྠིཾ ཨཱརབྦྷ ཀཐེསི.

ཨེཀོ ཀིར ཀུཊུམྦིཀཔུཏྟོ པིཏརི ཀཱལཀཏེ ཁེཏྟེ ཙ གྷརེ ཙ སབྦཀམྨཱནི ཨཏྟནཱཝ ཀརོནྟོ མཱཏརཾ པཊིཛགྒི. ཨཐསྶ མཱཏཱ ‘‘ཀུམཱརིཀཾ ཏེ, ཏཱཏ, ཨཱནེསྶཱམཱི’’ཏི ཨཱཧ. ‘‘ཨམྨ, མཱ ཨེཝཾ ཝདེཐ, ཨཧཾ ཡཱཝཛཱིཝཾ ཏུམྷེ པཊིཛགྒིསྶཱམཱི’’ཏི. ‘‘ཏཱཏ, ཁེཏྟེ ཙ གྷརེ ཙ ཀིཙྩཾ ཏྭམེཝ ཀརོསི, ཏེན མཡ྄ཧཾ ཙིཏྟསུཁཾ ནཱམ ན ཧོཏི, ཨཱནེསྶཱམཱི’’ཏི. སོ པུནཔྤུནཾ པཊིཀྑིཔིཏྭཱ ཏུཎྷཱི ཨཧོསི. སཱ ཨེཀཾ ཀུལཾ གནྟུཀཱམཱ གེཧཱ ནིཀྑམི. ཨཐ ནཾ པུཏྟོ ‘‘ཀཏརཾ ཀུལཾ གཙྪཐཱ’’ཏི པུཙྪིཏྭཱ ‘‘ཨསུཀཀུལཾ ནཱམཱ’’ཏི ཝུཏྟེ ཏཏྠ གམནཾ པཊིསེདྷེཏྭཱ ཨཏྟནོ ཨབྷིརུཙིཏཾ ཀུལཾ ཨཱཙིཀྑི. སཱ ཏཏྠ གནྟྭཱ ཀུམཱརིཀཾ ཝཱརེཏྭཱ དིཝསཾ ཝཝཏྠཔེཏྭཱ ཏཾ ཨཱནེཏྭཱ ཏསྶ གྷརེ ཨཀཱསི. སཱ ཝཉྫྷཱ ཨཧོསི. ཨཐ ནཾ མཱཏཱ, པུཏྟ, ཏྭཾ ཨཏྟནོ རུཙིཡཱ ཀུམཱརིཀཾ ཨཱཎཱཔེསི, སཱ ཨིདཱནི ཝཉྫྷཱ ཛཱཏཱ, ཨཔུཏྟཀཉྩ ནཱམ ཀུལཾ ཝིནསྶཏི, པཝེཎཱི ན གྷཊཱིཡཏི, ཏེན ཨཉྙཾ ཏེ ཀུམཱརིཀཾ ཨཱནེམཱིཏི. ཏེན ‘‘ཨལཾ, ཨམྨཱ’’ཏི ཝུཙྩམཱནཱཔི པུནཔྤུནཾ ཀཐེསི. ཝཉྫྷིཏྠཱི ཏཾ ཀཐཾ སུཏྭཱ ‘‘པུཏྟཱ ནཱམ མཱཏཱཔིཏཱུནཾ ཝཙནཾ ཨཏིཀྐམིཏུཾ ན སཀྐོནྟི, ཨིདཱནི ཨཉྙཾ ཝིཛཱཡིནིཾ ཨིཏྠིཾ ཨཱནེཏྭཱ མཾ དཱསིབྷོགེན བྷུཉྫིསྶཏི. ཡཾནཱུནཱཧཾ སཡམེཝ ཨེཀཾ ཀུམཱརིཀཾ ཨཱནེཡྻ’’ནྟི ཙིནྟེཏྭཱ ཨེཀཾ ཀུལཾ གནྟྭཱ ཏསྶཏྠཱཡ ཀུམཱརིཀཾ ཝཱརེཏྭཱ ‘‘ཀིཾ ནཱམེཏཾ, ཨམྨ, ཝདེསཱི’’ཏི ཏེཧི པཊིཀྑིཏྟཱ ‘‘ཨཧཾ ཝཉྫྷཱ, ཨཔུཏྟཀཾ ནཱམ ཀུལཾ ཝིནསྶཏི, ཏུམྷཱཀཾ པན དྷཱིཏཱ པུཏྟཾ ཝཱ དྷཱིཏརཾ ཝཱ ལབྷིཏྭཱ ཀུཊུམྦིཀསྶ སཱམིནཱི བྷཝིསྶཏི, མཡ྄ཧཾ སཱམིཀསྶ ནཾ དེཐཱ’’ཏི ཡཱཙིཏྭཱ སམྤཊིཙྪཱཔེཏྭཱ ཨཱནེཏྭཱ སཱམིཀསྶ གྷརེ ཨཀཱསི.

ཨཐསྶཱ ཨེཏདཧོསི – ‘‘སཙཱཡཾ པུཏྟཾ ཝཱ དྷཱིཏརཾ ཝཱ ལབྷིསྶཏི, ཨཡམེཝ ཀུཊུམྦསྶ སཱམིནཱི བྷཝིསྶཏི. ཡཐཱ དཱརཀཾ ན ལབྷཏི, ཏཐེཝ ནཾ ཀཱཏུཾ ཝཊྚཏཱི’’ཏི. ཨཐ ནཾ སཱ ཨཱཧ – ‘‘ཨམྨ, ཡདཱ ཏེ ཀུཙྪིཡཾ གབྦྷོ པཏིཊྛཱཏི, ཨཐ མེ ཨཱརོཙེཡྻཱསཱི’’ཏི. སཱ ‘‘སཱདྷཱུ’’ཏི པཊིསྶུཎིཏྭཱ གབྦྷེ པཏིཊྛིཏེ ཏསྶཱ ཨཱརོཙེསི. ཨིཏརིསྶཱ པན སཱ སཡམེཝ ནིཙྩཾ ཡཱགུབྷཏྟཾ དེཏི, ཨཐསྶཱ ཨཱཧཱརེནེཝ སདྡྷིཾ གབྦྷཔཱཏནབྷེསཛྫམདཱསི, གབྦྷོ པཏི. དུཏིཡམྤི གབྦྷེ པཏིཊྛིཏེ ཨཱརོཙེསི, ཨིཏརཱ དུཏིཡམྤི ཏཐེཝ པཱཏེསི. ཨཐ ནཾ པཊིཝིསྶཀིཏྠིཡོ པུཙྪིཾསུ – ‘‘ཀཙྩི ཏེ སཔཏྟི ཨནྟརཱཡཾ ཀརོཏཱི’’ཏི? སཱ ཏམཏྠཾ ཨཱརོཙེཏྭཱ ‘‘ཨནྡྷབཱལེ, ཀསྨཱ ཨེཝམཀཱསི, ཨཡཾ ཏཝ ཨིསྶརིཡབྷཡེན གབྦྷསྶ པཱཏནབྷེསཛྫཾ ཡོཛེཏྭཱ དེཏི, ཏེན ཏེ གབྦྷོ པཏཏི, མཱ པུན ཨེཝམཀཏྠཱ’’ཏི ཝུཏྟཱ ཏཏིཡཝཱརེ ན ཀཐེསི. ཨཐ སཱ ཨིཏརིསྶཱ ཨུདརཾ དིསྭཱ ‘‘ཀསྨཱ མཡ྄ཧཾ གབྦྷསྶ པཏིཊྛིཏབྷཱཝཾ ན ཀཐེསཱི’’ཏི ཝཏྭཱ ‘‘ཏྭཾ མཾ ཨཱནེཏྭཱ ཝཉྩེཏྭཱ དྭེ ཝཱརེ གབྦྷཾ པཱཏེསི, ཀིམཏྠཾ ཏུཡ྄ཧཾ ཀཐེམཱི’’ཏི ཝུཏྟེ ‘‘ནཊྛཱ དཱནིམྷཱི’’ཏི ཙིནྟེཏྭཱ ཏསྶཱ པམཱདཾ ཨོལོཀེནྟཱི པརིཎཏེ གབྦྷེ ཨོཀཱསཾ ལབྷིཏྭཱ བྷེསཛྫཾ ཡོཛེཏྭཱ ཨདཱསི. གབྦྷོ པརིཎཏཏྟཱ པཏིཏུཾ ཨསཀྐོནྟོ ཏིརིཡཾ ནིཔཏི, ཁརཱ ཝེདནཱ ཨུཔྤཛྫི, ཛཱིཝིཏསཾསཡཾ པཱཔུཎི. སཱ ‘‘ནཱསིཏམྷི ཏཡཱ, ཏྭམེཝ མཾ ཨཱནེཏྭཱ ཏྭམེཝ ཏཡོཔི ཝཱརེ དཱརཀེ ནཱསེསི, ཨིདཱནི ཨཧམྤི ནསྶཱམི, ཨིཏོ དཱནི ཙུཏཱ ཡཀྑིནཱི ཧུཏྭཱ ཏཝ དཱརཀེ ཁཱདིཏུཾ སམཏྠཱ ཧུཏྭཱ ནིབྦཏྟེཡྻ’’ནྟི པཏྠནཾ པཊྛཔེཏྭཱ ཀཱལཾ ཀཏྭཱ ཏསྨིཾཡེཝ གེཧེ མཛྫཱརཱི ཧུཏྭཱ ནིབྦཏྟི. ཨིཏརམྤི སཱམིཀོ གཧེཏྭཱ ‘‘ཏཡཱ མེ ཀུལཱུཔཙྪེདོ ཀཏོ’’ཏི ཀཔྤརཛཎྞུཀཱདཱིཧི སུཔོཐིཏཾ པོཐེསི. སཱ ཏེནེཝཱབཱདྷེན ཀཱལཾ ཀཏྭཱ ཏཏྠེཝ ཀུཀྐུཊཱི ཧུཏྭཱ ནིབྦཏྟཱ.

ཀུཀྐུཊཱི ན ཙིརསྶེཝ ཨཎྜཱནི ཝིཛཱཡི, མཛྫཱརཱི ཨཱགནྟྭཱ ཏཱནི ཨཎྜཱནི ཁཱདི. དུཏིཡམྤི ཏཏིཡམྤི ཁཱདིཡེཝ. ཀུཀྐུཊཱི ཙིནྟེསི – ‘‘ཏཡོ ཝཱརེ མམ ཨཎྜཱནི ཁཱདིཏྭཱ ཨིདཱནི མམྤི ཁཱདིཏུཀཱམཱསཱི’’ཏི. ‘‘ཨིཏོ ཙུཏཱ སཔུཏྟཀཾ ཏཾ ཁཱདིཏུཾ ལབྷེཡྻ’’ནྟི པཏྠནཾ ཀཏྭཱ ཏཏོ ཙུཏཱ ཨརཉྙེ དཱིཔིནཱི ཧུཏྭཱ ནིབྦཏྟི. ཨིཏརཱ མིགཱི ཧུཏྭཱ ནིབྦཏྟི. ཏསྶཱ ཝིཛཱཏཀཱལེ དཱིཔིནཱི ཨཱགནྟྭཱ ཏཡོ ཝཱརེ པུཏྟཀེ ཁཱདི. མིགཱི མརཎཀཱལེ ‘‘ཨཡཾ མེ ཏིཀྑཏྟུཾ པུཏྟཀེ ཁཱདིཏྭཱ ཨིདཱནི མམྤི ཁཱདིསྶཏི, ཨིཏོ དཱནི ཙུཏཱ ཨེཏཾ སཔུཏྟཀཾ ཁཱདིཏུཾ ལབྷེཡྻ’’ནྟི པཏྠནཾ ཀཏྭཱ ཨིཏོ ཙུཏཱ ཡཀྑིནཱི ཧུཏྭཱ ནིབྦཏྟི. དཱིཔིནཱིཔི ཏཐེཝ ཏཏོ ཙུཏཱ སཱཝཏྠིཡཾ ཀུལདྷཱིཏཱ ཧུཏྭཱ ནིབྦཏྟི, སཱ ཝུདྡྷིཔྤཏྟཱ དྭཱརགཱམཀེ པཏིཀུལཾ ཨགམཱསི, ཨཔརབྷཱགེ ཙ པུཏྟཾ ཝིཛཱཡི. ཡཀྑིནཱིཔི ཏསྶཱ པིཡསཧཱཡིཀཱཝཎྞེན ཨཱགནྟྭཱ ‘‘ཀུཧིཾ མེ སཧཱཡིཀཱ’’ཏི ‘‘ཨནྟོགབྦྷེ ཝིཛཱཏཱ’’ཏི ཝུཏྟེ ‘‘པུཏྟཾ ནུ ཁོ ཝིཛཱཏཱ, ཨུདཱཧུ དྷཱིཏརནྟི པསྶིསྶཱམི ན’’ནྟི གབྦྷཾ པཝིསིཏྭཱ པསྶནྟཱི ཝིཡ དཱརཀཾ གཧེཏྭཱ ཁཱདིཏྭཱ གཏཱ. པུན དུཏིཡཝཱརེཔི ཏཐེཝ ཁཱདི. ཏཏིཡཝཱརེ ཨིཏརཱ གརུབྷཱརཱ ཧུཏྭཱ སཱམིཀཾ ཨཱམནྟེཏྭཱ, ‘‘སཱམི, ཨིམསྨིཾ ཋཱནེ ཨེཀཱ ཡཀྑིནཱི མམ དྭེ པུཏྟེ ཁཱདིཏྭཱ གཏཱ, ཨིདཱནི མམ ཀུལགེཧཾ གནྟྭཱ ཝིཛཱཡིསྶཱམཱི’’ཏི ཀུལགེཧཾ གནྟྭཱ ཝིཛཱཡི.

ཏདཱ སཱ ཡཀྑིནཱི ཨུདཀཝཱརཾ གཏཱ ཧོཏི. ཝེསྶཝཎསྶ ཧི ཡཀྑིནིཡོ ཝཱརེན ཨནོཏཏྟདཧཏོ སཱིསཔརམྤརཱཡ ཨུདཀམཱཧརནྟི. ཏཱ ཙཏུམཱསཙྩཡེནཔི པཉྩམཱསཙྩཡེནཔི མུཙྩནྟི. ཨཔརཱ ཡཀྑིནིཡོ ཀིལནྟཀཱཡཱ ཛཱིཝིཏཀྑཡམྤི པཱཔུཎནྟི. སཱ པན ཨུདཀཝཱརཏོ མུཏྟམཏྟཱཝ ཝེགེན ཏཾ གྷརཾ གནྟྭཱ ‘‘ཀུཧིཾ མེ སཧཱཡིཀཱ’’ཏི པུཙྪི. ‘‘ཀུཧིཾ ནཾ པསྶིསྶསི, ཏསྶཱ ཨིམསྨིཾ ཋཱནེ ཛཱཏཛཱཏདཱརཀེ ཡཀྑིནཱི ཨཱགནྟྭཱ ཁཱདཏི, ཏསྨཱ ཀུལགེཧཾ གཏཱ’’ཏི. སཱ ‘‘ཡཏྠ ཝཱ ཏཏྠ ཝཱ གཙྪཏུ, ན མེ མུཙྩིསྶཏཱི’’ཏི ཝེརཝེགསམུསྶཱཧིཏམཱནསཱ ནགརཱབྷིམུཁཱི པཀྑནྡི. ཨིཏརཱཔི ནཱམགྒཧཎདིཝསེ ནཾ དཱརཀཾ ནྷཱཔེཏྭཱ ནཱམཾ ཀཏྭཱ, ‘‘སཱམི, ཨིདཱནི སཀགྷརཾ གཙྪཱམཱ’’ཏི པུཏྟམཱདཱཡ སཱམིཀེན སདྡྷིཾ ཝིཧཱརམཛ྄ཛྷེ གཏམགྒེན གཙྪནྟཱི པུཏྟཾ སཱམིཀསྶ དཏྭཱ ཝིཧཱརཔོཀྑརཎིཡཱ ནྷཱཏྭཱ སཱམིཀེ ནྷཱཡནྟེ ཨུཏྟརིཏྭཱ པུཏྟསྶ ཐཉྙཾ པཱཡམཱནཱ ཋིཏཱ ཡཀྑིནིཾ ཨཱགཙྪནྟིཾ དིསྭཱ སཉྫཱནིཏྭཱ, ‘‘སཱམི, ཝེགེན ཨེཧི, ཨཡཾ སཱ ཡཀྑིནཱི, ཝེགེན ཨེཧི, ཨཡཾ སཱ ཡཀྑིནཱི’’ཏི ཨུཙྩཱསདྡཾ ཀཏྭཱ ཡཱཝ ཏསྶ ཨཱགམནཾ སཎྛཱཏུཾ ཨསཀྐོནྟཱི ནིཝཏྟེཏྭཱ ཨནྟོཝིཧཱརཱབྷིམུཁཱི པཀྑནྡི.

ཏསྨིཾ སམཡེ སཏྠཱ པརིསམཛ྄ཛྷེ དྷམྨཾ དེསེསི. སཱ པུཏྟཾ ཏཐཱགཏསྶ པཱདཔིཊྛེ ནིཔཛྫཱཔེཏྭཱ ‘‘ཏུམྷཱཀཾ མཡཱ ཨེས དིནྣོ, པུཏྟསྶ མེ ཛཱིཝིཏཾ དེཐཱ’’ཏི ཨཱཧ. དྭཱརཀོཊྛཀེ ཨདྷིཝཏྠོ སུམནདེཝོ ནཱམ ཡཀྑིནིཡཱ ཨནྟོ པཝིསིཏུཾ ནཱདཱསི. སཏྠཱ ཨཱནནྡཏྠེརཾ ཨཱམནྟེཏྭཱ ‘‘གཙྪ, ཨཱནནྡ, ཏཾ ཡཀྑིནིཾ པཀྐོསཱཧཱི’’ཏི ཨཱཧ. ཐེརོ པཀྐོསི. ཨིཏརཱ ‘‘ཨཡཾ, བྷནྟེ, ཨཱགཙྪཏཱི’’ཏི ཨཱཧ. སཏྠཱ ‘‘ཨེཏུ, མཱ སདྡམཀཱསཱི’’ཏི ཝཏྭཱ ཏཾ ཨཱགནྟྭཱ ཋིཏཾ ‘‘ཀསྨཱ ཨེཝཾ ཀརོསི, སཙེ ཏུམྷེ མཱདིསསྶ བུདྡྷསྶ སམྨུཁཱིབྷཱཝཾ ནཱགམིསྶཐ, ཨཧིནཀུལཱནཾ ཝིཡ ཨཙྪཕནྡནཱནཾ ཝིཡ ཀཱཀོལཱུཀཱནཾ ཝིཡ ཙ ཀཔྤཊྛིཏིཀཾ ཝོ ཝེརཾ ཨབྷཝིསྶ, ཀསྨཱ ཝེརཾ པཊིཝེརཾ ཀརོཐ. ཝེརཉྷི ཨཝེརེན ཨུཔསམྨཏི, ནོ ཝེརེནཱ’’ཏི ཝཏྭཱ ཨིམཾ གཱཐམཱཧ –

༥.

‘‘ན ཧི ཝེརེན ཝེརཱནི, སམྨནྟཱིདྷ ཀུདཱཙནཾ;

ཨཝེརེན ཙ སམྨནྟི, ཨེས དྷམྨོ སནནྟནོ’’ཏི.

ཏཏྠ ན ཧི ཝེརེནཱཏི ཡཐཱ ཧི ཁེལ༹སིངྒྷཱཎིཀཱདཱིཧི ཨསུཙཱིཧི མཀྑིཏཾ ཋཱནཾ ཏེཧེཝ ཨསུཙཱིཧི དྷོཝནྟཱ སུདྡྷཾ ནིགྒནྡྷཾ ཀཱཏུཾ ན སཀྐོནྟི, ཨཐ ཁོ ཏཾ ཋཱནཾ བྷིཡྻོསོམཏྟཱཡ ཨསུདྡྷཏརཉྩེཝ དུགྒནྡྷཏརཉྩ ཧོཏི; ཨེཝམེཝ ཨཀྐོསནྟཾ པཙྩཀྐོསནྟོ པཧརནྟཾ པཊིཔཧརནྟོ ཝེརེན ཝེརཾ ཝཱུཔསམེཏུཾ ན སཀྐོཏི, ཨཐ ཁོ བྷིཡྻོ བྷིཡྻོ ཝེརམེཝ ཀརོཏི. ཨིཏི ཝེརཱནི ནཱམ ཝེརེན ཀིསྨིཉྩི ཀཱལེ ན སམྨནྟི, ཨཐ ཁོ ཝཌྜྷནྟིཡེཝ. ཨཝེརེན ཙ སམྨནྟཱིཏི ཡཐཱ པན ཏཱནི ཁེལཱ༹དཱིནི ཨསུཙཱིནི ཝིཔྤསནྣེན ཨུདཀེན དྷོཝིཡམཱནཱནི ནསྶནྟི, ཏཾ ཋཱནཾ སུདྡྷཾ ཧོཏི སུགནྡྷཾ; ཨེཝམེཝ ཨཝེརེན ཁནྟིམེཏྟོདཀེན ཡོནིསོ མནསིཀཱརེན པཙྩཝེཀྑཎེན ཝེརཱནི ཝཱུཔསམྨནྟི པཊིཔྤསྶམྦྷནྟི ཨབྷཱཝཾ གཙྪནྟི. ཨེས དྷམྨོ སནནྟནོཏི ཨེས ཨཝེརེན ཝེརཱུཔསམནསངྑཱཏོ པོརཱཎཀོ དྷམྨོ; སབྦེསཾ བུདྡྷཔཙྩེཀབུདྡྷཁཱིཎཱསཝཱནཾ གཏམགྒོཏི.

གཱཐཱཔརིཡོསཱནེ ཡཀྑིནཱི སོཏཱཔཏྟིཕལེ པཏིཊྛཧི. སམྤཏྟཔརིསཱཡཔི དྷམྨདེསནཱ སཱཏྠིཀཱ ཨཧོསི.

སཏྠཱ ཏཾ ཨིཏྠིཾ ཨཱཧ – ‘‘ཨེཏིསྶཱ ཏཝ པུཏྟཾ དེཧཱི’’ཏི. ‘‘བྷཱཡཱམི, བྷནྟེ’’ཏི. ‘‘མཱ བྷཱཡི, ནཏྠི ཏེ ཨེཏཾ ནིསྶཱཡ པརིཔནྠོ’’ཏི ཨཱཧ. སཱ ཏསྶཱ པུཏྟམདཱསི. སཱ ཏཾ ཙུམྦིཏྭཱ ཨཱལིངྒེཏྭཱ པུན མཱཏུཡེཝ དཏྭཱ རོདིཏུཾ ཨཱརབྷི. ཨཐ ནཾ སཏྠཱ ‘‘ཀིམེཏ’’ནྟི པུཙྪི. ‘‘བྷནྟེ, ཨཧཾ པུབྦེ ཡཐཱ ཝཱ ཏཐཱ ཝཱ ཛཱིཝིཀཾ ཀཔྤེནྟཱིཔི ཀུཙྪིཔཱུརཾ ནཱལཏྠཾ, ཨིདཱནི ཀཐཾ ཛཱིཝིསྶཱམཱི’’ཏི. ཨཐ ནཾ སཏྠཱ ‘‘མཱ ཙིནྟཡཱི’’ཏི སམསྶཱསེཏྭཱ ཏཾ ཨིཏྠིམཱཧ – ‘‘ཨིམཾ ནེཏྭཱ ཨཏྟནོ གེཧེ ནིཝཱསཱཔེཏྭཱ ཨགྒཡཱགུབྷཏྟེཧི པཊིཛགྒཱཧཱི’’ཏི. སཱ ཏཾ ནེཏྭཱ པིཊྛིཝཾསེ པཏིཊྛཱཔེཏྭཱ ཨགྒཡཱགུབྷཏྟེཧི པཊིཛགྒི, ཏསྶཱ ཝཱིཧིཔཧརཎཀཱལེ མུསལགྒེན མུདྡྷཾ པཧརནྟཾ ཝིཡ ཨུཔཊྛཱསི. སཱ སཧཱཡིཀཾ ཨཱམནྟེཏྭཱ ‘‘ཨིམསྨིཾ ཋཱནེ ཝསིཏུཾ ན སཀྐོམི, ཨཉྙཏྠ མཾ པཏིཊྛཱཔེཧཱི’’ཏི ཝཏྭཱ མུསལསཱལཱཡ ཨུདཀཙཱཊིཡཾ ཨུདྡྷནེ ནིབྦཀོསེ སངྐཱརཀཱུཊེ གཱམདྭཱརེ ཙཱཏི ཨེཏེསུ ཋཱནེསུ པཏིཊྛཱཔིཏཱཔི ཨིདྷ མེ མུསལེན སཱིསཾ བྷིནྡནྟཾ ཝིཡ ཨུཔཊྛཱཏི, ཨིདྷ དཱརཀཱ ཨུཙྪིཊྛོདཀཾ ཨོཏཱརེནྟི, ཨིདྷ སུནཁཱ ནིཔཛྫནྟི, ཨིདྷ དཱརཀཱ ཨསུཙིཾ ཀརོནྟི, ཨིདྷ ཀཙཝརཾ ཚཌྜེནྟི, ཨིདྷ གཱམདཱརཀཱ ལཀྑཡོགྒཾ ཀརོནྟཱིཏི སབྦཱནི ཏཱནི པཊིཀྑིཔི. ཨཐ ནཾ བཧིགཱམེ ཝིཝིཏྟོཀཱསེ པཏིཊྛཱཔེཏྭཱ ཏཏྠ ཏསྶཱ ཨགྒཡཱགུབྷཏྟཱདཱིནི ཧརིཏྭཱ པཊིཛགྒི. སཱ ཡཀྑིནཱི ཨེཝཾ ཙིནྟེསི – ‘‘ཨཡཾ མེ སཧཱཡིཀཱ ཨིདཱནི བཧཱུཔཀཱརཱ, ཧནྡཱཧཾ ཀིཉྩི པཊིགུཎཾ ཀརོམཱི’’ཏི. སཱ ‘‘ཨིམསྨིཾ སཾཝཙྪརེ སུབྦུཊྛིཀཱ བྷཝིསྶཏི, ཐལཊྛཱནེ སསྶཾ ཀརོཧི, ཨིམསྨིཾ སཾཝཙྪརེ དུབྦུཊྛིཀཱ བྷཝིསྶཏི, ནིནྣཊྛཱནེཡེཝ སསྶཾ ཀརོཧཱི’’ཏི སཧཱཡིཀཱཡ ཨཱརོཙེཏི. སེསཛནེཧི ཀཏསསྶཾ ཨཏིཨུདཀེན ཝཱ ཨནོདཀེན ཝཱ ནསྶཏི, ཏསྶཱ ཨཏིཝིཡ སམྤཛྫཏི. ཨཐ ནཾ སེསཛནཱ, ‘‘ཨམྨ, ཏཡཱ ཀཏསསྶཾ ནེཝ ཨཙྩོདཀེན, ན ཨནུདཀེན ནསྶཏི, སུབྦུཊྛིདུབྦུཊྛིབྷཱཝཾ ཉཏྭཱ ཀམྨཾ ཀརོསི, ཀིཾ ནུ ཁོ ཨེཏ’’ནྟི པུཙྪིཾསུ. ‘‘ཨམྷཱཀཾ སཧཱཡིཀཱ ཡཀྑིནཱི སུབྦུཊྛིདུབྦུཊྛིབྷཱཝཾ ཨཱཙིཀྑཏི, མཡཾ ཏསྶཱ ཝཙནེན ཐལེསུ ནིནྣེསུ སསྶཱནི ཀརོམ, ཏེན ནོ སམྤཛྫཏི. ཀིཾ ན པསྶཐ? ནིབདྡྷཾ ཨམྷཱཀཾ གེཧཏོ ཡཱགུབྷཏྟཱདཱིནི ཧརིཡམཱནཱནི, ཏཱནི ཨེཏིསྶཱ ཧརཱིཡནྟི, ཏུམྷེཔི ཨེཏིསྶཱ ཨགྒཡཱགུབྷཏྟཱདཱིནི ཧརཐ, ཏུམྷཱཀམྤི ཀམྨནྟེ ཨོལོཀེསྶཏཱི’’ཏི. ཨཐསྶཱ སཀལནགརཝཱསིནོ སཀྐཱརཾ ཀརིཾསུ. སཱཔི ཏཏོ པཊྛཱཡ སབྦེསཾ ཀམྨནྟེ ཨོལོཀེནྟཱི ལཱབྷགྒཔྤཏྟཱ ཨཧོསི མཧཱཔརིཝཱརཱ. སཱ ཨཔརབྷཱགེ ཨཊྛ སལཱཀབྷཏྟཱནི པཊྛཔེསི. ཏཱནི ཡཱཝཛྫཀཱལཱ དཱིཡནྟིཡེཝཱཏི.

ཀཱལ༹ཡཀྑིནཱིཝཏྠུ ཙཏུཏྠཾ.

༥. ཀོསམྦཀཝཏྠུ

པརེ ཙ ན ཝིཛཱནནྟཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀོསམྦཀེ བྷིཀྑཱུ ཨཱརབྦྷ ཀཐེསི.

ཀོསམྦིཡཉྷི གྷོསིཏཱརཱམེ པཉྩསཏཔཉྩསཏཔརིཝཱརཱ དྭེ བྷིཀྑཱུ ཝིཧརིཾསུ ཝིནཡདྷརོ ཙ དྷམྨཀཐིཀོ ཙ. ཏེསུ དྷམྨཀཐིཀོ ཨེཀདིཝསཾ སརཱིརཝལཉྫཾ ཀཏྭཱ ཨུདཀཀོཊྛཀེ ཨཱཙམནཨུདཀཱཝསེསཾ བྷཱཛནེ ཋཔེཏྭཱཝ ནིཀྑམི. པཙྪཱ ཝིནཡདྷརོ ཏཏྠ པཝིཊྛོ ཏཾ ཨུདཀཾ དིསྭཱ ནིཀྑམིཏྭཱ ཨིཏརཾ པུཙྪི, ‘‘ཨཱཝུསོ, ཏཡཱ ཨུདཀཾ ཋཔིཏ’’ནྟི? ‘‘ཨཱམ, ཨཱཝུསོ’’ཏི. ‘‘ཀིཾ པནེཏྠ ཨཱཔཏྟིབྷཱཝཾ ན ཛཱནཱསཱི’’ཏི? ‘‘ཨཱམ, ན ཛཱནཱམཱི’’ཏི. ‘‘ཧོཏི, ཨཱཝུསོ, ཨེཏྠ ཨཱཔཏྟཱི’’ཏི. ‘‘ཏེན ཧི པཊིཀརིསྶཱམི ན’’ནྟི. ‘‘སཙེ པན ཏེ, ཨཱཝུསོ, ཨསཉྩིཙྩ ཨསྶཏིཡཱ ཀཏཾ, ནཏྠི ཨཱཔཏྟཱི’’ཏི. སོ ཏསྶཱ ཨཱཔཏྟིཡཱ ཨནཱཔཏྟིདིཊྛི ཨཧོསི. ཝིནཡདྷརོཔི ཨཏྟནོ ནིསྶིཏཀཱནཾ ‘‘ཨཡཾ དྷམྨཀཐིཀོ ཨཱཔཏྟིཾ ཨཱཔཛྫམཱནོཔི ན ཛཱནཱཏཱི’’ཏི ཨཱརོཙེསི. ཏེ ཏསྶ ནིསྶིཏཀེ དིསྭཱ ‘‘ཏུམྷཱཀཾ ཨུཔཛ྄ཛྷཱཡོ ཨཱཔཏྟིཾ ཨཱཔཛྫིཏྭཱཔི ཨཱཔཏྟིབྷཱཝཾ ན ཛཱནཱཏཱི’’ཏི ཨཱཧཾསུ. ཏེ གནྟྭཱ ཨཏྟནོ ཨུཔཛ྄ཛྷཱཡསྶ ཨཱརོཙེསུཾ. སོ ཨེཝམཱཧ – ‘‘ཨཡཾ ཝིནཡདྷརོ པུབྦེ ཨནཱཔཏྟཱིཏི ཝཏྭཱ ཨིདཱནི ཨཱཔཏྟཱིཏི ཝདཏི, མུསཱཝཱདཱི ཨེསོ’’ཏི. ཏེ གནྟྭཱ ‘‘ཏུམྷཱཀཾ ཨུཔཛ྄ཛྷཱཡོ མུསཱཝཱདཱི’’ཏི ཨཱཧཾསུ. ཏེ ཨེཝཾ ཨཉྙམཉྙཾ ཀལཧཾ ཝཌྜྷཡིཾསུ. ཀཏོ ཝིནཡདྷརོ ཨོཀཱསཾ ལབྷིཏྭཱ དྷམྨཀཐིཀསྶ ཨཱཔཏྟིཡཱ ཨདསྶནེ ཨུཀྑེཔནཱིཡཀམྨམཀཱསི. ཏཏོ པཊྛཱཡ ཏེསཾ པཙྩཡདཱཡཀཱ ཨུཔཊྛཱཀཱཔི དྭེ ཀོཊྛཱསཱ ཨཧེསུཾ, ཨོཝཱདཔཊིགྒཱཧཀཱ བྷིཀྑུནིཡོཔི ཨཱརཀྑདེཝཏཱཔི ཏཱསཾ སནྡིཊྛསམྦྷཏྟཱ ཨཱཀཱསཊྛདེཝཏཱཔཱིཏི ཡཱཝ བྲཧྨལོཀཱ སབྦེཔི པུཐུཛྫནཱ དྭེ པཀྑཱ ཨཧེསུཾ. ཙཱཏུམཧཱརཱཛིཀཾ ཨཱདིཾ ཀཏྭཱ ཡཱཝ ཨཀནིཊྛབྷཱཝནཱ པན ཨེཀནིནྣཱདཾ ཀོལཱཧལཾ ཨགམཱསི.

ཨཐེཀོ ཨཉྙཏརོ བྷིཀྑུ ཏཐཱགཏམུཔསངྐམིཏྭཱ ཨུཀྑེཔཀཱནཾ ཝིནཡདྷརཨནྟེཝཱསིཀཱནཾ ‘‘དྷམྨིཀེནེཝཱཡཾ ཝིནཡཀམྨེན ཨུཀྑིཏྟོ’’ཏི ལདྡྷིཉྩ, ཨུཀྑིཏྟཱནུཝཏྟཀཱནཾ དྷམྨཀཐིཀཨནྟེཝཱསིཀཱནཾ པན ‘‘ཨདྷམྨིཀེནེཝ ཀམྨེན ཨུཀྑིཏྟོ’’ཏི ལདྡྷིཉྩ, ཨུཀྑེཔཀེཧི ཝཱརིཡམཱནཱནམྤི ཙ ཏེསཾ ཏཾ ཨནུཔརིཝཱརེཏྭཱ ཝིཙརཎབྷཱཝཉྩ ཨཱརོཙེསི བྷགཝཱ ‘‘སམགྒཱ ཀིར ཧོནྟཱུ’’ཏི དྭེ ཝཱརེ པེསེཏྭཱ ‘‘ན ཨིཙྪནྟི, བྷནྟེ, སམགྒཱ བྷཝིཏུ’’ནྟི སུཏྭཱ ཏཏིཡཝཱརེ ‘‘བྷིནྣོ བྷིཀྑུསངྒྷོ, བྷིནྣོ བྷིཀྑུསངྒྷོ’’ཏི ཏེསཾ སནྟིཀཾ གནྟྭཱ ཨུཀྑེཔཀཱནཾ ཨུཀྑེཔནེ, ཨིཏརེསཉྩ ཨཱཔཏྟིཡཱ ཨདསྶནེ ཨཱདཱིནཝཾ ཀཐེཏྭཱ པུན ཏེསཾ ཏཏྠེཝ ཨེཀསཱིམཱཡཾ ཨུཔོསཐཱདཱིནི ཨནུཛཱནིཏྭཱ བྷཏྟགྒཱདཱིསུ བྷཎྜནཛཱཏཱནཾ ‘‘ཨཱསནནྟརིཀཱཡ ནིསཱིདིཏབྦ’’ནྟི (མཧཱཝ. ༤༥༦) བྷཏྟགྒེ ཝཏྟཾ པཉྙཱཔེཏྭཱ ‘‘ཨིདཱནིཔི བྷཎྜནཛཱཏཱཝ ཝིཧརནྟཱི’’ཏི སུཏྭཱ ཏཏྠ གནྟྭཱ ‘‘ཨལཾ, བྷིཀྑཝེ, མཱ བྷཎྜན’’ནྟིཨཱདཱིནི ཝཏྭཱ, ‘‘བྷིཀྑཝེ, བྷཎྜནཀལཧཝིགྒཧཝིཝཱདཱ ནཱམེཏེ ཨནཏྠཀཱརཀཱ. ཀལཧཾ ནིསྶཱཡ ཧི ལཊུཀིཀཱཔི སཀུཎིཀཱ ཧཏྠིནཱགཾ ཛཱིཝིཏཀྑཡཾ པཱཔེསཱི’’ཏི ལཊུཀིཀཛཱཏཀཾ (ཛཱ. ༡.༥.༣༩ ཨཱདཡོ) ཀཐེཏྭཱ, ‘‘བྷིཀྑཝེ, སམགྒཱ ཧོཐ, མཱ ཝིཝདཐ. ཝིཝཱདཾ ནིསྶཱཡ ཧི ཨནེཀསཏསཧསྶཱ ཝཊྚཀཱཔི ཛཱིཝིཏཀྑཡཾ པཏྟཱ’’ཏི ཝཊྚཀཛཱཏཀཾ (ཛཱ. ༡.༡.༡༡༨) ཀཐེསི. ཨེཝམྤི ཏེསུ བྷགཝཏོ ཝཙནཾ ཨནཱདིཡནྟེསུ ཨཉྙཏརེན དྷམྨཝཱདིནཱ ཏཐཱགཏསྶ ཝིཧེསཾ ཨནིཙྪནྟེན ‘‘ཨཱགམེཏུ, བྷནྟེ བྷགཝཱ, དྷམྨསཱམི, ཨཔྤོསྶུཀྐོ, བྷནྟེ བྷགཝཱ, དིཊྛདྷམྨསུཁཝིཧཱརམནུཡུཏྟོ ཝིཧརཏུ, མཡམེཝ ཏེན བྷཎྜནེན ཀལཧེན ཝིགྒཧེན ཝིཝཱདེན པཉྙཱཡིསྶཱམཱ’’ཏི (མཧཱཝ. ༤༥༧; མ. ནི. ༣.༢༣༦) ཝུཏྟེ ཨཏཱིཏཾ ཨཱཧརི –

བྷཱུཏཔུབྦཾ, བྷིཀྑཝེ, བཱརཱཎསིཡཾ བྲཧྨདཏྟོ ནཱམ ཀཱསིརཱཛཱ ཨཧོསི. བྲཧྨདཏྟེན དཱིགྷཱིཏིསྶ ཀོསལརཉྙོ རཛྫཾ ཨཙྪིནྡིཏྭཱ ཨཉྙཱཏཀཝེསེན ཝསནྟསྶ པིཏུནོ མཱརིཏབྷཱཝཉྩེཝ དཱིགྷཱཝུཀུམཱརེན ཨཏྟནོ ཛཱིཝིཏེ དིནྣེ ཏཏོ པཊྛཱཡ ཏེསཾ སམགྒབྷཱཝཉྩ ཀཐེཏྭཱ ‘‘ཏེསཉྷི ནཱམ, བྷིཀྑཝེ, རཱཛཱུནཾ ཨཱདིནྣདཎྜཱནཾ ཨཱདིནྣསཏྠཱནཾ ཨེཝརཱུཔཾ ཁནྟིསོརཙྩཾ བྷཝིསྶཏི. ཨིདྷ ཁོ ཏཾ, བྷིཀྑཝེ, སོབྷེཐ, ཡཾ ཏུམྷེ ཨེཝཾ སྭཱཁཱཏེ དྷམྨཝིནཡེ པབྦཛིཏཱ སམཱནཱ ཁམཱ ཙ བྷཝེཡྻཱཐ སོརཏཱ ཙཱ’’ཏི ཨོཝདིཏྭཱཔི ནེཝ ཏེ སམགྒེ ཀཱཏུཾ ཨསཀྑི. སོ ཏཱཡ ཨཱཀིཎྞཝིཧཱརཏཱཡ ཨུཀྐཎྛིཏོ ‘‘ཨཧཾ ཁོ ཨིདཱནི ཨཱཀིཎྞོ དུཀྑཾ ཝིཧརཱམི, ཨིམེ ཙ བྷིཀྑཱུ མམ ཝཙནཾ ན ཀརོནྟི. ཡཾནཱུནཱཧཾ ཨེཀཀོཝ གཎམྷཱ ཝཱུཔཀཊྛོ ཝིཧརེཡྻ’’ནྟི ཙིནྟེཏྭཱ ཀོསམྦིཡཾ པིཎྜཱཡ ཙརིཏྭཱ ཨནཔལོཀེཏྭཱ བྷིཀྑུསངྒྷཾ ཨེཀཀོཝ ཨཏྟནོ པཏྟཙཱིཝརམཱདཱཡ བཱལཀལོཎཀགཱམཾ གནྟྭཱ ཏཏྠ བྷགུཏྠེརསྶ ཨེཀཙཱརིཀཝཏྟཾ ཀཐེཏྭཱ པཱཙིནཝཾསམིགདཱཡེ ཏིཎྞཾ ཀུལཔུཏྟཱནཾ སཱམགྒིཡཱནིསཾསཾ ཀཐེཏྭཱ ཡེན པཱལིལེཡྻཀཾ ཨཏྠི, ཏདཝསརི. ཏཏྲ སུདཾ བྷགཝཱ པཱལིལེཡྻཀཾ ཨུཔནིསྶཱཡ རཀྑིཏཝནསཎྜེ བྷདྡསཱལམཱུལེ པཱལིལེཡྻཀེན ཧཏྠིནཱ ཨུཔཊྛིཡམཱནོ ཕཱསུཀཾ ཝསྶཱཝཱསཾ ཝསི.

ཀོསམྦིཝཱསིནོཔི ཁོ ཨུཔཱསཀཱ ཝིཧཱརཾ གནྟྭཱ སཏྠཱརཾ ཨཔསྶནྟཱ ‘‘ཀུཧིཾ, བྷནྟེ, སཏྠཱ’’ཏི པུཙྪིཏྭཱ ‘‘པཱལིལེཡྻཀཝནསཎྜཾ གཏོ’’ཏི. ‘‘ཀིཾ ཀཱརཎཱ’’ཏི? ‘‘ཨམྷེ སམགྒེ ཀཱཏུཾ ཝཱཡམི, མཡཾ པན ན སམགྒཱ ཨཧུམྷཱ’’ཏི. ‘‘ཀིཾ, བྷནྟེ, ཏུམྷེ སཏྠུ སནྟིཀེ པབྦཛིཏྭཱ ཏསྨིཾ སཱམགྒིཾ ཀརོནྟེ སམགྒཱ ནཱཧུཝཏྠཱ’’ཏི? ‘‘ཨེཝམཱཝུསོ’’ཏི. ‘‘མནུསྶཱ ཨིམེ སཏྠུ སནྟིཀེ པབྦཛིཏྭཱ ཏསྨིཾ སཱམགྒིཾ ཀརོནྟེཔི སམགྒཱ ན ཛཱཏཱ, མཡཾ ཨིམེ ནིསྶཱཡ སཏྠཱརཾ དཊྛུཾ ན ལབྷིམྷཱ, ཨིམེསཾ ནེཝ ཨཱསནཾ དསྶཱམ, ན ཨབྷིཝཱདནཱདཱིནི ཀརིསྶཱམཱ’’ཏི ཏཏོ པཊྛཱཡ ཏེསཾ སཱམཱིཙིམཏྟམྤི ན ཀརིཾསུ. ཏེ ཨཔྤཱཧཱརཏཱཡ སུསྶམཱནཱ ཀཏིཔཱཧེནེཝ ཨུཛུཀཱ ཧུཏྭཱ ཨཉྙམཉྙཾ ཨཙྩཡཾ དེསེཏྭཱ ཁམཱཔེཏྭཱ ‘‘ཨུཔཱསཀཱ མཡཾ སམགྒཱ ཛཱཏཱ, ཏུམྷེཔི ནོ པུརིམསདིསཱ ཧོཐཱ’’ཏི ཨཱཧཾསུ. ‘‘ཁམཱཔིཏོ པན ཝོ, བྷནྟེ, སཏྠཱ’’ཏི. ‘‘ན ཁམཱཔིཏོ, ཨཱཝུསོ’’ཏི. ‘‘ཏེན ཧི སཏྠཱརཾ ཁམཱཔེཐ, སཏྠུ ཁམཱཔིཏཀཱལེ མཡམྤི ཏུམྷཱཀཾ པུརིམསདིསཱ བྷཝིསྶཱམཱ’’ཏི. ཏེ ཨནྟོཝསྶབྷཱཝེན སཏྠུ སནྟིཀཾ གནྟུཾ ཨཝིསཧནྟཱ དུཀྑེན ཏཾ ཨནྟོཝསྶཾ ཝཱིཏིནཱམེསུཾ. སཏྠཱ པན ཏེན ཧཏྠིནཱ ཨུཔཊྛིཡམཱནོ སུཁཾ ཝསི. སོཔི ཧི ཧཏྠིནཱགོ གཎཾ པཧཱཡ ཕཱསུཝིཧཱརཏྠཱཡེཝ ཏཾ ཝནསཎྜཾ པཱཝིསི.

ཡཐཱཧ – ‘‘ཨཧཾ ཁོ ཨཱཀིཎྞོ ཝིཧརཱམི ཧཏྠཱིཧི ཧཏྠཱིནཱིཧི ཧཏྠིཀལབྷེཧི ཧཏྠིཙྪཱཔེཧི, ཚིནྣགྒཱནི ཙེཝ ཏིཎཱནི ཁཱདཱམི, ཨོབྷགྒོབྷགྒཉྩ མེ སཱཁཱབྷངྒཾ ཁཱདནྟི, ཨཱཝིལཱནི ཙ པཱནཱིཡཱནི པིཝཱམི, ཨོགཱཧཱ ཙསྶ མེ ཨུཏྟིཎྞསྶ ཧཏྠིནིཡོ ཀཱཡཾ ཨུཔནིགྷཾསནྟིཡོ གཙྪནྟི, ཡཾནཱུནཱཧཾ ཨེཀོཝ གཎམྷཱ ཝཱུཔཀཊྛོ ཝིཧརེཡྻ’’ནྟི (མཧཱཝ. ༤༦༧; ཨུདཱ. ༣༥). ཨཐ ཁོ སོ ཧཏྠིནཱགོ ཡཱུཐཱ ཨཔཀྐམྨ ཡེན པཱལིལེཡྻཀཾ རཀྑིཏཝནསཎྜཾ བྷདྡསཱལམཱུལཾ, ཡེན བྷགཝཱ ཏེནུཔསངྐམི, ཨུཔསངྐམིཏྭཱ པན བྷགཝནྟཾ ཝནྡིཏྭཱ ཨོལོཀེནྟོ ཨཉྙཾ ཀིཉྩི ཨདིསྭཱ བྷདྡསཱལམཱུལཾ པཱདེནེཝ པཧརནྟོ ཏཙྪེཏྭཱ སོཎྜཱཡ སཱཁཾ གཧེཏྭཱ སམྨཛྫི. ཏཏོ པཊྛཱཡ སོཎྜཱཡ གྷཊཾ གཧེཏྭཱ པཱནཱིཡཾ པརིབྷོཛནཱིཡཾ ཨུཔཊྛཱཔེཏི, ཨུཎྷོདཀེན ཨཏྠེ སཏི ཨུཎྷོདཀཾ པཊིཡཱདེཏི. ཀཐཾ? ཧཏྠེན ཀཊྛཱནི གྷཾསིཏྭཱ ཨགྒིཾ སམྤཱདེཏི, ཏཏྠ དཱརཱུནི པཀྑིཔནྟོ ཨགྒིཾ ཛཱལེཏྭཱ ཏཏྠ པཱསཱཎེ པཀྑིཔིཏྭཱ པཙིཏྭཱ དཱརུདཎྜཀེན པཝཊྚེཏྭཱ པརིཙྪིནྣཱཡ ཁུདྡཀསོཎྜིཀཱཡ ཁིཔཏི, ཏཏོ ཧཏྠཾ ཨོཏཱརེཏྭཱ ཨུདཀསྶ ཏཏྟབྷཱཝཾ ཛཱནིཏྭཱ གནྟྭཱ སཏྠཱརཾ ཝནྡཏི. སཏྠཱ ‘‘ཨུདཀཾ ཏེ ཏཱཔིཏཾ པཱལིལེཡྻཀཱ’’ཏི ཝཏྭཱ ཏཏྠ གནྟྭཱ ནྷཱཡཏི. ཨཐསྶ ནཱནཱཝིདྷཱནི ཕལཱནི ཨཱཧརིཏྭཱ དེཏི. ཡདཱ པན སཏྠཱ གཱམཾ པིཎྜཱཡ པཝིསཏི, ཏདཱ སཏྠུ པཏྟཙཱིཝརམཱདཱཡ ཀུམྦྷེ པཏིཊྛཔེཏྭཱ སཏྠཱརཱ སདྡྷིཾཡེཝ གཙྪཏི. སཏྠཱ གཱམཱུཔཙཱརཾ པཏྭཱ ‘‘པཱལིལེཡྻཀ ཨིཏོ པཊྛཱཡ ཏཡཱ གནྟུཾ ན སཀྐཱ, ཨཱཧཱར མེ པཏྟཙཱིཝར’’ནྟི ཨཱཧརཱཔེཏྭཱ གཱམཾ པིཎྜཱཡ པཱཝིསི. སོཔི ཡཱཝ སཏྠུ ནིཀྑམནཱ ཏཏྠེཝ ཋཏྭཱ ཨཱགམནཀཱལེ པཙྩུགྒམནཾ ཀཏྭཱ པུརིམནཡེནེཝ པཏྟཙཱིཝརཾ གཧེཏྭཱ ཝསནཊྛཱནེ ཨོཏཱརེཏྭཱ ཝཏྟཾ དསྶེཏྭཱ སཱཁཱཡ བཱིཛཏི, རཏྟིཾ ཝཱལ༹མིགཔརིཔནྠནིཝཱརཎཏྠཾ མཧནྟཾ དཎྜཾ སོཎྜཱཡ གཧེཏྭཱ ‘‘སཏྠཱརཾ རཀྑིསྶཱམཱི’’ཏི ཡཱཝ ཨརུཎུགྒམནཱ ཝནསཎྜསྶ ཨནྟརནྟརེན ཝིཙརཏི, ཏཏོ པཊྛཱཡཡེཝ ཀིར སོ ཝནསཎྜོ པཱལིལེཡྻཀརཀྑིཏཝནསཎྜོ ནཱམ ཛཱཏོ. ཨརུཎེ ཨུགྒཏེ མུཁོདཀདཱནཾ ཨཱདིཾ ཀཏྭཱ ཏེནེཝཱུཔཱཡེན སབྦཝཏྟཱནི ཀརོཏི.

ཨཐེཀོ མཀྐཊོ ཏཾ ཧཏྠིཾ ཨུཊྛཱཡ སམུཊྛཱཡ དིཝསེ དིཝསེ ཏཐཱགཏསྶ ཨཱབྷིསམཱཙཱརིཀཾ ཀརོནྟཾ དིསྭཱ ‘‘ཨཧམྤི ཀིཉྩིདེཝ ཀརིསྶཱམཱི’’ཏི ཝིཙརནྟོ ཨེཀདིཝསཾ ནིམྨཀྑིཀཾ དཎྜཀམདྷུཾ དིསྭཱ དཎྜཀཾ བྷཉྫིཏྭཱ དཎྜཀེནེཝ སདྡྷིཾ མདྷུཔཊལཾ སཏྠུ སནྟིཀཾ ཨཱཧརིཏྭཱ ཀདལིཔཏྟཾ ཚིནྡིཏྭཱ ཏཏྠ ཋཔེཏྭཱ ཨདཱསི. སཏྠཱ གཎྷི. མཀྐཊོ ‘‘ཀརིསྶཏི ནུ ཁོ པརིབྷོགཾ ན ཀརིསྶཏཱི’’ཏི ཨོལོཀེནྟོ གཧེཏྭཱ ནིསིནྣཾ དིསྭཱ ‘‘ཀིཾ ནུ ཁོ’’ཏི ཙིནྟེཏྭཱ དཎྜཀོཊིཡཾ གཧེཏྭཱ པརིཝཏྟེཏྭཱ ཨུཔདྷཱརེནྟོ ཨཎྜཀཱནི དིསྭཱ ཏཱནི སཎིཀཾ ཨཔནེཏྭཱ པུན ཨདཱསི. སཏྠཱ པརིབྷོགམཀཱསི. སོ ཏུཊྛམཱནསོ ཏཾ ཏཾ སཱཁཾ གཧེཏྭཱ ནཙྩནྟོཝ ཨཊྛཱསི. ཨཐསྶ གཧིཏསཱཁཱཔི ཨཀྐནྟསཱཁཱཔི བྷིཛྫིཾསུ. སོ ཨེཀསྨིཾ ཁཱཎུམཏྠཀེ པཏིཏྭཱ ནིཝིཊྛགཏྟོ སཏྠརི པསནྣེནེཝ ཙིཏྟེན ཀཱལཾ ཀཏྭཱ ཏཱཝཏིཾསབྷཝནེ ཏིཾསཡོཛནིཀེ ཀནཀཝིམཱནེ ནིབྦཏྟི, ཨཙྪརཱསཧསྶཔརིཝཱརོ མཀྐཊདེཝཔུཏྟོ ནཱམ ཨཧོསི.

ཏཐཱགཏསྶ ཏཏྠ ཧཏྠིནཱགེན ཨུཔཊྛིཡམཱནསྶ ཝསནབྷཱཝོ སཀལཛམྦུདཱིཔེ པཱཀཊོ ཨཧོསི. སཱཝཏྠིནགརཏོ ‘‘ཨནཱཐཔིཎྜིཀོ ཝིསཱཁཱ ཙ མཧཱཨུཔཱསིཀཱ’’ཏིཨེཝམཱདཱིནི མཧཱཀུལཱནི ཨཱནནྡཏྠེརསྶ སཱསནཾ པཧིཎིཾསུ ‘‘སཏྠཱརཾ ནོ, བྷནྟེ, དསྶེཐཱ’’ཏི. དིསཱཝཱསིནོཔི པཉྩསཏཱ བྷིཀྑཱུ ཝུཊྛཝསྶཱ ཨཱནནྡཏྠེརཾ ཨུཔསངྐམིཏྭཱ ‘‘ཙིརསྶུཏཱ ནོ, ཨཱཝུསོ ཨཱནནྡ, བྷགཝཏོ སམྨུཁཱ དྷམྨཱི ཀཐཱ, སཱདྷུ མཡཾ, ཨཱཝུསོ ཨཱནནྡ, ལབྷེཡྻཱམ བྷགཝཏོ སམྨུཁཱ དྷམྨིཾ ཀཐཾ སཝནཱཡཱ’’ཏི ཡཱཙིཾསུ. ཐེརོ ཏེ བྷིཀྑཱུ ཨཱདཱཡ ཏཏྠ གནྟྭཱ ‘‘ཏེམཱསཾ ཨེཀཝིཧཱརིནོ ཏཐཱགཏསྶ སནྟིཀཾ ཨེཏྟཀེཧི བྷིཀྑཱུཧི སདྡྷིཾ ཨུཔསངྐམིཏུཾ ཨཡུཏྟ’’ནྟི ཙིནྟེཏྭཱ ཏེ བྷིཀྑཱུ བཧི ཋཔེཏྭཱ ཨེཀཀོཝ སཏྠཱརཾ ཨུཔསངྐམི. པཱལིལེཡྻཀོ ཏཾ དིསྭཱ དཎྜམཱདཱཡ པཀྑནྡི. སཏྠཱ ཨོལོཀེཏྭཱ ཨཔེཧི ‘‘ཨཔེཧི པཱལིལེཡྻཀ, མཱ ནིཝཱརཡི, བུདྡྷུཔཊྛཱཀོ ཨེསོ’’ཏི ཨཱཧ. སོ ཏཏྠེཝ དཎྜཾ ཚཌྜེཏྭཱ པཏྟཙཱིཝརཔཊིགྒཧཎཾ ཨཱཔུཙྪི. ཐེརོ ནཱདཱསི. ནཱགོ ‘‘སཙེ ཨུགྒཧིཏཝཏྟོ བྷཝིསྶཏི, སཏྠུ ནིསཱིདནཔཱསཱཎཕལཀེ ཨཏྟནོ པརིཀྑཱརཾ ན ཋཔེསྶཏཱི’’ཏི ཙིནྟེསི. ཐེརོ པཏྟཙཱིཝརཾ བྷཱུམིཡཾ ཋཔེསི. ཝཏྟསམྤནྣཱ ཧི གརཱུནཾ ཨཱསནེ ཝཱ སཡནེ ཝཱ ཨཏྟནོ པརིཀྑཱརཾ ན ཋཔེནྟི.

ཐེརོ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསཱིདི. སཏྠཱ ‘‘ཨཱནནྡ, ཨེཀོཝ ཨཱགཏོསཱི’’ཏི པུཙྪིཏྭཱ པཉྩསཏེཧི བྷིཀྑཱུཧི སདྡྷིཾ ཨཱགཏབྷཱཝཾ སུཏྭཱ ‘‘ཀཧཾ པནེཏེ’’ཏི ཝཏྭཱ ‘‘ཏུམྷཱཀཾ ཙིཏྟཾ ཨཛཱནནྟོ བཧི ཋཔེཏྭཱ ཨཱགཏོམྷཱི’’ཏི ཝུཏྟེ ‘‘པཀྐོསཱཧི ནེ’’ཏི ཨཱཧ. ཐེརོ ཏཐཱ ཨཀཱསི. ཏེ བྷིཀྑཱུ ཨཱགནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདིཾསུ. སཏྠཱ ཏེཧི སདྡྷིཾ པཊིསནྠཱརཾ ཀཏྭཱ ཏེཧི བྷིཀྑཱུཧི, ‘‘བྷནྟེ བྷགཝཱ, ཧི བུདྡྷསུཁུམཱལོ ཙེཝ ཁཏྟིཡསུཁུམཱལོ ཙ, ཏུམྷེཧི ཏེམཱསཾ ཨེཀཀེཧི ཏིཊྛནྟེཧི ནིསཱིདནྟེཧི ཙ དུཀྐརཾ ཀཏཾ, ཝཏྟཔཊིཝཏྟཀཱརཀོཔི མུཁོདཀཱདིདཱཡཀོཔི ནཱཧོསི མཉྙེ’’ཏི ཝུཏྟེ, ‘‘བྷིཀྑཝེ, པཱལིལེཡྻཀཧཏྠིནཱ མམ སབྦཀིཙྩཱནི ཀཏཱནི. ཨེཝརཱུཔཉྷི སཧཱཡཾ ལབྷནྟེན ཨེཀཏོཝ ཝསིཏུཾ ཡུཏྟཾ, ཨལབྷནྟསྶ ཨེཀཙཱརིཀབྷཱཝོཝ སེཡྻོ’’ཏི ཝཏྭཱ ཨིམཱ ནཱགཝགྒེ ཏིསྶོ གཱཐཱ ཨབྷཱསི –

‘‘སཙེ ལབྷེཐ ནིཔཀཾ སཧཱཡཾ,

སདྡྷིཾཙརཾ སཱདྷུཝིཧཱརི དྷཱིརཾ;

ཨབྷིབྷུཡྻ སབྦཱནི པརིསྶཡཱནི,

ཙརེཡྻ ཏེནཏྟམནོ སཏཱིམཱ.

‘‘ནོ ཙེ ལབྷེཐ ནིཔཀཾ སཧཱཡཾ,

སདྡྷིཾཙརཾ སཱདྷུཝིཧཱརི དྷཱིརཾ;

རཱཛཱཝ རཊྛཾ ཝིཛིཏཾ པཧཱཡ,

ཨེཀོ ཙརེ མཱཏངྒརཉྙེཝ ནཱགོ.

‘‘ཨེཀསྶ ཙརིཏཾ སེཡྻོ,

ནཏྠི བཱལེ སཧཱཡཏཱ;

ཨེཀོ ཙརེ ན ཙ པཱཔཱནི ཀཡིརཱ,

ཨཔྤོསྶུཀྐོ མཱཏངྒརཉྙེཝ ནཱགོ’’ཏི. (མཧཱཝ. ༤༦༤; མ. ནི. ༣.༢༣༧; དྷ. པ. ༣༢༨-༣༣༠; སུ. ནི. ༤༥-༤༦);

གཱཐཱཔརིཡོསཱནེ པཉྩསཏཱཔི ཏེ བྷིཀྑཱུ ཨརཧཏྟེ པཏིཊྛཧིཾསུ. ཨཱནནྡཏྠེརོཔི ཨནཱཐཔིཎྜིཀཱདཱིཧི པེསིཏསཱསནཾ ཨཱརོཙེཏྭཱ, ‘‘བྷནྟེ, ཨནཱཐཔིཎྜིཀཔྤམུཁཱ ཏེ པཉྩ ཨརིཡསཱཝཀཀོཊིཡོ ཏུམྷཱཀཾ ཨཱགམནཾ པཙྩཱསཱིསནྟཱི’’ཏི ཨཱཧ. སཏྠཱ ‘‘ཏེན ཧི གཎྷཱཧི པཏྟཙཱིཝར’’ནྟི པཏྟཙཱིཝརཾ གཱཧཱཔེཏྭཱ ནིཀྑམི. ནཱགོ གནྟྭཱ གཏམགྒེ ཏིརིཡཾ ཨཊྛཱསི. ‘‘ཀིཾ ཀརོཏི, བྷནྟེ, ནཱགོ’’ཏི? ‘‘ཏུམྷཱཀཾ, བྷིཀྑཝེ, བྷིཀྑཾ དཱཏུཾ པཙྩཱསཱིསཏི, དཱིགྷརཏྟཾ ཁོ པནཱཡཾ མཡ྄ཧཾ ཨུཔཀཱརཀོ, ནཱསྶ ཙིཏྟཾ ཀོཔེཏུཾ ཝཊྚཏི, ནིཝཏྟཐ, བྷིཀྑཝེ’’ཏི སཏྠཱ བྷིཀྑཱུ གཧེཏྭཱ ནིཝཏྟི. ཧཏྠཱིཔི ཝནསཎྜཾ པཝིསིཏྭཱ པནསཀདལིཕལཱདཱིནི ནཱནཱཕལཱནི སཾཧརིཏྭཱ རཱསིཾ ཀཏྭཱ པུནདིཝསེ བྷིཀྑཱུནཾ ཨདཱསི. པཉྩསཏཱ བྷིཀྑཱུ སབྦཱནི ཁེཔེཏུཾ ནཱསཀྑིཾསུ. བྷཏྟཀིཙྩཔརིཡོསཱནེ སཏྠཱ པཏྟཙཱིཝརཾ གཱཧེཏྭཱ ནིཀྑམི. ནཱགོ བྷིཀྑཱུནཾ ཨནྟརནྟརེན གནྟྭཱ སཏྠུ པུརཏོ ཏིརིཡཾ ཨཊྛཱསི. ‘‘ཀིཾ ཀརོཏི, བྷནྟེ, ནཱགོ’’ཏི? ‘‘ཨཡཉྷི བྷིཀྑཝེ, ཏུམྷེ པེསེཏྭཱ མཾ ནིཝཏྟེཏུཀཱམོ’’ཏི. ཨཐ ནཾ སཏྠཱ ‘‘པཱལིལེཡྻཀ, ཨིདཾ པན མམ ཨནིཝཏྟགམནཾ, ཏཝ ཨིམིནཱ ཨཏྟབྷཱཝེན ཛྷཱནཾ ཝཱ ཝིཔསྶནཾ ཝཱ མགྒཕལཾ ཝཱ ནཏྠི, ཏིཊྛ ཏྭ’’ནྟི ཨཱཧ. ཏཾ སུཏྭཱ ནཱགོ མུཁེ སོཎྜཾ པཀྑིཔིཏྭཱ རོདནྟོ པཙྪཏོ པཙྪཏོ ཨགམཱསི. སོ ཧི སཏྠཱརཾ ནིཝཏྟེཏུཾ ལབྷནྟོ ཏེནེཝ ནིཡཱམེན ཡཱཝཛཱིཝཾ པཊིཛགྒེཡྻ, སཏྠཱ པན ཏཾ གཱམཱུཔཙཱརཾ པཏྭཱ ‘‘པཱལིལེཡྻཀ ཨིཏོ པཊྛཱཡ ཏཝ ཨབྷཱུམི, མནུསྶཱཝཱསོ སཔརིཔནྠོ, ཏིཊྛ ཏྭ’’ནྟི ཨཱཧ. སོ རོདམཱནོ ཏཏྠེཝ ཋཏྭཱ སཏྠརི ཙཀྑུཔཐཾ ཝིཛཧནྟེ ཧདཡེན ཕལིཏེན ཀཱལཾ ཀཏྭཱ སཏྠརི པསཱདེན ཏཱཝཏིཾསབྷཝནེ ཏིཾསཡོཛནིཀེ ཀནཀཝིམཱནེ ཨཙྪརཱསཧསྶམཛ྄ཛྷེ ནིབྦཏྟི, པཱལིལེཡྻཀདེཝཔུཏྟོཡེཝསྶ ནཱམཾ ཨཧོསི.

སཏྠཱཔི ཨནུཔུབྦེན ཛེཏཝནཾ ཨགམཱསི. ཀོསམྦཀཱ བྷིཀྑཱུ ‘‘སཏྠཱ ཀིར སཱཝཏྠིཾ ཨཱགཏོ’’ཏི སུཏྭཱ སཏྠཱརཾ ཁམཱཔེཏུཾ ཏཏྠ ཨགམཾསུ. ཀོསལརཱཛཱ ‘‘ཏེ ཀིར ཀོསམྦཀཱ བྷཎྜནཀཱརཀཱ བྷིཀྑཱུ ཨཱགཙྪནྟཱི’’ཏི སུཏྭཱ སཏྠཱརཾ ཨུཔསངྐམིཏྭཱ ‘‘ཨཧཾ, བྷནྟེ, ཏེསཾ མམ ཝིཛིཏཾ པཝིསིཏུཾ ན དསྶཱམཱི’’ཏི ཨཱཧ. ‘‘མཧཱརཱཛ, སཱིལཝནྟཱ ཨེཏེ བྷིཀྑཱུ, ཀེཝལཾ ཨཉྙམཉྙཾ ཝིཝཱདེན མམ ཝཙནཾ ན གཎྷིཾསུ, ཨིདཱནི མཾ ཁམཱཔེཏུཾ ཨཱགཙྪནྟི, ཨཱགཙྪནྟུ མཧཱརཱཛཱ’’ཏི. ཨནཱཐཔིཎྜིཀོཔི ‘‘ཨཧཾ, བྷནྟེ, ཏེསཾ ཝིཧཱརཾ པཝིསིཏུཾ ན དསྶཱམཱི’’ཏི ཝཏྭཱ ཏཐེཝ བྷགཝཏཱ པཊིཀྑིཏྟོ ཏུཎྷཱི ཨཧོསི. སཱཝཏྠིཡཾ ཨནུཔྤཏྟཱནཾ པན ཏེསཾ བྷགཝཱ ཨེཀམནྟེ ཝིཝིཏྟཾ ཀཱརཱཔེཏྭཱ སེནཱསནཾ དཱཔེསི. ཨཉྙེ བྷིཀྑཱུ ཏེཧི སདྡྷིཾ ནེཝ ཨེཀཏོ ནིསཱིདནྟི, ན ཏིཊྛནྟི, ཨཱགཏཱགཏཱ སཏྠཱརཾ པུཙྪནྟི – ‘‘ཀཏམེཏེ, བྷནྟེ, བྷཎྜནཀཱརཀཱ ཀོསམྦཀཱ བྷིཀྑཱུ’’ཏི? སཏྠཱ ‘‘ཨེཏེ’’ཏི དསྶེཏི. ‘‘ཨེཏེ ཀིར ཏེ, ཨེཏེ ཀིར ཏེ’’ཏི ཨཱགཏཱགཏེཧི ཨངྒུལིཀཱ དསྶིཡམཱནཱ ལཛྫཱཡ སཱིསཾ ཨུཀྑིཔིཏུཾ ཨསཀྐོནྟཱ བྷགཝཏོ པཱདམཱུལེ ནིཔཛྫིཏྭཱ བྷགཝནྟཾ ཁམཱཔེསུཾ. སཏྠཱ ‘‘བྷཱརིཡཾ ཝོ, བྷིཀྑཝེ, ཀཏཾ, ཏུམྷེ ཧི ནཱམ མཱདིསསྶ བུདྡྷསྶ སནྟིཀེ པབྦཛིཏྭཱ མཡི སཱམགྒིཾ ཀརོནྟེ མམ ཝཙནཾ ན ཀརིཏྠ, པོརཱཎཀཔཎྜིཏཱཔི ཝཛ྄ཛྷཔྤཏྟཱནཾ མཱཏཱཔིཏཱུནཾ ཨོཝཱདཾ སུཏྭཱ ཏེསུ ཛཱིཝིཏཱ ཝོརོཔིཡམཱནེསུཔི ཏཾ ཨནཏིཀྐམིཏྭཱ པཙྪཱ དྭཱིསུ རཊྛེསུ རཛྫཾ ཀཱརཡིཾསཱུ’’ཏི ཝཏྭཱ པུནདེཝ ཀོསམྦིཀཛཱཏཀཾ (ཛཱ. ༡.༩.༡༠ ཨཱདཡོ) ཀཐེཏྭཱ ‘‘ཨེཝཾ, བྷིཀྑཝེ, དཱིགྷཱཝུཀུམཱརོ མཱཏཱཔིཏཱུསུ ཛཱིཝིཏཱ ཝོརོཔིཡམཱནེསུཔི ཏེསཾ ཨོཝཱདཾ ཨནཏིཀྐམིཏྭཱ པཙྪཱ བྲཧྨདཏྟསྶ དྷཱིཏརཾ ལབྷིཏྭཱ དྭཱིསུ ཀཱསིཀོསལརཊྛེསུ རཛྫཾ ཀཱརེསི, ཏུམྷེཧི པན མམ ཝཙནཾ ཨཀརོནྟེཧི བྷཱརིཡཾ ཀཏ’’ནྟི ཝཏྭཱ ཨིམཾ གཱཐམཱཧ –

༦.

‘‘པརེ ཙ ན ཝིཛཱནནྟི, མཡམེཏྠ ཡམཱམསེ;

ཡེ ཙ ཏཏྠ ཝིཛཱནནྟི, ཏཏོ སམྨནྟི མེདྷགཱ’’ཏི.

ཏཏྠ པརེཏི པཎྜིཏེ ཋཔེཏྭཱ ཏཏོ ཨཉྙེ བྷཎྜནཀཱརཀཱ པརེ ནཱམ. ཏེ ཏཏྠ སངྒྷམཛ྄ཛྷེ ཀོལཱཧལཾ ཀརོནྟཱ ‘‘མཡཾ ཡམཱམསེ ཨུཔརམཱམ ཝིནསྶཱམ སཏཏཾ སམིཏཾ མཙྩུསནྟིཀཾ གཙྪཱམཱ’’ཏི ན ཝིཛཱནནྟི. ཡེ ཙ ཏཏྠ ཝིཛཱནནྟཱིཏི ཡེ ཏཏྠ པཎྜིཏཱ ‘‘མཡཾ མཙྩུསནྟིཀཾ གཙྪཱམཱ’’ཏི ཝིཛཱནནྟི. ཏཏོ སམྨནྟི མེདྷགཱཏི ཨེཝཉྷི ཏེ ཛཱནནྟཱ ཡོནིསོམནསིཀཱརཾ ཨུཔྤཱདེཏྭཱ མེདྷགཱནཾ ཀལཧཱནཾ ཝཱུཔསམཱཡ པཊིཔཛྫནྟི. ཨཐ ནེསཾ ཏཱཡ པཊིཔཏྟིཡཱ ཏེ མེདྷགཱ སམྨནྟཱིཏི. ཨཐ ཝཱ པརེ ཙཱཏི པུབྦེ མཡཱ ‘‘མཱ, བྷིཀྑཝེ, བྷཎྜན’’ནྟིཨཱདཱིནི ཝཏྭཱ ཨོཝདིཡམཱནཱཔི མམ ཨོཝཱདསྶ ཨཔཊིགྒཧཎེན ཨཏིཀྐམནེན ཨམཱམཀཱ པརེ ནཱམ. ‘‘མཡཾ ཚནྡཱདིཝསེན མིཙྪཱགཱཧཾ གཧེཏྭཱ ཨེཏྠ སངྒྷམཛ྄ཛྷེ ཡམཱམསེ བྷཎྜནཱདཱིནཾ ཝུདྡྷིཡཱ ཝཱཡམཱམཱ’’ཏི ན ཝིཛཱནནྟི. ཨིདཱནི པན ཡོནིསོ པཙྩཝེཀྑམཱནཱ ཏཏྠ ཏུམྷཱཀཾ ཨནྟརེ ཡེ ཙ པཎྜིཏཔུརིསཱ ‘‘པུབྦེ མཡཾ ཚནྡཱདིཝསེན ཝཱཡམནྟཱ ཨཡོནིསོ པཊིཔནྣཱ’’ཏི ཝིཛཱནནྟི, ཏཏོ ཏེསཾ སནྟིཀཱ ཏེ པཎྜིཏཔུརིསེ ནིསྶཱཡ ཨིམེ དཱནི ཀལཧསངྑཱཏཱ མེདྷགཱ སམྨནྟཱིཏི ཨཡམེཏྠ ཨཏྠོཏི.

གཱཐཱཔརིཡོསཱནེ སམྤཏྟབྷིཀྑཱུ སོཏཱཔཏྟིཕལཱདཱིསུ པཏིཊྛཧིཾསཱུཏི.

ཀོསམྦཀཝཏྠུ པཉྩམཾ.

༦. མཧཱཀཱལ༹ཏྠེརཝཏྠུ

སུབྷཱནུཔསྶིནྟི ཨིམཾ དྷམྨདེསནཾ སཏྠཱ སེཏབྱནགརཾ ཨུཔནིསྶཱཡ སིཾསཔཱཝནེ ཝིཧརནྟོ ཙཱུལ༹ཀཱལ༹མཧཱཀཱལེ༹ ཨཱརབྦྷ ཀཐེསི.

སེཏབྱནགརཝཱསིནོ ཧི ཙཱུལ༹ཀཱལོ༹, མཛ྄ཛྷིམཀཱལོ༹, མཧཱཀཱལོ༹ཏི ཏཡོ བྷཱཏརོ ཀུཊུམྦིཀཱ. ཏེསུ ཛེཊྛཀནིཊྛཱ དིསཱསུ ཝིཙརིཏྭཱ པཉྩཧི སཀཊསཏེཧི བྷཎྜཾ ཨཱཧརནྟི, མཛ྄ཛྷིམཀཱལོ༹ ཨཱབྷཏཾ ཝིཀྐིཎཱཏི. ཨཐེཀསྨིཾ སམཡེ ཏེ ཨུབྷོཔི བྷཱཏརོ པཉྩཧི སཀཊསཏེཧི ནཱནཱབྷཎྜཾ གཧེཏྭཱ སཱཝཏྠིཾ གནྟྭཱ སཱཝཏྠིཡཱ ཙ ཛེཏཝནསྶ ཙ ཨནྟརེ སཀཊཱནི མོཙཡིཾསུ. ཏེསུ མཧཱཀཱལོ༹ སཱཡནྷསམཡེ མཱལཱགནྡྷཱདིཧཏྠེ སཱཝཏྠིཝཱསིནོ ཨརིཡསཱཝཀེ དྷམྨསྶཝནཱཡ གཙྪནྟེ དིསྭཱ ‘‘ཀུཧིཾ ཨིམེ གཙྪནྟཱི’’ཏི པུཙྪིཏྭཱ ཏམཏྠཾ སུཏྭཱ ‘‘ཨཧམྤི གམིསྶཱམཱི’’ཏི ཙིནྟེཏྭཱ ཀནིཊྛཾ ཨཱམནྟེཏྭཱ, ‘‘ཏཱཏ, ཏེསུ སཀཊེསུ ཨཔྤམཏྟོ ཧོཧི, ཨཧཾ དྷམྨཾ སོཏུཾ གཙྪཱམཱི’’ཏི ཝཏྭཱ གནྟྭཱ ཏཐཱགཏཾ ཝནྡིཏྭཱ པརིསཔརིཡནྟེ ནིསཱིདི. སཏྠཱ ཏཾ དིསྭཱ ཏསྶ ཨཛ྄ཛྷཱསཡཝསེན ཨནུཔུབྦིཾ ཀཐཾ ཀཐེནྟོ དུཀྑཀྑནྡྷསུཏྟཱདིཝསེན (མ. ནི. ༡.༡༦༣ ཨཱདཡོ) ཨནེཀཔརིཡཱཡེན ཀཱམཱནཾ ཨཱདཱིནཝཾ ཨོཀཱརཾ སཾཀིལེསཉྩ ཀཐེསི. ཏཾ སུཏྭཱ མཧཱཀཱལོ༹ ‘‘སབྦཾ ཀིར པཧཱཡ གནྟབྦཾ, པརལོཀཾ གཙྪནྟཾ ནེཝ བྷོགཱ, ན ཉཱཏཀཱ ཙ ཨནུགཙྪནྟི, ཀིཾ མེ གྷརཱཝཱསེན པབྦཛིསྶཱམཱི’’ཏི ཙིནྟེཏྭཱ མཧཱཛནེ སཏྠཱརཾ ཝནྡིཏྭཱ པཀྐནྟེ སཏྠཱརཾ པབྦཛྫཾ ཡཱཙིཏྭཱ སཏྠཱརཱ ‘‘ནཏྠི ཏེ ཀོཙི ཨཔལོཀེཏབྦོ’’ཏི ཝུཏྟེ, ‘‘ཀནིཊྛོ མེ, བྷནྟེ, ཨཏྠཱི’’ཏི ཝཏྭཱ ཏེན ཧི ‘‘ཨཔལོཀེཧི ན’’ནྟི ཝུཏྟེ, ‘‘སཱདྷུ, བྷནྟེ’’ཏི ཝཏྭཱ གནྟྭཱ ཀནིཊྛཾ པཀྐོསཱཔེཏྭཱ, ‘‘ཏཱཏ, ཨིམཾ སབྦཾ སཱཔཏེཡྻཾ པཊིཔཛྫཱཧཱི’’ཏི ཨཱཧ. ‘‘ཏུམྷེ པན ཀིཾ ཀརིསྶཐ བྷཱཏིཀཱ’’ཏི? ‘‘ཨཧཾ སཏྠུ སནྟིཀེ པབྦཛིསྶཱམཱི’’ཏི. སོ ཏཾ ནཱནཔྤཀཱརེཧི ཡཱཙིཏྭཱ ནིཝཏྟེཏུཾ ཨསཀྐོནྟོ ‘‘སཱདྷུ, སཱམི, ཡཐཱ ཨཛ྄ཛྷཱསཡཾ ཀརོཐཱ’’ཏི ཨཱཧ. མཧཱཀཱལོ༹ གནྟྭཱ སཏྠུ སནྟིཀེ པབྦཛི. ‘‘ཨཧཾ བྷཱཏིཀཾ གཧེཏྭཱཝ ཨུཔྤབྦཛིསྶཱམཱི’’ཏི ཙཱུལ༹ཀཱལོ༹པི པབྦཛི. ཨཔརབྷཱགེ མཧཱཀཱལོ༹ ཨུཔསམྤདཾ ལབྷིཏྭཱ སཏྠཱརཾ ཨུཔསངྐམིཏྭཱ སཱསནེ དྷུརཱནི པུཙྪིཏྭཱ སཏྠཱརཱ དྭཱིསུ དྷུརེསུ ཀཐིཏེསུ ‘‘ཨཧཾ, བྷནྟེ, མཧལླཀཀཱལེ པབྦཛིཏཏྟཱ གནྠདྷུརཾ པཱུརེཏུཾ ན སཀྑིསྶཱམི, ཝིཔསྶནཱདྷུརཾ པན པཱུརེསྶཱམཱི’’ཏི ཡཱཝ ཨརཧཏྟཱ ཀམྨཊྛཱནཾ ཀཐཱཔེཏྭཱ སོསཱནིཀདྷུཏངྒཾ སམཱདཱཡ པཋམཡཱམཱཏིཀྐནྟེ སབྦེསུ ནིདྡཾ ཨོཀྐནྟེསུ སུསཱནཾ གནྟྭཱ པཙྩཱུསཀཱལེ སབྦེསུ ཨནུཊྛིཏེསུཡེཝ ཝིཧཱརཾ ཨཱགཙྪཏི.

ཨཐེཀཱ སུསཱནགོཔིཀཱ ཀཱལཱི ནཱམ ཚཝཌཱཧིཀཱ ཐེརསྶ ཋིཏཊྛཱནཾ ནིསིནྣཊྛཱནཾ ཙངྐམིཏཊྛཱནཉྩ དིསྭཱ ‘‘ཀོ ནུ ཁོ ཨིདྷཱགཙྪཏི, པརིགྒཎྷིསྶཱམི ན’’ནྟི པརིགྒཎྷིཏུཾ ཨསཀྐོནྟཱི ཨེཀདིཝསཾ སུསཱནཀུཊིཀཱཡམེཝ དཱིཔཾ ཛཱལེཏྭཱ པུཏྟདྷཱིཏརོ ཨཱདཱཡ གནྟྭཱ ཨེཀམནྟེ ནིལཱིཡམཱནཱ མཛ྄ཛྷིམཡཱམེ ཐེརཾ ཨཱགཙྪནྟཾ དིསྭཱ གནྟྭཱ ཝནྡིཏྭཱ, ‘‘ཨཡྻོ, ནོ, བྷནྟེ, ཨིམསྨིཾ ཋཱནེ ཝིཧརཏཱི’’ཏི ཨཱཧ. ‘‘ཨཱམ, ཨུཔཱསིཀེ’’ཏི. ‘‘བྷནྟེ, སུསཱནེ ཝིཧརནྟེཧི ནཱམ ཝཏྟཾ ཨུགྒཎྷིཏུཾ ཝཊྚཏཱི’’ཏི. ཐེརོ ‘‘ཀིཾ པན མཡཾ ཏཡཱ ཀཐིཏཝཏྟེ ཝཏྟིསྶཱམཱ’’ཏི ཨཝཏྭཱ ‘‘ཀིཾ ཀཱཏུཾ ཝཊྚཏི ཨུཔཱསིཀེ’’ཏི ཨཱཧ. ‘‘བྷནྟེ, སོསཱནིཀེཧི ནཱམ སུསཱནེ ཝསནབྷཱཝོ སུསཱནགོཔཀཱནཉྩ ཝིཧཱརེ མཧཱཐེརསྶ ཙ གཱམབྷོཛཀསྶ ཙ ཀཐེཏུཾ ཝཊྚཏཱི’’ཏི. ‘‘ཐེརོ ཀིཾ ཀཱརཎཱ’’ཏི? ‘‘ཀཏཀམྨཱ ཙོརཱ དྷནསཱམིཀེཧི པདཱནུཔདཾ ཨནུབདྡྷཱ སུསཱནེ བྷཎྜཀཾ ཚཌྜེཏྭཱ པལཱཡནྟི, ཨཐ མནུསྶཱ སོསཱནིཀཱནཾ པརིཔནྠཾ ཀརོནྟི, ཨེཏེསཾ པན ཀཐིཏེ ‘མཡཾ ཨིམསྶ བྷདྡནྟསྶ ཨེཏྟཀཾ ནཱམ ཀཱལཾ ཨེཏྠ ཝསནབྷཱཝཾ ཛཱནཱམ, ཨཙོརོ ཨེསོ’ཏི ཨུཔདྡཝཾ ནིཝཱརེནྟི. ཏསྨཱ ཨེཏེསཾ ཀཐེཏུཾ ཝཊྚཏཱི’’ཏི.

‘‘ཐེརོ ཨཉྙཾ ཀིཾ ཀཱཏབྦ’’ནྟི? ‘‘བྷནྟེ, སུསཱནེ ཝསནྟེན ནཱམ ཨཡྻེན མཙྪམཾསཏིལཔིཊྛཏེལགུལཱ༹དཱིནི ཝཛྫེཏབྦཱནི, དིཝཱ ན ནིདྡཱཡིཏབྦཾ, ཀུསཱིཏེན ན བྷཝིཏབྦཾ, ཨཱརདྡྷཝཱིརིཡེན བྷཝིཏབྦཾ, ཨསཋེན ཨམཱཡཱཝིནཱ ཧུཏྭཱ ཀལྱཱཎཛ྄ཛྷཱསཡེན བྷཝིཏབྦཾ, སཱཡཾ སབྦེསུ སུཏྟེསུ ཝིཧཱརཏོ ཨཱགནྟབྦཾ, པཙྩཱུསཀཱལེ སབྦེསུ ཨནུཊྛིཏེསུཡེཝ ཝིཧཱརཾ གནྟབྦཾ. སཙེ, བྷནྟེ, ཨཡྻོ ཨིམསྨིཾ ཋཱནེ ཨེཝཾ ཝིཧརནྟོ པབྦཛིཏཀིཙྩཾ མཏྠཀཾ པཱཔེཏུཾ སཀྑིསྶཏི, སཙེ མཏསརཱིརཾ ཨཱནེཏྭཱ ཚཌྜེནྟི, ཨཧཾ ཀམྦལཀཱུཊཱགཱརཾ ཨཱརོཔེཏྭཱ གནྡྷམཱལཱདཱིཧི སཀྐཱརཾ ཀཏྭཱ སརཱིརཀིཙྩཾ ཀརིསྶཱམི. ནོ ཙེ སཀྑིསྶཏི, ཙིཏཀཾ ཨཱརོཔེཏྭཱ ཨགྒིཾ ཛཱལེཏྭཱ སངྐུནཱ ཨཱཀཌྜྷིཏྭཱ བཧི ཁིཔིཏྭཱ ཕརསུནཱ ཀོཊྚེཏྭཱ ཁཎྜཱཁཎྜིཀཾ ཚིནྡིཏྭཱ ཨགྒིམྷི པཀྑིཔིཏྭཱ ཛྷཱཔེསྶཱམཱི’’ཏི ཨཱཧ. ཨཐ ནཾ ཐེརོ ‘‘སཱདྷུ བྷདྡེ, ཨེཀཾ པན རཱུཔཱརམྨཎཾ དིསྭཱ མཡ྄ཧཾ ཀཐེཡྻཱསཱི’’ཏི ཨཱཧ. སཱ ‘‘སཱདྷཱུ’’ཏི པཙྩསྶོསི. ཐེརོ ཡཐཱཛ྄ཛྷཱསཡེན སུསཱནེ སམཎདྷམྨཾ ཀརོཏི. ཙཱུལ༹ཀཱལ༹ཏྠེརོ པན ཨུཊྛཱཡ སམུཊྛཱཡ གྷརཱཝཱསཾ ཙིནྟེཏི, པུཏྟདཱརཾ ཨནུསྶརཏི. ‘‘བྷཱཏིཀོ མེ ཨཏིབྷཱརིཡཾ ཀམྨཾ ཀརོཏཱི’’ཏི ཙིནྟེཏི.

ཨཐེཀཱ ཀུལདྷཱིཏཱ ཏཾམུཧུཏྟསམུཊྛིཏེན བྱཱདྷིནཱ སཱཡནྷསམཡེ ཨམིལཱཏཱ ཨཀིལནྟཱ ཀཱལམཀཱསི. ཏམེནཾ ཉཱཏཀཱདཡོ དཱརུཏེལཱདཱིཧི སདྡྷིཾ སཱཡཾ སུསཱནཾ ནེཏྭཱ སུསཱནགོཔིཀཱཡ ‘‘ཨིམཾ ཛྷཱཔེཧཱི’’ཏི བྷཏིཾ དཏྭཱ ནིཡྻཱདེཏྭཱ པཀྐམིཾསུ. སཱ ཏསྶཱ པཱརུཏཝཏྠཾ ཨཔནེཏྭཱ ཏཾམུཧུཏྟམཏཾ པཱིཎིཏཔཱིཎིཏཾ སུཝཎྞཝཎྞཾ སརཱིརཾ དིསྭཱ, ‘‘ཨིམཾ ཨཡྻསྶ དསྶེཏུཾ པཏིརཱུཔཾ ཨཱརམྨཎ’’ནྟི ཙིནྟེཏྭཱ གནྟྭཱ ཐེརཾ ཝནྡིཏྭཱ, ‘‘བྷནྟེ, ཨེཝརཱུཔཾ ནཱམ ཨཱརམྨཎཾ ཨཏྠི, ཨོལོཀེཐ ཨཡྻཱ’’ཏི ཨཱཧ. ཐེརོ ‘‘སཱདྷཱུ’’ཏི ཝཏྭཱ པཱརུཔནཾ ནཱིཧརཱཔེཏྭཱ པཱདཏལཏོ ཡཱཝ ཀེསགྒཱ ཨོལོཀེཏྭཱ ‘‘ཨཏིཔཱིཎིཏམེཏཾ རཱུཔཾ སུཝཎྞཝཎྞཾ ཨགྒིམྷི ནཾ པཀྑིཔིཏྭཱ མཧཱཛཱལཱཧི གཧིཏམཏྟཀཱལེ མཡ྄ཧཾ ཨཱརོཙེཡྻཱསཱི’’ཏི ཝཏྭཱ སཀཊྛཱནམེཝ གནྟྭཱ ནིསཱིདི. སཱ ཏཐཱ ཀཏྭཱ ཐེརསྶ ཨཱརོཙེསི. ཐེརོ གནྟྭཱ ཨོལོཀེསི. ཛཱལཱཡ པཧཊཔཧཊཊྛཱནཾ ཀབརགཱཝིཡཱ ཝིཡ སརཱིརཝཎྞཾ ཨཧོསི, པཱདཱ ནམིཏྭཱ ཨོལམྦིཾསུ, ཧཏྠཱ པཊིཀུཊིཾསུ, ཨཱུརུནལཱཊཾ ནིཙྩམྨཾ ཨཧོསི. ཐེརོ ‘‘ཨིདཾ སརཱིརཾ ཨིདཱནེཝ ཨོལོཀེནྟཱནཾ ཨཔརིཡནྟཀརཾ ཧུཏྭཱ ཨིདཱནེཝ ཁཡཾ པཏྟཾ ཝཡཾ པཏྟ’’ནྟི རཏྟིཊྛཱནཾ གནྟྭཱ ནིསཱིདིཏྭཱ ཁཡཝཡཾ སམྤསྶམཱནོ –

‘‘ཨནིཙྩཱ ཝཏ སངྑཱརཱ, ཨུཔྤཱདཝཡདྷམྨིནོ;

ཨུཔྤཛྫིཏྭཱ ནིརུཛ྄ཛྷནྟི, ཏེསཾ ཝཱུཔསམོ སུཁོ’’ཏི. (དཱི. ནི. ༢.༢༢༡, ༢༧༢; སཾ. ནི. ༡.༡༨༦; ༢.༡༤༣; ཛཱ. ༡.༡.༩༥) –

གཱཐཾ ཝཏྭཱ ཝིཔསྶནཾ ཝཌྜྷེཏྭཱ སཧ པཊིསམྦྷིདཱཧི ཨརཧཏྟཾ པཱཔུཎི.

ཏསྨིཾ ཨརཧཏྟཾ པཏྟེ སཏྠཱ བྷིཀྑུསངྒྷཔརིཝུཏོ ཙཱརིཀཾ ཙརམཱནོ སེཏབྱཾ གནྟྭཱ སིཾསཔཱཝནཾ པཱཝིསི. ཙཱུལ༹ཀཱལ༹སྶ བྷརིཡཱཡོ ‘‘སཏྠཱ ཀིར ཨནུཔྤཏྟོ སིཾསཔཱཝན’’ནྟི སུཏྭཱ ‘‘ཨམྷཱཀཾ སཱམིཀཾ གཎྷིསྶཱམཱ’’ཏི པེསེཏྭཱ སཏྠཱརཾ ནིམནྟཱཔེསུཾ. བུདྡྷཱནཾ པན ཨཔརིཙིཎྞཊྛཱནེ ཨཱསནཔཉྙཏྟིཾ ཨཱཙིཀྑནྟེན ཨེཀེན བྷིཀྑུནཱ པཋམཏརཾ གནྟུཾ ཝཊྚཏི. བུདྡྷཱནཉྷི མཛ྄ཛྷིམཊྛཱནེ ཨཱསནཾ པཉྙཱཔེཏྭཱ ཏསྶ དཀྑིཎཏོ སཱརིཔུཏྟཏྠེརསྶ, ཝཱམཏོ མཧཱམོགྒལླཱནཏྠེརསྶ, ཏཏོ པཊྛཱཡ ཨུབྷོསུ པསྶེསུ བྷིཀྑུསངྒྷསྶ ཨཱསནཾ པཉྙཱཔེཏབྦཾ ཧོཏི. ཏསྨཱ མཧཱཀཱལ༹ཏྠེརོ ཙཱིཝརཔཱརུཔནཊྛཱནེ ཋཏྭཱ, ‘‘ཙཱུལ༹ཀཱལ༹, ཏྭཾ པུརཏོ གནྟྭཱ ཨཱསནཔཉྙཏྟིཾ ཨཱཙིཀྑཱ’’ཏི ཙཱུལ༹ཀཱལ༹ཾ པེསེསི. ཏསྶ དིཊྛཀཱལཏོ པཊྛཱཡ གེཧཛནཱ ཏེན སདྡྷིཾ པརིཧཱསཾ ཀརོནྟཱ ནཱིཙཱསནཱནི སངྒྷཏྠེརསྶ ཀོཊིཡཾ ཨཏྠརནྟི, ཨུཙྩཱསནཱནི སངྒྷནཝཀསྶ ཀོཊིཡཾ. ཨིཏརོ ‘‘མཱ ཨེཝཾ ཀརོཐ, ནཱིཙཱསནཱནི ཨུཔརི མཱ པཉྙཱཔེཐ, ཨུཙྩཱསནཱནི ཨུཔརི པཉྙཱཔེཐ, ནཱིཙཱསནཱནི ཧེཊྛཱ’’ཏི ཨཱཧ. ཨིཏྠིཡོ ཏསྶ ཝཙནཾ ཨསུཎནྟིཡོ ཝིཡ ‘‘ཏྭཾ ཀིཾ ཀརོནྟོ ཝིཙརསི, ཀིཾ ཏཝ ཨཱསནཱནི པཉྙཱཔེཏུཾ ན ཝཊྚཏི, ཏྭཾ ཀཾ ཨཱཔུཙྪིཏྭཱ པབྦཛིཏོ, ཀེན པབྦཛིཏོསི, ཀསྨཱ ཨིདྷཱགཏོསཱི’’ཏི ཝཏྭཱ ནིཝཱསནཔཱརུཔནཾ ཨཙྪིནྡིཏྭཱ སེཏཀཱནི ནིཝཱསེཏྭཱ སཱིསེ ཙ མཱལཱཙུམྦུཊཀཾ ཋཔེཏྭཱ, ‘‘གཙྪ སཏྠཱརཾ ཨཱནེཧི, མཡཾ ཨཱསནཱནི པཉྙཱཔེསྶཱམཱ’’ཏི པཧིཎིཾསུ. ན ཙིརཾ བྷིཀྑུབྷཱཝེ ཋཏྭཱ ཨཝསྶིཀོཝ ཨུཔྤབྦཛིཏཏྟཱ ལཛྫིཏུཾ ན ཛཱནཱཏི, ཏསྨཱ སོ ཏེན ཨཱཀཔྤེན ནིརཱསངྐོཝ གནྟྭཱ སཏྠཱརཾ ཝནྡིཏྭཱ བུདྡྷཔྤམུཁཾ བྷིཀྑུསངྒྷཾ ཨཱདཱཡ ཨཱགཏོ. བྷིཀྑུསངྒྷསྶ པན བྷཏྟཀིཙྩཱཝསཱནེ མཧཱཀཱལ༹སྶ བྷརིཡཱཡོ ‘‘ཨིམཱཧི ཨཏྟནོ སཱམིཀོ གཧིཏོ, མཡམྤི ཨམྷཱཀཾ སཱམིཀཾ གཎྷིསྶཱམཱ’’ཏི ཙིནྟེཏྭཱ པུནདིཝསེ སཏྠཱརཾ ནིམནྟཡིཾསུ. ཏདཱ པན ཨཱསནཔཉྙཱཔནཏྠཾ ཨཉྙོ བྷིཀྑུ ཨགམཱསི. ཏཱ ཏསྨིཾ ཁཎེ ཨོཀཱསཾ ཨལབྷིཏྭཱ བུདྡྷཔྤམུཁཾ བྷིཀྑུསངྒྷཾ ནིསཱིདཱཔེཏྭཱ བྷིཀྑཾ ཨདཾསུ. ཙཱུལ༹ཀཱལ༹སྶ པན དྭེ བྷརིཡཱཡོ, མཛ྄ཛྷིམཀཱལ༹སྶ ཙཏསྶོ, མཧཱཀཱལ༹སྶ པན ཨཊྛ. བྷིཀྑཱུཔི བྷཏྟཀིཙྩཾ ཀཱཏུཀཱམཱ ནིསཱིདིཏྭཱ བྷཏྟཀིཙྩམཀཾསུ, བཧི གནྟུཀཱམཱ ཨུཊྛཱཡ ཨགམཾསུ. སཏྠཱ པན ནིསཱིདིཏྭཱ བྷཏྟཀིཙྩཾ ཀརི. ཏསྶ བྷཏྟཀིཙྩཔརིཡོསཱནེ ཏཱ ཨིཏྠིཡོ, ‘‘བྷནྟེ, མཧཱཀཱལོ༹ ཨམྷཱཀཾ ཨནུམོདནཾ ཀཏྭཱ ཨཱགཙྪིསྶཏི, ཏུམྷེ པུརཏོ གཙྪཐཱ’’ཏི ཝདིཾསུ. སཏྠཱ ‘‘སཱདྷཱུ’’ཏི ཝཏྭཱ པུརཏོ ཨགམཱསི. གཱམདྭཱརཾ པཏྭཱ བྷིཀྑཱུ ཨུཛ྄ཛྷཱཡིཾསུ ‘‘ཀིཾ ནཱམེཏཾ སཏྠཱརཱ ཀཏཾ, ཉཏྭཱ ནུ ཁོ ཀཏཾ, ཨུདཱཧུ ཨཛཱནིཏྭཱ. ཧིཡྻོ ཙཱུལ༹ཀཱལ༹སྶ པུརཏོ གཏཏྟཱ པབྦཛྫནྟརཱཡོ ཛཱཏོ, ཨཛྫ ཨཉྙསྶ པུརཏོ གཏཏྟཱ ཨནྟརཱཡོ ནཱཧོསི. ཨིདཱནི མཧཱཀཱལ༹ཾ ཋཔེཏྭཱ ཨཱགཏོ, སཱིལཝཱ ཁོ པན བྷིཀྑུ ཨཱཙཱརསམྤནྣོ, ཀརིསྶཏི ནུ ཁོ ཏསྶ པབྦཛྫནྟརཱཡ’’ནྟི. སཏྠཱ ཏེསཾ ཝཙནཾ སུཏྭཱ ནིཝཏྟིཏྭཱ ཋིཏོ ‘‘ཀིཾ ཀཐེཐ, བྷིཀྑཝེ’’ཏི པུཙྪི. ཏེ ཏམཏྠཾ ཨཱརོཙེསུཾ. ‘‘ཀིཾ པན ཏུམྷེ, བྷིཀྑཝེ, ཙཱུལ༹ཀཱལ༹ཾ ཝིཡ མཧཱཀཱལ༹ཾ སལླཀྑེཐཱ’’ཏི? ‘‘ཨཱམ, བྷནྟེ’’. ཏསྶ ཧི དྭེ པཛཱཔཏིཡོ, ཨིམསྶ ཨཊྛ. ‘‘ཨཊྛཧི པརིཀྑིཔིཏྭཱ གཧིཏོ ཀིཾ ཀརིསྶཏི, བྷནྟེ’’ཏི? སཏྠཱ ‘‘མཱ, བྷིཀྑཝེ, ཨེཝཾ ཨཝཙུཏྠ, ཙཱུལ༹ཀཱལོ༹ ཨུཊྛཱཡ སམུཊྛཱཡ སུབྷཱརམྨཎབཧུལོ ཝིཧརཏི, པཔཱཏེ ཋིཏོ དུབྦལརུཀྑསདིསོ. མཡ྄ཧཾ པན པུཏྟོ མཧཱཀཱལོ༹ ཨསུབྷཱནུཔསྶཱི ཝིཧརཏི, གྷནསེལཔབྦཏོ ཝིཡ ཨཙལོ’’ཏི ཝཏྭཱ ཨིམཱ གཱཐཱ ཨབྷཱསི –

༧.

‘‘སུབྷཱནུཔསྶིཾ ཝིཧརནྟཾ, ཨིནྡྲིཡེསུ ཨསཾཝུཏཾ;

བྷོཛནམྷི ཙཱམཏྟཉྙུཾ, ཀུསཱིཏཾ ཧཱིནཝཱིརིཡཾ;

ཏཾ ཝེ པསཧཏི མཱརོ, ཝཱཏོ རུཀྑཾཝ དུབྦལཾ.

༨.

‘‘ཨསུབྷཱནུཔསྶིཾ ཝིཧརནྟཾ, ཨིནྡྲིཡེསུ སུསཾཝུཏཾ;

བྷོཛནམྷི ཙ མཏྟཉྙུཾ, སདྡྷཾ ཨཱརདྡྷཝཱིརིཡཾ;

ཏཾ ཝེ ནཔྤསཧཏཱི མཱརོ, ཝཱཏོ སེལཾཝ པབྦཏ’’ནྟི.

ཏཏྠ སུབྷཱནུཔསྶིཾ ཝིཧརནྟནྟི སུཏཾ ཨནུཔསྶནྟཾ, ཨིཊྛཱརམྨཎེ མཱནསཾ ཝིསྶཛྫེཏྭཱ ཝིཧརནྟནྟི ཨཏྠོ. ཡོ ཧི པུགྒལོ ནིམིཏྟགྒཱཧཾ ཨནུབྱཉྫནགྒཱཧཾ གཎྷནྟོ ‘‘ནཁཱ སོབྷནཱ’’ཏི གཎྷཱཏི, ‘‘ཨངྒུལིཡོ སོབྷནཱ’’ཏི གཎྷཱཏི, ‘‘ཧཏྠཔཱདཱ, ཛངྒྷཱ, ཨཱུརུ, ཀཊི, ཨུདརཾ, ཐནཱ, གཱིཝཱ, ཨོཊྛཱ, དནྟཱ, མུཁཾ, ནཱསཱ, ཨཀྑཱིནི, ཀཎྞཱ, བྷམུཀཱ, ནལཱཊཾ, ཀེསཱ, སོབྷནཱ’’ཏི གཎྷཱཏི, ‘‘ཀེསཱ, ལོམཱ, ནཁཱ, དནྟཱ, ཏཙོ, སོབྷནཱ’’ཏི གཎྷཱཏི, ཝཎྞོ སུབྷོ, སཎྛཱནཾ སུབྷནྟི, ཨཡཾ སུབྷཱནུཔསྶཱི ནཱམ. ཨེཝཾ ཏཾ སུབྷཱནུཔསྶིཾ ཝིཧརནྟཾ. ཨིནྡྲིཡེསཱུཏི ཙཀྑཱདཱིསུ ཚསུ ཨིནྡྲིཡེསུ. ཨསཾཝུཏནྟི ཙཀྑུདྭཱརཱདཱིནི ཨརཀྑནྟཾ. པརིཡེསནམཏྟཱ པཊིགྒཧཎམཏྟཱ པརིབྷོགམཏྟཱཏི ཨིམིསྶཱ མཏྟཱཡ ཨཛཱནནཏོ བྷོཛནམྷི ཙཱམཏྟཉྙུཾ. ཨཔིཙ པཙྩཝེཀྑཎམཏྟཱ ཝིསྶཛྫནམཏྟཱཏི ཨིམིསྶཱཔི མཏྟཱཡ ཨཛཱནནཏོ ཨམཏྟཉྙུཾ, ཨིདཾ བྷོཛནཾ དྷམྨིཀཾ, ཨིདཾ ཨདྷམྨིཀནྟིཔི ཨཛཱནནྟཾ. ཀཱམཙྪནྡབྱཱཔཱདཝིཧིཾསཱཝིཏཀྐཝསིཏཱཡ ཀུསཱིཏཾ. ཧཱིནཝཱིརིཡནྟི ནིབྦཱིརིཡཾ ཙཏཱུསུ ཨིརིཡཱཔཐེསུ ཝཱིརིཡཀརཎརཧིཏཾ. པསཧཏཱིཏི ཨབྷིབྷཝཏི ཨཛ྄ཛྷོཏྠརཏི. ཝཱཏོ རུཀྑཾཝ དུབྦལནྟི བལཝཝཱཏོ ཚིནྣཔཔཱཏེ ཛཱཏཾ དུབྦལརུཀྑཾ ཝིཡ. ཡཐཱ ཧི སོ ཝཱཏོ ཏསྶ དུབྦལརུཀྑསྶ པུཔྥཕལཔལླཝཱདཱིནིཔི པཱཏེཏི, ཁུདྡཀསཱཁཱཔི བྷཉྫཏི, མཧཱསཱཁཱཔི བྷཉྫཏི, སམཱུལཀམྤི ཏཾ རུཀྑཾ ཨུཔྤཱཊེཏྭཱ ཨུདྡྷཾམཱུལཾ ཨདྷོསཱཁཾ ཀཏྭཱ གཙྪཏི, ཨེཝམེཝ ཨེཝརཱུཔཾ པུགྒལཾ ཨནྟོ ཨུཔྤནྣོ ཀིལེསམཱརོ པསཧཏི, བལཝཝཱཏོ དུབྦལརུཀྑསྶ པུཔྥཕལཔལླཝཱདིཔཱཏནཾ ཝིཡ ཁུདྡཱནུཁུདྡཀཱཔཏྟིཨཱཔཛྫནམྤི ཀརོཏི, ཁུདྡཀསཱཁཱབྷཉྫནཾ ཝིཡ ནིསྶགྒིཡཱདིཨཱཔཏྟིཨཱཔཛྫནམྤི ཀརོཏི, མཧཱསཱཁཱབྷཉྫནཾ ཝིཡ ཏེརསསངྒྷཱདིསེསཱཔཏྟིཨཱཔཛྫནམྤི ཀརོཏི, ཨུཔྤཱཊེཏྭཱ ཨུདྡྷཾ, མཱུལཀཾ ཧེཊྛཱསཱཁཾ ཀཏྭཱ པཱཏནཾ ཝིཡ པཱརཱཛིཀཱཔཏྟིཨཱཔཛྫནམྤི ཀརོཏི, སྭཱཀྑཱཏསཱསནཱ ནཱིཧརིཏྭཱ ཀཏིཔཱཧེནེཝ གིཧིབྷཱཝཾ པཱཔེཏཱིཏི ཨེཝཾ ཨེཝརཱུཔཾ པུགྒལཾ ཀིལེསམཱརོ ཨཏྟནོ ཝསེ ཝཏྟེཏཱིཏི ཨཏྠོ.

ཨསུབྷཱནུཔསྶིནྟི དསསུ ཨསུབྷེསུ ཨཉྙཏརཾ ཨསུབྷཾ པསྶནྟཾ པཊིཀཱུལམནསིཀཱརེ ཡུཏྟཾ ཀེསེ ཨསུབྷཏོ པསྶནྟཾ ལོམེ ནཁེ དནྟེ ཏཙཾ ཝཎྞཾ སཎྛཱནཾ ཨསུབྷཏོ པསྶནྟཾ. ཨིནྡྲིཡེསཱུཏི ཚསུ ཨིནྡྲིཡེསུ. སུསཾཝུཏནྟི ནིམིཏྟཱདིགྒཱཧརཧིཏཾ པིཧིཏདྭཱརཾ. ཨམཏྟཉྙུཏཱཔཊིཀྑེཔེན བྷོཛནམྷི ཙ མཏྟཉྙུཾ. སདྡྷནྟི ཀམྨསྶ ཙེཝ ཕལསྶ ཙ སདྡཧནལཀྑཎཱཡ ལོཀིཀཱཡ སདྡྷཱཡ ཙེཝ ཏཱིསུ ཝཏྠཱུསུ ཨཝེཙྩཔྤསཱདསངྑཱཏཱཡ ལོཀུཏྟརསདྡྷཱཡ ཙ སམནྣཱགཏཾ. ཨཱརདྡྷཝཱིརིཡནྟི པགྒཧིཏཝཱིརིཡཾ པརིཔུཎྞཝཱིརིཡཾ. ཏཾ ཝེཏི ཨེཝརཱུཔཾ ཏཾ པུགྒལཾ ཡཐཱ དུབྦལཝཱཏོ སཎིཀཾ པཧརནྟོ ཨེཀགྒྷནཾ སེལཾ ཙཱལེཏུཾ ན སཀྐོཏི, ཏཐཱ ཨབྦྷནྟརེ ཨུཔྤཛྫམཱནོཔི དུབྦལཀིལེསམཱརོ ནཔྤསཧཏི, ཁོབྷེཏུཾ ཝཱ ཙཱལེཏུཾ ཝཱ ན སཀྐོཏཱིཏི ཨཏྠོ.

ཏཱཔི ཁོ ཏསྶ པུརཱཎདུཏིཡིཀཱཡོ ཐེརཾ པརིཝཱརེཏྭཱ ‘‘ཏྭཾ ཀཾ ཨཱཔུཙྪིཏྭཱ པབྦཛིཏོ, ཨིདཱནི གིཧཱི བྷཝིསྶསི ན བྷཝིསྶསཱི’’ཏིཨཱདཱིནི ཝཏྭཱ ཀཱསཱཝཾ ནཱིཧརིཏུཀཱམཱ ཨཧེསུཾ. ཐེརོ ཏཱསཾ ཨཱཀཱརཾ སལླཀྑེཏྭཱ ནིསིནྣཱསནཱ ཝུཊྛཱཡ ཨིདྡྷིཡཱ ཨུཔྤཏྟིཏྭཱ ཀཱུཊཱགཱརཀཎྞིཀཾ དྭིདྷཱ བྷིནྡིཏྭཱ ཨཱཀཱསེནཱགནྟྭཱ སཏྠརི གཱཐཱ པརིཡོསཱཔེནྟེཡེཝ སཏྠུ སུཝཎྞཝཎྞཾ སརཱིརཾ ཨབྷིཏྠཝནྟོ ཨཱཀཱསཏོ ཨོཏརིཏྭཱ ཏཐཱགཏསྶ པཱདེ ཝནྡི.

གཱཐཱཔརིཡོསཱནེ སམྤཏྟབྷིཀྑཱུ སོཏཱཔཏྟིཕལཱདཱིསུ པཏིཊྛཧིཾསཱུཏི.

མཧཱཀཱལ༹ཏྠེརཝཏྠུ ཚཊྛཾ.

༧. དེཝདཏྟཝཏྠུ

ཨནིཀྐསཱཝོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ རཱཛགཧེ དེཝདཏྟསྶ ཀཱསཱཝལཱབྷཾ ཨཱརབྦྷ ཀཐེསི.

ཨེཀསྨིཉྷི སམཡེ དྭེ ཨགྒསཱཝཀཱ པཉྩསཏེ པཉྩསཏེ ཨཏྟནོ ཨཏྟནོ པརིཝཱརེ ཨཱདཱཡ སཏྠཱརཾ ཨཱཔུཙྪིཏྭཱ ཝནྡིཏྭཱ ཛེཏཝནཏོ རཱཛགཧཾ ཨགམཾསུ. རཱཛགཧཝཱསིནོ དྭེཔི ཏཡོཔི བཧཱུཔི ཨེཀཏོ ཧུཏྭཱ ཨཱགནྟུཀདཱནཾ ཨདཾསུ. ཨཐེཀདིཝསཾ ཨཱཡསྨཱ སཱརིཔུཏྟོ ཨནུམོདནཾ ཀརོནྟོ ‘‘ཨུཔཱསཀཱ ཨེཀོ སཡཾ དཱནཾ དེཏི, པརཾ ན སམཱདཔེཏི, སོ ནིབྦཏྟནིབྦཏྟཊྛཱནེ བྷོགསམྤདཾ ལབྷཏི, ནོ པརིཝཱརསམྤདཾ. ཨེཀོ སཡཾ ན དེཏི, པརཾ སམཱདཔེཏི, སོ ནིབྦཏྟནིབྦཏྟཊྛཱནེ པརིཝཱརསམྤདཾ ལབྷཏི, ནོ བྷོགསམྤདཾ. ཨེཀོ སཡམྤི ན དེཏི, པརམྤི ན སམཱདཔེཏི, སོ ནིབྦཏྟནིབྦཏྟཊྛཱནེ ཀཉྫིཀམཏྟམྤི ཀུཙྪིཔཱུརཾ ན ལབྷཏི, ཨནཱཐོ ཧོཏི ནིཔྤཙྩཡོ. ཨེཀོ སཡམྤི དེཏི, པརམྤི སམཱདཔེཏི, སོ ནིབྦཏྟནིབྦཏྟཊྛཱནེ ཨཏྟབྷཱཝསཏེཔི ཨཏྟབྷཱཝསཧསྶེཔི ཨཏྟབྷཱཝསཏསཧསྶེཔི བྷོགསམྤདཉྩེཝ པརིཝཱརསམྤདཉྩ ལབྷཏཱི’’ཏི ཨེཝཾ དྷམྨཾ དེསེསི.

ཏམེཀོ པཎྜིཏཔུརིསོ དྷམྨཾ སུཏྭཱ ‘‘ཨཙྪརིཡཱ ཝཏ བྷོ, ཨབྦྷུཏཱ ཝཏ བྷོ དྷམྨདེསནཱ, སུཀཱརཎཾ ཀཐིཏཾ, མཡཱ ཨིམཱསཾ དྭིནྣཾ སམྤཏྟཱིནཾ ནིཔྥཱདཀཾ ཀམྨཾ ཀཱཏུཾ ཝཊྚཏཱི’’ཏི ཙིནྟེཏྭཱ – ‘‘བྷནྟེ, སྭེ མཡ྄ཧཾ བྷིཀྑཾ གཎྷཐཱ’’ཏི ཐེརཾ ནིམནྟེསི. ‘‘ཀིཏྟཀེཧི ཏེ བྷིཀྑཱུཧི ཨཏྠོ ཨུཔཱསཀཱ’’ཏི. ‘‘ཀིཏྟཀཱ པན ཝོ, བྷནྟེ, པརིཝཱརཱ’’ཏི? ‘‘སཧསྶམཏྟཱ ཨུཔཱསཀཱ’’ཏི. ‘‘སབྦེཧི སདྡྷིཾཡེཝ སྭེ བྷིཀྑཾ གཎྷཐ, བྷནྟེ’’ཏི. ‘‘ཐེརོ ཨདྷིཝཱསེསི’’. ཨུཔཱསཀོ ནགརཝཱིཐིཡཾ ཙརནྟོ – ‘‘ཨམྨཱ, ཏཱཏཱ, མཡཱ བྷིཀྑུསཧསྶཾ ནིམནྟིཏཾ, ཏུམྷེ ཀིཏྟཀཱནཾ བྷིཀྑཱུནཾ བྷིཀྑཾ དཱཏུཾ སཀྑིསྶཐ, ཏུམྷེ ཀིཏྟཀཱན’’ནྟི སམཱདཔེསི. མནུསྶཱ ཨཏྟནོ ཨཏྟནོ པཧོནཀནིཡཱམེན – ‘‘མཡཾ དསནྣཾ དསྶཱམ, མཡཾ ཝཱིསཏིཡཱ, མཡཾ སཏསྶཱ’’ཏི ཨཱཧཾསུ. ཨུཔཱསཀོ – ‘‘ཏེན ཧི ཨེཀསྨིཾ ཋཱནེ སམཱགམཾ ཀཏྭཱ ཨེཀཏོཝ པརིཝིསིསྶཱམ, སབྦེ ཏིལཏཎྜུལསཔྤིམདྷུཕཱཎིཏཱདཱིནི སམཱཧརཐཱ’’ཏི ཨེཀསྨིཾ ཋཱནེ སམཱཧརཱཔེསི.

ཨཐསྶ ཨེཀོ ཀུཊུམྦིཀོ སཏསཧསྶགྒྷནིཀཾ གནྡྷཀཱསཱཝཝཏྠཾ དཏྭཱ – ‘‘སཙེ ཏེ དཱནཝཏྟཾ ནཔྤཧོཏི, ཨིདཾ ཝིསྶཛྫེཏྭཱ ཡཾ ཨཱུནཾ, ཏཾ པཱུརེཡྻཱསི. སཙེ པཧོཏི, ཡསྶིཙྪསི, ཏསྶ བྷིཀྑུནོ དདེཡྻཱསཱི’’ཏི ཨཱཧ. ཏདཱ ཏསྶ སབྦཾ དཱནཝཏྟཾ པཧོསི, ཀིཉྩི ཨཱུནཾ ནཱམ ནཱཧོསི. སོ མནུསྶེ པུཙྪི – ‘‘ཨིདཾ, ཨཡྻཱ, ཀཱསཱཝཾ ཨེཀེན ཀུཊུམྦིཀེན ཨེཝཾ ནཱམ ཝཏྭཱ དིནྣཾ ཨཏིརེཀཾ ཛཱཏཾ, ཀསྶ ནཾ དེམཱ’’ཏི. ཨེཀཙྩེ ‘‘སཱརིཔུཏྟཏྠེརསྶཱ’’ཏི ཨཱཧཾསུ. ཨེཀཙྩེ ‘‘ཐེརོ སསྶཔཱཀསམཡེ ཨཱགནྟྭཱ གམནསཱིལོ, དེཝདཏྟོ ཨམྷཱཀཾ མངྒལཱམངྒལེསུ སཧཱཡོ ཨུདཀམཎིཀོ ཝིཡ ནིཙྩཾ པཏིཊྛིཏོ, ཏསྶ ཏཾ དེམཱ’’ཏི ཨཱཧཾསུ. སམྦཧུལིཀཱཡ ཀཐཱཡཔི ‘‘དེཝདཏྟསྶ དཱཏབྦ’’ནྟི ཝཏྟཱརོ བཧུཏརཱ ཨཧེསུཾ, ཨཐ ནཾ དེཝདཏྟསྶ ཨདཾསུ. སོ ཏཾ ཚིནྡིཏྭཱ སིབྦིཏྭཱ རཛིཏྭཱ ནིཝཱསེཏྭཱ པཱརུཔིཏྭཱ ཝིཙརཏི. ཏཾ དིསྭཱ མནུསྶཱ ‘‘ནཡིདཾ དེཝདཏྟསྶ ཨནུཙྪཝིཀཾ, སཱརིཔུཏྟཏྠེརསྶ ཨནུཙྪཝིཀཾ. དེཝདཏྟོ ཨཏྟནོ ཨནནུཙྪཝིཀཾ ནིཝཱསེཏྭཱ པཱརུཔིཏྭཱ ཝིཙརཏཱི’’ཏི ཝདིཾསུ. ཨཐེཀོ དིསཱཝཱསིཀོ བྷིཀྑུ རཱཛགཧཱ སཱཝཏྠིཾ གནྟྭཱ སཏྠཱརཾ ཝནྡིཏྭཱ ཀཏཔཊིསནྠཱརོ སཏྠཱརཱ དྭིནྣཾ ཨགྒསཱཝཀཱནཾ ཕཱསུཝིཧཱརཾ པུཙྪིཏོ ཨཱདིཏོ པཊྛཱཡ སབྦཾ ཏཾ པཝཏྟིཾ ཨཱརོཙེསི. སཏྠཱ ‘‘ན ཁོ བྷིཀྑུ ཨིདཱནེཝེསོ ཨཏྟནོ ཨནནུཙྪཝིཀཾ ཝཏྠཾ དྷཱརེཏི, པུབྦེཔི དྷཱརེསིཡེཝཱ’’ཏི ཝཏྭཱ ཨཏཱིཏཾ ཨཱཧརི –

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བཱརཱཎསིཝཱསཱི ཨེཀོ ཧཏྠིམཱརཀོ ཧཏྠིཾ མཱརེཏྭཱ མཱརེཏྭཱ དནྟེ ཙ ནཁེ ཙ ཨནྟཱནི ཙ གྷནམཾསཉྩ ཨཱཧརིཏྭཱ ཝིཀྐིཎནྟོ ཛཱིཝིཏཾ ཀཔྤེཏི. ཨཐེཀསྨིཾ ཨརཉྙེ ཨནེཀསཧསྶཱ ཧཏྠིནོ གོཙརཾ གཧེཏྭཱ གཙྪནྟཱ པཙྩེཀབུདྡྷེ དིསྭཱ ཏཏོ པཊྛཱཡ གཙྪམཱནཱ གམནཱགམནཀཱལེ ཛཎྞུཀེཧི ནིཔཏིཏྭཱ ཝནྡིཏྭཱ པཀྐམནྟི. ཨེཀདིཝསཉྷི ཧཏྠིམཱརཀོ ཏཾ ཀིརིཡཾ དིསྭཱ – ‘‘ཨཧཾ ཨིམེ ཀིཙྪེན མཱརེམི, ཨིམེ ཙ གམནཱགམནཀཱལེ པཙྩེཀབུདྡྷེ ཝནྡནྟི, ཀིཾ ནུ ཁོ དིསྭཱ ཝནྡནྟཱི’’ཏི ཙིནྟེནྟོ – ‘‘ཀཱསཱཝ’’ནྟི སལླཀྑེཏྭཱ, ‘‘མཡཱཔི ཨིདཱནི ཀཱསཱཝཾ ལདྡྷུཾ ཝཊྚཏཱི’’ཏི ཙིནྟེཏྭཱ ཨེཀསྶ པཙྩེཀབུདྡྷསྶ ཛཱཏསྶརཾ ཨོརུཡ྄ཧ ནྷཱཡནྟསྶ ཏཱིརེ ཋཔིཏེསུ ཀཱསཱཝེསུ ཙཱིཝརཾ ཐེནེཏྭཱ ཏེསཾ ཧཏྠཱིནཾ གམནཱགམནམགྒེ སཏྟིཾ གཧེཏྭཱ སསཱིསཾ པཱརུཔིཏྭཱ ནིསཱིདཏི. ཧཏྠིནོ ཏཾ དིསྭཱ – ‘‘པཙྩེཀབུདྡྷོ’’ཏི སཉྙཱཡ ཝནྡིཏྭཱ པཀྐམནྟི. སོ ཏེསཾ སབྦཔཙྪཏོ གཙྪནྟཾ སཏྟིཡཱ པཧརིཏྭཱ མཱརེཏྭཱ དནྟཱདཱིནི གཧེཏྭཱ སེསཾ བྷཱུམིཡཾ ནིཁཎིཏྭཱ གཙྪཏི. ཨཔརབྷཱགེ བོདྷིསཏྟོ ཧཏྠིཡོནིཡཾ པཊིསནྡྷིཾ གཧེཏྭཱ ཧཏྠིཛེཊྛཀོ ཡཱུཐཔཏི ཨཧོསི. ཏདཱཔི སོ ཏཐེཝ ཀརོཏི. མཧཱཔུརིསོ ཨཏྟནོ པརིསཱཡ པརིཧཱནིཾ ཉཏྭཱ, ‘‘ཀུཧིཾ ཨིམེ ཧཏྠཱི གཏཱ, མནྡཱ ཛཱཏཱ’’ཏི པུཙྪིཏྭཱ, ‘‘ན ཛཱནཱམ, སཱམཱི’’ཏི ཝུཏྟེ, ‘‘ཀུཧིཉྩི གཙྪནྟཱ མཾ ཨནཱཔུཙྪིཏྭཱ ན གམིསྶནྟི, པརིཔནྠེན བྷཝིཏབྦ’’ནྟི ཝཏྭཱ, ‘‘ཨེཀསྨིཾ ཋཱནེ ཀཱསཱཝཾ པཱརུཔིཏྭཱ ནིསིནྣསྶ སནྟིཀཱ པརིཔནྠེན བྷཝིཏབྦ’’ནྟི པརིསངྐིཏྭཱ, ‘‘ཏཾ པརིགྒཎྷིཏུཾ ཝཊྚཏཱི’’ཏི སབྦེ ཧཏྠཱི པུརཏོ པེསེཏྭཱ སཡཾ པཙྪཏོ ཝིལམྦམཱནོ ཨཱགཙྪཏི. སོ སེསཧཏྠཱིསུ ཝནྡིཏྭཱ གཏེསུ མཧཱཔུརིསཾ ཨཱགཙྪནྟཾ དིསྭཱ ཙཱིཝརཾ སཾཧརིཏྭཱ སཏྟིཾ ཝིསྶཛྫི. མཧཱཔུརིསོ སཏིཾ ཨུཔྤཊྛཔེཏྭཱ ཨཱགཙྪནྟོ པཙྪཏོ པཊིཀྐམིཏྭཱ སཏྟིཾ ཝིཝཛྫེསི. ཨཐ ནཾ ‘‘ཨིམིནཱ ཨིམེ ཧཏྠཱི ནཱསིཏཱ’’ཏི གཎྷིཏུཾ པཀྑནྡི. ཨིཏརོ ཨེཀཾ རུཀྑཾ པུརཏོ ཀཏྭཱ ནིལཱིཡི. ཨཐ ‘‘ནཾ རུཀྑེན སདྡྷིཾ སོཎྜཱཡ པརིཀྑིཔིཏྭཱ གཧེཏྭཱ བྷཱུམིཡཾ པོཐེསྶཱམཱི’’ཏི ཏེན ནཱིཧརིཏྭཱ དསྶིཏཾ ཀཱསཱཝཾ དིསྭཱ – ‘‘སཙཱཧཾ ཨིམསྨིཾ དུབྦྷིསྶཱམི, ཨནེཀསཧསྶེསུ མེ བུདྡྷཔཙྩེཀབུདྡྷཁཱིཎཱསཝེསུ ལཛྫཱ ནཱམ བྷིནྣཱ བྷཝིསྶཏཱི’’ཏི ཨདྷིཝཱསེཏྭཱ – ‘‘ཏཡཱ མེ ཨེཏྟཀཱ ཉཱཏཀཱ ནཱསིཏཱ’’ཏི པུཙྪི. ‘‘ཨཱམ, སཱམཱི’’ཏི. ‘‘ཀསྨཱ ཨེཝཾ བྷཱརིཡཀམྨམཀཱསི, ཨཏྟནོ ཨནནུཙྪཝིཀཾ ཝཱིཏརཱགཱནཾ ཨནུཙྪཝིཀཾ ཝཏྠཾ པརིདཧིཏྭཱ ཨེཝརཱུཔཾ ཀམྨཾ ཀརོནྟེན བྷཱརིཡཾ ཏཡཱ ཀཏ’’ནྟི. ཨེཝཉྩ པན ཝཏྭཱ ཨུཏྟརིཔི ནཾ ནིགྒཎྷནྟོ ‘‘ཨནིཀྐསཱཝོ ཀཱསཱཝཾ…པེ… ས ཝེ ཀཱསཱཝམརཧཏཱི’’ཏི གཱཐཾ ཝཏྭཱ – ‘‘ཨཡུཏྟཾ ཏེ ཀཏ’’ནྟི ཝཏྭཱ ཏཾ ཝིསྶཛྫེསི.

སཏྠཱ ཨིམཾ དྷམྨདེསནཾ ཨཱཧརིཏྭཱ, ‘‘ཏདཱ ཧཏྠིམཱརཀོ དེཝདཏྟོ ཨཧོསི, ཏསྶ ནིགྒཱཧཀོ ཧཏྠིནཱགོ ཨཧམེཝཱ’’ཏི ཛཱཏཀཾ སམོདྷཱནེཏྭཱ, ‘‘ན, བྷིཀྑཝེ, ཨིདཱནེཝ, པུབྦེཔི དེཝདཏྟོ ཨཏྟནོ ཨནནུཙྪཝིཀཾ ཝཏྠཾ དྷཱརེསིཡེཝཱ’’ཏི ཝཏྭཱ ཨིམཱ གཱཐཱ ཨབྷཱསི –

༩.

‘‘ཨནིཀྐསཱཝོ ཀཱསཱཝཾ, ཡོ ཝཏྠཾ པརིདཧིསྶཏི;

ཨཔེཏོ དམསཙྩེན, ན སོ ཀཱསཱཝམརཧཏི.

༡༠.

‘‘ཡོ ཙ ཝནྟཀསཱཝསྶ, སཱིལེསུ སུསམཱཧིཏོ;

ཨུཔེཏོ དམསཙྩེན, ས ཝེ ཀཱསཱཝམརཧཏཱི’’ཏི.

ཚདྡནྟཛཱཏཀེནཱཔི (ཛཱ. ༡.༡༦.༡༢༢-༡༢༣) ཙ ཨཡམཏྠོ དཱིཔེཏབྦོ.

ཏཏྠ ཨནིཀྐསཱཝོཏི རཱགཱདཱིཧི ཀསཱཝེཧི སཀསཱཝོ. པརིདཧིསྶཏཱིཏི ནིཝཱསནཔཱརུཔནཨཏྠརཎཝསེན པརིབྷུཉྫིསྶཏི. པརིདྷསྶཏཱིཏིཔི པཱཋོ. ཨཔེཏོ དམསཙྩེནཱཏི ཨིནྡྲིཡདམེན ཙེཝ པརམཏྠསཙྩཔཀྑིཀེན ཝཙཱིསཙྩེན ཙ ཨཔེཏོ, ཝིཡུཏྟོ པརིཙྩཏྠོཏི ཨཏྠོ. ན སོཏི སོ ཨེཝརཱུཔོ པུགྒལོ ཀཱསཱཝཾ པརིདཧིཏུཾ ནཱརཧཏི. ཝནྟཀསཱཝསྶཱཏི ཙཏཱུཧི མགྒེཧི ཝནྟཀསཱཝོ ཚཌྜིཏཀསཱཝོ པཧཱིནཀསཱཝོ ཨསྶ. སཱིལེསཱུཏི ཙཏུཔཱརིསུདྡྷིསཱིལེསུ. སུསམཱཧིཏོཏི སུཊྛུ སམཱཧིཏོ སུཊྛིཏོ. ཨུཔེཏོཏི ཨིནྡྲིཡདམེན ཙེཝ ཝུཏྟཔྤཀཱརེན ཙ སཙྩེན ཨུཔགཏོ. ས ཝེཏི སོ ཨེཝརཱུཔོ པུགྒལོ ཏཾ གནྡྷཀཱསཱཝཝཏྠཾ ཨརཧཏཱིཏི.

གཱཐཱཔརིཡོསཱནེ སོ དིསཱཝཱསིཀོ བྷིཀྑུ སོཏཱཔནྣོ ཨཧོསི, ཨཉྙེཔི བཧཱུ སོཏཱཔཏྟིཕལཱདཱིནི པཱཔུཎིཾསུ. དེསནཱ མཧཱཛནསྶ སཱཏྠིཀཱ ཨཧོསཱིཏི.

དེཝདཏྟཝཏྠུ སཏྟམཾ.

༨. སཱརིཔུཏྟཏྠེརཝཏྠུ

ཨསཱརེ སཱརམཏིནོཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨགྒསཱཝཀེཧི ནིཝེདིཏཾ སཉྩཡསྶ ཨནཱགམནཾ ཨཱརབྦྷ ཀཐེསི.

ཏཏྲཱཡཾ ཨནུཔུབྦིཀཐཱ – ཨམྷཱཀཉྷི སཏྠཱ ཨིཏོ ཀཔྤསཏསཧསྶཱདྷིཀཱནཾ ཙཏུནྣཾ ཨསངྑྱེཡྻཱནཾ མཏྠཀེ ཨམརཝཏིཡཱ ནཱམ ནགརེ སུམེདྷོ ནཱམ བྲཱཧྨཎཀུམཱརོ ཧུཏྭཱ སབྦསིཔྤེསུ ནིཔྥཏྟིཾ པཏྭཱ མཱཏཱཔིཏཱུནཾ ཨཙྩཡེན ཨནེཀཀོཊིསངྑྱཾ དྷནཾ པརིཙྩཛིཏྭཱ ཨིསིཔབྦཛྫཾ པབྦཛིཏྭཱ ཧིམཝནྟེ ཝསནྟོ ཛྷཱནཱབྷིཉྙཱ ནིབྦཏྟེཏྭཱ ཨཱཀཱསེན གཙྪནྟོ དཱིཔངྐརདསབལསྶ སུདསྶནཝིཧཱརཏོ རམྨཝཏཱིནགརཾ པཝིསནཏྠཱཡ མགྒཾ སོདྷཡམཱནཾ ཛནཾ དིསྭཱ སཡམྤི ཨེཀཾ པདེསཾ གཧེཏྭཱ མགྒཾ སོདྷེཏི. ཏསྨིཾ ཨསོདྷིཏེཡེཝ ཨཱགཏསྶ སཏྠུནོ ཨཏྟཱནཾ སེཏུཾ ཀཏྭཱ ཀལལེ ཨཛིནཙམྨཾ ཨཏྠརིཏྭཱ ‘‘སཏྠཱ སསཱཝཀསངྒྷོ ཀལལཾ ཨནཀྐམིཏྭཱ མཾ ཨཀྐམནྟོ གཙྪཏཱུ’’ཏི ནིཔནྣོ. སཏྠཱརཱ ཏཾ དིསྭཱཝ ‘‘བུདྡྷངྐུརོ ཨེས, ཨནཱགཏེ ཀཔྤསཏསཧསྶཱདྷིཀཱནཾ ཙཏུནྣཾ ཨསངྑྱེཡྻཱནཾ པརིཡོསཱནེ གོཏམོ ནཱམ བུདྡྷོ བྷཝིསྶཏཱི’’ཏི བྱཱཀཏོ. ཏསྶ སཏྠུནོ ཨཔརབྷཱགེ ‘‘ཀོཎྜཉྙོ མངྒལོ སུམནོ རེཝཏོ སོབྷིཏོ ཨནོམདསྶཱི པདུམོ ནཱརདོ པདུམུཏྟརོ སུམེདྷོ སུཛཱཏོ པིཡདསྶཱི ཨཏྠདསྶཱི དྷམྨདསྶཱི སིདྡྷཏྠོ ཏིསྶོ ཕུསྶོ ཝིཔསྶཱི སིཁཱི ཝེསྶབྷཱུ ཀཀུསནྡྷོ ཀོཎཱགམནོ ཀསྶཔོ’’ཏི ལོཀཾ ཨོབྷཱསེཏྭཱ ཨུཔྤནྣཱནཾ ཨིམེསམྤི ཏེཝཱིསཏིཡཱ བུདྡྷཱནཾ སནྟིཀེ ལདྡྷབྱཱཀརཎོ, ‘‘དས པཱརམིཡོ, དས ཨུཔཔཱརམིཡོ, དས པརམཏྠཔཱརམིཡོ’’ཏི སམཏྟིཾས པཱརམིཡོ པཱུརེཏྭཱ ཝེསྶནྟརཏྟབྷཱཝེ ཋིཏོ པཐཝིཀམྤནཱནི མཧཱདཱནཱནི དཏྭཱ པུཏྟདཱརཾ པརིཙྩཛིཏྭཱ ཨཱཡུཔརིཡོསཱནེ ཏུསིཏཔུརེ ནིབྦཏྟིཏྭཱ ཏཏྠ ཡཱཝཏཱཡུཀཾ ཋཏྭཱ དས སཧསྶཙཀྐཝཱལ༹དེཝཏཱཧི སནྣིཔཏིཏྭཱ –

‘‘ཀཱལོ དེཝ མཧཱཝཱིར, ཨུཔྤཛྫ མཱཏུཀུཙྪིཡཾ;

སདེཝཀཾ ཏཱརཡནྟོ, བུཛ྄ཛྷསྶུ ཨམཏཾ པད’’ནྟི. (བུ. ཝཾ. ༡.༦༧) –

ཝུཏྟེ –

‘‘ཀཱལཾ དེསཉྩ དཱིཔཉྩ, ཀུལཾ མཱཏརམེཝ ཙ;

ཨིམེ པཉྩ ཝིལོཀེཏྭཱ, ཨུཔྤཛྫཏི མཧཱཡསོ’’ཏི. –

པཉྩ མཧཱཝིལོཀནཱནི ཝིལོཀེཏྭཱ ཏཏོ ཙུཏོ སཀྱརཱཛཀུལེ པཊིསནྡྷིཾ གཧེཏྭཱ དསམཱསཙྩཡེན མཱཏུཀུཙྪིཏོ ཝིཛཱཡི. སོལ༹སཝསྶཀཱལེ ཏཏྠ མཧཱསམྤཏྟིཡཱ པརིཧརིཡམཱནོ ཨནུཀྐམེན བྷདྲཡོབྦནཾ པཏྭཱ ཏིཎྞཾ ཨུཏཱུནཾ ཨནུཙྪཝིཀེསུ ཏཱིསུ པཱསཱདེསུ དེཝལོཀསིརིཾ ཝིཡ རཛྫསིརིཾ ཨནུབྷཝནྟོ ཨུཡྻཱནཀཱིལཱ༹ཡ གམནསམཡེ ཨནུཀྐམེན ཛིཎྞབྱཱདྷིམཏསངྑཱཏེ ཏཡོ དེཝདཱུཏེ དིསྭཱ སཉྫཱཏསཾཝེགོ ནིཝཏྟིཏྭཱ ཙཏུཏྠཝཱརེ པབྦཛིཏཾ དིསྭཱ, ‘‘སཱདྷུ པབྦཛྫཱ’’ཏི པབྦཛྫཱཡ རུཙིཾ ཨུཔྤཱདེཏྭཱ ཨུཡྻཱནཾ གནྟྭཱ ཏཏྠ དིཝསཾ ཁེཔེཏྭཱ མངྒལཔོཀྑརཎཱིཏཱིརེ ནིསིནྣོ ཀཔྤཀཝེསཾ གཧེཏྭཱ ཨཱགཏེན ཝིསྶཀམྨེན དེཝཔུཏྟེན ཨལངྐཏཔཊིཡཏྟོ རཱཧུལཀུམཱརསྶ ཛཱཏསཱསནཾ སུཏྭཱ པུཏྟསིནེཧསྶ བལཝབྷཱཝཾ ཉཏྭཱ, ‘‘ཡཱཝ ཨིདཾ བནྡྷནཾ ན ཝཌྜྷཏི, ཏཱཝདེཝ ནཾ ཚིནྡིསྶཱམཱི’’ཏི ཙིནྟེཏྭཱ སཱཡཾ ནགརཾ པཝིསནྟོ –

‘‘ནིབྦུཏཱ ནཱུན སཱ མཱཏཱ, ནིབྦུཏོ ནཱུན སོ པིཏཱ;

ནིབྦུཏཱ ནཱུན སཱ ནཱརཱི, ཡསྶཱཡཾ ཨཱིདིསོ པཏཱི’’ཏི. –

ཀིསཱགོཏམིཡཱ ནཱམ པིཏུཙྪཱདྷཱིཏཱཡ བྷཱསིཏཾ ཨིམཾ གཱཐཾ སུཏྭཱ, ‘‘ཨཧཾ ཨིམཱཡ ནིབྦུཏཔདཾ སཱཝིཏོ’’ཏི མུཏྟཱཧཱརཾ ཨོམུཉྩིཏྭཱ ཏསྶཱ པེསེཏྭཱ ཨཏྟནོ བྷཝནཾ པཝིསིཏྭཱ སིརིསཡནེ ནིསིནྣོ ནིདྡོཔགཏཱནཾ ནཱཊཀིཏྠཱིནཾ ཝིཔྤཀཱརཾ དིསྭཱ ནིབྦིནྣཧདཡོ ཚནྣཾ ཨུཊྛཱཔེཏྭཱ ཀཎྜཀཾ ཨཱཧརཱཔེཏྭཱ ཏཾ ཨཱརུཡ྄ཧ ཚནྣསཧཱཡོ དསསཧསྶཙཀྐཝཱལ༹དེཝཏཱཧི པརིཝུཏོ མཧཱབྷིནིཀྑམནཾ ནིཀྑམིཏྭཱ ཨནོམཱནདཱིཏཱིརེ པབྦཛིཏྭཱ ཨནུཀྐམེན རཱཛགཧཾ གནྟྭཱ ཏཏྠ པིཎྜཱཡ ཙརིཏྭཱ པཎྜཝཔབྦཏཔབྦྷཱརེ ནིསིནྣོ མགདྷརཉྙཱ རཛྫེན ནིམནྟིཡམཱནོ ཏཾ པཊིཀྑིཔིཏྭཱ སབྦཉྙུཏཾ པཏྭཱ ཨཏྟནོ ཝིཛིཏཾ ཨཱགམནཏྠཱཡ ཏེན གཧིཏཔཊིཉྙོ ཨཱལཱ༹རཉྩ ཨུདཀཉྩ ཨུཔསངྐམིཏྭཱ ཏེསཾ སནྟིཀེ ཨདྷིགཏཝིསེསཾ ཨནལངྐརིཏྭཱ ཚབྦསྶཱནི མཧཱཔདྷཱནཾ པདཧིཏྭཱ ཝིསཱཁཔུཎྞམདིཝསེ པཱཏོཝ སུཛཱཏཱཡ དིནྣཔཱཡསཾ པརིབྷུཉྫིཏྭཱ ནེརཉྫརཱཡ ནདིཡཱ སུཝཎྞཔཱཏིཾ པཝཱཧེཏྭཱ ནེརཉྫརཱཡ ནདིཡཱ ཏཱིརེ མཧཱཝནསཎྜེ ནཱནཱསམཱཔཏྟཱིཧི དིཝསབྷཱགཾ ཝཱིཏིནཱམེཏྭཱ སཱཡནྷསམཡེ སོཏྟིཡེན དིནྣཾ ཏིཎཾ གཧེཏྭཱ ཀཱལེ༹ན ནཱགརཱཛེན ཨབྷིཏྠུཏགུཎོ བོདྷིམཎྜཾ ཨཱརུཡ྄ཧ ཏིཎཱནི སནྠརིཏྭཱ ‘‘ན ཏཱཝིམཾ པལླངྐཾ བྷིནྡིསྶཱམི, ཡཱཝ མེ ཨནུཔཱདཱཡ ཨཱསཝེཧི ཙིཏྟཾ ན མུཙྩིསྶཏཱི’’ཏི པཊིཉྙཾ ཀཏྭཱ པུརཏྠཱབྷིམུཁོ ནིསཱིདིཏྭཱ སཱུརིཡེ ཨནཏྠངྒམིཏེཡེཝ མཱརབལཾ ཝིདྷམིཏྭཱ པཋམཡཱམེ པུབྦེནིཝཱསཉཱཎཾ, མཛ྄ཛྷིམཡཱམེ ཙུཏཱུཔཔཱཏཉཱཎཾ པཏྭཱ པཙྪིམཡཱམཱཝསཱནེ པཙྩཡཱཀཱརེ ཉཱཎཾ ཨོཏཱརེཏྭཱ ཨརུཎུགྒམནེ དསབལཙཏུཝེསཱརཛྫཱདིསབྦགུཎཔཊིམཎྜིཏཾ སབྦཉྙུཏཉྙཱཎཾ པཊིཝིཛ྄ཛྷིཏྭཱ སཏྟསཏྟཱཧཾ བོདྷིམཎྜེ ཝཱིཏིནཱམེཏྭཱ ཨཊྛམེ སཏྟཱཧེ ཨཛཔཱལནིགྲོདྷམཱུལེ ནིསིནྣོ དྷམྨགམྦྷཱིརཏཱཔཙྩཝེཀྑཎེན ཨཔྤོསྶུཀྐཏཾ ཨཱཔཛྫམཱནོ དསསཧསྶཙཀྐཝཱལ༹མཧཱབྲཧྨཔརིཝཱརེན སཧམྤཏིབྲཧྨུནཱ ཨཱཡཱཙིཏདྷམྨདེསནོ བུདྡྷཙཀྑུནཱ ལོཀཾ ཝོལོཀེཏྭཱ བྲཧྨུནོ ཨཛ྄ཛྷེསནཾ ཨདྷིཝཱསེཏྭཱ, ‘‘ཀསྶ ནུ ཁོ ཨཧཾ པཋམཾ དྷམྨཾ དེསེཡྻ’’ནྟི ཨོལོཀེནྟོ ཨཱལཱ༹རུདཀཱནཾ ཀཱལཀཏབྷཱཝཾ ཉཏྭཱ པཉྩཝགྒིཡཱནཾ བྷིཀྑཱུནཾ བཧཱུཔཀཱརཏཾ ཨནུསྶརིཏྭཱ ཨུཊྛཱཡཱསནཱ ཀཱསིཔུརཾ གཙྪནྟོ ཨནྟརཱམགྒེ ཨུཔཀེན སདྡྷིཾ མནྟེཏྭཱ ཨཱསཱལ༹ྷིཔུཎྞམདིཝསེ ཨིསིཔཏནེ མིགདཱཡེ པཉྩཝགྒིཡཱནཾ ཝསནཊྛཱནཾ པཏྭཱ ཏེ ཨནནུཙྪཝིཀེན སམུདཱཙཱརེན སམུདཱཙརནྟེ སཉྙཱཔེཏྭཱ ཨཉྙཱཏཀོཎྜཉྙཔྤམུཁེ ཨཊྛཱརས བྲཧྨཀོཊིཡོ ཨམཏཔཱནཾ པཱཡེནྟོ དྷམྨཙཀྐཾ པཝཏྟེཏྭཱ པཝཏྟིཏཝརདྷམྨཙཀྐོ པཉྩམིཡཾ པཀྑསྶ སབྦེཔི ཏེ བྷིཀྑཱུ ཨརཧཏྟེ པཏིཊྛཱཔེཏྭཱ ཏཾ དིཝསམེཝ ཡསཀུལཔུཏྟསྶ ཨུཔནིསྶཡསམྤཏྟིཾ དིསྭཱ ཏཾ རཏྟིབྷཱགེ ནིབྦིནྡིཏྭཱ གེཧཾ པཧཱཡ ནིཀྑནྟཾ དིསྭཱ, ‘‘ཨེཧི ཡསཱ’’ཏི པཀྐོསིཏྭཱ ཏསྨིཾཡེཝ རཏྟིབྷཱགེ སོཏཱཔཏྟིཕལཾ པཱཔེཏྭཱ པུནདིཝསེ ཨརཧཏྟཾ པཱཔེཏྭཱ ཨཔརེཔི ཏསྶ སཧཱཡཀེ ཙཏུཔཎྞཱས ཛནེ ཨེཧིབྷིཀྑུཔབྦཛྫཱཡ པབྦཱཛེཏྭཱ ཨརཧཏྟཾ པཱཔེསི.

ཨེཝཾ ལོཀེ ཨེཀསཊྛིཡཱ ཨརཧནྟེསུ ཛཱཏེསུ ཝུཊྛཝསྶོ པཝཱརེཏྭཱ, ‘‘ཙརཐ, བྷིཀྑཝེ, ཙཱརིཀ’’ནྟི སཊྛི བྷིཀྑཱུ དིསཱསུ པེསེཏྭཱ སཡཾ ཨུརུཝེལཾ གཙྪནྟོ ཨནྟརཱམགྒེ ཀཔྤཱསིཀཝནསཎྜེ ཏིཾས ཛནེ བྷདྡཝགྒིཡཀུམཱརེ ཝིནེསི. ཏེསུ སབྦཔཙྪིམཀོ སོཏཱཔནྣོ སབྦུཏྟམོ ཨནཱགཱམཱི ཨཧོསི. ཏེ སབྦེཔི ཨེཧིབྷིཀྑུབྷཱཝེནེཝ པབྦཱཛེཏྭཱ དིསཱསུ པེསེཏྭཱ སཡཾ ཨུརུཝེལཾ གནྟྭཱ ཨཌྜྷུཌྜྷཱནི པཱཊིཧཱརིཡསཧསྶཱནི དསྶེཏྭཱ ཨུརུཝེལཀསྶཔཱདཡོ སཧསྶཛཊིལཔརིཝཱརེ ཏེབྷཱཏིཀཛཊིལེ ཝིནེཏྭཱ ཨེཧིབྷིཀྑུབྷཱཝེནེཝ པབྦཱཛེཏྭཱ གཡཱསཱིསེ ནིསཱིདཱཔེཏྭཱ ཨཱདིཏྟཔརིཡཱཡདེསནཱཡ (མཧཱཝ. ༥༤; སཾ. ནི. ༤.༢༨) ཨརཧཏྟེ པཏིཊྛཱཔེཏྭཱ ཏེན ཨརཧནྟསཧསྶེན པརིཝུཏོ ‘‘བིམྦིསཱརརཉྙོ དིནྣཾ པཊིཉྙཾ མོཙེསྶཱམཱི’’ཏི རཱཛགཧནགརཱུཔཙཱརེ ལཊྛིཝནུཡྻཱནཾ གནྟྭཱ, ‘‘སཏྠཱ ཀིར ཨཱགཏོ’’ཏི སུཏྭཱ དྭཱདསནཧུཏེཧི བྲཱཧྨཎགཧཔཏིཀེཧི སདྡྷིཾ ཨཱགཏསྶ རཉྙོ མདྷུརདྷམྨཀཐཾ ཀཐེནྟོ རཱཛཱནཾ ཨེཀཱདསཧི ནཧུཏེཧི སདྡྷིཾ སོཏཱཔཏྟིཕལེ པཏིཊྛཱཔེཏྭཱ ཨེཀནཧུཏཾ སརཎེསུ པཏིཊྛཱཔེཏྭཱ པུནདིཝསེ སཀྐེན དེཝརཱཛེན མཱཎཝཀཝཎྞཾ གཧེཏྭཱ ཨབྷིཏྠུཏགུཎོ རཱཛགཧནགརཾ པཝིསིཏྭཱ རཱཛནིཝེསནེ ཀཏབྷཏྟཀིཙྩོ ཝེལུ༹ཝནཱརཱམཾ པཊིགྒཧེཏྭཱ ཏཏྠེཝ ཝཱསཾ ཀཔྤེསི. ཏཏྠ ནཾ སཱརིཔུཏྟམོགྒལླཱནཱ ཨུཔསངྐམིཾསུ.

ཏཏྲཱཡཾ ཨནུཔུབྦིཀཐཱ – ཨནུཔྤནྣེཡེཝ ཧི བུདྡྷེ རཱཛགཧཏོ ཨཝིདཱུརེ ཨུཔཏིསྶགཱམོ ཀོལིཏགཱམོཏི དྭེ བྲཱཧྨཎགཱམཱ ཨཧེསུཾ. ཏེསུ ཨུཔཏིསྶགཱམེ སཱརིཡཱ ནཱམ བྲཱཧྨཎིཡཱ གབྦྷསྶ པཏིཊྛིཏདིཝསེཡེཝ ཀོལིཏགཱམེ མོགྒལིཡཱ ནཱམ བྲཱཧྨཎིཡཱཔི གབྦྷོ པཏིཊྛཱསི. ཏཱནི ཀིར དྭེཔི ཀུལཱནི ཡཱཝ སཏྟམཱ ཀུལཔརིཝཊྚཱ ཨཱབདྡྷཔཊིབདྡྷསཧཱཡཀཱནེཝ ཨཧེསུཾ, ཏཱསཾ དྭིནྣམྤི ཨེཀདིཝསམེཝ གབྦྷཔརིཧཱརཾ ཨདཾསུ. ཏཱ ཨུབྷོཔི དསམཱསཙྩེཡེན པུཏྟེ ཝིཛཱཡིཾསུ. ནཱམགྒཧཎདིཝསེ སཱརིཡཱ བྲཱཧྨཎིཡཱ པུཏྟསྶ ཨུཔཏིསྶགཱམཀེ ཛེཊྛཀུལསྶ པུཏྟཏྟཱ ཨུཔཏིསྶོཏི ནཱམཾ ཀརིཾསུ, ཨིཏརསྶ ཀོལིཏགཱམེ ཛེཊྛཀུལསྶ པུཏྟཏྟཱ ཀོལིཏོཏི ནཱམཾ ཀརིཾསུ. ཏེ ཨུབྷོཔི ཝུཌྜྷིམནྭཱཡ སབྦསིཔྤཱནཾ པཱརཾ ཨགམཾསུ. ཨུཔཏིསྶམཱཎཝསྶ ཀཱིལ༹ནཏྠཱཡ ནདིཾ ཝཱ ཨུཡྻཱནཾ ཝཱ གམནཀཱལེ པཉྩ སུཝཎྞསིཝིཀསཏཱནི པརིཝཱརཱནི ཧོནྟི, ཀོལིཏམཱཎཝསྶ པཉྩ ཨཱཛཉྙཡུཏྟརཐསཏཱནི. དྭེཔི ཛནཱ པཉྩཔཉྩམཱཎཝཀསཏཔརིཝཱརཱ ཧོནྟི. རཱཛགཧེ ཙ ཨནུསཾཝཙྪརཾ གིརགྒསམཛྫོ ནཱམ ཨཧོསི. ཏེསཾ དྭིནྣམྤི ཨེཀཊྛཱནེཡེཝ མཉྩཾ བནྡྷནྟི. དྭེཔི ཨེཀཏོ ནིསཱིདིཏྭཱ སམཛྫཾ པསྶནྟཱ ཧསིཏབྦཊྛཱནེ ཧསནྟི, སཾཝེགཊྛཱནེ སཾཝེཛེནྟི, དཱཡཾ དཱཏུཾ ཡུཏྟཊྛཱནེ དཱཡཾ དེནྟི. ཏེསཾ ཨིམིནཱཝ ནིཡཱམེན ཨེཀདིཝསཾ སམཛྫཾ པསྶནྟཱནཾ པརིཔཱཀགཏཏྟཱ ཉཱཎསྶ པུརིམདིཝསེསུ ཝིཡ ཧསིཏབྦཊྛཱནེ ཧཱསོ ཝཱ སཾཝེགཊྛཱནེ སཾཝེགོ ཝཱ དཱཏུཾ ཡུཏྟཊྛཱནེ དཱནཾ ཝཱ ནཱཧོསི. དྭེཔི པན ཛནཱ ཨེཝཾ ཙིནྟཡིཾསུ – ‘‘ཀིམེཏྠ ཨོལོཀེཏབྦཾ ཨཏྠི, སབྦེཔིམེ ཨཔྤཏྟེ ཝསྶསཏེ ཨཔྤཎྞཏྟིཀབྷཱཝཾ གམིསྶནྟི, ཨམྷེཧི པན ཨེཀཾ མོཀྑདྷམྨཾ པརིཡེསིཏུཾ ཝཊྚཏཱི’’ཏི ཨཱརམྨཎཾ གཧེཏྭཱ ནིསཱིདིཾསུ. ཏཏོ ཀོལིཏོ ཨུཔཏིསྶཾ ཨཱཧ – ‘‘སམྨ ཨུཔཏིསྶ, ན ཏྭཾ ཨཉྙེསུ དིཝསེསུ ཝིཡ ཧཊྛཔཧཊྛོ, ཨིདཱནི ཨནཏྟམནདྷཱཏུཀོསི, ཀིཾ ཏེ སལླཀྑིཏ’’ནྟི? ‘‘སམྨ ཀོལིཏ, ཨེཏེསཾ ཝོལོཀནེ སཱརོ ནཏྠི, ནིརཏྠཀམེཏཾ, ཨཏྟནོ མོཀྑདྷམྨཾ གཝེསིཏུཾ ཝཊྚཏཱི’’ཏི ཨིདཾ ཙིནྟཡནྟོ ནིསིནྣོམྷི. ཏྭཾ པན ཀསྨཱ ཨནཏྟམནོསཱིཏི? སོཔི ཏཐེཝ ཨཱཧ. ཨཐསྶ ཨཏྟནཱ སདྡྷིཾ ཨེཀཛ྄ཛྷཱསཡཏཾ ཉཏྭཱ ཨུཔཏིསྶོ ཨཱཧ – ‘‘ཨམྷཱཀཾ ཨུབྷིནྣམྤི སུཙིནྟིཀཾ, མོཀྑདྷམྨཾ པན གཝེསནྟེཧི ཨེཀཱ པབྦཛྫཱ ལདྡྷུཾ ཝཊྚཏི. ཀསྶ སནྟིཀེ པབྦཛཱམཱ’’ཏི?

ཏེན ཁོ པན སམཡེན སཉྩཡོ ནཱམ པརིབྦཱཛཀོ རཱཛགཧེ པཊིཝསཏི མཧཏིཡཱ པརིབྦཱཛཀཔརིསཱཡ སདྡྷིཾ. ཏེ ‘‘ཏསྶ སནྟིཀེ པབྦཛིསྶཱམཱ’’ཏི པཉྩམཱཎཝཀསཏཱནི ‘‘སིཝིཀཱཡོ ཙ རཐེ ཙ གཧེཏྭཱ གཙྪཐཱ’’ཏི ཨུཡྻོཛེཏྭཱ ཨེཀཱཡ སིཝིཀཱཡ ཨེཀེན རཐེན གནྟྭཱ སཉྩཡསྶ སནྟིཀེ པབྦཛིཾསུ. ཏེསཾ པབྦཛིཏཀཱལཏོ པཊྛཱཡ སཉྩཡོ ཨཏིརེཀལཱབྷགྒཡསགྒཔྤཏྟོ ཨཧོསི. ཏེ ཀཏིཔཱཧེནེཝ སབྦཾ སཉྩཡསྶ སམཡཾ པརིམདྡིཏྭཱ, ‘‘ཨཱཙརིཡ, ཏུམྷཱཀཾ ཛཱནནསམཡོ ཨེཏྟཀོཝ, ཨུདཱཧུ ཨུཏྟརིམྤི ཨཏྠཱི’’ཏི པུཙྪིཾསུ. ‘‘ཨེཏྟཀོཝ སབྦཾ ཏུམྷེཧི ཉཱཏ’’ནྟི ཝུཏྟེ ཙིནྟཡིཾསུ – ‘‘ཨེཝཾ སཏི ཨིམསྶ སནྟིཀེ བྲཧྨཙརིཡཝཱསོ ནིརཏྠཀོ, མཡཾ ཡཾ མོཀྑདྷམྨཾ གཝེསིཏུཾ ནིཀྑནྟཱ, སོ ཨིམསྶ སནྟིཀེ ཨུཔྤཱདེཏུཾ ན སཀྐཱ, མཧཱ ཁོ པན ཛམྦུདཱིཔོ, གཱམནིགམརཱཛདྷཱནིཡོ ཙརནྟཱ ཨདྡྷཱ མོཀྑདྷམྨདེསཀཾ ཀཉྩི ཨཱཙརིཡཾ ལབྷིསྶཱམཱ’’ཏི. ཏཏོ པཊྛཱཡ, ‘‘ཡཏྠ ཡཏྠ པཎྜིཏཱ སམཎབྲཱཧྨཎཱ ཨཏྠཱི’’ཏི ཝདནྟི, ཏཏྠ ཏཏྠ གནྟྭཱ སཱཀཙྪཾ ཀརོནྟི. ཏེཧི པུཊྛཾ པཉྷཾ ཨཉྙེ ཀཐེཏུཾ ན སཀྐོནྟི, ཏེ པན ཏེསཾ པཉྷཾ ཝིསྶཛྫེནྟི. ཨེཝཾ སཀལཛམྦུདཱིཔཾ པརིགྒཎྷིཏྭཱ ནིཝཏྟིཏྭཱ སཀཊྛཱནམེཝ ཨཱགནྟྭཱ, ‘‘སམྨ ཀོལིཏ, ཨམྷེསུ ཡོ པཋམཾ ཨམཏཾ ཨདྷིགཙྪཏི, སོ ཨིཏརསྶ ཨཱརོཙེཏཱུ’’ཏི ཀཏིཀཾ ཨཀཾསུཾ.

ཨེཝཾ ཏེསུ ཀཏིཀཾ ཀཏྭཱ ཝིཧརནྟེསུ སཏྠཱ ཝུཏྟཱནུཀྐམེན རཱཛགཧཾ པཏྭཱ ཝེལུ༹ཝནཾ པཊིགྒཧེཏྭཱ ཝེལུ༹ཝནེ ཝིཧརཏི. ཏདཱ ‘‘ཙརཐ, བྷིཀྑཝེ, ཙཱརིཀཾ བཧུཛནཧིཏཱཡཱ’’ཏི རཏནཏྟཡགུཎཔཀཱསནཏྠཾ ཨུཡྻོཛིཏཱནཾ ཨེཀསཊྛིཡཱ ཨརཧནྟཱནཾ ཨནྟརེ པཉྩཝགྒིཡཱནཾ ཨབྦྷནྟརོ ཨསྶཛིཏྠེརོ པཊིནིཝཏྟིཏྭཱ རཱཛགཧཾ ཨཱགཏོ, པུནདིཝསེ པཱཏོཝ པཏྟཙཱིཝརམཱདཱཡ རཱཛགཧཾ པིཎྜཱཡ པཱཝིསི. ཏསྨིཾ སམཡེ ཨུཔཏིསྶཔརིབྦཱཛཀོཔི པཱཏོཝ བྷཏྟཀིཙྩཾ ཀཏྭཱ པརིབྦཱཛཀཱརཱམཾ གཙྪནྟོ ཐེརཾ དིསྭཱ ཙིནྟེསི – ‘‘མཡཱ ཨེཝརཱུཔོ པབྦཛིཏོ ནཱམ ན དིཊྛཔུབྦོཡེཝ, ཡེ ལོཀེ ཨརཧནྟོ ཝཱ ཨརཧཏྟམགྒཾ ཝཱ སམཱཔནྣཱ, ཨཡཾ ཏེསཾ བྷིཀྑཱུནཾ ཨཉྙཏརོ, ཡཾནཱུནཱཧཾ ཨིམཾ བྷིཀྑུཾ ཨུཔསངྐམིཏྭཱ པུཙྪེཡྻཾ – ‘ཀཾསི ཏྭཾ, ཨཱཝུསོ, ཨུདྡིསྶ པབྦཛིཏོ, ཀོ ཝཱ ཏེ སཏྠཱ, ཀསྶ ཝཱ ཏྭཾ དྷམྨཾ རོཙེསཱི’’’ཏི? ཨཐསྶ ཨེཏདཧོསི – ‘‘ཨཀཱལོ ཁོ ཨིམཾ བྷིཀྑུཾ པཉྷཾ པུཙྪིཏུཾ, ཨནྟརགྷརཾ པཝིཊྛོ པིཎྜཱཡ ཙརཏི, ཡཾནཱུནཱཧཾ ཨིམཾ བྷིཀྑུཾ པིཊྛིཏོ པིཊྛིཏོ ཨནུབནྡྷེཡྻཾ, ཨཏྠིཀེཧི ཨུཔཉྙཱཏཾ མགྒ’’ནྟི. སོ ཐེརཾ ལདྡྷཔིཎྜཔཱཏཾ ཨཉྙཏརཾ ཨོཀཱསཾ གཙྪནྟཾ དིསྭཱ ནིསཱིདིཏུཀཱམཏཉྩསྶ ཉཏྭཱ ཨཏྟནོ པརིབྦཱཛཀཔཱིཋཀཾ པཉྙཱཔེཏྭཱ ཨདཱསི, སོ བྷཏྟཀིཙྩཔརིཡོསཱནེཔིསྶ ཨཏྟནོ ཀུཎྜིཀཱཡ ཨུདཀཾ ཨདཱསི.

ཨེཝཾ ཨཱཙརིཡཝཏྟཾ ཀཏྭཱ ཀཏབྷཏྟཀིཙྩེན ཐེརེན སདྡྷིཾ མདྷུརཔཊིསནྠཱརཾ ཀཏྭཱ ཨེཝམཱཧ – ‘‘ཝིཔྤསནྣཱནི ཁོ པན ཏེ, ཨཱཝུསོ, ཨིནྡྲིཡཱནི, པརིསུདྡྷོ ཚཝིཝཎྞོ པརིཡོདཱཏོ, ཀཾསི ཏྭཾ, ཨཱཝུསོ, ཨུདྡིསྶ པབྦཛིཏོ, ཀོ ཝཱ ཏེ སཏྠཱ, ཀསྶ ཝཱ ཏྭཾ དྷམྨཾ རོཙེསཱི’’ཏི པུཙྪི. ཐེརོ ཙིནྟེསི – ‘‘ཨིམེ པརིབྦཱཛཀཱ ནཱམ སཱསནསྶ པཊིཔཀྑབྷཱུཏཱ, ཨིམསྶ སཱསནསྶ གམྦྷཱིརཏཾ དསྶེསྶཱམཱི’’ཏི. ཨཏྟནོ ནཝཀབྷཱཝཾ དསྶེནྟོ ཨཱཧ – ‘‘ཨཧཾ ཁོ, ཨཱཝུསོ, ནཝོ ཨཙིརཔབྦཛིཏོ, ཨདྷུནཱགཏོ ཨིམཾ དྷམྨཝིནཡཾ, ན ཏཱཝཱཧཾ སཀྑིསྶཱམི ཝིཏྠཱརེན དྷམྨཾ དེསེཏུ’’ནྟི. པརིབྦཱཛཀོ – ‘‘ཨཧཾ ཨུཔཏིསྶོ ནཱམ, ཏྭཾ ཡཐཱསཏྟིཡཱ ཨཔྤཾ ཝཱ བཧུཾ ཝཱ ཝད, ཨེཏཾ ནཡསཏེན ནཡསཧསྶེན པཊིཝིཛ྄ཛྷིཏུཾ མཡ྄ཧཾ བྷཱརོ’’ཏི ཙིནྟེཏྭཱ ཨཱཧ –

‘‘ཨཔྤཾ ཝཱ བཧུཾ ཝཱ བྷཱསསྶུ, ཨཏྠཾཡེཝ མེ བྲཱུཧི;

ཨཏྠེནེཝ མེ ཨཏྠོ, ཀིཾ ཀཱཧསི བྱཉྫནཾ བཧུ’’ནྟི. (མཧཱཝ. ༦༠);

ཨེཝཾ ཝུཏྟེ ཐེརོ – ‘‘ཡེ དྷམྨཱ ཧེཏུཔྤབྷཝཱ’’ཏི (མཧཱཝ. ༦༠; ཨཔ. ཐེར ༡.༡.༢༨༦) གཱཐམཱཧ. པརིབྦཱཛཀོ པཋམཔདདྭཡམེཝ སུཏྭཱ སཧསྶནཡཔཊིམཎྜིཏེ སོཏཱཔཏྟིཕལེ པཏིཊྛཧི, ཨིཏརཾ པདདྭཡཾ སོཏཱཔནྣཀཱལེ ནིཊྛཱཔེསི. སོ སོཏཱཔནྣོ ཧུཏྭཱ ཨུཔརིཝིསེསེ ཨཔྤཝཏྟནྟེ ‘‘བྷཝིསྶཏི ཨེཏྠ ཀཱརཎ’’ནྟི སལླཀྑེཏྭཱ ཐེརཾ ཨཱཧ – ‘‘བྷནྟེ, མཱ ཨུཔརི དྷམྨདེསནཾ ཝཌྜྷཡིཏྠ, ཨེཏྟཀམེཝ ཧོཏུ, ཀུཧིཾ ཨམྷཱཀཾ སཏྠཱ ཝསཏཱི’’ཏི? ‘‘ཝེལུ༹ཝནེ, ཨཱཝུསོ’’ཏི. ‘‘ཏེན ཧི, བྷནྟེ, ཏུམྷེ པུརཏོ ཡཱཐ, མཡ྄ཧཾ ཨེཀོ སཧཱཡཀོ ཨཏྠི, ཨམྷེཧི ཙ ཨཉྙམཉྙཾ ཀཏིཀཱ ཀཏཱ ‘ཨམྷེསུ ཡོ ཨམཏཾ པཋམཾ ཨདྷིགཙྪཏི, སོ ཨིཏརསྶ ཨཱརོཙེཏཱུ’ཏི. ཨཧཾ ཏཾ པཊིཉྙཾ མོཙེཏྭཱ སཧཱཡཀཾ གཧེཏྭཱ ཏུམྷཱཀཾ གཏམགྒེནེཝ སཏྠུ སནྟིཀཾ ཨཱགམིསྶཱམཱིཏི པཉྩཔཏིཊྛིཏེན ཐེརསྶ པཱདེསུ ནིཔཏིཏྭཱ ཏིཀྑཏྟུཾ པདཀྑིཎཾ ཀཏྭཱ ཐེརཾ ཨུཡྻོཛེཏྭཱ པརིབྦཱཛཀཱརཱམཱབྷིམུཁོ ཨགམཱསི’’.

ཨཐ ཁོ ཀོལིཏཔརིབྦཱཛཀོ ཏཾ དཱུརཏོཝ ཨཱགཙྪནྟཾ དིསྭཱ, ‘‘ཨཛྫ མཡ྄ཧཾ སཧཱཡཀསྶ མུཁཝཎྞོ ན ཨཉྙདིཝསེསུ ཝིཡ, ཨདྡྷཱ ཏེན ཨམཏཾ ཨདྷིགཏཾ བྷཝིསྶཏཱི’’ཏི ཨམཏཱདྷིགམཾ པུཙྪི. སོཔིསྶ ‘‘ཨཱམཱཝུསོ, ཨམཏཾ ཨདྷིགཏ’’ནྟི པཊིཛཱནིཏྭཱ ཏམེཝ གཱཐཾ ཨབྷཱསི. གཱཐཱཔརིཡོསཱནེ ཀོལིཏོ སོཏཱཔཏྟིཕལེ པཏིཊྛཧིཏྭཱ ཨཱཧ – ‘‘ཀུཧིཾ ཀིར, སམྨ, ཨམྷཱཀཾ སཏྠཱ ཝསཏཱི’’ཏི? ‘‘ཝེལུ༹ཝནེ ཀིར, སམྨ, ཨེཝཾ ནོ ཨཱཙརིཡེན ཨསྶཛིཏྠེརེན ཀཐིཏ’’ནྟི. ‘‘ཏེན ཧི, སམྨ, ཨཱཡཱམ, སཏྠཱརཾ པསྶིསྶཱམཱ’’ཏི. སཱརིཔུཏྟཏྠེརོ ཙ ནཱམེས སདཱཔི ཨཱཙརིཡཔཱུཛཀོཝ, ཏསྨཱ སཧཱཡཾ ཨེཝམཱཧ – ‘‘སམྨ, ཨམྷེཧི ཨདྷིགཏཾ ཨམཏཾ ཨམྷཱཀཾ ཨཱཙརིཡསྶ སཉྩཡཔརིབྦཱཛཀསྶཱཔི ཀཐེསྶཱམ, བུཛ྄ཛྷམཱནོ པཊིཝིཛ྄ཛྷིསྶཏི, ཨཔྤཊིཝིཛ྄ཛྷནྟོ ཨམྷཱཀཾ སདྡཧིཏྭཱ སཏྠུ, སནྟིཀཾ གམིསྶཏི, བུདྡྷཱནཾ དེསནཾ སུཏྭཱ མགྒཕལཔཊིཝེདྷཾ ཀརིསྶཏཱི’’ཏི. ཏཏོ དྭེཔི ཛནཱ སཉྩཡསྶ སནྟིཀཾ ཨགམཾསུ.

སཉྩཡོ ཏེ དིསྭཱཝ – ‘‘ཀིཾ, ཏཱཏཱ, ཀོཙི ཝོ ཨམཏམགྒདེསཀོ ལདྡྷོ’’ཏི པུཙྪི. ‘‘ཨཱམ, ཨཱཙརིཡ, ལདྡྷོ, བུདྡྷོ ལོཀེ ཨུཔྤནྣོ, དྷམྨོ ལོཀེ ཨུཔྤནྣོ, སངྒྷོ ལོཀེ ཨུཔྤནྣོ, ཏུམྷེ ཏུཙྪེ ཨསཱརེ ཝིཙརཐ, ཏསྨཱ ཨེཐ, སཏྠུ སནྟིཀཾ གམིསྶཱམཱ’’ཏི. ‘‘གཙྪཐ ཏུམྷེ, ནཱཧཾ སཀྑིསྶཱམཱི’’ཏི. ‘‘ཀིཾ ཀཱརཎཱཧི’’? ‘‘ཨཧཾ མཧཱཛནསྶ ཨཱཙརིཡོ ཧུཏྭཱ ཝིཙརིཾ, ཝིཙརནྟསྶ མེ ཨནྟེཝཱསིཀཝཱསོ ཙཱཊིཡཱ ཨུདཉྩནབྷཱཝཔྤཏྟི ཝིཡ ཧོཏི, ན སཀྑིསྶཱམཧཾ ཨནྟེཝཱསིཀཝཱསཾ ཝསིཏུ’’ནྟི. ‘‘མཱ ཨེཝཾ ཀརིཏྠ, ཨཱཙརིཡཱ’’ཏི. ‘‘ཧོཏུ, ཏཱཏཱ, གཙྪཐ ཏུམྷེ, ནཱཧཾ སཀྑིསྶཱམཱི’’ཏི. ཨཱཙརིཡ, ལོཀེ བུདྡྷསྶ ཨུཔྤནྣཀཱལཏོ པཊྛཱཡ མཧཱཛནོ གནྡྷམཱལཱདིཧཏྠོ གནྟྭཱ ཏམེཝ པཱུཛེསྶཏི, མཡམྤི ཏཏྠེཝ གམིསྶཱམ. ‘‘ཏུམྷེ ཀིཾ ཀརིསྶཐཱ’’ཏི? ‘‘ཏཱཏཱ, ཀིཾ ནུ ཁོ ཨིམསྨིཾ ལོཀེ དནྡྷཱ བཧཱུ, ཨུདཱཧུ པཎྜིཏཱ’’ཏི. ‘‘དནྡྷཱ, ཨཱཙརིཡ, བཧཱུ, པཎྜིཏཱ ཙ ནཱམ ཀཏིཔཡཱ ཨེཝ ཧོནྟཱི’’ཏི. ‘‘ཏེན ཧི, ཏཱཏཱ, པཎྜིཏཱ པཎྜིཏསྶ སམཎསྶ གོཏམསྶ སནྟིཀཾ གམིསྶནྟི, དནྡྷཱ དནྡྷསྶ མམ སནྟིཀཾ ཨཱགམིསྶནྟི, གཙྪཐ ཏུམྷེ, ནཱཧཾ གམིསྶཱམཱི’’ཏི. ཏེ ‘‘པཉྙཱཡིསྶཐ ཏུམྷེ, ཨཱཙརིཡཱ’’ཏི པཀྐམིཾསུ. ཏེསུ གཙྪནྟེསུ སཉྩཡསྶ པརིསཱ བྷིཛྫི, ཏསྨིཾ ཁཎེ ཨཱརཱམོ ཏུཙྪོ ཨཧོསི. སོ ཏུཙྪཾ ཨཱརཱམཾ དིསྭཱ ཨུཎྷཾ ལོཧིཏཾ ཚཌྜེསི. ཏེཧིཔི སདྡྷིཾ གཙྪནྟེསུ པཉྩསུ པརིབྦཱཛཀསཏེསུ སཉྩཡསྶ ཨཌྜྷཏེཡྻསཏཱནི ནིཝཏྟིཾསུ, ཨཐ ཁོ ཏེ ཨཏྟནོ ཨནྟེཝཱསིཀེཧི ཨཌྜྷཏེཡྻེཧི པརིབྦཱཛཀསཏེཧི སདྡྷིཾ ཝེལུ༹ཝནཾ ཨགམཾསུ.

སཏྠཱ ཙཏུཔརིསམཛ྄ཛྷེ ནིསིནྣོ དྷམྨཾ དེསེནྟོ ཏེ དཱུརཏོཝ དིསྭཱ བྷིཀྑཱུ ཨཱམནྟེསི – ‘‘ཨེཏེ, བྷིཀྑཝེ, དྭེ སཧཱཡཀཱ ཨཱགཙྪནྟི ཀོལིཏོ ཙ ཨུཔཏིསྶོ ཙ, ཨེཏཾ མེ སཱཝཀཡུགཾ བྷཝིསྶཏི ཨགྒཾ བྷདྡཡུག’’ནྟི. ཏེ སཏྠཱརཾ ཝནྡིཏྭཱ ཨེཀམནྟཾ ནིསཱིདིཾསུ, ནིསཱིདིཏྭཱ ཙ པན བྷགཝནྟཾ ཨེཏདཝོཙུཾ – ‘‘ལབྷེཡྻཱམ མཡཾ, བྷནྟེ, བྷགཝཏོ སནྟིཀེ པབྦཛྫཾ, ལབྷེཡྻཱམ ཨུཔསམྤད’’ནྟི. ‘‘ཨེཐ, བྷིཀྑཝོ’’ཏི བྷགཝཱ ཨཝོཙ – ‘‘སྭཱཀྑཱཏོ དྷམྨོ, ཙརཐ བྲཧྨཙརིཡཾ སམྨཱ དུཀྑསྶ ཨནྟཀིརིཡཱཡཱ’’ཏི. སབྦེཔི ཨིདྡྷིམཡཔཏྟཙཱིཝརདྷརཱ སཊྛིཝསྶིཀཏྠེརཱ ཝིཡ ཨཧེསུཾ.

ཨཐ ནེསཾ པརིསཱཡ ཙརིཏཝསེན སཏྠཱ དྷམྨདེསནཾ ཝཌྜྷེསི. ཋཔེཏྭཱ དྭེ ཨགྒསཱཝཀེ ཨཝསེསཱ ཨརཧཏྟཾ པཱཔུཎིཾསུ, ཨགྒསཱཝཀཱནཾ པན ཨུཔརིམགྒཏྟཡཀིཙྩཾ ན ནིཊྛཱསི. ཀིཾ ཀཱརཎཱ? སཱཝཀཔཱརམིཉཱཎསྶ མཧནྟཏཱཡ. ཨཐཱཡསྨཱ མཧཱམོགྒལླཱནོ པབྦཛིཏདིཝསཏོ སཏྟམེ དིཝསེ མགདྷརཊྛེ ཀལླཝཱལགཱམཀཾ ཨུཔནིསྶཱཡ ཝིཧརནྟོ ཐིནམིདྡྷེ ཨོཀྐམནྟེ སཏྠཱརཱ སཾཝེཛིཏོ ཐིནམིདྡྷཾ ཝིནོདེཏྭཱ ཏཐཱགཏེན དིནྣཾ དྷཱཏུཀམྨཊྛཱནཾ སུཎནྟོཝ ཨུཔརིམགྒཏྟཡཀིཙྩཾ ནིཊྛཱཔེཏྭཱ སཱཝཀཔཱརམིཉཱཎསྶ མཏྠཀཾ པཏྟོ. སཱརིཔུཏྟཏྠེརོཔི པབྦཛིཏདིཝསཏོ ཨཌྜྷམཱསཾ ཨཏིཀྐམིཏྭཱ སཏྠཱརཱ སདྡྷིཾ ཏམེཝ རཱཛགཧཾ ཨུཔནིསྶཱཡ སཱུཀརཁཏལེཎེ ཝིཧརནྟོ ཨཏྟནོ བྷཱགིནེཡྻསྶ དཱིགྷནཁཔརིབྦཱཛཀསྶ ཝེདནཱཔརིགྒཧསུཏྟནྟེ དེསིཡམཱནེ སུཏྟཱནུསཱརེན ཉཱཎཾ པེསེཏྭཱ པརསྶ ཝཌྜྷིཏབྷཏྟཾ པརིབྷུཉྫནྟོ ཝིཡ སཱཝཀཔཱརམིཉཱཎསྶ མཏྠཀཾ པཏྟོ. ནནུ ཙཱཡསྨཱ མཧཱཔཉྙོ, ཨཐ ཀསྨཱ མཧཱམོགྒལླཱནཏོ ཙིརཏརེན སཱཝཀཔཱརམིཉཱཎཾ པཱཔུཎཱིཏི? པརིཀམྨམཧནྟཏཱཡ. ཡཐཱ ཧི དུགྒཏམནུསྶཱ ཡཏྠ ཀཏྠཙི གནྟུཀཱམཱ ཁིཔྤམེཝ ནིཀྑམནྟི, རཱཛཱུནཾ པན ཧཏྠིཝཱཧནཀཔྤནཱདིཾ མཧནྟཾ པརིཀམྨཾ ལདྡྷུཾ ཝཊྚཏི, ཨེཝཾསམྤདམིདཾ ཝེདིཏབྦཾ.

ཏཾ དིཝསཉྙེཝ པན སཏྠཱ ཝཌྜྷམཱནཀཙྪཱཡཱཡ ཝེལུ༹ཝནེ སཱཝཀསནྣིཔཱཏཾ ཀཏྭཱ དྭིནྣཾ ཐེརཱནཾ ཨགྒསཱཝཀཊྛཱནཾ དཏྭཱ པཱཏིམོཀྑཾ ཨུདྡིསི. བྷིཀྑཱུ ཨུཛ྄ཛྷཱཡིཾསུ – ‘‘སཏྠཱ མུཁོལོཀནེན བྷིཀྑཾ དེཏི, ཨགྒསཱཝཀཊྛཱནཾ དདནྟེན ནཱམ པཋམཾ པབྦཛིཏཱནཾ པཉྩཝགྒིཡཱནཾ དཱཏུཾ ཝཊྚཏི, ཨེཏེ ཨནོལོཀེནྟེན ཡསཐེརཔྤམུཁཱནཾ པཉྩཔཎྞཱསབྷིཀྑཱུནཾ དཱཏུཾ ཝཊྚཏི, ཨེཏེ ཨནོལོཀེནྟེན བྷདྡཝགྒིཡཱནཾ ཏིཾསཛནཱནཾ, ཨེཏེ ཨནོལོཀེནྟེན ཨུརུཝེལཀསྶཔཱདཱིནཾ ཏེབྷཱཏིཀཱནཾ, ཨེཏེ པན ཨེཏྟཀེ མཧཱཐེརེ པཧཱཡ སབྦཔཙྪཱ པབྦཛིཏཱནཾ ཨགྒསཱཝཀཊྛཱནཾ དདནྟེན མུཁཾ ཨོལོཀེཏྭཱ དིནྣ’’ནྟི. སཏྠཱ, ‘‘ཀིཾ ཀཐེཐ, བྷིཀྑཝེ’’ཏི པུཙྪིཏྭཱ, ‘‘ཨིདཾ ནཱམཱ’’ཏི ཝུཏྟེ ‘‘ནཱཧཾ, བྷིཀྑཝེ, མུཁཾ ཨོལོཀེཏྭཱ བྷིཀྑཾ དེམི, ཨེཏེསཾ པན ཨཏྟནཱ ཨཏྟནཱ པཏྠིཏཔཏྠིཏམེཝ དེམི. ཨཉྙཱཏཀོཎྜཉྙོ ཧི ཨེཀསྨིཾ སསྶེ ནཝ ཝཱརེ ཨགྒསསྶདཱནཾ དདནྟོ ཨགྒསཱཝཀཊྛཱནཾ པཏྠེཏྭཱ ནཱདཱསི, ཨགྒདྷམྨཾ པན ཨརཧཏྟཾ སབྦཔཋམཾ པཊིཝིཛ྄ཛྷིཏུཾ པཏྠེཏྭཱ ཨདཱསཱི’’ཏི. ‘‘ཀདཱ པན བྷགཝཱ’’ཏི? ‘‘སུཎིསྶཐ, བྷིཀྑཝེ’’ཏི. ‘‘ཨཱམ, བྷནྟེ’’ཏི, བྷགཝཱ ཨཏཱིཏཾ ཨཱཧརི –

བྷིཀྑཝེ, ཨིཏོ ཨེཀནཝུཏིཀཔྤེ ཝིཔསྶཱི ནཱམ བྷགཝཱ ལོཀེ ཨུདཔཱདི. ཏདཱ མཧཱཀཱལོ༹ ཙཱུལ༹ཀཱལོ༹ཏི དྭེབྷཱཏིཀཱ ཀུཊུམྦིཀཱ མཧནྟཾ སཱལིཀྑེཏྟཾ ཝཔཱཔེསུཾ. ཨཐེཀདིཝསཾ ཙཱུལ༹ཀཱལོ༹ སཱལིཀྑེཏྟཾ གནྟྭཱ ཨེཀཾ སཱལིགབྦྷཾ ཕཱལེཏྭཱ ཁཱདི, ཏཾ ཨཏིམདྷུརཾ ཨཧོསི. སོ བུདྡྷཔྤམུཁསྶ སངྒྷསྶ སཱལིགབྦྷདཱནཾ དཱཏུཀཱམོ ཧུཏྭཱ ཛེཊྛབྷཱཏིཀཾ ཨུཔསངྐམིཏྭཱ, ‘‘བྷཱཏིཀ, སཱལིགབྦྷཾ ཕཱལེཏྭཱ བུདྡྷཱནཾ ཨནུཙྪཝིཀཾ ཀཏྭཱ པཙཱཔེཏྭཱ དཱནཾ དེམཱ’’ཏི ཨཱཧ. ‘‘ཀིཾ ཝདེསི, ཏཱཏ, སཱལིགབྦྷཾ ཕཱལེཏྭཱ དཱནཾ ནཱམ ནེཝ ཨཏཱིཏེ བྷཱུཏཔུབྦཾ, ན ཨནཱགཏེཔི བྷཝིསྶཏི, མཱ སསྶཾ ནཱསཡཱི’’ཏི; ཝུཏྟོཔི སོ པུནཔྤུནཾ ཡཱཙིཡེཝ. ཨཐ ནཾ བྷཱཏཱ, ‘‘ཏེན ཧི སཱལིཀྑེཏྟཾ དྭེ ཀོཊྛཱསེ ཀཏྭཱ མམ ཀོཊྛཱསཾ ཨནཱམསིཏྭཱ ཨཏྟནོ ཀོཊྛཱསེ ཁེཏྟེ ཡཾ ཨིཙྪསི, ཏཾ ཀརོཧཱི’’ཏི ཨཱཧ. སོ ‘‘སཱདྷཱུ’’ཏི ཁེཏྟཾ ཝིབྷཛིཏྭཱ བཧཱུ མནུསྶེ ཧཏྠཀམྨཾ ཡཱཙིཏྭཱ སཱལིགབྦྷཾ ཕཱལེཏྭཱ ནིརུདཀེན ཁཱིརེན པཙཱཔེཏྭཱ སཔྤིམདྷུསཀྑརཱདཱིཧི ཡོཛེཏྭཱ བུདྡྷཔྤམུཁསྶ བྷིཀྑུསངྒྷསྶ དཱནཾ དཏྭཱ བྷཏྟཀིཙྩཔརིཡོསཱནེ – ‘‘ཨིདཾ, བྷནྟེ, མམ ཨགྒདཱནཾ ཨགྒདྷམྨསྶ སབྦཔཋམཾ པཊིཝེདྷཱཡ སཾཝཏྟཏཱུ’’ཏི ཨཱཧ. སཏྠཱ ‘‘ཨེཝཾ ཧོཏཱུ’’ཏི ཨནུམོདནམཀཱསི.

སོ ཁེཏྟཾ གནྟྭཱ ཨོལོཀེནྟོ སཀལཀྑེཏྟཾ ཀཎྞིཀབདྡྷེཧི ཝིཡ སཱལིསཱིསེཧི སཉྪནྣཾ དིསྭཱ པཉྩཝིདྷཔཱིཏིཾ པཊིལབྷིཏྭཱ, ‘‘ལཱབྷཱ ཝཏ མེ’’ཏི ཙིནྟེཏྭཱ པུཐུཀཀཱལེ པུཐུཀགྒཾ ནཱམ ཨདཱསི, གཱམཝཱསཱིཧི སདྡྷིཾ ཨགྒསསྶདཱནཾ ནཱམ ཨདཱསི, ལཱཡནེ ལཱཡནགྒཾ, ཝེཎིཀརཎེ ཝེཎགྒཾ, ཀལཱཔཱདཱིསུ ཀལཱཔགྒཾ, ཁལགྒཾ, ཁལབྷཎྜགྒཾ, ཀོཊྛགྒནྟི. ཨེཝཾ ཨེཀསསྶེ ནཝ ཝཱརེ ཨགྒདཱནཾ ཨདཱསི. ཏསྶ སབྦཝཱརེསུ གཧིཏགཧིཏཊྛཱནཾ པརིཔཱུརི, སསྶཾ ཨཏིརེཀཾ ཨུཊྛཱནསམྤནྣཾ ཨཧོསི. དྷམྨོ ཧི ནཱམེས ཨཏྟཱནཾ རཀྑནྟཾ རཀྑཏི. ཏེནཱཧ བྷགཝཱ –

‘‘དྷམྨོ ཧཝེ རཀྑཏི དྷམྨཙཱརིཾ,

དྷམྨོ སུཙིཎྞོ སུཁམཱཝཧཱཏི;

ཨེསཱནིསཾསོ དྷམྨེ སུཙིཎྞེ,

ན དུགྒཏིཾ གཙྪཏི དྷམྨཙཱརཱི’’ཏི. (ཐེརགཱ. ༣༠༣; ཛཱ. ༡.༡༠.༡༠༢) –

‘‘ཨེཝམེས ཝིཔསྶཱིསམྨཱསམྦུདྡྷཀཱལེ ཨགྒདྷམྨཾ པཋམཾ པཊིཝིཛ྄ཛྷིཏུཾ པཏྠེནྟོ ནཝ ཝཱརེ ཨགྒདཱནཱནི ཨདཱསི. ཨིཏོ སཏསཧསྶཀཔྤམཏྠཀེ པན ཧཾསཝཏཱིནགརེ པདུམུཏྟརསམྦུདྡྷཀཱལེཔི སཏྟཱཧཾ མཧཱདཱནཾ དཏྭཱ ཏསྶ བྷགཝཏོ པཱདམཱུལེ ནིཔཛྫིཏྭཱ ཨགྒདྷམྨསྶ པཋམཾ པཊིཝིཛ྄ཛྷནཏྠམེཝ པཏྠནཾ ཋཔེསི. ཨིཏི ཨིམིནཱ པཏྠིཏམེཝ མཡཱ དིནྣཾ, ནཱཧཾ, བྷིཀྑཝེ, མུཁཾ ཨོལོཀེཏྭཱ དེམཱི’’ཏི.

‘‘ཡསཀུལཔུཏྟཔྤམུཁཱ པཉྩཔཉྙཱས ཛནཱ ཀིཾ ཀམྨཾ ཀརིཾསུ, བྷནྟེ’’ཏི? ‘‘ཨེཏེཔི ཨེཀསྶ བུདྡྷསྶ སནྟིཀེ ཨརཧཏྟཾ པཏྠེནྟཱ བཧུཾ པུཉྙཀམྨཾ ཀཏྭཱ ཨཔརབྷཱགེ ཨནུཔྤནྣེ བུདྡྷེ སཧཱཡཀཱ ཧུཏྭཱ ཝགྒབནྡྷནེན པུཉྙཱནི ཀརོནྟཱ ཨནཱཐམཏསརཱིརཱནི པཊིཛགྒནྟཱ ཝིཙརིཾསུ. ཏེ ཨེཀདིཝསཾ སགབྦྷཾ ཨིཏྠིཾ ཀཱལཀཏཾ དིསྭཱ, ‘ཛྷཱཔེསྶཱམཱ’ཏི སུསཱནཾ ཧརིཾསུ. ཏེསུ པཉྩ ཛནེ ‘ཏུམྷེ ཛྷཱཔེཐཱ’ཏི སུསཱནེ ཋཔེཏྭཱ སེསཱ གཱམཾ པཝིཊྛཱ. ཡསདཱརཀོ ཏཾ མཏསརཱིརཾ སཱུལེཧི ཝིཛ྄ཛྷིཏྭཱ པརིཝཏྟེཏྭཱ པརིཝཏྟེཏྭཱ ཛྷཱཔེནྟོ ཨསུབྷསཉྙཾ པཊིལབྷི, ཨིཏརེསམྤི ཙཏུནྣཾ ཛནཱནཾ – ‘པསྶཐ, བྷོ, ཨིམཾ སརཱིརཾ ཏཏྠ ཏཏྠ ཝིདྡྷཾསིཏཙམྨཾ, ཀབརགོརཱུཔཾ ཝིཡ ཨསུཙིཾ དུགྒནྡྷཾ པཊིཀཱུལ’ནྟི དསྶེསི. ཏེཔི ཏཏྠ ཨསུབྷསཉྙཾ པཊིལབྷིཾསུ. ཏེ པཉྩཔི ཛནཱ གཱམཾ གནྟྭཱ སེསསཧཱཡཀཱནཾ ཀཐཡིཾསུ. ཡསོ པན དཱརཀོ གེཧཾ གནྟྭཱ མཱཏཱཔིཏཱུནཉྩ བྷརིཡཱཡ ཙ ཀཐེསི. ཏེ སབྦེཔི ཨསུབྷཾ བྷཱཝཡིཾསུ. ཨིདམེཏེསཾ པུབྦཀམྨཾ. ཏེནེཝ ཡསསྶ ཨིཏྠཱགཱརེ སུསཱནསཉྙཱ ཨུཔྤཛྫི, ཏཱཡ ཙ ཨུཔནིསྶཡསམྤཏྟིཡཱ སབྦེསམྤི ཝིསེསཱདྷིགམོ ནིབྦཏྟི. ཨེཝཾ ཨིམེཔི ཨཏྟནཱ པཏྠིཏམེཝ ལབྷིཾསུ. ནཱཧཾ མུཁཾ ཨོལོཀེཏྭཱ དམྨཱི’’ཏི.

‘‘བྷདྡཝགྒིཡསཧཱཡཀཱ པན ཀིཾ ཀམྨཾ ཀརིཾསུ, བྷནྟེ’’ཏི? ‘‘ཨེཏེཔི པུབྦབུདྡྷཱནཾ སནྟིཀེ ཨརཧཏྟཾ པཏྠེཏྭཱ པུཉྙཱནི ཀཏྭཱ ཨཔརབྷཱགེ ཨནུཔྤནྣེ བུདྡྷེ ཏིཾས དྷུཏྟཱ ཧུཏྭཱ ཏུཎྜིལོཝཱདཾ སུཏྭཱ སཊྛིཝསྶསཧསྶཱནི པཉྩ སཱིལཱནི རཀྑིཾསུ. ཨེཝཾ ཨིམེཔི ཨཏྟནཱ པཏྠིཏམེཝ ལབྷིཾསུ. ནཱཧཾ མུཁཾ ཨོལོཀེཏྭཱ དམྨཱི’’ཏི.

‘‘ཨུརུཝེལཀསྶཔཱདཡོ པན ཀིཾ ཀམྨཾ ཀརིཾསུ, བྷནྟེ’’ཏི? ‘‘ཏེཔི ཨརཧཏྟམེཝ པཏྠེཏྭཱ པུཉྙཱནི ཀརིཾསུ. ཨིཏོ ཧི དྭེནཝུཏིཀཔྤེ ཏིསྶོ ཕུསྶོཏི དྭེ བུདྡྷཱ ཨུཔྤཛྫིཾསུ. ཕུསྶབུདྡྷསྶ མཧིནྡོ ནཱམ རཱཛཱ པིཏཱ ཨཧོསི. ཏསྨིཾ པན སམྦོདྷིཾ པཏྟེ རཉྙོ ཀནིཊྛཔུཏྟོ པཋམཨགྒསཱཝཀོ པུརོཧིཏཔུཏྟོ དུཏིཡཨགྒསཱཝཀོ ཨཧོསི. རཱཛཱ སཏྠུ སནྟིཀཾ གནྟྭཱ – ‘ཛེཊྛཔུཏྟོ མེ བུདྡྷོ, ཀནིཊྛཔུཏྟོ པཋམཨགྒསཱཝཀོ, པུརོཧིཏཔུཏྟོ དུཏིཡཨགྒསཱཝཀོ’ཏི ཏེ ཨོལོཀེཏྭཱ, ‘མམེཝ བུདྡྷོ, མམེཝ དྷམྨོ, མམེཝ སངྒྷོ, ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶཱ’ཏི ཏིཀྑཏྟུཾ ཨུདཱནཾ ཨུདཱནེཏྭཱ སཏྠུ པཱདམཱུལེ ནིཔཛྫིཏྭཱ, ‘བྷནྟེ, ཨིདཱནི མེ ནཝུཏིཝསྶསཧསྶཔརིམཱཎསྶ ཨཱཡུནོ ཀོཊིཡཾ ནིསཱིདིཏྭཱ ནིདྡཱཡནཀཱལོ ཝིཡ ཨཉྙེསཾ གེཧདྭཱརཾ ཨགནྟྭཱ ཡཱཝཱཧཾ ཛཱིཝཱམི, ཏཱཝ མེ ཙཏྟཱརོ པཙྩཡེ ཨདྷིཝཱསེཐཱ’ཏི པཊིཉྙཾ གཧེཏྭཱ ནིབདྡྷཾ བུདྡྷུཔཊྛཱནཾ ཀརོཏི. རཉྙོ པན ཨཔརེཔི ཏཏོ པུཏྟཱ ཨཧེསུཾ. ཏེསུ ཛེཊྛསྶ པཉྩ ཡོདྷསཏཱནི པརིཝཱརཱནི, མཛ྄ཛྷིམསྶ ཏཱིཎི, ཀནིཊྛསྶ དྭེ. ཏེ ‘མཡམྤི བྷཱཏིཀཾ བྷོཛེསྶཱམཱ’ཏི པིཏརཾ ཨོཀཱསཾ ཡཱཙིཏྭཱ ཨལབྷམཱནཱ པུནཔྤུནཾ ཡཱཙནྟཱཔི ཨལབྷིཏྭཱ པཙྩནྟེ ཀུཔིཏེ ཏསྶ ཝཱུཔསམནཏྠཱཡ པེསིཏཱ པཙྩནྟཾ ཝཱུཔསམེཏྭཱ པིཏུ སནྟིཀཾ ཨཱགམིཾསུ. ཨཐ ནེ པིཏཱ ཨཱལིངྒིཏྭཱ སཱིསེ ཙུམྦིཏྭཱ, ‘ཝརཾ ཝོ, ཏཱཏཱ, དམྨཱི’ཏི ཨཱཧ.

‘‘ཏེ ‘སཱདྷུ དེཝཱ’ཏི ཝརཾ གཧིཏཀཾ ཀཏྭཱ པུན ཀཏིཔཱཧཙྩཡེན པིཏརཱ ‘གཎྷཐ, ཏཱཏཱ, ཝར’ནྟི ཝུཏྟཱ, ‘‘དེཝ, ཨམྷཱཀཾ ཨཉྙེན ཀེནཙི ཨཏྠོ ནཏྠི, ཨིཏོ པཊྛཱཡ མཡཾ བྷཱཏིཀཾ བྷོཛེསྶཱམ, ཨིམཾ ནོ ཝརཾ དེཧཱི’’ཏི ཨཱཧཾསུ. ‘ན དེམི, ཏཱཏཱ’ཏི. ‘ནིཙྩཀཱལཾ ཨདེནྟོ སཏྟ སཾཝཙྪརཱནི དེཐ, དེཝཱ’ཏི. ‘ན དེམི, ཏཱཏཱ’ཏི. ‘ཏེན ཧི ཚ པཉྩ ཙཏྟཱརི ཏཱིཎི དྭེ ཨེཀཾ སཾཝཙྪརཾ དེཐ, དེཝཱ’ཏི. ‘ན དེམི, ཏཱཏཱ’ཏི. ‘ཏེན ཧི, དེཝ, སཏྟ མཱསེ དེཐཱ’ཏི. ‘ཚ མཱསེ པཉྩ མཱསེ ཙཏྟཱརོ མཱསེ ཏཡོ མཱསེ དེཐ, དེཝཱ’ཏི. ‘ན དེམི, ཏཱཏཱ’ཏི. ‘ཧོཏུ, དེཝ, ཨེཀེཀསྶ ནོ ཨེཀེཀཾ མཱསཾ ཀཏྭཱ ཏཡོ མཱསེ དེཐཱ’ཏི. ‘སཱདྷུ, ཏཱཏཱ, ཏེན ཧི ཏཡོ མཱསེ བྷོཛེཐཱ’ཏི ཨཱཧ. ཏེ ཏུཊྛཱ རཱཛཱནཾ ཝནྡིཏྭཱ སཀཊྛཱནམེཝ གཏཱ. ཏེསཾ པན ཏིཎྞམྤི ཨེཀོཝ ཀོཊྛཱགཱརིཀོ, ཨེཀོཝ ཨཱཡུཏྟཀོ, ཏསྶ དྭཱདསནཧུཏཱ པུརིསཔརིཝཱརཱ. ཏེ ཏེ པཀྐོསཱཔེཏྭཱ, ‘མཡཾ ཨིམཾ ཏེམཱསཾ དས སཱིལཱནི གཧེཏྭཱ དྭེ ཀཱསཱཝཱནི ནིཝཱསེཏྭཱ སཏྠཱརཱ སཧཝཱསཾ ཝསིསྶཱམ, ཏུམྷེ ཨེཏྟཀཾ ནཱམ དཱནཝཏྟཾ གཧེཏྭཱ དེཝསིཀཾ ནཝུཏིསཧསྶཱནཾ བྷིཀྑཱུནཾ ཡོདྷསཧསྶསྶ ཙ སབྦཾ ཁཱདནཱིཡབྷོཛནཱིཡཾ པཝཏྟེཡྻཱཐ. མཡཉྷི ཨིཏོ པཊྛཱཡ ན ཀིཉྩི ཝཀྑཱམཱ’ཏི ཝདིཾསུ.

‘‘ཏེ ཏཡོཔི ཛནཱ པརིཝཱརསཧསྶཾ གཧེཏྭཱ དས སཱིལཱནི སམཱདཱཡ ཀཱསཱཡཝཏྠཱནི ནིཝཱསེཏྭཱ ཝིཧཱརེཡེཝ ཝསིཾསུ. ཀོཊྛཱགཱརིཀོ ཙ ཨཱཡུཏྟཀོ ཙ ཨེཀཏོ ཧུཏྭཱ ཏིཎྞཾ བྷཱཏིཀཱནཾ ཀོཊྛཱགཱརེཧི ཝཱརེན ཝཱརེན དཱནཝཏྟཾ གཧེཏྭཱ དཱནཾ དེནྟི, ཀམྨཀཱརཱནཾ པན པུཏྟཱ ཡཱགུབྷཏྟཱདཱིནཾ ཨཏྠཱཡ རོདནྟི. ཏེ ཏེསཾ བྷིཀྑུསངྒྷེ ཨནཱགཏེཡེཝ ཡཱགུབྷཏྟཱདཱིནི དེནྟི. བྷིཀྑུསངྒྷསྶ བྷཏྟཀིཙྩཱཝསཱནེ ཀིཉྩི ཨཏིརེཀཾ ན བྷཱུཏཔུབྦཾ. ཏེ ‘ཨཔརབྷཱགེ དཱརཀཱནཾ དེམཱ’ཏི ཨཏྟནཱཔི གཧེཏྭཱ ཁཱདིཾསུ. མནུཉྙཾ ཨཱཧཱརཾ དིསྭཱ ཨདྷིཝཱསེཏུཾ ནཱསཀྑིཾསུ. ཏེ པན ཙཏུརཱསཱིཏིསཧསྶཱ ཨཧེསུཾ. ཏེ སངྒྷསྶ དིནྣདཱནཝཏྟཾ ཁཱདིཏྭཱ ཀཱཡསྶ བྷེདཱ པརཾ མརཎཱ པེཏྟིཝིསཡེ ནིབྦཏྟིཾསུ. ཏེབྷཱཏིཀཱ པན པུརིསསཧསྶེན སདྡྷིཾ ཀཱལཾ ཀཏྭཱ དེཝལོཀེ ནིབྦཏྟིཏྭཱ དེཝལོཀཱ མནུསྶལོཀཾ, མནུསྶལོཀཱ དེཝལོཀཾ སཾསརནྟཱ དྭེནཝུཏིཀཔྤེ ཁེཔེསུཾ. ‘ཨེཝཾ ཏེ ཏཡོ བྷཱཏརོ ཨརཧཏྟཾ པཏྠེནྟཱ ཏདཱ ཀལྱཱཎཀམྨཾ ཀརིཾསུ. ཏེ ཨཏྟནཱ པཏྠིཏམེཝ ལབྷིཾསུ. ནཱཧཾ མུཁཾ ཨོལོཀེཏྭཱ དམྨཱི’’’ཏི.

ཏདཱ པན ཏེསཾ ཨཱཡུཏྟཀོ བིམྦིསཱརོ རཱཛཱ ཨཧོསི, ཀོཊྛཱགཱརིཀོ ཝིསཱཁོ ཨུཔཱསཀོ. ཏཡོ རཱཛཀུམཱརཱ ཏཡོ ཛཊིལཱ ཨཧེསུཾ. ཏེསཾ ཀམྨཀཱརཱ ཏདཱ པེཏེསུ ནིབྦཏྟིཏྭཱ སུགཏིདུགྒཏིཝསེན སཾསརནྟཱ ཨིམསྨིཾ ཀཔྤེ ཙཏྟཱརི བུདྡྷནྟརཱནི པེཏལོཀེཡེཝ ནིབྦཏྟིཾསུ. ཏེ ཨིམསྨིཾ ཀཔྤེ སབྦཔཋམཾ ཨུཔྤནྣཾ ཙཏྟཱལཱིསཝསྶསཧསྶཱཡུཀཾ ཀཀུསནྡྷཾ བྷགཝནྟཾ ཨུཔསངྐམིཏྭཱ, ‘‘ཨམྷཱཀཾ ཨཱཧཱརཾ ལབྷནཀཱལཾ ཨཱཙིཀྑཐཱ’’ཏི པུཙྪིཾསུ. སོ ‘‘མམ ཏཱཝ ཀཱལེ ན ལབྷིསྶཐ, མམ པཙྪཏོ མཧཱཔཐཝིཡཱ ཡོཛནམཏྟཾ ཨབྷིརུལ༹ྷཱཡ ཀོཎཱགམནོ ནཱམ བུདྡྷོ ཨུཔྤཛྫིསྶཏི, ཏཾ པུཙྪེཡྻཱཐཱ’’ཏི ཨཱཧ. ཏེ ཏཏྟཀཾ ཀཱལཾ ཁེཔེཏྭཱ ཏསྨིཾ ཨུཔྤནྣེ ཏཾ པུཙྪིཾསུ. སོཔི ‘‘མམ ཀཱལེ ན ལབྷིསྶཐ, མམ པཙྪཏོ མཧཱཔཐཝིཡཱ ཡོཛནམཏྟཾ ཨབྷིརུལ༹ྷཱཡ ཀསྶཔོ ནཱམ བུདྡྷོ ཨུཔྤཛྫིསྶཏི, ཏཾ པུཙྪེཡྻཱཐཱ’’ཏི ཨཱཧ. ཏེ ཏཏྟཀཾ ཀཱལཾ ཁེཔེཏྭཱ ཏསྨིཾ ཨུཔྤནྣེ ཏཾ པུཙྪིཾསུ. སོཔི ‘‘མམ ཀཱལེ ན ལབྷིསྶཐ, མམ པན པཙྪཏོ མཧཱཔཐཝིཡཱ ཡོཛནམཏྟཾ ཨབྷིརུལ༹ྷཱཡ གོཏམོ ནཱམ བུདྡྷོ ཨུཔྤཛྫིསྶཏི, ཏདཱ ཏུམྷཱཀཾ ཉཱཏཀོ བིམྦིསཱརོ ནཱམ རཱཛཱ བྷཝིསྶཏི, སོ སཏྠུ དཱནཾ དཏྭཱ ཏུམྷཱཀཾ པཏྟིཾ པཱཔེསྶཏི, ཏདཱ ལབྷིསྶཐཱ’’ཏི ཨཱཧ. ཏེསཾ ཨེཀཾ བུདྡྷནྟརཾ སྭེདིཝསསདིསཾ ཨཧོསི. ཏེ ཏཐཱགཏེ ཨུཔྤནྣེ བིམྦིསཱརརཉྙཱ པཋམདིཝསཾ དཱནེ དིནྣེ པཏྟིཾ ཨལབྷིཏྭཱ རཏྟིབྷཱགེ བྷེརཝསདྡཾ ཀཏྭཱ རཉྙོ ཨཏྟཱནཾ དསྶཡིཾསུ. སོ པུནདིཝསེ ཝེལུ༹ཝནཾ གནྟྭཱ ཏཐཱགཏསྶ ཏཾ པཝཏྟིཾ ཨཱརོཙེསི.

སཏྠཱ, ‘‘མཧཱརཱཛ, ཨིཏོ དྭེནཝུཏིཀཔྤམཏྠཀེ ཕུསྶབུདྡྷཀཱལེ ཨེཏེ ཏཝ ཉཱཏཀཱ, བྷིཀྑུསངྒྷསྶ དིནྣདཱནཝཏྟཾ ཁཱདིཏྭཱ པེཏལོཀེ ནིབྦཏྟིཏྭཱ སཾསརནྟཱ ཀཀུསནྡྷཱདཡོ བུདྡྷེ པུཙྪིཏྭཱ ཏེཧི ཨིདཉྩིདཉྩ ཝུཏྟཱ ཨེཏྟཀཾ ཀཱལཾ ཏཝ དཱནཾ པཙྩཱསཱིསམཱནཱ ཧིཡྻོ ཏཡཱ དཱནེ དིནྣེ པཏྟིཾ ཨལབྷམཱནཱ ཨེཝམཀཾསཱུ’’ཏི ཨཱཧ. ‘‘ཀིཾ པན, བྷནྟེ, ཨིདཱནིཔི དིནྣེ ལབྷིསྶནྟཱི’’ཏི? ‘‘ཨཱམ, མཧཱརཱཛཱ’’ཏི. རཱཛཱ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ པུནདིཝསེ མཧཱདཱནཾ དཏྭཱ, ‘‘བྷནྟེ, ཨིཏོ ཏེསཾ པེཏཱནཾ དིབྦཨནྣཔཱནཾ སམྤཛྫཏཱུ’’ཏི པཏྟིཾ ཨདཱསི, ཏེསཾ ཏཐེཝ ནིབྦཏྟི. པུནདིཝསེ ནགྒཱ ཧུཏྭཱ ཨཏྟཱནཾ དསྶེསུཾ. རཱཛཱ ‘‘ཨཛྫ, བྷནྟེ, ནགྒཱ ཧུཏྭཱ ཨཏྟཱནཾ དསྶེསུ’’ནྟི ཨཱརོཙེསི. ‘‘ཝཏྠཱནི ཏེ ན དིནྣཱནི, མཧཱརཱཛཱ’’ཏི. རཱཛཱཔི པུནདིཝསེ བུདྡྷཔྤམུཁསྶ བྷིཀྑུསངྒྷསྶ ཙཱིཝརདཱནཾ དཏྭཱ, ‘‘ཨིཏོ ཏེསཾ པེཏཱནཾ དིབྦཝཏྠཱནི ཧོནྟཱུ’’ཏི པཱཔེསི. ཏངྑཎཉྙེཝ ཏེསཾ དིབྦཝཏྠཱནི ཨུཔྤཛྫིཾསུ. ཏེ པེཏཏྟབྷཱཝཾ ཝིཛཧིཏྭཱ དིབྦཏྟབྷཱཝེ སཎྛཧིཾསུ. སཏྠཱ ཨནུམོདནཾ ཀརོནྟོ ‘‘ཏིརོཀུཊྚེསུ ཏིཊྛནྟཱི’’ཏིཨཱདིནཱ (ཁུ. པཱ. ༧.༡; པེ. ཝ. ༡༤) ཏིརོཀུཊྚཱནུམོདནཾ ཨཀཱསི. ཨནུམོདནཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི. ཨིཏི སཏྠཱ ཏེབྷཱཏིཀཛཊིལཱནཾ ཝཏྠུཾ ཀཐེཏྭཱ ཨིམམྤི དྷམྨདེསནཾ ཨཱཧརི.

ཨགྒསཱཝཀཱ པན, ‘‘བྷནྟེ, ཀིཾ ཀརིཾསཱུ’’ཏི? ‘‘ཨགྒསཱཝཀབྷཱཝཱཡ པཏྠནཾ ཀརིཾསུ’’. ཨིཏོ ཀཔྤསཏསཧསྶཱདྷིཀསྶ ཧི ཀཔྤཱནཾ ཨསངྑྱེཡྻསྶ མཏྠཀེ སཱརིཔུཏྟོ བྲཱཧྨཎམཧཱསཱལཀུལེ ནིབྦཏྟི, ནཱམེན སརདམཱཎཝོ ནཱམ ཨཧོསི. མོགྒལླཱནོ གཧཔཏིམཧཱསཱལཀུལེ ནིབྦཏྟི, ནཱམེན སིརིཝཌྜྷནཀུཊུམྦིཀོ ནཱམ ཨཧོསི. ཏེ ཨུབྷོཔི སཧཔཾསུཀཱིལ༹ཀཱ སཧཱཡཀཱ ཨཧེསུཾ. ཏེསུ སརདམཱཎཝོ པིཏུ ཨཙྩཡེན ཀུསལནྟཀཾ མཧཱདྷནཾ པཊིཔཛྫིཏྭཱ ཨེཀདིཝསཾ རཧོགཏོ ཙིནྟེསི – ‘‘ཨཧཾ ཨིདྷལོཀཏྟབྷཱཝམེཝ ཛཱནཱམི, ནོ པརལོཀཏྟབྷཱཝཾ. ཛཱཏསཏྟཱནཉྩ མརཎཾ ནཱམ དྷུཝཾ, མཡཱ ཨེཀཾ པབྦཛྫཾ པབྦཛིཏྭཱ མོཀྑདྷམྨགཝེསནཾ ཀཱཏུཾ ཝཊྚཏཱི’’ཏི. སོ སཧཱཡཀཾ ཨུཔསངྐམིཏྭཱ ཨཱཧ – ‘‘སམྨ སིརིཝཌྜྷན, ཨཧཾ པབྦཛིཏྭཱ མོཀྑདྷམྨཾ གཝེསིསྶཱམི, ཏྭཾ མཡཱ སདྡྷིཾ པབྦཛིཏུཾ སཀྑིསྶསི, ན སཀྑིསྶསཱི’’ཏི? ‘‘ན སཀྑིསྶཱམི, སམྨ, ཏྭཾཡེཝ པབྦཛཱཧཱི’’ཏི. སོ ཙིནྟེསི – ‘‘པརལོཀཾ གཙྪནྟོ སཧཱཡེ ཝཱ ཉཱཏིམིཏྟེ ཝཱ གཧེཏྭཱ གཏོ ནཱམ ནཏྠི, ཨཏྟནཱ ཀཏཾ ཨཏྟནོཝ ཧོཏཱི’’ཏི. ཏཏོ རཏནཀོཊྛཱགཱརཾ ཝིཝརཱཔེཏྭཱ ཀཔཎདྡྷིཀཝཎིབྦཀཡཱཙཀཱནཾ མཧཱདཱནཾ དཏྭཱ པབྦཏཔཱདཾ པཝིསིཏྭཱ ཨིསིཔབྦཛྫཾ པབྦཛི. ཏསྶ ཨེཀོ དྭེ ཏཡོཏི ཨེཝཾ ཨནུཔབྦཛྫཾ པབྦཛིཏཱ ཙཏུསཏྟཏིསཧསྶམཏྟཱ ཛཊིལཱ ཨཧེསུཾ. སོ པཉྩ ཨབྷིཉྙཱ, ཨཊྛ ཙ སམཱཔཏྟིཡོ ནིབྦཏྟེཏྭཱ ཏེསཾ ཛཊིལཱནཾ ཀསིཎཔརིཀམྨཾ ཨཱཙིཀྑི. ཏེཔི སབྦེ པཉྩ ཨབྷིཉྙཱ ཨཊྛ ཙ སམཱཔཏྟིཡོ ནིབྦཏྟེསུཾ.

ཏེན སམཡེན ཨནོམདསྶཱི ནཱམ སམྨཱསམྦུདྡྷོ ལོཀེ ཨུདཔཱདི. ནགརཾ ཙནྡཝཏཱི ནཱམ ཨཧོསི, པིཏཱ ཡསཝཱ ནཱམ ཁཏྟིཡོ, མཱཏཱ ཡསོདྷརཱ ནཱམ དེཝཱི, བོདྷི ཨཛྫུནརུཀྑོ, ནིསབྷོ ཙ ཨནོམོ ཙ དྭེ ཨགྒསཱཝཀཱ, ཝརུཎོ ནཱམ ཨུཔཊྛཱཀོ, སུནྡརཱ ཙ སུམནཱ ཙ དྭེ ཨགྒསཱཝིཀཱ ཨཧེསུཾ. ཨཱཡུ ཝསྶསཏསཧསྶཾ ཨཧོསི, སརཱིརཾ ཨཊྛཔཉྙཱསཧཏྠུབྦེདྷཾ, སརཱིརཔྤབྷཱ དྭཱདསཡོཛནཾ ཕརི, བྷིཀྑུསཏསཧསྶཔརིཝཱརོ ཨཧོསི. སོ ཨེཀདིཝསཾ པཙྩཱུསཀཱལེ མཧཱཀརུཎཱསམཱཔཏྟིཏོ ཝུཊྛཱཡ ལོཀཾ ཝོལོཀེནྟོ སརདཏཱཔསཾ དིསྭཱ, ‘‘ཨཛྫ མཡ྄ཧཾ སརདཏཱཔསསྶཾ སནྟིཀཾ གཏཔཙྩཡེན དྷམྨདེསནཱ ཙ མཧཏཱི བྷཝིསྶཏི, སོ ཙ ཨགྒསཱཝཀཊྛཱནཾ པཏྠེསྶཏི, ཏསྶ སཧཱཡཀོ སིརིཝཌྜྷནཀུཊུམྦིཀོ དུཏིཡསཱཝཀཊྛཱནཾ, དེསནཱཔརིཡོསཱནེ ཙསྶ པརིཝཱརཱ ཙཏུསཏྟཏིསཧསྶམཏྟཱ ཛཊིལཱ ཨརཧཏྟཾ པཱཔུཎིསྶནྟི, མཡཱ ཏཏྠ གནྟུཾ ཝཊྚཏཱི’’ཏི ཨཏྟནོ པཏྟཙཱིཝརམཱདཱཡ ཨཉྙཾ ཀཉྩི ཨནཱམནྟེཏྭཱ སཱིཧོ ཝིཡ ཨེཀཙརོ ཧུཏྭཱ སརདཏཱཔསསྶ ཨནྟེཝཱསིཀེསུ ཕལཱཕལཏྠཱཡ གཏེསུ ‘‘བུདྡྷབྷཱཝཾ མེ ཛཱནཱཏཱུ’’ཏི ཨདྷིཊྛཧིཏྭཱ པསྶནྟསྶེཝ སརདཏཱཔསསྶ ཨཱཀཱསཏོ ཨོཏརིཏྭཱ པཐཝིཡཾ པཏིཊྛཱསི. སརདཏཱཔསོ བུདྡྷཱནུབྷཱཝཉྩེཝ སརཱིརནིཔྥཏྟིཉྩསྶ དིསྭཱ ལཀྑཎམནྟེ སམྨསིཏྭཱ ‘‘ཨིམེཧི ལཀྑཎེཧི སམནྣཱགཏོ ནཱམ ཨགཱརམཛ྄ཛྷེ ཝསནྟོ རཱཛཱ ཧོཏི ཙཀྐཝཏྟཱི, པབྦཛནྟོ ལོཀེ ཝིཝཊྚཙྪདོ སབྦཉྙུབུདྡྷོ ཧོཏི. ཨཡཾ པུརིསོ ནིསྶཾསཡཾ བུདྡྷོ’’ཏི ཛཱནིཏྭཱ པཙྩུགྒམནཾ ཀཏྭཱ པཉྩཔཏིཊྛིཏེན ཝནྡིཏྭཱ ཨགྒཱསནཾ པཉྙཱཔེཏྭཱ ཨདཱསི. ནིསཱིདི བྷགཝཱ པཉྙཏྟེ ཨགྒཱསནེ. སརདཏཱཔསོཔི ཨཏྟནོ ཨནུཙྪཝིཀཾ ཨཱསནཾ གཧེཏྭཱ ཨེཀམནྟཾ ནིསཱིདི.

ཏསྨིཾ སམཡེ ཙཏུསཏྟཏིསཧསྶཛཊིལཱ པཎཱིཏཔཎཱིཏཱནི ཨོཛཝནྟཱནི ཕལཱཕལཱནི གཧེཏྭཱ ཨཱཙརིཡསྶ སནྟིཀཾ སམྤཏྟཱ བུདྡྷཱནཉྩེཝ ཨཱཙརིཡསྶ ཙ ནིསིནྣཱསནཾ ཨོལོཀེཏྭཱ ཨཱཧཾསུ – ‘‘ཨཱཙརིཡ, མཡཾ ‘ཨིམསྨིཾ ལོཀེ ཏུམྷེཧི མཧནྟཏརོ ནཏྠཱི’ཏི ཝིཙརཱམ, ཨཡཾ པན པུརིསོ ཏུམྷེཧི མཧནྟཏརོ མཉྙེ’’ཏི? ‘‘ཏཱཏཱ, ཀིཾ ཝདེཐ, སཱསཔེན སདྡྷིཾ ཨཊྛསཊྛིཡོཛནསཏསཧསྶུབྦེདྷཾ སིནེརུཾ སམཾ ཀཱཏུཾ ཨིཙྪཐ, སབྦཉྙུབུདྡྷེན སདྡྷིཾ མམཾ ཨུཔམཾ མཱ ཀརིཏྠ པུཏྟཀཱ’’ཏི. ཨཐ ཏེ ཏཱཔསཱ, ‘‘སཙཱཡཾ ཨིཏྟརསཏྟོ ཨབྷཝིསྶ, ཨམྷཱཀཾ ཨཱཙརིཡོ ན ཨེཝརཱུཔཾ ཨུཔམཾ ཨཱཧརིསྶ, ཡཱཝ མཧཱ ཝཏཱཡཾ པུརིསོ’’ཏི སབྦེཝ པཱདེསུ ནིཔཏིཏྭཱ སིརསཱ ཝནྡིཾསུ. ཨཐ ནེ ཨཱཙརིཡོ ཨཱཧ – ‘‘ཏཱཏཱ, ཨམྷཱཀཾ བུདྡྷཱནཾ ཨནུཙྪཝིཀོ དེཡྻདྷམྨོ ནཏྠི, སཏྠཱ ཙ བྷིཀྑཱཙཱརཝེལཱཡཾ ཨིདྷཱགཏོ, མཡཾ ཡཐཱསཏྟི ཡཐཱབལཾ དེཡྻདྷམྨཾ དསྶཱམ, ཏུམྷེ ཡཾ ཡཾ པཎཱིཏཾ ཕལཱཕལཾ, ཏཾ ཏཾ ཨཱཧརཐཱ’’ཏི ཨཱཧརཱཔེཏྭཱ ཧཏྠེ དྷོཝིཏྭཱ སཡཾ ཏཐཱགཏསྶ པཏྟེ པཏིཊྛཱཔེསི. སཏྠཱརཱ ཕལཱཕལེ པཊིགྒཧིཏམཏྟེ དེཝཏཱ དིབྦོཛཾ པཀྑིཔིཾསུ. སོ ཏཱཔསོ ཨུདཀམྤི སཡམེཝ པརིསྶཱཝེཏྭཱ ཨདཱསི. ཏཏོ བྷཏྟཀིཙྩཾ ཀཏྭཱ ནིསིནྣེ སཏྠརི སབྦེ ཨནྟེཝཱསིཀེ པཀྐོསིཏྭཱ སཏྠུ སནྟིཀེ སཱརཎཱིཡཀཐཾ ཀཐེནྟོ ནིསཱིདི. སཏྠཱ ‘‘དྭེ ཨགྒསཱཝཀཱ བྷིཀྑུསངྒྷེན སདྡྷིཾ ཨཱགཙྪནྟཱུ’’ཏི ཙིནྟེསི. ཏེ སཏྠུ ཙིཏྟཾ ཉཏྭཱ སཏསཧསྶཁཱིཎཱསཝཔརིཝཱརཱ ཨཱགནྟྭཱ སཏྠཱརཾ ཝནྡིཏྭཱ ཨེཀམནྟཾ ཨཊྛཾསུ.

ཏཏོ སརདཏཱཔསོ ཨནྟེཝཱསིཀེ ཨཱམནྟེསི – ‘‘ཏཱཏཱ, བུདྡྷཱནཾ ནིསིནྣཱསནམྤི ནཱིཙཾ, སམཎསཏསཧསྶཱནམྤི ཨཱསནཾ ནཏྠི, ཨཛྫ ཏུམྷེཧི ཨུལཱ༹རཾ བུདྡྷསཀྐཱརཾ ཀཱཏུཾ ཝཊྚཏི, པབྦཏཔཱདཏོ ཝཎྞགནྡྷསམྤནྣཱནི པུཔྥཱནི ཨཱཧརཐཱ’’ཏི. ཀཐནཀཱལོ པཔཉྩོ ཝིཡ ཧོཏི, ཨིདྡྷིམཏོ པན ཨིདྡྷིཝིསཡོ ཨཙིནྟེཡྻོཏི མུཧུཏྟམཏྟེནེཝ ཏེ ཏཱཔསཱ ཝཎྞགནྡྷསམྤནྣཱནི པུཔྥཱནི ཨཱཧརིཏྭཱ བུདྡྷཱནཾ ཡོཛནཔྤམཱཎཾ པུཔྥཱསནཾ པཉྙཱཔེསུཾ. ཨུབྷིནྣཾ ཨགྒསཱཝཀཱནཾ ཏིགཱཝུཏཾ, སེསབྷིཀྑཱུནཾ ཨཌྜྷཡོཛནིཀཱདིབྷེདཾ, སངྒྷནཝཀསྶ ཨུསབྷམཏྟཾ ཨཧོསི. ‘‘ཀཐཾ ཨེཀསྨིཾ ཨསྶམཔདེ ཏཱཝ མཧནྟཱནི ཨཱསནཱནི པཉྙཏྟཱནཱི’’ཏི ན ཙིནྟེཏབྦཾ. ཨིདྡྷིཝིསཡོ ཧེས. ཨེཝཾ པཉྙཏྟེསུ ཨཱསནེསུ སརདཏཱཔསོ ཏཐཱགཏསྶ པུརཏོ ཨཉྫལིཾ པགྒཡ྄ཧ ཋིཏོ, ‘‘བྷནྟེ, མཡ྄ཧཾ དཱིགྷརཏྟཾ ཧིཏཱཡ སུཁཱཡ ཨིམཾ པུཔྥཱསནཾ ཨབྷིརུཧཐཱ’’ཏི ཨཱཧ. ཏེན ཝུཏྟཾ –

‘‘ནཱནཱཔུཔྥཉྩ གནྡྷཉྩ, སམྤཱདེཏྭཱན ཨེཀཏོ;

པུཔྥཱསནཾ པཉྙཱཔེཏྭཱ, ཨིདཾ ཝཙནམབྲཝི.

‘‘ཨིདཾ མེ ཨཱསནཾ ཝཱིར, པཉྙཏྟཾ ཏཝནུཙྪཝིཾ;

མམ ཙིཏྟཾ པསཱདེནྟོ, ནིསཱིད པུཔྥམཱསནེ.

‘‘སཏྟརཏྟིནྡིཝཾ བུདྡྷོ, ནིསཱིདི པུཔྥམཱསནེ;

མམ ཙིཏྟཾ པསཱདེཏྭཱ, ཧཱསཡིཏྭཱ སདེཝཀེ’’ཏི.

ཨེཝཾ ནིསིནྣེ སཏྠརི དྭེ ཨགྒསཱཝཀཱ སེསབྷིཀྑཱུ ཙ ཨཏྟནོ ཨཏྟནོ པཏྟཱསནེ ནིསཱིདིཾསུ. སརདཏཱཔསོ མཧནྟཾ པུཔྥཙྪཏྟཾ གཧེཏྭཱ ཏཐཱགཏསྶ མཏྠཀེ དྷཱརེནྟོ ཨཊྛཱསི. སཏྠཱ ‘‘ཛཊིལཱནཾ ཨཡཾ སཀྐཱརོ མཧཔྥལོ ཧོཏཱུ’’ཏི ནིརོདྷསམཱཔཏྟིཾ སམཱཔཛྫི. སཏྠུ སམཱཔཏྟིཾ སམཱཔནྣབྷཱཝཾ ཉཏྭཱ དྭེ ཨགྒསཱཝཀཱཔི སེསབྷིཀྑཱུཔི སམཱཔཏྟིཾ སམཱཔཛྫིཾསུ. ཏཐཱགཏེ སཏྟཱཧཾ ནིརོདྷསམཱཔཏྟིཾ སམཱཔཛྫིཏྭཱ ནིསིནྣེ ཨནྟེཝཱསིཀཱ བྷིཀྑཱཙཱརཀཱལེ སམྤཏྟེ ཝནམཱུལཕལཱཕལཾ པརིབྷུཉྫིཏྭཱ སེསཀཱལེ བུདྡྷཱནཾ ཨཉྫལིཾ པགྒཡ྄ཧ ཏིཊྛནྟི. སརདཏཱཔསོ པན བྷིཀྑཱཙཱརམྤི ཨགནྟྭཱ པུཔྥཙྪཏྟཾ དྷཱརཡམཱནོཝ སཏྟཱཧཾ པཱིཏིསུཁེན ཝཱིཏིནཱམེསི. སཏྠཱ ནིརོདྷཏོ ཝུཊྛཱཡ དཀྑིཎཔསྶེ ནིསིནྣཾ པཋམཨགྒསཱཝཀཾ ནིསབྷཏྠེརཾ ཨཱམནྟེསི – ‘‘ནིསབྷ, སཀྐཱརཀཱརཀཱནཾ ཏཱཔསཱནཾ པུཔྥཱསནཱནུམོདནཾ ཀརོཧཱི’’ཏི. ཐེརོ ཙཀྐཝཏྟིརཉྙོ སནྟིཀཱ པཊིལདྡྷམཧཱལཱབྷོ མཧཱཡོདྷོ ཝིཡ ཏུཊྛམཱནསོ སཱཝཀཔཱརམིཉཱཎེ ཋཏྭཱ པུཔྥཱསནཱནུམོདནཾ ཨཱརབྷི. ཏསྶ དེསནཱཝསཱནེ དུཏིཡསཱཝཀཾ ཨཱམནྟེསི – ‘‘ཏྭམྤི བྷིཀྑུ དྷམྨཾ དེསེཧཱི’’ཏི. ཨནོམཏྠེརོ ཏེཔིཊཀཾ བུདྡྷཝཙནཾ སམྨསིཏྭཱ དྷམྨཾ ཀཐེསི. དྭིནྣཾ ཨགྒསཱཝཀཱནཾ དེསནཱཡ ཨེཀསྶཱཔི ཨབྷིསམཡོ ནཱཧོསི. ཨཐ སཏྠཱ ཨཔརིམཱཎེ བུདྡྷཝིསཡེ ཋཏྭཱ དྷམྨདེསནཾ ཨཱརབྷི. དེསནཱཔརིཡོསཱནེ ཋཔེཏྭཱ སརདཏཱཔསཾ སབྦེཔི ཙཏུསཏྟཏིསཧསྶཛཊིལཱ ཨརཧཏྟཾ པཱཔུཎིཾསུ, སཏྠཱ ‘‘ཨེཐ, བྷིཀྑཝོ’’ཏི ཧཏྠཾ པསཱརེསི. ཏེསཾ ཏཱཝདེཝ ཀེསམསྶཱུནི ཨནྟརདྷཱཡིཾསུ, ཨཊྛཔརིཀྑཱརཱ ཀཱཡེ པཊིམུཀྐཱཝ ཨཧེསུཾ.

སརདཏཱཔསོ ‘‘ཀསྨཱ ཨརཧཏྟཾ ན པཏྟོ’’ཏི? ཝིཀྑིཏྟཙིཏྟཏྟཱ. སོ ཀིར བུདྡྷཱནཾ དུཏིཡཱསནེ ནིསཱིདིཏྭཱ སཱཝཀཔཱརམིཉཱཎེ ཋཏྭཱ དྷམྨཾ དེསཡཏོ ཨགྒསཱཝཀསྶ དྷམྨདེསནཾ སོཏུཾ ཨཱརདྡྷཀཱལཏོ པཊྛཱཡ, ‘‘ཨཧོ ཝཏཱཧམྤི ཨནཱགཏེ ཨུཔྤཛྫནཀབུདྡྷསྶ སཱསནེ ཨིམིནཱ སཱཝཀེན པཊིལདྡྷདྷུརཾ ལབྷེཡྻ’’ནྟི ཙིཏྟཾ ཨུཔྤཱདེསི. སོ ཏེན པརིཝིཏཀྐེན མགྒཕལཔཊིཝེདྷཾ ཀཱཏུཾ ནཱསཀྑི. ཏཐཱགཏཾ པན ཝནྡིཏྭཱ སམྨུཁེ ཋཏྭཱ ཨཱཧ – ‘‘བྷནྟེ, ཏུམྷཱཀཾ ཨནནྟརཱསནེ ནིསིནྣོ བྷིཀྑུ ཏུམྷཱཀཾ སཱསནེ ཀོ ནཱམ ཧོཏཱི’’ཏི? ‘‘མཡཱ པཝཏྟིཏཾ དྷམྨཙཀྐཾ ཨནུཔཝཏྟེནྟོ སཱཝཀཔཱརམིཉཱཎསྶ ཀོཊིཔྤཏྟོ སོལ༹ས པཉྙཱ པཊིཝིཛ྄ཛྷིཏྭཱ ཋིཏོ མཡ྄ཧཾ སཱསནེ ཨགྒསཱཝཀོ ནིསབྷོ ནཱམ ཨེསོ’’ཏི. ‘‘བྷནྟེ, ཡྭཱཡཾ མཡཱ སཏྟཱཧཾ པུཔྥཙྪཏྟཾ དྷཱརེནྟེན སཀྐཱརོ ཀཏོ, ཨཧཾ ཨིམསྶ ཕལེན ཨཉྙཾ སཀྐཏྟཾ ཝཱ བྲཧྨཏྟཾ ཝཱ ན པཏྠེམི, ཨནཱགཏེ པན ཨཡཾ ནིསབྷཏྠེརོ ཝིཡ ཨེཀསྶ བུདྡྷསྶ ཨགྒསཱཝཀོ བྷཝེཡྻ’’ནྟི པཏྠནཾ ཨཀཱསིནྟི. སཏྠཱ ‘‘སམཛ྄ཛྷིསྶཏི ནུ ཁོ ཨིམསྶ པུརིསསྶ པཏྠནཱ’’ཏི ཨནཱགཏཾསཉཱཎཾ པེསེཏྭཱ ཨོལོཀེནྟོ ཀཔྤསཏསཧསྶཱདྷིཀཾ ཨེཀཾ ཨསངྑྱེཡྻཾ ཨཏིཀྐམིཏྭཱ སམིཛ྄ཛྷནབྷཱཝཾ ཨདྡས. དིསྭཱན སརདཏཱཔསཾ ཨཱཧ – ‘‘ན ཏེ ཨཡཾ པཏྠནཱ མོགྷཱ བྷཝིསྶཏི, ཨནཱགཏེ པན ཀཔྤསཏསཧསྶཱདྷིཀཾ ཨེཀཾ ཨསངྑྱེཡྻཾ ཨཏིཀྐམིཏྭཱ གོཏམོ ནཱམ བུདྡྷོ ཨུཔྤཛྫིསྶཏི, ཏསྶ མཱཏཱ མཧཱམཱཡཱ ནཱམ དེཝཱི བྷཝིསྶཏི, པིཏཱ སུདྡྷོདནོ ནཱམ མཧཱརཱཛཱ, པུཏྟོ རཱཧུལོ ནཱམ, ཨུཔཊྛཱཀོ ཨཱནནྡོ ནཱམ, དུཏིཡཨགྒསཱཝཀོ མོགྒལླཱནོ ནཱམ, ཏྭཾ པནསྶ པཋམཨགྒསཱཝཀོ དྷམྨསེནཱཔཏི སཱརིཔུཏྟོ ནཱམ བྷཝིསྶསཱི’’ཏི. ཨེཝཾ ཏཱཔསཾ བྱཱཀརིཏྭཱ དྷམྨཀཐཾ ཀཐེཏྭཱ བྷིཀྑུསངྒྷཔརིཝུཏོ ཨཱཀཱསཾ པཀྑནྡི.

སརདཏཱཔསོཔི ཨནྟེཝཱསིཀཏྠེརཱནཾ སནྟིཀཾ གནྟྭཱ སཧཱཡཀསྶ སིརིཝཌྜྷནཀུཊུམྦིཀསྶ སཱསནཾ པེསེསི, ‘‘བྷནྟེ, མམ སཧཱཡཀསྶ ཝདེཐ, སཧཱཡཀེན ཏེ སརདཏཱཔསེན ཨནོམདསྶཱིབུདྡྷསྶ པཱདམཱུལེ ཨནཱགཏེ ཨུཔྤཛྫནཀསྶ གོཏམབུདྡྷསྶ སཱསནེ པཋམཨགྒསཱཝཀཊྛཱནཾ པཏྠིཏཾ, ཏྭཾ དུཏིཡཨགྒསཱཝཀཊྛཱནཾ པཏྠེཧཱི’’ཏི. ཨེཝཉྩ པན ཝཏྭཱ ཐེརེཧི པུརེཏརམེཝ ཨེཀཔསྶེན གནྟྭཱ སིརིཝཌྜྷནསྶ ནིཝེསནདྭཱརེ ཨཊྛཱསི. སིརིཝཌྜྷནོ ‘‘ཙིརསྶཾ ཝཏ མེ ཨཡྻོ ཨཱགཏོ’’ཏི ཨཱསནེ ནིསཱིདཱཔེཏྭཱ ཨཏྟནཱ ནཱིཙཱསནེ ནིསིནྣོ, ‘‘ཨནྟེཝཱསིཀཔརིསཱ པན ཝོ, བྷནྟེ, ན པཉྙཱཡཏཱི’’ཏི པུཙྪི. ‘‘ཨཱམ, སམྨ, ཨམྷཱཀཾ ཨསྶམཾ ཨནོམདསྶཱི བུདྡྷོ ཨཱགཏོ, མཡཾ ཏསྶ ཨཏྟནོ བལེན སཀྐཱརཾ ཨཀརིམྷཱ, སཏྠཱ སབྦེསཾ དྷམྨཾ དེསེསི, དེསནཱཔརིཡོསཱནེ ཋཔེཏྭཱ མཾ སེསཱ ཨརཧཏྟཾ པཏྭཱ པབྦཛིཾསུ. ཨཧཾ སཏྠུ པཋམཨགྒསཱཝཀཾ ནིསབྷཏྠེརཾ དིསྭཱ ཨནཱགཏེ ཨུཔྤཛྫནཀསྶ གོཏམབུདྡྷསྶ ནཱམ སཱསནེ པཋམཨགྒསཱཝཀཊྛཱནཾ པཏྠེསིཾ, ཏྭམྤི ཏསྶ སཱསནེ དུཏིཡཨགྒསཱཝཀཊྛཱནཾ པཏྠེཧཱི’’ཏི. ‘‘མཡ྄ཧཾ བུདྡྷེཧི སདྡྷིཾ པརིཙཡོ ནཏྠི, བྷནྟེ’’ཏི. ‘‘བུདྡྷེཧི སདྡྷིཾ ཀཐནཾ མཡ྄ཧཾ བྷཱརོ ཧོཏུ, ཏྭཾ མཧནྟཾ སཀྐཱརཾ སཛྫེཧཱི’’ཏི.

སིརིཝཌྜྷནོ ཏསྶ ཝཙནཾ སུཏྭཱ ཨཏྟནོ ནིཝེསནདྭཱརེ རཱཛམཱནེན ཨཊྛཀརཱིསམཏྟཾ ཋཱནཾ སམཏལཾ ཀཱརེཏྭཱ ཝཱལུཀཾ ཨོཀིརཱཔེཏྭཱ ལཱཛཔཉྩམཱནིཔུཔྥཱནི ཝིཀིརཱཔེཏྭཱ ནཱིལུཔྤལཙྪདནཾ མཎྜཔཾ ཀཱརེཏྭཱ བུདྡྷཱསནཾ པཉྙཱཔེཏྭཱ སེསབྷིཀྑཱུནམྤི ཨཱསནཱནི པཊིཡཱདེཏྭཱ མཧནྟཾ སཀྐཱརསམྨཱནཾ སཛྫེཏྭཱ བུདྡྷཱནཾ ནིམནྟནཏྠཱཡ སརདཏཱཔསསྶ སཉྙཾ ཨདཱསི. ཏཱཔསོ བུདྡྷཔྤམུཁཾ བྷིཀྑུསངྒྷཾ གཧེཏྭཱ ཏསྶ ནིཝེསནཾ ཨགམཱསི. སིརིཝཌྜྷནོཔི པཙྩུགྒམནཾ ཀཏྭཱ ཏཐཱགཏསྶ ཧཏྠཏོ པཏྟཾ གཧེཏྭཱ མཎྜཔཾ པཝེསེཏྭཱ པཉྙཏྟཱསནེསུ ནིསིནྣསྶ བུདྡྷཔྤམུཁསྶ བྷིཀྑུསངྒྷསྶ དཀྑིཎོདཀཾ དཏྭཱ པཎཱིཏེན བྷོཛནེན པརིཝིསིཏྭཱ བྷཏྟཀིཙྩཔརིཡོསཱནེ བུདྡྷཔྤམུཁཾ བྷིཀྑུསངྒྷཾ མཧཱརཧེཧི ཝཏྠེཧི ཨཙྪཱདེཏྭཱ, ‘‘བྷནྟེ, ནཱཡཾ ཨཱརབྦྷོ ཨཔྤམཏྟཀཊྛཱནཏྠཱཡ, ཨིམིནཱཝ ནིཡཱམེན སཏྟཱཧཾ ཨནུཀམྤཾ ཀརོཐཱ’’ཏི ཨཱཧ. སཏྠཱ ཨདྷིཝཱསེསི. སོ ཏེནེཝ ནིཡཱམེན སཏྟཱཧཾ མཧཱདཱནཾ པཝཏྟེཏྭཱ བྷགཝནྟཾ ཝནྡིཏྭཱ ཨཉྫལིཾ པགྒཡ྄ཧ ཋིཏོ ཨཱཧ – ‘‘བྷནྟེ, མམ སཧཱཡོ སརདཏཱཔསོ ཡསྶ སཏྠུསྶ པཋམཨགྒསཱཝཀོ བྷཝེཡྻ’’ནྟི པཏྠེསི, ཨཧམྤི ‘‘ཏསྶེཝ དུཏིཡཨགྒསཱཝཀོ བྷཝེཡྻ’’ནྟི པཏྠེམཱིཏི.

སཏྠཱ ཨནཱགཏཾ ཨོལོཀེཏྭཱ ཏསྶ པཏྠནཱཡ སམིཛ྄ཛྷནབྷཱཝཾ དིསྭཱ བྱཱཀཱསི – ‘‘ཏྭཾ ཨིཏོ ཀཔྤསཏསཧསྶཱདྷིཀཾ ཨསངྑྱེཡྻཾ ཨཏིཀྐམིཏྭཱ གོཏམབུདྡྷསྶ དུཏིཡཨགྒསཱཝཀོ བྷཝིསྶསཱི’’ཏི. བུདྡྷཱནཾ བྱཱཀརཎཾ སུཏྭཱ སིརིཝཌྜྷནོ ཧཊྛཔཧཊྛོ ཨཧོསི. སཏྠཱཔི བྷཏྟཱནུམོདནཾ ཀཏྭཱ སཔརིཝཱརོ ཝིཧཱརམེཝ གཏོ. ‘‘ཨཡཾ, བྷིཀྑཝེ, མམ པུཏྟེཧི ཏདཱ པཏྠིཏཔཏྠནཱ. ཏེ ཡཐཱཔཏྠིཏམེཝ ལབྷིཾསུ. ནཱཧཾ མུཁཾ ཨོལོཀེཏྭཱ དེམཱི’’ཏི.

ཨེཝཾ ཝུཏྟེ དྭེ ཨགྒསཱཝཀཱ བྷགཝནྟཾ ཝནྡིཏྭཱ, ‘‘བྷནྟེ, མཡཾ ཨགཱརིཡབྷཱུཏཱ སམཱནཱ གིརགྒསམཛྫཾ དསྶནཱཡ གཏཱ’’ཏི ཡཱཝ ཨསྶཛིཏྠེརསྶ སནྟིཀཱ སོཏཱཔཏྟིཕལཔཊིཝེདྷཱ སབྦཾ པཙྩུཔྤནྣཝཏྠུཾ ཀཐེཏྭཱ, ‘‘ཏེ མཡཾ, བྷནྟེ, ཨཱཙརིཡསྶ སཉྩཡསྶ སནྟིཀཾ གནྟྭཱ ཏཾ ཏུམྷཱཀཾ པཱདམཱུལེ ཨཱནེཏུཀཱམཱ ཏསྶ ལདྡྷིཡཱ ནིསྶཱརབྷཱཝཾ ཀཐེཏྭཱ ཨིདྷཱགམནེ ཨཱནིསཾསཾ ཀཐཡིམྷཱ. སོ ཨིདཱནི མཡ྄ཧཾ ཨནྟེཝཱསིཀཝཱསོ ནཱམ ཙཱཊིཡཱ ཨུདཉྩནབྷཱཝཔྤཏྟིསདིསོ, ན སཀྑིསྶཱམི ཨནྟེཝཱསིཝཱསཾ ཝསིཏུ’’ནྟི ཝཏྭཱ, ‘‘ཨཱཙརིཡ, ཨིདཱནི མཧཱཛནོ གནྡྷམཱལཱདིཧཏྠོ གནྟྭཱ སཏྠཱརམེཝ པཱུཛེསྶཏི, ཏུམྷེ ཀཐཾ བྷཝིསྶཐཱ’’ཏི ཝུཏྟེ ‘‘ཀིཾ པན ཨིམསྨིཾ ལོཀེ པཎྜིཏཱ བཧཱུ, ཨུདཱཧུ དནྡྷཱ’’ཏི? ‘‘དནྡྷཱ’’ཏི ཀཐིཏེ ‘‘ཏེན ཧི པཎྜིཏཱ པཎྜིཏསྶ སམཎསྶ གོཏམསྶ སནྟིཀཾ གམིསྶནྟི, དནྡྷཱ དནྡྷསྶ མམ སནྟིཀཾ ཨཱགམིསྶནྟི, གཙྪཐ ཏུམྷེ’’ཏི ཝཏྭཱ ‘‘ཨཱགནྟུཾ ན ཨིཙྪི, བྷནྟེ’’ཏི. ཏཾ སུཏྭཱ སཏྠཱ, ‘‘བྷིཀྑཝེ, སཉྩཡོ ཨཏྟནོ མིཙྪཱདིཊྛིཏཱཡ ཨསཱརཾ སཱརོཏི, སཱརཉྩ ཨསཱརོཏི གཎྷི. ཏུམྷེ པན ཨཏྟནོ པཎྜིཏཏཱཡ སཱརཉྩ སཱརཏོ, ཨསཱརཉྩ ཨསཱརཏོ ཉཏྭཱ ཨསཱརཾ པཧཱཡ སཱརམེཝ གཎྷིཏྠཱ’’ཏི ཝཏྭཱ ཨིམཱ གཱཐཱ ཨབྷཱསི –

༡༡.

‘‘ཨསཱརེ སཱརམཏིནོ, སཱརེ ཙཱསཱརདསྶིནོ;

ཏེ སཱརཾ ནཱདྷིགཙྪནྟི, མིཙྪཱསངྐཔྤགོཙརཱ.

༡༢.

‘‘སཱརཉྩ སཱརཏོ ཉཏྭཱ, ཨསཱརཉྩ ཨསཱརཏོ;

ཏེ སཱརཾ ཨདྷིགཙྪནྟི, སམྨཱསངྐཔྤགོཙརཱ’’ཏི.

ཏཏྠ ཨསཱརེ སཱརམཏིནོཏི ཙཏྟཱརོ པཙྩཡཱ, དསཝཏྠུཀཱ མིཙྪཱདིཊྛི, ཏསྶཱ ཨུཔནིསྶཡབྷཱུཏཱ དྷམྨདེསནཱཏི ཨཡཾ ཨསཱརོ ནཱམ, ཏསྨིཾ སཱརདིཊྛིནོཏི ཨཏྠོ. སཱརེ ཙཱསཱརདསྶིནོཏི དསཝཏྠུཀཱ སམྨཱདིཊྛི, ཏསྶཱ ཨུཔནིསྶཡབྷཱུཏཱ དྷམྨདེསནཱཏི ཨཡཾ སཱརོ ནཱམ, ཏསྨིཾ ‘‘ནཱཡཾ སཱརོ’’ཏི ཨསཱརདསྶིནོ. ཏེ སཱརནྟི ཏེ པན ཏཾ མིཙྪཱདིཊྛིགྒཧཎཾ གཧེཏྭཱ ཋིཏཱ ཀཱམཝིཏཀྐཱདཱིནཾ ཝསེན མིཙྪཱསངྐཔྤགོཙརཱ ཧུཏྭཱ སཱིལསཱརཾ, སམཱདྷིསཱརཾ, པཉྙཱསཱརཾ, ཝིམུཏྟིསཱརཾ, ཝིམུཏྟིཉཱཎདསྶནསཱརཾ, ‘‘པརམཏྠསཱརཾ, ནིབྦཱནཉྩ ནཱདྷིགཙྪ’’ནྟི. སཱརཉྩཱཏི ཏམེཝ སཱིལསཱརཱདིསཱརཾ ‘‘སཱརོ ནཱམཱཡ’’ནྟི, ཝུཏྟཔྤཀཱརཉྩ ཨསཱརཾ ‘‘ཨསཱརོ ཨཡ’’ནྟི ཉཏྭཱ. ཏེ སཱརནྟི ཏེ པཎྜིཏཱ ཨེཝཾ སམྨཱདསྶནཾ གཧེཏྭཱ ཋིཏཱ ནེཀྑམྨསངྐཔྤཱདཱིནཾ ཝསེན སམྨཱསངྐཔྤགོཙརཱ ཧུཏྭཱ ཏཾ ཝུཏྟཔྤཀཱརཾ སཱརཾ ཨདྷིགཙྪནྟཱིཏི.

གཱཐཱཔརིཡོསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ. སནྣིཔཏིཏཱནཾ སཱཏྠིཀཱ དྷམྨདེསནཱ ཨཧོསཱིཏི.

སཱརིཔུཏྟཏྠེརཝཏྠུ ཨཊྛམཾ.

༩. ནནྡཏྠེརཝཏྠུ

ཡཐཱ ཨགཱརནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཱཡསྨནྟཾ ནནྡཾ ཨཱརབྦྷ ཀཐེསི.

སཏྠཱ ཧི པཝཏྟིཏཝརདྷམྨཙཀྐོ རཱཛགཧཾ གནྟྭཱ ཝེལུ༹ཝནེ ཝིཧརནྟོ – ‘‘པུཏྟཾ མེ ཨཱནེཏྭཱ དསྶེཐཱ’’ཏི སུདྡྷོདནམཧཱརཱཛེན པེསིཏཱནཾ སཧསྶསཧསྶཔརིཝཱརཱནཾ དསནྣཾ དཱུཏཱནཾ སབྦཔཙྪཏོ གནྟྭཱ ཨརཧཏྟཔྤཏྟེན ཀཱལུ༹དཱཡིཏྠེརེན གམནཀཱལཾ ཉཏྭཱ མགྒཝཎྞཾ ཝཎྞེཏྭཱ ཝཱིསཏིསཧསྶཁཱིཎཱསཝཔརིཝུཏོ ཀཔིལཔུརཾ ནཱིཏོ ཉཱཏིསམཱགམེ པོཀྑརཝསྶཾ ཨཏྠུཔྤཏྟིཾ ཀཏྭཱ ཝེསྶནྟརཛཱཏཀཾ (ཛཱ. ༢.༢༢.༡༦༥༥ ཨཱདཡོ) ཀཐེཏྭཱ པུནདིཝསེ པིཎྜཱཡ པཝིཊྛོ, ‘‘ཨུཏྟིཊྛེ ནཔྤམཛྫེཡྻཱ’’ཏི (དྷ. པ. ༡༦༨) གཱཐཱཡ པིཏརཾ སོཏཱཔཏྟིཕལེ པཏིཊྛཱཔེཏྭཱ, ‘‘དྷམྨཉྩརེ’’ཏི (དྷ. པ. ༡༦༩) གཱཐཱཡ མཧཱཔཛཱཔཏིཾ སོཏཱཔཏྟིཕལེ, རཱཛཱནཉྩ སཀདཱགཱམིཕལེ པཏིཊྛཱཔེསི. བྷཏྟཀིཙྩཱཝསཱནེ པན རཱཧུལམཱཏུགུཎཀཐཾ ནིསྶཱཡ ཙནྡཀིནྣརཱིཛཱཏཀཾ (ཛཱ. ༡.༡༤.༡༨ ཨཱདཡོ) ཀཐེཏྭཱ ཏཏོ ཏཏིཡདིཝསེ ནནྡཀུམཱརསྶ ཨབྷིསེཀགེཧཔྤཝེསནཝིཝཱཧམངྒལེསུ པཝཏྟམཱནེསུ པིཎྜཱཡ པཝིསིཏྭཱ ནནྡཀུམཱརསྶ ཧཏྠེ པཏྟཾ དཏྭཱ མངྒལཾ ཝཏྭཱ ཨུཊྛཱཡཱསནཱ པཀྐམནྟོ ནནྡཀུམཱརསྶ ཧཏྠཏོ པཏྟཾ ན གཎྷི. སོཔི ཏཐཱགཏགཱརཝེན ‘‘པཏྟཾ ཝོ, བྷནྟེ, གཎྷཐཱ’’ཏི ཝཏྟུཾ ནཱསཀྑི. ཨེཝཾ པན ཙིནྟེསི – ‘‘སོཔཱནསཱིསེ པཏྟཾ གཎྷིསྶཏཱི’’ཏི. སཏྠཱ ཏསྨིམྤི ཋཱནེ ན གཎྷི. ཨིཏརོ ‘‘སོཔཱནཔཱདམཱུལེ གཎྷིསྶཏཱི’’ཏི ཙིནྟེསི. སཏྠཱ ཏཏྠཱཔི ན གཎྷི. ཨིཏརོ ‘‘རཱཛངྒཎེ གཎྷིསྶཏཱི’’ཏི ཙིནྟེསི. སཏྠཱ ཏཏྠཱཔི ན གཎྷི. ཀུམཱརོ ནིཝཏྟིཏུཀཱམོ ཨརུཙིཡཱ གཙྪནྟོ སཏྠུགཱརཝེན ‘‘པཏྟཾ གཎྷཐཱ’’ཏི ཝཏྟུཾ ན སཀྐོཏི. ‘‘ཨིདྷ གཎྷིསྶཏི, ཨེཏྠ གཎྷིསྶཏཱི’’ཏི ཙིནྟེནྟོ གཙྪཏི.

ཏསྨིཾ ཁཎེ ཨཉྙཱ ཨིཏྠིཡོ ཏཾ དིསྭཱ ཛནཔདཀལྱཱཎིཡཱ ཨཱཙིཀྑིཾསུ – ‘‘ཨཡྻེ, བྷགཝཱ ནནྡཀུམཱརཾ གཧེཏྭཱ གཏོ, ཏུམྷེཧི ཏཾ ཝིནཱ ཀརིསྶཏཱི’’ཏི. སཱ ཨུདཀབིནྡཱུཧི པགྒྷརནྟེཧེཝ ཨཌྜྷུལླིཁིཏེཧི ཀེསེཧི ཝེགེན གནྟྭཱ, ‘‘ཏུཝཊཾ ཁོ, ཨཡྻཔུཏྟ, ཨཱགཙྪེཡྻཱསཱི’’ཏི ཨཱཧ. ཏཾ ཏསྶཱ ཝཙནཾ ཏསྶ ཧདཡེ ཏིརིཡཾ པཏིཏྭཱ ཝིཡ ཋིཏཾ. སཏྠཱཔིསྶ ཧཏྠཏོ པཏྟཾ ཨགྒཎྷིཏྭཱཝ ཏཾ ཝིཧཱརཾ ནེཏྭཱ, ‘‘པབྦཛིསྶསི ནནྡཱ’’ཏིཨཱཧ. སོ བུདྡྷགཱརཝེན ‘‘ན པབྦཛིསྶཱམཱི’’ཏི ཨཝཏྭཱ, ‘‘ཨཱམ, པབྦཛིསྶཱམཱི’’ཏི ཨཱཧ. སཏྠཱ ‘‘ཏེན ཧི ནནྡཾ པབྦཱཛེཐཱ’’ཏི ཨཱཧ. སཏྠཱ ཀཔིལཔུརཾ གནྟྭཱ ཏཏིཡདིཝསེ ནནྡཾ པབྦཱཛེསི.

སཏྟམེ དིཝསེ རཱཧུལམཱཏཱ ཀུམཱརཾ ཨལངྐརིཏྭཱ བྷགཝཏོ སནྟིཀཾ པེསེསི – ‘‘པསྶ, ཏཱཏ, ཨེཏཾ ཝཱིསཏིསཧསྶསམཎཔརིཝུཏཾ སུཝཎྞཝཎྞཾ བྲཧྨརཱུཔིཝཎྞཾ སམཎཾ, ཨཡཾ ཏེ པིཏཱ, ཨེཏསྶ མཧནྟཱ ནིདྷིཀུམྦྷིཡོ ཨཧེསུཾ. ཏྱཱསྶ ནིཀྑམནཏོ པཊྛཱཡ ན པསྶཱམ, གཙྪ ནཾ དཱཡཛྫཾ ཡཱཙསྶུ – ‘ཨཧཾ, ཏཱཏ, ཀུམཱརོ, ཨབྷིསེཀཾ པཏྭཱ ཙཀྐཝཏྟཱི བྷཝིསྶཱམི, དྷནེན མེ ཨཏྠོ, དྷནཾ མེ དེཧི. སཱམིཀོ ཧི པུཏྟོ པིཏུསནྟཀསྶཱ’’’ཏི. ཀུམཱརོ བྷགཝཏོ སནྟིཀཾ གནྟྭཱཝ པིཏུསིནེཧཾ པཊིལབྷིཏྭཱ ཧཊྛཙིཏྟོ ‘‘སུཁཱ ཏེ, སམཎ, ཚཱཡཱ’’ཏི ཝཏྭཱ ཨཉྙམྤི བཧུཾ ཨཏྟནོ ཨནུརཱུཔཾ ཝདནྟོ ཨཊྛཱསི. བྷགཝཱ ཀཏབྷཏྟཀིཙྩོ ཨནུམོདནཾ ཀཏྭཱ ཨུཊྛཱཡཱསནཱ པཀྐཱམི. ཀུམཱརོཔི ‘‘དཱཡཛྫཾ མེ, སམཎ, དེཧི, དཱཡཛྫཾ མེ, སམཎ, དེཧཱི’’ཏི བྷགཝནྟཾ ཨནུབནྡྷི. བྷགཝཱཔི ཀུམཱརཾ ན ནིཝཏྟཱཔེསི. པརིཛནོཔི བྷགཝཏཱ སདྡྷིཾ གཙྪནྟཾ ནིཝཏྟེཏུཾ ནཱསཀྑི. ཨིཏི སོ བྷགཝཏཱ སདྡྷིཾ ཨཱརཱམམེཝ ཨགམཱསི.

ཏཏོ བྷགཝཱ ཙིནྟེསི – ‘‘ཡཾ ཨཡཾ པིཏུསནྟཀཾ དྷནཾ ཨིཙྪཏི, ཏཾ ཝཊྚཱནུགཏཾ སཝིགྷཱཏཾ, ཧནྡསྶ བོདྷིཏལེ པཊིལདྡྷཾ སཏྟཝིདྷཾ ཨརིཡདྷནཾ དེམི, ལོཀུཏྟརདཱཡཛྫསྶ ནཾ སཱམིཀཾ ཀརོམཱི’’ཏི. ཨཐ ཁོ བྷགཝཱ ཨཱཡསྨནྟཾ སཱརིཔུཏྟཾ ཨཱམནྟེསི – ‘‘ཏེན ཧི ཏྭཾ, སཱརིཔུཏྟ, རཱཧུལཀུམཱརཾ པབྦཱཛེཧཱི’’ཏི. ཐེརོ ཀུམཱརཾ པབྦཱཛེསི. པབྦཛིཏེ ཙ པན ཀུམཱརེ རཉྙོ ཨདྷིམཏྟཾ དུཀྑཾ ཨུཔྤཛྫི. ཏཾ ཨདྷིཝཱསེཏུཾ ཨསཀྐོནྟོ བྷགཝཏོ ནིཝེདེཏྭཱ, ‘‘སཱདྷུ, བྷནྟེ, ཨཡྻཱ, མཱཏཱཔིཏཱུཧི ཨནནུཉྙཱཏཾ པུཏྟཾ ན པབྦཱཛེཡྻུ’’ནྟི ཝརཾ ཡཱཙི. བྷགཝཱ ཏསྶ ཏཾ ཝརཾ དཏྭཱ པུནེཀདིཝསཾ རཱཛནིཝེསནེ ཀཏཔཱཏརཱསོ ཨེཀམནྟཾ ནིསིནྣེན རཉྙཱ, ‘‘བྷནྟེ, ཏུམྷཱཀཾ དུཀྐརཀཱརིཀཀཱལེ ཨེཀཱ དེཝཏཱ མཾ ཨུཔསངྐམིཏྭཱ, ‘པུཏྟོ ཏེ ཀཱལཀཏོ’ཏི ཨཱཧ. ཨཧཾ ཏསྶཱ ཝཙནཾ ཨསདྡཧནྟོ ‘ན མཡ྄ཧཾ པུཏྟོ བོདྷིཾ ཨཔྤཏྭཱ ཀཱལཾ ཀརོཏཱི’ཏི པཊིཀྑིཔི’’ནྟི ཝུཏྟེ – ‘‘ཨིདཱནི ཀིཾ སདྡཧིསྶཐ, པུབྦེཔི ཨཊྛིཀཱནི དསྶེཏྭཱ, ‘པུཏྟོ ཏེ མཏོ’ཏི ཝུཏྟེ ན སདྡཧིཏྭཱ’’ཏི ཨིམིསྶཱ ཨཏྠུཔྤཏྟིཡཱ མཧཱདྷམྨཔཱལཛཱཏཀཾ (ཛཱ. ༡.༡༠.༩༢ ཨཱདཡོ) ཀཐེསི. གཱཐཱཔརིཡོསཱནེ རཱཛཱ ཨནཱགཱམིཕལེ པཏིཊྛཧི. ཨིཏི བྷགཝཱ པིཏརཾ ཏཱིསུ ཕལེསུ པཏིཊྛཱཔེཏྭཱ བྷིཀྑུསངྒྷཔརིཝུཏོ པུནདེཝ རཱཛགཧཾ གནྟྭཱ ཏཏོ ཨནཱཐཔིཎྜིཀེན སཱཝཏྠིཾ ཨཱགམནཏྠཱཡ གཧིཏཔཊིཉྙོ ནིཊྛིཏེ ཛེཏཝནེ ཝིཧཱརེ ཏཏྠ གནྟྭཱ ཝཱསཾ ཀཔྤེསི.

ཨེཝཾ སཏྠརི ཛེཏཝནེ ཝིཧརནྟེ ཨཱཡསྨཱ ནནྡོ ཨུཀྐཎྛིཏྭཱ བྷིཀྑཱུནཾ ཨེཏམཏྠཾ ཨཱརོཙེསི – ‘‘ཨནབྷིརཏོ ཨཧཾ, ཨཱཝུསོ, བྲཧྨཙརིཡཾ ཙརཱམི, ན སཀྐོམི བྲཧྨཙརིཡཾ སནྡྷཱརེཏུཾ, སིཀྑཾ པཙྩཀྑཱཡ ཧཱིནཱཡཱཝཏྟིསྶཱམཱི’’ཏི. བྷགཝཱ ཏཾ པཝཏྟིཾ སུཏྭཱ ཨཱཡསྨནྟཾ ནནྡཾ པཀྐོསཱཔེཏྭཱ ཨེཏདཝོཙ – ‘‘སཙྩཾ ཀིར ཏྭཾ, ནནྡ, སམྦཧུལཱནཾ བྷིཀྑཱུནཾ ཨེཝཾ ཨཱརོཙེསི – ‘ཨནབྷིརཏོ, ཨཱཝུསོ, བྲཧྨཙརིཡཾ ཙརཱམི, ན སཀྐོམི བྲཧྨཙརིཡཾ སནྡྷཱརེཏུཾ, སིཀྑཾ པཙྩཀྑཱཡ ཧཱིནཱཡཱཝཏྟིསྶཱམཱི’’’ཏི? ‘‘ཨེཝཾ, བྷནྟེ’’ཏི. ‘‘ཀིསྶ པན ཏྭཾ, ནནྡ, ཨནབྷིརཏོ བྲཧྨཙརིཡཾ ཙརསི, ན སཀྐོསི བྲཧྨཙརིཡཾ སནྡྷཱརེཏུཾ, སིཀྑཾ པཙྩཀྑཱཡ ཧཱིནཱཡཱཝཏྟིསྶསཱི’’ཏི? ‘‘སཱཀིཡཱནཱི མཾ, བྷནྟེ, ཛནཔདཀལྱཱཎཱི གྷརཱ ནིཀྑམནྟསྶ ཨཌྜྷུལླིཁིཏེཧི ཀེསེཧི ཨཔལོཀེཏྭཱ མཾ ཨེཏདཝོཙ – ‘ཏུཝཊཾ ཁོ, ཨཡྻཔུཏྟ, ཨཱགཙྪེཡྻཱསཱི’ཏི, སོ ཁོ ཨཧཾ, བྷནྟེ, ཏཾ ཨནུསྶརམཱནོ ཨནབྷིརཏོ བྲཧྨཙརིཡཾ ཙརཱམི, ན སཀྐོམི བྲཧྨཙརིཡཾ སནྡྷཱརེཏུཾ, སིཀྑཾ པཙྩཀྑཱཡ ཧཱིནཱཡཱཝཏྟིསྶཱམཱི’’ཏི.

ཨཐ ཁོ བྷགཝཱ ཨཱཡསྨནྟཾ ནནྡཾ བཱཧཱཡཾ གཧེཏྭཱ ཨིདྡྷིབལེན ཏཱཝཏིཾསདེཝལོཀཾ ཨཱནེནྟོ ཨནྟརཱམགྒེ ཨེཀསྨིཾ ཛྷཱམཀྑེཏྟེ ཛྷཱམཁཱཎུཀེ ནིསིནྣཾ ཚིནྣཀཎྞནཱསནངྒུཊྛཾ ཨེཀཾ པལུཊྛམཀྐཊིཾ དསྶེཏྭཱ ཏཱཝཏིཾསབྷཝནེ སཀྐསྶ དེཝརཉྙོ ཨུཔཊྛཱནཾ ཨཱགཏཱནི ཀཀུཊཔཱདཱནི པཉྩ ཨཙྪརཱསཏཱནི དསྶེསི. ཀཀུཊཔཱདཱནཱིཏི རཏྟཝཎྞཏཱཡ པཱརེཝཏཔཱདསདིསཔཱདཱནི. དསྶེཏྭཱ ཙ པནཱཧ – ‘‘ཏཾ ཀིཾ མཉྙསི, ནནྡ, ཀཏམཱ ནུ ཁོ ཨབྷིརཱུཔཏརཱ ཝཱ དསྶནཱིཡཏརཱ ཝཱ པཱསཱདིཀཏརཱ ཝཱ སཱཀིཡཱནཱི ཝཱ ཛནཔདཀལྱཱཎཱི, ཨིམཱནི ཝཱ པཉྩ ཨཙྪརཱསཏཱནི ཀཀུཊཔཱདཱནཱི’’ཏི? ཏཾ སུཏྭཱ ཨཱཧ – ‘‘སེཡྻཐཱཔི སཱ, བྷནྟེ, ཚིནྣཀཎྞནཱསནངྒུཊྛཱ པལུཊྛམཀྐཊཱི, ཨེཝམེཝ ཁོ, བྷནྟེ, སཱཀིཡཱནཱི ཛནཔདཀལྱཱཎཱི, ཨིམེསཾ པཉྩནྣཾ ཨཙྪརཱསཏཱནཾ ཨུཔནིདྷཱཡ སངྑྱམྤི ན ཨུཔེཏི, ཀལམྤི ན ཨུཔེཏི, ཀལབྷཱགམྤི ན ཨུཔེཏི. ཨཐ ཁོ ཨིམཱནེཝ པཉྩ ཨཙྪརཱསཏཱནི ཨབྷིརཱུཔཏརཱནི ཙེཝ དསྶནཱིཡཏརཱནི ཙ པཱསཱདིཀཏརཱནི ཙཱ’’ཏི. ‘‘ཨབྷིརམ, ནནྡ, ཨབྷིརམ, ནནྡ, ཨཧཾ ཏེ པཱཊིབྷོགོ པཉྩནྣཾ ཨཙྪརཱསཏཱནཾ པཊིལཱབྷཱཡ ཀཀུཊཔཱདཱན’’ནྟི. ‘‘སཙེ མེ, བྷནྟེ བྷགཝཱ, པཱཊིབྷོགོ པཉྩནྣཾ ཨཙྪརཱསཏཱནཾ པཊིལཱབྷཱཡ ཀཀུཊཔཱདཱནཾ, ཨབྷིརམིསྶཱམཧཾ, བྷནྟེ, བྷགཝཏི བྲཧྨཙརིཡེ’’ཏི.

ཨཐ ཁོ བྷགཝཱ ཨཱཡསྨནྟཾ ནནྡཾ གཧེཏྭཱ ཏཏྠ ཨནྟརཧིཏོ ཛེཏཝནེཡེཝ པཱཏུརཧོསི. ཨསྶོསུཾ ཁོ བྷིཀྑཱུ, ‘‘ཨཱཡསྨཱ ཀིར ནནྡོ བྷགཝཏོ བྷཱཏཱ མཱཏུཙྪཱཔུཏྟོ ཨཙྪརཱནཾ ཧེཏུ བྲཧྨཙརིཡཾ ཙརཏི. བྷགཝཱ ཀིརསྶ པཱཊིབྷོགོ པཉྩནྣཾ ཨཙྪརཱསཏཱནཾ པཊིལཱབྷཱཡ ཀཀུཊཔཱདཱན’’ནྟི. ཨཐ ཁོ ཨཱཡསྨཏོ ནནྡསྶ སཧཱཡཀཱ བྷིཀྑཱུ ཨཱཡསྨནྟཾ ནནྡཾ བྷཏཀཝཱདེན ཙ ཨུཔཀྐིཏཀཝཱདེན ཙ སམུདཱཙརནྟི, ‘‘བྷཏཀོ ཀིརཱཡསྨཱ ནནྡོ, ཨུཔཀྐིཏཀོ ཀིརཱཡསྨཱ ནནྡོ, ཨཙྪརཱནཾ ཧེཏུ བྲཧྨཙརིཡཾ ཙརཏི. བྷགཝཱ ཀིརསྶ པཱཊིབྷོགོ པཉྩནྣཾ ཨཙྪརཱསཏཱནཾ པཊིལཱབྷཱཡ ཀཀུཊཔཱདཱན’’ནྟི. ཨཐ ཁོ ཨཱཡསྨཱ ནནྡོ སཧཱཡཀཱནཾ བྷིཀྑཱུནཾ བྷཏཀཝཱདེན ཙ ཨུཔཀྐིཏཀཝཱདེན ཙ ཨཊྚིཡམཱནོ ཧརཱཡམཱནོ ཛིགུཙྪམཱནོ ཨེཀོ ཝཱུཔཀཊྛོ ཨཔྤམཏྟོ ཨཱཏཱཔཱི པཧིཏཏྟོ ཝིཧརནྟོ ན ཙིརསྶེཝ ཡསྶཏྠཱཡ ཀུལཔུཏྟཱ སམྨདེཝ ཨགཱརསྨཱ ཨནགཱརིཡཾ པབྦཛནྟི, ཏདནུཏྟརཾ བྲཧྨཙརིཡཔརིཡོསཱནཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧཱསི, ‘‘ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱ’’ཏི ཨབྦྷཉྙཱསི. ཨཉྙཏརོ ཙ ཁོ པནཱཡསྨཱ ནནྡོ ཨརཧཏཾ ཨཧོསི.

ཨཐེཀཱ དེཝཏཱ རཏྟིབྷཱགེ སཀལཾ ཛེཏཝནཾ ཨོབྷཱསེཏྭཱ སཏྠཱརཾ ཨུཔསངྐམིཏྭཱ ཝནྡིཏྭཱ ཨཱརོཙེསི – ‘‘ཨཱཡསྨཱ, བྷནྟེ, ནནྡོ བྷགཝཏོ བྷཱཏཱ མཱཏུཙྪཱཔུཏྟོ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཏཱི’’ཏི. བྷགཝཏོཔི ཁོ ཉཱཎཾ ཨུདཔཱདི ‘‘ནནྡོ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཏཱི’’ཏི. སོཔཱཡསྨཱ ནནྡོ ཏསྶཱ རཏྟིཡཱ ཨཙྩཡེན བྷགཝནྟཾ ཨུཔསངྐམིཏྭཱ ཝནྡིཏྭཱ ཨེཏདཝོཙ – ‘‘ཡཾ མེ, བྷནྟེ, བྷགཝཱ པཱཊིབྷོགོ པཉྩནྣཾ ཨཙྪརཱསཏཱནཾ པཊིལཱབྷཱཡ ཀཀུཊཔཱདཱནཾ, མུཉྩཱམཧཾ, བྷནྟེ, བྷགཝནྟཾ ཨེཏསྨཱ པཊིསྶཝཱ’’ཏི. ‘‘མཡཱཔི ཁོ ཏེ, ནནྡ, ཙེཏསཱ ཙེཏོ པརིཙྩ ཝིདིཏོ ‘ནནྡོ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཏཱི’ཏི. དེཝཏཱཔི མེ ཨེཏམཏྠཾ ཨཱརོཙེསི – ‘ཨཱཡསྨཱ, བྷནྟེ, ནནྡོ ཨཱསཝཱནཾ ཁཡཱ ཨནཱསཝཾ ཙེཏོཝིམུཏྟིཾ པཉྙཱཝིམུཏྟིཾ དིཊྛེཝ དྷམྨེ སཡཾ ཨབྷིཉྙཱ སཙྪིཀཏྭཱ ཨུཔསམྤཛྫ ཝིཧརཏཱི’ཏི. ཡདེཝ ཁོ ཏེ, ནནྡ, ཨནུཔཱདཱཡ ཨཱསཝེཧི ཙིཏྟཾ ཝིམུཏྟཾ, ཨཐཱཧཾ མུཏྟོ ཨེཏསྨཱ པཊིསྶཝཱ’’ཏི. ཨཐ ཁོ བྷགཝཱ ཨེཏམཏྠཾ ཝིདིཏྭཱ ཏཱཡཾ ཝེལཱཡཾ ཨིམཾ ཨུདཱནཾ ཨུདཱནེསི –

‘‘ཡསྶ ནིཏྟིཎྞོ པངྐོ, མདྡིཏོ ཀཱམཀཎྚཀོ;

མོཧཀྑཡཾ ཨནུཔྤཏྟོ, སུཁདུཀྑེསུ ན ཝེདྷཏཱི ས བྷིཀྑཱུ’’ཏི. (ཨུདཱ. ༢༢);

ཨཐེཀདིཝསཾ བྷིཀྑཱུ ཏཾ ཨཱཡསྨནྟཾ ནནྡཾ པུཙྪིཾསུ – ‘‘ཨཱཝུསོ ནནྡ, པུབྦེ ཏྭཾ ‘ཨུཀྐཎྛིཏོམཱི’ཏི ཝདེསི, ཨིདཱནི ཏེ ཀཐ’’ནྟི? ‘‘ནཏྠི མེ, ཨཱཝུསོ, གིཧིབྷཱཝཱཡ ཨཱལཡོ’’ཏི. ཏཾ སུཏྭཱ བྷིཀྑཱུ – ‘‘ཨབྷཱུཏཾ ཨཱཡསྨཱ ནནྡོ ཀཐེཏི, ཨཉྙཾ བྱཱཀརོཏི, ཨཏཱིཏདིཝསེསུ ‘ཨུཀྐཎྛིཏོམྷཱི’ཏི ཝཏྭཱ ཨིདཱནི ‘ནཏྠི མེ གིཧིབྷཱཝཱཡ ཨཱལཡོ’ཏི ཀཐེཏཱི’’ཏི གནྟྭཱ བྷགཝཏོ ཨེཏམཏྠཾ ཨཱརོཙེསུཾ. བྷགཝཱ ‘‘བྷིཀྑཝེ, ཨཏཱིཏདིཝསེསུ ནནྡསྶ ཨཏྟབྷཱཝོ དུཙྪནྣགེཧསདིསོ ཨཧོསི, ཨིདཱནི སུཙྪནྣགེཧསདིསོ ཛཱཏོ. ཨཡཉྷི དིབྦཙྪརཱནཾ དིཊྛཀཱལཏོ པཊྛཱཡ པབྦཛིཏཀིཙྩསྶ མཏྠཀཾ པཱཔེཏུཾ ཝཱཡམནྟོ ཏཾ ཀིཙྩཾ པཏྟོ’’ཏི ཝཏྭཱ ཨིམཱ གཱཐཱ ཨབྷཱསི –

༡༣.

‘‘ཡཐཱ ཨགཱརཾ དུཙྪནྣཾ, ཝུཊྛཱི སམཏིཝིཛ྄ཛྷཏི;

ཨེཝཾ ཨབྷཱཝིཏཾ ཙིཏྟཾ, རཱགོ སམཏིཝིཛ྄ཛྷཏི.

༡༤.

‘‘ཡཐཱ ཨགཱརཾ སུཙྪནྣཾ, ཝུཊྛཱི ན སམཏིཝིཛ྄ཛྷཏི;

ཨེཝཾ སུབྷཱཝིཏཾ ཙིཏྟཾ, རཱགོ ན སམཏིཝིཛ྄ཛྷཏཱི’’ཏི.

ཏཏྠ ཨགཱརནྟི ཡཾཀིཉྩི གེཧཾ. དུཙྪནྣནྟི ཝིརལ༹ཙྪནྣཾ ཚིདྡཱཝཚིདྡཾ. སམཏིཝིཛ྄ཛྷཏཱིཏི ཝསྶཝུཊྛི ཝིནིཝིཛ྄ཛྷཏི. ཨབྷཱཝིཏནྟི ཏཾ ཨགཱརཾ ཝུཊྛི ཝིཡ བྷཱཝནཱཡ རཧིཏཏྟཱ ཨབྷཱཝིཏཾ ཙིཏྟཾ རཱགོ སམཏི ཝིཛ྄ཛྷཏི. ན ཀེཝལཾ རཱགོཝ, དོསམོཧམཱནཱདཡོ སབྦཀིལེསཱ ཏཐཱརཱུཔཾ ཙིཏྟཾ ཨཏིཝིཡ ཝིཛ྄ཛྷནྟིཡེཝ. སུབྷཱཝིཏནྟི སམཐཝིཔསྶནཱབྷཱཝནཱཧི སུབྷཱཝིཏཾ. ཨེཝརཱུཔཾ ཙིཏྟཾ སུཙྪནྣཾ གེཧཾ ཝུཊྛི ཝིཡ རཱགཱདཡོ ཀིལེསཱ ཨཏིཝིཛ྄ཛྷིཏུཾ ན སཀྐོནྟཱིཏི.

གཱཐཱཔརིཡོསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ. མཧཱཛནསྶ དེསནཱ སཱཏྠིཀཱ ཨཧོསི.

ཨཐ ཁོ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ, ‘‘ཨཱཝུསོ, བུདྡྷཱ ནཱམ ཨཙྪརིཡཱ, ཛནཔདཀལྱཱཎིཾ ནིསྶཱཡ ཨུཀྐཎྛིཏོ ནཱམཱཡསྨཱ ནནྡོ སཏྠཱརཱ དེཝཙྪརཱ ཨཱམིསཾ ཀཏྭཱ ཝིནཱིཏོ’’ཏི. སཏྠཱ ཨཱགནྟྭཱ – ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ, ‘‘ཨིམཱཡ ནཱམཱ’’ཏི ཝུཏྟེ, ‘‘ན, བྷིཀྑཝེ, ཨིདཱནེཝ, པུབྦེཔེས མཡཱ མཱཏུགཱམེན པལོབྷེཏྭཱ ཝིནཱིཏོཡེཝཱ’’ཏི ཝཏྭཱ ཨཏཱིཏཾ ཨཱཧརི –

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བཱརཱཎསིཝཱསཱི ཀཔྤཊོ ནཱམ ཝཱཎིཛོ ཨཧོསི. ཏསྶེཀོ གདྲབྷོ ཀུམྦྷབྷཱརཾ ཝཧཏི, ཨེཀདིཝསེན སཏྟ ཡོཛནཱནི གཙྪཏི. སོ ཨེཀསྨིཾ སམཡེ གདྲབྷབྷཱརཀེཧི སདྡྷིཾ ཏཀྐསིལཾ གནྟྭཱ ཡཱཝ བྷཎྜསྶ ཝིསྶཛྫནཾ, ཏཱཝ གདྲབྷཾ ཙརིཏུཾ ཝིསྶཛྫེསི. ཨཐསྶ སོ གདྲབྷོ པརིཁཱཔིཊྛེ ཙརམཱནོ ཨེཀཾ གདྲབྷིཾ དིསྭཱ ཨུཔསངྐམི. སཱ ཏེན སདྡྷིཾ པཊིསནྠཱརཾ ཀརོནྟཱི ཨཱཧ – ‘‘ཀུཏོ ཨཱགཏོསཱི’’ཏི? ‘‘བཱརཱཎསིཏོ’’ཏི. ‘‘ཀེན ཀམྨེནཱ’’ཏི? ‘‘ཝཱཎིཛྫཀམྨེནཱ’’ཏི. ‘‘ཀིཏྟཀཾ བྷཱརཾ ཝཧསཱི’’ཏི? ‘‘ཀུམྦྷབྷཱར’’ནྟི? ‘‘ཨེཏྟཀཾ བྷཱརཾ ཝཧནྟོ ཀཏི ཡོཛནཱནི གཙྪསཱི’’ཏི? ‘‘སཏྟ ཡོཛནཱནཱི’’ཏི. ‘‘གཏགཏཊྛཱནེ ཏེ ཀཱཙི པཱདཔརིཀམྨཔིཊྛིཔརིཀམྨཀརཱ ཨཏྠཱི’’ཏི? ‘‘ནཏྠཱི’’ཏི. ‘‘ཨེཝཾ སནྟེ མཧཱདུཀྑཾ ནཱམ ཨནུབྷོསཱི’’ཏི? ‘‘ཀིཉྩཱཔི ཧི ཏིརཙྪཱནགཏཱནཾ པཱདཔརིཀམྨཱདིཀཱརཀཱ ནཱམ ནཏྠི, ཀཱམསཾཡོཛནགྷཊྚནཏྠཱཡ པན ཨེཝརཱུཔཾ ཀཐཾ ཀཐེསི’’? སོ ཏསྶཱ ཀཐཱཡ ཨུཀྐཎྛི. ཀཔྤཊོཔི བྷཎྜཾ ཝིསྶཛྫེཏྭཱ ཏསྶ སནྟིཀཾ ཨཱགནྟྭཱ – ‘‘ཨེཧི, ཏཱཏ, གམིསྶཱམཱ’’ཏི ཨཱཧ. ‘‘གཙྪཐ ཏུམྷེ, ནཱཧཾ གམིསྶཱམཱི’’ཏི. ཨཐ ནཾ པུནཔྤུནཾ ཡཱཙིཏྭཱ, ‘‘ཨནིཙྪནྟཾ པརིབྷཱསེཏྭཱ ནཾ ནེསྶཱམཱི’’ཏི ཙིནྟེཏྭཱ གཱཐམཱཧ –

‘‘པཏོདཾ ཏེ ཀརིསྶཱམི, སཱལ༹སངྒུལིཀཎྚཀཾ;

སཉྪིནྡིསྶཱམི ཏེ ཀཱཡཾ, ཨེཝཾ ཛཱནཱཧི གདྲབྷཱ’’ཏི.

ཏཾ སུཏྭཱ གདྲབྷོ ‘‘ཨེཝཾ སནྟེ ཨཧམྤི ཏེ ཀཏྟབྦཾ ཛཱནིསྶཱམཱི’’ཏི ཝཏྭཱ ཨིམཾ གཱཐམཱཧ –

‘‘པཏོདཾ མེ ཀརིསྶསི, སོལ༹སངྒུལིཀཎྚཀཾ;

པུརཏོ པཏིཊྛཧིཏྭཱན, ཨུདྡྷརིཏྭཱན པཙྪཏོ;

དནྟཾ ཏེ པཱཏཡིསྶཱམི, ཨེཝཾ ཛཱནཱཧི ཀཔྤཊཱ’’ཏི.

ཏཾ སུཏྭཱ ཝཱཎིཛོ – ‘‘ཀེན ནུ ཁོ ཀཱརཎེན ཨེས ཨེཝཾ ཝདཏཱི’’ཏི ཙིནྟེཏྭཱ, ཨིཏོ ཙིཏོ ཙ ཨོལོཀེནྟོ ཏཾ གདྲབྷིཾ དིསྭཱ, ‘‘ཨིམཱཡེས ཨེཝཾ སིཀྑཱཔིཏོ བྷཝིསྶཏི, ‘ཨེཝརཱུཔིཾ ནཱམ ཏེ གདྲབྷིཾ ཨཱནེསྶཱམཱི’ཏི མཱཏུགཱམེན ནཾ པལོབྷེཏྭཱ ནེསྶཱམཱི’’ཏི ཨིམཾ གཱཐམཱཧ –

‘‘ཙཏུཔྤདིཾ སངྑམུཁིཾ, ནཱརིཾ སབྦངྒསོབྷིནིཾ;

བྷརིཡཾ ཏེ ཨཱནཡིསྶཱམི, ཨེཝཾ ཛཱནཱཧི གདྲབྷཱ’’ཏི.

ཏཾ སུཏྭཱ ཏུཊྛཙིཏྟོ གདྲབྷོ ཨིམཾ གཱཐམཱཧ –

‘‘ཙཏུཔྤདིཾ སངྑམུཁིཾ, ནཱརིཾ སབྦངྒསོབྷིནིཾ;

བྷརིཡཾ མེ ཨཱནཡིསྶསི, ཨེཝཾ ཛཱནཱཧི ཀཔྤཊ;

ཀཔྤཊ བྷིཡྻོ གམིསྶཱམི, ཡོཛནཱནི ཙཏུདྡསཱ’’ཏི.

ཨཐ ནཾ ཀཔྤཊོ, ‘‘ཏེན ཧི ཨེཧཱི’’ཏི གཧེཏྭཱ སཀཊྛཱནཾ ཨགམཱསི. སོ ཀཏིཔཱཧཙྩཡེན ནཾ ཨཱཧ – ‘‘ནནུ མཾ ཏུམྷེ ‘བྷརིཡཾ ཏེ ཨཱནཡིསྶཱམཱི’ཏི ཨཝོཙུཏྠཱ’’ཏི? ‘‘ཨཱམ, ཝུཏྟཾ, ནཱཧཾ ཨཏྟནོ ཀཐཾ བྷིནྡིསྶཱམི, བྷརིཡཾ ཏེ ཨཱནེསྶཱམི, ཝེཏནཾ པན ཏུཡ྄ཧཾ ཨེཀཀསྶེཝ དསྶཱམི, ཏུཡ྄ཧཾ ཝེཏནཾ དུཏིཡསྶ པཧོཏུ ཝཱ མཱ ཝཱ, ཏྭམེཝ ཛཱནེཡྻཱསི. ཨུབྷིནྣཾ པན ཝོ སཾཝཱསམནྭཱཡ པུཏྟཱ ཝིཛཱཡིསྶནྟི, ཏེཧིཔི བཧཱུཧི སདྡྷིཾ ཏུཡ྄ཧཾ ཏཾ པཧོཏུ ཝཱ མཱ ཝཱ, ཏྭམེཝ ཛཱནེཡྻཱསཱི’’ཏི. གདྲབྷོ ཏསྨིཾ ཀཐེནྟེཡེཝ ཨནཔེཀྑོ ཨཧོསི.

སཏྠཱ ཨིམཾ དྷམྨདེསནཾ ཨཱཧརིཏྭཱ, ‘‘ཏདཱ, བྷིཀྑཝེ, གདྲབྷཱི ཛནཔདཀལྱཱཎཱི ཨཧོསི, གདྲབྷོ ནནྡོ, ཝཱཎིཛོ ཨཧམེཝ. ཨེཝཾ པུབྦེཔེས མཡཱ མཱཏུགཱམེན པལོབྷེཏྭཱ ཝིནཱིཏོ’’ཏི ཛཱཏཀཾ ནིཊྛཱཔེསཱིཏི.

ནནྡཏྠེརཝཏྠུ ནཝམཾ.

༡༠. ཙུནྡསཱུཀརིཀཝཏྠུ

ཨིདྷ སོཙེཏཱིཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཙུནྡསཱུཀརིཀཾ ནཱམ པུརིསཾ ཨཱརབྦྷ ཀཐེསི.

སོ ཀིར པཉྩཔཎྞཱས ཝསྶཱནི སཱུཀརེ ཝདྷིཏྭཱ ཁཱདནྟོ ཙ ཝིཀྐིཎནྟོ ཙ ཛཱིཝིཀཾ ཀཔྤེསི. ཚཱཏཀཱལེ སཀཊེན ཝཱིཧིཾ ཨཱདཱཡ ཛནཔདཾ གནྟྭཱ ཨེཀནཱལི༹དྭེནཱལི༹མཏྟེན གཱམསཱུཀརཔོཏཀེ ཀིཎིཏྭཱ སཀཊཾ པཱུརེཏྭཱ ཨཱགནྟྭཱ པཙྪཱནིཝེསནེ ཝཛཾ ཝིཡ ཨེཀཾ ཋཱནཾ པརིཀྑིཔིཏྭཱ ཏཏྠེཝ ཏེསཾ ནིཝཱཔཾ རོཔེཏྭཱ, ཏེསུ ནཱནཱགཙྪེ ཙ སརཱིརམལཉྩ ཁཱདིཏྭཱ ཝཌྜྷིཏེསུ ཡཾ ཡཾ མཱརེཏུཀཱམོ ཧོཏི, ཏཾ ཏཾ ཨཱལཱ༹ནེ ནིཙྩལཾ བནྡྷིཏྭཱ སརཱིརམཾསསྶ ཨུདྡྷུམཱཡིཏྭཱ བཧལབྷཱཝཏྠཾ ཙཏུརསྶམུགྒརེན པོཐེཏྭཱ, ‘‘བཧལམཾསོ ཛཱཏོ’’ཏི ཉཏྭཱ མུཁཾ ཝིཝརིཏྭཱ ཨནྟརེ དཎྜཀཾ དཏྭཱ ལོཧཐཱལིཡཱ པཀྐུཐིཏཾ ཨུཎྷོདཀཾ མུཁེ ཨཱསིཉྩཏི. ཏཾ ཀུཙྪིཾ པཝིསིཏྭཱ པཀྐུཐིཏཾ ཀརཱིསཾ ཨཱདཱཡ ཨདྷོབྷཱགེན ནིཀྑམཏི, ཡཱཝ ཐོཀམྤི ཀརཱིསཾ ཨཏྠི, ཏཱཝ ཨཱཝིལཾ ཧུཏྭཱ ནིཀྑམཏི, སུདྡྷེ ཨུདརེ ཨཙྪཾ ཨནཱཝིལཾ ཧུཏྭཱ ནིཀྑམཏི. ཨཐསྶ ཨཝསེསཾ ཨུདཀཾ པིཊྛིཡཾ ཨཱསིཉྩཏི. ཏཾ ཀཱལ༹ཙམྨཾ ཨུཔྤཱཊེཏྭཱ གཙྪཏི. ཏཏོ ཏིཎུཀྐཱཡ ལོམཱནི ཛྷཱཔེཏྭཱ ཏིཁིཎེན ཨསིནཱ སཱིསཾ ཚིནྡཏི. པགྒྷརཎཏཾ ལོཧིཏཾ བྷཱཛནེན པཊིགྒཧེཏྭཱ མཾསཾ ལོཧིཏེན མདྡིཏྭཱ པཙིཏྭཱ པུཏྟདཱརམཛ྄ཛྷེ ནིསིནྣོ ཁཱདིཏྭཱ སེསཾ ཝིཀྐིཎཱཏི. ཏསྶ ཨིམིནཱཝ ནིཡཱམེན ཛཱིཝིཀཾ ཀཔྤེནྟསྶ པཉྩཔཎྞཱས ཝསྶཱནི ཨཏིཀྐནྟཱནི. ཏཐཱགཏེ དྷུརཝིཧཱརེ ཝསནྟེ ཨེཀདིཝསམྤི པུཔྥམུཊྛིམཏྟེན པཱུཛཱ ཝཱ ཀཊཙྪུམཏྟཾ བྷིཀྑདཱནཾ ཝཱ ཨཉྙཾ ཝཱ ཀིཉྩི པུཉྙཾ ནཱམ ནཱཧོསི. ཨཐསྶ སརཱིརེ རོགོ ཨུཔྤཛྫི, ཛཱིཝནྟསྶེཝ ཨཝཱིཙིམཧཱནིརཡསནྟཱཔོ ཨུཔཊྛཧི. ཨཝཱིཙིསནྟཱཔོ ནཱམ ཡོཛནསཏེ ཋཏྭཱ ཨོལོཀེནྟསྶ ཨཀྑཱིནཾ བྷིཛྫནསམཏྠོ པརིལཱ༹ཧོ ཧོཏི. ཝུཏྟམྤི ཙེཏཾ –

‘‘ཏསྶ ཨཡོམཡཱ བྷཱུམི, ཛལིཏཱ ཏེཛསཱཡུཏཱ;

སམནྟཱ ཡོཛནསཏཾ, ཕརིཏྭཱ ཏིཊྛཏི སབྦདཱ’’ཏི. (མ. ནི. ༣.༢༦༧; ཨ. ནི. ༣.༣༦);

ནཱགསེནཏྠེརེན པནསྶ པཱཀཏིཀགྒིསནྟཱཔཏོ ཨདྷིམཏྟཏཱཡ ཨཡཾ ཨུཔམཱ ཝུཏྟཱ – ‘‘ཡཐཱ, མཧཱརཱཛ, ཀཱུཊཱགཱརམཏྟོ པཱསཱཎོཔི ནེརཡིཀགྒིམྷི པཀྑིཏྟོ ཁཎེན ཝིལཡཾ གཙྪཏི, ནིབྦཏྟསཏྟཱ པནེཏྠ ཀམྨབལེན མཱཏུཀུཙྪིགཏཱ ཝིཡ ན ཝིལཱིཡནྟཱི’’ཏི (མི. པ. ༢.༤.༦). ཏསྶ ཏསྨིཾ སནྟཱཔེ ཨུཔཊྛིཏེ ཀམྨསརིཀྑཀོ ཨཱཀཱརོ ཨུཔྤཛྫི. གེཧམཛ྄ཛྷེཡེཝ སཱུཀརརཝཾ རཝིཏྭཱ ཛཎྞུཀེཧི ཝིཙརནྟོ པུརཏྠིམཝཏྠུམྤི པཙྪིམཝཏྠུམྤི གཙྪཏི. ཨཐསྶ གེཧམཱནུསཀཱ ཏཾ དལ༹ྷཾ གཧེཏྭཱ མུཁཾ པིདཧནྟི. ཀམྨཝིཔཱཀོ ནཱམ ན སཀྐཱ ཀེནཙི པཊིབཱཧིཏུཾ. སོ ཝིརཝནྟོཝ ཨིཏོ ཙིཏོ ཙ ཝིཙརཏི. སམནྟཱ སཏྟསུ གྷརེསུ མནུསྶཱ ནིདྡཾ ན ལབྷནྟི. མརཎབྷཡེན ཏཛྫིཏསྶ པན བཧིནིཀྑམནཾ ནིཝཱརེཏུཾ ཨསཀྐོནྟོ སབྦོ གེཧཛནོ ཡཐཱ ཨནྟོཋིཏོ བཧི ཝིཙརིཏུཾ ན སཀྐོཏི, ཏཐཱ གེཧདྭཱརཱནི ཐཀེཏྭཱ བཧིགེཧཾ པརིཝཱརེཏྭཱ རཀྑནྟོ ཨཙྪཏི. ཨིཏརོ ཨནྟོགེཧེཡེཝ ནིརཡསནྟཱཔེན ཝིརཝནྟོ ཨིཏོ ཙིཏོ ཙ ཝིཙརཏི. ཨེཝཾ སཏྟདིཝསཱནི ཝིཙརིཏྭཱ ཨཊྛམེ དིཝསེ ཀཱལཾ ཀཏྭཱ ཨཝཱིཙིམཧཱནིརཡེ ནིབྦཏྟི. ཨཝཱིཙིམཧཱནིརཡོ དེཝདཱུཏསུཏྟེན (མ. ནི. ༣.༢༦༡ ཨཱདཡོ; ཨ. ནི. ༣.༣༦) ཝཎྞེཏབྦོཏི.

བྷིཀྑཱུ ཏསྶ གྷརདྭཱརེན གཙྪནྟཱ ཏཾ སདྡཾ སུཏྭཱ, ‘‘སཱུཀརསདྡོ’’ཏི སཉྙིནོ ཧུཏྭཱ ཝིཧཱརཾ གནྟྭཱ སཏྠུ སནྟིཀེ ནིསིནྣཱ ཨེཝམཱཧཾསུ – ‘‘བྷནྟེ, ཙུནྡསཱུཀརིཏསྶ གེཧདྭཱརཾ པིདཧིཏྭཱ སཱུཀརཱནཾ མཱརིཡམཱནཱནཾ ཨཛྫ སཏྟམོ དིཝསོ, གེཧེ ཀཱཙི མངྒལཀིརིཡཱ བྷཝིསྶཏི མཉྙེ. ཨེཏྟཀེ ནཱམ, བྷནྟེ, སཱུཀརེ མཱརེནྟསྶ ཨེཀམྤི མེཏྟཙིཏྟཾ ཝཱ ཀཱརུཉྙཾ ཝཱ ནཏྠི, ན ཝཏ ནོ ཨེཝརཱུཔོ ཀཀྑལོ༹ ཕརུསོ སཏྟོ དིཊྛཔུབྦོ’’ཏི. སཏྠཱ – ‘‘ན, བྷིཀྑཝེ, སོ ཨིམེ སཏྟདིཝསེ སཱུཀརེ མཱརེཏི, ཀམྨསརིཀྑཀཾ པནསྶ ཝིཔཱཀཾ ཨུདཔཱདི, ཛཱིཝནྟསྶེཝ ཨཝཱིཙིམཧཱནིརཡསནྟཱཔོ ཨུཔཊྛཱསི. སོ ཏེན སནྟཱཔེན སཏྟ དིཝསཱནི སཱུཀརརཝཾ རཝནྟོ ཨནྟོནིཝེསནེ ཝིཙརིཏྭཱ ཨཛྫ ཀཱལཾ ཀཏྭཱ ཨཝཱིཙིམྷི ནིབྦཏྟོ’’ཏི ཝཏྭཱ, ‘‘བྷནྟེ, ཨིདྷ ལོཀེ ཨེཝཾ སོཙིཏྭཱ པུན གནྟྭཱ སོཙནཊྛཱནེཡེཝ ནིབྦཏྟོ’’ཏི ཝུཏྟེ, ‘‘ཨཱམ, བྷིཀྑཝེ, པམཏྟཱ ནཱམ གཧཊྛཱ ཝཱ ཧོནྟུ པབྦཛིཏཱ ཝཱ, ཨུབྷཡཏྠ སོཙནྟིཡེཝཱ’’ཏི ཝཏྭཱ ཨིམཾ གཱཐམཱཧ –

༡༥.

‘‘ཨིདྷ སོཙཏི པེཙྩ སོཙཏི,

པཱཔཀཱརཱི ཨུབྷཡཏྠ སོཙཏི;

སོ སོཙཏི སོ ཝིཧཉྙཏི;

དིསྭཱ ཀམྨཀིལིཊྛམཏྟནོ’’ཏི.

ཏཏྠ པཱཔཀཱརཱིཏི ནཱནཔྤཀཱརསྶ པཱཔཀམྨསྶ ཀཱརཀོ པུགྒལོ ‘‘ཨཀཏཾ ཝཏ མེ ཀལྱཱཎཾ, ཀཏཾ པཱཔ’’ནྟི ཨེཀཾསེནེཝ མརཎསམཡེ ཨིདྷ སོཙཏི, ཨིདམསྶ ཀམྨསོཙནཾ. ཝིཔཱཀཾ ཨནུབྷཝནྟོ པན པེཙྩ སོཙཏི. ཨིདམསྶ པརལོཀེ ཝིཔཱཀསོཙནཾ. ཨེཝཾ སོ ཨུབྷཡཏྠ སོཙཏིཡེཝ. ཏེནེཝ ཀཱརཎེན ཛཱིཝམཱནོཡེཝ སོ ཙུནྡསཱུཀརིཀོཔི སོཙཏི. དིསྭཱ ཀམྨཀིལིཊྛནྟི ཨཏྟནོ ཀིལིཊྛཀམྨཾ པསྶིཏྭཱ ནཱནཔྤཀཱརཀཾ ཝིལཔནྟོ ཝིཧཉྙཏཱིཏི.

གཱཐཱཔརིཡོསཱནེ བཧཱུ སོཏཱཔནྣཱདཡོ ཨཧེསུཾ. མཧཱཛནསྶ སཱཏྠིཀཱ དྷམྨདེསནཱ ཛཱཏཱཏི.

ཙུནྡསཱུཀརིཀཝཏྠུ དསམཾ.

༡༡. དྷམྨིཀཨུཔཱསཀཝཏྠུ

ཨིདྷ མོདཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ དྷམྨིཀཨུཔཱསཀཾ ཨཱརབྦྷ ཀཐེསི.

སཱཝཏྠིཡཾ ཀིར པཉྩསཏཱ དྷམྨིཀཨུཔཱསཀཱ ནཱམ ཨཧེསུཾ. ཏེསུ ཨེཀེཀསྶ པཉྩ པཉྩ ཨུཔཱསཀསཏཱནི པརིཝཱརཱ. ཡོ ཏེསཾ ཛེཊྛཀོ, ཏསྶ སཏྟ པུཏྟཱ སཏྟ དྷཱིཏརོ. ཏེསུ ཨེཀེཀསྶ ཨེཀེཀཱ སལཱཀཡཱགུ སལཱཀབྷཏྟཾ པཀྑིཀབྷཏྟཾ ནིམནྟནབྷཏྟཾ ཨུཔོསཐིཀབྷཏྟཾ ཨཱགནྟུཀབྷཏྟཾ སངྒྷབྷཏྟཾ ཝསྶཱཝཱསིཀཾ ཨཧོསི. ཏེཔི སབྦེཝ ཨནུཛཱཏཔུཏྟཱ ནཱམ ཨཧེསུཾ. ཨིཏི ཙུདྡསནྣཾ པུཏྟཱནཾ བྷརིཡཱཡ ཨུཔཱསཀསྶཱཏི སོལ༹ས སལཱཀཡཱགུཨཱདཱིནི པཝཏྟནྟི. ཨིཏི སོ སཔུཏྟདཱརོ སཱིལཝཱ ཀལྱཱཎདྷམྨོ དཱནསཾཝིབྷཱགརཏོ ཨཧོསི. ཨཐསྶ ཨཔརབྷཱགེ རོགོ ཨུཔྤཛྫི, ཨཱཡུསངྑཱརོ པརིཧཱཡི. སོ དྷམྨཾ སོཏུཀཱམོ ‘‘ཨཊྛ ཝཱ མེ སོལ༹ས ཝཱ བྷིཀྑཱུ པེསེཐཱ’’ཏི སཏྠུ སནྟིཀཾ པཧིཎི. སཏྠཱ པེསེསི. ཏེ གནྟྭཱ ཏསྶ མཉྩཾ པརིཝཱརེཏྭཱ པཉྙཏྟེསུ ཨཱསནེསུ ནིསིནྣཱ. ‘‘བྷནྟེ, ཨཡྻཱནཾ མེ དསྶནཾ དུལླབྷཾ བྷཝིསྶཏི, དུབྦལོམྷི, ཨེཀཾ མེ སུཏྟཾ སཛ྄ཛྷཱཡཐཱ’’ཏི ཝུཏྟེ ‘‘ཀཏརཾ སུཏྟཾ སོཏུཀཱམོ ཨུཔཱསཀཱ’’ཏི? ‘‘སབྦབུདྡྷཱནཾ ཨཝིཛཧིཏཾ སཏིཔཊྛཱནསུཏྟ’’ནྟི ཝུཏྟེ – ‘‘ཨེཀཱཡནོ ཨཡཾ, བྷིཀྑཝེ, མགྒོ སཏྟཱནཾ ཝིསུདྡྷིཡཱ’’ཏི (དཱི. ནི. ༢.༣༧༣; མ. ནི. ༡.༡༠༦) སུཏྟནྟཾ པཊྛཔེསུཾ. ཏསྨིཾ ཁཎེ ཚཧི དེཝལོཀེཧི སབྦཱལངྐཱརཔཊིམཎྜིཏཱ སཧསྶསིནྡྷཝཡུཏྟཱ དིཡཌྜྷཡོཛནསཏིཀཱ ཚ རཐཱ ཨཱགམིཾསུ. ཏེསུ ཋིཏཱ དེཝཏཱ ‘‘ཨམྷཱཀཾ དེཝལོཀཾ ནེསྶཱམ, ཨམྷཱཀཾ དེཝལོཀཾ ནེསྶཱམ, ཨམྦྷོ མཏྟིཀབྷཱཛནཾ བྷིནྡིཏྭཱ སུཝཎྞབྷཱཛནཾ གཎྷནྟོ ཝིཡ ཨམྷཱཀཾ དེཝལོཀེ ཨབྷིརམིཏུཾ ཨིདྷ ནིབྦཏྟཱཧི, ཨམྷཱཀཾ དེཝལོཀེ ཨབྷིརམིཏུཾ ཨིདྷ ནིབྦཏྟཱཧཱི’’ཏི ཝདིཾསུ. ཨུཔཱསཀོ དྷམྨསྶཝནནྟརཱཡཾ ཨནིཙྪནྟོ – ‘‘ཨཱགམེཐ ཨཱགམེཐཱ’’ཏི ཨཱཧ. བྷིཀྑཱུ ‘‘ཨམྷེ ཝཱརེཏཱི’’ཏི སཉྙཱཡ ཏུཎྷཱི ཨཧེསུཾ.

ཨཐསྶ པུཏྟདྷཱིཏརོ ‘‘ཨམྷཱཀཾ པིཏཱ པུབྦེ དྷམྨསྶཝནེན ཨཏིཏྟོ ཨཧོསི, ཨིདཱནི པན བྷིཀྑཱུ པཀྐོསཱཔེཏྭཱ སཛ྄ཛྷཱཡཾ ཀཱརེཏྭཱ སཡམེཝ ཝཱརེཏི, མརཎསྶ ཨབྷཱཡནཀསཏྟོ ནཱམ ནཏྠཱི’’ཏི ཝིརཝིཾསུ. བྷིཀྑཱུ ‘‘ཨིདཱནི ཨནོཀཱསོ’’ཏི ཨུཊྛཱཡཱསནཱ པཀྐམིཾསུ. ཨུཔཱསཀོ ཐོཀཾ ཝཱིཏིནཱམེཏྭཱ སཏིཾ པཊིལབྷིཏྭཱ པུཏྟེ པུཙྪི – ‘‘ཀསྨཱ ཀནྡཐཱ’’ཏི? ‘‘ཏཱཏ, ཏུམྷེ བྷིཀྑཱུ པཀྐོསཱཔེཏྭཱ དྷམྨཾ སུཎནྟཱ སཡམེཝ ཝཱརཡིཏྠ, ཨཐ མཡཾ ‘མརཎསྶ ཨབྷཱཡནཀསཏྟོ ནཱམ ནཏྠཱི’ཏི ཀནྡིམྷཱ’’ཏི. ‘‘ཨཡྻཱ པན ཀུཧི’’ནྟི? ‘‘‘ཨནོཀཱསོ’ཏི ཨུཊྛཱཡཱསནཱ པཀྐནྟཱ, ཏཱཏཱ’’ཏི. ‘‘ནཱཧཾ, ཨཡྻེཧི སདྡྷིཾ ཀཐེམཱི’’ཏི ཝུཏྟེ ‘‘ཨཐ ཀེན སདྡྷིཾ ཀཐེཐཱ’’ཏི. ‘‘ཚཧི དེཝལོཀེཧི དེཝཏཱ ཚ རཐེ ཨལངྐརིཏྭཱ ཨཱདཱཡ ཨཱཀཱསེ ཋཏྭཱ ‘ཨམྷཱཧི དེཝལོཀེ ཨབྷིརམ, ཨམྷཱཀཾ དེཝལོཀེ ཨབྷིརམཱ’ཏི སདྡཾ ཀརོནྟི, ཏཱཧི སདྡྷིཾ ཀཐེམཱི’’ཏི. ‘‘ཀུཧིཾ, ཏཱཏ, རཐཱ, ན མཡཾ པསྶཱམཱ’’ཏི? ‘‘ཨཏྠི པན མཡ྄ཧཾ གནྠིཏཱནི པུཔྥཱནཱི’’ཏི? ‘‘ཨཏྠི, ཏཱཏཱ’’ཏི. ‘‘ཀཏརོ དེཝལོཀོ རམཎཱིཡོ’’ཏི? ‘‘སབྦབོདྷིསཏྟཱནཾ བུདྡྷམཱཏཱཔིཏཱུནཉྩ ཝསིཏཊྛཱནཾ ཏུསིཏབྷཝནཾ རམཎཱིཡཾ, ཏཱཏཱ’’ཏི. ‘‘ཏེན ཧི ‘ཏུསིཏབྷཝནཏོ ཨཱགཏརཐེ ལགྒཏཱུ’ཏི པུཔྥདཱམཾ ཁིཔཐཱ’’ཏི. ཏེ ཁིཔིཾསུ. ཏཾ རཐདྷུརེ ལགྒིཏྭཱ ཨཱཀཱསེ ཨོལམྦི. མཧཱཛནོ ཏདེཝ པསྶཏི, རཐཾ ན པསྶཏི. ཨུཔཱསཀོ ‘‘པསྶཐེཏཾ པུཔྥདཱམ’’ནྟི ཝཏྭཱ, ‘‘ཨཱམ, པསྶཱམཱ’’ཏི ཝུཏྟེ – ‘‘ཨེཏཾ ཏུསིཏབྷཝནཏོ ཨཱགཏརཐེ ཨོལམྦཏི, ཨཧཾ ཏུསིཏབྷཝནཾ གཙྪཱམི, ཏུམྷེ མཱ ཙིནྟཡིཏྠ, མམ སནྟིཀེ ནིབྦཏྟིཏུཀཱམཱ ཧུཏྭཱ མཡཱ ཀཏནིཡཱམེནེཝ པུཉྙཱནི ཀརོཐཱ’’ཏི ཝཏྭཱ ཀཱལཾ ཀཏྭཱ རཐེ པཏིཊྛཱསི.

ཏཱཝདེཝསྶ ཏིགཱཝུཏཔྤམཱཎོ སཊྛིསཀཊབྷཱརཱལངྐཱརཔཊིམཎྜིཏོ ཨཏྟབྷཱཝོ ནིབྦཏྟི, ཨཙྪརཱསཧསྶཾ པརིཝཱརེསི, པཉྩཝཱིསཏིཡོཛནིཀཾ ཀནཀཝིམཱནཾ པཱཏུརཧོསི. ཏེཔི བྷིཀྑཱུ ཝིཧཱརཾ ཨནུཔྤཏྟེ སཏྠཱ པུཙྪི – ‘‘སུཏཱ, བྷིཀྑཝེ, ཨུཔཱསཀེན དྷམྨདེསནཱ’’ཏི? ‘‘ཨཱམ, བྷནྟེ, ཨནྟརཱཡེཝ པན ‘ཨཱགམེཐཱ’ཏི ཝཱརེསི. ཨཐསྶ པུཏྟདྷཱིཏརོ ཀནྡིཾསུ. མཡཾ ‘ཨིདཱནི ཨནོཀཱསོ’ཏི ཨུཊྛཱཡཱསནཱ ནིཀྑནྟཱ’’ཏི. ‘‘ན སོ, བྷིཀྑཝེ, ཏུམྷེཧི སདྡྷིཾ ཀཐེསི, ཚཧི དེཝལོཀེཧི དེཝཏཱ ཚ རཐེ ཨལངྐརིཏྭཱ ཨཱཧརིཏྭཱ ཏཾ ཨུཔཱསཀཾ པཀྐོསིཾསུ. སོ དྷམྨདེསནཱཡ ཨནྟརཱཡཾ ཨནིཙྪནྟོ ཏཱཧི སདྡྷིཾ ཀཐེསཱི’’ཏི. ‘‘ཨེཝཾ, བྷནྟེ’’ཏི. ‘‘ཨེཝཾ, བྷིཀྑཝེ’’ཏི. ‘‘ཨིདཱནི ཀུཧིཾ ནིབྦཏྟོ’’ཏི? ‘‘ཏུསིཏབྷཝནེ, བྷིཀྑཝེ’’ཏི. ‘‘བྷནྟེ, ཨིདཱནི ཨིདྷ ཉཱཏིམཛ྄ཛྷེ མོདམཱནོ ཝིཙརིཏྭཱ ཨིདཱནེཝ གནྟྭཱ པུན མོདནཊྛཱནེཡེཝ ནིབྦཏྟོ’’ཏི. ‘‘ཨཱམ, བྷིཀྑཝེ, ཨཔྤམཏྟཱ ཧི གཧཊྛཱ ཝཱ པབྦཛིཏཱ ཝཱ སབྦཏྠ མོདནྟིཡེཝཱ’’ཏི ཝཏྭཱ ཨིམཾ གཱཐམཱཧ –

༡༦.

‘‘ཨིདྷ མོདཏི པེཙྩ མོདཏི,

ཀཏཔུཉྙོ ཨུབྷཡཏྠ མོདཏི;

སོ མོདཏི སོ པམོདཏི,

དིསྭཱ ཀམྨཝིསུདྡྷིམཏྟནོ’’ཏི.

ཏཏྠ ཀཏཔུཉྙོཏི ནཱནཔྤཀཱརསྶ ཀུསལསྶ ཀཱརཀོ པུགྒལོ ‘‘ཨཀཏཾ ཝཏ མེ པཱཔཾ, ཀཏཾ མེ ཀལྱཱཎ’’ནྟི ཨིདྷ ཀམྨམོདནེན, པེཙྩ ཝིཔཱཀམོདནེན མོདཏི. ཨེཝཾ ཨུབྷཡཏྠ མོདཏི ནཱམ. ཀམྨཝིསུདྡྷིནྟི དྷམྨིཀཨུཔཱསཀོཔི ཨཏྟནོ ཀམྨཝིསུདྡྷིཾ པུཉྙཀམྨསམྤཏྟིཾ དིསྭཱ ཀཱལཀིརིཡཏོ པུབྦེ ཨིདྷལོཀེཔི མོདཏི, ཀཱལཾ ཀཏྭཱ ཨིདཱནི པརལོཀེཔི ཨཏིམོདཏིཡེཝཱཏི.

གཱཐཱཔརིཡོསཱནེ བཧཱུ སོཏཱཔནྣཱདཡོ ཨཧེསུཾ མཧཱཛནསྶ སཱཏྠིཀཱ དྷམྨདེསནཱ ཛཱཏཱཏི.

དྷམྨིཀཨུཔཱསཀཝཏྠུ ཨེཀཱདསམཾ.

༡༢. དེཝདཏྟཝཏྠུ

ཨིདྷ ཏཔྤཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ དེཝདཏྟཾ ཨཱརབྦྷ ཀཐེསི.

དེཝདཏྟསྶ ཝཏྠུ པབྦཛིཏཀཱལཏོ པཊྛཱཡ ཡཱཝ པཐཝིཔྤཝེསནཱ དེཝདཏྟཾ ཨཱརབྦྷ བྷཱསིཏཱནི སབྦཱནི ཛཱཏཀཱནི ཝིཏྠཱརེཏྭཱ ཀཐིཏཾ. ཨཡཾ པནེཏྠ སངྑེཔོ – སཏྠརི ཨནུཔིཡཾ ནཱམ མལླཱནཾ ནིགམོ ཨཏྠི. ཏཾ ནིསྶཱཡ ཨནུཔིཡམྦཝནེ ཝིཧརནྟེཡེཝ ཏཐཱགཏསྶ ལཀྑཎཔཊིགྒཧཎདིཝསེཡེཝ ཨསཱིཏིསཧསྶེཧི ཉཱཏིཀུལེཧི ‘‘རཱཛཱ ཝཱ ཧོཏུ, བུདྡྷོ ཝཱ, ཁཏྟིཡཔརིཝཱརོཝ ཝིཙརིསྶཏཱི’’ཏི ཨསཱིཏིསཧསྶཔུཏྟཱ པཊིཉྙཱཏཱ. ཏེསུ ཡེབྷུཡྻེན པབྦཛིཏེསུ བྷདྡིཡཾ ནཱམ རཱཛཱནཾ, ཨནུརུདྡྷཾ, ཨཱནནྡཾ, བྷགུཾ, ཀིམིལཾ, དེཝདཏྟནྟི ཨིམེ ཚ སཀྱེ ཨཔབྦཛནྟེ དིསྭཱ, ‘‘མཡཾ ཨཏྟནོ པུཏྟེ པབྦཱཛེམ, ཨིམེ ཚ སཀྱཱ ན ཉཱཏཀཱ མཉྙེ, ཀསྨཱ ན པབྦཛནྟཱི’’ཏི? ཀཐཾ སམུཊྛཱཔེསུཾ. ཨཐ ཁོ མཧཱནཱམོ སཀྱོ ཨནུརུདྡྷཾ ཨུཔསངྐམིཏྭཱ, ‘‘ཏཱཏ, ཨམྷཱཀཾ ཀུལཱ པབྦཛིཏོ ནཏྠི, ཏྭཾ ཝཱ པབྦཛ, ཨཧཾ ཝཱ པབྦཛིསྶཱམཱི’’ཏི ཨཱཧ. སོ པན སུཁུམཱལོ ཧོཏི སམྤནྣབྷོགོ, ‘‘ནཏྠཱི’’ཏི ཝཙནམྤི ཏེན ན སུཏཔུབྦཾ. ཨེཀདིཝསཉྷི ཏེསུ ཚསུ ཁཏྟིཡེསུ གུལ༹ཀཱིལ༹ཾ ཀཱིལ༹ནྟེསུ ཨནུརུདྡྷོ པཱུཝེན པརཱཛིཏོ པཱུཝཏྠཱཡ པཧིཎི, ཨཐསྶ མཱཏཱ པཱུཝེ སཛྫེཏྭཱ པཧིཎི. ཏེ ཁཱདིཏྭཱ པུན ཀཱིལི༹ཾསུ. པུནཔྤུནཾ ཏསྶེཝ པརཱཛཡོ ཧོཏི. མཱཏཱ པནསྶ པཧིཏེ པཧིཏེ ཏིཀྑཏྟུཾ པཱུཝེ པཧིཎིཏྭཱ ཙཏུཏྠཝཱརེ ‘‘པཱུཝཱ ནཏྠཱི’’ཏི པཧིཎི. སོ ‘‘ནཏྠཱི’’ཏི ཝཙནསྶ ཨསུཀཔུབྦཏྟཱ ‘‘ཨེསཱཔེཀཱ པཱུཝཝིཀཏི བྷཝིསྶཏཱི’’ཏི མཉྙམཱནོ ‘‘ནཏྠིཔཱུཝཾ མེ ཨཱཧརཐཱ’’ཏི པེསེསི. མཱཏཱ པནསྶ ‘‘ནཏྠིཔཱུཝཾ ཀིར, ཨཡྻེ, དེཐཱ’’ཏི ཝུཏྟེ, ‘‘མམ པུཏྟེན ‘ནཏྠཱི’ཏི པདཾ ན སུཏཔུབྦཾ, ཨིམིནཱ པན ཨུཔཱཡེན ནཾ ཨེཏམཏྠཾ ཛཱནཱཔེསྶཱམཱི’’ཏི ཏུཙྪཾ སུཝཎྞཔཱཏིཾ ཨཉྙཱཡ སུཝཎྞཔཱཏིཡཱ པཊིཀུཛྫིཏྭཱ པེསེསི. ནགརཔརིགྒཱཧིཀཱ དེཝཏཱ ཙིནྟེསུཾ – ‘‘ཨནུརུདྡྷསཀྱེན ཨནྣབྷཱརཀཱལེ ཨཏྟནོ བྷཱགབྷཏྟཾ ཨུཔརིཊྛཔཙྩེཀབུདྡྷསྶ དཏྭཱ ‘‘‘ནཏྠཱི’ཏི མེ ཝཙནསྶ སཝནཾ མཱ ཧོཏུ, བྷོཛནུཔྤཏྟིཊྛཱནཛཱནནཾ མཱ ‘ཧོཏཱུ’ཏི པཏྠནཱ ཀཏཱ, སཙཱཡཾ ཏུཙྪཔཱཏིཾ པསྶིསྶཏི, དེཝསམཱགམཾ པཝིསིཏུཾ ན ལབྷིསྶཱམ, སཱིསམྤི ནོ སཏྟདྷཱ ཕལེཡྻཱ’’ཏི. ཨཐ ནཾ པཱཏིཾ དིབྦཔཱུཝེཧི པུཎྞཾ ཨཀཾསུ. ཀསྶཱ གུལ༹མཎྜལེ ཋཔེཏྭཱ ཨུགྒྷཱཊིཏམཏྟཱཡ པཱུཝགནྡྷོ སཀལནགརེ ཚཱདེཏྭཱ ཋིཏོ. པཱུཝཁཎྜཾ མུཁེ ཋཔིཏམཏྟམེཝ སཏྟརསཧརཎཱིསཧསྶཱནི ཨནུཕརི.

སོ ཙིནྟེསི – ‘‘ནཱཧཾ མཱཏུ པིཡོ, ཨེཏྟཀཾ མེ ཀཱལཾ ཨིམཾ ནཏྠིཔཱུཝཾ ནཱམ ན པཙི, ཨིཏོ པཊྛཱཡ ཨཉྙཾ པཱུཝཾ ནཱམ ན ཁཱདིསྶཱམཱི’’ཏི, སོ གེཧཾ གནྟྭཱཝ མཱཏརཾ པུཙྪི – ‘‘ཨམྨ, ཏུམྷཱཀཾ ཨཧཾ པིཡོ, ཨཔྤིཡོ’’ཏི? ‘‘ཏཱཏ, ཨེཀཀྑིནོ ཨཀྑི ཝིཡ ཙ ཧདཡཾ ཝིཡ ཙ ཨཏིཝིཡ པིཡོ མེ ཨཧོསཱི’’ཏི. ‘‘ཨཐ ཀསྨཱ ཨེཏྟཀཾ ཀཱལཾ མཡ྄ཧཾ ནཏྠི པཱུཝཾ ན པཙིཏྠ, ཨམྨཱ’’ཏི? སཱ ཙཱུལཱུ༹པཊྛཱཀཾ པུཙྪི – ‘‘ཨཏྠི ཀིཉྩི པཱཏིཡཾ, ཏཱཏཱ’’ཏི? ‘‘པརིཔུཎྞཱ, ཨཡྻེ, པཱཏི པཱུཝེཧི, ཨེཝརཱུཔཱ པཱུཝཱ ནཱམ མེ ན དིཊྛཔུབྦཱ’’ཏི ཨཱརོཙེསི. སཱ ཙིནྟེསི – ‘‘མཡ྄ཧཾ པུཏྟོ པུཉྙཝཱ ཀཏཱབྷིནཱིཧཱརོ བྷཝིསྶཏི, དེཝཏཱཧི པཱཏིཾ པཱུརེཏྭཱ པཱུཝཱ པཧིཏཱ བྷཝིསྶནྟཱི’’ཏི. ‘‘ཨཐ ནཾ པུཏྟོ, ཨམྨ, ཨིཏོ པཊྛཱཡཱཧཾ ཨཉྙཾ པཱུཝཾ ནཱམ ན ཁཱདིསྶཱམི, ནཏྠིཔཱུཝམེཝ པཙེཡྻཱསཱི’’ཏི. སཱཔིསྶ ཏཏོ པཊྛཱཡ ‘‘པཱུཝཾ ཁཱདིཏུཀཱམོམྷཱི’’ཏི ཝུཏྟེ ཏུཙྪཔཱཏིམེཝ ཨཉྙཱཡ པཱཏིཡཱ པཊིཀུཙྪིཏྭཱ པེསེསི. ཡཱཝ ཨགཱརམཛ྄ཛྷེ ཝསི, ཏཱཝསྶ དེཝཏཱཝ པཱུཝེ པཧིཎིཾསུ.

སོ ཨེཏྟཀམྤི ཨཛཱནནྟོ པབྦཛྫཾ ནཱམ ཀིཾ ཛཱནིསྶཏི? ཏསྨཱ ‘‘ཀཱ ཨེསཱ པབྦཛྫཱ ནཱམཱ’’ཏི བྷཱཏརཾ པུཙྪིཏྭཱ ‘‘ཨོཧཱརིཏཀེསམསྶུནཱ ཀཱསཱཡནིཝཏྠེན ཀཊྛཏྠརཀེ ཝཱ བིདལམཉྩཀེ ཝཱ ནིཔཛྫིཏྭཱ པིཎྜཱཡ ཙརནྟེན ཝིཧརིཏབྦཾ. ཨེསཱ པབྦཛྫཱ ནཱམཱ’’ཏི ཝུཏྟེ, ‘‘བྷཱཏིཀ, ཨཧཾ སུཁུམཱལོ. ནཱཧཾ སཀྑིསྶཱམི པབྦཛིཏུ’’ནྟི ཨཱཧ. ‘‘ཏེན ཧི, ཏཱཏ, ཀམྨནྟཾ ཨུགྒཧེཏྭཱ གྷརཱཝཱསཾ ཝས. ན ཧི སཀྐཱ ཨམྷེསུ ཨེཀེན ཨཔབྦཛིཏུ’’ནྟི. ཨཐ ནཾ ‘‘ཀོ ཨེས ཀམྨནྟོ ནཱམཱ’’ཏི པུཙྪི. ‘‘བྷཏྟུཊྛཱནཊྛཱནམྤི ཨཛཱནནྟོ ཀུལཔུཏྟོ ཀམྨནྟཾ ནཱམ ཀིཾ ཛཱནིསྶཏཱི’’ཏི? ཨེཀདིཝསཉྷི ཏིཎྞཾ ཁཏྟིཡཱནཾ ཀཐཱ ཨུདཔཱདི – ‘‘བྷཏྟཾ ནཱམ ཀུཧིཾ ཨུཊྛཧཏཱི’’ཏི? ཀིམིལོ ཨཱཧ – ‘‘ཀོཊྛེ ཨུཊྛཧཏཱི’’ཏི. ཨཐ ནཾ བྷདྡིཡོ ‘‘ཏྭཾ བྷཏྟསྶ ཨུཊྛཱནཊྛཱནཾ ན ཛཱནཱསི, བྷཏྟཾ ནཱམ ཨུཀྑལིཡཾ ཨུཊྛཧཏཱི’’ཏི ཨཱཧ. ཨནུརུདྡྷོ ‘‘ཏུམྷེ དྭེཔི ན ཛཱནཱཐ, བྷཏྟཾ ནཱམ རཏནམཀུལཱ༹ཡ སུཝཎྞཔཱཏིཡཾ ཨུཊྛཧཏཱི’’ཏི ཨཱཧ.

ཏེསུ ཀིར ཨེཀདིཝསཾ ཀིམིལོ ཀོཊྛཏོ ཝཱིཧཱི ཨོཏཱརིཡམཱནེ དིསྭཱ, ‘‘ཨེཏེ ཀོཊྛེཡེཝ ཛཱཏཱ’’ཏི སཉྙཱི ཨཧོསི. བྷདྡིཡོ ཨེཀདིཝསཾ ཨུཀྑལིཏོ བྷཏྟཾ ཝཌྜྷིཡམཱནཾ དིསྭཱ ‘‘ཨུཀྑལིཡཉྙེཝ ཨུཔྤནྣ’’ནྟི སཉྙཱི ཨཧོསི. ཨནུརུདྡྷེན པན ནེཝ ཝཱིཧཱི ཀོཊྚེནྟཱ, ན བྷཏྟཾ པཙནྟཱ, ན ཝཌྜྷེནྟཱ དིཊྛཔུབྦཱ, ཝཌྜྷེཏྭཱ པན པུརཏོ ཋཔིཏམེཝ པསྶཏི. སོ བྷུཉྫིཏུཀཱམཀཱལེ ‘‘བྷཏྟཾ པཱཏིཡཾ ཨུཊྛཧཏཱི’’ཏི སཉྙམཀཱསི. ཨེཝཾ ཏཡོཔི ཏེ བྷཏྟུཊྛཱནཊྛཱནཾ ན ཛཱནནྟི. ཏེནཱཡཾ ‘‘ཀོ ཨེས ཀམྨནྟོ ནཱམཱ’’ཏི པུཙྪིཏྭཱ, ‘‘པཋམཾ ཁེཏྟཾ ཀསཱཔེཏབྦ’’ནྟིཨཱདིཀཾ སཾཝཙྪརེ སཾཝཙྪརེ ཀཏྟབྦཾ ཀིཙྩཾ སུཏྭཱ, ‘‘ཀདཱ ཀམྨནྟཱནཾ ཨནྟོ པཉྙཱཡིསྶཏི, ཀདཱ མཡཾ ཨཔྤོསྶུཀྐཱ བྷོགེ བྷུཉྫིསྶཱམཱ’’ཏི ཝཏྭཱ ཀམྨནྟཱནཾ ཨཔརིཡནྟཏཱཡ ཨཀྑཱཏཱཡ ‘‘ཏེན ཧི ཏྭཉྙེཝ གྷརཱཝཱསཾ ཝས, ན མཡ྄ཧཾ ཨེཏེནཏྠོ’’ཏི མཱཏརཾ ཨུཔསངྐམིཏྭཱ, ‘‘ཨནུཛཱནཱཧི མཾ, ཨམྨ, པབྦཛིསྶཱམཱི’’ཏི ཝཏྭཱ ཏཱཡ ནཱནཔྤཀཱརེཧི ཏིཀྑཏྟུཾ པཊིཀྑིཔིཏྭཱ, ‘‘སཙེ ཏེ སཧཱཡཀོ བྷདྡིཡརཱཛཱ པབྦཛིསྶཏི, ཏེན སདྡྷིཾ པབྦཛཱཧཱི’’ཏི ཝུཏྟེ ཏཾ ཨུཔསངྐམིཏྭཱ, ‘‘མམ ཁོ, སམྨ, པབྦཛྫཱ ཏཝ པཊིབདྡྷཱ’’ཏི ཝཏྭཱ ཏཾ ནཱནཔྤཀཱརེཧི སཉྙཱཔེཏྭཱ སཏྟམེ དིཝསེ ཨཏྟནཱ སདྡྷིཾ པབྦཛནཏྠཱཡ པཊིཉྙཾ གཎྷི.

ཏཏོ བྷདྡིཡོ སཀྱརཱཛཱ ཨནུརུདྡྷོ ཨཱནནྡོ བྷགུ ཀིམིལོ དེཝདཏྟོཏི ཨིམེ ཚ ཁཏྟིཡཱ ཨུཔཱལིཀཔྤཀསཏྟམཱ དེཝཱ ཝིཡ དིབྦསམྤཏྟིཾ སཏྟཱཧཾ སམྤཏྟིཾ ཨནུབྷཝིཏྭཱ ཨུཡྻཱནཾ གཙྪནྟཱ ཝིཡ ཙཏུརངྒིནིཡཱ སེནཱཡ ནིཀྑམིཏྭཱ པརཝིསཡཾ པཏྭཱ རཱཛཱཎཱཡ སེནཾ ནིཝཏྟཱཔེཏྭཱ པརཝིསཡཾ ཨོཀྐམིཾསུ. ཏཏྠ ཚ ཁཏྟིཡཱ ཨཏྟནོ ཨཏྟནོ ཨཱབྷརཎཱནི ཨོམུཉྩིཏྭཱ བྷཎྜིཀཾ ཀཏྭཱ, ‘‘ཧནྡ བྷཎེ, ཨུཔཱལི, ནིཝཏྟསྶུ, ཨལཾ ཏེ ཨེཏྟཀཾ ཛཱིཝིཀཱཡཱ’’ཏི ཏསྶ ཨདཾསུ. སོ ཏེསཾ པཱདམཱུལེ པརིཝཏྟིཏྭཱ པརིདེཝིཏྭཱ ཏེསཾ ཨཱཎཾ ཨཏིཀྐམིཏུཾ ཨསཀྐོནྟོ ཨུཊྛཱཡ ཏཾ གཧེཏྭཱ ནིཝཏྟི. ཏེསཾ དྭིདྷཱ ཛཱཏཀཱལེ, ཝནཾ ཨཱརོདནཔྤཏྟཾ ཝིཡ པཐཝཱིཀམྤམཱནཱཀཱརཔྤཏྟཱ ཝིཡ ཨཧོསི. ཨུཔཱལི ཀཔྤཀོཔི ཐོཀཾ གནྟྭཱ ནིཝཏྟིཏྭཱ ‘‘ཙཎྜཱ ཁོ སཱཀིཡཱ, ‘ཨིམིནཱ ཀུམཱརཱ ནིཔྤཱཏིཏཱ’ཏི གྷཱཏེཡྻུམྤི མཾ. ཨིམེ ཧི ནཱམ སཀྱཀུམཱརཱ ཨེཝརཱུཔཾ སམྤཏྟིཾ པཧཱཡ ཨིམཱནི ཨནགྒྷཱནི ཨཱབྷརཎཱནི ཁེལ༹པིཎྜཾ ཝིཡ ཚཌྜེཏྭཱ པབྦཛིསྶནྟི, ཀིམངྒཾ པནཱཧ’’ནྟི བྷཎྜིཀཾ ཨོམུཉྩིཏྭཱ ཏཱནི ཨཱབྷརཎཱནི རུཀྑེ ལགྒེཏྭཱ ‘‘ཨཏྠིཀཱ གཎྷནྟཱུ’’ཏི ཝཏྭཱ ཏེསཾ སནྟིཀཾ གནྟྭཱ ཏེཧི ‘‘ཀསྨཱ ནིཝཏྟོསཱི’’ཏི པུཊྛོ ཏམཏྠཾ ཨཱརོཙེསི. ཨཐ ནཾ ཏེ ཨཱདཱཡ སཏྠུ སནྟིཀཾ གནྟྭཱ, ‘‘མཡཾ, བྷནྟེ, སཱཀིཡཱ ནཱམ མཱནནིསྶིཏཱ, ཨཡཾ ཨམྷཱཀཾ དཱིགྷརཏྟཾ པརིཙཱརཀོ, ཨིམཾ པཋམཏརཾ པབྦཱཛེཐ, མཡམསྶ ཨབྷིཝཱདནཱདཱིནི ཀརིསྶཱམ, ཨེཝཾ ནོ མཱནོ ནིམྨཱནཱཡིསྶཏཱི’’ཏི ཝཏྭཱ ཏཾ པཋམཏརཾ པབྦཱཛེཏྭཱ པཙྪཱ སཡཾ པབྦཛིཾསུ. ཏེསུ ཨཱཡསྨཱ བྷདྡིཡོ ཏེནེཝ ཨནྟརཝསྶེན ཏེཝིཛྫོ ཨཧོསི. ཨཱཡསྨཱ ཨནུརུདྡྷོ དིབྦཙཀྑུཀོ ཧུཏྭཱ པཙྪཱ མཧཱཝིཏཀྐསུཏྟཾ (ཨ. ནི. ༨.༣༠) སུཏྭཱ ཨརཧཏྟཾ པཱཔུཎི. ཨཱཡསྨཱ ཨཱནནྡོ སོཏཱཔཏྟིཕལེ པཏིཊྛཧི. བྷགུཏྠེརོ ཙ ཀིམིལཏྠེརོ ཙ ཨཔརབྷཱགེ ཝིཔསྶནཾ ཝཌྜྷེཏྭཱ ཨརཧཏྟཾ པཱཔུཎིཾསུ. དེཝདཏྟོ པོཐུཛྫནིཀཾ ཨིདྡྷིཾ པཏྟོ.

ཨཔརབྷཱགེ སཏྠརི ཀོསམྦིཡཾ ཝིཧརནྟེ སསཱཝཀསངྒྷསྶ ཏཐཱགཏསྶ མཧནྟོ ལཱབྷསཀྐཱརོ ནིབྦཏྟི. ཝཏྠབྷེསཛྫཱདིཧཏྠཱ མནུསྶཱ ཝིཧཱརཾ པཝིསིཏྭཱ ‘‘ཀུཧིཾ སཏྠཱ, ཀུཧིཾ སཱརིཔུཏྟཏྠེརོ, ཀུཧིཾ མཧཱམོགྒལླཱནཏྠེརོ, ཀུཧིཾ མཧཱཀསྶཔཏྠེརོ, ཀུཧིཾ བྷདྡིཡཏྠེརོ, ཀུཧིཾ ཨནུརུདྡྷཏྠེརོ, ཀུཧིཾ ཨཱནནྡཏྠེརོ, ཀུཧིཾ བྷགུཏྠེརོ, ཀུཧིཾ ཀིམིལཏྠེརོ’’ཏི ཨསཱིཏིམཧཱསཱཝཀཱནཾ ནིསིནྣཊྛཱནཾ ཨོལོཀེནྟཱ ཝིཙརནྟི. ‘‘དེཝདཏྟཏྠེརོ ཀུཧིཾ ནིསིནྣོ ཝཱ, ཋིཏོ ཝཱ’’ཏི པུཙྪནྟོ ནཱམ ནཏྠི. སོ ཙིནྟེསི – ‘‘ཨཧམྤི ཨེཏེཧི སདྡྷིཉྙེཝ པབྦཛིཏོ, ཨེཏེཔི ཁཏྟིཡཔབྦཛིཏཱ, ཨཧམྤི ཁཏྟིཡཔབྦཛིཏོ, ལཱབྷསཀྐཱརཧཏྠཱ མནུསྶཱ ཨེཏེཡེཝ པརིཡེསནྟི, མམ ནཱམཾ གཧེཏཱཔི ནཏྠི. ཀེན ནུ ཁོ སདྡྷིཾ ཨེཀཏོ ཧུཏྭཱ ཀཾ པསཱདེཏྭཱ མམ ལཱབྷསཀྐཱརཾ ནིབྦཏྟེཡྻ’’ནྟི. ཨཐསྶ ཨེཏདཧོསི – ‘‘ཨཡཾ ཁོ རཱཛཱ བིམྦིསཱརོ པཋམདསྶནེནེཝ ཨེཀཱདསཧི ནཧུཏེཧི སདྡྷིཾ སོཏཱཔཏྟིཕལེ པཏིཊྛིཏོ, ན སཀྐཱ ཨེཏེན སདྡྷིཾ ཨེཀཏོ བྷཝིཏུཾ, ཀོསལརཉྙཱཔི སདྡྷིཾ ན སཀྐཱ བྷཝིཏུཾ. ཨཡཾ ཁོ པན རཉྙོ པུཏྟོ ཨཛཱཏསཏྟུ ཀུམཱརོ ཀསྶཙི གུཎདོསེ ན ཛཱནཱཏི, ཨེཏེན སདྡྷིཾ ཨེཀཏོ བྷཝིསྶཱམཱི’’ཏི. སོ ཀོསམྦིཏོ རཱཛགཧཾ གནྟྭཱ ཀུམཱརཀཝཎྞཾ ཨབྷིནིམྨིནིཏྭཱ ཙཏྟཱརོ ཨཱསཱིཝིསེ ཙཏཱུསུ ཧཏྠཔཱདེསུ ཨེཀཾ གཱིཝཱཡ པིལནྡྷིཏྭཱ ཨེཀཾ སཱིསེ ཙུམྦཊཀཾ ཀཏྭཱ ཨེཀཾ ཨེཀཾསཾ ཀརིཏྭཱ ཨིམཱཡ ཨཧིམེཁལཱཡ ཨཱཀཱསཏོ ཨོརུཡ྄ཧ ཨཛཱཏསཏྟུསྶ ཨུཙྪངྒེ ནིསཱིདིཏྭཱ ཏེན བྷཱིཏེན ‘‘ཀོསི ཏྭ’’ནྟི ཝུཏྟེ ‘‘ཨཧཾ དེཝདཏྟོ’’ཏི ཝཏྭཱ ཏསྶ བྷཡཝིནོདནཏྠཾ ཏཾ ཨཏྟབྷཱཝཾ པཊིསཾཧརིཏྭཱ སངྒྷཱཊིཔཏྟཙཱིཝརདྷརོ པུརཏོ ཋཏྭཱ ཏཾ པསཱདེཏྭཱ ལཱབྷསཀྐཱརཾ ནིབྦཏྟེསི. སོ ལཱབྷསཀྐཱརཱབྷིབྷཱུཏོ ‘‘ཨཧཾ བྷིཀྑུསངྒྷཾ པརིཧརིསྶཱམཱི’’ཏི པཱཔཀཾ ཙིཏྟཾ ཨུཔྤཱདེཏྭཱ སཧ ཙིཏྟུཔྤཱདེན ཨིདྡྷིཏོ པརིཧཱཡིཏྭཱ སཏྠཱརཾ ཝེལུ༹ཝནཝིཧཱརེ སརཱཛིཀཱཡ པརིསཱཡ དྷམྨཾ དེསེནྟཾ ཝནྡིཏྭཱ ཨུཊྛཱཡཱསནཱ ཨཉྫལིཾ པགྒཡ྄ཧ – ‘‘བྷགཝཱ, བྷནྟེ, ཨེཏརཧི ཛིཎྞོ ཝུཌྜྷོ མཧལླཀོ, ཨཔྤོསྶུཀྐོ དིཊྛདྷམྨསུཁཝིཧཱརཾ ཨནུཡུཉྫཏུ, ཨཧཾ བྷིཀྑུསངྒྷཾ པརིཧརིསྶཱམི, ནིཡྻཱདེཐ མེ བྷིཀྑུསངྒྷ’’ནྟི ཝཏྭཱ སཏྠཱརཱ ཁེལཱ༹སཀཝཱདེན ཨཔསཱདེཏྭཱ པཊིཀྑིཏྟོ ཨནཏྟམནོ ཨིམཾ པཋམཾ ཏཐཱགཏེ ཨཱགྷཱཏཾ བནྡྷིཏྭཱ པཀྐཱམི.

ཨཐསྶ བྷགཝཱ རཱཛགཧེ པཀཱསནཱིཡཀམྨཾ ཀཱརེསི. སོ ‘‘པརིཙྩཏྟོ དཱནི ཨཧཾ སམཎེན གོཏམེན, ཨིདཱནིསྶ ཨནཏྠཾ ཀརིསྶཱམཱི’’ཏི ཨཛཱཏསཏྟུཾ ཨུཔསངྐམིཏྭཱ, ‘‘པུབྦེ ཁོ, ཀུམཱར, མནུསྶཱ དཱིགྷཱཡུཀཱ, ཨེཏརཧི ཨཔྤཱཡུཀཱ. ཋཱནཾ ཁོ པནེཏཾ ཝིཛྫཏི, ཡཾ ཏྭཾ ཀུམཱརོཝ སམཱནོ ཀཱལཾ ཀརེཡྻཱསི, ཏེན ཧི ཏྭཾ, ཀུམཱར, པིཏརཾ ཧནྟྭཱ རཱཛཱ ཧོཧི, ཨཧཾ བྷགཝནྟཾ ཧནྟྭཱ བུདྡྷོ བྷཝིསྶཱམཱི’’ཏི ཝཏྭཱ ཏསྨིཾ རཛྫེ པཏིཊྛིཏེ ཏཐཱགཏསྶ ཝདྷཱཡ པུརིསེ པཡོཛེཏྭཱ ཏེསུ སོཏཱཔཏྟིཕལཾ པཏྭཱ ནིཝཏྟེསུ སཡཾ གིཛ྄ཛྷཀཱུཊཔབྦཏཾ ཨབྷིརུཧིཏྭཱ, ‘‘ཨཧམེཝ སམཎཾ གོཏམཾ ཛཱིཝིཏཱ ཝོརོཔེསྶཱམཱི’’ཏི སིལཾ པཝིཛ྄ཛྷིཏྭཱ རུཧིརུཔྤཱདཀཀམྨཾ ཀཏྭཱ ཨིམིནཱཔི ཨུཔཱཡེན མཱརེཏུཾ ཨསཀྐོནྟོ པུན ནཱལཱ༹གིརིཾ ཝིསྶཛྫཱཔེསི. ཏསྨིཾ ཨཱགཙྪནྟེ ཨཱནནྡཏྠེརོ ཨཏྟནོ ཛཱིཝིཏཾ སཏྠུ པརིཙྩཛིཏྭཱ པུརཏོ ཨཊྛཱསི. སཏྠཱ ནཱགཾ དམེཏྭཱ ནགརཱ ནིཀྑམིཏྭཱ ཝིཧཱརཾ གནྟྭཱ ཨནེཀསཧསྶེཧི ཨུཔཱསཀེཧི ཨབྷིཧཊཾ མཧཱདཱནཾ པརིབྷུཉྫིཏྭཱ ཏསྨིཾ དིཝསེ སནྣིཔཏིཏཱནཾ ཨཊྛཱརསཀོཊིསངྑཱཏཱནཾ རཱཛགཧཝཱསཱིནཾ ཨནུཔུབྦིཾ ཀཐཾ ཀཐེཏྭཱ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡེ ཛཱཏེ ‘‘ཨཧོ ཨཱཡསྨཱ ཨཱནནྡོ མཧཱགུཎོ, ཏཐཱརཱུཔེ ནཱམ ཧཏྠིནཱགེ ཨཱགཙྪནྟེ ཨཏྟནོ ཛཱིཝིཏཾ པརིཙྩཛིཏྭཱ སཏྠུ པུརཏོཝ ཨཊྛཱསཱི’’ཏི ཐེརསྶ གུཎཀཐཾ སུཏྭཱ ‘‘ན, བྷིཀྑཝེ, ཨིདཱནེཝ, པུབྦེཔེས མམཏྠཱཡ ཛཱིཝིཏཾ པརིཙྩཛིཡེཝཱ’’ཏི ཝཏྭཱ བྷིཀྑཱུཧི ཡཱཙིཏོ ཙཱུལ༹ཧཾས (ཛཱ. ༡.༡༥.༡༣༣ ཨཱདཡོ; ༢.༢༡.༡ ཨཱདཡོ) – མཧཱཧཾས (ཛཱ. ༢.༢༡.༨༩ ཨཱདཡོ) – ཀཀྐཊཀཛཱཏཀཱནི (ཛཱ. ༡.༣.༤༩ ཨཱདཡོ) ཀཐེསི. དེཝདཏྟསྶཱཔི ཀམྨཾ ནེཝ པཱཀཊཾ, ཏཐཱ རཉྙོ མཱརཱཔིཏཏྟཱ, ན ཝདྷཀཱནཾ པཡོཛིཏཏྟཱ ན སིལཱཡ པཝིདྡྷཏྟཱ པཱཀཊཾ ཨཧོསི, ཡཐཱ ནཱལཱ༹གིརིཧཏྠིནོ ཝིསྶཛྫིཏཏྟཱ. ཏདཱ ཧི མཧཱཛནོ ‘‘རཱཛཱཔི དེཝདཏྟེནེཝ མཱརཱཔིཏོ, ཝདྷཀོཔི པཡོཛིཏོ, སིལཱཔི ཨཔཝིདྡྷཱ. ཨིདཱནི པན ཏེན ནཱལཱ༹གིརི ཝིསྶཛྫཱཔིཏོ, ཨེཝརཱུཔཾ ནཱམ པཱཔཀཾ གཧེཏྭཱ རཱཛཱ ཝིཙརཏཱི’’ཏི ཀོལཱཧལམཀཱསི.

རཱཛཱ མཧཱཛནསྶ ཀཐཾ སུཏྭཱ པཉྩ ཐཱལིཔཱཀསཏཱནི ནཱིཧརཱཔེཏྭཱ ན པུན ཏསྶཱུཔཊྛཱནཾ ཨགམཱསི, ནཱགརཱཔིསྶ ཀུལཾ ཨུཔགཏསྶ བྷིཀྑཱམཏྟམྤི ན ཨདཾསུ. སོ པརིཧཱིནལཱབྷསཀྐཱརོ ཀོཧཉྙེན ཛཱིཝིཏུཀཱམོ སཏྠཱརཾ ཨུཔསངྐམིཏྭཱ པཉྩ ཝཏྠཱུནི ཡཱཙིཏྭཱ བྷགཝཏོ ‘‘ཨལཾ, དེཝདཏྟ, ཡོ ཨིཙྪཏི, སོ ཨཱརཉྙཀོ ཧོཏཱུ’’ཏི པཊིཀྑིཏྟོ ཀསྶཱཝུསོ, ཝཙནཾ སོབྷནཾ, ཀིཾ ཏཐཱགཏསྶ ཨུདཱཧུ མམ, ཨཧཉྷི ཨུཀྐཊྛཝསེན ཨེཝཾ ཝདཱམི, ‘‘སཱདྷུ, བྷནྟེ, བྷིཀྑཱུ ཡཱཝཛཱིཝཾ ཨཱརཉྙཀཱ ཨསྶུ, པིཎྜཔཱཏིཀཱ, པཾསུཀཱུལིཀཱ, རུཀྑམཱུལིཀཱ, མཙྪམཾསཾ ན ཁཱདེཡྻུ’’ནྟི. ‘‘ཡོ དུཀྑཱ མུཙྩིཏུཀཱམོ, སོ མཡཱ སདྡྷིཾ ཨཱགཙྪཏཱུ’’ཏི ཝཏྭཱ པཀྐཱམི. ཏསྶ ཝཙནཾ སུཏྭཱ ཨེཀཙྩེ ནཝཀཔབྦཛིཏཱ མནྡབུདྡྷིནོ ‘‘ཀལྱཱཎཾ དེཝདཏྟོ ཨཱཧ, ཨེཏེན སདྡྷིཾ ཝིཙརིསྶཱམཱ’’ཏི ཏེན སདྡྷིཾ ཨེཀཏོ ཨཧེསུཾ. ཨིཏི སོ པཉྩསཏེཧི བྷིཀྑཱུཧི སདྡྷིཾ ཏེཧི པཉྩཧི ཝཏྠཱུཧི ལཱུཁཔྤསནྣཾ ཛནཾ སཉྙཱཔེནྟོ ཀུལེསུ ཝིཉྙཱཔེཏྭཱ ཝིཉྙཱཔེཏྭཱ བྷུཉྫནྟོ སངྒྷབྷེདཱཡ པརཀྐམི. སོ བྷགཝཏཱ, ‘‘སཙྩཾ ཀིར ཏྭཾ, དེཝདཏྟ, སངྒྷབྷེདཱཡ པརཀྐམསི ཙཀྐབྷེདཱཡཱ’’ཏི པུཊྛོ ‘‘སཙྩཾ བྷགཝཱ’’ཏི ཝཏྭཱ, ‘‘གརུཀོ ཁོ, དེཝདཏྟ, སངྒྷབྷེདོ’’ཏིཨཱདཱིཧི ཨོཝདིཏོཔི སཏྠུ ཝཙནཾ ཨནཱདིཡིཏྭཱ པཀྐནྟོ ཨཱཡསྨནྟཾ ཨཱནནྡཾ རཱཛགཧེ པིཎྜཱཡ ཙརནྟཾ དིསྭཱ, ‘‘ཨཛྫཏགྒེ དཱནཱཧཾ, ཨཱཝུསོ ཨཱནནྡ, ཨཉྙཏྲེཝ བྷགཝཏཱ, ཨཉྙཏྲ, བྷིཀྑུསངྒྷཱ ཨུཔོསཐཾ ཀརིསྶཱམི, སངྒྷཀམྨཾ ཀརིསྶཱམཱི’’ཏི ཨཱཧ. ཐེརོ ཏམཏྠཾ བྷགཝཏོ ཨཱརོཙེསི. ཏཾ ཝིདིཏྭཱ སཏྠཱ ཨུཔྤནྣདྷམྨསཾཝེགོ ཧུཏྭཱ, ‘‘དེཝདཏྟོ སདེཝཀསྶ ལོཀསྶ ཨནཏྠནིསྶིཏཾ ཨཏྟནོ ཨཝཱིཙིམྷི པཙྩནཀཀམྨཾ ཀརོཏཱི’’ཏི ཝིཏཀྐེཏྭཱ –

‘‘སུཀརཱནི ཨསཱདྷཱུནི, ཨཏྟནོ ཨཧིཏཱནི ཙ;

ཡཾ ཝེ ཧིཏཉྩ སཱདྷུཉྩ, ཏཾ ཝེ པརམདུཀྐར’’ནྟི. (དྷ. པ. ༡༦༣) –

ཨིམཾ གཱཐཾ ཝཏྭཱ པུན ཨིམཾ ཨུདཱནཾ ཨུདཱནེསི –

‘‘སུཀརཾ སཱདྷུནཱ སཱདྷུ, སཱདྷུ པཱཔེན དུཀྐརཾ;

པཱཔཾ པཱཔེན སུཀརཾ, པཱཔམརིཡེཧི དུཀྐར’’ནྟི. (ཨུདཱ. ༤༨; ཙཱུལ༹ཝ. ༣༤༣);

ཨཐ ཁོ དེཝདཏྟོ ཨུཔོསཐདིཝསེ ཨཏྟནོ པརིསཱཡ སདྡྷིཾ ཨེཀམནྟཾ ནིསཱིདིཏྭཱ, ‘‘ཡསྶིམཱནི པཉྩ ཝཏྠཱུནི ཁམནྟི, སོ སལཱཀཾ གཎྷཏཱུ’’ཏི ཝཏྭཱ པཉྩསཏེཧི ཝཛྫིཔུཏྟཀེཧི ནཝཀེཧི ཨཔྤཀཏཉྙཱུཧི སལཱཀཱཡ གཧིཏཱཡ སངྒྷཾ བྷིནྡིཏྭཱ ཏེ བྷིཀྑཱུ ཨཱདཱཡ གཡཱསཱིསཾ ཨགམཱསི. ཏསྶ ཏཏྠ གཏབྷཱཝཾ སུཏྭཱ སཏྠཱ ཏེསཾ བྷིཀྑཱུནཾ ཨཱནཡནཏྠཱཡ དྭེ ཨགྒསཱཝཀེ པེསེསི. ཏེ ཏཏྠ གནྟྭཱ ཨཱདེསནཱཔཱཊིཧཱརིཡཱནུསཱསནིཡཱ ཙེཝ ཨིདྡྷིཔཱཊིཧཱརིཡཱནུསཱསནིཡཱ ཙ ཨནུསཱསནྟཱ ཏེ ཨམཏཾ པཱཡེཏྭཱ ཨཱདཱཡ ཨཱཀཱསེན ཨཱགམིཾསུ. ཀོཀཱལིཀོཔི ཁོ ‘‘ཨུཊྛེཧི, ཨཱཝུསོ དེཝདཏྟ, ནཱིཏཱ ཏེ བྷིཀྑཱུ སཱརིཔུཏྟམོགྒལླཱནེཧི, ནནུ ཏྭཾ མཡཱ ཝུཏྟོ ‘མཱ, ཨཱཝུསོ, སཱརིཔུཏྟམོགྒལླཱནེ ཝིསྶཱསཱི’ཏི. པཱཔིཙྪཱ སཱརིཔུཏྟམོགྒལླཱནཱ, པཱཔིཀཱནཾ ཨིཙྪཱནཾ ཝསཾ གཏཱ’’ཏི ཝཏྭཱ ཛཎྞུཀེན ཧདཡམཛ྄ཛྷེ པཧརི, ཏསྶ ཏཏྠེཝ ཨུཎྷཾ ལོཧིཏཾ མུཁཏོ ཨུགྒཉྪི. ཨཱཡསྨནྟཾ པན སཱརིཔུཏྟཾ བྷིཀྑུསངྒྷཔརིཝུཏཾ ཨཱཀཱསེན ཨཱགཙྪནྟཾ དིསྭཱ བྷིཀྑཱུ ཨཱཧཾསུ – ‘‘བྷནྟེ, ཨཱཡསྨཱ སཱརིཔུཏྟོ གམནཀཱལེ ཨཏྟདུཏིཡོ གཏོ, ཨིདཱནི མཧཱཔརིཝཱརོ ཨཱགཙྪནྟོ སོབྷཏཱི’’ཏི. སཏྠཱ ‘‘ན, བྷིཀྑཝེ, ཨིདཱནེཝ སཱརིཔུཏྟོ སོབྷཏི, པུབྦེ ཏིརཙྪཱནཡོནིཡཾ ནིབྦཏྟཀཱལེཔི མཡ྄ཧཾ པུཏྟོ མམ སནྟིཀཾ ཨཱགཙྪནྟོ སོབྷིཡེཝཱ’’ཏི ཝཏྭཱ –

‘‘ཧོཏི སཱིལཝཏཾ ཨཏྠོ, པཊིསནྠཱརཝུཏྟིནཾ;

ལཀྑཎཾ པསྶ ཨཱཡནྟཾ, ཉཱཏིསངྒྷཔུརཀྑཏཾ;

ཨཐ པསྶསིམཾ ཀཱལ༹ཾ, སུཝིཧཱིནཾཝ ཉཱཏིབྷཱི’’ཏི. (ཛཱ. ༡.༡.༡༡) –

ཨིདཾ ཛཱཏཀཾ ཀཐེསི. པུན བྷིཀྑཱུཧི, ‘‘བྷནྟེ, དེཝདཏྟོ ཀིར དྭེ ཨགྒསཱཝཀེ ཨུབྷོསུ པསྶེསུ ནིསཱིདཱཔེཏྭཱ ‘བུདྡྷལཱིལཱ༹ཡ དྷམྨཾ དེསེསྶཱམཱི’ཏི ཏུམྷཱཀཾ ཨནུཀིརིཡཾ ཀརོཏཱི’’ཏི ཝུཏྟེ, ‘‘ན, བྷིཀྑཝེ, ཨིདཱནེཝ, པུབྦེཔེས མམ ཨནུཀིརིཡཾ ཀཱཏུཾ ཝཱཡམི, ན པན སཀྑཱི’’ཏི ཝཏྭཱ –

‘‘ཨཔི ཝཱིརཀ པསྶེསི, སཀུཎཾ མཉྫུབྷཱཎཀཾ;

མཡཱུརགཱིཝསངྐཱསཾ, པཏིཾ མཡ྄ཧཾ སཝིཊྛཀཾ.

‘‘ཨུདཀཐལཙརསྶ པཀྑིནོ,

ནིཙྩཾ ཨཱམཀམཙྪབྷོཛིནོ;

ཏསྶཱནུཀརཾ སཝིཊྛཀོ,

སེཝཱལེ པལིགུཎྛིཏོ མཏོ’’ཏི. (ཛཱ. ༡.༢.༡༠༧-༡༠༨) –

ཨཱདིནཱ ཛཱཏཀཾ ཝཏྭཱ ཨཔརཱཔརེསུཔི དིཝསེསུ ཏཐཱནུརཱུཔམེཝ ཀཐཾ ཨཱརབྦྷ –

‘‘ཨཙཱརི ཝཏཱཡཾ ཝིཏུདཾ ཝནཱནི,

ཀཊྛངྒརུཀྑེསུ ཨསཱརཀེསུ;

ཨཐཱསདཱ ཁདིརཾ ཛཱཏསཱརཾ,

ཡཏྠབྦྷིདཱ གརུལོ༹ ཨུཏྟམངྒ’’ནྟི. (ཛཱ. ༡.༢.༡༢༠);

‘‘ལསཱི ཙ ཏེ ནིཔྥལིཀཱ, མཏྠཀོ ཙ པདཱལིཏོ;

སབྦཱ ཏེ ཕཱསུཀཱ བྷགྒཱ, ཨཛྫ ཁོ ཏྭཾ ཝིརོཙསཱི’’ཏི. (ཛཱ. ༡.༡.༡༤༣) –

ཨེཝམཱདཱིནི ཛཱཏཀཱནི ཀཐེསི. པུན ‘‘ཨཀཏཉྙཱུ དེཝདཏྟོ’’ཏི ཀཐཾ ཨཱརབྦྷ –

‘‘ཨཀརམྷས ཏེ ཀིཙྩཾ, ཡཾ བལཾ ཨཧུཝམྷསེ;

མིགརཱཛ ནམོ ཏྱཏྠུ, ཨཔི ཀིཉྩི ལབྷཱམསེ.

‘‘མམ ལོཧིཏབྷཀྑསྶ, ནིཙྩཾ ལུདྡཱནི ཀུབྦཏོ;

དནྟནྟརགཏོ སནྟོ, ཏཾ བཧུཾ ཡམྤི ཛཱིཝསཱི’’ཏི. (ཛཱ. ༡.༤.༢༩-༣༠) –

ཨཱདཱིནི ཛཱཏཀཱནི ཀཐེསི. པུན ཝདྷཱཡ པརིསཀྐནམསྶ ཨཱརབྦྷ –

‘‘ཉཱཏམེཏཾ ཀུརུངྒསྶ, ཡཾ ཏྭཾ སེཔཎྞི སིཡྻསི;

ཨཉྙཾ སེཔཎྞི གཙྪཱམི, ན མེ ཏེ རུཙྩཏེ ཕལ’’ནྟི. (ཛཱ. ༡.༡.༢༡) –

ཨཱདཱིནི ཛཱཏཀཱནི ཀཐེསི. པུནདིཝསེ ‘‘ཨུབྷཏོ པརིཧཱིནོ དེཝདཏྟོ ལཱབྷསཀྐཱརཏོ ཙ སཱམཉྙཏོ ཙཱ’’ཏི ཀཐཱསུ པཝཏྟམཱནཱསུ ‘‘ན, བྷིཀྑཝེ, ཨིདཱནེཝ དེཝདཏྟོ པརིཧཱིནོ, པུབྦེཔེས པརིཧཱིནོཡེཝཱ’’ཏི ཝཏྭཱ –

‘‘ཨཀྑཱི བྷིནྣཱ པཊོ ནཊྛོ, སཁིགེཧེ ཙ བྷཎྜནཾ;

ཨུབྷཏོ པདུཊྛཱ ཀམྨནྟཱ, ཨུདཀམྷི ཐལམྷི ཙཱ’’ཏི. (ཛཱ. ༡.༡.༡༣༩) –

ཨཱདཱིནི ཛཱཏཀཱནི ཀཐེསི. ཨེཝཾ རཱཛགཧེ ཝིཧརནྟོཝ དེཝདཏྟཾ ཨཱརབྦྷ བཧཱུནི ཛཱཏཀཱནི ཀཐེཏྭཱ རཱཛགཧཏོ སཱཝཏྠིཾ གནྟྭཱ ཛེཏཝནེ ཝིཧཱརེ ཝཱསཾ ཀཔྤེསི. དེཝདཏྟོཔི ཁོ ནཝ མཱསེ གིལཱནོ པཙྪིམེ ཀཱལེ སཏྠཱརཾ དཊྛུཀཱམོ ཧུཏྭཱ ཨཏྟནོ སཱཝཀེ ཨཱཧ – ‘‘ཨཧཾ སཏྠཱརཾ དཊྛུཀཱམོ, ཏཾ མེ དསྶེཐཱ’’ཏི. ‘‘ཏྭཾ སམཏྠཀཱལེ སཏྠཱརཱ སདྡྷིཾ ཝེརཱི ཧུཏྭཱ ཨཙརི, ན མཡཾ ཏཏྠ ནེསྶཱམཱ’’ཏི ཝུཏྟེ, ‘‘མཱ མཾ ནཱསེཐ, མཡཱ སཏྠརི ཨཱགྷཱཏོ ཀཏོ, སཏྠུ པན མཡི ཀེསགྒམཏྟོཔི ཨཱགྷཱཏོ ནཏྠི’’. སོ ཧི བྷགཝཱ –

‘‘ཝདྷཀེ དེཝདཏྟམྷི, ཙོརེ ཨངྒུལིམཱལཀེ;

དྷནཔཱལེ རཱཧུལེ ཙ, སབྦཏྠ སམམཱནསོ’’ཏི. (ཨཔ. ཐེར ༡.༡.༥༨༥; མི. པ. ༦.༦.༥) –

‘‘དསྶེཐ མེ བྷགཝནྟ’’ནྟི པུནཔྤུནཾ ཡཱཙི. ཨཐ ནཾ ཏེ མཉྩཀེནཱདཱཡ ནིཀྑམིཾསུ. ཏསྶ ཨཱགམནཾ སུཏྭཱ བྷིཀྑཱུ སཏྠུ ཨཱརོཙེསུཾ – ‘‘བྷནྟེ, དེཝདཏྟོ ཀིར ཏུམྷཱཀཾ དསྶནཏྠཱཡ ཨཱགཙྪཏཱི’’ཏི. ‘‘ན, བྷིཀྑཝེ, སོ ཏེནཏྟབྷཱཝེན མཾ པསྶིཏུཾ ལབྷིསྶཏཱི’’ཏི. དེཝདཏྟོ ཀིར པཉྩནྣཾ ཝཏྠཱུནཾ ཨཱཡཱཙིཏཀཱལཏོ པཊྛཱཡ པུན བུདྡྷཾ དཊྛུཾ ན ལབྷཏི, ཨཡཾ དྷམྨཏཱ. ‘‘ཨསུཀཊྛཱནཉྩ ཨསུཀཊྛཱནཉྩ ཨཱགཏོ, བྷནྟེ’’ཏི. ‘‘ཡཾ ཨིཙྪཏི, ཏཾ ཀརོཏུ, ན སོ མཾ པསྶིཏུཾ ལབྷིསྶཏཱི’’ཏི. ‘‘བྷནྟེ, ཨིཏོ ཡོཛནམཏྟཾ ཨཱགཏོ, ཨཌྜྷཡོཛནཾ, གཱཝུཏཾ, ཛེཏཝནཔོཀྑརཎཱིསམཱིཔཾ ཨཱགཏོ, བྷནྟེ’’ཏི. ‘‘སཙེཔི ཨནྟོཛེཏཝནཾ པཝིསཏི, ནེཝ མཾ པསྶིཏུཾ ལབྷིསྶཏཱི’’ཏི. དེཝདཏྟཾ གཧེཏྭཱ ཨཱགཏཱ ཛེཏཝནཔོཀྑརཎཱིཏཱིརེ མཉྩཾ ཨོཏཱརེཏྭཱ པོཀྑརཎིཾ ནྷཱཡིཏུཾ ཨོཏརིཾསུ. དེཝདཏྟོཔི ཁོ མཉྩཏོ ཝུཊྛཱཡ ཨུབྷོ པཱདེ བྷཱུམིཡཾ ཋཔེཏྭཱ ནིསཱིདི. པཱདཱ པཐཝིཾ པཝིསིཾསུ. སོ ཨནུཀྐམེན ཡཱཝ གོཔྥཀཱ, ཡཱཝ ཛཎྞུཀཱ, ཡཱཝ ཀཊིཏོ, ཡཱཝ ཐནཏོ, ཡཱཝ གཱིཝཏོ པཝིསིཏྭཱ ཧནུཀཊྛིཀསྶ བྷཱུམིཡཾ པཝིཊྛཀཱལེ –

‘‘ཨིམེཧི ཨཊྛཱིཧི ཏམགྒཔུགྒལཾ,

དེཝཱཏིདེཝཾ ནརདམྨསཱརཐིཾ;

སམནྟཙཀྑུཾ སཏཔུཉྙལཀྑཎཾ,

པཱཎེཧི བུདྡྷཾ སརཎཾ ཨུཔེམཱི’’ཏི. (མི. པ. ༤.༡.༣) –

ཨིམཾ གཱཐམཱཧ. ཨིདཾ ཀིར ཋཱནཾ དིསྭཱ ཏཐཱགཏོ དེཝདཏྟཾ པབྦཱཛེསི. སཙེ ཧི ན སོ པབྦཛིསྶ, གིཧཱི ཧུཏྭཱ ཀམྨཉྩ བྷཱརིཡཾ ཨཀརིསྶ, ཨཱཡཏིཾ བྷཝནིསྶརཎཔཙྩཡཾ ཀཱཏུཾ ན སཀྑིསྶ, པབྦཛིཏྭཱ ཙ པན ཀིཉྩཱཔི ཀམྨཾ བྷཱརིཡཾ ཀརིསྶཏི, ཨཱཡཏིཾ བྷཝནིསྶརཎཔཙྩཡཾ ཀཱཏུཾ སཀྑིསྶཏཱིཏི ཏཾ སཏྠཱ པབྦཱཛེསི. སོ ཧི ཨིཏོ སཏསཧསྶཀཔྤམཏྠཀེ ཨཊྛིསྶརོ ནཱམ པཙྩེཀབུདྡྷོ བྷཝིསྶཏི, སོ པཐཝིཾ པཝིསིཏྭཱ ཨཝཱིཙིམྷི ནིབྦཏྟི. ནིཙྩལེ བུདྡྷེ ཨཔརཛ྄ཛྷབྷཱཝེན པན ནིཙྩལོཝ ཧུཏྭཱ པཙྩཏཱུཏི ཡོཛནསཏིཀེ ཨནྟོ ཨཝཱིཙིམྷི ཡོཛནསཏུབྦེདྷམེཝསྶ སརཱིརཾ ནིབྦཏྟི. སཱིསཾ ཡཱཝ ཀཎྞསཀྑལིཏོ ཨུཔརི ཨཡཀཔལླཾ པཱཝིསི, པཱདཱ ཡཱཝ གོཔྥཀཱ ཧེཊྛཱ ཨཡཔཐཝིཡཾ པཝིཊྛཱ, མཧཱཏཱལཀྑནྡྷཔརིམཱཎཾ ཨཡསཱུལཾ པཙྪིམབྷིཏྟིཏོ ནིཀྑམིཏྭཱ པིཊྛིམཛ྄ཛྷཾ བྷིནྡིཏྭཱ ཨུརེན ནིཀྑམིཏྭཱ པུརིམབྷིཏྟིཾ པཱཝིསི, ཨཔརཾ དཀྑིཎབྷིཏྟིཏོ ནིཀྑམིཏྭཱ དཀྑིཎཔསྶཾ བྷིནྡིཏྭཱ ཝཱམཔསྶེན ནིཀྑམིཏྭཱ ཨུཏྟརབྷིཏྟིཾ པཱཝིསི, ཨཔརཾ ཨུཔརི ཀཔལླཏོ ནིཀྑམིཏྭཱ མཏྠཀཾ བྷིནྡིཏྭཱ ཨདྷོབྷཱགེན ནིཀྑམིཏྭཱ ཨཡཔཐཝིཾ པཱཝིསི. ཨེཝཾ སོ ཏཏྠ ནིཙྩལོཝ པཙྩི.

བྷིཀྑཱུ ‘‘ཨེཏྟཀཾ ཋཱནཾ དེཝདཏྟོ ཨཱགཙྪནྟོ སཏྠཱརཾ དཊྛུཾ ཨལབྷིཏྭཱཝ པཐཝིཾ པཝིཊྛོ’’ཏི ཀཐཾ སམུཊྛཱཔེསུཾ. སཏྠཱ ‘‘ན, བྷིཀྑཝེ, དེཝདཏྟོ ཨིདཱནེཝ མཡི ཨཔརཛ྄ཛྷིཏྭཱ པཐཝིཾ པཱཝིསི, པུབྦེཔི པཝིཊྛོཡེཝཱ’’ཏི ཝཏྭཱ ཧཏྠིརཱཛཀཱལེ མགྒམཱུལ༹ྷཾ པུརིསཾ སམསྶཱསེཏྭཱ ཨཏྟནོ པིཊྛིཾ ཨཱརོཔེཏྭཱ ཁེམནྟཾ པཱཔིཏསྶ པུན ཏིཀྑཏྟུཾ ཨཱགནྟྭཱ ཨགྒཊྛཱནེ མཛ྄ཛྷིམཊྛཱནེ མཱུལེཧི ཨེཝཾ དནྟེ ཚིནྡིཏྭཱ ཏཏིཡཝཱརེ མཧཱཔུརིསསྶ ཙཀྑུཔཐཾ ཨཏིཀྐམནྟསྶ ཏསྶ པཐཝིཾ པཝིཊྛབྷཱཝཾ དཱིཔེཏུཾ –

‘‘ཨཀཏཉྙུསྶ པོསསྶ, ནིཙྩཾ ཝིཝརདསྶིནོ;

སབྦཾ ཙེ པཐཝིཾ དཛྫཱ, ནེཝ ནཾ ཨབྷིརཱདྷཡེ’’ཏི. (ཛཱ. ༡.༡.༧༢; ༡.༩.༡༠༧) –

ཨིདཾ ཛཱཏཀཾ ཀཐེཏྭཱ པུནཔི ཏཐེཝ ཀཐཱཡ སམུཊྛིཏཱཡ ཁནྟིཝཱདིབྷཱུཏེ ཨཏྟནི ཨཔརཛ྄ཛྷིཏྭཱ ཀལཱབུརཱཛབྷཱུཏསྶ ཏསྶ པཐཝིཾ པཝིཊྛབྷཱཝཾ དཱིཔེཏུཾ ཁནྟིཝཱདིཛཱཏཀཉྩ (ཛཱ. ༡.༤.༤༩ ཨཱདཡོ), ཙཱུལ༹དྷམྨཔཱལབྷཱུཏེ ཨཏྟནི ཨཔརཛ྄ཛྷིཏྭཱ མཧཱཔཏཱཔརཱཛབྷཱུཏསྶ ཏསྶ པཐཝིཾ པཝིཊྛབྷཱཝཾ དཱིཔེཏུཾ ཙཱུལ༹དྷམྨཔཱལཛཱཏཀཉྩ (ཛཱ. ༡.༥.༤༤ ཨཱདཡོ) ཀཐེསི.

པཐཝིཾ པཝིཊྛེ པན དེཝདཏྟེ མཧཱཛནོ ཧཊྛཏུཊྛོ དྷཛཔཊཱཀཀདལིཡོ ཨུསྶཱཔེཏྭཱ པུཎྞགྷཊེ ཋཔེཏྭཱ ‘‘ལཱབྷཱ ཝཏ ནོ’’ཏི མཧནྟཾ ཚཎཾ ཨནུབྷོཏི. ཏམཏྠཾ བྷགཝཏོ ཨཱརོཙེསུཾ. བྷགཝཱ ‘‘ན, བྷིཀྑཝེ, ཨིདཱནེཝ དེཝདཏྟེ མཏེ མཧཱཛནོ ཏུསྶཏི, པུབྦེཔི ཏུསྶིཡེཝཱ’’ཏི ཝཏྭཱ སབྦཛནསྶ ཨཔྤིཡེ ཙཎྜེ ཕརུསེ བཱརཱཎསིཡཾ པིངྒལརཉྙེ ནཱམ མཏེ མཧཱཛནསྶ ཏུཊྛབྷཱཝཾ དཱིཔེཏུཾ –

‘‘སབྦོ ཛནོ ཧིཾསིཏོ པིངྒལེན,

ཏསྨིཾ མཏེ པཙྩཡཱ ཝེདཡནྟི;

པིཡོ ནུ ཏེ ཨཱསི ཨཀཎྷནེཏྟོ,

ཀསྨཱ ཏུཝཾ རོདསི དྭཱརཔཱལ.

‘‘ན མེ པིཡོ ཨཱསི ཨཀཎྷནེཏྟོ,

བྷཱཡཱམི པཙྩཱགམནཱཡ ཏསྶ;

ཨིཏོ གཏོ ཧིཾསེཡྻ མཙྩུརཱཛཾ,

སོ ཧིཾསིཏོ ཨཱནེཡྻ པུན ཨིདྷཱ’’ཏི. (ཛཱ. ༡.༢.༡༧༩-༡༨༠) –

ཨིདཾ པིངྒལཛཱཏཀཾ ཀཐེསི. བྷིཀྑཱུ སཏྠཱརཾ པུཙྪིཾསུ – ‘‘ཨིདཱནི, བྷནྟེ, དེཝདཏྟོ ཀུཧིཾ ནིབྦཏྟོ’’ཏི? ‘‘ཨཝཱིཙིམཧཱནིརཡེ, བྷིཀྑཝེ’’ཏི. ‘‘བྷནྟེ, ཨིདྷ ཏཔྤནྟོ ཝིཙརིཏྭཱ པུན གནྟྭཱ ཏཔྤནཊྛཱནེཡེཝ ནིབྦཏྟོ’’ཏི. ‘‘ཨཱམ, བྷིཀྑཝེ, པབྦཛིཏཱ ཝཱ ཧོནྟུ གཧཊྛཱ ཝཱ, པམཱདཝིཧཱརིནོ ཨུབྷཡཏྠ ཏཔྤནྟིཡེཝཱ’’ཏི ཝཏྭཱ ཨིམཾ གཱཐམཱཧ –

༡༧.

‘‘ཨིདྷ ཏཔྤཏི པེཙྩ ཏཔྤཏི, པཱཔཀཱརཱི ཨུབྷཡཏྠ ཏཔྤཏི;

པཱཔཾ མེ ཀཏནྟི ཏཔྤཏི, བྷིཡྻོ ཏཔྤཏི དུགྒཏིཾ གཏོ’’ཏི.

ཏཏྠ ཨིདྷ ཏཔྤཏཱིཏི ཨིདྷ ཀམྨཏཔྤནེན དོམནསྶམཏྟེན ཏཔྤཏི. པེཙྩཱཏི པརལོཀེ པན ཝིཔཱཀཏཔྤནེན ཨཏིདཱརུཎེན ཨཔཱཡདུཀྑེན ཏཔྤཏི. པཱཔཀཱརཱིཏི ནཱནཔྤཀཱརསྶ པཱཔསྶ ཀཏྟཱ. ཨུབྷཡཏྠཱཏི ཨིམིནཱ ཝུཏྟཔྤཀཱརེན ཏཔྤནེན ཨུབྷཡཏྠ ཏཔྤཏི ནཱམ. པཱཔཾ མེཏི སོ ཧི ཀམྨཏཔྤནེན ཀཔྤནྟོ ‘‘པཱཔཾ མེ ཀཏ’’ནྟི ཏཔྤཏི. ཏཾ ཨཔྤམཏྟཀཾ ཏཔྤནཾ, ཝིཔཱཀཏཔྤནེན པན ཏཔྤནྟོ བྷིཡྻོ ཏཔྤཏི དུགྒཏིཾ གཏོ ཨཏིཕརུསེན ཏཔྤནེན ཨཏིཝིཡ ཏཔྤཏཱིཏི.

གཱཐཱཔརིཡོསཱནེ བཧཱུ སོཏཱཔནྣཱདཡོ ཨཧེསུཾ. དེསནཱ མཧཱཛནསྶ སཱཏྠིཀཱ ཛཱཏཱཏི.

དེཝདཏྟཝཏྠུ དྭཱདསམཾ.

༡༣. སུམནཱདེཝཱིཝཏྠུ

ཨིདྷ ནནྡཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སུམནཱདེཝིཾ ཨཱརབྦྷ ཀཐེསི.

སཱཝཏྠིཡཉྷི དེཝསིཀཾ ཨནཱཐཔིཎྜིཀསྶ གེཧེ དྭེ བྷིཀྑཱུསཧསྶཱནི བྷུཉྫནྟི, ཏཐཱ ཝིསཱཁཱཡ མཧཱཨུཔཱསིཀཱཡ. སཱཝཏྠིཡཾ ཡོ ཡོ དཱནཾ དཱཏུཀཱམོ ཧོཏི, སོ སོ ཏེསཾ ཨུབྷིནྣཾ ཨོཀཱསཾ ལབྷིཏྭཱཝ ཀརོཏི. ཀིཾ ཀཱརཎཱ? ‘‘ཏུམྷཱཀཾ དཱནགྒཾ ཨནཱཐཔིཎྜིཀོ ཝཱ ཝིསཱཁཱ ཝཱ ཨཱགཏཱ’’ཏི པུཙྪིཏྭཱ, ‘‘ནཱགཏཱ’’ཏི ཝུཏྟེ སཏསཧསྶཾ ཝིསྶཛྫེཏྭཱ ཀཏདཱནམྤི ‘‘ཀིཾ དཱནཾ ནཱམེཏ’’ནྟི གརཧནྟི. ཨུབྷོཔི ཧི ཏེ བྷིཀྑུསངྒྷསྶ རུཙིཉྩ ཨནུཙྪཝིཀཀིཙྩཱནི ཙ ཨཏིཝིཡ ཛཱནནྟི, ཏེསུ ཝིཙཱརེནྟེསུ བྷིཀྑཱུ ཙིཏྟརཱུཔཾ བྷུཉྫནྟི. ཏསྨཱ སབྦེ དཱནཾ དཱཏུཀཱམཱ ཏེ གཧེཏྭཱཝ གཙྪནྟི. ཨིཏི ཏེ ཨཏྟནོ ཨཏྟནོ གྷརེ བྷིཀྑཱུ པརིཝིསིཏུཾ ན ལབྷནྟི. ཏཏོ ཝིསཱཁཱ, ‘‘ཀོ ནུ ཁོ མམ ཋཱནེ ཋཏྭཱ བྷིཀྑུསངྒྷཾ པརིཝིསིསྶཏཱི’’ཏི ཨུཔདྷཱརེནྟཱི པུཏྟསྶ དྷཱིཏརཾ དིསྭཱ ཏཾ ཨཏྟནོ ཋཱནེ ཋཔེསི. སཱ ཏསྶཱ ནིཝེསནེ བྷིཀྑུསངྒྷཾ པརིཝིསཏི. ཨནཱཐཔིཎྜིཀོཔི མཧཱསུབྷདྡཾ ནཱམ ཛེཊྛདྷཱིཏརཾ ཋཔེསི. སཱ བྷིཀྑཱུནཾ ཝེཡྻཱཝཙྩཾ ཀརོནྟཱི དྷམྨཾ སུཎནྟཱི སོཏཱཔནྣཱ ཧུཏྭཱ པཏིཀུལཾ ཨགམཱསི. ཏཏོ ཙཱུལ༹སུབྷདྡཾ ཋཔེསི. སཱཔི ཏཐེཝ ཀརོནྟཱི སོཏཱཔནྣཱ ཧུཏྭཱ པཏིཀུལཾ གཏཱ. ཨཐ སུམནདེཝིཾ ནཱམ ཀནིཊྛདྷཱིཏརཾ ཋཔེསི. སཱ པན དྷམྨཾ སུཏྭཱ སཀདཱགཱམིཕལཾ པཏྭཱ ཀུམཱརིཀཱཝ ཧུཏྭཱ ཏཐཱརཱུཔེན ཨཕཱསུཀེན ཨཱཏུརཱ ཨཱཧཱརུཔཙྪེདཾ ཀཏྭཱ པིཏརཾ དཊྛུཀཱམཱ ཧུཏྭཱ པཀྐོསཱཔེསི. སོ ཨེཀསྨིཾ དཱནགྒེ ཏསྶཱ སཱསནཾ སུཏྭཱཝ ཨཱགནྟྭཱ, ‘‘ཀིཾ, ཨམྨ སུམནེ’’ཏི ཨཱཧ. སཱཔི ནཾ ཨཱཧ – ‘‘ཀིཾ, ཏཱཏ ཀནིཊྛབྷཱཏིཀཱ’’ཏི? ‘‘ཝིལཔསི ཨམྨཱ’’ཏི? ‘‘ན ཝིལཔཱམི, ཀནིཊྛབྷཱཏིཀཱ’’ཏི. ‘‘བྷཱཡསི, ཨམྨཱ’’ཏི? ‘‘ན བྷཱཡཱམི, ཀནིཊྛབྷཱཏིཀཱ’’ཏི. ཨེཏྟཀཾ ཝཏྭཱཡེཝ པན སཱ ཀཱལམཀཱསི. སོ སོཏཱཔནྣོཔི སམཱནོ སེཊྛིདྷཱིཏརི ཨུཔྤནྣསོཀཾ ཨདྷིཝཱསེཏུཾ ཨསཀྐོནྟོ དྷཱིཏུ སརཱིརཀིཙྩཾ ཀཱརེཏྭཱ རོདནྟོ སཏྠུ སནྟིཀཾ གནྟྭཱ, ‘‘ཀིཾ, གཧཔཏི, དུཀྑཱི དུམྨནོ ཨསྶུམུཁོ རོདམཱནོ ཨཱགཏོསཱི’’ཏི ཝུཏྟེ, ‘‘དྷཱིཏཱ མེ, བྷནྟེ, སུམནདེཝཱི ཀཱལཀཏཱ’’ཏི ཨཱཧ. ‘‘ཨཐ ཀསྨཱ སོཙསི, ནནུ སབྦེསཾ ཨེཀཾསིཀཾ མརཎ’’ནྟི? ‘‘ཛཱནཱམེཏཾ, བྷནྟེ, ཨེཝརཱུཔཱ ནཱམ མེ ཧིརིཨོཏྟཔྤསམྤནྣཱ དྷཱིཏཱ, སཱ མརཎཀཱལེ སཏིཾ པཙྩུཔཊྛཱཔེཏུཾ ཨསཀྐོནྟཱི ཝིལཔམཱནཱ མཏཱ, ཏེན མེ ཨནཔྤཀཾ དོམནསྶཾ ཨུཔྤཛྫཏཱི’’ཏི. ‘‘ཀིཾ པན ཏཱཡ ཀཐིཏཾ མཧཱསེཊྛཱི’’ཏི? ‘‘ཨཧཾ ཏཾ, བྷནྟེ, ‘ཨམྨ, སུམནེ’ཏི ཨཱམནྟེསིཾ. ཨཐ མཾ ཨཱཧ – ‘ཀིཾ, ཏཱཏ, ཀནིཊྛབྷཱཏིཀཱ’ཏི? ‘ཝིལཔསི, ཨམྨཱ’ཏི? ‘ན ཝིལཔཱམི, ཀནིཊྛབྷཱཏིཀཱ’ཏི. ‘བྷཱཡསི, ཨམྨཱ’ཏི? ‘ན བྷཱཡཱམི ཀནིཊྛབྷཱཏིཀཱ’ཏི. ཨེཏྟཀཾ ཝཏྭཱ ཀཱལམཀཱསཱི’’ཏི. ཨཐ ནཾ བྷགཝཱ ཨཱཧ – ‘‘ན ཏེ མཧཱསེཊྛི དྷཱིཏཱ ཝིལཔཏཱི’’ཏི. ‘‘ཨཐ ཀསྨཱ བྷནྟེ ཨེཝམཱཧཱ’’ཏི? ‘‘ཀནིཊྛཏྟཱཡེཝ. དྷཱིཏཱ ཧི ཏེ, གཧཔཏི, མགྒཕལེཧི ཏཡཱ མཧལླིཀཱ. ཏྭཉྷི སོཏཱཔནྣོ, དྷཱིཏཱ པན ཏེ སཀདཱགཱམིནཱི. སཱ མགྒཕལེཧི ཏཡཱ མཧལླིཀཏྟཱ ཏཾ ཨེཝམཱཧཱ’’ཏི. ‘‘ཨེཝཾ, བྷནྟེ’’ཏི? ‘‘ཨེཝཾ, གཧཔཏཱི’’ཏི. ‘‘ཨིདཱནི ཀུཧིཾ ནིབྦཏྟཱ, བྷནྟེ’’ཏི? ‘‘ཏུསིཏབྷཝནེ, གཧཔཏཱི’’ཏི. ‘‘བྷནྟེ, མམ དྷཱིཏཱ ཨིདྷ ཉཱཏཀཱནཾ ཨནྟརེ ནནྡམཱནཱ ཝིཙརིཏྭཱ ཨིཏོ གནྟྭཱཔི ནནྡནཊྛཱནེཡེཝ ནིབྦཏྟཱ’’ཏི. ཨཐ ནཾ སཏྠཱ ‘‘ཨཱམ, གཧཔཏི, ཨཔྤམཏྟཱ ནཱམ གཧཊྛཱ ཝཱ པབྦཛིཏཱ ཝཱ ཨིདྷ ལོཀེ ཙ པརལོཀེ ཙ ནནྡནྟིཡེཝཱ’’ཏི ཝཏྭཱ ཨིམཾ གཱཐམཱཧ –

༡༨.

‘‘ཨིདྷ ནནྡཏི པེཙྩ ནནྡཏི, ཀཏཔུཉྙོ ཨུབྷཡཏྠ ནནྡཏི;

པུཉྙཾ མེ ཀཏནྟི ནནྡཏི, བྷིཡྻོ ནནྡཏི སུགྒཏིཾ གཏོ’’ཏི.

ཏཏྠ ཨིདྷཱཏི ཨིདྷ ལོཀེ ཀམྨནནྡནེན ནནྡཏི. པེཙྩཱཏི པརལོཀེ ཝིཔཱཀནནྡནེན ནནྡཏི. ཀཏཔུཉྙོཏི ནཱནཔྤཀཱརསྶ པུཉྙསྶ ཀཏྟཱ. ཨུབྷཡཏྠཱཏི ཨིདྷ ‘‘ཀཏཾ མེ ཀུསལཾ, ཨཀཏཾ མེ པཱཔ’’ནྟི ནནྡཏི, པརཏྠ ཝིཔཱཀཾ ཨནུབྷཝནྟོ ནནྡཏི. པུཉྙཾ མེཏི ཨིདྷ ནནྡནྟོ པན ‘‘པུཉྙཾ མེ ཀཏ’’ནྟི སོམནསྶམཏྟེནེཝ ཀམྨནནྡནཾ ཨུཔཱདཱཡ ནནྡཏི. བྷིཡྻོཏི ཝིཔཱཀནནྡནེན པན སུགཏིཾ གཏོ སཏྟཔཉྙཱསཝསྶཀོཊིཡོ སཊྛིཝསྶསཏསཧསྶཱནི དིབྦསམྤཏྟིཾ ཨནུབྷཝནྟོ ཏུསིཏཔུརེ ཨཏིཝིཡ ནནྡཏཱིཏི.

གཱཐཱཔརིཡོསཱནེ བཧཱུ སོཏཱཔནྣཱདཡོ ཨཧེསུཾ. མཧཱཛནསྶ སཱཏྠིཀཱ དྷམྨདེསནཱ ཛཱཏཱཏི.

སུམནཱདེཝཱིཝཏྠུ ཏེརསམཾ.

༡༤. དྭེསཧཱཡཀབྷིཀྑུཝཏྠུ

བཧུམྤི ཙེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ དྭེ སཧཱཡཀེ ཨཱརབྦྷ ཀཐེསི.

སཱཝཏྠིཝཱསིནོ ཧི དྭེ ཀུལཔུཏྟཱ སཧཱཡཀཱ ཝིཧཱརཾ གནྟྭཱ སཏྠུ དྷམྨདེསནཾ སུཏྭཱ ཀཱམེ པཧཱཡ སཱསནེ ཨུརཾ དཏྭཱ པབྦཛིཏྭཱ པཉྩ ཝསྶཱནི ཨཱཙརིཡུཔཛ྄ཛྷཱཡཱནཾ སནྟིཀེ ཝསིཏྭཱ སཏྠཱརཾ ཨུཔསངྐམིཏྭཱ སཱསནེ དྷུརཾ པུཙྪིཏྭཱ ཝིཔསྶནཱདྷུརཉྩ གནྠདྷུརཉྩ ཝིཏྠཱརཏོ སུཏྭཱ ཨེཀོ ཏཱཝ ‘‘ཨཧཾ, བྷནྟེ, མཧལླཀཀཱལེ པབྦཛིཏོ ན སཀྑིསྶཱམི གནྠདྷུརཾ པཱུརེཏུཾ, ཝིཔསྶནཱདྷུརཾ པན པཱུརེསྶཱམཱི’’ཏི ཡཱཝ ཨརཧཏྟཱ ཝིཔསྶནཱདྷུརཾ ཀཐཱཔེཏྭཱ གྷཊེནྟོ ཝཱཡམནྟོ སཧ པཊིསམྦྷིདཱཧི ཨརཧཏྟཾ པཱཔུཎི. ཨིཏརོ པན ‘‘ཨཧཾ གནྠདྷུརཾ པཱུརེསྶཱམཱི’’ཏི ཨནུཀྐམེན ཏེཔིཊཀཾ བུདྡྷཝཙནཾ ཨུགྒཎྷིཏྭཱ གཏགཏཊྛཱནེ དྷམྨཾ ཀཐེཏི, སརབྷཉྙཾ བྷཎཏི, པཉྩནྣཾ བྷིཀྑུསཏཱནཾ དྷམྨཾ ཝཱཙེནྟོ ཝིཙརཏི. ཨཊྛཱརསནྣཾ མཧཱགཎཱནཾ ཨཱཙརིཡོ ཨཧོསི. བྷིཀྑཱུ སཏྠུ སནྟིཀེ ཀམྨཊྛཱནཾ གཧེཏྭཱ ཨིཏརསྶ ཐེརསྶ ཝསནཊྛཱནཾ གནྟྭཱ ཏསྶ ཨོཝཱདེ ཋཏྭཱ ཨརཧཏྟཾ པཏྭཱ ཐེརཾ ཝནྡིཏྭཱ, ‘‘སཏྠཱརཾ དཊྛུཀཱམམྷཱ’’ཏི ཝདནྟི. ཐེརོ ‘‘གཙྪཐ, ཨཱཝུསོ, མམ ཝཙནེན སཏྠཱརཾ ཝནྡིཏྭཱ ཨསཱིཏི མཧཱཐེརེ ཝནྡཐ, སཧཱཡཀཏྠེརམྤི མེ ‘ཨམྷཱཀཾ ཨཱཙརིཡོ ཏུམྷེ ཝནྡཏཱི’ཏི ཝདཐཱ’’ཏི པེསེཏི. ཏེ བྷིཀྑཱུ ཝིཧཱརཾ གནྟྭཱ སཏྠཱརཉྩེཝ ཨསཱིཏི མཧཱཐེརེ ཙ ཝནྡིཏྭཱ གནྠིཀཏྠེརསྶ སནྟིཀཾ གནྟྭཱ, ‘‘བྷནྟེ, ཨམྷཱཀཾ ཨཱཙརིཡོ ཏུམྷེ ཝནྡཏཱི’’ཏི ཝདནྟི. ཨིཏརེན ཙ ‘‘ཀོ ནཱམ སོ’’ཏི ཝུཏྟེ, ‘‘ཏུམྷཱཀཾ སཧཱཡཀབྷིཀྑུ, བྷནྟེ’’ཏི ཝདནྟི. ཨེཝཾ ཐེརེ པུནཔྤུནཾ སཱསནཾ པཧིཎནྟེ སོ བྷིཀྑུ ཐོཀཾ ཀཱལཾ སཧིཏྭཱ ཨཔརབྷཱགེ སཧིཏུཾ ཨསཀྐོནྟོ ‘‘ཨམྷཱཀཾ ཨཱཙརིཡོ ཏུམྷེ ཝནྡཏཱི’’ཏི ཝུཏྟེ, ‘‘ཀོ ཨེསོ’’ཏི ཝཏྭཱ ‘‘ཏུམྷཱཀཾ སཧཱཡཀབྷིཀྑཱུ’’ཏི ཝུཏྟེ, ‘‘ཀིཾ པན ཏུམྷེཧི ཏསྶ སནྟིཀེ ཨུགྒཧིཏཾ, ཀིཾ དཱིགྷནིཀཱཡཱདཱིསུ ཨཉྙཏརོ ནིཀཱཡོ, ཀིཾ ཏཱིསུ པིཊཀེསུ ཨེཀཾ པིཊཀ’’ནྟི ཝཏྭཱ ‘‘ཙཏུཔྤདིཀམྤི གཱཐཾ ན ཛཱནཱཏི, པཾསུཀཱུལཾ གཧེཏྭཱ པབྦཛིཏཀཱལེཡེཝ ཨརཉྙཾ པཝིཊྛོ, བཧཱུ ཝཏ ཨནྟེཝཱསིཀེ ལབྷི, ཏསྶ ཨཱགཏཀཱལེ མཡཱ པཉྷཾ པུཙྪིཏུཾ ཝཊྚཏཱི’’ཏི ཙིནྟེསི.

ཨཐ ཨཔརབྷཱགེ ཐེརོ སཏྠཱརཾ དཊྛུཾ ཨཱགཏོ. སཧཱཡཀསྶ ཐེརསྶ སནྟིཀེ པཏྟཙཱིཝརཾ ཋཔེཏྭཱ གནྟྭཱ སཏྠཱརཉྩེཝ ཨསཱིཏི མཧཱཐེརེ ཙ ཝནྡིཏྭཱ སཧཱཡཀསྶ ཝསནཊྛཱནཾ པཙྩཱགམི. ཨཐསྶ སོ ཝཏྟཾ ཀཱརེཏྭཱ སམཔྤམཱཎཾ ཨཱསནཾ གཧེཏྭཱ, ‘‘པཉྷཾ པུཙྪིསྶཱམཱི’’ཏི ནིསཱིདི. ཏསྨིཾ ཁཎེ སཏྠཱ ‘‘ཨེས ཨེཝརཱུཔཾ མམ པུཏྟཾ ཝིཧེཋེཏྭཱ ནིརཡེ ནིབྦཏྟེཡྻཱ’’ཏི ཏསྨིཾ ཨནུཀམྤཱཡ ཝིཧཱརཙཱརིཀཾ ཙརནྟོ ཝིཡ ཏེསཾ ནིསིནྣཊྛཱནཾ གནྟྭཱ པཉྙཏྟཝརབུདྡྷཱསནེ ནིསཱིདི. ཏཏྠ ཏཏྠ ནིསཱིདནྟཱ ཧི བྷིཀྑཱུ བུདྡྷཱསནཾ པཉྙཱཔེཏྭཱཝ ནིསཱིདནྟི. ཏེན སཏྠཱ པཀཏིཔཉྙཏྟེཡེཝ ཨཱསནེ ནིསཱིདི. ནིསཛྫ ཁོ པན གནྠིཀབྷིཀྑུཾ པཋམཛ྄ཛྷཱནེ པཉྷཾ པུཙྪིཏྭཱ ཏསྨིཾ ཨཀཐིཏེ དུཏིཡཛ྄ཛྷཱནཾ ཨཱདིཾ ཀཏྭཱ ཨཊྛསུཔི སམཱཔཏྟཱིསུ རཱུཔཱརཱུཔེསུ ཙ པཉྷཾ པུཙྪི. གནྠིཀཏྠེརོ ཨེཀམྤི ཀཐེཏུཾ ནཱསཀྑི. ཨིཏརོ ཏཾ སབྦཾ ཀཐེསི. ཨཐ ནཾ སོཏཱཔཏྟིམགྒེ པཉྷཾ པུཙྪི. གནྠིཀཏྠེརོ ཀཐེཏུཾ ནཱསཀྑི. ཏཏོ ཁཱིཎཱསཝཏྠེརཾ པུཙྪི. ཐེརོ ཀཐེསི. སཏྠཱ ‘‘སཱདྷུ སཱདྷུ, བྷིཀྑཱུ’’ཏི ཨབྷིནནྡིཏྭཱ སེསམགྒེསུཔི པཊིཔཱཊིཡཱ པཉྷཾ པུཙྪི. གནྠིཀོ ཨེཀམྤི ཀཐེཏུཾ ནཱསཀྑི, ཁཱིཎཱསཝོ པུཙྪིཏཾ པུཙྪིཏཾ ཀཐེསི. སཏྠཱ ཙཏཱུསུཔི ཋཱནེསུ ཏསྶ སཱདྷུཀཱརཾ ཨདཱསི. ཏཾ སུཏྭཱ བྷུམྨདེཝེ ཨཱདིཾ ཀཏྭཱ ཡཱཝ བྲཧྨལོཀཱ སབྦཱ དེཝཏཱ ཙེཝ ནཱགསུཔཎྞཱ ཙ སཱདྷུཀཱརཾ ཨདཾསུ. ཏཾ སཱདྷུཀཱརཾ སུཏྭཱ ཏསྶ ཨནྟེཝཱསིཀཱ ཙེཝ སདྡྷིཝིཧཱརིནོ ཙ སཏྠཱརཾ ཨུཛ྄ཛྷཱཡིཾསུ – ‘‘ཀིཾ ནཱམེཏཾ སཏྠཱརཱ ཀཏཾ, ཀིཉྩི ཨཛཱནནྟསྶ མཧལླཀཏྠེརསྶ ཙཏཱུསུ ཋཱནེསུ སཱདྷུཀཱརཾ ཨདཱསི, ཨམྷཱཀཾ པནཱཙརིཡསྶ སབྦཔརིཡཏྟིདྷརསྶ པཉྩནྣཾ བྷིཀྑུསཏཱནཾ པཱམོཀྑསྶ པསཾསཱམཏྟམྤི ན ཀརཱི’’ཏི. ཨཐ ནེ སཏྠཱ ‘‘ཀིཾ ནཱམེཏཾ, བྷིཀྑཝེ, ཀཐེཐཱ’’ཏི པུཙྪིཏྭཱ ཏསྨིཾ ཨཏྠེ ཨཱརོཙིཏེ, ‘‘བྷིཀྑཝེ, ཏུམྷཱཀཾ ཨཱཙརིཡོ མམ སཱསནེ བྷཏིཡཱ གཱཝོ རཀྑཎསདིསོ, མཡ྄ཧཾ པན པུཏྟོ ཡཐཱརུཙིཡཱ པཉྩ གོརསེ པརིབྷུཉྫནཀསཱམིསདིསོ’’ཏི ཝཏྭཱ ཨིམཱ གཱཐཱ ཨབྷཱསི –

༡༩.

‘‘བཧུམྤི ཙེ སཾཧིཏ བྷཱསམཱནོ,

ན ཏཀྐརོ ཧོཏི ནརོ པམཏྟོ;

གོཔོཝ གཱཝོ གཎཡཾ པརེསཾ,

ན བྷཱགཝཱ སཱམཉྙསྶ ཧོཏི.

༢༠.

‘‘ཨཔྤམྤི ཙེ སཾཧིཏ བྷཱསམཱནོ,

དྷམྨསྶ ཧོཏི ཨནུདྷམྨཙཱརཱི;

རཱགཉྩ དོསཉྩ པཧཱཡ མོཧཾ,

སམྨཔྤཛཱནོ སུཝིམུཏྟཙིཏྟོ.

‘‘ཨནུཔཱདིཡཱནོ ཨིདྷ ཝཱ ཧུརཾ ཝཱ,

ས བྷཱགཝཱ སཱམཉྙསྶ ཧོཏཱི’’ཏི.

ཏཏྠ སཾཧིཏནྟི ཏེཔིཊཀསྶ བུདྡྷཝཙནསྶེཏཾ ནཱམཾ. ཏཾ ཨཱཙརིཡེ ཨུཔསངྐམིཏྭཱ ཨུགྒཎྷིཏྭཱ བཧུམྤི པརེསཾ བྷཱསམཱནོ ཝཱཙེནྟོ ཏཾ དྷམྨཾ སུཏྭཱ ཡཾ ཀཱརཀེན པུགྒལེན ཀཏྟབྦཾ, ཏཀྐརོ ན ཧོཏི. ཀུཀྐུཊསྶ པཀྑཔཧརཎམཏྟམྤི ཨནིཙྩཱདིཝསེན ཡོནིསོམནསིཀཱརཾ ནཔྤཝཏྟེཏི. ཨེསོ ཡཐཱ ནཱམ དིཝསཾ བྷཏིཡཱ གཱཝོ རཀྑནྟོ གོཔོ པཱཏོཝ ནིརཝསེསཾ སམྤཊིཙྪིཏྭཱ སཱཡཾ གཧེཏྭཱ སཱམིཀཱནཾ ནིཡྻཱདེཏྭཱ དིཝསབྷཏིམཏྟཾ གཎྷཱཏི, ཡཐཱརུཙིཡཱ པན པཉྩ གོརསེ པརིབྷུཉྫིཏུཾ ན ལབྷཏི, ཨེཝམེཝ ཀེཝལཾ ཨནྟེཝཱསིཀཱནཾ སནྟིཀཱ ཝཏྟཔཊིཝཏྟཀརཎམཏྟསྶ བྷཱགཱི ཧོཏི, སཱམཉྙསྶ པན བྷཱགཱི ན ཧོཏི. ཡཐཱ པན གོཔཱལཀེན ནིཡྻཱདིཏཱནཾ གུནྣཾ གོརསཾ སཱམིཀཱཝ པརིབྷུཉྫནྟི, ཏཐཱ ཏེན ཀཐིཏཾ དྷམྨཾ སུཏྭཱ ཀཱརཀཔུགྒལཱ ཡཐཱནུསིཊྛཾ པཊིཔཛྫིཏྭཱ ཀེཙི པཋམཛ྄ཛྷཱནཱདཱིནི པཱཔུཎནྟི, ཀེཙི ཝིཔསྶནཾ ཝཌྜྷེཏྭཱ མགྒཕལཱནི པཱཔུཎནྟི, གོཎསཱམིཀཱ གོརསསྶེཝ སཱམཉྙསྶ བྷཱགིནོ ཧོནྟི.

ཨིཏི སཏྠཱ སཱིལསམྤནྣསྶ བཧུསྶུཏསྶ པམཱདཝིཧཱརིནོ ཨནིཙྩཱདིཝསེན ཡོནིསོམནསིཀཱརེ པམཏྟསྶ བྷིཀྑུནོ ཝསེན པཋམཾ གཱཐཾ ཀཐེསི, ན དུསྶཱིལསྶ. དུཏིཡགཱཐཱ པན ཨཔྤསྶུཏསྶཔི ཡོནིསོམནསིཀཱརེ ཀམྨཾ ཀརོནྟསྶ ཀཱརཀཔུགྒལསྶ ཝསེན ཀཐིཏཱ.

ཏཏྠ ཨཔྤམྤཱི ཙེཏི ཐོཀཾ ཨེཀཝགྒདྭིཝགྒམཏྟམྤི. དྷམྨསྶ ཧོཏི ཨནུདྷམྨཙཱརཱིཏི ཨཏྠམཉྙཱཡ དྷམྨམཉྙཱཡ ནཝལོཀུཏྟརདྷམྨསྶ ཨནུརཱུཔཾ དྷམྨཾ པུབྦབྷཱགཔཊིཔདཱསངྑཱཏཾ ཙཏུཔཱརིསུདྡྷིསཱིལདྷུཏངྒཨསུབྷཀམྨཊྛཱནཱདིབྷེདཾ ཙརནྟོ ཨནུདྷམྨཙཱརཱི ཧོཏི. སོ ‘‘ཨཛྫ ཨཛྫེཝཱ’’ཏི པཊིཝེདྷཾ ཨཱཀངྑནྟོ ཝིཙརཏི. སོ ཨིམཱཡ སམྨཱཔཊིཔཏྟིཡཱ རཱགཉྩ དོསཉྩ པཧཱཡ མོཧཾ སམྨཱ ཧེཏུནཱ ནཡེན པརིཛཱནིཏབྦེ དྷམྨེ པརིཛཱནནྟོ ཏདངྒཝིཀྑམྦྷནསམུཙྪེདཔཊིཔྤསྶདྡྷིནིསྶརཎཝིམུཏྟཱིནཾ ཝསེན སུཝིམུཏྟཙིཏྟོ, ཨནུཔཱདིཡཱནོ ཨིདྷ ཝཱ ཧུརཾ ཝཱཏི ཨིདྷལོཀཔརལོཀཔརིཡཱཔནྣཱ ཝཱ ཨཛ྄ཛྷཏྟིཀབཱཧིརཱ ཝཱ ཁནྡྷཱཡཏནདྷཱཏུཡོ ཙཏཱུཧི ཨུཔཱདཱནེཧི ཨནུཔཱདིཡནྟོ མཧཱཁཱིཎཱསཝོ མགྒསངྑཱཏསྶ སཱམཉྙསྶ ཝསེན ཨཱགཏསྶ ཕལསཱམཉྙསྶ ཙེཝ པཉྩཨསེཀྑདྷམྨཀྑནྡྷསྶ ཙ བྷཱགཝཱ ཧོཏཱིཏི རཏནཀཱུཊེན ཝིཡ ཨགཱརསྶ ཨརཧཏྟེན དེསནཱཡ ཀཱུཊཾ གཎྷཱིཏི.

གཱཐཱཔརིཡོསཱནེ བཧཱུ སོཏཱཔནྣཱདཡོ ཨཧེསུཾ. དེསནཱ མཧཱཛནསྶ སཱཏྠིཀཱ ཛཱཏཱཏི.

དྭེསཧཱཡཀབྷིཀྑུཝཏྠུ ཙུདྡསམཾ.

ཡམཀཝགྒཝཎྞནཱ ནིཊྛིཏཱ.

པཋམོ ཝགྒོ.

༢. ཨཔྤམཱདཝགྒོ

༡. སཱམཱཝཏཱིཝཏྠུ

ཨཔྤམཱདོ ཨམཏཔདནྟི ཨིམཾ དྷམྨདེསནཾ སཏྠཱ ཀོསམྦིཾ ཨུཔནིསྶཱཡ གྷོསིཏཱརཱམེ ཝིཧརནྟོ སཱམཱཝཏིཔྤམུཁཱནཾ པཉྩནྣཾ ཨིཏྠིསཏཱནཾ, མཱགཎྜིཡཔྤམུཁཱནཉྩ ཨེཏིསྶཱ པཉྩནྣཾ ཉཱཏིསཏཱནཾ མརཎབྱསནཾ ཨཱརབྦྷ ཀཐེསི.

ཏཏྲཱཡཾ ཨནུཔུབྦིཀཐཱ – ཨཏཱིཏེ ཨལླཀཔྤརཊྛེ ཨལླཀཔྤརཱཛཱ ནཱམ, ཝེཋདཱིཔཀརཊྛེ ཝེཋདཱིཔཀརཱཛཱ ནཱམཱཏི ཨིམེ དྭེ དཧརཀཱལཏོ པཊྛཱཡ སཧཱཡཀཱ ཧུཏྭཱ ཨེཀཱཙརིཡཀུལེ སིཔྤཾ ཨུགྒཎྷིཏྭཱ ཨཏྟནོ ཨཏྟནོ པིཏཱུནཾ ཨཙྩཡེན ཚཏྟཾ ཨུསྶཱཔེཏྭཱ ཨཱཡཱམེན དསདསཡོཛནིཀེ རཊྛེ རཱཛཱནོ ཨཧེསུཾ. ཏེ ཀཱལེན ཀཱལཾ སམཱགནྟྭཱ ཨེཀཏོ ཏིཊྛནྟཱ ནིསཱིདནྟཱ ནིཔཛྫནྟཱ མཧཱཛནཾ ཛཱཡམཱནཉྩ ཛཱིཡམཱནཉྩ མཱིཡམཱནཉྩ དིསྭཱ ‘‘པརལོཀཾ གཙྪནྟཾ ཨནུགཙྪནྟོ ནཱམ ནཏྠི, ཨནྟམསོ ཨཏྟནོ སརཱིརམྤི ནཱནུགཙྪཏི, སབྦཾ པཧཱཡ གནྟབྦཾ, ཀིཾ ནོ གྷརཱཝཱསེན, པབྦཛིསྶཱམཱ’’ཏི མནྟེཏྭཱ རཛྫཱནི པུཏྟདཱརཱནཾ ནིཡྻཱདེཏྭཱ ཨིསིཔབྦཛྫཾ པབྦཛིཏྭཱ ཧིམཝནྟཔྤདེསེ ཝསནྟཱ མནྟཡིཾསུ – ‘‘མཡཾ རཛྫཾ པཧཱཡ པབྦཛིཏཱ, ན ཛཱིཝིཏུཾ ཨསཀྐོནྟཱ. ཏེ མཡཾ ཨེཀཊྛཱནེ ཝསནྟཱ ཨཔབྦཛིཏསདིསཱཡེཝ ཧོམ, ཏསྨཱ ཝིསུཾ ཝསིསྶཱམ. ཏྭཾ ཨེཏསྨིཾ པབྦཏེ ཝས, ཨཧཾ ཨིམསྨིཾ པབྦཏེ ཝསིསྶཱམི. ཨནྭཌྜྷམཱསཾ པན ཨུཔོསཐདིཝསེ ཨེཀཏོ བྷཝིསྶཱམཱ’’ཏི. ཨཐ ཁོ ནེསཾ ཨེཏདཧོསི – ‘‘ཨེཝམྤི ནོ གཎསངྒཎིཀཱཝ བྷཝིསྶཏི, ཏྭཾ པན ཏཝ པབྦཏེ ཨགྒིཾ ཛཱལེཡྻཱསི, ཨཧཾ མམ པབྦཏེ ཨགྒིཾ ཛཱལེསྶཱམི, ཏཱཡ སཉྙཱཡ ཨཏྠིབྷཱཝཾ ཛཱནིསྶཱམཱ’’ཏི. ཏེ ཏཐཱ ཀརིཾསུ.

ཨཐ ཨཔརབྷཱགེ ཝེཋདཱིཔཀཏཱཔསོ ཀཱལཾ ཀཏྭཱ མཧེསཀྑོ དེཝརཱཛཱ ཧུཏྭཱ ནིབྦཏྟོ. ཏཏོ ཨཌྜྷམཱསེ སམྤཏྟེ ཨགྒིཾ ཨདིསྭཱཝ ཨིཏརོ ‘‘སཧཱཡཀོ མེ ཀཱལཀཏོ’’ཏི ཨཉྙཱསི. ཨིཏརོཔི ནིབྦཏྟཀྑཎེཡེཝ ཨཏྟནོ དེཝསིརིཾ ཨོལོཀེཏྭཱ ཀམྨཾ ཨུཔདྷཱརེནྟོ ནིཀྑམནཏོ པཊྛཱཡ ཨཏྟནོ ཏཔཙརིཡཾ དིསྭཱ ‘‘གནྟྭཱ མམ སཧཱཡཀཾ པསྶིསྶཱམཱི’’ཏི ཏཾ ཨཏྟབྷཱཝཾ ཝིཛཧིཏྭཱ མགྒིཀཔུརིསོ ཝིཡ ཏསྶ སནྟིཀཾ གནྟྭཱ ཝནྡིཏྭཱ ཨེཀམནྟཾ ཨཊྛཱསི. ཨཐ ནཾ སོ ཨཱཧ – ‘‘ཀུཏོ ཨཱགཏོསཱི’’ཏི? ‘‘མགྒིཀཔུརིསོ ཨཧཾ, བྷནྟེ, དཱུརཏོཝ ཨཱགཏོམྷི. ཀིཾ པན, བྷནྟེ, ཨཡྻོ ཨིམསྨིཾ ཋཱནེ ཨེཀཀོཝ ཝསཏི, ཨཉྙོཔི ཀོཙི ཨཏྠཱི’’ཏི? ‘‘ཨཏྠི མེ ཨེཀོ སཧཱཡཀོ’’ཏི. ‘‘ཀུཧིཾ སོ’’ཏི? ‘‘ཨེཏསྨིཾ པབྦཏེ ཝསཏི, ཨུཔོསཐདིཝསེ པན ཨགྒིཾ ན ཛཱལེཏི, མཏོ ནཱུན བྷཝིསྶཏཱི’’ཏི. ‘‘ཨེཝཾ, བྷནྟེ’’ཏི? ‘‘ཨེཝམཱཝུསོ’’ཏི. ‘‘ཨཧཾ སོ, བྷནྟེ’’ཏི. ‘‘ཀུཧིཾ ནིབྦཏྟོསཱི’’ཏི? ‘‘དེཝལོཀེ མཧེསཀྑོ དེཝརཱཛཱ ཧུཏྭཱ ནིབྦཏྟོསྨི, བྷནྟེ, ‘ཨཡྻཾ པསྶིསྶཱམཱི’ཏི པུན ཨཱགཏོམྷི. ཨཔི ནུ ཁོ ཨཡྻཱནཾ ཨིམསྨིཾ ཋཱནེ ཝསནྟཱནཾ ཀོཙི ཨུཔདྡཝོ ཨཏྠཱི’’ཏི? ‘‘ཨཱམ, ཨཱཝུསོ, ཧཏྠཱི ནིསྶཱཡ ཀིལམཱམཱི’’ཏི. ‘‘ཀིཾ ཝོ, བྷནྟེ, ཧཏྠཱི ཀརོནྟཱི’’ཏི? ‘‘སམྨཛྫནཊྛཱནེ ལཎྜཾ པཱཏེནྟི, པཱདེཧི བྷཱུམིཡཾ པཧརིཏྭཱ པཾསུཾ ཨུདྡྷརནྟི, སྭཱཧཾ ལཎྜཾ ཚཌྜེནྟོ པཾསུཾ སམཾ ཀརོནྟོ ཀིལམཱམཱི’’ཏི. ‘‘ཀིཾ པན ཏེསཾ ཨནཱགམནཾ ཨིཙྪཐཱ’’ཏི? ‘‘ཨཱམཱཝུསོ’’ཏི. ‘‘ཏེན ཧི ཏེསཾ ཨནཱགམནཾ ཀརིསྶཱམཱི’’ཏི ཏཱཔསསྶ ཧཏྠིཀནྟཝཱིཎཉྩེཝ ཧཏྠིཀནྟམནྟཉྩ ཨདཱསི. དདནྟོ ཙ པན ཝཱིཎཱཡ ཏིསྶོ ཏནྟིཡོ དསྶེཏྭཱ ཏཡོ མནྟེ ཨུགྒཎྷཱཔེཏྭཱ ‘‘ཨིམཾ ཏནྟིཾ པཧརིཏྭཱ ཨིམསྨིཾ མནྟེ ཝུཏྟེ ནིཝཏྟིཏྭཱ ཨོལོཀེཏུམྤི ཨསཀྐོནྟཱ ཧཏྠཱི པལཱཡནྟི, ཨིམཾ ཏནྟིཾ པཧརིཏྭཱ ཨིམསྨིཾ མནྟེ ཝུཏྟེ ནིཝཏྟིཏྭཱ པཙྪཏོ ཨོལོཀེནྟཱ ཨོལོཀེནྟཱ པལཱཡནྟི, ཨིམཾ ཏནྟིཾ པཧརིཏྭཱ ཨིམསྨིཾ མནྟེ ཝུཏྟེ ཧཏྠིཡཱུཐཔཏི པིཊྛིཾ ཨུཔནཱམེནྟོ ཨཱགཙྪཏཱི’’ཏི ཨཱཙིཀྑིཏྭཱ, ‘‘ཡཾ ཝོ རུཙྩཏི, ཏཾ ཀརེཡྻཱཐཱ’’ཏི ཝཏྭཱ ཏཱཔསཾ ཝནྡིཏྭཱ པཀྐཱམི. ཏཱཔསོ པལཱཡནམནྟཾ ཝཏྭཱ པལཱཡནཏནྟིཾ པཧརིཏྭཱ ཧཏྠཱི པལཱཔེཏྭཱ ཝསི.

ཏསྨིཾ སམཡེ ཀོསམྦིཡཾ པཱུརནྟཔྤོ ནཱམ རཱཛཱ ཧོཏི. སོ ཨེཀདིཝསཾ གབྦྷིནིཡཱ དེཝིཡཱ སདྡྷིཾ བཱལསཱུརིཡཏཔཾ ཏཔྤམཱནོ ཨབྦྷོཀཱསཏལེ ནིསཱིདི. དེཝཱི རཉྙོ པཱརུཔནཾ སཏསཧསྶགྒྷནིཀཾ རཏྟཀམྦལཾ པཱརུཔིཏྭཱ ནིསིནྣཱ རཉྙཱ སདྡྷིཾ སམུལླཔམཱནཱ རཉྙོ ཨངྒུལིཏོ སཏསཧསྶགྒྷནིཀཾ རཱཛམུདྡིཀཾ ནཱིཧརིཏྭཱ ཨཏྟནོ ཨངྒུལིཡཾ པིལནྡྷི. ཏསྨིཾ སམཡེ ཧཏྠིལིངྒསཀུཎོ ཨཱཀཱསེན གཙྪནྟོ དཱུརཏོ རཏྟཀམྦལཔཱརུཔནཾ དེཝིཾ དིསྭཱ ‘‘མཾསཔེསཱི’’ཏི སཉྙཱཡ པཀྑེ ཝིསྶཛྫེཏྭཱ ཨོཏརི. རཱཛཱ ཏསྶ ཨོཏརཎསདྡེན བྷཱིཏོ ཨུཊྛཱཡ ཨནྟོནིཝེསནཾ པཱཝིསི. དེཝཱི གརུགབྦྷཏཱཡ ཙེཝ བྷཱིརུཀཛཱཏིཀཏཱཡ ཙ ཝེགེན གནྟུཾ ནཱསཀྑི. ཨཐ ནཾ སོ སཀུཎོ ཨཛ྄ཛྷཔྤཏྟོ ནཁཔཉྫརེ ནིསཱིདཱཔེཏྭཱ ཨཱཀཱསཾ པཀྑནྡི. ཏེ ཀིར སཀུཎཱ པཉྩནྣཾ ཧཏྠཱིནཾ བལཾ དྷཱརེནྟི. ཏསྨཱ ཨཱཀཱསེན ནེཏྭཱ ཡཐཱརུཙིཏཊྛཱནེ ནིསཱིདིཏྭཱ མཾསཾ ཁཱདནྟི. སཱཔི ཏེན ནཱིཡམཱནཱ མརཎབྷཡབྷཱིཏཱ ཙིནྟེསི – ‘‘སཙཱཧཾ ཝིརཝིསྶཱམི, མནུསྶསདྡོ ནཱམ ཏིརཙྪཱནགཏཱནཾ ཨུབྦེཛནཱིཡོ, ཏཾ སུཏྭཱ མཾ ཚཌྜེསྶཏི. ཨེཝཾ སནྟེ སཧ གབྦྷེན ཛཱིཝིཏཀྑཡཾ པཱཔུཎིསྶཱམི, ཡསྨིཾ པན ཋཱནེ ནིསཱིདིཏྭཱ མཾ ཁཱདིཏུཾ ཨཱརབྷིསྶཏི, ཏཏྲ ནཾ སདྡཾ ཀཏྭཱ པལཱཔེསྶཱམཱི’’ཏི. སཱ ཨཏྟནོ པཎྜིཏཏཱཡ ཨདྷིཝཱསེསི.

ཏདཱ ཙ ཧིམཝནྟཔདེསེ ཐོཀཾ ཝཌྜྷིཏྭཱ མཎྜཔཱཀཱརེན ཋིཏོ ཨེཀོ མཧཱནིགྲོདྷོ ཧོཏི. སོ སཀུཎོ མིགརཱུཔཱདཱིནི ཏཏྠ ནེཏྭཱ ཁཱདཏི, ཏསྨཱ ཏམྤི ཏཏྠེཝ ནེཏྭཱ ཝིཊཔབྦྷནྟརེ ཋཔེཏྭཱ ཨཱགཏམགྒཾ ཨོལོཀེསི. ཨཱགཏམགྒོལོཀནཾ ཀིར ཏེསཾ དྷམྨཏཱ. ཏསྨིཾ ཁཎེ དེཝཱི, ‘‘ཨིདཱནི ཨིམཾ པལཱཔེཏུཾ ཝཊྚཏཱི’’ཏི ཙིནྟེཏྭཱ ཨུབྷོ ཧཏྠེ ཨུཀྑིཔིཏྭཱ པཱཎིསདྡཉྩེཝ མུཁསདྡཉྩ ཀཏྭཱ ཏཾ པལཱཔེསི. ཨཐསྶཱ སཱུརིཡཏྠངྒམནཀཱལེ གབྦྷེ ཀམྨཛཝཱཏཱ ཙལིཾསུ. སབྦདིསཱསུ གཛྫནྟོ མཧཱམེགྷོ ཨུཊྛཧི. སུཁེདྷིཏཱཡ རཱཛམཧེསིཡཱ ‘‘མཱ བྷཱཡི, ཨཡྻེ’’ཏི ཝཙནམཏྟམྤི ཨལབྷམཱནཱཡ དུཀྑཔརེཏཱཡ སབྦརཏྟིཾ ནིདྡཱ ནཱམ ནཱཧོསི. ཝིབྷཱཏཱཡ པན རཏྟིཡཱ ཝལཱཧཀཝིགམོ ཙ ཨརུཎུགྒམནཉྩ ཏསྶཱ གབྦྷཝུཊྛཱནཉྩ ཨེཀཀྑཎེཡེཝ ཨཧོསི. སཱ མེགྷཨུཏུཉྩ པབྦཏཨུཏུཉྩ ཨརུཎཨུཏུཉྩ གཧེཏྭཱ ཛཱཏཏྟཱ པུཏྟསྶ ཨུཏེནོཏི ནཱམཾ ཨཀཱསི.

ཨལླཀཔྤཏཱཔསསྶཔི ཁོ ཏཏོ ཨཝིདཱུརེ ཝསནཊྛཱནཾ ཧོཏི. སོ པཀཏིཡཱཝ ཝསྶདིཝསེ སཱིཏབྷཡེན ཕལཱཕལཏྠཱཡ ཝནཾ ན པཝིསཏི, ཏཾ རུཀྑམཱུལཾ གནྟྭཱ སཀུཎེཧི ཁཱདིཏམཾསཱནཾ ཨཊྛིཾ ཨཱཧརིཏྭཱ ཀོཊྚེཏྭཱ རསཾ ཀཏྭཱ པིཝཏི. ཏསྨཱ ཏཾ དིཝསཾ ‘‘ཨཊྛིཾ ཨཱཧརིསྶཱམཱི’’ཏི ཏཏྠ གནྟྭཱ རུཀྑམཱུལེ ཨཊྛིཾ པརིཡེསེནྟོ ཨུཔརི དཱརཀསདྡཾ སུཏྭཱ ཨུལློཀེནྟོ དེཝིཾ དིསྭཱ ‘‘ཀཱསི ཏྭ’’ནྟི ཝཏྭཱ ‘‘མཱནུསིཏྠིམྷཱི’’ཏི. ‘‘ཀཐཾ ཨཱགཏཱསཱི’’ཏི? ‘‘ཧཏྠིལིངྒསཀུཎེནཱནཱིཏཱམྷཱི’’ཏི ཝུཏྟེ ‘‘ཨོཏརཱཧཱི’’ཏི ཨཱཧ. ‘‘ཛཱཏིསམྦྷེདཏོ བྷཱཡཱམི, ཨཡྻཱ’’ཏི. ‘‘ཀཱསི ཏྭ’’ནྟི? ‘‘ཁཏྟིཡཱམྷཱི’’ཏི. ‘‘ཨཧམྤི ཁཏྟིཡོཡེཝཱ’’ཏི. ‘‘ཏེན ཧི ཁཏྟིཡམཱཡཾ ཀཐེཧཱི’’ཏི. སོ ཁཏྟིཡམཱཡཾ ཀཐེསི. ‘‘ཏེན ཧི ཨཱརུཡ྄ཧ པུཏྟཾ མེ ཨོཏཱརེཧཱི’’ཏི. སོ ཨེཀེན པསྶེན ཨབྷིརུཧནམགྒཾ ཀཏྭཱ ཨབྷིརུཧིཏྭཱ དཱརཀཾ གཎྷི. ‘‘མཱ མཾ ཧཏྠེན ཚུཔཱི’’ཏི ཙ ཝུཏྟེ ཏཾ ཨཚུཔིཏྭཱཝ དཱརཀཾ ཨོཏཱརེསི. དེཝཱིཔི ཨོཏརི. ཨཐ ནཾ ཨསྶམཔདཾ ནེཏྭཱ སཱིལབྷེདཾ ཨཀཏྭཱཝ ཨནུཀམྤཱཡ པཊིཛགྒི, ནིམྨཀྑིཀམདྷུཾ ཨཱཧརིཏྭཱ སཡཾཛཱཏསཱལིཾ ཨཱཧརིཏྭཱ ཡཱགུཾ པཙིཏྭཱ ཨདཱསི. ཨེཝཾ ཏསྨིཾ པཊིཛགྒནྟེ སཱ ཨཔརབྷཱགེ ཙིནྟེསི – ‘‘ཨཧཾ ནེཝ ཨཱགཏམགྒཾ ཛཱནཱམི, ན གམནམགྒཾ ཛཱནཱམི, ཨིམིནཱཔི མེ སདྡྷིཾ ཝིསྶཱསམཏྟམྤི ནཏྠི. སཙེ པནཱཡཾ ཨམྷེ པཧཱཡ ཀཏྠཙི གམིསྶཏི, ཨུབྷོཔི ཨིདྷེཝ མརཎཾ པཱཔུཎིསྶཱམ, ཡཾཀིཉྩི ཀཏྭཱ ཨིམསྶ སཱིལཾ བྷིནྡིཏྭཱ ཡཐཱ མཾ ན མུཉྩཏི, ཏཐཱ ཏཾ ཀཱཏུཾ ཝཊྚཏཱི’’ཏི. ཨཐ ནཾ དུནྣིཝཏྠདུཔྤཱརུཏདསྶནེན པལོབྷེཏྭཱ སཱིལཝིནཱསཾ པཱཔེསི. ཏཏོ པཊྛཱཡ དྭེཔི སམགྒཝཱསཾ ཝསིཾསུ.

ཨཐེཀདིཝསཾ ཏཱཔསོ ནཀྑཏྟཡོགཾ ཨུལློཀེནྟོ པཱུརནྟཔྤསྶ ནཀྑཏྟམིལཱཡནཾ དིསྭཱ ‘‘བྷདྡེ ཀོསམྦིཡཾ པཱུརནྟཔྤརཱཛཱ མཏོ’’ཏི ཨཱཧ. ‘‘ཀསྨཱ, ཨཡྻ, ཨེཝཾ ཝདེསི? ཀིཾ ཏེ ཏེན སདྡྷིཾ ཨཱགྷཱཏོ ཨཏྠཱི’’ཏི? ‘‘ནཏྠི, བྷདྡེ, ནཀྑཏྟམིལཱཡནམསྶ དིསྭཱ ཨེཝཾ ཝདཱམཱི’’ཏི, སཱ པརོདི. ཨཐ ནཾ ‘‘ཀསྨཱ རོདསཱི’’ཏི པུཙྪིཏྭཱ ཏཱཡ ཏསྶ ཨཏྟནོ སཱམིཀབྷཱཝེ ཨཀྑཱཏེ ཨཱཧ – ‘‘མཱ, བྷདྡེ, རོདི, ཛཱཏསྶ ནཱམ ནིཡཏོ མཙྩཱུ’’ཏི. ‘‘ཛཱནཱམི, ཨཡྻཱ’’ཏི ཝུཏྟེ ‘‘ཨཐ ཀསྨཱ རོདསཱི’’ཏི? ‘‘པུཏྟོ མེ ཀུལསནྟཀསྶ རཛྫསྶ ཨནུཙྪཝིཀོ, ‘སཙེ ཏཏྲ ཨབྷཝིསྶ, སེཏཙྪཏྟཾ ཨུསྶཱཔཡིསྶ. ཨིདཱནི མཧཱཛཱནིཀོ ཝཏ ཛཱཏོ’ཏི སོཀེན རོདཱམི, ཨཡྻཱ’’ཏི. ‘‘ཧོཏུ, བྷདྡེ, མཱ ཙིནྟཡི, སཙསྶ རཛྫཾ པཏྠེསི, ཨཧམསྶ རཛྫལབྷནཱཀཱརཾ ཀརིསྶཱམཱི’’ཏི. ཨཐསྶ ཧཏྠིཀནྟཝཱིཎཉྩེཝ ཧཏྠིཀནྟམནྟེ ཙ ཨདཱསི. ཏདཱ ཨནེཀཱནི ཧཏྠིསཧསྶཱནི ཨཱགནྟྭཱ ཝཊརུཀྑམཱུལེ ནིསཱིདནྟི. ཨཐ ནཾ ཨཱཧ – ‘‘ཧཏྠཱིསུ ཨནཱགཏེསུཡེཝ རུཀྑཾ ཨབྷིརུཧིཏྭཱ ཏེསུ ཨཱགཏེསུ ཨིམཾ མནྟཾ ཝཏྭཱ ཨིམཾ ཏནྟིཾ པཧར, སབྦེ ནིཝཏྟིཏྭཱ ཨོལོཀེཏུམྤི ཨསཀྐོནྟཱ པལཱཡིསྶནྟི, ཨཐ ཨོཏརིཏྭཱ ཨཱགཙྪེཡྻཱསཱི’’ཏི. སོ ཏཐཱ ཀཏྭཱ ཨཱགནྟྭཱ ཏཾ པཝཏྟིཾ ཨཱརོཙེསི. ཨཐ ནཾ དུཏིཡདིཝསེ ཨཱཧ – ‘‘ཨཛྫ ཨིམཾ མནྟཾ ཝཏྭཱ ཨིམཾ ཏནྟིཾ པཧརེཡྻཱསི, སབྦེ ནིཝཏྟིཏྭཱ ཨོལོཀེནྟཱ པལཱཡིསྶནྟཱི’’ཏི. ཏདཱཔི ཏཐཱ ཀཏྭཱ ཨཱགནྟྭཱ ཨཱརོཙེསི. ཨཐ ནཾ ཏཏིཡདིཝསེ ཨཱཧ – ‘‘ཨཛྫ ཨིམཾ མནྟཾ ཝཏྭཱ ཨིམཾ ཏནྟིཾ པཧརེཡྻཱསི, ཡཱུཐཔཏི པིཊྛིཾ ཨུཔནཱམེནྟོ ཨཱགམིསྶཏཱི’’ཏི. ཏདཱཔི ཏཐཱ ཀཏྭཱ ཨཱརོཙེསི.

ཨཐསྶ མཱཏརཾ ཨཱམནྟེཏྭཱ, ‘‘བྷདྡེ, པུཏྟསྶ ཏེ སཱསནཾ ཝདེཧི, ཨེཏྟོཝ གནྟྭཱ རཱཛཱ བྷཝིསྶཏཱི’’ཏི ཨཱཧ. སཱ པུཏྟཾ ཨཱམནྟེཏྭཱ, ‘‘ཏཱཏ, ཏྭཾ ཀོསམྦིཡཾ པཱུརནྟཔྤརཉྙོ པུཏྟོ, མཾ སགབྦྷཾ ཧཏྠིལིངྒསཀུཎོ ཨཱནེསཱི’’ཏི ཝཏྭཱ སེནཱཔཏིཨཱདཱིནཾ ནཱམཱནི ཨཱཙིཀྑིཏྭཱ ‘‘ཨསདྡཧནྟཱནཾ ཨིམཾ པིཏུ པཱརུཔནཀམྦལཉྩེཝ པིལནྡྷནམུདྡིཀཉྩ དསྶེཡྻཱསཱི’’ཏི ཝཏྭཱ ཨུཡྻོཛེསི. ཀུམཱརོ ཏཱཔསཾ ‘‘ཨིདཱནི ཀིཾ ཀརོམཱི’’ཏི ཨཱཧ. ‘‘རུཀྑསྶ ཧེཊྛིམསཱཁཱཡ ནིསཱིདིཏྭཱ ཨིམཾ མནྟཾ ཝཏྭཱ ཨིམཾ ཏནྟིཾ པཧར, ཛེཊྛཀཧཏྠཱི ཏེ པིཊྛིཾ ཨུཔནཱཔེཏྭཱ ཨུཔསངྐམིསྶཏི, ཏསྶ པིཊྛིཡཾ ནིསིནྣོཝ རཊྛཾ གནྟྭཱ རཛྫཾ གཎྷཱཧཱི’’ཏི. སོ མཱཏཱཔིཏརོ ཝནྡིཏྭཱ ཏཐཱ ཀཏྭཱ ཨཱགཏསྶ ཧཏྠིནོ པིཊྛིཡཾ ནིསཱིདིཏྭཱ ཀཎྞེ མནྟཡི – ‘‘ཨཧཾ ཀོསམྦིཡཾ པཱུརནྟཔྤརཉྙོ པུཏྟོ, པེཏྟིཀཾ མེ རཛྫཾ གཎྷིཏྭཱ དེཧི སཱམཱི’’ཏི. སོ ཏཾ སུཏྭཱ ‘‘ཨནེཀཱནི ཧཏྠིསཧསྶཱནི སནྣིཔཏནྟཱུ’’ཏི ཧཏྠིརཝཾ རཝི, ཨནེཀཱནི ཧཏྠིསཧསྶཱནི སནྣིཔཏིཾསུ. པུན ‘‘ཛིཎྞཱ ཧཏྠཱི པཊིཀྐམནྟཱུ’’ཏི ཧཏྠིརཝཾ རཝི, ཛིཎྞཱ ཧཏྠཱི པཊིཀྐམིཾསུ. པུན ‘‘ཨཏིཏརུཎཱ ཧཏྠཱི ནིཝཏྟནྟཱུ’’ཏི ཧཏྠིརཝཾ རཝི, ཏེཔི ནིཝཏྟིཾསུ. སོ ཨནེཀེཧི ཡཱུཐཧཏྠིསཧསྶེཧེཝ པརིཝུཏོ པཙྩནྟགཱམཾ པཏྭཱ ‘‘ཨཧཾ རཉྙོ པུཏྟོ, སམྤཏྟིཾ པཏྠཡམཱནཱ མཡཱ སདྡྷིཾ ཨཱགཙྪནྟཱུ’’ཏི ཨཱཧ. ‘‘ཏཏོ པཊྛཱཡ མནུསྶཱནཾ སངྒཧཾ ཀརོནྟོ གནྟྭཱ ནགརཾ པརིཝཱརེཏྭཱ ‘ཡུདྡྷཾ ཝཱ མེ དེཏུ, རཛྫཾ ཝཱ’’’ཏི སཱསནཾ པེསེསི. ནཱགརཱ ཨཱཧཾསུ – ‘‘མཡཾ དྭེཔི ན དསྶཱམ. ཨམྷཱཀཉྷི དེཝཱི གརུགབྦྷཱ ཧཏྠིལིངྒསཀུཎེན ནཱིཏཱ, ཏསྶཱ ཨཏྠིབྷཱཝཾ ཝཱ ནཏྠིབྷཱཝཾ ཝཱ མཡཾ ན ཛཱནཱམ. ཡཱཝ ཏསྶཱ པཝཏྟིཾ ན སུཎཱམ. ཏཱཝ ནེཝ ཡུདྡྷཾ དསྶཱམ, ན རཛྫ’’ནྟི. ཏདཱ ཀིར ཏཾ པཝེཎིརཛྫཾ ཨཧོསི. ཏཏོ ཀུམཱརོ ‘‘ཨཧཾ ཏསྶཱ པུཏྟོ’’ཏི ཝཏྭཱ སེནཱཔཏིཨཱདཱིནཾ ནཱམཱནི ཀཐེཏྭཱ ཏཐཱཔི ཨསདྡཧནྟཱནཾ ཀམྦལཉྩ མུདྡིཀཉྩ དསྶེསི. ཏེ ཀམྦལཉྩ མུདྡིཀཉྩ སཉྫཱནིཏྭཱ ནིཀྐངྑཱ ཧུཏྭཱ དྭཱརཾ ཝིཝརིཏྭཱ ཏཾ རཛྫེ ཨབྷིསིཉྩིཾསུ. ཨཡཾ ཏཱཝ ཨུཏེནསྶ ཨུཔྤཏྟི.

ཨལླཀཔྤརཊྛེ པན དུབྦྷིཀྑེ ཛཱིཝིཏུཾ ཨསཀྐོནྟོ ཨེཀོ ཀོཏུཧལིཀོ ནཱམ མནུསྶོ ཀཱཔིཾ ནཱམ ཏརུཎཔུཏྟཉྩ ཀཱལི༹ཾ ནཱམ བྷརིཡཉྩ ཨཱདཱཡ ‘‘ཀོསམྦིཾ གནྟྭཱ ཛཱིཝིསྶཱམཱི’’ཏི པཱཐེཡྻཾ གཧེཏྭཱ ནིཀྑམི. ‘‘ཨཧིཝཱཏརོགེན མཧཱཛནེ མརནྟེ དིསྭཱ ནིཀྑམཱི’’ཏིཔི ཝདནྟིཡེཝ. ཏེ གཙྪནྟཱ པཱཐེཡྻེ པརིཀྑཱིཎེ ཁུདཱབྷིབྷཱུཏཱ དཱརཀཾ ཝཧིཏུཾ ནཱསཀྑིཾསུ. ཨཐ སཱམིཀོ པཛཱཔཏིཾ ཨཱཧ – ‘‘བྷདྡེ, མཡཾ ཛཱིཝནྟཱ པུན པུཏྟཾ ལབྷིསྶཱམ, ཚཌྜེཏྭཱ ནཾ གཙྪཱམཱ’’ཏི. མཱཏུ ཧདཡཾ ནཱམ མུདུཀཾ ཧོཏི. ཏསྨཱ སཱ ཨཱཧ – ‘‘ནཱཧཾ ཛཱིཝནྟམེཝ པུཏྟཾ ཚཌྜེཏུཾ སཀྑིསྶཱམཱི’’ཏི. ‘‘ཨཐ ཀིཾ ཀརོམཱ’’ཏི? ‘‘ཝཱརེན ནཾ ཝཧཱམཱ’’ཏི. མཱཏཱ ཨཏྟནོ ཝཱརེ པུཔྥདཱམཾ ཝིཡ ནཾ ཨུཀྑིཔིཏྭཱ ཨུརེ ནིཔཛྫཱཔེཏྭཱ ཨངྐེན ཝཧིཏྭཱ པིཏུནོ དེཏི. ཏསྶ ཏཾ གཧེཏྭཱ གམནཀཱལེ ཚཱཏཀཏོཔི བལཝཏརཱ ཝེདནཱ ཨུཔྤཛྫི. སོ པུནཔྤུནཾ ཨཱཧ – ‘‘བྷདྡེ, མཡཾ ཛཱིཝནྟཱ པུཏྟཾ ལབྷིསྶཱམ, ཚཌྜེམ ན’’ནྟི. སཱཔི པུནཔྤུནཾ པཊིཀྑིཔིཏྭཱ པཊིཝཙནཾ ནཱདཱསི. དཱརཀོ ཝཱརེན པརིཝཏྟིཡམཱནོ ཀིལནྟོ པིཏུ ཧཏྠེ ནིདྡཱཡི. སོ ཏསྶ ནིདྡཱཡནབྷཱཝཾ ཉཏྭཱ མཱཏརཾ པུརཏོ ཀཏྭཱ ཨེཀསྶ གཙྪསྶ ཧེཊྛཱ པཎྞསནྠརེ ཏཾ ནིཔཛྫཱཔེཏྭཱ པཱཡཱསི. མཱཏཱ ནིཝཏྟིཏྭཱ ཨོལོཀེནྟཱི པུཏྟཾ ཨདིསྭཱ, ‘‘སཱམི, ཀུཧིཾ མེ པུཏྟོ’’ཏི པུཙྪི. ‘‘ཨེཀསྶ མེ གཙྪསྶ ཧེཊྛཱ ནིཔཛྫཱཔིཏོ’’ཏི. ‘‘སཱམི, མཱ མཾ ནཱསཡི, པུཏྟཾ ཝིནཱ ཛཱིཝིཏུཾ ན སཀྑིསྶཱམི, ཨཱནེཧི མེ པུཏྟ’’ནྟི ཨུརཾ པཧརིཏྭཱ པརིདེཝི. ཨཐ ནཾ ནིཝཏྟིཏྭཱ ཨཱནེསི. པུཏྟོཔི ཨནྟརཱམགྒེ མཏོ ཧོཏི. ཨིཏི སོ ཨེཏྟཀེ ཋཱནེ པུཏྟཾ ཚཌྜེཏྭཱ ཏསྶ ནིསྶནྡེན བྷཝནྟརེ སཏྟ ཝཱརེ ཚཌྜིཏོ. ‘‘པཱཔཀམྨཾ ནཱམེཏཾ ཨཔྤཀ’’ནྟི ན ཨཝམཉྙིཏབྦཾ.

ཏེ གཙྪནྟཱ ཨེཀཾ གོཔཱལཀུལཾ པཱཔུཎིཾསུ. ཏཾ དིཝསཉྩ གོཔཱལཀསྶ དྷེནུམངྒལཾ ཧོཏི. གོཔཱལཀསྶ གེཧེ ནིབདྡྷཾ ཨེཀོ པཙྩེཀབུདྡྷོ བྷུཉྫཏི. སོ ཏཾ བྷོཛེཏྭཱ མངྒལམཀཱསི. བཧུ པཱཡཱསོ པཊིཡཏྟོ ཧོཏི. གོཔཱལཀོ ཏེ ཨཱགཏེ དིསྭཱ, ‘‘ཀུཏོ ཨཱགཏཏྠཱ’’ཏི པུཙྪིཏྭཱ སབྦཾ པཝཏྟིཾ སུཏྭཱ མུདུཛཱཏིཀོ ཀུལཔུཏྟོ ཏེསུ ཨནུཀམྤཾ ཀཏྭཱ བཧུཀེན སཔྤིནཱ པཱཡཱསཾ དཱཔེསི. བྷརིཡཱ ‘‘སཱམི, ཏཡི ཛཱིཝནྟེ ཨཧམྤི ཛཱིཝཱམི ནཱམ, དཱིགྷརཏྟཾ ཨཱུནོདརོསི, ཡཱཝདཏྠཾ བྷུཉྫཱཧཱི’’ཏི སཔྤིཉྩ དདྷིཉྩ ཏདབྷིམུཁཉྙེཝ ཀཏྭཱ ཨཏྟནཱ མནྡསཔྤིནཱ ཐོཀམེཝ བྷུཉྫི. ཨིཏརོ བཧུཾ བྷུཉྫིཏྭཱ སཏྟཊྛདིཝསེ ཚཱཏཏཱཡ ཨཱཧཱརཏཎྷཾ ཚིནྡིཏུཾ ནཱསཀྑི. གོཔཱལཀོ ཏེསཾ པཱཡཱསཾ དཱཔེཏྭཱ སཡཾ བྷུཉྫིཏུཾ ཨཱརབྷི. ཀོཏུཧལིཀོ ཏཾ ཨོལོཀེནྟོ ནིསཱིདིཏྭཱ ཧེཊྛཱཔཱིཋེ ནིཔནྣཱཡ སུནཁིཡཱ གོཔཱལཀེན ཝཌྜྷེཏྭཱ དིཡྻམཱནཾ པཱཡཱསཔིཎྜཾ དིསྭཱ ‘‘པུཉྙཱ ཝཏཱཡཾ སུནཁཱི, ནིབདྡྷཾ ཨེཝརཱུཔཾ བྷོཛནཾ ལབྷཏཱི’’ཏི ཙིནྟེསི. སོ རཏྟིབྷཱགེ ཏཾ པཱཡཱསཾ ཛཱིརཱཔེཏུཾ ཨསཀྐོནྟོ ཀཱལཾ ཀཏྭཱ ཏསྶཱ སུནཁིཡཱ ཀུཙྪིམྷི ནིབྦཏྟི.

ཨཐསྶ བྷརིཡཱ སརཱིརཀིཙྩཾ ཀཏྭཱ ཏསྨིཾཡེཝ གེཧེ བྷཏིཾ ཀཏྭཱ ཏཎྜུལནཱལི༹ཾ ལབྷིཏྭཱ པཙིཏྭཱ པཙྩེཀབུདྡྷསྶ པཏྟེ པཏིཊྛཱཔེཏྭཱ, ‘‘དཱསསྶ ཝོ པཱཔུཎཱཏཱུ’’ཏི ཝཏྭཱ ཙིནྟེསི – ‘‘མཡཱ ཨིདྷེཝ ཝསིཏུཾ ཝཊྚཏི, ནིབདྡྷཾ, ཨཡྻོ, ཨིདྷཱགཙྪཏི, དེཡྻདྷམྨོ ཧོཏུ ཝཱ, མཱ ཝཱ, དེཝསིཀཾ ཝནྡནྟཱི ཝེཡྻཱཝཙྩཾ ཀརོནྟཱི ཙིཏྟཾ པསཱདེནྟཱི བཧུཾ པུཉྙཾ པསཝིསྶཱམཱི’’ཏི. སཱ ཏཏྠེཝ བྷཏིཾ ཀརོནྟཱི ཝསི. སཱཔི སུནཁཱི ཚཊྛེ ཝཱ སཏྟམེ ཝཱ མཱསེ ཨེཀམེཝ ཀུཀྐུརཾ ཝིཛཱཡི. གོཔཱལཀོ ཏསྶ ཨེཀདྷེནུཡཱ ཁཱིརཾ དཱཔེསི. སོ ན ཙིརསྶེཝ ཝཌྜྷི. ཨཐསྶ པཙྩེཀབུདྡྷོ བྷུཉྫནྟོ ནིབདྡྷཾ ཨེཀཾ བྷཏྟཔིཎྜཾ དེཏི. སོ བྷཏྟཔིཎྜཾ ནིསྶཱཡ པཙྩེཀབུདྡྷེ སིནེཧམཀཱསི. གོཔཱལཀོཔི ནིབདྡྷཾ དྭེ ཝཱརེ པཙྩེཀབུདྡྷསྶུཔཊྛཱནཾ ཡཱཏི. གཙྪནྟོཔི ཨནྟརཱམགྒེ ཝཱལ༹མིགཊྛཱནེ དཎྜེན གཙྪེ ཙ བྷཱུམིཉྩ པཧརིཏྭཱ ‘‘སུསཱུ’’ཏི ཏིཀྑཏྟུཾ སདྡཾ ཀཏྭཱ ཝཱལ༹མིགེ པལཱཔེཏི. སུནཁོཔི ཏེན སདྡྷིཾ གཙྪཏི.

སོ ཨེཀདིཝསཾ པཙྩེཀབུདྡྷཾ ཨཱཧ – ‘‘བྷནྟེ, ཡདཱ མེ ཨོཀཱསོ ན བྷཝིསྶཏི, ཏདཱ ཨིམཾ སུནཁཾ པེསེསྶཱམི, ཏེན སཉྙཱཎེན ཨཱགཙྪེཡྻཱཐཱ’’ཏི. ཏཏོ པཊྛཱཡ ཨནོཀཱསདིཝསེ, ‘‘གཙྪ, ཏཱཏ, ཨཡྻཾ ཨཱནེཧཱི’’ཏི སུནཁཾ པེསེསི. སོ ཨེཀཝཙནེནེཝ པཀྑནྡིཏྭཱ སཱམིཀསྶ གཙྪཔོཐནབྷཱུམིཔོཐནཊྛཱནེ ཏིཀྑཏྟུཾ བྷུསྶིཏྭཱ ཏེན སདྡེན ཝཱལ༹མིགཱནཾ པལཱཏབྷཱཝཾ ཉཏྭཱ པཱཏོཝ སརཱིརཔཊིཛགྒནཾ ཀཏྭཱ པཎྞསཱལཾ པཝིསིཏྭཱ ནིསིནྣསྶ པཙྩེཀབུདྡྷསྶ ཝསནཊྛཱནཾ གནྟྭཱ པཎྞསཱལདྭཱརེ ཏིཀྑཏྟུཾ བྷུསྶིཏྭཱ ཨཏྟནོ ཨཱགཏབྷཱཝཾ ཛཱནཱཔེཏྭཱ ཨེཀམནྟེ ནིཔཛྫཏི, པཙྩེཀབུདྡྷེ ཝེལཾ སལླཀྑེཏྭཱ ནིཀྑནྟེ བྷུསྶནྟོ པུརཏོ གཙྪཏི. ཨནྟརནྟརཱ པཙྩེཀབུདྡྷོ ཏཾ ཝཱིམཾསནྟོ ཨཉྙཾ མགྒཾ པཊིཔཛྫཏི. ཨཐསྶ པུརཏོ ཏིརིཡཾ ཋཏྭཱ བྷུསྶིཏྭཱ ཨིཏརམགྒམེཝ ནཾ ཨཱརོཔེཏི. ཨཐེཀདིཝསཾ ཨཉྙཾ མགྒཾ པཊིཔཛྫིཏྭཱ ཏེན པུརཏོ ཏིརིཡཾ ཋཏྭཱ ཝཱརིཡམཱནོཔི ཨནིཝཏྟིཏྭཱ སུནཁཾ པཱདེན པཧརིཏྭཱ པཱཡཱསི. སུནཁོ ཏསྶ ཨནིཝཏྟནབྷཱཝཾ ཉཏྭཱ ནིཝཱསནཀཎྞེ ཌཾསིཏྭཱ ཨཱཀཌྜྷནྟོ ཨིཏརམགྒམེཝ ནཾ ཨཱརོཔེསི. ཨེཝཾ སོ ཏསྨིཾ བལཝསིནེཧཾ ཨུཔྤཱདེསི.

ཏཏོ ཨཔརབྷཱགེ པཙྩེཀབུདྡྷསྶ ཙཱིཝརཾ ཛཱིརི. ཨཐསྶ གོཔཱལཀོ ཙཱིཝརཝཏྠཱནི ཨདཱསི. ཏམེནཾ པཙྩེཀབུདྡྷོ ཨཱཧ – ‘‘ཨཱཝུསོ, ཙཱིཝརཾ ནཱམ ཨེཀཀེན ཀཱཏུཾ དུཀྐརཾ, ཕཱསུཀཊྛཱནཾ གནྟྭཱ ཀཱརེསྶཱམཱི’’ཏི. ‘‘ཨིདྷེཝ, བྷནྟེ, ཀརོཐཱ’’ཏི. ‘‘ན སཀྐཱ, ཨཱཝུསོ’’ཏི. ‘‘ཏེན ཧི, བྷནྟེ, མཱ ཙིརཾ བཧི ཝསིཏྠཱ’’ཏི. སུནཁོ ཏེསཾ ཀཐཾ སུཎནྟོཝ ཨཊྛཱསི, པཙྩེཀབུདྡྷོཔི ‘‘ཏིཊྛ, ཨུཔཱསཀཱ’’ཏི གོཔཱལཀཾ ནིཝཏྟཱཔེཏྭཱ ཝེཧཱསཾ ཨབྦྷུགྒནྟྭཱ གནྡྷམཱདནཱབྷིམུཁོ པཱཡཱསི. སུནཁསྶ ཏཾ ཨཱཀཱསེན གཙྪནྟཾ དིསྭཱ བྷུཀྐརིཏྭཱ ཋིཏསྶ ཏསྨིཾ ཙཀྑུཔཐཾ ཝིཛཧནྟེ ཧདཡཾ ཕལིཏྭཱ མཏོ. ཏིརཙྪཱནཱ ཀིར ནཱམེཏེ ཨུཛུཛཱཏིཀཱ ཧོནྟི ཨཀུཊིལཱ. མནུསྶཱ པན ཨཉྙཾ ཧདཡེན ཙིནྟེནྟི, ཨཉྙཾ མུཁེན ཀཐེནྟི. ཏེནེཝཱཧ – ‘‘གཧནཉྷེཏཾ, བྷནྟེ, ཡདིདཾ མནུསྶཱ, ཨུཏྟཱནཀཉྷེཏཾ, བྷནྟེ, ཡདིདཾ པསཝོ’’ཏི (མ. ནི. ༢.༣).

ཨིཏི སོ ཏཱཡ ཨུཛུཙིཏྟཏཱཡ ཨཀུཊིལཏཱཡ ཀཱལཾ ཀཏྭཱ ཏཱཝཏིཾསབྷཝནེ ནིབྦཏྟོ ཨཙྪརཱསཧསྶཔརིཝུཏོ མཧཱསམྤཏྟིཾ ཨནུབྷོསི. ཏསྶ ཀཎྞམཱུལེ མནྟཡནྟསྶ སདྡོ སོལ༹སཡོཛནཊྛཱནཾ ཕརཏི, པཀཏིཀཐཱསདྡོ པན སཀལཾ དསཡོཛནསཧསྶཾ དེཝནགརཾ ཚཱདེཏི. ཏེནེཝསྶ ‘‘གྷོསཀདེཝཔུཏྟོ’’ཏི ནཱམཾ ཨཧོསི. ‘‘ཀིསྶ པནེས ནིསྶནྡོ’’ཏི. པཙྩེཀབུདྡྷེ པེམེན བྷུཀྐརཎསྶ ནིསྶནྡོ. སོ ཏཏྠ ན ཙིརཾ ཋཏྭཱ ཙཝི. དེཝལོཀཏོ ཧི དེཝཔུཏྟཱ ཨཱཡུཀྑཡེན པུཉྙཀྑཡེན ཨཱཧཱརཀྑཡེན ཀོཔེནཱཏི ཙཏཱུཧི ཀཱརཎེཧི ཙཝནྟི.

ཏཏྠ ཡེན བཧུཾ པུཉྙཀམྨཾ ཀཏཾ ཧོཏི, སོ དེཝལོཀེ ཨུཔྤཛྫིཏྭཱ ཡཱཝཏཱཡུཀཾ ཋཏྭཱ ཨུཔརཱུཔརི ནིབྦཏྟཏི. ཨེཝཾ ཨཱཡུཀྑཡེན ཙཝཏི ནཱམ. ཡེན པརིཏྟཾ པུཉྙཾ ཀཏཾ ཧོཏི, ཏསྶ རཱཛཀོཊྛཱགཱརེ པཀྑིཏྟཾ ཏིཙཏུནཱལི༹མཏྟཾ དྷཉྙཾ ཝིཡ ཨནྟརཱཝ ཏཾ པུཉྙཾཁཱིཡཏི, ཨནྟརཱཝ ཀཱལཾ ཀརོཏི. ཨེཝཾ པུཉྙཀྑཡེན ཙཝཏི ནཱམ. ཨཔརོཔི ཀཱམགུཎེ པརིབྷུཉྫམཱནོ སཏིསམྨོསེན ཨཱཧཱརཾ ཨཔརིབྷུཉྫིཏྭཱ ཀིལནྟཀཱཡོ ཀཱལཾ ཀརོཏི. ཨེཝཾ ཨཱཧཱརཀྑཡེན ཙཝཏི ནཱམ. ཨཔརོཔི པརསྶ སམྤཏྟིཾ ཨསཧནྟོ ཀུཛ྄ཛྷིཏྭཱ ཀཱལཾ ཀརོཏི. ཨེཝཾ ཀོཔེན ཙཝཏི ནཱམ.

ཨཡཾ པན ཀཱམགུཎེ པརིབྷུཉྫནྟོ མུཊྛསྶཏི ཧུཏྭཱ ཨཱཧཱརཀྑཡེན ཙཝི, ཙཝིཏྭཱ ཙ པན ཀོསམྦིཡཾ ནགརསོབྷིནིཡཱ ཀུཙྪིམྷི པཊིསནྡྷིཾ གཎྷི. སཱཔི ཛཱཏདིཝསེ ‘‘ཀིཾ ཨེཏ’’ནྟི དཱསིཾ པུཙྪིཏྭཱ, ‘‘པུཏྟོ, ཨཡྻེ’’ཏི ཝུཏྟེ – ‘‘ཧནྡ, ཛེ, ཨིམཾ དཱརཀཾ ཀཏྟརསུཔྤེ ཨཱརོཔེཏྭཱ སངྐཱརཀཱུཊེ ཚཌྜེཧཱི’’ཏི ཚཌྜཱཔེསི. ནགརསོབྷིནིཡོ ཧི དྷཱིཏརཾ པཊིཛགྒནྟི, ན པུཏྟཾ. དྷཱིཏརཱ ཧི ཏཱསཾ པཝེཎཱི གྷཊཱིཡཏི. དཱརཀཾ ཀཱཀཱཔི སུནཁཱཔི པརིཝཱརེཏྭཱ ནིསཱིདིཾསུ. པཙྩེཀབུདྡྷེ སིནེཧཔྤབྷཝསྶ བྷུཀྐརཎསྶ ནིསྶནྡེན ཨེཀོཔི ཨུཔགནྟུཾ ན ཝིསཧི. ཏསྨིཾ ཁཎེ ཨེཀོ མནུསྶོ བཧི ནིཀྑནྟོ ཏཾ ཀཱཀསུནཁསནྣིཔཱཏཾ དིསྭཱ, ‘‘ཀིཾ ནུ ཁོ ཨེཏ’’ནྟི གནྟྭཱ དཱརཀཾ དིསྭཱ པུཏྟསིནེཧཾ པཊིལབྷིཏྭཱ ‘‘པུཏྟོ མེ ལདྡྷོ’’ཏི གེཧཾ ནེསི. ཏདཱ ཀོསམྦཀསེཊྛི རཱཛཀུལཾ གཙྪནྟོ རཱཛནིཝེསནཏོ ཨཱགཙྪནྟཾ པུརོཧིཏཾ དིསྭཱ, ‘‘ཀིཾ, ཨཱཙརིཡ, ཨཛྫ ཏེ ཏིཐིཀརཎནཀྑཏྟཡོགོ ཨོལོཀིཏོ’’ཏི པུཙྪི. ‘‘ཨཱམ, མཧཱསེཊྛི, ཨམྷཱཀཾ ཀིཾ ཨཉྙཾ ཀིཙྩནྟི? ཛནཔདསྶ ཀིཾ བྷཝིསྶཏཱི’’ཏི? ‘‘ཨཉྙཾ ནཏྠི, ཨིམསྨིཾ པན ནགརེ ཨཛྫ ཛཱཏདཱརཀོ ཛེཊྛཀསེཊྛི བྷཝིསྶཏཱི’’ཏི. ཏདཱ སེཊྛིནོ བྷརིཡཱ གརུགབྦྷཱ ཧོཏི. ཏསྨཱ སོ སཱིགྷཾ གེཧཾ པུརིསཾ པེསེསི – ‘‘གཙྪ བྷཎེ, ཛཱནཱཧི ནཾ ཝིཛཱཏཱ ཝཱ, ནོ ཝཱ’’ཏི. ‘‘ན ཝིཛཱཡཏཱི’’ཏི སུཏྭཱ རཱཛཱནཾ དིསྭཱཝ ཝེགེན གེཧཾ གནྟྭཱ ཀཱལི༹ཾ ནཱམ དཱསིཾ པཀྐོསིཏྭཱ སཧསྶཾ དཏྭཱ, ‘‘གཙྪ ཛེ, ཨིམསྨིཾ ནགརེ ཨུཔདྷཱརེཏྭཱ སཧསྶཾ དཏྭཱ ཨཛྫ ཛཱཏདཱརཀཾ གཎྷིཏྭཱ ཨེཧཱི’’ཏི. སཱ ཨུཔདྷཱརེནྟཱི ཏཾ གེཧཾ གནྟྭཱ དཱརཀཾ དིསྭཱ, ‘‘ཨཡཾ དཱརཀོ ཀདཱ ཛཱཏོ’’ཏི གཧཔཏཱནིཾ པུཙྪིཏྭཱ ‘‘ཨཛྫ ཛཱཏོ’’ཏི ཝུཏྟེ, ‘‘ཨིམཾ མཡ྄ཧཾ དེཧཱི’’ཏི ཨེཀཀཧཱཔཎཾ ཨཱདིཾ ཀཏྭཱ མཱུལཾ ཝཌྜྷེནྟཱི སཧསྶཾ དཏྭཱ ཏཾ ཨཱནེཏྭཱ སེཊྛིནོ དསྶེསི. སེཊྛི ‘‘སཙེ མེ དྷཱིཏཱ ཝིཛཱཡིསྶཏི, ཏཱཡ ནཾ སདྡྷིཾ ནིཝེསེཏྭཱ སེཊྛིཊྛཱནསྶ སཱམིཀཾ ཀརིསྶཱམི. སཙེ མེ པུཏྟོ ཝིཛཱཡིསྶཏི, མཱརེསྶཱམི ན’’ནྟི ཙིནྟེཏྭཱ ཏཾ གེཧེ ཀཱརེསི.

ཨཐསྶ བྷརིཡཱ ཀཏིཔཱཧཙྩཡེན པུཏྟཾ ཝིཛཱཡི. སེཊྛི ‘‘ཨིམསྨིཾ ཨསཏི མམ པུཏྟོཝ སེཊྛིཊྛཱནཾ ལབྷིསྶཏི, ཨིདཱནེཝ ཏཾ མཱརེཏུཾ ཝཊྚཏཱི’’ཏི ཙིནྟེཏྭཱ ཀཱལི༹ཾ ཨཱམནྟེཏྭཱ, ‘‘གཙྪ, ཛེ, ཝཛཏོ གུནྣཾ ནིཀྑམནཝེལཱཡ ཝཛདྭཱརམཛ྄ཛྷེ ཨིམཾ ཏིརིཡཾ ནིཔཛྫཱཔེཧི, གཱཝིཡོ ནཾ མདྡིཏྭཱ མཱརེསྶནྟི, མདྡིཏཱམདྡིཏབྷཱཝཾ པནསྶ ཉཏྭཱ ཨེཧཱི’’ཏི ཨཱཧ. སཱ གནྟྭཱ གོཔཱལཀེན ཝཛདྭཱརེ ཝིཝཊམཏྟེཡེཝ ཏཾ ཏཐཱ ནིཔཛྫཱཔེསི. གོགཎཛེཊྛཀོ ཨུསབྷོ ཨཉྙསྨིཾ ཀཱལེ སབྦཔཙྪཱ ནིཀྑམནྟོཔི ཏཾ དིཝསཾ སབྦཔཋམཾ ནིཀྑམིཏྭཱ དཱརཀཾ ཙཏུནྣཾ པཱདཱནཾ ཨནྟརེ ཀཏྭཱ ཨཊྛཱསི. ཨནེཀསཏགཱཝིཡོ ཨུསབྷསྶ དྭེ པསྶཱནི གྷཾསནྟིཡོ ནིཀྑམིཾསུ. གོཔཱལཀོཔི ‘‘ཨཡཾ ཨུསབྷོ པུབྦེ སབྦཔཙྪཱ ནིཀྑམཏི, ཨཛྫ པན སབྦཔཋམཾ ནིཀྑམིཏྭཱ ཝཛདྭཱརམཛ྄ཛྷེ ནིཙྩལོཝ ཋིཏོ, ཀིཾ ནུ ཁོ ཨེཏ’’ནྟི ཙིནྟེཏྭཱ གནྟྭཱ ཏསྶ ཧེཊྛཱ ནིཔནྣཾ དཱརཀཾ དིསྭཱ པུཏྟསིནེཧཾ པཊིལབྷིཏྭཱ, ‘‘པུཏྟོ མེ ལདྡྷོ’’ཏི གེཧཾ ནེསི.

ཀཱལཱི༹ གནྟྭཱ སེཊྛིནཱ པུཙྪིཏཱ ཏམཏྠཾ ཨཱརོཙེཏྭཱ, ‘‘གཙྪ, ནཾ པུན སཧསྶཾ དཏྭཱ ཨཱནེཧཱི’’ཏི ཝུཏྟཱ སཧསྶཾ དཏྭཱ པུན ཨཱནེཏྭཱ ཨདཱསི. ཨཐ ནཾ ཨཱཧ – ‘‘ཨམྨ, ཀཱལི༹ ཨིམསྨིཾ ནགརེ པཉྩ སཀཊསཏཱནི པཙྩཱུསཀཱལེ ཨུཊྛཱཡ ཝཱཎིཛྫཱཡ གཙྪནྟི, ཏྭཾ ཨིམཾ ནེཏྭཱ ཙཀྐམགྒེ ནིཔཛྫཱཔེཧི, གོཎཱ ཝཱ ནཾ མདྡིསྶནྟི, ཙཀྐཱ ཝཱ ཚིནྡིསྶནྟི, པཝཏྟིཾ ཙསྶ ཉཏྭཱཝ ཨཱགཙྪེཡྻཱསཱི’’ཏི. སཱ ཏཾ ནེཏྭཱ ཙཀྐམགྒེ ནིཔཛྫཱཔེསི. ཏདཱ སཱཀཊིཀཛེཊྛཀོ པུརཏོ ཨཧོསི. ཨཐསྶ གོཎཱ ཏཾ ཋཱནཾ པཏྭཱ དྷུརཾ ཚཌྜེསུཾ, པུནཔྤུནཾ ཨཱརོཔེཏྭཱ པཱཛིཡམཱནཱཔི པུརཏོ ན གཙྪིཾསུ. ཨེཝཾ ཏསྶ ཏེཧི སདྡྷིཾ ཝཱཡམནྟསྶེཝ ཨརུཎཾ ཨུཊྛཧི. སོ ‘‘ཀིཾ ནཱམེཏཾ གོཎཱ ཀརིཾསཱུ’’ཏི མགྒཾ ཨོལོཀེནྟོ དཱརཀཾ དིསྭཱ, ‘‘བྷཱརིཡཾ ཝཏ མེ ཀམྨ’’ནྟི ཙིནྟེཏྭཱ, ‘‘པུཏྟོ མེ ལདྡྷོ’’ཏི ཏུཊྛམཱནསོ ཏཾ གེཧཾ ནེསི.

ཀཱལཱི༹ གནྟྭཱ སེཊྛིནཱ པུཙྪིཏཱ ཏཾ པཝཏྟིཾ ཨཱཙིཀྑིཏྭཱ, ‘‘གཙྪ, ནཾ པུན སཧསྶཾ དཏྭཱ ཨཱནེཧཱི’’ཏི ཝུཏྟཱ ཏཐཱ ཨཀཱསི. ཨཐ ནཾ སོ ཨཱཧ – ‘‘ཨིདཱནི ནཾ ཨཱམཀསུསཱནཾ ནེཏྭཱ གཙྪནྟརེ ནིཔཛྫཱཔེཧི, ཏཏྠ སུནཁཱདཱིཧི ཝཱ ཁཱདིཏོ, ཨམནུསྶེཧི ཝཱ པཧཊོ མརིསྶཏི, མཱཏཱམཏབྷཱཝཉྩསྶ ཛཱནིཏྭཱཝ ཨཱགཙྪེཡྻཱསཱི’’ཏི. སཱ ཏཾ ནེཏྭཱ ཏཏྠ ནིཔཛྫཱཔེཏྭཱ ཨེཀམནྟེ ཨཊྛཱསི. ཏཾ སུནཁོ ཝཱ ཀཱཀོ ཝཱ ཨམནུསྶོ ཝཱ ཨུཔསངྐམིཏུཾ ནཱསཀྑི. ‘‘ནནུ ཙསྶ ནེཝ མཱཏཱ ན པིཏཱ ན བྷཱཏིཀཱདཱིསུ ཀོཙི རཀྑིཏཱ ནཱམ ཨཏྠི, ཀོ ཏཾ རཀྑཏཱི’’ཏི? སུནཁཀཱལེ པཙྩེཀབུདྡྷེ སིནེཧེན པཝཏྟིཏབྷུཀྐརཎམཏྟམེཝ ཏཾ རཀྑཏི. ཨཐེཀོ ཨཛཔཱལཀོ ཨནེཀསཧསྶཱ ཨཛཱ གོཙརཾ ནེནྟོ སུསཱནཔསྶེན གཙྪཏི. ཨེཀཱ ཨཛཱ པཎྞཱནི ཁཱདམཱནཱ གཙྪནྟརཾ པཝིཊྛཱ དཱརཀཾ དིསྭཱ ཛཎྞུཀེཧི ཋཏྭཱ དཱརཀསྶ ཐནཾ ཨདཱསི, ཨཛཔཱལཀེན ‘‘ཧེ ཧེ’’ཏི སདྡེ ཀཏེཔི ན ནིཀྑམི. སོ ‘‘ཡཊྛིཡཱ ནཾ པཧརིཏྭཱ ནཱིཧརིསྶཱམཱི’’ཏི གཙྪནྟརཾ པཝིཊྛོ ཛཎྞུཀེཧི ཋཏྭཱ དཱརཀཾ ཁཱིརཾ པཱཡནྟིཾ ཨཛིཾ དིསྭཱ དཱརཀེ པུཏྟསིནེཧཾ པཊིལབྷིཏྭཱ, ‘‘པུཏྟོ མེ ལདྡྷོ’’ཏི ཨཱདཱཡ པཀྐཱམི.

ཀཱལཱི༹ གནྟྭཱ སེཊྛིནཱ པུཙྪིཏཱ ཏཾ པཝཏྟིཾ ཨཱཙིཀྑིཏྭཱ, ‘‘གཙྪ, ཏཾ པུན སཧསྶཾ དཏྭཱ ཨཱནེཧཱི’’ཏི ཝུཏྟཱ ཏཐཱ ཨཀཱསི. ཨཐ ནཾ ཨཱཧ – ‘‘ཨམྨ ཀཱལི༹, ཨིམཾ ཨཱདཱཡ ཙོརཔཔཱཏཔབྦཏཾ ཨབྷིརུཧིཏྭཱ པཔཱཏེ ཁིཔ, པབྦཏཀུཙྪིཡཾ པཊིཧཉྙམཱནོ ཁཎྜཱཁཎྜིཀོ ཧུཏྭཱ བྷཱུམིཡཾ པཏིསྶཏི, མཏཱམཏབྷཱཝཉྩསྶ ཉཏྭཱཝ ཨཱགཙྪེཡྻཱསཱི’’ཏི. སཱ ཏཾ ཏཏྠ ནེཏྭཱ པབྦཏམཏྠཀེ ཋཏྭཱ ཁིཔི. ཏཾ ཁོ པན པབྦཏཀུཙྪིཾ ནིསྶཱཡ མཧཱཝེལུ༹གུམྦོ པབྦཏཱནུསཱརེནེཝ ཝཌྜྷི, ཏསྶ མཏྠཀཾ གྷནཛཱཏོ ཛིཉྫུཀགུམྦོ ཨཝཏྠརི. དཱརཀོ པཏནྟོ ཀོཛཝཀེ ཝིཡ ཏསྨིཾ པཏི. ཏཾ དིཝསཉྩ ནལ༹ཀཱརཛེཊྛཀསྶ ཝེལུ༹བལི པཏྟོ ཧོཏི. སོ པུཏྟེན སདྡྷིཾ གནྟྭཱ ཏཾ ཝེལུ༹གུམྦཾ ཚིནྡིཏུཾ ཨཱརབྷི. ཏསྨིཾ ཙལནྟེ དཱརཀོ སདྡམཀཱསི. སོ ‘‘དཱརཀསདྡོ ཝིཡཱ’’ཏི ཨེཀེན པསྶེན ཨབྷིརུཧིཏྭཱ ཏཾ དིསྭཱ, ‘‘པུཏྟོ མེ ལདྡྷོ’’ཏི ཏུཊྛཙིཏྟོ ཨཱདཱཡ གཏོ.

ཀཱལཱི༹ སེཊྛིསྶ སནྟིཀཾ གནྟྭཱ ཏེན པུཙྪིཏཱ ཏཾ པཝཏྟིཾ ཨཱཙིཀྑིཏྭཱ, ‘‘གཙྪ, ནཾ པུན སཧསྶཾ དཏྭཱ ཨཱནེཧཱི’’ཏི ཝུཏྟཱ ཏཐཱ ཨཀཱསི. སེཊྛིནོ ཨིདཉྩིདཉྩ ཀརོནྟསྶེཝ དཱརཀོ ཝཌྜྷིཏོ ‘‘གྷོསཀོ’’ཏྭེཝསྶ ནཱམཾ ཨཧོསི. སོ སེཊྛིནོ ཨཀྑིམྷི ཀཎྚཀོ ཝིཡ ཁཱཡི, ཨུཛུཀཾ ཏཾ ཨོལོཀེཏུམྤི ན ཝིསཏི. ཨཐསྶ མཱརཎཱུཔཱཡཾ ཙིནྟེནྟོ ཨཏྟནོ སཧཱཡཀསྶ ཀུམྦྷཀཱརསྶ སནྟིཀཾ གནྟྭཱ, ‘‘ཀདཱ ཏྭཾ ཨཱཝཱཔཾ ཨཱལིམྤེསྶསཱི’’ཏི པུཙྪིཏྭཱ – ‘‘སྭེ’’ཏི ཝུཏྟེ, ‘‘ཏེན ཧི ཨིདཾ སཧསྶཾ གཧེཏྭཱ མམ ཨེཀཾ ཀམྨཾ ཀརོཧཱི’’ཏི ཨཱཧ. ‘‘ཀིཾ, སཱམཱི’’ཏི? ‘‘ཨེཀོ མེ ཨཝཛཱཏཔུཏྟོ ཨཏྠི, ཏཾ ཏཝ སནྟིཀཾ པེསེསྶཱམི, ཨཐ ནཾ གཧེཏྭཱ གབྦྷཾ པཝེསེཏྭཱ ཏིཁིཎཱཡ ཝཱསིཡཱ ཁཎྜཱཁཎྜིཀཾ ཚིནྡིཏྭཱ ཙཱཊིཡཾ པཀྑིཔིཏྭཱ ཨཱཝཱཔེ པཙེཡྻཱསི, ཨིདཾ ཏེ སཧསྶཾ སཙྩཀཱརསདིསཾ. ཨུཏྟརིཾ པན ཏེ ཀཏྟབྦཡུཏྟཀཾ པཙྪཱ ཀརིསྶཱམཱི’’ཏི. ཀུམྦྷཀཱརོ ‘‘སཱདྷཱུ’’ཏི སམྤཊིཙྪི. སེཊྛི པུནདིཝསེ གྷོསཀཾ པཀྐོསིཏྭཱ, ‘‘ཧིཡྻོ མཡཱ ཀུམྦྷཀཱརོ ཨེཀཾ ཀམྨཾ ཨཱཎཏྟོ, ཨེཧི, ཏྭཾ ཏསྶ སནྟིཀཾ གནྟྭཱ ཨེཝཾ ཝདེཧི – ‘ཧིཡྻོ ཀིར མེ པིཏརཱ ཨཱཎཏྟཾ ཀམྨཾ ནིཔྥཱདེཧཱི’’’ཏི པཧིཎི. སོ ‘‘སཱདྷཱུ’’ཏི ཨགམཱསི. ཏཾ ཏཏྠ གཙྪནྟཾ ཨིཏརོ སེཊྛིནོ པུཏྟོ དཱརཀེཧི སདྡྷིཾ གུལ༹ཾ ཀཱིལ༹ནྟོ དིསྭཱ ཏཾ པཀྐོསིཏྭཱ, ‘‘ཀུཧིཾ གཙྪསི བྷཱཏིཀཱ’’ཏི པུཙྪིཏྭཱ ‘‘པིཏུ སཱསནཾ གཧེཏྭཱ ཀུམྦྷཀཱརསྶ སནྟིཀ’’ནྟི ཝུཏྟེ ‘‘ཨཧཾ ཏཏྠ གམིསྶཱམི. ཨིམེ མཾ དཱརཀཱ བཧུཾ ལཀྑཾ ཛིནིཾསུ, ཏཾ མེ པཊིཛིནིཏྭཱ དེཧཱི’’ཏི ཨཱཧ. ‘‘ཨཧཾ པིཏུ བྷཱཡཱམཱི’’ཏི. ‘‘མཱ བྷཱཡི, བྷཱཏིཀ, ཨཧཾ ཏཾ སཱསནཾ ཧརིསྶཱམི. བཧཱུཧི ཛིཏོ, ཡཱཝཱཧཾ ཨཱགཙྪཱམི, ཏཱཝ མེ ལཀྑཾ པཊིཛིནཱ’’ཏི.

གྷོསཀོ ཀིར གུལ༹ཀཱིལཱ༹ཡ ཚེཀོ, ཏེན ནཾ ཨེཝཾ ནིབནྡྷི. སོཔི ཏཾ ‘‘ཏེན ཧི གནྟྭཱ ཀུམྦྷཀཱརཾ ཝདེཧི – ‘པིཏརཱ ཀིར མེ ཧིཡྻོ ཨེཀཾ ཀམྨཾ ཨཱཎཏྟཾ, ཏཾ ནིཔྥཱདེཧཱི’’’ཏི ཝཏྭཱ ཨུཡྻོཛེསི. སོ ཏསྶ སནྟིཀཾ གནྟྭཱ ཏཐཱ ཨཝཙ. ཨཐ ནཾ ཀུམྦྷཀཱརོ སེཊྛིནཱ ཝུཏྟནིཡཱམེནེཝ མཱརེཏྭཱ ཨཱཝཱཔེ ཁིཔི. གྷོསཀོཔི དིཝསབྷཱགཾ ཀཱིལི༹ཏྭཱ སཱཡནྷསམཡེ གེཧཾ གནྟྭཱ ‘‘ཀིཾ, ཏཱཏ, ན གཏོསཱི’’ཏི ཝུཏྟེ ཨཏྟནོ ཨགཏཀཱརཎཉྩ ཀནིཊྛསྶ གཏཀཱརཎཉྩ ཨཱརོཙེསི. ཏཾ སུཏྭཱ སེཊྛི ‘‘ཨཧཾ དྷཱི’’ཏི མཧཱཝིརཝཾ ཝིརཝིཏྭཱ སཀལསརཱིརེ པཀྐུཐིཏལོཧིཏོ ཝིཡ ཧུཏྭཱ, ‘‘ཨམྦྷོ, ཀུམྦྷཀཱར, མཱ མཾ ནཱསཡི, མཱ མཾ ནཱསཡཱི’’ཏི བཱཧཱ པགྒཡ྄ཧ ཀནྡནྟོ ཏསྶ སནྟིཀཾ ཨགམཱསི. ཀུམྦྷཀཱརོ ཏཾ ཏཐཱ ཨཱགཙྪནྟཾ དིསྭཱ, ‘‘སཱམི, མཱ སདྡཾ ཀརི, ཀམྨཾ ཏེ ནིཔྥནྣ’’ནྟི ཨཱཧ. སོ པབྦཏེན ཝིཡ མཧནྟེན སོཀེན ཨཝཏྠཊོ ཧུཏྭཱ ཨནཔྤཀཾ དོམནསྶཾ པཊིསཾཝེདེསི. ཡཐཱ ཏཾ ཨཔྤདུཊྛསྶ པདུསྶམཱནོ. ཏེནཱཧ བྷགཝཱ –

‘‘ཡོ དཎྜེན ཨདཎྜེསུ, ཨཔྤདུཊྛེསུ དུསྶཏི;

དསནྣམཉྙཏརཾ ཋཱནཾ, ཁིཔྤམེཝ ནིགཙྪཏི.

‘‘ཝེདནཾ ཕརུསཾ ཛཱནིཾ, སརཱིརསྶ ཙ བྷེདནཾ;

གརུཀཾ ཝཱཔི ཨཱབཱདྷཾ, ཙིཏྟཀྑེཔཉྩ པཱཔུཎེ.

‘‘རཱཛཏོ ཝཱ ཨུཔསགྒཾ, ཨབྦྷཀྑཱནཉྩ དཱརུཎཾ;

པརིཀྑཡཉྩ ཉཱཏཱིནཾ, བྷོགཱནཉྩ པབྷངྒུརཾ.

‘‘ཨཐ ཝཱསྶ ཨགཱརཱནི, ཨགྒི ཌཧཏི པཱཝཀོ;

ཀཱཡསྶ བྷེདཱ དུཔྤཉྙོ, ནིརཡཾ སོཔཔཛྫཏཱི’’ཏི. (དྷ. པ. ༡༣༧-༡༤༠);

ཨེཝཾ སནྟེཔི པུན ནཾ སེཊྛི ཨུཛུཀཾ ཨོལོཀེཏུཾ ན སཀྐོཏི. ‘‘ཀིནྟི ནཾ མཱརེཡྻ’’ནྟི ཙིནྟེནྟོ, ‘‘མམ གཱམསཏེ ཨཱཡུཏྟཀསྶ སནྟིཀཾ པེསེཏྭཱ མཱརེསྶཱམཱི’’ཏི ཨུཔཱཡཾ དིསྭཱ, ‘‘ཨཡཾ མེ ཨཝཛཱཏཔུཏྟོ, ཨིམཾ མཱརེཏྭཱ ཝཙྩཀཱུཔེ ཁིཔཏུ, ཨེཝཾ ཀཏེ ཨཧཾ མཱཏུལསྶ ཀཏྟབྦཡུཏྟཀཾ པཙྪཱ ཛཱནིསྶཱམཱི’’ཏི ཏསྶ པཎྞཾ ལིཁིཏྭཱ, ‘‘ཏཱཏ གྷོསཀ, ཨམྷཱཀཾ གཱམསཏེ ཨཱཡུཏྟཀོ ཨཏྠི, ཨིམཾ པཎྞཾ ཧརིཏྭཱ ཏསྶ དེཧཱི’’ཏི ཝཏྭཱ པཎྞཾ ཏསྶ དུསྶནྟེ བནྡྷི. སོ པན ཨཀྑརསམཡཾ ན ཛཱནཱཏི. དཧརཀཱལཏོ པཊྛཱཡ ཧི ནཾ མཱརཱཔེནྟོཝ སེཊྛི མཱརེཏུཾ ནཱསཀྑི, ཀིཾ ཨཀྑརསམཡཾ སིཀྑཱཔེསྶཏི? ཨིཏི སོ ཨཏྟནོ མཱརཱཔནཔཎྞམེཝ དུསྶནྟེ བནྡྷིཏྭཱ ནིཀྑམནྟོ ཨཱཧ – ‘‘པཱཐེཡྻཾ མེ, ཏཱཏ, ནཏྠཱི’’ཏི. ‘‘པཱཐེཡྻེན ཏེ ཀམྨཾ ནཏྠི, ཨནྟརཱམགྒེ ‘ཨསུཀགཱམེ ནཱམ མམསཧཱཡཀོ སེཊྛི ཨཏྠི, ཏསྶ གྷརེ པཱཏརཱསཾ ཀཏྭཱ པུརཏོ གཙྪཱཧཱི’’’ཏི. སོ ‘‘སཱདྷཱུ’’ཏི པིཏརཾ ཝནྡིཏྭཱ ནིཀྑནྟོ ཏཾ གཱམཾ པཏྭཱ སེཊྛིསྶ གྷརཾ པུཙྪིཏྭཱ གནྟྭཱ སེཊྛིཛཱཡཾ པསྶི. ‘‘ཏྭཾ ཀུཏོ ཨཱགཏོསཱི’’ཏི ཙ ཝུཏྟེ, ‘‘ཨནྟོནགརཏོ’’ཏི ཨཱཧ. ‘‘ཀསྶ པུཏྟོསཱི’’ཏི? ‘‘ཏུམྷཱཀཾ སཧཱཡཀསེཊྛིནོ, ཨམྨཱ’’ཏི. ‘‘ཏྭཾསི གྷོསཀོ ནཱམཱ’’ཏི? ‘‘ཨཱམ, ཨམྨཱ’’ཏི. ཏསྶཱ སཧ དསྶནེནེཝ ཏསྨིཾ པུཏྟསིནེཧོ ཨུཔྤཛྫི. སེཊྛིནོ པནེཀཱ དྷཱིཏཱ ཨཏྠི པནྣརསསོལ༹སཝསྶུདྡེསིཀཱ ཨབྷིརཱུཔཱ པཱསཱདིཀཱ, ཏཾ རཀྑིཏུཾ ཨེཀམེཝ པེསནཀཱརིཀཾ དཱསིཾ དཏྭཱ སཏྟབྷཱུམིཀསྶ པཱསཱདསྶ ཨུཔརིམཏལེ སིརིགབྦྷེ ཝསཱཔེནྟི. སེཊྛིདྷཱིཏཱ ཏསྨིཾ ཁཎེ ཏཾ དཱསིཾ ཨནྟརཱཔཎཾ པེསེསི. ཨཐ ནཾ སེཊྛིཛཱཡཱ དིསྭཱ, ‘‘ཀུཧིཾ གཙྪསཱི’’ཏི པུཙྪིཏྭཱ, ‘‘ཨཡྻདྷཱིཏཱཡ པེསནེནཱ’’ཏི ཝུཏྟེ ‘‘ཨིཏོ ཏཱཝ ཨེཧི, ཏིཊྛཏུ པེསནཾ, པུཏྟསྶ མེ པཱིཋཀཾ ཨཏྠརིཏྭཱ པཱདེ དྷོཝིཏྭཱ ཏེལཾ མཀྑིཏྭཱ སཡནཾ ཨཏྠརིཏྭཱ དེཧི, པཙྪཱ པེསནཾ ཀརིསྶསཱི’’ཏི ཨཱཧ. སཱ ཏཐཱ ཨཀཱསི.

ཨཐ ནཾ ཙིརེནཱགཏཾ སེཊྛིདྷཱིཏཱ སནྟཛྫེསི. ཨཐ ནཾ སཱ ཨཱཧ – ‘‘མཱ མེ ཀུཛ྄ཛྷི, སེཊྛིཔུཏྟོ གྷོསཀོ ཨཱགཏོ, ཏསྶ ཨིདཉྩིདཉྩ ཀཏྭཱ ཏཏྠ གནྟྭཱ ཨཱགཏཱམྷཱི’’ཏི. སེཊྛིདྷཱིཏཱཡ ‘‘སེཊྛིཔུཏྟོ གྷོསཀོ’’ཏི ནཱམཾ སུཏྭཱཝ པེམཾ ཚཝིཡཱདཱིནི ཚིནྡིཏྭཱ ཨཊྛིམིཉྫཾ ཨཱཧཙྩ ཋིཏཾ. ཀོཏུཧལཀཱལསྨིཉྷི སཱ ཏསྶ པཛཱཔཏཱི ཧུཏྭཱ ནཱལི༹ཀོདནཾ པཙྩེཀབུདྡྷསྶ ཨདཱསི, ཏསྶཱནུབྷཱཝེནཱགནྟྭཱ ཨིམསྨིཾ སེཊྛིཀུལེ ནིབྦཏྟཱ. ཨིཏི ཏཾ སོ པུབྦསིནེཧོ ཨཝཏྠརིཏྭཱ གཎྷི. ཏེནཱཧ བྷགཝཱ –

‘‘པུབྦེཝ སནྣིཝཱསེན, པཙྩུཔྤནྣཧིཏེན ཝཱ;

ཨེཝཾ ཏཾ ཛཱཡཏེ པེམཾ, ཨུཔྤལཾཝ ཡཐོདཀེ’’ཏི. (ཛཱ. ༡.༢.༡༧༤);

ཨཐ ནཾ པུཙྪི – ‘‘ཀུཧིཾ སོ, ཨམྨཱ’’ཏི? ‘‘སཡནེ ནིཔནྣོ ནིདྡཱཡཏཱི’’ཏི. ‘‘ཨཏྠི པནསྶ ཧཏྠེ ཀིཉྩཱི’’ཏི? ‘‘དུསྶནྟེ པཎྞཾ ཨཏྠཱི’’ཏི. སཱ ‘‘ཀིཾ པཎྞཾ ནུ ཁོ ཨེཏ’’ནྟི ཏསྨིཾ ནིདྡཱཡནྟེ མཱཏཱཔིཏཱུནཾ ཨཉྙཝིཧིཏཏཱཡ ཨཔསྶནྟཱནཾ ཨོཏརིཏྭཱ སམཱིཔཾ གནྟྭཱ ཏཾ པཎྞཾ མོཙེཏྭཱ ཨཱདཱཡ ཨཏྟནོ གབྦྷཾ པཝིསིཏྭཱ དྭཱརཾ པིདྷཱཡ ཝཱཏཔཱནཾ ཝིཝརིཏྭཱ ཨཀྑརསམཡེ ཀུསལཏཱཡ པཎྞཾ ཝཱཙེཏྭཱ, ‘‘ཨཧོ ཝཏ བཱལོ, ཨཏྟནོ མརཎཔཎྞཾ དུསྶནྟེ བནྡྷིཏྭཱ ཝིཙརཏི, སཙེ མཡཱ ན དིཊྛཾ ཨསྶ, ནཏྠིསྶ ཛཱིཝིཏ’’ནྟི ཏཾ པཎྞཾ ཕཱལེཏྭཱ སེཊྛིསྶ ཝཙནེན ཨཔརཾ པཎྞཾ ལིཁི – ‘‘ཨཡཾ མམ པུཏྟོ གྷོསཀོ ནཱམ, གཱམསཏཏོ པཎྞཱཀཱརཾ ཨཱཧརཱཔེཏྭཱ ཨིམསྶ ཛནཔདསེཊྛིནོ དྷཱིཏརཱ སདྡྷིཾ མངྒལཾ ཀཏྭཱ ཨཏྟནོ ཝསནགཱམསྶ མཛ྄ཛྷེ དྭིབྷཱུམཀཾ གེཧཾ ཀཱརེཏྭཱ པཱཀཱརཔརིཀྑེཔེན ཙེཝ པུརིསགུཏྟིཡཱ ཙ སུསཾཝིཧིཏཱརཀྑཾ ཀརོཏུ, མཡ྄ཧཉྩ ‘ཨིདཉྩིདཉྩ མཡཱ ཀཏ’ནྟི སཱསནཾ པེསེཏུ, ཨེཝཾ ཀཏེ ཨཧཾ མཱཏུལསྶ ཀཏྟབྦཡུཏྟཀཾ པཙྪཱ ཛཱནིསྶཱམཱི’’ཏི, ལིཁིཏྭཱ ཙ པན སངྒྷརིཏྭཱ ཨོཏརིཏྭཱ དུསྶནྟེཡེཝསྶ བནྡྷི.

སོ དིཝསབྷཱགཾ ནིདྡཱཡིཏྭཱ ཨུཊྛཱཡ བྷུཉྫིཏྭཱ པཀྐཱམི. པུནདིཝསེ པཱཏོཝ ཏཾ གཱམཾ གནྟྭཱ ཨཱཡུཏྟཀཾ གཱམཀིཙྩཾ ཀརོནྟཾཡེཝ པསྶི. སོ ཏཾ དིསྭཱ, ‘‘ཀིཾ, ཏཱཏཱ’’ཏི པུཙྪི. ‘‘པིཏརཱ མེ ཏུམྷཱཀཾ པཎྞཾ པེསིཏ’’ནྟི. ‘‘ཀིཾ པཎྞཾ, ཏཱཏ, ཨཱཧརཱ’’ཏི པཎྞཾ གཧེཏྭཱ ཝཱཙེཏྭཱ ཏུཊྛམཱནསོ ‘‘པསྶཐ, བྷོ, མམ སཱམིནོ མཡི སིནེཧཾ ཀཏྭཱ ཛེཊྛཔུཏྟསྶ མེ མངྒལཾ ཀརོཏཱུ’’ཏི མམ སནྟིཀཾ པཧིཎི. ‘‘སཱིགྷཾ དཱརུཨཱདཱིནི ཨཱཧརཐཱ’’ཏི གཧཔཏིཀེ ཝཏྭཱ གཱམམཛ྄ཛྷེ ཝུཏྟཔཀཱརཾ གེཧཾ ཀཱརཱཔེཏྭཱ གཱམསཏཏོ པཎྞཱཀཱརཾ ཨཱཧརཱཔེཏྭཱ ཛནཔདསེཊྛིནོ སནྟིཀཱ དྷཱིཏརཾ ཨཱནེཏྭཱ མངྒལཾ ཀཏྭཱ སེཊྛིསྶ སཱསནཾ པཧིཎི ‘‘ཨིདཉྩིདཉྩ མཡཱ ཀཏ’’ནྟི.

ཏཾ སུཏྭཱ སེཊྛིནོ ‘‘ཡཾ ཀཱརེམི, ཏཾ ན ཧོཏི; ཡཾ ན ཀཱརེམི, ཏདེཝ ཧོཏཱི’’ཏི མཧནྟཾ དོམནསྶཾ ཨུཔྤཛྫི. པུཏྟསོཀེན སདྡྷིཾ སོ སོཀོ ཨེཀཏོ ཧུཏྭཱ ཀུཙྪིཌཱཧཾ ཨུཔྤཱདེཏྭཱ ཨཏིསཱརཾ ཛནེསི. སེཊྛིདྷཱིཏཱཔི ‘‘སཙེ ཀོཙི སེཊྛིནོ སནྟིཀཱ ཨཱགཙྪཏི, མམ ཨཀཐེཏྭཱ སེཊྛིཔུཏྟསྶ པཋམཏརཾ མཱ ཀཐཡིཏྠཱ’’ཏི ཛནེ ཨཱཎཱཔེསི. སེཊྛིཔི ཁོ ‘‘དཱནི ཏཾ དུཊྛཔུཏྟཾ མམ སཱཔཏེཡྻསྶ སཱམིཀཾ ན ཀརིསྶཱམཱི’’ཏི ཙིནྟེཏྭཱ ཨེཀཾ ཨཱཡུཏྟཀཾ ཨཱཧ – ‘‘མཱཏུལ, པུཏྟཾ མེ དཊྛུཀཱམོམྷི, ཨེཀཾ པཱདམཱུལིཀཾ པེསེཏྭཱ མམ པུཏྟཾ པཀྐོསཱཔེཧཱི’’ཏི. སོ ‘‘སཱདྷཱུ’’ཏི ཝཏྭཱ པཎྞཾ དཏྭཱ ཨེཀཾ པུརིསཾ པེསེསི. སེཊྛིདྷཱིཏཱཔི ཏསྶ ཨཱགནྟྭཱ དྭཱརེ ཋིཏབྷཱཝཾ སུཏྭཱ ཏཾ པཀྐོསཱཔེཏྭཱ, ‘‘ཀིཾ, ཏཱཏཱ’’ཏི པུཙྪི. སོ ཨཱཧ – ‘‘སེཊྛི གིལཱནོ, པུཏྟཾ པསྶིཏུཾ པཀྐོསཱཔེསི, ཨཡྻེ’’ཏི. ‘‘ཀིཾ, ཏཱཏ, བལཝཱ, དུབྦལོ’’ཏི? ‘‘བལཝཱ ཏཱཝ, ཨཱཧཱརཾ བྷུཉྫཏིཡེཝ, ཨཡྻེ’’ཏི. སཱ སེཊྛིཔུཏྟཾ ཨཛཱནཱཔེཏྭཱཝ ཏསྶ ནིཝེསནཉྩ པརིབྦཡཉྩ དཱཔེཏྭཱ ‘‘མཡཱ པེསིཏཀཱལེ གམིསྶསི, ཨཙྪསྶུ ཏཱཝཱ’’ཏི ཨཱཧ. སེཊྛི པུན ཨཱཡུཏྟཀཾ ཨཝཙ, ‘‘ཀིཾ, མཱཏུལ, ན ཏེ མམ པུཏྟསྶ སནྟིཀཾ པཧིཏ’’ནྟི? ‘‘པཧིཏཾ, སཱམི, གཏཔུརིསོ ན ཏཱཝ ཨེཏཱི’’ཏི. ‘‘ཏེན ཧི པུན ཨཔརཾ པེསེཧཱི’’ཏི. སོ པེསེསི. སེཊྛིདྷཱིཏཱ ཏསྨིམྤི ཏཐེཝ པཊིཔཛྫི. ཨཐ སེཊྛིནོ རོགོ བལཝཱ ཛཱཏོ, ཨེཀཾ བྷཱཛནཾ པཝིསཏི, ཨེཀཾ ནིཀྑམཏི. པུན སེཊྛི ཨཱཡུཏྟཀཾ པུཙྪི – ‘‘ཀིཾ, མཱཏུལ, ན ཏེ མམ པུཏྟསྶ སནྟིཀཾ པཧིཏ’’ནྟི? ‘‘པཧིཏཾ, སཱམི, གཏཔུརིསོ ན ཏཱཝ ཨེཏཱི’’ཏི. ‘‘ཏེན ཧི པུན ཨཔརཾ པེསེཧཱི’’ཏི. སོ པེསེསི. སེཊྛིདྷཱིཏཱ ཏཏིཡཝཱརེ ཨཱགཏམྤི ཏཾ པཝཏྟིཾ པུཙྪི. སོ ‘‘བཱལ༹ྷགིལཱནོ, ཨཡྻེ, སེཊྛི ཨཱཧཱརཾ པཙྪིནྡིཏྭཱ མཙྩུཔརཱཡཎོ ཛཱཏོ, ཨེཀཾ བྷཱཛནཾ ནིཀྑམཏི, ཨེཀཾ པཝིསཏཱི’’ཏི ཨཱཧ. སེཊྛིདྷཱིཏཱ ‘‘ཨིདཱནི གནྟུཾ ཀཱལོ’’ཏི སེཊྛིཔུཏྟསྶ ‘‘པིཏཱ ཏེ ཀིར གིལཱནོ’’ཏི ཨཱརོཙེཏྭཱ ‘‘ཀིཾ ཝདེསི བྷདྡེ’’ཏི ཝུཏྟེ ‘‘ཨཕཱསུཀམསྶ, སཱམཱི’’ཏི ཨཱཧ. ‘‘ཨིདཱནི ཀིཾ ཀཱཏབྦ’’ནྟི. སཱམི? ‘‘གཱམསཏཏོ ཝུཊྛཱནཀཔཎྞཱཀཱརཾ ཨཱདཱཡ གནྟྭཱ པསྶིསྶཱམ ན’’ནྟི. སོ ‘‘སཱདྷཱུ’’ཏི པཎྞཱཀཱརཾ ཨཱཧརཱཔེཏྭཱ སཀཊེཧི ཨཱདཱཡ པཀྐཱམི.

ཨཐ ནཾ སཱ ‘‘པིཏཱ ཏེ དུབྦལོ, ཨེཏྟཀཾ པཎྞཱཀཱརཾ གཧེཏྭཱ གཙྪནྟཱནཾ པཔཉྩོ བྷཝིསྶཏི, ཨེཏཾ ནིཝཏྟཱཔེཧཱི’’ཏི ཝཏྭཱ ཏཾ སབྦཾ ཨཏྟནོ ཀུལགེཧཾ པེསེཏྭཱ པུན ཏཾ ཨཱཧ – ‘‘སཱམི, ཏྭཾ ཨཏྟནོ པིཏུ པཱདཔསྶེ ཏིཊྛེཡྻཱསི, ཨཧཾ ཨུསྶཱིསཀཔསྶེ ཋསྶཱམཱི’’ཏི. གེཧཾ པཝིསམཱནཱཡེཝ ཙ ‘‘གེཧསྶ པུརཏོ ཙ པཙྪཏོ ཙ ཨཱརཀྑཾ གཎྷཐཱ’’ཏི ཨཏྟནོ པུརིསེ ཨཱཎཱཔེསི. པཝིཊྛཀཱལེ པན སེཊྛིཔུཏྟོ པིཏུ པཱདཔསྶེ ཨཊྛཱསི, ཨིཏརཱ ཨུསྶཱིསཀཔསྶེ.

ཏསྨིཾ ཁཎེ སེཊྛི ཨུཏྟཱནཀོ ནིཔནྣོ ཧོཏི. ཨཱཡུཏྟཀོ པན ཏསྶ པཱདེ པརིམཛྫནྟོ ‘‘པུཏྟོ ཏེ, སཱམི, ཨཱགཏོ’’ཏི ཨཱཧ. ‘‘ཀུཧིཾ སོ’’ཏི? ‘‘ཨེས པཱདམཱུལེ ཋིཏོ’’ཏི. ཨཐ ནཾ དིསྭཱ ཨཱཡཀམྨིཀཾ པཀྐོསཱཔེཏྭཱ, ‘‘མམ གེཧེ ཀིཏྟཀཾ དྷན’’ནྟི པུཙྪི. ‘‘སཱམི, དྷནསྶེཝ ཙཏྟཱལཱིསཀོཊིཡོ, ཨུཔབྷོགཔརིབྷོགབྷཎྜཱནཾ པན ཝནགཱམཀྑེཏྟདྭིཔདཙཏུཔྤདཡཱནཝཱཧནཱནཉྩ ཨཡཉྩ ཨཡཉྩ པརིཙྪེདོ’’ཏི ཝུཏྟེ, ‘‘ཨཧཾ ཨེཏྟཀཾ དྷནཾ མམ པུཏྟསྶ གྷོསཀསྶ ན དེམཱི’’ཏི ཝཏྟུཀཱམོ ‘‘དེམཱི’’ཏི ཨཱཧ. ཏཾ སུཏྭཱ སེཊྛིདྷཱིཏཱ ‘‘ཨཡཾ པུན ཀཐེནྟོ ཨཉྙཾ ཀིཉྩི ཀཐེཡྻཱ’’ཏི ཙིནྟེཏྭཱ སོཀཱཏུརཱ ཝིཡ ཀེསེ ཝིཀིརིཏྭཱ རོདམཱནཱ ‘‘ཀིཾ ནཱམེཏཾ, ཏཱཏ, ཝདེཐ, ཨིདམྤི ནཱམ ཝོ ཝཙནཾ སུཎོམ, ཨལཀྑིཀཱ ཝཏམྷཱ’’ཏི ཝཏྭཱ མཏྠཀེན ནཾ ཨུརམཛ྄ཛྷེ པཧརནྟཱི པཏིཏྭཱ ཡཐཱ པུན ཝཏྟུཾ ན སཀྐོཏི, ཏཐཱསྶ ཨུརམཛ྄ཛྷེ མཏྠཀེན གྷཾསེནྟཱི ཨཱརོདནཾ དསྶེསི. སེཊྛི ཏཾཁཎཉྙེཝ ཀཱལམཀཱསི. ‘‘སེཊྛི མཏོ’’ཏི གནྟྭཱ ཨུཏེནསྶ རཉྙོ ཨཱརོཙཡིཾསུ. རཱཛཱ ཏསྶ སརཱིརཀིཙྩཾ ཀཱརཱཔེཏྭཱ, ‘‘ཨཏྠི པནསྶ པུཏྟོ ཝཱ དྷཱིཏཱ ཝཱ’’ཏི པུཙྪི. ‘‘ཨཏྠི, དེཝ, གྷོསཀོ ནཱམ ཏསྶ པུཏྟོ, སབྦཾ སཱཔཏེཡྻཾ ཏསྶ ནིཡྻཱདེཏྭཱཝ མཏོ, དེཝཱ’’ཏི.

རཱཛཱ ཨཔརབྷཱགེ སེཊྛིཔུཏྟཾ པཀྐོསཱཔེསི. ཏསྨིཉྩ དིཝསེ དེཝོ ཝསྶི. རཱཛངྒཎེ ཏཏྠ ཏཏྠ ཨུདཀཾ སཎྛཱཏི. སེཊྛིཔུཏྟོ ‘‘རཱཛཱནཾ པསྶིསྶཱམཱི’’ཏི པཱཡཱསི. རཱཛཱ ཝཱཏཔཱནཾ ཝིཝརིཏྭཱ ཏཾ ཨཱགཙྪནྟཾ ཨོལོཀེནྟོ རཱཛངྒཎེ ཨུདཀཾ ལངྒྷིཏྭཱ ཨཱགཙྪནྟཾ དིསྭཱ ཨཱགནྟྭཱ ཝནྡིཏྭཱ ཋིཏཾ ‘‘ཏྭཾ གྷོསཀོ ནཱམ, ཏཱཏཱ’’ཏི པུཙྪིཏྭཱ ‘‘ཨཱམ, དེཝཱ’’ཏི ཝུཏྟེ ‘‘པིཏཱ མེ མཏོཏི མཱ སོཙི, ཏཝ པེཏྟིཀཾ སེཊྛིཊྛཱནཾ ཏུཡ྄ཧམེཝ དསྶཱམཱི’’ཏི ཏཾ སམསྶཱསེཏྭཱ ‘‘གཙྪ, ཏཱཏཱ’’ཏི ཨུཡྻོཛེསི. རཱཛཱ གཙྪནྟཉྩ ནཾ ཨོལོཀེནྟོཝ ཨཊྛཱསི. སོ ཨཱགམནཀཱལེ ལངྒྷིཏཾ ཨུདཀཾ གམནཀཱལེ ཨོཏརིཏྭཱ སཎིཀཾ ཨགམཱསི. ཨཐ ནཾ རཱཛཱ ཏཏོཝ པཀྐོསཱཔེཏྭཱ, ‘‘ཀིཾ ནུ ཁོ, ཏཱཏ, ཏྭཾ མམ སནྟིཀཾ ཨཱགཙྪནྟོ ཨུདཀཾ ལངྒྷིཏྭཱ ཨཱགམྨ གཙྪནྟོ ཨོཏརིཏྭཱ སཎིཀཾ གཙྪསཱི’’ཏི པུཙྪི. ‘‘ཨཱམ, དེཝ, ཨཧཾ ཏསྨིཾ ཁཎེ ཀུམཱརཀོ, ཀཱིལ༹ནཀཱལོ ནཱམ, སོ ཨིདཱནི པན མེ དེཝེན ཋཱནནྟརཾ པཊིསྶུཏཾ. ཏསྨཱ ཡཐཱ པུརེ ཨཙརིཏྭཱ ཨིདཱནི སནྣིསིནྣེན ཧུཏྭཱ ཙརིཏུཾ ཝཊྚཏཱི’’ཏི. ཏཾ སུཏྭཱ རཱཛཱ ‘‘དྷིཏིམཱཡཾ པུརིསོ, ཨིདཱནེཝསྶ ཋཱནནྟརཾ དསྶཱམཱི’’ཏི པིཏརཱ བྷུཏྟཾ བྷོགཾ དཏྭཱ སབྦསཏེན སེཊྛིཊྛཱནཾ ཨདཱསི.

སོ རཐེ ཋཏྭཱ ནགརཾ པདཀྑིཎཾ ཨཀཱསི. ཨོལོཀིཏོལོཀིཏཊྛཱནཾ ཀམྤཏི. སེཊྛིདྷཱིཏཱ ཀཱལི༹དཱསིཡཱ སདྡྷིཾ མནྟཡམཱནཱ ནིསིནྣཱ ‘‘ཨམྨ ཀཱལི༹, པུཏྟསྶ ཏེ ཨེཏྟིཀཱ སམྤཏྟི མཾ ནིསྶཱཡ ཨུཔྤནྣཱ’’ཏི ཨཱཧ. ‘‘ཀིཾ ཀཱརཎཱ, ཨམྨཱ’’ཏི? ‘‘ཨཡཉྷི ཨཏྟནོ མརཎཔཎྞཾ དུསྶནྟེ བནྡྷིཏྭཱ ཨམྷཱཀཾ གྷརཾ ཨཱགཏོ, ཨཐསྶ མཡཱ ཏཾ པཎྞཾ ཕཱལེཏྭཱ མཡཱ སདྡྷིཾ མངྒལཀརཎཏྠཱཡ ཨཉྙཾ པཎྞཾ ལིཁིཏྭཱ ཨེཏྟཀཾ ཀཱལཾ ཏཏྠ ཨཱརཀྑོ ཀཏོ’’ཏི. ‘‘ཨམྨ, ཏྭཾ ཨེཏྟཀཾ པསྶསི, ཨིམཾ པན སེཊྛི དཧརཀཱལཏོ པཊྛཱཡ མཱརེཏུཀཱམོ མཱརེཏུཾ ནཱསཀྑི, ཀེཝལཾ ཨིམཾ ནིསྶཱཡ བཧུཾ དྷནཾ ཁཱིཡཱི’’ཏི. ‘‘ཨམྨ, ཨཏིབྷཱརིཡཾ ཝཏ སེཊྛིནཱ ཀཏ’’ནྟི. ནགརཾ པདཀྑིཎཾ ཀཏྭཱ གེཧཾ པཝིསནྟཾ པན ནཾ དིསྭཱ, ‘‘ཨཡཾ ཨེཏྟིཀཱ སམྤཏྟི མཾ ནིསྶཱཡ ཨུཔྤནྣཱ’’ཏི ཧསིཏཾ ཨཀཱསི. ཨཐ ནཾ སེཊྛིཔུཏྟོ དིསྭཱ, ‘‘ཀིཾ ཀཱརཎཱ ཧསཱི’’ཏི པུཙྪི. ‘‘ཨེཀཾ ཀཱརཎཾ ནིསྶཱཡཱ’’ཏི. ‘‘ཀཐེཧི ན’’ནྟི? ‘‘སཱ ན ཀཐེསི’’. སོ ‘‘སཙེ ན ཀཐེསྶསི, དྭིདྷཱ ཏཾ ཚིནྡིསྶཱམཱི’’ཏི ཏཛྫེཏྭཱ ཨསིཾ ནིཀྐཌྜྷི. སཱ ‘‘ཨཡཾ ཨེཏྟིཀཱ སམྤཏྟི ཏཡཱ མཾ ནིསྶཱཡ ལདྡྷཱཏི ཙིནྟེཏྭཱ ཧསིཏ’’ནྟི ཨཱཧ. ‘‘ཡདི མམ པིཏརཱ ཨཏྟནོ སནྟཀཾ མཡ྄ཧཾ ནིཡྻཱདིཏཾ, ཏྭཾ ཨེཏྠ ཀིཾ ཧོསཱི’’ཏི? སོ ཀིར ཨེཏྟཀཾ ཀཱལཾ ཀིཉྩི ན ཛཱནཱཏི, ཏེནསྶཱ ཝཙནཾ ན སདྡཧི. ཨཐསྶ སཱ ‘‘ཏུམྷཱཀཾ པིཏརཱ མརཎཔཎྞཾ དཏྭཱ པེསིཏཱ, ཏུམྷེ མཡཱ ཨིདཉྩིདཉྩ ཀཏྭཱ རཀྑིཏཱ’’ཏི སབྦཾ ཀཐེསི. ‘‘ཏྭཾ ཨབྷཱུཏཾ ཀཐེསཱི’’ཏི ཨསདྡཧནྟོ ‘‘མཱཏརཾ ཀཱལི༹ཾ པུཙྪིསྶཱམཱི’’ཏི ཙིནྟེཏྭཱ ‘‘ཨེཝཾ ཀིར, ཨམྨཱ’’ཏི. ‘‘ཨཱམ, ཏཱཏ, དཧརཀཱལཏོ པཊྛཱཡ ཏཾ མཱརེཏུཀཱམོ མཱརེཏུཾ ཨསཀྐོནྟོ ཏཾ ནིསྶཱཡ བཧུཾ དྷནཾ ཁཱིཡི, སཏྟསུ ཋཱནེསུ ཏྭཾ མརཎཏོ མུཏྟོ, ཨིདཱནི བྷོགགཱམཏོ ཨཱགམྨ སབྦསཏེན སདྡྷིཾ སེཊྛིཊྛཱནཾ པཏྟོ’’ཏི. སོ ཏཾ སུཏྭཱ ‘‘བྷཱརིཡཾ ཝཏ ཀམྨཾ, ཨེཝརཱུཔཱ ཁོ པན མརཎཱ མུཏྟསྶ མམ པམཱདཛཱིཝིཏཾ ཛཱིཝིཏུཾ ཨཡུཏྟཾ, ཨཔྤམཏྟོ བྷཝིསྶཱམཱི’’ཏི ཙིནྟེཏྭཱ དེཝསིཀཾ སཧསྶཾ ཝིསྶཛྫེཏྭཱ ཨདྡྷིཀཀཔཎཱདཱིནཾ དཱནཾ པཊྛཔེསི. མིཏྟོ ནཱམསྶ ཀུཊུམྦིཀོ དཱནབྱཱཝཊོ ཨཧོསི. ཨཡཾ གྷོསཀསེཊྛིནོ ཨུཔྤཏྟི.

ཏསྨིཾ པན ཀཱལེ བྷདྡཝཏཱིནགརེ བྷདྡཝཏིཡསེཊྛི ནཱམ གྷོསཀསེཊྛིནོ ཨདིཊྛཔུབྦསཧཱཡཀོ ཨཧོསི. བྷདྡཝཏཱིནགརཏོ ཨཱགཏཱནཾ ཝཱཎིཛཱནཾ སནྟིཀེ གྷོསཀསེཊྛི བྷདྡཝཏིཡསེཊྛིནོ སམྤཏྟིཉྩ ཝཡཔྤདེསཉྩ སུཏྭཱ ཏེན སདྡྷིཾ སཧཱཡཀབྷཱཝཾ ཨིཙྪནྟོ པཎྞཱཀཱརཾ པེསེསི. བྷདྡཝཏིཡསེཊྛིཔི ཀོསམྦིཏོ ཨཱགཏཱནཾ ཝཱཎིཛཱནཾ སནྟིཀེ གྷོསཀསེཊྛིནོ སམྤཏྟིཉྩ ཝཡཔྤདེསཉྩ སུཏྭཱ ཏེན སདྡྷིཾ སཧཱཡཀབྷཱཝཾ ཨིཙྪནྟོ པཎྞཱཀཱརཾ པེསེསི. ཨེཝཾ ཏེ ཨཉྙམཉྙཾ ཨདིཊྛཔུབྦསཧཱཡཀཱ ཧུཏྭཱ ཝསིཾསུ. ཨཔརབྷཱགེ བྷདྡཝཏིཡསེཊྛིནོ གེཧེ ཨཧིཝཱཏརོགོ པཏིཏོ. ཏསྨིཾ པཏིཏེ པཋམཾ མཀྑིཀཱ མརནྟི, ཏཏོ ཨནུཀྐམེནེཝ ཀཱིཊཱ མཱུསིཀཱ ཀུཀྐུཊཱ སཱུཀརཱ གཱཝོ དཱསཱི དཱསཱ སབྦཔཙྪཱ གྷརམཱནུསཀཱཔི མརནྟི. ཏེསུ ཡེ བྷིཏྟིཾ བྷིནྡིཏྭཱ པལཱཡནྟི, ཏེ ཛཱིཝིཏཾ ལབྷནྟི, ཏདཱ པན སེཊྛི ཙ བྷརིཡཱ ཙ དྷཱིཏཱ ཙསྶ ཏཐཱ པལཱཡིཏྭཱ གྷོསཀསེཊྛིཾ པསྶིཏུཾ པཏྠེནྟཱ ཀོསམྦིམགྒཾ པཊིཔཛྫིཾསུ. ཏེ ཨནྟརཱམགྒེཡེཝ ཁཱིཎཔཱཐེཡྻཱ ཝཱཏཱཏཔེན ཙེཝ ཁུཔྤིཔཱསཱཧི ཙ ཀིལནྟསརཱིརཱ ཀིཙྪེན ཀོསམྦིཾ པཏྭཱ ཨུདཀཕཱསུཀཊྛཱནེ ཋཏྭཱ ནྷཏྭཱ ནགརདྭཱརེ ཨེཀཾ སཱལཾ པཝིསིཾསུ.

ཏཏོ སེཊྛི བྷརིཡཾ ཨཱཧ – ‘‘བྷདྡེ, ཨིམིནཱ ནཱིཧཱརེན གཙྪནྟཱ ཝིཛཱཏམཱཏུཡཱཔི ཨམནཱཔཱ ཧོནྟི, སཧཱཡཀོ ཀིར མེ ཨདྡྷིཀཀཔཎཱདཱིནཾ དེཝསིཀཾ སཧསྶཾ ཝིསྶཛྫེཏྭཱ དཱནཾ དཱཔེསི. ཏཏྠ དྷཱིཏརཾ པེསེཏྭཱ ཨཱཧཱརཾ ཨཱཧརཱཔེཏྭཱ ཨེཀཱཧཾ དྭཱིཧཾ ཨིདྷེཝ སརཱིརཾ སནྟཔྤེཏྭཱ སཧཱཡཀཾ པསྶིསྶཱམཱ’’ཏི. སཱ ‘‘སཱདྷུ, སཱམཱི’’ཏི. ཏེ སཱལཱཡམེཝ ཝསིཾསུ. པུནདིཝསེ ཀཱལེ ཨཱརོཙིཏེ ཀཔཎདྡྷིཀཱདཱིསུ ཨཱཧཱརཏྠཱཡ གཙྪནྟེསུ མཱཏཱཔིཏརོ, ‘‘ཨམྨ, གནྟྭཱ ཨམྷཱཀཾ ཨཱཧཱརཾ ཨཱཧརཱ’’ཏི དྷཱིཏརཾ པེསཡིཾསུ. མཧཱབྷོགཀུལསྶ དྷཱིཏཱ ཝིཔཏྟིཡཱ ཨཙྪིནྣལཛྫིཏཱཡ ཨལཛྫམཱནཱ པཱཏིཾ གཧེཏྭཱ ཀཔཎཛནེན སདྡྷིཾ ཨཱཧཱརཏྠཱཡ གནྟྭཱ ‘‘ཀཏི པཊིཝཱིསེ གཎྷིསྶསི, ཨམྨཱ’’ཏི པུཊྛཱ ཙ པན ‘‘ཏཡོ’’ཏི ཨཱཧ. ཨཐསྶཱ ཏཡོ པཊིཝཱིསེ ཨདཱསི. ཏཱཡ བྷཏྟེ ཨཱཧཊེ ཏཡོཔི ཨེཀཏོ བྷུཉྫིཏུཾ ནིསཱིདིཾསུ.

ཨཐ མཱཏཱདྷཱིཏརོ སེཊྛིཾ ཨཱཧཾསུ – ‘‘སཱམི, ཝིཔཏྟི ནཱམ མཧཱཀུལཱནམྤི ཨུཔྤཛྫཏི, མཱ ཨམྷེ ཨོལོཀེཏྭཱ བྷུཉྫ, མཱ ཙིནྟཡཱི’’ཏི. ཨིཏི ནཾ ནཱནཔྤཀཱརེཧི ཡཱཙིཏྭཱ བྷོཛེསུཾ. སོ བྷུཉྫིཏྭཱ ཨཱཧཱརཾ ཛཱིརཱཔེཏུཾ ཨསཀྐོནྟོ ཨརུཎེ ཨུགྒཙྪནྟེ ཀཱལམཀཱསི. མཱཏཱདྷཱིཏརོ ནཱནཔྤཀཱརེཧི པརིདེཝིཏྭཱ རོདིཾསུ. ཀུམཱརིཀཱ པུནདིཝསེ རོདམཱནཱ ཨཱཧཱརཏྠཱཡ གནྟྭཱ, ‘‘ཀཏི པཊིཝཱིསེ གཎྷིསྶསཱི’’ཏི ཝུཏྟཱ, ‘‘དྭེ’’ཏི ཝཏྭཱ ཨཱཧཱརཾ ཨཱཧརིཏྭཱ མཱཏརཾ ཡཱཙིཏྭཱ བྷོཛེསི. སཱཔི ཏཱཡ ཡཱཙིཡམཱནཱ བྷུཉྫིཏྭཱ ཨཱཧཱརཾ ཛཱིརཱཔེཏུཾ ཨསཀྐོནྟཱི ཏཾ དིཝསམེཝ ཀཱལམཀཱསི. ཀུམཱརིཀཱ ཨེཀིཀཱཝ རོདིཏྭཱ པརིདེཝིཏྭཱ ཏཱཡ དུཀྑུཔྤཏྟིཡཱ ཨཏིཝིཡ སཉྫཱཏཚཱཏཀདུཀྑཱ པུནདིཝསེ ཡཱཙཀེཧི སདྡྷིཾ རོདནྟཱི ཨཱཧཱརཏྠཱཡ གནྟྭཱ, ‘‘ཀཏི པཊིཝཱིསེ གཎྷིསྶསི, ཨམྨཱ’’ཏི ཝུཏྟཱ ‘‘ཨེཀ’’ནྟི ཨཱཧ. མིཏྟཀུཊུམྦིཀོ ཏཾ ཏཡོ དིཝསེ བྷཏྟཾ གཎྷནྟིཾ སཉྫཱནཱཏི, ཏེན ཏཾ ‘‘ཨཔེཧི ནསྶ, ཝསལི, ཨཛྫ ཏཝ ཀུཙྪིཔྤམཱཎཾ ཨཉྙཱསཱི’’ཏི ཨཱཧ. ཧིརོཏྟཔྤསམྤནྣཱ ཀུལདྷཱིཏཱ པཙྩོརསྨིཾ སཏྟིཔཧཱརཾ ཝིཡ ཝཎེ ཁཱརོདཀསེཙནཀཾ ཝིཡ ཙ པཏྭཱ ‘‘ཀིཾ, སཱམཱི’’ཏི ཨཱཧ. ‘‘ཏཡཱ པུརེ ཏཡོ ཀོཊྛཱསཱ གཧིཏཱ, ཧིཡྻོ དྭེ, ཨཛྫ ཨེཀཾ གཎྷཱསི. ཨཛྫ ཏེ ཨཏྟནོ ཀུཙྪིཔྤམཱཎཾ ཉཱཏ’’ནྟི. ‘‘མཱ མཾ, སཱམི, ‘ཨཏྟནོཝ ཨཏྠཱཡ གཎྷཱི’ཏི མཉྙིཏྠཱ’’ཏི. ‘‘ཨཐ ཀསྨཱ ཨེཝཾ གཎྷཱི’’ཏི? ‘‘པུརེ ཏཡོ ཛནཱ ཨཧུམྷ, སཱམི, ཧིཡྻོ དྭེ, ཨཛྫ ཨེཀིཀཱཝ ཛཱཏཱམྷཱི’’ཏི. སོ ‘‘ཀེན ཀཱརཎེནཱ’’ཏི པུཙྪིཏྭཱ ཨཱདིཏོ པཊྛཱཡ ཏཱཡ ཀཐིཏཾ སབྦཾ པཝཏྟིཾ སུཏྭཱ ཨསྶཱུནི སནྡྷཱརེཏུཾ ཨསཀྐོནྟོ སཉྫཱཏབལཝདོམནསྶོ ཧུཏྭཱ, ‘‘ཨམྨ, ཨེཝཾ སནྟེ མཱ ཙིནྟཡི, ཏྭཾ བྷདྡཝཏིཡསེཊྛིནོ དྷཱིཏཱ ཨཛྫཀཱལཏོ པཊྛཱཡ མམ དྷཱིཏཱཡེཝ ནཱམཱ’’ཏི ཝཏྭཱ སཱིསེ ཙུམྦིཏྭཱ གྷརཾ ནེཏྭཱ ཨཏྟནོ ཛེཊྛདྷཱིཏུཊྛཱནེ ཋཔེསི.

སཱ དཱནགྒེ ཨུཙྩཱསདྡཾ མཧཱསདྡཾ སུཏྭཱ, ‘‘ཏཱཏ, ཀསྨཱ ཨེཏཾ ཛནཾ ནིསྶདྡཾ ཀཏྭཱ དཱནཾ ན དེཐཱ’’ཏི ཨཱཧ. ‘‘ན སཀྐཱ ཀཱཏུཾ, ཨམྨཱ’’ཏི. ‘‘སཀྐཱ, ཏཱཏཱ’’ཏི. ‘‘ཀཐཾ སཀྐཱ, ཨམྨཱ’’ཏི? ‘‘ཏཱཏ དཱནགྒཾ པརིཀྑིཔིཏྭཱ ཨེཀེཀསྶེཝ པཝེསནཔྤམཱཎེན དྭེ དྭཱརཱནི ཡོཛེཏྭཱ, ‘ཨེཀེན དྭཱརེན པཝིསིཏྭཱ ཨེཀེན ནིཀྑམཐཱ’ཏི ཝདེཐ, ཨེཝཾ ནིསྶདྡཱ ཧུཏྭཱཝ གཎྷིསྶནྟཱི’’ཏི. སོ ཏཾ སུཏྭཱ, ‘‘བྷདྡཀོཝ, ཨམྨ, ཨུཔཱཡོ’’ཏི ཏཐཱ ཀཱརེསི. སཱཔི པུབྦེ སཱམཱ ནཱམ. ཝཏིཡཱ པན ཀཱརིཏཏྟཱ སཱམཱཝཏཱི ནཱམ ཛཱཏཱ. ཏཏོ པཊྛཱཡ དཱནགྒེ ཀོལཱཧལཾ པཙྪིནྡཱི. གྷོསཀསེཊྛི པུབྦེ ཏཾ སདྡཾ སུཎནྟོ ‘‘མཡ྄ཧཾ དཱནགྒེ སདྡོ’’ཏི ཏུསྶཏི. དྭཱིཧཏཱིཧཾ པན སདྡཾ ཨསུཎནྟོ མིཏྟཀུཊུམྦིཀཾ ཨཏྟནོ ཨུཔཊྛཱནཾ ཨཱགཏཾ པུཙྪི – ‘‘དིཡྻཏི ཀཔཎདྡྷིཀཱདཱིནཾ དཱན’’ནྟི? ‘‘ཨཱམ, སཱམཱི’’ཏི. ‘‘ཨཐ ཀིཾ དྭཱིཧཏཱིཧཾ སདྡོ ན སུཡྻཏཱི’’ཏི? ‘‘ཡཐཱ ནིསྶདྡཱ ཧུཏྭཱ གཎྷནྟི, ཏཐཱ མེ ཨུཔཱཡོ ཀཏོ’’ཏི. ‘‘ཨཐ པུབྦེཝ ཀསྨཱ ནཱཀཱསཱི’’ཏི? ‘‘ཨཛཱནནཏཱཡ, སཱམཱི’’ཏི. ‘‘ཨིདཱནི ཀཐཾ ཏེ ཉཱཏོ’’ཏི? ‘‘དྷཱིཏརཱ མེ ཨཀྑཱཏོ, སཱམཱི’’ཏི. མཡ྄ཧཾ ཨཝིདིཏཱ ‘‘ཏཝ དྷཱིཏཱ ནཱམ ཨཏྠཱི’’ཏི. སོ ཨཧིཝཱཏརོགུཔྤཏྟིཏོ པཊྛཱཡ སབྦཾ བྷདྡཝཏིཡསེཊྛིནོ པཝཏྟིཾ ཨཱཙིཀྑིཏྭཱ ཏསྶཱ ཨཏྟནོ ཛེཊྛདྷཱིཏུཊྛཱནེ ཋཔིཏབྷཱཝཾ ཨཱརོཙེསི. ཨཐ ནཾ སེཊྛི ‘‘ཨེཝཾ སནྟེ མམ ཀསྨཱ ན ཀཐེསི, མམ སཧཱཡཀསྶ དྷཱིཏཱ མམ དྷཱིཏཱ ནཱམཱ’’ཏི ཏཾ པཀྐོསཱཔེཏྭཱ པུཙྪི – ‘‘ཨམྨ, སེཊྛིནོ དྷཱིཏཱསཱི’’ཏི? ‘‘ཨཱམ, ཏཱཏཱ’’ཏི. ‘‘ཏེན ཧི མཱ ཙིནྟཡི, ཏྭཾ མམ དྷཱིཏཱསཱི’’ཏི ཏཾ སཱིསེ ཙུམྦིཏྭཱ པརིཝཱརཏྠཱཡ ཏསྶཱ པཉྩ ཨིཏྠིསཏཱནི དཏྭཱ ཏཾ ཨཏྟནོ ཛེཊྛདྷཱིཏུཊྛཱནེ ཋཔེསི.

ཨཐེཀདིཝསཾ ཏསྨིཾ ནགརེ ནཀྑཏྟཾ སངྒྷུཊྛཾ ཧོཏི. ཏསྨིཾ པན ནཀྑཏྟེ བཧི ཨནིཀྑམནཀཱ ཀུལདྷཱིཏརོཔི ཨཏྟནོ པརིཝཱརེན སདྡྷིཾ པདསཱཝ ནདིཾ གནྟྭཱ ནྷཱཡནྟི. ཏསྨཱ ཏཾ དིཝསཾ སཱམཱཝཏཱིཔི པཉྩཧི ཨིཏྠིསཏེཧི པརིཝཱརིཏཱ རཱཛངྒཎེནེཝ ནྷཱཡིཏུཾ ཨགམཱསི. ཨུཏེནོ སཱིཧཔཉྫརེ ཋིཏོ ཏཾ དིསྭཱ ‘‘ཀསྶིམཱ ནཱཊཀིཏྠིཡོ’’ཏི པུཙྪི. ‘‘ན ཀསྶཙི ནཱཊཀིཏྠིཡོ, དེཝཱ’’ཏི. ‘‘ཨཐ ཀསྶ དྷཱིཏརོ’’ཏི? ‘‘གྷོསཀསེཊྛིནོ དྷཱིཏཱ དེཝ, སཱམཱཝཏཱི ནཱམེསཱ’’ཏི. སོ དིསྭཱཝ ཨུཔྤནྣསིནེཧོ སེཊྛིནོ སཱསནཾ པཱཧེསི – ‘‘དྷཱིཏརཾ ཀིར མེ པེསེཏཱུ’’ཏི. ‘‘ན པེསེམི, དེཝཱ’’ཏི. ‘‘མཱ ཀིར ཨེཝཾ ཀརོཏུ, པེསེཏུཡེཝཱ’’ཏི. ‘‘མཡཾ གཧཔཏིཀཱ ནཱམ ཀུམཱརིཀཱནཾ པོཐེཏྭཱ ཝིཧེཋེཏྭཱ ཀཌྜྷནབྷཡེན ན དེམ, དེཝཱ’’ཏི. རཱཛཱ ཀུཛ྄ཛྷིཏྭཱ གེཧཾ ལཉྪཱཔེཏྭཱ སེཊྛིཉྩ བྷརིཡཉྩ ཧཏྠེ གཧེཏྭཱ བཧི ཀཱརཱཔེསི. སཱམཱཝཏཱི, ནྷཱཡིཏྭཱ ཨཱགནྟྭཱ གེཧཾ པཝིསིཏུཾ ཨོཀཱསཾ ཨལབྷནྟཱི, ‘‘ཀིཾ ཨེཏཾ, ཏཱཏཱ’’ཏི པུཙྪི. ‘‘ཨམྨ, རཱཛཱ ཏཝ ཀཱརཎཱ པཧིཎི. ཨཐ ‘ན མཡཾ དསྶཱམཱ’ཏི ཝུཏྟེ གྷརཾ ལཉྪཱཔེཏྭཱ ཨམྷེ བཧི ཀཱརཱཔེསཱི’’ཏི. ‘‘ཏཱཏ, བྷཱརིཡཾ ཝོ ཀམྨཾ ཀཏཾ, རཉྙཱ ནཱམ པཧིཏེ ‘ན, དེམཱ’ཏི ཨཝཏྭཱ ‘སཙེ མེ དྷཱིཏརཾ སཔརིཝཱརཾ གཎྷཐ, དེམཱ’ཏི ཝཏྟབྦཾ བྷཝེཡྻ, ཏཱཏཱ’’ཏི. ‘‘སཱདྷུ, ཨམྨ, ཏཝ རུཙིཡཱ སཏི ཨེཝཾ ཀརིསྶཱམཱི’’ཏི རཉྙོ ཏཐཱ སཱསནཾ པཱཧེསི. རཱཛཱ ‘‘སཱདྷཱུ’’ཏི སམྤཊིཙྪིཏྭཱ ཏཾ སཔརིཝཱརཾ ཨཱནེཏྭཱ ཨབྷིསིཉྩིཏྭཱ ཨགྒམཧེསིཊྛཱནེ ཋཔེསི. སེསཱ ཏསྶཱཡེཝ པརིཝཱརིཏྠིཡོ ཨཧེསུཾ. ཨཡཾ སཱམཱཝཏིཡཱ ཨུཔྤཏྟི.

ཨུཏེནསྶ པན ཨཔརཱཔི ཝཱསུལདཏྟཱ ནཱམ དེཝཱི ཨཧོསི ཙཎྜཔཛྫོཏསྶ དྷཱིཏཱ. ཨུཛྫེནིཡཉྷི ཙཎྜཔཛྫོཏོ ནཱམ རཱཛཱ ཨཧོསི. སོ ཨེཀདིཝསཾ ཨུཡྻཱནཏོ ཨཱགཙྪནྟོ ཨཏྟནོ སམྤཏྟིཾ ཨོལོཀེཏྭཱ, ‘‘ཨཏྠི ནུ ཁོ ཨཉྙསྶཔི ཀསྶཙི ཨེཝརཱུཔཱ སམྤཏྟཱི’’ཏི ཝཏྭཱ ཏཾ སུཏྭཱ མནུསྶེཧི ‘‘ཀིཾ སམྤཏྟི ནཱམེསཱ, ཀོསམྦིཡཾ ཨུཏེནསྶ རཉྙོ ཨཏིམཧཏཱི སམྤཏཱི’’ཏི ཝུཏྟེ རཱཛཱ ཨཱཧ – ‘‘ཏེན ཧི གཎྷིསྶཱམ ན’’ནྟི? ‘‘ན སཀྐཱ སོ གཧེཏུ’’ནྟི. ‘‘ཀིཉྩི ཀཏྭཱ གཎྷིསྶཱམཡེཝཱ’’ཏི? ‘‘ན སཀྐཱ དེཝཱ’’ཏི. ‘‘ཀིཾ ཀཱརཎཱ’’ཏི? ‘‘སོ ཧཏྠིཀནྟཾ ནཱམ སིཔྤཾ ཛཱནཱཏི, མནྟཾ པརིཝཏྟེཏྭཱ ཧཏྠིཀནྟཝཱིཎཾ ཝཱདེནྟོ ནཱགེ པལཱཔེཏིཔི གཎྷཱཏིཔི. ཧཏྠིཝཱཧནསམྤནྣོ ཏེན སདིསོ ནཱམ ནཏྠཱི’’ཏི. ‘‘ན སཀྐཱ མཡཱ སོ གཧེཏུ’’ནྟི. ‘‘སཙེ ཏེ, དེཝ, ཨེཀནྟེན ཨཡཾ ནིཙྪཡོ, ཏེན ཧི དཱརུཧཏྠིཾ ཀཱརེཏྭཱ ཏསྶཱསནྣཊྛཱནཾ པེསེཧི. སོ ཧཏྠིཝཱཧནཾ ཝཱ ཨསྶཝཱཧནཾ ཝཱ སུཏྭཱ དཱུརམྤི གཙྪཏི. ཏཏྠ ནཾ ཨཱགཏཾ གཧེཏུཾ སཀྐཱ བྷཝིསྶཏཱི’’ཏི.

རཱཛཱ ‘‘ཨཏྠེསོ ཨུཔཱཡོ’’ཏི དཱརུམཡཾ ཡནྟཧཏྠིཾ ཀཱརཱཔེཏྭཱ བཧི པིལོཏིཀཱཧི ཝེཋེཏྭཱ ཀཏཙིཏྟཀམྨཾ ཀཏྭཱ ཏསྶ ཝིཛིཏེ ཨཱསནྣཊྛཱནེ ཨེཀསྨིཾ སརཏཱིརེ ཝིསྶཛྫཱཔེསི. ཧཏྠིནོ ཨནྟོཀུཙྪིཡཾ སཊྛི པུརིསཱ ཨཔརཱཔརཾ ཙངྐམནྟི, ཧཏྠིལཎྜཾ ཨཱཧརིཏྭཱ ཏཏྠ ཏཏྠ ཚཌྜེསུཾ. ཨེཀོ ཝནཙརཀོ ཧཏྠིཾ དིསྭཱ, ‘‘ཨམྷཱཀཾ རཉྙོ ཨནུཙྪཝིཀོ’’ཏི ཙིནྟེཏྭཱ, གནྟྭཱ རཉྙོ ཨཱརོཙེསི – ‘‘དེཝ, མཡཱ སབྦསེཏོ ཀེལཱསཀཱུཊཔཊིབྷཱགོ ཏུམྷཱཀཉྙེཝ ཨནུཙྪཝིཀོ ཝརཝཱརཎོ དིཊྛོ’’ཏི. ཨུཏེནོ ཏམེཝ མགྒདེསཀཾ ཀཏྭཱ ཧཏྠིཾ ཨབྷིརུཡ྄ཧ སཔརིཝཱརོ ནིཀྑམི. ཏསྶ ཨཱགམནཾ ཉཏྭཱ ཙརཔུརིསཱ གནྟྭཱ ཙཎྜཔཛྫོཏསྶ ཨཱརོཙེསུཾ. སོ ཨཱགནྟྭཱ མཛ྄ཛྷེ ཏུཙྪཾ ཀཏྭཱ ཨུབྷོསུ པསྶེསུ བལཀཱཡཾ པཡོཛེསི. ཨུཏེནོ ཏསྶཱགམནཾ ཨཛཱནནྟོ ཧཏྠིཾ ཨནུབནྡྷི. ཨནྟོ ཋིཏམནུསྶཱ ཝེགེན པལཱཔེསུཾ. ཀཊྛཧཏྠཱི རཉྙོ མནྟཾ པརིཝཏྟེཏྭཱ ཝཱིཎཾ ཝཱདེནྟསྶ ཏནྟིསདྡཾ ཨསུཎནྟོ ཝིཡ པལཱཡཏིཡེཝ. རཱཛཱ ཧཏྠིནཱགཾ པཱཔུཎིཏུཾ ཨསཀྐོནྟོ ཨསྶཾ ཨཱརུཡ྄ཧ ཨནུབནྡྷི. ཏསྨིཾ ཝེགེན ཨནུབནྡྷནྟེ བལཀཱཡོ ཨོཧཱིཡི. རཱཛཱ ཨེཀཀོཝ ཨཧོསི. ཨཐ ནཾ ཨུབྷོསུ པསྶེསུ པཡུཏྟཱ ཙཎྜཔཛྫོཏསྶ པུརིསཱ གཎྷིཏྭཱ ཨཏྟནོ རཉྙོ ཨདཾསུ. ཨཐསྶ བལཀཱཡོ ཨམིཏྟཝསཾ གཏབྷཱཝཾ ཉཏྭཱ བཧིནགརེཝ ཁནྡྷཱཝཱརཾ ནིཝེསེཏྭཱ ཨཙྪི.

ཙཎྜཔཛྫོཏོཔི ཨུཏེནཾ ཛཱིཝགྒཱཧམེཝ གཱཧཱཔེཏྭཱ ཨེཀསྨིཾ ཙོརགེཧེ པཀྑིཔིཏྭཱ དྭཱརཾ པིདཧཱཔེཏྭཱ ཏཡོ དིཝསེ ཛཡཔཱནཾ པིཝི. ཨུཏེནོ ཏཏིཡདིཝསེ ཨཱརཀྑཀེ པུཙྪི – ‘‘ཀཧཾ ཝོ, ཏཱཏ, རཱཛཱ’’ཏི? ‘‘‘པཙྩཱམིཏྟོ མེ གཧིཏོ’ཏི ཛཡཔཱནཾ པིཝཏཱི’’ཏི. ‘‘ཀཱ ནཱམེསཱ མཱཏུགཱམསྶ ཝིཡ ཏུམྷཱཀཾ རཉྙོ ཀིརིཡཱ, ནནུ པཊིརཱཛཱུནཾ གཧེཏྭཱ ཝིསྶཛྫེཏུཾ ཝཱ མཱརེཏུཾ ཝཱ ཝཊྚཏི, ཨམྷེ དུཀྑཾ ནིསཱིདཱཔེཏྭཱ ཛཡཔཱནཾ ཀིར པིཝཏཱི’’ཏི. ཏེ གནྟྭཱ ཏམཏྠཾ རཉྙོ ཨཱརོཙེསུཾ. སོ ཨཱགནྟྭཱ ‘‘སཙྩཾ ཀིར ཏྭཾ ཨེཝཾ ཝདསཱི’’ཏི པུཙྪི. ‘‘ཨཱམ, མཧཱརཱཛཱ’’ཏི. ‘‘སཱདྷུ ཏཾ ཝིསྶཛྫེསྶཱམི, ཨེཝརཱུཔོ ཀིར ཏེ མནྟོ ཨཏྠི, ཏཾ མཡ྄ཧཾ དསྶསཱི’’ཏི. ‘‘སཱདྷུ དསྶཱམི, གཧཎསམཡེ མཾ ཝནྡིཏྭཱ ཏཾ གཎྷཱཧི. ཀིཾ པན ཏྭཾ ཝནྡིསྶསཱི’’ཏི? ‘‘ཀྱཱཧཾ ཏཾ ཝནྡིསྶཱམི, ན ཝནྡིསྶཱམཱི’’ཏི? ‘‘ཨཧམྤི ཏེ ན དསྶཱམཱི’’ཏི. ‘‘ཨེཝཾ སནྟེ རཱཛཱཎཾ ཏེ ཀརིསྶཱམཱི’’ཏི. ‘‘ཀརོཧི, སརཱིརསྶ མེ ཨིསྶརོ, ན པན ཙིཏྟསྶཱ’’ཏི. རཱཛཱ ཏསྶ སཱུརགཛྫིཏཾ སུཏྭཱ, ‘‘ཀཐཾ ནུ ཁོ ཨིམཾ མནྟཾ གཎྷིསྶཱམཱི’’ཏི ཙིནྟེཏྭཱ, ‘‘ཨིམཾ མནྟཾ ཨཉྙཾ ཛཱནཱཔེཏུཾ ན སཀྐཱ, མམ དྷཱིཏརཾ ཨེཏསྶ སནྟིཀེ ཨུགྒཎྷཱཔེཏྭཱ ཨཧཾ ཏསྶཱ སནྟིཀེ གཎྷིསྶཱམཱི’’ཏི. ཨཐ ནཾ ཨཱཧ – ‘‘ཨཉྙསྶ ཝནྡིཏྭཱ གཎྷནྟསྶ དསྶསཱི’’ཏི. ‘‘ཨཱམ, མཧཱརཱཛཱ’’ཏི. ‘‘ཏེན ཧི ཨམྷཱཀཾ གྷརེ ཨེཀཱ ཁུཛྫཱ ཨཏྠི ཏསྶཱ ཨནྟོསཱཎིཡཾ ཝནྡིཏྭཱ ནིསིནྣཱཡ ཏྭཾ བཧིསཱཎིཡཾ ཋིཏོཝ མནྟཾ ཝཱཙེཧཱི’’ཏི. ‘‘སཱདྷུ, མཧཱརཱཛ, ཁུཛྫཱ ཝཱ ཧོཏུ པཱིཋསཔྤི ཝཱ, ཝནྡནྟིཡཱ དསྶཱམཱི’’ཏི. ཏཏོ རཱཛཱ གནྟྭཱ དྷཱིཏརཾ ཝཱསུལདཏྟཾ ཨཱཧ – ‘‘ཨམྨ, ཨེཀོ སངྑཀུཊྛཱི ཨནགྒྷམནྟཾ ཛཱནཱཏི, ཏཾ ཨཉྙཾ ཛཱནཱཔེཏུཾ ན སཀྐཱ. ཏྭཾ ཨནྟོསཱཎིཡཾ ནིསཱིདིཏྭཱ ཏཾ ཝནྡིཏྭཱ མནྟཾ གཎྷ, སོ བཧིསཱཎིཡཾ ཋཏྭཱ ཏུཡ྄ཧཾ ཝཱཙེསྶཏི. ཏཝ སནྟིཀཱ ཨཧཾ ཏཾ གཎྷིསྶཱམཱི’’ཏི.

ཨེཝཾ སོ ཏེསཾ ཨཉྙམཉྙཾ སནྠཝཀརཎབྷཡེན དྷཱིཏརཾ ཁུཛྫཾ, ཨིཏརཾ སངྑཀུཊྛིཾ ཀཏྭཱ ཀཐེསི. སོ ཏསྶཱ ཨནྟོསཱཎིཡཾ ཝནྡིཏྭཱ ནིསིནྣཱཡ བཧི ཋིཏོ མནྟཾ ཝཱཙེསི. ཨཐ ནཾ ཨེཀདིཝསཾ པུནཔྤུནཾ ཝུཙྩམཱནམྤི མནྟཔདཾ ཝཏྟུཾ ཨསཀྐོནྟིཾ ‘‘ཨརེ ཁུཛྫེ ཨཏིབཧལོཊྛཀཔོལཾ ཏེ མུཁཾ, ཨེཝཾ ནཱམ ཝདེཧཱི’’ཏི ཨཱཧ. ‘‘སཱ ཀུཛ྄ཛྷིཏྭཱ ཨརེ དུཊྛསངྑཀུཊྛི ཀིཾ ཝདེསི, ཀིཾ མཱདིསཱ ཁུཛྫཱ ནཱམ ཧོཏཱི’’ཏི? སཱཎིཀཎྞཾ ཨུཀྑིཔིཏྭཱ ‘‘ཀཱསི ཏྭ’’ནྟི ཝུཏྟེ, ‘‘རཉྙོ དྷཱིཏཱ ཝཱསུལདཏྟཱ ནཱམཱཧ’’ནྟི ཨཱཧ. ‘‘པིཏཱ ཏེ ཏཾ མཡ྄ཧཾ ཀཐེནྟོ ‘ཁུཛྫཱ’ཏི ཀཐེསཱི’’ཏི. ‘‘མཡ྄ཧམྤི ཀཐེནྟོ ཏཾ སངྑཀུཊྛིཾ ཀཏྭཱ ཀཐེསཱི’’ཏི. ཏེ ཨུབྷོཔི ‘‘ཏེན ཧི ཨམྷཱཀཾ སནྠཝཀརཎབྷཡེན ཀཐིཏཾ བྷཝིསྶཏཱི’’ཏི ཨནྟོསཱཎིཡཉྙེཝ སནྠཝཾ ཀརིཾསུ.

ཏཏོ པཊྛཱཡ མནྟགྒཧཎཾ ཝཱ སིཔྤགྒཧཎཾ ཝཱ ནཏྠི. རཱཛཱཔི དྷཱིཏརཾ ནིཙྩཾ པུཙྪཏི – ‘‘སིཔྤཾ གཎྷསི, ཨམྨཱ’’ཏི? ‘‘གཎྷཱམི, ཏཱཏཱ’’ཏི. ཨཐ ནཾ ཨེཀདིཝསཾ ཨུཏེནོ ཨཱཧ – ‘‘བྷདྡེ, སཱམིཀེན ཀཏྟབྦཾ ནཱམ ནེཝ མཱཏཱཔིཏརོ ན བྷཱཏུབྷགིནིཡོ ཀཱཏུཾ སཀྐོནྟི, སཙེ མཡ྄ཧཾ ཛཱིཝིཏཾ དསྶསི, པཉྩ ཏེ ཨིཏྠིསཏཱནི པརིཝཱརཾ དཏྭཱ ཨགྒམཧེསིཊྛཱནཾ དསྶཱམཱི’’ཏི. ‘‘སཙེ ཨིམསྨིཾ ཝཙནེ པཏིཊྛཱཏུཾ སཀྑིསྶཐ, དསྶཱམི ཝོ ཛཱིཝིཏ’’ནྟི. ‘‘སཀྑིསྶཱམི, བྷདྡེ’’ཏི. སཱ ‘‘སཱདྷུ, སཱམཱི’’ཏི པིཏུ སནྟིཀཾ གནྟྭཱ ཝནྡིཏྭཱ ཨེཀམནྟཾ ཨཊྛཱསི. ཨཐ ནཾ སོ པུཙྪི – ‘‘ཨམྨ, ནིཊྛིཏཾ སིཔྤ’’ནྟི? ‘‘ན ཏཱཝ ནིཊྛིཏཾ, ཏཱཏ, སིཔྤ’’ནྟི. ཨཐ ནཾ སོ པུཙྪི – ‘‘ཀིཾ, ཨམྨཱ’’ཏི? ‘‘ཨམྷཱཀཾ ཨེཀཾ དྭཱརཉྩ ཨེཀཾ ཝཱཧནཉྩ ལདྡྷུཾ ཝཊྚཏི, ཏཱཏཱ’’ཏི. ‘‘ཨིདཾ ཀིཾ, ཨམྨཱ’’ཏི? ‘‘ཏཱཏ, རཏྟིཾ ཀིར ཏཱརཀསཉྙཱཡ མནྟསྶ ཨུཔཙཱརཏྠཱཡ ཨེཀཾ ཨོསདྷཾ གཧེཏབྦཾ ཨཏྠི. ཏསྨཱ ཨམྷཱཀཾ ཝེལཱཡ ཝཱ ཨཝེལཱཡ ཝཱ ནིཀྑམནཀཱལེ ཨེཀཾ དྭཱརཉྩེཝ ཨེཀཾ ཝཱཧནཉྩ ལདྡྷུཾ ཝཊྚཏཱི’’ཏི. རཱཛཱ ‘‘སཱདྷཱུ’’ཏི སམྤཊིཙྪི. ཏེ ཨཏྟནོ ཨབྷིརུཙིཏཾ ཨེཀཾ དྭཱརཾ ཧཏྠགཏཾ ཀརིཾསུ. རཉྙོ པན པཉྩ ཝཱཧནཱནི ཨཧེསུཾ. བྷདྡཝཏཱི ནཱམ ཀརེཎུཀཱ ཨེཀདིཝསཾ པཉྙཱས ཡོཛནཱནི གཙྪཏི, ཀཱཀོ ནཱམ དཱསོ སཊྛི ཡོཛནཱནི གཙྪཏི, ཙེལཀཊྛི ཙ མུཉྩཀེསཱི ཙཱཏི དྭེ ཨསྶཱ ཡོཛནསཏཾ གཙྪནྟི, ནཱལཱ༹གིརི ཧཏྠཱི ཝཱིསཏི ཡོཛནསཏནྟི.

སོ ཀིར རཱཛཱ ཨནུཔྤནྣེ བུདྡྷེ ཨེཀསྶ ཨིསྶརསྶ ཨུཔཊྛཱཀོ ཨཧོསི. ཨཐེཀདིཝསཾ ཨིསྶརེ བཧིནགརཾ གནྟྭཱ ནྷཏྭཱ ཨཱགཙྪནྟེ ཨེཀོ པཙྩེཀབུདྡྷོ ནགརཾ པིཎྜཱཡ པཝིསིཏྭཱ སཀལནགརཝཱསཱིནཾ མཱརེན ཨཱཝཊྚིཏཏྟཱ ཨེཀཾ བྷིཀྑཱམྤི ཨལབྷིཏྭཱ ཡཐཱདྷོཏེན པཏྟེན ནིཀྑམི. ཨཐ ནཾ ནགརདྭཱརཾ པཏྟཀཱལེ མཱརོ ཨཉྙཱཏཀཝེསེན ཨུཔསངྐམིཏྭཱ, ‘‘ཨཔི, བྷནྟེ, ཝོ ཀིཉྩི ལདྡྷ’’ནྟི པུཙྪི. ‘‘ཀིཾ པན མེ ཏྭཾ ཨལབྷནཱཀཱརཾ ཀརཱི’’ཏི? ‘‘ཏེན ཧི ནིཝཏྟིཏྭཱ པུན པཝིསཐ, ཨིདཱནི ན ཀརིསྶཱམཱི’’ཏི. ‘‘ནཱཧཾ པུན ནིཝཏྟིསྶཱམཱི’’ཏི. སཙེ ཧི ནིཝཏྟེཡྻ, པུན སོ སཀལནགརཝཱསཱིནཾ སརཱིརེ ཨདྷིམུཉྩིཏྭཱ པཱཎིཾ པཧརིཏྭཱ ཧསནཀེལི༹ཾ ཀརེཡྻ. པཙྩེཀབུདྡྷེ ཨནིཝཏྟིཏྭཱ གཏེ མཱརོ ཏཏྠེཝ ཨནྟརདྷཱཡི. ཨཐ སོ ཨིསྶརོ ཡཐཱདྷོཏེནེཝ པཏྟེན ཨཱགཙྪནྟཾ པཙྩེཀབུདྡྷཾ དིསྭཱ ཝནྡིཏྭཱ, ‘‘ཨཔི, བྷནྟེ, ཀིཉྩི ལདྡྷ’’ནྟི པུཙྪི. ‘‘ཙརིཏྭཱ ནིཀྑནྟམྷཱཝུསོ’’ཏི. སོ ཙིནྟེསི – ‘‘ཨཡྻོ, མཡཱ པུཙྪིཏཾ ཨཀཐེཏྭཱ ཨཉྙཾ ཝདཏི, ན ཀིཉྩི ལདྡྷཾ བྷཝིསྶཏཱི’’ཏི. ཨཐསྶ པཏྟཾ ཨོལོཀེནྟོ ཏུཙྪཾ དིསྭཱ གེཧེ བྷཏྟསྶ ནིཊྛིཏཱནིཊྛིཏབྷཱཝཾ ཨཛཱནནཏཱཡ སཱུརོ ཧུཏྭཱ པཏྟཾ གཧེཏུཾ ཨཝིསཧནྟོ ‘‘ཐོཀཾ, བྷནྟེ, ཨདྷིཝཱསེཐཱ’’ཏི ཝཏྭཱ ཝེགེན གྷརཾ གནྟྭཱ ‘‘ཨམྷཱཀཾ བྷཏྟཾ ནིཊྛིཏ’’ནྟི པུཙྪིཏྭཱ, ‘‘ནིཊྛིཏ’’ནྟི ཝུཏྟེ ཏཾ ཨུཔཊྛཱཀཾ ཨཱཧ – ‘‘ཏཱཏ, ཨཉྙོ ཏཡཱ སམྤནྣཝེགཏརོ ནཱམ ནཏྠི, སཱིགྷེན ཛཝེན བྷདནྟཾ པཏྭཱ ‘པཏྟཾ མེ, བྷནྟེ, དེཐཱ’ཏི ཝཏྭཱ པཏྟཾ གཧེཏྭཱ ཝེགེན ཨེཧཱི’’ཏི. སོ ཨེཀཝཙནེནེཝ པཀྑནྡིཏྭཱ པཏྟཾ གཧེཏྭཱ ཨཱཧརི. ཨིསྶརོཔི ཨཏྟནོ བྷོཛནསྶ པཏྟཾ པཱུརེཏྭཱ ‘‘ཨིམཾ སཱིགྷཾ གནྟྭཱ ཨཡྻསྶ སམྤཱདེཧི, ཨཧཾ ཏེ ཨིཏོ པཏྟིཾ དམྨཱི’’ཏི ཨཱཧ.

སོཔི ཏཾ གཧེཏྭཱ ཛཝེན གནྟྭཱ པཙྩེཀབུདྡྷསྶ པཏྟཾ དཏྭཱ པཉྩཔཏིཊྛིཏེན ཝནྡིཏྭཱ, ‘‘བྷནྟེ, ‘ཝེལཱ ཨུཔཀཊྛཱ’ཏི ཨཧཾ ཨཏིསཱིགྷེན ཛཝེན ཨཱགཏོ ཙ གཏོ ཙ, ཨེཏསྶ མེ ཛཝསྶ ཕལེན ཡོཛནཱནཾ པཎྞཱསསཊྛིསཏཝཱིསསཏགམནསམཏྠཱནི པཉྩ ཝཱཧནཱནི ནིབྦཏྟནྟུ, ཨཱགཙྪནྟསྶ ཙ མེ གཙྪནྟསྶ ཙ སརཱིརཾ སཱུརིཡཏེཛེན ཏཏྠཾ, ཏསྶ མེ ཕལེན ནིབྦཏྟནིབྦཏྟཊྛཱནེ ཨཱཎཱ སཱུརིཡཏེཛསདིསཱ ཧོཏུ, ཨིམསྨིཾ མེ པིཎྜཔཱཏེ སཱམིནཱ པཏྟི དིནྣཱ, ཏསྶཱ མེ ནིསྶནྡེན ཏུམྷེཧི དིཊྛདྷམྨསྶ བྷཱགཱི ཧོམཱི’’ཏི ཨཱཧ. པཙྩེཀབུདྡྷོ ‘‘ཨེཝཾ ཧོཏཱུ’’ཏི ཝཏྭཱ –

‘‘ཨིཙྪིཏཾ པཏྠིཏཾ ཏུཡ྄ཧཾ, སབྦམེཝ སམིཛ྄ཛྷཏུ;

སབྦེ པཱུརེནྟུ སངྐཔྤཱ, ཙནྡོ པནྣརསོ ཡཐཱ. (དཱི. ནི. ཨཊྛ. ༢.༩༥ པུབྦཱུཔནིསྶཡསམྤཏྟིཀཐཱ; ཨ. ནི. ཨཊྛ. ༡.༡. ༡༩༢);

‘‘ཨིཙྪིཏཾ པཏྠིཏཾ ཏུཡ྄ཧཾ, ཁིཔྤམེཝ སམིཛ྄ཛྷཏུ;

སབྦེ པཱུརེནྟུ སངྐཔྤཱ, མཎིཛོཏིརསོ ཡཐཱ’’ཏི. –

ཨནུམོདནཾ ཨཀཱསི. པཙྩེཀབུདྡྷཱནཾ ཀིར ཨིདྷཱཝ དྭེ གཱཐཱ ཨནུམོདནགཱཐཱ ནཱམ ཧོནྟི. ཏཏྠ ཛོཏིརསོཏི སབྦཀཱམདདཾ མཎིརཏནཾ ཝུཙྩཏི. ཨིདཾ ཏསྶ པུབྦཙརིཏཾ. སོ ཨེཏརཧི ཙཎྜཔཛྫོཏོ ཨཧོསི. ཏསྶ ཙ ཀམྨསྶ ནིསྶནྡེན ཨིམཱནི པཉྩ ཝཱཧནཱནི ནིབྦཏྟིཾསུ. ཨཐེཀདིཝསཾ རཱཛཱ ཨུཡྻཱནཀཱིལཱ༹ཡ ནིཀྑམི. ཨུཏེནོ ‘‘ཨཛྫ པལཱཡིཏབྦ’’ནྟི མཧནྟཱམཧནྟེ ཙམྨཔསིབྦཀེ ཧིརཉྙསུཝཎྞསྶ པཱུརེཏྭཱ ཀརེཎུཀཱཔིཊྛེ ཋཔེཏྭཱ ཝཱསུལདཏྟཾ ཨཱདཱཡ པལཱཡི. ཨནྟེཔུརཔཱལཀཱ པལཱཡནྟཾ ཏཾ དིསྭཱ གནྟྭཱ རཉྙོ ཨཱརོཙེསུཾ. རཱཛཱ ‘‘སཱིགྷཾ གཙྪཐཱ’’ཏི བལཾ པཧིཎི. ཨུཏེནོ བལསྶ པཀྑནྡབྷཱཝཾ ཉཏྭཱ ཀཧཱཔཎཔསིབྦཀཾ མོཙེཏྭཱ པཱཏེསི, མནུསྶཱ ཀཧཱཔཎེ ཨུཙྩིནིཏྭཱ པུན པཀྑནྡིཾསུ. ཨིཏརོ སུཝཎྞཔསིབྦཀཾ མོཙེཏྭཱ པཱཏེཏྭཱ ནེསཾ སུཝཎྞལོབྷེན པཔཉྩེནྟཱནཉྙེཝ བཧི ནིཝུཊྛཾ ཨཏྟནོ ཁནྡྷཱཝཱརཾ པཱཔུཎི. ཨཐ ནཾ ཨཱགཙྪནྟཾ དིསྭཱཝ ཨཏྟནོ བལཀཱཡོ པརིཝཱརེཏྭཱ ནགརཾ པཝེསེསི. སོ པཏྭཱཝ ཝཱསུལདཏྟཾ ཨབྷིསིཉྩིཏྭཱ ཨགྒམཧེསིཊྛཱནེ ཋཔེསཱིཏི. ཨཡཾ ཝཱསུལདཏྟཱཡ ཨུཔྤཏྟི.

ཨཔརཱ པན མཱགཎྜིཡཱ ནཱམ རཉྙོ སནྟིཀཱ ཨགྒམཧེསིཊྛཱནཾ ལབྷི. སཱ ཀིར ཀུརུརཊྛེ མཱགཎྜིཡབྲཱཧྨཎསྶ དྷཱིཏཱ. མཱཏཱཔིསྶཱ མཱགཎྜིཡཱཡེཝ ནཱམཾ. ཙཱུལ༹པིཏཱཔིསྶཱ མཱགཎྜིཡོཝ, སཱ ཨབྷིརཱུཔཱ ཨཧོསི དེཝཙྪརཔཊིབྷཱགཱ. པིཏཱ པནསྶཱ ཨནུཙྪཝིཀཾ སཱམིཀཾ ཨལབྷནྟོ མཧནྟེཧི མཧནྟེཧི ཀུལེཧི ཡཱཙིཏོཔི ‘‘ན མཡ྄ཧཾ དྷཱིཏུ ཏུམྷེ ཨནུཙྪཝིཀཱ’’ཏི ཏཛྫེཏྭཱ ཨུཡྻོཛེསི. ཨཐེཀདིཝསཾ སཏྠཱ པཙྩཱུསསམཡེ ལོཀཾ ཝོལོཀེནྟོ མཱགཎྜིཡབྲཱཧྨཎསྶ སཔཛཱཔཏིཀསྶ ཨནཱགཱམིཕལཱུཔནིསྶཡཾ དིསྭཱ ཨཏྟནོ པཏྟཙཱིཝརམཱདཱཡ ཏསྶ བཧིནིགམེ ཨགྒིཔརིཙརཎཊྛཱནཾ ཨགམཱསི. སོ ཏཐཱགཏསྶ རཱུཔསོབྷགྒཔྤཏྟཾ ཨཏྟབྷཱཝཾ ཨོལོཀེཏྭཱ, ‘‘ཨིམསྨིཾ ལོཀེ ཨིམིནཱ པུརིསེན སདིསོ ཨཉྙོ པུརིསོ ནཱམ ནཏྠི, ཨཡཾ མཡ྄ཧཾ དྷཱིཏུ ཨནུཙྪཝིཀོ, ཨིམསྶ པོསཱཔནཏྠཱཡ དྷཱིཏརཾ དསྶཱམཱི’’ཏི ཙིནྟེཏྭཱ, ‘‘སམཎ, ཨེཀཱ མེ དྷཱིཏཱ ཨཏྠི, ཨཧཾ ཨེཏྟཀཾ ཀཱལཾ ཏསྶཱ ཨནུཙྪཝིཀཾ པུརིསཾ ན པསྶཱམི, ཏུམྷེ ཏསྶཱ ཨནུཙྪཝིཀཱ, སཱ ཙ ཏུམྷཱཀཉྙེཝ ཨནུཙྪཝིཀཱ. ཏུམྷཱཀཉྷི པཱདཔརིཙཱརིཀཱ, ཏསྶཱ ཙ བྷཏྟཱ ལདྡྷུཾ ཝཊྚཏི, ཏཾ ཝོ ཨཧཾ དསྶཱམི, ཡཱཝ མམཱགམནཱ ཨིདྷེཝ ཏིཊྛཐཱ’’ཏི ཨཱཧ. སཏྠཱ ཀིཉྩི ཨཝཏྭཱ ཏུཎྷཱི ཨཧོསི. བྲཱཧྨཎོ ཝེགེན གྷརཾ གནྟྭཱ, ‘‘བྷོཏི, བྷོཏི དྷཱིཏུ མེ ཨནུཙྪཝིཀོ པུརིསོ དིཊྛོ, སཱིགྷཾ སཱིགྷཾ ནཾ ཨལངྐརོཧཱི’’ཏི ཏཾ ཨལངྐཱརཱཔེཏྭཱ སདྡྷིཾ བྲཱཧྨཎིཡཱ ཨཱདཱཡ སཏྠུ སནྟིཀཾ པཱཡཱསི. སཀལནགརཾ སངྑུབྷི. ཨཡཾ ‘‘ཨེཏྟཀཾ ཀཱལཾ མཡ྄ཧཾ དྷཱིཏུ ཨནུཙྪཝིཀོ ནཏྠཱི’’ཏི ཀསྶཙི ཨདཏྭཱ ‘‘ཨཛྫ མེ དྷཱིཏུ ཨནུཙྪཝིཀོ དིཊྛོ’’ཏི ཀིར ཝདེཏི, ‘‘ཀཱིདིསོ ནུ ཁོ སོ པུརིསོ, པསྶིསྶཱམ ན’’ནྟི མཧཱཛནོ ཏེནེཝ སདྡྷིཾ ནིཀྑམི.

ཏསྨིཾ དྷཱིཏརཾ གཧེཏྭཱ ཨཱགཙྪནྟེ སཏྠཱ ཏེན ཝུཏྟཊྛཱནེ ཨཊྛཏྭཱ ཏཏྠ པདཙེཏིཡཾ དསྶེཏྭཱ གནྟྭཱ ཨཉྙསྨིཾ ཋཱནེ ཨཊྛཱསི. བུདྡྷཱནཉྷི པདཙེཏིཡཾ ཨདྷིཊྛཧིཏྭཱ ཨཀྐནྟཊྛཱནེཡེཝ པཉྙཱཡཏི, ན ཨཉྙཏྠ. ཡེསཉྩཏྠཱཡ ཨདྷིཊྛིཏཾ ཧོཏི, ཏེཡེཝ ནཾ པསྶནྟི. ཏེསཾ པན ཨདསྶནཀརཎཏྠཾ ཧཏྠིཨཱདཡོ ཝཱ ཨཀྐམནྟུ, མཧཱམེགྷོ ཝཱ པཝསྶཏུ, ཝེརམྦྷཝཱཏཱ ཝཱ པཧརནྟུ, ན ཏཾ ཀོཙི མཀྑེཏུཾ སཀྐོཏི. ཨཐ བྲཱཧྨཎཱི བྲཱཧྨཎཾ ཨཱཧ – ‘‘ཀུཧིཾ སོ པུརིསོ’’ཏི. ‘‘‘ཨིམསྨིཾ ཋཱནེ ཏིཊྛཱཧཱི’ཏི ནཾ ཨཝཙཾ, ཀུཧིཾ ནུ ཁོ སོ གཏོ’’ཏི ཨིཏོ ཙིཏོ ཨོལོཀེནྟོ པདཙེཏིཡཾ དིསྭཱ ‘‘ཨཡམསྶ པདཝལཉྫོ’’ཏི ཨཱཧ. བྲཱཧྨཎཱི སལཀྑཎམནྟཱནཾ ཏིཎྞཾ ཝེདཱནཾ པགུཎཏཱཡ ལཀྑཎམནྟེ པརིཝཏྟེཏྭཱ པདལཀྑཎཾ ཨུཔདྷཱརེཏྭཱ, ‘‘ནཡིདཾ, བྲཱཧྨཎ, པཉྩཀཱམགུཎསེཝིནོ པད’’ནྟི ཝཏྭཱ ཨིམཾ གཱཐམཱཧ –

‘‘རཏྟསྶ ཧི ཨུཀྐུཊིཀཾ པདཾ བྷཝེ,

དུཊྛསྶ ཧོཏི སཧསཱནུཔཱིལི༹ཏཾ;

མཱུལ༹ྷསྶ ཧོཏི ཨཝཀཌྜྷིཏཾ པདཾ,

ཝིཝཊྚཙྪདསྶ ཨིདམཱིདིསཾ པད’’ནྟི. (ཨ. ནི. ཨཊྛ. ༡.༡.༢༦༠-༢༦༡; ཝིསུདྡྷི. ༡.༤༥);

ཨཐ ནཾ བྲཱཧྨཎོ ཨེཝམཱཧ – ‘‘བྷོཏི ཏྭཾ ཨུདཀཔཱཏིཡཾ ཀུམྦྷཱིལཾ, གེཧམཛ྄ཛྷེ ཙ པན ཙོརཾ ཝིཡ མནྟེ པསྶནསཱིལཱ, ཏུཎྷཱི ཧོཧཱི’’ཏི. བྲཱཧྨཎ, ཡཾ ཨིཙྪསི, ཏཾ ཝདེཧི, ནཡིདཾ པཉྩཀཱམགུཎསེཝིནོ པདནྟི. ཏཏོ ཨིཏོ ཙིཏོ ཙ ཨོལོཀེནྟོ སཏྠཱརཾ དིསྭཱ, ‘‘ཨཡཾ སོ པུརིསོ’’ཏི ཝཏྭཱ བྲཱཧྨཎོ གནྟྭཱ, ‘‘སམཎ, དྷཱིཏརཾ མེ ཏཝ པོསཱཔནཏྠཱཡ དེམཱི’’ཏི ཨཱཧ. སཏྠཱ ‘‘དྷཱིཏརཱ ཏེ མཡ྄ཧཾ ཨཏྠོ ཨཏྠི ཝཱ ནཏྠི ཝཱ’’ཏི ཨཝཏྭཱཝ, ‘‘བྲཱཧྨཎ, ཨེཀཾ ཏེ ཀཱརཎཾ ཀཐེམཱི’’ཏི ཝཏྭཱ, ‘‘ཀཐེཧི སམཎཱ’’ཏི ཝུཏྟེ མཧཱབྷིནིཀྑམནཏོ པཊྛཱཡ ཡཱཝ ཨཛཔཱལནིགྲོདྷམཱུལཱ མཱརེན ཨནུབདྡྷབྷཱཝཾ ཨཛཔཱལནིགྲོདྷམཱུལེ ཙ པན ‘‘ཨཏཱིཏོ དཱནི མེ ཨེས ཝིསཡ’’ནྟི ཏསྶ སོཀཱཏུརསྶ སོཀཝཱུཔསམནཏྠཾ ཨཱགཏཱཧི མཱརདྷཱིཏཱཧི ཀུམཱརིཀཝཎྞཱདིཝསེན པཡོཛིཏཾ པལོབྷནཾ ཨཱཙིཀྑིཏྭཱ, ‘‘ཏདཱཔི མཡ྄ཧཾ ཚནྡོ ནཱཧོསཱི’’ཏི ཝཏྭཱ –

‘‘དིསྭཱན ཏཎྷཾ ཨརཏིཾ རགཉྩ,

ནཱཧོསི ཚནྡོ ཨཔི མེཐུནསྨིཾ;

ཀིམེཝིདཾ མུཏྟཀརཱིསཔུཎྞཾ,

པཱདཱཔི ནཾ སམྥུསིཏུཾ ན ཨིཙྪེ’’ཏི. (ཨ. ནི. ཨཊྛ. ༡.༡.༢༦༠-༢༦༡; སུ. ནི. ༨༤༡) –

ཨིམཾ གཱཐམཱཧ. གཱཐཱཔརིཡོསཱནེ བྲཱཧྨཎོ ཙ བྲཱཧྨཎཱི ཙ ཨནཱགཱམིཕལེ པཏིཊྛཧིཾསུ. མཱགཎྜིཡཱཔི ཁོ ‘‘སཙསྶ མཡཱ ཨཏྠོ ནཏྠི, ཨནཏྠིཀབྷཱཝོཝ ཝཏྟབྦོ, ཨཡཾ པན མཾ མུཏྟཀརཱིསཔུཎྞཾ ཀརོཏི, པཱདཱཔི ནཾ སམྥུསིཏུཾ ན ཨིཙྪེཏི, ཧོཏུ, ཨཏྟནོ ཛཱཏིཀུལཔདེསབྷོགཡསཝཡསམྤཏྟིཾ ཨཱགམྨ ཏཐཱརཱུཔཾ བྷཏྟཱརཾ ལབྷིཏྭཱ སམཎསྶ གོཏམསྶ ཀཏྟབྦཡུཏྟཀཾ ཛཱནིསྶཱམཱི’’ཏི སཏྠརི ཨཱགྷཱཏཾ བནྡྷི. ‘‘ཀིཾ པན སཏྠཱ ཏཱཡ ཨཏྟནི ཨཱགྷཱཏུཔྤཏྟིཾ ཛཱནཱཏི, ནོ’’ཏི? ‘‘ཛཱནཱཏིཡེཝ. ཛཱནནྟོ ཀསྨཱ གཱཐམཱཧཱ’’ཏི? ཨིཏརེསཾ དྭིནྣཾ ཝསེན. བུདྡྷཱ ཧི ཨཱགྷཱཏཾ ཨགཎེཏྭཱ མགྒཕལཱདྷིགམཱརཧཱནཾ ཝསེན དྷམྨཾ དེསེནྟིཡེཝ. མཱཏཱཔིཏརོ ཏཾ ནེཏྭཱ ཙཱུལ༹མཱགཎྜིཡཾ ཀནིཊྛཾ པཊིཙྪཱཔེཏྭཱ པབྦཛིཏྭཱ ཨརཧཏྟཾ པཱཔུཎིཾསུ. ཙཱུལ༹མཱགཎྜིཡོཔི ཙིནྟེསི – ‘‘མམ དྷཱིཏཱ ཨོམཀསཏྟསྶ ན ཨནུཙྪཝིཀཱ, ཨེཀསྶ རཉྙོཝ ཨནུཙྪཝིཀཱ’’ཏི. ཏཾ ཨཱདཱཡ ཀོསམྦིཾ གནྟྭཱ སབྦཱལངྐཱརེཧི ཨལངྐརིཏྭཱ, ‘‘ཨིམཾ ཨིཏྠིརཏནཾ དེཝསྶ ཨནུཙྪཝིཀ’’ནྟི ཨུཏེནསྶ རཉྙོ ཨདཱསི. སོ ཏཾ དིསྭཱཝ ཨུཔྤནྣབལཝསིནེཧོ ཨབྷིསེཀཾ ཀཏྭཱ པཉྩསཏམཱཏུགཱམཔརིཝཱརཾ དཏྭཱ ཨགྒམཧེསིཊྛཱནེ ཋཔེསི. ཨཡཾ མཱགཎྜིཡཱཡ ཨུཔྤཏྟི.

ཨེཝམསྶ དིཡཌྜྷསཧསྶནཱཊཀིཏྠིཔརིཝཱརཱ ཏིསྶོ ཨགྒམཧེསིཡོ ཨཧེསུཾ. ཏསྨིཾ ཁོ པན སམཡེ གྷོསཀསེཊྛི ཀུཀྐུཊསེཊྛི པཱཝཱརིཀསེཊྛཱིཏི ཀོསམྦིཡཾ ཏཡོ སེཊྛིནོ ཧོནྟི. ཏེ ཨུཔཀཊྛཱཡ ཝསྶཱུཔནཱཡིཀཱཡ པཉྩསཏཏཱཔསེ ཧིམཝནྟཏོ ཨཱགནྟྭཱ ནགརེ བྷིཀྑཱཡ ཙརནྟེ དིསྭཱ པསཱིདིཏྭཱ ནིསཱིདཱཔེཏྭཱ བྷོཛེཏྭཱ པཊིཉྙཾ གཧེཏྭཱ ཙཏྟཱརོ མཱསེ ཨཏྟནོ སནྟིཀེ ཝསཱཔེཏྭཱ པུན ཝསྶཱརཏྟེ ཨཱགམནཏྠཱཡ པཊིཛཱནཱཔེཏྭཱ ཨུཡྻོཛེསུཾ. ཏཱཔསཱཔི ཏཏོ པཊྛཱཡ ཨཊྛ མཱསེ ཧིམཝནྟེ ཝསིཏྭཱ ཙཏྟཱརོ མཱསེ ཏེསཾ སནྟིཀེ ཝསིཾསུ. ཏེ ཨཔརབྷཱགེ ཧིམཝནྟཏོ ཨཱགཙྪནྟཱ ཨརཉྙཱཡཏནེ ཨེཀཾ མཧཱནིགྲོདྷཾ དིསྭཱ ཏསྶ མཱུལེ ནིསཱིདིཾསུ. ཏེསུ ཛེཊྛཀཏཱཔསོ ཙིནྟེསི – ‘‘ཨིམསྨིཾ རུཀྑེ ཨདྷིཝཏྠཱ དེཝཏཱ ཨོརམཏྟིཀཱ ན བྷཝིསྶཏི, མཧེསཀྑེནེཝེཏྠ དེཝརཱཛེན བྷཝིཏབྦཾ, སཱདྷུ ཝཏ སཙཱཡཾ ཨིསིགཎསྶ པཱནཱིཡཾ དདེཡྻཱ’’ཏི. སོཔི པཱནཱིཡཾ ཨདཱསི. ཏཱཔསོ ནྷཱནོདཀཾ ཙིནྟེསི, ཏམྤི ཨདཱསི. ཏཏོ བྷོཛནཾ ཙིནྟེསི, ཏམྤི ཨདཱསི. ཨཐསྶ ཨེཏདཧོསི – ‘‘ཨཡཾ དེཝརཱཛཱ ཨམྷེཧི ཙིནྟིཏཾ ཙིནྟིཏཾ སབྦཾ དེཏི, ཨཧོ ཝཏ ནཾ པསྶེཡྻཱམཱ’’ཏི. སོ རུཀྑཀྑནྡྷཾ པདཱལེཏྭཱ ཨཏྟཱནཾ དསྶེསི. ཨཐ ནཾ ཏཱཔསཱ, ‘‘དེཝརཱཛ, མཧཏཱི ཏེ སམྤཏྟི, ཀིཾ ནུ ཁོ ཀཏྭཱ ཨཡཾ ཏེ ལདྡྷཱ’’ཏི པུཙྪིཾསུ. ‘‘མཱ པུཙྪཐ, ཨཡྻཱ’’ཏི. ‘‘ཨཱཙིཀྑ, དེཝརཱཛཱ’’ཏི. སོ ཨཏྟནཱ ཀཏཀམྨསྶ པརིཏྟཀཏྟཱ ལཛྫམཱནོ ཀཐེཏུཾ ན ཝིསཧི. ཏེཧི པུནཔྤུནཾ ནིཔྤཱིལི༹ཡམཱནོ པན ‘‘ཏེན ཧི སུཎཱཐཱ’’ཏི ཝཏྭཱ ཀཐེསི.

སོ ཀིརེཀོ དུགྒཏམནུསྶོ ཧུཏྭཱ བྷཏིཾ པརིཡེསནྟོ ཨནཱཐཔིཎྜིཀསྶ སནྟིཀེ བྷཏིཀམྨཾ ལབྷིཏྭཱ ཏཾ ནིསྶཱཡ ཛཱིཝིཀཾ ཀཔྤེསི. ཨཐེཀསྨིཾ ཨུཔོསཐདིཝསེ སམྤཏྟེ ཨནཱཐཔིཎྜིཀོ ཝིཧཱརཏོ ཨཱགནྟྭཱ པུཙྪི – ‘‘ཏསྶ བྷཏིཀསྶ ཨཛྫུཔོསཐདིཝསབྷཱཝོ ཀེནཙི ཀཐིཏོ’’ཏི? ‘‘ན ཀཐིཏོ, སཱམཱི’’ཏི. ‘‘ཏེན ཧིསྶ སཱཡམཱསཾ པཙཐཱ’’ཏི. ཨཐསྶ པཏྠོདནཾ པཙིཾསུ. སོ དིཝསཾ ཨརཉྙེ ཀམྨཾ ཀཏྭཱ སཱཡཾ ཨཱགནྟྭཱ བྷཏྟེ ཝཌྜྷེཏྭཱ དིནྣེ ‘‘ཚཱཏོམྷཱི’’ཏི སཧསཱ ཨབྷུཉྫིཏྭཱཝ ‘‘ཨཉྙེསུ དིཝསེསུ ཨིམསྨིཾ གེཧེ ‘བྷཏྟཾ དེཐ, སཱུཔཾ དེཐ, བྱཉྫནཾ དེཐཱ’ཏི མཧཱཀོལཱཧལཾ ཨཧོསི, ཨཛྫ ཏེ སབྦེ ནིསྶདྡཱ ནིཔཛྫིཾསུ, མཡ྄ཧམེཝ ཨེཀསྶཱཧཱརཾ ཝཌྜྷཡིཾསུ, ཀིཾ ནུ ཁོ ཨེཏ’’ནྟི ཙིནྟེཏྭཱ པུཙྪི – ‘‘ཨཝསེསཱ བྷུཉྫིཾསུ, ན བྷུཉྫིཾསཱུ’’ཏི? ‘‘ན བྷུཉྫིཾསུ, ཏཱཏཱ’’ཏི. ‘‘ཀིཾ ཀཱརཎཱ’’ཏི? ཨིམསྨིཾ གེཧེ ཨུཔོསཐདིཝསེསུ སཱཡམཱསཾ ན བྷུཉྫནྟི, སབྦེཝ ཨུཔོསཐིཀཱ ཧོནྟི. ཨནྟམསོ ཐནཔཱཡིནོཔི དཱརཀེ མུཁཾ ཝིཀྑཱལཱཔེཏྭཱ ཙཏུམདྷུརཾ མུཁེ པཀྑིཔཱཔེཏྭཱ མཧཱསེཊྛི ཨུཔོསཐིཀེ ཀཱརེཏི. གནྡྷཏེལཔྤདཱིཔེ ཛཱལནྟེ ཁུདྡཀམཧལླཀདཱརཀཱ སཡནགཏཱ དྭཏྟིཾསཱཀཱརཾ སཛ྄ཛྷཱཡནྟི. ཏུཡ྄ཧཾ པན ཨུཔོསཐདིཝསབྷཱཝཾ ཀཐེཏུཾ སཏིཾ ན ཀརིམྷཱ. ཏསྨཱ ཏཝེཝ བྷཏྟཾ པཀྐཾ, ནཾ བྷུཉྫསྶཱུཏི. སཙེ ཨིདཱནི ཨུཔོསཐིཀེན བྷཝིཏུཾ ཝཊྚཏི, ཨཧམྤི བྷཝེཡྻནྟི. ‘‘ཨིདཾ སེཊྛི ཛཱནཱཏཱི’’ཏི. ‘‘ཏེན ཧི ནཾ པུཙྪཐཱ’’ཏི. ཏེ གནྟྭཱ སེཊྛིཾ པུཙྪིཾསུ. སོ ཨེཝམཱཧ – ‘‘ཨིདཱནི པན ཨབྷུཉྫིཏྭཱ མུཁཾ ཝིཀྑཱལེཏྭཱ ཨུཔོསཐངྒཱནི ཨདྷིཊྛཧནྟོ ཨུཔཌྜྷཾ ཨུཔོསཐཀམྨཾ ལབྷིསྶཏཱི’’ཏི. ཨིཏརོ ཏཾ སུཏྭཱ ཏཐཱ ཨཀཱསི.

ཏསྶ སཀལདིཝསཾ ཀམྨཾ ཀཏྭཱ ཚཱཏསྶ སརཱིརེ ཝཱཏཱ ཀུཔྤིཾསུ. སོ ཡོཏྟེན ཨུརཾ བནྡྷིཏྭཱ ཡོཏྟཀོཊིཡཾ གཧེཏྭཱ པརིཝཏྟཏི. སེཊྛི ཏཾ པཝཏྟིཾ སུཏྭཱ ཨུཀྐཱཧི དྷཱརིཡམཱནཱཧི ཙཏུམདྷུརཾ གཱཧཱཔེཏྭཱ ཏསྶ སནྟིཀཾ ཨཱགནྟྭཱ, ‘‘ཀིཾ, ཏཱཏཱ’’ཏི པུཙྪི. ‘‘སཱམི, ཝཱཏཱ མེ ཀུཔྤིཏཱ’’ཏི. ‘‘ཏེན ཧི ཨུཊྛཱཡ ཨིདཾ བྷེསཛྫཾ ཁཱདཱཧཱི’’ཏི. ‘‘ཏུམྷེཔི ཁཱདཐ, སཱམཱི’’ཏི. ‘‘ཨམྷཱཀཾ ཨཕཱསུཀཾ ནཏྠི, ཏྭཾ ཁཱདཱཧཱི’’ཏི. ‘‘སཱམི, ཨཧཾ ཨུཔོསཐཀམྨཾ ཀརོནྟོ སཀལཾ ཀཱཏུཾ ནཱསཀྑིཾ, ཨུཔཌྜྷཀམྨམྤི མེ ཝིཀལཾ མཱ ཨཧོསཱི’’ཏི ན ཨིཙྪི. ‘‘མཱ ཨེཝཾ ཀརི, ཏཱཏཱ’’ཏི ཝུཙྩམཱནོཔི ཨནིཙྪིཏྭཱ ཨརུཎེ ཨུཊྛཧནྟེ མིལཱཏམཱལཱ ཝིཡ ཀཱལཾ ཀཏྭཱ ཏསྨིཾ ནིགྲོདྷརུཀྑེ དེཝཏཱ ཧུཏྭཱ ནིབྦཏྟི. ཏསྨཱ ཨིམམཏྠཾ ཀཐེཏྭཱ ‘‘སོ སེཊྛི བུདྡྷམཱམཀོ, དྷམྨམཱམཀོ, སངྒྷམཱམཀོ, ཏཾ ནིསྶཱཡ ཀཏསྶ ཨུཔཌྜྷུཔོསཐཀམྨསྶ ནིསྶནྡེནེསཱ སམྤཏྟི མཡཱ ལདྡྷཱ’’ཏི ཨཱཧ.

‘‘བུདྡྷོ’’ཏི ཝཙནཾ སུཏྭཱཝ པཉྩསཏཱ ཏཱཔསཱ ཨུཊྛཱཡ དེཝཏཱཡ ཨཉྫལིཾ པགྒཡ྄ཧ ‘‘བུདྡྷོཏི ཝདེསི, བུདྡྷོཏི ཝདེསཱི’’ཏི པུཙྪིཏྭཱ, ‘‘བུདྡྷོཏི ཝདཱམི, བུདྡྷོཏི ཝདཱམཱི’’ཏི ཏིཀྑཏྟུཾ པཊིཛཱནཱཔེཏྭཱ ‘‘གྷོསོཔི ཁོ ཨེསོ དུལླབྷོ ལོཀསྨི’’ནྟི ཨུདཱནཾ ཨུདཱནེཏྭཱ ‘‘དེཝཏེ ཨནེཀེསུ ཀཔྤསཏསཧསྶེསུ ཨསུཏཔུབྦཾ སདྡཾ ཏཡཱ སུཎཱཔིཏམྷཱ’’ཏི ཨཱཧཾསུ. ཨཐ ཨནྟེཝཱསིནོ ཨཱཙརིཡཾ ཨེཏདཝོཙུཾ – ‘‘ཏེན ཧི སཏྠུ སནྟིཀཾ གཙྪཱམཱ’’ཏི. ‘‘ཏཱཏཱ, ཏཡོ སེཊྛིནོ ཨམྷཱཀཾ བཧཱུཔཀཱརཱ, སྭེ ཏེསཾ ནིཝེསནེ བྷིཀྑཾ གཎྷིཏྭཱ ཏེསམྤི ཨཱཙིཀྑིཏྭཱ གམིསྶཱམ, ཨདྷིཝཱསེཐ, ཏཱཏཱ’’ཏི. ཏེ ཨདྷིཝཱསཡིཾསུ. པུནདིཝསེ སེཊྛིནོ ཡཱགུབྷཏྟཾ སམྤཱདེཏྭཱ ཨཱསནཱནི པཉྙཱཔེཏྭཱ ‘‘ཨཛྫ ནོ ཨཡྻཱནཾ ཨཱགམནདིཝསོ’’ཏི ཉཏྭཱ པཙྩུགྒམནཾ ཀཏྭཱ ཏེ ཨཱདཱཡ ནིཝེསནཾ གནྟྭཱ ནིསཱིདཱཔེཏྭཱ བྷིཀྑཾ ཨདཾསུ. ཏེ ཀཏབྷཏྟཀིཙྩཱ མཧཱསེཊྛིནོ ‘‘མཡཾ གམིསྶཱམཱ’’ཏི ཝདིཾསུ. ‘‘ནནུ, བྷནྟེ, ཏུམྷེཧི ཙཏྟཱརོ ཝསྶིཀེ མཱསེ ཨམྷཱཀཾ གཧིཏཱཝ པཊིཉྙཱ, ཨིདཱནི ཀུཧིཾ གཙྪཐཱ’’ཏི? ‘‘ལོཀེ ཀིར བུདྡྷོ ཨུཔྤནྣོ, དྷམྨོ ཨུཔྤནྣོ, སངྒྷོ ཨུཔྤནྣོ, ཏསྨཱ སཏྠུ སནྟིཀཾ གམིསྶཱམཱ’’ཏི. ‘‘ཀིཾ པན ཏསྶ སཏྠུནོ སནྟིཀཾ ཏུམྷཱཀཉྙེཝ གནྟུཾ ཝཊྚཏཱི’’ཏི? ‘‘ཨཉྙེསམྤི ཨཝཱརིཏཾ, ཨཱཝུསོ’’ཏི. ‘‘ཏེན ཧི, བྷནྟེ, ཨཱགམེཐ, མཡམྤི གམནཔརིཝཙྪཾ ཀཏྭཱ གཙྪཱམཱ’’ཏི. ‘‘ཏུམྷེསུ པརིཝཙྪཾ ཀརོནྟེསུ ཨམྷཱཀཾ པཔཉྩོ ཧོཏི, མཡཾ པུརཏོ གཙྪཱམ, ཏུམྷེ པཙྪཱ ཨཱགཙྪེཡྻཱཐཱ’’ཏི ཝཏྭཱ ཏེ པུརེཏརཾ གནྟྭཱ སམྨཱསམྦུདྡྷཾ དིསྭཱ ཨབྷིཏྠཝིཏྭཱ ཝནྡིཏྭཱ ཨེཀམནྟཾ ནིསཱིདིཾསུ. ཨཐ ནེསཾ སཏྠཱ ཨནུཔུབྦིཾ ཀཐཾ ཀཐེཏྭཱ དྷམྨཾ དེསེསི. དེསནཱཔརིཡོསཱནེ སབྦེཔི སཧ པཊིསམྦྷིདཱཧི ཨརཧཏྟཾ པཏྭཱ པབྦཛྫཾ ཡཱཙིཏྭཱ ‘‘ཨེཐ, བྷིཀྑཝོ’’ཏི ཝཙནསམནནྟརཾཡེཝ ཨིདྡྷིམཡཔཏྟཙཱིཝརདྷརཱ ཨེཧིབྷིཀྑཱུ ཨཧེསུཾ.

ཏེཔི ཁོ ཏཡོ སེཊྛིནོ པཉྩཧི པཉྩཧི སཀཊསཏེཧི བྷཏྟཙྪཱདནསཔྤིམདྷུཕཱཎིཏཱདཱིནི དཱནཱུཔཀརཎཱནི ཨཱདཱཡ སཱཝཏྠིཾ པཏྭཱ སཏྠཱརཾ ཝནྡིཏྭཱ དྷམྨཀཐཾ སུཏྭཱ ཀཐཱཔརིཡོསཱནེ སོཏཱཔཏྟིཕལེ པཏིཊྛཱཡ ཨདྡྷམཱསམཏྟམྤི དཱནཾ དདམཱནཱ སཏྠུ སནྟིཀེ ཝསིཏྭཱ ཀོསམྦིཾ ཨཱགམནཏྠཱཡ སཏྠཱརཾ ཡཱཙིཏྭཱ སཏྠཱརཱ པཊིཉྙཾ དདནྟེན ‘‘སུཉྙཱགཱརེ ཁོ གཧཔཏཡོ ཏཐཱགཏཱ ཨབྷིརམནྟཱི’’ཏི ཝུཏྟེ, ‘‘ཨཉྙཱཏཾ, བྷནྟེ, ཨམྷེཧི པཧིཏསཱསནེན ཨཱགནྟུཾ ཝཊྚཏཱི’’ཏི ཝཏྭཱ ཀོསམྦིཾ གནྟྭཱ གྷོསཀསེཊྛི གྷོསིཏཱརཱམཾ, ཀུཀྐུཊསེཊྛི ཀུཀྐུཊཱརཱམཾ, པཱཝཱརིཀསེཊྛི པཱཝཱརིཀཱརཱམནྟི ཏཡོ མཧཱཝིཧཱརེ ཀཱརེཏྭཱ སཏྠུ ཨཱགམནཏྠཱཡ སཱསནཾ པཧིཎིཾསུ. སཏྠཱ ཏེསཾ སཱསནཾ སུཏྭཱ ཏཏྠ ཨགམཱསི. ཏེ པཙྩུགྒནྟྭཱ སཏྠཱརཾ ཝིཧཱརཾ པཝེསེཏྭཱ ཝཱརེན ཝཱརེན པཊིཛགྒནྟི. སཏྠཱ དེཝསིཀཾ ཨེཀེཀསྨིཾ ཝིཧཱརེ ཝསཏི. ཡསྶ ཝིཧཱརེ ཝུཊྛོ ཧོཏི, ཏསྶེཝ གྷརདྭཱརེ པིཎྜཱཡ ཙརཏི. ཏེསཾ པན ཏིཎྞཾ སེཊྛཱིནཾ ཨུཔཊྛཱཀོ སུམནོ ནཱམ མཱལཱཀཱརོ ཨཧོསི. སོ ཏེ སེཊྛིནོ ཨེཝམཱཧ – ‘‘ཨཧཾ ཏུམྷཱཀཾ དཱིགྷརཏྟཾ ཨུཔཀཱརཀོ, སཏྠཱརཾ བྷོཛེཏུཀཱམོམྷི, མཡ྄ཧམྤི ཨེཀདིཝསཾ སཏྠཱརཾ དེཐཱ’’ཏི. ‘‘ཏེན ཧི བྷཎེ སྭེ བྷོཛེཧཱི’’ཏི. ‘‘སཱདྷུ, སཱམཱི’’ཏི སོ སཏྠཱརཾ ནིམནྟེཏྭཱ སཀྐཱརཾ པཊིཡཱདེསི.

ཏདཱ རཱཛཱ སཱམཱཝཏིཡཱ དེཝསིཀཾ པུཔྥམཱུལེ ཨཊྛ ཀཧཱཔཎེ དེཏི. ཏསྶཱ ཁུཛྫུཏྟརཱ ནཱམ དཱསཱི སུམནམཱལཱཀཱརསྶ སནྟིཀཾ གནྟྭཱ ནིབདྡྷཾ པུཔྥཱནི གཎྷཱཏི. ཨཐ ནཾ ཏསྨིཾ དིཝསེ ཨཱགཏཾ མཱལཱཀཱརོ ཨཱཧ – ‘‘མཡཱ སཏྠཱ ནིམནྟིཏོ, ཨཛྫ པུཔྥེཧི སཏྠཱརཾ པཱུཛེསྶཱམི, ཏིཊྛ ཏཱཝ, ཏྭཾ པརིཝེསནཱཡ སཧཱཡིཀཱ ཧུཏྭཱ དྷམྨཾ སུཏྭཱ ཨཝསེསཱནི པུཔྥཱནི གཧེཏྭཱ གམིསྶསཱི’’ཏི. སཱ ‘‘སཱདྷཱུ’’ཏི ཨདྷིཝཱསེསི. སུམནོ བུདྡྷཔྤམུཁཾ བྷིཀྑུསངྒྷཾ པརིཝིསིཏྭཱ ཨནུམོདནཀརཎཏྠཱཡ པཏྟཾ ཨགྒཧེསི. སཏྠཱ ཨནུམོདནདྷམྨདེསནཾ ཨཱརབྷི. ཁུཛྫུཏྟརཱཔི སཏྠུ དྷམྨཀཐཾ སུཎནྟཱིཡེཝ སོཏཱཔཏྟིཕལེ པཏིཊྛཧི. སཱ ཨཉྙེསུ དིཝསེསུ ཙཏྟཱརོ ཀཧཱཔཎེ ཨཏྟནོ གཧེཏྭཱ ཙཏཱུཧི པུཔྥཱནི གཧེཏྭཱ གཙྪཏི, ཏཾ དིཝསཾ ཨཊྛཧིཔི པུཔྥཱནི གཧེཏྭཱ གཏཱ. ཨཐ ནཾ སཱམཱཝཏཱི ཨཱཧ – ‘‘ཀིཾ ནུ ཁོ, ཨམྨ, ཨཛྫ ཨམྷཱཀཾ རཉྙཱ དྭིགུཎཾ པུཔྥམཱུལཾ དིནྣ’’ནྟི? ‘‘ནོ, ཨཡྻེ’’ཏི. ‘‘ཨཐ ཀསྨཱ བཧཱུནི པུཔྥཱནཱི’’ཏི? ‘‘ཨཉྙེསུ དིཝསེསུ ཨཧཾ ཙཏྟཱརོ ཀཧཱཔཎེ ཨཏྟནོ གཧེཏྭཱ ཙཏཱུཧི པུཔྥཱནི ཨཱཧརཱམཱི’’ཏི. ‘‘ཨཛྫ ཀསྨཱ ན གཎྷཱི’’ཏི? ‘‘སམྨཱསམྦུདྡྷསྶ དྷམྨཀཐཾ སུཏྭཱ དྷམྨསྶ ཨདྷིགཏཏྟཱ’’ཏི. ཨཐ ནཾ ‘‘ཨརེ, དུཊྛདཱསི ཨེཏྟཀཾ ཀཱལཾ ཏཡཱ གཧིཏཀཧཱཔཎེ མེ དེཧཱི’’ཏི ཨཏཛྫེཏྭཱ, ‘‘ཨམྨ, ཏཡཱ པིཝིཏཾ ཨམཏཾ ཨམྷེཔི པཱཡེཧཱི’’ཏི ཝཏྭཱ ‘‘ཏེན ཧི མཾ ནྷཱཔེཧཱི’’ཏི ཝུཏྟེ སོལ༹སཧི གནྡྷོདཀགྷཊེཧི ནྷཱཔེཏྭཱ དྭེ མཊྛསཱཊཀེ དཱཔེསི. སཱ ཨེཀཾ ནིཝཱསེཏྭཱ ཨེཀཾ ཨེཀཾསཾ པཱརུཔིཏྭཱ ཨཱསནཾ པཉྙཱཔེཏྭཱ ཨེཀཾ བཱིཛནིཾ ཨཱཧརཱཔེཏྭཱ ཨཱསནེ ནིསཱིདིཏྭཱ ཙིཏྲབཱིཛནིཾ ཨཱདཱཡ པཉྩ མཱཏུགཱམསཏཱནི ཨཱམནྟེཏྭཱ ཏཱསཾ སཏྠཱརཱ དེསིཏནིཡཱམེནེཝ དྷམྨཾ དེསེསི. ཏསྶཱ དྷམྨཀཐཾ སུཏྭཱ ཏཱ སབྦཱཔི སོཏཱཔཏྟིཕལེ པཏིཊྛཧིཾསུ.

ཏཱ སབྦཱཔི ཁུཛྫུཏྟརཾ ཝནྡིཏྭཱ, ‘‘ཨམྨ, ཨཛྫཏོ པཊྛཱཡ ཏྭཾ ཀིལིཊྛཀམྨཾ མཱ ཀརི, ཨམྷཱཀཾ མཱཏུཊྛཱནེ ཙ ཨཱཙརིཡཊྛཱནེ ཙ ཋཏྭཱ སཏྠུ སནྟིཀཾ གནྟྭཱ སཏྠཱརཱ དེསིཏཾ དྷམྨཾ སུཏྭཱ ཨམྷཱཀཾ ཀཐེཧཱི’’ཏི ཝདིཾསུ. སཱ ཏཐཱ ཀརོནྟཱི ཨཔརབྷཱགེ ཏིཔིཊཀདྷརཱ ཛཱཏཱ. ཨཐ ནཾ སཏྠཱ ‘‘ཨེཏདགྒཾ, བྷིཀྑཝེ, མམ སཱཝིཀཱནཾ ཨུཔཱསིཀཱནཾ བཧུསྶུཏཱནཾ དྷམྨཀཐིཀཱནཾ ཡདིདཾ ཁུཛྫུཏྟརཱ’’ཏི ཨེཏདགྒེ ཋཔེསི. ཏཱཔི ཁོ པཉྩསཏཱ ཨིཏྠིཡོ ཏཾ ཨེཝམཱཧཾསུ – ‘‘ཨམྨ, སཏྠཱརཾ དཊྛུཀཱམཱམྷཱ, ཏཾ ནོ དསྶེཧི, གནྡྷམཱལཱདཱིཧི ཏཾ པཱུཛེསྶཱམཱ’’ཏི. ‘‘ཨཡྻེ, རཱཛཀུལཾ ནཱམ བྷཱརིཡཾ, ཏུམྷེ གཧེཏྭཱ བཧི གནྟུཾ ན སཀྐཱ’’ཏི. ‘‘ཨམྨ, ནོ མཱ ནཱསེཧི, དསྶེཧེཝ ཨམྷཱཀཾ སཏྠཱར’’ནྟི. ‘‘ཏེན ཧི ཏུམྷཱཀཾ ཝསནགབྦྷཱནཾ བྷིཏྟཱིསུ ཡཏྟཀེན ཨོལོཀེཏུཾ སཀྐཱ ཧོཏི, ཏཏྟཀཾ ཚིདྡཾ ཀཏྭཱ གནྡྷམཱལཱདཱིནི ཨཱཧརཱཔེཏྭཱ སཏྠཱརཾ ཏིཎྞཾ སེཊྛཱིནཾ གྷརདྭཱརཾ གཙྪནྟཾ ཏུམྷེ ཏེསུ ཏེསུ ཋཱནེསུ ཋཏྭཱ ཨོལོཀེཐ ཙེཝ, ཧཏྠེ ཙ པསཱརེཏྭཱ ཝནྡཐ, པཱུཛེཐ ཙཱ’’ཏི. ཏཱ ཏཐཱ ཀཏྭཱ སཏྠཱརཾ གཙྪནྟཉྩ ཨཱགཙྪནྟཉྩ ཨོལོཀེཏྭཱ ཝནྡིཾསུ ཙེཝ པཱུཛེསུཉྩ.

ཨཐེཀདིཝསཾ མཱགཎྜིཡཱ ཨཏྟནོ པཱསཱདཏལཏོ ནིཀྑམིཏྭཱ ཙངྐམམཱནཱ ཏཱསཾ ཝསནཊྛཱནཾ གནྟྭཱ གབྦྷེསུ ཚིདྡཾ དིསྭཱ, ‘‘ཨིདཾ ཀི’’ནྟི པུཙྪིཏྭཱ, ཏཱཧི ཏསྶཱ སཏྠརི ཨཱགྷཱཏབདྡྷབྷཱཝཾ ཨཛཱནནྟཱིཧི ‘‘སཏྠཱ ཨིམཾ ནགརཾ ཨཱགཏོ, མཡཾ ཨེཏྠ ཋཏྭཱ སཏྠཱརཾ ཝནྡཱམ ཙེཝ པཱུཛེམ ཙཱ’’ཏི ཝུཏྟེ, ‘‘ཨཱགཏོ ནཱམ ཨིམཾ ནགརཾ སམཎོ གོཏམོ, ཨིདཱནིསྶ ཀཏྟབྦཾ ཛཱནིསྶཱམི, ཨིམཱཔི ཏསྶ ཨུཔཊྛཱཡིཀཱ, ཨིམཱསམྤི ཀཏྟབྦཾ ཛཱནིསྶཱམཱི’’ཏི ཙིནྟེཏྭཱ གནྟྭཱ རཉྙོ ཨཱརོཙེསི – ‘‘མཧཱརཱཛ, སཱམཱཝཏིམིསྶིཀཱནཾ བཧིདྡྷཱ པཏྠནཱ ཨཏྠི, ཀཏིཔཱཧེནེཝ ཏེ ཛཱིཝིཏཾ མཱརེསྶནྟཱི’’ཏི. རཱཛཱ ‘‘ན ཏཱ ཨེཝརཱུཔཾ ཀརིསྶནྟཱི’’ཏི ན སདྡཧི. པུནཔྤུནཾ ཝུཏྟེཔི ན སདྡཧི ཨེཝ. ཨཐ ནཾ ཨེཝཾ ཏིཀྑཏྟུཾ ཝུཏྟེཔི ཨསདྡཧནྟཾ ‘‘སཙེ མེ ན སདྡཧསི, ཏཱསཾ ཝསནཊྛཱནཾ གནྟྭཱ ཨུཔཙཱརེཧི, མཧཱརཱཛཱ’’ཏི ཨཱཧ. རཱཛཱ གནྟྭཱ གབྦྷེསུ ཚིདྡཾ དིསྭཱ, ‘‘ཨིདཾ ཀི’’ནྟི པུཙྪིཏྭཱ, ཏསྨིཾ ཨཏྠེ ཨཱརོཙིཏེ ཏཱསཾ ཨཀུཛ྄ཛྷིཏྭཱ, ཀིཉྩི ཨཝཏྭཱཝ ཚིདྡཱནི པིདཧཱཔེཏྭཱ སབྦགབྦྷེསུ ཨུདྡྷཙྪིདྡཀཝཱཏཔཱནཱནི ཀཱརེསི. ཨུདྡྷཙྪིདྡཀཝཱཏཔཱནཱནི ཀིར ཏསྨིཾ ཀཱལེ ཨུཔྤནྣཱནི. མཱགཎྜིཡཱ ཏཱསཾ ཀིཉྩི ཀཱཏུཾ ཨསཀྐུཎིཏྭཱ, ‘‘སམཎསྶ གོཏམསྶེཝ ཀཏྟབྦཾ ཀརིསྶཱམཱི’’ཏི ནཱགརཱནཾ ལཉྫཾ དཏྭཱ, ‘‘སམཎཾ གོཏམཾ ཨནྟོནགརཾ པཝིསིཏྭཱ ཝིཙརནྟཾ དཱསཀམྨཀརཔོརིསེཧི ཨཀྐོསེཏྭཱ པརིབྷཱསེཏྭཱ པལཱཔེཐཱ’’ཏི ཨཱཎཱཔེསི. མིཙྪཱདིཊྛིཀཱ ཏཱིསུ རཏནེསུ ཨཔྤསནྣཱ ཨནྟོནགརཾ པཝིཊྛཾ སཏྠཱརཾ ཨནུབནྡྷིཏྭཱ, ‘‘ཙོརོསི, བཱལོསི, མཱུལ༹ྷོསི, ཨོཊྛོསི, གོཎོསི, གདྲབྷོསི, ནེརཡིཀོསི, ཏིརཙྪཱནགཏོསི, ནཏྠི ཏུཡ྄ཧཾ སུགཏི, དུགྒཏིཡེཝ ཏུཡ྄ཧཾ པཱཊིཀངྑཱ’’ཏི དསཧི ཨཀྐོསཝཏྠཱུཧི ཨཀྐོསནྟི པརིབྷཱསནྟི.

ཏཾ སུཏྭཱ ཨཱཡསྨཱ ཨཱནནྡོ སཏྠཱརཾ ཨེཏདཝོཙ – ‘‘བྷནྟེ, ཨིམེ ནཱགརཱ ཨམྷེ ཨཀྐོསནྟི པརིབྷཱསནྟི, ཨིཏོ ཨཉྙཏྠ གཙྪཱམཱ’’ཏི. ‘‘ཀུཧིཾ, ཨཱནནྡོཏི’’? ‘‘ཨཉྙཾ ནགརཾ, བྷནྟེ’’ཏི. ‘‘ཏཏྠ མནུསྶེསུ ཨཀྐོསནྟེསུ པུན ཀཏྠ གམིསྶཱམ, ཨཱནནྡོ’’ཏི? ‘‘ཏཏོཔི ཨཉྙཾ ནགརཾ, བྷནྟེ’’ཏི. ‘‘ཏཏྠཱཔི མནུསྶེསུ ཨཀྐོསནྟེསུ ཀུཧིཾ གམིསྶཱམཱ’’ཏི? ‘‘ཏཏོཔི ཨཉྙཾ ནགརཾ, བྷནྟེ’’ཏི. ‘‘ཨཱནནྡ, ཨེཝཾ ཀཱཏུཾ ན ཝཊྚཏི. ཡཏྠ ཨདྷིཀརཎཾ ཨུཔྤནྣཾ, ཏཏྠེཝ ཏསྨིཾ ཝཱུཔསནྟེ ཨཉྙཏྠ གནྟུཾ ཝཊྚཏི. ཀེ པན ཏེ, ཨཱནནྡ, ཨཀྐོསནྟཱི’’ཏི? ‘‘བྷནྟེ, དཱསཀམྨཀརེ ཨུཔཱདཱཡ སབྦེ ཨཀྐོསནྟཱི’’ཏི. ‘‘ཨཧཾ, ཨཱནནྡ, སངྒཱམཾ ཨོཏིཎྞཧཏྠིསདིསོ, སངྒཱམཾ ཨོཏིཎྞཧཏྠིནོ ཧི ཙཏཱུཧི དིསཱཧི ཨཱགཏེ སརེ སཧིཏུཾ བྷཱརོ, ཏཐེཝ བཧཱུཧི དུསྶཱིལེཧི ཀཐིཏཀཐཱནཾ སཧནཾ ནཱམ མཡ྄ཧཾ བྷཱརོ’’ཏི ཝཏྭཱ ཨཏྟཱནཾ ཨཱརབྦྷ དྷམྨཾ དེསེནྟོ ཨིམཱ ནཱགཝགྒེ ཏིསྶོ གཱཐཱ ཨབྷཱསི –

‘‘ཨཧཾ ནཱགོཝ སངྒཱམེ, ཙཱཔཏོ པཏིཏཾ སརཾ;

ཨཏིཝཱཀྱཾ ཏིཏིཀྑིསྶཾ, དུསྶཱིལོ ཧི བཧུཛྫནོ.

‘‘དནྟཾ ནཡནྟི སམིཏིཾ, དནྟཾ རཱཛཱབྷིརཱུཧཏི;

དནྟོ སེཊྛོ མནུསྶེསུ, ཡོཏིཝཱཀྱཾ ཏིཏིཀྑཏི.

‘‘ཝརམསྶཏརཱ དནྟཱ, ཨཱཛཱནཱིཡཱ ཙ སིནྡྷཝཱ;

ཀུཉྫརཱ ཙ མཧཱནཱགཱ, ཨཏྟདནྟོ ཏཏོ ཝར’’ནྟི. (དྷ. པ. ༣༢༠-༣༢༢);

དྷམྨཀཐཱ སམྤཏྟམཧཱཛནསྶ སཱཏྠིཀཱ ཨཧོསི. ཨེཝཾ དྷམྨཾ དེསེཏྭཱ མཱ ཙིནྟཡི, ཨཱནནྡ, ཨེཏེ སཏྟཱཧམཏྟམེཝ ཨཀྐོསིསྶནྟི, ཨཊྛམེ དིཝསེ ཏུཎྷཱི བྷཝིསྶནྟི, བུདྡྷཱནཉྷི ཨུཔྤནྣཾ ཨདྷིཀརཎཾ སཏྟཱཧཏོ ཨུཏྟརི ན གཙྪཏི. མཱགཎྜིཡཱ སཏྠཱརཾ ཨཀྐོསཱཔེཏྭཱ པལཱཔེཏུཾ ཨསཀྐོནྟཱི, ‘‘ཀིཾ ནུ ཁོ ཀརིསྶཱམཱི’’ཏི ཙིནྟེཏྭཱ, ‘‘ཨིམཱ ཨེཏསྶ ཨུཔཏྠམྦྷབྷཱུཏཱ, ཨེཏཱསམྤི བྱསནཾ ཀརིསྶཱམཱི’’ཏི ཨེཀདིཝསཾ རཉྙོ སུརཱཔཱནཊྛཱནེ ཨུཔཊྛཱནཾ ཀརོནྟཱི ཙཱུལ༹པིཏུ སཱསནཾ པཧིཎི ‘‘ཨཏྠོ མེ ཀིར ཀུཀྐུཊེཧི, ཨཊྛ མཏཀུཀྐུཊེ, ཨཊྛ སཛཱིཝཀུཀྐུཊེ ཙ གཧེཏྭཱ ཨཱགཙྪཏུ, ཨཱགནྟྭཱ ཙ སོཔཱནམཏྠཀེ ཋཏྭཱ ཨཱགཏབྷཱཝཾ ནིཝེདེཏྭཱ ‘པཝིསཏཱུ’ཏི ཝུཏྟེཔི ཨཔཝིསིཏྭཱ པཋམཾ ཨཊྛ སཛཱིཝཀུཀྐུཊེ པཧིཎཏུ, ‘པཙྪཱ ཨིཏརེ’’’ཏི. ཙཱུལཱ༹པཊྛཱཀསྶ ཙ ‘‘མམ ཝཙནཾ ཀརེཡྻཱསཱི’’ཏི ལཉྫཾ ཨདཱསི. མཱགཎྜིཡོ ཨཱགནྟྭཱ, རཉྙོ ནིཝེདཱཔེཏྭཱ, ‘‘པཝིསཏཱུ’’ཏི ཝུཏྟེ, ‘‘རཉྙོ ཨཱཔཱནབྷཱུམིཾ ན པཝིསིསྶཱམཱི’’ཏི ཨཱཧ. ཨིཏརཱ ཙཱུལུ༹པཊྛཱཀཾ པཧིཎི – ‘‘གཙྪ, ཏཱཏ, མམ ཙཱུལ༹པིཏུ སནྟིཀ’’ནྟི. སོ གནྟྭཱ ཏེན དིནྣེ ཨཊྛ སཛཱིཝཀུཀྐུཊེ ཨཱནེཏྭཱ, ‘‘དེཝ, པུརོཧིཏེན པཎྞཱཀཱརོ པཧིཏོ’’ཏི ཨཱཧ. རཱཛཱ ‘‘བྷདྡཀོ ཝཏ ནོ ཨུཏྟརིབྷངྒོ ཨུཔྤནྣོ, ཀོ ནུ ཁོ པཙེཡྻཱ’’ཏི ཨཱཧ. མཱགཎྜིཡཱ, ‘‘མཧཱརཱཛ, སཱམཱཝཏིཔྤམུཁཱ པཉྩསཏཱ ཨིཏྠིཡོ ནིཀྐམྨིཀཱ ཝིཙརནྟི, ཏཱསཾ པེསེཧི, ཏཱ པཙིཏྭཱ ཨཱཧརིསྶནྟཱི’’ཏི ཨཱཧ. རཱཛཱ ‘‘གཙྪ, ཏཱསཾ དཏྭཱ ཨཉྙསྶ ཀིར ཧཏྠེ ཨདཏྭཱ སཡམེཝ མཱརེཏྭཱ པཙནྟཱུ’’ཏི པེསེསི. ཙཱུལུ༹པཊྛཱཀོ ‘‘སཱདྷུ དེཝཱ’’ཏི གནྟྭཱ ཏཐཱ ཝཏྭཱ ཏཱཧི ‘‘མཡཾ པཱཎཱཏིཔཱཏཾ ན ཀརོམཱ’’ཏི པཊིཀྑིཏྟོ ཨཱགནྟྭཱ ཏམཏྠཾ རཉྙོ ཨཱརོཙེསི. མཱགཎྜིཡཱ ‘‘དིཊྛཾ ཏེ, མཧཱརཱཛ, ཨིདཱནི ཏཱསཾ པཱཎཱཏིཔཱཏསྶ ཀརཎཾ ཝཱ ཨཀརཎཾ ཝཱ ཛཱནིསྶསི, ‘སམཎསྶ གོཏམསྶ པཙིཏྭཱ པེསེནྟཱུ’ཏི ཝདེཧི དེཝཱ’’ཏི ཨཱཧ. རཱཛཱ ཏཐཱ ཝཏྭཱ པེསེསི. ཨིཏརོ ཏེ གཧེཏྭཱ གཙྪནྟོ ཝིཡ ཧུཏྭཱ གནྟྭཱ ཏེ ཀུཀྐུཊེ པུརོཧིཏསྶ དཏྭཱ མཏཀུཀྐུཊེ ཏཱསཾ སནྟིཀཾ ནེཏྭཱ, ‘‘ཨིམེ ཀིར ཀུཀྐུཊེ པཙིཏྭཱ སཏྠུ སནྟིཀཾ པཧིཎཐཱ’’ཏི ཨཱཧ. ཏཱ, ‘‘སཱམི, ཨཱཧར, ཨིདཾ ནཱམ ཨམྷཱཀཾ ཀིཙྩ’’ནྟི པཙྩུགྒནྟྭཱ གཎྷིཾསུ. སོ རཉྙོ སནྟིཀཾ གནྟྭཱ, ‘‘ཀིཾ, ཏཱཏཱ’’ཏི པུཊྛོ, ‘‘སམཎསྶ གོཏམསྶ པཙིཏྭཱ པེསེཐཱཏི ཝུཏྟམཏྟེཡེཝ པཊིམགྒཾ ཨཱགནྟྭཱ གཎྷིཾསཱུ’’ཏི ཨཱཙིཀྑི. མཱགཎྜིཡཱ ‘‘པསྶ, མཧཱརཱཛ, ན ཏཱ ཏུམྷཱདིསཱནཾ ཀརོནྟི, བཧིདྡྷཱ པཏྠནཱ ཏཱསཾ ཨཏྠཱིཏི ཝུཏྟེ ན སདྡཧསཱི’’ཏི ཨཱཧ. རཱཛཱ ཏཾ སུཏྭཱཔི ཨདྷིཝཱསེཏྭཱ ཏུཎྷཱིཡེཝ ཨཧོསི. མཱགཎྜིཡཱ ‘‘ཀིཾ ནུ ཁོ ཀརིསྶཱམཱི’’ཏི ཙིནྟེསི.

ཏདཱ པན རཱཛཱ ‘‘སཱམཱཝཏིཡཱ ཝཱསུལདཏྟཱཡ མཱགཎྜིཡཱཡ ཙཱ’’ཏི ཏིསྶནྣམྤི ཨེཏཱསཾ པཱསཱདཏལེ ཝཱརེན ཝཱརེན སཏྟཱཧཾ སཏྟཱཧཾ ཝཱིཏིནཱམེཏི. ཨཐ ནཾ ‘‘སྭེ ཝཱ པརསུཝེ ཝཱ སཱམཱཝཏིཡཱ པཱསཱདཏལཾ གམིསྶཏཱི’’ཏི ཉཏྭཱ མཱགཎྜིཡཱ ཙཱུལ༹པིཏུ སཱསནཾ པཧིཎི – ‘‘ཨགདེན ཀིར དཱཋཱ དྷོཝིཏྭཱ ཨེཀཾ སཔྤཾ པེསེཏཱུ’’ཏི. སོ ཏཐཱ ཀཏྭཱ པེསེསི. རཱཛཱ ཨཏྟནོ གམནཊྛཱནཾ ཧཏྠིཀནྟཝཱིཎཾ ཨཱདཱཡཡེཝ གཙྪཏི, ཏསྶཱ པོཀྑརེ ཨེཀཾ ཚིདྡཾ ཨཏྠི. མཱགཎྜིཡཱ ཏེན ཚིདྡེན སཔྤཾ པཝེསེཏྭཱ ཚིདྡཾ མཱལཱགུལེ༹ན ཐཀེསི. སཔྤོ དྭཱིཧཏཱིཧཾ ཨནྟོཝཱིཎཱཡམེཝ ཨཧོསི. མཱགཎྜིཡཱ རཉྙོ གམནདིཝསེ ‘‘ཨཛྫ ཀཏརིསྶིཏྠིཡཱ པཱསཱདཾ གམིསྶསི དེཝཱ’’ཏི པུཙྪིཏྭཱ ‘‘སཱམཱཝཏིཡཱ’’ཏི ཝུཏྟེ, ‘‘ཨཛྫ མཡཱ, མཧཱརཱཛ, ཨམནཱཔོ སུཔིནོ དིཊྛོ. ན སཀྐཱ ཏཏྠ གནྟུཾ, དེཝཱ’’ཏི? ‘‘གཙྪཱམེཝཱ’’ཏི. སཱ ཡཱཝ ཏཏིཡཾ ཝཱརེཏྭཱ, ‘‘ཨེཝཾ སནྟེ ཨཧམྤི ཏུམྷེཧི སདྡྷིཾ གམིསྶཱམི, དེཝཱ’’ཏི ཝཏྭཱ ནིཝཏྟིཡམཱནཱཔི ཨནིཝཏྟིཏྭཱ, ‘‘ན ཛཱནཱམི, ཀིཾ བྷཝིསྶཏི དེཝཱ’’ཏི རཉྙཱ སདྡྷིཾཡེཝ ཨགམཱསི.

རཱཛཱ སཱམཱཝཏིམིསྶིཀཱཧི དིནྣཱནི ཝཏྠཔུཔྥགནྡྷཱབྷརཎཱནི དྷཱརེཏྭཱ སུབྷོཛནཾ བྷུཉྫིཏྭཱ ཝཱིཎཾ ཨུསྶཱིསཀེ ཋཔེཏྭཱ སཡནེ ནིཔཛྫི. མཱགཎྜིཡཱ ཨཔརཱཔརཾ ཝིཙརནྟཱི ཝིཡ ཧུཏྭཱ ཝཱིཎཱཚིདྡཏོ པུཔྥགུལ༹ཾ ཨཔནེསི. སཔྤོ དྭཱིཧཏཱིཧཾ ནིརཱཧཱརོ ཏེན ཚིདྡེན ནིཀྑམིཏྭཱ པསྶསནྟོ ཕཎཾ ཀཏྭཱ སཡནཔིཊྛེ ནིཔཛྫི. མཱགཎྜིཡཱ ཏཾ དིསྭཱ, ‘‘དྷཱི དྷཱི, དེཝ, སཔྤོ’’ཏི མཧཱསདྡཾ ཀཏྭཱ རཱཛཱནཉྩ ཏཱ ཙ ཨཀྐོསནྟཱི, ‘‘ཨཡཾ ཨནྡྷབཱལརཱཛཱ ཨལཀྑིཀོ མཡ྄ཧཾ ཝཙནཾ ན སུཎཱཏི, ཨིམཱཔི ནིསྶིརཱིཀཱ དུབྦིནཱིཏཱ, ཀིཾ ནཱམ རཉྙོ སནྟིཀཱ ན ལབྷནྟི, ཀིཾ ནུ ཏུམྷེ ཨིམསྨིཾ མཏེཡེཝ སུཁཾ ཛཱིཝིསྶཐ, ཛཱིཝནྟེ དུཀྑཾ ཛཱིཝཐ, ‘ཨཛྫ མཡཱ པཱཔསུཔིནོ དིཊྛོ, སཱམཱཝཏིཡཱ པཱསཱདཾ གནྟུཾ ན ཝཊྚཏཱི’ཏི ཝཱརེནྟིཡཱཔི མེ ཝཙནཾ ན སུཎསི, དེཝཱ’’ཏི ཨཱཧ. རཱཛཱ སཔྤཾ དིསྭཱ མརཎབྷཡཏཛྫིཏོ ‘‘ཨེཝརཱུཔམྤི ནཱམ ཨིམཱ ཀརིསྶནྟི, ཨཧོ པཱཔཱ, ཨཧཾ ཨིམཱསཾ པཱཔབྷཱཝཾ ཨཱཙིཀྑནྟིཡཱཔི ཨིམིསྶཱ ཝཙནཾ ན སདྡཧིཾ, པཋམཾ ཨཏྟནོ གབྦྷེསུ ཚིདྡཱནི ཀཏྭཱ ནིསིནྣཱ, པུན མཡཱ པེསིཏེ ཀུཀྐུཊེ པཊིཔཧིཎིཾསུ, ཨཛྫ སཡནེ སཔྤཾ ཝིསྶཛྫིཾསཱུ’’ཏི ཀོདྷེན སམྤཛྫལིཏོ ཝིཡ ཨཧོསི.

སཱམཱཝཏཱིཔི པཉྩནྣཾ ཨིཏྠིསཏཱནཾ ཨོཝཱདཾ ཨདཱསི – ‘‘ཨམྨཱ, ཨམྷཱཀཾ ཨཉྙཾ པཊིསརཎཾ ནཏྠི, ནརིནྡེ ཙ དེཝིཡཱ ཙ ཨཏྟནི ཙ སམམེཝ མེཏྟཙིཏྟཾ པཝཏྟེཐ, མཱ ཀསྶཙི ཀོཔཾ ཀརིཏྠཱ’’ཏི. རཱཛཱ སཧསྶཐཱམཾ སིངྒདྷནུཾ ཨཱདཱཡ ཛིཡཾ པོཐེཏྭཱ ཝིསཔཱིཏཾ སརཾ སནྣཡ྄ཧིཏྭཱ སཱམཱཝཏིཾ དྷུརེ ཀཏྭཱ སབྦཱ ཏཱ པཊིཔཱཊིཡཱ ཋཔཱཔེཏྭཱ སཱམཱཝཏིཡཱ ཨུརེ སརཾ ཝིསྶཛྫེསི. སོ ཏསྶཱ མེཏྟཱནུབྷཱཝེན པཊིནིཝཏྟིཏྭཱ ཨཱགཏམགྒཱབྷིམུཁོཝ ཧུཏྭཱ རཉྙོ ཧདཡཾ པཝིསནྟོ ཝིཡ ཨཊྛཱསི. རཱཛཱ ཙིནྟེསི – ‘‘མཡཱ ཁིཏྟོ སརོ སིལམྤི ཝིནིཝིཛ྄ཛྷིཏྭཱ གཙྪཏི, ཨཱཀཱསེ པཊིཧནནཀཊྛཱནཾ ནཏྠི, ཨཐ ཙ པནེས ནིཝཏྟིཏྭཱ མམ ཧདཡཱབྷིམུཁོ ཛཱཏོ, ཨཡཉྷི ནཱམ ནིསྶཏྟོ ནིཛྫཱིཝོ སརོཔི ཨེཏིསྶཱ གུཎཾ ཛཱནཱཏི, ཨཧཾ མནུསྶབྷཱུཏོཔི ན ཛཱནཱམཱི’’ཏི, སོ དྷནུཾ ཚཌྜེཏྭཱ ཨཉྫལིཾ པགྒཡ྄ཧ སཱམཱཝཏིཡཱ པཱདམཱུལེ ཨུཀྐུཊིཀཾ ནིསཱིདིཏྭཱ ཨིམཾ གཱཐམཱཧ –

‘‘སམྨུཡ྄ཧཱམི པམུཡ྄ཧཱམི, སབྦཱ མུཡ྄ཧནྟི མེ དིསཱ;

སཱམཱཝཏི མཾ ཏཱཡསྶུ, ཏྭཉྩ མེ སརཎཾ བྷཝཱ’’ཏི.

སཱ ཏསྶ ཝཙནཾ སུཏྭཱ, ‘‘སཱདྷུ, དེཝ, མཾ སརཎཾ གཙྪཱ’’ཏི ཨཝཏྭཱ, ‘‘ཡམཧཾ, མཧཱརཱཛ, སརཎཾ གཏཱ, ཏམེཝ ཏྭམྤི སརཎཾ གཙྪཱཧཱི’’ཏི ཨིདཾ ཝཏྭཱ སཱམཱཝཏཱི སམྨཱསམྦུདྡྷསཱཝིཀཱ –

‘‘མཱ མཾ ཏྭཾ སརཎཾ གཙྪ, ཡམཧཾ སརཎཾ གཏཱ;

ཨེས བུདྡྷོ མཧཱརཱཛ, ཨེས བུདྡྷོ ཨནུཏྟརོ;

སརཎཾ གཙྪ ཏཾ བུདྡྷཾ, ཏྭཉྩ མེ སརཎཾ བྷཝཱ’’ཏི. –

ཨཱཧ. རཱཛཱ ཏསྶ ཝཙནཾ སུཏྭཱ, ‘‘ཨིདཱནཱཧཾ ཨཏིརེཀཏརཾ བྷཱཡཱམཱི’’ཏི ཝཏྭཱ ཨིམཾ གཱཐམཱཧ –

‘‘ཨེས བྷིཡྻོ པམུཡ྄ཧཱམི, སབྦཱ མུཡ྄ཧནྟི མེ དིསཱ;

སཱམཱཝཏི མཾ ཏཱཡསྶུ, ཏྭཉྩ མེ སརཎཾ བྷཝཱ’’ཏི.

ཨཐ ནཾ སཱ པུརིམནཡེནེཝ པུན པཊིཀྑིཔིཏྭཱ, ‘‘ཏེན ཧི ཏྭཉྩ སརཎཾ གཙྪཱམི, སཏྠཱརཉྩ སརཎཾ གཙྪཱམི, ཝརཉྩ ཏེ དམྨཱི’’ཏི ཝུཏྟེ, ‘‘ཝརོ གཧིཏོ ཧོཏུ, མཧཱརཱཛཱ’’ཏི ཨཱཧ. སོ སཏྠཱརཾ ཨུཔསངྐམིཏྭཱ སརཎཾ གནྟྭཱ ནིམནྟེཏྭཱ བུདྡྷཔྤམུཁསྶ བྷིཀྑུསངྒྷསྶ སཏྟཱཧཾ མཧཱདཱནཾ དཏྭཱ སཱམཱཝཏིཾ ཨཱམནྟེཏྭཱ, ‘‘ཨུཊྛེཧི, ཝརཾ གཎྷཱ’’ཏི ཨཱཧ. ‘‘མཧཱརཱཛ, མཡ྄ཧཾ ཧིརཉྙཱདཱིཧི ཨཏྠོ ནཏྠི, ཨིམཾ པན མེ ཝརཾ དེཧི, ཏཐཱ ཀརོཧི, ཡཐཱ སཏྠཱ ནིབདྡྷཾ པཉྩཧི བྷིཀྑུསཏེཧི སདྡྷིཾ ཨིདྷཱགཙྪཏི, དྷམྨཾ སུཎིསྶཱམཱི’’ཏི. རཱཛཱ སཏྠཱརཾ ཝནྡིཏྭཱ, ‘‘བྷནྟེ, པཉྩཧི བྷིཀྑུསཏེཧི སདྡྷིཾ ནིབདྡྷཾ ཨིདྷཱགཙྪཐ, སཱམཱཝཏིམིསྶིཀཱ ‘དྷམྨཾ སུཎིསྶཱམཱ’ཏི ཝདནྟཱི’’ཏི ཨཱཧ. ‘‘མཧཱརཱཛ, བུདྡྷཱནཾ ནཱམ ཨེཀསྨིཾ ཋཱནེ ནིབདྡྷཾ གནྟུཾ ན ཝཊྚཏི, མཧཱཛནོ སཏྠཱརཾ ཨཱགམནཏྠཱཡ པཙྩཱསཱིསཏཱི’’ཏི. ‘‘ཏེན ཧི, བྷནྟེ, ཨེཀཾ བྷིཀྑུཾ ཨཱཎཱཔེཐཱ’’ཏི. སཏྠཱ ཨཱནནྡཏྠེརཾ ཨཱཎཱཔེསི. སོ ཏཏོ པཊྛཱཡ པཉྩ བྷིཀྑུསཏཱནི ཨཱདཱཡ ནིབདྡྷཾ རཱཛཀུལཾ གཙྪཏི. ཏཱཔི དེཝིཡོ ནིབདྡྷཾ ཐེརཾ སཔརིཝཱརཾ བྷོཛེནྟི, དྷམྨཾ སུཎནྟི. ཏཱ ཨེཀདིཝསཾ ཐེརསྶ དྷམྨཀཐཾ སུཏྭཱ པསཱིདིཏྭཱ, པཉྩཧི ཨུཏྟརཱསངྒསཏེཧི དྷམྨཔཱུཛཾ ཨཀཾསུ. ཨེཀེཀོ ཨུཏྟརཱསངྒོ པཉྩ སཏཱནི པཉྩ སཏཱནི ཨགྒྷཏི.

ཏཱ ཨེཀཝཏྠཱ དིསྭཱ རཱཛཱ པུཙྪི – ‘‘ཀུཧིཾ ཝོ ཨུཏྟརཱསངྒོ’’ཏི. ‘‘ཨཡྻསྶ ནོ དིནྣཱ’’ཏི. ‘‘ཏེན སབྦེ གཧིཏཱ’’ཏི? ‘‘ཨཱམ, གཧིཏཱ’’ཏི. རཱཛཱ ཐེརཾ ཨུཔསངྐམིཏྭཱ ཝནྡིཏྭཱ ཏཱཧི ཨུཏྟརཱསངྒཱནཾ དིནྣབྷཱཝཾ པུཙྪིཏྭཱ ཏཱཧི དིནྣབྷཱཝཉྩ ཐེརེན གཧིཏབྷཱཝཉྩ སུཏྭཱ, ‘‘ནནུ, བྷནྟེ, ཨཏིབཧཱུནི ཝཏྠཱནི, ཨེཏྟཀེཧི ཀིཾ ཀརིསྶཐཱ’’ཏི པུཙྪི. ‘‘ཨམྷཱཀཾ པཧོནཀཱནི ཝཏྠཱནི གཎྷིཏྭཱ སེསཱནི ཛིཎྞཙཱིཝརིཀཱནཾ བྷིཀྑཱུནཾ དསྶཱམི, མཧཱརཱཛཱ’’ཏི. ‘‘ཏེ ཨཏྟནོ ཛིཎྞཙཱིཝརཱནི ཀིཾ ཀརིསྶནྟཱི’’ཏི? ‘‘ཛིཎྞཏརཙཱིཝརིཀཱནཾ དསྶནྟཱི’’ཏི. ‘‘ཏེ ཨཏྟནོ ཛིཎྞཏརཙཱིཝརཱནི ཀིཾ ཀརིསྶནྟཱི’’ཏི? ‘‘པཙྩཏྠརཎཱནི ཀརིསྶནྟཱི’’ཏི. ‘‘པུརཱཎཔཙྩཏྠརཎཱནི ཀིཾ ཀརིསྶནྟཱི’’ཏི? ‘‘བྷཱུམཏྠརཎཱནི ཀརིསྶནྟཱི’’ཏི. ‘‘པུརཱཎབྷཱུམཏྠརཎཱནི ཀིཾ ཀརིསྶནྟཱི’’ཏི? ‘‘པཱདཔུཉྪནཱནི ཀརིསྶནྟི, མཧཱརཱཛཱ’’ཏི. ‘‘པུརཱཎཔཱདཔུཉྪནཱནི ཀིཾ ཀརིསྶནྟཱི’’ཏི? ‘‘ཁཎྜཱཁཎྜིཀཾ ཀོཊྚེཏྭཱ མཏྟིཀཱཡ མདྡིཏྭཱ བྷིཏྟིཾ ལིམྤིསྶནྟཱི’’ཏི. ‘‘བྷནྟེ, ཨེཏྟཀཱནི ཀཏྭཱཔི ཨཡྻཱནཾ དིནྣཱནི ན ནསྶནྟཱི’’ཏི? ‘‘ཨཱམ, མཧཱརཱཛཱ’’ཏི. རཱཛཱ པསནྣོ ཨཔརཱནིཔི པཉྩ ཝཏྠསཏཱནི ཨཱཧརཱཔེཏྭཱ ཐེརསྶ པཱདམཱུལེ ཋཔཱཔེསི. ཐེརོ ཀིར པཉྩསཏགྒྷནཀཱནེཝ ཝཏྠཱནི པཉྩསཏབྷཱགེན པཱདམཱུལེ ཋཔེཏྭཱ དིནྣཱནི པཉྩསཏཀྑཏྟུཾ ལབྷི, སཧསྶགྒྷནཀཱནི སཧསྶབྷཱགེན པཱདམཱུལེ ཋཔེཏྭཱ དིནྣཱནི སཧསྶཀྑཏྟུཾ ལབྷི, སཏསཧསྶགྒྷནཀཱནི སཏསཧསྶབྷཱགེན པཱདམཱུལེ ཋཔེཏྭཱ དིནྣཱནི སཏསཧསྶཀྑཏྟུཾ ལབྷི. ཨེཀཾ དྭེ ཏཱིཎི ཙཏྟཱརི པཉྩ དསཱཏིཨཱདིནཱ ནཡེན ལདྡྷཱནཾ པན གཎནཱ ནཱམ ནཏྠི. ཏཐཱགཏེ ཀིར པརིནིབྦུཏེ ཐེརོ སཀལཛམྦུདཱིཔཾ ཝིཙརིཏྭཱ སབྦཝིཧཱརེསུ བྷིཀྑཱུནཾ ཨཏྟནོ སནྟཀཱནེཝ པཏྟཙཱིཝརཱནི ཨདཱསི.

ཏདཱ མཱགཎྜིཡཱཔི ‘‘ཡམཧཾ ཀརོམི. ཏཾ ཏཐཱ ཨཧུཏྭཱ ཨཉྙཐཱཝ ཧོཏི, ཨིདཱནི ཀིཾ ནུ ཁོ ཀརིསྶཱམཱི’’ཏི ཙིནྟེཏྭཱ, ‘‘ཨཏྠེསོ ཨུཔཱཡོ’’ཏི རཉྙེ ཨུཡྻཱནཀཱིལ༹ཾ གཙྪནྟེ ཙཱུལ༹པིཏུ སཱསནཾ པཧིཎི – ‘‘སཱམཱཝཏིཡཱ པཱསཱདཾ གནྟྭཱ, དུསྶཀོཊྛཱགཱརཱནི ཙ ཏེལཀོཊྛཱགཱརཱནི ཙ ཝིཝརཱཔེཏྭཱ, དུསྶཱནི ཏེལཙཱཊཱིསུ ཏེམེཏྭཱ ཏེམེཏྭཱ ཐམྦྷེ ཝེཋེཏྭཱ ཏཱ སབྦཱཔི ཨེཀཏོ ཀཏྭཱ དྭཱརཾ པིདཧིཏྭཱ བཧི ཡནྟཀཾ དཏྭཱ དཎྜདཱིཔིཀཱཧི གེཧེ ཨགྒིཾ དདམཱནོ ཨོཏརིཏྭཱ གཙྪཏཱུ’’ཏི. སོ པཱསཱདཾ ཨབྷིརུཡ྄ཧ ཀོཊྛཱགཱརཱནི ཝིཝརིཏྭཱ ཝཏྠཱནི ཏེལཙཱཊཱིསུ ཏེམེཏྭཱ ཏེམེཏྭཱ ཐམྦྷེ ཝེཋེཏུཾ ཨཱརབྷི. ཨཐ ནཾ སཱམཱཝཏིཔྤམུཁཱ ཨིཏྠིཡོ ‘‘ཀིཾ ཨེཏཾ ཙཱུལ༹པིཏཱ’’ཏི ཝདནྟིཡོ ཨུཔསངྐམིཾསུ. ‘‘ཨམྨཱ, རཱཛཱ དལ༹ྷིཀམྨཏྠཱཡ ཨིམེ ཐམྦྷེ ཏེལཔིལོཏིཀཱཧི ཝེཋཱཔེཏི, རཱཛགེཧེ ནཱམ སུཡུཏྟཾ དུཡུཏྟཾ དུཛྫཱནཾ, མཱ མེ སནྟིཀེ ཧོཐ, ཨམྨཱ’’ཏི ཨེཝཾ ཝཏྭཱ ཏཱ ཨཱགཏཱ གབྦྷེ པཝེསེཏྭཱ དྭཱརཱནི པིདཧིཏྭཱ བཧི ཡནྟཀཾ དཏྭཱ ཨཱདིཏོ པཊྛཱཡ ཨགྒིཾ དེནྟོ ཨོཏརི. སཱམཱཝཏཱི ཏཱསཾ ཨོཝཱདཾ ཨདཱསི – ‘‘ཨམྷཱཀཾ ཨནམཏགྒེ སཾསཱརེ ཝིཙརནྟཱིནཾ ཨེཝམེཝ ཨགྒིནཱ ཛྷཱཡམཱནཱནཾ ཨཏྟབྷཱཝཱནཾ པརིཙྪེདོ བུདྡྷཉཱཎེནཔི ན སུཀརོ, ཨཔྤམཏྟཱ ཧོཐཱ’’ཏི. ཏཱ གེཧེ ཛྷཱཡནྟེ ཝེདནཱཔརིགྒཧཀམྨཊྛཱནཾ མནསིཀརོནྟིཡོ ཀཱཙི དུཏིཡཕལཾ, ཀཱཙི ཏཏིཡཕལཾ པཱཔུཎིཾསུ. ཏེན ཝུཏྟཾ – ‘‘ཨཐ ཁོ སམྦཧུལཱ བྷིཀྑཱུ པཙྪཱབྷཏྟཾ པིཎྜཔཱཏཔཊིཀྐནྟཱ ཡེན བྷགཝཱ ཏེནུཔསངྐམིཾསུ, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ, ཨེཀམནྟཾ ནིསིནྣཱ ཁོ ཏེ བྷིཀྑཱུ བྷགཝནྟཾ ཨེཏདཝོཙུཾ – ‘ཨིདྷ, བྷནྟེ, རཉྙོ ཨུཏེནསྶ ཨུཡྻཱནགཏསྶ ཨནྟེཔུརཾ དཌྜྷཾ, པཉྩ ཙ ཨིཏྠིསཏཱནི ཀཱལཀཏཱནི སཱམཱཝཏིཔྤམུཁཱནི. ཏཱསཾ, བྷནྟེ, ཨུཔཱསིཀཱནཾ ཀཱ གཏི, ཀོ ཨབྷིསམྤརཱཡོ’ཏི? སནྟེཏྠ, བྷིཀྑཝེ, ཨུཔཱསིཀཱཡོ སོཏཱཔནྣཱ, སནྟི སཀདཱགཱམིཡོ, སནྟི ཨནཱགཱམིཡོ, སབྦཱ ཏཱ, བྷིཀྑཝེ, ཨུཔཱསིཀཱཡོ ཨནིཔྥལཱ ཀཱལཀཏཱ’’ཏི. ཨཐ ཁོ བྷགཝཱ ཨེཏམཏྠཾ ཝིདིཏྭཱ ཏཱཡཾ ཝེལཱཡཾ ཨིམཾ ཨུདཱནཾ ཨུདཱནེསི –

‘‘མོཧསམྦནྡྷནོ ལོཀོ, བྷབྦརཱུཔོཝ དིསྶཏི;

ཨུཔདྷཱིབནྡྷནོ བཱལོ, ཏམསཱ པརིཝཱརིཏོ;

སསྶཏོརིཝ ཁཱཡཏི, པསྶཏོ ནཏྠི ཀིཉྩན’’ནྟི. (ཨུདཱ. ༧༠);

ཨེཝཉྩ པན ཝཏྭཱ, ‘‘བྷིཀྑཝེ, སཏྟཱ ནཱམ ཝཊྚེ ཝིཙརནྟཱ ནིཙྩཀཱལཾ ཨཔྤམཏྟཱ ཧུཏྭཱ པུཉྙཀམྨམེཝ ན ཀརོནྟི, པམཱདིནོ ཧུཏྭཱ པཱཔཀམྨམྤི ཀརོནྟི. ཏསྨཱ ཝཊྚེ ཝིཙརནྟཱ སུཁམྤི དུཀྑམྤི ཨནུབྷཝནྟཱི’’ཏི དྷམྨཾ དེསེསི.

རཱཛཱ ‘‘སཱམཱཝཏིཡཱ གེཧཾ ཀིར ཛྷཱཡཏཱི’’ཏི སུཏྭཱ ཝེགེནཱགཙྪནྟོཔི ཨདཌྜྷེ སམྤཱཔུཎིཏུཾ ནཱསཀྑི. ཨཱགནྟྭཱ པན གེཧཾ ནིབྦཱཔེནྟོ ཨུཔྤནྣབལཝདོམནསྶོ ཨམཙྩགཎཔརིཝུཏོ ནིསཱིདིཏྭཱ སཱམཱཝཏིཡཱ གུཎེ ཨནུསྶརནྟོ, ‘‘ཀསྶ ནུ ཁོ ཨིདཾ ཀམྨ’’ནྟི ཙིནྟེཏྭཱ – ‘‘མཱགཎྜིཡཱཡ ཀཱརིཏཾ བྷཝིསྶཏཱི’’ཏི ཉཏྭཱ, ‘‘ཏཱསེཏྭཱ པུཙྪིཡམཱནཱ ན ཀཐེསྶཏི, སཎིཀཾ ཨུཔཱཡེན པུཙྪིསྶཱམཱི’’ཏི ཙིནྟེཏྭཱ ཨམཙྩེ ཨཱཧ – ‘‘ཨམྦྷོ, ཨཧཾ ཨིཏོ པུབྦེ ཨུཊྛཱཡ སམུཊྛཱཡ ཨཱསངྐིཏཔརིསངྐིཏོཝ ཧོམི, སཱམཱཝཏཱི མེ ནིཙྩཾ ཨོཏཱརམེཝ གཝེསཏི, ཨིདཱནི པན མེ ཙིཏྟཾ ནིབྦུཏཾ བྷཝིསྶཏི, སུཁེན ཙ ཝསིཏུཾ ལབྷིསྶཱམཱི’’ཏི, ཏེ ‘‘ཀེན ནུ ཁོ, དེཝ, ཨིདཾ ཀཏ’’ནྟི ཨཱཧཾསུ. ‘‘མཡི སིནེཧེན ཀེནཙི ཀཏཾ བྷཝིསྶཏཱི’’ཏི. མཱགཎྜིཡཱཔི སམཱིཔེ ཋིཏཱ ཏཾ སུཏྭཱ, ‘‘ནཱཉྙོ ཀོཙི ཀཱཏུཾ སཀྑིསྶཏི, མཡཱ ཀཏཾ, དེཝ, ཨཧཾ ཙཱུལ༹པིཏརཾ ཨཱཎཱཔེཏྭཱ ཀཱརེསི’’ནྟི ཨཱཧ. ‘‘ཏཾ ཋཔེཏྭཱ ཨཉྙོ མཡི སིནེཧོ སཏྟོ ནཱམ ནཏྠི, པསནྣོསྨི, ཝརཾ ཏེ དམྨི, ཨཏྟནོ ཉཱཏིགཎཾ པཀྐོསཱཔེཧཱི’’ཏི. སཱ ཉཱཏཀཱནཾ སཱསནཾ པཧིཎི – ‘‘རཱཛཱ མེ པསནྣོ ཝརཾ དེཏི, སཱིགྷཾ ཨཱགཙྪནྟཱུ’’ཏི. རཱཛཱ ཨཱགཏཱགཏཱནཾ མཧནྟཾ སཀྐཱརཾ ཀཱརེསི. ཏཾ དིསྭཱ ཏསྶཱ ཨཉྙཱཏཀཱཔི ལཉྫཾ དཏྭཱ ‘‘མཡཾ མཱགཎྜིཡཱཡ ཉཱཏཀཱ’’ཏི ཨཱགཙྪིཾསུ. རཱཛཱ ཏེ སབྦེ གཱཧཱཔེཏྭཱ རཱཛངྒཎེ ནཱབྷིཔྤམཱཎེ ཨཱཝཱཊེ ཁཎཱཔེཏྭཱ ཏེ ཏཏྠ ནིསཱིདཱཔེཏྭཱ པཾསཱུཧི པཱུརེཏྭཱ ཨུཔརི པལཱལེ ཝིཀིརཱཔེཏྭཱ ཨགྒིཾ དཱཔེསི. ཙམྨསྶ དཌྜྷཀཱལེ ཨཡནངྒལེན ཀསཱཔེཏྭཱ ཁཎྜཱཁཎྜཾ ཧཱིརཱཧཱིརཾ ཀཱརེསི. མཱགཎྜིཡཱཡ སརཱིརཏོཔི ཏིཁིཎེན སཏྠེན གྷནགྷནཊྛཱནེསུ མཾསཾ ཨུཔྤཱཊེཏྭཱ ཏེལཀཔཱལཾ ཨུདྡྷནཾ ཨཱརོཔེཏྭཱ པཱུཝེ ཝིཡ པཙཱཔེཏྭཱ ཏམེཝ ཁཱདཱཔེསི.

དྷམྨསབྷཱཡམྤི བྷིཀྑཱུ ཀཐཾ སམུཊྛཱཔེསུཾ, ‘‘ཨནནུཙྪཝིཀཾ ཝཏ, ཨཱཝུསོ, ཨེཝརཱུཔཱཡ སདྡྷཱཡ པསནྣཱཡ ཨུཔཱསིཀཱཡ ཨེཝརཱུཔཾ མརཎ’’ནྟི. སཏྠཱ ཨཱགནྟྭཱ, ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ, ‘‘ཨིམཱཡ ནཱམཱ’’ཏི ཝུཏྟེ ‘‘བྷིཀྑཝེ, ཨིམསྨིཾ ཨཏྟབྷཱཝེ སཱམཱཝཏིཔྤམུཁཱནཾ ཨིཏྠཱིནཾ ཨེཏཾ ཨཡུཏྟཾ སམྤཏྟཾ. པུབྦེ ཀཏཀམྨསྶ པན ཡུཏྟམེཝ ཨེཏཱཧི ལདྡྷ’’ནྟི ཝཏྭཱ, ‘‘ཀིཾ, བྷནྟེ, ཨེཏཱཧི པུབྦེ ཀཏཾ, ཏཾ ཨཱཙིཀྑཐཱ’’ཏི ཏེཧི ཡཱཙིཏོ ཨཏཱིཏཾ ཨཱཧརི –

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ རཱཛགེཧེ ནིབདྡྷཾ ཨཊྛ པཙྩེཀབུདྡྷཱ བྷུཉྫནྟི. པཉྩསཏཱ ཨིཏྠིཡོ ཏེ ཨུཔཊྛཧནྟི. ཏེསུ སཏྟ པཙྩེཀབུདྡྷཱ ཧིམཝནྟཾ གཙྪནྟི, ཨེཀོ ནདཱིཏཱིརེ ཨེཀཾ ཏིཎགཧནཾ ཨཏྠི, ཏཏྠ ཛྷཱནཾ སམཱཔཛྫིཏྭཱ ནིསཱིདི. ཨཐེཀདིཝསཾ རཱཛཱ པཙྩེཀབུདྡྷེསུ གཏེསུ ཏཱ ཨིཏྠིཡོ ཨཱདཱཡ ནདིཡཾ ཨུདཀཀཱིལ༹ཾ ཀཱིལི༹ཏུཾ གཏོ. ཏཏྠ ཏཱ ཨིཏྠིཡོ དིཝསབྷཱགཾ ཨུདཀེ ཀཱིལི༹ཏྭཱ ཨུཏྟརིཏྭཱ སཱིཏཔཱིལི༹ཏཱ ཨགྒིཾ ཝིསིབྦེཏུཀཱམཱ ‘‘ཨམྷཱཀཾ ཨགྒིཀརཎཊྛཱནཾ ཨོལོཀེཐཱ’’ཏི ཨཔརཱཔརཾ ཝིཙརནྟིཡོ ཏཾ ཏིཎགཧནཾ དིསྭཱ, ‘‘ཏིཎརཱསཱི’’ཏི སཉྙཱཡ ཏཾ པརིཝཱརེཏྭཱ ཋིཏཱ ཨགྒིཾ ཨདཾསུ. ཏིཎེསུ ཛྷཱཡིཏྭཱ པཏནྟེསུ པཙྩེཀབུདྡྷཾ དིསྭཱ, ‘‘ནཊྛཱམྷཱ, ཨམྷཱཀཾ རཉྙོ པཙྩེཀབུདྡྷོ ཛྷཱཡཏི, རཱཛཱ ཉཏྭཱ ཨམྷེ ནཱསེསྶཏི, སུདཌྜྷཾ ནཾ ཀརིསྶཱམཱ’’ཏི སབྦཱ ཏཱ ཨིཏྠིཡོ ཨིཏོ ཙིཏོ ཙ དཱརཱུནི ཨཱཧརིཏྭཱ ཏསྶ ཨུཔརི དཱརུརཱསིཾ ཀརིཾསུ. མཧཱདཱརུརཱསི ཨཧོསི. ཨཐ ནཾ ཨཱལིམྤེཏྭཱ, ‘‘ཨིདཱནི ཛྷཱཡིསྶཏཱི’’ཏི པཀྐམིཾསུ. ཏཱ པཋམཾ ཨསཉྩེཏནིཀཱ ཧུཏྭཱ ཀམྨུནཱ ན བཛ྄ཛྷིཾསུ, ཨིདཱནི པཙྪཱ སཉྩེཏནཱཡ ཀམྨུནཱ བཛ྄ཛྷིཾསུ. པཙྩེཀབུདྡྷཾ པན ཨནྟོསམཱཔཏྟིཡཾ སཀཊསཧསྶེཧི དཱརཱུནི ཨཱཧརིཏྭཱ ཨཱལིམྤེནྟཱཔི ཨུསྨཱཀཱརམཏྟམྤི གཧེཏུཾ ན སཀྐོནྟི. ཏསྨཱ སོ སཏྟམེ དིཝསེ ཨུཊྛཱཡ ཡཐཱསུཁཾ ཨགམཱསི. ཏཱ ཏསྶ ཀམྨསྶ ཀཏཏྟཱ བཧཱུནི ཝསྶསཏསཧསྶཱནི ནིརཡེ པཙྩིཏྭཱ ཏསྶེཝ ཀམྨསྶ ཝིཔཱཀཱཝསེསེན ཨཏྟབྷཱཝསཏེ ཨིམིནཱཝ ནིཡཱམེན གེཧེ ཛྷཱཡམཱནེ ཛྷཱཡིཾསུ. ཨིདཾ ཨེཏཱསཾ པུབྦཀམྨནྟི.

ཨེཝཾ ཝུཏྟེ བྷིཀྑཱུ སཏྠཱརཾ པཊིཔུཙྪིཾསུ – ‘‘ཁུཛྫུཏྟརཱ པན, བྷནྟེ, ཀེན ཀམྨེན ཁུཛྫཱ ཛཱཏཱ, ཀེན ཀམྨེན མཧཱཔཉྙཱ, ཀེན ཀམྨེན སོཏཱཔཏྟིཕལཾ ཨདྷིགཏཱ, ཀེན ཀམྨེན པརེསཾ པེསནཀཱརིཏཱ ཛཱཏཱ’’ཏི? བྷིཀྑཝེ, ཏསྶེཝ རཉྙོ བཱརཱཎསིཡཾ རཛྫཾ ཀརཎཀཱལེ སྭེཝ པཙྩེཀབུདྡྷོ ཐོཀཾ ཁུཛྫདྷཱཏུཀོ ཨཧོསི. ཨཐེཀཱ ཨུཔཊྛཱཡིཀཱ ཨིཏྠཱི ཀམྦལཾ པཱརུཔིཏྭཱ སུཝཎྞསརཎཾ གཧེཏྭཱ, ‘‘ཨམྷཱཀཾ པཙྩེཀབུདྡྷོ ཨེཝཉྩ ཨེཝཉྩ ཝིཙརཏཱི’’ཏི ཁུཛྫཱ ཧུཏྭཱ ཏསྶ ཝིཙརཎཱཀཱརཾ དསྶེསི. ཏསྶ ནིསྶནྡེན ཁུཛྫཱ ཛཱཏཱ. ཏེ པན པཙྩེཀབུདྡྷེ པཋམདིཝསེ རཱཛགེཧེ ནིསཱིདཱཔེཏྭཱ པཏྟེ གཱཧཱཔེཏྭཱ པཱཡཱསསྶ པཱུརེཏྭཱ དཱཔེསི. ཨུཎྷཔཱཡཱསསྶ པཱུརེ པཏྟེ པཙྩེཀབུདྡྷཱ པརིཝཏྟེཏྭཱ པརིཝཏྟེཏྭཱ གཎྷནྟི. སཱ ཨིཏྠཱི ཏེ ཏཐཱ ཀརོནྟེ དིསྭཱ ཨཏྟནོ སནྟཀཱནི ཨཊྛ དནྟཝལཡཱནི དཏྭཱ, ‘‘ཨིདྷ ཋཔེཏྭཱ གཎྷཐཱ’’ཏི ཨཱཧ. ཏེསུ ཏཐཱ ཀཏྭཱ ཏཾ ཨོལོཀེཏྭཱ ཋིཏེསུ ཏེསཾ ཨདྷིཔྤཱཡཾ ཉཏྭཱ, ‘‘ནཏྠི, བྷནྟེ, ཨམྷཱཀཾ ཨེཏེཧི ཨཏྠོ. ཏུམྷཱཀཉྙེཝ ཨེཏཱནི པརིཙྩཏྟཱནི, གཧེཏྭཱ གཙྪཐཱ’’ཏི ཨཱཧ. ཏེ གཧེཏྭཱ ནནྡམཱུལཀཔབྦྷཱརཾ ཨགམཾསུ. ཨཛྫཏནཱཔི ཏཱནི ཝལཡཱནི ཨརོགཱནེཝ. སཱ ཏསྶ ཀམྨསྶ ནིསྶནྡེན ཨིདཱནི ཏིཔིཊཀདྷརཱ མཧཱཔཉྙཱ ཛཱཏཱ. པཙྩེཀབུདྡྷཱནཾ ཀཏཨུཔཊྛཱནསྶ ནིསྶནྡེན པན སོཏཱཔཏྟིཕལཾ པཏྟཱ. ཨིདམསྶཱ བུདྡྷནྟརེ པུབྦཀམྨཾ.

ཀསྶཔསམྨཱསམྦུདྡྷཀཱལེ པན ཨེཀཱ བཱརཱཎསིསེཊྛིནོ དྷཱིཏཱ ཝཌྜྷམཱནཀཙྪཱཡཱཡ ཨཱདཱསཾ གཧེཏྭཱ ཨཏྟཱནཾ ཨལངྐརོནྟཱི ནིསཱིདི. ཨཐསྶཱ ཝིསྶཱསིཀཱ ཨེཀཱ ཁཱིཎཱསཝཱ བྷིཀྑུནཱི ཏཾ དཊྛུཾ ཨགམཱསི. བྷིཀྑུནིཡོ ཧི ཁཱིཎཱསཝཱཔི སཱཡནྷསམཡེ ཨུཔཊྛཱཀཀུལཱནི དཊྛུཀཱམཱ ཧོནྟི. ཏསྨིཾ པན ཁཎེ སེཊྛིདྷཱིཏཱཡ སནྟིཀེ ཀཱཙི པེསནཀཱརིཀཱ ནཏྠི, སཱ ‘‘ཝནྡཱམི, ཨཡྻེ, ཨེཏཾ ཏཱཝ མེ པསཱདྷནཔེལ༹ཀཾ གཧེཏྭཱ དེཐཱ’’ཏི ཨཱཧ. ཐེརཱི ཙིནྟེསི – ‘‘སཙསྶཱ ཨིམཾ གཎྷིཏྭཱ ན དསྶཱམི, མཡི ཨཱགྷཱཏཾ ཀཏྭཱ ནིརཡེ ནིབྦཏྟིསྶཏི. སཙེ པན དསྶཱམི, པརསྶ པེསནཀཱརིཀཱ ཧུཏྭཱ ནིབྦཏྟིསྶཏི. ནིརཡསནྟཱཔཏོ ཁོ པན པརསྶ པེསནབྷཱཝོཝ སེཡྻོ’’ཏི. ‘‘སཱ ཨནུདཡཾ པཊིཙྩ ཏཾ གཧེཏྭཱ ཏསྶཱ ཨདཱསི. ཏསྶ ཀམྨསྶ ནིསྶནྡེན པརེསཾ པེསནཀཱརིཀཱ ཛཱཏཱ’’ཏི.

ཨཐ པུནེཀདིཝསཾ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘སཱམཱཝཏིཔྤམུཁཱ པཉྩསཏཱ ཨིཏྠིཡོ གེཧེ ཨགྒིནཱ ཛྷཱཡིཾསུ, མཱགཎྜིཡཱཡ ཉཱཏཀཱ ཨུཔརི པལཱལགྒིཾ དཏྭཱ ཨཡནངྒལེཧི བྷིནྣཱ, མཱགཎྜིཡཱ པཀྐུཐིཏཏེལེ པཀྐཱ, ཀེ ནུ ཁོ ཨེཏྠ ཛཱིཝནྟི ནཱམ, ཀེ མཏཱ ནཱམཱ’’ཏི. སཏྠཱ ཨཱགནྟྭཱ, ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ, ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཡེ ཀེཙི པམཏྟཱ, ཏེ ཝསྶསཏཾ ཛཱིཝནྟཱཔི མཏཱཡེཝ ནཱམ. ཡེ ཨཔྤམཏྟཱ, ཏེ མཏཱཔི ཛཱིཝནྟིཡེཝ. ཏསྨཱ མཱགཎྜིཡཱ ཛཱིཝནྟཱིཔི མཏཱཡེཝ ནཱམ, སཱམཱཝཏིཔྤམུཁཱ པཉྩསཏཱ ཨིཏྠིཡོ མཏཱཔི ཛཱིཝནྟིཡེཝ ནཱམ. ན ཧི, བྷིཀྑཝེ, ཨཔྤམཏྟཱ མརནྟི ནཱམཱ’’ཏི ཝཏྭཱ ཨིམཱ གཱཐཱ ཨབྷཱསི –

༢༡.

‘‘ཨཔྤམཱདོ ཨམཏཔདཾ, པམཱདོ མཙྩུནོ པདཾ;

ཨཔྤམཏྟཱ ན མཱིཡནྟི, ཡེ པམཏྟཱ ཡཐཱ མཏཱ.

༢༢.

‘‘ཨེཝཾ ཝིསེསཏོ ཉཏྭཱ, ཨཔྤམཱདམྷི པཎྜིཏཱ;

ཨཔྤམཱདེ པམོདནྟི, ཨརིཡཱནཾ གོཙརེ རཏཱ.

༢༣.

‘‘ཏེ ཛྷཱཡིནོ སཱཏཏིཀཱ, ནིཙྩཾ དལ༹ྷཔརཀྐམཱ;

ཕུསནྟི དྷཱིརཱ ནིབྦཱནཾ, ཡོགཀྑེམཾ ཨནུཏྟར’’ནྟི.

ཏཏྠ ཨཔྤམཱདོཏི པདཾ མཧནྟཾ ཨཏྠཾ དཱིཔེཏི, མཧནྟཾ ཨཏྠཾ གཧེཏྭཱ ཏིཊྛཏི. སཀལམྤི ཧི ཏེཔིཊཀཾ བུདྡྷཝཙནཾ ཨཱཧརིཏྭཱ ཀཐིཡམཱནཾ ཨཔྤམཱདཔདམེཝ ཨོཏརཏི. ཏེན ཝུཏྟཾ –

‘‘སེཡྻཐཱཔི, བྷིཀྑཝེ, ཡཱནི ཀཱནིཙི ཛངྒལཱནཾ པཱཎཱནཾ པདཛཱཏཱནི, སབྦཱནི ཏཱནི ཧཏྠིཔདེ སམོདྷཱནཾ གཙྪནྟི, ཧཏྠིཔདཾ ཏེསཾ ཨགྒམཀྑཱཡཏི ཡདིདཾ མཧནྟཏྟེན. ཨེཝམེཝ ཁོ, བྷིཀྑཝེ, ཡེ ཀེཙི ཀུསལཱ དྷམྨཱ, སབྦེཏེ ཨཔྤམཱདམཱུལཀཱ ཨཔྤམཱདསམོསརཎཱ, ཨཔྤམཱདོ ཏེསཾ དྷམྨཱནཾ ཨགྒམཀྑཱཡཏཱི’’ཏི (སཾ. ནི. ༥.༡༤༠).

སོ པནེས ཨཏྠཏོ སཏིཡཱ ཨཝིཔྤཝཱསོ ནཱམ. ནིཙྩཾ ཨུཔཊྛིཏཱཡ སཏིཡཱ ཙེཏཾ ནཱམཾ. ཨམཏཔདནྟི ཨམཏཾ ཝུཙྩཏི ནིབྦཱནཾ. ཏཉྷི ཨཛཱཏཏྟཱ ནུ ཛཱིཡཏི ན མཱིཡཏི, ཏསྨཱ ཨམཏནྟི ཝུཙྩཏི. པཛྫནྟི ཨིམིནཱཏི པདཾ, ཨམཏཾ པཱཔུཎནྟཱིཏི ཨཏྠོ. ཨམཏསྶ པདཾ ཨམཏཔདཾ, ཨམཏསྶ ཨདྷིགམཱུཔཱཡོཏི ཝུཏྟཾ ཧོཏི, པམཱདོཏི པམཛྫནབྷཱཝོ, མུཊྛསྶཏིསངྑཱཏསྶ སཏིཡཱ ཝོསགྒསྶེཏཾ ནཱམཾ. མཙྩུནོཏི མརཎསྶ. པདནྟི ཨུཔཱཡོ མགྒོ. པམཏྟོ ཧི ཛཱཏིཾ ནཱཏིཝཏྟཏི, ཛཱཏོ ཛཱིཡཏི ཙེཝ མཱིཡཏི ཙཱཏི པམཱདོ མཙྩུནོ པདཾ ནཱམ ཧོཏི, མརཎཾ ཨུཔེཏི. ཨཔྤམཏྟཱ ན མཱིཡནྟཱིཏི སཏིཡཱ སམནྣཱགཏཱ ཧི ཨཔྤམཏྟཱ ན མརནྟི. ཨཛརཱ ཨམརཱ ཧོནྟཱིཏི ན སལླཀྑེཏབྦཾ. ན ཧི ཀོཙི སཏྟོ ཨཛརོ ཨམརོ ནཱམ ཨཏྠི, པམཏྟསྶ པན ཝཊྚཾ ནཱམ ཨཔརིཙྪིནྣཾ, ཨཔྤམཏྟསྶ པརིཙྪིནྣཾ. ཏསྨཱ པམཏྟཱ ཛཱཏིཨཱདཱིཧི ཨཔརིམུཏྟཏྟཱ ཛཱིཝནྟཱཔི མཏཱཡེཝ ནཱམ. ཨཔྤམཏྟཱ པན ཨཔྤམཱདལཀྑཎཾ ཝཌྜྷེཏྭཱ ཁིཔྤཾ མགྒཕལཱནི སཙྪིཀཏྭཱ དུཏིཡཏཏིཡཨཏྟབྷཱཝེསུ ན ནིབྦཏྟནྟི. ཏསྨཱ ཏེ ཛཱིཝནྟཱཔི མཏཱཔི ན མཱིཡནྟིཡེཝ ནཱམ. ཡེ པམཏྟཱ ཡཐཱ མཏཱཏི ཡེ པན སཏྟཱ པམཏྟཱ, ཏེ པམཱདམརཎེན མཏཏྟཱ, ཡཐཱ ཧི ཛཱིཝིཏིནྡྲིཡུཔཙྪེདེན མཏཱ དཱརུཀྑནྡྷསདིསཱ ཨཔགཏཝིཉྙཱཎཱ, ཏཐེཝ ཧོནྟི. ཏེསམྤི ཧི མཏཱནཾ ཝིཡ གཧཊྛཱནཾ ཏཱཝ ‘‘དཱནཾ དསྶཱམ, སཱིལཾ རཀྑིསྶཱམ, ཨུཔོསཐཀམྨཾ ཀརིསྶཱམཱ’’ཏི ཨེཀཙིཏྟམྤི ན ཨུཔྤཛྫཏི, པབྦཛིཏཱནམྤི ‘‘ཨཱཙརིཡུཔཛ྄ཛྷཱཡཝཏྟཱདཱིནི པཱུརེསྶཱམ, དྷུཏངྒཱནི སམཱདིཡིསྶཱམ, བྷཱཝནཾ ཝཌྜྷེསྶཱམཱ’’ཏི ན ཨུཔྤཛྫཏཱིཏི མཏེན ཏེ ཀིཾ ནཱནཱཀརཎཱཝ ཧོནྟི. ཏེན ཝུཏྟཾ – ‘‘ཡེ པམཏྟཱ ཡཐཱ མཏཱ’’ཏི.

ཨེཝཾ ཝིསེསཏོ ཉཏྭཱཏི པམཏྟསྶ ཝཊྚཏོ ནིསྶརཎཾ ནཏྠི, ཨཔྤམཏྟསྶ ཨཏྠཱིཏི ཨེཝཾ ཝིསེསཏོཝ ཛཱནིཏྭཱ. ཀེ པནེཏཾ ཝིསེསཾ ཛཱནནྟཱིཏི? ཨཔྤམཱདམྷི པཎྜིཏཱཏི ཡེ པཎྜིཏཱ མེདྷཱཝིནོ སཔྤཉྙཱ ཨཏྟནོ ཨཔྤམཱདེ ཋཏྭཱ ཨཔྤམཱདཾ ཝཌྜྷེནྟི, ཏེ ཨེཝཾ ཝིསེསཀཱརཎཾ ཛཱནནྟི. ཨཔྤམཱདེ པམོདནྟཱིཏི ཏེ ཨེཝཾ ཉཏྭཱ ཏསྨིཾ ཨཏྟནོ ཨཔྤམཱདེ པམོདནྟི, པཧཾསིཏམུཁཱ ཏུཊྛཔཧཊྛཱ ཧོནྟི. ཨརིཡཱནཾ གོཙརེ རཏཱཏི ཏེ ཨེཝཾ ཨཔྤམཱདེ པམོདནྟཱ ཏཾ ཨཔྤམཱདཾ ཝཌྜྷེཏྭཱ ཨརིཡཱནཾ བུདྡྷཔཙྩེཀབུདྡྷབུདྡྷསཱཝཀཱནཾ གོཙརསངྑཱཏེ ཙཏུསཏིཔཊྛཱནཱདིབྷེདེ སཏྟཏིཾས བོདྷིཔཀྑིཡདྷམྨེ ནཝཝིདྷལོཀུཏྟརདྷམྨེ ཙ རཏཱ ནིརཏཱ, ཨབྷིརཏཱ ཧོནྟཱིཏི ཨཏྠོ.

ཏེ ཛྷཱཡིནོཏི ཏེ ཨཔྤམཏྟཱ པཎྜིཏཱ ཨཊྛསམཱཔཏྟིསངྑཱཏེན ཨཱརམྨཎཱུཔནིཛ྄ཛྷཱནེན ཝིཔསྶནཱམགྒཕལསངྑཱཏེན ལཀྑཎཱུཔནིཛ྄ཛྷཱནེན ཙཱཏི དུཝིདྷེནཔི ཛྷཱནེན ཛྷཱཡིནོ. སཱཏཏིཀཱཏི ཨབྷིནིཀྑམནཀཱལཏོ པཊྛཱཡ ཡཱཝ ཨརཧཏྟམགྒཱ སཏཏཾ པཝཏྟཀཱཡིཀཙེཏསིཀཝཱིརིཡཱ. ནིཙྩཾ དལ༹ྷཔརཀྐམཱཏི ཡཾ ཏཾ པུརིསཐཱམེན པུརིསཝཱིརིཡེན པུརིསཔརཀྐམེན པཏྟབྦཾ, ན ཏཾ ཨཔཱཔུཎིཏྭཱ ཝཱིརིཡསྶ སཎྛཱནཾ བྷཝིསྶཏཱིཏི ཨེཝརཱུཔེན ཝཱིརིཡེན ཨནྟརཱ ཨནོསཀྐིཏྭཱ ནིཙྩཔྤཝཏྟེན དལ༹ྷཔརཀྐམེན སམནྣཱགཏཱ. ཕུསནྟཱིཏི ཨེཏྠ དྭེ ཕུསནཱ ཉཱཎཕུསནཱ ཙ, ཝིཔཱཀཕུསནཱ ཙ. ཏཏྠ ཙཏྟཱརོ མགྒཱ ཉཱཎཕུསནཱ ནཱམ, ཙཏྟཱརི ཕལཱནི ཝིཔཱཀཕུསནཱ ནཱམ. ཏེསུ ཨིདྷ ཝིཔཱཀཕུསནཱ ཨདྷིཔྤེཏཱ. ཨརིཡཕལེན ནིབྦཱནཾ སཙྪིཀརོནྟོ དྷཱིརཱ པཎྜིཏཱ ཏཱཡ ཝིཔཱཀཕུསནཱཡ ཕུསནྟི, ནིབྦཱནཾ སཙྪིཀརོནྟི. ཡོགཀྑེམཾ ཨནུཏྟརནྟི ཡེ ཙཏྟཱརོ ཡོགཱ མཧཱཛནཾ ཝཊྚེ ཨོསཱིདཱཔེནྟི, ཏེཧི ཁེམཾ ནིབྦྷཡཾ སབྦེཧི ལོཀིཡལོཀུཏྟརདྷམྨེཧི སེཊྛཏྟཱ ཨནུཏྟརནྟི.

དེསནཱཔརིཡོསཱནེ བཧཱུ སོཏཱཔནྣཱདཡོ ཨཧེསུཾ. དེསནཱ མཧཱཛནསྶ སཱཏྠིཀཱ ཛཱཏཱཏི.

སཱམཱཝཏཱིཝཏྠུ པཋམཾ.

༢. ཀུམྦྷགྷོསཀསེཊྛིཝཏྠུ

ཨུཊྛཱནཝཏོཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཀུམྦྷགྷོསཀཾ ཨཱརབྦྷ ཀཐེསི. རཱཛགཧནགརསྨིཉྷི རཱཛགཧསེཊྛིནོ གེཧེ ཨཧིཝཱཏརོགོ ཨུཔྤཛྫི, ཏསྨིཾ ཨུཔྤནྣེ མཀྑིཀཱ ཨཱདིཾ ཀཏྭཱ ཡཱཝ གཱཝཱ པཋམཾ ཏིརཙྪཱནགཏཱ མརནྟི, ཏཏོ དཱསཀམྨཀརོ, སབྦཔཙྪཱ གེཧསཱམིཀཱ, ཏསྨཱ སོ རོགོ སབྦཔཙྪཱ སེཊྛིཉྩ ཛཱཡཉྩ གཎྷི. ཏེ རོགེན ཕུཊྛཱ པུཏྟཾ སནྟིཀེ ཋིཏཾ ཨོལོཀེཏྭཱ ཨསྶུཔུཎྞེཧི ནེཏྟེཧི ཏཾ ཨཱཧཾསུ – ‘‘ཏཱཏ, ཨིམསྨིཾ ཀིར རོགེ ཨུཔྤནྣེ བྷིཏྟིཾ བྷིནྡིཏྭཱ པལཱཡནྟཱཝ ཛཱིཝིཏཾ ལབྷནྟི, ཏྭཾ ཨམྷེ ཨནོལོཀེཏྭཱ པལཱཡིཏྭཱ ཛཱིཝནྟོ པུནཱགནྟྭཱ ཨམྷཱཀཾ ཨསུཀཊྛཱནེ ནཱམ ཙཏྟཱལཱིས དྷནཀོཊིཡོ ནིདཧིཏྭཱ ཋཔིཏཱ, ཏཱ ཨུདྡྷརིཏྭཱ ཛཱིཝིཀཾ ཀཔྤེཡྻཱསཱི’’ཏི. སོ ཏེསཾ ཝཙནཾ སུཏྭཱ རུདམཱནོ མཱཏཱཔིཏརོ ཝནྡིཏྭཱ མརཎབྷཡབྷཱིཏོ བྷིཏྟིཾ བྷིནྡིཏྭཱ པལཱཡིཏྭཱ པབྦཏགཧནཾ གནྟྭཱ དྭཱདས ཝསྶཱནི ཏཏྠ ཝསིཏྭཱ མཱཏཱཔིཏུཝསནཊྛཱནཾ པཙྩཱགཉྪི.

ཨཐ ནཾ དཧརཀཱལེ གནྟྭཱ པརཱུལ༹ྷཀེསམསྶུཀཱལེ ཨཱགཏཏྟཱ ན ཀོཙི སཉྫཱནི. སོ མཱཏཱཔིཏཱུཧི དིནྣསཉྙཱཝསེན དྷནཊྛཱནཾ གནྟྭཱ དྷནསྶ ཨརོགབྷཱཝཾ ཉཏྭཱ ཙིནྟེསི – ‘‘མཾ ན ཀོཙི སཉྫཱནཱཏི, སཙཱཧཾ དྷནཾ ཨུདྡྷརིཏྭཱ ཝལཉྫིསྶཱམི, ‘ཨེཀེན དུགྒཏེན ནིདྷི ཨུདྡྷཊོ’ཏི མཾ གཧེཏྭཱ ཝིཧེཋེཡྻུཾ, ཡཾནཱུནཱཧཾ བྷཏིཾ ཀཏྭཱ ཛཱིཝེཡྻ’’ནྟི. ཨཐེཀཾ པིལོཏིཀཾ ནིཝཱསེཏྭཱ, ‘‘ཨཏྠི ཀོཙི བྷཏཀེན ཨཏྠིཀོ’’ཏི པུཙྪནྟོ བྷཏཀཝཱིཐིཾ པཱཔུཎི. ཨཐ ནཾ བྷཏཀཱ དིསྭཱ, ‘‘སཙེ ཨམྷཱཀཾ ཨེཀཾ ཀམྨཾ ཀརིསྶསི, བྷཏྟཝེཏནཾ ཏེ དསྶཱམཱ’’ཏི ཨཱཧཾསུ. ‘‘ཀིཾ ཀམྨཾ ནཱམཱ’’ཏི? ‘‘པབོདྷནཙོདནཀམྨཾ. སཙེ ཨུསྶཧསི, པཱཏོཝ ཨུཊྛཱཡ ‘ཏཱཏཱ, ཨུཊྛཧཐ, སཀཊཱནི སནྣཡ྄ཧཐ, གོཎེ ཡོཛེཐ, ཧཏྠིཨསྶཱནཾ ཏིཎཏྠཱཡ གམནཝེལཱ; ཨམྨཱ, ཏུམྷེཔི ཨུཊྛཧཐ, ཡཱགུཾ པཙཐ, བྷཏྟཾ པཙཐཱ’ཏི ཝིཙརིཏྭཱ ཨཱརོཙེཧཱི’’ཏི. སོ ‘‘སཱདྷཱུ’’ཏི སམྤཊིཙྪི. ཨཐསྶ ཝསནཏྠཱཡ ཨེཀཾ གྷརཾ ཨདཾསུ. སོ དེཝསིཀཾ ཏཾ ཀམྨཾ ཨཀཱསི.

ཨཐསྶ ཨེཀདིཝསཾ རཱཛཱ བིམྦིསཱརོ སདྡམསྶོསི. སོ པན སབྦརཝཉྙཱུ ཨཧོསི. ཏསྨཱ ‘‘མཧཱདྷནསྶ པུརིསསྶེས སདྡོ’’ཏི ཨཱཧ. ཨཐསྶ སནྟིཀེ ཋིཏཱ ཨེཀཱ པརིཙཱརིཀཱ ‘‘རཱཛཱ ཡཾ ཝཱ ཏཾ ཝཱ ན ཀཐེསྶཏི, ཨིདཾ མཡཱ ཉཱཏུཾ ཝཊྚཏཱི’’ཏི ཙིནྟེཏྭཱ – ‘‘གཙྪ, ཏཱཏ, ཨེཏཾ ཛཱནཱཧཱི’’ཏི ཨེཀཾ པུརིསཾ པཧིཎི. སོ ཝེགེན གནྟྭཱ ཏཾ དིསྭཱ ཨཱགནྟྭཱ, ‘‘ཨེཀོ བྷཏཀཱནཾ བྷཏིཀཱརཀོ ཀཔཎམནུསྶོ ཨེསོ’’ཏི ཨཱརོཙེསི. རཱཛཱ ཏསྶ ཝཙནཾ སུཏྭཱ ཏུཎྷཱི ཧུཏྭཱ དུཏིཡདིཝསེཔི ཏཏིཡདིཝསེཔི ཏཾ ཏསྶ སདྡཾ སུཏྭཱ ཏཐེཝ ཨཱཧ. སཱཔི པརིཙཱརིཀཱ ཏཐེཝ ཙིནྟེཏྭཱ པུནཔྤུནཾ པེསེཏྭཱ, ‘‘ཀཔཎམནུསྶོ ཨེསོ’’ཏི ཝུཏྟེ ཙིནྟེསི – ‘‘རཱཛཱ ‘ཀཔཎམནུསྶོ ཨེསོ’ཏི ཝཙནཾ སུཏྭཱཔི ན སདྡཧཏི, པུནཔྤུནཾ ‘མཧཱདྷནསྶ པུརིསསྶེས སདྡོ’ཏི ཝདཏི, བྷཝིཏབྦམེཏྠ ཀཱརཎེན, ཡཐཱསབྷཱཝཏོ ཨེཏཾ ཉཱཏུཾ ཝཊྚཏཱི’’ཏི. སཱ རཱཛཱནཾ ཨཱཧ, ‘‘དེཝ, ཨཧཾ སཧསྶཾ ལབྷམཱནཱ དྷཱིཏརཾ ཨཱདཱཡ གནྟྭཱ ཨེཏཾ དྷནཾ རཱཛཀུལཾ པཝེསེསྶཱམཱི’’ཏི. རཱཛཱ ཏསྶཱ སཧསྶཾ དཱཔེསི.

སཱ ཏཾ གཧེཏྭཱ དྷཱིཏརཾ ཨེཀཾ མལིནདྷཱཏུཀཾ ཝཏྠཾ ནིཝཱསཱཔེཏྭཱ ཏཱཡ སདྡྷིཾ རཱཛགེཧཏོ ནིཀྑམིཏྭཱ མགྒཔཊིཔནྣཱ ཝིཡ བྷཏཀཝཱིཐིཾ གནྟྭཱ ཨེཀཾ གྷརཾ པཝིསིཏྭཱ, ‘‘ཨམྨ, མཡཾ མགྒཔཊིཔནྣཱ, ཨེཀཱཧདྭཱིཧཾ ཨིདྷ ཝིསྶམིཏྭཱ གམིསྶཱམཱ’’ཏི ཨཱཧ. ‘‘ཨམྨ, བཧཱུནི གྷརམཱནུསཀཱནི, ན སཀྐཱ ཨིདྷ ཝསིཏུཾ, ཨེཏཾ ཀུམྦྷགྷོསཀསྶ གེཧཾ ཏུཙྪཾ, ཏཏྠ གཙྪཐཱ’’ཏི. སཱ ཏཏྠ གནྟྭཱ, ‘‘སཱམི, མཡཾ མགྒཔཊིཔནྣཀཱ, ཨེཀཱཧདྭཱིཧཾ ཨིདྷ ཝསིསྶཱམཱ’’ཏི ཝཏྭཱ ཏེན པུནཔྤུནཾ པཊིཀྑིཏྟཱཔི, ‘‘སཱམི, ཨཛྫེཀདིཝསམཏྟཾ ཝསིཏྭཱ པཱཏོཝ གམིསྶཱམཱ’’ཏི ནིཀྑམིཏུཾ ན ཨིཙྪི. སཱ ཏཏྠེཝ ཝསིཏྭཱ པུནདིཝསེ ཏསྶ ཨརཉྙགམནཝེལཱཡ, ‘‘སཱམི, ཏཝ ནིཝཱཔཾ དཏྭཱ ཡཱཧི, ཨཱཧཱརཾ ཏེ པཙིསྶཱམཱི’’ཏི ཝཏྭཱ, ‘‘ཨལཾ, ཨམྨ, ཨཧམེཝ པཙིཏྭཱ བྷུཉྫིསྶཱམཱི’’ཏི ཝུཏྟེ པུནཔྤུནཾ ནིབནྡྷིཏྭཱ ཏེན དིནྣེ གཧིཏམཏྟཀེཡེཝ ཀཏྭཱ ཨནྟརཱཔཎཏོ བྷཱཛནཱནི ཙེཝ པརིསུདྡྷཏཎྜུལཱདཱིནི ཙ ཨཱཧརཱཔེཏྭཱ རཱཛཀུལེ པཙནནིཡཱམེན སུཔརིསུདྡྷཾ ཨོདནཾ, སཱདྷུརསཱནི ཙ དྭེ ཏཱིཎི སཱུཔབྱཉྫནཱནི པཙིཏྭཱ ཏསྶ ཨརཉྙཏོ ཨཱགཏསྶ ཨདཱསི. ཨཐ ནཾ བྷུཉྫིཏྭཱ མུདུཙིཏྟཏཾ ཨཱཔནྣཾ ཉཏྭཱ, ‘‘སཱམི, ཀིལནྟམྷ, ཨེཀཱཧདྭཱིཧཾ ཨིདྷེཝ ཧོམཱ’’ཏི ཨཱཧ. སོ ‘‘སཱདྷཱུ’’ཏི སམྤཊིཙྪི.

ཨཐསྶ སཱཡམྤི པུནདིཝསེཔི མདྷུརབྷཏྟཾ པཙིཏྭཱ ཨདཱསི. ཨཐ མུདུཙིཏྟཏཾ ཏསྶ ཉཏྭཱ ‘‘སཱམི, ཀཏིཔཱཧཾ ཨིདྷེཝ ཝསིསྶཱམཱ’’ཏི. ཏཏྠ ཝསམཱནཱ ཏིཁིཎེན སཏྠེན ཏསྶ མཉྩཝཱཎཾ ཧེཊྛཱཨཊནིཡཾ ཏཧཾ ཏཧཾ ཚིནྡི. མཉྩོ ཏསྨིཾ ཨཱགནྟྭཱ ནིསིནྣམཏྟེཡེཝ ཧེཊྛཱ ཨོལམྦི. སོ ‘‘ཀསྨཱ ཨཡཾ མཉྩོ ཨེཝཾ ཚིཛྫིཏྭཱ གཏོ’’ཏི ཨཱཧ. ‘‘སཱམི, དཧརདཱརཀེ ཝཱརེཏུཾ ན སཀྐོམི, ཨེཏྠེཝ སནྣིཔཏནྟཱི’’ཏི. ‘‘ཨམྨ, ཨིདཾ མེ དུཀྑཾ ཏུམྷེ ནིསྶཱཡ ཛཱཏཾ. ཨཧཉྷི པུབྦེ ཀཏྠཙི གཙྪནྟོ དྭཱརཾ པིདཧིཏྭཱ གཙྪཱམཱི’’ཏི. ‘‘ཀིཾ ཀརོམི, ཏཱཏ, ཝཱརེཏུཾ ན སཀྐོམཱི’’ཏི. སཱ ཨིམིནཱཝ ནིཡཱམེན དྭེ ཏཡོ དིཝསེ ཚིནྡིཏྭཱ ཏེན ཨུཛ྄ཛྷཱཡིཏྭཱ ཁཱིཡིཏྭཱ ཝུཙྩམཱནཱཔི ཏཐེཝ ཝཏྭཱ པུན ཨེཀཾ དྭེ རཛྫུཀེ ཋཔེཏྭཱ སེསེ ཚིནྡི. ཏཾ དིཝསཾ ཏསྨིཾ ནིསིནྣམཏྟེཡེཝ སབྦཾ ཝཱཎཾ བྷཱུམིཡཾ པཏི, སཱིསཾ ཛཎྞུཀེཧི སདྡྷིཾ ཨེཀཏོ ཨཧོསི, སོ ཨུཊྛཱཡ, ‘‘ཀིཾ ཀརོམི, ཨིདཱནི ཀུཧིཾ གམིསྶཱམི, ནིཔཛྫནམཉྩསྶཔི ཏུམྷེཧི ཨསཱམིཀོ ཝིཡ ཀཏོམྷཱི’’ཏི ཨཱཧ. ‘‘ཏཱཏ, ཀིཾ ཀརོམི, པཊིཝིསྶཀདཱརཀེ ཝཱརེཏུཾ ན སཀྐོམི, ཧོཏུ, མཱ ཙིནྟཡི, ཨིམཱཡ ནཱམ ཝེལཱཡ ཀུཧིཾ གམིསྶསཱི’’ཏི དྷཱིཏརཾ ཨཱམནྟེཏྭཱ, ‘‘ཨམྨ, ཏཝ བྷཱཏིཀསྶ ནིཔཛྫནོཀཱསཾ ཀརོཧཱི’’ཏི ཨཱཧ. སཱ ཨེཀཔསྶེ སཡིཏྭཱ ‘‘ཨིདྷཱགཙྪ, སཱམཱི’’ཏི ཨཱཧ. ཨིཏརོཔི ནཾ ‘‘གཙྪ, ཏཱཏ, བྷགིནིཡཱ སདྡྷིཾ ནིཔཛྫཱ’’ཏི ཝདེསི. སོ ཏཱཡ སདྡྷིཾ ཨེཀམཉྩེ ནིཔཛྫིཏྭཱ ཏཾ དིཝསཉྙེཝ སནྠཝཾ ཨཀཱསི, ཀུམཱརིཀཱ པརོདི. ཨཐ ནཾ མཱཏཱ པུཙྪི – ‘‘ཀིཾ, ཨམྨ, རོདསཱི’’ཏི? ‘‘ཨམྨ, ཨིདཾ ནཱམ ཛཱཏ’’ནྟི. ‘‘ཧོཏུ, ཨམྨ, ཀིཾ སཀྐཱ ཀཱཏུཾ, ཏཡཱཔི ཨེཀཾ བྷཏྟཱརཾ ཨིམིནཱཔེཀཾ པཱདཔརིཙཱརིཀཾ ལདྡྷུཾ ཝཊྚཏཱི’’ཏི ཏཾ ཛཱམཱཏརཾ ཨཀཱསི. ཏེ སམགྒཝཱསཾ ཝསིཾསུ.

སཱ ཀཏིཔཱཧཙྩཡེན རཉྙོ སཱསནཾ པེསེསི – ‘‘བྷཏཀཝཱིཐིཡཾ ཚཎཾ ཀརོནྟུ. ཡསྶ པན གྷརེ ཚཎོ ན ཀརཱིཡཏི, ཏསྶ ཨེཏྟཀོ ནཱམ དཎྜོཏི གྷོསནཾ ཀཱརེཏཱུ’’ཏི. རཱཛཱ ཏཐཱ ཀཱརེསི. ཨཐ ནཾ སསྶུ ཨཱཧ – ‘‘ཏཱཏ, བྷཏཀཝཱིཐིཡཾ རཱཛཱཎཱཡ ཚཎོ ཀཏྟབྦོ ཛཱཏོ, ཀིཾ ཀརོམཱ’’ཏི? ‘‘ཨམྨ, ཨཧཾ བྷཏིཾ ཀརོནྟོཔི ཛཱིཝིཏུཾ ན སཀྐོམི, ཀིཾ ཀརིསྶཱམཱི’’ཏི? ‘‘ཏཱཏ, གྷརཱཝཱསཾ ཝསནྟཱ ནཱམ ཨིཎམྤི གཎྷནྟི, རཉྙོ ཨཱཎཱ ཨཀཱཏུཾ ན ལབྦྷཱ. ཨིཎཏོ ནཱམ ཡེན ཀེནཙི ཨུཔཱཡེན མུཙྩིཏུཾ སཀྐཱ, གཙྪ, ཀུཏོཙི ཨེཀཾ ཝཱ དྭེ ཝཱ ཀཧཱཔཎེ ཨཱཧརཱ’’ཏི ཨཱཧ. སོ ཨུཛ྄ཛྷཱཡནྟོ ཁཱིཡནྟོ གནྟྭཱ ཙཏྟཱལཱིསཀོཊིདྷནཊྛཱནཏོ ཨེཀམེཝ ཀཧཱཔཎཾ ཨཱཧརི. སཱ ཏཾ ཀཧཱཔཎཾ རཉྙོ པེསེཏྭཱ ཨཏྟནོ ཀཧཱཔཎེན ཚཎཾ ཀཏྭཱ པུན ཀཏིཔཱཧཙྩཡེན ཏཐེཝ སཱསནཾ པཧིཎི. པུན རཱཛཱ ཏཐེཝ ‘‘ཚཎཾ ཀརོནྟུ, ཨཀརོནྟཱནཾ ཨེཏྟཀོ དཎྜོ’’ཏི ཨཱཎཱཔེསི. པུནཔི སོ ཏཱཡ ཏཐེཝ ཝཏྭཱ ནིཔྤཱིལི༹ཡམཱནོ གནྟྭཱ ཏཡོ ཀཧཱཔཎེ ཨཱཧརི. སཱ ཏེཔི ཀཧཱཔཎེ རཉྙོ པེསེཏྭཱ པུན ཀཏིཔཱཧཙྩཡེན ཏཐེཝ སཱསནཾ པཧིཎི – ‘‘ཨིདཱནི པུརིསེ པེསེཏྭཱ ཨིམཾ པཀྐོསཱཔེཏཱུ’’ཏི. རཱཛཱ པེསེསི. པུརིསཱ གནྟྭཱ, ‘‘ཀུམྦྷགྷོསཀོ ནཱམ ཀཏརོ’’ཏི པུཙྪིཏྭཱ པརིཡེསནྟཱ ཏཾ དིསྭཱ ‘‘ཨེཧི, བྷོ རཱཛཱ, ཏཾ པཀྐོསཏཱི’’ཏི ཨཱཧཾསུ. སོ བྷཱིཏོ ‘‘ན མཾ རཱཛཱ ཛཱནཱཏཱི’’ཏིཨཱདཱིནི ཝཏྭཱ གནྟུཾ ན ཨིཙྪི. ཨཐ ནཾ བལཀྐཱརེན ཧཏྠཱདཱིསུ གཧེཏྭཱ ཨཱཀཌྜྷིཾསུ. སཱ ཨིཏྠཱི ཏེ དིསྭཱ, ‘‘ཨརེ, དུབྦིནཱིཏཱ, ཏུམྷེ མམ ཛཱམཱཏརཾ ཧཏྠཱདཱིསུ གཧེཏུཾ ཨནནུཙྪཝིཀཱ’’ཏི ཏཛྫེཏྭཱ, ‘‘ཨེཧི, ཏཱཏ, མཱ བྷཱཡི, རཱཛཱནཾ དིསྭཱ ཏཝ ཧཏྠཱདིགཱཧཀཱནཾ ཧཏྠེཡེཝ ཚིནྡཱཔེསྶཱམཱི’’ཏི དྷཱིཏརཾ ཨཱདཱཡ པུརཏོ ཧུཏྭཱ རཱཛགེཧཾ པཏྭཱ ཝེསཾ པརིཝཏྟེཏྭཱ སབྦཱལངྐཱརཔཊིམཎྜིཏཱ ཨེཀམནྟཾ ཨཊྛཱསི. ཨིཏརམྤི པརིཀཌྜྷིཏྭཱ ཨཱནཡིཾསུཡེཝ.

ཨཐ ནཾ ཝནྡིཏྭཱ ཋིཏཾ རཱཛཱ ཨཱཧ – ‘‘ཏྭཾ ཀུམྦྷགྷོསཀོ ནཱམཱ’’ཏི? ‘‘ཨཱམ, དེཝཱ’’ཏི. ‘‘ཀིཾ ཀཱརཎཱ མཧཱདྷནཾ ཝཉྩེཏྭཱ ཁཱདསཱི’’ཏི? ‘‘ཀུཏོ མེ, དེཝ, དྷནཾ བྷཏིཾ ཀཏྭཱ ཛཱིཝནྟསྶཱ’’ཏི? ‘‘མཱ ཨེཝཾ ཀརི, ཀིཾ ཨམྷེ ཝཉྩེསཱི’’ཏི? ‘‘ན ཝཉྩེམི, དེཝ, ནཏྠི མེ དྷན’’ནྟི. ཨཐསྶ རཱཛཱ ཏེ ཀཧཱཔཎེ དསྶེཏྭཱ, ‘‘ཨིམེ ཀསྶ ཀཧཱཔཎཱ’’ཏི ཨཱཧ. སོ སཉྫཱནིཏྭཱ, ‘‘ཨཧོ བཱལོམྷི, ཀཐཾ ནུ ཁོ ཨིམེ རཉྙོ ཧཏྠཾ པཏྟཱ’’ཏི ཨིཏོ ཙིཏོ ཙ ཨོལོཀེནྟོ ཏཱ དྭེཔི པཊིམཎྜིཏཔསཱདྷནཱ གབྦྷདྭཱརམཱུལེ ཋིཏཱ དིསྭཱ, ‘‘བྷཱརིཡཾ ཝཏིདཾ ཀམྨཾ, ཨིམཱཧི རཉྙཱ པཡོཛིཏཱཧི བྷཝིཏབྦ’’ནྟི ཙིནྟེསི. ཨཐ ནཾ རཱཛཱ ‘‘ཝདེཧི, བྷོ, ཀསྨཱ ཨེཝཾ ཀརོསཱི’’ཏི ཨཱཧ. ‘‘ནིསྶཡོ མེ ནཏྠི, དེཝཱ’’ཏི. ‘‘མཱདིསོ ནིསྶཡོ བྷཝིཏུཾ ན ཝཊྚཏཱི’’ཏི. ‘‘ཀལྱཱཎཾ, དེཝ, སཙེ མེ དེཝོ ཨཝསྶཡོ ཧོཏཱི’’ཏི. ‘‘ཧོམི, བྷོ, ཀིཏྟཀཾ ཏེ དྷན’’ནྟི? ‘‘ཙཏྟཱལཱིསཀོཊིཡོ, དེཝཱ’’ཏི. ‘‘ཀིཾ ལདྡྷུཾ ཝཊྚཏཱི’’ཏི? ‘‘སཀཊཱནི དེཝཱ’’ཏི? རཱཛཱ ཨནེཀསཏཱནི སཀཊཱནི ཡོཛཱཔེཏྭཱ པཧིཎིཏྭཱ ཏཾ དྷནཾ ཨཱཧརཱཔེཏྭཱ རཱཛངྒཎེ རཱསིཾ ཀཱརཱཔེཏྭཱ རཱཛགཧཝཱསིནོ སནྣིཔཱཏཱཔེཏྭཱ, ‘‘ཨཏྠི ཀསྶཙི ཨིམསྨིཾ ནགརེ ‘‘ཨེཏྟཀཾ དྷན’’ནྟི པུཙྪིཏྭཱ ‘‘ནཏྠི, དེཝཱ’’ཏི. ‘‘ཀིཾ པནསྶ ཀཱཏུཾ ཝཊྚཏཱི’’ཏི? ‘‘སཀྐཱརཾ, དེཝཱ’’ཏི ཝུཏྟེ མཧནྟེན སཀྐཱརེན ཏཾ སེཊྛིཊྛཱནེ ཋཔེཏྭཱ དྷཱིཏརཾ ཏསྶེཝ དཏྭཱ ཏེན སདྡྷིཾ སཏྠུ སནྟིཀཾ གནྟྭཱ ཝནྡིཏྭཱ ‘‘བྷནྟེ, པསྶཐིམཾ པུརིསཾ, ཨེཝརཱུཔོ དྷིཏིམཱ ནཱམ ནཏྠི, ཙཏྟཱལཱིསཀོཊིཝིབྷཝོ ཧོནྟོཔི ཨུཔྤིལཱཝིཏཱཀཱརཾ ཝཱ ཨསྨིམཱནམཏྟཾ ཝཱ ན ཀརོཏི, ཀཔཎོ ཝིཡ པིལོཏིཀཾ ནིཝཱསེཏྭཱ བྷཏཀཝཱིཐིཡཾ བྷཏིཾ ཀཏྭཱ ཛཱིཝནྟོ མཡཱ ཨིམིནཱ ནཱམ ཨུཔཱཡེན ཉཱཏོ. ཛཱནིཏྭཱ ཙ པན པཀྐོསཱཔེཏྭཱ སདྷནབྷཱཝཾ སམྤཊིཙྪཱཔེཏྭཱ ཏཾ དྷནཾ ཨཱཧརཱཔེཏྭཱ སེཊྛིཊྛཱནེ ཋཔིཏོ, དྷཱིཏཱ ཙསྶ མཡཱ དིནྣཱ. བྷནྟེ, མཡཱ ཙ ཨེཝརཱུཔོ དྷིཏིམཱ ན དིཊྛཔུབྦོ’’ཏི ཨཱཧ.

ཏཾ སུཏྭཱ སཏྠཱ ‘‘ཨེཝཾ ཛཱིཝནྟསྶ ཛཱིཝིཀཾ དྷམྨིཀཛཱིཝིཀཾ ནཱམ, མཧཱརཱཛ, ཙོརིཀཱདིཀམྨཾ པན ཨིདྷལོཀེ ཙེཝ པཱིལེ༹ཏི ཧིཾསེཏི, པརལོཀེ ཙ, ཏཏོནིདཱནཾ སུཁཾ ནཱམ ནཏྠི. པུརིསསྶ ཧི དྷནཔཱརིཛུཉྙཀཱལེ ཀསིཾ ཝཱ བྷཏིཾ ཝཱ ཀཏྭཱ ཛཱིཝིཀམེཝ དྷམྨིཀཛཱིཝིཀཾ ནཱམ. ཨེཝརཱུཔསྶ ཧི ཝཱིརིཡསམྤནྣསྶ སཏིསམྤནྣསྶ ཀཱཡཝཱཙཱཧི པརིསུདྡྷཀམྨསྶ པཉྙཱཡ ནིསམྨཀཱརིནོ ཀཱཡཱདཱིཧི སཉྙཏསྶ དྷམྨཛཱིཝིཀཾ ཛཱིཝནྟསྶ སཏིཨཝིཔྤཝཱསེ ཋིཏསྶ ཨིསྶརིཡཾ ཝཌྜྷཏིཡེཝཱ’’ཏི ཝཏྭཱ ཨིམཾ གཱཐམཱཧ –

༢༤.

‘‘ཨུཊྛཱནཝཏོ སཏཱིམཏོ,

སུཙིཀམྨསྶ ནིསམྨཀཱརིནོ;

སཉྙཏསྶ དྷམྨཛཱིཝིནོ,

ཨཔྤམཏྟསྶ ཡསོབྷིཝཌྜྷཏཱི’’ཏི.

ཏཏྠ ཨུཊྛཱནཝཏོཏི ཨུཊྛཱནཝཱིརིཡཝནྟསྶ. སཏིམཏོཏི སཏིསམྤནྣསྶ. སུཙིཀམྨསྶཱཏི ནིདྡོསེཧི ནིརཔརཱདྷེཧི ཀཱཡཀམྨཱདཱིཧི སམནྣཱགཏསྶ. ནིསམྨཀཱརིནོཏི ཨེཝཉྩེ བྷཝིསྶཏི, ཨེཝཾ ཀརིསྶཱམཱིཏི ཝཱ, ཨིམསྨིཾ ཀམྨེ ཨེཝཾ ཀཏེ ཨིདཾ ནཱམ བྷཝིསྶཏཱིཏི ཝཱ ཨེཝཾ ནིདཱནཾ སལླཀྑེཏྭཱ རོགཏིཀིཙྪནཾ ཝིཡ སབྦཀམྨཱནི ནིསཱམེཏྭཱ ཨུཔདྷཱརེཏྭཱ ཀརོནྟསྶ. སཉྙཏསྶཱཏི ཀཱཡཱདཱིཧི སཉྙཏསྶ ནིཙྪིདྡསྶ. དྷམྨཛཱིཝིནོཏི ཨགཱརིཀསྶ ཏུལཱཀཱུཊཱདཱིནི ཝཛྫེཏྭཱ ཀསིགོརཀྑཱདཱིཧི, ཨནགཱརིཀསྶ ཝེཛྫཀམྨདཱུཏཀམྨཱདཱིནི ཝཛྫེཏྭཱ དྷམྨེན སམེན བྷིཀྑཱཙརིཡཱཡ ཛཱིཝིཀཾ ཀཔྤེནྟསྶ. ཨཔྤམཏྟསྶཱཏི ཨཝིཔྤཝུཏྠསཏིནོ. ཡསོབྷིཝཌྜྷཏཱིཏི ཨིསྶརིཡབྷོགསམྤནྣསངྑཱཏོ ཙེཝ ཀིཏྟིཝཎྞབྷཎནསངྑཱཏོ ཙ ཡསོ ཨབྷིཝཌྜྷཏཱིཏི.

གཱཐཱཔརིཡོསཱནེ ཀུམྦྷགྷོསཀོ སོཏཱཔཏྟིཕལེ པཏིཊྛཧི. ཨཉྙེཔི བཧཱུ སོཏཱཔཏྟིཕལཱདཱིནི པཱཔུཎིཾསུ. ཨེཝཾ མཧཱཛནསྶ སཱཏྠིཀཱ དྷམྨདེསནཱ ཛཱཏཱཏི.

ཀུམྦྷགྷོསཀསེཊྛིཝཏྠུ དུཏིཡཾ.

༣. ཙཱུལ༹པནྠཀཏྠེརཝཏྠུ

ཨུཊྛཱནེནཔྤམཱདེནཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཙཱུལ༹པནྠཀཏྠེརཾ ཨཱརབྦྷ ཀཐེསི.

རཱཛགཧེ ཀིར དྷནསེཊྛིཀུལསྶ དྷཱིཏཱ ཝཡཔྤཏྟཀཱལེ མཱཏཱཔིཏཱུཧི སཏྟབྷཱུམིཀསྶ པཱསཱདསྶ ཨུཔརིམཏལེ ཨཏིཝིཡ རཀྑིཡམཱནཱ ཡོབྦནམདམཏྟཏཱཡ པུརིསལོལཱ ཧུཏྭཱ ཨཏྟནོ དཱསེནེཝ སདྡྷིཾ སནྠཝཾ ཀཏྭཱ, ‘‘ཨཉྙེཔི མེ ཨིདཾ ཀམྨཾ ཛཱནེཡྻུ’’ནྟི བྷཱིཏཱ ཨེཝམཱཧ – ‘‘ཨམྷེཧི ཨིམསྨིཾ ཋཱནེ ན སཀྐཱ ཝསིཏུཾ. སཙེ མེ མཱཏཱཔིཏརོ ཨིམཾ དོསཾ ཛཱནིསྶནྟི, ཁཎྜཱཁཎྜིཀཾ མཾ ཀརིསྶནྟི. ཝིདེསཾ གནྟྭཱ ཝསིསྶཱམཱ’’ཏི. ཏེ ཧཏྠསཱརཾ གཧེཏྭཱ ཨགྒདྭཱརེན ནིཀྑམིཏྭཱ, ‘‘ཡཏྠ ཝཱ ཏཏྠ ཝཱ ཨཉྙེཧི ཨཛཱནནཊྛཱནཾ གནྟྭཱ ཝསིསྶཱམཱ’’ཏི ཨུབྷོཔི ཨགམཾསུ. ཏེསཾ ཨེཀསྨིཾ ཋཱནེ ཝསནྟཱནཾ སཾཝཱསམནྭཱཡ ཏསྶཱ ཀུཙྪིསྨིཾ གབྦྷོ པཏིཊྛཱསི. སཱ གབྦྷཔརིཔཱཀཾ ཨཱགམྨ ཏེན སདྡྷིཾ མནྟེསི, ‘‘གབྦྷོ མེ པརིཔཱཀཾ གཏོ, ཉཱཏིབནྡྷུཝིརཧིཏེ ཋཱནེ གབྦྷཝུཊྛཱནཾ ནཱམ ཨུབྷིནྣམྤི ཨམྷཱཀཾ དུཀྑཱཝཧཾ, ཀུལགེཧམེཝ གཙྪཱམཱ’’ཏི. སོ ‘‘སཙཱཧཾ ཏཏྠ གམིསྶཱམི, ཛཱིཝིཏཾ མེ ནཏྠཱི’’ཏི བྷཡེན ‘‘ཨཛྫ གཙྪཱམ, སྭེ གཙྪཱམཱ’’ཏི དིཝསེ ཨཏིཀྐཱམེསི. སཱ ཙིནྟེསི – ‘‘ཨཡཾ བཱལོ ཨཏྟནོ དོསམཧནྟཏཱཡ གནྟུཾ ན ཨུསྶཧཏི, མཱཏཱཔིཏརོ ནཱམ ཨེཀནྟཧིཏཱཝ, ཨཡཾ གཙྪཏུ ཝཱ, མཱ ཝཱ, ཨཧཾ གམིསྶཱམཱི’’ཏི. སཱ ཏསྨིཾ གེཧཱ ནིཀྑནྟེ གེཧཔརིཀྑཱརཾ པཊིསཱམེཏྭཱ ཨཏྟནོ ཀུལགྷརཾ གཏབྷཱཝཾ ཨནནྟརགེཧཝཱསཱིནཾ ཨཱརོཙེཏྭཱ མགྒཾ པཊིཔཛྫི.

སོཔི གྷརཾ ཨཱགནྟྭཱ ཏཾ ཨདིསྭཱ པཊིཝིསྶཀེ པུཙྪིཏྭཱ, ‘‘སཱ ཀུལགྷརཾ གཏཱ’’ཏི སུཏྭཱ ཝེགེན ཨནུབནྡྷིཏྭཱ ཨནྟརཱམགྒེ སམྤཱཔུཎི. ཏསྶཱཔི ཏཏྠེཝ གབྦྷཝུཊྛཱནཾ ཨཧོསི. སོ ‘‘ཀིཾ ཨིདཾ, བྷདྡེ’’ཏི པུཙྪི. ‘‘སཱམི, མེ ཨེཀོ པུཏྟོ ཛཱཏོ’’ཏི. ‘‘ཨིདཱནི ཀིཾ ཀརིསྶཱམཱ’’ཏི? ‘‘ཡསྶཏྠཱཡ མཡཾ ཀུལགྷརཾ གཙྪེཡྻཱམ, ཏཾ ཀམྨཾ ཨནྟརཱམགྒེཝ ནིཔྥནྣཾ, ཏཏྠ གནྟྭཱ ཀིཾ ཀརིསྶཱམ, ནིཝཏྟིསྶཱམཱ’’ཏི དྭེཔི ཨེཀཙིཏྟཱ ཧུཏྭཱ ནིཝཏྟིཾསུ. ཏསྶ ཙ དཱརཀསྶ པནྠེ ཛཱཏཏྟཱ པནྠཀོཏི ནཱམཾ ཀརིཾསུ. ཏསྶཱ ནཙིརསྶེཝ ཨཔརོཔི གབྦྷོ པཏིཊྛཧི. སབྦཾ པུརིམནཡེནེཝ ཝིཏྠཱརེཏབྦཾ. ཏསྶཔི དཱརཀསྶ པནྠེ ཛཱཏཏྟཱ པཋམཛཱཏསྶ མཧཱཔནྠཀོཏི ནཱམཾ ཀཏྭཱ ཨིཏརསྶ ཙཱུལ༹པནྠཀོཏི ནཱམཾ ཀརིཾསུ. ཏེ དྭེཔི དཱརཀེ གཧེཏྭཱ ཨཏྟནོ ཝསནཊྛཱནམེཝ གཏཱ. ཏེསཾ ཏཏྠ ཝསནྟཱནཾ མཧཱཔནྠཀདཱརཀོ ཨཉྙེ དཱརཀེ ‘‘ཙཱུལ༹པིཏཱ མཧཱཔིཏཱཏི, ཨཡྻཀོ ཨཡྻིཀཱ’’ཏི ཙ ཝདནྟེ སུཏྭཱ མཱཏརཾ པུཙྪི – ‘‘ཨམྨ, ཨཉྙེ དཱརཀཱ ‘ཨཡྻཀོ ཨཡྻིཀཱ’ཏིཔི, ‘མཧཱཔིཏཱ ཙཱུལ༹པིཏཱ’ཏིཔི ཝདནྟི, ཀཙྩི ཨམྷཱཀཉྙེཝ ཉཱཏཀཱ ནཏྠཱི’’ཏི? ‘‘ཨཱམ, ཏཱཏ, ཨམྷཱཀཾ ཨེཏྠ ཉཱཏཀཱ ནཏྠི. རཱཛགཧནགརེ པན ཝོ དྷནསེཊྛི ནཱམ ཨཡྻཀོ, ཏཏྠ ཨམྷཱཀཾ བཧཱུ ཉཱཏཀཱ’’ཏི. ‘‘ཀསྨཱ ཏཏྠ ན གཙྪཐ, ཨམྨཱ’’ཏི? སཱ ཨཏྟནོ ཨགམནཀཱརཎཾ པུཏྟསྶ ཨཀཐེཏྭཱ པུཏྟེསུ པུནཔྤུནཾ ཀཐེནྟེསུ སཱམིཀཾ ཨཱཧ – ‘‘ཨིམེ དཱརཀཱ མཾ ཨཏིཝིཡ ཀིལམེནྟི, ཀིཾ ནོ མཱཏཱཔིཏརོ དིསྭཱ མཾསཾ ཁཱདིསྶནྟི, ཨེཧི, དཱརཀཱནཾ ཨཡྻཀཀུལཾ དསྶེསྶཱམཱ’’ཏི? ‘‘ཨཧཾ སམྨུཁཱ བྷཝིཏུཾ ན སཀྑིསྶཱམི, ཏེ པན ནཡིསྶཱམཱི’’ཏི. ‘‘སཱདྷུ ཡེན ཀེནཙི ཨུཔཱཡེན དཱརཀཱནཾ ཨཡྻཀཀུལམེཝ དཊྛུཾ ཝཊྚཏཱི’’ཏི. དྭེཔི ཛནཱ དཱརཀེ ཨཱདཱཡ ཨནུཔུབྦེན རཱཛགཧཾ པཏྭཱ ནགརདྭཱརེ ཨེཀིསྶཱ སཱལཱཡ པཝིསིཏྭཱ དཱརཀམཱཏཱ དྭེ དཱརཀེ གཧེཏྭཱ ཨཏྟནོ ཨཱགཏབྷཱཝཾ མཱཏཱཔིཏཱུནཾ ཨཱརོཙཱཔེསི. ཏེ ཏཾ སཱསནཾ སུཏྭཱ, ‘‘སཾསཱརེ ཝིཙརནྟཱནཾ ན པུཏྟོ ན དྷཱིཏཱ བྷཱུཏཔུབྦཱ ནཱམ ནཏྠི, ཏེ ཨམྷཱཀཾ མཧཱཔརཱདྷིཀཱ, ན སཀྐཱ ཏེཧི ཨམྷཱཀཾ ཙཀྑུཔཐེ ཋཱཏུཾ, ཨེཏྟཀཾ ནཱམ དྷནཾ གཧེཏྭཱ དྭེཔི ཛནཱ ཕཱསུཀཊྛཱནཾ གནྟྭཱ ཛཱིཝནྟུ, དཱརཀེ པན ཨིདྷ པེསེནྟཱུ’’ཏི དྷནཾ དཏྭཱ དཱུཏཾ པཱཧེསུཾ.

ཏེཧི པེསིཏཾ དྷནཾ གཧེཏྭཱ དཱརཀེ ཨཱགཏདཱུཏཱནཉྙེཝ ཧཏྠེ དཏྭཱ པཧིཎིཾསུ. དཱརཀཱ ཨཡྻཀཀུལེ ཝཌྜྷནྟི. ཏེསུ ཙཱུལ༹པནྠཀོ ཨཏིདཧརོ, མཧཱཔནྠཀོ པན ཨཡྻཀེན སདྡྷིཾ དསབལསྶ དྷམྨཀཐཾ སོཏུཾ གཙྪཏི. ཏསྶ ནིཙྩཾ སཏྠུ སནྟིཀཾ གཙྪནྟསྶ པབྦཛྫཱཡ ཙིཏྟཾ ནམི. སོ ཨཡྻཀཾ ཨཱཧ – ‘‘སཙེ མཾ ཨནུཛཱནེཡྻཱཐ, ཨཧཾ པབྦཛེཡྻ’’ནྟི. ‘‘ཀིཾ ཝདེསི, ཏཱཏ, སཀལསྶ ལོཀསྶཔི མེ པབྦཛྫཱཏོ ཏཝ པབྦཛྫཱ བྷདྡིཀཱ. སཙེ སཀྐོསི པབྦཛཱཧཱི’’ཏི. ཏཾ སཏྠུ སནྟིཀཾ ནེཏྭཱ, ‘‘ཀིཾ, གཧཔཏི, དཱརཀོ ཏེ ལདྡྷོ’’ཏི ཝུཏྟེ, ‘‘ཨཱམ, བྷནྟེ, ཨཡཾ མེ ནཏྟཱ ཏུམྷཱཀཾ སནྟིཀེ པབྦཛིཏུཀཱམོ’’ཏི ཨཱཧ. སཏྠཱ ཨཉྙཏརཾ པིཎྜཔཱཏཙཱརིཀཾ བྷིཀྑུཾ ‘‘ཨིམཾ དཱརཀཾ པབྦཱཛེཧཱི’’ཏི ཨཱཎཱཔེསི. ཐེརོ ཏསྶ ཏཙཔཉྩཀཀམྨཊྛཱནཾ ཨཱཙིཀྑིཏྭཱ པབྦཱཛེསི. སོ བཧུཾ བུདྡྷཝཙནཾ ཨུགྒཎྷིཏྭཱ པརིཔུཎྞཝསྶོ ཨུཔསམྤདཾ ལབྷིཏྭཱ ཡོནིསོམནསིཀཱརེན ཀམྨཊྛཱནཾ ཀརོནྟོ ཨརཧཏྟཾ པཱཔུཎི. སོ ཛྷཱནསུཁེན ཕལསུཁེན ཝཱིཏིནཱམེནྟོ ཙིནྟེསི – ‘‘སཀྐཱ ནུ ཁོ ཨིདཾ སུཁཾ ཙཱུལ༹པནྠཀསྶ དཱཏུ’’ནྟི! ཏཏོ ཨཡྻཀསེཊྛིསྶ སནྟིཀཾ གནྟྭཱ ཨེཝམཱཧ – ‘‘མཧཱསེཊྛི, སཙེ ཨནུཛཱནེཡྻཱཐ, ཨཧཾ ཙཱུལ༹པནྠཀཾ པབྦཱཛེཡྻ’’ནྟི. ‘‘པབྦཱཛེཐ, བྷནྟེ’’ཏི. སེཊྛི ཀིར སཱསནེ ཙ སུཔྤསནྣོ, ‘‘ཀཏརདྷཱིཏཱཡ ཝོ ཨེཏེ པུཏྟཱ’’ཏི པུཙྪིཡམཱནོ ཙ ‘‘པལཱཏདྷཱིཏཱཡཱ’’ཏི ཝཏྟུཾ ལཛྫཏི, ཏསྨཱ སུཁེནེཝ ཏེསཾ པབྦཛྫཾ ཨནུཛཱནི. ཐེརོ ཙཱུལ༹པནྠཀཾ པབྦཱཛེཏྭཱ སཱིལེསུ པཏིཊྛཱཔེསི. སོ པབྦཛིཏྭཱཝ དནྡྷོ ཨཧོསི.

‘‘པདྨཾ ཡཐཱ ཀོཀནདཾ སུགནྡྷཾ,

པཱཏོ སིཡཱ ཕུལླམཝཱིཏགནྡྷཾ;

ཨངྒཱིརསཾ པསྶ ཝིརོཙམཱནཾ,

ཏཔནྟམཱདིཙྩམིཝནྟལིཀྑེ’’ཏི. (སཾ. ནི. ༡.༡༢༣; ཨ. ནི. ༥.༡༩༥) –

ཨིམཾ ཨེཀཾ གཱཐཾ ཙཏཱུཧི མཱསེཧི ཨུགྒཎྷིཏུཾ ནཱསཀྑི. སོ ཀིར ཀསྶཔསམྨཱསམྦུདྡྷཀཱལེ པབྦཛིཏྭཱ པཉྙཝཱ ཧུཏྭཱ ཨཉྙཏརསྶ དནྡྷབྷིཀྑུནོ ཨུདྡེསགྒཧཎཀཱལེ པརིཧཱསཀེལི༹ཾ ཨཀཱསི. སོ བྷིཀྑུ ཏེན པརིཧཱསེན ལཛྫིཏོ ནེཝ ཨུདྡེསཾ གཎྷི, ན སཛ྄ཛྷཱཡམཀཱསི. ཏེན ཀམྨེན ཨཡཾ པབྦཛིཏྭཱཝ དནྡྷོ ཛཱཏོ, གཧིཏགཧིཏཾ པདཾ ཨུཔརཱུཔརིཔདཾ གཎྷནྟསྶ ནསྶཏི. ཏསྶ ཨིམམེཝ གཱཐཾ ཨུགྒཧེཏུཾ ཝཱཡམནྟསྶ ཙཏྟཱརོ མཱསཱ ཨཏིཀྐནྟཱ. ཨཐ ནཾ མཧཱཔནྠཀོ, ‘‘ཙཱུལ༹པནྠཀ, ཏྭཾ ཨིམསྨིཾ སཱསནེ ཨབྷབྦོ, ཙཏཱུཧི མཱསེཧི ཨེཀཾ གཱཐམྤི གཎྷིཏུཾ ན སཀྐོསི, པབྦཛིཏཀིཙྩཾ པན ཀཐཾ མཏྠཀཾ པཱཔེསྶསི, ནིཀྑམ ཨིཏོ’’ཏི ཝིཧཱརཱ ནིཀྐཌྜྷི. ཙཱུལ༹པནྠཀོ བུདྡྷསཱསནེ སིནེཧེན གིཧིབྷཱཝཾ ན པཏྠེཏི.

ཏསྨིཉྩ ཀཱལེ མཧཱཔནྠཀོ བྷཏྟུདྡེསཀོ ཨཧོསི. ཛཱིཝཀོ ཀོམཱརབྷཙྩོ བཧུཾ མཱལཱགནྡྷཝིལེཔནཾ ཨཱདཱཡ ཨཏྟནོ ཨམྦཝནཾ གནྟྭཱ སཏྠཱརཾ པཱུཛེཏྭཱ དྷམྨཾ སུཏྭཱ ཨུཊྛཱཡཱསནཱ དསབལཾ ཝནྡིཏྭཱ མཧཱཔནྠཀཾ ཨུཔསངྐམིཏྭཱ, ‘‘ཀིཏྟཀཱ, བྷནྟེ, སཏྠུ སནྟིཀེ བྷིཀྑཱུ’’ཏི པུཙྪི. ‘‘པཉྩམཏྟཱནི བྷིཀྑུསཏཱནཱི’’ཏི. ‘‘སྭེ, བྷནྟེ, བུདྡྷཔྤམུཁཱནི པཉྩ བྷིཀྑུསཏཱནི ཨཱདཱཡ ཨམྷཱཀཾ ནིཝེསནེ བྷིཀྑཾ གཎྷཐཱ’’ཏི. ‘‘ཨུཔཱསཀ, ཙཱུལ༹པནྠཀོ ནཱམ བྷིཀྑུ དནྡྷོ ཨཝིརུལ༹ྷིདྷམྨོ, ཏཾ ཋཔེཏྭཱ སེསཱནཾ ནིམནྟནཾ སམྤཊིཙྪཱམཱི’’ཏི ཐེརོ ཨཱཧ. ཏཾ སུཏྭཱ ཙཱུལ༹པནྠཀོ ཙིནྟེསི – ‘‘ཐེརོ ཨེཏྟཀཱནཾ བྷིཀྑཱུནཾ ནིམནྟནཾ སམྤཊིཙྪནྟོ མཾ བཱཧིརཾ ཀཏྭཱ སམྤཊིཙྪཏི, ནིསྶཾསཡཾ མཡ྄ཧཾ བྷཱཏིཀསྶ མཡི ཙིཏྟཾ བྷིནྣཾ བྷཝིསྶཏི, ཀིཾ དཱནི མཡ྄ཧཾ ཨིམིནཱ སཱསནེན, གིཧཱི ཧུཏྭཱ དཱནཱདཱིནི པུཉྙཱནི ཀརོནྟོ ཛཱིཝིསྶཱམཱི’’ཏི? སོ པུནདིཝསེ པཱཏོཝ ཝིབྦྷམིཏུཾ པཱཡཱསི.

སཏྠཱ པཙྩཱུསཀཱལེཡེཝ ལོཀཾ ཝོལོཀེནྟོ ཨིམཾ ཀཱརཎཾ དིསྭཱ པཋམཏརཾ གནྟྭཱ ཙཱུལ༹པནྠཀསྶ གམནམགྒེ དྭཱརཀོཊྛཀེ ཙངྐམནྟོ ཨཊྛཱསི. ཙཱུལ༹པནྠཀོ གཙྪནྟོ སཏྠཱརཾ དིསྭཱ ཨུཔསངྐམིཏྭཱ ཝནྡིཏྭཱ ཨཊྛཱསི. ཨཐ ནཾ སཏྠཱ ‘‘ཀུཧིཾ པན ཏྭཾ, ཙཱུལ༹པནྠཀ, ཨིམཱཡ ཝེལཱཡ གཙྪསཱི’’ཏི ཨཱཧ. ‘‘བྷཱཏཱ མཾ, བྷནྟེ, ནིཀྐཌྜྷཏི, ཏེནཱཧཾ ཝིབྦྷམིཏུཾ གཙྪཱམཱི’’ཏི. ‘‘ཙཱུལ༹པནྠཀ, ཏཝ པབྦཛྫཱ ནཱམ མམ སནྟཀཱ, བྷཱཏརཱ ནིཀྐཌྜྷིཏོ ཀསྨཱ མམ སནྟིཀཾ ནཱགཉྪི, ཨེཧི, ཀིཾ ཏེ གིཧིབྷཱཝེན, མམ སནྟིཀེ བྷཝིསྶསཱི’’ཏི ཙཀྐངྐིཏཏལེན པཱཎིནཱ ཏཾ སིརསི པརཱམསིཏྭཱ ཨཱདཱཡ གནྟྭཱ གནྡྷཀུཊིཔྤམུཁེ ནིསཱིདཱཔེཏྭཱ, ‘‘ཙཱུལ༹པནྠཀ, པུརཏྠཱབྷིམུཁོ ཧུཏྭཱ ཨིམཾ པིལོཏིཀཾ ‘རཛོཧརཎཾ རཛོཧརཎ’ནྟི པརིམཛྫནྟོ ཨིདྷེཝ ཧོཧཱི’’ཏི ཨིདྡྷིཡཱ ཨབྷིསངྑཏཾ པརིསུདྡྷཾ པིལོཏིཀཾ དཏྭཱ ཀཱལེ ཨཱརོཙིཏེ བྷིཀྑུསངྒྷཔརིཝུཏོ ཛཱིཝཀསྶ གེཧཾ གནྟྭཱ པཉྙཏྟཱསནེ ནིསཱིདི. ཙཱུལ༹པནྠཀོཔི སཱུརིཡཾ ཨོལོཀེནྟོ ཏཾ པིལོཏིཀཾ ‘‘རཛོཧརཎཾ རཛོཧརཎ’’ནྟི པརིམཛྫནྟོ ནིསཱིདི. ཏསྶ ཏཾ པིལོཏིཀཁཎྜཾ པརིམཛྫནྟསྶ ཀིལིཊྛཾ ཨཧོསི. ཏཏོ ཙིནྟེསི – ‘‘ཨིདཾ པིལོཏིཀཁཎྜཾ ཨཏིཝིཡ པརིསུདྡྷཾ, ཨིམཾ པན ཨཏྟབྷཱཝཾ ནིསྶཱཡ པུརིམཔཀཏིཾ ཝིཛཧིཏྭཱ ཨེཝཾ ཀིལིཊྛཾ ཛཱཏཾ, ཨནིཙྩཱ ཝཏ སངྑཱརཱ’’ཏི ཁཡཝཡཾ པཊྛཔེནྟོ ཝིཔསྶནཾ ཝཌྜྷེསི. སཏྠཱ ‘‘ཙཱུལ༹པནྠཀསྶ ཙིཏྟཾ ཝིཔསྶནཾ ཨཱརུལ༹ྷ’’ནྟི ཉཏྭཱ, ‘‘ཙཱུལ༹པནྠཀ, ཏྭཾ པིལོཏིཀཁཎྜམེཝ སཾཀིལིཊྛཾ ‘རཛཾ རཛ’ནྟི མཱ སཉྙཾ ཀརི, ཨབྦྷནྟརེ པན ཏེ རཱགརཛཱདཡོ ཨཏྠི, ཏེ ཧརཱཧཱི’’ཏི ཝཏྭཱ ཨོབྷཱསཾ ཝིསྶཛྫེཏྭཱ པུརཏོ ནིསིནྣོ ཝིཡ པཉྙཱཡམཱནརཱུཔོ ཧུཏྭཱ ཨིམཱ གཱཐཱ ཨབྷཱསི –

‘‘རཱགོ རཛོ ན ཙ པན རེཎུ ཝུཙྩཏི,

རཱགསྶེཏཾ ཨདྷིཝཙནཾ རཛོཏི;

ཨེཏཾ རཛྫཾ ཝིཔྤཛཧིཏྭ བྷིཀྑཝོ,

ཝིཧརནྟི ཏེ ཝིགཏརཛསྶ སཱསནེ.

‘‘དོསོ རཛོ ན ཙ པན རེཎུ ཝུཙྩཏི,

དོསསྶེཏཾ ཨདྷིཝཙནཾ རཛོཏི;

ཨེཏཾ རཛཾ ཝིཔྤཛཧིཏྭ བྷིཀྑཝོ,

ཝིཧརནྟི ཏེ ཝིགཏརཛསྶ སཱསནེ.

‘‘མོཧོ རཛོ ན ཙ པན རེཎུ ཝུཙྩཏི,

མོཧསྶེཏཾ ཨདྷིཝཙནཾ རཛོཏི;

ཨེཏཾ རཛཾ ཝིཔྤཛཧིཏྭ བྷིཀྑཝོ,

ཝིཧརནྟི ཏེ ཝིགཏརཛསྶ སཱསནེ’’ཏི. (མཧཱནི. ༢༠༩);

གཱཐཱཔརིཡོསཱནེ ཙཱུལ༹པནྠཀོ སཧ པཊིསམྦྷིདཱཧི ཨརཧཏྟཾ པཱཔུཎི. སཧ པཊིསམྦྷིདཱཧིཡེཝསྶ ཏཱིཎི པིཊཀཱནི ཨཱགམིཾསུ.

སོ ཀིར པུབྦེ རཱཛཱ ཧུཏྭཱ ནགརཾ པདཀྑིཎཾ ཀརོནྟོ ནལཱཊཏོ སེདེ མུཙྩནྟེ པརིསུདྡྷེན སཱཊཀེན ནལཱཊནྟཾ པུཉྪི, སཱཊཀོ ཀིལིཊྛོ ཨཧོསི. སོ ‘‘ཨིམཾ སརཱིརཾ ནིསྶཱཡ ཨེཝརཱུཔོ པརིསུདྡྷོ སཱཊཀོ པཀཏིཾ ཛཧིཏྭཱ ཀིལིཊྛོ ཛཱཏོ, ཨནིཙྩཱ ཝཏ སངྑཱརཱ’’ཏི ཨནིཙྩསཉྙཾ པཊིལབྷི. ཏེ ཀཱརཎེནསྶ རཛོཧརཎམེཝ པཙྩཡོ ཛཱཏོ.

ཛཱིཝཀོཔི ཁོ ཀོམཱརབྷཙྩོ དསབལསྶ དཀྑིཎོདཀཾ ཨུཔནཱམེསི. སཏྠཱ ‘‘ནནུ, ཛཱིཝཀ, ཝིཧཱརེ བྷིཀྑཱུ ཨཏྠཱི’’ཏི ཧཏྠེན པཏྟཾ པིདཧི. མཧཱཔནྠཀོ ‘‘ནནུ, བྷནྟེ, ཝིཧཱརེ བྷིཀྑཱུ ནཏྠཱི’’ཏི ཨཱཧ. སཏྠཱ ‘‘ཨཏྠི, ཛཱིཝཀཱ’’ཏི ཨཱཧ. ཛཱིཝཀོ ‘‘ཏེན ཧི བྷཎེ གཙྪ, ཝིཧཱརེ བྷིཀྑཱུནཾ ཨཏྠིབྷཱཝཾ ཝཱ ནཏྠིབྷཱཝཾ ཝཱ ཏྭཉྙེཝ ཛཱནཱཧཱི’’ཏི པུརིསཾ པེསེསི. ཏསྨིཾ ཁཎེ ཙཱུལ༹པནྠཀོ ‘‘མཡ྄ཧཾ བྷཱཏིཀོ ‘ཝིཧཱརེ བྷིཀྑཱུ ནཏྠཱི’ཏི བྷཎཏི, ཝིཧཱརེ བྷིཀྑཱུནཾ ཨཏྠིབྷཱཝམསྶ པཀཱསེསྶཱམཱི’’ཏི སཀལཾ ཨམྦཝནཾ བྷིཀྑཱུནཉྙེཝ པཱུརེསི. ཨེཀཙྩེ བྷིཀྑཱུ ཙཱིཝརཀམྨཾ ཀརོནྟི, ཨེཀཙྩེ རཛནཀམྨཾ ཀརོནྟི, ཨེཀཙྩེ སཛ྄ཛྷཱཡཾ ཀརོནྟི. ཨེཝཾ ཨཉྙམཉྙཨསདིསཾ བྷིཀྑུསཧསྶཾ མཱཔེསི. སོ པུརིསོ ཝིཧཱརེ བཧཱུ བྷིཀྑཱུ དིསྭཱ ནིཝཏྟིཏྭཱ, ‘‘ཨཡྻ, སཀལཾ ཨམྦཝནཾ བྷིཀྑཱུཧི པརིཔུཎྞ’’ནྟི ཛཱིཝཀསྶ ཨཱརོཙེསི. ཐེརོཔི ཁོ ཏཏྠེཝ –

‘‘སཧསྶཀྑཏྟུམཏྟཱནཾ, ནིམྨིནིཏྭཱན པནྠཀོ;

ནིསཱིདམྦཝནེ རམྨེ, ཡཱཝ ཀཱལཔྤཝེདནཱ’’ཏི.

ཨཐ སཏྠཱ ཏཾ པུརིསཾ ཨཱཧ – ‘‘ཝིཧཱརཾ གནྟྭཱ ‘སཏྠཱ ཙཱུལ༹པནྠཀཾ ནཱམ པཀྐོསཏཱི’ཏི ཝདེཧཱི’’ཏི. ཏེན གནྟྭཱ ཏཐཱ ཝུཏྟེ, ‘‘ཨཧཾ ཙཱུལ༹པནྠཀོ, ཨཧཾ ཙཱུལ༹པནྠཀོ’’ཏི མུཁསཧསྶཾ ཨུཊྛཧི. སོ པུརིསོ པུན གནྟྭཱ, ‘‘སབྦེཔི ཀིར, བྷནྟེ, ཙཱུལ༹པནྠཀཱཡེཝ ནཱམཱ’’ཏི ཨཱཧ. ‘‘ཏེན ཧི གནྟྭཱ ཡོ ‘ཨཧཾ ཙཱུལ༹པནྠཀོ’ཏི པཋམཾ ཝདཏི, ཏཾ ཧཏྠེ གཎྷ, ཨཝསེསཱ ཨནྟརདྷཱཡིསྶནྟཱི’’ཏི. སོ ཏཐཱ ཨཀཱསི. ཏཱཝདེཝ སཧསྶམཏྟཱ བྷིཀྑཱུ ཨནྟརདྷཱཡིཾསུ. ཐེརོཔི ཏེན པུརིསེན སདྡྷིཾ ཨགམཱསི. སཏྠཱ བྷཏྟཀིཙྩཔརིཡོསཱནེ ཛཱིཝཀཾ ཨཱམནྟེསི – ‘‘ཛཱིཝཀ, ཙཱུལ༹པནྠཀསྶ པཏྟཾ གཎྷཱཧི, ཨཡཾ ཏེ ཨནུམོདནཾ ཀརིསྶཏཱི’’ཏི. ཛཱིཝཀོ ཏཐཱ ཨཀཱསི. ཐེརོ སཱིཧནཱདཾ ནདནྟོ ཏརུཎསཱིཧོ ཝིཡ ཏཱིཧི པིཊཀེཧི སངྑོབྷེཏྭཱ ཨནུམོདནམཀཱསི. སཏྠཱ ཨུཊྛཱཡཱསནཱ བྷིཀྑུསངྒྷཔརིཝུཏོ ཝིཧཱརཾ གནྟྭཱ བྷིཀྑཱུཧི ཝཏྟེ དསྶིཏེ གནྡྷཀུཊིཔྤམུཁེ ཋཏྭཱ བྷིཀྑུསངྒྷསྶ སུགཏོཝཱདཾ དཏྭཱ ཀམྨཊྛཱནཾ ཀཐེཏྭཱ བྷིཀྑུསངྒྷཾ ཨུཡྻོཛེཏྭཱ སུརབྷིགནྡྷཝཱསིཏཾ གནྡྷཀུཊིཾ པཝིསིཏྭཱ དཀྑིཎེན པསྶེན སཱིཧསེཡྻཾ ཨུཔགཏོ. ཨཐ སཱཡནྷསམཡེ བྷིཀྑཱུ ཨིཏོ ཙིཏོ ཙ སམོསརིཏྭཱ རཏྟཀམྦལསཱཎིཡཱ པརིཀྑིཏྟཱ ཝིཡ ནིསཱིདིཏྭཱ སཏྠུ གུཎཀཐཾ ཨཱརབྷིཾསུ, ‘‘ཨཱཝུསོ, མཧཱཔནྠཀོ ཙཱུལ༹པནྠཀསྶ ཨཛ྄ཛྷཱསཡཾ ཨཛཱནནྟོ ཙཏཱུཧི མཱསེཧི ཨེཀཾ གཱཐཾ ཨུགྒཎྷཱཔེཏུཾ ན སཀྐོཏི, ‘དནྡྷོ ཨཡ’ནྟི ཝིཧཱརཱ ནིཀྐཌྜྷི, སམྨཱསམྦུདྡྷོ པན ཨཏྟནོ ཨནུཏྟརདྷམྨརཱཛཏཱཡ ཨེཀསྨིཾཡེཝསྶ ཨནྟརབྷཏྟེ སཧ པཊིསམྦྷིདཱཧི ཨརཧཏྟཾ ཨདཱསི, ཏཱིཎི པིཊཀཱནི སཧ པཊིསམྦྷིདཱཧིཡེཝ ཨཱགཏཱནི, ཨཧོ བུདྡྷཱནཾ བལཾ ནཱམ མཧནྟ’’ནྟི.

ཨཐ བྷགཝཱ དྷམྨསབྷཱཡཾ ཨིམཾ ཀཐཱཔཝཏྟིཾ ཉཏྭཱ, ‘‘ཨཛྫ མཡཱ གནྟུཾ ཝཊྚཏཱི’’ཏི བུདྡྷསེཡྻཱཡ ཨུཊྛཱཡ སུརཏྟདུཔཊྚཾ ནིཝཱསེཏྭཱ ཝིཛྫུལཏཾ ཝིཡ ཀཱཡབནྡྷནཾ བནྡྷིཏྭཱ རཏྟཀམྦལསདིསཾ སུགཏམཧཱཙཱིཝརཾ པཱརུཔིཏྭཱ སུརབྷིགནྡྷཀུཊིཏོ ནིཀྑམྨ མཏྟཝརཝཱརཎསཱིཧཝིཛམྦྷིཏཝིལཱསེན ཨནནྟཱཡ བུདྡྷལཱིལཱ༹ཡ དྷམྨསབྷཾ གནྟྭཱ ཨལངྐཏམཎྜལམཱལ༹མཛ྄ཛྷེ སུཔཉྙཏྟཝརབུདྡྷཱསནཾ ཨབྷིརུཡ྄ཧ ཚབྦཎྞབུདྡྷརཾསིཡོ ཝིསྶཛྫེནྟོ ཨཎྞཝཀུཙྪིཾ ཁོབྷཡམཱནོ ཡུགནྡྷརམཏྠཀེ བཱལསཱུརིཡོ ཝིཡ ཨཱསནམཛ྄ཛྷེ ནིསཱིདི. སམྨཱསམྦུདྡྷེ པན ཨཱགཏམཏྟེ བྷིཀྑུསངྒྷོ ཀཐཾ པཙྪིནྡིཏྭཱ ཏུཎྷཱི ཨཧོསི. སཏྠཱ མུདུཀེན མེཏྟཙིཏྟེན པརིསཾ ཨོལོཀེཏྭཱ, ‘‘ཨཡཾ པརིསཱ ཨཏིཝིཡ སོབྷཏི, ཨེཀསྶཔི ཧཏྠཀུཀྐུཙྩཾ ཝཱ པཱདཀུཀྐུཙྩཾ ཝཱ ཨུཀྐཱསིཏསདྡོ ཝཱ ཁིཔིཏསདྡོ ཝཱ ནཏྠི, སབྦེཔི ཨིམེ བུདྡྷགཱརཝེན སགཱརཝཱ, བུདྡྷཏེཛེན ཏཛྫིཏཱ. མཡི ཨཱཡུཀཔྤམྤི ཨཀཐེཏྭཱ ནིསིནྣེ པཋམཾ ཀཐཾ སམུཊྛཱཔེཏྭཱ ན ཀཐེསྶནྟི. ཀཐཱསམུཊྛཱཔནཝཏྟཾ ནཱམ མཡཱཝ ཛཱནིཏབྦཾ, ཨཧམེཝ པཋམཾ ཀཐེསྶཱམཱི’’ཏི མདྷུརེན བྲཧྨསྶརེན བྷིཀྑཱུ ཨཱམནྟེཏྭཱ, ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ, ཀཱ ཙ པན ཝོ ཨནྟརཱཀཐཱ ཝིཔྤཀཏཱ’’ཏི པུཙྪིཏྭཱ, ‘‘ཨིམཱཡ ནཱམཱ’’ཏི ཝུཏྟེ, ‘‘ན, བྷིཀྑཝེ, ཙཱུལ༹པནྠཀོ ཨིདཱནེཝ དནྡྷོ, པུབྦེཔི དནྡྷོཡེཝ. ན ཀེཝལཉྩསྶཱཧཾ ཨིདཱནེཝ ཨཝསྶཡོ ཛཱཏོ, པུབྦེཔི ཨཝསྶཡོ ཨཧོསིམེཝ. པུབྦེ པནཱཧཾ ཨིམཾ ལོཀིཡཀུཊུམྦསྶ སཱམིཀཾ ཨཀཱསིཾ, ཨིདཱནི ལོཀུཏྟརཀུཊུམྦསྶཱ’’ཏི ཝཏྭཱ ཏམཏྠཾ ཝིཏྠཱརཏོ སོཏུཀཱམེཧི བྷིཀྑཱུཧི ཨཱཡཱཙིཏོ ཨཏཱིཏཾ ཨཱཧརི –

‘‘ཨཏཱིཏེ, བྷིཀྑཝེ, བཱརཱཎསིནགརཝཱསཱི ཨེཀོ མཱཎཝོ ཏཀྐསིལཾ གནྟྭཱ སིཔྤུགྒཧཎཏྠཱཡ དིསཱཔཱམོཀྑསྶ ཨཱཙརིཡསྶ དྷམྨནྟེཝཱསིཀོ ཧུཏྭཱ པཉྩནྣཾ མཱཎཝཀསཏཱནཾ ཨནྟརེ ཨཏིཝིཡ ཨཱཙརིཡསྶ ཨུཔཀཱརཀོ ཨཧོསི, པཱདཔརིཀམྨཱདཱིནི སབྦཀིཙྩཱནི ཀརོཏི. དནྡྷཏཱཡ པན ཀིཉྩི ཨུགྒཎྷིཏུཾ ན སཀྐོ’’ཏི. ཨཱཙརིཡོ ‘‘ཨཡཾ མམ བཧཱུཔཀཱརོ, སིཀྑཱཔེསྶཱམི ན’’ནྟི ཝཱཡམནྟོཔི ཀིཉྩི སིཀྑཱཔེཏུཾ ན སཀྐོཏི. སོ ཙིརཾ ཝསིཏྭཱ ཨེཀགཱཐམྤི ཨུགྒཎྷིཏུཾ ཨསཀྐོནྟོ ཨུཀྐཎྛིཏྭཱ ‘‘གམིསྶཱམཱི’’ཏི ཨཱཙརིཡཾ ཨཱཔུཙྪི. ཨཱཙརིཡོ ཙིནྟེསི – ‘‘ཨཡཾ མཡ྄ཧཾ ཨུཔཀཱརཀོ, པཎྜིཏབྷཱཝམསྶ པཙྩཱསཱིསཱམི, ན ནཾ ཀཱཏུཾ སཀྐོམི, ཨཝསྶཾ མཡཱ ཨིམསྶ པཙྩུཔཀཱརོ ཀཱཏབྦོ, ཨེཀམསྶ མནྟཾ བནྡྷིཏྭཱ དསྶཱམཱི’’ཏི སོ ཏཾ ཨརཉྙཾ ནེཏྭཱ ‘‘གྷཊྚེསི གྷཊྚེསི, ཀིཾ ཀཱརཎཱ གྷཊྚེསི? ཨཧམྤི ཏཾ ཛཱནཱམི ཛཱནཱམཱི’’ཏི ཨིམཾ མནྟཾ བནྡྷིཏྭཱ ཨུགྒཎྷཱཔེནྟོ ཨནེཀསཏཀྑཏྟུཾ པརིཝཏྟཱཔེཏྭཱ, ‘‘པཉྙཱཡཏི ཏེ’’ཏི པུཙྪིཏྭཱ, ‘‘ཨཱམ, པཉྙཱཡཏཱི’’ཏི ཝུཏྟེ ‘‘དནྡྷེན ནཱམ ཝཱཡཱམཾ ཀཏྭཱ པགུཎཾ ཀཏཾ སིཔྤཾ ན པལཱཡཏཱི’’ཏི ཙིནྟེཏྭཱ མགྒཔརིབྦཡཾ དཏྭཱ, ‘‘གཙྪ, ཨིམཾ མནྟཾ ནིསྶཱཡ ཛཱིཝིསྶསི, ཨཔལཱཡནཏྠཱཡ པནསྶ ནིཙྩཾ སཛ྄ཛྷཱཡཾ ཀརེཡྻཱསཱི’’ཏི ཝཏྭཱ ཏཾ ཨུཡྻོཛེསི. ཨཐསྶ མཱཏཱ བཱརཱཎསིཡཾ སམྤཏྟཀཱལེ ‘‘པུཏྟོ མེ སིཔྤཾ སིཀྑིཏྭཱ ཨཱགཏོ’’ཏི མཧཱསཀྐཱརསམྨཱནཾ ཨཀཱསི.

ཏདཱ བཱརཱཎསིརཱཛཱ ‘‘ཨཏྠི ནུ ཁོ མེ ཀཱཡཀམྨཱདཱིསུ ཀོཙི དོསོ’’ཏི པཙྩཝེཀྑནྟོ ཨཏྟནོ ཨརུཙྩནཀཾ ཀིཉྩི ཀམྨཾ ཨདིསྭཱ ‘‘ཨཏྟནོ ཝཛྫཾ ནཱམ ཨཏྟནོ ན པཉྙཱཡཏི, པརེསཾ པཉྙཱཡཏི, ནཱགརཱནཾ པརིགྒཎྷིསྶཱམཱི’’ཏི ཙིནྟེཏྭཱ སཱཡཾ ཨཉྙཱཏཀཝེསེན ནིཀྑམིཏྭཱ, ‘‘སཱཡམཱསཾ བྷུཉྫིཏྭཱ ནིསིནྣམནུསྶཱནཾ ཀཐཱསལླཱཔོ ནཱམ ནཱནཔྤཀཱརཀོ ཧོཏི, ‘སཙཱཧཾ ཨདྷམྨེན རཛྫཾ ཀཱརེམི, པཱཔེན ཨདྷམྨིཀེན རཉྙཱ དཎྜབལིཨཱདཱིཧི ཧཏམྷཱ’ཏི ཝཀྑནྟི. ‘སཙེ དྷམྨེན རཛྫཾ ཀཱརེམི, དཱིགྷཱཡུཀོ ཧོཏུ ནོ རཱཛཱ’ཏིཨཱདཱིནི ཝཏྭཱ མམ གུཎཾ ཀཐེསྶནྟཱི’’ཏི ཏེསཾ ཏེསཾ གེཧཱནཾ བྷིཏྟིཨནུསཱརེནེཝ ཝིཙརཏི.

ཏསྨིཾ ཁཎེ ཨུམངྒཙོརཱ དྭིནྣཾ གེཧཱནཾ ཨནྟརེ ཨུམངྒཾ བྷིནྡནྟི ཨེཀཨུམངྒེནེཝ དྭེ གེཧཱནི པཝིསནཏྠཱཡ. རཱཛཱ ཏེ དིསྭཱ གེཧཙྪཱཡཱཡ ཨཊྛཱསི. ཏེསཾ ཨུམངྒཾ བྷིནྡིཏྭཱ གེཧཾ པཝིསིཏྭཱ བྷཎྜཀཾ ཨོལོཀིཏཀཱལེ མཱཎཝོ པབུཛ྄ཛྷིཏྭཱ ཏཾ མནྟཾ སཛ྄ཛྷཱཡནྟོ ‘‘གྷཊྚེསི གྷཊྚེསི, ཀིཾ ཀཱརཎཱ གྷཊྚེསི? ཨཧམྤི ཏཾ ཛཱནཱམི ཛཱནཱམཱི’’ཏི ཨཱཧ. ཏེ ཏཾ སུཏྭཱ, ‘‘ཨིམིནཱ ཀིརམྷཱ ཉཱཏཱ, ཨིདཱནི ནོ ནཱསེསྶཏཱི’’ཏི ནིཝཏྠཝཏྠཱནིཔི ཚཌྜེཏྭཱ བྷཱིཏཱ སམྨུཁསམྨུཁཊྛཱནེནེཝ པལཱཡིཾསུ. རཱཛཱ ཏེ པལཱཡནྟེ དིསྭཱ ཨིཏརསྶ ཙ མནྟསཛ྄ཛྷཱཡནསདྡཾ སུཏྭཱ གེཧཉྙེཝ ཝཝཏྠཔེཏྭཱ ནཱགརཱནཾ པརིགྒཎྷིཏྭཱ ནིཝེསནཾ པཱཝིསི. སོ ཝིབྷཱཏཱཡ པན རཏྟིཡཱ པཱཏོཝེཀཾ པུརིསཾ པཀྐོསིཏྭཱ ཨཱཧ – ‘‘གཙྪ བྷཎེ, ཨསུཀཝཱིཐིཡཾ ནཱམ ཡསྨིཾ གེཧེ ཨུམངྒོ བྷིནྣོ, ཏཏྠ ཏཀྐསིལཏོ སིཔྤཾ ཨུགྒཎྷིཏྭཱ ཨཱགཏམཱཎཝོ ཨཏྠི, ཏཾ ཨཱནེཧཱི’’ཏི. སོ གནྟྭཱ ‘‘རཱཛཱ ཏཾ པཀྐོསཏཱི’’ཏི ཝཏྭཱ མཱཎཝཾ ཨཱནེསི. ཨཐ ནཾ རཱཛཱ ཨཱཧ – ‘‘ཏྭཾ, ཏཱཏ, ཏཀྐསིལཏོ སིཔྤཾ ཨུགྒཎྷིཏྭཱ ཨཱགཏམཱཎཝོ’’ཏི? ‘‘ཨཱམ, དེཝཱ’’ཏི. ‘‘ཨམྷཱཀམྤི ཏཾ སིཔྤཾ དེཧཱི’’ཏི. ‘‘སཱདྷུ, དེཝ, སམཱནཱསནེ ནིསཱིདིཏྭཱ གཎྷཱཧཱི’’ཏི. རཱཛཱཔི ཏཐཱ ཀཏྭཱ མནྟཾ གཧེཏྭཱ ‘‘ཨཡཾ ཏེ ཨཱཙརིཡབྷཱགོ’’ཏི སཧསྶཾ ཨདཱསི.

ཏདཱ སེནཱཔཏི རཉྙོ ཀཔྤཀཾ ཨཱཧ – ‘‘ཀདཱ རཉྙོ མསྶུཾ ཀརིསྶསཱི’’ཏི? ‘‘སྭེ ཝཱ པརསུཝེ ཝཱ’’ཏི. སོ ཏསྶ སཧསྶཾ དཏྭཱ ‘‘ཀིཙྩཾ མེ ཨཏྠཱི’’ཏི ཝཏྭཱ, ‘‘ཀིཾ, སཱམཱི’’ཏི ཝུཏྟེ ‘‘རཉྙོ མསྶུཀམྨཾ ཀརོནྟོ ཝིཡ ཧུཏྭཱ ཁུརཾ ཨཏིཝིཡ པཧཾསིཏྭཱ གལནཱལི༹ཾ ཚིནྡ, ཏྭཾ སེནཱཔཏི བྷཝིསྶསི, ཨཧཾ རཱཛཱ’’ཏི. སོ ‘‘སཱདྷཱུ’’ཏི སམྤཊིཙྪིཏྭཱ རཉྙོ མསྶུཀམྨཀརཎདིཝསེ གནྡྷོདཀེན མསྶུཾ ཏེམེཏྭཱ ཁུརཾ པཧཾསིཏྭཱ ནལཱཊནྟེ གཧེཏྭཱ, ‘‘ཁུརོ ཐོཀཾ ཀུཎྛདྷཱརོ, ཨེཀཔྤཧཱརེནེཝ གལནཱལི༹ཾ ཚིནྡིཏུཾ ཝཊྚཏཱི’’ཏི པུན ཨེཀམནྟཾ ཋཏྭཱ ཁུརཾ པཧཾསི. ཏསྨིཾ ཁཎེ རཱཛཱ ཨཏྟནོ མནྟཾ སརིཏྭཱ སཛ྄ཛྷཱཡཾ ཀརོནྟོ ‘‘གྷཊྚེསི གྷཊྚེསི, ཀིཾ ཀཱརཎཱ གྷཊྚེསི? ཨཧམྤི ཏཾ ཛཱནཱམི ཛཱནཱམཱི’’ཏི ཨཱཧ. ནྷཱཔིཏསྶ ནལཱཊཏོ སེདཱ མུཙྩིཾསུ. སོ ‘‘ཛཱནཱཏི མམ ཀཱརཎཾ རཱཛཱ’’ཏི བྷཱིཏོ ཁུརཾ བྷཱུམིཡཾ ཁིཔིཏྭཱ པཱདམཱུལེ ཨུརེན ནིཔཛྫི. རཱཛཱནོ ནཱམ ཚེཀཱ ཧོནྟི, ཏེན ཏཾ ཨེཝམཱཧ – ‘‘ཨརེ, དུཊྛ, ནྷཱཔིཏ, ‘ན མཾ རཱཛཱ ཛཱནཱཏཱི’ཏི སཉྙཾ ཀརོསཱི’’ཏི. ‘‘ཨབྷཡཾ མེ དེཧི, དེཝཱ’’ཏི. ‘‘ཧོཏུ, མཱ བྷཱཡི, ཀཐེཧཱི’’ཏི. སེནཱཔཏི མེ, དེཝ, སཧསྶཾ དཏྭཱ, ‘‘རཉྙོ མསྶུཾ ཀརོནྟོ ཝིཡ གལནཱལི༹ཾ ཚིནྡ, ཨཧཾ རཱཛཱ ཧུཏྭཱ ཏཾ སེནཱཔཏིཾ ཀརིསྶཱམཱི’’ཏི ཨཱཧཱཏི. རཱཛཱ ཏཾ སུཏྭཱ ‘‘ཨཱཙརིཡཾ མེ ནིསྶཱཡ ཛཱིཝིཏཾ ལདྡྷ’’ནྟི ཙིནྟེཏྭཱ སེནཱཔཏིཾ པཀྐོསཱཔེཏྭཱ, ‘‘ཨམྦྷོ, སེནཱཔཏི, ཀིཾ ནཱམ ཏཡཱ མམ སནྟིཀཱ ན ལདྡྷཾ, ཨིདཱནི ཏཾ དཊྛུཾ ན སཀྐོམི, མམ རཊྛཱ ནིཀྑམཱཧཱི’’ཏི ཏཾ རཊྛཱ པབྦཱཛེཏྭཱ ཨཱཙརིཡཾ པཀྐོསཱཔེཏྭཱ, ‘‘ཨཱཙརིཡ, ཏཾ ནིསྶཱཡ མཡཱ ཛཱིཝིཏཾ ལདྡྷ’’ནྟི ཝཏྭཱ མཧནྟཾ སཀྐཱརཾ ཀརིཏྭཱ ཏསྶ སེནཱཔཏིཊྛཱནཾ ཨདཱསི. ‘‘སོ ཏདཱ ཙཱུལ༹པནྠཀོ ཨཧོསི, སཏྠཱ དིསཱཔཱམོཀྑོ ཨཱཙརིཡོ’’ཏི.

སཏྠཱ ཨིམཾ ཨཏཱིཏཾ ཨཱཧརིཏྭཱ, ‘‘ཨེཝཾ, བྷིཀྑཝེ, པུབྦེཔི ཙཱུལ༹པནྠཀོ དནྡྷོཡེཝ ཨཧོསི, ཏདཱཔིསྶཱཧཾ ཨཝསྶཡོ ཧུཏྭཱ ཏཾ ལོཀིཡཀུཊུམྦེ པཏིཊྛཱཔེསི’’ནྟི ཝཏྭཱ པུན ཨེཀདིཝསཾ ‘‘ཨཧོ སཏྠཱ ཙཱུལ༹པནྠཀསྶ ཨཝསྶཡོ ཛཱཏོ’’ཏི ཀཐཱཡ སམུཊྛིཏཱཡ ཙཱུལ༹སེཊྛིཛཱཏཀེ ཨཏཱིཏཝཏྠུཾ ཀཐེཏྭཱ –

‘‘ཨཔྤཀེནཱཔི མེདྷཱཝཱི, པཱབྷཏེན ཝིཙཀྑཎོ;

སམུཊྛཱཔེཏི ཨཏྟཱནཾ, ཨཎུཾ ཨགྒིཾཝ སནྡྷམ’’ནྟི. (ཛཱ. ༡.༡.༤) –

གཱཐཾ ཝཏྭཱ, ‘‘ན, བྷིཀྑཝེ, ཨིདཱནེཝཱཧཾ ཨིམསྶ ཨཝསྶཡོ ཛཱཏོ, པུབྦེཔི ཨཝསྶཡོ ཨཧོསིམེཝ. པུབྦེ པནཱཧཾ ཨིམཾ ལོཀིཡཀུཊུམྦསྶ སཱམིཀཾ ཨཀཱསིཾ, ཨིདཱནི ལོཀུཏྟརཀུཊུམྦསྶ. ཏདཱ ཧི ཙཱུལ༹ནྟེཝཱསིཀོ ཙཱུལ༹པནྠཀོ ཨཧོསི, ཙཱུལ༹སེཊྛི པན པཎྜིཏོ བྱཏྟོ ནཀྑཏྟཀོཝིདོ ཨཧམེཝཱ’’ཏི ཛཱཏཀཾ སམོདྷཱནེསི.

པུནེཀདིཝསཾ དྷམྨསབྷཱཡཾ ཀཐཾ སམུཊྛཱཔེསུཾ, ‘‘ཨཱཝུསོ, ཙཱུལ༹པནྠཀོ ཙཏཱུཧི མཱསེཧི ཙཏུཔྤདཾ གཱཐཾ གཧེཏུཾ ཨསཀྐོནྟོཔི ཝཱིརིཡཾ ཨནོསྶཛྫིཏྭཱཝ ཨརཧཏྟེ པཏིཊྛིཏོ, ཨིདཱནི ལོཀུཏྟརདྷམྨཀུཊུམྦསྶ སཱམིཀོ ཛཱཏོ’’ཏི. སཏྠཱ ཨཱགནྟྭཱ, ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ, ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, མམ སཱསནེ ཨཱརདྡྷཝཱིརིཡོ བྷིཀྑུ ལོཀུཏྟརདྷམྨསྶ སཱམིཀོ ཧོཏིཡེཝཱ’’ཏི ཝཏྭཱ ཨིམཾ གཱཐམཱཧ –

༢༥.

‘‘ཨུཊྛཱནེནཔྤམཱདེན, སཾཡམེན དམེན ཙ;

དཱིཔཾ ཀཡིརཱཐ མེདྷཱཝཱི, ཡཾ ཨོགྷོ ནཱབྷིཀཱིརཏཱི’’ཏི.

ཏཏྠ དཱིཔཾ ཀཡིརཱཐཱཏི ཝཱིརིཡསངྑཱཏེན ཨུཊྛཱནེན, སཏིཡཱ ཨཝིཔྤཝཱསཱཀཱརསངྑཱཏེན ཨཔྤམཱདེན, ཙཏུཔཱརིསུདྡྷིསཱིལསངྑཱཏེན སཾཡམེན, ཨིནྡྲིཡདམེན ཙཱཏི ཨིམེཧི ཀཱརཎབྷཱུཏེཧི ཙཏཱུཧི དྷམྨེཧི དྷམྨོཛཔཉྙཱཡ སམནྣཱགཏོ མེདྷཱཝཱི ཨིམསྨིཾ ཨཏིཝིཡ དུལླབྷཔཏིཊྛཏཱཡ ཨཏིགམྦྷཱིརེ སཾསཱརསཱགརེ ཨཏྟནོ པཏིཊྛཱནབྷཱུཏཾ ཨརཧཏྟཕལཾ དཱིཔཾ ཀཡིརཱཐ ཀརེཡྻ, ཀཱཏུཾ སཀྐུཎེཡྻཱཏི ཨཏྠོ. ཀཱིདིསཾ? ཡཾ ཨོགྷོ ནཱབྷིཀཱིརཏཱིཏི ཡཾ ཙཏུབྦིདྷོཔི ཀིལེསོགྷོ ཨབྷིཀིརིཏུཾ ཝིདྡྷཾསེཏུཾ ན སཀྐོཏི. ན ཧི སཀྐཱ ཨརཧཏྟཾ ཨོགྷེན ཨབྷིཀིརིཏུནྟི.

གཱཐཱཔརིཡོསཱནེ བཧཱུ སོཏཱཔནྣཱདཡོ ཨཧེསུཾ. ཨེཝཾ དེསནཱ སམྤཏྟཔརིསཱཡ སཱཏྠིཀཱ ཛཱཏཱཏི.

ཙཱུལ༹པནྠཀཏྠེརཝཏྠུ ཏཏིཡཾ.

༤. བཱལནཀྑཏྟསངྒྷུཊྛཝཏྠུ

པམཱདམནུཡུཉྫནྟཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ བཱལནཀྑཏྟཾ ཨཱརབྦྷ ཀཐེསི.

ཨེཀསྨིཉྷི སམཡེ སཱཝཏྠིཡཾ བཱལནཀྑཏྟཾ ནཱམ སངྒྷུཊྛཾ. ཏསྨིཾ ནཀྑཏྟེ བཱལཱ དུམྨེདྷིནོ ཛནཱ ཚཱརིཀཱཡ ཙེཝ གོམཡེན ཙ སརཱིརཾ མཀྑེཏྭཱ སཏྟཱཧཾ ཨསབྦྷཾ བྷཎནྟཱ ཝིཙརནྟི. ཀིཉྩི ཉཱཏི སུཧཛྫཾ ཝཱ པབྦཛིཏཾ ཝཱ དིསྭཱ ལཛྫནྟཱ ནཱམ ནཏྠི. དྭཱརེ དྭཱརེ ཋཏྭཱ ཨསབྦྷཾ བྷཎནྟི. མནུསྶཱ ཏེསཾ ཨསབྦྷཾ སོཏུཾ ཨསཀྐོནྟཱ ཡཐཱབལཾ ཨཌྜྷཾ ཝཱ པཱདཾ ཝཱ ཀཧཱཔཎཾ ཝཱ པེསེནྟི. ཏེ ཏེསཾ དྭཱརེ ལདྡྷཾ ལདྡྷཾ གཧེཏྭཱ པཀྐམནྟི. ཏདཱ པན སཱཝཏྠིཡཾ པཉྩ ཀོཊིམཏྟཱ ཨརིཡསཱཝཀཱ ཝསནྟི, ཏེ སཏྠུ སནྟིཀཾ སཱསནཾ པེསཡིཾསུ – ‘‘བྷགཝཱ, བྷནྟེ, སཏྟཱཧཾ བྷིཀྑུསངྒྷེན སདྡྷིཾ ནགརཾ ཨཔྤཝིསིཏྭཱ ཝིཧཱརེཡེཝ ཧོཏཱུ’’ཏི. ཏཉྩ པན སཏྟཱཧཾ བྷིཀྑུསངྒྷསྶ ཝིཧཱརེཡེཝ ཡཱགུབྷཏྟཱདཱིནི སམྤཱདེཏྭཱ པཧིཎིཾསུ, སཡམྤི གེཧཱ ན ནིཀྑམིཾསུ. ཏེ ནཀྑཏྟེ པན པརིཡོསིཏེ ཨཊྛམེ དིཝསེ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ ནགརཾ པཝེསེཏྭཱ མཧཱདཱནཾ དཏྭཱ ཨེཀམནྟཾ ནིསིནྣཱ, ‘‘བྷནྟེ, ཨཏིདུཀྑེན ནོ སཏྟ དིཝསཱནི ཨཏིཀྐནྟཱནི, བཱལཱནཾ ཨསབྦྷཱནི སུཎནྟཱནཾ ཀཎྞཱ བྷིཛྫནཱཀཱརཔྤཏྟཱ ཧོནྟི, ཀོཙི ཀསྶཙི ན ལཛྫཏི, ཏེན མཡཾ ཏུམྷཱཀཾ ཨནྟོནགརཾ པཝིསིཏུཾ ནཱདམྷ, མཡམྤི གེཧཏོ ན ནིཀྑམིམྷཱ’’ཏི ཨཱཧཾསུ. སཏྠཱ ཏེསཾ ཀཐཾ སུཏྭཱ, ‘‘བཱལཱནཾ དུམྨེདྷཱནཾ ཀིརིཡཱ ནཱམ ཨེཝརཱུཔཱ ཧོཏི, མེདྷཱཝིནོ པན དྷནསཱརཾ ཝིཡ ཨཔྤམཱདཾ རཀྑིཏྭཱ ཨམཏམཧཱནིབྦཱནསམྤཏྟིཾ པཱཔུཎནྟཱི’’ཏི ཝཏྭཱ ཨིམཱ གཱཐཱ ཨབྷཱསི –

༢༦.

‘‘པམཱདམནུཡུཉྫནྟི, བཱལཱ དུམྨེདྷིནོ ཛནཱ;

ཨཔྤམཱདཉྩ མེདྷཱཝཱི, དྷནཾ སེཊྛཾཝ རཀྑཏི.

༢༧.

‘‘མཱ པམཱདམནུཡུཉྫེཐ, མཱ ཀཱམརཏིསནྠཝཾ;

ཨཔྤམཏྟོ ཧི ཛྷཱཡནྟོ, པཔྤོཏི ཝིཔུལཾ སུཁ’’ནྟི.

ཏཏྠ བཱལཱཏི བཱལྱེན སམནྣཱགཏཱ ཨིདྷལོཀཔརལོཀཏྠཾ ཨཛཱནནྟཱ. དུམྨེདྷིནོཏི ནིཔྤཉྙཱ. ཏེ པམཱདེ ཨཱདཱིནཝཾ ཨཔསྶནྟཱ པམཱདཾ ཨནུཡུཉྫནྟི པཝཏྟེནྟི, པམཱདེན ཀཱལཾ ཝཱིཏིནཱམེནྟི. མེདྷཱཝཱིཏི དྷམྨོཛཔཉྙཱཡ སམནྣཱགཏོ པན པཎྜིཏོ ཀུལཝཾསཱགཏཾ སེཊྛཾ ཨུཏྟམཾ སཏྟརཏནདྷནཾ ཝིཡ ཨཔྤམཱདཾ རཀྑཏི. ཡཐཱ ཧི ཨུཏྟམཾ དྷནཾ ནིསྶཱཡ ‘‘ཀཱམགུཎསམྤཏྟིཾ པཱཔུཎིསྶཱམ, པུཏྟདཱརཾ པོསེསྶཱམ, པརལོཀགམནམགྒཾ སོདྷེསྶཱམཱ’’ཏི དྷནེ ཨཱནིསཾསཾ པསྶནྟཱ ཏཾ རཀྑནྟི, ཨེཝཾ པཎྜིཏོཔི ཨཔྤམཏྟོ ‘‘པཋམཛ྄ཛྷཱནཱདཱིནི པཊིལབྷིསྶཱམི, མགྒཕལཱདཱིནི པཱཔུཎིསྶཱམི, ཏིསྶོ ཝིཛྫཱ, ཚ ཨབྷིཉྙཱ སམྤཱདེསྶཱམཱི’’ཏི ཨཔྤམཱདེ ཨཱནིསཾསཾ པསྶནྟོ དྷནཾ སེཊྛཾཝ ཨཔྤམཱདཾ རཀྑཏཱིཏི ཨཏྠོ. མཱ པམཱདནྟི ཏསྨཱ ཏུམྷེ མཱ པམཱདམནུཡུཉྫེཐ མཱ པམཱདེན ཀཱལཾ ཝཱིཏིནཱམཡིཏྠ. མཱ ཀཱམརཏིསནྠཝནྟི ཝཏྠུཀཱམཀིལེསཀཱམེསུ རཏིསངྑཱཏཾ ཏཎྷཱསནྠཝམྤི མཱ ཨནུཡུཉྫེཐ མཱ ཙིནྟཡིཏྠ མཱ པཊིལབྷིཏྠ. ཨཔྤམཏྟོ ཧཱིཏི ཨུཔཊྛིཏསྶཏིཏཱཡ ཧི ཨཔྤམཏྟོ ཛྷཱཡནྟོ པུགྒལོ ཝིཔུལཾ ཨུལཱ༹རཾ ནིབྦཱནསུཁཾ པཱཔུཎཱཏཱིཏི.

གཱཐཱཔརིཡོསཱནེ བཧཱུ སོཏཱཔནྣཱདཡོ ཨཧེསུཾ. མཧཱཛནསྶ སཱཏྠིཀཱ དྷམྨདེསནཱ ཛཱཏཱཏི.

བཱལནཀྑཏྟསངྒྷུཊྛཝཏྠུ ཙཏུཏྠཾ.

༥. མཧཱཀསྶཔཏྠེརཝཏྠུ

པམཱདཾ ཨཔྤམཱདེནཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཧཱཀསྶཔཏྠེརཾ ཨཱརབྦྷ ཀཐེསི.

ཨེཀསྨིཉྷི དིཝསེ ཐེརོ པིཔྥལིགུཧཱཡཾ ཝིཧརནྟོ རཱཛགཧེ པིཎྜཱཡ ཙརིཏྭཱ པཙྪཱབྷཏྟཾ པིཎྜཔཱཏཔཊིཀྐནྟོ ཨཱལོཀཾ ཝཌྜྷེཏྭཱ པམཏྟེ ཙ ཨཔྤམཏྟེ ཙ ཨུདཀཔཐཝཱིཔབྦཏཱདཱིསུ ཙཝནཀེ ཨུཔཔཛྫནཀེ ཙ སཏྟེ དིབྦེན ཙཀྑུནཱ ཨོལོཀེནྟོ ནིསཱིདི. སཏྠཱ ཛེཏཝནེ ནིསིནྣཀོཝ ‘‘ཀེན ནུ ཁོ ཝིཧཱརེན ཨཛྫ མམ པུཏྟོ ཀསྶཔོ ཝིཧརཏཱི’’ཏི དིབྦེན ཙཀྑུནཱ ཨུཔདྷཱརེནྟོ ‘‘སཏྟཱནཾ ཙུཏཱུཔཔཱཏཾ ཨོལོཀེནྟོ ཝིཧརཏཱི’’ཏི ཉཏྭཱ ‘‘སཏྟཱནཾ ཙུཏཱུཔཔཱཏོ ནཱམ བུདྡྷཉཱཎེནཔི ཨཔརིཙྪིནྣོ, མཱཏུཀུཙྪིཡཾ པཊིསནྡྷིཾ གཧེཏྭཱ མཱཏཱཔིཏརོ ཨཛཱནཱཔེཏྭཱ ཙཝནསཏྟཱནཾ པརིཙྪེདོ ཀཱཏུཾ ན སཀྐཱ, ཏེ ཛཱནིཏུཾ ཏཝ ཨཝིསཡོ, ཀསྶཔ, ཨཔྤམཏྟཀོ ཏཝ ཝིསཡོ, སབྦསོ པན ཙཝནྟེ ཙ ཨུཔཔཛྫནྟེ ཙ ཛཱནིཏུཾ པསྶིཏུཾ བུདྡྷཱནམེཝ ཝིསཡོ’’ཏི ཝཏྭཱ ཨོབྷཱསཾ ཕརིཏྭཱ སམྨུཁེ ནིསིནྣོ ཝིཡ ཧུཏྭཱ ཨིམཾ གཱཐམཱཧ –

༢༨.

‘‘པམཱདཾ ཨཔྤམཱདེན, ཡདཱ ནུདཏི པཎྜིཏོ;

པཉྙཱཔཱསཱདམཱརུཡ྄ཧ, ཨསོཀོ སོཀིནིཾ པཛཾ;

པབྦཏཊྛོཝ བྷཱུམཊྛེ, དྷཱིརོ བཱལེ ཨཝེཀྑཏཱི’’ཏི.

ཏཏྠ ནུདཏཱིཏི ཡཐཱ ནཱམ པོཀྑརཎིཾ པཝིསནྟཾ ནཝོདཀཾ པུརཱཎོདཀཾ ཁོབྷེཏྭཱ ཏསྶོཀཱསཾ ཨདཏྭཱ ཏཾ ཨཏྟནོ མཏྠཀམཏྠཀེན པལཱཡནྟཾ ནུདཏི ནཱིཧརཏི, ཨེཝམེཝ པཎྜིཏོ ཨཔྤམཱདལཀྑཎཾ བྲཱུཧེནྟོ པམཱདསྶོཀཱསཾ ཨདཏྭཱ ཡདཱ ཨཔྤམཱདཝེགེན ཏཾ ནུདཏི ནཱིཧརཏི, ཨཐ སོ པནུནྣཔམཱདོ ཨཙྩུགྒཏཏྠེན པརིསུདྡྷཾ དིབྦཙཀྑུསངྑཱཏཾ པཉྙཱཔཱསཱདཾ ཏསྶ ཨནུཙྪཝིཀཾ པཊིཔདཾ པཱུརེནྟོ ཏཱཡ པཊིཔདཱཡ ནིསྶེཎིཡཱ པཱསཱདཾ ཝིཡ ཨཱརུཡ྄ཧ པཧཱིནསོཀསལླཏཱཡ ཨསོཀོ, ཨཔྤཧཱིནསོཀསལླཏཱཡ སོཀིནིཾ པཛཾ སཏྟནིཀཱཡཾ ཙཝམཱནཉྩེཝ ཨུཔཔཛྫམཱནཉྩ དིབྦཙཀྑུནཱ ཨཝེཀྑཏི པསྶཏི. ཡཐཱ ཀིཾ? པབྦཏཊྛོཝ བྷཱུམཊྛེཏི པབྦཏམུདྡྷནི ཋིཏོ བྷཱུམིཡཾ ཋིཏེ, ཨུཔརིཔཱསཱདེ ཝཱ པན ཋིཏོ པཱསཱདཔརིཝེཎེ ཋིཏེ ཨཀིཙྪེན ཨཝེཀྑཏི, ཏཐཱ སོཔི དྷཱིརོ པཎྜིཏོ མཧཱཁཱིཎཱསཝོ ཨསམུཙྪིནྣཝཊྚབཱིཛེ བཱལེ ཙཝནྟེ ཙ ཨུཔཔཛྫནྟེ ཙ ཨཀིཙྪེན ཨཝེཀྑཏཱིཏི.

གཱཐཱཔརིཡོསཱནེ བཧཱུ སོཏཱཔཏྟིཕལཱདཱིནི སཙྪིཀརིཾསཱུཏི.

མཧཱཀསྶཔཏྠེརཝཏྠུ པཉྩམཾ.

༦. པམཏྟཱཔམཏྟདྭེསཧཱཡཀཝཏྠུ

ཨཔྤམཏྟོ པམཏྟེསཱུཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ དྭེ སཧཱཡཀེ བྷིཀྑཱུ ཨཱརབྦྷ ཀཐེསི.

ཏེ ཀིར སཏྠུ སནྟིཀེ ཀམྨཊྛཱནཾ གཧེཏྭཱ ཨཱརཉྙཀཝིཧཱརཾ པཝིསིཾསུ. ཏེསུ ཨེཀོ ཀིར ཀཱལསྶེཝ དཱརཱུནི ཨཱཧརིཏྭཱ ཨངྒཱརཀཔལླཾ སཛྫེཏྭཱ དཧརསཱམཎེརེཧི སདྡྷིཾ སལླཔནྟོ པཋམཡཱམཾ ཝིསིབྦམཱནོ ནིསཱིདཏི. ཨེཀོ ཨཔྤམཏྟོ སམཎདྷམྨཾ ཀརོནྟོ ཨིཏརཾ ཨོཝདཏི, ‘‘ཨཱཝུསོ, མཱ ཨེཝཾ ཀརི, པམཏྟསྶ ཧི ཙཏྟཱརོ ཨཔཱཡཱ སཀགྷརསདིསཱ. བུདྡྷཱ ནཱམ སཱཋེཡྻེན ཨཱརཱདྷེཏུཾ ན སཀྐཱ’’ཏི སོ ཏསྶོཝཱདཾ ན སུཎཱཏི. ཨིཏརོ ‘‘ནཱཡཾ ཝཙནཀྑམོ’’ཏི ཏཾ ཨཝཏྭཱ ཨཔྤམཏྟོཝ སམཎདྷམྨམཀཱསི. ཨལསཏྠེརོཔི པཋམཡཱམེ ཝིསིབྦེཏྭཱ ཨིཏརསྶ ཙངྐམིཏྭཱ གབྦྷཾ པཝིཊྛཀཱལེ པཝིསིཏྭཱ, ‘‘མཧཱཀུསཱིཏ, ཏྭཾ ནིཔཛྫིཏྭཱ སཡནཏྠཱཡ ཨརཉྙཾ པཝིཊྛོསི, ཀིཾ བུདྡྷཱནཾ སནྟིཀེ ཀམྨཊྛཱནཾ གཧེཏྭཱ ཨུཊྛཱཡ སམཎདྷམྨཾ ཀཱཏུཾ ཝཊྚཏཱི’’ཏི ཝཏྭཱ ཨཏྟནོ ཝསནཊྛཱནཾ པཝིསིཏྭཱ ནིཔཛྫིཏྭཱ སུཔཏི. ཨིཏརོཔི མཛ྄ཛྷིམཡཱམེ ཝིསྶམིཏྭཱ པཙྪིམཡཱམེ པཙྩུཊྛཱཡ སམཎདྷམྨཾ ཀརོཏི. སོ ཨེཝཾ ཨཔྤམཏྟོ ཝིཧརནྟོ ན ཙིརསྶེཝ སཧ པཊིསམྦྷིདཱཧི ཨརཧཏྟཾ པཱཔུཎི. ཨིཏརོ པམཱདེནེཝ ཀཱལཾ ཝཱིཏིནཱམེསི. ཏེ ཝུཊྛཝསྶཱ སཏྠུ སནྟིཀཾ གནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདིཾསུ. སཏྠཱ ཏེཧི སདྡྷིཾ པཊིསནྠཱརཾ ཀཏྭཱ, ‘‘ཀཙྩི, བྷིཀྑཝེ, ཨཔྤམཏྟཱ སམཎདྷམྨཾ ཀརིཏྠ, ཀཙྩི ཝོ པབྦཛིཏཀིཙྩཾ མཏྠཀཾ པཏྟ’’ནྟི པུཙྪི. པཋམཾ པམཏྟོ བྷིཀྑུ ཨཱཧ – ‘‘ཀུཏོ, བྷནྟེ, ཨེཏསྶ ཨཔྤམཱདོ, གཏཀཱལཏོ པཊྛཱཡ ནིཔཛྫིཏྭཱ ནིདྡཱཡནྟོ ཀཱལཾ ཝཱིཏིནཱམེསཱི’’ཏི. ‘‘ཏྭཾ པན བྷིཀྑཱུ’’ཏི. ‘‘ཨཧཾ, བྷནྟེ, ཀཱལསྶེཝ དཱརཱུནི ཨཱཧརིཏྭཱ ཨངྒཱརཀཔལླཾ སཛྫེཏྭཱ པཋམཡཱམེ ཝིསིབྦེནྟོ ནིསཱིདིཏྭཱ ཨནིདྡཱཡནྟོཝ ཀཱལཾ ཝཱིཏིནཱམེསི’’ནྟི. ཨཐ ནཾ སཏྠཱ ‘‘ཏྭཾ པམཏྟོ ཀཱལཾ ཝཱིཏིནཱམེཏྭཱ ‘ཨཔྤམཏྟོམྷཱི’ཏི ཝདསི, ཨཔྤམཏྟཾ པན པམཏྟཾ ཀརོསཱི’’ཏི ཨཱཧ. པུན པམཱདེ དོསེ, ཨཔྤམཱདེ ཨཱནིསཾསེ པཀཱསེཏུཾ, ‘‘ཏྭཾ མམ པུཏྟསྶ སནྟིཀེ ཛཝཙྪིནྣོ དུབྦལསྶོ ཝིཡ, ཨེས པན ཏཝ སནྟིཀེ སཱིགྷཛཝསྶོ ཝིཡཱ’’ཏི ཝཏྭཱ ཨིམཾ གཱཐམཱཧ –

༢༩.

‘‘ཨཔྤམཏྟོ པམཏྟེསུ, སུཏྟེསུ བཧུཛཱགརོ;

ཨབལསྶཾཝ སཱིགྷསྶོ, ཧིཏྭཱ ཡཱཏི སུམེདྷསོ’’ཏི.

ཏཏྠ ཨཔྤམཏྟོཏི སཏིཝེཔུལླཔྤཏྟཏཱཡ ཨཔྤམཱདསམྤནྣེ ཁཱིཎཱསཝོ. པམཏྟེསཱུཏི སཏིཝོསགྒེ ཋིཏེསུ སཏྟེསུ. སུཏྟེསཱུཏི སཏིཛཱགརིཡཱབྷཱཝེན སབྦིརིཡཱཔཐེསུ ནིདྡཱཡནྟེསུ. བཧུཛཱགརོཏི མཧནྟེ སཏིཝེཔུལླེ ཛཱགརིཡེ ཋིཏོ. ཨབལསྶཾཝཱཏི ཀུཎྛཔཱདཾ ཚིནྣཛཝཾ དུབྦལསྶཾ སཱིགྷཛཝོ སིནྡྷཝཱཛཱནཱིཡོ ཝིཡ. སུམེདྷསོཏི ཨུཏྟམཔཉྙོ. ཏཐཱརཱུཔཾ པུགྒལཾ ཨཱགམེནཔི ཨདྷིགམེནཔི ཧིཏྭཱ ཡཱཏི. མནྡཔཉྙསྨིཉྷི ཨེཀཾ སུཏྟཾ གཧེཏུཾ ཝཱཡམནྟེཡེཝ སུམེདྷསོ ཨེཀཾ ཝགྒཾ གཎྷཱཏི, ཨེཝཾ ཏཱཝ ཨཱགམེན ཧིཏྭཱ ཡཱཏི. མནྡཔཉྙེ པན རཏྟིཊྛཱནདིཝཱཊྛཱནཱནི ཀཱཏུཾ ཝཱཡམནྟེཡེཝ ཀམྨཊྛཱནཾ ཨུགྒཧེཏྭཱ སཛ྄ཛྷཱཡནྟེཡེཝ ཙ སུམེདྷསོ པུབྦབྷཱགེཔི པརེན ཀཏཾ རཏྟིཊྛཱནཾ ཝཱ དིཝཱཊྛཱནཾ ཝཱ པཝིསིཏྭཱ ཀམྨཊྛཱནཾ སམྨསནྟོ སབྦཀིལེསེ ཁེཔེཏྭཱ ནེཝ ལོཀུཏྟརདྷམྨེ ཧཏྠགཏེ ཀརོཏི, ཨེཝཾ ཨདྷིགམེནཔི ཧིཏྭཱ ཡཱཏི. ཝཊྚེ པན ནཾ ཧིཏྭཱ ཚཌྜེཏྭཱ ཝཊྚཏོ ནིསྶརནྟོ ཡཱཏིཡེཝཱཏི.

གཱཐཱཔརིཡོསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པམཏྟཱཔམཏྟདྭེསཧཱཡཀཝཏྠུ ཚཊྛཾ.

༧. མགྷཝཏྠུ

ཨཔྤམཱདེན མགྷཝཱཏི ཨིམཾ དྷམྨདེསནཾ སཏྠཱ ཝེསཱལིཡཾ ཨུཔནིསྶཱཡ ཀཱུཊཱགཱརསཱལཱཡཾ ཝིཧརནྟོ སཀྐཾ དེཝརཱཛཱནཾ ཨཱརབྦྷ ཀཐེསི.

ཝེསཱལིཡཉྷི མཧཱལི ནཱམ ལིཙྪཝཱི ཝསཏི, སོ ཏཐཱགཏསྶ སཀྐཔཉྷསུཏྟནྟདེསནཾ (དཱི. ནི. ༢.༣༤༤ ཨཱདཡོ) སུཏྭཱ ‘‘སམྨཱསམྦུདྡྷོ སཀྐསམྤཏྟིཾ མཧཏིཾ ཀཏྭཱ ཀཐེསི, ‘དིསྭཱ ནུ ཁོ ཀཐེསི, ཨུདཱཧུ ཨདིསྭཱ. ཛཱནཱཏི ནུ ཁོ སཀྐཾ, ཨུདཱཧུ ནོ’ཏི པུཙྪིསྶཱམི ན’’ནྟི ཙིནྟེསི. ཨཐ ཁོ, མཧཱལི, ལིཙྪཝཱི ཡེན བྷགཝཱ ཏེནུཔསངྐམི, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི, ཨེཀམནྟཾ ནིསིནྣོ ཁོ, མཧཱལི, ལིཙྪཝཱི བྷགཝནྟཾ ཨེཏདཝོཙ – ‘‘དིཊྛོ ཁོ, བྷནྟེ, བྷགཝཏཱ སཀྐོ དེཝཱནམིནྡོ’’ཏི? ‘‘དིཊྛོ ཁོ མེ, མཧཱལི, སཀྐོ དེཝཱནམིནྡོ’’ཏི. ‘‘སོ ཧི ནུན, བྷནྟེ, སཀྐཔཏིརཱུཔཀོ བྷཝིསྶཏི. དུདྡསོ ཧི, བྷནྟེ, སཀྐོ དེཝཱནམིནྡོ’’ཏི. ‘‘སཀྐཉྩ ཁྭཱཧཾ, མཧཱལི, པཛཱནཱམི སཀྐཀརཎེ ཙ དྷམྨེ, ཡེསཾ དྷམྨཱནཾ སམཱདིནྣཏྟཱ སཀྐོ སཀྐཏྟཾ ཨཛ྄ཛྷགཱ, ཏཉྩ པཛཱནཱམི’’.

སཀྐོ, མཧཱལི, དེཝཱནམིནྡོ པུབྦེ མནུསྶབྷཱུཏོ སམཱནོ མགྷོ ནཱམ མཱཎཝོ ཨཧོསི, ཏསྨཱ ‘‘མགྷཝཱ’’ཏི ཝུཙྩཏི.

སཀྐོ, མཧཱལི, དེཝཱནམིནྡོ པུབྦེ མནུསྶབྷཱུཏོ སམཱནོ པུརེ དཱནཾ ཨདཱསི, ཏསྨཱ ‘‘པུརིནྡདོ’’ཏི ཝུཙྩཏི.

སཀྐོ, མཧཱལི, དེཝཱནམིནྡོ པུབྦེ མནུསྶབྷཱུཏོ སམཱནོ སཀྐཙྩཾ དཱནཾ ཨདཱསི, ཏསྨཱ ‘‘སཀྐོ’’ཏི ཝུཙྩཏི.

སཀྐོ, མཧཱལི, དེཝཱནམིནྡོ པུབྦེ མནུསྶབྷཱུཏོ སམཱནོ ཨཱཝསཐཾ ཨདཱསི, ཏསྨཱ ‘‘ཝཱསཝོ’’ཏི ཝུཙྩཏི.

སཀྐོ, མཧཱལི, དེཝཱནམིནྡོ སཧསྶམྤི ཨཏྠཾ མུཧུཏྟེན ཙིནྟེཏི, ཏསྨཱ ‘‘སཧསྶཀྑོ’’ཏི ཝུཙྩཏི.

སཀྐསྶ, མཧཱལི, དེཝཱནམིནྡསྶ སུཛཱ ནཱམ ཨསུརཀཉྙཱ, པཛཱཔཏི, ཏསྨཱ ‘‘སུཛམྤཏཱི’’ཏི ཝུཙྩཏི.

སཀྐོ, མཧཱལི, དེཝཱནམིནྡོ དེཝཱནཾ ཏཱཝཏིཾསཱནཾ ཨིསྶརིཡཱདྷིཔཙྩཾ རཛྫཾ ཀཱརེཏི, ཏསྨཱ ‘‘དེཝཱནམིནྡོ’’ཏི ཝུཙྩཏི.

སཀྐསྶ, མཧཱལི, དེཝཱནམིནྡསྶ པུབྦེ མནུསྶབྷཱུཏསྶ སཏྟ ཝཏཔདཱནི སམཏྟཱནི སམཱདིནྣཱནི ཨཧེསུཾ, ཡེསཾ སམཱདིནྣཏྟཱ སཀྐོ སཀྐཏྟཾ ཨཛ྄ཛྷགཱ. ཀཏམཱནི སཏྟ ཝཏཔདཱནི? ཡཱཝཛཱིཝཾ མཱཏཱཔེཏྟིབྷརོ ཨསྶཾ, ཡཱཝཛཱིཝཾ ཀུལེ ཛེཊྛཱཔཙཱཡཱི ཨསྶཾ, ཡཱཝཛཱིཝཾ སཎྷཝཱཙོ ཨསྶཾ, ཡཱཝཛཱིཝཾ ཨཔིསུཎཝཱཙོ ཨསྶཾ, ཡཱཝཛཱིཝཾ ཝིགཏམལམཙྪེརེན ཙེཏསཱ ཨགཱརཾ ཨཛ྄ཛྷཱཝསེཡྻཾ, མུཏྟཙཱགོ པཡཏཔཱཎི ཝོསགྒརཏོ ཡཱཙཡོགོ དཱནསཾཝིབྷཱགརཏོ ཨསྶཾ. ཡཱཝཛཱིཝཾ སཙྩཝཱཙོ ཨསྶཾ, ཡཱཝཛཱིཝཾ ཨཀྐོདྷནོ ཨསྶཾ, ‘‘སཙེཔི མེ ཀོདྷོ ཨུཔྤཛྫེཡྻ, ཁིཔྤམེཝ ན པཊིཝིནེཡྻ’’ནྟི. སཀྐསྶ, མཧཱལི, དེཝཱནམིནྡསྶ པུབྦེ མནུསྶབྷཱུཏསྶ ཨིམཱནི སཏྟ ཝཏཔདཱནི སམཏྟཱནི སམཱདིནྣཱནི ཨཧེསུཾ, ཡེསཾ སམཱདིནྣཏྟཱ སཀྐོ སཀྐཏྟཾ ཨཛ྄ཛྷགཱཏི.

‘‘མཱཏཱཔེཏྟིབྷརཾ ཛནྟུཾ, ཀུལེ ཛེཊྛཱཔཙཱཡིནཾ;

སཎྷཾ སཁིལསམྦྷཱསཾ, པེསུཎེཡྻཔྤཧཱཡིནཾ.

‘‘མཙྪེརཝིནཡེ ཡུཏྟཾ, སཙྩཾ ཀོདྷཱབྷིབྷུཾ ནརཾ;

ཏཾ ཝེ དེཝཱ ཏཱཝཏིཾསཱ, ཨཱཧུ སཔྤུརིསོ ཨིཏཱི’’ཏི. (སཾ. ནི. ༡.༢༥༧) –

ཨིདཾ, མཧཱལི, སཀྐེན མགྷམཱཎཝཀཱལེ ཀཏཀམྨནྟི ཝཏྭཱ པུན ཏེན ‘‘ཀཐཾ, བྷནྟེ, མགྷམཱཎཝོ པཊིཔཛྫཱི’’ཏི? ཏསྶ པཊིཔཏྟིཾ ཝིཏྠཱརཏོ སོཏུཀཱམེན པུཊྛོ ‘‘ཏེན ཧི, མཧཱལི, སུཎཱཧཱི’’ཏི ཝཏྭཱ ཨཏཱིཏཾ ཨཱཧརི –

ཨཏཱིཏེ མགདྷརཊྛེ མཙལགཱམེ མགྷོ ནཱམ མཱཎཝོ གཱམཀམྨཀརཎཊྛཱནཾ གནྟྭཱ ཨཏྟནོ ཋིཏཊྛཱནཾ པཱདནྟེན པཾསུཾ ཝིཡཱུཧིཏྭཱ རམཎཱིཡཾ ཀཏྭཱ ཨཊྛཱསི. ཨཔརོ ཏཾ བཱཧུནཱ པཧརིཏྭཱ ཏཏོ ཨཔནེཏྭཱ སཡཾ ཏཏྠ ཨཊྛཱསི. སོ ཏསྶ ཨཀུཛ྄ཛྷིཏྭཱཝ ཨཉྙཾ ཋཱནཾ རམཎཱིཡཾ ཀཏྭཱ ཋིཏོ. ཏཏོཔི ནཾ ཨཉྙོ ཨཱགནྟྭཱ བཱཧུནཱ པཧརིཏྭཱ ཨཔནེཏྭཱ སཡཾ ཨཊྛཱསི. སོ ཏསྶཔི ཨཀུཛ྄ཛྷིཏྭཱཝ ཨཉྙཾ ཋཱནཾ རམཎཱིཡཾ ཀཏྭཱ ཋིཏོ, ཨིཏི ཏཾ གེཧཏོ ནིཀྑནྟཱ ནིཀྑནྟཱ པུརིསཱ བཱཧུནཱ པཧརིཏྭཱ ཋིཏཋིཏཊྛཱནཏོ ཨཔནེསུཾ. སོ ‘‘སབྦེཔེཏེ མཾ ནིསྶཱཡ སུཁིཏཱ ཛཱཏཱ, ཨིམིནཱ ཀམྨེན མཡ྄ཧཾ སུཁདཱཡཀེན པུཉྙཀམྨེན བྷཝིཏབྦ’’ནྟི ཙིནྟེཏྭཱ, པུནདིཝསེ ཀུདཱལཾ ཨཱདཱཡ ཁལམཎྜལམཏྟཾ ཋཱནཾ རམཎཱིཡཾ ཨཀཱསི. སབྦེ གནྟྭཱ ཏཏྠེཝ ཨཊྛཾསུ. ཨཐ ནེསཾ སཱིཏསམཡེ ཨགྒིཾ ཀཏྭཱ ཨདཱསི, གིམྷཀཱལེ ཨུདཀཾ. ཏཏོ ‘‘རམཎཱིཡཾ ཋཱནཾ ནཱམ སབྦེསཾ པིཡཾ, ཀསྶཙི ཨཔྤིཡཾ ནཱམ ནཏྠི, ཨིཏོ པཊྛཱཡ མཡཱ མགྒཾ སམཾ ཀརོནྟེན ཝིཙརིཏུཾ ཝཊྚཏཱི’’ཏི ཙིནྟེཏྭཱ, པཱཏོཝ ནིཀྑམིཏྭཱ, མགྒཾ སམཾ ཀརོནྟོ ཚིནྡིཏྭཱ, ཧརིཏབྦཡུཏྟཀཱ རུཀྑསཱཁཱ ཧརནྟོ ཝིཙརཏི. ཨཐ ནཾ ཨཔརོ དིསྭཱ ཨཱཧ – ‘‘སམྨ, ཀིཾ ཀརོསཱི’’ཏི? ‘‘མཡ྄ཧཾ སགྒགཱམིནཾ མགྒཾ ཀརོམི, སམྨཱ’’ཏི. ‘‘ཏེན ཧི ཨཧམྤི ཏེ སཧཱཡོ ཧོམཱི’’ཏི. ‘‘ཧོཧི, སམྨ, སགྒོ ནཱམ བཧཱུནམྤི མནཱཔོ སུཁབཧུལོ’’ཏི. ཏཏོ པཊྛཱཡ དྭེ ཛནཱ ཨཧེསུཾ. ཏེ དིསྭཱ ཏཐེཝ པུཙྪིཏྭཱ ཙ སུཏྭཱ ཙ ཨཔརོཔི ཏེསཾ སཧཱཡོ ཛཱཏོ, ཨེཝཾ ཨཔརོཔི ཨཔརོཔཱིཏི སབྦེཔི ཏེཏྟིཾས ཛནཱ ཛཱཏཱ. ཏེ སབྦེཔི ཀུདཱལཱདིཧཏྠཱ མགྒཾ སམཾ ཀརོནྟཱ ཨེཀཡོཛནདྭིཡོཛནམཏྟཊྛཱནཾ གཙྪནྟི.

ཏེ དིསྭཱ གཱམབྷོཛཀོ ཙིནྟེསི – ‘‘ཨིམེ མནུསྶཱ ཨཡོགེ ཡུཏྟཱ, སཙེ ཨིམེ ཨརཉྙཏོ མཙྪམཾསཱདཱིནི ཝཱ ཨཱཧརེཡྻུཾ. སུརཾ ཝཱ ཀཏྭཱ པིཝེཡྻུཾ, ཨཉྙཾ ཝཱ ཏཱདིསཾ ཀམྨཾ ཀརེཡྻུཾ, ཨཧམྤི ཀིཉྩི ཀིཉྩི ལབྷེཡྻ’’ནྟི. ཨཐ ནེ པཀྐོསཱཔེཏྭཱ པུཙྪི – ‘‘ཀིཾ ཀརོནྟཱ ཝིཙརཐཱ’’ཏི? ‘‘སགྒམགྒཾ, སཱམཱི’’ཏི. ‘‘གྷརཱཝཱསཾ ཝསནྟེཧི ནཱམ ཨེཝཾ ཀཱཏུཾ ན ཝཊྚཏི, ཨརཉྙཏོ མཙྪམཾསཱདཱིནི ཨཱཧརིཏུཾ, སུརཾ ཀཏྭཱ པཱཏུཾ, ནཱནཔྤཀཱརེ ཙ ཀམྨནྟེ ཀཱཏུཾ ཝཊྚཏཱི’’ཏི. ཏེ ཏསྶ ཝཙནཾ པཊིཀྑིཔིཾསུ, ཨེཝཾ པུནཔྤུནཾ ཝུཙྩམཱནཱཔི པཊིཀྑིཔིཾསུཡེཝ. སོ ཀུཛ྄ཛྷིཏྭཱ ‘‘ནཱསེསྶཱམི ནེ’’ཏི རཉྙོ སནྟིཀཾ གནྟྭཱ, ‘‘ཙོརེ ཏེ, དེཝ, ཝགྒབནྡྷནེན ཝིཙརནྟེ པསྶཱམཱི’’ཏི ཝཏྭཱ, ‘‘གཙྪ, ཏེ གཧེཏྭཱ ཨཱནེཧཱི’’ཏི ཝུཏྟེ ཏཐཱ ཀཏྭཱ སབྦེ ཏེ བནྡྷིཏྭཱ ཨཱནེཏྭཱ རཉྙོ དསྶེསི. རཱཛཱ ཨཝཱིམཾསིཏྭཱཝ ‘‘ཧཏྠིནཱ མདྡཱཔེཐཱ’’ཏི ཨཱཎཱཔེསི. མགྷོ སེསཱནཾ ཨོཝཱདམདཱསི – ‘‘སམྨཱ, ཋཔེཏྭཱ མེཏྟཾ ཨཉྙོ ཨམྷཱཀཾ ཨཝསྶཡོ ནཏྠི, ཏུམྷེ ཀཏྠཙི ཀོཔཾ ཨཀཏྭཱ རཉྙེ ཙ གཱམབྷོཛཀེ ཙ མདྡནཧཏྠིམྷི ཙ ཨཏྟནི ཙ མེཏྟཙིཏྟེན སམཙིཏྟཱཝ ཧོཐཱ’’ཏི. ཏེ ཏཐཱ ཀརིཾསུ. ཨཐ ནེསཾ མེཏྟཱནུབྷཱཝེན ཧཏྠཱི ཨུཔྤསངྐམིཏུམྤི ན ཝིསཧི. རཱཛཱ ཏམཏྠཾ སུཏྭཱ བཧཱུ མནུསྶེ དིསྭཱ མདྡིཏུཾ ན ཝིསཧིསྶཏི? ‘‘གཙྪཐ, ནེ ཀིལཉྫེན པཊིཙྪཱདེཏྭཱ མདྡཱཔེཐཱ’’ཏི ཨཱཧ. ཏེ ཀིལཉྫེན པཊིཙྪཱདེཏྭཱ མདྡིཏུཾ པེསིཡམཱནོཔི ཧཏྠཱི དཱུརཏོཝ པཊིཀྐམི.

རཱཛཱ ཏཾ པཝཏྟིཾ སུཏྭཱ ‘‘ཀཱརཎེནེཏྠ བྷཝིཏབྦ’’ནྟི ཏེ པཀྐོསཱཔེཏྭཱ པུཙྪི – ‘‘ཏཱཏཱ, མཾ ནིསྶཱཡ ཏུམྷེ ཀིཾ ན ལབྷཐཱ’’ཏི? ‘‘ཀིཾ ནཱམེཏཾ, དེཝཱ’’ཏི? ‘‘ཏུམྷེ ཀིར ཝགྒབནྡྷནེན ཙོརཱ ཧུཏྭཱ ཨརཉྙེ ཝིཙརཐཱ’’ཏི? ‘‘ཀོ ཨེཝམཱཧ, དེཝཱ’’ཏི? ‘‘གཱམབྷོཛཀོ, ཏཱཏཱ’’ཏི. ‘‘ན མཡཾ, དེཝ, ཙོརཱ, མཡཾ པན ཨཏྟནོ སགྒམགྒཾ སོདྷེནྟཱ ཨིདཉྩིདཉྩ ཀརོམ, གཱམབྷོཛཀོ ཨམྷེ ཨཀུསལཀིརིཡཱཡ ནིཡོཛེཏྭཱ ཨཏྟནོ ཝཙནཾ ཨཀརོནྟེ ནཱསེཏུཀཱམོ ཀུཛ྄ཛྷིཏྭཱ ཨེཝམཱཧཱ’’ཏི. ཨཐ རཱཛཱ ཏེསཾ ཀཐཾ སུཏྭཱ སོམནསྶཔྤཏྟོ ཧུཏྭཱ, ‘‘ཏཱཏཱ, ཨཡཾ ཏིརཙྪཱནོ ཏུམྷཱཀཾ གུཎེ ཛཱནཱཏི, ཨཧཾ མནུསྶབྷཱུཏོ ཛཱནིཏུཾ ནཱསཀྑིཾ, ཁམཐ མེ’’ཏི. ཨེཝཉྩ པན ཝཏྭཱ སཔུཏྟདཱརཾ གཱམབྷོཛཀཾ ཏེསཾ དཱསཾ, ཧཏྠིཾ ཨཱརོཧནིཡཾ, ཏཉྩ གཱམཾ ཡཐཱསུཁཾ པརིབྷོགཾ ཀཏྭཱ ཨདཱསི. ཏེ ‘‘ཨིདྷེཝ ནོ ཀཏཔུཉྙསྶཱནིསཾསོ དིཊྛོ’’ཏི བྷིཡྻོསོམཏྟཱཡ པསནྣམཱནསཱ ཧུཏྭཱ ཏཾ ཧཏྠིཾ ཝཱརེན ཝཱརེན ཨབྷིརུཡ྄ཧ གཙྪནྟཱ མནྟཡིཾསུ ‘‘ཨིདཱནི ཨམྷེཧི ཨཏིརེཀཏརཾ པུཉྙཾ ཀཱཏབྦཾ, ཀིཾ ཀརོམ? ཙཏུམཧཱཔཐེ ཐཱཝརཾ ཀཏྭཱ མཧཱཛནསྶ ཝིསྶམནསཱལཾ ཀརིསྶཱམཱ’’ཏི. ཏེ ཝཌྜྷཀིཾ པཀྐོསཱཔེཏྭཱ སཱལཾ པཊྛཔེསུཾ. མཱཏུགཱམེསུ པན ཝིགཏཙྪནྡཏཱཡ ཏསྶཱ སཱལཱཡ མཱཏུགཱམཱནཾ པཏྟིཾ ནཱདཾསུ.

མགྷསྶ པན གེཧེ ནནྡཱ, ཙིཏྟཱ, སུདྷམྨཱ, སུཛཱཏི ཙཏསྶོ ཨིཏྠིཡོ ཧོནྟི. ཏཱསུ སུདྷམྨཱ ཝཌྜྷཀིནཱ སདྡྷིཾ ཨེཀཏོ ཧུཏྭཱ, ‘‘བྷཱཏིཀ, ཨིམིསྶཱ སཱལཱཡ མཾ ཛེཊྛིཀཾ ཀརོཧཱི’’ཏི ཝཏྭཱ ལཉྫཾ ཨདཱསི. སོ ‘‘སཱདྷཱུ’’ཏི སམྤཊིཙྪིཏྭཱ པཋམམེཝ ཀཎྞིཀཏྠཱཡ རུཀྑཾ སུཀྑཱཔེཏྭཱ ཏཙྪེཏྭཱ ཝིཛ྄ཛྷིཏྭཱ ཀཎྞིཀཾ ནིཊྛཱཔེཏྭཱ, ‘‘སུདྷམྨཱ ནཱམ ཨཡཾ སཱལཱ’’ཏི ཨཀྑརཱནི ཚིནྡིཏྭཱ ཝཏྠེན པལིཝེཋེཏྭཱ ཋཔེསི. ཨཐ ནེ ཝཌྜྷཀཱི སཱལཾ ནིཊྛཱཔེཏྭཱ ཀཎྞིཀཱརོཔནདིཝསེ ‘‘ཨཧོ, ཨཡྻཱ, ཨེཀཾ ཀརཎཱིཡཾ ན སརིམྷཱ’’ཏི ཨཱཧ. ‘‘ཀིཾ ནཱམ, བྷོ’’ཏི? ‘‘ཀཎྞིཀ’’ནྟི. ‘‘ཧོཏུ ཏཾ ཨཱཧརིསྶཱམཱ’’ཏི. ‘‘ཨིདཱནི ཚིནྣརུཀྑེན ཀཱཏུཾ ན སཀྐཱ, པུབྦེཡེཝ ཏཾ ཚིནྡིཏྭཱ ཏཙྪེཏྭཱ ཝིཛ྄ཛྷིཏྭཱ ཋཔིཏཀཎྞིཀཱ ལདྡྷུཾ ཝཊྚཏཱི’’ཏི. ‘‘ཨིདཱནི ཀིཾ ཀཱཏབྦ’’ནྟི? ‘‘སཙེ ཀསྶཙི གེཧེ ནིཊྛཱཔེཏྭཱ ཋཔིཏཱ ཝིཀྐཱཡིཀཀཎྞིཀཱ ཨཏྠི, སཱ པརིཡེསིཏབྦཱ’’ཏི. ཏེ པརིཡེསནྟཱ སུདྷམྨཱཡ གེཧེ དིསྭཱ སཧསྶཾ དཏྭཱཔི མཱུལེན ན ལབྷིཾསུ. ‘‘སཙེ མཾ སཱལཱཡ པཏྟིཾ ཀརོཐ, དསྶཱམཱི’’ཏི ཝུཏྟེ པན ‘‘མཡཾ མཱཏུགཱམཱནཾ པཏྟིཾ ན དམྨཱ’’ཏི ཨཱཧཾསུ.

ཨཐ ནེ ཝཌྜྷཀཱི ཨཱཧ – ‘‘ཨཡྻཱ, ཏུམྷེ ཀིཾ ཀཐེཐ, ཋཔེཏྭཱ བྲཧྨལོཀཾ ཨཉྙཾ མཱཏུགཱམརཧིཏཊྛཱནཾ ནཱམ ནཏྠི, གཎྷཐ ཀཎྞིཀཾ. ཨེཝཾ སནྟེ ཨམྷཱཀཾ ཀམྨཾ ནིཊྛཾ གམིསྶཏཱི’’ཏི. ཏེ ‘‘སཱདྷཱུ’’ཏི ཀཎྞིཀཾ གཧེཏྭཱ སཱལཾ ནིཊྛཱཔེཏྭཱ ཏིདྷཱ ཝིབྷཛིཾསུ. ཨེཀསྨིཾ ཀོཊྛཱསེ ཨིསྶརཱནཾ ཝསནཊྛཱནཾ ཀརིཾསུ, ཨེཀསྨིཾ དུགྒཏཱནཾ, ཨེཀསྨིཾ གིལཱནཱནཾ. ཏེཏྟིཾས ཛནཱ ཏེཏྟིཾས ཕལཀཱནི པཉྙཔེཏྭཱ ཧཏྠིསྶ སཉྙཾ ཨདཾསུ – ‘‘ཨཱགནྟུཀོ ཨཱགནྟྭཱ ཡསྶ ཨཏྠཏཕལཀེ ནིསཱིདཏི, ཏཾ གཧེཏྭཱ ཕལཀསཱམིཀསྶེཝ གེཧེ པཏིཊྛཔེཧི, ཏསྶ པཱདཔརིཀམྨཔིཊྛིཔརིཀམྨཔཱནཱིཡཁཱདནཱིཡབྷོཛནཱིཡསཡནཱནི སབྦཱནི ཕལཀསཱམིཀསྶེཝ བྷཱརོ བྷཝིསྶཏཱི’’ཏི. ཧཏྠཱི ཨཱགཏཱགཏཾ གཧེཏྭཱ ཕལཀསཱམིཀསྶེཝ གྷརཾ ནེཏི. སོ ཏསྶ ཏཾ དིཝསཾ ཀཏྟབྦཾ ཀརོཏི. མགྷོ སཱལཱཡ ཨཝིདཱུརེ ཀོཝིལཱ༹རརུཀྑཾ རོཔེཏྭཱ ཏསྶ མཱུལེ པཱསཱཎཕལཀཾ ཨཏྠརི. སཱལཾ པཝིཊྛཔཝིཊྛཱ ཛནཱ ཀཎྞིཀཾ ཨོལོཀེཏྭཱ ཨཀྑརཱནི ཝཱཙེཏྭཱ, ‘‘སུདྷམྨཱ ནཱམེསཱ སཱལཱ’’ཏི ཝདནྟི. ཏེཏྟིཾསཛནཱནཾ ནཱམཾ ན པཉྙཱཡཏི. ནནྡཱ ཙིནྟེསི – ‘‘ཨིམེ སཱལཾ ཀརོནྟཱ ཨམྷེ ཨཔཏྟིཀཱ ཀརིཾསུ, སུདྷམྨཱ པན ཨཏྟནོ བྱཏྟཏཱཡ ཀཎྞིཀཾ ཀཏྭཱ པཏྟིཀཱ ཛཱཏཱ, མཡཱཔི ཀིཉྩི ཀཱཏུཾ ཝཊྚཏི, ཀིཾ ནུ ཁོ ཀརིསྶཱམཱི’’ཏི? ཨཐསྶཱ ཨེཏདཧོསི – ‘‘སཱལཾ ཨཱགཏཱགཏཱནཾ པཱནཱིཡཉྩེཝ ནྷཱནོདཀཉྩ ལདྡྷུཾ ཝཊྚཏི, པོཀྑརཎིཾ ཁཎཱཔེསྶཱམཱི’’ཏི. སཱ པོཀྑརཎིཾ ཀཱརེསི. ཙིཏྟཱ ཙིནྟེསི – ‘‘སུདྷམྨཱཡ ཀཎྞིཀཱ དིནྣཱ, ནནྡཱཡ པོཀྑརཎཱི ཀཱརིཏཱ, མཡཱཔི ཀིཉྩི ཀཱཏུཾ ཝཊྚཏི, ཀིཾ ནུ ཁོ ཀརིསྶཱམཱི’’ཏི? ཨཐསྶཱ ཨེཏདཧོསི – ‘‘སཱལཾ ཨཱགཏཱགཏེཧི པཱནཱིཡཾ པིཝིཏྭཱ ནྷཏྭཱ གམནཀཱལེཔི མཱལཾ པིལནྡྷིཏྭཱ གནྟུཾ ཝཊྚཏི, པུཔྥཱརཱམཾ ཀཱརཱཔེསྶཱམཱི’’ཏི. སཱ རམཎཱིཡཾ པུཔྥཱརཱམཾ ཀཱརེསི. ཡེབྷུཡྻེན ཏསྨིཾ ཨཱརཱམེ ‘‘ཨསུཀོ ནཱམ པུཔྥཱུཔགཕལཱུཔགརུཀྑོ ནཏྠཱི’’ཏི ནཱཧོསི.

སུཛཱ པན ‘‘ཨཧཾ མགྷསྶ མཱཏུལདྷཱིཏཱ ཙེཝ པཱདཔརིཙཱརིཀཱ ཙ, ཨེཏེན ཀཏཾ ཀམྨཾ མཡ྄ཧམེཝ, མཡཱ ཀཏཾ ཨེཏསྶེཝཱ’’ཏི ཙིནྟེཏྭཱ, ཀིཉྩི ཨཀཏྭཱ ཨཏྟབྷཱཝམེཝ མཎྜཡམཱནཱ ཀཱལཾ ཝཱིཏིནཱམེསི. མགྷོཔི མཱཏཱཔིཏུཨུཔཊྛཱནཾ ཀུལེ ཛེཊྛཱཔཙཱཡནཀམྨཾ སཙྩཝཱཙཾ ཨཕརུསཝཱཙཾ ཨཔི, སུཎཝཱཙཾ མཙྪེརཝིནཡཾ ཨཀྐོདྷནནྟི ཨིམཱནི སཏྟ ཝཏཔདཱནི པཱུརེཏྭཱ –

‘‘མཱཏཱཔེཏྟིབྷརཾ ཛནྟུཾ, ཀུལེ ཛེཊྛཱཔཙཱཡིནཾ;

སཎྷཾ སཁིལསམྦྷཱསཾ, པེསུཎེཡྻཔྤཧཱཡིནཾ.

‘‘མཙྪེརཝིནཡེ ཡུཏྟཾ, སཙྩཾ ཀོདྷཱབྷིབྷུཾ ནརཾ;

ཏཾ ཝེ དེཝཱ ཏཱཝཏིཾསཱ, ཨཱཧུ ‘སཔྤུརིསོ’ཨིཏཱི’’ཏི. (སཾ. ནི. ༡.༢༥༧) –

ཨེཝཾ པསཾསིཡབྷཱཝཾ ཨཱཔཛྫིཏྭཱ ཛཱིཝིཏཔརིཡོསཱནེ ཏཱཝཏིཾསབྷཝནེ སཀྐོ དེཝརཱཛཱ ཧུཏྭཱ ནིབྦཏྟི, ཏེཔིསྶ སཧཱཡཀཱ ཏཏྠེཝ ནིབྦཏྟིཾསུ, ཝཌྜྷཀཱི ཝིསྶཀམྨདེཝཔུཏྟོ ཧུཏྭཱ ནིབྦཏྟི. ཏདཱ ཏཱཝཏིཾསབྷཝནེ ཨསུརཱ ཝསནྟི. ཏེ ‘‘ཨབྷིནཝཱ དེཝཔུཏྟཱ ནིབྦཏྟཱ’’ཏི དིབྦཔཱནཾ སཛྫཡིཾསུ. སཀྐོ ཨཏྟནོ པརིསཱཡ ཀསྶཙི ཨཔིཝནཏྠཱཡ སཉྙམདཱསི. ཨསུརཱ དིབྦཔཱནཾ པིཝིཏྭཱ མཛྫིཾསུ. སཀྐོ ‘‘ཀིཾ མེ ཨིམེཧི སཱདྷཱརཎེན རཛྫེནཱ’’ཏི ཨཏྟནོ པརིསཱཡ སཉྙཾ དཏྭཱ ཏེ པཱདེསུ གཱཧཱཔེཏྭཱ མཧཱསམུདྡེ ཁིཔཱཔེསི. ཏེ ཨཝཾསིརཱ སམུདྡེ པཏིཾསུ. ཨཐ ནེསཾ པུཉྙཱནུབྷཱཝེན སིནེརུནོ ཧེཊྛིམཏལེ ཨསུརཝིམཱནཾ ནཱམ ནིབྦཏྟི, ཙིཏྟཔཱཊལི ནཱམ ནིབྦཏྟི.

དེཝཱསུརསངྒཱམེ པན ཨསུརེསུ པརཱཛིཏེསུ དསཡོཛནསཧསྶཾ ཏཱཝཏིཾསདེཝནགརཾ ནཱམ ནིབྦཏྟི. ཏསྶ པན ནགརསྶ པཱཙཱིནཔཙྪིམདྭཱརཱནཾ ཨནྟརཱ དསཡོཛནསཧསྶཾ ཧོཏི, ཏཐཱ དཀྑིཎུཏྟརདྭཱརཱནཾ. ཏཾ ཁོ པན ནགརཾ དྭཱརསཧསྶཡུཏྟཾ ཨཧོསི ཨཱརཱམཔོཀྑརཎིཔཊིམཎྜིཏཾ. ཏསྶ མཛ྄ཛྷེ སཱལཱཡ ནིསྶནྡེན ཏིཡོཛནསཏུབྦེདྷེཧི དྷཛེཧི པཊིམཎྜིཏོ སཏྟརཏནམཡོ སཏྟཡོཛནསཏུབྦེདྷོ ཝེཛཡནྟོ ནཱམ པཱསཱདོ ཨུགྒཉྪི. སུཝཎྞཡཊྛཱིསུ མཎིདྷཛཱ ཨཧེསུཾ, མཎིཡཊྛཱིསུ སུཝཎྞདྷཛཱ; པཝཱལ༹ཡཊྛཱིསུ མུཏྟདྷཛཱ, མུཏྟཡཊྛཱིསུ པཝཱལ༹དྷཛཱ; སཏྟརཏནམཡཱསུ ཡཊྛཱིསུ སཏྟརཏནདྷཛཱ, མཛ྄ཛྷེ ཋིཏོ དྷཛོ ཏིཡོཛནསཏུབྦེདྷོ ཨཧོསི. ཨིཏི སཱལཱཡ ནིསྶནྡེན ཡོཛནསཧསྶུབྦེདྷོ པཱསཱདོ སཏྟརཏནམཡོཝ ཧུཏྭཱ ནིབྦཏྟི, ཀོཝིལཱ༹རརུཀྑསྶ ནིསྶནྡེན སམནྟཱ ཏིཡོཛནསཏཔརིམཎྜལོ པཱརིཙྪཏྟཀོ ནིབྦཏྟི, པཱསཱཎཕལཀསྶ ནིསྶནྡེན པཱརིཙྪཏྟཀམཱུལེ དཱིགྷཏོ སཊྛིཡོཛནཱ པུཐུལཏོ པཎྞཱསཡོཛནཱ བཧལཏོ པཉྩདསཡོཛནཱ ཛཡསུམནརཏྟཀམྦལཝཎྞཱ པཎྜུཀམྦལསིལཱ ནིབྦཏྟི. ཏཏྠ ནིསིནྣཀཱལེ ཨུཔཌྜྷཀཱཡོ པཝིསཏི, ཨུཊྛིཏཀཱལེ ཨཱུནཾ པརིཔཱུརཏི.

ཧཏྠཱི པན ཨེརཱཝཎོ ནཱམ དེཝཔུཏྟོ ཧུཏྭཱ ནིབྦཏྟི. དེཝལོཀསྨིཉྷི ཏིརཙྪཱནགཏཱ ན ཧོནྟི. ཏསྨཱ སོ ཨུཡྻཱནཀཱིལཱ༹ཡ ནིཀྑམནཀཱལེ ཨཏྟབྷཱཝཾ ཝིཛཧིཏྭཱ དིཡཌྜྷཡོཛནསཏིཀོ ཨེརཱཝཎོ ནཱམ ཧཏྠཱི ཨཧོསི. སོ ཏེཏྟིཾསཛནཱནཾ ཨཏྠཱཡ ཏེཏྟིཾས ཀུམྦྷེ མཱཔེསི ཨཱཝཊྚེན ཏིགཱཝུཏཨཌྜྷཡོཛནཔྤམཱཎེ, སབྦེསཾ མཛ྄ཛྷེ སཀྐསྶ ཨཏྠཱཡ སུདསྶནཾ ནཱམ ཏིཾསཡོཛནིཀཾ ཀུམྦྷཾ མཱཔེསི. ཏསྶ ཨུཔརི དྭཱདསཡོཛནིཀོ རཏནམཎྜཔོ ཧོཏི. ཏཏྠ ཨནྟརནྟརཱ སཏྟརཏནམཡཱ ཡོཛནུབྦེདྷཱ དྷཛཱ ཨུཊྛཧནྟི. པརིཡནྟེ ཀིངྐིཎིཀཛཱལཾ ཨོལམྦཏི. ཡསྶ མནྡཝཱཏེརིཏསྶ པཉྩངྒིཀཏཱུརིཡསདྡསཾམིསྶོ དིབྦགཱིཏསདྡོ ཝིཡ རཝོ ནིཙྪརཏི. མཎྜཔམཛ྄ཛྷེ སཀྐསྶཏྠཱཡ ཡོཛནིཀོ མཎིཔལླངྐོ པཉྙཏྟོ ཧོཏི, ཏཏྠ སཀྐོ ནིསཱིདི. ཏེཏྟིཾས དེཝཔུཏྟཱ ཨཏྟནོ ཀུམྦྷེ རཏནཔལླངྐེ ནིསཱིདིཾསུ. ཏེཏྟིཾསཱཡ ཀུམྦྷཱནཾ ཨེཀེཀསྨིཾ ཀུམྦྷེ སཏྟ སཏྟ དནྟེ མཱཔེསི. ཏེསུ ཨེཀེཀོ པཎྞཱསཡོཛནཱཡཱམོ, ཨེཀེཀསྨིཉྩེཏྠ དནྟེ སཏྟ སཏྟ པོཀྑརཎིཡོ ཧོནྟི, ཨེཀེཀཱཡ པོཀྑརཎིཡཱ སཏྟ སཏྟ པདུམིནཱིགཙྪཱནི, ཨེཀེཀསྨིཾ གཙྪེ སཏྟ སཏྟ པུཔྥཱནི ཧོནྟི, ཨེཀེཀསྨིཾ པུཔྥེ སཏྟ སཏྟ པཏྟཱནི, ཨེཀེཀསྨིཾ པཏྟེ སཏྟ སཏྟ དེཝདྷཱིཏརོ ནཙྩནྟི. ཨེཝཾ སམནྟཱ པཎྞཱསཡོཛནཋཱནེསུ ཧཏྠིདནྟེསུཡེཝ ནཊསམཛྫཱ ཧོནྟི. ཨེཝཾ མཧནྟཾ ཡསཾ ཨནུབྷཝནྟོ སཀྐོ དེཝརཱཛཱ ཝིཙརཏི.

སུདྷམྨཱཔི ཀཱལཾ ཀཏྭཱ གནྟྭཱ ཏཏྠེཝ ནིབྦཏྟི. ཏསྶཱ སུདྷམྨཱ ནཱམ ནཝ ཡོཛནསཏིཀཱ དེཝསབྷཱ ནིབྦཏྟི. ཏཏོ རམཎཱིཡཏརཾ ཀིར ཨཉྙཾ ཋཱནཾ ནཱམ ནཏྠི, མཱསསྶ ཨཊྛ དིཝསེ དྷམྨསྶཝནཾ ཏཏྠེཝ ཧོཏི. ཡཱཝཛྫཏནཱ ཨཉྙཏརཾ རམཎཱིཡཾ ཋཱནཾ དིསྭཱ, ‘‘སུདྷམྨཱ དེཝསབྷཱ ཝིཡཱ’’ཏི ཝདནྟི. ནནྡཱཔི ཀཱལཾ ཀཏྭཱ གནྟྭཱ ཏཏྠེཝ ནིབྦཏྟི, ཏསྶཱ པཉྩཡོཛནསཏིཀཱ ནནྡཱ ནཱམ པོཀྑརཎཱི ནིབྦཏྟི. ཙིཏྟཱཔི ཀཱལཾ ཀཏྭཱ གནྟྭཱ ཏཏྠེཝ ནིབྦཏྟི, ཏསྶཱཔི པཉྩཡོཛནསཏིཀཾ ཙིཏྟལཏཱཝནཾ ནཱམ ནིབྦཏྟི, ཏཏྠ ཨུཔྤནྣཔུབྦནིམིཏྟེ དེཝཔུཏྟེ ནེཏྭཱ མོཧཡམཱནཱ ཝིཙརནྟི. སུཛཱ པན ཀཱལཾ ཀཏྭཱ ཨེཀིསྶཱ གིརིཀནྡརཱཡ ཨེཀཱ བཀསཀུཎིཀཱ ཧུཏྭཱ ནིབྦཏྟི. སཀྐོ ཨཏྟནོ པརིཙཱརིཀཱ ཨོལོཀེནྟོ ‘‘སུདྷམྨཱ ཨིདྷེཝ ནིབྦཏྟཱ, ཏཐཱ ནནྡཱ ཙ ཙིཏྟཱ ཙ, སུཛཱ ནུ ཁོ ཀུཧིཾ ནིབྦཏྟཱ’’ཏི ཙིནྟེནྟོ ཏཾ ཏཏྠ ནིབྦཏྟཾ དིསྭཱ, ‘‘བཱལཱ ཀིཉྩི པུཉྙཾ ཨཀཏྭཱ ཨིདཱནི ཏིརཙྪཱནཡོནིཡཾ ནིབྦཏྟཱ, ཨིདཱནི པན ཏཾ པུཉྙཾ ཀཱརེཏྭཱ ཨིདྷཱནེཏུཾ ཝཊྚཏཱི’’ཏི ཨཏྟབྷཱཝཾ ཝིཛཧིཏྭཱ ཨཉྙཱཏཀཝེསེན ཏསྶཱ སནྟིཀཾ གནྟྭཱ, ‘‘ཀིཾ ཀརོནྟཱི ཨིདྷ ཝིཙརསཱི’’ཏི པུཙྪི. ‘‘ཀོ པན ཏྭཾ, སཱམཱི’’ཏི? ‘‘ཨཧཾ ཏེ སཱམིཀོ མགྷོ’’ཏི. ‘‘ཀུཧིཾ ནིབྦཏྟོསི, སཱམཱི’’ཏི? ‘‘ཨཧཾ ཏཱཝཏིཾསདེཝལོཀེ ནིབྦཏྟོ’’. ‘‘ཏཝ སཧཱཡིཀཱནཾ པན ནིབྦཏྟཊྛཱནཾ ཛཱནཱསཱི’’ཏི? ‘‘ན ཛཱནཱམི, སཱམཱི’’ཏི. ‘‘ཏཱཔི མམེཝ སནྟིཀེ ནིབྦཏྟཱ, པསྶིསྶསི ཏཱ སཧཱཡིཀཱ’’ཏི. ‘‘ཀཐཱཧཾ ཏཏྠ གམིསྶཱམཱི’’ཏི? སཀྐོ ‘‘ཨཧཾ ཏཾ ཏཏྠ ནེསྶཱམཱི’’ཏི ཝཏྭཱ ཧཏྠཏལེ ཋཔེཏྭཱ དེཝལོཀཾ ནེཏྭཱ ནནྡཱཡ པོཀྑརཎིཡཱ ཏཱིརེ ཝིསྶཛྫེཏྭཱ ཨིཏརཱསཾ ཏིསྶནྣཾ ཨཱརོཙེསི – ‘‘ཏུམྷཱཀཾ སཧཱཡིཀཾ སུཛཾ པསྶིསྶཐཱ’’ཏི. ‘‘ཀུཧིཾ སཱ, དེཝཱ’’ཏི? ‘‘ནནྡཱཡ པོཀྑརཎིཡཱ ཏཱིརེ ཋིཏཱ’’ཏི ཨཱཧ. ཏཱ ཏིསྶོཔི གནྟྭཱ, ‘‘ཨཧོ ཨཡྻཱཡ ཨེཝརཱུཔཾ ཨཏྟབྷཱཝམཎྜནསྶ ཕལཾ, ཨིདཱནིསྶཱ ཏུཎྜཾ པསྶཐ, པཱདེ པསྶཐ, ཛངྒྷཱ པསྶཐ, སོབྷཏི ཝཏསྶཱ ཨཏྟབྷཱཝོ’’ཏི ཀེལི༹ཾ ཀཏྭཱ པཀྐམིཾསུ.

པུན སཀྐོ ཏསྶཱ སནྟིཀཾ གནྟྭཱ, ‘‘དིཊྛཱ ཏེ སཧཱཡིཀཱ’’ཏི ཝཏྭཱ ‘‘དིཊྛཱ མཾ ཨུཔྤཎྜེཏྭཱ གཏཱ, ཏཏྠེཝ མཾ ནེཧཱི’’ཏི ཝུཏྟེ ཏཾ ཏཏྠེཝ ནེཏྭཱ ཨུདཀེ ཝིསྶཛྫེཏྭཱ, ‘‘དིཊྛཱ ཏེ ཏཱསཾ སམྤཏྟཱི’’ཏི པུཙྪི. ‘‘དིཊྛཱ, དེཝཱ’’ཏི? ‘‘ཏཡཱཔི ཏཏྠ ནིབྦཏྟནཱུཔཱཡཾ ཀཱཏུཾ ཝཊྚཏཱི’’ཏི. ‘‘ཀིཾ ཀརོམི, དེཝཱ’’ཏི? ‘‘མཡཱ དིནྣཾ ཨོཝཱདཾ རཀྑིསྶསཱི’’ཏི. ‘‘རཀྑིསྶཱམི, དེཝཱ’’ཏི. ཨཐསྶཱ པཉྩ སཱིལཱནི དཏྭཱ, ‘‘ཨཔྤམཏྟཱ རཀྑཱཧཱི’’ཏི ཝཏྭཱ པཀྐཱམི. སཱ ཏཏོ པཊྛཱཡ སཡཾམཏམཙྪཀེཡེཝ པརིཡེསིཏྭཱ ཁཱདཏི. སཀྐོ ཀཏིཔཱཧཙྩཡེན ཏསྶཱ ཝཱིམཾསནཏྠཱཡ གནྟྭཱ, ཝཱལུཀཱཔིཊྛེ མཏམཙྪཀོ ཝིཡ ཧུཏྭཱ ཨུཏྟཱནོ ནིཔཛྫི. སཱ ཏཾ དིསྭཱ ‘‘མཏམཙྪཀོ’’ཏི སཉྙཱཡ ཨགྒཧེསི. མཙྪོ གིལནཀཱལེ ནངྒུཊྛཾ ཙཱལེསི. སཱ ‘‘སཛཱིཝམཙྪཀོ’’ཏི ཨུདཀེ ཝིསྶཛྫེསི. སོ ཐོཀཾ ཝཱིཏིནཱམེཏྭཱ པུན ཏསྶཱ པུརཏོ ཨུཏྟཱནོ ཧུཏྭཱ ནིཔཛྫི. པུན སཱ ‘‘མཏམཙྪཀོ’’ཏི སཉྙཱཡ གཧེཏྭཱ གིལནཀཱལེ ཨགྒནངྒུཊྛཾ ཙཱལེསི. ཏཾ དིསྭཱ ‘‘སཛཱིཝམཙྪོ’’ཏི ཝིསྶཛྫེསི. ཨེཝཾ ཏིཀྑཏྟུཾ ཝཱིམཾསིཏྭཱ ‘‘སཱདྷུཀཾ སཱིལཾ རཀྑཏཱི’’ཏི ཨཏྟཱནཾ ཛཱནཱཔེཏྭཱ ‘‘ཨཧཾ ཏཝ ཝཱིམཾསནཏྠཱཡ ཨཱགཏོ, སཱདྷུཀཾ སཱིལཾ རཀྑསི, ཨེཝཾ རཀྑམཱནཱ ན ཙིརསྶེཝ མམ སནྟིཀེ ནིབྦཏྟིསྶསི, ཨཔྤམཏྟཱ ཧོཧཱི’’ཏི ཝཏྭཱ པཀྐཱམི.

སཱ ཏཏོ པཊྛཱཡ པན སཡཾམཏམཙྪཾ ལབྷཏི ཝཱ, ན ཝཱ. ཨལབྷམཱནཱ ཀཏིཔཱཧཙྩཡེནེཝ སུསྶིཏྭཱ ཀཱལཾ ཀཏྭཱ ཏསྶ སཱིལསྶ ཕལེན བཱརཱཎསིཡཾ ཀུམྦྷཀཱརསྶ དྷཱིཏཱ ཧུཏྭཱ ནིབྦཏྟི. ཨཐསྶཱ པནྣརསསོལ༹སཝསྶུདྡེསིཀཀཱལེ སཀྐོ ‘‘ཀུཧིཾ ནུ ཁོ སཱ ནིབྦཏྟཱ’’ཏི ཨཱཝཛྫེནྟོ དིསྭཱ, ‘‘ཨིདཱནི མཡཱ ཏཏྠ གནྟུཾ ཝཊྚཏཱི’’ཏི ཨེལཱ༹ལུཀཝཎྞེན པཉྙཱཡམཱནེཧི སཏྟཧི རཏནེཧི ཡཱནཀཾ པཱུརེཏྭཱ ཏཾ པཱཛེནྟོ བཱརཱཎསིཾ པཝིསིཏྭཱ, ‘‘ཨམྨཏཱཏཱ, ཨེལཱ༹ལུཀཱནི གཎྷཐ གཎྷཐཱ’’ཏི ཨུགྒྷོསེནྟོ ཝཱིཐིཾ པཊིཔཛྫི. མུགྒམཱསཱདཱིནི གཧེཏྭཱ ཨཱགཏེ པན ‘‘མཱུལེན ན དེམཱི’’ཏི ཝཏྭཱ, ‘‘ཀཐཾ དེསཱི’’ཏི ཝུཏྟེ, ‘‘སཱིལརཀྑིཀཱཡ ཨིཏྠིཡཱ དམྨཱི’’ཏི ཨཱཧ. ‘‘སཱིལཾ ནཱམ, སཱམི, ཀཱིདིསཾ, ཀིཾ ཀཱལ༹ཾ, ཨུདཱཧུ ནཱིལཱདིཝཎྞ’’ནྟི? ‘‘ཏུམྷེ ‘སཱིལཾ ཀཱིདིས’ནྟིཔི ན ཛཱནཱཐ, ཀིམེཝ ནཾ རཀྑིསྶཐ, སཱིལརཀྑིཀཱཡ པན དསྶཱམཱི’’ཏི. ‘‘སཱམི, ཨེསཱ ཀུམྦྷཀཱརསྶ དྷཱིཏཱ ‘སཱིལཾ རཀྑཱམཱི’ཏི ཝིཙརཏི, ཨེཏིསྶཱ དེཧཱི’’ཏི. སཱཔི ནཾ ‘‘ཏེན ཧི མཡ྄ཧཾ དེཧི, སཱམཱི’’ཏི ཨཱཧ. ‘‘ཀཱསི ཏྭ’’ནྟི? ‘‘ཨཧཾ ཨཝིཛཧིཏཔཉྩསཱིལཱ’’ཏི. ‘‘ཏུཡ྄ཧམེཝེཏཱནི མཡཱ ཨཱནཱིཏཱནཱི’’ཏི ཡཱནཀཾ པཱཛེནྟོ ཏསྶཱ གྷརཾ གནྟྭཱ ཨཉྙེཧི ཨནཱཧརིཡཾ ཀཏྭཱ ཨེལཱ༹ལུཀཝཎྞེན དེཝདཏྟིཡཾ དྷནཾ དཏྭཱ ཨཏྟཱནཾ ཛཱནཱཔེཏྭཱ, ‘‘ཨིདཾ ཏེ ཛཱིཝིཏཝུཏྟིཡཱ དྷནཾ, པཉྩསཱིལཱནི ཨཁཎྜཱདཱིནི ཀཏྭཱ རཀྑཱཧཱི’’ཏི ཝཏྭཱ པཀྐཱམི.

སཱཔི ཏཏོ ཙཝིཏྭཱ ཨསུརབྷཝནེ ཨསུརཛེཊྛཀསྶ དྷཱིཏཱ ཧུཏྭཱ སཀྐསྶ ཝེརིགྷརེ ནིབྦཏྟི. དྭཱིསུ པན ཨཏྟབྷཱཝེསུ སཱིལསྶ སུརཀྑིཏཏྟཱ ཨབྷིརཱུཔཱ ཨཧོསི སུཝཎྞཝཎྞཱ ཨསཱདྷཱརཎཱཡ རཱུཔསིརིཡཱ སམནྣཱགཏཱ. ཝེཔཙིཏྟིཨསུརིནྡོ ཨཱགཏཱགཏཱནཾ ཨསུརཱནཾ ‘‘ཏུམྷེ མམ དྷཱིཏུ ཨནུཙྪཝིཀཱ ན ཧོཐཱ’’ཏི ཏཾ ཀསྶཙི ཨདཏྭཱ, ‘‘མམ དྷཱིཏཱ ཨཏྟནཱཝ ཨཏྟནོ ཨནུཙྪཝིཀཾ སཱམིཀཾ གཧེསྶཏཱི’’ཏི ཨསུརབལཾ སནྣིཔཱཏཱཔེཏྭཱ, ‘‘ཏུཡ྄ཧཾ ཨནུཙྪཝིཀཾ སཱམིཀཾ གཎྷཱ’’ཏི ཏསྶཱ, ཧཏྠེ པུཔྥདཱམཾ ཨདཱསི. ཏསྨིཾ ཁཎེ སཀྐོ ཏསྶཱ ནིབྦཏྟཊྛཱནཾ ཨོལོཀེནྟོ ཏཾ པཝཏྟིཾ ཉཏྭཱ, ‘‘ཨིདཱནི མཡཱ གནྟྭཱ ཏཾ ཨཱནེཏུཾ ཝཊྚཏཱི’’ཏི མཧལླཀཨསུརཝཎྞཾ ནིམྨིནིཏྭཱ གནྟྭཱ པརིསཔརིཡནྟེ ཨཊྛཱསི. སཱཔི ཨིཏོ ཙིཏོ ཙ ཨོལོཀེནྟཱི ཏཾ དིཊྛམཏྟཱཝ པུབྦསནྣིཝཱསཝསེན ཨུཔྤནྣེན པེམེན མཧོགྷེནེཝ ཨཛ྄ཛྷོཏྠཊཧདཡཱ ཧུཏྭཱ, ‘‘ཨེསོ མེ སཱམིཀོ’’ཏི ཏསྶ ཨུཔརི པུཔྥདཱམཾ ཁིཔི. ཨསུརཱ ‘‘ཨམྷཱཀཾ རཱཛཱ ཨེཏྟཀཾ ཀཱལཾ དྷཱིཏུ ཨནུཙྪཝིཀཾ ཨལབྷིཏྭཱ ཨིདཱནི ལབྷི, ཨཡམེཝསྶ དྷཱིཏུ པིཏཱམཧཏོ མཧལླཀོ ཨནུཙྪཝིཀོ’’ཏི ལཛྫམཱནཱ ཨཔཀྐམིཾསུ. སཀྐོཔི ཏཾ ཧཏྠེ གཧེཏྭཱ ‘‘སཀྐོཧམསྨཱི’’ཏི ནདིཏྭཱ ཨཱཀཱསེ པཀྑནྡི. ཨསུརཱ ‘‘ཝཉྩིཏམྷཱ ཛརསཀྐེནཱ’’ཏི ཏཾ ཨནུབནྡྷིཾསུ. མཱཏལི, སངྒཱཧཀོ ཝེཛཡནྟརཐཾ ཨཱཧརིཏྭཱ ཨནྟརཱམགྒེ ཨཊྛཱསི. སཀྐོ ཏཾ ཏཏྠ ཨཱརོཔེཏྭཱ དེཝནགརཱབྷིམུཁོ པཱཡཱསི. ཨཐསྶ སིཔྤལིཝནཾ སམྤཏྟཀཱལེ རཐསདྡཾ སུཏྭཱ བྷཱིཏཱ གརུལ༹པོཏཀཱ ཝིརཝིཾསུ. ཏེསཾ སདྡཾ སུཏྭཱ སཀྐོ མཱཏལིཾ པུཙྪི – ‘‘ཀེ ཨེཏེ ཝིརཝནྟཱི’’ཏི? ‘‘གརུལ༹པོཏཀཱ, དེཝཱ’’ཏི. ‘‘ཀིཾ ཀཱརཎཱ’’ཏི? ‘‘རཐསདྡཾ སུཏྭཱ མརཎབྷཡེནཱ’’ཏི. ‘‘མཾ ཨེཀཾ ནིསྶཱཡ ཨེཏྟཀོ དིཛོ རཐཝེགེན ཝིཙུཎྞིཏོ མཱ ནསྶི, ནིཝཏྟེཧི རཐ’’ནྟི. སོཔི སིནྡྷཝསཧསྶསྶ དཎྜཀསཉྙཾ དཏྭཱ རཐཾ ནིཝཏྟེསི. ཏཾ དིསྭཱ ཨསུརཱ ‘‘ཛརསཀྐོ ཨསུརཔུརཏོ པཊྛཱཡ པལཱཡནྟོ ཨིདཱནི རཐཾ ནིཝཏྟེསི, ཨདྡྷཱ ཏེན ཨུཔཏྠམྦྷོ ལདྡྷོ བྷཝིསྶཏཱི’’ཏི ནིཝཏྟེཏྭཱ ཨཱགམནམགྒེནེཝ ཨསུརཔུརཾ པཝིསིཏྭཱ པུན སཱིསཾ ན ཨུཀྑིཔིཾསུ.

སཀྐོཔི སུཛཾ ཨསུརཀཉྙཾ དེཝནགརཾ ནེཏྭཱ ཨཌྜྷཏེཡྻཱནཾ ཨཙྪརཱཀོཊཱིནཾ ཛེཊྛིཀཊྛཱནེ ཋཔེསི. སཱ སཀྐཾ ཝརཾ ཡཱཙི – ‘‘མཧཱརཱཛ, མམ ཨིམསྨིཾ དེཝལོཀེ མཱཏཱཔིཏརོ ཝཱ བྷཱཏིཀབྷགིནིཡོ ཝཱ ནཏྠི, ཡཏྠ ཡཏྠ གཙྪསི, ཏཏྠ ཏཏྠ མཾ གཧེཏྭཱཝ གཙྪེཡྻཱསཱི’’ཏི. སོ ‘‘སཱདྷཱུ’’ཏི ཏསྶཱ པཊིཉྙཾ ཨདཱསི. ཏཏོ པཊྛཱཡ ཙིཏྟཔཱཊལིཡཱ པུཔྥིཏཱཡ ཨསུརཱ ‘‘ཨམྷཱཀཾ ནིབྦཏྟཊྛཱནེ དིབྦཔཱརིཙྪཏྟཀསྶ པུཔྥནཀཱལོ’’ཏི ཡུདྡྷཏྠཱཡ སགྒཾ ཨབྷིརུཧནྟི. སཀྐོ ཧེཊྛཱསམུདྡེ ནཱགཱནཾ ཨཱརཀྑཾ ཨདཱསི, ཏཏོ སུཔཎྞཱནཾ, ཏཏོ ཀུམྦྷཎྜཱནཾ, ཏཏོ ཡཀྑཱནཾ. ཏཏོ ཙཏུནྣཾ མཧཱརཱཛཱནཾ. སབྦཱུཔརི པན ཨུཔདྡཝནིཝཏྟནཏྠཱཡ དེཝནགརདྭཱརེསུ ཝཛིརཧཏྠཱ ཨིནྡཔཊིམཱ ཋཔེསི. ཨསུརཱ ནཱགཱདཡོ ཛིནིཏྭཱ ཨཱགཏཱཔི ཨིནྡཔཊིམཱ དཱུརཏོ དིསྭཱ ‘‘སཀྐོ ནིཀྑནྟོ’’ཏི པལཱཡནྟི. ཨེཝཾ, མཧཱལི, མགྷོ མཱཎཝོ ཨཔྤམཱདཔཊིཔདཾ པཊིཔཛྫི. ཨེཝཾ ཨཔྤམཏྟོ པནེས ཨེཝརཱུཔཾ ཨིསྶརིཡཾ པཏྭཱ དྭཱིསུ དེཝལོཀེསུ རཛྫཾ ཀཱརེསི. ཨཔྤམཱདོ ནཱམེས བུདྡྷཱདཱིཧི པསཏྠོ. ཨཔྤམཱདཉྷི ནིསྶཱཡ སབྦེསམྤི ལོཀིཡལོཀུཏྟརཱནཾ ཝིསེསཱནཾ ཨདྷིགམོ ཧོཏཱིཏི ཝཏྭཱ ཨིམཾ གཱཐམཱཧ –

༣༠.

‘‘ཨཔྤམཱདེན མགྷཝཱ, དེཝཱནཾ སེཊྛཏཾ གཏོ;

ཨཔྤམཱདཾ པསཾསནྟི, པམཱདོ གརཧིཏོ སདཱ’’ཏི.

ཏཏྠ ཨཔྤམཱདེནཱཏི མཙལགཱམེ བྷཱུམིཔྤདེསསོདྷནཾ ཨཱདིཾ ཀཏྭཱ ཀཏེན ཨཔྤམཱདེན. མགྷཝཱཏི ཨིདཱནི ‘‘མགྷཝཱ’’ཏིཔཉྙཱཏོ མགྷོ མཱཎཝོ དྭིནྣཾ དེཝལོཀཱནཾ རཱཛབྷཱཝེན དེཝཱནཾ སེཊྛཏཾ གཏོ. པསཾསནྟཱིཏི བུདྡྷཱདཡོ པཎྜིཏཱ ཨཔྤམཱདམེཝ ཐོམེནྟི ཝཎྞཡནྟི. ཀིཾ ཀཱརཎཱ? སབྦེསཾ ལོཀིཡལོཀུཏྟརཱནཾ ཝིསེསཱནཾ པཊིལཱབྷཀཱརཎཏྟཱ. པམཱདོ གརཧིཏོ སདཱཏི པམཱདོ པན ཏེཧི ཨརིཡེཧི ནིཙྩཾ གརཧིཏོ ནིནྡིཏོ. ཀིཾ ཀཱརཎཱ? སབྦཝིཔཏྟཱིནཾ མཱུལབྷཱཝཏོ. མནུསྶདོབྷགྒཾ ཝཱ ཧི ཨཔཱཡུཔྤཏྟི ཝཱ སབྦཱ པམཱདམཱུལིཀཱཡེཝཱཏི.

གཱཐཱཔརིཡོསཱནེ མཧཱལི ལིཙྪཝཱི སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི བཧཱུ སོཏཱཔནྣཱདཡོ ཛཱཏཱཏི.

མགྷཝཏྠུ སཏྟམཾ.

༨. ཨཉྙཏརབྷིཀྑུཝཏྠུ

ཨཔྤམཱདརཏོ བྷིཀྑཱུཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ བྷིཀྑུཾ ཨཱརབྦྷ ཀཐེསི.

སོ ཀིར སཏྠུ སནྟིཀེ ཡཱཝ ཨརཧཏྟཱ ཀམྨཊྛཱནཾ ཀཐཱཔེཏྭཱ ཨརཉྙཾ པཝིསིཏྭཱ གྷཊེནྟོ ཝཱཡམནྟོ ཨརཧཏྟཾ པཏྟུཾ ནཱསཀྑི. སོ ‘‘ཝིསེསེཏྭཱ ཀམྨཊྛཱནཾ ཀཐཱཔེསྶཱམཱི’’ཏི ཏཏོ ནིཀྑམིཏྭཱ སཏྠུ སནྟིཀཾ ཨཱགཙྪནྟོ ཨནྟརཱམགྒེ མཧནྟཾ དཱཝགྒིཾ ཨུཊྛིཏཾ དིསྭཱ ཝེགེན ཨེཀཾ མུཎྜཔབྦཏམཏྠཀཾ ཨབྷིརུཡ྄ཧ ནིསིནྣོ ཨརཉྙཾ ཌཡ྄ཧམཱནཾ ཨགྒིཾ དིསྭཱ ཨཱརམྨཎཾ གཎྷི – ‘‘ཡཐཱ ཨཡཾ ཨགྒི མཧནྟཱནི ཙ ཁུདྡཀཱནི ཙ ཨུཔཱདཱནཱནི ཌཧནྟོ གཙྪཏི, ཨེཝཾ ཨརིཡམགྒཉཱཎགྒིནཱཔི མཧནྟཱནི ཙ ཁུདྡཀཱནི ཙ སཾཡོཛནཱནི ཌཧནྟེན གནྟབྦཾ བྷཝིསྶཏཱི’’ཏི. སཏྠཱ གནྡྷཀུཊིཡཾ ནིསིནྣོཝ ཏསྶ ཙིཏྟཱཙཱརཾ ཉཏྭཱ, ‘‘ཨེཝམེཝ, བྷིཀྑུ, མཧནྟཱནིཔི ཁུདྡཀཱནིཔི ཨུཔཱདཱནཱནི ཝིཡ ཨིམེསཾ སཏྟཱནཾ ཨབྦྷནྟརེ ཨུཔྤཛྫམཱནཱནི ཨཎུཾཐཱུལཱནི སཾཡོཛནཱནི, ཏཱནི ཉཱཎགྒིནཱ ཛྷཱཔེཏྭཱ ཨབྷབྦུཔྤཏྟིཀཱནི ཀཱཏུཾ ཝཊྚཏཱི’’ཏི ཝཏྭཱ ཨོབྷཱསཾ ཝིསྶཛྫེཏྭཱ ཏསྶ བྷིཀྑུནོ ཨབྷིམུཁེ ནིསིནྣོ ཝིཡ པཉྙཱཡམཱནོ ཨིམཾ ཨོབྷཱསགཱཐམཱཧ –

༣༡.

‘‘ཨཔྤམཱདརཏོ བྷིཀྑུ, པམཱདེ བྷཡདསྶི ཝཱ;

སཾཡོཛནཾ ཨཎུཾ ཐཱུལཾ, ཌཧཾ ཨགྒཱིཝ གཙྪཏཱི’’ཏི.

ཏཏྠ ཨཔྤམཱདརཏོཏི ཨཔྤམཱདེ རཏོ ཨབྷིརཏོ, ཨཔྤམཱདེན ཝཱིཏིནཱམེནྟོཏི ཨཏྠོ. པམཱདེ བྷཡདསྶི ཝཱཏི ནིརཡུཔྤཏྟིཨཱདིཀཾ པམཱདེ བྷཡཾ བྷཡཏོ པསྶནྟོ, ཏཱསཾ ཝཱ ཨུཔྤཏྟཱིནཾ མཱུལཏྟཱ པམཱདཾ བྷཡཏོ པསྶནྟོ. སཾཡོཛནནྟི ཝཊྚདུཀྑེན སདྡྷིཾ ཡོཛནཾ བནྡྷནཾ པཛཱནཾ ཝཊྚེ ཨོསཱིདཱཔནསམཏྠཾ དསཝིདྷཾ སཾཡོཛནཾ. ཨཎུཾ ཐཱུལནྟི མཧནྟཉྩ ཁུདྡཀཉྩ. ཌཧཾ ཨགྒཱིཝ གཙྪཏཱིཏི ཡཐཱ ཨཡཾ ཨགྒཱི ཨེཏཾ མཧནྟཉྩ ཁུདྡཀཉྩ ཨུཔཱདཱནཾ ཌཧནྟོཝ གཙྪཏི. ཨེཝམེསོ ཨཔྤམཱདརཏོ བྷིཀྑུ ཨཔྤམཱདཱདྷིགཏེན ཉཱཎགྒིནཱ ཨེཏཾ སཾཡོཛནཾ ཌཧནྟོ ཨབྷབྦུཔྤཏྟིཀཾ ཀརོནྟོ གཙྪཏཱིཏི ཨཏྠོ.

གཱཐཱཔརིཡོསཱནེ སོ བྷིཀྑུ ཡཐཱནིསིནྣོཝ སབྦསཾཡོཛནཱནི ཛྷཱཔེཏྭཱ སཧ པཊིསམྦྷིདཱཧི ཨརཧཏྟཾ པཏྭཱ ཨཱཀཱསེནཱགནྟྭཱ ཏཐཱགཏསྶ སུཝཎྞཝཎྞཾ སརཱིརཾ ཐོམེཏྭཱ ཝཎྞེཏྭཱ ཝནྡམཱནོཝ པཀྐཱམཱིཏི.

ཨཉྙཏརབྷིཀྑུཝཏྠུ ཨཊྛམཾ.

༩. ནིགམཝཱསིཏིསྶཏྠེརཝཏྠུ

ཨཔྤམཱདརཏོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ནིགམཝཱསིཏིསྶཏྠེརཾ ནཱམ ཨཱརབྦྷ ཀཐེསི.

ཨེཀསྨིཉྷི སཱཝཏྠིཏོ ཨཝིདཱུརེ ནིགམགཱམེ ཛཱཏསཾཝཌྜྷོ ཨེཀོ ཀུལཔུཏྟོ སཏྠུ སཱསནེ པབྦཛིཏྭཱ ལདྡྷཱུཔསམྤདོ ‘‘ནིགམཝཱསིཏིསྶཏྠེརོ ནཱམ ཨཔྤིཙྪོ སནྟུཊྛོ པཝིཝིཏྟོ ཨཱརདྡྷཝཱིརིཡོ’’ཏི པཉྙཱཡི. སོ ནིབདྡྷཾ ཉཱཏིགཱམེཡེཝ པིཎྜཱཡ ཝིཙརཏི. ཨནཱཐཔིཎྜིཀཱདཱིསུ མཧཱདཱནཱནི ཀརོནྟེསུ, པསེནདིཀོསལེ ཨསདིསདཱནཾ ཀརོནྟེཔི སཱཝཏྠིཾ ནཱགཙྪཏི. བྷིཀྑཱུ ‘‘ཨཡཾ ནིགམཝཱསིཏིསྶཏྠེརོ ཨུཊྛཱཡ སམུཊྛཱཡ ཉཱཏིསཾསཊྛོ ཝིཧརཏི, ཨནཱཐཔིཎྜིཀཱདཱིསུ མཧཱདཱནཱདཱིནི ཀརོནྟེསུ, པསེནདིཀོསལེ ཨསདིསདཱནཾ ཀརོནྟེཔི ནེཝ ཨཱགཙྪཏཱི’’ཏི ཀཐཾ སམུཊྛཱཔེཏྭཱ སཏྠུ ཨཱརོཙཡིཾསུ. སཏྠཱ ཏཾ པཀྐོསཱཔེཏྭཱ, ‘‘སཙྩཾ ཀིར ཏྭཾ, བྷིཀྑུ, ཨེཝཾ ཀརོསཱི’’ཏི པུཙྪིཏྭཱ, ‘‘ནཏྠི, བྷནྟེ, མཡ྄ཧཾ ཉཱཏིསཾསགྒོ, ཨཧཾ ཨེཏེ མནུསྶེ ནིསྶཱཡ ཨཛ྄ཛྷོཧརཎཱིཡམཏྟཾ ཨཱཧཱརཾ ལབྷཱམི ལཱུཁེ ཝཱ པཎཱིཏེ ཝཱ. ཡཱཔནམཏྟེ ལདྡྷེ པུན ཀིཾ ཨཱཧཱརཔརིཡེསནེནཱཏི ན གཙྪཱམི, ཉཱཏཱིཧི པན མེ སཾསགྒོ ནཱམ ནཏྠི, བྷནྟེ’’ཏི ཝུཏྟེ སཏྠཱ པཀཏིཡཱཔི ཏསྶ ཨཛ྄ཛྷཱསཡཾ ཝིཛཱནནྟོ – ‘‘སཱདྷུ སཱདྷུ, བྷིཀྑཱུ’’ཏི ཏསྶ སཱདྷུཀཱརཾ དཏྭཱ, ‘‘ཨནཙྪརིཡཾ ཁོ པནེཏཾ བྷིཀྑུ, ཡཾ ཏྭཾ མཱདིསཾ ཨཱཙརིཡཾ ལབྷིཏྭཱ ཨཔྤིཙྪོ ཨཧོསི. ཨཡཉྷི ཨཔྤིཙྪཏཱ ནཱམ མམ ཏནྟི, མམ པཝེཎཱི’’ཏི ཝཏྭཱ བྷིཀྑཱུཧི ཡཱཙིཏོ ཨཏཱིཏཾ ཨཱཧརི –

ཨཏཱིཏེ ཧིམཝནྟེ གངྒཱཏཱིརེ ཨེཀསྨིཾ ཨུདུམྦརཝནེ ཨནེཀསཧསྶཱ སུཝཱ ཝསིཾསུ. ཏཏྲེཀོ སུཝརཱཛཱ ཨཏྟནོ ནིཝཱསརུཀྑསྶ ཕལེསུ ཁཱིཎེསུ ཡཾ ཡདེཝ ཨཝསིཊྛཾ ཧོཏི ཨངྐུརོ ཝཱ པཏྟཾ ཝཱ ཏཙོ ཝཱ, ཏཾ ཏཾ ཁཱདིཏྭཱ གངྒཱཡཾ པཱནཱིཡཾ པིཝིཏྭཱ པརམཔྤིཙྪོ སནྟུཊྛོ ཧུཏྭཱ ཨཉྙཏྠ ན གཙྪཏི. ཏསྶ ཨཔྤིཙྪསནྟུཊྛབྷཱཝགུཎེན སཀྐསྶ བྷཝནཾ ཀམྤི. སཀྐོ ཨཱཝཛྫམཱནོ ཏཾ དིསྭཱ ཏསྶ ཝཱིམཾསནཏྠཾ ཨཏྟནོ ཨཱནུབྷཱཝེན ཏཾ རུཀྑཾ སུཀྑཱཔེསི. རུཀྑོ ཨོབྷགྒོ ཁཱཎུམཏྟོ ཚིདྡཱཝཚིདྡོཝ ཧུཏྭཱ ཝཱཏེ པཧརནྟེ ཨཱཀོཊིཏོ ཝིཡ སདྡཾ ནིཙྪཱརེནྟོ ཨཊྛཱསི. ཏསྶ ཚིདྡེཧི ཙུཎྞཱནི ནིཀྑམནྟི. སུཝརཱཛཱ ཏཱནི ཁཱདིཏྭཱ གངྒཱཡཾ པཱནཱིཡཾ པིཝིཏྭཱ ཨཉྙཏྠ ཨགནྟྭཱ ཝཱཏཱཏཔཾ ཨགཎེཏྭཱ ཨུདུམྦརཁཱཎུམཏྠཀེ ནིསཱིདཏི. སཀྐོ ཏསྶ པརམཔྤིཙྪབྷཱཝཾ ཉཏྭཱ, ‘‘མིཏྟདྷམྨགུཎཾ ཀཐཱཔེཏྭཱ ཝརམསྶ དཏྭཱ ཨུདུམྦརཾ ཨམཏཕལཾ ཀཏྭཱ ཨཱགམིསྶཱམཱི’’ཏི ཨེཀོ ཧཾསརཱཛཱ ཧུཏྭཱ སུཛཾ ཨསུརཀཉྙཾ པུརཏོ ཀཏྭཱ ཨུདུམྦརཝནཾ གནྟྭཱ ཨཝིདཱུརེ ཨེཀསྶ རུཀྑསྶ སཱཁཱཡ ནིསཱིདིཏྭཱ ཏེན སདྡྷིཾ ཀཐེནྟོ ཨིམཾ གཱཐམཱཧ –

‘‘སནྟི རུཀྑཱ ཧརིཔཏྟཱ, དུམཱནེཀཕལཱ བཧཱུ;

ཀསྨཱ ནུ སུཀྑེ ཀོལཱ༹པེ, སུཝསྶ ནིརཏོ མནོ’’ཏི. (ཛཱ. ༡.༩.༣༠);

སབྦཾ སུཝཛཱཏཀཾ ནཝཀནིཔཱཏེ ཨཱགཏནཡེནེཝ ཝིཏྠཱརེཏབྦཾ. ཨཊྛུཔྤཏྟིཡེཝ ཧི ཏཏྠ ཙ ཨིདྷ ཙ ནཱནཱ, སེསཾ ཏཱདིསམེཝ. སཏྠཱ ཨིམཾ དྷམྨདེསནཾ ཨཱཧརིཏྭཱ, ‘‘ཏདཱ སཀྐོ ཨཱནནྡོ ཨཧོསི, སུཝརཱཛཱ ཨཧམེཝཱ’’ཏི ཝཏྭཱ, ‘‘ཨེཝཾ, བྷིཀྑཝེ, ཨཔྤིཙྪཏཱ ནཱམེསཱ མམ ཏནྟི, མམ པཝེཎཱི, ཨནཙྪརིཡཱ མམ པུཏྟསྶ ནིགམཝཱསིཏིསྶསྶ མཱདིསཾ ཨཱཙརིཡཾ ལབྷིཏྭཱ ཨཔྤིཙྪཏཱ, བྷིཀྑུནཱ ནཱམ ནིགམཝཱསིཏིསྶེན ཝིཡ ཨཔྤིཙྪེནེཝ བྷཝིཏབྦཾ. ཨེཝརཱུཔོ ཧི བྷིཀྑུ ཨབྷབྦོ སམཐཝིཔསྶནཱདྷམྨེཧི ཝཱ མགྒཕལེཧི ཝཱ པརིཧཱནཱཡ, ཨཉྙདཏྠུ ནིབྦཱནསྶེཝ སནྟིཀེ ཧོཏཱི’’ཏི ཝཏྭཱ ཨིམཾ གཱཐམཱཧ –

༣༢.

‘‘ཨཔྤམཱདརཏོ བྷིཀྑུ, པམཱདེ བྷཡདསྶི ཝཱ;

ཨབྷབྦོ པརིཧཱནཱཡ, ནིབྦཱནསྶེཝ སནྟིཀེ’’ཏི.

ཏཏྠ ཨབྷབྦོ པརིཧཱནཱཡཱཏི སོ ཨེཝརཱུཔོ བྷིཀྑུ སམཐཝིཔསྶནཱདྷམྨེཧི ཝཱ མགྒཕལེཧི ཝཱ པརིཧཱནཱཡ ཨབྷབྦོ, ནཱཔི པཏྟེཧི པརིཧཱཡཏི, ན ཨཔྤཏྟཱནི ན པཱཔུཎཱཏི. ནིབྦཱནསྶེཝ སནྟིཀེཏི ཀིལེསཔརིནིབྦཱནསྶཔི ཨནུཔཱདཱཔརིནིབྦཱནསྶཱཔི སནྟིཀེཡེཝཱཏི.

གཱཐཱཔརིཡོསཱནེ ནིགམཝཱསིཏིསྶཏྠེརོ སཧ པཊིསམྦྷིདཱཧི ཨརཧཏྟཾ པཱཔུཎི. ཨཉྙེཔི བཧཱུ སོཏཱཔནྣཱདཡོ ཨཧེསུཾ. མཧཱཛནསྶ སཱཏྠིཀཱ དྷམྨདེསནཱ ཛཱཏཱཏི.

ནིགམཝཱསིཏིསྶཏྠེརཝཏྠུ ནཝམཾ.

ཨཔྤམཱདཝགྒཝཎྞནཱ ནིཊྛིཏཱ. དུཏིཡོ ཝགྒོ.

༣. ཙིཏྟཝགྒོ

༡. མེགྷིཡཏྠེརཝཏྠུ

ཕནྡནཾ ཙཔལཾ ཙིཏྟནྟི ཨིམཾ དྷམྨདེསནཾ སཏྠཱ ཙཱལིཀཱཡ པབྦཏེ ཝིཧརནྟོ ཨཱཡསྨནྟཾ མེགྷིཡཾ ཨཱརབྦྷ ཀཐེསི.

ཏསྶ ཝཏྠུཾ ཝིབྷཱཝནཏྠཾ སབྦཾ མེགྷིཡསུཏྟནྟཾ (ཨུདཱ. ༣༡) ཝིཏྠཱརེཏབྦཾ. སཏྠཱ པན ཏཱིཧི ཝིཏཀྐེཧི ཨནྭཱསཏྟཏཱཡ ཏསྨིཾ ཨམྦཝནེ པདྷཱནཾ ཨནུཡུཉྫིཏུཾ ཨསཀྐུཎིཏྭཱ ཨཱགཏཾ མེགྷིཡཏྠེརཾ ཨཱམནྟེཏྭཱ, ‘‘ཨཏིབྷཱརིཡཾ ཏེ, མེགྷིཡ, ཀཏཾ ‘ཨཱགམེཧི ཏཱཝ, མེགྷིཡ, ཨེཀཀོམྷི ཡཱཝ ཨཉྙོཔི ཀོཙི བྷིཀྑུ ཨཱགཙྪཏཱི’ཏི མཾ ཡཱཙནྟཾ ཨེཀཀཾ པཧཱཡ གཙྪནྟེན བྷིཀྑུནཱ ནཱམ ཨེཝཾ ཙིཏྟཝསིཀེན བྷཝིཏུཾ ན ཝཊྚཏི, ཙིཏྟཾ ནཱམེཏཾ ལཧུཀཾ, ཏཾ ཨཏྟནོ ཝསེ ཝཏྟེཏུཾ ཝཊྚཏཱི’’ཏི ཝཏྭཱ ཨིམཱ དྭེ གཱཐཱ ཨབྷཱསི –

༣༣.

‘‘ཕནྡནཾ ཙཔལཾ ཙིཏྟཾ, དཱུརཀྑཾ དུནྣིཝཱརཡཾ;

ཨུཛུཾ ཀརོཏི མེདྷཱཝཱི, ཨུསུཀཱརོཝ ཏེཛནཾ.

༣༤.

‘‘ཝཱརིཛོཝ ཐལེ ཁིཏྟོ, ཨོཀམོཀཏཨུབྦྷཏོ;

པརིཔྥནྡཏིདཾ ཙིཏྟཾ, མཱརདྷེཡྻཾ པཧཱཏཝེ’’ཏི.

ཏཏྠ ཕནྡནནྟི རཱུཔཱདཱིསུ ཨཱརམྨཎེསུ ཝིཔྥནྡམཱནཾ. ཙཔལནྟི ཨེཀཨིརིཡཱཔཐེན ཨསཎྛཧནྟོ གཱམདཱརཀོ ཝིཡ ཨེཀསྨིཾ ཨཱརམྨཎེ ཨསཎྛཧནཏོ ཙཔལཾ. ཙིཏྟནྟི ཝིཉྙཱཎཾ, བྷཱུམིཝཏྠུཨཱརམྨཎཀིརིཡཱདིཝིཙིཏྟཏཱཡ པནེཏཾ ‘‘ཙིཏྟ’’ནྟི ཝུཏྟཾ. དཱུརཀྑནྟི ཀིཊྛསམྦཱདྷེ ཋཱནེ ཀིཊྛཁཱདཀགོཎཾ ཝིཡ ཨེཀེཀསྨིཾ སཔྤཱཡཱརམྨཎེཡེཝ དུཊྛཔནཏོ དཱུརཀྑཾ. དུནྣིཝཱརཡནྟི ཝིསབྷཱགཱརམྨཎཾ གཙྪནྟཾ པཊིསེདྷེཏུཾ དུཀྑཏྟཱ དུནྣིཝཱརཡཾ. ཨུསུཀཱརོཝ ཏེཛནནྟི ཡཐཱ ནཱམ ཨུསུཀཱརོ ཨརཉྙཏོ ཨེཀཾ ཝངྐདཎྜཀཾ ཨཱཧརིཏྭཱ ནིཏྟཙཾ ཀཏྭཱ ཀཉྫིཡཏེལེན མཀྑེཏྭཱ ཨངྒཱརཀཔལླེ ཏཱཔེཏྭཱ རུཀྑཱལཀེ ཨུཔྤཱིལེ༹ཏྭཱ ནིཝངྐཾ ཨུཛུཾ ཝཱལཝིཛ྄ཛྷནཡོགྒཾ ཀརོཏི, ཀཏྭཱ ཙ པན རཱཛརཱཛམཧཱམཏྟཱནཾ སིཔྤཾ དསྶེཏྭཱ མཧནྟཾ སཀྐཱརསམྨཱནཾ ལབྷཏི, ཨེཝམེཝ མེདྷཱཝཱི པཎྜིཏོ ཝིཉྙཱུ པུརིསོ ཕནྡནཱདིསབྷཱཝམེཏཾ ཙིཏྟཾ དྷུཏངྒཱརཉྙཱཝཱསཝསེན, ནིཏྟཙཾ ཨཔགཏཨོལཱ༹རིཀཀིལེསཾ ཀཏྭཱ སདྡྷཱསིནེཧེན ཏེམེཏྭཱ ཀཱཡིཀཙེཏསིཀཝཱིརིཡེན ཏཱཔེཏྭཱ སམཐཝིཔསྶནཱལཀེ ཨུཔྤཱིལེ༹ཏྭཱ ཨུཛུཾ ཨཀུཊིལཾ ནིབྦིསེཝནཾ ཀརོཏི, ཀཏྭཱ ཙ པན སངྑཱརེ སམྨསིཏྭཱ མཧནྟཾ ཨཝིཛྫཀྑནྡྷཾ པདཱལེཏྭཱ, ‘‘ཏིསྶོ ཝིཛྫཱ, ཚ ཨབྷིཉྙཱ, ནཝ ལོཀུཏྟརདྷམྨེ’’ཏི ཨིམཾ ཝིསེསཾ ཧཏྠགཏམེཝ ཀཏྭཱ ཨགྒདཀྑིཎེཡྻབྷཱཝཾ ལབྷཏི.

ཝཱརིཛོཝཱཏི མཙྪོ ཝིཡ, ཐལེ ཁིཏྟོཏི ཧཏྠེན ཝཱ པཱདེན ཝཱ ཛཱལཱདཱིནཾ ཝཱ ཨཉྙཏརེན ཐལེ ཚཌྜིཏོ. ཨོཀམོཀཏཨུབྦྷཏོཏི ‘‘ཨོཀཔུཎྞེཧི ཙཱིཝརེཧཱི’’ཏི ཨེཏྠ (མཧཱཝ. ༣༠༦) ཨུདཀཾ ཨོཀཾ, ‘‘ཨོཀཾ པཧཱཡ ཨནིཀེཏསཱརཱི’’ཏི ཨེཏྠ (སུ. ནི. ༨༥༠) ཨཱལཡོ, ཨེཏྠ ཨུབྷཡམྤི ལབྦྷཏི. ‘‘ཨོཀམོཀཏཨུབྦྷཏོ’’ཏི ཧི ཨེཏྠ ཨོཀམོཀཏོཏི ཨུདཀསངྑཱཏཱ ཨཱལཡཱཏི ཨཡམཏྠོ. ཨུབྦྷཏོཏི ཨུདྡྷཊོ. པརིཔྥནྡཏིདཾ ཙིཏྟནྟི ཡཐཱ སོ ཨུདཀཱལཡཏོ ཨུབྦྷཏོ ཐལེ ཁིཏྟོ མཙྪོ ཨུདཀཾ ཨལབྷནྟོ པརིཔྥནྡཏི, ཨེཝམིདཾ པཉྩཀཱམགུཎཱལཡཱབྷིརཏཾ ཙིཏྟཾ ཏཏོ ཨུདྡྷརིཏྭཱ མཱརདྷེཡྻསངྑཱཏཾ ཝཊྚཾ པཧཱཏུཾ ཝིཔསྶནཱཀམྨཊྛཱནེ ཁིཏྟཾ ཀཱཡིཀཙེཏསིཀཝཱིརིཡེན སནྟཱཔིཡམཱནཾ པརིཔྥནྡཏི, སཎྛཱཏུཾ ན སཀྐོཏི. ཨེཝཾ སནྟེཔི དྷུརཾ ཨནིཀྑིཔིཏྭཱ མེདྷཱཝཱི པུགྒལོ ཏཾ ཝུཏྟནཡེནེཝ ཨུཛུཾ ཀམྨནིཡཾ ཀརོཏཱིཏི ཨཏྠོ. ཨཔརོ ནཡོ – ཨིདཾ མཱརདྷེཡྻཾ ཀིལེསཝཊྚཾ ཨཝིཛཧིཏྭཱ ཋིཏཾ ཙིཏྟཾ སོ ཝཱརིཛོ ཝིཡ པརིཔྥནྡཏི, ཏསྨཱ མཱརདྷེཡྻཾ པཧཱཏཝེ, ཡེན ཀིལེསཝཊྚསངྑཱཏེན མཱརདྷེཡྻེནེཝ པརིཔྥནྡཏི, ཏཾ པཧཱཏབྦནྟི.

གཱཐཱཔརིཡོསཱནེ མེགྷིཡཏྠེརོ སོཏཱཔཏྟིཕལེ པཏིཊྛིཏོ, ཨཉྙེཔི བཧཱུ སོཏཱཔནྣཱདཡོ ཛཱཏཱཏི.

མེགྷིཡཏྠེརཝཏྠུ པཋམཾ.

༢. ཨཉྙཏརབྷིཀྑུཝཏྠུ

དུནྣིགྒཧསྶ ལཧུནོཏི ཨིམཾ དྷམྨདེསནཾ སཏྠཱ སཱཝཏྠིཡཾ ཛེཏཝནེ ཝིཧརནྟོ ཨཉྙཏརཾ བྷིཀྑུཾ ཨཱརབྦྷ ཀཐེསི.

ཀོསལརཉྙོ ཀིར ཝིཛིཏེ པབྦཏཔཱདེ མཱཏིཀགཱམོ ནཱམ ཨེཀོ གྷནཝཱསོ གཱམོ ཨཧོསི. ཨཐེཀདིཝསཾ སཊྛིམཏྟཱ བྷིཀྑཱུ སཏྠུ སནྟིཀེ ཡཱཝ ཨརཧཏྟཱ ཀམྨཊྛཱནཾ ཀཐཱཔེཏྭཱ ཏཾ གཱམཾ གནྟྭཱ པིཎྜཱཡ པཝིསིཾསུ. ཨཐ ནེ ཡོ ཏསྶ གཱམསྶ སཱམིཀོ མཱཏིཀོ ནཱམ, ཏསྶ མཱཏཱ དིསྭཱ གེཧེ ནིསཱིདཱཔེཏྭཱ ནཱནགྒརསེན ཡཱགུབྷཏྟེན པརིཝིསིཏྭཱ, ‘‘བྷནྟེ, ཀཏྠ གནྟུཀཱམཱ’’ཏི པུཙྪི. ‘‘ཡཐཱ ཕཱསུཀཊྛཱནཾ མཧཱཨུཔཱསིཀེ’’ཏི. སཱ ‘‘ཝསྶཱཝཱསཊྛཱནཾ, ཨཡྻཱ, པརིཡེསནྟི མཉྙེ’’ཏི ཉཏྭཱ པཱདམཱུལེ ནིཔཛྫིཏྭཱ, ‘‘སཙེ, ཨཡྻཱ, ཨིམཾ ཏེམཱསཾ ཨིདྷ ཝསིསྶནྟི, ཨཧཾ ཏཱིཎི སརཎཱནི, པཉྩ སཱིལཱནི གཧེཏྭཱ ཨུཔོསཐཀམྨཾ ཀརིསྶཱམཱི’’ཏི ཨཱཧ. བྷིཀྑཱུ ‘‘མཡཾ ཨིམཾ ནིསྶཱཡ བྷིཀྑཱཡ ཨཀིལམནྟཱ བྷཝནིསྶརཎཾ ཀཱཏུཾ སཀྑིསྶཱམཱ’’ཏི ཨདྷིཝཱསཡིཾསུ. སཱ ཏེསཾ ཝསནཊྛཱནཾ ཝིཧཱརཾ པཊིཛགྒིཏྭཱ ཨདཱསི.

ཏེ ཏཏྠེཝ ཝསནྟཱ ཨེཀདིཝསཾ སནྣིཔཏིཏྭཱ ཨཉྙམཉྙཾ ཨོཝདིཾསུ, ‘‘ཨཱཝུསོ, ཨམྷེཧི པམཱདཙཱརཾ ཙརིཏུཾ ན ཝཊྚཏི. ཨམྷཱཀཉྷི སཀགེཧཾ ཝིཡ ཨཊྛ མཧཱནིརཡཱ ཝིཝཊདྭཱརཱཡེཝ, དྷརམཱནཀབུདྡྷསྶ ཁོ པན སནྟིཀེ ཀམྨཊྛཱནཾ གཧེཏྭཱ མཡཾ ཨཱགཏཱ, བུདྡྷཱ ཙ ནཱམ པདཱནུཔདིཀཾ ཝིཙརནྟེནཱཔི སཋེན ཨཱརཱདྷེཏུཾ ན སཀྐཱ, ཡཐཱཛ྄ཛྷཱསཡེནེཝ ཨཱརཱདྷེཏུཾ སཀྐཱ, ཨཔྤམཏྟཱ ཧོཐ, དྭཱིཧི ཨེཀཊྛཱནེ ན ཋཱཏབྦཾ, ན ནིསཱིདིཏབྦཾ, སཱཡཾ ཁོ པན ཐེརཱུཔཊྛཱནཀཱལེ པཱཏོཝ བྷིཀྑཱཙཱརཀཱལེ ཨེཀཏོ བྷཝིསྶཱམ, སེསཀཱལེ དྭེ ཨེཀཏོ ན བྷཝིསྶཱམ, ཨཔིཙ ཁོ པན ཨཕཱསུཀེན བྷིཀྑུནཱ ཨཱགནྟྭཱ ཝིཧཱརམཛ྄ཛྷེ གྷཎྜིཡཱ པཧཏཱཡ གྷཎྜིསཉྙཱཡ ཨཱགནྟྭཱ ཏསྶ བྷེསཛྫཾ ཀརིསྶཱམཱ’’ཏི.

ཏེསུ ཨེཝཾ ཀཏིཀཾ ཀཏྭཱ ཝིཧརནྟེསུ ཨེཀདིཝསཾ སཱ ཨུཔཱསིཀཱ སཔྤིཏེལཕཱཎིཏཱདཱིནི གཱཧཱཔེཏྭཱ དཱསདཱསིཀམྨཀརཱདཱིཧི པརིཝུཏཱ སཱཡནྷསམཡེ ཏཾ ཝིཧཱརཾ གནྟྭཱ ཝིཧཱརམཛ྄ཛྷེ བྷིཀྑཱུ ཨདིསྭཱ, ‘‘ཀཧཾ ནུ ཁོ, ཨཡྻཱ, གཏཱ’’ཏི པུརིསེ པུཙྪིཏྭཱ, ‘‘ཨཏྟནོ ཨཏྟནོ རཏྟིཊྛཱནདིཝཱཊྛཱནེསུ ནིསིནྣཱ བྷཝིསྶནྟི, ཨཡྻེ’’ཏི ཝུཏྟེ, ‘‘ཀིཾ ནུ ཁོ ཀཏྭཱ དཊྛུཾ སཀྑིསྶཱམཱི’’ཏི ཨཱཧ. ཨཐ ནཾ བྷིཀྑུསངྒྷསྶ ཀཏིཀཝཏྟཾ ཛཱནནམནུསྶཱ ཨཱཧཾསུ – ‘‘གྷཎྜིཡཱ པཧཏཱཡ སནྣིཔཏིསྶནྟི, ཨཡྻེ’’ཏི. སཱ ཙ གྷཎྜིཾ པཧརཱཔེསི. བྷིཀྑཱུ གྷཎྜིསདྡཾ སུཏྭཱ, ‘‘ཀསྶཙི ཨཕཱསུཀཾ བྷཝིསྶཏཱི’’ཏི སཀསཀཊྛཱནེཧི ནིཀྑམིཏྭཱ ཝིཧཱརམཛ྄ཛྷེ སནྣིཔཏིཾསུ. དྭེཔི ཛནཱ ཨེཀམགྒེནཱགཏཱ ནཱམ ནཏྠི. ཨུཔཱསིཀཱ ཨེཀེཀཊྛཱནཏོ ཨེཀེཀམེཝ ཨཱགཙྪནྟཾ དིསྭཱ, ‘‘མམ པུཏྟེཧི ཨཉྙམཉྙཾ ཀལཧོ ཀཏོ བྷཝིསྶཏཱི’’ཏི ཙིནྟེཏྭཱ བྷིཀྑུསངྒྷཾ ཝནྡིཏྭཱ པུཙྪི – ‘‘ཀལཧཾ ནུ ཁོ, བྷནྟེ, ཀརིཏྠཱ’’ཏི? ‘‘ན ཀརོམ, མཧཱཨུཔཱསིཀེ’’ཏི. ‘‘སཙེ ཝོ, བྷནྟེ, ཀལཧོ ནཏྠི, ཨཐ ཀསྨཱ ཡཐཱ ཨམྷཱཀཾ གེཧཾ ཨཱགཙྪནྟཱ སབྦེ ཨེཀཏོཝ ཨཱགཙྪཐ, ཨེཝཾ ཨནཱགནྟྭཱ ཨེཀེཀཊྛཱནཏོ ཨེཀེཀཱཝ ཨཱགཏཱ’’ཏི? ‘‘མཧཱཨུཔཱསིཀེ, ཨེཀེཀསྨིཾ ཋཱནེ ནིསཱིདིཏྭཱ སམཎདྷམྨཾ ཀརིམྷཱ’’ཏི. ‘‘ཀོ ཨེས, བྷནྟེ, སམཎདྷམྨོ ནཱམཱ’’ཏི? ‘‘དྭཏྟིཾསཱཀཱརེ སཛ྄ཛྷཱཡཾ ཀརོམ, ཨཏྟབྷཱཝེ ཙ ཁཡཝཡཾ པཊྛཔེམ, མཧཱཨུཔཱསིཀེ’’ཏི. ‘‘ཀིཾ པན, བྷནྟེ, དྭཏྟིཾསཱཀཱརེ སཛ྄ཛྷཱཡཾ ཀཱཏུཾ, ཨཏྟབྷཱཝེ ཙ ཁཡཝཡཾ པཊྛཔེཏུཾ ཏུམྷཱཀམེཝ ཝཊྚཏི, ཨུདཱཧུ ཨམྷཱཀམྤཱིཏི, ཀསྶཙིཔི ཨཝཱརིཏོ ཨེས དྷམྨོ, མཧཱཨུཔཱསིཀེ’’ཏི. ‘‘ཏེན ཧི, བྷནྟེ, མཡ྄ཧམྤི དྭཏྟིཾསཱཀཱརཾ དེཐ, ཨཏྟབྷཱཝེ ཙ ཁཡཝཡཔཊྛཔནཾ ཨཱཙིཀྑཐཱ’’ཏི. ‘‘ཏེན ཧི ཨུགྒཎྷ, མཧཱཨུཔཱསིཀེ’’ཏི སབྦཾ ཨུགྒཎྷཱཔེསུཾ.

སཱ ཏཏོ པཊྛཱཡ དྭཏྟིཾསཱཀཱརེ སཛ྄ཛྷཱཡཾ ཀཏྭཱ ཨཏྟནི ཁཡཝཡཾ པཊྛཔེཏྭཱ ཏེཧི བྷིཀྑཱུཧི པུརེཏརམེཝ ཏཡོ མགྒེ, ཏཱིཎི ཙ ཕལཱནི པཱཔུཎི. མགྒེནེཝ ཙསྶཱ ཙཏསྶོ པཊིསམྦྷིདཱ ལོཀིཡཨབྷིཉྙཱ ཙ ཨཱགམིཾསུ. སཱ མགྒཕལསུཁཏོ ཝུཊྛཱཡ དིབྦཙཀྑུནཱ ཨོལོཀེཏྭཱ, ‘‘ཀདཱ ནུ ཁོ མམ པུཏྟེཧི ཨཡཾ དྷམྨོ ཨདྷིགཏོ’’ཏི ཨུཔདྷཱརེནྟཱི སབྦེཔིམེ སརཱགཱ སདོསཱ སམོཧཱ ཛྷཱནཝིཔསྶནཱམཏྟམྤི ཏེསཾ ནཏྠི, ‘‘ཀིཾ ནུ ཁོ མཡ྄ཧཾ པུཏྟཱནཾ ཨརཧཏྟསྶ ཨུཔནིསྶཡོ ཨཏྠི, ནཏྠཱི’’ཏི ཨཱཝཛྫེཏྭཱ, ‘‘ཨཏྠཱི’’ཏི དིསྭཱ, ‘‘སེནཱསནསཔྤཱཡཾ ནུ ཁོ ཨཏྠི, ནཏྠཱི’’ཏི ཨཱཝཛྫེཏྭཱ ཏམྤི དིསྭཱ, ‘‘པུགྒལསཔྤཱཡཾ ནུ ཁོ ལབྷནྟི, ན ལབྷནྟཱི’’ཏི ཨཱཝཛྫེསི, པུགྒལསཔྤཱཡམྤི དིསྭཱ, ‘‘ཨཱཧཱརསཔྤཱཡཾ ནུ ཁོ ལབྷནྟི, ན ལབྷནྟཱི’’ཏི ཨུཔདྷཱརེནྟཱི ‘‘ཨཱཧཱརསཔྤཱཡཾ ནེསཾ ནཏྠཱི’’ཏི དིསྭཱ ཏཏོ པཊྛཱཡ ནཱནཱཝིདྷཾ ཡཱགུཾ, ཨནེཀཔྤཀཱརཾ ཁཛྫཀཾ, ནཱནགྒརསཉྩ བྷོཛནཾ སམྤཱདེཏྭཱ གེཧེ བྷིཀྑཱུ ནིསཱིདཱཔེཏྭཱ དཀྑིཎོདཀཾ དཏྭཱ, ‘‘བྷནྟེ, ཏུམྷཱཀཾ ཡཾ ཡཾ རུཙྩཏི, ཏཾ ཏཾ གཧེཏྭཱ པརིབྷུཉྫཐཱ’’ཏི ནིཡྻཱདེསི. ཏེ ཡཐཱརུཙི ཡཱགུཨཱདཱིནི གཧེཏྭཱ པརིབྷུཉྫནྟི. ཏེསཾ སཔྤཱཡཱཧཱརཾ ལབྷནྟཱནཾ ཙིཏྟཾ ཨེཀགྒཾ ཨཧོསི.

ཏེ ཨེཀགྒེན ཙིཏྟེན ཝིཔསྶནཾ ཝཌྜྷེཏྭཱ ན ཙིརསྶེཝ སཧ པཊིསམྦྷིདཱཧི ཨརཧཏྟཾ པཏྭཱ ཙིནྟཡིཾསུ – ‘‘ཨཧོ མཧཱཨུཔཱསིཀཱ ཨམྷཱཀཾ པཏིཊྛཱ ཛཱཏཱ, སཙེ མཡཾ སཔྤཱཡཱཧཱརཾ ན ལབྷིམྷ, ན ནོ མགྒཕལཔཊིཝེདྷོ ཨབྷཝིསྶ, ཨིདཱནི ཝུཊྛཝསྶཱ པཝཱརེཏྭཱ སཏྠུ སནྟིཀཾ གམིསྶཱམཱ’’ཏི. ཏེ ‘‘སཏྠཱརཾ དཊྛུཀཱམམྷཱ’’ཏི མཧཱཨུཔཱསིཀཾ ཨཱཔུཙྪིཾསུ. ‘‘མཧཱཨུཔཱསིཀཱ སཱདྷུ, ཨཡྻཱ’’ཏི. ཏེ ཨནུགནྟྭཱ པུནཔི, ‘‘བྷནྟེ, ཨམྷེ ཨོལོཀེཡྻཱཐཱ’’ཏི བཧཱུནི པིཡཝཙནཱནི ཝཏྭཱ པཊིནིཝཏྟི. ཏེཔི ཁོ བྷིཀྑཱུ སཱཝཏྠིཾ གནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསིནྣཱ ‘‘ཀཙྩི, བྷིཀྑཝེ, ཁམནཱིཡཾ, ཀཙྩི ཡཱཔནཱིཡཾ, ན ཙ པིཎྜཀེན ཀིལམིཏྠཱ’’ཏི ཝུཏྟེ ‘‘ཁམནཱིཡཾ, བྷནྟེ, ཡཱཔནཱིཡཾ, བྷནྟེ, པིཎྜཀེན པན ནེཝ ཀིལམིམྷ. ཨམྷཱཀཉྷི མཱཏིཀམཱཏཱ ནཱམེཀཱ ཨུཔཱསིཀཱ ཙིཏྟཱཙཱརཾ ཉཏྭཱ, ‘ཨཧོ ཝཏ ནོ ཨེཝརཱུཔཾ ནཱམ ཨཱཧཱརཾ པཊིཡཱདེཡྻཱ’ཏི ཙིནྟིཏེ ཡཐཱཙིནྟིཏཾ ཨཱཧཱརཾ པཊིཡཱདེཏྭཱ ཨདཱསཱི’’ཏི ཏསྶཱ གུཎཀཐཾ ཀཐཡིཾསུ.

ཨཉྙཏརོ བྷིཀྑུ ཏསྶཱ གུཎཀཐཾ སུཏྭཱ ཏཏྠ གནྟུཀཱམོ ཧུཏྭཱ སཏྠུ སནྟིཀེ ཀམྨཊྛཱནཾ གཧེཏྭཱ, ‘‘བྷནྟེ, ཏཾ གཱམཾ གམིསྶཱམཱི’’ཏི སཏྠཱརཾ ཨཱཔུཙྪིཏྭཱ ཛེཏཝནཏོ ནིཀྑམིཏྭཱ ཨནུཔུབྦེན ཏཾ གཱམཾ པཏྭཱ ཝིཧཱརཾ པཝིསནདིཝསེཡེཝ ཙིནྟེསི – ‘‘ཨཡཾ ཀིར ཨུཔཱསིཀཱ ཙིནྟིཏཙིནྟིཏཾ ཛཱནཱཏི, ཨཧཉྩ མགྒཀིལནྟོ ཝིཧཱརཾ པཊིཛགྒིཏུཾ ན སཀྑིསྶཱམི, ཨཧོ ཝཏ མེ ཝིཧཱརཔཊིཛགྒཀཾ མནུསྶཾ པེསེཡྻཱ’’ཏི. ཨུཔཱསིཀཱ གེཧེ ནིསིནྣཱཝ ཨཱཝཛྫེནྟཱི ཏམཏྠཾ ཉཏྭཱ, ‘‘གཙྪ, ཝིཧཱརཾ པཊིཛགྒིཏྭཱ ཨེཧཱི’’ཏི མནུསྶཾ པེསེསི. ཨིཏརོཔི པཱནཱིཡཾ པིཝིཏུཀཱམོ ‘‘ཨཧོ ཝཏ མེ སཀྑརཔཱནཀཾ ཀཏྭཱ པེསེཡྻཱ’’ཏི ཙིནྟེསི. ཨུཔཱསིཀཱ ཏམྤི པེསེསི. སོ པུནདིཝསེ ‘‘པཱཏོཝ སིནིདྡྷཡཱགུཾ མེ སཨུཏྟརིབྷངྒཾ པེསེཏཱུ’’ཏི ཙིནྟེསི. ཨུཔཱསིཀཱ ཏཐཱ ཨཀཱསི. སོ ཡཱགུཾ པིཝིཏྭཱ, ‘‘ཨཧོ ཝཏ མེ ཨེཝརཱུཔཾ ཁཛྫཀཾ པེསེཡྻཱ’’ཏི ཙིནྟེསི. ཨུཔཱསིཀཱ ཏམྤི པེསེསི. སོ ཙིནྟེསི – ‘‘ཨཡཾ ཨུཔཱསིཀཱ མཡཱ སབྦཾ ཙིནྟིཏཙིནྟིཏཾ པེསེསི, ཨཧཾ ཨེཏཾ དཊྛུཀཱམོ, ཨཧོ ཝཏ མེ ནཱནགྒརསབྷོཛནཾ གཱཧཱཔེཏྭཱ སཡམེཝ ཨཱགཙྪེཡྻཱ’’ཏི. ཨུཔཱསིཀཱ ‘‘མམ པུཏྟོ མཾ དཊྛུཀཱམོ, ཨཱགམནཾ མེ པཙྩཱསཱིསཏཱི’’ཏི བྷོཛནཾ གཱཧཱཔེཏྭཱ ཝིཧཱརཾ གནྟྭཱ ཏསྶ ཨདཱསི. སོ ཀཏབྷཏྟཀིཙྩོ ‘‘མཱཏིཀམཱཏཱ ནཱམ ཏྭཾ, མཧཱཨུཔཱསིཀེ’’ཏི པུཙྪི. ‘‘ཨཱམ, ཏཱཏཱ’’ཏི. ‘‘ཏྭཾ པརཙིཏྟཾ ཛཱནཱསཱི’’ཏི? ‘‘ཀིཾ མཾ པུཙྪསི, ཏཱཏཱ’’ཏི? ‘‘མཡཱ ཙིནྟིཏཙིནྟིཏཾ སབྦམཀཱསི, ཏེན ཏཾ པུཙྪཱམཱི’’ཏི. ‘‘པརཙིཏྟཛཱནནཀབྷིཀྑཱུ བཧཱུ, ཏཱཏཱ’’ཏི? ‘‘ནཱཧཾ ཨཉྙེ པུཙྪཱམི, ཏུཝཾ པུཙྪཱམི, ཨུཔཱསིཀེ’’ཏི. ཨེཝཾ སནྟེཔི ཨུཔཱསིཀཱ ‘‘པརཙིཏྟཾ ཛཱནཱམཱི’’ཏི ཨཝཏྭཱ ‘‘པརཙིཏྟཾ ཛཱནནྟཱ ནཱམ ཨེཝཾ ཀརོནྟི པུཏྟཱ’’ཏི ཨཱཧ. སོ ‘‘བྷཱརིཡཾ ཝཏིདཾ ཀམྨཾ, པུཐུཛྫནཱ ནཱམ སོབྷནམྤི ཨསོབྷནམྤི ཙིནྟེནྟི, སཙཱཧཾ ཀིཉྩི ཨཡུཏྟཾ ཙིནྟཡིསྶཱམི, སཧ བྷཎྜཀེན ཙོརཾ ཙཱུལཱ༹ཡ གཎྷནྟཱི ཝིཡ མཾ ཝིཔྤཀཱརཾ པཱཔེཡྻ, མཡཱ ཨིཏོ པལཱཡིཏུཾ ཝཊྚཏཱི’’ཏི ཙིནྟེཏྭཱ, ‘‘ཨུཔཱསིཀེ, ཨཧཾ གམིསྶཱམཱི’’ཏི ཨཱཧ. ‘‘ཀཧཾ, ཨཡྻཱ’’ཏི? ‘‘སཏྠུ སནྟིཀཾ, ཨུཔཱསིཀེ’’ཏི. ‘‘ཝསཐ ཏཱཝ, བྷནྟེ, ཨིདྷཱ’’ཏི. ‘‘ན ཝསིསྶཱམི, ཨུཔཱསིཀེ, གམིསྶཱམེཝཱ’’ཏི ནིཀྑམིཏྭཱ སཏྠུ སནྟིཀཾ ཨགམཱསི. ཨཐ ནཾ སཏྠཱ ‘‘ཀིཾ བྷིཀྑུ ན ཏྭཾ ཏཏྠ ཝསསཱི’’ཏི པུཙྪི. ‘‘ཨཱམ, བྷནྟེ, ན སཀྐཱ ཏཏྠ ཝསིཏུ’’ནྟི. ‘‘ཀིཾ ཀཱརཎཱ བྷིཀྑཱུ’’ཏི? ‘‘བྷནྟེ, སཱ ཨུཔཱསིཀཱ ཙིནྟིཏཙིནྟིཏཾ སབྦཾ ཛཱནཱཏི, པུཐུཛྫནཱ ཙ ནཱམ སོབྷནམྤི ཨསོབྷནམྤི ཙིནྟེནྟི, སཙཱཧཾ ཀིཉྩི ཨཡུཏྟཾ ཙིནྟེསྶཱམི, སཧ བྷཎྜཀེན ཙོརཾ ཙཱུལཱ༹ཡ གཎྷནྟཱི ཝིཡ མཾ ཝིཔྤཀཱརཾ པཱཔེསྶཏཱི’’ཏི ཙིནྟེཏྭཱ ཨཱགཏོམྷཱིཏི. ‘‘བྷིཀྑུ, ཏཏྠེཝ ཏཡཱ ཝསིཏུཾ ཝཊྚཏཱི’’ཏི, ‘‘ན སཀྐོམི, བྷནྟེ, ནཱཧཾ ཏཏྠ ཝསིསྶཱམཱི’’ཏི. ‘‘ཏེན ཧི ཏྭཾ, བྷིཀྑུ, ཨེཀམེཝ རཀྑིཏུཾ སཀྑིསྶསཱི’’ཏི. ‘‘ཀིཾ, བྷནྟེ’’ཏི? ‘‘ཏཝ ཙིཏྟམེཝ རཀྑ, ཙིཏྟཾ ནཱམེཏཾ དུརཀྑཾ, ཏྭཾ ཨཏྟནོ ཙིཏྟམེཝ ནིགྒཎྷ, མཱ ཨཉྙཾ ཀིཉྩི ཙིནྟཡི, ཙིཏྟཾ ནཱམེཏཾ དུནྣིགྒཧ’’ནྟི ཝཏྭཱ ཨིམཾ གཱཐམཱཧ –

༣༥.

‘‘དུནྣིགྒཧསྶ ལཧུནོ, ཡཏྠཀཱམནིཔཱཏིནོ;

ཙིཏྟསྶ དམཐོ སཱདྷུ, ཙིཏྟཾ དནྟཾ སུཁཱཝཧ’’ནྟི.

ཏཏྠ ཙིཏྟཾ ནཱམེཏཾ དུཀྑེན ནིགྒཡ྄ཧཏཱིཏི དུནྣིགྒཧཾ. ལཧུཾ ཨུཔྤཛྫཏི ཙ ནིརུཛ྄ཛྷཏི ཙཱཏི ལཧུ. ཏསྶ དུནྣིགྒཧསྶ ལཧུནོ. ཡཏྠཀཱམནིཔཱཏིནོཏི ཡཏྠ ཀཏྠཙིདེཝ ནིཔཏནསཱིལསྶ. ཨེཏཉྷི ལབྷིཏབྦཊྛཱནཾ ཝཱ ཨལབྷིཏབྦཊྛཱནཾ ཝཱ ཡུཏྟཊྛཱནཾ ཝཱ ཨཡུཏྟཊྛཱནཾ ཝཱ ན ཛཱནཱཏི, ནེཝ ཛཱཏིཾ ཨོལོཀེཏི, ན གོཏྟཾ, ན ཝཡཾ. ཡཏྠ ཡཏྠ ཨིཙྪཏི, ཏཏྠ ཏཏྠེཝ ནིཔཏཏཱིཏི ‘‘ཡཏྠཀཱམནིཔཱཏཱི’’ཏི ཝུཙྩཏི. ཏསྶ ཨེཝརཱུཔསྶ ཙིཏྟསྶ དམཐོ སཱདྷུ ཙཏཱུཧི ཨརིཡམགྒེཧི དནྟབྷཱཝོ ཡཐཱ ནིབྦིསེཝནཾ ཧོཏི, ཏཐཱ ཀཏབྷཱཝོ སཱདྷུ. ཀིཾ ཀཱརཎཱ? ཨིདཉྷི ཙིཏྟཾ དནྟཾ སུཁཱཝཧཾ ནིབྦིསེཝནཾ ཀཏཾ མགྒཕལསུཁཾ པརམཏྠནིབྦཱནསུཁཉྩ ཨཱཝཧཏཱིཏི.

དེསནཱཔརིཡོསཱནེ སམྤཏྟཔརིསཱཡ བཧཱུ སོཏཱཔནྣཱདཡོ ཨཧེསུཾ, མཧཱཛནསྶ སཱཏྠིཀཱ དྷམྨདེསནཱ ཛཱཏཱཏི.

སཏྠཱ ཏསྶ བྷིཀྑུནོ ཨིམཾ ཨོཝཱདཾ དཏྭཱ, ‘‘གཙྪ, བྷིཀྑུ, ཨཉྙཾ ཀིཉྩི ཨཙིནྟཡིཏྭཱ ཏཏྠེཝ ཝསཱཧཱི’’ཏི པཧིཎི. སོ བྷིཀྑུ སཏྠུ སནྟིཀཱ ཨོཝཱདཾ ལབྷིཏྭཱ ཏཏྠ ཨགམཱསི. ཀིཉྩི བཧིདྡྷཱ ཙིནྟནཾ ནཱམ ན ཙིནྟེསི. མཧཱཨུཔཱསིཀཱཔི དིབྦེན ཙཀྑུནཱ ཨོལོཀེནྟཱི ཐེརཾ དིསྭཱ, ‘‘ཨིདཱནི ཨོཝཱདདཱཡཀཾ ཨཱཙརིཡཾ ལབྷིཏྭཱ པུནཱགཏོ མམ པུཏྟོ’’ཏི ཨཏྟནོ ཉཱཎེནེཝ པརིཙྪིནྡིཏྭཱ ཏསྶ སཔྤཱཡཱཧཱརཾ པཊིཡཱདེཏྭཱ ཨདཱསི. སོ སཔྤཱཡབྷོཛནཾ སེཝིཏྭཱ ཀཏིཔཱཧེནེཝ ཨརཧཏྟཾ པཏྭཱ མགྒཕལསུཁེན ཝཱིཏིནཱམེནྟོ ‘‘ཨཧོ མཧཱཨུཔཱསིཀཱ མཡ྄ཧཾ པཏིཊྛཱ ཛཱཏཱ, ཨཧཾ ཨིམཾ ནིསྶཱཡ བྷཝནིསྶརཎཾ པཏྟོམྷཱི’’ཏི ཙིནྟེཏྭཱ, ‘‘ཨིམསྨིཾ ཏཱཝ མེ ཨཏྟབྷཱཝེ པཏིཊྛཱ ཛཱཏཱ, སཾསཱརེ པན མེ སཾསརནྟསྶ ཨཉྙེསུཔི ཨཏྟབྷཱཝེསུ ཨཡཾ པཏིཊྛཱ བྷཱུཏཔུབྦཱ, ནོ’’ཏི ཨུཔདྷཱརེནྟོ ཨེཀཱུནཨཏྟབྷཱཝསཏཾ ཨནུསྶརི. སཱཔི ཨེཀཱུནཨཏྟབྷཱཝསཏེ ཏསྶ པཱདཔརིཙཱརིཀཱ ཨཉྙེསུ པཊིབདྡྷཙིཏྟཱ ཧུཏྭཱ ཏཾ ཛཱིཝིཏཱ ཝོརོཔེསི. ཐེརོ ཏསྶཱ ཨེཏྟཀཾ ཨགུཎཾ དིསྭཱ, ‘‘ཨཧོ མཡཾ མཧཱཨུཔཱསིཀཱ བྷཱརིཡཾ ཀམྨཾ ཨཀཱསཱི’’ཏི ཙིནྟེསི.

མཧཱཨུཔཱསིཀཱཔི གེཧེ ནིསིནྣཱཝ ‘‘ཀིཾ ནུ ཁོ མཡ྄ཧཾ པུཏྟསྶ པབྦཛིཏཀིཙྩཾ མཏྟཀཾ པཏྟཾ, ནོ’’ཏི ཨུཔདྷཱརཡམཱནཱ ཏསྶ ཨརཧཏྟཔཏྟིཾ ཉཏྭཱ ཨུཏྟརི ཨུཔདྷཱརིཡམཱནཱ, ‘‘མམ པུཏྟོ ཨརཧཏྟཾ པཏྭཱ ཨཧོ ཝཏ མེ ཨཡཾ ཨུཔཱསིཀཱ མཧཏཱི པཏིཊྛཱ ཛཱཏཱ’’ཏི ཙིནྟེཏྭཱ, ‘‘ཨཏཱིཏེཔི ནུ ཁོ མེ ཨཡཾ པཏིཊྛཱ བྷཱུཏཔུབྦཱ, ནོ’’ཏི ཨུཔདྷཱརེནྟོ ཨེཀཱུནཨཏྟབྷཱཝསཏཾ ཨནུསྶརི, ‘‘ཨཧཾ ཁོ པན ཨེཀཱུནཨཏྟབྷཱཝསཏེ ཨཉྙེཧི སདྡྷིཾ ཨེཀཏོ ཧུཏྭཱ ཨེཏཾ ཛཱིཝིཏཱ ཝོརོཔེསིཾ, ཨཡཾ མེ ཨེཏྟཀཾ ཨགུཎཾ དིསྭཱ ‘ཨཧོ བྷཱརིཡཾ ཀམྨཾ ཀཏཾ ཨུཔཱསིཀཱཡཱ’’ཏི ཙིནྟེསི. ‘‘ཨཏྠི ནུ ཁོ ཨེཝཾ སཾསཱརེ སཾསརནྟིཡཱ མམ པུཏྟསྶ ཨུཔཀཱརོ ཀཏཔུབྦོ’’ཏི ཨུཔདྷཱརཡམཱནཱ ཏཏོ ཨུཏྟརིཾ སཏམཾ ཨཏྟབྷཱཝཾ ཨནུསྶརིཏྭཱ སཏམེ ཨཏྟབྷཱཝེ མཡཱ ཨེཏསྶ པཱདཔརིཙཱརིཀཱཡ ཧུཏྭཱ ཨེཏསྨིཾ ཛཱིཝིཏཱ ཝོརོཔནཊྛཱནེ ཛཱིཝིཏདཱནཾ དིནྣཾ, ཨཧོ མཡཱ མམ པུཏྟསྶ མཧཱཨུཔཀཱརོ ཀཏཔུབྦོ’’ཏི གེཧེ ནིསིནྣཱཝ ཨུཏྟརིཾ ཝིསེསེཏྭཱ ‘‘ཨུཔདྷཱརེཐཱ’’ཏི ཨཱཧ. སོ དིབྦཱཡ སོཏདྷཱཏུཡཱ སདྡཾ སུཏྭཱ ཝིསེསེཏྭཱ སཏམཾ ཨཏྟབྷཱཝཾ ཨནུསྶརིཏྭཱ ཏཏྠ ཏཱཡ ཨཏྟནོ ཛཱིཝིཏསྶ དིནྣབྷཱཝཾ དིསྭཱ, ‘‘ཨཧོ མམ ཨིམཱཡ མཧཱཨུཔཱསིཀཱཡ ཨུཔཀཱརོ ཀཏཔུབྦོ’’ཏི ཨཏྟམནོ ཧུཏྭཱ ཏསྶཱ ཏཏྠེཝ ཙཏཱུསུ མགྒཕལེསུ པཉྷཾ ཀཐེཏྭཱ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡཱིཏི.

ཨཉྙཏརབྷིཀྑུཝཏྠུ དུཏིཡཾ.

༣. ཨཉྙཏརཨུཀྐཎྛིཏབྷིཀྑུཝཏྠུ

སུདུདྡསནྟི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ ཨཉྙཏརཾ ཨུཀྐཎྛིཏབྷིཀྑུཾ ཨཱརབྦྷ ཀཐེསི.

སཏྠརི ཀིར སཱཝཏྠིཡཾ ཝིཧརནྟེ ཨེཀོ སེཊྛིཔུཏྟོ ཨཏྟནོ ཀུལཱུཔགཏྠེརཾ ཨུཔསངྐམིཏྭཱ, ‘‘བྷནྟེ, ཨཧཾ དུཀྑཱ མུཙྩིཏུཀཱམོ, ཨེཀཾ མེ དུཀྑཏོ མུཙྩནཀཱརཎཾ ཀཐེཐཱ’’ཏི ཨཱཧ. ‘‘སཱདྷཱཝུསོ, སཙེསི དུཀྑཱ མུཙྩིཏུཀཱམོ, སལཱཀབྷཏྟཾ དེཧི, པཀྑིཀབྷཏྟཾ དེཧི, ཝསྶཱཝཱསིཀཾ དེཧི, ཙཱིཝརཱདཡོ པཙྩཡེ དེཧི, ཨཏྟནོ སཱཔཏེཡྻཾ ཏཡོ ཀོཊྛཱསེ ཀཏྭཱ ཨེཀེན ཀམྨནྟཾ པཡོཛེཧི, ཨེཀེན པུཏྟདཱརཾ པོསེཧི, ཨེཀཾ བུདྡྷསཱསནེ དེཧཱི’’ཏི ཨཱཧ. སོ ‘‘སཱདྷུ, བྷནྟེ’’ཏི ཝུཏྟཔཊིཔཱཊིཡཱ སབྦཾ ཀཏྭཱ པུན ཐེརཾ པུཙྪི – ‘‘ཏཏོ ཨུཏྟརིཾ ཨཉྙཾ ཀིཾ ཀརོམི, བྷནྟེ’’ཏི? ‘‘ཨཱཝུསོ, ཏཱིཎི སརཎཱནི གཎྷ, པཉྩ སཱིལཱནི གཎྷཱཧཱི’’ཏི. ཏཱནིཔི པཊིགྒཧེཏྭཱ ཏཏོ ཨུཏྟརིཾ པུཙྪི. ‘‘ཏེན ཧི དས སཱིལཱནི གཎྷཱཧཱི’’ཏི. ‘‘སཱདྷུ, བྷནྟེ’’ཏི གཎྷི. སོ ཨེཝཾ ཨནུཔུབྦེན པུཉྙཀམྨསྶ ཀཏཏྟཱ ཨནུཔུབྦསེཊྛིཔུཏྟོ ནཱམ ཛཱཏོ. ཏཏོ ‘‘ཨུཏྟརིམྤི ཀཏྟབྦཾ ཨཏྠི, བྷནྟེ’’ཏི པུན པུཙྪིཏྭཱ, ‘‘ཏེན ཧི པབྦཛཱཧཱི’’ཏི ཝུཏྟོ ནིཀྑམིཏྭཱ པབྦཛི. ཏསྶེཀོ ཨཱབྷིདྷམྨིཀབྷིཀྑུ ཨཱཙརིཡོ ཨཧོསི. ཨེཀོ ཝིནཡདྷརོ ཨུཔཛ྄ཛྷཱཡོ. ཏསྶ ལདྡྷཱུཔསམྤདསྶ ཨཱཙརིཡོ ཨཏྟནོ སནྟིཀཾ ཨཱགཏཀཱལེ ཨབྷིདྷམྨེ པཉྷཾ ཀཐེསི – ‘‘བུདྡྷསཱསནེ ནཱམ ཨིདཾ ཀཱཏུཾ ཝཊྚཏི, ཨིདཾ ན ཝཊྚཏཱི’’ཏི. ཨུཔཛ྄ཛྷཱཡོཔིསྶ ཨཏྟནོ སནྟིཀཾ ཨཱགཏཀཱལེ ཝིནཡེ པཉྷཾ ཀཐེསི – ‘‘བུདྡྷསཱསནེ ནཱམ ཨིདཾ ཀཱཏུཾ ཝཊྚཏི, ཨིདཾ ན ཝཊྚཏི, ཨིདཾ ཀཔྤཏི, ཨིདཾ ན ཀཔྤཏཱི’’ཏི. སོ ཙིནྟེསི – ‘‘ཨཧོ བྷཱརིཡཾ ཨིདཾ ཀམྨཾ, ཨཧཾ དུཀྑཱ མུཙྩིཏུཀཱམོ པབྦཛིཏོ, ཨིདྷ ཙ མམ ཧཏྠཔསཱརཎཊྛཱནམྤི ན པཉྙཱཡཏི, གེཧེ ཋཏྭཱཝ དུཀྑཱ མུཙྩིཏུཾ སཀྐཱ, མཡཱ གིཧིནཱ བྷཝིཏུཾ ཝཊྚཏཱི’’ཏི. སོ ཏཏོ པཊྛཱཡ ཨུཀྐཎྛིཏོ ཨནབྷིརཏོ དྭཏྟིཾསཱཀཱརེ སཛ྄ཛྷཱཡཾ ན ཀརོཏི, ཨུདྡེསཾ ན གཎྷཱཏི, ཀིསོ ལཱུཁོ དྷམནིསནྠཏགཏྟོ ཨཱལསྶིཡཱབྷིབྷཱུཏོ ཀཙྪུཔརིཀིཎྞོ ཨཧོསི.

ཨཐ ནཾ དཧརསཱམཎེརཱ, ‘‘ཨཱཝུསོ, ཀིཾ ཏྭཾ ཋིཏཊྛཱནེ ཋིཏོཝ ནིསིནྣཊྛཱནེ ནིསིནྣོཝ ཨཧོསི, པཎྜུརོགཱབྷིབྷཱུཏོ ཀིསོ ལཱུཁོ དྷམནིསནྠཏགཏྟོ ཨཱལསྶིཡཱབྷིབྷཱུཏོ ཀཙྪུཔརིཀིཎྞོ, ཀིཾ ཏེ ཀཏ’’ནྟི པུཙྪིཾསུ. ‘‘ཨུཀྐཎྛིཏོམྷི, ཨཱཝུསོ’’ཏི. ‘‘ཀིཾ ཀཱརཎཱ’’ཏི? སོ ཏཾ པཝཏྟིཾ ཨཱརོཙེསི. ཏེ ཏསྶ ཨཱཙརིཡུཔཛ྄ཛྷཱཡཱནཾ ཨཱཙིཀྑིཾསུ. ཨཱཙརིཡུཔཛ྄ཛྷཱཡཱ ཏཾ ཨཱདཱཡ སཏྠུ སནྟིཀཾ ཨགམཾསུ. སཏྠཱ ‘‘ཀིཾ, བྷིཀྑཝེ, ཨཱགཏཏྠཱ’’ཏི ཨཱཧ. ‘‘བྷནྟེ, ཨཡཾ བྷིཀྑུ ཏུམྷཱཀཾ སཱསནེ ཨུཀྐཎྛིཏོ’’ཏི. ‘‘ཨེཝཾ ཀིར བྷིཀྑཱུ’’ཏི. ‘‘ཨཱམ, བྷནྟེ’’ཏི. ‘‘ཀིཾ ཀཱརཎཱ’’ཏི? ‘‘ཨཧཾ, བྷནྟེ, དུཀྑཱ མུཙྩིཏུཀཱམོཝ པབྦཛིཏོ, ཏསྶ མེ ཨཱཙརིཡོ ཨབྷིདྷམྨཀཐཾ ཀཐེསི, ཨུཔཛ྄ཛྷཱཡོ ཝིནཡཀཐཾ ཀཐེསི, སྭཱཧཾ ‘ཨིདྷ མེ ཧཏྠཔསཱརཎཊྛཱནམྤི ནཏྠི, གིཧིནཱ ཧུཏྭཱ སཀྐཱ དུཀྑཱ མུཙྩིཏུཾ, གིཧི བྷཝིསྶཱམཱི’ཏི སནྣིཊྛཱནམཀཱསིཾ, བྷནྟེ’’ཏི. ‘‘སཙེ ཏྭཾ, བྷིཀྑུ, ཨེཀམེཝ རཀྑིཏུཾ སཀྑིསྶསི, ཨཝསེསཱནཾ རཀྑནཀིཙྩཾ ནཏྠཱི’’ཏི. ‘‘ཀིཾ, བྷནྟེ’’ཏི? ‘‘ཏཝ ཙིཏྟམེཝ རཀྑིཏུཾ སཀྑིསྶསཱི’’ཏི. ‘‘སཀྑིསྶཱམི, བྷནྟེ’’ཏི. ‘‘ཏེན ཧི ཨཏྟནོ ཙིཏྟམེཝ རཀྑཱཧི, སཀྐཱ དུཀྑཱ མུཙྩིཏུ’’ནྟི ཨིམཾ ཨོཝཱདཾ དཏྭཱ ཨིམཾ གཱཐམཱཧ –

༣༦.

‘‘སུདུདྡསཾ སུནིཔུཎཾ, ཡཏྠཀཱམནིཔཱཏིནཾ;

ཙིཏྟཾ རཀྑེཐ མེདྷཱཝཱི, ཙིཏྟཾ གུཏྟཾ སུཁཱཝཧ’’ནྟི.

ཏཏྠ སུདུདྡསནྟི སུཊྛུ དུདྡསཾ. སུནིཔུཎནྟི སུཊྛུ ནིཔུཎཾ པརམསཎྷཾ. ཡཏྠཀཱམནིཔཱཏིནནྟི ཛཱཏིཨཱདཱིནི ཨནོལོཀེཏྭཱ ལབྷིཏབྦཱལབྷིཏབྦཡུཏྟཱཡུཏྟཊྛཱནེསུ ཡཏྠ ཀཏྠཙི ནིཔཏནསཱིལཾ. ཙིཏྟཾ རཀྑེཐ མེདྷཱཝཱིཏི ཨནྡྷབཱལོ དུམྨེདྷོ ཨཏྟནོ ཙིཏྟཾ རཀྑིཏུཾ སམཏྠོ ནཱམ ནཏྠི, ཙིཏྟཝསིཀོ ཧུཏྭཱ ཨནཡབྱསནཾ པཱཔུཎཱཏི. མེདྷཱཝཱི པན པཎྜིཏོཝ ཙིཏྟཾ རཀྑིཏུཾ སཀྐོཏི, ཏསྨཱ ཏྭམྤི ཙིཏྟམེཝ གོཔེཧི. ཨིདཉྷི ཙིཏྟཾ གུཏྟཾ སུཁཱཝཧཾ མགྒཕལནིབྦཱནསུཁཱནི ཨཱཝཧཏཱིཏི.

དེསནཱཔརིཡོསཱནེ སོ བྷིཀྑུ སོཏཱཔཏྟིཕལཾ པཱཔུཎི, ཨཉྙེཔི བཧཱུ སོཏཱཔནྣཱདཡོ ཨཧེསུཾ, དེསནཱ མཧཱཛནསྶ སཱཏྠིཀཱ ཨཧོསཱིཏི.

ཨཉྙཏརཨུཀྐཎྛིཏབྷིཀྑུཝཏྠུ ཏཏིཡཾ.

༤. སངྒྷརཀྑིཏབྷཱགིནེཡྻཏྠེརཝཏྠུ

དཱུརངྒམནྟི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ སངྒྷརཀྑིཏཾ ནཱམ བྷིཀྑུཾ ཨཱརབྦྷ ཀཐེསི.

སཱཝཏྠིཡཾ ཀིརེཀོ ཀུལཔུཏྟོ སཏྠུ དྷམྨདེསནཾ སུཏྭཱ ནིཀྑམིཏྭཱ པབྦཛིཏོ ལདྡྷཱུཔསམྤདོ སངྒྷརཀྑིཏཏྠེརོ ནཱམ ཧུཏྭཱ ཀཏིཔཱཧེནེཝ ཨརཧཏྟཾ པཱཔུཎི. ཏསྶ ཀནིཊྛབྷགིནཱི པུཏྟཾ ལབྷིཏྭཱ ཐེརསྶ ནཱམཾ ཨཀཱསི. སོ བྷཱགིནེཡྻསངྒྷརཀྑིཏོ ནཱམ ཧུཏྭཱ ཝཡཔྤཏྟོ ཐེརསྶེཝ སནྟིཀེ པབྦཛིཏྭཱ ལདྡྷཱུཔསམྤདོ ཨཉྙཏརསྨིཾ གཱམཀཱརཱམེ ཝསྶཾ ཨུཔགནྟྭཱ, ‘‘ཨེཀཾ སཏྟཧཏྠཾ, ཨེཀཾ ཨཊྛཧཏྠ’’ནྟི དྭེ ཝསྶཱཝཱསིཀསཱཊཀེ ལབྷིཏྭཱ ཨཊྛཧཏྠཾ ‘‘ཨུཔཛ྄ཛྷཱཡསྶ མེ བྷཝིསྶཏཱི’’ཏི སལླཀྑེཏྭཱ ‘‘སཏྟཧཏྠཾ མཡ྄ཧཾ བྷཝིསྶཏཱི’’ཏི ཙིནྟེཏྭཱ ཝུཊྛཝསྶོ ‘‘ཨུཔཛ྄ཛྷཱཡཾ པསྶིསྶཱམཱི’’ཏི ཨཱགཙྪནྟོ ཨནྟརཱམགྒེ པིཎྜཱཡ ཙརནྟོ ཨཱགནྟྭཱ ཐེརེ ཝིཧཱརཾ ཨནཱགཏེཡེཝ ཝིཧཱརཾ པཝིསིཏྭཱ ཐེརསྶ དིཝཱཊྛཱནཾ སམྨཛྫིཏྭཱ པཱདོདཀཾ ཨུཔཊྛཔེཏྭཱ ཨཱསནཾ པཉྙཔེཏྭཱ ཨཱགམནམགྒཾ ཨོལོཀེནྟོ ནིསཱིདི. ཨཐསྶཱགམནབྷཱཝཾ དིསྭཱ པཙྩུགྒམནཾ ཀཏྭཱ པཏྟཙཱིཝརཾ པཊིགྒཧེཏྭཱ, ‘‘ནིསཱིདཐ, བྷནྟེ’’ཏི ཐེརཾ ནིསཱིདཱཔེཏྭཱ ཏཱལཝཎྚཾ ཨཱདཱཡ བཱིཛིཏྭཱ པཱནཱིཡཾ དཏྭཱ པཱདེ དྷོཝིཏྭཱ ཏཾ སཱཊཀཾ ཨཱནེཏྭཱ པཱདམཱུལེ ཋཔེཏྭཱ, ‘‘བྷནྟེ, ཨིམཾ པརིབྷུཉྫཐཱ’’ཏི ཝཏྭཱ བཱིཛཡམཱནོ ཨཊྛཱསི.

ཨཐ ནཾ ཐེརོ ཨཱཧ – ‘‘སངྒྷརཀྑིཏ, མཡ྄ཧཾ ཙཱིཝརཾ པརིཔུཎྞཾ, ཏྭམེཝ པརིབྷུཉྫཱ’’ཏི. ‘‘བྷནྟེ, མཡཱ ལདྡྷཀཱལཏོ པཊྛཱཡ ཨཡཾ ཏུམྷཱཀམེཝ སལླཀྑིཏོ, པརིབྷོགཾ ཀརོཐཱ’’ཏི. ‘‘ཧོཏུ, སངྒྷརཀྑིཏ, པརིཔུཎྞཾ མེ ཙཱིཝརཾ, ཏྭམེཝ པརིབྷུཉྫཱ’’ཏི. ‘‘བྷནྟེ, མཱ ཨེཝཾ ཀརོཐ, ཏུམྷེཧི པརིབྷུཏྟེ མཡ྄ཧཾ མཧཔྥལཾ བྷཝིསྶཏཱི’’ཏི. ཨཐ ནཾ ཏསྶ པུནཔྤུནཾ ཀཐེནྟསྶཔི ཐེརོ ན ཨིཙྪིཡེཝ.

ཨེཝཾ སོ བཱིཛཡམཱནོ ཋིཏོཝ ཙིནྟེསི – ‘‘ཨཧཾ ཐེརསྶ གིཧིཀཱལེ བྷཱགིནེཡྻོ, པབྦཛིཏཀཱལེ སདྡྷིཝིཧཱརིཀོ, ཨེཝམྤི མཡཱ སདྡྷིཾ ཨུཔཛ྄ཛྷཱཡོ པརིབྷོགཾ ན ཀཏྟུཀཱམོ. ཨིམསྨིཾ མཡཱ སདྡྷིཾ པརིབྷོགཾ ཨཀརོནྟེ ཀིཾ མེ སམཎབྷཱཝེན, གིཧི བྷཝིསྶཱམཱི’’ཏི. ཨཐསྶ ཨེཏདཧོསི – ‘‘དུསྶཎྛཱཔིཏོ གྷརཱཝཱསོ, ཀིཾ ནུ ཁོ ཀཏྭཱ གིཧིབྷཱུཏོ ཛཱིཝིསྶཱམཱི’’ཏི. ཏཏོ ཙིནྟེསི – ‘‘ཨཊྛཧཏྠསཱཊཀཾ ཝིཀྐིཎིཏྭཱ ཨེཀཾ ཨེལི༹ཀཾ གཎྷིསྶཱམི, ཨེལི༹ཀཱ ནཱམ ཁིཔྤཾ ཝིཛཱཡཏི, སྭཱཧཾ ཝིཛཱཏཾ ཝིཛཱཏཾ ཝིཀྐིཎིཏྭཱ མཱུལཾ ཀརིསྶཱམི, མཱུལེ བཧཱུ ཀཏྭཱ ཨེཀཾ པཛཱཔཏིཾ ཨཱནེསྶཱམི, སཱ ཨེཀཾ པུཏྟཾ ཝིཛཱཡིསྶཏི. ཨཐསྶ མམ མཱཏུལསྶ ནཱམཾ ཀཏྭཱ ཙཱུལ༹ཡཱནཀེ ནིསཱིདཱཔེཏྭཱ མམ པུཏྟཉྩ བྷརིཡཉྩ ཨཱདཱཡ མཱཏུལཾ ཝནྡིཏུཾ ཨཱགམིསྶཱམི, ཨཱགཙྪནྟེ ཨནྟརཱམགྒེ མམ བྷརིཡཾ ཨེཝཾ ཝཀྑཱམི – ‘ཨཱནེཧི ཏཱཝ མེ པུཏྟཾ ཝཧིསྶཱམིན’ནྟི. སཱ ‘ཀིཾ ཏེ པུཏྟེན, ཨེཧི, ཨིམཾ ཡཱནཀཾ པཱཛེཧཱི’ཏི ཝཏྭཱ པུཏྟཾ གཧེཏྭཱ, ‘ཨཧཾ ནེསྶཱམི ན’ནྟི ནེཏྭཱ སནྡྷཱརེཏུཾ ཨསཀྐོནྟཱི ཙཀྐཔཐེ ཚཌྜེསྶཏི. ཨཐསྶ སརཱིརཾ ཨབྷིརུཧིཏྭཱ ཙཀྐཾ གམིསྶཏི, ཨཐ ནཾ ‘ཏྭཾ མམ པུཏྟཾ ནེཝ མཡ྄ཧཾ ཨདཱསི, ནཾ སནྡྷཱརེཏུཾ ནཱསཀྑི ནཱསིཏོསྨི ཏཡཱ’ཏི ཝཏྭཱ པཏོདཡཊྛིཡཱ པིཊྛིཡཾ པཧརིསྶཱམཱི’’ཏི.

སོ ཨེཝཾ ཙིནྟེནྟོཝ ཋཏྭཱ བཱིཛཡམཱནོ ཐེརསྶ སཱིསེ ཏཱལཝཎྚེན པཧརི. ཐེརོ ‘‘ཀིཾ ནུ ཁོ ཨཧཾ སངྒྷརཀྑིཏེན སཱིསེ པཧཏོ’’ཏི ཨུཔདྷཱརེནྟོ ཏེན ཙིནྟིཏཙིནྟིཏཾ སབྦཾ ཉཏྭཱ, ‘‘སངྒྷརཀྑིཏ, མཱཏུགཱམསྶ པཧཱརཾ དཱཏུཾ ནཱསཀྑི, ཀོ ཨེཏྠ མཧལླཀཏྠེརསྶ དོསོ’’ཏི ཨཱཧ. སོ ‘‘ཨཧོ ནཊྛོམྷི, ཉཱཏཾ ཀིར མེ ཨུཔཛ྄ཛྷཱཡེན ཙིནྟིཏཙིནྟིཏཾ, ཀིཾ མེ སམཎབྷཱཝེནཱ’’ཏི ཏཱལཝཎྚཾ ཚཌྜེཏྭཱ པལཱཡིཏུཾ ཨཱརདྡྷོ.

ཨཐ ནཾ དཧརཱ ཙ སཱམཎེརཱ ཙ ཨནུབནྡྷིཏྭཱ ཨཱདཱཡ སཏྠུ སནྟིཀཾ ཨགམཾསུ. སཏྠཱ ཏེ བྷིཀྑཱུ དིསྭཱཝ ‘‘ཀིཾ, བྷིཀྑཝེ, ཨཱགཏཏྠ, ཨེཀོ ཝོ བྷིཀྑུ ལདྡྷོ’’ཏི པུཙྪི. ‘‘ཨཱམ, བྷནྟེ, ཨིམཾ དཧརཾ ཨུཀྐཎྛིཏྭཱ པལཱཡནྟཾ གཧེཏྭཱ ཏུམྷཱཀཾ སནྟིཀཾ ཨཱགཏམྷཱ’’ཏི. ‘‘ཨེཝཾ ཀིར བྷིཀྑཱུ’’ཏི? ‘‘ཨཱམ, བྷནྟེ’’ཏི. ‘‘ཀིམཏྠཾ ཏེ བྷིཀྑུ ཨེཝཾ བྷཱརིཡཾ ཀམྨཾ ཀཏཾ, ནནུ ཏྭཾ ཨཱརདྡྷཝཱིརིཡསྶ ཨེཀསྶ བུདྡྷསྶ པུཏྟོ, མཱདིསསྶ ནཱམ བུདྡྷསྶ སཱསནེ པབྦཛིཏྭཱ ཨཏྟཱནཾ དམེཏྭཱ སོཏཱཔནྣོཏི ཝཱ སཀདཱགཱམཱིཏི ཝཱ ཨནཱགཱམཱིཏི ཝཱ ཨརཧཱཏི ཝཱ ཝདཱཔེཏུཾ ནཱསཀྑི, ཀིམཏྠཾ ཨེཝཾ བྷཱརིཡཾ ཀམྨམཀཱསཱི’’ཏི? ‘‘ཨུཀྐཎྛིཏོསྨི, བྷནྟེ’’ཏི. ‘‘ཀིཾ ཀཱརཎཱ ཨུཀྐཎྛིཏོསཱི’’ཏི? སོ ཨེཝཾ ཝསྶཱཝཱསིཀསཱཊཀཱནཾ ལདྡྷདིཝསཏོ པཊྛཱཡ ཡཱཝ ཐེརསྶ ཏཱལཝཎྚེན པཧཱརཱ སབྦཾ ཏཾ པཝཏྟིཾ ཨཱརོཙེཏྭཱ, ‘‘ཨིམིནཱ ཀཱརཎེན པལཱཏོསྨི, བྷནྟེ’’ཏི ཨཱཧ. ཨཐ ནཾ སཏྠཱ ‘‘ཨེཧི བྷིཀྑུ, མཱ ཙིནྟཡི ཙིཏྟཾ ནཱམེཏཾ དཱུརེ ཧོནྟམྤི ཨཱརམྨཎཾ སམྤཊིཙྪནཀཛཱཏིཀཾ, རཱགདོསམོཧབནྡྷནཱ མུཙྩནཏྠཱཡ ཝཱཡམིཏུཾ ཝཊྚཏཱི’’ཏི ཝཏྭཱ ཨིམཾ གཱཐམཱཧ –

༣༧.

‘‘དཱུརངྒམཾ ཨེཀཙརཾ, ཨསརཱིརཾ གུཧཱསཡཾ;

ཡེ ཙིཏྟཾ སཾཡམེསྶནྟི, མོཀྑནྟི མཱརབནྡྷནཱ’’ཏི.

ཏཏྠ དཱུརངྒམནྟི ཙིཏྟསྶ ཧི མཀྐཊསུཏྟམཏྟཀམྤི པུརཏྠིམཱདིདིསཱབྷཱགེན གམནཱགམནཾ ནཱམ ནཏྠི, དཱུརེ སནྟམྤི པན ཨཱརམྨཎཾ སམྤཊིཙྪཏཱིཏི དཱུརངྒམཾ ནཱམ ཛཱཏཾ. སཏྟཊྛཙིཏྟཱནི པན ཨེཀཏོ ཀཎྞིཀབདྡྷཱནི ཨེཀཀྑཎེ ཨུཔྤཛྫིཏུཾ སམཏྠཱནི ནཱམ ནཏྠི. ཨུཔྤཏྟིཀཱལེ ཨེཀེཀམེཝ ཙིཏྟཾ ཨུཔྤཛྫཏི, ཏསྨིཾ ནིརུདྡྷེ པུན ཨེཀེཀམེཝ ཨུཔྤཛྫཏཱིཏི ཨེཀཙརཾ ནཱམ ཛཱཏཾ. ཙིཏྟསྶ སརཱིརསཎྛཱནཾ ཝཱ ནཱིལཱདིཔྤཀཱརོ ཝཎྞབྷེདོ ཝཱ ནཏྠཱིཏི ཨསརཱིརཾ ནཱམ ཛཱཏཾ. གུཧཱ ནཱམ ཙཏུམཧཱབྷཱུཏགུཧཱ, ཨིདཉྩ ཧདཡརཱུཔཾ ནིསྶཱཡ པཝཏྟཏཱིཏི གུཧཱསཡཾ ནཱམ ཛཱཏཾ. ཡེ ཙིཏྟནྟི ཡེ ཀེཙི པུརིསཱ ཝཱ ཨིཏྠིཡོ ཝཱ གཧཊྛཱ ཝཱ པབྦཛིཏཱ ཝཱ ཨནུཔྤཛྫནཀཀིལེསསྶ ཨུཔྤཛྫིཏུཾ ཨདེནྟཱ སཏིསམྨོསེན ཨུཔྤནྣཀིལེསཾ པཛཧནྟཱ ཙིཏྟཾ སཾཡམེསྶནྟི སཾཡཏཾ ཨཝིཀྑིཏྟཾ ཀརིསྶནྟི. མོཀྑནྟི མཱརབནྡྷནཱཏི སབྦེཏེ ཀིལེསབནྡྷནཱབྷཱཝེན མཱརབནྡྷནསངྑཱཏཱ ཏེབྷཱུམཀཝཊྚཱ མུཙྩིསྶནྟཱིཏི.

དེསནཱཔརིཡོསཱནེ བྷཱགིནེཡྻསངྒྷརཀྑིཏཏྠེརོ སོཏཱཔཏྟིཕལཾ པཱཔུཎི, ཨཉྙེཔི བཧཱུ སོཏཱཔནྣཱདཡོ ཛཱཏཱ, མཧཱཛནསྶ སཱཏྠིཀཱ དྷམྨདེསནཱ ཨཧོསཱིཏི.

སངྒྷརཀྑིཏབྷཱགིནེཡྻཏྠེརཝཏྠུ ཙཏུཏྠཾ.

༥. ཙིཏྟཧཏྠཏྠེརཝཏྠུ

ཨནཝཊྛིཏཙིཏྟསྶཱཏི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ ཙིཏྟཧཏྠཏྠེརཾ ཨཱརབྦྷ ཀཐེསི.

ཨེཀོ ཀིར སཱཝཏྠིཝཱསཱི ཀུལཔུཏྟོ ནཊྛགོཎཾ པརིཡེསནྟོ ཨརཉྙཾ པཝིསིཏྭཱ མཛ྄ཛྷནྷིཀེ ཀཱལེ གོཎཾ དིསྭཱ གོཡཱུཐེ ཝིསྶཛྫེཏྭཱ, ‘‘ཨཝསྶཾ ཨཡྻཱནཾ སནྟིཀེ ཨཱཧཱརམཏྟཾ ལབྷིསྶཱམཱི’’ཏི ཁུཔྤིཔཱསཱཔཱིལི༹ཏོ ཝིཧཱརཾ པཝིསིཏྭཱ བྷིཀྑཱུནཾ སནྟིཀཾ གནྟྭཱ ཝནྡིཏྭཱ ཨེཀམནྟཾ ནིསཱིདི. ཏསྨིཾ ཁོ པན སམཡེ བྷིཀྑཱུནཾ ཨཝཀྐཱརཔཱཏིཡཾ བྷུཏྟཱཝསེསཀཾ བྷཏྟཾ ཧོཏི, ཏེ ཏཾ ཚཱཏཀཔཱིལི༹ཏཾ དིསྭཱ, ‘‘ཨིཏོ བྷཏྟཾ གཧེཏྭཱ བྷུཉྫཱཧཱི’’ཏི ཝདིཾསུ. བུདྡྷཀཱལེ ཙ པན ཨནེཀསཱུཔབྱཉྫནཾ བྷཏྟཾ ཨུཔྤཛྫཏི, སོ ཏཏོ ཡཱཔནམཏྟཾ གཧེཏྭཱ བྷུཉྫིཏྭཱ པཱནཱིཡཾ པིཝིཏྭཱ ཧཏྠེ དྷོཝིཏྭཱ བྷིཀྑཱུ ཝནྡིཏྭཱ, ‘‘ཀིཾ, བྷནྟེ, ཨཛྫ, ཨཡྻཱ, ནིམནྟནཊྛཱནཾ ཨགམཾསཱུ’’ཏི པུཙྪི. ‘‘ནཏྠི, ཨུཔཱསཀ, བྷིཀྑཱུ ཨིམིནཱཝ ནཱིཧཱརེན ནིབདྡྷཾ ལབྷནྟཱི’’ཏི. སོ ‘‘མཡཾ ཨུཊྛཱཡ སམུཊྛཱཡ རཏྟིནྡིཝཾ ནིབདྡྷཾ ཀམྨཾ ཀརོནྟཱཔི ཨེཝཾ མདྷུརབྱཉྫནཾ བྷཏྟཾ ན ལབྷཱམ, ཨིམེ ཀིར ནིབདྡྷཾ བྷུཉྫནྟི, ཀིཾ མེ གིཧིབྷཱཝེན, བྷིཀྑུ བྷཝིསྶཱམཱི’’ཏི ཙིནྟེཏྭཱ བྷིཀྑཱུ ཨུཔསངྐམིཏྭཱ པབྦཛྫཾ ཡཱཙི. ཨཐ ནཾ བྷིཀྑཱུ ‘‘སཱདྷུ ཨུཔཱསཀཱ’’ཏི པབྦཱཛེསུཾ.

སོ ལདྡྷཱུཔསམྤདོ སབྦཔྤཀཱརཾ ཝཏྟཔཊིཝཏྟཾ ཨཀཱསི. སོ བུདྡྷཱནཾ ཨུཔྤནྣེན ལཱབྷསཀྐཱརེན ཀཏིཔཱཧཙྩཡེན ཐཱུལསརཱིརོ ཨཧོསི. ཏཏོ ཙིནྟེསི – ‘‘ཀིཾ མེ བྷིཀྑཱཡ ཙརིཏྭཱ ཛཱིཝིཏེན, གིཧཱི བྷཝིསྶཱམཱི’’ཏི. སོ ཝིབྦྷམིཏྭཱ གེཧཾ པཱཝིསི. ཏསྶ གེཧེ ཀམྨཾ ཀརོནྟསྶ ཀཏིཔཱཧེནེཝ སརཱིརཾ མིལཱཡི. ཏཏོ ‘‘ཀིཾ མེ ཨིམིནཱ དུཀྑེན, སམཎོ བྷཝིསྶཱམཱི’’ཏི ཙིནྟེཏྭཱ པུན གནྟྭཱ པབྦཛི. སོ ཀཏིཔཱཧཾ ཝཱིཏིནཱམེཏྭཱ པུན ཨུཀྐཎྛིཏྭཱ ཝིབྦྷམི, པབྦཛིཏཀཱལེ པན བྷིཀྑཱུནཾ ཨུཔཀཱརཀོ ཧོཏི. སོ ཀཏིཔཱཧེནེཝ པུནཔི ཨུཀྐཎྛིཏྭཱ, ‘‘ཀིཾ མེ གིཧིབྷཱཝེན, པབྦཛིསྶཱམཱི’’ཏི གནྟྭཱ བྷིཀྑཱུ ཝནྡིཏྭཱ པབྦཛྫཾ ཡཱཙི. ཨཐ ནཾ བྷིཀྑཱུ ཨུཔཀཱརཝསེན པུན པབྦཱཛཡིཾསུ. ཨེཝཾ སོ ཨིམིནཱ ནིཡཱམེནེཝ ཚཀྑཏྟུཾ པབྦཛིཏྭཱ ཨུཔྤབྦཛིཏོ. ཏསྶ བྷིཀྑཱུ ‘‘ཨེས ཙིཏྟཝསིཀོ ཧུཏྭཱ ཝིཙརཏཱི’’ཏི ཙིཏྟཧཏྠཏྠེརོཏི ནཱམཾ ཀརིཾསུ.

ཏསྶེཝཾ ཨཔརཱཔརཾ ཝིཙརནྟསྶེཝ བྷརིཡཱ གབྦྷིནཱི ཨཧོསི. སོ སཏྟམེ ཝཱརེ ཨརཉྙཏོ ཀསིབྷཎྜམཱདཱཡ གེཧཾ གནྟྭཱ བྷཎྜཀཾ ཋཔེཏྭཱ ‘‘ཨཏྟནོ ཀཱསཱཝཾ གཎྷིསྶཱམཱི’’ཏི གབྦྷཾ པཱཝིསི. ཏསྨིཾ ཁཎེ ཏསྶ བྷརིཡཱ ནིཔཛྫིཏྭཱ ནིདྡཱཡཏི. ཏསྶཱ ནིཝཏྠསཱཊཀོ ཨཔགཏོ ཧོཏི, མུཁཏོ ཙ ལཱལཱ པགྒྷརཏི, ནཱསཱ གྷུརགྷུརཱཡཏི, མུཁཾ ཝིཝཊྚཾ, དནྟཾ གྷཾསཏི, སཱ ཏསྶ ཨུདྡྷུམཱཏཀསརཱིརཾ ཝིཡ ཨུཔཊྛཱསི. སོ ‘‘ཨནིཙྩཾ དུཀྑཾ ཨིད’’ནྟི སཉྙཾ ལབྷིཏྭཱ, ‘‘ཨཧཾ ཨེཏྟཀཾ ཀཱལཾ པབྦཛིཏྭཱ ཨིམཾ ནིསྶཱཡ བྷིཀྑུབྷཱཝེ སཎྛཱཏུཾ ནཱསཀྑི’’ནྟི ཀཱསཱཡཀོཊིཡཾ གཧེཏྭཱ ཨུདརེ བནྡྷིཏྭཱ གེཧཱ ནིཀྑམི.

ཨཐསྶ ཨནནྟརགེཧེ ཋིཏཱ སསྶུ ཏཾ ཏཐཱ གཙྪནྟཾ དིསྭཱ, ‘‘ཨཡཾ པཊིཨུཀྐཎྛིཏོ བྷཝིསྶཏི, ཨིདཱནེཝ ཨརཉྙཏོ ཨཱགནྟྭཱ ཀཱསཱཝཾ ཨུདརེ བནྡྷིཏྭཱཝ གེཧཱ ནིཀྑནྟོ ཝིཧཱརཱབྷིམུཁོ གཙྪཏི, ཀིཾ ནུ ཁོ’’ཏི གེཧཾ པཝིསིཏྭཱ ནིདྡཱཡམཱནཾ དྷཱིཏརཾ པསྶིཏྭཱ ‘‘ཨིམཾ དིསྭཱ སོ ཝིཔྤཊིསཱརཱི ཧུཏྭཱ གཏོ’’ཏི ཉཏྭཱ དྷཱིཏརཾ པཧརིཏྭཱ ‘‘ཨུཊྛེཧི ཀཱལ༹ཀཎྞི, སཱམིཀོ ཏེ ཏཾ ནིདྡཱཡམཱནཾ དིསྭཱ ཝིཔྤཊིསཱརཱི ཧུཏྭཱ གཏོ, ནཏྠི སོ ཨིཏོ པཊྛཱཡ ཏུཡ྄ཧ’’ནྟི ཨཱཧ. ‘‘ཨཔེཧི ཨཔེཧི, ཨམྨ, ཀུཏོ ཏསྶ གམནཾ ཨཏྠི, ཀཏིཔཱཧེནེཝ པུནཱགམིསྶཏཱི’’ཏི ཨཱཧ. སོཔི ‘‘ཨནིཙྩཾ དུཀྑ’’ནྟི ཝཏྭཱ གཙྪནྟོ གཙྪནྟོཝ སོཏཱཔཏྟིཕལཾ པཱཔུཎི. སོ གནྟྭཱ བྷིཀྑཱུ ཝནྡིཏྭཱ པབྦཛྫཾ ཡཱཙི. ‘‘ན སཀྑིསྶཱམ མཾཡཾ ཏཾ པབྦཱཛེཏུཾ, ཀུཏོ ཏུཡ྄ཧཾ སམཎབྷཱཝོ, སཏྠཀནིསཱནཔཱསཱཎསདིསཾ ཏཝ སཱིས’’ནྟི. ‘‘བྷནྟེ, ཨིདཱནི མཾ ཨནུཀམྤཱཡ ཨེཀཝཱརཾ པབྦཱཛེཐཱ’’ཏི. ཏེ ཏཾ ཨུཔཀཱརཝསེན པབྦཱཛཡིཾསུ. སོ ཀཏིཔཱཧེནེཝ སཧ པཊིསམྦྷིདཱཧི ཨརཧཏྟཾ པཱཔུཎི.

ཏེཔི ནཾ ཨཱཧཾསུ – ‘‘ཨཱཝུསོ ཙིཏྟཧཏྠ, ཏཝ གམནསམཡཾ ཏྭམེཝ ཛཱནེཡྻཱསི, ཨིམསྨིཾ ཝཱརེ ཏེ ཙིརཱཡིཏ’’ནྟི. ‘‘བྷནྟེ, སཾསགྒསྶ ཨཏྠིབྷཱཝཀཱལེ གཏམྷཱ, སོ ནོ སཾསགྒོ ཚིནྣོ, ཨིདཱནི ཨགམནདྷམྨཱ ཛཱཏམྷཱ’’ཏི. བྷིཀྑཱུ སཏྠུ སནྟིཀཾ གནྟྭཱ, ‘‘བྷནྟེ, ཨཡཾ བྷིཀྑུ ཨམྷེཧི ཨེཝཾ ཝུཏྟོ ཨེཝཾ ནཱམ ཀཐེསི, ཨཉྙཾ བྱཱཀརོཏི, ཨབྷཱུཏཾ ཝདཏཱི’’ཏི ཨཱཧཾསུ. སཏྠཱ ‘‘ཨཱམ, བྷིཀྑཝེ, མམ པུཏྟོ ཨཏྟནོ ཨནཝཊྛིཏཙིཏྟཀཱལེ སདྡྷམྨཾ ཨཛཱནནཀཱལེ གམནཱགམནཾ ཨཀཱསི, ཨིདཱནིསྶ པུཉྙཉྩ པཱཔཉྩ པཧཱིན’’ནྟི ཝཏྭཱ ཨིམཱ དྭེ གཱཐཱ ཨཱཧ –

༣༨.

‘‘ཨནཝཊྛིཏཙིཏྟསྶ, སདྡྷམྨཾ ཨཝིཛཱནཏོ;

པརིཔླཝཔསཱདསྶ, པཉྙཱ ན པརིཔཱུརཏི.

༣༩.

‘‘ཨནཝསྶུཏཙིཏྟསྶ, ཨནནྭཱཧཏཙེཏསོ;

པུཉྙཔཱཔཔཧཱིནསྶ, ནཏྠི ཛཱགརཏོ བྷཡ’’ནྟི.

ཏཏྠ ཨནཝཊྛིཏཙིཏྟསྶཱཏི ཙིཏྟཾ ནཱམེཏཾ ཀསྶཙི ནིབདྡྷཾ ཝཱ ཐཱཝརཾ ཝཱ ནཏྠི. ཡོ པན པུགྒལོ ཨསྶཔིཊྛེ ཋཔིཏཀུམྦྷཎྜཾ ཝིཡ ཙ ཐུསརཱསིམྷི ཀོཊྚིཏཁཱཎུཀོ ཝིཡ ཙ ཁལླཱཊསཱིསེ ཋཔིཏཀདམྦཔུཔྥཾ ཝིཡ ཙ ན ཀཏྠཙི སཎྛཱཏི, ཀདཱཙི བུདྡྷསཱཝཀོ ཧོཏི, ཀདཱཙི ཨཱཛཱིཝཀོ, ཀདཱཙི ནིགཎྛོ, ཀདཱཙི ཏཱཔསོ. ཨེཝརཱུཔོ པུགྒལོ ཨནཝཊྛིཏཙིཏྟོ ནཱམ. ཏསྶ ཨནཝཊྛིཏཙིཏྟསྶ. སདྡྷམྨཾ ཨཝིཛཱནཏོཏི སཏྟཏིཾསབོདྷིཔཀྑིཡདྷམྨབྷེདཾ ཨིམཾ སདྡྷམྨཾ ཨཝིཛཱནནྟསྶ པརིཏྟསདྡྷཏཱཡ ཝཱ ཨུཔླཝསདྡྷཏཱཡ ཝཱ པརིཔླཝཔསཱདསྶ ཀཱམཱཝཙརརཱུཔཱཝཙརཱདིབྷེདཱ པཉྙཱ ན པརིཔཱུརཏི. ཀཱམཱཝཙརཱཡཔི ཨཔརིཔཱུརཡམཱནཱཡ ཀུཏོཝ རཱུཔཱཝཙརཱརཱུཔཱཝཙརལོཀུཏྟརཔཉྙཱ པརིཔཱུརིསྶཏཱིཏི དཱིཔེཏི. ཨནཝསྶུཏཙིཏྟསྶཱཏི རཱགེན ཨཏིནྟཙིཏྟསྶ. ཨནནྭཱཧཏཙེཏསོཏི ‘‘ཨཱཧཏཙིཏྟོ ཁིལཛཱཏོ’’ཏི (དཱི. ནི. ༣.༣༡༩; ཝིབྷ. ༩༤༡; མ. ནི. ༡.༡༨༥) ཨཱགཏཊྛཱནེ དོསེན ཙིཏྟསྶ པཧཏབྷཱཝོ ཝུཏྟོ, ཨིདྷ པན དོསེན ཨཔྤཊིཧཏཙིཏྟསྶཱཏི ཨཏྠོ. པུཉྙཔཱཔཔཧཱིནསྶཱཏི ཙཏུཏྠམགྒེན པཧཱིནཔུཉྙསྶ ཙེཝ པཧཱིནཔཱཔསྶ ཙ ཁཱིཎཱསཝསྶ. ནཏྠི ཛཱགརཏོ བྷཡནྟི ཁཱིཎཱསཝསྶ ཛཱགརནྟསྶེཝ ཨབྷཡབྷཱཝོ ཀཐིཏོ ཝིཡ. སོ པན སདྡྷཱདཱིཧི པཉྩཧི ཛཱགརདྷམྨེཧི སམནྣཱགཏཏྟཱ ཛཱགརོ ནཱམ. ཏསྨཱ ཏསྶ ཛཱགརནྟསྶཱཔི ཨཛཱགརནྟསྶཱཔི ཀིལེསབྷཡཾ ནཏྠི ཀིལེསཱནཾ ཨཔཙྪཱཝཏྟནཏོ. ན ཧི ཏཾ ཀིལེསཱ ཨནུབནྡྷནྟི ཏེན ཏེན མགྒེན པཧཱིནཱནཾ ཀིལེསཱནཾ པུན ཨནུཔགམནཏོ. ཏེནེཝཱཧ – ‘‘སོཏཱཔཏྟིམགྒེན ཡེ ཀིལེསཱ པཧཱིནཱ, ཏེ ཀིལེསེ ན པུནེཏི ན པཙྩེཏི ན པཙྩཱགཙྪཏི, སཀདཱགཱམིཨནཱགཱམིཨརཧཏྟམགྒེན ཡེ ཀིལེསཱ པཧཱིནཱ, ཏེ ཀིལེསེ ན པུནེཏི ན པཙྩེཏི ན པཙྩཱགཙྪཏཱི’’ཏི (ཙཱུལ༹ནི. མེཏྟགཱུམཱཎཝཔུཙྪཱནིདྡེས ༢༧).

དེསནཱ མཧཱཛནསྶ སཱཏྠིཀཱ སཕལཱ ཨཧོསི.

ཨཐེཀདིཝསཾ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘བྷཱརིཡཱ ཝཏིམེ, ཨཱཝུསོ, ཀིལེསཱ ནཱམ, ཨེཝརཱུཔསྶ ཨརཧཏྟསྶ ཨུཔནིསྶཱཡསམྤནྣོ ཀུལཔུཏྟོ ཀིལེསེཧི ཨཱལོལི༹ཏོ སཏྟཝཱརེ གིཧཱི ཧུཏྭཱ སཏྟཝཱརེ པབྦཛིཏོ’’ཏི. སཏྠཱ ཏེསཾ ཏཾ ཀཐཱཔཝཏྟིཾ སུཏྭཱ ཏངྑཎཱནུརཱུཔེན གམནེན དྷམྨསབྷཾ གནྟྭཱ བུདྡྷཱསནེ ནིསིནྣོ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ, ‘‘ཨིམཱཡ ནཱམཱ’’ཏི ཝུཏྟེ ཨེཝམེཝ, བྷིཀྑཝེ, ཀིལེསཱ ནཱམ བྷཱརིཡཱ, སཙེ ཨེཏེ རཱུཔིནོ ཧུཏྭཱ ཀཏྠཙི པཀྑིཔིཏུཾ སཀྐཱ བྷཝེཡྻུཾ, ཙཀྐཝཱལ༹ཾ ཨཏིསམྦཱདྷཾ, བྲཧྨལོཀོ ཨཏིནཱིཙཀོཏི ཨོཀཱསོ ནེསཾ ན བྷཝེཡྻ, མཱདིསམྤི ནཱམེཏེ པཉྙཱསམྤནྣཾ པུརིསཱཛཱནེཡྻཾ ཨཱལོལེ༹ནྟི, ཨཝསེསེསུ ཀཱ ཀཐཱ? ‘‘ཨཧཉྷི ཨཌྜྷནཱལི༹མཏྟཾ ཝརཀཙོརཀཾ ཀུཎྛཀུདཱལཉྩ ནིསྶཱཡ ཚ ཝཱརེ པབྦཛིཏྭཱ ཨུཔྤབྦཛིཏཔུབྦོ’’ཏི. ‘‘ཀདཱ, བྷནྟེ, ཀདཱ སུགཏཱ’’ཏི? ‘‘སུཎིསྶཐ, བྷིཀྑཝེ’’ཏི. ‘‘ཨཱམ, བྷནྟེ’’ཏི. ‘‘ཏེན ཧི སུཎཱཐཱ’’ཏི ཨཏཱིཏཾ ཨཱཧརི –

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ ཀུདཱལཔཎྜིཏོ ནཱམ བཱཧིརཀཔབྦཛྫཾ པབྦཛིཏྭཱ ཨཊྛ མཱསེ ཧིམཝནྟེ ཝསིཏྭཱ ཝསྶཱརཏྟསམཡེ བྷཱུམིཡཱ ཏིནྟཱཡ ‘‘གེཧེ མེ ཨཌྜྷནཱལི༹མཏྟོ ཝརཀཙོརཀོ ཙ ཀུཎྛཀུདཱལཀོ ཙ ཨཏྠི, ཝརཀཙོརཀབཱིཛཾ མཱ ནསྶཱི’’ཏི ཨུཔྤབྦཛིཏྭཱ ཨེཀཾ ཋཱནཾ ཀུདཱལེན ཀསིཏྭཱ ཏཾ བཱིཛཾ ཝཔིཏྭཱ ཝཏིཾ ཀཏྭཱ པཀྐཀཱལེ ཨུདྡྷརིཏྭཱ ནཱལི༹མཏྟབཱིཛཾ ཋཔེཏྭཱ སེསཾ ཁཱདི. སོ ‘‘ཀིཾ མེ དཱནི གེཧེན, པུན ཨཊྛ མཱསེ པབྦཛིསྶཱམཱི’’ཏི ཙིནྟེཏྭཱ ནིཀྑམིཏྭཱ པབྦཛི. ཨིམིནཱཝ ནཱིཧཱརེན ནཱལི༹མཏྟཾ ཝརཀཙོརཀཉྩ ཀུཎྛཀུདཱལཉྩ ནིསྶཱཡ སཏྟཝཱརེ གིཧཱི ཧུཏྭཱ སཏྟཝཱརེ པབྦཛིཏྭཱ སཏྟམེ པན ཝཱརེ ཙིནྟེསི – ‘‘ཨཧཾ ཚ ཝཱརེ ཨིམཾ ཀུཎྛཀུདཱལཾ ནིསྶཱཡ གིཧཱི ཧུཏྭཱ པབྦཛིཏོ, ཀཏྠཙིདེཝ ནཾ ཚཌྜེསྶཱམཱི’’ཏི. སོ གངྒཱཡ ཏཱིརཾ གནྟྭཱ, ‘‘པཏིཏཊྛཱནཾ པསྶནྟོ ཨོཏརིཏྭཱ གཎྷེཡྻཾ, ཡཐཱསྶ པཏིཏཊྛཱནཾ ན པསྶཱམི, ཏཐཱ ནཾ ཚཌྜེསྶཱམཱི’’ཏི ཙིནྟེཏྭཱ ནཱལི༹མཏྟཾ བཱིཛཾ པིལོཏིཀཱཡ བནྡྷིཏྭཱ པིལོཏིཀཾ ཀུདཱལཕལཀེ བནྡྷིཏྭཱ ཀུདཱལཾ ཨགྒདཎྜཀེ གཧེཏྭཱ གངྒཱཡ ཏཱིརེ ཋིཏོ ཨཀྑཱིནི ནིམཱིལེཏྭཱ ཨུཔརིསཱིསེ ཏིཀྑཏྟུཾ ཨཱཝིཛ྄ཛྷིཏྭཱ གངྒཱཡཾ ཁིཔིཏྭཱ ནིཝཏྟིཏྭཱ ཨོལོཀེནྟོ པཏིཏཊྛཱནཾ ཨདིསྭཱ ‘‘ཛིཏཾ མེ, ཛིཏཾ མེ’’ཏི ཏིཀྑཏྟུཾ སདྡམཀཱསི.

ཏསྨིཾ ཁཎེ བཱརཱཎསིརཱཛཱ པཙྩནྟཾ ཝཱུཔསམེཏྭཱ ཨཱགནྟྭཱ ནདཱིཏཱིརེ ཁནྡྷཱཝཱརཾ ནིཝཱསེཏྭཱ ནྷཱནཏྠཱཡ ནདིཾ ཨོཏིཎྞོ ཏཾ སདྡཾ ཨསྶོསི. རཱཛཱུནཉྩ ནཱམ ‘‘ཛིཏཾ མེ’’ཏི སདྡོ ཨམནཱཔོ ཧོཏི, སོ ཏསྶ སནྟིཀཾ གནྟྭཱ, ‘‘ཨཧཾ ཨིདཱནི ཨམིཏྟམདྡནཾ ཀཏྭཱ ‘ཛིཏཾ མེ’ཏི ཨཱགཏོ, ཏྭཾ པན ‘ཛིཏཾ མེ, ཛིཏཾ མེ’ཏི ཝིརཝསི, ཀིཾ ནཱམེཏ’’ནྟི པུཙྪི. ཀུདཱལཔཎྜིཏོ ‘‘ཏྭཾ བཱཧིརཀཙོརེ ཛིནི, ཏཡཱ ཛིཏཾ པུན ཨཝཛིཏམེཝ ཧོཏི, མཡཱ པན ཨཛ྄ཛྷཏྟིཀོ ལོབྷཙོརོ ཛིཏོ, སོ པུན མཾ ན ཛིནིསྶཏི, ཏསྶེཝ ཛཡོ སཱདྷཱུ’’ཏི ཝཏྭཱ ཨིམཾ གཱཐམཱཧ –

‘‘ན ཏཾ ཛིཏཾ སཱདྷུ ཛིཏཾ, ཡཾ ཛིཏཾ ཨཝཛཱིཡཏི;

ཏཾ ཁོ ཛིཏཾ སཱདྷུ ཛིཏཾ, ཡཾ ཛིཏཾ ནཱཝཛཱིཡཏཱི’’ཏི. (ཛཱ. ༡.༡.༧༠);

ཏཾ ཁཎཾཡེཝ ཙ གངྒཾ ཨོལོཀེནྟོ ཨཱཔོཀསིཎཾ ནིབྦཏྟེཏྭཱ ཨདྷིགཏཝིསེསོ ཨཱཀཱསེ པལླངྐེན ནིསཱིདི. རཱཛཱ མཧཱཔུརིསསྶ དྷམྨཀཐཾ སུཏྭཱ ཝནྡིཏྭཱ པབྦཛྫཾ ཡཱཙིཏྭཱ སདྡྷིཾ བལཀཱཡེན པབྦཛི. ཡོཛནམཏྟཱ པརིསཱ ཨཧོསི. ཨཔརོཔི སཱམནྟརཱཛཱ ཏསྶ པབྦཛིཏབྷཱཝཾ སུཏྭཱ, ‘‘ཏསྶ རཛྫཾ གཎྷིསྶཱམཱི’’ཏི ཨཱགནྟྭཱ ཏཐཱ སམིདྡྷཾ ནགརཾ སུཉྙཾ དིསྭཱ, ‘‘ཨེཝརཱུཔཾ ནགརཾ ཚཌྜེཏྭཱ པབྦཛིཏོ རཱཛཱ ཨོརཀེ ཋཱནེ ན པབྦཛིསྶཏི, མཡཱཔི པབྦཛིཏུཾ ཝཊྚཏཱི’’ཏི ཙིནྟེཏྭཱ ཏཏྠ གནྟྭཱ མཧཱཔུརིསཾ ཨུཔསངྐམིཏྭཱ པབྦཛྫཾ ཡཱཙིཏྭཱ སཔརིཝཱརོ པབྦཛི. ཨེཏེནེཝ ནཱིཧཱརེན སཏྟ རཱཛཱནོ པབྦཛིཾསུ. སཏྟཡོཛནིཀོ ཨསྶམོ ཨཧོསི. སཏྟ རཱཛཱནོ བྷོགེ ཚཌྜེཏྭཱ ཨེཏྟཀཾ ཛནཾ གཧེཏྭཱ པབྦཛིཾསུ. མཧཱཔུརིསོ བྲཧྨཙརིཡཝཱསཾ ཝསིཏྭཱ བྲཧྨལོཀཱུཔགོ ཨཧོསི.

སཏྠཱ ཨིམཾ དྷམྨདེསནཾ ཨཱཧརིཏྭཱ, ‘‘ཨཧཾ, བྷིཀྑཝེ, ཏདཱ ཀུདཱལཔཎྜིཏོ ཨཧོསིཾ, ཀིལེསཱ ནཱམེཏེ ཨེཝཾ བྷཱརིཡཱ’’ཏི ཨཱཧ.

ཙིཏྟཧཏྠཏྠེརཝཏྠུ པཉྩམཾ.

༦. པཉྩསཏབྷིཀྑུཝཏྠུ

ཀུམྦྷཱུཔམནྟི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ ཨཱརདྡྷཝིཔསྶཀེ བྷིཀྑཱུ ཨཱརབྦྷ ཀཐེསི.

སཱཝཏྠིཡཾ ཀིར པཉྩསཏཱ བྷིཀྑཱུ སཏྠུ སནྟིཀེ ཡཱཝ ཨརཧཏྟཱ ཀམྨཊྛཱནཾ གཧེཏྭཱ, ‘‘སམཎདྷམྨཾ ཀརིསྶཱམཱ’’ཏི ཡོཛནསཏམགྒཾ གནྟྭཱ ཨེཀཾ མཧཱཝཱསགཱམཾ ཨགམཾསུ. ཨཐ ཏེ མནུསྶཱ དིསྭཱ པཉྙཏྟཱསནེ ནིསཱིདཱཔེཏྭཱ པཎཱིཏེཧི ཡཱགུབྷཏྟཱདཱིཧི པརིཝིསིཏྭཱ, ‘‘ཀཧཾ, བྷནྟེ, གཙྪཐཱ’’ཏི པུཙྪིཏྭཱ, ‘‘ཡཐཱཕཱསུཀཊྛཱན’’ནྟི ཝུཏྟེ, ‘‘བྷནྟེ, ཨིམཾ ཏེམཱསཾ ཨིདྷེཝ ཝསཐ, མཡམྤི ཏུམྷཱཀཾ སནྟིཀེ སརཎེསུ པཏིཊྛཱཡ པཉྩ སཱིལཱནི རཀྑིསྶཱམཱ’’ཏི ཡཱཙིཏྭཱ ཏེསཾ ཨདྷིཝཱསནཾ ཝིདིཏྭཱ, ‘‘ཨཝིདཱུརེ ཋཱནེ མཧནྟོ ཝནསཎྜོ ཨཏྠི, ཨེཏྠ ཝསཐ, བྷནྟེ’’ཏི ཝཏྭཱ ཨུཡྻོཛེསུཾ. བྷིཀྑཱུ ཏཾ ཝནསཎྜཾ པཝིསིཾསུ. ཏསྨིཾ ཝནསཎྜེ ཨདྷིཝཏྠཱ དེཝཏཱ ‘‘སཱིལཝནྟོ, ཨཡྻཱ, ཨིམཾ ཝནསཎྜཾ ཨནུཔྤཏྟཱ, ཨཡུཏྟཾ ཁོ པན ཨསྨཱཀཾ ཨཡྻེསུ ཨིདྷ ཝསནྟེསུ པུཏྟདཱརེ གཧེཏྭཱ རུཀྑེ ཨབྷིརུཡ྄ཧ ཝསིཏུ’’ནྟི རུཀྑཏོ ཨོཏརིཏྭཱ བྷཱུམིཡཾ ནིསཱིདིཏྭཱ ཙིནྟཡིཾསུ, ‘‘ཨཡྻཱ, ཨིམསྨིཾ ཋཱནེ ཨཛྫེཀརཏྟིཾ ཝསིཏྭཱ ཨདྡྷཱ སྭེ གམིསྶནྟཱི’’ཏི. བྷིཀྑཱུཔི པུནདིཝསེ ཨནྟོགཱམེ པིཎྜཱཡ ཙརིཏྭཱ པུན ཏམེཝ ཝནསཎྜཾ ཨཱགམིཾསུ. དེཝཏཱ ‘‘བྷིཀྑུསངྒྷོ སྭཱཏནཱཡ ཀེནཙི ནིམནྟིཏོ བྷཝིསྶཏི, ཏསྨཱ པུནཱགཙྪཏི, ཨཛྫ གམནཾ ན བྷཝིསྶཏི, སྭེ གམིསྶཏི མཉྙེ’’ཏི ཨིམིནཱ ཨུཔཱཡེན ཨཌྜྷམཱསམཏྟཾ བྷཱུམིཡམེཝ ཨཙྪིཾསུ.

ཏཏོ ཙིནྟཡིཾསུ – ‘‘བྷདནྟཱ ཨིམཾ ཏེམཱསཾ ཨིདྷེཝ མཉྙེ ཝསིསྶནྟི, ཨིདྷེཝ ཁོ པན ཨིམེསུ ཝསནྟེསུ ཨམྷཱཀཾ རུཀྑེ ཨབྷིརུཧིཏྭཱ ནིསཱིདིཏུམྤི ན ཡུཏྟཾ, ཏེམཱསཾ པུཏྟདཱརེ གཧེཏྭཱ བྷཱུམིཡཾ ནིསཱིདནཊྛཱནཱནིཔི དུཀྑཱནི, ཀིཉྩི ཀཏྭཱ ཨིམེ བྷིཀྑཱུ པལཱཔེཏུཾ ཝཊྚཏཱི’’ཏི. ཏཱ ཏེསུ ཏེསུ རཏྟིཊྛཱནདིཝཱཊྛཱནེསུ ཙེཝ ཙངྐམནཀོཊཱིསུ ཙ ཚིནྣསཱིསཱནི ཀབནྡྷཱནི དསྶེཏུཾ ཨམནུསྶསདྡཉྩ བྷཱཝེཏུཾ ཨཱརབྷིཾསུ. བྷིཀྑཱུནཾ ཁིཔིཏཀཱསཱདཡོ རོགཱ པཝཏྟིཾསུ. ཏེ ཨཉྙམཉྙཾ ‘‘ཏུཡ྄ཧཾ, ཨཱཝུསོ, ཀིཾ རུཛྫཏཱི’’ཏི པུཙྪནྟཱ, ‘‘མཡ྄ཧཾ ཁིཔིཏརོགོ, མཡ྄ཧཾ ཀཱསོ’’ཏི ཝཏྭཱ, ‘‘ཨཱཝུསོ, ཨཧཾ ཨཛྫ ཙངྐམནཀོཊིཡཾ ཚིནྣསཱིསཾ ཨདྡསཾ, ཨཧཾ རཏྟིཊྛཱནེ ཀབནྡྷཾ ཨདྡསཾ, ཨཧཾ དིཝཱཊྛཱནེ ཨམནུསྶསདྡཾ ཨསྶོསིཾ, པརིཝཛྫེཏབྦཡུཏྟཀམིདཾ ཋཱནཾ, ཨམྷཱཀཾ ཨིདྷ ཨཕཱསུཀཾ ཨཧོསི, སཏྠུ སནྟིཀཾ གམིསྶཱམཱ’’ཏི ནིཀྑམིཏྭཱ ཨནུཔུབྦེན སཏྠུ སནྟིཀཾ གནྟྭཱ ཝནྡིཏྭཱ ཨེཀམནྟཾ ནིསཱིདིཾསུ.

ཨཐ ནེ སཏྠཱ ཨཱཧ – ‘‘ཀིཾ, བྷིཀྑཝེ, ཏསྨིཾ ཋཱནེ ཝསིཏུཾ ན སཀྑིསྶཐཱ’’ཏི? ‘‘ཨཱམ, བྷནྟེ, ཨམྷཱཀཾ ཏསྨིཾ ཋཱནེ ཝསནྟཱནཾ ཨེཝརཱུཔཱནི བྷེརཝཱརམྨཎཱནི ཨུཔཊྛཧནྟི, ཨེཝརཱུཔཾ ཨཕཱསུཀཾ ཧོཏི, ཏེན མཡཾ ‘ཝཛྫེཏབྦཡུཏྟཀམིདཾ ཋཱན’ནྟི ཏཾ ཚཌྜེཏྭཱ ཏུམྷཱཀཾ སནྟིཀཾ ཨཱགཏཱ’’ཏི. ‘‘བྷིཀྑཝེ, ཏཏྠེཝ ཏུམྷཱཀཾ གནྟུཾ ཝཊྚཏཱི’’ཏི. ‘‘ན སཀྐཱ, བྷནྟེ’’ཏི. ‘‘བྷིཀྑཝེ, ཏུམྷེ ཨཱཝུདྷཾ ཨགྒཧེཏྭཱ གཏཱ, ཨིདཱནི ཨཱཝུདྷཾ གཧེཏྭཱ གཙྪཐཱ’’ཏི. ‘‘ཀཏརཱཝུདྷཾ, བྷནྟེ’’ཏི? སཏྠཱ ‘‘ཨཧཾ ཨཱཝུདྷཾ ཝོ དསྶཱམི, མཡཱ དིནྣཾ ཨཱཝུདྷཾ གཧེཏྭཱ གཙྪཐཱ’’ཏི ཝཏྭཱ –

‘‘ཀརཎཱིཡམཏྠཀུསལེན, ཡནྟ སནྟཾ པདཾ ཨབྷིསམེཙྩ;

སཀྐོ ཨུཛཱུ ཙ སུཧུཛཱུ ཙ, སུཝཙོ ཙསྶ མུདུ ཨནཏིམཱནཱི’’ཏི. (ཁུ. པཱ. ༩.༡; སུ. ནི. ༡༤༣) –

སཀལཾ མེཏྟསུཏྟཾ ཀཐེཏྭཱ, ‘‘བྷིཀྑཝེ, ཨིམཾ ཏུམྷེ བཧི ཝིཧཱརསྶ ཝནསཎྜཏོ པཊྛཱཡ སཛ྄ཛྷཱཡནྟཱ ཨནྟོཝིཧཱརཾ པཝིསེཡྻཱཐཱ’’ཏི ཨུཡྻོཛེསི. ཏེ སཏྠཱརཾ ཝནྡིཏྭཱ ནིཀྑམིཏྭཱ ཨནུཔུབྦེན ཏཾ ཋཱནཾ པཏྭཱ བཧིཝིཧཱརེ གཎསཛ྄ཛྷཱཡཾ ཀཏྭཱ སཛ྄ཛྷཱཡམཱནཱ ཝནསཎྜཾ པཝིསིཾསུ. སཀལཝནསཎྜེ དེཝཏཱ མེཏྟཙིཏྟཾ པཊིལབྷིཏྭཱ ཏེསཾ པཙྩུགྒམནཾ ཀཏྭཱ པཏྟཙཱིཝརཔཊིགྒཧཎཾ ཨཱཔུཙྪིཾསུ, ཧཏྠཔཱདསམྦཱཧནཾ ཨཱཔུཙྪིཾསུ, ཏེསཾ ཏཏྠ ཏཏྠ ཨཱརཀྑཾ སཾཝིདཧིཾསུ, པཀྐདྷཱུཔནཏེལཾ ཝིཡ སནྣིསིནྣཱ ཨཧེསུཾ. ཀཏྠཙི ཨམནུསྶསདྡོ ནཱམ ནཱཧོསི. ཏེསཾ བྷིཀྑཱུནཾ ཙིཏྟཾ ཨེཀགྒཾ ཨཧོསི. ཏེ རཏྟིཊྛཱནདིཝཱཊྛཱནེསུ ནིསིནྣཱ ཝིཔསྶནཱཡ ཙིཏྟཾ ཨོཏཱརེཏྭཱ ཨཏྟནི ཁཡཝཡཾ པཊྛཔེཏྭཱ, ‘‘ཨཡཾ ཨཏྟབྷཱཝོ ནཱམ བྷིཛྫནཀཊྛེན ཨཐཱཝརཊྛེན ཀུལཱལབྷཱཛནསདིསོ’’ཏི ཝིཔསྶནཾ ཝཌྜྷཡིཾསུ. སམྨཱསམྦུདྡྷོ གནྡྷཀུཊིཡཱ ནིསིནྣོཝ ཏེསཾ ཝིཔསྶནཱཡ ཨཱརདྡྷབྷཱཝཾ ཉཏྭཱ ཏེ བྷིཀྑཱུ ཨཱམནྟེཏྭཱ, ‘‘ཨེཝམེཝ, བྷིཀྑཝེ, ཨཡཾ ཨཏྟབྷཱཝོ ནཱམ བྷིཛྫནཀཊྛེན ཨཐཱཝརཊྛེན ཀུལཱལབྷཱཛནསདིསོ ཨེཝཱ’’ཏི ཝཏྭཱ ཨོབྷཱསཾ ཕརིཏྭཱ ཡོཛནསཏེ ཋིཏོཔི ཨབྷིམུཁེ ནིསིནྣོ ཝིཡ ཚབྦཎྞརཾསིཡོ ཝིསྶཛྫེཏྭཱ དིསྶམཱནེན རཱུཔེན ཨིམཾ གཱཐམཱཧ –

༤༠.

‘‘ཀུམྦྷཱུཔམཾ ཀཱཡམིཾམ ཝིདིཏྭཱ, ནགརཱུཔམཾ ཙིཏྟམིདཾ ཋཔེཏྭཱ;

ཡོདྷེཐ མཱརཾ པཉྙཱཝུདྷེན, ཛིཏཉྩ རཀྑེ ཨནིཝེསནོ སིཡཱ’’ཏི.

ཏཏྠ ཀུམྦྷཱུཔམནྟི ཨབལདུབྦལཊྛེན ཨནདྡྷནིཡཏཱཝཀཱལིཀཊྛེན ཨིམཾ ཀེསཱདིསམཱུཧསངྑཱཏཾ ཀཱཡཾ ཀུམྦྷཱུཔམཾ ཀུལཱལབྷཱཛནསདིསཾ ཝིདིཏྭཱ. ནགརཱུཔམཾ ཙིཏྟམིདཾ ཋཔེཏྭཱཏི ནགརཾ ནཱམ བཧིདྡྷཱ ཐིརཾ ཧོཏི, གམྦྷཱིརཔརིཁཾ པཱཀཱརཔརིཀྑིཏྟཾ དྭཱརཊྚཱལཀཡུཏྟཾ, ཨནྟོསུཝིབྷཏྟཝཱིཐིཙཏུཀྐསིངྒྷཱཊཀསམྤནྣཾ ཨནྟརཱཔཎཾ, ཏཾ ‘‘ཝིལུམྤིསྶཱམཱ’’ཏི བཧིདྡྷཱ ཙོརཱ ཨཱགནྟྭཱ པཝིསིཏུཾ ཨསཀྐོནྟཱ པབྦཏཾ ཨཱསཛྫ པཊིཧཏཱ ཝིཡ གཙྪནྟི, ཨེཝམེཝ པཎྜིཏོ ཀུལཔུཏྟོ ཨཏྟནོ ཝིཔསྶནཱཙིཏྟཾ ཐིརཾ ནགརསདིསཾ ཀཏྭཱ ཋཔེཏྭཱ ནགརེ ཋིཏོ ཨེཀཏོདྷཱརཱདིནཱནཔྤཀཱརཱཝུདྷེན ཙོརགཎཾ ཝིཡ ཝིཔསྶནཱམཡེན ཙ ཨརིཡམགྒམཡེན ཙ པཉྙཱཝུདྷེན ཏཾཏཾམགྒཝཛ྄ཛྷཾ ཀིལེསམཱརཾ པཊིབཱཧནྟོ ཏཾ ཏཾ ཀིལེསམཱརཾ ཡོདྷེཐ, པཧརེཡྻཱཐཱཏི ཨཏྠོ. ཛིཏཉྩ རཀྑེཏི ཛིཏཉྩ ཨུཔྤཱདིཏཾ ཏརུཎཝིཔསྶནཾ ཨཱཝཱསསཔྤཱཡཨུཏུསཔྤཱཡབྷོཛནསཔྤཱཡཔུགྒལསཔྤཱཡདྷམྨསྶཝནསཔྤཱཡཱདཱིནི ཨཱསེཝནྟོ ཨནྟརནྟརཱ སམཱཔཏྟིཾ སམཱཔཛྫིཏྭཱ ཏཏོ ཝུཊྛཱཡ སུདྡྷཙིཏྟེན སངྑཱརེ སམྨསནྟོ རཀྑེཡྻ.

ཨནིཝེསནོ སིཡཱཏི ཨནཱལཡོ བྷཝེཡྻ. ཡཐཱ ནཱམ ཡོདྷོ སངྒཱམསཱིསེ བལཀོཊྛཀཾ ཀཏྭཱ ཨམིཏྟེཧི སདྡྷིཾ ཡུཛ྄ཛྷནྟོ ཚཱཏོ ཝཱ པིཔཱསིཏོ ཝཱ ཧུཏྭཱ སནྣཱཧེ ཝཱ སིཐིལེ ཨཱཝུདྷེ ཝཱ པཏིཏེ བལཀོཊྛཀཾ པཝིསིཏྭཱ ཝིསྶམིཏྭཱ བྷུཉྫིཏྭཱ པིཝིཏྭཱ སནྣཧིཏྭཱ ཨཱཝུདྷཾ གཧེཏྭཱ པུན ནིཀྑམིཏྭཱ ཡུཛ྄ཛྷནྟོ པརསེནཾ མདྡཏི, ཨཛིཏཾ ཛིནཱཏི, ཛིཏཾ རཀྑཏི. སོ ཧི སཙེ བལཀོཊྛཀེ ཋིཏོ ཨེཝཾ ཝིསྶམནྟོ ཏཾ ཨསྶཱདེནྟོ ཨཙྪེཡྻ, རཛྫཾ པརཧཏྠགཏཾ ཀརེཡྻ, ཨེཝམེཝ, བྷིཀྑུ, པཊིལདྡྷཾ ཏརུཎཝིཔསྶནཾ པུནཔྤུནཾ སམཱཔཏྟིཾ སམཱཔཛྫིཏྭཱ ཏཏོ ཝུཊྛཱཡ སུདྡྷཙིཏྟེན སངྑཱརེ སམྨསནྟོ རཀྑིཏུཾ སཀྐོཏི, ཨུཏྟརིམགྒཕལཔཊིལཱབྷེན ཀིལེསམཱརཾ ཛིནཱཏི. སཙེ པན སོ སམཱཔཏྟིམེཝ ཨསྶཱདེཏི, སུདྡྷཙིཏྟེན པུནཔྤུནཾ སངྑཱརེ ན སམྨསཏི, མགྒཕལཔཊིཝེདྷཾ ཀཱཏུཾ ན སཀྐོཏི. ཏསྨཱ རཀྑིཏབྦཡུཏྟཀཾ རཀྑནྟོ ཨནིཝེསནོ སིཡཱ, སམཱཔཏྟིཾ ནིཝེསནཾ ཀཏྭཱ ཏཏྠ ན ནིཝེསེཡྻ, ཨཱལཡཾ ན ཀརེཡྻཱཏི ཨཏྠོ. ‘‘ཨདྡྷཱ ཏུམྷེཔི ཨེཝཾ ཀརོཐཱ’’ཏི ཨེཝཾ སཏྠཱ ཏེསཾ བྷིཀྑཱུནཾ དྷམྨཾ དེསེསི.

དེསནཱཝསཱནེ པཉྩསཏཱ བྷིཀྑཱུ ནིསིནྣཊྛཱནེ ནིསིནྣཱཡེཝ སཧ པཊིསམྦྷིདཱཧི ཨརཧཏྟཾ པཏྭཱ ཏཐཱགཏསྶ སུཝཎྞཝཎྞཾ སརཱིརཾ ཝཎྞཡནྟཱ ཐོམེནྟཱ ཝནྡནྟཱཝ ཨཱགཙྪིཾསཱུཏི.

པཉྩསཏབྷིཀྑུཝཏྠུ ཚཊྛཾ.

༧. པཱུཏིགཏྟཏིསྶཏྠེརཝཏྠུ

ཨཙིརཾ ཝཏཡཾ ཀཱཡོཏི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ པཱུཏིགཏྟཏིསྶཏྠེརཾ ཨཱརབྦྷ ཀཐེསི.

ཨེཀོ ཀིར སཱཝཏྠིཝཱསཱི ཀུལཔུཏྟོ སཏྠུ སནྟིཀེ དྷམྨཾ སུཏྭཱ སཱསནེ ཨུརཾ དཏྭཱ པབྦཛིཏོ, སོ ལདྡྷཱུཔསམྤདོ ཏིསྶཏྠེརོ ནཱམ ཨཧོསི. གཙྪནྟེ གཙྪནྟེ ཀཱལེ ཏསྶ སརཱིརེ རོགོ ཨུདཔཱདི. སཱསཔམཏྟིཡོ པིལ༹ཀཱ ཨུཊྛཧིཾསུ. ཏཱ ཨནུཔུབྦེན མུགྒམཏྟཱ ཀལཱཡམཏྟཱ ཀོལཊྛིམཏྟཱ ཨཱམལཀམཏྟཱ བེལུ༹ཝསལཱཊུམཏྟཱ བེལུ༹ཝམཏྟཱ ཧུཏྭཱ པབྷིཛྫིཾསུ, སཀལསརཱིརཾ ཚིདྡཱཝཚིདྡཾ ཨཧོསི. པཱུཏིགཏྟཏིསྶཏྠེརོཏྭེཝསྶ ནཱམཾ ཨུདཔཱདི. ཨཐསྶ ཨཔརབྷཱགེ ཨཊྛཱིནི བྷིཛྫིཾསུ. སོ ཨཔྤཊིཛགྒིཡོ ཨཧོསི. ནིཝཱསནཔཱརུཔནཾ པུབྦལོཧིཏམཀྑིཏཾ ཛཱལཔཱུཝསདིསཾ ཨཧོསི. སདྡྷིཝིཧཱརིཀཱདཡོ པཊིཛགྒིཏུཾ ཨསཀྐོནྟཱ ཚཌྜཡིཾསུ. སོ ཨནཱཐོ ཧུཏྭཱ ནིཔཛྫི.

བུདྡྷཱནཉྩ ནཱམ དྭེ ཝཱརེ ལོཀཝོལོཀནཾ ཨཝིཛཧིཏཾ ཧོཏི. པཙྩཱུསཀཱལེ ལོཀཾ ཝོལོཀེནྟཱ ཙཀྐཝཱལ༹མུཁཝཊྚིཏོ པཊྛཱཡ གནྡྷཀུཊིཨབྷིམུཁཾ ཉཱཎཾ ཀཏྭཱ ཨོལོཀེནྟི, སཱཡཾ ཨོལོཀེནྟཱ གནྡྷཀུཊིཏོ པཊྛཱཡ བཱཧིརཱབྷིམུཁཾ ཉཱཎཾ ཀཏྭཱ ཨོལོཀེནྟི. ཏསྨིཾ པན སམཡེ བྷགཝཏོ ཉཱཎཛཱལསྶ ཨནྟོ པཱུཏིགཏྟཏིསྶཏྠེརོ པཉྙཱཡི. སཏྠཱ ཏསྶ བྷིཀྑུནོ ཨརཧཏྟསྶ ཨུཔནིསྶཡཾ དིསྭཱ, ‘‘ཨཡཾ སདྡྷིཝིཧཱརིཀཱདཱིཧི ཚཌྜིཏོ, ཨིདཱནིསྶ མཾ ཋཔེཏྭཱ ཨཉྙཾ པཊིསརཎཾ ནཏྠཱི’’ཏི གནྡྷཀུཊིཏོ ནིཀྑམིཏྭཱ ཝིཧཱརཙཱརིཀཾ ཙརམཱནོ ཝིཡ ཨགྒིསཱལཾ གནྟྭཱ ཨུཀྑལིཾ དྷོཝིཏྭཱ ཨུདཀཾ དཏྭཱ ཨུདྡྷནཾ ཨཱརོཔེཏྭཱ ཨུདཀསྶ ཏཏྟབྷཱཝཾ ཨཱགམཡམཱནོ ཨགྒིསཱལཱཡམེཝ ཨཊྛཱསི. ཏཏྟབྷཱཝཾ ཛཱནིཏྭཱ གནྟྭཱ ཏསྶ བྷིཀྑུནོ ནིཔནྣམཉྩཀོཊིཡཾ གཎྷི, ཏདཱ བྷིཀྑཱུ ‘‘ཨཔེཐ, བྷནྟེ, མཡཾ གཎྷིསྶཱམཱ’’ཏི མཉྩཀཾ གཧེཏྭཱ ཨགྒིསཱལཾ ཨཱནཡིཾསུ. སཏྠཱ ཨམྦཎཾ ཨཱཧརཱཔེཏྭཱ ཨུཎྷོདཀཾ ཨཱསིཉྩིཏྭཱ ཏེཧི བྷིཀྑཱུཧི ཏསྶ པཱརུཔནཾ གཱཧཱཔེཏྭཱ ཨུཎྷོདཀེ མདྡཱཔེཏྭཱ མནྡཱཏཔེ ཝིསྶཛྫཱཔེསི. ཨཐསྶ སནྟིཀེ ཋཏྭཱ སརཱིརཾ ཨུཎྷོདཀེན ཏེམེཏྭཱ གྷཾསིཏྭཱ ནྷཱཔེསི, ཏསྶ ནཧཱནཔརིཡོསཱནེ པཱརུཔནཾ སུཀྑི. ཨཐ ནཾ ཏཾ ནིཝཱསཱཔེཏྭཱ ནིཝཏྠཀཱསཱཝཾ ཨུདཀེ མདྡཱཔེཏྭཱ ཨཱཏཔེ ཝིསྶཛྫཱཔེསི. ཨཐསྶ གཏྟེ ཨུདཀེ ཚིནྣམཏྟེ ཏམྤི སུཀྑི. སོ ཨེཀཾ ཀཱསཱཝཾ ནིཝཱསེཏྭཱ ཨེཀཾ པཱརུཔིཏྭཱ སལླཧུཀསརཱིརོ ཨེཀགྒཙིཏྟོ མཉྩཀེ ནིཔཛྫི. སཏྠཱ ཏསྶ ཨུསྶཱིསཀེ ཋཏྭཱ, ‘‘བྷིཀྑུ ཨཡཾ ཏཝ ཀཱཡོ ཨཔེཏཝིཉྙཱཎོ ནིརུཔཀཱརོ ཧུཏྭཱ ཀལིངྒརཾ ཝིཡ པཐཝིཡཾ སེསྶཏཱི’’ཏི ཝཏྭཱ ཨིམཾ གཱཐམཱཧ –

༤༡.

‘‘ཨཙིརཾ ཝཏཡཾ ཀཱཡོ, པཐཝིཾ ཨདྷིསེསྶཏི;

ཚུདྡྷོ ཨཔེཏཝིཉྙཱཎོ, ནིརཏྠཾཝ ཀལིངྒར’’ནྟི.

ཏཏྠ ཨཙིརཾ ཝཏཱཏི བྷིཀྑུ ན ཙིརསྶེཝ ཨཡཾ ཀཱཡོ པཐཝིཾ ཨདྷིསེསྶཏི, ཨིམིསྶཱ པཀཏིསཡནེན སཡིཏཱཡ པཐཝིཡཱ ཨུཔརི སཡིསྶཏི. ཚུདྡྷོཏི ཨཔཝིདྡྷོ, ཨཔགཏཝིཉྙཱཎཏཱཡ ཏུཙྪོ ཧུཏྭཱ སེསྶཏཱིཏི དསྶེཏི. ཡཐཱ ཀིཾ? ནིརཏྠཾཝ ཀལིངྒརཾ ནིརུཔཀཱརཾ ནིརཏྠཀཾ ཀཊྛཁཎྜཾ ཝིཡ. དབྦསམྦྷཱརཏྠིཀཱ ཧི མནུསྶཱ ཨརཉྙཾ པཝིསིཏྭཱ ཨུཛུཀཾ ཨུཛུཀསཎྛཱནེན ཝངྐཾ ཝངྐསཎྛཱནེན ཚིནྡིཏྭཱ དབྦསམྦྷཱརཾ གཎྷནྟི, ཨཝསེསཾ པན སུསིརཉྩ པཱུཏིཀཉྩ ཨསཱརཀཉྩ གཎྛིཛཱཏཉྩ ཚིནྡིཏྭཱ ཏཏྠེཝ ཚཌྜེནྟི. ཨཉྙེ དབྦསམྦྷཱརཏྠིཀཱ ཨཱགནྟྭཱ ཏཾ གཧེཏཱརོ ནཱམ ནཏྠི, ཨོལོཀེཏྭཱ ཨཏྟནོ ཨུཔཀཱརཀམེཝ གཎྷནྟི, ཨིཏརཾ པཐཝཱིགཏམེཝ ཧོཏི. ཏཾ པན ཏེན ཏེན ཨུཔཱཡེན མཉྩཔཊིཔཱདཀཾ ཝཱ པཱདཀཐལིཀཾ ཝཱ ཕལཀཔཱིཋཾ ཝཱ ཀཱཏུཾ སཀྐཱཔི བྷཝེཡྻ. ཨིམསྨིཾ པན ཨཏྟབྷཱཝེ དྭཏྟིཾསཱཡ ཀོཊྛཱསེསུ ཨེཀཀོཊྛཱསོཔི མཉྩཔཊིཔཱདཀཱདིཝསེན ཨཉྙེན ཝཱ ཨུཔཀཱརམུཁེན གཡ྄ཧཱུཔགོ ནཱམ ནཏྠི, ཀེཝལཾ ནིརཏྠཾཝ ཀལིངྒརཾ ཨཡཾ ཀཱཡོ ཨཔགཏཝིཉྙཱཎོ ཀཏིཔཱཧེནེཝ པཐཝིཡཾ སེསྶཏཱིཏི.

དེསནཱཝསཱནེ པཱུཏིགཏྟཏིསྶཏྠེརོ སཧ པཊིསམྦྷིདཱཧི ཨརཧཏྟཾ པཱཔུཎི, ཨཉྙེཔི བཧཱུ སོཏཱཔནྣཱདཡོ ཨཧེསུཾ. ཐེརོཔི ཨརཧཏྟཾ པཏྭཱཝ པརིནིབྦཱཡི. སཏྠཱ ཏསྶ སརཱིརཀིཙྩཾ ཀཱརཱཔེཏྭཱ དྷཱཏུཡོ གཧེཏྭཱ ཙེཏིཡཾ ཀཱརཱཔེསི. བྷིཀྑཱུ སཏྠཱརཾ པུཙྪིཾསུ – ‘‘བྷནྟེ, པཱུཏིགཏྟཏིསྶཏྠེརོ ཀུཧིཾ ནིབྦཏྟོ’’ཏི. ‘‘པརིནིབྦུཏོ, བྷིཀྑཝེ’’ཏི. ‘‘བྷནྟེ, ཨེཝརཱུཔསྶ པན ཨརཧཏྟཱུཔནིསྶཡསམྤནྣསྶ བྷིཀྑུནོ ཀིཾ ཀཱརཎཱ གཏྟཾ པུཏིཀཾ ཛཱཏཾ, ཀིཾ ཀཱརཎཱ ཨཊྛཱིནི བྷིནྣཱནི, ཀིམསྶ ཀཱརཎཾ ཨརཧཏྟསྶ ཨུཔནིསྶཡབྷཱཝཾ པཏྟ’’ནྟི? ‘‘བྷིཀྑཝེ, སབྦམེཏཾ ཨེཏསྶ ཨཏྟནཱ ཀཏཀམྨེནེཝ ནིབྦཏྟ’’ནྟི. ‘‘ཀིཾ པན ཏེན, བྷནྟེ, ཀཏ’’ནྟི? ‘‘ཏེན ཧི, བྷིཀྑཝེ, སུཎཱཐཱ’’ཏི ཨཏཱིཏཾ ཨཱཧརི –

ཨཡཾ ཀསྶཔསམྨཱསམྦུདྡྷཀཱལེ སཱཀུཎིཀོ ཧུཏྭཱ བཧཱུ སཀུཎེ ཝདྷིཏྭཱ ཨིསྶརཛནཾ ཨུཔཊྛཧི. ཏེསཾ དིནྣཱཝསེསེ ཝིཀྐིཎཱཏི, ‘‘ཝིཀྐིཏཱཝསེསཱ མཱརེཏྭཱ ཋཔིཏཱ པཱུཏིཀཱ བྷཝིསྶནྟཱི’’ཏི ཡཐཱ ཨུཔྤཏིཏུཾ ན སཀྐོནྟི, ཏཐཱ ཏེསཾ ཛངྒྷཊྛཱིནི ཙ པཀྑཊྛཱིནི ཙ བྷིནྡིཏྭཱ རཱསིཾ ཀཏྭཱ ཋཔེཏི, ཏེ པུནདིཝསེ ཝིཀྐིཎཱཏི. ཨཏིབཧཱུནཾ པན ལདྡྷཀཱལེ ཨཏྟནོཔི ཨཏྠཱཡ པཙཱཔེཏི. ཏསྶེཀདིཝསཾ རསབྷོཛནེ པཀྐེ ཨེཀོ ཁཱིཎཱསཝོ པིཎྜཱཡ ཙརནྟོ གེཧདྭཱརེ ཨཊྛཱསི. སོ ཐེརཾ དིསྭཱ ཙིཏྟཾ པསཱདེཏྭཱ, ‘‘མཡཱ བཧཱུ པཱཎཱ མཱརེཏྭཱ ཁཱདིཏཱ, ཨཡྻོ ཙ མེ གེཧདྭཱརེ ཋིཏོ, ཨནྟོགེཧེ ཙ རསབྷོཛནཾ སཾཝིཛྫཏི, པིཎྜཔཱཏམསྶ དསྶཱམཱི’’ཏི ཏསྶ པཏྟཾ ཨཱདཱཡ པཱུརེཏྭཱ རསཔིཎྜཔཱཏཾ དཏྭཱ ཐེརཾ པཉྩཔཏིཊྛིཏེན ཝནྡིཏྭཱ, ‘‘བྷནྟེ, ཏུམྷེཧི དིཊྛདྷམྨསྶ མཏྠཀཾ པཱཔུཎེཡྻ’’ནྟི ཨཱཧ. ཐེརོ ‘‘ཨེཝཾ ཧོཏཱུ’’ཏི ཨནུམོདནཾ ཨཀཱསི. ‘‘བྷིཀྑཝེ, ཏདཱ ཀཏཀམྨཝསེནེཏཾ ཏིསྶསྶ ནིཔྥནྣཾ, སཀུཎཱནཾ ཨཊྛིབྷེདནནིསྶནྡེན ཏིསྶསྶ གཏྟཉྩ པཱུཏིཀཾ ཛཱཏཾ, ཨཊྛཱིནི ཙ བྷིནྣཱནི, ཁཱིཎཱསཝསྶ རསཔིཎྜཔཱཏདཱནནིསྶནྡེན ཨརཧཏྟཾ པཏྟོ’’ཏི.

པཱུཏིགཏྟཏིསྶཏྠེརཝཏྠུ སཏྟམཾ.

༨. ནནྡགོཔཱལཀཝཏྠུ

དིསོ དིསནྟི ཨིམཾ དྷམྨདེསནཾ སཏྠཱ ཀོསལཛནཔདེ ནནྡགོཔཱལཀཾ ཨཱརབྦྷ ཀཐེསི.

སཱཝཏྠིཡཾ ཀིར ཨནཱཐཔིཎྜིཀསྶ གཧཔཏིནོ ནནྡོ ནཱམ གོཔཱལཀོ གོཡཱུཐཾ རཀྑཏི ཨཌྜྷོ མཧདྡྷནོ མཧཱབྷོགོ. སོ ཀིར ཡཐཱ ཀེཎིཡོ ཛཊིལོ པབྦཛྫཱཝེསེན, ཨེཝཾ གོཔཱལཀཏྟེན རཱཛབལིཾ པརིཧརནྟོ ཨཏྟནོ ཀུཊུམྦཾ རཀྑཏི. སོ ཀཱལེན ཀཱལཾ པཉྩ གོརསེ ཨཱདཱཡ ཨནཱཐཔིཎྜིཀསྶ སནྟིཀཾ ཨཱགནྟྭཱ སཏྠཱརཾ པསྶཏི, དྷམྨཾ སུཎཱཏི, ཨཏྟནོ ཝསནཊྛཱནཾ ཨཱགམནཏྠཱཡ སཏྠཱརཾ ཡཱཙཏི. སཏྠཱ ཏསྶ ཉཱཎཔརིཔཱཀཾ ཨཱགམཡམཱནོ ཨཱགནྟྭཱ པརིཔཀྐབྷཱཝཾ ཉཏྭཱ ཨེཀདིཝསཾ མཧཱབྷིཀྑུསངྒྷཔརིཝུཏོ ཙཱརིཀཾ ཙརནྟོ མགྒཱ ཨོཀྐམྨ ཏསྶ ཝསནཊྛཱནཱསནྣེ ཨཉྙཏརསྨིཾ རུཀྑམཱུལེ ནིསཱིདི. ནནྡོ སཏྠུ སནྟིཀཾ ཨགནྟྭཱ ཝནྡིཏྭཱ པཊིསནྠཱརཾ ཀཏྭཱ སཏྠཱརཾ ནིམནྟེཏྭཱ སཏྠཱཧཾ བུདྡྷཔྤམུཁསྶ བྷིཀྑུསངྒྷསྶ པཎཱིཏཾ པཉྩགོརསདཱནཾ ཨདཱསི. སཏྟམེ དིཝསེ སཏྠཱ ཨནུམོདནཾ ཀཏྭཱ དཱནཀཐཱདིབྷེདཾ ཨནུཔུབྦིཾ ཀཐཾ ཀཐེསི. ཀཐཱཔརིཡོསཱནེ ནནྡགོཔཱལཀོ སོཏཱཔཏྟིཕལེ པཏིཊྛཱཡ སཏྠུ པཏྟཾ གཧེཏྭཱ སཏྠཱརཾ ཨནུགཙྪནྟོ དཱུརཾ གནྟྭཱ, ‘‘ཏིཊྛ, ཨུཔཱསཀཱ’’ཏི ནིཝཏྟིཡམཱནོ ཝནྡིཏྭཱ ནིཝཏྟི. ཨཐ ནཾ ཨེཀོ ལུདྡཀོ ཝིཛ྄ཛྷིཏྭཱ མཱརེསི. པཙྪཏོ ཨཱགཙྪནྟཱ བྷིཀྑཱུ ནཾ དིསྭཱ གནྟྭཱ སཏྠཱརཾ ཨཱཧཾསུ – ‘‘ནནྡོ, བྷནྟེ, གོཔཱལཀོ ཏུམྷཱཀཾ ཨིདྷཱགཏཏྟཱ མཧཱདཱནཾ དཏྭཱ ཨནུགནྟྭཱ ནིཝཏྟེནྟོ མཱརིཏོ, སཙེ ཏུམྷེ ནཱགཙྪིསྶཐ, ནཱསྶ མརཎཾ ཨབྷཝིསྶཱ’’ཏི. སཏྠཱ, ‘‘བྷིཀྑཝེ, མཡི ཨཱགཏེཔི ཨནཱགཏེཔི ཏསྶ ཙཏསྶོ དིསཱ ཙཏསྶོ ཨནུདིསཱ ཙ གཙྪནྟསྶཱཔི མརཎཏོ མུཙྩནཱུཔཱཡོ ནཱམ ནཏྠི. ཡཉྷི ནེཝ ཙོརཱ, ན ཝེརིནོ ཀརོནྟི, ཏཾ ཨིམེསཾ སཏྟཱནཾ ཨནྟོཔདུཊྛཾ མིཙྪཱཔཎིཧིཏཾ ཙིཏྟམེཝ ཀརོཏཱི’’ཏི ཝཏྭཱ ཨིམཾ གཱཐམཱཧ –

༤༢.

‘‘དིསོ དིསཾ ཡཾ ཏཾ ཀཡིརཱ, ཝེརཱི ཝཱ པན ཝེརིནཾ;

མིཙྪཱཔཎིཧིཏཾ ཙིཏྟཾ, པཱཔིཡོ ནཾ ཏཏོ ཀརེ’’ཏི.

ཏཏྠ དིསོ དིསནྟི ཙོརོ ཙོརཾ. ‘‘དིསྭཱ’’ཏི པཱཋསེསོ. ཡཾ ཏཾ ཀཡིརཱཏི ཡཾ ཏཾ ཏསྶ ཨནཡབྱསནཾ ཀརེཡྻ. དུཏིཡཔདེཔི ཨེསེཝ ནཡོ. ཨིདཾ ཝུཏྟཾ ཧོཏི – ཨེཀོ ཨེཀསྶ མིཏྟདུབྦྷཱི ཙོརོ པུཏྟདཱརཁེཏྟཝཏྠུ གོམཧིཾསཱདཱིསུ ཨཔརཛ྄ཛྷནྟོ ཡསྶ ཨཔརཛ྄ཛྷཏི, ཏམྤི ཏཐེཝ ཨཏྟནི ཨཔརཛ྄ཛྷནྟཾ ཙོརཾ དིསྭཱ, ཝེརི ཝཱ པན ཀེནཙིདེཝ ཀཱརཎེན བདྡྷཝེརཾ ཝེརིཾ དིསྭཱ ཨཏྟནོ ཀཀྑལ༹ཏཱཡ དཱརུཎཏཱཡ ཡཾ ཏཾ ཏསྶ ཨནཡབྱསནཾ ཀརེཡྻ, པུཏྟདཱརཾ ཝཱ པཱིལེ༹ཡྻ, ཁེཏྟཱདཱིནི ཝཱ ནཱསེཡྻ, ཛཱིཝིཏཱ ཝཱ པན ནཾ ཝོརོཔེཡྻ, དསསུ ཨཀུསལཀམྨཔཐེསུ མིཙྪཱཋཔིཏཏྟཱ མིཙྪཱཔཧིཎིཏཾ ཙིཏྟཾ པཱཔིཡོ ནཾ ཏཏོ ཀརེ ཏཾ པུརིསཾ ཏཏོ པཱཔཏརཾ ཀརེཡྻ. ཝུཏྟཔྤཀཱརེཧི, དིསོ དིསསྶ ཝཱ ཝེརཱི ཝེརིནོ ཝཱ ཨིམསྨིཾཡེཝ ཨཏྟབྷཱཝེ དུཀྑཾ ཝཱ ཨུཔྤཱདེཡྻ, ཛཱིཝིཏཀྑཡཾ ཝཱ ཀརེཡྻ. ཨིདཾ པན ཨཀུསལཀམྨཔཐེསུ མིཙྪཱཋཔིཏཾ ཙིཏྟཾ དིཊྛེཝ དྷམྨེ ཨནཡབྱསནཾ པཱཔེཏི, ཨཏྟབྷཱཝསཏསཧསྶེསུཔི ཙཏཱུསུ ཨཔཱཡེསུ ཁིཔིཏྭཱ སཱིསཾ ཨུཀྑིཔིཏུཾ ན དེཏཱིཏི.

དེསནཱཔརིཡོསཱནེ བཧཱུ སོཏཱཔཏྟིཕལཱདཱིནི པཏྟཱ. མཧཱཛནསྶ སཱཏྠིཀཱ དེསནཱ ཛཱཏཱ. ཨུཔཱསཀེན པན བྷཝནྟརེ ཀཏཀམྨཾ བྷིཀྑཱུཧི ན པུཙྪིཏཾ, ཏསྨཱ སཏྠཱརཱ ན ཀཐིཏནྟི.

ནནྡགོཔཱལཀཝཏྠུ ཨཊྛམཾ.

༩. སོརེཡྻཏྠེརཝཏྠུ

ན ཏཾ མཱཏཱ པིཏཱ ཀཡིརཱཏི ཨིམཾ དྷམྨདེསནཾ སཏྠཱ སཱཝཏྠིཡཾ ཛེཏཝནེ ཝིཧརནྟོ སོརེཡྻཏྠེརཾ ཨཱརབྦྷ ཀཐེསི.

ཝཏྠུ སོརེཡྻནགརེ སམུཊྛིཏཾ, སཱཝཏྠིཡཾ ནིཊྛཱཔེསི. སམྨཱསམྦུདྡྷེ སཱཝཏྠིཡཾ ཝིཧརནྟེ སོརེཡྻནགརེ སོརེཡྻསེཊྛིཔུཏྟོ ཨེཀེན སཧཱཡཀེན སདྡྷིཾ སུཁཡཱནཀེ ནིསཱིདིཏྭཱ མཧནྟེན པརིཝཱརེན ནྷཱནཏྠཱཡ ནགརཱ ནིཀྑམི. ཏསྨིཾ ཁཎེ མཧཱཀཙྩཱཡནཏྠེརོ སོརེཡྻནགརཾ པིཎྜཱཡ པཝིསིཏུཀཱམོ ཧུཏྭཱ བཧིནགརེ སངྒྷཱཊིཾ པཱརུཔཏི. ཐེརསྶ ཙ སུཝཎྞཝཎྞཾ སརཱིརཾ. སོརེཡྻསེཊྛིཔུཏྟོ ཏཾ དིསྭཱ ཙིནྟེསི – ‘‘ཨཧོ ཝཏ ཨཡཾ ཝཱ ཐེརོ མམ བྷརིཡཱ བྷཝེཡྻ, མམ ཝཱ བྷརིཡཱཡ སརཱིརཝཎྞོ ཨེཏསྶ སརཱིརཝཎྞོ ཝིཡ བྷཝེཡྻཱ’’ཏི. ཏསྶ ཙིནྟིཏམཏྟེཡེཝ པུརིསལིངྒཾ ཨནྟརདྷཱཡི, ཨིཏྠིལིངྒཾ པཱཏུརཧོསི. སོ ལཛྫམཱནོ ཡཱནཀཱ ཨོརུཡ྄ཧ པལཱཡི. པརིཛནོ ཏཾ ཨསཉྫཱནནྟོ ‘‘ཀིམེཏ’’ནྟི ཨཱཧ. སཱཔི ཏཀྐསིལམགྒཾ པཊིཔཛྫི. སཧཱཡཀོཔིསྶཱ ཨིཏོ ཙིཏོ ཙ ཝིཙརིཏྭཱཔི ནཱདྡས. སབྦེ ནྷཱཡིཏྭཱ གེཧཾ ཨགམིཾསུ. ‘‘ཀཧཾ སེཊྛིཔུཏྟོ’’ཏི ཙ ཝུཏྟེ, ‘‘ནྷཏྭཱ ཨཱགཏོ བྷཝིསྶཏཱིཏི མཉྙིམྷཱ’’ཏི ཝདིཾསུ. ཨཐསྶ མཱཏཱཔིཏརོ ཏཏྠ ཏཏྠ པརིཡེསིཏྭཱ ཨཔསྶནྟཱ རོདིཏྭཱ པརིདེཝིཏྭཱ, ‘‘མཏོ བྷཝིསྶཏཱི’’ཏི མཏཀབྷཏྟཾ ཨདཾསུ. སཱ ཨེཀཾ ཏཀྐསིལགཱམིཾ སཏྠཝཱཧཾ དིསྭཱ ཡཱནཀསྶ པཙྪཏོ པཙྪཏོ ཨནུབནྡྷི.

ཨཐ ནཾ མནུསྶཱ དིསྭཱ, ‘‘ཨམྷཱཀཾ ཡཱནཀསྶ པཙྪཏོ པཙྪཏོ ཨནུགཙྪཏི, མཡཾ ‘ཀསྶེསཱ དཱརིཀཱ’ཏི ཏཾ ན ཛཱནཱམཱ’’ཏི ཝདིཾསུ. སཱཔི ‘‘ཏུམྷེ ཨཏྟནོ ཡཱནཀཾ པཱཛེཐ, ཨཧཾ པདསཱ གམིསྶཱམཱི’’ཏི གཙྪནྟཱི ཨངྒུལིམུདྡིཀཾ དཏྭཱ ཨེཀསྨིཾ ཡཱནཀེ ཨོཀཱསཾ ཀཱརེསི. མནུསྶཱ ཙིནྟཡིཾསུ – ‘‘ཏཀྐསིལནགརེ ཨམྷཱཀཾ སེཊྛིཔུཏྟསྶ བྷརིཡཱ ནཏྠི, ཏསྶ ཨཱཙིཀྑིསྶཱམ, མཧཱཔཎྞཱཀཱརོ ནོ བྷཝིསྶཏཱི’’ཏི. ཏེ གེཧཾ གནྟྭཱ, ‘‘སཱམི, ཨམྷེཧི ཏུམྷཱཀཾ ཨེཀཾ ཨིཏྠིརཏནཾ ཨཱནཱིཏ’’ནྟི ཨཱཧཾསུ. སོ ཏཾ སུཏྭཱ ཏཾ པཀྐོསཱཔེཏྭཱ ཨཏྟནོ ཝཡཱནུརཱུཔཾ ཨབྷིརཱུཔཾ པཱསཱདིཀཾ དིསྭཱ ཨུཔྤནྣསིནེཧོ གེཧེ ཨཀཱསི. པུརིསཱ ཧི ཨིཏྠིཡོ, ཨིཏྠིཡོ ཝཱ པུརིསཱ ཨབྷཱུཏཔུབྦཱ ནཱམ ནཏྠི. པུརིསཱ ཧི པརསྶ དཱརེསུ ཨཏིཙརིཏྭཱ ཀཱལཾ ཀཏྭཱ བཧཱུནི ཝསྶསཏསཧསྶཱནི ནིརཡེ པཙྩིཏྭཱ མནུསྶཛཱཏིཾ ཨཱགཙྪནྟཱ ཨཏྟབྷཱཝསཏེ ཨིཏྠིབྷཱཝཾ ཨཱཔཛྫནྟི.

ཨཱནནྡཏྠེརོཔི ཀཔྤསཏསཧསྶཾ པཱུརིཏཔཱརམཱི ཨརིཡསཱཝཀོ སཾསཱརེ སཾསརནྟོ ཨེཀསྨིཾ ཨཏྟབྷཱཝེ ཀམྨཱརཀུལེ ནིབྦཏྟོ. པརདཱརཀམྨཾ ཀཏྭཱ ནིརཡེ པཙྩིཏྭཱ པཀྐཱཝསེསེན ཙུདྡསསུ ཨཏྟབྷཱཝེསུ པུརིསསྶ པཱདཔརིཙཱརིཀཱ ཨིཏྠཱི ཨཧོསི, སཏྟསུ ཨཏྟབྷཱཝེསུ བཱིཛུདྡྷརཎཾ པཱཔུཎི. ཨིཏྠིཡོ པན དཱནཱདཱིནི པུཉྙཱནི ཀཏྭཱ ཨིཏྠིབྷཱཝེ ཚནྡཾ ཝིརཱཛེཏྭཱ, ‘‘ཨིདཾ ནོ པུཉྙཾ པུརིསཏྟབྷཱཝཔཊིལཱབྷཱཡ སཾཝཏྟཏཱུ’’ཏི ཙིཏྟཾ ཨདྷིཊྛཧིཏྭཱ ཀཱལཾ ཀཏྭཱ པུརིསཏྟབྷཱཝཾ པཊིལབྷནྟི, པཏིདེཝཏཱ ཧུཏྭཱ སཱམིཀེ སམྨཱཔཊིཔཏྟིཝསེནཱཔི པུརིསཏྟབྷཱཝཾ པཊིལབྷནྟེཝ.

ཨཡཾ པན སེཊྛིཔུཏྟོ ཐེརེ ཨཡོནིསོ ཙིཏྟཾ ཨུཔྤཱདེཏྭཱ ཨིམསྨིཾཡེཝ ཨཏྟབྷཱཝེ ཨིཏྠིབྷཱཝཾ པཊིལབྷི. ཏཀྐསིལཱཡཾ སེཊྛིཔུཏྟེན སདྡྷིཾ སཾཝཱསམནྭཱཡ པན ཏསྶཱ ཀུཙྪིཡཾ གབྦྷོ པཏིཊྛཱསི. སཱ དསམཱསཙྩཡེན པུཏྟཾ ལབྷིཏྭཱ ཏསྶ པདསཱ གམནཀཱལེ ཨཔརམྤི པུཏྟཾ པཊིལབྷི. ཨེཝམསྶཱ ཀུཙྪིཡཾ ཝུཏྠཱ དྭེ, སོརེཡྻནགརེ ཏཾ པཊིཙྩ ནིབྦཏྟཱ དྭེཏི ཙཏྟཱརོ པུཏྟཱ ཨཧེསུཾ. ཏསྨིཾ ཀཱལེ སོརེཡྻནགརཏོ ཏསྶཱ སཧཱཡཀོ སེཊྛིཔུཏྟོ པཉྩཧི སཀཊསཏེཧི ཏཀྐསིལཾ གནྟྭཱ སུཁཡཱནཀེ ནིསིནྣོ ནགརཾ པཱཝིསི. ཨཐ ནཾ སཱ ཨུཔརིཔཱསཱདཏལེ ཝཱཏཔཱནཾ ཝིཝརིཏྭཱ ཨནྟརཝཱིཐིཾ ཨོལོཀཡམཱནཱ ཋིཏཱ དིསྭཱ སཉྫཱནིཏྭཱ དཱསིཾ པེསེཏྭཱ པཀྐོསཱཔེཏྭཱ མཧཱཏལེ ནིསཱིདཱཔེཏྭཱ མཧནྟཾ སཀྐཱརསམྨཱནཾ ཨཀཱསི. ཨཐ ནཾ སོ ཨཱཧ – ‘‘བྷདྡེ, ཏྭཾ ཨིཏོ པུབྦེ ཨམྷེཧི ན དིཊྛཔུབྦཱ, ཨཐ ཙ པན ནོ མཧནྟཾ སཀྐཱརཾ ཀརོསི, ཛཱནཱསི ཏྭཾ ཨམྷེ’’ཏི. ‘‘ཨཱམ, སཱམི, ཛཱནཱམི, ནནུ ཏུམྷེ སོརེཡྻནགརཝཱསིནོ’’ཏི? ‘‘ཨཱམ, བྷདྡེ’’ཏི. སཱ མཱཏཱཔིཏཱུནཉྩ བྷརིཡཱཡ ཙ པུཏྟཱནཉྩ ཨརོགབྷཱཝཾ པུཙྪི. ཨིཏརོ ‘‘ཨཱམ, བྷདྡེ, ཨརོགཱ’’ཏི ཝཏྭཱ ‘‘ཛཱནཱསི ཏྭཾ ཨེཏེ’’ཏི ཨཱཧ. ‘‘ཨཱམ སཱམི, ཛཱནཱམི. ཏེསཾ ཨེཀོ པུཏྟོ ཨཏྠི, སོ ཀཧཾ, སཱམཱི’’ཏི? ‘‘བྷདྡེ, མཱ ཨེཏཾ ཀཐེཧི, མཡཾ ཏེན སདྡྷིཾ ཨེཀདིཝསཾ སུཁཡཱནཀེ ནིསཱིདིཏྭཱ ནྷཱཡིཏུཾ ནིཀྑནྟཱ ནེཝསྶ གཏིཾ ཛཱནཱམ, ཨིཏོ ཙིཏོ ཙ ཝིཙརིཏྭཱ ཏཾ ཨདིསྭཱ མཱཏཱཔིཏཱུནཾ ཨཱརོཙཡིམྷཱ, ཏེཔིསྶ རོདིཏྭཱ ཀནྡིཏྭཱ པེཏཀིཙྩཾ ཀིརིཾསཱུ’’ཏི. ‘‘ཨཧཾ སོ, སཱམཱི’’ཏི. ‘‘ཨཔེཧི, བྷདྡེ, ཀིཾ ཀཐེསི མཡ྄ཧཾ སཧཱཡོ དེཝཀུམཱརོ ཝིཡ ཨེཀོ པུརིསོ’’ཏི? ‘‘ཧོཏུ, སཱམི, ཨཧཾ སོ’’ཏི. ‘‘ཨཐ ཨིདཾ ཀིཾ ནཱམཱ’’ཏི? ‘‘ཏཾ དིཝསཾ ཏེ ཨཡྻོ མཧཱཀཙྩཱཡནཏྠེརོ དིཊྛོ’’ཏི? ‘‘ཨཱམ, དིཊྛོ’’ཏི. ཨཧཾ ཨཡྻཾ མཧཱཀཙྩཱཡནཏྠེརཾ ཨོལོཀེཏྭཱ, ‘‘ཨཧོ ཝཏ ཨཡཾ ཝཱ ཐེརོ མམ བྷརིཡཱ བྷཝེཡྻ, ཨེཏསྶ ཝཱ སརཱིརཝཎྞོ ཝིཡ མམ བྷརིཡཱཡ སརཱིརཝཎྞོ བྷཝེཡྻཱ’’ཏི ཙིནྟེསིཾ. ཙིནྟིཏཀྑཎེཡེཝ མེ པུརིསལིངྒཾ ཨནྟརདྷཱཡི, ཨིཏྠིལིངྒཾ པཱཏུབྷཝི. ཨཐཱཧཾ ལཛྫམཱནཱ ཀསྶཙི ཀིཉྩི ཝཏྟུཾ ཨསཀྐུཎིཏྭཱ ཏཏོ པལཱཡིཏྭཱ ཨིདྷཱགཏཱ, སཱམཱིཏི.

‘‘ཨཧོ ཝཏ ཏེ བྷཱརིཡཾ ཀམྨཾ ཀཏཾ, ཀསྨཱ མཡ྄ཧཾ ནཱཙིཀྑི, ཨཔིཙ པན ཏེ ཐེརོ ཁམཱཔིཏོ’’ཏི? ‘‘ན ཁམཱཔིཏོ, སཱམི. ཛཱནཱསི པན ཏྭཾ ཀཧཾ ཐེརོ’’ཏི? ‘‘ཨིམམེཝ ནགརཾ ཨུཔནིསྶཱཡ ཝིཧརཏཱི’’ཏི. ‘‘སཙེ པིཎྜཱཡ ཙརནྟོ ཨིདྷཱགཙྪེཡྻ, ཨཧཾ མམ ཨཡྻསྶ བྷིཀྑཱཧཱརཾ དདེཡྻཾ, སཱམཱི’’ཏི. ‘‘ཏེན ཧི སཱིགྷཾ སཀྐཱརཾ ཀརོཧི, ཨམྷཱཀཾ ཨཡྻཾ ཁམཱཔེསྶཱམཱ’’ཏི སོ ཐེརསྶ ཝསནཊྛཱནཾ གནྟྭཱ ཝནྡིཏྭཱ ཨེཀམནྟཾ ནིསིནྣོ, ‘‘བྷནྟེ, སྭེ མཡ྄ཧཾ བྷིཀྑཾ གཎྷཐཱ’’ཏི ཨཱཧ. ‘‘ནནུ ཏྭཾ, སེཊྛིཔུཏྟ, ཨཱགནྟུཀོསཱི’’ཏི. ‘‘བྷནྟེ, མཱ ཨམྷཱཀཾ ཨཱགནྟུཀབྷཱཝཾ པུཙྪཐ, སྭེ མེ བྷིཀྑཾ གཎྷཐཱ’’ཏི. ཐེརོ ཨདྷིཝཱསེསི, གེཧེཔི ཐེརསྶ མཧཱསཀྐཱརོ པཊིཡཏྟོ. ཐེརོ པུནདིཝསེ ཏཾ གེཧདྭཱརཾ ཨགམཱསི. ཨཐ ནཾ ནིསཱིདཱཔེཏྭཱ པཎཱིཏེནཱཧཱརེན པརིཝིསིཏྭཱ སེཊྛིཔུཏྟོ ཏཾ ཨིཏྠིཾ གཧེཏྭཱ ཐེརསྶ པཱདམཱུལེ ནིཔཛྫཱཔེཏྭཱ, ‘‘བྷནྟེ, མཡ྄ཧཾ སཧཱཡིཀཱཡ ཁམཐཱ’’ཏི ཨཱཧ. ‘‘ཀིམེཏ’’ནྟི? ‘‘ཨཡཾ, བྷནྟེ, པུབྦེ མཡ྄ཧཾ པིཡསཧཱཡཀོ ཧུཏྭཱ ཏུམྷེ ཨོལོཀེཏྭཱ ཨེཝཾ ནཱམ ཙིནྟེསི, ཨཐསྶ པུརིསལིངྒཾ ཨནྟརདྷཱཡི, ཨིཏྠིལིངྒཾ པཱཏུབྷཝི, ཁམཐ, བྷནྟེ’’ཏི. ‘‘ཏེན ཧི ཨུཊྛཧཐ, ཁམཱམི ཝོ ཨཧ’’ནྟི. ཐེརེན ‘‘ཁམཱམཱི’’ཏི ཝུཏྟམཏྟེཡེཝ ཨིཏྠིལིངྒཾ ཨནྟརདྷཱཡི, པུརིསལིངྒཾ པཱཏུབྷཝི.

པུརིསལིངྒེ པཱཏུབྷཱུཏམཏྟེཡེཝ ཏཾ ཏཀྐསིལཱཡ སེཊྛིཔུཏྟོ ཨཱཧ – ‘‘སམྨ སཧཱཡཀ, ཨིམེ དྭེ དཱརཀཱ ཏཝ ཀུཙྪིཡཾ ཝུཏྠཏྟཱ མཾ པཊིཙྩ ནིབྦཏྟཏྟཱ ཨུབྷིནྣམྤིནོ པུཏྟཱ ཨེཝ, ཨིདྷེཝ ཝསིསྶཱམ, མཱ ཨུཀྐཎྛཱི’’ཏི. ‘‘སམྨ, ཨཧཾ ཨེཀེནཏྟབྷཱཝེན པཋམཾ པུརིསོ ཧུཏྭཱ ཨིཏྠིབྷཱཝཾ པཏྭཱ པུན པུརིསོ ཛཱཏོཏི ཝིཔྤཀཱརཔྤཏྟོ, པཋམཾ མཾ པཊིཙྩ དྭེ པུཏྟཱ ནིབྦཏྟཱ, ཨིདཱནི མེ ཀུཙྪིཏོ དྭེ པུཏྟཱ ནིཀྑནྟཱ, སྭཱཧཾ ཨེཀེནཏྟབྷཱཝེན ཝིཔྤཀཱརཔྤཏྟོ, པུན ‘གེཧེ ཝསིསྶཏཱི’ཏི སཉྙཾ མཱ ཀརི, ཨཧཾ མམ ཨཡྻསྶ སནྟིཀེ པབྦཛིསྶཱམི. ཨིམེ དྭེ དཱརཀཱ ཏཝ བྷཱརཱཏི, ཨིམེསུ མཱ པམཛྫཱི’’ཏི ཝཏྭཱ པུཏྟེ སཱིསེ པརིཙུམྦིཏྭཱ པརིམཛྫིཏྭཱ ཨུརེ ནིཔཛྫཱཔེཏྭཱ པིཏུ ནིཡྻཱདེཏྭཱ ནིཀྑམིཏྭཱ ཐེརསྶ སནྟིཀེ པབྦཛྫཾ ཡཱཙི. ཐེརོཔི ནཾ པབྦཱཛེཏྭཱ ཨུཔསམྤཱདེཏྭཱ གཎྷིཏྭཱཝ ཙཱརིཀཾ ཙརམཱནོ ཨནུཔུབྦེན སཱཝཏྠིཾ ཨགམཱསི. ཏསྶ སོརེཡྻཏྠེརོཏི ནཱམཾ ཨཧོསི. ཛནཔདཝཱསིནོ ཏཾ པཝཏྟིཾ ཉཏྭཱ སངྑུབྷིཏྭཱ ཀོཏཱུཧལཛཱཏཱ ཏཾ ཨུཔསངྐམིཏྭཱ པུཙྪིཾསུ – ‘‘ཨེཝཾ ཀིར, བྷནྟེ’’ཏི? ‘‘ཨཱམ, ཨཱཝུསོ’’ཏི. ‘‘བྷནྟེ, ཨེཝརཱུཔམྤི ཀཱརཎཾ ནཱམ ཧོཏི’’? ‘‘ཏུམྷཱཀཾ ཀུཙྪིཡཾ ཀིར དྭེ པུཏྟཱ ནིབྦཏྟཱ, ཏུམྷེ པཊིཙྩ དྭེ ཛཱཏཱ, ཏེསཾ ཝོ ཀཏརེསུ བལཝསིནེཧོ ཧོཏཱི’’ཏི? ‘‘ཀུཙྪིཡཾ ཝུཏྠཀེསུ, ཨཱཝུསོ’’ཏི. ཨཱགཏཱགཏཱ ནིབདྡྷཾ ཏཐེཝ པུཙྪིཾསུ.

ཐེརོ ‘‘ཀུཙྪིཡཾ ཝུཏྟཀེསུ ཨེཝ སིནེཧོ བལཝཱ’’ཏི པུནཔྤུནཾ ཀཐེནྟོ ཧརཱཡམཱནོ ཨེཀོཝ ནིསཱིདཏི, ཨེཀོཝ ཏིཊྛཏི. སོ ཨེཝཾ ཨེཀཏྟཱུཔགཏོ ཨཏྟབྷཱཝེ ཁཡཝཡཾ སམུཊྛཱཔེཏྭཱ སཧ པཊིསམྦྷིདཱཧི ཨརཧཏྟཾ པཱཔུཎི. ཨཐ ནཾ ཨཱགཏཱགཏཱ པུཙྪནྟི – ‘‘བྷནྟེ, ཨེཝཾ ཀིར ནཱམ ཨཧོསཱི’’ཏི? ‘‘ཨཱམཱཝུསོ’’ཏི. ‘‘ཀཏརེསུ སིནེཧོ བལཝཱ’’ཏི? ‘‘མཡ྄ཧཾ ཀཏྠཙི སིནེཧོ ནཱམ ནཏྠཱི’’ཏི. བྷིཀྑཱུ ‘‘ཨཡཾ ཨབྷཱུཏཾ ཀཐེསི, པུརིམདིཝསེསུ ‘ཀུཙྪིཡཾ ཝུཏྠཔུཏྟེསུ སིནེཧོ བལཝཱ’ཏི ཝཏྭཱ ཨིདཱནི ‘མཡ྄ཧཾ ཀཏྠཙི སིནེཧོ ནཏྠཱི’ཏི ཝདཏི, ཨཉྙཾ བྱཱཀརོཏི, བྷནྟེ’’ཏི ཨཱཧཾསུ. སཏྠཱ ‘‘ན, བྷིཀྑཝེ, མམ པུཏྟོ ཨཉྙཾ བྱཱཀརོཏི, མམ པུཏྟསྶ སམྨཱཔཎིཧིཏེན ཙིཏྟེན མགྒསྶ དིཊྛཀཱལཏོ པཊྛཱཡ ན ཀཏྠཙི སིནེཧོ ཛཱཏོ, ཡཾ སམྤཏྟིཾ ནེཝ མཱཏཱ, ན པིཏཱ ཀཱཏུཾ སཀྐོཏི, ཏཾ ཨིམེསཾ སཏྟཱནཾ ཨབྦྷནྟརེ པཝཏྟཾ སམྨཱཔཎིཧིཏཾ ཙིཏྟམེཝ དེཏཱི’’ཏི ཝཏྭཱ ཨིམཾ གཱཐམཱཧ –

༤༣.

‘‘ན ཏཾ མཱཏཱ པིཏཱ ཀཡིརཱ, ཨཉྙེ ཝཱཔི ཙ ཉཱཏཀཱ;

སམྨཱཔཎིཧིཏཾ ཙིཏྟཾ, སེཡྻསོ ནཾ ཏཏོ ཀརེ’’ཏི.

ཏཏྠན ཏནྟི ཏཾ ཀཱརཎཾ ནེཝ མཱཏཱ ཀརེཡྻ, ན པིཏཱ, ན ཨཉྙེ ཉཱཏཀཱ. སམྨཱཔཎིཧིཏནྟི དསསུ ཀུསལཀམྨཔཐེསུ སམྨཱ ཋཔིཏཾ. སེཡྻསོ ནཾ ཏཏོ ཀརེཏི ཏཏོ ཀཱརཎཏོ སེཡྻསོ ནཾ ཝརཏརཾ ཨུཏྟརིཏརཾ ཀརེཡྻ, ཀརོཏཱིཏི ཨཏྠོ. མཱཏཱཔིཏརོ ཧི པུཏྟཱནཾ དྷནཾ དདམཱནཱ ཨེཀསྨིཾཡེཝ ཨཏྟབྷཱཝེ ཀམྨཾ ཨཀཏྭཱ སུཁེན ཛཱིཝིཀཀཔྤནཾ དྷནཾ དཱཏུཾ སཀྐོནྟི. ཝིསཱཁཱཡ མཱཏཱཔིཏརོཔི ཏཱཝ མཧདྡྷནཱ མཧཱབྷོགཱ, ཏསྶཱ ཨེཀསྨིཾཡེཝ ཨཏྟབྷཱཝེ སུཁེན ཛཱིཝིཀཀཔྤནཾ དྷནཾ ཨདཾསུ. ཙཏཱུསུ པན དཱིཔེསུ ཙཀྐཝཏྟིསིརིཾ དཱཏུཾ སམཏྠཱ མཱཏཱཔིཏརོཔི ནཱམ པུཏྟཱནཾ ནཏྠི, པགེཝ དིབྦསམྤཏྟིཾ ཝཱ པཋམཛ྄ཛྷཱནཱདིསམྤཏྟིཾ ཝཱ, ལོཀུཏྟརསམྤཏྟིདཱནེ ཀཐཱཝ ནཏྠི, སམྨཱཔཎིཧིཏཾ པན ཙིཏྟཾ སབྦམྤེཏཾ སམྤཏྟིཾ དཱཏུཾ སཀྐོཏི. ཏེན ཝུཏྟཾ ‘‘སེཡྻསོ ནཾ ཏཏོ ཀརེ’’ཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཏྟཱ. དེསནཱ མཧཱཛནསྶ སཱཏྠིཀཱ ཛཱཏཱཏི.

སོརེཡྻཏྠེརཝཏྠུ ནཝམཾ.

ཙིཏྟཝགྒཝཎྞནཱ ནིཊྛིཏཱ.

ཏཏིཡོ ཝགྒོ.

༤. པུཔྥཝགྒོ

༡. པཐཝིཀཐཱཔསུཏཔཉྩསཏབྷིཀྑུཝཏྠུ

ཀོ ཨིམཾ པཐཝིཾ ཝིཙེསྶཏཱིཏི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ པཐཝིཀཐཱཔསུཏེ པཉྩསཏེ བྷིཀྑཱུ ཨཱརབྦྷ ཀཐེསི.

ཏེ ཀིར བྷགཝཏཱ སདྡྷིཾ ཛནཔདཙཱརིཀཾ ཙརིཏྭཱ ཛེཏཝནཾ ཨཱགནྟྭཱ སཱཡནྷསམཡེ ཨུཔཊྛཱནསཱལཱཡཾ སནྣིསིནྣཱ ཨཏྟནཱ གཏགཏཊྛཱནེསུ ‘‘ཨསུཀགཱམཏོ ཨསུཀགཱམགམནཊྛཱནེ སམཾ ཝིསམཾ ཀདྡམབཧུལཾ སཀྑརབཧུལཾ ཀཱལ༹མཏྟིཀཾ ཏམྦམཏྟིཀ’’ནྟི པཐཝིཀཐཾ ཀཐེསུཾ. སཏྠཱ ཨཱགནྟྭཱ, ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ, ‘‘བྷནྟེ, ཨམྷེཧི ཝིཙརིཏཊྛཱནེ པཐཝིཀཐཱཡཱ’’ཏི ཝུཏྟེ, ‘‘བྷིཀྑཝེ, ཨེསཱ བཱཧིརཔཐཝཱི ནཱམ, ཏུམྷེཧི ཨཛ྄ཛྷུཏྟིཀཔཐཝིཡཾ པརིཀམྨཾ ཀཱཏུཾ ཝཊྚཏཱི’’ཏི ཝཏྭཱ ཨིམཱ དྭེ གཱཐཱ ཨབྷཱསི –

༤༤.

‘‘ཀོ ཨིམཾ པཐཝིཾ ཝིཙེསྶཏི,

ཡམལོཀཉྩ ཨིམཾ སདེཝཀཾ;

ཀོ དྷམྨཔདཾ སུདེསིཏཾ,

ཀུསལོ པུཔྥམིཝ པཙེསྶཏི.

༤༥.

‘‘སེཁོ པཐཝིཾ ཝིཙེསྶཏི,

ཡམལོཀཉྩ ཨིམཾ སདེཝཀཾ;

སེཁོ དྷམྨཔདཾ སུདེསིཏཾ,

ཀུསལོ པུཔྥམིཝ པཙེསྶཏཱི’’ཏི.

ཏཏྠ ཀོ ཨིམནྟི ཀོ ཨིམཾ ཨཏྟབྷཱཝསངྑཱཏཾ པཐཝིཾ. ཝིཙེསྶཏཱིཏི ཨཏྟནོ ཉཱཎེན ཝིཙིནིསྶཏི ཝིཛཱནིསྶཏི, པཊིཝིཛ྄ཛྷིསྶཏི, སཙྪིཀརིསྶཏཱིཏི ཨཏྠོ. ཡམལོཀཉྩཱཏི ཙཏུབྦིདྷཾ ཨཔཱཡལོཀཉྩ. ཨིམཾ སདེཝཀནྟི ཨིམཾ མནུསྶལོཀཉྩ དེཝལོཀེན སདྡྷིཾ ཀོ ཝིཙེསྶཏི ཝིཙིནིསྶཏི ཝིཛཱནིསྶཏི པཊིཝིཛ྄ཛྷིསྶཏི སཙྪིཀརིསྶཏཱིཏི པུཙྪི. ཀོ དྷམྨཔདཾ སུདེསིཏནྟི ཡཐཱསབྷཱཝཏོ ཀཐིཏཏྟཱ སུདེསིཏཾ སཏྟཏིཾསབོདྷིཔཀྑིཡདྷམྨསངྑཱཏཾ དྷམྨཔདཾ ཀུསལོ མཱལཱཀཱརོ པུཔྥཾ ཝིཙིནནྟོ ཝིཡ ཀོ པཙེསྶཏི ཝིཙིནིསྶཏི ཝིཛཱནིསྶཏི ཨུཔཔརིཀྑིསྶཏི པཊིཝིཛ྄ཛྷིསྶཏི, སཙྪིཀརིསྶཏཱིཏི ཨཏྠོ. སེཁོཏི ཨདྷིསཱིལསིཀྑཱ, ཨདྷིཙིཏྟསིཀྑཱ, ཨདྷིཔཉྙཱསིཀྑཱཏི ཨིམཱ ཏིསྶོ སིཀྑཱ སིཀྑནཏོ སོཏཱཔཏྟིམགྒཊྛཾ ཨཱདིཾ ཀཏྭཱ ཡཱཝ ཨརཧཏྟམགྒཊྛཱ སཏྟཝིདྷོ སེཁོ ཨིམཾ ཨཏྟབྷཱཝསངྑཱཏཾ པཐཝིཾ ཨརཧཏྟམགྒེན ཏཏོ ཚནྡརཱགཾ ཨཔཀཌྜྷནྟོ ཝིཙེསྶཏི ཝིཙིནིསྶཏི ཝིཛཱནིསྶཏི པཊིཝིཛ྄ཛྷིསྶཏི སཙྪིཀརིསྶཏི. ཡམལོཀཉྩཱཏི ཏཾ ཡཐཱཝུཏྟཔཀཱརཾ ཡམལོཀཉྩ ཨིམཾ མནུསྶལོཀཉྩ སཧ དེཝེཧི སདེཝཀཾ སྭེཝ ཝིཙེསྶཏི ཝིཙིནིསྶཏི ཝིཛཱནིསྶཏི པཊིཝིཛ྄ཛྷིསྶཏི སཙྪིཀརིསྶཏི. སེཁོཏི སྭེཝ སཏྟཝིདྷོ སེཁོ, ཡཐཱ ནཱམ ཀུསལོ མཱལཱཀཱརོ པུཔྥཱརཱམཾ པཝིསིཏྭཱ ཏརུཎམཀུལཱ༹ནི ཙ པཱཎཀཝིདྡྷཱནི ཙ མིལཱཏཱནི ཙ གཎྛིཀཛཱཏཱནི ཙ པུཔྥཱནི ཝཛྫེཏྭཱ སོབྷནཱནི སུཛཱཏསུཛཱཏཱནེཝ པུཔྥཱནི ཝིཙིནཱཏི, ཨེཝམེཝ ཨིམཾ སུཀཐིཏཾ སུནིདྡིཊྛཾ བོདྷིཔཀྑིཡདྷམྨཔདམྤི པཉྙཱཡ པཙེསྶཏི ཝིཙིནིསྶཏི ཨུཔཔརིཀྑིསྶཏི པཊིཝིཛ྄ཛྷིསྶཏི སཙྪིཀརིསྶཏཱིཏི སཏྠཱ སཡམེཝ པཉྷཾ ཝིསྶཛྫེསི.

དེསནཱཝསཱནེ པཉྩསཏཱཔི བྷིཀྑཱུ སཧ པཊིསམྦྷིདཱཧི ཨརཧཏྟཾ པཱཔུཎིཾསུ. སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

པཐཝིཀཐཱཔསུཏཔཉྩསཏབྷིཀྑུཝཏྠུ པཋམཾ.

༢. མརཱིཙིཀམྨཊྛཱནིཀཏྠེརཝཏྠུ

ཕེཎཱུཔམནྟི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ ཨཉྙཏརཾ མརཱིཙིཀམྨཊྛཱནིཀཾ བྷིཀྑུཾ ཨཱརབྦྷ ཀཐེསི.

སོ ཀིར བྷིཀྑུ སཏྠུ སནྟིཀེ ཀམྨཊྛཱནཾ གཧེཏྭཱ, ‘‘སམཎདྷམྨཾ ཀརིསྶཱམཱི’’ཏི ཨརཉྙཾ པཝིསིཏྭཱ གྷཊེཏྭཱ ཝཱཡམིཏྭཱ ཨརཧཏྟཾ པཏྟུཾ ཨསཀྐོནྟོ ‘‘ཝིསེསེཏྭཱ ཀམྨཊྛཱནཾ ཀཐཱཔེསྶཱམཱི’’ཏི སཏྠུ སནྟིཀཾ ཨཱགཙྪནྟོ ཨནྟརཱམགྒེ མརཱིཙིཾ དིསྭཱ, ‘‘ཡཐཱ ཨཡཾ གིམྷསམཡེ ཨུཊྛིཏཱ མརཱིཙི དཱུརེ ཋིཏཱནཾ རཱུཔགཏཱ ཝིཡ པཉྙཱཡཏི, སནྟིཀཾ ཨཱགཙྪནྟཱནཾ ནེཝ པཉྙཱཡཏི, ཨཡཾ ཨཏྟབྷཱཝོཔི ཨུཔྤཱདཝཡཊྛེན ཨེཝརཱུཔོ’’ཏི མརཱིཙིཀམྨཊྛཱནཾ བྷཱཝེནྟོ ཨཱགནྟྭཱ མགྒཀིལནྟོ ཨཙིརཝཏིཡཾ ནྷཱཡིཏྭཱ ཨེཀསྨིཾ ཙཎྜསོཏཏཱིརེ རུཀྑཚཱཡཱཡ ནིསིནྣོ ཨུདཀཝེགཱབྷིགྷཱཏེན ཨུཊྛཧིཏྭཱ མཧནྟེ མཧནྟེ ཕེཎཔིཎྜེ བྷིཛྫམཱནེ དིསྭཱ, ‘‘ཨཡཾ ཨཏྟབྷཱཝོཔི ཨུཔྤཛྫིཏྭཱ བྷིཛྫནཊྛེན ཨེཝརཱུཔོཡེཝཱ’’ཏི ཨཱརམྨཎཾ ཨགྒཧེསི. སཏྠཱ གནྡྷཀུཊིཡཾ ཋིཏོཝ ཏཾ ཐེརཾ དིསྭཱ, ‘‘ཨེཝམེཝ, བྷིཀྑུ, ཨེཝརཱུཔོཝཱཡཾ ཨཏྟབྷཱཝོ ཕེཎཔིཎྜོ ཝིཡ མརཱིཙི ཝིཡ ཨུཔྤཛྫནབྷིཛྫནསབྷཱཝོཡེཝཱ’’ཏི ཝཏྭཱ ཨིམཾ གཱཐམཱཧ –

༤༦.

‘‘ཕེཎཱུཔམཾ ཀཱཡམིམཾ ཝིདིཏྭཱ,

མརཱིཙིདྷམྨཾ ཨབྷིསམྦུདྷཱནོ;

ཚེཏྭཱན མཱརསྶ པཔུཔྥཀཱནི,

ཨདསྶནཾ མཙྩུརཱཛསྶ གཙྪེ’’ཏི.

ཏཏྠ ཕེཎཱུཔམནྟི ཨིམཾ ཀེསཱདིསམཱུཧསངྑཱཏཾ ཀཱཡཾ ཨབལདུབྦལཊྛེན ཨནདྡྷནིཡཏཱཝཀཱལིཀཊྛེན ཕེཎཔིཎྜསརིཀྑཀོཏི ཝིདིཏྭཱ. མརཱིཙིདྷམྨནྟི ཡཐཱ མརཱིཙི དཱུརེ ཋིཏཱནཾ རཱུཔགཏཱ ཝིཡ གཡ྄ཧཱུཔགཱ ཝིཡ ཧོཏི, སནྟིཀེ ཨུཔགཙྪནྟཱནཾ རིཏྟཱ ཏུཙྪཱ ཨགཡ྄ཧཱུཔགཱ སམྤཛྫཏི, ཨེཝམེཝ ཁཎིཀཨིཏྟརཔཙྩུཔཊྛཱནཊྛེན ཨཡཾ ཀཱཡོཔི མརཱིཙིདྷམྨོཏི ཨབྷིསམྦུདྷཱནོ བུཛ྄ཛྷནྟོ, ཛཱནནྟོཏི ཨཏྠོ. མཱརསྶ པཔུཔྥཀཱནཱིཏི མཱརསྶ པཔུཔྥཀསངྑཱཏཱནི ཏེབྷཱུམཀཱནི ཝཊྚཱནི ཨརིཡམགྒེན ཚིནྡིཏྭཱ ཁཱིཎཱསཝོ བྷིཀྑུ མཙྩུརཱཛསྶ ཨདསྶནཾ ཨཝིསཡཾ ཨམཏམཧཱནིབྦཱནཾ གཙྪེཡྻཱཏི.

གཱཐཱཔརིཡོསཱནེ ཐེརོ སཧ པཊིསམྦྷིདཱཧི ཨརཧཏྟཾ པཏྭཱ སཏྠུ སུཝཎྞཝཎྞཾ སརཱིརཾ ཐོམེནྟོ ཝཎྞེནྟོ ཝནྡནྟོཝ ཨཱགཏོཏི.

མརཱིཙིཀམྨཊྛཱནིཀཏྠེརཝཏྠུ དུཏིཡཾ.

༣. ཝིཊཊཱུབྷཝཏྠུ

པུཔྥཱནིཧེཝ པཙིནནྟནྟི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ སཔརིསཾ མཧོགྷེན ཨཛ྄ཛྷོཏྠརིཏྭཱ མཱརིཏཾ ཝིཊཊཱུབྷཾ ཨཱརབྦྷ ཀཐེསི.

ཏཏྲཱཡཾ ཨནུཔུབྦིཀཐཱ – སཱཝཏྠིཡཉྷི མཧཱཀོསལརཉྙོ པུཏྟོ པསེནདིཀུམཱརོ ནཱམ. ཝེསཱལིཡཾ ལིཙྪཝིརཉྙོ པུཏྟོ ལིཙྪཝིཀུམཱརོ མཧཱལི ནཱམ, ཀུསིནཱརཱཡཾ མལླརཱཛཔུཏྟོ བནྡྷུལོ ནཱམཱཏི ཨིམེ ཏཡོ དིསཱཔཱམོཀྑསྶཱཙརིཡསྶ སནྟིཀེ སིཔྤུགྒཧཎཏྠཾ ཏཀྐསིལཾ གནྟྭཱ བཧིནགརེ སཱལཱཡ སམཱགཏཱ ཨཉྙམཉྙསྶ ཨཱགཏཀཱརཎཉྩ ཀུལཉྩ ནཱམཉྩ པུཙྪིཏྭཱ སཧཱཡཀཱ ཧུཏྭཱ ཨེཀཏོཝ ཨཱཙརིཡཾ ཨུཔསངྐམིཏྭཱ སིཔྤཾ སིཀྑནྟཱ ན ཙིརསྶེཝ ཨུགྒཧིཏསིཔྤཱ ཨཱཙརིཡཾ ཨཱཔུཙྪིཏྭཱ ཨེཀཏོཝ ནིཀྑམིཏྭཱ སཀསཀཊྛཱནཱནི ཨགམཾསུ. ཏེསུ པསེནདིཀུམཱརོ པིཏུ སིཔྤཾ དསྶེཏྭཱ པསནྣེན པིཏརཱ རཛྫེ ཨབྷིསིཏྟོ. མཧཱལིཀུམཱརོ ལིཙྪཝཱིནཾ སིཔྤཾ དསྶེནྟོ མཧནྟེན ཨུསྶཱཧེན དསྶེསི, ཏསྶ ཨཀྑཱིནི བྷིཛྫིཏྭཱ ཨགམཾསུ. ལིཙྪཝིརཱཛཱནོ ‘‘ཨཧོ ཝཏ ཨམྷཱཀཾ ཨཱཙརིཡོ ཨཀྑིཝིནཱསཾ པཏྟོ, ན ནཾ པརིཙྩཛིསྶཱམ, ཨུཔཊྛཧིསྶཱམ ན’’ནྟི ཏསྶ སཏསཧསྶུཊྛཱནཀཾ ཨེཀཾ དྭཱརཾ ཨདཾསུ. སོ ཏཾ ནིསྶཱཡ པཉྩསཏེ ལིཙྪཝིརཱཛཔུཏྟེ སིཔྤཾ སིཀྑཱཔེནྟོ ཝསི. བནྡྷུལཀུམཱརོ སཊྛིཾ སཊྛིཾ ཝེལཱུ༹ གཧེཏྭཱ མཛ྄ཛྷེ ཨཡསལཱཀཾ པཀྑིཔིཏྭཱ སཊྛིཀལཱཔེ ཨུསྶཱཔེཏྭཱ ཋཔིཏེ མལླརཱཛཀུལེཧི ‘‘ཨིམེ ཀཔྤེཏཱུ’’ཏི ཝུཏྟོ ཨསཱིཏིཧཏྠཾ ཨཱཀཱསཾ ཨུལླངྒྷིཏྭཱ ཨསིནཱ ཀཔྤེནྟོ ཨགམཱསི. སོ ཨོསཱནཀལཱཔེ ཨཡསལཱཀཱཡ ‘‘ཀིརཱི’’ཏི སདྡཾ སུཏྭཱ, ‘‘ཀིཾ ཨེཏ’’ནྟི པུཙྪིཏྭཱ སབྦཀལཱཔེསུ ཨཡསལཱཀཱནཾ ཋཔིཏབྷཱཝཾ ཉཏྭཱ ཨསིཾ ཚཌྜེཏྭཱ རོདམཱནོ ‘‘མཡ྄ཧཾ ཨེཏྟཀེསུ ཉཱཏིསུཧཛྫེསུ ཨེཀོཔི སསིནེཧོ ཧུཏྭཱ ཨིམཾ ཀཱརཎཾ ནཱཙིཀྑི. སཙེ ཧི ཨཧཾ ཛཱནེཡྻཾ, ཨཡསལཱཀཱཡ སདྡཾ ཨནུཊྛཱཔེནྟོཝ ཚིནྡེཡྻ’’ནྟི ཝཏྭཱ, ‘‘སབྦེཔིམེ མཱརེཏྭཱ རཛྫཾ ཀརེཡྻ’’ནྟི མཱཏཱཔིཏཱུནཾ ཀཐེསི. ཏེཧི ‘‘པཝེཎིརཛྫཾ ནཱམ, ཏཱཏ, ཨིདཾ ན ལབྦྷཱ ཨེཝཾ ཀཱཏུ’’ནྟི ནཱནཔྤཀཱརེན ཝཱརིཏོ ‘‘ཏེན ཧི མམ སཧཱཡཀསྶ སནྟིཀཾ གམིསྶཱམཱི’’ཏི སཱཝཏྠིཾ ཨགམཱསི.

པསེནདི ཀོསལོ རཱཛཱ ཏསྶཱགམནཾ སུཏྭཱ པཙྩུགྒནྟྭཱ མཧནྟེན སཀྐཱརེན ཏཾ ནགརཾ པཝེསེཏྭཱ སེནཱཔཏིཊྛཱནེ ཋཔེསི. སོ མཱཏཱཔིཏརོ པཀྐོསཱཔེཏྭཱ ཏཏྠེཝ ཝཱསཾ ཀཔྤེསི. ཨཐེཀདིཝསཾ རཱཛཱ ཨུཔརིཔཱསཱདེ ཋིཏོ ཨནྟརཝཱིཐིཾ ཨོལོཀཡམཱནོ ‘‘ཨནཱཐཔིཎྜིཀསྶ ཙཱུལ༹ཨནཱཐཔིཎྜིཀསྶ ཝིསཱཁཱཡ སུཔྤཝཱསཱཡཱ’’ཏི ཨེཏེསཾ གེཧེ ནིཙྩཾ བྷཏྟཀིཙྩཏྠཱཡ གཙྪནྟེ ཨནེཀསཧསྶེ བྷིཀྑཱུ དིསྭཱ, ‘‘ཀཧཾ, ཨཡྻཱ, གཙྪནྟཱི’’ཏི པུཙྪིཏྭཱ, ‘‘དེཝ, ཨནཱཐཔིཎྜིཀསྶ གེཧེ ནིཙྩབྷཏྟསལཱཀབྷཏྟགིལཱནབྷཏྟཱདཱིནཾ ཨཏྠཱཡ དེཝསིཀཾ དྭེ བྷིཀྑུསཧསྶཱནི གཙྪནྟི, ཙཱུལ༹ཨནཱཐཔིཎྜིཀསྶ གེཧེ པཉྩསཏཱནི, ཏཐཱ ཝིསཱཁཱཡ ཏཐཱ སུཔྤཝཱསཱཡཱ’’ཏི ཝུཏྟེ སཡམྤི བྷིཀྑུསངྒྷཾ ཨུཔཊྛཧིཏུཀཱམོ ཝིཧཱརཾ གནྟྭཱ བྷིཀྑུསཧསྶེན སདྡྷིཾ སཏྠཱརཾ ནིམནྟེཏྭཱ སཏྟཱཧཾ སཧཏྠཱ དཱནཾ དཏྭཱ སཏྟམེ དིཝསེ སཏྠཱརཾ ཝནྡིཏྭཱ, ‘‘བྷནྟེ, པཉྩཧི མེ བྷིཀྑུསཏེཧི སདྡྷིཾ ནིབདྡྷཾ བྷིཀྑཾ གཎྷཐཱ’’ཏི ཨཱཧ. ‘‘མཧཱརཱཛ བུདྡྷཱ ནཱམ ཨེཀཊྛཱནེ ནིབདྡྷཾ བྷིཀྑཾ ན གཎྷནྟི, བཧཱུ ཛནཱ བུདྡྷཱནཾ ཨཱགམནཾ པཙྩཱསཱིསནྟཱི’’ཏི. ‘‘ཏེན ཧི ཨེཀཾ བྷིཀྑུཾ ནིབདྡྷཾ པེསེཐཱ’’ཏི ཨཱཧ. སཏྠཱ ཨཱནནྡཏྠེརསྶ བྷཱརཾ ཨཀཱསི. རཱཛཱ བྷིཀྑུསངྒྷེ ཨཱགཏེ པཏྟཾ གཧེཏྭཱ, ‘‘ཨིམེ ནཱམ པརིཝིསནྟཱུ’’ཏི ཨཝིཙཱརེཏྭཱཝ སཏྟཱཧཾ སཡམེཝ པརིཝིསིཏྭཱ ཨཊྛམེ དིཝསེ ཝིཀྑིཏྟཙིཏྟོ པམཛྫམཀཱསི. རཱཛཀུལེ ནཱམ ཨནཱཎཏྟཱ ཨཱསནཱནི པཉྙཱཔེཏྭཱ བྷིཀྑཱུ ནིསཱིདཱཔེཏྭཱ པརིཝིསིཏུཾ ན ལབྷནྟི ‘‘ན མཡཾ ཨིདྷ ཋཱཏུཾ སཀྑིསྶཱམཱ’’ཏི བཧཱུ བྷིཀྑཱུ པཀྐམིཾསུ. རཱཛཱ དུཏིཡདིཝསེཔི པམཛྫི, དུཏིཡདིཝསེཔི བཧཱུ བྷིཀྑཱུ པཀྐམིཾསུ. ཏཏིཡདིཝསེཔི པམཛྫི, ཏདཱ ཨཱནནྡཏྠེརཾ ཨེཀཀམེཝ ཋཔེཏྭཱ ཨཝསེསཱ པཀྐམིཾསུ. པུཉྙཝནྟཱ ནཱམ ཀཱརཎཝསིཀཱ ཧོནྟི, ཀུལཱནཾ པསཱདཾ རཀྑནྟི. ཏཐཱགཏསྶ ཙ སཱརིཔུཏྟཏྠེརོ མཧཱམོགྒལླཱནཏྠེརོཏི དྭེ ཨགྒསཱཝཀཱ, ཁེམཱ ཨུཔྤལཝཎྞཱཏི དྭེ ཨགྒསཱཝིཀཱ, ཨུཔཱསཀེསུ ཙིཏྟོ, གཧཔཏི, ཧཏྠཀོ ཨཱལ༹ཝཀོཏི དྭེ ཨགྒཨུཔཱསཀཱ, ཨུཔཱསིཀཱསུ ཝེལུ༹ཀཎྛཀཱི ནནྡམཱཏཱ, ཁུཛྫུཏྟརཱཏི དྭེ ཨགྒཨུཔཱསིཀཱ, ཨིཏི ཨིམེ ཨཊྛ ཛནེ ཨཱདིཾ ཀཏྭཱ ཋཱནནྟརཔཏྟཱ སབྦེཔི སཱཝཀཱ ཨེཀདེསེན དསནྣཾ པཱརམཱིནཾ པཱུརིཏཏྟཱ མཧཱཔུཉྙཱ ཨབྷིནཱིཧཱརསམྤནྣཱ. ཨཱནནྡཏྠེརོཔི ཀཔྤསཏསཧསྶཾ པཱུརིཏཔཱརམཱི ཨབྷིནཱིཧཱརསམྤནྣོ མཧཱཔུཉྙོ ཨཏྟནོ ཀཱརཎཝསིཀཏཱཡ ཀུལསྶ པསཱདཾ རཀྑནྟོ ཨཊྛཱསི. ཏཾ ཨེཀཀམེཝ ནིསཱིདཱཔེཏྭཱ པརིཝིསིཾསུ.

རཱཛཱ བྷིཀྑཱུནཾ གཏཀཱལེ ཨཱགནྟྭཱ ཁཱདནཱིཡབྷོཛནཱིཡཱནི ཏཐེཝ ཋིཏཱནི དིསྭཱ, ‘‘ཀིཾ, ཨཡྻཱ, ནཱགམིཾསཱུ’’ཏི པུཙྪིཏྭཱ, ‘‘ཨཱནནྡཏྠེརོ ཨེཀཀོཝ ཨཱགཏོ དེཝཱ’’ཏི སུཏྭཱ, ‘‘ཨདྡྷཱ ཨེཏྟཀཾ མེ བྷཏྟཙྪེདནམཀཾསཱུ’’ཏི བྷིཀྑཱུནཾ ཀུདྡྷོ སཏྠུ སནྟིཀཾ གནྟྭཱ, ‘‘བྷནྟེ, མཡཱ པཉྩནྣཾ བྷིཀྑུསཏཱནཾ བྷིཀྑཱ པཊིཡཏྟཱ, ཨཱནནྡཏྠེརོ ཀིར ཨེཀཀོཝཱགཏོ, པཊིཡཏྟཱ བྷིཀྑཱ ཏཐེཝ ཋིཏཱ, པཉྩསཏཱ བྷིཀྑཱུ མམ གེཧེ སཉྙཾ ན ཀརིཾསུ, ཀིཾ ནུ ཁོ ཀཱརཎ’’ནྟི ཨཱཧ. སཏྠཱ བྷིཀྑཱུནཾ དོསཾ ཨཝཏྭཱ, ‘‘མཧཱརཱཛ, མམ སཱཝཀཱནཾ ཏུམྷེཧི སདྡྷིཾ ཝིསྶཱསོ ནཏྠི, ཏེན ན གཏཱ བྷཝིསྶནྟཱི’’ཏི ཝཏྭཱ ཀུལཱནཾ ཨནུཔགམནཀཱརཎཉྩ ཨུཔགམནཀཱརཎཉྩ པཀཱསེནྟོ བྷིཀྑཱུ ཨཱམནྟེཏྭཱ ཨིམཾ སུཏྟམཱཧ –

‘‘ནཝཧི, བྷིཀྑཝེ, ཨངྒེཧི སམནྣཱགཏཾ ཀུལཾ ཨནུཔགནྟྭཱ ཝཱ ནཱལཾ ཨུཔགནྟུཾ, ཨུཔགནྟྭཱ ཝཱ ནཱལཾ ཨུཔནིསཱིདིཏུཾ. ཀཏམེཧི ནཝཧི? ན མནཱཔེན པཙྩུཊྛེནྟི, ན མནཱཔེན ཨབྷིཝཱདེནྟི, ན མནཱཔེན ཨཱསནཾ དེནྟི, སནྟམསྶ པརིགུཧནྟི, བཧུཀམྤི ཐོཀཾ དེནྟི, པཎཱིཏམྤི ལཱུཁཾ དེནྟི, ཨསཀྐཙྩཾ དེནྟི ནོ སཀྐཙྩཾ, ན ཨུཔནིསཱིདནྟི དྷམྨསྶཝནཱཡ, བྷཱསིཏམསྶ ན སུསྶཱུསནྟི. ཨིམེཧི ཁོ, བྷིཀྑཝེ, ནཝཧངྒེཧི སམནྣཱགཏཾ ཀུལཾ ཨནུཔགནྟྭཱ ཝཱ ནཱལཾ ཨུཔགནྟུཾ, ཨུཔགནྟྭཱ ཝཱ ནཱལཾ ཨུཔནིསཱིདིཏུཾ.

‘‘ནཝཧི, བྷིཀྑཝེ, ཨངྒེཧི སམནྣཱགཏཾ ཀུལཾ ཨནུཔགནྟྭཱ ཝཱ ཨལཾ ཨུཔགནྟུཾ, ཨུཔགནྟྭཱ ཝཱ ཨལཾ ཨུཔནིསཱིདིཏུཾ. ཀཏམེཧི ནཝཧི? མནཱཔེན པཙྩུཊྛེནྟི, མནཱཔེན ཨབྷིཝཱདེནྟི, མནཱཔེན ཨཱསནཾ དེནྟི, སནྟམསྶ ན པརིགུཧནྟི, བཧུཀམྤི བཧུཀཾ དེནྟི, པཎཱིཏམྤི པཎཱིཏཾ དེནྟི, སཀྐཙྩཾ དེནྟི ནོ ཨསཀྐཙྩཾ, ཨུཔནིསཱིདནྟི དྷམྨསྶཝནཱཡ, བྷཱསིཏམསྶ སུསྶཱུསནྟི. ཨིམེཧི ཁོ, བྷིཀྑཝེ, ནཝཧངྒེཧི སམནྣཱགཏཾ ཀུལཾ ཨནུཔགནྟྭཱ ཝཱ ཨལཾ ཨུཔགནྟུཾ, ཨུཔགནྟྭཱ ཝཱ ཨལཾ ཨུཔནིསཱིདིཏུ’’ནྟི (ཨ. ནི. ༩.༡༧).

ཨིཏི ཁོ, མཧཱརཱཛ, མམ སཱཝཀཱ ཏུམྷཱཀཾ སནྟིཀཱ ཝིསྶཱསཾ ཨལབྷནྟཱ ན གཏཱ བྷཝིསྶནྟཱིཏི. པོརཱཎཀཔཎྜིཏཱཔི ཧི ཨཝིསྶཱསིཀཊྛཱནེ སཀྐཙྩཾ ཨུཔཊྛིཡམཱནཱཔི མཱརཎནྟིཀཾ ཝེདནཾ པཏྭཱ ཝིསྶཱསིཀཊྛཱནམེཝ ཨགམིཾསཱུཏི. ‘‘ཀདཱ, བྷནྟེ’’ཏི རཉྙཱ པུཊྛོ ཨཏཱིཏཾ ཨཱཧརི –

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ ཀེསཝོ ནཱམ རཱཛཱ རཛྫཾ པཧཱཡ ཨིསིཔབྦཛྫཾ པབྦཛི. ཏཾ པཉྩ པུརིསསཏཱནི ཨནུཔབྦཛིཾསུ. སོ ཀེསཝཏཱཔསོ ནཱམ ཨཧོསི. པསཱདྷནཀཔྤཀོ པནསྶ ཨནུཔབྦཛིཏྭཱ ཀཔྤཀོ ནཱམ ཨནྟེཝཱསིཀོ ཨཧོསི. ཀེསཝཏཱཔསོ པརིསཱཡ སདྡྷིཾ ཨཊྛ མཱསེ ཧིམཝནྟེ ཝསིཏྭཱ ཝསྶཱརཏྟསམཡེ ལོཎམྦིལསེཝནཏྠཱཡ བཱརཱཎསིཾ པཏྭཱ བྷིཀྑཱཡ པཱཝིསི. ཨཐ ནཾ རཱཛཱ དིསྭཱ པསཱིདིཏྭཱ ཙཏུམཱསཾ ཨཏྟནོ སནྟིཀེ ཝསནཏྠཱཡ པཊིཉྙཾ གཧེཏྭཱ ཨུཡྻཱནེཝ ཝསཱཔེནྟོ སཡཾ སཱཡཾཔཱཏཾ ཨསྶ ཨུཔཊྛཱནཾ གཙྪཏི. ཨཝསེསཱ ཏཱཔསཱ ཀཏིཔཱཧཾ ཝསིཏྭཱ ཧཏྠིསདྡཱདཱིཧི ཨུབྦཱལ༹ྷཱ ཧུཏྭཱ ཨུཀྐཎྛིཏྭཱ, ‘‘ཨཱཙརིཡ, ཨུཀྐཎྛིཏམྷཱ, གཙྪཱམཱ’’ཏི ཨཱཧཾསུ. ‘‘ཀཧཾ, ཏཱཏཱ’’ཏི? ‘‘ཧིམཝནྟཾ, ཨཱཙརིཡཱ’’ཏི. རཱཛཱ ཨམྷཱཀཾ ཨཱགཏདིཝསེཡེཝ ཙཏུམཱསཾ ཨིདྷ ཝསནཏྠཱཡ པཊིཉྙཾ གཎྷི. ‘‘ཀཐཾ གམིསྶཐ, ཏཱཏཱ’’ཏི? ‘‘ཏུམྷེཧི ཨམྷཱཀཾ ཨནཱཙིཀྑིཏྭཱཝ པཊིཉྙཱ དིནྣཱ, མཡཾ ཨིདྷ ན སཀྐོམ ཝསིཏུཾ, ཨིཏོ ཨཝིདཱུརེ ཏུམྷཱཀཾ པཝཏྟིསྶཝནཊྛཱནེ ཝསིསྶཱམཱ’’ཏི ཝནྡིཏྭཱ པཀྐམིཾསུ. ཀཔྤནྟེཝཱསིཀེན སདྡྷིཾ ཨཱཙརིཡོ ཨོཧཱིཡི.

རཱཛཱ ཨུཔཊྛཱནཾ ཨཱགཏོ, ‘‘ཀཧཾ, ཨཡྻཱ’’ཏི པུཙྪི. ‘‘སབྦེ ཨུཀྐཎྛིཏམྷཱཏི ཝཏྭཱ ཧིམཝནྟཾ གཏཱ, མཧཱརཱཛཱ’’ཏི ཨཱཧ. ཀཔྤཀོཔི ན ཙིརསྶེཝ ཨུཀྐཎྛིཏྭཱ ཨཱཙརིཡེན པུནཔྤུནཾ ཝཱརིཡམཱནོཔི ‘‘ན སཀྐོམཱི’’ཏི ཝཏྭཱ པཀྐཱམི. ཨིཏརེསཾ པན སནྟིཀཾ ཨགནྟྭཱ ཨཱཙརིཡསྶ པཝཏྟིཾ སུཎནྟོ ཨཝིདཱུརེ ཋཱནེ ཝསི. ཨཔརབྷཱགེ ཨཱཙརིཡསྶ ཨནྟེཝཱསིཀེ ཨནུསྶརནྟསྶ ཀུཙྪིརོགོ ཨུཔྤཛྫི. རཱཛཱ ཝེཛྫེཧི ཏིཀིཙྪཱཔེསི, རོགོ ན ཝཱུཔསམྨཏི. ཏཱཔསོ ཨཱཧ – ‘‘ཀིཾ, མཧཱརཱཛ, ཨིཙྪསི མེ རོགཝཱུཔསམ’’ནྟི? ‘‘བྷནྟེ, སཙཱཧཾ སཀྐུཎེཡྻཾ, ཨིདཱནེཝ ཝོ ཕཱསུཀཾ ཀརེཡྻ’’ནྟི. ‘‘མཧཱརཱཛ, སཙེ མེ ཕཱསུཀཾ ཨིཙྪསི, མཾ ཨནྟེཝཱསིཀཱནཾ སནྟིཀཾ པེསེཧཱི’’ཏི. རཱཛཱ ‘‘སཱདྷུ, བྷནྟེ’’ཏི ཏཾ མཉྩཀེ ནིཔཛྫཱཔེཏྭཱ ནཱརདཨམཙྩཔྤམུཁེ ཙཏྟཱརོ ཨམཙྩེ ‘‘མམ ཨཡྻསྶ པཝཏྟིཾ ཉཏྭཱ, མཡ྄ཧཾ སཱསནཾ པཧིཎེཡྻཱཐཱ’’ཏི ཨུཡྻོཛེསི. ཀཔྤནྟེཝཱསིཀོ ཨཱཙརིཡསྶ ཨཱགམནཾ སུཏྭཱ པཙྩུགྒམནཾ ཀཏྭཱ ཨིཏརེ ‘‘ཀཧ’’ནྟི ཝུཏྟེ, ‘‘ཨསུཀཊྛཱནེ ཀིར ཝསནྟཱི’’ཏི ཨཱཧ. ཏེཔི ཨཱཙརིཡསྶཱགམནབྷཱཝཾ སུཏྭཱ ཏཏྠེཝ སམོསརིཏྭཱ ཨཱཙརིཡསྶ ཨུཎྷོདཀཾ དཏྭཱ ཕལཱཕལཾ ཨདཾསུ. ཏཾ ཁཎཉྙེཝ རོགོ ཝཱུཔསམྨཏི. སོ ཀཏིཔཱཧེནེཝ སུཝཎྞཝཎྞོ ཨཧོསི. ཨཐ ནཾ ནཱརདོ པུཙྪི –

‘‘མནུསྶིནྡཾ ཛཧིཏྭཱན, སབྦཀཱམསམིདྡྷིནཾ;

ཀཐཾ ནུ བྷགཝཱ ཀེསཱི, ཀཔྤསྶ རམཏི ཨསྶམེ.

‘‘སཱདཱུནི རམཎཱིཡཱནི, སནྟི ཝཀྑཱ མནོརམཱ;

སུབྷཱསིཏཱནི ཀཔྤསྶ, ནཱརད རམཡནྟི མཾ.

‘‘སཱལཱིནཾ ཨོདནཾ བྷུཉྫེ, སུཙིཾ མཾསཱུཔསེཙནཾ;

ཀཐཾ སཱམཱཀནཱིཝཱརཾ, ཨལོཎཾ ཚཱདཡནྟི ཏཾ.

‘‘སཱདུཾ ཝཱ ཡདི ཝཱསཱདུཾ, ཨཔྤཾ ཝཱ ཡདི ཝཱ བཧུཾ;

ཝིསྶཏྠོ ཡཏྠ བྷུཉྫེཡྻ, ཝིསྶཱསཔརམཱ རསཱ’’ཏི. (ཛཱ. ༡.༤.༡༨༡-༡༨༤);

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེནྟོ ‘‘ཏདཱ རཱཛཱ མོགྒལླཱནོ ཨཧོསི, ནཱརདོ སཱརིཔུཏྟོ, ཀཔྤནྟེཝཱསིཀོ ཨཱནནྡོ, ཀེསཝཏཱཔསོ ཨཧམེཝཱ’’ཏི ཝཏྭཱ, ‘‘ཨེཝཾ, མཧཱརཱཛ, པུབྦེཔི པཎྜིཏཱ མཱརཎནྟིཀཾ ཝེདནཾ པཏྭཱ ཝིསྶཱསིཀཊྛཱནཾ གམིཾསུ, མམ སཱཝཀཱ ཏུམྷཱཀཾ སནྟིཀེ ཝིསྶཱསཾ ན ལབྷནྟི མཉྙེ’’ཏི ཨཱཧ. རཱཛཱ ‘‘བྷིཀྑུསངྒྷེན སདྡྷིཾ མཡཱ ཝིསྶཱསཾ ཀཱཏུཾ ཝཊྚཏི, ཀཐཾ ནུ ཁོ ཀརིསྶཱམཱིཏི སམྨཱསམྦུདྡྷསྶ ཉཱཏིདྷཱིཏརཾ མམ གེཧེ ཀཱཏུཾ ཝཊྚཏི, ཨེཝཾ སནྟེ ‘དཧརཱ ཙ སཱམཎེརཱ ཙ སམྨཱསམྦུདྡྷསྶ ཉཱཏིརཱཛཱ’ཏི མམ སནྟིཀཾ ཝིསྶཏྠཱ ནིབདྡྷཾ ཨཱགམིསྶནྟཱི’’ཏི ཙིནྟེཏྭཱ – ‘‘ཨེཀཾ མེ དྷཱིཏརཾ དེནྟཱུ’’ཏི སཱཀིཡཱནཾ སནྟིཀཾ སཱསནཾ པེསེསི. ‘‘ཀཏརསྶ སཀྱསྶ དྷཱིཏཱ’’ཏི ཙ པུཙྪིཏྭཱ, ‘‘ཉཏྭཱ ཨཱགཙྪེཡྻཱཐཱ’’ཏི ཝཏྭཱ དཱུཏེ ཨཱཎཱཔེསི. དཱུཏཱ གནྟྭཱ སཱཀིཡེ དཱརིཀཾ ཡཱཙིཾསུ. ཏེ སནྣིཔཏིཏྭཱ, ‘‘པཀྑནྟརིཀོ རཱཛཱ, སཙེ ན དསྶཱམ, ཝིནཱསེསྶཏི ནོ, ན ཁོ པན ཨམྷེཧི ཀུལེན སདིསོ, ཀིཾ ནུ ཁོ ཀཱཏབྦ’’ནྟི མནྟཡིཾསུ. མཧཱནཱམོ ‘‘མམ དཱསིཡཱ ཀུཙྪིམྷི ཛཱཏཱ ཝཱསབྷཁཏྟིཡཱ ནཱམ དྷཱིཏཱ རཱུཔསོབྷགྒཔྤཏྟཱ ཨཏྠི, ཏཾ དསྶཱམཱ’’ཏི ཝཏྭཱ དཱུཏེ ཨཱཧ – ‘‘སཱདྷུ, རཉྙོ དཱརིཀཾ དསྶཱམཱ’’ཏི. ‘‘སཱ ཀསྶ, དྷཱིཏཱ’’ཏི? ‘‘སམྨཱསམྦུདྡྷསྶ ཙཱུལ༹པིཏུཔུཏྟསྶ མཧཱནཱམསྶ སཀྐསྶ དྷཱིཏཱ ཝཱསབྷཁཏྟིཡཱ ནཱམཱ’’ཏི.

ཏེ གནྟྭཱ རཉྙོ ཨཱརོཙཡིཾསུ. རཱཛཱ ‘‘ཡདི ཨེཝཾ, སཱདྷུ, སཱིགྷཾ ཨཱནེཐ, ཁཏྟིཡཱ ཙ ནཱམ བཧུམཱཡཱ, དཱསིདྷཱིཏརམྤི པཧིཎེཡྻུཾ, པིཏརཱ སདྡྷིཾ ཨེཀབྷཱཛནེ བྷུཉྫནྟིཾ ཨཱནེཡྻཱཐཱ’’ཏི པེསེསི. ཏེ གནྟྭཱ, ‘‘དེཝ, ཏུམྷེཧི སདྡྷིཾ ཨེཀཏོ བྷུཉྫནྟིཾ རཱཛཱ ཨིཙྪཏཱི’’ཏི ཨཱཧཾསུ. མཧཱནཱམོ ‘‘སཱདྷུ, ཏཱཏཱ’’ཏི ཏཾ ཨལངྐཱརཱཔེཏྭཱ ཨཏྟནོ བྷོཛནཀཱལེ པཀྐོསཱཔེཏྭཱ ཏཱཡ སདྡྷིཾ ཨེཀཏོ བྷུཉྫནཱཀཱརཾ དསྶེཏྭཱ དཱུཏཱནཾ ནིཡྻཱདེསི. ཏེ ཏཾ ཨཱདཱཡ སཱཝཏྠིཾ གནྟྭཱ ཏཾ པཝཏྟིཾ རཉྙོ ཨཱརོཙེསུཾ. རཱཛཱ ཏུཊྛམཱནསོ ཏཾ པཉྩནྣཾ ཨིཏྠིསཏཱནཾ ཛེཊྛིཀཾ ཀཏྭཱ ཨགྒམཧེསིཊྛཱནེ ཨབྷིསིཉྩི. སཱ ན ཙིརསྶེཝ སུཝཎྞཝཎྞཾ པུཏྟཾ ཝིཛཱཡི.

ཨཐསྶ ནཱམགྒཧཎདིཝསེ རཱཛཱ དཱརཀསྶ ཨཡྻཀསྶ སནྟིཀཾ པེསེསི ‘‘སཀྱརཱཛདྷཱིཏཱ ཝཱསབྷཁཏྟིཡཱ པུཏྟཾ ཝིཛཱཏཱ, ཀིམསྶ ནཱམཾ ཀརོམཱ’’ཏི? ཏཾ པན སཱསནཾ གཧེཏྭཱ གཏོ ཨམཙྩོ ཐོཀཾ བདྷིརདྷཱཏུཀོ, སོ གནྟྭཱ རཉྙོ ཨཡྻཀསྶ ཨཱརོཙེསི, སོ ཏཾ སུཏྭཱ ‘‘ཝཱསབྷཁཏྟིཡཱ པུཏྟཾ ཨཝིཛཱཡིཏྭཱཔི སབྦཛནཾ ཨབྷིབྷཝི, ཨིདཱནི པན རཉྙོ ཨཏིཝིཡ ཝལླབྷཱ བྷཝིསྶཏཱི’’ཏི ཨཱཧ. བདྷིརོ ཨམཙྩོ ‘‘ཝལླབྷཱ’’ཏི ཝཙནཾ དུསྶུཏཾ སུཏྭཱ ‘‘ཝིཊཊཱུབྷོ’’ཏི སལླཀྑེཏྭཱ རཱཛཱནཾ ཨུཔགནྟྭཱ, ‘‘དེཝ, ཀུམཱརསྶ ཀིར ‘ཝིཊཊཱུབྷོ’ཏི ནཱམཾ ཀརོཐཱ’’ཏི ཨཱཧ. རཱཛཱ ‘‘པོརཱཎཀཾ ནོ ཀུལསནྟཀཾ ནཱམཾ བྷཝིསྶཏཱི’’ཏི ཙིནྟེཏྭཱ ཏཾ ནཱམཾ ཨཀཱསི. ཨཐསྶ དཧརཀཱལེཡེཝ རཱཛཱ ‘‘སཏྠུ པིཡཾ ཀརོམཱི’’ཏི སེནཱཔཏིཊྛཱནཾ ཨདཱསི.

སོ ཀུམཱརཔརིཧཱརེན ཝཌྜྷནྟོ སཏྟཝསྶིཀཀཱལེ ཨཉྙེསཾ ཀུམཱརཱནཾ མཱཏཱམཧཀུལཏོ ཧཏྠིརཱུཔཀཨསྶརཱུཔཀཱདཱིནི ཨཱཧརིཡམཱནཱནི དིསྭཱ མཱཏརཾ པུཙྪི – ‘‘ཨམྨ, ཨཉྙེསཾ མཱཏཱམཧཀུལཏོ པཎྞཱཀཱརོ ཨཱཧརཱིཡཏི, མཡ྄ཧཾ ཀོཙི ཀིཉྩི ན པེསེསི, ཀིཾ ཏྭཾ ནིམཱཏཱ ནིཔིཏཱ’’ཏི? ཨཐ ནཾ སཱ, ‘‘ཏཱཏ, ཏཝ སཀྱརཱཛཱནོ མཱཏཱམཧཱ དཱུརེ པན ཝསནྟི, ཏེན ཏེ ཀིཉྩི ན པེསེནྟཱི’’ཏི ཝཉྩེསི. སོལ༹སཝསྶིཀཀཱལེ, ‘‘ཨམྨ, ཏཝ མཱཏཱམཧཀུལཾ པསྶིཏུཀཱམོམྷཱི’’ཏི ཝཏྭཱ, ‘‘ཨལཾ, ཏཱཏ, ཀིཾ ཏཏྠ གནྟྭཱ ཀརིསྶཏཱི’’ཏི ཝཱརིཡམཱནོཔི པུནཔྤུནཾ ཡཱཙི. ཨཐསྶ མཱཏཱ ‘‘ཏེན ཧི གཙྪཱ’’ཏི སམྤཊིཙྪི. སོ པིཏུ ཨཱརོཙེཏྭཱ མཧནྟེན པརིཝཱརེན ནིཀྑམི. ཝཱསབྷཁཏྟིཡཱ པུརེཏརཾ པཎྞཾ པེསེསི – ‘‘ཨཧཾ ཨིདྷ སུཁཾ ཝསཱམི, མཱསྶ ཀིཉྩི སཱམིནོ ཨནྟརཾ དསྶཡིཾསཱུ’’ཏི. སཱཀིཡཱ ཝིཊཊཱུབྷསྶ ཨཱགམནཾ ཉཏྭཱ, ‘‘ཝནྡིཏུཾ ན སཀྐོམཱ’’ཏི ཏསྶ དཧརདཧརེ ཀུམཱརེ ཛནཔདཾ པཧིཎིཏྭཱ ཏསྨིཾ ཀཔིལཔུརཾ སམྤཏྟེ སནྠཱགཱརེ སནྣིཔཏིཾསུ. ཀུམཱརོ ཏཏྠ གནྟྭཱ ཨཊྛཱསི.

ཨཐ ནཾ ‘‘ཨཡཾ ཏེ, ཏཱཏ, མཱཏཱམཧོ, ཨཡཾ མཱཏུལོ’’ཏི ཝཏྭཱ ཝནྡཱཔེསུཾ. སོ སབྦེ ཝནྡམཱནོ ཝིཙརིཏྭཱ ཨེཀམྤི ཨཏྟཱནཾ ཝནྡནྟཾ ཨདིསྭཱ ‘‘ཀིཾ ནུ ཁོ མཾ ཝནྡནྟཱ ནཏྠཱི’’ཏི པུཙྪི. སཱཀིཡཱ, ‘‘ཏཱཏ, ཏེ ཀནིཊྛཀུམཱརཱ ཛནཔདཾ གཏཱ’’ཏི ཝཏྭཱ ཏསྶ མཧནྟཾ སཀྐཱརཾ ཀརིཾསུ. སོ ཀཏིཔཱཧཾ ཝསིཏྭཱ མཧནྟེན པརིཝཱརེན ནིཀྑམི. ཨཐེཀཱ དཱསཱི སནྠཱགཱརེ ཏེན ནིསིནྣཕལཀཾ ‘‘ཨིདཾ ཝཱསབྷཁཏྟིཡཱཡ དཱསིཡཱ པུཏྟསྶ ནིསིནྣཕལཀ’’ནྟི ཨཀྐོསིཏྭཱ པརིབྷཱསིཏྭཱ ཁཱིརོདཀེན དྷོཝི. ཨེཀོ པུརིསོ ཨཏྟནོ ཨཱཝུདྷཾ པམུསྶིཏྭཱ ནིཝཏྟོ ཏཾ གཎྷནྟོ ཝིཊཊཱུབྷཀུམཱརསྶ ཨཀྐོསནསདྡཾ སུཏྭཱ ཏཾ ཀཱརཎཾ པུཙྪིཏྭཱ, ‘‘ཝཱསབྷཁཏྟིཡཱ དཱསིཡཱ ཀུཙྪིམྷི མཧཱནཱམསཀྐཾ པཊིཙྩ ཛཱཏཱ’’ཏི ཉཏྭཱ བལཀཱཡསྶ ཀཐེསི. ‘‘ཝཱསབྷཁཏྟིཡཱ ཀིར དཱསིདྷཱིཏཱ’’ཏི མཧཱཀོལཱཧལཾ ཨཧོསི. ཏཾ སུཏྭཱ ཝིཊཊཱུབྷོ ‘‘ཨེཏེ ཏཱཝ མམ ནིསིནྣཕལཀཾ ཁཱིརོདཀེན དྷོཝནྟུ, ཨཧཾ པན རཛྫེ པཏིཊྛིཏཀཱལེ ཨེཏེསཾ གལལོཧིཏཾ གཧེཏྭཱ མམ ནིསིནྣཕལཀཾ དྷོཝིསྶཱམཱི’’ཏི ཙིཏྟཾ པཊྛཔེསི. ཏསྨིཾ སཱཝཏྠིཾ གཏེ ཨམཙྩཱ ཏཾ པཝཏྟིཾ རཉྙོ ཨཱརོཙཡིཾསུ. རཱཛཱ ‘‘མཡ྄ཧཾ དཱསིདྷཱིཏརཾ ཨདཾསཱུ’’ཏི སཱཀིཡཱནཾ ཀུཛ྄ཛྷིཏྭཱ ཝཱསབྷཁཏྟིཡཱཡ ཙ པུཏྟསྶ ཙ དིནྣཔརིཧཱརཾ ཨཙྪིནྡིཏྭཱ དཱསདཱསཱིཧི ལདྡྷབྦམཏྟམེཝ དཱཔེསི.

ཏཏོ ཀཏིཔཱཧཙྩཡེན སཏྠཱ རཱཛནིཝེསནཾ གནྟྭཱ པཉྙཏྟཱསནེ ནིསཱིདི. རཱཛཱ ཨཱགནྟྭཱ ཝནྡིཏྭཱ, ‘‘བྷནྟེ, ཏུམྷཱཀཾ ཀིར ཉཱཏཀེཧི དཱསིདྷཱིཏཱ མཡ྄ཧཾ དིནྣཱ, ཏེནསྶཱ ཨཧཾ སཔུཏྟཱཡ པརིཧཱརཾ ཨཙྪིནྡིཏྭཱ དཱསདཱསཱིཧི ལདྡྷབྦམཏྟམེཝ དཱཔེསི’’ནྟི ཨཱཧ. སཏྠཱ ‘‘ཨཡུཏྟཾ, མཧཱརཱཛ, སཱཀིཡེཧི ཀཏཾ, དདནྟེཧི ནཱམ སམཱནཛཱཏིཀཱ དཱཏབྦཱ ཨསྶ, ཏཾ པན, མཧཱརཱཛ, ཝདཱམི, ཝཱསབྷཁཏྟིཡཱ ཁཏྟིཡརཱཛདྷཱིཏཱ ཁཏྟིཡརཉྙོ གེཧེ ཨབྷིསེཀཾ ལབྷི. ཝིཊཊཱུབྷོཔི ཁཏྟིཡརཱཛཱནམེཝ པཊིཙྩ ཛཱཏོ, མཱཏུགོཏྟཾ ནཱམ ཀིཾ ཀརིསྶཏི, པིཏུགོཏྟམེཝ པམཱཎནྟི. པོརཱཎཀཔཎྜིཏཱ དལིདྡིཏྠིཡཱ ཀཊྛཧཱརིཀཱཡ ཨགྒམཧེསིཊྛཱནཾ ཨདཾསུ, ཏསྶཱ ཙ ཀུཙྪིམྷི ཛཱཏཀུམཱརོ དྭཱདསཡོཛནིཀཱཡ བཱརཱཎསིཡཱ རཛྫཾ པཏྭཱ ཀཊྛཝཱཧནརཱཛཱ ནཱམ ཛཱཏོ’’ཏི ཀཊྛཧཱརིཛཱཏཀཾ (ཛཱ. ༡.༡.༧) ཀཐེསི. རཱཛཱ དྷམྨཀཐཾ སུཏྭཱ ‘‘པིཏུགོཏྟམེཝ ཀིར པམཱཎ’’ནྟི ཏུསྶིཏྭཱ ཝཱསབྷཁཏྟིཡཱཡ ཙ པུཏྟསྶ ཙ པཀཏིཔརིཧཱརམེཝ དཱཔེསི.

བནྡྷུལསེནཱཔཏིསྶཔི ཁོ ཀུསིནཱརཱཡཾ མལླརཱཛདྷཱིཏཱ མལླིཀཱ ནཱམ བྷརིཡཱ དཱིགྷརཏྟཾ པུཏྟཾ ན ཝིཛཱཡི. ཨཐ ནཾ བནྡྷུལོ ‘‘ཨཏྟནོ ཀུལགྷརམེཝ གཙྪཱ’’ཏི ཨུཡྻོཛེསི. སཱ ‘‘སཏྠཱརཾ དིསྭཱཝ གམིསྶཱམཱི’’ཏི ཛེཏཝནཾ པཝིསིཏྭཱ ཏཐཱགཏཾ ཝནྡིཏྭཱ ཋིཏཱ, ‘‘ཀཧཾ གཙྪསཱི’’ཏི ཝུཏྟཱ ‘‘སཱམིཀོ མཾ བྷནྟེ, ཀུལགྷརཾ པེསེཏཱི’’ ཨཱཧ. ‘‘ཀིཾ ཀཱརཎཱ’’ཏི? ‘‘ཝཉྫྷཱ ཀིརསྨི ཨཔུཏྟིཀཱ’’ཏི. ‘‘ཡདི ཨེཝཾ, གམནཀིཙྩཾ ནཏྠི, ནིཝཏྟསྶཱུ’’ཏི. སཱ ཏུཊྛམཱནསཱ སཏྠཱརཾ ཝནྡིཏྭཱ ནིཝེསནཾ གནྟྭཱ ‘‘ཀསྨཱ ནིཝཏྟཱསཱི’’ཏི ཝུཏྟཱ ‘‘དསབལེན ནིཝཏྟིཏཱམྷཱི’’ཏི ཨཱཧ བནྡྷུལོ ‘‘དིཊྛཾ བྷཝིསྶཏི དཱིགྷདསྶིནཱ ཀཱརཎ’’ནྟི སམྤཊིཙྪི. སཱ ན ཙིརསྶེཝ གབྦྷཾ པཊིལབྷིཏྭཱ ཨུཔྤནྣདཱཧལཱ༹ ‘‘དོཧལོ༹ མེ ཨུཔྤནྣོ’’ཏི ཨཱརོཙེསི. ‘‘ཀིཾ དོཧལོ༹’’ཏི? ‘‘ཝེསཱལིནགརེ གཎརཱཛཀུལཱནཾ ཨབྷིསེཀམངྒལཔོཀྑརཎིཡཾ ཨོཏརིཏྭཱ ནྷཏྭཱ པཱནཱིཡཾ པཱཏུཀཱམཱམྷི, སཱམཱི’’ཏི. བནྡྷུལོ ‘‘སཱདྷཱུ’’ཏི ཝཏྭཱ སཧསྶཐཱམདྷནུཾ གཧེཏྭཱ ཏཾ རཐཾ ཨཱརོཔེཏྭཱ སཱཝཏྠིཏོ ནིཀྑམིཏྭཱ རཐཾ པཱཛེནྟོ མཧཱལིལིཙྪཝིནོ དིནྣདྭཱརེན ཝེསཱལིཾ པཱཝིསི. མཧཱལིལིཙྪཝིནོ ཙ དྭཱརསམཱིཔེ ཨེཝ ནིཝེསནཾ ཧོཏི. སོ རཐསྶ ཨུམྨཱརེ པནིགྷཱཏསདྡཾ སུཏྭཱཝ ‘‘བནྡྷུལསྶ རཐསདྡོ ཨེསོ, ཨཛྫ ལིཙྪཝཱིནཾ བྷཡཾ ཨུཔྤཛྫིསྶཏཱི’’ཏི ཨཱཧ.

པོཀྑརཎིཡཱ ཨནྟོ ཙ བཧི ཙ ཨཱརཀྑཱ བལཝཏཱི, ཨུཔརི ལོཧཛཱལཾ པཏྠཊཾ, སཀུཎཱནམྤི ཨོཀཱསོ ནཏྠི. བནྡྷུལསེནཱཔཏི པན རཐཱ ཨོཏརིཏྭཱ ཨཱརཀྑཀེ མནུསྶེ ཝེཏྟེན པཧརནྟོ པལཱཔེཏྭཱ ལོཧཛཱལཾ ཚིནྡིཏྭཱ ཨནྟོཔོཀྑརཎཱིཡཾ བྷརིཡཾ ནྷཱཔེཏྭཱ སཡམྤི ནྷཏྭཱ པུན ཏཾ རཐཾ ཨཱརོཔེཏྭཱ ནགརཱ ནིཀྑམིཏྭཱ ཨཱགཏམགྒེནེཝ པཱཡཱསི. ཏེ ཨཱརཀྑམནུསྶཱ ལིཙྪཝིརཱཛཱུནཾ ཨཱརོཙེསུཾ. ལིཙྪཝིརཱཛཱནོ ཀུཛ྄ཛྷིཏྭཱ པཉྩ རཐསཏཱནི ཨཱརུཡ྄ཧ ‘‘བནྡྷུལམལླཾ གཎྷིསྶཱམཱ’’ཏི ནིཀྑམིཾསུ. ཏཾ པཝཏྟིཾ མཧཱལིསྶ ཨཱརོཙེསུཾ. མཧཱལི, ‘‘མཱ གམིཏྠ, སོ ཧི ཝོ སབྦེ གྷོཏེསྶཏཱི’’ཏི ཨཱཧ. ཏེཔི ‘‘མཡཾ གམིསྶཱམ ཨེཝཱ’’ཏི ཝདིཾསུ. ‘‘ཏེན ཧི ཏསྶ རཐཙཀྐསྶ ཡཱཝ ནཱབྷིཏོ པཐཝིཾ པཝིཊྛཊྛཱནཾ དིསྭཱ ནིཝཏྟེཡྻཱཐ, ཏཏོ ཨནིཝཏྟནྟཱ པུརཏོ ཨསནིསདྡཾ ཝིཡ སུཎིསྶཐ, ཏམྷཱ ཋཱནཱ ནིཝཏྟེཡྻཱཐ. ཏཏོ ཨནིཝཏྟནྟཱ ཏུམྷཱཀཾ རཐདྷུརེསུ ཚིདྡཾ པསྶིསྶཐ, ཏམྷཱ ཋཱནཱ ནིཝཏྟེཡྻཱཐ, པུརཏོ མཱ གམིཏྠཱ’’ཏི. ཏེ ཏསྶ ཝཙནེན ཨནིཝཏྟིཏྭཱ ཏཾ ཨནུབནྡྷིཾསུ ཨེཝ. མལླིཀཱ དིསྭཱ, ‘‘རཐཱ, སཱམི, པཉྙཱཡནྟཱི’’ཏི ཨཱཧ. ‘‘ཏེན ཧི ཨེཀསྶེཝ རཐསྶ པཉྙཱཡནཀཱལེ མཾ ཨཱརོཙེཡྻཱསཱི’’ཏི. སཱ ཡདཱ སབྦེ རཐཱ ཨེཀོ ཝིཡ ཧུཏྭཱ པཉྙཱཡིཾསུ, ཏདཱ ‘‘ཨེཀམེཝ, སཱམི, རཐསཱིསཾ པཉྙཱཡཏཱི’’ཏི ཨཱཧ. བནྡྷུལོ ‘‘ཏེན ཧི ཨིམཱ རསྨིཡོ གཎྷཱཧཱི’’ཏི ཏསྶཱ རསྨིཡོ དཏྭཱ རཐེ ཋིཏོཝ དྷནུཾ ཨཱརོཔེསི, རཐཙཀྐཾ ཡཱཝ ནཱབྷིཏོ པཐཝིཾ པཱཝིསི.

ལིཙྪཝིནོ ཏཾ ཋཱནཾ དིསྭཱཔི ན ནིཝཏྟིཾསུ. ཨིཏརོ ཐོཀཾ གནྟྭཱ ཛིཡཾ པོཐེསི, ཨསནིསདྡོ ཝིཡ ཨཧོསི. ཏེ ཏཏོཔི ན ནིཝཏྟིཾསུ, ཨནུབནྡྷནྟཱ གཙྪནྟེཝ. བནྡྷུལོ རཐེ ཋིཏཀོཝ ཨེཀསརཾ ཁིཔི, སོ པཉྩནྣཾ རཐསཏཱནཾ རཐསཱིསེ ཚིདྡཾ ཀཏྭཱ པཉྩ རཱཛསཏཱནི པརིཀརབནྡྷནཊྛཱནེ ཝིནིཝིཛ྄ཛྷིཏྭཱ པཐཝིཾ པཱཝིསི. ཏེ ཨཏྟནོ པཝིདྡྷབྷཱཝཾ ཨཛཱནིཏྭཱ, ‘‘ཏིཊྛ, རེ, ཏིཊྛ, རེ’’ཏི ཝདནྟཱ ཨནུབནྡྷིཾསུ ཨེཝ. བནྡྷུལོ རཐཾ ཋཔེཏྭཱ ‘‘ཏུམྷེ མཏཀཱ, མཏཀེཧི སདྡྷིཾ མཡ྄ཧཾ ཡུདྡྷཾ ནཱམ ནཏྠཱི’’ཏི ཨཱཧ. ‘‘མཏཀཱ ནཱམ ཨམྷཱདིསཱ ན ཧོནྟཱི’’ཏི. ‘‘ཏེན ཧི སབྦཔཙྪིམསྶ པརིཀརཾ མོཙེཐཱ’’ཏི. ཏེ མོཙཡིཾསུ. སོ མུཏྟམཏྟེ ཨེཝ མརིཏྭཱ པཏིཏོ. ཨཐ ཏེ སབྦེཔི ‘‘ཏུམྷེ ཨེཝརཱུཔཱ, ཨཏྟནོ གྷརཱནི གནྟྭཱ སཾཝིདྷཱཏབྦཾ སཾཝིདཧིཏྭཱ པུཏྟདཱརཾ ཨནུསཱསིཏྭཱ སནྣཱཧཾ མོཙེཐཱ’’ཏི ཨཱཧ. ཏེ ཏཐཱ ཀཏྭཱ སབྦེཔི ཛཱིཝིཏཀྑཡཾ པཏྟཱ. བནྡྷུལོཔི མལླིཀཾ སཱཝཏྠིཾ ཨཱནེསི. སཱ སོལ༹སཀྑཏྟུཾ ཡམཀེ ཡམཀེ པུཏྟེ ཝིཛཱཡི. སབྦེཔི སཱུརཱ ཐཱམསམྤནྣཱ ཨཧེསུཾ, སབྦསིཔྤཱནཾ ནིཔྥཏྟིཾ པཱཔུཎིཾསུ. ཨེཀེཀསྶ པུརིསསཧསྶཾ པརིཝཱརོ ཨཧོསི. པིཏརཱ སདྡྷིཾ རཱཛནིཝེསནཾ གཙྪནྟེཧི ཏེཧེཝ རཱཛངྒཎཾ པརིཔཱུརི.

ཨཐེཀདིཝསཾ ཝིནིཙྪཡེ ཀཱུཊཊྚཔརཱཛིཏཱ མནུསྶཱ བནྡྷུལཾ ཨཱགཙྪནྟཾ དིསྭཱ མཧཱཝིརཝཾ ཝིརཝནྟཱ ཝིནིཙྪཡཨམཙྩཱནཾ ཀཱུཊཊྚཀརཎཾ ཏསྶ ཨཱརོཙེསུཾ. སོ ཝིནིཙྪཡཾ གནྟྭཱ ཏཾ ཨཊྚཾ ཝིཙཱརེཏྭཱ སཱམིཀམེཝ སཱམིཀཾ ཨཀཱསི. མཧཱཛནོ མཧཱསདྡེན སཱདྷུཀཱརཾ པཝཏྟེཏི. རཱཛཱ ‘‘ཀིཾ ཨིད’’ནྟི པུཙྪིཏྭཱ ཏམཏྠཾ སུཏྭཱ ཏུསྶིཏྭཱ སབྦེཔི ཏེ ཨམཙྩེ ཧཱརེཏྭཱ བནྡྷུལསྶེཝ ཝིནིཙྪཡཾ ནིཡྻཱདེསི. སོ ཏཏོ པཊྛཱཡ སམྨཱ ཝིནིཙྪཡི. ཏཏོ ཏེ པོརཱཎཀཝིནིཙྪཡིཀཱ ཨམཙྩཱ ཀིཉྩི ལཉྫཾ ཨལབྷནྟཱ ཨཔྤལཱབྷཱ ཧུཏྭཱ ‘‘བནྡྷུལོ རཛྫཾ པཏྠེཏཱི’’ཏི རཱཛཀུལེ པརིབྷིནྡིཾསུ. རཱཛཱ ཏེསཾ ཀཐཾ སདྡཧིཏྭཱ ཙིཏྟཾ ནིགྒཧེཏུཾ ནཱསཀྑི. ‘‘ཨིམསྨིཾ ཨིདྷེཝ གྷཱཏིཡམཱནེ གརཧཱ མེ ཨུཔྤཛྫིསྶཏཱི’’ཏི པུན ཙིནྟེཏྭཱ པཡུཏྟཔུརིསེཧི པཙྩནྟཾ པཧཱརཱཔེཏྭཱ བནྡྷུལཾ པཀྐོསཱཔེཏྭཱ, ‘‘པཙྩནྟོ ཀིར ཀུཔིཏོ, ཏཝ པུཏྟེཧི སདྡྷིཾ གནྟྭཱ, ཙོརེ གཎྷཱཧཱི’’ཏི པཧིཎིཏྭཱ, ‘‘ཨེཏྠེཝསྶ དྭཏྟིཾསཱཡ པུཏྟེཧི སདྡྷིཾ སཱིསཾ ཚིནྡིཏྭཱ ཨཱཧརཐཱ’’ཏི ཏེཧི སདྡྷིཾ ཨཉྙེཔི སམཏྠེ མཧཱཡོདྷེ པེསེསི. ཏསྨིཾ པཙྩནྟཾ གཙྪནྟེཡེཝ ‘‘སེནཱཔཏི ཀིར ཨཱགཙྪཏཱི’’ཏི པཡུཏྟཙོརཱ པལཱཡིཾསུ. སོ ཏཾ པདེསཾ ཨཱཝཱསཱཔེཏྭཱ སཎྛཱཔེཏྭཱ ནིཝཏྟི.

ཨཐསྶ ནགརཏོ ཨཝིདཱུརེ ཋཱནེ ཏེ ཡོདྷཱ པུཏྟེཧི སདྡྷིཾ སཱིསཾ ཚིནྡིཾསུ. ཏཾ དིཝསཾ མལླིཀཱཡ པཉྩཧི བྷིཀྑུསཏེཧི སདྡྷིཾ དྭེ ཨགྒསཱཝཀཱ ནིམནྟིཏཱ ཧོནྟི. ཨཐསྶཱ པུབྦཎྷེ ཨེཝ ‘‘སཱམིཀསྶ ཏེ སདྡྷིཾ པུཏྟེཧི སཱིསཾ ཚིནྣ’’ནྟི པཎྞཾ ཨཱཧརིཏྭཱ ཨདཾསུ. སཱ ཏཾ པཝཏྟིཾ ཉཏྭཱ ཀསྶཙི ཀིཉྩི ཨཝཏྭཱ པཎྞཾ ཨུཙྪངྒེ ཋཔེཏྭཱ བྷིཀྑུསངྒྷམེཝ པརིཝིསི. ཨཐསྶཱ པརིཙཱརིཀཱཡོ བྷིཀྑཱུནཾ བྷཏྟཾ དཏྭཱ སཔྤིཙཱཊིཾ ཨཱཧརནྟིཡོ ཐེརཱནཾ པུརཏོ སཔྤིཙཱཊིཾ བྷིནྡིཾསུ. དྷམྨསེནཱཔཏི ‘‘བྷེདནདྷམྨཾ བྷིནྣཾ, ན ཙིནྟིཏབྦ’’ནྟི ཨཱཧ. སཱ ཨུཙྪངྒཏོ པཎྞཾ ནཱིཧརིཏྭཱ ‘‘དྭཏྟིཾསཱཡ པུཏྟེཧི སདྡྷིཾ པིཏུསཱིསཾ ཚིནྣནྟི མེ ཨིམཾ པཎྞཾ ཨཱཧརིཾསུ, ཨཧཾ ཨིདཾ སུཏྭཱཔི ན ཙིནྟེམི, སཔྤིཙཱཊིཡཱ བྷིནྣཱཡ ཀིཾ ཙིནྟཡིསྶཱམི, བྷནྟེ’’ཏི ཨཱཧ. དྷམྨསེནཱཔཏི ‘‘ཨནིམིཏྟམནཉྙཱཏཾ, མཙྩཱནཾ ཨིདྷ ཛཱིཝིཏ’’ནྟིཨཱདཱིནི (སུ. ནི. ༥༧༩) ཝཏྭཱ དྷམྨཾ དེསེཏྭཱ ཨུཊྛཱཡཱསནཱ ཝིཧཱརཾ ཨགམཱསི. སཱཔི དྭཏྟིཾས སུཎིསཱཡོ པཀྐོསཱཔེཏྭཱ, ‘‘ཏུམྷཱཀཾ སཱམིཀཱ ནིརཔརཱདྷཱ ཨཏྟནོ པུརིམཀམྨཕལཾ ལབྷིཾསུ, ཏུམྷེ མཱ སོཙཡིཏྠ, མཱ པརིདེཝིཏྠ, རཉྙོ ཨུཔརི མནོཔདོསཾ མཱ ཀརིཏྠཱ’’ཏི ཨོཝདི.

རཉྙོ ཙརཔུརིསཱ ཏཾ ཀཐཾ སུཏྭཱ གནྟྭཱ ཏེསཾ ནིདྡོསབྷཱཝཾ རཉྙོ ཀཐཡིཾསུ. རཱཛཱ སཾཝེགཔྤཏྟོ ཏསྶཱ ནིཝེསནཾ གནྟྭཱ མལླིཀཉྩ སུཎིསཱཡོ ཙསྶཱ ཁམཱཔེཏྭཱ མལླིཀཱཡ ཝརཾ ཨདཱསི. སཱ ‘‘ཝརོ གཧིཏོ མེ ཧོཏཱུ’’ཏི ཝཏྭཱ ཏསྨིཾ གཏེ མཏཀབྷཏྟཾ དཏྭཱ ནྷཏྭཱ རཱཛཱནཾ ཨུཔསངྐམིཏྭཱ ཝནྡིཏྭཱ, ‘‘དེཝ, ཏུམྷེཧི མཡ྄ཧཾ ཝརོ དིནྣོ, མཡ྄ཧཉྩ ཨཉྙེན ཨཏྠོ ནཏྠི, དྭཏྟིཾསཱཡ མེ སུཎིསཱནཾ མམཉྩ ཀུལགྷརགམནཾ ཨནུཛཱནཱཐཱ’’ཏི ཨཱཧ. རཱཛཱ སམྤཊིཙྪི. སཱ དྭཏྟིཾས སུཎིསཱཡོ ཡཐཱསཀཱནི ཀུལཱནི པེསེསི, སཡམྤི ཀུསིནཱརཱནགརེ ཨཏྟནོ ཀུལགྷརཾ ཨགམཱསི.

རཱཛཱཔི བནྡྷུལསེནཱཔཏིནོ བྷཱགིནེཡྻསྶ དཱིགྷཀཱརཱཡནསྶ ནཱམ སེནཱཔཏིཊྛཱནཾ ཨདཱསི. སོ པན ‘‘མཱཏུལོ མེ ཨིམིནཱ མཱརིཏོ’’ཏི རཉྙོ ཨོཏཱརཾ གཝེསནྟོ ཝིཙརཏི. རཱཛཱཔི ནིརཔརཱདྷསྶ བནྡྷུལསྶ མཱརིཏཀཱལཏོ པཊྛཱཡ ཝིཔྤཊིསཱརཱི ཧུཏྭཱ ཙིཏྟསྶཱདཾ ན ལབྷཏི, རཛྫསུཁཾ ནཱནུབྷོཏི. ཏདཱ སཏྠཱ སཀྱཱནཾ མེདཱལུ༹པཾ ནཱམ ནིགམཾ ཨུཔནིསྶཱཡ ཝིཧརཏི. རཱཛཱ ཏཏྠ གནྟྭཱ ཨཱརཱམཏོ ཨཝིདཱུརེ ཁནྡྷཱཝཱརཾ ནིཝཱསེཏྭཱ, ‘‘མནྡེན པརིཝཱརེན སཏྠཱརཾ ཝནྡིསྶཱམཱི’’ཏི ཝིཧཱརཾ གནྟྭཱ པཉྩརཱཛཱཀཀུདྷབྷཎྜཱནི དཱིགྷཀཱརཱཡནསྶ དཏྭཱ ཨེཀཀོཝ གནྡྷཀུཊིཾ པཱཝིསི. སབྦཾ དྷམྨཙེཏིཡསུཏྟནིཡཱམེན (མ. ནི. ༢.༣༦༤ ཨཱདཡོ) དཱིཔེཏབྦཾ. ཏསྨིཾ གནྡྷཀུཊིཾ པཝིཊྛེ དཱིགྷཀཱརཱཡནོ ཏཱནི པཉྩ རཱཛཀཀུདྷབྷཎྜཱནི གཧེཏྭཱ ཝིཊཊཱུབྷཾ རཱཛཱནཾ ཀཏྭཱ རཉྙོ ཨེཀཾ ཨསྶཾ ཨེཀཉྩ ཨུཔཊྛཱནཀཱརིཀཾ མཱཏུགཱམཾ ཋཔེཏྭཱ ནིཝཏྟེཏྭཱ སཱཝཏྠིཾ ཨགམཱསི.

རཱཛཱ སཏྠཱརཱ སདྡྷིཾ པིཡཀཐཾ ཀཐེཏྭཱ སཏྠཱརཾ ཝནྡིཏྭཱ ནིཀྑནྟོ སེནཾ ཨདིསྭཱ ཏཾ མཱཏུགཱམཾ པུཙྪིཏྭཱ ཏཾ པཝཏྟིཾ སུཏྭཱ, ‘‘ཨཧཾ བྷཱགིནེཡྻཾ ཨཱདཱཡ གནྟྭཱ, ཝིཊཊཱུབྷཾ གཧེསྶཱམཱི’’ཏི རཱཛགཧནགརཾ གཙྪནྟོ ཝིཀཱལེ དྭཱརེསུ པིདཧིཏེསུ ནགརཾ པཏྭཱ ཨེཀིསྶཱ སཱལཱཡ ནིཔཛྫིཏྭཱ ཝཱཏཱཏཔེཧི ཀིལནྟོ རཏྟིབྷཱགེ ཏཏྠེཝ ཀཱལམཀཱསི. ཝིབྷཱཏཱཡ རཏྟིཡཱ, ‘‘དེཝ, ཀོསལནརིནྡ ཨནཱཐོ ཛཱཏོསཱི’’ཏི ཝིཔྤལཔནྟིཡཱ ཏསྶཱ ཨིཏྠིཡཱ སདྡཾ སུཏྭཱ རཉྙོ ཨཱརོཙེསུཾ. སོ མཱཏུལསྶ མཧནྟེན སཀྐཱརེན སརཱིརཀིཙྩཾ ཀཱརེསི.

ཝིཊཊཱུབྷོཔི རཛྫཾ ལབྷིཏྭཱ ཏཾ ཝེརཾ སརིཏྭཱ ‘‘སབྦེཔི སཱཀིཡེ མཱརེསྶཱམཱི’’ཏི མཧཏིཡཱ སེནཱཡ ནིཀྑམི. ཏཾ དིཝསཾ སཏྠཱ པཙྩཱུསཀཱལེ ལོཀཾ ཝོལོཀེནྟོ ཉཱཏིསངྒྷསྶ ཝིནཱསཾ དིསྭཱ, ‘‘ཉཱཏིསངྒཧཾ ཀཱཏུཾ ཝཊྚཏཱི’’ཏི ཙིནྟེཏྭཱ པུབྦཎྷསམཡེ པིཎྜཱཡ ཙརིཏྭཱ, པིཎྜཔཱཏཔཊིཀྐནྟོ གནྡྷཀུཊིཡཾ སཱིཧསེཡྻཾ ཀཔྤེཏྭཱ, སཱཡནྷསམཡེ ཨཱཀཱསེན གནྟྭཱ, ཀཔིལཝཏྠུསཱམནྟེ ཨེཀསྨིཾ ཀབརཙྪཱཡེ རུཀྑམཱུལེ ནིསཱིདི. ཏཏོ ཝིཊཊཱུབྷསྶ རཛྫསཱིམཱཡ མཧནྟོ སནྡཙྪཱཡོ ནིགྲོདྷོ ཨཏྠི. ཝིཊཊཱུབྷོ སཏྠཱརཾ དིསྭཱ ཨུཔསངྐམིཏྭཱ ཝནྡིཏྭཱ, ‘‘བྷནྟེ, ཀིཾ ཀཱརཎཱ ཨེཝརཱུཔཱཡ ཨུཎྷཝེལཱཡ ཨིམསྨིཾ ཀབརཙྪཱཡེ རུཀྑམཱུལེ ནིསཱིདཐ, ཨེཏསྨིཾ སནྡཙྪཱཡེ ནིགྲོདྷམཱུལེ ནིསཱིདཐ, བྷནྟེ’’ཏི ཝཏྭཱ, ‘‘ཧོཏུ, མཧཱརཱཛ, ཉཱཏཀཱནཾ ཚཱཡཱ ནཱམ སཱིཏལཱ’’ཏི ཝུཏྟེ, ‘‘ཉཱཏཀཱནུརཀྑནཏྠཱཡ སཏྠཱ ཨཱགཏོ བྷཝིསྶཏཱི’’ཏི ཙིནྟེཏྭཱ སཏྠཱརཾ ཝནྡིཏྭཱ ནིཝཏྟིཏྭཱ སཱཝཏྠིཾཡེཝ པཙྩཱགམི. སཏྠཱཔི ཨུཔྤཏིཏྭཱ ཛེཏཝནམེཝ གཏོ.

རཱཛཱ སཱཀིཡཱནཾ དོསཾ སརིཏྭཱ དུཏིཡམྤི ནིཀྑམིཏྭཱ ཏཐེཝ སཏྠཱརཾ པསྶིཏྭཱ པུན ནིཝཏྟི. ཏཏིཡཝཱརེཔི ནིཀྑམིཏྭཱ ཏཐེཝ སཏྠཱརཾ པསྶིཏྭཱ པུན ནིཝཏྟི. ཙཏུཏྠཝཱརེ པན ཏསྨིཾ ནིཀྑནྟེ སཏྠཱ སཱཀིཡཱནཾ པུབྦཀམྨཾ ཨོལོཀེཏྭཱ ཏེསཾ ཨེཀདིཝསཾ ནདིཡཾ ཝིསཔཀྑིཔནཔཱཔཀམྨསྶ ཨཔྤཊིབཱཧིཡབྷཱཝཾ ཉཏྭཱ ཙཏུཏྠཝཱརེ ནཱགམཱསི. ཝིཊཊཱུབྷོ ‘‘སཱཀིཡེ གྷཱཏེསྶཱམཱི’’ཏི མཧནྟེན བལཀཱཡེན ནིཀྑམི. སམྨཱསམྦུདྡྷསྶ པན ཉཱཏཀཱ ཨསཏྟགྷཱཏཀཱ ནཱམ, ཨཏྟནཱ མརནྟཱཔི པརེསཾ ཛཱིཝིཏཾ ན ཝོརོཔེནྟི. ཏེ ཙིནྟཡིཾསུ – ‘‘མཡཾ སུསིཀྑིཏཱ ཀཏཧཏྠཱ ཀཏཱུཔཱསནཱ མཧིསྶཱསཱ, ན ཁོ པན སཀྐཱ ཨམྷེཧི པརཾ ཛཱིཝིཏཱ ཝོརོཔེཏུཾ, ཨཏྟནོ ཀམྨཾ དསྶེཏྭཱ པལཱཔེསྶཱམཱ’’ཏི ཏེ ཀཏསནྣཱཧཱ ནིཀྑམིཏྭཱ ཡུདྡྷཾ ཨཱརབྷིཾསུ. ཏེཧི ཁིཏྟཱ སརཱ ཝིཊཊཱུབྷསྶ པུརིསཱནཾ ཨནྟརནྟརེན གཙྪནྟི, ཕལཀནྟརཀཎྞཚིདྡནྟརཱདཱིཧི ནིཀྑམནྟི. ཝིཊཊཱུབྷོ དིསྭཱ ནནུ བྷཎེ ‘‘སཱཀིཡཱ ཨསཏྟགྷཱཏཀཱམྷཱ’’ཏི ཝདནྟི, ཨཐ ཙ པན མེ པུརིསེ ནཱསེནྟཱིཏི.

ཨཐ ནཾ ཨེཀོ པུརིསོ ཨཱཧ – ‘‘ཀིཾ སཱམི, ནིཝཏྟིཏྭཱ ཨོལོཀེསཱི’’ཏི? ‘‘སཱཀིཡཱ མེ པུརིསེ ནཱསེནྟཱི’’ཏི. ‘‘ཏུམྷཱཀཾ ཀོཙི པུརིསོ མཏོ ནཱམ ནཏྠི. ཨིངྒྷ ཏེ གཎཱཔེཐཱ’’ཏི. གཎཱཔེནྟོ ཨེཀསྶཔི ཁཡཾ ན པསྶི. སོ ཏཏོ ནིཝཏྟིཏྭཱ ‘‘ཡེ ཡེ པན བྷཎེ ‘སཱཀིཡམྷཱ’ཏི བྷཎནྟི, སབྦེ མཱརེཐ, མཱཏཱམཧསྶ པན མཧཱནཱམསཀྐསྶ སནྟིཀེ ཋིཏཱནཾ ཛཱིཝིཏཾ དེཐཱ’’ཏི ཨཱཧ. སཱཀིཡཱ གཧེཏབྦགཧཎཾ ཨཔསྶནྟཱ ཨེཀཙྩེ ཏིཎཾ ཌཾསིཏྭཱ, ཨེཀཙྩེ ནལ༹ཾ གཧེཏྭཱ ཨཊྛཾསུ. ‘‘ཏུམྷེ སཱཀིཡཱ, ནོ’’ཏི པུཙྪིཏཱ ཡསྨཱ ཏེ མརནྟཱཔི མུསཱཝཱདཾ ན བྷཎནྟི, ཏསྨཱ ཏིཎཾ ཌཾསིཏྭཱ ཋིཏཱ ‘‘ནོ སཱཀོ, ཏིཎ’’ནྟི ཝདནྟི. ནལ༹ཾ གཧེཏྭཱ ཋིཏཱ ‘‘ནོ སཱཀོ, ནལོ༹’’ཏི ཝདནྟི. ཡེ ཙ མཧཱནཱམསྶ སནྟིཀེ ཋིཏཱ, ཏེ ཙ ཛཱིཝིཏཾ ལབྷིཾསུ. ཏེསུ ཏིཎཾ ཌཾསིཏྭཱ ཋིཏཱ ཏིཎསཱཀིཡཱ ནཱམ, ནལ༹ཾ གཧེཏྭཱ ཋིཏཱ ནལ༹སཱཀིཡཱ ནཱམ ཛཱཏཱཏི, ཝིཊཊཱུབྷོ ཨཝསེསེ ཁཱིརཔཀེཔི དཱརཀེ ཨཝིསྶཛྫེཏྭཱ གྷཱཏཱཔེནྟོ ལོཧིཏནདིཾ པཝཏྟེཏྭཱ ཏེསཾ གལལོཧིཏེན ཕལཀཾ དྷོཝཱཔེསི. ཨེཝཾ སཱཀིཡཝཾསོ ཝིཊཊཱུབྷེན ཨུཔཙྪིནྣོ.

སོ མཧཱནཱམསཀྐཾ གཱཧཱཔེཏྭཱ ནིཝཏྟོ ‘‘པཱཏརཱསཝེལཱཡ པཱཏརཱསཾ ཀརིསྶཱམཱི’’ཏི ཨེཀསྨིཾ ཋཱནེ ཨོཏརིཏྭཱ བྷོཛནེ ཨུཔནཱིཏེ ‘‘ཨེཀཏོཝ བྷུཉྫིསྶཱམཱ’’ཏི ཨཡྻཀཾ པཀྐོསཱཔེསི. ཁཏྟིཡཱ པན ཛཱིཝིཏཾ ཙཛནྟཱཔི དཱསིཔུཏྟེཧི སདྡྷིཾ ན བྷུཉྫནྟི. ཏསྨཱ མཧཱནཱམོ ཨེཀཾ སརཾ ཨོལོཀེཏྭཱ ‘‘ཀིལིཊྛགཏྟོམྷི, ནྷཱཡིསྶཱམི, ཏཱཏཱ’’ཏི ཨཱཧ. ‘‘སཱདྷུ, ཨཡྻཀ, ནྷཱཡཐཱ’’ཏི. སོ ‘‘ཨཡཾ མཾ ཨེཀཏོ ཨབྷུཉྫནྟཾ གྷཱཏེསྶཏི, སཡམེཝ མེ མཏཾ སེཡྻོ’’ཏི ཀེསེ མུཉྩིཏྭཱ ཨགྒེ གཎྛིཾ ཀཏྭཱ ཀེསེསུ པཱདངྒུཊྛཀེ པཝེསེཏྭཱ ཨུདཀེ ནིམུཛྫི. ཏསྶ གུཎཏེཛེན ནཱགབྷཝནཾ ཨུཎྷཱཀཱརཾ དསྶེསི. ནཱགརཱཛཱ ‘‘ཀིཾ ནུ ཁོ’’ཏི ཨུཔདྷཱརེནྟོ ཏཾ ཉཏྭཱ ཏསྶ སནྟིཀཾ ཨཱགནྟྭཱ ཏཾ ཨཏྟནོ ཕཎེ ནིསཱིདཱཔེཏྭཱ ནཱགབྷཝནཾ པཝེསེསི. སོ དྭཱདསྶ ཝསྶཱནི ཏཏྠེཝ ཝསི. ཝིཊཊཱུབྷོཔི ‘‘མཡ྄ཧཾ ཨཡྻཀོ ཨིདཱནི ཨཱགམིསྶཏི, ཨིདཱནི ཨཱགམིསྶཏཱི’’ཏི ཨཱགམཡམཱནོཝ ནིསཱིདི. ཏསྨིཾ ཨཏིཙིརཱཡནྟེ སརཾ ཝིཙིནཱཔེཏྭཱ དཱིཔཱལོཀེན པུརིསབྦྷནྟརཱནིཔི ཨོལོཀེཏྭཱ ཨདིསྭཱ ‘‘གཏོ བྷཝིསྶཏཱི’’ཏི པཀྐཱམི. སོ རཏྟིབྷཱགེ ཨཙིརཝཏིཾ པཏྭཱ ཁནྡྷཱཝཱརཾ ནིཝཱསེསི. ཨེཀཙྩེ ཨནྟོནདིཡཾ ཝཱལུཀཱཔུལིནེ ནིཔཛྫིཾསུ, ཨེཀཙྩེ བཧིཐལེ, ཨནྟོནིཔནྣེསུཔི པུབྦེ ཨཀཏཔཱཔཀམྨཱ ཨཏྠི, བཧིནིཔནྣེསུཔི པུབྦེ ཀཏཔཱཔཀམྨཱ ཨཏྠི, ཏེསཾ ནིཔནྣཊྛཱནེསུ ཀིཔིལླིཀཱ ཨུཊྛཧིཾསུ. ཏེ ‘‘མཡ྄ཧཾ ནིཔནྣཊྛཱནེ ཀིཔིལླིཀཱ, མཡ྄ཧཾ ནིཔནྣཊྛཱནེ ཀིཔིལླིཀཱ’’ཏི ཨུཊྛཧིཏྭཱ ཨཀཏཔཱཔཀམྨཱ ཨུཏྟརིཏྭཱ ཐལེ ནིཔཛྫིཾསུ, ཀཏཔཱཔཀམྨཱ ཨོཏརིཏྭཱ ཝཱལུཀཱཔུལིནེ ནིཔཛྫིཾསུ. ཏསྨིཾ ཁཎེ མཧཱམེགྷོ ཨུཊྛཧིཏྭཱ གྷནཝསྶཾ ཝསྶི. ནདིཡཱ ཨོགྷོ ཨཱགནྟྭཱ ཝིཊཊཱུབྷཾ སདྡྷིཾ པརིསཱཡ སམུདྡམེཝ པཱཔེསི. སབྦེ ཏཏྠ མཙྪཀཙྪཔབྷཀྑཱ ཨཧེསུཾ.

མཧཱཛནོ ཀཐཾ སམུཊྛཱཔེསི ‘‘སཱཀིཡཱནཾ མརཎཾ ཨཡུཏྟཾ, ‘ཨེཝཾ ནཱམ ཀོཊྚེཏྭཱ ཀོཊྚེཏྭཱ སཱཀིཡཱ མཱརེཏབྦཱ’ཏི ཨནནུཙྪཝིཀམེཏ’’ནྟི. སཏྠཱ ཏཾ ཀཐཾ སུཏྭཱ, ‘‘བྷིཀྑཝེ, ཨིམསྨིཾ ཨཏྟབྷཱཝེ ཀིཉྩཱཔི སཱཀིཡཱནཾ ཨེཝཾ མརཎཾ ཨཡུཏྟཾ, པུབྦེ ཀཏཔཱཔཀམྨཝསེན པན ཡུཏྟམེཝེཏེཧི ལདྡྷ’’ནྟི ཨཱཧ. ‘‘ཀིཾ པན, བྷནྟེ, ཨེཏེ པུབྦེ ཨཀཾསཱུ’’ཏི? སབྦེ ཨེཀཏོ ཧུཏྭཱ ནདིཡཾ ཝིསཾ པཀྑིཔིཾསཱུཏི. པུནེཀདིཝསཾ དྷམྨསབྷཱཡཾ བྷིཀྑཱུ ཀཐཾ སམུཊྛཱཔེསུཾ – ‘‘ཝིཊཊཱུབྷོ ཨེཏྟཀེ སཱཀིཡེ མཱརེཏྭཱ ཨཱགཙྪནྟོ ཨཏྟནོ མནོརཐེ མཏྠཀཾ ཨཔྤཏྟེཡེཝ ཨེཏྟཀཾ ཛནཾ ཨཱདཱཡ མཧཱསམུདྡེ མཙྪཀཙྪཔབྷཀྑོ ཛཱཏོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘ཨིམེསཾ སཏྟཱནཾ མནོརཐེ མཏྠཀཾ ཨཔྤཏྟེཡེཝ མཙྩུརཱཛཱ སུཏྟཾ གཱམཾ ཨཛ྄ཛྷོཏྠརནྟོ མཧོགྷོ ཝིཡ ཛཱིཝིཏིནྡྲིཡཾ ཚིནྡིཏྭཱ ཙཏཱུསུ ཨཔཱཡསམུདྡེསུ ནིམུཛྫཱཔེཏཱི’’ཏི ཝཏྭཱ ཨིམཾ གཱཐམཱཧ –

༤༧.

‘‘པུཔྥཱནི ཧེཝ པཙིནནྟཾ, བྱཱསཏྟམནསཾ ནརཾ;

སུཏྟཾ གཱམཾ མཧོགྷོཝ, མཙྩུ ཨཱདཱཡ གཙྪཏཱི’’ཏི.

ཏཏྠ བྱཱསཏྟམནསཾ ནརནྟི སམྤཏྟེ ཝཱ ཨསམྤཏྟེ ཝཱ ལགྒམཱནསཾ. ཨིདཾ ཝུཏྟཾ ཧོཏི – ཡཐཱ མཱལཱཀཱརོ པུཔྥཱརཱམཾ པཝིསིཏྭཱ ‘‘པུཔྥཱནི པཙིནིསྶཱམཱི’’ཏི ཏཏོ པུཔྥཱནི གཧེཏྭཱ ཨཉྙམཉྙཾ ཝཱ གཙྪཾ པཏྠེནྟོ སཀལེ པུཔྥཱརཱམེ མནཾ པེསེཏི, ‘‘ཨིཏོ ཙིཏོ ཙ པུཔྥཱནི པཙིནིསྶཱམཱི’’ཏི ཏཏོ པུཔྥཱནི ཨགྒཧེཏྭཱ ཨཉྙཏྠ མནཾ པེསེསི, ཏམེཝ གཙྪཾ པཙིནནྟོ པམཱདམཱཔཛྫཏི, ཨེཝམེཝ ཨེཀཙྩོ པུཔྥཱརཱམསདིསཾ པཉྩཀཱམགུཎམཛ྄ཛྷཾ ཨོཏརིཏྭཱ མནོརམཾ རཱུཔཾ ལབྷིཏྭཱ མནོརམཱནཾ སདྡགནྡྷརསཕོཊྛབྦཱནཾ ཨཉྙཏརཾ པཏྠེཏི. ཨཉྙོ ཏེསུ ཝཱ ཨཉྙཏརཾ ལབྷིཏྭཱ ཨཉྙཏརཾ པཏྠེཏི, རཱུཔམེཝ ཝཱ ལབྷིཏྭཱ ཨཉྙཾ ཨཔཏྠེནྟོ ཏམེཝ ཨསྶཱདེཏི, སདྡཱདཱིསུ ཝཱ ཨཉྙཏརཾ. ཨེསེཝ ནཡོ གོམཧིཾསདཱསིདཱསཁེཏྟཝཏྠུགཱམནིགམཛནཔདཱདཱིསུ, པབྦཛིཏཱནམྤི པརིཝེཎཝིཧཱརཔཏྟཙཱིཝརཱདཱིསཱུཏི ཨེཝཾ པཉྩཀཱམགུཎསངྑཱཏཱནི པུཔྥཱནི ཨེཝ པཙིནནྟཾ སམྤཏྟེ ཝཱ ཨསམྤཏྟེ ཝཱ ཀཱམགུཎེ བྱཱསཏྟམནསཾ ནརཾ. སུཏྟཾ གཱམནྟི གཱམསྶ གེཧབྷིཏྟིཨཱདཱིནཾ པན སུཔནཝསེན སུཔནཾ ནཱམ ནཏྠི, སཏྟཱནཾ པན སུཏྟཔམཏྟཏཾ ཨུཔཱདཱཡ སུཏྟོ ནཱམ ཧོཏི. ཨེཝཾ སུཏྟཾ གཱམཾ དྭེ ཏཱིཎི ཡོཛནཱནི ཨཱཡཏགམྦྷཱིརོ མཧོགྷོཝ མཙྩུ ཨཱདཱཡ གཙྪཏི. ཡཐཱ སོ མཧོགྷོ ཨིཏྠིཔུརིསགོམཧིཾསཀུཀྐུཊཱདཱིསུ ཀིཉྩི ཨནཝསེསེཏྭཱ སབྦཾ ཏཾ གཱམཾ སམུདྡཾ པཱཔེཏྭཱ མཙྪཀཙྪཔབྷཀྑཾ ཀརོཏི, ཨེཝམེཝ བྱཱསཏྟམནསཾ ནརཾ མཙྩུ ཨཱདཱཡ ཛཱིཝིཏིནྡྲིཡམསྶ ཚིནྡིཏྭཱ ཙཏཱུསུ ཨཔཱཡསམུདྡེསུ ནིམུཛྫཱཔེཏཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཏྟཱ. མཧཱཛནསྶ སཱཏྠིཀཱ དེསནཱ ཛཱཏཱཏི.

ཝིཊཊཱུབྷཝཏྠུ ཏཏིཡཾ.

༤. པཏིཔཱུཛིཀཀུམཱརིཝཏྠུ

པུཔྥཱནི ཧེཝཱཏི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ པཏིཔཱུཛིཀཾ ནཱམ ཀུམཱརིཀཾ ཨཱརབྦྷ ཀཐེསི. ཝཏྠུ ཏཱཝཏིཾསདེཝལོཀེ སམུཊྛིཏཾ.

ཏཏྠ ཀིར མཱལབྷཱརཱི ནཱམ དེཝཔུཏྟོ ཨཙྪརཱསཧསྶཔརིཝུཏོ ཨུཡྻཱནཾ པཱཝིསི. པཉྩསཏཱ དེཝདྷཱིཏརོ རུཀྑཾ ཨཱརུཡ྄ཧ པུཔྥཱནི པཱཏེནྟི, པཉྩསཏཱ པཏིཏཱནི པུཔྥཱནི གཧེཏྭཱ དེཝཔུཏྟཾ ཨལངྐརོནྟི. ཏཱསུ ཨེཀཱ དེཝདྷཱིཏཱ རུཀྑསཱཁཱཡམེཝ ཙུཏཱ, སརཱིརཾ དཱིཔསིཁཱ ཝིཡ ནིབྦཱཡི. སཱ སཱཝཏྠིཡཾ ཨེཀསྨིཾ ཀུལགེཧེ པཊིསནྡྷིཾ གཧེཏྭཱ ཛཱཏཀཱལེ ཛཱཏིསྶརཱ ཧུཏྭཱ ‘‘མཱལབྷཱརཱིདེཝཔུཏྟསྶ བྷརིཡཱམྷཱི’’ཏི ཨནུསྶརནྟཱི ཝུཌྜྷིམནྭཱཡ གནྡྷམཱལཱདཱིཧི པཱུཛཾ ཀཏྭཱ སཱམིཀསྶ སནྟིཀེ ཨབྷིནིབྦཏྟིཾ པཏྠེསི. སཱ སོལ༹སཝསྶཀཱལེ པརཀུལཾ གཏཱཔི སལཱཀབྷཏྟཔཀྑིཀབྷཏྟཝསྶཱཝཱསིཀཱདཱིནི དཏྭཱ, ‘‘ཨཡཾ མེ སཱམིཀསྶ སནྟིཀེ ནིབྦཏྟནཏྠཱཡ པཙྩཡོ ཧོཏཱུ’’ཏི ཝདཏི. ཨཐསྶཱ བྷིཀྑཱུ ‘‘ཨཡཾ ཀུམཱརིཀཱ ཨུཊྛཱཡ སམུཊྛཱཡ པཏིམེཝ པཏྠེཏཱིཏི པཏིཔཱུཛིཀཱ’’ཏི ནཱམཾ ཀརིཾསུ. སཱཔི ནིབདྡྷཾ ཨཱསནསཱལཾ པཊིཛགྒཏི, པཱནཱིཡཾ ཨུཔཊྛཔེཏི, ཨཱསནཱནི པཉྙཔེཏི. ཨཉྙེཔི མནུསྶཱ སལཱཀབྷཏྟཱདཱིནི དཱཏུཀཱམཱ, ‘‘ཨམྨ, ཨིམཱནིཔི བྷིཀྑུསངྒྷསྶ པཊིཔཱདེཡྻཱསཱི’’ཏི ཝཏྭཱ ཨཱཧརིཏྭཱ དེནྟི. སཱཔི ཨེཏེན ནིཡཱམེན ཨཱགཙྪནྟཱི གཙྪནྟཱི ཨེཀཔདཝཱརེ ཚཔཉྙཱས ཀུསལདྷམྨེ (དྷ. ས. ༡; དྷ. ས. ཨཊྛ. ༡ ཡེཝཱཔནཀཝཎྞནཱ) པཊིལབྷཏི. ཏསྶཱ ཀུཙྪིཡཾ གབྦྷོ པཏིཊྛཧི. སཱ དསམཱསཙྩཡེན པུཏྟཾ ཝིཛཱཡི. ཏསྶ པདསཱ གམནཀཱལེ ཨཉྙམྤི ཨཉྙམྤཱིཏི ཙཏྟཱརོ པུཏྟེ པཊིལབྷི.

སཱ ཨེཀདིཝསཾ དཱནཾ དཏྭཱ པཱུཛཾ ཀཏྭཱ དྷམྨཾ སུཏྭཱ སིཀྑཱཔདཱནི རཀྑིཏྭཱ དིཝསཔརིཡོསཱནེ ཏཾ ཁཎཾ ནིབྦཏྟེན ཀེནཙི རོགེན ཀཱལཾ ཀཏྭཱ ཨཏྟནོ སཱམིཀསྶེཝ སནྟིཀེ ནིབྦཏྟི. ཨིཏརཱཔི ཨེཏྟཀཾ ཀཱལཾ དེཝཔུཏྟཾ ཨལངྐརོནྟི ཨེཝ. དེཝཔུཏྟོ ཏཾ དིསྭཱ ‘‘ཏྭཾ པཱཏོཝ པཊྛཱཡ ན དིསྶསི, ཀུཧིཾ གཏཱསཱི’’ཏི ཨཱཧ. ‘‘ཙུཏཱམྷི སཱམཱི’’ཏི. ‘‘ཀིཾ ཝདེསཱི’’ཏི? ‘‘ཨེཝམེཏཾ, སཱམཱི’’ཏི. ‘‘ཀུཧིཾ ནིབྦཏྟཱསཱི’’ཏི? ‘‘སཱཝཏྠིཡཾ ཀུལགེཧེ’’ཏི. ‘‘ཀིཏྟཀཾ ཀཱལཾ ཏཏྠ ཋིཏཱསཱི’’ཏི? ‘‘དསམཱསཙྩཡེན མཱཏུ ཀུཙྪིཏོ ནིཀྑམིཏྭཱ སོལ༹སཝསྶཀཱལེ པརཀུལཾ གནྟྭཱ ཙཏྟཱརོ པུཏྟེ ཝིཛཱཡིཏྭཱ དཱནཱདཱིནི པུཉྙཱནི ཀཏྭཱ ཏུམྷེ པཏྠེཏྭཱ ཨཱགནྟྭཱ ཏུམྷཱཀམེཝ སནྟིཀེ ནིབྦཏྟཱམྷི, སཱམཱི’’ཏི. ‘‘མནུསྶཱནཾ ཀིཏྟཀཾ ཨཱཡཱུ’’ཏི? ‘‘ཝསྶསཏམཏྟ’’ནྟི. ‘‘ཨེཏྟཀམེཝཱ’’ཏི? ‘‘ཨཱམ, སཱམཱི’’ཏི. ‘‘ཨེཏྟཀཾ ཨཱཡུཾ གཧེཏྭཱ ནིབྦཏྟམནུསྶཱ ཀིཾ ནུ ཁོ སུཏྟཔམཏྟཱ ཀཱལཾ ཨཏིཀྐཱམེནྟི, ཨུདཱཧུ དཱནཱདཱིནི པུཉྙཱནི ཀརོནྟཱི’’ཏི. ‘‘ཀིཾ ཝདེཐ, སཱམི’’? ‘‘ཨསངྑྱེཡྻཾ ཨཱཡུཾ གཧེཏྭཱ ནིབྦཏྟཱ ཝིཡ ཨཛརཱམརཱ ཝིཡ ཙ ནིཙྩཾ པམཏྟཱ, མནུསྶཱ’’ཏི. མཱལབྷཱརཱིདེཝཔུཏྟསྶ མཧཱསཾཝེགོ ཨུདཔཱདི ‘‘ཝསྶསཏམཏྟམཱཡུཾ གཧེཏྭཱ ནིབྦཏྟམནུསྶཱ ཀིར པམཏྟཱ ནིཔཛྫིཏྭཱ ནིདྡཱཡནྟི, ཀདཱ ནུ ཁོ དུཀྑཱ མུཙྩིསྶནྟཱི’’ཏི? མནུསྶཱནཾ པན ཝསྶསཏཾ ཏཱཝཏིཾསཱནཾ དེཝཱནཾ ཨེཀོ རཏྟིནྡིཝོ, ཏཱཡ རཏྟིཡཱ ཏིཾསརཏྟིཡོ མཱསོ, ཏེན མཱསེན དྭཱདསམཱསིཀོ སཾཝཙྪརོ, ཏེན སཾཝཙྪརེན དིབྦཝསྶསཧསྶཾ ཨཱཡུཔྤམཱཎཾ, ཏཾ མནུསྶགཎནཱཡ ཏིསྶོ ཝསྶཀོཊིཡོ, སཊྛི ཙ ཝསྶསཏསཧསྶཱནི ཧོནྟི. ཏསྨཱ ཏསྶ དེཝཔུཏྟསྶ ཨེཀདིཝསོཔི ནཱཏིཀྐནྟོ མུཧུཏྟསདིསོཝ ཀཱལོ ཨཧོསི. ཨེཝཾ ཨཔྤཱཡུཀམནུསྶཱནཾ པམཱདོ ནཱམ ཨཏིཝིཡ ཨཡུཏྟོཏི.

པུནདིཝསེ བྷིཀྑཱུ གཱམཾ པཝིཊྛཱ ཨཱསནསཱལཾ ཨཔཊིཛགྒིཏཾ, ཨཱསནཱནི ཨཔཉྙཏྟཱནི, པཱནཱིཡཾ ཨནུཊྛཔིཏཾ དིསྭཱ, ‘‘ཀཧཾ པཏིཔཱུཛིཀཱ’’ཏི ཨཱཧཾསུ. ‘‘བྷནྟེ, ཀཧཾ ཏུམྷེ ཏཾ དཀྑིསྶཐ, ཧིཡྻོ ཨཡྻེསུ བྷུཉྫིཏྭཱ གཏེསུ སཱཡནྷསམཡེ མཏཱ’’ཏི. ཏཾ སུཏྭཱ པུཐུཛྫནཱ བྷིཀྑཱུ ཏསྶཱ ཨུཔཀཱརཾ སརནྟཱ ཨསྶཱུནི སནྡྷཱརེཏུཾ ནཱསཀྑིཾསུ. ཁཱིཎཱསཝཱནཾ དྷམྨསཾཝེགོ ཨུདཔཱདི. ཏེ བྷཏྟཀིཙྩཾ ཀཏྭཱ ཝིཧཱརཾ གནྟྭཱ སཏྠཱརཾ ཝནྡིཏྭཱ པུཙྪིཾསུ – ‘‘བྷནྟེ, པཏིཔཱུཛིཀཱ ནཱམ ཨུཔཱསིཀཱ ཨུཊྛཱཡ སམུཊྛཱཡ ནཱནཔྤཀཱརཱནི པུཉྙཱནི ཀཏྭཱ སཱམིཀམེཝ པཏྠེསི, སཱ ཨིདཱནི མཏཱ, ཀཧཾ ནུ ཁོ ནིབྦཏྟཱ’’ཏི? ‘‘ཨཏྟནོ སཱམིཀསྶེཝ སནྟིཀེ, བྷིཀྑཝེ’’ཏི. ‘‘ནཏྠི, བྷནྟེ, སཱམིཀསྶ སནྟིཀེ’’ཏི. ‘‘ན སཱ, བྷིཀྑཝེ, ཨེཏཾ སཱམིཀཾ པཏྠེཏི, ཏཱཝཏིཾསབྷཝནེ ཏསྶཱ མཱལབྷཱརཱིདེཝཔུཏྟོ ནཱམ སཱམིཀོ, སཱ ཏསྶ པུཔྥཔིལནྡྷནཊྛཱནཏོ ཙཝིཏྭཱ པུན གནྟྭཱ ཏསྶེཝ སནྟིཀེ ནིབྦཏྟཱ’’ཏི. ‘‘ཨེཝཾ ཀིར, བྷནྟེ’’ཏི. ‘‘ཨཱམ, བྷིཀྑཝེ’’ཏི. ‘‘ཨཧོ པརིཏྟཾ, བྷནྟེ, སཏྟཱནཾ ཛཱིཝིཏཾ, པཱཏོཝ ཨམྷེ པརིཝིསིཏྭཱ སཱཡཾ ཨུཔྤནྣབྱཱདྷིནཱ མཏཱ’’ཏི. སཏྠཱ ‘‘ཨཱམ, བྷིཀྑཝེ, པརིཏྟཾ སཏྟཱནཾ ཛཱིཝིཏཾ ནཱམ, ཏེནེཝ ཨིམེ སཏྟེ ཝཏྠུཀཱམེཧི ཙེཝ ཀིལེསཀཱམེཧི ཙ ཨཏིཏྟེ ཨེཝ ཨནྟཀོ ཨཏྟནོ ཝསེ ཝཏྟེཏྭཱ ཀནྡནྟེ པརིདེཝནྟེ གཧེཏྭཱ གཙྪཏཱི’’ཏི ཝཏྭཱ ཨིམཾ གཱཐམཱཧ –

༤༨.

‘‘པུཔྥཱནི ཧེཝ པཙིནནྟཾ, བྱཱསཏྟམནསཾ ནརཾ;

ཨཏིཏྟཾཡེཝ ཀཱམེསུ, ཨནྟཀོ ཀུརུཏེ ཝས’’ནྟི.

ཏཏྠ པུཔྥཱནི ཧེཝ པཙིནནྟནྟི པུཔྥཱརཱམེ མཱལཱཀཱརོ ནཱནཱཔུཔྥཱནི ཝིཡ ཨཏྟབྷཱཝཔཊིབདྡྷཱནི ཙེཝ ཨུཔཀརཎཔཊིབདྡྷཱནི ཙ ཀཱམགུཎཔུཔྥཱནི ཨོཙིནནྟམེཝ. བྱཱསཏྟམནསཾ ནརནྟི ཨསམྤཏྟེསུ པཏྠནཱཝསེན, སམྤཏྟེསུ གེདྷཝསེན ཝིཝིདྷེནཱཀཱརེན ཨཱསཏྟཙིཏྟཾ. ཨཏིཏྟཾཡེཝ ཀཱམེསཱུཏི ཝཏྠུཀཱམཀིལེསཀཱམེསུ པརིཡེསནེནཔི པཊིལཱབྷེནཔི པརིབྷོགེནཔི ནིདྷཱནེནཔི ཨཏིཏྟཾ ཨེཝ སམཱནཾ. ཨནྟཀོ ཀུརུཏེ ཝསནྟི མརཎསངྑཱཏོ ཨནྟཀོ ཀནྡནྟཾ པརིདེཝནྟཾ གཧེཏྭཱ གཙྪནྟོ ཨཏྟནོ ཝསཾ པཱཔེཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཏྟཱ, དེསནཱ མཧཱཛནསྶ སཱཏྠིཀཱ ཛཱཏཱཏི.

པཏིཔཱུཛིཀཀུམཱརིཝཏྠུ ཙཏུཏྠཾ.

༥. མཙྪརིཡཀོསིཡསེཊྛིཝཏྠུ

ཡཐཱཔི བྷམརོ པུཔྥནྟི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ མཙྪརིཡཀོསིཡསེཊྛིཾ ཨཱརབྦྷ ཀཐེསི. ཏསྶ ཝཏྠུ རཱཛགཧེ སམུཊྛིཏཾ.

རཱཛགཧནགརསྶ ཀིར ཨཝིདཱུརེ སཀྐཱརཾ ནཱམ ནིགམོ ཨཧོསི. ཏཏྠེཀོ མཙྪརིཡཀོསིཡོ ནཱམ སེཊྛི ཨསཱིཏིཀོཊིཝིབྷཝོ པཊིཝསཏི. སོ ཏིཎགྒེན ཏེལབིནྡུམྤི པརེསཾ ན དེཏི, ན ཨཏྟནཱ པརིབྷུཉྫཏི. ཨིཏིསྶ ཏཾ ཝིབྷཝཛཱཏཾ ནེཝ པུཏྟདཱརཱདཱིནཾ, ན སམཎབྲཱཧྨཎཱནཾ ཨཏྠཾ ཨནུབྷོཏི, རཀྑསཔརིགྒཧིཏཱ པོཀྑརཎཱི ཝིཡ ཨཔརིབྷོགཾ ཏིཊྛཏི. སཏྠཱ ཨེཀདིཝསཾ པཙྩཱུསསམཡེ མཧཱཀརུཎཱསམཱཔཏྟིཏོ ཝུཊྛཱཡ སཀལལོཀདྷཱཏུཡཾ བོདྷནེཡྻབནྡྷཝེ ཨོལོཀེནྟོ པཉྩཙཏྟཱལཱིསཡོཛནམཏྠཀེ ཝསནྟསྶ སེཊྛིནོ སཔཛཱཔཏིཀསྶ སོཏཱཔཏྟིཕལསྶ ཨུཔནིསྶཡཾ ཨདྡས. ཏཏོ པུརིམདིཝསེ པན སོ རཱཛཱནཾ ཨུཔཊྛཱཏུཾ རཱཛགེཧཾ གནྟྭཱ རཱཛཱུཔཊྛཱནཾ ཀཏྭཱ ཨཱགཙྪནྟོ ཨེཀཾ ཚཱཏཛ྄ཛྷཏྟཾ ཛནཔདམནུསྶཾ ཀུམྨཱསཔཱུརཾ ཀཔལླཀཔཱུཝཾ ཁཱདནྟཾ དིསྭཱ ཏཏྠ པིཔཱསཾ ཨུཔྤཱདེཏྭཱ ཨཏྟནོ གྷརཾ གནྟྭཱ ཙིནྟེསི – ‘‘སཙཱཧཾ ཀཔལླཀཔཱུཝཾ ཁཱདིཏུཀཱམོམྷཱིཏི ཝཀྑཱམི, བཧཱུ མནུསྶཱ མཡཱ སདྡྷིཾ ཁཱདིཏུཀཱམཱ བྷཝིསྶནྟི, ཨེཝཾ མེ བཧཱུནི ཏིལཏཎྜུལསཔྤིཕཱཎིཏཱདཱིནི པརིཀྑཡཾ གམིསྶནྟི, ན ཀསྶཙི ཀཐེསྶཱམཱི’’ཏི ཏཎྷཾ ཨདྷིཝཱསེནྟོ ཙརཏི. སོ གཙྪནྟེ གཙྪནྟེ ཀཱལེ ཨུཔྤཎྜུཔྤཎྜུཀཛཱཏོ དྷམནིསནྠཏགཏྟོ ཛཱཏོ. ཏཏོ ཏཎྷཾ ཨདྷིཝཱསེཏུཾ ཨསཀྐོནྟོ གབྦྷཾ པཝིསིཏྭཱ མཉྩཀེ ཨུཔགཱུཧིཏྭཱ ནིཔཛྫི. ཨེཝཾ གཏོཔི དྷནཧཱནིབྷཡེན ན ཀསྶཙི ཀིཉྩི ཀཐེསི.

ཨཐ ནཾ བྷརིཡཱ ཨུཔསངྐམིཏྭཱ པིཊྛིཾ པརིམཛྫིཏྭཱ, ‘‘ཀིཾ ཏེ, སཱམི, ཨཕཱསུཀཾ ཛཱཏ’’ནྟི པུཙྪི. ‘‘ན མེ ཀིཉྩི ཨཕཱསུཀཾ ཨཏྠཱི’’ཏི. ‘‘ཀིཾ ནུ ཁོ ཏེ རཱཛཱ ཀུཔིཏོ’’ཏི? ‘‘རཱཛཱཔི མེ ན ཀུཔྤཏཱི’’ཏི. ‘‘ཨཐ ཀིཾ ཏེ པུཏྟདྷཱིཏཱཧི ཝཱ དཱསཀམྨཀརཱདཱིཧི ཝཱ ཀིཉྩི ཨམནཱཔཾ ཀཏཾ ཨཏྠཱི’’ཏི? ‘‘ཨེཝརཱུཔམྤི ནཏྠཱི’’ཏི. ‘‘ཀིསྨིཉྩི པན ཏེ ཏཎྷཱ ཨཏྠཱི’’ཏི? ཨེཝཾ ཝུཏྟེཔི དྷནཧཱནིབྷཡེན ཀིཉྩི ཨཝཏྭཱ ནིསྶདྡོཝ ནིཔཛྫི, ཨཐ ནཾ བྷརིཡཱ ‘‘ཀཐེཧི, སཱམི ཀིསྨིཉྩི ཏེ ཏཎྷཱ ཨཏྠཱི’’ཏི ཨཱཧ. སོ ཝཙནཾ པརིགིལནྟོ ཝིཡ ‘‘ཨཏྠི མེ ཏཎྷཱ’’ཏི ཨཱཧ. ‘‘ཀིཾ ཏཎྷཱ, སཱམཱི’’ཏི? ‘‘ཀཔལླཀཔཱུཝཾ ཁཱདིཏུཀཱམོམྷཱི’’ཏི. ‘‘ཨཐ ཀིམཏྠཾ མེ ན ཀཐེསི, ཀིཾ ཏྭཾ དལིདྡོསི, ཨིདཱནི སཀལནིགམཝཱསཱིནཾ པཧོནཀེ ཀཔལླཀཔཱུཝེ པཙིསྶཱམཱི’’ཏི. ‘‘ཀིཾ ཏེ ཨེཏེཧི, ཨཏྟནོ ཀམྨཾ ཀཏྭཱ ཁཱདིསྶནྟཱི’’ཏི? ‘‘ཏེན ཧི ཨེཀརཙྪཝཱསཱིནཾ པཧོནཀེ པཙིསྶཱམཱི’’ཏི. ‘‘ཛཱནཱམཧཾ ཏཝ མཧདྡྷནབྷཱཝ’’ནྟི. ‘‘ཨིམསྨིཾ གེཧསཱམནྟེ སབྦེསཾ པཧོནཀཾ ཀཏྭཱ པཙཱམཱི’’ཏི. ‘‘ཛཱནཱམཧཾ ཏཝ མཧཛ྄ཛྷཱསཡབྷཱཝ’’ནྟི. ‘‘ཏེན ཧི ཏེ པུཏྟདཱརམཏྟསྶེཝ པཧོནཀཾ ཀཏྭཱ པཙཱམཱི’’ཏི. ‘‘ཀིཾ ཏེ ཨེཏེཧཱི’’ཏི? ‘‘ཀིཾ པན ཏུཡ྄ཧཉྩ མཡ྄ཧཉྩ པཧོནཀཾ ཀཏྭཱ པཙཱམཱི’’ཏི? ‘‘ཏྭཾ ཀིཾ ཀརིསྶསཱི’’ཏི? ‘‘ཏེན ཧི ཨེཀཀསྶེཝ ཏེ པཧོནཀཾ ཀཏྭཱ པཙཱམཱི’’ཏི. ‘‘ཨིམསྨིཾ ཋཱནེ པཙམཱནེ བཧཱུ པཙྩཱསཱིསནྟི. སཀལཏཎྜུལེ ཋཔེཏྭཱ བྷིནྣཏཎྜུལེ ཙ ཨུདྡྷནཀཔལླཱནི ཙ ཨཱདཱཡ ཐོཀཾ ཁཱིརསཔྤིམདྷུཕཱཎིཏཉྩ གཧེཏྭཱ སཏྟབྷཱུམིཀསྶ པཱསཱདསྶ ཨུཔརིམཏལཾ ཨཱརུཡ྄ཧ པཙ, ཏཏྠཱཧཾ ཨེཀཀོཝ ནིསཱིདིཏྭཱ ཁཱདིསྶཱམཱི’’ཏི. སཱ ‘‘སཱདྷཱུ’’ཏི པཊིསྶུཎིཏྭཱ གཧེཏབྦཾ གཱཧཱཔེཏྭཱ པཱསཱདཾ ཨབྷིརུཡ྄ཧ དཱསིཡོ ཝིསྶཛྫེཏྭཱ སེཊྛིཾ པཀྐོསཱཔེསི, སོ ཨཱདིཏོ པཊྛཱཡ དྭཱརཱནི པིདཧནྟོ སབྦདྭཱརེསུ སཱུཙིགྷཊིཀཾ དཏྭཱ སཏྟམཏལཾ ཨབྷིརུཧིཏྭཱ ཏཏྠཔི དྭཱརཾ པིདཧིཏྭཱ ནིསཱིདི. བྷརིཡཱཔིསྶ ཨུདྡྷནེ ཨགྒིཾ ཛཱལེཏྭཱ ཀཔལླཾ ཨཱརོཔེཏྭཱ པཱུཝེ པཙིཏུཾ ཨཱརབྷི.

ཨཐ སཏྠཱ པཱཏོཝ མཧཱམོགྒལླཱནཏྠེརཾ ཨཱམནྟེསི – ‘‘ཨེསོ, མོགྒལླཱན, རཱཛགཧསྶ ཨཝིདཱུརེ སཀྐཱརནིགམེ མཙྪརིཡསེཊྛི ‘ཀཔལླཀཔཱུཝེ ཁཱདིསྶཱམཱི’ཏི ཨཉྙེསཾ དསྶནབྷཡེན སཏྟབྷཱུམིཀེ པཱསཱདེ ཀཔལླཀཔཱུཝེ པཙཱཔེཏི, ཏྭཾ ཏཏྠ གནྟྭཱ སེཊྛིཾ དམེཏྭཱ ནིབྦིསེཝནཾ ཀཏྭཱ ཨུབྷོཔི ཛཱཡམྤཏིཀེ པཱུཝེ ཙ ཁཱིརསཔྤིམདྷུཕཱཎིཏཱནི ཙ གཱཧཱཔེཏྭཱ ཨཏྟནོ བལེན ཛེཏཝནཾ ཨཱནེཧི, ཨཛྫཱཧཾ པཉྩཧི བྷིཀྑུསཏེཧི སདྡྷིཾ ཝིཧཱརེ ཨེཝ ནིསཱིདིསྶཱམི, པཱུཝེཧེཝ བྷཏྟཀིཙྩཾ ཀརིསྶཱམཱི’’ཏི.

ཐེརོ ‘‘སཱདྷུ, བྷནྟེ’’ཏི སཏྠུ ཝཙནཾ སམྤཊིཙྪིཏྭཱ ཏཱཝདེཝ ཨིདྡྷིབལེན ཏཾ ནིགམཾ གནྟྭཱ ཏསྶ པཱསཱདསྶ སཱིཧཔཉྫརདྭཱརེ སུནིཝཏྠོ སུཔཱརུཏོ ཨཱཀཱསེ ཨེཝ མཎིརཱུཔཀཾ ཝིཡ ཨཊྛཱསི. མཧཱསེཊྛིནོ ཐེརཾ དིསྭཱཝ ཧདཡམཾསཾ ཀམྤི. སོ ཨཧཾ ཨེཝརཱུཔཱནཾཡེཝ དསྶནབྷཡེན ཨིམཾ ཋཱནམཱགཏོ, ཨཡཉྩ བྷིཀྑུ ཨཱཀཱསེནཱགནྟྭཱ ཝཱཏཔཱནདྭཱརེ ཋིཏོཏི. སོ གཧེཏབྦགཧཎཾ ཨཔསྶནྟོ ཨགྒིམྷི པཀྑིཏྟལོཎསཀྑརཱ ཝིཡ དོསེན ཏཊཏཊཱཡནྟོ ཨེཝམཱཧ – ‘‘སམཎ, ཨཱཀཱསེ ཋཏྭཱཔི ཀིཾ ལབྷིསྶསི, ཨཱཀཱསེ ཨཔདེ པདཾ དསྶེཏྭཱ ཙངྐམནྟོཔི ནེཝ ལབྷིསྶསཱི’’ཏི. ཐེརོ ཏསྨིཾ ཨེཝ ཋཱནེ ཨཔརཱཔརཾ ཙངྐམི. སེཊྛི ‘‘ཙངྐམནྟོ ཀིཾ ལབྷིསྶསི, ཨཱཀཱསེ པལླངྐེན ནིསཱིདནྟོཔི ན ལབྷིསྶསིཡེཝཱ’’ཏི ཨཱཧ. ཐེརོ པལླངྐཾ ཨཱབྷུཛིཏྭཱ ནིསཱིདི. ཨཐ ནཾ ‘‘ཨཱཀཱསེ ནིསིནྣོ ཀིཾ ལབྷིསྶསི, ཨཱགནྟྭཱ ཝཱཏཔཱནསྶ ཨུམྨཱརེ ཋིཏོཔི ན ལབྷིསྶསཱི’’ཏི ཨཱཧ. ཐེརོ ཨུམྨཱརེ ཋིཏོ. ‘‘ཨུམྨཱརེ ཋིཏོཔི ཀིཾ ལབྷིསྶསི, དྷཱུམཱཡནྟོཔི ན ལབྷིསྶསི ཨེཝཱ’’ཏི ཨཱཧ. ཐེརོཔི དྷཱུམཱཡི. སཀལཔཱསཱདོ ཨེཀདྷཱུམོ ཨཧོསི. སེཊྛིནོ ཨཀྑཱིནཾ སཱུཙིཡཱ ཝིཛ྄ཛྷནཀཱལོ ཝིཡ ཨཧོསི, གེཧཛ྄ཛྷཱཡནབྷཡེན པན ‘‘ཏྭཾ པཛྫལནྟོཔི ན ལབྷིསྶསཱི’’ཏི ཨཝཏྭཱ ‘‘ཨཡཾ སམཎོ སུཊྛུ ལགྒོ, ཨལདྡྷཱ ན གམིསྶཏི, ཨེཀམསྶ པཱུཝཾ དཱཔེསྶཱམཱི’’ཏི བྷརིཡཾ ཨཱཧ – ‘‘བྷདྡེ ཨེཀཾ ཁུདྡཀཔཱུཝཾ པཙིཏྭཱ སམཎསྶ དཏྭཱ ཨུཡྻོཛེཧི ན’’ནྟི. སཱ ཐོཀཾ ཨེཝ པིཊྛཾ ཀཔལླཔཱཏིཡཾ པཀྑིཔི, མཧཱཔཱུཝོ ཧུཏྭཱ སཀལཔཱཏིཾ པཱུརེཏྭཱ ཨུདྡྷུམཱཏོ ཧུཏྭཱ ཨཊྛཱསི.

སེཊྛི ཏཾ དིསྭཱ ‘‘བཧུཾ ཏཡཱ པིཊྛཾ གཧིཏཾ བྷཝིསྶཏཱི’’ཏི སཡམེཝ དབྦིཀཎྞེན ཐོཀཾ པིཊྛཾ གཧེཏྭཱ པཀྑིཔི, པཱུཝོ པུརིམཔཱུཝཏོ མཧནྟཏརོ ཛཱཏོ. ཨེཝཾ ཡཾ ཡཾ པཙཏི, སོ སོ མཧནྟམཧནྟོཝ ཧོཏི. སོ ནིབྦིནྣོ བྷརིཡཾ ཨཱཧ – ‘‘བྷདྡེ, ཨིམསྶ ཨེཀཾ པཱུཝཾ དེཧཱི’’ཏི. ཏསྶཱ པཙྪིཏོ ཨེཀཾ པཱུཝཾ གཎྷནྟིཡཱ སབྦེ ཨེཀཱབདྡྷཱ ཨལླཱིཡིཾསུ. སཱ སེཊྛིཾ ཨཱཧ – ‘‘སཱམི, སབྦེ པཱུཝཱ ཨེཀཏོ ལགྒཱ, ཝིསུཾ ཀཱཏུཾ ན སཀྐོམཱི’’ཏི. ‘‘ཨཧཾ ཀརིསྶཱམཱི’’ཏི སོཔི ཀཱཏུཾ ནཱསཀྑི. ཨུབྷོཔི ཛནཱ ཀོཊིཡཾ གཧེཏྭཱ ཀཌྜྷནྟཱཔི ཝིཡོཛེཏུཾ ནཱསཀྑིཾསུ ཨེཝ. ཨཐསྶ པཱུཝེཧི སདྡྷིཾ ཝཱཡམནྟསྶེཝ སརཱིརཏོ སེདཱ མུཙྩིཾསུ, པིཔཱསཱ ཨུཔཙྪིཛྫི. ཏཏོ བྷརིཡཾ ཨཱཧ – ‘‘བྷདྡེ, ན མེ པཱུཝེཧི ཨཏྠོ, པཙྪིཡཱ སདྡྷིཾཡེཝ ཨིམསྶ དེཧཱི’’ཏི. སཱ པཙྪིཾ ཨཱདཱཡ ཐེརཾ ཨུཔསངྐམིཏྭཱ ཨདཱསི. ཐེརོ ཨུབྷིནྣམྤི དྷམྨཾ དེསེསི, ཏིཎྞཾ རཏནཱནཾ གུཎཾ ཀཐེསི, ‘‘ཨཏྠི དིནྣཾ, ཨཏྠི ཡིཊྛ’’ནྟི དིནྣདཱནཱདཱིནཾ ཕལཾ གགནཏལེ པུཎྞཙནྡཾ ཝིཡ དསྶེསི.

ཏཾ སུཏྭཱ པསནྣཙིཏྟོ ཧུཏྭཱ སེཊྛི ‘‘བྷནྟེ, ཨཱགནྟྭཱ ཨིམསྨིཾ པལླངྐེ ནིསཱིདིཏྭཱ པརིབྷུཉྫཐཱ’’ཏི ཨཱཧ. ཐེརོ, ‘‘མཧཱསེཊྛི, སམྨཱསམྦུདྡྷོ ‘པཱུཝེ ཁཱདིསྶཱམཱི’ཏི པཉྩཧི བྷིཀྑུསཏེཧི སདྡྷིཾ ཝིཧཱརེ ནིསིནྣོ, ཏུམྷཱཀཾ རུཙིཡཱ སཏི ཨཧཾ ཝོ ནེསྶཱམི, སེཊྛིབྷརིཡཾ པཱུཝེ ཙ ཁཱིརཱདཱིནི ཙ གཎྷཱཔེཐ, སཏྠུ སནྟིཀཾ གམིསྶཱམཱ’’ཏི ཨཱཧ. ‘‘ཀཧཾ པན, བྷནྟེ, ཨེཏརཧི སཏྠཱ’’ཏི? ‘‘ཨིཏོ པཉྩཙཏྟཱལཱིསཡོཛནམཏྠཀེ ཛེཏཝནཝིཧཱརེ, མཧཱསེཊྛཱི’’ཏི. ‘‘བྷནྟེ, ཀཱལཾ ཨནཏིཀྐམིཏྭཱ ཨེཏྟཀཾ ཨདྡྷཱནཾ ཀཐཾ གམིསྶཱམཱ’’ཏི. ‘‘མཧཱསེཊྛི, ཏུམྷཱཀཾ རུཙིཡཱ སཏི ཨཧཾ ཝོ ཨཏྟནོ ཨིདྡྷིབལེན ནེསྶཱམི, ཏུམྷཱཀཾ པཱསཱདེ སོཔཱནསཱིསཾ ཨཏྟནོ ཋཱནེ ཨེཝ བྷཝིསྶཏི, སོཔཱནཔརིཡོསཱནཾ པན ཝོ ཛེཏཝནདྭཱརཀོཊྛཀེ བྷཝིསྶཏི, ཨུཔརིཔཱསཱདཱ ཧེཊྛཱཔཱསཱདཾ ཨོཏརཎཀཱལམཏྟེནེཝ ཛེཏཝནཾ ནེསྶཱམཱི’’ཏི. སོ ‘‘སཱདྷུ, བྷནྟེ’’ཏི སམྤཊིཙྪི.

ཐེརོ སོཔཱནསཱིསཾ ཏཏྠེཝ ཀཏྭཱ ‘‘སོཔཱནཔཱདམཱུལཾ ཛེཏཝནདྭཱརཀོཊྛཀེ ཧོཏཱུ’’ཏི ཨདྷིཊྛཱསི. ཏཐེཝ ཨཧོསི. ཨིཏི ཐེརོ སེཊྛིཉྩ སེཊྛིབྷརིཡཉྩ ཨུཔརིཔཱསཱདཱ ཧེཊྛཱཔཱསཱདཾ ཨོཏརཎཀཱལཏོ ཁིཔྤཏརཾ ཛེཏཝནཾ སམྤཱཔེསི. ཏེ ཨུབྷོཔི སཏྠཱརཾ ཨུཔསངྐམིཏྭཱ ཀཱལཾ ཨཱརོཙེསུཾ. སཏྠཱ བྷཏྟགྒཾ པཝིསིཏྭཱ པཉྙཏྟཝརབུདྡྷཱསནེ ནིསཱིདི སདྡྷིཾ བྷིཀྑུསངྒྷེན. མཧཱསེཊྛི བུདྡྷཔྤམུཁསྶ བྷིཀྑུསངྒྷསྶ དཀྑིཎོདཀཾ ཨདཱསི. བྷརིཡཱཔིསྶ ཏཐཱགཏསྶ པཏྟེ པཱུཝཾ པཏིཊྛཱཔེསི. སཏྠཱ ཨཏྟནོ ཡཱཔནམཏྟཾ གཎྷི, པཉྩསཏཱ བྷིཀྑཱུཔི ཡཱཔནམཏྟཾ གཎྷིཾསུ. སེཊྛི ཁཱིརསཔྤིམདྷུསཀྑརཱདཱིནི དདམཱནོ ན ཁཡཾ ཨགམཱསི. སཏྠཱ པཉྩཧི བྷིཀྑུསཏེཧི སདྡྷིཾ བྷཏྟཀིཙྩཾ ནིཊྛཱཔེསི. མཧཱསེཊྛིཔི སདྡྷིཾ བྷརིཡཱཡ ཡཱཝདཏྠཾ ཁཱདི. པཱུཝཱནཾ པརིཡོསཱནམེཝ ན པཉྙཱཡཏི. སཀལཝིཧཱརེ བྷིཀྑཱུནཉྩ ཝིགྷཱསཱདཱནཉྩ དིནྣེསུཔི པརིཡནྟོ ན པཉྙཱཡཏེཝ. ‘‘བྷནྟེ, པཱུཝཱ པརིཀྑཡཾ ན གཙྪནྟཱི’’ཏི བྷགཝཏོ ཨཱརོཙེསུཾ. ‘‘ཏེན ཧི ཛེཏཝནདྭཱརཀོཊྛཀེ ཚཌྜེཐཱ’’ཏི. ཨཐ ནེ དྭཱརཀོཊྛཀསྶ ཨཝིདཱུརེ པབྦྷཱརཊྛཱནེ ཚཌྜཡིཾསུ. ཡཱཝཛྫཏནཱཔི ཏཾ ཋཱནཾ ཀཔལླཀཔཱུཝཔབྦྷཱརནྟེཝ པཉྙཱཡཏི. མཧཱསེཊྛི སཧ བྷརིཡཱཡ བྷགཝནྟཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ཨཊྛཱསི. བྷགཝཱ ཨནུམོདནམཀཱསི. ཨནུམོདནཱཝསཱནེ ཨུབྷོཔི སོཏཱཔཏྟིཕལེ པཏིཊྛཱཡ སཏྠཱརཾ ཝནྡིཏྭཱ དྭཱརཀོཊྛཀེ སོཔཱནཾ ཨཱརུཡ྄ཧ ཨཏྟནོ པཱསཱདེཡེཝ པཏིཊྛཧིཾསུ.

ཏཏོ པཊྛཱཡ སེཊྛི ཨསཱིཏིཀོཊིདྷནཾ བུདྡྷསཱསནེཡེཝ ཝིཀྐིརི. པུནདིཝསེ སཱཡནྷསམཡེ དྷམྨསབྷཱཡཾ སནྣིསིནྣཱ བྷིཀྑཱུ ‘‘པསྶཐཱཝུསོ, མཧཱམོགྒལླཱནཏྠེརསྶ ཨཱནུབྷཱཝཾ, ཨནུཔཧཙྩ ནཱམ སདྡྷཾ, ཨནུཔཧཙྩ བྷོགེ མཙྪརིཡསེཊྛིཾ མུཧུཏྟེནེཝ དམེཏྭཱ ནིབྦིསེཝནཾ ཀཏྭཱ པཱུཝེ གཱཧཱཔེཏྭཱ ཛེཏཝནཾ ཨཱནེཏྭཱ སཏྠུ སམྨུཁཾ ཀཏྭཱ སོཏཱཔཏྟིཕལེ པཏིཊྛཱཔེསི, ཨཧོ མཧཱནུབྷཱཝོ ཐེརོ’’ཏི ཐེརསྶ གུཎཾ ཀཐེནྟཱ ནིསཱིདིཾསུ. སཏྠཱ དིབྦཱཡ སོཏདྷཱཏུཡཱ ཀཐཾ སུཏྭཱ ཨཱགནྟྭཱ, ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ, ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཀུལདམཀེན ནཱམ བྷིཀྑུནཱ ཨནུཔཧཙྩ སདྡྷཾ, ཨནུཔཧཙྩ བྷོགེ, ཀུལཾ ཨཀིལམེཏྭཱ ཨཝིཧེཋེཏྭཱ པུཔྥཏོ རེཎུཾ གཎྷནྟེན བྷམརེན ཝིཡ ཨུཔསངྐམིཏྭཱ བུདྡྷགུཎཾ ཛཱནཱཔེཏབྦཾ, ཏཱདིསོ མམ པུཏྟོ མོགྒལླཱནོ’’ཏི ཐེརཾ པསཾསིཏྭཱ ཨིམཾ གཱཐམཱཧ –

༤༩.

‘‘ཡཐཱཔི བྷམརོ པུཔྥཾ, ཝཎྞགནྡྷམཧེཋཡཾ;

པལེཏི རསམཱདཱཡ, ཨེཝཾ གཱམེ མུནཱི ཙརེ’’ཏི.

ཏཏྠ བྷམརོཏི ཡཱ ཀཱཙི མདྷུཀརཛཱཏི. པུཔྥནྟི པུཔྥཱརཱམེ ཙརནྟོ པུཔྥཉྩ ཝཎྞཉྩ གནྡྷཉྩ ཨཧེཋཡནྟོ ཨཝིནཱསེནྟོ ཝིཙརཏཱིཏི ཨཏྠོ. པལེཏཱིཏི ཨེཝཾ ཙརིཏྭཱ ཡཱཝདཏྠཾ རསཾ པིཝིཏྭཱ ཨཔརམྤི མདྷུཀརཎཏྠཱཡ ཨཱདཱཡ པལེཏི, སོ ཨེཝཾ ཝནགཧནཾ ཨཛ྄ཛྷོགཱཧེཏྭཱ ཨེཀསྨིཾ རུཀྑསུསིརེ ཏཾ རཛམིསྶཀཾ རསཾ ཋཔེཏྭཱ ཨནུཔུབྦེན མདྷུརརསཾ མདྷུཾ ཀརོཏི, ན ཏསྶ པུཔྥཱརཱམེ ཝིཙརིཏཔཙྩཡཱ པུཔྥཾ ཝཱ ཝཎྞགནྡྷཾ ཝཱསྶ ཝིགཙྪཏི, ཨཐ ཁོ སབྦཾ པཱཀཏིཀམེཝ ཧོཏི. ཨེཝཾ གཱམེ མུནཱི ཙརེཏི ཨེཝཾ སེཁཱསེཁབྷེདོ ཨནཱགཱརིཡམུནི ཀུལཔཊིཔཱཊིཡཱ གཱམེ བྷིཀྑཾ གཎྷནྟོ ཝིཙརཏཱིཏི ཨཏྠོ. ན ཧི ཏསྶ གཱམེ ཙརཎཔཙྩཡཱ ཀུལཱནཾ སདྡྷཱཧཱནི ཝཱ བྷོགཧཱནི ཝཱ ཧོནྟི. སདྡྷཱཔི བྷོགཱཔི པཱཀཏིཀཱཝ ཧོནྟི. ཨེཝཾ ཙརིཏྭཱ ཙ པན ནིཀྑམིཏྭཱ སེཁམུནི ཏཱཝ བཧིགཱམེ ཨུདཀཕཱསུཀཊྛཱནེ སངྒྷཱཊིཾ པཉྙཱཔེཏྭཱ ནིསིནྣོ ཨཀྑབྷཉྫནཝཎཔཊིཙྪཱདནཔུཏྟམཾསཱུཔམཱདིཝསེན པཙྩཝེཀྑནྟོ པིཎྜཔཱཏཾ པརིབྷུཉྫིཏྭཱ ཏཐཱརཱུཔཾ ཝནསཎྜཾ ཨནུཔཝིསིཏྭཱ ཨཛ྄ཛྷཏྟིཀཀམྨཊྛཱནཾ སམྨསནྟོ ཙཏྟཱརོ མགྒེ, ཙཏྟཱརི ཙ སཱམཉྙཕལཱནི ཧཏྠགཏཱནེཝ ཀརོཏི. ཨསེཁམུནི པན དིཊྛདྷམྨསུཁཝིཧཱརམནུཡུཉྫཏི. ཨཡམསྶ བྷམརེན སདྡྷིཾ མདྷུཀརཎསརིཀྑཏཱ ཝེདིཏབྦཱ. ཨིདྷ པན ཁཱིཎཱསཝོཝ ཨདྷིཔྤེཏོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཏྠཱ ཨིམཾ དྷམྨདེསནཾ ཝཏྭཱ ཨུཏྟརིཔི ཐེརསྶ གུཎཾ པཀཱསེཏུཾ ‘‘ན, བྷིཀྑཝེ, ཨིདཱནེཝ མོགྒལླཱནེན མཙྪརིཡསེཊྛི དམིཏོ, པུབྦེཔི ནཾ དམེཏྭཱ ཀམྨཕལསམྦནྡྷཾ ཛཱནཱཔེསི ཨེཝཱ’’ཏི ཝཏྭཱ ཨིམམཏྠཾ པཀཱསེནྟོ ཨཏཱིཏཾ ཨཱཧརིཏྭཱ –

‘‘ཨུབྷོ ཁཉྫཱ ཨུབྷོ ཀུཎཱི, ཨུབྷོ ཝིསམཙཀྑུཀཱ;

ཨུབྷིནྣཾ པིལ༹ཀཱ ཛཱཏཱ, ནཱཧཾ པསྶཱམི ཨིལླིས’’ནྟི. (ཛཱ. ༡.༡.༧༨) –

ཨིམཾ ཨིལླིསཛཱཏཀཾ ཀཐེསཱིཏི.

མཙྪརིཡཀོསིཡསེཊྛིཝཏྠུ པཉྩམཾ.

༦. པཱཝེཡྻཀཱཛཱིཝཀཝཏྠུ

ན པརེསཾ ཝིལོམཱནཱིཏི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ པཱཝེཡྻཾ ནཱམ ཨཱཛཱིཝཀཾ ཨཱརབྦྷ ཀཐེསི.

སཱཝཏྠིཡཾ ཀིརེཀཱ གཧཔཏཱནཱི པུཏྟཊྛཱནེ ཋཔེཏྭཱ པཱཝེཡྻཾ ནཱམ ཨཱཛཱིཝཀཾ པཊིཛགྒི. ཏསྶཱནནྟརགྷརེསུ མནུསྶཱ སཏྠུ དྷམྨདེསནཾ སུཏྭཱ ཨཱགནྟྭཱ, ‘‘ཨཧོ ཨཙྪརིཡཱ བུདྡྷཱནཾ དྷམྨདེསནཱ’’ཏི ནཱནཔྤཀཱརེཧི བུདྡྷགུཎེ ཝཎྞེནྟི. སཱ བུདྡྷཱནཾ གུཎཀཐཾ སུཏྭཱ ཝིཧཱརཾ གནྟྭཱ དྷམྨཾ སོཏུཀཱམཱ ཨཱཛཱིཝཀསྶ ཨེཏམཏྠཾ ཀཐེཏྭཱ, ‘‘གཙྪིསྶཱམི ཨཧཾ བུདྡྷསནྟིཀཾ, ཨཡྻཱ’’ཏི ཨཱཧ. སོ ‘‘མཱ གཙྪཱཧཱི’’ཏི ནིཝཱརེཏྭཱ ཏཾ པུནཔྤུནཾ ཡཱཙམཱནམྤི ནིཝཱརེསི ཨེཝ. སཱ ‘‘ཨཡཾ མམ ཝིཧཱརཾ གནྟྭཱ དྷམྨཾ སོཏུཾ ན དེཏི, སཏྠཱརཾ ནིམནྟེཏྭཱ ཨིདྷེཝ དྷམྨཾ སུཎིསྶཱམཱི’’ཏི སཱཡནྷསམཡེ པུཏྟཾ པཀྐོསིཏྭཱ, ‘‘གཙྪ, ཏཱཏ, སྭཱཏནཱཡ སཏྠཱརཾ ནིམནྟེཧཱི’’ཏི པེསེསི. སོ གཙྪནྟོ པཋམཏརཾ ཨཱཛཱིཝཀསྶ ཝསནཊྛཱནཾ གནྟྭཱ ཏཾ ཝནྡིཏྭཱ ནིསཱིདི. ཨཐ ནཾ སོ ‘‘ཀཧཾ གཙྪསཱི’’ཏི ཨཱཧ. ‘‘མཱཏུ ཝཙནེན སཏྠཱརཾ ནིམནྟེཏུཾ གཙྪཱམཱི’’ཏི ཨཱཧ. ‘‘མཱ ཏསྶ སནྟིཀཾ གཙྪཱཧཱི’’ཏི. ‘‘ཨལཾ, ཨཡྻ, མམ མཱཏུ བྷཱཡཱམི, གཙྪིསྶཱམཧ’’ནྟི. ‘‘ཨེཏསྶ ཀཏསཀྐཱརཾ ཨུབྷོཔི ཁཱདིསྶཱམ, མཱ གཙྪཱཧཱི’’ཏི. ‘‘ཨལཾ, ཨཡྻ, མཱཏཱ མེ ཏཛྫེསྶཏཱི’’ཏི. ཏེན ཧི གཙྪ, གནྟྭཱ པན ནིམནྟེཏྭཱ, ‘‘ཨམྷཱཀཾ གེཧཾ ཨསུཀཊྛཱནེ ཝཱ ཨསུཀཝཱིཐིཡཾ ཝཱ ཨསུཀམགྒེན ཝཱ གནྟབྦ’’ནྟི མཱ ཨཱཙིཀྑི. ‘‘སནྟིཀེ ཋིཏོ ཝིཡ ཨཉྙེན མགྒེན གཙྪནྟོ ཝིཡ པལཱཡིཏྭཱ ཨེཧཱི’’ཏི. སོ ཨཱཛཱིཝཀསྶ ཝཙནཾ སུཏྭཱ སཏྠུ སནྟིཀཾ གནྟྭཱ ནིམནྟེཏྭཱ ཨཱཛཱིཝཀེན ཝུཏྟནིཡཱམེནེཝ སབྦཾ ཀཏྭཱ ཏསྶ སནྟིཀཾ གནྟྭཱ, ‘‘ཀིཾ ཏེ ཀཏ’’ནྟི པུཊྛོ, ‘‘སབྦཾ ཀཏཾ, ཨཡྻཱ’’ཏི ཨཱཧ. ‘‘བྷདྡཀཾ ཏེ ཀཏཾ, ཏསྶ སཀྐཱརཾ ཨུབྷོཔི ཁཱདིསྶཱམཱ’’ཏི ཝཏྭཱ པུནདིཝསེ ཨཱཛཱིཝཀོ པཱཏོཝ ཏཾ གེཧཾ ཨགམཱསི. ཏཾ གཧེཏྭཱ པཙྪཱགབྦྷེ ནིསཱིདཱཔེསུཾ.

པཊིཝིསྶཀམནུསྶཱ ཏཾ གེཧཾ ཨལླགོམཡེན ཨུཔལིམྤིཏྭཱ ལཱཛཔཉྩམཱནི པུཔྥཱནི ཝིཀིརིཏྭཱ སཏྠུ ནིསཱིདནཏྠཱཡ མཧཱརཧཾ ཨཱསནཾ པཉྙཱཔེསུཾ. བུདྡྷེཧི སདྡྷིཾ ཨཔརིཙིཏམནུསྶཱ ཧི ཨཱསནཔཉྙཏྟིཾ ན ཛཱནནྟི, བུདྡྷཱནཉྩ མགྒདེསཀེན ཀིཙྩཾ ནཱམ ནཏྠི, བོདྷིམཱུལེ དསསཧསྶིསོཀདྷཱཏུཾ ཀམྤེཏྭཱ སམྦོདྷིཾ པཏྟདིཝསེཡེཝ ཧི ནེསཾ ‘‘ཨཡཾ མགྒོ ནིརཡཾ གཙྪཏི, ཨཡཾ ཏིརཙྪཱནཡོནིཾ, ཨཡཾ པེཏྟིཝིསཡཾ, ཨཡཾ མནུསྶལོཀཾ, ཨཡཾ དེཝལོཀཾ, ཨཡཾ ཨམཏམཧཱནིབྦཱན’’ནྟི སབྦེ མགྒཱ ཨཱཝིབྷཱུཏཱ. གཱམནིགམཱདཱིནཾ པན མགྒེ ཝཏྟབྦམེཝ ནཏྠི. ཏསྨཱ སཏྠཱ པཱཏོཝ པཏྟཙཱིཝརམཱདཱཡ མཧཱཨུཔཱསིཀཱཡ གེཧདྭཱརཾ གཏོ. སཱ གེཧཱ ནིཀྑམིཏྭཱ སཏྠཱརཾ པཉྩཔཏིཊྛིཏེན ཝནྡིཏྭཱ ཨནྟོནིཝེསནཾ པཝེསེཏྭཱ ཨཱསནེ ནིསཱིདཱཔེཏྭཱ དཀྑིཎོདཀཾ དཏྭཱ པཎཱིཏེན ཁཱདནཱིཡེན བྷོཛནཱིཡེན པརིཝིསི. ཨུཔཱསིཀཱ ཀཏབྷཏྟཀིཙྩསྶ སཏྠུནོ ཨནུམོདནཾ ཀཱརེཏུཀཱམཱ པཏྟཾ གཎྷི. སཏྠཱ མདྷུརསྶརེན ཨནུམོདནདྷམྨཀཐཾ ཨཱརབྷི. ཨུཔཱསིཀཱ ‘‘སཱདྷུ, སཱདྷཱུ’’ཏི སཱདྷུཀཱརཾ དདམཱནཱ དྷམྨཾ སུཎི. ཨཱཛཱིཝཀོཔི པཙྪཱགབྦྷེ ནིསིནྣོཝ ཏསྶཱ སཱདྷུཀཱརཾ དཏྭཱ དྷམྨཾ སུཎནྟིཡཱ སདྡཾ སུཏྭཱ སནྡྷཱརེཏུཾ ནཱསཀྑི. ‘‘ན ཨིདཱནེསཱ མཡ྄ཧ’’ནྟི ནིཀྑམིཏྭཱ ‘‘ནཊྛཱསི ཀཱལ༹ཀཎྞི, ཨེཏསྶ ཨེཝཾ སཀྐཱརཾ ཀརོཏཱི’’ཏི ནཱནཔྤཀཱརེན ཨུཔཱསིཀཉྩ སཏྠཱརཉྩ ཨཀྐོསནྟོ པལཱཡི. ཨུཔཱསིཀཱ ཏསྶ ཀཐཱཡ ལཛྫིཏཱ ཨཉྙཐཏྟཾ གཏཾ ཙིཏྟཾ དེསནཱནུསཱརེན ཉཱཎཾ པེསེཏུཾ ནཱསཀྑི. ཨཐ ནཾ སཏྠཱ ‘‘ཀིཾ ཨུཔཱསིཀེ ཙིཏྟཾ དེསནཱནུགཏཾ ཀཱཏུཾ ན སཀྐོསཱི’’ཏི? ‘‘བྷནྟེ, ཨེཏསྶ མེ ཀཐཱཡ ཙིཏྟཾ ཨཉྙཐཏྟཾ ཨུཔགཏ’’ནྟི. སཏྠཱ ‘‘ཨེཝརཱུཔསྶ ཝིསབྷཱགཛནསྶ ཀཐིཏཾ ཀཐཾ ནཱམ ཨཱཝཛྫིཏུཾ ན ཝཊྚཏི, ཨེཝརཱུཔཾ ཨསམནྣཱཧརིཏྭཱ ཨཏྟནོ ཀཏཱཀཏམེཝ ཨོལོཀེཏུཾ ཝཊྚཏཱི’’ཏི ཝཏྭཱ ཨིམཾ གཱཐམཱཧ –

༥༠.

‘‘ན པརེསཾ ཝིལོམཱནི, ན པརེསཾ ཀཏཱཀཏཾ;

ཨཏྟནོཝ ཨཝེཀྑེཡྻ, ཀཏཱནི ཨཀཏཱནི ཙཱ’’ཏི.

ཏཏྠ ན པརེསཾ ཝིལོམཱནཱིཏི པརེསཾ ཝིལོམཱནི ཕརུསཱནི མམྨཙྪེདཀཝཙནཱནི ན མནསིཀཱཏབྦཱནི. ན པརེསཾ ཀཏཱཀཏནྟི ‘‘ཨསུཀོ ཨུཔཱསཀོ ཨསྶདྡྷོ ཨཔྤསནྣོ, ནཱཔིསྶ གེཧེ ཀཊཙྪུབྷིཀྑཱདཱིནི དིཡྻནྟི, ན སལཱཀབྷཏྟཱདཱིནི, ན ཙཱིཝརཱདིཔཙྩཡདཱནཾ ཨེཏསྶ ཨཏྠི, ཏཐཱ ཨསུཀཱ ཨུཔཱསིཀཱ ཨསྶདྡྷཱ ཨཔྤསནྣཱ, ནཱཔིསྶཱ གེཧེ ཀཊཙྪུབྷིཀྑཱདཱིནི དིཡྻནྟི, ན སལཱཀབྷཏྟཱདཱིནི, ན ཙཱིཝརཱདིཔཙྩཡདཱནཾ ཨེཏིསྶཱ ཨཏྠི, ཏཐཱ ཨསུཀོ བྷིཀྑུ ཨསྶདྡྷོ ཨཔྤསནྣོ, ནཱཔི ཨུཔཛ྄ཛྷཱཡཝཏྟཾ ཀརོཏི, ན ཨཱཙརིཡཝཏྟཾ, ན ཨཱགནྟུཀཝཏྟཾ, ན གམིཀཝཏྟཾ, ན ཙེཏིཡངྒཎཝཏྟཾ, ན ཨུཔོསཐཱགཱརཝཏྟཾ, ན བྷོཛནསཱལཱཝཏྟཾ, ན ཛནྟཱགྷརཝཏྟཱདཱིནི, ནཱཔིསྶ ཀིཉྩི དྷུཏངྒཾ ཨཏྠི, ན བྷཱཝནཱརཱམཏཱཡ ཨུསྶཱཧམཏྟམྤཱི’’ཏི ཨེཝཾ པརེསཾ ཀཏཱཀཏཾ ནཱམ ན ཨོལོཀེཏབྦཾ. ཨཏྟནོཝ ཨཝེཀྑེཡྻཱཏི ‘‘ཀཐཾ བྷཱུཏསྶ མེ རཏྟིནྡིཝཱ ཝཱིཏིཝཏྟནྟཱིཏི པབྦཛིཏེན ཨབྷིཎྷཾ པཙྩཝེཀྑིཏབྦ’’ནྟི (ཨ. ནི. ༡༠.༤༨) ཨིམཾ ཨོཝཱདཾ ཨནུསྶརནྟོ སདྡྷཱཔབྦཛིཏོ ཀུལཔུཏྟོ ‘‘ཀིཾ ནུ ཁོ ཨཧཾ ‘ཨནིཙྩཾ དུཀྑཾ ཨནཏྟཱ’ཏི ཏིལཀྑཎཾ ཨཱརོཔེཏྭཱ ཡོགེ ཀམྨཾ ཀཱཏུཾ སཀྑིཾ, ནཱསཀྑི’’ནྟི ཨེཝཾ ཨཏྟནོ ཀཏཱཀཏཱནི ཨོལོཀེཡྻཱཏི.

དེསནཱཝསཱནེ སཱ ཨུཔཱསིཀཱ སོཏཱཔཏྟིཕལེ པཏིཊྛིཏཱ, དེསནཱ མཧཱཛནསྶ སཱཏྠིཀཱ ཛཱཏཱཏི.

པཱཝེཡྻཀཱཛཱིཝཀཝཏྠུ ཚཊྛཾ.

༧. ཚཏྟཔཱཎིཨུཔཱསཀཝཏྠུ

ཡཐཱཔི རུཙིརཾ པུཔྥནྟི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ ཚཏྟཔཱཎིཨུཔཱསཀཾ ཨཱརབྦྷ ཀཐེསི.

སཱཝཏྠིཡཉྷི ཚཏྟཔཱཎི ནཱམ ཨུཔཱསཀོ ཏིཔིཊཀདྷརོ ཨནཱགཱམཱི. སོ པཱཏོཝ ཨུཔོསཐིཀོ ཧུཏྭཱ སཏྠུ ཨུཔཊྛཱནཾ ཨགམཱསི. ཨནཱགཱམིཨརིཡསཱཝཀཱནཉྷི སམཱདཱནཝསེན ཨུཔོསཐཀམྨཾ ནཱམ ནཏྠི, མགྒེནེཝ ཏེསཾ བྲཧྨཙརིཡཉྩ ཨེཀབྷཏྟིཀཉྩ ཨཱགཏཾ. ཏེནེཝཱཧ – ‘‘གྷཊིཀཱརོ ཁོ, མཧཱརཱཛ, ཀུམྦྷཀཱརོ ཨེཀབྷཏྟིཀོ བྲཧྨཙཱརཱི སཱིལཝཱ ཀལྱཱཎདྷམྨོ’’ཏི (མ. ནི. ༢.༢༨༨). ཨེཝཾ ཨནཱགཱམིནོ པཀཏིཡཱཝ ཨེཀབྷཏྟིཀཱ ཙ བྲཧྨཙཱརིནོ ཙ ཧོནྟི. སོཔི ཏཐེཝ ཨུཔོསཐིཀོ ཧུཏྭཱ སཏྠཱརཾ ཨུཔསངྐམིཏྭཱ ཝནྡིཏྭཱ དྷམྨཀཐཾ སུཎནྟོ ནིསཱིདི. ཏསྨིཾ སམཡེ རཱཛཱ པསེནདི ཀོསལོ སཏྠུ ཨུཔཊྛཱནཾ ཨགམཱསི. ཚཏྟཔཱཎི ཨུཔཱསཀོ ཏཾ ཨཱགཙྪནྟཾ དིསྭཱ ‘‘ཨུཊྛཱཏབྦཾ ནུ ཁོ, ནོ’’ཏི ཙིནྟེཏྭཱ – ‘‘ཨཧཾ ཨགྒརཱཛསྶ སནྟིཀེ ནིསིནྣོ, ཏསྶ མེ པདེསརཱཛཱནཾ དིསྭཱ ཨུཊྛཱཏུཾ ན ཡུཏྟཾ, རཱཛཱ ཁོ པན མེ ཨནུཊྛཧནྟསྶ ཀུཛ྄ཛྷིསྶཏི, ཨེཏསྨིཾ ཀུཛ྄ཛྷནྟེཔི ནེཝ ཨུཊྛཧིསྶཱམི. རཱཛཱནཾ དིསྭཱ ཨུཊྛཧནྟེན ཧི རཱཛཱ གརུཀཏོ ཧོཏི, ནོ སཏྠཱ, ཏསྨཱ ནེཝ ཨུཊྛཧིསྶཱམཱི’’ཏི ན ཨུཊྛཧི. པཎྜིཏཔུརིསཱ ནཱམ གརུཏརཱནཾ སནྟིཀེ ནིསཱིདིཏྭཱ ཨནུཊྛཧནྟཾ དིསྭཱ ན ཀུཛ྄ཛྷནྟི. རཱཛཱ པན ཏཾ ཨནུཊྛཧནྟཾ དིསྭཱ ཀུཔིཏམཱནསོ སཏྠཱརཾ ཝནྡིཏྭཱ ཨེཀམནྟཾ ནིསཱིདི. སཏྠཱ ཀུཔིཏབྷཱཝཾ ཉཏྭཱ, ‘‘མཧཱརཱཛ, ཨཡཾ ཚཏྟཔཱཎི ཨུཔཱསཀོ པཎྜིཏོ དིཊྛདྷམྨོ ཏིཔིཊཀདྷརོ ཨཏྠཱནཏྠཀུསལོ’’ཏི ཨུཔཱསཀསྶ གུཎཾ ཀཐེསི. རཉྙོ ཏསྶ གུཎཀཐཾ སུཎནྟསྶེཝ ཙིཏྟཾ མུདུཀཾ ཛཱཏཾ.

ཨཐེཀདིཝསཾ རཱཛཱ ཨུཔརིཔཱསཱདེ ཋིཏོ ཚཏྟཔཱཎིཾ ཨུཔཱསཀཾ ཀཏབྷཏྟཀིཙྩཾ ཚཏྟམཱདཱཡ ཨུཔཱཧནམཱརུཡ྄ཧ རཱཛངྒཎེན གཙྪནྟཾ དིསྭཱ པཀྐོསཱཔེསི. སོ ཚཏྟུཔཱཧནཾ ཨཔནེཏྭཱ རཱཛཱནམུཔསངྐམིཏྭཱ ཝནྡིཏྭཱ ཨེཀམནྟཾ ཨཊྛཱསི. ཨཐ ནཾ རཱཛཱ ཨཱཧ – ‘‘བྷོ ཨུཔཱསཀ, ཀིནྟེ ཚཏྟུཔཱཧནཾ ཨཔནཱིཏ’’ནྟི. ‘‘‘རཱཛཱ པཀྐོསཏཱི’ཏི སུཏྭཱ ཨཔནེཏྭཱ ཨཱགཏོམྷཱི’’ཏི. ‘‘ཨཛྫ ཨམྷཱཀཾ རཱཛབྷཱཝོ ཏུམྷེཧི ཉཱཏོ བྷཝིསྶཏཱི’’ཏི. ‘‘སདཱཔི མཡཾ, དེཝ, ཏུམྷཱཀཾ རཱཛབྷཱཝཾ ཛཱནཱམཱ’’ཏི. ‘‘ཡདི ཨེཝཾ ཀསྨཱ པུརིམདིཝསེ སཏྠུ སནྟིཀེ ནིསིནྣོ མཾ དིསྭཱ ན ཨུཊྛཧཱི’’ཏི? ‘‘མཧཱརཱཛ, ཨཧཾ ཨགྒརཱཛསྶ སནྟིཀེ ནིསིནྣོ, པདེསརཱཛཱནཾ དིསྭཱ ཨུཊྛཧནྟོ སཏྠརི ཨགཱརཝཾ པཝེདེཡྻཾ, ཏསྨཱ ན ཨུཊྛཧི’’ནྟི. ‘‘ཧོཏུ, བྷོ, ཏིཊྛཏེཏཾ’’. ‘‘ཏུམྷེ ཀིར དིཊྛདྷམྨིཀསམྤརཱཡིཀཱནཾ ཨཏྠཱནཏྠཱནཾ ཀུསལཱ ཏིཔིཊཀདྷརཱ ཨམྷཱཀཾ ཨནྟེཔུརེ དྷམྨཾ ཝཱཙེཐཱ’’ཏི. ‘‘ན སཀྐོམི, དེཝཱ’’ཏི. ‘‘ཀིཾ ཀཱརཎཱ’’ཏི? ‘‘རཱཛགེཧཾ ནཱམ མཧཱསཱཝཛྫཾ, དུཡུཏྟསུཡུཏྟཀཱནི གརུཀཱནེཏྠ, དེཝཱ’’ཏི. ‘‘མཱ ཨེཝཾ ཝདེཐ, ‘པུརིམདིཝསེ མཾ དིསྭཱ ན ཨུཊྛིཏོམྷཱི’ཏི མཱ ཀུཀྐུཙྩཾ ཀརོཐཱ’’ཏི. ‘‘དེཝ, གིཧཱིནཾ ཝིཙརཎཊྛཱནཾ ནཱམ མཧཱསཱཝཛྫཾ, ཨེཀཾ པབྦཛིཏཾ པཀྐོསཱཔེཏྭཱ དྷམྨཾ ཝཱཙཱཔེཐཱ’’ཏི. རཱཛཱ ‘‘སཱདྷུ, བྷོ, གཙྪཐ ཏུམྷེ’’ཏི ཏཾ ཨུཡྻོཛེཏྭཱ སཏྠུ སནྟིཀཾ གནྟྭཱ སཏྠཱརཾ ཡཱཙི, ‘‘བྷནྟེ, མལླིཀཱ ཙ དེཝཱི ཝཱསབྷཁཏྟིཡཱ ཙ དྷམྨཾ པརིཡཱཔུཎིསྶཱམཱཏི ཝདནྟི, པཉྩཧི བྷིཀྑུསཏེཧི སདྡྷིཾ ནིབདྡྷཾ མམ གེཧཾ གནྟྭཱ ཏཱསཾ དྷམྨཾ ཨུདྡིསཐཱ’’ཏི. ‘‘བུདྡྷཱནཾ ནིབདྡྷཾ ཨེཀཊྛཱནགམནཾ ནཱམ ནཏྠི, མཧཱརཱཛཱ’’ཏི. ‘‘ཏེན ཧི, བྷནྟེ, ཨཉྙཾ ཨེཀཾ བྷིཀྑུཾ དེཐཱ’’ཏི. སཏྠཱ ཨཱནནྡཏྠེརསྶ བྷཱརམཀཱསི. ཐེརོ ནིབདྡྷཾ གནྟྭཱ ཏཱསཾ ཨུདྡེསཾ ཨུདྡིསཏི. ཏཱསུ མལླིཀཱ སཀྐཙྩཾ གཧེཏྭཱ སཛ྄ཛྷཱཡིཏྭཱ ཨུདྡེསཾ པཊིཙྪཱཔེསི. ཝཱསབྷཁཏྟིཡཱ པན ནེཝ སཀྐཙྩཾ གཎྷཱཏི, ན སཛ྄ཛྷཱཡཏི, ན ཨུདྡེསཾ པཊིཙྪཱཔེཏུཾ སཀྐོཏི.

ཨཐེཀདིཝསཾ སཏྠཱ ཐེརཾ པུཙྪི – ‘‘ཀིམཱནནྡ, ཨུཔཱསིཀཱ དྷམྨཾ པརིཡཱཔུཎནྟཱི’’ཏི? ‘‘ཨཱམ, བྷནྟེ’’ཏི. ‘‘ཀཱ སཀྐཙྩཾ གཎྷཱཏཱི’’ཏི? ‘‘མལླིཀཱ, བྷནྟེ, སཀྐཙྩཾ གཎྷཱཏི, སཀྐཙྩཾ སཛ྄ཛྷཱཡཏི, སཀྐཙྩཾ ཨུདྡེསཾ པཊིཙྪཱཔེཏུཾ སཀྐོཏི. ཏུམྷཱཀཾ པན ཉཱཏིདྷཱིཏཱ ནེཝ སཀྐཙྩཾ གཎྷཱཏི, ན སཛ྄ཛྷཱཡཏི, ན ཨུདྡེསཾ པཊིཙྪཱཔེཏུཾ སཀྐོཏཱི’’ཏི. སཏྠཱ ཐེརསྶ ཝཙནཾ སུཏྭཱ, ‘‘ཨཱནནྡ, མཡཱ ཀཐིཏདྷམྨོ ནཱམ སཀྐཙྩམསུཎནྟསྶ ཨགྒཎྷནྟསྶ ཨསཛ྄ཛྷཱཡནྟསྶ ཨདེསེནྟསྶ ཝཎྞསམྤནྣཾ ཨགནྡྷཀཔུཔྥཾ ཝིཡ ཨཕལོ ཧོཏི, སཀྐཙྩཾ པན སཝནཱདཱིནི ཀརོནྟསྶ མཧཔྥལོ ཧོཏི མཧཱནིསཾསོ’’ཏི ཝཏྭཱ ཨིམཱ དྭེ གཱཐཱ ཨབྷཱསི –

༥༡.

‘‘ཡཐཱཔི རུཙིརཾ པུཔྥཾ, ཝཎྞཝནྟཾ ཨགནྡྷཀཾ;

ཨེཝཾ སུབྷཱསིཏཱ ཝཱཙཱ, ཨཕལཱ ཧོཏི ཨཀུབྦཏོ.

༥༢.

‘‘ཡཐཱཔི རུཙིརཾ པུཔྥཾ, ཝཎྞཝནྟཾ སགནྡྷཀཾ;

ཨེཝཾ སུབྷཱསིཏཱ ཝཱཙཱ, སཕལཱ ཧོཏི ཀུབྦཏོ’’ཏི.

ཏཏྠ རུཙིརནྟི སོབྷནཾ. ཝཎྞཝནྟནྟི ཝཎྞསཎྛཱནསམྤནྣཾ, ཨགནྡྷཀནྟི གནྡྷཝིརཧིཏཾ པཱལིབྷདྡཀགིརིཀཎྞིཀཛཡསུམནཱདིབྷེདཾ. ཨེཝཾ སུབྷཱསིཏཱ ཝཱཙཱཏི སུབྷཱསིཏཱ ཝཱཙཱ ནཱམ ཏེཔིཊཀཾ བུདྡྷཝཙནཾ. ཏཾ ཝཎྞསཎྛཱནསམྤནྣཾ ཨགནྡྷཀཔུཔྥསདིསཾ. ཡཐཱ པན ཨགནྡྷཀཔུཔྥཾ ཡོ ནཾ དྷཱརེཏི, ཏསྶ སརཱིརེ གནྡྷཾ ན ཕརཏི, ཨེཝཾ ཨེཏམྤི ཡོ ནཾ སཀྐཙྩཾ སཝནཱདཱིཧི ན སམཱཙརཏི, ཏསྶ སཀྐཙྩཾ ཨསམཱཙརནྟསྶ ཡཾ ཏཏྠ ཀཏྟབྦཾ, ཏཾ ཨཀུབྦཏོ སུཏགནྡྷཉྩ ཝཱཙཱགནྡྷཉྩ པཊིཔཏྟིགནྡྷཉྩ ན ཨཱཝཧཏི ཨཕལཱ ཧོཏི. ཏེན ཝུཏྟཾ – ‘‘ཨེཝཾ སུབྷཱསིཏཱ ཝཱཙཱ, ཨཕལཱ ཧོཏི ཨཀུབྦཏོ’’ཏི. སགནྡྷཀནྟི ཙམྤཀནཱིལུཔྤལཱདིབྷེདཾ. ཨེཝནྟི ཡཐཱ ཏཾ པུཔྥཾ དྷཱརེནྟསྶ སརཱིརེ གནྡྷོ ཕརཏི, ཨེཝཾ ཏེཔིཊཀབུདྡྷཝཙནསངྑཱཏཱ སུབྷཱསིཏཱ ཝཱཙཱཔི. ཀུབྦཏོཏི ཡོ སཀྐཙྩཾ སཝནཱདཱིཧི ཏཏྠ ཀཏྟབྦཾ ཀརོཏི, སཱ ཨསྶ པུགྒལསྶ སཕལཱ ཧོཏི, སུཏགནྡྷཝཱཙཱགནྡྷཔཊིཔཏྟིགནྡྷཱནཾ ཨཱཝཧནཏོ མཧཔྥལཱ ཧོཏི, མཧཱནིསཾསཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཏྟཱ. དེསནཱ མཧཱཛནསྶ སཱཏྠིཀཱ ཛཱཏཱཏི.

ཚཏྟཔཱཎིཨུཔཱསཀཝཏྠུ སཏྟམཾ.

༨. ཝིསཱཁཱཝཏྠུ

ཡཐཱཔི པུཔྥརཱསིམྷཱཏི ཨིམཾ དྷམྨདེསནཾ སཏྠཱ སཱཝཏྠིཡཾ ཨུཔནིསྶཱཡ པུབྦཱརཱམེ ཝིཧརནྟོ ཝིསཱཁཾ ཨུཔཱསིཀཾ ཨཱརབྦྷ ཀཐེསི.

སཱ ཀིར ཨངྒརཊྛེ བྷདྡིཡནགརེ མེཎྜཀསེཊྛིཔུཏྟསྶ དྷནཉྩཡསེཊྛིནོ ཨགྒམཧེསིཡཱ སུམནདེཝིཡཱ ཀུཙྪིསྨིཾ ནིབྦཏྟི. ཏསྶཱ སཏྟཝསྶིཀཀཱལེ སཏྠཱ སེལབྲཱཧྨཎཱདཱིནཾ བོདྷནེཡྻབནྡྷཝཱནཾ ཨུཔནིསྶཡསམྤདཾ དིསྭཱ མཧཱབྷིཀྑུསངྒྷཔརིཝཱརོ ཙཱརིཀཾ ཙརམཱནོ ཏཾ ནགརཾ པཱཔུཎི.

ཏསྨིཉྩ སམཡེ མེཎྜཀོ, གཧཔཏི, ཏསྨིཾ ནགརེ པཉྩནྣཾ མཧཱཔུཉྙཱནཾ ཛེཊྛཀོ ཧུཏྭཱ སེཊྛིཊྛཱནཾ ཀརོཏི. པཉྩ མཧཱཔུཉྙཱ ནཱམ མེཎྜཀོ སེཊྛི, ཙནྡཔདུམཱ ནཱམ ཏསྶེཝ ཛེཊྛཀབྷརིཡཱ, ཏསྶེཝ ཛེཊྛཀཔུཏྟོ དྷནཉྩཡོ ནཱམ, ཏསྶ བྷརིཡཱ སུམནདེཝཱི ནཱམ, མེཎྜཀསེཊྛིནོ དཱསོ པུཎྞོ ནཱམཱཏི. ན ཀེཝལཉྩ མེཎྜཀསེཊྛིཡེཝ, བིམྦིསཱརརཉྙོ པན ཝིཛིཏེ པཉྩ ཨམིཏབྷོགཱ ནཱམ ཨཧེསུཾ – ཛོཏིཀོ, ཛཊིལོ, མེཎྜཀོ, པུཎྞཀོ, ཀཱཀཝལིཡོཏི. ཏེསུ ཨཡཾ མེཎྜཀསེཊྛི དསབལསྶ ཨཏྟནོ ནགརཾ སམྤཏྟབྷཱཝཾ ཉཏྭཱ པུཏྟསྶ དྷནཉྩཡསེཊྛིནོ དྷཱིཏརཾ ཝིསཱཁཾ དཱརིཀཾ པཀྐོསཱཔེཏྭཱ ཨཱཧ – ‘‘ཨམྨ, ཏུཡ྄ཧམྤི མངྒལཾ, ཨམྷཱཀམྤི མངྒལཾ, ཏཝ པརིཝཱརེཧི པཉྩཧི དཱརིཀཱསཏེཧི སདྡྷིཾ པཉྩ རཐསཏཱནི ཨཱརུཡ྄ཧ པཉྩཧི དཱསིསཏེཧི པརིཝུཏཱ དསབལསྶ པཙྩུགྒམནཾ ཀརོཧཱི’’ཏི. སཱ ‘‘སཱདྷཱུ’’ཏི པཊིསྶུཎིཏྭཱ ཏཐཱ ཨཀཱསི. ཀཱརཎཱཀཱརཎེསུ པན ཀུསལཏྟཱ ཡཱཝཏིཀཱ ཡཱནསྶ བྷཱུམི, ཡཱནེན གནྟྭཱ ཡཱནཱ པཙྩོརོཧིཏྭཱ པཏྟིཀཱཝ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ཨཊྛཱསི. ཨཐསྶཱ ཙརིཡཱཝསེན སཏྠཱ དྷམྨཾ དེསེསི. སཱ དེསནཱཝསཱནེ པཉྩཧི དཱརིཀཱསཏེཧི སདྡྷིཾ སོཏཱཔཏྟིཕལེ པཏིཊྛཧི. མེཎྜཀསེཊྛིཔི ཁོ སཏྠཱརམུཔསངྐམིཏྭཱ དྷམྨཀཐཾ སུཏྭཱ སོཏཱཔཏྟིཕལེ པཏིཊྛཱཡ སྭཱཏནཱཡ ནིམནྟེཏྭཱ པུནདིཝསེ ཨཏྟནོ ནིཝེསནེ པཎཱིཏེན ཁཱདནཱིཡེན བྷོཛནཱིཡེན བུདྡྷཔྤམུཁཾ བྷིཀྑུསངྒྷཾ པརིཝིསིཏྭཱ ཨེཏེནེཝ ཨུཔཱཡེན ཨཌྜྷམཱསཾ མཧཱདཱནམདཱསི. སཏྠཱ བྷདྡིཡནགརེ ཡཐཱབྷིརནྟཾ ཝིཧརིཏྭཱ པཀྐཱམི.

ཏེན ཁོ པན སམཡེན བིམྦིསཱརོ ཙ པསེནདི ཀོསལོ ཙ ཨཉྙམཉྙཾ བྷགིནིཔཏིཀཱ ཧོནྟི. ཨཐེཀདིཝསཾ ཀོསལརཱཛཱ ཙིནྟེསི – ‘‘བིམྦིསཱརསྶ ཝིཛིཏེ པཉྩ ཨམིཏབྷོགཱ མཧཱཔུཉྙཱ ཝསནྟི, མཡ྄ཧཾ ཝིཛིཏེ ཨེཀོཔི ཏཱདིསོ ནཏྠི, ཡཾནཱུནཱཧཾ བིམྦིསཱརསྶ སནྟིཀཾ གནྟྭཱ ཨེཀཾ མཧཱཔུཉྙཾ ཡཱཙེཡྻ’’ནྟི. སོ ཏཏྠ གནྟྭཱ རཉྙཱ ཀཏཔཊིསནྠཱརོ ‘‘ཀིཾ ཀཱརཎཱ ཨཱགཏོསཱི’’ཏི པུཊྛོ ‘‘‘ཏུམྷཱཀཾ ཝིཛིཏེ པཉྩ ཨམིཏབྷོགཱ མཧཱཔུཉྙཱ ཝསནྟི, ཏཏོ ཨེཀཾ གཧེཏྭཱ གམིསྶཱམཱི’ཏི ཨཱགཏོམྷི, ཏེསུ མེ ཨེཀཾ དེཐཱ’’ཏི ཨཱཧ. ‘‘མཧཱཀུལཱནི ཨམྷེཧི ཙཱལེཏུཾ ན སཀྐཱ’’ཏི ཨཱཧ. ‘‘ཨཧཾ ཨལདྡྷཱ ན གམིསྶཱམཱི’’ཏི ཨཱཧ. རཱཛཱ ཨམཙྩེཧི སདྡྷིཾ མནྟེཏྭཱ ‘‘ཛོཏིཀཱདཱིནཾ མཧཱཀུལཱནཾ ཙཱལནཾ ནཱམ མཧཱཔཐཝིཡཱ ཙཱལནསདིསཾ, མེཎྜཀམཧཱསེཊྛིསྶ པུཏྟོ དྷནཉྩཡསེཊྛི ནཱམ ཨཏྠི, ཏེན སདྡྷིཾ མནྟེཏྭཱ པཊིཝཙནཾ ཏེ དསྶཱམཱི’’ཏི ཝཏྭཱ ཏཾ པཀྐོསཱཔེཏྭཱ, ཏཱཏ, ཀོསལརཱཛཱ ‘‘‘ཨེཀཾ དྷནསེཊྛིཾ གཧེཏྭཱ གམིསྶཱམཱི’ཏི ཝདཏི, ཏྭཾ ཏེན སདྡྷིཾ གཙྪཱཧཱི’’ཏི. ‘‘ཏུམྷེསུ པཧིཎནྟེསུ གམིསྶཱམི, དེཝཱ’’ཏི. ‘‘ཏེན ཧི པརིཝཙྪཾ ཀཏྭཱ གཙྪ, ཏཱཏཱ’’ཏི. སོ ཨཏྟནོ ཀཏྟབྦཡུཏྟཀམཀཱསི. རཱཛཱཔིསྶ མཧནྟཾ སཀྐཱརཾ ཀཏྭཱ, ‘‘ཨིམཾ ཨཱདཱཡ གཙྪཐཱ’’ཏི པསེནདིརཱཛཱནཾ ཨུཡྻོཛེསི. སོ ཏཾ ཨཱདཱཡ སབྦཏྠ ཨེཀརཏྟིཝཱསེན གཙྪནྟོ ཨེཀཾ ཕཱསུཀཊྛཱནཾ པཏྭཱ ནིཝཱསཾ གཎྷི, ཨཐ ནཾ དྷནཉྩཡསེཊྛི པུཙྪི – ‘‘ཨིདཾ ཀསྶ ཝིཛིཏ’’ནྟི? ‘‘མཡ྄ཧཾ, སེཊྛཱི’’ཏི. ‘‘ཀཱིཝ དཱུརོ ཨིཏོ སཱཝཏྠཱི’’ཏི? ‘‘སཏྟཡོཛནམཏྠཀེ’’ཏི. ‘‘ཨནྟོནགརཾ སམྦཱདྷཾ, ཨམྷཱཀཾ པརིཛནོ མཧནྟོ, སཙེ རོཙེཐ, ཨིདྷེཝ ཝསེཡྻཱམ, དེཝཱ’’ཏི. རཱཛཱ ‘‘སཱདྷཱུ’’ཏི སམྤཊིཙྪིཏྭཱ ཏསྨིཾ ཋཱནེ ནགརཾ མཱཔེཏྭཱ ཏསྶ དཏྭཱ ཨགམཱསི. ཏསྨིཾ པདེསེ སཡཾ ཝསནཊྛཱནསྶ གཧིཏཏྟཱ ནགརསྶ སཱཀེཏནྟྭེཝ ནཱམཾ ཨཧོསི.

སཱཝཏྠིཡམྤི ཁོ མིགཱརསེཊྛིནོ པུཏྟོ པུཎྞཝཌྜྷནཀུམཱརོ ནཱམ ཝཡཔྤཏྟོ ཨཧོསི. ཨཐ ནཾ མཱཏཱཔིཏརོ ཝདིཾསུ – ‘‘ཏཱཏ, ཏཝ རུཙྩནཊྛཱནེ ཨེཀཾ དཱརིཀཾ ཨུཔདྷཱརེཧཱི’’ཏི. ‘‘‘མཡ྄ཧཾ ཨེཝརཱུཔཱཡ བྷརིཡཱཡ ཀིཙྩཾ ནཏྠཱི’ཏི, པུཏྟ, མཱ ཨེཝཾ ཀརི, ཀུལཾ ནཱམ ཨཔུཏྟཀཾ ན ཏིཊྛཏཱི’’ཏི. སོ པུནཔྤུནཾ ཝུཙྩམཱནོ ‘‘ཏེན ཧི པཉྩཀལྱཱཎསམནྣཱགཏཾ དཱརིཀཾ ལབྷམཱནོ ཏུམྷཱཀཾ ཝཙནཾ ཀརིསྶཱམཱི’’ཏི ཨཱཧ. ‘‘ཀཱནི པནེཏཱནི པཉྩ ཀལྱཱཎཱནི ནཱམ, ཏཱཏཱ’’ཏི. ཀེསཀལྱཱཎཾ, མཾསཀལྱཱཎཾ, ཨཊྛིཀལྱཱཎཾ, ཚཝིཀལྱཱཎཾ, ཝཡཀལྱཱཎནྟི. མཧཱཔུཉྙཱཡ ཧི ཨིཏྠིཡཱ ཀེསཱ མོརཀལཱཔསདིསཱ ཧུཏྭཱ མུཉྩིཏྭཱ ཝིསྶཊྛཱ ནིཝཱསནནྟཾ པཧརིཏྭཱ ནིཝཏྟིཏྭཱ ཨུདྡྷགྒཱ ཏིཊྛནྟི, ཨིདཾ ཀེསཀལྱཱཎཾ ནཱམ, དནྟཱཝརཎཾ བིམྦཕལསདིསཾ ཝཎྞསམྤནྣཾ སམཾ སུཕུསིཏཾ ཧོཏི, ཨིདཾ མཾསཀལྱཱཎཾ ནཱམ, དནྟཱ སུཀྐཱ སམཱ ཨཝིརལཱ༹ ཨུསྶཱཔེཏྭཱ ཋཔིཏཝཛིརཔནྟི ཝིཡ སམཙྪིནྣསངྑཔནྟི ཝིཡ ཙ སོབྷནྟི, ཨིདཾ ཨཊྛིཀལྱཱཎཾ ནཱམ, ཀཱལི༹ཡཱ ཙུཎྞཀཱདཱིཧི ཨཝིལིཏྟོ ཨེཝ ཚཝིཝཎྞོ སིནིདྡྷོ ནཱིལུཔྤལདཱམསདིསོ ཧོཏི, ཨོདཱཏཱཡ ཙ ཀཎིཀཱརཔུཔྥདཱམསདིསོ ཧོཏི, ཨིདཾ ཚཝིཀལྱཱཎཾ ནཱམ, དསཀྑཏྟུཾ ཝིཛཱཏཱཔི ཁོ པན སཀིཾ ཝིཛཱཏཱ ཝིཡ ཨཝིགཏཡོབྦནཱཡེཝ ཧོཏི, ཨིདཾ ཝཡཀལྱཱཎཾ ནཱམ ཧོཏི. ཨཐསྶ མཱཏཱཔིཏརོ ཨཊྛུཏྟརསཏབྲཱཧྨཎེ ནིམནྟེཏྭཱ བྷོཛེཏྭཱ ‘‘པཉྩཀལྱཱཎསམནྣཱགཏཱ ཨིཏྠིཡོ ནཱམ ཧོནྟཱི’’ཏི པུཙྪིཾསུ. ‘‘ཨཱམ, ཧོནྟཱི’’ཏི. ‘‘ཏེན ཧི ཨེཝརཱུཔཾ དཱརིཀཾ པརིཡེསིཏུཾ ཨཊྛ ཛནཱ གཙྪནྟཱུ’’ཏི བཧུཾ དྷནཾ དཏྭཱ ‘‘ཨཱགཏཀཱལེ ཝོ ཀཏྟབྦཾ ཛཱནིསྶཱམ, གཙྪཐ, ཨེཝརཱུཔཾ དཱརིཀཾ པརིཡེསཐ, དིཊྛཀཱལེ ཙ ཨིམཾ པིལནྡྷནཾ དདེཡྻཱཐཱ’’ཏི སཏསཧསྶགྒྷནིཀཾ སུཝཎྞམཱལཾ དཏྭཱ ཨུཡྻོཛེསུཾ.

ཏེ མཧནྟམཧནྟཱནི ནགརཱནི གནྟྭཱ པརིཡེསམཱནཱ པཉྩཀལྱཱཎསམནྣཱགཏཾ དཱརིཀཾ ཨདིསྭཱ ནིཝཏྟིཏྭཱ ཨཱགཙྪནྟཱ ཝིཝཊནཀྑཏྟདིཝསེ སཱཀེཏཾ ཨནུཔྤཏྟཱ – ‘‘ཨཛྫ ཨམྷཱཀཾ ཀམྨཾ ནིཔྥཛྫིསྶཏཱི’’ཏི ཙིནྟཡིཾསུ. ཏསྨིཾ པན ནགརེ ཨནུསཾཝཙྪརཾ ཝིཝཊནཀྑཏྟཾ ནཱམ ཧོཏི. ཏདཱ བཧི ཨནིཀྑམནཀུལཱནིཔི པརིཝཱརེན སདྡྷིཾ གེཧཱ ནིཀྑམིཏྭཱ ཨཔྤཊིཙྪནྣེན སརཱིརེན པདསཱཝ ནདཱིཏཱིརཾ གཙྪནྟི. ཏསྨིཾ དིཝསེ ཁཏྟིཡམཧཱསཱལཱདཱིནཾ པུཏྟཱཔི ‘‘ཨཏྟནོ སམཱནཛཱཏིཀཾ མནཱཔཾ ཀུལདཱརིཀཾ དིསྭཱ མཱལཱགུལེ༹ན པརིཀྑིཔིསྶཱམཱ’’ཏི ཏཾ ཏཾ མགྒཾ ནིསྶཱཡ ཏིཊྛནྟི. ཏེཔི ཁོ བྲཱཧྨཎཱ ནདཱིཏཱིརེ ཨེཀཾ སཱལཾ པཝིསིཏྭཱ ཨཊྛཾསུ. ‘‘ཏསྨིཾ ཁཎེ ཝིསཱཁཱ པནྣརསསོལ༹སཝསྶུདྡེསིཀཱ ཧུཏྭཱ སབྦཱབྷརཎཔཊིམཎྜིཏཱ པཉྩཧི ཀུམཱརིཀཱསཏེཧི པརིཝུཏཱ ནདིཾ གནྟྭཱ ནྷཱཡིསྶཱམཱི’’ཏི ཏཾ པདེསཾ པཏྟཱ, ཨཐ ཁོ མེགྷོ ཨུཊྛཧིཏྭཱ པཱཝསྶི. པཉྩསཏཱ ཀུམཱརིཀཱཡོ ཝེགེན གནྟྭཱ སཱལཾ པཝིསིཾསུ. བྲཱཧྨཎཱ ཨོལོཀེནྟཱ ཏཱསུ ཨེཀམྤི པཉྩཀལྱཱཎསམནྣཱགཏཾ ན པསྶིཾསུ. ཨཐ ཝིསཱཁཱ པཀཏིགམནེནེཝ སཱལཾ པཱཝིསི, ཝཏྠཱབྷརཎཱནི ཏེམིཾསུ. བྲཱཧྨཎཱ ཏསྶཱ ཙཏྟཱརི ཀལྱཱཎཱནི དིསྭཱ དནྟེ པསྶིཏུཀཱམཱ ‘‘ཨལསཛཱཏིཀཱ ཨམྷཱཀཾ དྷཱིཏཱ, ཨེཏིསྶཱ སཱམིཀོ ཀཉྫིཀམཏྟམྤི ན ལབྷིསྶཏི མཉྙེ’’ཏི ཨཉྙམཉྙཾ ཀཐཡིཾསུ. ཨཐ ནེ ཝིསཱཁཱ ཨཱཧ – ‘‘ཀཾ ཝདེཐ ཏུམྷེ’’ཏི? ‘‘ཏཾ ཀཐེམ, ཨམྨཱ’’ཏི. མདྷུརོ ཧི ཏསྶཱ སདྡོ ཀཾསཏཱལ༹སརོ ཝིཡ ནིཙྪརཏི. ཨཐ ནེ པུན མདྷུརསདྡེན ‘‘ཀིཾ ཀཱརཎཱ བྷཎཐཱ’’ཏི པུཙྪི. ‘‘ཏཝ པརིཝཱརིཏྠིཡོ ཝཏྠཱལངྐཱརེ ཨཏེམེཏྭཱ ཝེགེན སཱལཾ པཝིཊྛཱ, ཏུཡ྄ཧཾ ཨེཏྟཀཾ ཋཱནཾ ཝེགེན ཨཱགམནམཏྟམྤི ནཏྠི, ཝཏྠཱབྷརཎཱནི ཏེམེཏྭཱ ཨཱགཏཱསི. ཏསྨཱ ཀཐེམ, ཨམྨཱ’’ཏི.

‘‘ཏཱཏཱ, ཨེཝཾ མཱ ཝདེཐ, ཨཧཾ ཨེཏཱཧི བལཝཏརཱ, ཀཱརཎཾ པན སལླཀྑེཏྭཱ ཛཝེན ནཱགཏཱམྷཱི’’ཏི. ‘‘ཀིཾ, ཨམྨཱ’’ཏི? ‘‘ཏཱཏཱ, ཙཏྟཱརོ ཛནཱ ཛཝམཱནཱ ན སོབྷནྟི, ཨཔརམྤི ཀཱརཎཾ ཨཏྠཱི’’ཏི. ‘‘ཀཏམེ ཙཏྟཱརོ ཛནཱ ཛཝམཱནཱ ན སོབྷནྟི, ཨམྨཱ’’ཏི? ཏཱཏཱ, ཨབྷིསིཏྟརཱཛཱ ཏཱཝ སབྦཱབྷརཎཔཊིམཎྜིཏོ ཀཙྪཾ བནྡྷིཏྭཱ རཱཛངྒཎེ ཛཝམཱནོ ན སོབྷཏི, ‘‘ཀིཾ ཨཡཾ རཱཛཱ གཧཔཏིཀོ ཝིཡ དྷཱཝཏཱི’’ཏི ཨཉྙདཏྠུ གརཧཾ ལབྷཏི, སཎིཀཾ གཙྪནྟོཝ སོབྷཏི. རཉྙོ མངྒལཧཏྠཱིཔི ཨལངྐཏོ ཛཝམཱནོ ན སོབྷཏི, ཝཱརཎལཱིལཱ༹ཡ གཙྪནྟོཝ སོབྷཏི. པབྦཛིཏོ ཛཝམཱནོ ན སོབྷཏི, ‘‘ཀིཾ ཨཡཾ སམཎོ གིཧཱི ཝིཡ དྷཱཝཏཱི’’ཏི ཀེཝལཾ གརཧམེཝ ལབྷཏི, སམིཏགམནེན པན སོབྷཏི. ཨིཏྠཱི ཛཝམཱནཱ ན སོབྷཏི, ‘‘ཀིཾ ཨེསཱ ཨིཏྠཱི པུརིསོ ཝིཡ དྷཱཝཏཱི’’ཏི གརཧིཏབྦཱཝ ཧོཏི, ‘‘ཨིམེ ཙཏྟཱརོ ཛནཱ ཛཝམཱནཱ ན སོབྷནྟི, ཏཱཏཱ’’ཏི. ‘‘ཀཏམཾ པན ཨཔརཾ ཀཱརཎཾ, ཨམྨཱ’’ཏི? ‘‘ཏཱཏཱ, མཱཏཱཔིཏརོ ནཱམ དྷཱིཏརཾ ཨངྒཔཙྩངྒཱནི སཎྛཱཔེཏྭཱ པོསེནྟི. མཡཉྷི ཝིཀྐིཎེཡྻབྷཎྜཾ ནཱམ, ཨམྷེ པརཀུལཔེསནཏྠཱཡ པོསེནྟི. སཙེ ཛཝམཱནཱནཾ ནིཝཏྠདུསྶཀཎྞེ ཝཱ ཨཀྐམིཏྭཱ བྷཱུམིཡཾ ཝཱ པཀྑལིཏྭཱ པཏིཏཀཱལེ ཧཏྠོ ཝཱ པཱདོ ཝཱ བྷིཛྫེཡྻ, ཀུལསྶེཝ བྷཱརོ བྷཝེཡྻ, པསཱདྷནབྷཎྜཾ པན མེ ཏེམེཏྭཱ སུསྶིསྶཏི. ཨིམཾ ཀཱརཎཾ སལླཀྑེཏྭཱ ན དྷཱཝིཏཱམྷི, ཏཱཏཱ’’ཏི.

བྲཱཧྨཎཱ ཏསྶཱ ཀཐནཀཱལེ དནྟསམྤཏྟིཾ དིསྭཱ ‘‘ཨེཝརཱུཔཱ ནོ དནྟསམྤཏྟི དིཊྛཔུབྦཱ’’ཏི ཏསྶཱ སཱདྷུཀཱརཾ དཏྭཱ, ‘‘ཨམྨ, ཏུཡ྄ཧམེཝེསཱ ཨནུཙྪཝིཀཱ’’ཏི ཝཏྭཱ ཏཾ སུཝཎྞམཱལཾ པིལནྡྷཡིཾསུ. ཨཐ ནེ པུཙྪི – ‘‘ཀཏརནགརཏོ ཨཱགཏཱཏྠ, ཏཱཏཱ’’ཏི? ‘‘སཱཝཏྠིཏོ, ཨམྨཱ’’ཏི. ‘‘སེཊྛིཀུལཾ ཀཏརཾ ནཱམཱ’’ཏི? ‘‘མིགཱརསེཊྛི ནཱམ, ཨམྨཱ’’ཏི. ‘‘ཨཡྻཔུཏྟོ ཀོ ནཱམཱ’’ཏི? ‘‘པུཎྞཝཌྜྷནཀུམཱརོ ནཱམ, ཨམྨཱ’’ཏི. སཱ ‘‘སམཱནཛཱཏིཀཾ ནོ ཀུལ’’ནྟི ཨདྷིཝཱསེཏྭཱ པིཏུ སཱསནཾ པཧིཎི ‘‘ཨམྷཱཀཾ རཐཾ པེསེཏཱུ’’ཏི. ཀིཉྩཱཔི ཧི སཱ ཨཱགམནཀཱལེ པདསཱ ཨཱགཏཱ, སུཝཎྞམཱལཱཡ པན པིལནྡྷནཀཱལཏོ པཊྛཱཡ ཏཐཱ གནྟུཾ ན ལབྷཏི, ཨིསྶརདཱརིཀཱ རཐཱདཱིཧི གཙྪནྟི, ཨིཏརཱ པཀཏིཡཱནཀཾ ཝཱ ཨབྷིརུཧནྟི, ཚཏྟཾ ཝཱ ཏཱལཔཎྞཾ ཝཱ ཨུཔརི ཀརོནྟི, ཏསྨིམྤི ཨསཏི ནིཝཏྠསཱཊཀསྶ དསནྟཾ ཨུཀྑིཔིཏྭཱ ཨཾསེ ཁིཔནྟཱ གཙྪནྟི ཨེཝ. ཏསྶཱ པན པིཏཱ པཉྩ རཐསཏཱནི པེསེསི. སཱ སཔརིཝཱརཱ རཐཾ ཨཱརུཡ྄ཧ གཏཱ. བྲཱཧྨཎཱཔི ཨེཀཏོཝ ཨགམཾསུ. ཨཐ ནེ སེཊྛི པུཙྪི – ‘‘ཀུཏོ ཨཱགཏཱཏྠཱ’’ཏི? ‘‘སཱཝཏྠིཏོ མཧཱསེཊྛཱི’’ཏི. ‘‘སེཊྛི ཀཏརོ ནཱམཱ’’ཏི? ‘‘མིགཱརསེཊྛི ནཱམཱ’’ཏི. ‘‘པུཏྟོ ཀོ ནཱམཱ’’ཏི? ‘‘པུཎྞཝཌྜྷནཀུམཱརོ ནཱམ མཧཱསེཊྛཱི’’ཏི. ‘‘དྷནཾ ཀིཏྟཀ’’ནྟི? ‘‘ཙཏྟཱལཱིསཀོཊིཡོ མཧཱསེཊྛཱི’’ཏི. ‘‘དྷནཾ ཏཱཝ ཨམྷཱཀཾ དྷནཾ ཨུཔཱདཱཡ ཀཱཀཎིཀམཏྟཾ, དཱརིཀཱཡ པན ཨཱརཀྑམཏྟཱཡ ལདྡྷཀཱལཏོ པཊྛཱཡ ཀིཾ ཨཉྙེན ཀཱརཎེནཱ’’ཏི ཨདྷིཝཱསེསི. སོ ཏེསཾ སཀྐཱརཾ ཀཏྭཱ ཨེཀཱཧདྭཱིཧཾ ཝསཱཔེཏྭཱ ཨུཡྻོཛེསི.

ཏེ སཱཝཏྠིཾ གནྟྭཱ མིགཱརསེཊྛིསྶ ‘‘ལདྡྷཱ ནོ དཱརིཀཱ’’ཏི ཨཱརོཙཡིཾསུ. ‘‘ཀསྶ དྷཱིཏཱ’’ཏི? ‘‘དྷནཉྩཡསེཊྛིནོ’’ཏི. སོ ‘‘མཧཱཀུལསྶ མེ དཱརིཀཱ ལདྡྷཱ, ཁིཔྤམེཝ ནཾ ཨཱནེཏུཾ ཝཊྚཏཱི’’ཏི ཏཏྠ གམནཏྠཾ རཉྙོ ཨཱརོཙེསི. རཱཛཱ ‘‘‘མཧཱཀུལཾ ཨེཏཾ མཡཱ བིམྦིསཱརསྶ སནྟིཀཱ ཨཱནེཏྭཱ སཱཀེཏེ ནིཝེསིཏཾ, ཏསྶ སམྨཱནཾ ཀཱཏུཾ ཝཊྚཏཱི’ཏི ཨཧམྤི ཨཱགམིསྶཱམཱི’’ཏི ཨཱཧ, སོ ‘‘སཱདྷུ, དེཝཱ’’ཏི ཝཏྭཱ དྷནཉྩཡསེཊྛིནོ སཱསནཾ པེསེསི – ‘‘མཡི ཨཱགཙྪནྟེ རཱཛཱཔི ཨཱགམིསྶཏི, མཧནྟཾ རཱཛབལཾ ཨེཏྟཀསྶ ཛནསྶ ཀཏྟབྦཡུཏྟཀཾ ཀཱཏུཾ སཀྑིསྶསི, ན སཀྑིསྶསཱི’’ཏི? ཨིཏརོཔི ‘‘སཙེཔི དས རཱཛཱནོ ཨཱགཙྪནྟི, ཨཱགཙྪནྟཱུ’’ཏི པཊིསཱསནཾ པེསེསི. མིགཱརསེཊྛི ཏཱཝ མཧནྟེ ནགརེ གེཧགོཔཀམཏྟཾ ཋཔེཏྭཱ སེསཛནཾ ཨཱདཱཡ གནྟྭཱ ཨཌྜྷཡོཛནམཏྟེ ཋཱནེ ཋཏྭཱ ‘‘ཨཱགཏཱམྷཱ’’ཏི སཱསནཾ པཧིཎི. དྷནཉྩཡསེཊྛི བཧུཔཎྞཱཀཱརཾ པེསེཏྭཱ དྷཱིཏརཱ སདྡྷིཾ མནྟེསི, ‘‘ཨམྨ, སསུརོ ཀིར ཏེ ཀོསལརཉྙཱ སདྡྷིཾ ཨཱགཏོ, ཏསྶ ཀཏརཾ གེཧཾ པཊིཛགྒིཏབྦཾ, རཉྙོ ཀཏརཾ, ཨུཔརཱཛཱདཱིནཾ ཀཏརཱནཱི’’ཏི? པཎྜིཏཱ སེཊྛིདྷཱིཏཱ ཝཛིརགྒཏིཁིཎཉཱཎཱ ཀཔྤསཏསཧསྶཾ པཏྠིཏཔཏྠནཱ ཨབྷིནཱིཧཱརསམྤནྣཱ ‘‘སསུརསྶ མེ ཨསུཀགེཧཾ པཊིཛགྒཐ, རཉྙོ ཨསུཀགེཧཾ, ཨུཔརཱཛཱདཱིནཾ ཨསུཀཱནཱི’’ཏི སཾཝིདཧིཏྭཱ དཱསཀམྨཀརེ པཀྐོསཱཔེཏྭཱ ‘‘ཨེཏྟཀཱ རཉྙོ ཀཏྟབྦཀིཙྩཾ ཀརོཐ, ཨེཏྟཀཱ ཨུཔརཱཛཱདཱིནཾ, ཧཏྠིཨསྶཱདཡོཔི ཏུམྷེཡེཝ པཊིཛགྒཐ, ཨསྶབནྡྷཱདཡོཔི ཨཱགནྟྭཱ མངྒལཚཎཾ ཨནུབྷཝིསྶནྟཱི’’ཏི སཾཝིདཧི. ‘‘ཀིཾ ཀཱརཎཱ’’? ‘‘‘མཡཾ ཝིསཱཁཱཡ མངྒལཊྛཱནཾ གནྟྭཱ ན ཀིཉྩི ལབྷིམྷ, ཨསྶརཀྑཎཱདཱིནི ཀརོནྟཱ སུཁཾ ན ཝིཙརིམྷཱ’ཏི ཀེཙི ཝཏྟུཾ མཱ ལབྷིཾསཱུ’’ཏི.

ཏཾ དིཝསམེཝ ཝིསཱཁཱཡ པིཏཱ པཉྩསཏེ སུཝཎྞཀཱརེ པཀྐོསཱཔེཏྭཱ ‘‘དྷཱིཏུ མེ མཧཱལཏཱཔསཱདྷནཾ ནཱམ ཀརོཐཱ’’ཏི རཏྟསུཝཎྞསྶ ནིཀྑསཧསྶཾ, ཏདནུརཱུཔཱནི ཙ རཛཏམཎིམུཏྟཱཔཝཱལ༹ཝཛིརཱདཱིནི དཱཔེསི. རཱཛཱ ཀཏིཔཱཧཾ ཝསིཏྭཱཝ དྷནཉྩཡསེཊྛིསྶ སཱསནཾ པཧིཎི ‘‘ན སཀྐཱ སེཊྛིནཱ ཨམྷཱཀཾ ཙིརཾ པོསནཾ ནཱམ ཀཱཏུཾ, དཱནི དཱརིཀཱཡ གམནཀཱལཾ ཛཱནཱཏཱུ’’ཏི. སོཔི རཉྙོ སཱསནཾ པེསེསི – ‘‘ཨིདཱནི ཝསྶཀཱལོ ཨཱགཏོ, ན སཀྐཱ ཙཏུམཱསཾ ཝིཙརིཏུཾ, ཏུམྷཱཀཾ བལཀཱཡསྶ ཡཾ ཡཾ ལདྡྷུཾ ཝཊྚཏི, སབྦཾ ཏཾ མམ བྷཱརོ, མཡཱ པེསིཏཀཱལེ དེཝོ གམིསྶཏཱི’’ཏི. ཏཏོ པཊྛཱཡ སཱཀེཏནགརཾ ནིཙྩནཀྑཏྟཾ ཝིཡ ཨཧོསི. རཱཛཱནཾ ཨཱདིཾ ཀཏྭཱ སབྦེསཾ མཱལཱགནྡྷཝཏྠཱདཱིནི པཊིཡཏྟཱནེཝ ཧོནྟི. ཏཏོ ཏེ ཛནཱ ཙིནྟཡིཾསུ – ‘‘སེཊྛི ཨམྷཱཀམེཝ སཀྐཱརཾ ཀརོཏཱི’’ཏི, ཨེཝཾ ཏཡོ མཱསཱ ཨཏིཀྐནྟཱ, པསཱདྷནཾ པན ཏཱཝ ན ནིཊྛཱཏི. ཀམྨནྟཱདྷིཊྛཱཡཀཱ ཨཱགནྟྭཱ སེཊྛིནོ ཨཱརོཙེསུཾ – ‘‘ཨཉྙཾ ཨསནྟཾ ནཱམ ནཏྠི, བལཀཱཡསྶ པན བྷཏྟཔཙནདཱརཱུནི ནཔྤཧོནྟཱི’’ཏི. ‘‘གཙྪཐ, ཏཱཏཱ, ཨིམསྨིཾ ནགརེ པརིཛིཎྞཱ ཧཏྠིསཱལཱདཡོ ཙེཝ པརིཛིཎྞཀཱནི ཙ གེཧཱནི གཧེཏྭཱ པཙཐཱ’’ཏི. ཨེཝཾ པཙནྟཱནམྤི ཨཌྜྷམཱསོ ཨཏིཀྐནྟོ. ཏཏོ པུནཔི ‘‘དཱརཱུནི ནཏྠཱི’’ཏི ཨཱརོཙཡིཾསུ. ‘‘ཨིམསྨིཾ ཀཱལེ ན སཀྐཱ དཱརཱུནི ལདྡྷུཾ, དུསྶཀོཊྛཱགཱརཱནི ཝིཝརིཏྭཱ ཐཱུལསཱཊཀེཧི ཝཊྚིཡོ ཀཏྭཱ ཏེལཙཱཊཱིསུ ཏེམེཏྭཱ བྷཏྟཾ པཙཐཱ’’ཏི. ཏེ ཨཌྜྷམཱསཾ ཏཐཱ ཨཀཾསུ. ཨེཝཾ ཙཏྟཱརོ མཱསཱ ཨཏིཀྐནྟཱ, པསཱདྷནམྤི ནིཊྛིཏཾ.

ཏསྨིཾ པསཱདྷནེ ཙཏསྶོ ཝཛིརནཱལི༹ཡོ ཨུཔཡོགཾ ཨགམཾསུ, མུཏྟཱནཾ ཨེཀཱདས ནཱལི༹ཡོ, པཝཱལ༹སྶ བཱཝཱིསཏི ནཱལི༹ཡོ, མཎཱིནཾ ཏེཏྟིཾས ནཱལི༹ཡོ. ཨིཏི ཨེཏེཧི ཙ ཨཉྙེཧི ཙ རཏནེཧི ནིཊྛཱནཾ ཨགམཱསི. ཨསུཏྟམཡཾ པསཱདྷནཾ རཛཏེན སུཏྟཀིཙྩཾ ཀརིཾསུ. ཏཾ སཱིསེ པཊིམུཀྐཾ པཱདཔིཊྛིཾ གཙྪཏི. ཏསྨིཾ ཏསྨིཾ ཋཱནེ མུདྡིཀཱ ཡོཛེཏྭཱ ཀཏཱ སུཝཎྞམཡཱ གཎྛིཀཱ ཧོནྟི, རཛཏམཡཱ པཱསཀཱ, མཏྠཀམཛ྄ཛྷེ ཨེཀཱ མུདྡིཀཱ, དྭཱིསུ ཀཎྞཔིཊྛཱིསུ དྭེ, གལཝཱཊཀེ ཨེཀཱ, དྭཱིསུ ཛཏྟཱུསུ དྭེ, དྭཱིསུ ཀཔྤརེསུ དྭེ, དྭཱིསུ ཀཊིཔསྶེསུ དྭེཏི. ཏསྨིཾ ཁོ པན པསཱདྷནེ ཨེཀཾ མོརཾ ཀརིཾསུ, ཏསྶ དཀྑིཎཔཀྑེ རཏྟསུཝཎྞམཡཱནི པཉྩ པཏྟསཏཱནི ཨཧེསུཾ, ཝཱམཔཀྑེ པཉྩ པཏྟསཏཱནི, ཏུཎྜཾ པཝཱལ༹མཡཾ, ཨཀྑཱིནི མཎིམཡཱནི, ཏཐཱ གཱིཝཱ ཙ པིཉྪཱནི ཙ, པཏྟནཱལི༹ཡོ རཛཏམཡཱ, ཏཐཱ ཛངྒྷཱཡོ. སོ ཝིསཱཁཱཡ མཏྠཀམཛ྄ཛྷེ པབྦཏཀཱུཊེ ཋཏྭཱ ནཙྩནམཡཱུརོ ཝིཡ ཁཱཡཏི. པཏྟནཱལི༹སཧསྶསྶ སདྡོ དིབྦསངྒཱིཏཾ ཝིཡ པཉྩངྒིཀཏཱུརིཡགྷོསོ ཝིཡ ཙ པཝཏྟཏི. སནྟིཀཾ ཨུཔགཏཱཡེཝ ཏསྶཱ ཨམོརབྷཱཝཾ ཛཱནནྟི. པསཱདྷནཾ ནཝཀོཊིཨགྒྷནཀཾ ཨཧོསི, སཏསཧསྶཾ ཧཏྠཀམྨམཱུལཾ དཱིཡིཏྠ.

‘‘ཀིསྶ པན ནིསྶནྡེན ཏཱཡེཏཾ པསཱདྷནཾ ལདྡྷ’’ནྟི? སཱ ཀིར ཀསྶཔསམྨཱསམྦུདྡྷཀཱལེ ཝཱིསཏིཡཱ བྷིཀྑུསཧསྶཱནཾ ཙཱིཝརསཱཊཀཾ དཏྭཱ སུཏྟམྤི སཱུཙིཡོཔི རཛནམྤི ཨཏྟནོ སནྟཀམེཝ ཨདཱསི. ཏསྶ ཙཱིཝརདཱནསྶ ནིསྶནྡེན ཨིམཾ མཧཱལཏཱཔསཱདྷནཾ ལབྷི. ཨིཏྠཱིནཉྷི ཙཱིཝརདཱནཾ མཧཱལཏཱཔསཱདྷནབྷཎྜེན མཏྠཀཾ པཔྤོཏི, པུརིསཱནཾ ཨིདྡྷིམཡཔཏྟཙཱིཝརེནཱཏི. ཨེཝཾ མཧཱསེཊྛི ཙཏཱུཧི མཱསེཧི དྷཱིཏུ པརིཝཙྪཾ ཀཏྭཱ ཏསྶཱ དེཡྻདྷམྨཾ དདམཱནོ ཀཧཱཔཎཔཱུརཱནི པཉྩ སཀཊསཏཱནི ཨདཱསི, སུཝཎྞབྷཱཛནཔཱུརཱནི པཉྩ, རཛཏབྷཱཛནཔཱུརཱནི པཉྩ, ཏམྦབྷཱཛནཔཱུརཱནི པཉྩ, པཏྟུཎྞཝཏྠཀོསེཡྻཝཏྠཔཱུརཱནི པཉྩ, སཔྤིཔཱུརཱནི པཉྩ, ཏེལཔཱུརཱནི པཉྩ, སཱལིཏཎྜུལཔཱུརཱནི པཉྩ, ནངྒལཕཱལཱདིཨུཔཀརཎཔཱུརཱནི པཉྩསཀཊསཏཱནི ཨདཱསི. ཨེཝཾ ཀིརསྶ ཨཧོསི – ‘‘མམ དྷཱིཏུ གཏཊྛཱནེ ‘ཨསུཀེན ནཱམ མེ ཨཏྠོ’ཏི མཱ པརསྶ གེཧདྭཱརཾ པཧིཎཱི’’ཏི. ཏསྨཱ སབྦཱུཔཀརཎཱནི དཱཔེསི. ཨེཀེཀསྨིཾ རཐེ སབྦཱལངྐཱརཔཊིམཎྜིཏཱ ཏིསྶོ ཏིསྶོ ཝཎྞདཱསིཡོ ཋཔེཏྭཱ པཉྩ རཐསཏཱནི ཨདཱསི. ‘‘ཨེཏཾ ནྷཱཔེནྟིཡོ བྷོཛེནྟིཡོ ཨལངྐརོནྟིཡོ ཝིཙརཐཱ’’ཏི དིཡཌྜྷསཧསྶཔརིཙཱརིཀཱཡོ ཨདཱསི. ཨཐསྶ ཨེཏདཧོསི – ‘‘མམ དྷཱིཏུ གཱཝོ དསྶཱམཱི’’ཏི. སོ པུརིསེ ཨཱཎཱཔེསི – ‘‘གཙྪཐ བྷཎེ ཙཱུལ༹ཝཛསྶ དྭཱརཾ ཝིཝརིཏྭཱ ཏཱིསུ གཱཝུཏེསུ ཏིསྶོ བྷེརིཡོ གཧེཏྭཱ ཏིཊྛཐ, པུཐུལཏོ ཨུསབྷམཏྟེ ཋཱནེ ཨུབྷོསུ པསྶེསུ ཏིཊྛཐ. གཱཝཱིནཾ ཏཏོ པརཾ གནྟུཾ མཱ ཨདཏྠ. ཨེཝཾ ཋིཏཀཱལེ བྷེརིསཉྙཾ ཀརེཡྻཱཐཱ’’ཏི. ཏེ ཏཐཱ ཨཀཾསུ. ཏེ གཱཝཱིནཾ ཝཛཏོ ནིཀྑམིཏྭཱ གཱཝུཏཾ གཏཀཱལེ བྷེརིསཉྙཾ ཨཀཾསུ, པུན ཨཌྜྷཡོཛནཾ གཏཀཱལེ ཨཀཾསུ. པུནཔི ཏིགཱཝུཏཾ གཏཀཱལེ བྷེརིསཉྙཾ ཨཀཾསུ, པུཐུལཏོ གམནཉྩ ནིཝཱརེསུཾ. ཨེཝཾ དཱིགྷཏོ ཏིགཱཝུཏེ, པུཐུལཏོ ཨུསབྷམཏྟེ ཋཱནེ གཱཝིཡོ ཨཉྙམཉྙཾ ནིགྷཾསནྟིཡོ ཨཊྛཾསུ.

མཧཱསེཊྛི ‘‘མམ དྷཱིཏུ ཨེཏྟཀཱ གཱཝོ ཨལཾ, དྭཱརཾ པིདཧཐཱ’’ཏི ཝཛདྭཱརཾ པིདཧཱཔེསི. དྭཱརསྨིཾ པིདཧིཏེ ཝིསཱཁཱཡ པུཉྙབལེན བལཝགཱཝོ ཙ དྷེནུཡོ ཙ ཨུཔྤཏིཏྭཱ ཨུཔྤཏིཏྭཱ ནིཀྑམིཾསུ. མནུསྶཱནཾ ཝཱརེནྟཱནཾ ཝཱརེནྟཱནམེཝ སཊྛིསཧསྶཱ བལཝགཱཝོ ཙ སཊྛིསཧསྶཱ དྷེནུཡོ ཙ ནིཀྑནྟཱ, ཏཏྟཀཱ བལཝཝཙྪཱ ཏཱསཾ དྷེནཱུནཾ ཨུསབྷཱ ཨུཔྤཏིཏྭཱ ཨནུབནྡྷཱ ཨཧེསུཾ. ‘‘ཀིསྶ པན ནིསྶནྡེན ཨེཝཾ གཱཝོ གཏཱ’’ཏི? ནིཝཱརེནྟཱནཾ ནིཝཱརེནྟཱནཾ དིནྣདཱནསྶ. སཱ ཀིར ཀསྶཔསམྨཱསམྦུདྡྷཀཱལེ ཀིཀིསྶ རཉྙོ སཏྟནྣཾ དྷཱིཏཱནཾ ཀནིཊྛཱ སངྒྷདཱསཱི ནཱམ ཧུཏྭཱ ཝཱིསཏིཡཱ བྷིཀྑུསཧསྶཱནཾ པཉྩགོརསདཱནཾ དདམཱནཱ ཐེརཱནཉྩ དཧརཱནཉྩ སཱམཎེརཱནཉྩ པཏྟཾ པིདཧིཏྭཱ, ‘‘ཨལཾ, ཨལ’’ནྟི ནིཝཱརེནྟཱནམྤི ‘‘ཨིདཾ མདྷུརཾ, ཨིདཾ མནཱཔ’’ནྟི ཨདཱསི. ཨེཝཾ ཏསྶ ནིསྶནྡེན ཝཱརིཡམཱནཱཔི གཱཝོ ནིཀྑམིཾསུ. སེཊྛིནཱ ཨེཏྟཀསྶ དྷནསྶ དིནྣཀཱལེ སེཊྛིབྷརིཡཱ ཨཱཧ – ‘‘ཏུམྷེཧི མཡ྄ཧཾ དྷཱིཏུ སབྦཾ སཾཝིདཧིཏཾ, ཝེཡྻཱཝཙྩཀརཱ པན དཱསདཱསིཡོ ན སཾཝིདཧིཏཱ, ཀིཾ ཀཱརཎཱ’’ཏི? ‘‘མམ དྷཱིཏརི སསིནེཧནིསྶིནེཧཱནཾ ཛཱནནཏྠཾ. ཨཧཉྷི ཏཱཡ སདྡྷིཾ ཨཱགཙྪམཱནཀེ གཱིཝཱཡ གཧེཏྭཱ ན པཧིཎཱམི, ཡཱནཾ ཨཱརུཡ྄ཧ གམནཀཱལེཡེཝ ཨེཏཱཡ སདྡྷིཾ གནྟུཀཱམཱ གཙྪནྟུ, མཱ ཨགནྟུཀཱམཱཏི ཝཀྑཱམཱི’’ཏི ཨཱཧ.

ཨཐ ‘‘སྭེ མམ དྷཱིཏཱ གམིསྶཏཱི’’ཏི གབྦྷེ ནིསིནྣོ དྷཱིཏརཾ སམཱིཔེ ནིསཱིདཱཔེཏྭཱ, ‘‘ཨམྨ, པཏིཀུལེ ཝསནྟིཡཱ ནཱམ ཨིམཉྩ ཨིམཉྩ ཨཱཙཱརཾ རཀྑིཏུཾ ཝཊྚཏཱི’’ཏི ཨོཝཱདམདཱསི. ཨཡམྤི མིགཱརསེཊྛི ཨནནྟརགབྦྷེ ནིསིནྣོ དྷནཉྩཡསེཊྛིནོ ཨོཝཱདཾ ཨསྶོསི. སོཔི སེཊྛི དྷཱིཏརཾ ཨེཝཾ ཨོཝདི –

‘‘ཨམྨ, སསུརཀུལེ ཝསནྟིཡཱ ནཱམ ཨནྟོཨགྒི བཧི ན ནཱིཧརིཏབྦོ, བཧིཨགྒི ཨནྟོ ན པཝེསེཏབྦོ, དདནྟསྶེཝ དཱཏབྦཾ, ཨདདནྟསྶ ན དཱཏབྦཾ, དདནྟསྶཱཔི ཨདདནྟསྶཱཔི དཱཏབྦཾ, སུཁཾ ནིསཱིདིཏབྦཾ, སུཁཾ བྷུཉྫིཏབྦཾ, སུཁཾ ནིཔཛྫིཏབྦཾ, ཨགྒི པརིཙརིཏབྦོ, ཨནྟོདེཝཏཱ ནམསྶིཏབྦཱ’’ཏི.

ཨིམཾ དསཝིདྷཾ ཨོཝཱདཾ དཏྭཱ པུནདིཝསེ སབྦཱ སེནིཡོ སནྣིཔཱཏེཏྭཱ རཱཛསེནཱཡ མཛ྄ཛྷེ ཨཊྛ ཀུཊུམྦིཀེ པཱཊིབྷོགེ གཧེཏྭཱ, ‘‘སཙེ མེ གཏཊྛཱནེ དྷཱིཏུ དོསོ ཨུཔྤཛྫཏི, ཏུམྷེཧི སོདྷེཏབྦོ’’ཏི ཝཏྭཱ ནཝཀོཊིཨགྒྷནཀེན མཧཱལཏཱཔསཱདྷནེན དྷཱིཏརཾ པསཱདྷེཏྭཱ ནྷཱནཙུཎྞམཱུལཀཾ ཙཏུཔཎྞཱསཀོཊིདྷནཾ དཏྭཱ ཡཱནཾ ཨཱརོཔེཏྭཱ སཱཀེཏསྶ སཱམནྟཱ ཨཏྟནོ སནྟཀེསུ ཨནུརཱདྷཔུརམཏྟེསུ ཙུདྡསསུ བྷཏྟགཱམེསུ བྷེརིཾ ཙརཱཔེསི – ‘‘མམ དྷཱིཏརཱ སདྡྷིཾ གནྟུཀཱམཱ གཙྪནྟཱུ’’ཏི. ཏེ སདྡཾ སུཏྭཱཝ – ‘‘ཨམྷཱཀཾ ཨཡྻཱཡ གམནཀཱལེ ཀིཾ ཨམྷཱཀཾ ཨིདྷཱ’’ཏི ཙུདྡས གཱམཀཱ ཀིཉྩི ཨསེསེཏྭཱ ནིཀྑམིཾསུ? དྷནཉྩཡསེཊྛིཔི རཉྙོ ཙ མིགཱརསེཊྛིནོ ཙ སཀྐཱརཾ ཀཏྭཱ ཐོཀཾ ཨནུགནྟྭཱ ཏེཧི སདྡྷིཾ དྷཱིཏརཾ ཨུཡྻོཛེསི.

མིགཱརསེཊྛིཔི སབྦཔཙྪཏོ ཡཱནཀེ ནིསཱིདིཏྭཱ གཙྪནྟོ བལཀཱཡཾ དིསྭཱ, ‘‘ཀེ ནཱམེཏེ’’ཏི པུཙྪི. ‘‘སུཎིསཱཡ ཝོ ཝེཡྻཱཝཙྩཀརཱ དཱསིདཱསཱ’’ཏི. ‘‘ཨེཏྟཀེ ཀོ པོསེསྶ’’ཏི? ‘‘པོཐེཏྭཱ ཏེ པལཱཔེཐ, ཨཔལཱཡནྟེ ཨིཏོ དཎྜཾ ཀརོཐཱ’’ཏི. ཝིསཱཁཱ པན ‘‘ཨཔེཐ, མཱ ཝཱརེཐ, བལམེཝ བལསྶ བྷཏྟཾ དསྶཏཱི’’ཏི ཨཱཧ. སེཊྛི ཨེཝཾ ཝུཏྟེཔི, ‘‘ཨམྨ, ནཏྠི ཨམྷཱཀཾ ཨེཏེཧི ཨཏྠོ, ཀོ ཨེཏེ པོསེསྶཏཱི’’ཏི ལེཌྜུདཎྜཱདཱིཧི པོཐེཏྭཱ པལཱཔེཏྭཱ སེསཀེ ‘‘ཨལཾ ཨམྷཱཀཾ ཨེཏྟཀེཧཱི’’ཏི གཧེཏྭཱ པཱཡཱསི. ཨཐ ཝིསཱཁཱ སཱཝཏྠིནགརདྭཱརཾ སམྤཏྟཀཱལེ ཙིནྟེསི – ‘‘པཊིཙྪནྣཡཱནསྨིཾ ནུ ཁོ ནིསཱིདིཏྭཱ པཝིསིསྶཱམི, ཨུདཱཧུ རཐེ ཋཏྭཱ’’ཏི. ཨཐསྶཱ ཨེཏདཧོསི – ‘‘པཊིཙྪནྣཡཱནེན མེ པཝིསནྟིཡཱ མཧཱལཏཱཔསཱདྷནསྶ ཝིསེསོ ན པཉྙཱཡིསྶཏཱི’’ཏི. སཱ སཀལནགརསྶ ཨཏྟཱནཾ དསྶེནྟཱི རཐེ ཋཏྭཱ ནགརཾ པཱཝིསི. སཱཝཏྠིཝཱསིནོ ཝིསཱཁཱཡ སམྤཏྟིཾ དིསྭཱ, ‘‘ཨེསཱ ཀིར ཝིསཱཁཱ ནཱམ, ཨེཝརཱུཔཱ ཨཡཾ སམྤཏྟི ཨེཏིསྶཱཝ ཨནུཙྪཝིཀཱ’’ཏི ཨཱཧཾསུ. ཨིཏི སཱ མཧཱསམྤཏྟིཡཱ སེཊྛིནོ གེཧཾ པཱཝིསི. གཏདིཝསེ ཙསྶཱ སཀལནགརཝཱསིནོ ‘‘ཨམྷཱཀཾ དྷནཉྩཡསེཊྛི ཨཏྟནོ ནགརཾ སམྤཏྟཱནཾ མཧཱསཀྐཱརཾ ཨཀཱསཱི’’ཏི ཡཐཱསཏྟི ཡཐཱབལཾ པཎྞཱཀཱརཾ པཧིཎིཾསུ. ཝིསཱཁཱ པཧིཏཔཧིཏཾ པཎྞཱཀཱརཾ ཏསྨིཾཡེཝ ནགརེ ཨཉྙམཉྙེསུ ཀུལེསུ སབྦཏྠཀམེཝ དཱཔེསི. ཨིཏི སཱ ‘‘ཨིདཾ མཡ྄ཧཾ མཱཏུ དེཐ, ཨིདཾ མཡ྄ཧཾ པིཏུ དེཐ, ཨིདཾ མཡ྄ཧཾ བྷཱཏུ དེཐ, ཨིདཾ མཡ྄ཧཾ བྷགིནིཡཱ དེཐཱ’’ཏི ཏེསཾ ཏེསཾ ཝཡཱནུརཱུཔཾ པིཡཝཙནཾ ཝཏྭཱ པཎྞཱཀཱརཾ པེསེནྟཱི སཀལནགརཝཱསིནོ ཉཱཏཀེ ཝིཡ ཨཀཱསི. ཨཐསྶཱ རཏྟིབྷཱགསམནནྟརེ ཨཱཛཉྙཝལ༹ཝཱཡ གབྦྷཝུཊྛཱནཾ ཨཧོསི. སཱ དཱསཱིཧི དཎྜདཱིཔིཀཱ གཱཧཱཔེཏྭཱ ཏཏྠ གནྟྭཱ ཝལ༹ཝཾ ཨུཎྷོདཀེན ནྷཱཔེཏྭཱ ཏེལེན མཀྑཱཔེཏྭཱ ཨཏྟནོ ཝསནཊྛཱནམེཝ ཨགམཱསི.

མིགཱརསེཊྛིཔི པུཏྟསྶ ཨཱཝཱཧམངྒལཾ ཀརོནྟོ དྷུརཝིཧཱརེ ཝསནྟམྤི ཏཐཱགཏཾ ཨམནསིཀརིཏྭཱ དཱིགྷརཏྟཾ ནགྒསམཎཀེསུ པཏིཊྛིཏེན པེམེན ཙོདིཡམཱནོ ‘‘མཡ྄ཧཾ ཨཡྻཱནམྤི སཀྐཱརཾ ཀརིསྶཱམཱི’’ཏི ཨེཀདིཝསཾ ཨནེཀསཏེསུ ནཝབྷཱཛནེསུ ནིརུདཀཔཱཡཱསཾ པཙཱཔེཏྭཱ པཉྩསཏེ ཨཙེལཀེ ནིམནྟཱཔེཏྭཱ ཨནྟོགེཧཾ པཝེསེཏྭཱ, ‘‘ཨཱགཙྪཏུ མེ སུཎིསཱ, ཨརཧནྟེ ཝནྡཏཱུ’’ཏི ཝིསཱཁཱཡ སཱསནཾ པཧིཎི. སཱ ‘‘ཨརཧནྟོ’’ཏི ཝཙནཾ སུཏྭཱ སོཏཱཔནྣཱ ཨརིཡསཱཝིཀཱ ཧཊྛཏུཊྛཱ ཧུཏྭཱ ཏེསཾ བྷོཛནཊྛཱནཾ ཨཱགནྟྭཱ ཏེ ཨོལོཀེཏྭཱ, ‘‘ཨེཝརཱུཔཱ ཧིརོཏྟཔྤཝིརཧིཏཱ ཨརཧནྟཱ ནཱམ ན ཧོནྟི, ཀསྨཱ མཾ སསུརོ པཀྐོསཱཔེསཱི’’ཏི, ‘‘དྷཱི, དྷཱི’’ཏི སེཊྛིཾ གརཧིཏྭཱ ཨཏྟནོ ཝསནཊྛཱནམེཝ གཏཱ. ཨཙེལཀཱ ཏཾ དིསྭཱ སབྦེ ཨེཀཔྤཧཱརེནེཝ སེཊྛིཾ གརཧིཾསུ – ‘‘ཀིཾ ཏྭཾ, གཧཔཏི, ཨཉྙཾ ནཱལཏྠ, སམཎསྶ གོཏམསྶ སཱཝིཀཾ མཧཱཀཱལ༹ཀཎྞིཾ ཨིདྷ པཝེསེསི, ཝེགེན ནཾ ཨིམསྨཱ གེཧཱ ནིཀྐཌྜྷཱཔེཧཱི’’ཏི. སོ ‘‘ན སཀྐཱ མཡཱ ཨིམེསཾ ཝཙནམཏྟེནེཝ ནིཀྐཌྜྷཱཔེཏུཾ, མཧཱཀུལསྶ སཱ དྷཱིཏཱ’’ཏི ཙིནྟེཏྭཱ, ‘‘ཨཡྻཱ, དཧརཱ ནཱམ ཛཱནིཏྭཱ ཝཱ ཨཛཱནིཏྭཱ ཝཱ ཀརེཡྻུཾ, ཏུམྷེ ཏུཎྷཱི ཧོཐཱ’’ཏི ཏེ ཨུཡྻོཛེཏྭཱ སཡཾ མཧཱརཧེ ཨཱསནེ ནིསཱིདིཏྭཱ སུཝཎྞཔཱཏིཡཾ ནིརུདཀཾ མདྷུཔཱཡཱསཾ པརིབྷུཉྫི.

ཏསྨིཾ སམཡེ ཨེཀོ པིཎྜཔཱཏིཀཏྠེརོ པིཎྜཱཡ ཙརནྟོ ཏཾ ནིཝེསནཾ པཱཝིསི. ཝིསཱཁཱ སསུརཾ བཱིཛཡམཱནཱ ཋིཏཱ ཏཾ དིསྭཱ ‘‘སསུརསྶ ཨཱཙིཀྑིཏུཾ ཨཡུཏྟ’’ནྟི ཡཐཱ སོ ཐེརཾ པསྶཏི, ཨེཝཾ ཨཔགནྟྭཱ ཨཊྛཱསི. སོ པན བཱལོ ཐེརཾ དིསྭཱཔི ཨཔསྶནྟོ ཝིཡ ཧུཏྭཱ ཨདྷོམུཁོ བྷུཉྫཏེཝ. ཝིསཱཁཱ ‘‘ཐེརཾ དིསྭཱཔི མེ སསུརོ སཉྙཾ ན ཀརོཏཱི’’ཏི ཉཏྭཱ, ‘‘ཨཏིཙྪཐ, བྷནྟེ, མཡ྄ཧཾ སསུརོ པུརཱཎཾ ཁཱདཏཱི’’ཏི ཨཱཧ. སོ ནིགཎྛེཧི ཀཐིཏཀཱལེ ཨདྷིཝཱསེཏྭཱཔི ‘‘པུརཱཎཾ ཁཱདཏཱི’’ཏི ཝུཏྟཀྑཎེཡེཝ ཧཏྠཾ ཨཔནེཏྭཱ, ‘‘ཨིམཾ པཱཡཱསཾ ཨིཏོ ནཱིཧརཐ, ཨེཏཾ ཨིམསྨཱ གེཧཱ ནིཀྐཌྜྷཐ, ཨཡཾ མཾ ཨེཝརཱུཔེ མངྒལཀཱལེ ཨསུཙིཁཱདཀཾ ནཱམ ཀརོཏཱི’’ཏི ཨཱཧ. ཏསྨིཾ ཁོ པན ནིཝེསནེ སབྦེཔི དཱསཀམྨཀརཱ ཝིསཱཁཱཡ སནྟཀཱཝ, ཀོ ནཾ ཧཏྠེ ཝཱ པཱདེ ཝཱ གཎྷིསྶཏི, མུཁེན ཀཐེཏུཾ སམཏྠོཔི ནཏྠི. ཝིསཱཁཱ སསུརསྶ ཀཐཾ སུཏྭཱ ཨཱཧ – ‘‘ཏཱཏ, ན ཨེཏྟཀེནེཝ མཡཾ ནིཀྑམཱམ, ནཱཧཾ ཏུམྷེཧི ཨུདཀཏིཏྠཏོ ཀུམྦྷདཱསཱི ཝིཡ ཨཱནཱིཏཱ, དྷརམཱནཀམཱཏཱཔིཏཱུནཾ དྷཱིཏརོ ནཱམ ན ཨེཏྟཀེནེཝ ནིཀྑམནྟི, ཨེཏེནེཝ མེ ཀཱརཎེན པིཏཱ ཨིདྷཱགམནཀཱལེ ཨཊྛ ཀུཊུམྦིཀེ པཀྐོསཱཔེཏྭཱ ‘སཙེ མེ དྷཱིཏུ དོསོ ཨུཔྤཛྫཏི, སོདྷེཡྻཱཐཱ’ཏི ཝཏྭཱ མཾ ཏེསཾ ཧཏྠེ ཋཔེསི, ཏེ པཀྐོསཱཔེཏྭཱ མཡ྄ཧཾ དོསཱདོསཾ སོདྷཱཔེཐཱ’’ཏི.

སེཊྛི ‘‘ཀལྱཱཎཾ ཨེསཱ ཀཐེཏཱི’’ཏི ཨཊྛ ཀུཊུམྦིཀེ པཀྐོསཱཔེཏྭཱ, ‘‘ཨཡཾ དཱརིཀཱ མངྒལཀཱལེ ནིསཱིདིཏྭཱ སུཝཎྞཔཱཏིཡཾ ནིརུདཀཔཱཡཱསཾ པརིབྷུཉྫནྟཾ མཾ ‘ཨསུཙིཁཱདཀོ’ཏི ཝདཏཱི’’ཏི ཨཱཧ, ‘‘ཨིམིསྶཱ དོསཾ ཨཱརོཔེཏྭཱ ཨིམཾ གེཧཏོ ནིཀྐཌྜྷཐཱ’’ཏི. ‘‘ཨེཝཾ ཀིར, ཨམྨཱ’’ཏི. ནཱཧཾ ཨེཝཾ ཝདཱམི, ཨེཀསྨིཾ པན པིཎྜཔཱཏིཀཏྠེརེ གྷརདྭཱརེ ཋིཏེ སསུརོ མེ ཨཔྤོདཀཾ མདྷུཔཱཡཱསཾ པརིབྷུཉྫནྟོ ཏཾ ན མནསིཀརོཏི, ཨཧཾ ‘‘མཡ྄ཧཾ སསུརོ ཨིམསྨིཾ ཨཏྟབྷཱཝེ པུཉྙཾ ན ཀརོཏི, པུརཱཎཔུཉྙམེཝ ཁཱདཏཱི’’ཏི ཙིནྟེཏྭཱ, ‘‘ཨཏིཙྪཐ, བྷནྟེ, མཡ྄ཧཾ སསུརོ པུརཱཎཾ ཁཱདཏཱི’’ཏི ཨཝཙཾ, ‘‘ཨེཏྠ མེ ཀོ དོསོ’’ཏི? ‘‘ཨཡྻ, ཨིདྷ དོསོ ནཏྠི, ཨམྷཱཀཾ དྷཱིཏཱ ཡུཏྟཾ ཀཐེཏི, ཏྭཾ ཀསྨཱ ཀུཛ྄ཛྷསཱི’’ཏི? ‘‘ཨཡྻཱ, ཨེས ཏཱཝ དོསོ མཱ ཧོཏུ, ཨཡཾ པན ཨེཀདིཝསཾ མཛ྄ཛྷིམཡཱམེ དཱསཱིཔརིཝུཏཱ པཙྪཱགེཧཾ ཨགམཱསཱི’’ཏི. ‘‘ཨེཝཾ ཀིར, ཨམྨཱ’’ཏི. ‘‘ཏཱཏཱ, ནཱཧཾ ཨཉྙེན ཀཱརཎེན གཏཱ, ཨིམསྨིཾ པན གེཧེ ཨཱཛཱནེཡྻཝལ༹ཝཱཡ ཝིཛཱཏཱཡ སཉྙམྤི ཨཀཏྭཱ ནིསཱིདིཏུཾ ནཱམ ཨཡུཏྟ’’ནྟི དཎྜདཱིཔིཀཱ གཱཧཱཔེཏྭཱ ཨུཎྷོདཀཱདཱིནིཔི གཱཧཱཔེཏྭཱ དཱསཱིཧི སདྡྷིཾ གནྟྭཱ ཝལ༹ཝཱཡ ཝིཛཱཏཔརིཧཱརཾ ཀཱརཱཔེསིཾ, ‘‘ཨེཏྠ མེ ཀོ དོསོ’’ཏི? ‘‘ཨཡྻ, ཨིདྷ དོསོ ནཏྠི, ཨམྷཱཀཾ དྷཱིཏཱ ཏཝ གེཧེ དཱསཱིཧིཔི ཨཀཏྟབྦཡུཏྟཀཾ ཀམྨཾ ཀརོཏི, ཏྭཾ ཀིཾ ཨེཏྠ དོསཾ པསྶསཱི’’ཏི?

ཨཡྻཱ, ཨིདྷཱཔི ཏཱཝ དོསོ མཱ ཧོཏུ, ཨིམིསྶཱ པན པིཏཱ ཨིདྷཱགམནཀཱལེ ཨིམཾ ཨོཝདནྟོ གུཡ྄ཧེ པཊིཙྪནྣེ དས ཨོཝཱདེ ཨདཱསི, ཏེསཾ ཨཏྠཾ ན ཛཱནཱམི, ཏེསཾ མེ ཨཏྠཾ ཀཐེཏུ. ཨིམིསྶཱ པན པིཏཱ ‘‘ཨནྟོཨགྒི བཧི ན ནཱིཧརིཏབྦོ’’ཏི ཨཱཧ, ‘‘སཀྐཱ ནུ ཁོ ཨམྷེཧི ཨུབྷཏོ པཊིཝིསྶཀགེཧཱནཾ ཨགྒིཾ ཨདཏྭཱ ཝསིཏུ’’ནྟི? ‘‘ཨེཝཾ ཀིར, ཨམྨཱ’’ཏི. ‘‘ཏཱཏཱ, མཡ྄ཧཾ པིཏཱ ན ཨེཏཾ སནྡྷཱཡ ཀཐེསི. ཨིདཾ པན སནྡྷཱཡ ཀཐེསི – ‘ཨམྨ, ཏཝ སསྶུསསུརསཱམིཀཱནཾ ཨགུཎཾ དིསྭཱ བཧི ཏསྨིཾ ཏསྨིཾ གེཧེ ཋཏྭཱ མཱ ཀཐེསི. ཨེཝརཱུཔོ ཧི ཨགྒིསདིསོ ཨགྒི ནཱམ ནཏྠཱི’’’ཏི.

ཨཡྻཱ, ཨེཏཾ ཏཱཝ ཨེཝཾ ཧོཏུ, ཨིམིསྶཱ པན པིཏཱ ‘‘བཱཧིརཏོ ཨགྒི ན ཨནྟོ པཝེསེཏབྦོ’’ཏི ཨཱཧ, ‘‘ཀིཾ སཀྐཱ ཨམྷེཧི ཨནྟོ ཨགྒིམྷི ནིབྦུཏེ བཱཧིརཏོ ཨགྒིཾ ཨནཱཧརིཏུ’’ནྟི? ‘‘ཨེཝཾ ཀིར, ཨམྨཱ’’ཏི. ཏཱཏཱ, མཡ྄ཧཾ པིཏཱ ན ཨེཏཾ སནྡྷཱཡ ཀཐེསི, ཨིདཾ པན སནྡྷཱཡ ཀཐེསི – སཙེ པཊིཝིསྶཀགེཧེསུ ཨིཏྠིཡོ ཝཱ པུརིསཱ ཝཱ སསྶུསསུརསཱམིཀཱནཾ ཨགུཎཾ ཀཐེནྟི, ཏེཧི ཀཐིཏཾ ཨཱཧརིཏྭཱ ‘‘ཨསུཀོ ནཱམ ཏུམྷཱཀཾ ཨེཝཉྩ ཨེཝཉྩ ཨགུཎཾ ཀཐེཏཱི’’ཏི པུན མཱ ཀཐེཡྻཱསི. ‘‘ཨེཏེན ཧི ཨགྒིནཱ སདིསོ ཨགྒི ནཱམ ནཏྠཱི’’ཏི. ཨེཝཾ ཨིམསྨིམྤི ཀཱརཎེ སཱ ནིདྡོསཱཝ ཨཧོསི. ཡཐཱ ཙ ཨེཏྠ, ཨེཝཾ སེསེསུཔི.

ཏེསུ པན ཨཡམདྷིཔྤཱཡོ – ཡམྤི ཧི ཏསྶཱ པིཏརཱ ‘‘ཡེ དདནྟི, ཏེསཾཡེཝ དཱཏབྦ’’ནྟི ཝུཏྟཾ. ཏཾ ‘‘ཡཱཙིཏཀཾ ཨུཔཀརཎཾ གཧེཏྭཱ ཡེ པཊིདེནྟི, ཏེསཉྙེཝ དཱཏབྦ’’ནྟི སནྡྷཱཡ ཝུཏྟཾ.

‘‘ཡེ ན དེནྟི, ཏེསཾ ན དཱཏབྦ’’ནྟི ཨིདམྤི ཡེ ཡཱཙིཏཀཾ གཧེཏྭཱ ན པཊིདེནྟི, ཏེསཾ ན དཱཏབྦནྟི སནྡྷཱཡ ཝུཏྟཾ.

‘‘དདནྟསྶཱཔི ཨདདནྟསྶཱཔི དཱཏབྦ’’ནྟི ཨིདཾ པན དལིདྡེསུ ཉཱཏིམིཏྟེསུ སམྤཏྟེསུ ཏེ པཊིདཱཏུཾ སཀྐོནྟུ ཝཱ མཱ ཝཱ, ཏེསཾ དཱཏུམེཝ ཝཊྚཏཱིཏི སནྡྷཱཡ ཝུཏྟཾ.

‘‘སུཁཾ ནིསཱིདིཏབྦ’’ནྟི ཨིདམྤི སསྶུསསུརསཱམིཀེ དིསྭཱ ཝུཊྛཱཏབྦཊྛཱནེ ནིསཱིདིཏུཾ ན ཝཊྚཏཱིཏི སནྡྷཱཡ ཝུཏྟཾ.

‘‘སུཁཾ བྷུཉྫིཏབྦ’’ནྟི ཨིདཾ པན སསྶུསསུརསཱམིཀེཧི པུརེཏརཾ ཨབྷུཉྫིཏྭཱ ཏེ པརིཝིསིཏྭཱ སབྦེཧི ལདྡྷཱལདྡྷཾ ཉཏྭཱ པཙྪཱ སཡཾ བྷུཉྫིཏུཾ ཝཊྚཏཱིཏི སནྡྷཱཡ ཝུཏྟཾ.

‘‘སུཁཾ ནིཔཛྫིཏབྦ’’ནྟི ཨིདམྤི སསྶུསསུརསཱམིཀེཧི པུརེཏརཾ སཡནཾ ཨཱརུཡ྄ཧ ན ནིཔཛྫིཏབྦཾ, ཏེསཾ ཀཏྟབྦཡུཏྟཀཾ ཝཏྟཔཊིཝཏྟཾ ཀཏྭཱ པཙྪཱ སཡཾ ནིཔཛྫིཏུཾ ཡུཏྟནྟི སནྡྷཱཡ ཝུཏྟཾ.

‘‘ཨགྒི པརིཙརིཏབྦོ’’ཏི ཨིདཾ པན སསྶུམྤི སསུརམྤི སཱམིཀམྤི ཨགྒིཀྑནྡྷཾ ཝིཡ ཨུརགརཱཛཱནཾ ཝིཡ ཙ ཀཏྭཱ པསྶིཏུཾ ཝཊྚཏཱིཏི སནྡྷཱཡ ཝུཏྟཾ.

‘‘ཨནྟོདེཝཏཱ ནམསྶིཏབྦཱ’’ཏི ཨིདམྤི སསྶུཉྩ སསུརཉྩ སཱམིཀཉྩ དེཝཏཱ ཝིཡ ཀཏྭཱ དཊྛུཾ ཝཊྚཏཱིཏི སནྡྷཱཡ ཝུཏྟཾ. ཨེཝཾ སེཊྛི ཨིམེསཾ དསཨོཝཱདཱནཾ ཨཏྠཾ སུཏྭཱ པཊིཝཙནཾ ཨཔསྶནྟོ ཨདྷོམུཁོ ནིསཱིདི.

ཨཐ ནཾ ཀུཊུམྦིཀཱ ‘‘ཀིཾ སེཊྛི ཨཉྙོཔི ཨམྷཱཀཾ དྷཱིཏུ དོསོ ཨཏྠཱི’’ཏི པུཙྪིཾསུ. ‘‘ནཏྠི, ཨཡྻཱ’’ཏི. ‘‘ཨཐ ཀསྨཱ ནཾ ནིདྡོསཾ ཨཀཱརཎེན གེཧཱ ནིཀྐཌྜྷཱཔེསཱི’’ཏི ཨེཝཾ ཝུཏྟེ ཝིསཱཁཱ ཨཱཧ – ‘‘ཏཱཏཱ, ཀིཉྩཱཔི མཡ྄ཧཾ སསུརསྶ ཝཙནེན པཋམམེཝ གམནཾ ན ཡུཏྟཾ, པིཏཱ པན མེ ཨཱགམནཀཱལེ མམ དོསསོདྷནཏྠཱཡ མཾ ཏུམྷཱཀཾ ཧཏྠེ ཋཔེསི, ཏུམྷེཧི ཙ མེ ནིདྡོསབྷཱཝོ ཉཱཏོ, ཨིདཱནི ཙ མཡ྄ཧཾ གནྟུཾ ཡུཏྟ’’ནྟི དཱསིདཱསེ ‘‘ཡཱནཱདཱིཧི སཛྫཱཔེཐཱ’’ཏི ཨཱཎཱཔེསི. ཨཐ ནཾ སེཊྛི ཀུཊུམྦིཀེ གཧེཏྭཱ ‘‘ཨམྨ, མཡཱ ཨཛཱནིཏྭཱཝ ཀཐིཏཾ, ཁམཱཧི མེ’’ཏི ཨཱཧ. ‘‘ཏཱཏ, ཏུམྷཱཀཾ ཁམིཏབྦཾ ཏཱཝ ཁམཱམི, ཨཧཾ པན བུདྡྷསཱསནེ ཨཝེཙྩཔྤསནྣསྶ ཀུལསྶ དྷཱིཏཱ, ན མཡཾ ཝིནཱ བྷིཀྑུསངྒྷེན ཝཏྟཱམ, སཙེ མམ རུཙིཡཱ བྷིཀྑུསངྒྷཾ པཊིཛགྒིཏུཾ ལབྷཱམི, ཝསིསྶཱམཱི’’ཏི. ‘‘ཨམྨ, ཏྭཾ ཡཐཱརུཙིཡཱ ཏཝ སམཎེ པཊིཛགྒཱ’’ཏི ཨཱཧ.

ཝིསཱཁཱ དསབལཾ ནིམནྟཱཔེཏྭཱ པུནདིཝསེ ནིཝེསནཾ པཝེསེསི. ནགྒསམཎཱཔི སཏྠུ མིགཱརསེཊྛིནོ གེཧཾ གམནབྷཱཝཾ སུཏྭཱ གནྟྭཱ གེཧཾ པརིཝཱརེཏྭཱ ནིསཱིདིཾསུ. ཝིསཱཁཱ དཀྑིཎོདཀཾ དཏྭཱ ‘‘སབྦོ སཀྐཱརོ པཊིཡཱདིཏོ, སསུརོ མེ ཨཱགནྟྭཱ དསབལཾ པརིཝིསཏཱུ’’ཏི སཱསནཾ པེསེསི. ཨཐ ནཾ གནྟུཀཱམཾ ཨཱཛཱིཝཀཱ ‘‘མཱ ཁོ ཏྭཾ, གཧཔཏི, སམཎསྶ གོཏམསྶ སནྟིཀཾ གཙྪཱ’’ཏི ནིཝཱརེསུཾ. སོ ‘‘སུཎྷཱ མེ སཡམེཝ པརིཝིསཏཱུ’’ཏི སཱསནཾ པཧིཎི. སཱ བུདྡྷཔྤམུཁཾ བྷིཀྑུསངྒྷཾ པརིཝིསིཏྭཱ ནིཊྛིཏེ བྷཏྟཀིཙྩེ པུན སཱསནཾ པེསེསི – ‘‘སསུརོ མེ ཨཱགནྟྭཱ དྷམྨཀཐཾ སུཎཱཏཱུ’’ཏི. ཨཐ ནཾ ‘‘ཨིདཱནི ཨགམནཾ ནཱམ ཨཏིཝིཡ ཨཡུཏྟ’’ནྟི དྷམྨཾ སོཏུཀཱམཏཱཡ གཙྪནྟཾ པུན ཏེ ཨཱཧཾསུ – ‘‘ཏེན ཧི སམཎསྶ གོཏམསྶ དྷམྨཾ སུཎནྟོ བཧིསཱཎིཡཱ ནིསཱིདིཏྭཱ སུཎཱཧཱི’’ཏི. པུརེཏརམེཝསྶ གནྟྭཱ སཱཎིཾ པརིཀྑིཔིཾསུ. སོ གནྟྭཱ བཧིསཱཎིཡཾ ནིསཱིདི. སཏྠཱ ‘‘ཏྭཾ བཧིསཱཎིཡཾ ཝཱ ནིསཱིད, པརཀུཊྚེ ཝཱ པརསེལེ ཝཱ པརཙཀྐཝཱལེ༹ ཝཱ པན ནིསཱིད, ཨཧཾ བུདྡྷོ ནཱམ སཀྐོམི ཏཾ མམ སདྡཾ སཱཝེཏུ’’ནྟི མཧཱཛམྦུཾ ཁནྡྷེ གཧེཏྭཱ ཙཱལེནྟོ ཝིཡ ཨམཏཝསྶཾ ཝསྶེནྟོ ཝིཡ ཙ དྷམྨཾ དེསེཏུཾ ཨནུཔུབྦིཾ ཀཐཾ ཨཱརབྷི.

སམྨཱསམྦུདྡྷེ ཙ པན དྷམྨཾ དེསེནྟེ པུརཏོ ཋིཏཱཔི པཙྪཏོ ཋིཏཱཔི ཙཀྐཝཱལ༹སཏཾ ཙཀྐཝཱལ༹སཧསྶཾ ཨཏིཀྐམིཏྭཱ ཋིཏཱཔི ཨཀནིཊྛབྷཝནེ ཋིཏཱཔི ‘‘སཏྠཱ མམཉྙེཝ ཨོལོཀེཏི, མཡ྄ཧམེཝ དྷམྨཾ དེསེཏཱི’’ཏི ཝདནྟི. སཏྠཱ ཧི ཏཾ ཏཾ ཨོལོཀེནྟོ ཝིཡ ཏེན ཏེན སདྡྷིཾ སལླཔནྟོ ཝིཡ ཙ ཨཧོསི. ཙནྡསམཱ ཀིར བུདྡྷཱ. ཡཐཱ ཙནྡོ གགནམཛ྄ཛྷེ ཋིཏོ ‘‘མཡ྄ཧཾ ཨུཔརི ཙནྡོ, མཡ྄ཧཾ ཨུཔརི ཙནྡོ’’ཏི སབྦསཏྟཱནཾ ཁཱཡཏི, ཨེཝམེཝ ཡཏྠ ཀཏྠཙི ཋིཏཱནཾ ཨབྷིམུཁེ ཋིཏཱ ཝིཡ ཁཱཡནྟི. ཨིདཾ ཀིར ཏེསཾ ཨལངྐཏསཱིསཾ ཚིནྡིཏྭཱ ཨཉྫིཏཨཀྑཱིནི ཨུཔྤཱཊེཏྭཱ ཧདཡམཾསཾ ཨུཔྤཱཊེཏྭཱ པརསྶ དཱསཏྠཱཡ ཛཱལིསདིསེ པུཏྟེ ཀཎྷཱཛིནཱསདིསཱ དྷཱིཏརོ མདྡིསདིསཱ པཛཱཔཏིཡོ པརིཙྩཛིཏྭཱ དིནྣདཱནསྶ ཕལཾ. མིགཱརསེཊྛིཔི ཁོ ཏཐཱགཏེ དྷམྨདེསནཾ ཝིནིཝཏྟེནྟེ བཧིསཱཎིཡཾ ནིསིནྣོཝ སཧསྶ ནཡཔཊིམཎྜིཏེ སོཏཱཔཏྟིཕལེ པཏིཊྛཱཡ ཨཙལཱཡ སདྡྷཱཡ སམནྣཱགཏོ ཏཱིསུ རཏནེསུ ནིཀྐངྑོ ཧུཏྭཱ སཱཎིཀཎྞཾ ཨུཀྑིཔིཏྭཱ ཨཱགནྟྭཱ སུཎྷཱཡ ཐནཾ མུཁེན གཧེཏྭཱ, ‘‘ཏྭཾ མེ ཨཛྫཏོ པཊྛཱཡ མཱཏཱ’’ཏི ཏཾ མཱཏུཊྛཱནེ ཋཔེསི. ཏཏོ པཊྛཱཡ མིགཱརམཱཏཱ ནཱམ ཛཱཏཱ. པཙྪཱབྷཱགེ པུཏྟཾ ལབྷིཏྭཱཔི མིགཱརོཏིསྶ ནཱམམཀཱསི.

མཧཱསེཊྛི སུཎྷཱཡ ཐནཾ ཝིསྶཛྫེཏྭཱ གནྟྭཱ བྷགཝཏོ དྭཱིསུ པཱདེསུ སིརསཱ ནིཔཏིཏྭཱ པཱདེ པཱཎཱིཧི ཙ པརིསམྦཱཧནྟོ མུཁེན ཙ པརིཙུམྦནྟོ ‘‘མིགཱརོ ཨཧཾ, བྷནྟེ, མིགཱརོ ཨཧཾ, བྷནྟེ’’ཏི ཏིཀྑཏྟུཾ ནཱམཾ སཱཝེཏྭཱ, ‘‘ཨཧཾ, བྷནྟེ, ཨེཏྟཀཾ ཀཱལཾ ཡཏྠ ནཱམ དྭིནྣཾ མཧཔྥལནྟི ན ཛཱནཱམི, ཨིདཱནི ཙ མེ སུཎིསཾ ནིསྶཱཡ ཉཱཏཾ, སབྦཱ ཨཔཱཡདུཀྑཱ མུཏྟོམྷི, སུཎིསཱ མེ ཨིམཾ གེཧཾ ཨཱགཙྪནྟཱི མམ ཨཏྠཱཡ ཧིཏཱཡ སུཁཱཡ ཨཱགཏཱ’’ཏི ཝཏྭཱ ཨིམཾ གཱཐམཱཧ –

‘‘སོཧཾ ཨཛྫ པཛཱནཱམི, ཡཏྠ དིནྣཾ མཧཔྥལཾ;

ཨཏྠཱཡ ཝཏ མེ བྷདྡཱ, སུཎིསཱ གྷརམཱགཏཱ’’ཏི.

ཝིསཱཁཱ པུནདིཝསཏྠཱཡཔི སཏྠཱརཾ ནིམནྟེསི. ཨཐསྶཱ པུནདིཝསེཔི སསྶུ སོཏཱཔཏྟིཕལཾ པཏྟཱ. ཏཏོ པཊྛཱཡ ཏཾ གེཧཾ སཱསནསྶ ཝིཝཊདྭཱརཾ ཨཧོསི. ཏཏོ སེཊྛི ཙིནྟེསི – ‘‘བཧཱུཔཀཱརཱ མེ སུཎིསཱ པསནྣཱཀཱརམསྶཱ ཀརིསྶཱམི, ཨེཏིསྶཱ བྷཱརིཡཾ པསཱདྷནཾ ནིཙྩཀཱལཾ པསཱདྷེཏུཾ ན སཀྐཱ, སལླཧུཀམསྶཱ དིཝཱ ཙ རཏྟོ ཙ སབྦཨིརིཡཱཔཐེསུ པསཱདྷནཡོགྒཾ པསཱདྷནཾ ཀཱརེསྶཱམཱི’’ཏི སཏསཧསྶགྒྷནཀཾ གྷནམཊྛཀཾ ནཱམ པསཱདྷནཾ ཀཱརེཏྭཱ ཏསྨིཾ ནིཊྛིཏེ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ སཀྐཙྩཾ བྷོཛེཏྭཱ ཝིསཱཁཾ སོལ༹སཧི གནྡྷོདཀགྷཊེཧི ནྷཱཔེཏྭཱ སཏྠུ སམྨུཁེ ཋཔེཏྭཱ པསཱདྷེཏྭཱ སཏྠཱརཾ ཝནྡཱཔེསི. སཏྠཱ ཨནུམོདནཾ ཀཏྭཱ ཝིཧཱརམེཝ གཏོ. ཝིསཱཁཱཔི ཏཏོ པཊྛཱཡ དཱནཱདཱིནི པུཉྙཱནི ཀརོནྟཱི སཏྠུ སནྟིཀཱ ཨཊྛ ཝརེ (མཧཱཝ. ༣༥༠) ལབྷིཏྭཱ གགནཏལེ ཙནྡལེཁཱ ཝིཡ པཉྙཱཡམཱནཱ པུཏྟདྷཱིཏཱཧི ཝུཌྜྷིཾ པཱཔུཎི. ཏསྶཱ ཀིར དས པུཏྟཱ དས དྷཱིཏརོ ཙ ཨཧེསུཾ. ཏེསུ ཨེཀེཀསྶ དས དས པུཏྟཱ དས དས དྷཱིཏརོ ཨཧེསུཾ. ཏེསུ ཏེསུཔི ཨེཀེཀསྶ དས དས པུཏྟཱ དས དས དྷཱིཏརོ ཙཱཏི ཨེཝམསྶཱ པུཏྟནཏྟཔནཏྟསནྟཱནཝསེན པཝཏྟཱནི ཝཱིསཱདྷིཀཱནི ཙཏྟཱརི སཏཱནི ཨཊྛ ཙ པཱཎསཧསྶཱནི ཨཧེསུཾ. ཏེནཱཧུ པོརཱཎཱ –

‘‘ཝིསཱཁཱ ཝཱིསཏི པུཏྟཱ, ནཏྟཱ ཙ ཙཏུརོ སཏཱ;

པནཏྟཱ ཨཊྛསཧསྶཱ, ཛམྦུདཱིཔེ སུཔཱཀཊཱ’’ཏི.

ཨཱཡུ ཝཱིསཝསྶསཏཾ ཨཧོསི, སཱིསེ ཨེཀམྤི པལིཏཾ ནཱམ ནཱཧོསི, ནིཙྩཾ སོལ༹སཝསྶུདྡེསིཀཱ ཝིཡ ཨཧོསི. ཏཾ པུཏྟནཏྟཔནཏྟཔརིཝཱརཾ ཝིཧཱརཾ གཙྪནྟིཾ དིསྭཱ, ‘‘ཀཏམཱ ཨེཏྠ ཝིསཱཁཱ’’ཏི པརིཔུཙྪིཏཱརོ ཧོནྟི? ཡེ ནཾ གཙྪནྟིཾ པསྶནྟི, ‘‘ཨིདཱནི ཐོཀཾ གཙྪཏུ, གཙྪམཱནཱཝ ནོ, ཨཡྻཱ སོབྷཏཱི’’ཏི, ཙིནྟེནྟི. ཡེ ནཾ ཋིཏཾ ནིསིནྣཾ ནིཔནྣཾ པསྶནྟི, ‘‘ཨིདཱནི ཐོཀཾ ནིཔཛྫཏུ, ནིཔནྣཱཝ ནོ, ཨཡྻཱ, སོབྷཏཱི’’ཏི ཙིནྟེནྟི. ཨིཏི སཱ ‘‘ཙཏཱུསུ ཨིརིཡཱཔཐེསུ ཨསུཀཨིརིཡཱཔཐེན ནཱམ ན སོབྷཏཱི’’ཏི ཝཏྟབྦཱ ན ཧོཏི. པཉྩནྣཾ ཁོ པན ཧཏྠཱིནཾ བལཾ དྷཱརེཏི. རཱཛཱ ‘‘ཝིསཱཁཱ ཀིར པཉྩནྣཾ ཧཏྠཱིནཾ བལཾ དྷཱརེཏཱི’’ཏི སུཏྭཱ ཏསྶཱ ཝིཧཱརཾ གནྟྭཱ དྷམྨཾ སུཏྭཱ ཨཱགམནཝེལཱཡ ཐཱམཾ ཝཱིམཾསིཏུཀཱམོ ཧཏྠིཾ ཝིསྶཛྫཱཔེསི, སོ སོཎྜཾ ཨུཀྑིཔིཏྭཱ ཝིསཱཁཱབྷིམུཁོ ཨགམཱསི. ཏསྶཱ པརིཝཱརིཏྠིཡོ པཉྩསཏཱ ཨེཀཙྩཱ པལཱཡིཾསུ, ཨེཀཙྩཱ ན པརིསྶཛྫིཏྭཱ ‘‘ཀིཾ ཨིད’’ནྟི ཝུཏྟེ – ‘‘རཱཛཱ ཀིར ཏེ, ཨཡྻེ, བལཾ ཝཱིམཾསིཏུཀཱམོ ཧཏྠིཾ ཝིསྶཛྫཱཔེསཱི’’ཏི ཝདིཾསུ. ཝིསཱཁཱ ཨིམཾ དིསྭཱ, ‘‘ཀིཾ པལཱཡིཏེན, ཀཐཾ ནུ ཁོ ཏཾ གཎྷིསྶཱམཱི’’ཏི ཙིནྟེཏྭཱ, ‘‘སཙེ ཏཾ དལ༹ྷཾ གཎྷིསྶཱམི, ཝིནསྶེཡྻཱ’’ཏི དྭཱིཧི ཨངྒུལཱིཧི སོཎྜཱཡ གཧེཏྭཱ པཊིཔཎཱམེསི. ཧཏྠཱི ཨཏྟཱནཾ སནྡྷཱརེཏྭཱ ཋཱཏུཾ ནཱསཀྑི, རཱཛངྒཎེ ཨུཀྐུཊིཀོ ཧུཏྭཱ པཏིཏོ. མཧཱཛནོ སཱདྷུཀཱརཾ ཨདཱསི. སཱཔི སཔརིཝཱརཱ སོཏྠིནཱ གེཧཾ ཨགམཱསི.

ཏེན ཁོ པན སམཡེན སཱཝཏྠིཡཾ ཝིསཱཁཱ མིགཱརམཱཏཱ བཧུཔུཏྟཱ ཧོཏི བཧུནཏྟཱ ཨརོགཔུཏྟཱ ཨརོགནཏྟཱ ཨབྷིམངྒལསམྨཏཱ, ཏཱཝཏཀེསུ པུཏྟནཏྟེསུ ཨེཀོཔི ཨནྟརཱ མརཎཾ པཏྟོ ནཱམ ནཱཧོསི. སཱཝཏྠིཝཱསིནོ མངྒལེསུ ཚཎེསུ ཝིསཱཁཾ པཋམཾ ནིམནྟེཏྭཱ བྷོཛེནྟི. ཨཐེཀསྨིཾ ཨུསྶཝདིཝསེ མཧཱཛནེ མཎྜིཏཔསཱདྷིཏེ དྷམྨསྶཝནཱཡ ཝིཧཱརཾ གཙྪནྟེ ཝིསཱཁཱཔི ནིམནྟིཏཊྛཱནེ བྷུཉྫིཏྭཱ མཧཱལཏཱཔསཱདྷནཾ པསཱདྷེཏྭཱ མཧཱཛནེན སདྡྷིཾ ཝིཧཱརཾ གནྟྭཱ ཨཱབྷརཎཱནི ཨོམུཉྩིཏྭཱ ཨུཏྟརཱསངྒེན བྷཎྜིཀཾ བནྡྷིཏྭཱ དཱསིཡཱ ཨདཱསི. ཡཾ སནྡྷཱཡ ཝུཏྟཾ –

‘‘ཏེན ཁོ པན སམཡེན སཱཝཏྠིཡཾ ཨུསྶཝོ ཧོཏི, མནུསྶཱ ཨལངྐཏཔཊིཡཏྟཱ ཨཱརཱམཾ གཙྪནྟི, ཝིསཱཁཱཔི མིགཱརམཱཏཱ ཨལངྐཏཔཊིཡཏྟཱ ཝིཧཱརཾ གཙྪཏི. ཨཐ ཁོ ཝིསཱཁཱ མིགཱརམཱཏཱ ཨཱབྷརཎཱནི ཨོམུཉྩིཏྭཱ ཨུཏྟརཱསངྒེན བྷཎྜིཀཾ བནྡྷིཏྭཱ དཱསིཡཱ ཨདཱསི ‘ཧནྡ ཛེ ཨིམཾ བྷཎྜིཀཾ གཎྷཱཧཱི’’’ཏི (པཱཙི. ༥༠༣).

སཱ ཀིར ཝིཧཱརཾ གཙྪནྟཱི ཙིནྟེསི – ‘‘ཨེཝརཱུཔཾ མཧགྒྷཾ པསཱདྷནཾ སཱིསེ པཊིམུཀྐཾ ཡཱཝ པཱདཔིཊྛིཾ ཨལངྐཱརཾ ཨལངྐརིཏྭཱ ཝིཧཱརཾ པཝིསིཏུཾ ཨཡུཏྟ’’ནྟི ནཾ ཨོམུཉྩིཏྭཱ བྷཎྜིཀཾ ཀཏྭཱ ཨཏྟནོ པུཉྙེནེཝ ནིབྦཏྟཱཡ པཉྩཧཏྠིཐཱམདྷརཱཡ དཱསིཡཱ ཧཏྠེ ཨདཱསི. སཱ ཨེཝ ཀིར ཏཾ གཎྷིཏུཾ སཀྐོཏི. ཏེན ནཾ ཨཱཧ – ‘‘ཨམྨ, ཨིམཾ པསཱདྷནཾ གཎྷ, སཏྠུསནྟིཀཱ ནིཝཏྟནཀཱལེ པསཱདྷེསྶཱམི ན’’ནྟི. ཏཾ པན དཏྭཱ གྷནམཊྛཀཾ པསཱདྷནཾ པསཱདྷེཏྭཱ སཏྠཱརཾ ཨུཔསངྐམིཏྭཱ དྷམྨཾ ཨསྶོསི, དྷམྨསྶཝནཱཝསཱནེ བྷགཝནྟཾ ཝནྡིཏྭཱ ཨུཊྛཱཡ པཀྐཱམི. སཱཔིསྶཱ དཱསཱི ཏཾ པསཱདྷནཾ པམུཊྛཱ. དྷམྨཾ སུཏྭཱ པན པཀྐནྟཱཡ པརིསཱཡ སཙེ ཀིཉྩི པམུཊྛཾ ཧོཏི, ཏཾ ཨཱནནྡཏྠེརོ པཊིསཱམེཏི. ཨིཏི སོ ཏཾ དིཝསཾ མཧཱལཏཱཔསཱདྷནཾ དིསྭཱ སཏྠུ ཨཱརོཙེསི – ‘‘བྷནྟེ, ཝིསཱཁཱ པསཱདྷནཾ པམུསྶིཏྭཱ གཏཱ’’ཏི. ‘‘ཨེཀམནྟཾ ཋཔེཧི, ཨཱནནྡཱ’’ཏི. ཐེརོ ཏཾ ཨུཀྑིཔིཏྭཱ སོཔཱནཔསྶེ ལགྒེཏྭཱ ཋཔེསི.

ཝིསཱཁཱཔི སུཔྤིཡཱཡ སདྡྷིཾ ‘‘ཨཱགནྟུཀགམིཀགིལཱནཱདཱིནཾ ཀཏྟབྦཡུཏྟཀཾ ཛཱནིསྶཱམཱི’’ཏི ཨནྟོཝིཧཱརེ ཝིཙརི. ཏཱ པན ཨུཔཱསིཀཱཡོ ཨནྟོཝིཧཱརེ དིསྭཱ སཔྤིམདྷུཏེལཱདཱིཧི ཨཏྠིཀཱ པཀཏིཡཱཝ དཧརཱ ཙ སཱམཎེརཱ ཙ ཐཱལཀཱདཱིནི གཧེཏྭཱ ཨུཔསངྐམནྟི. ཏསྨིམྤི དིཝསེ ཏཐེཝ ཀརིཾསུ. ཨཐེཀཾ གིལཱནཾ བྷིཀྑུཾ དིསྭཱ སུཔྤིཡཱ (མཧཱཝ. ༢༨༠) ‘‘ཀེནཏྠོ ཨཡྻསྶཱ’’ཏི པུཙྪིཏྭཱ ‘‘པཊིཙྪཱདནཱིཡེནཱ’’ཏི ཝུཏྟེ ཧོཏུ, ཨཡྻ, པེསེསྶཱམཱིཏི དུཏིཡདིཝསེ ཀཔྤིཡམཾསཾ ཨལབྷནྟཱི ཨཏྟནོ ཨཱུརུམཾསེན ཀཏྟབྦཀིཙྩཾ ཀཏྭཱ པུན སཏྠརི པསཱདེན པཱཀཏིཀསརཱིརཱཝ ཨཧོསི. ཝིསཱཁཱཔི གིལཱནེ ཙ དཧརེ ཙ སཱམཎེརེ ཙ ཨོལོཀེཏྭཱ ཨཉྙེན དྭཱརེན ནིཀྑམིཏྭཱ ཝིཧཱརཱུཔཙཱརེ ཋིཏཱ, ‘‘ཨམྨ, པསཱདྷནཾ ཨཱཧར པསཱདྷེསྶཱམཱི’’ཏི ཨཱཧ. ཏསྨིཾ ཁཎེ སཱ དཱསཱི པམུསྶིཏྭཱ ནིཀྑནྟབྷཱཝཾ ཉཏྭཱ, ‘‘ཨཡྻེ, པམུཊྛཱམྷཱི’’ཏི ཨཱཧ. ‘‘ཏེན ཧི གནྟྭཱ གཎྷིཏྭཱ ཨེཧི, སཙེ པན མཡ྄ཧཾ ཨཡྻེན ཨཱནནྡཏྠེརེན ཨུཀྑིཔིཏྭཱ ཨཉྙསྨིཾ ཋཱནེ ཋཔིཏཾ ཧོཏི, མཱ ཨཱཧརེཡྻཱསི, ཨཡྻསྶེཝ ཏཾ མཡཱ པརིཙྩཏྟ’’ནྟི. ཛཱནཱཏི ཀིར སཱ ‘‘ཀུལམནུསྶཱནཾ པམུཊྛབྷཎྜཀཾ ཐེརོ པཊིསཱམེཏཱི’’ཏི; ཏསྨཱ ཨེཝམཱཧ. ཐེརོཔི ཏཾ དཱསིཾ དིསྭཱཝ ‘‘ཀིམཏྠཾ ཨཱགཏཱསཱི’’ཏི པུཙྪིཏྭཱ, ‘‘ཨཡྻཱཡ མེ པསཱདྷནཾ པམུསྶིཏྭཱ ཨཱགཏཱམྷཱི’’ཏི ཝུཏྟེ, ‘‘ཨེཏསྨིཾ མེ སོཔཱནཔསྶེ ཋཔིཏཾ, གཙྪ ནཾ གཎྷཱཧཱི’’ཏི ཨཱཧ. སཱ, ‘‘ཨཡྻ, ཏུམྷཱཀཾ ཧཏྠེན ཨཱམཊྛབྷཎྜཀཾ མཡ྄ཧཾ ཨཡྻཱཡ ཨནཱཧཱརིཡཾ ཀཏ’’ནྟི ཝཏྭཱ ཏུཙྪཧཏྠཱཝ གནྟྭཱ, ‘‘ཀིཾ, ཨམྨཱ’’ཏི ཝིསཱཁཱཡ པུཊྛཱ ཏམཏྠཾ ཨཱརོཙེསི. ‘‘ཨམྨ, ནཱཧཾ མམ ཨཡྻེན ཨཱམཊྛབྷཎྜཾ པིལནྡྷིསྶཱམི, པརིཙྩཏྟཾ མཡཱ. ཨཡྻཱནཾ པན པཊིཛགྒིཏུཾ དུཀྑཾ, ཏཾ ཝིསྶཛྫེཏྭཱ ཀཔྤིཡབྷཎྜཾ ཨུཔནེསྶཱམི, གཙྪ, ཏཾ ཨཱཧརཱཧཱི’’ཏི. སཱ གནྟྭཱ ཨཱཧརི. ཝིསཱཁཱ ཏཾ ཨཔིལནྡྷིཏྭཱཝ ཀམྨཱརེ པཀྐོསཱཔེཏྭཱ ཨགྒྷཱཔེསི. ཏེཧི ‘‘ནཝ ཀོཊིཡོ ཨགྒྷཏི, ཧཏྠཀཱརཱཔཎིཡཾ པནསྶ སཏསཧསྶ’’ནྟི ཝུཏྟེ པསཱདྷནཾ ཡཱནེ ཋཔཱཔེཏྭཱ ‘‘ཏེན ཧི ཏཾ ཝིཀྐིཎཐཱ’’ཏི ཨཱཧ. བྷཏྟཀཾ དྷནཾ དཏྭཱ གཎྷིཾཏུ ན ཀོཙི སཀྑིསྶཏི. ཏཉྷི པསཱདྷནཾ པསཱདྷེཏུཾ ཨནུཙྪཝིཀཱ ཨིཏྠིཡོ ནཱམ དུལླབྷཱ. པཐཝིམཎྜལསྨིཉྷི ཏིསྶོཝ ཨིཏྠིཡོ མཧཱལཏཱཔསཱདྷནཾ ལབྷིཾསུ ཝིསཱཁཱ མཧཱཨུཔཱསིཀཱ, བནྡྷུལམལླསེནཱཔཏིསྶ བྷརིཡཱ, མལླིཀཱ, བཱརཱཎསཱིསེཊྛིནོ དྷཱིཏཱཏི.

ཏསྨཱ ཝིསཱཁཱ སཡམེཝ ཏསྶ མཱུལཾ དཏྭཱ སཏསཧསྶཱདྷིཀཱ ནཝ ཀོཊིཡོ སཀཊེ ཨཱརོཔེཏྭཱ ཝིཧཱརཾ ནེཏྭཱ སཏྠཱརཾ ཝནྡིཏྭཱ, ‘‘བྷནྟེ, མཡ྄ཧཾ ཨཡྻེན ཨཱནནྡཏྠེརེན མམ པསཱདྷནཾ ཧཏྠེན ཨཱམཊྛཾ, ཏེན ཨཱམཊྛཀཱལཏོ པཊྛཱཡ ན སཀྐཱ ཏཾ མཡཱ པིལནྡྷིཏུཾ. ཏཾ པན ཝིསྶཛྫེཏྭཱ ཀཔྤིཡཾ ཨུཔནེསྶཱམཱིཏི ཝིཀྐིཎཱཔེནྟཱི ཨཉྙཾ ཏཾ གཎྷིཏུཾ སམཏྠཾ ཨདིསྭཱ ཨཧམེཝ ཏསྶ མཱུལཾ གཱཧཱཔེཏྭཱ ཨཱགཏཱ, ཙཏཱུསུ པཙྩཡེསུ ཀཏརཔཙྩཡེན ཨུཔནེསྶཱམི, བྷནྟེ’’ཏི. པཱཙཱིནདྭཱརེ སངྒྷསྶ ཝསནཊྛཱནཾ ཀཱཏུཾ ཏེ ཡུཏྟཾ ཝིསཱཁེཏི ‘‘ཡུཏྟཾ, བྷནྟེ’’ཏི ཝིསཱཁཱ ཏུཊྛམཱནསཱ ནཝཀོཊཱིཧི བྷཱུམིམེཝ གཎྷི. ཨཔརཱཧི ནཝཀོཊཱིཧི ཝིཧཱརཾ ཀཱཏུཾ ཨཱརབྷི.

ཨཐེཀདིཝསཾ སཏྠཱ པཙྩཱུསསམཡེ ལོཀཾ ཝོལོཀེནྟོ དེཝལོཀཱ ཙཝིཏྭཱ བྷདྡིཡནགརེ སེཊྛིཀུལེ ནིབྦཏྟསྶ བྷདྡིཡསྶ ནཱམ སེཊྛིཔུཏྟསྶ ཨུཔནིསྶཡསམྤཏྟིཾ དིསྭཱ ཨནཱཐཔིཎྜིཀསྶ གེཧེ བྷཏྟཀིཙྩཾ ཀཏྭཱ ཨུཏྟརདྭཱརཱབྷིམུཁོ ཨཧོསི. པཀཏིཡཱ ཧི སཏྠཱ ཝིསཱཁཱཡ གེཧེ བྷིཀྑཾ གཎྷིཏྭཱ དཀྑིཎདྭཱརེན ནིཀྑམིཏྭཱ ཛེཏཝནེ ཝསཏི. ཨནཱཐཔིཎྜིཀསྶ གེཧེ བྷིཀྑཾ གཧེཏྭཱ པཱཙཱིནདྭཱརེན ནིཀྑམིཏྭཱ པུབྦཱརཱམེ ཝསཏི. ཨུཏྟརདྭཱརཾ སནྡྷཱཡ གཙྪནྟཾཡེཝ བྷགཝནྟཾ དིསྭཱ, ‘‘ཙཱརིཀཾ པཀྐམིསྶཏཱི’’ཏི ཛཱནནྟི. ཝིསཱཁཱཔི ཏཾ དིཝསཾ ‘‘སཏྠཱ ཨུཏྟརདྭཱརཱབྷིམུཁོ གཏོ’’ཏི སུཏྭཱ ཝེགེན གནྟྭཱ ཝནྡིཏྭཱ ཨཱཧ – ‘‘ཙཱརིཀཾ གནྟུཀཱམཏྠ, བྷནྟེ’’ཏི? ‘‘ཨཱམ, ཝིསཱཁེ’’ཏི. ‘‘བྷནྟེ, ཨེཏྟཀཾ དྷནཾ པརིཙྩཛིཏྭཱ ཏུམྷཱཀཾ ཝིཧཱརཾ ཀཱརེམི, ནིཝཏྟཐ, བྷནྟེ’’ཏི. ‘‘ཨནིཝཏྟགམནཾ ཨིདཾ ཝིསཱཁེ’’ཏི. སཱ ‘‘ཨདྡྷཱ ཧེཏུསམྤནྣཾ ཀཉྩི པསྶིསྶཏི བྷགཝཱ’’ཏི ཙིནྟེཏྭཱ, ‘‘ཏེན ཧི, བྷནྟེ, མཡ྄ཧཾ ཀཏཱཀཏཝིཛཱནནཀཾ ཨེཀཾ བྷིཀྑུཾ ནིཝཏྟེཏྭཱ གཙྪཐཱ’’ཏི ཨཱཧ. ‘‘ཡཾ རུཙྩསི, ཏསྶ པཏྟཾ གཎྷ ཝིསཱཁེ’’ཏི ཨཱཧ. སཱ ཀིཉྩཱཔི ཨཱནནྡཏྠེརཾ པིཡཱཡཏི, ‘‘མཧཱམོགྒལླཱནཏྠེརོ ཨིདྡྷིམཱ, ཨེཏཾ མེ ནིསྶཱཡ ཀམྨཾ ལཧུཾ ནིཔྥཛྫིསྶཏཱི’’ཏི པན ཙིནྟེཏྭཱ ཐེརསྶ པཏྟཾ གཎྷི. ཐེརོ སཏྠཱརཾ ཨོལོཀེསི. སཏྠཱ ‘‘ཏཝ པརིཝཱརེ པཉྩསཏེ བྷིཀྑཱུ གཧེཏྭཱ ནིཝཏྟ མོགྒལླཱནཱ’’ཏི ཨཱཧ. སོ ཏཐཱ ཨཀཱསི. ཏསྶཱནུབྷཱཝེན པཉྙཱསསཊྛིཡོཛནཱནིཔི རུཀྑཏྠཱཡ ཙ པཱསཱཎཏྠཱཡ ཙ གཏཱ མནུསྶཱ མཧནྟེ མཧནྟེ རུཀྑེ ཙ པཱསཱཎེ ཙ གཧེཏྭཱ ཏཾ དིཝསམེཝ ཨཱགཙྪནྟི, ནེཝ སཀཊེ རུཀྑཔཱསཱཎེ ཨཱརོཔེནྟཱ ཀིལམནྟི, ན ཨཀྑོ བྷིཛྫཏི. ན ཙིརསྶེཝ དྭེབྷཱུམིཀཾ པཱསཱདཾ ཀརིཾསུ. ཧེཊྛཱབྷཱུམིཡཾ པཉྩ གབྦྷསཏཱནི, ཨུཔརིབྷཱུམིཡཾ པཉྩ གབྦྷསཏཱནཱིཏི གབྦྷསཧསྶཔཊིམཎྜིཏོ པཱསཱདོ ཨཧོསི. ཨཊྛཀརཱིསེ པརིསུདྡྷེ བྷཱུམིབྷཱགེ པཱསཱདཾ ཀཱརཱཔེསི, ‘‘སུདྡྷཔཱསཱདོ པན ན སོབྷཏཱི’’ཏི ཏཾ པརིཝཱརེཏྭཱ པཉྩ པདྷཱནཝེཏྟགེཧསཏཱནི, པཉྩ ཙཱུལ༹པཱསཱདསཏཱནི, པཉྩ དཱིགྷམཱལ༹ཀསཏཱནི ཀཱརཱཔེསི.

ཨཐ སཏྠཱ ནཝཧི མཱསེཧི ཙཱརིཀཾ ཙརིཏྭཱ པུན སཱཝཏྠིཾ ཨགམཱསི. ཝིསཱཁཱཡཔི པཱསཱདེ ཀམྨཾ ནཝཧི མཱསེཧི ནིཊྛིཏཾ. པཱསཱདཀཱུཊཾ གྷནཀོཊྚིཏརཏྟསུཝཎྞེནེཝ སཊྛིཨུདཀགྷཊགཎྷནཀཾ ཀཱརཱཔེསི. ‘‘སཏྠཱ ཛེཏཝནཝིཧཱརཾ གཙྪཏཱི’’ཏི ཙ སུཏྭཱ པཙྩུགྒམནཾ ཀཏྭཱ སཏྠཱརཾ ཨཏྟནོ ཝིཧཱརཾ ནེཏྭཱ པཊིཉྙཾ གཎྷི, ‘‘བྷནྟེ, ཨིམཾ ཙཏུམཱསཾ བྷིཀྑུསངྒྷཾ གཧེཏྭཱ ཨིདྷེཝ ཝསཐ, པཱསཱདམཧཾ ཀརིསྶཱམཱི’’ཏི. སཏྠཱ ཨདྷིཝཱསེསི. སཱ ཏཏོ པཊྛཱཡ བུདྡྷཔྤམུཁསྶ བྷིཀྑུསངྒྷསྶ ཝིཧཱརེ ཨེཝ དཱནཾ དེཏི. ཨཐསྶཱ ཨེཀཱ སཧཱཡིཀཱ སཏསཧསྶགྒྷནཀཾ ཨེཀཾ ཝཏྠཾ ཨཱདཱཡ ཨཱགནྟྭཱ, ‘‘སཧཱཡིཀེ ཨཧཾ ཨིམཾ ཝཏྠཾ ཏཝ པཱསཱདེ བྷཱུམཏྠརཎསངྑེཔེན ཨཏྠརིཏུཀཱམཱ, ཨཏྠརཎཊྛཱནཾ མེ ཨཱཙིཀྑཐཱ’’ཏི ཨཱཧ. ‘‘སཱདྷུ སཧཱཡིཀེ, སཙེ ཏྱཱཧཾ ‘ཨོཀཱསོ ནཏྠཱི’ཏི ཝཀྑཱམི, ཏྭཾ ‘མེ ཨོཀཱསཾ ཨདཱཏུཀཱམཱ’ཏི མཉྙིསྶསི, སཡམེཝ པཱསཱདསྶ དྭེ བྷཱུམིཡོ གབྦྷསཧསྶཉྩ ཨོལོཀེཏྭཱ ཨཏྠརཎཊྛཱནཾ ཛཱནཱཧཱི’’ཏི ཨཱཧ. སཱ སཏསཧསྶགྒྷནཀཾ ཝཏྠཾ གཧེཏྭཱ ཏཏྠ ཏཏྠ ཝིཙརནྟཱི ཏཏོ ཨཔྤཏརམཱུལཾ ཝཏྠཾ ཨདིསྭཱ ‘‘ནཱཧཾ ཨིམསྨིཾ པཱསཱདེ པུཉྙབྷཱགཾ ལབྷཱམཱི’’ཏི དོམནསྶཔྤཏྟཱ ཨེཀསྨིཾ ཋཱནེ རོདནྟཱི ཨཊྛཱསི. ཨཐ ནཾ ཨཱནནྡཏྠེརོ དིསྭཱ, ‘‘ཀསྨཱ རོདསཱི’’ཏི པུཙྪི. སཱ ཏམཏྠཾ ཨཱརོཙེསི. ཐེརོ ‘‘མཱ ཙིནྟཡི, ཨཧཾ ཏེ ཨཏྠརཎཊྛཱནཾ ཨཱཙིཀྑིསྶཱམཱི’’ཏི ཝཏྭཱ, ‘‘སོཔཱནཔཱདམཱུལེ པཱདདྷོཝནཊྛཱནེ ཨིམཾ པཱདཔུཉྪནཀཾ ཀཏྭཱ ཨཏྠརཱཧི, བྷིཀྑཱུ པཱདེ དྷོཝིཏྭཱ པཋམཾ ཨེཏྠ པཱདཾ པུཉྪིཏྭཱ ཨནྟོ པཝིསིསྶནྟི, ཨེཝཾ ཏེ མཧཔྥལཾ བྷཝིསྶཏཱི’’ཏི ཨཱཧ. ཝིསཱཁཱཡ ཀིརེཏཾ ཨསལླཀྑིཏཊྛཱནཾ.

ཝིསཱཁཱ ཙཏྟཱརོ མཱསེ ཨནྟོཝིཧཱརེ བུདྡྷཔྤམུཁསྶ བྷིཀྑུསངྒྷསྶ དཱནཾ ཨདཱསི, ཨཝསཱནདིཝསེ བྷིཀྑུསངྒྷསྶ ཙཱིཝརསཱཊཀེ ཨདཱསི. སངྒྷནཝཀེན ལདྡྷཙཱིཝརསཱཊཀཱ སཧསྶགྒྷནཀཱ ཧོནྟི. སབྦེསཾ པཏྟཱནི པཱུརེཏྭཱ བྷེསཛྫཾ ཨདཱསི. དཱནཔརིཙྩཱགེ ནཝ ཀོཊིཡོ ཨགམཾསུ. ཨིཏི ཝིཧཱརསྶ བྷཱུམིགྒཧཎེ ནཝ ཀོཊིཡོ, ཝིཧཱརསྶ ཀཱརཱཔནེ ནཝ, ཝིཧཱརམཧེ ནཝཱཏི སབྦཱཔི སཏྟཝཱིསཏི ཀོཊིཡོ སཱ བུདྡྷསཱསནེ པརིཙྩཛི. ཨིཏྠིབྷཱཝེ ཋཏྭཱ མིཙྪཱདིཊྛིཀསྶ གེཧེ ཝསམཱནཱཡ ཨེཝརཱུཔོ མཧཱཔརིཙྩཱགོ ནཱམ ཨཉྙིསྶཱ ནཏྠི. སཱ ཝིཧཱརམཧསྶ ནིཊྛིཏདིཝསེ ཝཌྜྷམཱནཀཙྪཱཡཱཡ པུཏྟནཏྟཔནཏྟཔརིཝུཏཱ ‘‘ཡཾ ཡཾ མཡཱ པུབྦེ པཏྠིཏཾ, སབྦམེཝ མཏྠཀཾ པཏྟ’’ནྟི པཱསཱདཾ ཨནུཔརིཡཱཡནྟཱི པཉྩཧི གཱཐཱཧི མདྷུརསདྡེན ཨིམཾ ཨུདཱནཾ ཨུདཱནེསི –

‘‘ཀདཱཧཾ པཱསཱདཾ རམྨཾ, སུདྷཱམཏྟིཀལེཔནཾ;

ཝིཧཱརདཱནཾ དསྶཱམི, སངྐཔྤོ མཡ྄ཧ པཱུརིཏོ.

‘‘ཀདཱཧཾ མཉྩཔཱིཋཉྩ, བྷིསིབིམྦོཧནཱནི ཙ;

སེནཱསནབྷཎྜཾ དསྶཱམི, སངྐཔྤོ མཡ྄ཧ པཱུརིཏོ.

‘‘ཀདཱཧཾ སལཱཀབྷཏྟཾ, སུཙིཾ མཾསཱུཔསེཙནཾ;

བྷོཛནདཱནཾ དསྶཱམི, སངྐཔྤོ མཡ྄ཧ པཱུརིཏོ.

‘‘ཀདཱཧཾ ཀཱསིཀཾ ཝཏྠཾ, ཁོམཀཔྤཱསིཀཱནི ཙ;

ཙཱིཝརདཱནཾ དསྶཱམི, སངྐཔྤོ མཡ྄ཧ པཱུརིཏོ.

‘‘ཀདཱཧཾ སཔྤིནཝནཱིཏཾ, མདྷུཏེལཉྩ ཕཱཎིཏཾ;

བྷེསཛྫདཱནཾ དསྶཱམི, སངྐཔྤོ མཡ྄ཧ པཱུརིཏོ’’ཏི.

བྷིཀྑཱུ ཏསྶཱ སདྡཾ སུཏྭཱ སཏྠུ ཨཱརོཙཡིཾསུ – ‘‘བྷནྟེ, ཨམྷེཧི ཨེཏྟཀེ ཨདྡྷཱནེ ཝིསཱཁཱཡ གཱཡནཾ ནཱམ ན དིཊྛཔུབྦཾ, སཱ ཨཛྫ པུཏྟནཏྟཔནཏྟཔརིཝུཏཱ གཱཡམཱནཱ པཱསཱདཾ ཨནུཔརིཡཱཡཏི, ཀིཾ ནུ ཁྭསྶཱ པིཏྟཾ ཝཱ ཀུཔིཏཾ, ཨུདཱཧུ ཨུམྨཏྟིཀཱ ཛཱཏཱ’’ཏི? སཏྠཱ ‘‘ན, བྷིཀྑཝེ, མཡ྄ཧཾ དྷཱིཏཱ གཱཡཏི, ཨཏྟནོ པནསྶཱ ཨཛ྄ཛྷཱསཡོ པརིཔུཎྞོ, སཱ ‘པཏྠིཏཔཏྠནཱ མེ མཏྠཀཾ པཏྟཱ’ཏི ཏུཊྛམཱནསཱ ཨུདཱནཾ ཨུདཱནེནྟཱི ཝིཙརཏཱི’’ཏི ཝཏྭཱ ‘‘ཀདཱ པན, བྷནྟེ, ཏཱཡ པཏྠནཱ པཏྠིཏཱ’’ཏི? ‘‘སུཎིསྶཐ, བྷིཀྑཝེ’’ཏི. ‘‘སུཎིསྶཱམ, བྷནྟེ’’ཏི ཝུཏྟེ ཨཏཱིཏཾ ཨཱཧརི –

‘‘ཨཏཱིཏེ, བྷིཀྑཝེ, ཨིཏོ ཀཔྤསཏསཧསྶམཏྠཀེ པདུམུཏྟརོ ནཱམ བུདྡྷོ ལོཀེ ནིབྦཏྟི. ཏསྶ ཝསྶསཏསཧསྶཾ ཨཱཡུ ཨཧོསི, ཁཱིཎཱསཝཱནཾ སཏསཧསྶཔརིཝཱརོ, ནགརཾ ཧཾསཝཏཱི ནཱམ, པིཏཱ སུནནྡོ ནཱམ རཱཛཱ, མཱཏཱ སུཛཱཏཱ ནཱམ དེཝཱི, ཏསྶ ཨགྒཨུཔཊྛཱཡིཀཱ ཨེཀཱ ཨུཔཱསིཀཱ ཨཊྛ ཝརེ ཡཱཙིཏྭཱ མཱཏུཊྛཱནེ ཋཏྭཱ སཏྠཱརཾ ཙཏཱུཧི པཙྩཡེཧི པཊིཛགྒནྟཱི སཱཡཾཔཱཏཾ ཨུཔཊྛཱནཾ གཙྪཏི. ཏསྶཱ ཨེཀཱ སཧཱཡིཀཱ ཏཱཡ སདྡྷིཾ ཝིཧཱརཾ ནིབདྡྷཾ གཙྪཏི. སཱ ཏསྶཱ སཏྠཱརཱ སདྡྷིཾ ཝིསྶཱསེན ཀཐནཉྩ ཝལླབྷབྷཱཝཉྩ དིསྭཱ, ‘ཀིཾ ནུ ཁོ ཀཏྭཱ ཨེཝཾ བུདྡྷཱནཾ ཝལླཏཱ ཧོཏཱི’ཏི ཙིནྟེཏྭཱ སཏྠཱརཾ པུཙྪི – ‘བྷནྟེ, ཨེསཱ ཨིཏྠཱི ཏུམྷཱཀཾ ཀིཾ ཧོཏཱི’’’ཏི? ‘‘ཨུཔཊྛཱཡིཀཱནཾ ཨགྒཱ’’ཏི. ‘‘བྷནྟེ, ཀིཾ ཀཏྭཱ ཨུཔཊྛཱཡིཀཱནཾ ཨགྒཱ ཧོཏཱི’’ཏི? ‘‘ཀཔྤསཏསཧསྶཾ པཏྠནཾ པཏྠེཏྭཱ’’ཏི. ‘‘ཨིདཱནི པཏྠེཏྭཱ ལདྡྷུཾ སཀྐཱ, བྷནྟེ’’ཏི. ‘‘ཨཱམ, སཀྐཱ’’ཏི. ‘‘ཏེན ཧི, བྷནྟེ, བྷིཀྑུསཏསཧསྶེན སདྡྷིཾ སཏྟཱཧཾ མཡ྄ཧཾ བྷིཀྑཾ གཎྷཐཱ’’ཏི ཨཱཧ. སཏྠཱ ཨདྷིཝཱསེསི. སཱ སཏྟཱཧཾ དཱནཾ དཏྭཱ ཨོསཱནདིཝསེ ཙཱིཝརསཱཊཀེ དཏྭཱ སཏྠཱརཾ ཝནྡིཏྭཱ པཱདམཱུལེ ནིཔཛྫིཏྭཱ, ‘‘བྷནྟེ, ནཱཧཾ ཨིམསྶ དཱནསྶ ཕལེན དེཝིསྶརིཡཱདཱིནཾ ཨཉྙཏརཾ པཏྠེམི, ཏུམྷཱདིསསྶ པནེཀསྶ བུདྡྷསྶ སནྟིཀེ ཨཊྛ ཝརེ ལབྷིཏྭཱ མཱཏུཊྛཱནེ ཋཏྭཱ ཙཏཱུཧི པཙྩཡེཧི པཊིཛགྒིཏུཾ སམཏྠཱནཾ ཨགྒཱ བྷཝེཡྻ’’ནྟི པཏྠནཾ པཊྛཔེསི. སཏྠཱ ‘‘སམིཛ྄ཛྷིསྶཏི ནུ ཁོ ཨིམིསྶཱ པཏྠནཱ’’ཏི ཨནཱགཏཾ ཨཱཝཛྫེནྟོ ཀཔྤསཏསཧསྶཾ ཨོལོཀེཏྭཱ ‘‘ཀཔྤསཏསཧསྶཔརིཡོསཱནེ གོཏམོ ནཱམ བུདྡྷོ ཨུཔྤཛྫིསྶཏི, ཏདཱ ཏྭཾ ཝིསཱཁཱ ནཱམ ཨུཔཱསིཀཱ ཧུཏྭཱ ཏསྶ སནྟིཀེ ཨཊྛ ཝརེ ལབྷིཏྭཱ མཱཏུཊྛཱནེ ཋཏྭཱ ཙཏཱུཧི པཙྩཡེཧི པཊིཛགྒནྟཱིནཾ ཨུཔཊྛཱཡིཀཱནཾ ཨགྒཱ བྷཝིསྶསཱི’’ཏི ཨཱཧ. ཏསྶཱ སཱ སམྤཏྟི སྭེཝ ལདྡྷབྦཱ ཝིཡ ཨཧོསི.

སཱ ཡཱཝཏཱཡུཀཾ པུཉྙཾ ཀཏྭཱ ཏཏོ ཙུཏཱ དེཝལོཀེ ནིབྦཏྟིཏྭཱ དེཝམནུསྶེསུ སཾསརནྟཱི ཀསྶཔསམྨཱསམྦུདྡྷཀཱལེ ཀིཀིསྶ ཀཱསིརཉྙོ སཏྟནྣཾ དྷཱིཏཱནཾ ཀནིཊྛཱ སངྒྷདཱསཱི ནཱམ ཧུཏྭཱ པརཀུལཾ ཨགནྟྭཱ ཏཱཧི ཛེཊྛབྷགིནཱིཧི སདྡྷིཾ དཱིགྷརཏྟཾ དཱནཱདཱིནི པུཉྙཱནི ཀཏྭཱ ཀསྶཔསམྨཱསམྦུདྡྷསྶ པཱདམཱུལེཔི ‘‘ཨནཱགཏེ ཏུམྷཱདིསསྶ བུདྡྷསྶ མཱཏུཊྛཱནེ ཋཏྭཱ ཙཏུཔཙྩཡདཱཡིཀཱནཾ ཨགྒཱ བྷཝེཡྻ’’ནྟི པཏྠནཾ ཨཀཱསི. སཱ ཏཏོ པཊྛཱཡ པན དེཝམནུསྶེསུ སཾསརནྟཱི ཨིམསྨིཾ ཨཏྟབྷཱཝེ མེཎྜཀསེཊྛིཔུཏྟསྶ དྷནཉྩཡསེཊྛིནོ དྷཱིཏཱ ཧུཏྭཱ ནིབྦཏྟཱ. མཡ྄ཧཾ སཱསནེ བཧཱུནི པུཉྙཱནི ཨཀཱསི. ཨིཏི ཁོ, བྷིཀྑཝེ, ‘‘ན མཡ྄ཧཾ དྷཱིཏཱ གཱཡཏི, པཏྠིཏཔཏྠནཱཡ པན ནིཔྥཏྟིཾ དིསྭཱ ཨུདཱནཾ ཨུདཱནེཏཱི’’ཏི ཝཏྭཱ སཏྠཱ དྷམྨཾ དེསེནྟོ, ‘‘བྷིཀྑཝེ, ཡཐཱ ནཱམ ཚེཀོ མཱལཱཀཱརོ ནཱནཱཔུཔྥཱནཾ མཧནྟཾ རཱསིཾ ཀཏྭཱ ནཱནཔྤཀཱརེ མཱལཱགུཎེ ཀརོཏི, ཨེཝམེཝ ཝིསཱཁཱཡ ནཱནཔྤཀཱརཱནི པུཉྙཱནི ཀཱཏུཾ ཙིཏྟཾ ནམཏཱི’’ཏི ཝཏྭཱ ཨིམཾ གཱཐམཱཧ –

༥༣.

‘‘ཡཐཱཔི པུཔྥརཱསིམྷཱ, ཀཡིརཱ མཱལཱགུཎེ བཧཱུ;

ཨེཝཾ ཛཱཏེན མཙྩེན, ཀཏྟབྦཾ ཀུསལཾ བཧུ’’ནྟི.

ཏཏྠ པུཔྥརཱསིམྷཱཏི ནཱནཔྤཀཱརཱནཾ པུཔྥཱནཾ རཱསིམྷཱ. ཀཡིརཱཏི ཀརེཡྻ. མཱལཱགུཎེ བཧཱུཏི ཨེཀཏོ ཝཎྚིཀམཱལཱདིབྷེདཱ ནཱནཔྤཀཱརཱ མཱལཱཝིཀཏིཡོ. མཙྩེནཱཏི མརིཏབྦསབྷཱཝཏཱཡ ‘‘མཙྩོ’’ཏི ལདྡྷནཱམེན སཏྟེན ཙཱིཝརདཱནཱདིབྷེདཾ བཧུཾ ཀུསལཾ ཀཏྟབྦཾ. ཏཏྠ པུཔྥརཱསིགྒཧཎཾ བཧུཔུཔྥདསྶནཏྠཾ. སཙེ ཧི ཨཔྤཱནི པུཔྥཱནི ཧོནྟི, མཱལཱཀཱརོ ཙ ཚེཀོ ནེཝ བཧཱུ མཱལཱགུཎེ ཀཱཏུཾ སཀྐོཏི, ཨཚེཀོ པན ཨཔྤེསུ བཧཱུསུཔི པུཔྥེསུ ན སཀྐོཏིཡེཝ. བཧཱུསུ པན པུཔྥེསུ སཏི ཚེཀོ མཱལཱཀཱརོ དཀྑོ ཀུསལོ བཧཱུ མཱལཱགུཎེ ཀརོཏི, ཨེཝམེཝ སཙེ ཨེཀཙྩསྶ སདྡྷཱ མནྡཱ ཧོཏི, བྷོགཱ ཙ བཧཱུ སཾཝིཛྫནྟི, ནེཝ སཀྐོཏི བཧཱུནི ཀུསལཱནི ཀཱཏུཾ, མནྡཱཡ ཙ པན སདྡྷཱཡ མནྡེསུ ཙ པན བྷོགེསུ ན སཀྐོཏི. ཨུལཱ༹རཱཡ ཙ པན སདྡྷཱཡ མནྡེསུ ཙ བྷོགེསུ ན སཀྐོཏིཡེཝ. ཨུལཱ༹རཱཡ ཙ པན སདྡྷཱཡ ཨུལཱ༹རེསུ ཙ བྷོགེསུ སཏི སཀྐོཏི. ཏཐཱརཱུཔཱ ཙ ཝིསཱཁཱ ཨུཔཱསིཀཱ. ཏཾ སནྡྷཱཡེཏཾ ཝུཏྟཾ – ‘‘ཡཐཱཔི…པེ… ཀཏྟབྦཾ ཀུསལཾ བཧུ’’ནྟི.

དེསནཱཝསཱནེ བཧཱུ སོཏཱཔནྣཱདཡོ ཨཧེསུཾ. མཧཱཛནསྶ སཱཏྠིཀཱ དྷམྨདེསནཱ ཛཱཏཱཏི.

ཝིསཱཁཱཝཏྠུ ཨཊྛམཾ

༩. ཨཱནནྡཏྠེརཔཉྷཱཝཏྠུ

ན པུཔྥགནྡྷོ པཊིཝཱཏམེཏཱིཏི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ ཨཱནནྡཏྠེརསྶ པཉྷཾ ཝིསྶཛྫེནྟོ ཀཐེསི.

ཐེརོ ཀིར སཱཡནྷསམཡེ པཊིསལླཱིནོ ཙིནྟེསི – ‘‘བྷགཝཏཱ མཱུལགནྡྷོ, སཱརགནྡྷོ, པུཔྥགནྡྷོཏི ཏཡོ ཨུཏྟམགནྡྷཱ ཝུཏྟཱ, ཏེསཾ ཨནུཝཱཏམེཝ གནྡྷོ གཙྪཏི, ནོ པཊིཝཱཏཾ. ཨཏྠི ནུ ཁོ ཏཾ གནྡྷཛཱཏཾ, ཡསྶ པཊིཝཱཏམྤི གནྡྷོ གཙྪཏཱི’’ཏི. ཨཐསྶ ཨེཏདཧོསི – ‘‘ཀིཾ མཡ྄ཧཾ ཨཏྟནཱ ཝིནིཙྪིཏེན, སཏྠཱརཾཡེཝ པུཙྪིསྶཱམཱི’’ཏི. སོ སཏྠཱརཾ ཨུཔསངྐམིཏྭཱ པུཙྪི. ཏེན ཝུཏྟཾ –

‘‘ཨཐ ཁོ ཨཱཡསྨཱ ཨཱནནྡོ སཱཡནྷསམཡེ པཊིསལླཱནཱ ཝུཊྛིཏོ ཡེན བྷགཝཱ ཏེནུཔསངྐམི, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི, ཨེཀམནྟཾ ནིསིནྣོ ཁོ ཨཱཡསྨཱ ཨཱནནྡོ བྷགཝནྟཾ ཨེཏདཝོཙ –

‘‘ཏཱིཎིམཱནི, བྷནྟེ, གནྡྷཛཱཏཱནི, ཡེསཾ ཨནུཝཱཏམེཝ གནྡྷོ གཙྪཏི, ནོ པཊིཝཱཏཾ. ཀཏམཱནི ཏཱིཎི? མཱུལགནྡྷོ, སཱརགནྡྷོ, པུཔྥགནྡྷོ, ཨིམཱནི ཁོ, བྷནྟེ, ཏཱིཎི གནྡྷཛཱཏཱནི. ཡེསཾ ཨནུཝཱཏམེཝ གནྡྷོ གཙྪཏི, ནོ པཊིཝཱཏཾ. ཨཏྠི ནུ ཁོ, བྷནྟེ, ཀིཉྩི གནྡྷཛཱཏཾ ཡསྶ ཨནུཝཱཏམྤི གནྡྷོ གཙྪཏི, པཊིཝཱཏམྤི གནྡྷོ གཙྪཏི, ཨནུཝཱཏཔཊིཝཱཏམྤི གནྡྷོ གཙྪཏཱི’’ཏི? (ཨ. ནི. ༣.༨༠)

ཨཐསྶ བྷགཝཱ པཉྷཾ ཝིསྶཛྫེནྟོ –

‘‘ཨཏྠཱནནྡ, ཀིཉྩི གནྡྷཛཱཏཾ, ཡསྶ ཨནུཝཱཏམྤི གནྡྷོ གཙྪཏི, པཊིཝཱཏམྤི གནྡྷོ གཙྪཏི, ཨནུཝཱཏཔཊིཝཱཏམྤི གནྡྷོ གཙྪཏཱི’’ཏི. ‘‘ཀཏམཾ པན ཏཾ, བྷནྟེ, གནྡྷཛཱཏཾ’’? ‘‘ཡསྶ ཨནུཝཱཏམྤི གནྡྷོ གཙྪཏི, པཊིཝཱཏམྤི གནྡྷོ གཙྪཏི, ཨནུཝཱཏཔཊིཝཱཏམྤི གནྡྷོ གཙྪཏཱི’’ཏི?

‘‘ཨིདྷཱནནྡ, ཡསྨིཾ གཱམེ ཝཱ ནིགམེ ཝཱ ཨིཏྠཱི ཝཱ པུརིསོ ཝཱ བུདྡྷཾ སརཎཾ གཏོ ཧོཏི, དྷམྨཾ སརཎཾ གཏོ ཧོཏི, སངྒྷཾ སརཎཾ གཏོ ཧོཏི, པཱཎཱཏིཔཱཏཱ པཊིཝིརཏོ ཧོཏི, ཨདིནྣཱདཱནཱ པཊིཝིརཏོ ཧོཏི, ཀཱམེསུམིཙྪཱཙཱརཱ པཊིཝིརཏོ ཧོཏི, མུསཱཝཱདཱ པཊིཝིརཏོ ཧོཏི, སུརཱམེརཡམཛྫཔམཱདཊྛཱནཱ པཊིཝིརཏོ ཧོཏི, སཱིལཝཱ ཧོཏི ཀལྱཱཎདྷམྨོ, ཝིགཏམལམཙྪེརེན ཙེཏསཱ ཨགཱརཾ ཨཛ྄ཛྷཱཝསཏི མུཏྟཙཱགོ པཡཏཔཱཎི ཝོསྶགྒརཏོ ཡཱཙཡོགོ དཱནསཾཝིབྷཱགརཏོ.

‘‘ཏསྶ དིསཱསུ སམཎབྲཱཧྨཎཱ ཝཎྞཾ བྷཱསནྟི, ‘ཨམུཀསྨིཾ ནཱམ གཱམེ ཝཱ ནིགམེ ཝཱ ཨིཏྠཱི ཝཱ པུརིསོ ཝཱ བུདྡྷཾ སརཎཾ གཏོ ཧོཏི, དྷམྨཾ སརཎཾ གཏོ ཧོཏི, སངྒྷཾ སརཎཾ གཏོ ཧོཏི…པེ… དཱནསཾཝིབྷཱགརཏོ’’’ཏི.

‘‘དེཝཏཱཔིསྶ ཝཎྞཾ བྷཱསནྟི, ‘ཨམུཀསྨིཾ ནཱམ གཱམེ ཝཱ ནིགམེ ཝཱ ཨིཏྠཱི ཝཱ པུརིསོ ཝཱ བུདྡྷཾ སརཎཾ གཏོ ཧོཏི, དྷམྨཾ སརཎཾ གཏོ ཧོཏི, སངྒྷཾ སརཎཾ གཏོ ཧོཏི…པེ… དཱནསཾཝིབྷཱགརཏོ’’’ཏི. ‘‘ཨིདཾ ཁོ ཏཾ, ཨཱནནྡ, གནྡྷཛཱཏཾ, ཡསྶ ཨནུཝཱཏམྤི གནྡྷོ གཙྪཏི, པཊིཝཱཏམྤི གནྡྷོ གཙྪཏི, ཨནུཝཱཏཔཊིཝཱཏམྤི གནྡྷོ གཙྪཏཱི’’ཏི (ཨ. ནི. ༣.༨༠) ཝཏྭཱ ཨིམཱ གཱཐཱ ཨབྷཱསི –

༥༤.

‘‘ན པུཔྥགནྡྷོ པཊིཝཱཏམེཏི,

ན ཙནྡནཾ ཏགརམལླིཀཱ ཝཱ;

སཏཉྩ གནྡྷོ པཊིཝཱཏམེཏི,

སབྦཱ དིསཱ སཔྤུརིསོ པཝཱཡཏི. (ཨ. ནི. ༣.༨༠);

༥༥.

‘‘ཙནྡནཾ ཏགརཾ ཝཱཔི, ཨུཔྤལཾ ཨཐ ཝསྶིཀཱི;

ཨེཏེསཾ གནྡྷཛཱཏཱནཾ, སཱིལགནྡྷོ ཨནུཏྟརོ’’ཏི.

ཏཏྠ ན པུཔྥགནྡྷོཏི ཏཱཝཏིཾསབྷཝནེ པརིཙྪཏྟཀརུཀྑོ ཨཱཡཱམཏོ ཙ ཝིཏྠཱརཏོ ཙ ཡོཛནསཏིཀོ, ཏསྶ པུཔྥཱནཾ ཨཱབྷཱ པཉྙཱས ཡོཛནཱནི གཙྪཏི, གནྡྷོ ཡོཛནསཏཾ, སོཔི ཨནུཝཱཏམེཝ གཙྪཏི, པཊིཝཱཏཾ པན ཨཊྛངྒུལམཏྟམྤི གནྟུཾ ན སཀྐོཏི, ཨེཝརཱུཔོཔི ན པུཔྥགནྡྷོ པཊིཝཱཏམེཏི. ཙནྡནནྟི ཙནྡནགནྡྷོ. ཏགརམལླིཀཱ ཝཱཏི ཨིམེསམྤི གནྡྷོ ཨེཝ ཨདྷིཔྤེཏོ. སཱརགནྡྷཱནཾ ཨགྒསྶ ཧི ལོཧིཏཙནྡནསྶཱཔི ཏགརསྶཔི མལླིཀཱཡཔི ཨནུཝཱཏམེཝ ཝཱཡཏི, ནོ པཊིཝཱཏཾ. སཏཉྩ གནྡྷོཏི སཔྤུརིསཱནཾ པན བུདྡྷཔཙྩེཀབུདྡྷསཱཝཀཱནཾ སཱིལགནྡྷོ པཊིཝཱཏམེཏི. ཀིཾ ཀཱརཎཱ? སབྦཱ དིསཱ སཔྤུརིསོ པཝཱཡཏི ཡསྨཱ པན སཔྤུརིསོ སཱིལགནྡྷེན སབྦཱཔི དིསཱ ཨཛ྄ཛྷོཏྠརིཏྭཱཝ གཙྪཏི, ཏསྨཱ ‘‘ཏསྶ གནྡྷོ ན པཊིཝཱཏམེཏཱི’’ཏི ན ཝཏྟབྦོ. ཏེན ཝུཏྟཾ ‘‘པཊིཝཱཏམེཏཱི’’ཏི. ཝསྶིཀཱིཏི ཛཱཏིསུམནཱ. ཨེཏེསནྟི ཨིམེསཾ ཙནྡནཱདཱིནཾ གནྡྷཛཱཏཱནཾ གནྡྷཏོ སཱིལཝནྟཱནཾ སཔྤུརིསཱནཾ སཱིལགནྡྷོཝ ཨནུཏྟརོ ཨསདིསོ ཨཔཊིབྷཱགོཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཏྟཱ. དེསནཱ མཧཱཛནསྶ སཱཏྠིཀཱ ཛཱཏཱཏི.

ཨཱནནྡཏྠེརཔཉྷཱཝཏྠུ ནཝམཾ.

༡༠. མཧཱཀསྶཔཏྠེརཔིཎྜཔཱཏདིནྣཝཏྠུ

ཨཔྤམཏྟོ ཨཡཾ གནྡྷོཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ མཧཱཀསྶཔཏྠེརསྶ པིཎྜཔཱཏདཱནཾ ཨཱརབྦྷ ཀཐེསི.

ཨེཀསྨིཉྷི དིཝསེ ཐེརོ སཏྟཱཧཙྩཡེན ནིརོདྷཱ ཝུཊྛཱཡ ‘‘རཱཛགཧེ སཔདཱནཾ པིཎྜཱཡ ཙརིསྶཱམཱི’’ཏི ནིཀྑམི. ཏསྨིཾ པན སམཡེ སཀྐསྶ དེཝརཉྙོ པརིཙཱརིཀཱ ཀཀུཊཔཱདིནིཡོ པཉྩསཏཱ ཨཙྪརཱཡོ ‘‘ཐེརསྶ པིཎྜཔཱཏཾ དསྶཱམཱ’’ཏི ཨུསྶཱཧཛཱཏཱ པཉྩ པིཎྜཔཱཏསཏཱནི སཛྫེཏྭཱ ཨཱདཱཡ ཨནྟརཱམགྒེ ཋཏྭཱ, ‘‘བྷནྟེ, ཨིམཾ པིཎྜཔཱཏཾ གཎྷཐ, སངྒཧཾ ནོ ཀརོཐཱ’’ཏི ཝདིཾསུ. ‘‘གཙྪཐ ཏུམྷེ, ཨཧཾ དུགྒཏཱནཾ སངྒཧཾ ཀརིསྶཱམཱི’’ཏི. ‘‘བྷནྟེ, མཱ ནོ ནཱསེཐ, སངྒཧཾ ནོ ཀརོཐཱ’’ཏི. ཐེརོ ཉཏྭཱ པུན པཊིཀྑིཔིཏྭཱ པུནཔི ཨཔགནྟུཾ ཨནིཙྪམཱནཱ ཡཱཙནྟིཡོ ‘‘ཨཏྟནོ པམཱཎཾ ན ཛཱནཱཐ, ཨཔགཙྪཐཱ’’ཏི ཨཙྪརཾ པཧརི. ཏཱ ཐེརསྶ ཨཙྪརསདྡཾ སུཏྭཱ སནྠམྦྷིཏྭཱ སམྨུཁཱ ཋཱཏུཾ ཨསཀྐོནྟིཡོ པལཱཡིཏྭཱ དེཝལོཀམེཝ གནྟྭཱ, སཀྐེན ‘‘ཀཧཾ གཏཱཏྠཱ’’ཏི པུཊྛཱ, ‘‘‘སམཱཔཏྟིཏོ ཝུཊྛིཏསྶ ཐེརསྶ པིཎྜཔཱཏཾ དསྶཱམཱ’ཏི གཏཱམྷཱ, དེཝཱ’’ཏི. ‘‘དིནྣོ པན ཝཱ’’ཏི? ‘‘གཎྷིཏུཾ ན ཨིཙྪཏཱི’’ཏི. ‘‘ཀིཾ ཀཐེསཱི’’ཏི? ‘‘‘དུགྒཏཱནཾ སངྒཧཾ ཀརིསྶཱམཱི’ཏི ཨཱཧ, དེཝཱ’’ཏི. ‘‘ཏུམྷེ ཀེནཱཀཱརེན གཏཱ’’ཏི. ‘‘ཨིམིནཱཝ, དེཝཱ’’ཏི. སཀྐོ ‘‘ཏུམྷཱདིསིཡོ ཐེརསྶ པིཎྜཔཱཏཾ ཀིཾ དསྶནྟཱི’’ཏི སཡཾ དཱཏུཀཱམོ ཧུཏྭཱ, ཛརཱཛིཎྞོ མཧལླཀོ ཁཎྜདནྟོ པལིཏཀེསོ ཨོཏགྒསརཱིརོ མཧལླཀཏནྟ ཝཱཡོ ཧུཏྭཱ སུཛམྤི དེཝདྷཱིཏརཾ ཏཐཱརཱུཔམེཝ མཧལླིཀཾ ཀཏྭཱ ཨེཀཾ པེསཀཱརཝཱིཐིཾ མཱཔེཏྭཱ ཏནྟཾ པསཱརེནྟོ ཨཙྪི.

ཐེརོཔི ‘‘དུགྒཏཱནཾ སངྒཧཾ ཀརིསྶཱམཱི’’ཏི ནགརཱབྷིམུཁོ གཙྪནྟོ བཧིནགརེ ཨེཝ ཏཾ ཝཱིཐིཾ དིསྭཱ ཨོལོཀེནྟོ དྭེ ཛནེ ཨདྡས. ཏསྨིཾ ཁཎེ སཀྐོ ཏནྟཾ པསཱརེཏི, སུཛཱ ཏསརཾ ཝཊྚེཏི. ཐེརོ ཙིནྟེསི – ‘‘ཨིམེ མཧལླཀཀཱལེཔི ཀམྨཾ ཀརོནྟིཡེཝ ཨིམསྨིཾ ནགརེ ཨིམེཧི དུགྒཏཏརཱ ནཏྠི མཉྙེ, ཨིམེཧི དིནྣཾ ཨུལུ༹ངྐམཏྟམྤི སཱཀམཏྟམྤི གཧེཏྭཱ ཨིམེསཾ སངྒཧཾ ཀརིསྶཱམཱི’’ཏི. སོ ཏེསཾ གེཧཱབྷིམུཁོ ཨཧོསི. སཀྐོ ཏཾ ཨཱགཙྪནྟཾ དིསྭཱ སུཛཾ ཨཱཧ – ‘‘བྷདྡེ, མཡ྄ཧཾ ཨཡྻོ ཨིཏོ ཨཱགཙྪཏི, ཏྭཾ ཨཔསྶནྟཱི ཝིཡ ཏུཎྷཱི ཧུཏྭཱ ནིསཱིད, ཁཎེན ཐེརཾ ཝཉྩེཏྭཱ པིཎྜཔཱཏཾ དསྶཱམཱ’’ཏི. ཐེརོ ཨཱགནྟྭཱ གེཧདྭཱརེ ཨཊྛཱསི. ཏེཔི ཨཔསྶནྟཱ ཝིཡ ཨཏྟནོ ཀམྨམེཝ ཀརོནྟཱ ཐོཀཾ ཨཱགམིཾསུ.

ཨཐ སཀྐོ ‘‘གེཧདྭཱརེ ཨེཀོ ཐེརོ ཝིཡ ཋིཏོ, ཨུཔདྷཱརེཧི ཏཱཝཱ’’ཏི ཨཱཧ. ‘‘གནྟྭཱ ཨུཔདྷཱརེཐ, སཱམཱི’’ཏི. སོ གེཧཱ ནིཀྑམིཏྭཱ ཐེརཾ པཉྩཔཏིཊྛིཏེན ཝནྡིཏྭཱ ཨུབྷོཧི ཧཏྠེཧི ཛཎྞུཀཱནི ཨོལམྦིཏྭཱ ནིཏྠུནནྟོ ཨུཊྛཱཡ ‘‘ཀཏརོ ཐེརོ ནུ ཁོ ཨཡྻོ’’ཏི ཐོཀཾ ཨོསཀྐིཏྭཱ ‘‘ཨཀྑཱིནི མེ དྷཱུམཱཡནྟཱི’’ཏི ཝཏྭཱ ནལཱཊེ ཧཏྠཾ ཋཔེཏྭཱ ཨུདྡྷཾ ཨོལོཀེཏྭཱ ‘‘ཨཧོ དུཀྑཾ, ཨཡྻོ ནོ མཧཱཀསྶཔཏྠེརོ ཙིརསྶཾ མེ ཀུཊིདྭཱརཾ ཨཱགཏོ, ཨཏྠི ནུ ཁོ ཀིཉྩི གེཧེ’’ཏི ཨཱཧ. སུཛཱ ཐོཀཾ ཨཱཀུལཾ ཝིཡ ཧུཏྭཱ ‘‘ཨཏྠི, སཱམཱི’’ཏི པཊིཝཙནཾ ཨདཱསི. སཀྐོ, ‘‘བྷནྟེ, ལཱུཁཾ ཝཱ པཎཱིཏཾ ཝཱཏི ཨཙིནྟེཏྭཱ སངྒཧཾ ནོ ཀརོཐཱ’’ཏི པཏྟཾ གཎྷི. ཐེརོ ‘‘ཨེཏེཧི དིནྣཾ སཱཀཾ ཝཱ ཧོཏུ ཀུཎྜཀམུཊྛི ཝཱ, སངྒཧཾ ནེསཾ ཀརིསྶཱམཱི’’ཏི པཏྟཾ ཨདཱསི. སོ ཨནྟོགྷརཾ པཝིསིཏྭཱ གྷཊིཨོདནཾ ནཱམ གྷཊིཡཱ ཨུདྡྷརིཏྭཱ པཏྟཾ པཱུརེཏྭཱ ཐེརསྶ ཧཏྠེ ཋཔེསི. སོ ཨཧོསི པིཎྜཔཱཏོ ཨནེཀསཱུཔབྱཉྫནོ, སཀལཾ རཱཛགཧནགརཾ གནྡྷེན ཨཛ྄ཛྷོཏྠརི.

ཏདཱ ཐེརོ ཙིནྟེསི – ‘‘ཨཡཾ པུརིསོ ཨཔྤེསཀྑོ, པིཎྜཔཱཏོ མཧེསཀྑོ, སཀྐསྶ བྷོཛནསདིསོ, ཀོ ནུ ཁོ ཨེསོ’’ཏི. ཨཐ ནཾ ‘‘སཀྐོ’’ཏི ཉཏྭཱ ཨཱཧ – ‘‘བྷཱརིཡཾ ཏེ ཀམྨཾ ཀཏཾ དུགྒཏཱནཾ སམྤཏྟིཾ ཝིལུམྤནྟེན, ཨཛྫ མཡ྄ཧཾ དཱནཾ དཏྭཱ ཀོཙིདེཝ དུགྒཏོ སེནཱཔཏིཊྛཱནཾ ཝཱ སེཊྛིཊྛཱནཾ ཝཱ ལབྷེཡྻཱ’’ཏི. ‘‘མཡཱ དུགྒཏཏརོ ནཏྠི, བྷནྟེ’’ཏི. ‘‘ཀིཾ ཀཱརཎཱ ཏྭཾ དུགྒཏོ དེཝལོཀེ རཛྫསིརིཾ ཨནུབྷཝནྟོ’’ཏི? ‘‘བྷནྟེ, ཨེཝཾ ནཱམེཏཾ, མཡཱ པན ཨནུཔྤནྣེ བུདྡྷེ ཀལྱཱཎཀམྨཾ ཀཏཾ, བུདྡྷུཔྤཱདེ ཝཏྟམཱནེ ཀལྱཱཎཀམྨཾ ཀཏྭཱ ཙཱུལ༹རཐདེཝཔུཏྟོ མཧཱརཐདེཝཔུཏྟོ ཨནེཀཝཎྞདེཝཔུཏྟོཏི ཨིམེ ཏཡོ སམཱནདེཝཔུཏྟཱ མམ ཨཱསནྣཊྛཱནེ ནིབྦཏྟཱ, མཡཱ ཏེཛཝནྟཏརཱ. ཨཧཉྷི ཏེསུ དེཝཔུཏྟེསུ ‘ནཀྑཏྟཾ ཀཱིལི༹སྶཱམཱ’ཏི པརིཙཱརིཀཱཡོ གཧེཏྭཱ ཨནྟརཝཱིཐིཾ ཨོཏིཎྞེསུ པལཱཡིཏྭཱ གེཧཾ པཝིསཱམི. ཏེསཉྷི སརཱིརཏོ ཏེཛོ མམ སརཱིརཾ ཨོཏྠརཏི, མམ སརཱིརཏོ ཏེཛོ ཏེསཾ སརཱིརཾ ན ཨོཏྠརཏི, ‘ཀོ མཡཱ དུགྒཏཏརོ, བྷནྟེ’ཏི. ‘ཨེཝཾ སནྟེཔི ཨིཏོ པཊྛཱཡ མཡ྄ཧཾ མཱ ཨེཝཾ ཝཉྩེཏྭཱ དཱནམདཱསཱི’’’ཏི. ‘‘ཝཉྩེཏྭཱ ཏུམྷཱཀཾ དཱནེ དིནྣེ མཡ྄ཧཾ ཀུསལཾ ཨཏྠི, ན ཨཏྠཱི’’ཏི? ‘‘ཨཏྠཱཝུསོ’’ཏི. ‘‘ཨེཝཾ སནྟེ ཀུསལཀམྨཀརཎཾ ནཱམ མཡ྄ཧཾ བྷཱརོ, བྷནྟེ’’ཏི. སོ ཨེཝཾ ཝཏྭཱ ཐེརཾ ཝནྡིཏྭཱ སུཛཾ གཧེཏྭཱ ཐེརཾ པདཀྑིཎཾ ཀཏྭཱ ཝེཧཱསཾ ཨབྦྷུགྒནྟྭཱ ‘‘ཨཧོ དཱནཾ པརམདཱནཾ ཀསྶཔེ སུཔྤཏིཊྛིཏ’’ནྟི ཨུདཱནཾ ཨུདཱནེསི. ཏེན ཝུཏྟཾ –

‘‘ཨེཀཾ སམཡཾ བྷགཝཱ རཱཛགཧེ ཝིཧརཏི ཝེལུ༹ཝནེ ཀལནྡཀནིཝཱཔེ. ཏེན ཁོ པན སམཡེན ཨཱཡསྨཱ མཧཱཀསྶཔོ པིཔྤལིགུཧཱཡཾ ཝིཧརཏི, སཏྟཱཧཾ ཨེཀཔལླངྐེན ནིསིནྣོ ཧོཏི ཨཉྙཏརཾ སམཱདྷིཾ སམཱཔཛྫིཏྭཱ. ཨཐ ཁོ ཨཱཡསྨཱ མཧཱཀསྶཔོ ཏསྶ སཏྟཱཧསྶ ཨཙྩཡེན ཏམྷཱ སམཱདྷིམྷཱ ཝུཊྛཱསི. ཨཐ ཁོ ཨཱཡསྨཏོ མཧཱཀསྶཔསྶ ཏམྷཱ སམཱདྷིམྷཱ ཝུཊྛིཏསྶ ཨེཏདཧོསི – ‘‘ཡཾནཱུནཱཧཾ རཱཛགཧཾ པིཎྜཱཡ པཝིསེཡྻ’’ནྟི.

‘‘ཏེན ཁོ པན སམཡེན པཉྩམཏྟཱནི དེཝཏཱསཏཱནི ཨུསྶུཀྐཾ ཨཱཔནྣཱནི ཧོནྟི ཨཱཡསྨཏོ མཧཱཀསྶཔསྶ པིཎྜཔཱཏཔཊིལཱབྷཱཡ. ཨཐ ཁོ ཨཱཡསྨཱ མཧཱཀསྶཔོ ཏཱནི པཉྩམཏྟཱནི དེཝཏཱསཏཱནི པཊིཀྑིཔིཏྭཱ པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ རཱཛགཧཾ པིཎྜཱཡ པཱཝིསི.

‘‘ཏེན ཁོ པན སམཡེན སཀྐོ དེཝཱནམིནྡོ ཨཱཡསྨཏོ མཧཱཀསྶཔསྶ པིཎྜཔཱཏཾ དཱཏུཀཱམོ ཧོཏི. པེསཀཱརཝཎྞཾ ཨབྷིནིམྨིནིཏྭཱ ཏནྟཾ ཝིནཱཏི, སུཛཱ ཨསུརཀཉྙཱ ཏསརཾ པཱུརེཏི. ཨཐ ཁོ ཨཱཡསྨཱ མཧཱཀསྶཔོ རཱཛགཧེ སཔདཱནཾ པིཎྜཱཡ ཙརམཱནོ ཡེན སཀྐསྶ དེཝཱནམིནྡསྶ ནིཝེསནཾ ཏེནུཔསངྐམི, ཨདྡསཱ ཁོ སཀྐོ དེཝཱནམིནྡོ ཨཱཡསྨནྟཾ མཧཱཀསྶཔཾ དཱུརཏོཝ ཨཱགཙྪནྟཾ, དིསྭཱ གྷརཱ ནིཀྑམིཏྭཱ པཙྩུགྒནྟྭཱ ཧཏྠཏོ པཏྟཾ གཧེཏྭཱ གྷརཾ པཝིསིཏྭཱ གྷཊིཡཱ ཨོདནཾ ཨུདྡྷརིཏྭཱ པཏྟཾ པཱུརེཏྭཱ ཨཱཡསྨཏོ མཧཱཀསྶཔསྶ ཨདཱསི. སོ ཨཧོསི པིཎྜཔཱཏོ ཨནེཀསཱུཔོ ཨནེཀབྱཉྫནོ ཨནེཀརསབྱཉྫནོ. ཨཐ ཁོ ཨཱཡསྨཏོ མཧཱཀསྶཔསྶ ཨེཏདཧོསི – ‘ཀོ ནུ ཁོ ཨཡཾ སཏྟོ, ཡསྶཱཡཾ ཨེཝརཱུཔོ ཨིདྡྷཱནུབྷཱཝོ’ཏི. ཨཐ ཁོ ཨཱཡསྨཏོ མཧཱཀསྶཔསྶ ཨེཏདཧོསི – ‘སཀྐོ ཁོ ཨཡཾ དེཝཱནམིནྡོ’ཏི ཝིདིཏྭཱ སཀྐཾ དེཝཱནམིནྡཾ ཨེཏདཝོཙ – ‘ཀཏཾ ཁོ ཏེ ཨིདཾ, ཀོསིཡ, མཱ པུནཔི ཨེཝརཱུཔམཀཱསཱི’’’ཏི. ‘‘ཨམྷཱཀམྤི, བྷནྟེ ཀསྶཔ, པུཉྙེན ཨཏྠོ, ཨམྷཱཀམྤི པུཉྙེན ཀརཎཱིཡ’’ནྟི.

‘‘ཨཐ ཁོ སཀྐོ དེཝཱནམིནྡོ ཨཱཡསྨནྟཾ མཧཱཀསྶཔཾ ཨབྷིཝཱདེཏྭཱ པདཀྑིཎཾ ཀཏྭཱ ཝེཧཱསཾ ཨབྦྷུགྒནྟྭཱ ཨཱཀཱསེ ཨནྟལིཀྑེ ཏིཀྑཏྟུཾ ཨུདཱནཾ ཨུདཱནེསི – ‘ཨཧོ དཱནཾ པརམདཱནཾ ཀསྶཔེ སུཔྤཏིཊྛིཏཾ, ཨཧོ དཱནཾ པརམདཱནཾ ཀསྶཔེ སུཔྤཏིཊྛིཏཾ, ཨཧོ དཱནཾ པརམདཱནཾ ཀསྶཔེ སུཔྤཏིཊྛིཏ’’’ནྟི (ཨུདཱ. ༢༧).

ཨཐ ཁོ བྷགཝཱ ཝིཧཱརེ ཋིཏོ ཨེཝ ཏསྶ ཏཾ སདྡཾ སུཏྭཱ བྷིཀྑཱུ ཨཱམནྟེཏྭཱ – ‘‘པསྶཐ, བྷིཀྑཝེ, སཀྐཾ དེཝཱནམིནྡཾ ཨུདཱནཾ ཨུདཱནེཏྭཱ ཨཱཀཱསེན གཙྪནྟ’’ནྟི ཨཱཧ. ‘‘ཀིཾ པན ཏེན ཀཏཾ, བྷནྟེ’’ཏི? ‘‘ཝཉྩེཏྭཱ ཏེན མཡ྄ཧཾ པུཏྟསྶ ཀསྶཔསྶ པིཎྜཔཱཏོ དིནྣོ, ཏཾ དཏྭཱ ཏུཊྛམཱནསོ ཨུདཱནཾ ཨུདཱནེནྟོ གཙྪཏཱི’’ཏི. ‘‘ཐེརསྶ པིཎྜཔཱཏཾ དཱཏུཾ ཝཊྚཏཱི’’ཏི ཀཐཾ, བྷནྟེ, ཏེན ཉཱཏནྟི. ‘‘བྷིཀྑཝེ, མམ པུཏྟེན སདིསཾ ནཱམ པིཎྜཔཱཏིཀཾ དེཝཱཔི མནུསྶཱཔི པིཧཡནྟཱིཏི ཝཏྭཱ སཡམྤི ཨུདཱནཾ ཨུདཱནེ’’སི. སུཏྟེ པན ཨེཏྠཀམེཝ ཨཱགཏཾ –

‘‘ཨསྶོསི ཁོ བྷགཝཱ དིབྦཱཡ སོཏདྷཱཏུཡཱ ཝིསུདྡྷཱཡ ཨཏིཀྐནྟམཱནུསིཀཱཡ སཀྐསྶ དེཝཱནམིནྡསྶ ཝེཧཱསཾ ཨབྦྷུགྒནྟྭཱ ཨཱཀཱསེ ཨནྟལིཀྑེ ཏིཀྑཏྟུཾ ཨུདཱནཾ ཨུདཱནེནྟསྶ ‘‘ཨཧོ དཱནཾ པརམདཱནཾ ཀསྶཔེ སུཔྤཏིཊྛིཏཾ, ཨཧོ དཱནཾ པརམདཱནཾ ཀསྶཔེ སུཔྤཏིཊྛིཏཾ, ཨཧོ དཱནཾ པརམདཱནཾ ཀསྶཔེ སུཔྤཏིཊྛིཏ’’ནྟི (ཨུདཱ. ༢༧).

ཨཐ ཁོ བྷགཝཱ ཨེཏམཏྠཾ ཝིདིཏྭཱ ཏཱཡཾ ཝེལཱཡཾ ཨིམཾ ཨུདཱནཾ ཨུདཱནེསི –

‘‘པིཎྜཔཱཏིཀསྶ བྷིཀྑུནོ,

ཨཏྟབྷརསྶ ཨནཉྙཔོསིནོ;

དེཝཱ པིཧཡནྟི ཏཱདིནོ,

ཨུཔསནྟསྶ སདཱ སཏཱིམཏོ’’ཏི. (ཨུདཱ. ༢༧);

ཨིམཉྩ པན ཨུདཱནཾ ཨུདཱནེཏྭཱ, ‘‘བྷིཀྑཝེ, སཀྐོ དེཝཱནམིནྡོ མམ པུཏྟསྶ སཱིལགནྡྷེན ཨཱགནྟྭཱ པིཎྜཔཱཏཾ ཨདཱསཱི’’ཏི ཝཏྭཱ ཨིམཾ གཱཐམཱཧ –

༥༦.

‘‘ཨཔྤམཏྟོ ཨཡཾ གནྡྷོ, ཡྭཱཡཾ ཏགརཙནྡནཾ;

ཡོ ཙ སཱིལཝཏཾ གནྡྷོ, ཝཱཏི དེཝེསུ ཨུཏྟམོ’’ཏི.

ཏཏྠ ཨཔྤམཏྟོཏི པརིཏྟཔྤམཱཎོ. ཡོ ཙ སཱིལཝཏནྟི ཡོ པན སཱིལཝནྟཱནཾ སཱིལགནྡྷོ, སོ ཏགརཾ ཝིཡ ལོཧིཏཙནྡནཾ ཝིཡ ཙ པརིཏྟཀོ ན ཧོཏི, ཨཏིཝིཡ ཨུལཱ༹རོ ཝིཔྥཱརིཏོ. ཏེནེཝ ཀཱརཎེན ཝཱཏི དེཝེསུ ཨུཏྟམོཏི པཝརོ སེཊྛོ ཧུཏྭཱ དེཝེསུ ཙ མནུསྶེསུ ཙ སབྦཏྠམེཝ ཝཱཡཏི, ཨོཏྠརནྟོ གཙྪཏཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཏྟཱ. དེསནཱ མཧཱཛནསྶ སཱཏྠིཀཱ ཛཱཏཱཏི.

མཧཱཀསྶཔཏྠེརཔིཎྜཔཱཏདིནྣཝཏྠུ དསམཾ.

༡༡. གོདྷིཀཏྠེརཔརིནིབྦཱནཝཏྠུ

ཏེསཾ སམྤནྣསཱིལཱནནྟི ཨིམཾ དྷམྨདེསནཾ སཏྠཱ རཱཛགཧཾ ཨུཔནིསྶཱཡ ཝེལུ༹ཝནེ ཝིཧརནྟོ གོདྷིཀཏྠེརསྶ པརིནིབྦཱནཾ ཨཱརབྦྷ ཀཐེསི.

སོ ཧི ཨཱཡསྨཱ ཨིསིགིལིཔསྶེ ཀཱལ༹སིལཱཡཾ ཝིཧརནྟོ ཨཔྤམཏྟོ ཨཱཏཱཔཱི པཧིཏཏྟོ སཱམཱཡིཀཾ ཙེཏོཝིམུཏྟིཾ ཕུསིཏྭཱ ཨེཀསྶ ཨནུསྶཱཡིཀསྶ རོགསྶ ཝསེན ཏཏོ པརིཧཱཡི. སོ དུཏིཡམྤི ཏཏིཡམྤི ཚཀྑཏྟུཾ ཛྷཱནཾ ནིབྦཏྟེཏྭཱ པརིཧཱིནོ, སཏྟམེ ཝཱརེ ཨུཔྤཱདེཏྭཱ ཙིནྟེསི – ‘‘ཨཧཾ ཚཀྑཏྟུཾ ཛྷཱནཱ པརིཧཱིནོ, པརིཧཱིནཛ྄ཛྷཱནསྶ ཁོ པན ཨནིཡཏཱ གཏི, ཨིདཱནེཝ སཏྠཾ ཨཱཧརིསྶཱམཱི’’ཏི ཀེསོརོཔནསཏྠཀཾ གཧེཏྭཱ གལནཱལི༹ཾ ཚིནྡིཏུཾ པཉྩཀེ ནིཔཛྫི. མཱརོ ཏསྶ ཙིཏྟཾ ཉཏྭཱ ‘‘ཨཡཾ བྷིཀྑུ སཏྠཾ ཨཱཧརིཏུཀཱམོ, སཏྠཾ ཨཱཧརནྟཱ ཁོ པན ཛཱིཝིཏེ ནིརཔེཀྑཱ ཧོནྟི, ཏེ ཝིཔསྶནཾ པཊྛཔེཏྭཱ ཨརཧཏྟམྤི པཱཔུཎནྟི, སཙཱཧཾ ཨེཏཾ ཝཱརེསྶཱམི, ན མེ ཝཙནཾ ཀརིསྶཏི, སཏྠཱརཾ ཝཱརཱཔེསྶཱམཱི’’ཏི ཨཉྙཱཏཀཝེསེན སཏྠཱརཾ ཨུཔསངྐམིཏྭཱ ཨེཝམཱཧ –

‘‘མཧཱཝཱིར མཧཱཔཉྙ, ཨིདྡྷིཡཱ ཡསསཱ ཛལཾ;

སབྦཝེརབྷཡཱཏཱིཏ, པཱདེ ཝནྡཱམི ཙཀྑུམ.

‘‘སཱཝཀོ ཏེ མཧཱཝཱིར, མརཎཾ མརཎཱབྷིབྷཱུ;

ཨཱཀངྑཏི ཙེཏཡཏི, ཏཾ ནིསེདྷ ཛུཏིནྡྷར.

‘‘ཀཐཉྷི བྷགཝཱ ཏུཡ྄ཧཾ, སཱཝཀོ སཱསནེ རཏོ;

ཨཔྤཏྟམཱནསོ སེཀྑོ, ཀཱལཾ ཀཡིརཱ ཛནེ སུཏཱ’’ཏི. (སཾ. ནི. ༡.༡༥༩);

ཏསྨིཾ ཁཎེ ཐེརེན སཏྠཾ ཨཱཧརིཏཾ ཧོཏི. སཏྠཱ ‘‘མཱརོ ཨཡ’’ནྟི ཝིདིཏྭཱ ཨིམཾ གཱཐམཱཧ –

‘‘ཨེཝཉྷི དྷཱིརཱ ཀུབྦནྟི, ནཱཝཀངྑནྟི ཛཱིཝིཏཾ;

སམཱུལཾ ཏཎྷམབྦུཡ྄ཧ, གོདྷིཀོ པརིནིབྦུཏོ’’ཏི. (སཾ. ནི. ༡.༡༥༩);

ཨཐ ཁོ བྷགཝཱ སམྦཧུལེཧི བྷིཀྑཱུཧི སདྡྷིཾ ཐེརསྶ སཏྠཾ ཨཱཧརིཏྭཱ ནིཔནྣཊྛཱནཾ ཨགམཱསི. ཏསྨིཾ ཁཎེ མཱརོ པཱཔིམཱ ‘‘ཀཏྠ ནུ ཁོ ཨིམསྶ པཊིསནྡྷིཝིཉྙཱཎཾ པཏིཊྛིཏ’’ནྟི དྷཱུམརཱསི ཝིཡ ཏིམིརཔུཉྫོ ཝིཡ ཙ ཧུཏྭཱ སབྦདིསཱསུ ཐེརསྶ ཝིཉྙཱཎཾ སམནྭེསཏི. བྷགཝཱ ཏཾ དྷཱུམཏིམིརབྷཱཝཾ བྷིཀྑཱུནཾ དསྶེཏྭཱ ‘‘ཨེསོ ཁོ, བྷིཀྑཝེ, མཱརོ པཱཔིམཱ གོདྷིཀསྶ ཀུལཔུཏྟསྶ ཝིཉྙཱཎཾ སམནྭེསཏི ‘ཀཏྠ གོདྷིཀསྶ ཀུལཔུཏྟསྶ ཝིཉྙཱཎཾ པཏིཊྛིཏ’ནྟི. ཨཔཏིཊྛིཏེན ཙ, བྷིཀྑཝེ, ཝིཉྙཱཎེན གོདྷིཀོ ཀུལཔུཏྟོ པརིནིབྦུཏོ’’ཏི ཨཱཧ. མཱརོཔི ཏསྶ ཝིཉྙཱཎཊྛཱནཾ དཊྛུཾ ཨསཀྐོནྟོ ཀུམཱརཀཝཎྞོ ཧུཏྭཱ བེལུཝཔཎྜུཝཱིཎཾ ཨཱདཱཡ སཏྠཱརཾ ཨུཔསངྐམིཏྭཱ པུཙྪི –

‘‘ཨུདྡྷཾ ཨདྷོ ཙ ཏིརིཡཾ, དིསཱ ཨནུདིསཱ སྭཧཾ;

ཨནྭེསཾ ནཱདྷིགཙྪཱམི, གོདྷིཀོ སོ ཀུཧིཾ གཏོ’’ཏི. (སཾ. ནི. ༡.༡༥༩);

ཨཐ ནཾ སཏྠཱ ཨཱཧ –

‘‘ཡོ དྷཱིརོ དྷིཏིསམྤནྣོ, ཛྷཱཡཱི ཛྷཱནརཏོ སདཱ;

ཨཧོརཏྟཾ ཨནུཡུཉྫཾ, ཛཱིཝིཏཾ ཨནིཀཱམཡཾ.

‘‘ཛེཏྭཱན མཙྩུནོ སེནཾ, ཨནཱགནྟྭཱ པུནབྦྷཝཾ;

སམཱུལཾ ཏཎྷམབྦུཡ྄ཧ, གོདྷིཀོ པརིནིབྦུཏོ’’ཏི. (སཾ. ནི. ༡.༡༥༩);

ཨེཝཾ ཝུཏྟེ མཱརོ པཱཔིམཱ བྷགཝནྟཾ གཱཐཱཡ ཨཛ྄ཛྷབྷཱསི –

‘‘ཏསྶ སོཀཔརེཏསྶ, ཝཱིཎཱ ཀཙྪཱ ཨབྷསྶཐ;

ཏཏོ སོ དུམྨནོ ཡཀྑོ, ཏཏྠེཝནྟརདྷཱཡཐཱ’’ཏི. (སཾ. ནི. ༡.༡༥༩);

སཏྠཱཔི ‘‘ཀིཾ ཏེ, པཱཔིམ, གོདྷིཀསྶ ཀུལཔུཏྟསྶ ནིབྦཏྟཊྛཱནེན? ཏསྶ ཧི ནིབྦཏྟཊྛཱནཾ ཏུམྷཱདིསཱནཾ སཏམྤི སཧསྶམྤི དཊྛུཾ ན སཀྐོཏཱི’’ཏི ཝཏྭཱ ཨིམཾ གཱཐམཱཧ –

༥༧.

‘‘ཏེསཾ སམྤནྣསཱིལཱནཾ, ཨཔྤམཱདཝིཧཱརིནཾ;

སམྨདཉྙཱ ཝིམུཏྟཱནཾ, མཱརོ མགྒཾ ན ཝིནྡཏཱི’’ཏི.

ཏཏྠ ཏེསནྟི ཡཐཱ ཨཔྤཏིཊྛིཏེན ཝིཉྙཱཎེན གོདྷིཀོ ཀུལཔུཏྟོ པརིནིབྦུཏོ, ཡེ ཙ ཨེཝཾ པརིནིབྦཱཡནྟི, ཏེསཾ སམྤནྣསཱིལཱནནྟི པརིཔུཎྞསཱིལཱནཾ. ཨཔྤམཱདཝིཧཱརིནནྟི སཏིཨཝིཔྤཝཱསསངྑཱཏེན ཨཔྤམཱདེན ཝིཧརནྟཱནཾ. སམྨདཉྙཱ ཝིམུཏྟཱནནྟི ཧེཏུནཱ ཉཱཡེན ཀཱརཎེན ཛཱནིཏྭཱ ‘‘ཏདངྒཝིམུཏྟིཡཱ, ཝིཀྑམྦྷནཝིམུཏྟིཡཱ, སམུཙྪེདཝིམུཏྟིཡཱ, པཊིཔྤསྶདྡྷིཝིམུཏྟིཡཱ, ནིསྶརཎཝིམུཏྟིཡཱ’’ཏི ཨིམཱཧི པཉྩཧི ཝིམུཏྟཱིཧི ཝིམུཏྟཱནཾ. མཱརོ མགྒཾ ན ཝིནྡཏཱིཏི ཨེཝརཱུཔཱནཾ མཧཱཁཱིཎཱསཝཱནཾ སབྦཐཱམེན མགྒནྟོཔི མཱརོ གཏམགྒཾ ན ཝིནྡཏི ན ལབྷཏི ན པསྶཏཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཏྟཱ. དེསནཱ མཧཱཛནསྶ སཱཏྠིཀཱ ཛཱཏཱཏི.

གོདྷིཀཏྠེརཔརིནིབྦཱནཝཏྠུ ཨེཀཱདསམཾ.

༡༢. གརཧདིནྣཝཏྠུ

ཡཐཱ སངྐཱརཊྛཱནསྨིནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ གརཧདིནྣཾ ནཱམ ནིགཎྛསཱཝཀཾ ཨཱརབྦྷ ཀཐེསི.

སཱཝཏྠིཡཉྷི སིརིགུཏྟོ ཙ གརཧདིནྣོ ཙཱཏི དྭེ སཧཱཡཀཱ ཨཧེསུཾ. ཏེསུ སིརིགུཏྟོ ཨུཔཱསཀོ བུདྡྷསཱཝཀོ, གརཧདིནྣོ ནིགཎྛསཱཝཀོ. ཏཾ ནིགཎྛཱ ཨབྷིཀྑཎཾ ཨེཝཾ ཝདནྟི – ‘‘ཏཝ སཧཱཡཀཾ སིརིགུཏྟཾ ‘ཀིཾ ཏྭཾ སམཎཾ གོཏམཾ ཨུཔསངྐམསི, ཏསྶ སནྟིཀེ ཀིཾ ལབྷིསྶསཱི’ཏི ཝཏྭཱ ཡཐཱ ཨམྷེ ཨུཔསངྐམིཏྭཱ ཨམྷཱཀཉྩ དེཡྻདྷམྨཾ དསྶཏི, ཀིཾ ཨེཝཾ ཨོཝདིཏུཾ ན ཝཊྚཏཱི’’ཏི. གརཧདིནྣོ ཏེསཾ ཝཙནཾ སུཏྭཱ ཨབྷིཀྑཎཾ གནྟྭཱ ཋིཏནིསིནྣཊྛཱནཱདཱིསུ སིརིགུཏྟཾ ཨེཝཾ ཨོཝདཏི – ‘‘སམྨ, ཀིཾ ཏེ སམཎེན གོཏམེན, ཏཾ ཨུཔསངྐམིཏྭཱ ཀིཾ ལབྷིསྶསི, ཀིཾ ཏེ མམ, ཨཡྻེ, ཨུཔསངྐམིཏྭཱ ཏེསཾ དཱནཾ དཱཏུཾ ན ཝཊྚཏཱི’’ཏི? སིརིགུཏྟོ ཏསྶ ཀཐཾ སུཏྭཱཔི བཧཱུ དིཝསེ ཏུཎྷཱི ཧུཏྭཱ ནིབྦིཛྫིཏྭཱ ཨེཀདིཝསཾ, ‘‘སམྨ, ཏྭཾ ཨབྷིཀྑཎཾ ཨཱགནྟྭཱ མཾ ཋིཏཊྛཱནཱདཱིསུ ཨེཝཾ ཝདེསི, ‘སམཎཾ གོཏམཾ ཨུཔསངྐམིཏྭཱ ཀིཾ ལབྷིསྶསི, མམ, ཨཡྻེ, ཨུཔསངྐམིཏྭཱ ཏེསཾ དཱནཾ དེཧཱི’ཏི, ཀཐེཧི ཏཱཝ མེ, ཏཝ, ཨཡྻཱ, ཀིཾ ཛཱནནྟཱི’’ཏི? ‘‘‘ཨཧོ, སཱམི, མཱ ཨེཝཾ ཝད, མམ ཨཡྻཱནཾ ཨཉྙཱཏཾ ནཱམ ནཏྠི, སབྦཾ ཨཏཱིཏཱནཱགཏཔཙྩུཔྤནྣཾ སབྦཾ ཀཱཡཝཙཱིམནོཀམྨཾ ཨིདཾ བྷཝིསྶཏི, ཨིདཾ ན བྷཝིསྶཏཱི’ཏི སབྦཾ བྷབྦཱབྷབྦཾ ཛཱནནྟཱི’’ཏི? ‘‘ཨེཝཾ ཝདེསཱི’’ཏི. ‘‘ཨཱམ, ཝདེམཱི’’ཏི. ‘‘ཡདི ཨེཝཾ, ཨཏིབྷཱརིཡཾ ཏེ ཀཏཾ, ཨེཏྟཀཾ ཀཱལཾ མཡ྄ཧཾ ཨེཏམཏྠཾ ཨནཱཙིཀྑནྟེན, ཨཛྫ མཡཱ ཨཡྻཱནཾ ཉཱཎཱནུབྷཱཝོ ཉཱཏོ, གཙྪ, སམྨ, ཨཡྻེ, མམ ཝཙནེན ནིམནྟེཧཱི’’ཏི. སོ ནིགཎྛཱནཾ སནྟིཀཾ གནྟྭཱ ཏེ ཝནྡིཏྭཱ ‘‘མཡ྄ཧཾ སཧཱཡཀོ སིརིགུཏྟོ སྭཱཏནཱཡ ཏུམྷེ ནིམནྟེཏཱི’’ཏི ཨཱཧ. ‘‘སིརིགུཏྟེན སཱམཾ ཏྭཾ ཝུཏྟོ’’ཏི? ‘‘ཨཱམ, ཨཡྻཱ’’ཏི. ཏེ ཧཊྛཏུཊྛཱ ཧུཏྭཱ ‘‘ནིཔྥནྣཾ ནོ ཀིཙྩཾ, སིརིགུཏྟསྶ ཨམྷེསུ པསནྣཀཱལཏོ པཊྛཱཡ ཀཱ ནཱམ སམྤཏྟི ཨམྷཱཀཾ ན བྷཝིསྶཏཱི’’ཏི ཝདིཾསུ.

སིརིགུཏྟསྶཱཔི མཧནྟཾ ནིཝེསནཾ. སོ ཏསྨིཾ དྭིནྣཾ གེཧཱནཾ ཨནྟརེ ཨུབྷཏོ དཱིགྷཾ ཨཱཝཱཊཾ ཁཎཱཔེཏྭཱ གཱུཐཀལལསྶ པཱུརཱཔེསི. བཧིཨཱཝཱཊེ དྭཱིསུ པརིཡནྟེསུ ཁཱཎུཀེ ཀོཊྚཱཔེཏྭཱ ཏེསུ རཛྫུཡོ བནྡྷཱཔེཏྭཱ ཨཱསནཱནཾ པུརིམཔཱདེ ཨཱཝཱཊསྶ པུརིམཔསྶེ ཋཔཱཔེཏྭཱ པཙྪིམཔཱདེ རཛྫུཀེསུ ཋཔཱཔེསི. ‘‘ཨེཝཾ ནིསིནྣཀཱལེ ཨེཝཾ ཨཝཾསིརཱ པཏིསྶནྟཱི’’ཏི མཉྙམཱནོ ཡཐཱ ཨཱཝཱཊོ ན པཉྙཱཡཏི, ཨེཝཾ ཨཱསནཱནཾ ཨུཔརི པཙྩཏྠརཎཱནི དཱཔེསི. མཧནྟཱ མཧནྟཱ ཙཱཊིཡོ ཋཔཱཔེཏྭཱ ཀདལིཔཎྞེཧི ཙ སེཏཔིལོཏིཀཱཧི ཙ མུཁཱནི བནྡྷཱཔེཏྭཱ ཏཱ ཏུཙྪཱ ཨེཝ གེཧསྶ པཙྪིམབྷཱགེ བཧི ཡཱགུབྷཏྟསིཏྠསཔྤིཏེལམདྷུཕཱཎིཏཔཱུཝཙུཎྞམཀྑིཏཱ ཀཏྭཱ ཋཔཱཔེསི. གརཧདིནྣོ པཱཏོཝ ཏསྶ གྷརཾ ཝེགེན གནྟྭཱ, ‘‘ཨཡྻཱནཾ སཀྐཱརོ སཛྫིཏོ’’ཏི པུཙྪི. ‘‘ཨཱམ, སམྨ, སཛྫིཏོ’’ཏི. ‘‘ཀཧཾ པན ཨེསོ’’ཏི. ‘‘ཨེཏཱསུ ཨེཏྟིཀཱསུ ཙཱཊཱིསུ ཡཱགུ, ཨེཏྟིཀཱསུ བྷཏྟཾ, ཨེཏྟིཀཱསུ སཔྤིཕཱཎིཏཔཱུཝཱདཱིནི པཱུརིཏཱནི, ཨཱསནཱནི པཉྙཏྟཱནཱི’’ཏི. སོ ‘‘སཱདྷཱུ’’ཏི ཝཏྭཱ གཏོ ཏསྶ གཏཀཱལེ པཉྩསཏཱ ནིགཎྛཱ ཨཱགམིཾསུ. སིརིགུཏྟོ གེཧཱ ནིཀྑམིཏྭཱ པཉྩཔཏིཊྛིཏེན ནིགཎྛེ ཝནྡིཏྭཱ ཏེསཾ པུརཏོ ཨཉྫལིཾ པགྒཡ྄ཧ ཋིཏོ ཨེཝཾ ཙིནྟེསི – ‘‘ཏུམྷེ ཀིར ཨཏཱིཏཱདིབྷེདཾ སབྦཾ ཛཱནཱཐ, ཨེཝཾ ཏུམྷཱཀཾ ཨུཔཊྛཱཀེན མཡ྄ཧཾ ཀཐིཏཾ. སཙེ སབྦཾ ཏུམྷེ ཛཱནཱཐ, མཡ྄ཧཾ གེཧཾ མཱ པཝིསིཏྠ. མམ གེཧཾ པཝིཊྛཱནཉྷི ཝོ ནེཝ ཡཱགུ ཨཏྠི, ན བྷཏྟཱདཱིནི. སཙེ ཨཛཱནིཏྭཱ པཝིསིསྶཐ, གཱུཐཨཱཝཱཊེ ཝོ པཱཏེཏྭཱ པོཐེསྶཱམཱི’’ཏི ཨེཝཾ ཙིནྟེཏྭཱ པུརིསཱནཾ སཉྙཾ ཨདཱསི. ཨེཝཾ ཏེསཾ ནིསཱིདནབྷཱཝཾ ཉཏྭཱ པཙྪིམཔསྶེ ཋཏྭཱ ཨཱསནཱནཾ ཨུཔརི པཙྩཏྠརཎཱནི ཨཔནེཡྻཱཐ, མཱ ཏཱནི ཨསུཙིནཱ མཀྑཡིཾསཱུཏི.

ཨཐ ནིགཎྛེ ‘‘ཨིཏོ ཨེཐ, བྷནྟེ’’ཏི ཨཱཧ. ནིགཎྛཱ པཝིསིཏྭཱ པཉྙཏྟཱསནེསུ ནིསཱིདིཏུཾ ཨཱརབྷིཾསུ. ཨཐ ནེ མནུསྶཱ ཝདིཾསུ – ‘‘ཨཱགམེཐ, བྷནྟེ, མཱ ཏཱཝ ནིསཱིདཐཱ’’ཏི. ‘‘ཀིཾ ཀཱརཎཱ’’ཏི? ‘‘ཨམྷཱཀཾ གེཧཾ པཝིཊྛཱནཾ ཨཡྻཱནཾ ཝཏྟཾ ཉཏྭཱ ནིསཱིདིཏུཾ ཝཊྚཏཱི’’ཏི. ‘‘ཀིཾ ཀཱཏུཾ ཝཊྚཏི, ཨཱཝུསོ’’ཏི? ‘‘ཨཏྟནོ ཨཏྟནོ པཏྟཱསནམཱུལེསུ ཋཏྭཱ སབྦེཔི ཨེཀཔྤཧཱརེནེཝ ནིསཱིདིཏུཾ ཝཊྚཏཱི’’ཏི. ཨིདཾ ཀིརསྶ ཨདྷིཔྤཱཡོ – ‘‘ཨེཀསྨིཾ ཨཱཝཱཊེ པཏིཏེ ‘མཱ, ཨཱཝུསོ, ཨཝསེསཱ ཨཱསནེ ནིསཱིདནྟཱུ’ཏི ཝཏྟུཾ མཱ ལབྷཏཱུ’’ཏི. ཏེ ‘‘སཱདྷཱུ’’ཏི ཝཏྭཱ ‘‘ཨིམེཧི ཀཐིཏཀཐཾ ཨམྷེཧི ཀཱཏུཾ ཝཊྚཏཱི’’ཏི ཙིནྟཡིཾསུ. ཨཐ སབྦེ ཨཏྟནོ ཨཏྟནོ པཏྟཱསནམཱུལེ པཊིཔཱཊིཡཱ ཨཊྛཾསུ. ཨཐ ནེ, ‘‘བྷནྟེ, ཁིཔྤཾ ཨེཀཔྤཧཱརེནེཝ ནིསཱིདཐཱ’’ཏི ཝཏྭཱ ཏེསཾ ནིསིནྣབྷཱཝཾ ཉཏྭཱ ཨཱསནཱནཾ ཨུཔརི པཙྩཏྠརཎཱནི ནཱིཧརིཾསུ. ནིགཎྛཱ ཨེཀཔྤཧཱརེནེཝ ནིསིནྣཱ, རཛྫཱུནཾ ཨུཔརི ཋཔིཏཱ ཨཱསནཔཱདཱ བྷཊྛཱ, ནིགཎྛཱ ཨཝཾསིརཱ ཨཱཝཱཊེ པཏིཾསུ. སིརིགུཏྟོ ཏེསུ པཏིཏེསུ དྭཱརཾ པིདཧིཏྭཱ ཏེ ཨུཏྟིཎྞུཏྟིཎྞེ ‘‘ཨཏཱིཏཱནཱགཏཔཙྩུཔྤནྣཾ ཀསྨཱ ན ཛཱནཱཐཱ’’ཏི དཎྜེཧི པཱཐེཏྭཱ ‘‘ཨེཏྟཀཾ ཨེཏེསཾ ཝཊྚིསྶཏཱི’’ཏི དྭཱརཾ ཝིཝརཱཔེསི. ཏེ ནིཀྑམིཏྭཱ པལཱཡིཏུཾ ཨཱརབྷིཾསུ. གམནམགྒེ པན ཏེསཾ སུདྷཱཔརིཀམྨཀཏཾ བྷཱུམིཾ པིཙྪིལཾ ཀཱརཱཔེསི. ཏེ ཏཏྠ ཨསཎྛཧིཏྭཱ པཏིཏེ པཏིཏེ པུན པོཐཱཔེཏྭཱ ‘‘ཨལཾ ཨེཏྟཀཾ ཏུམྷཱཀ’’ནྟི ཨུཡྻོཛེསི. ཏེ ‘‘ནཱསིཏམྷཱ ཏཡཱ, ནཱསིཏམྷཱ ཏཡཱ’’ཏི ཀནྡནྟཱ ཨུཔཊྛཱཀསྶ གེཧདྭཱརཾ ཨགམཾསུ.

གརཧདིནྣོ ཏཾ ཝིཔྤཀཱརཾ དིསྭཱ ཀུདྡྷོ ‘‘ནཱསིཏམྷི སིརིགུཏྟེན, ཧཏྠཾ པསཱརེཏྭཱ ཝནྡནྟཱནཾ སདེཝཀེ ལོཀེ ཡཐཱརུཙིཡཱ དཱཏུཾ སམཏྠེ ནཱམ པུཉྙཀྑེཏྟབྷཱུཏེ མམ, ཨཡྻེ, པོཐཱཔེཏྭཱ བྱསནཾ པཱཔེསཱི’’ཏི རཱཛཀུལཾ གནྟྭཱ ཏསྶ ཀཧཱཔཎསཧསྶཾ དཎྜཾ ཀཱརེསི. ཨཐསྶ རཱཛཱ སཱསནཾ པེསེསི. སོ གནྟྭཱ རཱཛཱནཾ ཝནྡིཏྭཱ, ‘‘དེཝ, ཨུཔཔརིཀྑིཏྭཱ དཎྜཾ གཎྷཐ, མཱ ཨནུཔཔརིཀྑིཏྭཱ’’ཏི ཨཱཧ. ‘‘ཨུཔཔརིཀྑིཏྭཱ གཎྷིསྶཱམཱི’’ཏི. ‘‘སཱདྷུ, དེཝཱ’’ཏི. ‘‘ཏེན ཧི གཎྷཱཧཱི’’ཏི. དེཝ, མཡ྄ཧཾ སཧཱཡཀོ ནིགཎྛསཱཝཀོ མཾ ཨུཔསངྐམིཏྭཱ ཋིཏནིསིནྣཊྛཱནཱདཱིསུ ཨབྷིཎྷཾ ཨེཝཾ ཝདེསི – ‘‘སམྨ, ཀིཾ ཏེ སམཎེན གོཏམེན, ཏཾ ཨུཔསངྐམིཏྭཱ ཀིཾ ལབྷིསྶསཱི’’ཏི ཨིདཾ ཨཱདིཾ ཀཏྭཱ སིརིགུཏྟོ སབྦཾ ཏཾ པཝཏྟིཾ ཨཱརོཙེཏྭཱ ‘‘དེཝ, སཙེ ཨིམསྨིཾ ཀཱརཎེ དཎྜཾ གཧེཏུཾ ཡུཏྟཾ, གཎྷཐཱ’’ཏི. རཱཛཱ གརཧདིནྣཾ ཨོལོཀེཏྭཱ ‘‘སཙྩཾ ཀིར ཏེ ཨེཝཾ ཝུཏྟ’’ནྟི ཨཱཧ. ‘‘སཙྩཾ, དེཝཱ’’ཏི. ཏྭཾ ཨེཏྟཀམྤི ཨཛཱནནྟེ སཏྠཱརོཏི གཧེཏྭཱ ཝིཙརནྟོ ‘‘སབྦཾ ཛཱནནྟཱི’’ཏི ཀིཾ ཀཱརཎཱ ཏཐཱགཏསཱཝཀསྶ ཀཐེསི. ‘‘ཏཡཱ ཨཱརོཔིཏདཎྜོ ཏུཡ྄ཧམེཝ ཧོཏཱུ’’ཏི ཨེཝཾ སྭེཝ དཎྜཾ པཱཔིཏོ, ཏསྶེཝ ཀུལཱུཔཀཱ པོཐེཏྭཱ ནཱིཧཊཱ.

སོ ཏཾ ཀུཛ྄ཛྷིཏྭཱ ཏཏོ པཊྛཱཡ ཨཌྜྷམཱསམཏྟམྤི སིརིགུཏྟེན སདྡྷིཾ ཨཀཐེཏྭཱ ཙིནྟེསི – ‘‘ཨེཝཾ ཝིཙརིཏུཾ མཡ྄ཧཾ ཨཡུཏྟཾ, ཨེཏསྶ ཀུལཱུཔཀཱནམྤི མཡཱ བྱསནཾ ཀཱཏུཾ ཝཊྚཏཱི’’ཏི སིརིགུཏྟཾ ཨུཔསངྐམིཏྭཱ ཨཱཧ – ‘‘སཧཱཡ སིརིགུཏྟཱ’’ཏི. ‘‘ཀིཾ, སམྨཱ’’ཏི? ‘‘ཉཱཏིསུཧཛྫཱནཾ ནཱམ ཀལཧོཔི ཧོཏི ཝིཝཱདོཔི, ཀིཾ ཏྭཾ ཀིཉྩི ན ཀཐེསི, ཀསྨཱ ཨེཝཾ ཀརོསཱི’’ཏི? ‘‘སམྨ, ཏཝ མཡཱ སདྡྷིཾ ཨཀཐནཏོ ན ཀཐེམཱི’’ཏི. ‘‘ཡཾ, སམྨ, ཀཏཾ, ཀཏམེཝ ཏཾ ན མཡཾ མེཏྟིཾ བྷིནྡིསྶཱམཱ’’ཏི. ཏཏོ པཊྛཱཡ ཨུབྷོཔི ཨེཀཊྛཱནེ ཏིཊྛནྟི ནིསཱིདནྟི. ཨཐེཀདིཝསཾ སིརིགུཏྟོ གརཧདིནྣཾ ཨཱཧ – ‘‘ཀིཾ ཏེ ནིགཎྛེཧི, ཏེ ཨུཔསངྐམིཏྭཱ ཀིཾ ལབྷིསྶསི, མམ སཏྠཱརཾ ཨུཔསངྐམིཏུཾ ཝཱ ཨཡྻཱནཾ དཱནཾ དཱཏུཾ ཝཱ ཀིཾ ཏེ ན ཝཊྚཏཱི’’ཏི? སོཔི ཨེཏམེཝ པཙྩཱསཱིསཏི, ཏེནསྶ ཀཎྜུཝནཊྛཱནེ ནཁེན ཝིལེཁིཏཾ ཝིཡ ཨཧོསི. སོ, ‘‘སིརིགུཏྟ, ཏཝ སཏྠཱ ཀིཾ ཛཱནཱཏཱི’’ཏི པུཙྪི. ‘‘ཨམྦྷོ, མཱ ཨེཝཾ ཝད, སཏྠུ མེ ཨཛཱནིཏབྦཾ ནཱམ ནཏྠི, ཨཏཱིཏཱདིབྷེདཾ སབྦཾ ཛཱནཱཏི, སོལ༹སཧཱཀཱརེཧི སཏྟཱནཾ ཙིཏྟཾ པརིཙྪིནྡཏཱི’’ཏི. ‘‘ཨཧཾ ཨེཝཾ ན ཛཱནཱམི, ཀསྨཱ མཡ྄ཧཾ ཨེཏྟཀཾ ཀཱལཾ ན ཀཐེསི, ཏེན ཧི ཏྭཾ གཙྪ, ཏཝ སཏྠཱརཾ སྭཱཏནཱཡ ནིམནྟེཧི, བྷོཛེསྶཱམི, པཉྩཧི བྷིཀྑུསཏེཧི སདྡྷིཾ མམ བྷིཀྑཾ གཎྷིཏུཾ ཝདེཧཱི’’ཏི.

སིརིགུཏྟོ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཝམཱཧ – ‘‘བྷནྟེ, མམ སཧཱཡཀོ གརཧདིནྣོ ཏུམྷེ ནིམནྟཱཔེཏི, པཉྩཧི ཀིར བྷིཀྑུསཏེཧི སདྡྷིཾ སྭེ ཏསྶ བྷིཀྑཾ གཎྷཐ, པུརིམདིཝསེ ཁོ པན ཏསྶ ཀུལཱུཔཀཱནཾ མཡཱ ཨིདཾ ནཱམ ཀཏཾ, མཡཱ ཀཏསྶ པཊིཀརཎམྤི ན ཛཱནཱམི, ཏུམྷཱཀཾ སུདྡྷཙིཏྟེན བྷིཀྑཾ དཱཏུཀཱམཏམྤི ན ཛཱནཱམི, ཨཱཝཛྫེཏྭཱ ཡུཏྟཾ ཙེ, ཨདྷིཝཱསེཐ. ནོ ཙེ, མཱ ཨདྷིཝཱསཡིཏྠཱ’’ཏི. སཏྠཱ ‘‘ཀིཾ ནུ ཁོ སོ ཨམྷཱཀཾ ཀཱཏུ ཀཱམོ’’ཏི ཨཱཝཛྫེཏྭཱ ཨདྡས ‘‘དྭིནྣཾ གེཧཱནཾ ཨནྟརེ མཧནྟཾ ཨཱཝཱཊཾ ཁཎཱཔེཏྭཱ ཨསཱིཏིསཀཊམཏྟཱནི ཁདིརདཱརཱུནི ཨཱཧརཱཔེཏྭཱ པཱུརཱཔེཏྭཱ ཨགྒིཾ དཏྭཱ ཨམྷེ ཨངྒཱརཨཱཝཱཊེ པཱཏེཏྭཱ ནིགྒཎྷིཏུཀཱམོ’’ཏི. པུན ཨཱཝཛྫེསི – ‘‘ཀིཾ ནུ ཁོ ཏཏྠ གཏཔཙྩཡཱ ཨཏྠོ ཨཏྠི, ནཏྠཱི’’ཏི. ཏཏོ ཨིདཾ ཨདྡས – ‘‘ཨཧཾ ཨངྒཱརཨཱཝཱཊེ པཱདཾ པསཱརེསྶཱམི, ཏཾ པཊིཙྪཱདེཏྭཱ ཋཔིཏཀིལཉྫཾ ཨནྟརདྷཱཡིསྶཏི, ཨངྒཱརཀཱསུཾ བྷིནྡིཏྭཱ ཙཀྐམཏྟཾ མཧཱཔདུམཾ ཨུཊྛཧིསྶཏི, ཨཐཱཧཾ པདུམཀཎྞིཀཱ ཨཀྐམནྟོ ཨཱསནེ ནིསཱིདིསྶཱམི, པཉྩསཏཱ བྷིཀྑཱུཔི ཏཐེཝ གནྟྭཱ ནིསཱིདིསྶནྟི, མཧཱཛནོ སནྣིཔཏིསྶཏི, ཨཧཾ ཏསྨིཾ སམཱགམེ དྭཱིཧི གཱཐཱཧི ཨནུམོདནཾ ཀརིསྶཱམི, ཨནུམོདནཔརིཡོསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ བྷཝིསྶཏི, སིརིགུཏྟོ ཙ གརཧདིནྣོ ཙ སོཏཱཔནྣཱ བྷཝིསྶནྟི, ཨཏྟནོ ཙ དྷནརཱསིཾ སཱསནེ ཝིཀིརིསྶནྟི, ཨིམཾ ཀུལཔུཏྟཾ ནིསྶཱཡ མཡཱ གནྟུཾ ཝཊྚཏཱི’’ཏི བྷིཀྑཾ ཨདྷིཝཱསེསི.

སིརིགུཏྟོ གནྟྭཱ སཏྠུ ཨདྷིཝཱསནཾ གརཧདིནྣསྶ ཨཱརོཙེཏྭཱ ‘‘ལོཀཛེཊྛསྶ སཀྐཱརཾ ཀརོཧཱི’’ཏི ཨཱཧ. གརཧདིནྣོ ‘‘ཨིདཱནིསྶ ཀཏྟབྦཡུཏྟཀཾ ཛཱནིསྶཱམཱི’’ཏི དྭིནྣཾ གེཧཱནཾ ཨནྟརེ མཧནྟཾ ཨཱཝཱཊཾ ཁཎཱཔེཏྭཱ ཨསཱིཏིསཀཊམཏྟཱནི ཁདིརདཱརཱུནི ཨཱཧརཱཔེཏྭཱ པཱུརཱཔེཏྭཱ ཨགྒིཾ དཏྭཱ ཁདིརངྒཱརརཱསཱིནཾ ཡོཛཱཔེཏྭཱ སབྦརཏྟིཾ དྷམཱཔེཏྭཱ ཁདིརངྒཱརརཱསིཾ ཀཱརཱཔེཏྭཱ ཨཱཝཱཊམཏྠཀེ རུཀྑཔདརཱནི ཋཔཱཔེཏྭཱ ཀིལཉྫེན པཊིཙྪཱདེཏྭཱ གོམཡེན ལིམྤཱཔེཏྭཱ ཨེཀེན པསྶེན དུབྦལདཎྜཀེ ཨཏྠརིཏྭཱ གམནམགྒཾ ཀཱརེསི, ‘‘ཨེཝཾ ཨཀྐནྟཨཀྐནྟཀཱལེ དཎྜཀེསུ བྷགྒེསུ པརིཝཊྚེཏྭཱ ཨངྒཱརཀཱསུཡཾ པཏིསྶནྟཱི’’ཏི མཉྙམཱནོ གེཧཔཙྪཱབྷཱགེ སིརིགུཏྟེན ཋཔིཏནིཡཱམེནེཝ ཙཱཊིཡོ ཋཔཱཔེསི, ཨཱསནཱནིཔི ཏཐེཝ པཉྙཱཔེསི. སིརིགུཏྟོ པཱཏོཝ ཏསྶ གེཧཾ གནྟྭཱ ‘‘ཀཏོ ཏེ, སམྨ, སཀྐཱརོ’’ཏི ཨཱཧ. ‘‘ཨཱམ, སམྨཱ’’ཏི. ‘‘ཀཧཾ པན སོ’’ཏི? ‘‘ཨེཧི, པསྶཱམཱ’’ཏི སབྦཾ སིརིགུཏྟེན དསྶིཏནཡེནེཝ དསྶེསི. སིརིགུཏྟོ ‘‘སཱདྷུ, སམྨཱ’’ཏི ཨཱཧ. མཧཱཛནོ སནྣིཔཏི. མིཙྪཱདིཊྛིཀེན ཧི ནིམནྟིཏེ མཧནྟོ སནྣིཔཱཏོ ཨཧོསི. མིཙྪཱདིཊྛིཀཱཔི ‘‘སམཎསྶ གོཏམསྶ ཝིཔྤཀཱརཾ པསྶིསྶཱམཱ’’ཏི སནྣིཔཏནྟི, སམྨཱདིཊྛིཀཱཔི ‘‘ཨཛྫ སཏྠཱ མཧཱདྷམྨདེསནཾ དེསེསྶཏི, བུདྡྷཝིསཡཾ བུདྡྷལཱིལཾ ཨུཔདྷཱརེསྶཱམཱ’’ཏི སནྣིཔཏནྟི.

པུནདིཝསེ སཏྠཱ པཉྩཧི བྷིཀྑུསཏེཧི སདྡྷིཾ གརཧདིནྣསྶ གེཧདྭཱརཾ ཨགམཱསི. སོ གེཧཱ ནིཀྑམིཏྭཱ པཉྩཔཏིཊྛིཏེན ཝནྡིཏྭཱ པུརཏོ ཨཉྫལིཾ པགྒཡ྄ཧ ཋིཏོ ཙིནྟེསི – ‘‘བྷནྟེ, ‘ཏུམྷེ ཀིར ཨཏཱིཏཱདིབྷེདཾ སབྦཾ ཛཱནཱཐ, སཏྟཱནཾ སོལ༹སཧཱཀཱརེཧི ཙིཏྟཾ པརིཙྪིནྡཐཱ’ཏི ཨེཝཾ ཏུམྷཱཀཾ ཨུཔཊྛཱཀེན མཡ྄ཧཾ ཀཐིཏཾ. སཙེ ཛཱནཱཐ, མཡ྄ཧཾ གེཧཾ མཱ པཝིསིཏྠ. པཝིཊྛཱནཉྷི ཝོ ནེཝ ཡཱགུ ཨཏྠི, ན བྷཏྟཱདཱིནི, སབྦེ ཁོ པན ཏུམྷེ ཨངྒཱརཀཱསུཡཾ པཱཏེཏྭཱ ནིགྒཎྷིསྶཱམཱི’’ཏི. ཨེཝཾ ཙིནྟེཏྭཱ སཏྠུ པཏྟཾ གཧེཏྭཱ ‘‘ཨིཏོ ཨེཐ བྷགཝཱ’’ཏི ཝཏྭཱ, ‘‘བྷནྟེ, ཨམྷཱཀཾ གེཧཾ ཨཱགཏཱནཾ ཝཏྟཾ ཉཏྭཱ ཨཱགནྟུཾ ཝཊྚཏཱི’’ཏི ཨཱཧ. ‘‘ཀིཾ ཀཱཏུཾ ཝཊྚཏི, ཨཱཝུསོ’’ཏི? ‘‘ཨེཀེཀསྶ པཝིསིཏྭཱ པུརཏོ གནྟྭཱ ནིསིནྣཀཱལེ པཙྪཱ ཨཉྙེན ཨཱགནྟུཾ ཝཊྚཏཱི’’ཏི. ཨེཝཾ ཀིརསྶ ཨཧོསི – ‘‘པུརཏོ གཙྪནྟཾ ཨངྒཱརཀཱསུཡཾ པཏིཏཾ དིསྭཱ ཨཝསེསཱ ན ཨཱགཙྪིསྶནྟི, ཨེཀེཀམེཝ པཱཏེཏྭཱ ནིགྒཎྷིསྶཱམཱི’’ཏི. སཏྠཱ ‘‘སཱདྷཱུ’’ཏི ཝཏྭཱ ཨེཀཀོཝ པཱཡཱསི. གརཧདིནྣོ ཨངྒཱརཀཱསུཾ པཏྭཱ ཨཔསཀྐིཏྭཱ ཋིཏོ ‘‘པུརཏོ ཡཱཐ, བྷནྟེ’’ཏི ཨཱཧ. ཨཐ སཏྠཱ ཨངྒཱརཀཱསུམཏྠཀེ པཱདཾ པསཱརེསི, ཀིལཉྫཾ ཨནྟརདྷཱཡི, ཨངྒཱརཀཱསུཾ བྷིནྡིཏྭཱ ཙཀྐམཏྟཱནི པདུམཱནི ཨུཊྛཧིཾསུ. སཏྠཱ པདུམཀཎྞིཀཱ ཨཀྐམནྟོ གནྟྭཱ པཉྙཏྟེ བུདྡྷཱསནེ ནིསཱིདི, བྷིཀྑཱུཔི ཏཐེཝ གནྟྭཱ ནིསཱིདིཾསུ. གརཧདིནྣསྶ ཀཱཡཏོ ཌཱཧོ ཨུཊྛཧི.

སོ ཝེགེན གནྟྭཱ སིརིགུཏྟཾ ཨུཔསངྐམིཏྭཱ, ‘‘སཱམི, མེ ཏཱཎཾ ཧོཧཱི’’ཏི ཨཱཧ. ‘‘ཀིཾ ཨེཏ’’ནྟི? ‘‘པཉྩནྣཾ བྷིཀྑུསཏཱནཾ གེཧེ ཡཱགུ ཝཱ བྷཏྟཱདཱིནི ཝཱ ནཏྠི, ཀིཾ ནུ ཁོ ཀརོམཱི’’ཏི? ‘‘ཀིཾ པན ཏཡཱ ཀཏ’’ནྟི ཨཱཧ. ཨཧཾ དྭིནྣཾ གེཧཱནཾ ཨནྟརེ མཧནྟཾ ཨཱཝཱཊཾ ཨངྒཱརསྶ པཱུརཾ ཀཱརེསིཾ – ‘‘ཏཏྠ པཱཏེཏྭཱ ནིགྒཎྷིསྶཱམཱི’’ཏི. ‘‘ཨཐ ནཾ བྷིནྡིཏྭཱ མཧཱཔདུམཱནི ཨུཊྛཧིཾསུ. སབྦེ པདུམཀཎྞིཀཱ ཨཀྐམིཏྭཱ གནྟྭཱ པཉྙཏྟཱསནེསུ ནིསིནྣཱ, ཨིདཱནི ཀིཾ ཀརོམི, སཱམཱི’’ཏི? ནནུ ཏྭཾ ཨིདཱནེཝ མཡ྄ཧཾ ‘‘‘ཨེཏྟིཀཱ ཙཱཊིཡོ, ཨེཏྟིཀཱ ཡཱགུ, ཨེཏྟཀཱནི སཏྟཱདཱིནཱི’ཏི དསྶེསཱི’’ཏི. ‘‘མུསཱ ཏཾ, སཱམི, ཏུཙྪཱཝ ཙཱཊིཡོ’’ཏི. ཧོཏུ, ‘‘གཙྪ, ཏཱསུ ཙཱཊཱིསུ ཡཱགུཨཱདཱིནི ཨོལོཀེཧཱི’’ཏི. ཏཾ ཁཎཉྙེཝ ཏེན ཡཱསུ ཙཱཊཱིསུ ‘‘ཡཱགཱུ’’ཏི ཝུཏྟཾ, ཏཱ ཡཱགུཡཱ པཱུརཡིཾསུ, ཡཱསུ ‘‘བྷཏྟཱདཱིནཱི’’ཏི ཝུཏྟཾ, ཏཱ བྷཏྟཱདཱིནཾ པརིཔུཎྞཱཝ ཨཧེསུཾ. ཏཾ སམྤཏྟིཾ དིསྭཱཝ གརཧདིནྣསྶ སརཱིརཾ པཱིཏིཔཱམོཛྫེན པརིཔཱུརིཏཾ, ཙིཏྟཾ པསནྣཾ. སོ སཀྐཙྩཾ བུདྡྷཔྤམུཁཾ བྷིཀྑུསངྒྷཾ པརིཝིསིཏྭཱ ཀཏབྷཏྟཀིཙྩསྶ སཏྠུནོ ཨནུམོདནཾ ཀཱརེཏུཀཱམོ པཏྟཾ གཎྷི. སཏྠཱ ཨནུམོདནཾ ཀརོནྟོ ‘‘ཨིམེ སཏྟཱ པཉྙཱཙཀྑུནོ ཨབྷཱཝེནེཝ མམ སཱཝཀཱནཾ བུདྡྷསཱསནསྶ གུཎཾ ན ཛཱནནྟི. པཉྙཱཙཀྑུཝིརཧིཏཱ ཧི ཨནྡྷཱ ནཱམ, པཉྙཝནྟོ སཙཀྑུཀཱ ནཱམཱ’’ཏི ཝཏྭཱ ཨིམཱ གཱཐཱ ཨབྷཱསི –

༥༨.

‘‘ཡཐཱ སངྐཱརདྷཱནསྨིཾ, ཨུཛ྄ཛྷིཏསྨིཾ མཧཱཔཐེ;

པདུམཾ ཏཏྠ ཛཱཡེཐ, སུཙིགནྡྷཾ མནོརམཾ.

༥༩.

‘‘ཨེཝཾ སངྐཱརབྷཱུཏེསུ, ཨནྡྷབྷཱུཏེ པུཐུཛྫནེ;

ཨཏིརོཙཏི པཉྙཱཡ, སམྨཱསམྦུདྡྷསཱཝཀོ’’ཏི.

ཏཏྠ སངྐཱརདྷཱནསྨིནྟི སངྐཱརཋཱནསྨིཾ, ཀཙཝརརཱསིམྷཱིཏི ཨཏྠོ. ཨུཛ྄ཛྷིཏསྨིཾ མཧཱཔཐེཏི མཧཱམགྒེ ཚཌྜིཏསྨིཾ. སུཙིགནྡྷནྟི སུརབྷིགནྡྷཾ. མནོ ཨེཏྠ རམཏཱིཏི མནོརམཾ. སངྐཱརབྷཱུཏེསཱུཏི སངྐཱརམིཝ བྷཱུཏེསུ. པུཐུཛྫནེཏི པུཐཱུནཾ ཀིལེསཱནཾ ཛནནཏོ ཨེཝཾལདྡྷནཱམེ ལོཀིཡམཧཱཛནེ. ཨིདཾ ཝུཏྟཾ ཧོཏི – ཡཐཱ ནཱམ མཧཱཔཐེ ཚཌྜིཏེ སངྐཱརརཱསིམྷི ཨསུཙིཛེགུཙྪིཡཔཊིཀཱུལེཔི སུཙིགནྡྷཾ པདུམཾ ཛཱཡེཐ, ཏཾ རཱཛརཱཛམཧཱམཏྟཱདཱིནཾ མནོརམཾ པིཡཾ མནཱཔཾ ཨུཔརིམཏྠཀེ པཏིཊྛཱནཱརཧམེཝ བྷཝེཡྻ, ཨེཝམེཝ སངྐཱརབྷཱུཏེསུཔི པུཐུཛྫནེསུ ཛཱཏོ ནིཔྤཉྙསྶ མཧཱཛནསྶ ཨཙཀྑུཀསྶ ཨནྟརེ ནིབྦཏྟོཔི ཨཏྟནོ པཉྙཱབལེན ཀཱམེསུ ཨཱདཱིནཝཾ, ནེཀྑམྨེ ཙ ཨཱནིསཾསཾ དིསྭཱ ནིཀྑམིཏྭཱ པབྦཛིཏོ པབྦཛྫཱམཏྟེནཔི, ཀཏོ ཨུཏྟརིཾ སཱིལསམཱདྷིཔཉྙཱཝིམུཏྟིཝིམུཏྟིཉཱཎདསྶནཱནི ཨཱརཱདྷེཏྭཱཔི ཨཏིརོཙཏི. སམྨཱསམྦུདྡྷསཱཝཀོ ཧི ཁཱིཎཱསཝོ བྷིཀྑུ ཨནྡྷབྷཱུཏེ པུཐུཛྫནེ ཨཏིཀྐམིཏྭཱ རོཙཏི ཝིརོཙཏི སོབྷཏཱིཏི.

དེསནཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི. གརཧདིནྣོ ཙ སིརིགུཏྟོ ཙ སོཏཱཔཏྟིཕལཾ པཱཔུཎིཾསུ. ཏེ སབྦཾ ཨཏྟནོ དྷནཾ བུདྡྷསཱསནེ ཝིཔྤཀིརིཾསུ. སཏྠཱ ཨུཊྛཱཡཱསནཱ ཝིཧཱརམགམཱསི. བྷིཀྑཱུ སཱཡནྷསམཡེ དྷམྨསབྷཱཡཾ ཀཐཾ སམུཊྛཱཔེསུཾ – ‘‘ཨཧོ ཨཙྪརིཡཱ བུདྡྷགུཎཱ ནཱམ, ཏཐཱརཱུཔཾ ནཱམ ཁདིརངྒཱརརཱསིཾ བྷིནྡིཏྭཱ པདུམཱནི ཨུཊྛཧིཾསཱུ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ, ‘‘ཨིམཱཡ ནཱམཱ’’ཏི ཝུཏྟེ – ‘‘ཨནཙྪརིཡཾ, བྷིཀྑཝེ, ཡཾ མམ ཨེཏརཧི བུདྡྷབྷཱུཏསྶ ཨངྒཱརརཱསིམྷཱ པདུམཱནི ཨུཊྛིཏཱནི, ཨཔརིཔཀྐེ ཉཱཎེ ཝཏྟམཱནསྶ བོདྷིསཏྟབྷཱུཏསྶཔི མེ ཨུཊྛཧིཾསཱུ’’ཏི ཝཏྭཱ, ‘‘ཀདཱ, བྷནྟེ, ཨཱཙིཀྑཐ ནོ’’ཏི ཡཱཙིཏོ ཨཏཱིཏཾ ཨཱཧརིཏྭཱ –

‘‘ཀཱམཾ པཏཱམི ནིརཡཾ, ཨུདྡྷཾཔཱདོ ཨཝཾསིརོ;

ནཱནརིཡཾ ཀརིསྶཱམི, ཧནྡ པིཎྜཾ པཊིགྒཧཱ’’ཏི. (ཛཱ. ༡.༡.༤༠) –

ཨིདཾ ཁདིརངྒཱརཛཱཏཀཾ ཝིཏྠཱརེཏྭཱ ཀཐེསཱིཏི.

གརཧདིནྣཝཏྠུ དྭཱདསམཾ.

པུཔྥཝགྒཝཎྞནཱ ནིཊྛིཏཱ.

ཙཏུཏྠོ ཝགྒོ.

༥. བཱལཝགྒོ

༡. ཨཉྙཏརཔུརིསཝཏྠུ

དཱིགྷཱ ཛཱགརཏོ རཏྟཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པསེནདིཀོསལཉྩེཝ ཨཉྙཏརཉྩ པུརིསཾ ཨཱརབྦྷ ཀཐེསི.

རཱཛཱ ཀིར པསེནདི ཀོསལོ ཨེཀསྨིཾ ཚཎདིཝསེ ཨལངྐཏཔཊིཡཏྟཾ སབྦསེཏཾ ཨེཀཾ པུཎྜརཱིཀཾ ནཱམ ཧཏྠིཾ ཨབྷིརུཡ྄ཧ མཧནྟེན རཱཛཱནུབྷཱཝེན ནགརཾ པདཀྑིཎཾ ཀརོཏི. ཨུསྶཱརཎཱཡ ཝཏྟམཱནཱཡ ལེཌྜུདཎྜཱདཱིཧི པོཐིཡམཱནོ མཧཱཛནོ པལཱཡནྟོ གཱིཝཾ པརིཝཊྚེཏྭཱཔི ཨོལོཀེཏིཡེཝ. རཱཛཱུནཾ ཀིར སུདིནྣདཱནསྶེཏཾ ཕལཾ. ཨཉྙཏརསྶཱཔི དུགྒཏཔུརིསསྶ བྷརིཡཱ སཏྟབྷཱུམིཀསྶ པཱསཱདསྶ ཨུཔརིཏལེ ཋིཏཱ ཨེཀཾ ཝཱཏཔཱནཀཝཱཊཾ ཝིཝརིཏྭཱ རཱཛཱནཾ ཨོལོཀེཏྭཱཝ ཨཔགཙྪི. རཉྙོ པུཎྞཙནྡོ ཝལཱཧཀནྟརཾ པཝིཊྛོ ཝིཡ ཨུཔཊྛཱསི. སོ ཏསྶཱ པཊིབདྡྷཙིཏྟོ ཧཏྠིཀྑནྡྷཏོ པཏནཱཀཱརཔྤཏྟོ ཝིཡ ཧུཏྭཱ ཁིཔྤཾ ནགརཾ པདཀྑིཎཾ ཀཏྭཱ ཨནྟེཔུརཾ པཝིསིཏྭཱ ཨེཀཾ ཝིསྶཱསཀཾ ཨམཙྩཾ ཨཱཧ – ‘‘ཨསུཀཊྛཱནེ ཏེ མཡཱ ཨོལོཀིཏཔཱསཱདོ དིཊྛོ’’ཏི? ‘‘ཨཱམ, དེཝཱ’’ཏི. ‘‘ཏཏྠེཀཾ ཨིཏྠིཾ ཨདྡསཱ’’ཏི? ‘‘ཨདྡསཾ, དེཝཱ’’ཏི. ‘‘གཙྪ, ཏསྶཱ སསཱམིཀཨསཱམིཀབྷཱཝཾ ཛཱནཱཧཱི’’ཏི. སོ གནྟྭཱ ཏསྶཱ སསཱམིཀབྷཱཝཾ ཉཏྭཱ ཨཱགནྟྭཱ རཉྙོ ‘‘སསཱམིཀཱ’’ཏི ཨཱརོཙེསི. ཨཐ རཉྙཱ ‘‘ཏེན ཧི ཏསྶཱ སཱམིཀཾ པཀྐོསཱཧཱི’’ཏི ཝུཏྟེ སོ གནྟྭཱ, ‘‘ཨེཧི, བྷོ, རཱཛཱ ཏཾ པཀྐོསཏཱི’’ཏི ཨཱཧ. སོ ‘‘བྷརིཡཾ མེ ནིསྶཱཡ བྷཡེན ཨུཔྤནྣེན བྷཝིཏབྦ’’ནྟི ཙིནྟེཏྭཱ རཉྙོ ཨཱཎཾ པཊིབཱཧིཏུཾ ཨསཀྐོནྟོ གནྟྭཱ རཱཛཱནཾ ཝནྡིཏྭཱ ཨཊྛཱསི. ཨཐ ནཾ རཱཛཱ ‘‘མཾ ཨིཏོ པཊྛཱཡ ཨུཔཊྛཱཧཱི’’ཏི ཨཱཧ. ‘‘ཨལཾ, དེཝ, ཨཧཾ ཨཏྟནོ ཀམྨཾ ཀཏྭཱ ཏུམྷཱཀཾ སུངྐཾ དདཱམི, གྷརེཡེཝ མེ ཛཱིཝིཀཱ ཧོཏཱུ’’ཏི. ‘‘ཏཝ སུངྐེན མཡ྄ཧཾ ཨཏྠོ ནཏྠི, ཨཛྫཏོ པཊྛཱཡ མཾ ཨུཔཊྛཱཧཱི’’ཏི ཏསྶ ཕལཀཉྩ ཨཱཝུདྷཉྩ དཱཔེསི. ཨེཝཾ ཀིརསྶ ཨཧོསི – ‘‘ཀཉྩིདེཝསྶ དོསཾ ཨཱརོཔེཏྭཱ གྷཱཏེཏྭཱ བྷརིཡཾ གཎྷིསྶཱམཱི’’ཏི. ཨཐ ནཾ སོ མརཎབྷཡབྷཱིཏོ ཨཔྤམཏྟོ ཧུཏྭཱ ཨུཔཊྛཱསི.

རཱཛཱ ཏསྶ དོསཾ ཨཔསྶནྟོ ཀཱམཔརིལཱ༹ཧེ ཝཌྜྷནྟེ ‘‘ཨེཀམསྶ དོསཾ ཨཱརོཔེཏྭཱ རཱཛཱཎཾ ཀརིསྶཱམཱི’’ཏི པཀྐོསཱཔེཏྭཱ ཨེཝམཱཧ – ‘‘ཨམྦྷོ ཨིཏོ ཡོཛནམཏྠཀེ ནདིཡཱ ཨསུཀཊྛཱནཾ ནཱམ གནྟྭཱ སཱཡཾ མམ ནྷཱནཝེལཱཡ ཀུམུདུཔྤལཱནི ཙེཝ ཨརུཎཝཏཱིམཏྟིཀཉྩ ཨཱཧར. སཙེ ཏསྨིཾ ཁཎེ ནཱགཙྪསི, ཨཱཎཾ ཏེ ཀརིསྶཱམཱི’’ཏི. སེཝཀོ ཀིར ཙཏཱུཧིཔི དཱསེཧི པཏིཀིཊྛཏརོ. དྷནཀྐཱིཏཱདཡོ ཧི དཱསཱ ‘‘སཱིསཾ མེ རུཛྫཏི, པིཊྛི མེ རུཛྫཏཱི’’ཏི ཝཏྭཱ ཨཙྪིཏུཾ ལབྷནྟིཡེཝ. སེཝཀསྶེཏཾ ནཏྠི, ཨཱཎཏྟཀམྨཾ ཀཱཏུམེཝ ཝཊྚཏི. ཏསྨཱ སོ ‘‘ཨཝསྶཾ མཡཱ གནྟབྦཾ, ཀུམུདུཔྤལེཧི སདྡྷིཾ ཨརུཎཝཏཱིམཏྟིཀཱ ནཱམ ནཱགབྷཝནེ ཨུཔྤཛྫཏི, ཨཧཾ ཀུཧིཾ ལབྷིསྶཱམཱི’’ཏི ཙིནྟེནྟོ མརཎབྷཡབྷཱིཏོ ཝེགེན གེཧཾ གནྟྭཱ, ‘‘བྷདྡེ, ནིཊྛིཏཾ མེ བྷཏྟ’’ནྟི ཨཱཧ. ‘‘ཨུདྡྷནམཏྠཀེ, སཱམཱི’’ཏི. སོ ཡཱཝ བྷཏྟཾ ཨོཏརཏི, ཏཱཝ སནྡྷཱརེཏུཾ ཨསཀྐོནྟོ ཨུལུ༹ངྐེན ཀཉྫིཀཾ ཧརཱཔེཏྭཱ ཡཐཱལདྡྷེན བྱཉྫནེན སདྡྷིཾ ཨལླམེཝ བྷཏྟཾ པཙྪིཡཾ ཨོཔཱིལེ༹ཏྭཱ ཨཱདཱཡ ཡོཛནིཀཾ མགྒཾ པཀྑནྡོ, ཏསྶ གཙྪནྟསྶེཝ བྷཏྟཾ པཀྐཾ ཨཧོསི. སོ ཨནུཙྪིཊྛཾ ཀཏྭཱཝ ཐོཀཾ བྷཏྟཾ ཨཔནེཏྭཱ བྷུཉྫནྟོ ཨེཀཾ ཨདྡྷིཀཾ དིསྭཱ མཡཱ ཨཔནེཏྭཱ ཋཔིཏཾ ཐོཀཾ ཨནུཙྪིཊྛཾ བྷཏྟམེཝ ཨཏྠི གཧེཏྭཱ བྷུཉྫ སཱམཱིཏི. སོ གཎྷིཏྭཱ བྷུཉྫི. ཨིཏརོཔི བྷུཉྫིཏྭཱ ཨེཀཾ བྷཏྟམུཊྛིཾ ཨུདཀེ ཁིཔིཏྭཱ མུཁཾ ཝིཀྑཱལེཏྭཱ མཧནྟེན སདྡེན ‘‘ཨིམསྨིཾ ནདཱིཔདེསེ ཨདྷིཝཏྠཱ ནཱགཱ སུཔཎྞཱ དེཝཏཱ ཙ ཝཙནཾ མེ སུཎནྟུ, རཱཛཱ མཡ྄ཧཾ ཨཱཎཾ ཀཱཏུཀཱམོ ‘ཀུམུདུཔྤལེཧི སདྡྷིཾ ཨརུཎཝཏཱིམཏྟིཀཾ ཨཱཧརཱ’ཏི མཾ ཨཱཎཱཔེསི, ཨདྡྷིཀམནུསྶསྶ ཙ མེ བྷཏྟཾ དིནྣཾ, ཏཾ སཧསྶཱནིསཾསཾ, ཨུདཀེ མཙྪཱནཾ དིནྣཾ, ཏཾ སཏཱནིསཾསཾ. ཨེཏྟཀཾ པུཉྙཕལཾ ཏུམྷཱཀཾ པཏྟིཾ ཀཏྭཱ དམྨི, མཡ྄ཧཾ ཀུམུདུཔྤལེཧི སདྡྷིཾ ཨརུཎཝཏཱིམཏྟིཀཾ ཨཱཧརཐཱ’’ཏི ཏིཀྑཏྟུཾ ཨནུསྶཱཝེསི. ཏཏྠ ཨདྷིཝཏྠོ ནཱགརཱཛཱ ཏཾ སདྡཾ སུཏྭཱ མཧལླཀཝེསེན ཏསྶ སནྟིཀཾ གནྟྭཱ ‘‘ཀིཾ ཝདེསཱི’’ཏི ཨཱཧ. སོ པུནཔི ཏཐེཝ ཝཏྭཱ ‘‘མཡ྄ཧཾ ཏཾ པཏྟིཾ དེཧཱི’’ཏི ཝུཏྟེ, ‘‘དེམཱི’’ཏི ཨཱཧ. པུནཔི ‘‘དེཧཱི’’ཏི ཝུཏྟེ, ‘‘དེམི, སཱམཱི’’ཏི ཨཱཧ. ཨེཝཾ སོ དྭེ ཏཡོ ཝཱརེ པཏྟིཾ ཨཱཧརཱཔེཏྭཱ ཀུམུདུཔྤལེཧི སདྡྷིཾ ཨརུཎཝཏཱིམཏྟིཀཾ ཨདཱསི.

རཱཛཱ པན ཙིནྟེསི – ‘‘མནུསྶཱ ནཱམ བཧུམཱཡཱ, སཙེ སོ ཀེནཙི ཨུཔཱཡེན ལབྷེཡྻ, ཀིཙྩཾ མེ ན ནིཔྥཛྫེཡྻཱ’’ཏི. སོ ཀཱལསྶེཝ དྭཱརཾ པིདཧཱཔེཏྭཱ མུདྡིཀཾ ཨཏྟནོ སནྟིཀཾ ཨཱཧརཱཔེསི. ཨིཏརོཔི པུརིསོ རཉྙོ ནྷཱནཝེལཱཡམེཝཱགནྟྭཱ དྭཱརཾ ཨལབྷནྟོ དྭཱརཔཱལཾ པཀྐོསེཏྭཱ ‘‘དྭཱརཾ ཝིཝརཱ’’ཏི ཨཱཧ. ‘‘ན སཀྐཱ ཝིཝརིཏུཾ, རཱཛཱ ཀཱལསྶེཝ མུདྡིཀཾ དཏྭཱ རཱཛགེཧཾ ཨཱཧརཱཔེསཱི’’ཏི. སོ ‘‘རཱཛདཱུཏོ ཨཧཾ, དྭཱརཾ ཝིཝརཱ’’ཏི ཝཏྭཱཔི ‘‘དྭཱརཾ ཨལབྷནྟོ ནཏྠི མེ ཨིདཱནི ཛཱིཝིཏཾ. ཀིཾ ནུ ཁོ ཀརིསྶཱམཱི’’ཏི ཙིནྟེཏྭཱ དྭཱརསྶ ཨུཔརིཨུམྨཱརེ མཏྟིཀཱཔིཎྜཾ ཁིཔིཏྭཱ ཏསྶཱུཔརི པུཔྥཱནི ལགྒེཏྭཱ མཧཱསདྡཾ ཀརོནྟོ, ‘‘ཨམྦྷོ, ནགརཝཱསིནོ རཉྙོ མཡཱ ཨཱཎཏྟིཡཱ གཏབྷཱཝཾ ཛཱནཱཐ, རཱཛཱ མཾ ཨཀཱརཎེན ཝིནཱསེཏུཀཱམོ’’ཏི ཏིཀྑཏྟུཾ ཝིརཝིཏྭཱ ‘‘ཀཏྠ ནུ ཁོ གཙྪིསྶཱམཱི’’ཏི ཙིནྟེཏྭཱ ‘‘བྷིཀྑཱུ ནཱམ མུདུཧདཡཱ, ཝིཧཱརཾ གནྟྭཱ ནིཔཛྫིསྶཱམཱི’’ཏི སནྣིཊྛཱནམཀཱསི. ཨིམེ ཧི ནཱམ སཏྟཱ སུཁིཏཀཱལེ བྷིཀྑཱུནཾ ཨཏྠིབྷཱཝམྤི ཨཛཱནིཏྭཱ དུཀྑཱབྷིབྷཱུཏཀཱལེ ཝིཧཱརཾ གནྟུཀཱམཱ ཧོནྟི, ཏསྨཱ སོཔི ‘‘མེ ཨཉྙཾ ཏཱཎཾ ནཏྠཱི’’ཏི ཝིཧཱརཾ གནྟྭཱ ཨེཀསྨིཾ ཕཱསུཀཊྛཱནེ ནིཔཛྫི. ཨཐ རཉྙོཔི ཏཾ རཏྟིཾ ནིདྡཾ ཨལབྷནྟསྶ ཏཾ ཨིཏྠིཾ ཨནུསྶརནྟསྶ ཀཱམཔརིལཱ༹ཧོ ཨུཔྤཛྫི. སོ ཙིནྟེསི – ‘‘ཝིབྷཱཏཀྑཎེཡེཝ ཏཾ པུརིསཾ གྷཱཏཱཔེཏྭཱ ཏཾ ཨིཏྠིཾ ཨཱནེསྶཱམཱི’’ཏི.

ཏསྨིཾ ཁཎེཡེཝ སཊྛིཡོཛནིཀཱཡ ལོཧཀུམྦྷིཡཱ ནིབྦཏྟཱ ཙཏྟཱརོ པུརིསཱ པཀྐུཐིཏཱཡ ཨུཀྑལིཡཱ ཏཎྜུལཱ ཝིཡ སམྤརིཝཏྟཀཾ པཙྩམཱནཱ ཏིཾསཱཡ ཝསྶསཧསྶེཧི ཧེཊྛིམཏལཾ པཏྭཱ ཨཔརེཧི ཏིཾསཱཡ ཝསྶསཧསྶེཧི པུན མུཁཝཊྚིཡཾ པཱཔུཎིཾསུ. ཏེ སཱིསཾ ཨུཀྑིཔིཏྭཱ ཨཉྙམཉྙཾ ཨོལོཀེཏྭཱ ཨེཀེཀཾ གཱཐཾ ཝཏྟུཀཱམཱ ཝཏྟུཾ ཨསཀྐོནྟཱ ཨེཀེཀཾ ཨཀྑརཾ ཝཏྭཱ པརིཝཏྟིཏྭཱ ལོཧཀུམྦྷིམེཝ པཝིཊྛཱ. རཱཛཱ ནིདྡཾ ཨལབྷནྟོ མཛ྄ཛྷིམཡཱམསམནནྟརེ ཏཾ སདྡཾ སུཏྭཱ བྷཱིཏོ ཨུཏྲསྟམཱནསོ ‘‘ཀིཾ ནུ ཁོ མཡ྄ཧཾ ཛཱིཝིཏནྟརཱཡོ བྷཝིསྶཏི, ཨུདཱཧུ མེ ཨགྒམཧེསིཡཱ, ཨུདཱཧུ མེ རཛྫཾ ཝིནསྶིསྶཏཱི’’ཏི ཙིནྟེནྟོ སཀལརཏྟིཾ ཨཀྑཱིནི ནིམཱིལེཏུཾ ནཱསཀྑི. སོ ཨརུཎུགྒམནཝེལཱཡ ཨེཝ པུརོཧིཏཾ པཀྐོསཱཔེཏྭཱ, ‘‘ཨཱཙརིཡ, མཡཱ མཛ྄ཛྷིམཡཱམསམནནྟརེ མཧནྟཱ བྷེརཝསདྡཱ སུཏཱ, ‘རཛྫསྶ ཝཱ ཨགྒམཧེསིཡཱ ཝཱ མཡ྄ཧཾ ཝཱ ཀསྶ ཨནྟརཱཡོ བྷཝིསྶཏཱི’ཏི ན ཛཱནཱམི, ཏེན མེ ཏྭཾ པཀྐོསཱཔིཏོ’’ཏི ཨཱཧ. མཧཱརཱཛ, ཀིཾ ཏེ སདྡཱ སུཏཱཏི? ‘‘ཨཱཙརིཡ, དུ-ཨིཏི ས-ཨིཏི ན-ཨིཏི སོ-ཨིཏཱིཏི ཨིམེ སདྡེ ཨསྶོསིཾ, ཨིམེསཾ ནིཔྥཏྟིཾ ཨུཔདྷཱརེཧཱི’’ཏི. བྲཱཧྨཎསྶ མཧཱཨནྡྷཀཱརཾ པཝིཊྛསྶ ཝིཡ ན ཀིཉྩི པཉྙཱཡཏི, ‘‘ན ཛཱནཱམཱི’’ཏི ཝུཏྟེ ‘‘པན ལཱབྷསཀྐཱརོ མེ པརིཧཱཡིསྶཏཱི’’ཏི བྷཱཡིཏྭཱ ‘‘བྷཱརིཡཾ, མཧཱརཱཛཱ’’ཏི ཨཱཧ. ‘‘ཀིཾ, ཨཱཙརིཡཱ’’ཏི? ‘‘ཛཱིཝིཏནྟརཱཡོ ཏེ པཉྙཱཡཏཱི’’ཏི. སོ དྭིགུཎཾ བྷཱིཏོ, ‘‘ཨཱཙརིཡ, ཨཏྠི ཀིཉྩི པན པཊིགྷཱཏཀཱརཎ’’ནྟི ཨཱཧ. ‘‘ཨཏྠི, མཧཱརཱཛ, མཱ བྷཱཡི, ཨཧཾ ཏཡོ ཝེདེ ཛཱནཱམཱི’’ཏི. ‘‘ཀིཾ པན ལདྡྷུཾ ཝཊྚཏཱི’’ཏི? ‘‘སབྦསཏཡཉྙཾ ཡཛིཏྭཱ ཛཱིཝིཏཾ ལབྷིསྶསི, དེཝཱ’’ཏི. ‘‘ཀིཾ ལདྡྷུཾ ཝཊྚཏཱི’’ཏི? ཧཏྠིསཏཾ ཨསྶསཏཾ ཨུསབྷསཏཾ དྷེནུསཏཾ ཨཛསཏཾ ཨུརབྦྷསཏཾ ཀུཀྐུཊསཏཾ སཱུཀརསཏཾ དཱརཀསཏཾ དཱརིཀཱསཏནྟི ཨེཝཾ ཨེཀེཀཾ པཱཎཛཱཏིཾ སཏཾ སཏཾ ཀཏྭཱ གཎྷཱཔེནྟོ ‘‘སཙེ མིགཛཱཏིམེཝ གཎྷཱཔེསྶཱམི, ‘ཨཏྟནོ ཁཱདནཱིཡམེཝ གཎྷཱཔེཏཱི’ཏི ཝཀྑནྟཱི’’ཏི ཧཏྠིཨསྶམནུསྶེཔི གཎྷཱཔེཏི. རཱཛཱ ‘‘མམ ཛཱིཝིཏམེཝ མཡ྄ཧཾ ལཱབྷོ’’ཏི ཙིནྟེཏྭཱ ‘‘སབྦཔཱཎེ སཱིགྷཾ གཎྷཐཱ’’ཏི ཨཱཧ. ཨཱཎཏྟམནུསྶཱ ཨདྷིཀཏརཾ གཎྷིཾསུ. ཝུཏྟམྤི ཙེཏཾ ཀོསལསཾཡུཏྟེ –

‘‘ཏེན ཁོ པན སམཡེན རཉྙོ པསེནདིསྶ ཀོསལསྶ མཧཱཡཉྙོ པཙྩུཔཊྛིཏོ ཧོཏི, པཉྩ ཙ ཨུསབྷསཏཱནི པཉྩ ཙ ཝཙྪཏརསཏཱནི པཉྩ ཙ ཝཙྪཏརིསཏཱནི པཉྩ ཙ ཨཛསཏཱནི པཉྩ ཙ ཨུརབྦྷསཏཱནི ཐཱུཎཱུཔནཱིཏཱནི ཧོནྟི ཡཉྙཏྠཱཡ. ཡེཔིསྶ ཏེ ཧོནྟི དཱསཱཏི ཝཱ པེསྶཱཏི ཝཱ ཀམྨཀརཱཏི ཝཱ, ཏེཔི དཎྜཏཛྫིཏཱ བྷཡཏཛྫིཏཱ ཨསྶུམུཁཱ རུདམཱནཱ པརིཀམྨཱནི ཀརོནྟཱི’’ཏི (སཾ. ནི. ༡.༡༢༠).

མཧཱཛནོ ཨཏྟནོ ཨཏྟནོ པུཏྟདྷཱིཏུཉཱཏཱིནཾ ཨཏྠཱཡ པརིདེཝམཱནོ མཧཱསདྡམཀཱསི, མཧཱཔཐཝཱིཨུནྡྲིཡནསདྡོ ཝིཡ ཨཧོསི. ཨཐ མལླིཀཱ དེཝཱི ཏཾ སདྡཾ སུཏྭཱ རཉྙོ སནྟིཀཾ གནྟྭཱ ‘‘ཀིཾ ནུ ཁོ ཏེ, མཧཱརཱཛ, ཨིནྡྲིཡཱནི ཨཔཱཀཏིཀཱནི, ཀིལནྟརཱུཔཱནི ཝིཡ པཉྙཱཡནྟཱི’’ཏི པུཙྪི. ‘‘ཀིཾ ཏུཡ྄ཧཾ, མལླིཀེ, ཏྭཾ མམ ཀཎྞམཱུལེན ཨཱསིཝིསམྤི གཙྪནྟཾ ན ཛཱནཱསཱི’’ཏི? ‘‘ཀིཾ པནེཏཾ, དེཝཱ’’ཏི? ‘‘རཏྟིབྷཱགེ མེ ཨེཝརཱུཔོ ནཱམ སདྡོ སུཏོ, སྭཱཧཾ པུརོཧིཏཾ པུཙྪིཏྭཱ ཛཱིཝིཏནྟརཱཡོ ཏེ པཉྙཱཡཏི, སབྦསཏཡཉྙཾ ཡཛིཏྭཱ ཛཱིཝིཏཾ ལབྷིསྶསཱི’’ཏི སུཏྭཱ ‘‘མམ ཛཱིཝིཏམེཝ མཡ྄ཧཾ ལཱབྷོ’’ཏི ཨིམེ པཱཎེ གཎྷཱཔེསིནྟི. མལླིཀཱ དེཝཱི, ‘‘ཨནྡྷབཱལོསི, མཧཱརཱཛ, ཀིཉྩཱཔི མཧཱབྷཀྑོསི, ཨནེཀསཱུཔབྱཉྫནཝིཀཏིཀཾ དོཎཔཱཀཾ བྷོཛནཾ བྷུཉྫསི, དྭཱིསུ རཊྛེསུ རཛྫཾ ཀཱརེསི, པཉྙཱ པན ཏེ མནྡཱ’’ཏི ཨཱཧ. ‘‘ཀསྨཱ ཨེཝཾ ཝདེསི, དེཝཱི’’ཏི? ‘‘ཀཧཾ ཏཡཱ ཨཉྙསྶ མརཎེན ཨཉྙསྶ ཛཱིཝིཏལཱབྷོ དིཊྛཔུབྦོ, ཨནྡྷབཱལསྶ བྲཱཧྨཎསྶ ཀཐཾ གཧེཏྭཱ ཀསྨཱ མཧཱཛནསྶ ཨུཔརི དུཀྑཾ ཁིཔསི, དྷུརཝིཧཱརེ སདེཝཀསྶ ལོཀསྶ ཨགྒཔུགྒལོ ཨཏཱིཏཱདཱིསུ ཨཔྤཊིཧཏཉཱཎོ སཏྠཱ ཝསཏི, ཏཾ པུཙྪིཏྭཱ ཏསྶོཝཱདཾ ཀརོཧཱི’’ཏི ཝུཏྟེ རཱཛཱ སལླཧུཀེཧི ཡཱནེཧི མལླིཀཱཡ སདྡྷིཾ ཝིཧཱརཾ གནྟྭཱ མརཎབྷཡཏཛྫིཏོ ཀིཉྩི ཝཏྟུཾ ཨསཀྐོནྟོ སཏྠཱརཾ ཝནྡིཏྭཱ ཨེཀམནྟཾ ནིསཱིདི.

ཨཐ ནཾ སཏྠཱ ‘‘ཧནྡ ཀུཏོ ནུ ཏྭཾ, མཧཱརཱཛ, ཨཱགཙྪསི དིཝཱ དིཝསྶཱ’’ཏི པཋམཏརཾ ཨཱལཔི. སོ ཏུཎྷཱིཡེཝ ནིསཱིདི. ཏཏོ མལླིཀཱ བྷགཝཏོ ཨཱརོཙེསི – ‘‘བྷནྟེ, རཉྙཱ ཀིར མཛ྄ཛྷིམཡཱམསམནནྟརེ སདྡོ སུཏོ. ཨཐ ནཾ པུརོཧིཏསྶ ཨཱརོཙེསི. པུརོཧིཏོ ‘ཛཱིཝིཏནྟརཱཡོ ཏེ བྷཝིསྶཏི, ཏསྶ པཊིགྷཱཏཏྠཱཡ སབྦསཏེ པཱཎེ གཧེཏྭཱ ཏེསཾ གལལོཧིཏེན ཡཉྙེ ཡཛིཏེ ཛཱིཝིཏཾ ལབྷིསྶསཱི’ཏི ཨཱཧ. རཱཛཱ པཱཎེ གཎྷཱཔེསི, ཏེནཱཡཾ མཡཱ ཨིདྷཱནཱིཏོ’’ཏི. ‘‘ཨེཝཾ ཀིར, མཧཱརཱཛཱ’’ཏི? ‘‘ཨེཝཾ, བྷནྟེ’’ཏི. ‘‘ཀིནྟི ཏེ སདྡོ སུཏོ’’ཏི? སོ ཨཏྟནཱ སུཏནིཡཱམེནེཝ ཨཱཙིཀྑི. ཏཐཱགཏསྶ ཏཾ སུཏྭཱཝ ཨེཀོབྷཱསོ ཨཧོསི. ཨཐ ནཾ སཏྟཱ ཨཱཧ – ‘‘མཱ བྷཱཡི, མཧཱརཱཛ, ཏཝ ཨནྟརཱཡོ ནཏྠི, པཱཔཀམྨིནོ སཏྠཱ ཨཏྟནོ དུཀྑཾ ཨཱཝཱིཀརོནྟཱ ཨེཝམཱཧཾསཱུ’’ཏི. ‘‘ཀིཾ པན, བྷནྟེ, ཏེཧི ཀཏ’’ནྟི? ཨཐ ཁོ བྷགཝཱ ཏེསཾ ཀམྨཾ ཨཱཙིཀྑིཏུཾ ‘‘ཏེན ཧི, མཧཱརཱཛ, སུཎཱཧཱི’’ཏི ཝཏྭཱ ཨཏཱིཏཾ ཨཱཧརི –

ཨཏཱིཏེ ཝཱིསཏིཝསྶསཧསྶཱཡུཀེསུ མནུསྶེསུ ཀསྶཔོ བྷགཝཱ ལོཀེ ཨུཔྤཛྫིཏྭཱ ཝཱིསཏིཡཱ ཁཱིཎཱསཝསཧསྶེཧི སདྡྷིཾ ཙཱརིཀཾ ཙརམཱནོ བཱརཱཎསིམགམཱསི. བཱརཱཎསིཝཱསིནོ དྭེཔི ཏཡོཔི བཧུཏརཱཔི ཨེཀཏོ ཧུཏྭཱ ཨཱགནྟུཀདཱནཾ པཝཏྟཡིཾསུ. ཏདཱ བཱརཱཎསིཡཾ ཙཏྟཱལཱིསཀོཊིཝིབྷཝཱ ཙཏྟཱརོ སེཊྛིཔུཏྟཱ སཧཱཡཀཱ ཨཧེསུཾ. ཏེ མནྟཡིཾསུ – ‘‘ཨམྷཱཀཾ གེཧེ བཧུདྷནཾ, ཏེན ཀིཾ ཀརོམཱ’’ཏི? ‘‘ཨེཝརཱུཔེ བུདྡྷེ ཙཱརིཀཾ ཙརམཱནེ དཱནཾ དསྶཱམ, སཱིལཾ རཀྑིསྶཱམ, པཱུཛཾ ཀརིསྶཱམཱ’’ཏི ཨེཀོཔི ཨཝཏྭཱ ཏེསུ ཨེཀོ ཏཱཝ ཨེཝམཱཧ – ‘‘ཏིཁིཎསུརཾ པིཝནྟཱ མདྷུརམཾསཾ ཁཱདནྟཱ ཝིཙརིསྶཱམ, ཨིདཾ ཨམྷཱཀཾ ཛཱིཝིཏཕལ’’ནྟི. ཨཔརོཔི ཨེཝམཱཧ – ‘‘དེཝསིཀཾ ཏིཝསྶིཀགནྡྷསཱལིབྷཏྟཾ ནཱནགྒརསེཧི བྷུཉྫནྟཱ ཝིཙརིསྶཱམཱ’’ཏི. ཨཔརོཔི ཨེཝམཱཧ – ‘‘ནཱནཔྤཀཱརཾ པཱུཝཁཛྫཀཝིཀཏིཾ པཙཱཔེཏྭཱ ཁཱདནྟཱ ཝིཙརིསྶཱམཱ’’ཏི. ཨཔརོཔི ཨེཝམཱཧ – ‘‘སམྨཱ མཡཾ ཨཉྙཾ ཀིཉྩི ན ཀརིསྶཱམ, ‘དྷནཾ དསྶཱམཱ’ཏི ཝུཏྟེ ཨནིཙྪམཱནཱ ཨིཏྠཱི ནཱམ ནཏྠི, ཏསྨཱ དྷནེན པལོབྷེཏྭཱ པཱརདཱརིཀཀམྨཾ ཀརིསྶཱམཱ’’ཏི. ‘‘སཱདྷུ, སཱདྷཱུ’’ཏི སབྦེཝ ཏསྶ ཀཐཱཡ ཨཊྛཾསུ.

ཏེ ཏཏོ པཊྛཱཡ ཨབྷིརཱུཔཱནཾ ཨིཏྠཱིནཾ དྷནཾ པེསེཏྭཱ ཝཱིསཏིཝསྶསཧསྶཱནི པཱརདཱརིཀཀམྨཾ ཀཏྭཱ ཀཱལཾ ཀཏྭཱ ཨཝཱིཙིནིརཡེ ནིབྦཏྟཱ. ཏེ ཨེཀཾ བུདྡྷནྟརཾ ནིརཡེ པཙྩིཏྭཱ ཏཏྠ ཀཱལཾ ཀཏྭཱ པཀྐཱཝསེསེན སཊྛིཡོཛནིཀཱཡ ལོཧཀུམྦྷིཡཱ ནིབྦཏྟིཏྭཱ ཏིཾསཱཡ ཝསྶསཧསྶེཧི ཧེཊྛིམཏལཾ པཏྭཱ པུནཔི ཏིཾསཱཡ ཝསྶསཧསྶེཧི ལོཧཀུམྦྷིམུཁཾ པཏྭཱ ཨེཀེཀཾ གཱཐཾ ཝཏྟུཀཱམཱ ཧུཏྭཱ ཝཏྟུཾ ཨསཀྐོནྟཱ ཨེཀེཀཾ ཨཀྑརཾ ཝཏྭཱ པུན པརིཝཏྟིཏྭཱ, ལོཧཀུམྦྷིམེཝ པཝིཊྛཱ. ‘‘ཝདེཧི, མཧཱརཱཛ, པཋམཾ ཏེ ཀིཾ སདྡོ ནཱམ སུཏོ’’ཏི? ‘‘དུ-ཨིཏི, བྷནྟེ’’ཏི. སཏྠཱ ཏེན ཨཔརིཔུཎྞཾ ཀཏྭཱ ཝུཏྟཾ གཱཐཾ པརིཔུཎྞཾ ཀཏྭཱ དསྶེནྟོ ཨེཝམཱཧ –

‘‘དུཛྫཱིཝིཏམཛཱིཝིམྷ, ཡེ སནྟེ ན དདམྷསེ;

ཝིཛྫམཱནེསུ བྷོགེསུ, དཱིཔཾ ནཱཀམྷ ཨཏྟནོ’’ཏི. (ཛཱ. ༡.༤.༥༣; པེ. ཝ. ༨༠༤);

ཨཐ རཉྙོ ཨིམིསྶཱ གཱཐཱཡ ཨཏྠཾ པཀཱསེཏྭཱ, ‘‘ཀིཾ ཏེ, མཧཱརཱཛ, དུཏིཡསདྡོ ཏཏིཡསདྡོ ཙཏུཏྠསདྡོ སུཏོ’’ཏི པུཙྪིཏྭཱ ‘‘ཨེཝཾ ནཱམཱ’’ཏི ཝུཏྟེ ཨཝསེསཾ པརིཔཱུརེནྟོ –

‘‘སཊྛིཝསྶསཧསྶཱནི, པརིཔུཎྞཱནི སབྦསོ;

ནིརཡེ པཙྩམཱནཱནཾ, ཀདཱ ཨནྟོ བྷཝིསྶཏི.

‘‘ནཏྠི ཨནྟོ ཀུཏོ ཨནྟོ, ན ཨནྟོ པཊིདིསྶཏི;

ཏདཱ ཧི པཀཏཾ པཱཔཾ, མམ ཏུཡ྄ཧཉྩ མཱརིསཱ.

‘‘སོཧཾ ནཱུན ཨིཏོ གནྟྭཱ, ཡོནིཾ ལདྡྷཱན མཱནུསིཾ;

ཝདཉྙཱུ སཱིལསམྤནྣོ, ཀཱཧཱམི ཀུསལཾ བཧུ’’ནྟི. (ཛཱ. ༡.༤.༥༤-༥༦; པེ. ཝ. ༨༠༢, ༨༠༣, ༨༠༥) –

པཊིཔཱཊིཡཱ ཨིམཱ གཱཐཱ ཝཏྭཱ ཏཱསཾ ཨཏྠཾ པཀཱསེཏྭཱ ‘‘ཨིཏི ཁོ, མཧཱརཱཛ, ཏེ ཙཏྟཱརོ ཛནཱ ཨེཀེཀཾ གཱཐཾ ཝཏྟུཀཱམཱཔི ཝཏྟུཾ ཨསཀྐོནྟཱ ཨེཀཀམེཝ ཨཀྑརཾ ཝཏྭཱ པུན ལོཧཀུམྦྷིམེཝ པཝིཊྛཱ’’ཏི ཨཱཧ.

རཉྙཱ ཀིར པསེནདིཀོསལེན ཏསྶ སདྡསྶ སུཏཀཱལཏོ པཊྛཱཡ ཏེ ཧེཊྛཱ བྷསྶནྟི ཨེཝ, ཨཛྫཱཔི ཨེཀཾ ཝསྶསཧསྶཾ ནཱཏིཀྐམནྟི. རཉྙོ ཏཾ དེསནཾ སུཏྭཱ མཧཱསཾཝེགོ ཨུཔྤཛྫི. སོ ‘‘བྷཱརིཡཾ ཝཏིདཾ པཱརདཱརིཀཀམྨཾ ནཱམ, ཨེཀཾ ཀིར བུདྡྷནྟརཾ ནིརཡེ པཙྩིཏྭཱ ཏཏོ ཙུཏཱ སཊྛིཡོཛནིཀཱཡ ལོཧཀུམྦྷིཡཱ ནིབྦཏྟིཏྭཱ ཏཏྠ སཊྛིཝསྶསཧསྶཱནི པཙྩིཏྭཱ ཨེཝམྤི ནེསཾ དུཀྑཱ མུཙྩནཀཱལོ ན པཉྙཱཡཏི, ཨཧམྤི པརདཱརེ སིནེཧཾ ཀཏྭཱ སབྦརཏྟིཾ ནིདྡཾ ན ལབྷིཾ, ཨིདཱནི ཨིཏོ པཊྛཱཡ པརདཱརེ མཱནསཾ ན བནྡྷིསྶཱམཱི’’ཏི ཙིནྟེཏྭཱ ཏཐཱགཏཾ ཨཱཧ – ‘‘བྷནྟེ, ཨཛྫ མེ རཏྟིཡཱ དཱིགྷབྷཱཝོ ཉཱཏོ’’ཏི. སོཔི པུརིསོ ཏཏྠེཝ ནིསིནྣོ ཏཾ ཀཐཾ སུཏྭཱ ‘‘ལདྡྷོ མེ བལཝཔྤཙྩཡོ’’ཏི སཏྠཱརཾ ཨཱཧ – ‘‘བྷནྟེ, རཉྙཱ ཏཱཝ ཨཛྫ རཏྟིཡཱ དཱིགྷབྷཱཝོ ཉཱཏོ, ཨཧཾ པན ཧིཡྻོ སཡམེཝ ཡོཛནསྶ དཱིགྷབྷཱཝཾ ཨཉྙཱསི’’ནྟི. སཏྠཱ དྭིནྣམྤི ཀཐཾ སཾསནྡིཏྭཱ ‘‘ཨེཀཙྩསྶ རཏྟི དཱིགྷཱ ཧོཏི, ཨེཀཙྩསྶ ཡོཛནཾ དཱིགྷཾ ཧོཏི, བཱལསྶ པན སཾསཱརོ དཱིགྷོ ཧོཏཱི’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༦༠.

‘‘དཱིགྷཱ ཛཱགརཏོ རཏྟི, དཱིགྷཾ སནྟསྶ ཡོཛནཾ;

དཱིགྷོ བཱལཱན སཾསཱརོ, སདྡྷམྨཾ ཨཝིཛཱནཏ’’ནྟི.

ཏཏྠ དཱིགྷཱཏི རཏྟི ནཱམེསཱ ཏིཡཱམམཏྟཱཝ, ཛཱགརནྟསྶ པན དཱིགྷཱ ཧོཏི, དྭིགུཎཏིགུཎཱ ཝིཡ ཧུཏྭཱ ཁཱཡཏི. ཏསྶཱ དཱིགྷབྷཱཝཾ ཨཏྟཱནཾ མངྐུཎསངྒྷསྶ བྷཏྟཾ ཀཏྭཱ ཡཱཝ སཱུརིཡུགྒམནཱ སམྤརིཝཏྟཀཾ སེམཱནོ མཧཱཀུསཱིཏོཔི, སུབྷོཛནཾ བྷུཉྫིཏྭཱ སིརིསཡནེ སཡམཱནོ ཀཱམབྷོགཱིཔི ན ཛཱནཱཏི, སབྦརཏྟིཾ པན པདྷཱནཾ པདཧནྟོ ཡོགཱཝཙརོ ཙ, དྷམྨཀཐཾ ཀཐེནྟོ དྷམྨཀཐིཀོ ཙ, ཨཱསནསམཱིཔེ ཋཏྭཱ དྷམྨཾ སུཎནྟོ ཙ, སཱིསརོགཱདིཕུཊྛོ ཝཱ ཧཏྠཔཱདཙྪེདནཱདིཾ པཏྟོ ཝཱ ཝེདནཱབྷིབྷཱུཏོ ཙ, རཏྟིཾ མགྒཔཊིཔནྣོ ཨདྡྷིཀོ ཙ ཛཱནཱཏི. ཡོཛནནྟི ཡོཛནམྤི ཙཏུགཱཝུཏམཏྟམེཝ, སནྟསྶ པན ཀིལནྟསྶ དཱིགྷཾ ཧོཏི, དྭིགུཎཏིགུཎཾ ཝིཡ ཁཱཡཏི. སཀལདིཝསཉྷི མགྒཾ གནྟྭཱ ཀིལནྟོ པཊིཔཐཾ ཨཱགཙྪནྟཾ དིསྭཱ ‘‘པུརཏོ གཱམོ ཀཱིཝདཱུརོ’’ཏི པུཙྪིཏྭཱ ‘‘ཡོཛན’’ནྟི ཝུཏྟེ ཐོཀཾ གནྟྭཱ ཨཔརམྤི པུཙྪིཏྭཱ ཏེནཱཔི ‘‘ཡོཛན’’ནྟི ཝུཏྟེ པུན ཐོཀཾ གནྟྭཱ ཨཔརམྤི པུཙྪཏི. སོཔི ‘‘ཡོཛན’’ནྟི ཝདཏི. སོ པུཙྪིཏཔུཙྪིཏཱ ཡོཛནནྟེཝ ཝདནྟི, དཱིགྷཾ ཝཏིདཾ ཡོཛནཾ, ཨེཀཡོཛནཾ དྭེ ཏཱིཎི ཡོཛནཱནི ཝིཡ མཉྙེཏི. བཱལཱནནྟི ཨིདྷལོཀཔརལོཀཏྠཾ པན ཨཛཱནནྟཱནཾ བཱལཱནཾ སཾསཱརཝཊྚསྶ པརིཡནྟཾ ཀཱཏུཾ ཨསཀྐོནྟཱནཾ ཡཾ སཏྟཏིཾསབོདྷིཔཀྑིཡབྷེདཾ སདྡྷམྨཾ ཉཏྭཱ སཾསཱརསྶ ཨནྟཾ ཀརོནྟི, ཏཾ སདྡྷམྨཾ ཨཝིཛཱནཏཾ སཾསཱརོ དཱིགྷོ ནཱམ ཧོཏི. སོ ཧི ཨཏྟནོ དྷམྨཏཱཡ ཨེཝ དཱིགྷོ ནཱམ. ཝུཏྟམྤི ཙེཏཾ – ‘‘ཨནམཏགྒོཡཾ, བྷིཀྑཝེ, སཾསཱརོ, པུབྦཱ ཀོཊི ན པཉྙཱཡཏཱི’’ཏི (སཾ. ནི. ༢.༡༢༤). བཱལཱནཾ པན པརིཡནྟཾ ཀཱཏུཾ ཨསཀྐོནྟཱནཾ ཨཏིདཱིགྷོཡེཝཱཏི.

དེསནཱཝསཱནེ སོ པུརིསོ སོཏཱཔཏྟིཕལཾ པཏྟོ, ཨཉྙེཔི བཧཱུ སོཏཱཔཏྟིཕལཱདཱིནི པཏྟཱ. མཧཱཛནསྶ སཱཏྠིཀཱ དྷམྨདེསནཱ ཛཱཏཱཏི.

རཱཛཱ སཏྠཱརཾ ཝནྡིཏྭཱ གཙྪནྟོཡེཝ ཏེ སཏྟེ བནྡྷནཱ མོཙེསི. ཏཏྠ ཨིཏྠིཔུརིསཱ བནྡྷནཱ མུཏྟཱ སཱིསཾ ནྷཏྭཱ སཀཱནི གེཧཱནི གཙྪནྟཱ ‘‘ཙིརཾ ཛཱིཝཏུ ནོ, ཨཡྻཱ, མལླིཀཱ དེཝཱི, ཏཾ ནིསྶཱཡ ཛཱིཝིཏཾ ལབྷིམྷཱ’’ཏི མལླིཀཱཡ གུཎཀཐཾ ཀཐཡིཾསུ. སཱཡནྷསམཡེ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ – ‘‘ཨཧོ པཎྜིཏཱ ཝཏཱཡཾ, མལླིཀཱ, ཨཏྟནོ པཉྙཾ ནིསྶཱཡ ཨེཏྟཀསྶ ཛནསྶ ཛཱིཝིཏདཱནཾ ཨདཱསཱི’’ཏི. སཏྠཱ གནྡྷཀུཊིཡཾ ནིསིནྣོཝ ཏེསཾ བྷིཀྑཱུནཾ ཀཐཾ སུཏྭཱ གནྡྷཀུཊིཏོ ནིཀྑམིཏྭཱ དྷམྨསབྷཾ པཝིསིཏྭཱ པཉྙཏྟེ ཨཱསནེ ནིསཱིདིཏྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘ན, བྷིཀྑཝེ, མལླིཀཱ, ཨིདཱནེཝ ཨཏྟནོ པཉྙཾ ནིསྶཱཡ མཧཱཛནསྶ ཛཱིཝིཏདཱནཾ དེཏི, པུབྦེཔི ཨདཱསིཡེཝཱ’’ཏི ཝཏྭཱ ཏམཏྠཾ པཀཱསནྟོ ཨཏཱིཏཾ ཨཱཧརི –

ཨཏཱིཏེ བཱརཱཎསིཡཾ རཉྙོ པུཏྟོ ཨེཀཾ ནིགྲོདྷརུཀྑཾ ཨུཔསངྐམིཏྭཱ ཏཏྠ ནིབྦཏྟཱཡ དེཝཏཱཡ ཨཱཡཱཙི – ‘‘སཱམི དེཝརཱཛ, ཨིམསྨིཾ ཛམྦུདཱིཔེ ཨེཀསཏརཱཛཱནོ ཨེཀསཏཨགྒམཧེསིཡོ, སཙཱཧཾ པིཏུ ཨཙྩཡེན རཛྫཾ ལབྷིསྶཱམཱི, ཨེཏེསཾ གལལོཧིཏེན བལིཾ ཀརིསྶཱམཱི’’ཏི. སོ པིཏརི ཀཱལཀཏེ རཛྫཾ པཏྭཱ ‘‘དེཝཏཱཡ མེ ཨཱནུབྷཱཝེན རཛྫཾ པཏྟཾ, བལིམསྶཱ ཀརིསྶཱམཱི’’ཏི མཧཏིཡཱ སེནཱཡ ནིཀྑམིཏྭཱ ཨེཀཾ རཱཛཱནཾ ཨཏྟནོ ཝསེ ཝཏྟེཏྭཱ ཏེན སདྡྷིཾ ཨཔརམྤི ཨཔརམྤཱིཏི སབྦེ རཱཛཱནོ ཨཏྟནོ ཝསེ ཀཏྭཱ སདྡྷིཾ ཨགྒམཧེསཱིཧི ཨཱདཱཡ གཙྪནྟོ ཨུགྒསེནསྶ ནཱམ སབྦཀནིཊྛསྶ རཉྙོ དྷམྨདིནྣཱ ནཱམ ཨགྒམཧེསཱི གརུགབྦྷཱ, ཏཾ ཨོཧཱཡ ཨཱགནྟྭཱ ‘‘ཨེཏྟཀཛནཾ ཝིསཔཱནཀཾ པཱཡེཏྭཱ མཱརེསྶཱམཱི’’ཏི རུཀྑམཱུལཾ སོདྷཱཔེསི. དེཝཏཱ ཙིནྟེསི – ‘‘ཨཡཾ རཱཛཱ ཨེཏྟཀེ རཱཛཱནོ གཎྷནྟོ ‘མཾ ནིསྶཱཡ གཧིཏཱ ཨིམེ’ཏི ཙིནྟེཏྭཱ ཏེསཾ གལལོཧིཏེན མཡ྄ཧཾ བལིཾ ཀཱཏུཀཱམོ, སཙེ པནཱཡཾ ཨེཏེ གྷཱཏེསྶཏི, ཛམྦུདཱིཔེ རཱཛཝཾསོ ཨུཔཙྪིཛྫིསྶཏི, རུཀྑམཱུལེཔི, མེ ཨསུཙི བྷཝིསྶཏི, སཀྑིསྶཱམི ནུ ཁོ ཨེཏཾ ནིཝཱརེཏུ’’ནྟི. སཱ ཨུཔདྷཱརེནྟཱི ‘‘ནཱཧཾ སཀྑིསྶཱམཱི’’ཏི ཉཏྭཱ ཨཉྙམྤི དེཝཏཾ ཨུཔསངྐམིཏྭཱ ཨེཏམཏྠཾ ཨཱརོཙེཏྭཱ ‘‘ཏྭཾ སཀྑིསྶསཱི’’ཏི ཨཱཧ. ཏཱཡཔི པཊིཀྑིཏྟཱ ཨཉྙམྤི ཨཉྙམྤཱིཏི ཨེཝཾ སཀལཙཀྐཝཱལ༹དེཝཏཱཡོ ཨུཔསངྐམིཏྭཱ ཏཱཧིཔི པཊིཀྑིཏྟཱ ཙཏུནྣཾ མཧཱརཱཛཱུནཾ སནྟིཀཾ གནྟྭཱ ‘‘མཡཾ ན སཀྐོམ, ཨམྷཱཀཾ པན རཱཛཱ ཨམྷེཧི པུཉྙེན ཙ པཉྙཱཡ ཙ ཝིསིཊྛོ, ཏཾ པུཙྪཱ’’ཏི ཏེཧིཔི པཊིཀྑིཏྟཀཱལེ སཀྐཾ ཨུཔསངྐམིཏྭཱ ཏམཏྠཾ ཨཱརོཙེཏྭཱ, ‘‘དེཝ, ཏུམྷེསུ ཨཔྤོསྶུཀྐཏཾ ཨཱཔནྣེསུ ཁཏྟིཡཝཾསོ ཨུཔཙྪིཛྫིསྶཏི, ཏསྶ པཊིསརཎཾ ཧོཐཱ’’ཏི ཨཱཧ. སཀྐོ ‘‘ཨཧམྤི ནཾ པཊིབཱཧིཏུཾ ན སཀྑིསྶཱམི, ཨུཔཱཡཾ པན ཏེ ཝཀྑཱམཱི’’ཏི ཝཏྭཱ ཨུཔཱཡཾ ཨཱཙིཀྑི – ‘‘གཙྪ, ཏྭཾ རཉྙོ པསྶནྟསྶེཝ རཏྟཝཏྠཾ ནིཝཱསེཏྭཱ ཨཏྟནོ རུཀྑཏོ ནིཀྑམིཏྭཱ གམནཱཀཱརཾ དསྶེཧི. ཨཐ ཏཾ རཱཛཱ ‘དེཝཏཱ གཙྪཏི, ནིཝཏྟཱཔེསྶཱམི ན’ནྟི ནཱནཔྤཀཱརེན ཡཱཙིསྶཏི. ཨཐ ནཾ ཝདེཡྻཱསི ‘ཏྭཾ ཨེཀསཏརཱཛཱནོ སདྡྷིཾ ཨགྒམཧེསཱིཧི ཨཱནེཏྭཱ ཏེསཾ གལལོཧིཏེན བལིཾ ཀརིསྶཱམཱི’ཏི མཡ྄ཧཾ ཨཱཡཱཙིཏྭཱ ཨུགྒསེནསྶ རཉྙོ དེཝིཾ ཨོཧཱཡ ཨཱགཏོ, ནཱཧཾ ཏཱདིསསྶ མུསཱཝཱདསྶ བལིཾ སམྤཊིཙྪཱམཱི’’ཏི, ‘‘ཨེཝཾ ཀིར ཝུཏྟེ རཱཛཱ ཏཾ ཨཱཎཱཔེསྶཏི, སཱ རཉྙོ དྷམྨཾ དེསེཏྭཱ ཨེཏྟཀསྶ ཛནསྶ ཛཱིཝིཏདཱནཾ དསྶཏཱི’’ཏི. ཨིམིནཱ ཀཱརཎེན སཀྐོ དེཝཏཱཡ ཨིམཾ ཨུཔཱཡཾ ཨཱཙིཀྑི. དེཝཏཱ ཏཐཱ ཨཀཱསི.

རཱཛཱཔི ཏཾ ཨཱཎཱཔེསི. སཱ ཨཱགནྟྭཱ ཏེསཾ རཱཛཱུནཾ པརིཡནྟེ ནིསིནྣམྤི ཨཏྟནོ རཱཛཱནམེཝ ཝནྡི. རཱཛཱ ‘‘མཡི སབྦརཱཛཛེཊྛཀེ ཋིཏེ སབྦཀནིཊྛཾ ཨཏྟནོ སཱམིཀཾ ཝནྡཏཱི’’ཏི ཏསྶཱ ཀུཛ྄ཛྷི. ཨཐ ནཾ སཱ ཨཱཧ – ‘‘ཀིཾ མཡ྄ཧཾ ཏཡི པཊིབདྡྷཾ, ཨཡཾ པན མེ སཱམིཀོ ཨིསྶརིཡསྶ དཱཡཀོ, ཨིམཾ ཨཝནྡིཏྭཱ ཀསྨཱ ཏཾ ཝནྡིསྶཱམཱི’’ཏི? རུཀྑདེཝཏཱ པསྶནྟསྶེཝ མཧཱཛནསྶ ‘‘ཨེཝཾ, བྷདྡེ, ཨེཝཾ, བྷདྡེ’’ཏི ཝཏྭཱ ཏཾ པུཔྥམུཊྛིནཱ པཱུཛེསི. པུན རཱཛཱ ཨཱཧ – ‘‘སཙེ མཾ ན ཝནྡསི, མཡ྄ཧཾ རཛྫསིརིདཱཡིཀཾ ཨེཝཾ མཧཱནུབྷཱཝཾ དེཝཏཾ ཀསྨཱ ན ཝནྡསཱི’’ཏི? ‘‘མཧཱརཱཛ, ཏཡཱ ཨཏྟནོ པུཉྙེ ཋཏྭཱ རཱཛཱནོ གཧིཏཱ, ན དེཝཏཱཡ གཧེཏྭཱ དིནྣཱ’’ཏི. པུནཔི ཏཾ དེཝཏཱ ‘‘ཨེཝཾ, བྷདྡེ, ཨེཝཾ, བྷདྡེ’’ཏི ཝཏྭཱ ཏཐེཝ པཱུཛེསི. པུན སཱ རཱཛཱནཾ ཨཱཧ – ‘‘ཏྭཾ ‘དེཝཏཱཡ མེ ཨེཏྟཀཱ རཱཛཱནོ གཧེཏྭཱ དིནྣཱ’ཏི ཝདེསི, ཨིདཱནི ཏེ དེཝཏཱཡ ཨུཔརི ཝཱམཔསྶེ རུཀྑོ ཨགྒིནཱ དཌྜྷོ, སཱ ཏཾ ཨགྒིཾ ནིབྦཱཔེཏུཾ ཀསྨཱ ནཱསཀྑི, ཡདི ཨེཝཾ མཧཱནུབྷཱཝཱ’’ཏི. པུནཔི ཏཾ དེཝཏཱ ‘‘ཨེཝཾ, བྷདྡེ, ཨེཝཾ, བྷདྡེ’’ཏི ཝཏྭཱ ཏཐེཝ པཱུཛེསི.

སཱ ཀཐཡམཱནཱ ཋིཏཱ རོདི ཙེཝ ཧསི ཙ. ཨཐ ནཾ རཱཛཱ ‘‘ཀིཾ ཨུམྨཏྟིཀཱསཱི’’ཏི ཨཱཧ. ‘‘ཀསྨཱ དེཝ ཨེཝཾ ཝདེསི’’? ‘‘ན མཱདིསིཡོ ཨུམྨཏྟིཀཱ ཧོནྟཱི’’ཏི. ཨཐ ‘‘ནཾ ཀིཾ ཀཱརཎཱ རོདསི ཙེཝ ཧསསི ཙཱ’’ཏི? ‘‘སུཎཱཧི, མཧཱརཱཛ, ཨཧཉྷི ཨཏཱིཏེ ཀུལདྷཱིཏཱ ཧུཏྭཱ པཏིཀུལེ ཝསནྟཱི སཱམིཀསྶ སཧཱཡཀཾ པཱཧུནཀཾ ཨཱགཏཾ དིསྭཱ ཏསྶ བྷཏྟཾ པཙིཏུཀཱམཱ ‘མཾསཾ ཨཱཧརཱ’ཏི དཱསིཡཱ ཀཧཱཔཎཾ དཏྭཱ ཏཱཡ མཾསཾ ཨལབྷིཏྭཱ ཨཱགཏཱཡ ‘ནཏྠི མཾས’ནྟི ཝུཏྟེ གེཧསྶ པཙྪིམབྷཱགེ སཡིཏཱཡ ཨེལི༹ཀཱཡ སཱིསཾ ཚིནྡིཏྭཱ བྷཏྟཾ སམྤཱདེསིཾ. སཱཧཾ ཨེཀིསྶཱཡ ཨེལི༹ཀཱཡ སཱིསཾ ཚིནྡིཏྭཱ ནིརཡེ པཙྩིཏྭཱ པཀྐཱཝསེསེན ཏསྶཱ ལོམགཎནཱཡ སཱིསཙྪེདཾ པཱཔུཎིཾ, ‘ཏྭཾ ཨེཏྟཀཾ ཛནཾ ཝདྷིཏྭཱ ཀདཱ དུཀྑཱ མུཙྩིསྶསཱི’ཏི ཨེཝམཧཾ ཏཝ དུཀྑཾ ཨནུསྶརནྟཱི རོདི’’ནྟི ཝཏྭཱ ཨིམཾ གཱཐམཱཧ –

‘‘ཨེཀིསྶཱ ཀཎྛཾ ཚེཏྭཱན, ལོམགཎནཱཡ པཙྩིསཾ;

བཧཱུནཾ ཀཎྛེ ཚེཏྭཱན, ཀཐཾ ཀཱཧསི ཁཏྟིཡཱ’’ཏི.

ཨཐ ‘‘ཀསྨཱ ཏྭཾ ཧསསཱི’’ཏི? ‘‘‘ཨེཏསྨཱ དུཀྑཱ མུཏྟཱམྷཱི’ཏི ཏུསྶིཏྭཱ, མཧཱརཱཛཱ’’ཏི. པུནཔི ཏཾ དེཝཏཱ ‘‘ཨེཝཾ, བྷདྡེ, ཨེཝཾ, བྷདྡེ’’ཏི ཝཏྭཱ པུཔྥམུཊྛིནཱ པཱུཛེསི. རཱཛཱ ‘‘ཨཧོ མེ བྷཱརིཡཾ ཀཏཾ ཀམྨཾ, ཨཡཾ ཀིར ཨེཀཾ ཨེལི༹ཀཾ ཝདྷིཏྭཱ ནིརཡེ པཀྐཱཝསེསེན ཏསྶཱ ལོམགཎནཱཡ སཱིསཙྪེདཾ པཱཔུཎི, ཨཧཾ ཨེཏྟཀཾ ཛནཾ ཝདྷིཏྭཱ ཀདཱ སོཏྠིཾ པཱཔུཎིསྶཱམཱི’’ཏི སབྦེ རཱཛཱནོ མོཙེཏྭཱ ཨཏྟནོ མཧལླཀཏརེ ཝནྡིཏྭཱ དཧརདཧརཱནཾ ཨཉྫལིཾ པགྒཡ྄ཧ སབྦེ ཁམཱཔེཏྭཱ སཀསཀཊྛཱནམེཝ པཧིཎི.

སཏྠཱ ཨིམཾ དྷམྨདེསནཾ ཨཱཧརིཏྭཱ ‘‘ཨེཝཾ, བྷིཀྑཝེ, ན ཨིདཱནེཝ, མལླིཀཱ དེཝཱི, ཨཏྟནོ པཉྙཾ ནིསྶཱཡ མཧཱཛནསྶ ཛཱིཝིཏདཱནཾ དེཏི, པུབྦེཔི ཨདཱསིཡེཝཱ’’ཏི ཝཏྭཱ ཨཏཱིཏཾ སམོདྷཱནེསི – ‘‘ཏདཱ བཱརཱཎསིརཱཛཱ པསེནདི ཀོསལོ ཨཧོསི, དྷམྨདིནྣཱ, དེཝཱི མལླིཀཱ, རུཀྑདེཝཏཱ ཨཧམེཝཱ’’ཏི. ཨེཝཾ ཨཏཱིཏཾ སམོདྷཱནེཏྭཱ པུན དྷམྨཾ དེསེནྟོ, ‘‘བྷིཀྑཝེ, པཱཎཱཏིཔཱཏོ ནཱམ ན ཀཏྟབྦཡུཏྟཀོ. པཱཎཱཏིཔཱཏིནོ ཧི དཱིགྷརཏྟཾ སོཙནྟཱི’’ཏི ཝཏྭཱ ཨིམཱ གཱཐཱ ཨཱཧ –

‘‘ཨིདྷ སོཙཏི པེཙྩ སོཙཏི,

པཱཔཀཱརཱི ཨུབྷཡཏྠ སོཙཏི;

སོ སོཙཏི སོ ཝིཧཉྙཏི,

དིསྭཱ ཀམྨཀིལིཊྛམཏྟནོ’’ཏི. (དྷ. པ. ༡༥);

‘‘ཨེཝཾ ཙེ སཏྟཱ ཛཱནེཡྻུཾ, དུཀྑཱཡཾ ཛཱཏིསམྦྷཝོ;

ན པཱཎོ པཱཎིནཾ ཧཉྙེ, པཱཎགྷཱཏཱི ཧི སོཙཏཱི’’ཏི. (ཛཱ. ༡.༡.༡༨);

ཨཉྙཏརཔུརིསཝཏྠུ པཋམཾ.

༢. མཧཱཀསྶཔཏྠེརསདྡྷིཝིཧཱརིཀཝཏྠུ

ཙརཉྩེ ནཱདྷིགཙྪེཡྻཱཏི ཨིམཾ དྷམྨདེསནཾ སཏྠཱ སཱཝཏྠིཡཾ ཛེཏཝནེ ཝིཧརནྟོ མཧཱཀསྶཔཏྠེརསྶ སདྡྷིཝིཧཱརིཀཾ ཨཱརབྦྷ ཀཐེསི. དེསནཱ རཱཛགཧེ སམུཊྛིཏཱ.

ཐེརཾ ཀིར རཱཛགཧཾ ནིསྶཱཡ པིཔྤལིགུཧཱཡཾ ཝསནྟཾ དྭེ སདྡྷིཝིཧཱརིཀཱ ཨུཔཊྛཧིཾསུ. ཏེསུ ཨེཀོ སཀྐཙྩཾ ཝཏྟཾ ཀརོཏི, ཨེཀོ ཏེན ཀཏཾ ཀཏཾ ཨཏྟནཱ ཀཏཾ ཝིཡ དསྶེནྟོ མུཁོདཀདནྟཀཊྛཱནཾ པཊིཡཱདིཏབྷཱཝཾ ཉཏྭཱ, ‘‘བྷནྟེ, མུཁོདཀདནྟཀཊྛཱནི མེ པཊིཡཱདིཏཱནི, མུཁཾ དྷོཝཐཱ’’ཏི ཝདཏི, པཱདདྷོཝནནྷཱནཱདིཀཱལེཔི ཨེཝམེཝ ཝདཏི. ཨིཏརོ ཙིནྟེསི – ‘‘ཨཡཾ ནིཙྩཀཱལཾ མཡཱ ཀཏཾ ཀཏཾ ཨཏྟནཱ ཀཏཾ ཝིཡ ཀཏྭཱ དསྶེཏི, ཧོཏུ, ཀཏྟབྦཡུཏྟཀམསྶ ཀརིསྶཱམཱི’’ཏི. ཏསྶ བྷུཉྫིཏྭཱ སུཔནྟསྶེཝ ནྷཱནོདཀཾ ཏཱཔེཏྭཱ ཨེཀསྨིཾ གྷཊེ ཀཏྭཱ པིཊྛིཀོཊྛཀེ ཋཔེསི, ཨུདཀཏཱཔནབྷཱཛནེ པན ནཱལི༹མཏྟཾ ཨུདཀཾ སེསེཏྭཱ ཨུསུམཾ མུཉྩནྟཾ ཋཔེསི. ཏཾ ཨིཏརོ སཱཡནྷསམཡེ པབུཛ྄ཛྷིཏྭཱ ཨུསུམཾ ནིཀྑནྟཾ དིསྭཱ ‘‘ཨུདཀཾ ཏཱཔེཏྭཱ ཀོཊྛཀེ ཋཔིཏཾ བྷཝིསྶཏཱི’’ཏི ཝེགེན གནྟྭཱ ཐེརཾ ཝནྡིཏྭཱ, ‘‘བྷནྟེ, ཀོཊྛཀེ ཨུདཀཾ ཋཔིཏཾ, ནྷཱཡཐཱ’’ཏི ཝཏྭཱ ཐེརེན སདྡྷིཾཡེཝ ཀོཊྛཀཾ པཱཝིསི. ཐེརོ ཨུདཀཾ ཨཔསྶནྟོ ‘‘ཀཧཾ ཨུདཀཾ, ཨཱཝུསོ’’ཏི ཨཱཧ. དཧརོ ཨགྒིསཱལཾ གནྟྭཱ བྷཱཛནེ ཨུལུ༹ངྐཾ ཨོཏཱརེཏྭཱ ཏུཙྪབྷཱཝཾ ཉཏྭཱ ‘‘པསྶཐ དུཊྛསྶ ཀམྨཾ ཏུཙྪབྷཱཛནཾ ཨུདྡྷནེ ཨཱརོཔེཏྭཱ ཀུཧིཾ གཏོ, ཨཧཾ ‘ཀོཊྛཀེ ཨུདཀ’ནྟི སཉྙཱཡ ཨཱརོཙེསི’’ནྟི ཨུཛ྄ཛྷཱཡནྟོ གྷཊཾ ཨཱདཱཡ ཏིཏྠཾ ཨགམཱསི. ཨིཏརོཔི པིཊྛིཀོཊྛཀཏོ ཨུདཀཾ ཨཱཧརིཏྭཱ ཀོཊྛཀེ ཋཔེསི.

ཐེརོ ཙིནྟེསི – ‘‘ཨཡཾ དཧརོ ‘ཨུདཀཾ མེ ཏཱཔེཏྭཱ ཀོཊྛཀེ ཋཔིཏཾ, ཨེཐ, བྷནྟེ, ནྷཱཡཐཱ’ཏི ཝཏྭཱ ཨིདཱནི ཨུཛ྄ཛྷཱཡནྟོ གྷཊཾ ཨཱདཱཡ ཏིཏྠཾ གཙྪཏི, ཀིཾ ནུ ཁོ ཨེཏ’’ནྟི ཨུཔདྷཱརེནྟོ ‘‘ཨེཏྟཀཾ ཀཱལཾ ཨེས དཧརོ ཨིམིནཱ ཀཏཾ ཝཏྟཾ ཨཏྟནཱཝ ཀཏཾ ཝིཡ པཀཱསེཏཱི’’ཏི ཉཏྭཱ སཱཡཾ ཨཱགནྟྭཱ ནིསིནྣསྶ ཨོཝཱདམདཱསི, ‘‘ཨཱཝུསོ, བྷིཀྑུནཱ ནཱམ ‘ཨཏྟནཱ ཀཏམེཝ ཀཏ’ནྟི ཝཏྟུཾ ཝཊྚཏི, ནོ ཨཀཏཾ, ཏྭཾ ཨིདཱནེཝ ‘ཀོཊྛཀེ ཨུདཀཾ ཋཔིཏཾ, ནྷཱཡཐ, བྷནྟེ’ཏི ཝཏྭཱ མཡི པཝིསིཏྭཱ ཋིཏེ གྷཊཾ ཨཱདཱཡ ཨུཛ྄ཛྷཱཡནྟོ གཙྪསི, པབྦཛིཏསྶ ནཱམ ཨེཝཾ ཀཱཏུཾ ན ཝཊྚཏཱི’’ཏི. སོ ‘‘པསྶཐ ཐེརསྶ ཀམྨཾ, ཨུདཀམཏྟཀཾ ནཱམ ནིསྶཱཡ མཾ ཨེཝཾ ཝདེསཱི’’ཏི ཀུཛ྄ཛྷིཏྭཱ པུནདིཝསེ ཐེརེན སདྡྷིཾ པིཎྜཱཡ ན པཱཝིསི. ཐེརོ ཨིཏརེན སདྡྷིཾ ཨེཀཾ པདེསཾ ཨགམཱསི. སོ ཏསྨིཾ གཏེ ཐེརསྶ ཨུཔཊྛཱཀཀུལཾ གནྟྭཱ ‘‘ཐེརོ ཀཧཾ, བྷནྟེ’’ཏི པུཊྛོ ‘‘ཐེརསྶ ཨཕཱསུཀཾ ཛཱཏཾ, ཝིཧཱརེཡེཝ ནིསིནྣོ’’ཏི ཨཱཧ. ‘‘ཀིཾ པན, བྷནྟེ, ལདྡྷུཾ ཝཊྚཏཱི’’ཏི? ‘‘ཨེཝརཱུཔཾ ཀིར ནཱམ ཨཱཧཱརཾ དེཐཱ’’ཏི ཝུཏྟེ ཏེན ཝུཏྟནིཡཱམེནེཝ སམྤཱདེཏྭཱ ཨདཾསུ. སོ ཨནྟརཱམགྒེཝ ཏཾ བྷཏྟཾ བྷུཉྫིཏྭཱ ཝིཧཱརཾ གཏོ. ཐེརོཔི གཏཊྛཱནེ མཧནྟཾ སུཁུམཝཏྠཾ ལབྷིཏྭཱ ཨཏྟནཱ སདྡྷིཾ གཏདཧརསྶ ཨདཱསི. སོ ཏཾ རཛིཏྭཱ ཨཏྟནོ ནིཝཱསནཔཱརུཔནཾ ཨཀཱསི.

ཐེརོ པུནདིཝསེ ཏཾ ཨུཔཊྛཱཀཀུལཾ གནྟྭཱ, ‘‘བྷནྟེ, ‘ཏུམྷཱཀཾ ཀིར ཨཕཱསུཀཾ ཛཱཏ’ནྟི ཨམྷེཧི དཧརེན ཝུཏྟནིཡཱམེནེཝ པཊིཡཱདེཏྭཱ ཨཱཧཱརོ པེསིཏོ, པརིབྷུཉྫིཏྭཱ ཝོ ཕཱསུཀཾ ཛཱཏ’’ནྟི ཝུཏྟེ ཏུཎྷཱི ཨཧོསི. ཝིཧཱརཾ པན གནྟྭཱ ཏཾ དཧརཾ ཝནྡིཏྭཱ ནིསིནྣཾ ཨེཝམཱཧ – ‘‘ཨཱཝུསོ, ཏཡཱ ཀིར ཧིཡྻོ, ཨིདཾ ནཱམ ཀཏཾ, ཨིདཾ པབྦཛིཏཱནཾ ན ཨནུཙྪཝིཀཾ, ཝིཉྙཏྟིཾ ཀཏྭཱ བྷུཉྫིཏུཾ ན ཝཊྚཏཱི’’ཏི. སོ ཀུཛ྄ཛྷིཏྭཱ ཐེརེ ཨཱགྷཱཏཾ བནྡྷིཏྭཱ ‘‘པུརིམདིཝསེ ཨུདཀམཏྟཾ ནིསྶཱཡ མཾ མུསཱཝཱདིཾ ཀཏྭཱ ཨཛྫ ཨཏྟནོ ཨུཔཊྛཱཀཀུལེ བྷཏྟམུཊྛིཡཱ བྷུཏྟཀཱརཎཱ མཾ ‘ཝིཉྙཏྟིཾ ཀཏྭཱ བྷུཉྫིཏུཾ ན ཝཊྚཏཱི’ཏི ཝདཏི, ཝཏྠམྤི ཏེན ཨཏྟནོ ཨུཔཊྛཱཀསྶེཝ དིནྣཾ, ཨཧོ ཐེརསྶ བྷཱརིཡཾ ཀམྨཾ, ཛཱནིསྶཱམིསྶ ཀཏྟབྦཡུཏྟཀ’’ནྟི པུནདིཝསེ ཐེརེ གཱམཾ པཝིསནྟེ སཡཾ ཝིཧཱརེ ཨོཧཱིཡིཏྭཱ དཎྜཾ གཧེཏྭཱ པརིབྷོགབྷཱཛནཱནི བྷིནྡིཏྭཱ ཐེརསྶ པཎྞསཱལཱཡ ཨགྒིཾ དཏྭཱ ཡཾ ན ཛྷཱཡཏི, ཏཾ མུགྒརེན པཧརནྟོ བྷིནྡིཏྭཱ ནིཀྑམིཏྭཱ པལཱཏོ. སོ ཀཱལཾ ཀཏྭཱ ཨཝཱིཙིམཧཱནིརཡེ ནིབྦཏྟི.

མཧཱཛནོ ཀཐཾ སམུཊྛཱཔེསི – ‘‘ཐེརསྶ ཀིར སདྡྷིཝིཧཱརིཀོ ཨོཝཱདམཏྟཾ ཨསཧནྟོ ཀུཛ྄ཛྷིཏྭཱ པཎྞསཱལཾ ཛྷཱཔེཏྭཱ པལཱཏོ’’ཏི. ཨཐེཀོ བྷིཀྑུ ཨཔརབྷཱགེ རཱཛགཧཱ ནིཀྑམིཏྭཱ སཏྠཱརཾ དཊྛུཀཱམོ ཛེཏཝནཾ གནྟྭཱ སཏྠཱརཾ ཝནྡིཏྭཱ སཏྠཱརཱ པཊིསནྠཱརཾ ཀཏྭཱ ‘‘ཀུཏོ ཨཱགཏོསཱི’’ཏི པུཊྛོ ‘‘རཱཛགཧཏོ, བྷནྟེ’’ཏི ཨཱཧ. ‘‘མམ པུཏྟསྶ མཧཱཀསྶཔསྶ ཁམནཱིཡ’’ནྟི? ‘‘ཁམནཱིཡཾ, བྷནྟེ, ཨེཀོ པན སདྡྷིཝིཧཱརིཀོ ཨོཝཱདམཏྟེན ཀུཛ྄ཛྷིཏྭཱ པཎྞསཱལཾ ཛྷཱཔེཏྭཱ པལཱཏོ’’ཏི. སཏྠཱ ‘‘ན སོ ཨིདཱནེཝ ཨོཝཱདཾ སུཏྭཱ ཀུཛ྄ཛྷཏི, པུབྦེཔི ཀུཛ྄ཛྷིཡེཝ. ན ཨིདཱནེཝ ཀུཊིཾ དཱུསེཏི, པུབྦེཔི དཱུསེསིཡེཝཱ’’ཏི ཝཏྭཱ ཨཏཱིཏཾ ཨཱཧརི –

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ ཧིམཝནྟཔདེསེ ཨེཀོ སིངྒིལསཀུཎོ ཀུལཱཝཀཾ ཀཏྭཱ ཝསི. ཨཐེཀདིཝསཾ དེཝེ ཝསྶནྟེ ཨེཀོ མཀྐཊོ སཱིཏེན ཀམྤམཱནོ ཏཾ པདེསཾ ཨགམཱསི. སིངྒིལོ ཏཾ དིསྭཱ གཱཐམཱཧ –

‘‘མནུསྶསྶེཝ ཏེ སཱིསཾ, ཧཏྠཔཱདཱ ཙ ཝཱནར;

ཨཐ ཀེན ནུ ཝཎྞེན, ཨགཱརཾ ཏེ ན ཝིཛྫཏཱི’’ཏི. (ཛཱ. ༡.༤.༨༡);

མཀྐཊོ ‘‘ཀིཉྩཱཔི མེ ཧཏྠཔཱདཱ ཨཏྠི, ཡཱཡ པན པཉྙཱཡ ཝིཙཱརེཏྭཱ ཨགཱརཾ ཀརེཡྻཾ, སཱ མེ པཉྙཱ ནཏྠཱི’’ཏི ཙིནྟེཏྭཱ ཏམཏྠཾ ཝིཉྙཱཔེཏུཀཱམོ ཨིམཾ གཱཐམཱཧ –

‘‘མནུསྶསྶེཝ མེ སཱིསཾ, ཧཏྠཔཱདཱ ཙ སིངྒིལ;

ཡཱཧུ སེཊྛཱ མནུསྶེསུ, སཱ མེ པཉྙཱ ན ཝིཛྫཏཱི’’ཏི. (ཛཱ. ༡.༤.༨༢);

ཨཐ ནཾ ‘‘ཨེཝརཱུཔསྶ ཏཝ ཀཐཾ གྷརཱཝཱསོ ཨིཛ྄ཛྷིསྶཏཱི’’ཏི གརཧནྟོ སིངྒིལོ ཨིམཾ གཱཐཱདྭཡམཱཧ –

‘‘ཨནཝཊྛིཏཙིཏྟསྶ, ལཧུཙིཏྟསྶ དུབྦྷིནོ;

ནིཙྩཾ ཨདྡྷུཝསཱིལསྶ, སུཁབྷཱཝོ ན ཝིཛྫཏི.

‘‘སོ ཀརསྶུ ཨཱནུབྷཱཝཾ, ཝཱིཏིཝཏྟསྶུ སཱིལིཡཾ;

སཱིཏཝཱཏཔརིཏྟཱཎཾ, ཀརསྶུ ཀུཊཝཾ ཀཔཱི’’ཏི. (ཛཱ. ༡.༤.༨༣-༨༤);

མཀྐཊོ ‘‘ཨཡཾ མཾ ཨནཝཊྛིཏཙིཏྟཾ ལཧུཙིཏྟཾ མིཏྟདུབྦྷིཾ ཨདྡྷུཝསཱིལཾ ཀརོཏི, ཨིདཱནིསྶ མིཏྟདུབྦྷིབྷཱཝཾ དསྶེསྶཱམཱི’’ཏི ཀུལཱཝཀཾ ཝིདྡྷཾསེཏྭཱ ཝིཔྤཀིརི. སཀུཎོ ཏསྨིཾ ཀུལཱཝཀཾ གཎྷནྟེ ཨེཝ ཨེཀེན པསྶེན ནིཀྑམིཏྭཱ པལཱཡི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ མཀྐཊོ ཀུཊིདཱུསཀབྷིཀྑུ ཨཧོསི, སིངྒིལསཀུཎོ ཀསྶཔོ ཨཧོསཱི’’ཏི. ཛཱཏཀཾ སམོདྷཱནེཏྭཱ ‘‘ཨེཝཾ, བྷིཀྑཝེ, ན ཨིདཱནེཝ, པུབྦེཔི སོ ཨོཝཱདཀྑཎེ ཀུཛ྄ཛྷིཏྭཱ ཀུཊིཾ དཱུསེསི, མམ པུཏྟསྶ ཀསྶཔསྶ ཨེཝརཱུཔེན བཱལེན སདྡྷིཾ ཝསནཏོ ཨེཀཀསྶེཝ ནིཝཱསོ སེཡྻོ’’ཏི ཝཏྭཱ ཨིམཾ གཱཐམཱཧ –

༦༡.

‘‘ཙརཉྩེ ནཱདྷིགཙྪེཡྻ, སེཡྻཾ སདིསམཏྟནོ;

ཨེཀཙརིཡཾ དལ༹ྷཾ ཀཡིརཱ, ནཏྠི བཱལེ སཧཱཡཏཱ’’ཏི.

ཏཏྠ ཙརནྟི ཨིརིཡཱཔཐཙཱརཾ ཨགྒཧེཏྭཱ མནསཱཙཱརོ ཝེདིཏབྦོ, ཀལྱཱཎམིཏྟཾ པརིཡེསནྟོཏི ཨཏྠོ. སེཡྻཾ སདིསམཏྟནོཏི ཨཏྟནོ སཱིལསམཱདྷིཔཉྙཱགུཎེཧི ཨདྷིཀཏརཾ ཝཱ སདིསཾ ཝཱ ན ལབྷེཡྻ ཙེ. ཨེཀཙརིཡནྟི ཨེཏེསུ ཧི སེཡྻཾ ལབྷམཱནོ སཱིལཱདཱིཧི ཝཌྜྷཏི, སདིསཾ ལབྷམཱནོ ན པརིཧཱཡཏི, ཧཱིནེན པན སདྡྷིཾ ཨེཀཏོ ཝསནྟོ ཨེཀཏོ སཾབྷོགཔརིབྷོགཾ ཀརོནྟོ སཱིལཱདཱིཧི པརིཧཱཡཏི. ཏེན ཝུཏྟཾ – ‘‘ཨེཝརཱུཔོ པུགྒལོ ན སེཝིཏབྦོ ན བྷཛིཏབྦོ ན པཡིརུཔཱསིཏབྦོ ཨཉྙཏྲ ཨནུདྡཡཱ ཨཉྙཏྲ ཨནུཀམྤཱ’’ཏི (པུ. པ. ༡༢༡; ཨ. ནི. ༣.༢༦). ཏསྨཱ སཙེ ཀཱརུཉྙཾ པཊིཙྩ ‘‘ཨཡཾ མཾ ནིསྶཱཡ སཱིལཱདཱིཧི ཝཌྜྷིསྶཏཱི’’ཏི ཏམྷཱ པུགྒལཱ ཀིཉྩི ཨཔཙྩཱསཱིསནྟོ ཏཾ སངྒཎྷིཏུཾ སཀྐོཏི, ཨིཙྩེཏཾ ཀུསལཾ. ནོ ཙེ སཀྐོཏི, ཨེཀཙརིཡཾ དལ༹ྷཾ ཀཡིརཱ ཨེཀཱིབྷཱཝམེཝ ཐིརཾ ཀཏྭཱ སབྦཨིརིཡཱཔཐེསུ ཨེཀཀོཝ ཝིཧརེཡྻ. ཀིཾ ཀཱརཎཱ? ནཏྠི བཱལེ སཧཱཡཏཱཏི སཧཱཡཏཱ ནཱམ ཙཱུལ༹སཱིལཾ མཛ྄ཛྷིམསཱིལཾ མཧཱསཱིལཾ དས ཀཐཱཝཏྠཱུནི ཏེརས དྷུཏངྒགུཎཱ ཝིཔསྶནཱགུཎཱ ཙཏྟཱརོ མགྒཱ ཙཏྟཱརི ཕལཱནི ཏིསྶོ ཝིཛྫཱ ཚ ཨབྷིཉྙཱ. ཨཡཾ སཧཱཡཏཱགུཎོ བཱལཾ ནིསྶཱཡ ནཏྠཱིཏི.

དེསནཱཝསཱནེ ཨཱགནྟུཀོ བྷིཀྑུ སོཏཱཔཏྟིཕལཾ པཏྟོ, ཨཉྙེཔི བཧཱུ སོཏཱཔཏྟིཕལཱདཱིནི པཱཔུཎིཾསུ, དེསནཱ མཧཱཛནསྶ སཱཏྠིཀཱ ཨཧོསཱིཏི.

མཧཱཀསྶཔཏྠེརསདྡྷིཝིཧཱརིཀཝཏྠུ དུཏིཡཾ.

༣. ཨཱནནྡསེཊྛིཝཏྠུ

པུཏྟཱ མཏྠཱིཏི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ ཨཱནནྡསེཊྛིཾ ཨཱརབྦྷ ཀཐེསི.

སཱཝཏྠིཡཾ ཀིར ཨཱནནྡསེཊྛི ནཱམ ཙཏྟཱལཱིསཀོཊིཝིབྷཝོ མཧཱམཙྪརཱི ཨཧོསི. སོ ཨནྭཌྜྷམཱསཾ ཉཱཏཀེ སནྣིཔཱཏེཏྭཱ པུཏྟཾ མཱུལསིརིཾ ནཱམ ཏཱིསུ ཝེལཱསུ ཨེཝཾ ཨོཝདཏི – ‘‘ཨིདཾ ཙཏྟཱལཱིསཀོཊིདྷནཾ ‘བཧཱུ’’’ཏི མཱ སཉྙཾ ཀརི, ཝིཛྫམཱནཾ དྷནཾ ན དཱཏབྦཾ, ནཝཾ དྷནཾ ཨུཔྤཱདེཏབྦཾ. ཨེཀེཀམྤི ཧི ཀཧཱཔཎཾ ཝཡཾ ཀརོནྟསྶ པན ཁཱིཡཏེཝ. ཏསྨཱ –

‘‘ཨཉྫནཱནཾ ཁཡཾ དིསྭཱ, ཨུཔཙིཀཱནཉྩ ཨཱཙཡཾ;

མདྷཱུནཉྩ སམཱཧཱརཾ, པཎྜིཏོ གྷརམཱཝསེ’’ཏི.

སོ ཨཔརེན སམཡེན ཨཏྟནོ པཉྩ མཧཱནིདྷིཡོ པུཏྟསྶ ཨནཱཙིཀྑིཏྭཱ དྷནནིསྶིཏོ མཙྪེརམལམལིནོ ཀཱལཾ ཀཏྭཱ ཏསྶེཝ ནགརསྶ ཨེཀསྨིཾ དྭཱརགཱམཀེ ཙཎྜཱལཱནཾ ཀུལསཧསྶཾ པཊིཝསཏི. ཏཏྠེཀིསྶཱ ཙཎྜཱལིཡཱ ཀུཙྪིསྨིཾ པཊིསནྡྷིཾ གཎྷི. རཱཛཱ ཏསྶ ཀཱལཀིརིཡཾ སུཏྭཱ པུཏྟམསྶ མཱུལསིརིཾ པཀྐོསཱཔེཏྭཱ སེཊྛིཊྛཱནེ ཋཔེསི. ཏམྤི ཙཎྜཱལཀུལསཧསྶཾ ཨེཀཏོཝ བྷཏིཡཱ ཀམྨཾ ཀཏྭཱ ཛཱིཝམཱནཾ ཏསྶ པཊིསནྡྷིགྒཧཎཏོ པཊྛཱཡ ནེཝ བྷཏིཾ ལབྷཏི, ན ཡཱཔནམཏྟཏོ པརཾ བྷཏྟཔིཎྜམྤི. ཏེ ‘‘མཡཾ ཨེཏརཧི ཀམྨཾ ཀརོནྟཱཔི པིཎྜབྷཏྟམྤི ན ལབྷཱམ, ཨམྷཱཀཾ ཨནྟརེ ཀཱལ༹ཀཎྞིཡཱ བྷཝིཏབྦ’’ནྟི དྭེ ཀོཊྛཱསཱ ཧུཏྭཱ ཡཱཝ ཏསྶ མཱཏཱཔིཏརོ ཝིསུཾ ཧོནྟི, ཏཱཝ ཝིབྷཛིཏྭཱ ‘‘ཨིམསྨིཾ ཀུལེ ཀཱལ༹ཀཎྞཱི ཨུཔྤནྣཱ’’ཏི ཏསྶ མཱཏརཾ ནཱིཧརིཾསུ.

སཱཔི ཡཱཝསྶཱ སོ ཀུཙྪིགཏོ, ཏཱཝ ཡཱཔནམཏྟམྤི ཀིཙྪེན ལབྷིཏྭཱ པུཏྟཾ ཝིཛཱཡི. ཏསྶ ཧཏྠཱ ཙ པཱདཱ ཙ ཨཀྑཱིནི ཙ ཀཎྞཱ ཙ ནཱསཱ ཙ མུཁཉྩ ཡཐཱཋཱནེ ན ཨཧེསུཾ. སོ ཨེཝརཱུཔེན ཨངྒཝེཀལླེན སམནྣཱགཏོ པཾསུཔིསཱཙཀོ ཝིཡ ཨཏིཝིརཱུཔོ ཨཧོསི. ཨེཝཾ སནྟེཔི ཏཾ མཱཏཱ ན པརིཙྩཛི. ཀུཙྪིཡཾ ཝསིཏཔུཏྟསྨིཉྷི སིནེཧོ བལཝཱ ཧོཏི. སཱ ཏཾ ཀིཙྪེན པོསཡམཱནཱ ཏཾ ཨཱདཱཡ གཏདིཝསེ ཀིཉྩི ཨལབྷིཏྭཱ གེཧེ ཀཏྭཱ སཡམེཝ གཏདིཝསེ བྷཏིཾ ལབྷཏི. ཨཐ ནཾ པིཎྜཱཡ ཙརིཏྭཱ ཛཱིཝིཏུཾ སམཏྠཀཱལེ སཱ ཀཔཱལཀཾ ཧཏྠེ ཋཔེཏྭཱ, ‘‘ཏཱཏ, མཡཾ ཏཾ ནིསྶཱཡ མཧཱདུཀྑཾ པཏྟཱ, ཨིདཱནི ན སཀྐོམི ཏཾ པོསེཏུཾ, ཨིམསྨིཾ ནགརེ ཀཔཎདྡྷིཀཱདཱིནཾ པཊིཡཏྟབྷཏྟཱནི ཨཏྠི, ཏཏྠ བྷིཀྑཱཡ ཙརིཏྭཱ ཛཱིཝཱཧཱི’’ཏི ཏཾ ཝིསྶཛྫེསི. སོ གྷརཔཊིཔཱཊིཡཱ ཙརནྟོ ཨཱནནྡསེཊྛིཀཱལེ ནིཝུཏྟཊྛཱནཾ གནྟྭཱ ཛཱཏིསྶརོ ཧུཏྭཱ ཨཏྟནོ གེཧཾ པཱཝིསི. ཏཱིསུ པན དྭཱརཀོཊྛཀེསུ ན ཀོཙི སལླཀྑེསི. ཙཏུཏྠེ དྭཱརཀོཊྛཀེ མཱུལསིརིསེཊྛིནོ པུཏྟཀཱ དིསྭཱ ཨུབྦིགྒཧདཡཱ པརོདིཾསུ. ཨཐ ནཾ སེཊྛིཔུརིསཱ ‘‘ནིཀྑམ ཀཱལ༹ཀཎྞཱི’’ཏི པོཐེཏྭཱ ནཱིཧརིཏྭཱ སངྐཱརཊྛཱནེ ཁིཔིཾསུ. སཏྠཱ ཨཱནནྡཏྠེརེན པཙྪཱསམཎེན པིཎྜཱཡ ཙརནྟོ ཏཾ ཋཱནཾ པཏྟོ ཐེརཾ ཨོལོཀེཏྭཱ ཏེན པུཊྛོ ཏཾ པཝཏྟིཾ ཨཱཙིཀྑི. ཐེརོ མཱུལསིརིཾ པཀྐོསཱཔེསི. ཨཐ མཧཱཛནཀཱཡོ སནྣིཔཏི. སཏྠཱ མཱུལསིརིཾ ཨཱམནྟེཏྭཱ ‘‘ཛཱནཱསི ཨེཏ’’ནྟི པུཙྪིཏྭཱ ‘‘ན ཛཱནཱམཱི’’ཏི ཝུཏྟེ, ‘‘པིཏཱ ཏེ ཨཱནནྡསེཊྛཱི’’ཏི ཝཏྭཱ ཨསདྡཧནྟཾ ‘‘ཨཱནནྡསེཊྛི པུཏྟསྶ ཏེ པཉྩ མཧཱནིདྷིཡོ ཨཱཙིཀྑཱཧཱི’’ཏི ཨཱཙིཀྑཱཔེཏྭཱ སདྡཧཱཔེསི. སོ སཏྠཱརཾ སརཎཾ ཨགམཱསི. ཏསྶ དྷམྨཾ དེསེནྟོ ཨིམཾ གཱཐམཱཧ –

༦༢.

‘‘པུཏྟཱ མཏྠི དྷནམྨཏྠི, ཨིཏི བཱལོ ཝིཧཉྙཏི;

ཨཏྟཱ ཧི ཨཏྟནོ ནཏྠི, ཀུཏོ པུཏྟཱ ཀུཏོ དྷན’’ནྟི.

ཏསྶཏྠོ – པུཏྟཱ མེ ཨཏྠི, དྷནཾ མེ ཨཏྠི, ཨིཏི བཱལོ པུཏྟཏཎྷཱཡ ཙེཝ དྷནཏཎྷཱཡ ཙ ཧཉྙཏི ཝིཧཉྙཏི དུཀྑཡཏི, ‘‘པུཏྟཱ མེ ནསྶིཾསཱུ’’ཏི ཝིཧཉྙཏི, ‘‘ནསྶནྟཱི’’ཏི ཝིཧཉྙཏི, ‘‘ནསྶིསྶནྟཱི’’ཏི ཝིཧཉྙཏི. དྷནེཔི ཨེསེཝ ནཡོ. ཨིཏི ཚཧཱཀཱརེཧི ཝིཧཉྙཏི. ‘‘པུཏྟེ པོསེསྶཱམཱི’’ཏི རཏྟིཉྩ དིཝཱ ཙ ཐལཛལཔཐཱདཱིསུ ནཱནཔྤཀཱརཏོ ཝཱཡམནྟོཔི ཝིཧཉྙཏི, ‘‘དྷནཾ ཨུཔྤཱདེསྶཱམཱི’’ཏི ཀསིཝཱཎིཛྫཱདཱིནི ཀརོནྟོཔི ཝིཧཉྙཏེཝ. ཨེཝཾ ཝིཧཉྙསྶ ཙ ཨཏྟཱ ཧི ཨཏྟནོ ནཏྠི ཏེན ཝིགྷཱཏེན དུཀྑིཏཾ ཨཏྟཱནཾ སུཁིཏཾ ཀཱཏུཾ ཨསཀྐོནྟསྶ པཝཏྟིཡམྤིསྶ ཨཏྟཱ ཧི ཨཏྟནོ ནཏྠི, མརཎམཉྩེ ནིཔནྣསྶ མཱརཎནྟིཀཱཧི ཝེདནཱཧི ཨགྒིཛཱལཱཧི ཝིཡ པརིཌཡ྄ཧམཱནསྶ ཚིཛྫམཱནེསུ སནྡྷིབནྡྷནེསུ, བྷིཛྫམཱནེསུ ཨཊྛིསངྒྷཱཊེསུ ནིམཱིལེཏྭཱ པརལོཀཾ ཨུམྨཱིལེཏྭཱ ཨིདྷལོཀཾ པསྶནྟསྶཱཔི དིཝསེ དིཝསེ དྭིཀྑཏྟུཾ ནྷཱཔེཏྭཱ ཏིཀྑཏྟུཾ བྷོཛེཏྭཱ གནྡྷམཱལཱདཱིཧི ཨལངྐརིཏྭཱ ཡཱཝཛཱིཝཾ པོསིཏོཔི སཧཱཡབྷཱཝེན དུཀྑཔརིཏྟཱཎཾ ཀཱཏུཾ ཨསམཏྠཏཱཡ ཨཏྟཱ ཧི ཨཏྟནོ ནཏྠི. ཀུཏོ པུཏྟཱ ཀུཏོ དྷནཾ པུཏྟཱ ཝཱ དྷནཾ ཝཱ ཏསྨིཾ སམཡེ ཀིམེཝ ཀརིསྶནྟི, ཨཱནནྡསེཊྛིནོཔི ཀསྶཙི ཀིཉྩི ཨདཏྭཱ པུཏྟསྶཏྠཱཡ དྷནཾ སཎྛཔེཏྭཱ པུབྦེ ཝཱ མརཎམཉྩེ ནིཔནྣསྶ, ཨིདཱནི ཝཱ ཨིམཾ དུཀྑཾ པཏྟསྶ ཀུཏོ པུཏྟཱ ཀུཏོ དྷནཾ. པུཏྟཱ ཝཱ དྷནཾ ཝཱ ཏསྨིཾ སམཡེ ཀིཾ དུཀྑཾ ཧརིཾསུ, ཀིཾ ཝཱ སུཁཾ ཨུཔྤཱདཡིཾསཱུཏི.

དེསནཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི. དེསནཱ མཧཱཛནསྶ སཱཏྠིཀཱ ཨཧོསཱིཏི.

ཨཱནནྡསེཊྛིཝཏྠུ ཏཏིཡཾ.

༤. གཎྛིབྷེདཀཙོརཝཏྠུ

ཡོ བཱལོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ གཎྛིབྷེདཀཙོརེ ཨཱརབྦྷ ཀཐེསི.

ཏེ ཀིར དྭེ སཧཱཡཀཱ དྷམྨསྶཝནཏྠཱཡ གཙྪནྟེན མཧཱཛནེན སདྡྷིཾ ཛེཏཝནཾ གནྟྭཱ ཨེཀོ དྷམྨཀཐཾ ཨསྶོསི, ཨེཀོ ཨཏྟནོ གཡ྄ཧཱུཔགཾ ཨོལོཀེསི. ཏེསུ ཨེཀོ དྷམྨཾ སུཎམཱནོ སོཏཱཔཏྟིཕལཾ པཱཔུཎི, ཨིཏརོ ཨེཀསྶ དུསྶནྟེ བདྡྷཾ པཉྩམཱསཀམཏྟཾ ལབྷི. ཏསྶ ཏཾ གེཧེ པཱཀབྷཏྟཾ ཛཱཏཾ, ཨིཏརསྶ གེཧེ ན པཙྩཏི. ཨཐ ནཾ སཧཱཡཀཙོརོ ཨཏྟནོ བྷརིཡཱཡ སདྡྷིཾ ཨུཔྤཎྜཡམཱནོ ‘‘ཏྭཾ ཨཏིཔཎྜིཏཏཱཡ ཨཏྟནོ གེཧེ པཱཀབྷཏྟམཱུལམྤི ན ནིཔྥཱདེསཱི’’ཏི ཨཱཧ. ཨིཏརོ པན ‘‘བཱལབྷཱཝེནེཝ ཝཏཱཡཾ ཨཏྟནོ པཎྜིཏབྷཱཝཾ མཉྙཏཱི’’ཏི ཏཾ པཝཏྟིཾ སཏྠུ ཨཱརོཙེཏུཾ ཉཱཏཱིཧི སདྡྷིཾ ཛེཏཝནཾ གནྟྭཱ ཨཱརོཙེསི. སཏྠཱ ཏསྶ དྷམྨཾ དེསེནྟོ ཨིམཾ གཱཐམཱཧ –

༦༣.

‘‘ཡོ བཱལོ མཉྙཏི བཱལྱཾ, པཎྜིཏོ ཝཱཔི ཏེན སོ;

བཱལོ ཙ པཎྜིཏམཱནཱི, ས ཝེ ‘བཱལོ’ཏི ཝུཙྩཏཱི’’ཏི.

ཏཏྠ ཡོ བཱལོཏི ཡོ ཨནྡྷབཱལོ ཨཔཎྜིཏོ སམཱནོ ‘‘བཱལོ ཨཧ’’ནྟི ཨཏྟནོ བཱལྱཾ བཱལབྷཱཝཾ མཉྙཏི ཛཱནཱཏི. ཏེན སོཏི ཏེན ཀཱརཎེན སོ པུགྒལོ པཎྜིཏོ ཝཱཔི ཧོཏི པཎྜིཏསདིསོ ཝཱ. སོ ཧི ‘‘བཱལོ ཨཧ’’ནྟི ཛཱནམཱནོ ཨཉྙཾ པཎྜིཏཾ ཨུཔསངྐམནྟོ པཡིརུཔཱསནྟོ ཏེན པཎྜིཏབྷཱཝཏྠཱཡ ཨོཝདིཡམཱནོ ཨནུསཱསིཡམཱནོ ཏཾ ཨོཝཱདཾ གཎྷིཏྭཱ པཎྜིཏོ ཝཱ ཧོཏི པཎྜིཏཏརོ ཝཱ. ས ཝེ བཱལོཏི ཡོ ཙ བཱལོ སམཱནོ ‘‘ཀོ ཨཉྙོ མཡཱ སདིསོ བཧུསྶུཏོ ཝཱ དྷམྨཀཐིཀོ ཝཱ ཝིནཡདྷརོ ཝཱ དྷུཏངྒདྷརོ ཝཱ ཨཏྠཱི’’ཏི ཨེཝཾ པཎྜིཏམཱནཱི ཧོཏི. སོ ཨཉྙཾ པཎྜིཏཾ ཨནུཔསངྐམནྟོ ཨཔཡིརུཔཱསནྟོ ནེཝ པརིཡཏྟིཾ ཨུགྒཎྷཱཏི, ན པཊིཔཏྟིཾ པཱུརེཏི, ཨེཀནྟབཱལབྷཱཝམེཝ པཱཔུཎཱཏི. སོ གཎྛིབྷེདཀཙོརོ ཝིཡ. ཏེན ཝུཏྟཾ ‘‘ས ཝེ ‘བཱལོ’ཏི ཝུཙྩཏཱི’’ཏི.

དེསནཱཔརིཡོསཱནེ ཨིཏརསྶ ཉཱཏཀེཧི སདྡྷིཾ མཧཱཛནོ སོཏཱཔཏྟིཕལཱདཱིནི པཱཔུཎཱིཏི.

གཎྛིབྷེདཀཙོརཝཏྠུ ཙཏུཏྠཾ.

༥. ཨུདཱཡིཏྠེརཝཏྠུ

ཡཱཝཛཱིཝམྤི ཙེ བཱལོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨུདཱཡིཏྠེརཾ ཨཱརབྦྷ ཀཐེསི.

སོ ཀིར མཧཱཐེརེསུ པཊིཀྐནྟེསུ དྷམྨསབྷཾ གནྟྭཱ དྷམྨཱསནེ ནིསཱིདི. ཨཐ ནཾ ཨེཀདིཝསཾ ཨཱགནྟུཀཱ བྷིཀྑཱུ དིསྭཱ ‘‘ཨཡཾ བཧུསྶུཏོ མཧཱཐེརོ བྷཝིསྶཏཱི’’ཏི མཉྙམཱནཱ ཁནྡྷཱདིཔཊིསཾཡུཏྟཾ པཉྷཾ པུཙྪིཏྭཱ ཀིཉྩི ཨཛཱནམཱནཾ ‘‘ཀོ ཨེསོ, བུདྡྷེཧི སདྡྷིཾ ཨེཀཝིཧཱརེ ཝསམཱནོ ཁནྡྷདྷཱཏུཨཱཡཏནམཏྟམྤི ན ཛཱནཱཏཱི’’ཏི གརཧིཏྭཱ ཏཾ པཝཏྟིཾ ཏཐཱགཏསྶ ཨཱརོཙེསུཾ. སཏྠཱ ཏེསཾ དྷམྨཾ དེསེནྟོ ཨིམཾ གཱཐམཱཧ –

༦༤.

‘‘ཡཱཝཛཱིཝམྤི ཙེ བཱལོ, པཎྜིཏཾ པཡིརུཔཱསཏི;

ན སོ དྷམྨཾ ཝིཛཱནཱཏི, དབྦཱི སཱུཔརསཾ ཡཐཱ’’ཏི.

ཏསྶཏྠོ – བཱལོ ནཱམེས ཡཱཝཛཱིཝམྤི པཎྜིཏཾ ཨུཔསངྐམནྟོ པཡིརུཔཱསནྟོ ‘‘ཨིདཾ བུདྡྷཝཙནཾ, ཨེཏྟཀཾ བུདྡྷཝཙན’’ནྟི ཨེཝཾ པརིཡཏྟིདྷམྨཾ ཝཱ ‘‘ཨཡཾ ཙཱརོ, ཨཡཾ ཝིཧཱརོ, ཨཡཾ ཨཱཙཱརོ, ཨཡཾ གོཙརོ, ཨིདཾ སཱཝཛྫཾ, ཨིདཾ ཨནཝཛྫཾ, ཨིདཾ སེཝིཏབྦཾ, ཨིདཾ ན སེཝིཏབྦཾ, ཨིདཾ པཊིཝིཛ྄ཛྷིཏབྦཾ, ཨིདཾ སཙྪིཀཱཏབྦ’’ནྟི ཨེཝཾ པཊིཔཏྟིཔཊིཝེདྷདྷམྨཾ ཝཱ ན ཛཱནཱཏི. ཡཐཱ ཀིཾ? དབྦཱི སཱུཔརསཾ ཡཐཱཏི. ཡཐཱ ཧི དབྦཱི ཡཱཝ པརིཀྑཡཱ ནཱནཔྤཀཱརཱཡ སཱུཔཝིཀཏིཡཱ སམྤརིཝཏྟམཱནཱཔི ‘‘ཨིདཾ ལོཎིཀཾ, ཨིདཾ ཨལོཎིཀཾ, ཨིདཾ ཏིཏྟཀཾ, ཨིདཾ ཁཱརིཀཾ, ཨིདཾ ཀཊུཀཾ, ཨིདཾ ཨམྦིལཾ, ཨིདཾ ཨནམྦིལཾ, ཨིདཾ ཀསཱཝ’’ནྟི སཱུཔརསཾ ན ཛཱནཱཏི, ཨེཝམེཝ བཱལོ ཡཱཝཛཱིཝམྤི པཎྜིཏཾ པཡིརུཔཱསམཱནོ ཝུཏྟཔྤཀཱརཾ དྷམྨཾ ན ཛཱནཱཏཱིཏི.

དེསནཱཝསཱནེ ཨཱགནྟུཀཱ བྷིཀྑཱུ ཨཱསཝེཧི ཙིཏྟཱནི ཝིམུཙྩིཾསཱུཏི.

ཨུདཱཡིཏྠེརཝཏྠུ པཉྩམཾ.

༦. ཏིཾསམཏྟཔཱཝེཡྻཀབྷིཀྑུཝཏྠུ

མུཧུཏྟམཔི ཙེ ཝིཉྙཱུཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏིཾསམཏྟེ པཱཝེཡྻཀེ བྷིཀྑཱུ ཨཱརབྦྷ ཀཐེསི.

ཏེསཉྷི བྷགཝཱ ཨིཏྠིཾ པརིཡེསནྟཱནཾ ཀཔྤཱསིཀཝནསཎྜེ པཋམཾ དྷམྨཾ དེསེསི. ཏདཱ ཏེ སབྦེཝ ཨེཧིབྷིཀྑུབྷཱཝཾ པཏྭཱ ཨིདྡྷིམཡཔཏྟཙཱིཝརདྷརཱ ཧུཏྭཱ ཏེརས དྷུཏངྒཱནི སམཱདཱཡ ཝཏྟམཱནཱ པུནཔི དཱིགྷསྶ ཨདྡྷུནོ ཨཙྩཡེན སཏྠཱརཾ ཨུཔསངྐམིཏྭཱ ཨནམཏགྒདྷམྨདེསནཾ སུཏྭཱ ཏསྨིཾཡེཝ ཨཱསནེ ཨརཧཏྟཾ པཱཔུཎིཾསུ. བྷིཀྑཱུ ‘‘ཨཧོ ཝཏིམེཧི བྷིཀྑཱུཧི ཁིཔྤམེཝ དྷམྨོ ཝིཉྙཱཏོ’’ཏི དྷམྨསབྷཱཡཾ ཀཐཾ སམུཊྛཱཔེསུཾ. སཏྠཱ ཏཾ སུཏྭཱ ‘‘ན, བྷིཀྑཝེ, ཨིདཱནེཝ, པུབྦེཔི ཨིམེ ཏིཾསམཏྟཱ སཧཱཡཀཱ དྷུཏྟཱ ཧུཏྭཱ ཏུཎྜིལཛཱཏཀེ (ཛཱ. ༡.༦.༨༨ ཨཱདཡོ) མཧཱཏུཎྜིལསྶ དྷམྨདེསནཾ སུཏྭཱཔི ཁིཔྤམེཝ དྷམྨཾ ཝིཉྙཱཡ པཉྩ སཱིལཱནི སམཱདིཡིཾསུ, ཏེ ཏེནེཝ ཨུཔནིསྶཡེན ཨེཏརཧི ནིསིནྣཱསནེཡེཝ ཨརཧཏྟཾ པཏྟཱ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༦༥.

‘‘མུཧུཏྟམཔི ཙེ ཝིཉྙཱུ, པཎྜིཏཾ པཡིརུཔཱསཏི;

ཁིཔྤཾ དྷམྨཾ ཝིཛཱནཱཏི, ཛིཝ྄ཧཱ སཱུཔརསཾ ཡཐཱ’’ཏི.

ཏསྶཏྠོ – ཝིཉྙཱུ པཎྜིཏཔུརིསོ མུཧུཏྟམཔི ཙེ ཨཉྙཾ པཎྜིཏཾ པཡིརུཔཱསཏི, སོ ཏསྶ སནྟིཀེ ཨུགྒཎྷནྟོ པརིཔུཙྪནྟོ ཁིཔྤམེཝ པརིཡཏྟིདྷམྨཾ ཝིཛཱནཱཏི. ཏཏོ ཀམྨཊྛཱནཾ ཀཐཱཔེཏྭཱ པཊིཔཏྟིཡཾ གྷཊེནྟོ ཝཱཡམནྟོ ཡཐཱ ནཱམ ཨནུཔཧཏཛིཝ྄ཧཱཔསཱདོ པུརིསོ རསཝིཛཱནནཏྠཾ ཛིཝ྄ཧགྒེ ཋཔེཏྭཱ ཨེཝ ལོཎིཀཱདིབྷེདཾ རསཾ ཝིཛཱནཱཏི, ཨེཝཾ པཎྜིཏོ ཁིཔྤམེཝ ལོཀུཏྟརདྷམྨམྤི ཝིཛཱནཱཏཱིཏི.

དེསནཱཝསཱནེ བཧཱུ བྷིཀྑཱུ ཨརཧཏྟཾ པཱཔུཎིཾསཱུཏི.

ཏིཾསམཏྟཔཱཝེཡྻཀབྷིཀྑུཝཏྠུ ཚཊྛཾ.

༧. སུཔྤབུདྡྷཀུཊྛིཝཏྠུ

ཙརནྟི བཱལཱ དུམྨེདྷཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ སུཔྤབུདྡྷཀུཊྛིཾ ཨཱརབྦྷ ཀཐེསི. སུཔྤབུདྡྷཀུཊྛིཝཏྠུ ཨུདཱནེ (ཨུདཱ. ༤༣) ཨཱགཏམེཝ.

ཏདཱ ཧི སུཔྤབུདྡྷཀུཊྛི པརིསཔརིཡནྟེ ནིསིནྣོ བྷགཝཏོ དྷམྨདེསནཾ སུཏྭཱ སོཏཱཔཏྟིཕལཾ པཏྭཱ ཨཏྟནཱ པཊིལདྡྷགུཎཾ སཏྠུ ཨཱརོཙེཏུཀཱམོ པརིསམཛ྄ཛྷེ ཨོགཱཧིཏུཾ ཨཝིསཧནྟོ མཧཱཛནསྶ སཏྠཱརཾ ཝནྡིཏྭཱ ཨནུགནྟྭཱ ནིཝཏྟནཀཱལེ ཝིཧཱརཾ ཨགམཱསི. ཏསྨིཾ ཁཎེ སཀྐོ དེཝརཱཛཱ ‘‘ཨཡཾ སུཔྤབུདྡྷཀུཊྛི ཨཏྟནོ སཏྠུ སཱསནེ པཊིལདྡྷགུཎཾ པཱཀཊཾ ཀཱཏུཀཱམོ’’ཏི ཉཏྭཱ ‘‘ཝཱིམཾསིསྶཱམི ན’’ནྟི གནྟྭཱ ཨཱཀཱསེ ཋིཏོཝ ཨེཏདཝོཙ – ‘‘སུཔྤབུདྡྷ, ཏྭཾ མནུསྶདལིདྡོ མནུསྶཝརཱཀོ, ཨཧཾ ཏེ ཨཔརིཡནྟཾ དྷནཾ དསྶཱམི, ‘བུདྡྷོ ན བུདྡྷོ, དྷམྨོ ན དྷམྨོ, སངྒྷོ ན སངྒྷོ, ཨལཾ མེ བུདྡྷེན, ཨལཾ མེ དྷམྨེན, ཨལཾ མེ སངྒྷེནཱ’ཏི ཝདེཧཱི’’ཏི. ཨཐ ནཾ སོ ཨཱཧ – ‘‘ཀོསི ཏྭ’’ནྟི? ‘‘ཨཧཾ སཀྐོ’’ཏི. ཨནྡྷབཱལ, ཨཧིརིཀ ཏྭཾ མཡཱ སདྡྷིཾ ཀཐེཏུཾ ན ཡུཏྟརཱུཔོ, ཏྭཾ མཾ ‘‘དུགྒཏོ དལིདྡོ ཀཔཎོ’’ཏི ཝདེསི, ནེཝཱཧཾ དུགྒཏོ, ན དལིདྡོ, སུཁཔྤཏྟོ ཨཧམསྨི མཧདྡྷནོ –

‘‘སདྡྷཱདྷནཾ སཱིལདྷནཾ, ཧིརཱི ཨོཏྟཔྤིཡཾ དྷནཾ;

སུཏདྷནཉྩ ཙཱགོ ཙ, པཉྙཱ ཝེ སཏྟམཾ དྷནཾ.

‘‘ཡསྶ ཨེཏེ དྷནཱ ཨཏྠི, ཨིཏྠིཡཱ པུརིསསྶ ཝཱ;

‘ཨདལིདྡོ’ཏི ཏཾ ཨཱཧུ, ཨམོགྷཾ ཏསྶ ཛཱིཝིཏ’’ནྟི. (ཨ. ནི. ༧.༥-༦) –

ཨིམཱནི མེ སཏྟཝིདྷཨརིཡདྷནཱནི སནྟི, ཡེསཉྷི ཨིམཱནི སཏྟ དྷནཱནི སནྟི, ན ཏེ བུདྡྷེཧི ཝཱ པཙྩེཀབུདྡྷེཧི ཝཱ ‘‘དལིདྡཱ’’ཏི ཝུཙྩནྟཱིཏི. སཀྐོ ཏསྶ ཀཐཾ སུཏྭཱ ཏཾ ཨནྟརཱམགྒེ ཨོཧཱཡ སཏྠུ སནྟིཀཾ གནྟྭཱ སབྦཾ ཏཾ ཝཙནཔཊིཝཙནཾ ཨཱརོཙེསི. ཨཐ ནཾ བྷགཝཱ ཨཱཧ – ‘‘ན ཁོ, སཀྐ, སཀྐཱ ཏཱདིསཱནཾ སཏེནཔི སཧསྶེནཔི སུཔྤབུདྡྷཀུཊྛིཾ ‘བུདྡྷོ ན བུདྡྷོ’ཏི ཝཱ, ‘དྷམྨོ ན དྷམྨོ’ཏི ཝཱ, ‘སངྒྷོ ན སངྒྷོ’ཏི ཝཱ ཀཐཱཔེཏུ’’ནྟི. སུཔྤབུདྡྷོཔི ཁོ ཀུཊྛི སཏྠུ སནྟིཀཾ གནྟྭཱ སཏྠཱརཱ ཀཏཔཊིསནྠཱརོ སམྨོདམཱནོ ཨཏྟནཱ པཊིལདྡྷགུཎཾ ཨཱརོཙེཏྭཱ ཝུཊྛཱཡཱསནཱ པཀྐཱམི. ཨཐ ནཾ ཨཙིརཔཀྐནྟཾ གཱཝཱི ཏརུཎཝཙྪཱ ཛཱིཝིཏཱ ཝོརོཔེསི.

སཱ ཀིར ཨེཀཱ ཡཀྑིནཱི པུཀྐུསཱཏིཀུལཔུཏྟཾ, བཱཧིཡཾ དཱརུཙཱིརིཡཾ, ཏམྦདཱཋིཀཙོརགྷཱཏཀཾ, སུཔྤབུདྡྷཀུཊྛིནྟི ཨིམེསཾ ཙཏུནྣཾ ཛནཱནཾ ཨནེཀསཏེ ཨཏྟབྷཱཝེ གཱཝཱི ཧུཏྭཱ ཛཱིཝིཏཱ ཝོརོཔེསི. ཏེ ཀིར ཨཏཱིཏེ ཙཏྟཱརོ སེཊྛིཔུཏྟཱ ཧུཏྭཱ ཨེཀཾ ནགརསོབྷིནིཾ གཎིཀཾ ཨུཡྻཱནཾ ནེཏྭཱ དིཝསཾ སམྤཏྟིཾ ཨནུབྷཝིཏྭཱ སཱཡནྷསམཡེ ཨེཝཾ སམྨནྟཡིཾསུ – ‘‘ཨིམསྨིཾ ཋཱནེ ཨཉྙོ ནཏྠི, ཨིམིསྶཱ ཨམྷེཧི དིནྣཾ ཀཧཱཔཎསཧསྶཉྩ སབྦཉྩ པསཱདྷནབྷཎྜཾ གཧེཏྭཱ ཨིམཾ མཱརེཏྭཱ གཙྪཱམཱ’’ཏི. སཱ ཏེསཾ ཀཐཾ སུཏྭཱ ‘‘ཨིམེ ནིལླཛྫཱ, མཡཱ སདྡྷིཾ ཨབྷིརམིཏྭཱ ཨིདཱནི མཾ མཱརེཏུཀཱམཱ, ཛཱནིསྶཱམི ནེསཾ ཀཏྟབྦཡུཏྟཀ’’ནྟི ཏེཧི མཱརིཡམཱནཱ ‘‘ཨཧཾ ཡཀྑིནཱི ཧུཏྭཱ ཡཐཱ མཾ ཨེཏེ མཱརེནྟི, ཨེཝམེཝ ཏེ མཱརེཏུཾ སམཏྠཱ བྷཝེཡྻ’’ནྟི པཏྠནཾ ཨཀཱསི. ཏསྶ ནིསྶནྡེན ཨིམེ མཱརེསི. སམྦཧུལཱ བྷིཀྑཱུ ཏསྶ ཀཱལཀིརིཡཾ བྷགཝཏོ ཨཱརོཙེཏྭཱ ‘‘ཏསྶ ཀཱ གཏི, ཀེན ཙ ཀཱརཎེན ཀུཊྛིབྷཱཝཾ པཏྟོ’’ཏི པུཙྪིཾསུ. སཏྠཱ སོཏཱཔཏྟིཕལཾ པཏྭཱ ཏསྶ ཏཱཝཏིཾསབྷཝནེ ཨུཔྤནྣབྷཱཝཉྩ ཏགརསིཁིཔཙྩེཀབུདྡྷཾ དིསྭཱ ནིཊྛུབྷིཏྭཱ ཨཔསབྱཾ ཀཏྭཱ དཱིགྷརཏྟཾ ནིརཡེ པཙྩིཏྭཱ ཝིཔཱཀཱཝསེསེན ཨིདཱནི ཀུཊྛིབྷཱཝཔྤཏྟིཉྩ བྱཱཀརིཏྭཱ, ‘‘བྷིཀྑཝེ, ཨིམེ སཏྟཱ ཨཏྟནཱཝ ཨཏྟནོ ཀཊུཀཝིཔཱཀཀམྨཾ ཀརོནྟཱ ཝིཙརནྟཱི’’ཏི ཝཏྭཱ ཨནུསནྡྷིཾ གྷཊེཏྭཱ ཨུཏྟརི དྷམྨཾ དེསེནྟོ ཨིམཾ གཱཐམཱཧ –

༦༦.

‘‘ཙརནྟི བཱལཱ དུམྨེདྷཱ, ཨམིཏྟེནེཝ ཨཏྟནཱ;

ཀརོནྟཱ པཱཔཀཾ ཀམྨཾ, ཡཾ ཧོཏི ཀཊུཀཔྥལ’’ནྟི.

ཏཏྠ ཙརནྟཱིཏི ཙཏཱུཧི ཨིརིཡཱཔཐེཧི ཨཀུསལམེཝ ཀརོནྟཱ ཝིཙརནྟི. བཱལཱཏི ཨིདྷལོཀཏྠཉྩ པརལོཀཏྠཉྩ ཨཛཱནནྟཱ ཨིདྷ བཱལཱ ནཱམ. དུམྨེདྷཱཏི དུཔྤཉྙཱ. ཨམིཏྟེནེཝ ཨཏྟནཱཏི ཨཏྟནཱ ཨམིཏྟབྷཱུཏེན ཝིཡ ཝེརིནཱ ཧུཏྭཱ. ཀཊུཀཔྥལནྟི ཏིཁིཎཕལཾ དུཀྑཕལནྟི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སུཔྤབུདྡྷཀུཊྛིཝཏྠུ སཏྟམཾ.

༨. ཀསྶཀཝཏྠུ

ན ཏཾ ཀམྨཾ ཀཏཾ སཱདྷཱུཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཀསྶཀཾ ཨཱརབྦྷ ཀཐེསི.

སོ ཀིར སཱཝཏྠིཏོ ཨཝིདཱུརེ ཨེཀཾ ཁེཏྟཾ ཀསཏི. ཙོརཱ ཨུདཀནིདྡྷམནེན ནགརཾ པཝིསིཏྭཱ ཨེཀསྨིཾ ཨཌྜྷཀུལེ ཨུམངྒཾ བྷིནྡིཏྭཱ བཧུཾ ཧིརཉྙསུཝཎྞཾ གཧེཏྭཱ ཨུདཀནིདྡྷམནེནེཝ ནིཀྑམིཾསུ. ཨེཀོ ཙོརོ ཏེ ཝཉྩེཏྭཱ ཨེཀཾ སཧསྶཏྠཝིཀཾ ཨོཝཊྚིཀཱཡ ཀཏྭཱ ཏཾ ཁེཏྟཾ གནྟྭཱ ཏེཧི སདྡྷིཾ བྷཎྜཾ བྷཱཛེཏྭཱ ཨཱདཱཡ གཙྪནྟོ ཨོཝཊྚིཀཏོ པཏམཱནཾ སཧསྶཏྠཝིཀཾ ན སལླཀྑེསི. ཏཾ དིཝསཾ སཏྠཱ པཙྩཱུསསམཡེ ལོཀཾ ཝོལོཀེནྟོ ཏཾ ཀསྶཀཾ ཨཏྟནོ ཉཱཎཛཱལསྶ ཨནྟོཔཝིཊྛཾ དིསྭཱ ‘‘ཀིཾ ནུ ཁོ བྷཝིསྶཏཱི’’ཏི ཨུཔདྷཱརཡམཱནོ ཨིདཾ ཨདྡས – ‘‘ཨཡཾ ཀསྶཀོ པཱཏོཝ ཀསིཏུཾ གམིསྶཏི, བྷཎྜསཱམིཀཱ ཙོརཱནཾ ཨནུཔདཾ གནྟྭཱ ཨོཝཊྚིཀཏོ པཏམཱནཾ སཧསྶཏྠཝིཀཾ དིསྭཱ ཨེཏཾ གཎྷིསྶནྟི, མཾ ཋཔེཏྭཱ ཏསྶ ཨཉྙོ སཀྑཱི ནཱམ ན བྷཝིསྶཏི, སོཏཱཔཏྟིམགྒསྶ ཨུཔནིསྶཡོཔིསྶ ཨཏྠི, ཏཏྠ མཡཱ གནྟུཾ ཝཊྚཏཱི’’ཏི. སོཔི ཀསྶཀོ པཱཏོཝ ཀསིཏུཾ གཏོ. སཏྠཱ ཨཱནནྡཏྠེརེན པཙྪཱསམཎེན ཏཏྠ ཨགམཱསི. ཀསྶཀོ སཏྠཱརཾ དིསྭཱ གནྟྭཱ བྷགཝནྟཾ ཝནྡིཏྭཱ པུན ཀསིཏུཾ ཨཱརབྷི. སཏྠཱ ཏེན སདྡྷིཾ ཀིཉྩི ཨཝཏྭཱཝ སཧསྶཏྠཝིཀཱཡ པཏིཏཊྛཱནཾ གནྟྭཱ ཏཾ དིསྭཱ ཨཱནནྡཏྠེརཾ ཨཱཧ – ‘‘པསྶ, ཨཱནནྡ, ཨཱསཱིཝིསོ’’ཏི. ‘‘པསྶཱམི, བྷནྟེ, གྷོརཝིསོ’’ཏི.

ཀསྶཀོ ཏཾ ཀཐཾ སུཏྭཱ ‘‘མམ ཝེལཱཡ ཝཱ ཨཝེལཱཡ ཝཱ ཝིཙརཎཊྛཱནམེཏཾ, ཨཱསཱིཝིསོ ཀིརེཏྠ ཨཏྠཱི’’ཏི ཙིནྟེཏྭཱ སཏྠརི ཨེཏྟཀཾ ཝཏྭཱ པཀྐནྟེ ‘‘མཱརེསྶཱམི ན’’ནྟི པཏོདལཊྛིཾ ཨཱདཱཡ གཏོ སཧསྶབྷཎྜིཀཾ དིསྭཱ ‘‘ཨིམཾ སནྡྷཱཡ སཏྠཱརཱ ཀཐིཏཾ བྷཝིསྶཏཱི’’ཏི ཏཾ ཨཱདཱཡ ནིཝཏྟོ, ཨབྱཏྟཏཱཡ ཨེཀམནྟེ ཋཔེཏྭཱ པཾསུནཱ པཊིཙྪཱདེཏྭཱ པུན ཀསིཏུཾ ཨཱརབྷི. མནུསྶཱ ཙ ཝིབྷཱཏཱཡ རཏྟིཡཱ གེཧེ ཙོརེཧི ཀཏཀམྨཾ དིསྭཱ པདཱནུཔདཾ གཙྪནྟཱ ཏཾ ཁེཏྟཾ གནྟྭཱ ཏཏྠ ཙོརེཧི བྷཎྜསྶ བྷཱཛིཏཊྛཱནཾ དིསྭཱ ཀསྶཀསྶ པདཝལཉྫཾ ཨདྡསཾསུ. ཏེ ཏསྶ པདཱནུསཱརེན གནྟྭཱ ཐཝིཀཱཡ ཋཔིཏཊྛཱནཾ དིསྭཱ པཾསུཾ ཝིཡཱུཧིཏྭཱ ཐཝིཀཾ ཨཱདཱཡ ‘‘ཏྭཾ གེཧཾ ཝིལུམྤིཏྭཱ ཁེཏྟཾ ཀསམཱནོ ཝིཡ ཝིཙརསཱི’’ཏི ཏཛྫེཏྭཱ པོཐེཏྭཱ ནེཏྭཱ རཉྙོ དསྶཡིཾསུ. རཱཛཱ ཏཾ པཝཏྟིཾ སུཏྭཱ ཏསྶ ཝདྷཾ ཨཱཎཱཔེསི. རཱཛཔུརིསཱ ཏཾ པཙྪཱབཱཧཾ བནྡྷིཏྭཱ ཀསཱཧི ཏཱལེ༹ནྟཱ ཨཱགྷཱཏནཾ ནཡིཾསུ. སོ ཀསཱཧི ཏཱལི༹ཡམཱནོ ཨཉྙཾ ཀིཉྩི ཨཝཏྭཱ ‘‘པསྶཱནནྡ, ཨཱསཱིཝིསོཏི, པསྶཱམི བྷགཝཱ གྷོརཝིསོ’’ཏི ཝདནྟོ གཙྪཏི. ཨཐ ནཾ རཱཛཔུརིསཱ ‘‘ཏྭཾ སཏྠུ ཙེཝ ཨཱནནྡཏྠེརསྶ ཙ ཀཐཾ ཀཐེསི, ཀིཾ ནཱམེཏ’’ནྟི པུཙྪིཏྭཱ – ‘‘རཱཛཱནཾ དཊྛུཾ ལབྷམཱནོ ཀཐེསྶཱམཱི’’ཏི ཝུཏྟེ རཉྙོ སནྟིཀཾ ནེཏྭཱ རཉྙོ ཏཾ པཝཏྟིཾ ཀཐཡིཾསུ. ཨཐ ནཾ རཱཛཱ ‘‘ཀསྨཱ ཨེཝཾ ཀཐེསཱི’’ཏི པུཙྪི. སོ ‘‘ནཱཧཾ, དེཝ, ཙོརོ’’ཏི ཝཏྭཱ ཀསནཏྠཱཡ ནིཀྑནྟཀཱལཏོ པཊྛཱཡ སབྦཾ ཏཾ པཝཏྟིཾ རཉྙོ ཨཱཙིཀྑི. རཱཛཱ ཏསྶ ཀཐཾ སུཏྭཱ ‘‘ཨཡཾ བྷཎེ ལོཀེ ཨགྒཔུགྒལཾ སཏྠཱརཾ སཀྑིཾ ཨཔདིསཏི, ན ཡུཏྟཾ ཨེཏསྶ དོསཾ ཨཱརོཔེཏུཾ, ཨཧམེཏྠ ཀཏྟབྦཾ ཛཱནིསྶཱམཱི’’ཏི ཏཾ ཨཱདཱཡ སཱཡནྷསམཡེ སཏྠུ སནྟིཀཾ གནྟྭཱ སཏྠཱརཾ པུཙྪི – ‘‘བྷགཝཱ ཀཙྩི ཏུམྷེ ཨཱནནྡཏྠེརེན སདྡྷིཾ ཨེཏསྶ ཀསྶཀསྶ ཀསནཊྛཱནཾ གཏཱ’’ཏི? ‘‘ཨཱམ, མཧཱརཱཛཱ’’ཏི. ‘‘ཀིཾ ཝོ ཏཏྠ དིཊྛ’’ནྟི? ‘‘སཧསྶཏྠཝིཀཱ, མཧཱརཱཛཱ’’ཏི. ‘‘དིསྭཱ ཀིཾ ཨཝོཙུཏྠཱ’’ཏི? ‘‘ཨིདཾ ནཱམ, མཧཱརཱཛཱ’’ཏི. ‘‘བྷནྟེ, སཙཱཡཾ པུརིསོ ཏུམྷཱདིསཾ ཨཔདིསཾ ནཱཀརིསྶ, ན ཛཱིཝིཏཾ ཨལབྷིསྶ, ཏུམྷེཧི པན ཀཐིཏཀཐཾ ཀཐེཏྭཱ ཏེན ཛཱིཝིཏཾ ལདྡྷ’’ནྟི. ཏཾ སུཏྭཱ སཏྠཱ ‘‘ཨཱམ, མཧཱརཱཛ, ཨཧམྤི ཨེཏྟཀམེཝ ཝཏྭཱ གཏོ, པཎྜིཏེན ནཱམ ཡཾ ཀམྨཾ ཀཏྭཱ པཙྪཱནུཏཔྤཾ ཧོཏི, ཏཾ ན ཀཏྟབྦ’’ནྟི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༦༧.

‘‘ན ཏཾ ཀམྨཾ ཀཏཾ སཱདྷུ, ཡཾ ཀཏྭཱ ཨནུཏཔྤཏི;

ཡསྶ ཨསྶུམུཁོ རོདཾ, ཝིཔཱཀཾ པཊིསེཝཏཱི’’ཏི.

ཏཏྠ ན ཏཾ ཀམྨནྟི ཡཾ ནིརཡཱདཱིསུ ནིབྦཏྟནསམཏྠཾ དུཀྑུདྲཡཾ ཀམྨཾ ཀཏྭཱ ཨནུསྶརནྟོ ཨནུསྶརིཏཱནུསྶརིཏཀྑཎེ ཨནུཏཔྤཏི ཨནུསོཙཏི, ཏཾ ཀཏཾ ན སཱདྷུ ན སུནྡརཾ ནིརཏྠཀཾ. ཡསྶ ཨསྶུམུཁོཏི ཡསྶ ཨསྶཱུཧི ཏིནྟམུཁོ རོདནྟོ ཝིཔཱཀཾ ཨནུབྷོཏཱིཏི.

དེསནཱཝསཱནེ ཀསྶཀོ ཨུཔཱསཀོ སོཏཱཔཏྟིཕལཾ པཏྟོ, སམྤཏྟབྷིཀྑཱུཔི སོཏཱཔཏྟིཕལཱདཱིནི པཱཔུཎིཾསཱུཏི.

ཀསྶཀཝཏྠུ ཨཊྛམཾ.

༩. སུམནམཱལཱཀཱརཝཏྠུ

ཏཉྩ ཀམྨཾ ཀཏཾ སཱདྷཱུཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ སུམནཾ ནཱམ མཱལཱཀཱརཾ ཨཱརབྦྷ ཀཐེསི.

སོ ཀིར དེཝསིཀཾ བིམྦིསཱརརཱཛཱནཾ པཱཏོཝ ཨཊྛཧི སུམནཔུཔྥནཱལཱི༹ཧི ཨུཔཊྛཧནྟོ ཨཊྛ ཀཧཱཔཎེ ལབྷཏི. ཨཐེཀདིཝསཾ ཏསྨིཾ པུཔྥཱནི གཧེཏྭཱ ནགརཾ པཝིཊྛམཏྟེ བྷགཝཱ མཧཱབྷིཀྑུསངྒྷཔརིཝུཏོ ཚབྦཎྞརཾསིཡོ ཝིསྶཛྫེཏྭཱ མཧཏཱ བུདྡྷཱནུབྷཱཝེན མཧཏིཡཱ བུདྡྷལཱིལཱ༹ཡ ནགརཾ པིཎྜཱཡ པཱཝིསི. བྷགཝཱ ཧི ཨེཀདཱ ཚབྦཎྞརཾསིཡོ ཙཱིཝརེན པཊིཙྪཱདེཏྭཱ ཨཉྙཏརོ པིཎྜཔཱཏིཀོ ཝིཡ ཙརཏི ཏིཾསཡོཛནམགྒཾ ཨངྒུལིམཱལསྶ པཙྩུགྒམནཾ གཙྪནྟོ ཝིཡ, ཨེཀདཱ ཚབྦཎྞརཾསིཡོ ཝིསྶཛྫེཏྭཱ ཀཔིལཝཏྠུཔྤཝེསནཱདཱིསུ ཝིཡ. ཏསྨིམྤི དིཝསེ སརཱིརཏོ ཚབྦཎྞརཾསིཡོ ཝིསྶཛྫེནྟོ མཧནྟེན བུདྡྷཱནུབྷཱཝེན མཧཏིཡཱ བུདྡྷལཱིལཱ༹ཡ རཱཛགཧཾ པཱཝིསི. མཱལཱཀཱརོ བྷགཝཏོ རཏནགྒྷིཡསདིསཾ ཨཏྟབྷཱཝཾ དིསྭཱ དྭཏྟིཾསམཧཱཔུརིསལཀྑཎཨསཱིཏཱནུབྱཉྫནསརཱིརསོབྷགྒཾ ཨོལོཀེཏྭཱ པསནྣཙིཏྟོ ‘‘ཀིཾ ནུ ཁོ སཏྠུ ཨདྷིཀཱརཾ ཀརོམཱི’’ཏི ཙིནྟེཏྭཱ ཨཉྙཾ ཨཔསྶནྟོ ‘‘ཨིམེཧི པུཔྥེཧི བྷགཝནྟཾ པཱུཛེསྶཱམཱི’’ཏི ཙིནྟེཏྭཱ པུན ཙིནྟེསི – ‘‘ཨིམཱནི རཉྙོ ནིབདྡྷཾ ཨུཔཊྛཱནཔུཔྥཱནི, རཱཛཱ ཨིམཱནི ཨལབྷནྟོ མཾ བནྡྷཱཔེཡྻ ཝཱ གྷཱཏཱཔེཡྻ ཝཱ རཊྛཏོ ཝཱ པབྦཱཛེཡྻ, ཀིཾ ནུ ཁོ ཀརོམཱི’’ཏི? ཨཐསྶ ཨེཏདཧོསི ‘‘རཱཛཱ མཾ གྷཱཏེཏུ ཝཱ བནྡྷཱཔེཏུ ཝཱ རཊྛཏོ པབྦཱཛེཏུ ཝཱ, སོ ཧི མཡ྄ཧཾ དདམཱནོཔི ཨིམསྨིཾ ཨཏྟབྷཱཝེ ཛཱིཝིཏམཏྟཾ དྷནཾ དདེཡྻ, སཏྠུཔཱུཛཱ པན མེ ཨནེཀཱསུ ཀཔྤཀོཊཱིསུ ཨལཾ ཧིཏཱཡ ཙེཝ སུཁཱཡ ཙཱ’’ཏི ཨཏྟནོ ཛཱིཝིཏཾ ཏཐཱགཏསྶ པརིཙྩཛི.

སོ ‘‘ཡཱཝ མེ པསནྣཾ ཙིཏྟཾ ན པཏིཀུཊཏི, ཏཾ ཏཱཝདེཝ པཱུཛཾ ཀརིསྶཱམཱི’’ཏི ཧཊྛཏུཊྛོ ཨུདགྒུདགྒོ སཏྠཱརཾ པཱུཛེསི. ཀཐཾ? པཋམཾ ཏཱཝ དྭེཝ པུཔྥམུཊྛིཡོ ཏཐཱགཏསྶ ཨུཔརི ཁིཔི, ཏཱ ཨུཔརིམཏྠཀེ ཝིཏཱནཾ ཧུཏྭཱ ཨཊྛཾསུ. ཨཔརཱ དྭེ མུཊྛིཡོ ཁིཔི, ཏཱ དཀྑིཎཧཏྠཔསྶེན མཱལཱཔཊཙྪནྣེན ཨོཏརིཏྭཱ ཨཊྛཾསུ. ཨཔརཱ དྭེ མུཊྛིཡོ ཁིཔི, ཏཱ པིཊྛིཔསྶེན ཨོཏརིཏྭཱ ཏཐེཝ ཨཊྛཾསུ. ཨཔརཱ དྭེ མུཊྛིཡོ ཁིཔི, ཏཱ ཝཱམཧཏྠཔསྶེན ཨོཏརིཏྭཱ ཏཐེཝ ཨཊྛཾསུ. ཨེཝཾ ཨཊྛ ནཱལི༹ཡོ ཨཊྛ མུཊྛིཡོ ཧུཏྭཱ ཙཏཱུསུ ཋཱནེསུ ཏཐཱགཏཾ པརིཀྑིཔིཾསུ. པུརཏོ གམནདྭཱརམཏྟམེཝ ཨཧོསི. པུཔྥཱནཾ ཝཎྚཱནི ཨནྟོ ཨཧེསུཾ, པཏྟཱནི བཧིམུཁཱནི. བྷགཝཱ རཛཏཔཏྟཔརིཀྑིཏྟོ ཝིཡ ཧུཏྭཱ པཱཡཱསི. པུཔྥཱནི ཨཙིཏྟཀཱནིཔི སཙིཏྟཀཾ ནིསྶཱཡ སཙིཏྟཀཱནི ཝིཡ ཨབྷིཛྫིཏྭཱ ཨཔཏིཏྭཱ སཏྠཱརཱ སདྡྷིཾཡེཝ གཙྪནྟི, ཋིཏཋིཏཊྛཱནེ ཏིཊྛནྟི. སཏྠུ སརཱིརཏོ སཏསཧསྶཝིཛྫུལཏཱ ཝིཡ རཾསིཡོ ནིཀྑམིཾསུ. པུརཏོ ཙ པཙྪཏོ ཙ དཀྑིཎཏོ ཙ ཝཱམཏོ ཙ སཱིསམཏྠཀཏོ ཙ ནིརནྟརཾ ནིཀྑནྟརཾསཱིསུ ཨེཀཱཔི སམྨུཁསམྨུཁཊྛཱནེནེཝ ཨཔལཱཡིཏྭཱ སབྦཱཔི སཏྠཱརཾ ཏིཀྑཏྟུཾ པདཀྑིཎཾ ཀཏྭཱ ཏརུཎཏཱལཀྑནྡྷཔྤམཱཎཱ ཧུཏྭཱ པུརཏོ ཨེཝ དྷཱཝནྟི. སཀལནགརཾ སངྑུབྷི. ཨནྟོནགརེ ནཝ ཀོཊིཡོ, བཧིནགརེ ནཝ ཀོཊིཡོཏི ཨཊྛཱརསསུ ཀོཊཱིསུ ཨེཀོཔི པུརིསོ ཝཱ ཨིཏྠཱི ཝཱ བྷིཀྑཾ གཧེཏྭཱ ཨནིཀྑནྟོ ནཱམ ནཏྠི. མཧཱཛནོ སཱིཧནཱདཾ ནདནྟོ ཙེལུཀྑེཔསཧསྶཱནི ཀརོནྟོ སཏྠུ པུརཏོཝ གཙྪཏི. སཏྠཱཔི མཱལཱཀཱརསྶ གུཎཾ པཱཀཊཾ ཀཱཏུཾ ཏིགཱཝུཏཔྤམཱཎེ ནགརེ བྷེརིཙརཎམགྒེནེཝ ཨཙརི. མཱལཱཀཱརསྶ སཀལསརཱིརཾ པཉྩཝཎྞཱཡ པཱིཏིཡཱ པརིཔཱུརི.

སོ ཐོཀཉྙེཝ ཏཐཱགཏེན སདྡྷིཾ ཙརིཏྭཱ མནོསིལཱརསེ ནིམུགྒོ ཝིཡ བུདྡྷརསྨཱིནཾ ཨནྟོ པཝིཊྛོ སཏྠཱརཾ ཐོམེཏྭཱ ཝནྡིཏྭཱ ཏུཙྪཔཙྪིམེཝ གཧེཏྭཱ གེཧཾ ཨགམཱསི. ཨཐ ནཾ བྷརིཡཱ པུཙྪི ‘‘ཀཧཾ པུཔྥཱནཱི’’ཏི? ‘‘སཏྠཱ མེ པཱུཛིཏོ’’ཏི. ‘‘རཉྙོ དཱནི ཀིཾ ཀརིསྶསཱི’’ཏི? ‘‘རཱཛཱ མཾ གྷཱཏེཏུ ཝཱ རཊྛཏོ ཝཱ ནཱིཧརཏུ, ཨཧཾ ཛཱིཝིཏཾ པརིཙྩཛིཏྭཱ སཏྠཱརཾ པཱུཛེསིཾ, སབྦཔུཔྥཱནི ཨཊྛ མུཊྛིཡོཝ ཨཧེསུཾ, ཨེཝརཱུཔཱ ནཱམ པཱུཛཱ ཛཱཏཱ. མཧཱཛནོ ཨུཀྐུཊྛིསཧསྶཱནི ཀརོནྟོ སཏྠཱརཱ སདྡྷིཾ ཙརཏི, ཡོ ཨེས མཧཱཛནསྶ ཨུཀྐུཊྛིསདྡོ, ཏསྨིཾ ཋཱནེ ཨེསོ’’ཏི. ཨཐསྶ བྷརིཡཱ ཨནྡྷབཱལཏཱཡ ཨེཝརཱུཔེ པཱཊིཧཱརིཡེ པསཱདཾ ནཱམ ཨཛནེཏྭཱ ཏཾ ཨཀྐོསིཏྭཱ པརིབྷཱསིཏྭཱ ‘‘རཱཛཱནོ ནཱམ ཙཎྜཱ, སཀིཾ ཀུདྡྷཱ ཧཏྠཔཱདཱདིཙྪེདནེན བཧུམྤི ཨནཏྠཾ ཀརོནྟི, ཏཡཱ ཀཏཀམྨེན མཡ྄ཧམྤི ཨནཏྠོ སིཡཱ’’ཏི པུཏྟེ ཨཱདཱཡ རཱཛཀུལཾ གནྟྭཱ རཉྙཱ པཀྐོསིཏྭཱ ‘‘ཀིཾ ཨེཏ’’ནྟི པུཙྪིཏཱ ཨཱཧ – ‘‘མམ སཱམིཀོ ཏུམྷཱཀཾ ཨུཔཊྛཱནཔུཔྥེཧི སཏྠཱརཾ པཱུཛེཏྭཱ ཏུཙྪཧཏྠོ གྷརཾ ཨཱགནྟྭཱ ‘ཀཧཾ པུཔྥཱནཱི’ཏི མཡཱ པུཊྛོ ཨིདཾ ནཱམ ཝདེསི, ཨཧཾ ཏཾ པརིབྷཱསིཏྭཱ ‘རཱཛཱནོ ནཱམ ཙཎྜཱ, སཀིཾ ཀུདྡྷཱ ཧཏྠཔཱདཱདིཙྪེདནེན བཧུམྤི ཨནཏྠཾ ཀརོནྟི, ཏཡཱ ཀཏཀམྨེན མཡ྄ཧམྤི ཨནཏྠོ སིཡཱ’ཏི ཏཾ ཚཌྜེཏྭཱ ཨིདྷཱགཏཱ, ཏེན ཀཏཾ ཀམྨཾ སུཀཏཾ ཝཱ ཧོཏུ, དུཀྐཊཾ ཝཱ, ཏསྶེཝེཏཾ, མཡཱ ཏསྶ ཚཌྜིཏབྷཱཝཾ ཛཱནཱཧི, དེཝཱ’’ཏི. རཱཛཱ པཋམདསྶནེནེཝ སོཏཱཔཏྟིཕལཾ པཏྟོ སདྡྷོ པསནྣོ ཨརིཡསཱཝཀོ ཙིནྟེསི – ‘‘ཨཧོ ཨཡཾ ཨིཏྠཱི ཨནྡྷབཱལཱ, ཨེཝརཱུཔེ གུཎེ པསཱདཾ ན ཨུཔྤཱདེསཱི’’ཏི. སོ ཀུདྡྷོ ཝིཡ ཧུཏྭཱ, ‘‘ཨམྨ, ཀིཾ ཝདེསི, མཡ྄ཧཾ ཨུཔཊྛཱནཔུཔྥེཧི ཏེན པཱུཛཱ ཀཏཱ’’ཏི? ‘‘ཨཱམ, དེཝཱ’’ཏི. ‘‘བྷདྡཀཾ ཏེ ཀཏཾ ཏཾ ཚཌྜེནྟིཡཱ, མམ པུཔྥེཧི པཱུཛཱཀཱརསྶ ཨཧཾ ཀཏྟབྦཡུཏྟཀཾ ཛཱནིསྶཱམཱི’’ཏི ཏཾ ཨུཡྻོཛེཏྭཱ ཝེགེན སཏྠུ སནྟིཀཾ གནྟྭཱ ཝནྡིཏྭཱ སཏྠཱརཱ སདྡྷིཾཡེཝ ཝིཙརི.

སཏྠཱ རཉྙོ ཙིཏྟཔྤསཱདཾ ཉཏྭཱ བྷེརིཙརཎཝཱིཐིཡཱ ནགརཾ ཙརིཏྭཱ རཉྙོ གྷརདྭཱརཾ ཨགམཱསི. རཱཛཱ པཏྟཾ གཧེཏྭཱ སཏྠཱརཾ གེཧཾ པཝེསེཏུཀཱམོ ཨཧོསི. སཏྠཱ པན རཱཛངྒཎེཡེཝ ནིསཱིདནཱཀཱརཾ དསྶེསི. རཱཛཱ ཏཾ ཉཏྭཱ ‘‘སཱིགྷཾ མཎྜཔཾ ཀརོཐཱ’’ཏི ཏངྑཎཉྙེཝ མཎྜཔཾ ཀཱརཱཔེསི. ནིསཱིདི སཏྠཱ སདྡྷིཾ བྷིཀྑུསངྒྷེན. ཀསྨཱ པན སཏྠཱ རཱཛགེཧཾ ན པཱཝིསི?

ཨེཝཾ ཀིརསྶ ཨཧོསི – ‘‘སཙཱཧཾ ཨནྟོ པཝིསིཏྭཱ ནིསཱིདེཡྻཾ, མཧཱཛནོ མཾ དཊྛུཾ ན ལབྷེཡྻ, མཱལཱཀཱརསྶ གུཎོ པཱཀཊོ ན བྷཝེཡྻ, རཱཛངྒཎེ པན མཾ ནིསིནྣཾ མཧཱཛནོ དཊྛུཾ ལབྷིསྶཏི, མཱལཱཀཱརསྶ གུཎོ པཱཀཊོ བྷཝིསྶཏཱི’’ཏི. གུཎཝནྟཱནཉྷི གུཎཾ བུདྡྷཱ ཨེཝ པཱཀཊཾ ཀཱཏུཾ སཀྐོནྟི, ཨཝསེསཛནོ གུཎཝནྟཱནཾ གུཎཾ ཀཐེནྟོ མཙྪརཱཡཏི. ཙཏྟཱརོ པུཔྥཔཊཱ ཙཏུདྡིསཾ ཨཊྛཾསུ. མཧཱཛནོ སཏྠཱརཾ པརིཝཱརེསི. རཱཛཱ བུདྡྷཔྤམུཁཾ བྷིཀྑུསངྒྷཾ པཎཱིཏེནཱཧཱརེན པརིཝིསི. སཏྠཱ བྷཏྟཀིཙྩཱཝསཱནེ ཨནུམོདནཾ ཀཏྭཱ པུརིམནཡེནེཝ ཙཏཱུཧི པུཔྥཔཊེཧི པརིཀྑིཏྟོ སཱིཧནཱདཾ ནདནྟོ མཧཱཛནེན པརིཝུཏོ ཝིཧཱརཾ ཨགམཱསི. རཱཛཱ སཏྠཱརཾ ཨནུགནྟྭཱ ནིཝཏྟོ མཱལཱཀཱརཾ པཀྐོསཱཔེཏྭཱ ‘‘མམ ཨཱཧརིཏཔུཔྥེཧི ཀིནྟི ཀཏྭཱ སཏྠཱརཾ པཱུཛེསཱི’’ཏི པུཙྪི. མཱལཱཀཱརོ ‘‘རཱཛཱ མཾ གྷཱཏེཏུ ཝཱ རཊྛཏོ ཝཱ པབྦཱཛེཏཱུཏི ཛཱིཝིཏཾ པརིཙྩཛིཏྭཱ པཱུཛེསིཾ དེཝཱ’’ཏི ཨཱཧ. རཱཛཱ ‘‘ཏྭཾ མཧཱཔུརིསོ ནཱམཱ’’ཏི ཝཏྭཱ ཨཊྛ ཧཏྠཱི ཙ ཨསྶེ ཙ དཱསེ ཙ དཱསིཡོ ཙ མཧཱཔསཱདྷནཱནི ཙ ཨཊྛ ཀཧཱཔཎསཧསྶཱནི ཙ རཱཛཀུལཏོ ནཱིཧརིཏྭཱ སབྦཱལངྐཱརཔྤཊིམཎྜིཏཱ ཨཊྛ ནཱརིཡོ ཙ ཨཊྛ གཱམཝརེ ཙཱཏི ཨིདཾ སབྦཊྛཀཾ ནཱམ དཱནཾ ཨདཱསི.

ཨཱནནྡཏྠེརོ ཙིནྟེསི – ‘‘ཨཛྫ པཱཏོཝ པཊྛཱཡ སཱིཧནཱདསཧསྶཱནི ཙེཝ ཙེལུཀྑེཔསཧསྶཱནི ཙ པཝཏྟནྟི, ཀོ ནུ ཁོ མཱལཱཀཱརསྶ ཝིཔཱཀོ’’ཏི? སོ སཏྠཱརཾ པུཙྪི. ཨཐ ནཾ སཏྠཱ ཨཱཧ – ‘‘ཨཱནནྡ, ཨིམིནཱ མཱལཱཀཱརེན ཨཔྤམཏྟཀཾ ཀམྨཾ ཀཏ’’ནྟི མཱ སལླཀྑེསི, ཨཡཉྷི མཡ྄ཧཾ ཛཱིཝིཏཾ པརིཙྩཛིཏྭཱ པཱུཛཾ ཨཀཱསི. སོ ཨེཝཾ མཡི ཙིཏྟཾ པསཱདེཏྭཱ –

‘‘ཀཔྤཱནཾ སཏསཧསྶཾ, དུགྒཏིཾ ན གམིསྶཏི;

ཋཏྭཱ དེཝམནུསྶེསུ, ཕལཾ ཨེཏསྶ ཀམྨུནོ;

པཙྪཱ པཙྩེཀསམྦུདྡྷོ, སུམནོ ནཱམ བྷཝིསྶཏཱི’’ཏི. –

ཨཱཧ. སཏྠུ པན ཝིཧཱརཾ གནྟྭཱ གནྡྷཀུཊིཔཝིསནཀཱལེ ཏཱནི པུཔྥཱནི དྭཱརཀོཊྛཀེ པཏིཾསུ. སཱཡནྷསམཡེ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ – ‘‘ཨཧོ ཨཙྪརིཡཾ མཱལཱཀཱརསྶ ཀམྨཾ, དྷརམཱནཀབུདྡྷསྶ ཛཱིཝིཏཾ པརིཙྩཛིཏྭཱ པུཔྥཔཱུཛཾ ཀཏྭཱ ཏངྑཎཉྙེཝ སབྦཊྛཀཾ ནཱམ ལབྷཏཱི’’ཏི. སཏྠཱ གནྡྷཀུཊིཏོ ནིཀྑམིཏྭཱ ཏིཎྞཾ གམནཱནཾ ཨཉྙཏརེན གམནེན དྷམྨསབྷཾ གནྟྭཱ བུདྡྷཱསནེ ནིསཱིདིཏྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘ཨཱམ, བྷིཀྑཝེ, ཡསྶ ཀམྨསྶ ཀཏཏྟཱ པཙྪཱནུཏཔྤཾ ན ཧོཏི, ཨནུསྶརིཏཱནུསྶརིཏཀྑཎེ སོམནསྶམེཝ ཨུཔྤཛྫཏི, ཨེཝརཱུཔཾ ཀམྨཾ ཀཏྟབྦམེཝཱ’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༦༨.

‘‘ཏཉྩ ཀམྨཾ ཀཏཾ སཱདྷུ, ཡཾ ཀཏྭཱ ནཱནུཏཔྤཏི;

ཡསྶ པཏཱིཏོ སུམནོ, ཝིཔཱཀཾ པཊིསེཝཏཱི’’ཏི.

ཏཏྠ ཡཾ ཀཏྭཱཏི ཡཾ དེཝམནུསྶསམྤཏྟཱིནཉྩེཝ ནིབྦཱནསམྤཏྟིཡཱ ཙ ནིབྦཏྟནསམཏྠཾ སུཁུདྲཡཾ ཀམྨཾ ཀཏྭཱ ནཱནུཏཔྤཏི, ཨཐ ཁོ དིཊྛདྷམྨེཡེཝ ཨནུསྶརིཏཱནུསྶརིཏཀྑཎེཡེཝ པཱིཏིཝེགེན པཏཱིཏོ སོམནསྶཝེགེན ཙ སུམནོ ཧུཏྭཱ ཨཱཡཏིཾ པཱིཏིསོམནསྶཛཱཏོ ཧུཏྭཱ ཝིཔཱཀཾ པཊིསེཝཏི, ཏཾ ཀམྨཾ ཀཏཾ སཱདྷུ བྷདྡཀནྟི.

དེསནཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསཱིཏི.

སུམནམཱལཱཀཱརཝཏྠུ ནཝམཾ.

༡༠. ཨུཔྤལཝཎྞཏྠེརཱིཝཏྠུ

མདྷུཝཱ མཉྙཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨུཔྤལཝཎྞཏྠེརིཾ ཨཱརབྦྷ ཀཐེསི.

སཱ ཀིར པདུམུཏྟརབུདྡྷསྶ པཱདམཱུལེ པཏྠནཾ པཊྛཔེཏྭཱ ཀཔྤསཏསཧསྶཾ པུཉྙཱནི ཀུརུམཱནཱ དེཝེསུ ཙ མནུསྶེསུ ཙ སཾསརནྟཱི ཨིམསྨིཾ བུདྡྷུཔྤཱདེ དེཝལོཀཏོ ཙཝིཏྭཱ སཱཝཏྠིཡཾ སེཊྛིཀུལེ པཊིསནྡྷིཾ གཎྷི. ནཱིལུཔྤལགབྦྷསམཱནཝཎྞཏཱཡ ཙསྶཱ ཨུཔྤལཝཎྞཱཏྭེཝ ནཱམཾ ཨཀཾསུ. ཨཐསྶཱ ཝཡཔྤཏྟཀཱལེ སཀལཛམྦུདཱིཔེ རཱཛཱནོ ཙ སེཊྛིནོ ཙ སེཊྛིསྶ སནྟིཀཾ སཱསནཾ པཧིཎིཾསུ – ‘‘དྷཱིཏརཾ ཨམྷཱཀཾ དེཏཱུ’’ཏི. ཨཔཧིཎནྟོ ནཱམ ནཱཧོསི. ཏཏོ སེཊྛི ཙིནྟེསི – ‘‘ཨཧཾ སབྦེསཾ མནཾ གཧེཏུཾ ན སཀྑིསྶཱམི, ཨུཔཱཡཾ པནེཀཾ ཀརིསྶཱམཱི’’ཏི དྷཱིཏརཾ པཀྐོསཱཔེཏྭཱ, ‘‘ཨམྨ, པབྦཛིཏུཾ སཀྑིསྶསཱི’’ཏི ཨཱཧ. ཏསྶཱ པཙྪིམབྷཝིཀཏྟཱ ཏཾ ཝཙནཾ སཱིསེ ཨཱསིཏྟཾ སཏཔཱཀཏེལཾ ཝིཡ ཨཧོསི. ཏསྨཱ པིཏརཾ ‘‘པབྦཛིསྶཱམི, ཏཱཏཱ’’ཏི ཨཱཧ. སོ ཏསྶཱ མཧནྟཾ སཀྐཱརཾ ཀཏྭཱ བྷིཀྑུནཱིཨུཔསྶཡཾ ནེཏྭཱ པབྦཱཛེསི. ཏསྶཱ ཨཙིརཔབྦཛིཏཱཡ ཨེཝ ཨུཔོསཐཱགཱརེ ཀཱལཝཱརོ པཱཔུཎི. སཱ དཱིཔཾ ཛཱལེཏྭཱ ཨུཔོསཐཱགཱརཾ སམྨཛྫིཏྭཱ དཱིཔསིཁཱཡ ནིམིཏྟཾ གཎྷིཏྭཱ ཋིཏཱཝ པུནཔྤུནཾ ཨོལོཀཡམཱནཱ ཏེཛོཀསིཎཱརམྨཎཾ ཛྷཱནཾ ནིབྦཏྟེཏྭཱ ཏམེཝ པཱདཀཾ ཀཏྭཱ ཨརཧཏྟཾ པཱཔུཎི སདྡྷིཾ པཊིསམྦྷིདཱཧི ཙེཝ ཨབྷིཉྙཱཧི ཙ.

སཱ ཨཔརེན སམཡེན ཛནཔདཙཱརིཀཾ ཙརིཏྭཱ པཙྩཱགནྟྭཱ ཨནྡྷཝནཾ པཱཝིསི. ཏདཱ བྷིཀྑུནཱིནཾ ཨརཉྙཝཱསོ ཨཔྤཊིཀྑིཏྟོ ཧོཏི. ཨཐསྶཱ ཏཏྠ ཀུཊིཀཾ ཀཏྭཱ མཉྩཀཾ པཉྙཱཔེཏྭཱ སཱཎིཡཱ པརིཀྑིཔིཾསུ. སཱ སཱཝཏྠིཡཾ པིཎྜཱཡ པཝིསིཏྭཱ ནིཀྑམི. མཱཏུལཔུཏྟོ པནསྶཱ ནནྡམཱཎཝོ ནཱམ གིཧིཀཱལཏོ པཊྛཱཡ པཊིབདྡྷཙིཏྟོ. སོ ཏསྶཱ ཨཱགཏབྷཱཝཾ སུཏྭཱ ཐེརིཡཱ ཨཱགམནཏོ པུརེཏརམེཝ ཨནྡྷཝནཾ གནྟྭཱ ཏཾ ཀུཊིཀཾ པཝིསིཏྭཱ ཧེཊྛཱམཉྩཀེ ནིལཱིནོ ཐེརིཡཱ ཨཱགནྟྭཱ ཀུཊིཀཾ པཝིསིཏྭཱ དྭཱརཾ པིདྷཱཡ མཉྩཀེ ནིསིནྣམཏྟཱཡ བཧི ཨཱཏཔཏོ ཨཱགཏཏྟཱ ཙཀྑུཔཐེ ཨནྡྷཀཱརེ ཨཝིགཏེཡེཝ ཧེཊྛཱམཉྩཀཏོ ནིཀྑམིཏྭཱ མཉྩཀཾ ཨབྷིརུཡ྄ཧ ‘‘མཱ ནསྶི བཱལ, མཱ ནསྶི བཱལཱ’’ཏི ཐེརིཡཱ ཝཱརིཡམཱནོཡེཝ ཨབྷིབྷཝིཏྭཱ ཨཏྟནཱ པཏྠིཏཀམྨཾ ཀཏྭཱ པཱཡཱསི. ཨཐསྶ ཨགུཎཾ དྷཱརེཏུཾ ཨསཀྐོནྟཱི ཝིཡ མཧཱཔཐཝཱི དྭེདྷཱ བྷིཛྫི. སོ པཐཝིཾ པཝིཊྛོ གནྟྭཱ མཧཱཨཝཱིཙིམྷི ཨེཝ ནིབྦཏྟི. ཐེརཱིཔི ཏམཏྠཾ བྷིཀྑུནཱིནཾ ཨཱརོཙེསི. བྷིཀྑུནིཡོ བྷིཀྑཱུནཾ ཨེཏམཏྠཾ ཨཱརོཙེསུཾ. བྷིཀྑཱུ བྷགཝཏོ ཨཱརོཙཡིཾསུ. ཏཾ སུཏྭཱ སཏྠཱ བྷིཀྑཱུ ཨཱམནྟེཏྭཱ, ‘‘བྷིཀྑཝེ, བྷིཀྑུབྷིཀྑཱུནཱི ཨུཔཱསཀཨུཔཱསིཀཱསུ ཡོ ཀོཙི བཱལོ པཱཔཀམྨཾ ཀརོནྟོ མདྷུསཀྑརཱདཱིསུ ཀིཉྩི དེཝ མདྷུརརསཾ ཁཱདམཱནོ པུརིསོ ཝིཡ ཏུཊྛཧཊྛོ ཨུདགྒུདགྒོ ཝིཡ ཀརོཏཱི’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༦༩.

‘‘མདྷུཝཱ མཉྙཏི བཱལོ, ཡཱཝ པཱཔཾ ན པཙྩཏི;

ཡདཱ ཙ པཙྩཏི པཱཔཾ, བཱལོ དུཀྑཾ ནིགཙྪཏཱི’’ཏི.

ཏཏྠ མདྷུཝཱཏི བཱལསྶ ཧི པཱཔཾ ཨཀུསལཀམྨཾ ཀརོནྟསྶ ཏཾ ཀམྨཾ མདྷུ ཝིཡ མདྷུརརསཾ ཝིཡ ཨིཊྛཾ ཀནྟཾ མནཱཔཾ ཝིཡ ཨུཔཊྛཱཏི. ཨིཏི ནཾ སོ མདྷུཾཝ མཉྙཏི. ཡཱཝཱཏི ཡཏྟཀཾ ཀཱལཾ. པཱཔཾ ན པཙྩཏཱིཏི དིཊྛདྷམྨེ ཝཱ སམྤརཱཡེ ཝཱ ཝིཔཱཀཾ ན དེཏི, ཏཱཝ ནཾ ཨེཝཾ མཉྙཏི. ཡདཱ ཙཱཏི ཡདཱ པནསྶ དིཊྛདྷམྨེ ཝཱ ཝིཝིདྷཱ ཀམྨཀཱརཎཱ ཀཡིརམཱནསྶ, སམྤརཱཡེ ཝཱ ནིརཡཱདཱིསུ མཧཱདུཀྑཾ ཨནུབྷཝནྟསྶ ཏཾ པཱཔཾ པཙྩཏི, ཨཐ སོ བཱལོ དུཀྑཾ ནིགཙྪཏི ཝིནྡཏི པཊིལབྷཏཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ.

ཨཔརེན པན སམཡེན དྷམྨསབྷཱཡཾ མཧཱཛནོ ཀཐཾ སམུཊྛཱཔེསི ‘‘ཁཱིཎཱསཝཱཔི མཉྙེ ཀཱམསུཁཾ སཱདིཡནྟི, ཀཱམཾ སེཝནྟི, ཀིཾ ན སེཝིསྶནྟི, ན ཧི ཨེཏེ ཀོལཱ༹པརུཀྑཱ, ན ཙ ཝམྨིཀཱ ཨལླམཾསསརཱིརཱཝ, ཏསྨཱ ཨེཏེཔི ཀཱམསུཁཾ སཱདིཡནྟི, ཀཱམཾ སེཝནྟཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘ན, བྷིཀྑཝེ, ཁཱིཎཱསཝཱ ཀཱམསུཁཾ སཱདིཡནྟི, ན ཀཱམཾ སེཝནྟི. ཡཐཱ ཧི པདུམཔཏྟེ པཏིཏཾ ཨུདཀབིནྡུ, ན ཝིལིམྤཏི, ན སཎྛཱཏི, ཝིནིཝཏྟེཏྭཱ པཏཏེཝ, ཡཐཱ ཙ ཨཱརགྒེ སཱསཔོ ན ཝིལིམྤཏི, ན སཎྛཱཏི, ཝིནིཝཏྟེཏྭཱ པཏཏེཝ, ཨེཝཾ ཁཱིཎཱསཝསྶ ཙིཏྟེ དུཝིདྷོཔི ཀཱམོ ན ཝིལིམྤཏི, ན སཎྛཱཏཱི’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ བྲཱཧྨཎཝགྒེ གཱཐམཱཧ –

‘‘ཝཱརི པོཀྑརཔཏྟེཝ, ཨཱརགྒེརིཝ སཱསཔོ;

ཡོ ན ལིམྤཏི ཀཱམེསུ, ཏམཧཾ བྲཱུམི བྲཱཧྨཎ’’ནྟི. (དྷ. པ. ༤༠༡);

ཨིམིསྶཱ ཨཏྠོ བྲཱཧྨཎཝགྒེཡེཝ ཨཱཝི བྷཝིསྶཏི. སཏྠཱ པན རཱཛཱནཾ པསེནདིཀོསལཾ པཀྐོསཱཔེཏྭཱ, ‘‘མཧཱརཱཛ, ཨིམསྨིཾ སཱསནེ ཡཐེཝ ཀུལཔུཏྟཱ, ཨེཝཾ ཀུལདྷཱིཏརོཔི མཧནྟཾ ཉཱཏིགཎཉྩ བྷོགཀྑནྡྷཉྩ པཧཱཡ པབྦཛིཏྭཱ ཨརཉྙེ ཝིཧརནྟི. ཏཱ ཨེཝཾ ཝིཧརམཱནཱ རཱགརཏྟཱ པཱཔཔུགྒལཱ ཨོམཱནཱཏིམཱནཝསེན ཝིཧེཋེནྟིཔི, བྲཧྨཙརིཡནྟརཱཡམྤི པཱཔེནྟི, ཏསྨཱ བྷིཀྑུནིསངྒྷསྶ ཨནྟོནགརེ ཝསནཊྛཱནཾ ཀཱཏུཾ ཝཊྚཏཱི’’ཏི. རཱཛཱ ‘‘སཱདྷཱུ’’ཏི སམྤཊིཙྪིཏྭཱ ནགརསྶ ཨེཀཔསྶེ བྷིཀྑུནིསངྒྷསྶ ཝསནཊྛཱནཾ ཀཱརཱཔེསི. ཏཏོ པཊྛཱཡ བྷིཀྑུནིཡོ ཨནྟོགཱམེཡེཝ ཝསནྟཱིཏི.

ཨུཔྤལཝཎྞཏྠེརཱིཝཏྠུ དསམཾ.

༡༡. ཛམྦུཀཏྠེརཝཏྠུ

མཱསེ མཱསེཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཛམྦུཀཾ ཨཱཛཱིཝཀཾ ཨཱརབྦྷ ཀཐེསི.

ཨཏཱིཏེ ཀིར ཀསྶཔསམྨཱསམྦུདྡྷཀཱལེ གཱམཝཱསཱི ཨེཀོ ཀུཊུམྦིཀོ ཨེཀསྶ ཐེརསྶ ཝིཧཱརཾ ཀཏྭཱ ཏཾ ཏཏྠ ཝིཧརནྟཾ ཙཏཱུཧི པཙྩཡེཧི ཨུཔཊྛཧི. ཐེརོ ཏསྶ གེཧེ ནིབདྡྷཾ བྷུཉྫཏི. ཨཐེཀོ ཁཱིཎཱསཝོ བྷིཀྑུ དིཝཱ པིཎྜཱཡ ཙརནྟོ ཏསྶ གེཧདྭཱརཾ པཱཔུཎི. ཀུཊུམྦིཀོ ཏཾ དིསྭཱ ཏསྶ ཨིརིཡཱཔཐེ པསནྣོ གེཧཾ པཝེསེཏྭཱ སཀྐཙྩཾ པཎཱིཏེན བྷོཛནེན པརིཝིསིཏྭཱ, ‘‘བྷནྟེ, ཨིམཾ སཱཊཀཾ རཛིཏྭཱ ནིཝཱསེཡྻཱཐཱ’’ཏི མཧནྟཾ སཱཊཀཾ དཏྭཱ, ‘‘བྷནྟེ, ཀེསཱ ཝོ དཱིགྷཱ, ཏུམྷཱཀཾ ཀེསོརོཔནཏྠཱཡ ནྷཱཔིཏཾ ཨཱནེསྶཱམི, སཡནཏྠཱཡ ཙ ཝོ མཉྩཀཾ གཱཧཱཔེཏྭཱ ཨཱགམིསྶཱམཱི’’ཏི ཨཱཧ. ནིབདྡྷཾ གེཧེ བྷུཉྫནྟོ ཀུལཱུཔཀོ བྷིཀྑུ ཏཾ ཏསྶ སཀྐཱརཾ དིསྭཱ ཙིཏྟཾ པསཱདེཏུཾ ནཱསཀྑི, ‘‘ཨཡཾ ཏཾ མུཧུཏྟཾ དིཊྛཀསྶ ཨེཝརཱུཔཾ སཀྐཱརཾ ཀརོཏི, ནིབདྡྷཾ གེཧེ བྷུཉྫནྟསྶ པན མཡ྄ཧཾ ན ཀརོཏཱི’’ཏི ཙིནྟེཏྭཱ ཝིཧཱརཾ ཨགམཱསི. ཨིཏརོཔི ཏེནེཝ སདྡྷིཾ གནྟྭཱ ཀུཊུམྦིཀེན དིནྣསཱཊཀཾ རཛིཏྭཱ ནིཝཱསེསི. ཀུཊམྦིཀོཔི ནྷཱཔིཏཾ ཨཱདཱཡ གནྟྭཱ ཐེརསྶ ཀེསེ ཨོཧཱརཱཔེཏྭཱ མཉྩཀཾ ཨཏྠརཱཔེཏྭཱ, ‘‘བྷནྟེ, ཨིམསྨིཾཡེཝ མཉྩཀེ སཡཐཱ’’ཏི ཝཏྭཱ དྭེཔི ཐེརེ སྭཱཏནཱཡ ནིམནྟེཏྭཱ པཀྐཱམི.

ནེཝཱསིཀོ ཏསྶ ཏཾ སཀྐཱརཾ ཀཡིརམཱནཾ ཨདྷིཝཱསེཏུཾ ནཱསཀྑི. ཨཐསྶ སོ སཱཡཾ ཐེརསྶ ནིཔནྣཊྛཱནཾ གནྟྭཱ ཙཏཱུཧཱཀཱརེཧི ཐེརཾ ཨཀྐོསི, ‘‘ཨཱཝུསོ, ཨཱགནྟུཀ ཀུཊུམྦིཀསྶ ཏེ གེཧེ བྷཏྟཾ བྷུཉྫནཏོ ཝརཏརཾ མཱིལ༹ྷཾ ཁཱདིཏུཾ, ཀུཊུམྦིཀེན ཨཱནཱིཏནྷཱཔིཏེན ཀེསོཧཱརཱཔནཏོ ཝརཏརཾ ཏཱལཊྛིཀེན ཀེསེ ལུཉྩཱཔེཏུཾ. ཀུཊུམྦིཀེན དིནྣསཱཊཀནིཝཱསནཏོ ཝརཏརཾ ནགྒེན ཝིཙརིཏུཾ, ཀུཊུམྦིཀེན ཨཱབྷཏམཉྩཀེ ནིཔཛྫནཏོ ཝརཏརཾ བྷཱུམིཡཾ ནིཔཛྫིཏུ’’ནྟི. ཐེརོཔི ‘‘མཱ ཨེས བཱལོ མཾ ནིསྶཱཡ ནསྶཱི’’ཏི ནིམནྟནཾ ཨནཱདིཡིཏྭཱ པཱཏོཝ ཨུཊྛཱཡ ཡཐཱསུཁཾ ཨགམཱསི. ནེཝཱསིཀོཔི པཱཏོཝ ཝིཧཱརེ ཀཏྟབྦཝཏྟཾ ཀཏྭཱ བྷིཀྑཱཙཱརཝེལཱཡ ‘‘ཨིདཱནིཔི ཨཱགནྟུཀོ ནིདྡཱཡཏི, གྷཎྜིཀསདྡེན པབུཛ྄ཛྷེཡྻཱ’’ཏི སཉྙཱཡ ནཁཔིཊྛེནེཝ གྷཎྜིཾ པཧརིཏྭཱ གཱམཾ པིཎྜཱཡ པཱཝིསི. ཀུཊུམྦིཀོཔི སཀྐཱརཾ ཀཏྭཱ ཐེརཱནཾ ཨཱགམནམགྒཾ ཨོལོཀེནྟོ ནེཝཱསིཀཾ དིསྭཱ, ‘‘བྷནྟེ, ཐེརོ ཀུཧི’’ནྟི པུཙྪི. ཨཐ ནཾ ནེཝཱསིཀོ ‘‘མཱ, ཨཱཝུསོ, ཀིཉྩི ཨཝཙ, ཏུཡ྄ཧཾ ཀུལཱུཔཀོ ཧིཡྻོ, ཏཝ ནིཀྑནྟཝེལཱཡ ཨོཝརཀཾ པཝིསིཏྭཱ ནིདྡཾ ཨོཀྐནྟོ པཱཏོཝ ཨུཊྛཱཡ མམ ཝིཧཱརསམྨཛྫནསདྡམྤི པཱནཱིཡགྷཊཔརིབྷོཛནཱིཡགྷཊེསུ ཨུདཀསིཉྩནསདྡམྤི གྷཎྜིཀསདྡམྤི ཀརོནྟསྶ ན ཛཱནཱཏཱི’’ཏི ཨཱཧ. ཀུཊུམྦིཀོ ཙིནྟེསི – ‘‘ཏཱདིསཱཡ ཨིརིཡཱཔཐསམྤཏྟིཡཱ སམནྣཱགཏསྶ མེ ཨཡྻསྶ ཡཱཝ ཨིམམྷཱ ཀཱལཱ ནིདྡཱཡནཾ ནཱམ ནཏྠི, མཾ པན ཏསྶ སཀྐཱརཾ ཀརོནྟཾ དིསྭཱ ཨདྡྷཱ ཨིམིནཱ བྷདནྟེན ཀིཉྩི ཝུཏྟཾ བྷཝིསྶཏཱི’’ཏི. སོ ཨཏྟནོ པཎྜིཏབྷཱཝེན ཏཾ སཀྐཙྩཾ བྷོཛེཏྭཱ ཏསྶ པཏྟཾ སཱདྷུཀཾ དྷོཝིཏྭཱ ནཱནགྒརསབྷོཛནསྶ པཱུརེཏྭཱ, ‘‘བྷནྟེ, སཙེ མེ ཨཡྻཾ པསྶེཡྻཱཐ, ཨིམམསྶ པིཎྜཔཱཏཾ དདེཡྻཱཐཱ’’ཏི ཨཱཧ.

ཨིཏརོ ཏཾ གཧེཏྭཱཝ ཙིནྟེསི – ‘‘སཙེ སོ ཨེཝརཱུཔཾ པིཎྜཔཱཏཾ བྷུཉྫིསྶཏི, ཨིམསྨིཾཡེཝ ཋཱནེ པལུདྡྷོ བྷཝིསྶཏཱི’’ཏི ཨནྟརཱམགྒེ ཏཾ པིཎྜཔཱཏཾ ཚཌྜེཏྭཱ ཐེརསྶ ཝསནཊྛཱནཾ གནྟྭཱ ཏཾ ཏཏྠ ཨོལོཀེནྟོ ན ཨདྡས. ཨཐ ནཾ ཨེཏྟཀསྶ ཀམྨསྶ ཀཏཏྟཱ ཝཱིསཏིཝསྶསཧསྶཱནི ཀཏོཔི སམཎདྷམྨོ རཀྑིཏུཾ ནཱསཀྑི. ཨཱཡུཔརིཡོསཱནེ པན ཀཱལཾ ཀཏྭཱ ཨཝཱིཙིམྷི ནིབྦཏྟིཏྭཱ ཨེཀཾ བུདྡྷནྟརཾ མཧཱདུཀྑཾ ཨནུབྷཝིཏྭཱ ཨིམསྨིཾ བུདྡྷུཔྤཱདེ རཱཛགཧནགརེ ཨེཀསྨིཾ བཧྭནྣཔཱནེ ཀུལགྷརེ ནིབྦཏྟི. སོ པདསཱ གམནཀཱལཏོ པཊྛཱཡ ནེཝ སཡནེ སཡིཏུཾ, ན བྷཏྟཾ བྷུཉྫིཏུཾ ཨིཙྪཏི, ཨཏྟནོ སརཱིརཝལཉྫམེཝ ཁཱདཏི. ‘‘བཱལཏཱཡ ཨཛཱནནྟོ ཀརོཏཱི’’ཏི ཏཾ པོསཡིཾསུ. མཧལླཀཀཱལེཔི ཝཏྠཾ ནིཝཱསེཏུཾ ན ཨིཙྪཏི, ནགྒོཝ ཝིཙརཏི, བྷཱུམིཡཾ སཡཏི, ཨཏྟནོ སརཱིརཝལཉྫམེཝ ཁཱདཏི. ཨཐསྶ མཱཏཱཔིཏརོ ‘‘ནཱཡཾ ཀུལགྷརསྶ ཨནུཙྪཝིཀོ, ཀེཝལཾ ཨལཛྫནཀོ ཨཱཛཱིཝཀཱནཾ ཨེས ཨནུཙྪཝིཀོ’’ཏི ཏེསཾ སནྟིཀཾ ནེཏྭཱ ‘‘ཨིམཾ དཱརཀཾ པབྦཱཛེཐཱ’’ཏི ཨདཾསུ. ཨཐ ནཾ ཏེ པབྦཱཛེསུཾ. པབྦཱཛེནྟཱ ཙ པན གལཔྤམཱཎེ ཨཱཝཱཊེ ཋཔེཏྭཱ དྭིནྣཾ ཨཾསཀཱུཊཱནཾ ཨུཔརིཾ པདརཱནི དཏྭཱ ཏེསཾ ཨུཔརི ནིསཱིདིཏྭཱ ཏཱལཊྛིཁཎྜེན ཀེསེ ལུཉྩིཾསུ. ཨཐ ནེ ཏསྶ མཱཏཱཔིཏརོ སྭཱཏནཱཡ ནིམནྟེཏྭཱ པཀྐམིཾསུ.

པུནདིཝསེ ཨཱཛཱིཝཀཱ ‘‘ཨེཧི, གཱམཾ པཝིསིསྶཱམཱ’’ཏི ཏཾ ཝདིཾསུ. སོ ‘‘གཙྪཐ ཏུམྷེ, ཨཧཾ ཨིདྷེཝ བྷཝིསྶཱམཱི’’ཏི ན ཨིཙྪི. ཨཐ ནཾ པུནཔྤུནཾ ཝཏྭཱ ཨནིཙྪམཱནཾ ཨོཧཱཡ ཨགམཾསུ. སོཔི ཏེསཾ གཏབྷཱཝཾ ཉཏྭཱ ཝཙྩཀུཊིཡཱ པདརཾ ཝིཝརིཏྭཱ ཨོརུཡ྄ཧ ཨུབྷོཧི ཧཏྠེཧི ཨཱལོཔཾ ཨཱལོཔཾ ཀཏྭཱ གཱུཐཾ ཁཱདི. ཨཱཛཱིཝཀཱ ཏསྶ ཨནྟོགཱམཏོ ཨཱཧཱརཾ པཧིཎིཾསུ. ཏམྤི ན ཨིཙྪི. པུནཔྤུནཾ ཝུཙྩམཱནོཔི ‘‘ན མེ ཨིམིནཱ ཨཏྠོ. ལདྡྷོ མེ ཨཱཧཱརོ’’ཏི ཨཱཧ. ‘‘ཀཧཾ ལདྡྷོ’’ཏི? ‘‘ཨིདྷེཝ ལདྡྷོ’’ཏི. ཨེཝཾ དུཏིཡེ ཏཏིཡེ ཙཏུཏྠེཔི དིཝསེ ཏེཧི བཧུམྤི ཝུཙྩམཱནོ ‘‘ཨཧཾ ཨིདྷེཝ བྷཝིསྶཱམཱི’’ཏི གཱམཾ གནྟུཾ ན ཨིཙྪི. ཨཱཛཱིཝཀཱ ‘‘ཨཡཾ དིཝསེ དིཝསེ ནེཝ གཱམཾ པཝིསིཏུཾ ཨིཙྪཏི, ན ཨམྷེཧི པཧིཏཱཧཱརཾ ཨཱཧརིཏུཾ ཨིཙྪཏི, ‘ཨིདྷེཝ མེ ལདྡྷོ’ཏི ཝདཏི, ཀིཾ ནུ ཁོ ཀརོཏི, པརིགྒཎྷིསྶཱམ ན’’ནྟི གཱམཾ པཝིསནྟཱ ཨེཀཾ དྭེ ཛནེ ཏསྶ པརིགྒཎྷནཏྠཾ ཨོཧཱཡ གམིཾསུ. ཏེ པཙྪཏོ གཙྪནྟཱ ཝིཡ ཧུཏྭཱ ནིལཱིཡིཾསུ. སོཔི ཏེསཾ གཏབྷཱཝཾ ཉཏྭཱ པུརིམནཡེནེཝ ཝཙྩཀུཊིཾ ཨོརུཡ྄ཧ གཱུཐཾ ཁཱདི.

ཨིཏརེ ཏསྶ ཀིརིཡཾ དིསྭཱ ཨཱཛཱིཝཀཱནཾ ཨཱརོཙཡིཾསུ. ཏཾ སུཏྭཱ ཨཱཛཱིཝཀཱ ‘‘ཨཧོ བྷཱརིཡཾ ཀམྨཾ, སཙེ སམཎསྶ གོཏམསྶ སཱཝཀཱ ཛཱནེཡྻུཾ, ‘ཨཱཛཱིཝཀཱ གཱུཐཾ ཁཱདམཱནཱ ཝིཙརནྟཱི’ཏི ཨམྷཱཀཾ ཨཀིཏྟིཾ པཀཱསེཡྻུཾ, ནཱཡཾ ཨམྷཱཀཾ ཨནུཙྪཝིཀོ’’ཏི ཏཾ ཨཏྟནོ སནྟིཀཱ ནཱིཧརིཾསུ. སོ ཏེཧི ནཱིཧརིཏོ མཧཱཛནསྶ ཨུཙྩཱརཀརཎཊྛཱནེ པཏྠརིཏོ ཨེཀོ པིཊྛིཔཱསཱཎོ ཨཏྠི. ཏསྨིཾ མཧནྟཾ སོཎྜི, པིཊྛིཔཱསཱཎཾ ནིསྶཱཡ མཧཱཛནསྶ ཨུཙྩཱརཀརཎཊྛཱནཾ. སོ ཏཏྠ གནྟྭཱ རཏྟིཾ གཱུཐཾ ཁཱདིཏྭཱ མཧཱཛནསྶ སརཱིརཝལཉྫནཏྠཱཡ ཨཱགམནཀཱལེ ཨེཀེན ཧཏྠེན པཱསཱཎསྶ ཨེཀཾ ཨནྟཾ ཨོལུབྦྷ ཨེཀཾ པཱདཾ ཨུཀྑིཔིཏྭཱ ཛཎྞུཀེ ཋཔེཏྭཱ ཨུདྡྷཾཝཱཏཱབྷིམུཁོ མུཁཾ ཝིཝརིཏྭཱ ཏིཊྛཏི. མཧཱཛནོ ཏཾ དིསྭཱ ཨུཔསངྐམིཏྭཱ ཝནྡིཏྭཱ, ‘‘བྷནྟེ, ཀསྨཱ ཨཡྻོ མུཁཾ ཝིཝརིཏྭཱ ཋིཏོ’’ཏི པུཙྪཏི. ‘‘ཨཧཾ ཝཱཏབྷཀྑོ, ཨཉྙོ མེ ཨཱཧཱརོ ནཏྠཱི’’ཏི. ཨཐ ‘‘ཀསྨཱ ཨེཀཾ པཱདཾ ཛཎྞུཀེ ཀཏྭཱ ཋིཏོསི, བྷནྟེ’’ཏི? ‘‘ཨཧཾ ཨུགྒཏཔོ གྷོརཏཔོ, མཡཱ དྭཱིཧི པཱདེཧི ཨཀྐནྟཱ པཐཝཱི ཀམྤཏི, ཏསྨཱ ཨེཀཾ པཱདཾ ཨུཀྑིཔིཏྭཱ ཛཎྞུཀེ ཋཔེཏྭཱ ཋིཏོམྷི. ཨཧཉྷི རཏྟིནྡིཝཾ ཋིཏཀོཝ ཝཱིཏིནཱམེམི, ན ནིསཱིདཱམི, ན ནིཔཛྫཱམཱི’’ཏི. མནུསྶཱ ནཱམ ཡེབྷུཡྻེན ཝཙནམཏྟམེཝ སདྡཧནྟི, ཏསྨཱ ‘‘ཨཧོ ཨཙྪརིཡཾ, ཨེཝརཱུཔཱཔི ནཱམ ཏཔསྶིནོ ཧོནྟི, ན ནོ ཨེཝརཱུཔཱ དིཊྛཔུབྦཱ’’ཏི ཡེབྷུཡྻེན ཨངྒམགདྷཝཱསིནོ སངྑུབྷིཏྭཱ ཨུཔསངྐམིཏྭཱ མཱསེ མཱསེ མཧནྟཾ སཀྐཱརཾ ཨབྷིཧརནྟི. སོ ‘‘ཨཧཾ ཝཱཏམེཝ བྷཀྑཱམི, ན ཨཉྙཾ ཨཱཧཱརཾ. ཨཉྙཉྷི མེ ཁཱདནྟསྶ ཏཔོ ནསྶཏཱི’’ཏི ཏེཧི ཨབྷིཧཊཾ ན ཀིཉྩི ཨིཙྪཏི. མནུསྶཱ ‘‘མཱ ནོ, བྷནྟེ, ནཱསེཐ, ཏུམྷཱདིསེན གྷོརཏཔེན པརིབྷོགེ ཀཏེ ཨམྷཱཀཾ དཱིགྷརཏྟཾ ཧིཏཱཡ སུཁཱཡ སཾཝཏྟཏཱི’’ཏི པུནཔྤུནཾ ཡཱཙནྟི. ཏསྶ ཨཉྙོ ཨཱཧཱརོ ན རུཙྩཏི. མཧཱཛནསྶ པན ཡཱཙནཱཡ པཱིལི༹ཏོ ཏེཧི ཨཱབྷཏཱནི སཔྤིཕཱཎིཏཱདཱིནི ཀུསགྒེན ཛིཝ྄ཧགྒེ ཋཔེཏྭཱ ‘‘གཙྪཐ, ཨལཾ ཝོ ཨེཏྟཀཾ ཧིཏཱཡ སུཁཱཡ ཙཱ’’ཏི ཨུཡྻོཛེསི. ཨེཝཾ སོ པཉྩཔཉྙཱས ཝསྶཱནི ནགྒོ གཱུཐཾ ཁཱདནྟོ ཀེསེ ལུཉྩནྟོ བྷཱུམིཡཾ སཡམཱནོ ཝཱིཏིནཱམེསི.

བུདྡྷཱནམྤི ཁོ པཙྩཱུསཀཱལེ ལོཀཝོལོཀནཾ ཨཝིཛཧིཏམེཝ ཧོཏི. ཏསྨཱ ཨེཀདིཝསཾ བྷགཝཏོ པཙྩཱུསསམཡེ ལོཀཾ ཝོལོཀེནྟསྶ ཨཡཾ ཛམྦུཀཱཛཱིཝཀོ ཉཱཎཛཱལསྶ ཨནྟོ པཉྙཱཡི. སཏྠཱ ‘‘ཀིཾ ནུ ཁོ བྷཝིསྶཏཱི’’ཏི ཨཱཝཛྫེཏྭཱ ཏསྶ སཧ པཊིསམྦྷིདཱཧི ཨརཧཏྟསྶཱུཔནིསྶཡཾ དིསྭཱ ‘‘ཨཧཾ ཨེཏཾ ཨཱདིཾ ཀཏྭཱ ཨེཀཾ གཱཐཾ བྷཱསིསྶཱམི, གཱཐཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ བྷཝིསྶཏི. ཨིམཾ ཀུལཔུཏྟཾ ནིསྶཱཡ མཧཱཛནོ སོཏྠིབྷཱཝཾ པཱཔུཎིསྶཏཱི’’ཏི ཉཏྭཱ པུནདིཝསེ རཱཛགཧེ པིཎྜཱཡ ཙརིཏྭཱ པིཎྜཔཱཏཔཊིཀྐནྟོ ཨཱནནྡཏྠེརཾ ཨཱམནྟེསི – ‘‘ཨཱནནྡ, ཛམྦུཀཱཛཱིཝཀསྶ སནྟིཀཾ གམིསྶཱམཱི’’ཏི. ‘‘བྷནྟེ, ཀིཾ ཏུམྷེཡེཝ གམིསྶཐཱ’’ཏི? ‘‘ཨཱམ, ཨཧམེཝཱ’’ཏི ཨེཝཾ ཝཏྭཱ སཏྠཱ ཝཌྜྷམཱནཀཙྪཱཡཱཡ ཏསྶ སནྟིཀཾ པཱཡཱསི.

དེཝཏཱ ཙིནྟཡིཾསུ – ‘‘སཏྠཱ སཱཡཾ ཛམྦུཀཱཛཱིཝཀསྶ སནྟིཀཾ གཙྪཏི, སོ ཙ ཛེགུཙྪེ ཨུཙྩཱརཔསྶཱཝདནྟཀཊྛཀིལིཊྛེ པིཊྛིཔཱསཱཎེ ཝསཏི, དེཝཾ ཝསྶཱཔེཏུཾ ཝཊྚཏཱི’’ཏི ཨཏྟནོ ཨཱནུབྷཱཝེན ཏཾ མུཧུཏྟཾཡེཝ དེཝཾ ཝསྶཱཔེསུཾ. པིཊྛིཔཱསཱཎོ སུཙི ནིམྨལོ ཨཧོསི. ཨཐསྶ ཨུཔརི པཉྩཝཎྞཾ པུཔྥཝསྶཾ ཝསྶཱཔེསུཾ. སཏྠཱ སཱཡཾ ཛམྦུཀཱཛཱིཝཀསྶ སནྟིཀཾ གནྟྭཱ ‘‘ཛམྦུཀཱ’’ཏི སདྡམཀཱསི. ཛམྦུཀོ ‘‘ཀོ ནུ ཁོ ཨེས, དུཛྫནོ མཾ ཛམྦུཀཝཱདེན ཝདཏཱི’’ཏི ཙིནྟེཏྭཱ ‘‘ཀོ ཨེསོ’’ཏི ཨཱཧ. ‘‘ཨཧཾ སམཎོ’’ཏི. ‘‘ཀིཾ མཧཱསམཎཱ’’ཏི? ‘‘ཨཛྫ མེ ཨེཀརཏྟིཾ ཨིདྷ ཝསནཊྛཱནཾ དེཧཱི’’ཏི. ‘‘ནཏྠི, མཧཱསམཎ, ཨིམསྨིཾ ཋཱནེ ཝསནཊྛཱན’’ནྟི. ‘‘ཛམྦུཀ, མཱ ཨེཝཾ ཀརི, ཨེཀརཏྟིཾ མེ ཝསནཊྛཱནཾ དེཧི, པབྦཛིཏཱ ནཱམ པབྦཛིཏཾ པཏྠེནྟི, མནུསྶཱ མནུསྶཾ, པསཝོ པསཝ’’ནྟི. ‘‘ཀིཾ པན ཏྭཾ པབྦཛིཏོ’’ཏི? ‘‘ཨཱམ, པབྦཛིཏོམྷཱི’’ཏི. ‘‘སཙེ ཏྭཾ པབྦཛིཏོ, ཀཧཾ ཏེ ལཱབུཀཾ, ཀཧཾ དྷཱུམཀཊཙྪུཀོ, ཀཧཾ ཡཉྙསུཏྟཀ’’ནྟི? ‘‘‘ཨཏྠེཏཾ མཡ྄ཧཾ, ཝིསུཾ ཝིསུཾ པན གཧེཏྭཱ ཝིཙརཎཾ དུཀྑ’ནྟི ཨབྦྷནྟརེནེཝ གཧེཏྭཱ ཙརཱམཱི’’ཏི. སོ ‘‘ཙརིསྶསི ཏྭཾ ཨེཏཾ ཨགྒཎྷིཏྭཱ’’ཏི ཀུཛ྄ཛྷི. ཨཐ ནཾ སཏྠཱ ཨཱཧ – ‘‘ཧོཏུ, ཛམྦུཀ, མཱ ཀུཛ྄ཛྷ, ཝསནཊྛཱནཾ མེ ཨཱཙིཀྑཱ’’ཏི. ‘‘ནཏྠི, མཧཱསམཎ, ཨེཏྠ ཝསནཊྛཱན’’ནྟི.

སཏྠཱ ཏསྶ ཝསནཊྛཱནཏོ ཨཝིདཱུརེ ཨེཀཾ པབྦྷཱརཾ ཨཏྠི, ཏཾ ནིདྡིསནྟོ ‘‘ཨེཏསྨིཾ པབྦྷཱརེ ཀོ ཝསཏཱི’’ཏི ཨཱཧ. ‘‘ནཏྠི ཀོཙི, མཧཱསམཎཱ’’ཏི. ‘‘ཏེན ཧི ཨེཏཾ མཡ྄ཧཾ དེཧཱི’’ཏི. ‘‘ཏྭཉྙེཝ ཛཱན, མཧཱསམཎཱ’’ཏི. སཏྠཱ པབྦྷཱརེ ནིསཱིདནཾ པཉྙཱཔེཏྭཱ ནིསཱིདི. པཋམཡཱམེ ཙཏྟཱརོ མཧཱརཱཛཱནོ ཙཏུདྡིསཾ ཨེཀོབྷཱསཾ ཀརོནྟཱ སཏྠུ ཨུཔཊྛཱནཾ ཨཱགམིཾསུ. ཛམྦུཀོ ཨོབྷཱསཾ དིསྭཱ ‘‘ཀོ ཨོབྷཱསོ ནཱམེསོ’’ཏི ཙིནྟེསི. མཛ྄ཛྷིམཡཱམེ སཀྐོ དེཝརཱཛཱ ཨཱགམི. ཛམྦུཀོ ཏམྤི དིསྭཱ ‘‘ཀོ ནཱམེསོ’’ཏི ཙིནྟེསི. པཙྪིམཡཱམེ ཨེཀཱཡ ཨངྒུལིཡཱ ཨེཀཾ, དྭཱིཧི དྭེ, དསཧི དས ཙཀྐཝཱལཱ༹ནི ཨོབྷཱསེཏུཾ སམཏྠོ མཧཱབྲཧྨཱ སཀལཾ ཨརཉྙཾ ཨེཀོབྷཱསཾ ཀརོནྟོ ཨཱགམི. ཛམྦུཀོ ཏམྤི དིསྭཱ ‘‘ཀོ ནུ ཁོ ཨེསོ’’ཏི ཙིནྟེཏྭཱ པཱཏོཝ སཏྠུ སནྟིཀཾ གནྟྭཱ པཊིསནྠཱརཾ ཀཏྭཱ ཨེཀམནྟཾ ཋིཏོ སཏྠཱརཾ པུཙྪི – ‘‘མཧཱསམཎ, ཏུམྷཱཀཾ སནྟིཀཾ ཙཏསྶོ དིསཱ ཨོབྷཱསེནྟོ ཀེ ཨཱགཏཱ’’ཏི? ‘‘ཙཏྟཱརོ མཧཱརཱཛཱནོ’’ཏི. ‘‘ཀིཾ ཀཱརཎཱ’’ཏི? ‘‘མཾ ཨུཔཊྛཱཏུ’’ནྟི. ‘‘ཀིཾ པན ཏྭཾ ཙཏཱུཧི མཧཱརཱཛེཧི ཨུཏྟརིཏརོ’’ཏི? ‘‘ཨཱམ, ཛམྦུཀ, མཧཱརཱཛཱུནམྤི ཨཏིརཱཛཱ’’ཏི. ‘‘མཛ྄ཛྷིམཡཱམེ པན ཀོ ཨཱགཏོ’’ཏི? ‘‘སཀྐོ དེཝརཱཛཱ, ཛམྦུཀཱ’’ཏི. ‘‘ཀིཾ ཀཱརཎཱ’’ཏི? ‘‘མཾ ཨུཔཊྛཱཏུམེཝཱ’’ཏི. ‘‘ཀིཾ པན ཏྭཾ སཀྐདེཝརཱཛཏོཔི ཨུཏྟརིཏརོ’’ཏི? ‘‘ཨཱམ, ཛམྦུཀ, སཀྐཏོཔི ཨུཏྟརིཏརོམྷི, ཨེསོ པན མཡ྄ཧཾ གིལཱནུཔཊྛཱཀོ ཀཔྤིཡཀཱརཀསཱམཎེརསདིསོ’’ཏི. ‘‘པཙྪིམཡཱམེ སཀལཾ ཨརཉྙཾ ཨོབྷཱསེཏྭཱ ཀོ ཨཱགཏོ’’ཏི? ‘‘ཡཾ ལོཀེ བྲཱཧྨཎཱདཡོ ཁིཔིཏྭཱ པཀྑལིཏྭཱ ‘ནམོ མཧཱབྲཧྨུནོ’ཏི ཝདནྟི, སོ ཨེཝ མཧཱབྲཧྨཱ’’ཏི. ‘‘ཀིཾ པན ཏྭཾ མཧཱབྲཧྨཏོཔི ཨུཏྟརིཏརོ’’ཏི? ‘‘ཨཱམ, ཛམྦུཀ, ཨཧཉྷི བྲཧྨུནཱཔི ཨཏིབྲཧྨཱ’’ཏི. ‘‘ཨཙྪརིཡོསི ཏྭཾ, མཧཱསམཎ, མཡ྄ཧཾ པན པཉྩ པཉྙཱས ཝསྶཱནི ཨིདྷ ཝསནྟསྶ ཨེཏེསུ ཨེཀོཔི མཾ ཨུཔཊྛཱཏུཾ ནཱགཏཔུབྦོ. ཨཧཉྷི ཨེཏྟཀཾ ཨདྡྷཱནཾ ཝཱཏབྷཀྑོ ཧུཏྭཱ ཋིཏཀོཝ ཝཱིཏིནཱམེསིཾ, ན ཏཱཝ ཏེ མཡ྄ཧཾ ཨུཔཊྛཱནཾ ཨཱགཏཔུབྦཱ’’ཏི.

ཨཐ ནཾ སཏྠཱ ཨཱཧ – ཛམྦུཀ, ཏྭཾ ལོཀསྨིཾ ཨནྡྷབཱལཾ མཧཱཛནཾ ཝཉྩཡམཱནོ མམྤི ཝཉྩེཏུཀཱམོ ཛཱཏོ, ནནུ ཏྭཾ པཉྩཔཉྙཱས ཝསྶཱནི གཱུཐམེཝ ཁཱདི, བྷཱུམིཡཾཡེཝ ནིཔཛྫི, ནགྒོ ཧུཏྭཱ ཝིཙརི, ཏཱལཊྛིཁཎྜེན ཀེསེ ལུཉྩི. ཨཐ ཙ པན ལོཀཾ ཝཉྩེནྟོ ‘‘ཨཧཾ ཝཱཏབྷཀྑོ, ཨེཀཔཱདེན ཏིཊྛཱམི, ན ནིསཱིདཱམི, ན ནིཔཛྫཱམཱི’’ཏི ཝདེསི, ‘‘མམམྤི ཝཉྩེཏུཀཱམོསི པུབྦེཔི ཏྭཾ པཱཔིཀཾ ལཱམིཀཾ དིཊྛིཾ ནིསྶཱཡ ཨེཏྟཀཾ ཀཱལཾ གཱུཐབྷཀྑོ བྷཱུམིསཡོ ནགྒོ ཝིཙརནྟོ ཏཱལཊྛིཁཎྜེན ཀེསལུཉྩནཾ པཏྟོ, ཨིདཱནིཔི པཱཔིཀཾ ལཱམིཀཾ དིཊྛིམེཝ གཎྷཱསཱི’’ཏི. ‘‘ཀིཾ པན མཡཱ ཀཏཾ, མཧཱསམཎཱ’’ཏི? ཨཐསྶ སཏྠཱ པུབྦེ ཀཏཀམྨཾ ཨཱཙིཀྑི. ཏསྶ སཏྠརི ཀཐེནྟེཡེཝ སཾཝེགོ ཨུཔྤཛྫི, ཧིརོཏྟཔྤཾ ཨུཔཊྛིཏཾ, སོ ཨུཀྐུཊིཀོ ནིསཱིདི. ཨཐསྶ སཏྠཱ ཨུདཀསཱཊིཀཾ ཁིཔིཏྭཱ ཨདཱསི. སོ ཏཾ ནིཝཱསེཏྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདི. སཏྠཱཔིསྶ ཨནུཔུབྦིཾ ཀཐཾ ཀཐེཏྭཱ དྷམྨཾ དེསེསི. སོ དེསནཱཝསཱནེ སཧ པཊིསམྦྷིདཱཧི ཨརཧཏྟཾ པཏྭཱ སཏྠཱརཾ ཝནྡིཏྭཱ ཨུཊྛཱཡཱསནཱ པབྦཛྫཉྩ ཨུཔསམྤདཉྩ ཡཱཙི. ཨེཏྟཱཝཏཱ ཏསྶ པུརིམཀམྨཾ པརིཀྑཱིཎཾ. ཨཡཉྷི ཁཱིཎཱསཝམཧཱཐེརཾ ཙཏཱུཧི ཨཀྐོསེཧི ཨཀྐོསིཏྭཱ ཡཱཝཱཡཾ མཧཱཔཐཝཱི ཏིགཱཝུཏཱདྷིཀཾ ཡོཛནཾ ཨུསྶནྣཱ, ཏཱཝ ཨཝཱིཙིམྷི པཙྩིཏྭཱ ཏཏྠ པཀྐཱཝསེསེན པཉྩཔཉྙཱས ཝསྶཱནི ཨིམཾ ཝིཔྤཀཱརཾ པཏྟོ. ཏེནསྶ ཏཾ ཀམྨཾ ཁཱིཎཾ. ཝཱིསཏི པན ཝསྶསཧསྶཱནི ཨིམིནཱ ཀཏསྶ སམཎདྷམྨསྶ ཕལཾ ནཱསེཏུཾ ན སཀྐཱ. ཏསྨཱ སཏྠཱ དཀྑིཎཧཏྠཾ པསཱརེཏྭཱ ‘‘ཨེཧི, བྷིཀྑུ, ཙར བྲཧྨཙརིཡཾ སམྨཱ དུཀྑསྶ ཨནྟཀིརིཡཱཡཱ’’ཏི ཨཱཧ. ཏཱཝདེཝསྶ གིཧིལིངྒཾ ཨནྟརདྷཱཡི ཨཊྛཔརིཀྑཱརདྷརོ སཊྛིཝསྶིཀམཧཱཐེརོ ཝིཡ ཨཧོསི.

ཨངྒམགདྷཝཱསཱིནཾ ཏསྶ སཀྐཱརཾ གཧེཏྭཱ ཨཱགཏདིཝསོ ཀིརེས, ཏསྨཱ ཨུབྷཡརཊྛཝཱསིནོ སཀྐཱརཾ གཧེཏྭཱ ཨཱགཏཱ ཏཐཱགཏཾ དིསྭཱ ‘‘ཀིཾ ནུ ཁོ ཨམྷཱཀཾ ཨཡྻོ ཛམྦུཀོ མཧཱ, ཨུདཱཧུ སམཎོ གོཏམོ’’ཏི ཙིནྟེཏྭཱ ‘‘སཙེ སམཎོ གོཏམོ མཧཱ བྷཝེཡྻ, ཨཡཾ སམཎསྶ གོཏམསྶ སནྟིཀཾ གཙྪེཡྻ, ཛམྦུཀཱཛཱིཝཀསྶ པན མཧནྟཏཱཡ སམཎོ གོཏམོ ཨིམསྶ སནྟིཀཾ ཨཱགཏོ’’ཏི ཙིནྟཡིཾསུ. སཏྠཱ མཧཱཛནསྶ པརིཝིཏཀྐཾ ཉཏྭཱ, ‘‘ཛམྦུཀ, ཏཝ ཨུཔཊྛཱཀཱནཾ ཀངྑཾ ཚིནྡཱཧཱི’’ཏི ཨཱཧ, སོ ‘‘ཨཧམྤི, བྷནྟེ, ཨེཏྟཀམེཝ པཙྩཱསཱིསཱམཱི’’ཏི ཝཏྭཱ ཙཏུཏྠཛ྄ཛྷཱནཾ སམཱཔཛྫིཏྭཱ ཨུཊྛཱཡ ཏཱལཔྤམཱཎཾ ཝེཧཱསཾ ཨབྦྷུགྒནྟྭཱ ‘‘སཏྠཱ མེ, བྷནྟེ བྷགཝཱ, སཱཝཀོཧམསྨཱི’’ཏི ཝཏྭཱ ཨོརུཡ྄ཧ ཝནྡིཏྭཱ པུན དྭིཏཱལམཏྟཾ ཏིཏཱལམཏྟནྟི ཨེཝཾ སཏྟཏཱལམཏྟཾ ཝེཧཱསཾ ཨབྦྷུགྒནྟྭཱ ཨོརུཡ྄ཧ ཨཏྟནོ སཱཝཀབྷཱཝཾ ཛཱནཱཔེསི. ཏཾ དིསྭཱ མཧཱཛནོ ‘‘ཨཧོ བུདྡྷཱ ནཱམ ཨཙྪརིཡཱ ཨནོཔམགུཎཱ’’ཏི ཙིནྟེསི. སཏྠཱ མཧཱཛནེན སདྡྷིཾ ཀཐེནྟོ ཨེཝམཱཧ – ‘‘ཨཡཾ ཨེཏྟཀཾ ཀཱལཾ ཏུམྷེཧི ཨཱབྷཏཾ སཀྐཱརཾ ཀུསགྒེན ཛིཝ྄ཧགྒེ ཋཔེཏྭཱ ‘ཏཔཙརཎཾ པཱུརེམཱི’ཏི ཨིདྷ ནིཝུཊྛོ, སཙེཔི ཨིམིནཱ ཨུཔཱཡེན ཝསྶསཏཾ ཏཔཙརཎཾ པཱུརེཡྻ, ཡཱ ཙསྶ ཨིདཱནི ཀཱལཾ ཝཱ བྷཏྟཾ ཝཱ ཀུཀྐུཙྩཱཡིཏྭཱ ཨབྷུཉྫནྟསྶ བྷཏྟཙྪེདནཀུསལཙེཏནཱ, ཏསྶཱ ཏཾ ཏཔཙརཎཾ སོལ༹སིཾ ཀལམྤི ན ཨགྒྷཏཱི’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༧༠.

‘‘མཱསེ མཱསེ ཀུསགྒེན, བཱལོ བྷུཉྫེཡྻ བྷོཛནཾ;

ན སོ སངྑཱཏདྷམྨཱནཾ, ཀལཾ ཨགྒྷཏི སོལ༹སི’’ནྟི.

ཏསྶཏྠོ – སཙེ བཱལོ ཨཔརིཉྙཱཏདྷམྨོ སཱིལཱདིགུཎཱ པརིབཱཧིརོ ཏིཏྠཱཡཏནེ པབྦཛིཏོ ‘‘ཏཔཙརཎཾ པཱུརེསྶཱམཱི’’ཏི མཱསེ མཱསེ པཏྟེ ཀུསགྒེན བྷོཛནཾ བྷུཉྫནྟོ ཝསྶསཏཾ བྷུཉྫེཡྻ བྷོཛནཾ. ན སོ སངྑཱཏདྷམྨཱནཾ, ཀལཾ ཨགྒྷཏི སོལ༹སིནྟི སངྑཱཏདྷམྨཱ ཝུཙྩནྟི ཉཱཏདྷམྨཱ ཏུལིཏདྷམྨཱ. ཏེསུ ཧེཊྛིམཀོཊིཡཱ སོཏཱཔནྣོ སངྑཱཏདྷམྨོ, ཨུཔརིམཀོཊིཡཱ ཁཱིཎཱསཝོ. ཨིམེསཾ སངྑཱཏདྷམྨཱནཾ སོ བཱལོ ཀལཾ ན ཨགྒྷཏི སོལ༹སིནྟི པུགྒལཱདྷིཊྛཱནཱ དེསནཱ. ཨཡཾ པནེཏྠ ཨཏྠོ – ཡཱ ཙསྶ ཏཐཱ ཏཔཙརཎཾ པཱུརེནྟསྶ ཝསྶསཏཾ ཙེཏནཱ ཡཱ ཙ སངྑཱཏདྷམྨཱནཾ ཀཱལཾ ཝཱ བྷཏྟཾ ཝཱ ཀུཀྐུཙྩཱཡིཏྭཱ ཨབྷུཉྫནྟཱནཾ ཨེཀཱ བྷཏྟཙྪེདནཀུསལཙེཏནཱ, ཏསྶཱ ཙེཏནཱཡ སཱ ཏཱཝ དཱིགྷརཏྟཾ པཝཏྟཙེཏནཱ སོལ༹སིཾ ཀལཾ ན ཨགྒྷཏི. ཨིདཾ ཝུཏྟཾ ཧོཏི – ཡཾ ཏསྶཱ སངྑཱཏདྷམྨཱནཾ ཙེཏནཱཡ ཕལཾ, ཏཾ སོལ༹ས ཀོཊྛཱསེ ཀཏྭཱ ཏཏོ ཨེཀེཀཾ པུན སོལ༹ས སོལ༹ས ཀོཊྛཱསེ ཀཏྭཱ ཏཏོ ཨེཀསྶ ཀོཊྛཱསསྶ ཡཾ ཕལཾ, ཏདེཝ ཏསྶ བཱལསྶ ཏཔཙརཎཏོ མཧཔྥལཏརནྟི.

དེསནཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསཱིཏི.

ཛམྦུཀཏྠེརཝཏྠུ ཨེཀཱདསམཾ.

༡༢. ཨཧིཔེཏཝཏྠུ

ན ཧི པཱཔཾ ཀཏཾ ཀམྨནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨཉྙཏརཾ ཨཧིཔེཏཾ ཨཱརབྦྷ ཀཐེསི.

ཨེཀསྨིཉྷི དིཝསེ ཛཊིལསཧསྶསྶ ཨབྦྷནྟརོ ཨཱཡསྨཱ ལཀྑཎཏྠེརོ ཙ མཧཱམོགྒལླཱནཏྠེརོ ཙ ‘‘རཱཛགཧེ པིཎྜཱཡ ཙརིསྶཱམཱ’’ཏི གིཛ྄ཛྷཀཱུཊཏོ ཨོཏརནྟི. ཏེསུ ཨཱཡསྨཱ མཧཱམོགྒལླཱནཏྠེརོ ཨེཀཾ ཨཧིཔེཏཾ དིསྭཱ སིཏཾ པཱཏྭཱཀཱསི. ཨཐ ནཾ ལཀྑཎཏྠེརོ ‘‘ཀསྨཱ, ཨཱཝུསོ, སིཏཾ པཱཏུཀརོསཱི’’ཏི སིཏཀཱརཎཾ པུཙྪི. ‘‘ཨཀཱལོ, ཨཱཝུསོ ལཀྑཎ, ཨིམསྶ པཉྷསྶ, བྷགཝཏོ སནྟིཀེ མཾ པུཙྪེཡྻཱསཱི’’ཏི ཐེརོ ཨཱཧ. ཏེསུ རཱཛགཧེ པིཎྜཱཡ ཙརིཏྭཱ བྷགཝཏོ སནྟིཀཾ གནྟྭཱ ནིསིནྣེསུ ལཀྑཎཏྠེརོ པུཙྪི, ‘‘ཨཱཝུསོ, མོགྒལླཱནཾ ཏྭཾ གིཛ྄ཛྷཀཱུཊཱ ཨོཏརནྟོ སིཏཾ པཱཏུཀརིཏྭཱ མཡཱ སིཏཀཱརཎཾ པུཊྛོ ‘བྷགཝཏོ སནྟིཀེ མཾ པུཙྪེཡྻཱསཱི’ཏི ཨཝཙ, ཀཐེཧི ཨིདཱནི ཏཾ ཀཱརཎ’’ནྟི. ཐེརོ ཨཱཧ – ‘‘ཨཧཾ, ཨཱཝུསོ, ཨེཀཾ པེཏཾ དིསྭཱ སིཏཾ པཱཏྭཱཀཱསིཾ. ཏསྶ ཨེཝརཱུཔོ ཨཏྟབྷཱཝོ – མནུསྶསཱིསཾ ཝིཡ ཨསྶ སཱིསཾ, ཨཧིསྶ ཝིཡ སེསོ ཨཏྟབྷཱཝོ, ཨཧིཔེཏོ ནཱམེས པམཱཎཏོ པཉྩཝཱིསཏིཡོཛནིཀོ, ཏསྶ སཱིསཏོ ཨུཊྛིཏཱ ཨགྒིཛཱལཱ ཡཱཝ ནངྒུཊྛཱ གཙྪནྟི, ནངྒུཊྛཏོ ཨུཊྛིཏཱ ཨགྒིཛཱལཱ ཡཱཝ སཱིསཱ, མཛ྄ཛྷེསཱིསཏོ ཨུཊྛིཏཱ དྭེ པསྶཱནི གཙྪནྟི, དྭཱིཧི པསྶེཧི ཨུཊྛིཏཱ མཛ྄ཛྷེ ཨོཏརནྟཱི’’ཏི. དྭིནྣཾཡེཝ ཀིར པེཏཱནཾ ཨཏྟབྷཱཝོ པཉྩཝཱིསཏིཡོཛནིཀོ, ཨཝསེསཱནཾ ཏིགཱཝུཏཔྤམཱཎོ. ཨིམསྶ ཙེཝ ཨཧིཔེཏསྶ ཀཱཀཔེཏསྶ ཙ པཉྩཝཱིསཏིཡོཛནིཀོ. ཏེསུ ཨཡཾ ཏཱཝ ཨཧིཔེཏོ. ཀཱཀཔེཏམྤི མཧཱམོགྒལླཱནོ གིཛ྄ཛྷཀཱུཊམཏྠཀེ པཙྩམཱནཾ དིསྭཱ ཏསྶ པུབྦཀམྨཾ པུཙྪནྟོ ཨིམཾ གཱཐམཱཧ –

‘‘པཉྩཡོཛནིཀཱ ཛིཝ྄ཧཱ, སཱིསཾ ཏེ ནཝཡོཛནཾ;

ཀཱཡོ ཨཙྩུགྒཏོ ཏུཡ྄ཧཾ, པཉྩཝཱིསཏིཡོཛནཾ;

ཀིཾ ནུ ཀམྨཾ ཀརིཏྭཱན, པཏྟོསི དུཀྑམཱིདིས’’ནྟི.

ཨཐསྶ པེཏོ ཨཱཙིཀྑནྟོ –

‘‘ཨཧཾ བྷནྟེ མོགྒལླཱན, ཀསྶཔསྶ མཧེསིནོ;

སངྒྷསྶ ཨཱབྷཏཾ བྷཏྟཾ, ཨཱཧཱརེསིཾ ཡདིཙྪཀ’’ནྟི. –

གཱཐཾ ཝཏྭཱ ཨཱཧ – ‘‘བྷནྟེ, ཀསྶཔབུདྡྷཀཱལེ སམྦཧུལཱ བྷིཀྑཱུ གཱམཾ པིཎྜཱཡ པཝིསིཾསུ,. མནུསྶཱ ཐེརེ དིསྭཱ སམྤིཡཱཡམཱནཱ ཨཱསནསཱལཱཡཾ ནིསཱིདཱཔེཏྭཱ པཱདེ དྷོཝིཏྭཱ ཏེལཾ མཀྑེཏྭཱ ཡཱགུཾ པཱཡེཏྭཱ ཁཛྫཀཾ དཏྭཱ པིཎྜཔཱཏཀཱལཾ ཨཱགམཡམཱནཱ དྷམྨཾ སུཎནྟཱ ནིསཱིདིཾསུ. དྷམྨཀཐཱཝསཱནེ ཐེརཱནཾ པཏྟེ ཨཱདཱཡ ཨཏྟནོ ཨཏྟནོ གེཧཱ ནཱནགྒརསབྷོཛནསྶ པཱུརེཏྭཱ ཨཱཧརིཾསུ. ཏདཱ ཨཧཾ ཀཱཀོ ཧུཏྭཱ ཨཱསནསཱལཱཡ ཚདནཔིཊྛེ ནིལཱིནོ ཏཾ དིསྭཱ ཨེཀེན གཧིཏཔཏྟཏོ ཏིཀྑཏྟུཾ མུཁཾ པཱུརེནྟོ ཏཡོ ཀབལེ༹ ཨགྒཧེསིཾ. ཏཾ པན བྷཏྟཾ ནེཝ སངྒྷསྶ སནྟཀཾ, ན སངྒྷསྶ ནིཡམེཏྭཱ དིནྣཾ, ན བྷིཀྑཱུཧི གཧིཏཱཝསེསཀཾ. ཨཏྟནོ ཨཏྟནོ གེཧཾ ནེཏྭཱ མནུསྶེཧི བྷུཉྫིཏབྦཀཾ, ཀེཝལཾ སངྒྷཾ ཨུདྡིསྶ ཨབྷིཧཊམཏྟམེཝ. ཏཏོ མཡཱ ཏཡོ ཀབལཱ༹ གཧིཏཱ, ཨེཏྟཀཾ མེ པུབྦཀམྨཾ. སྭཱཧཾ ཀཱལཾ ཀཏྭཱ ཏསྶ ཀམྨསྶ ཝིཔཱཀེན ཨཝཱིཙིམྷི པཙྩིཏྭཱ ཏཏྠ པཀྐཱཝསེསེན ཨིདཱནི གིཛ྄ཛྷཀཱུཊེ ཀཱཀཔེཏོ ཧུཏྭཱ ནིབྦཏྟོ ཨིམཾ དུཀྑཾ པཙྩཱནུབྷོམཱི’’ཏི. ཨིདཾ ཀཱཀཔེཏསྶ ཝཏྠུ.

ཨིདྷ པན ཐེརོ ‘‘ཨཧིཔེཏཾ དིསྭཱ སིཏཾ པཱཏྭཱཀཱསི’’ནྟི ཨཱཧ. ཨཐསྶ སཏྠཱ སཀྑཱི ཧུཏྭཱཔི ཨུཊྛཱཡ ‘‘སཙྩཾ, བྷིཀྑཝེ, མོགྒལླཱནོ ཨཱཧ. མཡཱཔེས སམྦོདྷིཔཏྟདིཝསེཡེཝ དིཊྛོ, ཨཔིཙཱཧཾ ‘ཡེ མེ ཝཙནཾ ན སདྡཧེཡྻུཾ, ཏེསཾ ཨཧིཏཱཡ བྷཝེཡྻཱ’ཏི པརཱནུདྡཡཱཡ ན ཀཐེསི’’ནྟི ཨཱཧ. ལཀྑཎསཾཡུཏྟེཔི (སཾ. ནི. ༢.༢༠༢ ཨཱདཡོ) ཧི མཧཱམོགྒལླཱནེན དིཊྛཀཱལེཡེཝ སཏྠཱ ཏསྶ སཀྑཱི ཧུཏྭཱ ཝིནཱིཏཝཏྠཱུནི ཀཐེསི, ཨིདམྤི ཏེན ཏཐེཝ ཀཐིཏཾ. ཏཾ སུཏྭཱ བྷིཀྑཱུ ཏསྶ པུབྦཀམྨཾ པུཙྪིཾསུ. སཏྠཱཔི ཏེསཾ ཀཐེསི –

ཨཏཱིཏེ ཀིར བཱརཱཎསིཾ ནིསྶཱཡ ནདཱིཏཱིརེ པཙྩེཀབུདྡྷསྶ པཎྞསཱལཾ ཀརིཾསུ. སོ ཏཏྠ ཝིཧརནྟོ ནིབདྡྷཾ ནགརེ པིཎྜཱཡ ཙརཏི. ནཱགརཱཔི སཱཡཾཔཱཏཾ གནྡྷཔུཔྥཱདིཧཏྠཱ པཙྩེཀབུདྡྷསྶཱུཔཊྛཱནཾ གཙྪནྟི. ཨེཀོ བཱརཱཎསིཝཱསཱི པུརིསོ ཏཾ མགྒཾ ནིསྶཱཡ ཁེཏྟཾ ཀསི. མཧཱཛནོ སཱཡཾཔཱཏཾ པཙྩེཀབུདྡྷསྶཱུཔཊྛཱནཾ གཙྪནྟོ ཏཾ ཁེཏྟཾ མདྡནྟོ གཙྪཏི. ཀསྶཀོ ཙ ‘‘མཱ མེ ཁེཏྟཾ མདྡཐཱ’’ཏི ཝཱརེནྟོཔི ཝཱརེཏུཾ ནཱསཀྑི. ཨཐསྶ ཨེཏདཧོསི – ‘‘སཙེ ཨིམསྨིཾ ཋཱནེ པཙྩེཀབུདྡྷསྶ པཎྞསཱལཱ ན བྷཝེཡྻ, ན མེ ཁེཏྟཾ མདྡེཡྻུ’’ནྟི. སོ པཙྩེཀབུདྡྷསྶ པིཎྜཱཡ པཝིཊྛཀཱལེ པརིབྷོགབྷཱཛནཱནི བྷིནྡིཏྭཱ པཎྞསཱལཾ ཛྷཱཔེསི. པཙྩེཀབུདྡྷོ ཏཾ ཛྷཱམཾ དིསྭཱ ཡཐཱསུཁཾ པཀྐཱམི. མཧཱཛནོ གནྡྷམཱལཾ ཨཱདཱཡ ཨཱགཏོ ཛྷཱམཔཎྞསཱལཾ དིསྭཱ ‘‘ཀཧཾ ནུ ཁོ ནོ ཨཡྻོ གཏོ’’ཏི ཨཱཧ. སོཔི མཧཱཛནེནེཝ སདྡྷིཾ གཏོ མཧཱཛནམཛ྄ཛྷེ ཋིཏཀོཝ ཨེཝམཱཧ – ‘‘མཡཱ ཏསྶ པཎྞསཱལཱ ཛྷཱཔིཏཱ’’ཏི. ཨཐ ནཾ ‘‘གཎྷཐ, ཨིམཾ པཱཔིམཾ ནིསྶཱཡ མཡཾ པཙྩེཀབུདྡྷཾ དཊྛུཾ ན ལབྷིམྷཱ’’ཏི དཎྜཱདཱིཧི པོཐེཏྭཱ ཛཱིཝིཏཀྑཡཾ པཱཔེསུཾ. སོ ཨཝཱིཙིམྷི ནིབྦཏྟིཏྭཱ ཡཱཝཱཡཾ མཧཱཔཐཝཱི ཡོཛནམཏྟཾ ཨུསྶནྣཱ, ཏཱཝ ནིརཡེ པཙྩིཏྭཱ པཀྐཱཝསེསེན གིཛ྄ཛྷཀཱུཊེ ཨཧིཔེཏོ ཧུཏྭཱ ནིབྦཏྟི. སཏྠཱ ཨིདཾ ཏསྶ པུབྦཀམྨཾ ཀཐེཏྭཱ, ‘‘བྷིཀྑཝེ, པཱཔཀམྨཾ ནཱམེཏཾ ཁཱིརསདིསཾ, ཡཐཱ ཁཱིརཾ དུཡ྄ཧམཱནམེཝ ན པརིཎམཏི. ཏཐཱ ཀམྨཾ ཀཡིརམཱནམེཝ ན ཝིཔཙྩཏི. ཡདཱ པན ཝིཔཙྩཏི, ཏདཱ ཨེཝརཱུཔེན དུཀྑེན སོཙཏཱི’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༧༡.

‘‘ན ཧི པཱཔཾ ཀཏཾ ཀམྨཾ, སཛྫུཁཱིརཾཝ མུཙྩཏི;

ཌཧནྟཾ བཱལམནྭེཏི, བྷསྨཙྪནྣོཝ པཱཝཀོ’’ཏི.

ཏཏྠ སཛྫུཁཱིརཾ ཝཱཏི ཏཾ ཁཎཾཡེཝ དྷེནུཡཱ ཐནེཧི ནིཀྑནྟཾ ཨབྦྷུཎྷཾ ཁཱིརཾ ན མུཙྩཏི ན པརིཎམཏི. ཨིདཾ ཝུཏྟཾ ཧོཏི – ཡཐཱ ཨིདཾ སཛྫུཁཱིརཾ ཏཾ ཁཎཉྙེཝ ན མུཙྩཏི ན པརིཎམཏི ན པཀཏིཾ ཝིཛཧཏི. ཡསྨིཾ པན བྷཱཛནེ དུཧིཏྭཱ གཧིཏཾ ཡཱཝ ཏཏྠ ཏཀྐཱདིཨམྦིལཾ ན པཀྑིཔཏི, ཡཱཝ དདྷིབྷཱཛནཱདིཀཾ ཨམྦིལབྷཱཛནཾ ན པཱཔུཎཱཏི, ཏཱཝ པཀཏིཾ ཨཝིཛཧིཏྭཱ པཙྪཱ ཛཧཏི, ཨེཝམེཝ པཱཔཀམྨམྤི ཀརིཡམཱནམེཝ ན ཝིཔཙྩཏི. ཡདི ཝིཔཙྩེཡྻ, ན ཀོཙི པཱཔཀམྨཾ ཀཱཏུཾ ཝིསཧེཡྻ. ཡཱཝ པན ཀུསལཱབྷིནིབྦཏྟཱ ཁནྡྷཱ དྷརནྟི, ཏཱཝ ནཾ ཏེ རཀྑནྟི. ཏེསཾ བྷེདཱ ཨཔཱཡེ ནིབྦཏྟཀྑནྡྷེསུ ཝིཔཙྩཏི, ཝིཔཙྩམཱནཉྩ ཌཧནྟཾ བཱལམནྭེཏི.‘‘ཀིཾ ཝིཡཱ’’ཏི? ‘‘བྷསྨཙྪནྣོཝ པཱཝཀོ’’ཏི. ཡཐཱ ཧི ཚཱརིཀཱཡ པཊིཙྪནྣོ ཝཱིཏཙྩིཏངྒཱརོ ཨཀྐནྟོཔི ཚཱརིཀཱཡ པཊིཙྪནྣཏྟཱ ན ཏཱཝ ཌཧཏི, ཚཱརིཀཾ པན ཏཱཔེཏྭཱ ཙམྨཱདཱིནཾ ཌཧནཝསེན ཡཱཝ མཏྠལུངྒཱ ཌཧནྟོ གཙྪཏི, ཨེཝམེཝ པཱཔཀམྨམྤི ཡེན ཀཏཾ ཧོཏི, ཏཾ བཱལཾ དུཏིཡེ ཝཱ ཏཏིཡེ ཝཱ ཨཏྟབྷཱཝེ ནིརཡཱདཱིསུ ནིབྦཏྟཾ ཌཧནྟཾ ཨནུགཙྪཏཱིཏི.

དེསནཱཝསཱནེ བཧཱུ སོཏཱཔནྣཱདཡོ ཨཧེསུནྟི.

ཨཧིཔེཏཝཏྠུ དྭཱདསམཾ.

༡༣. སཊྛིཀཱུཊཔེཏཝཏྠུ

ཡཱཝདེཝ ཨནཏྠཱཡཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ སཊྛིཀཱུཊཔེཏཾ ཨཱརབྦྷ ཀཐེསི.

པུརིམནཡེནེཝ ཧི མཧཱམོགྒལླཱནཏྠེརོ ལཀྑཎཏྠེརེན སདྡྷིཾ གིཛ྄ཛྷཀཱུཊཱ ཨོརོཧནྟོ ཨཉྙཏརསྨིཾ པདེསེ སིཏཾ པཱཏྭཱཀཱསི. ཐེརེན སིཏཀཱརཎཾ པུཊྛོ ‘‘བྷགཝཏོ སནྟིཀེ མཾ པུཙྪེཡྻཱསཱི’’ཏི ཝཏྭཱ པིཎྜཱཡ ཙརིཏྭཱ སཏྠཱརཾ ཨུཔསངྐམིཏྭཱ ཝནྡིཏྭཱ ནིསིནྣཀཱལེ པུན པུཊྛོ ཨཱཧ – ‘‘ཨཧཾ, ཨཱཝུསོ, ཨེཀཾ པེཏཾ ཨདྡསཾ ཏིགཱཝུཏཔྤམཱཎེན ཨཏྟབྷཱཝེན, ཏསྶ སཊྛི ཨཡཀཱུཊསཧསྶཱནི ཨཱདིཏྟཱནི སམྤཛྫལིཏཱནི ཨུཔརིམཏྠཀེ པཏིཏྭཱ པཏིཏྭཱ ཨུཊྛཧནྟི སཱིསཾ བྷིནྡནྟི, བྷིནྣཾ བྷིནྣཾ པུན སམུཊྛཧཏི, ཨིམིནཱ ཨཏྟབྷཱཝེན མཡཱ ཨེཝརཱུཔོ ཨཏྟབྷཱཝོ ན དིཊྛཔུབྦོ, ཨཧཾ ཏཾ དིསྭཱ སིཏཾ པཱཏྭཱཀཱསི’’ནྟི. པེཏཝཏྠུསྨིཉྷི –

‘‘སཊྛི ཀཱུཊསཧསྶཱནི, པརིཔུཎྞཱནི སབྦསོ;

སཱིསེ ཏུཡ྄ཧཾ ནིཔཏནྟི, ཝོབྷིནྡནྟེཝ མཏྠཀ’’ནྟི. (པེ. ཝ. ༨༠༨, ༨༡༠, ༨༡༣) ཨཱདི –

ཨིམམེཝ པེཏཾ སནྡྷཱཡ ཝུཏྟཾ. སཏྠཱ ཐེརསྶ ཀཐཾ སུཏྭཱཝ, ‘‘བྷིཀྑཝེ, མཡཱཔེས སཏྟོ བོདྷིམཎྜེ ནིསིནྣེནེཝ དིཊྛོ ‘ཡེ ཙ པན མེ ཝཙནཾ ན སདྡཧེཡྻུཾ, ཏེསཾ ཨཧིཏཱཡ བྷཝེཡྻཱ’ཏི པརེསཾ ཨནུཀམྤཱཡ ན ཀཐེསིཾ, ཨིདཱནི པན མོགྒལླཱནསྶ སཀྑཱི ཧུཏྭཱ ཀཐེམཱི’’ཏི ཨཱཧ. ཏཾ སུཏྭཱ བྷིཀྑཱུ ཏསྶ པུབྦཀམྨཾ པུཙྪིཾསུ. སཏྠཱཔི ནེསཾ ཀཐེསི –

ཨཏཱིཏེ ཀིར བཱརཱཎསིཡཾ སཱལི༹ཏྟཀསིཔྤེ ནིཔྥཏྟིཾ པཏྟོ ཨེཀོ པཱིཋསཔྤི ཨཧོསི. སོ ནགརདྭཱརེ ཨེཀསྶ ཝཊརུཀྑསྶ ཧེཊྛཱ ནིསིནྣོ སཀྑརཱནི ཁིཔིཏྭཱ ཏསྶ པཎྞཱནི ཚིནྡནྟོ ‘‘ཧཏྠིརཱུཔཀཾ ནོ དསྶེཧི, ཨསྶརཱུཔཀཾ ནོ དསྶེཧཱི’’ཏི གཱམདཱརཀེཧི ཝུཙྩམཱནོ ཨིཙྪིཏིཙྪིཏཱནི རཱུཔཱནི དསྶེཏྭཱ ཏེསཾ སནྟིཀཱ ཁཱདནཱིཡཱདཱིནི ལབྷཏི. ཨཐེཀདིཝསཾ རཱཛཱ ཨུཡྻཱནཾ གཙྪནྟོ ཏཾ པདེསཾ པཱཔུཎི. དཱརཀཱ པཱིཋསཔྤིཾ པཱརོཧནྟརེ ཀཏྭཱ པལཱཡིཾསུ. རཉྙོ ཋིཏམཛ྄ཛྷནྷིཀེ རུཀྑམཱུལཾ པཝིཊྛསྶ ཚིདྡཱཝཚིདྡཙྪཱཡཱ སརཱིརཾ ཕརི. སོ ‘‘ཀིཾ ནུ ཁོ ཨེཏ’’ནྟི ཨུདྡྷཾ ཨོལོཀེནྟོ རུཀྑཔཎྞེསུ ཧཏྠིརཱུཔཀཱདཱིནི དིསྭཱ ‘‘ཀསྶེཏཾ ཀམྨ’’ནྟི པུཙྪིཏྭཱ ‘‘པཱིཋསཔྤིནོ’’ཏི སུཏྭཱ ཏཾ པཀྐོསཱཔེཏྭཱ ཨཱཧ – ‘‘མཡ྄ཧཾ པུརོཧིཏོ ཨཏིམུཁརོ ཨཔྤམཏྟཀེཔི ཝུཏྟེ བཧུཾ བྷཎནྟོ མཾ ཨུཔདྡཝེཏི, སཀྑིསྶསི ཏསྶ མུཁེ ནཱལི༹མཏྟཱ ཨཛལཎྜིཀཱ ཁིཔིཏུ’’ནྟི? ‘‘སཀྑིསྶཱམི, དེཝ. ཨཛལཎྜིཀཱ ཨཱཧརཱཔེཏྭཱ པུརོཧིཏེན སདྡྷིཾ ཏུམྷེ ཨནྟོསཱཎིཡཾ ནིསཱིདཐ, ཨཧམེཏྠ ཀཏྟབྦཾ ཛཱནིསྶཱམཱི’’ཏི. ཨཐ རཱཛཱ ཏཐཱ ཀཱརེསི. ཨིཏརོ ཀཏྟརིཡགྒེན སཱཎིཡཱ ཚིདྡཾ ཀཏྭཱ པུརོཧིཏསྶ རཉྙཱ སདྡྷིཾ ཀཐེནྟསྶ མུཁེ ཝིཝཊམཏྟེ ཨེཀེཀཾ ཨཛལཎྜིཀཾ ཁིཔི. པུརོཧིཏོ མུཁཾ པཝིཊྛཾ པཝིཊྛཾ གིལི. པཱིཋསཔྤཱི ཁཱིཎཱསུ ཨཛལཎྜིཀཱསུ སཱཎིཾ ཙཱལེསི. རཱཛཱ ཏཱཡ སཉྙཱཡ ཨཛལཎྜིཀཱནཾ ཁཱིཎབྷཱཝཾ ཉཏྭཱ ཨཱཧ – ‘‘ཨཱཙརིཡ, ཨཧཾ ཏུམྷེཧི སདྡྷིཾ ཀཐེནྟོ ཀཐཾ ནིཏྠརིཏུཾ ན སཀྑིསྶཱམི, ཏུམྷེ ཨཏིམུཁརཏཱཡ ནཱལི༹མཏྟཱ ཨཛལཎྜིཀཱ གིལནྟཱཔི ཏུཎྷཱིབྷཱཝཾ ནཱཔཛྫཐཱ’’ཏི. བྲཱཧྨཎོ མངྒུཨུབྷཱཝཾ ཨཱཔཛྫིཏྭཱ ཏཏོ པཊྛཱཡ མུཁཾ ཝིཝརིཏྭཱ རཉྙཱ སདྡྷིཾ སལླཔིཏུཾ ནསཀྑི. རཱཛཱ པཱིཋསཔྤིགུཎཾ ཨནུསྶརིཏྭཱ ཏཾ པཀྐོསཱཔེཏྭཱ ‘‘ཏཾ ནིསྶཱཡ མེ སུཁཾ ལདྡྷ’’ནྟི ཏུཊྛོ ཏསྶ སབྦཊྛཀཾ ནཱམ དྷནཾ དཏྭཱ ནགརསྶ ཙཏཱུསུ དིསཱསུ ཙཏྟཱརོ ཝརགཱམེ ཨདཱསི. ཏམཏྠཾ ཝིདིཏྭཱ རཉྙོ ཨཏྠདྷམྨཱནུསཱསཀོ ཨམཙྩོ ཨིམཾ གཱཐམཱཧ –

‘‘སཱདྷུ ཁོ སིཔྤཀཾ ནཱམ, ཨཔི ཡཱདིས ཀཱིདིསཾ;

པསྶ ཁཉྫཔྤཧཱརེན, ལདྡྷཱ གཱམཱ ཙཏུདྡིསཱ’’ཏི. (ཛཱ. ༡.༡.༡༠༧);

སོ པན ཨམཙྩོ ཏེན སམཡེན ཨཡམེཝ བྷགཝཱ ཨཧོསི. ཨཐེཀོ པུརིསོ པཱིཋསཔྤིནཱ ལདྡྷསམྤཏྟིཾ དིསྭཱ ཙིནྟེསི – ‘‘ཨཡཾ ནཱམ པཱིཋསཔྤཱི ཧུཏྭཱ ཨིམཾ སིཔྤཾ ནིསྶཱཡ མཧཱསམྤཏྟིཾ པཏྟོ, མཡཱཔེཏཾ སིཀྑིཏུཾ ཝཊྚཏཱི’’ཏི. སོ ཏཾ ཨུཔསངྐམིཏྭཱ ཝནྡིཏྭཱ ‘‘ཨིདཾ མེ, ཨཱཙརིཡ, སིཔྤཾ དེཐཱ’’ཏི ཨཱཧ. ‘‘ན སཀྐཱ, ཏཱཏ, དཱཏུ’’ནྟི. སོ ཏེན པཊིཀྑིཏྟོ ‘‘ཧོཏུ, ཨཱརཱདྷེསྶཱམི ན’’ནྟི ཏསྶ ཧཏྠཔཱདཔརིཀམྨཱདཱིནི ཀརོནྟོ ཙིརསྶཾ ཏཾ ཨཱརཱདྷེཏྭཱ པུནཔྤུནཾ ཡཱཙི, པཱིཋསཔྤཱི ‘‘ཨཡཾ མེ ཨཏིཝིཡ ཨུཔཀཱརོ’’ཏི ཏཾ པཊིབཱཧིཏུཾ ཨསཀྐོནྟོ སིཔྤཾ སིཀྑཱཔེཏྭཱ ‘‘ནིཔྥནྣཾ ཏེ, ཏཱཏ, སིཔྤཾ, ཨིདཱནི ཀིཾ ཀརིསྶསཱི’’ཏི ཨཱཧ. ‘‘བཧི གནྟྭཱ སིཔྤཾ ཝཱིམཾསིསྶཱམཱི’’ཏི. ‘‘ཀིཾ ཀརིསྶསཱི’’ཏི? ‘‘གཱཝིཾ ཝཱ མནུསྶཾ ཝཱ པཧརིཏྭཱ མཱརེསྶཱམཱི’’ཏི. ‘‘ཏཱཏཱ, གཱཝིཾ མཱརེནྟསྶ སཏཾ དཎྜོ ཧོཏི མནུསྶཾ མཱརེནྟསྶ སཧསྶཾ, ཏྭཾ སཔུཏྟདཱརོཔི ཏཾ ནིཏྠརིཏུཾ ན སཀྑིསྶསི, མཱ ཝིནསྶ, ཡམྷི པཧཊེ དཎྜོ ནཏྠི, ཏཱདིསཾ ནིམཱཏཱཔིཏིཀཾ ཀཉྩི ཨུཔདྷཱརེཧཱི’’ཏི. སོ ‘‘སཱདྷཱུ’’ཏི སཀྑརཱ ཨུཙྪངྒེ ཀཏྭཱ ཏཱདིསཾ ཨུཔདྷཱརཡམཱནོ ཝིཙརནྟོ གཱཝིཾ དིསྭཱ ‘‘ཨཡཾ སསཱམིཀཱ’’ཏི པཧརིཏུཾ ན ཝིསཧི, མནུསྶཾ དིསྭཱ ‘‘ཨཡཾ སམཱཏཱཔིཏིཀོ’’ཏི པཧརིཏུཾ ན ཝིསཏི.

ཏེན སམཡེན སུནེཏྟོ ནཱམ པཙྩེཀབུདྡྷོ ཏཾ ནགརཾ ནིསྶཱཡ པཎྞསཱལཱཡ ཝིཧརཏི. སོ ཏཾ པིཎྜཱཡ པཝིསནྟཾ ནགརདྭཱརནྟརེ དིསྭཱ ‘‘ཨཡཾ ནིམཱཏཱཔིཏིཀོ, ཨིམསྨིཾ པཧཊེ དཎྜོ ནཏྠི, ཨིམཾ པཧརིཏྭཱ སིཔྤཾ ཝཱིམཾསིསྶཱམཱི’’ཏི པཙྩེཀབུདྡྷསྶ དཀྑིཎཀཎྞསོཏཾ སནྡྷཱཡ སཀྑརཾ ཁིཔི. སཱ དཀྑིཎཀཎྞསོཏེན པཝིསིཏྭཱ ཝཱམེན ནིཀྑམི, དུཀྑཱ ཝེདནཱ ཨུཔྤཛྫི. པཙྩེཀབུདྡྷོ བྷིཀྑཱཡ ཙརིཏུཾ ནཱསཀྑི, ཨཱཀཱསེན པཎྞསཱལཾ གནྟྭཱ པརིནིབྦཱཡི. མནུསྶཱ པཙྩེཀབུདྡྷེ ཨནཱགཙྪནྟེ ‘‘ཀིཉྩི ཨཕཱསུཀཾ བྷཝིསྶཏཱི’’ཏི ཙིནྟེཏྭཱ ཏཏྠ གནྟྭཱ ཏཾ པརིནིབྦུཏཾ དིསྭཱ རོདིཾསུ པརིདེཝིཾསུ. སོཔི མཧཱཛནཾ གཙྪནྟཾ དིསྭཱ ཏཏྠ གནྟྭཱ པཙྩེཀབུདྡྷཾ སཉྫཱནིཏྭཱ ‘‘ཨཡཾ པིཎྜཱཡ པཝིསནྟོ དྭཱརནྟརེ མམ སམྨུཁཱིབྷཱུཏོ, ཨཧཾ ཨཏྟནོ སིཔྤཾ ཝཱིམཾསནྟོ ཨིམཾ པཧརི’’ནྟི ཨཱཧ. མནུསྶཱ ‘‘ཨིམིནཱ ཀིར པཱཔཀེན པཙྩེཀབུདྡྷོ པཧཊོ, གཎྷཐ གཎྷཐཱ’’ཏི པོཐེཏྭཱ ཏཏྠེཝ ནཾ ཛཱིཝིཏཀྑཡཾ པཱཔེསུཾ. སོ ཨཝཱིཙིམྷི ནིབྦཏྟིཏྭཱ ཡཱཝཱཡཾ མཧཱཔཐཝཱི ཡོཛནམཏྟཾ ཨུསྶནྣཱ, ཏཱཝ པཙྩིཏྭཱ ཝིཔཱཀཱཝསེསེན གིཛ྄ཛྷཀཱུཊམཏྠཀེ སཊྛིཀཱུཊཔེཏོ ཧུཏྭཱ ནིབྦཏྟི. སཏྠཱ ཏསྶ ཨིམཾ པུབྦཀམྨཾ ཀཐེཏྭཱ, ‘‘བྷིཀྑཝེ, བཱལསྶ ནཱམ སིཔྤཾ ཝཱ ཨིསྶརིཡཾ ཝཱ ཨུཔྤཛྫམཱནཾ ཨནཏྠཱཡ ཨུཔྤཛྫཏི. བཱལོ ཧི སིཔྤཾ ཝཱ ཨིསྶརིཡཾ ཝཱ ལབྷིཏྭཱ ཨཏྟནོ ཨནཏྠམེཝ ཀརོཏཱི’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ.

༧༢.

‘‘ཡཱཝདེཝ ཨནཏྠཱཡ, ཉཏྟཾ བཱལསྶ ཛཱཡཏི;

ཧནྟི བཱལསྶ སུཀྐཾསཾ, མུདྡྷམསྶ ཝིཔཱཏཡ’’ནྟི.

ཏཏྠ ཡཱཝདེཝཱཏི ཨཝདྷིཔརིཙྪེདནཏྠེ ནིཔཱཏོ. ཉཏྟནྟི ཛཱནནསབྷཱཝོ. ཡཾ སིཔྤཾ ཛཱནཱཏི, ཡམྷི ཝཱ ཨིསྶརིཡེ ཡསེ སམྤཏྟིཡཉྩ ཋིཏོ ཛནེན ཉཱཡཏི, པཱཀཊོ པཉྙཱཏོ ཧོཏི, ཏསྶེཏཾ ནཱམཾ. སིཔྤཾ ཝཱ ཧི ཨིསྶརིཡཱདིབྷཱཝོ ཝཱ བཱལསྶ ཨནཏྠཱཡེཝ ཛཱཡཏི. ཏཾ ནིསྶཱཡ སོ ཨཏྟནོ ཨནཏྠམེཝ ཀརོཏི. ཧནྟཱིཏི ཝིནཱསེཏི. སུཀྐཾསནྟི ཀུསལཀོཊྛཱསཾ, བཱལསྶ ཧི སིཔྤཾ ཝཱ ཨིསྶརིཡཾ ཝཱ ཨུཔྤཛྫམཱནཾ ཀུསལཀོཊྛཱསཾ གྷཱཏེནྟམེཝ ཨུཔྤཛྫཏི. མུདྡྷནྟི པཉྙཱཡེཏཾ ནཱམཾ. ཝིཔཱཏཡནྟི ཝིདྡྷཾསཡམཱནཾ. ཏསྶ ཧི ཏཾ སུཀྐཾསཾ ཧནནྟཾ པཉྙཱསངྑཱཏཾ མུདྡྷཾ ཝིཔཱཏེནྟཾ ཝིདྡྷཾསེནྟམེཝ ཧནྟཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ.

སཊྛིཀཱུཊཔེཏཝཏྠུ ཏེརསམཾ.

༡༤. ཙིཏྟགཧཔཏིཝཏྠུ

ཨསནྟཾ བྷཱཝནམིཙྪེཡྻཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སུདྷམྨཏྠེརཾ ཨཱརབྦྷ ཀཐེསི. དེསནཱ མཙྪིཀཱསཎྜེ སམུཊྛཱཡ སཱཝཏྠིཡཾ ནིཊྛིཏཱ.

མཙྪིཀཱསཎྜནགརསྨིཉྷི ཙིཏྟོ ནཱམ གཧཔཏི པཉྩཝགྒིཡཱནཾ ཨབྦྷནྟརཾ མཧཱནཱམཏྠེརཾ ནཱམ པིཎྜཱཡ ཙརམཱནཾ དིསྭཱ ཏསྶ ཨིརིཡཱཔཐེ པསཱིདིཏྭཱ པཏྟཾ ཨཱདཱཡ གེཧཾ པཝེསེཏྭཱ བྷོཛེཏྭཱ བྷཏྟཀིཙྩཱཝསཱནེ དྷམྨཀཐཾ སུཎནྟོ སོཏཱཔཏྟིཕལཾ པཏྭཱ ཨཙལསདྡྷོ ཧུཏྭཱ ཨམྦཱཊཀཝནཾ ནཱམ ཨཏྟནོ ཨུཡྻཱནཾ སངྒྷཱརཱམཾ ཀཏྟུཀཱམོ ཐེརསྶ ཧཏྠེ ཨུདཀཾ པཱཏེཏྭཱ ནིཡྻཱདེསི. ཏསྨིཾ ཁཎེ ‘‘པཏིཊྛིཏཾ བུདྡྷསཱསན’’ནྟི ཨུདཀཔརིཡནྟཾ ཀཏྭཱ མཧཱཔཐཝཱི ཀམྤི. མཧཱསེཊྛི ཨུཡྻཱནེ མཧཱཝིཧཱརཾ ཀཱརེཏྭཱ སབྦདིསཱཧི ཨཱགཏཱནཾ བྷིཀྑཱུནཾ ཝིཝཊདྭཱརོ ཨཧོསི. མཙྪིཀཱསཎྜེ སུདྷམྨཏྠེརོ ནཱམ ནེཝཱསིཀོ ཨཧོསི.

ཨཔརེན སམཡེན ཙིཏྟསྶ གུཎཀཐཾ སུཏྭཱ དྭེ ཨགྒསཱཝཀཱ ཏསྶ སངྒཧཾ ཀཏྟུཀཱམཱ མཙྪིཀཱསཎྜཾ ཨགམཾསུ. ཙིཏྟོ གཧཔཏི ཏེསཾ ཨཱགམནཾ སུཏྭཱ ཨཌྜྷཡོཛནམགྒཾ པཙྩུགྒནྟྭཱ ཏེ ཨཱདཱཡ ཨཏྟནོ ཝིཧཱརཾ པཝེསེཏྭཱ ཨཱགནྟུཀཝཏྟཾ ཀཏྭཱ, ‘‘བྷནྟེ, ཐོཀཾ དྷམྨཀཐཾ སོཏུཀཱམོམྷཱི’’ཏི དྷམྨསེནཱཔཏིཾ ཡཱཙི. ཨཐ ནཾ ཐེརོ, ‘‘ཨུཔཱསཀ, ཨདྡྷཱནེན ཨཱགཏཱམྷཱ ཀིལནྟརཱུཔཱ. ཨཔིཙ ཐོཀཾ སུཎཱཧཱི’’ཏི ཏསྶ དྷམྨཾ ཀཐེསི. སོ ཐེརསྶ དྷམྨཾ སུཎནྟོཝ ཨནཱགཱམིཕལཾ པཱཔུཎི. སོ དྭེ ཨགྒསཱཝཀེ ཝནྡིཏྭཱ, ‘‘བྷནྟེ, སྭེ བྷིཀྑུསཧསྶེན སདྡྷིཾ མམ གེཧེ བྷིཀྑཾ གཎྷཐཱ’’ཏི ནིམནྟེཏྭཱ པཙྪཱ ནེཝཱསིཀཾ སུདྷམྨཏྠེརཾ ‘‘ཏུམྷེཔི, བྷནྟེ, སྭེ ཐེརེཧི སདྡྷིཾ ཨཱགཙྪེཡྻཱཐཱ’’ཏི ནིམནྟེསི. སོ ‘‘ཨཡཾ མཾ པཙྪཱ ནིམནྟེཏཱི’’ཏི ཀུདྡྷོ པཊིཀྑིཔིཏྭཱ པུནཔྤུནཾ ཡཱཙིཡམཱནོཔི པཊིཀྑིཔི ཨེཝ. ཨུཔཱསཀོ ‘‘པཉྙཱཡིསྶཐ, བྷནྟེ’’ཏི པཀྐམིཏྭཱ པུནདིཝསེ ཨཏྟནོ ནིཝེསནེ མཧཱདཱནཾ སཛྫེསི. སུདྷམྨཏྠེརོཔི པཙྩཱུསཀཱལེཡེཝ ‘‘ཀཱིདིསོ ནུ ཁོ གཧཔཏིནཱ ཨགྒསཱཝཀཱནཾ སཀྐཱརོ སཛྫིཏོ, སྭེ གནྟྭཱ པསྶིསྶཱམཱི’’ཏི ཙིནྟེཏྭཱ པཱཏོཝ པཏྟཙཱིཝརཾ ཨཱདཱཡ ཏསྶ གེཧཾ ཨགམཱསི.

སོ གཧཔཏིནཱ ‘‘ནིསཱིདཐ, བྷནྟེ’’ཏི ཝུཙྩམཱནོཔི ‘‘ནཱཧཾ ནིསཱིདཱམི, པིཎྜཱཡ ཙརིསྶཱམཱི’’ཏི ཝཏྭཱ ཨགྒསཱཝཀཱནཾ པཊིཡཱདིཏཾ སཀྐཱརཾ ཨོལོཀེཏྭཱ གཧཔཏིཾ ཛཱཏིཡཱ གྷཊྚེཏུཀཱམོ ‘‘ཨུལཱ༹རོ ཏེ, གཧཔཏི, སཀྐཱརོ, ཨཔིཙེཏྠ ཨེཀཉྙེཝ ནཏྠཱི’’ཏི ཨཱཧ. ‘‘ཀིཾ, བྷནྟེ’’ཏི? ‘‘ཏིལསཾགུལི༹ཀཱ, གཧཔཏཱི’’ཏི ཝཏྭཱ གཧཔཏིནཱ ཀཱཀོཔམཱཡ ཨཔསཱདིཏོ ཀུཛ྄ཛྷིཏྭཱ ‘‘ཨེསོ ཏེ, གཧཔཏི, ཨཱཝཱསོ, པཀྐམིསྶཱམཧ’’ནྟི ཝཏྭཱ ཡཱཝཏཏིཡཾ ཝཱརིཡམཱནོཔི པཀྐམིཏྭཱ སཏྠུ སནྟིཀཾ གནྟྭཱ ཙིཏྟེན ཙ ཨཏྟནཱ ཙ ཝུཏྟཝཙནཾ ཨཱརོཙེསི. སཏྠཱ ‘‘ཏཡཱ ཨུཔཱསཀོ སདྡྷོ པསནྣོ ཧཱིནེན ཁུཾསིཏོ’’ཏི ཏསྶེཝ དོསཾ ཨཱརོཔེཏྭཱ པཊིསཱརཎཱིཡཀམྨཾ ཀཱརཱཔེཏྭཱ ‘‘གཙྪ, ཙིཏྟགཧཔཏིཾ ཁམཱཔེཧཱི’’ཏི པེསེསི. སོ ཏཏྠ གནྟྭཱ, ‘‘གཧཔཏི, མཡ྄ཧམེཝ སོ དོསོ, ཁམཱཧི མེ’’ཏི ཝཏྭཱཔི ‘‘ནཱཧཾ ཁམཱམཱི’’ཏི ཏེན པཊིཀྑིཏྟོ མངྐུབྷཱུཏོ ཏཾ ཁམཱཔེཏུཾ ནཱསཀྑི. པུནདེཝ སཏྠུ སནྟིཀཾ པཙྩཱགམཱསི. སཏྠཱ ‘‘ནཱསྶ ཨུཔཱསཀོ ཁམིསྶཏཱི’’ཏི ཛཱནནྟོཔི ‘‘མཱནཐདྡྷོ ཨེས, ཏིཾསཡོཛནཾ ཏཱཝ མགྒཾ གནྟྭཱ པཙྩཱགཙྪཏཱུ’’ཏི ཁམནཱུཔཱཡཾ ཨནཱཙིཀྑིཏྭཱཝ ཨུཡྻོཛེསི. ཨཐསྶ པུནཱགཏཀཱལེ ནིཧཏམཱནསྶ ཨནུདཱུཏཾ དཏྭཱ ‘‘གཙྪ, ཨིམིནཱ སདྡྷིཾ གནྟྭཱ ཨུཔཱསཀཾ ཁམཱཔེཧཱི’’ཏི ཝཏྭཱ ‘‘སམཎེན ནཱམ ‘མཡ྄ཧཾ ཝིཧཱརོ, མཡ྄ཧཾ ནིཝཱསཊྛཱནཾ, མཡ྄ཧཾ ཨུཔཱསཀོ, མཡ྄ཧཾ ཨུཔཱསིཀཱ’ཏི མཱནཾ ཝཱ ཨིསྶཾ ཝཱ ཀཱཏུཾ ན ཝཊྚཏི. ཨེཝཾ ཀརོནྟསྶ ཧི ཨིཙྪཱམཱནཱདཡོ ཀིལེསཱ ཝཌྜྷནྟཱི’’ཏི ཨནུསནྡྷིཾ གྷཊྚེཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༧༣.

‘‘ཨསནྟཾ བྷཱཝནམིཙྪེཡྻ, པུརེཀྑཱརཉྩ བྷིཀྑུསུ;

ཨཱཝཱསེསུ ཨིསྶརིཡཾ, པཱུཛཱ པརཀུལེསུ ཙ.

༧༤.

‘‘མམེཝ ཀཏ མཉྙནྟུ, གིཧཱི པབྦཛིཏཱ ཨུབྷོ.

མམེཝཱཏིཝསཱ ཨསྶུ, ཀིཙྩཱཀིཙྩེསུ ཀིསྨིཙི;

ཨིཏི བཱལསྶ སངྐཔྤོ, ཨིཙྪཱ མཱནོ ཙ ཝཌྜྷཏཱི’’ཏི.

ཏཏྠ ཨསནྟནྟི ཡོ བཱལོ བྷིཀྑུ ཨཝིཛྫམཱནཾ སམྦྷཱཝནཾ ཨིཙྪེཡྻ, ‘‘ཨསྶདྡྷོཝ སམཱནོ ‘སདྡྷོཏི མཾ ཛནོ ཛཱནཱཏཱུ’ཏི ཨིཙྪཏཱི’’ཏི. པཱཔིཙྪཏཱནིདྡེསེ (ཝིབྷ. ༨༥༡) ཝུཏྟནཡེནེཝ བཱལོ ‘‘ཨསདྡྷོ དུསྶཱིལོ ཨཔྤསྶུཏོ ཨཔྤཝིཝིཏྟོ ཀུསཱིཏོ ཨནུཔཊྛིཏསྶཏི ཨསམཱཧིཏོ དུཔྤཉྙོ ཨཁཱིཎཱསཝོཝ སམཱནོ ‘ཨཧོ ཝཏ མཾ ཛནོ ཨཡཾ སདྡྷོ, སཱིལཝཱ, བཧུསྶུཏོ, པཝིཝིཏྟོ, ཨཱརདྡྷཝཱིརིཡོ, ཨུཔཊྛིཏསྶཏི, སམཱཧིཏོ, པཉྙཝཱ, ཁཱིཎཱསཝོ’ཏི ཛཱནེཡྻཱ’’ཏི ཨིདཾ ཨསནྟསམྦྷཱཝནཾ ཨིཙྪཏི. པུརེཀྑཱརནྟི པརིཝཱརཾ. ‘‘ཨཧོ ཝཏ མཾ སཀལཝིཧཱརེ བྷིཀྑཱུ པརིཝཱརེཏྭཱ པཉྷཾ པུཙྪནྟཱ ཝིཧརེཡྻུ’’ནྟི ཨེཝཾ ཨིཙྪཱཙཱརེ ཋཏྭཱ པུརེཀྑཱརཉྩ བྷིཀྑཱུསུ ཨིཙྪཏི. ཨཱཝཱསེསཱུཏི སངྒྷིཀེསུ ཙ ཨཱཝཱསེསུ ཡཱནི ཝིཧཱརམཛ྄ཛྷེ པཎཱིཏསེནཱསནཱནི, ཏཱནི ཨཏྟནོ སནྡིཊྛསམྦྷཏྟཱདཱིནཾ བྷིཀྑཱུནཾ ‘‘ཏུམྷེ ཨིདྷ ཝསཐཱ’’ཏི ཝིཙཱརེནྟོ སཡམྤི ཝརཏརཾ སེནཱསནཾ པལིབོདྷེནྟོ, སེསཱནཾ ཨཱགནྟུཀབྷིཀྑཱུནཾ པཙྩནྟིམཱནི ལཱམཀསེནཱསནཱནི ཙེཝ ཨམནུསྶཔརིགྒཧིཏཱནི ཙ ‘‘ཏུམྷེ ཨིདྷ ཝསཐཱ’’ཏི ཝིཙཱརེནྟོ ཨཱཝཱསེསུ ཨིསྶརིཡཾ ཨིཙྪཏི. པཱུཛཱ པརཀུལེསུ ཙཱཏི ནེཝ མཱཏཱཔིཏཱུནཾ ན ཉཱཏཀཱནཾ པརེསུཡེཝ ཀུལེསུ ‘‘ཨཧོ ཝཏིམེ མཡ྄ཧམེཝ དདེཡྻུཾ, ན ཨཉྙེས’’ནྟི ཨེཝཾ ཙཏུཔྤཙྩཡེཧི པཱུཛཾ ཨིཙྪཏི.

མམེཝ ཀཏ མཉྙནྟཱུཏི ཡསྶ ཙ བཱལསྶ ‘‘ཡཾཀིཉྩི ཝིཧཱརེ ཨུཔོསཐཱགཱརཱདིཀརཎཝསེན ཀཏཾ ནཝཀམྨཾ, ཏཾ སབྦཾ ཨམྷཱཀཾ ཐེརེན ཀཏནྟི ཨེཝཾ གིཧཱི ཙ པབྦཛིཏཱ ཙ ཨུབྷོཔི མམེཝ ནིསྶཱཡ ཀཏཾ པརིཀམྨཾ ནིཊྛིཏཾ མཉྙནྟཱུ’’ཏི སངྐཔྤོ ཨུཔྤཛྫཏི. མམེཝཱཏིཝསཱ ཨསྶཱུཏི ‘‘གིཧཱི ཙ པབྦཛིཏཱ ཙ སབྦེཔི མམེཝ ཝསེ ཝཏྟནྟུ, སཀཊགོཎཝཱསིཕརསུཨཱདཱིནི ཝཱ ལདྡྷབྦཱནི ཧོནྟུ, ཨནྟམསོ ཡཱགུམཏྟམྤི ཏཱཔེཏྭཱ པིཝནཱདཱིནི ཝཱ, ཨེཝརཱུཔེསུ ཀིཙྩཱཀིཙྩེསུ ཁུདྡཀམཧནྟེསུ ཀརཎཱིཡེསུ ཀིསྨིཉྩི ཨེཀཀིཙྩེཔི མམེཝ ཝསེ ཝཏྟནྟུ, མམེཝ ཨཱཔུཙྪིཏྭཱ ཀརོནྟཱུ’’ཏི སངྐཔྤོ ཨུཔྤཛྫཏི. ཨིཏི བཱལསྶཱཏི ཡསྶ བཱལསྶ སཱ ཙ ཨིཙྪཱ ཨཡཉྩ ཨེཝརཱུཔོ སངྐཔྤོ ཨུཔྤཛྫཏི, ཏསྶ ནེཝ ཝིཔསྶནཱ, ན མགྒཕལཱནི ཝཌྜྷནྟི. ཀེཝལཾ པནསྶ ཙནྡོདཡེ སམུདྡསྶ ཨུདཀཾ ཝིཡ ཚསུ དྭཱརེསུ ཨུཔྤཛྫམཱནཱ ཏཎྷཱ ཙེཝ ནཝཝིདྷམཱནོ ཙ ཝཌྜྷཏཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སུདྷམྨཏྠེརོཔི ཨིམཾ ཨོཝཱདཾ སུཏྭཱ སཏྠཱརཾ ཝནྡིཏྭཱ ཨུཊྛཱཡཱསནཱ པདཀྑིཎཾ ཀཏྭཱ ཏེན ཨནུདཱུཏེན བྷིཀྑུནཱ སདྡྷིཾ གནྟྭཱ ཨུཔཱསཀསྶ ཙཀྑུཔཐེ ཨཱཔཏྟིཾ པཊིཀརིཏྭཱ ཨུཔཱསཀཾ ཁམཱཔེསི. སོ ཨུཔཱསཀེན ‘‘ཁམཱམཧཾ, བྷནྟེ, སཙེ མཡ྄ཧཾ དོསོ ཨཏྠི, ཁམཐ མེ’’ཏི པཊིཁམཱཔིཏོ སཏྠཱརཱ དིནྣེ ཨོཝཱདེ ཋཏྭཱ ཀཏིཔཱཧེནེཝ སཧ པཊིསམྦྷིདཱཧི ཨརཧཏྟཾ པཱཔུཎི. ཨུཔཱསཀོཔི ཙིནྟེསི – ‘‘མཡཱ སཏྠཱརཾ ཨདིསྭཱཝ སོཏཱཔཏྟིཕལཾ པཏྟཾ, ཨདིསྭཱ ཨེཝ ཨནཱགཱམིཕལེ པཏིཊྛིཏོ, སཏྠཱརཾ མེ དཊྛུཾ ཝཊྚཏཱི’’ཏི. སོ ཏིལཏཎྜུལསཔྤིཕཱཎིཏཝཏྠཙྪཱདནཱདཱིཧི པརིཔཱུརཱནི པཉྩ སཀཊསཏཱནི ཡོཛཱཔེཏྭཱ ‘‘སཏྠཱརཾ དཊྛུཀཱམཱ ཨཱགཙྪནྟུ, པིཎྜཔཱཏཱདཱིཧི ན ཀིལམིསྶནྟཱི’’ཏི བྷིཀྑུསངྒྷསྶ ཨཱརོཙཱཔེཏྭཱ བྷིཀྑུནཱིསངྒྷསྶཱཔི ཨུཔཱསཀཱནམྤི ཨུཔཱསིཀཱནམྤི ཨཱརོཙཱཔེསི. ཏེན སདྡྷིཾ པཉྩསཏཱ པཉྩསཏཱ བྷིཀྑཱུ ཙ བྷིཀྑུནིཡོ ཙ ཨུཔཱསཀཱ ཙ ཨུཔཱསིཀཱཡོ ཙ ནིཀྑམིཾསུ. སོ ཏེསཉྩེཝ ཨཏྟནོ པརིསཱཡ ཙཱཏི ཏིཎྞཾ ཛནསཧསྶཱནཾ ཡཐཱ ཏིཾསཡོཛནེ མགྒེ ཡཱགུབྷཏྟཱདཱིཧི ཀིཉྩི ཝེཀལླཾ ན ཧོཏི, ཏཐཱ སཾཝིདཧི. ཏསྶ པན ནིཀྑནྟབྷཱཝཾ ཉཏྭཱ ཡོཛནེ ཡོཛནེ དེཝཏཱ ཁནྡྷཱཝཱརཾ བནྡྷིཏྭཱ དིབྦེཧི ཡཱགུཁཛྫཀབྷཏྟཔཱནཀཱདཱིཧི ཏཾ མཧཱཛནཾ ཨུཔཊྛཧིཾསུ, ཀསྶཙི ཀེནཙི ཝེཀལླཾ ན ཧོཏི. ཨེཝཾ དེཝཏཱཧི ཨུཔཊྛིཡམཱནོ དེཝསིཀཾ ཡོཛནཾ གཙྪནྟོ མཱསེན སཱཝཏྠིཾ པཱཔུཎི, པཉྩ སཀཊསཏཱནི ཡཐཱཔཱུརིཏཱནེཝ ཨཧེསུཾ. དེཝཏཱཧི ཙེཝ མནུསྶེཧི ཙ ཨབྷིཧཊཾ པཎྞཱཀཱརཾ ཝིསྶཛྫེནྟོཝ ཨགམཱསི.

སཏྠཱ ཨཱནནྡཏྠེརཾ ཨཱཧ – ‘‘ཨཱནནྡ, ཨཛྫ ཝཌྜྷམཱནཀཙྪཱཡཱཡ ཙིཏྟོ གཧཔཏི པཉྩཧི ཨུཔཱསཀསཏེཧི པརིཝུཏོ ཨཱགནྟྭཱ མཾ ཝནྡིསྶཏཱི’’ཏི. ‘‘ཀིཾ པན, བྷནྟེ, ཏསྶ ཏུམྷཱཀཾ ཝནྡནཀཱལེ ཀིཉྩི པཱཊིཧཱརིཡཾ བྷཝིསྶཏཱི’’ཏི? ‘‘བྷཝིསྶཏི, ཨཱནནྡཱ’’ཏི. ‘‘ཀིཾ, བྷནྟེ’’ཏི? ཏསྶ ཨཱགནྟྭཱ ‘‘མཾ ཝནྡནཀཱལེ རཱཛམཱནེན ཨཊྛཀརཱིསམཏྟེ པདེསེ ཛཎྞུཀམཏྟེན ཨོདྷིནཱ པཉྩཝཎྞཱནཾ དིབྦཔུཔྥཱནཾ གྷནཝསྶཾ ཝསྶིསྶཏཱི’’ཏི. ཏཾ ཀཐཾ སུཏྭཱ ནགརཝཱསིནོ ‘‘ཨེཝཾ མཧཱཔུཉྙོ ཀིར ཙིཏྟོ ནཱམ གཧཔཏི ཨཱགནྟྭཱ ཨཛྫ སཏྠཱརཾ ཝནྡིསྶཏི, ཨེཝརཱུཔཾ ཀིར པཱཊིཧཱརིཡཾ བྷཝིསྶཏི, མཡམྤི ཏཾ མཧཱཔུཉྙཾ དཊྛུཾ ལབྷིསྶཱམཱ’’ཏི པཎྞཱཀཱརཾ ཨཱདཱཡ མགྒསྶ ཨུབྷོསུ པསྶེསུ ཨཊྛཾསུ. ཝིཧཱརསམཱིཔེ ཨཱགཏཀཱལེ པཉྩ བྷིཀྑུསཏཱནི པཋམཾ ཨཱགམིཾསུ. ཙིཏྟོ གཧཔཏི, ‘‘ཨམྨཱ, ཏུམྷེ པཙྪཏོ ཨཱགཙྪཐཱ’’ཏི མཧཱཨུཔཱསིཀཱཡོ ཋཔེཏྭཱ པཉྩཧི ཨུཔཱསཀསཏེཧི པརིཝུཏོ སཏྠུ སནྟིཀཾ ཨགམཱསི. བུདྡྷཱནཾ སམྨུཁཊྛཱནེ པན ཋིཏཱ ཝཱ ནིསིནྣཱ ཝཱ ཨིཏོ ཝཱ ཨེཏྟོ ཝཱ ན ཧོནྟི, བུདྡྷཝཱིཐིཡཱ དྭཱིསུ པསྶེསུ ནིཙྩལཱཝ ཏིཊྛནྟི. ཙིཏྟོ གཧཔཏི མཧནྟཾ བུདྡྷཝཱིཐིཾ ཨོཀྐམི. ཏཱིཎི ཕལཱནི པཏྟེན ཨརིཡསཱཝཀེན ཨོལོཀིཏོལོཀིཏཊྛཱནཾ ཀམྤི. ‘‘ཨེསོ ཀིར ཙིཏྟོ གཧཔཏཱི’’ཏི མཧཱཛནོ ཨོལོཀེསི. སོ སཏྠཱརཾ ཨུཔསངྐམིཏྭཱ ཚབྦཎྞཱནཾ བུདྡྷརསྨཱིནཾ ཨནྟོ པཝིསིཏྭཱ དྭཱིསུ གོཔྥཀེསུ སཏྠུ པཱདེ གཧེཏྭཱ ཝནྡི. ཏཾ ཁཎཉྙེཝ ཝུཏྟཔྤཀཱརཾ པུཔྥཝསྶཾ ཝསྶི, སཱདྷུཀཱརསཧསྶཱནི པཝཏྟཡིཾསུ. སོ ཨེཀམཱསཾ སཏྠུ སནྟིཀེ ཝསི, ཝསམཱནོ ཙ སཀལཾ བུདྡྷཔྤམུཁཾ བྷིཀྑུསངྒྷཾ ཝིཧཱརེཡེཝ ནིསཱིདཱཔེཏྭཱ མཧཱདཱནཾ ཨདཱསི, ཨཏྟནཱ སདྡྷིཾ ཨཱགཏེཔི ཨནྟོཝིཧཱརེཡེཝ ཀཏྭཱ པཊིཛགྒི. ཨེཀདིཝསམྤི ཨཏྟནོ སཀཊེསུ ཀིཉྩི གཧེཏབྦཾ ནཱཧོསི, དེཝམནུསྶེཧི ཨཱབྷཏཔཎྞཱཀཱརེནེཝ དཱནཾ ཨདཱསི, སབྦཀིཙྩཱནི ཨཀཱསི. སོ སཏྠཱརཾ ཝནྡིཏྭཱ ཨཱཧ – ‘‘བྷནྟེ, ཨཧཾ ‘ཏུམྷཱཀཾ དཱནཾ དསྶཱམཱི’ཏི ཨཱགཙྪནྟོ མཱསཾ ཨནྟརཱམགྒེ ཨཧོསིཾ. ཨིདྷེཝ མེ མཱསོ ཝཱིཏིཝཏྟོ, མཡཱ ཨཱབྷཏཾ པཎྞཱཀཱརཾ ཀིཉྩི གཧེཏུཾ ན ལབྷཱམི, ཨེཏྟཀཾ ཀཱལཾ དེཝམནུསྶེཧི ཨཱབྷཏཔཎྞཱཀཱརེནེཝ དཱནཾ ཨདཱསིཾ, སོཧཾ སཙེཔི ཨིདྷ སཾཝཙྪརཾ ཝསིསྶཱམི, ནེཝ མམ དེཡྻདྷམྨཾ དཱཏུཾ ལབྷིསྶཱམི. ཨཧཾ སཀཊཱནི ཨོཏཱརེཏྭཱ གནྟུཾ ཨིཙྪཱམི, པཊིསཱམནཊྛཱནཾ མེ ཨཱརོཙཱཔེཐཱ’’ཏི.

སཏྠཱ ཨཱནནྡཏྠེརཾ ཨཱཧ – ‘‘ཨཱནནྡ, ཨུཔཱསཀསྶ ཨེཀཾ པདེསཾ ཏུཙྪཾ ཀཱརེཏྭཱ དེཧཱི’’ཏི. ཐེརོ ཏཐཱ ཨཀཱསི. ཀཔྤིཡབྷཱུམི (མཧཱཝ. ༢༩༥) ཀིར ཙིཏྟསྶ གཧཔཏིནོ ཨནུཉྙཱཏཱ. ཨུཔཱསཀོཔི ཨཏྟནཱ སདྡྷིཾ ཨཱགཏེཧི ཏཱིཧི ཛནསཧསྶེཧི སདྡྷིཾ ཏུཙྪསཀཊེཧི པུན མགྒཾ པཊིཔཛྫི. དེཝམནུསྶཱ ཨུཊྛཱཡ, ‘‘ཨཡྻ, ཏཡཱ ཏུཙྪསཀཊེཧི གམནཀམྨཾ ཀཏ’’ནྟི སཏྟཧི རཏནེཧི སཀཊཱནི པཱུརཡིཾསུ. སོ ཨཏྟནོ ཨཱབྷཏཔཎྞཱཀཱརེནེཝ མཧཱཛནཾ པཊིཛགྒནྟོ ཨགམཱསི. ཨཱནནྡཏྠེརོ སཏྠཱརཾ ཝནྡིཏྭཱ ཨཱཧ – ‘‘བྷནྟེ, ཏུམྷཱཀཾ སནྟིཀཾ ཨཱགཙྪནྟོཔི མཱསེན ཨཱགཏོ, ཨིདྷཱཔི མཱསམེཝ ཝུཊྛོ, ཨེཏྟཀཾ ཀཱལཾ དེཝམནུསྶེཧི ཨབྷིཧཊཔཎྞཱཀཱརེནེཝ མཧཱཝདཱནཾ ཨདཱསི, ཨིདཱནི པཉྩ སཀཊསཏཱནི ཏུཙྪཱནི ཀཏྭཱ མཱསེནེཝ ཀིར གམིསྶཏི, དེཝམནུསྶཱ པནསྶ ཨུཊྛཱཡ, ‘ཨཡྻ, ཏཡཱ ཏུཙྪསཀཊེཧི གམནཀམྨཾ ཀཏ’ནྟི པཉྩ སཀཊསཏཱནི སཏྟརཏནེཧི པཱུརཡིཾསུ. སོ པུན ཨཏྟནོ ཨཱབྷཏཔཎྞཱཀཱརེནེཝ ཀིར མཧཱཛནཾ པཊིཛགྒནྟོ གམིསྶཏཱི’’ཏི. ‘‘ཀིཾ པན, བྷནྟེ, ཨེཏསྶ ཏུམྷཱཀཾ སནྟིཀཾ ཨཱགཙྪནྟསྶེཝཱཡཾ སཀྐཱརོ ཨུཔྤཛྫཏི, ཨུདཱཧུ ཨཉྙཏྠ གཙྪནྟསྶཱཔི ཨུཔྤཛྫཏཱི’’ཏི? ‘‘ཨཱནནྡ, མམ སནྟིཀཾ ཨཱགཙྪནྟསྶཱཔི ཨཉྙཏྠ གཙྪནྟསྶཱཔི ཨེཏསྶ ཨུཔྤཛྫཏེཝ. ཨཡཉྷི ཨུཔཱསཀོ སདྡྷོ པསནྣོ སམྤནྣསཱིལོ, ཨེཝརཱུཔོ པུགྒལོ ཡཾ ཡཾ པདེསཾ བྷཛཏི, ཏཏྠ ཏཏྠེཝསྶ ལཱབྷསཀྐཱརོ ནིབྦཏྟཏཱི’’ཏི ཝཏྭཱ སཏྠཱ ཨིམཾ པཀིཎྞཀཝགྒེ གཱཐམཱཧ –

‘‘སདྡྷོ སཱིལེན སམྤནྣོ, ཡསོ བྷོགསམཔྤིཏོ;

ཡཾ ཡཾ པདེསཾ བྷཛཏི, ཏཏྠ ཏཏྠེཝ པཱུཛིཏོ’’ཏི. (དྷ. པ. ༣༠༣);

ཨཏྠོ པནསྶཱ ཏཏྠེཝ ཨཱཝིབྷཝིསྶཏི.

ཨེཝཾ ཝུཏྟེ ཨཱནནྡཏྠེརོ ཙིཏྟསྶ པུབྦཀམྨཾ པུཙྪི. ཨཐསྶ སཏྠཱ ཨཱཙིཀྑནྟོ ཨཱཧ –

ཨཱནནྡ, ཨཡཾ པདུམུཏྟརསྶ བྷགཝཏོ པཱདམཱུལེ ཀཏཱབྷིནཱིཧཱརོ ཀཔྤསཏསཧསྶཾ དེཝམནུསྶེསུ སཾསརིཏྭཱ ཀསྶཔབུདྡྷཀཱལེ མིགལུདྡཀཀུལེ ནིབྦཏྟོ ཝུདྡྷིམནྭཱཡ ཨེཀདིཝསཾ དེཝེ ཝསྶནྟེ མིགཱནཾ མཱརཎཏྟཱཡ སཏྟིཾ ཨཱདཱཡ ཨརཉྙཾ གནྟྭཱ མིགེ ཨོལོཀེནྟོ ཨེཀསྨིཾ ཨཀཊཔབྦྷཱརེ སསཱིསཾ པཱརུཔིཏྭཱ ཨེཀཾ བྷིཀྑུཾ ནིསིནྣཾ དིསྭཱ ‘‘ཨེཀོ, ཨཡྻོ, སམཎདྷམྨཾ ཀརོནྟོ ནིསིནྣོ བྷཝིསྶཏི, བྷཏྟམསྶ ཨཱཧརིསྶཱམཱི’’ཏི ཝེགེན གེཧཾ གནྟྭཱ ཨེཀསྨིཾ ཨུདྡྷནེ ཧིཡྻོ, ཨཱབྷཏམཾསཾ, ཨེཀསྨིཾ བྷཏྟཾ པཙཱཔེཏྭཱ ཨཉྙེ པིཎྜཔཱཏཙཱརིཀེ བྷིཀྑཱུ དིསྭཱ ཏེསམྤི པཏྟེ ཨཱདཱཡ པཉྙཏྟཱསནེ ནིསཱིདཱཔེཏྭཱ བྷིཀྑཾ སམྤཱདེཏྭཱ, ‘‘ཨཡྻེ, པརིཝིསཐཱ’’ཏི ཨཉྙཾ ཨཱཎཱཔེཏྭཱ ཏཾ བྷཏྟཾ པུཊཀེ པཀྑིཔིཏྭཱ ཨཱདཱཡ གཙྪནྟོ ཨནྟརཱམགྒེ ནཱནཱཔུཔྥཱནི ཨོཙིནིཏྭཱ པཏྟཔུཊེ ཀཏྭཱ ཐེརསྶ ནིསིནྣཊྛཱནཾ གནྟྭཱ ‘‘མཡ྄ཧཾ, བྷནྟེ, སངྒཧཾ ཀརོཐཱ’’ཏི ཝཏྭཱ པཏྟཾ ཨཱདཱཡ པཱུརེཏྭཱ ཐེརསྶ ཧཏྠེ ཋཔེཏྭཱ ཏེཧི པུཔྥེཧི པཱུཛཾ ཀཏྭཱ ‘‘ཡཐཱ མེ ཨཡཾ རསཔིཎྜཔཱཏོ པུཔྥཔཱུཛཱཡ སདྡྷིཾ ཙིཏྟཾ ཏོསེསི, ཨེཝཾ ནིབྦཏྟནིབྦཏྟཊྛཱནེ པཎྞཱཀཱརསཧསྶཱནི ཨཱདཱཡ ཨཱགནྟྭཱ མཡ྄ཧཾ ཙིཏྟཾ ཏོསེནྟུ, པཉྩཝཎྞཀུསུམཝསྶཉྩ ཝསྶཏཱུ’’ཏི པཏྠནཾ པཊྛཔེསི. སོ ཡཱཝཛཱིཝཾ ཀུསལཾ ཀཏྭཱ དེཝལོཀེ ནིབྦཏྟི, ནིབྦཏྟཊྛཱནེ ཛཎྞུཀམཏྟེན ཨོདྷིནཱ དིབྦཔུཔྥཝསྶཾ ཝསྶི. ཨིདཱནིཔིསྶ ཛཱཏདིཝསེ ཙེཝ ཨིདྷ ཙ ཨཱགཏསྶ པུཔྥཝསྶཝསྶནཉྩ པཎྞཱཀཱརཱབྷིཧཱརོ ཙ སཏྟཧི རཏནེཧི སཀཊཔཱུརཎཉྩ ཏསྶེཝ ཀམྨསྶ ནིསྶནྡོཏི.

ཙིཏྟགཧཔཏིཝཏྠུ ཙུདྡསམཾ.

༡༥. ཝནཝཱསཱིཏིསྶསཱམཎེརཝཏྠུ

ཨཉྙཱ ཧི ལཱབྷཱུཔནིསཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཝནཝཱསིཀཏིསྶཏྠེརཾ ཨཱརབྦྷ ཀཐེསི. དེསནཱ རཱཛགཧེ སམུཊྛིཏཱ.

སཱརིཔུཏྟཏྠེརས ཀིར པིཏུ ཝངྒནྟབྲཱཧྨཎསྶ སཧཱཡཀོ མཧཱསེནབྲཱཧྨཎོ ནཱམ རཱཛགཧེ ཝསཏི. སཱརིཔུཏྟཏྠེརོ ཨེཀདིཝསཾ པིཎྜཱཡ ཙརནྟོ ཏསྨིཾ ཨནུཀམྤཱཡ ཏསྶ གེཧདྭཱརཾ ཨགམཱསི. སོ པན པརིཀྑཱིཎཝིབྷཝོ དལིདྡོ. སོ ‘‘མམ པུཏྟོ མཡ྄ཧཾ གེཧདྭཱརཾ པིཎྜཱཡ ཙརིཏུཾ ཨཱགཏོ བྷཝིསྶཏི, ཨཧཉྩམྷི དུགྒཏོ, མཡ྄ཧཾ དུགྒཏབྷཱཝཾ ན ཛཱནཱཏི མཉྙེ, ནཏྠི མེ ཀོཙི དེཡྻདྷམྨོ’’ཏི ཐེརསྶ སམྨུཁཱ བྷཝིཏུཾ ཨསཀྐོནྟོ ནིལཱིཡི. ཐེརོ ཨཔརམྤི དིཝསཾ ཨགམཱསི, བྲཱཧྨཎོ ཏཐེཝ ནིལཱིཡི. ‘‘ཀིཉྩིདེཝ ལབྷིཏྭཱ དསྶཱམཱི’’ཏི ཙིནྟེནྟོཔི ནཱལབྷི. ཨཐེཀདིཝསཾ ཨེཀསྨིཾ བྲཱཧྨཎཝཱཙཀེ ཐཱུལསཱཊཀེན སདྡྷིཾ པཱཡསཔཱཏིཾ ལབྷིཏྭཱ ཨཱདཱཡ གེཧཾ གནྟྭཱཝ ཐེརཾ ཨནུསྶརི, ‘‘ཨིམཾ པིཎྜཔཱཏཾ མཡཱ ཐེརསྶ དཱཏུཾ ཝཊྚཏཱི’’ཏི. ཐེརོཔི ཏཾ ཁཎཾ ཛྷཱནཾ སམཱཔཛྫིཏྭཱ སམཱཔཏྟིཏོ ཝུཊྛཱཡ ཏཾ བྲཱཧྨཎཾ དིསྭཱ ‘‘བྲཱཧྨཎོ དེཡྻདྷམྨཾ ལབྷིཏྭཱ མམ ཨཱགམནཾ པཙྩཱསཱིསཏི, མཡཱ ཏཏྠ གནྟུཾ ཝཊྚཏཱི’’ཏི སངྒྷཱཊིཾ པཱརུཔིཏྭཱ པཏྟཾ ཨཱདཱཡ ཏསྶ གེཧདྭཱརེ ཋིཏམེཝ ཨཏྟཱནཾ དསྶེསི.

བྲཱཧྨཎོ ཐེརཾ དིསྭཱཝ ཙིཏྟཾ པསཱིདི. ཨཐ ནཾ ཨུཔསངྐམིཏྭཱ ཝནྡིཏྭཱ པཊིསནྠཱརཾ ཀཏྭཱ ཨནྟོགེཧེ ནིསཱིདཱཔེཏྭཱ པཱཡསཔཱཏིཾ གཧེཏྭཱ ཐེརསྶ པཏྟེ ཨཱཀིརི. ཐེརོ ཨུཔཌྜྷཾ སམྤཊིཙྪིཏྭཱ ཧཏྠེན པཏྟཾ པིདཧི. ཨཐ ནཾ བྲཱཧྨཎོ ཨཱཧ – ‘‘བྷནྟེ, ཨེཀཔཊིཝཱིསམཏྟོཝ ཨཡཾ པཱཡསོ, པརལོཀསངྒཧཾ མེ ཀརོཐ, མཱ ཨིདྷལོཀསངྒཧཾ, ནིརཝསེསམེཝ དཱཏུཀཱམོམྷཱི’’ཏི སབྦཾ ཨཱཀིརི. ཐེརོ ཏཏྠེཝ པརིབྷུཉྫི. ཨཐསྶ བྷཏྟཀིཙྩཔརིཡོསཱནེ ཏམྤི སཱཊཀཾ དཏྭཱ ཝནྡིཏྭཱ ཨེཝམཱཧ – ‘‘བྷནྟེ, ཨཧམྤི ཏུམྷེཧི དིཊྛདྷམྨམེཝ པཱཔུཎེཡྻ’’ནྟི. ཐེརོ ‘‘ཨེཝཾ ཧོཏུ བྲཱཧྨཎཱ’’ཏི ཏསྶ ཨནུམོདནཾ ཀཏྭཱ ཨུཊྛཱཡཱསནཱ པཀྐམནྟོ ཨནུཔུབྦེན ཙཱརིཀཾ ཙརནྟོ ཛེཏཝནཾ ཨགམཱསི. ‘‘དུགྒཏཀཱལེ དིནྣདཱནཾ པན ཨཏིཝིཡ ཏོསེཏཱི’’ཏི བྲཱཧྨཎོཔི ཏཾ དཱནཾ དཏྭཱ པསནྣཙིཏྟོ སོམནསྶཛཱཏོ ཐེརེ ཨདྷིམཏྟཾ སིནེཧམཀཱསི. སོ ཐེརེ སིནེཧེནེཝ ཀཱལཾ ཀཏྭཱ སཱཝཏྠིཡཾ ཐེརསྶཱུཔཊྛཱཀཀུལེ པཊིསནྡྷིཾ གཎྷི. ཏཾཁཎེཡེཝ པནསྶ མཱཏཱ ‘‘ཀུཙྪིཡཾ མེ གབྦྷོ པཏིཊྛིཏོ’’ཏི ཉཏྭཱ སཱམིཀསྶ ཨཱརོཙེསི. སོ ཏསྶཱ གབྦྷཔརིཧཱརཾ ཨདཱསི.

ཏསྶཱ ཨཙྩུཎྷཨཏིསཱིཏཨཏིཨམྦིལཱདིཔརིབྷོགཾ ཝཛྫེཏྭཱ སུཁེན གབྦྷཾ པརིཧརིཡམཱནཱཡ ཨེཝརཱུཔོ དོཧལོ༹ ཨུཔྤཛྫི ‘‘ཨཧོ ཝཏཱཧཾ སཱརིཔུཏྟཏྠེརཔྤམུཁཱནི པཉྩ བྷིཀྑུསཏཱནི ནིམནྟེཏྭཱ གེཧེ ནིསཱིདཱཔེཏྭཱ ཨསམྦྷིནྣཁཱིརཔཱཡསཾ དཏྭཱ སཡམྤི ཀཱསཱཡཝཏྠཱནི པརིདཧིཏྭཱ སུཝཎྞསརཀཾ ཨཱདཱཡ ཨཱསནཔརིཡནྟེ ནིསཱིདིཏྭཱ ཨེཏྟཀཱནཾ བྷིཀྑཱུནཾ ཨུཙྪིཊྛཔཱཡསཾ པརིབྷུཉྫེཡྻ’’ནྟི. ཏསྶཱ ཀིར སོ ཀཱསཱཡཝཏྠཔརིདཧནེ དོཧལོ༹ ཀུཙྪིཡཾ པུཏྟསྶ བུདྡྷསཱསནེ པབྦཛྫཱཡ པུབྦནིམིཏྟཾ ཨཧོསི. ཨཐསྶཱ ཉཱཏཀཱ ‘‘དྷམྨིཀོ ནོ དྷཱིཏཱཡ དོཧལོ༹’’ཏི སཱརིཔུཏྟཏྠེརཾ སངྒྷཏྠེརཾ ཀཏྭཱ པཉྩནྣཾ བྷིཀྑུསཏཱནཾ ཨསམྦྷིནྣཁཱིརཔཱཡསཾ ཨདཾསུ. སཱཔི ཨེཀཾ ཀཱསཱཝཾ ནིཝཱསེཏྭཱ ཨེཀཾ པཱརུཔིཏྭཱ སུཝཎྞསརཀཾ གཧེཏྭཱ ཨཱསནཔརིཡནྟེ ནིསིནྣཱ ཨུཙྪིཊྛཔཱཡསཾ པརིབྷུཉྫི, དོཧལོ༹ པཊིཔྤསྶམྦྷི. ཏསྶཱ ཡཱཝ གབྦྷཝུཊྛཱནཱ ཨནྟརནྟརཱ ཀཏམངྒལེསུཔི, དསམཱསཙྩཡེན པུཏྟཾ ཝིཛཱཏཱཡ ཀཏམངྒལེསུཔི སཱརིཔུཏྟཏྠེརཔྤམུཁཱནཾ པཉྩནྣཾ བྷིཀྑུསཏཱནཾ ཨཔྤོདཀམདྷུཔཱཡསམེཝ ཨདཾསུ. པུབྦེ ཀིརེས དཱརཀེན བྲཱཧྨཎཀཱལེ དིནྣཔཱཡསསྶ ནིསྶནྡོ.

ཛཱཏམངྒལདིཝསེ པན ཏཾ དཱརཀཾ པཱཏོཝ ནྷཱཔེཏྭཱ མཎྜེཏྭཱ སིརིསཡནེ སཏསཧསྶགྒྷནིཀསྶ ཀམྦལསྶ ཨུཔརི ནིཔཛྫཱཔེསུཾ. སོ ཏཏྠ ནིཔནྣཀོཝ ཐེརཾ ཨོལོཀེཏྭཱ ‘‘ཨཡཾ མེ པུབྦཱཙརིཡོ, མཡཱ ཐེརཾ ནིསྶཱཡ ཨཡཾ སམྤཏྟི ལདྡྷཱ, མཡཱ ཨིམསྶ ཨེཀཾ པརིཙྩཱགཾ ཀཱཏུཾ ཝཊྚཏཱི’’ཏི སིཀྑཱཔདགཧཎཏྠཱཡ ཨཱནཱིཡམཱནོ ཏཾ ཀམྦལཾ ཙཱུལ༹ངྒུལིཡཱ ཝེཋེཏྭཱ ཨགྒཧེསི. ཨཐསྶ ‘‘ཨངྒུལིཡཾ ཀམྦལོ ལགྒོ’’ཏི ཏེ ཏཾ ཧརིཏུཾ ཨཱརབྷིཾསུ. སོ པརོདི. ཉཱཏཀཱ ‘‘ཨཔེཐ, མཱ དཱརཀཾ རོདཱཔེཐཱ’’ཏི ཀམྦལེནེཝ སདྡྷིཾ ཨཱནཡིཾསུ. སོ ཐེརཾ ཝནྡནཀཱལེ ཀམྦལཏོ ཨངྒུལིཾ ཨཔཀཌྜྷིཏྭཱ ཀམྦལཾ ཐེརསྶ པཱདམཱུལེ པཱཏེསི. ཉཱཏཀཱ ‘‘དཧརཀུམཱརེན ཨཛཱནིཏྭཱ ཀཏ’’ནྟི ཨཝཏྭཱ ‘‘པུཏྟེན ནོ དིནྣཾ, པརིཙྩཏྟམེཝ ཧོཏུ, བྷནྟེ’’ཏི ཝཏྭཱ, ‘‘བྷནྟེ, སཏསཧསྶགྒྷནིཀེན ཀམྦལེན པཱུཛཱཀཱརཀསྶ ཏུམྷཱཀཾ དཱསསྶ སིཀྑཱཔདཱནི དེཐཱ’’ཏི ཨཱཧཾསུ. ‘‘ཀོ ནཱམོ ཨཡཾ དཱརཀོ’’ཏི? ‘‘བྷནྟེ, ཨཡྻེན སམཱནནཱམཀོ, ཏིསྶོ ནཱམེས བྷཝིསྶཏཱི’’ཏི. ཐེརོ ཀིར གིཧིཀཱལེ ཨུཔཏིསྶམཱཎཝོ ནཱམ ཨཧོསི. མཱཏཱཔིསྶ ཙིནྟེསི – ‘‘ན མཡཱ པུཏྟསྶ ཨཛ྄ཛྷཱསཡོ བྷིནྡིཏབྦོ’’ཏི. ཨེཝཾ དཱརཀསྶ ནཱམཀརཎམངྒལཾ ཀཏྭཱ པུན ཏསྶ ཨཱཧཱརཔརིབྷོགམངྒལེཔི པུན ཏསྶ ཀཎྞཝིཛ྄ཛྷནམངྒལེཔི དུསྶགཧཎམངྒལེཔི ཙཱུལཱ༹ཀཔྤནམངྒལེཔི སཱརིཔུཏྟཏྠེརཔྤམུཁཱནཾ པཉྩནྣཾ བྷིཀྑུསཏཱནཾ ཨཔྤོདཀམདྷུཔཱཡསམེཝ ཨདཾསུ.

དཱརཀོ ཝུདྡྷིམནྭཱཡ སཏྟཝསྶིཀཀཱལེ མཱཏརཾ ཨཱཧ – ‘‘ཨམྨ, ཐེརསྶ སནྟིཀེ པབྦཛིསྶཱམཱི’’ཏི. ‘‘སཱདྷུ, ཏཱཏ, པུབྦེཝཱཧཾ ‘ན མཡཱ པུཏྟསྶ ཨཛ྄ཛྷཱསཡོ བྷིནྡིཏབྦོ’ཏི མནཾ ཨཀཱསིཾ, པབྦཛ, པུཏྟཱ’’ཏི ཐེརཾ ནིམནྟཱཔེཏྭཱ ཏསྶ ཨཱགཏསྶ བྷིཀྑཉྩ དཏྭཱ, ‘‘བྷནྟེ, ཏུམྷཱཀཾ དཱསོ ‘པབྦཛིསྶཱམཱི’ཏི ཝདཏི, ཨིམཾ ཨཱདཱཡ སཱཡཾ ཝིཧཱརཾ ཨཱགམིསྶཱམཱ’’ཏི ཐེརཾ ཨུཡྻོཛེཏྭཱ སཱཡནྷསམཡེ མཧནྟེན སཀྐཱརསམྨཱནེན པུཏྟཾ ཨཱདཱཡ ཝིཧཱརཾ གནྟྭཱ ཐེརསྶ ནིཡྻཱདེསི. ཐེརོ ཏེན སདྡྷིཾ ཀཐེསི – ‘‘ཏིསྶ, པབྦཛྫཱ ནཱམ དུཀྐརཱ, ཨུཎྷེན ཨཏྠེ སཏི སཱིཏཾ ལབྷཏི, སཱིཏེན ཨཏྠེ སཏི ཨུཎྷཾ ལབྷཏི, པབྦཛིཏཱ ཀིཙྪེན ཛཱིཝནྟི, ཏྭཉྩ སུཁེདྷིཏོ’’ཏི. ‘‘བྷནྟེ, ཨཧཾ ཏུམྷེཧི ཝུཏྟནིཡཱམེནེཝ སབྦཾ ཀཱཏུཾ སཀྑིསྶཱམཱི’’ཏི. ཐེརོ ‘‘སཱདྷཱུ’’ཏི ཝཏྭཱ ཏསྶ པཊིཀཱུལམནསིཀཱརཝསེན ཏཙཔཉྩཀཀམྨཊྛཱནཾ ཨཱཙིཀྑིཏྭཱ ཏཾ པབྦཱཛེསི. སཀལམྤི ཧི དྭཏྟིཾསཱཀཱརཾ ཀཐེཏུཾ ཝཊྚཏིཡེཝ. སབྦཾ ཀཐེཏུཾ ཨསཀྐོནྟེན པན ཏཙཔཉྩཀཀམྨཊྛཱནཾ ཀཐེཏབྦམེཝ. ཨིདཉྷི ཀམྨཊྛཱནཾ སབྦབུདྡྷཱནཾ ཨཝིཛཧིཏམེཝ. ཀེསཱདཱིསུ ཨེཀེཀཀོཊྛཱསེསུ ཨརཧཏྟཾ པཏྟཱནཾ བྷིཀྑཱུནམྤི བྷིཀྑུནཱིནམྤི ཨུཔཱསཀཱནམྤི ཨུཔཱསིཀཱནམྤི པརིཙྪེདོ ནཏྠི. ཨབྱཏྟཱ བྷིཀྑཱུ པན པབྦཛེནྟཱ ཨརཧཏྟསྶཱུཔནིསྶཡཾ ནཱསེནྟི. ཏསྨཱ ཐེརོ ཀམྨཊྛཱནཾ ཨཱཙིཀྑིཏྭཱ པབྦཱཛེཏྭཱ དསསུ སཱིལེསུ པཏིཊྛཱཔེསི.

མཱཏཱཔིཏརོ པུཏྟསྶ པབྦཛིཏསཀྐཱརཾ ཀརོནྟཱ སཏྟཱཧཾ ཝིཧཱརེཡེཝ བུདྡྷཔྤམུཁསྶ བྷིཀྑུསངྒྷསྶ ཨཔྤོདཀམདྷུཔཱཡསམེཝ ཨདཾསུ. བྷིཀྑཱུཔི ‘‘ནིབདྡྷཾ ཨཔྤོདཀམདྷུཔཱཡསཾ པརིབྷུཉྫིཏུཾ ན སཀྐོམཱ’’ཏི ཨུཛ྄ཛྷཱཡིཾསུ. ཏསྶཔི མཱཏཱཔིཏརོ སཏྟམེ དིཝསེ སཱཡཾ གེཧཾ ཨགམཾསུ. སཱམཎེརོ ཨཊྛམེ དིཝསེ བྷིཀྑཱུཧི སདྡྷིཾ པིཎྜཱཡ པཱཝིསི. སཱཝཏྠིཝཱསིནོ ‘‘སཱམཎེརོ ཀིར ཨཛྫ པིཎྜཱཡ པཝིསིསྶཏི, སཀྐཱརམསྶ ཀརིསྶཱམཱ’’ཏི པཉྩཧི སཱཊཀསཏེཧི ཙུམྦཊཀཱནི ཀཏྭཱ པཉྩ པིཎྜཔཱཏསཏཱནི སཛྫེཏྭཱ ཨཱདཱཡ པཊིཔཐེ ཋཏྭཱ ཨདཾསུ, པུནདིཝསེ ཝིཧཱརསྶ ཨུཔཝནཾ ཨཱགནྟྭཱ ཨདཾསུ. ཨེཝཾ སཱམཎེརོ དྭཱིཧེཝ དིཝསེཧི སཱཊཀསཧསྶེཧི སདྡྷིཾ པིཎྜཔཱཏསཧསྶཾ ལབྷིཏྭཱ བྷིཀྑུསངྒྷསྶ དཱཔེསི. བྲཱཧྨཎཀཱལེ དིནྣཐཱུལསཱཊཀསྶ ཀིརེས ནིསྶནྡོ. ཨཐསྶ བྷིཀྑཱུ ‘‘པིཎྜཔཱཏདཱཡཀཏིསྶོ’’ཏི ནཱམཾ ཀརིཾསུ.

པུནེཀདིཝསཾ སཱམཎེརོ སཱིཏཀཱལེ ཝིཧཱརཙཱརིཀཾ ཙརནྟོ བྷིཀྑཱུ ཏཏྠ ཏཏྠ ཨགྒིསཱལཱདཱིསུ ཝིསིབྦེནྟེ དིསྭཱ ཨཱཧ – ‘‘ཀིཾ, བྷནྟེ, ཝིསིབྦེནྟཱ ནིསིནྣཱཏྠཱ’’ཏི? ‘‘སཱིཏཾ ནོ པཱིལེ༹ཏི སཱམཎེརོ’’ཏི. ‘‘བྷནྟེ, སཱིཏཀཱལེ ནཱམ ཀམྦལཾ པཱརུཔིཏུཾ ཝཊྚཏི. སོ ཧི སཱིཏཾ པཊིབཱཧིཏུཾ སམཏྠོ’’ཏི. སཱམཎེར ‘‘ཏྭཾ མཧཱཔུཉྙོ ཀམྦལཾ ལབྷེཡྻཱསི, ཨམྷཱཀཾ ཀུཏོ ཀམྦལོ’’ཏི. ‘‘ཏེན ཧི, བྷནྟེ, ཀམྦལཏྠིཀཱ མཡཱ སདྡྷིཾ ཨཱགཙྪནྟཱུ’’ཏི སཀལཝིཧཱརེ ཨཱརོཙཱཔེསི. ཨཐ བྷིཀྑཱུ ‘‘སཱམཎེརེན སདྡྷིཾ གནྟྭཱ ཀམྦལཾ ཨཱཧརིསྶཱམཱ’’ཏི སཏྟཝསྶིཀསཱམཎེརཾ ནིསྶཱཡ སཧསྶམཏྟཱ བྷིཀྑཱུ ནིཀྑམིཾསུ. སོ ‘‘ཨེཏྟཀཱནཾ བྷིཀྑཱུནཾ ཀུཏོ ཀམྦལཾ ལབྷིསྶཱམཱི’’ཏི ཙིཏྟམྤི ཨནུཔྤཱདེཏྭཱ ཏེ ཨཱདཱཡ ནགརཱབྷིམུཁོ པཱཡཱསི. སུདིནྣསྶ ཧི དཱནསྶ ཨེཝརཱུཔོ ཨཱནུབྷཱཝོ ཧོཏི. སོ བཧིནགརེཡེཝ གྷརཔཊིཔཱཊིཡཱ ཙརནྟོ པཉྩ ཀམྦལསཏཱནི ལབྷིཏྭཱ ཨནྟོནགརཾ པཱཝིསི. མནུསྶཱ ཨིཏོ ཙིཏོ ཙ ཀམྦལེ ཨཱཧརནྟི.

ཨེཀོ པན པུརིསོ ཨཱཔཎདྭཱརེན ཨཱགཙྪནྟོ པཉྩ ཀམྦལསཏཱནི པསཱརེཏྭཱ ནིསིནྣཾ ཨེཀཾ ཨཱཔཎིཀཾ དིསྭཱ ཨཱཧ – ‘‘ཨམྦྷོ, ཨེཀོ སཱམཎེརོ ཀམྦལེ སཾཧརནྟོ ཨཱགཙྪཏི, ཏཝ ཀམྦལེ པཊིཙྪཱདེཧཱི’’ཏི? ‘‘ཀིཾ པན སོ དིནྣཀེ གཎྷཱཏི, ཨུདཱཧུ ཨདིནྣཀེ’’ཏི? ‘‘དིནྣཀེ གཎྷཱཏཱི’’ཏི. ‘‘ཨེཝཾ སནྟེ སཙེ ཨིཙྪཱམི, དསྶཱམི, ནོ ཙེ, ན དསྶཱམི, གཙྪ ཏྭ’’ནྟི ཨུཡྻོཛེསི. མཙྪརིནོ ཧི ཨནྡྷབཱལཱ ཨེཝརཱུཔེསུ དཱནཾ དདམཱནེསུ མཙྪརཱཡིཏྭཱ ཨསདིསདཱནཾ དིསྭཱ མཙྪརཱཡནྟོ ཀཱལོ༹ (དྷ. པ. ༡༧༧) ཝིཡ ནིརཡེ ནིབྦཏྟནྟི. ཨཱཔཎིཀོ ཙིནྟེསི – ‘‘ཨཡཾ པུརིསོ ཨཏྟནོ དྷམྨཏཱཡ ཨཱགཙྪམཱནོ ‘ཏཝ ཀམྦལེ པཊིཙྪཱདེཧཱི’ཏི མཾ ཨཱཧ. ‘སཙེཔི སོ དིནྣཀཾ གཎྷཱ’ཏི, ཨཧཾ པན ‘མམ སནྟཀཾ སཙེ ཨིཙྪཱམི, དསྶཱམི, ནོ ཙེ, ན དསྶཱམཱི’ཏི ཨཝཙཾ, དིཊྛཀཾ པན ཨདེནྟསྶ ལཛྫཱ ཨུཔྤཛྫཏི, ཨཏྟནོ སནྟཀཾ པཊིཙྪཱདེནྟསྶ དོསོ ནཏྠི, ཨིམེསུ པཉྩཀམྦལསཏེསུ དྭེ ཀམྦལཱནི སཏསཧསྶགྒྷནིཀཱནི, ཨིམཱནེཝ པཊིཙྪཱདེཏུཾ ཝཊྚཏཱི’’ཏི. དྭེཔི ཀམྦལེ དསཱཡ དསཾ སམྦནྡྷིཏྭཱ ཏེསཾ ཨནྟརེ པཀྑིཔིཏྭཱ པཊིཙྪཱདེསི. སཱམཎེརོཔི བྷིཀྑུསཧསྶེན སདྡྷིཾ ཏཾ པདེསཾ པཱཔུཎི. ཨཱཔཎིཀསྶ སཱམཎེརཾ དིསྭཱཝ པུཏྟསིནེཧོ ཨུཔྤཛྫི, སཀལསརཱིརཾ སིནེཧེན པརིཔུཎྞཾ ཨཧོསི. སོ ཙིནྟེསི – ‘‘ཏིཊྛཏུ ཀམྦལཱནི, ཨིམཾ དིསྭཱ ཧདཡམཾསམྤི དཱཏུཾ ཡུཏྟ’’ནྟི. ཏེ དྭེཔི ཀམྦལེ ནཱིཧརིཏྭཱ སཱམཎེརསྶ པཱདམཱུལེ ཋཔེཏྭཱ ཝནྡིཏྭཱ, ‘‘བྷནྟེ, ཏཡཱ དིཊྛདྷམྨསྶ བྷཱགཱི ཨསྶ’’ནྟི ཨཝཙ. སོཔིསྶ ‘‘ཨེཝཾ ཧོཏཱུ’’ཏི ཨནུམོདནཾ ཨཀཱསི.

སཱམཎེརོ ཨནྟོནགརེཔི པཉྩ ཀམྦལསཏཱནི ལབྷི. ཨེཝཾ ཨེཀདིཝསཾཡེཝ ཀམྦལསཧསྶཾ ལབྷིཏྭཱ བྷིཀྑུསཧསྶསྶ ཨདཱསི. ཨཐསྶ ཀམྦལདཱཡཀཏིསྶཏྠེརོཏི ནཱམཾ ཀརིཾསུ. ཨེཝཾ ནཱམཀརཎདིཝསེ དིནྣཀམྦལོ སཏྟཝསྶིཀཀཱལེ ཀམྦལསཧསྶབྷཱཝཾ པཱཔུཎི. བུདྡྷསཱསནཉྷི ཋཔེཏྭཱ ནཏྠཉྙཾ ཏཾ ཋཱནཾ, ཡཏྠ ཨཔྤཾ དིནྣཾ བཧུཾ ཧོཏི, བཧུཾ དིནྣཾ བཧུཏརཾ. ཏེནཱཧ བྷགཝཱ –

‘‘ཏཐཱརཱུཔོཡཾ, བྷིཀྑཝེ, བྷིཀྑུསངྒྷོ, ཡཐཱརཱུཔེ བྷིཀྑུསངྒྷེ ཨཔྤཾ དིནྣཾ བཧུཾ ཧོཏི, བཧུཾ དིནྣཾ བཧུཏར’’ནྟི (མ. ནི. ༣.༡༤༦) –

ཨེཝཾ སཱམཎེརོ ཨེཀཀམྦལསྶ ནིསྶནྡེན སཏྟཝསྶིཀོཝ ཀམྦལསཧསྶཾ ལབྷི. ཏསྶ ཛེཏཝནེ ཝིཧརནྟསྶ ཨབྷིཀྑཎཾ ཉཱཏིདཱཡཀཱ སནྟིཀཾ ཨཱགནྟྭཱ ཀཐཱསལླཱཔཾ ཀརོནྟི. སོ ཙིནྟེསི – ‘‘མཡཱ ཨིདྷ ཝསནྟེན ཉཱཏིདཱཡཀེསུ ཨཱགནྟྭཱ ཀཐེནྟེསུ ཨཀཐེཏུམྤི ན སཀྐཱ, ཨེཏེཧི སདྡྷིཾ ཀཐཱཔཔཉྩེན ཨཏྟནོ པཏིཊྛཾ ཀཱཏུཾ ན སཀྐཱ, ཡཾནཱུནཱཧཾ སཏྠུ སནྟིཀེ ཀམྨཊྛཱནཾ ཨུགྒཎྷིཏྭཱ ཨརཉྙཾ པཝིསེཡྻ’’ནྟི. སོ སཏྠཱརཾ ཨུཔསངྐམིཏྭཱ ཝནྡིཏྭཱ ཡཱཝ ཨརཧཏྟཱ ཀམྨཊྛཱནཾ ཀཐཱཔེཏྭཱ ཨུཔཛ྄ཛྷཱཡཾ ཝནྡིཏྭཱ པཏྟཙཱིཝརམཱདཱཡ ཝིཧཱརཱ ནིཀྑམིཏྭཱ ‘‘སཙེ ཨཱསནྣཊྛཱནེ ཝསིསྶཱམི, ཉཱཏཀཱ མཾ པཀྐོསིསྶནྟཱི’’ཏི ཝཱིསཏི ཡོཛནསཏཾ མགྒཾ ཨགམཱསི. ཨཐེཀེན གཱམདྭཱརེན གཙྪནྟོ ཨེཀཾ མཧལླཀཔུརིསཾ དིསྭཱ པུཙྪི – ‘‘ཀིཾ ནུ ཁོ, མཧཱཨུཔཱསཀ, ཨིམསྨིཾ པདེསེ ཝསནྟཱནཾ ཨཱརཉྙཀཝིཧཱརོ ཨཏྠཱི’’ཏི? ‘‘ཨཏྠི, བྷནྟེ’’ཏི. ‘‘ཏེན ཧི མེ མགྒཾ ཨཱཙིཀྑཱཧཱི’’ཏི. མཧལླཀཨུཔཱསཀསྶ པན ཏཾ དིསྭཱཝ པུཏྟསིནེཧོ ཨུདཔཱདི. ཨཐསྶ ཏཏྠེཝ ཋིཏོ ཨནཱཙིཀྑིཏྭཱ ‘‘ཨེཧི, བྷནྟེ, ཨཱཙིཀྑིསྶཱམི ཏེ’’ཏི གཧེཏྭཱ ཨགམཱསི. སཱམཎེརོ ཏེན སདྡྷིཾ གཙྪནྟོ ཨནྟརཱམགྒེ ནཱནཱཔུཔྥཕལཔཊིམཎྜིཏེ རུཀྑཔབྦཏཔདེསེ དིསྭཱ ‘‘ཨཡཾ, ཨུཔཱསཀ, ཀིཾ པདེསོ ནཱམ, ཨཡཾ ཨུཔཱསཀ ཀིཾ པདེསོ ནཱམཱ’’ཏི པུཙྪི. སོཔིསྶ ཏེསཾ ནཱམཱནི ཨཱཙིཀྑནྟོ ཨཱརཉྙཀཝིཧཱརཾ པཏྭཱ ‘‘ཨིདཾ, བྷནྟེ, ཕཱསུཀཊྛཱནཾ, ཨིདྷེཝ ཝསཱཧཱི’’ཏི ཝཏྭཱ, ‘‘བྷནྟེ, ཀོ ནཱམོ ཏྭ’’ནྟི ནཱམཾ པུཙྪིཏྭཱ ‘‘ཨཧཾ ཝནཝཱསཱིཏིསྶོ ནཱམ ཨུཔཱསཀཱ’’ཏི ཝུཏྟེ, ‘‘སྭེ ཨམྷཱཀཾ གཱམེ བྷིཀྑཱཡ ཙརིཏུཾ ཝཊྚཏཱི’’ཏི ཝཏྭཱ ནིཝཏྟིཏྭཱ ཨནྟོགཱམམེཝ གཏོ. ‘‘ཝནཝཱསཱིཏིསྶོ ནཱམ ཝིཧཱརཾ ཨཱགཏོ, ཏསྶ ཡཱགུབྷཏྟཱདཱིནི པཊིཡཱདེཐཱ’’ཏི མནུསྶཱནཾ ཨཱརོཙེསི.

སཱམཎེརོ པཋམམེཝ ཏིསྶོ ནཱམ ཧུཏྭཱ ཏཏོ པིཎྜཔཱཏདཱཡཀཏིསྶོ ཀམྦལདཱཡཀཏིསྶོ ཝནཝཱསཱིཏིསྶོཏི ཏཱིཎི ནཱམཱནི ལབྷིཏྭཱ སཏྟཝསྶབྦྷནྟརེ ཙཏྟཱརི ནཱམཱནི ལབྷི. སོ པུནདིཝསེ པཱཏོཝ ཏཾ གཱམཾ པིཎྜཱཡ པཱཝིསི. མནུསྶཱ བྷིཀྑཾ དཏྭཱ ཝནྡིཾསུ. སཱམཎེརོ ‘‘སུཁིཏཱ ཧོཐ, དུཀྑཱ མུཙྩཐཱ’’ཏི ཨཱཧ. ཨེཀམནུསྶོཔི ཏསྶ བྷིཀྑཾ དཏྭཱ པུན གེཧཾ གནྟུཾ ནཱསཀྑི, སབྦེཝ ཨོལོཀེནྟཱ ཨཊྛཾསུ. སོཔི ཨཏྟནོ ཡཱཔནམཏྟམེཝ གཎྷི. སཀལགཱམཝཱསིནོ ཏསྶ པཱདམཱུལེ ཨུརེན ནིཔཛྫིཏྭཱ, ‘‘བྷནྟེ, ཏུམྷེསུ ཨིམཾ ཏེམཱསཾ ཨིདྷ ཝསནྟེསུ མཡཾ ཏཱིཎི སརཎཱནི གཧེཏྭཱ པཉྩསུ སཱིལེསུ པཏིཊྛཱཡ མཱསསྶ ཨཊྛ ཨུཔོསཐཀམྨཱནི ཨུཔཝསིསྶཱམ, ཨིདྷ ཝསནཏྠཱཡ ནོ པཊིཉྙཾ དེཐཱ’’ཏི. སོ ཨུཔཀཱརཾ སལླཀྑེཏྭཱ ཏེསཾ པཊིཉྙཾ དཏྭཱ ནིབདྡྷཾ ཏཏྠེཝ པིཎྜཔཱཏཙཱརཾ ཙརི. ཝནྡིཏཝནྡིཏཀྑཎེ ཙ ‘‘སུཁིཏཱ ཧོཐ, དུཀྑཱ མུཙྩཐཱ’’ཏི པདདྭཡམེཝ ཀཐེཏྭཱ པཀྐཱམི. སོ ཏཏྠེཝཔཋམམཱསཉྩ དུཏིཡམཱསཉྩ ཝཱིཏིནཱམེཏྭཱ ཏཏིཡམཱསེ གཙྪནྟེ སཧ པཊིསམྦྷིདཱཧི ཨརཧཏྟཾ པཱཔུཎི.

ཨཐསྶ པཝཱརེཏྭཱ ཝུཊྛཝསྶཀཱལེ ཨུཔཛ྄ཛྷཱཡོ སཏྠཱརཾ ཨུཔསངྐམིཏྭཱ ཝནྡིཏྭཱ ཨཱཧ – ‘‘ཨཧཾ, བྷནྟེ, ཏིསྶསཱམཎེརསྶ སནྟིཀཾ གཙྪཱམཱི’’ཏི. ‘‘གཙྪ, སཱརིཔུཏྟཱ’’ཏི. སོ ཨཏྟནོ པརིཝཱརེ པཉྩསཏེ བྷིཀྑཱུ ཨཱདཱཡ པཀྐནྟོ, ‘‘ཨཱཝུསོ མོགྒལླཱན, ཨཧཾ ཏིསྶསཱམཎེརསྶ སནྟིཀཾ གཙྪཱམཱི’’ཏི ཨཱཧ. མཧཱམོགྒལླཱནཏྠེརོ ‘‘ཨཧམྤི, ཨཱཝུསོ, གཙྪཱམཱི’’ཏི པཉྩཧི བྷིཀྑུསཏེཧི སདྡྷིཾ ནིཀྑམི. ཨེཏེནུཔཱཡེན མཧཱཀསྶཔཏྠེརོ ཨནུརུདྡྷཏྠེརོ ཨུཔཱལིཏྠེརོ པུཎྞཏྠེརོཏི སབྦེ མཧཱསཱཝཀཱ པཉྩཧི པཉྩཧི བྷིཀྑུསཏེཧི སདྡྷིཾ ནིཀྑམིཾསུ. སབྦེཔི མཧཱསཱཝཀཱནཾ པརིཝཱརཱ ཙཏྟཱལཱིས བྷིཀྑུསཧསྶཱནི ཨཧེསུཾ. ཏེ ཝཱིསཏིཡོཛནསཏཾ མགྒཾ གནྟྭཱ གོཙརགཱམཾ སམྤཏྟཱ. སཱམཎེརསྶ ནིབདྡྷཱུཔཊྛཱཀོ ཨུཔཱསཀོ དྭཱརེཡེཝ དིསྭཱ པཙྩུགྒནྟྭཱ ཝནྡི.

ཨཐ ནཾ སཱརིཔུཏྟཏྠེརོ པུཙྪི – ‘‘ཨཏྠི ནུ ཁོ, ཨུཔཱསཀ, ཨིམསྨིཾ པདེསེ ཨཱརཉྙཀཝིཧཱརོ’’ཏི? ‘‘ཨཏྠི, བྷནྟེ’’ཏི. ‘‘སབྷིཀྑུཀོ, ཨབྷིཀྑུཀོ’’ཏི? ‘‘སབྷིཀྑུཀོ, བྷནྟེ’’ཏི. ‘‘ཀོ ནཱམོ ཏཏྠ ཝསཏཱི’’ཏི? ‘‘ཝནཝཱསཱིཏིསྶོ, བྷནྟེ’’ཏི. ‘‘ཏེན ཧི མགྒཾ ནོ ཨཱཙིཀྑཱ’’ཏི. ‘‘ཀེ ཏུམྷེ, བྷནྟེ’’ཏི? ‘‘མཡཾ སཱམཎེརསྶ སནྟིཀཾ ཨཱགཏཱ’’ཏི. ཨུཔཱསཀོ ཨོལོཀེཏྭཱ དྷམྨསེནཱཔཏིཾ ཨཱདིཾ ཀཏྭཱ སབྦེཔི མཧཱསཱཝཀེ སཉྫཱནིཏྭཱ ནིརནྟརཾ པཱིཏིཡཱ ཕུཊྛསརཱིརོ ཧུཏྭཱ ‘‘ཏིཊྛཐ ཏཱཝ, བྷནྟེ’’ཏི ཝེགེན གཱམཾ པཝིསིཏྭཱ ‘‘ཨེཏེ, ཨཡྻཱ, སཱརིཔུཏྟཏྠེརཾ ཨཱདིཾ ཀཏྭཱ ཨསཱིཏི མཧཱསཱཝཀཱ ཨཏྟནོ ཨཏྟནོ པརིཝཱརེཧི སདྡྷིཾ སཱམཎེརསྶ སནྟིཀཾ ཨཱགཏཱ, མཉྩཔཱིཋཔཙྩཏྠརཎདཱིཔཏེལཱདཱིནི གཧེཏྭཱ ཝེགེན ནིཀྑམཐཱ’’ཏི ཨུགྒྷོསེསི. མནུསྶཱ ‘‘ཏཱཝདེཝ མཉྩཱདཱིནི གཧེཏྭཱ ཐེརཱནཾ པདཱནུཔདིཀཱ ཧུཏྭཱ ཐེརེཧི སདྡྷིཾཡེཝ ཝིཧཱརཾ པཝིསིཾསུ. སཱམཎེརོ བྷིཀྑུསངྒྷཾ སཉྫཱནིཏྭཱ ཀཏིཔཡཱནཾ མཧཱཐེརཱནཾ པཏྟཙཱིཝརཱནི པཊིགྒཧེཏྭཱ ཝཏྟམཀཱསི. ཏསྶ ཐེརཱནཾ ཝསནཊྛཱནཾ སཾཝིདཧནྟསྶ པཏྟཙཱིཝརཾ པཊིསཱམེནྟསྶེཝ ཨནྡྷཀཱརོ ཛཱཏཱ’’ཏི. སཱརིཔུཏྟཏྠེརོ ཨུཔཱསཀེ ཨཱཧ – ‘‘གཙྪཐ, ཨུཔཱསཀཱ, ཏུམྷཱཀཾ ཨནྡྷཀཱརོ ཛཱཏོ’’ཏི. ‘‘བྷནྟེ, ཨཛྫ དྷམྨསྶཝནདིཝསོ, ན མཡཾ གམིསྶཱམ, དྷམྨཾ སུཎིསྶཱམ, ཨིཏོ པུབྦེ དྷམྨསྶཝནམྤི ནཏྠཱི’’ཏི. ‘‘ཏེན ཧི, སཱམཎེར, དཱིཔཾ ཛཱལེཏྭཱ དྷམྨསྶཝནསྶ ཀཱལཾ གྷོསེཧཱི’’ཏི. སོ ཏཐཱ ཨཀཱསི. ཨཐ ནཾ ཐེརོ ཨཱཧ – ‘‘ཏིསྶ ཏཝ ཨུཔཊྛཱཀཱ ‘དྷམྨཾ སོཏུཀཱམཱམྷཱ’ཏི ཝདནྟི, ཀཐེཧི ཏེསཾ དྷམྨ’’ནྟི. ཨུཔཱསཀཱ ཨེཀཔྤཧཱརེནེཝ ཨུཊྛཱཡ, ‘‘བྷནྟེ, ཨམྷཱཀཾ ཨཡྻོ ‘སུཁིཏཱ ཧོཐ, དུཀྑཱ མུཙྩཐཱ’ཏི ཨིམཱནི དྭེ པདཱནི ཋཔེཏྭཱ ཨཉྙཾ དྷམྨཀཐཾ ན ཛཱནཱཏི, ཨམྷཱཀཾ ཨཉྙཾ དྷམྨཀཐིཀཾ དེཐཱ’’ཏི ཝདིཾསུ. ‘‘སཱམཎེརོ པན ཨརཧཏྟཾ པཏྭཱཔི ནེཝ ཏེསཾ དྷམྨཀཐཾ ཀཐེསཱི’’ཏི.

ཏདཱ པན ནཾ ཨུཔཛ྄ཛྷཱཡོ, ‘‘སཱམཎེར, ཀཐཾ པན སུཁིཏཱ ཧོནྟི, ‘ཀཐཾ པན དུཀྑཱ མུཙྩནྟཱི’ཏི ཨིམེསཾ ནོ དྭིནྣཾ པདཱནཾ ཨཏྠཾ ཀཐེཧཱི’’ཏི ཨཱཧ. སོ ‘‘སཱདྷུ, བྷནྟེ’’ཏི ཙིཏྟབཱིཛནིཾ གཧེཏྭཱ དྷམྨཱསནཾ ཨཱརུཡ྄ཧ པཉྩཧི ནིཀཱཡེཧི ཨཏྠཉྩ ཀཱརཎཉྩ ཨཱཀཌྜྷིཏྭཱ གྷནཝསྶཾ ཝསྶནྟོ ཙཱཏུདྡཱིཔཀམཧཱམེགྷོ ཝིཡ ཁནྡྷདྷཱཏུཨཱཡཏནབོདྷིཔཀྑིཡདྷམྨེ ཝིབྷཛནྟོ ཨརཧཏྟཀཱུཊེན དྷམྨཀཐཾ ཀཐེཏྭཱ, ‘‘བྷནྟེ, ཨེཝཾ ཨརཧཏྟཔྤཏྟསྶ སུཁཾ ཧོཏི, ཨརཧཏྟཾ པཏྟོཡེཝ དུཀྑཱ མུཙྩཏི, སེསཛནཱ ཛཱཏིདུཀྑཱདཱིཧི ཙེཝ ནིརཡདུཀྑཱདཱིཧི ཙ ན པརིམུཙྩནྟཱི’’ཏི ཨཱཧ. ‘‘སཱདྷུ, སཱམཎེར, སུཀཐིཏོ ཏེ པཊིབྷཱཎོ, ཨིདཱནི སརབྷཉྙཾ བྷཎཱཧཱི’’ཏི. སོ སརབྷཉྙམྤི བྷཎི. ཨརུཎེ ཨུགྒཙྪནྟེ སཱམཎེརསྶ ཨུཔཊྛཱཀམནུསྶཱ དྭེ བྷཱགཱ ཨཧེསུཾ. ཨེཀཙྩེ ‘‘ན ཝཏ ནོ ཨིཏོ པུབྦེ ཨེཝརཱུཔོ ཀཀྑལོ༹ དིཊྛཔུབྦོ. ཀཐཉྷི ནཱམ ཨེཝརཱུཔཾ དྷམྨཀཐཾ ཛཱནནྟོ ཨེཏྟཀཾ ཀཱལཾ མཱཏཱཔིཏུཊྛཱནེ ཋཏྭཱ ཨུཔཊྛཧནྟཱནཾ མནུསྶཱནཾ ཨེཀམྤི དྷམྨཔདཾ ན ཀཐེསཱི’’ཏི ཀུཛ྄ཛྷིཾསུ. ཨེཀཙྩེ ‘‘ལཱབྷཱ ཝཏ ནོ, ཡེ མཡཾ ཨེཝརཱུཔཾ བྷདནྟཾ གུཎཾ ཝཱ ཨགུཎཾ ཝཱ ཨཛཱནནྟཱཔི ཨུཔཊྛཧིམྷ, ཨིདཱནི ཙ པནསྶ སནྟིཀེ དྷམྨཾ སོཏུཾ ལབྷིམྷཱ’’ཏི ཏུསྶིཾསུ.

སམྨཱསམྦུདྡྷོཔི ཏཾ དིཝསཾ པཙྩཱུསསམཡེ ལོཀཾ ཝོལོཀེནྟོ ཝནཝཱསཱིཏིསྶསྶ ཨུཔཊྛཱཀེ ཨཏྟནོ ཉཱཎཛཱལསྶ ཨནྟོ པཝིཊྛེ དིསྭཱ ‘‘ཀིཾ ནུ ཁོ བྷཝིསྶཏཱི’’ཏི ཨཱཝཛྫེནྟོ ཨིམམཏྠཾ ཨུཔདྷཱརེསི ‘‘ཝནཝཱསཱིཏིསྶསཱམཎེརསྶ ཨུཔཊྛཱཀཱ ཨེཀཙྩེ ཏུཊྛཱ, ཨེཀཙྩེ ཀུདྡྷཱ, མཡ྄ཧཾ པུཏྟསྶ པན སཱམཎེརསྶ ཀུདྡྷཱ ནིརཡབྷཱགིནོ བྷཝིསྶནྟི, གནྟབྦམེཝ ཏཏྠ མཡཱ, མཡི གཏེ སབྦེཔི ཏེ སཱམཎེརེ མེཏྟཙིཏྟཾ ཀཏྭཱ དུཀྑཱ མུཙྩིསྶནྟཱི’’ཏི. ཏེཔི མནུསྶཱ བྷིཀྑུསངྒྷཾ ནིམནྟེཏྭཱ གཱམཾ གནྟྭཱ མཎྜཔཾ ཀཱརེཏྭཱ ཡཱགུབྷཏྟཱདཱིནི སམྤཱདེཏྭཱ ཨཱསནཱནི པཉྙཱཔེཏྭཱ སངྒྷསྶ ཨཱགམནམགྒཾ ཨོལོཀེནྟཱ ནིསཱིདིཾསུ. བྷིཀྑཱུཔི སརཱིརཔཊིཛགྒནཾ ཀཏྭཱ བྷིཀྑཱཙཱརཝེལཱཡ གཱམཾ པིཎྜཱཡ པཝིསནྟཱ སཱམཎེརཾ པུཙྪིཾསུ – ‘‘ཀིཾ, ཏིསྶ, ཏྭཾ ཨམྷེཧི སདྡྷིཾ གམིསྶསི, ཨུདཱཧུ པཙྪཱ’’ཏི? ‘‘མམ གམནཝེལཱཡམེཝ གམིསྶཱམི, གཙྪཐ ཏུམྷེ, བྷནྟེ’’ཏི. བྷིཀྑཱུ པཏྟཙཱིཝརམཱདཱཡ པཝིསིཾསུ.

སཏྠཱ ཛེཏཝནསྨིཾཡེཝ ཙཱིཝརཾ པཱརུཔིཏྭཱ པཏྟམཱདཱཡ ཨེཀཙིཏྟཀྑཎེནེཝ གནྟྭཱ བྷིཀྑཱུནཾ པུརཏོ ཋིཏམེཝ ཨཏྟཱནཾ དསྶེསི. ‘‘སམྨཱསམྦུདྡྷོ ཨཱགཏོ’’ཏི སཀལགཱམོ སངྑུབྷིཏྭཱ ཨེཀཀོལཱཧལོ ཨཧོསི. མནུསྶཱ ཨུདགྒཙིཏྟཱ བུདྡྷཔྤམུཁཾ བྷིཀྑུསངྒྷཾ ནིསཱིདཱཔེཏྭཱ ཡཱགུཾ དཏྭཱ ཁཛྫཀཾ ཨདཾསུ. སཱམཎེརོ བྷཏྟེ ཨནིཊྛིཏེཡེཝ ཨནྟོགཱམཾ པཱཝིསི. གཱམཝཱསིནོ ནཱིཧརིཏྭཱ ཏསྶ སཀྐཙྩཾ བྷིཀྑཾ ཨདཾསུ. སོ ཡཱཔནམཏྟཾ གཧེཏྭཱ སཏྠུ སནྟིཀཾ གནྟྭཱ པཏྟཾ ཨུཔནཱམེསི. སཏྠཱ ‘‘ཨཱཧར, ཏིསྶཱ’’ཏི ཧཏྠཾ པསཱརེཏྭཱ པཏྟཾ གཧེཏྭཱ ‘‘པསྶ, སཱརིཔུཏྟ, ཏཝ སཱམཎེརསྶ པཏྟ’’ནྟི ཐེརསྶ དསྶེསི. ཐེརོ སཏྠུ ཧཏྠཏོ པཏྟཾ གཧེཏྭཱ སཱམཎེརསྶ དཏྭཱ ‘‘གཙྪ, ཨཏྟནོ པཏྟཊྛཱནེ ནིསཱིདིཏྭཱ བྷཏྟཀིཙྩཾ ཀརོཧཱི’’ཏི ཨཱཧ.

གཱམཝཱསིནོ བུདྡྷཔྤམུཁཾ བྷིཀྑུསངྒྷཾ པརིཝིསིཏྭཱ སཏྠཱརཾ ཝནྡིཏྭཱ ཨནུམོདནཾ ཡཱཙིཾསུ. སཏྠཱ ཨནུམོདནཾ ཀརོནྟོ ཨེཝམཱཧ – ‘‘ལཱབྷཱ ཝཏ ཝོ ཨུཔཱསཀཱ, ཡེ ཏུམྷེ ཨཏྟནོ ཀུལཱུཔཀཾ སཱམཎེརཾ ནིསྶཱཡ སཱརིཔུཏྟཾ མོགྒལླཱནཾ ཀསྶཔཾ ཨནུརུདྡྷནྟི ཨསཱིཏིམཧཱསཱཝཀེ དསྶནཱཡ ལབྷཐ, ཨཧམྤི ཏུམྷཱཀཾ ཀུལཱུཔཀམེཝ ནིསྶཱཡ ཨཱགཏོ, བུདྡྷདསྶནམྤི ཝོ ཨིམཾ ནིསྶཱཡེཝ ལདྡྷཾ, ལཱབྷཱ ཝོ, སུལདྡྷཾ ཝོ’’ཏི. མནུསྶཱ ཙིནྟཡིཾསུ – ‘‘ཨཧོ ཨམྷཱཀཾ ལཱབྷཱ, བུདྡྷཱནཉྩེཝ བྷིཀྑུསངྒྷསྶ ཙ ཨཱརཱདྷནསམཏྠཾ ཨམྷཱཀཾ ཨཡྻཾ དསྶནཱཡ ལབྷཱམ, དེཡྻདྷམྨཉྩསྶ དཱཏུཾ ལབྷཱམཱ’’ཏི སཱམཎེརསྶ ཀུདྡྷཱ མནུསྶཱ ཏུསྶིཾསུ. ཏུཊྛཱ མནུསྶཱ བྷིཡྻོསོམཏྟཱཡ པསཱིདིཾསུ. ཨནུམོདནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ. སཏྠཱ ཨུཊྛཱཡཱསནཱ པཀྐཱམི. མནུསྶཱ སཏྠཱརཾ ཨནུགནྟྭཱ ཝནྡིཏྭཱ ནིཝཏྟིཾསུ. སཏྠཱ སཱམཎེརེན སདྡྷིཾ སམདྷུརེན གཙྪནྟོ, ‘‘སཱམཎེར, ཨཡཾ པདེསོ ཀོནཱམོ, ཨཡཾ པདེསོ ཀོནཱམོ’’ཏི པུབྦེ ཏསྶ ཨུཔཱསཀེན དསྶིཏཔདེསེ པུཙྪནྟོ ཨགམཱསི. སཱམཎེརོཔི, ‘‘བྷནྟེ, ཨཡཾ ཨིཏྠནྣཱམོ, ཨཡཾ ཨིཏྠནྣཱམོ’’ཏི ཨཱཙིཀྑམཱནོཝ ཨགམཱསི. སཏྠཱ ཏསྶ ཝསནཊྛཱནཾ གནྟྭཱ པབྦཏམཏྠཀཾ ཨབྷིརུཧི. ཏཏྠ ཋིཏཱནཾ པན མཧཱསམུདྡོ པཉྙཱཡཏི. སཏྠཱ སཱམཎེརཾ པུཙྪི – ‘‘ཏིསྶ, པབྦཏམཏྠཀེ ཋིཏོ ཨིཏོ ཙིཏོ ཙ ཨོལོཀེཏྭཱ ཀིཾ པསྶསཱི’’ཏི? ‘‘མཧཱསམུདྡཾ, བྷནྟེ’’ཏི. ‘‘མཧཱསམུདྡཾ དིསྭཱ ཀིཾ ཙིནྟེསཱི’’ཏི? ‘‘མམ དུཀྑིཏཀཱལེ རོདནྟསྶ ཙཏཱུཧི མཧཱསམུདྡེཧི ཨཏིརེཀཏརེན ཨསྶུནཱ བྷཝིཏབྦནྟི ཨིདཾ, བྷནྟེ, ཙིནྟེསི’’ནྟི. ‘‘སཱདྷུ སཱདྷུ, ཏིསྶ, ཨེཝམེཏཾ. ཨེཀེཀསྶ ཧི སཏྟསྶ དུཀྑིཏཀཱལེ པགྒྷརིཏཨསྶཱུནི ཙཏཱུཧི མཧཱསམུདྡེཧི ཨཏིརེཀཏརཱནེཝཱ’’ཏི. ཨིདཉྩ པན ཝཏྭཱ ཨིམཾ གཱཐམཱཧ –

‘‘ཙཏཱུསུ སམུདྡེསུ ཛལཾ པརིཏྟཀཾ,

ཏཏོ བཧུཾ ཨསྶུཛལཾ ཨནཔྤཀཾ;

དུཀྑེན ཕུཊྛསྶ ནརསྶ སོཙནཱ,

ཀིཾཀཱརཎཱ སམྨ ཏུཝཾ པམཛྫསཱི’’ཏི.

ཨཐ ནཾ པུན པུཙྪི – ‘‘ཏིསྶ, ཀཧཾ ཝསསཱི’’ཏི? ‘‘ཨིམསྨིཾ པབྦྷཱརེ, བྷནྟེ’’ཏི. ‘‘ཏཏྠ པན ཝསནྟོ ཀིཾ ཙིནྟེསཱི’’ཏི? ‘‘མཡཱ མརནྟེན ཨིམསྨིཾ ཋཱནེ ཀཏསྶ སརཱིརནིཀྑེཔསྶ པརིཙྪེདོ ‘ནཏྠཱི’ཏི ཙིནྟེསིཾ, བྷནྟེ’’ཏི. ‘‘སཱདྷུ སཱདྷུ, ཏིསྶ, ཨེཝམེཏཾ. ཨིམེསཉྷི སཏྟཱནཾ པཐཝིཡཾ ནིཔཛྫིཏྭཱ ཨམཏཊྛཱནཾ ནཱམ ནཏྠཱི’’ཏི ཝཏྭཱ –

‘‘ཨུཔསཱལ༹ཀནཱམཱནི, སཧསྶཱནི ཙཏུདྡས;

ཨསྨིཾ པདེསེ དཌྜྷཱནི, ནཏྠི ལོཀེ ཨནཱམཏཾ.

‘‘ཡམྷི སཙྩཉྩ དྷམྨོ ཙ, ཨཧིཾསཱ སཾཡམོ དམོ;

ཨེཏཾ ཨརིཡཱ སེཝནྟི, ཨེཏཾ ལོཀེ ཨནཱམཏ’’ནྟི. (ཛཱ.༡.༢.༣༡-༣༢) –

ཨིམཾ དུཀནིཔཱཏེ ཨུཔསཱལ༹ཀཛཱཏཀཾ ཀཐེསི. ཨིཏི པཐཝིཡཾ སརཱིརནིཀྑེཔཾ ཀཏྭཱ མརནྟེསུ སཏྟེསུ ཨམཏཔུབྦཔདེསེ མརནྟཱ ནཱམ ནཏྠི, ཨཱནནྡཏྠེརསདིསཱ པན ཨམཏཔུབྦཔདེསེ པརིནིབྦཱཡནྟི.

ཨཱནནྡཏྠེརོ ཀིར ཝཱིསཝསྶསཏིཀཀཱལེ ཨཱཡུསངྑཱརཾ ཨོལོཀེནྟོ པརིཀྑཱིཎབྷཱཝཾ ཉཏྭཱ ‘‘ཨིཏོ སཏྟམེ དིཝསེ པརིནིབྦཱཡིསྶཱམཱི’’ཏི ཨཱརོཙེསི. ཏཾ པཝཏྟིཾ སུཏྭཱ རོཧིཎཱིནདིཡཱ ཨུབྷཡཏཱིརཝཱསིཀེསུ མནུསྶེསུ ཨོརིམཏཱིརཝཱསིཀཱ ‘‘མཡཾ ཐེརསྶ བཧཱུཔཀཱརཱ, ཨམྷཱཀཾ སནྟིཀེ པརིནིབྦཱཡིསྶཏཱི’’ཏི ཝདིཾསུ. པརཏཱིརཝཱསིཀཱཔི ‘‘མཡཾ ཐེརསྶ བཧཱུཔཀཱརཱ, ཨམྷཱཀཾ སནྟིཀེ པརིནིབྦཱཡིསྶཏཱི’’ཏི ཝདིཾསུ. ཐེརོ ཏེསཾ ཝཙནཾ སུཏྭཱ ‘‘ཨུབྷཡཏཱིརཝཱསིནོ མཡ྄ཧཾ ཨུཔཀཱརཱ, ཨིམེ ནཱམ ཨནུཔཀཱརཱཏི ན སཀྐཱ ཝཏྟུཾ, སཙཱཧཾ ཨོརིམཏཱིརེ པརིནིབྦཱཡིསྶཱམི, པརཏཱིརཝཱསིནོ དྷཱཏུགཧཎཏྠཾ ཏེཧི སདྡྷིཾ ཀལཧཾ ཀརིསྶནྟི. སཙེ པརཏཱིརེ པརིནིབྦཱཡིསྶཱམི, ཨོརིམཏཱིརཝཱསིནོཔི ཏཐཱ ཀརིསྶནྟི, ཀལཧོ ཨུཔྤཛྫམཱནོཔི མཾ ནིསྶཱཡེཝ ཨུཔྤཛྫིསྶཏི, ཝཱུཔསམམཱནོཔི མཾ ནིསྶཱཡེཝ ཝཱུཔསམིསྶཏཱི’’ཏི ཙིནྟེཏྭཱ ‘‘ཨོརིམཏཱིརཝཱསིནོཔི མཡ྄ཧཾ ཨུཔཀཱརཱ, པརཏཱིརཝཱསིནོཔི མཡ྄ཧཾ ཨུཔཀཱརཱ, ཨནུཔཀཱརཱཔི ནཱམ ནཏྠི, ཨོརིམཏཱིརཝཱསིནོ ཨོརིམཏཱིརེཡེཝ སནྣིཔཏནྟུ, པརཏཱིརཝཱསིནོཔི པརཏཱིརེཡེཝཱ’’ཏི ཨཱཧ. ཏཏོ སཏྟམེ དིཝསེ མཛ྄ཛྷེནདིཡཱ སཏྟཏཱལཔྤམཱཎེ ཨཱཀཱསེ པལླངྐེན ནིསཱིདིཏྭཱ མཧཱཛནསྶ དྷམྨཾ ཀཐེཏྭཱ ‘‘མམ སརཱིརཾ མཛ྄ཛྷེ བྷིཛྫིཏྭཱ ཨེཀོ བྷཱགོ ཨོརིམཏཱིརེ པཏཏུ, ཨེཀོ བྷཱགོ པརཏཱིརེ’’ཏི ཨདྷིཊྛཱཡ ཡཐཱནིསིནྣོཝ ཏེཛོདྷཱཏུཾ སམཱཔཛྫི, ཛཱལཱ ཨུཊྛཧིཾསུ. སརཱིརཾ མཛ྄ཛྷེ བྷིཛྫིཏྭཱ ཨེཀོ བྷཱགོ ཨོརིམཏཱིརེ པཏི, ཨེཀོ བྷཱགོ པརཏཱིརེ. ཏཏོ མཧཱཛནོ པརིདེཝི, པཐཝིཨུནྡྲིཡནསདྡོ ཝིཡ ཨཱརོདནསདྡོ ཨཧོསི. སཏྠུ པརིནིབྦཱནེ ཨཱརོདནསདྡཏོཔི ཀཱརུཉྙཏརོ ཨཧོསི. མནུསྶཱ ཙཏྟཱརོ མཱསེ རོདནྟཱ པརིདེཝནྟཱ ‘‘སཏྠུ པཏྟཙཱིཝརགྒཱཧཀེ ཏིཊྛནྟེ སཏྠུ ཋིཏཀཱལོ ཝིཡ ནོ ཨཧོསི, ཨིདཱནི ནོ སཏྠཱ པརིནིབྦུཏོ’’ཏི ཝིཔྤལཔནྟཱ ཝིརཝནྟཱ ཝིཙརིཾསཱུཏི.

པུན སཏྠཱ སཱམཎེརཾ པུཙྪི – ‘‘ཏིསྶ, ཨིམསྨིཾ ཝནསཎྜེ དཱིཔིཨཱདཱིནཾ སདྡེན བྷཱཡསི, ན བྷཱཡསཱི’’ཏི? ‘‘ན བྷཱཡཱམི བྷགཝཱ, ཨཔིཙ ཁོ པན མེ ཨེཏེསཾ སདྡཾ སུཏྭཱ ཝནརཏི ནཱམ ཨུཔྤཛྫཏཱི’’ཏི ཝཏྭཱ སཊྛིམཏྟཱཧི གཱཐཱཧི ཝནཝཎྞནཾ ནཱམ ཀཐེསི. ཨཐ ནཾ སཏྠཱ ‘‘ཏིསྶཱ’’ཏི ཨཱམནྟེསི. ‘‘ཀིཾ, བྷནྟེ’’ཏི? ‘‘མཡཾ གཙྪཱམ, ཏྭཾ གམིསྶསི, ནིཝཏྟིསྶསཱི’’ཏི. ‘‘མཡ྄ཧཾ ཨུཔཛ྄ཛྷཱཡེ མཾ ཨཱདཱཡ གཙྪནྟེ གམིསྶཱམི, ནིཝཏྟེནྟེ ནིཝཏྟིསྶཱམི, བྷནྟེ’’ཏི. སཏྠཱ བྷིཀྑུསངྒྷེན སདྡྷིཾ པཀྐཱམི. སཱམཎེརསྶ པན ནིཝཏྟིཏུམེཝ ཨཛ྄ཛྷཱསཡོ, ཐེརོ ཏཾ ཉཏྭཱ ‘‘ཏིསྶ, སཙེ ནིཝཏྟིཏུཀཱམོ, ནིཝཏྟཱ’’ཏི ཨཱཧ. སོ སཏྠཱརཉྩ བྷིཀྑུསངྒྷཉྩ ཝནྡིཏྭཱ ནིཝཏྟི. སཏྠཱ ཛེཏཝནམེཝ ཨགམཱསི.

བྷིཀྑཱུནཾ དྷམྨསབྷཱཡཾ ཀཐཱ ཨུདཔཱདི – ‘‘ཨཧོ ཝཏ ཝནཝཱསཱིཏིསྶསཱམཎེརོ དུཀྐརཾ ཀརོཏི, པཊིསནྡྷིགྒཧཎཏོ པཊྛཱཡསྶ ཉཱཏཀཱ སཏྟསུ མངྒལེསུ པཉྩནྣཾ བྷིཀྑུསཏཱནཾ ཨཔྤོདཀམདྷུཔཱཡསམེཝ ཨདཾསུ, པབྦཛིཏཀཱལེ ཨནྟོཝིཧཱརེ བུདྡྷཔྤམུཁསྶ བྷིཀྑུསངྒྷསྶ སཏྟ དིཝསཱནི ཨཔྤོདཀམདྷུཔཱཡསམེཝ ཨདཾསུ. པབྦཛིཏྭཱ ཨཊྛམེ དིཝསེ ཨནྟོགཱམཾ པཝིསནྟོ དྭཱིཧེཝ དིཝསེཧི སཱཊཀསཧསྶེན སདྡྷིཾ པིཎྜཔཱཏསཧསྶཾ ལབྷི, པུནེཀདིཝསཾ ཀམྦལསཧསྶཾ ལབྷི. ཨིཏིསྶ ཨིདྷ ཝསནཀཱལེ མཧཱལཱབྷསཀྐཱརོ ཨུཔྤཛྫི, ཨིདཱནི ཨེཝརཱུཔཾ ལཱབྷསཀྐཱརཾ ཚཌྜེཏྭཱ ཨརཉྙཾ པཝིསིཏྭཱ མིསྶཀཱཧཱརེན ཡཱཔེཏི, དུཀྐརཀཱརཀོ ཝཏ ཏིསྶསཱམཎེརོ’’ཏི. སཏྠཱ ཨཱགནྟྭཱ, ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ཨཱམ, བྷིཀྑཝེ, ལཱབྷཱུཔནིསཱ ནཱམེསཱ ཨཉྙཱ, ནིབྦཱནགཱམིནཱི པཊིཔདཱ ཨཉྙཱ. ‘ཨེཝཾ ལཱབྷཾ ལབྷིསྶཱམཱི’ཏི ཧི ཨཱརཉྙིཀཱདིདྷུཏངྒསམཱདཱནཝསེན ལཱབྷཱུཔནིསཾ རཀྑནྟསྶ བྷིཀྑུནོ ཙཏྟཱརོ ཨཔཱཡཱ ཝིཝཊདྭཱརཱ ཨེཝ ཏིཊྛནྟི, ནིབྦཱནགཱམིནིཡཱ པན པཊིཔདཱཡ ཨུཔྤནྣཾ ལཱབྷསཀྐཱརཾ པཧཱཡ ཨརཉྙཾ པཝིསིཏྭཱ གྷཊེནྟོ ཝཱཡམནྟོ ཨརཧཏྟཾ གཎྷཱཏཱི’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༧༥.

‘‘ཨཉྙཱ ཧི ལཱབྷཱུཔནིསཱ, ཨཉྙཱ ནིབྦཱནགཱམིནཱི;

ཨེཝམེཏཾ ཨབྷིཉྙཱཡ, བྷིཀྑུ བུདྡྷསྶ སཱཝཀོ;

སཀྐཱརཾ ནཱབྷིནནྡེཡྻ, ཝིཝེཀམནུབྲཱུཧཡེ’’ཏི.

ཏཏྠ ཨཉྙཱ ཧི ལཱབྷཱུཔནིསཱ, ཨཉྙཱ ནིབྦཱནགཱམིནཱིཏི ལཱབྷཱུཔནིསཱ ནཱམེསཱ ཨཉྙཱ ཨེཝ, ཨཉྙཱ ནིབྦཱནགཱམིནཱི པཊིཔདཱ. ལཱབྷུཔྤཱདཀེན ཧི བྷིཀྑུནཱ ཐོཀཾ ཨཀུསལཀམྨཾ ཀཱཏུཾ ཝཊྚཏི, ཀཱཡཝངྐཱདཱིནི ཀཱཏབྦཱནི ཧོནྟི. ཡསྨིཉྷི ཀཱལེ ཀཱཡཝངྐཱདཱིསུ ཀིཉྩི ཀརོཏི, ཏདཱ ལཱབྷོ ཨུཔྤཛྫཏི. པཱཡསཔཱཏིཡཉྷི ཝངྐཾ ཨཀཏྭཱ ཨུཛུཀམེཝ ཧཏྠཾ ཨོཏཱརེཏྭཱ ཨུཀྑིཔནྟསྶ ཧཏྠོ མཀྑིཏམཏྟཀོཝ ཧོཏི, ཝངྐཾ ཀཏྭཱ ཨོཏཱརེཏྭཱ ཨུཀྑིཔནྟསྶ པན པཱཡསཔིཎྜཾ ཨུདྡྷརནྟོཝ ནིཀྑམཏི, ཨེཝཾ ཀཱཡཝངྐཱདཱིནི ཀརཎཀཱལེཡེཝ ལཱབྷོ ཨུཔྤཛྫཏི. ཨཡཾ ཨདྷམྨིཀཱ ལཱབྷཱུཔནིསྶཱ ནཱམ. ཨུཔདྷིསམྤདཱ ཙཱིཝརདྷཱརཎཾ བཱཧུསཙྩཾ པརིཝཱརོ ཨརཉྙཝཱསོཏི ཨེཝརཱུཔེཧི པན ཀཱརཎེཧི ཨུཔྤནྣོ ལཱབྷོ དྷམྨིཀོ ནཱམ ཧོཏི. ནིབྦཱནགཱམིནིཾ པཊིཔདཾ པཱུརེནྟེན པན བྷིཀྑུནཱ ཀཱཡཝངྐཱདཱིནི པཧཱཏབྦཱནི. ཨནནྡྷེནེཝ ཨནྡྷེན ཝིཡ, ཨམཱུགེནེཝ མཱུགེན ཝིཡ, ཨབདྷིརེནེཝ བདྷིརེན ཝིཡ བྷཝིཏུཾ ཝཊྚཏི. ཨསཋེན ཨམཱཡེན བྷཝིཏུཾ ཝཊྚཏི. ཨེཝམེཏནྟི ཨེཏཾ ལཱབྷུཔྤཱདནཾ པཊིཔདཉྩ ནིབྦཱནགཱམིནིཾ པཊིཔདཉྩ ཨེཝཾ ཉཏྭཱ སབྦེསཾ སངྑཏཱསངྑཏདྷམྨཱནཾ བུཛ྄ཛྷནཊྛེན བུདྡྷསྶ སཝནནྟེ ཛཱཏཊྛེན ཨོཝཱདཱནུསཱསནིཾ ཝཱ སཝནཊྛེན སཱཝཀོ བྷིཀྑུ ཨདྷམྨིཀཾ ཙཏུཔཙྩཡསཀྐཱརཾ ནཱབྷིནནྡེཡྻ, ན ཙེཝ དྷམྨིཀཾ པཊིཀྐོསེཡྻ, ཀཱཡཝིཝེཀཱདིཀཾ ཝིཝེཀཾ ཨནུབྲཱུཧཡེ. ཏཏྠ ཀཱཡཝིཝེཀོཏི ཀཱཡསྶ ཨེཀཱིབྷཱཝོ. ཙིཏྟཝིཝེཀོཏི ཨཊྛ སམཱཔཏྟིཡོ. ཨུཔདྷིཝིཝེཀོཏི ནིབྦཱནཾ. ཏེསུ ཀཱཡཝིཝེཀོ གཎསངྒཎིཀཾ ཝིནོདེཏི, ཙིཏྟཝིཝེཀོ ཀིལེསསངྒཎིཀཾ ཝིནོདེཏི, ཨུཔདྷིཝིཝེཀོ སངྑཱརསངྒཎིཀཾ ཝིནོདེཏི. ཀཱཡཝིཝེཀོ ཙིཏྟཝིཝེཀསྶ པཙྩཡོ ཧོཏི, ཙིཏྟཝིཝེཀོ ཨུཔདྷིཝིཝེཀསྶ པཙྩཡོ ཧོཏི. ཝུཏྟམྤིཧེཏཾ –

‘‘ཀཱཡཝིཝེཀོ ཙ ཝིཝེཀཊྛཀཱཡཱནཾ ནེཀྑམྨཱབྷིརཏཱནཾ, ཙིཏྟཝིཝེཀོ ཙ པརིསུདྡྷཙིཏྟཱནཾ པརམཝོདཱནཔྤཏྟཱནཾ, ཨུཔདྷིཝིཝེཀོ ཙ ནིརུཔདྷཱིནཾ པུགྒལཱནཾ ཝིསངྑཱརགཏཱན’’ནྟི (མཧཱནི. ༡༥༠). –

ཨིམཾ ཏིཝིདྷམྤི ཝིཝེཀཾ བྲཱུཧེཡྻ ཝཌྜྷེཡྻ, ཨུཔསམྤཛྫ ཝིཧརེཡྻཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཝནཝཱསཱིཏིསྶསཱམཎེརཝཏྠུ པནྣརསམཾ.

བཱལཝགྒཝཎྞནཱ ནིཊྛིཏཱ.

པཉྩམོ ཝགྒོ.

༦. པཎྜིཏཝགྒོ

༡. རཱདྷཏྠེརཝཏྠུ

ནིདྷཱིནཾཝ པཝཏྟཱརནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཱཡསྨནྟཾ རཱདྷཏྠེརཾ ཨཱརབྦྷ ཀཐེསི.

སོ ཀིར གིཧིཀཱལེ སཱཝཏྠིཡཾ དུགྒཏབྲཱཧྨཎོ ཨཧོསི. སོ ‘‘བྷིཀྑཱུནཾ སནྟིཀེ ཛཱིཝིསྶཱམཱི’’ཏི ཙིནྟེཏྭཱ ཝིཧཱརཾ གནྟྭཱ ཨཔྤཧརིཏཀཾ ཀརོནྟོ པརིཝེཎཾ སམྨཛྫནྟོ མུཁདྷོཝནཱདཱིནི དདནྟོ ཨནྟོཝིཧཱརེཡེཝ ཝསི. བྷིཀྑཱུཔི ནཾ སངྒཎྷིཾསུ, པབྦཱཛེཏུཾ པན ན ཨིཙྪནྟི. སོ པབྦཛྫཾ ཨལབྷམཱནོ ཀིསོ ཨཧོསི. ཨཐེཀདིཝསཾ སཏྠཱ པཙྩཱུསཀཱལེ ལོཀཾ ཝོལོཀེནྟོ ཏཾ བྲཱཧྨཎཾ དིསྭཱ ‘‘ཀིཾ ནུ ཁོ’’ཏི ཨུཔདྷཱརེནྟོ ‘‘ཨརཧཱ བྷཝིསྶཏཱི’’ཏི ཉཏྭཱ སཱཡནྷསམཡེ ཝིཧཱརཙཱརིཀཾ ཙརནྟོ ཝིཡ བྲཱཧྨཎསྶ སནྟིཀཾ གནྟྭཱ, ‘‘བྲཱཧྨཎ, ཀིཾ ཀརོནྟོ ཝིཙརསཱི’’ཏི ཨཱཧ. ‘‘བྷིཀྑཱུནཾ ཝཏྟཔཊིཝཏྟཾ ཀརོནྟོ, བྷནྟེ’’ཏི. ‘‘ལབྷསི ནེསཾ སནྟིཀཱ སངྒཧ’’ནྟི? ‘‘ཨཱམ, བྷནྟེ, ཨཱཧཱརམཏྟཾ ལབྷཱམི, ན པན མཾ པབྦཱཛེནྟཱི’’ཏི. སཏྠཱ ཨེཏསྨིཾ ནིདཱནེ བྷིཀྑུསངྒྷཾ སནྣིཔཱཏཱཔེཏྭཱ ཏམཏྠཾ པུཙྪིཏྭཱ, ‘‘བྷིཀྑཝེ, ཨཏྠི ཀོཙི ཨིམསྶ བྲཱཧྨཎསྶ ཨདྷིཀཱརཾ སརཏཱི’’ཏི པུཙྪི. སཱརིཔུཏྟཏྠེརོ ‘‘ཨཧཾ, བྷནྟེ, སརཱམི, ཨཡཾ མེ རཱཛགཧེ པིཎྜཱཡ ཙརནྟསྶ ཨཏྟནོ ཨབྷིཧཊཾ ཀཊཙྪུབྷིཀྑཾ དཱཔེསི, ཨིམམསྶཱཧཾ ཨདྷིཀཱརཾ སརཱམཱི’’ཏི ཨཱཧ. སོ སཏྠཱརཱ ‘‘ཀིཾ པན ཏེ, སཱརིཔུཏྟ, ཨེཝཾ ཀཏཱུཔཀཱརཾ དུཀྑཏོ མོཙེཏུཾ ན ཝཊྚཏཱི’’ཏི ཝུཏྟེ, ‘‘སཱདྷུ, བྷནྟེ, པབྦཱཛེསྶཱམཱི’’ཏི ཏཾ བྲཱཧྨཎཾ པབྦཱཛེསི. ཏསྶ བྷཏྟགྒེ ཨཱསནཔརིཡནྟེ ཨཱསནཾ པཱཔུཎཱཏི, ཡཱགུབྷཏྟཱདཱིཧིཔི ཀིལམཏི. ཐེརོ ཏཾ ཨཱདཱཡ ཙཱརིཀཾ པཀྐཱམི, ཨབྷིཀྑཎཉྩ ནཾ ‘‘ཨིདཾ ཏེ ཀཏྟབྦཾ, ཨིདཾ ཏེ ན ཀཏྟབྦ’’ནྟི ཨོཝདི ཨནུསཱསི. སོ སུཝཙོ ཨཧོསི པདཀྑིཎགྒཱཧཱི. ཏསྨཱ ཡཐཱནུསིཊྛཾ པཊིཔཛྫམཱནོ ཀཏིཔཱཧེནེཝ ཨརཧཏྟཾ པཱཔུཎི.

ཐེརོ ཏཾ ཨཱདཱཡ སཏྠུ སནྟིཀཾ གནྟྭཱ ཝནྡིཏྭཱ ནིསཱིདི. ཨཐ ནཾ སཏྠཱ པཊིསནྠཱརཾ ཀཏྭཱ ཨཱཧ – ‘‘སུཝཙོ ནུ ཁོ, སཱརིཔུཏྟ, ཏེ ཨནྟེཝཱསིཀོ’’ཏི. ‘‘ཨཱམ, བྷནྟེ, ཨཏིཝིཡ སུཝཙོ, ཀིསྨིཉྩི དོསེ ཝུཙྩམཱནེ ན ཀུདྡྷཔུབྦོ’’ཏི. ‘‘སཱརིཔུཏྟ, ཨེཝརཱུཔེ སདྡྷིཝིཧཱརིཀེ ལབྷནྟོ ཀིཏྟཀེ གཎྷེཡྻཱསཱི’’ཏི? ‘‘བྷནྟེ, བཧུཀེཔི གཎྷེཡྻམེཝཱ’’ཏི. ཨཐེཀདིཝསཾ དྷམྨསབྷཱཡ ཀཐཾ སམུཊྛཱཔེསུཾ – ‘‘སཱརིཔུཏྟཏྠེརོ ཀིར ཀཏཉྙཱུ ཀཏཝེདཱི, ཀཊཙྪུབྷིཀྑཱམཏྟཾ ཨུཔཀཱརཾ སརིཏྭཱ དུགྒཏབྲཱཧྨཎཾ པབྦཱཛེསི. ཐེརོཔི ཨོཝཱདཀྑམོ ཨོཝཱདཀྑམམེཝ ལབྷཱི’’ཏི. སཏྠཱ ཏེསཾ ཀཐཾ སུཏྭཱ ‘‘ན, བྷིཀྑཝེ, ཨིདཱནེཝ, པུབྦེཔི སཱརིཔུཏྟོ ཀཏཉྙཱུ ཀཏཝེདཱིཡེཝཱ’’ཏི ཝཏྭཱ ཏམཏྠཾ པཀཱསེཏུཾ –

‘‘ཨལཱིནཙིཏྟཾ ནིསྶཱཡ, པཧཊྛཱ མཧཏཱི ཙམཱུ;

ཀོསལཾ སེནཱསནྟུཊྛཾ, ཛཱིཝགྒཱཧཾ ཨགཱཧཡི.

‘‘ཨེཝཾ ནིསྶཡསམྤནྣོ, བྷིཀྑུ ཨཱརདྡྷཝཱིརིཡོ;

བྷཱཝཡཾ ཀུསལཾ དྷམྨཾ, ཡོགཀྑེམསྶ པཏྟིཡཱ;

པཱཔུཎེ ཨནུཔུབྦེན, སབྦསཾཡོཛནཀྑཡ’’ནྟི. (ཛཱ. ༡.༢.༡༡-༡༢) –

ཨིམཾ དུཀནིཔཱཏེ ཨལཱིནཙིཏྟཛཱཏཀཾ ཝིཏྠཱརེཏྭཱ ཀཐེསི. ཏདཱ ཀིར ཝཌྜྷཀཱིཧི པཱདསྶ ཨརོགཀརཎབྷཱཝེན ཀཧཾ ཨཏྟནོ ཨུཔཀཱརཾ ཉཏྭཱ སབྦསེཏསྶ ཧཏྠིཔོཏཀསྶ དཱཡཀོ ཨེཀཙཱརིཀོ ཧཏྠཱི སཱརིཔུཏྟཏྠེརོ ཨཧོསཱིཏི ཨེཝཾ ཐེརཾ ཨཱརབྦྷ ཛཱཏཀཾ ཀཐེཏྭཱ རཱདྷཏྠེརཾ ཨཱརབྦྷ, ‘‘བྷིཀྑཝེ, བྷིཀྑུནཱ ནཱམ རཱདྷེན ཝིཡ སུཝཙེན བྷཝིཏབྦཾ, དོསཾ དསྶེཏྭཱ ཨོཝདིཡམཱནེནཔི ན ཀུཛ྄ཛྷིཏབྦཾ, ཨོཝཱདདཱཡཀོ པན ནིདྷིཨཱཙིཀྑཎཀོ ཝིཡ དཊྛབྦོ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༧༦.

‘‘ནིདྷཱིནཾཝ པཝཏྟཱརཾ, ཡཾ པསྶེ ཝཛྫདསྶིནཾ;

ནིགྒཡ྄ཧཝཱདིཾ མེདྷཱཝིཾ, ཏཱདིསཾ པཎྜིཏཾ བྷཛེ;

ཏཱདིསཾ བྷཛམཱནསྶ, སེཡྻོ ཧོཏི ན པཱཔིཡོ’’ཏི.

ཏཏྠ ནིདྷཱིནནྟི ཏཏྠ ཏཏྠ ནིདཧིཏྭཱ ཋཔིཏཱནཾ ཧིརཉྙསུཝཎྞཱདིཔཱུརཱནཾ ནིདྷིཀུམྦྷཱིནཾ. པཝཏྟཱརནྟི ཀིཙྪཛཱིཝིཀེ དུགྒཏམནུསྶེ ཨནུཀམྤཾ ཀཏྭཱ ‘‘ཨེཧི, སུཁེན ཛཱིཝནཱུཔཱཡཾ དསྶེསྶཱམཱི’’ཏི ནིདྷིཊྛཱནཾ ནེཏྭཱ ཧཏྠཾ པསཱརེཏྭཱ ‘‘ཨིམཾ གཧེཏྭཱ སུཁེན ཛཱིཝཱ’’ཏི ཨཱཙིཀྑིཏཱརཾ ཝིཡ. ཝཛྫདསྶིནནྟི དྭེ ཝཛྫདསྶིནོ ‘‘ཨིམིནཱ ནཾ ཨསཱརུཔྤེན ཝཱ ཁལིཏེན ཝཱ སངྒྷམཛ྄ཛྷེ ནིགྒཎྷིསྶཱམཱི’’ཏི རནྡྷགཝེསཀོ ཙ, ཨཉྙཱཏཾ ཉཱཔནཏྠཱཡ ཉཱཏཾ ཨནུགྒཧཎཏྠཱཡ སཱིལཱདཱིནམསྶ ཝུདྡྷིཀཱམཏཱཡ ཏཾ ཏཾ ཝཛྫཾ ཨོལོཀནེན ཨུལླུམྤནསབྷཱཝསཎྛིཏོ ཙ. ཨཡཾ ཨིདྷ ཨདྷིཔྤེཏོ. ཡཐཱ ཧི དུགྒཏམནུསྶོ ‘‘ཨིམཾ གཎྷཱཧཱི’’ཏི ཏཛྫེཏྭཱཔི པོཐེཏྭཱཔི ནིདྷིཾ དསྶེནྟེ ཀོཔཾ ན ཀརོཏི, པམུདིཏོ ཨེཝ ཧོཏི, ཨེཝམེཝ ཨེཝརཱུཔེ པུགྒལེ ཨསཱརུཔྤཾ ཝཱ ཁལིཏཾ ཝཱ དིསྭཱ ཨཱཙིཀྑནྟེ ཀོཔོ ན ཀཱཏབྦོ, ཏུཊྛེནེཝ བྷཝིཏབྦཾ, ‘‘བྷནྟེ, མཧནྟཾ ཝོ ཀམྨཾ ཀཏཾ, མཡ྄ཧཾ ཨཱཙརིཡུཔཛ྄ཛྷཱཡཊྛཱནེ ཋཏྭཱ ཨོཝདནྟེཧི པུནཔི མཾ ཝདེཡྻཱཐཱ’’ཏི པཝཱརེཏབྦམེཝ. ནིགྒཡ྄ཧཝཱདིནྟི ཨེཀཙྩོ ཧི སདྡྷིཝིཧཱརིཀཱདཱིནཾ ཨསཱརུཔྤཾ ཝཱ ཁལིཏཾ ཝཱ དིསྭཱ ‘‘ཨཡཾ མེ མུཁོདཀདཱནཱདཱིཧི སཀྐཙྩཾ ཨུཔཊྛཧཏི, སཙེ ནཾ ཝཀྑཱམི, ན མཾ ཨུཔཊྛཧིསྶཏི, ཨེཝཾ མེ པརིཧཱནི བྷཝིསྶཏཱི’’ཏི ཝཏྠུཾ ཨཝིསཧནྟོ ན ནིགྒཡ྄ཧཝཱདཱི ནཱམ ཧོཏི. སོ ཨིམསྨིཾ སཱསནེ ཀཙཝརཾ ཨཱཀིརཏི. ཡོ པན ཏཐཱརཱུཔཾ ཝཛྫཾ དིསྭཱ ཝཛྫཱནུརཱུཔཾ ཏཛྫེནྟོ པཎཱམེནྟོ དཎྜཀམྨཾ ཀརོནྟོ ཝིཧཱརཱ ཏཾ ནཱིཧརནྟོ སིཀྑཱཔེཏི, ཨཡཾ ནིགྒཡ྄ཧཝཱདཱི ནཱམ སེཡྻཐཱཔི སམྨཱསམྦུདྡྷོ. ཝུཏྟཉྷེཏཾ – ‘‘ནིགྒཡ྄ཧ ནིགྒཡ྄ཧཱཧཾ, ཨཱནནྡ, ཝཀྑཱམི, པཝཡ྄ཧ པཝཡ྄ཧ, ཨཱནནྡ, ཝཀྑཱམི, ཡོ སཱརོ སོ ཋསྶཏཱི’’ཏི (མ. ནི. ༣.༡༩༦). མེདྷཱཝིནྟི དྷམྨོཛཔཉྙཱཡ སམནྣཱགཏཾ. ཏཱདིསནྟི ཨེཝརཱུཔཾ པཎྜིཏཾ བྷཛེཡྻ པཡིརུཔཱསེཡྻ. ཏཱདིསཉྷི ཨཱཙརིཡཾ བྷཛམཱནསྶ ཨནྟེཝཱསིཀསྶ སེཡྻོ ཧོཏི, ན པཱཔིཡོ ཝཌྜྷིཡེཝ ཧོཏི, ནོ པརིཧཱནཱིཏི.

དེསནཱཔརིཡོསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

རཱདྷཏྠེརཝཏྠུ པཋམཾ.

༢. ཨསྶཛིཔུནབྦསུཀཝཏྠུ

ཨོཝདེཡྻཱནུསཱསེཡྻཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨསྶཛིཔུནབྦསུཀབྷིཀྑཱུ ཨཱརབྦྷ ཀཐེསི. དེསནཱ པན ཀཱིཊཱགིརིསྨིཾ སམུཊྛིཏཱ.

ཏེ ཀིར དྭེ བྷིཀྑཱུ ཀིཉྩཱཔི ཨགྒསཱཝཀཱནཾ སདྡྷིཝིཧཱརིཀཱ, ཨལཛྫིནོ པན ཨཧེསུཾ པཱཔབྷིཀྑཱུ. ཏེ པཱཔཀེཧི ཨཏྟནོ པརིཝཱརེཧི པཉྩཧི བྷིཀྑུསཏེཧི སདྡྷིཾ ཀཱིཊཱགིརིསྨིཾ ཝིཧརནྟཱ ‘‘མཱལཱཝཙྪཾ རོཔེནྟིཔི རོཔཱཔེནྟིཔཱི’’ཏིཨཱདིཀཾ (པཱརཱ. ༤༣༡; ཙཱུལ༹ཝ. ༢༡) ནཱནཔྤཀཱརཾ ཨནཱཙཱརཾ ཀརོནྟཱ ཀུལདཱུསཀཀམྨཾ ཀཏྭཱ ཏཏོ ཨུཔྤནྣེཧི པཙྩཡེཧི ཛཱིཝིཀཾ ཀཔྤེནྟཱ ཏཾ ཨཱཝཱསཾ པེསལཱནཾ བྷིཀྑཱུནཾ ཨནཱཝཱསཾ ཨཀཾསུ. སཏྠཱ ཏཾ པཝཏྟིཾ སུཏྭཱ ཏེསཾ པབྦཱཛནཱིཡཀམྨཀརཎཏྠཱཡ སཔརིཝཱརེ དྭེ ཨགྒསཱཝཀེ ཨཱམནྟེཏྭཱ ‘‘གཙྪཐ, སཱརིཔུཏྟཱ, ཏེསུ ཡེ ཏུམྷཱཀཾ ཝཙནཾ ན ཀརོནྟི, ཏེསཾ པབྦཱཛནཱིཡཀམྨཾ ཀརོཐ, ཡེ པན ཀརོནྟི, ཏེ ཨོཝདཐ ཨནུསཱསཐ. ཨོཝདནྟོ ཧི ཨནུསཱསནྟོ ཨཔཎྜིཏཱནཾཡེཝ ཨཔྤིཡོ ཧོཏི ཨམནཱཔོ, པཎྜིཏཱནཾ པན པིཡོ ཧོཏི མནཱཔོ’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༧༧.

‘‘ཨོཝདེཡྻཱནུསཱསེཡྻ, ཨསབྦྷཱ ཙ ནིཝཱརཡེ;

སཏཉྷི སོ པིཡོ ཧོཏི, ཨསཏཾ ཧོཏི ཨཔྤིཡོ’’ཏི.

ཏཏྠ ཨོཝདེཡྻཱཏི ཨུཔྤནྣེ ཝཏྠུསྨིཾ ཝདནྟོ ཨོཝདཏི ནཱམ, ཨནུཔྤནྣེ ཝཏྠུསྨིཾ ‘‘ཨཡསོཔི ཏེ སིཡཱ’’ཏིཨཱདིཝསེན ཨནཱགཏཾ དསྶེནྟོ ཨནུསཱསཏི ནཱམ. སམྨུཁཱ ཝདནྟོ ཨོཝདཏི ནཱམ, པརམྨུཁཱ དཱུཏཾ ཝཱ སཱསནཾ ཝཱ པེསེནྟོ ཨནུསཱསཏི ནཱམ. སཀིཾ ཝདནྟོ ཨོཝདཏི ནཱམ, པུནཔྤུནཾ ཝདནྟོ ཨནུསཱསཏི ནཱམ. ཨོཝདནྟོ ཨེཝ ཝཱ ཨནུསཱསཏི ནཱམཱཏི ཨེཝཾ ཨོཝདེཡྻ ཨནུསཱསེཡྻ. ཨསབྦྷཱ ཙཱཏི ཨཀུསལདྷམྨཱ ཙ ནིཝཱརེཡྻ, ཀུསལདྷམྨེ པཏིཊྛཱཔེཡྻཱཏི ཨཏྠོ. སཏཉྷི སོ པིཡོ ཧོཏཱིཏི སོ ཨེཝརཱུཔོ པུགྒལོ བུདྡྷཱདཱིནཾ སཔྤུརིསཱནཾ པིཡོ ཧོཏི. ཡེ པན ཨདིཊྛདྷམྨཱ ཨཝིཏིཎྞཔརལོཀཱ ཨཱམིསཙཀྑུཀཱ ཛཱིཝིཀཏྠཱཡ པབྦཛིཏཱ, ཏེསཾ ཨསཏཾ སོ ཨོཝཱདཀོ ཨནུསཱསཀོ, ‘‘‘ན ཏྭཾ ཨམྷཱཀཾ ཨུཔཛ྄ཛྷཱཡོ, ན ཨཱཙརིཡོ, ཀསྨཱ ཨམྷེ ཨོཝདསཱི’ཏི ཨེཝཾ མུཁསཏྟཱིཧི ཝིཛ྄ཛྷནྟཱནཾ ཨཔྤིཡོ ཧོཏཱི’’ཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི. སཱརིཔུཏྟམོགྒལླཱནཱཔི ཏཏྠ གནྟྭཱ ཏེ བྷིཀྑཱུ ཨོཝདིཾསུ ཨནུསཱསིཾསུ. ཏེསུ ཨེཀཙྩེ ཨོཝཱདཾ སམྤཊིཙྪིཏྭཱ སམྨཱ ཝཏྟིཾསུ, ཨེཀཙྩེ ཝིབྦྷམིཾསུ, ཨེཀཙྩེ པབྦཱཛནཱིཡཀམྨཾ པཱཔུཎིཾསཱུཏི.

ཨསྶཛིཔུནབྦསུཀཝཏྠུ དུཏིཡཾ.

༣. ཚནྣཏྠེརཝཏྠུ

ན བྷཛེ པཱཔཀེ མིཏྟེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཚནྣཏྠེརཾ ཨཱརབྦྷ ཀཐེསི.

སོ ཀིར ཨཱཡསྨཱ ‘‘ཨཧཾ ཨམྷཱཀཾ ཨཡྻཔུཏྟེན སདྡྷིཾ མཧཱབྷིནིཀྑམནཾ ནིཀྑནྟོ ཏདཱ ཨཉྙཾ ཨེཀམྤི ན པསྶཱམི, ཨིདཱནི པན ‘ཨཧཾ སཱརིཔུཏྟོ ནཱམ, ཨཧཾ མོགྒལླཱནོ ནཱམ, མཡཾ ཨགྒསཱཝཀམྷཱ’ཏི ཝཏྭཱ ཨིམེ ཝིཙརནྟཱི’’ཏི དྭེ ཨགྒསཱཝཀེ ཨཀྐོསཏི. སཏྠཱ བྷིཀྑཱུནཾ སནྟིཀཱ ཏཾ པཝཏྟིཾ སུཏྭཱ ཚནྣཏྠེརཾ པཀྐོསཱཔེཏྭཱ ཨོཝདཏི. སོ ཏངྑཎེཡེཝ ཏུཎྷཱི ཧུཏྭཱ པུན གནྟྭཱ ཐེརེ ཨཀྐོསཏིཡེཝ. ཨེཝཾ ཡཱཝཏཏིཡཾ ཨཀྐོསནྟཾ པཀྐོསཱཔེཏྭཱ སཏྠཱ ཨོཝདིཏྭཱ ‘‘ཚནྣ, དྭེ ཨགྒསཱཝཀཱ ནཱམ ཏུཡ྄ཧཾ ཀལྱཱཎམིཏྟཱ ཨུཏྟམཔུརིསཱ, ཨེཝརཱུཔེ ཀལྱཱཎམིཏྟེ སེཝསྶུ བྷཛསྶཱུ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༧༨.

‘‘ན བྷཛེ པཱཔཀེ མིཏྟེ, ན བྷཛེ པུརིསཱདྷམེ;

བྷཛེཐ མིཏྟེ ཀལྱཱཎེ, བྷཛེཐ པུརིསུཏྟམེ’’ཏི.

ཏསྶཏྠོ – ཀཱཡདུཙྩརིཏཱདིཨཀུསལཀམྨཱབྷིརཏཱ པཱཔམིཏྟཱ ནཱམ. སནྡྷིཙྪེདནཱདིཀེ ཝཱ ཨེཀཝཱིསཏིཨནེསནཱདིབྷེདེ ཝཱ ཨཊྛཱནེ ནིཡོཛཀཱ པུརིསཱདྷམཱ ནཱམ. ཨུབྷོཔི ཝཱ ཨེཏེ པཱཔམིཏྟཱ ཙེཝ པུརིསཱདྷམཱ ཙ, ཏེ ན བྷཛེཡྻ ན པཡིརུཔཱསེཡྻ, ཝིཔརཱིཏཱ པན ཀལྱཱཎམིཏྟཱ ཙེཝ སཔྤུརིསཱ ཙ, ཏེ བྷཛེཐ པཡིརུཔཱསེཐཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཚནྣཏྠེརོ པན ཏཾ ཨོཝཱདཾ སུཏྭཱཔི པུརིམནཡེནེཝ བྷིཀྑཱུ ཨཀྐོསཏི པརིབྷཱསཏི. པུནཔི སཏྠུ ཨཱརོཙེསུཾ. སཏྠཱ, ‘‘བྷིཀྑཝེ, མཡི དྷརནྟེ ཚནྣཾ སིཀྑཱཔེཏུཾ ན སཀྑིསྶཐ, མཡི པན པརིནིབྦུཏེ སཀྑིསྶཐཱ’’ཏི ཝཏྭཱ པརིནིབྦཱནཀཱལེ ཨཱཡསྨཏཱ ཨཱནནྡེན, ‘‘བྷནྟེ, ཀཐཾ ཚནྣཏྠེརེ ཨམྷེཧི པཊིཔཛྫིཏབྦ’’ནྟི ཝུཏྟེ, ‘‘ཨཱནནྡ, ཚནྣསྶ བྷིཀྑུནོ བྲཧྨདཎྜོ དཱཏབྦོ’’ཏི ཨཱཎཱཔེསི. སོ སཏྠརི པརིནིབྦུཏེ ཨཱནནྡཏྠེརེན ཨཱརོཙིཏཾ བྲཧྨདཎྜཾ སུཏྭཱ དུཀྑཱི དུམྨནོ ཏིཀྑཏྟུཾ མུཙྪིཏོ པཏིཏྭཱ ‘‘མཱ མཾ, བྷནྟེ, ནཱསཡིཏྠཱ’’ཏི ཡཱཙིཏྭཱ སམྨཱ ཝཏྟཾ པཱུརེནྟོ ན ཙིརསྶེཝ སཧ པཊིསམྦྷིདཱཧི ཨརཧཏྟཾ པཱཔུཎཱིཏི.

ཚནྣཏྠེརཝཏྠུ ཏཏིཡཾ.

༤. མཧཱཀཔྤིནཏྠེརཝཏྠུ

དྷམྨཔཱིཏི སུཁཾ སེཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཧཱཀཔྤིནཏྠེརཾ ཨཱརབྦྷ ཀཐེསི.

ཏཏྲཱཡཾ ཨནུཔུབྦཱི ཀཐཱ – ཨཏཱིཏེ ཀིར ཨཱཡསྨཱ མཧཱཀཔྤིནོ པདུམུཏྟརབུདྡྷསྶ པཱདམཱུལེ ཀཏཱབྷིནཱིཧཱརོ སཾསཱརེ སཾསརནྟོ བཱརཱཎསིཏོ ཨཝིདཱུརེ ཨེཀསྨིཾ པེསཀཱརགཱམེ ཛེཊྛཀཔེསཀཱརོ ཧུཏྭཱ ནིབྦཏྟི. ཏདཱ སཧསྶམཏྟཱ པཙྩེཀབུདྡྷཱ ཨཊྛ མཱསེ ཧིམཝནྟེ ཝསིཏྭཱ ཝསྶིཀེ ཙཏྟཱརོ མཱསེ ཛནཔདེ ཝསནྟི. ཏེ ཨེཀཝཱརཾ བཱརཱཎསིཡཱ ཨཝིདཱུརེ ཨོཏརིཏྭཱ ‘‘སེནཱསནཀརཎཏྠཱཡ ཧཏྠཀམྨཾ ཡཱཙཐཱ’’ཏི རཉྙོ སནྟིཀཾ ཨཊྛ པཙྩེཀབུདྡྷེ པཧིཎིཾསུ. ཏདཱ པན རཉྙོ ཝཔྤམངྒལཀཱལོ ཧོཏི. སོ ‘‘པཙྩེཀབུདྡྷཱ ཀིར ཨཱགཏཱ’’ཏི སུཏྭཱ ཏསྨིཾ ཁཎེ ནིཀྑམིཏྭཱ ཨཱགཏཀཱརཎཾ པུཙྪིཏྭཱ ‘‘ཨཛྫ, བྷནྟེ, ཨོཀཱསོ ནཏྠི, སྭེ ཨམྷཱཀཾ ཝཔྤམངྒལཾ, ཏཏིཡདིཝསེ ཀརིསྶཱམཱི’’ཏི ཝཏྭཱ པཙྩེཀབུདྡྷེ ཨནིམནྟེཏྭཱཝ པཱཝིསི. པཙྩེཀབུདྡྷཱ ‘‘ཨཉྙཏྠ གམིསྶཱམཱ’’ཏི པཀྐམིཾསུ. ཏསྨིཾ ཁཎེ ཛེཊྛཔེསཀཱརསྶ བྷརིཡཱ ཀེནཙིདེཝ ཀརཎཱིཡེན བཱརཱཎསིཾ གཙྪནྟཱི ཏེ པཙྩེཀབུདྡྷེ དིསྭཱ ཝནྡིཏྭཱ ‘‘ཀིཾ, བྷནྟེ, ཨཝེལཱཡ, ཨཡྻཱ, ཨཱགཏཱ’’ཏི པུཙྪིཏྭཱ ཨཱདིཏོ པཊྛཱཡ ཀཐེསུཾ. ཏཾ པཝཏྟིཾ སུཏྭཱ སདྡྷཱསམྤནྣཱ ཉཱཎསམྤནྣཱ ཨིཏྠཱི ‘‘སྭེ, བྷནྟེ, ཨམྷཱཀཾ བྷིཀྑཾ གཎྷཐཱ’’ཏི ནིམནྟེསི. ‘‘བཧུཀཱ མཡཾ བྷགིནཱི’’ཏི. ‘‘ཀིཏྟཀཱ, བྷནྟེ’’ཏི? ‘‘སཧསྶམཏྟཱ’’ཏི. ‘‘བྷནྟེ, ཨིམསྨིཾ གཱམེ སཧསྶཔེསཀཱརཱ ཝསིམྷ. ཨེཀེཀོ ཨེཀེཀསྶ བྷིཀྑཾ དསྶཏི, བྷིཀྑཾ ཨདྷིཝཱསེཐ, ཨཧམེཝ ཝོ ཝསནཊྛཱནམྤི ཀཱརེསྶཱམཱི’’ཏི ཨཱཧ. པཙྩེཀབུདྡྷཱ ཨདྷིཝཱསཡིཾསུ.

སཱ གཱམཾ པཝིསིཏྭཱ ཨུགྒྷོསེསི – ‘‘ཨཧཾ སཧསྶམཏྟེ པཙྩེཀབུདྡྷེ དིསྭཱ ནིམནྟཡིཾ, ཨཡྻཱནཾ ནིསཱིདནཊྛཱནཾ སཾཝིདཧཐ, ཡཱགུབྷཏྟཱདཱིནི སམྤཱདེཐཱ’’ཏི. གཱམམཛ྄ཛྷེ མཎྜཔཾ ཀཱརེཏྭཱ ཨཱསནཱནི པཉྙཱཔེཏྭཱ པུནདིཝསེ པཙྩེཀབུདྡྷེ ནིསཱིདཱཔེཏྭཱ པཎཱིཏེན ཁཱདནཱིཡེན བྷོཛནཱིཡེན པརིཝིསིཏྭཱ བྷཏྟཀིཙྩཱཝསཱནེ ཏསྨིཾ གཱམེ སབྦཱ ཨིཏྠིཡོ ཨཱདཱཡ ཏཱཧི སདྡྷིཾ པཙྩེཀབུདྡྷེ ཝནྡིཏྭཱ, ‘‘བྷནྟེ, ཏེམཱསཾ ཝསནཏྠཱཡ པཊིཉྙཾ དེཐཱ’’ཏི ཏེསཾ པཊིཉྙཾ གཧེཏྭཱ པུན གཱམེ ཨུགྒྷོསེསི – ‘‘ཨམྨཏཱཏཱ, ཨེཀེཀཀུལཏོ ཨེཀེཀོ པུརིསོ ཕརསུཝཱསིཨཱདཱིནི གཧེཏྭཱ ཨརཉྙཾ པཝིསིཏྭཱ དབྦསམྦྷཱརེ ཨཱཧརིཏྭཱ ཨཡྻཱནཾ ཝསནཊྛཱནཾ ཀརོཏཱུ’’ཏི. གཱམཝཱསིནོ ཏསྶཱཡེཝ ཝཙནཾ སུཏྭཱ ཨེཀེཀོ ཨེཀེཀཾ ཀཏྭཱ སདྡྷིཾ རཏྟིཊྛཱནདིཝཱཊྛཱནེཧི པཎྞསཱལསཧསྶཾ ཀཱརེཏྭཱ ཨཏྟནོ ཨཏྟནོ པཎྞསཱལཱཡཾ ཝསྶཱུཔགཏེ པཙྩེཀབུདྡྷེ ‘‘ཨཧཾ སཀྐཙྩཾ ཨུཔཊྛཧིསྶཱམི, ཨཧཾ སཀྐཙྩཾ ཨུཔཊྛཧིསྶཱམཱི’’ཏི ཨུཔཊྛཧིཾསུ. ཝསྶཾཝུཊྛཀཱལེ ‘‘ཨཏྟནོ ཨཏྟནོ པཎྞསཱལཱཡ ཝསྶཾཝུཊྛཱནཾ པཙྩེཀབུདྡྷཱནཾ ཙཱིཝརསཱཊཀེ སཛྫེཐཱ’’ཏི སམཱདཔེཏྭཱ ཨེཀེཀསྶ སཧསྶསཧསྶམཱུལཾ ཙཱིཝརཾ དཱཔེསི. པཙྩེཀབུདྡྷཱ ཝུཊྛཝསྶཱ ཨནུམོདནཾ ཀཏྭཱ པཀྐམིཾསུ.

གཱམཝཱསིནོཔི ཨིདཾ པུཉྙཀམྨཾ ཀཏྭཱ ཨིཏོ ཙུཏཱ ཏཱཝཏིཾསབྷཝནེ ནིབྦཏྟིཏྭཱ གཎདེཝཔུཏྟཱ ནཱམ ཨཧེསུཾ. ཏེ ཏཏྠ དིབྦསམྤཏྟིཾ ཨནུབྷཝིཏྭཱ ཀསྶཔསམྨཱསམྦུདྡྷཀཱལེ བཱརཱཎསིཡཾ ཀུཊུམྦིཀགེཧེསུ ནིབྦཏྟིཾསུ. ཛེཊྛཀཔེསཀཱརོ ཛེཊྛཀཀུཊུམྦིཀསྶ པུཏྟོ ཨཧོསི. བྷརིཡཱཔིསྶ ཛེཊྛཀཀུཊུམྦིཀསྶེཝ དྷཱིཏཱ ཨཧོསི. ཏཱ སབྦཱཔི ཝཡཔྤཏྟཱ པརཀུལཾ གཙྪནྟིཡོ ཏེསཾ ཏེསཾཡེཝ གེཧཱནི ཨགམིཾསུ. ཨཐེཀདིཝསཾ ཝིཧཱརེ དྷམྨསྶཝནཾ སངྒྷུཊྛཾ. ‘‘སཏྠཱ དྷམྨཾ དེསེསྶཏཱི’’ཏི སུཏྭཱ སབྦེཔི ཏེ ཀུཊུམྦིཀཱ ‘‘དྷམྨཾ སོསྶཱམཱ’’ཏི བྷརིཡཱཧི སདྡྷིཾ ཝིཧཱརཾ ཨགམིཾསུ. ཏེསཾ ཝིཧཱརམཛ྄ཛྷཾ པཝིཊྛཀྑཎེ ཝསྶཾ ཨུཊྛཧི. ཡེསཾ ཀུལཱུཔཀཱ ཝཱ ཉཱཏིསཱམཎེརཱདཡོ ཝཱ ཨཏྠི, ཏེ ཏེསཾ པརིཝེཎཱནི པཝིསིཾསུ. ཏེ པན ཏཐཱརཱུཔཱནཾ ནཏྠིཏཱཡ ཀཏྠཙི, པཝིསིཏུཾ ཨཝིསཧནྟཱ ཝིཧཱརམཛ྄ཛྷེཡེཝ ཨཊྛཾསུ. ཨཐ ནེ ཛེཊྛཀཀུཊུམྦིཀོ ཨཱཧ – ‘‘པསྶཐ ཨམྷཱཀཾ ཝིཔྤཀཱརཾ, ཀུལཔུཏྟེཧི ནཱམ ཨེཏྟཀེན ལཛྫིཏུཾ ཡུཏྟ’’ནྟི. ‘‘ཨཡྻ, ཀིཾ པན ཀརོམཱ’’ཏི? ‘‘མཡཾ ཝིསྶཱསིཀཊྛཱནསྶ ཨབྷཱཝེན ཨིམཾ ཝིཔྤཀཱརཾ པཏྟཱ, སབྦེ དྷནཾ སཾཧརིཏྭཱ པརིཝེཎཾ ཀརོམཱ’’ཏི. ‘‘སཱདྷུ, ཨཡྻཱ’’ཏི ཛེཊྛཀོ སཧསྶཾ ཨདཱསི, སེསཱ པཉྩ པཉྩ སཏཱནི. ཨིཏྠིཡོ ཨཌྜྷཏེཡྻཱནི ཨཌྜྷཏེཡྻཱནི སཏཱནི. ཏེ ཏཾ དྷནཾ སཾཧརིཏྭཱ སཧསྶཀཱུཊཱགཱརཔརིཝཱརཾ སཏྠུ ཝསནཏྠཱཡ མཧཱཔརིཝེཎཾ ནཱམ ཨཱརབྷིཾསུ. ནཝཀམྨསྶ མཧནྟཏཱཡ དྷནེ ཨཔྤཧོནྟེ པུབྦེ དིནྣདྷནཏོ པུན ཨུཔཌྜྷཱུཔཌྜྷཾ ཨདཾསུ. ནིཊྛིཏེ པརིཝེཎེ ཝིཧཱརམཧཾ ཀརོནྟཱ བུདྡྷཔྤམུཁསྶ བྷིཀྑུསངྒྷསྶ སཏྟཱཧཾ མཧཱདཱནཾ དཏྭཱ ཝཱིསཏིཡཱ བྷིཀྑུསཧསྶཱནཾ ཙཱིཝརཱནི སཛྫིཾསུ.

ཛེཊྛཀཀུཊུམྦིཀསྶ པན བྷརིཡཱ སབྦེཧི སམཱནཾ ཨཀཏྭཱ ཨཏྟནོ པཉྙཱཡ ཋིཏཱ ‘‘ཨཏིརེཀཏརཾ ཀཏྭཱ སཏྠཱརཾ པཱུཛེསྶཱམཱི’’ཏི ཨནོཛཔུཔྥཝཎྞེན སཧསྶམཱུལེན སཱཊཀེན སདྡྷིཾ ཨནོཛཔུཔྥཙངྐོཊཀཾ གཧེཏྭཱ ཨནུམོདནཀཱལེ སཏྠཱརཾ ཨནོཛཔུཔྥེཧི པཱུཛེཏྭཱ ཏཾ སཱཊཀཾ སཏྠུ པཱདམཱུལེ ཋཔེཏྭཱ, ‘‘བྷནྟེ, ནིབྦཏྟནིབྦཏྟཊྛཱནེ ཨནོཛཔུཔྥཝཎྞཾཡེཝ མེ སརཱིརཾ ཧོཏུ, ཨནོཛཱ ཨེཝ ཙ མེ ནཱམཾ ཧོཏཱུ’’ཏི པཏྠནཾ པཊྛཔེསི. སཏྠཱ ‘‘ཨེཝཾ ཧོཏཱུ’’ཏི ཨནུམོདནཾ ཨཀཱསི. ཏེ སབྦེཔི ཡཱཝཏཱཡུཀཾ ཋཏྭཱ ཏཏོ ཙུཏཱ དེཝལོཀེ ནིབྦཏྟིཏྭཱ ཨིམསྨིཾ བུདྡྷུཔྤཱདེ དེཝལོཀཱ ཙཝིཏྭཱ ཛེཊྛཀཀུཊུམྦིཀོ ཀུཀྐུཊཝཏཱིནགརེ རཱཛཀུལེ ནིབྦཏྟིཏྭཱ ཝཡཔྤཏྟོ མཧཱཀཔྤིནརཱཛཱ ནཱམ ཨཧོསི, སེསཱ ཨམཙྩཀུལེ ནིབྦཏྟིཾསུ. ཛེཊྛཀཀུཊུམྦིཀསྶ བྷརིཡཱ མདྡརཊྛེ སཱགལནགརེ རཱཛཀུལེ ནིབྦཏྟི, ཨནོཛཔུཔྥཝཎྞམེཝསྶཱ སརཱིརཾ ཨཧོསི, ཨནོཛཱཏྭེཝསྶཱ ནཱམཾ ཀརིཾསུ. སཱ ཝཡཔྤཏྟཱ མཧཱཀཔྤིནརཉྙོ གེཧཾ གནྟྭཱ ཨནོཛཱདེཝཱི ནཱམ ཨཧོསི. སེསིཏྠིཡོཔི ཨམཙྩཀུལེསུ ནིབྦཏྟིཏྭཱ ཝཡཔྤཏྟཱ ཏེསཾཡེཝ ཨམཙྩཔུཏྟཱནཾ གེཧཱནི ཨགམཾསུ. ཏེ སབྦེ རཉྙོ སམྤཏྟིསདིསཾ སམྤཏྟིཾ ཨནུབྷཝིཾསུ. ཡདཱ རཱཛཱ སབྦཱལངྐཱརཔཊིམཎྜིཏོ ཧཏྠིཾ ཨབྷིརུཧིཏྭཱ ཝིཙརི, ཏདཱ ཏེཔི ཏཐེཝ ཝིཙརནྟི. ཏསྨིཾ ཨསྶེན ཝཱ རཐེན ཝཱ ཝིཙརནྟེ ཏེཔི ཏཐེཝ ཝིཙརནྟི? ཨེཝཾ ཏེ ཨེཀཏོ ཧུཏྭཱ ཀཏཱནཾ པུཉྙཱནཾ ཨཱནུབྷཱཝེན ཨེཀཏོཝ སམྤཏྟིཾ ཨནུབྷཝིཾསུ. རཉྙོ པན བལོ, བལཝཱཧནོ, པུཔྥོ, པུཔྥཝཱཧནོ, སུཔཏྟོཏི པཉྩ ཨསྶཱ ཧོནྟི. རཱཛཱ ཏེསུ སུཔཏྟཾ ཨསྶཾ སཡཾ ཨཱརོཧཏི, ཨིཏརེ ཙཏྟཱརོ ཨསྶཱརོཧཱནཾ སཱསནཱཧརཎཏྠཱཡ ཨདཱསི. རཱཛཱ ཏེ པཱཏོཝ བྷོཛེཏྭཱ ‘‘གཙྪཐ དྭེ ཝཱ ཏཱིཎི ཝཱ ཡོཛནཱནི ཨཱཧིཎྜིཏྭཱ བུདྡྷསྶ ཝཱ དྷམྨསྶ ཝཱ སངྒྷསྶ ཝཱ ཨུཔྤནྣབྷཱཝཾ ཉཏྭཱ མཡ྄ཧཾ སུཁསཱསནཾ ཨཱཧརཐཱ’’ཏི པེསེསི. ཏེ ཙཏཱུཧི དྭཱརེཧི ནིཀྑམིཏྭཱ ཏཱིཎི ཡོཛནཱནི ཨཱཧིཎྜིཏྭཱ སཱསནཾ ཨལབྷིཏྭཱ པཙྩཱགཙྪནྟི.

ཨཐེཀདིཝསཾ རཱཛཱ སུཔཏྟཾ ཨསྶཾ ཨཱརུཡ྄ཧ ཨམཙྩསཧསྶཔརིཝུཏོ ཨུཡྻཱནཾ གཙྪནྟོ ཀིལནྟརཱུཔེ པཉྩསཏཝཱཎིཛཀེ ནགརཾ པཝིསནྟེ དིསྭཱ ‘‘ཨིམེ ཨདྡྷཱནཀིལནྟཱ, ཨདྡྷཱ ཨིམེསཾ སནྟིཀཱ ཨེཀཾ བྷདྡཀཾ སཱསནཾ སོསྶཱམཱི’’ཏི ཏེ པཀྐོསཱཔེཏྭཱ ‘‘ཀུཏོ ཨཱགཙྪཐཱ’’ཏི པུཙྪི. ‘‘ཨཏྠི, དེཝ, ཨིཏོ ཝཱིསཏིཡོཛནསཏམཏྠཀེ སཱཝཏྠི ནཱམ ནགརཾ, ཏཏོ ཨཱགཙྪཱམཱ’’ཏི. ‘‘ཨཏྠི པན ཝོ པདེསེ ཀིཉྩི སཱསནཾ ཨུཔྤནྣ’’ནྟི. ‘‘དེཝ, ཨཉྙཾ ཀིཉྩི ནཏྠི, སམྨཱསམྦུདྡྷོ པན ཨུཔྤནྣོ’’ཏི. རཱཛཱ ཏཱཝདེཝ པཉྩཝཎྞཱཡ པཱིཏིཡཱ ཕུཊྛསརཱིརོ ཀིཉྩི སལླཀྑེཏུཾ ཨསཀྐོནྟོ མུཧུཏྟཾ ཝཱིཏིནཱམེཏྭཱ, ‘‘ཏཱཏཱ, ཀིཾ ཝདེཐཱ’’ཏི པུཙྪི. ‘‘བུདྡྷོ, དེཝ, ཨུཔྤནྣོ’’ཏི. རཱཛཱ དུཏིཡམྤི ཏཏིཡམྤི ཏཐེཝ ཝཱིཏིནཱམེཏྭཱ ཙཏུཏྠེ ཝཱརེ ‘‘ཀིཾ ཝདེཐ, ཏཱཏཱ’’ཏི པུཙྪིཏྭཱ ‘‘བུདྡྷོ, དེཝ, ཨུཔྤནྣོ’’ཏི ཝུཏྟེ, ‘‘ཏཱཏཱ, ཝོ སཏསཧསྶཾ དདཱམཱི’’ཏི ཝཏྭཱ ‘‘ཨཉྙམྤི ཀིཉྩི སཱསནཾ ཨཏྠཱི’’ཏི པུཙྪི. ‘‘ཨཏྠི, དེཝ, དྷམྨོ ཨུཔྤནྣོ’’ཏི. རཱཛཱ ཏམྤི སུཏྭཱ པུརིམནཡེནེཝ ཏཡོ ཝཱརེ ཝཱིཏིནཱམེཏྭཱ ཙཏུཏྠེ ཝཱརེ ‘‘དྷམྨོ ཨུཔྤནྣོ’’ཏི ཝུཏྟེ ‘‘ཨིདྷཱཔི ཝོ སཏསཧསྶཾ དམྨཱི’’ཏི ཝཏྭཱ ‘‘ཨཔརམྤི སཱསནཾ ཨཏྠི, ཏཱཏཱ’’ཏི པུཙྪི. ‘‘ཨཏྠི, དེཝ, སངྒྷརཏནཾ ཨུཔྤནྣ’’ནྟི. རཱཛཱ ཏམྤི སུཏྭཱ ཏཡོ ཝཱརེ ཝཱིཏིནཱམེཏྭཱ ཙཏུཏྠེ ཝཱརེ ‘‘སངྒྷོ’’ཏི པདེ ཝུཏྟེ ‘‘ཨིདྷཱཔི ཝོ སཏསཧསྶཾ དམྨཱི’’ཏི ཝཏྭཱ ཨམཙྩསཧསྶཾ ཨོལོཀེཏྭཱ, ‘‘ཏཱཏཱ, ཀིཾ ཀརིསྶཐཱ’’ཏི པུཙྪི. ‘‘དེཝ, ཏུམྷེ ཀིཾ ཀརིསྶཐཱ’’ཏི? ‘‘ཨཧཾ, ཏཱཏཱ, ‘བུདྡྷོ ཨུཔྤནྣོ, དྷམྨོ ཨུཔྤནྣོ, སངྒྷོ ཨུཔྤནྣོ’ཏི སུཏྭཱ ན པུན ནིཝཏྟིསྶཱམི, སཏྠཱརཾ ཨུདྡིསྶ གནྟྭཱ ཏསྶ སནྟིཀེ པབྦཛིསྶཱམཱི’’ཏི. ‘‘མཡམྤི, དེཝ, ཏུམྷེཧི སདྡྷིཾ པབྦཛིསྶཱམཱ’’ཏི. རཱཛཱ སུཝཎྞཔཊྚེ ཨཀྑརཱནི ལིཁཱཔེཏྭཱ ཝཱཎིཛཀེ ཨཱཧ – ‘‘ཨནོཛཱ ནཱམ དེཝཱི ཏུམྷཱཀཾ ཏཱིཎི སཏསཧསྶཱནི དསྶཏི, ཨེཝཉྩ པན ནཾ ཝདེཡྻཱཐ ‘རཉྙོ ཀིར ཏེ ཨིསྶརིཡཾ ཝིསྶཊྛཾ, ཡཐཱསུཁཾ སམྤཏྟིཾ པརིབྷུཉྫཱཧཱི’ཏི, སཙེ པན ཝོ ‘རཱཛཱ ཀཧ’ནྟི པུཙྪཏི, ‘སཏྠཱརཾ ཨུདྡིསྶ པབྦཛིསྶཱམཱིཏི ཝཏྭཱ གཏོ’ཏི ཨཱརོཙེཡྻཱཐཱ’’ཏི. ཨམཙྩཱཔི ཨཏྟནོ ཨཏྟནོ བྷརིཡཱནཾ ཏཐེཝ སཱསནཾ པཧིཎིཾསུ. རཱཛཱ ཝཱཎིཛཀེ ཨུཡྻོཛེཏྭཱ ཨསྶཾ ཨབྷིརུཡ྄ཧ ཨམཙྩསཧསྶཔརིཝུཏོ ཏཾ ཁཎཾཡེཝ ནིཀྑམི.

སཏྠཱཔི ཏཾ དིཝསཾ པཙྩཱུསཀཱལེ ལོཀཾ ཝོལོཀེནྟོ མཧཱཀཔྤིནརཱཛཱནཾ སཔརིཝཱརཾ དིསྭཱ ‘‘ཨཡཾ མཧཱཀཔྤིནོ ཝཱཎིཛཀཱནཾ སནྟིཀཱ ཏིཎྞཾ རཏནཱནཾ ཨུཔྤནྣབྷཱཝཾ སུཏྭཱ ཏེསཾ ཝཙནཾ ཏཱིཧི སཏསཧསྶེཧི པཱུཛེཏྭཱ རཛྫཾ པཧཱཡ ཨམཙྩསཧསྶེཧི པརིཝུཏོ མཾ ཨུདྡིསྶ པབྦཛིཏུཀཱམོ སྭེ ནིཀྑམིསྶཏི. སོ སཔརིཝཱརོ སཧ པཊིསམྦྷིདཱཧི ཨརཧཏྟཾ པཱཔུཎིསྶཏི, པཙྩུགྒམནམསྶ ཀརིསྶཱམཱི’’ཏི པུནདིཝསེ ཙཀྐཝཏྟཱི ཝིཡ ཁུདྡཀགཱམབྷོཛཀཾ པཙྩུགྒཙྪནྟོ སཡམེཝ པཏྟཙཱིཝརཾ གཧེཏྭཱ ཝཱིསཡོཛནསཏཾ མགྒཾ པཙྩུགྒནྟྭཱ ཙནྡབྷཱགཱཡ ནདིཡཱ ཏཱིརེ ནིགྲོདྷརུཀྑམཱུལེ ཚབྦཎྞརསྨིཡོ ཝིསྶཛྫེནྟོ ནིསཱིདི. ‘‘རཱཛཱཔི ཨཱགཙྪནྟོ ཨེཀཾ ནདིཾ པཏྭཱ ‘‘ཀཱ ནཱམེསཱ’’ཏི པུཙྪི. ‘‘ཨཔརཙྪཱ ནཱམ, དེཝཱ’’ཏི. ‘‘ཀིམསྶཱ པརིམཱཎཾ, ཏཱཏཱ’’ཏི? ‘‘གམྦྷཱིརཏོ གཱཝུཏཾ, པུཐུལཏོ དྭེ གཱཝུཏཱནི, དེཝཱ’’ཏི. ‘‘ཨཏྠི པནེཏྠ ནཱཝཱ ཝཱ ཨུལུ༹མྤོ ཝཱ’’ཏི? ‘‘ནཏྠི, དེཝཱ’’ཏི. ‘‘ནཱཝཱདཱིནི ཨོལོཀེནྟེ ཨམྷེ ཛཱཏི ཛརཾ ཨུཔནེཏི, ཛརཱ མརཎཾ. ཨཧཾ ནིབྦེམཏིཀོ ཧུཏྭཱ ཏཱིཎི རཏནཱནི ཨུདྡིསྶ ནིཀྑནྟོ, ཏེསཾ མེ ཨཱནུབྷཱཝེན ཨིམཾ ཨུདཀཾ ཨུདཀཾ ཝིཡ མཱ ཨཧོསཱི’’ཏི ཏིཎྞཾ རཏནཱནཾ གུཎཾ ཨཱཝཛྫེཏྭཱ ‘‘ཨིཏིཔི སོ བྷགཝཱ ཨརཧཾ སམྨཱསམྦུདྡྷོ’’ཏི བུདྡྷཱནུསྶཏིཾ ཨནུསྶརནྟོ སཔརིཝཱརོ ཨསྶསཧསྶེན ཨུདཀཔིཊྛིཾ པཀྑནྡི. སིནྡྷཝཱ པིཊྛིཔཱསཱཎེ ཝིཡ པཀྑནྡིཾསུ. ཁུརཱནཾ ཨགྒཱ ནེཝ ཏེམིཾསུ.

སོ ཏཾ ཨུཏྟརིཏྭཱ པུརཏོ གཙྪནྟོ ཨཔརམྤི ནདིཾ དིསྭཱ ‘‘ཨཡཾ ཀཱ ནཱམཱ’’ཏི པུཙྪི. ‘‘ནཱིལཝཱཧིནཱི ནཱམ, དེཝཱ’’ཏི. ‘‘ཀིམསྶཱ པརིམཱཎ’’ནྟི? ‘‘གམྦྷཱིརཏོཔི པུཐུལཏོཔི ཨཌྜྷཡོཛནཾ, དེཝཱ’’ཏི. སེསཾ པུརིམསདིསམེཝ. ཏཾ པན ནདིཾ དིསྭཱ ‘‘སྭཱཀྑཱཏོ བྷགཝཏཱ དྷམྨོ’’ཏི དྷམྨཱནུསྶཏིཾ ཨནུསྶརནྟོ པཀྑནྡི. ཏམྤི ཨཏིཀྐམིཏྭཱ གཙྪནྟོ ཨཔརམྤི ནདིཾ དིསྭཱ ‘‘ཨཡཾ ཀཱ ནཱམཱ’’ཏི པུཙྪི. ‘‘ཙནྡབྷཱགཱ ནཱམ, དེཝཱ’’ཏི. ‘‘ཀིམསྶཱ པརིམཱཎ’’ནྟི? ‘‘གམྦྷཱིརཏོཔི པུཐུལཏོཔི ཡོཛནཾ, དེཝཱ’’ཏི. སེསཾ པུརིམསདིསམེཝ. ཨིམཾ པན ནདིཾ དིསྭཱ ‘‘སུཔྤཊིཔནྣོ བྷགཝཏོ སཱཝཀསངྒྷོ’’ཏི སངྒྷཱནུསྶཏིཾ ཨནུསྶརནྟོ པཀྑནྡི. ཏཾ པན ནདིཾ ཨཏིཀྐམིཏྭཱ གཙྪནྟོ སཏྠུ སརཱིརཏོ ནིཀྑནྟཱ ཚབྦཎྞརསྨིཡོ ཨདྡས. ནིགྲོདྷརུཀྑསྶ སཱཁཱཝིཊཔཔལཱསཱནི སོཝཎྞམཡཱནི ཝིཡ ཨཧེསུཾ. རཱཛཱ ཙིནྟེསི – ‘‘ཨཡཾ པན ཨོབྷཱསོ ནེཝ ཙནྡསྶ, ན སཱུརིཡསྶ, ན དེཝམཱརབྲཧྨནཱགསུཔཎྞཱདཱིནཾ ཨཉྙཏརསྶ, ཨདྡྷཱ ཨཧཾ སཏྠཱརཾ ཨུདྡིསྶ ཨཱགཙྪནྟོ མཧཱགོཏམབུདྡྷེན དིཊྛོ བྷཝིསྶཱམཱི’’ཏི. སོ ཏཱཝདེཝ ཨསྶཔིཊྛིཏོ ཨོཏརིཏྭཱ ཨོནཏསརཱིརོ རསྨིཨནུསཱརེན སཏྠཱརཾ ཨུཔསངྐམིཏྭཱ མནོསིལཱརསེ ནིམུཛྫནྟོ ཝིཡ བུདྡྷརསྨཱིནཾ ཨནྟོ པཝིསིཏྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདི སདྡྷིཾ ཨམཙྩསཧསྶེན, སཏྠཱ ཏསྶ ཨནུཔུབྦིཾ ཀཐཾ ཀཐེསི. དེསནཱཝསཱནེ རཱཛཱ སཔརིཝཱརོ སོཏཱཔཏྟིཕལེ པཏིཊྛཧི. ཨཐ སབྦེཝ ཨུཊྛཧིཏྭཱ པབྦཛྫཾ ཡཱཙིཾསུ. སཏྠཱ ‘‘ཨཱགམིསྶཏི ནུ ཁོ ཨིམེསཾ ཀུལཔུཏྟཱནཾ ཨིདྡྷིམཡཔཏྟཙཱིཝར’’ནྟི ཨུཔདྷཱརེནྟོ ‘‘ཨིམེ ཀུལཔུཏྟཱ པཙྩེཀབུདྡྷསཧསྶསྶ ཙཱིཝརསཧསྶཾ ཨདཾསུ, ཀསྶཔསམྨཱསམྦུདྡྷཀཱལེ ཝཱིསཏིཡཱ བྷིཀྑུསཧསྶཱནམྤི ཝཱིསཏིཙཱིཝརསཧསྶཱནིཔི ཨདཾསུ. ཨནཙྪརིཡཾ ཨིམེསཾ ཨིདྡྷིམཡཔཏྟཙཱིཝརཱགམན’’ནྟི ཉཏྭཱ དཀྑིཎཧཏྠཾ པསཱརེཏྭཱ ‘‘ཨེཐ, བྷིཀྑཝོ, ཙརཐ བྲཧྨཙརིཡཾ སམྨཱ དུཀྑསྶ ཨནྟཀིརིཡཱཡཱ’’ཏི ཨཱཧ. ཏེ ཏཱཝདེཝ ཨཊྛཔརིཀྑཱརདྷརཱ ཝསྶསཊྛིཀཏྠེརཱ ཝིཡ ཧུཏྭཱ ཝེཧཱསཾ ཨབྦྷུགྒནྟྭཱ པཙྩོརོཧིཏྭཱ སཏྠཱརཾ ཝནྡིཏྭཱ ནིསཱིདིཾསུ.

ཏེཔི ཝཱཎིཛཀཱ རཱཛཀུལཾ གནྟྭཱ རཉྙཱ པཧིཏབྷཱཝཾ ཨཱརོཙཱཔེཏྭཱ དེཝིཡཱ ‘‘ཨཱགཙྪནྟཱུ’’ཏི ཝུཏྟེ པཝིསིཏྭཱ ཝནྡིཏྭཱ ཨེཀམནྟཾ ཨཊྛཾསུ. ཨཐ ནེ དེཝཱི པུཙྪི – ‘‘ཏཱཏཱ, ཀིཾ ཀཱརཎཱ ཨཱགཏཱཏྠཱ’’ཏི? ‘‘མཡཾ རཉྙཱ ཏུམྷཱཀཾ སནྟིཀཾ པཧིཏཱ, ཏཱིཎི ཀིར ནོ སཏསཧསྶཱནི དེཐཱ’’ཏི. ‘‘ཏཱཏཱ, ཨཏིབཧུཾ བྷཎཐ, ཀིཾ ཏུམྷེཧི རཉྙོ ཀཏཾ, ཀིསྨིཾ ཝོ རཱཛཱ པསནྣོ ཨེཏྟཀཾ དྷནཾ དཱཔེསཱི’’ཏི? ‘‘དེཝི, ན ཨཉྙཾ ཀིཉྩི ཀཏཾ, རཉྙོ པན ཨེཀཾ སཱསནཾ ཨཱརོཙཡིམྷཱ’’ཏི? ‘‘སཀྐཱ པན, ཏཱཏཱ, མཡ྄ཧཾ ཨཱརོཙེཏུ’’ནྟི. ‘‘སཀྐཱ, དེཝཱི’’ཏི. ‘‘ཏེན ཧི, ཏཱཏཱ, ཝདེཐཱ’’ཏི. ‘‘དེཝི བུདྡྷོ ལོཀེ ཨུཔྤནྣོ’’ཏི. སཱཔི ‘‘ཏཾ སུཏྭཱ པུརིམནཡེནེཝ པཱིཏིཡཱ ཕུཊྛསརཱིརཱ ཏིཀྑཏྟུཾ ཀིཉྩི ཨསལླཀྑེཏྭཱ ཙཏུཏྠེ ཝཱརེ ‘བུདྡྷོ’ཏི པདཾ སུཏྭཱ, ཏཱཏཱ, ཨིམསྨིཾ པདེ རཉྙཱ ཀིཾ དིནྣ’’ནྟི? ‘‘སཏསཧསྶཾ, དེཝཱི’’ཏི. ‘‘ཏཱཏཱ, ཨནནུཙྪཝིཀཾ རཉྙཱ ཀཏཾ ཨེཝརཱུཔཾ སཱསནཾ སུཏྭཱ ཏུམྷཱཀཾ སཏསཧསྶཾ དདམཱནེན. ཨཧཉྷི ཝོ མམ དུགྒཏཔཎྞཱཀཱརེ ཏཱིཎི སཏསཧསྶཱནི དམྨི, ཨཔརམྤི ཏུམྷེཧི རཉྙོ ཀིཾ ཨཱརོཙིཏ’’ནྟི? ཏེ ཨིདཉྩིདཉྩཱཏི ཨིཏརཱནིཔི དྭེ སཱསནཱནི ཨཱརོཙཡིཾསུ. དེཝཱི པུརིམནཡེནེཝ པཱིཏིཡཱ ཕུཊྛསརཱིརཱ ཏིཀྑཏྟུཾ ཀིཉྩི ཨསལླཀྑེཏྭཱ ཙཏུཏྠེ ཝཱརེ ཏཐེཝ སུཏྭཱ ཏཱིཎི ཏཱིཎི སཏསཧསྶཱནི དཱཔེསི, ཨེཝཾ ཏེ སབྦཱནིཔི དྭཱདས སཏསཧསྶཱནི ལབྷིཾསུ.

ཨཐ ནེ དེཝཱི པུཙྪི – ‘‘རཱཛཱ ཀཧཾ, ཏཱཏཱ’’ཏི? དེཝི, ‘‘སཏྠཱརཾ ཨུདྡིསྶ ‘པབྦཛིསྶཱམཱི’ཏི གཏོ’’ཏི. ‘‘མཡ྄ཧཾ ཏེན ཀིཾ སཱསནཾ དིནྣ’’ནྟི? ‘‘སབྦཾ ཀིར ཏེན ཏུམྷཱཀཾ ཨིསྶརིཡཾ ཝིསྶཊྛཾ, ཏུམྷེ ཀིར ཡཐཱརུཙིཡཱ སམྤཏྟིཾ ཨནུབྷཝཐཱ’’ཏི. ‘‘ཨམཙྩཱ པན ཀཧཾ, ཏཱཏཱ’’ཏི? ཏེཔི ‘‘‘རཉྙཱ སདྡྷིཾཡེཝ པབྦཛིསྶཱམཱ’ཏི གཏཱ, དེཝཱི’’ཏི. སཱ ཏེསཾ བྷརིཡཱཡོ པཀྐོསཱཔེཏྭཱ, ཨམྨཱ, ཏུམྷཱཀཾ སཱམིཀཱ ‘‘རཉྙཱ སདྡྷིཾ པབྦཛིསྶཱམཱ’’ཏི གཏཱ, ‘‘ཏུམྷེ ཀིཾ ཀརིསྶཐཱ’’ཏི? ‘‘ཀིཾ པན ཏེཧི ཨམྷཱཀཾ སཱསནཾ པཧིཏཾ, དེཝཱི’’ཏི? ‘‘ཏེཧི ཀིར ཨཏྟནོ སམྤཏྟི ཏུམྷཱཀཾ ཝིསྶཊྛཱ, ཏུམྷེ ཀིར ཏཾ སམྤཏྟིཾ ཡཐཱརུཙི པརིབྷུཉྫཐཱ’’ཏི. ‘‘ཏུམྷེ པན, དེཝི, ཀིཾ ཀརིསྶཐཱ’’ཏི? ‘‘ཨམྨཱ, སོ ཏཱཝ རཱཛཱ སཱསནཾ སུཏྭཱ མགྒེ ཋིཏཀོཝ ཏཱིཧི སཏསཧསྶེཧི ཏཱིཎི རཏནཱནི པཱུཛེཏྭཱ ཁེལ༹པིཎྜཾ ཝིཡ སམྤཏྟིཾ པཧཱཡ ‘པབྦཛིསྶཱམཱི’ཏི ནིཀྑནྟོ, མཡཱ པན ཏིཎྞཾ རཏནཱནཾ སཱསནཾ སུཏྭཱ ཏཱིཎི རཏནཱནི ནཝཧི སཏསཧསྶེཧི པཱུཛིཏཱནི, ན ཁོ པནེསཱ སམྤཏྟི ནཱམ རཉྙོཡེཝ དུཀྑཱ, མཡ྄ཧམྤི དུཀྑཱཡེཝ. ཀོ རཉྙཱ ཚཌྜིཏཁེལ༹པིཎྜཾ ཛཱཎུཀེཧི པཏིཊྛཧིཏྭཱ མུཁེན གཎྷིསྶཏི, ན མཡ྄ཧཾ སམྤཏྟིཡཱ ཨཏྠོ, ཨཧམྤི སཏྠཱརཾ ཨུདྡིསྶ གནྟྭཱ པབྦཛིསྶཱམཱི’’ཏི. ‘‘དེཝི, མཡམྤི ཏུམྷེཧེཝ སདྡྷིཾ པབྦཛིསྶཱམཱ’’ཏི. ‘‘སཙེ སཀྐོཐ, སཱདྷུ, ཨམྨཱ’’ཏི? ‘‘སཀྐོམ, དེཝཱི’’ཏི. ‘‘སཱདྷུ, ཨམྨཱ, ཏེན ཧི ཨེཐཱ’’ཏི རཐསཧསྶཾ ཡོཛཱཔེཏྭཱ རཐཾ ཨཱརུཡ྄ཧ ཏཱཧི སདྡྷིཾ ནིཀྑམིཏྭཱ ཨནྟརཱམགྒེ པཋམཾ ནདིཾ དིསྭཱ ཡཐཱ རཉྙཱ པུཊྛཾ, ཏཐེཝ པུཙྪིཏྭཱ སབྦཔཝཏྟིཾ སུཏྭཱ ‘‘རཉྙོ གཏམགྒཾ ཨོལོཀེཐཱ’’ཏི ཝཏྭཱ ‘‘སིནྡྷཝཱནཾ པདཝལཉྫཾ ན པསྶཱམ, དེཝཱི’’ཏི ཝུཏྟེ ‘‘རཱཛཱ ཏཱིཎི རཏནཱནི ཨུདྡིསྶ ནིཀྑནྟོ སཙྩཀིརིཡཾ ཀཏྭཱ གཏོ བྷཝིསྶཏི. ཨཧམྤི ཏཱིཎི རཏནཱནི ཨུདྡིསྶ ནིཀྑནྟཱ, ཏེསམེཝ ཨནུབྷཱཝེན ཨིདཾ ཨུདཀཾ ཝིཡ མཱ ཨཧོསཱི’’ཏི ཏིཎྞཾ རཏནཱནཾ གུཎཾ ཨནུསྶརིཏྭཱ རཐསཧསྶཾ པེསེསི. ཨུདཀཾ པིཊྛིཔཱསཱཎསདིསཾ ཨཧོསི. ཙཀྐཱནཾ ཨགྒགྒནེམིཝཊྚིཡོ ནེཝ ཏེམིཾསུ. ཨེཏེནེཝ ཨུཔཱཡེན ཨིཏརཱ དྭེ ནདིཡོ ཨུཏྟརི.

ཨཐ སཏྠཱ ཏསྶཱགམནབྷཱཝཾ ཉཏྭཱ ཡཐཱ ཨཏྟནོ སནྟིཀེ ནིསིནྣཱ བྷིཀྑཱུ ན པཉྙཱཡནྟི, ཨེཝམཀཱསི. སཱཔི གཙྪནྟཱི གཙྪནྟཱི སཏྠུ སརཱིརཏོ ནིཀྑནྟཱ ཚབྦཎྞརསྨིཡོ དིསྭཱ ཏཐེཝ ཙིནྟེཏྭཱ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ཋིཏཱ པུཙྪི – ‘‘བྷནྟེ, མཧཱཀཔྤིནོ ཏུམྷཱཀཾ ཨུདྡིསྶ ནིཀྑནྟོ ཨཱགཏེཏྠ མཉྙེ, ཀཧཾ སོ, ཨམྷཱཀམྤི ནཾ དསྶེཐཱ’’ཏི? ‘‘ནིསཱིདཐ ཏཱཝ, ཨིདྷེཝ ནཾ པསྶིསྶཐཱ’’ཏི. ཏཱ སབྦཱཔི ཏུཊྛཙིཏྟཱ ‘‘ཨིདྷེཝ ཀིར ནིསིནྣཱ སཱམིཀེ པསྶིསྶཱམཱ’’ཏི ནིསཱིདིཾསུ. སཏྠཱ ཏཱསཾ ཨནུཔུབྦིཾ ཀཐཾ ཀཐེསི, ཨནོཛཱདེཝཱི དེསནཱཝསཱནེ སཔརིཝཱརཱ སོཏཱཔཏྟིཕལཾ པཱཔུཎི. མཧཱཀཔྤིནཏྠེརོ ཏཱསཾ ཝཌྜྷིཏདྷམྨདེསནཾ སུཎནྟོ སཔརིཝཱརོ སཧ པཊིསམྦྷིདཱཧི ཨརཧཏྟཾ པཱཔུཎི. ཏསྨིཾ ཁཎེ སཏྠཱ ཏཱསཾ ཏེ བྷིཀྑཱུ ཨརཧཏྟཔྤཏྟེ དསྶེསི. ཏཱསཾ ཀིར ཨཱགཏཀྑཎེཡེཝ ཨཏྟནོ སཱམིཀེ ཀཱསཱཝདྷརེ མུཎྜཀསཱིསེ དིསྭཱ ཙིཏྟཾ ཨེཀགྒཾ ན བྷཝེཡྻ, ཏེན མགྒཕལཱནི པཏྟུཾ ན སཀྐུཎེཡྻུཾ. ཏསྨཱ ཨཙལསདྡྷཱཡ པཏིཊྛིཏཀཱལེ ཏཱསཾ ཏེ བྷིཀྑཱུ ཨརཧཏྟཔྤཏྟེཡེཝ དསྶེསི.

ཏཱཔི ཏེ དིསྭཱ པཉྩཔཏིཊྛིཏེན ཝནྡིཏྭཱ, ‘‘བྷནྟེ, ཏུམྷཱཀཾ ཏཱཝ པབྦཛིཏཀིཙྩཾ མཏྠཀཾ པཏྟ’’ནྟི ཝཏྭཱ སཏྠཱརཾ ཝནྡིཏྭཱ ཨེཀམནྟཾ ཋིཏཱ པབྦཛྫཾ ཡཱཙིཾསུ. ཨེཝཾ ཀིར ཝུཏྟེ ‘‘སཏྠཱ ཨུཔྤལཝཎྞཱཡ ཨཱགམནཾ ཙིནྟེསཱི’’ཏི ཨེཀཙྩེ ཝདནྟི. སཏྠཱ པན ཏཱ ཨུཔཱསིཀཱཡོ ཨཱཧ – ‘‘སཱཝཏྠིཾ གནྟྭཱ བྷིཀྑུནཱིཨུཔསྶཡེ པབྦཛེཐཱ’’ཏི. ཏཱ ཨནུཔུབྦེན ཛནཔདཙཱརིཀཾ ཙརམཱནཱ ཨནྟརཱམགྒེ མཧཱཛནེན ཨབྷིཧཊསཀྐཱརསམྨཱནཱ པདསཱཝ ཝཱིསཡོཛནསཏིཀཾ གནྟྭཱ བྷིཀྑུནཱིཨུཔསྶཡེ པབྦཛིཏྭཱ ཨརཧཏྟཾ པཱཔུཎིཾསུ. སཏྠཱཔི བྷིཀྑུསཧསྶཾ ཨཱདཱཡ ཨཱཀཱསེནེཝ ཛེཏཝནཾ ཨགམཱསི. ཏཏྲ སུདཾ ཨཱཡསྨཱ མཧཱཀཔྤིནོ རཏྟིཊྛཱནདིཝཱཊྛཱནཱདཱིསུ ‘‘ཨཧོ སུཁཾ, ཨཧོ སུཁ’’ནྟི ཨུདཱནཾ ཨུདཱནེནྟོ ཝིཙརཏི. བྷིཀྑཱུ བྷགཝཏོ ཨཱརོཙེསུཾ – ‘‘བྷནྟེ, མཧཱཀཔྤིནོ ‘ཨཧོ སུཁཾ, ཨཧོ སུཁ’ནྟི ཨུདཱནཾ ཨུདཱནེནྟོ ཝིཙརཏི, ཨཏྟནོ ཀཱམསུཁཾ རཛྫསུཁཾ ཨཱརབྦྷ ཀཐེསི མཉྙེ’’ཏི. སཏྠཱ ཏཾ པཀྐོསཱཔེཏྭཱ ‘‘སཙྩཾ ཀིར ཏྭཾ, ཀཔྤིན, ཀཱམསུཁཾ རཛྫསུཁཾ ཨཱརབྦྷ ཨུདཱནཾ ཨུདཱནེསཱི’’ཏི. ‘‘བྷགཝཱ མེ, བྷནྟེ, ཏཾ ཨཱརབྦྷ ཨུདཱནབྷཱཝཾ ཝཱ ཨནུདཱནབྷཱཝཾ ཝཱ ཛཱནཱཏཱི’’ཏི? སཏྠཱ ‘‘ན, བྷིཀྑཝེ, མམ པུཏྟོ ཀཱམསུཁཾ རཛྫསུཁཾ ཨཱརབྦྷ ཨུདཱནཾ ཨུདཱནེཏི, པུཏྟསྶ པན མེ དྷམྨཔཱིཏི ནཱམ དྷམྨརཏི ནཱམ ཨུཔྤཛྫཏི, སོ ཨམཏམཧཱནིབྦཱནཾ ཨཱརབྦྷ ཨེཝ ཨུདཱནཾ ཨུདཱནེསཱི’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༧༩.

‘‘དྷམྨཔཱིཏི སུཁཾ སེཏི, ཝིཔྤསནྣེན ཙེཏསཱ;

ཨརིཡཔྤཝེདིཏེ དྷམྨེ, སདཱ རམཏི པཎྜིཏོ’’ཏི.

ཏཏྠ དྷམྨཔཱིཏཱིཏི དྷམྨཔཱཡཀོ, དྷམྨཾ པིཝནྟོཏི ཨཏྠོ. དྷམྨོ ཙ ནཱམེས ན སཀྐཱ བྷཱཛནེན ཡཱགུཨཱདཱིནི ཝིཡ པཱཏུཾ? ནཝཝིདྷཾ པན ལོཀུཏྟརདྷམྨཾ ནཱམཀཱཡེན ཕུསནྟོ ཨཱརམྨཎཏོ སཙྪིཀརོནྟོ པརིཉྙཱབྷིསམཡཱདཱིཧི དུཀྑཱདཱིནི ཨརིཡསཙྩཱནི པཊིཝིཛ྄ཛྷནྟོ དྷམྨཾ པིཝཏི ནཱམ. སུཁཾ སེཏཱིཏི དེསནཱམཏྟམེཝེཏཾ, ཙཏཱུཧིཔི ཨིརིཡཱཔཐེཧི སུཁཾ ཝིཧརཏཱིཏི ཨཏྠོ. ཝིཔྤསནྣེནཱཏི ཨནཱཝིལེན ནིརུཔཀྐིལེསེན. ཨརིཡཔྤཝེདིཏེཏི བུདྡྷཱདཱིཧི ཨརིཡེཧི པཝེདིཏེ སཏིཔཊྛཱནཱདིབྷེདེ བོདྷིཔཀྑིཡདྷམྨེ. སདཱ རམཏཱིཏི ཨེཝརཱུཔོ དྷམྨཔཱིཏི ཝིཔྤསནྣེན ཙེཏསཱ ཝིཧརནྟོ པཎྜིཙྩེན སམནྣཱགཏོ སདཱ རམཏི ཨབྷིརམཏཱིཏི.

དེསནཱཝསཱནེ བཧཱུ སོཏཱཔནྣཱདཡོ ཨཧེསུནྟི.

མཧཱཀཔྤིནཏྠེརཝཏྠུ ཙཏུཏྠཾ.

༥. པཎྜིཏསཱམཎེརཝཏྠུ

ཨུདཀཉྷི ནཡནྟཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཎྜིཏསཱམཎེརཾ ཨཱརབྦྷ ཀཐེསི.

ཨཏཱིཏེ ཀིར ཀསྶཔསམྨཱསམྦུདྡྷོ ཝཱིསཏིཁཱིཎཱསཝསཧསྶཔརིཝཱརོ བཱརཱཎསིཾ ཨགམཱསི. མནུསྶཱ ཨཏྟནོ བལཾ སལླཀྑེཏྭཱ ཨཊྛཔི དསཔི ཨེཀཏོ ཧུཏྭཱ ཨགནྟུཀདཱནཱདཱིནི ཨདཾསུ. ཨཐེཀདིཝསཾ སཏྠཱ བྷཏྟཀིཙྩཔརིཡོསཱནེ ཨེཝཾ ཨནུམོདནམཀཱསི –

‘‘ཨུཔཱསཀཱ ཨིདྷ ཨེཀཙྩོ ‘ཨཏྟནོ སནྟཀམེཝ དཱཏུཾ ཝཊྚཏི, ཀིཾ པརེན སམཱདཔིཏེནཱ’ཏི ཨཏྟནཱཝ དཱནཾ དེཏི, པརཾ ན སམཱདཔེཏི. སོ ནིབྦཏྟནིབྦཏྟཊྛཱནེ བྷོགསམྤདཾ ལབྷཏི, ནོ པརིཝཱརསམྤདཾ. ཨེཀཙྩོ པརཾ སམཱདཔེཏི, ཨཏྟནཱ ན དེཏི. སོ ནིབྦཏྟནིབྦཏྟཊྛཱནེ པརིཝཱརསམྤདཾ ལབྷཏི, ནོ བྷོགསམྤདཾ ཨེཀཙྩོ ཨཏྟནཱཔི ན དེཏི, པརམྤི ན སམཱདཔེཏི. སོ ནིབྦཏྟནིབྦཏྟཊྛཱནེ ནེཝ བྷོགསམྤདཾ ལབྷཏི, ན པརིཝཱརསམྤདཾ, ཝིགྷཱསཱདོཝ ཧུཏྭཱ ཛཱིཝཏི. ཨེཀཙྩོ ཨཏྟནཱ ཙ དེཏི, པརཉྩ སམཱདཔེཏི. སོ ནིབྦཏྟནིབྦཏྟཊྛཱནེ བྷོགསམྤདམྤི ལབྷཏི པརིཝཱརསམྤདམྤཱི’’ཏི.

ཏཾ སུཏྭཱ སམཱིཔེ ཋིཏོ ཨེཀོ པཎྜིཏཔུརིསོ ཙིནྟེསི – ‘‘ཨཧཾ དཱནི ཏཐཱ ཀརིསྶཱམི, ཡཐཱ མེ དྭེཔི སམྤཏྟིཡོ བྷཝིསྶནྟཱི’’ཏི. སོ སཏྠཱརཾ ཝནྡིཏྭཱ ཨཱཧ – ‘‘བྷནྟེ, སྭཱཏནཱཡ མཡ྄ཧཾ བྷིཀྑཾ གཎྷཐཱ’’ཏི. ‘‘ཀིཏྟཀེཧི ཏེ བྷིཀྑཱུཧི ཨཏྠོ’’ཏི? ‘‘ཀིཏྟཀོ པན ཝོ, བྷནྟེ, པརིཝཱརོ’’ཏི? ‘‘ཝཱིསཏི བྷིཀྑུསཧསྶཱནཱི’’ཏི. ‘‘བྷནྟེ, སབྦེཧི སདྡྷིཾ སྭཱཏནཱཡ མཡ྄ཧཾ བྷིཀྑཾ གཎྷཐཱ’’ཏི. སཏྠཱ ཨདྷིཝཱསེསི. སོ གཱམཾ པཝིསིཏྭཱ, ‘‘ཨམྨཏཱཏཱ, སྭཱཏནཱཡ མཡཱ བུདྡྷཔྤམུཁོ བྷིཀྑུསངྒྷོ ནིམནྟིཏོ, ཏུམྷེ ཡཏྟཀཱནཾ བྷིཀྑཱུནཾ དཱཏུཾ སཀྑིསྶཐ, ཏཏྟཀཱནཾ དཱནཾ དེཐཱ’’ཏི ཨཱརོཙེཏྭཱ ཝིཙརནྟོ ཨཏྟནོ ཨཏྟནོ བལཾ སལླཀྑེཏྭཱ ‘‘མཡཾ དསནྣཾ དསྶཱམ, མཡཾ ཝཱིསཏིཡཱ, མཡཾ སཏསྶ, མཡཾ པཉྩསཏཱན’’ནྟི ཝུཏྟེ སབྦེསཾ ཝཙནཾ ཨཱདིཏོ པཊྛཱཡ པཎྞེ ཨཱརོཔེསི.

ཏེན ཙ སམཡེན ཏསྨིཾ ནགརེ ཨཏིདུགྒཏབྷཱཝེནེཝ ‘‘མཧཱདུགྒཏོ’’ཏི པཉྙཱཏོ ཨེཀོ པུརིསོ ཨཏྠི. སོ ཏམྤི སམྨུཁཱགཏཾ དིསྭཱ, སམྨ མཧཱདུགྒཏ, མཡཱ སྭཱཏནཱཡ བུདྡྷཔྤམུཁོ བྷིཀྑུསངྒྷོ ནིམནྟིཏོ, སྭེ ནགརཝཱསིནོ དཱནཾ དསྶནྟི, ‘‘ཏྭཾ ཀཏི བྷིཀྑཱུ བྷོཛེསྶསཱི’’ཏི? ‘‘སཱམི, མཡ྄ཧཾ ཀིཾ བྷིཀྑཱུཧི, བྷིཀྑཱུཧི ནཱམ སདྷནཱནཾ ཨཏྠོ, མཡ྄ཧཾ པན སྭེ ཡཱགུཨཏྠཱཡ ཏཎྜུལནཱལི༹མཏྟམྤི ནཏྠི, ཨཧཾ བྷཏིཾ ཀཏྭཱ ཛཱིཝཱམི, ཀིཾ མེ བྷིཀྑཱུཧཱི’’ཏི? སམཱདཔཀེན ནཱམ བྱཏྟེན བྷཝིཏབྦཾ. ཏསྨཱ སོ ཏེན ‘‘ནཏྠཱི’’ཏི ཝུཏྟེཔི ཏུཎྷཱིབྷཱུཏོ ཨཧུཏྭཱ ཨེཝམཱཧ – ‘‘སམྨ མཧཱདུགྒཏ, ཨིམསྨིཾ ནགརེ སུབྷོཛནཾ བྷུཉྫིཏྭཱ སུཁུམཝཏྠཾ ནིཝཱསེཏྭཱ ནཱནཱབྷརཎཔཊིམཎྜིཏཱ སིརིསཡནེ སཡམཱནཱ བཧཱུ ཛནཱ སམྤཏྟིཾ ཨནུབྷཝནྟི, ཏྭཾ པན དིཝསཾ བྷཏིཾ ཀཏྭཱ ཀུཙྪིཔཱུརཎམཏྟམྤི ན ལབྷསི, ཨེཝཾ སནྟེཔི ‘ཨཧཾ པུབྦེ པུཉྙཾ ཨཀཏཏྟཱ ཀིཉྩི ན ལབྷཱམཱི’ཏི ན ཛཱནཱསཱི’’ཏི? ‘‘ཛཱནཱམི, སཱམཱི’’ཏི. ‘‘ཨཐ ཀསྨཱ ཨིདཱནི པུཉྙཾ ན ཀརོསི, ཏྭཾ ཡུཝཱ བལསམྤནྣོ, ཀིཾ ཏཡཱ བྷཏིཾ ཀཏྭཱཔི ཡཐཱབལཾ དཱནཾ དཱཏུཾ ན ཝཊྚཏཱི’’ཏི? སོ ཏསྨིཾ ཀཐེནྟེཡེཝ སཾཝེགཔྤཏྟོ ཧུཏྭཱ ‘‘མཡ྄ཧམྤི ཨེཀཾ བྷིཀྑུཾ པཎྞེ ཨཱརོཔེཧི, ཀིཉྩིདེཝ བྷཏིཾ ཀཏྭཱ ཨེཀསྶ བྷིཀྑཾ དསྶཱམཱི’’ཏི ཨཱཧ. ཨིཏརོ ‘‘ཀིཾ ཨེཀེན བྷིཀྑུནཱ པཎྞེ ཨཱརོཔིཏེནཱ’’ཏི ན ཨཱརོཔེསི? མཧཱདུགྒཏོཔི གེཧཾ གནྟྭཱ བྷརིཡཾ ཨཱཧ – ‘‘བྷདྡེ, ནགརཝཱསིནོ སྭེ སངྒྷབྷཏྟཾ ཀརིསྶནྟི, ཨཧམྤི སམཱདཔཀེན ‘ཨེཀསྶ བྷིཀྑཾ དེཧཱི’ཏི ཝུཏྟོ, མཡམྤི སྭེ ཨེཀསྶ བྷིཀྑཾ དསྶཱམཱ’’ཏི. ཨཐསྶ བྷརིཡཱ ‘‘མཡཾ དལིདྡཱ, ཀསྨཱ ཏཡཱ སམྤཊིཙྪིཏ’’ནྟི ཨཝཏྭཱཝ, ‘‘སཱམི, བྷདྡཀཾ ཏེ ཀཏཾ, མཡཾ པུབྦེཔི ཀིཉྩི ཨདཏྭཱ ཨིདཱནི དུགྒཏཱ ཛཱཏཱ, མཡཾ ཨུབྷོཔི བྷཏིཾ ཀཏྭཱ ཨེཀསྶ བྷིཀྑཾ དསྶཱམ, སཱམཱི’’ཏི ཝཏྭཱ ཨུབྷོཔི གེཧཱ ནིཀྑམིཏྭཱ བྷཏིཊྛཱནཾ ཨགམཾསུ.

མཧཱསེཊྛི ཏཾ དིསྭཱ ‘‘ཀིཾ, སམྨ མཧཱདུགྒཏ, བྷཏིཾ ཀརིསྶསཱི’’ཏི པུཙྪི. ‘‘ཨཱམ, ཨཡྻཱ’’ཏི. ‘‘ཀིཾ ཀརིསྶསཱི’’ཏི? ‘‘ཡཾ ཏུམྷེ ཀཱརེསྶཐ, ཏཾ ཀརིསྶཱམཱི’’ཏི. ‘‘ཏེན ཧི མཡཾ སྭེ དྭེ ཏཱིཎི བྷིཀྑུསཏཱནི བྷོཛེསྶཱམ, ཨེཧི, དཱརཱུནི ཕཱལེཧཱི’’ཏི ཝཱསིཕརསུཾ ནཱིཧརིཏྭཱ དཱཔེསི. མཧཱདུགྒཏོ དལ༹ྷཾ ཀཙྪཾ བནྡྷིཏྭཱ མཧུསྶཱཧཔྤཏྟོ ཝཱསིཾ པཧཱཡ ཕརསུཾ གཎྷནྟོ, ཕརསུཾ པཧཱཡ ཝཱསིཾ གཎྷནྟོ དཱརཱུནི ཕཱལེཏི. ཨཐ ནཾ སེཊྛི ཨཱཧ – ‘‘སམྨ, ཏྭཾ ཨཛྫ ཨཏིཝིཡ ཨུསྶཱཧཔྤཏྟོ ཀམྨཾ ཀརོསི, ཀིཾ ནུ ཁོ ཀཱརཎ’’ནྟི? ‘‘སཱམི, ཨཧཾ སྭེ ཨེཀཾ བྷིཀྑུཾ བྷོཛེསྶཱམཱི’’ཏི. ཏཾ སུཏྭཱ སེཊྛི པསནྣམཱནསོ ཙིནྟེསི – ‘‘ཨཧོ ཨིམིནཱ དུཀྐརཾ ཀཏཾ, ‘ཨཧཾ དུགྒཏོ’ཏི ཏུཎྷཱིབྷཱཝཾ ཨནཱཔཛྫིཏྭཱ ‘བྷཏིཾ ཀཏྭཱ ཨེཀཾ བྷིཀྑུཾ བྷོཛེསྶཱམཱི’ཏི ཝདཏཱི’’ཏི. སེཊྛིབྷརིཡཱཔི ཏསྶ བྷརིཡཾ དིསྭཱ, ‘‘ཨམྨ, ཀིཾ ཀམྨཾ ཀརིསྶསཱི’’ཏི པུཙྪིཏྭཱ ‘‘ཡཾ ཏུམྷེ ཀཱརེསྶཐ, ཏཾ ཀརོམཱི’’ཏི ཝུཏྟེ ཨུདུཀྑལསཱལཾ པཝེསེཏྭཱ སུཔྤམུསལཱདཱིནི དཱཔེསི. སཱ ནཙྩནྟཱི ཝིཡ ཏུཊྛཔཧཊྛཱ ཝཱིཧིཾ ཀོཊྚེཏི ཙེཝ ཨོཕུཎཱཏི ཙ. ཨཐ ནཾ སེཊྛིབྷརིཡཱ པུཙྪི – ‘‘ཨམྨ, ཏྭཾ ཨཏིཝིཡ ཏུཊྛཔཧཊྛཱ ཀམྨཾ ཀརོསི, ཀིཾ ནུ ཁོ ཀཱརཎ’’ནྟི? ‘‘ཨཡྻེ, ཨིམཾ བྷཏིཾ ཀཏྭཱ མཡམྤི ཨེཀཾ བྷིཀྑུཾ བྷོཛེསྶཱམཱ’’ཏི. ཏཾ སུཏྭཱ སེཊྛིབྷརིཡཱཔི ཏསྶཾ ‘‘ཨཧོ ཝཏཱཡཾ དུཀྐརཀཱརིཀཱ’’ཏི པསཱིདི. སེཊྛི མཧཱདུགྒཏསྶ དཱརཱུནཾ ཕཱལིཏཀཱལེ ‘‘ཨཡཾ ཏེ བྷཏཱི’’ཏི སཱལཱིནཾ ཙཏསྶོ ནཱལི༹ཡོ དཱཔེཏྭཱ ‘‘ཨཡཾ ཏེ ཏུཊྛིདཱཡོ’’ཏི ཨཔརཱཔི ཙཏསྶོ ནཱལི༹ཡོ དཱཔེསི.

སོ གེཧཾ གནྟྭཱ བྷརིཡཾ ཨཱཧ – ‘‘མཡཱ བྷཏིཾ ཀཏྭཱ སཱལི ལདྡྷོ, ཨཡཾ ནིཝཱཔོ བྷཝིསྶཏི, ཏཡཱ ལདྡྷཱཡ བྷཏིཡཱ དདྷིཏེལཀཊུཀབྷཎྜཱནི གཎྷཱཧཱི’’ཏི. སེཊྛིབྷརིཡཱཔི པུན ཏསྶཱ ཨེཀཾ སཔྤིཀརོཊིཀཉྩེཝ དདྷིབྷཱཛནཉྩ ཀཊུཀབྷཎྜཉྩ སུདྡྷཏཎྜུལི༹ནཱལི༹ཉྩ དཱཔེསི. ཨིཏི ཙ ཨུབྷིནྣམྤི ནཝ ཏཎྜུལནཱལི༹ཡོ ཨཧེསུཾ. ཏེ ‘‘དེཡྻདྷམྨོ ནོ ལདྡྷོ’’ཏི ཏུཊྛཧཊྛཱ པཱཏོཝ ཨུཊྛཧིཾསུ. བྷརིཡཱ མཧཱདུགྒཏཾ ཨཱཧ – ‘‘གཙྪ, སཱམི, པཎྞཾ པརིཡེསིཏྭཱ ཨཱཧརཱ’’ཏི. སོ ཨནྟརཱཔཎེ པཎྞཾ ཨདིསྭཱ ནདཱིཏཱིརཾ གནྟྭཱ ‘‘ཨཛྫ ཨཡྻཱནཾ བྷོཛནཾ དཱཏུཾ ལབྷིསྶཱམཱི’’ཏི པཧཊྛམཱནསོ གཱཡནྟོ པཎྞཾ ཨུཙྩིནཏི. མཧཱཛཱལཾ ཁིཔིཏྭཱ ཋིཏོ ཀེཝཊྚོ ‘‘མཧཱདུགྒཏསྶ སདྡེན བྷཝིཏབྦ’’ནྟི ཏཾ པཀྐོསིཏྭཱ པུཙྪི – ‘‘ཨཏིཝིཡ ཏུཊྛཙིཏྟོ གཱཡསི, ཀིཾ ནུ ཁོ ཀཱརཎ’’ནྟི? ‘‘པཎྞཾ ཨུཙྩིནཱམི, སམྨཱ’’ཏི. ‘‘ཀིཾ ཀརིསྶསཱི’’ཏི? ‘‘ཨེཀཾ བྷིཀྑུཾ བྷོཛེསྶཱམཱི’’ཏི. ‘‘ཨཧོ སུཁིཏོ, བྷིཀྑུ, སོ ཏཝ ཀིཾ པཎྞཾ ཁཱདིསྶཏཱི’’ཏི? ‘‘ཀིཾ ཀརོམི, སམྨ, ཨཏྟནཱ ལདྡྷཔཎྞེན བྷོཛེསྶཱམཱི’’ཏི? ‘‘ཏེན ཧི ཨེཧཱི’’ཏི. ‘‘ཀིཾ ཀརོམི, སམྨཱ’’ཏི? ‘‘ཨིམེ མཙྪེ གཧེཏྭཱ པཱདགྒྷནཀཱནི ཨཌྜྷགྒྷནཀཱནི ཀཧཱཔཎགྒྷནཀཱནི ཙ ཨུདྡཱནཱནི ཀརོཧཱི’’ཏི. སོ ཏཐཱ ཨཀཱསི. བདྡྷབདྡྷེ མཙྪེ ནགརཝཱསིནོ ནིམནྟིཏནིམནྟིཏཱནཾ བྷིཀྑཱུནཾ ཨཏྠཱཡ ཧརིཾསུ. ཏསྶ མཙྪུདྡཱནཱནི ཀརོནྟསྶེཝ བྷིཀྑཱཙཱརཝེལཱ པཱཔུཎི. སོ ཝེལཾ སལླཀྑེཏྭཱ ‘‘གམིསྶཱམཧཾ, སམྨ, ཨཡཾ བྷིཀྑཱུནཾ ཨཱགམནཝེལཱ’’ཏི ཨཱཧ. ‘‘ཨཏྠི པན ཀིཉྩི མཙྪུདྡཱན’’ནྟི? ‘‘ནཏྠི, སམྨ, སབྦཱནི ཁཱིཎཱནཱི’’ཏི. ‘‘ཏེན ཧི མཡཱ ཨཏྟནོ ཨཏྠཱཡ ཝཱལུཀཱཡ ནིཁཎིཏྭཱ ཙཏྟཱརོ རོཧིཏམཙྪཱ ཋཔིཏཱ, སཙེ བྷིཀྑུཾ བྷོཛེཏུཀཱམོསི, ཨིམེ གཧེཏྭཱ གཙྪཱ’’ཏི ཏེ མཙྪེ ཏསྶ ཨདཱསི.

ཏཾ དིཝསཾ པན སཏྠཱ པཙྩཱུསཀཱལེ ལོཀཾ ཝོལོཀེནྟོ མཧཱདུགྒཏཾ ཨཏྟནོ ཉཱཎཛཱལསྶ ཨནྟོ པཝིཊྛཾ དིསྭཱ ‘‘ཀིཾ ནུ ཁོ བྷཝིསྶཏཱི’’ཏི ཨཱཝཛྫེནྟོ ‘‘མཧཱདུགྒཏོ ‘ཨེཀཾ བྷིཀྑུཾ བྷོཛེསྶཱམཱི’ཏི བྷརིཡཱཡ སདྡྷིཾ ཧིཡྻོ བྷཏིཾ ཨཀཱསི, ཀཏརཾ ནུ ཁོ བྷིཀྑུཾ ལབྷིསྶཏཱི’’ཏི ཙིནྟེཏྭཱ ‘‘མནུསྶཱ པཎྞེ ཨཱརོཔིཏསཉྙཱཡ བྷིཀྑཱུ གཧེཏྭཱ ཨཏྟནོ ཨཏྟནོ གེཧེསུ ནིསཱིདཱཔེསྶནྟི, མཧཱདུགྒཏོ མཾ ཋཔེཏྭཱ ཨཉྙཾ བྷིཀྑུཾ ན ལབྷིསྶཏཱི’’ཏི ཨུཔདྷཱརེསི. བུདྡྷཱ ཀིར དུགྒཏེསུ ཨནུཀམྤཾ ཀརོནྟི. ཏསྨཱ སཏྠཱ པཱཏོཝ སརཱིརཔཊིཛགྒནཾ ཀཏྭཱ ‘‘མཧཱདུགྒཏཾ སངྒཎྷིསྶཱམཱི’’ཏི གནྡྷཀུཊིཾ པཝིསིཏྭཱ ནིསཱིདི. མཧཱདུགྒཏེཔི མཙྪེ གཧེཏྭཱ གེཧཾ པཝིསནྟེ སཀྐསྶ པཎྜུཀམྦལསིལཱསནཾ ཨུཎྷཱཀཱརཾ དསྶེསི. སོ ‘‘ཀིཾ ནུ ཁོ ཀཱརཎ’’ནྟི ཨོལོཀེནྟོ ‘‘ཧིཡྻོ, མཧཱདུགྒཏོ ‘ཨེཀསྶ བྷིཀྑུནོ བྷིཀྑཾ དསྶཱམཱི’ཏི ཨཏྟནོ བྷརིཡཱཡ སདྡྷིཾ བྷཏིཾ ཨཀཱསི, ཀཏརཾ ནུ ཁོ བྷིཀྑུཾ ལབྷིསྶཏཱི’’ཏི ཙིནྟེཏྭཱ ‘‘ནཏྠེཏསྶ ཨཉྙོ བྷིཀྑུ, སཏྠཱ པན མཧཱདུགྒཏསྶ སངྒཧཾ ཀརིསྶཱམཱི’’ཏི གནྡྷཀུཊིཡཾ ནིསིནྣོ. མཧཱདུགྒཏོ ཨཏྟནོ ཨུཔཀཔྤནཀཾ ཡཱགུབྷཏྟཾ པཎྞསཱུཔེཡྻམྤི ཏཐཱགཏསྶ དདེཡྻ, ‘‘ཡཾནཱུནཱཧཾ མཧཱདུགྒཏསྶ གེཧཾ གནྟྭཱ བྷཏྟཀཱརཀཀམྨཾ ཀརེཡྻ’’ནྟི ཨཉྙཱཏཀཝེསེན ཏསྶ གེཧསམཱིཔཾ གནྟྭཱ ‘‘ཨཏྠི ནུ ཁོ ཀསྶཙི ཀིཉྩི བྷཏིཡཱ ཀཱཏབྦ’’ནྟི པུཙྪི. མཧཱདུགྒཏོ ཏཾ དིསྭཱ ཨཱཧ – ‘‘སམྨ, ཀིཾ ཀམྨཾ ཀརིསྶསཱི’’ཏི? ‘‘ཨཧཾ, སཱམི, སབྦསིཔྤིཀོ, མཡ྄ཧཾ ཨཛཱནནསིཔྤཾ ནཱམ ནཏྠི, ཡཱགུབྷཏྟཱདཱིནིཔི སམྤཱདེཏུཾ ཛཱནཱམཱི’’ཏི. ‘‘སམྨ, མཡཾ ཏཝ ཀམྨེན ཨཏྠིཀཱ, ཏུཡ྄ཧཾ པན ཀིཉྩི དཱཏབྦཾ བྷཏིཾ ན པསྶཱམཱ’’ཏི. ‘‘ཀིཾ པན ཏེ ཀཏྟབྦ’’ནྟི? ‘‘ཨེཀསྶ བྷིཀྑུསྶ བྷིཀྑཾ དཱཏུཀཱམོམྷི, ཏསྶ ཡཱགུབྷཏྟསཾཝིདྷཱནཾ ཨིཙྪཱམཱི’’ཏི. ‘‘སཙེ བྷིཀྑུསྶ བྷིཀྑཾ དསྶསི, ན མེ བྷཏིཡཱ ཨཏྠོ, ཀིཾ མམ པུཉྙཾ ན ཝཊྚཏཱི’’ཏི? ‘‘ཨེཝཾ སནྟེ སཱདྷུ, སམྨ, པཝིསཱ’’ཏི. སོ ཏསྶ གེཧཾ པཝིསིཏྭཱ ཏེལཏཎྜུལཱདཱིནི ཨཱཧརཱཔེཏྭཱ ‘‘གཙྪ, ཨཏྟནོ པཏྟབྷིཀྑུཾ ཨཱནེཧཱི’’ཏི ཏཾ ཨུཡྻོཛེསི. དཱནཝེཡྻཱཝཊིཀོཔི པཎྞེ ཨཱརོཔིཏནིཡཱམེནེཝ ཏེསཾ ཏེསཾ གེཧཱནི བྷིཀྑཱུ པཧིཎི.

མཧཱདུགྒཏོ ཏསྶ སནྟིཀཾ གནྟྭཱ ‘‘མཡ྄ཧཾ པཏྟབྷིཀྑུཾ དེཧཱི’’ཏི ཨཱཧ. སོ ཏསྨིཾ ཁཎེ སཏིཾ ལབྷིཏྭཱ ‘‘ཨཧཾ ཏཝ བྷིཀྑུཾ པམུཊྛོ’’ཏི ཨཱཧ. མཧཱདུགྒཏོ ཏིཁིཎཱཡ སཏྟིཡཱ ཀུཙྪིཡཾ པཧཊོ ཝིཡ, ‘‘སཱམི, ཀསྨཱ མཾ ནཱསེསི, ཨཧཾ ཏཡཱ ཧིཡྻོ སམཱདཔིཏོ བྷརིཡཱཡ སདྡྷིཾ དིཝསཾ བྷཏིཾ ཀཏྭཱ ཨཛྫ པཱཏོཝ པཎྞཏྠཱཡ ནདཱིཏཱིརེ ཨཱཧིཎྜིཏྭཱ ཨཱགཏོ, དེཧི མེ ཨེཀཾ བྷིཀྑུ’’ནྟི བཱཧཱ པགྒཡ྄ཧ པརིདེཝི. མནུསྶཱ སནྣིཔཏིཏྭཱ ‘‘ཀིམེཏཾ, མཧཱདུགྒཏཱ’’ཏི པུཙྪིཾསུ. སོ ཏམཏྠཾ ཨཱརོཙེསི. ཏེ ཝེཡྻཱཝཊིཀཾ པུཙྪིཾསུ – ‘‘སཙྩཾ ཀིར, སམྨ, ཏཡཱ ཨེས ‘བྷཏིཾ ཀཏྭཱ ཨེཀསྶ བྷིཀྑུསྶ བྷིཀྑཾ དེཧཱི’ཏི སམཱདཔིཏོ’’ཏི? ‘‘ཨཱམ, ཨཡྻཱ’’ཏི. ‘‘བྷཱརིཡཾ ཏེ ཀམྨཾ ཀཏཾ, ཡོ ཏྭཾ ཨེཏྟཀེ བྷིཀྑཱུ སཾཝིདཧནྟོ ཨེཏསྶ ཨེཀཾ བྷིཀྑུཾ ནཱདཱསཱི’’ཏི. སོ ཏེསཾ ཝཙནེན མངྐུབྷཱུཏོ ཏཾ ཨཱཧ – ‘‘སམྨ མཧཱདུགྒཏ, མཱ མཾ ནཱསཡི, ཨཧཾ ཏཝ ཀཱརཎཱ མཧཱཝིཧེསཾ པཏྟོ, མནུསྶཱ པཎྞེ ཨཱརོཔིཏནིཡཱམེན ཨཏྟནོ ཨཏྟནོ པཏྟབྷིཀྑཱུ ནཡིཾསུ, ཨཏྟནོ གེཧེ ནིསིནྣབྷིཀྑུཾ ནཱིཧརིཏྭཱ དེནྟོ ནཱམ ནཏྠི, སཏྠཱ པན མུཁཾ དྷོཝིཏྭཱ གནྡྷཀུཊིཡམེཝ ནིསིནྣོ, རཱཛཡུཝརཱཛསེནཱཔཏིཨཱདཡོ སཏྠུ གནྡྷཀུཊིཏོ ནིཀྑམནཾ ཨོལོཀེནྟཱ ནིསིནྣཱ སཏྠུ པཏྟཾ གཧེཏྭཱ ‘གམིསྶཱམཱ’ཏི. བུདྡྷཱ ནཱམ དུགྒཏེ ཨནུཀམྤཾ ཀརོནྟི, ཏྭཾ ཝིཧཱརཾ གནྟྭཱ ‘དུགྒཏོམྷི, བྷནྟེ, མམ སངྒཧཾ ཀརོཐཱ’ཏི སཏྠཱརཾ ཝནྡ, སཙེ ཏེ པུཉྙཾ ཨཏྠི, ཨདྡྷཱ ལཙྪསཱི’’ཏི.

སོ ཝིཧཱརཾ ཨགམཱསི. ཨཐ ནཾ ཨཉྙེསུ དིཝསེསུ ཝིཧཱརེ ཝིགྷཱསཱདབྷཱཝེན དིཊྛཏྟཱ རཱཛཡུཝརཱཛཱདཡོ, ‘‘མཧཱདུགྒཏ, ན ཏཱཝ བྷཏྟཀཱལོ, ཀསྨཱ ཏྭཾ ཨཱགཙྪསཱི’’ཏི ཨཱཧཾསུ. སོ ‘‘ཛཱནཱམི, སཱམི, ‘ན ཏཱཝ བྷཏྟཀཱལོ’ཏི. སཏྠཱརཾ པན ཝནྡིཏུཾ ཨཱགཙྪཱམཱི’’ཏི ཝདནྟོ གནྟྭཱ གནྡྷཀུཊིཡཱ ཨུམྨཱརེ སཱིསཾ ཋཔེཏྭཱ པཉྩཔཏིཊྛིཏེན ཝནྡིཏྭཱ, ‘‘བྷནྟེ, ཨིམསྨིཾ ནགརེ མཡཱ དུགྒཏཏརོ ནཏྠི, ཨཝསྶཡོ མེ ཧོཐ, ཀརོཐ མེ སངྒཧ’’ནྟི ཨཱཧ. སཏྠཱ གནྡྷཀུཊིདྭཱརཾ ཝིཝརིཏྭཱ པཏྟཾ ནཱིཧརིཏྭཱ ཏསྶ ཧཏྠེ ཋཔེསི. སོ ཙཀྐཝཏྟིསིརིཾ པཏྟོ ཝིཡ ཨཧོསི, རཱཛཡུཝརཱཛཱདཡོ ཨཉྙམཉྙསྶ མུཁཱནི ཨོལོཀཡིཾསུ. སཏྠཱརཱ དིནྣཔཏྟཉྷི ཀོཙི ཨིསྶརིཡཝསེན གཧེཏུཾ སམཏྠོ ནཱམ ནཏྠི. ཨེཝཾ པན ཝདིཾསུ, ‘‘སམྨ མཧཱདུགྒཏ, སཏྠུ པཏྟཾ ཨམྷཱཀཾ དེཧི ཨེཏྟཀཾ ནཱམ ཏེ དྷནཾ དསྶཱམ, ཏྭཾ དུགྒཏོ དྷནཾ གཎྷཱཧི, ཀིཾ ཏེ པཏྟེནཱ’’ཏི? མཧཱདུགྒཏོ ‘‘ན ཀསྶཙི དསྶཱམི, ན མེ དྷནེན ཨཏྠོ, སཏྠཱརཾཡེཝ བྷོཛེསྶཱམཱི’’ཏི ཨཱཧ. ཨཝསེསཱ ཏཾ ཡཱཙིཏྭཱ པཏྟཾ ཨལབྷིཏྭཱ ནིཝཏྟིཾསུ. རཱཛཱ པན ‘‘མཧཱདུགྒཏོ དྷནེན པལོབྷིཡམཱནོཔི སཏྠུ པཏྟཾ ན དེཏི, སཏྠཱརཱ ཙ སཡཾ དིནྣཔཏྟཾ ཀོཙི གཧེཏུཾ ན སཀྐོཏི, ཨིམསྶ དེཡྻདྷམྨོ ནཱམ ཀིཏྟཀོ བྷཝིསྶཏི, ཨིམིནཱ དེཡྻདྷམྨསྶ དིནྣཀཱལེ སཏྠཱརཾ ཨཱདཱཡ གེཧཾ ནེཏྭཱ མཡ྄ཧཾ སམྤཱདིཏཾ ཨཱཧཱརཾ དསྶཱམཱི’’ཏི ཙིནྟེཏྭཱ སཏྠཱརཱ སདྡྷིཾཡེཝ ཨགམཱསི. སཀྐོཔི དེཝརཱཛཱ ཡཱགུཁཛྫཀབྷཏྟསཱུཔེཡྻཔཎྞཱདཱིནི སམྤཱདེཏྭཱ སཏྠུ ནིསཱིདནཱརཧཾ ཨཱསནཾ པཉྙཔེཏྭཱ ནིསཱིདི.

མཧཱདུགྒཏོ སཏྠཱརཾ ནེཏྭཱ ‘‘པཝིསཐ, བྷནྟེ’’ཏི ཨཱཧ. ཝསནགེཧཉྩསྶ ནཱིཙཾ ཧོཏི, ཨནོནཏེན པཝིསིཏུཾ ན སཀྐཱ. བུདྡྷཱ ཙ ནཱམ གེཧཾ པཝིསནྟཱ ན ཨོནམིཏྭཱ པཝིསནྟི. གེཧཉྷི པཝིསནཀཱལེ མཧཱཔཐཝཱི ཝཱ ཧེཊྛཱ ཨོགཙྪཏི, གེཧཾ ཝཱ ཨུདྡྷཾ གཙྪཏི. ཨིདཾ ཏེསཾ སུདིནྣདཱནསྶ ཕལཾ. པུན ནིཀྑམིཏྭཱ གཏཀཱལེ སབྦཾ པཱཀཏིཀམེཝ ཧོཏི. ཏསྨཱ སཏྠཱ ཋིཏཀོཝ གེཧཾ པཝིསིཏྭཱ སཀྐེན པཉྙཏྟཱསནེ ནིསཱིདི. སཏྠརི ནིསིནྣེ རཱཛཱ ཨཱཧ – ‘‘སམྨ མཧཱདུགྒཏ, ཏཡཱ ཨམྷཱཀཾ ཡཱཙནྟཱནམྤི སཏྠུ པཏྟོ ན དིནྣོ, པསྶཱམ ཏཱཝ, ཀཱིདིསོ ཏེ སཏྠུ སཀྐཱརོ ཀཏོ’’ཏི? ཨཐསྶ སཀྐོ ཡཱགུཁཛྫཀཱདཱིནི ཝིཝརིཏྭཱ དསྶེསི. ཏེསཾ ཝཱསགནྡྷོ སཀལནགརཾ ཚཱདེཏྭཱ ཨཊྛཱསི. རཱཛཱ ཡཱགུཨཱདཱིནི ཨོལོཀེཏྭཱ བྷགཝནྟཾ ཨཱཧ – ‘‘བྷནྟེ, ‘ཨཧཾ མཧཱདུགྒཏསྶ དེཡྻདྷམྨོ ཀིཏྟཀོ བྷཝིསྶཏི, ཨིམིནཱ དེཡྻདྷམྨེ དིནྣེ སཏྠཱརཾ གེཧཾ ནེཏྭཱ ཨཏྟནོ སམྤཱདིཏཾ ཨཱཧཱརཾ དསྶཱམཱི’ཏི ཙིནྟེཏྭཱ ཨཱགཏོ, མཡཱ ཨེཝརཱུཔོ ཨཱཧཱརོ ན དིཊྛཔུབྦོ, མཡི ཨིདྷ ཋིཏེ མཧཱདུགྒཏོ ཀིལམེཡྻ, གཙྪཱམཧ’’ནྟི སཏྠཱརཾ ཝནྡིཏྭཱ པཀྐཱམི. སཀྐོཔི སཏྠཱརཾ ཡཱགུཨཱདཱིནི དཏྭཱ སཀྐཙྩཾ པརིཝིསི. སཏྠཱཔི ཀཏབྷཏྟཀིཙྩོ ཨནུམོདནཾ ཀཏྭཱ ཨུཊྛཱཡཱསནཱ པཀྐཱམི.

སཀྐོ མཧཱདུགྒཏསྶ སཉྙཾ ཨདཱསི. སོ པཏྟཾ གཧེཏྭཱ སཏྠཱརཾ ཨནུགཙྪི. སཀྐོ ནིཝཏྟིཏྭཱ མཧཱདུགྒཏསྶ གེཧདྭཱརེ ཋིཏོ ཨཱཀཱསཾ ཨོལོཀེསི. ཏཱཝདེཝ ཨཱཀཱསཏོ སཏྟརཏནཝསྶཾ ཝསྶིཏྭཱ ཏསྶ གེཧེ སབྦབྷཱཛནཱནི པཱུརེཏྭཱ སཀལཾ གེཧཾ པཱུརེསི. ཏསྶ གེཧེ ཨོཀཱསོ ནཱཧོསི. ཏསྶ བྷརིཡཱ དཱརཀེ ཧཏྠེསུ གཧེཏྭཱ ནཱིཧརིཏྭཱ བཧི ཨཊྛཱསི. སོ སཏྠཱརཾ ཨནུགནྟྭཱ ནིཝཏྟོ དཱརཀེ བཧི དིསྭཱ ‘‘ཀིཾ ཨིད’’ནྟི པུཙྪི. ‘‘སཱམི, སཀལཾ ནོ གེཧཾ སཏྟཧི རཏནེཧི པུཎྞཾ, པཝིསིཏུཾ ཨོཀཱསོ ནཏྠཱི’’ཏི. སོ ‘‘ཨཛྫེཝ མེ དཱནེན ཝིཔཱཀོ དིནྣོ’’ཏི ཙིནྟེཏྭཱ རཉྙོ སནྟིཀཾ གནྟྭཱ ཝནྡིཏྭཱ, ‘‘ཀསྨཱ ཨཱགཏོསཱི’’ཏི ཝུཏྟེ ཨཱཧ –‘‘དེཝ, གེཧཾ མེ སཏྟཧི རཏནེཧི པུཎྞཾ, ཏཾ དྷནཾ གཎྷཐཱ’’ཏི. རཱཛཱ ‘‘ཨཧོ བུདྡྷཱནཾ དིནྣདཱནཾ, ཨཛྫེཝ མཏྠཀཾ པཏྟ’’ནྟི ཙིནྟེཏྭཱ ཏཾ ཨཱཧ – ‘‘ཀིཾ ཏེ ལདྡྷུཾ ཝཊྚཏཱི’’ཏི? ‘‘དྷནཧརཎཏྠཱཡ སཀཊསཧསྶཾ, དེཝཱ’’ཏི. རཱཛཱ སཀཊསཧསྶཾ པེསེཏྭཱ དྷནཾ ཨཱཧརཱཔེཏྭཱ རཱཛངྒཎེ ཨོཀིརཱཔེསི. ཏཱལཔྤམཱཎོ རཱསི ཨཧོསི. རཱཛཱ ནགརེ སནྣིཔཱཏཱཔེཏྭཱ ‘‘ཨིམསྨིཾ ནགརེ ཨཏྠི ཀསྶཙི ཨེཏྟཀཾ དྷན’’ནྟི པུཙྪི. ‘‘ནཏྠི, དེཝཱ’’ཏི. ‘‘ཨེཝཾ མཧཱདྷནསྶ ཀིཾ ཀཱཏུཾ ཝཊྚཏཱི’’ཏི? ‘‘སེཊྛིཊྛཱནཾ དཱཏུཾ ཝཊྚཏི, དེཝཱ’’ཏི. རཱཛཱ ཏསྶ མཧཱསཀྐཱརཾ ཀཏྭཱ སེཊྛིཊྛཱནཾ དཱཔེསི.

ཨཐསྶ པུབྦེ ཨེཀསྶ སེཊྛིནོ གེཧཊྛཱནཾ ཨཱཙིཀྑིཏྭཱ ‘‘ཨེཏྠ ཛཱཏེ གཙྪེ ཧརཱཔེཏྭཱ གེཧཾ ཨུཊྛཱཔེཏྭཱ ཝསཱཧཱི’’ཏི ཨཱཧ. ཏསྶ ཏཾ ཋཱནཾ སོདྷེཏྭཱ སམཾ ཀཏྭཱ བྷཱུམིཡཱ ཁཉྙམཱནཱཡ ཨཉྙམཉྙཾ ཨཱཧཙྩ ནིདྷིཀུམྦྷིཡོ ཨུཊྛཧིཾསུ. ཏེན རཉྙོ ཨཱརོཙིཏེ ‘‘ཏཝ པུཉྙེན ནིབྦཏྟཱ, ཏྭམེཝ གཎྷཱཧཱི’’ཏི ཨཱཧ. སོ གེཧཾ ཀཱརེཏྭཱ སཏྟཱཧཾ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ ཨདཱསི. ཏཏོ པརམྤི ཡཱཝཏཱཡུཀཾ ཏིཊྛནྟོ པུཉྙཱནི ཀརིཏྭཱ ཨཱཡུཔརིཡོསཱནེ དེཝལོཀེ ནིབྦཏྟོ.

ཨེཀཾ བུདྡྷནྟརཾ དིབྦསམྤཏྟིཾ ཨནུབྷཝིཏྭཱ ཨིམསྨིཾ བུདྡྷུཔྤཱདེ ཏཏོ ཙུཏོ སཱཝཏྠིཡཾ སཱརིཔུཏྟཏྠེརསྶཱུཔཊྛཱཀཀུལེ སེཊྛིདྷཱིཏུ ཀུཙྪིཡཾ པཊིསནྡྷིཾ གཎྷི. ཨཐསྶཱ མཱཏཱཔིཏརོ གབྦྷསྶ པཏིཊྛིཏབྷཱཝཾ ཉཏྭཱ གབྦྷཔརིཧཱརཾ ཨདཾསུ. ཏསྶཱ ཨཔརེན སམཡེན ཨེཝརཱུཔོ དོཧལོ༹ ཨུཔྤཛྫི – ‘‘ཨཧོ ཝཏཱཧཾ དྷམྨདེསནཱཔཏིཾ ཨཱདིཾ ཀཏྭཱ པཉྩནྣཾ བྷིཀྑུསཏཱནཾ རོཧིཏམཙྪརསེན དཱནཾ དཏྭཱ ཀཱསཱཡཱནི ཝཏྠཱནི ནིཝཱསེཏྭཱ ཨཱསནཔརིཡནྟེ ནིསིནྣཱ ཏེསཾ བྷིཀྑཱུནཾ ཨུཙྪིཊྛབྷཏྟཾ པརིབྷུཉྫེཡྻ’’ནྟི. སཱ མཱཏཱཔིཏཱུནཾ ཨཱརོཙེཏྭཱ ཏཐཱ ཨཀཱསི, དོཧལོ༹ པཊིཔསྶམྦྷི. ཨཐསྶཱ ཏཏོ ཨཔརེསུཔི སཏྟསུ མངྒལེསུ རོཧིཏམཙྪརསེནེཝ དྷམྨསེནཱཔཏིཏྠེརཔྤམུཁཱནི པཉྩ བྷིཀྑུསཏཱནི བྷོཛེསུཾ. སབྦཾ ཏིསྶཀུམཱརསྶ ཝཏྠུམྷི ཝུཏྟནིཡཱམེནེཝ ཝེདིཏབྦཾ. ཨཡམསྶ པན མཧཱདུགྒཏཀཱལེ དིནྣསྶ རོཧིཏམཙྪརསདཱནསྶེཝ ནིསྶནྡོ. ནཱམགྒཧཎདིཝསེ པནསྶ, ‘‘བྷནྟེ, དཱསསྶ ཝོ སིཀྑཱཔདཱནི དེཐཱ’’ཏི མཱཏརཱ ཝུཏྟེ ཐེརོ ཨཱཧ – ‘‘ཀོནཱམོ ཨཡཾ དཱརཀོ’’ཏི? ‘‘བྷནྟེ, ཨིམསྶ དཱརཀསྶ ཀུཙྪིཡཾ པཊིསནྡྷིགྒཧཎཏོ པཊྛཱཡ ཨིམསྨིཾ གེཧེ ཛལཱ༹ ཨེལ༹མཱུགཱཔི པཎྜིཏཱ ཛཱཏཱ, ཏསྨཱ མེ པུཏྟསྶ པཎྜིཏོཏྭེཝ ནཱམཾ བྷཝིསྶཏཱི’’ཏི. ཐེརོ སིཀྑཱཔདཱནི ཨདཱསི. ཛཱཏདིཝསཏོ པཊྛཱཡ པནསྶ ‘‘ནཱཧཾ མམ པུཏྟསྶ ཨཛ྄ཛྷཱསཡཾ བྷིནྡིསྶཱམཱི’’ཏི མཱཏུ ཙིཏྟཾ ཨུཔྤཛྫི. སོ སཏྟཝསྶིཀཀཱལེ མཱཏརཾ ཨཱཧ – ‘‘ཨམྨ, ཐེརསྶ སནྟིཀེ པབྦཛིསྶཱམཱི’’ཏི. ‘‘སཱདྷུ, ཏཱཏ, ‘ཨཧཾ ཏཝ ཨཛ྄ཛྷཱསཡཾ ན བྷིནྡིསྶཱམིཙྩེཝ མནཾ ཨུཔྤཱདེསི’’’ནྟི ཝཏྭཱ ཐེརཾ ནིམནྟེཏྭཱ བྷོཛེཏྭཱ, ‘‘བྷནྟེ, དཱསོ ཝོ པབྦཛིཏུཀཱམོ, ཨཧཾ ཨིམཾ སཱཡནྷསམཡེ ཝིཧཱརཾ ཨཱནེསྶཱམཱི’’ཏི ཐེརཾ ཨུཡྻོཛེཏྭཱ ཉཱཏཀེ སནྣིཔཱཏཱཔེཏྭཱ ‘‘མམ པུཏྟསྶ གིཧིཀཱལེ ཀཏྟབྦསཀྐཱརཾ ཨཛྫེཝ ཀརིསྶཱམཱ’’ཏི མཧནྟཾ སཀྐཱརཾ ཀཱརེཏྭཱ ཏཾ ཨཱདཱཡ ཝིཧཱརཾ གནྟྭཱ ‘‘ཨིམཾ, བྷནྟེ, པབྦཱཛེཐཱ’’ཏི ཐེརསྶ ཨདཱསི.

ཐེརོ པབྦཛྫཱཡ དུཀྐརབྷཱཝཾ ཨཱཙིཀྑིཏྭཱ ‘‘ཀརིསྶཱམཧཾ, བྷནྟེ, ཏུམྷཱཀཾ ཨོཝཱད’’ནྟི ཝུཏྟེ ‘‘ཏེན ཧི ཨེཧཱི’’ཏི ཀེསེ ཏེམེཏྭཱ ཏཙཔཉྩཀཀམྨཊྛཱནཾ ཨཱཙིཀྑིཏྭཱ པབྦཱཛེསི. མཱཏཱཔིཏརོཔིསྶ སཏྟཱཧཾ ཝིཧཱརེཡེཝ ཝསནྟཱ བུདྡྷཔྤམུཁསྶ བྷིཀྑུསངྒྷསྶ རོཧིཏམཙྪརསེནེཝ དཱནཾ དཏྭཱ སཏྟམེ དིཝསེ སཱཡཾ གེཧཾ ཨགམཾསུ. ཐེརོ ཨཊྛམེ དིཝསེ ཨནྟོགཱམཾ གཙྪནྟོ ཏཾ ཨཱདཱཡ གཙྪཏི, བྷིཀྑུསངྒྷེན སདྡྷིཾ ནཱགམཱསི. ཀིཾ ཀཱརཎཱ? ན ཏཱཝསྶ པཏྟཙཱིཝརགྒཧཎཱནི ཝཱ ཨིརིཡཱཔཐོ ཝཱ པཱསཱདིཀོ ཧོཏི, ཨཔིཙ ཝིཧཱརེ ཐེརསྶ ཀཏྟབྦཝཏྟཾ ཨཏྠི. ཐེརོ ཧི བྷིཀྑུསངྒྷེ ཨནྟོགཱམཾ པཝིཊྛེ སཀལཝིཧཱརཾ ཝིཙརནྟོ ཨསམྨཛྫནཊྛཱནཾ སམྨཛྫིཏྭཱ ཏུཙྪབྷཱཛནེསུ པཱནཱིཡཔརིབྷོཛནཱིཡཱནི ཨུཔཊྛཔེཏྭཱ དུནྣིཀྑིཏྟཱནི མཉྩཔཱིཋཱདཱིནི པཊིསཱམེཏྭཱ པཙྪཱ གཱམཾ པཝིསཏི. ཨཔིཙ ‘‘ཨཉྙཏིཏྠིཡཱ ཏུཙྪཝིཧཱརཾ པཝིསིཏྭཱ ‘པསྶཐ སམཎསྶ གོཏམསྶ སཱཝཀཱནཾ ནིསིནྣཊྛཱནཱནཱི’ཏི ཝཏྟུཾ མཱ ལབྷིཾསཱུ’’ཏི སཀལཝིཧཱརཾ པཊིཛགྒིཏྭཱ པཙྪཱ གཱམཾ པཝིསཏི. ཏསྨཱ ཏཾ དིཝསམྤི སཱམཎེརེན པཏྟཙཱིཝརཾ གཱཧཱཔེཏྭཱ དིཝཱཏརཾ པིཎྜཱཡ པཱཝིསི.

སཱམཎེརོ ཨུཔཛ྄ཛྷཱཡེན སདྡྷིཾ གཙྪནྟོ ཨནྟརཱམགྒེ མཱཏིཀཾ དིསྭཱ, ‘‘བྷནྟེ, ཨིདཾ ཀིཾ ནཱམཱ’’ཏི པུཙྪི. ‘‘མཱཏིཀཱ ནཱམ, སཱམཎེརཱ’’ཏི. ‘‘ཨིམཱཡ ཀིཾ ཀརོནྟཱི’’ཏི? ‘‘ཨིཏོ ཙིཏོ ཙ ཨུདཀཾ ཨཱཧརིཏྭཱ ཨཏྟནོ སསྶཀམྨཾ སམྤཱདེནྟཱི’’ཏི. ‘‘ཀིཾ པན, བྷནྟེ, ཨུདཀསྶ ཙིཏྟཾ ཨཏྠཱི’’ཏི? ‘‘ནཏྠཱཝུསོ’’ཏི. ‘‘ཨེཝརཱུཔཾ ཨཙིཏྟཀཾ ཨཏྟནོ ཨིཙྪིཏཊྛཱནཾ ཧརནྟི, བྷནྟེ’’ཏི? ‘‘ཨཱམཱཝུསོ’’ཏི. སོ ཙིནྟེསི – ‘‘སཙེ ཨེཝརཱུཔམྤི ཨཙིཏྟཀཾ ཨཏྟནོ ཨིཙྪིཏིཙྪིཏཊྛཱནཾ ཧརིཏྭཱ ཀམྨཾ ཀརོནྟི, ཀསྨཱ སཙིཏྟཀཱཔི ཙིཏྟཾ ཨཏྟནོ ཝསེ ཝཏྟེཏྭཱ སམཎདྷམྨཾ ཀཱཏུཾ ན སཀྑིསྶནྟཱི’’ཏི. ཨཐེསོ པུརཏོ གཙྪནྟོ ཨུསུཀཱརེ སརདཎྜཀཾ ཨགྒིམྷི ཏཱཔེཏྭཱ ཨཀྑིཀོཊིཡཱ ཨོལོཀེཏྭཱ ཨུཛུཀཾ ཀརོནྟེ དིསྭཱ, ‘‘ཨིམེ, བྷནྟེ, ཀེ ནཱམཱ’’ཏི པུཙྪི. ‘‘ཨུསུཀཱརཱ ནཱམཱཝུསོ’’ཏི. ‘‘ཀིཾ པནེཏེ ཀརོནྟཱི’’ཏི? ‘‘ཨགྒིམྷི ཏཱཔེཏྭཱ སརདཎྜཀཾ ཨུཛུཾ ཀརོནྟཱི’’ཏི. ‘‘སཙིཏྟཀོ, བྷནྟེ, ཨེསོ’’ཏི? ‘‘ཨཙིཏྟཀོ, ཨཱཝུསོ’’ཏི. སོ ཙིནྟེསི – ‘‘སཙེ ཨཙིཏྟཀཾ གཧེཏྭཱ ཨགྒིམྷི ཏཱཔེཏྭཱ ཨུཛུཾ ཀརོནྟི, ཀསྨཱ སཙིཏྟཀཱཔི ཨཏྟནོ ཙིཏྟཾ ཝསེ ཝཏྟེཏྭཱ སམཎདྷམྨཾ ཀཱཏུཾ ན སཀྑིསྶནྟཱི’’ཏི. ཨཐེསོ པུརཏོ གཙྪནྟོ དཱརཱུནི ཨརནེམིནཱབྷིཨཱདཱིནི ཏཙྪནྟེ དིསྭཱ, ‘‘བྷནྟེ, ཨིམེ ཀེ ནཱམཱ’’ཏི པུཙྪི. ‘‘ཏཙྪཀཱ ནཱམཱཝུསོ’’ཏི. ‘‘ཀིཾ པནེཏེ ཀརོནྟཱི’’ཏི? ‘‘དཱརཱུནི གཧེཏྭཱ ཡཱནཀཱདཱིནཾ ཙཀྐཱདཱིནི ཀརོནྟི, ཨཱཝུསོ’’ཏི. ‘‘ཨེཏཱནི པན སཙིཏྟཀཱནི, བྷནྟེ’’ཏི? ‘‘ཨཙིཏྟཀཱནི, ཨཱཝུསོ’’ཏི. ཨཐསྶ ཨེཏདཧོསི – ‘‘སཙེ ཨཙིཏྟཀཱནི ཀཊྛཀལིངྒརཱནི གཧེཏྭཱ ཙཀྐཱདཱིནི ཀརོནྟི, ཀསྨཱ སཙིཏྟཀཱ ཨཏྟནོ ཙིཏྟཾ ཝསེ ཝཏྟེཏྭཱ སམཎདྷམྨཾ ཀཱཏུཾ ན སཀྑིསྶནྟཱི’’ཏི. སོ ཨིམཱནི ཀཱརཎཱནི དིསྭཱ, ‘‘བྷནྟེ, སཙེ ཏུམྷཱཀཾ པཏྟཙཱིཝརེ ཏུམྷེ གཎྷེཡྻཱཐ, ཨཧཾ ནིཝཏྟེཡྻ’’ནྟི. ཐེརོ ‘‘ཨཡཾ ཨདྷུནཱ པབྦཛིཏོ དཧརསཱམཎེརོ མཾ ཨནུབནྡྷམཱནོ ཨེཝཾ ཝདེཏཱི’’ཏི ཙིཏྟཾ ཨནུཔྤཱདེཏྭཱཝ ‘‘ཨཱཧར, སཱམཎེརཱ’’ཏི ཝཏྭཱ ཨཏྟནོ པཏྟཙཱིཝརཾ ཨགྒཧེསི.

སཱམཎེརོཔི ཨུཔཛ྄ཛྷཱཡཾ ཝནྡིཏྭཱ ནིཝཏྟནྟོ, ‘‘བྷནྟེ, མཡ྄ཧཾ ཨཱཧཱརཾ ཨཱཧརནྟོ རོཧིཏམཙྪརསེནེཝ ཨཱཧརེཡྻཱཐཱ’’ཏི ཨཱཧ. ‘‘ཀཐཾ ལབྷིསྶཱམཱཝུསོ’’ཏི? ‘‘བྷནྟེ, ཨཏྟནོ པུཉྙེན ཨལབྷནྟཱ མམ པུཉྙེན ལབྷིསྶཐཱ’’ཏི ཨཱཧ. ཐེརོ ‘‘དཧརསཱམཎེརསྶ བཧི ནིསིནྣཀསྶ པརིཔནྠོཔི བྷཝེཡྻཱ’’ཏི ཀུཉྫིཀཾ དཏྭཱ ‘‘མཡ྄ཧཾ ཝསནགབྦྷསྶ དྭཱརཾ ཝིཝརིཏྭཱ ཨནྟོ པཝིསིཏྭཱ ནིསཱིདེཡྻཱསཱི’’ཏི ཨཱཧ. སོ ཏཐཱ ཀཏྭཱ ཨཏྟནོ ཀརཛཀཱཡེ ཉཱཎཾ ཨོཏཱརེཏྭཱ ཨཏྟབྷཱཝཾ སམྨསནྟོ ནིསཱིདི. ཨཐསྶ གུཎཏེཛེན སཀྐསྶ ཨཱསནཾ ཨུཎྷཱཀཱརཾ དསྶེསི. སོ ‘‘ཀིཾ ནུ ཁོ ཀཱརཎ’’ནྟི ཨུཔདྷཱརེནྟོ ‘‘པཎྜིཏསཱམཎེརོ ཨུཔཛ྄ཛྷཱཡསྶ པཏྟཙཱིཝརཾ དཏྭཱ ‘སམཎདྷམྨཾ ཀརིསྶཱམཱི’ཏི ནིཝཏྟོ, མཡཱཔི ཏཏྠ གནྟུཾ ཝཊྚཏཱི’’ཏི ཙིནྟེཏྭཱ ཙཏྟཱརོ མཧཱརཱཛེ ཨཱམནྟེཏྭཱ ‘‘ཝིཧཱརསྶ ཨུཔཝནེ ཝསནྟེ སཀུཎེ པལཱཔེཏྭཱ སམནྟཏོ ཨཱརཀྑཾ གཎྷཐཱ’’ཏི ཝཏྭཱ ཙནྡདེཝཔུཏྟཾ ‘‘ཙནྡམཎྜལཾ ཨཱཀཌྜྷིཏྭཱ གཎྷཱཧཱི’’ཏི, སཱུརིཡདེཝཔུཏྟཾ ‘‘སཱུརིཡམཎྜལཾ ཨཱཀཌྜྷིཏྭཱ གཎྷཱཧཱི’’ཏི ཝཏྭཱ སཡཾ གནྟྭཱ ཨཱཝིཉྪནརཛྫུཊྛཱནེ ཨཱརཀྑཾ གཧེཏྭཱ ཨཊྛཱསི, ཝིཧཱརེ པུརཱཎཔཎྞསྶ པཏནྟསྶཔི སདྡོ ནཱཧོསི, སཱམཎེརསྶ ཙིཏྟཾ ཨེཀགྒཾ ཨཧོསི. སོ ཨནྟརཱབྷཏྟེཡེཝ ཨཏྟབྷཱཝཾ སམྨསིཏྭཱ ཏཱིཎི ཕལཱནི པཱཔུཎི.

ཐེརོཔི ‘‘སཱམཎེརོ ཝིཧཱརེ ནིསིནྣོ, ཏསྶ ཨུཔཀཔྤནཀཾ བྷོཛནཾ ཨསུཀཀུལེ ནཱམ སཀྐཱ ལདྡྷུ’’ནྟི ཨེཀཾ པེམགཱརཝཡུཏྟཾ ཨུཔཊྛཱཀཀུལཾ ཨགམཱསི. ཏཏྠ ཙ མནུསྶཱ ཏཾ དིཝསཾ རོཧིཏམཙྪེ ལབྷིཏྭཱ ཐེརསྶེཝ ཨཱགམནཾ ཨོལོཀེནྟོ ནིསཱིདིཾསུ. ཏེ ཐེརཾ ཨཱགཙྪནྟཾ དིསྭཱ, ‘‘བྷནྟེ, བྷདྡཀཾ ཝོ ཀཏཾ ཨིདྷཱགཙྪནྟེཧཱི’’ཏི ཨནྟོགེཧེ པཝེསེཏྭཱ ཡཱགུཁཛྫཀཱདཱིནི དཏྭཱ རོཧིཏམཙྪརསེནསྶ པིཎྜཔཱཏཾ ཨདཾསུ. ཐེརོ ཧརཎཱཀཱརཾ དསྶེསི. མནུསྶཱ ‘‘པརིབྷུཉྫཐ, བྷནྟེ, ཧརཎཀབྷཏྟམྤི ལབྷིསྶཐཱ’’ཏི ཝཏྭཱ ཐེརསྶ བྷཏྟཀིཙྩཱཝསཱནེ པཏྟཾ རོཧིཏམཙྪརསབྷོཛནསྶ པཱུརེཏྭཱ ཨདཾསུ. ཐེརོ ‘‘སཱམཎེརོ མེ ཚཱཏོ’’ཏི སཱིགྷཾ ཨགམཱསི. སཏྠཱཔི ཏཾ དིཝསཾ ཀཱལསྶེཝ བྷུཉྫིཏྭཱ ཝིཧཱརཾ གནྟྭཱ ཨེཝཾ ཨཱཝཛྫེསི – ‘‘པཎྜིཏསཱམཎེརོ ཨུཔཛ྄ཛྷཱཡསྶ པཏྟཙཱིཝརཾ དཏྭཱ ‘སམཎདྷམྨཾ ཀརིསྶཱམཱི’ཏི ནིཝཏྟོ, ནིཔྥཛྫིསྶཏི ནུ ཁོ ཨསྶ པབྦཛིཏཀིཙྩ’’ནྟི ཨུཔདྷཱརེནྟོ ཏིཎྞཾ ཕལཱནཾ པཏྟབྷཱཝཾ ཉཏྭཱ ‘‘ཨརཧཏྟསྶ ཨུཔནིསྶཡོ ཨཏྠི, ནཏྠཱི’’ཏི ཨཱཝཛྫེནྟོ ‘‘ཨཏྠཱི’’ཏི དིསྭཱ ‘‘པུརེབྷཏྟམེཝ ཨརཧཏྟཾ པཏྟུཾ སཀྑིསྶཏི, ན སཀྑིསྶཏཱི’’ཏི ཨུཔདྷཱརེནྟོ ‘‘སཀྑིསྶཏཱི’’ཏི ཨཉྙཱསི. ཨཐསྶ ཨེཏདཧོསི – ‘‘སཱརིཔུཏྟོ སཱམཎེརསྶ བྷཏྟཾ ཨཱདཱཡ སཱིགྷཾ ཨཱགཙྪཏི, ཨནྟརཱཡམྤིསྶ ཀརེཡྻ དྭཱརཀོཊྛཀེ ཨཱརཀྑཾ གཧེཏྭཱ ནིསཱིདིསྶཱམི, ཨཐ ནཾ པཉྷཾ པུཙྪིསྶཱམི, ཏསྨིཾ པཉྷེ ཝིསྶཛྫིཡམཱནེ སཱམཎེརོ སཧ པཊིསམྦྷིདཱཧི ཨརཧཏྟཾ པཱཔུཎིསྶཏཱི’’ཏི. ཏཏོ གནྟྭཱ དྭཱརཀོཊྛཀེ ཋཏྭཱ སམྤཏྟཾ ཐེརཾ ཙཏྟཱརོ པཉྷེ པུཙྪི, པུཊྛཾ པུཊྛཾ པཉྷཾ ཝིསྶཛྫེསི.

ཏཏྲིདཾ པུཙྪཱཝིསྶཛྫནཾ – སཏྠཱ ཀིར ནཾ ཨཱཧ – ‘‘སཱརིཔུཏྟ, ཀིཾ ཏེ ལདྡྷ’’ནྟི? ‘‘ཨཱཧཱརོ, བྷནྟེ’’ཏི. ‘‘ཨཱཧཱརོ ནཱམ ཀིཾ ཨཱཧརཏི, སཱརིཔུཏྟཱ’’ཏི? ‘‘ཝེདནཾ, བྷནྟེ’’ཏི. ‘‘ཝེདནཾ ཀིཾ ཨཱཧརཏི, སཱརིཔུཏྟཱ’’ཏི? ‘‘རཱུཔཾ, བྷནྟེ’’ཏི. ‘‘རཱུཔཾ པན ཀིཾ ཨཱཧརཏི, སཱརིཔུཏྟཱ’’ཏི? ‘‘ཕསྶཾ, བྷནྟེ’’ཏི. ཏཏྲཱཡཾ ཨདྷིཔྤཱཡོ – ‘‘ཛིགྷཙྪིཏེན ཧི པརིབྷུཏྟོ ཨཱཧཱརོ ཏསྶ ཁུདྡཾ པརིཧརིཏྭཱ སུཁཾ ཝེདནཾ ཨཱཧརཏི. ཨཱཧཱརཔརིབྷོགེན སུཁིཏསྶ སུཁཱཡ ཝེདནཱཡ ཨུཔྤཛྫམཱནཱཡ སརཱིརེ ཝཎྞསམྤཏྟི ཧོཏི. ཨེཝཾ ཝེདནཱ རཱུཔཾ ཨཱཧརཏི. སུཁིཏོ པན ཨཱཧཱརཛརཱུཔཝསེན ཨུཔྤནྣསུཁསོམནསྶོ ‘ཨིདཱནི མེ ཨསྶཱདོ ཛཱཏོ’ཏི ནིཔྤཛྫནྟོ ཝཱ ནིསཱིདནྟོ ཝཱ སུཁསམྥསྶཾ པཊིལབྷཏཱི’’ཏི.

ཨེཝཾ ཨིམེསུ ཙཏཱུསུ པཉྷེསུ ཝིསྶཛྫིཀེསུ སཱམཎེརོ སཧ པཊིསམྦྷིདཱཧི ཨརཧཏྟཾ པཏྟོ. སཏྠཱཔི ཐེརཾ ཨཱཧ – ‘‘གཙྪ, སཱརིཔུཏྟ, ཏཝ སཱམཎེརསྶ བྷཏྟཾ དེཧཱི’’ཏི. ཐེརོ གནྟྭཱ དྭཱརཾ ཨཱཀོཊེསི. སཱམཎེརོ ནིཀྑམིཏྭཱ ཐེརསྶ ཧཏྠཏོ པཏྟཾ གཧེཏྭཱ ཨེཀམནྟཾ ཋཔེཏྭཱ ཏཱལཝཎྚེན ཐེརཾ བཱིཛི. ཨཐ ནཾ ཐེརོ ཨཱཧ – ‘‘སཱམཎེར, བྷཏྟཀིཙྩཾ ཀརོཧཱི’’ཏི. ‘‘ཏུམྷེ པན, བྷནྟེ’’ཏི. ‘‘ཀཏཾ མཡཱ བྷཏྟཀིཙྩཾ, ཏྭཾ ཀརོཧཱི’’ཏི. སཏྟཝསྶིཀདཱརཀོ པབྦཛིཏྭཱ ཨཊྛམེ དིཝསེ ཏཾ ཁཎཾ ཝིཀསིཏཔདུམུཔྤལསདིསོ ཨརཧཏྟཾ པཏྟོ, པཙྩཝེཀྑིཏཊྛཱནཾ པན པཙྩཝེཀྑནྟོ ནིསཱིདིཏྭཱ བྷཏྟཀིཙྩམཀཱསི. ཏེན པཏྟཾ དྷོཝིཏྭཱ པཊིསཱམིཏཀཱལེ ཙནྡདེཝཔུཏྟོ ཙནྡམཎྜལཾ ཝིསྶཛྫེསི, སཱུརིཡདེཝཔུཏྟོ སཱུརིཡམཎྜལཾ. ཙཏྟཱརོ མཧཱརཱཛཱནོ ཙཏུདྡིསཾ ཨཱརཀྑཾ ཝིསྶཛྫེསུཾ, སཀྐོ དེཝརཱཛཱ ཨཱཝིཉྪནཀེ ཨཱརཀྑཾ ཝིསྶཛྫེསི. སཱུརིཡོ མཛ྄ཛྷཊྛཱནཏོ གལིཏྭཱ གཏོ.

བྷིཀྑཱུ ཨུཛ྄ཛྷཱཡིཾསུ, ‘‘ཚཱཡཱ ཨདྷིཀཔྤམཱཎཱ ཛཱཏཱ, སཱུརིཡོ མཛ྄ཛྷཊྛཱནཏོ གལིཏྭཱ གཏོ, སཱམཎེརེན ཙ ཨིདཱནེཝ བྷུཏྟཾ, ཀིཾ ནུ ཁོ ཨེཏ’’ནྟི. སཏྠཱ ཏཾ པཝཏྟིཾ ཉཏྭཱ ཨཱགནྟྭཱ པུཙྪི – ‘‘བྷིཀྑཝེ, ཀིཾ ཀཐེཐཱ’’ཏི? ‘‘ཨིདཾ ནཱམ, བྷནྟེ’’ཏི? ‘‘ཨཱམ, བྷིཀྑཝེ, པུཉྙཝཏོ སམཎདྷམྨཾ ཀརཎཀཱལེ ཙནྡདེཝཔུཏྟོ ཙནྡམཎྜལཾ, སཱུརིཡདེཝཔུཏྟོ སཱུརིཡམཎྜལཾ ཨཱཀཌྜྷིཏྭཱ གཎྷི, ཙཏྟཱརོ མཧཱརཱཛཱནོ ཝིཧཱརོཔཝནེ ཙཏུདྡིསཾ ཨཱརཀྑཾ གཎྷིཾསུ, སཀྐོ དེཝརཱཛཱ ཨཱཝིཉྪནཀེ ཨཱརཀྑཾ གཎྷི, ཨཧམྤི ‘བུདྡྷོམྷཱི’ཏི ཨཔྤོསྶུཀྐོ ནིསཱིདིཏུཾ ནཱལཏྠཾ, གནྟྭཱ དྭཱརཀོཊྛཀེ མམ པུཏྟསྶ ཨཱརཀྑཾ ཨགྒཧེསིཾ, ནེཏྟིཀེ ཙ མཱཏིཀཱཡ ཨུདཀཾ ཧརནྟེ, ཨུསུཀཱརེ ཙ ཨུསུཾ ཨུཛུཾ ཀརོནྟེ, ཏཙྪཀེ ཙ དཱརཱུནི ཏཙྪནྟེ དིསྭཱ ཨེཏྟཀཾ ཨཱརམྨཎཾ གཧེཏྭཱ པཎྜིཏཱ ཨཏྟཱནཾ དམེཏྭཱ ཨརཧཏྟཾ གཎྷནྟིཡེཝཱ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༨༠.

‘‘ཨུདཀཉྷི ནཡནྟི ནེཏྟིཀཱ, ཨུསུཀཱརཱ ནམཡནྟི ཏེཛནཾ;

དཱརུཾ ནམཡནྟི ཏཙྪཀཱ, ཨཏྟཱནཾ དམཡནྟི པཎྜིཏཱ’’ཏི.

ཏཏྠ ཨུདཀནྟི པཐཝིཡཱ ཐལཊྛཱནཾ ཁཎིཏྭཱ ཨཱཝཱཊཊྛཱནཾ པཱུརེཏྭཱ མཱཏིཀཾ ཝཱ ཀཏྭཱ རུཀྑདོཎིཾ ཝཱ ཋཔེཏྭཱ ཨཏྟནཱ ཨིཙྪིཏིཙྪིཏཊྛཱནཾ ཨུདཀཾ. ནེནྟཱིཏི ནེཏྟིཀཱ. ཏེཛནནྟི ཀཎྜཾ. ཨིདཾ ཝུཏྟཾ ཧོཏི – ནེཏྟིཀཱ ཨཏྟནོ རུཙིཡཱ ཨུདཀཾ ནཡནྟི, ཨུསུཀཱརཱཔི ཏཱཔེཏྭཱ ཏེཛནཾ ནམཡནྟི ཨུསུཾ ཨུཛུཾ ཀརོནྟི. ཏཙྪཀཱཔི ནེམིཨཱདཱིནཾ ཨཏྠཱཡ ཏཙྪནྟཱ དཱརུཾ ནམཡནྟི ཨཏྟནོ རུཙིཡཱ ཨུཛུཾ ཝཱ ཝངྐཾ ཝཱ ཀརོནྟི. ཨེཝཾ ཨེཏྟཀཾ ཨཱརམྨཎཾ ཀཏྭཱ པཎྜིཏཱ སོཏཱཔཏྟིམགྒཱདཱིནི ཨུཔྤཱདེནྟཱ ཨཏྟཱནཾ དམཡནྟི, ཨརཧཏྟཔྤཏྟཱ པན ཨེཀནྟདནྟཱ ནཱམ ཧོནྟཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པཎྜིཏསཱམཎེརཝཏྠུ པཉྩམཾ.

༦. ལཀུཎྜཀབྷདྡིཡཏྠེརཝཏྠུ

སེལོ ཡཐཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ལཀུཎྜཀབྷདྡིཡཏྠེརཾ ཨཱརབྦྷ ཀཐེསི.

པུཐུཛྫནཱ ཀིར སཱམཎེརཱདཡོ ཐེརཾ དིསྭཱ སཱིསེཔི ཀཎྞེསུཔི ནཱསཱཡཔི གཧེཏྭཱ ‘‘ཀིཾ, ཙཱུལ༹པིཏ, སཱསནསྨིཾ ན ཨུཀྐཎྛསི, ཨབྷིརམསཱི’’ཏི ཝདནྟི. ཐེརོ ཏེསུ ནེཝ ཀུཛ྄ཛྷཏི, ན དུསྶཏི. དྷམྨསབྷཱཡཾ ཀཐཾ སམུཊྛཱཔེསུཾ ‘‘པསྶཐཱཝུསོ, ལཀུཎྜཀབྷདྡིཡཏྠེརཾ དིསྭཱ སཱམཎེརཱདཡོ ཨེཝཉྩེཝཉྩ ཝིཧེཋེནྟི, སོ ཏེསུ ནེཝ ཀུཛ྄ཛྷཏི, ན དུསྶཏཱི’’ཏི. སཏྠཱ ཨཱགནྟྭཱ ‘‘ཀིཾ ཀཐེཐ, བྷིཀྑཝེ’’ཏི པུཙྪིཏྭཱ ‘‘ཨིམཾ ནཱམ, བྷནྟེ’’ཏི ཝུཏྟེ ‘‘ཨཱམ, བྷིཀྑཝེ, ཁཱིཎཱསཝཱ ནཱམ ནེཝ ཀུཛ྄ཛྷནྟི, ན དུསྶནྟི. གྷནསེལསདིསཱ ཧེཏེ ཨཙལཱ ཨཀམྤིཡཱ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༨༡.

‘‘སེལོ ཡཐཱ ཨེཀགྷནོ, ཝཱཏེན ན སམཱིརཏི;

ཨེཝཾ ནིནྡཱཔསཾསཱསུ, ན སམིཉྫནྟི པཎྜིཏཱ’’ཏི.

ཏཏྠ ནིནྡཱཔསཾསཱསཱུཏི ཀིཉྩཱཔི ཨིདྷ དྭེ ལོཀདྷམྨཱ ཝུཏྟཱ, ཨཏྠོ པན ཨཊྛནྣམྤི ཝསེན ཝེདིཏབྦོ. ཡཐཱ ཧི ཨེཀགྷནོ ཨསུསིརོ སེལོ པུརཏྠིམཱདིབྷེདེན ཝཱཏེན ན སམཱིརཏི ན ཨིཉྫཏི ན ཙལཏི, ཨེཝཾ ཨཊྛསུཔི ལོཀདྷམྨེསུ ཨཛ྄ཛྷོཏྠརནྟེསུ པཎྜིཏཱ ན སམིཉྫནྟི, པཊིགྷཝསེན ཝཱ ཨནུནཡཝསེན ཝཱ ན ཙལནྟི ན ཀམྤནྟི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ལཀུཎྜཀབྷདྡིཡཏྠེརཝཏྠུ ཚཊྛཾ.

༧. ཀཱཎམཱཏུཝཏྠུ

ཡཐཱཔི རཧདོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀཱཎམཱཏརཾ ཨཱརབྦྷ ཀཐེསི. ཝཏྠུ ཝིནཡེ (པཱཙི. ༢༣༠) ཨཱགཏམེཝ.

ཏདཱ པན ཀཱཎམཱཏརཱ ཨཏུཙྪཧཏྠཾ དྷཱིཏརཾ པཏིཀུལཾ པེསེཏུཾ པཀྐེསུ པཱུཝེསུ ཙཏུཀྑཏྟུཾ ཙཏུནྣཾ བྷིཀྑཱུནཾ དིནྣཀཱལེ སཏྠཱརཱ ཏསྨིཾ ཝཏྠུསྨིཾ སིཀྑཱཔདེ པཉྙཏྟེ ཀཱཎཱཡ སཱམིཀེན ཨཉྙཱཡ པཛཱཔཏིཡཱ ཨཱནཱིཏཱཡ ཀཱཎཱ ཏཾ པཝཏྟིཾ སུཏྭཱ ‘‘ཨིམེཧི མེ གྷརཱཝཱསོ ནཱསིཏོ’’ཏི དིཊྛདིཊྛེ བྷིཀྑཱུ ཨཀྐོསཏི པརིབྷཱསཏི. བྷིཀྑཱུ ཏཾ ཝཱིཐིཾ པཊིཔཛྫིཏུཾ ན ཝིསཧིཾསུ. སཏྠཱ ཏཾ པཝཏྟིཾ ཉཏྭཱ ཏཏྠ ཨགམཱསི. ཀཱཎམཱཏཱ སཏྠཱརཾ ཝནྡིཏྭཱ པཉྙཏྟཱསནེ ནིསཱིདཱཔེཏྭཱ ཡཱགུཁཛྫཀཾ ཨདཱསི. སཏྠཱ ཀཏཔཱཏརཱསོ ‘‘ཀཧཾ ཀཱཎཱ’’ཏི པུཙྪི. ‘‘ཨེསཱ, བྷནྟེ, ཏུམྷེ དིསྭཱ མངྐུབྷཱུཏཱ རོདནྟཱི ཋིཏཱ’’ཏི. ‘‘ཀིཾ ཀཱརཎཱ’’ཏི? ‘‘ཨེསཱ, བྷནྟེ, བྷིཀྑཱུ ཨཀྐོསཏི པརིབྷཱསཏི, ཏསྨཱ ཏུམྷེ དིསྭཱ མངྐུབྷཱུཏཱ རོདམཱནཱ ཋིཏཱ’’ཏི. ཨཐ ནཾ སཏྠཱ པཀྐོསཱཔེཏྭཱ – ‘‘ཀཱཎེ, ཀསྨཱ མཾ དིསྭཱ མངྐུབྷཱུཏཱ ནིལཱིཡིཏྭཱ རོདསཱི’’ཏི. ཨཐསྶཱ མཱཏཱ ཏཱཡ ཀཏཀིརིཡཾ ཨཱརོཙེསི. ཨཐ ནཾ སཏྠཱ ཨཱཧ – ‘‘ཀིཾ པན ཀཱཎམཱཏེ མམ སཱཝཀཱ ཏཡཱ དིནྣཀཾ གཎྷིཾསུ, ཨདིནྣཀ’’ནྟི? ‘‘དིནྣཀཾ, བྷནྟེ’’ཏི. ‘‘སཙེ མམ སཱཝཀཱ པིཎྜཱཡ ཙརནྟཱ ཏཝ གེཧདྭཱརཾ པཏྟཱ ཏཡཱ དིནྣཀཾ གཎྷིཾསུ, ཀོ ཏེསཾ དོསོ’’ཏི? ‘‘ནཏྠི, བྷནྟེ, ཨཡྻཱནཾ དོསོ’’. ‘‘ཨེཏིསྶཱཡེཝ དོསོ’’ཏི. སཏྠཱ ཀཱཎཾ ཨཱཧ – ‘‘ཀཱཎེ, མཡ྄ཧཾ ཀིར སཱཝཀཱ པིཎྜཱཡ ཙརམཱནཱ གེཧདྭཱརཾ ཨཱགཏཱ, ཨཐ ནེསཾ ཏཝ མཱཏརཱ པཱུཝཱ དིནྣཱ, ཀོ ནཱམེཏྠ མམ སཱཝཀཱནཾ དོསོ’’ཏི? ‘‘ནཏྠི, བྷནྟེ, ཨཡྻཱནཾ དོསོ, མཡ྄ཧམེཝ དོསོ’’ཏི སཏྠཱརཾ ཝནྡིཏྭཱ ཁམཱཔེསི.

ཨཐསྶཱ སཏྠཱ ཨནུཔུབྦིཾ ཀཐཾ ཀཐེསི, སཱ སོཏཱཔཏྟིཕལཾ པཱཔུཎི. སཏྠཱ ཨུཊྛཱཡཱསནཱ ཝིཧཱརཾ གཙྪནྟོ རཱཛངྒཎེན པཱཡཱསི. རཱཛཱ དིསྭཱ ‘‘སཏྠཱ ཝིཡ བྷཎེ’’ཏི པུཙྪིཏྭཱ ‘‘ཨཱམ, དེཝཱ’’ཏི ཝུཏྟེ ‘‘གཙྪཐ, མམ ཨཱགནྟྭཱ ཝནྡནབྷཱཝཾ ཨཱརོཙེཐཱ’’ཏི པེསེཏྭཱ རཱཛངྒཎེ ཋིཏཾ སཏྠཱརཾ ཨུཔསངྐམིཏྭཱ ཝནྡིཏྭཱ ‘‘ཀཧཾ, བྷནྟེ, གཏཱཏྠཱ’’ཏི པུཙྪི. ‘‘ཀཱཎམཱཏཱཡ གེཧཾ, མཧཱརཱཛཱ’’ཏི. ‘‘ཀིཾ ཀཱརཎཱ, བྷནྟེ’’ཏི? ‘‘ཀཱཎཱ ཀིར བྷིཀྑཱུ ཨཀྐོསཏི པརིབྷཱསཏི, ཏཾཀཱརཎཱ གཏོམྷཱི’’ཏི. ‘‘ཀིཾ པན ཝོ, བྷནྟེ, ཏསྶཱ ཨནཀྐོསནབྷཱཝོ ཀཏོ’’ཏི? ‘‘ཨཱམ, མཧཱརཱཛ, བྷིཀྑཱུནཉྩ ཨནཀྐོསིཀཱ ཀཏཱ, ལོཀུཏྟརཀུཊུམྦསཱམིནཱི ཙཱ’’ཏི. ‘‘ཧོཏུ, བྷནྟེ, ཏུམྷེཧི སཱ ལོཀུཏྟརཀུཊུམྦསཱམིནཱི ཀཏཱ, ཨཧཾ པན ནཾ ལོཀིཡཀུཊུམྦསཱམིནིཾ ཀརིསྶཱམཱི’’ཏི ཝཏྭཱ རཱཛཱ སཏྠཱརཾ ཝནྡིཏྭཱ པཊིནིཝཏྟོ པཊིཙྪནྣམཧཱཡོགྒཾ པཧིཎིཏྭཱ ཀཱཎཾ པཀྐོསཱཔེཏྭཱ སབྦཱབྷརཎེཧི ཨལངྐརིཏྭཱ ཛེཊྛདྷཱིཏུཊྛཱནེ ཋཔེཏྭཱ ‘‘མམ དྷཱིཏརཾ པོསེཏུཾ སམཏྠཱ གཎྷནྟཱུ’’ཏི ཨཱཧ. ཨཐེཀོ སབྦཏྠཀམཧཱམཏྟོ ‘‘ཨཧཾ དེཝསྶ དྷཱིཏརཾ པོསེསྶཱམཱི’’ཏི ཏཾ ཨཏྟནོ གེཧཾ ནེཏྭཱ སབྦཾ ཨིསྶརིཡཾ པཊིཙྪཱཔེཏྭཱ ‘‘ཡཐཱརུཙི པུཉྙཱནི ཀརོཧཱི’’ཏི ཨཱཧ. ཏཏོ པཊྛཱཡ ཀཱཎཱ ཙཏཱུསུ དྭཱརེསུ པུརིསེ ཋཔེཏྭཱ ཨཏྟནཱ ཨུཔཊྛཱཏབྦེ བྷིཀྑཱུ ཙ བྷིཀྑུནིཡོ ཙ པརིཡེསམཱནཱཔི ན ལབྷཏི. ཀཱཎཱཡ གེཧདྭཱརེ པཊིཡཱདེཏྭཱ ཋཔིཏཾ ཁཱདནཱིཡབྷོཛནཱིཡཾ མཧོགྷོ ཝིཡ པཝཏྟཏི. བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘པུབྦེ, ཨཱཝུསོ, ཙཏྟཱརོ མཧལླཀཏྠེརཱ ཀཱཎཱཡ ཝིཔྤཊིསཱརཾ ཀརིཾསུ, སཱ ཨེཝཾ ཝིཔྤཊིསཱརིནཱི ཧུཏྭཱཔི སཏྠཱརཾ ཨཱགམྨ སདྡྷཱསམྤདཾ ལབྷི. སཏྠཱརཱ པུན ཏསྶཱ གེཧདྭཱརཾ བྷིཀྑཱུནཾ ཨུཔསངྐམནཱརཧཾ ཀཏཾ. ཨིདཱནི ཨུཔཊྛཱཏབྦེ བྷིཀྑཱུ ཝཱ བྷིཀྑུནིཡོ ཝཱ པརིཡེསམཱནཱཔི ན ལབྷཏི, ཨཧོ བུདྡྷཱ ནཱམ ཨཙྪརིཡགུཎཱ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ ཏེཧི མཧལླཀབྷིཀྑཱུཧི ཀཱཎཱཡ ཝིཔྤཊིསཱརོ ཀཏོ, པུབྦེཔི ཀརིཾསུཡེཝ. ན ཙ ཨིདཱནེཝ མཡཱ ཀཱཎཱ མམ ཝཙནཀཱརིཀཱ ཀཏཱ, པུབྦེཔི ཀཏཱཡེཝཱ’’ཏི ཝཏྭཱ ཏམཏྠཾ སོཏུཀཱམེཧི བྷིཀྑཱུཧི ཡཱཙིཏོ –

‘‘ཡཏྠེཀོ ལབྷཏེ བབྦུ, དུཏིཡོ ཏཏྠ ཛཱཡཏི;

ཏཏིཡོ ཙ ཙཏུཏྠོ ཙ, ཨིདཾ ཏེ བབྦུཀཱ བིལ’’ནྟི. (ཛཱ. ༡.༡.༡༣༧) –

ཨིདཾ བབྦུཛཱཏཀཾ ཝིཏྠཱརེན ཀཐེཏྭཱ ‘‘ཏདཱ ཙཏྟཱརོ མཧལླཀབྷིཀྑཱུ ཙཏྟཱརོ བིལཱ༹རཱ ཨཧེསུཾ, མཱུསིཀཱ ཀཱཎཱ, མཎིཀཱརོ ཨཧམེཝཱ’’ཏི ཛཱཏཀཾ སམོདྷཱནེཏྭཱ ‘‘ཨེཝཾ, བྷིཀྑཝེ, ཨཏཱིཏེཔི ཀཱཎཱ དུམྨནཱ ཨཱཝིལཙིཏྟཱ ཝིཀྑིཏྟཙིཏྟཱ ཧུཏྭཱ མམ ཝཙནེན པསནྣཨུདཀརཧདོ ཝིཡ ཝིཔྤསནྣཙིཏྟཱ ཨཧོསཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༨༢.

‘‘ཡཐཱཔི རཧདོ གམྦྷཱིརོ, ཝིཔྤསནྣོ ཨནཱཝིལོ;

ཨེཝཾ དྷམྨཱནི སུཏྭཱན, ཝིཔྤསཱིདནྟི པཎྜིཏཱ’’ཏི.

ཏཏྠ རཧདོཏི ཡོ ཙཏུརངྒིནིཡཱཔི སེནཱཡ ཨོགཱཧནྟིཡཱ ནཁུབྷཏི ཨེཝརཱུཔོ ཨུདཀཎྞཝོ, སབྦཱཀཱརེན པན ཙཏུརཱསཱིཏིཡོཛནསཧསྶགམྦྷཱིརོ ནཱིལམཧཱསམུདྡོ རཧདོ ནཱམ. ཏསྶ ཧི ཧེཊྛཱ ཙཏྟཱལཱིསཡོཛནསཧསྶམཏྟེ ཋཱནེ ཨུདཀཾ མཙྪེཧི ཙལཏི, ཨུཔརི ཏཱཝཏྟཀེཡེཝ ཋཱནེ ཨུདཀཾ ཝཱཏེན ཙལཏི, མཛ྄ཛྷེ ཙཏུཡོཛནསཧསྶམཏྟེ ཋཱནེ ཨུདཀཾ ནིཙྩལཾ ཏིཊྛཏི. ཨཡཾ གམྦྷཱིརོ རཧདོ ནཱམ. ཨེཝཾ དྷམྨཱནཱིཏི དེསནཱདྷམྨཱནི. ཨིདཾ ཝུཏྟཾ ཧོཏི – ཡཐཱ ནཱམ རཧདོ ཨནཱཀུལཏཱཡ ཝིཔྤསནྣོ, ཨཙལཏཱཡ ཨནཱཝིལོ, ཨེཝཾ མམ དེསནཱདྷམྨཾ སུཏྭཱ སོཏཱཔཏྟིམགྒཱདིཝསེན ནིརུཔཀྐིལེསཙིཏྟཏཾ ཨཱཔཛྫནྟཱ ཝིཔྤསཱིདནྟི པཎྜིཏཱ, ཨརཧཏྟཔྤཏྟཱ པན ཨེཀནྟཝིཔྤསནྣཱཝ ཧོནྟཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཀཱཎམཱཏུཝཏྠུ སཏྟམཾ.

༨. པཉྩསཏབྷིཀྑུཝཏྠུ

སབྦཏྠ ཝེ སཔྤུརིསཱ ཙཛནྟཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩསཏེ བྷིཀྑཱུ ཨཱརབྦྷ ཀཐེསི. དེསནཱ ཝེརཉྫཱཡཾ སམུཊྛིཏཱ.

པཋམབོདྷིཡཉྷི བྷགཝཱ ཝེརཉྫཾ གནྟྭཱ ཝེརཉྫེན བྲཱཧྨཎེན ནིམནྟིཏོ པཉྩཧི བྷིཀྑུསཏེཧི སདྡྷིཾ ཝསྶཾ ཨུཔགཉྪི. ཝེརཉྫོ བྲཱཧྨཎོ མཱརཱཝཊྚནེན ཨཱཝཊྚོ ཨེཀདིཝསམྤི སཏྠཱརཾ ཨཱརབྦྷ སཏིཾ ན ཨུཔྤཱདེསི. ཝེརཉྫཱཔི དུབྦྷིཀྑཱ ཨཧོསི, བྷིཀྑཱུ སནྟརབཱཧིརཾ ཝེརཉྫཾ པིཎྜཱཡ ཙརིཏྭཱ པིཎྜཔཱཏཾ ཨལབྷནྟཱ ཀིལམིཾསུ. ཏེསཾ ཨསྶཝཱཎིཛཀཱ པཏྠཔཏྠཔུལཀཾ བྷིཀྑཾ པཉྙཱཔེསུཾ. ཏེ ཀིལམནྟེ དིསྭཱ མཧཱམོགྒལླཱནཏྠེརོ པཐཝོཛཾ བྷོཛེཏུཀཱམོ, ཨུཏྟརཀུརུཉྩ པིཎྜཱཡ པཝེསེཏུཀཱམོ ཨཧོསི, སཏྠཱ ཏཾ པཊིཀྑིཔི. བྷིཀྑཱུནཾ ཨེཀདིཝསམྤི པིཎྜཔཱཏཾ ཨཱརབྦྷ པརིཏྟཱསོ ནཱཧོསི, ཨིཙྪཱཙཱརཾ ཝཛྫེཏྭཱ ཨེཝ ཝིཧརིཾསུ. སཏྠཱ ཏཏྠ ཏེམཱསཾ ཝསིཏྭཱ ཝེརཉྫཾ བྲཱཧྨཎཾ ཨཔལོཀེཏྭཱ ཏེན ཀཏསཀྐཱརསམྨཱནོ ཏཾ སརཎེསུ པཏིཊྛཱཔེཏྭཱ ཏཏོ ནིཀྑནྟོ ཨནུཔུབྦེན ཙཱརིཀཾ ཙརམཱནོ ཨེཀསྨིཾ སམཡེ སཱཝཏྠིཾ པཏྭཱ ཛེཏཝནེ ཝིཧཱསི, སཱཝཏྠིཝཱསིནོ སཏྠུ ཨཱགནྟུཀབྷཏྟཱནི ཀརིཾསུ. ཏདཱ པན པཉྩསཏམཏྟཱ ཝིགྷཱསཱདཱ བྷིཀྑཱུ ནིསྶཱཡ ཨནྟོཝིཧཱརེཡེཝ ཝསནྟི. ཏེ བྷིཀྑཱུནཾ བྷུཏྟཱཝསེསཱནི པཎཱིཏབྷོཛནཱནི བྷུཉྫིཏྭཱ ནིདྡཱཡིཏྭཱ ཨུཊྛཱཡ ནདཱིཏཱིརཾ གནྟྭཱ ནདནྟཱ ཝགྒནྟཱ མལླམུཊྛིཡུདྡྷཾ ཡུཛ྄ཛྷནྟཱ ཀཱིལ༹ནྟཱ ཨནྟོཝིཧཱརེཔི བཧིཝིཧཱརེཔི ཨནཱཙཱརམེཝ ཙརནྟཱ ཝིཙརནྟི. བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘པསྶཐཱཝུསོ, ཨིམེ ཝིགྷཱསཱདཱ དུབྦྷིཀྑཀཱལེ ཝེརཉྫཱཡཾ ཀཉྩི ཝིཀཱརཾ ན དསྶེསུཾ, ཨིདཱནི པན ཨེཝརཱུཔཱནི པཎཱིཏབྷོཛནཱནི བྷུཉྫིཏྭཱ ཨནེཀཔྤཀཱརཾ ཝིཀཱརཾ དསྶེནྟཱ ཝིཙརནྟི. བྷིཀྑཱུ པན ཝེརཉྫཱཡམྤི ཨུཔསནྟརཱུཔཱ ཝིཧརིཏྭཱ ཨིདཱནིཔི ཨུཔསནྟུཔསནྟཱཝ ཝིཧརནྟཱི’’ཏི. སཏྠཱ དྷམྨསབྷཾ གནྟྭཱ, ‘‘བྷིཀྑཝེ, ཀིཾ ཀཐེཐཱ’’ཏི པུཙྪིཏྭཱ ‘‘ཨིདཾ ནཱམཱ’’ཏི ཝུཏྟེ ‘‘པུབྦེཔེཏེ གདྲབྷཡོནིཡཾ ནིབྦཏྟཱ པཉྩསཏཱ གདྲབྷཱ ཧུཏྭཱ པཉྩསཏཱནཾ ཨཱཛཱནཱིཡསིནྡྷཝཱནཾ ཨལླརསམུདྡིཀཔཱནཀཔཱིཏཱཝསེསཾ ཨུཙྪིཊྛཀསཊཾ ཨུདཀེན མདྡིཏྭཱ མཀཙིཔིལོཏིཀཱཧི པརིསྶཱཝིཏཏྟཱ ‘ཝོལོདཀ’ནྟི སངྑྱཾ གཏཾ ཨཔྤརསཾ ནིཧཱིནཾ པིཝིཏྭཱ མདྷུམཏྟཱ ཝིཡ ནདནྟཱ ཝིཙརིཾསཱུཏི ཝཏྭཱ –

‘‘ཝཱལོདཀཾ ཨཔྤརསཾ ནིཧཱིནཾ,

པིཏྭཱ མདོ ཛཱཡཏི གདྲབྷཱནཾ;

ཨིམཉྩ པིཏྭཱན རསཾ པཎཱིཏཾ,

མདོ ན སཉྫཱཡཏི སིནྡྷཝཱནཾ.

‘‘ཨཔྤཾ པིཝིཏྭཱན ནིཧཱིནཛཙྩོ,

སོ མཛྫཏཱི ཏེན ཛནིནྡ པུཊྛོ;

དྷོརཡ྄ཧསཱིལཱི ཙ ཀུལམྷི ཛཱཏོ,

ན མཛྫཏཱི ཨགྒརསཾ པིཝིཏྭཱ’’ཏི. (ཛཱ. ༡.༢.༦༥);

ཨིདཾ ཝཱལོདཀཛཱཏཀཾ ཝིཏྠཱརེན ཀཐེཏྭཱ ‘‘ཨེཝཾ, བྷིཀྑཝེ, སཔྤུརིསཱ ལོཀདྷམྨཾ ཝིཝཛྫེཏྭཱ སུཁིཏཀཱལེཔི དུཀྑིཏཀཱལེཔི ནིབྦིཀཱརཱཝ ཧོནྟཱི’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༨༣.

‘‘སབྦཏྠ ཝེ སཔྤུརིསཱ ཙཛནྟི,

ན ཀཱམཀཱམཱ ལཔཡནྟི སནྟོ;

སུཁེན ཕུཊྛཱ ཨཐ ཝཱ དུཁེན,

ན ཨུཙྩཱཝཙཾ པཎྜིཏཱ དསྶཡནྟཱི’’ཏི.

ཏཏྠ སབྦཏྠཱཏི པཉྩཀྑནྡྷཱདིབྷེདེསུ སབྦདྷམྨེསུ. སཔྤུརིསཱཏི སུཔུརིསཱ. ཙཛནྟཱིཏི ཨརཧཏྟམགྒཉཱཎེན ཨཔཀཌྜྷནྟཱ ཚནྡརཱགཾ ཝིཛཧནྟི. ཀཱམཀཱམཱཏི ཀཱམེ ཀཱམཡནྟཱ ཀཱམཧེཏུ ཀཱམཀཱརཎཱ. ན ལཔཡནྟི སནྟོཏི བུདྡྷཱདཡོ སནྟོ ཀཱམཧེཏུ ནེཝ ཨཏྟནཱ ལཔཡནྟི, ན པརཾ ལཔཱཔེནྟི. ཡེ ཧི བྷིཀྑཱཡ པཝིཊྛཱ ཨིཙྪཱཙཱརེ ཋིཏཱ ‘‘ཀིཾ, ཨུཔཱསཀ, སུཁཾ ཏེ པུཏྟདཱརསྶ, རཱཛཙོརཱདཱིནཾ ཝསེན དྭིཔདཙཏུཔྤདེསུ ནཏྠི ཀོཙི ཨུཔདྡཝོ’’ཏིཨཱདཱིནི ཝདནྟི, ཏཱཝ ཏེ ལཔཡནྟི ནཱམ. ཏཐཱ པན ཝཏྭཱ ‘‘ཨཱམ, བྷནྟེ, སབྦེསཾ ནོ སུཁཾ, ནཏྠི ཀོཙི ཨུཔདྡཝོ, ཨིདཱནི ནོ གེཧཾ པཧཱུཏཨནྣཔཱནཾ, ཨིདྷེཝ ཝསཐཱ’’ཏི ཨཏྟཱནཾ ནིམནྟཱཔེནྟཱ ལཔཱཔེནྟི ནཱམ. སནྟོ པན ཨིདཾ ཨུབྷཡམྤི ན ཀརོནྟི. སུཁེན ཕུཊྛཱ ཨཐ ཝཱ དུཁེནཱཏི དེསནཱམཏྟམེཏཾ, ཨཊྛཧི པན ལོཀདྷམྨེཧི ཕུཊྛཱ ཏུཊྛིབྷཱཝམངྐུབྷཱཝཝསེན ཝཱ ཝཎྞབྷཎནཨཝཎྞབྷཎནཝསེན ཝཱ ཨུཙྩཱཝཙཾ ཨཱཀཱརཾ པཎྜིཏཱ ན དསྶཡནྟཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པཉྩསཏབྷིཀྑུཝཏྠུ ཨཊྛམཾ.

༩. དྷམྨིཀཏྠེརཝཏྠུ

ན ཨཏྟཧེཏཱུཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ དྷམྨིཀཏྠེརཾ ཨཱརབྦྷ ཀཐེསི.

སཱཝཏྠིཡཾ ཀིརེཀོ ཨུཔཱསཀོ དྷམྨེན སམེན ཨགཱརཾ ཨཛ྄ཛྷཱཝསཏི. སོ པབྦཛིཏུཀཱམོ ཧུཏྭཱ ཨེཀདིཝསཾ བྷརིཡཱཡ སདྡྷིཾ ནིསཱིདིཏྭཱ སུཁཀཐཾ ཀཐེནྟོ ཨཱཧ – ‘‘བྷདྡེ, ཨིཙྪཱམཧཾ པབྦཛིཏུ’’ནྟི. ‘‘ཏེན ཧི, སཱམི, ཨཱགམེཧི ཏཱཝ, ཡཱཝཱཧཾ ཀུཙྪིགཏཾ དཱརཀཾ ཝིཛཱཡཱམཱི’’ཏི. སོ ཨཱགམེཏྭཱ དཱརཀསྶ པདསཱ གམནཀཱལེ པུན ཏཾ ཨཱཔུཙྪིཏྭཱ ‘‘ཨཱགམེཧི ཏཱཝ, སཱམི, ཡཱཝཱཡཾ ཝཡཔྤཏྟོ ཧོཏཱི’’ཏི ཝུཏྟེ ‘‘ཀིཾ མེ ཨིམཱཡ ཨཔལོཀིཏཱཡ ཝཱ ཨནཔལོཀིཏཱཡ ཝཱ, ཨཏྟནོ དུཀྑནིསྶརཎཾ ཀརིསྶཱམཱི’’ཏི ནིཀྑམིཏྭཱ པབྦཛི. སོ ཀམྨཊྛཱནཾ གཧེཏྭཱ གྷཊེནྟོ ཝཱཡམནྟོ ཨཏྟནོ པབྦཛིཏཀིཙྩཾ ནིཊྛཔེཏྭཱ ཏེསཾ དསྶནཏྠཱཡ པུན སཱཝཏྠིཾ གནྟྭཱ པུཏྟསྶ དྷམྨཀཐཾ ཀཐེསི. སོཔི ནིཀྑམིཏྭཱ པབྦཛི, པབྦཛིཏྭཱ ཙ པན ན ཙིརསྶེཝ ཨརཧཏྟཾ པཱཔུཎི. པུརཱཎདུཏིཡིཀཱཔིསྶ ‘‘ཡེསཾ ཨཏྠཱཡ ཨཧཾ གྷརཱཝཱསེ ཝསེཡྻཾ, ཏེ ཨུབྷོཔི པབྦཛིཏཱ, ཨིདཱནི མེ ཀིཾ གྷརཱཝཱསེན, པབྦཛིསྶཱམཱི’’ཏི ནིཀྑམིཏྭཱ པབྦཛི, པབྦཛིཏྭཱ ཙ པན ན ཙིརསྶེཝ ཨརཧཏྟཾ པཱཔུཎི. ཨཐེཀདིཝསཾ དྷམྨསབྷཱཡཾ ཀཐཾ སམུཊྛཱཔེསུཾ – ‘‘ཨཱཝུསོ, དྷམྨིཀཨུཔཱསཀོ ཨཏྟནོ དྷམྨེ པཏིཊྛིཏཏྟཱ ནིཀྑམིཏྭཱ པབྦཛིཏྭཱ ཨརཧཏྟཾ པཏྟོ པུཏྟདཱརསྶཱཔི པཏིཊྛཱ ཛཱཏོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘ཨིམཱཡ ནཱམཱ’’’ཏི ཝུཏྟེ, ‘‘བྷིཀྑཝེ, པཎྜིཏེན ནཱམ ནེཝ ཨཏྟཧེཏུ, ན པརཧེཏུ སམིདྡྷི ཨིཙྪིཏབྦཱ, དྷམྨིཀེནེཝ པན དྷམྨཔཊིསརཎེན བྷཝིཏབྦ’’ནྟི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༨༤.

‘‘ན ཨཏྟཧེཏུ ན པརསྶ ཧེཏུ,

ན པུཏྟམིཙྪེ ན དྷནཾ ན རཊྛཾ;

ན ཨིཙྪེཡྻ ཨདྷམྨེན སམིདྡྷིམཏྟནོ,

ས སཱིལཝཱ པཉྙཝཱ དྷམྨིཀོ སིཡཱ’’ཏི.

ཏཏྠ ན ཨཏྟཧེཏཱུཏི པཎྜིཏོ ནཱམ ཨཏྟཧེཏུ ཝཱ པརཧེཏུ ཝཱ པཱཔཾ ན ཀརོཏི. ན པུཏྟམིཙྪེཏི པུཏྟཾ ཝཱ དྷནཾ ཝཱ རཊྛཾ ཝཱ པཱཔཀམྨེན ན ཨིཙྪེཡྻ, ཨེཏཱནིཔི ཨིཙྪཏོ པཱཔཀམྨཾ ན ཀརོཏིཡེཝཱཏི ཨཏྠོ. སམིདྡྷིམཏྟནོཏི ཡཱ ཨཏྟནོ སམིདྡྷི, ཏམྤི ཨདྷམྨེན ན ཨིཙྪེཡྻ,སམིདྡྷིཀཱརཎཱཔི པཱཔཾ ན ཀརོཏཱིཏི ཨཏྠོ. ས སཱིལཝཱཏི ཡོ ཨེཝརཱུཔོ པུགྒལོ, སོ ཨེཝ སཱིལཝཱ ཙ པཉྙཝཱ ཙ དྷམྨིཀོཙ སིཡཱ, ན ཨཉྙོཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

དྷམྨིཀཏྠེརཝཏྠུ ནཝམཾ.

༡༠. དྷམྨསྶཝནཝཏྠུ

ཨཔྤཀཱ ཏེ མནུསྶེསཱུཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ དྷམྨསྶཝནཾ ཨཱརབྦྷ ཀཐེསི.

སཱཝཏྠིཡཾ ཀིར ཨེཀཝཱིཐིཝཱསིནོ མནུསྶཱ སམགྒཱ ཧུཏྭཱ གཎབནྡྷེན དཱནཾ དཏྭཱ སབྦརཏྟིཾ དྷམྨསྶཝནཾ ཀཱརེསུཾ, སབྦརཏྟིཾ པན དྷམྨཾ སོཏུཾ ནཱསཀྑིཾསུ. ཨེཀཙྩེ ཀཱམརཏིནིསྶིཏཱ ཧུཏྭཱ, པུན གེཧམེཝ གཏཱ, ཨེཀཙྩེ དོསནིསྶིཏཱ ཧུཏྭཱ, ཨེཀཙྩེ མཱནནིསྶིཏཱ ཧུཏྭཱ, ཨེཀཙྩེ ཐིནམིདྡྷསམངྒིནོ ཧུཏྭཱ ཏཏྠེཝ ནིསཱིདིཏྭཱ པཙལཱཡནྟཱ སོཏུཾ ནཱསཀྑིཾསུ. པུནདིཝསེ བྷིཀྑཱུ ཏཾ པཝཏྟིཾ ཉཏྭཱ དྷམྨསབྷཱཡཾ ཀཐཾ སམུཊྛཱཔེསུཾ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཨིམཱ སཏྟཱ ནཱམ ཡེབྷུཡྻེན བྷཝནིསྶིཏཱ, བྷཝེསུ ཨེཝ ལགྒཱ ཝིཧརནྟི, པཱརགཱམིནོ ནཱམ ཨཔྤཀཱ’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཱ གཱཐཱ ཨཱཧ –

༨༥.

‘‘ཨཔྤཀཱ ཏེ མནུསྶེསུ, ཡེ ཛནཱ པཱརགཱམིནོ;

ཨཐཱཡཾ ཨིཏརཱ པཛཱ, ཏཱིརམེཝཱནུདྷཱཝཏི.

༨༦.

‘‘ཡེ ཙ ཁོ སམྨདཀྑཱཏེ, དྷམྨེ དྷམྨཱནུཝཏྟིནོ;

ཏེ ཛནཱ པཱརམེསྶནྟི, མཙྩུདྷེཡྻཾ སུདུཏྟར’’ནྟི.

ཏཏྠ ཨཔྤཀཱཏི ཐོཀཱ ན བཧཱུ. པཱརགཱམིནོཏི ནིབྦཱནཔཱརགཱམིནོ. ཨཐཱཡཾ ཨིཏརཱ པཛཱཏི ཡཱ པནཱཡཾ ཨཝསེསཱ པཛཱ སཀྐཱཡདིཊྛིཏཱིརམེཝ ཨནུདྷཱཝཏི, ཨཡམེཝ བཧུཏརཱཏི ཨཏྠོ. སམྨདཀྑཱཏེཏི སམྨཱ ཨཀྑཱཏེ སུཀཐིཏེ. དྷམྨེཏི དེསནཱདྷམྨེ. དྷམྨཱནུཝཏྟིནོཏི ཏཾ དྷམྨཾ སུཏྭཱ ཏདནུཙྪཝིཀཾ པཊིཔདཾ པཱུརེཏྭཱ མགྒཕལསཙྪིཀརཎེན དྷམྨཱནུཝཏྟིནོ. པཱརམེསྶནྟཱིཏི ཏེ ཨེཝརཱུཔཱ ཛནཱ ནིབྦཱནཔཱརཾ གམིསྶནྟི. མཙྩུདྷེཡྻནྟི ཀིལེསམཱརསངྑཱཏསྶ མཙྩུསྶ ནིཝཱསཊྛཱནབྷཱུཏཾ ཏེབྷཱུམིཀཝཊྚཾ. སུདུཏྟརནྟི ཡེ ཛནཱ དྷམྨཱནུཝཏྟིནོ, ཏེ ཨེཏཾ སུདུཏྟརཾ དུརཏིཀྐམཾ མཱརདྷེཡྻཾ ཏརིཏྭཱ ཨཏིཀྐམིཏྭཱ ནིབྦཱནཔཱརཾ གམིསྶནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

དྷམྨསྶཝནཝཏྠུ དསམཾ.

༡༡. པཉྩསཏཨཱགནྟུཀབྷིཀྑུཝཏྠུ

ཀཎྷཾ དྷམྨཾ ཝིཔྤཧཱཡཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩསཏེ ཨཱགནྟུཀེ བྷིཀྑཱུ ཨཱརབྦྷ ཀཐེསི.

ཀོསལརཊྛེ ཀིར པཉྩསཏཱ བྷིཀྑཱུ ཝསྶཾ ཝསིཏྭཱ ཝུཊྛཝསྶཱ ‘‘སཏྠཱརཾ པསྶིསྶཱམཱ’’ཏི ཛེཏཝནཾ གནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདིཾསུ. སཏྠཱ ཏེསཾ ཙརིཡཔཊིཔཀྑཾ ནིསཱམེཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༨༧.

‘‘ཀཎྷཾ དྷམྨཾ ཝིཔྤཧཱཡ, སུཀྐཾ བྷཱཝེཐ པཎྜིཏོ;

ཨོཀཱ ཨནོཀམཱགམྨ, ཝིཝེཀེ ཡཏྠ དཱུརམཾ.

༨༨.

‘‘ཏཏྲཱབྷིརཏིམིཙྪེཡྻ, ཧིཏྭཱ ཀཱམེ ཨཀིཉྩནོ;

པརིཡོདཔེཡྻ ཨཏྟཱནཾ, ཙིཏྟཀླེསེཧི པཎྜིཏོ.

༨༩.

‘‘ཡེསཾ སམྦོདྷིཡངྒེསུ, སམྨཱ ཙིཏྟཾ སུབྷཱཝིཏཾ;

ཨཱདཱནཔཊིནིསྶགྒེ, ཨནུཔཱདཱཡ ཡེ རཏཱ;

ཁཱིཎཱསཝཱ ཛུཏིམནྟོ, ཏེ ལོཀེ པརིནིབྦུཏཱ’’ཏི.

ཏཏྠ ཀཎྷཾ དྷམྨནྟི ཀཱཡདུཙརིཏཱདིབྷེདཾ ཨཀུསལཾ དྷམྨཾ ཝིཔྤཧཱཡ ཛཧིཏྭཱ. སུཀྐཾ བྷཱཝེཐཱཏི པཎྜིཏོ བྷིཀྑུ ཨབྷིནིཀྑམནཏོ པཊྛཱཡ ཡཱཝ ཨརཧཏྟམགྒཱ ཀཱཡསུཙརིཏཱདིབྷེདཾ སུཀྐཾ དྷམྨཾ བྷཱཝེཡྻ. ཀཐཾ? ཨོཀཱ ཨནོཀམཱགམྨཱཏི ཨོཀཾ ཝུཙྩཏི ཨཱལཡོ, ཨནོཀཾ ཝུཙྩཏི ཨནཱལཡོ, ཨཱལཡཏོ ནིཀྑམིཏྭཱ ཨནཱལཡསངྑཱཏཾ ནིབྦཱནཾ པཊིཙྩ ཨཱརབྦྷ ཏཾ པཏྠཡམཱནོ བྷཱཝེཡྻཱཏི ཨཏྠོ. ཏཏྲཱབྷིརཏིམིཙྪེཡྻཱཏི ཡསྨིཾ ཨནཱལཡསངྑཱཏེ ཝིཝེཀེ ནིབྦཱནེ ཨིམེཧི སཏྟེཧི དུརབྷིརམཾ, ཏཏྲ ཨབྷིརཏིཾ ཨིཙྪེཡྻ. ཧིཏྭཱ ཀཱམེཏི ཝཏྠུཀཱམཀིལེསཀཱམེ ཧིཏྭཱ ཨཀིཉྩནོ ཧུཏྭཱ ཝིཝེཀེ ཨབྷིརཏིཾ ཨིཙྪེཡྻཱཏི ཨཏྠོ. ཙིཏྟཀླེསེཧཱིཏི པཉྩཧི ནཱིཝརཎེཧི, ཨཏྟཱནཾ པརིཡོདཔེཡྻ ཝོདཱཔེཡྻ, པརིསོདྷེཡྻཱཏི ཨཏྠོ. སམྦོདྷིཡངྒེསཱུཏི སམྦོཛ྄ཛྷངྒེསུ. སམྨཱ ཙིཏྟཾ སུབྷཱཝིཏནྟི ཧེཏུནཱ ནཡེན ཙིཏྟཾ སུཊྛུ བྷཱཝིཏཾ ཝཌྜྷིཏཾ. ཨཱདཱནཔཊིནིསྶགྒེཏི ཨཱདཱནཾ ཝུཙྩཏི གཧཎཾ, ཏསྶ པཊིནིསྶགྒསངྑཱཏེ ཨགྒཧཎེ ཙཏཱུཧི ཨུཔཱདཱནེཧི ཀིཉྩི ཨནུཔཱདིཡིཏྭཱ ཡེ རཏཱཏི ཨཏྠོ. ཛུཏིམནྟོཏི ཨཱནུབྷཱཝཝནྟོ, ཨརཧཏྟམགྒཉཱཎཛུཏིཡཱ ཁནྡྷཱདིབྷེདེ དྷམྨེ ཛོཏེཏྭཱ ཋིཏཱཏི ཨཏྠོ. ཏེ ལོཀེཏི ཨིམསྨིཾ ཁནྡྷཱདིལོཀེ པརིནིབྦུཏཱ ནཱམ ཨརཧཏྟཔཏྟིཏོ པཊྛཱཡ ཀིལེསཝཊྚསྶ ཁེཔིཏཏྟཱ སཨུཔཱདིསེསེན, ཙརིམཙིཏྟནིརོདྷེན ཁནྡྷཝཊྚསྶ ཁེཔིཏཏྟཱ ཨནུཔཱདིསེསེན ཙཱཏི དྭཱིཧི པརིནིབྦཱནེཧི པརིནིབྦུཏཱ, ཨནུཔཱདཱནོ ཝིཡ པདཱིཔོ ཨཔཎྞཏྟིཀབྷཱཝཾ གཏཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པཉྩསཏཨཱགནྟུཀབྷིཀྑུཝཏྠུ ཨེཀཱདསམཾ.

པཎྜིཏཝགྒཝཎྞནཱ ནིཊྛིཏཱ.

ཚཊྛོ ཝགྒོ.

༧. ཨརཧནྟཝགྒོ

༡. ཛཱིཝཀཔཉྷཝཏྠུ

གཏདྡྷིནོཏི ཨིམཾ དྷམྨདེསནཾ སཏྠཱ ཛཱིཝཀམྦཝནེ ཝིཧརནྟོ ཛཱིཝཀེན པུཊྛཔཉྷཾ ཨཱརབྦྷ ཀཐེསི. ཛཱིཝཀཝཏྠུ ཁནྡྷཀེ (མཧཱཝ. ༣༢༦ ཨཱདཡོ) ཝིཏྠཱརིཏམེཝ.

ཨེཀསྨིཾ པན སམཡེ དེཝདཏྟོ ཨཛཱཏསཏྟུནཱ སདྡྷིཾ ཨེཀཏོ ཧུཏྭཱ གིཛ྄ཛྷཀཱུཊཾ ཨབྷིརུཧིཏྭཱ པདུཊྛཙིཏྟོ ‘‘སཏྠཱརཾ ཝདྷིསྶཱམཱི’’ཏི སིལཾ པཝིཛ྄ཛྷི. ཏཾ དྭེ པབྦཏཀཱུཊཱནི སམྤཊིཙྪིཾསུ. ཏཏོ བྷིཛྫིཏྭཱ གཏཱ པཔཊིཀཱ བྷགཝཏོ པཱདཾ པཧརིཏྭཱ ལོཧིཏཾ ཨུཔྤཱདེསི, བྷུསཱ ཝེདནཱ པཝཏྟིཾསུ. བྷིཀྑཱུ སཏྠཱརཾ མདྡཀུཙྪིཾ ནཡིཾསུ. སཏྠཱ ཏཏོཔི ཛཱིཝཀམྦཝནཾ གནྟུཀཱམོ ‘‘ཏཏྠ མཾ ནེཐཱ’’ཏི ཨཱཧ. བྷིཀྑཱུ བྷགཝནྟཾ ཨཱདཱཡ ཛཱིཝཀམྦཝནཾ ཨགམཾསུ. ཛཱིཝཀོ ཏཾ པཝཏྟིཾ སུཏྭཱ སཏྠུ སནྟིཀཾ གནྟྭཱ ཝཎཔཊིཀམྨཏྠཱཡ ཏིཁིཎབྷེསཛྫཾ དཏྭཱ ཝཎཾ བནྡྷིཏྭཱ སཏྠཱརཾ ཨེཏདཝོཙ – ‘‘བྷནྟེ, མཡཱ ཨནྟོནགརེ ཨེཀསྶ མནུསྶསྶ བྷེསཛྫཾ ཀཏཾ, ཏསྶ སནྟིཀཾ གནྟྭཱ པུན ཨཱགམིསྶཱམི, ཨིདཾ བྷེསཛྫཾ ཡཱཝ མམཱགམནཱ བདྡྷནིཡཱམེནེཝ ཏིཊྛཏཱུ’’ཏི. སོ གནྟྭཱ ཏསྶ པུརིསསྶ ཀཏྟབྦཀིཙྩཾ ཀཏྭཱ དྭཱརཔིདཧནཝེལཱཡ ཨཱགཙྪནྟོ དྭཱརཾ ན སམྤཱཔུཎི. ཨཐསྶ ཨེཏདཧོསི – ‘‘ཨཧོ མཡཱ བྷཱརིཡཾ ཀམྨཾ ཀཏཾ, ཡྭཱཧཾ ཨཉྙཏརསྶ པུརིསསྶ ཝིཡ ཏཐཱགཏསྶ པཱདེ ཏིཁིཎབྷེསཛྫཾ དཏྭཱ ཝཎཾ བནྡྷིཾ, ཨཡཾ ཏསྶ མོཙནཝེལཱ, ཏསྨིཾ ཨམུཙྩམཱནེ སབྦརཏྟིཾ བྷགཝཏོ སརཱིརེ པརིལཱ༹ཧོ ཨུཔྤཛྫིསྶཏཱི’’ཏི. ཏསྨིཾ ཁཎེ སཏྠཱ ཨཱནནྡཏྠེརཾ ཨཱམནྟེསི – ‘‘ཨཱནནྡ, ཛཱིཝཀོ སཱཡཾ ཨཱགཙྪནྟོ དྭཱརཾ ན སམྤཱཔུཎི, ‘ཨཡཾ ཝཎསྶ མོཙནཝེལཱ’ཏི པན ཙིནྟེསི, མོཙེསི ན’’ནྟི. ཐེརོ མོཙེསི, ཝཎོ རུཀྑཏོ ཚལླི ཝིཡ ཨཔགཏོ. ཛཱིཝཀོ ཨནྟོཨརུཎེཡེཝ སཏྠུ སནྟིཀཾ ཝེགེན ཨཱགནྟྭཱ ‘‘ཀིཾ ནུ ཁོ, བྷནྟེ, སརཱིརེ ཝོ པརིལཱ༹ཧོ ཨུཔྤནྣོ’’ཏི པུཙྪི. སཏྠཱ ‘‘ཏཐཱགཏསྶ ཁོ, ཛཱིཝཀ, བོདྷིམཎྜེཡེཝ སབྦཔརིལཱ༹ཧོ ཝཱུཔསནྟོ’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༩༠.

‘‘གཏདྡྷིནོ ཝིསོཀསྶ, ཝིཔྤམུཏྟསྶ སབྦདྷི;

སབྦགནྠཔྤཧཱིནསྶ, པརིལཱ༹ཧོ ན ཝིཛྫཏཱི’’ཏི.

ཏཏྠ གཏདྡྷིནོཏི གཏམགྒསྶ ཀནྟཱརདྡྷཱ ཝཊྚདྡྷཱཏི དྭེ ཨདྡྷཱ ནཱམ. ཏེསུ ཀནྟཱརཔཊིཔནྣོ ཡཱཝ ཨིཙྪིཏཊྛཱནཾ ན པཱཔུཎཱཏི, ཏཱཝ ཨདྡྷིཀོཡེཝ, ཨེཏསྨིཾ པན པཏྟེ གཏདྡྷི ནཱམ ཧོཏི. ཝཊྚསནྣིསྶིཏཱཔི སཏྟཱ ཡཱཝ ཝཊྚེ ཝསནྟི, ཏཱཝ ཨདྡྷིཀཱ ཨེཝ. ཀསྨཱ? ཝཊྚསྶ ཨཁེཔིཏཏྟཱ. སོཏཱཔནྣཱདཡོཔི ཨདྡྷིཀཱ ཨེཝ, ཝཊྚཾ པན ཁེཔེཏྭཱ ཋིཏོ ཁཱིཎཱསཝོ གཏདྡྷི ནཱམ ཧོཏི. ཏསྶ གཏདྡྷིནོ. ཝིསོཀསྶཱཏི ཝཊྚམཱུལཀསྶ སོཀསྶ ཝིགཏཏྟཱ ཝིསོཀསྶ. ཝིཔྤམུཏྟསྶ སབྦདྷཱིཏི སབྦེསུ ཁནྡྷཱདིདྷམྨེསུ ཝིཔྤམུཏྟསྶ, སབྦགནྠཔྤཧཱིནསྶཱཏི ཙཏུནྣམྤི གནྠཱནཾ པཧཱིནཏྟཱ སབྦཱགནྠཔྤཧཱིནསྶ. པརིལཱ༹ཧོ ན ཝིཛྫཏཱིཏི དུཝིདྷོ པརིལཱ༹ཧོ ཀཱཡིཀོ ཙེཏསིཀོ ཙཱཏི. ཏེསུ ཁཱིཎཱསཝསྶ སཱིཏུཎྷཱདིཝསེན ཨུཔྤནྣཏྟཱ ཀཱཡིཀཔརིལཱ༹ཧོ ཨནིབྦུཏོཝ, ཏཾ སནྡྷཱཡ ཛཱིཝཀོ པུཙྪཏི. སཏྠཱ པན དྷམྨརཱཛཏཱཡ དེསནཱཝིདྷིཀུསལཏཱཡ ཙེཏསིཀཔརིལཱ༹ཧཝསེན དེསནཾ ཝིནིཝཏྟེནྟོ, ‘‘ཛཱིཝཀ, པརམཏྠེན ཨེཝརཱུཔསྶ ཁཱིཎཱསཝསྶ པརིལཱ༹ཧོ ན ཝིཛྫཏཱི’’ཏི ཨཱཧ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཛཱིཝཀཔཉྷཝཏྠུ པཋམཾ.

༢. མཧཱཀསྶཔཏྠེརཝཏྠུ

ཨུཡྻུཉྫནྟཱིཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ མཧཱཀསྶཔཏྠེརཾ ཨཱརབྦྷ ཀཐེསི.

ཨེཀསྨིཉྷི སམཡེ སཏྠཱ རཱཛགཧེ ཝུཊྛཝསྶོ ‘‘ཨདྡྷམཱསཙྩཡེན ཙཱརིཀཾ པཀྐམིསྶཱམཱི’’ཏི བྷིཀྑཱུནཾ ཨཱརོཙཱཔེསི. ཝཏྟཾ ཀིརེཏཾ བུདྡྷཱནཾ བྷིཀྑཱུཧི སདྡྷིཾ ཙཱརིཀཾ ཙརིཏུཀཱམཱནཾ ‘‘ཨེཝཾ བྷིཀྑཱུ ཨཏྟནོ པཏྟཔཙནཙཱིཝརརཛནཱདཱིནི ཀཏྭཱ སུཁཾ གམིསྶནྟཱི’’ཏི ‘‘ཨིདཱནི ཨདྡྷམཱསཙྩཡེན ཙཱརིཀཾ པཀྐམིསྶཱམཱི’’ཏི བྷིཀྑཱུནཾ ཨཱརོཙཱཔནཾ. བྷིཀྑཱུསུ པན ཨཏྟནོ པཏྟཙཱིཝརཱདཱིནི ཀརོནྟེསུ མཧཱཀསྶཔཏྠེརོཔི ཙཱིཝརཱནི དྷོཝི. བྷིཀྑཱུ ཨུཛ྄ཛྷཱཡིཾསུ ‘‘ཐེརོ ཀསྨཱ ཙཱིཝརཱནི དྷོཝཏི, ཨིམསྨིཾ ནགརེ ཨནྟོ ཙ བཧི ཙ ཨཊྛཱརས མནུསྶཀོཊིཡོ ཝསནྟི. ཏཏྠ ཡེ ཐེརསྶ ན ཉཱཏཀཱ, ཏེ ཨུཔཊྛཱཀཱ, ཡེ ན ཨུཔཊྛཱཀཱ, ཏེ ཉཱཏཀཱ. ཏེ ཐེརསྶ ཙཏཱུཧི པཙྩཡེཧི སམྨཱནསཀྐཱརཾ ཀརོནྟི. ཨེཏྟཀཾ ཨུཔཀཱརཾ པཧཱཡ ཨེས ཀཧཾ གམིསྶཏི? སཙེཔི གཙྪེཡྻ, མཱཔམཱདཀནྡརཏོ པརཾ ན གམིསྶཏཱི’’ཏི. སཏྠཱ ཀིར ཡཾ ཀནྡརཾ པཏྭཱ ནིཝཏྟེཏབྦཡུཏྟཀེ བྷིཀྑཱུ ‘‘ཏུམྷེ ཨིཏོ ནིཝཏྟཐ, མཱ པམཛྫིཏྠཱ’’ཏི ཝདཏི. ཏཾ ‘‘མཱཔམཱདཀནྡར’’ནྟི ཝུཙྩཏི, ཏཾ སནྡྷཱཡེཏཾ ཝུཏྟཾ.

སཏྠཱཔི ཙཱརིཀཾ པཀྐམནྟོ ཙིནྟེསི – ‘‘ཨིམསྨིཾ ནགརེ ཨནྟོ ཙ བཧི ཙ ཨཊྛཱརས མནུསྶཀོཊིཡོ ཝསནྟི. མནུསྶཱནཾ མངྒལཱམངྒལཊྛཱནེསུ བྷིཀྑཱུཧི གནྟབྦཾ ཧོཏི, ན སཀྐཱ ཝིཧཱརཾ ཏུཙྪཾ ཀཱཏུཾ, ཀཾ ནུ ཁོ ནིཝཏྟེསྶཱམཱི’’ཏི? ཨཐསྶ ཨེཏདཧོསི –‘‘ཀསྶཔསྶ ཧེཏེ མནུསྶཱ ཉཱཏཀཱ ཙ ཨུཔཊྛཱཀཱ ཙ, ཀསྶཔཾ ནིཝཏྟེཏུཾ ཝཊྚཏཱི’’ཏི. སོ ཐེརཾ ཨཱཧ – ‘‘ཀསྶཔ, ན སཀྐཱ ཝིཧཱརཾ ཏུཙྪཾ ཀཱཏུཾ, མནུསྶཱནཾ མངྒལཱམངྒལཊྛཱནེསུ བྷིཀྑཱུཧི ཨཏྠོ ཧོཏི, ཏྭཾ ཨཏྟནོ པརིསཱཡ སདྡྷིཾ ནིཝཏྟསྶཱུ’’ཏི. ‘‘སཱདྷུ, བྷནྟེ’’ཏི ཐེརོ པརིསཾ ཨཱདཱཡ ནིཝཏྟི. བྷིཀྑཱུ ཨུཔཛ྄ཛྷཱཡིཾསུ ‘‘དིཊྛཾ ཝོ, ཨཱཝུསོ, ནནུ ཨིདཱནེཝ ཨམྷེཧི ཝུཏྟཾ ‘མཧཱཀསྶཔོ ཀསྨཱ ཙཱིཝརཱནི དྷོཝཏི, ན ཨེསོ སཏྠཱརཱ སདྡྷིཾ གམིསྶཏཱི’ཏི, ཡཾ ཨམྷེཧི ཝུཏྟཾ, ཏདེཝ ཛཱཏ’’ནྟི. སཏྠཱ བྷིཀྑཱུནཾ ཀཐཾ སུཏྭཱ ནིཝཏྟིཏྭཱ ཋིཏོ ཨཱཧ – ‘‘བྷིཀྑཝེ, ཀིཾ ནཱམེཏཾ ཀཐེཐཱ’’ཏི? ‘‘མཧཱཀསྶཔཏྠེརཾ ཨཱརབྦྷ ཀཐེམ, བྷནྟེ’’ཏི ཨཏྟནཱ ཀཐིཏནིཡཱམེནེཝ སབྦཾ ཨཱརོཙེསུཾ. ཏཾ སུཏྭཱ སཏྠཱ ‘‘ན, བྷིཀྑཝེ, ཏུམྷེ ཀསྶཔཾ ‘ཀུལེསུ ཙ པཙྩཡེསུ ཙ ལགྒོ’ཏི ཝདེཐ, སོ ‘མམ ཝཙནཾ ཀརིསྶཱམཱི’ཏི ནིཝཏྟོ. ཨེསོ ཧི པུབྦེ པཏྠནཾ ཀརོནྟོཡེཝ ‘ཙཏཱུསུ པཙྩཡེསུ ཨལགྒོ ཙནྡཱུཔམོ ཧུཏྭཱ ཀུལཱནི ཨུཔསངྐམིཏུཾ སམཏྠོ བྷཝེཡྻ’ནྟི པཏྠནཾ ཨཀཱསི. ནཏྠེཏསྶ ཀུལེ ཝཱ པཙྩཡེ ཝཱ ལགྒོ, ཨཧཾ ཙནྡོཔམཔྤཊིཔདཉྩེཝ (སཾ. ནི. ༢.༡༤༦) ཨརིཡཝཾསཔྤཊིཔདཉྩ ཀཐེནྟོ མམ པུཏྟཾ ཀསྶཔཾ ཨཱདིཾ ཀཏྭཱ ཀཐེསི’’ནྟི ཨཱཧ.

བྷིཀྑཱུ སཏྠཱརཾ པུཙྪིཾསུ – ‘‘བྷནྟེ, ཀདཱ པན ཐེརེན པཏྠནཱ ཋཔིཏཱ’’ཏི? ‘‘སོཏུཀཱམཱཏྠ, བྷིཀྑཝེ’’ཏི? ‘‘ཨཱམ, བྷནྟེ’’ཏི. སཏྠཱ ཏེསཾ, ‘‘བྷིཀྑཝེ, ཨིཏོ ཀཔྤསཏསཧསྶམཏྠཀེ པདུམུཏྟརོ ནཱམ བུདྡྷོ ལོཀེ ཨུདཔཱདཱི’’ཏི ཝཏྭཱ པདུམུཏྟརཔཱདམཱུལེ ཏེན ཋཔིཏཔཏྠནཾ ཨཱདིཾ ཀཏྭཱ སབྦཾ ཐེརསྶ པུབྦཙརིཏཾ ཀཐེསི. ཏཾ ཐེརཔཱལི༹ཡཾ (ཐེརགཱ. ༡༠༥༤ ཨཱདཡོ) ཝིཏྠཱརིཏམེཝ. སཏྠཱ པན ཨིམཾ ཐེརསྶ པུབྦཙརིཏཾ ཝིཏྠཱརེཏྭཱ ‘‘ཨིཏི ཁོ, བྷིཀྑཝེ, ཨཧཾ ཙནྡོཔམཔྤཊིཔདཉྩེཝ ཨརིཡཝཾསཔྤཊིཔདཉྩ མམ པུཏྟཾ ཀསྶཔཾ ཨཱདིཾ ཀཏྭཱ ཀཐེསིཾ, མམ པུཏྟསྶ ཀསྶཔསྶ པཙྩཡེསུ ཝཱ ཀུལེསུ ཝཱ ཝིཧཱརེསུ ཝཱ པརིཝེཎེསུ ཝཱ ལགྒོ ནཱམ ནཏྠི, པལླལེ ཨོཏརིཏྭཱ ཏཏྠ ཙརིཏྭཱ གཙྪནྟོ རཱཛཧཾསོ ཝིཡ ཀཏྠཙི ཨལགྒོཡེཝ མམ པུཏྟོ’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༩༡.

‘‘ཨུཡྻུཉྫནྟི སཏཱིམནྟོ, ན ནིཀེཏེ རམནྟི ཏེ;

ཧཾསཱཝ པལླལཾ ཧིཏྭཱ, ཨོཀམོཀཾ ཛཧནྟི ཏེ’’ཏི.

ཏཏྠ ཨུཡྻུཉྫནྟི སཏཱིམནྟོཏི སཏིཝེཔུལླཔྤཏྟཱ ཁཱིཎཱསཝཱ ཨཏྟནཱ པཊིཝིདྡྷགུཎེསུ ཛྷཱནཝིཔསྶནཱདཱིསུ ཨཱཝཛྫནསམཱཔཛྫནཝུཊྛཱནཱདྷིཊྛཱནཔཙྩཝེཀྑཎཱཧི ཡུཉྫནྟི གྷཊེནྟི. ན ནིཀེཏེ རམནྟི ཏེཏི ཏེསཾ ཨཱལཡེ རཏི ནཱམ ནཏྠི. ཧཾསཱཝཱཏི དེསནཱསཱིསམེཏཾ, ཨཡཾ པནེཏྠ ཨཏྠོ – ཡཐཱ གོཙརསམྤནྣེ པལླལེ སཀུཎཱ ཨཏྟནོ གོཙརཾ གཧེཏྭཱ གམནཀཱལེ ‘‘མམ ཨུདཀཾ, མམ པདུམཾ, མམ ཨུཔྤལཾ, མམ ཀཎྞིཀཱ’’ཏི ཏསྨིཾ ཋཱནེ ཀཉྩི ཨཱལཡཾ ཨཀཏྭཱ ཨནཔེཀྑཱཝ ཏཾ ཋཱནཾ པཧཱཡ ཨུཔྤཏིཏྭཱ ཨཱཀཱསེ ཀཱིལ༹མཱནཱ གཙྪནྟི; ཨེཝམེཝཾ ཁཱིཎཱསཝཱ ཡཏྠ ཀཏྠཙི ཝིཧརནྟཱཔི ཀུལཱདཱིསུ ཨལགྒཱ ཨེཝ ཝིཧརིཏྭཱ གམནསམཡེཔི ཏཾ ཋཱནཾ པཧཱཡ གཙྪནྟཱ ‘‘མམ ཝིཧཱརོ, མམ པརིཝེཎཾ, མམཱུཔཊྛཱཀཱ’’ཏི ཨནཱལཡཱ ཨནུཔེཀྑཱཝ གཙྪནྟི. ཨོཀམོཀནྟི ཨཱལཡཱལཡཾ, སབྦཱལཡེ པརིཙྩཛནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཧཱཀསྶཔཏྠེརཝཏྠུ དུཏིཡཾ.

༣. བེལཊྛསཱིསཏྠེརཝཏྠུ

ཡེསཾ སནྣིཙཡོ ནཏྠཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཱཡསྨནྟཾ བེལཊྛསཱིསཾ ཨཱརབྦྷ ཀཐེསི.

སོ ཀིརཱཡསྨཱ ཨནྟོགཱམེ ཨེཀཾ ཝཱིཐིཾ པིཎྜཱཡ ཙརིཏྭཱ བྷཏྟཀིཙྩཾ ཀཏྭཱ པུན ཨཔརཾ ཝཱིཐིཾ ཙརིཏྭཱ སུཀྑཾ ཀཱུརཾ ཨཱདཱཡ ཝིཧཱརཾ ཧརིཏྭཱ པཊིསཱམེཏྭཱ ‘‘ནིབདྡྷཾ པིཎྜཔཱཏཔརིཡེསནཾ ནཱམ དུཀྑ’’ནྟི ཀཏིཔཱཧཾ ཛྷཱནསུཁེན ཝཱིཏིནཱམེཏྭཱ ཨཱཧཱརེན ཨཏྠེ སཏི ཏཾ པརིབྷུཉྫཏི. བྷིཀྑཱུ ཉཏྭཱ ཨུཛ྄ཛྷཱཡིཏྭཱ ཏམཏྠཾ བྷགཝཏོ ཨཱརོཙེསུཾ. སཏྠཱ ཨེཏསྨིཾ ནིདཱནེ ཨཱཡཏིཾ སནྣིདྷིཀཱརཔརིཝཛྫནཏྠཱཡ བྷིཀྑཱུནཾ སིཀྑཱཔདཾ པཉྙཔེཏྭཱཔི ཐེརེན པན ཨཔཉྙཏྟེ སིཀྑཱཔདེ ཨཔྤིཙྪཏཾ ནིསྶཱཡ ཀཏཏྟཱ ཏསྶ དོསཱབྷཱཝཾ པཀཱསེནྟོ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༩༢.

‘‘ཡེསཾ སནྣིཙཡོ ནཏྠི, ཡེ པརིཉྙཱཏབྷོཛནཱ;

སུཉྙཏོ ཨནིམིཏྟོ ཙ, ཝིམོཀྑོ ཡེསཾ གོཙརོ;

ཨཱཀཱསེཝ སཀུནྟཱནཾ, གཏི ཏེསཾ དུརནྣཡཱ’’ཏི.

ཏཏྠ སནྣིཙཡོཏི དྭེ སནྣིཙཡཱ – ཀམྨསནྣིཙཡོ ཙ, པཙྩཡསནྣིཙཡོ ཙ. ཏེསུ ཀུསལཱཀུསལཀམྨཾ ཀམྨསནྣིཙཡོ ནཱམ, ཙཏྟཱརོ པཙྩཡཱ པཙྩཡསནྣིཙཡོ ནཱམ. ཏཏྠ ཝིཧཱརེ ཝསནྟསྶ བྷིཀྑུནོ ཨེཀཾ གུལ༹པིཎྜཾ, ཙཏུབྷཱགམཏྟཾ སཔྤིཾ, ཨེཀཉྩ ཏཎྜུལནཱལི༹ཾ ཋཔེནྟསྶ པཙྩཡསནྣིཙཡོ ནཏྠི, ཏཏོ ཨུཏྟརི ཧོཏི. ཡེསཾ ཨཡཾ དུཝིདྷོཔི སནྣིཙཡོ ནཏྠི. པརིཉྙཱཏབྷོཛནཱཏི ཏཱིཧི པརིཉྙཱཧི པརིཉྙཱཏབྷོཛནཱ. ཡཱགུཨཱདཱིནཉྷི ཡཱགུབྷཱཝཱདིཛཱནནཾ ཉཱཏཔརིཉྙཱ, ཨཱཧཱརེ པཊིཀཱུལསཉྙཱཝསེན པན བྷོཛནསྶ པརིཛཱནནཾ ཏཱིརཎཔརིཉྙཱ, ཀབལཱི༹ཀཱརཱཧཱརེ ཚནྡརཱགཨཔཀཌྜྷནཉཱཎཾ པཧཱནཔརིཉྙཱ. ཨིམཱཧི ཏཱིཧི པརིཉྙཱཧི ཡེ པརིཉྙཱཏབྷོཛནཱ. སུཉྙཏོ ཨནིམིཏྟོ ཙཱཏི ཨེཏྠ ཨཔྤཎིཧིཏཝིམོཀྑོཔི གཧིཏོཡེཝ. ཏཱིཎིཔི ཙེཏཱནི ནིབྦཱནསྶེཝ ནཱམཱནི. ནིབྦཱནཉྷི རཱགདོསམོཧཱནཾ ཨབྷཱཝེན སུཉྙཏོ, ཏེཧི ཙ ཝིམུཏྟནྟི སུཉྙཏོ ཝིམོཀྑོ, ཏཐཱ རཱགཱདིནིམིཏྟཱནཾ ཨབྷཱཝེན ཨནིམིཏྟཾ, ཏེཧི ཙ ཝིམུཏྟནྟི ཨནིམིཏྟོ ཝིམོཀྑོ, རཱགཱདིཔཎིདྷཱིནཾ པན ཨབྷཱཝེན ཨཔྤཎིཧིཏཾ, ཏེཧི ཙ ཝིམུཏྟནྟི ཨཔྤཎིཧིཏོ ཝིམོཀྑོཏི ཝུཙྩཏི. ཕལསམཱཔཏྟིཝསེན ཏཾ ཨཱརམྨཎཾ ཀཏྭཱ ཝིཧརནྟཱནཾ ཨཡཾ ཏིཝིདྷོ ཝིམོཀྑོ ཡེསཾ གོཙརོ. གཏི ཏེསཾ དུརནྣཡཱཏི ཡཐཱ ནཱམ ཨཱཀཱསེན གཏཱནཾ སཀུཎཱནཾ པདནིཀྑེཔསྶ ཨདསྶནེན གཏི དུརནྣཡཱ ན སཀྐཱ ཛཱནིཏུཾ, ཨེཝམེཝ ཡེསཾ ཨཡཾ དུཝིདྷོ སནྣིཙཡོ ནཏྠི, ཨིམཱཧི ཙ ཏཱིཧི པརིཉྙཱཧི པརིཉྙཱཏབྷོཛནཱ, ཡེསཉྩ ཨཡཾ ཝུཏྟཔྤཀཱརོ ཝིམོཀྑོ གོཙརོ, ཏེསཾ ཏཡོ བྷཝཱ, ཙཏསྶོ ཡོནིཡོ, པཉྩ གཏིཡོ, སཏྟ ཝིཉྙཱཎཊྛིཏིཡོ, ནཝ སཏྟཱཝཱསཱཏི ཨིམེསུ པཉྩསུ ཀོཊྛཱསེསུ ཨིམིནཱ ནཱམ གཏཱཏི གམནསྶ ཨཔཉྙཱཡནཏོ གཏི དུརནྣཡཱ ན སཀྐཱ པཉྙཱཔེཏུནྟི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

བེལཊྛསཱིསཏྠེརཝཏྠུ ཏཏིཡཾ.

༤. ཨནུརུདྡྷཏྠེརཝཏྠུ

ཡསྶཱསཝཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨནུརུདྡྷཏྠེརཾ ཨཱརབྦྷ ཀཐེསི.

ཨེཀསྨིཉྷི དིཝསེ ཐེརོ ཛིཎྞཙཱིཝརོ སངྐཱརཀཱུཊཱདཱིསུ ཙཱིཝརཾ པརིཡེསཏི. ཏསྶ ཨིཏོ ཏཏིཡེ ཨཏྟབྷཱཝེ པུརཱཎདུཏིཡིཀཱ ཏཱཝཏིཾསབྷཝནེ ནིབྦཏྟིཏྭཱ ཛཱལིནཱི ནཱམ དེཝདྷཱིཏཱ ཨཧོསི. སཱ ཐེརཾ ཙོལ༹ཀཱནི པརིཡེསམཱནཾ དིསྭཱ ཐེརསྶ ཨཏྠཱཡ ཏེརསཧཏྠཱཡཏཱནི ཙཏུཧཏྠཝིཏྠཏཱནི ཏཱིཎི དིབྦདུསྶཱནི གཧེཏྭཱ ‘‘སཙཱཧཾ ཨིམཱནི ཨིམིནཱ ནཱིཧཱརེན དསྶཱམི, ཐེརོ ན གཎྷིསྶཏཱི’’ཏི ཙིནྟེཏྭཱ ཏསྶ ཙོལ༹ཀཱནི པརིཡེསམཱནསྶ པུརཏོ ཨེཀསྨིཾ སངྐཱརཀཱུཊེ ཡཐཱ ནེསཾ དསནྟམཏྟམེཝ པཉྙཱཡཏི, ཏཐཱ ཋཔེསི. ཐེརོ ཏེན མགྒེན ཙོལ༹ཀཔརིཡེསམཱནཾ ཙརནྟོ ནེསཾ དསནྟཾ དིསྭཱ ཏཏྠེཝ གཧེཏྭཱ ཨཱཀཌྜྷམཱནོ ཝུཏྟཔྤམཱཎཱནི དིབྦདུསྶཱནི དིསྭཱ ‘‘ཨུཀྐཊྛཔཾསུཀཱུལཾ ཝཏ ཨིད’’ནྟི ཨཱདཱཡ པཀྐཱམི. ཨཐསྶ ཙཱིཝརཀརཎདིཝསེ སཏྠཱ པཉྩསཏབྷིཀྑུཔརིཝཱརོ ཝིཧཱརཾ གནྟྭཱ ནིསཱིདི, ཨསཱིཏིམཧཱཐེརཱཔི ཏཏྠེཝ ནིསཱིདིཾསུ, ཙཱིཝརཾ སིབྦེཏུཾ མཧཱཀསྶཔཏྠེརོ མཱུལེ ནིསཱིདི, སཱརིཔུཏྟཏྠེརོ མཛ྄ཛྷེ, ཨཱནནྡཏྠེརོ ཨགྒེ, བྷིཀྑུསངྒྷོ སུཏྟཾ ཝཊྚེསི, སཏྠཱ སཱུཙིཔཱསཀེ ཨཱཝུཎི, མཧཱམོགྒལླཱནཏྠེརོ ཡེན ཡེན ཨཏྠོ, ཏཾ ཏཾ ཨུཔནེནྟོ ཝིཙརི.

དེཝདྷཱིཏཱཔི ཨནྟོགཱམཾ པཝིསིཏྭཱ ‘‘བྷོནྟཱ ཨཡྻསྶ ནོ ཨནུརུདྡྷཏྠེརསྶ ཙཱིཝརཾ ཀརོནྟོ སཏྠཱ ཨསཱིཏིམཧཱསཱཝཀཔརིཝུཏོ པཉྩཧི བྷིཀྑུསཏེཧི སདྡྷིཾ ཝིཧཱརེ ནིསཱིདི, ཡཱགུཨཱདཱིནི ཨཱདཱཡ ཝིཧཱརཾ གཙྪཐཱ’’ཏི བྷིཀྑཾ སམཱདཔེསི. མཧཱམོགྒལླཱནཏྠེརོཔི ཨནྟརཱབྷཏྟེ མཧཱཛམྦུཔེསིཾ ཨཱཧརི, པཉྩསཏཱ བྷིཀྑཱུ པརིཀྑཱིཎཾ ཁཱདིཏུཾ ནཱསཀྑིཾསུ. སཀྐོ ཙཱིཝརཀརཎཊྛཱནེ བྷཱུམིཔརིབྷཎྜམཀཱསི, བྷཱུམི ཨལཏྟཀརསརཉྫིཏཱ ཝིཡ ཨཧོསི. བྷིཀྑཱུཧི པརིབྷུཏྟཱཝསེསཱནཾ ཡཱགུཁཛྫཀབྷཏྟཱནཾ མཧཱརཱསི ཨཧོསི. བྷིཀྑཱུ ཨུཛ྄ཛྷཱཡིཾསུ ‘‘ཨེཏྟཀཱནཾ བྷིཀྑཱུནཾ ཀིཾ ཨེཝཾབཧུཀེཧི ཡཱགུཨཱདཱིཧི, ནནུ ནཱམ པམཱཎཾ སལླཀྑེཏྭཱ ཨེཏྟཀཾ ནཱམ ཨཱཧརཐཱ’’ཏི ཉཱཏཀཱ ཙ ཨུཔཊྛཱཀཱ ཙ ཝཏྟབྦཱ སིཡུཾ, ཨནུརུདྡྷཏྠེརོ ཨཏྟནོ ཉཱཏིཨུཔཊྛཱཀཱནཾ བཧུབྷཱཝཾ ཉཱཔེཏུཀཱམོ མཉྙེ’’ཏི, ཨཐ ནེ སཏྠཱ ‘‘ཀིཾ, བྷིཀྑཝེ, ཀཐེཐཱ’’ཏི པུཙྪིཏྭཱ, ‘‘བྷནྟེ, ཨིདཾ ནཱམཱ’’ཏི ཝུཏྟེ ‘‘ཀིཾ པན ཏུམྷེ, བྷིཀྑཝེ, ‘ཨིདཾ ཨནུརུདྡྷེན ཨཱཧརཱཔིཏ’ནྟི མཉྙཐཱ’’ཏི? ‘‘ཨཱམ, བྷནྟེ’’ཏི. ‘‘ན, བྷིཀྑཝེ, མམ པུཏྟོ ཨནུརུདྡྷོ ཨེཝརཱུཔཾ ཝདེཏི. ན ཧི ཁཱིཎཱསཝཱ པཙྩཡཔཊིསཾཡུཏྟཾ ཀཐཾ ཀཐེནྟི, ཨཡཾ པན པིཎྜཔཱཏོ དེཝཏཱནུབྷཱཝེན ནིབྦཏྟོ’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༩༣.

‘‘ཡསྶཱསཝཱ པརིཀྑཱིཎཱ, ཨཱཧཱརེ ཙ ཨནིསྶིཏོ;

སུཉྙཏོ ཨནིམིཏྟོ ཙ, ཝིམོཀྑོ ཡསྶ གོཙརོ;

ཨཱཀཱསེཝ སཀུནྟཱནཾ, པདཾ ཏསྶ དུརནྣཡ’’ནྟི.

ཏཏྠ ཡསྶཱསཝཱཏི ཡསྶ ཙཏྟཱརོ ཨཱསཝཱ པརིཀྑཱིཎཱ. ཨཱཧཱརེ ཙ ཨནིསྶིཏོཏི ཨཱཧཱརསྨིཉྩ ཏཎྷཱདིཊྛིནིསྶཡེཧི ཨནིསྶིཏོ. པདཾ ཏསྶ དུརནྣཡནྟི ཡཐཱ ཨཱཀཱསེ གཙྪནྟཱནཾ སཀུཎཱནཾ ‘‘ཨིམསྨིཾ ཋཱནེ པཱདེཧི ཨཀྐམིཏྭཱ གཏཱ, ཨིདཾ ཋཱནཾ ཨུརེན པཧརིཏྭཱ གཏཱ, ཨིདཾ སཱིསེན, ཨིདཾ པཀྑེཧཱི’’ཏི ན སཀྐཱ ཉཱཏུཾ, ཨེཝམེཝ ཨེཝརཱུཔསྶ བྷིཀྑུནོ ‘‘ནིརཡཔདེན ཝཱ གཏོ, ཏིརཙྪཱནཡོནིཔདེན ཝཱ’’ཏིཨཱདིནཱ ནཡེན པདཾ པཉྙཱཔེཏུཾ ནཱམ ན སཀྐོཏི.

དེསནཱཝསཱནེ བཧཱུ སོཏཱཔཏྟི ཕལཱདཱིནི པཱཔུཎིཾསཱུཏི.

ཨནུརུདྡྷཏྠེརཝཏྠུ ཙཏུཏྠཾ.

༥. མཧཱཀཙྩཱཡནཏྠེརཝཏྠུ

ཡསྶིནྡྲིཡཱནཱིཏི ཨིམཾ དྷམྨདེསནཾ སཏྠཱ པུབྦཱརཱམེ ཝིཧརནྟོ མཧཱཀཙྩཱཡནཏྠེརཾ ཨཱརབྦྷ ཀཐེསི.

ཨེཀསྨིཉྷི སམཡེ བྷགཝཱ མཧཱཔཝཱརཎཱཡ མིགཱརམཱཏུཡཱ པཱསཱདསྶ ཧེཊྛཱ མཧཱསཱཝཀཔརིཝུཏོ ནིསཱིདི. ཏསྨིཾ སམཡེ མཧཱཀཙྩཱཡནཏྠེརོ ཨཝནྟཱིསུ ཝིཧརཏི. སོ པནཱཡསྨཱ དཱུརཏོཔི ཨཱགནྟྭཱ དྷམྨསྶཝནཾ པགྒཎྷཱཏིཡེཝ. ཏསྨཱ མཧཱཐེརཱ ནིསཱིདནྟཱ མཧཱཀཙྩཱཡནཏྠེརསྶ ཨཱསནཾ ཋཔེཏྭཱ ནིསཱིདིཾསུ. སཀྐོ དེཝརཱཛཱ དྭཱིཧི དེཝལོཀེཧི དེཝཔརིསཱཡ སདྡྷིཾ ཨཱགནྟྭཱ དིབྦགནྡྷམཱལཱདཱིཧི སཏྠཱརཾ པཱུཛེཏྭཱ ཋིཏོ མཧཱཀཙྩཱཡནཏྠེརཾ ཨདིསྭཱ ཀིཾ ནུ ཁོ མམ, ཨཡྻོ, ན དིསྶཏི, སཱདྷུ ཁོ པནསྶ སཙེ ཨཱགཙྪེཡྻཱཏི. ཐེརོཔི ཏཾ ཁཎཉྙེཝ ཨཱགནྟྭཱ ཨཏྟནོ ཨཱསནེ ནིསིནྣམེཝ ཨཏྟཱནཾ དསྶེསི. སཀྐོ ཐེརཾ དིསྭཱ གོཔྥཀེསུ དལ༹ྷཾ གཧེཏྭཱ ‘‘སཱདྷུ ཝཏ མེ, ཨཡྻོ, ཨཱགཏོ, ཨཧཾ ཨཡྻསྶ ཨཱགམནམེཝ པཙྩཱསཱིསཱམཱི’’ཏི ཝཏྭཱ ཨུབྷོཧི ཧཏྠེཧི པཱདེ སམྦཱཧིཏྭཱ གནྡྷམཱལཱདཱིཧི པཱུཛེཏྭཱ ཝནྡིཏྭཱ ཨེཀམནྟཾ ཨཊྛཱསི. བྷིཀྑཱུ ཨུཛ྄ཛྷཱཡིཾསུ. ‘‘སཀྐོ མུཁཾ ཨོལོཀེཏྭཱ སཀྐཱརཾ ཀརོཏི, ཨཝསེསམཧཱསཱཝཀཱནཾ ཨེཝརཱུཔཾ སཀྐཱརཾ ཨཀརིཏྭཱ མཧཱཀཙྩཱཡནཾ དིསྭཱ ཝེགེན གོཔྥཀེསུ གཧེཏྭཱ ‘སཱདྷུ ཝཏ མེ, ཨཡྻོ, ཨཱགཏོ, ཨཧཾ ཨཡྻསྶ ཨཱགམནམེཝ པཙྩཱསཱིསཱམཱི’ཏི ཝཏྭཱ ཨུབྷོཧི ཧཏྠེཧི པཱདེ སམྦཱཧིཏྭཱ པཱུཛེཏྭཱ ཝནྡིཏྭཱ ཨེཀམནྟཾ ཋིཏོ’’ཏི. སཏྠཱ ཏེསཾ ཏཾ ཀཐཾ སུཏྭཱ, ‘‘བྷིཀྑཝེ, མམ པུཏྟེན མཧཱཀཙྩཱཡནེན སདིསཱ ཨིནྡྲིཡེསུ གུཏྟདྭཱརཱ བྷིཀྑཱུ དེཝཱནམྤི མནུསྶཱནམྤི པིཡཱཡེཝཱ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༩༤.

‘‘ཡསྶིནྡྲིཡཱནི སམཐངྒཏཱནི,

ཨསྶཱ ཡཐཱ སཱརཐིནཱ སུདནྟཱ;

པཧཱིནམཱནསྶ ཨནཱསཝསྶ,

དེཝཱཔི ཏསྶ པིཧཡནྟི ཏཱདིནོ’’ཏི.

ཏསྶཏྠོ – ཡསྶ བྷིཀྑུནོ ཚེཀེན སཱརཐིནཱ སུདནྟཱ ཨསྶཱ ཝིཡ ཚ ཨིནྡྲིཡཱནི སམཐཾ དནྟབྷཱཝཾ ནིབྦིསེཝནབྷཱཝཾ གཏཱནི, ཏསྶ ནཝཝིདྷཾ མཱནཾ པཧཱཡ ཋིཏཏྟཱ པཧཱིནམཱནསྶ ཙཏུནྣཾ ཨཱསཝཱནཾ ཨབྷཱཝེན ཨནཱསཝསྶ. ཏཱདིནོཏི ཏཱདིབྷཱཝསཎྛིཏསྶ ཏཐཱརཱུཔསྶ དེཝཱཔི པིཧཡནྟི, མནུསྶཱཔི དསྶནཉྩ ཨཱགམནཉྩ པཏྠེནྟིཡེཝཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཧཱཀཙྩཱཡནཏྠེརཝཏྠུ པཉྩམཾ.

༦. སཱརིཔུཏྟཏྠེརཝཏྠུ

པཐཝིསམོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཱརིཔུཏྟཏྠེརཾ ཨཱརབྦྷ ཀཐེསི.

ཨེཀསྨིཉྷི སམཡེ ཨཱཡསྨཱ སཱརིཔུཏྟོ ཝུཊྛཝསྶོ ཙཱརིཀཾ པཀྐམིཏུཀཱམོ བྷགཝནྟཾ ཨཱཔུཙྪིཏྭཱ ཝནྡིཏྭཱ ཨཏྟནོ པརིཝཱརེན སདྡྷིཾ ནིཀྑམི. ཨཉྙེཔི བཧཱུ བྷིཀྑཱུ ཐེརཾ ཨནུགཙྪིཾསུ. ཐེརོ ཙ ནཱམགོཏྟཝསེན པཉྙཱཡམཱནེ བྷིཀྑཱུ ནཱམགོཏྟཝསེན ཀཐེཏྭཱ ནིཝཏྟཱཔེསི. ཨཉྙཏརོ ནཱམགོཏྟཝསེན ཨཔཱཀཊོ བྷིཀྑུ ཙིནྟེསི – ‘‘ཨཧོ ཝཏ མམྤི ནཱམགོཏྟཝསེན པགྒཎྷནྟོ ཀཐེཏྭཱ ནིཝཏྟཱཔེཡྻཱ’’ཏི ཐེརོ མཧཱབྷིཀྑུསངྒྷསྶ ཨནྟརེ ཏཾ ན སལླཀྑེསི. སོ ‘‘ཨཉྙེ ཝིཡ བྷིཀྑཱུ ན མཾ པགྒཎྷཱཏཱི’’ཏི ཐེརེ ཨཱགྷཱཏཾ བནྡྷི. ཐེརསྶཔི སངྒྷཱཊིཀཎྞོ ཏསྶ བྷིཀྑུནོ སརཱིརཾ ཕུསི, ཏེནཱཔི ཨཱགྷཱཏཾ བནྡྷིཡེཝ. སོ ‘‘དཱནི ཐེརོ ཝིཧཱརཱུཔཙཱརཾ ཨཏིཀྐནྟོ བྷཝིསྶཏཱི’’ཏི ཉཏྭཱ སཏྠཱརཾ ཨུཔསངྐམིཏྭཱ ‘‘ཨཱཡསྨཱ མཾ, བྷནྟེ, སཱརིཔུཏྟོ ཏུམྷཱཀཾ ཨགྒསཱཝཀོམྷཱིཏི ཀཎྞསཀྑལིཾ བྷིནྡནྟོ ཝིཡ པཧརིཏྭཱ ཨཁམཱཔེཏྭཱཝ ཙཱརིཀཾ པཀྐནྟོ’’ཏི ཨཱཧ. སཏྠཱ ཐེརཾ པཀྐོསཱཔེསི.

ཏསྨིཾ ཁཎེ མཧཱམོགྒལླཱནཏྠེརོ ཙ ཨཱནནྡཏྠེརོ ཙ ཙིནྟེསུཾ – ‘‘ཨམྷཱཀཾ ཨགྒཛེཊྛབྷཱཏརཱ ཨིམསྶ བྷིཀྑུནོ ཨཔཧཊབྷཱཝཾ སཏྠཱ ནོ ན ཛཱནཱཏི, སཱིཧནཱདཾ པན ནདཱཔེཏུཀཱམོ བྷཝིསྶཏཱིཏི པརིསཾ སནྣིཔཱཏཱཔེསྶཱམཱ’’ཏི. ཏེ ཀུཉྩིཀཧཏྠཱ པརིཝེཎདྭཱརཱནི ཝིཝརིཏྭཱ ‘‘ཨབྷིཀྐམཐཱཡསྨནྟོ, ཨབྷིཀྐམཐཱཡསྨནྟོ, ཨིདཱནཱཡསྨཱ སཱརིཔུཏྟོ བྷགཝཏོ སམྨུཁཱ སཱིཧནཱདཾ ནདིསྶཏཱི’’ཏི (ཨ. ནི. ༩.༡༡) མཧཱབྷིཀྑུསངྒྷཾ སནྣིཔཱཏེསུཾ. ཐེརོཔི ཨཱགནྟྭཱ སཏྠཱརཾ ཝནྡིཏྭཱ ནིསཱིདི. ཨཐ ནཾ སཏྠཱ ཏམཏྠཾ པུཙྪི. ཐེརོ ‘‘ནཱཡཾ བྷིཀྑུ མཡཱ པཧཊོ’’ཏི ཨཝཏྭཱཝ ཨཏྟནོ གུཎཀཐཾ ཀཐེནྟོ ‘‘ཡསྶ ནཱུན, བྷནྟེ, ཀཱཡེ ཀཱཡགཏཱསཏི ཨནུཔཊྛིཏཱ ཨསྶ, སོ ཨིདྷ ཨཉྙཏརཾ སབྲཧྨཙཱརིཾ ཨཱསཛྫ ཨཔྤཊིནིསྶཛྫ ཙཱརིཀཾ པཀྐམེཡྻཱ’’ཏི ཝཏྭཱ ‘‘སེཡྻཐཱཔི, བྷནྟེ, པཐཝིཡཾ སུཙིམྤི ནིཀྑིཔནྟི, ཨསུཙིམྤི ནིཀྑིཔནྟཱི’’ཏིཨཱདིནཱ ནཡེན ཨཏྟནོ པཐཝཱིསམཙིཏྟཏཉྩ ཨཱཔོཏེཛོཝཱཡོ རཛོཧརཎཙཎྜཱལཀུམཱརཀཨུསབྷཚིནྣཝིསཱཎསམཙིཏྟཏཉྩ ཨཧིཀུཎཔཱདཱིཧི ཝིཡ ཨཏྟནོ ཀཱཡེན ཨཊྚིཡནཉྩ མེདཀཐཱལིཀཱ ཝིཡ ཨཏྟནོ ཀཱཡཔརིཧརཎཉྩ པཀཱསེསི. ཨིམཱཧི ཙ པན ནཝཧི ཨུཔམཱཧི ཐེརེ ཨཏྟནོ གུཎེ ཀཐེནྟེ ནཝསུཔི ཋཱནེསུ ཨུདཀཔརིཡནྟཾ ཀཏྭཱ མཧཱཔཐཝཱི ཀམྤི. རཛོཧརཎཙཎྜཱལཀུམཱརཀམེདཀཐཱལིཀོ པམཱནཾ པན ཨཱཧརཎཀཱལེ པུཐུཛྫནཱ བྷིཀྑཱུ ཨསྶཱུནི སནྡྷཱརེཏུཾ ནཱསཀྑིཾསུ, ཁཱིཎཱསཝཱནཾ དྷམྨསཾཝེགོ ཨུདཔཱདི.

ཐེརེ ཨཏྟནོ གུཎཾ ཀཐེནྟེཡེཝ ཨབྦྷཱཙིཀྑནཀསྶ བྷིཀྑུནོ སཀལསརཱིརེ ཌཱཧོ ཨུཔྤཛྫི, སོ ཏཱཝདེཝ བྷགཝཏོ པཱདེསུ པཏིཏྭཱ ཨཏྟནོ ཨབྦྷཱཙིཀྑནདོསཾ པཀཱསེཏྭཱ ཨཙྩཡཾ དེསེསི. སཏྠཱ ཐེརཾ ཨཱམནྟེཏྭཱ, ‘‘སཱརིཔུཏྟ, ཁམ ཨིམསྶ མོགྷཔུརིསསྶ, ཡཱཝསྶ སཏྟདྷཱ མུདྡྷཱ ན ཕལཏཱི’’ཏི ཨཱཧ. ཐེརོ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཡ྄ཧ ‘‘ཁམཱམཧཾ, བྷནྟེ, ཏསྶ ཨཱཡསྨཏོ, ཁམཏུ ཙ མེ སོ ཨཱཡསྨཱ, སཙེ མཡ྄ཧཾ དོསོ ཨཏྠཱི’’ཏི ཨཱཧ. བྷིཀྑཱུ ཀཐཡིཾསུ ‘‘པསྶཐ དཱནཱཝུསོ, ཐེརསྶ ཨནོཔམགུཎཾ, ཨེཝརཱུཔསྶ ནཱམ མུསཱཝཱདེན ཨབྦྷཱཙིཀྑནཀསྶ བྷིཀྑུནོ ཨུཔརི ཨཔྤམཏྟཀམྤི ཀོཔཾ ཝཱ དོསཾ ཝཱ ཨཀཏྭཱ སཡམེཝ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཡ྄ཧ ཁམཱཔེཏཱི’’ཏི. ‘‘སཏྠཱ ཏཾ ཀཐཾ སུཏྭཱ, བྷིཀྑཝེ, ཀིཾ ཀཐེཐཱ’’ཏི པུཙྪིཏྭཱ ‘‘ཨིདཾ ནཱམ, བྷནྟེ’’ཏི ཝུཏྟེ, ‘‘ན བྷིཀྑཝེ, སཀྐཱ སཱརིཔུཏྟསདིསཱནཾ ཀོཔཾ ཝཱ དོསཾ ཝཱ ཨུཔྤཱདེཏུཾ, མཧཱཔཐཝཱིསདིསཾ, བྷིཀྑཝེ, ཨིནྡཁཱིལསདིསཾ པསནྣཨུདཀརཧདསདིསཉྩ སཱརིཔུཏྟསྶ ཙིཏྟ’’ནྟི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༩༥.

‘‘པཐཝིསམོ ནོ ཝིརུཛ྄ཛྷཏི,

ཨིནྡཁིལུཔམོ ཏཱདི སུབྦཏོ;

རཧདོཝ ཨཔེཏཀདྡམོ,

སཾསཱརཱ ན བྷཝནྟི ཏཱདིནོ’’ཏི.

ཏསྶཏྠོ – བྷིཀྑཝེ, ཡཐཱ ནཱམ པཐཝིཡཾ སུཙཱིནི གནྡྷམཱལཱདཱིནིཔི ནིཀྑིཔནྟི, ཨསུཙཱིནི མུཏྟཀརཱིསཱདཱིནིཔི ནིཀྑིཔནྟི, ཡཐཱ ནཱམ ནགརདྭཱརེ ནིཁཱཏཾ ཨིནྡཁཱིལཾ དཱརཀཱདཡོ ཨོམུཏྟེནྟིཔི ཨཱུཧདནྟིཔི, ཨཔརེ པན ཏཾ གནྡྷམཱལཱདཱིཧི སཀྐརོནྟི. ཏཏྠ པཐཝིཡཱ ཨིནྡཁཱིལསྶ ཙ ནེཝ ཨནུརོདྷོ ཨུཔྤཛྫཏི, ན ཝིརོདྷོ; ཨེཝམེཝ ཡྭཱཡཾ ཁཱིཎཱསཝོ བྷིཀྑུ ཨཊྛཧི ལོཀདྷམྨེཧི ཨཀམྤིཡབྷཱཝེན ཏཱདི, ཝཏཱནཾ སུནྡརཏཱཡ སུབྦཏོ. སོ ‘‘ཨིམེ མཾ ཙཏཱུཧི པཙྩཡེཧི སཀྐརོནྟི, ཨིམེ པན ན སཀྐརོནྟཱི’’ཏི སཀྐཱརཉྩ ཨསཀྐཱརཉྩ ཀརོནྟེསུ ནེཝ ཨནུརུཛ྄ཛྷཏི, ནོ ཝིརུཛ྄ཛྷཏི, ཨཐ ཁོ པཐཝིསམོ ཙ ཨིནྡཁིལུཔམོ ཨེཝ ཙ ཧོཏི. ཡཐཱ ཙ ཨཔགཏཀདྡམོ རཧདོ པསནྣོདཀོ ཧོཏི, ཨེཝཾ ཨཔགཏཀིལེསཏཱཡ རཱགཀདྡམཱདཱིཧི ཨཀདྡམོ ཝིཔྤསནྣོཝ ཧོཏི. ཏཱདིནོཏི ཏསྶ པན ཨེཝརཱུཔསྶ སུགཏིདུགྒཏཱིསུ སཾསརཎཝསེན སཾསཱརཱ ནཱམ ན ཧོནྟཱིཏི.

དེསནཱཝསཱནེ ནཝ བྷིཀྑུསཧསྶཱནི སཧ པཊིསམྦྷིདཱཧི ཨརཧཏྟཾ པཱཔུཎིཾསཱུཏི.

སཱརིཔུཏྟཏྠེརཝཏྠུ ཚཊྛཾ.

༧. ཀོསམྦིཝཱསཱིཏིསྶཏྠེརསཱམཎེརཝཏྠུ

སནྟཾ ཏསྶ མནཾ ཧོཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏིསྶཏྠེརསྶ སཱམཎེརཾ ཨཱརབྦྷ ཀཐེསི.

ཨེཀོ ཀིར ཀོསམྦིཝཱསཱི ཀུལཔུཏྟོ སཏྠུ སཱསནེ པབྦཛིཏྭཱ ལདྡྷུཔསམྤདོ ‘‘ཀོསམྦིཝཱསཱིཏིསྶཏྠེརོ’’ཏི པཉྙཱཡི. ཏསྶ ཀོསམྦིཡཾ ཝུཊྛཝསྶསྶ ཨུཔཊྛཱཀོ ཏིཙཱིཝརཉྩེཝ སཔྤིཕཱཎིཏཉྩ ཨཱཧརིཏྭཱ པཱདམཱུལེ ཋཔེསི. ཨཐ ནཾ ཐེརོ ཨཱཧ – ‘‘ཀིཾ ཨིདཾ ཨུཔཱསཀཱ’’ཏི. ‘‘ནནུ མཡཱ, བྷནྟེ, ཏུམྷེ ཝསྶཾ ཝཱསིཏཱ, ཨམྷཱཀཉྩ ཝིཧཱརེ ཝུཊྛཝསྶཱ ཨིམཾ ལཱབྷཾ ལབྷནྟི, གཎྷཐ, བྷནྟེ’’ཏི. ‘‘ཧོཏུ, ཨུཔཱསཀ, ན མཡ྄ཧཾ ཨིམིནཱ ཨཏྠོ’’ཏི. ‘‘ཀིཾ ཀཱརཎཱ, བྷནྟེ’’ཏི? ‘‘མམ སནྟིཀེ ཀཔྤིཡཀཱརཀོ སཱམཎེརོཔི ནཏྠི, ཨཱཝུསོ’’ཏི. ‘‘སཙེ, བྷནྟེ, ཀཔྤིཡཀཱརཀོ ནཏྠི, མམ པུཏྟོ ཨཡྻསྶ སནྟིཀེ སཱམཎེརོ བྷཝིསྶཏཱི’’ཏི. ཐེརོ ཨདྷིཝཱསེསི. ཨུཔཱསཀོ སཏྟཝསྶིཀཾ ཨཏྟནོ པུཏྟཾ ཐེརསྶ སནྟིཀཾ ནེཏྭཱ ‘‘ཨིམཾ པབྦཱཛེཐཱ’’ཏི ཨདཱསི. ཨཐསྶ ཐེརོ ཀེསེ ཏེམེཏྭཱ ཏཙཔཉྩཀཀམྨཊྛཱནཾ དཏྭཱ པབྦཱཛེསི. སོ ཁུརགྒེཡེཝ སཧ པཊིསམྦྷིདཱཧི ཨརཧཏྟཾ པཱཔུཎི.

ཐེརོ ཏཾ པབྦཱཛེཏྭཱ ཨཌྜྷམཱསཾ ཏཏྠ ཝསིཏྭཱ ‘‘སཏྠཱརཾ པསྶིསྶཱམཱི’’ཏི སཱམཎེརཾ བྷཎྜཀཾ གཱཧཱཔེཏྭཱ གཙྪནྟོ ཨནྟརཱམགྒེ ཨེཀཾ ཝིཧཱརཾ པཱཝིསི. སཱམཎེརོ ཨུཔཛ྄ཛྷཱཡསྶ སེནཱསནཾ གཧེཏྭཱ པཊིཛགྒི. ཏསྶ ཏཾ པཊིཛགྒནྟསྶེཝ ཝིཀཱལོ ཛཱཏོ, ཏེན ཨཏྟནོ སེནཱསནཾ པཊིཛགྒིཏུཾ ནཱསཀྑི. ཨཐ ནཾ ཨུཔཊྛཱནཝེལཱཡཾ ཨཱགནྟྭཱ ནིསིནྣཾ ཐེརོ པུཙྪི – ‘‘སཱམཎེར, ཨཏྟནོ ཝསནཊྛཱནཾ པཊིཛགྒིཏ’’ནྟི? ‘‘བྷནྟེ, པཊིཛགྒིཏུཾ ཨོཀཱསཾ ནཱལཏྠ’’ནྟི. ‘‘ཏེན ཧི མམ ཝསནཊྛཱནེཡེཝ ཝས, དུཀྑཾ ཏེ ཨཱགནྟུཀཊྛཱནེ བཧི ཝསིཏུ’’ནྟི ཏཾ གཧེཏྭཱཝ སེནཱསནཾ པཱཝིསི. ཐེརོ པན པུཐུཛྫནོ ནིཔནྣམཏྟོཝ ནིདྡཾ ཨོཀྐམི. སཱམཎེརོ ཙིནྟེསི – ‘‘ཨཛྫ མེ ཨུཔཛ྄ཛྷཱཡེན སདྡྷིཾ ཏཏིཡོ དིཝསོ ཨེཀསེནཱསནེ ཝསནྟསྶ, ‘སཙེ ནིཔཛྫིཏྭཱ ནིདྡཱཡིསྶཱམི, ཐེརོ སཧསེཡྻཾ ཨཱཔཛྫེཡྻཱ’ཏི ནིསིནྣཀོཝ ཝཱིཏིནཱམེསྶཱམཱི’’ཏི ཨུཔཛ྄ཛྷཱཡསྶ མཉྩཀསམཱིཔེ པལླངྐཾ ཨཱབྷུཛིཏྭཱ ནིསིནྣཀོཝ རཏྟིཾ ཝཱིཏིནཱམེསི. ཐེརོ པཙྩཱུསཀཱལེ པཙྩུཊྛཱཡ ‘‘སཱམཎེརཾ ནིཀྑམཱཔེཏུཾ ཝཊྚཏཱི’’ཏི མཉྩཀཔསྶེ ཋཔིཏབཱིཛནིཾ གཧེཏྭཱ བཱིཛནིཔཏྟསྶ ཨགྒེན སཱམཎེརསྶ ཀཊསཱརཀཾ པཧརིཏྭཱ བཱིཛནིཾ ཨུདྡྷཾ ཨུཀྑིཔནྟོ ‘‘སཱམཎེར, བཧི ནིཀྑམཱ’’ཏི ཨཱཧ, བཱིཛནིཔཏྟདཎྜཀོ ཨཀྑིམྷི པཊིཧཉྙི, ཏཱཝདེཝ ཨཀྑི བྷིཛྫི. སོ ‘‘ཀིཾ, བྷནྟེ’’ཏི ཝཏྭཱ ཨུཊྛཱཡ ‘‘བཧི ནིཀྑམཱ’’ཏི ཝུཏྟེ ‘‘ཨཀྑི མེ, བྷནྟེ, བྷིནྣ’’ནྟི ཨཝཏྭཱ ཨེཀེན ཧཏྠེན པཊིཙྪཱདེཏྭཱ ནིཀྑམི. ཝཏྟཀརཎཀཱལེ ཙ པན ‘‘ཨཀྑི མེ བྷིནྣ’’ནྟི ཏུཎྷཱི ཨནིསཱིདིཏྭཱ ཨེཀེན ཧཏྠེན ཨཀྑིཾ གཧེཏྭཱ ཨེཀེན ཧཏྠེན མུཊྛིསམྨུཉྫནིཾ ཨཱདཱཡ ཝཙྩཀུཊིཉྩ མུཁདྷོཝནཊྛཱནཉྩ སམྨཛྫིཏྭཱ མུཁདྷོཝནོདཀཉྩ ཋཔེཏྭཱ པརིཝེཎཾ སམྨཛྫི. སོ ཨུཔཛ྄ཛྷཱཡསྶ དནྟཀཊྛཾ དདམཱནོ ཨེཀེནེཝ ཧཏྠེན ཨདཱསི.

ཨཐ ནཾ ཨུཔཛ྄ཛྷཱཡོ ཨཱཧ – ‘‘ཨསིཀྑིཏོ ཝཏཱཡཾ སཱམཎེརོ, ཨཱཙརིཡུཔཛ྄ཛྷཱཡཱནཾ ཨེཀེན ཧཏྠེན དནྟཀཊྛཾ དཱཏུཾ ན ཝཊྚཏཱི’’ཏི. ཛཱནཱམཧཾ, བྷནྟེ, ‘‘ན ཨེཝཾ ཝཊྚཏཱི’’ཏི, ཨེཀོ པན མེ ཧཏྠོ ན ཏུཙྪོཏི. ‘‘ཀིཾ སཱམཎེརཱ’’ཏི? སོ ཨཱདིཏོ པཊྛཱཡ ཏཾ པཝཏྟིཾ ཨཱརོཙེསི. ཐེརོ སུཏྭཱཝ སཾཝིགྒམཱནསོ ‘‘ཨཧོ ཝཏ མཡཱ བྷཱརིཡཾ ཀམྨཾ ཀཏ’’ནྟི ཝཏྭཱ ‘‘ཁམཱཧི མེ, སཔྤུརིས, ནཱཧམེཏཾ ཛཱནཱམི, ཨཝསྶཡོ མེ ཧོཧཱི’’ཏི ཨཉྫལིཾ པགྒཡ྄ཧ སཏྟཝསྶིཀདཱརཀསྶ པཱདམཱུལེ ཨུཀྐུཊིཀཾ ནིསཱིདི. ཨཐ ནཾ སཱམཎེརོ ཨཱཧ – ‘‘ནཱཧཾ, བྷནྟེ, ཨེཏདཏྠཱཡ ཀཐེསིཾ, ཏུམྷཱཀཾ ཙིཏྟཾ ཨནུརཀྑནྟེན མཡཱ ཨེཝཾ ཝུཏྟཾ ནེཝེཏྠ ཏུམྷཱཀཾ དོསོ ཨཏྠི, ན མཡ྄ཧཾ. ཝཊྚསྶེཝེསོ དོསོ, མཱ ཙིནྟཡིཏྠ, མཡཱ ཏུམྷཱཀཾ ཝིཔྤཊིསཱརཾ རཀྑནྟེནེཝ ནཱརོཙིཏ’’ནྟི. ཐེརོ སཱམཎེརེན ཨསྶཱསིཡམཱནོཔི ཨནསྶཱསིཏྭཱ ཨུཔྤནྣསཾཝེགོ སཱམཎེརསྶ བྷཎྜཀཾ གཧེཏྭཱ སཏྠུ སནྟིཀཾ པཱཡཱསི. སཏྠཱཔིསྶ ཨཱགམནཾ ཨོལོཀེནྟོཝ ནིསཱིདི. སོ གནྟྭཱ སཏྠཱརཾ ཝནྡིཏྭཱ སཏྠཱརཱ སདྡྷིཾ པཊིསམྨོདནཾ ཀཏྭཱ ‘‘ཁམནཱིཡཾ ཏེ བྷིཀྑུ, ཀིཉྩི ཨཏིརེཀཾ ཨཕཱསུཀཾ ཨཏྠཱི’’ཏི པུཙྪིཏོ ཨཱཧ – ‘‘ཁམནཱིཡཾ, བྷནྟེ, ནཏྠི མེ ཀིཉྩི ཨཏིརེཀཾ ཨཕཱསུཀཾ, ཨཔིཙ ཁོ པན མེ ཨཡཾ དཧརསཱམཎེརོ ཝིཡ ཨཉྙོ ཨཏིརེཀགུཎོ ན དིཊྛཔུབྦོ’’ཏི. ‘‘ཀིཾ པན ཨིམིནཱ ཀཏཾ བྷིཀྑཱུ’’ཏི. སོ ཨཱདིཏོ པཊྛཱཡ སབྦཾ ཏཾ པཝཏྟིཾ བྷགཝཏོ ཨཱརོཙེནྟོ ཨཱཧ – ‘‘ཨེཝཾ, བྷནྟེ, མཡཱ ཁམཱཔིཡམཱནོ མཾ ཨེཝཾ ཝདེསི ‘ནེཝེཏྠ ཏུམྷཱཀཾ དོསོ ཨཏྠི, ན མཡ྄ཧཾ. ཝཊྚསྶེཝེསོ དོསོ, ཏུམྷེ མཱ ཙིནྟཡིཏྠཱ’ཏི, ཨིཏི མཾ ཨསྶཱསེསིཡེཝ, མཡི ནེཝ ཀོཔཾ, ན དོསམཀཱསི, ན མེ, བྷནྟེ, ཨེཝརཱུཔོ གུཎསམྤནྣོ དིཊྛཔུབྦོ’’ཏི. ཨཐ ནཾ སཏྠཱ ‘‘བྷིཀྑུ ཁཱིཎཱསཝཱ ནཱམ ན ཀསྶཙི ཀུཔྤནྟི, ན དུསྶནྟི, སནྟིནྡྲིཡཱ སནྟམཱནསཱཝ ཧོནྟཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༩༦.

‘‘སནྟཾ ཏསྶ མནཾ ཧོཏི, སནྟཱ ཝཱཙཱ ཙ ཀམྨ ཙ;

སམྨདཉྙཱ ཝིམུཏྟསྶ, ཨུཔསནྟསྶ ཏཱདིནོ’’ཏི.

ཏཏྠ སནྟཾ ཏསྶཱཏི ཏསྶ ཁཱིཎཱསཝསཱམཎེརསྶ ཨབྷིཛ྄ཛྷཱདཱིནཾ ཨབྷཱཝེན མནཾ སནྟམེཝ ཧོཏི ཨུཔསནྟཾ ནིབྦུཏཾ. ཏཐཱ མུསཱཝཱདཱདཱིནཾ ཨབྷཱཝེན ཝཱཙཱ ཙ པཱཎཱཏིཔཱཏཱདཱིནཾ ཨབྷཱཝེན ཀཱཡཀམྨཉྩ སནྟམེཝ ཧོཏི. སམྨདཉྙཱ ཝིམུཏྟསྶཱཏི ནཡེན ཧེཏུནཱ ཛཱནིཏྭཱ པཉྩཧི ཝིམུཏྟཱིཧི ཝིམུཏྟསྶ. ཨུཔསནྟསྶཱཏི ཨབྦྷནྟརེ རཱགཱདཱིནཾ ཨུཔསམེན ཨུཔསནྟསྶ. ཏཱདིནོཏི ཏཐཱརཱུཔསྶ གུཎསམྤནྣསྶཱཏི.

དེསནཱཝསཱནེ ཀོསམྦིཝཱསཱིཏིསྶཏྠེརོ སཧ པཊིསམྦྷིདཱཧི ཨརཧཏྟཾ པཱཔུཎི. སེསམཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཀོསམྦིཝཱསཱིཏིསྶཏྠེརསཱམཎེརཝཏྠུ སཏྟམཾ.

༨. སཱརིཔུཏྟཏྠེརཝཏྠུ

ཨསྶདྡྷོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཱརིཔུཏྟཏྠེརཾ ཨཱརབྦྷ ཀཐེསི.

ཨེཀསྨིཉྷི སམཡེ ཏིཾསམཏྟཱ ཨཱརཉྙཀཱ བྷིཀྑཱུ སཏྠུ སནྟིཀཾ ཨཱགནྟྭཱ ཝནྡིཏྭཱ ནིསཱིདིཾསུ. སཏྠཱ ཏེསཾ སཧ པཊིསམྦྷིདཱཧི ཨརཧཏྟསྶཱུཔནིསྶཡཾ དིསྭཱ སཱརིཔུཏྟཏྠེརཾ ཨཱམནྟེཏྭཱ ‘‘སདྡཧསི ཏྭཾ, སཱརིཔུཏྟ, སདྡྷིནྡྲིཡཾ བྷཱཝིཏཾ བཧུལཱིཀཏཾ ཨམཏོགདྷཾ ཧོཏི ཨམཏཔརིཡོསཱན’’ནྟི (སཾ. ནི. ༥.༥༡༤) ཨེཝཾ པཉྩིནྡྲིཡཱནི ཨཱརབྦྷ པཉྷཾ པུཙྪི. ཐེརོ ‘‘ན ཁྭཱཧཾ, བྷནྟེ, ཨེཏྠ བྷགཝཏོ སདྡྷཱཡ གཙྪཱམི, སདྡྷིནྡྲིཡཾ…པེ… ཨམཏཔརིཡོསཱནཾ. ཡེསཉྷེཏཾ, བྷནྟེ, ཨཉྙཱཏཾ ཨསྶ ཨདིཊྛཾ ཨཝིདིཏཾ ཨསཙྪིཀཏཾ ཨཕསྶིཏཾ པཉྙཱཡ, ཏེ ཏཏྠ པརེསཾ སདྡྷཱཡ གཙྪེཡྻུཾ. སདྡྷིནྡྲིཡཾ…པེ… ཨམཏཔརིཡོསཱན’’ནྟི (སཾ. ནི. ༥.༥༡༤) ཨེཝཾ ཏཾ པཉྷཾ བྱཱཀཱསི. ཏཾ སུཏྭཱ བྷིཀྑཱུ ཀཐཾ སམུཊྛཱཔེསུཾ ‘‘སཱརིཔུཏྟཏྠེརོ མིཙྪཱགཧཎཾ ནེཝ ཝིསྶཛྫེསི, ཨཛྫཱཔི སམྨཱསམྦུདྡྷསྶ ན སདྡཧཏིཡེཝཱ’’ཏི. ཏཾ སུཏྭཱ སཏྠཱ ‘‘ཀིཾ ནཱམེཏཾ, བྷིཀྑཝེ, ཝདེཐ. ཨཧཉྷི ‘པཉྩིནྡྲིཡཱནི ཨབྷཱཝེཏྭཱ སམཐཝིཔསྶནཾ ཨཝཌྜྷེཏྭཱ མགྒཕལཱནི སཙྪིཀཱཏུཾ སམཏྠོ ནཱམ ཨཏྠཱིཏི སདྡཧསི ཏྭཾ སཱརིཔུཏྟོ’ཏི པུཙྪིཾ. སོ ‘ཨེཝཾ སཙྪིཀརོནྟོ ཨཏྠི ནཱམཱཏི ན སདྡཧཱམི, བྷནྟེ’ཏི ཀཐེསི. ན དིནྣསྶ ཝཱ ཀཏསྶ ཝཱ ཕལཾ ཝིཔཱཀཾ ན སདྡཧཏི, ནཱཔི བུདྡྷཱདཱིནཾ གུཎཾ ན སདྡཧཏི. ཨེསོ པན ཨཏྟནཱ པཊིཝིདྡྷེསུ ཛྷཱནཝིཔསྶནཱམགྒཕལདྷམྨེསུ པརེསཾ སདྡྷཱཡ ན གཙྪཏི. ཏསྨཱ ཨནུཔཝཛྫོ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༩༧.

‘‘ཨསྶདྡྷོ ཨཀཏཉྙཱུ ཙ, སནྡྷིཙྪེདོ ཙ ཡོ ནརོ,

ཧཏཱཝཀཱསོ ཝནྟཱསོ, ས ཝེ ཨུཏྟམཔོརིསོ’’ཏི.

ཏསྶཐོ – ཨཏྟནོ པཊིཝིདྡྷགུཎཾ པརེསཾ ཀཐཱཡ ན སདྡཧཏཱིཏི ཨསྶདྡྷོ. ཨཀཏཾ ནིབྦཱནཾ ཛཱནཱཏཱིཏི ཨཀཏཉྙཱུ, སཙྪིཀཏནིབྦཱནོཏི ཨཏྠོ. ཝཊྚསནྡྷིཾ, སཾསཱརསནྡྷིཾ ཚིནྡིཏྭཱ ཋིཏོཏི སནྡྷིཙྪེདོ. ཀུསལཱཀུསལཀམྨབཱིཛསྶ ཁཱིཎཏྟཱ ནིབྦཏྟནཱཝཀཱསོ ཧཏོ ཨསྶཱཏི ཧཏཱཝཀཱསོ. ཙཏཱུཧི མགྒེཧི ཀཏྟབྦཀིཙྩསྶ ཀཏཏྟཱ,སབྦཱ ཨཱསཱ ཨིམིནཱ ཝནྟཱཏི ཝནྟཱསོ. སོ ཨེཝརཱུཔོ ནརོ. པཊིཝིདྡྷལོཀུཏྟརདྷམྨཏཱཡ པུརིསེསུ ཨུཏྟམབྷཱཝཾ པཏྟོཏི པུརིསུཏྟམོཏི.

གཱཐཱཝསཱནེ ཏེ ཨཱརཉྙཀཱ ཏིཾསམཏྟཱ བྷིཀྑཱུ སཧ པཊིསམྦྷིདཱཧི ཨརཧཏྟཾ པཱཔུཎིཾསུ. སེསཛནསྶཱཔི སཏྠིཀཱ དྷམྨདེསནཱ ཨཧོསཱིཏི.

སཱརིཔུཏྟཏྠེརཝཏྠུ ཨཊྛམཾ.

༩. ཁདིརཝནིཡརེཝཏཏྠེརཝཏྠུ

གཱམེ ཝཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཁདིརཝནིཡརེཝཏཏྠེརཾ ཨཱརབྦྷ ཀཐེསི.

ཨཱཡསྨཱ ཧི སཱརིཔུཏྟོ སཏྟཱསཱིཏིཀོཊིདྷནཾ པཧཱཡ པབྦཛིཏྭཱ ཙཱལཱ, ཨུཔཙཱལཱ, སཱིསཱུཔཙཱལཱཏི ཏིསྶོ བྷགིནིཡོ, ཙུནྡོ ཨུཔསེནོཏི ཨིམེ དྭེ ཙ བྷཱཏརོ པབྦཱཛེསི. རེཝཏཀུམཱརོ ཨེཀོཝ གེཧེ ཨཝསིཊྛོ. ཨཐསྶ མཱཏཱ ཙིནྟེསི – ‘‘མམ པུཏྟོ ཨུཔཏིསྶོ ཨེཏྟཀཾ དྷནཾ པཧཱཡ པབྦཛིཏྭཱ ཏིསྶོ ཙ བྷགིནིཡོ དྭེ ཙ བྷཱཏརོ པབྦཱཛེསི, རེཝཏོ ཨེཀོཝ ཨཝསེསོ. སཙེ ཨིམམྤི པབྦཱཛེསྶཏི, ཨེཏྟཀཾ ནོ དྷནཾ ནསྶིསྶཏི, ཀུལཝཾསོ པཙྪིཛྫིསྶཏི, དཧརཀཱལེཡེཝ ནཾ གྷརཱཝཱསེན བནྡྷིསྶཱམཱི’’ཏི. སཱརིཔུཏྟཏྠེརོཔི པཊིཀཙྩེཝ བྷིཀྑཱུ ཨཱཎཱཔེསི ‘‘སཙེ, ཨཱཝུསོ, རེཝཏོ པབྦཛིཏུཀཱམོ ཨཱགཙྪཏི, ཨཱགཏམཏྟམེཝ ནཾ པབྦཱཛེཡྻཱཐ, མམ མཱཏཱཔིཏརོ མིཙྪཱདིཊྛིཀཱ, ཀིཾ ཏེཧི ཨཱཔུཙྪིཏེཧི, ཨཧམེཝ ཏསྶ མཱཏཱ ཙ པིཏཱ ཙཱ’’ཏི. མཱཏཱཔིསྶ རེཝཏཀུམཱརཾ སཏྟཝསྶིཀམེཝ གྷརབནྡྷནེན བནྡྷིཏུཀཱམཱ སམཱནཛཱཏིཀེ ཀུལེ དཱརིཀཾ ཝཱརེཏྭཱ དིཝསཾ ཝཝཏྠཔེཏྭཱ ཀུམཱརཾ མཎྜེཏྭཱ པསཱདྷེཏྭཱ མཧཏཱ པརིཝཱརེན སདྡྷིཾ ཨཱདཱཡ ཀུམཱརིཀཱཡ ཉཱཏིགྷརཾ ཨགམཱསི. ཨཐ ནེསཾ ཀཏམངྒལཱནཾ དྭིནྣམྤི ཉཱཏཀེསུ སནྣིཔཏིཏེསུ ཨུདཀཔཱཏིཡཾ ཧཏྠེ ཨོཏཱརེཏྭཱ མངྒལཱནི ཝཏྭཱ ཀུམཱརིཀཱཡ ཝུཌྜྷིཾ ཨཱཀངྑམཱནཱ ཉཱཏཀཱ ‘‘ཏཝ ཨཡྻིཀཱཡ དིཊྛདྷམྨཾ པསྶ, ཨཡྻིཀཱ ཝིཡ ཙིརཾ ཛཱིཝ, ཨམྨཱ’’ཏི ཨཱཧཾསུ. རེཝཏཀུམཱརོ ‘‘ཀོ ནུ ཁོ ཨིམིསྶཱ ཨཡྻིཀཱཡ དིཊྛདྷམྨོ’’ཏི ཙིནྟེཏྭཱ ‘‘ཀཏརཱ ཨིམིསྶཱ ཨཡྻིཀཱ’’ཏི པུཙྪི. ཨཐ ནཾ ཨཱཧཾསུ, ‘‘ཏཱཏ, ཀིཾ ན པསྶསི ཨིམཾ ཝཱིསཝསྶསཏིཀཾ ཁཎྜདནྟཾ པལིཏཀེསཾ ཝལིཏྟཙཾ ཏིལཀཱཧཏགཏྟཾ གོཔཱནསིཝངྐཾ, ཨེསཱ ཨེཏིསྶཱ ཨཡྻིཀཱ’’ཏི. ‘‘ཀིཾ པན ཨཡམྤི ཨེཝརཱུཔཱ བྷཝིསྶཏཱི’’ཏི? ‘‘སཙེ ཛཱིཝིསྶཏི, བྷཝིསྶཏི, ཏཱཏཱ’’ཏི. སོ ཙིནྟེསི – ‘‘ཨེཝརཱུཔམྤི ནཱམ སརཱིརཾ ཛརཱཡ ཨིམཾ ཝིཔྤཀཱརཾ པཱཔུཎིསྶཏི, ཨིམཾ མེ བྷཱཏརཱ ཨུཔཏིསྶེན དིཊྛཾ བྷཝིསྶཏི, ཨཛྫེཝ མཡཱ པལཱཡིཏྭཱ པབྦཛིཏུཾ ཝཊྚཏཱི’’ཏི. ཨཐ ནཾ ཉཱཏཀཱ ཀུམཱརིཀཱཡ སདྡྷིཾ ཨེཀཡཱནཾ ཨཱརོཔེཏྭཱ ཨཱདཱཡ པཀྐམིཾསུ.

སོ ཐོཀཾ གནྟྭཱ སརཱིརཀིཙྩཾ ཨཔདིསིཏྭཱ ‘‘ཋཔེཐ ཏཱཝ ཡཱནཾ, ཨོཏརིཏྭཱ ཨཱགམིསྶཱམཱི’’ཏི ཡཱནཱ ཨོཏརིཏྭཱ ཨེཀསྨིཾ གུམྦེ ཐོཀཾ པཔཉྩཾ ཀཏྭཱ ཨགམཱསི. པུནཔི ཐོཀཾ གནྟྭཱ ཏེནེཝ ཨཔདེསེན ཨོཏརིཏྭཱ ཨབྷིརུཧི, པུནཔི ཏཐེཝ ཨཀཱསི. ཨཐསྶ ཉཱཏཀཱ ‘‘ཨདྡྷཱ ཨིམསྶ ཨུཊྛཱནཱནི ཝཏྟནྟཱི’’ཏི སལླཀྑེཏྭཱ ནཱཏིདལ༹ྷཾ ཨཱརཀྑཾ ཀརིཾསུ. སོ པུནཔི ཐོཀཾ གནྟྭཱ ཏེནེཝ ཨཔདེསེན ཨོཏརིཏྭཱ ‘‘ཏུམྷེ པཱཛེནྟོ པུརཏོ གཙྪཐ, མཡཾ པཙྪཏོ སཎིཀཾ ཨཱགམིསྶཱམཱ’’ཏི ཝཏྭཱ ཨོཏརིཏྭཱ གུམྦཱབྷིམུཁོ ཨཧོསི. ཉཱཏཀཱཔིསྶ ‘‘པཙྪཏོ ཨཱགམིསྶཏཱི’’ཏི སཉྙཱཡ ཡཱནཾ པཱཛེནྟཱ གམིཾསུ. སོཔི ཏཏོ པལཱཡིཏྭཱ ཨེཀསྨིཾ པདེསེ ཏིཾསམཏྟཱ བྷིཀྑཱུ ཝསནྟི, ཏེསཾ སནྟིཀཾ གནྟྭཱ ཝནྡིཏྭཱ ཨཱཧ – ‘‘པབྦཱཛེཐ མཾ, བྷནྟེ’’ཏི. ‘‘ཨཱཝུསོ, ཏྭཾ སབྦཱལངྐཱརཔཊིམཎྜིཏོ, མཡཾ ཏེ རཱཛཔུཏྟབྷཱཝཾ ཝཱ ཨམཙྩཔུཏྟབྷཱཝཾ ཝཱ ན ཛཱནཱམ, ཀཐཾ པབྦཱཛེསྶཱམཱ’’ཏི? ‘‘ཏུམྷེ མཾ, བྷནྟེ, ན ཛཱནཱཐཱ’’ཏི? ‘‘ན ཛཱནཱམཱཝུསོ’’ཏི. ‘‘ཨཧཾ ཨུཔཏིསྶསྶ ཀནིཊྛབྷཱཏིཀོ’’ཏི. ‘‘ཀོ ཨེས ཨུཔཏིསྶོ ནཱམཱ’’ཏི? ‘‘བྷནྟེ, བྷདྡནྟཱ མམ བྷཱཏརཾ ‘སཱརིཔུཏྟོ’ཏི ཝདནྟི, ཏསྨཱ མཡཱ ‘ཨུཔཏིསྶོ’ཏི ཝུཏྟེ ན ཛཱནནྟཱི’’ཏི. ‘‘ཀིཾ པན ཏྭཾ སཱརིཔུཏྟཏྠེརསྶ ཀནིཊྛབྷཱཏིཀོ’’ཏི? ‘‘ཨཱམ, བྷནྟེ’’ཏི. ‘‘ཏེན ཧི ཨེཧི, བྷཱཏརཱ ཏེ ཨནུཉྙཱཏམེཝཱ’’ཏི ཝཏྭཱ བྷིཀྑཱུ ཏསྶ ཨཱབྷརཎཱནི ཨོམུཉྩཱཔེཏྭཱ ཨེཀམནྟཾ ཋཔེཏྭཱ ཏཾ པབྦཱཛེཏྭཱ ཐེརསྶ སཱསནཾ པཧིཎིཾསུ. ཐེརོ ཏཾ སུཏྭཱ བྷགཝཏོ ཨཱརོཙེསི – ‘‘བྷནྟེ, ‘ཨཱརཉྙིཀབྷིཀྑཱུཧི ཀིར རེཝཏོ པབྦཱཛིཏོ’ཏི སཱསནཾ པཧིཎིཾསུ, གནྟྭཱ ཏཾ པསྶིཏྭཱ ཨཱགམིསྶཱམཱི’’ཏི. སཏྠཱ ‘‘ཨདྷིཝཱསེཧི ཏཱཝ, སཱརིཔུཏྟཱ’’ཏི གནྟུཾ ན ཨདཱསི. ཐེརོ པུན ཀཏིཔཱཧཙྩཡེན སཏྠཱརཾ ཨཱཔུཙྪི. སཏྠཱ ‘‘ཨདྷིཝཱསེཧི ཏཱཝ, སཱརིཔུཏྟ, མཡམྤི ཨཱགམིསྶཱམཱ’’ཏི ནེཝ གནྟུཾ ཨདཱསི.

སཱམཎེརོཔི ‘‘སཙཱཧཾ ཨིདྷ ཝསིསྶཱམི, ཉཱཏཀཱ མཾ ཨནུབནྡྷིཏྭཱ པཀྐོསིསྶནྟཱི’’ཏི ཏེསཾ བྷིཀྑཱུནཾ སནྟིཀེ ཡཱཝ ཨརཧཏྟཱ ཀམྨཊྛཱནཾ ཨུགྒཎྷིཏྭཱ པཏྟཙཱིཝརམཱདཱཡ ཙཱརིཀཾ ཙརམཱནོ ཏཏོ ཏིཾསཡོཛནིཀེ ཋཱནེ ཁདིརཝནཾ གནྟྭཱ ཨནྟོཝསྶེཡེཝ ཏེམཱསབྦྷནྟརེ སཧ པཊིསམྦྷིདཱཧི ཨརཧཏྟཾ པཱཔུཎི. ཐེརོཔི པཝཱརེཏྭཱ སཏྠཱརཾ པུན ཏཏྠ གམནཏྠཱཡ ཨཱཔུཙྪི. སཏྠཱ ‘‘མཡམྤི གམིསྶཱམ, སཱརིཔུཏྟཱ’’ཏི པཉྩཧི བྷིཀྑུསཏེཧི སདྡྷིཾ ནིཀྑམི. ཐོཀཾ གཏཀཱལེ ཨཱནནྡཏྠེརོ དྭེདྷཱཔཐེ ཋཏྭཱ སཏྠཱརཾ ཨཱཧ – ‘‘བྷནྟེ, རེཝཏསྶ སནྟིཀཾ གམནམགྒེསུ ཨཡཾ པརིཧཱརཔཐོ སཊྛིཡོཛནིཀོ མནུསྶཱཝཱསོ, ཨཡཾ ཨུཛུམགྒོ ཏིཾསཡོཛནིཀོ ཨམནུསྶཔརིགྒཧིཏོ, ཀཏརེན གཙྪཱམཱ’’ཏི. ‘‘སཱིཝལི, པན, ཨཱནནྡ, ཨམྷེཧི སདྡྷིཾ ཨཱགཏོ’’ཏི? ‘‘ཨཱམ, བྷནྟེ’’ཏི. ‘‘སཙེ, སཱིཝལི, ཨཱགཏོ, ཨུཛུམགྒམེཝ གཎྷཱཧཱི’’ཏི. སཏྠཱ ཀིར ‘‘ཨཧཾ ཏུམྷཱཀཾ ཡཱགུབྷཏྟཾ ཨུཔྤཱདེསྶཱམི, ཨུཛུམགྒཾ གཎྷཱཧཱི’’ཏི ཨཝཏྭཱ ‘‘ཏེསཾ ཏེསཾ ཛནཱནཾ པུཉྙསྶ ཝིཔཱཀདཱནཊྛཱནཾ ཨེཏ’’ནྟི ཉཏྭཱ ‘‘སཙེ, སཱིཝལི, ཨཱགཏོ, ཨུཛུམགྒཾ གཎྷཱཧཱི’’ཏི ཨཱཧ. སཏྠརི པན ཏཾ མགྒཾ པཊིཔནྣེ དེཝཏཱ ‘‘ཨམྷཱཀཾ ཨཡྻསྶ སཱིཝལིཏྠེརསྶ སཀྐཱརཾ ཀརིསྶཱམཱ’’ཏི ཙིནྟེཏྭཱ ཨེཀེཀཡོཛནེ ཝིཧཱརེ ཀཱརེཏྭཱ ཨེཀཡོཛནཏོ ཨུདྡྷཾ གནྟུཾ ཨདཏྭཱ པཱཏོ ཝུཊྛཱཡ དིབྦཡཱགུཨཱདཱིནི གཧེཏྭཱ, ‘‘ཨཡྻོ, ནོ སཱིཝལིཏྠེརོ ཀཧཾ ནིསིནྣོ’’ཏི ཝིཙརནྟི. ཐེརོ ཨཏྟནོ ཨབྷིཧཊཾ བུདྡྷཔྤམུཁསྶ བྷིཀྑུསངྒྷསྶ དཱཔེསི. ཨེཝཾ སཏྠཱ སཔརིཝཱརོ ཏིཾསཡོཛནིཀཾ ཀནྟཱརཾ སཱིཝལིཏྠེརསྶ པུཉྙཾ ཨནུབྷཝམཱནོཝ ཨཱགམཱསི. རེཝཏཏྠེརོཔི སཏྠུ ཨཱགམནཾ ཉཏྭཱ བྷགཝཏོ གནྡྷཀུཊིཾ མཱཔེཏྭཱ པཉྩ ཀཱུཊཱགཱརསཏཱནི, པཉྩ ཙངྐམནསཏཱནི, པཉྩརཏྟིཊྛཱནདིཝཱཊྛཱནསཏཱནི ཙ མཱཔེསི. སཏྠཱ ཏསྶ སནྟིཀེ མཱསམཏྟམེཝ ཝསི. ཏསྨིཾ ཝསམཱནོཔི སཱིཝལིཏྠེརསྶེཝ པུཉྙཾ ཨནུབྷཝི.

ཏཏྠ པན དྭེ མཧལླཀབྷིཀྑཱུ སཏྠུ ཁདིརཝནཾ པཝིསནཀཱལེ ཨེཝཾ ཙིནྟཡིཾསུ – ‘‘ཨཡཾ བྷིཀྑུ ཨེཏྟཀཾ ནཝཀམྨཾ ཀརོནྟོ ཀིཾ སཀྑིསྶཏི སམཎདྷམྨཾ ཀཱཏུཾ, སཏྠཱ ‘སཱརིཔུཏྟསྶ ཀནིཊྛོ’ཏི མུཁོལོཀནཀིཙྩཾ ཀརོནྟོ ཨེཝརཱུཔསྶ ནཝཀམྨིཀསྶ བྷིཀྑུསྶ སནྟིཀཾ ཨཱགཏོ’’ཏི. སཏྠཱཔི ཏཾ དིཝསཾ པཙྩཱུསཀཱལེ ལོཀཾ ཝོལོཀེཏྭཱ ཏེ བྷིཀྑཱུ དིསྭཱ ཏེསཾ ཙིཏྟཱཙཱརཾ ཨཉྙཱསི. ཏསྨཱ ཏཏྠ མཱསམཏྟཾ ཝསིཏྭཱ ནིཀྑམནདིཝསེ ཡཐཱ ཏེ བྷིཀྑཱུ ཨཏྟནོ ཏེལནཱལི༹ཉྩ ཨུདཀཏུམྦཉྩ ཨུཔཱཧནཱནི ཙ པམུསྶནྟི, ཏཐཱ ཨདྷིཊྛཧིཏྭཱ ནིཀྑམནྟོ ཝིཧཱརཱུཔཙཱརཏོ བཧི ནིཀྑནྟཀཱལེ ཨིདྡྷིཾ ཝིསྶཛྫེསི. ཨཐ ཏེ བྷིཀྑཱུ ‘‘མཡཱ ཨིདཉྩིདཉྩ པམུཊྛཾ, མཡཱཔི པམུཊྛ’’ནྟི ཨུབྷོཔི ནིཝཏྟིཏྭཱ ཏཾ ཋཱནཾ ཨསལླཀྑེཏྭཱ ཁདིརརུཀྑཀཎྚཀེཧི ཝིཛ྄ཛྷམཱནཱ ཝིཙརིཏྭཱ ཨེཀསྨིཾ ཁདིརརུཀྑེ ཨོལམྦནྟཾ ཨཏྟནོ བྷཎྜཀཾ དིསྭཱ ཨཱདཱཡ པཀྐམིཾསུ. སཏྠཱཔི བྷིཀྑུསངྒྷཾ ཨཱདཱཡ པུན མཱསམཏྟེནེཝ སཱིཝལིཏྠེརསྶ པུཉྙཾ ཨནུབྷཝམཱནོ པཊིགནྟྭཱ པུབྦཱརཱམཾ པཱཝིསི.

ཨཐ ཏེ མཧལླཀབྷིཀྑཱུ པཱཏོཝ མུཁཾ དྷོཝིཏྭཱ ‘‘ཨཱགནྟུཀབྷཏྟདཱཡིཀཱཡ ཝིསཱཁཱཡ གྷརཾ ཡཱགུཾ པིཝིསྶཱམཱ’’ཏི གནྟྭཱ ཡཱགུཾ པིཝིཏྭཱ ཁཛྫཀཾ ཁཱདིཏྭཱ ནིསཱིདིཾསུ. ཨཐ ནེ ཝིསཱཁཱ པུཙྪི – ‘‘ཏུམྷེཔི, བྷནྟེ, སཏྠཱརཱ སདྡྷིཾ རེཝཏཏྠེརསྶ ཝསནཊྛཱནཾ ཨགམིཏྠཱ’’ཏི. ‘‘ཨཱམ, ཨུཔཱསིཀེཏི, རམཎཱིཡཾ, བྷནྟེ, ཐེརསྶ ཝསནཊྛཱན’’ནྟི. ‘‘ཀུཏོ ཏསྶ རམཎཱིཡཏཱ སེཏཀཎྚཀཁདིརརུཀྑགཧནཾ པེཏཱནཾ ནིཝཱསནཊྛཱནསདིསཾ ཨུཔཱསིཀེ’’ཏི. ཨཐཉྙེ དྭེ དཧརབྷིཀྑཱུ ཨཱགམིཾསུ. ཨུཔཱསིཀཱ ཏེསམྤི ཡཱགུཁཛྫཀཾ དཏྭཱ ཏཐེཝ པཊིཔུཙྪི. ཏེ ཨཱཧཾསུ – ‘‘ན སཀྐཱ ཨུཔཱསིཀེ ཝཎྞེཏུཾ, སུདྷམྨདེཝསབྷཱསདིསཾ ཨིདྡྷིཡཱ ཨབྷིསངྑཏཾ ཝིཡ ཐེརསྶ ཝསནཊྛཱན’’ནྟི. ཨུཔཱསིཀཱ ཙིནྟེསི – ‘‘པཋམཾ ཨཱགཏཱ བྷིཀྑཱུ ཨཉྙཐཱ ཝདིཾསུ, ཨིམེ ཨཉྙཐཱ ཝདནྟི, པཋམཾ ཨཱགཏཱ བྷིཀྑཱུ ཀིཉྩིདེཝ པམུསྶིཏྭཱ ཨིདྡྷིཡཱ ཝིསྶཊྛཀཱལེ པཊིནིཝཏྟིཏྭཱ གཏཱ བྷཝིསྶནྟི, ཨིམེ པན ཨིདྡྷིཡཱ ཨབྷིསངྑརིཏྭཱ ནིམྨིཏཀཱལེ གཏཱ བྷཝིསྶནྟཱི’’ཏི ཨཏྟནོ པཎྜིཏབྷཱཝེན ཨེཏམཏྠཾ ཉཏྭཱ ‘‘སཏྠཱརཾ ཨཱགཏཀཱལེ པུཙྪིསྶཱམཱི’’ཏི ཨཊྛཱསི. ཏཏོ མུཧུཏྟཾཡེཝ སཏྠཱ བྷིཀྑུསངྒྷཔརིཝུཏོ ཝིསཱཁཱཡ གེཧཾ གནྟྭཱ པཉྙཏྟཱསནེ ནིསཱིདི. སཱ བུདྡྷཔྤམུཁཾ བྷིཀྑུསངྒྷཾ སཀྐཙྩཾ པརིཝིསིཏྭཱ བྷཏྟཀིཙྩཱཝསཱནེ སཏྠཱརཾ ཝནྡིཏྭཱ པཊིཔུཙྪི – ‘‘བྷནྟེ, ཏུམྷེཧི སདྡྷིཾ གཏབྷིཀྑཱུསུ ཨེཀཙྩེ རེཝཏཏྠེརསྶ ཝསནཊྛཱནཾ ‘ཁདིརགཧནཾ ཨརཉྙ’ནྟི ཝདནྟི, ཨེཀཙྩེ ‘རམཎཱིཡ’ནྟི, ཀིཾ ནུ ཁོ ཨེཏ’’ནྟི? ཏཾ སུཏྭཱ སཏྠཱ ‘‘ཨུཔཱསིཀེ གཱམོ ཝཱ ཧོཏུ ཨརཉྙཾ ཝཱ, ཡསྨིཾ ཋཱནེ ཨརཧནྟོ ཝིཧརནྟི, ཏཾ རམཎཱིཡམེཝཱ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༩༨.

‘‘གཱམེ ཝཱ ཡདི ཝཱརཉྙེ, ནིནྣེ ཝཱ ཡདི ཝཱ ཐལེ;

ཡཏྠ ཨརཧནྟོ ཝིཧརནྟི, ཏཾ བྷཱུམིརཱམཎེཡྻཀ’’ནྟི.

ཏཏྠ ཀིཉྩཱཔི ཨརཧནྟོ གཱམནྟེ ཀཱཡཝིཝེཀཾ ན ལབྷནྟི, ཙིཏྟཝིཝེཀཾ པན ལབྷནྟེཝ. ཏེསཉྷི དིབྦཔཊིབྷཱགཱནིཔི ཨཱརམྨཎཱནི ཙིཏྟཾ ཙཱལེཏུཾ ན སཀྐོནྟི. ཏསྨཱ གཱམོ ཝཱ ཧོཏུ ཨརཉྙཱདཱིནཾ ཝཱ ཨཉྙཏརཾ, ཡཏྠ ཨརཧནྟོ ཝིཧརནྟི, ཏཾ བྷཱུམིརཱམཎེཡྻཀནྟི སོ བྷཱུམིཔདེསོ རམཎཱིཡོ ཨེཝཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཔརེན སམཡེན བྷིཀྑཱུ ཀཐཾ སམུཊྛཱཔེསུཾ – ‘‘ཨཱཝུསོ, ཀེན ནུ ཁོ ཀཱརཎེན ཨཱཡསྨཱ སཱིཝལིཏྠེརོ སཏྟདིཝསསཏྟམཱསཱདྷིཀཱནི སཏྟ ཝསྶཱནི མཱཏུ ཀུཙྪིཡཾ ཝསི, ཀེན ནིརཡེ པཙྩི, ཀེན ནིསྶནྡེན ལཱབྷགྒཡསགྒཔྤཏྟོ ཛཱཏོ’’ཏི? སཏྠཱ ཏཾ ཀཐཾ སུཏྭཱ, ‘‘བྷིཀྑཝེ, ཀིཾ ཀཐེཐཱ’’ཏི པུཙྪིཏྭཱ, ‘‘བྷནྟེ, ཨིདཾ ནཱམཱ’’ཏི ཝུཏྟེ ཏསྶཱཡསྨཏོ པུབྦཀམྨཾ ཀཐེནྟོ ཨཱཧ –

བྷིཀྑཝེ, ཨིཏོ ཨེཀནཝུཏིཀཔྤེ ཝིཔསྶཱི བྷགཝཱ ལོཀེ ཨུཔྤཛྫིཏྭཱ ཨེཀསྨིཾ སམཡེ ཛནཔདཙཱརིཀཾ ཙརིཏྭཱ པིཏུ ནགརཾ པཙྩཱགམཱསི. རཱཛཱ བུདྡྷཔྤམུཁསྶ བྷིཀྑུསངྒྷསྶ ཨཱགནྟུཀདཱནཾ སཛྫེཏྭཱ ནཱགརཱནཾ སཱསནཾ པེསེསི ‘‘ཨཱགནྟྭཱ མཡ྄ཧཾ དཱནེ སཧཱཡཀཱ ཧོནྟཱུ’’ཏི. ཏེ ཏཐཱ ཀཏྭཱ ‘‘རཉྙཱ དིནྣདཱནཏོ ཨཏིརེཀཏརཾ དསྶཱམཱ’’ཏི སཏྠཱརཾ ནིམནྟེཏྭཱ པུནདིཝསེ དཱནཾ པཊིཡཱདེཏྭཱ རཉྙོ སཱསནཾ པཧིཎིཾསུ. རཱཛཱ ཨཱགནྟྭཱ ཏེསཾ དཱནཾ དིསྭཱ ‘‘ཨིཏོ ཨདྷིཀཏརཾ དསྶཱམཱི’’ཏི པུནདིཝསཏྠཱཡ སཏྠཱརཾ ནིམནྟེསི, ནེཝ རཱཛཱ ནཱགརེ པརཱཛེཏུཾ སཀྑི, ན ནཱགརཱ རཱཛཱནཾ. ནཱགརཱ ཚཊྛེ ཝཱརེ ‘‘སྭེ དཱནི ཡཐཱ ‘ཨིམསྨིཾ དཱནེ ཨིདཾ ནཱམ ནཏྠཱི’ཏི ན སཀྐཱ ཧོཏི ཝཏྟུཾ, ཨེཝཾ དཱནཾ དསྶཱམཱ’’ཏི ཙིནྟེཏྭཱ པུནདིཝསེ དཱནཾ པཊིཡཱདེཏྭཱ ‘‘ཀིཾ ནུ ཁོ ཨེཏྠ ནཏྠཱི’’ཏི ཨོལོཀེནྟཱ ཨལླམདྷུམེཝ ན ཨདྡསཾསུ. པཀྐམདྷུ པན བཧུཾ ཨཏྠི. ཏེ ཨལླམདྷུསྶཏྠཱཡ ཙཏཱུསུ ནགརདྭཱརེསུ ཙཏྟཱརི ཀཧཱཔཎསཧསྶཱནི གཱཧཱཔེཏྭཱ པཧིཎིཾསུ. ཨཐེཀོ ཛནཔདམནུསྶོ གཱམབྷོཛཀཾ པསྶིཏུཾ ཨཱགཙྪནྟོ ཨནྟརཱམགྒེ མདྷུཔཊལཾ དིསྭཱ མཀྑིཀཱ པལཱཔེཏྭཱ སཱཁཾ ཚིནྡིཏྭཱ སཱཁཱདཎྜཀེནེཝ སདྡྷིཾ མདྷུཔཊལཾ ཨཱདཱཡ ‘‘གཱམབྷོཛཀསྶ དསྶཱམཱི’’ཏི ནགརཾ པཱཝིསི. མདྷུཨཏྠཱཡ གཏོ ཏཾ དིསྭཱ, ‘‘ཨམྦྷོ, ཝིཀྐིཎིཡཾ མདྷུ’’ནྟི པུཙྪི. ‘‘ན ཝིཀྐིཎིཡཾ, སཱམཱི’’ཏི. ‘‘ཧནྡ, ཨིམཾ ཀཧཱཔཎཾ གཧེཏྭཱ དེཧཱི’’ཏི. སོ ཙིནྟེསི – ‘‘ཨིམཾ མདྷུཔཊལཾ པཱདམཏྟམྤི ན ཨགྒྷཏི, ཨཡཾ པན ཀཧཱཔཎཾ དེཏི. བཧུཀཧཱཔཎཀོ མཉྙེ, མཡཱ ཝཌྜྷེཏུཾ ཝཊྚཏཱི’’ཏི. ཨཐ ནཾ ‘‘ན དེམཱི’’ཏི ཨཱཧ, ‘‘ཏེན ཧི དྭེ ཀཧཱཔཎེ གཎྷཱཧཱི’’ཏི. ‘‘དྭཱིཧིཔི ན དེམཱི’’ཏི. ཨེཝཾ ཏཱཝ ཝཌྜྷེསི, ཡཱཝ སོ ‘‘ཏེན ཧི ཨིདཾ སཧསྶཾ གཎྷཱཧཱི’’ཏི བྷཎྜིཀཾ ཨུཔནེསི.

ཨཐ ནཾ སོ ཨཱཧ – ‘‘ཀིཾ ནུ ཁོ ཏྭཾ ཨུམྨཏྟཀོ, ཨུདཱཧུ ཀཧཱཔཎཱནཾ ཋཔནོཀཱསཾ ན ལབྷསི, པཱདམྤི ན ཨགྒྷནཀཾ མདྷུཾ ‘སཧསྶཾ གཧེཏྭཱ དེཧཱི’ཏི ཝདསི, ‘ཀིཾ ནཱམེཏ’’’ནྟི? ‘ཛཱནཱམཧཾ, བྷོ, ཨིམིནཱ པན མེ ཀམྨཾ ཨཏྠི, ཏེནེཝཾ ཝདཱམཱི’ཏི. ‘‘ཀིཾ ཀམྨཾ, སཱམཱི’’ཏི? ‘‘ཨམྷེཧི ཝིཔསྶཱིབུདྡྷསྶ ཨཊྛསཊྛིསམཎསཧསྶཔརིཝཱརསྶ མཧཱདཱནཾ སཛྫིཏཾ, ཏཏྲེཀཾ ཨལླམདྷུམེཝ ནཏྠི, ཏསྨཱ ཨེཝཾ གཎྷཱམཱི’’ཏི. ཨེཝཾ, སནྟེ, ནཱཧཾ མཱུལེན དསྶཱམི, སཙེ ‘‘ཨཧམྤི དཱནེ པཏྟིཾ ལབྷིསྶཱམི, དསྶཱམཱི’’ཏི. སོ གནྟྭཱ ནཱགརཱནཾ ཏམཏྠཾ ཨཱརོཙེསི. ནཱགརཱ ཏསྶ སདྡྷཱཡ བལཝབྷཱཝཾ ཉཏྭཱ, ‘‘སཱདྷུ, པཏྟིཀོ ཧོཏཱུ’’ཏི པཊིཛཱནིཾསུ, ཏེ བུདྡྷཔྤམུཁཾ བྷིཀྑུསངྒྷཾ ནིསཱིདཱཔེཏྭཱ ཡཱགུཁཛྫཀཾ དཏྭཱ མཧཏིཾ སུཝཎྞཔཱཏིཾ ཨཱཧརཱཔེཏྭཱ མདྷུཔཊལཾ པཱིལཱ༹པེསུཾ. ཏེནེཝ མནུསྶེན པཎྞཱཀཱརཏྠཱཡ དདྷིཝཱརཀོཔི ཨཱཧཊོ ཨཏྠི, སོ ཏམྤི དདྷིཾ པཱཏིཡཾ ཨཱཀིརིཏྭཱ ཏེན མདྷུནཱ སཾསནྡིཏྭཱ བུདྡྷཔྤམུཁསྶ བྷིཀྑུསངྒྷསྶ ཨཱདིཏོ པཊྛཱཡ ཨདཱསི. ཏཾ ཡཱཝདཏྠཾ གཎྷནྟཱནཾ སབྦེསཾ པཱཔུཎི ཨུཏྟརིམྤི ཨཝསིཊྛཾ ཨཧོསིཡེཝ. ‘‘ཨེཝཾ ཐོཀཾ མདྷུ ཀཐཾ ཏཱཝ བཧཱུནཾ པཱཔུཎཱི’’ཏི ན ཙིནྟེཏབྦཾ. ཏཉྷི བུདྡྷཱནུབྷཱཝེན པཱཔུཎི. བུདྡྷཝིསཡོ ན ཙིནྟེཏབྦོ. ཙཏྟཱརི ཧི ‘‘ཨཙིནྟེཡྻཱནཱི’’ཏི (ཨ. ནི. ༤.༧༧) ཝུཏྟཱནི. ཏཱནི ཙིནྟེནྟོ ཨུམྨཱདསྶེཝ བྷཱགཱི ཧོཏཱིཏི. སོ པུརིསོ ཨེཏྟཀཾ ཀམྨཾ ཀཏྭཱ ཨཱཡུཔརིཡོསཱནེ དེཝལོཀེ ནིབྦཏྟིཏྭཱ ཨེཏྟཀཾ ཀཱལཾ སཾསརནྟོ ཨེཀསྨིཾ སམཡེ དེཝལོཀཱ ཙཝིཏྭཱ བཱརཱཎསིཡཾ རཱཛཀུལེ ནིབྦཏྟོ པིཏུ ཨཙྩཡེན རཛྫཾ པཱཔུཎི. སོ ‘‘ཨེཀཾ ནགརཾ གཎྷིསྶཱམཱི’’ཏི གནྟྭཱ པརིཝཱརེསི, ནཱགརཱནཉྩ སཱསནཾ པཧིཎི ‘‘རཛྫཾ ཝཱ མེ དེནྟུ ཡུདྡྷཾ ཝཱ’’ཏི. ཏེ ‘‘ནེཝ རཛྫཾ དསྶཱམ, ན ཡུདྡྷ’’ནྟི ཝཏྭཱ ཙཱུལ༹དྭཱརེཧི ནིཀྑམིཏྭཱ དཱརཱུདཀཱདཱིནི ཨཱཧརནྟི, སབྦཀིཙྩཱནི ཀརོནྟི.

ཨིཏརོཔི ཙཏྟཱརི མཧཱདྭཱརཱནི རཀྑནྟོ སཏྟམཱསཱདྷིཀཱནི སཏྟ ཝསྶཱནི ནགརཾ ཨུཔརུནྡྷི. ཨཐསྶ མཱཏཱ ‘‘ཀིཾ མེ པུཏྟོ ཀརོཏཱི’’ཏི པུཙྪིཏྭཱ ‘‘ཨིདཾ ནཱམ དེཝཱི’’ཏི ཏཾ པཝཏྟིཾ སུཏྭཱ ‘‘བཱལོ མམ པུཏྟོ, གཙྪཐ, ཏསྶ ‘ཙཱུལ༹དྭཱརཱནིཔི པིདྷཱཡ ནགརཾ ཨུཔརུནྡྷཏཱུ’ཏི ཝདེཐཱ’’ཏི. སོ མཱཏུ སཱསནཾ སུཏྭཱ ཏཐཱ ཨཀཱསི. ནཱགརཱཔི བཧི ནིཀྑམིཏུཾ ཨལབྷནྟཱ སཏྟམེ དིཝསེ ཨཏྟནོ རཱཛཱནཾ མཱརེཏྭཱ ཏསྶ རཛྫཾ ཨདཾསུ. སོ ཨིམཾ ཀམྨཾ ཀཏྭཱ ཨཱཡུཔརིཡོསཱནེ ཨཝཱིཙིམྷི ནིབྦཏྟིཏྭཱ ཡཱཝཱཡཾ པཐཝཱི ཡོཛནམཏྟཾ ཨུསྶནྣཱ, ཏཱཝ ནིརཡེ པཙྩིཏྭཱ ཙཏུནྣཾ ཙཱུལ༹དྭཱརཱནཾ པིདཧིཏཏྟཱ ཏཏོ ཙུཏོ ཏསྶཱ ཨེཝ མཱཏུ ཀུཙྪིསྨིཾ པཊིསནྡྷིཾ གཧེཏྭཱ སཏྟམཱསཱདྷིཀཱནི སཏྟ ཝསྶཱནི ཨནྟོཀུཙྪིསྨིཾ ཝསིཏྭཱ སཏྟ དིཝསཱནི ཡོནིམུཁེ ཏིརིཡཾ ནིཔཛྫི. ཨེཝཾ, བྷིཀྑཝེ, སཱིཝལི, ཏདཱ ནགརཾ ཨུཔརུནྡྷིཏྭཱ གཧིཏཀམྨེན ཨེཏྟཀཾ ཀཱལཾ ནིརཡེ པཙྩིཏྭཱ ཙཏུནྣཾ ཙཱུལ༹དྭཱརཱནཾ པིདཧིཏཏྟཱ ཏཏོ ཙུཏོ ཏསྶཱ ཨེཝ མཱཏུ ཀུཙྪིཡཾ པཊིསནྡྷིཾ གཧེཏྭཱ ཨེཏྟཀཾ ཀཱལཾ ཀུཙྪིཡཾ ཝསི. ནཝམདྷུནོ དིནྣཏྟཱ ལཱབྷགྒཡསགྒཔྤཏྟོ ཛཱཏོཏི.

པུནེཀདིཝསཾ བྷིཀྑཱུ ཀཐཾ སམུཊྛཱཔེསུཾ – ‘‘ཨཧོ སཱམཎེརསྶ ལཱབྷོ, ཨཧོ པུཉྙཾ, ཡེན ཨེཀཀེན པཉྩནྣཾ བྷིཀྑུསཏཱནཾ པཉྩཀཱུཊཱགཱརསཏཱདཱིནི ཀཏཱནཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, མཡ྄ཧཾ པུཏྟསྶ ནེཝ པུཉྙཾ ཨཏྠི, ན པཱཔཾ, ཨུབྷཡམསྶ པཧཱིན’’ནྟི ཝཏྭཱ བྲཱཧྨཎཝགྒེ ཨིམཾ གཱཐམཱཧ –

‘‘ཡོདྷ པུཉྙཉྩ པཱཔཉྩ, ཨུབྷོ སངྒམུཔཙྩགཱ;

ཨསོཀཾ ཝིརཛཾ སུདྡྷཾ, ཏམཧཾ བྲཱུམི བྲཱཧྨཎ’’ནྟི. (དྷ. པ. ༤༡༢);

ཁདིརཝནིཡརེཝཏཏྠེརཝཏྠུ ནཝམཾ.

༡༠. ཨཉྙཏརཨིཏྠིཝཏྠུ

རམཎཱིཡཱནཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ ཨིཏྠིཾ ཨཱརབྦྷ ཀཐེསི.

ཨེཀོ ཀིར པིཎྜཔཱཏིཀོ བྷིཀྑུ སཏྠུ སནྟིཀེ ཀམྨཊྛཱནཾ གཧེཏྭཱ ཨེཀཾ ཛིཎྞཨུཡྻཱནཾ པཝིསིཏྭཱ སམཎདྷམྨཾ ཀརོཏི. ཨེཀཱ ནགརསོབྷིནཱི ཨིཏྠཱི པུརིསེན སདྡྷིཾ ‘‘ཨཧཾ ཨསུཀཊྛཱནཾ ནཱམ གམིསྶཱམི, ཏྭཾ ཏཏྠ ཨཱགཙྪེཡྻཱསཱི’’ཏི སངྐེཏཾ ཀཏྭཱ ཨགམཱསི. སོ པུརིསོ ནཱགཙྪི. སཱ ཏསྶ ཨཱགམནམགྒཾ ཨོལོཀེནྟཱི ཏཾ ཨདིསྭཱ ཨུཀྐཎྛིཏྭཱ ཨིཏོ ཙིཏོ ཙ ཝིཙརམཱནཱ ཏཾ ཨུཡྻཱནཾ པཝིསིཏྭཱ ཐེརཾ པལླངྐཾ ཨཱབྷུཛིཏྭཱ ནིསིནྣཾ དིསྭཱ ཨིཏོ ཙིཏོ ཙ ཨོལོཀཡམཱནཱ ཨཉྙཾ ཀཉྩི ཨདིསྭཱ ‘‘ཨཡཉྩ པུརིསོ ཨེཝ, ཨིམསྶ ཙིཏྟཾ པམོཧེསྶཱམཱི’’ཏི ཏསྶ པུརཏོ ཋཏྭཱ པུནཔྤུནཾ ནིཝཏྠསཱཊཀཾ མོཙེཏྭཱ ནིཝཱསེཏི, ཀེསེ མུཉྩིཏྭཱ བནྡྷཏི, པཱཎིཾ པཧརིཏྭཱ ཧསཏི. ཐེརསྶ སཾཝེགོ ཨུཔྤཛྫིཏྭཱ སཀལསརཱིརཾ ཕརི. སོ ‘‘ཀིཾ ནུ ཁོ ཨིད’’ནྟི ཙིནྟེསི. སཏྠཱཔི ‘‘མམ སནྟིཀེ ཀམྨཊྛཱནཾ གཧེཏྭཱ ‘སམཎདྷམྨཾ ཀརིསྶཱམཱི’ཏི གཏསྶ བྷིཀྑུནོ ཀཱ ནུ ཁོ པཝཏྟཱི’’ཏི ཨུཔདྷཱརེནྟོ ཏཾ ཨིཏྠིཾ དིསྭཱ ཏསྶཱ ཨནཱཙཱརཀིརིཡཾ, ཐེརསྶ ཙ སཾཝེགུཔྤཏྟིཾ ཉཏྭཱ གནྡྷཀུཊིཡཾ ནིསིནྣོཝ ཏེན སདྡྷིཾ ཀཐེསི – ‘‘བྷིཀྑུ, ཀཱམགཝེསཀཱནཾ ཨརམཎཊྛཱནམེཝ ཝཱིཏརཱགཱནཾ རམཎཊྛཱནཾ ཧོཏཱི’’ཏི. ཨེཝཉྩ པན ཝཏྭཱ ཨོབྷཱསཾ ཕརིཏྭཱ ཏསྶ དྷམྨཾ དེསེནྟོ ཨིམཾ གཱཐམཱཧ –

༩༩.

‘‘རམཎཱིཡཱནི ཨརཉྙཱནི, ཡཏྠ ན རམཏཱི ཛནོ;

ཝཱིཏརཱགཱ རམིསྶནྟི, ན ཏེ ཀཱམགཝེསིནོ’’ཏི.

ཏཏྠ ཨརཉྙཱནཱིཏི སུཔུཔྥིཏཏརུཝནསཎྜཔཊིམཎྜིཏཱནི ཝིམལསལིལསམྤནྣཱནི ཨརཉྙཱནི ནཱམ རམཎཱིཡཱནི. ཡཏྠཱཏི ཡེསུ ཨརཉྙེསུ ཝིཀསིཏེསུ པདུམཝནེསུ གཱམམཀྑིཀཱ ཝིཡ ཀཱམགཝེསཀོ ཛནོ ན རམཏི. ཝཱིཏརཱགཱཏི ཝིགཏརཱགཱ པན ཁཱིཎཱསཝཱ ནཱམ བྷམརམདྷུཀརཱ ཝིཡ པདུམཝནེསུ ཏཐཱརཱུཔེསུ ཨརཉྙེསུ རམིསྶནྟི. ཀིཾ ཀཱརཎཱ? ན ཏེ ཀཱམཔཝེསིནོ, ཡསྨཱ ཏེ ཀཱམགཝེསིནོ ན ཧོནྟཱིཏི ཨཏྠོ.

དེསནཱཝསཱནེ སོ ཐེརོ ཡཐཱནིསིནྣོཝ སཧ པཊིསམྦྷིདཱཧི ཨརཧཏྟཾ པཱཔུཎིཏྭཱ ཨཱཀཱསེནཱགནྟྭཱ ཐུཏིཾ ཀརོནྟོ ཏཐཱགཏསྶ པཱདེ ཝནྡིཏྭཱ ཨགམཱསཱིཏི.

ཨཉྙཏརཨིཏྠིཝཏྠུ དསམཾ.

ཨརཧནྟཝགྒཝཎྞནཱ ནིཊྛིཏཱ.

སཏྟམོ ཝགྒོ.

༨. སཧསྶཝགྒོ

༡. ཏམྦདཱཋིཀཙོརགྷཱཏཀཝཏྠུ

སཧསྶམཔི ཙེ ཝཱཙཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཏམྦདཱཋིཀཙོརགྷཱཏཀཾ ཨཱརབྦྷ ཀཐེསི.

ཨེཀཱུནཔཉྩསཏཱ ཀིར ཙོརཱ གཱམགྷཱཏཀཱདཱིནི ཀརོནྟཱ ཛཱིཝིཀཾ ཀཔྤེསུཾ. ཨཐེཀོ པུརིསོ ནིབྦིདྡྷཔིངྒལོ ཏམྦདཱཋིཀོ ཏེསཾ སནྟིཀཾ གནྟྭཱ ‘‘ཨཧམྤི ཏུམྷེཧི སདྡྷིཾ ཛཱིཝིསྶཱམཱི’’ཏི ཨཱཧ. ཨཐ ནཾ ཙོརཛེཊྛཀསྶ དསྶེཏྭཱ ‘‘ཨཡམྤི ཨམྷཱཀཾ སནྟིཀེ ཝསིཏུཾ ཨིཙྪཏཱི’’ཏི ཨཱཧཾསུ. ཨཐ ནཾ ཙོརཛེཊྛཀོ ཨོལོཀེཏྭཱ ‘‘ཨཡཾ མཱཏུ ཐནཾ ཚིནྡིཏྭཱ པིཏུ ཝཱ གལལོཧིཏཾ ནཱིཧརིཏྭཱ ཁཱདནསམཏྠོ ཨཏིཀཀྑལོ༹’’ཏི ཙིནྟེཏྭཱ ‘‘ནཏྠེཏསྶ ཨམྷཱཀཾ སནྟིཀེ ཝསནཀིཙྩ’’ནྟི པཊིཀྑིཔི. སོ ཨེཝཾ པཊིཀྑིཏྟོཔི ཨཱགནྟྭཱ ཨེཀཾ ཏསྶེཝ ཨནྟེཝཱསིཀཾ ཨུཔཊྛཧནྟོ ཨཱརཱདྷེསི. སོ ཏཾ ཨཱདཱཡ ཙོརཛེཊྛཀཾ ཨུཔསངྐམིཏྭཱ, ‘‘སཱམི, བྷདྡཀོ ཨེས, ཨམྷཱཀཾ ཨུཔཀཱརཀོ, སངྒཎྷཐ ན’’ནྟི ཡཱཙིཏྭཱ ཙོརཛེཊྛཀཾ པཊིཙྪཱཔེསི. ཨཐེཀདིཝསཾ ནཱགརཱ རཱཛཔུརིསེཧི སདྡྷིཾ ཨེཀཏོ ཧུཏྭཱ ཏེ ཙོརེ གཧེཏྭཱ ཝིནིཙྪཡམཧཱམཙྩཱནཾ སནྟིཀཾ ནཡིཾསུ. ཨམཙྩཱ ཏེསཾ ཕརསུནཱ སཱིསཙྪེདཾ ཨཱཎཱཔེསུཾ. ཏཏོ ‘‘ཀོ ནུ ཁོ ཨིམེ མཱརེསྶཏཱི’’ཏི པརིཡེསནྟཱ ཏེ མཱརེཏུཾ ཨིཙྪནྟཾ ཀཉྩི ཨདིསྭཱ ཙོརཛེཊྛཀཾ ཨཱཧཾསུ – ‘‘ཏྭཾ ཨིམེ མཱརེཏྭཱ ཛཱིཝིཏཉྩེཝ ལབྷིསྶསི སམྨཱནཉྩ, མཱརེཧི ནེ’’ཏི. སོཔི ཨཏྟཱནཾ ནིསྶཱཡ ཝསིཏཏྟཱ ཏེ མཱརེཏུཾ ན ཨིཙྪི. ཨེཏེནཱུཔཱཡེན ཨེཀཱུནཔཉྩསཏེ པུཙྪིཾསུ, སབྦེཔི ན ཨིཙྪིཾསུ. སབྦཔཙྪཱ ཏཾ ནིབྦིདྡྷཔིངྒལཾ ཏམྦདཱཋིཀཾ པུཙྪིཾསུ. སོ ‘‘སཱདྷཱུ’’ཏི སམྤཊིཙྪིཏྭཱ ཏེ སབྦེཔི མཱརེཏྭཱ ཛཱིཝིཏཉྩེཝ སམྨཱནཉྩ ལབྷི. ཨེཏེནཱུཔཱཡེན ནགརསྶ དཀྑིཎཏོཔི པཉྩ ཙོརསཏཱནི ཨཱནེཏྭཱ ཨམཙྩཱནཾ དསྶེཏྭཱ ཏེཧི ཏེསམྤི སཱིསཙྪེདེ ཨཱཎཏྟེ ཙོརཛེཊྛཀཾ ཨཱདིཾ ཀཏྭཱ པུཙྪནྟཱ ཀཉྩི མཱརེཏུཾ ཨིཙྪནྟཾ ཨདིསྭཱ ‘‘པུརིམདིཝསེ ཨེཀོ པུརིསོ པཉྩསཏེ ཙོརེ མཱརེསི, ཀཧཾ ནུ ཁོ སོ’’ཏི. ‘‘ཨསུཀཊྛཱནེ ཨམྷེཏི དིཊྛོ’’ཏི ཝུཏྟེ ཏཾ པཀྐོསཱཔེཏྭཱ ‘‘ཨིམེ མཱརེཧི, སམྨཱནཾ ལཙྪསཱི’’ཏི ཨཱཎཱཔེསུཾ. སོ ‘‘སཱདྷཱུ’’ཏི སམྤཊིཙྪིཏྭཱ ཏེ སབྦེཔི མཱརེཏྭཱ སམྨཱནཾ ལབྷི. ཨཐ ནཾ ‘‘བྷདྡཀོ ཨཡཾ པུརིསོ, ནིབདྡྷཾ ཙོརགྷཱཏཀམེཝ ཨེཏཾ ཀརིསྶཱམཱ’’ཏི མནྟེཏྭཱ ཏསྶ ཏཾ ཋཱནནྟརཾ དཏྭཱཝ སམྨཱནཾ ཀརིཾསུ. སོ པཙྪིམདིསཏོཔི ཨུཏྟརདིསཏོཔི ཨཱནཱིཏེ པཉྩསཏེ པཉྩསཏེ ཙོརེ གྷཱཏེསིཡེཝ. ཨེཝཾ ཙཏཱུཧི དིསཱཧི ཨཱནཱིཏཱནི དྭེ སཧསྶཱནི མཱརེཏྭཱ ཏཏོ པཊྛཱཡ དེཝསིཀཾ ཨེཀཾ དྭེཏི ཨཱནཱིཏེ ཏེ མནུསྶེ མཱརེཏྭཱ པཉྩཔཎྞཱས སཾཝཙྪརཱནི ཙོརགྷཱཏཀཀམྨཾ ཨཀཱསི.

སོ མཧལླཀཀཱལེ ཨེཀཔྤཧཱརེནེཝ སཱིསཾ ཚིནྡིཏུཾ ན སཀྐོཏི, དྭེ ཏཡོ ཝཱརེ པཧརནྟོ མནུསྶེ ཀིལམེཏི. ནཱགརཱ ཙིནྟཡིཾསུ – ‘‘ཨཉྙོཔི ཙོརགྷཱཏཀོ ཨུཔྤཛྫིསྶཏི, ཨཡཾ ཨཏིཝིཡ མནུསྶེ ཀིལམེཏི, ཀིཾ ཨིམིནཱ’’ཏི ཏསྶ ཏཾ ཋཱནནྟརཾ ཧརིཾསུ. སོ པུབྦེ ཙོརགྷཱཏཀཀམྨཾ ཀརོནྟོ ‘‘ཨཧཏསཱཊཀེ ནིཝཱསེཏུཾ, ནཝསཔྤིནཱ སངྑཏཾ ཁཱིརཡཱགུཾ པིཝིཏུཾ, སུམནཔུཔྥཱནི པིལནྡྷིཏུཾ, གནྡྷེ ཝིལིམྤིཏུ’’ནྟི ཨིམཱནི ཙཏྟཱརི ན ལབྷི. སོ ཋཱནཱ ཙཱཝིཏདིཝསེ ‘‘ཁཱིརཡཱགུཾ མེ པཙཐཱ’’ཏི ཝཏྭཱ ཨཧཏཝཏྠསུམནམཱལཱཝིལེཔནཱནི གཱཧཱཔེཏྭཱ ནདིཾ གནྟྭཱ ནྷཏྭཱ ཨཧཏཝཏྠཱནི ནིཝཱསེཏྭཱ མཱལཱ པིལནྡྷིཏྭཱ གནྡྷེཧི ཨནུལིཏྟགཏྟོ གེཧཾ ཨཱགནྟྭཱ ནིསཱིདི. ཨཐསྶ ནཝསཔྤིནཱ སངྑཏཾ ཁཱིརཡཱགུཾ པུརཏོ ཋཔེཏྭཱ ཧཏྠདྷོཝནོདཀཾ ཨཱཧརིཾསུ. ཏསྨིཾ ཁཎེ སཱརིཔུཏྟཏྠེརོ སམཱཔཏྟིཏོ ཝུཊྛཱཡ ‘‘ཀཏྠ ནུ ཁོ ཨཛྫ མཡཱ གནྟབྦ’’ནྟི ཨཏྟནོ བྷིཀྑཱཙཱརཾ ཨོལོཀེནྟོ ཏསྶ གེཧེ ཁཱིརཡཱགུཾ དིསྭཱ ‘‘ཀརིསྶཏི ནུ ཁོ མེ པུརིསོ སངྒཧ’’ནྟི ཨུཔདྷཱརེནྟོ ‘‘མཾ དིསྭཱ མམ སངྒཧཾ ཀརིསྶཏི, ཀརིཏྭཱ ཙ པན མཧཱསམྤཏྟིཾ ལབྷིསྶཏི ཨཡཾ ཀུལཔུཏྟོ’’ཏི ཉཏྭཱ ཙཱིཝརཾ པཱརུཔིཏྭཱ པཏྟཾ ཨཱདཱཡ ཏསྶ གེཧདྭཱརེ ཋིཏམེཝ ཨཏྟཱནཾ དསྶེསི.

སོ ཐེརཾ དིསྭཱ པསནྣཙིཏྟོ ཙིནྟེསི – ‘‘མཡཱ ཙིརཾ ཙོརགྷཱཏཀཀམྨཾ ཀཏཾ, བཧཱུ མནུསྶཱ མཱརིཏཱ, ཨིདཱནི མེ གེཧེ ཁཱིརཡཱགུ པཊིཡཏྟཱ, ཐེརོ ཨཱགནྟྭཱ མམ གེཧདྭཱརེ ཋིཏོ, ཨིདཱནི མཡཱ ཨཡྻསྶ དེཡྻདྷམྨཾ དཱཏུཾ ཝཊྚཏཱི’’ཏི པུརཏོ ཋཔིཏཡཱགུཾ ཨཔནེཏྭཱ ཐེརཾ ཨུཔསངྐམིཏྭཱ ཝནྡིཏྭཱ ཨནྟོགེཧེ ནིསཱིདཱཔེཏྭཱ པཏྟེ ཁཱིརཡཱགུཾ ཨཱཀིརིཏྭཱ ནཝསཔྤིཾ ཨཱསིཉྩིཏྭཱ ཐེརཾ བཱིཛམཱནོ ཨཊྛཱསི. ཨཐསྶ ཙ དཱིགྷརཏྟཾ ཨལདྡྷཔུབྦཏཱཡ ཁཱིརཡཱགུཾ པཱཏུཾ བལཝཨཛ྄ཛྷཱསཡོ ཨཧོསི. ཐེརོ ཏསྶ ཨཛ྄ཛྷཱསཡཾ ཉཏྭཱ ‘‘ཏྭཾ, ཨུཔཱསཀ, ཨཏྟནོ ཡཱགུཾ པིཝཱ’’ཏི ཨཱཧ. སོ ཨཉྙསྶ ཧཏྠེ བཱིཛནིཾ དཏྭཱ ཡཱགུཾ པིཝི. ཐེརོ བཱིཛམཱནཾ པུརིསཾ ‘‘གཙྪ, ཨུཔཱསཀམེཝ བཱིཛཱཧཱི’’ཏི ཨཱཧ. སོ བཱིཛིཡམཱནོ ཀུཙྪིཔཱུརཾ ཡཱགུཾ པིཝིཏྭཱ ཨཱགནྟྭཱ ཐེརཾ བཱིཛམཱནོ ཋཏྭཱ ཀཏཱཧཱརཀིཙྩསྶ ཐེརསྶ པཏྟཾ ཨགྒཧེསི. ཐེརོ ཏསྶ ཨནུམོདནཾ ཨཱརབྷི. སོ ཨཏྟནོ ཙིཏྟཾ ཐེརསྶ དྷམྨདེསནཱནུགཾ ཀཱཏུཾ ནཱསཀྑི. ཐེརོ སལླཀྑེཏྭཱ, ‘‘ཨུཔཱསཀ, ཀསྨཱ ཙིཏྟཾ དེསནཱནུགཾ ཀཱཏུཾ ན སཀྐོསཱི’’ཏི པུཙྪི. ‘‘བྷནྟེ, མཡཱ དཱིགྷརཏྟཾ ཀཀྑལ༹ཀམྨཾ ཀཏཾ, བཧཱུ མནུསྶཱ མཱརིཏཱ, ཏམཧཾ ཨཏྟནོ ཀམྨཾ ཨནུསྶརནྟོ ཙིཏྟཾ ཨཡྻསྶ དེསནཱནུགཾ ཀཱཏུཾ ནཱསཀྑི’’ནྟི. ཐེརོ ‘‘ཝཉྩེསྶཱམི ན’’ནྟི ཙིནྟེཏྭཱ ‘‘ཀིཾ པན ཏྭཾ ཨཏྟནོ རུཙིཡཱ ཨཀཱསི, ཨཉྙེཧི ཀཱརིཏོསཱི’’ཏི? ‘‘རཱཛཱ མཾ ཀཱརེསི, བྷནྟེ’’ཏི. ‘‘ཀིཾ ནུ ཁོ ཏེ, ཨུཔཱསཀ, ཨེཝཾ སནྟེ ཨཀུསལཾ ཧོཏཱི’’ཏི? མནྡདྷཱཏུཀོ ཨུཔཱསཀོ ཐེརེནེཝཾ ཝུཏྟེ ‘‘ནཏྠི མཡ྄ཧཾ ཨཀུསལ’’ནྟི སཉྙཱི ཧུཏྭཱ ཏེན ཧི, ‘‘བྷནྟེ, དྷམྨཾ ཀཐེཐཱ’’ཏི. སོ ཐེརེ ཨནུམོདནཾ ཀརོནྟེ ཨེཀགྒཙིཏྟོ ཧུཏྭཱ དྷམྨཾ སུཎནྟོ སོཏཱཔཏྟིམགྒསྶ ཨོརཏོ ཨནུལོམིཀཾ ཁནྟིཾ ནིབྦཏྟེསི. ཐེརོཔི ཨནུམོདནཾ ཀཏྭཱ པཀྐཱམི.

ཨུཔཱསཀཾ ཐེརཾ ཨནུགནྟྭཱ ནིཝཏྟམཱནཾ ཨེཀཱ ཡཀྑིནཱི དྷེནུཝེསེན ཨཱགནྟྭཱ ཨུརེ པཧརིཏྭཱ མཱརེསི. སོ ཀཱལཾ ཀཏྭཱ ཏུསིཏཔུརེ ནིབྦཏྟི. བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཙོརགྷཱཏཀོ པཉྩཔཎྞཱས ཝསྶཱནི ཀཀྑལ༹ཀམྨཾ ཀཏྭཱ ཨཛྫེཝ ཏཏོ མུཏྟོ, ཨཛྫེཝ ཐེརསྶ བྷིཀྑཾ དཏྭཱ ཨཛྫེཝ ཀཱལཾ ཀཏོ, ཀཧཾ ནུ ཁོ ནིབྦཏྟོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཏུསིཏཔུརེ ནིབྦཏྟོ’’ཏི ཨཱཧ. ‘‘ཀིཾ, བྷནྟེ, ཝདེཐ, ཨེཏྟཀཾ ཀཱལཾ ཨེཏྟཀེ མནུསྶེ གྷཱཏེཏྭཱ ཏུསིཏཝིམཱནེ ནིབྦཏྟོ’’ཏི. ‘‘ཨཱམ, བྷིཀྑཝེ, མཧནྟོ ཏེན ཀལྱཱཎམིཏྟོ ལདྡྷོ, སོ སཱརིཔུཏྟསྶ དྷམྨདེསནཾ སུཏྭཱ ཨནུལོམཉཱཎཾ ནིབྦཏྟེཏྭཱ ཨིཏོ ཙུཏོ ཏུསིཏཝིམཱནེ ནིབྦཏྟོ’’ཏི ཝཏྭཱ ཨིམཾ གཱཐམཱཧ –

‘‘སུབྷཱསིཏཾ སུཎིཏྭཱན, ནགརེ ཙོརགྷཱཏཀོ;

ཨནུལོམཁནྟིཾ ལདྡྷཱན, མོདཏཱི ཏིདིཝཾ གཏོ’’ཏི.

‘‘བྷནྟེ, ཨནུམོདནཀཐཱ ནཱམ ན བལཝཱ, ཏེན ཀཏཾ ཨཀུསལཀམྨཾ མཧནྟཾ, ཀཐཾ ཨེཏྟཀེན ཝིསེསཾ ནིབྦཏྟེསཱི’’ཏི. སཏྠཱ ‘‘ཀིཾ, བྷིཀྑཝེ, ‘མཡཱ དེསིཏདྷམྨསྶ ཨཔྤཾ ཝཱ བཧུཾ ཝཱ’ཏི མཱ པམཱཎཾ གཎྷཐ. ཨེཀཝཱཙཱཔི ཧི ཨཏྠནིསྶིཏཱ སེཡྻཱཝཱ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༠༠.

‘‘སཧསྶམཔི ཙེ ཝཱཙཱ, ཨནཏྠཔདསཾཧིཏཱ;

ཨེཀཾ ཨཏྠཔདཾ སེཡྻོ, ཡཾ སུཏྭཱ ཨུཔསམྨཏཱི’’ཏི.

ཏཏྠ སཧསྶམཔཱིཏི པརིཙྪེདཝཙནཾ, ཨེཀཾ སཧསྶཾ དྭེ སཧསྶཱནཱིཏི ཨེཝཾ སཧསྶེན ཙེཔི པརིཙྪིནྣཝཱཙཱ ཧོནྟི, ཏཱ ཙ པན ཨནཏྠཔདསཾཧིཏཱ ཨཱཀཱསཝཎྞནཱཔབྦཏཝཎྞནཱཝནཝཎྞནཱདཱིནི པཀཱསཀེཧི ཨནིཡྻཱནདཱིཔཀེཧི ཨནཏྠཀེཧི པདེཧི སཾཧིཏཱ ཡཱཝ བཧུཀཱ ཧོཏི, ཏཱཝ པཱཔིཀཱ ཨེཝཱཏི ཨཏྠོ. ཨེཀཾ ཨཏྠཔདནྟི ཡཾ པན ‘‘ཨཡཾ ཀཱཡོ, ཨཡཾ ཀཱཡགཏཱསཏི, ཏིསྶོ ཝིཛྫཱ ཨནུཔྤཏྟོ, ཀཏཾ བུདྡྷསྶ སཱསན’’ནྟི ཨེཝརཱུཔཾ ཨེཀཾ ཨཏྠཔདཾ སུཏྭཱ རཱགཱདིཝཱུཔསམེན ཨུཔསམྨཏི, ཏཾ ཨཏྠསཱདྷཀཾ ནིབྦཱནཔྤཊིསཾཡུཏྟཾ ཁནྡྷདྷཱཏུཨཱཡཏནཨིནྡྲིཡབལབོཛ྄ཛྷངྒསཏིཔཊྛཱནཔརིདཱིཔཀཾ ཨེཀམྤི པདཾ སེཡྻོཡེཝཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཏམྦདཱཋིཀཙོརགྷཱཏཀཝཏྠུ པཋམཾ.

༢. བཱཧིཡདཱརུཙཱིརིཡཏྠེརཝཏྠུ

སཧསྶམཔི ཙེ གཱཐཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ དཱརུཙཱིརིཡཏྠེརཾ ཨཱརབྦྷ ཀཐེསི.

ཨེཀསྨིཉྷི ཀཱལེ བཧཱུ མནུསྶཱ ནཱཝཱཡ མཧཱསམུདྡཾ པཀྑནྡིཏྭཱ ཨནྟོམཧཱསམུདྡེ བྷིནྣཱཡ ནཱཝཱཡ མཙྪཀཙྪཔབྷཀྑཱ ཨཧེསུཾ. ཨེཀོཝེཏྠ ཨེཀཾ ཕལཀཾ གཧེཏྭཱ ཝཱཡམནྟོ སུཔྤཱརཀཔཊྚནཏཱིརཾ ཨོཀྐམི, ཏསྶ ནིཝཱསནཔཱརུཔནཾ ནཏྠི. སོ ཨཉྙཾ ཀིཉྩི ཨཔསྶནྟོ སུཀྑཀཊྛདཎྜཀེ ཝཱཀེཧི པལིཝེཋེཏྭཱ ནིཝཱསནཔཱརུཔནཾ ཀཏྭཱ དེཝཀུལཏོ ཀཔཱལཾ གཧེཏྭཱ སུཔྤཱརཀཔཊྚནཾ ཨགམཱསི, མནུསྶཱ ཏཾ དིསྭཱ ཡཱགུབྷཏྟཱདཱིནི དཏྭཱ ‘‘ཨཡཾ ཨེཀོ ཨརཧཱ’’ཏི སམྦྷཱཝེསུཾ. སོ ཝཏྠེསུ ཨུཔནཱིཏེསུ ‘‘སཙཱཧཾ ནིཝཱསེསྶཱམི ཝཱ པཱརུཔིསྶཱམི ཝཱ, ལཱབྷསཀྐཱརོ མེ པརིཧཱཡིསྶཏཱི’’ཏི ཏཱནི ཝཏྠཱནི པཊིཀྑིཔིཏྭཱ དཱརུཙཱིརཱནེཝ པརིདཧི. ཨཐསྶ བཧཱུཧི ‘‘ཨརཧཱ ཨརཧཱ’’ཏི ཝུཙྩམཱནསྶ ཨེཝཾ ཙེཏསོ པརིཝིཏཀྐོ ཨུདཔཱདི ‘‘ཡེ ཁོ ཀེཙི ལོཀེ ཨརཧནྟོ ཝཱ ཨརཧཏྟམགྒཾ ཝཱ སམཱཔནྣཱ, ཨཧཾ ཏེསཾ ཨཉྙཏརོ’’ཏི. ཨཐསྶ པུརཱཎསཱལོཧིཏཱ དེཝཏཱ ཨེཝཾ ཙིནྟེསི.

པུརཱཎསཱལོཧིཏཱཏི པུབྦེ ཨེཀཏོ ཀཏསམཎདྷམྨཱ. པུབྦེ ཀིར ཀསྶཔདསབལསྶ སཱསནེ ཨོསཀྐམཱནེ སཱམཎེརཱདཱིནཾ ཝིཔྤཀཱརཾ དིསྭཱ སཏྟ བྷིཀྑཱུ སཾཝེགཔྤཏྟཱ ‘‘ཡཱཝ སཱསནསྶ ཨནྟརདྷཱནཾ ན ཧོཏི, ཏཱཝ ཨཏྟནོ པཏིཊྛཾ ཀརིསྶཱམཱ’’ཏི སུཝཎྞཙེཏིཡཾ ཝནྡིཏྭཱ ཨརཉྙཾ པཝིཊྛཱ ཨེཀཾ པབྦཏཾ དིསྭཱ ‘‘ཛཱིཝིཏེ སཱལཡཱ ནིཝཏྟནྟུ. ནིརཱལཡཱ ཨིམཾ པབྦཏཾ ཨབྷིརུཧནྟཱུ’’ཏི ཝཏྭཱ ནིསྶེཎིཾ བནྡྷིཏྭཱ སབྦེཔི ཏཾ ཨབྷིརུཡ྄ཧ ནིསྶེཎིཾ པཱཏེཏྭཱ སམཎདྷམྨཾ ཀརིཾསུ. ཏེསུ སངྒྷཏྠེརོ ཨེཀརཏྟཱཏིཀྐམེནེཝ ཨརཧཏྟཾ པཱཔུཎི. སོ ཨནོཏཏྟདཧེ ནཱགལཏཱདནྟཀཊྛཾ ཁཱདིཏྭཱ ཨུཏྟརཀུརུཏོ པིཎྜཔཱཏཾ ཨཱཧརིཏྭཱ ཏེ བྷིཀྑཱུ ཨཱཧ – ‘‘ཨཱཝུསོ, ཨིམཾ དནྟཀཊྛཾ ཁཱདིཏྭཱ མུཁཾ དྷོཝིཏྭཱ ཨིམཾ པིཎྜཔཱཏཾ པརིབྷུཉྫཐཱ’’ཏི. ཀིཾ པན, བྷནྟེ, ཨམྷེཧི ཨེཝཾ ཀཏིཀཱ ཀཏཱ ‘‘ཡོ པཋམཾ ཨརཧཏྟཾ པཱཔུཎཱཏི, ཏེནཱབྷཏཾ པིཎྜཔཱཏཾ ཨཝསེསཱ པརིབྷུཉྫིསྶནྟཱི’’ཏི? ‘‘ནོ ཧེཏཾ, ཨཱཝུསོ’’ཏི. ‘‘ཏེན ཧི སཙེ མཡམྤི ཏུམྷེ ཝིཡ ཝིསེསཾ ནིབྦཏྟེསྶཱམ, སཡཾ ཨཱཧརིཏྭཱ པརིབྷུཉྫིསྶཱམཱ’’ཏི ན ཨིཙྪིཾསུ. དུཏིཡདིཝསེ དུཏིཡཏྠེརོ ཨནཱགཱམིཕལཾ པཱཔུཎི. སོཔི ཏཐེཝ པིཎྜཔཱཏཾ ཨཱཧརིཏྭཱ ཨིཏརེ ནིམནྟེསི. ཏེ ཨེཝམཱཧཾསུ – ‘‘ཀིཾ པན, བྷནྟེ, ཨམྷེཧི ཨེཝཾ ཀཏིཀཱ ཀཏཱ ‘མཧཱཐེརེན ཨཱབྷཏཾ པིཎྜཔཱཏཾ ཨབྷུཉྫིཏྭཱ ཨནུཐེརེན ཨཱབྷཏཾ བྷུཉྫིསྶཱམཱ’’’ཏི? ‘‘ནོ ཧེཏཾ, ཨཱཝུསོ’’ཏི. ‘‘ཨེཝཾ སནྟེ ཏུམྷེ ཝིཡ མཡམྤི ཝིསེསཾ ནིབྦཏྟེཏྭཱ ཨཏྟནོ པུརིསཀཱརེན བྷུཉྫིཏུཾ སཀྐོནྟཱ བྷུཉྫིསྶཱམཱ’’ཏི ན ཨིཙྪིཾསུ. ཏེསུ ཨརཧཏྟཾ པཏྟོ བྷིཀྑུ པརིནིབྦཱཡི, ཨནཱགཱམཱི བྲཧྨལོཀེ ནིབྦཏྟི. ཨིཏརེ པཉྩ ཐེརཱ ཝིསེསཾ ནིབྦཏྟེཏུཾ ཨསཀྐོནྟཱ སུསྶིཏྭཱ སཏྟམེ དིཝསེ ཀཱལཾ ཀཏྭཱ དེཝལོཀེ ནིབྦཏྟིཏྭཱ ཨིམསྨིཾ བུདྡྷུཔྤཱདེ ཏཏོ ཙཝིཏྭཱ ཏཏྠ ཏཏྠ ཀུལགྷརེསུ ནིབྦཏྟིཾསུ. ཏེསུ ཨེཀོ པུཀྐུསཱཏི རཱཛཱ (མ. ནི. ༣.༣༤༢) ཨཧོསི, ཨེཀོ ཀུམཱརཀསྶཔོ (མ. ནི. ༡.༢༤༩), ཨེཀོ དཱརུཙཱིརིཡོ (ཨུདཱ. ༡༠), ཨེཀོ དབྦོ མལླཔུཏྟོ (པཱརཱ. ༣༨༠; ཨུདཱ. ༧༩) ཨེཀོ སབྷིཡོ པརིབྦཱཛཀོཏི (སུ. ནི. སབྷིཡསུཏྟཾ). ཏཏྠ ཡོ བྲཧྨལོཀེ ནིབྦཏྟོ བྷིཀྑུ ཏཾ སནྡྷཱཡེཏཾ ཝུཏྟཾ ‘‘པུརཱཎསཱལོཧིཏཱ དེཝཏཱ’’ཏི.

ཏསྶ ཧི བྲཧྨུནོ ཨེཏདཧོསི – ‘‘ཨཡཾ མཡཱ སདྡྷིཾ ནིསྶེཎིཾ བནྡྷིཏྭཱ པབྦཏཾ ཨབྷིརུཧིཏྭཱ སམཎདྷམྨཾ ཨཀཱསི, ཨིདཱནི ཨིམཾ ལདྡྷིཾ གཧེཏྭཱ ཝིཙརནྟོ ཝིནསྶེཡྻ, སཾཝེཛེསྶཱམི ན’’ནྟི. ཨཐ ནཾ ཨུཔསངྐམིཏྭཱ ཨེཝམཱཧ – ‘‘ནེཝ ཁོ ཏྭཾ, བཱཧིཡ, ཨརཧཱ, ནཔི ཨརཧཏྟམགྒཾ ཝཱ སམཱཔནྣོ, སཱཔི ཏེ པཊིཔདཱ ནཏྠི, ཡཱཡ ཏྭཾ ཨརཧཱ ཝཱ ཨསྶ ཨརཧཏྟམགྒཾ ཝཱ སམཱཔནྣོ’’ཏི. བཱཧིཡོ ཨཱཀཱསེ ཋཏྭཱ ཀཐེནྟཾ མཧཱབྲཧྨཱནཾ ཨོལོཀེཏྭཱ ཙིནྟེསི – ‘‘ཨཧོ བྷཱརིཡཾ ཀམྨཾ ཀཏཾ, ཨཧཾ ‘ཨརཧནྟོམྷཱི’ཏི ཙིནྟེསིཾ, ཨཡཉྩ མཾ ‘ན ཏྭཾ ཨརཧཱ, ནཔི ཨརཧཏྟམགྒཾ ཝཱ སམཱཔནྣོསཱི’ཏི ཝདཏི, ཨཏྠི ནུ ཁོ ལོཀེ ཨཉྙོ ཨརཧཱ’’ཏི. ཨཐ ནཾ པུཙྪི – ‘‘ཨཏྠི ནུ ཁོ ཨེཏརཧི དེཝཏེ ལོཀེ ཨརཧཱ ཝཱ ཨརཧཏྟམགྒཾ ཝཱ སམཱཔནྣོ’’ཏི. ཨཐསྶ དེཝཏཱ ཨཱཙིཀྑི – ‘‘ཨཏྠི, བཱཧིཡ, ཨུཏྟརེསུ ཛནཔདེསུ སཱཝཏྠི ནཱམ ནགརཾ, ཏཏྠ སོ བྷགཝཱ ཨེཏརཧི ཝིཧརཏི ཨརཧཾ སམྨཱསམྦུདྡྷོ. སོ ཧི, བཱཧིཡ, བྷགཝཱ ཨརཧཱ ཙེཝ ཨརཧཏྟཏྠཱཡ ཙ དྷམྨཾ དེསེཏཱི’’ཏི.

བཱཧིཡོ རཏྟིབྷཱགེ དེཝཏཱཡ ཀཐཾ སུཏྭཱ སཾཝིགྒམཱནསོ ཏཾ ཁཎཾཡེཝ སུཔྤཱརཀཱ ནིཀྑམིཏྭཱ ཨེཀརཏྟིཝཱསེན སཱཝཏྠིཾ ཨགམཱསི, སབྦཾ ཝཱིསཡོཛནསཏིཀཾ མགྒཾ ཨེཀརཏྟིཝཱསེནེཝ ཨགམཱསི. གཙྪནྟོ ཙ པན དེཝཏཱནུབྷཱཝེན གཏོ. ‘‘བུདྡྷཱནུབྷཱཝེནཱ’’ཏིཔི ཝདནྟིཡེཝ. ཏསྨིཾ པན ཁཎེ སཏྠཱ སཱཝཏྠིཾ པིཎྜཱཡ པཝིཊྛོ ཧོཏི. སོ བྷུཏྟཔཱཏརཱསེ ཀཱཡཨཱལསིཡཝིམོཙནཏྠཾ ཨབྦྷོཀཱསེ ཙངྐམནྟེ སམྦཧུལེ བྷིཀྑཱུ ‘‘ཀཧཾ ཨེཏརཧི སཏྠཱ’’ཏི པུཙྪི. བྷིཀྑཱུ ‘‘བྷགཝཱ སཱཝཏྠིཾ པིཎྜཱཡ པཝིཊྛོ’’ཏི ཝཏྭཱ ཏཾ པུཙྪིཾསུ – ‘‘ཏྭཾ པན ཀུཏོ ཨཱགཏོསཱི’’ཏི? ‘‘སུཔྤཱརཀཱ ཨཱགཏོམྷཱི’’ཏི. ‘‘ཀདཱ ནིཀྑནྟོསཱི’’ཏི? ‘‘ཧིཡྻོ སཱཡཾ ནིཀྑནྟོམྷཱི’’ཏི. ‘‘དཱུརཏོསི ཨཱགཏོ, ནིསཱིད, ཏཝ པཱདེ དྷོཝིཏྭཱ ཏེལེན མཀྑེཏྭཱ ཐོཀཾ ཝིསྶམཱཧི, ཨཱགཏཀཱལེ སཏྠཱརཾ དཀྑིསྶསཱི’’ཏི. ‘‘ཨཧཾ, བྷནྟེ, སཏྠུ ཝཱ ཨཏྟནོ ཝཱ ཛཱིཝིཏནྟརཱཡཾ ན ཛཱནཱམི, ཨེཀརཏྟེནེཝམྷི ཀཏྠཙི ཨཊྛཏྭཱ ཨནིསཱིདིཏྭཱ ཝཱིསཡོཛནསཏིཀཾ མགྒཾ ཨཱགཏོ, སཏྠཱརཾ པསྶིཏྭཱཝ ཝིསྶམིསྶཱམཱི’’ཏི. སོ ཨེཝཾ ཝཏྭཱ ཏརམཱནརཱུཔོ སཱཝཏྠིཾ པཝིསིཏྭཱ བྷགཝནྟཾ ཨནོཔམཱཡ བུདྡྷསིརིཡཱ པིཎྜཱཡ ཙརནྟཾ དིསྭཱ ‘‘ཙིརསྶཾ ཝཏ མེ གོཏམོ སམྨཱསམྦུདྡྷོ དིཊྛོ’’ཏི དིཊྛཊྛཱནཏོ པཊྛཱཡ ཨོནཏསརཱིརོ གནྟྭཱ ཨནྟརཝཱིཐིཡམེཝ པཉྩཔཏིཊྛིཏེན ཝནྡིཏྭཱ གོཔྥཀེསུ དལ༹ྷཾ གཧེཏྭཱ ཨེཝམཱཧ – ‘‘དེསེཏུ མེ, བྷནྟེ, བྷགཝཱ དྷམྨཾ, དེསེཏུ སུགཏོ དྷམྨཾ, ཡཾ མམསྶ དཱིགྷརཏྟཾ ཧིཏཱཡ སུཁཱཡཱ’’ཏི. ཨཐ ནཾ སཏྠཱ ‘‘ཨཀཱལོ ཁོ ཏཱཝ, བཱཧིཡ, ཨནྟརགྷརཾ པཝིཊྛམྷཱ པིཎྜཱཡཱ’’ཏི པཊིཀྑིཔི.

ཏཾ སུཏྭཱ བཱཧིཡོ, བྷནྟེ, སཾསཱརེ སཾསརནྟེན ཀབལཱི༹ཀཱརཱཧཱརོ ན ཨལདྡྷཔུབྦོ, ཏུམྷཱཀཾ ཝཱ མཡ྄ཧཾ ཝཱ ཛཱིཝིཏནྟརཱཡཾ ན ཛཱནཱམི, དེསེཏུ མེ དྷམྨནྟི. སཏྠཱ དུཏིཡམྤི པཊིཀྑིཔིཡེཝ. ཨེཝཾ ཀིརསྶ ཨཧོསི – ‘‘ཨིམསྶ མཾ དིཊྛཀཱལཏོ པཊྛཱཡ སཀལསརཱིརཾ པཱིཏིཡཱ ནིརནྟརཾ ཨཛ྄ཛྷོཏྠཊཾ ཧོཏི, བལཝཔཱིཏིཝེགོ དྷམྨཾ སུཏྭཱཔི ན སཀྑིསྶཏི པཊིཝིཛ྄ཛྷིཏུཾ, མཛ྄ཛྷཏྟུཔེཀྑཱཡ ཏཱཝ ཏིཊྛཏུ, ཨེཀརཏྟེནེཝ ཝཱིསཡོཛནསཏིཀཾ མགྒཾ ཨཱགཏཏྟཱ དརཐོཔིསྶ བལཝཱ, སོཔི ཏཱཝ པཊིཔྤསྶམྦྷཏཱུ’’ཏི. ཏསྨཱ དྭིཀྑཏྟུཾ པཊིཀྑིཔིཏྭཱ ཏཏིཡཾ ཡཱཙིཏོ ཨནྟརཝཱིཐིཡཾ ཋིཏོཝ ‘‘ཏསྨཱཏིཧ ཏེ, བཱཧིཡ, ཨེཝཾ སིཀྑིཏབྦཾ ‘དིཊྛེ དིཊྛམཏྟཾ བྷཝིསྶཏཱི’’’ཏིཨཱདིནཱ (ཨུདཱ. ༡༠) ནཡེན དྷམྨཾ དེསེསི. སོ སཏྠུ དྷམྨཾ སུཎནྟོཡེཝ སབྦཱསཝེ ཁེཔེཏྭཱ སཧ པཊིསམྦྷིདཱཧི ཨརཧཏྟཾ པཱཔུཎི. ཏཱཝདེཝ ཙ པན བྷགཝནྟཾ པབྦཛྫཾ ཡཱཙི, ‘‘པརིཔུཎྞཾ ཏེ པཏྟཙཱིཝར’’ནྟི པུཊྛོ ‘‘ན པརིཔུཎྞ’’ནྟི ཨཱཧ. ཨཐ ནཾ སཏྠཱ ‘‘ཏེན ཧི པཏྟཙཱིཝརཾ པརིཡེསཱཧཱི’’ཏི ཝཏྭཱ པཀྐཱམི.

‘‘སོ ཀིར ཝཱིསཏི ཝསྶསཧསྶཱནི སམཎདྷམྨཾ ཀརོནྟོ ‘བྷིཀྑུནཱ ནཱམ ཨཏྟནཱ པཙྩཡེ ལབྷིཏྭཱ ཨཉྙཾ ཨནོལོཀེཏྭཱ སཡམེཝ པརིབྷུཉྫིཏུཾ ཝཊྚཏཱི’ཏི ཨེཀབྷིཀྑུསྶཱཔི པཏྟེན ཝཱ ཙཱིཝརེན ཝཱ སངྒཧཾ ན ཨཀཱསི, ཏེནསྶ ཨིདྡྷིམཡཔཏྟཙཱིཝརཾ ན ཨུཔཛྫིསྶཏཱི’’ཏི ཉཏྭཱ ཨེཧིབྷིཀྑུབྷཱཝེན པབྦཛྫཾ ན ཨདཱསི. ཏམྤི པཏྟཙཱིཝརཾ པརིཡེསམཱནམེཝ ཨེཀཱ ཡཀྑིནཱི དྷེནུརཱུཔེན ཨཱགནྟྭཱ ཨུརམྷི པཧརིཏྭཱ ཛཱིཝིཏཀྑཡཾ པཱཔེསི. སཏྠཱ པིཎྜཱཡ ཙརིཏྭཱ ཀཏབྷཏྟཀིཙྩོ སམྦཧུལེཧི བྷིཀྑཱུཧི སདྡྷིཾ ནིཀྑནྟོ བཱཧིཡསྶ སརཱིརཾ སངྐཱརཊྛཱནེ པཏིཏཾ དིསྭཱ བྷིཀྑཱུ ཨཱཎཱཔེསི, ‘‘བྷིཀྑཝེ, ཨེཀསྨིཾ གེཧདྭཱརེ ཋཏྭཱ མཉྩཀཾ ཨཱཧརཱཔེཏྭཱ ཨིམཾ སརཱིརཾ ནགརཏོ ནཱིཧརིཏྭཱ ཛྷཱཔེཏྭཱ ཐཱུཔཾ ཀརོཐཱ’’ཏི. བྷིཀྑཱུ ཏཐཱ ཀརིཾསུ, ཀཏྭཱ ཙ པན ཝིཧཱརཾ གནྟྭཱ སཏྠཱརཾ ཨུཔསངྐམིཏྭཱ ཨཏྟནཱ ཀཏཀིཙྩཾ ཨཱརོཙེཏྭཱ ཏསྶ ཨབྷིསམྤརཱཡཾ པུཙྪིཾསུ. ཨཐ ནེསཾ བྷགཝཱ ཏསྶ པརིནིབྦུཏབྷཱཝཾ ཨཱཙིཀྑིཏྭཱ ‘‘ཨེཏདགྒཾ, བྷིཀྑཝེ, མམ སཱཝཀཱནཾ བྷིཀྑཱུནཾ ཁིཔྤཱབྷིཉྙཱནཾ ཡདིདཾ བཱཧིཡོ དཱརུཙཱིརིཡོ’’ཏི (ཨ. ནི. ༡.༢༡༦) ཨེཏདགྒེ ཋཔེསི. ཨཐ ནཾ བྷིཀྑཱུ པུཙྪིཾསུ – ‘‘བྷནྟེ, ཏུམྷེ ‘བཱཧིཡོ ཨརཧཏྟཾ པཏྟོ’ཏི ཝདེཐ, ཀདཱ སོ ཨརཧཏྟཾ པཏྟོ’’ཏི? ‘‘མམ དྷམྨཾ སུཏཀཱལེ, བྷིཀྑཝེ’’ཏི. ‘‘ཀདཱ པནསྶ, བྷནྟེ, ཏུམྷེཧི དྷམྨོ ཀཐིཏོ’’ཏི? ‘‘པིཎྜཱཡ ཙརནྟེན ཨནྟརཝཱིཐིཡཾ ཋཏྭཱ’’ཏི. ‘‘ཨཔྤམཏྟཀོ ཧི, བྷནྟེ, ཏུམྷེཧི ཨནྟརཝཱིཐིཡཾ ཋཏྭཱ ཀཐིཏདྷམྨོ ཀཐཾ སོ ཏཱཝཏྟཀེན ཝིསེསཾ ནིབྦཏྟེསཱི’’ཏི, ཨཐ ནེ སཏྠཱ ‘‘ཀིཾ, བྷིཀྑཝེ, མམ དྷམྨཾ ‘ཨཔྤཾ ཝཱ བཧུཾ ཝཱ’ཏི མཱ པམཱཎཾ གཎྷཐ. ཨནེཀཱནིཔི ཧི གཱཐཱསཧསྶཱནི ཨནཏྠནིསྶིཏཱནི ན སེཡྻོ, ཨཏྠནིསྶིཏཾ པན ཨེཀམྤི གཱཐཱཔདཾ སེཡྻོ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༠༡.

‘‘སཧསྶམཔི ཙེ གཱཐཱ, ཨནཏྠཔདསཾཧིཏཱ;

ཨེཀཾ གཱཐཱཔདཾ སེཡྻོ, ཡཾ སུཏྭཱ ཨུཔསམྨཏཱི’’ཏི.

ཏཏྠ ཨེཀཾ གཱཐཱཔདཾ སེཡྻོཏི ‘‘ཨཔྤམཱདོ ཨམཏཔདཾ…པེ… ཡཐཱ མཡཱ’’ཏི (དྷ. པ. ༢༡) ཨེཝརཱུཔཱ ཨེཀཱ གཱཐཱཔི སེཡྻོཏི ཨཏྠོ. སེསཾ པུརིམནཡེནེཝ ཝེདིཏབྦཾ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

བཱཧིཡདཱརུཙཱིརིཡཏྠེརཝཏྠུ དུཏིཡཾ.

༣. ཀུཎྜལཀེསིཏྠེརཱིཝཏྠུ

ཡོ ཙ གཱཐཱསཏཾ བྷཱསེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀུཎྜལཀེསིཾ ཨཱརབྦྷ ཀཐེསི.

རཱཛགཧེ ཀིར ཨེཀཱ སེཊྛིདྷཱིཏཱ སོལ༹སཝསྶུདྡེསིཀཱ ཨབྷིརཱུཔཱ ཨཧོསི དསྶནཱིཡཱ པཱསཱདིཀཱ. ཏསྨིཉྩ ཝཡེ ཋིཏཱ ནཱརིཡོ པུརིསཛ྄ཛྷཱསཡཱ ཧོནྟི པུརིསལོལཱ. ཨཐ ནཾ མཱཏཱཔིཏརོ སཏྟབྷཱུམིཀསྶ པཱསཱདསྶ ཨུཔརིམཏལེ སིརིགབྦྷེ ནིཝཱསཱཔེསུཾ. ཨེཀམེཝསྶཱ དཱསིཾ པརིཙཱརིཀཾ ཨདཾསུ. ཨཐེཀཾ ཀུལཔུཏྟཾ ཙོརཀམྨཾ ཀརོནྟཾ གཧེཏྭཱ པཙྪཱབཱཧཾ བནྡྷིཏྭཱ ཙཏུཀྐེ ཙཏུཀྐེ ཀསཱཧི པཧརིཏྭཱ ཨཱགྷཱཏནཾ ནཡིཾསུ. སེཊྛིདྷཱིཏཱ མཧཱཛནསྶ སདྡཾ སུཏྭཱ ‘‘ཀིཾ ནུ ཁོ ཨེཏ’’ནྟི པཱསཱདཏལེ ཋཏྭཱ ཨོལོཀེནྟཱི ཏཾ དིསྭཱ པཊིབདྡྷཙིཏྟཱ ཧུཏྭཱ ཏཾ པཏྠཡམཱནཱ ཨཱཧཱརཾ པཊིཀྑིཔིཏྭཱ མཉྩཀེ ནིཔཛྫི. ཨཐ ནཾ མཱཏཱ པུཙྪི – ‘‘ཀིཾ ཨིདཾ, ཨམྨཱ’’ཏི? ‘‘སཙེ ཨེཏཾ ‘ཙོརོ’ཏི གཧེཏྭཱ ནིཡྻམཱནཾ པུརིསཾ ལབྷིསྶཱམི, ཛཱིཝིསྶཱམི. ནོ ཙེ ལབྷིསྶཱམི, ཛཱིཝིཏཾ མེ ནཏྠི, ཨིདྷེཝ མརིསྶཱམཱི’’ཏི. ‘‘ཨམྨ, མཱ ཨེཝཾ ཀརི, ཨམྷཱཀཾ ཛཱཏིཡཱ ཙ གོཏྟེན ཙ བྷོགེན ཙ སདིསཾ ཨཉྙཾ སཱམིཀཾ ལབྷིསྶསཱི’’ཏི. ‘‘མཡ྄ཧཾ ཨཉྙེན ཀིཙྩཾ ནཏྠི, ཨིམཾ ཨལབྷམཱནཱ མརིསྶཱམཱི’’ཏི. མཱཏཱ དྷཱིཏརཾ སཉྙཱཔེཏུཾ ཨསཀྐོནྟཱི པིཏུནོ ཨཱརོཙེསི. སོཔི ནཾ སཉྙཱཔེཏུཾ ཨསཀྐོནྟོ ‘‘ཀིཾ སཀྐཱ ཀཱཏུ’’ནྟི ཙིནྟེཏྭཱ ཏཾ ཙོརཾ གཧེཏྭཱ གཙྪནྟསྶ རཱཛཔུརིསསྶ སཧསྶབྷཎྜིཀཾ པེསེསི – ‘‘ཨིམཾ གཧེཏྭཱ ཨེཏཾ པུརིསཾ མཡ྄ཧཾ དེཧཱི’’ཏི. སོ ‘‘སཱདྷཱུ’’ཏི ཀཧཱཔཎེ གཧེཏྭཱ ཏཾ མུཉྩིཏྭཱ ཨཉྙཾ མཱརེཏྭཱ ‘‘མཱརིཏོ, དེཝ, ཙོརོ’’ཏི རཉྙོ ཨཱརོཙེསི. སེཊྛིཔི ཏསྶ དྷཱིཏརཾ ཨདཱསི.

སཱ ཏཏོ པཊྛཱཡ ‘‘སཱམིཀཾ ཨཱརཱདྷེསྶཱམཱི’’ཏི སབྦཱབྷརཎཔཊིམཎྜིཏཱ སཡམེཝ ཏསྶ ཡཱགུཨཱདཱིནི སཾཝིདཧཏི, ཙོརོ ཀཏིཔཱཧཙྩཡེན ཙིནྟེསི – ‘‘ཀདཱ ནུ ཁོ ཨིམཾ མཱརེཏྭཱ ཨེཏིསྶཱ ཨཱབྷརཎཱནི གཧེཏྭཱ ཨེཀསྨིཾ སུརཱགེཧེ ཝིཀྐིཎིཏྭཱ ཁཱདིཏུཾ ལབྷིསྶཱམཱི’’ཏི? སོ ‘‘ཨཏྠེཀོ ཨུཔཱཡོ’’ཏི ཙིནྟེཏྭཱ ཨཱཧཱརཾ པཊིཀྑིཔིཏྭཱ མཉྩཀེ ནིཔཛྫི, ཨཐ ནཾ སཱ ཨུཔསངྐམིཏྭཱ ‘‘ཀིཾ ཏེ, སཱམི, རུཛྫཏཱི’’ཏི པུཙྪི. ‘‘ན ཀིཉྩི མེ, བྷདྡེཏི, ཀཙྩི པན མེ མཱཏཱཔིཏརོ ཏུཡ྄ཧཾ ཀུདྡྷཱ’’ཏི? ‘‘ན ཀུཛ྄ཛྷནྟི, བྷདྡེ’’ཏི. ཨཐ ‘‘ཀིཾ ནཱམེཏ’’ནྟི? ‘‘བྷདྡེ, ཨཧཾ ཏཾ དིཝསཾ བནྡྷིཏྭཱ ནིཡྻམཱནོ ཙོརཔཔཱཏེ ཨདྷིཝཏྠཱཡ དེཝཏཱཡ བལིཀམྨཾ པཊིསྶུཎིཏྭཱ ཛཱིཝིཏཾ ལབྷིཾ, ཏྭམྤི མཡཱ ཏསྶཱ ཨེཝ ཨཱནུབྷཱཝེན ལདྡྷཱ, ‘ཏཾ མེ དེཝཏཱཡ བལིཀམྨཾ ཋཔིཏ’ནྟི ཙིནྟེམི, བྷདྡེ’’ཏི. ‘‘སཱམི, མཱ ཙིནྟཡི, ཀརིསྶཱམི བལིཀམྨཾ, ཝདེཧི, ཀེནཏྠོ’’ཏི? ‘‘ཨཔྤོདཀམདྷུཔཱཡསེན ཙ ལཱཛཔཉྩམཀཔུཔྥེཧི ཙཱ’’ཏི. ‘‘སཱདྷུ, སཱམི, ཨཧཾ པཊིཡཱདེསྶཱམཱི’’ཏི སཱ སབྦཾ བལིཀམྨཾ པཊིཡཱདེཏྭཱ ‘‘ཨེཧི, སཱམི, གཙྪཱམཱ’’ཏི ཨཱཧ. ‘‘ཏེན ཧི, བྷདྡེ, ཏཝ ཉཱཏཀེ ནིཝཏྟེཏྭཱ མཧགྒྷཱནི ཝཏྠཱབྷརཎཱནི གཧེཏྭཱ ཨཏྟཱནཾ ཨལངྐརོཧི, ཧསནྟཱ ཀཱིལ༹ནྟཱ སུཁཾ གམིསྶཱམཱ’’ཏི. སཱ ཏཐཱ ཨཀཱསི.

ཨཐ ནཾ སོ པབྦཏཔཱདཾ གཏཀཱལེ ཨཱཧ – ‘‘བྷདྡེ, ཨིཏོ པརཾ ཨུབྷོཝ ཛནཱ གམིསྶཱམ, སེསཛནཾ ཡཱནཀེན སདྡྷིཾ ནིཝཏྟཱཔེཏྭཱ བལིཀམྨབྷཱཛནཾ སཡཾ ཨུཀྑིཔིཏྭཱ གཎྷཱཧཱི’’ཏི. སཱ ཏཐཱ ཨཀཱསི. ཙོརོ ཏཾ གཧེཏྭཱ ཙོརཔཔཱཏཔབྦཏཾ ཨབྷིརུཧི. ཏསྶ ཧི ཨེཀེན པསྶེན མནུསྶཱ ཨབྷིརུཧནྟི, ཨེཀཾ པསྶཾ ཚིནྣཔཔཱཏཾ. པབྦཏམཏྠཀེ ཋིཏཱ ཏེན པསྶེན ཙོརེ པཱཏེནྟི. ཏེ ཁཎྜཱཁཎྜཾ ཧུཏྭཱ བྷཱུམིཡཾ པཏནྟི. ཏསྨཱ ‘‘ཙོརཔཔཱཏོ’’ཏི ཝུཙྩཏི. སཱ ཏསྶ པབྦཏསྶ མཏྠཀེ ཋཏྭཱ ‘‘བལིཀམྨཾ ཏེ, སཱམི, ཀརོཧཱི’’ཏི ཨཱཧ. སོ ཏུཎྷཱི ཨཧོསི. པུན ཏཱཡ ‘‘ཀསྨཱ, སཱམི, ཏུཎྷཱིབྷཱུཏོསཱི’’ཏི ཝུཏྟེ ཏཾ ཨཱཧ – ‘‘ན མཡ྄ཧཾ བལིཀམྨེནཏྠོ, ཝཉྩེཏྭཱ པན ཏཾ ཨཱདཱཡ ཨཱགཏོམྷཱི’’ཏི. ‘‘ཀིཾ ཀཱརཎཱ, སཱམཱི’’ཏི? ‘‘ཏཾ མཱརེཏྭཱ ཏཝ ཨཱབྷརཎཱནི གཧེཏྭཱ པལཱཡནཏྠཱཡཱ’’ཏི. སཱ མརཎབྷཡཏཛྫིཏཱ ཨཱཧ – ‘‘སཱམི, ཨཧཉྩ ཨཱབྷརཎཱནི ཙ ཏཝ སནྟཀཱནེཝ, ཀསྨཱ ཨེཝཾ ཝདེསཱི’’ཏི? སོ, ‘‘མཱ ཨེཝཾ ཀརོཧཱི’’ཏི, པུནཔྤུནཾ ཡཱཙིཡམཱནོཔི ‘‘མཱརེམི ཨེཝཱ’’ཏི ཨཱཧ. ‘‘ཨེཝཾ སནྟེ ཀིཾ ཏེ མམ མརཎེན? ཨིམཱནི ཨཱབྷརཎཱནི གཧེཏྭཱ མཡ྄ཧཾ ཛཱིཝིཏཾ དེཧི, ཨིཏོ པཊྛཱཡ མཾ ‘མཏཱ’ཏི དྷཱརེཧི, དཱསཱི ཝཱ ཏེ ཧུཏྭཱ ཀམྨཾ ཀརིསྶཱམཱི’’ཏི ཝཏྭཱ ཨིམཾ གཱཐམཱཧ –

‘‘ཨིདཾ སུཝཎྞཀེཡཱུརཾ, མུཏྟཱ ཝེལུ༹རིཡཱ བཧཱུ;

སབྦཾ ཧརསྶུ བྷདྡནྟེ, མཾ ཙ དཱསཱིཏི སཱཝཡཱ’’ཏི. (ཨཔ. ཐེརཱི ༢.༣.༢༧);

ཏཾ སུཏྭཱ ཙོརོ ‘‘ཨེཝཾ ཀཏེ ཏྭཾ གནྟྭཱ མཱཏཱཔིཏཱུནཾ ཨཱཙིཀྑིསྶསི, མཱརེསྶཱམིཡེཝ, མཱ ཏྭཾ བཱལ༹ྷཾ པརིདེཝསཱི’’ཏི ཝཏྭཱ ཨིམཾ གཱཐམཱཧ –

‘‘མཱ བཱལ༹ྷཾ པརིདེཝེསི, ཁིཔྤཾ བནྡྷཱཧི བྷཎྜིཀཾ;

ན ཏུཡ྄ཧཾ ཛཱིཝིཏཾ ཨཏྠི, སབྦཾ གཎྷཱམི བྷཎྜཀ’’ནྟི. –

སཱ ཙིནྟེསི – ‘‘ཨཧོ ཨིདཾ ཀམྨཾ བྷཱརིཡཾ. པཉྙཱ ནཱམ ན པཙིཏྭཱ ཁཱདནཏྠཱཡ ཀཏཱ, ཨཐ ཁོ ཝིཙཱརཎཏྠཱཡ ཀཏཱ, ཛཱནིསྶཱམིསྶ ཀཏྟབྦ’’ནྟི, ཨཐ ནཾ ཨཱཧ – ‘‘སཱམི, ཡདཱ ཏྭཾ ‘ཙོརོ’ཏི གཧེཏྭཱ ནཱིཡསི, ཏདཱཧཾ མཱཏཱཔིཏཱུནཾ ཨཱཙིཀྑིཾ, ཏེ སཧསྶཾ ཝིསྶཛྫེཏྭཱ ཏཾ ཨཱཧརཱཔེཏྭཱ གེཧེ ཀརིཾསུ. ཏཏོ པཊྛཱཡ ཨཧཾ ཏུཡ྄ཧཾ ཨུཔཀཱརིཀཱ, ཨཛྫ མེ སུདིཊྛཾ ཀཏྭཱ ཨཏྟཱནཾ ཝནྡིཏུཾ དེཧཱི’’ཏི. སོ ‘‘སཱདྷུ, བྷདྡེ, སུདིཊྛཾ ཀཏྭཱ ཝནྡཱཧཱི’’ཏི ཝཏྭཱ པབྦཏནྟེ ཨཊྛཱསི. ཨཐ ནཾ སཱ ཏིཀྑཏྟུཾ པདཀྑིཎཾ ཀཏྭཱ ཙཏཱུསུ ཋཱནེསུ ཝནྡིཏྭཱ, ‘‘སཱམི, ཨིདཾ ཏེ པཙྪིམདསྶནཾ, ཨིདཱནི ཏུཡ྄ཧཾ ཝཱ མམ དསྶནཾ, མཡ྄ཧཾ ཝཱ ཏཝ དསྶནཾ ནཏྠཱི’’ཏི པུརཏོ ཙ པཙྪཏོ ཙ ཨཱལིངྒིཏྭཱ པམཏྟཾ ཧུཏྭཱ པབྦཏནྟེ ཋིཏཾ པིཊྛིཔསྶེ ཋཏྭཱ ཨེཀེན ཧཏྠེན ཁནྡྷེ གཧེཏྭཱ ཨེཀེན པིཊྛིཀཙྪཱཡ གཧེཏྭཱ པབྦཏཔཔཱཏེ ཁིཔི. སོ པབྦཏཀུཙྪིཡཾ པཊིཧཏོ ཁཎྜཱཁཎྜིཀཾ ཧུཏྭཱ བྷཱུམིཡཾ པཏི. ཙོརཔཔཱཏམཏྠཀེ ཨདྷིཝཏྠཱ དེཝཏཱ ཏེསཾ དྭིནྣམྤི ཀིརིཡཾ དིསྭཱ ཏསྶཱ ཨིཏྠིཡཱ སཱདྷུཀཱརཾ དཏྭཱ ཨིམཾ གཱཐམཱཧ –

‘‘ན ཧི སབྦེསུ ཋཱནེསུ, པུརིསོ ཧོཏི པཎྜིཏོ;

ཨིཏྠཱིཔི པཎྜིཏཱ ཧོཏི, ཏཏྠ ཏཏྠ ཝིཙཀྑཎཱ’’ཏི. (ཨཔ. ཐེརཱི ༢.༣.༣༡);

སཱཔི ཙོརཾ པཔཱཏེ ཁིཔིཏྭཱ ཙིནྟེསི – ‘‘སཙཱཧཾ གེཧཾ གམིསྶཱམི, ‘སཱམིཀོ ཏེ ཀུཧི’ནྟི པུཙྪིསྶནྟི, སཙཱཧཾ ཨེཝཾ པུཊྛཱ ‘མཱརིཏོ མེ’ཏི ཝཀྑཱམི, ‘དུབྦིནཱིཏེ སཧསྶཾ དཏྭཱ ཏཾ ཨཱཧརཱཔེཏྭཱ ཨིདཱནི ནཾ མཱརེསཱི’ཏི མཾ མུཁསཏྟཱིཧི ཝིཛ྄ཛྷིསྶནྟི, ‘ཨཱབྷརཎཏྠཱཡ སོ མཾ མཱརེཏུཀཱམོ ཨཧོསཱི’ཏི ཝུཏྟེཔི ན སདྡཧིསྶནྟི, ཨལཾ མེ གེཧེནཱ’’ཏི ཏཏྠེཝཱབྷརཎཱནི ཚཌྜེཏྭཱ ཨརཉྙཾ པཝིསིཏྭཱ ཨནུཔུབྦེན ཝིཙརནྟཱི ཨེཀཾ པརིབྦཱཛཀཱནཾ ཨསྶམཾ པཏྭཱ ཝནྡིཏྭཱ ‘‘མཡ྄ཧཾ, བྷནྟེ, ཏུམྷཱཀཾ སནྟིཀེ པབྦཛྫཾ དེཐཱ’’ཏི ཨཱཧ. ཨཐ ནཾ པབྦཱཛེསུཾ. སཱ པབྦཛིཏྭཱཝ པུཙྪི – ‘‘བྷནྟེ, ཏུམྷཱཀཾ པབྦཛྫཱཡ ཀིཾ ཨུཏྟམ’’ནྟི? ‘‘བྷདྡེ, དསསུ ཝཱ ཀསིཎེསུ པརིཀམྨཾ ཀཏྭཱ ཛྷཱནཾ ནིབྦཏྟེཏབྦཾ, ཝཱདསཧསྶཾ ཝཱ ཨུགྒཎྷིཏབྦཾ, ཨཡཾ ཨམྷཱཀཾ པབྦཛྫཱཡ ཨུཏྟམཏྠོ’’ཏི. ‘‘ཛྷཱནཾ ཏཱཝ ནིབྦཏྟེཏུཾ ཨཧཾ ན སཀྑིསྶཱམི, ཝཱདསཧསྶཾ པན ཨུགྒཎྷིསྶཱམི, ཨཡྻཱ’’ཏི. ཨཐ ནཾ ཏེ ཝཱདསཧསྶཾ ཨུགྒཎྷཱཔེཏྭཱ ‘‘ཨུགྒཧིཏཾ ཏེ སིཔྤཾ, ཨིདཱནི ཏྭཾ ཛམྦུདཱིཔཏལེ ཝིཙརིཏྭཱ ཨཏྟནཱ སདྡྷིཾ པཉྷཾ ཀཐེཏུཾ སམཏྠཾ ཨོལོཀེཧཱི’’ཏི ཏསྶ ཧཏྠེ ཛམྦུསཱཁཾ དཏྭཱ ཨུཡྻོཛེསུཾ – ‘‘གཙྪ, བྷདྡེ, སཙེ ཀོཙི གིཧིབྷཱུཏོ ཏཡཱ སདྡྷིཾ པཉྷཾ ཀཐེཏུཾ སཀྐོཏི, ཏསྶེཝ པཱདཔརིཙཱརིཀཱ བྷཝཱཧི, སཙེ པབྦཛིཏོ སཀྐོཏི, ཏསྶ སནྟིཀེ པབྦཛཱཧཱི’’ཏི.

སཱ ནཱམེན ཛམྦུཔརིབྦཱཛིཀཱ ནཱམ ཧུཏྭཱ ཏཏོ ནིཀྑམིཏྭཱ དིཊྛེ དིཊྛེ པཉྷཾ པུཙྪནྟཱི ཝིཙརཏི. ཏཱཡ སདྡྷིཾ ཀཐེཏུཾ སམཏྠོ ནཱམ ནཱཧོསི. ‘‘ཨིཏོ ཛམྦུཔརིབྦཱཛིཀཱ ཨཱགཙྪཏཱི’’ཏི སུཏྭཱཝ མནུསྶཱ པལཱཡནྟི. སཱ གཱམཾ ཝཱ ནིགམཾ ཝཱ བྷིཀྑཱཡ པཝིསནྟཱི གཱམདྭཱརེ ཝཱལུཀརཱསིཾ ཀཏྭཱ ཏཏྠ ཛམྦུསཱཁཾ ཋཔེཏྭཱ ‘‘མཡཱ སདྡྷིཾ ཀཐེཏུཾ སམཏྠོ ཛམྦུསཱཁཾ མདྡཏཱུ’’ཏི ཝཏྭཱ གཱམཾ པཱཝིསི. ཏཾ ཋཱནཾ ཨུཔསངྐམིཏུཾ སམཏྠོ ནཱམ ནཱཧོསི. སཱཔི མིལཱཏཱཡ ཛམྦུསཱཁཱཡ ཨཉྙཾ ཛམྦུསཱཁཾ གཎྷཱཏི, ཨིམིནཱ ནཱིཧཱརེན ཝིཙརནྟཱི སཱཝཏྠིཾ པཏྭཱ གཱམདྭཱརེ ཝཱལུཀརཱསིཾ ཀཏྭཱ ཛམྦུསཱཁཾ ཋཔེཏྭཱ ཝུཏྟནཡེནེཝ ཝཏྭཱ བྷིཀྑཱཡ པཱཝིསི. སམྦཧུལཱ གཱམདཱརཀཱ ཛམྦུསཱཁཾ པརིཝཱརེཏྭཱ ཨཊྛཾསུ. ཏདཱ སཱརིཔུཏྟཏྠེརོ པིཎྜཱཡ ཙརིཏྭཱ ཀཏབྷཏྟཀིཙྩོ ནགརཱ ནིཀྑནྟོ ཏེ དཱརཀེ ཛམྦུསཱཁཾ པརིཝཱརེཏྭཱ ཋིཏེ དིསྭཱ ‘‘ཀིཾ ཨིད’’ནྟི པུཙྪི. དཱརཀཱ ཐེརསྶ ཏཾ པཝཏྟིཾ ཨཱཙིཀྑིཾསུ. ‘‘ཏེན ཧི དཱརཀཱ ཨིམཾ སཱཁཾ མདྡཐཱ’’ཏི. ‘‘བྷཱཡཱམ, བྷནྟེ’’ཏི. ‘‘ཨཧཾ པཉྷཾ ཀཐེསྶཱམི, མདྡཐ ཏུམྷེ’’ཏི. ཏེ ཐེརསྶ ཝཙནེན སཉྫཱཏུསྶཱཧཱ ཏཐཱ ཀཏྭཱ མདྡནྟཱ ཛམྦུསཱཁཾ ཨུཀྑིཔིཾསུ. པརིབྦཱཛིཀཱ ཨཱགནྟྭཱ ཏེ པརིབྷཱསིཏྭཱ ‘‘ཏུམྷེཧི སདྡྷིཾ མམ པཉྷེན ཀིཙྩཾ ནཏྠི, ཀསྨཱ མེ སཱཁཾ མདྡཐཱ’’ཏི ཨཱཧ. ‘‘ཨཡྻེནམྷཱ མདྡཱཔིཏཱ’’ཏི ཨཱཧཾསུ. ‘‘བྷནྟེ, ཏུམྷེཧི མེ སཱཁཱ མདྡཱཔིཏཱ’’ཏི? ‘‘ཨཱམ, བྷགིནཱི’’ཏི. ‘‘ཏེན ཧི མཡཱ སདྡྷིཾ པཉྷཾ ཀཐེཐཱ’’ཏི. ‘‘སཱདྷུ ཀཐེསྶཱམཱི’’ཏི.

སཱ ཝཌྜྷམཱནཀཙྪཱཡཱཡ པཉྷཾ པུཙྪིཏུཾ ཐེརསྶ སནྟིཀཾ ཨགམཱསི, སཀལནགརཾ སངྑུབྷི. ‘‘དྭིནྣཾ པཎྜིཏཱནཾ ཀཐཾ སུཎིསྶཱམཱ’’ཏི ནཱགརཱ ཏཱཡ སདྡྷིཾཡེཝ གནྟྭཱ ཐེརཾ ཝནྡིཏྭཱ ཨེཀམནྟཾ ནིསཱིདིཾསུ. པརིབྦཱཛིཀཱ ཐེརཾ ཨཱཧ – ‘‘བྷནྟེ, པུཙྪཱམི ཏེ པཉྷ’’ནྟི. ‘‘པུཙྪ, བྷགིནཱི’’ཏི. སཱ ཝཱདསཧསྶཾ པུཙྪི, པུཙྪིཏཾ པུཙྪིཏཾ ཐེརོ ཝིསྶཛྫེསི. ཨཐ ནཾ ཐེརོ ཨཱཧ – ‘‘ཨེཏྟཀཱ ཨེཝ ཏེ པཉྷཱ, ཨཉྙེཔི ཨཏྠཱི’’ཏི? ‘‘ཨེཏྟཀཱ ཨེཝ, བྷནྟེ’’ཏི. ‘‘ཏཡཱ བཧཱུ པཉྷཱ པུཊྛཱ, མཡམྤི ཨེཀཾ པུཙྪཱམ, ཝིསྶཛྫིསྶསི ནོ’’ཏི? ‘‘ཛཱནམཱནཱ ཝིསྶཛྫིསྶཱམི པུཙྪཐ, བྷནྟེ’’ཏི. ཐེརོ ‘‘ཨེཀཾ ནཱམ ཀི’’ནྟི (ཁུ. པཱ. ༤.༡) པཉྷཾ པུཙྪི. སཱ ‘‘ཨེཝཾ ནཱམེས ཝིསྶཛྫེཏབྦོ’’ཏི ཨཛཱནནྟཱི ‘‘ཀིཾ ནཱམེཏཾ, བྷནྟེ’’ཏི པུཙྪི. ‘‘བུདྡྷཔཉྷོ ནཱམ, བྷགིནཱི’’ཏི. ‘‘མཡ྄ཧམྤི ཏཾ དེཐ, བྷནྟེ’’ཏི. ‘‘སཙེ མཱདིསཱ བྷཝིསྶསི, དསྶཱམཱི’’ཏི. ‘‘ཏེན ཧི མཾ པབྦཱཛེཐཱ’’ཏི. ཐེརོ བྷིཀྑུནཱིནཾ ཨཱཙིཀྑིཏྭཱ པབྦཱཛེསི. སཱ པབྦཛིཏྭཱ ལདྡྷཱུཔསམྤདཱ ཀུཎྜལཀེསིཏྠེརཱི ནཱམ ཧུཏྭཱ ཀཏིཔཱཧཙྩཡེནེཝ སཧ པཊིསམྦྷིདཱཧི ཨརཧཏྟཾ པཱཔུཎི.

བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ – ‘‘ཀུཎྜལཀེསིཏྠེརིཡཱ དྷམྨསྶཝནཉྩ བཧུཾ ནཏྠི, པབྦཛིཏཀིཙྩཉྩསྶཱ མཏྠཀཾ པཏྟཾ, ཨེཀེན ཀིར ཙོརེན སདྡྷིཾ མཧཱསངྒཱམཾ ཀཏྭཱ ཛིནིཏྭཱ ཨཱགཏཱ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, མཡཱ དེསིཏདྷམྨཾ ‘ཨཔྤཾ ཝཱ བཧུཾ ཝཱ’ཏི པམཱཎཾ མཱ གཎྷཐ, ཨནཏྠཀཾ པདསཏམྤི སེཡྻོ ན ཧོཏི, དྷམྨཔདཾ པན ཨེཀམྤི སེཡྻོཝ. ཨཝསེསཙོརེ ཛིནནྟསྶ ཙ ཛཡོ ནཱམ ན ཧོཏི, ཨཛ྄ཛྷཏྟིཀཀིལེསཙོརེ ཛིནནྟསྶེཝ པན ཛཡོ ནཱམ ཧོཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༡༠༢.

‘‘ཡོ ཙ གཱཐཱསཏཾ བྷཱསེ, ཨནཏྠཔདསཾཧིཏཱ;

ཨེཀཾ དྷམྨཔདཾ སེཡྻོ, ཡཾ སུཏྭཱ ཨུཔསམྨཏི.

༡༠༣.

‘‘ཡོ སཧསྶཾ སཧསྶེན, སངྒཱམེ མཱནུསེ ཛིནེ;

ཨེཀཉྩ ཛེཡྻམཏྟཱནཾ, ས ཝེ སངྒཱམཛུཏྟམོ’’ཏི.

ཏཏྠ གཱཐཱསཏནྟི ཡོ ཙ པུགྒལོ སཏཔརིཙྪེདཱ བཧཱུཔི གཱཐཱ བྷཱསེཡྻཱཏི ཨཏྠོ. ཨནཏྠཔདསཾཧིཏཱཏི ཨཱཀཱསཝཎྞནཱདིཝསེན ཨནཏྠཀེཧི པདེཧི སཾཧིཏཱ. དྷམྨཔདནྟི ཨཏྠསཱདྷཀཾ ཁནྡྷཱདིཔཊིསཾཡུཏྟཾ, ‘‘ཙཏྟཱརིམཱནི པརིབྦཱཛཀཱ དྷམྨཔདཱནི. ཀཏམཱནི ཙཏྟཱརི? ཨནབྷིཛ྄ཛྷཱ པརིབྦཱཛཀཱ དྷམྨཔདཾ, ཨབྱཱཔཱདོ པརིབྦཱཛཀཱ དྷམྨཔདཾ, སམྨཱསཏི པརིབྦཱཛཀཱ དྷམྨཔདཾ, སམྨཱསམཱདྷི པརིབྦཱཛཀཱ དྷམྨཔད’’ནྟི (ཨ. ནི. ༤.༣༠) ཨེཝཾ ཝུཏྟེསུ ཙཏཱུསུ དྷམྨཔདེསུ ཨེཀམྤི དྷམྨཔདཾ སེཡྻོ. ཡོ སཧསྶཾ སཧསྶེནཱཏི ཡོ ཨེཀོ སངྒཱམཡོདྷོ སཧསྶེན གུཎིཏཾ སཧསྶཾ མཱནུསེ ཨེཀསྨིཾ སངྒཱམེ ཛིནེཡྻ, དསམནུསྶསཏསཧསྶཾ ཛིནིཏྭཱ ཛཡཾ ཨཱཧརེཡྻ, ཨཡམྤི སངྒཱམཛིནཏཾ ཨུཏྟམོ པཝརོ ནཱམ ན ཧོཏི. ཨེཀཉྩ ཛེཡྻམཏྟཱནནྟི ཡོ རཏྟིཊྛཱནདིཝཱཊྛཱནེསུ ཨཛ྄ཛྷཏྟིཀཀམྨཊྛཱནཾ སམྨསནྟོ ཨཏྟནོ ལོབྷཱདིཀིལེསཛཡེན ཨཏྟཱནཾ ཛིནེཡྻ. ས ཝེ སངྒཱམཛུཏྟམོཏི སོ སངྒཱམཛིནཱནཾ ཨུཏྟམོ པཝརོ སངྒཱམསཱིསཡོདྷོཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཀུཎྜལཀེསིཏྠེརཱིཝཏྠུ ཏཏིཡཾ.

༤. ཨནཏྠཔུཙྪཀབྲཱཧྨཎཝཏྠུ

ཨཏྟཱ ཧཝེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨནཏྠཔུཙྪཀཾ བྲཱཧྨཎཾ ཨཱརབྦྷ ཀཐེསི.

སོ ཀིར བྲཱཧྨཎོ ‘‘ཀིཾ ནུ ཁོ སམྨཱསམྦུདྡྷོ ཨཏྠམེཝ ཛཱནཱཏི, ཨུདཱཧུ ཨནཏྠམྤི, པུཙྪིསྶཱམི ན’’ནྟི སཏྠཱརཾ ཨུཔསངྐམིཏྭཱ པུཙྪི – ‘‘བྷནྟེ, ཏུམྷེ ཨཏྠམེཝ ཛཱནཱཐ མཉྙེ, ནོ ཨནཏྠ’’ནྟི? ‘‘ཨཏྠཉྩཱཧཾ, བྲཱཧྨཎ, ཛཱནཱམི ཨནཏྠཉྩཱ’’ཏི. ‘‘ཏེན ཧི མེ ཨནཏྠཾ ཀཐེཐཱ’’ཏི. ཨཐསྶ སཏྠཱ ཨིམཾ གཱཐམཱཧ –

‘‘ཨུསྶཱུརསེཡྻཾ ཨཱལསྱཾ, ཙཎྜིཀྐཾ དཱིགྷསོཎྜིཡཾ;

ཨེཀསྶདྡྷཱནགམནཾ པརདཱརཱུཔསེཝནཾ;

ཨེཏཾ བྲཱཧྨཎ སེཝསྶུ, ཨནཏྠཾ ཏེ བྷཝིསྶཏཱི’’ཏི.

ཏཾ སུཏྭཱ བྲཱཧྨཎོ སཱདྷུཀཱརམདཱསི ‘‘སཱདྷུ སཱདྷུ, གཎཱཙརིཡ, གཎཛེཊྛཀ, ཏུམྷེ ཨཏྠཉྩ ཛཱནཱཐ ཨནཏྠཉྩཱ’’ཏི. ‘‘ཨེཝཾ ཁོ, བྲཱཧྨཎ, ཨཏྠཱནཏྠཛཱནནཀོ ནཱམ མཡཱ སདིསོ ནཏྠཱི’’ཏི. ཨཐསྶ སཏྠཱ ཨཛ྄ཛྷཱསཡཾ ཨུཔདྷཱརེཏྭཱ, ‘‘བྲཱཧྨཎ, ཀེན ཀམྨེན ཛཱིཝསཱི’’ཏི པུཙྪི. ‘‘ཛཱུཏཀམྨེན, བྷོ གོཏམཱ’’ཏི. ‘‘ཀིཾ པན ཏེ ཛཡོ ཧོཏི པརཱཛཡོ’’ཏི. ‘‘ཛཡོཔི ཧོཏི པརཱཛཡོཔཱི’’ཏི ཝུཏྟེ, ‘‘བྲཱཧྨཎ, ཨཔྤམཏྟཀོ ཨེས, པརཾ ཛིནནྟསྶ ཛཡོ ནཱམ ན སེཡྻོ. ཡོ པན ཀིལེསཛཡེན ཨཏྟཱནཾ ཛིནཱཏི, ཏསྶ ཛཡོ སེཡྻོ. ན ཧི ཏཾ ཛཡཾ ཀོཙི ཨཔཛཡཾ ཀཱཏུཾ སཀྐོཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༡༠༤.

‘‘ཨཏྟཱ ཧཝེ ཛིཏཾ སེཡྻོ, ཡཱ ཙཱཡཾ ཨིཏརཱ པཛཱ;

ཨཏྟདནྟསྶ པོསསྶ, ནིཙྩཾ སཉྙཏཙཱརིནོ.

༡༠༥.

‘‘ནེཝ དེཝོ ན གནྡྷབྦོ, ན མཱརོ སཧ བྲཧྨུནཱ;

ཛིཏཾ ཨཔཛིཏཾ ཀཡིརཱ, ཏཐཱརཱུཔསྶ ཛནྟུནོ’’ཏི.

ཏཏྠ ཧཝེཏི ནིཔཱཏོ. ཛིཏནྟི ལིངྒཝིཔལླཱསོ, ཨཏྟནོ ཀིལེསཛཡེན ཨཏྟཱ ཛིཏོ སེཡྻོཏི ཨཏྠོ. ཡཱ ཙཱཡཾ ཨིཏརཱ པཛཱཏི ཡཱ པནཱཡཾ ཨཝསེསཱ པཛཱ ཛཱུཏེན ཝཱ དྷནཧརཎེན ཝཱ སངྒཱམེན ཝཱ བལཱབྷིབྷཝེན ཝཱ ཛིཏཱ བྷཝེཡྻ, ཏཾ ཛིནནྟེན ཡཾ ཛིཏཾ, ན ཏཾ སེཡྻོཏི ཨཏྠོ. ཀསྨཱ པན ཏདེཝ ཛིཏཾ སེཡྻོ, ཨིདཾ ན སེཡྻོཏི? ཡསྨཱ ཨཏྟདནྟསྶ…པེ… ཏཐཱརཱུཔསྶ ཛནྟུནོཏི. ཨིདཾ ཝུཏྟཾ ཧོཏི – ཡསྨཱ ཧི ཡྭཱཡཾ ནིཀྐིལེསཏཱཡ ཨཏྟདནྟོ པོསོ, ཏསྶ ཨཏྟདནྟསྶ ཀཱཡཱདཱིཧི ནིཙྩཾ སཉྙཏཙཱརིནོ ཨེཝརཱུཔསྶ ཨིམེཧི ཀཱཡསཉྙམཱདཱིཧི སཉྙཏསྶ ཛནྟུནོ དེཝོ ཝཱ གནྡྷབྦོ ཝཱ མཱརོ ཝཱ བྲཧྨུནཱ སཧ ཨུཊྛཧིཏྭཱ ‘‘ཨཧམསྶ ཛིཏཾ ཨཔཛིཏཾ ཀརིསྶཱམི, མགྒབྷཱཝནཱཡ པཧཱིནེ ཀིལེསེ པུན ཨུཔྤཱདེསྶཱམཱི’’ཏི གྷཊེནྟོཔི ཝཱཡམནྟོཔི ཡཐཱ དྷནཱདཱིཧི པརཱཛིཏོ པཀྑནྟརོ ཧུཏྭཱ ཨིཏརེན ཛིཏཾ པུན ཛིནནྟོ ཨཔཛིཏཾ ཀརེཡྻ, ‘‘ཨེཝཾ ཨཔཛིཏཾ ཀཱཏུཾ ནེཝ སཀྐུཎེཡྻཱ’’ཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨནཏྠཔུཙྪཀབྲཱཧྨཎཝཏྠུ ཙཏུཏྠཾ.

༥. སཱརིཔུཏྟཏྠེརསྶ མཱཏུལབྲཱཧྨཎཝཏྠུ

མཱསེ མཱསེཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ སཱརིཔུཏྟཏྠེརསྶ མཱཏུལབྲཱཧྨཎཾ ཨཱརབྦྷ ཀཐེསི.

ཐེརོ ཀིར ཏསྶ སནྟིཀཾ གནྟྭཱ ཨཱཧ – ‘‘ཀིཾ ནུ ཁོ, བྲཱཧྨཎ, ཀིཉྩིདེཝ ཀུསལཾ ཀརོསཱི’’ཏི? ‘‘ཀརོམི, བྷནྟེ’’ཏི. ‘‘ཀིཾ ཀརོསཱི’’ཏི? ‘‘མཱསེ མཱསེ སཧསྶཔརིཙྩཱགེན དཱནཾ དམྨཱི’’ཏི. ‘‘ཀསྶ དེསཱི’’ཏི? ‘‘ནིགཎྛཱནཾ, བྷནྟེ’’ཏི. ‘‘ཀིཾ པཏྠཡནྟོ’’ཏི? ‘‘བྲཧྨལོཀཾ, བྷནྟེ’’ཏི. ‘‘ཀིཾ པན བྲཧྨལོཀསྶ ཨཡཾ མགྒོ’’ཏི? ‘‘ཨཱམ, བྷནྟེ’’ཏི. ‘‘ཀོ ཨེཝམཱཧཱ’’ཏི? ‘‘ཨཱཙརིཡེཧི མེ ཀཐིཏཾ, བྷནྟེ’’ཏི. ‘‘ནོ ཏྭཾ བྲཧྨལོཀསྶ མགྒཾ ཛཱནཱསི, ནཱཔི ཏེ ཨཱཙརིཡཱ, སཏྠཱཝ ཨེཀོ ཛཱནཱཏི, ཨེཧི, བྲཱཧྨཎ, བྲཧྨལོཀསྶ ཏེ མགྒཾ ཀཐཱཔེསྶཱམཱི’’ཏི ཏཾ ཨཱདཱཡ སཏྠུ སནྟིཀཾ ནེཏྭཱ, ‘‘བྷནྟེ, ཨཡཾ བྲཱཧྨཎོ ཨེཝམཱཧཱ’’ཏི, ‘‘ཏཾ པཝཏྟིཾ ཨཱརོཙེཏྭཱ སཱདྷུ ཝཏསྶ བྲཧྨལོཀསྶ མགྒཾ ཀཐེཐཱ’’ཏི. སཏྠཱ ‘‘ཨེཝཾ ཀིར, བྲཱཧྨཎཱ’’ཏི པུཙྪིཏྭཱ ‘‘ཨཱམ, བྷོ གོཏམཱ’’ཏི ཝུཏྟེ, ‘‘བྲཱཧྨཎ, ཏཡཱ ཨེཝཾ དདམཱནེན ཝསྶསཏཾ དིནྣདཱནཏོཔི མུཧུཏྟམཏྟཾ པསནྣཙིཏྟེན མམ སཱཝཀསྶ ཨོལོཀནཾ ཝཱ ཀཊཙྪུབྷིཀྑཱམཏྟདཱནཾ ཝཱ མཧཔྥལཏར’’ནྟི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༠༦.

‘‘མཱསེ མཱསེ སཧསྶེན, ཡོ ཡཛེཐ སཏཾ སམཾ;

ཨེཀཉྩ བྷཱཝིཏཏྟཱནཾ, མུཧུཏྟམཔི པཱུཛཡེ;

སཱཡེཝ པཱུཛནཱ སེཡྻོ, ཡཉྩེ ཝསྶསཏཾ ཧུཏ’’ནྟི.

ཏཏྠ སཧསྶེནཱཧི སཧསྶཔརིཙྩཱགེན. ཡོ ཡཛེཐ སཏཾ སམནྟི ཡོ ཝསྶསཏཾ མཱསེ མཱསེ སཧསྶཾ པརིཙྩཛནྟོ ལོཀིཡམཧཱཛནསྶ དཱནཾ དདེཡྻ, ཨེཀཉྩ བྷཱཝིཏཏྟཱནནྟི ཡོ པན ཨེཀཾ སཱིལཱདིགུཎཝིསེསེན ཝཌྜྷིཏཨཏྟཱནཾ ཧེཊྛིམཀོཊིཡཱ སོཏཱཔནྣཾ, ཨུཔརིམཀོཊིཡཱ ཁཱིཎཱསཝཾ གྷརདྭཱརཾ སམྤཏྟཾ ཀཊཙྪུབྷིཀྑཱདཱནཝསེན ཝཱ ཡཱཔནམཏྟཨཱཧཱརདཱནཝསེན ཝཱ ཐཱུལསཱཊཀདཱནམཏྟེན ཝཱ པཱུཛེཡྻ. ཡཾ ཨིཏརེན ཝསྶསཏཾ ཧུཏཾ. ཏཏོ སཱཡེཝ པཱུཛནཱ སེཡྻོ. སེཊྛོ ཨུཏྟམོཏི ཨཏྠོཏི.

དེསནཱཝསཱནེ སོ བྲཱཧྨཎོ སོཏཱཔཏྟིཕལཾ པཏྟོ, ཨཉྙེཔི བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཱརིཔུཏྟཏྠེརསྶ མཱཏུལབྲཱཧྨཎཝཏྠུ པཉྩམཾ.

༦. སཱརིཔུཏྟཏྠེརསྶ བྷཱགིནེཡྻཝཏྠུ

ཡོ ཙ ཝསྶསཏཾ ཛནྟཱུཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ སཱརིཔུཏྟཏྠེརསྶ བྷཱགིནེཡྻཾ ཨཱརབྦྷ ཀཐེསི.

ཏམྤི ཧི ཐེརོ ཨུཔསངྐམིཏྭཱ ཨཱཧ – ‘‘ཀིཾ, བྲཱཧྨཎ, ཀུསལཾ ཀརོསཱི’’ཏི? ‘‘ཨཱམ, བྷནྟེ’’ཏི. ‘‘ཀིཾ ཀརོསཱི’’ཏི? ‘‘མཱསེ མཱསེ ཨེཀཾ ཨེཀཾ པསུཾ གྷཱཏེཏྭཱ ཨགྒིཾ པརིཙརཱམཱི’’ཏི. ‘‘ཀིམཏྠཾ ཨེཝཾ ཀརོསཱི’’ཏི? ‘‘བྲཧྨལོཀམགྒོ ཀིརེསོ’’ཏི. ‘‘ཀེནེཝཾ ཀཐིཏ’’ནྟི? ‘‘ཨཱཙརིཡེཧི མེ, བྷནྟེ’’ཏི. ‘‘ནེཝ ཏྭཾ བྲཧྨལོཀསྶ མགྒཾ ཛཱནཱསི, ནཱཔི ཏེ ཨཱཙརིཡཱ, ཨེཧི, སཏྠུ སནྟིཀཾ གམིསྶཱམཱ’’ཏི ཏཾ སཏྠུ སནྟིཀཾ ནེཏྭཱ ཏཾ པཝཏྟིཾ ཨཱརོཙེཏྭཱ ‘‘ཨིམསྶ, བྷནྟེ, བྲཧྨལོཀསྶ མགྒཾ ཀཐེཐཱ’’ཏི ཨཱཧ. སཏྠཱ ‘‘ཨེཝཾ ཀིརཱ’’ཏི པུཙྪིཏྭཱ ‘‘ཨེཝཾ, བྷོ གོཏམཱ’’ཏི ཝུཏྟེ, ‘‘བྲཱཧྨཎ, ཝསྶསཏམྤི ཨེཝཾ ཨགྒིཾ པརིཙརནྟསྶ ཏཝ ཨགྒིཔཱརིཙརིཡཱ མམ སཱཝཀསྶ ཏངྑཎམཏྟཾ པཱུཛམྤི ན པཱཔུཎཱཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༠༧.

‘‘ཡོ ཙ ཝསྶསཏཾ ཛནྟུ, ཨགྒིཾ པརིཙརེ ཝནེ;

ཨེཀཉྩ བྷཱཝིཏཏྟཱནཾ, མུཧུཏྟམཔི པཱུཛཡེ;

སཱཡེཝ པཱུཛནཱ སེཡྻོ, ཡཉྩེ ཝསྶསཏཾ ཧུཏ’’ནྟི.

ཏཏྠ ཛནྟཱུཏི སཏྟཱདྷིཝཙནམེཏཾ. ཨགྒིཾ པརིཙརེ ཝནེཏི ནིཔྤཔཉྩབྷཱཝཔཏྠནཱཡ ཝནཾ པཝིསིཏྭཱཔི ཏཏྠ ཨགྒིཾ པརིཙརེཡྻ. སེསཾ པུརིམསདིསམེཝཱཏི.

དེསནཱཝསཱནེ སོ བྲཱཧྨཎོ སོཏཱཔཏྟིཕལཾ པཱཔུཎི, ཨཉྙེཔི བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཱརིཔུཏྟཏྠེརསྶ བྷཱགིནེཡྻཝཏྠུ ཚཊྛཾ.

༧. སཱརིཔུཏྟཏྠེརསྶ སཧཱཡཀབྲཱཧྨཎཝཏྠུ

ཡཾ ཀིཉྩི ཡིཊྛཾ ཝཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ སཱརིཔུཏྟཏྠེརསྶ སཧཱཡཀབྲཱཧྨཎཾ ཨཱརབྦྷ ཀཐེསི.

ཏམྤི ཧི ཐེརོ ཨུཔསངྐམིཏྭཱ ‘‘ཀིཾ, བྲཱཧྨཎ, ཀིཉྩི ཀུསལཾ ཀརོསཱི’’ཏི པུཙྪི. ‘‘ཨཱམ, བྷནྟེ’’ཏི. ‘‘ཀིཾ ཀརོསཱི’’ཏི? ‘‘ཡིཊྛཡཱགཾ ཡཛཱམཱི’’ཏི. ‘‘ཏདཱ ཀིར ཏཾ ཡཱགཾ མཧཱཔརིཙྩཱགེན ཡཛ’’ནྟི. ཨིཏོ པརཾ ཐེརོ པུརིམནཡེནེཝ པུཙྪིཏྭཱ ཏཾ སཏྠུ སནྟིཀཾ ནེཏྭཱ ཏཾ པཝཏྟིཾ ཨཱརོཙེཏྭཱ ‘‘ཨིམསྶ, བྷནྟེ, བྲཧྨལོཀསྶ མགྒཾ ཀཐེཐཱ’’ཏི ཨཱཧ. སཏྠཱ, ‘‘བྲཱཧྨཎ, ཨེཝཾ ཀིརཱ’’ཏི པུཙྪིཏྭཱ ‘‘ཨེཝཾ, བྷོ གོཏམཱ’’ཏི ཝུཏྟེ, ‘‘བྲཱཧྨཎ, ཏཡཱ སཾཝཙྪརཾ ཡིཊྛཡཱགཾ ཡཛནྟེན ལོཀིཡམཧཱཛནསྶ དིནྣདཱནཾ པསནྣཙིཏྟེན མམ སཱཝཀཱནཾ ཝནྡནྟཱནཾ ཨུཔྤནྣཀུསལཙེཏནཱཡ ཙཏུབྷཱགམཏྟམྤི ན ཨགྒྷཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༠༨.

‘‘ཡཾ ཀིཉྩི ཡིཊྛཾ ཝ ཧུཏཾ ཝ ལོཀེ,

སཾཝཙྪརཾ ཡཛེཐ པུཉྙཔེཀྑོ;

སབྦམྤི ཏཾ ན ཙཏུབྷཱགམེཏི,

ཨབྷིཝཱདནཱ ཨུཛྫུགཏེསུ སེཡྻོ’’ཏི.

ཏཏྠ ཡཾ ཀིཉྩཱིཏི ཨནཝསེསཔརིཡཱདཱནཝཙནམེཏཾ. ཡིཊྛནྟི ཡེབྷུཡྻེན མངྒལཀིརིཡཱདིཝསེསུ དིནྣདཱནཾ. ཧུཏནྟི ཨབྷིསངྑརིཏྭཱ ཀཏཾ པཱཧུནདཱནཉྩེཝ, ཀམྨཉྩ ཕལཉྩ སདྡཧིཏྭཱ ཀཏདཱནཉྩ. སཾཝཙྪརཾ ཡཛེཐཱཏི ཨེཀསཾཝཙྪརཾ ནིརནྟརམེཝ ཝུཏྟཔྤཀཱརཾ དཱནཾ སཀལཙཀྐཝཱལེ༹པི ལོཀིཡམཧཱཛནསྶ དདེཡྻ. པུཉྙཔེཀྑོཏི པུཉྙཾ ཨིཙྪནྟོ. ཨུཛྫུགཏེསཱུཏི ཧེཊྛིམཀོཊིཡཱ སོཏཱཔནྣེསུ ཨུཔརིམཀོཊིཡཱ ཁཱིཎཱསཝེསུ. ཨིདཾ ཝུཏྟཾ ཧོཏི – ‘‘ཨེཝརཱུཔེསུ པསནྣཙིཏྟེན སརཱིརཾ ཨོནམིཏྭཱ ཝནྡནྟསྶ ཀུསལཙེཏནཱཡ ཡཾ ཕལཾ, ཏཏོ ཙཏུབྷཱགམྤི སབྦཾ ཏཾ དཱནཾ ན ཨགྒྷཏི, ཏསྨཱ ཨུཛུགཏེསུ ཨབྷིཝཱདནམེཝ སེཡྻོ’’ཏི.

དེསནཱཝསཱནེ སོ བྲཱཧྨཎོ སོཏཱཔཏྟིཕལཾ པཏྟོ, ཨཉྙེཔི བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཱརིཔུཏྟཏྠེརསྶ སཧཱཡཀབྲཱཧྨཎཝཏྠུ སཏྟམཾ.

༨. ཨཱཡུཝཌྜྷནཀུམཱརཝཏྠུ

ཨབྷིཝཱདནསཱིལིསྶཱཏི ཨིམཾ དྷམྨདེསནཾ སཏྠཱ དཱིགྷལངྒྷིཀཾ ནིསྶཱཡ ཨརཉྙཀུཊིཡཾ ཝིཧརནྟོ དཱིགྷཱཡུཀུམཱརཾ ཨཱརབྦྷ ཀཐེསི.

དཱིགྷལངྒྷིཀནགརཝཱསིནོ ཀིར དྭེ བྲཱཧྨཎཱ བཱཧིརཀཔབྦཛྫཾ པབྦཛིཏྭཱ ཨཊྛཙཏྟཱལཱིས ཝསྶཱནི ཏཔཙརཎཾ ཀརིཾསུ. ཏེསུ ཨེཀོ ‘‘པཝེཎི མེ ནསྶིསྶཏི, ཝིབྦྷམིསྶཱམཱི’’ཏི ཙིནྟེཏྭཱ ཨཏྟནཱ ཀཏཾ ཏཔཾ པརེསཾ ཝིཀྐིཎིཏྭཱ གོསཏེན ཙེཝ ཀཧཱཔཎསཏེན ཙ སདྡྷིཾ བྷརིཡཾ ལབྷིཏྭཱ ཀུཊུམྦཾ སཎྛཔེསི. ཨཐསྶ བྷརིཡཱ པུཏྟཾ ཝིཛཱཡི. ཨིཏརོ པནསྶ སཧཱཡཀོ པཝཱསཾ གནྟྭཱ པུནདེཝ ཏཾ ནགརཾ པཙྩཱགམི. སོ ཏསྶ ཨཱགཏབྷཱཝཾ སུཏྭཱ པུཏྟདཱརཾ ཨཱདཱཡ སཧཱཡཀསྶ དསྶནཏྠཱཡ ཨགམཱསི. གནྟྭཱ པུཏྟཾ མཱཏུ ཧཏྠེ དཏྭཱ སཡཾ ཏཱཝ ཝནྡི, མཱཏཱཔི པུཏྟཾ པིཏུ ཧཏྠེ དཏྭཱ ཝནྡི. སོ ‘‘དཱིགྷཱཡུཀཱ ཧོཐཱ’’ཏི ཨཱཧ, པུཏྟེ པན ཝནྡཱཔིཏེ ཏུཎྷཱི ཨཧོསི. ཨཐ ནཾ ‘‘ཀསྨཱ, བྷནྟེ, ཨམྷེཧི ཝནྡིཏེ ‘དཱིགྷཱཡུཀཱ ཧོཐཱ’ཏི ཝཏྭཱ ཨིམསྶ ཝནྡནཀཱལེ ཀིཉྩི ན ཝདེཐཱ’’ཏི ཨཱཧ. ‘‘ཨིམསྶེཀོ ཨནྟརཱཡོ ཨཏྠི, བྲཱཧྨཎཱ’’ཏི. ‘‘ཀིཏྟཀཾ ཛཱིཝིསྶཏི, བྷནྟེ’’ཏི? ‘‘སཏྟཱཧཾ, བྲཱཧྨཎཱ’’ཏི. ‘‘པཊིབཱཧནཀཱརཎཾ ཨཏྠི, བྷནྟེ’’ཏི? ‘‘ནཱཧཾ པཊིབཱཧནཀཱརཎཾ ཛཱནཱམཱི’’ཏི. ‘‘ཀོ པན ཛཱནེཡྻ, བྷནྟེ’’ཏི? ‘‘སམཎོ གོཏམོ ཛཱནེཡྻ, ཏསྶ སནྟིཀཾ གནྟྭཱ པུཙྪཱཧཱི’’ཏི. ‘‘ཏཏྠ གཙྪནྟོ ཏཔཔརིཧཱནིཏོ བྷཱཡཱམཱི’’ཏི. ‘‘སཙེ ཏེ པུཏྟསིནེཧོ ཨཏྠི, ཏཔཔརིཧཱནིཾ ཨཙིནྟེཏྭཱ ཏསྶ སནྟིཀཾ གནྟྭཱ པུཙྪཱཧཱི’’ཏི.

སོ སཏྠུ སནྟིཀཾ གནྟྭཱ སཡཾ ཏཱཝ ཝནྡི. སཏྠཱ ‘‘དཱིགྷཱཡུཀོ ཧོཧཱི’’ཏི ཨཱཧ, པཛཱཔཏིཡཱ ཝནྡནཀཱལེཔི ཏསྶཱ ཏཐེཝ ཝཏྭཱ པུཏྟསྶ ཝནྡཱཔནཀཱལེ ཏུཎྷཱི ཨཧོསི. སོ པུརིམནཡེནེཝ སཏྠཱརཾ པུཙྪི, སཏྠཱཔི ཏཐེཝ བྱཱཀཱསི. སོ ཀིར བྲཱཧྨཎོ སབྦཉྙུཏཉྙཱཎཾ ཨཔཊིཝིཛ྄ཛྷིཏྭཱཝ ཨཏྟནོ མནྟཾ སབྦཉྙུཏཉྙཱཎེན སཾསནྡེསི, པཊིབཱཧནཱུཔཱཡཾ པན ན ཛཱནཱཏི. བྲཱཧྨཎོ སཏྠཱརཾ པུཙྪི – ‘‘ཨཏྠི པན, བྷནྟེ, པཊིབཱཧནཱུཔཱཡོ’’ཏི? ‘‘བྷཝེཡྻ, བྲཱཧྨཎཱ’’ཏི. ‘‘ཀིཾ བྷཝེཡྻཱ’’ཏི? ‘‘སཙེ ཏྭཾ ཨཏྟནོ གེཧདྭཱརེ མཎྜཔཾ ཀཱརེཏྭཱ ཏསྶ མཛ྄ཛྷེ པཱིཋིཀཾ ཀཱརེཏྭཱ ཏཾ པརིཀྑིཔནྟོ ཨཊྛ ཝཱ སོལ༹ས ཝཱ ཨཱསནཱནི པཉྙཱཔེཏྭཱ ཏེསུ མམ སཱཝཀེ ནིསཱིདཱཔེཏྭཱ སཏྟཱཧཾ ནིརནྟརཾ པརིཏྟཾ ཀཱཏུཾ སཀྐུཎེཡྻཱསི, ཨེཝམསྶ ཨནྟརཱཡོ ནསྶེཡྻཱ’’ཏི. ‘‘བྷོ གོཏམ, མཡཱ མཎྜཔཱདཱིནི སཀྐཱ ཀཱཏུཾ, ཏུམྷཱཀཾ པན སཱཝཀེ ཀཐཾ ལཙྪཱམཱི’’ཏི? ‘‘ཏཡཱ ཨེཏྟཀེ ཀཏེ ཨཧཾ མམ སཱཝཀེ པཧིཎིསྶཱམཱི’’ཏི. ‘‘སཱདྷུ, བྷོ གོཏམཱ’’ཏི སོ ཨཏྟནོ གེཧདྭཱརེ སབྦཾ ཀིཙྩཾ ནིཊྛཱཔེཏྭཱ སཏྠུ སནྟིཀཾ ཨགམཱསི. སཏྠཱ བྷིཀྑཱུ པཧིཎི, ཏེ གནྟྭཱ ཏཏྠ ནིསཱིདིཾསུ, དཱརཀམྤི པཱིཋིཀཱཡཾ ནིཔཛྫཱཔེསུཾ, བྷིཀྑཱུ སཏྟརཏྟིནྡིཝཾ ནིརནྟརཾ པརིཏྟཾ བྷཎིཾསུ, སཏྟམེ དིཝསེ སཱཡཾ སཏྠཱ ཨཱགཙྪི. ཏསྨིཾ ཨཱགཏེ སབྦཙཀྐཝཱལ༹དེཝཏཱ སནྣིཔཏིཾསུ. ཨེཀོ པན ཨཝརུདྡྷཀོ ནཱམ ཡཀྑོ དྭཱདས སཾཝཙྪརཱནི ཝེསྶཝཎཾ ཨུཔཊྛཧིཏྭཱ ཏསྶ སནྟིཀཱ ཝརཾ ལབྷནྟོ ‘‘ཨིཏོ སཏྟམེ དིཝསེ ཨིམཾ དཱརཀཾ གཎྷེཡྻཱསཱི’’ཏི ལབྷི. ཏསྨཱ སོཔི ཨཱགནྟྭཱ ཨཊྛཱསི.

སཏྠརི པན ཏཏྠ གཏེ མཧེསཀྑཱསུ དེཝཏཱསུ སནྣིཔཏིཏཱསུ ཨཔྤེསཀྑཱ དེཝཏཱ ཨོསཀྐིཏྭཱ ཨོསཀྐིཏྭཱ ཨོཀཱསཾ ཨལབྷམཱནཱ དྭཱདས ཡོཛནཱནི པཊིཀྐམིཾསུ. ཨཝརུདྡྷཀོཔི ཏཐེཝ པཊིཀྐམི, སཏྠཱཔི སབྦརཏྟིཾ པརིཏྟམཀཱསི. སཏྟཱཧེ ཝཱིཏིཝཏྟེ ཨཝརུདྡྷཀོ དཱརཀཾ ན ལབྷི. ཨཊྛམེ པན དིཝསེ ཨརུཎེ ཨུགྒཏམཏྟེ དཱརཀཾ ཨཱནེཏྭཱ སཏྠཱརཾ ཝནྡཱཔེསུཾ. སཏྠཱ ‘‘དཱིགྷཱཡུཀོ ཧོཧཱི’’ཏི ཨཱཧ. ‘‘ཀཱིཝཙིརཾ པན, བྷོ གོཏམ, དཱརཀོ ཋསྶཏཱི’’ཏི? ‘‘ཝཱིསཝསྶསཏཾ, བྲཱཧྨཎཱ’’ཏི. ཨཐསྶ ‘‘ཨཱཡུཝཌྜྷནཀུམཱརོ’’ཏི ནཱམཾ ཀརིཾསུ. སོ ཝུདྡྷིམནྭཱཡ པཉྩཧི ཨུཔཱསཀསཏེཧི པརིཝུཏོ ཝིཙརི. ཨཐེཀདིཝསཾ དྷམྨསབྷཱཡཾ བྷིཀྑཱུ ཀཐཾ སམུཊྛཱཔེསུཾ ‘‘པསྶཐཱཝུསོ, ཨཱཡུཝཌྜྷནཀུམཱརེན ཀིར སཏྟམེ དིཝསེ མརིཏབྦཾ ཨབྷཝིསྶ, སོ ཨིདཱནི ཝཱིསཝསྶསཏཊྛཱཡཱི ཧུཏྭཱ པཉྩཧི ཨུཔཱསཀསཏེཧི པརིཝུཏོ ཝིཙརཏི, ཨཏྠི མཉྙེ ཨིམེསཾ སཏྟཱནཾ ཨཱཡུཝཌྜྷནཀཱརཎ’’ནྟི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ན ཀེཝལཾ ཨཱཡུཝཌྜྷནམེཝ, ཨིམེ པན སཏྟཱ གུཎཝནྟེ ཝནྡནྟཱ ཨབྷིཝཱདེནྟཱ ཙཏཱུཧི ཀཱརཎེཧི ཝཌྜྷནྟི, པརིསྶཡཏོ མུཙྩནྟི, ཡཱཝཏཱཡུཀམེཝ ཏིཊྛནྟཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༠༩.

‘‘ཨབྷིཝཱདནསཱིལིསྶ, ནིཙྩཾ ཝུཌྜྷཱཔཙཱཡིནོ;

ཙཏྟཱརོ དྷམྨཱ ཝཌྜྷནྟི, ཨཱཡུ ཝཎྞོ སུཁཾ བལ’’ནྟི.

ཏཏྠ ཨབྷིཝཱདནསཱིལིསྶཱཏི ཝནྡནསཱིལིསྶ, ཨབྷིཎྷཾ ཝནྡནཀིཙྩཔསུཏསྶཱཏི ཨཏྠོ. ཝུཌྜྷཱཔཙཱཡིནོཏི གིཧིསྶ ཝཱ ཏདཧུཔབྦཛིཏེ དཧརསཱམཎེརེཔི, པབྦཛིཏསྶ ཝཱ པན པབྦཛྫཱཡ ཝཱ ཨུཔསམྤདཱཡ ཝཱ ཝུཌྜྷཏརེ གུཎཝུཌྜྷེ ཨཔཙཱཡམཱནསྶ, ཨབྷིཝཱདནེན ཝཱ ནིཙྩཾ པཱུཛེནྟསྶཱཏི ཨཏྠོ. ཙཏྟཱརོ དྷམྨཱ ཝཌྜྷནྟཱིཏི ཨཱཡུམྷི ཝཌྜྷམཱནེ ཡཏྟཀཾ ཀཱལཾ ཏཾ ཝཌྜྷཏི, ཏཏྟཀཾ ཨིཏརེཔི ཝཌྜྷནྟིཡེཝ. ཡེན ཧི པཉྙཱསཝསྶཨཱཡུསཾཝཏྟནིཀཾ ཀུསལཾ ཀཏཾ, པཉྩཝཱིསཏིཝསྶཀཱལེ ཙསྶ ཛཱིཝིཏནྟརཱཡོ ཨུཔྤཛྫེཡྻ, སོ ཨབྷིཝཱདནསཱིལཏཱཡ པཊིཔྤསྶམྦྷཏི, སོ ཡཱཝཏཱཡུཀམེཝ ཏིཊྛཏི, ཝཎྞཱདཡོཔིསྶ ཨཱཡུནཱཝ སདྡྷིཾ ཝཌྜྷནྟི. ཨིཏོ ཨུཏྟརིཔི ཨེསེཝ ནཡོ. ཨནནྟརཱཡེན པཝཏྟསྶཱཡུནོ ཝཌྜྷནཾ ནཱམ ནཏྠི.

དེསནཱཝསཱནེ ཨཱཡུཝཌྜྷནཀུམཱརོ པཉྩཧི ཨུཔཱསཀསཏེཧི སདྡྷིཾ སོཏཱཔཏྟིཕལེ པཏིཊྛཧི, ཨཉྙེཔི བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཱཡུཝཌྜྷནཀུམཱརཝཏྠུ ཨཊྛམཾ.

༩. སཾཀིཙྩསཱམཎེརཝཏྠུ

ཡོ ཙ ཝསྶསཏཾ ཛཱིཝེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཾཀིཙྩསཱམཎེརཾ ཨཱརབྦྷ ཀཐེསི.

སཱཝཏྠིཡཾ ཀིར ཏིཾསམཏྟཱ ཀུལཔུཏྟཱ སཏྠུ དྷམྨཀཐཾ སུཏྭཱ སཱསནེ ཨུརཾ དཏྭཱ པབྦཛིཾསུ. ཏེ ཨུཔསམྤདཱཡ པཉྩཝསྶཱ ཧུཏྭཱ སཏྠཱརཾ ཨུཔསངྐམིཏྭཱ གནྠདྷུརཾ ཝིཔསྶནཱདྷུརནྟི དྭེ དྷུརཱནཱིཏི སུཏྭཱ ‘‘མཡཾ མཧལླཀཀཱལེ པབྦཛིཏཱ’’ཏི གནྠདྷུརེ ཨུསྶཱཧཾ ཨཀཏྭཱ ཝིཔསྶནཱདྷུརཾ པཱུརེཏུཀཱམཱ ཡཱཝ ཨརཧཏྟཱ ཀམྨཊྛཱནཾ ཀཐཱཔེཏྭཱ, ‘‘བྷནྟེ, ཨེཀཾ ཨརཉྙཱཡཏནཾ གམིསྶཱམཱ’’ཏི སཏྠཱརཾ ཨཱཔུཙྪིཾསུ. སཏྠཱ ‘‘ཀཏརཾ ཋཱནཾ གམིསྶཐཱ’’ཏི པུཙྪིཏྭཱ ‘‘ཨསུཀཾ ནཱམཱ’’ཏི ཝུཏྟེ ‘‘ཏཏྠ ཏེསཾ ཨེཀཾ ཝིགྷཱསཱདཾ ནིསྶཱཡ བྷཡཾ ཨུཔྤཛྫིསྶཏི, ཏཉྩ པན སཾཀིཙྩསཱམཎེརེ གཏེ ཝཱུཔསམིསྶཏི, ཨཐ ནེསཾ པབྦཛིཏཀིཙྩཾ པཱརིཔཱུརིཾ གམིསྶཏཱི’’ཏི ཨཉྙཱསི.

སཾཀིཙྩསཱམཎེརོ ནཱམ སཱརིཔུཏྟཏྠེརསྶ སཱམཎེརོ སཏྟཝསྶིཀོ ཛཱཏིཡཱ. ཏསྶ ཀིར མཱཏཱ སཱཝཏྠིཡཾ ཨཌྜྷཀུལསྶ དྷཱིཏཱ. སཱ ཏསྨིཾ ཀུཙྪིགཏེ ཨེཀེན བྱཱདྷིནཱ ཏངྑཎཉྙེཝ ཀཱལམཀཱསི. ཏསྶཱ ཛྷཱཔིཡམཱནཱཡ ཋཔེཏྭཱ གབྦྷམཾསཾ སེསཾ ཛྷཱཡི. ཨཐསྶཱ གབྦྷམཾསཾ ཙིཏཀཏོ ཨོཏཱརེཏྭཱ དྭཱིསུ ཏཱིསུ ཋཱནེསུ སཱུལེཧི ཝིཛ྄ཛྷིཾསུ. སཱུལཀོཊི དཱརཀསྶ ཨཀྑིཀོཊིཾ པཧརི. ཨེཝཾ གབྦྷམཾསཾ ཝིཛ྄ཛྷིཏྭཱ ཨངྒཱརརཱསིམྷི ཁིཔིཏྭཱ ཨངྒཱརེཧེཝ པཊིཙྪཱདེཏྭཱ པཀྐམིཾསུ. གབྦྷམཾསཾ ཛྷཱཡི, ཨངྒཱརམཏྠཀེ པན སུཝཎྞབིམྦསདིསོ དཱརཀོ པདུམགབྦྷེ ནིཔནྣོ ཝིཡ ཨཧོསི. པཙྪིམབྷཝིཀསྶ སཏྟསྶ ཧི སིནེརུནཱ ཨོཏྠརིཡམཱནསྶཔི ཨརཧཏྟཾ ཨཔྤཏྭཱ ཛཱིཝིཏཀྑཡོ ནཱམ ནཏྠི. པུནདིཝསེ ‘‘ཙིཏཀཾ ནིབྦཱཔེསྶཱམཱ’’ཏི ཨཱགཏཱ ཏཐཱནིཔནྣཾ དཱརཀཾ དིསྭཱ ཨཙྪརིཡབྦྷུཏཙིཏྟཛཱཏཱ ‘‘ཀཐཉྷི ནཱམ ཨེཏྟཀེསུ དཱརཱུསུ ཁཱིཡམཱནེསུ སཀལསརཱིརེ ཛྷཱཔིཡམཱནེ དཱརཀོ ན ཛྷཱཡི, ཀིཾ ནུ ཁོ བྷཝིསྶཏཱི’’ཏི དཱརཀཾ ཨཱདཱཡ ཨནྟོགཱམཾ གནྟྭཱ ནེམིཏྟཀེ པུཙྪིཾསུ. ནེམིཏྟཀཱ ‘‘སཙེ ཨཡཾ དཱརཀོ ཨགཱརཾ ཨཛ྄ཛྷཱཝསྶིསྶཏི, ཡཱཝ སཏྟམཱ ཀུལཔརིཝཊྚཱ ཉཱཏཀཱ དུགྒཏཱ བྷཝིསྶནྟི? སཙེ པབྦཛིསྶཏི, པཉྩཧི སམཎསཏེཧི པརིཝུཏོ ཝིཙརིསྶཏཱི’’ཏི ཨཱཧཾསུ. ཏསྶ སངྐུནཱ ཨཀྑིཀོཊིཡཱ བྷིནྣཏྟཱ སཾཀིཙྩནྟི ནཱམཾ ཀརིཾསུ. སོ ཨཔརེན སམཡེན སཾཀིཙྩོཏི པཉྙཱཡི. ཨཐ ནཾ ཉཱཏཀཱ ‘‘ཧོཏུ, ཝཌྜྷིཏཀཱལེ ཨམྷཱཀཾ ཨཡྻསྶ སཱརིཔུཏྟསྶ སནྟིཀེ པབྦཱཛེསྶཱམཱ’’ཏི པོསིཾསུ. སོ སཏྟཝསྶིཀཀཱལེ ‘‘ཏཝ མཱཏུཀུཙྪིཡཾ ཝསནཀཱལེ མཱཏཱ ཏེ ཀཱལམཀཱསི, ཏསྶཱ སརཱིརེ ཛྷཱཔིཡམཱནེཔི ཏྭཾ ན ཛྷཱཡཱི’’ཏི ཀུམཱརཀཱནཾ ཀཐཾ སུཏྭཱ ‘‘ཨཧཾ ཀིར ཨེཝརཱུཔཱ བྷཡཱ མུཏྟོ, ཀིཾ མེ གྷརཱཝཱསེན, པབྦཛིསྶཱམཱི’’ཏི ཉཱཏཀཱནཾ ཨཱརོཙེསི. ཏེ ‘‘སཱདྷུ, ཏཱཏཱ’’ཏི སཱརིཔུཏྟཏྠེརསྶ སནྟིཀཾ ནེཏྭཱ, ‘‘བྷནྟེ, ཨིམཾ པབྦཱཛེཐཱ’’ཏི ཨདཾསུ. ཐེརོ ཏཙཔཉྩཀཀམྨཊྛཱནཾ དཏྭཱ པབྦཱཛེསི. སོ ཁུརགྒེཡེཝ སཧ པཊིསམྦྷིདཱཧི ཨརཧཏྟཾ པཱཔུཎི. ཨཡཾ སཾཀིཙྩསཱམཎེརོ ནཱམ.

སཏྠཱ ‘‘ཨེཏསྨིཾ གཏེ ཏཾ བྷཡཾ ཝཱུཔསམིསྶཏི, ཨཐ ནེསཾ པབྦཛིཏཀིཙྩཾ པཱརིཔཱུརིཾ གམིསྶཏཱི’’ཏི ཉཏྭཱ, ‘‘བྷིཀྑཝེ, ཏུམྷཱཀཾ ཛེཊྛབྷཱཏིཀཾ སཱརིཔུཏྟཏྠེརཾ ཨོལོཀེཏྭཱ གཙྪཐཱ’’ཏི ཨཱཧ. ཏེ ‘‘སཱདྷཱུ’’ཏི ཝཏྭཱ ཐེརསྶ སནྟིཀཾ གནྟྭཱ ‘‘ཀིཾ, ཨཱཝུསོ’’ཏི ཝུཏྟེ མཡཾ སཏྠུ སནྟིཀེ ཀམྨཊྛཱནཾ གཧེཏྭཱ ཨརཉྙཾ པཝིསིཏུཀཱམཱ ཧུཏྭཱ ཨཱཔུཙྪིམྷཱ, ཨཐ ནོ སཏྠཱ ཨེཝམཱཧ – ‘‘ཏུམྷཱཀཾ ཛེཊྛབྷཱཏིཀཾ ཨོལོཀེཏྭཱ གཙྪཐཱ’’ཏི? ‘‘ཏེནམྷཱ ཨིདྷཱགཏཱ’’ཏི. ཐེརོ ‘‘སཏྠཱརཱ ཨིམེ ཨེཀཾ ཀཱརཎཾ དིསྭཱ ཨིདྷ པཧིཏཱ བྷཝིསྶནྟི, ཀིཾ ནུ ཁོ ཨེཏ’’ནྟི ཨཱཝཛྫེནྟོ ཏམཏྠཾ ཉཏྭཱ ཨཱཧ – ‘‘ཨཏྠི པན ཝོ, ཨཱཝུསོ, སཱམཎེརོ’’ཏི? ‘‘ནཏྠི, ཨཱཝུསོ’’ཏི. ‘‘སཙེ ནཏྠི, ཨིམཾ སཾཀིཙྩསཱམཎེརཾ གཧེཏྭཱ གཙྪཐཱ’’ཏི. ‘‘ཨལཾ, ཨཱཝུསོ, སཱམཎེརཾ ནིསྶཱཡ ནོ པལིབོདྷོ བྷཝིསྶཏི, ཀིཾ ཨརཉྙེ ཝསནྟཱནཾ སཱམཎེརེནཱ’’ཏི? ‘‘ནཱཝུསོ, ཨིམཾ ནིསྶཱཡ ཏུམྷཱཀཾ པལིབོདྷོ, ཨཔིཙ ཁོ པན ཏུམྷེ ནིསྶཱཡ ཨིམསྶ པལིབོདྷོ བྷཝིསྶཏི. སཏྠཱཔི ཏུམྷེ མམ སནྟིཀཾ པཧིཎནྟོ ཏུམྷེཧི སདྡྷིཾ སཱམཎེརསྶ པཧིཎནཾ པཙྩཱསཱིསནྟོ པཧིཎི, ཨིམཾ གཧེཏྭཱ གཙྪཐཱ’’ཏི. ཏེ ‘‘སཱདྷཱུ’’ཏི ཨདྷིཝཱསེཏྭཱ སཱམཎེརེན སདྡྷིཾ ཨེཀཏིཾས ཛནཱ ཐེརཾ ཨཔལོཀེཏྭཱ ཝིཧཱརཱ ནིཀྑམྨ ཙཱརིཀཾ ཙརནྟཱ ཝཱིསཡོཛནསཏམཏྠཀེ ཨེཀཾ སཧསྶཀུལཾ གཱམཾ པཱཔུཎིཾསུ.

མནུསྶཱ ཏེ དིསྭཱ པསནྣཙིཏྟཱ སཀྐཙྩཾ པརིཝིསིཏྭཱ, ‘‘བྷནྟེ, ཀཏྠ གམིསྶཐཱ’’ཏི པུཙྪིཏྭཱ ‘‘ཡཐཱཕཱསུཀཊྛཱནཾ, ཨཱཝུསོ’’ཏི ཝུཏྟེ པཱདམཱུལེ ནིཔཛྫིཏྭཱ ‘‘མཡཾ, བྷནྟེ, ཨཡྻེསུ ཨིམཾ ཋཱནཾ ནིསྶཱཡ ཨནྟོཝསྶཾ ཝསནྟེསུ པཉྩསཱིལཾ སམཱདཱཡ ཨུཔོསཐཀམྨཾ ཀརིསྶཱམཱ’’ཏི ཡཱཙིཾསུ. ཐེརཱ ཨདྷིཝཱསེསུཾ. ཨཐ ནེསཾ མནུསྶཱ རཏྟིཊྛཱནདིཝཱཊྛཱནཙངྐམནཔཎྞསཱལཱཡོ སཾཝིདཧིཏྭཱ ‘‘ཨཛྫ མཡཾ, སྭེ མཡ’’ནྟི ཨུསྶཱཧཔྤཏྟཱ ཨུཔཊྛཱནམཀཾསུ. ཐེརཱ ཝསྶཱུཔནཱཡིཀདིཝསེ ཀཏིཀཝཏྟཾ ཀརིཾསུ, ‘‘ཨཱཝུསོ, ཨམྷེཧི དྷརམཱནཀབུདྡྷསྶ སནྟིཀེ ཀམྨཊྛཱནཾ གཧིཏཾ, ན ཁོ པན སཀྐཱ ཨཉྙཏྲ པཊིཔཏྟིསམྤདཱཡ བུདྡྷེ ཨཱརཱདྷེཏུཾ, ཨམྷཱཀཉྩ ཨཔཱཡདྭཱརཱནི ཝིཝཊཱནེཝ, ཏསྨཱ ཨཉྙཏྲ པཱཏོ བྷིཀྑཱཙཱརཝེལཾ, སཱཡཾ ཐེརཱུཔཊྛཱནཝེལཉྩ སེསཀཱལེ དྭེ ཨེཀཊྛཱནེ ན བྷཝིསྶཱམ, ཡསྶ ཨཕཱསུཀཾ བྷཝིསྶཏི, ཏེན གྷཎྜིཡཱ པཧཊཱཡ ཏསྶ སནྟིཀཾ གནྟྭཱ བྷེསཛྫཾ ཀརིསྶཱམ, ཨིཏོ ཨཉྙསྨིཾ རཏྟིབྷཱགེ ཝཱ དིཝསབྷཱགེ ཝཱ ཨཔྤམཏྟཱ ཀམྨཊྛཱནམནུཡུཉྫིསྶཱམཱ’’ཏི.

ཏེསུ ཨེཝཾ ཀཏིཀཾ ཀཏྭཱ ཝིཧརནྟེསུ ཨེཀོ དུགྒཏཔུརིསོ དྷཱིཏརཾ ཨུཔནིསྶཱཡ ཛཱིཝནྟོ ཏསྨིཾ ཋཱནེ དུབྦྷིཀྑེ ཨུཔྤནྣེ ཨཔརཾ དྷཱིཏརཾ ཨུཔནིསྶཱཡ ཛཱིཝིཏུཀཱམོ མགྒཾ པཊིཔཛྫི. ཐེརཱཔི གཱམེ པིཎྜཱཡ ཙརིཏྭཱ ཝསནཊྛཱནཾ ཨཱགཙྪནྟཱ ཨནྟརཱམགྒེ ཨེཀིསྶཱ ནདིཡཱ ནྷཏྭཱ ཝཱལུཀཔུལིནེ ནིསཱིདིཏྭཱ བྷཏྟཀིཙྩཾ ཀརིཾསུ. ཏསྨིཾ ཁཎེ སོ པུརིསོ ཏཾ ཋཱནཾ པཏྭཱ ཨེཀམནྟཾ ཨཊྛཱསི. ཨཐ ནཾ ཐེརཱ ‘‘ཀཧཾ གཙྪསཱི’’ཏི པུཙྪིཾསུ. སོ ཏམཏྠཾ ཨཱརོཙེསི. ཐེརཱ ཏསྨིཾ ཀཱརུཉྙཾ ཨུཔྤཱདེཏྭཱ, ‘‘ཨུཔཱསཀ, ཨཏིཝིཡ ཚཱཏོསི, གཙྪ, པཎྞཾ ཨཱཧར, ཨེཀམེཀཾ ཏེ བྷཏྟཔིཎྜཾ དསྶཱམཱ’’ཏི ཝཏྭཱ ཏེན པཎྞེ ཨཱཧཊེ ཨཏྟནཱ ཨཏྟནཱ བྷུཉྫནནིཡཱམེནེཝ སཱུཔབྱཉྫནེཧི སནྣཧིཏྭཱ ཨེཀམེཀཾ པིཎྜཾ ཨདཾསུ. ཨེཏདེཝ ཀིར ཝཏྟཾ, ཡཾ བྷོཛནཀཱལེ ཨཱགཏསྶ བྷཏྟཾ དདམཱནེན བྷིཀྑུནཱ ཨགྒབྷཏྟཾ ཨདཏྭཱ ཨཏྟནཱ བྷུཉྫནནིཡཱམེནེཝ ཐོཀཾ ཝཱ བཧུཾ ཝཱ དཱཏབྦཾ. ཏསྨཱ ཏེཔི ཏཐཱ ཨདཾསུ. སོ ཀཏབྷཏྟཀིཙྩོ ཐེརེ ཝནྡིཏྭཱ པུཙྪི – ‘‘ཀིཾ, བྷནྟེ, ཨཡྻཱ, ཀེནཙི ནིམནྟིཏཱ’’ཏི? ‘‘ནཏྠི, ཨུཔཱསཀ, ནིམནྟནཾ, མནུསྶཱ དེཝསིཀཾ ཨེཝརཱུཔམེཝ ཨཱཧཱརཾ དེནྟཱི’’ཏི. སོ ཙིནྟེསི – ‘‘མཡཾ ནིཙྩཀཱལཾ ཨུཊྛཱཡ སམུཊྛཱཡ ཀམྨཾ ཀརོནྟཱཔི ཨེཝརཱུཔཾ ཨཱཧཱརཾ ལདྡྷུཾ ན སཀྐོམ, ཀིཾ མེ ཨཉྙཏྠ གཏེན, ཨིམེསཾ སནྟིཀེཡེཝ ཛཱིཝིསྶཱམཱི’’ཏི. ཨཐ ནེ ཨཱཧ – ‘‘ཨཧཾ ཝཏྟཔཊིཝཏྟཾ ཀཏྭཱ ཨཡྻཱནཾ སནྟིཀེ ཝསིཏུཾ ཨིཙྪཱམཱི’’ཏི. ‘‘སཱདྷུ, ཨུཔཱསཀཱ’’ཏི. སོ ཏེཧི སདྡྷིཾ ཏེསཾ ཝསནཊྛཱནཾ གནྟྭཱ སཱདྷུཀཾ ཝཏྟཔཊིཝཏྟཾ ཀརོནྟོ བྷིཀྑཱུ ཨཏིཝིཡ ཨཱརཱདྷེཏྭཱ དྭེམཱསཙྩཡེན དྷཱིཏརཾ དཊྛུཀཱམོ ཧུཏྭཱ ‘‘སཙེ, ཨཡྻེ, ཨཱཔུཙྪིསྶཱམི, ན མཾ ཝིསྶཛྫིསྶནྟི, ཨནཱཔུཙྪཱ གམིསྶཱམཱི’’ཏི ཏེསཾ ཨནཱཙིཀྑིཏྭཱཝ ནིཀྑམི. ཨེཏྟཀམེཝ ཀིརསྶ ཨོལཱ༹རིཀཾ ཁལིཏཾ ཨཧོསི, ཡཾ བྷིཀྑཱུནཾ ཨནཱརོཙེཏྭཱ པཀྐཱམི.

ཏསྶ པན གམནམགྒེ ཨེཀཱ ཨཊཝཱི ཨཏྠི. ཏཏྠ པཉྩསཏཱནཾ ཙོརཱནཾ ‘‘ཡོ ཨིམཾ ཨཊཝིཾ པཝིསཏི, ཏཾ མཱརེཏྭཱ ཏསྶ མཾསལོཧིཏེན ཏུཡ྄ཧཾ བལིཀམྨཾ ཀརིསྶཱམཱ’’ཏི དེཝཏཱཡ ཨཱཡཱཙནཾ ཀཏྭཱ ཝསནྟཱནཾ སཏྟམོ དིཝསོ ཧོཏི. ཏསྨཱ སཏྟམེ དིཝསེ ཙོརཛེཊྛཀོ རུཀྑཾ ཨཱརུཡ྄ཧ ཨོལོཀེནྟོ ཏཾ ཨཱགཙྪནྟཾ དིསྭཱ ཙོརཱནཾ སཉྙམདཱསི. ཏེ ཏསྶ ཨཊཝིམཛ྄ཛྷཾ པཝིཊྛབྷཱཝཾ ཉཏྭཱ པརིཀྑིཔིཏྭཱ ཏཾ གཎྷིཏྭཱ གཱལ༹ྷབནྡྷནཾ ཀཏྭཱ ཨརཎིསཧིཏེན ཨགྒིཾ ནིབྦཏྟེཏྭཱ དཱརཱུནི སངྐཌྜྷིཏྭཱ མཧནྟཾ ཨགྒིཀྑནྡྷཾ ཀཏྭཱ སཱུལཱནི ཏཙྪིཾསུ. སོ ཏེསཾ ཏཾ ཀིརིཡཾ དིསྭཱ, ‘‘སཱམི, ཨིམསྨིཾ ཋཱནེ ནེཝ སཱུཀརཱ, ན མིགཱདཡོ དིསྶནྟི, ཀིཾ ཀཱརཎཱ ཨིདཾ ཀརོཐཱ’’ཏི པུཙྪི. ‘‘ཏཾ མཱརེཏྭཱ ཏཝ མཾསལོཧིཏེན དེཝཏཱཡ བལིཀམྨཾ ཀརིསྶཱམཱ’’ཏི. སོ མརཎབྷཡཏཛྫིཏོ བྷིཀྑཱུནཾ ཏཾ ཨུཔཀཱརཾ ཨཙིནྟེཏྭཱ ཀེཝལཾ ཨཏྟནོ ཛཱིཝིཏམེཝ རཀྑམཱནོ ཨེཝམཱཧ – ‘‘སཱམི, ཨཧཾ ཝིགྷཱསཱདོ, ཨུཙྪིཊྛབྷཏྟཾ བྷུཉྫིཏྭཱ ཝཌྜྷིཏོ, ཝིགྷཱསཱདོ ནཱམ ཀཱལ༹ཀཎྞིཀོ, ཨཡྻཱ པན ཡཏོ ཏཏོ ནིཀྑམིཏྭཱ པབྦཛིཏཱཔི ཁཏྟིཡཱཝ, ཨསུཀསྨིཾ ཋཱནེ ཨེཀཏིཾས བྷིཀྑཱུ ཝསནྟི, ཏེ མཱརེཏྭཱ བལིཀམྨཾ ཀརོཐ, ཨཏིཝིཡ ཝོ དེཝཏཱ ཏུསྶིསྶཏཱི’’ཏི. ཏཾ སུཏྭཱ ཙོརཱ ‘‘བྷདྡཀཾ ཨེས ཝདེཏི, ཀིཾ ཨིམིནཱ ཀཱལ༹ཀཎྞིནཱ, ཁཏྟིཡེ མཱརེཏྭཱ བལིཀམྨཾ ཀརིསྶཱམཱ’’ཏི ཙིནྟེཏྭཱ ‘‘ཨེཧི, ནེསཾ ཝསནཊྛཱནཾ དསྶེཧཱི’’ཏི ཏམེཝ མགྒདེསཀཾ ཀཏྭཱ ཏཾ ཋཱནཾ པཏྭཱ ཝིཧཱརམཛ྄ཛྷེ བྷིཀྑཱུ ཨདིསྭཱ ‘‘ཀཧཾ བྷིཀྑཱུ’’ཏི ནཾ པུཙྪིཾསུ. སོ དྭེ མཱསེ ཝསིཏཏྟཱ ཏེསཾ ཀཏིཀཝཏྟཾ ཛཱནནྟོ ཨེཝམཱཧ – ‘‘ཨཏྟནོ དིཝཱཊྛཱནརཏྟིཊྛཱནེསུ ནིསིནྣཱ, ཨེཏཾ གྷཎྜིཾ པཧརཐ, གྷཎྜིསདྡེན སནྣིཔཏིསྶནྟཱི’’ཏི. ཙོརཛེཊྛཀོ གྷཎྜིཾ པཧརི.

བྷིཀྑཱུ གྷཎྜིསདྡཾ སུཏྭཱ ‘‘ཨཀཱལེ གྷཎྜི པཧཊཱ, ཀསྶཙི ཨཕཱསུཀཾ བྷཝིསྶཏཱི’’ཏི ཨཱགནྟྭཱ ཝིཧཱརམཛ྄ཛྷེ པཊིཔཱཊིཡཱ པཉྙཏྟེསུ པཱསཱཎཕལཀེསུ ནིསཱིདིཾསུ. སངྒྷཏྠེརོ ཙོརེ ཨོལོཀེཏྭཱ པུཙྪི – ‘‘ཨུཔཱསཀཱ ཀེནཱཡཾ གྷཎྜི པཧཊཱ’’ཏི? ཙོརཛེཊྛཀོ ཨཱཧ – ‘‘མཡཱ, བྷནྟེ’’ཏི. ‘‘ཀིཾ ཀཱརཎཱ’’ཏི? ‘‘ཨམྷེཧི ཨཊཝིདེཝཏཱཡ ཨཱཡཱཙིཏཾ ཨཏྠི, ཏསྶཱ བལིཀམྨཀརཎཏྠཱཡ ཨེཀཾ བྷིཀྑུཾ གཧེཏྭཱ གམིསྶཱམཱ’’ཏི. ཏཾ སུཏྭཱ མཧཱཐེརོ བྷིཀྑཱུ ཨཱཧ – ‘‘ཨཱཝུསོ, བྷཱཏིཀཱནཾ ཨུཔྤནྣཀིཙྩཾ ནཱམ ཛེཊྛབྷཱཏིཀེན ནིཏྠརིཏབྦཾ, ཨཧཾ ཨཏྟནོ ཛཱིཝིཏཾ ཏུམྷཱཀཾ པརིཙྩཛིཏྭཱ ཨིམེཧི སདྡྷིཾ གམིསྶཱམི, མཱ སབྦེསཾ ཨནྟརཱཡོ ཧོཏུ, ཨཔྤམཏྟཱ སམཎདྷམྨཾ ཀརོཐཱ’’ཏི. ཨནུཐེརོ ཨཱཧ – ‘‘བྷནྟེ, ཛེཊྛབྷཱཏུ ཀིཙྩཾ ནཱམ ཀནིཊྛསྶ བྷཱརོ, ཨཧཾ གམིསྶཱམི, ཏུམྷེ ཨཔྤམཏྟཱ ཧོཐཱ’’ཏི. ཨིམིནཱ ཨུཔཱཡེན ‘‘ཨཧམེཝ ཨཧམེཝཱ’’ཏི ཝཏྭཱ པཊིཔཱཊིཡཱ ཏིཾསཔི ཛནཱ ཨུཊྛཧིཾསུ, ཨེཝཾ ཏེ ནེཝ ཨེཀིསྶཱ མཱཏུཡཱ པུཏྟཱ, ན ཨེཀསྶ པིཏུནོ, ནཱཔི ཝཱིཏརཱགཱ, ཨཐ ཙ པན ཨཝསེསཱནཾ ཨཏྠཱཡ པཊིཔཱཊིཡཱ ཛཱིཝིཏཾ པརིཙྩཛིཾསུ. ཏེསུ ཨེཀོཔི ‘‘ཏྭཾ ཡཱཧཱི’’ཏི ཝཏྟུཾ སམཏྠོ ནཱམ ནཱཧོསི.

སཾཀིཙྩསཱམཎེརོ ཏེསཾ ཀཐཾ སུཏྭཱ, ‘‘བྷནྟེ, ཏུམྷེ ཏིཊྛཐ, ཨཧཾ ཏུམྷཱཀཾ ཛཱིཝིཏཾ པརིཙྩཛིཏྭཱ གམིསྶཱམཱི’’ཏི ཨཱཧ. ཏེ ཨཱཧཾསུ – ‘‘ཨཱཝུསོ, མཡཾ སབྦེ ཨེཀཏོ མཱརིཡམཱནཱཔི ཏཾ ཨེཀཀཾ ན ཝིསྶཛྫེསྶཱམཱ’’ཏི. ‘‘ཀིཾ ཀཱརཎཱ, བྷནྟེ’’ཏི? ‘‘‘ཨཱཝུསོ, ཏྭཾ དྷམྨསེནཱཔཏིསཱརིཔུཏྟཏྠེརསྶ སཱམཎེརོ, སཙེ ཏཾ ཝིསྶཛྫེསྶཱམ, སཱམཎེརཾ མེ ཨཱདཱཡ གནྟྭཱ ཙོརཱནཾ ནིཡྻཱདིཾསཱུ’ཏི ཐེརོ ནོ གརཧིསྶཏི, ཏཾ ནིནྡཾ ནིཏྠརིཏུཾ ན སཀྑིསྶཱམ, ཏེན ཏཾ ན ཝིསྶཛྫེསྶཱམཱ’’ཏི. ‘‘བྷནྟེ, སམྨཱསམྦུདྡྷོ ཏུམྷེ མམ ཨུཔཛ྄ཛྷཱཡསྶ སནྟིཀཾ པཧིཎནྟོཔི, མམ ཨུཔཛ྄ཛྷཱཡོ མཾ ཏུམྷེཧི སདྡྷིཾ པཧིཎནྟོཔི ཨིདམེཝ ཀཱརཎཾ དིསྭཱ པཧིཎི, ཏིཊྛཐ ཏུམྷེ, ཨཧམེཝ གམིསྶཱམཱི’’ཏི སོ ཏིཾས བྷིཀྑཱུ ཝནྡིཏྭཱ ‘‘སཙེ, བྷནྟེ, མེ དོསོ ཨཏྠི, ཁམཐཱ’’ཏི ཝཏྭཱ ནིཀྑམི. ཏདཱ བྷིཀྑཱུནཾ མཧཱསཾཝེགོ ཨུཔྤཛྫི, ཨཀྑཱིནི ཨསྶུཔུཎྞཱནི ཧདཡམཾསཾ པཝེདྷི. མཧཱཐེརོ ཙོརེ ཨཱཧ – ‘‘ཨུཔཱསཀཱ ཨཡཾ དཧརཀོ ཏུམྷེ ཨགྒིཾ ཀརོནྟེ, སཱུལཱནི ཏཙྪནྟེ, པཎྞཱནི ཨཏྠརནྟེ དིསྭཱ བྷཱཡིསྶཏི, ཨིམཾ ཨེཀམནྟེ ཋཔེཏྭཱ ཏཱནི ཀིཙྩཱནི ཀརེཡྻཱཐཱ’’ཏི. ཙོརཱ སཱམཎེརཾ ཨཱདཱཡ གནྟྭཱ ཨེཀམནྟེ ཋཔེཏྭཱ སབྦཀིཙྩཱནི ཀརིཾསུ.

ཀིཙྩཔརིཡོསཱནེ ཙོརཛེཊྛཀོ ཨསིཾ ཨབྦཱཧིཏྭཱ སཱམཎེརཾ ཨུཔསངྐམི. སཱམཎེརོ ནིསཱིདམཱནོ ཛྷཱནཾ སམཱཔཛྫིཏྭཱཝ ནིསཱིདི. ཙོརཛེཊྛཀོ ཨསིཾ པརིཝཏྟེཏྭཱ སཱམཎེརསྶ ཁནྡྷེ པཱཏེསི, ཨསི ནམིཏྭཱ དྷཱརཱཡ དྷཱརཾ པཧརི, སོ ‘‘ན སམྨཱ པཧརི’’ནྟི མཉྙམཱནོ པུན ཏཾ ཨུཛུཀཾ ཀཏྭཱ པཧརི. ཨསི ཏཱལཔཎྞཾ ཝིཡ ཝེཋཡམཱནོ ཐརུམཱུལཾ ཨགམཱསི. སཱམཎེརཉྷི ཏསྨིཾ ཀཱལེ སིནེརུནཱ ཨཝཏྠརནྟོཔི མཱརེཏུཾ སམཏྠོ ནཱམ ནཏྠི, པགེཝ ཨསིནཱ. ཏཾ པཱཊིཧཱརིཡཾ དིསྭཱ ཙོརཛེཊྛཀོ ཙིནྟེསི – ‘‘པུབྦེ མེ ཨསི སིལཱཐམྦྷཾ ཝཱ ཁདིརཁཱཎུཾ ཝཱ ཀལཱི༹རཾ ཝིཡ ཚིནྡཏི, ཨིདཱནི ཨེཀཝཱརཾ ནམི, ཨེཀཝཱརཾ ཏཱལཔཏྟཝེཋཀོ ཝིཡ ཛཱཏོ. ཨཡཾ ནཱམ ཨསི ཨཙེཏནཱ ཧུཏྭཱཔི ཨིམསྶ གུཎཾ ཛཱནཱཏི, ཨཧཾ སཙེཏནོཔི ན ཛཱནཱམཱི’’ཏི. སོ ཨསིཾ བྷཱུམིཡཾ ཁིཔིཏྭཱ ཏསྶ པཱདམཱུལེ ཨུརེན ནིཔཛྫིཏྭཱ, ‘‘བྷནྟེ, མཡཾ དྷནཀཱརཎཱ ཨཊཝིཾ པཝིཊྛཱམྷཱ, ཨམྷེ དཱུརཏོཝ དིསྭཱ སཧསྶམཏྟཱཔི མནུསྶཱ པཝེདྷནྟི, དྭེ ཏིསྶོ ཀཐཱ ཀཐེཏུཾ ན སཀྐོནྟི. ཏཝ པན སནྟཱསམཏྟམྤི ནཏྠི, ཨུཀྐཱམུཁེ སུཝཎྞཾ ཝིཡ སུཔུཔྥིཏཀཎིཀཱརཾ ཝིཡ ཙ ཏེ མུཁཾ ཝིརོཙཏི, ཀིཾ ནུ ཁོ ཀཱརཎ’’ནྟི པུཙྪནྟོ ཨིམཾ གཱཐམཱཧ –

‘‘ཏསྶ ཏེ ནཏྠི བྷཱིཏཏྟཾ, བྷིཡྻོ ཝཎྞོ པསཱིདཏི;

ཀསྨཱ ན པརིདེཝེསི, ཨེཝརཱུཔེ མཧབྦྷཡེ’’ཏི. (ཐེརགཱ. ༧༠༦);

སཱམཎེརོ ཛྷཱནཱ ཝུཊྛཱཡ ཏསྶ དྷམྨཾ དེསེནྟོ, ‘‘ཨཱཝུསོ གཱམཎི, ཁཱིཎཱསཝསྶ ཨཏྟབྷཱཝོ ནཱམ སཱིསེ ཋཔིཏབྷཱརོ ཝིཡ ཧོཏི, སོ ཏསྨིཾ བྷིཛྫནྟེ ཝཱ ནསྶནྟེ ཝཱ ཏུསྶཏེཝ, ན བྷཱཡཏཱི’’ཏི ཝཏྭཱ ཨིམཱ གཱཐཱ ཨབྷཱསི –

‘‘ནཏྠི ཙེཏསིཀཾ དུཀྑཾ, ཨནཔེཀྑསྶ གཱམཎི;

ཨཏིཀྐནྟཱ བྷཡཱ སབྦེ, ཁཱིཎསཾཡོཛནསྶ ཝེ.

‘‘ཁཱིཎཱཡ བྷཝནེཏྟིཡཱ, དིཊྛེ དྷམྨེ ཡཐཱཏཐེ;

ན བྷཡཾ མརཎེ ཧོཏི, བྷཱརནིཀྑེཔནེ ཡཐཱ’’ཏི. (ཐེརགཱ. ༧༠༧-༧༠༨);

སོ ཏསྶ ཀཐཾ སུཏྭཱ པཉྩ ཙོརསཏཱནི ཨོལོཀེཏྭཱ ཨཱཧ – ‘‘ཏུམྷེ ཀིཾ ཀརིསྶཐཱ’’ཏི? ‘‘ཏུམྷེ པན, སཱམཱི’’ཏི. ‘‘མམ ཏཱཝ, བྷོ, ‘ཨེཝརཱུཔཾ པཱཊིཧཱརིཡཾ དིསྭཱ ཨགཱརམཛ྄ཛྷེ ཀམྨཾ ནཏྠི, ཨཡྻསྶ སནྟིཀེ པབྦཛིསྶཱམཱི’ཏི. མཡམྤི ཏཐེཝ ཀརིསྶཱམཱ’’ཏི. ‘‘སཱདྷུ, ཏཱཏཱ’’ཏི ཏཏོ པཉྩསཏཱཔི ཙོརཱ སཱམཎེརཾ ཝནྡིཏྭཱ པབྦཛྫཾ ཡཱཙིཾསུ. སོ ཏེསཾ ཨསིདྷཱརཱཧི ཨེཝ ཀེསེ ཙེཝ ཝཏྠདསཱ ཙ ཚིནྡིཏྭཱ ཏམྦམཏྟིཀཱཡ རཛིཏྭཱ ཏཱནི ཀཱསཱཡཱནི ཨཙྪཱདཱཔེཏྭཱ དསསུ སཱིལེསུ པཏིཊྛཱཔེཏྭཱ ཏེ ཨཱདཱཡ གཙྪནྟོ ཙིནྟེསི – ‘‘སཙཱཧཾ ཐེརེ ཨདིསྭཱཝ གམིསྶཱམི, ཏེ སམཎདྷམྨཾ ཀཱཏུཾ ན སཀྑིསྶནྟི. ཙོརཱནཉྷི མཾ གཧེཏྭཱ ནིཀྑནྟཀཱལཏོ པཊྛཱཡ ཏེསུ ཨེཀོཔི ཨསྶཱུནི སནྡྷཱརེཏུཾ ནཱསཀྑི, ‘མཱརིཏོ ནུ ཁོ སཱམཎེརོ, ནོ’ཏི ཙིནྟེནྟཱནཾ ཀམྨཊྛཱནཾ ཨབྷིམུཁཾ ན བྷཝིསྶཏི, ཏསྨཱ དིསྭཱཝ ནེ གམིསྶཱམཱི’’ཏི. སོ པཉྩསཏབྷིཀྑུཔརིཝཱརོ ཏཏྠ གནྟྭཱ ཨཏྟནོ དསྶནེན པཊིལདྡྷཨསྶཱསེཧི ཏེཧི ‘‘ཀིཾ, སཔྤུརིས, སཾཀིཙྩ, ལདྡྷཾ ཏེ ཛཱིཝིཏ’’ནྟི ཝུཏྟེ, ‘‘ཨཱམ, བྷནྟེ, ཨིམེ མཾ མཱརེཏུཀཱམཱ ཧུཏྭཱ མཱརེཏུཾ ཨསཀྐོནྟཱ མམ གུཎེ པསཱིདིཏྭཱ དྷམྨཾ སུཏྭཱ པབྦཛིཏཱ, ཨཧཾ ‘ཏུམྷེ དིསྭཱཝ གམིསྶཱམཱི’ཏི ཨཱགཏོ, ཨཔྤམཏྟཱ སམཎདྷམྨཾ ཀརོཐ, ཨཧཾ སཏྠུ སནྟིཀཾ གམིསྶཱམཱི’’ཏི ཏེ བྷིཀྑཱུ ཝནྡིཏྭཱ ཨིཏརེ ཨཱདཱཡ ཨུཔཛ྄ཛྷཱཡསྶ སནྟིཀཾ གནྟྭཱ ‘‘ཀིཾ སཾཀིཙྩ, ཨནྟེཝཱསིཀཱ ཏེ ལདྡྷཱ’’ཏི ཝུཏྟེ, ‘‘ཨཱམ, བྷནྟེ’’ཏི ཏཾ པཝཏྟིཾ ཨཱརོཙེསི. ཐེརེན ‘‘གཙྪ སཾཀིཙྩ, སཏྠཱརཾ པསྶཱཧཱི’’ཏི ཝུཏྟེ, ‘‘སཱདྷཱུ’’ཏི ཐེརཾ ཝནྡིཏྭཱ ཏེ ཨཱདཱཡ སཏྠུ སནྟིཀཾ གནྟྭཱ སཏྠཱརཱཔི ‘‘ཀིཾ སཾཀིཙྩ, ཨནྟེཝཱསིཀཱ ཏེ ལདྡྷཱ’’ཏི ཝུཏྟེ, ‘‘ཨཱམ, བྷནྟེ’’ཏི ཏཾ པཝཏྟིཾ ཨཱརོཙེསི. སཏྠཱ ‘‘ཨེཝཾ ཀིར, བྷིཀྑཝེ’’ཏི པུཙྪིཏྭཱ, ‘‘ཨཱམ, བྷནྟེ’’ཏི ཝུཏྟེ, ‘‘བྷིཀྑཝེ, ཏུམྷཱཀཾ ཙོརཀམྨཾ ཀཏྭཱ དུསྶཱིལེ པཏིཊྛཱཡ ཝསྶསཏཾ ཛཱིཝནཏོ ཨིདཱནི སཱིལེ པཏིཊྛཱཡ ཨེཀདིཝསམྤི ཛཱིཝིཏཾ སེཡྻོ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༡༠.

‘‘ཡོ ཙ ཝསྶསཏཾ ཛཱིཝེ, དུསྶཱིལོ ཨསམཱཧིཏོ;

ཨེཀཱཧཾ ཛཱིཝིཏཾ སེཡྻོ, སཱིལཝནྟསྶ ཛྷཱཡིནོ’’ཏི.

ཏཏྠ དུསྶཱིལོཏི ནིསྶཱིལོ. སཱིལཝནྟསྶཱཏི དུསྶཱིལསྶ ཝསྶསཏཾ ཛཱིཝནཏོ སཱིལཝནྟསྶ དྭཱིཧི ཛྷཱནེཧི ཛྷཱཡིནོ ཨེཀདིཝསམྤི ཨེཀམུཧུཏྟམྤི ཛཱིཝིཏཾ སེཡྻོ, ཨུཏྟམནྟི ཨཏྠོ.

དེསནཱཝསཱནེ ཏེ པཉྩསཏཱཔི བྷིཀྑཱུ སཧ པཊིསམྦྷིདཱཧི ཨརཧཏྟཾ པཱཔུཎིཾསུ, སམྤཏྟམཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཨཔརེན སམཡེན སཾཀིཙྩོ ཨུཔསམྤདཾ ལབྷིཏྭཱ དསཝསྶོ ཧུཏྭཱ སཱམཎེརཾ གཎྷི. སོ པན ཏསྶེཝ བྷཱགིནེཡྻོ ཨདྷིམུཏྟསཱམཎེརོ ནཱམ. ཨཐ ནཾ ཐེརོ པརིཔུཎྞཝསྶཀཱལེ ཨཱམནྟེཏྭཱ ‘‘ཨུཔསམྤདཾ ཏེ ཀརིསྶཱམི, གཙྪ, ཉཱཏཀཱནཾ སནྟིཀེ ཝསྶཔརིམཱཎཾ པུཙྪིཏྭཱ ཨེཧཱི’’ཏི ཨུཡྻོཛེསི. སོ མཱཏཱཔིཏཱུནཾ སནྟིཀཾ གཙྪནྟོ ཨནྟརཱམགྒེ པཉྩསཏེཧི ཙོརེཧི བལིཀམྨཏྠཱཡ མཱརིཡམཱནོ ཏེསཾ དྷམྨཾ དེསེཏྭཱ པསནྣཙིཏྟེཧི ཏེཧི ‘‘ན ཏེ ཨིམསྨིཾ ཋཱནེ ཨམྷཱཀཾ ཨཏྠིབྷཱཝོ ཀསྶཙི ཨཱརོཙེཏབྦོ’’ཏི ཝིསྶཊྛོ པཊིཔཐེ མཱཏཱཔིཏརོ ཨཱགཙྪནྟེ དིསྭཱ ཏམེཝ མགྒཾ པཊིཔཛྫནྟཱནམྤི ཏེསཾ སཙྩམནུརཀྑནྟོ ནཱརོཙེསི. ཏེསཾ ཙོརེཧི ཝིཧེཋིཡམཱནཱནཾ ‘‘ཏྭམྤི ཙོརེཧི སདྡྷིཾ ཨེཀཏོ ཧུཏྭཱ མཉྙེ, ཨམྷཱཀཾ ནཱརོཙེསཱི’’ཏི པརིདེཝནྟཱནཾ སདྡཾ སུཏྭཱ ཏེ མཱཏཱཔིཏཱུནམྤི ཨནཱརོཙིཏབྷཱཝཾ ཉཏྭཱ པསནྣཙིཏྟཱ པབྦཛྫཾ ཡཱཙིཾསུ. སོཔི སཾཀིཙྩསཱམཎེརོ ཝིཡ ཏེ སབྦེ པབྦཱཛེཏྭཱ ཨུཔཛ྄ཛྷཱཡསྶ སནྟིཀཾ ཨཱནེཏྭཱ ཏེན སཏྠུ སནྟིཀཾ པེསིཏོ གནྟྭཱ ཏཾ པཝཏྟིཾ ཨཱརོཙེསི. སཏྠཱ ‘‘ཨེཝཾ ཀིར, བྷིཀྑཝེ’’ཏི པུཙྪིཏྭཱ, ‘‘ཨཱམ, བྷནྟེ’’ཏི ཝུཏྟེ པུརིམནཡེནེཝ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམམེཝ གཱཐམཱཧ –

‘‘ཡོ ཙ ཝསྶསཏཾ ཛཱིཝེ, དུསྶཱིལོ ཨསམཱཧིཏོ;

ཨེཀཱཧཾ ཛཱིཝིཏཾ སེཡྻོ, སཱིལཝནྟསྶ ཛྷཱཡིནོ’’ཏི.

ཨིདམྤི ཨདྷིམུཏྟསཱམཎེརཝཏྠུ ཝུཏྟནཡམེཝཱཏི.

སཾཀིཙྩསཱམཎེརཝཏྠུ ནཝམཾ.

༡༠. ཁཱཎུཀོཎྜཉྙཏྠེརཝཏྠུ

ཡོ ཙ ཝསྶསཏཾ ཛཱིཝེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཁཱཎུཀོཎྜཉྙཏྠེརཾ ཨཱརབྦྷ ཀཐེསི.

སོ ཀིར ཐེརོ སཏྠུ སནྟིཀེ ཀམྨཊྛཱནཾ གཧེཏྭཱ ཨརཉྙེ ཝིཧརནྟོ ཨརཧཏྟཾ པཏྭཱ ‘‘སཏྠུ ཨཱརོཙེསྶཱམཱི’’ཏི ཏཏོ ཨཱགཙྪནྟོ ཨནྟརཱམགྒེ ཀིལནྟོ མགྒཱ ཨོཀྐམྨ ཨེཀསྨིཾ པིཊྛིཔཱསཱཎེ ནིསིནྣོ ཛྷཱནཾ སམཱཔཛྫི. ཨཐེཀཾ གཱམཾ ཝིལུམྤིཏྭཱ པཉྩསཏཱ ཙོརཱ ཨཏྟནོ བལཱནུརཱུཔེན བྷཎྜིཀཾ བནྡྷིཏྭཱ སཱིསེནཱདཱཡ གཙྪནྟཱ དཱུརཾ གནྟྭཱ ཀིལནྟརཱུཔཱ ‘‘དཱུརཾ ཨཱགཏཱམྷ, ཨིམསྨིཾ པིཊྛིཔཱསཱཎེ ཝིསྶམིསྶཱམཱ’’ཏི མགྒཱ ཨོཀྐམྨ པིཊྛིཔཱསཱཎསྶ སནྟིཀཾ གནྟྭཱ ཐེརཾ དིསྭཱཔི ‘‘ཁཱཎུཀོ ཨཡ’’ནྟི སཉྙིནོ ཨཧེསུཾ. ཨཐེཀོ ཙོརོ ཐེརསྶ སཱིསེ བྷཎྜིཀཾ ཋཔེསི, ཨཔརོཔི ཏཾ ནིསྶཱཡ བྷཎྜིཀཾ ཋཔེསི. ཨེཝཾ པཉྩསཏཱཔི ཙོརཱ པཉྩཧི བྷཎྜིཀསཏེཧི ཐེརཾ པརིཀྑིཔིཏྭཱ སཡམྤི ནིསིནྣཱ ནིདྡཱཡིཏྭཱ ཨརུཎུགྒམནཀཱལེ པབུཛ྄ཛྷིཏྭཱ ཨཏྟནོ ཨཏྟནོ བྷཎྜིཀཾ གཎྷནྟཱ ཐེརཾ དིསྭཱ ‘‘ཨམནུསྶོ’’ཏི སཉྙཱཡ པལཱཡིཏུཾ ཨཱརབྷིཾསུ. ཨཐ ནེ ཐེརོ ཨཱཧ – ‘‘མཱ བྷཱཡིཏྠ ཨུཔཱསཀཱ, པབྦཛིཏོ ཨཧ’’ནྟི. ཏེ ཐེརསྶ པཱདམཱུལེ ནིཔཛྫིཏྭཱ ‘‘ཁམཐ, བྷནྟེ, མཡཾ ཁཱཎུཀསཉྙིནོ ཨཧུམྷཱ’’ཏི ཐེརཾ ཁམཱཔེཏྭཱ ཙོརཛེཊྛཀེན ‘‘ཨཧཾ ཨཡྻསྶ སནྟིཀེ པབྦཛིསྶཱམཱི’’ཏི ཝུཏྟེ སེསཱ ‘‘མཡམྤི པབྦཛིསྶཱམཱ’’ཏི ཝཏྭཱ སབྦེཔི ཨེཀཙྪནྡཱ ཧུཏྭཱ ཐེརཾ པབྦཛྫཾ ཡཱཙིཾསུ. ཐེརོ སཾཀིཙྩསཱམཎེརོ ཝིཡ སབྦེཔི ཏེ པབྦཱཛེསི. ཏཏོ པཊྛཱཡ ཁཱཎུཀོཎྜཉྙོཏི པཉྙཱཡི. སོ ཏེཧི བྷིཀྑཱུཧི སདྡྷིཾ སཏྠུ སནྟིཀཾ གནྟྭཱ སཏྠཱརཱ ‘‘ཀིཾ, ཀོཎྜཉྙ, ཨནྟེཝཱསིཀཱ ཏེ ལདྡྷཱ’’ཏི ཝུཏྟེ ཏཾ པཝཏྟིཾ ཨཱརོཙེསི. སཏྠཱ ‘‘ཨེཝཾ ཀིར, བྷིཀྑཝེ’’ཏི པུཙྪིཏྭཱ, ‘‘ཨཱམ, བྷནྟེ, ན ནོ ཨཉྙསྶ ཨེཝརཱུཔོ ཨཱནུབྷཱཝོ དིཊྛཔུབྦོ, ཏེནམྷཱ པབྦཛིཏཱ’’ཏི ཝུཏྟེ, ‘‘བྷིཀྑཝེ, ཨེཝརཱུཔེ དུཔྤཉྙཀམྨེ པཏིཊྛཱཡ ཝསྶསཏཾ ཛཱིཝནཏོ ཨིདཱནི ཝོ པཉྙཱསམྤདཱཡ ཝཏྟམཱནཱནཾ ཨེཀཱཧམྤི ཛཱིཝིཏཾ སེཡྻོ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༡༡.

‘‘ཡོ ཙ ཝསྶསཏཾ ཛཱིཝེ, དུཔྤཉྙོ ཨསམཱཧིཏོ;

ཨེཀཱཧཾ ཛཱིཝིཏཾ སེཡྻོ, པཉྙཝནྟསྶ ཛྷཱཡིནོ’’ཏི.

ཏཏྠ དུཔྤཉྙོ ནིཔྤཉྙོ. པཉྙཝནྟསྶཱཏི སཔྤཉྙསྶ. སེསཾ པུརིམསདིསམེཝཱཏི.

དེསནཱཝསཱནེ པཉྩསཏཱཔི ཏེ བྷིཀྑཱུ སཧ པཊིསམྦྷིདཱཧི ཨརཧཏྟཾ པཱཔུཎིཾསུ. སམྤཏྟམཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཁཱཎུཀོཎྜཉྙཏྠེརཝཏྠུ དསམཾ.

༡༡. སཔྤདཱསཏྠེརཝཏྠུ

ཡོ ཙ ཝསྶསཏཾ ཛཱིཝེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཔྤདཱསཏྠེརཾ ཨཱརབྦྷ ཀཐེསི.

སཱཝཏྠིཡཾ ཀིརེཀོ ཀུལཔུཏྟོ སཏྠུ དྷམྨདེསནཾ སུཏྭཱ པབྦཛིཏྭཱ ལདྡྷཱུཔསམྤདོ ཨཔརེན སམཡེན ཨུཀྐཎྛིཏྭཱ ‘‘མཱདིསསྶ ཀུལཔུཏྟསྶ གིཧིབྷཱཝོ ནཱམ ཨཡུཏྟོ, པབྦཛྫཱཡ ཋཏྭཱ མརཎམྷི མེ སེཡྻོ’’ཏི ཙིནྟེཏྭཱ ཨཏྟནོ མརཎཱུཔཱཡཾ ཙིནྟེནྟོ ཝིཙརཏི. ཨཐེཀདིཝསཾ པཱཏོཝ ཀཏབྷཏྟཀིཙྩཱ བྷིཀྑཱུ ཝིཧཱརཾ གནྟྭཱ ཨགྒིསཱལཱཡ སཔྤཾ དིསྭཱ ཏཾ ཨེཀསྨིཾ ཀུཊེ པཀྑིཔིཏྭཱ ཀུཊཾ པིདཧིཏྭཱ ཨཱདཱཡ ཝིཧཱརཱ ནིཀྑམིཾསུ. ཨུཀྐཎྛིཏབྷིཀྑུཔི བྷཏྟཀིཙྩཾ ཀཏྭཱ ཨཱགཙྪནྟོ ཏེ བྷིཀྑཱུ དིསྭཱ ‘‘ཀིཾ ཨིདཾ, ཨཱཝུསོ’’ཏི པུཙྪིཏྭཱ ‘‘སཔྤོ, ཨཱཝུསོ’’ཏི ཝུཏྟེ ཨིམིནཱ ‘‘ཀིཾ ཀརིསྶཐཱ’’ཏི? ‘‘ཚཌྜེསྶཱམ ན’’ནྟི. ཏེསཾ ཝཙནཾ སུཏྭཱ ‘‘ཨིམིནཱ ཨཏྟཱནཾ ཌཾསཱཔེཏྭཱ མརིསྶཱམཱི’’ཏི ‘‘ཨཱཧརཐ, ཨཧཾ ཏཾ ཚཌྜེསྶཱམཱི’’ཏི ཏེསཾ ཧཏྠཏོ ཀུཊཾ གཧེཏྭཱ ཨེཀསྨིཾ ཋཱནེ ནིསིནྣོ ཏེན སཔྤེན ཨཏྟཱནཾ ཌཾསཱཔེཏི, སཔྤོ ཌཾསིཏུཾ ན ཨིཙྪཏི. སོ ཀུཊེ ཧཏྠཾ ཨོཏཱརེཏྭཱ ཨིཏོ ཙིཏོ ཙ ཨཱལོལེཏི, གྷོརསཔྤསྶ མུཁཾ ཝིཝརིཏྭཱ ཨངྒུལིཾ པཀྑིཔཏི, ནེཝ ནཾ སཔྤོ ཌཾསི. སོ ‘‘ནཱཡཾ ཨཱསཱིཝིསོ, གྷརསཔྤོ ཨེསོ’’ཏི ཏཾ པཧཱཡ ཝིཧཱརཾ ཨགམཱསི. ཨཐ ནཾ བྷིཀྑཱུ ‘‘ཚཌྜིཏོ ཏེ, ཨཱཝུསོ, སཔྤོ’’ཏི ཨཱཧཾསུ. ‘‘ན སོ, ཨཱཝུསོ, གྷོརསཔྤོ, གྷརསཔྤོ ཨེསོ’’ཏི. ‘‘གྷོརསཔྤོཡེཝཱཝུསོ, མཧནྟཾ ཕཎཾ ཀཏྭཱ སུསུཡནྟོ དུཀྑེན ཨམྷེཧི གཧིཏོ, ཀིཾ ཀཱརཎཱ ཨེཝཾ ཏྭཾ ཝདེསཱི’’ཏི ཨཱཧཾསུ. ‘‘ཨཧཾ, ཨཱཝུསོ, ཏེན ཨཏྟཱནཾ ཌཾསཱཔེནྟོཔི མུཁེ ཨངྒུལིཾ པཀྑིཔེནྟོཔི ཏཾ ཌཾསཱཔེཏུཾ ནཱསཀྑི’’ནྟི. ཏཾ སུཏྭཱ བྷིཀྑཱུ ཏུཎྷཱི ཨཧེསུཾ.

ཨཐེཀདིཝསཾ ནྷཱཔིཏོ དྭེ ཏཡོ ཁུརེ ཨཱདཱཡ ཝིཧཱརཾ གནྟྭཱ ཨེཀཾ བྷཱུམིཡཾ ཋཔེཏྭཱ ཨེཀེན བྷིཀྑཱུནཾ ཀེསེ ཨོཧཱརེཏི. སོ བྷཱུམིཡཾ ཋཔིཏཾ ཁུརཾ གཧེཏྭཱ ‘‘ཨིམིནཱ གཱིཝཾ ཚིནྡིཏྭཱ མརིསྶཱམཱི’’ཏི ཨེཀསྨིཾ རུཀྑེ གཱིཝཾ ཨུཔནིདྷཱཡ ཁུརདྷཱརཾ གལནཱལི༹ཡཾ ཀཏྭཱ ཋིཏོ ཨུཔསམྤདཱམཱལ༹ཏོ པཊྛཱཡ ཨཏྟནོ སཱིལཾ ཨཱཝཛྫེནྟོ ཝིམལཙནྡམཎྜལཾ ཝིཡ སུདྷོཏམཎིཁནྡྷམིཝ ཙ ནིམྨལཾ སཱིལཾ ཨདྡས. ཏསྶ ཏཾ ཨོལོཀེནྟསྶ སཀལསརཱིརཾ ཕརནྟཱི པཱིཏི ཨུཔྤཛྫི. སོ པཱིཏིཾ ཝིཀྑམྦྷེཏྭཱ ཝིཔསྶནཾ ཝཌྜྷེནྟོ སཧ པཊིསམྦྷིདཱཧི ཨརཧཏྟཾ པཏྭཱ ཁུརཾ ཨཱདཱཡ ཝིཧཱརམཛ྄ཛྷཾ པཱཝིསི. ཨཐ ནཾ བྷིཀྑཱུ ‘‘ཀཧཾ གཏོསི, ཨཱཝུསོ’’ཏི པུཙྪིཾསུ. ‘‘‘ཨིམིནཱ ཁུརེན གལནཱལི༹ཾ ཚིནྡིཏྭཱ མརིསྶཱམཱི’ཏི གཏོམྷི, ཨཱཝུསོ’’ཏི. ཨཐ ‘‘ཀསྨཱ ན མཏོསཱི’’ཏི? ཨིདཱནིམྷི སཏྠཾ ཨཱཧརིཏུཾ ཨབྷབྦོ ཛཱཏོ. ཨཧཉྷི ‘‘ཨིམིནཱ ཁུརེན གལནཱལི༹ཾ ཚིནྡིསྶཱམཱི’’ཏི ཉཱཎཁུརེན སབྦཀིལེསེ ཚིནྡིནྟི. བྷིཀྑཱུ ‘‘ཨཡཾ ཨབྷཱུཏེན ཨཉྙཾ བྱཱཀརོཏཱི’’ཏི བྷགཝཏོ ཨཱརོཙེསུཾ. བྷགཝཱ ཏེསཾ ཀཐཾ སུཏྭཱ ཨཱཧ – ‘‘ན, བྷིཀྑཝེ, ཁཱིཎཱསཝཱ ནཱམ སཧཏྠཱ ཨཏྟཱནཾ ཛཱིཝིཏཱ ཝོརོཔེནྟཱི’’ཏི. བྷནྟེ, ཏུམྷེ ཨིམཾ ‘‘ཁཱིཎཱསཝོ’’ཏི ཝདཐ, ཨེཝཾ ཨརཧཏྟཱུཔནིསྶཡསམྤནྣོ པནཱཡཾ ཀསྨཱ ཨུཀྐཎྛཏི, ཀིམསྶ ཨརཧཏྟཱུཔནིསྶཡཀཱརཎཾ ‘‘ཀསྨཱ སོ སཔྤོ ཨེཏཾ ན ཌཾསཏཱི’’ཏི? ‘‘བྷིཀྑཝེ, སོ ཏཱཝ སཔྤོ ཨིམསྶ ཨིཏོ ཏཏིཡེ ཨཏྟབྷཱཝེ དཱསོ ཨཧོསི, སོ ཨཏྟནོ སཱམིཀསྶ སརཱིརཾ ཌཾསིཏུཾ ན ཝིསཧཏཱི’’ཏི. ཨེཝཾ ཏཱཝ ནེསཾ སཏྠཱ ཨེཀཾ ཀཱརཎཾ ཨཱཙིཀྑི. ཏཏོ པཊྛཱཡ ཙ སོ བྷིཀྑུ སཔྤདཱསོ ནཱམ ཛཱཏོ.

ཀསྶཔསམྨཱསམྦུདྡྷཀཱལེ ཀིརེཀོ ཀུལཔུཏྟོ སཏྠུ དྷམྨཀཐཾ སུཏྭཱ ཨུཔྤནྣསཾཝེགོ པབྦཛིཏྭཱ ལདྡྷཱུཔསམྤདོ ཨཔརེན སམཡེན ཨནབྷིརཏིཡཱ ཨུཔྤནྣཱཡ ཨེཀསྶ སཧཱཡཀསྶ བྷིཀྑུནོ ཨཱརོཙེསི. སོ ཏསྶ ཨབྷིཎྷཾ གིཧིབྷཱཝེ ཨཱདཱིནཝཾ ཀཐེསི. ཏཾ སུཏྭཱ ཨིཏརོ སཱསནེ ཨབྷིརམིཏྭཱ པུབྦེ ཨནབྷིརཏཀཱལེ མལགྒཧིཏེ སམཎཔརིཀྑཱརེ ཨེཀསྨིཾ སོཎྜིཏཱིརེ ནིམྨལེ ཀརོནྟོ ནིསཱིདི. སཧཱཡཀོཔིསྶ སནྟིཀེཡེཝ ནིསིནྣོ. ཨཐ ནཾ སོ ཨེཝམཱཧ – ‘‘ཨཧཾ, ཨཱཝུསོ, ཨུཔྤབྦཛནྟོ ཨིམེ པརིཀྑཱརེ ཏུཡ྄ཧཾ དཱཏུཀཱམོ ཨཧོསི’’ནྟི. སོ ལོབྷཾ ཨུཔྤཱདེཏྭཱ ཙིནྟེསི – ‘‘ཨིམིནཱ མཡ྄ཧཾ པབྦཛིཏེན ཝཱ ཨུཔྤབྦཛིཏེན ཝཱ ཀོ ཨཏྠོ, ཨིདཱནི པརིཀྑཱརེ གཎྷིསྶཱམཱི’’ཏི. སོ ཏཏོ པཊྛཱཡ ‘‘ཀིཾ དཱནཱཝུསོ, ཨམྷཱཀཾ ཛཱིཝིཏེན, ཡེ མཡཾ ཀཔཱལཧཏྠཱ པརཀུལེསུ བྷིཀྑཱཡ ཙརཱམ, པུཏྟདཱརེཧི སདྡྷིཾ ཨཱལཱཔསལླཱཔཾ ན ཀརོམཱ’’ཏིཨཱདཱིནི ཝདནྟོ གིཧིབྷཱཝསྶ གུཎཾ ཀཐེསི. སོ ཏསྶ ཀཐཾ སུཏྭཱ པུན ཨུཀྐཎྛིཏོ ཧུཏྭཱ ཙིནྟེསི – ‘‘ཨཡཾ མཡཱ ‘ཨུཀྐཎྛིཏོམྷཱི’ཏི ཝུཏྟེ པཋམཾ གིཧིབྷཱཝེ ཨཱདཱིནཝཾ ཀཐེཏྭཱ ཨིདཱནི ཨབྷིཎྷཾ གུཎཾ ཀཐེཏི, ‘ཀིཾ ནུ ཁོ ཀཱརཎ’’’ནྟི ཙིནྟེནྟོ ‘‘ཨིམེསུ སམཎཔརིཀྑཱརེསུ ལོབྷེནཱ’’ཏི ཉཏྭཱ སཡམེཝ ཨཏྟནོ ཙིཏྟཾ ནིཝཏྟེསི. ཨེཝམསྶ ཀསྶཔསམྨཱསམྦུདྡྷཀཱལེ ཨེཀསྶ བྷིཀྑུནོ ཨུཀྐཎྛཱཔིཏཏྟཱ ཨིདཱནི ཨནབྷིརཏི ཨུཔྤནྣཱ. ཡོ པན ཏེནེཝ ཏདཱ ཝཱིསཏི ཝསྶསཧསྶཱནི སམཎདྷམྨོ ཀཏོ, སྭསྶ ཨེཏརཧི ཨརཧཏྟཱུཔནིསྶཡོ ཛཱཏོཏི.

ཨིམམཏྠཾ ཏེ བྷིཀྑཱུ བྷགཝཏོ སནྟིཀཱ སུཏྭཱ ཨུཏྟརིཾ པུཙྪིཾསུ – ‘‘བྷནྟེ, ཨཡཾ ཀིར བྷིཀྑུ ཁུརདྷཱརཾ གལནཱལི༹ཡཾ ཀཏྭཱ ཋིཏོཝ ཨརཧཏྟཾ པཱཔུཎཱཏི, ཨུཔྤཛྫིསྶཏི ནུ ཁོ ཨེཏྟཀེན ཁཎེན ཨརཧཏྟམགྒོ’’ཏི. ‘‘ཨཱམ, བྷིཀྑཝེ, ཨཱརདྡྷཝཱིརིཡསྶ བྷིཀྑུནོ པཱདཾ ཨུཀྑིཔིཏྭཱ བྷཱུམིཡཾ ཋཔེནྟསྶ པཱདེ བྷཱུམིཡཾ ཨསམྤཏྟེཡེཝ ཨརཧཏྟམགྒོ ཨུཔྤཛྫཏི. ཀུསཱིཏསྶ པུགྒལསྶ ཧི ཝསྶསཏཾ ཛཱིཝནཏོ ཨཱརདྡྷཝཱིརིཡསྶ ཁཎམཏྟམྤི ཛཱིཝིཏཾ སེཡྻོ’’ཏི ཝཏྭཱ ཨནུསནྡྷིཾ གྷཊེཏྭཱ ཨིམཾ གཱཐམཱཧ –

༡༡༢.

‘‘ཡོ ཙ ཝསྶསཏཾ ཛཱིཝེ, ཀུསཱིཏོ ཧཱིནཝཱིརིཡོ;

ཨེཀཱཧཾ ཛཱིཝིཀཾ སེཡྻོ, ཝཱིརིཡམཱརབྷཏོ དལ༹ྷ’’ནྟི.

ཏཏྠ ཀུསཱིཏོཏི ཀཱམཝིཏཀྐཱདཱིཧི ཏཱིཧི ཝིཏཀྐེཧི ཝཱིཏིནཱམེནྟོ པུགྒལོ. ཧཱིནཝཱིརིཡོཏི ནིབྦཱིརིཡོ. ཝཱིརིཡམཱརབྷཏོ དལ༹ྷནྟི དུཝིདྷཛ྄ཛྷཱནནིབྦཏྟནསམཏྠཾ ཐིརཾ ཝཱིརིཡཾ ཨཱརབྷནྟསྶ. སེསཾ པུརིམསདིསམེཝ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཔྤདཱསཏྠེརཝཏྠུ ཨེཀཱདསམཾ.

༡༢. པཊཱཙཱརཱཐེརཱིཝཏྠུ

ཡོ ཙ ཝསྶསཏཾ ཛཱིཝེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཊཱཙཱརཾ ཐེརིཾ ཨཱརབྦྷ ཀཐེསི.

སཱ ཀིར སཱཝཏྠིཡཾ ཙཏྟཱལཱིསཀོཊིཝིབྷཝསྶ སེཊྛིནོ དྷཱིཏཱ ཨཧོསི ཨབྷིརཱུཔཱ. ཏཾ སོལ༹སཝསྶུདྡེསིཀཀཱལེ སཏྟབྷཱུམིཀསྶ པཱསཱདསྶ ཨུཔརིམཏལེ རཀྑནྟཱ ཝསཱཔེསུཾ. ཨེཝཾ སནྟེཔི སཱ ཨེཀེན ཨཏྟནོ ཙཱུལཱུ༹པཊྛཱཀེན སདྡྷིཾ ཝིཔྤཊིཔཛྫི. ཨཐསྶཱ མཱཏཱཔིཏརོ སམཛཱཏིཀཀུལེ ཨེཀསྶ ཀུམཱརསྶ པཊིསྶུཎིཏྭཱ ཝིཝཱཧདིཝསཾ ཋཔེསུཾ. ཏསྨིཾ ཨུཔཀཊྛེ སཱ ཏཾ ཙཱུལཱུ༹པཊྛཱཀཾ ཨཱཧ – ‘‘མཾ ཀིར ཨསུཀཀུལསྶ ནཱམ དསྶནྟི, མཡི པཏིཀུལཾ གཏེ མམ པཎྞཱཀཱརཾ གཧེཏྭཱ ཨཱགཏོཔི ཏཏྠ པཝེསནཾ ན ལབྷིསྶསི, སཙེ ཏེ མཡི སིནེཧོ ཨཏྠི, ཨིདཱནེཝ མཾ གཧེཏྭཱ ཡེན ཝཱ ཏེན ཝཱ པལཱཡསྶཱུ’’ཏི. ‘‘སོ སཱདྷུ, བྷདྡེ’’ཏི. ‘‘ཏེན ཧི ཨཧཾ སྭེ པཱཏོཝ ནགརདྭཱརསྶ ཨསུཀཊྛཱནེ ནཱམ ཋསྶཱམི, ཏྭཾ ཨེཀེན ཨུཔཱཡེན ནིཀྑམིཏྭཱ ཏཏྠ ཨཱགཙྪེཡྻཱསཱི’’ཏི ཝཏྭཱ དུཏིཡདིཝསེ སངྐེཏཊྛཱནེ ཨཊྛཱསི. སཱཔི པཱཏོཝ ཀིལིཊྛཾ ཝཏྠཾ ནིཝཱསེཏྭཱ ཀེསེ ཝིཀྐིརིཏྭཱ ཀུཎྜཀེན སརཱིརཾ མཀྑིཏྭཱ ཀུཊཾ ཨཱདཱཡ དཱསཱིཧི སདྡྷིཾ གཙྪནྟཱི ཝིཡ གྷརཱ ནིཀྑམིཏྭཱ ཏཾ ཋཱནཾ ཨགམཱསི. སོ ཏཾ ཨཱདཱཡ དཱུརཾ གནྟྭཱ ཨེཀསྨིཾ གཱམེ ནིཝཱསཾ ཀཔྤེཏྭཱ ཨརཉྙེ ཁེཏྟཾ ཀསིཏྭཱ དཱརུཔཎྞཱདཱིནི ཨཱཧརཏི. ཨིཏརཱ ཀུཊེན ཨུདཀཾ ཨཱཧརིཏྭཱ སཧཏྠཱ ཀོཊྚནཔཙནཱདཱིནི ཀརོནྟཱི ཨཏྟནོ པཱཔསྶ ཕལཾ ཨནུབྷོཏི. ཨཐསྶཱ ཀུཙྪིཡཾ གབྦྷོ པཏིཊྛཱསི. སཱ པརིཔུཎྞགབྦྷཱ ‘‘ཨིདྷ མེ ཀོཙི ཨུཔཀཱརཀོ ནཏྠི, མཱཏཱཔིཏརོ ནཱམ པུཏྟེསུ མུདུཧདཡཱ ཧོནྟི, ཏེསཾ སནྟིཀཾ མཾ ནེཧི, ཏཏྠ མེ གབྦྷཝུཊྛཱནཾ བྷཝིསྶཏཱི’’ཏི སཱམིཀཾ ཡཱཙི. སོ ‘‘ཀིཾ, བྷདྡེ, ཀཐེསི, མཾ དིསྭཱ ཏཝ མཱཏཱཔིཏརོ ཝིཝིདྷཱ ཀམྨཀཱརཎཱ ཀརེཡྻུཾ, ན སཀྐཱ མཡཱ ཏཏྠ གནྟུ’’ནྟི པཊིཀྑིཔི. སཱ པུནཔྤུནཾ ཡཱཙིཏྭཱཔི གམནཾ ཨལབྷམཱནཱ ཏསྶ ཨརཉྙཾ གཏཀཱལེ པཊིཝིསྶཀེ ཨཱམནྟེཏྭཱ ‘‘སཙེ སོ ཨཱགནྟྭཱ མཾ ཨཔསྶནྟོ ‘ཀཧཾ གཏཱ’ཏི པུཙྪིསྶཏི, མམ ཨཏྟནོ ཀུལགྷརཾ གཏབྷཱཝཾ ཨཱཙིཀྑེཡྻཱཐཱ’’ཏི ཝཏྭཱ གེཧདྭཱརཾ པིདཧིཏྭཱ པཀྐཱམི. སོཔི ཨཱགནྟྭཱ ཏཾ ཨཔསྶནྟོ པཊིཝིསྶཀེ པུཙྪིཏྭཱ ཏཾ པཝཏྟིཾ སུཏྭཱ ‘‘ནིཝཏྟེསྶཱམི ན’’ནྟི ཨནུབནྡྷིཏྭཱ ཏཾ དིསྭཱ ནཱནཔྤཀཱརཾ ཡཱཙིཡམཱནོཔི ནིཝཏྟེཏུཾ ནཱསཀྑི. ཨཐསྶཱ ཨེཀསྨིཾ ཋཱནེ ཀམྨཛཝཱཏཱ ཙལིཾསུ. སཱ ཨེཀཾ གཙྪནྟརཾ པཝིསིཏྭཱ, ‘‘སཱམི, ཀམྨཛཝཱཏཱ མེ ཙལིཏཱ’’ཏི ཝཏྭཱ བྷཱུམིཡཾ ནིཔཛྫིཏྭཱ སམྤརིཝཏྟམཱནཱ ཀིཙྪེན དཱརཀཾ ཝིཛཱཡིཏྭཱ ‘‘ཡསྶཏྠཱཡཱཧཾ ཀུལགྷརཾ གཙྪེཡྻཾ, སོ ཨཏྠོ ནིཔྥནྣོ’’ཏི པུནདེཝ ཏེན སདྡྷིཾ གེཧཾ ཨཱགནྟྭཱ ཝཱསཾ ཀཔྤེསི.

ཏསྶཱ ཨཔརེན སམཡེན པུན གབྦྷོ པཏིཊྛཧི. སཱ པརིཔུཎྞགབྦྷཱ ཧུཏྭཱ པུརིམནཡེནེཝ སཱམིཀཾ ཡཱཙིཏྭཱ གམནཾ ཨལབྷམཱནཱ པུཏྟཾ ཨངྐེནཱདཱཡ ཏཐེཝ པཀྐམིཏྭཱ ཏེན ཨནུབནྡྷིཏྭཱ ‘‘ཏིཊྛཱཧཱི’’ཏི ཝུཏྟེ ནིཝཏྟིཏུཾ ན ཨིཙྪི. ཨཐ ནེསཾ གཙྪནྟཱནཾ མཧཱ ཨཀཱལམེགྷོ ཨུདཔཱདི སམནྟཱ ཝིཛྫུལཏཱཧི ཨཱདིཏྟཾ ཝིཡ མེགྷཏྠནིཏེཧི, བྷིཛྫམཱནཾ ཝིཡ ཨུདཀདྷཱརཱནིཔཱཏནིརནྟརཾ ནབྷཾ ཨཧོསི. ཏསྨིཾ ཁཎེ ཏསྶཱ ཀམྨཛཝཱཏཱ ཙལིཾསུ. སཱ སཱམིཀཾ ཨཱམནྟེཏྭཱ, ‘‘སཱམི, ཀམྨཛཝཱཏཱ མེ ཙལིཏཱ, ན སཀྐོམི སནྡྷཱརེཏུཾ, ཨནོཝསྶཀཊྛཱནཾ མེ ཛཱནཱཧཱི’’ཏི ཨཱཧ. སོ ཧཏྠགཏཱཡ ཝཱསིཡཱ ཨིཏོ ཙིཏོ ཙ ཨུཔདྷཱརེནྟོ ཨེཀསྨིཾ ཝམྨིཀམཏྠཀེ ཛཱཏཾ གུམྦཾ དིསྭཱ ཚིནྡིཏུཾ ཨཱརབྷི. ཨཐ ནཾ ཝམྨིཀཏོ ནིཀྑམིཏྭཱ གྷོརཝིསོ ཨཱསཱིཝིསོ ཌཾསི. ཏངྑཎཉྙེཝསྶ སརཱིརཾ ཨནྟོསམུཊྛིཏཱཧི ཨགྒིཛཱལཱཧི ཌཡ྄ཧམཱནཾ ཝིཡ ནཱིལཝཎྞཾ ཧུཏྭཱ ཏཏྠེཝ པཏི. ཨིཏརཱཔི མཧཱདུཀྑཾ ཨནུབྷཝམཱནཱ ཏསྶ ཨཱགམནཾ ཨོལོཀེནྟཱིཔི ཏཾ ཨདིསྭཱཝ ཨཔརམྤི པུཏྟཾ ཝིཛཱཡི. དྭེ དཱརཀཱ ཝཱཏཝུཊྛིཝེགཾ ཨསཧམཱནཱ མཧཱཝིརཝཾ ཝིརཝནྟི. སཱ ཨུབྷོཔི ཏེ ཨུརནྟརེ ཀཏྭཱ དྭཱིཧི ཛཎྞུཀེཧི ཙེཝ ཧཏྠེཧི ཙ བྷཱུམིཡཾ ཨུཔྤཱིལེ༹ཏྭཱ ཏཐཱ ཋིཏཱཝ རཏྟིཾ ཝཱིཏིནཱམེསི. སཀལསརཱིརཾ ནིལློཧིཏཾ ཝིཡ པཎྜུཔལཱསཝཎྞཾ ཨཧོསི. སཱ ཨུཊྛིཏེ ཨརུཎེ མཾསཔེསིཝཎྞཾ ཨེཀཾ པུཏྟཾ ཨངྐེནཱདཱཡ ཨིཏརཾ ཨངྒུལིཡཱ གཧེཏྭཱ ‘‘ཨེཧི, ཏཱཏ, པིཏཱ ཏེ ཨིཏོ གཏོ’’ཏི ཝཏྭཱ སཱམིཀསྶ གཏམགྒེན གཙྪནྟཱི ཏཾ ཝམྨིཀམཏྠཀེ ཀཱལཾ ཀཏྭཱ པཏིཏཾ ནཱིལཝཎྞཾ ཐདྡྷསརཱིརཾ དིསྭཱ ‘‘མཾ ནིསྶཱཡ མམ སཱམིཀོ པནྠེ མཏོ’’ཏི རོདནྟཱི པརིདེཝནྟཱི པཱཡཱསི.

སཱ སཀལརཏྟིཾ དེཝེན ཝུཊྛཏྟཱ ཨཙིརཝཏིཾ ནདིཾ ཛཎྞུཔྤམཱཎེན ཀཊིཔྤམཱཎེན ཐནཔྤམཱཎེན ཨུདཀེན པརིཔུཎྞཾ དིསྭཱ ཨཏྟནོ མནྡབུདྡྷིཏཱཡ དྭཱིཧི དཱརཀེཧི སདྡྷིཾ ཨུདཀཾ ཨོཏརིཏུཾ ཨཝིསཧནྟཱི ཛེཊྛཔུཏྟཾ ཨོརིམཏཱིརེ ཋཔེཏྭཱ ཨིཏརཾ ཨཱདཱཡ པརཏཱིརཾ གནྟྭཱ སཱཁཱབྷངྒཾ ཨཏྠརིཏྭཱ ནིཔཛྫཱཔེཏྭཱ ‘‘ཨིཏརསྶ སནྟིཀཾ གམིསྶཱམཱི’’ཏི བཱལཔུཏྟཀཾ པཧཱཡ ཏརིཏུཾ ཨསཀྐོནྟཱི པུནཔྤུནཾ ནིཝཏྟིཏྭཱ ཨོལོཀཡམཱནཱ པཱཡཱསི. ཨཐསྶཱ ནདཱིམཛ྄ཛྷཾ གཏཀཱལེ ཨེཀོ སེནོ ཏཾ ཀུམཱརཾ དིསྭཱ ‘‘མཾསཔེསཱི’’ཏི སཉྙཱཡ ཨཱཀཱསཏོ བྷསྶི. སཱ ཏཾ པུཏྟསྶཏྠཱཡ བྷསྶནྟཾ དིསྭཱ ཨུབྷོ ཧཏྠེ ཨུཀྑིཔིཏྭཱ ‘‘སཱུསཱུ’’ཏི ཏིཀྑཏྟུཾ མཧཱསདྡཾ ནིཙྪཱརེསི. སེནོ དཱུརབྷཱཝེན ཏཾ ཨསུཏྭཱཝ ཀུམཱརཀཾ གཧེཏྭཱ ཝེཧཱསཾ ཨུཔྤཏིཏྭཱ གཏོ. ཨོརིམཏཱིརེ ཋིཏཔུཏྟོ མཱཏརཾ ནདཱིམཛ྄ཛྷེ ཨུབྷོ ཧཏྠེ ཨུཀྑིཔིཏྭཱ མཧཱསདྡཾ ནིཙྪཱརཡམཱནཾ དིསྭཱ ‘‘མཾ པཀྐོསཏཱི’’ཏི སཉྙཱཡ ཝེགེན ཨུདཀེ པཏི. ཨིཏིསྶཱ བཱལཔུཏྟཾ སེནོ ཧརི, ཛེཊྛཔུཏྟོ ཨུདཀེན ཝཱུལ༹ྷོ.

སཱ ‘‘ཨེཀོ མེ པུཏྟོ སེནེན གཧིཏོ, ཨེཀོ ཨུདཀེན ཝཱུལ༹ྷོ, པནྠེ མེ པཏི མཏོ’’ཏི རོདནྟཱི པརིདེཝནྟཱི གཙྪམཱནཱ སཱཝཏྠིཏོ ཨཱགཙྪནྟཾ ཨེཀཾ པུརིསཾ དིསྭཱ པུཙྪི – ‘‘ཀཏྠ ཝཱསིཀོསི, ཏཱཏཱ’’ཏི? ‘‘སཱཝཏྠིཝཱསིཀོམྷི, ཨམྨཱ’’ཏི. ‘‘སཱཝཏྠིནགརེ ཨསུཀཝཱིཐིཡཾ ཨེཝརཱུཔཾ ཨསུཀཀུལཾ ནཱམ ཨཏྠི, ཛཱནཱསི, ཏཱཏཱ’’ཏི? ‘‘ཛཱནཱམི, ཨམྨ, ཏཾ པན མཱ པུཙྪི, སཙེ ཨཉྙཾ ཛཱནཱསི པུཙྪཱ’’ཏི. ‘‘ཨཉྙེན མེ ཀམྨཾ ནཏྠི, ཏདེཝ པུཙྪཱམི, ཏཱཏཱ’’ཏི. ‘‘ཨམྨ, ཏྭཾ ཨཏྟནོ ཨནཱཙིཀྑིཏུཾ ན དེསི, ཨཛྫ ཏེ སབྦརཏྟིཾ དེཝོ ཝསྶནྟོ དིཊྛོ’’ཏི. ‘‘དིཊྛོ མེ, ཏཱཏ, མཡ྄ཧམེཝེསོ སབྦརཏྟིཾ ཝུཊྛོ, ན ཨཉྙསྶ. མཡ྄ཧཾ པན ཝུཊྛཀཱརཎཾ པཙྪཱ ཏེ ཀཐེསྶཱམི, ཨེཏསྨིཾ ཏཱཝ མེ སེཊྛིགེཧེ པཝཏྟིཾ ཀཐེཧཱི’’ཏི. ‘‘ཨམྨ, ཨཛྫ རཏྟིཾ སེཊྛིཉྩ སེཊྛིབྷརིཡཉྩ སེཊྛིཔུཏྟཉྩཱཏི ཏཡོཔི ཛནེ ཨཝཏྠརམཱནཾ གེཧཾ པཏི, ཏེ ཨེཀཙིཏཀསྨིཾ ཛྷཱཡནྟི. ཨེས དྷཱུམོ པཉྙཱཡཏི, ཨམྨཱ’’ཏི. སཱ ཏསྨིཾ ཁཎེ ནིཝཏྠཝཏྠཾ པཏམཱནཾ ན སཉྫཱནི, ཨུམྨཏྟིཀབྷཱཝཾ པཏྭཱ ཡཐཱཛཱཏཱཝ རོདནྟཱི པརིདེཝནྟཱི –

‘‘ཨུབྷོ པུཏྟཱ ཀཱལཀཏཱ, པནྠེ མཡ྄ཧཾ པཏཱི མཏོ;

མཱཏཱ པིཏཱ ཙ བྷཱཏཱ ཙ, ཨེཀཙིཏམྷི ཌཡ྄ཧརེ’’ཏི. (ཨཔ. ཐེརཱི ༢.༢.༤༩༨) –

ཝིལཔནྟཱི པརིབྦྷམི. མནུསྶཱ ཏཾ དིསྭཱ ‘‘ཨུམྨཏྟིཀཱ ཨུམྨཏྟིཀཱ’’ཏི ཀཙཝརཾ གཧེཏྭཱ པཾསུཾ གཧེཏྭཱ མཏྠཀེ ཨོཀིརནྟཱ ལེཌྜཱུཧི པཧརནྟི. སཏྠཱ ཛེཏཝནམཧཱཝིཧཱརེ ཨཊྛཔརིསམཛ྄ཛྷེ ནིསཱིདིཏྭཱ དྷམྨཾ དེསེནྟོ ཏཾ ཨཱགཙྪམཱནཾ ཨདྡས ཀཔྤསཏསཧསྶཾ པཱུརིཏཔཱརམིཾ ཨབྷིནཱིཧཱརསམྤནྣཾ.

སཱ ཀིར པདུམུཏྟརབུདྡྷཀཱལེ པདུམུཏྟརསཏྠཱརཱ ཨེཀཾ ཝིནཡདྷརཏྠེརིཾ བཱཧཱཡ གཧེཏྭཱ ནནྡནཝནེ ཋཔེནྟཾ ཝིཡ ཨེཏདགྒཊྛཱནེ ཋཔིཡམཱནཾ དིསྭཱ ‘‘ཨཧམྤི ཏུམྷཱདིསསྶ བུདྡྷསྶ སནྟིཀེ ཝིནཡདྷརཏྠེརཱིནཾ ཨགྒཊྛཱནཾ ལབྷེཡྻ’’ནྟི ཨདྷིཀཱརཾ ཀཏྭཱ པཏྠནཾ ཋཔེསི. པདུམུཏྟརབུདྡྷོ ཨནཱགཏཾསཉཱཎཾ པཏྠརིཏྭཱ པཏྠནཱཡ སམིཛ྄ཛྷནབྷཱཝཾ ཉཏྭཱ ‘‘ཨནཱགཏེ གོཏམབུདྡྷསྶ ནཱམ སཱསནེ ཨཡཾ པཊཱཙཱརཱ ནཱམེན ཝིནཡདྷརཏྠེརཱིནཾ ཨགྒཱ བྷཝིསྶཏཱི’’ཏི བྱཱཀཱསི. ཏཾ ཨེཝཾ པཏྠིཏཔཏྠནཾ ཨབྷིནཱིཧཱརསམྤནྣཾ སཏྠཱ དཱུརཏོཝ ཨཱགཙྪནྟིཾ དིསྭཱ ‘‘ཨིམིསྶཱ ཋཔེཏྭཱ མཾ ཨཉྙོ ཨཝསྶཡོ བྷཝིཏུཾ སམཏྠོ ནཱམ ནཏྠཱི’’ཏི ཙིནྟེཏྭཱ ཏཾ ཡཐཱ ཝིཧཱརཱབྷིམུཁཾ ཨཱགཙྪཏི, ཨེཝཾ ཨཀཱསི. པརིསཱ ཏཾ དིསྭཱཝ ‘‘ཨིམིསྶཱ ཨུམྨཏྟིཀཱཡ ཨིཏོ ཨཱགནྟུཾ མཱ དདིཏྠཱ’’ཏི ཨཱཧ. སཏྠཱ ‘‘ཨཔེཐ, མཱ ནཾ ཝཱརཡིཏྠཱ’’ཏི ཝཏྭཱ ཨཝིདཱུརཊྛཱནཾ ཨཱགཏཀཱལེ ‘‘སཏིཾ པཊིལབྷ བྷགིནཱི’’ཏི ཨཱཧ. སཱ ཏཾ ཁཎཾཡེཝ བུདྡྷཱནུབྷཱཝེན སཏིཾ པཊིལབྷི. ཏསྨིཾཀཱལེ ནིཝཏྠཝཏྠསྶ པཏིཏབྷཱཝཾ སལླཀྑེཏྭཱ ཧིརོཏྟཔྤཾ པཙྩུཔཊྛཱཔེཏྭཱ ཨུཀྐུཊིཀཾ ནིསཱིདི. ཨཐསྶཱ ཨེཀོ པུརིསོ ཨུཏྟརསཱཊཀཾ ཁིཔི. སཱ ཏཾ ནིཝཱསེཏྭཱ སཏྠཱརཾ ཨུཔསངྐམིཏྭཱ སུཝཎྞཝཎྞེསུ པཱདེསུ པཉྩཔཏིཊྛིཏེན ཝནྡིཏྭཱ, ‘‘བྷནྟེ, ཨཝསྶཡོ མེ ཧོཐ, པཏིཊྛཱ མེ ཧོཐ. ཨེཀཉྷི མེ པུཏྟཾ སེནོ གཎྷི, ཨེཀོ ཨུདཀེན ཝཱུལ༹ྷོ, པནྠེ མེ པཏི མཏོ, མཱཏཱཔིཏརོ ཙེཝ མེ བྷཱཏཱ ཙ གེཧེན ཨཝཏྠཊཱ ཨེཀཙིཏཀསྨིཾ ཛྷཱཡནྟཱི’’ཏི.

སཏྠཱ ཏསྶཱ ཝཙནཾ སུཏྭཱ ‘‘པཊཱཙཱརེ, མཱ ཙིནྟཡི, ཏཝ ཏཱཎཾ སརཎཾ ཨཝསྶཡོ བྷཝིཏུཾ སམཏྠསྶེཝ སནྟིཀཾ ཨཱགཏཱསི. ཡཐཱ ཧི ཏཝ ཨིདཱནི ཨེཀོ པུཏྟཀོ སེནེན གཧིཏོ, ཨེཀོ ཨུདཀེན ཝཱུལ༹ྷོ, པནྠེ པཏི མཏོ, མཱཏཱཔིཏརོ ཙེཝ བྷཱཏཱ ཙ གེཧེན ཨཝཏྠཊཱ; ཨེཝམེཝ ཨིམསྨིཾ སཾསཱརེ པུཏྟཱདཱིནཾ མཏཀཱལེ ཏཝ རོདནྟིཡཱ པགྒྷརིཏཨསྶུ ཙཏུནྣཾ མཧཱསམུདྡཱནཾ ཨུདཀཏོ བཧུཏར’’ནྟི ཝཏྭཱ ཨིམཾ གཱཐམཱཧ –

‘‘ཙཏཱུསུ སམུདྡེསུ ཛལཾ པརིཏྟཀཾ,

ཏཏོ བཧུཾ ཨསྶུཛལཾ ཨནཔྤཀཾ;

དུཀྑེན ཕུཊྛསྶ ནརསྶ སོཙནཱ,

ཀིཾ ཀཱརཎཱ ཨམྨ ཏུཝཾ པམཛྫསཱི’’ཏི.

ཨེཝཾ སཏྠརི ཨནམཏགྒཔརིཡཱཡཾ ཀཐེནྟེ ཏསྶ སརཱིརེ སོཀོ ཏནུཏྟཾ ཨགམཱསི. ཨཐ ནཾ ཏནུབྷཱུཏསོཀཾ ཉཏྭཱ པུན སཏྠཱ ཨཱམནྟེཏྭཱ ‘‘པཊཱཙཱརེ པུཏྟཱདཡོ ནཱམ པརལོཀཾ གཙྪནྟསྶ ཏཱཎཾ ཝཱ ལེཎཾ ཝཱ སརཎཾ ཝཱ བྷཝིཏུཾ ན སཀྐོནྟི, ཏསྨཱ ཝིཛྫམཱནཱཔི ཏེ ན སནྟིཡེཝ, པཎྜིཏེན པན སཱིལཾ ཝིསོདྷེཏྭཱ ཨཏྟནོ ནིབྦཱནགཱམིམགྒཾ ཁིཔྤམེཝ སོདྷེཏུཾ ཝཊྚཏཱི’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ན སནྟི པུཏྟཱ ཏཱཎཱཡ, ན པིཏཱ ནཱཔི བནྡྷཝཱ;

ཨནྟཀེནཱདྷིཔནྣསྶ, ནཏྠི ཉཱཏཱིསུ ཏཱཎཏཱ. (དྷ. པ. ༢༨༨; ཨཔ. ཐེརཱི ༢.༢.༥༠༡);

‘‘ཨེཏམཏྠཝསྶཾ ཉཏྭཱ, པཎྜིཏོ སཱིལསཾཝུཏོ;

ནིབྦཱནགམནཾ མགྒཾ, ཁིཔྤམེཝ ཝིསོདྷཡེ’’ཏི. (དྷ. པ. ༢༨༩);

དེསནཱཝསཱནེ པཊཱཙཱརཱ མཧཱཔཐཝིཡཾ པཾསུཔརིམཱཎེ ཀིལེསེ ཛྷཱཔེཏྭཱ སོཏཱཔཏྟིཕལེ པཏིཊྛཧི, ཨཉྙེཔི བཧཱུ སོཏཱཔཏྟིཕལཱདཱིནི པཱཔུཎིཾསཱུཏི. སཱ པན སོཏཱཔནྣཱ ཧུཏྭཱ སཏྠཱརཾ པབྦཛྫཾ ཡཱཙི. སཏྠཱ ཏཾ བྷིཀྑུནཱིནཾ སནྟིཀཾ པཧིཎིཏྭཱ པབྦཱཛེསི. སཱ ལདྡྷཱུཔསམྤདཱ པཊིཏཱཙཱརཏྟཱ པཊཱཙཱརཱཏྭེཝ པཉྙཱཡི. སཱ ཨེཀདིཝསཾ ཀུཊེན ཨུདཀཾ ཨཱདཱཡ པཱདེ དྷོཝནྟཱི ཨུདཀཾ ཨཱསིཉྩི, ཏཾ ཐོཀཾ གནྟྭཱ པཙྪིཛྫི. དུཏིཡཝཱརེ ཨཱསིཏྟཾ ཏཏོ དཱུརཏརཾ ཨགམཱསི. ཏཏིཡཝཱརེ ཨཱསིཏྟཾ ཏཏོཔི དཱུརཏརནྟི. སཱ ཏདེཝ ཨཱརམྨཎཾ གཧེཏྭཱ ཏཡོ ཝཡེ པརིཙྪིནྡིཏྭཱ ‘‘མཡཱ པཋམཾ ཨཱསིཏྟཾ ཨུདཀཾ ཝིཡ ཨིམེ སཏྟཱ པཋམཝཡེཔི མརནྟི, ཏཏོ དཱུརཏརཾ གཏཾ དུཏིཡཝཱརེ ཨཱསིཏྟཾ ཨུདཀཾ ཝིཡ མཛ྄ཛྷིམཝཡེཔི མརནྟི, ཏཏོཔི དཱུརཏརཾ གཏཾ ཏཏིཡཝཱརེ ཨཱསིཏྟཾ ཨུདཀཾ ཝིཡ པཙྪིམཝཡེཔི མརནྟིཡེཝཱ’’ཏི ཙིནྟེསི. སཏྠཱ གནྡྷཀུཊིཡཾ ནིསིནྣོཝ ཨོབྷཱསཾ ཕརིཏྭཱ ཏསྶཱ སམྨུཁེ ཋཏྭཱ ཀཐེནྟོ ཝིཡ ‘‘ཨེཝམེཏཾ པཊཱཙཱརེ, པཉྩནྣམྤི ཁནྡྷཱནཾ ཨུདཡབྦཡཾ ཨཔསྶནྟསྶ ཝསྶསཏཾ ཛཱིཝནཏོ ཏེསཾ ཨུདཡབྦཡཾ པསྶནྟསྶ ཨེཀཱཧམྤི ཨེཀཀྑཎམྤི ཛཱིཝིཏཾ སེཡྻོ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ གཱཐམཱཧ –

༡༡༣.

‘‘ཡོ ཙ ཝསྶསཏཾ ཛཱིཝེ, ཨཔསྶཾ ཨུདཡབྦཡཾ;

ཨེཀཱཧཾ ཛཱིཝིཏཾ སེཡྻོ, པསྶཏོ ཨུདཡབྦཡ’’ནྟི.

ཏཏྠ ཨཔསྶཾ ཨུདཡབྦཡནྟི པཉྩནྣཾ ཁནྡྷཱནཾ པཉྩཝཱིསཏིཡཱ ལཀྑཎེཧི ཨུདཡཉྩ ཝཡཉྩ ཨཔསྶནྟོ. པསྶཏོ ཨུདཡབྦཡནྟི ཏེསཾ ཨུདཡཉྩ ཝཡཉྩ པསྶནྟསྶ. ཨིཏརསྶ ཛཱིཝནཏོ ཨེཀཱཧམྤི ཛཱིཝིཏཾ སེཡྻོཏི.

དེསནཱཝསཱནེ པཊཱཙཱརཱ སཧ པཊིསམྦྷིདཱཧི ཨརཧཏྟཾ པཱཔུཎི.

པཊཱཙཱརཱཐེརཱིཝཏྠུ དྭཱདསམཾ.

༡༣. ཀིསཱགོཏམཱིཝཏྠུ

ཡོ ཙ ཝསྶསཏཾ ཛཱིཝེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀིསཱགོཏམིཾ ཨཱརབྦྷ ཀཐེསི.

སཱཝཏྠིཡཾ ཀིརེཀསྶ སེཊྛིསྶ གེཧེ ཙཏྟཱལཱིསཀོཊིདྷནཾ ཨངྒཱརཱ ཨེཝ ཧུཏྭཱ ཨཊྛཱསི. སེཊྛི ཏཾ དིསྭཱ ཨུཔྤནྣསོཀོ ཨཱཧཱརཾ པཊིཀྑིཔིཏྭཱ མཉྩཀེ ནིཔཛྫི. ཏསྶེཀོ སཧཱཡཀོ གེཧཾ གནྟྭཱ, ‘‘སམྨ, ཀསྨཱ སོཙསཱི’’ཏི པུཙྪིཏྭཱ ཏཾ པཝཏྟིཾ སུཏྭཱ, ‘‘སམྨ, མཱ སོཙི, ཨཧཾ ཨེཀཾ ཨུཔཱཡཾ ཛཱནཱམི, ཏཾ ཀརོཧཱི’’ཏི. ‘‘ཀིཾ ཀརོམི, སམྨཱ’’ཏི? ཨཏྟནོ ཨཱཔཎེ ཀིལཉྫཾ པསཱརེཏྭཱ ཏཏྠ ཏེ ཨངྒཱརེ རཱསིཾ ཀཏྭཱ ཝིཀྐིཎནྟོ ཝིཡ ནིསཱིད, ཨཱགཏཱགཏེསུ མནུསྶེསུ ཡེ ཨེཝཾ ཝདནྟི – ‘‘སེསཛནཱ ཝཏྠཏེལམདྷུཕཱཎིཏཱདཱིནི ཝིཀྐིཎནྟི, ཏྭཾ པན ཨངྒཱརེ ཝིཀྐིཎནྟོ ནིསིནྣོ’’ཏི. ཏེ ཝདེཡྻཱསི – ‘‘ཨཏྟནོ སནྟཀཾ ཨཝིཀྐིཎནྟོ ཀིཾ ཀརོམཱི’’ཏི? ཡོ པན ཏཾ ཨེཝཾ ཝདཏི ‘‘སེསཛནཱ ཝཏྠཏེལམདྷུཕཱཎིཏཱདཱིནི ཝིཀྐིཎནྟི, ཏྭཾ པན ཧིརཉྙསུཝཎྞཾ ཝིཀྐིཎནྟོ ནིསིནྣོ’’ཏི. ཏཾ ཝདེཡྻཱསི ‘‘ཀཧཾ ཧིརཉྙསུཝཎྞ’’ནྟི. ‘‘ཨིད’’ནྟི ཙ ཝུཏྟེ ‘‘ཨཱཧར, ཏཱཝ ན’’ནྟི ཧཏྠེཧི པཊིཙྪེཡྻཱསི. ཨེཝཾ དིནྣཾ ཏཝ ཧཏྠེ ཧིརཉྙསུཝཎྞཾ བྷཝིསྶཏི. སཱ པན སཙེ ཀུམཱརིཀཱ ཧོཏི, ཏཝ གེཧེ པུཏྟསྶ ནཾ ཨཱཧརིཏྭཱ ཙཏྟཱལཱིསཀོཊིདྷནཾ ཏསྶཱ ནིཡྻཱདེཏྭཱ ཏཱཡ དིནྣཾ ཝལཉྫེཡྻཱསི. སཙེ ཀུམཱརཀོ ཧོཏི, ཏཝ གེཧེ ཝཡཔྤཏྟཾ དྷཱིཏརཾ ཏསྶ དཏྭཱ ཙཏྟཱལཱིསཀོཊིདྷནཾ ནིཡྻཱདེཏྭཱ ཏེན དིནྣཾ ཝལཉྫེཡྻཱསཱིཏི. སོ ‘‘བྷདྡཀོ ཨུཔཱཡོ’’ཏི ཨཏྟནོ ཨཱཔཎེ ཨངྒཱརེ རཱསིཾ ཀཏྭཱ ཝིཀྐིཎནྟོ ཝིཡ ནིསཱིདི. ཡེ པན ནཾ ཨེཝམཱཧཾསུ – ‘‘སེསཛནཱ ཝཏྠཏེལམདྷུཕཱཎིཏཱདཱིནི ཝིཀྐིཎནྟི, ཀིཾ པན ཏྭཾ ཨངྒཱརེ ཝིཀྐིཎནྟོ ནིསིནྣོ’’ཏི? ཏེསཾ ‘‘ཨཏྟནོ སནྟཀཾ ཨཝིཀྐིཎནྟོ ཀིཾ ཀརོམཱི’’ཏི པཊིཝཙནཾ ཨདཱསི. ཨཐེཀཱ གོཏམཱི ནཱམ ཀུམཱརིཀཱ ཀིསསརཱིརཏཱཡ ཀིསཱགོཏམཱིཏི པཉྙཱཡམཱནཱ པརིཛིཎྞཀུལསྶ དྷཱིཏཱ ཨཏྟནོ ཨེཀེན ཀིཙྩེན ཨཱཔཎདྭཱརཾ གནྟྭཱ ཏཾ སེཊྛིཾ དིསྭཱ ཨེཝམཱཧ – ‘‘ཀིཾ, ཏཱཏ, སེསཛནཱ ཝཏྠཏེལམདྷུཕཱཎིཏཱདཱིནི ཝིཀྐིཎནྟི, ཏྭཾ ཧིརཉྙསུཝཎྞཾ ཝིཀྐིཎནྟོ ནིསིནྣོ’’ཏི? ‘‘ཀཧཾ, ཨམྨ, ཧིརཉྙསུཝཎྞ’’ནྟི? ‘‘ནནུ ‘ཏྭཾ ཏདེཝ གཧེཏྭཱ ནིསིནྣོསཱི’ཏི, ཨཱཧར, ཏཱཝ ནཾ, ཨམྨཱ’’ཏི. སཱ ཧཏྠཔཱུརཾ གཧེཏྭཱ ཏསྶ ཧཏྠེསུ ཋཔེསི, ཏཾ ཧིརཉྙསུཝཎྞམེཝ ཨཧོསི.

ཨཐ ནཾ སེཊྛི ‘‘ཀཏརཾ ཏེ, ཨམྨ, གེཧ’’ནྟི པུཙྪིཏྭཱ ‘‘ཨསུཀཾ ནཱམཱ’’ཏི ཝུཏྟེ ཏསྶཱ ཨསྶཱམིཀབྷཱཝཾ ཉཏྭཱ དྷནཾ པཊིསཱམེཏྭཱ ཏཾ ཨཏྟནོ པུཏྟསྶ ཨཱནེཏྭཱ ཙཏྟཱལཱིསཀོཊིདྷནཾ པཊིཙྪཱཔེསི. སབྦཾ ཧིརཉྙསུཝཎྞམེཝ ཨཧོསི. ཏསྶཱ ཨཔརེན སམཡེན གབྦྷོ པཏིཊྛཧི. སཱ དསམཱསཙྩཡེན པུཏྟཾ ཝིཛཱཡི. སོ པདསཱ གམནཀཱལེ ཀཱལམཀཱསི. སཱ ཨདིཊྛཔུབྦམརཎཏཱཡ ཏཾ ཛྷཱཔེཏུཾ ནཱིཧརནྟེ ཝཱརེཏྭཱ ‘‘པུཏྟསྶ མེ བྷེསཛྫཾ པུཙྪིསྶཱམཱི’’ཏི མཏཀལེ༹ཝརཾ ཨངྐེནཱདཱཡ ‘‘ཨཔི ནུ མེ པུཏྟསྶ བྷེསཛྫཾ ཛཱནཱཐཱ’’ཏི པུཙྪནྟཱི གྷརཔཊིཔཱཊིཡཱ ཝིཙརཏི. ཨཐ ནཾ མནུསྶཱ, ‘‘ཨམྨ, ཏྭཾ ཨུམྨཏྟིཀཱ ཛཱཏཱ, མཏཀཔུཏྟསྶ བྷེསཛྫཾ པུཙྪནྟཱི ཝིཙརསཱི’’ཏི ཝདནྟི. སཱ ‘‘ཨཝསྶཾ མམ པུཏྟསྶ བྷེསཛྫཾ ཛཱནནཀཾ ལབྷིསྶཱམཱི’’ཏི མཉྙམཱནཱ ཝིཙརཏི. ཨཐ ནཾ ཨེཀོ པཎྜིཏཔུརིསོ དིསྭཱ, ‘‘ཨཡཾ མམ དྷཱིཏཱ པཋམཾ པུཏྟཀཾ ཝིཛཱཏཱ བྷཝིསྶཏི ཨདིཊྛཔུབྦམརཎཱ, མཡཱ ཨིམིསྶཱ ཨཝསྶཡེན བྷཝིཏུཾ ཝཊྚཏཱི’’ཏི ཙིནྟེཏྭཱ ཨཱཧ – ‘‘ཨམྨ, ཨཧཾ བྷེསཛྫཾ ན ཛཱནཱམི, བྷེསཛྫཛཱནནཀཾ པན ཛཱནཱམཱི’’ཏི. ‘‘ཀོ ཛཱནཱཏི, ཏཱཏཱ’’ཏི? ‘‘སཏྠཱ, ཨམྨ, ཛཱནཱཏི, གཙྪ, ཏཾ པུཙྪཱཧཱི’’ཏི. སཱ ‘‘གམིསྶཱམི, ཏཱཏ, པུཙྪིསྶཱམི, ཏཱཏཱ’’ཏི ཝཏྭཱ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ཋིཏཱ པུཙྪི – ‘‘ཏུམྷེ ཀིར མེ པུཏྟསྶ བྷེསཛྫཾ ཛཱནཱཐ, བྷནྟེ’’ཏི? ‘‘ཨཱམ, ཛཱནཱམཱི’’ཏི. ‘‘ཀིཾ ལདྡྷུཾ ཝཊྚཏཱི’’ཏི? ‘‘ཨཙྪརགྒཧཎམཏྟེ སིདྡྷཏྠཀེ ལདྡྷུཾ ཝཊྚཏཱི’’ཏི. ‘‘ལབྷིསྶཱམི, བྷནྟེ’’. ‘‘ཀསྶ པན གེཧེ ལདྡྷུཾ ཝཊྚཏཱི’’ཏི? ‘‘ཡསྶ གེཧེ པུཏྟོ ཝཱ དྷཱིཏཱ ཝཱ ན ཀོཙི མཏཔུབྦོ’’ཏི. སཱ ‘‘སཱདྷུ, བྷནྟེ’’ཏི སཏྠཱརཾ ཝནྡིཏྭཱ མཏཔུཏྟཀཾ ཨངྐེནཱདཱཡ ཨནྟོགཱམཾ པཝིསིཏྭཱ པཋམགེཧསྶ དྭཱརེ ཋཏྭཱ ‘‘ཨཏྠི ནུ ཁོ ཨིམསྨིཾ གེཧེ སིདྡྷཏྠཀོ, པུཏྟསྶ ཀིར མེ བྷེསཛྫཾ ཨེཏ’’ནྟི ཝཏྭཱ ‘‘ཨཏྠཱི’’ཏི ཝུཏྟེ ཏེན ཧི དེཐཱཏི. ཏེཧི ཨཱཧརིཏྭཱ སིདྡྷཏྠཀེསུ དིཡྻམཱནེསུ ‘‘ཨིམསྨིཾ གེཧེ པུཏྟོ ཝཱ དྷཱིཏཱ ཝཱ མཏཔུབྦོ ཀོཙི ནཏྠི, ཨམྨཱ’’ཏི པུཙྪིཏྭཱ ‘‘ཀིཾ ཝདེསི, ཨམྨ? ཛཱིཝམཱནཱ ཧི ཀཏིཔཡཱ, མཏཀཱ ཨེཝ བཧུཀཱ’’ཏི ཝུཏྟེ ‘‘ཏེན ཧི གཎྷཐ ཝོ སིདྡྷཏྠཀེ, ནེཏཾ མམ པུཏྟསྶ བྷེསཛྫ’’ནྟི པཊིཨདཱསི.

སཱ ཨིམིནཱ ནཱིཡཱམེན ཨཱདིཏོ པཊྛཱཡ ནཾ པུཙྪནྟཱི ཝིཙརི. སཱ ཨེཀགེཧེཔི སིདྡྷཏྠཀེ ཨགཧེཏྭཱ སཱཡནྷསམཡེ ཙིནྟེསི – ‘‘ཨཧོ བྷཱརིཡཾ ཀམྨཾ, ཨཧཾ ‘མམེཝ པུཏྟོ མཏོ’ཏི སཉྙམཀཱསིཾ, སཀལགཱམེཔི པན ཛཱིཝནྟེཧི མཏཀཱཝ བཧུཏརཱ’’ཏི. ཏསྶཱ ཨེཝཾ ཙིནྟཡམཱནཱཡ པུཏྟསིནེཧཾ མུདུཀཧདཡཾ ཐདྡྷབྷཱཝཾ ཨགམཱསི. སཱ པུཏྟཾ ཨརཉྙེ ཚཌྜེཏྭཱ སཏྠུ སནྟིཀཾ གནྟྭཱ ཝནྡིཏྭཱ ཨེཀམནྟཾ ཨཊྛཱསི. ཨཐ ནཾ སཏྠཱ ‘‘ལདྡྷཱ ཏེ ཨེཀཙྪརམཏྟཱ སིདྡྷཏྠཀཱ’’ཏི ཨཱཧ. ‘‘ན ལདྡྷཱ, བྷནྟེ, སཀལགཱམེ ཛཱིཝནྟེཧི མཏཀཱཝ བཧུཏརཱ’’ཏི. ཨཐ ནཾ སཏྠཱ ‘‘ཏྭཾ ‘མམེཝ པུཏྟོ མཏོ’ཏི སལླཀྑེསི, དྷུཝདྷམྨོ ཨེས སཏྟཱནཾ. མཙྩུརཱཛཱ ཧི སབྦསཏྟེ ཨཔརིཔུཎྞཛ྄ཛྷཱསཡེ ཨེཝ མཧོགྷོ ཝིཡ པརིཀཌྜྷམཱནོཡེཝ ཨཔཱཡསམུདྡེ པཀྑིཔཏཱི’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཏཾ པུཏྟཔསུསམྨཏྟཾ, བྱཱསཏྟམནསཾ ནརཾ;

སུཏྟཾ གཱམཾ མཧོགྷོཝ, མཙྩུ ཨཱདཱཡ གཙྪཏཱི’’ཏི. (དྷ. པ. ༢༨༧);

གཱཐཱཔརིཡོསཱནེ ཀིསཱགོཏམཱི སོཏཱཔཏྟིཕལེ པཏིཊྛཧི, ཨཉྙེཔི བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཱ པན སཏྠཱརཾ པབྦཛྫཾ ཡཱཙི, སཏྠཱ ཏཾ བྷིཀྑུནཱིནཾ སནྟིཀཾ པེསེཏྭཱ པབྦཱཛེསི. སཱ ལདྡྷཱུཔསམྤདཱ ཀིསཱགོཏམཱི ཐེརཱིཏི པཉྙཱཡི. སཱ ཨེཀདིཝསཾ ཨུཔོསཐཱགཱརེ ཝཱརཾ པཏྭཱ དཱིཔཾ ཛཱལེཏྭཱ ནིསིནྣཱ དཱིཔཛཱལཱ ཨུཔྤཛྫནྟིཡོ ཙ བྷིཛྫནྟིཡོ ཙ དིསྭཱ ‘‘ཨེཝམེཝ ཨིམེ སཏྟཱ ཨུཔྤཛྫནྟི ཙེཝ ནིརུཛ྄ཛྷནྟི ཙ, ནིབྦཱནཔྤཏྟཱ ཨེཝ ན པཉྙཱཡནྟཱི’’ཏི ཨཱརམྨཎཾ ཨགྒཧེསི. སཏྠཱ གནྡྷཀུཊིཡཾ ནིསིནྣོཝ ཨོབྷཱསཾ ཕརིཏྭཱ ཏསྶཱ སམྨུཁེ ནིསཱིདིཏྭཱ ཀཐེནྟོ ཝིཡ ‘‘ཨེཝམེཝ, གོཏམི, ཨིམེ སཏྟཱ དཱིཔཛཱལཱ ཝིཡ ཨུཔྤཛྫནྟི ཙེཝ ནིརུཛ྄ཛྷནྟི ཙ, ནིབྦཱནཔྤཏྟཱ ཨེཝ ན པཉྙཱཡནྟི, ཨེཝཾ ནིབྦཱནཾ ཨཔསྶནྟཱནཾ ཝསྶསཏཾ ཛཱིཝནཏོ ནིབྦཱནཾ པསྶནྟསྶ ཁཎམཏྟམྤི ཛཱིཝིཏཾ སེཡྻོ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༡༤.

‘‘ཡོ ཙ ཝསྶསཏཾ ཛཱིཝེ, ཨཔསྶཾ ཨམཏཾ པདཾ;

ཨེཀཱཧཾ ཛཱིཝིཏཾ སེཡྻོ, པསྶཏོ ཨམཏཾ པད’’ནྟི.

ཏཏྠ ཨམཏཾ པདནྟི མརཎཝིརཧིཏཀོཊྛཱསཾ, ཨམཏམཧཱནིབྦཱནནྟི ཨཏྠོ. སེསཾ པུརིམསདིསམེཝ.

དེསནཱཝསཱནེ ཀིསཱགོཏམཱི ཡཐཱནིསིནྣཱཝ སཧ པཊིསམྦྷིདཱཧི ཨརཧཏྟེ པཏིཊྛཧཱིཏི.

ཀིསཱགོཏམཱིཝཏྠུ ཏེརསམཾ.

༡༤. བཧུཔུཏྟིཀཏྠེརཱིཝཏྠུ

ཡོ ཙ ཝསྶསཏཾ ཛཱིཝེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ བཧུཔུཏྟིཀཾ ཐེརིཾ ཨཱརབྦྷ ཀཐེསི.

སཱཝཏྠིཡཾ ཀིརེཀསྨིཾ ཀུལེ སཏྟ པུཏྟཱ སཏྟ ཙ དྷཱིཏརོ ཨཧེསུཾ. ཏེ སབྦེཔི ཝཡཔྤཏྟཱ གེཧེ པཏིཊྛཧིཏྭཱ ཨཏྟནོ དྷམྨཏཱཡ སུཁཔྤཏྟཱ ཨཧེསུཾ. ཏེསཾ ཨཔརེན སམཡེན པིཏཱ ཀཱལམཀཱསི. མཧཱཨུཔཱསིཀཱ སཱམིཀེ ནཊྛེཔི ན ཏཱཝ ཀུཊུམྦཾ ཝིབྷཛཏི. ཨཐ ནཾ པུཏྟཱ ཨཱཧཾསུ – ‘‘ཨམྨ, ཨམྷཱཀཾ པིཏརི ནཊྛེ ཏུཡ྄ཧཾ ཀོ ཨཏྠོ ཀུཊུམྦེན, ཀིཾ མཡཾ ཏཾ ཨུཔཊྛཱཏུཾ ན སཀྐོམཱ’’ཏི. སཱ ཏེསཾ ཀཐཾ སུཏྭཱ ཏུཎྷཱི ཧུཏྭཱ པུནཔྤུནཾ ཏེཧི ཝུཙྩམཱནཱ ‘‘པུཏྟཱ མཾ པཊིཛགྒིསྶནྟི, ཀིཾ མེ ཝིསུཾ ཀུཊུམྦེནཱ’’ཏི སབྦཾ སཱཔཏེཡྻཾ མཛ྄ཛྷེ བྷིནྡིཏྭཱ ཨདཱསི. ཨཐ ནཾ ཀཏིཔཱཧཙྩཡེན ཛེཊྛཔུཏྟསྶ བྷརིཡཱ ‘‘ཨཧོ ཨམྷཱཀཾ, ཨཡྻཱ, ‘ཛེཊྛཔུཏྟོ མེ’ཏི དྭེ ཀོཊྛཱསེ དཏྭཱ ཝིཡ ཨིམམེཝ གེཧཾ ཨཱགཙྪཏཱི’’ཏི ཨཱཧ. སེསཔུཏྟཱནཾ བྷརིཡཱཔི ཨེཝམེཝ ཝདིཾསུ. ཛེཊྛདྷཱིཏརཾ ཨཱདིཾ ཀཏྭཱ ཏཱསཾ གེཧཾ གཏཀཱལེཔི ནཾ ཨེཝམེཝ ཝདིཾསུ. སཱ ཨཝམཱནཔྤཏྟཱ ཧུཏྭཱ ‘‘ཀིཾ ཨིམེསཾ སནྟིཀེ ཝུཊྛེན, བྷིཀྑུནཱི ཧུཏྭཱ ཛཱིཝིསྶཱམཱི’’ཏི བྷིཀྑུནཱིཨུཔསྶཡཾ གནྟྭཱ པབྦཛྫཾ ཡཱཙི. ཏཱ ནཾ པབྦཱཛེསུཾ. སཱ ལདྡྷཱུཔསམྤདཱ ཧུཏྭཱ བཧུཔུཏྟིཀཏྠེརཱིཏི པཉྙཱཡི. སཱ ‘‘ཨཧཾ མཧལླཀཀཱལེ པབྦཛིཏཱ, ཨཔྤམཏྟཱཡ མེ བྷཝིཏབྦ’’ནྟི བྷིཀྑུནཱིནཾ ཝཏྟཔཊིཝཏྟཾ ཀརོནྟཱི ‘‘སབྦརཏྟིཾ སམཎདྷམྨཾ ཀརིསྶཱམཱི’’ཏི ཧེཊྛཱཔཱསཱདེ ཨེཀཾ ཐམྦྷཾ ཧཏྠེན གཧེཏྭཱ ཏཾ ཨཱཝིཉྪམཱནཱཝ སམཎདྷམྨཾ ཀརོཏི, ཙངྐམམཱནཱཔི ‘‘ཨནྡྷཀཱརཊྛཱནེ མེ རུཀྑེ ཝཱ ཀཏྠཙི ཝཱ སཱིསཾ པཊིཧཉྙེཡྻཱ’’ཏི ཏཾ རུཀྑཾ ཧཏྠེན གཧེཏྭཱ ཏཾ ཨཱཝིཉྪམཱནཱཝ སམཎདྷམྨཾ ཀརོཏི, ‘‘སཏྠཱརཱ དེསིཏདྷམྨམེཝ ཀརིསྶཱམཱི’’ཏི དྷམྨཾ ཨཱཝཛྫེཏྭཱ དྷམྨཾ ཨནུསྶརམཱནཱཝ སམཎདྷམྨཾ ཀརོཏི. ཨཐ སཏྠཱ གནྡྷཀུཊིཡཾ ནིསིནྣོཝ ཨོབྷཱསཾ ཕརིཏྭཱ སམྨུཁེ ནིསིནྣོ ཝིཡ ཏཱཡ སདྡྷིཾ ཀཐེནྟོ ‘‘བཧུཔུཏྟིཀེ མཡཱ དེསིཏཾ དྷམྨཾ ཨནཱཝཛྫེནྟསྶ ཨཔསྶནྟསྶ ཝསྶསཏཾ ཛཱིཝནཏོ མཡཱ དེསིཏཾ དྷམྨཾ པསྶནྟསྶ མུཧུཏྟམྤི ཛཱིཝིཏཾ སེཡྻོ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༡༥.

‘‘ཡོ ཙ ཝསྶསཏཾ ཛཱིཝེ, ཨཔསྶཾ དྷམྨམུཏྟམཾ;

ཨེཀཱཧཾ ཛཱིཝིཏཾ སེཡྻོ, པསྶཏོ དྷམྨམུཏྟམ’’ནྟི.

ཏཏྠ དྷམྨམུཏྟམནྟི ནཝཝིདྷཾ ལོཀུཏྟརདྷམྨཾ. སོ ཧི ཨུཏྟམོ དྷམྨོ ནཱམ. ཡོ ཧི ཏཾ ན པསྶཏི, ཏསྶ ཝསྶསཏམྤི ཛཱིཝནཏོ ཏཾ དྷམྨཾ པསྶནྟསྶ པཊིཝིཛ྄ཛྷནྟསྶ ཨེཀཱཧམྤི ཨེཀཀྑཎམྤི ཛཱིཝིཏཾ སེཡྻོཏི.

གཱཐཱཔརིཡོསཱནེ བཧུཔུཏྟིཀཏྠེརཱི སཧ པཊིསམྦྷིདཱཧི ཨརཧཏྟེ པཏིཊྛཧཱིཏི.

བཧུཔུཏྟིཀཏྠེརཱིཝཏྠུ ཙུདྡསམཾ.

སཧསྶཝགྒཝཎྞནཱ ནིཊྛིཏཱ.

ཨཊྛམོ ཝགྒོ.

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཁུདྡཀནིཀཱཡེ

དྷམྨཔད-ཨཊྛཀཐཱ

(དུཏིཡོ བྷཱགོ)

༩. པཱཔཝགྒོ

༡. ཙཱུལེ༹ཀསཱཊཀབྲཱཧྨཎཝཏྠུ

ཨབྷིཏྠརེཐ ཀལྱཱཎེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཙཱུལེ༹ཀསཱཊཀབྲཱཧྨཎཾ ཨཱརབྦྷ ཀཐེསི.

ཝིཔསྶིདསབལསྶ ཀཱལསྨིཉྷི མཧཱཨེཀསཱཊཀབྲཱཧྨཎོ ནཱམ ཨཧོསི, ཨཡཾ པན ཨེཏརཧི སཱཝཏྠིཡཾ ཙཱུལེ༹ཀསཱཊཀོ ནཱམ. ཏསྶ ཧི ཨེཀོ ནིཝཱསནསཱཊཀོ ཨཧོསི, བྲཱཧྨཎིཡཱཔི ཨེཀོ. ཨུབྷིནྣམྤི ཨེཀམེཝ པཱརུཔནཾ, བཧི གམནཀཱལེ བྲཱཧྨཎོ ཝཱ བྲཱཧྨཎཱི ཝཱ ཏཾ པཱརུཔཏི. ཨཐེཀདིཝསཾ ཝིཧཱརེ དྷམྨསྶཝནེ གྷོསིཏེ བྲཱཧྨཎོ ཨཱཧ – ‘‘བྷོཏི དྷམྨསྶཝནཾ གྷོསིཏཾ, ཀིཾ དིཝཱ དྷམྨསྶཝནཾ གམིསྶསི, ཨུདཱཧུ རཏྟིཾ. པཱརུཔནསྶ ཧི ཨབྷཱཝེན ན སཀྐཱ ཨམྷེཧི ཨེཀཏོ གནྟུ’’ནྟི. བྲཱཧྨཎཱི, ‘‘སཱམི, ཨཧཾ དིཝཱ གམིསྶཱམཱི’’ཏི སཱཊཀཾ པཱརུཔིཏྭཱ ཨགམཱསི. བྲཱཧྨཎོ དིཝསབྷཱགཾ གེཧེ ཝཱིཏིནཱམེཏྭཱ རཏྟིཾ གནྟྭཱ སཏྠུ པུརཏོ ནིསིནྣོཝ དྷམྨཾ ཨསྶོསི. ཨཐསྶ སརཱིརཾ ཕརམཱནཱ པཉྩཝཎྞཱ པཱིཏི ཨུཔྤཛྫི. སོ སཏྠཱརཾ པཱུཛིཏུཀཱམོ ཧུཏྭཱ ‘‘སཙེ ཨིམཾ སཱཊཀཾ དསྶཱམི, ནེཝ བྲཱཧྨཎིཡཱ, ན མཡ྄ཧཾ པཱརུཔནཾ བྷཝིསྶཏཱི’’ཏི ཙིནྟེསི. ཨཐསྶ མཙྪེརཙིཏྟཱནཾ སཧསྶཾ ཨུཔྤཛྫི, པུནེཀཾ སདྡྷཱཙིཏྟཾ ཨུཔྤཛྫི. ཏཾ ཨབྷིབྷཝིཏྭཱ པུན མཙྪེརསཧསྶཾ ཨུཔྤཛྫི. ཨིཏིསྶ བལཝམཙྪེརཾ བནྡྷིཏྭཱ གཎྷནྟཾ ཝིཡ སདྡྷཱཙིཏྟཾ པཊིབཱཧཏིཡེཝ. ཏསྶ ‘‘དསྶཱམི, ན དསྶཱམཱི’’ཏི ཙིནྟེནྟསྶེཝ པཋམཡཱམོ ཨཔགཏོ, མཛ྄ཛྷིམཡཱམོ སམྤཏྟོ. ཏསྨིམྤི དཱཏུཾ ནཱསཀྑི. པཙྪིམཡཱམེ སམྤཏྟེ སོ ཙིནྟེསི – ‘‘མམ སདྡྷཱཙིཏྟེན མཙྪེརཙིཏྟེན ཙ སདྡྷིཾ ཡུཛ྄ཛྷནྟསྶེཝ དྭེ ཡཱམཱ ཝཱིཏིཝཏྟཱ, ཨིདཾ མམ ཨེཏྟཀཾ མཙྪེརཙིཏྟཾ ཝཌྜྷམཱནཾ ཙཏཱུཧི ཨཔཱཡེཧི སཱིསཾ ཨུཀྑིཔིཏུཾ ན དསྶཏི, དསྶཱམི ན’’ནྟི. སོ མཙྪེརསཧསྶཾ ཨབྷིབྷཝིཏྭཱ སདྡྷཱཙིཏྟཾ པུརེཙཱརིཀཾ ཀཏྭཱ སཱཊཀཾ ཨཱདཱཡ སཏྠུ པཱདམཱུལེ ཋཔེཏྭཱ ‘‘ཛིཏཾ མེ, ཛིཏཾ མེ’’ཏི ཏིཀྑཏྟུཾ མཧཱསདྡམཀཱསི.

རཱཛཱ པསེནདི ཀོསལོ དྷམྨཾ སུཎནྟོ ཏཾ སདྡཾ སུཏྭཱ ‘‘པུཙྪཐ ནཾ, ཀིཾ ཀིར ཏེན ཛིཏ’’ནྟི ཨཱཧ. སོ རཱཛཔུརིསེཧི པུཙྪིཏོ ཏམཏྠཾ ཨཱརོཙེསི. ཏཾ སུཏྭཱ རཱཛཱ ‘‘དུཀྐརཾ ཀཏཾ བྲཱཧྨཎེན, སངྒཧམསྶ ཀརིསྶཱམཱི’’ཏི ཨེཀཾ སཱཊཀཡུགཾ དཱཔེསི. སོ ཏམྤི ཏཐཱགཏསྶེཝ ཨདཱསི. པུན རཱཛཱ དྭེ ཙཏྟཱརི ཨཊྛ སོལ༹སཱཏི དྭིགུཎཾ ཀཏྭཱ དཱཔེསི. སོ ཏཱནིཔི ཏཐཱགཏསྶེཝ ཨདཱསི. ཨཐསྶ རཱཛཱ དྭཏྟིཾས ཡུགཱནི དཱཔེསི. བྲཱཧྨཎོ ‘‘ཨཏྟནོ ཨགྒཧེཏྭཱ ལདྡྷཾ ལདྡྷཾ ཝིསྶཛྫེསིཡེཝཱ’’ཏི ཝཱདམོཙནཏྠཾ ཏཏོ ཨེཀཾ ཡུགཾ ཨཏྟནོ, ཨེཀཾ བྲཱཧྨཎིཡཱཏི དྭེ ཡུགཱནི གཧེཏྭཱ ཏིཾས ཡུགཱནི ཏཐཱགཏསྶེཝ ཨདཱསི. རཱཛཱ པན ཏསྨིཾ སཏྟཀྑཏྟུམྤི དདནྟེ པུན དཱཏུཀཱམོཡེཝ ཨཧོསི. པུབྦེ མཧཱཨེཀསཱཊཀོ ཙཏུསཊྛིཡཱ སཱཊཀཡུགེསུ དྭེ ཨགྒཧེསི, ཨཡཾ པན དྭཏྟིཾསཱཡ ལདྡྷཀཱལེ དྭེ ཨགྒཧེསི. རཱཛཱ པུརིསེ ཨཱཎཱཔེསི – ‘‘དུཀྐརཾ བྷཎེ བྲཱཧྨཎེན ཀཏཾ, ཨནྟེཔུརེ མམ དྭེ ཀམྦལཱནི ཨཱཧརཱཔེཡྻཱཐཱ’’ཏི. ཏེ ཏཐཱ ཀརིཾསུ. རཱཛཱ སཏསཧསྶགྒྷནཀེ དྭེ ཀམྦལེ དཱཔེསི. བྲཱཧྨཎོ ‘‘ན ཨིམེ མམ སརཱིརེ ཨུཔཡོགཾ ཨརཧནྟི, བུདྡྷསཱསནསྶེཝ ཨེཏེ ཨནུཙྪཝིཀཱ’’ཏི ཨེཀཾ ཀམྦལཾ ཨནྟོགནྡྷཀུཊིཡཾ སཏྠུ སཡནསྶ ཨུཔརི ཝིཏཱནཾ ཀཏྭཱ བནྡྷི, ཨེཀཾ ཨཏྟནོ གྷརེ ནིབདྡྷཾ བྷུཉྫནྟསྶ བྷིཀྑུནོ བྷཏྟཀིཙྩཊྛཱནེ ཝིཏཱནཾ ཀཏྭཱ བནྡྷི. རཱཛཱ སཱཡནྷསམཡེ སཏྠུ སནྟིཀཾ གནྟྭཱ ཏཾ ཀམྦལཾ སཉྫཱནིཏྭཱ, ‘‘བྷནྟེ, ཀེན པཱུཛཱ ཀཏཱ’’ཏི པུཙྪིཏྭཱ ‘‘ཨེཀསཱཊཀེནཱ’’ཏི ཝུཏྟེ ‘‘བྲཱཧྨཎོ མམ པསཱདཊྛཱནེཡེཝ པསཱིདཏཱི’’ཏི ཝཏྭཱ ‘‘ཙཏྟཱརོ ཧཏྠཱི ཙཏྟཱརོ ཨསྶེ ཙཏྟཱརི ཀཧཱཔཎསཧསྶཱནི ཙཏསྶོ ཨིཏྠིཡོ ཙཏསྶོ དཱསིཡོ ཙཏྟཱརོ པུརིསེ ཙཏུརོ གཱམཝརེ’’ཏི ཨེཝཾ ཡཱཝ སབྦསཏཱ ཙཏྟཱརི ཙཏྟཱརི ཀཏྭཱ སབྦཙཏུཀྐཾ ནཱམ ཨསྶ དཱཔེསི.

བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ – ‘‘ཨཧོ ཨཙྪརིཡཾ ཙཱུལེ༹ཀསཱཊཀསྶ ཀམྨཾ, ཏཾམུཧུཏྟམེཝ སབྦཙཏུཀྐཾ ལབྷི, ཨིདཱནི ཀཏེན ཀལྱཱཎཀམྨེན ཨཛྫམེཝ ཝིཔཱཀོ དིནྣོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, སཙཱཡཾ ཨེཀསཱཊཀོ པཋམཡཱམེ མཡ྄ཧཾ དཱཏུཾ ཨསཀྑིསྶ, སབྦསོལ༹སཀཾ ཨལབྷིསྶ. སཙེ མཛ྄ཛྷིམཡཱམེ ཨསཀྑིསྶ, སབྦཊྛཀཾ ཨལབྷིསྶ. བལཝཔཙྪིམཡཱམེ དིནྣཏྟཱ པནེས སབྦཙཏུཀྐཾ ལབྷི. ཀལྱཱཎཀམྨཾ ཀརོནྟེན ཧི ཨུཔྤནྣཾ ཙིཏྟཾ ཨཧཱཔེཏྭཱ ཏངྑཎཉྙེཝ ཀཱཏབྦཾ. དནྡྷཾ ཀཏཾ ཀུསལཉྷི སམྤཏྟིཾ དདམཱནཾ དནྡྷམེཝ དདཱཏི, ཏསྨཱ ཙིཏྟུཔྤཱདསམནནྟརམེཝ ཀལྱཱཎཀམྨཾ ཀཱཏབྦ’’ནྟི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༡༦.

‘‘ཨབྷིཏྠརེཐ ཀལྱཱཎེ, པཱཔཱ ཙིཏྟཾ ནིཝཱརཡེ;

དནྡྷཉྷི ཀརོཏོ པུཉྙཾ, པཱཔསྨིཾ རམཏཱི མནོ’’ཏི.

ཏཏྠ ཨབྷིཏྠརེཐཱཏི ཏུརིཏཏུརིཏཾ སཱིགྷསཱིགྷཾ ཀརེཡྻཱཏི ཨཏྠོ. གིཧིནཱ ཝཱ ཧི ‘‘སལཱཀབྷཏྟདཱནཱདཱིསུ ཀིཉྩིདེཝ ཀུསལཾ ཀརིསྶཱམཱི’’ཏི ཙིཏྟེ ཨུཔྤནྣེ ཡཐཱ ཨཉྙེ ཨོཀཱསཾ ན ལབྷནྟི, ཨེཝཾ ‘‘ཨཧཾ པུརེ, ཨཧཾ པུརེ’’ཏི ཏུརིཏཏུརིཏམེཝ ཀཱཏབྦཾ. པབྦཛིཏེན ཝཱ ཨུཔཛ྄ཛྷཱཡཝཏྟཱདཱིནི ཀརོནྟེན ཨཉྙསྶ ཨོཀཱསཾ ཨདཏྭཱ ‘‘ཨཧཾ པུརེ, ཨཧཾ པུརེ’’ཏི ཏུརིཏཏུརིཏམེཝ ཀཱཏབྦཾ. པཱཔཱ ཙིཏྟནྟི ཀཱཡདུཙྩརིཏཱདིཔཱཔཀམྨཏོ ཝཱ ཨཀུསལཙིཏྟུཔྤཱདཏོ ཝཱ སབྦཐཱམེན ཙིཏྟཾ ནིཝཱརཡེ. དནྡྷཉྷི ཀརོཏོཏི ཡོ པན ‘‘དསྶཱམི, ན དསྶཱམི སམྤཛྫིསྶཏི ནུ ཁོ མེ, ནོ’’ཏི ཨེཝཾ ཙིཀྑལླམགྒེན གཙྪནྟོ ཝིཡ དནྡྷཾ པུཉྙཾ ཀརོཏི, ཏསྶ ཨེཀསཱཊཀསྶ ཝིཡ མཙྪེརསཧསྶཾ པཱཔཾ ཨོཀཱསཾ ལབྷཏི. ཨཐསྶ པཱཔསྨིཾ རམཏཱི མནོ, ཀུསལཀམྨཀརཎཀཱལེཡེཝ ཧི ཙིཏྟཾ ཀུསལེ རམཏི, ཏཏོ མུཙྩིཏྭཱ པཱཔནིནྣམེཝ ཧོཏཱིཏི.

གཱཐཱཔརིཡོསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཙཱུལེ༹ཀསཱཊཀབྲཱཧྨཎཝཏྠུ པཋམཾ.

༢. སེཡྻསཀཏྠེརཝཏྠུ

པཱཔཉྩ པུརིསོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སེཡྻསཀཏྠེརཾ ཨཱརབྦྷ ཀཐེསི.

སོ ཧི ལཱལུ༹དཱཡིཏྠེརསྶ སདྡྷིཝིཧཱརིཀོ, ཨཏྟནོ ཨནབྷིརཏིཾ ཏསྶ ཨཱརོཙེཏྭཱ ཏེན པཋམསངྒྷཱདིསེསཀམྨེ སམཱདཔིཏོ ཨུཔྤནྣུཔྤནྣཱཡ ཨནབྷིརཏིཡཱ ཏཾ ཀམྨམཀཱསི (པཱརཱ. ༢༣༤). སཏྠཱ ཏསྶ ཀིརིཡཾ སུཏྭཱ ཏཾ པཀྐོསཱཔེཏྭཱ ‘‘ཨེཝཾ ཀིར ཏྭཾ ཀརོསཱི’’ཏི པུཙྪིཏྭཱ ‘‘ཨཱམ, བྷནྟེ’’ཏི ཝུཏྟེ ‘‘ཀསྨཱ བྷཱརིཡཾ ཀམྨཾ ཨཀཱསི, ཨནནུཙྪཝིཀཾ མོགྷཔུརིསཱ’’ཏི ནཱནཔྤཀཱརཏོ གརཧིཏྭཱ སིཀྑཱཔདཾ པཉྙཱཔེཏྭཱ ‘‘ཨེཝརཱུཔཉྷི ཀམྨཾ དིཊྛདྷམྨེཔི སམྤརཱཡེཔི དུཀྑསཾཝཏྟནིཀམེཝ ཧོཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༡༧.

‘‘པཱཔཉྩེ པུརིསོ ཀཡིརཱ, ན ནཾ ཀཡིརཱ པུནཔྤུནཾ;

ན ཏམྷི ཚནྡཾ ཀཡིརཱཐ, དུཀྑོ པཱཔསྶ ཨུཙྩཡོ’’ཏི.

ཏསྶཏྠོ – སཙེ པུརིསོ སཀིཾ པཱཔཀམྨཾ ཀརེཡྻ, ཏངྑཎེཡེཝ པཙྩཝེཀྑིཏྭཱ ‘‘ཨིདཾ ཨཔྤཏིརཱུཔཾ ཨོལཱ༹རིཀ’’ནྟི ན ནཾ ཀཡིརཱ པུནཔྤུནཾ. ཡོཔི ཏམྷི ཚནྡོ ཝཱ རུཙི ཝཱ ཨུཔྤཛྫེཡྻ, ཏམྤི ཝིནོདེཏྭཱ ན ཀཡིརཱཐེཝ. ཀིཾ ཀཱརཎཱ? དུཀྑོ པཱཔསྶ ཨུཙྩཡོ. པཱཔསྶ ཧི ཨུཙྩཡོ ཝུཌྜྷི ཨིདྷལོཀེཔི སམྤརཱཡེཔི དུཀྑམེཝ ཨཱཝཧཏཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སེཡྻསཀཏྠེརཝཏྠུ དུཏིཡཾ.

༣. ལཱཛདེཝདྷཱིཏཱཝཏྠུ

པུཉྙཉྩེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ལཱཛདེཝདྷཱིཏརཾ ཨཱརབྦྷ ཀཐེསི. ཝཏྠུ རཱཛགཧེ སམུཊྛིཏཾ.

ཨཱཡསྨཱ ཧི མཧཱཀསྶཔོ པིཔྤལིགུཧཱཡཾ ཝིཧརནྟོ ཛྷཱནཾ སམཱཔཛྫིཏྭཱ སཏྟམེ དིཝསེ ཝུཊྛཱཡ དིབྦེན ཙཀྑུནཱ བྷིཀྑཱཙཱརཊྛཱནཾ ཨོལོཀེནྟོ ཨེཀཾ སཱལིཁེཏྟཔཱལིཀཾ ཨིཏྠིཾ སཱལིསཱིསཱནི གཧེཏྭཱ ལཱཛེ ཀུརུམཱནཾ དིསྭཱ ‘‘སདྡྷཱ ནུ ཁོ, ཨསྶདྡྷཱ’’ཏི ཝཱིམཾསིཏྭཱ ‘‘སདྡྷཱ’’ཏི ཉཏྭཱ ‘‘སཀྑིསྶཏི ནུ ཁོ མེ སངྒཧཾ ཀཱཏུཾ, ནོ’’ཏི ཨུཔདྷཱརེནྟོ ‘‘ཝིསཱརདཱ ཀུལདྷཱིཏཱ མམ སངྒཧཾ ཀརིསྶཏི, ཀཏྭཱ ཙ པན མཧཱསམྤཏྟིཾ ལབྷིསྶཏཱི’’ཏི ཉཏྭཱ ཙཱིཝརཾ པཱརུཔིཏྭཱ པཏྟམཱདཱཡ སཱལིཁེཏྟསམཱིཔེཡེཝ ཨཊྛཱསི. ཀུལདྷཱིཏཱ ཐེརཾ དིསྭཱཝ པསནྣཙིཏྟཱ པཉྩཝཎྞཱཡ པཱིཏིཡཱ ཕུཊྛསརཱིརཱ ‘‘ཏིཊྛཐ, བྷནྟེ’’ཏི ཝཏྭཱ ལཱཛེ ཨཱདཱཡ ཝེགེན གནྟྭཱ ཐེརསྶ པཏྟེ ཨཱཀིརིཏྭཱ པཉྩཔཏིཊྛིཏེན ཝནྡིཏྭཱ, ‘‘བྷནྟེ, ཏུམྷེཧི དིཊྛདྷམྨསྶ བྷཱགིནཱི ཨསྶ’’ནྟི པཏྠནཾ ཨཀཱསི. ཐེརོ ‘‘ཨེཝཾ ཧོཏཱུ’’ཏི ཨནུམོདནམཀཱསི. སཱཔི ཐེརཾ ཝནྡིཏྭཱ ཨཏྟནཱ དིནྣདཱནཾ ཨཱཝཛྫམཱནཱ ནིཝཏྟི. ཏཱཡ ཙ པན ཀེདཱརམརིཡཱདཱཡ གམནམགྒེ ཨེཀསྨིཾ བིལེ གྷོརཝིསོ སཔྤོ ནིཔཛྫི. སོ ཐེརསྶ ཀཱསཱཡཔཊིཙྪནྣཾ ཛངྒྷཾ ཌཾསིཏུཾ ནཱསཀྑི. ཨིཏརཱ དཱནཾ ཨཱཝཛྫམཱནཱ ནིཝཏྟནྟཱི ཏཾ པདེསཾ པཱཔུཎི. སཔྤོ བིལཱ ནིཀྑམིཏྭཱ ཏཾ ཌཾསིཏྭཱ ཏཏྠེཝ པཱཏེསི. སཱ པསནྣཙིཏྟེན ཀཱལཾ ཀཏྭཱ ཏཱཝཏིཾསབྷཝནེ ཏིཾསཡོཛནིཀེ ཀནཀཝིམཱནེ སུཏྟཔྤབུདྡྷཱ ཝིཡ སབྦཱལངྐཱརཔཊིམཎྜིཏེན ཏིགཱཝུཏེན ཨཏྟབྷཱཝེན ནིབྦཏྟི. སཱ དྭཱདསཡོཛནིཀཾ ཨེཀཾ དིབྦཝཏྠཾ ནིཝཱསེཏྭཱ ཨེཀཾ པཱརུཔིཏྭཱ ཨཙྪརཱསཧསྶཔརིཝུཏཱ པུབྦཀམྨཔཀཱསནཏྠཱཡ སུཝཎྞལཱཛབྷརིཏེན ཨོལམྦཀེན སུཝཎྞསརཀེན པཊིམཎྜིཏེ ཝིམཱནདྭཱརེ ཋིཏཱ ཨཏྟནོ སམྤཏྟིཾ ཨོལོཀེཏྭཱ ‘‘ཀིཾ ནུ ཁོ མེ ཀཏྭཱ ཨཡཾ སམྤཏྟི ལདྡྷཱ’’ཏི དིབྦེན ཙཀྑུནཱ ཨུཔདྷཱརེནྟཱི ‘‘ཨཡྻསྶ མེ མཧཱཀསྶཔཏྠེརསྶ དིནྣལཱཛནིསྶནྡེན སཱ ལདྡྷཱ’’ཏི ཨཉྙཱསི.

སཱ ཨེཝཾ པརིཏྟཀེན ཀམྨེན ཨེཝརཱུཔཾ སམྤཏྟིཾ ལབྷིཏྭཱ ‘‘ན དཱནི མཡཱ པམཛྫིཏུཾ ཝཊྚཏི, ཨཡྻསྶ ཝཏྟཔཊིཝཏྟཾ ཀཏྭཱ ཨིམཾ སམྤཏྟིཾ ཐཱཝརཾ ཀརིསྶཱམཱི’’ཏི ཙིནྟེཏྭཱ པཱཏོཝ ཀནཀམཡཾ སམྨཛྫནིཉྩེཝ ཀཙཝརཚཌྜནཀཉྩ པཙྪིཾ ཨཱདཱཡ གནྟྭཱ ཐེརསྶ པརིཝེཎཾ སམྨཛྫིཏྭཱ པཱནཱིཡཔརིབྷོཛནཱིཡཾ ཨུཔཊྛཱཔེསི. ཐེརོ ཏཾ དིསྭཱ ‘‘ཀེནཙི དཧརེན ཝཱ སཱམཎེརེན ཝཱ ཝཏྟཾ ཀཏཾ བྷཝིསྶཏཱི’’ཏི སལླཀྑེསི. སཱ དུཏིཡདིཝསེཔི ཏཐེཝ ཨཀཱསི, ཐེརོཔི ཏཐེཝ སལླཀྑེསི. ཏཏིཡདིཝསེ པན ཐེརོ ཏསྶཱ སམྨཛྫནིསདྡཾ སུཏྭཱ ཏཱལཙྪིདྡཱདཱིཧི ཙ པཝིཊྛཾ སརཱིརོབྷཱསཾ དིསྭཱ དྭཱརཾ ཝིཝརིཏྭཱ ‘‘ཀོ ཨེས སམྨཛྫཏཱི’’ཏི པུཙྪི. ‘‘ཨཧཾ, བྷནྟེ, ཏུམྷཱཀཾ ཨུཔཊྛཱཡིཀཱ ལཱཛདེཝདྷཱིཏཱ’’ཏི. ‘‘ནནུ མཡ྄ཧཾ ཨེཝཾནཱམིཀཱ ཨུཔཊྛཱཡིཀཱ ནཱམ ནཏྠཱི’’ཏི. ‘‘ཨཧཾ, བྷནྟེ, སཱལིཁེཏྟཾ རཀྑམཱནཱ ལཱཛེ དཏྭཱ པསནྣཙིཏྟཱ ནིཝཏྟནྟཱི སཔྤེན དཊྛཱ ཀཱལཾ ཀཏྭཱ ཏཱཝཏིཾསདེཝལོཀེ ཨུཔྤནྣཱ, མཡཱ ཨཡྻཾ ནིསྶཱཡ ཨཡཾ སམྤཏྟི ལདྡྷཱ, ཨིདཱནིཔི ཏུམྷཱཀཾ ཝཏྟཔཊིཝཏྟཾ ཀཏྭཱ ‘སམྤཏྟིཾ ཐཱཝརཾ ཀརིསྶཱམཱི’ཏི ཨཱགཏཱམྷི, བྷནྟེ’’ཏི. ‘‘ཧིཡྻོཔི པརེཔི ཏཡཱཝེཏཾ ཋཱནཾ སམྨཛྫིཏཾ, ཏཡཱཝ པཱནཱིཡབྷོཛནཱིཡཾ ཨུཔཊྛཱཔིཏ’’ནྟི. ‘‘ཨཱམ, བྷནྟེ’’ཏི. ‘‘ཨཔེཧི དེཝདྷཱིཏེ, ཏཡཱ ཀཏཾ ཝཏྟཾ ཀཏཾཝ ཧོཏུ, ཨིཏོ པཊྛཱཡ ཨིམཾ ཋཱནཾ མཱ ཨཱགམཱི’’ཏི. ‘‘བྷནྟེ, མཱ མཾ ནཱསེཐ, ཏུམྷཱཀཾ ཝཏྟཾ ཀཏྭཱ སམྤཏྟིཾ མེ ཐིརཾ ཀཱཏུཾ དེཐཱ’’ཏི. ‘‘ཨཔེཧི དེཝདྷཱིཏེ, མཱ མཾ ཨནཱགཏེ ཙིཏྟབཱིཛནིཾ གཧེཏྭཱ ནིསིནྣེཧི དྷམྨཀཐིཀེཧི ‘མཧཱཀསྶཔཏྠེརསྶ ཀིར ཨེཀཱ དེཝདྷཱིཏཱ ཨཱགནྟྭཱ ཝཏྟཔཊིཝཏྟཾ ཀཏྭཱ པཱནཱིཡཔརིབྷོཛནཱིཡཾ ཨུཔཊྛཱཔེསཱི’ཏི ཝཏྟབྦཏཾ ཀརི, ཨིཏོ པཊྛཱཡ ཨིདྷ མཱ ཨཱགམི, པཊིཀྐམཱ’’ཏི. སཱ ‘‘མཱ མཾ, བྷནྟེ, ནཱསེཐཱ’’ཏི པུནཔྤུནཾ ཡཱཙིཡེཝ. ཐེརོ ‘‘ནཱཡཾ མམ ཝཙནཾ སུཎཱཏཱི’’ཏི ཙིནྟེཏྭཱ ‘‘ཏུཝཾ པམཱཎཾ ན ཛཱནཱསཱི’’ཏི ཨཙྪརཾ པཧརི. སཱ ཏཏྠ སཎྛཱཏུཾ ཨསཀྐོནྟཱི ཨཱཀཱསེ ཨུཔྤཏིཏྭཱ ཨཉྫལིཾ པགྒཡ྄ཧ, ‘‘བྷནྟེ, མཡཱ ལདྡྷསམྤཏྟིཾ མཱ ནཱསེཐ, ཐཱཝརཾ ཀཱཏུཾ དེཐཱ’’ཏི རོདནྟཱི ཨཱཀཱསེ ཨཊྛཱསི.

སཏྠཱ ཛེཏཝནེ གནྡྷཀུཊིཡཾ ནིསིནྣོཝ ཏསྶཱ རོདིཏསདྡཾ སུཏྭཱ ཨོབྷཱསཾ ཕརིཏྭཱ དེཝདྷཱིཏཱཡ སམྨུཁེ ནིསཱིདིཏྭཱ ཀཐེནྟོ ཝིཡ ‘‘དེཝདྷཱིཏེ མམ པུཏྟསྶ ཀསྶཔསྶ སཾཝརཀརཎམེཝ བྷཱརོ, པུཉྙཏྠིཀཱནཾ པན ‘ཨཡཾ ནོ ཨཏྠོ’ཏི སལླཀྑེཏྭཱ པུཉྙཀརཎམེཝ བྷཱརོ. པུཉྙཀརཎཉྷི ཨིདྷ ཙེཝ སམྤརཱཡེ ཙ སུཁམེཝཱ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༡༨.

‘‘པུཉྙཉྩེ པུརིསོ ཀཡིརཱ, ཀཡིརཱ ནཾ པུནཔྤུནཾ;

ཏམྷི ཚནྡཾ ཀཡིརཱཐ, སུཁོ པུཉྙསྶ ཨུཙྩཡོ’’ཏི.

ཏསྶཏྠོ – སཙེ པུརིསོ པུཉྙཾ ཀརེཡྻ, ‘‘ཨེཀཝཱརཾ མེ པུཉྙཾ ཀཏཾ, ཨལཾ ཨེཏྟཱཝཏཱ’’ཏི ཨནོརམིཏྭཱ པུནཔྤུནཾ ཀརོཐེཝ. ཏསྶ ཨཀརཎཀྑཎེཔི ཏམྷི པུཉྙེ ཚནྡཾ རུཙིཾ ཨུསྶཱཧཾ ཀརོཐེཝ. ཀིཾ ཀཱརཎཱ? སུཁོ པུཉྙསྶ ཨུཙྩཡོ. པུཉྙསྶ ཧི ཨུཙྩཡོ ཝུཌྜྷི ཨིདྷལོཀཔརལོཀསུཁཱཝཧནཏོ སུཁོཏི.

དེསནཱཝསཱནེ དེཝདྷཱིཏཱ པཉྩཙཏྟཱལཱིསཡོཛནམཏྠཀེ ཋིཏཱཝ སོཏཱཔཏྟིཕལཾ པཱཔུཎཱིཏི.

ལཱཛདེཝདྷཱིཏཱཝཏྠུ ཏཏིཡཾ.

༤. ཨནཱཐཔིཎྜིཀསེཊྛིཝཏྠུ

པཱཔོཔི པསྶཏཱི བྷདྲནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨནཱཐཔིཎྜིཀཾ ཨཱརབྦྷ ཀཐེསི.

ཨནཱཐཔིཎྜིཀོ ཧི ཝིཧཱརམེཝ ཨུདྡིསྶ ཙཏུཔཎྞཱསཀོཊིདྷནཾ བུདྡྷསཱསནེ ཝིཀིརིཏྭཱ སཏྠརི ཛེཏཝནེ ཝིཧརནྟེ དེཝསིཀཾ ཏཱིཎི མཧཱཨུཔཊྛཱནཱནི གཙྪཏི, གཙྪནྟོ ཙ ‘‘ཀིཾ ནུ ཁོ ཨཱདཱཡ ཨཱགཏོཏི སཱམཎེརཱ ཝཱ དཧརཱ ཝཱ ཧཏྠམྤི མེ ཨོལོཀེཡྻུ’’ནྟི ཏུཙྪཧཏྠོ ནཱམ ན གཏཔུབྦོ. པཱཏོཝ གཙྪནྟོ ཡཱགུཾ གཱཧཱཔེཏྭཱཝ གཙྪཏི, ཀཏཔཱཏརཱསོ སཔྤིནཝནཱིཏཱདཱིནི བྷེསཛྫཱནི. སཱཡནྷསམཡེ མཱལཱགནྡྷཝིལེཔནཝཏྠཱདཱིནི གཱཧཱཔེཏྭཱ གཙྪཏི. ཨེཝཾ ནིཙྩཀཱལམེཝ དིཝསེ དིཝསེ དཱནཾ དཏྭཱ སཱིལཾ རཀྑཏི. ཨཔརབྷཱགེ དྷནཾ པརིཀྑཡཾ གཙྪཏི. ཝོཧཱརཱུཔཛཱིཝིནོཔིསྶ ཧཏྠཏོ ཨཊྛཱརསཀོཊིདྷནཾ ཨིཎཾ གཎྷིཾསུ, ཀུལསནྟཀཱཔིསྶ ཨཊྛཱརསཧིརཉྙཀོཊིཡོ, ནདཱིཏཱིརེ ནིདཧིཏྭཱ ཋཔིཏཱ ཨུདཀེན ཀཱུལེ བྷིནྣེ མཧཱསམུདྡཾ པཝིསིཾསུ. ཨེཝམསྶ ཨནུཔུབྦེན དྷནཾ པརིཀྑཡཾ ཨགམཱསི. སོ ཨེཝཾབྷཱུཏོཔི སངྒྷསྶ དཱནཾ དེཏིཡེཝ, པཎཱིཏཾ པན ཀཏྭཱ དཱཏུཾ ན སཀྐོཏི.

སོ ཨེཀདིཝསཾ སཏྠཱརཱ ‘‘དཱིཡཏི པན ཏེ, གཧཔཏི, ཀུལེ དཱན’’ནྟི ཝུཏྟེ ‘‘དཱིཡཏི, བྷནྟེ, ཏཉྩ ཁོ ཀཎཱཛཀཾ བིལངྒདུཏིཡ’’ནྟི ཨཱཧ. ཨཐ ནཾ སཏྠཱ, ‘‘གཧཔཏི, ‘ལཱུཁཾ དཱནཾ དེམཱི’ཏི མཱ ཙིནྟཡི. ཙིཏྟསྨིཉྷི པཎཱིཏེ བུདྡྷཱདཱིནཾ དིནྣདཱནཾ ལཱུཁཾ ནཱམ ནཏྠི, ཨཔིཙ ཏྭཾ ཨཊྛནྣཾ ཨརིཡཔུགྒལཱནཾ དཱནཾ དེསི, ཨཧཾ པན ཝེལཱམཀཱལེ སཀལཛམྦུདཱིཔཾ ཨུནྣངྒལཾ ཀཏྭཱ མཧཱདཱནཾ པཝཏྟཡམཱནོཔི ཏིསརཎགཏམྤི ཀཉྩི ནཱལཏྠཾ, དཀྑིཎེཡྻཱ ནཱམ ཨེཝཾ དུལླབྷཱ. ཏསྨཱ ‘ལཱུཁཾ མེ དཱན’ནྟི མཱ ཙིནྟཡཱི’’ཏི ཝཏྭཱ ཝེལཱམསུཏྟམསྶ (ཨ. ནི. ༩.༢༠) ཀཐེསི. ཨཐསྶ དྭཱརཀོཊྛཀེ ཨདྷིཝཏྠཱ དེཝཏཱ སཏྠརི ཙེཝ སཏྠུསཱཝཀེསུ ཙ གེཧཾ པཝིསནྟེསུ ཏེསཾ ཏེཛེན སཎྛཱཏུཾ ཨསཀྐོནྟཱི, ‘‘ཡཐཱ ཨིམེ ཨིམཾ གེཧཾ ན པཝིསནྟི, ཏཐཱ གཧཔཏིཾ པརིབྷིནྡིསྶཱམཱི’’ཏི ཏཾ ཝཏྟུཀཱམཱཔི ཨིསྶརཀཱལེ ཀིཉྩི ཝཏྟུཾ ནཱསཀྑི, ཨིདཱནི ‘‘པནཱཡཾ དུགྒཏོ གཎྷིསྶཏི མེ ཝཙན’’ནྟི རཏྟིབྷཱགེ སེཊྛིསྶ སིརིགབྦྷཾ པཝིསིཏྭཱ ཨཱཀཱསེ ཨཊྛཱསི. ཨཐ སེཊྛི ནཾ དིསྭཱ ‘‘ཀོ ཨེསོ’’ཏི ཨཱཧ. ཨཧཾ ཏེ མཧཱསེཊྛི ཙཏུཏྠདྭཱརཀོཊྛཀེ ཨདྷིཝཏྠཱ དེཝཏཱ, ཏུཡ྄ཧཾ ཨོཝཱདདཱནཏྠཱཡ ཨཱགཏཱཏི. ཏེན ཧི ཨོཝདེཧཱིཏི. མཧཱསེཊྛི ཏཡཱ པཙྪིམཀཱལཾ ཨནོལོཀེཏྭཱཝ སམཎསྶ གོཏམསྶ སཱསནེ བཧུཾ དྷནཾ ཝིཔྤཀིཎྞཾ, ཨིདཱནི དུགྒཏོ ཧུཏྭཱཔི ཏཾ ན མུཉྩསིཡེཝ, ཨེཝཾ ཝཏྟམཱནོ ཀཏིཔཱཧེནེཝ གྷཱསཙྪཱདནམཏྟམྤི ན ལབྷིསྶསི, ཀིཾ ཏེ སམཎེན གོཏམེན, ཨཏིཔརིཙྩཱགཏོ ཨོརམིཏྭཱ ཀམྨནྟེ པཡོཛེནྟོ ཀུཊུམྦཾ སཎྛཱཔེཧཱིཏི. ཨཡཾ མེ ཏཡཱ དིནྣཨོཝཱདོཏི. ཨཱམ, སེཊྛཱིཏི. གཙྪ, ནཱཧཾ ཏཱདིསཱིནཾ སཏེནཔི སཧསྶེནཔི སཏསཧསྶེནཔི སཀྐཱ ཀམྤེཏུཾ, ཨཡུཏྟཾ ཏེ ཝུཏྟཾ, ཀཾ ཏཡཱ མམ གེཧེ ཝསམཱནཱཡ, སཱིགྷཾ སཱིགྷཾ མེ གྷརཱ ནིཀྑམཱཧཱིཏི. སཱ སོཏཱཔནྣསྶ ཨརིཡསཱཝཀསྶ ཝཙནཾ སུཏྭཱ ཋཱཏུཾ ཨསཀྐོནྟཱི དཱརཀེ ཨཱདཱཡ ནིཀྑམི, ནིཀྑམིཏྭཱ ཙ པན ཨཉྙཏྠ ཝསནཊྛཱནཾ ཨལབྷམཱནཱ ‘‘སེཊྛིཾ ཁམཱཔེཏྭཱ ཏཏྠེཝ ཝསིསྶཱམཱི’’ཏི ནགརཔརིགྒཱཧཀཾ དེཝཔུཏྟཾ ཨུཔསངྐམིཏྭཱ ཨཏྟནཱ ཀཏཱཔརཱདྷཾ ཨཱཙིཀྑིཏྭཱ ‘‘ཨེཧི, མཾ སེཊྛིསྶ སནྟིཀཾ ནེཏྭཱ ཁམཱཔེཏྭཱ ཝསནཊྛཱནཾ དཱཔེཧཱི’’ཏི ཨཱཧ. སོ ‘‘ཨཡུཏྟཾ ཏཡཱ ཝུཏྟཾ, ནཱཧཾ ཏསྶ སནྟིཀཾ གནྟུཾ ཨུསྶཧཱམཱི’’ཏི ཏཾ པཊིཀྑིཔི. སཱ ཙཏུནྣཾ མཧཱརཱཛཱནཾ སནྟིཀཾ གནྟྭཱ ཏེཧིཔི པཊིཀྑིཏྟཱ སཀྐཾ དེཝརཱཛཱནཾ ཨུཔསངྐམིཏྭཱ ཏཾ པཝཏྟིཾ ཨཱཙིཀྑིཏྭཱ, ‘‘ཨཧཾ, དེཝ, ཝསནཊྛཱནཾ ཨལབྷམཱནཱ དཱརཀེ ཧཏྠེན གཧེཏྭཱ ཨནཱཐཱ ཝིཙརཱམི, ཝསནཊྛཱནཾ མེ དཱཔེཧཱི’’ཏི སུཊྛུཏརཾ ཡཱཙི.

ཨཐ ནཾ སོ ‘‘ཨཧམྤི ཏཝ ཀཱརཎཱ སེཊྛིཾ ཝཏྟུཾ ན སཀྑིསྶཱམི, ཨེཀཾ པན ཏེ ཨུཔཱཡཾ ཀཐེསྶཱམཱི’’ཏི ཨཱཧ. སཱདྷུ, དེཝ, ཀཐེཧཱིཏི. གཙྪ, སེཊྛིནོ ཨཱཡུཏྟཀཝེསཾ གཧེཏྭཱ སེཊྛིསྶ ཧཏྠཏོ པཎྞཾ ཨཱརོཔེཏྭཱ ཝོཧཱརཱུཔཛཱིཝཱིཧི གཧིཏཾ ཨཊྛཱརསཀོཊིདྷནཾ ཨཏྟནོ ཨཱནུབྷཱཝེན སོདྷེཏྭཱ ཏུཙྪགབྦྷེ པཱུརེཏྭཱ མཧཱསམུདྡཾ པཝིཊྛཾ ཨཊྛཱརསཀོཊིདྷནཾ ཨཏྠི, ཨཉྙམྤི ཨསུཀཊྛཱནེ ནཱམ ཨསྶཱམིཀཾ ཨཊྛཱརསཀོཊིདྷནཾ ཨཏྠི, ཏཾ སབྦཾ སཾཧརིཏྭཱ ཏསྶ ཏུཙྪགབྦྷེ པཱུརེཏྭཱ དཎྜཀམྨཾ ཀཏྭཱ ཁམཱཔེཧཱིཏི. སཱ ‘‘སཱདྷུ, དེཝཱ’’ཏི ཝུཏྟནཡེནེཝ ཏཾ སབྦཾ ཀཏྭཱ པུན ཏསྶ སིརིགབྦྷཾ ཨོབྷཱསཡམཱནཱ ཨཱཀཱསེ ཋཏྭཱ ‘‘ཀོ ཨེསོ’’ཏི ཝུཏྟེ ཨཧཾ ཏེ ཙཏུཏྠདྭཱརཀོཊྛཀེ ཨདྷིཝཏྠཱ ཨནྡྷབཱལདེཝཏཱ, མཡཱ ཨནྡྷབཱལཏཱཡ ཡཾ ཏུམྷཱཀཾ སནྟིཀེ ཀཐིཏཾ, ཏཾ མེ ཁམཐ. སཀྐསྶ ཧི མེ ཝཙནེན ཙཏུཔཎྞཱསཀོཊིདྷནཾ སཾཧརིཏྭཱ ཏུཙྪགབྦྷཔཱུརཎཾ དཎྜཀམྨཾ ཀཏཾ, ཝསནཊྛཱནཾ ཨལབྷམཱནཱ ཀིལམཱམཱིཏི. ཨནཱཐཔིཎྜིཀོ ཙིནྟེསི – ‘‘ཨཡཾ དེཝཏཱ ‘དཎྜཀམྨཉྩ མེ ཀཏ’ནྟི ཝདཏི, ཨཏྟནོ ཙ དོསཾ པཊིཛཱནཱཏི, སམྨཱསམྦུདྡྷསྶ ནཾ དསྶེསྶཱམཱི’’ཏི. སོ ཏཾ སཏྠུ སནྟིཀཾ ནེཏྭཱ ཏཱཡ ཀཏཀམྨཾ སབྦཾ ཨཱརོཙེསི. དེཝཏཱ སཏྠུ པཱདེསུ སིརསཱ ནིཔཏིཏྭཱ, ‘‘བྷནྟེ, ཡཾ མཡཱ ཨནྡྷབཱལཏཱཡ ཏུམྷཱཀཾ གུཎེ ཨཛཱནིཏྭཱ པཱཔཀཾ ཝཙནཾ ཝུཏྟཾ, ཏཾ མེ ཁམཐཱ’’ཏི སཏྠཱརཾ ཁམཱཔེཏྭཱ མཧཱསེཊྛིཾ ཁམཱཔེསི. སཏྠཱ ཀལྱཱཎཔཱཔཀཱནཾ ཀམྨཱནཾ ཝིཔཱཀཝསེན སེཊྛིཉྩེཝ དེཝཏཉྩ ཨོཝདནྟོ ‘‘ཨིདྷ, གཧཔཏི, པཱཔཔུགྒལོཔི ཡཱཝ པཱཔཾ ན པཙྩཏི, ཏཱཝ བྷདྲམྤི པསྶཏི. ཡདཱ པནསྶ པཱཔཾ པཙྩཏི, ཏདཱ པཱཔམེཝ པསྶཏི. བྷདྲཔུགྒལོཔི ཡཱཝ བྷདྲཾ ན པཙྩཏི, ཏཱཝ པཱཔཱནི པསྶཏི. ཡདཱ པནསྶ བྷདྲཾ པཙྩཏི, ཏདཱ བྷདྲམེཝ པསྶཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༡༡༩.

‘‘པཱཔོཔི པསྶཏཱི བྷདྲཾ, ཡཱཝ པཱཔཾ ན པཙྩཏི;

ཡདཱ ཙ པཙྩཏཱི པཱཔཾ, ཨཐ པཱཔོ པཱཔཱནི པསྶཏི.

༡༢༠.

‘‘བྷདྲོཔི པསྶཏཱི པཱཔཾ, ཡཱཝ བྷདྲཾ ན པཙྩཏི;

ཡདཱ ཙ པཙྩཏཱི བྷདྲཾ, ཨཐ བྷདྲོ བྷདྲཱནི པསྶཏཱི’’ཏི.

ཏཏྠ པཱཔོཏི ཀཱཡདུཙྩརིཏཱདིནཱ པཱཔཀམྨེན ཡུཏྟཔུགྒལོ. སོཔི ཧི པུརིམསུཙརིཏཱནུབྷཱཝེན ནིབྦཏྟཾ སུཁཾ ཨནུབྷཝམཱནོ བྷདྲམྤི པསྶཏི. ཡཱཝ པཱཔཾ ན པཙྩཏཱིཏི ཡཱཝསྶ ཏཾ པཱཔཀམྨཾ དིཊྛདྷམྨེ ཝཱ སམྤརཱཡེ ཝཱ ཝིཔཱཀཾ ན དེཏི. ཡདཱ པནསྶ ཏཾ དིཊྛདྷམྨེ ཝཱ སམྤརཱཡེ ཝཱ ཝིཔཱཀཾ དེཏི, ཨཐ དིཊྛདྷམྨེ ཝིཝིདྷཱ ཀམྨཀཱརཎཱ, སམྤརཱཡེ ཙ ཨཔཱཡདུཀྑཾ ཨནུབྷོནྟོ སོ པཱཔོ པཱཔཱནིཡེཝ པསྶཏི. དུཏིཡགཱཐཱཡཔི ཀཱཡསུཙརིཏཱདིནཱ བྷདྲཀམྨེན ཡུཏྟོ བྷདྲོ. སོཔི ཧི པུརིམདུཙྩརིཏཱནུབྷཱཝེན ནིབྦཏྟཾ དུཀྑཾ ཨནུབྷཝམཱནོ པཱཔཾ པསྶཏི. ཡཱཝ བྷདྲཾ ན པཙྩཏཱིཏི ཡཱཝསྶ ཏཾ བྷདྲཾ ཀམྨཾ དིཊྛདྷམྨེ ཝཱ སམྤརཱཡེ ཝཱ ཝིཔཱཀཾ ན དེཏི. ཡདཱ པན ཏཾ ཝིཔཱཀཾ དེཏི, ཨཐ དིཊྛདྷམྨེ ལཱབྷསཀྐཱརཱདིསུཁཾ, སམྤརཱཡེ ཙ དིབྦསམྤཏྟིསུཁཾ ཨནུབྷཝམཱནོ སོ བྷདྲོ བྷདྲཱནིཡེཝ པསྶཏཱིཏི.

དེསནཱཝསཱནེ སཱ དེཝཏཱ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

ཨནཱཐཔིཎྜིཀསེཊྛིཝཏྠུ ཙཏུཏྠཾ.

༥. ཨསཉྙཏཔརིཀྑཱརབྷིཀྑུཝཏྠུ

མཱཝམཉྙེཐ པཱཔསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཨསཉྙཏཔརིཀྑཱརཾ བྷིཀྑུཾ ཨཱརབྦྷ ཀཐེསི.

སོ ཀིར ཡཾ ཀིཉྩི མཉྩཔཱིཋཱདིབྷེདཾ པརིཀྑཱརཾ བཧི པརིབྷུཉྫིཏྭཱ ཏཏྠེཝ ཚཌྜེཏི. པརིཀྑཱརོ ཝསྶེནཔི ཨཱཏཔེནཔི ཨུཔཙིཀཱདཱིཧིཔི ཝིནསྶཏི. སོ བྷིཀྑཱུཧི ‘‘ནནུ, ཨཱཝུསོ, པརིཀྑཱརོ ནཱམ པཊིསཱམིཏབྦོ’’ཏི ཝུཏྟེ ‘‘ཨཔྤཀཾ མཡཱ ཀཏཾ, ཨཱཝུསོ, ཨེཏཾ, ན ཨེཏསྶ ཙིཏྟཾ ཨཏྠི, ན པིཏྟ’’ནྟི ཝཏྭཱ ཏཐེཝ ཀརོཏི. བྷིཀྑཱུ ཏསྶ ཀིརིཡཾ སཏྠུ ཨཱརོཙེསུཾ. སཏྠཱ ཏཾ པཀྐོསཱཔེཏྭཱ ‘‘སཙྩཾ ཀིར ཏྭཾ བྷིཀྑུ ཨེཝཾ ཀརོསཱི’’ཏི པུཙྪི. སོ སཏྠཱརཱ པུཙྪིཏོཔི ‘‘ཀིཾ ཨེཏཾ བྷགཝཱ ཨཔྤཀཾ མཡཱ ཀཏཾ, ན ཏསྶ ཙིཏྟཾ ཨཏྠི, ནཱསྶ པིཏྟ’’ནྟི ཏཐེཝ ཨཝམཉྙནྟོ ཨཱཧ. ཨཐ ནཾ སཏྠཱ ‘‘བྷིཀྑཱུཧི ཨེཝཾ ཀཱཏུཾ ན ཝཊྚཏི, པཱཔཀམྨཾ ནཱམ ‘ཨཔྤཀ’ནྟི ན ཨཝམཉྙིཏབྦཾ. ཨཛ྄ཛྷོཀཱསེ ཋཔིཏཉྷི ཝིཝཊམུཁཾ བྷཱཛནཾ དེཝེ ཝསྶནྟེ ཀིཉྩཱཔི ཨེཀབིནྡུནཱ ན པཱུརཏི, པུནཔྤུནཾ ཝསྶནྟེ པན པཱུརཏེཝ, ཨེཝམེཝཾ པཱཔཾ ཀརོནྟོ པུགྒལོ ཨནུཔུབྦེན མཧནྟཾ པཱཔརཱསིཾ ཀརོཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༢༡.

‘‘མཱཝམཉྙེཐ པཱཔསྶ, ན མནྡཾ ཨཱགམིསྶཏི;

ཨུདབིནྡུནིཔཱཏེན, ཨུདཀུམྦྷོཔི པཱུརཏི;

བཱལོ པཱུརཏི པཱཔསྶ, ཐོཀཾ ཐོཀམྤི ཨཱཙིན’’ནྟི.

ཏཏྠ མཱཝམཉྙེཐཱཏི ན ཨཝཛཱནེཡྻ. པཱཔསྶཱཏི པཱཔཾ. ན མནྡཾ ཨཱགམིསྶཏཱིཏི ‘‘ཨཔྤམཏྟཀཾ མེ པཱཔཀཾ ཀཏཾ, ཀདཱ ཨེཏཾ ཝིཔཙྩིསྶཏཱི’’ཏི ཨེཝཾ པཱཔཾ ནཱཝཛཱནེཡྻཱཏི ཨཏྠོ. ཨུདཀུམྦྷོཔཱིཏི དེཝེ ཝསྶནྟེ མུཁཾ ཝིཝརིཏྭཱ ཋཔིཏཾ ཡཾ ཀིཉྩི ཀུལཱལབྷཱཛནཾ ཡཐཱ ཏཾ ཨེཀེཀསྶཱཔི ཨུདཀབིནྡུནོ ནིཔཱཏེན ཨནུཔུབྦེན པཱུརཏི, ཨེཝཾ བཱལཔུགྒལོ ཐོཀཾ ཐོཀམྤི པཱཔཾ ཨཱཙིནནྟོ ཀརོནྟོ ཝཌྜྷེནྟོ པཱཔསྶ པཱུརཏིཡེཝཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ. སཏྠཱཔི ‘‘ཨཛ྄ཛྷོཀཱསེ སེཡྻཾ སནྠརིཏྭཱ པཊིཔཱཀཏིཀཾ ཨཀརོནྟོ ཨིམཾ ནཱམ ཨཱཔཏྟིམཱཔཛྫཏཱི’’ཏི (པཱཙི. ༡༠༨-༡༡༠) སིཀྑཱཔདཾ པཉྙཱཔེསཱིཏི.

ཨསཉྙཏཔརིཀྑཱརབྷིཀྑུཝཏྠུ པཉྩམཾ.

༦. བིལཱ༹ལཔཱདཀསེཊྛིཝཏྠུ

མཱཝམཉྙེཐ པུཉྙསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ བིལཱ༹ལཔཱདཀསེཊྛིཾ ཨཱརབྦྷ ཀཐེསི.

ཨེཀསྨིཉྷི སམཡེ སཱཝཏྠིཝཱསིནོ ཝགྒབནྡྷནེན བུདྡྷཔྤམུཁསྶ བྷིཀྑུསངྒྷསྶ དཱནཾ དེནྟི. ཨཐེཀདིཝསཾ སཏྠཱ ཨནུམོདནཾ ཀརོནྟོ ཨེཝམཱཧ –

‘‘ཨུཔཱསཀཱ ཨིདྷེཀཙྩོ ཨཏྟནཱཝ དཱནཾ དེཏི, པརཾ ན སམཱདཔེཏི. སོ ནིབྦཏྟནིབྦཏྟཊྛཱནེ བྷོགསམྤདཾ ལབྷཏི, ནོ པརིཝཱརསམྤདཾ. ཨེཀཙྩོ ཨཏྟནཱ དཱནཾ ན དེཏི, པརཾ སམཱདཔེཏི. སོ ནིབྦཏྟནིབྦཏྟཊྛཱནེ པརིཝཱརསམྤདཾ ལབྷཏི, ནོ བྷོགསམྤདཾ. ཨེཀཙྩོ ཨཏྟནཱ ཙ ན དེཏི, པརཉྩ ན སམཱདཔེཏི. སོ ནིབྦཏྟནིབྦཏྟཊྛཱནེ ནེཝ བྷོགསམྤདཾ ལབྷཏི, ན པརིཝཱརསམྤདཾ, ཝིགྷཱསཱདོ ཧུཏྭཱ ཝིཙརཏི. ཨེཀཙྩོ ཨཏྟནཱ ཙ དེཏི, པརཉྩ སམཱདཔེཏི. སོ ནིབྦཏྟནིབྦཏྟཊྛཱནེ བྷོགསམྤདཉྩེཝ ལབྷཏི, པརིཝཱརསམྤདཉྩཱ’’ཏི.

ཨཐེཀོ པཎྜིཏཔུརིསོ ཏཾ དྷམྨདེསནཾ སུཏྭཱ ‘‘ཨཧོ ཨཙྪརིཡམིདཾ ཀཱརཎཾ, ཨཧཾ དཱནི ཨུབྷཡསམྤཏྟིསཾཝཏྟནིཀཾ ཀམྨཾ ཀརིསྶཱམཱི’’ཏི ཙིནྟེཏྭཱ སཏྠཱརཾ ཨུཊྛཱཡ གམནཀཱལེ ཨཱཧ – ‘‘བྷནྟེ, སྭེ ཨམྷཱཀཾ བྷིཀྑཾ གཎྷཐཱ’’ཏི. ཀིཏྟཀེཧི པན ཏེ བྷིཀྑཱུཧི ཨཏྠོཏི? སབྦབྷིཀྑཱུཧི, བྷནྟེཏི. སཏྠཱ ཨདྷིཝཱསེསི. སོཔི གཱམཾ པཝིསིཏྭཱ, ‘‘ཨམྨཏཱཏཱ, མཡཱ སྭཱཏནཱཡ བུདྡྷཔྤམུཁོ བྷིཀྑུསངྒྷོ ནིམནྟིཏོ, ཡོ ཡཏྟཀཱནཾ བྷིཀྑཱུནཾ སཀྐོཏི, སོ ཏཏྟཀཱནཾ ཡཱགུཨཱདཱིནཾ ཨཏྠཱཡ ཏཎྜུལཱདཱིནི དེཏུ, ཨེཀསྨིཾ ཋཱནེ པཙཱཔེཏྭཱ དཱནཾ དསྶཱམཱ’’ཏི ཨུགྒྷོསེནྟོ ཝིཙརི.

ཨཐ ནཾ ཨེཀོ སེཊྛི ཨཏྟནོ ཨཱཔཎདྭཱརཾ སམྤཏྟཾ དིསྭཱ ‘‘ཨཡཾ ཨཏྟནོ པཧོནཀེ བྷིཀྑཱུ ཨནིམནྟེཏྭཱ པན སཀལགཱམཾ སམཱདཔེནྟོ ཝིཙརཏཱི’’ཏི ཀུཛ྄ཛྷིཏྭཱ ‘‘ཏཡཱ གཧིཏབྷཱཛནཾ ཨཱཧརཱ’’ཏི ཏཱིཧི ཨངྒུལཱིཧི གཧེཏྭཱ ཐོཀེ ཏཎྜུལེ ཨདཱསི, ཏཐཱ མུགྒེ, ཏཐཱ མཱསེཏི. སོ ཏཏོ པཊྛཱཡ བིལཱ༹ལཔཱདཀསེཊྛི ནཱམ ཛཱཏོ, སཔྤིཕཱཎིཏཱདཱིནི དེནྟོཔི ཀརཎྜཾ ཀུཊེ པཀྑིཔིཏྭཱ ཨེཀཏོ ཀོཎཾ ཀཏྭཱ བིནྡུཾ བིནྡུཾ པགྒྷརཱཡནྟོ ཐོཀཐོཀམེཝ ཨདཱསི. ཨུཔཱསཀོ ཨཝསེསེཧི དིནྣཾ ཨེཀཏོ ཀཏྭཱ ཨིམིནཱ དིནྣཾ ཝིསུཾཡེཝ ཨགྒཧེསི. སོ སེཊྛི ཏསྶ ཀིརིཡཾ དིསྭཱ ‘‘ཀིཾ ནུ ཁོ ཨེས མཡཱ དིནྣཾ ཝིསུཾ གཎྷཱཏཱི’’ཏི ཙིནྟེཏྭཱ ཏསྶ པཙྪཏོ པཙྪཏོ ཨེཀཾ ཙཱུལུ༹པཊྛཱཀཾ པཧིཎི ‘‘གཙྪ, ཡཾ ཨེས ཀརོཏི, ཏཾ ཛཱནཱཧཱི’’ཏི. སོ གནྟྭཱ ‘‘སེཊྛིསྶ མཧཔྥལཾ ཧོཏཱུ’’ཏི ཡཱགུབྷཏྟཔཱུཝཱནཾ ཨཏྠཱཡ ཨེཀཾ དྭེ ཏཎྜུལེ པཀྑིཔིཏྭཱ མུགྒམཱསེཔི ཏེལཕཱཎིཏཱདིབིནྡཱུནིཔི སབྦབྷཱཛནེསུ པཀྑིཔི. ཙཱུལུ༹པཊྛཱཀོ གནྟྭཱ སེཊྛིསྶ ཨཱརོཙེསི. ཏཾ སུཏྭཱ སེཊྛི ཙིནྟེསི – ‘‘སཙེ མེ སོ པརིསམཛ྄ཛྷེ ཨཝཎྞཾ བྷཱསིསྶཏི, མམ ནཱམེ གཧིཏམཏྟེཡེཝ ནཾ པཧརིཏྭཱ མཱརེསྶཱམཱི’’ཏི ནིཝཱསནནྟརེ ཚུརིཀཾ བནྡྷིཏྭཱ པུནདིཝསེ གནྟྭཱ བྷཏྟགྒེ ཨཊྛཱསི. སོ པུརིསོ བུདྡྷཔྤམུཁཾ བྷིཀྑུསངྒྷཾ པརིཝིསིཏྭཱ བྷགཝནྟཾ ཨཱཧ – ‘‘བྷནྟེ, མཡཱ མཧཱཛནཾ སམཱདཔེཏྭཱ ཨིམཾ དཱནཾ དིནྣཾ, ཏཏྠ སམཱདཔིཏམནུསྶཱ ཨཏྟནོ ཨཏྟནོ བལེན བཧཱུནིཔི ཐོཀཱནིཔི ཏཎྜུལཱདཱིནི ཨདཾསུ, ཏེསཾ སབྦེསཾ མཧཔྥལཾ ཧོཏཱུ’’ཏི. ཏཾ སུཏྭཱ སོ སེཊྛི ཙིནྟེསི – ‘‘ཨཧཾ ‘ཨསུཀེན ནཱམ ཨཙྪརཱཡ གཎྷིཏྭཱ ཏཎྜུལཱདཱིནི དིནྣཱནཱིཏི མམ ནཱམེ གཧིཏམཏྟེ ཨིམཾ མཱརེསྶཱམཱི’ཏི ཨཱགཏོ, ཨཡཾ པན སབྦསངྒཱཧིཀཾ ཀཏྭཱ ‘ཡེཧིཔི ནཱལི༹ཨཱདཱིཧི མིནིཏྭཱ དིནྣཾ, ཡེཧིཔི ཨཙྪརཱཡ གཧེཏྭཱ དིནྣཾ, སབྦེསཾ མཧཔྥལཾ ཧོཏཱུ’ཏི ཝདཏི. སཙཱཧཾ ཨེཝརཱུཔཾ ན ཁམཱཔེསྶཱམི, དེཝདཎྜོ མམ མཏྠཀེ པཏིསྶཏཱི’’ཏི. སོ ཏསྶ པཱདམཱུལེ ནིཔཛྫིཏྭཱ ‘‘ཁམཱཧི མེ, སཱམཱི’’ཏི ཨཱཧ. ‘‘ཀིཾ ཨིད’’ནྟི ཙ ཏེན ཝུཏྟེ སབྦཾ ཏཾ པཝཏྟིཾ ཨཱརོཙེསི. ཏཾ ཀིརིཡཾ དིསྭཱ སཏྠཱ ‘‘ཀིཾ ཨིད’’ནྟི དཱནཝེཡྻཱཝཊིཀཾ པུཙྪི. སོ ཨཏཱིཏདིཝསཏོ པཊྛཱཡ སབྦཾ ཏཾ པཝཏྟིཾ ཨཱརོཙེསི. ཨཐ ནཾ སཏྠཱ ‘‘ཨེཝཾ ཀིར སེཊྛཱི’’ཏི པུཙྪིཏྭཱ, ‘‘ཨཱམ, བྷནྟེ’’ཏི ཝུཏྟེ, ‘‘ཨུཔཱསཀ, པུཉྙཾ ནཱམ ‘ཨཔྤཀ’ནྟི ན ཨཝམཉྙིཏབྦཾ, མཱདིསསྶ བུདྡྷཔྤམུཁསྶ བྷིཀྑུསངྒྷསྶ དཱནཾ དཏྭཱ ‘ཨཔྤཀ’ནྟི ན ཨཝམཉྙིཏབྦཾ. པཎྜིཏམནུསྶཱ ཧི པུཉྙཾ ཀརོནྟཱ ཝིཝཊབྷཱཛནཾ ཝིཡ ཨུདཀེན ཨནུཀྐམེན པུཉྙེན པཱུརནྟིཡེཝཱ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༢༢.

‘‘མཱཝམཉྙེཐ པུཉྙསྶ, ན མནྡཾ ཨཱགམིསྶཏི;

ཨུདབིནྡུནིཔཱཏེན, ཨུདཀུམྦྷོཔི པཱུརཏི;

དྷཱིརོ པཱུརཏི པུཉྙསྶ, ཐོཀཾ ཐོཀམྤི ཨཱཙིན’’ནྟི.

ཏསྶཏྠོ – པཎྜིཏམནུསྶོ པུཉྙཾ ཀཏྭཱ ‘‘ཨཔྤཀམཏྟཾ མཡཱ ཀཏཾ, ན མནྡཾ ཝིཔཱཀཝསེན ཨཱགམིསྶཏི, ཨེཝཾ པརིཏྟཀཾ ཀམྨཾ ཀཧཾ མཾ དཀྑིསྶཏི, ཨཧཾ ཝཱ ཏཾ ཀཧཾ དཀྑིསྶཱམི, ཀདཱ ཨེཏཾ ཝིཔཙྩིསྶཏཱི’’ཏི ཨེཝཾ པུཉྙཾ མཱཝམཉྙེཐ ན ཨཝཛཱནེཡྻ. ཡཐཱ ཧི ནིརནྟརཾ ཨུདབིནྡུནིཔཱཏེན ཝིཝརིཏྭཱ ཋཔིཏཾ ཀུལཱལབྷཱཛནཾ པཱུརཏི, ཨེཝཾ དྷཱིརོ པཎྜིཏཔུརིསོ ཐོཀཾ ཐོཀམྤི པུཉྙཾ ཨཱཙིནནྟོ པུཉྙསྶ པཱུརཏཱིཏི.

དེསནཱཝསཱནེ སོ སེཊྛི སོཏཱཔཏྟིཕལཾ པཱཔུཎི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

བིལཱ༹ལཔཱདཀསེཊྛིཝཏྠུ ཚཊྛཾ.

༧. མཧཱདྷནཝཱཎིཛཝཏྠུ

ཝཱཎིཛོཝཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཧཱདྷནཝཱཎིཛཾ ཨཱརབྦྷ ཀཐེསི.

ཏསྶ ཀིར ཝཱཎིཛསྶ གེཧེ པཉྩསཏཱ ཙོརཱ ཨོཏཱརཾ གཝེསམཱནཱ ཨོཏཱརཾ ན ལབྷིཾསུ. ཨཔརེན སམཡེན ཝཱཎིཛོ པཉྩ སཀཊསཏཱནི བྷཎྜསྶ པཱུརེཏྭཱ བྷིཀྑཱུནཾ ཨཱརོཙཱཔེསི – ‘‘ཨཧཾ ཨསུཀཊྛཱནཾ ནཱམ ཝཱཎིཛྫཏྠཱཡ གཙྪཱམི, ཡེ, ཨཡྻཱ, ཏཾ ཋཱནཾ གནྟུཀཱམཱ, ཏེ ནིཀྑམནྟུ, མགྒེ བྷིཀྑཱཡ ན ཀིལམིསྶནྟཱི’’ཏི. ཏཾ སུཏྭཱ པཉྩསཏཱ བྷིཀྑཱུ ཏེན སདྡྷིཾ མགྒཾ པཊིཔཛྫིཾསུ. ཏེཔི ཙོརཱ ‘‘སོ ཀིར ཝཱཎིཛོ ནིཀྑནྟོ’’ཏི གནྟྭཱ ཨཊཝིཡཾ ཨཊྛཾསུ. ཝཱཎིཛོཔི གནྟྭཱ ཨཊཝིམུཁེ ཨེཀསྨིཾ གཱམེ ཝཱསཾ ཀཏྭཱ དྭེ ཏཡོཔི དིཝསེ གོཎསཀཊཱདཱིནི སཾཝིདཧི, ཏེསཾ པན བྷིཀྑཱུནཾ ནིབདྡྷཾ བྷིཀྑཾ དེཏིཡེཝ. ཙོརཱ ཏསྨིཾ ཨཏིཙིརཱཡནྟེ ‘‘གཙྪ, ཏསྶ ནིཀྑམནདིཝསཾ ཉཏྭཱ ཨེཧཱི’’ཏི ཨེཀཾ པུརིསཾ པཧིཎིཾསུ. སོ ཏཾ གཱམཾ གནྟྭཱ ཨེཀཾ སཧཱཡཀཾ པུཙྪི – ‘‘ཀདཱ ཝཱཎིཛོ ནིཀྑམིསྶཏཱི’’ཏི. སོ ‘‘དྭཱིཧཏཱིཧཙྩཡེནཱ’’ཏི ཝཏྭཱ ‘‘ཀིམཏྠཾ པན པུཙྪསཱི’’ཏི ཨཱཧ. ཨཐསྶ སོ ‘‘མཡཾ པཉྩསཏཱ ཙོརཱ ཨེཏསྶཏྠཱཡ ཨཊཝིཡཾ ཋིཏཱ’’ཏི ཨཱཙིཀྑི. ཨིཏརོ ‘‘ཏེན ཧི གཙྪ, སཱིགྷཾ ནིཀྑམིསྶཏཱི’’ཏི ཏཾ ཨུཡྻོཛེཏྭཱ, ‘‘ཀིཾ ནུ ཁོ ཙོརེ ཝཱརེམི, ཨུདཱཧུ ཝཱཎིཛ’’ནྟི ཙིནྟེཏྭཱ, ‘‘ཀིཾ མེ ཙོརེཧི, ཝཱཎིཛཾ ནིསྶཱཡ པཉྩསཏཱ བྷིཀྑཱུ ཛཱིཝནྟི, ཝཱཎིཛསྶ སཉྙཾ དསྶཱམཱི’’ཏི སོ ཏསྶ སནྟིཀཾ གནྟྭཱ ‘‘ཀདཱ གམིསྶཐཱ’’ཏི པུཙྪིཏྭཱ ‘‘ཏཏིཡདིཝསེ’’ཏི ཝུཏྟེ མཡ྄ཧཾ ཝཙནཾ ཀརོཐ, ཨཊཝིཡཾ ཀིར ཏུམྷཱཀཾ ཨཏྠཱཡ པཉྩསཏཱ ཙོརཱ ཋིཏཱ, མཱ ཏཱཝ གམིཏྠཱཏི. ཏྭཾ ཀཐཾ ཛཱནཱསཱིཏི? ཏེསཾ ཨནྟརེ མམ སཧཱཡོ ཨཏྠི, ཏསྶ མེ ཀཐཱཡ ཉཱཏནྟི. ‘‘ཏེན ཧི ‘ཀིཾ མེ ཨེཏྟོ གཏེནཱ’ཏི ནིཝཏྟིཏྭཱ གེཧམེཝ གམིསྶཱམཱི’’ཏི ཨཱཧ. ཏསྨིཾ ཙིརཱཡནྟེ པུན ཏེཧི ཙོརེཧི པེསིཏོ པུརིསོ ཨཱགནྟྭཱ ཏཾ སཧཱཡཀཾ པུཙྪིཏྭཱ ཏཾ པཝཏྟིཾ སུཏྭཱ ‘‘ནིཝཏྟིཏྭཱ གེཧམེཝ ཀིར གམིསྶཏཱི’’ཏི གནྟྭཱ ཙོརཱནཾ ཨཱརོཙེསི. ཏཾ སུཏྭཱ ཙོརཱ ཏཏོ ནིཀྑམིཏྭཱ ཨིཏརསྨིཾ མགྒེ ཨཊྛཾསུ, ཏསྨིཾ ཙིརཡནྟེ པུནཔི ཏེ ཙོརཱ ཏསྶ སནྟིཀཾ པུརིསཾ པེསེསུཾ. སོ ཏེསཾ ཏཏྠ ཋིཏབྷཱཝཾ ཉཏྭཱ པུན ཝཱཎིཛསྶ ཨཱརོཙེསི. ཝཱཎིཛོ ‘‘ཨིདྷཱཔི མེ ཝེཀལླཾ ནཏྠི, ཨེཝཾ སནྟེ ནེཝ ཨེཏྟོ གམིསྶཱམི, ན ཨིཏོ, ཨིདྷེཝ བྷཝིསྶཱམཱི’’ཏི བྷིཀྑཱུནཾ སནྟིཀཾ གནྟྭཱ ཨཱཧ – ‘‘བྷནྟེ, ཙོརཱ ཀིར མཾ ཝིལུམྤིཏུཀཱམཱ མགྒེ ཋིཏཱ, ‘པུན ནིཝཏྟིསྶཏཱི’ཏི སུཏྭཱ ཨིཏརསྨིཾ མགྒེ ཋིཏཱ, ཨཧཾ ཨེཏྟོ ཝཱ ཨིཏོ ཝཱ ཨགནྟྭཱ ཐོཀཾ ཨིདྷེཝ བྷཝིསྶཱམི, བྷདནྟཱ ཨིདྷེཝ ཝསིཏུཀཱམཱ ཝསནྟུ, གནྟུཀཱམཱ ཨཏྟནོ རུཙིཾ ཀརོནྟཱུ’’ཏི. བྷིཀྑཱུ ‘‘ཨེཝཾ སནྟེ མཡཾ ནིཝཏྟིསྶཱམཱ’’ཏི ཝཱཎིཛཾ ཨཱཔུཙྪིཏྭཱ པུནདེཝ སཱཝཏྠིཾ གནྟྭཱ སཏྠཱརཾ ཝནྡིཏྭཱ ནིསཱིདིཾསུ. སཏྠཱ ‘‘ཀིཾ, བྷིཀྑཝེ, མཧཱདྷནཝཱཎིཛེན སདྡྷིཾ ན གམིཏྠཱ’’ཏི པུཙྪིཏྭཱ ‘‘ཨཱམ, བྷནྟེ, མཧཱདྷནཝཱཎིཛསྶ ཝིལུམྤནཏྠཱཡ དྭཱིསུཔི མགྒེསུ ཙོརཱ པརིཡུཊྛིཾསུ, ཏེན སོ ཏཏྠེཝ ཋིཏོ, མཡཾ པན ཏཾ ཨཱཔུཙྪིཏྭཱ ཨཱགཏཱ’’ཏི ཝུཏྟེ, ‘‘བྷིཀྑཝེ, མཧཱདྷནཝཱཎིཛོ ཙོརཱནཾ ཨཏྠིཏཱཡ མགྒཾ པརིཝཛྫཏི, ཛཱིཝིཏུཀཱམོ ཝིཡ པུརིསོ ཧལཱཧལཾ ཝིསཾ པརིཝཛྫེཏི, བྷིཀྑུནཱཔི ‘ཏཡོ བྷཝཱ ཙོརེཧི པརིཡུཊྛིཏམགྒསདིསཱ’ཏི ཉཏྭཱ པཱཔཾ པརིཝཛྫེཏུཾ ཝཊྚཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༢༣.

‘‘ཝཱཎིཛོཝ བྷཡཾ མགྒཾ, ཨཔྤསཏྠོ མཧདྡྷནོ;

ཝིསཾ ཛཱིཝིཏུཀཱམོཝ, པཱཔཱནི པརིཝཛྫཡེ’’ཏི.

ཏཏྠ བྷཡནྟི བྷཱཡིཏབྦཾ, ཙོརེཧི པརིཡུཊྛིཏཏྟཱ སཔྤཊིབྷཡནྟི ཨཏྠོ. ཨིདཾ ཝུཏྟཾ ཧོཏི – ཡཐཱ མཧཱདྷནཝཱཎིཛོ ཨཔྤསཏྠོ སཔྤཊིབྷཡཾ མགྒཾ, ཡཐཱ ཙ ཛཱིཝིཏུཀཱམོ ཧལཱཧལཾ ཝིསཾ པརིཝཛྫེཏི, ཨེཝཾ པཎྜིཏོ བྷིཀྑུ ཨཔྤམཏྟཀཱནིཔི པཱཔཱནི པརིཝཛྫེཡྻཱཏི.

དེསནཱཝསཱནེ ཏེ བྷིཀྑཱུ སཧ པཊིསམྦྷིདཱཧི ཨརཧཏྟཾ པཱཔུཎིཾསུ, སམྤཏྟམཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

མཧཱདྷནཝཱཎིཛཝཏྠུ སཏྟམཾ.

༨. ཀུཀྐུཊམིཏྟནེསཱདཝཏྠུ

པཱཎིམྷི ཙེཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཀུཀྐུཊམིཏྟཾ ནཱམ ནེསཱདཾ ཨཱརབྦྷ ཀཐེསི.

རཱཛགཧེ ཀིར ཨེཀཱ སེཊྛིདྷཱིཏཱ ཝཡཔྤཏྟཱ སཏྟབྷཱུམིཀཔཱསཱདསྶ ཨུཔརི སིརིགབྦྷེ ཨཱརཀྑཎཏྠཱཡ ཨེཀཾ པརིཙཱརིཀཾ དཏྭཱ མཱཏཱཔིཏཱུཧི ཝཱསིཡམཱནཱ ཨེཀདིཝསཾ སཱཡནྷསམཡེ ཝཱཏཔཱནེན ཨནྟརཝཱིཐིཾ ཨོལོཀེནྟཱི པཉྩ པཱསསཏཱནི པཉྩ སཱུལསཏཱནི ཨཱདཱཡ མིགེ ཝདྷིཏྭཱ ཛཱིཝམཱནཾ ཨེཀཾ ཀུཀྐུཊམིཏྟཾ ནཱམ ནེསཱདཾ པཉྩ མིགསཏཱནི ཝདྷིཏྭཱ ཏེསཾ མཾསེན མཧཱསཀཊཾ པཱུརེཏྭཱ སཀཊདྷུརེ ནིསཱིདིཏྭཱ མཾསཝིཀྐིཎནཏྠཱཡ ནགརཾ པཝིསནྟཾ དིསྭཱ ཏསྨིཾ པཊིབདྡྷཙིཏྟཱ པརིཙཱརིཀཱཡ ཧཏྠེ པཎྞཱཀཱརཾ དཏྭཱ ‘‘གཙྪ, ཨེཏསྶ པཎྞཱཀཱརཾ དཏྭཱ གམནཀཱལཾ ཉཏྭཱ ཨེཧཱི’’ཏི པེསེསི. སཱ གནྟྭཱ ཏསྶ པཎྞཱཀཱརཾ དཏྭཱ པུཙྪི – ‘‘ཀདཱ གམིསྶསཱི’’ཏི? སོ ‘‘ཨཛྫ མཾསཾ ཝིཀྐིཎིཏྭཱ པཱཏོཝ ཨསུཀདྭཱརེན ནཱམ ནིཀྑམིཏྭཱ གམིསྶཱམཱི’’ཏི ཨཱཧ. སཱ ཏེན ཀཐིཏཀཐཾ སུཏྭཱ ཨཱགནྟྭཱ ཏསྶཱ ཨཱརོཙེསི. སེཊྛིདྷཱིཏཱ ཨཏྟནཱ གཧེཏབྦཡུཏྟཀཾ ཝཏྠཱབྷརཎཛཱཏཾ སཾཝིདཧིཏྭཱ པཱཏོཝ མལིནཝཏྠཾ ནིཝཱསེཏྭཱ ཀུཊཾ ཨཱདཱཡ དཱསཱིཧི སདྡྷིཾ ཨུདཀཏིཏྠཾ གཙྪནྟཱི ཝིཡ ནིཀྑམིཏྭཱ ཏཾ ཋཱནཾ གནྟྭཱ ཏསྶཱགམནཾ ཨོལོཀེནྟཱི ཨཊྛཱསི. སོཔི པཱཏོཝ སཀཊཾ པཱཛེནྟོ ནིཀྑམི. སཱ ཏསྶ པཙྪཏོ པཙྪཏོ པཱཡཱསི. སོ ཏཾ དིསྭཱ ‘‘ཨཧཾ ཏཾ ‘ཨསུཀསྶ ནཱམ དྷཱིཏཱ’ཏི ན ཛཱནཱམི, མཱ མཾ ཨནུབནྡྷི, ཨམྨཱ’’ཏི ཨཱཧ. ན མཾ ཏྭཾ པཀྐོསསི, ཨཧཾ ཨཏྟནོ དྷམྨཏཱཡ ཨཱགཙྪཱམི, ཏྭཾ ཏུཎྷཱི ཧུཏྭཱ ཨཏྟནོ སཀཊཾ པཱཛེཧཱིཏི. སོ པུནཔྤུནཾ ཏཾ ནིཝཱརེཏིཡེཝ. ཨཐ ནཾ སཱ ཨཱཧ – ‘‘སཱམི, སིརཱི ནཱམ ཨཏྟནོ སནྟིཀཾ ཨཱགཙྪནྟཱི ནིཝཱརེཏུཾ ན ཝཊྚཏཱི’’ཏི. སོ ཏསྶཱ ནིསྶཾསཡེན ཨཱགམནཀཱརཎཾ ཉཏྭཱ ཏཾ སཀཊཾ ཨཱརོཔེཏྭཱ ཨགམཱསི. ཏསྶཱ མཱཏཱཔིཏརོ ཨིཏོ ཙིཏོ ཙ པརིཡེསཱཔེཏྭཱ ཨཔསྶནྟཱ ‘‘མཏཱ བྷཝིསྶཏཱི’’ཏི མཏཀབྷཏྟཾ ཀརིཾསུ. སཱཔི ཏེན སདྡྷིཾ སཾཝཱསམནྭཱཡ པཊིཔཱཊིཡཱ སཏྟ པུཏྟེ ཝིཛཱཡིཏྭཱ ཏེ ཝཡཔྤཏྟེ གྷརབནྡྷནེན བནྡྷི.

ཨཐེཀདིཝསཾ སཏྠཱ པཙྩཱུསསམཡེ ལོཀཾ ཝོལོཀེནྟོ ཀུཀྐུཊམིཏྟཾ སཔུཏྟཾ སསུཎིསཾ ཨཏྟནོ ཉཱཎཛཱལསྶ ཨནྟོ པཝིཊྛཾ དིསྭཱ, ‘‘ཀིཾ ནུ ཁོ ཨེཏ’’ནྟི ཨུཔདྷཱརེནྟོ ཏེསཾ པནྣརསནྣམྤི སོཏཱཔཏྟིམགྒསྶ ཨུཔནིསྶཡཾ དིསྭཱ པཱཏོཝ པཏྟཙཱིཝརཾ ཨཱདཱཡ ཏསྶ པཱསཊྛཱནཾ ཨགམཱསི. ཏཾ དིཝསཾ པཱསེ བདྡྷོ ཨེཀམིགོཔི ནཱཧོསི. སཏྠཱ ཏསྶ པཱསམཱུལེ པདཝལཉྫཾ དསྶེཏྭཱ པུརཏོ ཨེཀསྶ གུམྦསྶ ཧེཊྛཱ ཚཱཡཱཡཾ ནིསཱིདི. ཀུཀྐུཊམིཏྟོ པཱཏོཝ དྷནུཾ ཨཱདཱཡ པཱསཊྛཱནཾ གནྟྭཱ ཨཱདིཏོ པཊྛཱཡ པཱསེ ཨོལོཀཡམཱནོ པཱསེ བདྡྷཾ ཨེཀམྤི མིགཾ ཨདིསྭཱ སཏྠུ པདཝལཉྫཾ ཨདྡས. ཨཐསྶ ཨེཏདཧོསི – ‘‘ཀོ མཡ྄ཧཾ བདྡྷམིགེ མོཙེནྟོ ཝིཙརཏཱི’’ཏི. སོ སཏྠརི ཨཱགྷཱཏཾ བནྡྷིཏྭཱ གཙྪནྟོ གུམྦམཱུལེ ནིསིནྣཾ སཏྠཱརཾ དིསྭཱ, ‘‘ཨིམིནཱ མམ མིགཱ མོཙིཏཱ བྷཝིསྶནྟི, མཱརེསྶཱམི ན’’ནྟི དྷནུཾ ཨཱཀཌྜྷི. སཏྠཱ དྷནུཾ ཨཱཀཌྜྷིཏུཾ དཏྭཱ ཝིསྶཛྫེཏུཾ ནཱདཱསི. སོ སརཾ ཝིསྶཛྫེཏུམྤི ཨོརོཔེཏུམྤི ཨསཀྐོནྟོ ཕཱསུཀཱཧི བྷིཛྫནྟཱིཧི ཝིཡ མུཁཏོ ཁེལེ༹ན པགྒྷརནྟེན ཀིལནྟརཱུཔོ ཨཊྛཱསི. ཨཐསྶ པུཏྟཱ གེཧཾ གནྟྭཱ ‘‘པིཏཱ ནོ ཙིརཱཡཏི, ཀིཾ ནུ ཁོ ཨེཏ’’ནྟི ཝཏྭཱ ‘‘གཙྪཐ, ཏཱཏཱ, པིཏུ སནྟིཀ’’ནྟི མཱཏརཱ པེསིཏཱ དྷནཱུནི ཨཱདཱཡ གནྟྭཱ པིཏརཾ ཏཐཱཋིཏཾ དིསྭཱ ‘‘ཨཡཾ ནོ པིཏུ པཙྩཱམིཏྟོ བྷཝིསྶཏཱི’’ཏི སཏྟཔི ཛནཱ དྷནཱུནི ཨཱཀཌྜྷིཏྭཱ བུདྡྷཱནུབྷཱཝེན ཡཐཱ ནེསཾ པིཏཱ ཋིཏོ, ཏཐེཝ ཨཊྛཾསུ. ཨཐ ནེསཾ མཱཏཱ ‘‘ཀིཾ ནུ ཁོ མེ པུཏྟཱཔི ཙིརཱཡནྟཱི’’ཏི ཝཏྭཱ སཏྟཧི སུཎིསཱཧི སདྡྷིཾ གནྟྭཱ ཏེ ཏཐཱཋིཏེ དིསྭཱ ‘‘ཀསྶ ནུ ཁོ ཨིམེ དྷནཱུནི ཨཱཀཌྜྷིཏྭཱ ཋིཏཱ’’ཏི ཨོལོཀེནྟཱི སཏྠཱརཾ དིསྭཱ བཱཧཱ པགྒཡ྄ཧ – ‘‘མཱ མེ པིཏརཾ ནཱསེཐ, མཱ མེ པིཏརཾ ནཱསེཐཱ’’ཏི མཧཱསདྡམཀཱསི. ཀུཀྐུཊམིཏྟོ ཏཾ སདྡཾ སུཏྭཱ ཙིནྟེསི – ‘‘ནཊྛོ ཝཏམྷི, སསུརོ ཀིར མེ ཨེས, ཨཧོ མཡཱ བྷཱརིཡཾ ཀམྨཾ ཀཏ’’ནྟི. པུཏྟཱཝིསྶ ‘‘ཨཡྻཀོ ཀིར ནོ ཨེས, ཨཧོ བྷཱརིཡཾ ཀམྨཾ ཀཏ’’ནྟི ཙིནྟཡིཾསུ. ཀུཀྐུཊམིཏྟོ ‘‘ཨཡཾ སསུརོ མེ’’ཏི མེཏྟཙིཏྟཾ ཨུཔཊྛཔེསི, པུཏྟཱཔིསྶ ‘‘ཨཡྻཀོ ནོ’’ཏི མེཏྟཙིཏྟཾ ཨུཔཊྛཔེསུཾ. ཨཐ ཏེ ནེསཾ མཱཏཱ སེཊྛིདྷཱིཏཱ ‘‘ཁིཔྤཾ དྷནཱུནི ཚཌྜེཏྭཱ པིཏརཾ མེ ཁམཱཔེཐཱ’’ཏི ཨཱཧ.

སཏྠཱ ཏེསཾ མུདུཙིཏྟཏཾ ཉཏྭཱ དྷནུཾ ཨོཏཱརེཏུཾ ཨདཱསི. ཏེ སབྦེ སཏྠཱརཾ ཝནྡིཏྭཱ ‘‘ཁམཐ ནོ, བྷནྟེ’’ཏི ཁམཱཔེཏྭཱ ཨེཀམནྟཾ ནིསཱིདིཾསུ. ཨཐ ནེསཾ སཏྠཱ ཨནུཔུབྦིཾ ཀཐཾ ཀཐེསི. དེསནཱཝསཱནེ ཀུཀྐུཊམིཏྟོ སདྡྷིཾ པུཏྟེཧི ཙེཝ སུཎིསཱཧི ཙ ཨཏྟཔཉྩདསམོ སོཏཱཔཏྟིཕལེ པཏིཊྛཧི. སཏྠཱ པིཎྜཱཡ ཙརིཏྭཱ པཙྪཱབྷཏྟཾ ཝིཧཱརཾ ཨགམཱསི. ཨཐ ནཾ ཨཱནནྡཏྠེརོ པུཙྪི – ‘‘བྷནྟེ, ཀཧཾ གམིཏྠཱ’’ཏི. ཀུཀྐུཊམིཏྟསྶ སནྟིཀཾ, ཨཱནནྡཱཏི. པཱཎཱཏིཔཱཏཀམྨསྶ ཝོ, བྷནྟེ, ཨཀཱརཀོ ཀཏོཏི. ཨཱམཱནནྡ, སོ ཨཏྟཔཉྩདསམོ ཨཙལསདྡྷཱཡ པཏིཊྛཱཡ ཏཱིསུ རཏནེསུ ནིཀྐངྑོ ཧུཏྭཱ པཱཎཱཏིཔཱཏཀམྨསྶ ཨཀཱརཀོ ཛཱཏོཏི. བྷིཀྑཱུ ཨཱཧཾསུ – ‘‘ནནུ, བྷནྟེ, བྷརིཡཱཔིསྶ ཨཏྠཱི’’ཏི. ཨཱམ, བྷིཀྑཝེ, སཱ ཀུལགེཧེ ཀུམཱརིཀཱ ཧུཏྭཱ སོཏཱཔཏྟིཕལཾ པཏྟཱཏི. བྷིཀྑཱུ ཀཐཾ སམུཊྛཱཔེསུཾ ‘‘ཀུཀྐུཊམིཏྟསྶ ཀིར བྷརིཡཱ ཀུམཱརིཀཀཱལེ ཨེཝ སོཏཱཔཏྟིཕལཾ པཏྭཱ ཏསྶ གེཧཾ གནྟྭཱ སཏྟ པུཏྟེ ལབྷི, སཱ ཨེཏྟཀཾ ཀཱལཾ སཱམིཀེན ‘དྷནུཾ ཨཱཧར, སརེ ཨཱཧར, སཏྟིཾ ཨཱཧར, སཱུལཾ ཨཱཧར, ཛཱལཾ ཨཱཧརཱ’ཏི ཝུཙྩམཱནཱ ཏཱནི ཨདཱསི. སོཔི ཏཱཡ དིནྣཱནི ཨཱདཱཡ གནྟྭཱ པཱཎཱཏིཔཱཏཾ ཀརོཏི, ཀིཾ ནུ ཁོ སོཏཱཔནྣཱཔི པཱཎཱཏིཔཱཏཾ ཀརོནྟཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘ན, བྷིཀྑཝེ, སོཏཱཔནྣཱ པཱཎཱཏིཔཱཏཾ ཀརོནྟི, སཱ པན ‘སཱམིཀསྶ ཝཙནཾ ཀརོམཱི’ཏི ཏཐཱ ཨཀཱསི. ‘ཨིདཾ གཧེཏྭཱ ཨེས གནྟྭཱ པཱཎཱཏིཔཱཏཾ ཀརོཏཱུ’ཏི ཏསྶཱ ཙིཏྟཾ ནཏྠི. པཱཎིཏལསྨིཉྷི ཝཎེ ཨསཏི ཝིསཾ གཎྷནྟསྶ ཏཾ ཝིསཾ ཨནུཌཧིཏུཾ ན སཀྐོཏི, ཨེཝམེཝཾ ཨཀུསལཙེཏནཱཡ ཨབྷཱཝེན པཱཔཾ ཨཀརོནྟསྶ དྷནུཨཱདཱིནི ནཱིཧརིཏྭཱ དདཏོཔི པཱཔཾ ནཱམ ན ཧོཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༢༤.

‘‘པཱཎིམྷི ཙེ ཝཎོ ནཱསྶ, ཧརེཡྻ པཱཎིནཱ ཝིསཾ;

ནཱབྦཎཾ ཝིསམནྭེཏི, ནཏྠི པཱཔཾ ཨཀུབྦཏོ’’ཏི.

ཏཏྠ ནཱསྶཱཏི ན བྷཝེཡྻ. ཧརེཡྻཱཏི ཧརིཏུཾ སཀྐུཎེཡྻ. ཀིཾ ཀཱརཎཱ? ཡསྨཱ ནཱབྦཎཾ ཝིསམནྭེཏི ཨཝཎཉྷི པཱཎིཾ ཝིསཾ ཨནྭེཏུཾ ན སཀྐོཏི, ཨེཝམེཝ དྷནུཨཱདཱིནི ནཱིཧརིཏྭཱ དེནྟསྶཱཔི ཨཀུསལཙེཏནཱཡ ཨབྷཱཝེན པཱཔཾ ཨཀུབྦཏོ པཱཔཾ ནཱམ ནཏྠི, ཨཝཎཾ པཱཎིཾ ཝིསཾ ཝིཡ ནཱསྶ ཙིཏྟཾ པཱཔཾ ཨནུགཙྪཏཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཔརེན སམཡེན བྷིཀྑཱུ ཀཐཾ སམུཊྛཱཔེསུཾ – ‘‘ཀོ ནུ ཁོ ཀུཀྐུཊམིཏྟསྶ སཔུཏྟསྶ སསུཎིསསྶ སོཏཱཔཏྟིམགྒསྶཱུཔནིསྶཡོ, ཀེན ཀཱརཎེན ནེསཱདཀུལེ ནིབྦཏྟོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, བྷིཀྑཝེ, ཨཏཱིཏེ ཀསྶཔདསབལསྶ དྷཱཏུཙེཏིཡཾ སཾཝིདཧནྟཱ ཨེཝམཱཧཾསུ – ‘‘ཀིཾ ནུ ཁོ ཨིམསྶ ཙེཏིཡསྶ མཏྟིཀཱ བྷཝིསྶཏི, ཀིཾ ཨུདཀ’’ནྟི. ཨཐ ནེསཾ ཨེཏདཧོསི – ‘‘ཧརིཏཱལམནོསིལཱ མཏྟིཀཱ བྷཝིསྶཏི, ཏིལཏེལཾ ཨུདཀ’’ནྟི. ཏེ ཧརིཏཱལམནོསིལཱ ཀོཊྚེཏྭཱ ཏིལཏེལེན སཾསནྡིཏྭཱ ཨིཊྛཀཱཡ གྷཊེཏྭཱ སུཝཎྞེན ཁཙིཏྭཱ ཨནྟོ ཙིནིཾསུ, བཧིམུཁེ པན ཨེཀགྒྷནསུཝཎྞཨིཊྛཀཱཝ ཨཧེསུཾ. ཨེཀེཀཱ སཏསཧསྶགྒྷནིཀཱ ཨཧོསི. ཏེ ཡཱཝ དྷཱཏུནིདྷཱནཱ ཙེཏིཡེ ནིཊྛིཏེ ཙིནྟཡིཾསུ – ‘‘དྷཱཏུནིདྷཱནཀཱལེ བཧུནཱ དྷནེན ཨཏྠོ, ཀཾ ནུ ཁོ ཛེཊྛཀཾ ཀརོམཱ’’ཏི.

ཨཐེཀོ གཱམཝཱསིཀོ སེཊྛི ‘‘ཨཧཾ ཛེཊྛཀོ བྷཝིསྶཱམཱི’’ཏི དྷཱཏུནིདྷཱནེ ཨེཀཾ ཧིརཉྙཀོཊིཾ པཀྑིཔི. ཏཾ དིསྭཱ རཊྛཝཱསིནོ ‘‘ཨཡཾ ནགརསེཊྛི དྷནམེཝ སཾཧརཏི, ཨེཝརཱུཔེ ཙེཏིཡེ ཛེཊྛཀོ བྷཝིཏུཾ ན སཀྐོཏི, གཱམཝཱསཱི པན ཀོཊིདྷནཾ པཀྑིཔིཏྭཱ ཛེཊྛཀོ ཛཱཏོ’’ཏི ཨུཛ྄ཛྷཱཡིཾསུ. སོ ཏེསཾ ཀཐཾ སུཏྭཱ ‘‘ཨཧཾ དྭེ ཀོཊིཡོ དཏྭཱ ཛེཊྛཀོ བྷཝིསྶཱམཱི’’ཏི དྭེ ཀོཊིཡོ ཨདཱསི. ཨིཏརོ ‘‘ཨཧམེཝ ཛེཊྛཀོ བྷཝིསྶཱམཱི’’ཏི ཏིསྶོ ཀོཊིཡོ ཨདཱསི. ཨེཝཾ ཝཌྜྷེཏྭཱ ཝཌྜྷེཏྭཱ ནགརཝཱསཱི ཨཊྛ ཀོཊིཡོ ཨདཱསི. གཱམཝཱསིནོ པན གེཧེ ནཝཀོཊིདྷནམེཝ ཨཏྠི, ནགརཝཱསིནོ ཙཏྟཱལཱིསཀོཊིདྷནཾ. ཏསྨཱ གཱམཝཱསཱི ཙིནྟེསི – ‘‘སཙཱཧཾ ནཝ ཀོཊིཡོ དསྶཱམི, ཨཡཾ ‘དས ཀོཊིཡོ དསྶཱམཱི’ཏི ཝཀྑཏི, ཨཐ མེ ནིདྡྷནབྷཱཝོ པཉྙཱཡིསྶཏཱི’’ཏི. སོ ཨེཝམཱཧ – ‘‘ཨཧཾ ཨེཏྟཀཉྩ དྷནཾ དསྶཱམི, སཔུཏྟདཱརོ ཙ ཙེཏིཡསྶ དཱསོ བྷཝིསྶཱམཱི’’ཏི སཏྟ པུཏྟེ སཏྟ སུཎིསཱཡོ བྷརིཡཉྩ གཧེཏྭཱ ཨཏྟནཱ སདྡྷིཾ ཙེཏིཡསྶ ནིཡྻཱདེསི. རཊྛཝཱསིནོ ‘‘དྷནཾ ནཱམ སཀྐཱ ཨུཔྤཱདེཏུཾ, ཨཡཾ པན སཔུཏྟདཱརོ ཨཏྟཱནཾ ནིཡྻཱདེསི, ཨཡམེཝ ཛེཊྛཀོ ཧོཏཱུ’’ཏི ཏཾ ཛེཊྛཀཾ ཀརིཾསུ. ཨིཏི ཏེ སོལ༹སཔི ཛནཱ ཙེཏིཡསྶ དཱསཱ ཨཧེསུཾ. རཊྛཝཱསིནོ པན ཏེ བྷུཛིསྶེ ཨཀཾསུ. ཨེཝཾ སནྟེཔི ཙེཏིཡམེཝ པཊིཛགྒིཏྭཱ ཡཱཝཏཱཡུཀཾ ཋཏྭཱ ཏཏོ ཙུཏཱ དེཝལོཀེ ནིབྦཏྟིཾསུ. ཏེསུ ཨེཀཾ བུདྡྷནྟརཾ དེཝལོཀེ ཝསནྟེསུ ཨིམསྨིཾ བུདྡྷུཔྤཱདེ བྷརིཡཱ ཏཏོ ཙཝིཏྭཱ རཱཛགཧེ སེཊྛིནོ དྷཱིཏཱ ཧུཏྭཱ ནིབྦཏྟི. སཱ ཀུམཱརིཀཱཝ ཧུཏྭཱ སོཏཱཔཏྟིཕལཾ པཱཔུཎི. ཨདིཊྛསཙྩསྶ པན པཊིསནྡྷི ནཱམ བྷཱརིཡཱཏི ཏསྶཱ སཱམིཀོ སམྤརིཝཏྟམཱནོ གནྟྭཱ ནེསཱདཀུལེ ནིབྦཏྟི. ཏསྶ སཧ དསྶནེནེཝ སེཊྛིདྷཱིཏརཾ པུབྦསིནེཧོ ཨཛ྄ཛྷོཏྠརི. ཝུཏྟམྤི ཙེཏཾ –

‘‘པུབྦེཝ སནྣིཝཱསེན, པཙྩུཔྤནྣཧིཏེན ཝཱ;

ཨེཝཾ ཏཾ ཛཱཡཏེ པེམཾ, ཨུཔྤལཾཝ ཡཐོདཀེ’’ཏི. (ཛཱ. ༡.༢.༡༧༤);

སཱ པུབྦསིནེཧེནེཝ ནེསཱདཀུལཾ ཨགམཱསི. པུཏྟཱཔིསྶཱ དེཝལོཀཱ ཙཝིཏྭཱ ཏསྶཱ ཨེཝ ཀུཙྪིསྨིཾ པཊིསནྡྷིཾ གཎྷིཾསུ, སུཎིསཱཡོཔིསྶཱ ཏཏྠ ཏཏྠ ནིབྦཏྟིཏྭཱ ཝཡཔྤཏྟཱ ཏེསཾཡེཝ གེཧཾ ཨགམཾསུ. ཨེཝཾ ཏེ སབྦེཔི ཏདཱ ཙེཏིཡཾ པཊིཛགྒིཏྭཱ ཏསྶ ཀམྨསྶཱནུབྷཱཝེན སོཏཱཔཏྟིཕལཾ པཏྟཱཏི.

ཀུཀྐུཊམིཏྟནེསཱདཝཏྠུ ཨཊྛམཾ.

༩. ཀོཀསུནཁལུདྡཀཝཏྠུ

ཡོ ཨཔྤདུཊྛསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀོཀཾ ནཱམ སུནཁལུདྡཀཾ ཨཱརབྦྷ ཀཐེསི.

སོ ཀིར ཨེཀདིཝསཾ པུབྦཎྷསམཡེ དྷནུཾ ཨཱདཱཡ སུནཁཔརིཝུཏོ ཨརཉྙཾ གཙྪནྟོ ཨནྟརཱམགྒེ ཨེཀཾ པིཎྜཱཡ པཝིསནྟཾ བྷིཀྑུཾ དིསྭཱ ཀུཛ྄ཛྷིཏྭཱ ‘‘ཀཱལ༹ཀཎྞི མེ དིཊྛོ, ཨཛྫ ཀིཉྩི ན ལབྷིསྶཱམཱི’’ཏི ཙིནྟེཏྭཱ པཀྐཱམི. ཐེརོཔི གཱམེ པིཎྜཱཡ ཙརིཏྭཱ ཀཏབྷཏྟཀིཙྩོ པུན ཝིཧཱརཾ པཱཡཱསི. ཨིཏརོཔི ཨརཉྙེ ཝིཙརིཏྭཱ ཀིཉྩི ཨལབྷིཏྭཱ པཙྩཱགཙྪནྟོ པུན ཐེརཾ དིསྭཱ ‘‘ཨཛྫཱཧཾ ཨིམཾ ཀཱལ༹ཀཎྞིཾ དིསྭཱ ཨརཉྙཾ གཏོ ཀིཉྩི ན ལབྷིཾ, ཨིདཱནི མེ པུནཔི ཨབྷིམུཁོ ཛཱཏོ, སུནཁེཧི ནཾ ཁཱདཱཔེསྶཱམཱི’’ཏི སཉྙཾ དཏྭཱ སུནཁེ ཝིསྶཛྫེསི. ཐེརོཔི ‘‘མཱ ཨེཝཾ ཀརི ཨུཔཱསཀཱ’’ཏི ཡཱཙི. སོ ‘‘ཨཛྫཱཧཾ ཏཝ སམྨུཁཱིབྷཱུཏཏྟཱ ཀིཉྩི ནཱལཏྠཾ, པུནཔི མེ སམྨུཁཱིབྷཱཝམཱགཏོསི, ཁཱདཱཔེསྶཱམེཝ ཏ’’ནྟི ཝཏྭཱ སུནཁེ ཨུཡྻོཛེསི. ཐེརོ ཝེགེན ཨེཀཾ རུཀྑཾ ཨབྷིརུཧིཏྭཱ པུརིསཔྤམཱཎེ ཋཱནེ ནིསཱིདི. སུནཁཱ རུཀྑཾ པརིཝཱརེསུཾ. ལུདྡཀོ གནྟྭཱ ‘‘རུཀྑཾ ཨབྷིརུཧཏོཔི ཏེ མོཀྑོ ནཏྠཱི’’ཏི ཏཾ སརཏུཎྜེན པཱདཏལེ ཝིཛ྄ཛྷི. ཐེརོ ‘‘མཱ ཨེཝཾ ཀརོཧཱི’’ཏི ཏཾ ཡཱཙིཡེཝ. ཨིཏརོ ཏསྶ ཡཱཙནཾ ཨནཱདིཡིཏྭཱ པུནཔྤུནཾ ཝིཛ྄ཛྷིཡེཝ. ཐེརོ ཨེཀསྨིཾ པཱདཏལེ ཝིཛ྄ཛྷིཡམཱནེ ཏཾ ཨུཀྑིཔིཏྭཱ དུཏིཡཾ པཱདཾ ཨོལམྦིཏྭཱ ཏསྨིཾ ཝིཛ྄ཛྷིཡམཱནེ ཏམྤི ཨུཀྑིཔཏི, ཨེཝམསྶ སོ ཡཱཙནཾ ཨནཱདིཡིཏྭཱཝ དྭེཔི པཱདཏལཱནི ཝིཛ྄ཛྷིཡེཝ. ཐེརསྶ སརཱིརཾ ཨུཀྐཱཧི ཨཱདིཏྟཾ ཝིཡ ཨཧོསི. སོ ཝེདནཱནུཝཏྟིཀོ ཧུཏྭཱ སཏིཾ པཙྩུཔཊྛཱཔེཏུཾ ནཱསཀྑི, པཱརུཏཙཱིཝརཾ བྷསྶནྟམྤི ན སལླཀྑེསི. ཏཾ པཏམཱནཾ ཀོཀཾ སཱིསཏོ པཊྛཱཡ པརིཀྑིཔནྟམེཝ པཏི. སུནཁཱ ‘‘ཐེརོ པཏིཏོ’’ཏི སཉྙཱཡ ཙཱིཝརནྟརཾ པཝིསིཏྭཱ ཨཏྟནོ སཱམིཀཾ ལུཉྫིཏྭཱ ཁཱདནྟཱ ཨཊྛིམཏྟཱཝསེསཾ ཀརིཾསུ. སུནཁཱ ཙཱིཝརནྟརཏོ ནིཀྑམིཏྭཱ བཧི ཨཊྛཾསུ.

ཨཐ ནེསཾ ཐེརོ ཨེཀཾ སུཀྑདཎྜཀཾ བྷཉྫིཏྭཱ ཁིཔི. སུནཁཱ ཐེརཾ དིསྭཱ ‘‘སཱམིཀོཝ ཨམྷེཧི ཁཱདིཏོ’’ཏི ཉཏྭཱ ཨརཉྙཾ པཝིསིཾསུ. ཐེརོ ཀུཀྐུཙྩཾ ཨུཔྤཱདེསི ‘‘མམ ཙཱིཝརནྟརཾ པཝིསིཏྭཱ ཨེས ནཊྛོ, ཨརོགཾ ནུ ཁོ མེ སཱིལ’’ནྟི. སོ རུཀྑཱ ཨོཏརིཏྭཱ སཏྠུ སནྟིཀཾ གནྟྭཱ ཨཱདིཏོ པཊྛཱཡ སབྦཾ ཏཾ པཝཏྟིཾ ཨཱརོཙེཏྭཱ – ‘‘བྷནྟེ, མམ ཙཱིཝརཾ ནིསྶཱཡ སོ ཨུཔཱསཀོ ནཊྛོ, ཀཙྩི མེ ཨརོགཾ སཱིལཾ, ཨཏྠི མེ སམཎབྷཱཝོ’’ཏི པུཙྪི. སཏྠཱ ཏསྶ ཝཙནཾ སུཏྭཱ ‘‘བྷིཀྑུ ཨརོགཾ ཏེ སཱིལཾ, ཨཏྠི ཏེ སམཎབྷཱཝོ, སོ ཨཔྤདུཊྛསྶ པདུསྶིཏྭཱ ཝིནཱསཾ པཏྟོ, ན ཀེཝལཉྩ ཨིདཱནེཝ, ཨཏཱིཏེཔི ཨཔྤདུཊྛཱནཾ པདུསྶིཏྭཱ ཝིནཱསཾ པཏྟོཡེཝཱ’’ཏི ཝཏྭཱ ཏམཏྠཾ པཀཱསེནྟོ ཨཏཱིཏཾ ཨཱཧརི –

ཨཏཱིཏེ ཀིརེཀོ ཝེཛྫོ ཝེཛྫཀམྨཏྠཱཡ གཱམཾ ཝིཙརིཏྭཱ ཀིཉྩི ཀམྨཾ ཨལབྷིཏྭཱ ཚཱཏཛ྄ཛྷཏྟོ ནིཀྑམིཏྭཱ གཱམདྭཱརེ སམྦཧུལེ ཀུམཱརཀེ ཀཱིལ༹ནྟེ དིསྭཱ ‘‘ཨིམེ སཔྤེན ཌཾསཱཔེཏྭཱ ཏིཀིཙྪིཏྭཱ ཨཱཧཱརཾ ལབྷིསྶཱམཱི’’ཏི ཨེཀསྨིཾ རུཀྑབིལེ སཱིསཾ ནིཧརིཏྭཱ ནིཔནྣཾ སཔྤཾ དསྶེཏྭཱ, ‘‘ཨམྦྷོ, ཀུམཱརཀཱ ཨེསོ སཱལི༹ཀཔོཏཀོ, གཎྷཐ ན’’ནྟི ཨཱཧ. ཨཐེཀོ ཀུམཱརཀོ སཔྤཾ གཱིཝཱཡཾ དལ༹ྷཾ གཧེཏྭཱ ནཱིཧརིཏྭཱ ཏསྶ སཔྤབྷཱཝཾ ཉཏྭཱ ཝིརཝནྟོ ཨཝིདཱུརེ ཋིཏསྶ ཝེཛྫསྶ མཏྠཀེ ཁིཔི. སཔྤོ ཝེཛྫསྶ ཁནྡྷཊྛིཀཾ པརིཀྑིཔིཏྭཱ དལ༹ྷཾ ཌཾསིཏྭཱ ཏཏྠེཝ ཛཱིཝིཏཀྑཡཾ པཱཔེསི, ཨེཝམེས ཀོཀོ སུནཁལུདྡཀོ པུབྦེཔི ཨཔྤདུཊྛསྶ པདུསྶིཏྭཱ ཝིནཱསཾ པཏྟོཡེཝཱཏི.

སཏྠཱ ཨིམཾ ཨཏཱིཏཾ ཨཱཧརིཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༢༥.

‘‘ཡོ ཨཔྤདུཊྛསྶ ནརསྶ དུསྶཏི, སུདྡྷསྶ པོསསྶ ཨནངྒཎསྶ;

ཏམེཝ བཱལཾ པཙྩེཏི པཱཔཾ, སུཁུམོ རཛོ པཊིཝཱཏཾཝ ཁིཏྟོ’’ཏི.

ཏཏྠ ཨཔྤདུཊྛསྶཱཏི ཨཏྟནོ ཝཱ སབྦསཏྟཱནཾ ཝཱ ཨདུཊྛསྶ. ནརསྶཱཏི སཏྟསྶ. དུསྶཏཱིཏི ཨཔརཛ྄ཛྷཏི. སུདྡྷསྶཱཏི ནིརཔརཱདྷསྶེཝ. པོསསྶཱཏི ཨིདམྤི ཨཔརེནཱཀཱརེན སཏྟཱདྷིཝཙནམེཝ. ཨནངྒཎསྶཱཏི ནིཀྐིལེསསྶ. པཙྩེཏཱིཏི པཏིཨེཏི. པཊིཝཱཏནྟི ཡཐཱ ཨེཀེན པུརིསེན པཊིཝཱཏེ ཋིཏཾ པཧརིཏུཀཱམཏཱཡ ཁིཏྟོ སུཁུམོ རཛོཏི ཏམེཝ པུརིསཾ པཙྩེཏི, ཏསྶེཝ ཨུཔརི པཏཏི, ཨེཝམེཝ ཡོ པུགྒལོ ཨཔདུཊྛསྶ པུརིསསྶ པཱཎིཔྤཧརཱདཱིནི དདནྟོ པདུསྶཏི, ཏམེཝ བཱལཾ དིཊྛེཝ དྷམྨེ, སམྤརཱཡེ ཝཱ ནིརཡཱདཱིསུ ཝིཔཙྩམཱནཾ ཏཾ པཱཔཾ ཝིཔཱཀདུཀྑཝསེན པཙྩེཏཱིཏི ཨཏྠོ.

དེསནཱཝསཱནེ སོ བྷིཀྑུ ཨརཧཏྟེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

ཀོཀསུནཁལུདྡཀཝཏྠུ ནཝམཾ.

༡༠. མཎིཀཱརཀུལཱུཔཀཏིསྶཏྠེརཝཏྠུ

གབྦྷམེཀེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཎིཀཱརཀུལཱུཔཀཾ ཏིསྶཏྠེརཾ ཨཱརབྦྷ ཀཐེསི.

སོ ཀིར ཐེརོ ཨེཀསྶ མཎིཀཱརསྶ ཀུལེ དྭཱདས ཝསྶཱནི བྷུཉྫི. ཏསྨིཾ ཀུལེ ཛཡམྤཏིཀཱ མཱཏཱཔིཏུཊྛཱནེ ཋཏྭཱ ཐེརཾ པཊིཛགྒིཾསུ. ཨཐེཀདིཝསཾ སོ མཎིཀཱརོ ཐེརསྶ པུརཏོ མཾསཾ ཚིནྡནྟོ ནིསིནྣོ ཧོཏི. ཏསྨིཾ ཁཎེ རཱཛཱ པསེནདི ཀོསལོ ཨེཀཾ མཎིརཏནཾ ‘‘ཨིམཾ དྷོཝིཏྭཱ ཝིཛ྄ཛྷིཏྭཱ པཧིཎཏཱུ’’ཏི པེསེསི. མཎིཀཱརོ སལོཧིཏེནེཝ ཧཏྠེན ཏཾ པཊིགྒཧེཏྭཱ པེལཱ༹ཡ ཨུཔརི ཋཔེཏྭཱ ཧཏྠདྷོཝནཏྠཾ ཨནྟོ པཱཝིསི. ཏསྨིཾ པན གེཧེ པོསཱཝནིཡཀོཉྩསཀུཎོ ཨཏྠི. སོ ལོཧིཏགནྡྷེན མཾསསཉྙཱཡ ཏཾ མཎིཾ ཐེརསྶ པསྶནྟསྶེཝ གིལི. མཎིཀཱརོ ཨཱགནྟྭཱ མཎིཾ ཨཔསྶནྟོ ‘‘མཎི ཀེན གཧིཏོ’’ཏི བྷརིཡཉྩ པུཏྟཀེ ཙ པཊིཔཱཊིཡཱ པུཙྪིཏྭཱ ཏེཧི ‘‘ན གཎྷཱམཱ’’ཏི ཝུཏྟེ ‘‘ཐེརེན གཧིཏོ བྷཝིསྶཏཱི’’ཏི. ཙིནྟེཏྭཱ བྷརིཡཱཡ སདྡྷིཾ མནྟེསི – ‘‘ཐེརེན མཎི གཧིཏོ བྷཝིསྶཏཱི’’ཏི. སཱ, སཱམི, མཱ ཨེཝཾ ཨཝཙ, ཨེཏྟཀཾ ཀཱལཾ མཡཱ ཐེརསྶ ན ཀིཉྩི ཝཛྫཾ དིཊྛཔུབྦཾ, ན སོ མཎིཾ གཎྷཱཏཱིཏི. མཎིཀཱརོ ཐེརཾ པུཙྪི – ‘‘བྷནྟེ, ཨིམསྨིཾ ཋཱནེ མཎིརཏནཾ ཏུམྷེཧི གཧིཏ’’ནྟི. ན གཎྷཱམི, ཨུཔཱསཀཱཏི. བྷནྟེ, ན ཨིདྷ ཨཉྙོ ཨཏྠི, ཏུམྷེཧིཡེཝ གཧིཏོ བྷཝིསྶཏི, དེཐ མེ མཎིརཏནནྟི. སོ ཏསྨིཾ ཨསམྤཊིཙྪནྟེ པུན བྷརིཡཾ ཨཱཧ – ‘‘ཐེརེནེཝ མཎི གཧིཏོ, པཱིལེ༹ཏྭཱ ནཾ པུཙྪིསྶཱམཱི’’ཏི. སཱ, སཱམི, མཱ ནོ ནཱསཡི, ཝརཾ ཨམྷེཧི དཱསབྱཾ ཨུཔགནྟུཾ, ན ཙ ཐེརཾ ཨེཝརཱུཔཾ ཝཏྟུནྟི. སོ ‘‘སབྦེཝ མཡཾ དཱསཏྟཾ ཨུཔགཙྪནྟཱ མཎིམཱུལཾ ན ཨགྒྷཱམཱ’’ཏི རཛྫུཾ གཧེཏྭཱ ཐེརསྶ སཱིསཾ ཝེཋེཏྭཱ དཎྜེན གྷཊྚེསི. ཐེརསྶ སཱིསཏོ ཙ ཀཎྞནཱསཱཧི ཙ ལོཧིཏཾ པགྒྷརི, ཨཀྑཱིནི ནིཀྑམནཱཀཱརཔྤཏྟཱནི ཨཧེསུཾ, སོ ཝེདནཱཔམཏྟོ བྷཱུམིཡཾ པཏི. ཀོཉྩོ ལོཧིཏགནྡྷེནཱ གནྟྭཱ ལོཧིཏཾ པིཝི. ཨཐ ནཾ མཎིཀཱརོ ཐེརེ ཨུཔྤནྣཀོདྷཝེགེན ‘‘ཏྭཾ ཀིཾ ཀརོསཱི’’ཏི པཱདེན པཧརིཏྭཱ ཁིཔི. སོ ཨེཀཔྤཧཱརེནེཝ མརིཏྭཱ ཨུཏྟཱནོ ཨཧོསི.

ཐེརོ ཏཾ དིསྭཱ, ཨུཔཱསཀ, སཱིསེ ཝེཋནཾ ཏཱཝ མེ སིཐིལཾ ཀཏྭཱ ཨིམཾ ཀོཉྩཾ ཨོལོཀེཧི ‘‘མཏོ ཝཱ, ནོ ཝཱ’’ཏི. ཨཐ ནཾ སོ ཨཱཧ – ‘‘ཨེསོ ཝིཡ ཏྭམྤི མརིསྶསཱི’’ཏི. ཨུཔཱསཀ, ཨིམིནཱ སོ མཎི གིལིཏོ, སཙེ ཨཡཾ ན ཨམརིསྶཱ, ན ཏེ ཨཧཾ མརནྟོཔི མཎིཾ ཨཱཙིཀྑིསྶནྟི. སོ ཏསྶ ཨུདརཾ ཕཱལེཏྭཱ མཎིཾ དིསྭཱ པཝེདྷེནྟོ སཾཝིགྒམཱནསོ ཐེརསྶ པཱདམཱུལེ ནིཔཛྫིཏྭཱ ‘‘ཁམཐ, མེ, བྷནྟེ, ཨཛཱནནྟེན མཡཱ ཀཏ’’ནྟི ཨཱཧ. ཨུཔཱསཀ, ནེཝ ཏུཡ྄ཧཾ དོསོ ཨཏྠི, ན མཡ྄ཧཾ, ཝཊྚསྶེཝེས དོསོ, ཁམཱམི ཏེཏི. བྷནྟེ, སཙེ མེ ཁམཐ, པཀཏིནིཡཱམེནེཝ མེ གེཧེ ནིསཱིདིཏྭཱ བྷིཀྑཾ གཎྷཐཱཏི. ‘‘ཨུཔཱསཀ, ན དཱནཱཧཾ ཨིཏོ པཊྛཱཡ པརེསཾ གེཧསྶ ཨནྟོཚདནཾ པཝིསིསྶཱམི, ཨནྟོགེཧཔཝེསནསྶེཝ ཧི ཨཡཾ དོསོ, ཨིཏོ པཊྛཱཡ པཱདེསུ ཨཱཝཧནྟེསུ གེཧདྭཱརེ ཋིཏོཝ བྷིཀྑཾ གཎྷིསྶཱམཱི’’ཏི ཝཏྭཱ དྷུཏངྒཾ སམཱདཱཡ ཨིམཾ གཱཐམཱཧ –

‘‘པཙྩཏི མུནིནོ བྷཏྟཾ, ཐོཀཾ ཐོཀཾ ཀུལེ ཀུལེ;

པིཎྜིཀཱཡ ཙརིསྶཱམི, ཨཏྠི ཛངྒྷབལཾ མམཱ’’ཏི. (ཐེརགཱ. ༢༤༨) –

ཨིདཉྩ པན ཝཏྭཱ ཐེརོ ཏེནེཝ བྱཱདྷིནཱ ན ཙིརསྶེཝ པརིནིབྦཱཡི. ཀོཉྩོ མཎིཀཱརསྶ བྷརིཡཱཡ ཀུཙྪིསྨིཾ པཊིསནྡྷིཾ གཎྷི. མཎིཀཱརོ ཀཱལཾ ཀཏྭཱ ནིརཡེ ནིབྦཏྟི. མཎིཀཱརསྶ བྷརིཡཱ ཐེརེ མུདུཙིཏྟཏཱཡ ཀཱལཾ ཀཏྭཱ དེཝལོཀེ ནིབྦཏྟི. བྷིཀྑཱུ སཏྠཱརཾ ཏེསཾ ཨབྷིསམྤརཱཡཾ པུཙྪིཾསུ. སཏྠཱ, ‘‘བྷིཀྑཝེ, ཨིདྷེཀཙྩེ གབྦྷེ ནིབྦཏྟནྟི, ཨེཀཙྩེ པཱཔཀཱརིནོ ནིརཡེ ནིབྦཏྟནྟི, ཨེཀཙྩེ ཀཏཀལྱཱཎཱ དེཝལོཀེ ནིབྦཏྟནྟི, ཨནཱསཝཱ པན པརིནིབྦཱཡནྟཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༢༦.

‘‘གབྦྷམེཀེ ཨུཔྤཛྫནྟི, ནིརཡཾ པཱཔཀམྨིནོ;

སགྒཾ སུགཏིནོ ཡནྟི, པརིནིབྦནྟི ཨནཱསཝཱ’’ཏི.

ཏཏྠ གབྦྷནྟི ཨིདྷ མནུསྶགབྦྷོཝ ཨདྷིཔྤེཏོ. སེསམེཏྠ ཨུཏྟཱནཏྠམེཝ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཎིཀཱརཀུལཱུཔཀཏིསྶཏྠེརཝཏྠུ དསམཾ.

༡༡. ཏཡོཛནཝཏྠུ

ན ཨནྟལིཀྑེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏཡོ ཛནེ ཨཱརབྦྷ ཀཐེསི.

སཏྠརི ཀིར ཛེཏཝནེ ཝིཧརནྟེ སམྦཧུལཱ བྷིཀྑཱུ སཏྠུ དསྶནཏྠཱཡ ཨཱགཙྪནྟཱ ཨེཀཾ གཱམཾ པིཎྜཱཡ པཝིསིཾསུ. གཱམཝཱསིནོ ཏེ སམྤཏྟེ ཨཱདཱཡ ཨཱསནསཱལཱཡ ནིསཱིདཱཔེཏྭཱ ཡཱགུཁཛྫཀཾ དཏྭཱ པིཎྜཔཱཏཝེལཾ ཨཱགམཡམཱནཱ དྷམྨཾ སུཎནྟཱ ནིསཱིདིཾསུ. ཏསྨིཾ ཁཎེ བྷཏྟཾ པཙིཏྭཱ སཱུཔབྱཉྫནཾ དྷཱུཔཡམཱནཱཡ ཨེཀིསྶཱ ཨིཏྠིཡཱ བྷཱཛནཏོ ཨགྒིཛཱལཱ ཨུཊྛཧིཏྭཱ ཚདནཾ གཎྷི. ཏཏོ ཨེཀཾ ཏིཎཀརལ༹ཾ ཨུཊྛཧིཏྭཱ ཛལམཱནཾ ཨཱཀཱསཾ པཀྑནྡི. ཏསྨིཾ ཁཎེ ཨེཀོ ཀཱཀོ ཨཱཀཱསེན གཙྪནྟོ ཏཏྠ གཱིཝཾ པཝེསེཏྭཱ ཏིཎཝལླིཝེཋིཏོ ཛྷཱཡིཏྭཱ གཱམམཛ྄ཛྷེ པཏི. བྷིཀྑཱུ ཏཾ དིསྭཱ ‘‘ཨཧོ བྷཱརིཡཾ ཀམྨཾ, པསྶཐཱཝུསོ, ཀཱཀེན པཏྟཾ ཝིཔྤཀཱརཾ, ཨིམིནཱ ཀཏཀམྨཾ ཨཉྙཏྲ སཏྠཱརཱ ཀོ ཛཱནིསྶཏི, སཏྠཱརམསྶ ཀམྨཾ པུཙྪིསྶཱམཱ’’ཏི ཙིནྟེཏྭཱ པཀྐམིཾསུ.

ཨཔརེསམྤི བྷིཀྑཱུནཾ སཏྠུ དསྶནཏྠཱཡ ནཱཝཾ ཨབྷིརུཡ྄ཧ གཙྪནྟཱནཾ ནཱཝཱ སམུདྡེ ནིཙྩལཱ ཨཊྛཱསི. མནུསྶཱ ‘‘ཀཱལ༹ཀཎྞིནཱ ཨེཏྠ བྷཝིཏབྦ’’ནྟི སལཱཀཾ ཝིཙཱརེསུཾ. ནཱཝིཀསྶ ཙ བྷརིཡཱ པཋམཝཡེ ཋིཏཱ དསྶནཱིཡཱ པཱསཱདིཀཱ, སལཱཀཱ ཏསྶཱ པཱཔུཎི. ‘‘སལཱཀཾ པུན ཝིཙཱརེཐཱ’’ཏི ཝཏྭཱ ཡཱཝཏཏིཡཾ ཝིཙཱརེསུཾ, ཏིཀྑཏྟུམྤི ཏསྶཱ ཨེཝ པཱཔུཎི. མནུསྶཱ ‘‘ཀིཾ, སཱམཱི’’ཏི ནཱཝིཀསྶ མུཁཾ ཨོལོཀེསུཾ. ནཱཝིཀོ ‘‘ན སཀྐཱ ཨེཀིསྶཱ ཨཏྠཱཡ མཧཱཛནཾ ནཱསེཏུཾ, ཨུདཀེ ནཾ ཁིཔཐཱ’’ཏི ཨཱཧ. སཱ གཧེཏྭཱ ཨུདཀེ ཁིཔིཡམཱནཱ མརཎབྷཡཏཛྫིཏཱ ཝིརཝཾ ཨཀཱསི. ཏཾ སུཏྭཱ ནཱཝིཀོ ཀོ ཨཏྠོ ཨིམིསྶཱ ཨཱབྷརཎེཧི ནཊྛེཧི, སབྦཱབྷརཎཱནི ཨོམུཉྩིཏྭཱ ཨེཀཾ པིལོཏིཀཾ ནིཝཱསཱཔེཏྭཱ ཚཌྜེཐ ནཾ, ཨཧཾ པནེཏཾ ཨུདཀཔིཊྛེ པླཝམཱནཾ དཊྛུཾ ན སཀྑིསྶཱམཱི ཏསྨཱ ཡཐཱ ནཾ ཨཧཾ ན པསྶཱམི, ཏཐཱ ཨེཀཾ ཝཱལུཀཀུཊཾ གཱིཝཱཡ བནྡྷིཏྭཱ སམུདྡེ ཁིཔཐཱཏི. ཏེ ཏཐཱ ཀརིཾསུ. ཏམྤི པཏིཏཊྛཱནེཡེཝ མཙྪཀཙྪཔཱ ཝིལུམྤིཾསུ. བྷིཀྑཱུ ཏཾ པཝཏྟིཾ ཉཏྭཱ ‘‘ཋཔེཏྭཱ སཏྠཱརཾ ཀོ ཨཉྙོ ཨེཏིསྶཱ ཨིཏྠིཡཱ ཀཏཀམྨཾ ཛཱནིསྶཏི, སཏྠཱརཾ ཏསྶཱ ཀམྨཾ པུཙྪིསྶཱམཱ’’ཏི ཨིཙྪིཏཊྛཱནཾ པཏྭཱ ནཱཝཱཏོ ཨོརུཡ྄ཧ པཀྐམིཾསུ.

ཨཔརེཔི སཏྟ བྷིཀྑཱུ སཏྠུ དསྶནཏྠཱཡ གཙྪནྟཱ སཱཡཾ ཨེཀཾ ཝིཧཱརཾ པཝིསིཏྭཱ ཝསནཊྛཱནཾ པུཙྪིཾསུ. ཨེཀསྨིཉྩ ལེཎེ སཏྟ མཉྩཱ ཧོནྟི. ཏེསཾ ཏདེཝ ལབྷིཏྭཱ ཏཏྠ ནིཔནྣཱནཾ རཏྟིབྷཱགེ ཀཱུཊཱགཱརམཏྟོ པཱསཱཎོ པཝཊྚམཱནོ ཨཱགནྟྭཱ ལེཎདྭཱརཾ པིདཧི. ནེཝཱསིཀཱ བྷིཀྑཱུ ‘‘མཡཾ ཨིམཾ ལེཎཾ ཨཱགནྟུཀབྷིཀྑཱུནཾ པཱཔཡིམྷཱ, ཨཡཉྩ མཧཱཔཱསཱཎོ ལེཎདྭཱརཾ པིདཧནྟོ ཨཊྛཱསི, ཨཔནེསྶཱམ ན’’ནྟི སམནྟཱ སཏྟཧི གཱམེཧི མནུསྶེ སནྣིཔཱཏེཏྭཱ ཝཱཡམནྟཱཔི ཋཱནཱ ཙཱལེཏུཾ ནཱསཀྑིཾསུ. ཨནྟོ པཝིཊྛབྷིཀྑཱུཔི ཝཱཡམིཾསུཡེཝ. ཨེཝཾ སནྟེཔི སཏྟཱཧཾ པཱསཱཎཾ ཙཱལེཏུཾ ནཱསཀྑིཾསུ. ཨཱགནྟུཀཱ སཏྟཱཧཾ ཚཱཏཛ྄ཛྷཏྟཱ མཧཱདུཀྑཾ ཨནུབྷཝིཾསུ. སཏྟམེ དིཝསེ པཱསཱཎོ སཡམེཝ པཝཊྚིཏྭཱ ཨཔགཏོ. བྷིཀྑཱུ ནིཀྑམིཏྭཱ ‘‘ཨམྷཱཀཾ ཨིམཾ པཱཔཾ ཨཉྙཏྲ སཏྠཱརཱ ཀོ ཛཱནིསྶཏི, སཏྠཱརཾ པུཙྪིསྶཱམཱ’’ཏི ཙིནྟེཏྭཱ པཀྐམིཾསུ. ཏེ པུརིམེཧི སདྡྷིཾ ཨནྟརཱམགྒེ སམཱགནྟྭཱ སབྦེ ཨེཀཏོཝ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསིནྣཱ སཏྠཱརཱ ཀཏཔཊིསནྠཱརཱ ཨཏྟནཱ ཨཏྟནཱ དིཊྛཱནུབྷཱུཏཱནི ཀཱརཎཱནི པཊིཔཱཊིཡཱ པུཙྪིཾསུ.

སཏྠཱཔི ཏེསཾ པཊིཔཱཊིཡཱ ཨེཝཾ བྱཱཀཱསི – ‘‘བྷིཀྑཝེ, སོ ཏཱཝ ཀཱཀོ ཨཏྟནཱ ཀཏཀམྨམེཝ ཨནུབྷོསི. ཨཏཱིཏཀཱལེ ཧི བཱརཱཎསིཡཾ ཨེཀོ ཀསྶཀོ ཨཏྟནོ གོཎཾ དམེནྟོ དམེཏུཾ ནཱསཀྑི. སོ ཧིསྶ གོཎོ ཐོཀཾ གནྟྭཱ ནིཔཛྫི, པོཐེཏྭཱ ཨུཊྛཱཔིཏོཔི ཐོཀཾ གནྟྭཱ པུནཔི ཏཐེཝ ནིཔཛྫི. སོ ཝཱཡམིཏྭཱ ཏཾ དམེཏུཾ ཨསཀྐོནྟོ ཀོདྷཱབྷིབྷཱུཏོ ཧུཏྭཱ ‘ཨིཏོ དཱནི པཊྛཱཡ སུཁཾ ནིཔཛྫིསྶསཱི’ཏི པལཱལཔིཎྜཾ ཝིཡ ཀརོནྟོ པལཱལེན ཏསྶ གཱིཝཾ པལིཝེཋེཏྭཱ ཨགྒིམདཱསི, གོཎོ ཏཏྠེཝ ཛྷཱཡིཏྭཱ མཏོ. ཏདཱ, བྷིཀྑཝེ, ཏེན ཀཱཀེན ཏཾ པཱཔཀམྨཾ ཀཏཾ. སོ ཏསྶ ཝིཔཱཀེན དཱིགྷརཏྟཾ ནིརཡེ པཙྩིཏྭཱ ཝིཔཱཀཱཝསེསེན སཏྟཀྑཏྟུཾ ཀཱཀཡོནིཡཾ ནིབྦཏྟིཏྭཱ ཨེཝམེཝ ཨཱཀཱསེ ཛྷཱཡིཏྭཱཝ མཏོ’’ཏི.

སཱཔི, བྷིཀྑཝེ, ཨིཏྠཱི ཨཏྟནཱ ཀཏཀམྨམེཝ ཨནུབྷོསི. སཱ ཧི ཨཏཱིཏེ བཱརཱཎསིཡཾ ཨེཀསྶ གཧཔཏིཀསྶ བྷརིཡཱ ཨུདཀཧརཎཀོཊྚནཔཙནཱདཱིནི སབྦཀིཙྩཱནི སཧཏྠེནེཝ ཨཀཱསི. ཏསྶཱ ཨེཀོ སུནཁོ ཏཾ གེཧེ སབྦཀིཙྩཱནི ཀུརུམཱནཾ ཨོལོཀེནྟོཝ ནིསཱིདཏི. ཁེཏྟེ བྷཏྟཾ ཧརནྟིཡཱ དཱརུཔཎྞཱདཱིནཾ ཝཱ ཨཏྠཱཡ ཨརཉྙཾ གཙྪནྟིཡཱ ཏཱཡ སདྡྷིཾཡེཝ གཙྪཏི. ཏཾ དིསྭཱ དཧརམནུསྶཱ ‘‘ཨམྦྷོ ནིཀྑནྟོ སུནཁལུདྡཀོ, ཨཛྫ མཡཾ མཾསེན བྷུཉྫིསྶཱམཱ’’ཏི ཨུཔྤཎྜེནྟི. སཱ ཏེསཾ ཀཐཱཡ མངྐུ ཧུཏྭཱ སུནཁཾ ལེཌྜུདཎྜཱདཱིཧི པཧརིཏྭཱ པལཱཔེཏི, སུནཁོ ནིཝཏྟིཏྭཱ པུན ཨནུབནྡྷཏི. སོ ཀིརསྶཱ ཏཏིཡེ ཨཏྟབྷཱཝེ བྷཏྟཱ ཨཧོསི, ཏསྨཱ སིནེཧཾ ཚིནྡིཏུཾ ན སཀྐོཏི. ཀིཉྩཱཔི ཧི ཨནམཏགྒེ སཾསཱརེ ཛཱཡཱ ཝཱ པཏི ཝཱ ཨབྷཱུཏཔུབྦཱ ནཱམ ནཏྠི, ཨཝིདཱུརེ པན ཨཏྟབྷཱཝེ ཉཱཏཀེསུ ཨདྷིམཏྟོ སིནེཧོ ཧོཏི, ཏསྨཱ སོ སུནཁོ ཏཾ ཝིཛཧིཏུཾ ན སཀྐོཏི. སཱ ཏསྶ ཀུཛ྄ཛྷིཏྭཱ ཁེཏྟཾ སཱམིཀསྶ ཡཱགུཾ ཧརམཱནཱ རཛྫུཾ ཨུཙྪངྒེ ཋཔེཏྭཱ ཨགམཱསི, སུནཁོ ཏཱཡེཝ སདྡྷིཾ གཏོ. སཱ སཱམིཀསྶ ཡཱགུཾ དཏྭཱ ཏུཙྪཀུཊཾ ཨཱདཱཡ ཨེཀཾ ཨུདཀཊྛཱནཾ གནྟྭཱ ཀུཊཾ ཝཱལུཀཱཡ པཱུརེཏྭཱ སམཱིཔེ ཨོལོཀེཏྭཱ ཋིཏསྶ སུནཁསྶ སདྡམཀཱསི. སུནཁོ ‘‘ཙིརསྶཾ ཝཏ མེ ཨཛྫ མདྷུརཀཐཱ ལདྡྷཱ’’ཏི ནངྒུཊྛཾ ཙཱལེནྟོ ཏཾ ཨུཔསངྐམི. སཱ ཏཾ གཱིཝཱཡཾ དལ༹ྷཾ གཧེཏྭཱ ཨེཀཱཡ རཛྫུཀོཊིཡཱ ཀུཊཾ བནྡྷིཏྭཱ ཨེཀཾ རཛྫུཀོཊིཾ སུནཁསྶ གཱིཝཱཡཾ བནྡྷིཏྭཱ ཀུཊཾ ཨུདཀཱབྷིམུཁཾ པཝཊྚེསི. སུནཁོ ཀུཊཾ ཨནུབནྡྷནྟོ ཨུདཀེ པཏིཏྭཱ ཏཏྠེཝ ཀཱལམཀཱསི. སཱ ཏསྶ ཀམྨསྶ ཝིཔཱཀེན དཱིགྷརཏྟཾ ནིརཡེ པཙྩིཏྭཱ ཝིཔཱཀཱཝསེསེན ཨཏྟབྷཱཝསཏེ ཝཱལུཀཀུཊཾ གཱིཝཱཡཾ བནྡྷིཏྭཱ ཨུདཀེ པཀྑིཏྟཱ ཀཱལམཀཱསཱིཏི.

ཏུམྷེཧིཔི, བྷིཀྑཝེ, ཨཏྟནཱ ཀཏཀམྨམེཝ ཨནུབྷཱུཏཾ. ཨཏཱིཏསྨིཉྷི བཱརཱཎསིཝཱསིནོ སཏྟ གོཔཱལཀདཱརཀཱ ཨེཀསྨིཾ ཨཊཝིཔདེསེ སཏྟཱཧཝཱརེན གཱཝིཡོ ཝིཙརནྟཱ ཨེཀདིཝསཾ གཱཝིཡོ ཝིཙཱརེཏྭཱ ཨཱགཙྪནྟཱ ཨེཀཾ མཧཱགོདྷཾ དིསྭཱ ཨནུབནྡྷིཾསུ. གོདྷཱ པལཱཡིཏྭཱ ཨེཀཾ ཝམྨིཀཾ པཱཝིསི. ཏསྶ པན ཝམྨིཀསྶ སཏྟ ཚིདྡཱནི, དཱརཀཱ ‘‘མཡཾ དཱནི གཧེཏུཾ ན སཀྑིསྶཱམ, སྭེ ཨཱགནྟྭཱ གཎྷིསྶཱམཱ’’ཏི ཨེཀེཀོ ཨེཀེཀཾ སཱཁབྷངྒམུཊྛིཾ ཨཱདཱཡ སཏྟཔི ཛནཱ སཏྟ ཚིདྡཱནི པིདཧིཏྭཱ པཀྐམིཾསུ. ཏེ པུནདིཝསེ ཏཾ གོདྷཾ ཨམནསིཀཏྭཱ ཨཉྙསྨིཾ པདེསེ གཱཝིཡོ ཝིཙཱརེཏྭཱ སཏྟམེ དིཝསེ གཱཝིཡོ ཨཱདཱཡ གཙྪནྟཱ ཏཾ ཝམྨིཀཾ དིསྭཱ སཏིཾ པཊིལབྷིཏྭཱ ‘‘ཀཱ ནུ ཁོ ཏསྶཱ གོདྷཱཡ པཝཏྟཱི’’ཏི ཨཏྟནཱ ཨཏྟནཱ པིདཧིཏཱནི ཚིདྡཱནི ཝིཝརིཾསུ. གོདྷཱ ཛཱིཝིཏེ ནིརཱལཡཱ ཧུཏྭཱ ཨཊྛིཙམྨཱཝསེསཱ པཝེདྷམཱནཱ ནིཀྑམི. ཏེ ཏཾ དིསྭཱ ཨནུཀམྤཾ ཀཏྭཱ ‘‘མཱ ནཾ མཱརེཐ, སཏྟཱཧཾ ཚིནྣབྷཏྟཱ ཛཱཏཱ’’ཏི ཏསྶཱ པིཊྛིཾ པརིམཛྫིཏྭཱ ‘‘སུཁེན གཙྪཱཧཱི’’ཏི ཝིསྶཛྫེསུཾ. ཏེ གོདྷཱཡ ཨམཱརིཏཏྟཱ ནིརཡེ ཏཱཝ ན པཙྩིཾསུ. ཏེ པན སཏྟ ཛནཱ ཨེཀཏོ ཧུཏྭཱ ཙུདྡསསུ ཨཏྟབྷཱཝེསུ སཏྟ སཏྟ དིཝསཱནི ཚིནྣབྷཏྟཱ ཨཧེསུཾ. ཏདཱ, བྷིཀྑཝེ, ཏུམྷེཧི སཏྟཧི གོཔཱལཀེཧི ཧུཏྭཱ ཏཾ ཀམྨཾ ཀཏནྟི. ཨེཝཾ སཏྠཱ ཏེཧི པུཊྛཔུཊྛཾ པཉྷཾ བྱཱཀཱསི.

ཨཐེཀོ བྷིཀྑུ སཏྠཱརཾ ཨཱཧ – ‘‘ཀིཾ པན, བྷནྟེ, པཱཔཀམྨཾ ཀཏྭཱ ཨཱཀཱསེ ཨུཔྤཏིཏསྶཔི སམུདྡཾ པཀྑནྡསྶཱཔི པབྦཏནྟརཾ པཝིཊྛསྶཱཔི མོཀྑོ ནཏྠཱི’’ཏི. སཏྠཱ ‘‘ཨེཝམེཏཾ, བྷིཀྑཝེ, ཨཱཀཱསཱདཱིསུཔི ཨེཀཔདེསོཔི ནཏྠི, ཡཏྠ ཋིཏོ པཱཔཀམྨཏོ མུཙྩེཡྻཱ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༢༧.

‘‘ན ཨནྟལིཀྑེ ན སམུདྡམཛ྄ཛྷེ, ན པབྦཏཱནཾ ཝིཝརཾ པཝིསྶ;

ན ཝིཛྫཏཱི སོ ཛགཏིཔྤདེསོ, ཡཏྠཊྛིཏོ མུཙྩེཡྻ པཱཔཀམྨཱ’’ཏི.

ཏསྶཏྠོ – སཙེ ཧི ཀོཙི ‘‘ཨིམིནཱ ཨུཔཱཡེན པཱཔཀམྨཏོ མུཙྩིསྶཱམཱི’’ཏི ཨནྟལིཀྑེ ཝཱ ནིསཱིདེཡྻ, ཙཏུརཱསཱིཏིཡོཛནསཧསྶགམྦྷཱིརཾ མཧཱསམུདྡཾ ཝཱ པཝིསེཡྻ, པབྦཏནྟརེ ཝཱ ནིསཱིདེཡྻ, ནེཝ པཱཔཀམྨཏོ མུཙྩེཡྻ. པུརཏྠིམཱདཱིསུ ཛགཏིཔདེསེསུ པཐཝཱིབྷཱགེསུ ན སོ ཝཱལགྒམཏྟོཔི ཨོཀཱསོ ཨཏྠི, ཡཏྠ ཋིཏོ པཱཔཀམྨཏོ མུཙྩིཏུཾ སཀྐུཎེཡྻཱཏི.

དེསནཱཝསཱནེ ཏེ བྷིཀྑཱུ སོཏཱཔཏྟིཕལཱདཱིནི པཱཔུཎིཾསུ, སམྤཏྟམཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཏཡོཛནཝཏྠུ ཨེཀཱདསམཾ.

༡༢. སུཔྤབུདྡྷསཀྱཝཏྠུ

ན ཨནྟལིཀྑེཏི ཨིམཾ དྷམྨདེསནཾ སཏྠཱ ནིགྲོདྷཱརཱམེ ཝིཧརནྟོ སུཔྤབུདྡྷཾ སཀྐཾ ཨཱརབྦྷ ཀཐེསི.

སོ ཀིར ‘‘ཨཡཾ མམ དྷཱིཏརཾ ཚཌྜེཏྭཱ ནིཀྑནྟོ ཙ, མམ པུཏྟཾ པབྦཱཛེཏྭཱ ཏསྶ ཝེརིཊྛཱནེ ཋིཏོ ཙཱ’’ཏི ཨིམེཧི དྭཱིཧི ཀཱརཎེཧི སཏྠརི ཨཱགྷཱཏཾ བནྡྷིཏྭཱ ཨེཀདིཝསཾ ‘‘ན དཱནིསྶ ནིམནྟནཊྛཱནཾ གནྟྭཱ བྷུཉྫིཏུཾ དསྶཱམཱི’’ཏི གམནམགྒཾ པིདཧིཏྭཱ ཨནྟརཝཱིཐིཡཾ སུརཾ པིཝནྟོ ནིསཱིདི. ཨཐསྶ སཏྠརི བྷིཀྑུསངྒྷཔརིཝུཏེ ཏཾ ཋཱནཾ ཨཱགཏེ ‘‘སཏྠཱ ཨཱགཏོ’’ཏི ཨཱརོཙེསུཾ. སོ ཨཱཧ – ‘‘པུརཏོ གཙྪཱཏི ཏསྶ ཝདེཐ, ནཱཡཾ མཡཱ མཧལླཀཏརོ, ནཱསྶ མགྒཾ དསྶཱམཱི’’ཏི པུནཔྤུནཾ ཝུཙྩམཱནོཔི ཏཐེཝ ཝཏྭཱ ནིསཱིདི. སཏྠཱ མཱཏུལསྶ སནྟིཀཱ མགྒཾ ཨལབྷིཏྭཱ ཏཏོ ནིཝཏྟི. སོཔི ཨེཀཾ ཙརཔུརིསཾ པེསེསི ‘‘གཙྪ, ཏསྶ ཀཐཾ སུཏྭཱ ཨེཧཱི’’ཏི. སཏྠཱཔི ནིཝཏྟནྟོ སིཏཾ ཀཏྭཱ ཨཱནནྡཏྠེརེན ‘‘ཀོ ནུ ཁོ, བྷནྟེ, སིཏསྶ པཱཏུཀམྨསྶ པཙྩཡོ’’ཏི པུཊྛོ ཨཱཧ – ‘‘པསྶསི, ཨཱནནྡ, སུཔྤབུདྡྷ’’ནྟི. པསྶཱམི, བྷནྟེཏི. བྷཱརིཡཾ ཏེན ཀམྨཾ ཀཏཾ མཱདིསསྶ བུདྡྷསྶ མགྒཾ ཨདེནྟེན, ཨིཏོ སཏྟམེ དིཝསེ ཧེཊྛཱཔཱསཱདེ སོཔཱནཔཱདམཱུལེ པཐཝིཾ པཝིསིསྶཏཱིཏི. ཙརཔུརིསོ ཏཾ ཀཐཾ སུཏྭཱ སུཔྤབུདྡྷསྶ སནྟིཀཾ གནྟྭཱ ‘‘ཀིཾ མམ བྷཱགིནེཡྻེན ནིཝཏྟནྟེན ཝུཏྟ’’ནྟི པུཊྛོ ཡཐཱསུཏཾ ཨཱརོཙེསི. སོ ཏསྶ ཝཙནཾ སུཏྭཱ ‘‘ན དཱནི མམ བྷཱགིནེཡྻསྶ ཀཐཱཡ དོསོ ཨཏྠི, ཨདྡྷཱ ཡཾ སོ ཝདཏི, ཏཾ ཏཐེཝ ཧོཏི. ཨེཝཾ སནྟེཔི ནཾ ཨིདཱནི མུསཱཝཱདེན ནིགྒཎྷིསྶཱམི. སོ ཧི མཾ ‘སཏྟམེ དིཝསེ པཐཝིཾ པཝིསིསྶཏཱི’ཏི ཨནིཡམེན ཨཝཏྭཱ ‘ཧེཊྛཱཔཱསཱདེ སོཔཱནཔཱདམཱུལེ པཐཝིཾ པཝིསིསྶཏཱི’’’ཏི ཨཱཧ. ‘‘ཨིཏོ དཱནི པཊྛཱཡཱཧཾ ཏཾ ཋཱནཾ ན གམིསྶཱམི, ཨཐ ནཾ ཏསྨིཾ ཋཱནེ པཐཝིཾ ཨཔཝིསིཏྭཱ མུསཱཝཱདེན ནིགྒཎྷིསྶཱམཱི’’ཏི ཨཏྟནོ ཨུཔབྷོགཛཱཏཾ སབྦཾ སཏྟབྷཱུམིཀཔཱསཱདསྶ ཨུཔརི ཨཱརོཔེཏྭཱ སོཔཱནཾ ཧརཱཔེཏྭཱ དྭཱརཾ པིདཧཱཔེཏྭཱ ཨེཀེཀསྨིཾ དྭཱརེ དྭེ དྭེ མལླེ ཋཔེཏྭཱ ‘‘སཙཱཧཾ པམཱདེན ཧེཊྛཱ ཨོརོཧིཏུཀཱམོ ཧོམི, ནིཝཱརེཡྻཱཐ མ’’ནྟི ཝཏྭཱ སཏྟམེ པཱསཱདཏལེ སིརིགབྦྷེ ནིསཱིདི. སཏྠཱ ཏཾ པཝཏྟིཾ སུཏྭཱ, ‘‘བྷིཀྑཝེ, སུཔྤབུདྡྷོ ན ཀེཝལཾ པཱསཱདཏལེ ཝེཧཱསཾ ཨུཔྤཏིཏྭཱ ཨཱཀཱསེ ཝཱ ནིསཱིདཏུ, ནཱཝཱཡ ཝཱ སམུདྡཾ པཀྑནྡཏུ, པབྦཏནྟརཾ ཝཱ པཝིསཏུ, བུདྡྷཱནཾ ཀཐཱཡ དྭིདྷཱབྷཱཝོ ནཱམ ནཏྠི, མཡཱ ཝུཏྟཊྛཱནེཡེཝ སོ པཐཝིཾ པཝིསིསྶཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༢༨.

‘‘ན ཨནྟལིཀྑེ ན སམུདྡམཛ྄ཛྷེ, ན པབྦཏཱནཾ ཝིཝརཾ པཝིསྶ;

ན ཝིཛྫཏཱི སོ ཛགཏིཔྤདེསོ, ཡཏྠཊྛིཏཾ ནཔྤསཧེཡྻ མཙྩཱུ’’ཏི.

ཏཏྠ ཡཏྠ ཋིཏཾ ནཔྤསཧེཡྻ, མཙྩཱུཏི ཡསྨིཾ པདེསེ ཋིཏཾ མརཎཾ ནཔྤསཧེཡྻ ནཱབྷིབྷཝེཡྻ, ཀེསགྒམཏྟོཔི པཐཝིཔྤདེསོ ནཏྠི. སེསཾ པུརིམསདིསམེཝཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཏྟམེ དིཝསེ སཏྠུ བྷིཀྑཱཙཱརམགྒསྶ ནིརུདྡྷཝེལཱཡ ཧེཊྛཱཔཱསཱདེ སུཔྤབུདྡྷསྶ མངྒལསྶོ ཨུདྡཱམོ ཧུཏྭཱ ཏཾ ཏཾ བྷིཏྟིཾ པཧརི. སོ ཨུཔརི ནིསིནྣོཝསྶ སདྡཾ སུཏྭཱ ‘‘ཀིམེཏ’’ནྟི པུཙྪི. ‘‘མངྒལསྶོ ཨུདྡཱམོ’’ཏི. སོ པནསྶོ སུཔྤབུདྡྷཾ དིསྭཱཝ སནྣིསཱིདཏི. ཨཐ ནཾ སོ གཎྷིཏུཀཱམོ ཧུཏྭཱ ནིསིནྣཊྛཱནཱ ཨུཊྛཱཡ དྭཱརཱབྷིམུཁོ ཨཧོསི, དྭཱརཱནི སཡམེཝ ཝིཝཊཱནི, སོཔཱནཾ སཀཊྛཱནེཡེཝ ཋིཏཾ. དྭཱརེ ཋིཏཱ མལླཱ ཏཾ གཱིཝཱཡཾ གཧེཏྭཱ ཧེཊྛཱབྷིམུཁཾ ཁིཔིཾསུ. ཨེཏེནུཔཱཡེན སཏྟསུཔི ཏལེསུ དྭཱརཱནི སཡམེཝ ཝིཝཊཱནི, སོཔཱནཱནི ཡཐཱཋཱནེ ཋིཏཱནི. ཏཏྠ ཏཏྠ མལླཱ ཏཾ གཱིཝཱཡམེཝ གཧེཏྭཱ ཧེཊྛཱབྷིམུཁཾ ཁིཔིཾསུ. ཨཐ ནཾ ཧེཊྛཱཔཱསཱདེ སོཔཱནཔཱདམཱུལཾ སམྤཏྟམེཝ མཧཱཔཐཝཱི ཝིཝརམཱནཱ བྷིཛྫིཏྭཱ སམྤཊིཙྪི, སོ གནྟྭཱ ཨཝཱིཙིམྷི ནིབྦཏྟཱིཏི.

སུཔྤབུདྡྷསཀྱཝཏྠུ དྭཱདསམཾ.

པཱཔཝགྒཝཎྞནཱ ནིཊྛིཏཱ.

ནཝམོ ཝགྒོ.

༡༠. དཎྜཝགྒོ

༡. ཚབྦགྒིཡབྷིཀྑུཝཏྠུ

སབྦེ ཏསནྟཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཚབྦགྒིཡེ བྷིཀྑཱུ ཨཱརབྦྷ ཀཐེསི.

ཨེཀསྨིཉྷི སམཡེ སཏྟརསཝགྒིཡེཧི སེནཱསནེ པཊིཛགྒིཏེ ཚབྦགྒིཡཱ བྷིཀྑཱུ ‘‘ནིཀྑམཐ, མཡཾ མཧལླཀཏརཱ, ཨམྷཱཀཾ ཨེཏཾ པཱཔུཎཱཏཱི’’ཏི ཝཏྭཱ ཏེཧི ‘‘ན མཡཾ དསྶཱམ, ཨམྷེཧི པཋམཾ པཊིཛགྒིཏ’’ནྟི ཝུཏྟེ ཏེ བྷིཀྑཱུ པཧརིཾསུ. སཏྟརསཝགྒིཡཱ མརཎབྷཡཏཛྫིཏཱ མཧཱཝིརཝཾ ཝིརཝིཾསུ. སཏྠཱ ཏེསཾ སདྡཾ སུཏྭཱ ‘‘ཀིཾ ཨིད’’ནྟི པུཙྪིཏྭཱ ‘‘ཨིདཾ ནཱམཱ’’ཏི ཨཱརོཙིཏེ ‘‘ན, བྷིཀྑཝེ, ཨིཏོ པཊྛཱཡ བྷིཀྑུནཱ ནཱམ ཨེཝཾ ཀཏྟབྦཾ, ཡོ ཀརོཏི, སོ ཨིམཾ ནཱམ ཨཱཔཏྟིཾ ཨཱཔཛྫཏཱི’’ཏི པཧཱརདཱནསིཀྑཱཔདཾ (པཱཙི. ༤༤༩ ཨཱདཡོ) པཉྙཱཔེཏྭཱ, ‘‘བྷིཀྑཝེ, བྷིཀྑུནཱ ནཱམ ‘ཡཐཱ ཨཧཾ, ཏཐེཝ ཨཉྙེཔི དཎྜསྶ ཏསནྟི, མཙྩུནོ བྷཱཡནྟཱི’ཏི ཉཏྭཱ པརོ ན པཧརིཏབྦོ, ན གྷཱཏེཏབྦོ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༢༩.

‘‘སབྦེ ཏསནྟི དཎྜསྶ, སབྦེ བྷཱཡནྟི མཙྩུནོ;

ཨཏྟཱནཾ ཨུཔམཾ ཀཏྭཱ, ན ཧནེཡྻ ན གྷཱཏཡེ’’ཏི.

ཏཏྠ སབྦེ ཏསནྟཱིཏི སབྦེཔི སཏྟཱ ཨཏྟནི དཎྜེ པཏནྟེ ཏསྶ དཎྜསྶ ཏསནྟི. མཙྩུནོཏི མརཎསྶཱཔི བྷཱཡནྟིཡེཝ. ཨིམིསྶཱ ཙ དེསནཱཡ བྱཉྫནཾ ནིརཝསེསཾ, ཨཏྠོ པན སཱཝསེསོ. ཡཐཱ ཧི རཉྙཱ ‘‘སབྦེ སནྣིཔཏནྟཱུ’’ཏི བྷེརིཡཱ ཙརཱཔིཏཱཡཔི རཱཛམཧཱམཏྟེ ཋཔེཏྭཱ སེསཱ སནྣིཔཏནྟི, ཨེཝམིདྷ ‘‘སབྦེ ཏསནྟཱི’’ཏི ཝུཏྟེཔི ཧཏྠཱཛཱནེཡྻོ ཨསྶཱཛཱནེཡྻོ ཨུསབྷཱཛཱནེཡྻོ ཁཱིཎཱསཝོཏི ཨིམེ ཙཏྟཱརོ ཋཔེཏྭཱ ཨཝསེསཱཝ ཏསནྟཱིཏི ཝེདིཏབྦཱ. ཨིམེསུ ཧི ཁཱིཎཱསཝོ སཀྐཱཡདིཊྛིཡཱ པཧཱིནཏྟཱ མརཎཀསཏྟཾ ཨཔསྶནྟོ ན བྷཱཡཏི, ཨིཏརེ ཏཡོ སཀྐཱཡདིཊྛིཡཱ བལཝཏྟཱ ཨཏྟནོ པཊིཔཀྑབྷཱུཏཾ སཏྟཾ ཨཔསྶནྟཱ ན བྷཱཡནྟཱིཏི. ན ཧནེཡྻ ན གྷཱཏཡེཏི ཡཐཱ ཨཧཾ, ཨེཝཾ ཨཉྙེཔི སཏྟཱཏི ནེཝ པརཾ པཧརེཡྻ ན པཧརཱཔེཡྻཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཚབྦགྒིཡབྷིཀྑུཝཏྠུ པཋམཾ.

༢. ཚབྦགྒིཡབྷིཀྑུཝཏྠུ

སབྦེ ཏསནྟཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཚབྦགྒིཡེ བྷིཀྑཱུ ཨཱརབྦྷ ཀཐེསི.

ཏེཡེཝ ཨེཀསྨིཉྷི སམཡེ ཏེནེཝ ཀཱརཎེན པུརིམསིཀྑཱཔདེ སཏྟརསཝགྒིཡེ པཧརིཾསུ. ཏེནེཝ ཀཱརཎེན ཏེསཾ ཏལསཏྟིཀཾ ཨུགྒིརིཾསུ. ཨིདྷཱཔི སཏྠཱ ཏེསཾ སདྡཾ སུཏྭཱ ‘‘ཀིཾ ཨིད’’ནྟི པུཙྪིཏྭཱ ‘‘ཨིདཾ ནཱམཱ’’ཏི ཨཱརོཙིཏེ ‘‘ན, བྷིཀྑཝེ, ཨིཏོ པཊྛཱཡ བྷིཀྑུནཱ ནཱམ ཨེཝཾ ཀཏྟབྦཾ, ཡོ ཀརོཏི, སོ ཨིམཾ ནཱམ ཨཱཔཏྟིཾ ཨཱཔཛྫཏཱི’’ཏི ཏལསཏྟིཀསིཀྑཱཔདཾ (པཱཙི. ༤༥༤ ཨཱདཡོ) པཉྙཱཔེཏྭཱ, ‘‘བྷིཀྑཝེ, བྷིཀྑུནཱ ནཱམ ‘ཡཐཱ ཨཧཾ, ཏཐེཝ ཨཉྙེཔི དཎྜསྶ ཏསནྟི, ཡཐཱ ཙ མཡ྄ཧཾ, ཏཐེཝ ནེསཾ ཛཱིཝིཏཾ པིཡ’ནྟི ཉཏྭཱ པརོ ན པཧརིཏབྦོ ན གྷཱཊེཏབྦོ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༣༠.

‘‘སབྦེ ཏསནྟི དཎྜསྶ, སབྦེསཾ ཛཱིཝིཏཾ པིཡཾ;

ཨཏྟཱནཾ ཨུཔམཾ ཀཏྭཱ, ན ཧནེཡྻ ན གྷཱཏཡེ’’ཏི.

ཏཏྠ སབྦེསཾ ཛཱིཝིཏཾ པིཡནྟི ཁཱིཎཱསཝཾ ཋཔེཏྭཱ སེསསཏྟཱནཾ ཛཱིཝིཏཾ པིཡཾ མདྷུརཾ, ཁཱིཎཱསཝོ པན ཛཱིཝིཏེ ཝཱ མརཎེ ཝཱ ཨུཔེཀྑཀོཝ ཧོཏི. སེསཾ པུརིམསདིསམེཝཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཚབྦགྒིཡབྷིཀྑུཝཏྠུ དུཏིཡཾ.

༣. སབྦཧུལཀུམཱརཀཝཏྠུ

སུཁཀཱམཱནི བྷཱུཏཱནཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ ཀུམཱརཀེ ཨཱརབྦྷ ཀཐེསི.

ཨེཀསྨིཉྷི སམཡེ སཏྠཱ སཱཝཏྠིཡཾ པིཎྜཱཡ པཝིསནྟོ ཨནྟརཱམགྒེ སམྦཧུལེ ཀུམཱརཀེ ཨེཀཾ གྷརསཔྤཛཱཏིཀཾ ཨཧིཾ དཎྜཀེན པཧརནྟེ དིསྭཱ ‘‘ཀུམཱརཀཱ ཀིཾ ཀརོཐཱ’’ཏི པུཙྪིཏྭཱ ‘‘ཨཧིཾ, བྷནྟེ, དཎྜཀེན པཧརཱམཱ’’ཏི ཝུཏྟེ ‘‘ཀིཾ ཀཱརཎཱ’’ཏི པུན པུཙྪིཏྭཱ ‘‘ཌཾསནབྷཡེན, བྷནྟེ’’ཏི ཝུཏྟེ ‘‘ཏུམྷེ ‘ཨཏྟནོ སུཁཾ ཀརིསྶཱམཱ’ཏི ཨིམཾ པཧརནྟཱ ནིབྦཏྟནིབྦཏྟཊྛཱནེ སུཁལཱབྷིནོ ན བྷཝིསྶཐ. ཨཏྟནོ སུཁཾ པཏྠེནྟེན ཧི པརཾ པཧརིཏུཾ ན ཝཊྚཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༡༣༡.

‘‘སུཁཀཱམཱནི བྷཱུཏཱནི, ཡོ དཎྜེན ཝིཧིཾསཏི;

ཨཏྟནོ སུཁམེསཱནོ, པེཙྩ སོ ན ལབྷཏེ སུཁཾ.

༡༣༢.

‘‘སུཁཀཱམཱནི བྷཱུཏཱནི, ཡོ དཎྜེན ན ཧིཾསཏི;

ཨཏྟནོ སུཁམེསཱནོ, པེཙྩ སོ ལབྷཏེ སུཁ’’ནྟི.

ཏཏྠ ཡོ དཎྜེནཱཏི ཡོ པུགྒལོ དཎྜེན ཝཱ ལེཌྜུཨཱདཱིཧི ཝཱ ཝིཧེཋེཏི. པེཙྩ སོ ན ལབྷཏེ སུཁནྟི སོ པུགྒལོ པརལོཀེ མནུསྶསུཁཾ ཝཱ དིབྦསུཁཾ ཝཱ པརམཏྠབྷཱུཏཾ ཝཱ ནིབྦཱནསུཁཾ ན ལབྷཏི. དུཏིཡགཱཐཱཡ པེཙྩ སོ ལབྷཏེཏི སོ པུགྒལོ པརལོཀེ ཝུཏྟཔྤཀཱརཾ ཏིཝིདྷམྤི སུཁཾ ལབྷཏཱིཏི ཨཏྠོ.

དེསནཱཝསཱནེ པཉྩསཏཱཔི ཏེ ཀུམཱརཀཱ སོཏཱཔཏྟིཕལེ པཏིཊྛཧིཾསཱུཏི.

སམྦཧུལཀུམཱརཀཝཏྠུ ཏཏིཡཾ.

༤. ཀོཎྜདྷཱནཏྠེརཝཏྠུ

མཱཝོཙ ཕརུསཾ ཀཉྩཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀོཎྜདྷཱནཏྠེརཾ ཨཱརབྦྷ ཀཐེསི.

ཏསྶ ཀིར པབྦཛིཏདིཝསཏོ པཊྛཱཡ ཨེཀཾ ཨིཏྠིརཱུཔཾ ཐེརེན སདྡྷིཾཡེཝ ཝིཙརཏི. ཏཾ ཐེརོ ན པསྶཏི, མཧཱཛནོ པན པསྶཏི. ཨནྟོགཱམཾ པིཎྜཱཡ ཙརཏོཔིསྶ མནུསྶཱ ཨེཀཾ བྷིཀྑཾ དཏྭཱ, ‘‘བྷནྟེ, ཨཡཾ ཏུམྷཱཀཾ ཧོཏུ, ཨཡཾ པན ཏུམྷཱཀཾ སཧཱཡིཀཱཡཱ’’ཏི ཝཏྭཱ དུཏིཡམྤི དདནྟི.

ཀིཾ ཏསྶ པུབྦཀམྨནྟི? ཀསྶཔསམྨཱསམྦུདྡྷཀཱལེ ཀིར དྭེ སཧཱཡཀཱ བྷིཀྑཱུ ཨེཀམཱཏུཀུཙྪིཏོ ནིཀྑནྟསདིསཱ ཨཏིཝིཡ སམགྒཱ ཨཧེསུཾ. དཱིགྷཱཡུཀབུདྡྷཀཱལེ ཙ ཨནུསཾཝཙྪརཾ ཝཱ ཨནུཚམཱསཾ ཝཱ བྷིཀྑཱུ ཨུཔོསཐཏྠཱཡ སནྣིཔཏནྟི. ཏསྨཱ ཏེཔི ‘‘ཨུཔོསཐགྒཾ གམིསྶཱམཱ’’ཏི ཝསནཊྛཱནཱ ནིཀྑམིཾསུ. ཏེ ཨེཀཱ ཏཱཝཏིཾསབྷཝནེ ནིབྦཏྟདེཝཏཱ དིསྭཱ ‘‘ཨིམེ བྷིཀྑཱུ ཨཏིཝིཡ སམགྒཱ, སཀྐཱ ནུ ཁོ ཨིམེ བྷིནྡིཏུ’’ནྟི ཙིནྟེཏྭཱ ཨཏྟནོ བཱལཏཱཡ ཙིནྟིཏསམནནྟརམེཝ ཨཱགནྟྭཱ ཏེསུ ཨེཀེན, ‘‘ཨཱཝུསོ, མུཧུཏྟཾ ཨཱགམེཧི, སརཱིརཀིཙྩེནམྷི ཨཏྠིཀོ’’ཏི ཝུཏྟེ སཱ དེཝཏཱ ཨེཀཾ མནུསྶིཏྠིཝཎྞཾ མཱཔེཏྭཱ ཐེརསྶ གཙྪནྟརཾ པཝིསིཏྭཱ ནིཀྑམནཀཱལེ ཨེཀེན ཧཏྠེན ཀེསཀལཱཔཾ, ཨེཀེན ནིཝཱསནཾ སཎྛཱཔཡམཱནཱ ཏསྶ པིཊྛིཏོ ནིཀྑམི. སོ ཏཾ ན པསྶཏི, ཏམཱགམཡམཱནོ པན པུརཏོ ཋིཏབྷིཀྑུ ནིཝཏྟིཏྭཱ ཨོལོཀཡམཱནོ ཏཾ ཏཐཱ ཀཏྭཱ ནིཀྑམནྟཾ པསྶི. སཱ ཏེན དིཊྛབྷཱཝཾ ཉཏྭཱ ཨནྟརདྷཱཡི. ཨིཏརོ ཏཾ བྷིཀྑུཾ ཨཏྟནོ སནྟིཀཾ ཨཱགཏཀཱལེ ཨཱཧ – ‘‘ཨཱཝུསོ, སཱིལཾ ཏེ བྷིནྣ’’ནྟི. ‘‘ནཏྠཱཝུསོ, མཡ྄ཧཾ ཨེཝརཱུཔ’’ནྟི. ཨིདཱནེཝ ཏེ མཡཱ པཙྪཏོ ནིཀྑམམཱནཱ ཏརུཎཨིཏྠཱི ཨིདཾ ནཱམ ཀརོནྟཱི དིཊྛཱ, ཏྭཾ ‘‘ནཏྠི མཡ྄ཧཾ ཨེཝརཱུཔ’’ནྟི ཀིཾ ཝདེསཱིཏི. སོ ཨསནིཡཱ མཏྠཀེ ཨཝཏྠཊོ ཝིཡ མཱ མཾ, ཨཱཝུསོ, ནཱསེཧི, ནཏྠི མཡ྄ཧཾ ཨེཝརཱུཔནྟི. ཨིཏརོ ‘‘མཡཱ སཱམཾ ཨཀྑཱིཧི དིཊྛཾ, ཀིཾ ཏཝ སདྡཧིསྶཱམཱི’’ཏི དཎྜཀོ ཝིཡ བྷིཛྫིཏྭཱ པཀྐཱམི, ཨུཔོསཐགྒེཔི ‘‘ནཱཧཾ ཨིམིནཱ སདྡྷིཾ ཨུཔོསཐཾ ཀརིསྶཱམཱི’’ཏི ནིསཱིདི. ཨིཏརོ ‘‘མཡ྄ཧཾ, བྷནྟེ, སཱིལེ ཨཎུམཏྟམྤི ཀཱལ༹ཾ ནཏྠཱི’’ཏི བྷིཀྑཱུནཾ ཀཐེསི. སོཔི ‘‘མཡཱ སཱམཾ དིཊྛ’’ནྟི ཨཱཧ. དེཝཏཱ ཏཾ ཏེན སདྡྷིཾ ཨུཔོསཐཾ ཀཱཏུཾ ཨནིཙྪནྟཾ དིསྭཱ ‘‘བྷཱརིཡཾ མཡཱ ཀམྨཾ ཀཏ’’ནྟི ཙིནྟེཏྭཱ – ‘‘བྷནྟེ, མཡ྄ཧཾ ཨཡྻསྶ སཱིལབྷེདོ ནཏྠི, མཡཱ པན ཝཱིམཾསནཝསེནེཏཾ ཀཏཾ, ཀརོཐ ཏེན སདྡྷིཾ ཨུཔོསཐ’’ནྟི ཨཱཧ. སོ ཏསྶཱ ཨཱཀཱསེ ཋཏྭཱ ཀཐེནྟིཡཱ སདྡཧིཏྭཱ ཨུཔོསཐཾ ཨཀཱསི, ན པན ཐེརེ པུབྦེ ཝིཡ མུདུཙིཏྟོ ཨཧོསི. ཨེཏྟཀཾ དེཝཏཱཡ པུབྦཀམྨཾ.

ཨཱཡུཔརིཡོསཱནེ པན ཏེ ཐེརཱ ཡཐཱསུཁཾ དེཝལོཀེ ནིབྦཏྟིཾསུ. དེཝཏཱ ཨཔཱིཙིམྷི ནིབྦཏྟིཏྭཱ ཨེཀཾ བུདྡྷནྟརཾ ཏཏྠ པཙྩིཏྭཱ ཨིམསྨིཾ བུདྡྷུཔྤཱདེ སཱཝཏྠིཡཾ ནིབྦཏྟིཏྭཱ ཝུདྡྷིམནྭཱཡ སཱསནེ པབྦཛིཏྭཱ ཨུཔསམྤདཾ ལབྷི. ཏསྶ པབྦཛིཏདིཝསཏོ པཊྛཱཡ ཏཾ ཨིཏྠིརཱུཔཾ ཏཐེཝ པཉྙཱཡི. ཏེནེཝསྶ ཀོཎྜདྷཱནཏྠེརོཏི ནཱམཾ ཀརིཾསུ. ཏཾ ཏཐཱཝིཙརནྟཾ དིསྭཱ བྷིཀྑཱུ ཨནཱཐཔིཎྜིཀཾ ཨཱཧཾསུ – ‘‘མཧཱསེཊྛི, ཨིམཾ དུསྶཱིལཾ ཏཝ ཝིཧཱརཱ ནཱིཧར. ཨིམཉྷི ནིསྶཱཡ སེསབྷིཀྑཱུནཾ ཨཡསོ ཨུཔྤཛྫིསྶཏཱི’’ཏི. ཀིཾ པན, བྷནྟེ, སཏྠཱ ཝིཧཱརེ ནཏྠཱིཏི? ཨཏྠི ཨུཔཱསཀཱཏི. ཏེན ཧི, བྷནྟེ, སཏྠཱཝ ཛཱནིསྶཏཱིཏི. བྷིཀྑཱུ གནྟྭཱ ཝིསཱཁཱཡཔི ཏཐེཝ ཀཐེསུཾ. སཱཔི ནེསཾ ཏཐེཝ པཊིཝཙནཾ ཨདཱསི.

བྷིཀྑཱུཔི ཏེཧི ཨསམྤཊིཙྪིཏཝཙནཱ རཉྙོ ཨཱརོཙེསུཾ – ‘‘མཧཱརཱཛ, ཀོཎྜདྷཱནཏྠེརོ ཨེཀཾ ཨིཏྠིཾ གཧེཏྭཱ ཝིཙརནྟོ སབྦེསཾ ཨཡསཾ ཨུཔྤཱདེསི, ཏཾ ཏུམྷཱཀཾ ཝིཛིཏཱ ནཱིཧརཐཱ’’ཏི. ‘‘ཀཧཾ པན སོ, བྷནྟེ’’ཏི? ‘‘ཝིཧཱརེ, མཧཱརཱཛཱ’’ཏི. ‘‘ཀཏརསྨིཾ སེནཱསནེ ཝིཧརཏཱི’’ཏི? ‘‘ཨསུཀསྨིཾ ནཱམཱ’’ཏི. ‘‘ཏེན ཧི གཙྪཐ, ཨཧཾ ཏཾ གཎྷིསྶཱམཱི’’ཏི སོ སཱཡནྷསམཡེ ཝིཧཱརཾ གནྟྭཱ ཏཾ སེནཱསནཾ པུརིསེཧི པརིཀྑིཔཱཔེཏྭཱ ཐེརསྶ ཝསནཊྛཱནཱབྷིམུཁོ ཨགམཱསི. ཐེརོ མཧཱསདྡཾ སུཏྭཱ ཝིཧཱརཱ ནིཀྑམིཏྭཱ པམུཁེ ཨཊྛཱསི. ཏམྤིསྶ ཨིཏྠིརཱུཔཾ པིཊྛིཔསྶེ ཋིཏཾ རཱཛཱ ཨདྡས. ཐེརོ རཉྙོ ཨཱགམནཾ ཉཏྭཱ ཝིཧཱརཾ ཨབྷིརུཧིཏྭཱ ནིསཱིདི. རཱཛཱ ཐེརཾ ན ཝནྡི, ཏམྤི ཨིཏྠིཾ ནཱདྡས. སོ དྭཱརནྟརེཔི ཧེཊྛཱམཉྩེཔི ཨོལོཀེནྟོ ཨདིསྭཱཝ ཐེརཾ ཨཱཧ – ‘‘བྷནྟེ, ཨིམསྨིཾ ཋཱནེ ཨེཀཾ ཨིཏྠིཾ ཨདྡསཾ, ཀཧཾ སཱ’’ཏི? ‘‘ན པསྶཱམི, མཧཱརཱཛཱ’’ཏི. ‘‘ཨིདཱནི མཡཱ ཏུམྷཱཀཾ པིཊྛིཔསྶེ ཋིཏཱ དིཊྛཱ’’ཏི ཝུཏྟེཔི ‘‘ཨཧཾ ན པསྶཱམི’’ཙྩེཝཱཧ. རཱཛཱ ‘‘ཀིཾ ནུ ཁོ ཨེཏ’’ནྟི ཙིནྟེཏྭཱ, ‘‘བྷནྟེ, ཨིཏོ ཏཱཝ ནིཀྑམཐཱ’’ཏི ཨཱཧ. ཐེརེ ནིཀྑམིཏྭཱ པམུཁེ ཋིཏེ པུན སཱ ཐེརསྶ པིཊྛིཔསྶེ ཨཊྛཱསི. རཱཛཱ ཏཾ དིསྭཱ པུན ཨུཔརིཏལཾ ཨབྷིརུཧི, ཏསྶ ཨཱགཏབྷཱཝཾ ཉཏྭཱ ཐེརོ ནིསཱིདི. པུན རཱཛཱ ཏཾ སབྦཊྛཱནེསུ ཨོལོཀེནྟོཔི ཨདིསྭཱ, ‘‘བྷནྟེ, ཀཧཾ སཱ ཨིཏྠཱི’’ཏི པུན ཐེརཾ པུཙྪི. ནཱཧཾ པསྶཱམི མཧཱརཱཛཱཏི. ‘‘ཀིཾ ཀཐེཐ, བྷནྟེ, མཡཱ ཨིདཱནེཝ ཏུམྷཱཀཾ པིཊྛིཔསྶེ ཋིཏཱ དིཊྛཱ’’ཏི ཨཱཧ. ཨཱམ, མཧཱརཱཛ, མཧཱཛནོཔི ‘‘མེ པཙྪཏོ པཙྪཏོ ཨིཏྠཱི ཝིཙརཏཱི’’ཏི ཝདཏི, ཨཧཾ པན ན པསྶཱམཱིཏི. རཱཛཱ ‘‘པཊིརཱུཔཀེན བྷཝིཏབྦ’’ནྟི སལླཀྑེཏྭཱ པུན ཐེརཾ, ‘‘བྷནྟེ, ཨིཏོ ཏཱཝ ཨོཏརཐཱ’’ཏི ཝཏྭཱ ཐེརེ ཨོཏརིཏྭཱ པམུཁེ ཋིཏེ པུན ཏཾ ཏསྶ པིཊྛིཔསྶེ ཋིཏཾ དིསྭཱ ཨུཔརིཏལཾ ཨབྷིརུཧི. པུན ནཱདྡས. སོ པུན ཐེརཾ པུཙྪིཏྭཱ ཏེན ‘‘ན པསྶཱམི’’ཙྩེཝ ཝུཏྟེ ‘‘པཊིརཱུཔཀམེཝེཏ’’ནྟི ནིཊྛཾ གནྟྭཱ ཐེརཾ ཨཱཧ – ‘‘བྷནྟེ, ཨེཝརཱུཔེ སཾཀིལེསེ ཏུམྷཱཀཾ པིཊྛིཏོ ཝིཙརནྟེ ཨཉྙོ ཀོཙི ཏུམྷཱཀཾ བྷིཀྑཾ ན དསྶཏི, ནིབདྡྷཾ མམ གེཧཾ པཝིསཐ, ཨཧམེཝ ཙཏཱུཧི པཙྩཡེཧི ཨུཔཊྛཧིསྶཱམཱི’’ཏི ཐེརཾ ནིམནྟེཏྭཱ པཀྐཱམི.

བྷིཀྑཱུ ‘‘པསྶཐཱཝུསོ, རཉྙོ པཱཔཀིརིཡཾ, ‘ཨེཏཾ ཝིཧཱརཏོ ནཱིཧརཱ’ཏི ཝུཏྟེ ཨཱགནྟྭཱ ཙཏཱུཧི པཙྩཡེཧི ནིམནྟེཏྭཱ གཏོ’’ཏི ཨུཛ྄ཛྷཱཡིཾསུ. ཏམྤི ཐེརཾ ཨཱཧཾསུ – ‘‘ཨམྦྷོ, དུསྶཱིལ, ཨིདཱནིསི རཱཛཀོཎྜོ ཛཱཏོ’’ཏི. སོཔི པུབྦེ བྷིཀྑཱུ ཀིཉྩི ཝཏྟུཾ ཨསཀྐོནྟོ ‘‘ཏུམྷེ དུསྶཱིལཱ, ཏུམྷེ ཀོཎྜཱ, ཏུམྷེ ཨིཏྠིཾ གཧེཏྭཱ ཝིཙརཐཱ’’ཏི ཨཱཧ. ཏེ གནྟྭཱ སཏྠུ ཨཱརོཙེསུཾ – ‘‘བྷནྟེ, ཀོཎྜདྷཱནཏྠེརོ ཨམྷེཧི ཝུཏྟོ ཨམྷེ ‘དུསྶཱིལཱ’ཏིཨཱདཱིནི ཝཏྭཱ ཨཀྐོསཏཱི’’ཏི. སཏྠཱ ཏཾ པཀྐོསཱཔེཏྭཱ པུཙྪི – ‘‘སཙྩཾ ཀིར ཏྭཾ, བྷིཀྑུ, ཨེཝཾ ཝདེསཱི’’ཏི? ‘‘སཙྩཾ, བྷནྟེ’’ཏི. ‘‘ཀིཾ ཀཱརཎཱ’’ཏི? ‘‘མཡཱ སདྡྷིཾ ཀཐིཏཀཱརཎཱ’’ཏི. ‘‘ཏུམྷེ, བྷིཀྑཝེ, ཨིམིནཱ སདྡྷིཾ ཀསྨཱ ཀཐེཐཱ’’ཏི. ‘‘ཨིམསྶ པཙྪཏོ ཨིཏྠིཾ ཝིཙརནྟིཾ དིསྭཱ, བྷནྟེ’’ཏི. ‘‘ཨིམེ ཀིར ཏཡཱ སདྡྷིཾ ཨིཏྠིཾ ཝིཙརནྟིཾ དིསྭཱ ཝདནྟི, ཏྭཾ ཀསྨཱ ཀཐེསི, ཨེཏེ ཏཱཝ དིསྭཱ ཀཐེནྟི. ཏྭཾ ཨདིསྭཱཝ ཨིམེཧི སདྡྷིཾ ཀསྨཱ ཀཐེསི, ནནུ པུབྦེ ཏཝེཝ པཱཔིཀཾ དིཊྛིཾ ནིསྶཱཡ ཨིདཾ ཛཱཏཾ, ཨིདཱནི ཀསྨཱ པུན པཱཔིཀཾ དིཊྛིཾ གཎྷཱསཱི’’ཏི. བྷིཀྑཱུ ‘‘ཀིཾ པན, བྷནྟེ, ཨིམིནཱ པུབྦེ ཀཏ’’ནྟི པུཙྪིཾསུ. ཨཐ ནེསཾ སཏྠཱ ཏསྶ པུབྦཀམྨཾ ཀཐེཏྭཱ ‘‘བྷིཀྑུ ཨིདཾ པཱཔཀམྨཾ ནིསྶཱཡ ཏྭཾ ཨིམཾ ཝིཔྤཀཱརཾ པཏྟོ, ཨིདཱནི ཏེ པུན ཏཐཱརཱུཔཾ པཱཔིཀཾ དིཊྛིཾ གཧེཏུཾ ན ཡུཏྟཾ, མཱ པུན བྷིཀྑཱུཧི སདྡྷིཾ ཀིཉྩི ཀཐེཧི, ནིསྶདྡོ མུཁཝཊྚིཡཾ ཚིནྣཀཾསཐཱལསདིསོ ཧོཧི, ཨེཝཾ ཀརོནྟོ ནིབྦཱནཔྤཏྟོ ནཱམ བྷཝིསྶཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༡༣༣.

‘‘མཱཝོཙ ཕརུསཾ ཀཉྩི, ཝུཏྟཱ པཊིཝདེཡྻུ ཏཾ;

དུཀྑཱ ཧི སཱརམྦྷཀཐཱ, པཊིདཎྜཱ ཕུསེཡྻུ ཏཾ.

༡༣༤.

‘‘སཙེ ནེརེསི ཨཏྟཱནཾ, ཀཾསོ ཨུཔཧཏོ ཡཐཱ;

ཨེས པཏྟོསི ནིབྦཱནཾ, སཱརམྦྷོ ཏེ ན ཝིཛྫཏཱི’’ཏི.

ཏཏྠ མཱཝོཙ ཕརུསཾ ཀཉྩཱིཏི ཀཉྩི ཨེཀཔུགྒལམྤི ཕརུསཾ མཱ ཨཝཙ. ཝུཏྟཱཏི ཏཡཱ པརེ ‘‘དུསྶཱིལཱ’’ཏི ཝུཏྟཱ, ཏམྤི ཏཐེཝ པཊིཝདེཡྻུཾ. སཱརམྦྷཀཐཱཏི ཨེསཱ ཀརཎུཏྟརཱ ཡུགགྒཱཧཀཐཱ ནཱམ དུཀྑཱ. པཊིདཎྜཱཏི ཀཱཡདཎྜཱདཱིཧི པརཾ པཧརནྟསྶ ཏཱདིསཱ པཊིདཎྜཱ ཙ ཏཝ མཏྠཀེ པཏེཡྻུཾ. སཙེ ནེརེསཱིཏི སཙེ ཨཏྟཱནཾ ནིཙྩལཾ ཀཱཏུཾ སཀྑིསྶསི. ཀཾསོ ཨུཔཧཏོ ཡཐཱཏི མུཁཝཊྚིཡཾ ཚིནྡིཏྭཱ ཏལམཏྟཾ ཀཏྭཱ ཋཔིཏཀཾསཐཱལཾ ཝིཡ. ཏཉྷི ཧཏྠཔཱདེཧི ཝཱ དཎྜཀེན ཝཱ པཧཊམྤི སདྡཾ ན ཀརོཏི, ཨེས པཏྟོསཱིཏི སཙེ ཨེཝརཱུཔོ བྷཝིཏུཾ སཀྑིསྶསི, ཨིམཾ པཊིཔདཾ པཱུརཡམཱནོ ཨིདཱནི ཨཔྤཏྟོཔི ཨེསོ ནིབྦཱནཔྤཏྟོ ནཱམ. སཱརམྦྷོ ཏེ ན ཝིཛྫཏཱིཏི ཨེཝཾ སནྟེ ཙ པན ‘‘ཏྭཾ དུསྶཱིལོ, ཏུམྷེ དུསྶཱིལཱ’’ཏིཨེཝམཱདིཀོ ཨུཏྟརཀརཎཝཱཙཱལཀྑཎོ སཱརམྦྷོཔི ཏེ ན ཝིཛྫཏི, ན བྷཝིསྶཏིཡེཝཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ, ཀོཎྜདྷཱནཏྠེརོཔི སཏྠཱརཱ དིནྣཨོཝཱདེ ཋཏྭཱ ཨརཧཏྟཾ པཱཔུཎི, ན ཙིརསྶེཝ ཨཱཀཱསེ ཨུཔྤཏིཏྭཱ པཋམཾ སལཱཀཾ གཎྷཱིཏི.

ཀོཎྜདྷཱནཏྠེརཝཏྠུ ཙཏུཏྠཾ.

༥. ཨུཔོསཐིཀཨིཏྠཱིནཾ ཝཏྠུ

ཡཐཱ དཎྜེནཱཏི ཨིམཾ དྷམྨདེསནཾ སཏྠཱ པུབྦཱརཱམེ ཝིཧརནྟོ ཝིསཱཁཱདཱིནཾ ཨུཔཱསིཀཱནཾ ཨུཔོསཐཀམྨཾ ཨཱརབྦྷ ཀཐེསི.

སཱཝཏྠིཡཾ ཀིར ཨེཀསྨིཾ མཧཱཨུཔོསཐདིཝསེ པཉྩསཏམཏྟཱ ཨིཏྠིཡོ ཨུཔོསཐིཀཱ ཧུཏྭཱ ཝིཧཱརཾ ཨགམིཾསུ. ཝིསཱཁཱ ཏཱསུ མཧལླཀིཏྠིཡོ ཨུཔསངྐམིཏྭཱ པུཙྪི, ‘‘ཨམྨཱ, ཀིམཏྠཾ ཨུཔོསཐིཀཱ ཛཱཏཏྠཱ’’ཏི. ཏཱཧི ‘‘དིབྦསམྤཏྟིཾ པཏྠེཏྭཱ’’ཏི ཝུཏྟེ མཛ྄ཛྷིམིཏྠིཡོ པུཙྪི, ཏཱཧི ‘‘སཔཏྟིཝཱསཱ མུཙྩནཏྠཱཡཱ’’ཏི ཝུཏྟེ ཏརུཎིཏྠིཡོ པུཙྪི, ཏཱཧི ‘‘པཋམགབྦྷེ པུཏྟཔཊིལཱབྷཏྠཱཡཱ’’ཏི ཝུཏྟེ ཀུམཱརིཀཱཡོ པུཙྪི, ཏཱཧི ‘‘ཏརུཎབྷཱཝེཡེཝ པཏིཀུལགམནཏྠཱཡཱ’’ཏི ཝུཏྟེ ཏཾ སབྦམྤི ཏཱསཾ ཀཐཾ སུཏྭཱ ཏཱ ཨཱདཱཡ སཏྠུ སནྟིཀཾ གནྟྭཱ པཊིཔཱཊིཡཱ ཨཱརོཙེསི. ཏཾ སུཏྭཱ སཏྠཱ ‘‘ཝིསཱཁེ ཨིམེསཾ སཏྟཱནཾ ཛཱཏིཨཱདཡོ ནཱམ དཎྜཧཏྠཀགོཔཱལཀསདིསཱ, ཛཱཏི ཛརཱཡ སནྟིཀཾ, ཛརཱ བྱཱདྷིནོ སནྟིཀཾ, བྱཱདྷི མརཎསྶ སནྟིཀཾ པེསེཏྭཱ མརཎཾ ཀུཋཱརིཡཱ ཚིནྡནྟཱ ཝིཡ ཛཱིཝིཏཾ ཚིནྡཏི, ཨེཝཾ སནྟེཔི ཝིཝཊྚཾ པཏྠེནྟཱ ནཱམ ནཏྠི, ཝཊྚམེཝ པན པཏྠེནྟཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༣༥.

‘‘ཡཐཱ དཎྜེན གོཔཱལོ, གཱཝོ པཱཛེཏི གོཙརཾ;

ཨེཝཾ ཛརཱ ཙ མཙྩུ ཙ, ཨཱཡུཾ པཱཛེནྟི པཱཎིན’’ནྟི.

ཏཏྠ པཱཛེཏཱིཏི ཚེཀོ གོཔཱལོ ཀེདཱརནྟརཾ པཝིསནྟིཡོ གཱཝོ དཎྜེན ནིཝཱརེཏྭཱ ཏེནེཝ པོཐེནྟོ སུལབྷཏིཎོདཀཾ གོཙརཾ ནེཏི. ཨཱཡུཾ པཱཛེནྟཱིཏི ཛཱིཝིཏིནྡྲིཡཾ ཚིནྡནྟི ཁེཔེནྟི. གོཔཱལཀོ ཝིཡ ཧི ཛརཱ ཙ མཙྩུ ཙ, གོགཎོ ཝིཡ ཛཱིཝིཏིནྡྲིཡཾ, གོཙརབྷཱུམི ཝིཡ མརཎཾ. ཏཏྠ ཛཱཏི ཏཱཝ སཏྟཱནཾ ཛཱིཝིཏིནྡྲིཡཾ ཛརཱཡ སནྟིཀཾ པེསེསི, ཛརཱ བྱཱདྷིནོ སནྟིཀཾ, བྱཱདྷི མརཎསྶ སནྟིཀཾ. ཏམེཝ མརཎཾ ཀུཋཱརིཡཱ ཚེདཾ ཝིཡ ཚིནྡིཏྭཱ གཙྪཏཱིཏི ཨིདམེཏྠ ཨོཔམྨསམྤཊིཔཱདནཾ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨུཔོསཐིཀཨིཏྠཱིནཾ ཝཏྠུ པཉྩམཾ.

༦. ཨཛགརཔེཏཝཏྠུ

ཨཐ པཱཔཱནི ཀམྨཱནཱིཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨཛགརཔེཏཾ ཨཱརབྦྷ ཀཐེསི.

ཨེཀསྨིཉྷི སམཡེ མཧཱམོགྒལླཱནཏྠེརོ ལཀྑཎཏྠེརེན སདྡྷིཾ གིཛ྄ཛྷཀཱུཊཏོ ཨོཏརནྟོ དིབྦེན ཙཀྑུནཱ པཉྩཝཱིསཏིཡོཛནིཀཾ ཨཛགརཔེཏཾ ནཱམ ཨདྡས. ཏསྶ སཱིསཏོ ཨགྒིཛཱལཱ ཨུཊྛཧིཏྭཱ པརིཡནྟཾ གཙྪནྟི, པརིཡནྟཏོ ཨུཊྛཧིཏྭཱ སཱིསཾ གཙྪནྟི, ཨུབྷཡཏོ ཨུཊྛཧིཏྭཱ མཛ྄ཛྷེ ཨོཏརནྟི. ཐེརོ ཏཾ དིསྭཱ སིཏཾ པཱཏྭཱཀཱསི. ལཀྑཎཏྠེརེན སིཏཀཱརཎཾ པུཊྛོ ‘‘ཨཀཱལོ, ཨཱཝུསོ, ཨིམསྶ པཉྷསྶ ཝེཡྻཱཀརཎཱཡ, སཏྠུ སནྟིཀེ མཾ པུཙྪེཡྻཱསཱི’’ཏི ཝཏྭཱ རཱཛགཧེ པིཎྜཱཡ ཙརིཏྭཱ སཏྠུ སནྟིཀཾ གཏཀཱལེ ལཀྑཎཏྠེརེན པུཊྛོ ཨཱཧ – ‘‘ཏཏྲཱཧཾ, ཨཱཝུསོ, ཨེཀཾ པེཏཾ ཨདྡསཾ, ཏསྶ ཨེཝརཱུཔོ ནཱམ ཨཏྟབྷཱཝོ, ཨཧཾ ཏཾ དིསྭཱ ‘ན ཝཏ མེ ཨེཝརཱུཔོ ཨཏྟབྷཱཝོ དིཊྛཔུབྦོ’ཏི སིཏཾ པཱཏྭཱཀཱསི’’ནྟི. སཏྠཱ ‘‘ཙཀྑུབྷཱུཏཱ ཝཏ, བྷིཀྑཝེ, སཱཝཀཱ ཝིཧརནྟཱི’’ཏིཨཱདཱིནི (པཱརཱ. ༢༢༨; སཾ. ནི. ༢.༢༠༢) ཝདནྟོ ཐེརསྶ ཀཐཾ པཏིཊྛཱཔེཏྭཱ ‘‘མཡཱཔི ཨེསོ, བྷིཀྑཝེ, པེཏོ བོདྷིམཎྜེཡེཝ དིཊྛོ, ‘ཡེ ཙ པན མེ ཝཙནཾ ན སདྡཧེཡྻུཾ, ཏེསཾ ཏཾ ཨཧིཏཱཡ ཨསྶཱ’ཏི ན ཀཐེསིཾ, ཨིདཱནི མོགྒལླཱནཾ སཀྑིཾ ལབྷིཏྭཱ ཀཐེམཱི’’ཏི ཝཏྭཱ བྷིཀྑཱུཧི ཏསྶ པུབྦཀམྨཾ པུཊྛོ བྱཱཀཱསི –

ཀསྶཔབུདྡྷཀཱལེ ཀིར སུམངྒལསེཊྛི ནཱམ སུཝཎྞིཊྛཀཱཧི བྷཱུམིཾ སནྠརིཏྭཱ ཝཱིསཏིཨུསབྷཊྛཱནེ ཏཏྟཀེནེཝ དྷནེན ཝིཧཱརཾ ཀཱརེཏྭཱ ཏཱཝཏྟཀེནེཝ ཝིཧཱརམཧཾ ཀཱརེསི. སོ ཨེཀདིཝསཾ པཱཏོཝ སཏྠུ སནྟིཀཾ གཙྪནྟོ ནགརདྭཱརེ ཨེཀིསྶཱ སཱལཱཡ ཀཱསཱཝཾ སསཱིསཾ པཱརུཔིཏྭཱ ཀལལམཀྑིཏེཧི པཱདེཧི ནིཔནྣཾ ཨེཀཾ ཙོརཾ དིསྭཱ ‘‘ཨཡཾ ཀལལམཀྑིཏཔཱདོ རཏྟིཾ ཝིཙརིཏྭཱ དིཝཱ ནིཔནྣམནུསྶོ བྷཝིསྶཏཱི’’ཏི ཨཱཧ. ཙོརོ མུཁཾ ཝིཝརིཏྭཱ སེཊྛིཾ དིསྭཱ ‘‘ཧོཏུ, ཛཱནིསྶཱམི ཏེ ཀཏྟབྦ’’ནྟི ཨཱགྷཱཏཾ བནྡྷིཏྭཱ སཏྟཀྑཏྟུཾ ཁེཏྟཾ ཛྷཱཔེསི, སཏྟཀྑཏྟུཾ ཝཛེ གུནྣཾ པཱདེ ཚིནྡི, སཏྟཀྑཏྟུཾ གེཧཾ ཛྷཱཔེསི, སོ ཨེཏྟཀེནཱཔི ཀོཔཾ ནིབྦཱཔེཏུཾ ཨསཀྐོནྟོ ཏསྶ ཙཱུལཱུ༹པཊྛཱཀེན སདྡྷིཾ མིཏྟསནྠཝཾ ཀཏྭཱ ‘‘ཀིཾ ཏེ སེཊྛིནོ པིཡ’’ནྟི པུཊྛོ ‘‘གནྡྷཀུཊིཏོ ཨཉྙཾ ཏསྶ པིཡཏརཾ ནཏྠཱི’’ཏི སུཏྭཱ ‘‘ཧོཏུ, གནྡྷཀུཊིཾ ཛྷཱཔེཏྭཱ ཀོཔཾ ནིབྦཱཔེསྶཱམཱི’’ཏི སཏྠརི པིཎྜཱཡ པཝིཊྛེ པཱནཱིཡཔརིབྷོཛནཱིཡགྷཊེ བྷིནྡིཏྭཱ གནྡྷཀུཊིཡཾ ཨགྒིཾ ཨདཱསི. སེཊྛི ‘‘གནྡྷཀུཊི ཀིར ཛྷཱཡཏཱི’’ཏི སུཏྭཱ ཨཱགཙྪནྟོ ཛྷཱམཀཱལེ ཨཱགནྟྭཱ གནྡྷཀུཊིཾ ཛྷཱམཾ ཨོལོཀེནྟོ ཝཱལགྒམཏྟམྤི དོམནསྶཾ ཨཀཏྭཱ ཝཱམབཱཧུཾ སམཉྫིཏྭཱ དཀྑིཎེན ཧཏྠེན མཧཱཨཔྥོཊནཾ ཨཔྥོཊེསི. ཨཐ ནཾ སམཱིཔེ ཋིཏཱ པུཙྪིཾསུ – ‘‘ཀསྨཱ, སཱམི, ཨེཏྟཀཾ དྷནཾ ཝིསྶཛྫེཏྭཱ ཀཏགནྡྷཀུཊིཡཱ ཛྷཱམཀཱལེ ཨཔྥོཊེསཱི’’ཏི? སོ ཨཱཧ – ‘‘ཨེཏྟཀཾ མེ, ཏཱཏཱ, ཨགྒིཨཱདཱིཧི ཨསཱདྷཱརཎེ བུདྡྷསྶ སཱསནེ དྷནཾ ནིདཧིཏུཾ ལདྡྷཾ, ‘པུནཔི ཨེཏྟཀཾ དྷནཾ ཝིསྶཛྫེཏྭཱ སཏྠུ གནྡྷཀུཊིཾ ཀཱཏུཾ ལབྷིསྶཱམཱི’ཏི ཏུཊྛམཱནསོ ཨཔྥོཊེསི’’ནྟི. སོ པུན ཏཏྟཀཾ དྷནཾ ཝིསྶཛྫེཏྭཱ གནྡྷཀུཊིཾ ཀཱརེཏྭཱ ཝཱིསཏིསཧསྶབྷིཀྑུཔརིཝཱརསྶ སཏྠུནོ དཱནཾ ཨདཱསི. ཏཾ དིསྭཱ ཙོརོ ཙིནྟེསི – ‘‘ཨཧཾ ཨིམཾ ཨམཱརེཏྭཱ མངྐུཀཱཏུཾ ན སཀྑིསྶཱམི, ཧོཏུ, མཱརེསྶཱམི ན’’ནྟི ནིཝཱསནནྟརེ ཚུརིཀཾ བནྡྷིཏྭཱ སཏྟཱཧཾ ཝིཧཱརེ ཝིཙརནྟོཔི ཨོཀཱསཾ ན ལབྷི. མཧཱསེཊྛིཔི སཏྟ དིཝསཱནི བུདྡྷཔྤམུཁསྶ བྷིཀྑུསངྒྷསྶ དཱནཾ དཏྭཱ སཏྠཱརཾ ཝནྡིཏྭཱ ཨཱཧ – ‘‘བྷནྟེ, མམ ཨེཀེན པུརིསེན སཏྟཀྑཏྟུཾ ཁེཏྟཾ ཛྷཱཔིཏཾ, སཏྟཀྑཏྟུཾ ཝཛེ གུནྣཾ པཱདཱ ཚིནྣཱ, སཏྟཀྑཏྟུཾ གེཧཾ ཛྷཱཔིཏཾ, ཨིདཱནི གནྡྷཀུཊིཔི ཏེནེཝ ཛྷཱཔིཏཱ བྷཝིསྶཏི, ཨཧཾ ཨིམསྨིཾ དཱནེ པཋམཾ པཏྟིཾ ཏསྶ དམྨཱི’’ཏི.

ཏཾ སུཏྭཱ ཙོརོ ‘‘བྷཱརིཡཾ ཝཏ མེ ཀམྨཾ ཀཏཾ, ཨེཝཾ ཨཔརཱདྷཀཱརཀེ མཡི ཨིམསྶ ཀོཔམཏྟམྤི ནཏྠི, ཨིམསྨིམྤི དཱནེ མཡ྄ཧམེཝ པཋམཾ པཏྟིཾ དེཏི, ཨཧཾ ཨིམསྨིཾ དུབྦྷཱམི, ཨེཝརཱུཔཾ མེ པུརིསཾ ཨཁམཱཔེནྟསྶ དེཝདཎྜོཔི མེ མཏྠཀེ པཏེཡྻཱ’’ཏི གནྟྭཱ སེཊྛིསྶ པཱདམཱུལེ ནིཔཛྫིཏྭཱ ‘‘ཁམཱཧི མེ, སཱམཱི’’ཏི ཝཏྭཱ ‘‘ཀིཾ ཨིད’’ནྟི ཝུཏྟེ, ‘‘སཱམི, ཨེཝཾ ཨཡུཏྟཀཾ ཀམྨཾ མཡཱ ཀཏཾ, ཏསྶ མེ ཁམཱཧཱི’’ཏི ཨཱཧ. ཨཐ ནཾ སེཊྛི ‘‘ཏཡཱ མེ ཨིདཉྩིདཉྩ ཀཏ’’ནྟི སབྦཾ པུཙྪིཏྭཱ ‘‘ཨཱམ, མཡཱ ཀཏ’’ནྟི ཝུཏྟེ, ‘‘ཏྭཾ མཡཱ ན དིཊྛཔུབྦོ, ཀསྨཱ མེ ཀུཛ྄ཛྷིཏྭཱ ཨེཝམཀཱསཱི’’ཏི པུཙྪི. སོ ཨེཀདིཝསཾ ནགརཱ ནིཀྑནྟེན ཏེན ཝུཏྟཝཙནཾ སཱརེཏྭཱ ‘‘ཨིམིནཱ མེ ཀཱརཎེན ཀོཔོ ཨུཔྤཱདིཏོ’’ཏི ཨཱཧ. སེཊྛི ཨཏྟནཱ ཝུཏྟཾ སརིཏྭཱ ‘‘ཨཱམ, ཏཱཏ, ཝུཏྟཾ མཡཱ, ཏཾ མེ ཁམཱཧཱི’’ཏི ཙོརཾ ཁམཱཔེཏྭཱ ‘‘ཨུཊྛེཧི, ཏཱཏ, ཁམཱམི ཏེ, གཙྪ, ཏཱཏཱ’’ཏི ཨཱཧ. སཙེ མེ, སཱམི, ཁམསི, སཔུཏྟདཱརཾ མཾ གེཧེ དཱསཾ ཀརོཧཱིཏི. ཏཱཏ, ཏྭཾ མཡཱ ཨེཏྟཀེ ཀཐིཏེ ཨེཝརཱུཔཾ ཚེདནཾ ཨཀཱསི, གེཧེ ཝསནྟེན པན སདྡྷིཾ ན སཀྐཱ ཀིཉྩི ཀཐེཏུཾ, ན མེ ཏཡཱ གེཧེ ཝསནྟེན ཀིཙྩཾ ཨཏྠི, ཁམཱམི ཏེ, གཙྪ, ཏཱཏཱཏི. ཙོརོ ཏཾ ཀམྨཾ ཀཏྭཱ ཨཱཡུཔརིཡོསཱནེ ཨཝཱིཙིམྷི ནིབྦཏྟོ དཱིགྷརཏྟཾ ཏཏྠ པཙྩིཏྭཱ ཝིཔཱཀཱཝསེསེན ཨིདཱནི གིཛ྄ཛྷཀཱུཊེ པབྦཏེ པཙྩཏཱིཏི.

ཨེཝཾ སཏྠཱ ཏསྶ པུབྦཀམྨཾ ཀཐེཏྭཱ, ‘‘བྷིཀྑཝེ, བཱལཱ ནཱམ པཱཔཱནི ཀམྨཱནི ཀརོནྟཱ ན བུཛ྄ཛྷནྟི, པཙྪཱ པན ཨཏྟནཱ ཀཏཀམྨེཧི ཌཡ྄ཧམཱནཱ ཨཏྟནཱཝ ཨཏྟནོ དཱཝགྒིསདིསཱཝ ཧོནྟཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༣༦.

‘‘ཨཐ པཱཔཱནི ཀམྨཱནི, ཀརཾ བཱལོ ན བུཛ྄ཛྷཏི;

སེཧི ཀམྨེཧི དུམྨེདྷོ, ཨགྒིཌཌྜྷོཝ ཏཔྤཏཱི’’ཏི.

ཏཏྠ ཨཐ པཱཔཱནཱིཏི ན ཀེཝལཾ བཱལོ ཀོདྷཝསེན པཱཔཱནི ཀརོཏི, ཀརོནྟོཔི པན ན བུཛ྄ཛྷཏཱིཏི ཨཏྠོ. པཱཔཾ ཀརོནྟོ ཙ ‘‘པཱཔཾ ཀརོམཱི’’ཏི ཨབུཛ྄ཛྷནཀོ ནཱམ ནཏྠི. ‘‘ཨིམསྶ ཀམྨསྶ ཨེཝརཱུཔོ ནཱམ ཝིཔཱཀོ’’ཏི ཨཛཱནནཏཱཡ ‘‘ན བུཛ྄ཛྷཏཱི’’ཏི ཝུཏྟཾ. སེཧཱིཏི སོ ཏེཧི ཨཏྟནོ སནྟཀེཧི ཀམྨེཧི དུམྨེདྷོ ནིཔྤཉྙོ པུགྒལོ ནིརཡེ ནིབྦཏྟིཏྭཱ ཨགྒིཌཌྜྷོཝ ཏཔྤཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཛགརཔེཏཝཏྠུ ཚཊྛཾ.

༧. མཧཱམོགྒལླཱནཏྠེརཝཏྠུ

ཡོ དཎྜེནཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ མཧཱམོགྒལླཱནཏྠེརཾ ཨཱརབྦྷ ཀཐེསི.

ཨེཀསྨིཉྷི སམཡེ ཏིཏྠིཡཱ སནྣིཔཏིཏྭཱ མནྟེསུཾ – ‘‘ཛཱནཱཐཱཝུསོ, ‘ཀེན ཀཱརཎེན སམཎསྶ གོཏམསྶ ལཱབྷསཀྐཱརོ མཧཱ ཧུཏྭཱ ནིབྦཏྟོ’ཏི. མཡཾ ན ཛཱནཱམ, ཏུམྷེ པན ཛཱནཱཐཱཏི. ཨཱམ, ཛཱནཱམ, མཧཱམོགྒལླཱནཾ ནཱམ ཨེཀཾ ནིསྶཱཡ ཨུཔྤནྣོ. སོ ཧི དེཝལོཀཾ གནྟྭཱ དེཝཏཱཧི ཀཏཀམྨཾ པུཙྪིཏྭཱ ཨཱགནྟྭཱ མནུསྶཱནཾ ཀཐེཏི ‘ཨིདཾ ནཱམ ཀཏྭཱ ཨེཝརཱུཔཾ སམྤཏྟིཾ ལབྷནྟཱི’ཏི. ནིརཡེ ནིབྦཏྟཱནམྤི ཀམྨཾ པུཙྪིཏྭཱ ཨཱགནྟྭཱ མནུསྶཱནཾ ཀཐེཏི ‘ཨིདཾ ནཱམ ཀཏྭཱ ཨེཝརཱུཔཾ དུཀྑཾ ཨནུབྷཝནྟཱི’ཏི. མནུསྶཱ ཏསྶ ཀཐཾ སུཏྭཱ མཧནྟཾ ལཱབྷསཀྐཱརཾ ཨབྷིཧརནྟི, སཙེ ཏཾ མཱརེཏུཾ སཀྑིསྶཱམ, སོ ལཱབྷསཀྐཱརོ ཨམྷཱཀཾ ནིབྦཏྟིསྶཏཱི’’ཏི. ཏེ ‘‘ཨཏྠེཀོ ཨུཔཱཡོ’’ཏི སབྦེ ཨེཀཙྪནྡཱ ཧུཏྭཱ ‘‘ཡཾཀིཉྩི ཀཏྭཱ ཏཾ མཱརཱཔེསྶཱམཱ’’ཏི ཨཏྟནོ ཨུཔཊྛཱཀེ སམཱདཔེཏྭཱ ཀཧཱཔཎསཧསྶཾ ལབྷིཏྭཱ པུརིསགྷཱཏཀམྨཾ ཀཏྭཱ ཙརནྟེ ཙོརེ པཀྐོསཱཔེཏྭཱ ‘‘མཧཱམོགྒལླཱནཏྠེརོ ནཱམ ཀཱལ༹སིལཱཡཾ ཝསཏི, ཏཏྠ གནྟྭཱ ཏཾ མཱརེཐཱ’’ཏི ཏེསཾ ཀཧཱཔཎེ ཨདཾསུ. ཙོརཱ དྷནལོབྷེན སམྤཊིཙྪིཏྭཱ ‘‘ཐེརཾ མཱརེསྶཱམཱ’’ཏི གནྟྭཱ ཏསྶ ཝསནཊྛཱནཾ པརིཝཱརེསུཾ. ཐེརོ ཏེཧི པརིཀྑིཏྟབྷཱཝཾ ཉཏྭཱ ཀུཉྩིཀཙྪིདྡེན ནིཀྑམིཏྭཱ པཀྐཱམི. ཏེ ཙོརཱ ཏཾ དིཝསཾ ཐེརཾ ཨདིསྭཱ པུནེཀདིཝསཾ གནྟྭཱ པརིཀྑིཔིཾསུ. ཐེརོ ཉཏྭཱ ཀཎྞིཀཱམཎྜལཾ བྷིནྡིཏྭཱ ཨཱཀཱསཾ པཀྑནྡི. ཨེཝཾ ཏེ པཋམམཱསེཔི མཛ྄ཛྷིམམཱསེཔི ཐེརཾ གཧེཏུཾ ནཱསཀྑིཾསུ. པཙྪིམམཱསེ པན སམྤཏྟེ ཐེརོ ཨཏྟནཱ ཀཏཀམྨསྶ ཨཱཀཌྜྷནབྷཱཝཾ ཉཏྭཱ ན ཨཔགཙྪི. ཙོརཱ གནྟྭཱ ཐེརཾ གཧེཏྭཱ ཏཎྜུལཀཎམཏྟཱནིསྶ ཨཊྛཱིནི ཀརོནྟཱ བྷིནྡིཾསུ. ཨཐ ནཾ ‘‘མཏོ’’ཏི སཉྙཱཡ ཨེཀསྨིཾ གུམྦཔིཊྛེ ཁིཔིཏྭཱ པཀྐམིཾསུ.

ཐེརོ ‘‘སཏྠཱརཾ པསྶིཏྭཱཝ པརིནིབྦཱཡིསྶཱམཱི’’ཏི ཨཏྟབྷཱཝཾ ཛྷཱནཝེཋནེན ཝེཋེཏྭཱ ཐིརཾ ཀཏྭཱ ཨཱཀཱསེན སཏྠུ སནྟིཀཾ གནྟྭཱ སཏྠཱརཾ ཝནྡིཏྭཱ, ‘‘བྷནྟེ, པརིནིབྦཱཡིསྶཱམཱི’’ཏི ཨཱཧ. ‘‘པརིནིབྦཱཡིསྶསི, མོགྒལླཱནཱ’’ཏི? ‘‘ཨཱམ, བྷནྟེ’’ཏི. ‘‘ཀཏྠ གནྟྭཱ’’ཏི? ‘‘ཀཱལ༹སིལཱཔདེསཾ, བྷནྟེ’’ཏི. ཏེན ཧི, མོགྒལླཱན, མཡ྄ཧཾ དྷམྨཾ ཀཐེཏྭཱ ཡཱཧི. ཏཱདིསསྶ ཧི མེ སཱཝཀསྶ ཨིདཱནི དསྶནཾ ནཏྠཱིཏི. སོ ‘‘ཨེཝཾ ཀརིསྶཱམི, བྷནྟེ’’ཏི སཏྠཱརཾ ཝནྡིཏྭཱ ཨཱཀཱསཾ ཨུཔྤཏིཏྭཱ པརིནིབྦཱནདིཝསེ སཱརིཔུཏྟཏྠེརོ ཝིཡ ནཱནཔྤཀཱརཱ ཨིདྡྷིཡོ ཀཏྭཱ དྷམྨཾ ཀཐེཏྭཱ སཏྠཱརཾ ཝནྡིཏྭཱ ཀཱལ༹སིལཱཊཝིཾ གནྟྭཱ པརིནིབྦཱཡི. ‘‘ཐེརཾ ཀིར ཙོརཱ མཱརེསུ’’ནྟི ཨཡམྤི ཀཐཱ སཀལཛམྦུདཱིཔེ པཏྠརི. རཱཛཱ ཨཛཱཏསཏྟུ ཙོརེ པརིཡེསནཏྠཱཡ ཙརཔུརིསེ པཡོཛེསི. ཏེསུཔི ཙོརེསུ སུརཱཔཱནེ སུརཾ པིཝནྟེསུ ཨེཀོ ཨེཀསྶ པིཊྛིཾ པཧརིཏྭཱ པཱཏེསི. སོ ཏཾ སནྟེཛྫེཏྭཱ ‘‘ཨམྦྷོ དུབྦིནཱིཏ, ཏྭཾ ཀསྨཱ མེ པིཊྛིཾ པཱཏེསཱི’’ཏི ཨཱཧ. ཀིཾ པན ཧརེ དུཊྛཙོར, ཏཡཱ མཧཱམོགྒལླཱནཏྠེརོ པཋམཾ པཧཊོཏི? ཀིཾ པན མཡཱ པཧཊབྷཱཝཾ ཏྭཾ ན ཛཱནཱསཱིཏི? ཨིཏི ནེསཾ ‘‘མཡཱ པཧཊོ, མཡཱ པཧཊོ’’ཏི ཝདནྟཱནཾ ཝཙནཾ སུཏྭཱ ཏེ ཙརཔུརིསཱ ཏེ སབྦེ ཙོརེ གཧེཏྭཱ རཉྙོ ཨཱརོཙེསུཾ. རཱཛཱ ཙོརེ པཀྐོསཱཔེཏྭཱ པུཙྪི – ‘‘ཏུམྷེཧི ཐེརོ མཱརིཏོ’’ཏི? ‘‘ཨཱམ, དེཝཱ’’ཏི. ‘‘ཀེན ཏུམྷེ ཨུཡྻོཛིཏཱ’’ཏི? ‘‘ནགྒསམཎཀེཧི, དེཝཱ’’ཏི. རཱཛཱ པཉྩསཏེ ནགྒསམཎཀེ གཱཧཱཔེཏྭཱ པཉྩསཏེཧི ཙོརེཧི སདྡྷིཾ རཱཛངྒཎེ ནཱབྷིཔྤམཱཎེསུ ཨཱཝཱཊེསུ ནིཁཎཱཔེཏྭཱ པལཱལེཧི པཊིཙྪཱདཱཔེཏྭཱ ཨགྒིཾ དཱཔེསི. ཨཐ ནེསཾ ཛྷཱམབྷཱཝཾ ཉཏྭཱ ཨཡནངྒལེཧི ཀསཱཔེཏྭཱ སབྦེ ཁཎྜཱཁཎྜིཀཾ ཀཱརཱཔེསི.

བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ – ‘‘མཧཱམོགྒལླཱནཏྠེརོ ཨཏྟནོ ཨནནུརཱུཔམེཝ མརཎཾ པཏྟོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, མོགྒལླཱནོ ཨིམསྶེཝ ཨཏྟབྷཱཝསྶ ཨནནུརཱུཔཾ མརཎཾ པཏྟོ, པུབྦེ པན ཏེན ཀཏསྶ ཀམྨསྶ ཨནུརཱུཔམེཝ མརཎཾ པཏྟོ’’ཏི ཝཏྭཱ ‘‘ཀིཾ པནསྶ, བྷནྟེ, པུབྦཀམྨ’’ནྟི པུཊྛོ ཝིཏྠཱརེཏྭཱ ཀཐེསི –

ཨཏཱིཏེ ཀིར བཱརཱཎསིཝཱསཱི ཨེཀོ ཀུལཔུཏྟོ སཡམེཝ ཀོཊྚནཔཙནཱདཱིནི ཀམྨཱནི ཀརོནྟོ མཱཏཱཔིཏརོ པཊིཛགྒི. ཨཐསྶ མཱཏཱཔིཏརོ ནཾ, ‘‘ཏཱཏ, ཏྭཾ ཨེཀཀོཝ གེཧེ ཙ ཨརཉྙེ ཙ ཀམྨཾ ཀརོནྟོ ཀིལམསི, ཨེཀཾ ཏེ ཀུམཱརིཀཾ ཨཱནེསྶཱམཱ’’ཏི ཝཏྭཱ, ‘‘ཨམྨཏཱཏཱ, ན མཡ྄ཧཾ ཨེཝརཱུཔཱཡཏྠོ, ཨཧཾ ཡཱཝ ཏུམྷེ ཛཱིཝཐ, ཏཱཝ ཝོ སཧཏྠཱ ཨུཔཊྛཧིསྶཱམཱི’’ཏི ཏེན པཊིཀྑིཏྟཱ པུནཔྤུནཾ ཏཾ ཡཱཙིཏྭཱ ཀུམཱརིཀཾ ཨཱནཡིཾསུ. སཱ ཀཏིཔཱཧམེཝ ཏེ ཨུཔཊྛཧིཏྭཱ པཙྪཱ ཏེསཾ དསྶནམྤི ཨནིཙྪནྟཱི ‘‘ན སཀྐཱ ཏཝ མཱཏཱཔིཏཱུཧི སདྡྷིཾ ཨེཀཊྛཱནེ ཝསིཏུ’’ནྟི ཨུཛ྄ཛྷཱཡིཏྭཱ ཏསྨིཾ ཨཏྟནོ ཀཐཾ ཨགྒཎྷནྟེ ཏསྶ བཧིགཏཀཱལེ མཀཙིཝཱཀཁཎྜཱནི ཙ ཡཱགུཕེཎཉྩ གཧེཏྭཱ ཏཏྠ ཏཏྠ ཨཱཀིརིཏྭཱ ཏེནཱགནྟྭཱ ‘‘ཀིཾ ཨིད’’ནྟི པུཊྛཱ ཨཱཧ – ‘‘ཨིམེསཾ ཨནྡྷམཧལླཀཱནཾ ཨེཏཾ ཀམྨཾ, སབྦཾ གེཧཾ ཀིལིཊྛཾ ཀརོནྟཱ ཝིཙརནྟི, ན སཀྐཱ ཨེཏེཧི སདྡྷིཾ ཨེཀཊྛཱནེ ཝསིཏུ’’ནྟི. ཨེཝཾ ཏཱཡ ནཾ པུནཔྤུནཾ ཀཐཡམཱནཱཡ ཨེཝརཱུཔོཔི པཱུརིཏཔཱརམཱི སཏྟོ མཱཏཱཔིཏཱུཧི སདྡྷིཾ བྷིཛྫི. སོ ‘‘ཧོཏུ, ཛཱནིསྶཱམི ནེསཾ ཀཏྟབྦ’’ནྟི ཏེ བྷོཛེཏྭཱ, ‘‘ཨམྨཏཱཏཱ, ཨསུཀཊྛཱནེ ནཱམ ཏུམྷཱཀཾ ཉཱཏཀཱ ཨཱགམནཾ པཙྩཱསཱིསནྟི, ཏཏྠ གམིསྶཱམཱ’’ཏི ཏེ ཡཱནཀཾ ཨཱརོཔེཏྭཱ ཨཱདཱཡ གཙྪནྟོ ཨཊཝིམཛ྄ཛྷཾ པཏྟཀཱལེ, ‘‘ཏཱཏ, རསྨིཡོ གཎྷཱཐ, གཱཝོ པཏོདསཉྙཱཡ གམིསྶནྟི, ཨིམསྨིཾ ཋཱནེ ཙོརཱ ཝསནྟི, ཨཧཾ ཨོཏརཱམཱི’’ཏི པིཏུ ཧཏྠེ རསྨིཡོ དཏྭཱ ཨོཏརིཏྭཱ གཙྪནྟོ སདྡཾ པརིཝཏྟེཏྭཱ ཙོརཱནཾ ཨུཊྛིཏསདྡམཀཱསི. མཱཏཱཔིཏརོ སདྡཾ སུཏྭཱ ‘‘ཙོརཱ ཨུཊྛིཏཱ’’ཏི སཉྙཱཡ, ‘‘ཏཱཏ, མཡཾ མཧལླཀཱ, ཏྭཾ ཨཏྟཱནམེཝ རཀྑཱཧཱི’’ཏི ཨཱཧཾསུ. སོ མཱཏཱཔིཏརོ ཏཐཱཝིརཝནྟེཔི ཙོརསདྡཾ ཀརོནྟོ ཀོཊྚེཏྭཱ མཱརེཏྭཱ ཨཊཝིཡཾ ཁིཔིཏྭཱ པཙྩཱགམི.

སཏྠཱ ཨིདཾ ཏསྶ པུབྦཀམྨཾ ཀཐེཏྭཱ, ‘‘བྷིཀྑཝེ, མོགྒལླཱནོ ཨེཏྟཀཾ ཀམྨཾ ཀཏྭཱ ཨནེཀཝསྶསཏསཧསྶཱནི ནིརཡེ པཙྩིཏྭཱ ཝིཔཱཀཱཝསེསེན ཨཏྟབྷཱཝསཏེ ཨེཝམེཝ ཀོཊྚེཏྭཱ སཾཙུཎྞིཏོ མརཎཾ པཏྟོ. ཨེཝཾ མོགྒལླཱནེན ཨཏྟནོ ཀམྨཱནུརཱུཔམེཝ མརཎཾ ལདྡྷཾ, པཉྩཧི ཙོརསཏེཧི སདྡྷིཾ ལབྷིཾསུ. ཨཔྤདུཊྛེསུ ཧི པདུསྶནྟོ དསཧི ཀཱརཎེཧི ཨནཡབྱསནཾ པཱཔུཎཱཏིཡེཝཱ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༡༣༧.

‘‘ཡོ དཎྜེན ཨདཎྜེསུ, ཨཔྤདུཊྛེསུ དུསྶཏི;

དསནྣམཉྙཏརཾ ཋཱནཾ, ཁིཔྤམེཝ ནིགཙྪཏི.

༡༣༨.

‘‘ཝེདནཾ ཕརུསཾ ཛཱནིཾ, སརཱིརསྶ ཝ བྷེདནཾ;

གརུཀཾ ཝཱཔི ཨཱབཱདྷཾ, ཙིཏྟཀྑེཔཾ ཝ པཱཔུཎེ.

༡༣༩.

‘‘རཱཛཏོ ཝཱ ཨུཔསགྒཾ, ཨབྦྷཀྑཱནཾ ཝ དཱརུཎཾ;

པརིཀྑཡཾ ཝ ཉཱཏཱིནཾ, བྷོགཱནཾ ཝ པབྷངྒུརཾ.

༡༤༠.

‘‘ཨཐ ཝཱསྶ ཨགཱརཱནི, ཨགྒི ཌཧཏི པཱཝཀོ;

ཀཱཡསྶ བྷེདཱ དུཔྤཉྙོ, ནིརཡཾ སོཔཔཛྫཏཱི’’ཏི.

ཏཏྠ ཨདཎྜེསཱུཏི ཀཱཡདཎྜཱདིརཧིཏེསུ ཁཱིཎཱསཝེསུ. ཨཔྤདུཊྛེསཱུཏི པརེསུ ཝཱ ཨཏྟནི ཝཱ ནིརཔརཱདྷེསུ. དསནྣམཉྙཏརཾ ཋཱནནྟི དསསུ དུཀྑཀཱརཎེསུ ཨཉྙཏརཾ ཀཱརཎཾ. ཝེདནནྟི སཱིསརོགཱདིབྷེདཾ ཕརུསཾ ཝེདནཾ. ཛཱནིནྟི ཀིཙྪཱདྷིགཏསྶ དྷནསྶ ཛཱནིཾ. བྷེདནནྟི ཧཏྠཙྪེདཱདིཀཾ སརཱིརབྷེདནཾ. གརུཀནྟི པཀྑཧཏཨེཀཙཀྑུཀཔཱིཋསཔྤིཀུཎཱིབྷཱཝཀུཊྛརོགཱདིབྷེདཾ གརུཀཱབཱདྷཾ ཝཱ. ཙིཏྟཀྑེཔནྟི ཨུམྨཱདཾ. ཨུཔསགྒནྟི ཡསཝིལོཔསེནཱཔཏིཊྛཱནཱདིཨཙྪིནྡནཱདིཀཾ རཱཛཏོ ཨུཔསགྒཾ ཝཱ. ཨབྦྷཀྑཱནནྟི ཨདིཊྛཨསུཏཨཙིནྟིཏཔུབྦཾ ‘‘ཨིདཾ སནྡྷིཙྪེདཱདིཀམྨཾ, ཨིདཾ ཝཱ རཱཛཱཔརཱདྷིཏཀམྨཾ ཏཡཱ ཀཏ’’ནྟི ཨེཝརཱུཔཾ དཱརུཎཾ ཨབྦྷཀྑཱནཾ ཝཱ. པརིཀྑཡཾ ཝ ཉཱཏཱིནནྟི ཨཏྟནོ ཨཝསྶཡོ བྷཝིཏུཾ སམཏྠཱནཾ ཉཱཏཱིནཾ པརིཀྑཡཾ ཝཱ. པབྷངྒུརནྟི པབྷངྒུབྷཱཝཾ པཱུཏིབྷཱཝཾ. ཡཾ ཧིསྶ གེཧེ དྷཉྙཾ, ཏཾ པཱུཏིབྷཱཝཾ ཨཱཔཛྫཏི, སུཝཎྞཾ ཨངྒཱརབྷཱཝཾ, མུཏྟཱ ཀཔྤཱསཊྛིབྷཱཝཾ, ཀཧཱཔཎཾ ཀཔཱལཁཎྜཱདིབྷཱཝཾ, དྭིཔདཙཏུཔྤདཱ ཀཱཎཀུཎཱདིབྷཱཝནྟི ཨཏྠོ. ཨགྒི ཌཧཏཱིཏི ཨེཀསཾཝཙྪརེ དྭཏྟིཀྑཏྟུཾ ཨཉྙསྨིཾ ཌཱཧཀེ ཨཝིཛྫམཱནེཔི ཨསནིཨགྒི ཝཱ པཏིཏྭཱ ཌཧཏི, ཨཏྟནོཝ དྷམྨཏཱཡ ཨུཊྛིཏོ པཱཝཀོ ཝཱ ཌཧཏིཡེཝ. ནིརཡནྟི དིཊྛེཝ དྷམྨེ ཨིམེསཾ དསནྣཾ ཋཱནཱནཾ ཨཉྙཏརཾ པཏྭཱཔི ཨེཀཾསེན སམྤརཱཡེ པཏྟབྦཾ དསྶེཏུཾ ‘‘ནིརཡཾ སོཔཔཛྫཏཱི’’ཏི ཝུཏྟཾ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཧཱམོགྒལླཱནཏྠེརཝཏྠུ སཏྟམཾ.

༨. བཧུབྷཎྜིཀབྷིཀྑུཝཏྠུ

ན ནགྒཙརིཡཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ བཧུབྷཎྜིཀཾ བྷིཀྑུཾ ཨཱརབྦྷ ཀཐེསི.

སཱཝཏྠིཝཱསཱི ཀིརེཀོ ཀུཊུམྦིཀོ བྷརིཡཱཡ ཀཱལཀཏཱཡ པབྦཛི. སོ པབྦཛནྟོ ཨཏྟནོ པརིཝེཎཉྩ ཨགྒིསཱལཉྩ བྷཎྜགབྦྷཉྩ ཀཱརེཏྭཱ སབྦམྤི བྷཎྜགབྦྷཾ སཔྤིམདྷུཏེལཱདཱིཧི པཱུརེཏྭཱ པབྦཛི, པབྦཛིཏྭཱ ཙ པན ཨཏྟནོ དཱསེ པཀྐོསཱཔེཏྭཱ ཡཐཱརུཙིཀཾ ཨཱཧཱརཾ པཙཱཔེཏྭཱ བྷུཉྫཏི. བཧུབྷཎྜོ ཙ བཧུཔརིཀྑཱརོ ཙ ཨཧོསི. རཏྟིཾ ཨཉྙཾ ནིཝཱསནཔཱརུཔནཾ ཧོཏི, དིཝཱ ཨཉྙཾ ནིཝཱསནཔཱརུཔནཾ ཧོཏི, དིཝཱ ཨཉྙཾ ཝིཧཱརཔཙྩནྟེ ཝསཏི. ཏསྶེཀདིཝསཾ ཙཱིཝརཔཙྩཏྠརཎཱནི སུཀྑཱཔེནྟསྶ སེནཱསནཙཱརིཀཾ ཨཱཧིཎྜནྟཱ བྷིཀྑཱུ པསྶིཏྭཱ ‘‘ཀསྶིམཱནི, ཨཱཝུསོ’’ཏི པུཙྪིཏྭཱ ‘‘མཡ྄ཧ’’ནྟི ཝུཏྟེ, ‘‘ཨཱཝུསོ, བྷགཝཏཱ ཏིཙཱིཝརཱནི ཨནུཉྙཱཏཱནི, ཏྭཉྩ པན ཨེཝཾ ཨཔྤིཙྪསྶ བུདྡྷསྶ སཱསནེ པབྦཛིཏྭཱ ཨེཝཾ བཧུཔརིཀྑཱརོ ཛཱཏོ’’ཏི ཏཾ སཏྠུ སནྟིཀཾ ནེཏྭཱ, ‘‘བྷནྟེ, ཨཡཾ བྷིཀྑུ ཨཏིབཧུབྷཎྜོ’’ཏི ཨཱརོཙེསུཾ. སཏྠཱ ‘‘སཙྩཾ ཀིར ཏཾ བྷིཀྑཱུ’’ཏི པུཙྪིཏྭཱ ‘‘སཙྩཾ, བྷནྟེ’’ཏི ཝུཏྟེ ཨཱཧ – ‘‘ཀསྨཱ པན ཏྭཾ, བྷིཀྑུ, མཡཱ ཨཔྤིཙྪཏཱཡ དྷམྨེ དེསིཏེ ཨེཝཾ བཧུབྷཎྜོ ཛཱཏོ’’ཏི. སོ ཏཱཝཏྟཀེནེཝ ཀུཔིཏོ ‘‘ཨིམིནཱ དཱནི ནཱིཧཱརེན ཙརིསྶཱམཱི’’ཏི པཱརུཔནཾ ཚཌྜེཏྭཱ པརིསམཛ྄ཛྷེ ཨེཀཙཱིཝརོ ཨཊྛཱསི. ཨཐ ནཾ སཏྠཱ ཨུཔཏྠམྦྷཡམཱནོ ནནུ ཏྭཾ བྷིཀྑུ པུབྦེ ཧིརོཏྟཔྤགཝེསཀོ དཀརཀྑསཀཱལེཔི ཧིརོཏྟཔྤཾ གཝེསམཱནོ དྭཱདས ཝསྶཱནི ཝིཧཱསི, ཀསྨཱ ཨིདཱནི ཨེཝཾ གརུཀེ བུདྡྷསཱསནེ པབྦཛིཏྭཱ ཙཏུཔརིསམཛ྄ཛྷེ པཱརུཔནཾ ཚཌྜེཏྭཱ ཧིརོཏྟཔྤཾ པཧཱཡ ཋིཏོསཱིཏི. སོ སཏྠུ ཝཙནཾ སུཏྭཱ ཧིརོཏྟཔྤཾ པཙྩུཔཊྛཱཔེཏྭཱ ཏཾ ཙཱིཝརཾ པཱརུཔིཏྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདི. བྷིཀྑཱུ ཏསྶ ཨཏྠསྶ ཨཱཝིབྷཱཝཏྠཾ བྷགཝནྟཾ ཡཱཙིཾསུ. བྷགཝཱ ཨཏཱིཏཾ ཨཱཧརིཏྭཱ ཀཐེསི –

ཨཏཱིཏེ ཀིར བཱརཱཎསིརཉྙོ ཨགྒམཧེསིཡཱ ཀུཙྪིསྨིཾ བོདྷིསཏྟོ པཊིསནྡྷིཾ གཎྷི. ཏསྶ ནཱམགྒཧཎདིཝསེ མཧིཾསཀུམཱརོཏི ནཱམཾ ཀརིཾསུ. ཏསྶ ཀནིཊྛབྷཱཏཱ ཙནྡཀུམཱརོ ནཱམ ཨཧོསི. ཏེསཾ མཱཏརི ཀཱལཀཏཱཡ རཱཛཱ ཨཉྙཾ ཨགྒམཧེསིཊྛཱནེ ཋཔེསི. སཱཔི པུཏྟཾ ཝིཛཱཡི, སཱུརིཡཀུམཱརོཏིསྶ ནཱམཾ ཀརིཾསུ. ཏཾ དིསྭཱ རཱཛཱ ཏུཊྛོ ‘‘པུཏྟསྶ ཏེ ཝརཾ དམྨཱི’’ཏི ཨཱཧ. སཱཔི ཁོ, ‘‘དེཝ, ཨིཙྪིཏཀཱལེ གཎྷིསྶཱམཱི’’ཏི ཝཏྭཱ པུཏྟསྶ ཝཡཔྤཏྟཀཱལེ རཱཛཱནཾ ཨཱཧ – ‘‘དེཝེན མཡ྄ཧཾ པུཏྟསྶ ཛཱཏཀཱལེ ཝརོ དིནྣོ, ཨིདཱནི མེ པུཏྟསྶ རཛྫཾ དེཧཱི’’ཏི. རཱཛཱ ‘‘མམ དྭེ པུཏྟཱ ཨགྒིཀྑནྡྷཱ ཝིཡ ཛལནྟཱ ཝིཙརནྟི, ན སཀྐཱ ཏསྶ རཛྫཾ དཱཏུ’’ནྟི པཊིཀྑིཔིཏྭཱཔི ཏཾ པུནཔྤུནཾ ཡཱཙམཱནམེཝ དིསྭཱ ‘‘ཨཡཾ མེ པུཏྟཱནཾ ཨནཏྠམྤི ཀརེཡྻཱ’’ཏི པུཏྟེ པཀྐོསཱཔེཏྭཱ, ‘‘ཏཱཏཱ, ཨཧཾ སཱུརིཡཀུམཱརསྶ ཛཱཏཀཱལེ ཝརཾ ཨདཱསིཾ, ཨིདཱནིསྶ མཱཏཱ རཛྫཾ ཡཱཙཏི, ཨཧཾ ཏསྶ ན དཱཏུཀཱམོ, ཏསྶ མཱཏཱ ཏུམྷཱཀཾ ཨནཏྠམྤི ཀརེཡྻ, གཙྪཐ ཏུམྷེ, ཨརཉྙེ ཝསིཏྭཱ མམཙྩཡེནཱགནྟྭཱ རཛྫཾ གཎྷཐཱ’’ཏི ཨུཡྻོཛེསི. ཏེ པིཏརཾ ཝནྡིཏྭཱ པཱསཱདཱ ཨོཏརནྟེ རཱཛངྒཎེ ཀཱིལ༹མཱནོ སཱུརིཡཀུམཱརོ དིསྭཱ ཏཾ ཀཱརཎཾ ཉཏྭཱ ཏེཧི སདྡྷིཾ ནིཀྑམི. ཏེསཾ ཧིམཝནྟཾ པཝིཊྛཀཱལེ བོདྷིསཏྟོ མགྒཱ ཨོཀྐམྨ ཨཉྙཏརསྨིཾ རུཀྑམཱུལེ ནིསཱིདིཏྭཱ སཱུརིཡཀུམཱརཾ ཨཱཧ – ‘‘ཏཱཏ, ཨེཏཾ སརཾ གནྟྭཱ ནྷཏྭཱ ཙ པིཝིཏྭཱ ཙ ཨམྷཱཀམྤི པདུམིནིཔཎྞེཧི ཨུདཀཾ ཨཱཧརཱ’’ཏི. སོ པན སརོ ཝེསྶཝཎྞསྶ སནྟིཀཱ ཨེཀེན དཀརཀྑསེན ལདྡྷོ ཧོཏི. ཝེསྶཝཎྞོ ཙ ཏཾ ཨཱཧ – ‘‘ཋཔེཏྭཱ དེཝདྷམྨཛཱནནཀེ ཡེ ཙ ཨཉྙེ ཨིམཾ སརཾ ཨོཏརནྟི, ཏེ ཁཱདིཏུཾ ལབྷསཱི’’ཏི. ཏཏོ པཊྛཱཡ སོ ཏཾ སརཾ ཨོཏིཎྞོཏིཎྞེ དེཝདྷམྨེ པུཙྪིཏྭཱ ཨཛཱནནྟེ ཁཱདཏི, སཱུརིཡཀུམཱརོཔི ཏཾ སརཾ ཨཝཱིམཾསིཏྭཱཝ ཨོཏརི, ཏེན ཙ ‘‘དེཝདྷམྨེ ཛཱནཱསཱི’’ཏི པུཙྪིཏོ ‘‘དེཝདྷམྨཱ ནཱམ ཙནྡིམསཱུརིཡཱ’’ཏི ཨཱཧ. ཨཐ ནཾ ‘‘ཏྭཾ དེཝདྷམྨེ ན ཛཱནཱསཱི’’ཏི ཨུདཀཾ པཝེསེཏྭཱ ཨཏྟནོ བྷཝནེ ཋཔེསི. བོདྷིསཏྟོཔི ཏཾ ཙིརཱཡནྟཾ དིསྭཱ ཙནྡཀུམཱརཾ པེསེསི. སོཔི ཏེན ‘‘དེཝདྷམྨེ ཛཱནཱསཱི’’ཏི པུཙྪིཏོ ‘‘དེཝདྷམྨཱ ནཱམ ཙཏསྶོ དིསཱ’’ཏི ཨཱཧ. དཀརཀྑསོ ཏམྤི ཨུདཀཾ པཝེསེཏྭཱ ཏཏྠེཝ ཋཔེསི.

བོདྷིསཏྟོ ཏསྨིམྤི ཙིརཱཡནྟེ ‘‘ཨནྟརཱཡེན བྷཝིཏབྦ’’ནྟི སཡཾ གནྟྭཱ དྭིནྣམྤི ཨོཏརཎཔདཾཡེཝ དིསྭཱ ‘‘ཨཡཾ སརོ རཀྑསཔརིགྒཧིཏོ’’ཏི ཉཏྭཱ ཁགྒཾ སནྣཡ྄ཧིཏྭཱ དྷནུཾ གཧེཏྭཱ ཨཊྛཱསི. རཀྑསོ ཏཾ ཨནོཏརནྟཾ དིསྭཱ ཝནཀམྨིཀཔུརིསཝེསེནཱགནྟྭཱ ཨཱཧ – ‘‘བྷོ པུརིས, ཏྭཾ མགྒཀིལནྟོ, ཀསྨཱ ཨིམཾ སརཾ ཨོཏརིཏྭཱ ནྷཏྭཱ ཙ པིཝིཏྭཱ ཙ བྷིསམུལཱལཾ ཁཱདིཏྭཱ པུཔྥཱནི པིལནྡྷིཏྭཱ ན གཙྪསཱི’’ཏི. བོདྷིསཏྟོ ཏཾ དིསྭཱཝ ‘‘ཨེས སོ ཡཀྑོ’’ཏི ཉཏྭཱ ‘‘ཏཡཱ མེ བྷཱཏརོ གཧིཏཱ’’ཏི ཨཱཧ. ཨཱམ, མཡཱ གཧིཏཱཏི. ཀིཾ ཀཱརཎཱཏི? ཨཧཾ ཨིམཾ སརཾ ཨོཏིཎྞོཏིཎྞེ ལབྷཱམཱིཏི. ཀིཾ པན སབྦེཝ ལབྷསཱིཏི? དེཝདྷམྨཛཱནནཀེ ཋཔེཏྭཱ ཨཝསེསེ ལབྷཱམཱིཏི. ཨཏྠི པན ཏེ དེཝདྷམྨེཧི ཨཏྠོཏི? ཨཱམ, ཨཏྠཱིཏི. ཨཧཾ ཀཐེསྶཱམཱིཏི. ཏེན ཧི ཀཐེཧཱིཏི. ན སཀྐཱ ཀིལིཊྛེན གཏྟེན ཀཐེཏུནྟི. ཡཀྑོ བོདྷིསཏྟཾ ནྷཱཔེཏྭཱ པཱནཱིཡཾ པཱཡེཏྭཱ ཨལངྐརིཏྭཱ ཨལངྐཏམཎྜཔམཛ྄ཛྷེ པལླངྐཾ ཨཱརོཔེཏྭཱ སཡམསྶ པཱདམཱུལེ ནིསཱིདི. ཨཐ ནཾ བོདྷིསཏྟོ ‘‘སཀྐཙྩཾ སུཎཱཧཱི’’ཏི ཝཏྭཱ ཨིམཾ གཱཐམཱཧ –

‘‘ཧིརིཨོཏྟཔྤསམྤནྣཱ, སུཀྐདྷམྨསམཱཧིཏཱ;

སནྟོ སཔྤུརིསཱ ལོཀེ, དེཝདྷམྨཱཏི ཝུཙྩརེ’’ཏི. (ཛཱ. ༡.༡.༦);

ཡཀྑོ ཨིམཾ དྷམྨདེསནཾ སུཏྭཱ པསནྣོ བོདྷིསཏྟཾ ཨཱཧ – ‘‘པཎྜིཏ, ཨཧཾ ཏེ པསནྣོ, ཨེཀཾ བྷཱཏརཾ དམྨི, ཀཏརཾ ཨཱནེམཱི’’ཏི? ‘‘ཀནིཊྛཾ ཨཱནེཧཱི’’ཏི. པཎྜིཏ, ཏྭཾ ཀེཝལཾ དེཝདྷམྨེ ཛཱནཱསིཡེཝ, ན པན ཏེསུ ཝཏྟསཱིཏི. ཀིཾ ཀཱརཎཱཏི? ཡསྨཱ ཛེཊྛཾ ཋཔེཏྭཱ ཀནིཊྛཾ ཨཱཧརཱཔེནྟོ ཛེཊྛཱཔཙཱཡིཀཀམྨཾ ན ཀརོསཱིཏི, དེཝདྷམྨེ ཙཱཧཾ ཡཀྑ ཛཱནཱམི, ཏེསུ ཙ ཝཏྟཱམི. མཡཉྷི ཨེཏཾ ནིསྶཱཡ ཨིམཾ ཨརཉྙཾ པཝིཊྛཱ. ཨེཏསྶ ཧི ཨཏྠཱཡ ཨམྷཱཀཾ པིཏརཾ ཨེཏསྶ མཱཏཱ རཛྫཾ ཡཱཙི, ཨམྷཱཀཾ པན པིཏཱ ཏཾ ཝརཾ ཨདཏྭཱ ཨམྷཱཀཾ ཨནུརཀྑཎཏྠཱཡ ཨརཉྙེ ཝཱསཾ ཨནུཛཱནི, སོ ཀུམཱརོ ཨནིཝཏྟིཏྭཱ ཨམྷེཧི སདྡྷིཾ ཨཱགཏོ. ‘‘ཏཾ ཨརཉྙེ ཨེཀོ ཡཀྑོ ཁཱདཱི’’ཏི ཝུཏྟེཔི ན ཀོཙི སདྡཧིསྶཏི. ཏེནཱཧཾ གརཧབྷཡབྷཱིཏོ ཏམེཝཱཧརཱཔེམཱིཏི. ཡཀྑོ བོདྷིསཏྟསྶ པསཱིདིཏྭཱ ‘‘སཱདྷུ པཎྜིཏ, ཏྭམེཝ དེཝདྷམྨེ ཛཱནཱསི, དེཝདྷམྨེསུ ཙ ཝཏྟསཱི’’ཏི དྭེ བྷཱཏརོ ཨཱནེཏྭཱ ཨདཱསི. ཨཐ ནཾ བོདྷིསཏྟོ ཡཀྑབྷཱཝེ ཨཱདཱིནཝཾ ཀཐེཏྭཱ པཉྩསུ སཱིལེསུ པཏིཊྛཱཔེསི. སོ ཏེན སུསཾཝིཧིཏཱརཀྑོ ཏསྨིཾ ཨརཉྙེ ཝསིཏྭཱ པིཏརི ཀཱལཀཏེ ཡཀྑཾ ཨཱདཱཡ བཱརཱཎསིཾ གནྟྭཱ རཛྫཾ གཧེཏྭཱ ཙནྡཀུམཱརསྶ ཨུཔརཛྫཾ, སཱུརིཡཀུམཱརསྶ སེནཱཔཏིཊྛཱནཾ དཏྭཱ ཡཀྑསྶ རམཎཱིཡེ ཋཱནེ ཨཱཡཏནཾ ཀཱརཱཔེཏྭཱ ཡཐཱ སོ ལཱབྷགྒཔྤཏྟོ ཧོཏི, ཏཐཱ ཨཀཱསི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི ‘‘ཏདཱ རཀྑསོ བཧུབྷཎྜིཀབྷིཀྑུ ཨཧོསི, སཱུརིཡཀུམཱརོ ཨཱནནྡོ, ཙནྡཀུམཱརོ སཱརིཔུཏྟོ, མཧིཾསཀུམཱརོ པན ཨཧམེཝཱ’’ཏི. ཨེཝཾ སཏྠཱ ཛཱཏཀཾ ཀཐེཏྭཱ ‘‘ཨེཝཾ ཏྭཾ, བྷིཀྑུ, པུབྦེ དེཝདྷམྨེ གཝེསམཱནོ ཧིརིཨོཏྟཔྤསམྤནྣོ ཝིཙརིཏྭཱ ཨིདཱནི ཙཏུཔརིསམཛ྄ཛྷེ ཨིམིནཱ ནཱིཧཱརེན ཋཏྭཱ མམ པུརཏོ ‘ཨཔྤིཙྪོམྷཱི’ཏི ཝདནྟོ ཨཡུཏྟཾ ཨཀཱསི. ན ཧི སཱཊཀཔཊིཀྑེཔཱདིམཏྟེན སམཎོ ནཱམ ཧོཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༡༤༡.

‘‘ན ནགྒཙརིཡཱ ན ཛཊཱ ན པངྐཱ, ནཱནཱསཀཱ ཐཎྜིལསཱཡིཀཱ ཝཱ;

རཛོཛལླཾ ཨུཀྐུཊིཀཔྤདྷཱནཾ, སོདྷེནྟི མཙྩཾ ཨཝིཏིཎྞཀངྑ’’ནྟི.

ཏཏྠ ནཱནཱསཀཱཏི ན ཨནསཀཱ, བྷཏྟཔཊིཀྑེཔཀཱཏི ཨཏྠོ. ཐཎྜིལསཱཡིཀཱཏི བྷཱུམིསཡནཱ. རཛོཛལླནྟི ཀདྡམལེཔནཱཀཱརེན སརཱིརེ སནྣིཧིཏརཛོ. ཨུཀྐུཊིཀཔྤདྷཱནནྟི ཨུཀྐུཊིཀབྷཱཝེན ཨཱརདྡྷཝཱིརིཡཾ. ཨིདཾ ཝུཏྟཾ ཧོཏི – ཡོ ཧི མཙྩོ ‘‘ཨེཝཾ ཨཧཾ ལོཀནིསྶརཎསངྑཱཏཾ སུདྡྷིཾ པཱཔུཎིསྶཱམཱི’’ཏི ཨིམེསུ ནགྒཙརིཡཱདཱིསུ ཡཾ ཀིཉྩི སམཱདཱཡ ཝཏྟེཡྻ, སོ ཀེཝལཾ མིཙྪཱདསྶནཉྩེཝ ཝཌྜྷེཡྻ, ཀིལམཐསྶ ཙ བྷཱགཱི ཨསྶ. ན ཧི ཨེཏཱནི སུསམཱདིནྣཱནིཔི ཨཊྛཝཏྠུཀཱཡ ཀངྑཱཡ ཨཝིཏིཎྞབྷཱཝེན ཨཝིཏིཎྞཀངྑཾ མཙྩཾ སོདྷེནྟཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

བཧུབྷཎྜིཀབྷིཀྑུཝཏྠུ ཨཊྛམཾ.

༩. སནྟཏིམཧཱམཏྟཝཏྠུ

ཨལངྐཏོ ཙེཔཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སནྟཏིམཧཱམཏྟཾ ཨཱརབྦྷ ཀཐེསི.

སོ ཧི ཨེཀསྨིཾ ཀཱལེ རཉྙོ པསེནདིཀོསལསྶ པཙྩནྟཾ ཀུཔིཏཾ ཝཱུཔསམེཏྭཱ ཨཱགཏོ. ཨཐསྶ རཱཛཱ ཏུཊྛོ སཏྟ དིཝསཱནི རཛྫཾ དཏྭཱ ཨེཀཾ ནཙྩགཱིཏཀུསལཾ ཨིཏྠིཾ ཨདཱསི. སོ སཏྟ དིཝསཱནི སུརཱམདམཏྟོ ཧུཏྭཱ སཏྟམེ དིཝསེ སབྦཱལངྐཱརཔཊིམཎྜིཏོ ཧཏྠིཀྑནྡྷཝརགཏོ ནྷཱནཏིཏྠཾ གཙྪནྟོ སཏྠཱརཾ པིཎྜཱཡ པཝིསནྟཾ དྭཱརནྟརེ དིསྭཱ ཧཏྠིཀྑནྡྷཝརགཏོཝ སཱིསཾ ཙཱལེཏྭཱ ཝནྡིཏྭཱ པཀྐཱམི. སཏྠཱ སིཏཾ ཀཏྭཱ ‘‘ཀོ ནུ ཁོ, བྷནྟེ, སིཏཔཱཏུཀརཎེ ཧེཏཱུ’’ཏི ཨཱནནྡཏྠེརེན པུཊྛོ སིཏཀཱརཎཾ ཨཱཙིཀྑནྟོ ཨཱཧ – ‘‘པསྶཱནནྡ, སནྟཏིམཧཱམཏྟཾ, ཨཛྫ སབྦཱབྷརཎཔཊིམཎྜིཏོཝ མམ སནྟིཀཾ ཨཱགནྟྭཱ ཙཏུཔྤདིཀགཱཐཱཝསཱནེ ཨརཧཏྟཾ པཏྭཱ སཏྟཏཱལམཏྟེ ཨཱཀཱསེ ནིསཱིདིཏྭཱ པརིནིབྦཱཡིསྶཏཱི’’ཏི. མཧཱཛནོ ཐེརེན སདྡྷིཾ ཀཐེནྟསྶ སཏྠུ ཝཙནཾ ཨསྶོསི. ཏཏྠ མིཙྪཱདིཊྛིཀཱ ཙིནྟཡིཾསུ – ‘‘པསྶཐ སམཎསྶ གོཏམསྶ ཀིརིཡཾ, མུཁཔྤཏྟམེཝ བྷཱསཏི, ཨཛྫ ཀིར ཨེས ཨེཝཾ སུརཱམདམཏྟོ ཡཐཱལངྐཏོཝ ཨེཏསྶ སནྟིཀེ དྷམྨཾ སུཏྭཱ པརིནིབྦཱཡིསྶཏི, ཨཛྫེཝ ཏཾ མུསཱཝཱདེན ནིགྒཎྷིསྶཱམཱ’’ཏི. སམྨཱདིཊྛིཀཱ ཙིནྟེསུཾ – ‘‘ཨཧོ བུདྡྷཱནཾ མཧཱནུབྷཱཝཏཱ, ཨཛྫ བུདྡྷལཱིལ༹ཉྩེཝ སནྟཏིམཧཱམཏྟལཱིལ༹ཉྩ དཊྛུཾ ལབྷིསྶཱམཱ’’ཏི.

སནྟཏིམཧཱམཏྟོཔི ནྷཱནཏིཏྠེ དིཝསབྷཱགཾ ཨུདཀཀཱིལ༹ཾ ཀཱིལི༹ཏྭཱ ཨུཡྻཱནཾ གནྟྭཱ ཨཱཔཱནབྷཱུམིཡཾ ནིསཱིདི. སཱཔི ཨིཏྠཱི རངྒམཛ྄ཛྷཾ ཨོཏརིཏྭཱ ནཙྩགཱིཏཾ དསྶེཏུཾ ཨཱརབྷི. ཏསྶཱ སརཱིརལཱིལཱ༹ཡ དསྶནཏྠཾ སཏྟཱཧཾ ཨཔྤཱཧཱརཏཱཡ ཏཾ དིཝསཾ ནཙྩགཱིཏཾ དསྶཡམཱནཱཡ ཨནྟོཀུཙྪིཡཾ སཏྠཀཝཱཏཱ སམུཊྛཱཡ ཧདཡམཾསཾ ཀནྟིཏྭཱ ཨགམཾསུ. སཱ ཏངྑཎཉྙེཝ མུཁེན ཙེཝ ཨཀྑཱིཧི ཙ ཝིཝཊེཧི ཀཱལམཀཱསི. སནྟཏིམཧཱམཏྟོ ‘‘ཨུཔདྷཱརེཐ ན’’ནྟི ཝཏྭཱ ‘‘ནིརུདྡྷཱ, སཱམཱི’’ཏི ཙ ཝུཏྟམཏྟེཡེཝ བལཝསོཀེན ཨབྷིབྷཱུཏོ ཏངྑཎཉྙེཝསྶ སཏྟཱཧཾ པཱིཏསུརཱ ཏཏྟཀཔཱལེ ཨུདཀབིནྡུ ཝིཡ པརིཀྑཡཾ ཨགམཱསི. སོ ‘‘ན མེ ཨིམཾ སོཀཾ ཨཉྙེ ནིབྦཱཔེཏུཾ སཀྑིསྶནྟི ཨཉྙཏྲ ཏཐཱགཏེནཱ’’ཏི བལཀཱཡཔརིཝུཏོ སཱཡནྷསམཡེ སཏྠུ སནྟིཀཾ གནྟྭཱ ཝནྡིཏྭཱ ཨེཝམཱཧ – ‘‘བྷནྟེ, ‘ཨེཝརཱུཔོ མེ སོཀོ ཨུཔྤནྣོ, ཏཾ མེ ཏུམྷེ ནིབྦཱཔེཏུཾ སཀྑིསྶཐཱ’ཏི ཨཱགཏོམྷི, པཊིསརཎཾ མེ ཧོཐཱ’’ཏི. ཨཐ ནཾ སཏྠཱ ‘‘སོཀཾ ནིབྦཱཔེཏུཾ སམཏྠསྶེཝ སནྟིཀཾ ཨཱགཏོསི. ཨིམིསྶཱ ཧི ཨིཏྠིཡཱ ཨིམིནཱཝ ཨཱཀཱརེན མཏཀཱལེ ཏཝ རོདནྟསྶ པགྒྷརིཏཨསྶཱུནི ཙཏུནྣཾ མཧཱསམུདྡཱནཾ ཨུདཀཏོ ཨཏིརེཀཏརཱནཱི’’ཏི ཝཏྭཱ ཨིམཾ གཱཐམཱཧ –

‘‘ཡཾ པུབྦེ ཏཾ ཝིསོསེཧི, པཙྪཱ ཏེ མཱཧུ ཀིཉྩནཾ;

མཛ྄ཛྷེ ཙེ ནོ གཧེསྶསི, ཨུཔསནྟོ ཙརིསྶསཱི’’ཏི. (སུ. ནི. ༩༥༥, ༡༡༠༥; ཙཱུལ༹ནི. ཛཏུཀཎྞིམཱཎཝཔུཙྪཱནིདྡེས ༦༨);

གཱཐཱཔརིཡོསཱནེ སནྟཏིམཧཱམཏྟོ ཨརཧཏྟཾ པཏྭཱ ཨཏྟནོ ཨཱཡུསངྑཱརཾ ཨོལོཀེནྟོ ཏསྶ ཨཔྤཝཏྟནབྷཱཝཾ ཉཏྭཱ སཏྠཱརཾ ཨཱཧ – ‘‘བྷནྟེ, པརིནིབྦཱནཾ མེ ཨནུཛཱནཱཐཱ’’ཏི. སཏྠཱ ཏེན ཀཏཀམྨཾ ཛཱནནྟོཔི ‘‘མུསཱཝཱདེན ནིགྒཎྷནཏྠཾ སནྣིཔཏིཏཱ མིཙྪཱདིཊྛིཀཱ ཨོཀཱསཾ ན ལབྷིསྶནྟི, ‘བུདྡྷལཱིལ༹ཉྩེཝ སནྟཏིམཧཱམཏྟལཱིལ༹ཉྩ པསྶིསྶཱམཱ’ཏི སནྣིཔཏིཏཱ སམྨཱདིཊྛིཀཱ ཨིམིནཱ ཀཏཀམྨཾ སུཏྭཱ པུཉྙེསུ ཨཱདརཾ ཀརིསྶནྟཱི’’ཏི སལླཀྑེཏྭཱ ‘‘ཏེན ཧི ཏཡཱ ཀཏཀམྨཾ མཡ྄ཧཾ ཀཐེཧི, ཀཐེནྟོ ཙ བྷཱུམིཡཾ ཋིཏོ ཨཀཐེཏྭཱ སཏྟཏཱལམཏྟེ ཨཱཀཱསེ ཋིཏོ ཀཐེཧཱི’’ཏི ཨཱཧ. སོ ‘‘སཱདྷུ, བྷནྟེ’’ཏི སཏྠཱརཾ ཝནྡིཏྭཱ ཨེཀཏཱལཔྤམཱཎཾ ཨུགྒམྨ ཨོརོཧིཏྭཱ པུན སཏྠཱརཾ ཝནྡིཏྭཱ ཨུགྒཙྪནྟོ པཊིཔཱཊིཡཱ སཏྟཏཱལཔྤམཱཎེ ཨཱཀཱསེ པལླངྐེན ནིསཱིདིཏྭཱ ‘‘སུཎཱཐ མེ, བྷནྟེ, པུབྦཀམྨ’’ནྟི ཝཏྭཱ ཨཱཧ –

ཨིཏོ ཨེཀནཝུཏིཀཔྤེ ཝིཔསྶཱིསམྨཱསམྦུདྡྷཀཱལེ ཨཧཾ བནྡྷུམཏིནགརེ ཨེཀསྨིཾ ཀུལེ ནིབྦཏྟིཏྭཱ ཙིནྟེསིཾ – ‘‘ཀིཾ ནུ ཁོ པརེསཾ ཚེདཾ ཝཱ པཱིལ༹ཾ ཝཱ ཨཀརཎཀམྨ’’ནྟི ཨུཔདྷཱརེནྟོ དྷམྨགྷོསཀཀམྨཾ དིསྭཱ ཏཏོ པཊྛཱཡ ཏཾ ཀམྨཾ ཀརོནྟོ མཧཱཛནཾ སམཱདཔེཏྭཱ ‘‘པུཉྙཱནི ཀརོཐ, ཨུཔོསཐདིཝསེསུ ཨུཔོསཐཾ སམཱདིཡཐ, དཱནཾ དེཐ, དྷམྨཾ སུཎཱཐ, བུདྡྷརཏནཱདཱིཧི སདིསཾ ཨཉྙཾ ནཱམ ནཏྠི, ཏིཎྞཾ རཏནཱནཾ སཀྐཱརཾ ཀརོཐཱ’’ཏི ཨུགྒྷོསེནྟོ ཝིཙརཱམི. ཏསྶ མཡ྄ཧཾ སདྡཾ སུཏྭཱ བུདྡྷཔིཏཱ བནྡྷུམཏིམཧཱརཱཛཱ མཾ པཀྐོསཱཔེཏྭཱ, ‘‘ཏཱཏ, ཀིཾ ཀརོནྟོ ཝིཙརསཱི’’ཏི པུཙྪིཏྭཱ, ‘‘དེཝ, ཏིཎྞཾ རཏནཱནཾ གུཎཾ པཀཱསེཏྭཱ མཧཱཛནཾ པུཉྙཀམྨེསུ སམཱདཔེནྟོ ཝིཙརཱམཱི’’ཏི ཝུཏྟེ, ‘‘ཀཏྠ ནིསིནྣོ ཝིཙརསཱི’’ཏི མཾ པུཙྪིཏྭཱ ‘‘པདསཱཝ, དེཝཱ’’ཏི མཡཱ ཝུཏྟེ, ‘‘ཏཱཏ, ན ཏྭཾ ཨེཝཾ ཝིཙརིཏུཾ ཨརཧསི, ཨིམཾ པུཔྥདཱམཾ པིལནྡྷིཏྭཱ ཨསྶཔིཊྛེ ནིསིནྣོཝ ཝིཙརཱ’’ཏི མཡ྄ཧཾ མུཏྟཱདཱམསདིསཾ པུཔྥདཱམཾ དཏྭཱ དནྟཾ ཨསྶཾ ཨདཱསི. ཨཐ མཾ རཉྙཱ དིནྣཔརིཧཱརེན ཏཐེཝ ཨུགྒྷོསེཏྭཱ ཝིཙརནྟཾ པུན རཱཛཱ པཀྐོསཱཔེཏྭཱ, ‘‘ཏཱཏ, ཀིཾ ཀརོནྟོ ཝིཙརསཱི’’ཏི པུཙྪིཏྭཱ ‘‘ཏདེཝ, དེཝཱ’’ཏི ཝུཏྟེ, ‘‘ཏཱཏ, ཨསྶོཔི ཏེ ནཱནུཙྪཝིཀོ, ཨིདྷ ནིསཱིདིཏྭཱ ཝིཙརཱ’’ཏི ཙཏུསིནྡྷཝཡུཏྟརཐཾ ཨདཱསི. ཏཏིཡཝཱརེཔི མེ རཱཛཱ སདྡཾ སུཏྭཱ པཀྐོསཱཔེཏྭཱ, ‘‘ཏཱཏ, ཀིཾ ཀརོནྟོ ཝིཙརསཱི’’ཏི པུཙྪིཏྭཱ ‘‘ཏདེཝ, དེཝཱ’’ཏི ཝུཏྟེ, ‘‘ཏཱཏ, རཐོཔི ཏེ ནཱནུཙྪཝིཀོ’’ཏི མཡ྄ཧཾ མཧནྟཾ བྷོགཀྑནྡྷཾ མཧཱཔསཱདྷནཉྩ དཏྭཱ ཨེཀཉྩ ཧཏྠིཾ ཨདཱསི. སྭཱཧཾ སབྦཱབྷརཎཔཊིམཎྜིཏོ ཧཏྠིཀྑནྡྷེ ནིསིནྣོ ཨསཱིཏི ཝསྶསཧསྶཱནི དྷམྨགྷོསཀཀམྨཾ ཨཀཱསིཾ, ཏསྶ མེ ཨེཏྟཀཾ ཀཱལཾ ཀཱཡཏོ ཙནྡནགནྡྷོ ཝཱཡཏི, མུཁཏོ ཨུཔྤལགནྡྷོ ཝཱཡཏི. ཨིདཾ མཡཱ ཀཏཀམྨནྟི.

ཨེཝཾ སོ ཨཏྟནོ པུབྦཀམྨཾ ཀཐེཏྭཱ ཨཱཀཱསེ ནིསིནྣོཝ ཏེཛོདྷཱཏུཾ སམཱཔཛྫིཏྭཱ པརིནིབྦཱཡི. སརཱིརེ ཨགྒིཛཱལཱ ཨུཊྛཧིཏྭཱ མཾསལོཧིཏཾ ཛྷཱཔེསི, སུམནཔུཔྥཱནི ཝིཡ དྷཱཏུཡོ ཨཝསིསྶིཾསུ. སཏྠཱ སུདྡྷཝཏྠཾ པསཱརེསི, དྷཱཏུཡོ ཏཏྠ པཏིཾསུ. ཏཱ པཏྟེ པཀྑིཔིཏྭཱ ཙཏུམཧཱཔཐེ ཐཱུཔཾ ཀཱརེསི ‘‘མཧཱཛནོ ཝནྡིཏྭཱ པུཉྙབྷཱགཱི བྷཝིསྶཏཱི’’ཏི. བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ, ‘‘ཨཱཝུསོ, སནྟཏིམཧཱམཏྟོ གཱཐཱཝསཱནེ ཨརཧཏྟཾ པཏྭཱ ཨལངྐཏཔཊིཡཏྟོཡེཝ ཨཱཀཱསེ ནིསཱིདིཏྭཱ པརིནིབྦུཏོ, ཀིཾ ནུ ཁོ ཨེཏཾ ‘སམཎོ’ཏི ཝཏྟུཾ ཝཊྚཏི ཨུདཱཧུ བྲཱཧྨཎོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, མམ པུཏྟཾ ‘སམཎོ’ཏིཔི ཝཏྟུཾ ཝཊྚཏི, ‘བྲཱཧྨཎོ’ཏིཔི ཝཏྟུཾ ཝཊྚཏིཡེཝཱ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༡༤༢.

ཨལངྐཏོ ཙེཔི སམཾ ཙརེཡྻ,

སནྟོ དནྟོ ནིཡཏོ བྲཧྨཙཱརཱི;

སབྦེསུ བྷཱུཏེསུ ནིདྷཱཡ དཎྜཾ,

སོ བྲཱཧྨཎོ སོ སམཎོ ས བྷིཀྑཱུ’’ཏི.

ཏཏྠ ཨལངྐཏོཏི ཝཏྠཱབྷརཎེཧི པཊིམཎྜིཏོ. ཏསྶཏྠོ – ཝཏྠཱལངྐཱརཱདཱིཧི ཨལངྐཏོ ཙེཔི པུགྒལོ ཀཱཡཱདཱིཧི སམཾ ཙརེཡྻ, རཱགཱདིཝཱུཔསམེན སནྟོ ཨིནྡྲིཡདམནེན དནྟོ ཙཏུམགྒནིཡམེན ནིཡཏོ སེཊྛཙརིཡཱཡ བྲཧྨཙཱརཱི ཀཱཡདཎྜཱདཱིནཾ ཨོརོཔིཏཏཱཡ སབྦེསུ བྷཱུཏེསུ ནིདྷཱཡ དཎྜཾ. སོ ཨེཝརཱུཔོ བཱཧིཏཔཱཔཏྟཱ བྲཱཧྨཎོཏིཔི སམིཏཔཱཔཏྟཱ སམཎོཏིཔི བྷིནྣཀིལེསཏྟཱ བྷིཀྑཱུཏིཔི ཝཏྟབྦོཡེཝཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སནྟཏིམཧཱམཏྟཝཏྠུ ནཝམཾ.

༡༠. པིལོཏིཀཏིསྶཏྠེརཝཏྠུ

ཧིརཱིནིསེདྷོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པིལོཏིཀཏྠེརཾ ཨཱརབྦྷ ཀཐེསི.

ཨེཀསྨིཉྷི སམཡེ ཨཱནནྡཏྠེརོ ཨེཀཾ པིལོཏིཀཁཎྜནིཝཏྠཾ ཀཔཱལཾ ཨཱདཱཡ བྷིཀྑཱཡ ཙརནྟཾ དཱརཀཾ དིསྭཱ ‘‘ཀིཾ ཏེ ཨེཝཾ ཝིཙརིཏྭཱ ཛཱིཝནཏོ པབྦཛྫཱ ན ཨུཏྟརིཏརཱ’’ཏི ཝཏྭཱ, ‘‘བྷནྟེ, ཀོ མཾ པབྦཱཛེསྶཏཱི’’ཏི ཝུཏྟེ ‘‘ཨཧཾ པབྦཱཛེསྶཱམཱི’’ཏི ཏཾ ཨཱདཱཡ གནྟྭཱ སཧཏྠཱ ནྷཱཔེཏྭཱ ཀམྨཊྛཱནཾ དཏྭཱ པབྦཱཛེསི. ཏཉྩ པན ནིཝཏྠཔིལོཏིཀཁཎྜཾ པསཱརེཏྭཱ ཨོལོཀེནྟོ པརིསྶཱཝནཀརཎམཏྟམྤི གཡ྄ཧཱུཔགཾ ཀཉྩི པདེསཾ ཨདིསྭཱ ཀཔཱལེན སདྡྷིཾ ཨེཀིསྶཱ རུཀྑསཱཁཱཡ ཋཔེསི. སོ པབྦཛིཏྭཱ ལདྡྷཱུཔསམྤདོ བུདྡྷཱནཾ ཨུཔྤནྣལཱབྷསཀྐཱརཾ པརིབྷུཉྫམཱནོ མཧགྒྷཱནི ཙཱིཝརཱནི ཨཙྪཱདེཏྭཱ ཝིཙརནྟོ ཐཱུལསརཱིརོ ཧུཏྭཱ ཨུཀྐཎྛིཏྭཱ ‘‘ཀིཾ མེ ཛནསྶ སདྡྷཱདེཡྻཾ ནིཝཱསེཏྭཱ ཝིཙརཎེན, ཨཏྟནོ པིལོཏིཀམེཝ ནིཝཱསེསྶཱམཱི’’ཏི ཏཾ ཋཱནཾ གནྟྭཱ པིལོཏིཀཾ གཧེཏྭཱ ‘‘ཨཧིརིཀ ནིལླཛྫ ཨེཝརཱུཔཱནཾ ཝཏྠཱནཾ ཨཙྪཱདནཊྛཱནཾ པཧཱཡ ཨིམཾ པིལོཏིཀཁཎྜཾ ནིཝཱསེཏྭཱ ཀཔཱལཧཏྠོ བྷིཀྑཱཡ ཙརིཏུཾ གཙྪསཱི’’ཏི ཏཾ ཨཱརམྨཎཾ ཀཏྭཱ ཨཏྟནཱཝ ཨཏྟཱནཾ ཨོཝདི, ཨོཝདནྟསྶེཝ པནསྶ ཙིཏྟཾ སནྣིསཱིདི. སོ ཏཾ པིལོཏིཀཾ ཏཏྠེཝ པཊིསཱམེཏྭཱ ནིཝཏྟིཏྭཱ ཝིཧཱརམེཝ གཏོ. སོ ཀཏིཔཱཧཙྩཡེན པུནཔི ཨུཀྐཎྛིཏྭཱ ཏཐེཝ ཝཏྭཱ ནིཝཏྟི, པུནཔི ཏཐེཝཱཏི. ཏཾ ཨེཝཾ ཨཔརཱཔརཾ ཝིཙརནྟཾ དིསྭཱ བྷིཀྑཱུ ‘‘ཀཧཾ, ཨཱཝུསོ, གཙྪསཱི’’ཏི པུཙྪནྟི. སོ ‘‘ཨཱཙརིཡསྶ སནྟིཀཾ གཙྪཱམཱཝུསོ’’ཏི ཝཏྭཱ ཨེཏེནེཝ ནཱིཧཱརེན ཨཏྟནོ པིལོཏིཀཁཎྜམེཝ ཨཱརམྨཎཾ ཀཏྭཱ ཨཏྟཱནཾ ནིསེདྷེཏྭཱ ཀཏིཔཱཧེནེཝ ཨརཧཏྟཾ པཱཔུཎི. བྷིཀྑཱུ ཨཱཧཾསུ – ‘‘ཀིཾ, ཨཱཝུསོ, ན དཱནི ཨཱཙརིཡསྶ སནྟིཀཾ གཙྪསི, ནནུ ཨཡཾ ཏེ ཝིཙརཎམགྒོ’’ཏི. ཨཱཝུསོ, ཨཱཙརིཡེན སདྡྷིཾ སཾསགྒེ སཏི གཏོམྷི, ཨིདཱནི པན མེ ཚིནྣོ སཾསགྒོ, ཏེནསྶ སནྟིཀཾ ན གཙྪཱམཱིཏི. བྷིཀྑཱུ ཏཐཱགཏསྶ ཨཱརོཙེསུཾ – ‘‘བྷནྟེ, པིལོཏིཀཏྠེརོ ཨཉྙཾ བྱཱཀརོཏཱི’’ཏི. ཀིམཱཧ, བྷིཀྑཝེཏི? ཨིདཾ ནཱམ, བྷནྟེཏི. ཏཾ སུཏྭཱ སཏྠཱ ‘‘ཨཱམ, བྷིཀྑཝེ, མམ པུཏྟོ སཾསགྒེ སཏི ཨཱཙརིཡསྶ སནྟིཀཾ གཏོ, ཨིདཱནི པནསྶ སཾསགྒོ ཚིནྣོ, ཨཏྟནཱཝ ཨཏྟཱནཾ ནིསེདྷེཏྭཱ ཨརཧཏྟཾ པཏྟོ’’ཏི ཝཏྭཱ ཨིམཱ གཱཐཱ ཨབྷཱསི –

༡༤༣.

‘‘ཧིརཱིནིསེདྷོ པུརིསོ, ཀོཙི ལོཀསྨིཾ ཝིཛྫཏི;

ཡོ ནིདྡཾ ཨཔབོདྷེཏི, ཨསྶོ བྷདྲོ ཀསཱམིཝ.

༡༤༤.

‘‘ཨསྶོ ཡཐཱ བྷདྲོ ཀསཱནིཝིཊྛོ,

ཨཱཏཱཔིནོ སཾཝེགིནོ བྷཝཱཐ;

སདྡྷཱཡ སཱིལེན ཙ ཝཱིརིཡེན ཙ,

སམཱདྷིནཱ དྷམྨཝིནིཙྪཡེན ཙ;

སམྤནྣཝིཛྫཱཙརཎཱ པཏིསྶཏཱ,

ཛཧིསྶཐ དུཀྑམིདཾ ཨནཔྤཀ’’ནྟི.

ཏཏྠ ཨནྟོ ཨུཔྤནྣཾ ཨཀུསལཝིཏཀྐཾ ཧིརིཡཱ ནིསེདྷེཏཱིཏི ཧིརཱིནིསེདྷོ. ཀོཙི ལོཀསྨིནྟི ཨེཝརཱུཔོ པུགྒལོ དུལླབྷོ, ཀོཙིདེཝ ལོཀསྨིཾ ཝིཛྫཏི. ཡོ ནིདྡནྟི ཨཔྤམཏྟོ སམཎདྷམྨཾ ཀརོནྟོ ཨཏྟནོ ཨུཔྤནྣཾ ནིདྡཾ ཨཔཧརནྟོ བུཛ྄ཛྷཏཱིཏི ཨཔབོདྷེཏི. ཀསཱམིཝཱཏི ཡཐཱ བྷདྲོ ཨསྶོ ཨཏྟནི པཏམཱནཾ ཀསཾ ཨཔཧརཏི, ཨཏྟནི པཏིཏུཾ ན དེཏི. ཡོ ཨེཝཾ ནིདྡཾ ཨཔབོདྷེཏི, སོ དུལླབྷོཏི ཨཏྠོ.

དུཏིཡགཱཐཱཡ ཨཡཾ སངྑེཔཏྠོ – ‘‘བྷིཀྑཝེ, ཡཐཱ བྷདྲོ ཨསྶོ པམཱདམཱགམྨ ཀསཱཡ ནིཝིཊྛོ, ཨཧམྤི ནཱམ ཀསཱཡ པཧཊོ’’ཏི ཨཔརབྷཱགེ ཨཱཏཔྤཾ ཀརོཏི, ཨེཝཾ ཏུམྷེཔི ཨཱཏཱཔིནོ སཾཝེགིནོ བྷཝཐ, ཨེཝཾབྷཱུཏཱ ལོཀིཡལོཀུཏྟརཱཡ དུཝིདྷཱཡ སདྡྷཱཡ ཙ ཙཏུཔཱརིསུདྡྷིསཱིལེན ཙ ཀཱཡིཀཙེཏསིཀཝཱིརིཡེན ཙ ཨཊྛསམཱཔཏྟིསམཱདྷིནཱ ཙ ཀཱརཎཱཀཱརཎཛཱནནལཀྑཎེན དྷམྨཝིནིཙྪཡེན ཙ སམནྣཱགཏཱ ཧུཏྭཱ ཏིསྶནྣཾ ཝཱ ཨཊྛནྣཾ ཝཱ ཝིཛྫཱནཾ, པཉྩདསནྣཉྩ ཙརཎཱནཾ སམྤཏྟིཡཱ སམྤནྣཝིཛྫཱཙརཎཱ. ཨུཔཊྛིཏསཏིཏཱཡ པཏིསྶཏཱ ཧུཏྭཱ ཨིདཾ ཨནཔྤཀཾ ཝཊྚདུཀྑཾ པཛཧིསྶཐཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པིལོཏིཀཏིསྶཏྠེརཝཏྠུ དསམཾ.

༡༡. སུཁསཱམཎེརཝཏྠུ

ཨུདཀཉྷི ནཡནྟཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སུཁསཱམཎེརཾ ཨཱརབྦྷ ཀཐེསི.

ཨཏཱིཏསྨིཉྷི བཱརཱཎསིསེཊྛིནོ གནྡྷཀུམཱརོ ནཱམ པུཏྟོ ཨཧོསི. རཱཛཱ ཏསྶ པིཏརི ཀཱལཀཏེ ཏཾ པཀྐོསཱཔེཏྭཱ སམསྶཱསེཏྭཱ མཧནྟེན སཀྐཱརེན ཏསྶེཝ སེཊྛིཊྛཱནཾ ཨདཱསི. སོ ཏཏོ པཊྛཱཡ གནྡྷསེཊྛཱིཏི པཉྙཱཡི. ཨཐསྶ བྷཎྜཱགཱརིཀོ དྷནགབྦྷདྭཱརཾ ཝིཝརིཏྭཱ, ‘‘སཱམི, ཨིདཾ ཏེ ཨེཏྟཀཾ པིཏུ དྷནཾ, ཨེཏྟཀཾ པིཏཱམཧཱདཱིན’’ནྟི ནཱིཧརིཏྭཱ དསྶེསི. སོ ཏཾ དྷནརཱསིཾ ཨོལོཀེཏྭཱ ཨཱཧ – ‘‘ཀིཾ པན ཏེ ཨིམཾ དྷནཾ གཧེཏྭཱ ན གམིཾསཱུ’’ཏི. ‘‘སཱམི, དྷནཾ གཧེཏྭཱ གཏཱ ནཱམ ནཏྠི. ཨཏྟནཱ ཀཏཾ ཀུསལཱཀུསལམེཝ ཧི ཨཱདཱཡ སཏྟཱ གཙྪནྟཱི’’ཏི. སོ ཙིནྟེསི – ‘‘ཏེ བཱལཏཱཡ དྷནཾ སཎྛཱཔེཏྭཱ པཧཱཡ གཏཱ, ཨཧཾ པནེཏཾ གཧེཏྭཱཝ གམིསྶཱམཱི’’ཏི. ཨེཝཾ པན ཙིནྟེནྟོ ‘‘དཱནཾ ཝཱ དསྶཱམི, པཱུཛཾ ཝཱ ཀརིསྶཱམཱི’’ཏི ཨཙིནྟེཏྭཱ ‘‘ཨིདཾ སབྦཾ ཁཱདིཏྭཱཝ གམིསྶཱམཱི’’ཏི ཙིནྟེསི. སོ སཏསཧསྶཾ ཝིསྶཛྫེཏྭཱ ཕལིཀམཡཾ ནྷཱནཀོཊྛཀཾ ཀཱརེསི, སཏསཧསྶཾ དཏྭཱ ཕལིཀམཡམེཝ ནྷཱནཕལཀཾ, སཏསཧསྶཾ དཏྭཱ ནིསཱིདནཔལླངྐཾ, སཏསཧསྶཾ དཏྭཱ བྷོཛནཔཱཏིཾ, སཏསཧསྶམེཝ དཏྭཱ བྷོཛནཊྛཱནེ མཎྜཔཾ ཀཱརཱཔེསི, སཏསཧསྶཾ དཏྭཱ བྷོཛནཔཱཏིཡཱ ཨཱསིཏྟཀཱུཔདྷཱནཾ ཀཱརེསི, སཏསཧསྶེནེཝ གེཧེ སཱིཧཔཉྫརཾ སཎྛཱཔེསི, ཨཏྟནོ པཱཏརཱསཏྠཱཡ སཧསྶཾ ཨདཱསི, སཱཡམཱསཏྠཱཡཔི སཧསྶམེཝ. པུཎྞམདིཝསེ པན བྷོཛནཏྠཱཡ སཏསཧསྶཾ དཱཔེསི, ཏཾ བྷཏྟཾ བྷུཉྫནདིཝསེ སཏསཧསྶཾ ཝིསྶཛྫེཏྭཱ ནགརཾ ཨལངྐརིཏྭཱ བྷེརིཾ ཙརཱཔེསི – ‘‘གནྡྷསེཊྛིསྶ ཀིར བྷཏྟབྷུཉྫནཱཀཱརཾ ཨོལོཀེནྟཱུ’’ཏི.

མཧཱཛནོ མཉྩཱཏིམཉྩེ བནྡྷིཏྭཱ སནྣིཔཏི. སོཔི སཏསཧསྶགྒྷནཀེ ནྷཱནཀོཊྛཀེ སཏསཧསྶགྒྷནཀེ ཕལཀེ ནིསཱིདིཏྭཱ སོལ༹སཧི གནྡྷོདཀགྷཊེཧི ནྷཏྭཱ ཏཾ སཱིཧཔཉྫརཾ ཝིཝརིཏྭཱ ཏསྨིཾ པལླངྐེ ནིསཱིདི. ཨཐསྶ ཏསྨིཾ ཨཱསིཏྟཀཱུཔདྷཱནེ ཏཾ པཱཏིཾ ཋཔེཏྭཱ སཏསཧསྶགྒྷནཀཾ བྷོཛནཾ ཝཌྜྷེསུཾ. སོ ནཱཊཀཔརིཝུཏོ ཨེཝརཱུཔཱཡ སམྤཏྟིཡཱ ཏཾ བྷོཛནཾ བྷུཉྫཏི. ཨཔརེན སམཡེན ཨེཀོ གཱམིཀམནུསྶོ ཨཏྟནོ པརིབྦཡཱཧརཎཏྠཾ དཱརུཨཱདཱིནི ཡཱནཀེ པཀྑིཔིཏྭཱ ནགརཾ གནྟྭཱ སཧཱཡཀསྶ གེཧེ ནིཝཱསཾ གཎྷི. ཏདཱ པན པུཎྞམདིཝསོ ཧོཏི. ‘‘གནྡྷསེཊྛིནོ བྷུཉྫནལཱིལ༹ཾ ཨོལོཀེནྟཱུ’’ཏི ནགརེ བྷེརིཾ ཙརཱཔེསི. ཨཐ ནཾ སཧཱཡཀོ ཨཱཧ – ‘‘སམྨ, གནྡྷསེཊྛིནོ ཏེ བྷུཉྫནལཱིལ༹ཾ དིཊྛཔུབྦ’’ནྟི. ‘‘ན དིཊྛཔུབྦཾ, སམྨཱ’’ཏི. ‘‘ཏེན ཧི ཨེཧི, གཙྪཱམ, ཨཡཾ ནགརེ བྷེརཱི ཙརཏི, ཨེཏསྶ མཧཱསམྤཏྟིཾ པསྶཱམཱ’’ཏི ནགརཝཱསཱི ཛནཔདཝཱསིཾ གཧེཏྭཱ ཨགམཱསི. མཧཱཛནོཔི མཉྩཱཏིམཉྩེ ཨབྷིརུཧིཏྭཱ པསྶཏི. གཱམཝཱསཱི བྷཏྟགནྡྷཾ གྷཱཡིཏྭཱཝ ནགརཝཱསིཾ ཨཱཧ – ‘‘མཡ྄ཧཾ ཨེཏཱཡ པཱཏིཡཱ བྷཏྟཔིཎྜེ པིཔཱསཱ ཛཱཏཱ’’ཏི. སམྨ, མཱ ཨེཏཾ པཏྠཡི, ན སཀྐཱ ལདྡྷུནྟི. སམྨ, ཨལབྷནྟོ ན ཛཱིཝིསྶཱམཱིཏི. སོ ཏཾ པཊིབཱཧིཏུཾ ཨསཀྐོནྟོ པརིསཔརིཡནྟེ ཋཏྭཱ ‘‘པཎམཱམི ཏེ, སཱམཱི’’ཏི ཏིཀྑཏྟུཾ མཧཱསདྡཾ ནིཙྪཱརེཏྭཱ ‘‘ཀོ ཨེསོ’’ཏི ཝུཏྟེ ཨཧཾ, སཱམཱིཏི. ‘‘ཀིམེཏ’’ནྟི. ‘‘ཨཡཾ ཨེཀོ གཱམཝཱསཱི ཏུམྷཱཀཾ པཱཏིཡཾ བྷཏྟཔིཎྜེ པིཔཱསཾ ཨུཔཱདེསི, ཨེཀཾ བྷཏྟཔིཎྜཾ དཱཔེཐཱ’’ཏི. ‘‘ན སཀྐཱ ལདྡྷུ’’ནྟི. ‘‘ཀིཾ, སམྨ, སུཏཾ ཏེ’’ཏི? ‘‘སུཏཾ མེ, ཨཔིཙ ལབྷནྟོ ཛཱིཝིསྶཱམི, ཨལབྷནྟསྶ མེ མརཎཾ བྷཝིསྶཏཱི’’ཏི. སོ པུནཔི ཝིརཝི – ‘‘ཨཡཾ ཀིར, སཱམི, ཨལབྷནྟོ མརིསྶཏི, ཛཱིཝིཏམསྶ དེཐཱ’’ཏི. ཨམྦྷོ བྷཏྟཔིཎྜོ ནཱམ སཏམྤི ཨགྒྷཏི, སཏདྭཡམྤི ཨགྒྷཏི. ཡོ ཡོ ཡཱཙཏི, ཏསྶ ཏསྶ དདམཱནོ ཨཧཾ ཀིཾ བྷུཉྫིསྶཱམཱིཏི? སཱམི, ཨཡཾ ཨལབྷནྟོ མརིསྶཏི, ཛཱིཝིཏམསྶ དེཐཱཏི. ན སཀྐཱཝ མུདྷཱ ལདྡྷུཾ, ཡདི པན ཨལབྷནྟོ ན ཛཱིཝཏི, ཏཱིཎི སཾཝཙྪརཱནི མམ གེཧེ བྷཏིཾ ཀརོཏུ, ཨེཝམསྶ བྷཏྟཔཱཏིཾ དཱཔེསྶཱམཱིཏི. གཱམཝཱསཱི ཏཾ སུཏྭཱ ‘‘ཨེཝཾ ཧོཏུ, སམྨཱ’’ཏི སཧཱཡཀཾ ཝཏྭཱ པུཏྟདཱརཾ པཧཱཡ ‘‘བྷཏྟཔཱཏིཨཏྠཱཡ ཏཱིཎི སཾཝཙྪརཱནི བྷཏིཾ ཀརིསྶཱམཱི’’ཏི སེཊྛིསྶ གེཧཾ པཱཝིསི. སོ བྷཏིཾ ཀརོནྟོ སབྦཀིཙྩཱནི སཀྐཙྩཾ ཨཀཱསི. གེཧེ ཝཱ ཨརཉྙེ ཝཱ རཏྟིཾ ཝཱ དིཝཱ ཝཱ སབྦཱནི ཀཏྟབྦཀམྨཱནི ཀཏཱནེཝ པཉྙཱཡིཾསུ. ‘‘བྷཏྟབྷཏིཀོ’’ཏི ཙ ཝུཏྟེ སཀལནགརེཔི པཉྙཱཡི. ཨཐསྶ དིཝསེ པརིཔུཎྞེ བྷཏྟཝེཡྻཱཝཊིཀོ ‘‘བྷཏྟབྷཏིཀསྶ, སཱམི, དིཝསོ པུཎྞོ, དུཀྐརཾ ཏེན ཀཏཾ ཏཱིཎི སཾཝཙྪརཱནི བྷཏིཾ ཀརོནྟེན, ཨེཀམྤི ཀམྨཾ ན ཀོཔིཏཔུབྦ’’ནྟི ཨཱཧ.

ཨཐསྶ སེཊྛི ཨཏྟནོ སཱཡཔཱཏརཱསཏྠཱཡ དྭེ སཧསྶཱནི, ཏསྶ པཱཏརཱསཏྠཱཡ སཧསྶནྟི ཏཱིཎི སཧསྶཱནི དཱཔེཏྭཱ ཨཱཧ – ‘‘ཨཛྫ མཡ྄ཧཾ ཀཏྟབྦཾ པརིཧཱརཾ ཏསྶེཝ ཀརོཐཱ’’ཏི. ཝཏྭཱ ཙ པན ཋཔེཏྭཱ ཨེཀཾ ཙིནྟཱམཎིཾ ནཱམ པིཡབྷརིཡཾ ཨཝསེསཛནམྤི ‘‘ཨཛྫ ཏམེཝ པརིཝཱརེཐཱ’’ཏི ཝཏྭཱ སབྦསམྤཏྟིཾ ཏསྶ ནིཡྻཱདེསི. སོ སེཊྛིནོ ནྷཱནོདཀེན ཏསྶེཝ ཀོཊྛཀེ ཏསྨིཾ ཕལཀེ ནིསིནྣོ ནྷཏྭཱ ཏསྶེཝ ནིཝཱསནསཱཊཀེ ནིཝཱསེཏྭཱ ཏསྶེཝ པལླངྐེ ནིསཱིདི. སེཊྛིཔི ནགརེ བྷེརིཾ ཙརཱཔེསི – ‘‘བྷཏྟབྷཏིཀོ གནྡྷསེཊྛིསྶ གེཧེ ཏཱིཎི སཾཝཙྪརཱནི བྷཏིཾ ཀཏྭཱ པཱཏིཾ ལབྷི, ཏསྶ བྷུཉྫནསམྤཏྟིཾ ཨོལོཀེནྟཱུ’’ཏི. མཧཱཛནོ མཉྩཱཏིམཉྩེ ཨབྷིརུཧིཏྭཱ པསྶཏི, གཱམཝཱསིསྶ ཨོལོཀིཏོལོཀིཏཊྛཱནཾ ཀམྤནཱཀཱརཔྤཏྟཾ ཨཧོསི. ནཱཊཀཱ པརིཝཱརེཏྭཱ ཨཊྛསུཾ, ཏསྶ པུརཏོ བྷཏྟཔཱཏིཾ ཝཌྜྷེཏྭཱ ཋཔཡིཾསུ. ཨཐསྶ ཧཏྠདྷོཝནཝེལཱཡ གནྡྷམཱདནེ ཨེཀོ པཙྩེཀབུདྡྷོ སཏྟམེ དིཝསེ སམཱཔཏྟིཏོ ཝུཊྛཱཡ ‘‘ཀཏྠ ནུ ཁོ ཨཛྫ བྷིཀྑཱཙཱརཏྠཱཡ གཙྪཱམཱི’’ཏི ཨུཔདྷཱརེནྟོ བྷཏྟབྷཏིཀཾ ཨདྡས. ཨཐ སོ ‘‘ཨཡཾ ཏཱིཎི སཾཝཙྪརཱནི བྷཏིཾ ཀཏྭཱ བྷཏྟཔཱཏིཾ ལབྷི, ཨཏྠི ནུ ཁོ ཨེཏསྶ སདྡྷཱ, ནཏྠཱི’’ཏི ཨུཔདྷཱརེནྟོ ‘‘ཨཏྠཱི’’ཏི ཉཏྭཱ ‘‘སདྡྷཱཔི ཨེཀཙྩེ སངྒཧཾ ཀཱཏུཾ ན སཀྐོནྟི, སཀྑིསྶཏི ནུ ཁོ མེ སངྒཧཾ ཀཱཏུ’’ནྟི ཙིནྟེཏྭཱ ‘‘སཀྑིསྶཏི ཙེཝ མམ ཙ སངྒཧཀརཎཾ ནིསྶཱཡ མཧཱསམྤཏྟིཾ ལབྷིསྶཏཱི’’ཏི ཉཏྭཱ ཙཱིཝརཾ པཱརུཔིཏྭཱ པཏྟམཱདཱཡ ཝེཧཱསཾ ཨབྦྷུགྒནྟྭཱ པརིསནྟརེན གནྟྭཱ ཏསྶ པུརཏོ ཋིཏམེཝ ཨཏྟཱནཾ དསྶེསི.

སོ པཙྩེཀབུདྡྷཾ དིསྭཱ ཙིནྟེསི – ‘‘ཨཧཾ པུབྦེ ཨདིནྣབྷཱཝེན ཨེཀིསྶཱ བྷཏྟཔཱཏིཡཱ ཨཏྠཱཡ ཏཱིཎི སཾཝཙྪརཱནི པརགེཧེ བྷཏིཾ ཨཀཱསིཾ, ཨིདཱནི མེ ཨིདཾ བྷཏྟཾ ཨེཀཾ རཏྟིནྡིཝཾ རཀྑེཡྻ, སཙེ པན ནཾ ཨཡྻསྶ དསྶཱམི, ཨནེཀཱནིཔི ཀཔྤཀོཊིསཧསྶཱནི རཀྑིསྶཏི, ཨཡྻསྶེཝ ནཾ དསྶཱམཱི’’ཏི. སོ ཏཱིཎི སཾཝཙྪརཱནི བྷཏིཾ ཀཏྭཱ ལདྡྷབྷཏྟཔཱཏིཏོ ཨེཀཔིཎྜམྤི མུཁེ ཨཊྛཔེཏྭཱ ཏཎྷཾ ཝིནོདེཏྭཱ སཡམེཝ པཱཏིཾ ཨུཀྑིཔིཏྭཱ པཙྩེཀབུདྡྷསྶ སནྟིཀཾ གནྟྭཱ པཱཏིཾ ཨཉྙསྶ ཧཏྠེ དཏྭཱ པཉྩཔཏིཊྛིཏེན ཝནྡིཏྭཱ པཱཏིཾ ཝཱམཧཏྠེན གཧེཏྭཱ དཀྑིཎཧཏྠེན ཏསྶ པཏྟེ བྷཏྟཾ ཨཱཀིརི. པཙྩེཀབུདྡྷོ བྷཏྟསྶ ཨུཔཌྜྷསེསཀཱལེ པཏྟཾ ཧཏྠེན པིདཧི. ཨཐ ནཾ སོ ཨཱཧ – ‘‘བྷནྟེ, ཨེཀོཝ པཊིཝིསོ ན སཀྐཱ དྭིདྷཱ ཀཱཏུཾ, མཱ མཾ ཨིདྷལོཀེན སངྒཎྷཐ, པརལོཀེན སངྒཧམེཝ ཀརོཐ, སཱཝསེསཾ ཨཀཏྭཱ ནིརཝསེསམེཝ དསྶཱམཱི’’ཏི. ཨཏྟནོ ཧི ཐོཀམྤི ཨནཝསེསེཏྭཱ དིནྣཾ ནིརཝསེསདཱནཾ ནཱམ, ཏཾ མཧཔྥལཾ ཧོཏི. སོ ཏཐཱ ཀརོནྟོ སབྦཾ དཏྭཱ པུན ཝནྡིཏྭཱ ཨཱཧ – ‘‘བྷནྟེ, ཨེཀཾ བྷཏྟཔཱཏིཾ ནིསྶཱཡ ཏཱིཎི སཾཝཙྪརཱནི མེ པརགེཧེ བྷཏིཾ ཀརོནྟེན དུཀྑཾ ཨནུབྷཱུཏཾ, ཨིདཱནི མེ ནིབྦཏྟནིབྦཏྟཊྛཱནེ སུཁམེཝ ཧོཏུ, ཏུམྷེཧི དིཊྛདྷམྨསྶེཝ བྷཱགཱི ཨསྶ’’ནྟི. པཙྩེཀབུདྡྷོ ‘‘ཨེཝཾ ཧོཏུ, ཙིནྟཱམཎི ཝིཡ ཏེ སབྦཀཱམདདོ མནོསངྐཔྤཱ པུཎྞཙནྡོ ཝིཡ པཱུརེནྟཱུ’’ཏི ཨནུམོདནཾ ཀརོནྟོ –

‘‘ཨིཙྪིཏཾ པཏྠིཏཾ ཏུཡ྄ཧཾ, སབྦམེཝ སམིཛ྄ཛྷཏུ;

སབྦེ པཱུརེནྟུ སངྐཔྤཱ, ཙནྡོ པནྣརསོ ཡཐཱ.

‘‘ཨིཙྪིཏཾ པཏྠིཀཾ ཏུཡ྄ཧཾ, ཁིཔྤམེཝ སམིཛ྄ཛྷཏུ;

སབྦེ པཱུརེནྟུ སངྐཔྤཱ, མཎི ཛོཏིརསོ ཡཐཱ’’ཏི. –

ཝཏྭཱ ‘‘ཨཡཾ མཧཱཛནོ ཡཱཝ གནྡྷམཱདནཔབྦཏགམནཱ མཾ པསྶནྟོ ཏིཊྛཏཱུ’’ཏི ཨདྷིཊྛཱཡ ཨཱཀཱསེན གནྡྷམཱདནཾ ཨགམཱསི.

མཧཱཛནོཔི ནཾ པསྶནྟོཝ ཨཊྛཱསི. སོ ཏཏྠ གནྟྭཱ ཏཾ པིཎྜཔཱཏཾ པཉྩསཏཱནཾ པཙྩེཀབུདྡྷཱནཾ ཝིབྷཛིཏྭཱ ཨདཱསི. སབྦེ ཨཏྟནོ པཧོནཀཾ གཎྷིཾསུ. ‘‘ཨཔྤོ པིཎྜཔཱཏོ ཀཐཾ པཧོསཱི’’ཏི ན ཙིནྟེཏབྦཾ. ཙཏྟཱརི ཧི ཨཙིནྟེཡྻཱནི (ཨ. ནི. ༤.༧༧) ཝུཏྟཱནི, ཏཏྲཱཡཾ པཙྩེཀབུདྡྷཝིསཡོཏི. མཧཱཛནོ པཙྩེཀབུདྡྷཱནཾ པིཎྜཔཱཏཾ ཝིབྷཛིཏྭཱ དིཡྻམཱནཾ དིསྭཱ སཱདྷུཀཱརསཧསྶཱནི པཝཏྟེསི, ཨསནིསཏནིཔཱཀསདྡོ ཝིཡ ཨཧོསི. ཏཾ སུཏྭཱ གནྡྷསེཊྛི ཙིནྟེསི – ‘‘བྷཏྟབྷཏིཀོ མཡཱ དིནྣསམྤཏྟིཾ དྷཱརེཏུཾ ནཱསཀྑི མཉྙེ, ཏེནཱཡཾ མཧཱཛནོ པརིཧཱསཾ ཀརོནྟོ སནྣིཔཏིཏོ ནདཏཱི’’ཏི. སོ ཏཔྤཝཏྟིཛཱནནཏྠཾ མནུསྶེ པེསེསི. ཏེ ཨཱགནྟྭཱ ‘‘སམྤཏྟིདྷཱརཀཱ ནཱམ, སཱམི, ཨེཝཾ ཧོནྟཱུ’’ཏི ཝཏྭཱ ཏཾ པཝཏྟིཾ ཨཱརོཙེསུཾ. སེཊྛི ཏཾ སུཏྭཱཝ པཉྩཝཎྞཱཡ པཱིཏིཡཱ ཕུཊྛསརཱིརོ ཧུཏྭཱ ‘‘ཨཧོ དུཀྐརཾ ཏེན ཀཏཾ, ཨཧཾ ཨེཏྟཀཾ ཀཱལཾ ཨེཝརཱུཔཱཡ སམྤཏྟིཡཱ ཋིཏོ ཀིཉྩི དཱཏུཾ ནཱསཀྑི’’ནྟི ཏཾ པཀྐོསཱཔེཏྭཱ ‘‘སཙྩཾ ཀིར ཏཡཱ ཨིདཾ ནཱམ ཀཏ’’ནྟི པུཙྪིཏྭཱ ‘‘ཨཱམ, སཱམཱི’’ཏི ཝུཏྟེ, ‘‘ཧནྡ, སཧསྶཾ གཧེཏྭཱ ཏཝ དཱནེ མཡ྄ཧམྤི པཏྟིཾ དེཧཱི’’ཏི ཨཱཧ. སོ ཏཐཱ ཨཀཱསི. སེཊྛིཔིསྶ སབྦཾ ཨཏྟནོ སནྟཀཾ མཛ྄ཛྷེ བྷིནྡིཏྭཱ ཨདཱསི.

ཙཏསྶོ ཧི སམྤདཱ ནཱམ – ཝཏྠུསམྤདཱ, པཙྩཡསམྤདཱ, ཙེཏནཱསམྤདཱ, གུཎཱཏིརེཀསམྤདཱཏི. ཏཏྠ ནིརོདྷསམཱཔཏྟིརཧོ ཨརཧཱ ཝཱ ཨནཱགཱམཱི ཝཱ དཀྑིཎེཡྻོ ཝཏྠུསམྤདཱ ནཱམ. པཙྩཡཱནཾ དྷམྨེན སམེན ཨུཔྤཏྟི པཙྩཡསམྤདཱ ནཱམ. དཱནཏོ པུབྦེ དཱནཀཱལེ པཙྪཱ བྷཱགེཏི ཏཱིསུ ཀཱལེསུ ཙེཏནཱཡ སོམནསྶསཧགཏཉཱཎསམྤཡུཏྟབྷཱཝོ ཙེཏནཱསམྤདཱ ནཱམ. དཀྑིཎེཡྻསྶ སམཱཔཏྟིཏོ ཝུཊྛིཏབྷཱཝོ གུཎཱཏིརེཀསམྤདཱ ནཱམཱཏི. ཨིམསྶ ཙ ཁཱིཎཱསཝོ པཙྩེཀབུདྡྷོ དཀྑིཎེཡྻཱ, བྷཏིཾ ཀཏྭཱ ལདྡྷབྷཱཝེན པཙྩཡོ དྷམྨཏོ ཨུཔྤནྣོ, ཏཱིསུ ཀཱལེསུ པརིསུདྡྷཱ ཙེཏནཱ, སམཱཔཏྟིཏོ ཝུཊྛིཏམཏྟོ པཙྩེཀབུདྡྷོ གུཎཱཏིརེཀོཏི ཙཏསྶོཔི སམྤདཱ ནིཔྥནྣཱ. ཨེཏཱསཾ ཨཱནུབྷཱཝེན དིཊྛེཝ དྷམྨེ མཧཱསམྤཏྟིཾ པཱཔུཎནྟི. ཏསྨཱ སོ སེཊྛིནོ སནྟིཀཱ སམྤཏྟིཾ ལབྷི. ཨཔརབྷཱགེ ཙ རཱཛཱཔི ཨིམིནཱ ཀཏཀམྨཾ སུཏྭཱ ཏཾ པཀྐོསཱཔེཏྭཱ སཧསྶཾ དཏྭཱ པཏྟིཾ གཧེཏྭཱ ཏུཊྛམཱནསོ མཧནྟཾ བྷོགཀྑནྡྷཾ དཏྭཱ སེཊྛིཊྛཱནཾ ཨདཱསི. བྷཏྟབྷཏིཀསེཊྛཱིཏིསྶ ནཱམཾ ཨཀཱསི. སོ གནྡྷསེཊྛིནཱ སདྡྷིཾ སཧཱཡོ ཧུཏྭཱ ཨེཀཏོ ཁཱདནྟོ པིཝནྟོ ཡཱཝཏཱཡུཀཾ ཋཏྭཱ ཏཏོ ཙུཏོ དེཝལོཀེ ནིབྦཏྟིཏྭཱ ཨེཀཾ བུདྡྷནྟརཾ དིབྦསམྤཏྟིཾ ཨནུབྷཝིཏྭཱ ཨིམསྨིཾ བུདྡྷུཔྤཱདེ སཱཝཏྠིཡཾ སཱརིཔུཏྟཏྠེརསྶཱུཔཊྛཱཀཀུལེ པཊིསནྡྷིཾ གཎྷི. ཨཐསྶ མཱཏཱ ལདྡྷགབྦྷཔརིཧཱརཱ ཀཏིཔཱཧཙྩཡེན ‘‘ཨཧོ ཝཏཱཧཾ པཉྩསཏེཧི བྷིཀྑཱུཧི སདྡྷིཾ སཱརིཔུཏྟཏྠེརསྶ སཏརསབྷོཛནཾ དཏྭཱ ཀཱསཱཡཝཏྠནིཝཏྠཱ སུཝཎྞསརཀཾ ཨཱདཱཡ ཨཱསནཔརིཡནྟེ ནིསིནྣཱ ཏེསཾ བྷིཀྑཱུནཾ ཨུཙྪིཊྛཱཝསེསཀཾ པརིབྷུཉྫེཡྻ’’ནྟི དོཧལི༹ནཱི ཧུཏྭཱ ཏཐེཝ ཀཏྭཱ དོཧལ༹ཾ པཊིཝིནོདེསི. སཱ སེསམངྒལེསུཔི ཏཐཱརཱུཔམེཝ དཱནཾ དཏྭཱ པུཏྟཾ ཝིཛཱཡིཏྭཱ ནཱམགྒཧཎདིཝསེ ‘‘པུཏྟསྶ མེ, བྷནྟེ, སིཀྑཱཔདཱནི དེཐཱ’’ཏི ཐེརཾ ཨཱཧ. ཐེརོ ‘‘ཀིམསྶ ནཱམ’’ནྟི པུཙྪི. ‘‘བྷནྟེ, པུཏྟསྶ མེ པཊིསནྡྷིགྒཧཎཏོ པཊྛཱཡ ཨིམསྨིཾ གེཧེ ཀསྶཙི དུཀྑཾ ནཱམ ན བྷཱུཏཔུབྦཾ, ཏེནེཝསྶ སུཁཀུམཱརོཏི ནཱམཾ བྷཝིསྶཏཱི’’ཏི ཝུཏྟེ ཏདེཝསྶ ནཱམཾ གཧེཏྭཱ སིཀྑཱཔདཱནི ཨདཱསི.

ཏདཱ ཨེཝཉྩསྶ མཱཏུ ‘‘ནཱཧཾ མམ པུཏྟསྶ ཨཛ྄ཛྷཱསཡཾ བྷིནྡིསྶཱམཱི’’ཏི ཙིཏྟཾ ཨུཔྤཛྫི. སཱ ཏསྶ ཀཎྞཝིཛ྄ཛྷནམངྒལཱདཱིསུཔི ཏཐེཝ དཱནཾ ཨདཱསི. ཀུམཱརོཔི སཏྟཝསྶིཀཀཱལེ ‘‘ཨིཙྪཱམཧཾ, ཨམྨ, ཐེརསྶ སནྟིཀེ པབྦཛིཏུ’’ནྟི ཨཱཧ. སཱ ‘‘སཱདྷུ, ཏཱཏ, ནཱཧཾ ཏཝ ཨཛ྄ཛྷཱསཡཾ བྷིནྡིསྶཱམཱི’’ཏི ཐེརཾ ནིམནྟེཏྭཱ བྷོཛེཏྭཱ, ‘‘བྷནྟེ, པུཏྟོ མེ པབྦཛིཏུཾ ཨིཙྪཏི, ཨིམཱཧཾ སཱཡནྷསམཡེ ཝིཧཱརཾ ཨཱནེསྶཱམཱི’’ཏི ཐེརཾ ཨུཡྻོཛེཏྭཱ ཉཱཏཀེ སནྣིཔཱཏེཏྭཱ ‘‘པུཏྟསྶ མེ གིཧིཀཱལེ ཀཏྟབྦཾ ཀིཙྩཾ ཨཛྫེཝ ཀརིསྶཱམཱ’’ཏི ཝཏྭཱ པུཏྟཾ ཨལངྐརིཏྭཱ མཧནྟེན སིརིསོབྷགྒེན ཝིཧཱརཾ ནེཏྭཱ ཐེརསྶ ནིཡྻཱདེསི. ཐེརོཔི ཏཾ, ‘‘ཏཱཏ, པབྦཛྫཱ ནཱམ དུཀྐརཱ, སཀྑིསྶསི ཨབྷིརམིཏུ’’ནྟི ཝཏྭཱ ‘‘ཀརིསྶཱམི ཝོ, བྷནྟེ, ཨོཝཱད’’ནྟི ཝུཏྟེ ཀམྨཊྛཱནཾ དཏྭཱ པབྦཱཛེསི. མཱཏཱཔིཏརོཔིསྶ པབྦཛྫཱཡ སཀྐཱརཾ ཀརོནྟཱ ཨནྟོཝིཧཱརེཡེཝ སཏྟཱཧཾ བུདྡྷཔྤམུཁསྶ བྷིཀྑུསངྒྷསྶ སཏརསབྷོཛནཾ དཏྭཱ སཱཡཾ ཨཏྟནོ གེཧཾ ཨགམཾསུ. ཨཊྛམེ དིཝསེ སཱརིཔུཏྟཏྠེརོ བྷིཀྑུསངྒྷེ གཱམཾ པཝིཊྛེ ཝིཧཱརེ ཀཏྟབྦཀིཙྩཾ ཀཏྭཱ སཱམཎེརཾ པཏྟཙཱིཝརཾ གཱཧཱཔེཏྭཱ གཱམཾ པིཎྜཱཡ པཱཝིསི. སཱམཎེརོ ཨནྟརཱམགྒེ མཱཏིཀཱདཱིནི དིསྭཱ པཎྜིཏསཱམཎེརོ ཝིཡ པུཙྪི. ཐེརོཔི ཏསྶ ཏཐེཝ བྱཱཀཱསི. སཱམཎེརོ ཏཱནི ཀཱརཎཱནི སུཏྭཱ ‘‘སཙེ ཏུམྷེ ཨཏྟནོ པཏྟཙཱིཝརཾ གཎྷེཡྻཱཐ, ཨཧཾ ནིཝཏྟེཡྻ’’ནྟི ཝཏྭཱ ཐེརེན ཏསྶ ཨཛ྄ཛྷཱསཡཾ ཨབྷིནྡིཏྭཱ, ‘‘སཱམཎེར, དེཧི མམ པཏྟཙཱིཝར’’ནྟི པཏྟཙཱིཝརེ གཧིཏེ ཐེརཾ ཝནྡིཏྭཱ ནིཝཏྟམཱནོ, ‘‘བྷནྟེ, མཡ྄ཧཾ ཨཱཧཱརཾ ཨཱཧརམཱནོ སཏརསབྷོཛནཾ ཨཱཧརེཡྻཱཐཱ’’ཏི ཨཱཧ. ཀུཏོ ཏཾ ལབྷིསྶཱམཱིཏི? ཨཏྟནོ པུཉྙེན ཨལབྷནྟོ མམ པུཉྙེན ལབྷིསྶཐ, བྷནྟེཏི. ཨཐསྶ ཐེརོ ཀུཉྩིཀཾ དཏྭཱ གཱམཾ པིཎྜཱཡ པཱཝིསི. སོཔི ཝིཧཱརཾ ཨཱགནྟྭཱ ཐེརསྶ གབྦྷཾ ཝིཝརིཏྭཱ པཝིསིཏྭཱ དྭཱརཾ པིདྷཱཡ ཨཏྟནོ ཀཱཡེ ཉཱཎཾ ཨོཏཱརེཏྭཱ ནིསཱིདི.

ཏསྶ གུཎཏེཛེན སཀྐསྶ ཨཱསནཾ ཨུཎྷཱཀཱརཾ དསྶེསི. སཀྐོ ‘‘ཀིཾ ནུ ཁོ ཨེཏ’’ནྟི ཨོལོཀེནྟོ སཱམཎེརཾ དིསྭཱ ‘‘སུཁསཱམཎེརོ ཨཏྟནོ ཨུཔཛ྄ཛྷཱཡསྶ པཏྟཙཱིཝརཾ དཏྭཱ ‘སམཎདྷམྨཾ ཀརིསྶཱམཱི’ཏི ནིཝཏྟོ, མཡཱ ཏཏྠ གནྟུཾ ཝཊྚཏཱི’’ཏི ཙིནྟེཏྭཱ ཙཏྟཱརོ མཧཱརཱཛེ པཀྐོསཱཔེཏྭཱ ‘‘གཙྪཐ, ཏཱཏཱ, ཝིཧཱརསྶཱུཔཝནེ དུསྶདྡཀེ སཀུཎེ པལཱཔེཐཱ’’ཏི ཨུཡྻོཛེསི. ཏེ ཏཐཱ ཀཏྭཱ སཱམནྟཱ ཨཱརཀྑཾ གཎྷིཾསུ. ཙནྡིམསཱུརིཡེ ‘‘ཨཏྟནོ ཝིམཱནཱནི གཧེཏྭཱ ཏིཊྛཐཱ’’ཏི ཨཱཎཱཔེསི. ཏེཔི ཏཐཱ ཀརིཾསུ. སཡམྤི ཨཱཝིཉྪནཊྛཱནེ ཨཱརཀྑཾ གཎྷི. ཝིཧཱརོ སནྣིསིནྣོ ནིརཝོ ཨཧོསི. སཱམཎེརོ ཨེཀགྒཙིཏྟེན ཝིཔསྶནཾ ཝཌྜྷེཏྭཱ ཏཱིཎི མགྒཕལཱནི པཱཔུཎི. ཐེརོ ‘‘སཱམཎེརེན ‘སཏརསབྷོཛནཾ ཨཱཧརེཡྻཱཐཱ’ཏི ཝུཏྟཾ, ཀསྶ ནུ ཁོ གྷརེ སཀྐཱ ལདྡྷུ’’ནྟི ཨོལོཀེནྟོ ཨེཀཾ ཨཛ྄ཛྷཱསཡསམྤནྣཾ ཨུཔཊྛཱཀཏུལཾ དིསྭཱ ཏཏྠ གནྟྭཱ, ‘‘བྷནྟེ, སཱདྷུ ཝོ ཀཏཾ ཨཛྫ ཨིདྷཱགཙྪནྟེཧཱི’’ཏི ཏེཧི ཏུཊྛམཱནསེཧི པཏྟཾ གཧེཏྭཱ ནིསཱིདཱཔེཏྭཱ ཡཱགུཁཛྫཀཾ དཏྭཱ ཡཱཝ བྷཏྟཀཱལཾ དྷམྨཀཐཾ ཡཱཙིཏོ ཏེསཾ སཱརཎཱིཡདྷམྨཀཐཾ ཀཐེཏྭཱ ཀཱལཾ སལླཀྑེཏྭཱ དེསནཾ ནིཊྛཱཔེསི. ཨཐསྶ སཏརསབྷོཛནཾ དཏྭཱ ཏཾ ཨཱདཱཡ གནྟུཀཱམཾ ཐེརཾ དིསྭཱ ‘‘བྷུཉྫཐ, བྷནྟེ, ཨཔརམྤི ཏེ དསྶཱམཱ’’ཏི ཐེརཾ བྷོཛེཏྭཱ པུན པཏྟཔཱུརཾ ཨདཾསུ. ཐེརོ ཏཾ ཨཱདཱཡ ‘‘སཱམཎེརོ མེ ཚཱཏོ’’ཏི ཏུརིཏཏུརིཏོ ཝིཧཱརཾ པཱཡཱསི. ཏཾ དིཝསཾ སཏྠཱ པཱཏོཝ ནིཀྑམིཏྭཱ གནྡྷཀུཊིཡཾ ནིསིནྣོཝ ཨཱཝཛྫེསི – ‘‘ཨཛྫ སུཁསཱམཎེརོ ཨུཔཛ྄ཛྷཱཡསྶ པཏྟཙཱིཝརཾ དཏྭཱ ‘སམཎདྷམྨཾ ཀརིསྶཱམཱི’ཏི ནིཝཏྟོ, ནིཔྥནྣཾ ནུ ཁོ ཏསྶ ཀིཙྩ’’ནྟི. སོ ཏིཎྞཾཡེཝ མགྒཕལཱནཾ པཏྟབྷཱཝཾ དིསྭཱ ཨུཏྟརིཔི ཨུཔདྷཱརེནྟོ ‘‘སཀྑིསྶཏཱཡཾ ཨཛྫ ཨརཧཏྟཾ པཱཔུཎིཏུཾ, སཱརིཔུཏྟོ པན ‘སཱམཎེརོ མེ ཚཱཏོ’ཏི ཝེགེན བྷཏྟཾ ཨཱདཱཡ ནིཀྑམཏི, སཙེ ཨིམསྨིཾ ཨརཧཏྟཾ ཨཔྤཏྟེ བྷཏྟཾ ཨཱཧརིསྶཏི, ཨིམསྶ ཨནྟརཱཡོ བྷཝིསྶཏི, མཡཱ གནྟྭཱ དྭཱརཀོཊྛཀེ ཨཱརཀྑཾ གཎྷིཏུཾ ཝཊྚཏཱི’’ཏི ཙིནྟེཏྭཱ གནྡྷཀུཊིཏོ ནིཀྑམིཏྭཱ དྭཱརཀོཊྛཀེ ཋཏྭཱ ཨཱརཀྑཾ གཎྷི.

ཐེརོཔི བྷཏྟཾ ཨཱཧརི. ཨཐ ནཾ ཧེཊྛཱ ཝུཏྟནཡེནེཝ ཙཏྟཱརོ པཉྷེ པུཙྪི. པཉྷཝིསྶཛྫནཱཝསཱནེ སཱམཎེརོ ཨརཧཏྟཾ པཱཔུཎི. སཏྠཱ ཐེརཾ ཨཱམནྟེཏྭཱ ‘‘གཙྪ, སཱརིཔུཏྟ, སཱམཎེརསྶ ཏེ བྷཏྟཾ དེཧཱི’’ཏི ཨཱཧ. ཐེརོ གནྟྭཱ དྭཱརཾ ཨཱཀོཊེསི. སཱམཎེརོཔི ནིཀྑམིཏྭཱ ཨུཔཛ྄ཛྷཱཡསྶ ཝཏྟཾ ཀཏྭཱ ‘‘བྷཏྟཀིཙྩཾ ཀརོཧཱི’’ཏི ཝུཏྟེ ཐེརསྶ བྷཏྟེན ཨནཏྠིཀབྷཱཝཾ ཉཏྭཱ སཏྟཝསྶིཀཀུམཱརོ ཏངྑཎཉྙེཝ ཨརཧཏྟཾ པཏྟོ ནཱིཙཱསནཊྛཱནཾ པཙྩཝེཀྑནྟོ བྷཏྟཀིཙྩཾ ཀཏྭཱ པཏྟཾ དྷོཝི. ཏསྨིཾ ཀཱལེ ཙཏྟཱརོ མཧཱརཱཛཱནོ ཨཱརཀྑཾ ཝིསྶཛྫེསུཾ. ཙནྡིམསཱུརིཡཱཔི ཝིམཱནཱནི མུཉྩིཾསུ. སཀྐོཔི ཨཱཝིཉྪནཊྛཱནེ ཨཱརཀྑཾ ཝིསྶཛྫེསི. སཱུརིཡོ ནབྷམཛ྄ཛྷཾ ཨཏིཀྐནྟོཡེཝ པཉྙཱཡི. བྷིཀྑཱུ ‘‘སཱཡནྷོ པཉྙཱཡཏི, སཱམཎེརེན ཙ ཨིདཱནེཝ བྷཏྟཀིཙྩཾ ཀཏཾ, ཀིཾ ནུ ཁོ ཨཛྫ པུབྦཎྷོ བལཝཱ ཛཱཏོ, སཱཡནྷོ མནྡོ’’ཏི ཝདིཾསུ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ, ‘‘བྷནྟེ, ཨཛྫ པུབྦཎྷོ བལཝཱ ཛཱཏོ, སཱཡནྷོ མནྡོ, སཱམཎེརེན ཙ ཨིདཱནེཝ བྷཏྟཀིཙྩཾ ཀཏཾ, ཨཐ ཙ པན སཱུརིཡོ ནབྷམཛ྄ཛྷཾ ཨཏིཀྐནྟོཡེཝ པཉྙཱཡཏཱི’’ཏི ཝུཏྟེ, ‘‘བྷིཀྑཝེ, ཨེཝམེཝཾ ཧོཏི པུཉྙཝནྟཱནཾ སམཎདྷམྨཀརཎཀཱལེ. ཨཛྫ ཧི ཙཏྟཱརོ མཧཱརཱཛཱནོ སཱམནྟཱ ཨཱརཀྑཾ གཎྷིཾསུ, ཙནྡིམསཱུརིཡཱ ཝིམཱནཱནི གཧེཏྭཱ ཨཊྛཾསུ, སཀྐོ ཨཱཝིཉྪནཀེ ཨཱརཀྑཾ གཎྷི, ཨཧམྤི དྭཱརཀོཊྛཀེ ཨཱརཀྑཾ གཎྷིཾ, ཨཛྫ སུཁསཱམཎེརོ མཱཏིཀཱཡ ཨུདཀཾ ཧརནྟེ, ཨུསུཀཱརེ ཨུསུཾ ཨུཛུཾ ཀརོནྟེ, ཏཙྪཀེ ཙཀྐཱདཱིནི ཀརོནྟེ དིསྭཱ ཨཏྟཱནཾ དམེཏྭཱ ཨརཧཏྟཾ པཏྟོ’’ཏི ཝཏྭཱ ཨིམཾ གཱཐམཱཧ –

༡༤༥.

‘‘ཨུདཀཉྷི ནཡནྟི ནེཏྟིཀཱ, ཨུསུཀཱརཱ ནམཡནྟི ཏེཛནཾ;

དཱརུཾ ནམཡནྟི ཏཙྪཀཱ, ཨཏྟཱནཾ དམཡནྟི སུབྦཏཱ’’ཏི.

ཏཏྠ སུབྦཏཱཏི སུཝདཱ, སུཁེན ཨོཝདིཏབྦཱ ཨནུསཱསིཏབྦཱཏི ཨཏྠོ. སེསཾ ཧེཊྛཱ ཝུཏྟནཡམེཝ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སུཁསཱམཎེརཝཏྠུ ཨེཀཱདསམཾ.

དཎྜཝགྒཝཎྞནཱ ནིཊྛིཏཱ.

དསམོ ཝགྒོ.

༡༡. ཛརཱཝགྒོ

༡. ཝིསཱཁཱཡ སཧཱཡིཀཱནཾ ཝཏྠུ

ཀོ ནུ ཧཱསོ ཀིམཱནནྡོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཝིསཱཁཱཡ སཧཱཡིཀཱཡོ ཨཱརབྦྷ ཀཐེསི.

སཱཝཏྠིཡཾ ཀིར པཉྩསཏཱ ཀུལཔུཏྟཱ ‘‘ཨེཝཾ ཨིམཱ ཨཔྤམཱདཝིཧཱརིནིཡོ བྷཝིསྶནྟཱི’’ཏི ཨཏྟནོ ཨཏྟནོ བྷརིཡཱཡོ ཝིསཱཁཾ མཧཱཨུཔཱསིཀཾ སམྤཊིཙྪཱཔེསུཾ. ཏཱ ཨུཡྻཱནཾ ཝཱ ཝིཧཱརཾ ཝཱ གཙྪནྟིཡོ ཏཱཡ སདྡྷིཾཡེཝ གཙྪནྟི. ཏཱ ཨེཀསྨིཾ ཀཱལེ ‘‘སཏྟཱཧཾ སུརཱཚཎོ བྷཝིསྶཏཱི’’ཏི ཚཎེ སངྒྷུཊྛེ ཨཏྟནོ ཨཏྟནོ སཱམིཀཱནཾ སུརཾ པཊིཡཱདེསུཾ. ཏེ སཏྟཱཧཾ སུརཱཚཎཾ ཀཱིལི༹ཏྭཱ ཨཊྛམེ དིཝསེ ཀམྨནྟབྷེརིཡཱ ནིཀྑནྟཱཡ ཀམྨནྟེ ཨགམཾསུ. ཏཱཔི ཨིཏྠིཡོ ‘‘མཡཾ སཱམིཀཱནཾ སམྨུཁཱ སུརཾ པཱཏུཾ ན ལབྷིམྷཱ, ཨཝསེསཱ སུརཱ ཙ ཨཏྠི, ཨིདཾ ཡཐཱ ཏེ ན ཛཱནནྟི, ཏཐཱ པིཝིསྶཱམཱ’’ཏི ཝིསཱཁཱཡ སནྟིཀཾ གནྟྭཱ ‘‘ཨིཙྪཱམ, ཨཡྻེ, ཨུཡྻཱནཾ དཊྛུ’’ནྟི ཝཏྭཱ ‘‘སཱདྷུ, ཨམྨཱ, ཏེན ཧི ཀཏྟབྦཀིཙྩཱནི ཀཏྭཱ ནིཀྑམཐཱ’’ཏི ཝུཏྟེ ཏཱཡ སདྡྷིཾ གནྟྭཱ པཊིཙྪནྣཱཀཱརེན སུརཾ ནཱིཧརཱཔེཏྭཱ ཨུཡྻཱནེ པིཝིཏྭཱ མཏྟཱ ཝིཙརིཾསུ. ཝིསཱཁཱཔི ‘‘ཨཡུཏྟཾ ཨིམཱཧི ཀཏཾ, ཨིདཱནི མཾ ‘སམཎསྶ གོཏམསྶ སཱཝིཀཱ ཝིསཱཁཱ སུརཾ པིཝིཏྭཱ ཝིཙརཏཱི’ཏི ཏིཏྠིཡཱཔི གརཧིསྶནྟཱི’’ཏི ཙིནྟེཏྭཱ ཏཱ ཨིཏྠིཡོ ཨཱཧ – ‘‘ཨམྨཱ ཨཡུཏྟཾ ཝོ ཀཏཾ, མམཔི ཨཡསོ ཨུཔྤཱདིཏོ, སཱམིཀཱཔི ཝོ ཀུཛ྄ཛྷིསྶནྟི, ཨིདཱནི ཀིཾ ཀརིསྶཐཱ’’ཏི. གིལཱནཱལཡཾ དསྶཡིསྶཱམ, ཨཡྻེཏི. ཏེན ཧི པཉྙཱཡིསྶཐ སཀེན ཀམྨེནཱཏི. ཏཱ གེཧཾ གནྟྭཱ གིལཱནཱལཡཾ ཀརིཾསུ. ཨཐ ཏཱསཾ སཱམིཀཱ ‘‘ཨིཏྠནྣཱམཱ ཙ ཨིཏྠནྣཱམཱ ཙ ཀཧ’’ནྟི པུཙྪིཏྭཱ ‘‘གིལཱནཱ’’ཏི སུཏྭཱ ‘‘ཨདྡྷཱ ཨེཏཱཧི ཨཝསེསསུརཱ པཱིཏཱ བྷཝིསྶནྟཱི’’ཏི སལླཀྑེཏྭཱ ཏཱ པོཐེཏྭཱ ཨནཡབྱསནཾ པཱཔེསུཾ. ཏཱ ཨཔརསྨིམྤི ཚཎཝཱརེ ཏཐེཝ སུརཾ པིཝིཏུཀཱམཱ ཝིསཱཁཾ ཨུཔསངྐམིཏྭཱ, ‘‘ཨཡྻེ, ཨུཡྻཱནཾ ནོ ནེཧཱི’’ཏི ཝཏྭཱ ‘‘པུབྦེཔི མེ ཏུམྷེཧི ཨཡསོ ཨུཔྤཱདིཏོ, གཙྪཐ, ན ཝོ ཨཧཾ ནེསྶཱམཱི’’ཏི ཏཱཡ པཊིཀྑིཏྟཱ ‘‘ཨིདཱནི ཨེཝཾ ན ཀརིསྶཱམཱ’’ཏི སམྨནྟཡིཏྭཱ པུན ཏཾ ཨུཔསངྐམིཏྭཱ ཨཱཧཾསུ, ‘‘ཨཡྻེ, བུདྡྷཔཱུཛཾ ཀཱཏུཀཱམཱམྷཱ, ཝིཧཱརཾ ནོ ནེཧཱི’’ཏི. ཨིདཱནི ཨམྨཱ ཡུཛྫཏི, གཙྪཐ, པརིཝཙྪཾ ཀརོཐཱཏི. ཏཱ ཙངྐོཊཀེཧི གནྡྷམཱལཱདཱིནི གཱཧཱཔེཏྭཱ སུརཱཔུཎྞེ མུཊྛིཝཱརཀེ ཧཏྠེཧི ཨོལམྦེཏྭཱ མཧཱཔཊེ པཱརུཔིཏྭཱ ཝིསཱཁཾ ཨུཔསངྐམིཏྭཱ ཏཱཡ སདྡྷིཾ ཝིཧཱརཾ པཝིསམཱནཱ ཨེཀམནྟཾ གནྟྭཱ མུཊྛིཝཱརཀེཧེཝ སུརཾ པིཝིཏྭཱ ཝཱརཀེ ཚཌྜེཏྭཱ དྷམྨསབྷཱཡཾ སཏྠུ པུརཏོ ནིསཱིདིཾསུ.

ཝིསཱཁཱ ‘‘ཨིམཱསཾ, བྷནྟེ, དྷམྨཾ ཀཐེཐཱ’’ཏི ཨཱཧ. ཏཱཔི མདཝེགེན ཀམྤམཱནསརཱིརཱ ‘‘ཨིཙྩཱམ, གཱཡཱམཱ’’ཏི ཙིཏྟཾ ཨུཔྤཱདེསུཾ. ཨཐེཀཱ མཱརཀཱཡིཀཱ དེཝཏཱ ‘‘ཨིམཱསཾ སརཱིརེ ཨདྷིམུཙྩིཏྭཱ སམཎསྶ གོཏམསྶ པུརཏོ ཝིཔྤཀཱརཾ དསྶེསྶཱམཱི’’ཏི ཙིནྟེཏྭཱ ཏཱསཾ སརཱིརེ ཨདྷིམུཙྩི. ཏཱསུ ཨེཀཙྩཱ སཏྠུ པུརཏོ པཱཎིཾ པཧརིཏྭཱ ཧསིཏུཾ, ཨེཀཙྩཱ ནཙྩིཏུཾ ཨཱརབྷིཾསུ. སཏྠཱ ‘‘ཀིཾ ཨིད’’ནྟི ཨཱཝཛྫེནྟོ ཏཾ ཀཱརཎཾ ཉཏྭཱ ‘‘ན ཨིདཱནི མཱརཀཱཡིཀཱནཾ ཨོཏཱརཾ ལབྷིཏུཾ དསྶཱམི. ན ཧི མཡཱ ཨེཏྟཀཾ ཀཱལཾ པཱརམིཡོ པཱུརེནྟེན མཱརཀཱཡིཀཱནཾ ཨོཏཱརལཱབྷཏྠཱཡ པཱུརིཏཱ’’ཏི ཏཱ སཾཝེཛེཏུཾ བྷམུཀལོམཏོ རསྨིཡོ ཝིསྶཛྫེསི, ཏཱཝདེཝ ཨནྡྷཀཱརཏིམིསཱ ཨཧོསི. ཏཱ བྷཱིཏཱ ཨཧེསུཾ མརཎབྷཡཏཛྫིཏཱ. ཏེན ཏཱསཾ ཀུཙྪིཡཾ སུརཱ ཛཱིརི. སཏྠཱ ནིསིནྣཔལླངྐེ ཨནྟརཧིཏོ སིནེརུམུདྡྷནི ཋཏྭཱ ཨུཎྞཱལོམཏོ རསྨིཾ ཝིསྶཛྫེསི, ཏངྑཎཾཡེཝ ཙནྡསཧསྶུགྒམནཾ ཝིཡ ཨཧོསི. ཨཐ སཏྠཱ ཏཱ ཨིཏྠིཡོ ཨཱམནྟེཏྭཱ ‘‘ཏུམྷེཧི མམ སནྟིཀཾ ཨཱགཙྪམཱནཱཧི པམཏྟཱཧི ཨཱགནྟུཾ ན ཝཊྚཏི. ཏུམྷཱཀཉྷི པམཱདེནེཝ མཱརཀཱཡིཀཱ དེཝཏཱ ཨོཏཱརཾ ལབྷིཏྭཱ ཏུམྷེ ཧསཱདཱིནཾ ཨཀརཎཊྛཱནེ ཧསཱདཱིནི ཀཱརཱཔེསི, ཨིདཱནི ཏུམྷེཧི རཱགཱདཱིནཾ ཨགྒཱིནཾ ནིབྦཱཔནཏྠཱཡ ཨུསྶཱཧཾ ཀཱཏུཾ ཝཊྚཏཱི’’ཏི ཝཏྭཱ ཨིམཾ གཱཐམཱཧ –

༡༤༦.

‘‘ཀོ ནུ ཧཱསོ ཀིམཱནནྡོ, ནིཙྩཾ པཛྫལིཏེ སཏི;

ཨནྡྷཀཱརེན ཨོནདྡྷཱ, པདཱིཔཾ ན གཝེསཐཱ’’ཏི.

ཏཏྠ ཨཱནནྡོཏི ཏུཊྛི. ཨིདཾ ཝུཏྟཾ ཧོཏི – ཨིམསྨིཾ ལོཀསནྣིཝཱསེ རཱགཱདཱིཧི ཨེཀཱདསཧི ཨགྒཱིཧི ནིཙྩཾ པཛྫལིཏེ སཏི ཀོ ནུ ཏུམྷཱཀཾ ཧཱསོ ཝཱ ཏུཊྛི ཝཱ? ནནུ ཨེས ཨཀཏྟབྦརཱུཔོཡེཝ. ཨཊྛཝཏྠུཀེན ཧི ཨཝིཛྫཱནྡྷཀཱརེན ཨོནདྡྷཱ ཏུམྷེ ཏསྶེཝ ཨནྡྷཀཱརསྶ ཝིདྷམནཏྠཱཡ ཀིཾ ཀཱརཎཱ ཉཱཎཔྤདཱིཔཾ ན གཝེསཐ ན ཀརོཐཱཏི.

དེསནཱཝསཱནེ པཉྩསཏཱཔི ཏཱ ཨིཏྠིཡོ སོཏཱཔཏྟིཕལེ པཏིཊྛཧིཾསུ.

སཏྠཱ ཏཱསཾ ཨཙལསདྡྷཱཡ པཏིཊྛིཏབྷཱཝཾ ཉཏྭཱ སིནེརུམཏྠཀཱ ཨོཏརིཏྭཱ བུདྡྷཱསནེ ནིསཱིདི. ཨཐ ནཾ ཝིསཱཁཱ ཨཱཧ – ‘‘བྷནྟེ, སུརཱ ནཱམེསཱ པཱཔིཀཱ. ཨེཝརཱུཔཱ ཧི ནཱམ ཨིམཱ ཨིཏྠིཡོ ཏུམྷཱདིསསྶ བུདྡྷསྶ པུརཏོ ནིསཱིདིཏྭཱ ཨིརིཡཱཔཐམཏྟམྤི སཎྛཱཔེཏུཾ ཨསཀྐོནྟིཡོ ཨུཊྛཱཡ པཱཎིཾ པཧརིཏྭཱ ཧསནགཱིཏནཙྩཱདཱིནི ཨཱརབྷིཾསཱུ’’ཏི. སཏྠཱ ‘‘ཨཱམ, ཝིསཱཁེ, པཱཔིཀཱ ཨེཝ ཨེསཱ སུརཱ ནཱམ. ཨེཏཉྷི ནིསྶཱཡ ཨནེཀེ སཏྟཱ ཨནཡབྱསནཾ པཏྟཱ’’ཏི ཝཏྭཱ ‘‘ཀདཱ པནེསཱ, བྷནྟེ, ཨུཔྤནྣཱ’’ཏི ཝུཏྟེ ཏསྶཱ ཨུཔྤཏྟིཾ ཝིཏྠཱརེན ཀཐེཏུཾ ཨཏཱིཏཾ ཨཱཧརིཏྭཱ ཀུམྦྷཛཱཏཀཾ (ཛཱ. ༡.༡༦.༣༣ ཨཱདཡོ) ཀཐེསཱིཏི.

ཝིསཱཁཱཡ སཧཱཡིཀཱནཾ ཝཏྠུ པཋམཾ.

༢. སིརིམཱཝཏྠུ

པསྶ ཙིཏྟཀཏནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ སིརིམཾ ཨཱརབྦྷ ཀཐེསི.

སཱ ཀིར རཱཛགཧེ ཨབྷིརཱུཔཱ གཎིཀཱ. ཨེཀསྨིཾ པན ཨནྟོཝསྶེ སུམནསེཊྛིཔུཏྟསྶ བྷརིཡཱཡ པུཎྞཀསེཊྛིསྶ དྷཱིཏཱཡ ཨུཏྟརཱཡ ནཱམ ཨུཔཱསིཀཱཡ ཨཔརཛ྄ཛྷིཏྭཱ ཏཾ པསཱདེཏུཀཱམཱ ཏསྶཱ གེཧེ བྷིཀྑུསངྒྷེན སདྡྷིཾ ཀཏབྷཏྟཀིཙྩཾ སཏྠཱརཾ ཁམཱཔེཏྭཱ ཏཾ དིཝསཾ དསབལསྶ བྷཏྟཱནུམོདནཾ སུཏྭཱ –

‘‘ཨཀྐོདྷེན ཛིནེ ཀོདྷཾ, ཨསཱདྷུཾ སཱདྷུནཱ ཛིནེ;

ཛིནེ ཀདརིཡཾ དཱནེན, སཙྩེནཱལིཀཝཱདིན’’ནྟི. (ཛཱ. ༡.༢.༢; དྷ. པ. ༢༢༣) –

གཱཐཱཔརིཡོསཱནེ སོཏཱཔཏྟིཕལཾ པཱཔུཎི. ཨཡམེཏྠ སངྑེཔོ, ཝིཏྠཱརཀཐཱ པན ཀོདྷཝགྒེ ཨནུམོདནགཱཐཱཝཎྞནཱཡམེཝ ཨཱཝིབྷཝིསྶཏི. ཨེཝཾ སོཏཱཔཏྟིཕལཾ པཏྟཱ པན སིརིམཱ དསབལཾ ནིམནྟེཏྭཱ པུནདིཝསེ མཧཱདཱནཾ དཏྭཱ སངྒྷསྶ ཨཊྛཀབྷཏྟཾ ནིབདྡྷཾ དཱཔེསི. ཨཱདིཏོ པཊྛཱཡ ནིབདྡྷཾ ཨཊྛ བྷིཀྑཱུ གེཧཾ གཙྪནྟི. ‘‘སཔྤིཾ གཎྷཐ, ཁཱིརཾ གཎྷཐཱ’’ཏིཨཱདཱིནི ཝཏྭཱ ཏེསཾ པཏྟེ པཱུརེཏི. ཨེཀེན ལདྡྷཾ ཏིཎྞམྤི ཙཏུནྣམྤི པཧོཏི. དེཝསིཀཾ སོལ༹སཀཧཱཔཎཔརིབྦཡེན པིཎྜཔཱཏོ དཱིཡཏི. ཨཐེཀདིཝསཾ ཨེཀོ བྷིཀྑུ ཏསྶཱ གེཧེ ཨཊྛཀབྷཏྟཾ བྷུཉྫིཏྭཱ ཏིཡོཛནམཏྠཀེ ཨེཀཾ ཝིཧཱརཾ ཨགམཱསི. ཨཐ ནཾ སཱཡཾ ཐེརུཔཊྛཱནེ ནིསིནྣཾ པུཙྪིཾསུ – ‘‘ཨཱཝུསོ, ཀཧཾ བྷིཀྑཾ གཧེཏྭཱ ཨཱགཏོསཱི’’ཏི. སིརིམཱཡ ཨཊྛཀབྷཏྟཾ མེ བྷུཏྟནྟི. མནཱཔཾ ཀཏྭཱ དེཏི, ཨཱཝུསོཏི. ‘‘ན སཀྐཱ ཏསྶཱ བྷཏྟཾ ཝཎྞེཏུཾ, ཨཏིཝིཡ པཎཱིཏཾ ཀཏྭཱ དེཏི, ཨེཀེན ལདྡྷཾ ཏིཎྞམྤི ཙཏུནྣམྤི པཧོཏི, ཏསྶཱ པན དེཡྻདྷམྨཏོཔི དསྶནམེཝ ཨུཏྟརིཏརཾ. སཱ ཧི ཨིཏྠཱི ཨེཝརཱུཔཱ ཙ ཨེཝརཱུཔཱ ཙཱ’’ཏི ཏསྶཱ གུཎེ ཝཎྞེསི.

ཨཐེཀོ བྷིཀྑུ ཏསྶཱ གུཎཀཐཾ སུཏྭཱ ཨདསྶནེནེཝ སིནེཧཾ ཨུཔྤཱདེཏྭཱ ‘‘མཡཱ གནྟྭཱ ཏཾ དཊྛུཾ ཝཊྚཏཱི’’ཏི ཨཏྟནོ ཝསྶགྒཾ ཀཐེཏྭཱ ཏཾ བྷིཀྑུཾ ཋིཏིཀཾ པུཙྪིཏྭཱ ‘‘སྭེ, ཨཱཝུསོ, ཏསྨིཾ གེཧེ ཏྭཾ སངྒྷཏྠེརོ ཧུཏྭཱ ཨཊྛཀབྷཏྟཾ ལབྷིསྶསཱི’’ཏི སུཏྭཱ ཏངྑཎཉྙེཝ པཏྟཙཱིཝརཾ ཨཱདཱཡ པཀྐནྟོཔི པཱཏོཝ ཨརུཎེ ཨུགྒཏེ སལཱཀགྒཾ པཝིསིཏྭཱ ཋིཏོ སངྒྷཏྠེརོ ཧུཏྭཱ ཏསྶཱ གེཧེ ཨཊྛཀབྷཏྟཾ ལབྷི. ཡོ པན བྷིཀྑུ ཧིཡྻོ བྷུཉྫིཏྭཱ པཀྐཱམི, ཏསྶ གཏཝེལཱཡམེཝ ཨསྶཱ སརཱིརེ རོགོ ཨུཔྤཛྫི. ཏསྨཱ སཱ ཨཱབྷརཎཱནི ཨོམུཉྩིཏྭཱ ནིཔཛྫི. ཨཐསྶཱ དཱསིཡོ ཨཊྛཀབྷཏྟཾ ལབྷིཏྭཱ ཨཱགཏེ བྷིཀྑཱུ དིསྭཱ ཨཱརོཙེསུཾ. སཱ སཧཏྠཱ པཏྟེ གཧེཏྭཱ ནིསཱིདཱཔེཏུཾ ཝཱ པརིཝིསིཏུཾ ཝཱ ཨསཀྐོནྟཱི དཱསིཡོ ཨཱཎཱཔེསི – ‘‘ཨམྨཱ པཏྟེ གཧེཏྭཱ, ཨཡྻེ, ནིསཱིདཱཔེཏྭཱ ཡཱགུཾ པཱཡེཏྭཱ ཁཛྫཀཾ དཏྭཱ བྷཏྟཝེལཱཡ པཏྟེ པཱུརེཏྭཱ དེཐཱ’’ཏི. ཏཱ ‘‘སཱདྷུ, ཨཡྻེ’’ཏི བྷིཀྑཱུ པཝེསེཏྭཱ ཡཱགུཾ པཱཡེཏྭཱ ཁཛྫཀཾ དཏྭཱ བྷཏྟཝེལཱཡ བྷཏྟསྶ པཏྟེ པཱུརེཏྭཱ ཏསྶཱ ཨཱརོཙཡིཾསུ. སཱ ‘‘མཾ པརིགྒཧེཏྭཱ ནེཐ, ཨཡྻེ, ཝནྡིསྶཱམཱི’’ཏི ཝཏྭཱ ཏཱཧི པརིགྒཧེཏྭཱ བྷིཀྑཱུནཾ སནྟིཀཾ ནཱིཏཱ ཝེདྷམཱནེན སརཱིརེན བྷིཀྑཱུ ཝནྡི. སོ བྷིཀྑུ ཏཾ ཨོལོཀེཏྭཱ ཙིནྟེསི – ‘‘གིལཱནཱཡ ཏཱཝ ཨེཝརཱུཔཱ ཨཡཾ ཨེཏིསྶཱ རཱུཔསོབྷཱ, ཨརོགཀཱལེ པན སབྦཱབྷརཎཔཊིམཎྜིཏཱཡ ཨིམིསྶཱ ཀཱིདིསཱི རཱུཔསམྤཏྟཱི’’ཏི. ཨཐསྶ ཨནེཀཝསྶཀོཊིསནྣིཙིཏོ ཀིལེསོ སམུདཱཙརི, སོ ཨཉྙཱཎཱི ཧུཏྭཱ བྷཏྟཾ བྷུཉྫིཏུཾ ཨསཀྐོནྟོ པཏྟམཱདཱཡ ཝིཧཱརཾ གནྟྭཱ པཏྟཾ པིདྷཱཡ ཨེཀམནྟེ ཋཔེཏྭཱ ཙཱིཝརཾ པཏྠརིཏྭཱ ནིཔཛྫི.

ཨཐ ནཾ ཨེཀོ སཧཱཡཀོ བྷིཀྑུ ཡཱཙནྟོཔི བྷོཛེཏུཾ ནཱསཀྑི. སོ ཚིནྣབྷཏྟོ ཨཧོསི. ཏཾ དིཝསམེཝ སཱཡནྷསམཡེ སིརིམཱ ཀཱལམཀཱསི. རཱཛཱ སཏྠུ སཱསནཾ པེསེསི – ‘‘བྷནྟེ, ཛཱིཝཀསྶ ཀནིཊྛབྷགིནཱི, སིརིམཱ, ཀཱལམཀཱསཱི’’ཏི. སཏྠཱ ཏཾ སུཏྭཱ རཉྙོ སཱསནཾ པཧིཎི ‘‘སིརིམཱཡ ཛྷཱཔནཀིཙྩཾ ནཏྠི, ཨཱམཀསུསཱནེ ཏཾ ཡཐཱ ཀཱཀསུནཁཱདཡོ ན ཁཱདནྟི, ཏཐཱ ནིཔཛྫཱཔེཏྭཱ རཀྑཱཔེཐཱ’’ཏི. རཱཛཱཔི ཏཐཱ ཨཀཱསི. པཊིཔཱཊིཡཱ ཏཡོ དིཝསཱ ཨཏིཀྐནྟཱ, ཙཏུཏྠེ དིཝསེ སརཱིརཾ ཨུདྡྷུམཱཡི, ནཝཧི ཝཎམུཁེཧི པུལ༹ཝཱ པགྒྷརིཾསུ, སཀལསརཱིརཾ བྷིནྣཾ སཱལིབྷཏྟཙཱཊི ཝིཡ ཨཧོསི. རཱཛཱ ནགརེ བྷེརིཾ ཙརཱཔེསི – ‘‘ཋཔེཏྭཱ གེཧརཀྑཀེ དཱརཀེ སིརིམཱཡ དསྶནཏྠཾ ཨནཱགཙྪནྟཱནཾ ཨཊྛ ཀཧཱཔཎཱནི དཎྜོ’’ཏི. སཏྠུ སནྟི ཀཉྩ པེསེསི – ‘‘བུདྡྷཔྤམུཁོ ཀིར བྷིཀྑུསངྒྷོ སིརིམཱཡ དསྶནཏྠཾ ཨཱགཙྪཏཱུ’’ཏི. སཏྠཱ བྷིཀྑཱུནཾ ཨཱརོཙེསི – ‘‘སིརིམཱཡ དསྶནཏྠཾ གམིསྶཱམཱ’’ཏི. སོཔི དཧརབྷིཀྑུ ཙཏྟཱརོ དིཝསེ ཀསྶཙི ཝཙནཾ ཨགྒཧེཏྭཱ ཚིནྣབྷཏྟོཝ ནིཔཛྫི. པཏྟེ བྷཏྟཾ པཱུཏིཀཾ ཛཱཏཾ, པཏྟེ མལཾ ཨུཊྛཧི. ཨཐ ནཾ སོ སཧཱཡཀོ བྷིཀྑུ ཨུཔསངྐམིཏྭཱ, ‘‘ཨཱཝུསོ, སཏྠཱ སིརིམཱཡ དསྶནཏྠཾ གཙྪཏཱི’’ཏི ཨཱཧ. སོ ཏཐཱ ཚཱཏཛ྄ཛྷཏྟོཔི ‘‘སིརིམཱ’’ཏི ཝུཏྟཔདེཡེཝ སཧསཱ ཨུཊྛཧིཏྭཱ ‘‘ཀིཾ བྷཎསཱི’’ཏི ཨཱཧ. ‘‘སཏྠཱ སིརིམཾ དཊྛུཾ གཙྪཏི, ཏྭམྤི གམིསྶསཱི’’ཏི ཝུཏྟེ, ‘‘ཨཱམ, གམིསྶཱམཱི’’ཏི བྷཏྟཾ ཚཌྜེཏྭཱ པཏྟཾ དྷོཝིཏྭཱ ཐཝིཀཱཡ པཀྑིཔིཏྭཱ བྷིཀྑུསངྒྷེན སདྡྷིཾ ཨགམཱསི. སཏྠཱ བྷིཀྑུསངྒྷཔརིཝུཏོ ཨེཀཔསྶེ ཨཊྛཱསི, བྷིཀྑུནིསངྒྷོཔི རཱཛཔརིསཱཔི ཨུཔཱསཀཔརིསཱཔི ཨུཔཱསིཀཱཔརིསཱཔི ཨེཀེཀཔསྶེ ཨཊྛཾསུ.

སཏྠཱ རཱཛཱནཾ པུཙྪི – ‘‘ཀཱ ཨེསཱ, མཧཱརཱཛོ’’ཏི. བྷནྟེ, ཛཱིཝཀསྶ བྷགིནཱི, སིརིམཱ, ནཱམཱཏི. སིརིམཱ, ཨེསཱཏི. ཨཱམ, བྷནྟེཏི. ཏེན ཧི ནགརེ བྷེརིཾ ཙརཱཔེཧི ‘‘སཧསྶཾ དཏྭཱ སིརིམཾ གཎྷནྟཱུ’’ཏི. རཱཛཱ ཏཐཱ ཀཱརེསི. ཨེཀོཔི ‘ཧ’ནྟི ཝཱ ‘ཧུ’ནྟི ཝཱ ཝདནྟོ ནཱམ ནཱཧོསི. རཱཛཱ སཏྠུ ཨཱརོཙེསི – ‘‘ན གཎྷནྟི, བྷནྟེ’’ཏི. ཏེན ཧི, མཧཱརཱཛ, ཨགྒྷཾ ཨོཧཱརེཧཱིཏི. རཱཛཱ ‘‘པཉྩསཏཱནི དཏྭཱ གཎྷནྟཱུ’’ཏི བྷེརིཾ ཙརཱཔེཏྭཱ ཀཉྩི གཎྷནཀཾ ཨདིསྭཱ ‘‘ཨཌྜྷཏེཡྻཱནི སཏཱནི, དྭེ སཏཱནི, སཏཾ, པཎྞཱསཾ, པཉྩཝཱིསཏི ཀཧཱཔཎེ, དས ཀཧཱཔཎེ, པཉྩ ཀཧཱཔཎེ, ཨེཀཾ ཀཧཱཔཎཾ ཨཌྜྷཾ, པཱདཾ, མཱསཀཾ, ཀཱཀཎིཀཾ དཏྭཱ སིརིམཾ གཎྷནྟཱུ’’ཏི བྷེརིཾ ཙརཱཔེསི. ཀོཙི ཏཾ ན ཨིཙྪི. ‘‘མུདྷཱཔི གཎྷནྟཱུ’’ཏི བྷེརིཾ ཙརཱཔེསི. ‘ཧ’ནྟི ཝཱ ‘ཧུ’ནྟི ཝཱ ཝདནྟོ ནཱམ ནཱཧོསི. རཱཛཱ ‘‘མུདྷཱཔི, བྷནྟེ, གཎྷནྟོ ནཱམ ནཏྠཱི’’ཏི ཨཱཧ. སཏྠཱ ‘‘པསྶཐ, བྷིཀྑཝེ, མཧཱཛནསྶ པིཡཾ མཱཏུགཱམཾ, ཨིམསྨིཾཡེཝ ནགརེ སཧསྶཾ དཏྭཱ པུབྦེ ཨེཀདིཝསཾ ལབྷིཾསུ, ཨིདཱནི མུདྷཱ གཎྷནྟོཔི ནཏྠི, ཨེཝརཱུཔཾ ནཱམ རཱུཔཾ ཁཡཝཡཔྤཏྟཾ, པསྶཐ, བྷིཀྑཝེ, ཨཱཏུརཾ ཨཏྟབྷཱཝ’’ནྟི ཝཏྭཱ ཨིམཾ གཱཐམཱཧ –

༡༤༧.

‘‘པསྶ ཙིཏྟཀཏཾ བིམྦཾ, ཨརུཀཱཡཾ སམུསྶིཏཾ;

ཨཱཏུརཾ བཧུསངྐཔྤཾ, ཡསྶ ནཏྠི དྷུཝཾ ཋིཏཱི’’ཏི.

ཏཏྠ ཙིཏྟཀཏནྟི ཀཏཙིཏྟཾ, ཝཏྠཱབྷརཎམཱལཱལཏྟཀཱདཱིཧི ཝིཙིཏྟནྟི ཨཏྠོ. བིམྦནྟི དཱིགྷཱདིཡུཏྟཊྛཱནེསུ དཱིགྷཱདཱིཧི ཨངྒཔཙྩངྒེཧི སཎྛིཏཾ ཨཏྟབྷཱཝཾ. ཨརུཀཱཡནྟི ནཝནྣཾ ཝཎམུཁཱནཾ ཝསེན ཨརུབྷཱུཏཾ ཀཱཡཾ. སམུསྶིཏནྟི ཏཱིཧི ཨཊྛིསཏེཧི སམུསྶིཏཾ. ཨཱཏུརནྟི སབྦཀཱལཾ ཨིརིཡཱཔཐཱདཱིཧི པརིཧརིཏབྦཏཱཡ ནིཙྩགིལཱནཾ. བཧུསངྐཔྤནྟི མཧཱཛནེན བཧུདྷཱ སངྐཔྤིཏཾ. ཡསྶ ནཏྠི དྷུཝཾ ཋིཏཱིཏི ཡསྶ དྷུཝབྷཱཝོ ཝཱ ཋིཏིབྷཱཝོ ཝཱ ནཏྠི, ཨེཀནྟེན བྷེདནཝིཀིརཎཝིདྡྷཾསནདྷམྨམེཝེཏཾ, ཨིམཾ པསྶཐཱཏི ཨཏྠོ.

དེསནཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི, སོཔི བྷིཀྑུ སོཏཱཔཏྟིཕལེ པཏིཊྛཧཱིཏི.

སིརིམཱཝཏྠུ དུཏིཡཾ.

༣. ཨུཏྟརཱཐེརཱིཝཏྠུ

པརིཛིཎྞམིདནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨུཏྟརཱཐེརིཾ ནཱམ བྷིཀྑུནིཾ ཨཱརབྦྷ ཀཐེསི.

ཐེརཱི ཀིར ཝཱིསཝསྶསཏིཀཱ ཛཱཏིཡཱ པིཎྜཱཡ ཙརིཏྭཱ ལདྡྷཔིཎྜཔཱཏཱ ཨནྟརཝཱིཐིཡཾ ཨེཀཾ བྷིཀྑུཾ དིསྭཱ པིཎྜཔཱཏེན ཨཱཔུཙྪིཏྭཱ ཏསྶ ཨཔཊིཀྑིཔིཏྭཱ གཎྷནྟསྶ སབྦཾ དཏྭཱ ནིརཱཧཱརཱ ཨཧོསི. ཨེཝཾ དུཏིཡེཔི ཏཏིཡེཔི དིཝསེ ཏསྶེཝ བྷིཀྑུནོ ཏསྨིཾཡེཝ ཋཱནེ བྷཏྟཾ དཏྭཱ ནིརཱཧཱརཱ ཨཧོསི, ཙཏུཏྠེ དིཝསེ པན པིཎྜཱཡ ཙརནྟཱི ཨེཀསྨིཾ སམྦཱདྷཊྛཱནེ སཏྠཱརཾ དིསྭཱ པཊིཀྐམནྟཱི ཨོལམྦནྟཾ ཨཏྟནོ ཙཱིཝརཀཎྞཾ ཨཀྐམིཏྭཱ སཎྛཱཏུཾ ཨསཀྐོནྟཱི པརིཝཏྟིཏྭཱ པཏི. སཏྠཱ ཏསྶཱ སནྟིཀཾ གནྟྭཱ, ‘‘བྷགིནི, པརིཛིཎྞོ ཏེ ཨཏྟབྷཱཝོ ན ཙིརསྶེཝ བྷིཛྫིསྶཏཱི’’ཏི ཝཏྭཱ ཨིམཾ གཱཐམཱཧ –

༡༤༨.

‘‘པརིཛིཎྞམིདཾ རཱུཔཾ, རོགནཱིལ༹ཾ པབྷངྒུརཾ;

བྷིཛྫཏི པཱུཏིསནྡེཧོ, མརཎནྟཉྷི ཛཱིཝིཏ’’ནྟི.

ཏསྶཏྠོ – བྷགིནི ཨིདཾ ཏཝ སརཱིརསངྑཱཏཾ རཱུཔཾ མཧལླཀབྷཱཝེན པརིཛིཎྞཾ, ཏཉྩ ཁོ སབྦརོགཱནཾ ནིཝཱསཊྛཱནཊྛེན རོགནཱིལ༹ཾ, ཡཐཱ ཁོ པན ཏརུཎོཔི སིངྒཱལོ ‘‘ཛརསིངྒཱལོ’’ཏི ཝུཙྩཏི, ཏརུཎཱཔི གལོ༹ཙཱིལཏཱ ‘‘པཱུཏིལཏཱ’’ཏི ཝུཙྩཏི, ཨེཝཾ ཏདཧུཛཱཏཾ སུཝཎྞཝཎྞམྤི སམཱནཾ ནིཙྩཾ པགྒྷརཎཊྛེན པཱུཏིཏཱཡ པབྷངྒུརཾ, སོ ཨེས པཱུཏིཀོ སམཱནོ ཏཝ དེཧོ བྷིཛྫཏི, ན ཙིརསྶེཝ བྷིཛྫིསྶཏཱིཏི ཝེདིཏབྦོ. ཀིཾ ཀཱརཎཱ? མརཎནྟཉྷི ཛཱིཝིཏཾ ཡསྨཱ སབྦསཏྟཱནཾ ཛཱིཝིཏཾ མརཎཔརིཡོསཱནམེཝཱཏི ཝུཏྟཾ ཧོཏི.

དེསནཱཝསཱནེ སཱ ཐེརཱི སོཏཱཔཏྟིཕལཾ པཏྟཱ, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཨུཏྟརཱཐེརཱིཝཏྠུ ཏཏིཡཾ.

༤. སམྦཧུལཨདྷིམཱནིཀབྷིཀྑུཝཏྠུ

ཡཱནིམཱནཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ ཨདྷིམཱནིཀེ བྷིཀྑཱུ ཨཱརབྦྷ ཀཐེསི.

པཉྩསཏཱ ཀིར བྷིཀྑཱུ སཏྠུ སནྟིཀེ ཀམྨཊྛཱནཾ གཧེཏྭཱ ཨརཉྙཾ པཝིསིཏྭཱ གྷཊེནྟཱ ཝཱཡམནྟཱ ཛྷཱནཾ ནིབྦཏྟེཏྭཱ ‘‘ཀིལེསཱནཾ ཨསམུདཱཙཱརེན པབྦཛིཏཀིཙྩཾ ནོ ནིཔྥནྣཾ, ཨཏྟནཱ པཊིལདྡྷགུཎཾ སཏྠུ ཨཱརོཙེསྶཱམཱ’’ཏི ཨཱགམིཾསུ. སཏྠཱ ཏེསཾ བཧིདྭཱརཀོཊྛཀཾ པཏྟཀཱལེཡེཝ ཨཱནནྡཏྠེརཾ ཨཱཧ – ‘‘ཨཱནནྡ, ཨེཏེསཾ བྷིཀྑཱུནཾ པཝིསིཏྭཱ མཡཱ དིཊྛེན ཀམྨཾ ནཏྠི, ཨཱམཀསུསཱནཾ གནྟྭཱ ཏཏོ ཨཱགནྟྭཱ མཾ པསྶནྟཱུ’’ཏི. ཐེརོ གནྟྭཱ ཏེསཾ ཏམཏྠཾ ཨཱརོཙེསི. ཏེ ‘‘ཀིཾ ཨམྷཱཀཾ ཨཱམཀསུསཱནེནཱ’’ཏི ཨཝཏྭཱཝ ‘‘དཱིགྷདསྶིནཱ བུདྡྷེན ཀཱརཎཾ དིཊྛཾ བྷཝིསྶཏཱི’’ཏི ཨཱམཀསུསཱནཾ གནྟྭཱ ཏཏྠ ཀུཎཔཱནི པསྶནྟཱ ཨེཀཱཧདྭཱིཧཔཏིཏེསུ ཀུཎཔེསུ ཨཱགྷཱཏཾ པཊིལབྷིཏྭཱ ཏཾ ཁཎཾ པཏིཏེསུ ཨལླསརཱིརེསུ རཱགཾ ཨུཔྤཱདཡིཾསུ, ཏསྨིཾ ཁཎེ ཨཏྟནོ སཀིལེསབྷཱཝཾ ཛཱནིཾསུ. སཏྠཱ གནྡྷཀུཊིཡཾ ནིསིནྣོཝ ཨོབྷཱསཾ ཕརིཏྭཱ ཏེསཾ བྷིཀྑཱུནཾ སམྨུཁེ ཀཐེནྟོ ཝིཡ ‘‘ནཔྤཏིརཱུཔཾ ནུ ཁོ, བྷིཀྑཝེ, ཏུམྷཱཀཾ ཨེཝརཱུཔཾ ཨཊྛིསངྒྷཱཏཾ དིསྭཱ རཱགརཏིཾ ཨུཔྤཱདེཏུ’’ནྟི ཝཏྭཱ ཨིམཾ གཱཐམཱཧ –

༡༤༩.

‘‘ཡཱནིམཱནི ཨཔཏྠཱནི, ཨལཱབཱུནེཝ སཱརདེ;

ཀཱཔོཏཀཱནི ཨཊྛཱིནི, ཏཱནི དིསྭཱན ཀཱ རཏཱི’’ཏི.

ཏཏྠ ཨཔཏྠཱནཱིཏི ཚཌྜིཏཱནི. སཱརདེཏི སརདཀཱལེ ཝཱཏཱཏཔཔཧཏཱནི ཏཏྠ ཏཏྠ ཝིཔྤཀིཎྞཨལཱབཱུནི ཝིཡ. ཀཱཔོཏཀཱནཱིཏི ཀཔོཏཀཝཎྞཱནི. ཏཱནི དིསྭཱནཱཏི ཏཱནི ཨེཝརཱུཔཱནི ཨཊྛཱིནི དིསྭཱ ཏུམྷཱཀཾ ཀཱ རཏི, ནནུ ཨཔྤམཏྟཀམྤི ཀཱམརཏིཾ ཀཱཏུཾ ན ཝཊྚཏིཡེཝཱཏི ཨཏྠོ.

དེསནཱཝསཱནེ ཏེ བྷིཀྑཱུ ཡཐཱཋིཏཱཝ ཨརཧཏྟཾ པཏྭཱ བྷགཝནྟཾ ཨབྷིཏྠཝམཱནཱ ཨཱགནྟྭཱ ཝནྡིཾསཱུཏི.

སམྦཧུལཨདྷིམཱནིཀབྷིཀྑུཝཏྠུ ཙཏུཏྠཾ.

༥. ཛནཔདཀལྱཱཎཱི རཱུཔནནྡཱཐེརཱིཝཏྠུ

ཨཊྛཱིནཾ ནགརཾ ཀཏནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཛནཔདཀལྱཱཎིཾ རཱུཔནནྡཱཐེརིཾ ཨཱརབྦྷ ཀཐེསི.

སཱ ཀིར ཨེཀདིཝསཾ ཙིནྟེསི – ‘‘མཡ྄ཧཾ ཛེཊྛབྷཱཏིཀོ རཛྫསིརིཾ པཧཱཡ པབྦཛིཏྭཱ ལོཀེ ཨགྒཔུགྒལོ བུདྡྷོ ཛཱཏོ, པུཏྟོཔིསྶ རཱཧུལཀུམཱརོ པབྦཛིཏོ, བྷཏྟཱཔི མེ པབྦཛིཏོ, མཱཏཱཔི མེ པབྦཛིཏཱ, ཨཧམྤི ཨེཏྟཀེ ཉཱཏིཛནེ པབྦཛིཏེ གེཧེ ཀིཾ ཀརིསྶཱམི, པབྦཛིསྶཱམཱ’’ཏི. སཱ བྷིཀྑུནུཔསྶཡཾ གནྟྭཱ པབྦཛི ཉཱཏིསིནེཧེནེཝ, ནོ སདྡྷཱཡ, ཨབྷིརཱུཔཏཱཡ པན རཱུཔནནྡཱཏི པཉྙཱཡི. ‘‘སཏྠཱ ཀིར ‘རཱུཔཾ ཨནིཙྩཾ དུཀྑཾ ཨནཏྟཱ, ཝེདནཱ… སཉྙཱ… སངྑཱརཱ… ཝིཉྙཱཎཾ ཨནིཙྩཾ དུཀྑཾ ཨནཏྟཱ’ཏི ཝདེཏཱི’’ཏི སུཏྭཱ སཱ ཨེཝཾ དསྶནཱིཡེ པཱསཱདིཀེ མམཔི རཱུཔེ དོསཾ ཀཐེཡྻཱཏི སཏྠུ སམྨུཁཱིབྷཱཝཾ ན གཙྪཏི. སཱཝཏྠིཝཱསིནོ པཱཏོཝ དཱནཾ དཏྭཱ སམཱདིནྣུཔོསཐཱ སུདྡྷུཏྟརཱསངྒཱ གནྡྷམཱལཱདིཧཏྠཱ སཱཡནྷསམཡེ ཛེཏཝནེ སནྣིཔཏིཏྭཱ དྷམྨཾ སུཎནྟི. བྷིཀྑུནིསངྒྷོཔི སཏྠུ དྷམྨདེསནཱཡ ཨུཔྤནྣཙྪནྡོ ཝིཧཱརཾ གནྟྭཱ དྷམྨཾ སུཎཱཏི. དྷམྨཾ སུཏྭཱ ནགརཾ པཝིསནྟོ སཏྠུ གུཎཀཐཾ ཀཐེནྟོཝ པཝིསཏི.

ཙཏུཔྤམཱཎིཀེ ཧི ལོཀསནྣིཝཱསེ ཨཔྤཀཱཝ ཏེ སཏྟཱ, ཡེསཾ ཏཐཱགཏཾ པསྶནྟཱནཾ པསཱདོ ན ཨུཔྤཛྫཏི. རཱུཔཔྤམཱཎིཀཱཔི ཧི ཏཐཱགཏསྶ ལཀྑཎཱནུབྱཉྫནཔཊིམཎྜིཏཾ སུཝཎྞཝཎྞཾ སརཱིརཾ དིསྭཱ པསཱིདནྟི, གྷོསཔྤམཱཎིཀཱཔི ཨནེཀཱནི ཛཱཏིསཏཱནི ནིསྶཱཡ པཝཏྟཾ སཏྠུ གུཎགྷོསཉྩེཝ ཨཊྛངྒསམནྣཱགཏཾ དྷམྨདེསནཱགྷོསཉྩ སུཏྭཱ པསཱིདནྟི, ལཱུཁཔྤམཱཎིཀཱཔིསྶ ཙཱིཝརཱདིལཱུཁཏཾ པཊིཙྩ པསཱིདནྟི, དྷམྨཔྤམཱཎིཀཱཔི ‘‘ཨེཝརཱུཔཾ དསབལསྶ སཱིལཾ, ཨེཝརཱུཔོ སམཱདྷི, ཨེཝརཱུཔཱ པཉྙཱ, བྷགཝཱ སཱིལཱདཱིཧི གུཎེཧི ཨསམོ ཨཔྤཊིཔུགྒལོ’’ཏི པསཱིདནྟི. ཏེསཾ ཏཐཱགཏསྶ གུཎཾ ཀཐེནྟཱནཾ མུཁཾ ནཔྤཧོཏི. རཱུཔནནྡཱ བྷིཀྑུནཱིནཉྩེཝ ཨུཔཱསིཀཱནཉྩ སནྟིཀཱ ཏཐཱགཏསྶ གུཎཀཐཾ སུཏྭཱ ཙིནྟེསི – ‘‘ཨཏིཝིཡ མེ བྷཱཏིཀསྶ ཝཎྞཾ ཀཐེནྟིཡེཝ. ཨེཀདིཝསམྤི མེ རཱུཔེ དོསཾ ཀཐེནྟོ ཀིཏྟཀཾ ཀཐེསྶཏི. ཡཾནཱུནཱཧཾ བྷིཀྑུནཱིཧི སདྡྷིཾ གནྟྭཱ ཨཏྟཱནཾ ཨདསྶེཏྭཱཝ ཏཐཱགཏཾ པསྶིཏྭཱ དྷམྨམསྶ སུཎིཏྭཱ ཨཱགཙྪེཡྻ’’ནྟི. སཱ ‘‘ཨཧམྤི ཨཛྫ དྷམྨསྶཝནཾ གམིསྶཱམཱི’’ཏི བྷིཀྑུནཱིནཾ ཨཱརོཙེསི.

བྷིཀྑུནིཡོ ‘‘ཙིརསྶཾ ཝཏ རཱུཔནནྡཱཡ སཏྠུ ཨུཔཊྛཱནཾ གནྟུཀཱམཏཱ ཨུཔྤནྣཱ, ཨཛྫ སཏྠཱ ཨིམཾ ནིསྶཱཡ ཝིཙིཏྲདྷམྨདེསནཾ ནཱནཱནཡཾ དེསེསྶཏཱི’’ཏི ཏུཊྛམཱནསཱ ཏཾ ཨཱདཱཡ ནིཀྑམིཾསུ. སཱ ནིཀྑནྟཀཱལཏོ པཊྛཱཡ ‘‘ཨཧཾ ཨཏྟཱནཾ ནེཝ དསྶེསྶཱམཱི’’ཏི ཙིནྟེསི. སཏྠཱ ‘‘ཨཛྫ རཱུཔནནྡཱ མཡ྄ཧཾ ཨུཔཊྛཱནཾ ཨཱགམིསྶཏི, ཀཱིདིསཱི ནུ ཁོ ཏསྶཱ དྷམྨདེསནཱ སཔྤཱཡཱ’’ཏི ཙིནྟེཏྭཱ ‘‘རཱུཔགརུཀཱ ཨེསཱ ཨཏྟབྷཱཝེ བལཝསིནེཧཱ, ཀཎྚཀེན ཀཎྚཀུདྡྷརཎཾ ཝིཡ རཱུཔེནེཝསྶཱ རཱུཔམདནིམྨདནཾ སཔྤཱཡ’’ནྟི སནྣིཊྛཱནཾ ཀཏྭཱ ཏསྶཱ ཝིཧཱརཾ པཝིསནསམཡེ ཨེཀཾ པན ཨབྷིརཱུཔཾ ཨིཏྠིཾ སོལ༹སཝསྶུདྡེསིཀཾ རཏྟཝཏྠནིཝཏྠཾ སབྦཱབྷརཎཔཊིམཎྜིཏཾ བཱིཛནིཾ གཧེཏྭཱ ཨཏྟནོ སནྟིཀེ ཋཏྭཱ བཱིཛཡམཱནཾ ཨིདྡྷིབལེན ཨབྷིནིམྨིནི. ཏཾ ཁོ པན ཨིཏྠིཾ སཏྠཱ ཙེཝ པསྶཏི རཱུཔནནྡཱ ཙ. སཱ བྷིཀྑུནཱིཧི སདྡྷིཾ ཝིཧཱརཾ པཝིསིཏྭཱ བྷིཀྑུནཱིནཾ པིཊྛིཔསྶེ ཋཏྭཱ པཉྩཔཏིཊྛིཏེན སཏྠཱརཾ ཝནྡིཏྭཱ བྷིཀྑུནཱིནཾ ཨནྟརེ ནིསིནྣཱ པཱདནྟཏོ པཊྛཱཡ སཏྠཱརཾ ཨོལོཀེནྟཱི ལཀྑཎཝིཙིཏྟཾ ཨནུབྱཉྫནསམུཛྫལཾ བྱཱམཔྤབྷཱཔརིཀྑིཏྟཾ སཏྠུ སརཱིརཾ དིསྭཱ པུཎྞཙནྡསསྶིརིཀཾ མུཁཾ ཨོལོཀེནྟཱི སམཱིཔེ ཋིཏཾ ཨིཏྠིརཱུཔཾ ཨདྡས. སཱ ཏཾ ཨོལོཀེཏྭཱ ཨཏྟབྷཱཝཾ ཨོལོཀེནྟཱི སུཝཎྞརཱཛཧཾསིཡཱ པུརཏོ ཀཱཀཱིསདིསཾ ཨཏྟཱནཾ ཨཝམཉྙི. ཨིདྡྷིམཡརཱུཔཾ དིཊྛཀཱལཏོ པཊྛཱཡེཝ ཧི ཏསྶཱ ཨཀྑཱིནི བྷམིཾསུ. སཱ ‘‘ཨཧོ ཨིམིསྶཱ ཀེསཱ སོབྷནཱ, ཨཧོ ནལཱཊཾ སོབྷན’’ནྟི སབྦེསཾ སཱརཱིརཔྤདེསཱནཾ རཱུཔསིརིཡཱ སམཱཀཌྜྷིཏཙིཏྟཱ ཏསྨིཾ རཱུཔེ བལཝསིནེཧཱ ཨཧོསི.

སཏྠཱ ཏསྶཱ ཏཏྠ ཨབྷིརཏིཾ ཉཏྭཱ དྷམྨཾ དེསེནྟོཝ ཏཾ རཱུཔཾ སོལ༹སཝསྶུདྡེསིཀབྷཱཝཾ ཨཏིཀྐམིཏྭཱ ཝཱིསཏིཝསྶུདྡེསིཀཾ ཀཏྭཱ དསྶེསི. རཱུཔནནྡཱ ཨོལོཀེཏྭཱ ‘‘ན ཝཏིདཾ རཱུཔཾ པུརིམསདིས’’ནྟི ཐོཀཾ ཝིརཏྟཙིཏྟཱ ཨཧོསི. སཏྠཱ ཨནུཀྐམེནེཝ ཏསྶཱ ཨིཏྠིཡཱ སཀིཾ ཝིཛཱཏཝཎྞཾ མཛ྄ཛྷིམིཏྠིཝཎྞཾ ཛརཱཛིཎྞམཧལླིཀིཏྠིཝཎྞཉྩ དསྶེསི. སཱཔི ཨནུཔུབྦེནེཝ ‘‘ཨིདམྤི ཨནྟརཧིཏཾ, ཨིདམྤི ཨནྟརཧིཏ’’ནྟི ཛརཱཛིཎྞཀཱལེ ཏཾ ཝིརཛྫམཱནཱ ཁཎྜདནྟིཾ པལིཏསིརཾ ཨོབྷགྒཾ གོཔཱནསིཝངྐཾ དཎྜཔརཱཡཎཾ པཝེདྷམཱནཾ དིསྭཱ ཨཏིཝིཡ ཝིརཛྫི. ཨཐ སཏྠཱ ཏཾ བྱཱདྷིནཱ ཨབྷིབྷཱུཏཾ ཀཏྭཱ དསྶེསི. སཱ ཏངྑཎཉྙེཝ དཎྜཉྩ ཏཱལཝཎྚཉྩ ཚཌྜེཏྭཱ མཧཱཝིརཝཾ ཝིརཝམཱནཱ བྷཱུམིཡཾ པཏིཏྭཱ སཀེ མུཏྟཀརཱིསེ ནིམུགྒཱ ཨཔརཱཔརཾ པརིཝཏྟི. རཱུཔནནྡཱ ཏམྤི དིསྭཱ ཨཏིཝིཡ ཝིརཛྫི. སཏྠཱཔི ཏསྶཱ ཨིཏྠིཡཱ མརཎཾ དསྶེསི. སཱ ཏངྑཎཾཡེཝ ཨུདྡྷུམཱཏཀབྷཱཝཾ ཨཱཔཛྫི, ནཝཧི ཝཎམུཁེཧི པུབྦཝཊྚིཡོ ཙེཝ པུལ༹ཝཱ ཙ པགྒྷརིཾསུ, ཀཱཀཱདཡོ སནྣིཔཏིཏྭཱ ཝིལུམྤིཾསུ. རཱུཔནནྡཱཔི ཏཾ ཨོལོཀེཏྭཱ ‘‘ཨཡཾ ཨིཏྠཱི ཨིམསྨིཾཡེཝ ཋཱནེ ཛརཾ པཏྟཱ, བྱཱདྷིཾ པཏྟཱ, མརཎཾ པཏྟཱ, ཨིམསྶཱཔི མེ ཨཏྟབྷཱཝསྶ ཨེཝམེཝ ཛརཱབྱཱདྷིམརཎཱནི ཨཱགམིསྶནྟཱི’’ཏི ཨཏྟབྷཱཝཾ ཨནིཙྩཏོ པསྶི. ཨནིཙྩཏོ དིཊྛཏྟཱ ཨེཝ པན དུཀྑཏོ ཨནཏྟཏོ དིཊྛོཡེཝ ཧོཏི. ཨཐསྶཱ ཏཡོ བྷཝཱ ཨཱདིཏྟཱ གེཧཱ ཝིཡ གཱིཝཱཡ བདྡྷཀུཎཔཾ ཝིཡ ཙ ཨུཔཊྛཧིཾསུ, ཀམྨཊྛཱནཱབྷིམུཁཾ ཙིཏྟཾ པཀྑནྡི. སཏྠཱ ཏཱཡ ཨནིཙྩཏོ དིཊྛབྷཱཝཾ ཉཏྭཱ ‘‘སཀྑིསྶཏི ནུ ཁོ སཡམེཝ ཨཏྟནོ པཏིཊྛཾ ཀཱཏུ’’ནྟི ཨོལོཀེནྟོ ‘‘ན སཀྑིསྶཏི, བཧིདྡྷཱ པཙྩཡཾ ལདྡྷུཾ ཝཊྚཏཱི’’ཏི ཙིནྟེཏྭཱ ཏསྶཱ སཔྤཱཡཝསེན དྷམྨཾ དེསེནྟོ ཨཱཧ –

‘‘ཨཱཏུརཾ ཨསུཙིཾ པཱུཏིཾ, པསྶ ནནྡེ སམུསྶཡཾ;

ཨུགྒྷརནྟཾ པགྒྷརནྟཾ, བཱལཱནཾ ཨབྷིཔཏྠིཏཾ.

‘‘ཡཐཱ ཨིདཾ ཏཐཱ ཨེཏཾ, ཡཐཱ ཨེཏཾ ཏཐཱ ཨིདཾ;

དྷཱཏུཏོ སུཉྙཏོ པསྶ, མཱ ལོཀཾ པུནརཱགམི;

བྷཝེ ཚནྡཾ ཝིརཱཛེཏྭཱ, ཨུཔསནྟོ ཙརིསྶཏཱི’’ཏི. –

ཨིཏྠཾ སུདཾ བྷགཝཱ ནནྡཾ བྷིཀྑུནིཾ ཨཱརབྦྷ ཨིམཱ གཱཐཱཡོ ཨབྷཱསིཏྠཱཏི. ནནྡཱ དེསནཱནུསཱརེན ཉཱཎཾ པེསེཏྭཱ སོཏཱཔཏྟིཕལཾ པཱཔུཎི. ཨཐསྶཱ ཨུཔརི ཏིཎྞཾ མགྒཕལཱནཾ ཝིཔསྶནཱཔརིཝཱསཏྠཱཡ སུཉྙཏཱཀམྨཊྛཱནཾ ཀཐེཏུཾ, ‘‘ནནྡེ, མཱ ‘ཨིམསྨིཾ སརཱིརེ སཱརོ ཨཏྠཱི’ཏི སཉྙཾ ཀརི. ཨཔྤམཏྟཀོཔི ཧི ཨེཏྠ སཱརོ ནཏྠི, ཏཱིཎི ཨཊྛིསཏཱནི ཨུསྶཱཔེཏྭཱ ཀཏཾ ཨཊྛིནགརམེཏ’’ནྟི ཝཏྭཱ ཨིམཾ གཱཐམཱཧ –

༡༥༠.

‘‘ཨཊྛཱིནཾ ནགརཾ ཀཏཾ, མཾསལོཧིཏལེཔནཾ;

ཡཏྠ ཛརཱ ཙ མཙྩུ ཙ, མཱནོ མཀྑོ ཙ ཨོཧིཏོ’’ཏི.

ཏསྶཏྠོ – ཡཐེཝ ཧི པུབྦཎྞཱཔརཎྞཱདཱིནཾ ཨོདཧནཏྠཱཡ ཀཊྛཱནི ཨུསྶཱཔེཏྭཱ ཝལླཱིཧི བནྡྷིཏྭཱ མཏྟིཀཱཡ ཝིལིམྤེཏྭཱ ནགརསངྑཱཏཾ བཧིདྡྷཱ གེཧཾ ཀརོནྟི, ཨེཝམིདཾ ཨཛ྄ཛྷཏྟིཀམྤི ཏཱིཎི ཨཊྛིསཏཱནི ཨུསྶཱཔེཏྭཱ ནྷཱརུཝིནདྡྷཾ མཾསལོཧིཏལེཔནཾ ཏཙཔཊིཙྪནྣཾ ཛཱིརཎལཀྑཎཱཡ ཛརཱཡ མརཎལཀྑཎསྶ མཙྩུནོ ཨཱརོཧསམྤདཱདཱིནི པཊིཙྩ མཉྙནལཀྑཎསྶ མཱནསྶ སུཀཏཀཱརཎཝིནཱསནལཀྑཎསྶ མཀྑསྶ ཙ ཨོདཧནཏྠཱཡ ནགརཾ ཀཏཾ. ཨེཝརཱུཔོ ཨེཝ ཧི ཨེཏྠ ཀཱཡིཀཙེཏསིཀོ ཨཱབཱདྷོ ཨོཧིཏོ, ཨིཏོ ཨུདྡྷཾ ཀིཉྩི གཡ྄ཧཱུཔགཾ ནཏྠཱིཏི.

དེསནཱཝསཱནེ སཱ ཐེརཱི ཨརཧཏྟཾ པཱཔུཎི, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཛནཔདཀལྱཱཎཱི རཱུཔནནྡཱཐེརཱིཝཏྠུ པཉྩམཾ.

༦. མལླིཀཱདེཝཱིཝཏྠུ

ཛཱིརནྟི ཝེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མལླིཀཾ དེཝིཾ ཨཱརབྦྷ ཀཐེསི.

སཱ ཀིར ཨེཀདིཝསཾ ནྷཱནཀོཊྛཀཾ པཝིཊྛཱ མུཁཾ དྷོཝིཏྭཱ ཨོནཏསརཱིརཱ ཛངྒྷཾ དྷོཝིཏུཾ ཨཱརབྷི. ཏཱཡ ཙ སདྡྷིཾཡེཝ པཝིཊྛོ ཨེཀོ ཝལླབྷསུནཁོ ཨཏྠི. སོ ཏཾ ཏཐཱ ཨོནཏཾ དིསྭཱ ཨསདྡྷམྨསནྠཝཾ ཀཱཏུཾ ཨཱརབྷི. སཱ ཕསྶཾ སཱདིཡནྟཱི ཨཊྛཱསི. རཱཛཱཔི ཨུཔརིཔཱསཱདེ ཝཱཏཔཱནེན ཨོལོཀེནྟོ ཏཾ དིསྭཱ ཏཏོ ཨཱགཏཀཱལེ ‘‘ནསྶ, ཝསལི, ཀསྨཱ ཨེཝརཱུཔམཀཱསཱི’’ཏི ཨཱཧ. ཀིཾ མཡཱ ཀཏཾ, དེཝཱཏི. སུནཁེན སདྡྷིཾ སནྠཝོཏི. ནཏྠེཏཾ, དེཝཱཏི. མཡཱ སཱམཾ དིཊྛཾ, ནཱཧཾ ཏཝ སདྡཧིསྶཱམི, ནསྶ, ཝསལཱིཏི. ‘‘མཧཱརཱཛ, ཡོ ཀོཙི ཨིམཾ ཀོཊྛཀཾ པཝིཊྛོ ཨིམིནཱ ཝཱཏཔཱནེན ཨོལོཀེནྟསྶ ཨེཀོཝ དྭིདྷཱ པཉྙཱཡཏཱི’’ཏི ཨབྷཱུཏཾ ཀཐེསི. དེཝ, སཙེ མེ སདྡཧསི, ཨེཏཾ ཀོཊྛཀཾ པཝིས, ཨཧཾ ཏཾ ཨིམིནཱ ཝཱཏཔཱནེན ཨོལོཀེསྶཱམཱིཏི. རཱཛཱ མཱུལ༹ྷདྷཱཏུཀོ ཏསྶཱ ཝཙནཾ སདྡཧིཏྭཱ ཀོཊྛཀཾ པཱཝིསི. སཱཔི ཁོ དེཝཱི ཝཱཏཔཱནེ ཋཏྭཱ ཨོལོཀེནྟཱི ‘‘ཨནྡྷབཱལ, མཧཱརཱཛ, ཀིཾ ནཱམེཏཾ, ཨཛིཀཱཡ སདྡྷིཾ སནྠཝཾ ཀརོསཱི’’ཏི ཨཱཧ. ‘‘ནཱཧཾ, བྷདྡེ, ཨེཝརཱུཔཾ ཀརོམཱི’’ཏི ཙ ཝུཏྟེཔི ‘‘མཡཱ སཱམཾ དིཊྛཾ, ནཱཧཾ ཏཝ སདྡཧིསྶཱམཱི’’ཏི ཨཱཧ.

ཏཾ སུཏྭཱ རཱཛཱ ‘‘ཨདྡྷཱ ཨིམཾ ཀོཊྛཀཾ པཝིཊྛོ ཨེཀོཝ དྭིདྷཱ པཉྙཱཡཏཱི’’ཏི སདྡཧི. མལླིཀཱ ཙིནྟེསི – ‘‘ཨཡཾ རཱཛཱ ཨནྡྷབཱལཏཱཡ མཡཱ ཝཉྩིཏོ, པཱཔཾ མེ ཀཏཾ, ཨཡཉྩ མེ ཨབྷཱུཏེན ཨབྦྷཱཙིཀྑིཏོ, ཨིདཾ མེ ཀམྨཾ སཏྠཱཔི ཛཱནིསྶཏི, དྭེ ཨགྒསཱཝཀཱཔི ཨསཱིཏི མཧཱསཱཝཀཱཔི ཛཱནིསྶནྟི, ཨཧོ ཝཏ མེ བྷཱརིཡཾ ཀམྨཾ ཀཏ’’ནྟི. ཨཡཾ ཀིར རཉྙོ ཨསདིསདཱནེ སཧཱཡིཀཱ ཨཧོསི. ཏཏྠ ཙ ཨེཀདིཝསཾ ཀཏཔརིཙྩཱགོ དྷནསྶ ཙུདྡསཀོཊིཨགྒྷནཀོ ཨཧོསི. ཏཐཱགཏསྶ སེཏཙྪཏྟཾ ནིསཱིདནཔལླངྐོ ཨཱདྷཱརཀོ པཱདཔཱིཋནྟི ཨིམཱནི པན ཙཏྟཱརི ཨནགྒྷཱནེཝ ཨཧེསུཾ. སཱ མརཎཀཱལེ ཨེཝརཱུཔཾ མཧཱཔརིཙྩཱགཾ ནཱནུསྶརིཏྭཱ ཏདེཝ པཱཔཀམྨཾ ཨནུསྶརནྟཱི ཀཱལཾ ཀཏྭཱ ཨཝཱིཙིམྷི ནིབྦཏྟི. རཉྙོ པན སཱ ཨཏིཝིཡ པིཡཱ ཨཧོསི. སོ བལཝསོཀཱབྷིབྷཱུཏོ ཏསྶཱ སརཱིརཀིཙྩཾ ཀཱརེཏྭཱ ‘‘ནིབྦཏྟཊྛཱནམསྶཱ པུཙྪིསྶཱམཱི’’ཏི སཏྠུ སནྟིཀཾ ཨགམཱསི. སཏྠཱ ཡཐཱ སོ ཨཱགཏཀཱརཎཾ ན སརཏི, ཏཐཱ ཨཀཱསི. སོ སཏྠུ སནྟིཀེ སཱརཎཱིཡདྷམྨཀཐཾ སུཏྭཱ གེཧཾ པཝིཊྛཀཱལེ སརིཏྭཱ ‘‘ཨཧཾ བྷཎེ མལླིཀཱཡ ནིབྦཏྟཊྛཱནཾ པུཙྪིསྶཱམཱིཏི སཏྠུ སནྟིཀཾ གནྟྭཱ པམུཊྛོ, སྭེ པུན པུཙྪིསྶཱམཱི’’ཏི པུནདིཝསེཔི ཨགམཱསི. སཏྠཱཔི པཊིཔཱཊིཡཱ སཏྟ དིཝསཱནི ཡཐཱ སོ ན སརཏི, ཏཐཱ ཨཀཱསི. སཱཔི སཏྟཱཧམེཝ ནིརཡེ པཙྩིཏྭཱ ཨཊྛམེ དིཝསེ ཏཏོ ཙུཏཱ ཏུསིཏབྷཝནེ ནིབྦཏྟི. ཀསྨཱ པནསྶ སཏྠཱ ཨསརཎབྷཱཝཾ ཨཀཱསཱིཏི? སཱ ཀིར ཏསྶ ཨཏིཝིཡ པིཡཱ ཨཧོསི མནཱཔཱ, ཏསྨཱ ཏསྶཱ ནིརཡེ ནིབྦཏྟབྷཱཝཾ སུཏྭཱ ‘‘སཙེ ཨེཝརཱུཔཱ སདྡྷཱསམྤནྣཱ ནིརཡེ ནིབྦཏྟཱ, དཱནཾ དཏྭཱ ཀིཾ ཀརིསྶཱམཱི’’ཏི མིཙྪཱདིཊྛིཾ གཧེཏྭཱ པཉྩནྣཾ བྷིཀྑུསཏཱནཾ གེཧེ པཝཏྟཾ ནིཙྩབྷཏྟཾ ཧརཱཔེཏྭཱ ནིརཡེ ནིབྦཏྟེཡྻ, ཏེནསྶ སཏྠཱ སཏྟཱཧཾ ཨསརཎབྷཱཝཾ ཀཏྭཱ ཨཊྛམེ དིཝསེ པིཎྜཱཡ ཙརནྟོ སཡམེཝ རཱཛཀུལདྭཱརཾ ཨགམཱསི.

རཱཛཱ ‘‘སཏྠཱ ཨཱགཏོ’’ཏི སུཏྭཱ ནིཀྑམིཏྭཱ པཏྟཾ ཨཱདཱཡ པཱསཱདཾ ཨབྷིརུཧིཏུཾ ཨཱརབྷི. སཏྠཱ པན རཐསཱལཱཡ ནིསཱིདིཏུཾ ཨཱཀཱརཾ དསྶེསི. རཱཛཱ སཏྠཱརཾ ཏཏྠེཝ ནིསཱིདཱཔེཏྭཱ ཡཱགུཁཛྫཀེན པཊིམཱནེཏྭཱ ཝནྡིཏྭཱ ནིསིནྣོཝ ཨཧཾ, བྷནྟེ, མལླིཀཱཡ དེཝིཡཱ ནིབྦཏྟཊྛཱནཾ པུཙྪིསྶཱམཱིཏི གནྟྭཱ པམུཊྛོ, ཀཏྠ ནུ ཁོ སཱ, བྷནྟེ, ནིབྦཏྟཱཏི. ཏུསིཏབྷཝནེ, མཧཱརཱཛཱཏི, བྷནྟེ, ཏཱཡ ཏུསིཏབྷཝནེ ཨནིབྦཏྟནྟིཡཱ ཀོ ཨཉྙོ ནིབྦཏྟིསྶཏི, བྷནྟེ, ནཏྠི ཏཱཡ སདིསཱ ཨིཏྠཱི. ཏསྶཱ ཧི ནིསིནྣཊྛཱནཱདཱིསུ ‘‘སྭེ ཏཐཱགཏསྶ ཨིདཾ དསྶཱམི, ཨིདཾ ཀརིསྶཱམཱི’’ཏི དཱནསཾཝིདྷཱནཾ ཋཔེཏྭཱ ཨཉྙཾ ཀིཙྩམེཝ ནཏྠི, བྷནྟེ, ཏསྶཱ པརལོཀཾ གཏཀཱལཏོ པཊྛཱཡ སརཱིརཾ མེ ན ཝཧཏཱིཏི. ཨཐ ནཾ སཏྠཱ ‘‘མཱ ཙིནྟཡི, མཧཱརཱཛ, སབྦེསཾ དྷུཝདྷམྨོ ཨཡ’’ནྟི ཝཏྭཱ ‘‘ཨཡཾ, མཧཱརཱཛ, རཐོ ཀསྶཱ’’ཏི པུཙྪི. ཏཾ སུཏྭཱ རཱཛཱ སིརསྨིཾ ཨཉྫལིཾ པཏིཊྛཱཔེཏྭཱ ‘‘པིཏཱམཧསྶ མེ, བྷནྟེ’’ཏི ཨཱཧ. ‘‘ཨཡཾ ཀསྶཱ’’ཏི? ‘‘པིཏུ མེ, བྷནྟེ’’ཏི. ‘‘ཨཡཾ པན རཐོ ཀསྶཱ’’ཏི? ‘‘མམ, བྷནྟེ’’ཏི. ཨེཝཾ ཝུཏྟེ སཏྠཱ, ‘‘མཧཱརཱཛ, ཏཝ པིཏཱམཧསྶ རཐོ ཏེནེཝཱཀཱརེན ཏཝ པིཏུ རཐཾ ན པཱཔུཎི, ཏཝ པིཏུ རཐོ ཏཝ རཐཾ ན པཱཔུཎི, ཨེཝརཱུཔསྶ ནཱམ ཀཊྛཀལིངྒརསྶཱཔི ཛརཱ ཨཱགཙྪཏི, ཀིམངྒཾ པན ཨཏྟབྷཱཝསྶ. མཧཱརཱཛ, སཔྤུརིསདྷམྨསྶེཝ ཧི ཛརཱ ནཏྠི, སཏྟཱ པན ཨཛཱིརཀཱ ནཱམ ནཏྠཱི’’ཏི ཝཏྭཱ ཨིམཾ གཱཐམཱཧ –

༡༥༡.

‘‘ཛཱིརནྟི ཝེ རཱཛརཐཱ སུཙིཏྟཱ,

ཨཐོ སརཱིརམྤི ཛརཾ ཨུཔེཏི;

སཏཉྩ དྷམྨོ ན ཛརཾ ཨུཔེཏི,

སནྟོ ཧཝེ སབྦྷི པཝེདཡནྟཱི’’ཏི.

ཏཏྠ ཝེཏི ནིཔཱཏོ. སུཙིཏྟཱཏི སཏྟཧི རཏནེཧི ཨཔརེཧི ཙ རཐཱལངྐཱརེཧི སུཊྛུ ཙིཏྟིཏཱ རཱཛཱུནཾ རཐཱཔི ཛཱིརནྟི. སརཱིརམྤཱིཏི ན ཀེཝལཾ རཐཱ ཨེཝ, ཨིདཾ སུཔྤཊིཛགྒིཏཾ སརཱིརམྤི ཁཎྜིཙྩཱདཱིནི པཱཔུཎནྟཾ ཛརཾ ཨུཔེཏི. སཏཉྩཱཏི བུདྡྷཱདཱིནཾ པན སནྟཱནཾ ནཝཝིདྷོ ལོཀུཏྟརདྷམྨོ ཙ ཀིཉྩི ཨུཔགྷཱཏཾ ན ཨུཔེཏཱིཏི ན ཛརཾ ཨུཔེཏི ནཱམ. པཝེདཡནྟཱིཏི ཨེཝཾ སནྟོ བུདྡྷཱདཡོ སབྦྷི པཎྜིཏེཧི སདྡྷིཾ ཀཐེནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མལླིཀཱདེཝཱིཝཏྠུ ཚཊྛཾ.

༧. ལཱལུ༹དཱཡིཏྠེརཝཏྠུ

ཨཔྤསྶུཏཱཡནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ལཱལུ༹དཱཡིཏྠེརཾ ཨཱརབྦྷ ཀཐེསི.

སོ ཀིར མངྒལཾ ཀརོནྟཱནཾ གེཧཾ གནྟྭཱ ‘‘ཏིརོཀུཊྚེསུ ཏིཊྛནྟཱི’’ཏིཨཱདིནཱ (ཁུ. པཱ. ༧.༡; པེ. ཝ. ༡༤) ནཡེན ཨཝམངྒལཾ ཀཐེཏི, ཨཝམངྒལཾ ཀརོནྟཱནཾ གེཧཾ གནྟྭཱ ཏིརོཀུཊྚཱདཱིསུ ཀཐེཏབྦེསུ ‘‘དཱནཉྩ དྷམྨཙརིཡཱ ཙཱ’’ཏིཨཱདིནཱ (ཁུ. པཱ. ༥.༧; སུ. ནི. ༢༦༦) ནཡེན མངྒལགཱཐཱ ཝཱ ‘‘ཡཾ ཀིཉྩི ཝིཏྟཾ ཨིདྷ ཝཱ ཧུརཾ ཝཱ’’ཏི རཏནསུཏྟཾ (ཁུ. པཱ. ༦.༣; སུ. ནི. ༢༢༦) ཝཱ ཀཐེཏི. ཨེཝཾ ཏེསུ ཏེསུ ཋཱནེསུ ‘‘ཨཉྙཾ ཀཐེསྶཱམཱི’’ཏི ཨཉྙཾ ཀཐེནྟོཔི ‘‘ཨཉྙཾ ཀཐེམཱི’’ཏི ན ཛཱནཱཏི. བྷིཀྑཱུ ཏསྶ ཀཐཾ སུཏྭཱ སཏྠུ ཨཱརོཙེསུཾ – ‘‘ཀིཾ, བྷནྟེ, ལཱལུ༹དཱཡིསྶ མངྒལཱམངྒལཊྛཱནེསུ གམནེན, ཨཉྙསྨིཾ ཀཐེཏབྦེ ཨཉྙམེཝ ཀཐེཏཱི’’ཏི. སཏྠཱ ‘‘ན, བྷིཀྑཝེ, ཨིདཱནེཝེས ཨེཝཾ ཀཐེཏི, པུབྦེཔི ཨཉྙསྨིཾ ཀཐེཏབྦེ ཨཉྙམེཝ ཀཐེསཱི’’ཏི ཝཏྭཱ ཨཏཱིཏཾ ཨཱཧརི –

ཨཏཱིཏེ ཀིར བཱརཱཎསིཡཾ ཨགྒིདཏྟསྶ ནཱམ བྲཱཧྨཎསྶ པུཏྟོ སོམདཏྟཀུམཱརོ ནཱམ རཱཛཱནཾ ཨུཔཊྛཧི. སོ རཉྙཱ པིཡོ ཨཧོསི མནཱཔོ. བྲཱཧྨཎོ པན ཀསིཀམྨཾ ནིསྶཱཡ ཛཱིཝཏི. ཏསྶ དྭེཡེཝ གོཎཱ ཨཧེསུཾ. ཏེསུ ཨེཀོ མཏོ. བྲཱཧྨཎོ པུཏྟཾ ཨཱཧ – ‘‘ཏཱཏ, སོམདཏྟ, རཱཛཱནཾ མེ ཡཱཙིཏྭཱ ཨེཀཾ གོཎཾ ཨཱཧརཱ’’ཏི. སོམདཏྟོ ‘‘སཙཱཧཾ རཱཛཱནཾ ཡཱཙིསྶཱམི, ལཧུབྷཱཝོ མེ པཉྙཱཡིསྶཏཱི’’ཏི ཙིནྟེཏྭཱ ‘‘ཏུམྷེཡེཝ, ཏཱཏ, རཱཛཱནཾ ཡཱཙཐཱ’’ཏི ཝཏྭཱ ‘‘ཏེན ཧི, ཏཱཏ, མཾ གཧེཏྭཱ ཡཱཧཱི’’ཏི ཝུཏྟོ ཙིནྟེསི – ‘‘ཨཡཾ བྲཱཧྨཎོ དནྡྷཔཉྙོ ཨབྷིཀྐམཱདིཝཙནམཏྟམྤི ན ཛཱནཱཏི, ཨཉྙསྨིཾ ཝཏྟབྦེ ཨཉྙམེཝ ཝདཏི, སིཀྑཱཔེཏྭཱ པན ནཾ ནེསྶཱམཱི’’ཏི. སོ ཏཾ ཨཱདཱཡ བཱིརཎཏྠམྦྷཀཾ ནཱམ སུསཱནཾ གནྟྭཱ ཏིཎཀལཱཔེ བནྡྷིཏྭཱ ‘‘ཨཡཾ རཱཛཱ, ཨཡཾ ཨུཔརཱཛཱ, ཨཡཾ སེནཱཔཏཱི’’ཏི ནཱམཱནི ཀཏྭཱ པཊིཔཱཊིཡཱ པིཏུ དསྶེཏྭཱ ‘‘ཏུམྷེཧི རཱཛཀུལཾ གནྟྭཱ ཨེཝཾ ཨབྷིཀྐམིཏབྦཾ, ཨེཝཾ པཊིཀྐམིཏབྦཾ, ཨེཝཾ ནཱམ རཱཛཱ ཝཏྟབྦོ, ཨེཝཾ ནཱམ ཨུཔརཱཛཱ, རཱཛཱནཾ པན ཨུཔསངྐམིཏྭཱ ‘ཛཡཏུ བྷཝཾ, མཧཱརཱཛཱ’ཏི ཝཏྭཱ ཨེཝཾ ཋཏྭཱ ཨིམཾ གཱཐཾ ཝཏྭཱ གོཎཾ ཡཱཙེཡྻཱཐཱ’’ཏི གཱཐཾ ཨུགྒཎྷཱཔེསི –

‘‘དྭེ མེ གོཎཱ མཧཱརཱཛ, ཡེཧི ཁེཏྟཾ ཀསཱམསེ;

ཏེསུ ཨེཀོ མཏོ དེཝ, དུཏིཡཾ དེཧི ཁཏྟིཡཱ’’ཏི.

སོ ཧི སཾཝཙྪརམཏྟེན ཏཾ གཱཐཾ པགུཎཾ ཀཏྭཱ པགུཎབྷཱཝཾ པུཏྟསྶ ཨཱརོཙེཏྭཱ ‘‘ཏེན ཧི, ཏཱཏ, ཀཉྩིདེཝ པཎྞཱཀཱརཾ ཨཱདཱཡ ཨཱགཙྪཐ, ཨཧཾ པུརིམཏརཾ གནྟྭཱ རཉྙོ སནྟིཀེ ཋསྶཱམཱི’’ཏི ཝུཏྟེ ‘‘སཱདྷུ, ཏཱཏཱ’’ཏི པཎྞཱཀཱརཾ གཧེཏྭཱ སོམདཏྟསྶ རཉྙོ སནྟིཀེ ཋིཏཀཱལེ ཨུསྶཱཧཔྤཏྟོ རཱཛཀུལཾ གནྟྭཱ རཉྙཱ ཏུཊྛཙིཏྟེན ཀཏཔཊིསམྨོདནོ, ‘‘ཏཱཏ, ཙིརསྶཾ ཝཏ ཨཱགཏཏྠ, ཨིདམཱསནཾ ནིསཱིདིཏྭཱ ཝདཐ, ཡེནཏྠོ’’ཏི ཝུཏྟེ ཨིམཾ གཱཐམཱཧ –

‘‘དྭེ མེ གོཎཱ མཧཱརཱཛ, ཡེཧི ཁེཏྟཾ ཀསཱམསེ;

ཏེསུ ཨེཀོ མཏོ དེཝ, དུཏིཡཾ གཎྷ ཁཏྟིཡཱ’’ཏི.

རཉྙཱ ‘‘ཀིཾ ཝདེསི, ཏཱཏ, པུན ཝདེཧཱི’’ཏི ཝུཏྟེཔི ཏམེཝ གཱཐཾ ཨཱཧ. རཱཛཱ ཏེན ཝིརཛ྄ཛྷིཏྭཱ ཀཐིཏབྷཱཝཾ ཉཏྭཱ སིཏཾ ཀཏྭཱ, ‘‘སོམདཏྟ, ཏུམྷཱཀཾ གེཧེ བཧཱུ མཉྙེ གོཎཱ’’ཏི ཝཏྭཱ ‘‘ཏུམྷེཧི དིནྣཱ བཧཱུ བྷཝིསྶནྟི, དེཝཱ’’ཏི ཝུཏྟེ བོདྷིསཏྟསྶ ཏུསྶིཏྭཱ བྲཱཧྨཎསྶ སོལ༹ས གོཎེ ཨལངྐཱརབྷཎྜཀཾ ནིཝཱསགཱམཉྩསྶ བྲཧྨདེཡྻཾ དཏྭཱ མཧནྟེན ཡསེན བྲཱཧྨཎཾ ཨུཡྻོཛེསཱིཏི.

སཏྠཱ ཨིམཾ དྷམྨདེསནཾ ཨཱཧརིཏྭཱ ‘‘ཏདཱ རཱཛཱ ཨཱནནྡོ ཨཧོསི, བྲཱཧྨཎོ ལཱལུ༹དཱཡཱི, སོམདཏྟོ པན ཨཧམེཝཱ’’ཏི ཛཱཏཀཾ སམོདྷཱནེཏྭཱ ‘‘ན, བྷིཀྑཝེ, ཨིདཱནེཝ, པུབྦེཔེས ཨཏྟནོ ཨཔྤསྶུཏཏཱཡ ཨཉྙསྨིཾ ཝཏྟབྦེ ཨཉྙམེཝ ཝདཏི. ཨཔྤསྶུཏཔུརིསོ ཧི བལིབདྡསདིསོ ནཱམ ཧོཏཱི’’ཏི ཝཏྭཱ ཨིམཾ གཱཐམཱཧ –

༡༥༢.

‘‘ཨཔྤསྶུཏཱཡཾ པུརིསོ, བལིབདྡོཝ ཛཱིརཏི;

མཾསཱནི ཏསྶ ཝཌྜྷནྟི, པཉྙཱ ཏསྶ ན ཝཌྜྷཏཱི’’ཏི.

ཏཏྠ ཨཔྤསྶུཏཱཡནྟི ཨེཀསྶ ཝཱ དྭིནྣཾ ཝཱ པཎྞཱསཀཱནཾ. ཨཐ ཝཱ པན ཝགྒཱནཾ སབྦནྟིམེན པརིཙྪེདེན ཨེཀསྶ ཝཱ དྭིནྣཾ ཝཱ སུཏྟནྟཱནཾ ཝཱཔི ཨབྷཱཝེན ཨཔྤསྶུཏོ ཨཡཾ. ཀམྨཊྛཱནཾ པན ཨུགྒཧེཏྭཱ ཨནུཡུཉྫནྟོ བཧུསྶུཏོཝ. བལིབདྡོཝ ཛཱིརཏཱིཏི ཡཐཱ ཧི བལིབདྡོ ཛཱིརམཱནོ ཝཌྜྷམཱནོ ནེཝ མཱཏུ, ན པིཏུ, ན སེསཉཱཏཀཱནཾ ཨཏྠཱཡ ཝཌྜྷཏི, ཨཐ ཁོ ནིརཏྠཀམེཝ ཛཱིརཏི, ཨེཝམེཝཾ ཨཡམྤི ན ཨུཔཛ྄ཛྷཱཡཝཏྟཾ ཀརོཏི, ན ཨཱཙརིཡཝཏྟཾ, ན ཨཱགནྟུཀཝཏྟཱདཱིནི, ན བྷཱཝནཱརཱམཏཾ ཨནུཡུཉྫཏི, ནིརཏྠཀམེཝ ཛཱིརཏི, མཾསཱནི ཏསྶ ཝཌྜྷནྟཱིཏི ཡཐཱ བལིབདྡསྶ ‘‘ཡུགནངྒལཱདཱིནི ཝཧིཏུཾ ཨསམཏྠོ ཨེསོ’’ཏི ཨརཉྙེ ཝིསྶཊྛསྶ ཏཏྠེཝ ཝིཙརནྟསྶ ཁཱདནྟསྶ པིཝནྟསྶ མཾསཱནི ཝཌྜྷནྟི, ཨེཝམེཝ ཨིམསྶཱཔི ཨུཔཛ྄ཛྷཱཡཱདཱིཧི ཝིསྶཊྛསྶ སངྒྷཾ ནིསྶཱཡ ཙཏྟཱརོ པཙྩཡེ ལབྷིཏྭཱ ཨུདྡྷཝིརེཙནཱདཱིནི ཀཏྭཱ ཀཱཡཾ པོསེནྟསྶ མཾསཱནི ཝཌྜྷནྟི, ཐཱུལསརཱིརོ ཧུཏྭཱ ཝིཙརཏི. པཉྙཱ ཏསྶཱཏི ལོཀིཡལོཀུཏྟརཱ པནསྶ པཉྙཱ ཨེཀངྒུལམཏྟཱཔི ན ཝཌྜྷཏི, ཨརཉྙེ པན གཙྪལཏཱདཱིནི ཝིཡ ཚ དྭཱརཱནི ནིསྶཱཡ ཏཎྷཱ ཙེཝ ནཝཝིདྷམཱནོ ཙ ཝཌྜྷཏཱིཏི ཨཏྠོ.

དེསནཱཝསཱནེ མཧཱཛནོ སོཏཱཔཏྟིཕལཱདཱིནི པཱཔུཎཱིཏི.

ལཱལུ༹དཱཡིཏྠེརཝཏྠུ སཏྟམཾ.

༨. ཨུདཱནཝཏྠུ

ཨནེཀཛཱཏིསཾསཱརནྟི ཨིམཾ དྷམྨདེསནཾ སཏྠཱ བོདྷིརུཀྑམཱུལེ ནིསིནྣོ ཨུདཱནཝསེན ཨུདཱནེཏྭཱ ཨཔརབྷཱགེ ཨཱནནྡཏྠེརེན པུཊྛོ ཀཐེསི.

སོ ཧི བོདྷིརུཀྑམཱུལེ ནིསིནྣོ སཱུརིཡེ ཨནཏྠངྒཏེཡེཝ མཱརབལཾ ཝིདྡྷཾསེཏྭཱ པཋམཡཱམེ པུབྦེནིཝཱསཔཊིཙྪཱདཀཾ ཏམཾ པདཱལེཏྭཱ མཛ྄ཛྷིམཡཱམེ དིབྦཙཀྑུཾ ཝིསོདྷེཏྭཱ པཙྪིམཡཱམེ སཏྟེསུ ཀཱརུཉྙཏཾ པཊིཙྩ པཙྩཡཱཀཱརེ ཉཱཎཾ ཨོཏཱརེཏྭཱ ཏཾ ཨནུལོམཔཊིལོམཝསེན སམྨསནྟོ ཨརུཎུགྒམནཝེལཱཡ སམྨཱསམྦོདྷིཾ ཨབྷིསམྦུཛ྄ཛྷིཏྭཱ ཨནེཀེཧི བུདྡྷསཏསཧསྶེཧི ཨཝིཛཧིཏཾ ཨུདཱནཾ ཨུདཱནེནྟོ ཨིམཱ གཱཐཱ ཨབྷཱསི –

༡༥༣.

‘‘ཨནེཀཛཱཏིསཾསཱརཾ, སནྡྷཱཝིསྶཾ ཨནིབྦིསཾ;

གཧཀཱརཾ གཝེསནྟོ, དུཀྑཱ ཛཱཏི པུནཔྤུནཾ.

༡༥༤.

‘‘གཧཀཱརཀ དིཊྛོསི, པུན གེཧཾ ན ཀཱཧསི;

སབྦཱ ཏེ ཕཱསུཀཱ བྷགྒཱ, གཧཀཱུཊཾ ཝིསངྑཏཾ;

ཝིསངྑཱརགཏཾ ཙིཏྟཾ, ཏཎྷཱནཾ ཁཡམཛ྄ཛྷགཱ’’ཏི.

ཏཏྠ གཧཀཱརཾ གཝེསནྟོཏི ཨཧཾ ཨིམསྶ ཨཏྟབྷཱཝསངྑཱཏསྶ གེཧསྶ ཀཱརཀཾ ཏཎྷཱཝཌྜྷཀིཾ གཝེསནྟོ ཡེན ཉཱཎེན སཀྐཱ ཏཾ དཊྛུཾ, ཏསྶ བོདྷིཉཱཎསྶཏྠཱཡ དཱིཔངྐརཔཱདམཱུལེ ཀཏཱབྷིནཱིཧཱརོ ཨེཏྟཀཾ ཀཱལཾ ཨནེཀཛཱཏིསཾསཱརཾ ཨནེཀཛཱཏིསཏསཧསྶསངྑཱཏཾ ཨིམཾ སཾསཱརཝཊྚཾ ཨནིབྦིསཾ ཏཾ ཉཱཎཾ ཨཝིནྡནྟོ ཨལབྷནྟོཡེཝ སནྡྷཱཝིསྶཾ སཾསརིཾ, ཨཔརཱཔརཾ ཨནུཝིཙརིནྟི ཨཏྠོ. དུཀྑཱ ཛཱཏི པུནཔྤུནནྟི ཨིདཾ གཧཀཱརཀགཝེསནསྶ ཀཱརཎཝཙནཾ. ཡསྨཱ ཛརཱབྱཱདྷིམརཎམིསྶིཏཱཡ ཛཱཏི ནཱམེསཱ པུནཔྤུནཾ ཨུཔགནྟུཾ དུཀྑཱ, ན ཙ སཱ ཏསྨིཾ ཨདིཊྛེ ནིཝཏྟཏི. ཏསྨཱ ཏཾ གཝེསནྟོ སནྡྷཱཝིསྶནྟི ཨཏྠོ. དིཊྛོསཱིཏི སབྦཉྙུཏཉྙཱཎཾ པཊིཝིཛ྄ཛྷནྟེན མཡཱ ཨིདཱནི དིཊྛོསི. པུན གེཧནྟི པུན ཨིམསྨིཾ སཾསཱརཝཊྚེ ཨཏྟབྷཱཝསངྑཱཏཾ མམ གེཧཾ ན ཀཱཧསི. སབྦཱ ཏེ ཕཱསུཀཱ བྷགྒཱཏི ཏཝ སབྦཱ ཨཝསེསཱ ཀིལེསཕཱསུཀཱ མཡཱ བྷགྒཱ. གཧཀཱུཊཾ ཝིསངྑཏནྟི ཨིམསྶ ཏཡཱ ཀཏསྶ ཨཏྟབྷཱཝགེཧསྶ ཨཝིཛྫཱསངྑཱཏཾ ཀཎྞིཀམཎྜལམྤི མཡཱ ཝིདྡྷཾསིཏཾ. ཝིསངྑཱརགཏཾ ཙིཏྟནྟི ཨིདཱནི མམ ཙིཏྟཾ ཝིསངྑཱརཾ ནིབྦཱནཾ ཨཱརམྨཎཀརཎཝསེན གཏཾ ཨནུཔཝིཊྛཾ. ཏཎྷཱནཾ ཁཡམཛ྄ཛྷགཱཏི ཏཎྷཱནཾ ཁཡསངྑཱཏཾ ཨརཧཏྟཾ ཨདྷིགཏོསྨཱིཏི.

ཨུདཱནཝཏྠུ ཨཊྛམཾ.

༩. མཧཱདྷནསེཊྛིཔུཏྟཝཏྠུ

ཨཙརིཏྭཱཏི ཨིམཾ དྷམྨདེསནཾ སཏྠཱ ཨིསིཔཏནེ མིགདཱཡེ ཝིཧརནྟོ མཧཱདྷནསེཊྛིཔུཏྟཾ ཨཱརབྦྷ ཀཐེསི.

སོ ཀིར བཱརཱཎསིཡཾ ཨསཱིཏིཀོཊིཝིབྷཝེ ཀུལེ ནིབྦཏྟི. ཨཐསྶ མཱཏཱཔིཏརོ ཙིནྟེསུཾ – ‘‘ཨམྷཱཀཾ ཀུལེ མཧཱབྷོགཀྑནྡྷོ, པུཏྟསྶ ནོ ཧཏྠེ ཋཔེཏྭཱ ཡཐཱསུཁཾ པརིབྷོགཾ ཀརིསྶཱམ, ཨཉྙེན ཀམྨེན ཀིཙྩཾ ནཏྠཱི’’ཏི. ཏཾ ནཙྩགཱིཏཝཱདིཏམཏྟམེཝ སིཀྑཱཔེསུཾ. ཏསྨིཾཡེཝ ནགརེ ཨཉྙསྨིཾ ཨསཱིཏིཀོཊིཝིབྷཝེ ཀུལེ ཨེཀཱ དྷཱིཏཱཔི ནིབྦཏྟི. ཏསྶཱཔི མཱཏཱཔིཏརོ ཏཐེཝ ཙིནྟེཏྭཱ ཏཾ ནཙྩགཱིཏཝཱདིཏམཏྟམེཝ སིཀྑཱཔེསུཾ. ཏེསཾ ཝཡཔྤཏྟཱནཾ ཨཱཝཱཧཝིཝཱཧོ ཨཧོསི. ཨཐ ནེསཾ ཨཔརབྷཱགེ མཱཏཱཔིཏརོ ཀཱལམཀཾསུ. དྭེཨསཱིཏིཀོཊིདྷནཾ ཨེཀསྨིཾཡེཝ གེཧེ ཨཧོསི. སེཊྛིཔུཏྟོ དིཝསསྶ ཏིཀྑཏྟུཾ རཉྙོ ཨུཔཊྛཱནཾ གཙྪཏི. ཨཐ ཏསྨིཾ ནགརེ དྷུཏྟཱ ཙིནྟེསུཾ – ‘‘སཙཱཡཾ སེཊྛིཔུཏྟོ སུརཱསོཎྜོ བྷཝིསྶཏི, ཨམྷཱཀཾ ཕཱསུཀཾ བྷཝིསྶཏི, ཨུགྒཎྷཱཔེམ ནཾ སུརཱསོཎྜབྷཱཝ’’ནྟི. ཏེ སུརཾ ཨཱདཱཡ ཁཛྫཀམཾསེ ཙེཝ ལོཎསཀྑརཱ ཙ དུསྶནྟེ བནྡྷིཏྭཱ མཱུལཀནྡེ གཧེཏྭཱ ཏསྶ རཱཛཀུལཏོ ཨཱགཙྪནྟསྶ མགྒཾ ཨོལོཀཡམཱནཱ ནིསཱིདིཏྭཱ ཏཾ ཨཱགཙྪནྟཾ དིསྭཱ སུརཾ པིཝིཏྭཱ ལོཎསཀྑརཾ མུཁེ ཁིཔིཏྭཱ མཱུལཀནྡཾ ཌཾསིཏྭཱ ‘‘ཝསྶསཏཾ ཛཱིཝ སཱམི, སེཊྛིཔུཏྟ, ཏཾ ནིསྶཱཡ མཡཾ ཁཱདནཔིཝནསམཏྠཱ བྷཝེཡྻཱམཱ’’ཏི ཨཱཧཾསུ. སོ ཏེསཾ ཝཙནཾ སུཏྭཱ པཙྪཏོ ཨཱགཙྪནྟཾ ཙཱུལཱུ༹པཊྛཱཀཾ པུཙྪི – ‘‘ཀིཾ ཨེཏེ པིཝནྟཱི’’ཏི. ཨེཀཾ པཱནཀཾ, སཱམཱིཏི. མནཱཔཛཱཏིཀཾ ཨེཏནྟི. སཱམི, ཨིམསྨིཾ ཛཱིཝལོཀེ ཨིམིནཱ སདིསཾ པཱཏབྦཡུཏྟཀཾ ནཱམ ནཏྠཱིཏི. སོ ‘‘ཨེཝཾ སནྟེ མཡཱཔི པཱཏུཾ ཝཊྚཏཱི’’ཏི ཐོཀཾ ཐོཀཾ ཨཱཧརཱཔེཏྭཱ པིཝཏི. ཨཐསྶ ནཙིརསྶེཝ ཏེ དྷུཏྟཱ པིཝནབྷཱཝཾ ཉཏྭཱ ཏཾ པརིཝཱརཡིཾསུ. གཙྪནྟེ ཀཱལེ པརིཝཱརོ མཧཱ ཨཧོསི. སོ སཏེནཔི སཏདྭཡེནཔི སུརཾ ཨཱཧརཱཔེཏྭཱ པིཝནྟོ ཨིམིནཱ ཨནུཀྐམེནེཝ ནིསིནྣཊྛཱནཱདཱིསུ ཀཧཱཔཎརཱསིཾ ཋཔེཏྭཱ སུརཾ པིཝནྟོ ‘‘ཨིམིནཱ མཱལཱ ཨཱཧརཐ, ཨིམིནཱ གནྡྷེ, ཨཡཾ ཛནོ ཛུཏེ ཚེཀོ, ཨཡཾ ནཙྩེ, ཨཡཾ གཱིཏེ, ཨཡཾ ཝཱདིཏེ. ཨིམསྶ སཧསྶཾ དེཐ, ཨིམསྶ དྭེ སཧསྶཱནཱི’’ཏི ཨེཝཾ ཝིཀིརནྟོ ནཙིརསྶེཝ ཨཏྟནོ སནྟཀཾ ཨསཱིཏིཀོཊིདྷནཾ ཁེཔེཏྭཱ ‘‘ཁཱིཎཾ ཏེ, སཱམི, དྷན’’ནྟི ཝུཏྟེ ཀིཾ བྷརིཡཱཡ མེ སནྟཀཾ ནཏྠཱིཏི. ཨཏྠི, སཱམཱིཏི. ཏེན ཧི ཏཾ ཨཱཧརཐཱཏི. ཏམྤི ཏཐེཝ ཁེཔེཏྭཱ ཨནུཔུབྦེན ཁེཏྟཨཱརཱམུཡྻཱནཡོགྒཱདིཀམྤི ཨནྟམསོ བྷཱཛནབྷཎྜཀམྤི ཨཏྠརཎཔཱཝུརཎནིསཱིདནམྤི སབྦཾ ཨཏྟནོ སནྟཀཾ ཝིཀྐིཎིཏྭཱ ཁཱདི. ཨཐ ནཾ མཧལླཀཀཱལེ ཡེཧིསྶ ཀུལསནྟཀཾ གེཧཾ ཝིཀྐིཎིཏྭཱ གཧིཏཾ, ཏེ ཏཾ གེཧཱ ནཱིཧརིཾསུ. སོ བྷརིཡཾ ཨཱདཱཡ པརཛནསྶ གེཧབྷིཏྟིཾ ནིསྶཱཡ ཝསནྟོ ཀཔཱལཁཎྜཾ ཨཱདཱཡ བྷིཀྑཱཡ ཙརིཏྭཱ ཛནསྶ ཨུཙྪིཊྛཀཾ བྷུཉྫིཏུཾ ཨཱརབྷི.

ཨཐ ནཾ ཨེཀདིཝསཾ ཨཱསནསཱལཱཡ དྭཱརེ ཋཏྭཱ དཧརསཱམཎེརེཧི དིཡྻམཱནཾ ཨུཙྪིཊྛཀབྷོཛནཾ པཊིགྒཎྷནྟཾ དིསྭཱ སཏྠཱ སིཏཾ པཱཏྭཱཀཱསི. ཨཐ ནཾ ཨཱནནྡཏྠེརོ སིཏཀཱརཎཾ པུཙྪི. སཏྠཱ སིཏཀཱརཎཾ ཀཐེནྟོ ‘‘པསྶཱནནྡ, ཨིམཾ མཧཱདྷནསེཊྛིཔུཏྟཾ ཨིམསྨིཾ ནགརེ དྭེཨསཱིཏིཀོཊིདྷནཾ ཁེཔེཏྭཱ བྷརིཡཾ ཨཱདཱཡ བྷིཀྑཱཡ ཙརནྟཾ. སཙེ ཧི ཨཡཾ པཋམཝཡེ བྷོགེ ཨཁེཔེཏྭཱ ཀམྨནྟེ པཡོཛཡིསྶ, ཨིམསྨིཾཡེཝ ནགརེ ཨགྒསེཊྛི ཨབྷཝིསྶ. སཙེ པན ནིཀྑམིཏྭཱ པབྦཛིསྶ, ཨརཧཏྟཾ པཱཔུཎིསྶ, བྷརིཡཱཔིསྶ ཨནཱགཱམིཕལེ པཏིཊྛཧིསྶ. སཙེ མཛ྄ཛྷིམཝཡེ བྷོགེ ཨཁེཔེཏྭཱ ཀམྨནྟེ པཡོཛཡིསྶ, དུཏིཡསེཊྛི ཨབྷཝིསྶ, ནིཀྑམིཏྭཱ པབྦཛནྟོ ཨནཱགཱམཱི ཨབྷཝིསྶ. བྷརིཡཱཔིསྶ སཀདཱགཱམིཕལེ པཏིཊྛཧིསྶ. སཙེ པཙྪིམཝཡེ བྷོགེ ཨཁེཔེཏྭཱ ཀམྨནྟེ པཡོཛཡིསྶ, ཏཏིཡསེཊྛི ཨབྷཝིསྶ, ནིཀྑམིཏྭཱ པབྦཛནྟོཔི སཀདཱགཱམཱི ཨབྷཝིསྶ, བྷརིཡཱཔིསྶ སོཏཱཔཏྟིཕལེ པཏིཊྛཧིསྶ. ཨིདཱནི པནེས གིཧིབྷོགཏོཔི པརིཧཱིནོ སཱམཉྙཏོཔི. པརིཧཱཡིཏྭཱ ཙ པན སུཀྑཔལླལེ ཀོཉྩསཀུཎོ ཝིཡ ཛཱཏོ’’ཏི ཝཏྭཱ ཨིམཱ གཱཐཱ ཨབྷཱསི –

༡༥༥.

‘‘ཨཙརིཏྭཱ བྲཧྨཙརིཡཾ, ཨལདྡྷཱ ཡོབྦནེ དྷནཾ;

ཛིཎྞཀོཉྩཱཝ ཛྷཱཡནྟི, ཁཱིཎམཙྪེཝ པལླལེ.

༡༥༦.

‘‘ཨཙརིཏྭཱ བྲཧྨཙརིཡཾ, ཨལདྡྷཱ ཡོབྦནེ དྷནཾ;

སེནྟི ཙཱཔཱཏིཁཱིཎཱཝ, པུརཱཎཱནི ཨནུཏྠུན’’ནྟི.

ཏཏྠ ཨཙརིཏྭཱཏི བྲཧྨཙརིཡཝཱསཾ ཨཝསིཏྭཱ. ཡོབྦནེཏི ཨནུཔྤནྣེ ཝཱ བྷོགེ ཨུཔྤཱདེཏུཾ ཨུཔྤནྣེ ཝཱ བྷོགེ རཀྑིཏུཾ སམཏྠཀཱལེ དྷནམྤི ཨལབྷིཏྭཱ. ཁཱིཎམཙྪེཏི ཏེ ཨེཝརཱུཔཱ བཱལཱ ཨུདཀསྶ ཨབྷཱཝཱ ཁཱིཎམཙྪེ པལླལེ པརིཀྑཱིཎཔཏྟཱ ཛིཎྞཀོཉྩཱ ཝིཡ ཨཝཛྷཱཡནྟི. ཨིདཾ ཝུཏྟཾ ཧོཏི – པལླལེ ཨུདཀསྶ ཨབྷཱཝོ ཝིཡ ཧི ཨིམེསཾ ཝསནཊྛཱནསྶ ཨབྷཱཝོ, མཙྪཱནཾ ཁཱིཎབྷཱཝོ ཝིཡ ཨིམེསཾ བྷོགཱནཾ ཨབྷཱཝོ, ཁཱིཎཔཏྟཱནཾ ཀོཉྩཱནཾ ཨུཔྤཏིཏྭཱ གམནཱབྷཱཝོ ཝིཡ ཨིམེསཾ ཨིདཱནི ཛལཐལཔཐཱདཱིཧི བྷོགེ སཎྛཱཔེཏུཾ ཨསམཏྠབྷཱཝོ. ཏསྨཱ ཏེ ཁཱིཎཔཏྟཱ ཀོཉྩཱ ཝིཡ ཨེཏྠེཝ བཛ྄ཛྷིཏྭཱ ཨཝཛྷཱཡནྟཱིཏི. ཙཱཔཱཏིཁཱིཎཱཝཱཏི ཙཱཔཏོ ཨཏིཁཱིཎཱ, ཙཱཔཱ ཝིནིམུཏྟཱཏི ཨཏྠོ. ཨིདཾ ཝུཏྟཾ ཧོཏི – ཡཐཱ ཙཱཔཱ ཝིནིམུཏྟཱ སརཱ ཡཐཱཝེགཾ གནྟྭཱ པཏིཏཱ, ཏཾ གཧེཏྭཱ ཨུཀྑིཔནྟེ ཨསཏི ཏཏྠེཝ ཨུཔཙིཀཱནཾ བྷཏྟཾ ཧོནྟི, ཨེཝཾ ཨིམེཔི ཏཡོ ཝཡེ ཨཏིཀྐནྟཱ ཨིདཱནི ཨཏྟཱནཾ ཨུདྡྷརིཏུཾ ཨསམཏྠཏཱཡ མརཎཾ ཨུཔགམིསྶནྟི. ཏེན ཝུཏྟཾ – ‘‘སེནྟི ཙཱཔཱཏིཁཱིཎཱཝཱ’’ཏི. པུརཱཎཱནི ཨནུཏྠུནནྟི ‘‘ཨིཏི ཨམྷེཧི ཁཱདིཏཾ ཨིཏི པཱིཏ’’ནྟི པུབྦེ ཀཏཱནི ཁཱདིཏཔིཝིཏནཙྩགཱིཏཝཱདིཏཱདཱིནི ཨནུཏྠུནནྟཱ སོཙནྟཱ ཨནུསོཙནྟཱ སེནྟཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཧཱདྷནསེཊྛིཔུཏྟཝཏྠུ ནཝམཾ.

ཛརཱཝགྒཝཎྞནཱ ནིཊྛིཏཱ.

ཨེཀཱདསམོ ཝགྒོ.

༡༢. ཨཏྟཝགྒོ

༡. བོདྷིརཱཛཀུམཱརཝཏྠུ

ཨཏྟཱནཉྩེཏི ཨིམཾ དྷམྨདེསནཾ སཏྠཱ བྷེསཀལཱ༹ཝནེ ཝིཧརནྟོ བོདྷིརཱཛཀུམཱརཾ ཨཱརབྦྷ ཀཐེསི.

སོ ཀིར པཐཝཱིཏལེ ཨཉྙེཧི པཱསཱདེཧི ཨསདིསརཱུཔཾ ཨཱཀཱསེ ཨུཔྤཏམཱནཾ ཝིཡ ཀོཀནུདཾ ནཱམ པཱསཱདཾ ཀཱརེཏྭཱ ཝཌྜྷཀིཾ པུཙྪི – ‘‘ཀིཾ ཏཡཱ ཨཉྙཏྠཱཔི ཨེཝརཱུཔོ པཱསཱདོ ཀཏཔུབྦོ, ཨུདཱཧུ པཋམསིཔྤམེཝ ཏེ ཨིད’’ནྟི. ‘‘པཋམསིཔྤམེཝ, དེཝཱ’’ཏི ཙ ཝུཏྟེ ཙིནྟེསི – ‘‘སཙེ ཨཡཾ ཨཉྙསྶཔི ཨེཝརཱུཔཾ པཱསཱདཾ ཀརིསྶཏི, ཨཡཾ པཱསཱདོ ཨནཙྪརིཡོ བྷཝིསྶཏི. ཨིམཾ མཡཱ མཱརེཏུཾ ཝཱ ཧཏྠཔཱདེ ཝཱསྶ ཚིནྡིཏུཾ ཨཀྑཱིནི ཝཱ ཨུཔྤཱཊེཏུཾ ཝཊྚཏི, ཨེཝཾ ཨཉྙསྶ པཱསཱདཾ ན ཀརིསྶཏཱི’’ཏི. སོ ཏམཏྠཾ ཨཏྟནོ པིཡསཧཱཡཀསྶ སཉྫཱིཝཀཔུཏྟསྶ ནཱམ མཱཎཝཀསྶ ཀཐེསི. སོ ཙིནྟེསི – ‘‘ནིསྶཾསཡཾ ཨེས ཝཌྜྷཀིཾ ནཱསེསྶཏི, ཨནགྒྷོ སིཔྤཱི, སོ མཡི པསྶནྟེ མཱ ནསྶཏུ, སཉྙམསྶ དསྶཱམཱི’’ཏི. སོ ཏཾ ཨུཔསངྐམིཏྭཱ ‘‘པཱསཱདེ ཏེ ཀམྨཾ ནིཊྛིཏཾ, ནོ’’ཏི པུཙྪིཏྭཱ ‘‘ནིཊྛིཏ’’ནྟི ཝུཏྟེ ‘‘རཱཛཀུམཱརོ ཏཾ ནཱསེཏུཀཱམོ ཨཏྟཱནཾ རཀྑེཡྻཱསཱི’’ཏི ཨཱཧ. ཝཌྜྷཀཱིཔི ‘‘བྷདྡཀཾ ཏེ, སཱམི, ཀཏཾ མམ ཨཱརོཙེནྟེན, ཨཧམེཏྠ ཀཏྟབྦཾ ཛཱནིསྶཱམཱི’’ཏི ཝཏྭཱ ‘‘ཀིཾ, སམྨ, ཨམྷཱཀཾ པཱསཱདེ ཀམྨཾ ནིཊྛིཏ’’ནྟི རཱཛཀུམཱརེན པུཊྛོ ‘‘ན ཏཱཝ, དེཝ, ནིཊྛིཏཾ, བཧུ ཨཝསིཊྛ’’ནྟི ཨཱཧ. ཀིཾ ཀམྨཾ ནཱམ ཨཝསིཊྛནྟི? པཙྪཱ, དེཝ, ཨཱཙིཀྑིསྶཱམི, དཱརཱུནི ཏཱཝ ཨཱཧརཱཔེཐཱཏི. ཀིཾ དཱརཱུནི ནཱམཱཏི? ནིསྶཱརཱནི སུཀྑདཱརཱུནི, དེཝཱཏི. སོ ཨཱཧརཱཔེཏྭཱ ཨདཱསི. ཨཐ ནཾ ཨཱཧ – ‘‘དེཝ, ཏེ ཨིཏོ པཊྛཱཡ མམ སནྟིཀཾ ནཱགནྟབྦཾ. ཀིཾ ཀཱརཎཱ? སུཁུམཀམྨཾ ཀརོནྟསྶ ཧི ཨཉྙེཧི སདྡྷིཾ སལླཔནྟསྶ མེ ཀམྨཝིཀྑེཔོ ཧོཏི, ཨཱཧཱརཝེལཱཡཾ པན མེ བྷརིཡཱཝ ཨཱཧཱརཾ ཨཱཧརིསྶཏཱི’’ཏི. རཱཛཀུམཱརོཔི ‘‘སཱདྷཱུ’’ཏི པཊིསྶུཎི. སོཔི ཨེཀསྨིཾ གབྦྷེ ནིསཱིདིཏྭཱ ཏཱནི དཱརཱུནི ཏཙྪེཏྭཱ ཨཏྟནོ པུཏྟདཱརསྶ ཨནྟོ ནིསཱིདནཡོགྒཾ གརུལ༹སཀུཎཾ ཀཏྭཱ ཨཱཧཱརཝེལཱཡ པན བྷརིཡཾ ཨཱཧ – ‘‘གེཧེ ཝིཛྫམཱནཀཾ སབྦཾ ཝིཀྐིཎིཏྭཱ ཧིརཉྙསུཝཎྞཾ གཎྷཱཧཱི’’ཏི. རཱཛཀུམཱརོཔི ཝཌྜྷཀིསྶ ཨནིཀྑམནཏྠཱཡ གེཧཾ པརིཀྑིཔིཏྭཱ ཨཱརཀྑཾ ཋཔེསི. ཝཌྜྷཀཱིཔི སཀུཎསྶ ནིཊྛིཏཀཱལེ ‘‘ཨཛྫ སབྦེཔི དཱརཀེ གཧེཏྭཱ ཨཱགཙྪེཡྻཱསཱི’’ཏི བྷརིཡཾ ཝཏྭཱ བྷུཏྟཔཱཏརཱསོ པུཏྟདཱརཾ སཀུཎསྶ ཀུཙྪིཡཾ ནིསཱིདཱཔེཏྭཱ ཝཱཏཔཱནེན ནིཀྑམིཏྭཱ པལཱཡི. སོ ཏེསཾ, ‘‘དེཝ, ཝཌྜྷཀཱི པལཱཡཏཱི’’ཏི ཀནྡནྟཱནཾཡེཝ གནྟྭཱ ཧིམཝནྟེ ཨོཏརིཏྭཱ ཨེཀཾ ནགརཾ མཱཔེཏྭཱ ཀཊྛཝཱཧནརཱཛཱ ནཱམ ཛཱཏོ.

རཱཛཀུམཱརོཔི ‘‘པཱསཱདམཧཾ ཀརིསྶཱམཱི’’ཏི སཏྠཱརཾ ནིམནྟེཏྭཱ པཱསཱདེ ཙཏུཛྫཱཏིཡགནྡྷེཧི པརིབྷཎྜིཀཾ ཀཏྭཱ པཋམཨུམྨཱརཏོ པཊྛཱཡ ཙེལཔཊིཀཾ པཏྠརི. སོ ཀིར ཨཔུཏྟཀོ, ཏསྨཱ ‘‘སཙཱཧཾ པུཏྟཾ ཝཱ དྷཱིཏརཾ ཝཱ ལཙྪཱམི, སཏྠཱ ཨིམཾ ཨཀྐམིསྶཏཱི’’ཏི ཙིནྟེཏྭཱ པཏྠརི. སོ སཏྠརི ཨཱགཏེ སཏྠཱརཾ པཉྩཔཏིཊྛིཏེན ཝནྡིཏྭཱ པཏྟཾ གཧེཏྭཱ ‘‘པཝིསཐ, བྷནྟེ’’ཏི ཨཱཧ. སཏྠཱ ན པཱཝིསི, སོ དུཏིཡམྤི ཏཏིཡམྤི ཡཱཙི. སཏྠཱ ཨཔཝིསིཏྭཱཝ ཨཱནནྡཏྠེརཾ ཨོལོཀེསི. ཐེརོ ཨོལོཀིཏསཉྙཱཡེཝ ཝཏྠཱནཾ ཨནཀྐམནབྷཱཝཾ ཉཏྭཱ ཏཾ ‘‘སཾཧརཏུ, རཱཛཀུམཱར, དུསྶཱནི, ན བྷགཝཱ ཙེལཔཊིཀཾ ཨཀྐམིསྶཏི, པཙྪིམཛནཏཾ ཏཐཱགཏོ ཨོལོཀེཏཱི’’ཏི དུསྶཱནི སཾཧརཱཔེསི. སོ དུསྶཱནི སཾཧརིཏྭཱ སཏྠཱརཾ ཨནྟོནིཝེསནཾ པཝེསཏྭཱ ཡཱགུཁཛྫཀེན སམྨཱནེཏྭཱ ཨེཀམནྟཾ ནིསིནྣོ ཝནྡིཏྭཱ ཨཱཧ – ‘‘བྷནྟེ, ཨཧཾ ཏུམྷཱཀཾ ཨུཔཀཱརཀོ ཏིཀྑཏྟུཾ སརཎཾ གཏོ, ཀུཙྪིགཏོ ཙ ཀིརམྷི ཨེཀཝཱརཾ སརཎཾ གཏོ, དུཏིཡཾ ཏརུཎདཱརཀཀཱལེ, ཏཏིཡཾ ཝིཉྙུབྷཱཝཾ པཏྟཀཱལེ. ཏསྶ མེ ཀསྨཱ ཙེལཔཊིཀཾ ན ཨཀྐམིཏྠཱ’’ཏི? ‘‘ཀིཾ པན ཏྭཾ, ཀུམཱར, ཙིནྟེཏྭཱ ཙེལཱནི ཨཏྠརཱི’’ཏི? ‘‘སཙེ པུཏྟཾ ཝཱ དྷཱིཏརཾ ཝཱ ལཙྪཱམི, སཏྠཱ མེ ཙེལཔཊིཀཾ ཨཀྐམིསྶཏཱི’’ཏི ཨིདཾ ཙིནྟེཏྭཱ, བྷནྟེཏི. ཏེནེཝཱཧཾ ཏཾ ན ཨཀྐམིནྟི. ‘‘ཀིཾ པནཱཧཾ, བྷནྟེ, པུཏྟཾ ཝཱ དྷཱིཏརཾ ཝཱ ནེཝ ལཙྪཱམཱི’’ཏི? ‘‘ཨཱམ, ཀུམཱརཱ’’ཏི. ‘‘ཀིཾ ཀཱརཎཱ’’ཏི? ‘‘པུརིམཀཨཏྟབྷཱཝེ ཛཱཡཱཡ སདྡྷིཾ པམཱདཾ ཨཱཔནྣཏྟཱ’’ཏི. ‘‘ཀསྨིཾ ཀཱལེ, བྷནྟེ’’ཏི? ཨཐསྶ སཏྠཱ ཨཏཱིཏཾ ཨཱཧརིཏྭཱ དསྶེསི –

ཨཏཱིཏེ ཀིར ཨནེཀསཏཱ མནུསྶཱ མཧཏིཡཱ ནཱཝཱཡ སམུདྡཾ པཀྑནྡིཾསུ. ནཱཝཱ སམུདྡམཛ྄ཛྷེ བྷིཛྫི. དྭེ ཛཡམྤཏིཀཱ ཨེཀཾ ཕལཀཾ གཧེཏྭཱ ཨནྟརདཱིཔཀཾ པཝིསིཾསུ, སེསཱ སབྦེ ཏཏྠེཝ མརིཾསུ. ཏསྨིཾ ཁོ པན དཱིཔཀེ མཧཱསཀུཎསངྒྷོ ཝསཏི. ཏེ ཨཉྙཾ ཁཱདིཏབྦཀཾ ཨདིསྭཱ ཚཱཏཛ྄ཛྷཏྟཱ སཀུཎཨཎྜཱནི ཨངྒཱརེསུ པཙིཏྭཱ ཁཱདིཾསུ, ཏེསུ ཨཔྤཧོནྟེསུ སཀུཎཙྪཱཔེ གཧེཏྭཱ ཁཱདིཾསུ. ཨེཝཾ པཋམཝཡེཔི མཛ྄ཛྷིམཝཡེཔི པཙྪིམཝཡེཔི ཁཱདིཾསུཡེཝ. ཨེཀསྨིམྤི ཝཡེ ཨཔྤམཱདཾ ནཱཔཛྫིཾསུ, ཨེཀོཔི ཙ ནེསཾ ཨཔྤམཱདཾ ནཱཔཛྫི.

སཏྠཱ ཨིདཾ ཏསྶ པུབྦཀམྨཾ དསྶེཏྭཱ ‘‘སཙེ ཧི ཏྭཾ, ཀུམཱར, ཏདཱ ཨེཀསྨིམྤི ཝཡེ བྷརིཡཱཡ སདྡྷིཾ ཨཔྤམཱདཾ ཨཱཔཛྫིསྶ, ཨེཀསྨིམྤི ཝཡེ པུཏྟོ ཝཱ དྷཱིཏཱ ཝཱ ཨུཔྤཛྫེཡྻ. སཙེ པན ཝོ ཨེཀོཔི ཨཔྤམཏྟོ ཨབྷཝིསྶ, ཏཾ པཊིཙྩ པུཏྟོ ཝཱ དྷཱིཏཱ ཝཱ ཨུཔྤཛྫིསྶ. ཀུམཱར, ཨཏྟཱནཉྷི པིཡཾ མཉྙམཱནེན ཏཱིསུཔི ཝཡེསུ ཨཔྤམཏྟེན ཨཏྟཱ རཀྑིཏབྦོ, ཨེཝཾ ཨསཀྐོནྟེན ཨེཀཝཡེཔི རཀྑིཏབྦོཡེཝཱ’’ཏི ཝཏྭཱ ཨིམཾ གཱཐམཱཧ –

༡༥༧.

‘‘ཨཏྟཱནཉྩེ པིཡཾ ཛཉྙཱ, རཀྑེཡྻ ནཾ སུརཀྑིཏཾ;

ཏིཎྞཾ ཨཉྙཏརཾ ཡཱམཾ, པཊིཛགྒེཡྻ པཎྜིཏོ’’ཏི.

ཏཏྠ ཡཱམནྟི སཏྠཱ ཨཏྟནོ དྷམྨིསྶརཏཱཡ དེསནཱཀུསལཏཱཡ ཙ ཨིདྷ ཏིཎྞཾ ཝཡཱནཾ ཨཉྙཏརཾ ཝཡཾ ཡཱམནྟི ཀཏྭཱ དེསེསི, ཏསྨཱ ཨེཝམེཏྠ ཨཏྠོ ཝེདིཏབྦོ. སཙེ ཨཏྟཱནཾ པིཡཾ ཛཱནེཡྻ, རཀྑེཡྻ ནཾ སུརཀྑིཏནྟི ཡཐཱ སོ སུརཀྑིཏོ ཧོཏི, ཨེཝཾ ནཾ རཀྑེཡྻ. ཏཏྠ སཙེ གཱིཧཱི སམཱནོ ‘‘ཨཏྟཱནཾ རཀྑིསྶཱམཱི’’ཏི ཨུཔརིཔཱསཱདཏལེ སུསཾཝུཏཾ གབྦྷཾ པཝིསིཏྭཱ སམྤནྣཱརཀྑོ ཧུཏྭཱ ཝསནྟོཔི, པབྦཛིཏོ ཧུཏྭཱ སུསཾཝུཏེ པིཧིཏདྭཱརཝཱཏཔཱནེ ལེཎེ ཝིཧརནྟོཔི ཨཏྟཱནཾ ན རཀྑཏིཡེཝ. གིཧཱི པན སམཱནོ ཡཐཱབལཾ དཱནསཱིལཱདཱིནི པུཉྙཱནི ཀརོནྟོ, པབྦཛིཏོ ཝཱ པན ཝཏྟཔཊིཝཏྟཔརིཡཏྟིམནསིཀཱརེསུ ཨུསྶུཀྐཾ ཨཱཔཛྫནྟོ ཨཏྟཱནཾ རཀྑཏི ནཱམ. ཨེཝཾ ཏཱིསུ ཝཡེསུ ཨསཀྐོནྟོ ཨཉྙཏརསྨིམྤི ཝཡེ པཎྜིཏཔུརིསོ ཨཏྟཱནཾ པཊིཛགྒཏིཡེཝ. སཙེ ཧི གིཧིབྷཱུཏོ པཋམཝཡེ ཁིཌྜཱཔསུཏཏཱཡ ཀུསལཾ ཀཱཏུཾ ན སཀྐོཏི, མཛ྄ཛྷིམཝཡེ ཨཔྤམཏྟེན ཧུཏྭཱ ཀུསལཾ ཀཱཏབྦཾ. སཙེ མཛ྄ཛྷིམཝཡེ པུཏྟདཱརཾ པོསེནྟོ ཀུསལཾ ཀཱཏུཾ ན སཀྐོཏི, པཙྪིམཝཡེ ཀཱཏབྦམེཝ. ཨེཝམྤི ཀརོནྟེན ཨཏྟཱ པཊིཛགྒིཏོཝ ཧོཏི. ཨེཝཾ ཨཀརོནྟསྶ པན ཨཏྟཱ པིཡོ ནཱམ ན ཧོཏི, ཨཔཱཡཔརཱཡཎམེཝ ནཾ ཀརོཏི. སཙེ པན པབྦཛིཏོ པཋམཝཡེ སཛ྄ཛྷཱཡཾ ཀརོནྟོ དྷཱརེནྟོ ཝཱཙེནྟོ ཝཏྟཔཊིཝཏྟཾ ཀརོནྟོ པམཱདཾ ཨཱཔཛྫཏི, མཛ྄ཛྷིམཝཡེ ཨཔྤམཏྟེན སམཎདྷམྨོ ཀཱཏབྦོ. སཙེ པཋམཝཡེ ཨུགྒཧིཏཔརིཡཏྟིཡཱ ཨཊྛཀཐཾ ཝིནིཙྪཡཾ ཀཱརཎཱཀཱརཎཉྩ པུཙྪནྟོ མཛ྄ཛྷིམཝཡེ པམཱདཾ ཨཱཔཛྫཏི, པཙྪིམཝཡེ ཨཔྤམཏྟེན སམཎདྷམྨོ ཀཱཏབྦོཡེཝ. ཨེཝམྤི ཀརོནྟེན ཨཏྟཱ པཊིཛགྒིཏོཝ ཧོཏི. ཨེཝཾ ཨཀརོནྟསྶ པན ཨཏྟཱ པིཡོ ནཱམ ན ཧོཏི, པཙྪཱནུཏཱཔེནེཝ ནཾ ཏཱཔེཏཱིཏི.

དེསནཱཝསཱནེ བོདྷིརཱཛཀུམཱརོ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

བོདྷིརཱཛཀུམཱརཝཏྠུ པཋམཾ.

༢. ཨུཔནནྡསཀྱཔུཏྟཏྠེརཝཏྠུ

ཨཏྟཱནམེཝ པཋམནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨུཔནནྡཾ སཀྱཔུཏྟཾ ཨཱརབྦྷ ཀཐེསི.

སོ ཀིར ཐེརོ དྷམྨཀཐཾ ཀཐེཏུཾ ཚེཀོ. ཏསྶ ཨཔྤིཙྪཏཱདིཔཊིསཾཡུཏྟཾ དྷམྨཀཐཾ སུཏྭཱ བཧཱུ བྷིཀྑུ ཏཾ ཏིཙཱིཝརེཧི པཱུཛེཏྭཱ དྷུཏངྒཱནི སམཱདིཡིཾསུ. ཏེཧི ཝིསྶཊྛཔརིཀྑཱརེ སོཡེཝ གཎྷི. སོ ཨེཀསྨིཾ ཨནྟོཝསྶེ ཨུཔཀཊྛེ ཛནཔདཾ ཨགམཱསི. ཨཐ ནཾ ཨེཀསྨིཾ ཝིཧཱརེ དཧརསཱམཎེརཱ དྷམྨཀཐིཀཔེམེན, ‘‘བྷནྟེ, ཨིདྷ ཝསྶཾ ཨུཔེཐཱ’’ཏི ཝདིཾསུ. ‘‘ཨིདྷ ཀིཏྟཀཾ ཝསྶཱཝཱསིཀཾ ལབྦྷཏཱི’’ཏི པུཙྪིཏྭཱ ཏེཧི ‘‘ཨེཀེཀོ སཱཊཀོ’’ཏི ཝུཏྟེ ཏཏྠ ཨུཔཱཧནཱ ཋཔེཏྭཱ ཨཉྙཾ ཝིཧཱརཾ ཨགམཱསི. དུཏིཡཾ ཝིཧཱརཾ གནྟྭཱ ‘‘ཨིདྷ ཀིཾ ལབྦྷཏཱི’’ཏི པུཙྪིཏྭཱ ‘‘དྭེ སཱཊཀཱ’’ཏི ཝུཏྟེ ཀཏྟརཡཊྛིཾ ཋཔེསི. ཏཏིཡཾ ཝིཧཱརཾ གནྟྭཱ ‘‘ཨིདྷ ཀིཾ ལབྦྷཏཱི’’ཏི པུཙྪིཏྭཱ ‘‘ཏཡོ སཱཊཀཱ’’ཏི ཝུཏྟེ ཏཏྠ ཨུདཀཏུམྦཾ ཋཔེསི. ཙཏུཏྠཾ ཝིཧཱརཾ གནྟྭཱ ‘‘ཨིདྷ ཀིཾ ལབྦྷཏཱི’’ཏི པུཙྪིཏྭཱ ‘‘ཙཏྟཱརོ སཱཊཀཱ’’ཏི ཝུཏྟེ ‘‘སཱདྷུ ཨིདྷ ཝསིསྶཱམཱི’’ཏི ཏཏྠ ཝསྶཾ ཨུཔགནྟྭཱ གཧཊྛཱནཉྩེཝ བྷིཀྑཱུནཉྩ དྷམྨཀཐཾ ཀཐེསི. ཏེ ནཾ བཧཱུཧི ཝཏྠེཧི ཙེཝ ཙཱིཝརེཧི ཙ པཱུཛེསུཾ. སོ ཝུཊྛཝསྶོ ཨིཏརེསུཔི ཝིཧཱརེསུ སཱསནཾ པེསེཏྭཱ ‘‘མཡཱ པརིཀྑཱརསྶ ཋཔིཏཏྟཱ ཝསྶཱཝཱསིཀཾ ལདྡྷབྦཾ, ཏཾ མེ པཧིཎནྟཱུ’’ཏི སབྦཾ ཨཱཧརཱཔེཏྭཱ ཡཱནཀཾ པཱུརེཏྭཱ པཱཡཱསི.

ཨཐེཀསྨིཾ ཝིཧཱརེ དྭེ དཧརབྷིཀྑཱུ དྭེ སཱཊཀེ ཨེཀཉྩ ཀམྦལཾ ལབྷིཏྭཱ ‘‘ཏུཡ྄ཧཾ སཱཊཀཱ ཧོནྟུ, མཡ྄ཧཾ ཀམྦལོ’’ཏི བྷཱཛེཏུཾ ཨསཀྐོནྟཱ མགྒསམཱིཔེ ནིསཱིདིཏྭཱ ཝིཝདནྟི. ཏེ ཏཾ ཐེརཾ ཨཱགཙྪནྟཾ དིསྭཱ, ‘‘བྷནྟེ, ཏུམྷེ ནོ བྷཱཛེཏྭཱ དེཐཱ’’ཏི ཝདིཾསུ. ཏུམྷེཡེཝ བྷཱཛེཐཱཏི. ན སཀྐོམ, བྷནྟེ, ཏུམྷེཡེཝ ནོ བྷཱཛེཏྭཱ དེཐཱཏི. ཏེན ཧི མམ ཝཙནེ ཋསྶཐཱཏི. ཨཱམ, ཋསྶཱམཱཏི. ‘‘ཏེན ཧི སཱདྷཱུ’’ཏི ཏེསཾ དྭེ སཱཊཀེ དཏྭཱ ‘‘ཨཡཾ དྷམྨཀཐཾ ཀཐེནྟཱནཾ ཨམྷཱཀཾ པཱརུཔནཱརཧོ’’ཏི མཧགྒྷཾ ཀམྦལཾ ཨཱདཱཡ པཀྐཱམི. དཧརབྷིཀྑཱུ ཝིཔྤཊིསཱརིནོ ཧུཏྭཱ སཏྠུ སནྟིཀཾ གནྟྭཱ ཏམཏྠཾ ཨཱརོཙེསུཾ. སཏྠཱ ‘‘ན, བྷིཀྑཝེ, ཨིདཱནེཝ ཏུམྷཱཀཾ སནྟཀཾ གཧེཏྭཱ ཏུམྷེ ཝིཔྤཊིསཱརིནོ ཀརོཏི, པུབྦེཔི ཨཀཱསིཡེཝཱ’’ཏི ཝཏྭཱ ཨཏཱིཏཾ ཨཱཧརི –

ཨཏཱིཏསྨིཾ ཨནུཏཱིརཙཱརཱི ཙ གམྦྷཱིརཙཱརཱི ཙཱཏི དྭེ ཨུདྡཱ མཧནྟཾ རོཧིཏམཙྪཾ ལབྷིཏྭཱ ‘‘མཡ྄ཧཾ སཱིསཾ ཧོཏུ, ཏཝ ནངྒུཊྛ’’ནྟི ཝིཝཱདཱཔནྣཱ བྷཱཛེཏུཾ ཨསཀྐོནྟཱ ཨེཀཾ སིངྒཱལཾ དིསྭཱ ཨཱཧཾསུ – ‘‘མཱཏུལ, ཨིམཾ ནོ བྷཱཛེཏྭཱ དེཧཱི’’ཏི. ཨཧཾ རཉྙཱ ཝིནིཙྪཡཊྛཱནེ ཋཔིཏོ, ཏཏྠ ཙིརཾ ནིསཱིདིཏྭཱ ཛངྒྷཝིཧཱརཏྠཱཡ ཨཱགཏོམྷི, ཨིདཱནི མེ ཨོཀཱསོ ནཏྠཱིཏི. མཱཏུལ, མཱ ཨེཝཾ ཀརོཐ, བྷཱཛེཏྭཱ ཨེཝ ནོ དེཐཱཏི. མམ ཝཙནེ ཋསྶཐཱཏི. ཋསྶཱམ, མཱཏུལཱཏི. ‘‘ཏེན ཧི སཱདྷཱུ’’ཏི སོ སཱིསཾ ཚིནྡིཏྭཱ ཨེཀམནྟེ ཨཀཱསི, ནངྒུཊྛཾ ཨེཀམནྟེ. ཀཏྭཱ ཙ པན, ‘‘ཏཱཏཱ, ཡེན ཝོ ཨནུཏཱིརེ ཙརིཏཾ, སོ ནངྒུཊྛཾ གཎྷཱཏུ. ཡེན གམྦྷཱིརེ ཙརིཏཾ, ཏསྶ སཱིསཾ ཧོཏུ. ཨཡཾ པན མཛ྄ཛྷིམོ ཁཎྜོ མམ ཝིནིཙྪཡདྷམྨེ ཋིཏསྶ བྷཝིསྶཏཱི’’ཏི ཏེ སཉྙཱཔེནྟོ –

‘‘ཨནུཏཱིརཙཱརི ནངྒུཊྛཾ, སཱིསཾ གམྦྷཱིརཙཱརིནོ;

ཨཙྩཱཡཾ མཛ྄ཛྷིམོ ཁཎྜོ, དྷམྨཊྛསྶ བྷཝིསྶཏཱི’’ཏི. (ཛཱ. ༡.༧.༣༣) –

ཨིམཾ གཱཐཾ ཝཏྭཱ མཛ྄ཛྷིམཁཎྜཾ ཨཱདཱཡ པཀྐཱམི. ཏེཔི ཝིཔྤཊིསཱརིནོ ཏཾ ཨོལོཀེཏྭཱ ཨཊྛཾསུ.

སཏྠཱ ཨིམཾ ཨཏཱིཏཾ དསྶེཏྭཱ ‘‘ཨེཝམེས ཨཏཱིཏེཔི ཏུམྷེ ཝིཔྤཊིསཱརིནོ ཨཀཱསིཡེཝཱ’’ཏི ཏེ བྷིཀྑཱུ སཉྙཱཔེཏྭཱ ཨུཔནནྡཾ གརཧནྟོ, ‘‘བྷིཀྑཝེ, པརཾ ཨོཝདནྟེན ནཱམ པཋམམེཝ ཨཏྟཱ པཏིརཱུཔེ པཏིཊྛཱཔེཏབྦོ’’ཏི ཝཏྭཱ ཨིམཾ གཱཐམཱཧ –

༡༥༨.

‘‘ཨཏྟཱནམེཝ པཋམཾ, པཏིརཱུཔེ ནིཝེསཡེ;

ཨཐཉྙམནུསཱསེཡྻ, ན ཀིལིསྶེཡྻ པཎྜིཏོ’’ཏི.

ཏཏྠ པཏིརཱུཔེ ནིཝེསཡེཏི ཨནུཙྪཝིཀེ གུཎེ པཏིཊྛཱཔེཡྻ. ཨིདཾ ཝུཏྟཾ ཧོཏི – ཡོ ཨཔྤིཙྪཏཱདིགུཎེཧི ཝཱ ཨརིཡཝཾསཔཊིཔདཱདཱིཧི ཝཱ པརཾ ཨནུསཱསིཏུཀཱམོ, སོ ཨཏྟཱནམེཝ པཋམཾ ཏསྨིཾ གུཎེ པཏིཊྛཱཔེཡྻ. ཨེཝཾ པཏིཊྛཱཔེཏྭཱ ཨཐཉྙཾ ཏེཧི གུཎེཧི ཨནུསཱསེཡྻ. ཨཏྟཱནཉྷི ཏཏྠ ཨནིཝེསེཏྭཱ ཀེཝལཾ པརམེཝ ཨནུསཱསམཱནོ པརཏོ ནིནྡཾ ལབྷིཏྭཱ ཀིལིསྶཏི ནཱམ, ཏཏྠ ཨཏྟཱནཾ ནིཝེསེཏྭཱ ཨནུསཱསམཱནོ པརཏོ པསཾསཾ ལབྷཏི, ཏསྨཱ ན ཀིལིསྶཏི ནཱམ. ཨེཝཾ ཀརོནྟོ པཎྜིཏོ ན ཀིལིསྶེཡྻཱཏི.

དེསནཱཝསཱནེ ཏེ བྷིཀྑཱུ སོཏཱཔཏྟིཕལེ པཏིཊྛཧིཾསུ, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཨུཔནནྡསཀྱཔུཏྟཏྠེརཝཏྠུ དུཏིཡཾ.

༣. པདྷཱནིཀཏིསྶཏྠེརཝཏྠུ

ཨཏྟཱནཉྩེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པདྷཱནིཀཏིསྶཏྠེརཾ ཨཱརབྦྷ ཀཐེསི.

སོ ཀིར སཏྠུ སནྟིཀེ ཀམྨཊྛཱནཾ གཧེཏྭཱ པཉྩསཏེ བྷིཀྑཱུ ཨཱདཱཡ ཨརཉྙེ ཝསྶཾ ཨུཔགནྟྭཱ, ‘‘ཨཱཝུསོ, དྷརམཱནཀསྶ བུདྡྷསྶ སནྟིཀེ ཝོ ཀམྨཊྛཱནཾ གཧིཏཾ, ཨཔྤམཏྟཱཝ སམཎདྷམྨཾ ཀརོཐཱ’’ཏི ཨོཝདིཏྭཱ སཡཾ གནྟྭཱ ནིཔཛྫིཏྭཱ སུཔཏི. ཏེ བྷིཀྑཱུ པཋམཡཱམེ ཙངྐམིཏྭཱ མཛ྄ཛྷིམཡཱམེ ཝིཧཱརཾ པཝིསནྟི. སོ ནིདྡཱཡིཏྭཱ པབུདྡྷཀཱལེ ཏེསཾ སནྟིཀཾ གནྟྭཱ ‘‘ཀིཾ ཏུམྷེ ‘ནིཔཛྫིཏྭཱ ནིདྡཱཡིསྶཱམཱ’ཏི ཨཱགཏཱ, སཱིགྷཾ ནིཀྑམིཏྭཱ སམཎདྷམྨཾ ཀརོཐཱ’’ཏི ཝཏྭཱ སཡཾ གནྟྭཱ ཏཐེཝ སུཔཏི. ཨིཏརེ མཛ྄ཛྷིམཡཱམེ བཧི ཙངྐམིཏྭཱ པཙྪིམཡཱམེ ཝིཧཱརཾ པཝིསནྟི. སོ པུནཔི པབུཛ྄ཛྷིཏྭཱ ཏེསཾ སནྟིཀཾ གནྟྭཱ ཏེ ཝིཧཱརཱ ནཱིཧརིཏྭཱ སཡཾ པུན གནྟྭཱ ཏཐེཝ སུཔཏི. ཏསྨིཾ ནིཙྩཀཱལཾ ཨེཝཾ ཀརོནྟེ ཏེ བྷིཀྑཱུ སཛ྄ཛྷཱཡཾ ཝཱ ཀམྨཊྛཱནཾ ཝཱ མནསིཀཱཏུཾ ནཱསཀྑིཾསུ, ཙིཏྟཾ ཨཉྙཐཏྟཾ ཨགམཱསི. ཏེ ‘‘ཨམྷཱཀཾ ཨཱཙརིཡོ ཨཏིཝིཡ ཨཱརདྡྷཝཱིརིཡོ, པརིགྒཎྷིསྶཱམ ན’’ནྟི པརིགྒཎྷནྟཱ ཏསྶ ཀིརིཡཾ དིསྭཱ ‘‘ནཊྛམྷཱ, ཨཱཝུསོ, ཨཱཙརིཡོ ནོ ཏུཙྪརཝཾ རཝཏཱི’’ཏི ཝདིཾསུ. ཏེསཾ ཨཏིཝིཡ ནིདྡཱཡ ཀིལམནྟཱནཾ ཨེཀབྷིཀྑུཔི ཝིསེསཾ ནིབྦཏྟེཏུཾ ནཱསཀྑི. ཏེ ཝུཊྛཝསྶཱ སཏྠུ སནྟིཀཾ གནྟྭཱ སཏྠཱརཱ ཀཏཔཊིསནྠཱརཱ ‘‘ཀིཾ, བྷིཀྑཝེ, ཨཔྤམཏྟཱ ཧུཏྭཱ སམཎདྷམྨཾ ཀརིཏྠཱ’’ཏི པུཙྪིཏཱ ཏམཏྠཾ ཨཱརོཙེསུཾ. སཏྠཱ ‘‘ན, བྷིཀྑཝེ, ཨིདཱནེཝ, པུབྦེཔེས ཏུམྷཱཀཾ ཨནྟརཱཡམཀཱསིཡེཝཱ’’ཏི ཝཏྭཱ ཏེཧི ཡཱཙིཏོ –

‘‘ཨམཱཏཱཔིཏརསཾཝཌྜྷོ, ཨནཱཙེརཀུལེ ཝསཾ;

ནཱཡཾ ཀཱལཾ ཨཀཱལཾ ཝཱ, ཨབྷིཛཱནཱཏི ཀུཀྐུཊོ’’ཏི. (ཛཱ. ༡.༡.༡༡༩) –

ཨིམཾ ཨཀཱལརཱཝིཀུཀྐུཊཛཱཏཀཾ ཝིཏྠཱརེཏྭཱ ཀཐེསི. ‘‘ཏདཱ ཧི སོ ཀུཀྐུཊོ ཨཡཾ པདྷཱནིཀཏིསྶཏྠེརོ ཨཧོསི, ཨིམེ པཉྩ སཏཱ བྷིཀྑཱུ ཏེ མཱཎཝཱ ཨཧེསུཾ, དིསཱཔཱམོཀྑོ ཨཱཙརིཡོ ཨཧམེཝཱ’’ཏི སཏྠཱ ཨིམཾ ཛཱཏཀཾ ཝིཏྠཱརེཏྭཱ, ‘‘བྷིཀྑཝེ, པརཾ ཨོཝདནྟེན ནཱམ ཨཏྟཱ སུདནྟོ ཀཱཏབྦོ. ཨེཝཾ ཨོཝདནྟོ ཧི སུདནྟོ ཧུཏྭཱ དམེཏི ནཱམཱ’’ཏི ཝཏྭཱ ཨིམཾ གཱཐམཱཧ –

༡༥༩.

‘‘ཨཏྟཱནཉྩེ ཏཐཱ ཀཡིརཱ, ཡཐཱཉྙམནུསཱསཏི;

སུདནྟོ ཝཏ དམེཐ, ཨཏྟཱ ཧི ཀིར དུདྡམོ’’ཏི.

ཏསྶཏྠོ – ཡོ ཧི བྷིཀྑུ ‘‘པཋམཡཱམཱདཱིསུ ཙངྐམིཏབྦ’’ནྟི ཝཏྭཱ པརཾ ཨོཝདཏི, སཡཾ ཙངྐམནཱདཱིནི ཨདྷིཊྛཧནྟོ ཨཏྟཱནཉྩེ ཏཐཱ ཀཡིརཱ, ཡཐཱཉྙམནུསཱསཏི, ཨེཝཾ སནྟེ སུདནྟོ ཝཏ དམེཐཱཏི ཡེན གུཎེན པརཾ ཨནུསཱསཏི, ཏེན ཨཏྟནཱ སུདནྟོ ཧུཏྭཱ དམེཡྻ. ཨཏྟཱ ཧི ཀིར དུདྡམོཏི ཨཡཉྷི ཨཏྟཱ ནཱམ དུདྡམོ. ཏསྨཱ ཡཐཱ སོ སུདནྟོ ཧོཏི, ཏཐཱ དམེཏབྦོཏི.

དེསནཱཝསཱནེ པཉྩ སཏཱཔི ཏེ བྷིཀྑཱུ ཨརཧཏྟཾ པཱཔུཎིཾསཱུཏི.

པདྷཱནིཀཏིསྶཏྠེརཝཏྠུ ཏཏིཡཾ.

༤. ཀུམཱརཀསྶཔམཱཏུཐེརཱིཝཏྠུ

ཨཏྟཱ ཧི ཨཏྟནོ ནཱཐོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀུམཱརཀསྶཔཏྠེརསྶ མཱཏརཾ ཨཱརབྦྷ ཀཐེསི.

སཱ ཀིར རཱཛགཧནགརེ སེཊྛིདྷཱིཏཱ ཝིཉྙུཏཾ པཏྟཀཱལཏོ པཊྛཱཡ པབྦཛྫཾ ཡཱཙི. ཨཐ སཱ པུནཔྤུནཾ ཡཱཙམཱནཱཔི མཱཏཱཔིཏཱུནཾ སནྟིཀཱ པབྦཛྫཾ ཨལབྷིཏྭཱ ཝཡཔྤཏྟཱ པཏིཀུལཾ གནྟྭཱ པཏིདེཝཏཱ ཧུཏྭཱ ཨགཱརཾ ཨཛ྄ཛྷཱཝསི. ཨཐསྶཱ ན ཙིརསྶེཝ ཀུཙྪིསྨིཾ གབྦྷོ པཏིཊྛཧི. སཱ གབྦྷསྶ པཏིཊྛིཏབྷཱཝཾ ཨཛཱནིཏྭཱཝ སཱམིཀཾ ཨཱརཱདྷེཏྭཱ པབྦཛྫཾ ཡཱཙི. ཨཐ ནཾ སོ མཧནྟེན སཀྐཱརེན བྷིཀྑུནུཔསྶཡཾ ནེཏྭཱ ཨཛཱནནྟོ དེཝདཏྟཔཀྑིཀཱནཾ བྷིཀྑུནཱིནཾ སནྟིཀེ པབྦཱཛེསི. ཨཔརེན སམཡེན བྷིཀྑུནིཡོ ཏསྶཱ གབྦྷིནིབྷཱཝཾ ཉཏྭཱ ཏཱཧི ‘‘ཀིཾ ཨིད’’ནྟི ཝུཏྟཱ ནཱཧཾ, ཨཡྻེ, ཛཱནཱམི ‘‘ཀིམེཏཾ’’, སཱིལཾ ཝཏ མེ ཨརོགམེཝཱཏི. བྷིཀྑུནིཡོ ཏཾ དེཝདཏྟསྶ སནྟིཀཾ ནེཏྭཱ ‘‘ཨཡཾ བྷིཀྑུནཱི སདྡྷཱཔབྦཛིཏཱ, ཨིམིསྶཱ མཡཾ གབྦྷསྶ པཏིཊྛིཏབྷཱཝཾ ཛཱནཱམ, ཀཱལཾ ན ཛཱནཱམ, ཀིཾ དཱནི ཀརོམཱ’’ཏི པུཙྪིཾསུ. དེཝདཏྟོ ‘‘མཱ མཡ྄ཧཾ ཨོཝཱདཀཱརིཀཱནཾ བྷིཀྑུནཱིནཾ ཨཡསོ ཨུཔྤཛྫཏཱུ’’ཏི ཨེཏྟཀམེཝ ཙིནྟེཏྭཱ ‘‘ཨུཔྤབྦཱཛེཐ ན’’ནྟི ཨཱཧ. ཏཾ སུཏྭཱ སཱ དཧརཱ མཱ མཾ, ཨཡྻེ, ནཱསེཐ, ནཱཧཾ དེཝདཏྟཾ ཨུདྡིསྶ པབྦཛིཏཱ, ཨེཐ, མཾ སཏྠུ སནྟིཀཾ ཛེཏཝནཾ ནེཐཱཏི. ཏཱ ཏཾ ཨཱདཱཡ ཛེཏཝནཾ གནྟྭཱ སཏྠུ ཨཱརོཙེསུཾ. སཏྠཱ ‘‘ཏསྶཱ གིཧིཀཱལེ གབྦྷོ པཏིཊྛིཏོ’’ཏི ཛཱནནྟོཔི པརཝཱདམོཙནཏྠཾ རཱཛཱནཾ པསེནདིཀོསལཾ མཧཱཨནཱཐཔིཎྜིཀཾ ཙཱུལ༹ཨནཱཐཔིཎྜིཀཾ ཝིསཱཁཱཨུཔཱསིཀཾ ཨཉྙཱནི ཙ མཧཱཀུལཱནི པཀྐོསཱཔེཏྭཱ ཨུཔཱལིཏྠེརཾ ཨཱཎཱཔེསི – ‘‘གཙྪ, ཨིམིསྶཱ དཧརཱཡ བྷིཀྑུནིཡཱ ཙཏུཔརིསམཛ྄ཛྷེ ཀམྨཾ པརིསོདྷེཧཱི’’ཏི. ཐེརོ རཉྙོ པུརཏོ ཝིསཱཁཾ པཀྐོསཱཔེཏྭཱ ཏཾ ཨདྷིཀརཎཾ པཊིཙྪཱཔེསི. སཱ སཱཎིཔཱཀཱརཾ པརིཀྑིཔཱཔེཏྭཱ ཨནྟོསཱཎིཡཾ ཏསྶཱ ཧཏྠཔཱདནཱབྷིཨུདརཔརིཡོསཱནཱནི ཨོལོཀེཏྭཱ མཱསདིཝསེ སམཱནེཏྭཱ ‘‘གིཧིབྷཱཝེ ཨིམཱཡ གབྦྷོ ལདྡྷོ’’ཏི ཉཏྭཱ ཐེརསྶ ཏམཏྠཾ ཨཱརོཙེསི. ཨཐསྶཱ ཐེརོ པརིསམཛ྄ཛྷེ པརིསུདྡྷབྷཱཝཾ པཏིཊྛཱཔེསི. སཱ ཨཔརེན སམཡེན པདུམུཏྟརབུདྡྷསྶ པཱདམཱུལེ པཏྠིཏཔཏྠནཾ མཧཱནུབྷཱཝཾ པུཏྟཾ ཝིཛཱཡི.

ཨཐེཀདིཝསཾ རཱཛཱ བྷིཀྑུནུཔསྶཡསམཱིཔེན གཙྪནྟོ དཱརཀསདྡཾ སུཏྭཱ ‘‘ཀིཾ ཨིད’’ནྟི པུཙྪིཏྭཱ, ‘‘དེཝ, ཨེཀིསྶཱ བྷིཀྑུནིཡཱ པུཏྟོ ཛཱཏོ, ཏསྶེས སདྡོ’’ཏི ཝུཏྟེ ཏཾ ཀུམཱརཾ ཨཏྟནོ གྷརཾ ནེཏྭཱ དྷཱཏཱིནཾ ཨདཱསི. ནཱམགྒཧཎདིཝསེ ཙསྶ ཀསྶཔོཏི ནཱམཾ ཀཏྭཱ ཀུམཱརཔརིཧཱརེན ཝཌྜྷིཏཏྟཱ ཀུམཱརཀསྶཔོཏི སཉྫཱནིཾསུ. སོ ཀཱིལཱ༹མཎྜལེ དཱརཀེ པཧརིཏྭཱ ‘‘ནིམྨཱཏཱཔིཏིཀེནམྷཱ པཧཊཱ’’ཏི ཝུཏྟེ རཱཛཱནཾ ཨུཔསངྐམིཏྭཱ, ‘‘དེཝ, མཾ ‘ནིམྨཱཏཱཔིཏིཀོ’ཏི ཝདནྟི, མཱཏརཾ མེ ཨཱཙིཀྑཐཱ’’ཏི པུཙྪིཏྭཱ རཉྙཱ དྷཱཏིཡོ དསྶེཏྭཱ ‘‘ཨིམཱ ཏེ མཱཏརོ’’ཏི ཝུཏྟེ ‘‘ན ཨེཏྟིཀཱ མེ མཱཏརོ, ཨེཀཱཡ མེ མཱཏརཱ བྷཝིཏབྦཾ, ཏཾ མེ ཨཱཙིཀྑཐཱ’’ཏི ཨཱཧ. རཱཛཱ ‘‘ན སཀྐཱ ཨིམཾ ཝཉྩེཏུ’’ནྟི ཙིནྟེཏྭཱ, ཏཱཏ, ཏཝ མཱཏཱ བྷིཀྑུནཱི, ཏྭཾ མཡཱ བྷིཀྑུནུཔསྶཡཱ ཨཱནཱིཏོཏི. སོ ཏཱཝཏཀེནེཝ སམུཔྤནྣསཾཝེགོ ཧུཏྭཱ, ‘‘ཏཱཏ, པབྦཱཛེཐ མ’’ནྟི ཨཱཧ. རཱཛཱ ‘‘སཱདྷུ, ཏཱཏཱ’’ཏི ཏཾ མཧནྟེན སཀྐཱརེན སཏྠུ སནྟིཀེ པབྦཱཛེསི. སོ ལདྡྷཱུཔསམྤདོ ཀུམཱརཀསྶཔཏྠེརོཏི པཉྙཱཡི. སོ སཏྠུ སནྟིཀེ ཀམྨཊྛཱནཾ གཧེཏྭཱ ཨརཉྙཾ པཝིསིཏྭཱ ཝཱཡམིཏྭཱ ཝིསེསཾ ནིབྦཏྟེཏུཾ ཨསཀྐོནྟོ ‘‘པུན ཀམྨཊྛཱནཾ ཝིསེསེཏྭཱ གཧེསྶཱམཱི’’ཏི སཏྠུ སནྟིཀཾ གནྟྭཱ ཨནྡྷཝནེ ཝིཧཱསི.

ཨཐ ནཾ ཀསྶཔབུདྡྷཀཱལེ ཨེཀཏོ སམཎདྷམྨཾ ཀཏྭཱ ཨནཱགཱམིཕལཾ པཏྭཱ བྲཧྨལོཀེ ནིབྦཏྟབྷིཀྑུ བྲཧྨལོཀཏོ ཨཱགནྟྭཱ པནྣརས པཉྷེ པུཙྪིཏྭཱ ‘‘ཨིམེ པཉྷེ ཋཔེཏྭཱ སཏྠཱརཾ ཨཉྙོ བྱཱཀཱཏུཾ སམཏྠོ ནཱམ ནཏྠི, གཙྪ, སཏྠུ སནྟིཀེ ཨིམེསཾ ཨཏྠཾ ཨུགྒཎྷཱ’’ཏི ཨུཡྻོཛེསི. སོ ཏཐཱ ཀཏྭཱ པཉྷཝིསྶཛྫནཱཝསཱནེ ཨརཧཏྟཾ པཱཔུཎི. ཏསྶ པན ནིཀྑནྟདིཝསཏོ པཊྛཱཡ དྭཱདས ཝསྶཱནི མཱཏུབྷིཀྑུནིཡཱ ཨཀྑཱིཧི ཨསྶཱུནི པཝཏྟིཾསུ. སཱ པུཏྟཝིཡོགདུཀྑིཏཱ ཨསྶུཏིནྟེནེཝ མུཁེན བྷིཀྑཱཡ ཙརམཱནཱ ཨནྟརཝཱིཐིཡཾ ཐེརཾ དིསྭཱཝ, ‘‘པུཏྟ, པུཏྟཱ’’ཏི ཝིརཝནྟཱི ཏཾ གཎྷིཏུཾ ཨུཔདྷཱཝམཱནཱ པརིཝཏྟིཏྭཱ པཏི. སཱ ཐནེཧི ཁཱིརཾ མུཉྩནྟེཧི ཨུཊྛཧིཏྭཱ ཨལླཙཱིཝརཱ གནྟྭཱ ཐེརཾ གཎྷི. སོ ཙིནྟེསི – ‘‘སཙཱཡཾ མམ སནྟིཀཱ མདྷུརཝཙནཾ ལབྷིསྶཏི, ཝིནསྶིསྶཏི. ཐདྡྷམེཝ ཀཏྭཱ ཨིམཱཡ སདྡྷིཾ སལླཔིསྶཱམཱི’’ཏི. ཨཐ ནཾ ཨཱཧ – ‘‘ཀིཾ ཀརོནྟཱི ཝིཙརསི, སིནེཧམཏྟམྤི ཚིནྡིཏུཾ ན སཀྐོསཱི’’ཏི. སཱ ‘‘ཨཧོ ཀཀྑལཱ༹ ཐེརསྶ ཀཐཱ’’ཏི ཙིནྟེཏྭཱ ‘‘ཀིཾ ཝདེསི, ཏཱཏཱ’’ཏི ཝཏྭཱ པུནཔི ཏེན ཏཐེཝ ཝུཏྟཱ ཙིནྟེསི – ‘‘ཨཧཾ ཨིམསྶ ཀཱརཎཱ དྭཱདས ཝསྶཱནི ཨསྶཱུནི སནྡྷཱརེཏུཾ ན སཀྐོམི, ཨཡཾ པནེཝཾ ཐདྡྷཧདཡོ, ཀིཾ མེ ཨིམིནཱ’’ཏི པུཏྟསིནེཧཾ ཚིནྡིཏྭཱ ཏཾདིཝསམེཝ ཨརཧཏྟཾ པཱཔུཎི.

ཨཔརེན སམཡེན དྷམྨསབྷཱཡཾ ཀཐཾ སམུཊྛཱཔེསུཾ – ‘‘ཨཱཝུསོ, དེཝདཏྟེན ཨེཝཾ ཨུཔནིསྶཡསམྤནྣོ ཀུམཱརཀསྶཔོ ཙ ཐེརཱི ཙ ནཱསིཏཱ, སཏྠཱ པན ཏེསཾ པཏིཊྛཱ ཛཱཏོ, ཨཧོ བུདྡྷཱ ནཱམ ལོཀཱནུཀམྤཀཱ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ ཨཧཾ ཨིམེསཾ པཙྩཡོ པཏིཊྛཱ ཛཱཏོ, པུབྦེཔི ནེསཾ ཨཧཾ པཏིཊྛཱ ཨཧོསིཾཡེཝཱ’’ཏི ཝཏྭཱ –

‘‘ནིགྲོདྷམེཝ སེཝེཡྻ, ན སཱཁམུཔསཾཝསེ;

ནིགྲོདྷསྨིཾ མཏཾ སེཡྻོ, ཡཉྩེ སཱཁསྨི ཛཱིཝིཏ’’ནྟི. (ཛཱ. ༡.༡.༡༢; ༡.༡༠.༨༡) –

ཨིམཾ ནིགྲོདྷཛཱཏཀཾ ཝིཏྠཱརེན ཀཐེཏྭཱ ‘‘ཏདཱ སཱཁམིགོ དེཝདཏྟོ ཨཧོསི, པརིསཱཔིསྶ དེཝདཏྟཔརིསཱ, ཝཱརཔྤཏྟཱ མིགདྷེནུ ཐེརཱི ཨཧོསི, པུཏྟོ ཀུམཱརཀསྶཔོ, གབྦྷིནཱིམིགིཡཱ ཛཱིཝིཏཾ པརིཙྩཛིཏྭཱ གཏོ ནིགྲོདྷམིགརཱཛཱ པན ཨཧམེཝཱ’’ཏི ཛཱཏཀཾ སམོདྷཱནེཏྭཱ པུཏྟསིནེཧཾ ཚིནྡིཏྭཱ ཐེརིཡཱ ཨཏྟནཱཝ ཨཏྟནོ པཏིཊྛཱནཀཏབྷཱཝཾ པཀཱསེནྟོ, ‘‘བྷིཀྑཝེ, ཡསྨཱ པརསྶ ཨཏྟནི ཋིཏེན སགྒཔརཱཡཎེན ཝཱ མགྒཔརཱཡཎེན ཝཱ བྷཝིཏུཾ ན སཀྐཱ, ཏསྨཱ ཨཏྟཱཝ ཨཏྟནོ ནཱཐོ, པརོ ཀིཾ ཀརིསྶཏཱི’’ཏི ཝཏྭཱ ཨིམཾ གཱཐམཱཧ –

༡༦༠.

‘‘ཨཏྟཱ ཧི ཨཏྟནོ ནཱཐོ, ཀོ ཧི ནཱཐོ པརོ སིཡཱ;

ཨཏྟནཱ ཧི སུདནྟེན, ནཱཐཾ ལབྷཏི དུལླབྷ’’ནྟི.

ཏཏྠ ནཱཐོཏི པཏིཊྛཱ. ཨིདཾ ཝུཏྟཾ ཧོཏི – ཡསྨཱ ཨཏྟནི ཋིཏེན ཨཏྟསམྤནྣེན ཀུསལཾ ཀཏྭཱ སགྒཾ ཝཱ པཱཔུཎིཏུཾ, མགྒཾ ཝཱ བྷཱཝེཏུཾ, ཕལཾ ཝཱ སཙྪིཀཱཏུཾ སཀྐཱ. ཏསྨཱ ཧི ཨཏྟཱཝ ཨཏྟནོ པཏིཊྛཱ ཧོཏི, པརོ ཀོ ནཱམ ཀསྶ པཏིཊྛཱ སིཡཱ. ཨཏྟནཱ ཨེཝ ཧི སུདནྟེན ནིབྦིསེཝནེན ཨརཧཏྟཕལསངྑཱཏཾ དུལླབྷཾ ནཱཐཾ ལབྷཏི. ཨརཧཏྟཉྷི སནྡྷཱཡ ཨིདྷ ‘‘ནཱཐཾ ལབྷཏི དུལླབྷ’’ནྟི ཝུཏྟཾ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཀུམཱརཀསྶཔམཱཏུཐེརཱིཝཏྠུ ཙཏུཏྠཾ.

༥. མཧཱཀཱལཨུཔཱསཀཝཏྠུ

ཨཏྟནཱ ཧི ཀཏཾ པཱཔནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ མཧཱཀཱལཾ ནཱམ སོཏཱཔནྣཨུཔཱསཀཾ ཨཱརབྦྷ ཀཐེསི.

སོ ཀིར མཱསསྶ ཨཊྛདིཝསེསུ ཨུཔོསཐིཀོ ཧུཏྭཱ ཝིཧཱརེ སབྦརཏྟིཾ དྷམྨཀཐཾ སུཎཱཏི. ཨཐ རཏྟིཾ ཙོརཱ ཨེཀསྨིཾ གེཧེ སནྡྷིཾ ཚིནྡིཏྭཱ བྷཎྜཀཾ གཧེཏྭཱ ལོཧབྷཱཛནསདྡེན པབུདྡྷེཧི སཱམིཀེཧི ཨནུབདྡྷཱ གཧིཏབྷཎྜཾ ཚཌྜེཏྭཱ པལཱཡིཾསུ. སཱམིཀཱཔི ཏེ ཨནུབནྡྷིཾསུཡེཝ, ཏེ དིསཱ པཀྑནྡིཾསུ. ཨེཀོ པན ཝིཧཱརམགྒཾ གཧེཏྭཱ མཧཱཀཱལསྶ རཏྟིཾ དྷམྨཀཐཾ སུཏྭཱ པཱཏོཝ པོཀྑརཎིཏཱིརེ མུཁཾ དྷོཝནྟསྶ པུརཏོ བྷཎྜིཀཾ ཚཌྜེཏྭཱ པལཱཡི. ཙོརེ ཨནུབནྡྷིཏྭཱ ཨཱགཏམནུསྶཱ བྷཎྜིཀཾ དིསྭཱ ‘‘ཏྭཾ ནོ གེཧསནྡྷིཾ ཚིནྡིཏྭཱ བྷཎྜིཀཾ ཧརིཏྭཱ དྷམྨཾ སུཎནྟོ ཝིཡ ཝིཙརསཱི’’ཏི ཏཾ གཧེཏྭཱ པོཐེཏྭཱ མཱརེཏྭཱ ཚཌྜེཏྭཱ ཨགམིཾསུ. ཨཐ ནཾ པཱཏོཝ པཱནཱིཡགྷཊཾ ཨཱདཱཡ གཏཱ དཧརསཱམཎེརཱ དིསྭཱ ‘‘ཝིཧཱརེ དྷམྨཀཐཾ སུཏྭཱ སཡིཏཨུཔཱསཀོ ཨཡུཏྟཾ མརཎཾ ལབྷཏཱི’’ཏི ཝཏྭཱ སཏྠུ ཨཱརོཙེསུཾ. སཏྠཱ ‘‘ཨཱམ, བྷིཀྑཝེ, ཨིམསྨིཾ ཨཏྟབྷཱཝེ ཀཱལེན ཨཔྤཏིརཱུཔཾ མརཎཾ ལདྡྷཾ, པུབྦེ ཀཏཀམྨསྶ པན ཏེན ཡུཏྟམེཝ ལདྡྷ’’ནྟི ཝཏྭཱ ཏེཧི ཡཱཙིཏོ ཏསྶ པུབྦཀམྨཾ ཀཐེསི –

ཨཏཱིཏེ ཀིར བཱརཱཎསིརཉྙོ ཝིཛིཏེ ཨེཀསྶ པཙྩནྟགཱམསྶ ཨཊཝིམུཁེ ཙོརཱ པཧརནྟི. རཱཛཱ ཨཊཝིམུཁེ ཨེཀཾ རཱཛབྷཊཾ ཋཔེསི, སོ བྷཏིཾ གཧེཏྭཱ མནུསྶེ ཨོརཏོ པཱརཾ ནེཏི, པཱརཏོ ཨོརཾ ཨཱནེཏི. ཨཐེཀོ མནུསྶོ ཨབྷིརཱུཔཾ ཨཏྟནོ བྷརིཡཾ ཙཱུལ༹ཡཱནཀཾ ཨཱརོཔེཏྭཱ ཏཾ ཋཱནཾ ཨགམཱསི. རཱཛབྷཊོ ཏཾ ཨིཏྠིཾ དིསྭཱཝ སཉྫཱཏསིནེཧོ ཏེན ‘‘ཨཊཝིཾ ནོ, སཱམི, ཨཏིཀྐཱམེཧཱི’’ཏི ཝུཏྟེཔི ‘‘ཨིདཱནི ཝིཀཱལོ, པཱཏོཝ ཨཏིཀྐཱམེསྶཱམཱི’’ཏི ཨཱཧ. སོ སཀཱལོ, སཱམི, ཨིདཱནེཝ ནོ ནེཧཱིཏི. ནིཝཏྟ, བྷོ, ཨམྷཱཀཾཡེཝ གེཧེ ཨཱཧཱརོ ཙ ནིཝཱསོ ཙ བྷཝིསྶཏཱིཏི. སོ ནེཝ ནིཝཏྟིཏུཾ ཨིཙྪི. ཨིཏརོ པུརིསཱནཾ སཉྙཾ དཏྭཱ ཡཱནཀཾ ནིཝཏྟཱཔེཏྭཱ ཨནིཙྪནྟསྶེཝ དྭཱརཀོཊྛཀེ ནིཝཱསཾ དཏྭཱ ཨཱཧཱརཾ པཊིཡཱདཱཔེསི. ཏསྶ པན གེཧེ ཨེཀཾ མཎིརཏནཾ ཨཏྠི. སོ ཏཾ ཏསྶ ཡཱནཀནྟརེ པཀྑིཔཱཔེཏྭཱ པཙྩཱུསཀཱལེ ཙོརཱནཾ པཝིཊྛསདྡཾ ཀཱརེསི. ཨཐསྶ པུརིསཱ ‘‘མཎིརཏནཾ, སཱམི, ཙོརེཧི ཧཊ’’ནྟི ཨཱརོཙེསུཾ. སོ གཱམདྭཱརེསུ ཨཱརཀྑཾ ཋཔེཏྭཱ ‘‘ཨནྟོགཱམཏོ ནིཀྑམནྟེ ཝིཙིནཐཱ’’ཏི ཨཱཧ. ཨིཏརོཔི པཱཏོཝ ཡཱནཀཾ ཡོཛེཏྭཱ པཱཡཱསི. ཨཐསྶ ཡཱནཀཾ སོདྷེནྟཱ ཨཏྟནཱ ཋཔིཏཾ མཎིརཏནཾ དིསྭཱ སནྟཛྫེཏྭཱ ‘‘ཏྭཾ མཎིཾ གཧེཏྭཱ པལཱཡསཱི’’ཏི པོཐེཏྭཱ ‘‘གཧིཏོ ནོ, སཱམི, ཙོརོ’’ཏི གཱམབྷོཛཀསྶ དསྶེསུཾ. སོ ‘‘བྷཏཀསྶ ཝཏ མེ གེཧེ ནིཝཱསཾ དཏྭཱ བྷཏྟཾ དིནྣཾ, མཎིཾ གཧེཏྭཱ གཏོ, གཎྷཐ ནཾ པཱཔཔུརིས’’ནྟི པོཐཱཔེཏྭཱ མཱརེཏྭཱ ཚཌྜཱཔེསི. ཨིདཾ ཏསྶ པུབྦཀམྨཾ. སོ ཏཏོ ཙུཏོ ཨཝཱིཙིམྷི ནིབྦཏྟིཏྭཱ ཏཏྠ དཱིགྷརཏྟཾ པཙྩིཏྭཱ ཝིཔཱཀཱཝསེསེན ཨཏྟབྷཱཝསཏེ ཏཐེཝ པོཐིཏོ མརཎཾ པཱཔུཎི.

ཨེཝཾ སཏྠཱ མཧཱཀཱལསྶ པུབྦཀམྨཾ དསྶེཏྭཱ, ‘‘བྷིཀྑཝེ, ཨེཝཾ ཨིམེ སཏྟེ ཨཏྟནཱ ཀཏཔཱཔཀམྨམེཝ ཙཏཱུསུ ཨཔཱཡེསུ ཨབྷིམཏྠཏཱི’’ཏི ཝཏྭཱ ཨིམཾ གཱཐམཱཧ –

༡༦༡.

‘‘ཨཏྟནཱ ཧི ཀཏཾ པཱཔཾ, ཨཏྟཛཾ ཨཏྟསམྦྷཝཾ;

ཨབྷིམཏྠཏི དུམྨེདྷཾ, ཝཛིརཾཝསྨམཡཾ མཎི’’ནྟི.

ཏཏྠ ཝཛིརཾཝསྨམཡཾ མཎིནྟི ཝཛིརཾཝ ཨསྨམཡཾ མཎིཾ. ཨིདཾ ཝུཏྟཾ ཧོཏི – ཡཐཱ པཱསཱཎམཡཾ པཱསཱཎསམྦྷཝཾ ཝཛིརཾ ཏམེཝ ཨསྨམཡཾ མཎིཾ ཨཏྟནོ ཨུཊྛཱནཊྛཱནསངྑཱཏཾ པཱསཱཎམཎིཾ ཁཱདིཏྭཱ ཚིདྡཾ ཚིདྡཾ ཁཎྜཾ ཁཎྜཾ ཀཏྭཱ ཨཔརིབྷོགཾ ཀརོཏི, ཨེཝམེཝ ཨཏྟནཱ ཀཏཾ ཨཏྟནི ཛཱཏཾ ཨཏྟསམྦྷཝཾ པཱཔཾ དུམྨེདྷཾ ནིཔྤཉྙཾ པུགྒལཾ ཙཏཱུསུ ཨཔཱཡེསུ ཨབྷིམཏྠཏི ཀནྟཏི ཝིདྡྷཾསེཏཱིཏི.

དེསནཱཝསཱནེ སམྤཏྟབྷིཀྑཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཧཱཀཱལཨུཔཱསཀཝཏྠུ པཉྩམཾ.

༦. དེཝདཏྟཝཏྠུ

ཡསྶ ཨཙྩནྟདུསྶཱིལྱནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ དེཝདཏྟཾ ཨཱརབྦྷ ཀཐེསི.

ཨེཀསྨིཉྷི དིཝསེ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ – ‘‘ཨཱཝུསོ, དེཝདཏྟོ དུསྶཱིལོ པཱཔདྷམྨོ དུསྶཱིལྱཀཱརཎེན ཝཌྜྷིཏཱཡ ཏཎྷཱཡ ཨཛཱཏསཏྟུཾ སངྒཎྷིཏྭཱ མཧནྟཾ ལཱབྷསཀྐཱརཾ ནིབྦཏྟེཏྭཱ ཨཛཱཏསཏྟུཾ པིཏུཝདྷེ སམཱདཔེཏྭཱ ཏེན སདྡྷིཾ ཨེཀཏོ ཧུཏྭཱ ནཱནཔྤཀཱརེན ཏཐཱགཏསྶ ཝདྷཱཡ པརིསཀྐཏཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ, པུབྦེཔི དེཝདཏྟོ ནཱནཔྤཀཱརེན མཡ྄ཧཾ ཝདྷཱཡ པརིསཀྐཏཱི’’ཏི ཝཏྭཱ ཀུརུངྒམིགཛཱཏཀཱདཱིནི (ཛཱ. ༡.༢.༡༡༡-༢) ཀཐེཏྭཱ, ‘‘བྷིཀྑཝེ, ཨཙྩནྟདུསྶཱིལཔུགྒལཾ ནཱམ དུསྶཱིལྱཀཱརཎཱ ཨུཔྤནྣཱ ཏཎྷཱ མཱལུཝཱ ཝིཡ སཱལཾ པརིཡོནནྡྷིཏྭཱ སམྦྷཉྫམཱནཱ ནིརཡཱདཱིསུ པཀྑིཔཏཱི’’ཏི ཝཏྭཱ ཨིམཾ གཱཐཱམཱཧ –

༡༦༢.

‘‘ཡསྶ ཨཙྩནྟདུསྶཱིལྱཾ, མཱལུཝཱ སཱལམིཝོཏྠཏཾ;

ཀརོཏི སོ ཏཐཏྟཱནཾ, ཡཐཱ ནཾ ཨིཙྪཏཱི དིསོ’’ཏི.

ཏཏྠ ཨཙྩནྟདུསྶཱིལྱནྟི ཨེཀནྟདུསྶཱིལབྷཱཝོ. གིཧཱི ཝཱ ཛཱཏིཏོ པཊྛཱཡ དས ཨཀུསལཀམྨཔཐེ ཀརོནྟོ, པབྦཛིཏོ ཝཱ ཨུཔསམྤནྣདིཝསཏོ པཊྛཱཡ གརུཀཱཔཏྟིཾ ཨཱཔཛྫམཱནོ ཨཙྩནྟདུསྶཱིལོ ནཱམ. ཨིདྷ པན ཡོ དྭཱིསུ ཏཱིསུ ཨཏྟབྷཱཝེསུ དུསྶཱིལོ, ཨེཏསྶ གཏིཡཱ ཨཱགཏཾ དུསྶཱིལབྷཱཝཾ སནྡྷཱཡེཏཾ ཝུཏྟཾ. དུསྶཱིལབྷཱཝོཏི ཙེཏྠ དུསྶཱིལསྶ ཚ དྭཱརཱནི ནིསྶཱཡ ཨུཔྤནྣཱ ཏཎྷཱ ཝེདིཏབྦཱ. མཱལུཝཱ སཱལམིཝོཏྠཏནྟི ཡསྶ པུགྒལསྶ ཏཾ ཏཎྷཱསངྑཱཏཾ དུསྶཱིལྱཾ ཡཐཱ ནཱམ མཱལུཝཱ སཱལཾ ཨོཏྠརནྟཱི དེཝེ ཝསྶནྟེ པཏྟེཧི ཨུདཀཾ སམྤཊིཙྪིཏྭཱ སམྦྷཉྫནཝསེན སབྦཏྠཀམེཝ པརིཡོནནྡྷཏི, ཨེཝཾ ཨཏྟབྷཱཝཾ ཨོཏྠཏཾ པརིཡོནནྡྷིཏྭཱ ཋིཏཾ. སོ མཱལུཝཱཡ སམྦྷཉྫིཏྭཱ བྷཱུམིཡཾ པཱཏིཡམཱནོ རུཀྑོ ཝིཡ ཏཱཡ དུསྶཱིལྱསངྑཱཏཱཡ ཏཎྷཱཡ སམྦྷཉྫིཏྭཱ ཨཔཱཡེསུ པཱཏིཡམཱནོ, ཡཐཱ ནཾ ཨནཏྠཀཱམོ དིསོ ཨིཙྪཏི, ཏཐཱ ཨཏྟཱནཾ ཀརོཏི ནཱམཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

དེཝདཏྟཝཏྠུ ཚཊྛཾ.

༧. སངྒྷབྷེདཔརིསཀྐནཝཏྠུ

སུཀརཱནཱིཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ སངྒྷབྷེདཔརིསཀྐནཾ ཨཱརབྦྷ ཀཐེསི.

ཨེཀདིཝསཉྷི དེཝདཏྟོ སངྒྷབྷེདཱཡ པརིསཀྐནྟོ ཨཱཡསྨནྟཾ ཨཱནནྡཾ པིཎྜཱཡ ཙརནྟཾ དིསྭཱ ཨཏྟནོ ཨདྷིཔྤཱཡཾ ཨཱརོཙེསི. ཏཾ སུཏྭཱ ཐེརོ སཏྠུ སནྟིཀཾ གནྟྭཱ བྷགཝནྟཾ ཨེཏདཝོཙ – ‘‘ཨིདྷཱཧཾ, བྷནྟེ, པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ རཱཛགཧཾ པིཎྜཱཡ པཱཝིསིཾ. ཨདྡསཱ ཁོ མཾ, བྷནྟེ, དེཝདཏྟོ རཱཛགཧེ པིཎྜཱཡ ཙརནྟཾ. དིསྭཱ ཡེནཱཧཾ ཏེནུཔསངྐམི, ཨུཔསངྐམིཏྭཱ མཾ ཨེཏདཝོཙ – ‘ཨཛྫཏགྒེ དཱནཱཧཾ, ཨཱཝུསོ ཨཱནནྡ, ཨཉྙཏྲེཝ བྷགཝཏཱ ཨཉྙཏྲ བྷིཀྑུསངྒྷེན ཨུཔོསཐཾ ཀརིསྶཱམི སངྒྷཀམྨཉྩཱ’ཏི. ཨཛྫ བྷགཝཱ དེཝདཏྟོ སངྒྷཾ བྷིནྡིསྶཏི, ཨུཔོསཐཉྩ ཀརིསྶཏི སངྒྷཀམྨཱནི ཙཱ’’ཏི. ཨེཝཾ ཝུཏྟེ སཏྠཱ –

‘‘སུཀརཾ སཱདྷུནཱ སཱདྷུ, སཱདྷུ པཱཔེན དུཀྐརཾ;

པཱཔཾ པཱཔེན སུཀརཾ, པཱཔམརིཡེཧི དུཀྐར’’ནྟི. (ཨུདཱ. ༤༨) –

ཨིམཾ ཨུདཱནཾ ཨུདཱནེཏྭཱ, ‘‘ཨཱནནྡ, ཨཏྟནོ ཨཧིཏཀམྨཾ ནཱམ སུཀརཾ, ཧིཏཀམྨམེཝ དུཀྐར’’ནྟི ཝཏྭཱ ཨིམཾ གཱཐམཱཧ –

༡༦༣.

‘‘སུཀརཱནི ཨསཱདྷཱུནི, ཨཏྟནོ ཨཧིཏཱནི ཙ;

ཡཾ ཝེ ཧིཏཉྩ སཱདྷུཉྩ, ཏཾ ཝེ པརམདུཀྐར’’ནྟི.

ཏསྶཏྠོ – ཡཱནི ཀམྨཱནི ཨསཱདྷཱུནི སཱཝཛྫཱནི ཨཔཱཡསཾཝཏྟནིཀཏྟཱཡེཝ ཨཏྟནོ ཨཧིཏཱནི ཙ ཧོནྟི, ཏཱནི སུཀརཱནི. ཡཾ པན སུགཏིསཾཝཏྟནིཀཏྟཱ ཨཏྟནོ ཧིཏཉྩ ཨནཝཛྫཏྠེན སཱདྷུཉྩ སུགཏིསཾཝཏྟནིཀཉྩེཝ ནིབྦཱནསཾཝཏྟནིཀཉྩ ཀམྨཾ, ཏཾ པཱཙཱིནནིནྣཱཡ གངྒཱཡ ཨུབྦཏྟེཏྭཱ པཙྪཱམུཁཀརཎཾ ཝིཡ ཨཏིདུཀྐརནྟི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སངྒྷབྷེདཔརིསཀྐནཝཏྠུ སཏྟམཾ.

༨. ཀཱལཏྠེརཝཏྠུ

ཡོ སཱསནནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀཱལཏྠེརཾ ཨཱརབྦྷ ཀཐེསི.

སཱཝཏྠིཡཾ ཀིརེཀཱ ཨིཏྠཱི མཱཏུཊྛཱནེ ཋཏྭཱ ཏཾ ཐེརཾ ཨུཔཊྛཧི. ཏསྶཱ པཊིཝིསྶཀགེཧེ མནུསྶཱ སཏྠུ སནྟིཀེ དྷམྨཾ སུཏྭཱ ཨཱགནྟྭཱ ‘‘ཨཧོ བུདྡྷཱ ནཱམ ཨཙྪརིཡཱ, ཨཧོ དྷམྨདེསནཱ མདྷུརཱ’’ཏི པསཾསནྟི. སཱ ཨིཏྠཱི ཏེསཾ ཀཐཾ སུཏྭཱ, ‘‘བྷནྟེ, ཨཧམྤི སཏྠུ དྷམྨདེསནཾ སོཏུཀཱམཱ’’ཏི ཏསྶ ཨཱརོཙེསི. སོ ‘‘ཏཏྠ མཱ གམཱི’’ཏི ཏཾ ནིཝཱརེསི. སཱ པུནདིཝསེ པུནདིཝསེཔཱིཏི ཡཱཝཏཏིཡཾ ཏེན ནིཝཱརིཡམཱནཱཔི སོཏུཀཱམཱཝ ཨཧོསི. ཀསྨཱ སོ པནེཏཾ ནིཝཱརེསཱིཏི? ཨེཝཾ ཀིརསྶ ཨཧོསི – ‘‘སཏྠུ སནྟིཀེ དྷམྨཾ སུཏྭཱ མཡི བྷིཛྫིསྶཏཱི’’ཏི. སཱ ཨེཀདིཝསཾ པཱཏོཝ བྷུཏྟཔཱཏརཱསཱ ཨུཔོསཐཾ སམཱདིཡིཏྭཱ, ‘‘ཨམྨ, སཱདྷུཀཾ ཨཡྻཾ པརིཝིསེཡྻཱསཱི’’ཏི དྷཱིཏརཾ ཨཱཎཱཔེཏྭཱ ཝིཧཱརཾ ཨགམཱསི. དྷཱིཏཱཔིསྶཱ ཏཾ བྷིཀྑུཾ ཨཱགཏཀཱལེ པརིཝིསིཏྭཱ ‘‘ཀུཧིཾ མཧཱཨུཔཱསིཀཱ’’ཏི ཝུཏྟཱ ‘‘དྷམྨསྶཝནཱཡ ཝིཧཱརཾ གཏཱ’’ཏི ཨཱཧ. སོ ཏཾ སུཏྭཱཝ ཀུཙྪིཡཾ ཨུཊྛིཏེན ཌཱཧེན སནྟཔྤམཱནོ ‘‘ཨིདཱནི སཱ མཡི བྷིནྣཱ’’ཏི ཝེགེན གནྟྭཱ སཏྠུ སནྟིཀེ དྷམྨཾ སུཎམཱནཾ དིསྭཱ སཏྠཱརཾ ཨཱཧ, ‘‘བྷནྟེ, ཨཡཾ ཨིཏྠཱི དནྡྷཱ སུཁུམཾ དྷམྨཀཐཾ ན ཛཱནཱཏི, ཨིམིསྶཱ ཁནྡྷཱདིཔཊིསཾཡུཏྟཾ སུཁུམཾ དྷམྨཀཐཾ ཨཀཐེཏྭཱ དཱནཀཐཾ ཝཱ སཱིལཀཐཾ ཝཱ ཀཐེཏུཾ ཝཊྚཏཱི’’ཏི. སཏྠཱ ཏསྶཛ྄ཛྷཱསཡཾ ཝིདིཏྭཱ ‘‘ཏྭཾ དུཔྤཉྙོ པཱཔིཀཾ དིཊྛིཾ ནིསྶཱཡ བུདྡྷཱནཾ སཱསནཾ པཊིཀྐོསསི. ཨཏྟགྷཱཏཱཡེཝ ཝཱཡམསཱི’’ཏི ཝཏྭཱ ཨིམཾ གཱཐམཱཧ –

༡༦༤.

‘‘ཡོ སཱསནཾ ཨརཧཏཾ, ཨརིཡཱནཾ དྷམྨཛཱིཝིནཾ;

པཊིཀྐོསཏི དུམྨེདྷོ, དིཊྛིཾ ནིསྶཱཡ པཱཔིཀཾ;

ཕལཱནི ཀཊྛཀསྶེཝ, ཨཏྟགྷཱཏཱཡ ཕལླཏཱི’’ཏི.

ཏསྶཏྠོ – ཡོ དུམྨེདྷོ པུགྒལོ ཨཏྟནོ སཀྐཱརཧཱནིབྷཡེན པཱཔིཀཾ དིཊྛིཾ ནིསྶཱཡ ‘‘དྷམྨཾ ཝཱ སོསྶཱམ, དཱནཾ ཝཱ དསྶཱམཱ’’ཏི ཝདནྟེ པཊིཀྐོསནྟོ ཨརཧཏཾ ཨརིཡཱནཾ དྷམྨཛཱིཝིནཾ བུདྡྷཱནཾ སཱསནཾ པཊིཀྐོསཏི, ཏསྶ ཏཾ པཊིཀྐོསནཾ སཱ ཙ པཱཔིཀཱ དིཊྛི ཝེལུ༹སངྑཱཏསྶ ཀཊྛཀསྶ ཕལཱནི ཝིཡ ཧོཏི. ཏསྨཱ ཡཐཱ ཀཊྛཀོ ཕལཱནི གཎྷནྟོ ཨཏྟགྷཱཏཱཡ ཕལླཏི, ཨཏྟནོ གྷཱཏཏྠམེཝ ཕལཏི, ཨེཝཾ སོཔི ཨཏྟགྷཱཏཱཡ ཕལླཏཱིཏི. ཝུཏྟམྤི ཙེཏཾ –

‘‘ཕལཾ ཝེ ཀདལིཾ ཧནྟི, ཕལཾ ཝེལུ༹ཾ ཕལཾ ནལ༹ཾ;

སཀྐཱརོ ཀཱཔུརིསཾ ཧནྟི, གབྦྷོ ཨསྶཏརིཾ ཡཐཱ’’ཏི. (ཙཱུལ༹ཝ. ༣༣༥; ཨ. ནི. ༤.༦༨);

དེསནཱཝསཱནེ ཨུཔཱསིཀཱ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

ཀཱལཏྠེརཝཏྠུ ཨཊྛམཾ.

༩. ཙཱུལ༹ཀཱལཨུཔཱསཀཝཏྠུ

ཨཏྟནཱ ཧི ཀཏནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཙཱུལ༹ཀཱལཾ ཨུཔཱསཀཾ ཨཱརབྦྷ ཀཐེསི.

ཨེཀདིཝསཉྷི མཧཱཀཱལཝཏྠུསྨིཾ ཝུཏྟནཡེནེཝ ཨུམངྒཙོརཱ སཱམིཀེཧི ཨནུབདྡྷཱ རཏྟིཾ ཝིཧཱརེ དྷམྨཀཐཾ སུཏྭཱ པཱཏོཝ ཝིཧཱརཱ ནིཀྑམིཏྭཱ སཱཝཏྠིཾ ཨཱགཙྪནྟསྶ ཏསྶ ཨུཔཱསཀསྶ པུརཏོ བྷཎྜིཀཾ ཚཌྜེཏྭཱ པལཱཡིཾསུ. མནུསྶཱ ཏཾ དིསྭཱ ‘‘ཨཡཾ རཏྟིཾ ཙོརཀམྨཾ ཀཏྭཱ དྷམྨཾ སུཎནྟོ ཝིཡ ཙརཏི, གཎྷཐ ན’’ནྟི ཏཾ པོཐཡིཾསུ. ཀུམྦྷདཱསིཡོ ཨུདཀཏིཏྠཾ གཙྪམཱནཱ ཏཾ དིསྭཱ ‘‘ཨཔེཐ, སཱམི, ནཱཡཾ ཨེཝརཱུཔཾ ཀརོཏཱི’’ཏི ཏཾ མོཙེསུཾ. སོ ཝིཧཱརཾ གནྟྭཱ, ‘‘བྷནྟེ, ཨཧམྷི མནུསྶེཧི ནཱསིཏོ, ཀུམྦྷདཱསིཡོ མེ ནིསྶཱཡ ཛཱིཝིཏཾ ལདྡྷ’’ནྟི བྷིཀྑཱུནཾ ཨཱརོཙེསི. བྷིཀྑཱུ ཏཐཱགཏསྶ ཏམཏྠཾ ཨཱརོཙེསུཾ. སཏྠཱ ཏེསཾ ཀཐཾ སུཏྭཱ, ‘‘བྷིཀྑཝེ, ཙཱུལ༹ཀཱལཨུཔཱསཀོ ཀུམྦྷདཱསིཡོ ཙེཝ ནིསྶཱཡ, ཨཏྟནོ ཙ ཨཀརཎབྷཱཝེན ཛཱིཝིཏཾ ལབྷི. ཨིམེ ཧི ནཱམ སཏྟཱ ཨཏྟནཱ པཱཔཀམྨཾ ཀཏྭཱ ནིརཡཱདཱིསུ ཨཏྟནཱཝ ཀིལིསྶནྟི, ཀུསལཾ ཀཏྭཱ པན སུགཏིཉྩེཝ ནིབྦཱནཉྩ གཙྪནྟཱ ཨཏྟནཱཝ ཝིསུཛ྄ཛྷནྟཱི’’ཏི ཝཏྭཱ ཨིམཾ གཱཐམཱཧ –

༡༦༥.

‘‘ཨཏྟནཱ ཧི ཀཏཾ པཱཔཾ, ཨཏྟནཱ སཾཀིལིསྶཏི;

ཨཏྟནཱ ཨཀཏཾ པཱཔཾ, ཨཏྟནཱཝ ཝིསུཛ྄ཛྷཏི;

སུདྡྷཱི ཨསུདྡྷི པཙྩཏྟཾ, ནཱཉྙོ ཨཉྙཾ ཝིསོདྷཡེ’’ཏི.

ཏསྶཏྠོ – ཡེན ཨཏྟནཱ ཨཀུསལཀམྨཾ ཀཏཾ ཧོཏི, སོ ཙཏཱུསུ ཨཔཱཡེསུ དུཀྑཾ ཨནུབྷཝནྟོ ཨཏྟནཱཝ སཾཀིལིསྶཏི. ཡེན པན ཨཏྟནཱ ཨཀཏཾ པཱཔཾ, སོ སུགཏིཉྩེཝ ནིབྦཱནཉྩ གཙྪནྟོ ཨཏྟནཱཝ ཝིསུཛ྄ཛྷཏི. ཀུསལཀམྨསངྑཱཏཱ སུདྡྷི ཨཀུསལཀམྨསངྑཱཏཱ ཙ ཨསུདྡྷི པཙྩཏྟཾ ཀཱརཀསཏྟཱནཾ ཨཏྟནིཡེཝ ཝིཔཙྩཏི. ཨཉྙོ པུགྒལོ ཨཉྙཾ པུགྒལཾ ན ཝིསོདྷཡེ ནེཝ ཝིསོདྷེཏི, ན ཀིལེསེཏཱིཏི ཝུཏྟཾ ཧོཏི.

དེསནཱཝསཱནེ ཙཱུལ༹ཀཱལོ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

ཙཱུལ༹ཀཱལཨུཔཱསཀཝཏྠུ ནཝམཾ.

༡༠. ཨཏྟདཏྠཏྠེརཝཏྠུ

ཨཏྟདཏྠནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཏྟདཏྠཏྠེརཾ ཨཱརབྦྷ ཀཐེསི.

སཏྠཱརཱ ཧི པརིནིབྦཱནཀཱལེ, ‘‘བྷིཀྑཝེ, ཨཧཾ ཨིཏོ ཙཏུམཱསཙྩཡེན པརིནིབྦཱཡིསྶཱམཱི’’ཏི ཝུཏྟེ ཨུཔྤནྣསཾཝེགཱ སཏྟསཏཱ པུཐུཛྫནཱ བྷིཀྑཱུ སཏྠུ སནྟིཀཾ ཨཝིཛཧིཏྭཱ ‘‘ཀིཾ ནུ ཁོ, ཨཱཝུསོ, ཀརིསྶཱམཱ’’ཏི སམྨནྟཡམཱནཱ ཝིཙརནྟི. ཨཏྟདཏྠཏྠེརོ པན ཙིནྟེསི – ‘‘སཏྠཱ ཀིར ཙཏུམཱསཙྩཡེན པརིནིབྦཱཡིསྶཏི, ཨཧཉྩམྷི ཨཝཱིཏརཱགོ, སཏྠརི དྷརམཱནེཡེཝ ཨརཧཏྟཏྠཱཡ ཝཱཡམིསྶཱམཱི’’ཏི. སོ བྷིཀྑཱུནཾ སནྟིཀཾ ན གཙྪཏི. ཨཐ ནཾ བྷིཀྑཱུ ‘‘ཀསྨཱ, ཨཱཝུསོ, ཏྭཾ ནེཝ ཨམྷཱཀཾ སནྟིཀཾ ཨཱགཙྪསི, ན ཀིཉྩི མནྟེསཱི’’ཏི ཝཏྭཱ སཏྠུ སནྟིཀཾ ནེཏྭཱ ‘‘ཨཡཾ, བྷནྟེ, ཨེཝཾ ནཱམ ཀརོཏཱི’’ཏི ཨཱརོཙཡིཾསུ. སོ སཏྠཱརཱཔི ‘‘ཀསྨཱ ཨེཝཾ ཀརོསཱི’’ཏི ཝུཏྟེ ‘‘ཏུམྷེ ཀིར, བྷནྟེ, ཙཏུམཱསཙྩཡེན པརིནིབྦཱཡིསྶཐ, ཨཧཾ ཏུམྷེསུ དྷརནྟེསུཡེཝ ཨརཧཏྟཔྤཏྟིཡཱ ཝཱཡམིསྶཱམཱི’’ཏི. སཏྠཱ ཏསྶ སཱདྷུཀཱརཾ དཏྭཱ, ‘‘བྷིཀྑཝེ, ཡསྶ མཡི སིནེཧོ ཨཏྠི, ཏེན ཨཏྟདཏྠེན ཝིཡ བྷཝིཏུཾ ཝཊྚཏི. ན ཧི གནྡྷཱདཱིཧི པཱུཛེནྟཱ མཾ པཱུཛེནྟི, དྷམྨཱནུདྷམྨཔཊིཔཏྟིཡཱ པན མཾ པཱུཛེནྟི. ཏསྨཱ ཨཉྙེནཔི ཨཏྟདཏྠསདིསེནེཝ བྷཝིཏབྦ’’ནྟི ཝཏྭཱ ཨིམཾ གཱཐམཱཧ –

༡༦༦.

‘‘ཨཏྟདཏྠཾ པརཏྠེན, བཧུནཱཔི ན ཧཱཔཡེ;

ཨཏྟདཏྠམབྷིཉྙཱཡ, སདཏྠཔསུཏོ སིཡཱ’’ཏི.

ཏསྶཏྠོ – གིཧིབྷཱུཏཱ ཏཱཝ ཀཱཀཎིཀམཏྟམྤི ཨཏྟནོ ཨཏྠཾ སཧསྶམཏྟེནཱཔི པརསྶ ཨཏྠེན ན ཧཱཔཡེ. ཀཱཀཎིཀམཏྟེནཱཔི ཧིསྶ ཨཏྟདཏྠོཝ ཁཱདནཱིཡཾ ཝཱ བྷོཛནཱིཡཾ ཝཱ ནིཔྥཱདེཡྻ, ན པརཏྠོ. ཨིདཾ པན ཨེཝཾ ཨཀཐེཏྭཱ ཀམྨཊྛཱནསཱིསེན ཀཐིཏཾ, ཏསྨཱ ‘‘ཨཏྟདཏྠཾ ན ཧཱཔེམཱི’’ཏི བྷིཀྑུནཱ ནཱམ སངྒྷསྶ ཨུཔྤནྣཾ ཙེཏིཡཔཊིསངྑརཎཱདིཀིཙྩཾ ཝཱ ཨུཔཛ྄ཛྷཱཡཱདིཝཏྟཾ ཝཱ ན ཧཱཔེཏབྦཾ. ཨཱབྷིསམཱཙཱརིཀཝཏྟཉྷི པཱུརེནྟོཡེཝ ཨརིཡཕལཱདཱིནི སཙྪིཀརོཏི, ཏསྨཱ ཨཡམྤི ཨཏྟདཏྠོཝ. ཡོ པན ཨཙྩཱརདྡྷཝིཔསྶཀོ ‘‘ཨཛྫ ཝཱ སུཝེ ཝཱ’’ཏི པཊིཝེདྷཾ པཏྠཡམཱནོ ཝིཙརཏི, ཏེན ཨུཔཛ྄ཛྷཱཡཝཏྟཱདཱིནིཔི ཧཱཔེཏྭཱ ཨཏྟནོ ཀིཙྩམེཝ ཀཱཏབྦཾ. ཨེཝརཱུཔཉྷི ཨཏྟདཏྠམབྷིཉྙཱཡ ‘‘ཨཡཾ མེ ཨཏྟནོ ཨཏྠོ’’ཏི སལླཀྑེཏྭཱ, སདཏྠཔསུཏོ སིཡཱཏི ཏསྨིཾ སཀེ ཨཏྠེ ཨུཡྻུཏྟཔཡུཏྟོ བྷཝེཡྻཱཏི.

དེསནཱཝསཱནེ སོ ཐེརོ ཨརཧཏྟེ པཏིཊྛཧི, སམྤཏྟབྷིཀྑཱུནམྤི སཱཏྠིཀཱ དྷམྨདེསནཱ ཨཧོསཱིཏི.

ཨཏྟདཏྠཏྠེརཝཏྠུ དསམཾ.

ཨཏྟཝགྒཝཎྞནཱ ནིཊྛིཏཱ.

དྭཱདསམོ ཝགྒོ.

༡༣. ལོཀཝགྒོ

༡. དཧརབྷིཀྑུཝཏྠུ

ཧཱིནཾ དྷམྨནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ དཧརབྷིཀྑུཾ ཨཱརབྦྷ ཀཐེསི.

ཨཉྙཏརོ ཀིར ཐེརོ དཧརབྷིཀྑུནཱ སདྡྷིཾ པཱཏོཝ ཝིསཱཁཱཡ གེཧཾ ཨགམཱསི. ཝིསཱཁཱཡ གེཧེ པཉྩསཏཱནཾ བྷིཀྑཱུནཾ དྷུཝཡཱགུ ནིཙྩཔཉྙཏྟཱ ཧོཏི. ཐེརོ ཏཏྠ ཡཱགུཾ པིཝིཏྭཱ དཧརབྷིཀྑུཾ ནིསཱིདཱཔེཏྭཱ སཡཾ ཨཉྙཾ གེཧཾ ཨགམཱསི. ཏེན ཙ སམཡེན ཝིསཱཁཱཡ པུཏྟསྶ དྷཱིཏཱ ཨཡྻིཀཱཡ ཋཱནེ ཋཏྭཱ བྷིཀྑཱུནཾ ཝེཡྻཱཝཙྩཾ ཀརོཏི. སཱ ཏསྶ དཧརསྶ ཨུདཀཾ པརིསྶཱཝེནྟཱི ཙཱཊིཡཾ ཨཏྟནོ མུཁནིམིཏྟཾ དིསྭཱ ཧསི, དཧརོཔི ཏཾ ཨོལོཀེཏྭཱ ཧསི. སཱ ཏཾ ཧསམཱནཾ དིསྭཱ ‘‘ཚིནྣསཱིསོ ཧསཏཱི’’ཏི ཨཱཧ. ཨཐ ནཾ དཧརོ ‘‘ཏྭཾ ཚིནྣསཱིསཱ, མཱཏཱཔིཏརོཔི ཏེ ཚིནྣསཱིསཱ’’ཏི ཨཀྐོསི. སཱ རོདམཱནཱ མཧཱནསེ ཨཡྻིཀཱཡ སནྟིཀཾ གནྟྭཱ ‘‘ཀིཾ ཨིདཾ, ཨམྨཱ’’ཏི ཝུཏྟེ ཏམཏྠཾ ཨཱརོཙེསི. སཱ དཧརསྶ སནྟིཀཾ ཨཱགནྟྭཱ, ‘‘བྷནྟེ, མཱ ཀུཛ྄ཛྷི, ན ཨེཏཾ ཚིནྣཀེསནཁསྶ ཚིནྣནིཝཱསནཔཱརུཔནསྶ མཛ྄ཛྷེ ཚིནྣཀཔཱལཾ ཨཱདཱཡ བྷིཀྑཱཡ ཙརནྟསྶ ཨཡྻསྶ ཨགརུཀ’’ནྟི ཨཱཧ. དཧརོ ཨཱམ, ཨུཔཱསིཀེ, ཏྭཾ མམ ཚིནྣཀེསཱདིབྷཱཝཾ ཛཱནཱསི, ཨིམིསྶཱ མཾ ‘‘ཚིནྣསཱིསོ’’ཏི ཀཏྭཱ ཨཀྐོསིཏུཾ ཝཊྚིསྶཏཱིཏི. ཝིསཱཁཱ ནེཝ དཧརཾ སཉྙཱཔེཏུཾ ཨསཀྑི, ནཔི དཱརིཀཾ. ཏསྨིཾ ཁཎེ ཐེརོ ཨཱགནྟྭཱ ‘‘ཀིམིདཾ ཨུཔཱསིཀེ’’ཏི པུཙྪིཏྭཱ ཏམཏྠཾ སུཏྭཱ དཧརཾ ཨོཝདནྟོ ཨཱཧ – ‘‘ཨཔེཧི, ཨཱཝུསོ, ནཱཡཾ ཚིནྣཀེསནཁཝཏྠསྶ མཛ྄ཛྷེ ཚིནྣཀཔཱལཾ ཨཱདཱཡ བྷིཀྑཱཡ ཙརནྟསྶ ཨཀྐོསོ, ཏུཎྷཱི ཧོཧཱི’’ཏི. ཨཱམ, བྷནྟེ, ཀིཾ ཏུམྷེ ཨཏྟནོ ཨུཔཊྛཱཡིཀཾ ཨཏཛྫེཏྭཱ མཾ ཏཛྫེཐ, མཾ ‘‘ཚིནྣསཱིསོ’’ཏི ཨཀྐོསིཏུཾ ཝཊྚིསྶཏཱིཏི. ཏསྨིཾ ཁཎེ སཏྠཱ ཨཱགནྟྭཱ ‘‘ཀིཾ ཨིད’’ནྟི པུཙྪི. ཝིསཱཁཱ ཨཱདིཏོ པཊྛཱཡ ཏཾ པཝཏྟིཾ ཨཱརོཙེསི. སཏྠཱ ཏསྶ དཧརསྶ སོཏཱཔཏྟིཕལཱུཔནིསྶཡཾ དིསྭཱ ‘‘མཡཱ ཨིམཾ དཧརཾ ཨནུཝཏྟིཏུཾ ཝཊྚཏཱི’’ཏི ཙིནྟེཏྭཱ ཝིསཱཁཾ ཨཱཧ – ‘‘ཀིཾ པན ཝིསཱཁེ ཏཝ དཱརིཀཱཡ ཚིནྣཀེསཱདིམཏྟཀེནེཝ མམ སཱཝཀེ ཚིནྣསཱིསེ ཀཏྭཱ ཨཀྐོསིཏུཾ ཝཊྚཏཱི’’ཏི? དཧརོ ཏཱཝདེཝ ཨུཊྛཱཡ ཨཉྫལིཾ པགྒཧེཏྭཱ, ‘‘བྷནྟེ, ཨེཏཾ པཉྷཾ ཏུམྷེཝ སུཊྛུ ཛཱནཱཐ, ཨམྷཱཀཾ ཨུཔཛ྄ཛྷཱཡོ ཙ ཨུཔཱསིཀཱ ཙ སུཊྛུ ན ཛཱནནྟཱི’’ཏི ཨཱཧ. སཏྠཱ དཧརསྶ ཨཏྟནོ ཨནུཀུལབྷཱཝཾ ཉཏྭཱ ‘‘ཀཱམགུཎཾ ཨཱརབྦྷ ཧསནབྷཱཝོ ནཱམ ཧཱིནོ དྷམྨོ, ཧཱིནཉྩ ནཱམ དྷམྨཾ སེཝིཏུཾ པམཱདེན སདྡྷིཾ སཾཝསིཏུཾ ན ཝཊྚཏཱི’’ཏི ཝཏྭཱ ཨིམཾ གཱཐམཱཧ –

༡༦༧.

‘‘ཧཱིནཾ དྷམྨཾ ན སེཝེཡྻ, པམཱདེན ན སཾཝསེ;

མིཙྪཱདིཊྛིཾ ན སེཝེཡྻ, ན སིཡཱ ལོཀཝཌྜྷནོ’’ཏི.

ཏཏྠ ཧཱིནཾ དྷམྨནྟི པཉྩཀཱམགུཎཾ དྷམྨཾ. སོ ཧི ཧཱིནོ དྷམྨོ ན ཨནྟམསོ ཨོཊྛགོཎཱདཱིཧིཔི པཊིསེཝིཏབྦོ. ཧཱིནེསུ ཙ ནིརཡཱདཱིསུ ཋཱནེསུ ནིབྦཏྟཱཔེཏཱིཏི ཧཱིནོ ནཱམ, ཏཾ ན སེཝེཡྻ. པམཱདེནཱཏི སཏིཝོསྶགྒལཀྑཎེན པམཱདེནཱཔི ན སཾཝསེ. ན སེཝེཡྻཱཏི མིཙྪཱདིཊྛིམྤི ན གཎྷེཡྻ. ལོཀཝཌྜྷནོཏི ཡོ ཧི ཨེཝཾ ཀརོཏི, སོ ལོཀཝཌྜྷནོ ནཱམ ཧོཏི. ཏསྨཱ ཨེཝཾ ཨཀརཎེན ན སིཡཱ ལོཀཝཌྜྷནོཏི.

དེསནཱཝསཱནེ སོ དཧརོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

དཧརབྷིཀྑུཝཏྠུ པཋམཾ.

༢. སུདྡྷོདནཝཏྠུ

ཨུཏྟིཊྛེཏི ཨིམཾ དྷམྨདེསནཾ སཏྠཱ ནིགྲོདྷཱརཱམེ ཝིཧརནྟོ པིཏརཾ ཨཱརབྦྷ ཀཐེསི.

ཨེཀསྨིཉྷི སམཡེ སཏྠཱ པཋམགམནེན ཀཔིལཔུརཾ གནྟྭཱ ཉཱཏཱིཧི ཀཏཔཙྩུགྒམནོ ནིགྲོདྷཱརཱམཾ པཏྭཱ ཉཱཏཱིནཾ མཱནབྷིནྡནཏྠཱཡ ཨཱཀཱསེ རཏནཙངྐམཾ མཱཔེཏྭཱ ཏཏྠ ཙངྐམནྟོ དྷམྨཾ དེསེསི. ཉཱཏཱི པསནྣཙིཏྟཱ སུདྡྷོདནམཧཱརཱཛཱནཾ ཨཱདིཾ ཀཏྭཱ ཝནྡིཾསུ. ཏསྨིཾ ཉཱཏིསམཱགམེ པོཀྑརཝསྶཾ ཝསྶི. ཏཾ ཨཱརབྦྷ མཧཱཛནེན ཀཐཱཡ སམུཊྛཱཔིཏཱཡ ‘‘ན, བྷིཀྑཝེ, ཨིདཱནེཝ, པུབྦེཔི མཡ྄ཧཾ ཉཱཏིསམཱགམེ པོཀྑརཝསྶཾ ཝསྶིཡེཝཱ’’ཏི ཝཏྭཱ ཝེསྶནྟརཛཱཏཀཾ (ཛཱ. ༢.༢༢.༡༦༥༥ ཨཱདཡོ) ཀཐེསི. དྷམྨདེསནཾ སུཏྭཱ པཀྐམནྟེསུ ཉཱཏཱིསུ ཨེཀོཔི སཏྠཱརཾ ན ནིམནྟེསི. རཱཛཱཔི ‘‘མཡ྄ཧཾ པུཏྟོ མམ གེཧཾ ཨནཱགནྟྭཱ ཀཧཾ གམིསྶཏཱི’’ཏི ཨནིམནྟེཏྭཱཝ ཨགམཱསི. གནྟྭཱ ཙ པན གེཧེ ཝཱིསཏིཡཱ བྷིཀྑུསཧསྶཱནཾ ཡཱགུཨཱདཱིནི པཊིཡཱདཱཔེཏྭཱ ཨཱསནཱནི པཉྙཱཔེསི. པུནདིཝསེ སཏྠཱ པིཎྜཱཡ པཝིསནྟོ ‘‘ཀིཾ ནུ ཁོ ཨཏཱིཏབུདྡྷཱ པིཏུ ནགརཾ པཏྭཱ ཨུཛུཀམེཝ ཉཱཏིཀུལཾ པཝིསིཾསུ, ཨུདཱཧུ པཊིཔཱཊིཡཱ པིཎྜཱཡ ཙརིཾསཱུ’’ཏི ཨཱཝཛྫེནྟོ ‘‘པཊིཔཱཊིཡཱ ཙརིཾསཱུ’’ཏི དིསྭཱ པཋམགེཧཏོ པཊྛཱཡ པིཎྜཱཡ ཙརནྟོ པཱཡཱསི. རཱཧུལམཱཏཱ པཱསཱདཏལེ ནིསིནྣཱཝ དིསྭཱ ཏཾ པཝཏྟིཾ རཉྙོ ཨཱརོཙེསི. རཱཛཱ སཱཊཀཾ སཎྛཱཔེནྟོ ཝེགེན ནིཀྑམིཏྭཱ སཏྠཱརཾ ཝནྡིཏྭཱ – ‘‘པུཏྟ, ཀསྨཱ མཾ ནཱསེསི, ཨཏིཝིཡ ཏེ པིཎྜཱཡ ཙརནྟེན ལཛྫཱ ཨུཔྤཱདིཏཱ, ཡུཏྟཾ ནཱམ ཝོ ཨིམསྨིཾཡེཝ ནགརེ སུཝཎྞསིཝིཀཱདཱིཧི ཝིཙརིཏྭཱ པིཎྜཱཡ ཙརིཏུཾ, ཀིཾ མཾ ལཛྫཱཔེསཱི’’ཏི? ‘‘ནཱཧཾ ཏཾ, མཧཱརཱཛ, ལཛྫཱཔེམི, ཨཏྟནོ པན ཀུལཝཾསཾ ཨནུཝཏྟཱམཱི’’ཏི. ‘‘ཀིཾ པན, ཏཱཏ, པིཎྜཱཡ ཙརིཏྭཱ ཛཱིཝནཝཾསོ མམ ཝཾསོ’’ཏི? ‘‘ནེསོ, མཧཱརཱཛ, ཏཝ ཝཾསོ, མམ པནེསོ ཝཾསོ. ཨནེཀཱནི ཧི བུདྡྷསཧསྶཱནི པིཎྜཱཡ ཙརིཏྭཱཝ ཛཱིཝིཾསཱུ’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༡༦༨.

‘‘ཨུཏྟིཊྛེ ནཔྤམཛྫེཡྻ, དྷམྨཾ སུཙརིཏཾ ཙརེ;

དྷམྨཙཱརཱི སུཁཾ སེཏི, ཨསྨིཾ ལོཀེ པརམྷི ཙ.

༡༦༩.

‘‘དྷམྨཾ ཙརེ སུཙརིཏཾ, ན ནཾ དུཙྩརིཏཾ ཙརེ;

དྷམྨཙཱརཱི སུཁཾ སེཏི, ཨསྨིཾ ལོཀེ པརམྷི ཙཱ’’ཏི.

ཏཏྠ ཨུཏྟིཊྛེཏི ཨུཊྛཧིཏྭཱ པརེསཾ གྷརདྭཱརེ ཋཏྭཱ གཧེཏབྦཔིཎྜེ. ནཔྤམཛྫེཡྻཱཏི པིཎྜཙཱརིཀཝཏྟཉྷི ཧཱཔེཏྭཱ པཎཱིཏབྷོཛནཱནི པརིཡེསནྟོ ཨུཏྟིཊྛེ པམཛྫཏི ནཱམ, སཔདཱནཾ པིཎྜཱཡ ཙརནྟོ པན ན པམཛྫཏི ནཱམ. ཨེཝཾ ཀརོནྟོ ཨུཏྟིཊྛེ ནཔྤམཛྫེཡྻ. དྷམྨནྟི ཨནེསནཾ པཧཱཡ སཔདཱནཾ ཙརནྟོ ཏམེཝ བྷིཀྑཱཙརིཡདྷམྨཾ སུཙརིཏཾ ཙརེ. སུཁཾ སེཏཱིཏི དེསནཱམཏྟམེཏཾ, ཨེཝཾ པནེཏཾ བྷིཀྑཱཙརིཡདྷམྨཾ ཙརནྟོ དྷམྨཙཱརཱི ཨིདྷ ལོཀེ ཙཏཱུཧི ཨིརིཡཱཔཐེཧི སུཁཾ ཝིཧརཏཱིཏི ཨཏྠོ. ན ནཾ དུཙྩརིཏནྟི ཝེསིཡཱདིབྷེདེ ཨགོཙརེ ཙརནྟོ བྷིཀྑཱཙརིཡདྷམྨཾ དུཙྩརིཏཾ ཙརཏི ནཱམ. ཨེཝཾ ཨཙརིཏྭཱ དྷམྨཾ ཙརེ སུཙརིཏཾ, ན ནཾ དུཙྩརིཏཾ ཙརེ. སེསཾ ཝུཏྟཏྠམེཝ.

དེསནཱཝསཱནེ རཱཛཱ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

སུདྡྷོདནཝཏྠུ དུཏིཡཾ.

༣. པཉྩསཏཝིཔསྶཀབྷིཀྑུཝཏྠུ

ཡཐཱ པུབྦུལ༹ཀནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩསཏེ ཝིཔསྶཀེ བྷིཀྑཱུ ཨཱརབྦྷ ཀཐེསི.

ཏེ ཀིར སཏྠུ སནྟིཀེ ཀམྨཊྛཱནཾ གཧེཏྭཱ ཨརཉྙཾ པཝིསིཏྭཱ གྷཊེནྟཱ ཝཱཡམནྟཱ ཨཔྤཝིསེསཱ ‘‘ཝིསེསེཏྭཱ ཀམྨཊྛཱནཾ གཧེསྶཱམཱ’’ཏི སཏྠུ སནྟིཀཾ ཨཱགཙྪནྟཱ ཨནྟརཱམགྒེ མརཱིཙིཀམྨཊྛཱནཾ བྷཱཝེནྟཱཝ ཨཱགམིཾསུ. ཏེསཾ ཝིཧཱརཾ པཝིཊྛཀྑཎེཡེཝ དེཝོ ཝསྶི. ཏེ ཏཏྠ ཏཏྠ པམུཁེསུ ཋཏྭཱ དྷཱརཱཝེགེན ཨུཊྛཧིཏྭཱ བྷིཛྫནྟེ པུབྦལ༹ཀེ དིསྭཱ ‘‘ཨཡམྤི ཨཏྟབྷཱཝོ ཨུཔྤཛྫིཏྭཱ བྷིཛྫནཏྠེན པུབྦུལ༹ཀསདིསོཡེཝཱ’’ཏི ཨཱརམྨཎཾ གཎྷིཾསུ. སཏྠཱ གནྡྷཀུཊིཡཾ ནིསིནྣོཝ ཏེ བྷིཀྑཱུ ཨོལོཀེཏྭཱ ཏེཧི སདྡྷིཾ ཀཐེནྟོ ཝིཡ ཨོབྷཱསཾ ཕརིཏྭཱ ཨིམཾ གཱཐམཱཧ –

༡༧༠.

‘‘ཡཐཱ པུབྦུལ༹ཀཾ པསྶེ, ཡཐཱ པསྶེ མརཱིཙིཀཾ;

ཨེཝཾ ལོཀཾ ཨཝེཀྑནྟཾ, མཙྩུརཱཛཱ ན པསྶཏཱི’’ཏི.

ཏཏྠ མརཱིཙིཀནྟི མཡཱུཁཾ. ཏེ ཧི དཱུརཏོཝ གེཧསཎྛཱནཱདིཝསེན ཨུཔཊྛིཏཱཔི ཨུཔགཙྪནྟཱནཾ ཨགཡ྄ཧཱུཔགཱ རིཏྟཀཱ ཏུཙྪཀཱཝ. ཏསྨཱ ཡཐཱ ཨུཔྤཛྫིཏྭཱ བྷིཛྫནཏྠེན པུབྦུལ༹ཀཾ རིཏྟཏུཙྪཱདིབྷཱཝེནེཝ པསྶེཡྻ, ཨེཝཾ ཁནྡྷཱདིལོཀཾ ཨཝེཀྑནྟཾ མཙྩུརཱཛཱ ན པསྶཏཱིཏི ཨཏྠོ.

དེསནཱཝསཱནེ ཏེ བྷིཀྑཱུ ཋིཏཊྛཱནེཡེཝ ཨརཧཏྟཾ པཱཔུཎིཾསཱུཏི.

པཉྩསཏཝིཔསྶཀབྷིཀྑུཝཏྠུ ཏཏིཡཾ.

༤. ཨབྷཡརཱཛཀུམཱརཝཏྠུ

ཨེཐ པསྶཐིམཾ ལོཀནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨབྷཡརཱཛཀུམཱརཾ ཨཱརབྦྷ ཀཐེསི.

ཏསྶ ཀིར པཙྩནྟཾ ཝཱུཔསམེཏྭཱ ཨཱགཏསྶ པིཏཱ བིམྦིསཱརོ ཏུསྶིཏྭཱ ཨེཀཾ ནཙྩགཱིཏཀུསལཾ ནཱཊཀིཏྠིཾ དཏྭཱ སཏྟཱཧཾ རཛྫམདཱསི. སོ སཏྟཱཧཾ གེཧཱ བཧི ཨནིཀྑནྟོཝ རཛྫསིརིཾ ཨནུབྷཝིཏྭཱ ཨཊྛམེ དིཝསེ ནདཱིཏིཏྠཾ གནྟྭཱ ནྷཏྭཱ ཨུཡྻཱནཾ པཝིསིཏྭཱ སནྟཏིམཧཱམཏྟོ ཝིཡ ཏསྶཱ ཨིཏྠིཡཱ ནཙྩགཱིཏཾ པསྶནྟོ ནིསཱིདི. སཱཔི ཏངྑཎཉྙེཝ སནྟཏིམཧཱམཏྟསྶ ནཱཊཀིཏྠཱི ཝིཡ སཏྠཀཝཱཏཱནཾ ཝསེན ཀཱལམཀཱསི. ཀུམཱརོ ཏསྶཱ ཀཱལཀིརིཡཱཡ ཨུཔྤནྣསོཀོ ‘‘ན མེ ཨིམཾ སོཀཾ ཋཔེཏྭཱ སཏྠཱརཾ ཨཉྙོ ནིབྦཱཔེཏུཾ སཀྑིསྶཏཱི’’ཏི སཏྠཱརཾ ཨུཔསངྐམིཏྭཱ, ‘‘བྷནྟེ, སོཀཾ མེ ནིབྦཱཔེཐཱ’’ཏི ཨཱཧ. སཏྠཱ ཏཾ སམསྶཱསེཏྭཱ ‘‘ཏཡཱ ཧི, ཀུམཱར, ཨིམིསྶཱ ཨིཏྠིཡཱ ཨེཝམེཝ མཏཀཱལེ རོདནྟེན པཝཏྟིཏཱནཾ ཨསྶཱུནཾ ཨནམཏགྒེ སཾསཱརེ པམཱཎཾ ནཏྠཱི’’ཏི ཝཏྭཱ ཏཱཡ དེསནཱཡ སོཀསྶ ཏནུབྷཱཝཾ ཉཏྭཱ, ‘‘ཀུམཱར, མཱ སོཙི, བཱལཛནཱནཾ སཾསཱིདནཊྛཱནམེཏ’’ནྟི ཝཏྭཱ ཨིམཾ གཱཐམཱཧ –

༡༧༡.

‘‘ཨེཐ པསྶཐིམཾ ལོཀཾ, ཙིཏྟཾ རཱཛརཐཱུཔམཾ;

ཡཏྠ བཱལཱ ཝིསཱིདནྟི, ནཏྠི སངྒོ ཝིཛཱནཏ’’ནྟི.

ཏཏྠ ཏེ པསྶཐཱཏི རཱཛཀུམཱརམེཝ སནྡྷཱཡཱཧ. ཨིམཾ ལོཀནྟི ཨིམཾ ཁནྡྷལོཀཱདིསངྑཱཏཾ ཨཏྟབྷཱཝཾ. ཙིཏྟནྟི སཏྟརཏནཱདིཝིཙིཏྟཾ རཱཛརཐཾ ཝིཡ ཝཏྠཱལངྐཱརཱདིཙིཏྟིཏཾ. ཡཏྠ བཱལཱཏི ཡསྨིཾ ཨཏྟབྷཱཝེ བཱལཱ ཨེཝཾ ཝིསཱིདནྟི. ཝིཛཱནཏནྟི ཝིཛཱནནྟཱནཾ པཎྜིཏཱནཾ ཨེཏྠ རཱགསངྒཱདཱིསུ ཨེཀོཔི སངྒོ ནཏྠཱིཏི ཨཏྠོ.

དེསནཱཝསཱནེ རཱཛཀུམཱརོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཨབྷཡརཱཛཀུམཱརཝཏྠུ ཙཏུཏྠཾ.

༥. སམྨཛྫནཏྠེརཝཏྠུ

ཡོ ཙ པུབྦེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྨཛྫནཏྠེརཾ ཨཱརབྦྷ ཀཐེསི.

སོ ཀིར པཱཏོ ཝཱ སཱཡཾ ཝཱཏི ཝེལཾ པམཱཎཾ ཨཀཏྭཱ ཨབྷིཀྑཎཾ སམྨཛྫནྟོཝ ཝིཙརཏི. སོ ཨེཀདིཝསཾ སམྨཛྫནིཾ གཧེཏྭཱ དིཝཱཊྛཱནེ ནིསིནྣསྶ རེཝཏཏྠེརསྶ སནྟིཀཾ གནྟྭཱ ‘‘ཨཡཾ མཧཱཀུསཱིཏོ ཛནསྶ སདྡྷཱདེཡྻཾ བྷུཉྫིཏྭཱ ཨཱགནྟྭཱ ནིསཱིདཏི, ཀིཾ ནཱམེཏསྶ སམྨཛྫནིཾ གཧེཏྭཱ ཨེཀཾ ཋཱནཾ སམྨཛྫིཏུཾ ན ཝཊྚཏཱི’’ཏི ཨཱཧ. ཐེརོ ‘‘ཨོཝཱདམསྶ དསྶཱམཱི’’ཏི ཙིནྟེཏྭཱ ཨེཧཱཝུསོཏི. ཀིཾ, བྷནྟེཏི? གཙྪ ནྷཏྭཱ ཨེཧཱིཏི. སོ ཏཐཱ ཨཀཱསི. ཨཐ ནཾ ཐེརོ ཨེཀམནྟཾ ནིསཱིདཱཔེཏྭཱ ཨོཝདནྟོ ཨཱཧ – ‘‘ཨཱཝུསོ, བྷིཀྑུནཱ ནཱམ ན སབྦཀཱལཾ སམྨཛྫནྟེན ཝིཙརིཏུཾ ཝཊྚཏི, པཱཏོ ཨེཝ པན སམྨཛྫིཏྭཱ པིཎྜཱཡ ཙརིཏྭཱ པིཎྜཔཱཏཔཊིཀྐནྟེན ཨཱགནྟྭཱ རཏྟིཊྛཱནེ ཝཱ དིཝཱཊྛཱནེ ཝཱ ནིསིནྣེན དྭཏྟིཾསཱཀཱརཾ སཛ྄ཛྷཱཡིཏྭཱ ཨཏྟབྷཱཝེ ཁཡཝཡཾ པཊྛཔེཏྭཱ སཱཡནྷེ ཨུཊྛཱཡ སམྨཛྫིཏུཾ ཝཊྚཏི, ནིཙྩཀཱལཾ ཨསམྨཛྫིཏྭཱ ཨཏྟནོཔི ནཱམ ཨོཀཱསོ ཀཱཏབྦོ’’ཏི. སོ ཐེརསྶ ཨོཝཱདེ ཋཏྭཱ ན ཙིརསྶེཝ ཨརཧཏྟཾ པཱཔུཎི. ཏཾ ཏཾ ཋཱནཾ ཨུཀླཱཔཾ ཨཧོསི. ཨཐ ནཾ བྷིཀྑཱུ ཨཱཧཾསུ – ‘‘ཨཱཝུསོ སམྨཛྫནཏྠེར, ཏཾ ཏཾ ཋཱནཾ ཨུཀླཱཔཾ ཀསྨཱ ན སམྨཛྫསཱི’’ཏི? ‘‘བྷནྟེ, མཡཱ པམཱདཀཱལེ ཨེཝཾ ཀཏཾ, ཨིདཱནཱམྷི ཨཔྤམཏྟོ’’ཏི. བྷིཀྑཱུ ‘‘ཨཡཾ ཐེརོ ཨཉྙཾ བྱཱཀརོཏཱི’’ཏི སཏྠུ ཨཱརོཙེསུཾ. སཏྠཱ ‘‘ཨཱམ, བྷིཀྑཝེ, མམ པུཏྟོ པུབྦེ པམཱདཀཱལེ སམྨཛྫནྟོ ཝིཙརི, ཨིདཱནི པན མགྒཕལསུཁེན ཝཱིཏིནཱམེནྟོ ན སམྨཛྫཏཱི’’ཏི ཝཏྭཱ ཨིམཾ གཱཐམཱཧ –

༡༧༢.

‘‘ཡོ ཙ པུབྦེ པམཛྫིཏྭཱ, པཙྪཱ སོ ནཔྤམཛྫཏི;

སོམཾ ལོཀཾ པབྷཱསེཏི, ཨབྦྷཱ མུཏྟོཝ ཙནྡིམཱ’’ཏི.

ཏསྶཏྠོ – ཡོ པུགྒལོ པུབྦེ ཝཏྟཔཊིཝཏྟཀརཎེན ཝཱ སཛ྄ཛྷཱཡཱདཱིཧི ཝཱ པམཛྫིཏྭཱ པཙྪཱ མགྒཕལསུཁེན ཝཱིཏིནཱམེནྟོ ནཔྤམཛྫཏི, སོ ཨབྦྷཱདཱིཧི མུཏྟོ ཙནྡོཝ ཨོཀཱསལོཀཾ མགྒཉཱཎེན ཨིམཾ ཁནྡྷཱདིལོཀཾ ཨོབྷཱསེཏི, ཨེཀཱལོཀཾ ཀརོཏཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སམྨཛྫནཏྠེརཝཏྠུ པཉྩམཾ.

༦. ཨངྒུལིམཱལཏྠེརཝཏྠུ

ཡསྶ པཱཔནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨངྒུལིམཱལཏྠེརཾ ཨཱརབྦྷ ཀཐེསི. ཝཏྠུ ཨངྒུལིམཱལསུཏྟནྟཝསེནེཝ (མ. ནི. ༢.༣༤༧ ཨཱདཡོ) ཝེདིཏབྦཾ.

ཐེརོ པན སཏྠུ སནྟིཀེ པབྦཛིཏྭཱ ཨརཧཏྟཾ པཱཔུཎི. ཨཐ ཁོ ཨཱཡསྨཱ ཨངྒུལིམཱལོ རཧོགཏོ པཊིསལླཱིནོ ཝིམུཏྟིསུཁཔཊིསཾཝེདཱི. ཏཱཡཾ ཝེལཱཡཾ ཨིམཾ ཨུདཱནཾ ཨུདཱནེསི –

‘‘ཡོ ཙ པུབྦེ པམཛྫིཏྭཱ, པཙྪཱ སོ ནཔྤམཛྫཏི;

སོམཾ ལོཀཾ པབྷཱསེཏི, ཨབྦྷཱ མུཏྟོཝ ཙནྡིམཱ’’ཏི. –

ཨཱདིནཱ ནཡེན ཨུདཱནཾ ཨུདཱནེཏྭཱ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦུཏོ. བྷིཀྑཱུ ‘‘ཀཧཾ ནུ ཁོ, ཨཱཝུསོ, ཐེརོ ཨུཔྤནྣོ’’ཏི དྷམྨསབྷཱཡཾ ཀཐཾ སམུཊྛཱཔེསུཾ? སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ, ‘‘བྷནྟེ, ཨངྒུལིམཱལཏྠེརསྶ ནིབྦཏྟཊྛཱནཀཐཱཡཱ’’ཏི ཝུཏྟེ ‘‘པརིནིབྦུཏོ ཙ, བྷིཀྑཝེ, མམ པུཏྟོ’’ཏི. ‘‘བྷནྟེ, ཨེཏྟཀེ མནུསྶེ མཱརེཏྭཱ པརིནིབྦུཏོ’’ཏི? ‘‘ཨཱམ, བྷིཀྑཝེ, སོ པུབྦེ ཨེཀཾ ཀལྱཱཎམིཏྟཾ ཨལབྷིཏྭཱ ཨེཏྟཀཾ པཱཔམཀཱསི, པཙྪཱ པན ཀལྱཱཎམིཏྟཔཙྩཡཾ ལབྷིཏྭཱ ཨཔྤམཏྟོ ཨཧོསི. ཏེནསྶ ཏཾ པཱཔཀམྨཾ ཀུསལེན པིཧིཏ’’ནྟི ཝཏྭཱ ཨིམཾ གཱཐམཱཧ –

༡༧༣.

‘‘ཡསྶ པཱཔཾ ཀཏཾ ཀམྨཾ, ཀུསལེན པིདྷཱིཡཏི;

སོམཾ ལོཀཾ པབྷཱསེཏི, ཨབྦྷཱ མུཏྟོཝ ཙནྡིམཱ’’ཏི.

ཏཏྠ ཀུསལེནཱཏི ཨརཧཏྟམགྒཾ སནྡྷཱཡ ཝུཏྟཾ. སེསཾ ཨུཏྟཱནཏྠམེཝཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨངྒུལིམཱལཏྠེརཝཏྠུ ཚཊྛཾ.

༧. པེསཀཱརདྷཱིཏཱཝཏྠུ

ཨནྡྷབྷཱུཏོཏི ཨིམཾ དྷམྨདེསནཾ སཏྠཱ ཨགྒཱལ༹ཝེ ཙེཏིཡེ ཝིཧརནྟོ ཨེཀཾ པེསཀཱརདྷཱིཏརཾ ཨཱརབྦྷ ཀཐེསི.

ཨེཀདིཝསཉྷི ཨཱལ༹ཝིཝཱསིནོ སཏྠརི ཨཱལ༹ཝིཾ སམྤཏྟེ ནིམནྟེཏྭཱ དཱནཾ ཨདཾསུ. སཏྠཱ བྷཏྟཀིཙྩཱཝསཱནེ ཨནུམོདནཾ ཀརོནྟོ ‘‘ཨདྡྷུཝཾ མེ ཛཱིཝིཏཾ, དྷུཝཾ མེ མརཎཾ, ཨཝསྶཾ མཡཱ མརིཏབྦམེཝ, མརཎཔརིཡོསཱནཾ མེ ཛཱིཝིཏཾ, ཛཱིཝིཏམེཝ ཨནིཡཏཾ, མརཎཾ ནིཡཏནྟི ཨེཝཾ མརཎསྶཏིཾ བྷཱཝེཐ. ཡེསཉྷི མརཎསྶཏི ཨབྷཱཝིཏཱ, ཏེ པཙྪིམེ ཀཱལེ ཨཱསཱིཝིསཾ དིསྭཱ བྷཱིཏཨདཎྜཔུརིསོ ཝིཡ སནྟཱསཔྤཏྟཱ བྷེརཝརཝཾ རཝནྟཱ ཀཱལཾ ཀརོནྟི. ཡེསཾ པན མརཎསྶཏི བྷཱཝིཏཱ, ཏེ དཱུརཏོཝ ཨཱསཱིཝིསཾ དིསྭཱ དཎྜཀེན གཧེཏྭཱ ཚཌྜེཏྭཱ ཋིཏཔུརིསོ ཝིཡ པཙྪིམེ ཀཱལེ ན སནྟསནྟི, ཏསྨཱ མརཎསྶཏི བྷཱཝེཏབྦཱ’’ཏི ཨཱཧ. ཏཾ དྷམྨདེསནཾ སུཏྭཱ ཨཝསེསཛནཱ སཀིཙྩཔྤསུཏཱཝ ཨཧེསུཾ. ཨེཀཱ པན སོལ༹སཝསྶུདྡེསིཀཱ པེསཀཱརདྷཱིཏཱ ‘‘ཨཧོ བུདྡྷཱནཾ ཀཐཱ ནཱམ ཨཙྪརིཡཱ, མཡཱ པན མརཎསྶཏིཾ བྷཱཝེཏུཾ ཝཊྚཏཱི’’ཏི རཏྟིནྡིཝཾ མརཎསྶཏིམེཝ བྷཱཝེསི. སཏྠཱཔི ཏཏོ ནིཀྑམིཏྭཱ ཛེཏཝནཾ ཨགམཱསི. སཱཔི ཀུམཱརིཀཱ ཏཱིཎི ཝསྶཱནི མརཎསྶཏིཾ བྷཱཝེསིཡེཝ.

ཨཐེཀདིཝསཾ སཏྠཱ པཙྩཱུསསམཡེ ལོཀཾ ཨོལོཀེནྟོ ཏཾ ཀུམཱརིཀཾ ཨཏྟནོ ཉཱཎཛཱལསྶ ཨནྟོཔཝིཊྛཾ དིསྭཱ ‘‘ཀིཾ ནུ ཁོ བྷཝིསྶཏཱི’’ཏི ཨུཔདྷཱརེནྟོ ‘‘ཨིམཱཡ ཀུམཱརིཀཱཡ མམ དྷམྨདེསནཱཡ སུཏདིཝསཏོ པཊྛཱཡ ཏཱིཎི ཝསྶཱནི མརཎསྶཏི བྷཱཝིཏཱ, ཨིདཱནཱཧཾ ཏཏྠ གནྟྭཱ ཨིམཾ ཀུམཱརིཀཾ ཙཏྟཱརོ པཉྷེ པུཙྪིཏྭཱ ཏཱཡ ཝིསྶཛྫེནྟིཡཱ ཙཏཱུསུ ཋཱནེསུ སཱདྷུཀཱརཾ དཏྭཱ ཨིམཾ གཱཐཾ བྷཱསིསྶཱམི. སཱ གཱཐཱཝསཱནེ སོཏཱཔཏྟིཕལེ པཏིཊྛཧིསྶཏི, ཏཾ ནིསྶཱཡ མཧཱཛནསྶཱཔི སཱཏྠིཀཱ དྷམྨདེསནཱ བྷཝིསྶཏཱི’’ཏི ཉཏྭཱ པཉྩསཏབྷིཀྑུཔརིཝཱརོ ཛེཏཝནཱ ནིཀྑམིཏྭཱ ཨནུཔུབྦེན ཨགྒཱལ༹ཝཝིཧཱརཾ ཨགམཱསི. ཨཱལ༹ཝིཝཱསིནོ ‘‘སཏྠཱ ཨཱགཏོ’’ཏི སུཏྭཱ ཏཾ ཝིཧཱརཾ གནྟྭཱ ནིམནྟཡིཾསུ. ཏདཱ སཱཔི ཀུམཱརིཀཱ སཏྠུ ཨཱགམནཾ སུཏྭཱ ‘‘ཨཱགཏོ ཀིར མཡ྄ཧཾ པིཏཱ, སཱམི, ཨཱཙརིཡོ པུཎྞཙནྡམུཁོ མཧཱགོཏམབུདྡྷོ’’ཏི ཏུཊྛམཱནསཱ ‘‘ཨིཏོ མེ ཏིཎྞཾ སཾཝཙྪརཱནཾ མཏྠཀེ སུཝཎྞཝཎྞོ སཏྠཱ དིཊྛཔུབྦོ, ཨིདཱནིསྶ སུཝཎྞཝཎྞཾ སརཱིརཾ དཊྛུཾ མདྷུརོཛཉྩ ཝརདྷམྨཾ སོཏུཾ ལབྷིསྶཱམཱི’’ཏི ཙིནྟེསི. པིཏཱ པནསྶཱ སཱལཾ གཙྪནྟོ ཨཱཧ – ‘‘ཨམྨ, པརསནྟཀོ མེ སཱཊཀོ ཨཱརོཔིཏོ, ཏསྶ ཝིདཏྠིམཏྟཾ ཨནིཊྛིཏཾ, ཏཾ ཨཛྫ ནིཊྛཱཔེསྶཱམི, སཱིགྷཾ མེ ཏསརཾ ཝཊྚེཏྭཱ ཨཱཧརེཡྻཱསཱི’’ཏི. སཱ ཙིནྟེསི – ‘‘ཨཧཾ སཏྠུ དྷམྨཾ སོཏུཀཱམཱ, པིཏཱ ཙ མཾ ཨེཝཾ ཨཱཧ. ཀིཾ ནུ ཁོ སཏྠུ དྷམྨཾ སུཎཱམི, ཨུདཱཧུ པིཏུ ཏསརཾ ཝཊྚེཏྭཱ ཧརཱམཱི’’ཏི? ཨཐསྶཱ ཨེཏདཧོསི ‘‘པིཏཱ མཾ ཏསརེ ཨནཱཧརིཡམཱནེ པོཐེཡྻཔི པཧརེཡྻཔི, ཏསྨཱ ཏསརཾ ཝཊྚེཏྭཱ ཏསྶ དཏྭཱ པཙྪཱ དྷམྨཾ སོསྶཱམཱི’’ཏི པཱིཋཀེ ནིསཱིདིཏྭཱ ཏསརཾ ཝཊྚེསི.

ཨཱལ༹ཝིཝཱསིནོཔི སཏྠཱརཾ པརིཝིསིཏྭཱ པཏྟཾ གཧེཏྭཱ ཨནུམོདནཏྠཱཡ ཨཊྛཾསུ. སཏྠཱ ‘‘ཡམཧཾ ཀུལདྷཱིཏརཾ ནིསྶཱཡ ཏིཾསཡོཛནམགྒཾ ཨཱགཏོ, སཱ ཨཛྫཱཔི ཨོཀཱསཾ ན ལབྷཏི. ཏཱཡ ཨོཀཱསེ ལདྡྷེ ཨནུམོདནཾ ཀརིསྶཱམཱི’’ཏི ཏུཎྷཱིབྷཱུཏོ ཨཧོསི. ཨེཝཾ ཏུཎྷཱིབྷཱུཏམྤི སཏྠཱརཾ སདེཝཀེ ལོཀེ ཀོཙི ཀིཉྩི ཝཏྟུཾ ན ཝིསཧཏི. སཱཔི ཁོ ཀུམཱརིཀཱ ཏསརཾ ཝཊྚེཏྭཱ པཙྪིཡཾ ཋཔེཏྭཱ པིཏུ སནྟིཀཾ གཙྪམཱནཱ པརིསཔརིཡནྟེ ཋཏྭཱ སཏྠཱརཾ ཨོལོཀཡམཱནཱཝ ཨཊྛཱསི. སཏྠཱཔི གཱིཝཾ ཨུཀྑིཔིཏྭཱ ཏཾ ཨོལོཀེསི. སཱ ཨོལོཀིཏཱཀཱརེནེཝ ཨཉྙཱསི – ‘‘སཏྠཱ ཨེཝརཱུཔཱཡ པརིསཱཡ མཛ྄ཛྷེ ནིསཱིདིཏྭཱཝ མཾ ཨོལོཀེནྟོ མམཱགམནཾ པཙྩཱསཱིསཏི, ཨཏྟནོ སནྟིཀཾ ཨཱགམནམེཝ པཙྩཱསཱིསཏཱི’’ཏི. སཱ ཏསརཔཙྪིཾ ཋཔེཏྭཱ སཏྠུ སནྟིཀཾ ཨགམཱསི. ཀསྨཱ པན ནཾ སཏྠཱ ཨོལོཀེསཱིཏི? ཨེཝཾ ཀིརསྶ ཨཧོསི ‘‘ཨེསཱ ཨེཏྟོཝ གཙྪམཱནཱ པུཐུཛྫནཀཱལཀིརིཡཾ ཀཏྭཱ ཨནིཡཏགཏིཀཱ བྷཝིསྶཏི, མམ སནྟིཀཾ ཨཱགནྟྭཱ གཙྪམཱནཱ སོཏཱཔཏྟིཕལཾ པཏྭཱ ནིཡཏགཏིཀཱ ཧུཏྭཱ ཏུསིཏཝིམཱནེ ནིབྦཏྟིསྶཏཱི’’ཏི. ཏསྶཱ ཀིར ཏཾ དིཝསཾ མརཎཏོ མུཏྟི ནཱམ ནཏྠི. སཱ ཨོལོཀིཏསཉྙཱཎེནེཝ སཏྠཱརཾ ཨུཔསངྐམིཏྭཱ ཚབྦཎྞརཾསཱིནཾ ཨནྟརཾ པཝིསིཏྭཱ ཝནྡིཏྭཱ ཨེཀམནྟཾ ཨཊྛཱསི. ཏཐཱརཱུཔཱཡ པརིསཱཡ མཛ྄ཛྷེ ནིསཱིདིཏྭཱ ཏུཎྷཱིབྷཱུཏཾ སཏྠཱརཾ ཝནྡིཏྭཱ ཋིཏཀྑཎེཡེཝ ཏཾ ཨཱཧ – ‘‘ཀུམཱརིཀེ, ཀུཏོ ཨཱགཙྪསཱི’’ཏི? ‘‘ན ཛཱནཱམི, བྷནྟེ’’ཏི. ‘‘ཀཏྠ གམིསྶསཱི’’ཏི? ‘‘ན ཛཱནཱམི, བྷནྟེ’’ཏི. ‘‘ན ཛཱནཱསཱི’’ཏི? ‘‘ཛཱནཱམི, བྷནྟེ’’ཏི. ‘‘ཛཱནཱསཱི’’ཏི? ‘‘ན ཛཱནཱམི, བྷནྟེ’’ཏི. ཨིཏི ནཾ སཏྠཱ ཙཏྟཱརོ པཉྷེ པུཙྪི. མཧཱཛནོ ཨུཛ྄ཛྷཱཡི – ‘‘ཨམྦྷོ, པསྶཐ, ཨཡཾ པེསཀཱརདྷཱིཏཱ སམྨཱསམྦུདྡྷེན སདྡྷིཾ ཨིཙྪིཏིཙྪིཏཾ ཀཐེསི, ནནུ ནཱམ ཨིམཱཡ ‘ཀུཏོ ཨཱགཙྪསཱི’ཏི ཝུཏྟེ ‘པེསཀཱརགེཧཏོ’ཏི ཝཏྟབྦཾ. ‘ཀཧཾ གཙྪསཱི’ཏི ཝུཏྟེ ‘པེསཀཱརསཱལ’ནྟི ཝཏྟབྦཾ སིཡཱ’’ཏི.

སཏྠཱ མཧཱཛནཾ ནིསྶདྡཾ ཀཏྭཱ, ‘‘ཀུམཱརིཀེ, ཏྭཾ ཀུཏོ ཨཱགཙྪསཱི’’ཏི ཝུཏྟེ ‘‘ཀསྨཱ ན ཛཱནཱམཱིཏི ཝདེསཱི’’ཏི པུཙྪི. བྷནྟེ, ཏུམྷེ མམ པེསཀཱརགེཧཏོ ཨཱགཏབྷཱཝཾ ཛཱནཱཐ, ‘‘ཀུཏོ ཨཱགཏཱསཱི’’ཏི པུཙྪནྟཱ པན ‘‘ཀུཏོ ཨཱགནྟྭཱ ཨིདྷ ནིབྦཏྟཱསཱི’’ཏི པུཙྪཐ. ཨཧཾ པན ན ཛཱནཱམི ‘‘ཀུཏོ ཙ ཨཱགནྟྭཱ ཨིདྷ ནིབྦཏྟཱམྷཱི’’ཏི. ཨཐསྶཱ སཏྠཱ ‘‘སཱདྷུ སཱདྷུ, ཀུམཱརིཀེ, མཡཱ པུཙྪིཏཔཉྷོཝ ཏཡཱ ཝིསྶཛྫིཏོ’’ཏི པཋམཾ སཱདྷུཀཱརཾ དཏྭཱ ཨུཏྟརིམྤི པུཙྪི – ‘‘ཀཏྠ གམིསྶསཱིཏི པུན པུཊྛཱ ཀསྨཱ ‘ན ཛཱནཱམཱི’ཏི ཝདེསཱི’’ཏི? བྷནྟེ, ཏུམྷེ མཾ ཏསརཔཙྪིཾ གཧེཏྭཱ པེསཀཱརསཱལཾ གཙྪནྟིཾ ཛཱནཱཐ, ‘‘ཨིཏོ གནྟྭཱ ཀཏྠ ནིབྦཏྟིསྶསཱི’’ཏི པུཙྪཐ. ཨཧཉྩ ཨིཏོ ཙུཏཱ ན ཛཱནཱམི ‘‘ཀཏྠ གནྟྭཱ ནིབྦཏྟིསྶཱམཱི’’ཏི. ཨཐསྶཱ སཏྠཱ ‘‘མཡཱ པུཙྪིཏཔཉྷོཡེཝ ཏཡཱ ཝིསྶཛྫིཏོ’’ཏི དུཏིཡཾ སཱདྷུཀཱརཾ དཏྭཱ ཨུཏྟརིམྤི པུཙྪི – ‘‘ཨཐ ཀསྨཱ ‘ན ཛཱནཱསཱི’ཏི པུཊྛཱ ‘ཛཱནཱམཱི’ཏི ཝདེསཱི’’ཏི? ‘‘མརཎབྷཱཝཾ ཛཱནཱམི, བྷནྟེ, ཏསྨཱ ཨེཝཾ ཝདེམཱི’’ཏི. ཨཐསྶཱ སཏྠཱ ‘‘མཡཱ པུཙྪིཏཔཉྷོཡེཝ ཏཡཱ ཝིསྶཛྫིཏོ’’ཏི ཏཏིཡཾ སཱདྷུཀཱརཾ དཏྭཱ ཨུཏྟརིམྤི པུཙྪི – ‘‘ཨཐ ཀསྨཱ ‘ཛཱནཱསཱི’ཏི པུཊྛཱ ‘ན ཛཱནཱམཱི’ཏི ཝདེསཱི’’ཏི. མམ མརཎབྷཱཝམེཝ ཨཧཾ ཛཱནཱམི, བྷནྟེ, ‘‘རཏྟིནྡིཝཔུབྦཎྷཱདཱིསུ པན ཨསུཀཀཱལེ ནཱམ མརིསྶཱམཱི’’ཏི ན ཛཱནཱམི, ཏསྨཱ ཨེཝཾ ཝདེམཱིཏི. ཨཐསྶཱ སཏྠཱ ‘‘མཡཱ པུཙྪིཏཔཉྷོཡེཝ ཏཡཱ ཝིསྶཛྫིཏོ’’ཏི ཙཏུཏྠཾ སཱདྷུཀཱརཾ དཏྭཱ པརིསཾ ཨཱམནྟེཏྭཱ ‘‘ཨེཏྟཀཾ ནཱམ ཏུམྷེ ཨིམཱཡ ཀཐིཏཾ ན ཛཱནཱཐ, ཀེཝལཾ ཨུཛ྄ཛྷཱཡཐེཝ. ཡེསཉྷི པཉྙཱཙཀྑུ ནཏྠི, ཏེ ཨནྡྷཱ ཨེཝ. ཡེསཾ པཉྙཱཙཀྑུ ཨཏྠི, ཏེ ཨེཝ ཙཀྑུམནྟོ’’ཏི ཝཏྭཱ ཨིམཾ གཱཐམཱཧ –

༡༧༤.

‘‘ཨནྡྷབྷཱུཏོ ཨཡཾ ལོཀོ, ཏནུཀེཏྠ ཝིཔསྶཏི;

སཀུཎོ ཛཱལམུཏྟོཝ, ཨཔྤོ སགྒཱཡ གཙྪཏཱི’’ཏི.

ཏཏྠ ཨནྡྷབྷཱུཏོ ཨཡཾ ལོཀོཏི ཨཡཾ ལོཀིཡམཧཱཛནོ པཉྙཱཙཀྑུནོ ཨབྷཱཝེན ཨནྡྷབྷཱུཏོ. ཏནུཀེཏྠཱཏི ཏནུཀོ ཨེཏྠ, ན བཧུ ཛནོ ཨནིཙྩཱདིཝསེན ཝིཔསྶཏི. ཛཱལམུཏྟོཝཱཏི ཡཐཱ ཚེཀེན སཱཀུཎིཀེན ཛཱལེན ཨོཏྠརིཏྭཱ གཡ྄ཧམཱནེསུ ཝཊྚཀེསུ ཀོཙིདེཝ ཛཱལཏོ མུཙྩཏི. སེསཱ ཨནྟོཛཱལམེཝ པཝིསནྟི. ཏཐཱ མརཎཛཱལེན ཨོཏྠཊེསུ སཏྟེསུ བཧཱུ ཨཔཱཡགཱམིནོ ཧོནྟི, ཨཔྤོ ཀོཙིདེཝ སཏྟོ སགྒཱཡ གཙྪཏི, སུགཏིཾ ཝཱ ནིབྦཱནཾ ཝཱ པཱཔུཎཱཏཱིཏི ཨཏྠོ.

དེསནཱཝསཱནེ ཀུམཱརིཀཱ སོཏཱཔཏྟིཕལེ པཏིཊྛཧི, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

སཱཔི ཏསརཔཙྪིཾ གཧེཏྭཱ པིཏུ སནྟིཀཾ ཨགམཱསི, སོཔི ནིསིནྣཀོཝ ནིདྡཱཡི. ཏསྶཱ ཨསལླཀྑེཏྭཱཝ ཏསརཔཙྪིཾ ཨུཔནཱམེནྟིཡཱ ཏསརཔཙྪི ཝེམཀོཊིཡཾ པཊིཧཉྙིཏྭཱ སདྡཾ ཀུརུམཱནཱ པཏི. སོ པབུཛ྄ཛྷིཏྭཱ གཧིཏནིམིཏྟེནེཝ ཝེམཀོཊིཾ ཨཱཀཌྜྷི. ཝེམཀོཊི གནྟྭཱ ཏཾ ཀུམཱརིཀཾ ཨུརེ པཧརི, སཱ ཏཏྠེཝ ཀཱལཾ ཀཏྭཱ ཏུསིཏབྷཝནེ ནིབྦཏྟི. ཨཐསྶཱ པིཏཱ ཏཾ ཨོལོཀེནྟོ སཀལསརཱིརེན ལོཧིཏམཀྑིཏེན པཏིཏྭཱ མཏཾ ཨདྡས. ཨཐསྶ མཧཱསོཀོ ཨུཔྤཛྫི. སོ ‘‘ན མམ སོཀཾ ཨཉྙོ ནིབྦཱཔེཏུཾ སཀྑིསྶཏཱི’’ཏི རོདནྟོ སཏྠུ སནྟིཀཾ གནྟྭཱ ཏམཏྠཾ ཨཱརོཙེཏྭཱ, ‘‘བྷནྟེ, སོཀཾ མེ ནིབྦཱཔེཐཱ’’ཏི ཨཱཧ. སཏྠཱ ཏཾ སམསྶཱསེཏྭཱ ‘‘མཱ སོཙི, ཨུཔཱསཀ. ཨནམཏགྒསྨིཉྷི སཾསཱརེ ཏཝ ཨེཝམེཝ དྷཱིཏུ མརཎཀཱལེ པགྒྷརིཏཨསྶུ ཙཏུནྣཾ མཧཱསམུདྡཱནཾ ཨུདཀཏོ ཨཏིརེཀཏར’’ནྟི ཝཏྭཱ ཨནམཏགྒཀཐཾ ཀཐེསི. སོ ཏནུབྷཱུཏསོཀོ སཏྠཱརཾ པབྦཛྫཾ ཡཱཙིཏྭཱ ལདྡྷཱུཔསམྤདོ ན ཙིརསྶེཝ ཨརཧཏྟཾ པཱཔུཎཱིཏི.

པེསཀཱརདྷཱིཏཱཝཏྠུ སཏྟམཾ.

༨. ཏིཾསབྷིཀྑུཝཏྠུ

ཧཾསཱདིཙྩཔཐེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏིཾས བྷིཀྑཱུ ཨཱརབྦྷ ཀཐེསི.

ཨེཀསྨིཉྷི དིཝསེ ཏིཾསམཏྟཱ དིསཱཝཱསིཀཱ བྷིཀྑཱུ སཏྠཱརཾ ཨུཔསངྐམིཾསུ. ཨཱནནྡཏྠེརོ སཏྠུ ཝཏྟཀརཎཝེལཱཡ ཨཱགནྟྭཱ ཏེ བྷིཀྑཱུ དིསྭཱ ‘‘སཏྠཱརཱ ཨིམེཧི སདྡྷིཾ པཊིསནྠཱརེ ཀཏེ ཝཏྟཾ ཀརིསྶཱམཱི’’ཏི དྭཱརཀོཊྛཀེ ཨཊྛཱསི. སཏྠཱཔི ཏེཧི སདྡྷིཾ པཊིསནྠཱརཾ ཀཏྭཱ ཏེསཾ སཱརཎཱིཡདྷམྨཾ ཀཐེསི. ཏཾ སུཏྭཱ ཏེ སབྦེཔི ཨརཧཏྟཾ པཏྭཱ ཨུཔྤཏིཏྭཱ ཨཱཀཱསེན ཨགམིཾསུ. ཨཱནནྡཏྠེརོ ཏེསུ ཙིརཱཡནྟེསུ སཏྠཱརཾ ཨུཔསངྐམིཏྭཱ, ‘‘བྷནྟེ, ཨིདཱནེཝ ཏིཾསམཏྟཱ བྷིཀྑཱུ ཨཱགཏཱ, ཏེ ཀུཧི’’ནྟི པུཙྪི. ‘‘གཏཱ, ཨཱནནྡཱ’’ཏི. ‘‘ཀཏརེན མགྒེན, བྷནྟེ’’ཏི? ‘‘ཨཱཀཱསེནཱནནྡཱ’’ཏི. ‘‘ཀིཾ པན ཏེ, བྷནྟེ, ཁཱིཎཱསཝཱ’’ཏི? ‘‘ཨཱམཱནནྡ, མམ སནྟིཀེ དྷམྨཾ སུཏྭཱ ཨརཧཏྟཾ པཏྟཱ’’ཏི. ཏསྨིཾ པན ཁཎེ ཨཱཀཱསེན ཧཾསཱ ཨཱགམིཾསུ. སཏྠཱ ‘‘ཡསྶ ཁོ པནཱནནྡ, ཙཏྟཱརོ ཨིདྡྷིཔཱདཱ སུབྷཱཝིཏཱ, སོ ཧཾསཱ ཝིཡ ཨཱཀཱསེན གཙྪཏཱི’’ཏི ཝཏྭཱ ཨིམཾ གཱཐམཱཧ –

༡༧༥.

‘‘ཧཾསཱདིཙྩཔཐེ ཡནྟི, ཨཱཀཱསེ ཡནྟི ཨིདྡྷིཡཱ;

ནཱིཡནྟི དྷཱིརཱ ལོཀམྷཱ, ཛེཏྭཱ མཱརཾ སཝཱཧིནི’’ནྟི.

ཏསྶཏྠོ – ཨིམེ ཧཾསཱ ཨཱདིཙྩཔཐེ ཨཱཀཱསེ གཙྪནྟི. ཡེསཾ ཨིདྡྷིཔཱདཱ སུབྷཱཝིཏཱ, ཏེཔི ཨཱཀཱསེ ཡནྟི ཨིདྡྷིཡཱ. དྷཱིརཱ པཎྜིཏཱ སཝཱཧིནིཾ མཱརཾ ཛེཏྭཱ ཨིམམྷཱ ཝཊྚལོཀཱ ནཱིཡནྟི, ནིབྦཱནཾ པཱཔུཎནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཏིཾསབྷིཀྑུཝཏྠུ ཨཊྛམཾ.

༩. ཙིཉྩམཱཎཝིཀཱཝཏྠུ

ཨེཀཾ དྷམྨནྟི དྷམྨདེསནཾ སཏྠཱ ཛེཏཝནེ ཝིཧརནྟོ ཙིཉྩམཱཎཝིཀཾ ཨཱརབྦྷ ཀཐེསི.

པཋམབོདྷིཡཉྷི དསབལསྶ པུཐུབྷཱུཏེསུ སཱཝཀེསུ ཨཔྤམཱཎེསུ དེཝམནུསྶེསུ ཨརིཡབྷཱུམིཾ ཨོཀྐནྟེསུ པཏྠཊེ གུཎསམུདཡེ མཧཱལཱབྷསཀྐཱརོ ཨུདཔཱདི. ཏིཏྠིཡཱ སཱུརིཡུགྒམནེ ཁཛྫོཔནཀསདིསཱ ཨཧེསུཾ ཧཏལཱབྷསཀྐཱརཱ. ཏེ ཨནྟརཝཱིཐིཡཾ ཋཏྭཱ ‘‘ཀིཾ སམཎོ གོཏམོཝ བུདྡྷོ, མཡམྤི བུདྡྷཱ, ཀིཾ ཏསྶེཝ དིནྣཾ མཧཔྥལཾ, ཨམྷཱཀམྤི དིནྣཾ མཧཔྥལམེཝ, ཨམྷཱཀམྤི དེཐ སཀྐརོཐཱ’’ཏི ཨེཝཾ མནུསྶེ ཝིཉྙཱཔེནྟཱཔི ལཱབྷསཀྐཱརཾ ཨལབྷིཏྭཱ རཧོ སནྣིཔཏིཏྭཱ ‘‘ཀེན ནུ ཁོ ཨུཔཱཡེན སམཎསྶ གོཏམསྶ མནུསྶཱནཾ ཨནྟརེ ཨཝཎྞཾ ཨུཔྤཱདེཏྭཱ ལཱབྷསཀྐཱརཾ ནཱསེཡྻཱམཱ’’ཏི ཙིནྟཡིཾསུ.

ཏདཱ སཱཝཏྠིཡཾ ཙིཉྩམཱཎཝིཀཱ ནཱམེཀཱ པརིབྦཱཛིཀཱ ཨུཏྟམརཱུཔདྷརཱ སོབྷགྒཔྤཏྟཱ དེཝཙྪརཱ ཝིཡ. ཨསྶཱ སརཱིརཏོ རསྨིཡོ ནིཙྪརནྟི. ཨཐེཀོ ཁརམནྟཱི ཨེཝམཱཧ – ‘‘ཙིཉྩམཱཎཝིཀཾ པཊིཙྩ སམཎསྶ གོཏམསྶ ཨཝཎྞཾ ཨུཔྤཱདེཏྭཱ ལཱབྷསཀྐཱརཾ ནཱསེསྶཱམཱ’’ཏི. ཏེ ‘‘ཨཏྠེཀོ ཨུཔཱཡོ’’ཏི སམྤཊིཙྪིཾསུ. ཨཐ སཱ ཏིཏྠིཡཱརཱམཾ གནྟྭཱ ཝནྡིཏྭཱ ཨཊྛཱསི, ཏིཏྠིཡཱ ཏཱཡ སདྡྷིཾ ན ཀཐེསུཾ. སཱ ‘‘ཀོ ནུ ཁོ མེ དོསོ’’ཏི ཡཱཝཏཏིཡཾ ‘‘ཝནྡཱམི, ཨཡྻཱ’’ཏི ཝཏྭཱ, ‘‘ཨཡྻཱ, ཀོ ནུ ཁོ མེ དོསོ, ཀིཾ མཡཱ སདྡྷིཾ ན ཀཐེཐཱ’’ཏི ཨཱཧ. ‘‘བྷགིནི, སམཎཾ གོཏམཾ ཨམྷེ ཝིཧེཋཡནྟཾ ཧཏལཱབྷསཀྐཱརེ ཀཏྭཱ ཝིཙརནྟཾ ན ཛཱནཱསཱི’’ཏི? ‘‘ན ཛཱནཱམི, ཨཡྻཱ, ཀིཾ པནེཏྠ མཡཱ ཀཏྟབྦ’’ནྟི. ‘‘སཙེ ཏྭཾ, བྷགིནི, ཨམྷཱཀཾ སུཁམིཙྪསི, ཨཏྟཱནཾ པཊིཙྩ སམཎསྶ གོཏམསྶ ཨཝཎྞཾ ཨུཔྤཱདེཏྭཱ ལཱབྷསཀྐཱརཾ ནཱསེཧཱི’’ཏི.

སཱ ‘‘སཱདྷུ, ཨཡྻཱ, མཡ྄ཧཾཝེསོ བྷཱརོ, མཱ ཙིནྟཡིཏྠཱ’’ཏི ཝཏྭཱ པཀྐམིཏྭཱ ཨིཏྠིམཱཡཱསུ ཀུསལཏཱཡ ཏཏོ པཊྛཱཡ སཱཝཏྠིཝཱསཱིནཾ དྷམྨཀཐཾ སུཏྭཱ ཛེཏཝནཱ ནིཀྑམནསམཡེ ཨིནྡགོཔཀཝཎྞཾ པཊཾ པཱརུཔིཏྭཱ གནྡྷམཱལཱདིཧཏྠཱ ཛེཏཝནཱབྷིམུཁཱི གཙྪཏི. ‘‘ཨིམཱཡ ཝེལཱཡ ཀུཧིཾ གཙྪསཱི’’ཏི ཝུཏྟེ, ‘‘ཀིཾ ཏུམྷཱཀཾ མམ གམནཊྛཱནེནཱ’’ཏི ཝཏྭཱ ཛེཏཝནསམཱིཔེ ཏིཏྠིཡཱརཱམེ ཝསིཏྭཱ པཱཏོཝ ‘‘ཨགྒཝནྡནཾ ཝནྡིསྶཱམཱ’’ཏི ནགརཱ ནིཀྑམནྟེ ཨུཔཱསཀཛནེ ཛེཏཝནསྶ ཨནྟོཝུཊྛཱ ཝིཡ ཧུཏྭཱ ནགརཾ པཝིསཏི. ‘‘ཀུཧིཾ ཝུཊྛཱསཱི’’ཏི ཝུཏྟེ, ‘‘ཀིཾ ཏུམྷཱཀཾ མམ ཝུཊྛཊྛཱནེནཱ’’ཏི ཝཏྭཱ མཱསདྡྷམཱསཙྩཡེན པུཙྪིཡམཱནཱ ཛེཏཝནེ སམཎེན གོཏམེན སདྡྷིཾ ཨེཀགནྡྷཀུཊིཡཱ ཝུཊྛཱམྷཱིཏི. པུཐུཛྫནཱནཾ ‘‘སཙྩཾ ནུ ཁོ ཨེཏཾ, ནོ’’ཏི ཀངྑཾ ཨུཔྤཱདེཏྭཱ ཏེམཱསཙཏུམཱསཙྩཡེན པིལོཏིཀཱཧི ཨུདརཾ ཝེཋེཏྭཱ གབྦྷིནིཝཎྞཾ དསྶེཏྭཱ ཨུཔརི རཏྟཔཊཾ པཱརུཔིཏྭཱ ‘‘སམཎཾ གོཏམཾ པཊིཙྩ གབྦྷོ ཨུཔྤནྣོ’’ཏི ཨནྡྷབཱལེ སདྡཧཱཔེཏྭཱ ཨཊྛནཝམཱསཙྩཡེན ཨུདརེ དཱརུམཎྜལིཀཾ བནྡྷིཏྭཱ ཨུཔརི པཊཾ པཱརུཔིཏྭཱ ཧཏྠཔཱདཔིཊྛིཡོ གོཧནུཀེན ཀོཊྚཱཔེཏྭཱ ཨུསྶདེ དསྶེཏྭཱ ཀིལནྟིནྡྲིཡཱ ཧུཏྭཱ སཱཡནྷསམཡེ ཏཐཱགཏེ ཨལངྐཏདྷམྨཱསནེ ནིསཱིདིཏྭཱ དྷམྨཾ དེསེནྟེ དྷམྨསབྷཾ གནྟྭཱ ཏཐཱགཏསྶ པུརཏོ ཋཏྭཱ, ‘‘མཧཱསམཎ, མཧཱཛནསྶ ཏཱཝ དྷམྨཾ དེསེསི, མདྷུརོ ཏེ སདྡོ, སམྥུསིཏཾ དནྟཱཝརཎཾ. ཨཧཾ པན ཏཾ པཊིཙྩ གབྦྷཾ ལབྷིཏྭཱ པརིཔུཎྞགབྦྷཱ ཛཱཏཱ, ནེཝ མེ སཱུཏིགྷརཾ ཛཱནཱསི, སཔྤིཏེལཱདཱིནི སཡཾ ཨཀརོནྟོ ཨུཔཊྛཱཀཱནམྤི ཨཉྙཏརཾ ཀོསལརཱཛཱནཾ ཝཱ ཨནཱཐཔིཎྜིཀཾ ཝཱ ཝིསཱཁཾ ཨུཔཱསིཀཾ ཝཱ ‘ཨིམིསྶཱ ཙིཉྩམཱཎཝིཀཱཡ ཀཏྟབྦཡུཏྟཀཾ ཀརོཧཱི’ཏི ན ཝདེསི, ཨབྷིརམིཏུཾཡེཝ ཛཱནཱསི, གབྦྷཔརིཧཱརཾ ན ཛཱནཱསཱི’’ཏི གཱུཐཔིཎྜཾ གཧེཏྭཱ ཙནྡམཎྜལཾ དཱུསེཏུཾ ཝཱཡམནྟཱི ཝིཡ པརིསམཛ྄ཛྷེ ཏཐཱགཏཾ ཨཀྐོསི. ཏཐཱགཏོ དྷམྨཀཐཾ ཋཔེཏྭཱ སཱིཧོ ཝིཡ ཨབྷིནདནྟོ, ‘‘བྷགིནི, ཏཡཱ ཀཐིཏསྶ ཏཐབྷཱཝཾ ཝཱ ཝིཏཐབྷཱཝཾ ཝཱ ཨཧམེཝ ཙ ཏྭཉྩ ཛཱནཱམཱ’’ཏི ཨཱཧ. ‘‘ཨཱམ, མཧཱསམཎ, ཏཡཱ ཙ མཡཱ ཙ ཉཱཏབྷཱཝེནེཏཾ ཛཱཏ’’ནྟི.

ཏསྨིཾ ཁཎེ སཀྐསྶ ཨཱསནཾ ཨུཎྷཱཀཱརཾ དསྶེསི. སོ ཨཱཝཛྫམཱནོ ‘‘ཙིཉྩམཱཎཝིཀཱ ཏཐཱགཏཾ ཨབྷཱུཏེན ཨཀྐོསཏཱི’’ཏི ཉཏྭཱ ‘‘ཨིདཾ ཝཏྠུཾ སོདྷེསྶཱམཱི’’ཏི ཙཏཱུཧི དེཝཔུཏྟེཧི སདྡྷིཾ ཨཱགམི. དེཝཔུཏྟཱ མཱུསིཀཔོཏཀཱ ཧུཏྭཱ དཱརུམཎྜལིཀསྶ བནྡྷནརཛྫུཀེ ཨེཀཔྤཧཱརེནེཝ ཚིནྡིཾསུ, པཱརུཏཔཊཾ ཝཱཏོ ཨུཀྑིཔི, དཱརུམཎྜལིཀཾ པཏམཱནཾ ཏསྶཱ པཱདཔིཊྛིཡཾ པཏི, ཨུབྷོ ཨགྒཔཱདཱ ཚིཛྫིཾསུ. མནུསྶཱ ‘‘དྷཱི ཀཱལ༹ཀཎྞི, སམྨཱསམྦུདྡྷཾ ཨཀྐོསཱི’’ཏི སཱིསེ ཁེལ༹ཾ པཱཏེཏྭཱ ལེཌྜུདཎྜཱདིཧཏྟཱ ཛེཏཝནཱ ནཱིཧརིཾསུ. ཨཐསྶཱ ཏཐཱགཏསྶ ཙཀྑུཔཐཾ ཨཏིཀྐནྟཀཱལེ མཧཱཔཐཝཱི བྷིཛྫིཏྭཱ ཝིཝརམདཱསི, ཨཝཱིཙིཏོ ཨགྒིཛཱལཱ ཨུཊྛཧི. སཱ ཀུལདཏྟིཡཾ ཀམྦལཾ པཱརུཔམཱནཱ ཝིཡ གནྟྭཱ ཨཝཱིཙིམྷི ནིབྦཏྟི. ཨཉྙཏིཏྠིཡཱནཾ ལཱབྷསཀྐཱརོ པརིཧཱཡི, དསབལསྶ བྷིཡྻོསོམཏྟཱཡ ཝཌྜྷི. པུནདིཝསེ དྷམྨསབྷཱཡཾ ཀཐཾ སམུཊྛཱཔེསུཾ, ‘‘ཨཱཝུསོ, ཙིཉྩམཱཎཝིཀཱ ཨེཝཾ ཨུལཱ༹རགུཎཾ ཨགྒདཀྑིཎེཡྻཾ སམྨཱསམྦུདྡྷཾ ཨབྷཱུཏེན ཨཀྐོསིཏྭཱ མཧཱཝིནཱསཾ པཏྟཱ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ, པུབྦེཔི ཨེསཱ མཾ ཨབྷཱུཏེན ཨཀྐོསིཏྭཱ ཝིནཱསཾ པཏྟཱཡེཝཱ’’ཏི ཝཏྭཱ –

‘‘ནཱདཊྛཱ པརཏོ དོསཾ, ཨཎུཾ ཐཱུལཱནི སབྦསོ;

ཨིསྶརོ པཎཡེ དཎྜཾ, སཱམཾ ཨཔྤཊིཝེཀྑིཡཱ’’ཏི. –

ཨིམཾ དྭཱདསནིཔཱཏེ མཧཱཔདུམཛཱཏཀཾ (ཛཱ. ༡.༡༢.༡༠༦) ཝིཏྠཱརེཏྭཱ ཀཐེསི –

ཏདཱ ཀིརེསཱ མཧཱཔདུམཀུམཱརསྶ བོདྷིསཏྟསྶ མཱཏུ སཔཏྟཱི རཉྙོ ཨགྒམཧེསཱི ཧུཏྭཱ མཧཱསཏྟཾ ཨསདྡྷམྨེན ནིམནྟེཏྭཱ ཏསྶ མནཾ ཨལབྷིཏྭཱ ཨཏྟནཱཝ ཨཏྟནི ཝིཔྤཀཱརཾ ཀཏྭཱ གིལཱནཱལཡཾ དསྶེཏྭཱ ‘‘ཏཝ པུཏྟོ མཾ ཨནིཙྪནྟིཾ ཨིམཾ ཝིཔྤཀཱརཾ པཱཔེསཱི’’ཏི རཉྙོ ཨཱརོཙེསི. རཱཛཱ ཀུདྡྷོ མཧཱསཏྟཾ ཙོརཔཔཱཏེ ཁིཔི. ཨཐ ནཾ པབྦཏཀུཙྪིཡཾ ཨདྷིཝཏྠཱ དེཝཏཱ པཊིགྒཧེཏྭཱ ནཱགརཱཛསྶ ཕཎགབྦྷེ པཏིཊྛཔེསི. ནཱགརཱཛཱ ཏཾ ནཱགབྷཝནཾ ནེཏྭཱ ཨུཔཌྜྷརཛྫེན སམྨཱནེསི. སོ ཏཏྠ སཾཝཙྪརཾ ཝསིཏྭཱ པབྦཛིཏུཀཱམོ ཧིམཝནྟཔྤདེསཾ པཏྭཱ པབྦཛིཏྭཱ ཛྷཱནཱབྷིཉྙཱཡོ ནིབྦཏྟེསི. ཨཐ ནཾ ཨེཀོ ཝནཙརཀོ དིསྭཱ རཉྙོ ཨཱརོཙེསི. རཱཛཱ ཏསྶ སནྟིཀཾ གནྟྭཱ ཀཏཔཊིསནྠཱརོ སབྦཾ ཏཾ པཝཏྟིཾ ཉཏྭཱ མཧཱསཏྟཾ རཛྫེན ནིམནྟེཏྭཱ ཏེན ‘‘མཡ྄ཧཾ རཛྫེན ཀིཙྩཾ ནཏྠི, ཏྭཾ པན དས རཱཛདྷམྨེ ཨཀོཔེཏྭཱ ཨགཏིགམནཾ པཧཱཡ དྷམྨེན རཛྫཾ ཀཱརེཧཱི’’ཏི ཨོཝདིཏོ ཨུཊྛཱཡཱསནཱ རོདིཏྭཱ ནགརཾ གཙྪནྟོ ཨནྟརཱམགྒེ ཨམཙྩེ པུཙྪི – ‘‘ཨཧཾ ཀཾ ནིསྶཱཡ ཨེཝཾ ཨཱཙཱརསམྤནྣེན པུཏྟེན ཝིཡོགཾ པཏྟོ’’ཏི? ‘‘ཨགྒམཧེསིཾ ནིསྶཱཡ, དེཝཱ’’ཏི. རཱཛཱ ཏཾ ཨུདྡྷཾཔཱདཾ གཧེཏྭཱ ཙོརཔཔཱཏེ ཁིཔཱཔེཏྭཱ ནགརཾ པཝིསིཏྭཱ དྷམྨེན རཛྫཾ ཀཱརེསི. ཏདཱ མཧཱཔདུམཀུམཱརོ སཏྠཱ ཨཧོསི, མཱཏུ སཔཏྟཱི ཙིཉྩམཱཎཝིཀཱཏི.

སཏྠཱ ཨིམམཏྠཾ པཀཱསེཏྭཱ, ‘‘བྷིཀྑཝེ, ཨེཀཾ དྷམྨཉྷི སཙྩཝཙནཾ པཧཱཡ མུསཱཝཱདེ པཏིཊྛིཏཱནཾ ཝིསྶཊྛཔརལོཀཱནཾ ཨཀཏྟབྦཔཱཔཀམྨཾ ནཱམ ནཏྠཱི’’ཏི ཝཏྭཱ ཨིམཾ གཱཐམཱཧ –

༡༧༦.

‘‘ཨེཀཾ དྷམྨཾ ཨཏཱིཏསྶ, མུསཱཝཱདིསྶ ཛནྟུནོ;

ཝིཏིཎྞཔརལོཀསྶ, ནཏྠི པཱཔཾ ཨཀཱརིཡ’’ནྟི.

ཏཏྠ ཨེཀཾ དྷམྨནྟི སཙྩཾ. མུསཱཝཱདིསྶཱཏི ཡསྶ དསསུ ཝཙནེསུ ཨེཀམྤི སཙྩཾ ནཏྠི, ཨེཝརཱུཔསྶ མུསཱཝཱདིནོ. ཝིཏིཎྞཔརལོཀསྶཱཏི ཝིསྶཊྛཔརལོཀསྶ. ཨེཝརཱུཔོ ཧི མནུསྶསམྤཏྟིཾ དེཝསམྤཏྟིཾ ཨཝསཱནེ ནིབྦཱནསམྤཏྟིནྟི ཨིམཱ ཏིསྶོཔི སམྤཏྟིཡོ ན པསྶཏི. ནཏྠི པཱཔནྟི ཏསྶ ཨེཝརཱུཔསྶ ཨིདཾ ནཱམ པཱཔཾ ཨཀཏྟབྦནྟི ནཏྠི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཙིཉྩམཱཎཝིཀཱཝཏྠུ ནཝམཾ.

༡༠. ཨསདིསདཱནཝཏྠུ

ན ཝེ ཀདརིཡཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨསདིསདཱནཾ ཨཱརབྦྷ ཀཐེསི.

ཨེཀསྨིཉྷི སམཡེ སཏྠཱ ཙཱརིཀཾ ཙརིཏྭཱ པཉྩསཏབྷིཀྑུཔརིཝཱརོ ཛེཏཝནཾ པཱཝིསི. རཱཛཱ ཝིཧཱརཾ གནྟྭཱ སཏྠཱརཾ ནིམནྟེཏྭཱ པུནདིཝསེ ཨཱགནྟུཀདཱནཾ སཛྫེཏྭཱ ‘‘དཱནཾ མེ པསྶནྟཱུ’’ཏི ནཱགརེ པཀྐོསི. ནཱགརཱ ཨཱགནྟྭཱ རཉྙོ དཱནཾ དིསྭཱ པུནདིཝསེ སཏྠཱརཾ ནིམནྟེཏྭཱ དཱནཾ སཛྫེཏྭཱ ‘‘ཨམྷཱཀམྤི དཱནཾ, དེཝོ, པསྶཏཱུ’’ཏི རཉྙོ པཧིཎིཾསུ. རཱཛཱ ཏེསཾ དཱནཾ དིསྭཱ ‘‘ཨིམེཧི མམ དཱནཏོ ཨུཏྟརིཏརཾ ཀཏཾ, པུན དཱནཾ ཀརིསྶཱམཱི’’ཏི པུནདིཝསེཔི དཱནཾ སཛྫེསི. ནཱགརཱཔི ཏཾ དིསྭཱ པུནདིཝསེ སཛྫཡིཾསུ. ཨེཝཾ ནེཝ རཱཛཱ ནཱགརེ པརཱཛེཏུཾ སཀྐོཏི, ན ནཱགརཱ རཱཛཱནཾ. ཨཐ ཚཊྛེ ཝཱརེ ནཱགརཱ སཏགུཎཾ སཧསྶགུཎཾ ཝཌྜྷེཏྭཱ ཡཐཱ ན སཀྐཱ ཧོཏི ‘‘ཨིདཾ ནཱམ ཨིམེསཾ དཱནེ ནཏྠཱི’’ཏི ཝཏྟུཾ, ཨེཝཾ དཱནཾ སཛྫཡིཾསུ. རཱཛཱ ཏཾ དིསྭཱ ‘‘སཙཱཧཾ ཨིམེསཾ དཱནཏོ ཨུཏྟརིཏརཾ ཀཱཏུཾ ན སཀྑིསྶཱམི, ཀིཾ མེ ཛཱིཝིཏེནཱ’’ཏི ཨུཔཱཡཾ ཙིནྟེནྟོ ནིཔཛྫི. ཨཐ ནཾ མལླིཀཱ དེཝཱི ཨུཔསངྐམིཏྭཱ, ‘‘ཀསྨཱ, མཧཱརཱཛ, ཨེཝཾ ནིཔནྣོསི, ཀེན ཏེ ཨིནྡྲིཡཱནི ཀིལནྟཱནི ཝིཡཱ’’ཏི པུཙྪི. རཱཛཱ ཨཱཧ – ‘‘ན དཱནི ཏྭཾ, དེཝི, ཛཱནཱསཱི’’ཏི. ‘‘ན ཛཱནཱམི, དེཝཱ’’ཏི. སོ ཏསྶཱ ཏམཏྠཾ ཨཱརོཙེསི.

ཨཐ ནཾ མལླིཀཱ ཨཱཧ – ‘‘དེཝ, མཱ ཙིནྟཡི, ཀཧཾ ཏཡཱ པཐཝིསྶརོ རཱཛཱ ནཱགརེཧི པརཱཛིཡམཱནོ དིཊྛཔུབྦོ ཝཱ སུཏཔུབྦོ ཝཱ, ཨཧཾ ཏེ དཱནཾ སཾཝིདཧིསྶཱམཱི’’ཏི. ཨིཏིསྶ ཨསདིསདཱནཾ སཾཝིདཧིཏུཀཱམཏཱཡ ཨེཝཾ ཝཏྭཱ, མཧཱརཱཛ, སཱལཀལྱཱཎིཔདརེཧི པཉྩནྣཾ བྷིཀྑུསཏཱནཾ ཨནྟོ ཨཱཝཊྚེ ནིསཱིདནམཎྜཔཾ ཀཱརེཧི, སེསཱ བཧིཨཱཝཊྚེ ནིསཱིདིསྶནྟི. པཉྩ སེཏཙྪཏྟསཏཱནི ཀཱརེཧི, ཏཱནི གཧེཏྭཱ པཉྩསཏཱ ཧཏྠཱི པཉྩནྣཾ བྷིཀྑུསཏཱནཾ མཏྠཀེ དྷཱརཡམཱནཱ ཋསྶནྟི. ཨཊྛ ཝཱ དས ཝཱ རཏྟསུཝཎྞནཱཝཱཡོ ཀཱརེཧི, ཏཱ མཎྜཔམཛ྄ཛྷེ བྷཝིསྶནྟི. དྭིནྣཾ དྭིནྣཾ བྷིཀྑཱུནཾ ཨནྟརེ ཨེཀེཀཱ ཁཏྟིཡདྷཱིཏཱ ནིསཱིདིཏྭཱ གནྡྷེ པིསིསྶཏི, ཨེཀེཀཱ ཁཏྟིཡདྷཱིཏཱ བཱིཛནཾ ཨཱདཱཡ དྭེ དྭེ བྷིཀྑཱུ བཱིཛམཱནཱ ཋསྶཏི, སེསཱ ཁཏྟིཡདྷཱིཏརོ པིསེ པིསེ གནྡྷེ ཧརིཏྭཱ སུཝཎྞནཱཝཱསུ པཀྑིཔིསྶནྟི, ཏཱསུ ཨེཀཙྩཱ ཁཏྟིཡདྷཱིཏརོ ནཱིལུཔྤལཀལཱཔེ གཧེཏྭཱ སུཝཎྞནཱཝཱསུ པཀྑིཏྟགནྡྷེ ཨཱལོལེ༹ཏྭཱ ཝཱསཾ གཱཧཱཔེསྶནྟི. ནཱགརཱནཉྷིནེཝ ཁཏྟིཡདྷཱིཏརོ ཨཏྠི, ན སེཏཙྪཏྟཱནི, ན ཧཏྠིནོ ཙ. ཨིམེཧི ཀཱརཎེཧི ནཱགརཱ པརཱཛིསྶནྟི, ཨེཝཾ ཀརོཧི, མཧཱརཱཛཱཏི. རཱཛཱ ‘‘སཱདྷུ, དེཝི, ཀལྱཱཎཾ ཏེ ཀཐིཏ’’ནྟི ཏཱཡ ཀཐིཏནིཡཱམེན སབྦཾ ཀཱརེསི. ཨེཀསྶ པན བྷིཀྑུནོ ཨེཀོ ཧཏྠི ནཔྤཧོསི. ཨཐ རཱཛཱ མལླིཀཾ ཨཱཧ – ‘‘བྷདྡེ, ཨེཀསྶ བྷིཀྑུནོ ཨེཀོ ཧཏྠི ནཔྤཧོཏི, ཀིཾ ཀརིསྶཱམཱ’’ཏི. ‘‘ཀིཾ, དེཝ, པཉྩ ཧཏྠིསཏཱནི ནཏྠཱི’’ཏི? ‘‘ཨཏྠི, དེཝི, ཨཝསེསཱ དུཊྛཧཏྠིནོ, ཏེ བྷིཀྑཱུ དིསྭཱཝ ཝེརམྦྷཝཱཏཱ ཝིཡ ཙཎྜཱ ཧོནྟཱི’’ཏི. ‘‘དེཝ, ཨཧཾ ཨེཀསྶ དུཊྛཧཏྠིཔོཏཀསྶ ཚཏྟཾ གཧེཏྭཱ ཏིཊྛནཊྛཱནཾ ཛཱནཱམཱི’’ཏི. ‘‘ཀཏྠ ནཾ ཋཔེསྶཱམཱ’’ཏི? ‘‘ཨཡྻསྶ ཨངྒུལིམཱལསྶ སནྟིཀེ’’ཏི. རཱཛཱ ཏཐཱ ཀཱརེསི. ཧཏྠིཔོཏཀོ ཝཱལདྷིཾ ཨནྟརསཏྠིམྷི པཀྑིཔིཏྭཱ ཨུབྷོ ཀཎྞེ པཱཏེཏྭཱ ཨཀྑཱིནི ནིམིལེཏྭཱ ཨཊྛཱསི. མཧཱཛནོ ‘‘ཨེཝརཱུཔསྶ ནཱམ ཙཎྜཧཏྠིནོ ཨཡམཱཀཱརོ’’ཏི ཧཏྠིམེཝ ཨོལོཀེསི.

རཱཛཱ བུདྡྷཔྤམུཁཾ བྷིཀྑུསངྒྷཾ པརིཝིསིཏྭཱ སཏྠཱརཾ ཝནྡིཏྭཱ, ‘‘བྷནྟེ, ཡཾ ཨིམསྨིཾ དཱནགྒེ ཀཔྤིཡབྷཎྜཾ ཝཱ ཨཀཔྤིཡབྷཎྜཾ ཝཱ, སབྦཾ ཏཾ ཏུམྷཱཀམེཝ དམྨཱི’’ཏི ཨཱཧ. ཏསྨིཾ པན དཱནེ ཨེཀདིཝསེནེཝ པརིཙྩཏྟཾ ཙུདྡསཀོཊིདྷནཾ ཧོཏི. སཏྠུ པན སེཏཙྪཏྟཾ ནིསཱིདནཔལླངྐོ ཨཱདྷཱརཀོ པཱདཔཱིཋིཀཱཏི ཙཏྟཱརི ཨནགྒྷཱནེཝ. པུན ཨེཝརཱུཔཾ ཀཏྭཱ བུདྡྷཱནཾ དཱནཾ ནཱམ དཱཏུཾ སམཏྠོ ནཱཧོསི, ཏེནེཝ ཏཾ ‘‘ཨསདིསདཱན’’ནྟི པཉྙཱཡི. ཏཾ ཀིར སབྦབུདྡྷཱནཾ ཨེཀཝཱརཾ ཧོཏིཡེཝ, སབྦེསཾ པན ཨིཏྠཱིཡེཝ སཾཝིདཧཏི. རཉྙོ པན ཀཱལོ༹ ཙ ཛུཎྷོ ཙཱཏི དྭེ ཨམཙྩཱ ཨཧེསུཾ. ཏེསུ ཀཱལོ༹ ཙིནྟེསི – ‘‘ཨཧོ རཱཛཀུལསྶ པརིཧཱནི, ཨེཀདིཝསེནེཝ ཙུདྡསཀོཊིདྷནཾ ཁཡཾ གཙྪཏི, ཨིམེ ཨིམཾ དཱནཾ བྷུཉྫིཏྭཱ གནྟྭཱ ནིཔནྣཱ ནིདྡཱཡིསྶནྟི, ཨཧོ ནཊྛཾ རཱཛཀུལ’’ནྟི. ཛུཎྷོ ཙིནྟེསི – ‘‘ཨཧོ རཉྙོ དཱནཾ སུདིནྣཾ. ན ཧི སཀྐཱ རཱཛབྷཱཝེ ཨཊྛིཏེན ཨེཝརཱུཔཾ དཱནཾ དཱཏུཾ, སབྦསཏྟཱནཾ པཏྟིཾ ཨདེནྟོ ནཱམ ནཏྠི, ཨཧཾ པནིདཾ དཱནཾ ཨནུམོདཱམཱི’’ཏི.

སཏྠུ བྷཏྟཀིཙྩཱཝསཱནེ རཱཛཱ ཨནུམོདནཏྠཱཡ པཏྟཾ གཎྷི. སཏྠཱ ཙིནྟེསི – ‘‘རཉྙཱ མཧོགྷཾ པཝཏྟེནྟེན ཝིཡ མཧཱདཱནཾ དིནྣཾ, ཨསཀྑི ནུ ཁོ མཧཱཛནོ ཙིཏྟཾ པསཱདེཏུཾ, ཨུདཱཧུ ནོ’’ཏི. སོ ཏེསཾ ཨམཙྩཱནཾ ཙིཏྟཱཙཱརཾ ཉཏྭཱ ‘‘སཙེ རཉྙོ དཱནཱནུཙྪཝིཀཾ ཨནུམོདནཾ ཀརིསྶཱམི, ཀཱལ༹སྶ མུདྡྷཱ སཏྟདྷཱ ཕལིསྶཏི, ཛུཎྷོ སོཏཱཔཏྟིཕལེ པཏིཊྛཧིསྶཏཱི’’ཏི ཉཏྭཱ ཀཱལེ༹ ཨནུཀམྤཾ པཊིཙྩ ཨེཝརཱུཔཾ དཱནཾ དཏྭཱ ཋིཏསྶ རཉྙོ ཙཏུཔྤདིཀཾ གཱཐམེཝ ཝཏྭཱ ཨུཊྛཱཡཱསནཱ ཝིཧཱརཾ གཏོ. བྷིཀྑཱུ ཨངྒུལིམཱལཾ པུཙྪིཾསུ – ‘‘ན ཀིཾ ནུ ཁོ, ཨཱཝུསོ, དུཊྛཧཏྠིཾ ཚཏྟཾ དྷཱརེཏྭཱ ཋིཏཾ དིསྭཱ བྷཱཡཱི’’ཏི? ‘‘ན བྷཱཡིཾ, ཨཱཝུསོ’’ཏི. ཏེ སཏྠཱརཾ ཨུཔསངྐམིཏྭཱ ཨཱཧཾསུ – ‘‘ཨངྒུལིམཱལོ, བྷནྟེ, ཨཉྙཾ བྱཱཀརོསཱི’’ཏི. སཏྠཱ ‘‘ན, བྷིཀྑཝེ, ཨངྒུལིམཱལོ བྷཱཡཏི. ཁཱིཎཱསཝཨུསབྷཱནཉྷི ཨནྟརེ ཛེཊྛཀཨུསབྷཱ མམ པུཏྟསདིསཱ བྷིཀྑཱུ ན བྷཱཡནྟཱི’’ཏི ཝཏྭཱ བྲཱཧྨཎཝགྒེ ཨིམཾ གཱཐམཱཧ –

‘‘ཨུསབྷཾ པཝརཾ ཝཱིརཾ, མཧེསིཾ ཝིཛིཏཱཝིནཾ;

ཨནེཛཾ ནྷཱཏཀཾ བུདྡྷཾ, ཏམཧཾ བྲཱུམི བྲཱཧྨཎ’’ནྟི. (དྷ. པ. ༤༢༢; སུ. ནི. ༦༥༡);

རཱཛཱཔི དོམནསྶཔྤཏྟོ ‘‘ཨེཝརཱུཔཱཡ ནཱམ པརིསཱཡ དཱནཾ དཏྭཱ ཋིཏསྶ མཡ྄ཧཾ ཨནུཙྪཝིཀཾ ཨནུམོདནཾ ཨཀཏྭཱ གཱཐམེཝ ཝཏྭཱ སཏྠཱ ཨུཊྛཱཡཱསནཱ གཏོ. མཡཱ སཏྠུ ཨནུཙྪཝིཀཾ དཱནཾ ཨཀཏྭཱ ཨནནུཙྪཝིཀཾ ཀཏཾ བྷཝིསྶཏི, ཀཔྤིཡབྷཎྜཾ ཨདཏྭཱ ཨཀཔྤིཡབྷཎྜཾ ཝཱ དིནྣཾ བྷཝིསྶཏི, སཏྠཱརཱ མེ ཀུཔིཏེན བྷཝིཏབྦཾ. ཨེཝཉྷི ཨསདིསདཱནཾ ནཱམ, དཱནཱནུརཱུཔཾ ཨནུམོདནཾ ཀཱཏུཾ ཝཊྚཏཱི’’ཏི ཝིཧཱརཾ གནྟྭཱ སཏྠཱརཾ ཝནྡིཏྭཱ ཨེཏདཝོཙ – ‘‘ཀིཾ ནུ ཁོ མེ, བྷནྟེ, དཱཏབྦཡུཏྟཀཾ དཱནཾ ན དིནྣཾ, ཨུདཱཧུ དཱནཱནུརཱུཔཾ ཀཔྤིཡབྷཎྜཾ ཨདཏྭཱ ཨཀཔྤིཡབྷཎྜམེཝ དིནྣ’’ནྟི. ‘‘ཀིམེཏཾ, མཧཱརཱཛཱ’’ཏི? ‘‘ན མེ ཏུམྷེཧི དཱནཱནུཙྪཝིཀཱ ཨནུམོདནཱ ཀཏཱ’’ཏི? ‘‘མཧཱརཱཛ, ཨནུཙྪཝིཀམེཝ ཏེ དཱནཾ དིནྣཾ. ཨེཏཉྷི ཨསདིསདཱནཾ ནཱམ, ཨེཀསྶ བུདྡྷསྶ ཨེཀཝཱརམེཝ སཀྐཱ དཱཏུཾ, པུན ཨེཝརཱུཔཾ ནཱམ དཱནཾ དུདྡད’’ནྟི. ‘‘ཨཐ ཀསྨཱ, བྷནྟེ, མེ དཱནཱནུརཱུཔཾ ཨནུམོདནཾ ན ཀརིཏྠཱ’’ཏི? ‘‘པརིསཱཡ ཨསུདྡྷཏྟཱ, མཧཱརཱཛཱ’’ཏི. ‘‘ཀོ ནུ ཁོ, བྷནྟེ, པརིསཱཡ དོསོ’’ཏི? ཨཐསྶ སཏྠཱ དྭིནྣམྤི ཨམཙྩཱནཾ ཙིཏྟཱཙཱརཾ ཨཱརོཙེཏྭཱ ཀཱལེ༹ ཨནུཀམྤཾ པཊིཙྩ ཨནུམོདནཱཡ ཨཀཏབྷཱཝཾ ཨཱཙིཀྑི. རཱཛཱ ‘‘སཙྩཾ ཀིར ཏེ, ཀཱལ༹, ཨེཝཾ ཙིནྟིཏ’’ནྟི པུཙྪིཏྭཱ ‘‘སཙྩ’’ནྟི ཝུཏྟེ ‘‘ཏཝ སནྟཀཾ ཨགྒཧེཏྭཱ མམ པུཏྟདཱརེཧི སདྡྷིཾ མཡི ཨཏྟནོ སནྟཀཾ དེནྟེ ཏུཡ྄ཧཾ ཀཱ པཱིལཱ༹. གཙྪ, བྷོ, ཡཾ ཏེ མཡཱ དིནྣཾ, ཏཾ དིནྣམེཝ ཧོཏུ, རཊྛཏོ པན མེ ནིཀྑམཱ’’ཏི ཏཾ རཊྛཱ ནཱིཧརིཏྭཱ ཛུཎྷཾ པཀྐོསཱཔེཏྭཱ ‘‘སཙྩཾ ཀིར ཏེ ཨེཝཾ ཙིནྟིཏ’’ནྟི པུཙྪིཏྭཱ ‘‘སཙྩ’’ནྟི ཝུཏྟེ, ‘‘སཱདྷུ, མཱཏུལ, པསནྣོསྨི, ཏྭཾ མམ པརིཛནཾ གཧེཏྭཱ མཡཱ དིནྣནིཡཱམེནེཝ སཏྟ དིཝསཱནི དཱནཾ དེཧཱི’’ཏི སཏྟཱཧཾ རཛྫཾ ནིཡྻཱདེཏྭཱ སཏྠཱརཾ ཨཱཧ – ‘‘པསྶཐ, བྷནྟེ, བཱལསྶ ཀརཎཾ, མཡཱ ཨེཝཾ དིནྣདཱནེ པཧཱརམདཱསཱི’’ཏི. སཏྠཱ ‘‘ཨཱམ, མཧཱརཱཛ, བཱལཱ ནཱམ པརསྶ དཱནཾ ཨནབྷིནནྡིཏྭཱ དུགྒཏིཔརཱཡཎཱ ཧོནྟི, དྷཱིརཱ པན པརེསམྤི དཱནཾ ཨནུམོདིཏྭཱ སགྒཔརཱཡཎཱ ཨེཝ ཧོནྟཱི’’ཏི ཝཏྭཱ ཨིམཾ གཱཐམཱཧ –

༡༧༧.

‘‘ན ཝེ ཀདརིཡཱ དེཝལོཀཾ ཝཛནྟི, བཱལཱ ཧཝེ ནཔྤསཾསནྟི དཱནཾ;

དྷཱིརོ ཙ དཱནཾ ཨནུམོདམཱནོ, ཏེནེཝ སོ ཧོཏི སུཁཱི པརཏྠཱ’’ཏི.

ཏཏྠ ཀདརིཡཱཏི ཐདྡྷམཙྪརིནོ. བཱལཱཏི ཨིདྷལོཀཔརལོཀཾ ཨཛཱནནཀཱ. དྷཱིརོཏི པཎྜིཏོ. སུཁཱི པརཏྠཱཏི ཏེནེཝ སོ དཱནཱནུམོདནཔུཉྙེན པརལོཀེ དིབྦསམྤཏྟིཾ ཨནུབྷཝམཱནོ སུཁཱི ཧོཏཱིཏི.

དེསནཱཝསཱནེ ཛུཎྷོ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསི, ཛུཎྷོཔི སོཏཱཔནྣོ ཧུཏྭཱ སཏྟཱཧཾ རཉྙཱ དིནྣནིཡཱམེནེཝ དཱནཾ ཨདཱསཱིཏི.

ཨསདིསདཱནཝཏྠུ དསམཾ.

༡༡. ཨནཱཐཔིཎྜཀཔུཏྟཀཱལཝཏྠུ

པཐབྱཱ ཨེཀརཛྫེནཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀཱལཾ ནཱམ ཨནཱཐཔིཎྜིཀསྶ པུཏྟཾ ཨཱརབྦྷ ཀཐེསི.

སོ ཀིར ཏཐཱཝིདྷསྶ སདྡྷཱསམྤནྣསྶ སེཊྛིནོ པུཏྟོ ཧུཏྭཱ ནེཝ སཏྠུ སནྟིཀཾ གནྟུཾ, ན གེཧཾ ཨཱགཏཀཱལེ དཊྛུཾ, ན དྷམྨཾ སོཏུཾ, ན སངྒྷསྶ ཝེཡྻཱཝཙྩཾ ཀཱཏུཾ ཨིཙྪཏི. པིཏརཱ ‘‘མཱ ཨེཝཾ, ཏཱཏ, ཀརཱི’’ཏི ཝུཏྟོཔི ཏསྶ ཝཙནཾ ན སུཎཱཏི. ཨཐསྶ པིཏཱ ཙིནྟེསི – ‘‘ཨཡཾ ཨེཝརཱུཔཾ དིཊྛིཾ གཧེཏྭཱ ཝིཙརནྟོ ཨཝཱིཙིཔརཱཡཎོ བྷཝིསྶཏི, ན ཁོ པནེཏཾ པཏིརཱུཔཾ, ཡཾ མཡི པསྶནྟེ མམ པུཏྟོ ནིརཡཾ གཙྪེཡྻ. ཨིམསྨིཾ ཁོ པན ལོཀེ དྷནདཱནེན ཨབྷིཛྫནཀསཏྟོ ནཱམ ནཏྠི, དྷནེན ནཾ བྷིནྡིསྶཱམཱི’’ཏི. ཨཐ ནཾ ཨཱཧ – ‘‘ཏཱཏ, ཨུཔོསཐིཀོ ཧུཏྭཱ ཝིཧཱརཾ གནྟྭཱ དྷམྨཾ སུཏྭཱ ཨེཧི, ཀཧཱཔཎསཏཾ ཏེ དསྶཱམཱི’’ཏི. དསྶཐ, ཏཱཏཱཏི. དསྶཱམི, པུཏྟཱཏི. སོ ཡཱཝཏཏིཡཾ པཊིཉྙཾ གཧེཏྭཱ ཨུཔོསཐིཀོ ཧུཏྭཱ ཝིཧཱརཾ ཨགམཱསི. དྷམྨསྶཝནེན པནསྶ ཀིཙྩཾ ནཏྠི, ཡཐཱཕཱསུཀཊྛཱནེ སཡིཏྭཱ པཱཏོཝ གེཧཾ ཨགམཱསི. ཨཐསྶ པིཏཱ ‘‘པུཏྟོ མེ ཨུཔོསཐིཀོ ཨཧོསི, སཱིགྷམསྶ ཡཱགུཨཱདཱིནི ཨཱཧརཐཱ’’ཏི ཝཏྭཱ དཱཔེསི. སོ ‘‘ཀཧཱཔཎེ ཨགྒཧེཏྭཱ ན བྷུཉྫིསྶཱམཱི’’ཏི ཨཱཧཊཱཧཊཾ པཊིཀྑིཔི. ཨཐསྶ པིཏཱ པཱིལ༹ཾ ཨསཧནྟོ ཀཧཱཔཎབྷཎྜཾ དཱཔེསི. སོ ཏཾ ཧཏྠེན གཧེཏྭཱཝ ཨཱཧཱརཾ པརིབྷུཉྫི.

ཨཐ ནཾ པུནདིཝསེ སེཊྛི, ‘‘ཏཱཏ, ཀཧཱཔཎསཧསྶཾ ཏེ དསྶཱམི, སཏྠུ པུརཏོ ཋཏྭཱ ཨེཀཾ དྷམྨཔདཾ ཨུགྒཎྷིཏྭཱ ཨཱགཙྪེཡྻཱསཱི’’ཏི པེསེསི. སོཔི ཝིཧཱརཾ གནྟྭཱ སཏྠུ པུརཏོ ཋཏྭཱཝ ཨེཀམེཝ པདཾ ཨུགྒཎྷིཏྭཱ པལཱཡིཏུཀཱམོ ཨཧོསི. ཨཐསྶ སཏྠཱ ཨསལླཀྑཎཱཀཱརཾ ཨཀཱསི. སོ ཏཾ པདཾ ཨསལླཀྑེཏྭཱ ཨུཔརིཔདཾ ཨུགྒཎྷིསྶཱམཱིཏི ཋཏྭཱ ཨསྶོསིཡེཝ. ཨུགྒཎྷིསྶཱམཱིཏི སུཎནྟོཝ ཀིར སཀྐཙྩཾ སུཎཱཏི ནཱམ. ཨེཝཉྩ ཀིར སུཎནྟཱནཾ དྷམྨོ སོཏཱཔཏྟིམགྒཱདཡོ དེཏི. སོཔི ཨུགྒཎྷིསྶཱམཱིཏི སུཎཱཏི, སཏྠཱཔིསྶ ཨསལླཀྑཎཱཀཱརཾ ཀརོཏི. སོ ‘‘ཨུཔརིཔདཾ ཨུགྒཎྷིསྶཱམཱི’’ཏི ཋཏྭཱ སུཎནྟོཝ སོཏཱཔཏྟིཕལེ པཏིཊྛཱསི.

སོ པུནདིཝསེ བུདྡྷཔྤམུཁེན བྷིཀྑུསངྒྷེན སདྡྷིཾཡེཝ སཱཝཏྠིཾ པཱཝིསི. མཧཱསེཊྛི ཏཾ དིསྭཱ ‘‘ཨཛྫ མམ པུཏྟསྶ ཨཱཀཱརོ རུཙྩཏཱི’’ཏི ཙིནྟེསི. ཏསྶཔི ཨེཏདཧོསི – ‘‘ཨཧོ ཝཏ མེ པིཏཱ ཨཛྫ སཏྠུ སནྟིཀེ ཀཧཱཔཎེ ན དདེཡྻ, ཀཧཱཔཎཀཱརཎཱ མཡ྄ཧཾ ཨུཔོསཐིཀབྷཱཝཾ པཊིཙྪཱདེཡྻཱ’’ཏི. སཏྠཱ པནསྶ ཧིཡྻོཝ ཀཧཱཔཎསྶ ཀཱརཎཱ ཨུཔོསཐིཀབྷཱཝཾ ཨཉྙཱསི. མཧཱསེཊྛི, བུདྡྷཔྤམུཁསྶ བྷིཀྑུསངྒྷསྶ ཡཱགུཾ དཱཔེཏྭཱ པུཏྟསྶཔི དཱཔེསི. སོ ནིསཱིདིཏྭཱ ཏུཎྷཱིབྷཱུཏོཝ ཡཱགུཾ པིཝི, ཁཱདནཱིཡཾ ཁཱདི, བྷཏྟཾ བྷུཉྫི. མཧཱསེཊྛི སཏྠུ བྷཏྟཀིཙྩཱཝསཱནེ པུཏྟསྶ པུརཏོ སཧསྶབྷཎྜིཀཾ ཋཔཱཔེཏྭཱ, ‘‘ཏཱཏ, མཡཱ ཏེ ‘སཧསྶཾ དསྶཱམཱི’ཏི ཝཏྭཱ ཨུཔོསཐཾ སམཱདཱཔེཏྭཱ ཝིཧཱརཾ པཧིཏོ. ཨིདཾ ཏེ སཧསྶ’’ནྟི ཨཱཧ. སོ སཏྠུ པུརཏོ ཀཧཱཔཎེ དིཡྻམཱནེ དིསྭཱ ལཛྫནྟོ ‘‘ཨལཾ མེ ཀཧཱཔཎེཧཱི’’ཏི ཝཏྭཱ, ‘‘གཎྷ, ཏཱཏཱ’’ཏི ཝུཙྩམཱནོཔི ན གཎྷི. ཨཐསྶ པིཏཱ སཏྠཱརཾ ཝནྡིཏྭཱ, ‘‘བྷནྟེ, ཨཛྫ མེ པུཏྟསྶ ཨཱཀཱརོ རུཙྩཏཱི’’ཏི ཝཏྭཱ ‘‘ཀིཾ, མཧཱསེཊྛཱི’’ཏི ཝུཏྟེ ‘‘མཡཱ ཨེས པུརིམདིཝསེ ‘ཀཧཱཔཎསཏཾ ཏེ དསྶཱམཱི’ཏི ཝཏྭཱ ཝིཧཱརཾ པེསིཏོ. པུནདིཝསེ ཀཧཱཔཎེ ཨགྒཧེཏྭཱ བྷུཉྫིཏུཾ ན ཨིཙྪི, ཨཛྫ པན དིཡྻམཱནེཔི ཀཧཱཔཎེ ན ཨིཙྪཏཱི’’ཏི ཨཱཧ. སཏྠཱ ‘‘ཨཱམ, མཧཱསེཊྛི, ཨཛྫ ཏཝ པུཏྟསྶ ཙཀྐཝཏྟིསམྤཏྟིཏོཔི དེཝལོཀབྲཧྨལོཀསམྤཏྟཱིཧིཔི སོཏཱཔཏྟིཕལམེཝ ཝར’’ནྟི ཝཏྭཱ ཨིམཾ གཱཐམཱཧ –

༡༧༨.

‘‘པཐབྱཱ ཨེཀརཛྫེན, སགྒསྶ གམནེན ཝཱ;

སབྦལོཀཱདྷིཔཙྩེན, སོཏཱཔཏྟིཕལཾ ཝར’’ནྟི.

ཏཏྠ པཐབྱཱ ཨེཀརཛྫེནཱཏི ཙཀྐཝཏྟིརཛྫེན. སགྒསྶ གམནེན ཝཱཏི ཚབྦཱིསཏིཝིདྷསྶ སགྒསྶ ཨདྷིགམནེན. སབྦལོཀཱདྷིཔཙྩེནཱཏི ན ཨེཀསྨིཾ ཨེཏྟཀེ ལོཀེ ནཱགསུཔཎྞཝེམཱནིཀཔེཏེཧི སདྡྷིཾ, སབྦསྨིཾ ལོཀེ ཨཱདྷིཔཙྩེན. སོཏཱཔཏྟིཕལཾ ཝརནྟི ཡསྨཱ ཨེཏྟཀེ ཋཱནེ རཛྫཾ ཀཱརེཏྭཱཔི ནིརཡཱདཱིཧི ཨམུཏྟོཝ ཧོཏི, སོཏཱཔནྣོ པན པིཧིཏཱཔཱཡདྭཱརོ ཧུཏྭཱ སབྦདུབྦལོཔི ཨཊྛམེ བྷཝེ ན ནིབྦཏྟཏི, ཏསྨཱ སོཏཱཔཏྟིཕལམེཝ ཝརཾ ཨུཏྟམནྟི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨནཱཐཔིཎྜཀཔུཏྟཀཱལཝཏྠུ ཨེཀཱདསམཾ.

ལོཀཝགྒཝཎྞནཱ ནིཊྛིཏཱ.

ཏེརསམོ ཝགྒོ.

༡༤. བུདྡྷཝགྒོ

༡. མཱརདྷཱིཏརཝཏྠུ

ཡསྶ ཛིཏནྟི ཨིམཾ དྷམྨདེསནཾ སཏྠཱ བོདྷིམཎྜེ ཝིཧརནྟོ མཱརདྷཱིཏརོ ཨཱརབྦྷ ཀཐེསི. དེསནཾ པན སཱཝཏྠིཡཾ སམུཊྛཱཔེཏྭཱ པུན ཀུརུརཊྛེ མཱགཎྜིཡབྲཱཧྨཎསྶ ཀཐེསི.

ཀུརུརཊྛེ ཀིར མཱགཎྜིཡབྲཱཧྨཎསྶ དྷཱིཏཱ མཱགཎྜིཡཱཡེཝ ནཱམ ཨཧོསི ཨུཏྟམརཱུཔདྷརཱ. ཏཾ པཏྠཡམཱནཱ ཨནེཀབྲཱཧྨཎམཧཱསཱལཱ ཙེཝ ཁཏྟིཡམཧཱསཱལཱ ཙ ‘‘དྷཱིཏརཾ ནོ དེཏཱུ’’ཏི མཱགཎྜིཡསྶ པཧིཎིཾསུ. སོཔི ‘‘ན ཏུམྷེ མཡ྄ཧཾ དྷཱིཏུ ཨནུཙྪཝིཀཱ’’ཏི སབྦེ པཊིཀྑིཔཏེཝ. ཨཐེཀདིཝསཾ སཏྠཱ པཙྩཱུསསམཡེ ལོཀཾ ཝོལོཀེནྟོ ཨཏྟནོ ཉཱཎཛཱལསྶ ཨནྟོ པཝིཊྛཾ མཱགཎྜིཡབྲཱཧྨཎཾ དིསྭཱ ‘‘ཀིཾ ནུ ཁོ བྷཝིསྶཏཱི’’ཏི ཨུཔདྷཱརེནྟོ བྲཱཧྨཎསྶ ཙ བྲཱཧྨཎིཡཱ ཙ ཏིཎྞཾ མགྒཕལཱནཾ ཨུཔནིསྶཡཾ ཨདྡས. བྲཱཧྨཎོཔི བཧིགཱམེ ནིབདྡྷཾ ཨགྒིཾ པརིཙརཏི. སཏྠཱ པཱཏོཝ པཏྟཙཱིཝརམཱདཱཡ ཏཾ ཋཱནཾ ཨགམཱསི. བྲཱཧྨཎོ སཏྠུ རཱུཔསིརིཾ ཨོལོཀེནྟོ ‘‘ཨིམསྨིཾ ལོཀེ ཨིམིནཱ སདིསོ པུརིསོ ནཱམ ནཏྠི, ཨཡཾ མཡ྄ཧཾ དྷཱིཏུ ཨནུཙྪཝིཀོ, ཨིམསྶ མེ དྷཱིཏརཾ དསྶཱམཱ’’ཏི ཙིནྟེཏྭཱ སཏྠཱརཾ ཨཱཧ – ‘‘སམཎ, མམ ཨེཀཱ དྷཱིཏཱ ཨཏྠི, ཨཧཾ ཏསྶཱ ཨནུཙྪཝིཀཾ པུརིསཾ ཨཔསྶནྟོ ཏཾ ན ཀསྶཙི ཨདཱསིཾ, ཏྭཾ པནསྶཱ ཨནུཙྪཝིཀོ, ཨཧཾ ཏེ དྷཱིཏརཾ པཱདཔརིཙཱརིཀཾ ཀཏྭཱ དཱཏུཀཱམོ, ཡཱཝ ནཾ ཨཱནེམི, ཏཱཝ ཨིདྷེཝ ཏིཊྛཱཧཱི’’ཏི. སཏྠཱ ཏསྶ ཀཐཾ སུཏྭཱ ནེཝ ཨབྷིནནྡི, ན པཊིཀྐོསི.

བྲཱཧྨཎོཔི གེཧཾ གནྟྭཱ བྲཱཧྨཎིཾ ཨཱཧ – ‘‘བྷོཏི, ཨཛྫ མེ དྷཱིཏུ ཨནུཙྪཝིཀོ པུརིསོ དིཊྛོ, ཏསྶ ནཾ དསྶཱམཱ’’ཏི དྷཱིཏརཾ ཨལངྐཱརཱཔེཏྭཱ ཨཱདཱཡ བྲཱཧྨཎིཡཱ སདྡྷིཾ ཏཾ ཋཱནཾ ཨགམཱསི. མཧཱཛནོཔི ཀུཏཱུཧལཛཱཏོ ནིཀྑམི. སཏྠཱ བྲཱཧྨཎེན ཝུཏྟཊྛཱནེ ཨཊྛཏྭཱ ཏཏྠ པདཙེཏིཡཾ དསྶེཏྭཱ ཨཉྙསྨིཾ ཋཱནེ ཨཊྛཱསི. བུདྡྷཱནཾ ཀིར པདཙེཏིཡཾ ‘‘ཨིདཾ ཨསུཀོ ནཱམ པསྶཏཱུ’’ཏི ཨདྷིཊྛཧིཏྭཱ ཨཀྐནྟཊྛཱནེཡེཝ པཉྙཱཡཏི, སེསཊྛཱནེ ཏཾ པསྶནྟོ ནཱམ ནཏྠི. བྲཱཧྨཎོ ཨཏྟནཱ སདྡྷིཾ གཙྪམཱནཱཡ བྲཱཧྨཎིཡཱ ‘‘ཀཧཾ སོ’’ཏི པུཊྛོ ‘‘ཨིམསྨིཾ ཋཱནེ ཏིཊྛཱཧཱིཏི ཏཾ ཨཝཙ’’ནྟི ཨོལོཀེནྟོ པདཝལཉྫཾ དིསྭཱ ‘‘ཨིདམསྶ པད’’ནྟི དསྶེསི. སཱ ལཀྑཎམནྟཀུསལཏཱཡ ‘‘ན ཨིདཾ, བྲཱཧྨཎ, ཀཱམབྷོགིནོ པད’’ནྟི ཝཏྭཱ བྲཱཧྨཎེན, ‘‘བྷོཏི, ཏྭཾ ཨུདཀཔཱཏིམྷི སུསུམཱརཾ པསྶསི, མཡཱ སོ སམཎོ དིཊྛོ ‘དྷཱིཏརཾ ཏེ དསྶཱམཱི’ཏི ཝུཏྟོ, ཏེནཱཔི ཨདྷིཝཱསིཏ’’ནྟི ཝུཏྟེ, ‘‘བྲཱཧྨཎ, ཀིཉྩཱཔི ཏྭཾ ཨེཝཾ ཝདེསི, ཨིདཾ པན ནིཀྐིལེསསྶེཝ པད’’ནྟི ཝཏྭཱ ཨིམཾ གཱཐམཱཧ –

‘‘རཏྟསྶ ཧི ཨུཀྐུཊིཀཾ པདཾ བྷཝེ,

དུཊྛསྶ ཧོཏི སཧསཱནུཔཱིལི༹ཏཾ;

མཱུལ༹ྷསྶ ཧོཏི ཨཝཀཌྜྷིཏཾ པདཾ,

ཝིཝཊྚཙྪདསྶ ཨིདམཱིདིསཾ པད’’ནྟི. (ཝིསུདྡྷི. ༡.༤༥; ཨ. ནི. ཨཊྛ. ༡.༡.༢༦༠-༢༦༡; དྷ. པ. ཨཊྛ. ༡.སཱམཱཝཏཱིཝཏྠུ);

ཨཐ ནཾ བྲཱཧྨཎོ, ‘‘བྷོཏི, མཱ ཝིརཝི, ཏུཎྷཱིབྷཱུཏཱཝ ཨེཧཱི’’ཏི གཙྪནྟོ སཏྠཱརཾ དིསྭཱ ‘‘ཨཡཾ སོ པུརིསོ’’ཏི ཏསྶཱ དསྶེཏྭཱ སཏྠཱརཾ ཨུཔསངྐམིཏྭཱ, ‘‘སམཎ, དྷཱིཏརཾ ཏེ དསྶཱམཱི’’ཏི ཨཱཧ. སཏྠཱ ‘‘ན མེ ཏཝ དྷཱིཏཱཡ ཨཏྠོ’’ཏི ཨཝཏྭཱ, ‘‘བྲཱཧྨཎ, ཨེཀཾ ཏེ ཀཱརཎཾ ཀཐེསྶཱམི, སུཎིསྶསཱི’’ཏི ཝཏྭཱ ‘‘ཀཐེཧི, བྷོ སམཎ, སུཎིསྶཱམཱི’’ཏི ཝུཏྟེ ཨབྷིནིཀྑམནཏོ པཊྛཱཡ ཨཏཱིཏཾ ཨཱཧརིཏྭཱ དསྶེསི.

ཏཏྲཱཡཾ སངྑེཔཀཐཱ – མཧཱསཏྟོ རཛྫསིརིཾ པཧཱཡ ཀཎྚཀཾ ཨཱརུཡ྄ཧ ཚནྣསཧཱཡོ ཨབྷིནིཀྑམནྟོ ནགརདྭཱརེ ཋིཏེན མཱརེན ‘‘སིདྡྷཏྠ, ནིཝཏྟ, ཨིཏོ ཏེ སཏྟམེ དིཝསེ ཙཀྐརཏནཾ པཱཏུབྷཝིསྶཏཱི’’ཏི ཝུཏྟེ, ‘‘ཨཧམེཏཾ, མཱར, ཛཱནཱམི, ན མེ ཏེནཏྠོ’’ཏི ཨཱཧ. ཨཐ ཀིམཏྠཱཡ ནིཀྑམསཱིཏི? སབྦཉྙུཏཉྙཱཎཏྠཱཡཱཏི. ‘‘ཏེན ཧི སཙེ ཨཛྫཏོ པཊྛཱཡ ཀཱམཝིཏཀྐཱདཱིནཾ ཨེཀམྤི ཝིཏཀྐཾ ཝིཏཀྐེསྶསི, ཛཱནིསྶཱམི ཏེ ཀཏྟབྦ’’ནྟི ཨཱཧ. སོ ཏཏོ པཊྛཱཡ ཨོཏཱརཱཔེཀྑོ སཏྟ ཝསྶཱནི མཧཱསཏྟཾ ཨནུབནྡྷི.

སཏྠཱཔི ཚབྦསྶཱནི དུཀྐརཀཱརིཀཾ ཙརིཏྭཱ པཙྩཏྟཔུརིསཀཱརཾ ནིསྶཱཡ བོདྷིམཱུལེ སབྦཉྙུཏཉྙཱཎཾ པཊིཝིཛ྄ཛྷིཏྭཱ ཝིམུཏྟིསུཁཾ པཊིསཾཝེདཡམཱནོ པཉྩམསཏྟཱཧེ ཨཛཔཱལནིགྲོདྷམཱུལེ ནིསཱིདི. ཏསྨིཾ སམཡེ མཱརོ ‘‘ཨཧཾ ཨེཏྟཀཾ ཀཱལཾ ཨནུབནྡྷིཏྭཱ ཨོཏཱརཱཔེཀྑོཔི ཨིམསྶ ཀིཉྩི ཁལིཏཾ ནཱདྡསཾ, ཨཏིཀྐནྟོ ཨིདཱནི ཨེས མམ ཝིསཡ’’ནྟི དོམནསྶཔྤཏྟོ མཧཱམགྒེ ནིསཱིདི. ཨཐསྶ ཏཎྷཱ ཨརཏཱི རགཱཏི ཨིམཱ ཏིསྶོ དྷཱིཏརོ ‘‘པིཏཱ ནོ ན པཉྙཱཡཏི, ཀཧཾ ནུ ཁོ ཨེཏརཧཱི’’ཏི ཨོལོཀཡམཱནཱ ཏཾ ཏཐཱ ནིསིནྣཾ དིསྭཱ ཨུཔསངྐམིཏྭཱ ‘‘ཀསྨཱ, ཏཱཏ, དུཀྑཱི དུམྨནོསཱི’’ཏི པུཙྪིཾསུ. སོ ཏཱསཾ ཏམཏྠཾ ཨཱརོཙེསི. ཨཐ ནཾ ཏཱ ཨཱཧཾསུ – ‘‘ཏཱཏ, མཱ ཙིནྟཡི, མཡཾ ཏཾ ཨཏྟནོ ཝསེ ཀཏྭཱ ཨཱནེསྶཱམཱ’’ཏི. ‘‘ན སཀྐཱ ཨམྨཱ, ཨེས ཀེནཙི ཝསེ ཀཱཏུནྟི. ‘‘ཏཱཏ, མཡཾ ཨིཏྠིཡོ ནཱམ ཨིདཱནེཝ ནཾ རཱགཔཱསཱདཱིཧི བནྡྷིཏྭཱ ཨཱནེསྶཱམ, ཏུམྷེ མཱ ཙིནྟཡིཏྠཱ’’ཏི སཏྠཱརཾ ཨུཔསངྐམིཏྭཱ ‘‘པཱདེ ཏེ, སམཎ, པརིཙཱརེམཱ’’ཏི ཨཱཧཾསུ. སཏྠཱ ནེཝ ཏཱསཾ ཝཙནཾ མནསཱཀཱསི, ན ཨཀྑཱིནི ཨུམྨཱིལེཏྭཱ ཨོལོཀེསི.

པུན མཱརདྷཱིཏརོ ‘‘ཨུཙྩཱཝཙཱ ཁོ པུརིསཱནཾ ཨདྷིཔྤཱཡཱ, ཀེསཉྩི ཀུམཱརིཀཱསུ པེམཾ ཧོཏི, ཀེསཉྩི པཋམཝཡེ ཋིཏཱསུ, ཀེསཉྩི མཛ྄ཛྷིམཝཡེ ཋིཏཱསུ, ཀེསཉྩི པཙྪིམཝཡེ ཋིཏཱསུ, ནཱནཔྤཀཱརེཧི ཏཾ པལོབྷེསྶཱམཱ’’ཏི ཨེཀེཀཱ ཀུམཱརིཀཝཎྞཱདིཝསེན སཏཾ སཏཾ ཨཏྟབྷཱཝེ ཨབྷིནིམྨིནིཏྭཱ ཀུམཱརིཡོ, ཨཝིཛཱཏཱ, སཀིཾ ཝིཛཱཏཱ, དུཝིཛཱཏཱ, མཛ྄ཛྷིམིཏྠིཡོ, མཧལླཀིཏྠིཡོ ཙ ཧུཏྭཱ ཚཀྑཏྟུཾ བྷགཝནྟཾ ཨུཔསངྐམིཏྭཱ ‘‘པཱདེ ཏེ, སམཎ, པརིཙཱརེམཱ’’ཏི ཨཱཧཾསུ. ཏམྤི བྷགཝཱ ན མནསཱཀཱསི ཡཐཱ ཏཾ ཨནུཏྟརེ ཨུཔདྷིསངྑཡེ ཝིམུཏྟོཏི. ཨཐ སཏྠཱ ཨེཏྟཀེནཔི ཏཱ ཨནུགཙྪནྟིཡོ ‘‘ཨཔེཐ, ཀིཾ དིསྭཱ ཨེཝཾ ཝཱཡམཐ, ཨེཝརཱུཔཾ ནཱམ ཝཱིཏརཱགཱནཾ པུརཏོ ཀཱཏུཾ ན ཝཊྚཏི. ཏཐཱགཏསྶ པན རཱགཱདཡོ པཧཱིནཱ. ཀེན ཏཾ ཀཱརཎེན ཨཏྟནོ ཝསཾ ནེསྶཐཱ’’ཏི ཝཏྭཱ ཨིམཱ གཱཐཱ ཨབྷཱསི –

༡༧༩.

‘‘ཡསྶ ཛིཏཾ ནཱཝཛཱིཡཏི,

ཛིཏཾ ཡསྶ ནོཡཱཏི ཀོཙི ལོཀེ;

ཏཾ བུདྡྷམནནྟགོཙརཾ,

ཨཔདཾ ཀེན པདེན ནེསྶཐ.

༡༨༠.

‘‘ཡསྶ ཛཱལིནཱི ཝིསཏྟིཀཱ,

ཏཎྷཱ ནཏྠི ཀུཧིཉྩི ནེཏཝེ;

ཏཾ བུདྡྷམནནྟགོཙརཾ,

ཨཔདཾ ཀེན པདེན ནེསྶཐཱ’’ཏི.

ཏཏྠ ཡསྶ ཛིཏཾ ནཱཝཛཱིཡཏཱིཏི ཡསྶ སམྨཱསམྦུདྡྷསྶ ཏེན ཏེན མགྒེན ཛིཏཾ རཱགཱདིཀིལེསཛཱཏཾ པུན ཨསམུདཱཙརཎཏོ ནཱཝཛཱིཡཏི, དུཛྫིཏཾ ནཱམ ན ཧོཏི. ནོཡཱཏཱིཏི ན ཨུཡྻཱཏི, ཡསྶ ཛིཏཾ ཀིལེསཛཱཏཾ རཱགཱདཱིསུ ཀོཙི ཨེཀོ ཀིལེསོཔི ལོཀེ པཙྪཏོ ཝཏྟཱི ནཱམ ན ཧོཏི, ནཱནུབནྡྷཏཱིཏི ཨཏྠོ. ཨནནྟགོཙརནྟི ཨནནྟཱརམྨཎསྶ སབྦཉྙུཏཉྙཱཎསྶ ཝསེན ཨཔརིཡནྟ གོཙརཾ. ཀེན པདེནཱཏི ཡསྶ ཧི རཱགཔདཱདཱིསུ ཨེཀཔདམྤི ཨཏྠི, ཏཾ ཏུམྷེ ཏེན པདེན ནེསྶཐ. བུདྡྷསྶ པན ཨེཀཔདམྤི ནཏྠི, ཏཾ ཨཔདཾ བུདྡྷཾ ཏུམྷེ ཀེན པདེན ནེསྶཐ.

དུཏིཡགཱཐཱཡ ཏཎྷཱ ནཱམེསཱ སཾསིབྦིཏཔརིཡོནནྡྷནཊྛེན ཛཱལམསྶཱ ཨཏྠཱིཏིཔི ཛཱལཀཱརིཀཱཏིཔི ཛཱལཱུཔམཱཏིཔི ཛཱལིནཱི. རཱུཔཱདཱིསུ ཨཱརམྨཎེསུ ཝིསཏྟཏཱཡ ཝིསཏྟམནཏཱཡ ཝིསཱཧརཏཱཡ ཝིསཔུཔྥཏཱཡ ཝིསཕལཏཱཡ ཝིསཔརིབྷོགཏཱཡ ཝིསཏྟིཀཱ. སཱ ཨེཝརཱུཔཱ ཏཎྷཱ ཡསྶ ཀུཧིཉྩི བྷཝེ ནེཏུཾ ནཏྠི, ཏཾ ཏུམྷེ ཨཔདཾ བུདྡྷཾ ཀེན པདེན ནེསྶཐཱཏི ཨཏྠོ.

དེསནཱཝསཱནེ བཧཱུནཾ དེཝཏཱནཾ དྷམྨཱབྷིསམཡོ ཨཧོསི. མཱརདྷཱིཏརོཔི ཏཏྠེཝ ཨནྟརདྷཱཡིཾསུ.

སཏྠཱ ཨིམཾ དྷམྨདེསནཾ ཨཱཧརིཏྭཱ, ‘‘མཱགཎྜིཡ, ཨཧཾ པུབྦེ ཨིམཱ ཏིསྶོ མཱརདྷཱིཏརོ ཨདྡསཾ སེམྷཱདཱིཧི ཨཔལིབུདྡྷེན སུཝཎྞཀྑནྡྷསདིསེན ཨཏྟབྷཱཝེན སམནྣཱགཏཱ, ཏདཱཔི མེཐུནསྨིཾ ཚནྡོ ནཱཧོསིཡེཝ. ཏཝ དྷཱིཏུ སརཱིརཾ དྭཏྟིཾསཱཀཱརཀུཎཔཔརིཔཱུརཾ བཧིཝིཙིཏྟོ ཝིཡ ཨསུཙིགྷཊོ. སཙེ ཧི མམ པཱདོ ཨསུཙིམཀྑིཏོ བྷཝེཡྻ, ཨཡཉྩ ཨུམྨཱརཊྛཱནེ ཏིཊྛེཡྻ, ཏཐཱཔིསྶཱ སརཱིརེ ཨཧཾ པཱདེ ན ཕུསེཡྻ’’ནྟི ཝཏྭཱ ཨིམཾ གཱཐམཱཧ –

‘‘དིསྭཱན ཏཎྷཾ ཨརཏིཾ རགཉྩ,

ནཱཧོསི ཚནྡོ ཨཔི མེཐུནསྨིཾ;

ཀིམེཝིདཾ མུཏྟཀརཱིསཔུཎྞཾ,

པཱདཱཔི ནཾ སམྥུསིཏུཾ ན ཨིཙྪེ’’ཏི. (སུ. ནི. ༨༤༡; མཧཱནི. ༧༠);

དེསནཱཝསཱནེ ཨུབྷོཔི ཛཡམྤཏིཀཱ ཨནཱགཱམིཕལེ པཏིཊྛཧིཾསཱུཏི.

མཱརདྷཱིཏརཝཏྠུ པཋམཾ.

༢. དེཝོརོཧཎཝཏྠུ

ཡེ ཛྷཱནཔསུཏཱ དྷཱིརཱཏི ཨིམཾ དྷམྨདེསནཾ སཏྠཱ སངྐསྶནགརདྭཱརེ བཧཱུ དེཝམནུསྶེ ཨཱརབྦྷ ཀཐེསི. དེསནཱ པན རཱཛགཧེ སམུཊྛིཏཱ.

ཨེཀསྨིཉྷི སམཡེ རཱཛགཧསེཊྛི པརིསྶཡམོཙནཏྠཉྩེཝ པམཱདེན གལིཏཱནཾ ཨཱབྷརཎཱདཱིནཾ རཀྑཎཏྠཉྩ ཛཱལཀརཎྜཀཾ པརིཀྑིཔཱཔེཏྭཱ གངྒཱཡ ཨུདཀཀཱིལ༹ཾ ཀཱིལི༹. ཨཐེཀོ རཏྟཙནྡནརུཀྑོ གངྒཱཡ ཨུཔརིཏཱིརེ ཛཱཏོ གངྒོདཀེན དྷོཏམཱུལོ པཏིཏྭཱ ཏཏྠ ཏཏྠ པཱསཱཎེསུ སཾབྷཛྫམཱནོ ཝིཔྤཀིརི. ཏཏོ ཨེཀཱ གྷཊཔྤམཱཎཱ གྷཊིཀཱ པཱསཱཎེཧི གྷཾསིཡམཱནཱ ཨུདཀཨཱུམཱིཧི པོཐིཡམཱནཱ མཊྛཱ ཧུཏྭཱ ཨནུཔུབྦེན ཝུཡ྄ཧམཱནཱ སེཝཱལཔརིཡོནདྡྷཱ ཨཱགནྟྭཱ ཏསྶ ཛཱལེ ལགྒི. སེཊྛི ‘‘ཀིམེཏ’’ནྟི ཝཏྭཱ ‘‘རུཀྑགྷཊིཀཱ’’ཏི སུཏྭཱ ཏཾ ཨཱཧརཱཔེཏྭཱ ‘‘ཀིཾ ནཱམེཏ’’ནྟི ཨུཔདྷཱརཎཏྠཾ ཝཱསིཀཎྞེན ཏཙྪཱཔེསི. ཏཱཝདེཝ ཨལཏྟཀཝཎྞཾ རཏྟཙནྡནཾ པཉྙཱཡི. སེཊྛི པན ནེཝ སམྨཱདིཊྛི ན མིཙྪཱདིཊྛི, མཛ྄ཛྷཏྟདྷཱཏུཀོ. སོ ཙིནྟེསི – ‘‘མཡ྄ཧཾ གེཧེ རཏྟཙནྡནཾ བཧུ, ཀིཾ ནུ ཁོ ཨིམིནཱ ཀརིསྶཱམཱི’’ཏི. ཨཐསྶ ཨེཏདཧོསི – ‘‘ཨིམསྨིཾ ལོཀེ ‘མཡཾ ཨརཧནྟོ མཡཾ ཨརཧནྟོ’ཏི ཝཏྟཱརོ བཧཱུ, ཨཧཾ ཨེཀཾ ཨརཧནྟམྤི ན པསྶཱམི. གེཧེ བྷམཾ ཡོཛེཏྭཱ པཏྟཾ ལིཁཱཔེཏྭཱ སིཀྐཱཡ ཋཔེཏྭཱ ཝེལུ༹པརམྤརཱཡ སཊྛིཧཏྠམཏྟེ ཨཱཀཱསེ ཨོལམྦཱཔེཏྭཱ ‘སཙེ ཨརཧཱ ཨཏྠི, ཨིམཾ ཨཱཀཱསེནཱགནྟྭཱ གཎྷཱཏཱུ’ཏི ཝཀྑཱམི. ཡོ ཏཾ གཧེསྶཏི, ཏཾ སཔུཏྟདཱརོ སརཎཾ གམིསྶཱམཱི’’ཏི. སོ ཙིནྟིཏནིཡཱམེནེཝ པཏྟཾ ལིཁཱཔེཏྭཱ ཝེལུ༹པརམྤརཱཡ ཨུསྶཱཔེཏྭཱ ‘‘ཡོ ཨིམསྨིཾ ལོཀེ ཨརཧཱ, སོ ཨཱཀཱསེནཱགནྟྭཱ ཨིམཾ པཏྟཾ གཎྷཱཏཱུ’’ཏི ཨཱཧ.

ཚ སཏྠཱརོ ‘‘ཨམྷཱཀཾ ཨེས ཨནུཙྪཝིཀོ, ཨམྷཱཀམེཝ ནཾ དེཧཱི’’ཏི ཝདིཾསུ. སོ ‘‘ཨཱཀཱསེནཱགནྟྭཱ གཎྷཐཱ’’ཏི ཨཱཧ. ཨཐ ཚཊྛེ དིཝསེ ནིགཎྛོ ནཱཊཔུཏྟོ ཨནྟེཝཱསིཀེ པེསེསི – ‘‘གཙྪཐ, སེཊྛིཾ ཨེཝཾ ཝདེཐ – ‘ཨམྷཱཀཾ ཨཱཙརིཡསྶེཝ ཨནུཙྪཝིཀོཡཾ, མཱ ཨཔྤམཏྟཀསྶ ཀཱརཎཱ ཨཱཀཱསེནཱགམནཾ ཀརི, དེཧི ཀིར མེ ཏཾ པཏྟ’’’ནྟི. ཏེ གནྟྭཱ སེཊྛིཾ ཏཐཱ ཝདིཾསུ. སེཊྛི ‘‘ཨཱཀཱསེནཱགནྟྭཱ གཎྷིཏུཾ སམཏྠོཝ གཎྷཱཏཱུ’’ཏི ཨཱཧ. ནཱཊཔུཏྟོ སཡཾ གནྟུཀཱམོ ཨནྟེཝཱསིཀཱནཾ སཉྙཾ ཨདཱསི – ‘‘ཨཧཾ ཨེཀཾ ཧཏྠཉྩ པཱདཉྩ ཨུཀྑིཔིཏྭཱ ཨུཔྤཏིཏུཀཱམོ ཝིཡ བྷཝིསྶཱམི, ཏུམྷེ མཾ, ‘ཨཱཙརིཡ, ཀིཾ ཀརོཐ, དཱརུམཡཔཏྟསྶ ཀཱརཎཱ པཊིཙྪནྣཾ ཨརཧཏྟགུཎཾ མཧཱཛནསྶ མཱ དསྶཡིཏྠཱ’ཏི ཝཏྭཱ མཾ ཧཏྠེསུ ཙ པཱདེསུ ཙ གཧེཏྭཱ ཨཱཀཌྜྷནྟཱ བྷཱུམིཡཾ པཱཏེཡྻཱཐཱ’’ཏི. སོ ཏཏྠ གནྟྭཱ སེཊྛིཾ ཨཱཧ, ‘‘མཧཱསེཊྛི, མཡ྄ཧཾ ཨཡཾ པཏྟོ ཨནུཙྪཝིཀོ, ཨཉྙེསཾ ནཱནུཙྪཝིཀོ, མཱ ཏེ ཨཔྤམཏྟཀསྶ ཀཱརཎཱ མམ ཨཱཀཱསེ ཨུཔྤཏནཾ རུཙྩི, དེཧི མེ པཏྟ’’ནྟི. བྷནྟེ, ཨཱཀཱསེ ཨུཔྤཏིཏྭཱཝ གཎྷཐཱཏི. ཏཏོ ནཱཊཔུཏྟོ ‘‘ཏེན ཧི ཨཔེཐ ཨཔེཐཱ’’ཏི ཨནྟེཝཱསིཀེ ཨཔནེཏྭཱ ‘‘ཨཱཀཱསེ ཨུཔྤཏིསྶཱམཱི’’ཏི ཨེཀཾ ཧཏྠཉྩ པཱདཉྩ ཨུཀྑིཔི. ཨཐ ནཾ ཨནྟེཝཱསིཀཱ, ‘‘ཨཱཙརིཡ, ཀིཾ ནཱམེཏཾ ཀརོཐ, ཚཝསྶ ལཱམཀསྶ དཱརུམཡཔཏྟསྶ ཀཱརཎཱ པཊིཙྪནྣགུཎེན མཧཱཛནསྶ དསྶིཏེན ཀོ ཨཏྠོ’’ཏི ཏཾ ཧཏྠཔཱདེསུ གཧེཏྭཱ ཨཱཀཌྜྷིཏྭཱ བྷཱུམིཡཾ པཱཏེསུཾ. སོ སེཊྛིཾ ཨཱཧ – ‘‘ཨིམེ, མཧཱསེཊྛི, ཨུཔྤཏིཏུཾ ན དེནྟི, དེཧི མེ པཏྟ’’ནྟི. ཨུཔྤཏིཏྭཱ གཎྷཐ, བྷནྟེཏི. ཨེཝཾ ཏིཏྠིཡཱ ཚ དིཝསཱནི ཝཱཡམིཏྭཱཔི ཏཾ པཏྟཾ ན ལབྷིཾསུཡེཝ.

སཏྟམེ དིཝསེ ཨཱཡསྨཏོ མཧཱམོགྒལླཱནསྶ ཙ ཨཱཡསྨཏོ པིཎྜོལབྷཱརདྭཱཛསྶ ཙ ‘‘རཱཛགཧེ པིཎྜཱཡ ཙརིསྶཱམཱ’’ཏི གནྟྭཱ ཨེཀསྨིཾ པིཊྛིཔཱསཱཎེ ཋཏྭཱ ཙཱིཝརཾ པཱརུཔནཀཱལེ དྷུཏྟཀཱ ཀཐཾ སམུཊྛཱཔེསུཾ ‘‘ཨམྦྷོ པུབྦེ ཚ སཏྠཱརོ ལོཀེ ‘མཡཾ ཨརཧནྟམྷཱ’ཏི ཝིཙརིཾསུ., རཱཛགཧསེཊྛིནོ པན ཨཛྫ སཏྟམོ དིཝསོ པཏྟཾ ཨུསྶཱཔེཏྭཱ ‘སཙེ ཨརཧཱ ཨཏྠི, ཨཱཀཱསེནཱགནྟྭཱ གཎྷཱཏཱུ’ཏི ཝདནྟསྶ, ཨེཀོཔི ‘ཨཧཾ ཨརཧཱ’ཏི ཨཱཀཱསེ ཨུཔྤཏནྟོ ནཏྠི. ཨཛྫ ནོ ལོཀེ ཨརཧནྟཱནཾ ནཏྠིབྷཱཝོ ཉཱཏོ’’ཏི. ཏཾ ཀཐཾ སུཏྭཱ ཨཱཡསྨཱ མཧཱམོགྒལླཱནོ ཨཱཡསྨནྟཾ པིཎྜོལབྷཱརདྭཱཛཾ ཨཱཧ – ‘‘སུཏཾ ཏེ, ཨཱཝུསོ བྷཱརདྭཱཛ, ཨིམེསཾ ཝཙནཾ, ཨིམེ བུདྡྷསྶ སཱསནཾ པརིགྒཎྷནྟཱ ཝིཡ ཝདནྟི. ཏྭཉྩ མཧིདྡྷིཀོ མཧཱནུབྷཱཝོ, གཙྪ ཏཾ པཏྟཾ ཨཱཀཱསེན གནྟྭཱ གཎྷཱཧཱི’’ཏི. ཨཱཝུསོ མཧཱམོགྒལླཱན, ཏྭཾ ཨིདྡྷིམནྟཱནཾ ཨགྒོ, ཏྭཾ ཨེཏཾ གཎྷཱཧི, ཏཡི པན ཨགྒཎྷནྟེ ཨཧཾ གཎྷིསྶཱམཱིཏི. ‘‘གཎྷཱཝུསོ’’ཏི ཝུཏྟེ ཨཱཡསྨཱ པིཎྜོལབྷཱརདྭཱཛོ ཨབྷིཉྙཱཔཱདཀཾ ཙཏུཏྠཛ྄ཛྷཱནཾ སམཱཔཛྫིཏྭཱ ཨུཊྛཱཡ ཏིགཱཝུཏཾ པིཊྛིཔཱསཱཎཾ པཱདནྟེན པཊིཙྪཱདེནྟོ ཏུལཔིཙུ ཝིཡ ཨཱཀཱསེ ཨུཊྛཱཔེཏྭཱ རཱཛགཧནགརསྶ ཨུཔརི སཏྟཀྑཏྟུཾ ཨནུཔརིཡཱཡི. སོ ཏིགཱཝུཏཔམཱཎསྶ ནགརསྶ པིདྷཱནཾ ཝིཡ པཉྙཱཡི. ནགརཝཱསིནོ ‘‘པཱསཱཎོ ནོ ཨཝཏྠརིཏྭཱ གཎྷཱཏཱི’’ཏི བྷཱིཏཱ སུཔྤཱདཱིནི མཏྠཀེ ཀཏྭཱ ཏཏྠ ཏཏྠ ནིལཱིཡིཾསུ. སཏྟམེ ཝཱརེ ཐེརོ པིཊྛིཔཱསཱཎཾ བྷིནྡིཏྭཱ ཨཏྟཱནཾ དསྶེསི. མཧཱཛནོ ཐེརཾ དིསྭཱ, ‘‘བྷནྟེ པིཎྜོལབྷཱརདྭཱཛ, ཏཝ པཱསཱཎཾ དལ༹ྷཾ ཀཏྭཱ གཎྷ, མཱ ནོ སབྦེ ནཱསཡཱི’’ཏི. ཐེརོ པཱསཱཎཾ པཱདནྟེན ཁིཔིཏྭཱ ཝིསྶཛྫེསི. སོ གནྟྭཱ ཡཐཱཋཱནེཡེཝ པཏིཊྛཱསི. ཐེརོ སེཊྛིསྶ གེཧམཏྠཀེ ཨཊྛཱསི. ཏཾ དིསྭཱ སེཊྛི ཨུརེན ནིཔཛྫིཏྭཱ ‘‘ཨོཏརཐ སཱམཱི’’ཏི ཝཏྭཱ ཨཱཀཱསཏོ ཨོཏིཎྞཾ ཐེརཾ ནིསཱིདཱཔེཏྭཱ པཏྟཾ ཨོཏཱརཱཔེཏྭཱ ཙཏུམདྷུརཔུཎྞཾ ཀཏྭཱ ཐེརསྶ ཨདཱསི. ཐེརོ པཏྟཾ གཧེཏྭཱ ཝིཧཱརཱབྷིམུཁོ པཱཡཱསི. ཨཐསྶ ཡེ ཨརཉྙགཏཱ ཝཱ སུཉྙཱགཱརགཏཱ ཝཱ ཏཾ པཱཊིཧཱརིཡཾ ནཱདྡསཾསུ. ཏེ སནྣིཔཏིཏྭཱ, ‘‘བྷནྟེ, ཨམྷཱཀམྤི པཱཊིཧཱརིཡཾ དསྶེཧཱི’’ཏི ཐེརཾ ཨནུབནྡྷིཾསུ. སོ ཏེསཾ ཏེསཾ པཱཊིཧཱརིཡཾ དསྶེཏྭཱ ཝིཧཱརཾ ཨགམཱསི.

སཏྠཱ ཏཾ ཨནུབནྡྷིཏྭཱ ཨུནྣཱདེནྟསྶ མཧཱཛནསྶ སདྡཾ སུཏྭཱ, ‘‘ཨཱནནྡ, ཀསྶེསོ སདྡོ’’ཏི པུཙྪིཏྭཱ, ‘‘བྷནྟེ, པིཎྜོལབྷཱརདྭཱཛེན ཨཱཀཱསེ ཨུཔྤཏིཏྭཱ ཙནྡནཔཏྟོ གཧིཏོ, ཏསྶ སནྟིཀེ ཨེསོ སདྡོ’’ཏི སུཏྭཱ བྷཱརདྭཱཛཾ པཀྐོསཱཔེཏྭཱ ‘‘སཙྩཾ ཀིར ཏཡཱ ཨེཝཾ ཀཏ’’ནྟི པུཙྪིཏྭཱ ‘‘སཙྩཾ, བྷནྟེ’’ཏི ཝུཏྟེ, ‘‘ཀསྨཱ ཏེ, བྷཱརདྭཱཛ, ཨེཝཾ ཀཏ’’ནྟི ཐེརཾ གརཧིཏྭཱ ཏཾ པཏྟཾ ཁཎྜཱཁཎྜཾ བྷེདཱཔེཏྭཱ བྷིཀྑཱུནཾ ཨཉྫནཔིསནཏྠཱཡ དཱཔེཏྭཱ པཱཊིཧཱརིཡསྶ ཨཀརཎཏྠཱཡ སཱཝཀཱནཾ སིཀྑཱཔདཾ (ཙཱུལ༹ཝ. ༢༥༢) པཉྙཱཔེསི.

ཏིཏྠིཡཱ ‘‘སམཎོ ཀིར གོཏམོ ཏཾ པཏྟཾ བྷེདཱཔེཏྭཱ པཱཊིཧཱརིཡསྶ ཨཀརཎཏྠཱཡ སཱཝཀཱནཾ སིཀྑཱཔདཾ པཉྙཱཔེསཱི’’ཏི སུཏྭཱ ‘‘སམཎསྶ གོཏམསྶ སཱཝཀཱ པཉྙཏྟཾ སིཀྑཱཔདཾ ཛཱིཝིཏཧེཏུཔི ནཱཏིཀྐམནྟི, སམཎོཔི གོཏམོ ཏཾ རཀྑིསྶཏེཝ. ཨིདཱནི ཨམྷེཧི ཨོཀཱསོ ལདྡྷོ’’ཏི ནགརཝཱིཐཱིསུ ཨཱརོཙེནྟཱ ཝིཙརིཾསུ ‘‘མཡཾ ཨཏྟནོ གུཎཾ རཀྑནྟཱ པུབྦེ དཱརུམཡཔཏྟསྶ ཀཱརཎཱ ཨཏྟནོ གུཎཾ མཧཱཛནསྶ ན དསྶཡིམྷཱ, སམཎསྶ གོཏམསྶ སཱཝཀཱ པཏྟཀམཏྟསྶ ཀཱརཎཱ ཨཏྟནོ གུཎཾ མཧཱཛནསྶ དསྶེསུཾ. སམཎོ གོཏམོ ཨཏྟནོ པཎྜིཏཏཱཡ པཏྟཾ བྷེདཱཔེཏྭཱ སིཀྑཱཔདཾ པཉྙཱཔེསི, ཨིདཱནི མཡཾ ཏེནེཝ སདྡྷིཾ པཱཊིཧཱརིཡཾ ཀརིསྶཱམཱ’’ཏི.

རཱཛཱ བིམྦིསཱརོ ཏཾ ཀཐཾ སུཏྭཱ སཏྠུ སནྟིཀཾ གནྟྭཱ ‘‘ཏུམྷེཧི ཀིར, བྷནྟེ, པཱཊིཧཱརིཡསྶ ཨཀརཎཏྠཱཡ སཱཝཀཱནཾ སིཀྑཱཔདཾ པཉྙཏྟ’’ནྟི? ‘‘ཨཱམ, མཧཱརཱཛཱ’’ཏི. ཨིདཱནི ཏིཏྠིཡཱ ‘‘ཏུམྷེཧི སདྡྷིཾ པཱཊིཧཱརིཡཾ ཀརིསྶཱམཱ’’ཏི ཝདནྟི, ཀིཾ ཨིདཱནི ཀརིསྶཐཱཏི? ‘‘ཏེསུ ཀརོནྟེསུ ཀརིསྶཱམི, མཧཱརཱཛཱ’’ཏི. ནནུ ཏུམྷེཧི སིཀྑཱཔདཾ པཉྙཏྟནྟི. ནཱཧཾ, མཧཱརཱཛ, ཨཏྟནོ སིཀྑཱཔདཾ པཉྙཱཔེསིཾ, ཏཾ མམེཝ སཱཝཀཱནཾ པཉྙཏྟནྟི. ཏུམྷེ ཋཔེཏྭཱ ཨཉྙཏྠ སིཀྑཱཔདཾ པཉྙཏྟཾ ནཱམ ཧོཏི, བྷནྟེཏི. ཏེན ཧི, མཧཱརཱཛ, ཏམེཝེཏྠ པཊིཔུཙྪཱམི, ‘‘ཨཏྠི པན ཏེ, མཧཱརཱཛ, ཝིཛིཏེ ཨུཡྻཱན’’ནྟི. ‘‘ཨཏྠི, བྷནྟེ’’ཏི. ‘‘སཙེ ཏེ, མཧཱརཱཛ, ཨུཡྻཱནེ མཧཱཛནོ ཨམྦཱདཱིནི ཁཱདེཡྻ, ཀིམསྶ ཀཏྟབྦ’’ནྟི? ‘‘དཎྜོ, བྷནྟེ’’ཏི. ‘‘ཏྭཾ པན ཁཱདིཏུཾ ལབྷསཱི’’ཏི? ‘‘ཨཱམ, བྷནྟེ, མཡ྄ཧཾ དཎྜོ ནཏྠི, ཨཧཾ ཨཏྟནོ སནྟཀཾ ཁཱདིཏུཾ ལབྷཱམཱི’’ཏི. ‘‘མཧཱརཱཛ, ཡཐཱ ཏཝ ཏིཡོཛནསཏིཀེ རཛྫེ ཨཱཎཱ པཝཏྟཏི, ཨཏྟནོ ཨུཡྻཱནེ ཨམྦཱདཱིནི ཁཱདནྟསྶ དཎྜོ ནཏྠི, ཨཉྙེསཾ ཨཏྠི, ཨེཝཾ མམཔི ཙཀྐཝཱལ༹ཀོཊིསཏསཧསྶེ ཨཱཎཱ པཝཏྟཏི, ཨཏྟནོ སིཀྑཱཔདཔཉྙཏྟིཡཱ ཨཏིཀྐམོ ནཱམ ནཏྠི, ཨཉྙེསཾ པན ཨཏྠི, ཀརིསྶཱམཧཾ པཱཊིཧཱརིཡ’’ནྟི. ཏིཏྠིཡཱ ཏཾ ཀཐཾ སུཏྭཱ ‘‘ཨིདཱནམྷཱ ནཊྛཱ, སམཎེན ཀིར གོཏམེན སཱཝཀཱནཾཡེཝ སིཀྑཱཔདཾ པཉྙཏྟཾ, ན ཨཏྟནོ. སཡམེཝ ཀིར པཱཊིཧཱརིཡཾ ཀཏྟུཀཱམོ, ཀིཾ ནུ ཁོ ཀརོམཱ’’ཏི མནྟཡིཾསུ.

རཱཛཱ སཏྠཱརཾ པུཙྪི – ‘‘བྷནྟེ, ཀདཱ པཱཊིཧཱརིཡཾ ཀརིསྶཐཱ’’ཏི. ‘‘ཨིཏོ ཙཏུམཱསཙྩཡེན ཨཱསཱལ༹ྷིཔུཎྞམཱཡཾ, མཧཱརཱཛཱ’’ཏི. ‘‘ཀཏྠ ཀརིསྶཐ, བྷནྟེ’’ཏི? ‘‘སཱཝཏྠིཾ ནིསྶཱཡ, མཧཱརཱཛཱ’’ཏི. ‘‘ཀསྨཱ པན སཏྠཱ ཨེཝཾ དཱུརཊྛཱནཾ ཨཔདིསཱི’’ཏི? ‘‘ཡསྨཱ ཏཾ སབྦབུདྡྷཱནཾ མཧཱཔཱཊིཧཱརིཡཀརཎཊྛཱནཾ, ཨཔིཙ མཧཱཛནསྶ སནྣིཔཱཏནཏྠཱཡཔི དཱུརཊྛཱནམེཝ ཨཔདིསཱི’’ཏི. ཏིཏྠིཡཱ ཏཾ ཀཐཾ སུཏྭཱ ‘‘ཨིཏོ ཀིར ཙཏུནྣཾ མཱསཱནཾ ཨཙྩཡེན སམཎོ གོཏམོ སཱཝཏྠིཡཾ པཱཊིཧཱརིཡཾ ཀརིསྶཏི, ཨིདཱནི ཏཾ ཨམུཉྩིཏྭཱཝ ཨནུབནྡྷིསྶཱམ, མཧཱཛནོ ཨམྷེ དིསྭཱ ‘ཀིཾ ཨིད’ནྟི པུཙྪིསྶཏི. ཨཐསྶ ཝཀྑཱམ ‘མཡཾ སམཎེན གོཏམེན སདྡྷིཾ པཱཊིཧཱརིཡཾ ཀརིསྶཱམཱ’ཏི ཝདིམྷཱ. སོ པལཱཡཏི, མཡམསྶ པལཱཡིཏུཾ ཨདཏྭཱ ཨནུབནྡྷཱམཱ’’ཏི. སཏྠཱ རཱཛགཧེ པིཎྜཱཡ ཙརིཏྭཱ ནིཀྑམི. ཏིཏྠིཡཱཔིསྶ པཙྪཏོཝ ནིཀྑམིཏྭཱ བྷཏྟཀིཙྩཊྛཱནེ ཝསནྟི. ཝསིཏཊྛཱནེ པུནདིཝསེ པཱཏརཱསཾ ཀརོནྟི. ཏེ མནུསྶེཧི ‘‘ཀིམིད’’ནྟི པུཙྪིཏཱ ཧེཊྛཱ ཙིནྟིཏནིཡཱམེནེཝ ཨཱརོཙེསུཾ. མཧཱཛནོཔི ‘‘པཱཊིཧཱརིཡཾ པསྶིསྶཱམཱ’’ཏི ཨནུབནྡྷི.

སཏྠཱ ཨནུཔུབྦེན སཱཝཏྠིཾ པཱཔུཎི. ཏིཏྠིཡཱཔི ཏེན སདྡྷིཾཡེཝ གནྟྭཱ ཨུཔཊྛཱཀེ སམཱདཔེཏྭཱ སཏསཧསྶཾ ལབྷིཏྭཱ ཁདིརཐམྦྷེཧི མཎྜཔཾ ཀཱརེཏྭཱ ནཱིལུཔྤལེཧི ཚཱདཱཔེཏྭཱ ‘‘ཨིདྷ པཱཊིཧཱརིཡཾ ཀརིསྶཱམཱ’’ཏི ནིསཱིདིཾསུ. རཱཛཱ པསེནདི ཀོསལོ སཏྠཱརཾ ཨུཔསངྐམིཏྭཱ, ‘‘བྷནྟེ, ཏིཏྠིཡེཧི མཎྜཔོ ཀཱརིཏོ, ཨཧམྤི ཏུམྷཱཀཾ མཎྜཔཾ ཀརིསྶཱམཱི’’ཏི. ‘‘ཨལཾ, མཧཱརཱཛ, ཨཏྠི མཡ྄ཧཾ མཎྜཔཀཱརཀོ’’ཏི. ‘‘བྷནྟེ, མཾ ཋཔེཏྭཱ ཀོ ཨཉྙོ ཀཱཏུཾ སཀྑིསྶཏཱི’’ཏི? ‘‘སཀྐོ, དེཝརཱཛཱ’’ཏི. ‘‘ཀཧཾ པན, བྷནྟེ, པཱཊིཧཱརིཡཾ ཀརིསྶཐཱ’’ཏི? ‘‘ཀཎྜམྦརུཀྑམཱུལེ, མཧཱརཱཛཱ’’ཏི. ཏིཏྠིཡཱ ‘‘ཨམྦརུཀྑམཱུལེ ཀིར པཱཊིཧཱརིཡཾ ཀརིསྶཏཱི’’ཏི སུཏྭཱ ཨཏྟནོ ཨུཔཊྛཱཀཱནཾ ཨཱརོཙེཏྭཱ ཡོཛནབྦྷནྟརེ ཋཱནེ ཨནྟམསོ ཏདཧུཛཱཏམྤི ཨམྦཔོཏཀཾ ཨུཔྤཱཊེཏྭཱ ཨརཉྙེ ཁིཔཱཔེསུཾ.

སཏྠཱ ཨཱསཱལ༹ྷིཔུཎྞམདིཝསེ ཨནྟོནགརཾ པཱཝིསི. རཉྙོཔི ཨུཡྻཱནཔཱལོ ཀཎྜོ ནཱམ ཨེཀཾ པིངྒལཀིཔིལླིཀེཧི ཀཏཔཏྟཔུཊསྶ ཨནྟརེ མཧནྟཾ ཨམྦཔཀྐཾ དིསྭཱ ཏསྶ གནྡྷརསལོབྷེན སམྤཏནྟེ ཝཱཡསེ པལཱཔེཏྭཱ རཉྙོ ཁཱདནཏྠཱཡ ཨཱདཱཡ གཙྪནྟོ ཨནྟརཱམགྒེ སཏྠཱརཾ དིསྭཱ ཙིནྟེསི – ‘‘རཱཛཱ ཨིམཾ ཨམྦཾ ཁཱདིཏྭཱ མཡ྄ཧཾ ཨཊྛ ཝཱ སོལ༹ས ཝཱ ཀཧཱཔཎེ དདེཡྻ, ཏཾ མེ ཨེཀཏྟབྷཱཝེཔི ཛཱིཝིཏཝུཏྟིཡཱ ནཱལཾ. སཙེ པནཱཧཾ སཏྠུ ཨིམཾ དསྶཱམི, ཨཝསྶཾ ཏཾ མེ དཱིགྷཀཱལཾ ཧིཏཱཝཧཾ བྷཝིསྶཏཱི’’ཏི. སོ ཏཾ ཨམྦཔཀྐཾ སཏྠུ ཨུཔནཱམེསི. སཏྠཱ ཨཱནནྡཏྠེརཾ ཨོལོཀེསི. ཨཐསྶ ཐེརོ ཙཏུམཧཱརཱཛདཏྟིཡཾ པཏྟཾ ནཱིཧརིཏྭཱ ཧཏྠེ ཋཔེསི. སཏྠཱ པཏྟཾ ཨུཔནཱམེཏྭཱ ཨམྦཔཀྐཾ པཊིགྒཧེཏྭཱ ཏཏྠེཝ ནིསཱིདནཱཀཱརཾ དསྶེསི. ཐེརོ ཙཱིཝརཾ པཉྙཱཔེཏྭཱ ཨདཱསི. ཨཐསྶ ཏསྨིཾ ནིསིནྣེ ཐེརོ པཱནཱིཡཾ པརིསྶཱཝེཏྭཱ ཨམྦཔཀྐཾ མདྡིཏྭཱ པཱནཀཾ ཀཏྭཱ ཨདཱསི. སཏྠཱ ཨམྦཔཱནཀཾ པིཝིཏྭཱ ཀཎྜཾ ཨཱཧ – ‘‘ཨིམཾ ཨམྦཊྛིཾ ཨིདྷེཝ པཾསུཾ ཝིཡཱུཧིཏྭཱ རོཔེཧཱི’’ཏི. སོ ཏཐཱ ཨཀཱསི. སཏྠཱ ཏསྶ ཨུཔརི ཧཏྠཾ དྷོཝི. ཧཏྠེ དྷོཝིཏམཏྟེཡེཝ ནངྒལསཱིསམཏྟཀྑནྡྷོ ཧུཏྭཱ ཨུབྦེདྷེན པཎྞཱསཧཏྠོ ཨམྦརུཀྑོ ཨུཊྛཧི. ཙཏཱུསུ དིསཱསུ ཨེཀེཀཱ, ཨུདྡྷཾ ཨེཀཱཏི པཉྩ མཧཱསཱཁཱ པཎྞཱསཧཏྠཱ ཨཧེསུཾ. སོ ཏཱཝདེཝ པུཔྥཕལསཉྪནྣོ ཧུཏྭཱ ཨེཀེཀསྨིཾ ཋཱནེ པརིཔཀྐཨམྦཔིཎྜིདྷརོ ཨཧོསི. པཙྪཏོ ཨཱགཙྪནྟཱ བྷིཀྑཱུ ཨམྦཔཀྐཱནི ཁཱདནྟཱ ཨེཝ ཨཱགམིཾསུ. རཱཛཱ ‘‘ཨེཝརཱུཔོ ཀིར ཨམྦརུཀྑོ ཨུཊྛིཏོ’’ཏི སུཏྭཱ ‘‘མཱ ནཾ ཀོཙི ཚིནྡཱི’’ཏི ཨཱརཀྑཾ ཋཔེསི. སོ པན ཀཎྜེན རོཔིཏཏྟཱ ཀཎྜམྦརུཀྑོཏྭེཝ པཉྙཱཡི. དྷུཏྟཀཱཔི ཨམྦཔཀྐཱནི ཁཱདིཏྭཱ ‘‘ཧརེ དུཊྛཏིཏྠིཡཱ ‘སམཎོ ཀིར གོཏམོ ཀཎྜམྦརུཀྑམཱུལེ པཱཊིཧཱརིཡཾ ཀརིསྶཏཱི’ཏི ཏུམྷེཧི ཡོཛནབྦྷནྟརེ ཏདཧུཛཱཏཱཔི ཨམྦཔོཏཀཱ ཨུཔྤཱཊཱཔིཏཱ, ཀཎྜམྦོ ནཱམ ཨཡ’’ནྟི ཝཏྭཱ ཏེ ཨུཙྪིཊྛཨམྦཊྛཱིཧི པཧརིཾསུ.

སཀྐོ ཝཱཏཝལཱཧཀཾ དེཝཔུཏྟཾ ཨཱཎཱཔེསི ‘‘ཏིཏྠིཡཱནཾ མཎྜཔཾ ཝཱཏེཧི ཨུཔྤཱཊེཏྭཱ ཨུཀྐཱརབྷཱུམིཡཾ ཁིཔཱཔེཧཱི’’ཏི. སོ ཏཐཱ ཨཀཱསི. སཱུརིཡམྤི དེཝཔུཏྟཾ ཨཱཎཱཔེསི ‘‘སཱུརིཡམཎྜལཾ ནིཀཌྜྷནྟོ ཏཱཔེཧཱི’’ཏི. སོ ཏཐཱ ཨཀཱསི. པུན ཝཱཏཝལཱཧཀཾ ཨཱཎཱཔེསི ‘‘ཝཱཏམཎྜལཾ ཨུཊྛཱཔེནྟོ ཡཱཧཱི’’ཏི. སོ ཏཐཱ ཀརོནྟོ ཏིཏྠིཡཱནཾ པགྒྷརིཏསེདསརཱིརེ རཛོཝཊྚིཡཱ ཨོཀིརི. ཏེ ཏམྦམཏྟིཀསདིསཱ ཨཧེསུཾ. ཝསྶཝལཱཧཀམྤི ཨཱཎཱཔེསི ‘‘མཧནྟཱནི བིནྡཱུནི པཱཏེཧཱི’’ཏི. སོ ཏཐཱ ཨཀཱསི. ཨཐ ནེསཾ ཀཱཡོ ཀབརགཱཝིསདིསོ ཨཧོསི. ཏེ ནིགཎྛཱ ལཛྫམཱནཱ ཧུཏྭཱ སམྨུཁསམྨུཁཊྛཱནེནེཝ པལཱཡིཾསུ. ཨེཝཾ པལཱཡནྟེསུ པུརཱཎཀསྶཔསྶ ཨུཔཊྛཱཀོ ཨེཀོ ཀསྶཀོ ‘‘ཨིདཱནི མེ ཨཡྻཱནཾ པཱཊིཧཱརིཡཀརཎཝེལཱ, གནྟྭཱ པཱཊིཧཱརིཡཾ པསྶིསྶཱམཱི’’ཏི གོཎེ ཝིསྶཛྫེཏྭཱ པཱཏོཝ ཨཱབྷཏཾ ཡཱགུཀུཊཉྩེཝ ཡོཏྟཀཉྩ གཧེཏྭཱ ཨཱགཙྪནྟོ པུརཱཎཾ ཏཐཱ པལཱཡནྟཾ དིསྭཱ, བྷནྟེ, ཨཛྫ ‘ཨཡྻཱནཾ པཱཊིཧཱརིཡཾ པསྶིསྶཱམཱི’ཏི ཨཱགཙྪཱམི, ཏུམྷེ ཀཧཾ གཙྪཐཱ’’ཏི. ཀིཾ ཏེ པཱཊིཧཱརིཡེན, ཨིམཾ ཀུཊཉྩ ཡོཏྟཉྩ དེཧཱིཏི. སོ ཏེན དིནྣཾ ཀུཊཉྩ ཡོཏྟཉྩ ཨཱདཱཡ ནདཱིཏཱིརཾ གནྟྭཱ ཀུཊཾ ཡོཏྟེན ཨཏྟནོ གཱིཝཱཡ བནྡྷིཏྭཱ ལཛྫནྟོ ཀིཉྩི ཨཀཐེཏྭཱ རཧདེ པཏིཏྭཱ ཨུདཀཔུབྦུལེ༹ ཨུཊྛཱཔེནྟོ ཀཱལཾ ཀཏྭཱ ཨཝཱིཙིམྷི ནིབྦཏྟི.

སཀྐོ ཨཱཀཱསེ རཏནཙངྐམཾ མཱཔེསི. ཏསྶ ཨེཀཱ ཀོཊི པཱཙཱིནཙཀྐཝཱལ༹མུཁཝཊྚིཡཾ ཨཧོསི, ཨེཀཱ པཙྪིམཙཀྐཝཱལ༹མུཁཝཊྚིཡཾ. སཏྠཱ སནྣིཔཏིཏཱཡ ཚཏྟིཾསཡོཛནིཀཱཡ པརིསཱཡ ཝཌྜྷམཱནཀཙྪཱཡཱཡ ‘‘ཨིདཱནི པཱཊིཧཱརིཡཀརཎཝེལཱ’’ཏི གནྡྷཀུཊིཏོ ནིཀྑམིཏྭཱ པམུཁེ ཨཊྛཱསི. ཨཐ ནཾ གྷརཎཱི ནཱམ ཨིདྡྷིམནྟཱི ཨེཀཱ ཨནཱགཱམིཨུཔཱསིཀཱ ཨུཔསངྐམིཏྭཱ, ‘‘བྷནྟེ, མཱདིསཱཡ དྷཱིཏརི ཝིཛྫམཱནཱཡ ཏུམྷཱཀཾ ཀིལམནཀིཙྩཾ ནཏྠི, ཨཧཾ པཱཊིཧཱརིཡཾ ཀརིསྶཱམཱི’’ཏི ཨཱཧ. ‘‘ཀཐཾ ཏྭཾ ཀརིསྶསི, གྷརཎཱི’’ཏི? ‘‘བྷནྟེ, ཨེཀསྨིཾ ཙཀྐཝཱལ༹གབྦྷེ མཧཱཔཐཝིཾ ཨུདཀཾ ཀཏྭཱ ཨུདཀསཀུཎིཀཱ ཝིཡ ནིམུཛྫིཏྭཱ པཱཙཱིནཙཀྐཝཱལ༹མུཁཝཊྚིཡཾ ཨཏྟཱནཾ དསྶེསྶཱམི, ཏཐཱ པཙྪིམཨུཏྟརདཀྑིཎཙཀྐཝཱལ༹མུཁཝཊྚིཡཾ, ཏཐཱ མཛ྄ཛྷེ’’. མཧཱཛནོ མཾ དིསྭཱ ‘‘ཀཱ ཨེསཱ’’ཏི ཝུཏྟེ ཝཀྑཏི ‘‘གྷརཎཱི ནཱམེསཱ, ཨཡཾ ཏཱཝ ཨེཀིསྶཱ ཨིཏྠིཡཱ ཨཱནུབྷཱཝོ, བུདྡྷཱནུབྷཱཝོ པན ཀཱིདིསོ བྷཝིསྶཏཱི’’ཏི. ཨེཝཾ ཏིཏྠིཡཱ ཏུམྷེ ཨདིསྭཱཝ པལཱཡིསྶནྟཱིཏི. ཨཐ ནཾ སཏྠཱ ‘‘ཛཱནཱམི ཏེ གྷརཎཱི ཨེཝརཱུཔཾ པཱཊིཧཱརིཡཾ ཀཱཏུཾ སམཏྠབྷཱཝཾ, ན པནཱཡཾ ཏཝཏྠཱཡ བདྡྷོ མཱལཱཔུཊོ’’ཏི ཝཏྭཱ པཊིཀྑིཔི. སཱ ‘‘ན མེ སཏྠཱ ཨནུཛཱནཱཏི, ཨདྡྷཱ མཡཱ ཨུཏྟརིཏརཾ པཱཊིཧཱརིཡཾ ཀཱཏུཾ སམཏྠོ ཨཉྙོ ཨཏྠཱི’’ཏི ཨེཀམནྟཾ ཨཊྛཱསི. སཏྠཱཔི ‘‘ཨེཝམེཝ ཏེསཾ གུཎོ པཱཀཊོ བྷཝིསྶཏཱིཏི ཨེཝཾ ཚཏྟིཾསཡོཛནིཀཱཡ པརིསཱཡ མཛ྄ཛྷེ སཱིཧནཱདཾ ནདིསྶཏཱི’’ཏི མཉྙམཱནོ ཨཔརེཔི པུཙྪི – ‘‘ཏུམྷེ ཀཐཾ པཱཊིཧཱརིཡཾ ཀརིསྶཐཱ’’ཏི. ཏེ ‘‘ཨེཝཉྩ ཨེཝཉྩ ཀརིསྶཱམ, བྷནྟེ’’ཏི སཏྠུ པུརཏོ ཋིཏཱཝ སཱིཧནཱདཾ ནདིཾསུ. ཏེསུ ཀིར ཙཱུལ༹ཨནཱཐཔིཎྜིཀོ ‘‘མཱདིསེ ཨནཱགཱམིཨུཔཱསཀེ པུཏྟེ ཝིཛྫམཱནེ སཏྠུ ཀིལམནཀིཙྩཾ ནཏྠཱི’’ཏི ཙིནྟེཏྭཱ ‘‘ཨཧཾ, བྷནྟེ, པཱཊིཧཱརིཡཾ ཀརིསྶཱམཱི’’ཏི ཝཏྭཱ ‘‘ཀཐཾ ཀརིསྶསཱི’’ཏི པུཊྛོ ‘‘ཨཧཾ, བྷནྟེ, དྭཱདསཡོཛནིཀཾ བྲཧྨཏྟབྷཱཝཾ ནིམྨིནིཏྭཱ ཨིམིསྶཱ པརིསཱཡ མཛ྄ཛྷེ མཧཱམེགྷགཛྫིཏསདིསེན སདྡེན བྲཧྨཨཔྥོཊནཾ ནཱམ ཨཔྥོཊེསྶཱམཱི’’ཏི. མཧཱཛནོ ‘‘ཀིཾ ནཱམེསོ སདྡོ’’ཏི པུཙྪིཏྭཱ ‘‘ཙཱུལ༹ཨནཱཐཔིཎྜིཀསྶ ཀིར བྲཧྨཨཔྥོཊནསདྡོ ནཱམཱ’’ཏི ཝཀྑཏི. ཏིཏྠིཡཱ ‘‘གཧཔཏིཀསྶ ཀིར ཏཱཝ ཨེསོ ཨཱནུབྷཱཝོ, བུདྡྷཱནུབྷཱཝོ ཀཱིདིསོ བྷཝིསྶཏཱི’’ཏི ཏུམྷེ ཨདིསྭཱཝ པལཱཡིསྶནྟཱིཏི. སཏྠཱ ‘‘ཛཱནཱམི ཏེ ཨཱནུབྷཱཝ’’ནྟི ཏསྶཔི ཏཐེཝ ཝཏྭཱ པཱཊིཧཱརིཡཀརཎཾ ནཱནུཛཱནི.

ཨཐེཀཱ པཊིསམྦྷིདཔྤཏྟཱ སཏྟཝསྶིཀཱ ཙཱིརསཱམཎེརཱི ཀིར ནཱམ སཏྠཱརཾ ཝནྡིཏྭཱ ‘‘ཨཧཾ, བྷནྟེ, པཱཊིཧཱརིཡཾ ཀརིསྶཱམཱི’’ཏི ཨཱཧ. ‘‘ཀཐཾ ཀརིསྶསི ཙཱིརེ’’ཏི? ‘‘བྷནྟེ, སིནེརུཉྩ ཙཀྐཝཱལ༹པབྦཏཉྩ ཧིམཝནྟཉྩ ཨཱཧརིཏྭཱ ཨིམསྨིཾ ཋཱནེ པཊིཔཱཊིཡཱ ཋཔེཏྭཱ ཨཧཾ ཧཾསསཀུཎཱི ཝིཡ ཏཏོ ཏཏོ ནིཀྑམིཏྭཱ ཨསཛྫམཱནཱ གམིསྶཱམི, མཧཱཛནོ མཾ དིསྭཱ ‘ཀཱ ཨེསཱ’ཏི པུཙྪིཏྭཱ ‘ཙཱིརསཱམཎེརཱི’ཏི ཝཀྑཏི. ཏིཏྠིཡཱ ‘སཏྟཝསྶིཀཱཡ ཏཱཝ སཱམཎེརིཡཱ ཨཡམཱནུབྷཱཝོ, བུདྡྷཱནུབྷཱཝོ ཀཱིདིསོ བྷཝིསྶཏཱི’ཏི ཏུམྷེ ཨདིསྭཱཝ པལཱཡིསྶནྟཱི’’ཏི. ཨིཏོ པརཾ ཨེཝརཱུཔཱནི ཝཙནཱནི ཝུཏྟཱནུསཱརེནེཝ ཝེདིཏབྦཱནི. ཏསྶཱཔི བྷགཝཱ ‘‘ཛཱནཱམི ཏེ ཨཱནུབྷཱཝ’’ནྟི ཝཏྭཱ པཱཊིཧཱརིཡཀརཎཾ ནཱནུཛཱནི. ཨཐེཀོ པཊིསམྦྷིདཔྤཏྟོ ཁཱིཎཱསཝོ ཙུནྡསཱམཎེརོ ནཱམ ཛཱཏིཡཱ སཏྟཝསྶིཀོ སཏྠཱརཾ ཝནྡིཏྭཱ ‘‘ཨཧཾ བྷགཝཱ པཱཊིཧཱརིཡཾ ཀརིསྶཱམཱི’’ཏི ཝཏྭཱ ‘‘ཀཐཾ ཀརིསྶསཱི’’ཏི པུཊྛོ ཨཱཧ – ‘‘ཨཧཾ, བྷནྟེ, ཛམྦུདཱིཔསྶ དྷཛབྷཱུཏཾ མཧཱཛམྦུརུཀྑཾ ཁནྡྷེ གཧེཏྭཱ ཙཱལེཏྭཱ མཧཱཛམྦུཔེསིཡོ ཨཱཧརིཏྭཱ ཨིམཾ པརིསཾ ཁཱདཱཔེསྶཱམི, པཱརིཙྪཏྟཀཀུསུམཱནི ཙ ཨཱཧརིཏྭཱ ཏུམྷེ ཝནྡིསྶཱམཱི’’ཏི. སཏྠཱ ‘‘ཛཱནཱམི ཏེ ཨཱནུབྷཱཝ’’ནྟི ཏསྶ པཱཊིཧཱརིཡཀརཎཾ པཊིཀྑིཔི.

ཨཐ ཨུཔྤལཝཎྞཱ ཐེརཱི སཏྠཱརཾ ཝནྡིཏྭཱ ‘‘ཨཧཾ, བྷནྟེ, པཱཊིཧཱརིཡཾ ཀརིསྶཱམཱི’’ཏི ཝཏྭཱ ‘‘ཀཐཾ ཀརིསྶསཱི’’ཏི པུཊྛཱ ཨཱཧ – ‘‘ཨཧཾ, བྷནྟེ, སམནྟཱ དྭཱདསཡོཛནིཀཾ པརིསཾ དསྶེཏྭཱ ཨཱཝཊྚཏོ ཚཏྟིཾསཡོཛནཱཡ པརིསཱཡ པརིཝུཏོ ཙཀྐཝཏྟིརཱཛཱ ཧུཏྭཱ ཨཱགནྟྭཱ ཏུམྷེ ཝནྡིསྶཱམཱི’’ཏི. སཏྠཱ ‘‘ཛཱནཱམི ཏེ ཨཱནུབྷཱཝ’’ནྟི ཏསྶཱཔི པཱཊིཧཱརིཡཀརཎཾ པཊིཀྑིཔི. ཨཐ མཧཱམོགྒལླཱནཏྠེརོ བྷགཝནྟཾ ཝནྡིཏྭཱ ‘‘ཨཧཾ, བྷནྟེ, པཱཊིཧཱརིཡཾ ཀརིསྶཱམཱི’’ཏི ཝཏྭཱ ‘‘ཀཐཾ ཀརིསྶསཱི’’ཏི པུཊྛོ ཨཱཧ – ‘‘ཨཧཾ, བྷནྟེ, སིནེརུཔབྦཏརཱཛཱནཾ དནྟནྟརེ ཋཔེཏྭཱ མཱསསཱསཔབཱིཛཾ ཝིཡ ཁཱདིསྶཱམཱི’’ཏི. ‘‘ཨཉྙཾ ཀིཾ ཀརིསྶསཱི’’ཏི? ‘‘ཨིམཾ མཧཱཔཐཝིཾ ཀཊསཱརཀཾ ཝིཡ སཾཝེལླིཏྭཱ ཨངྒུལནྟརེ ནིཀྑིཔིསྶཱམཱི’’ཏི. ‘‘ཨཉྙཾ ཀིཾ ཀརིསྶསཱི’’ཏི? ‘‘མཧཱཔཐཝིཾ ཀུལཱལཙཀྐཾ ཝིཡ པརིཝཏྟེཏྭཱ མཧཱཛནཾ པཐཝོཛཾ ཁཱདཱཔེསྶཱམཱི’’ཏི. ‘‘ཨཉྙཾ ཀིཾ ཀརིསྶསཱི’’ཏི? ‘‘ཝཱམཧཏྠེ པཐཝིཾ ཀཏྭཱ ཨིམེ སཏྟེ དཀྑིཎཧཏྠེན ཨཉྙསྨིཾ དཱིཔེ ཋཔེསྶཱམཱི’’ཏི. ‘‘ཨཉྙཾ ཀིཾ ཀརིསྶསཱི’’ཏི? ‘‘སིནེརུཾ ཚཏྟདཎྜཾ ཝིཡ ཀཏྭཱ མཧཱཔཐཝིཾ ཨུཀྑིཔིཏྭཱ ཏསྶུཔརི ཋཔེཏྭཱ ཚཏྟཧཏྠོ བྷིཀྑུ ཝིཡ ཨེཀཧཏྠེནཱདཱཡ ཨཱཀཱསེ ཙངྐམིསྶཱམཱི’’ཏི. སཏྠཱ ‘‘ཛཱནཱམི ཏེ ཨཱནུབྷཱཝ’’ནྟི ཏསྶཔི པཱཊིཧཱརིཡཀརཎཾ ནཱནུཛཱནི. སོ ‘‘ཛཱནཱཏི མཉྙེ སཏྠཱ མཡཱ ཨུཏྟརིཏརཾ པཱཊིཧཱརིཡཾ ཀཱཏུཾ སམཏྠ’’ནྟི ཨེཀམནྟཾ ཨཊྛཱསི.

ཨཐ ནཾ སཏྠཱ ‘‘ནཱཡཾ མོགྒལླཱནཾ ཏཝཏྠཱཡ བདྡྷོ བཱལཱཔུཊོ. ཨཧཉྷི ཨསམདྷུརོ, མམ དྷུརཾ ཨཉྙོ ཝཧིཏུཾ སམཏྠོ ནཱམ ནཏྠི. ཨནཙྪརིཡམེཏཾ, ཡཾ ཨིདཱནི མམ དྷུརཾ ཝཧིཏུཾ སམཏྠོ ནཱམ བྷཝེཡྻ. ཨཧེཏུཀཏིརཙྪཱནཡོནིཡཾ ནིབྦཏྟཀཱལེཔི མམ དྷུརཾ ཨཉྙོ ཝཧིཏུཾ སམཏྠོ ནཱམ ནཱཧོསིཡེཝཱ’’ཏི ཝཏྭཱ ‘‘ཀདཱ པན, བྷནྟེ’’ཏི ཐེརེན པུཊྛོ ཨཏཱིཏཾ ཨཱཧརིཏྭཱ –

‘‘ཡཏོ ཡཏོ གརུ དྷུརཾ, ཡཏོ གམྦྷཱིརཝཏྟནཱི;

ཏདཱསྶུ ཀཎྷཾ ཡུཉྫནྟི, སྭཱསྶུ ཏཾ ཝཧཏེ དྷུར’’ནྟི. –

ཨིདཾ ཀཎྷཨུསབྷཛཱཏཀཾ (ཛཱ. ༡.༡.༢༩) ཝིཏྠཱརེཏྭཱ པུན ཏམེཝ ཝཏྠུཾ ཝིསེསེཏྭཱ དསྶེནྟོ –

‘‘མནུཉྙམེཝ བྷཱསེཡྻ, ནཱམནུཉྙཾ ཀུདཱཙནཾ;

མནུཉྙཾ བྷཱསམཱནསྶ, གརུཾ བྷཱརཾ ཨུདདྡྷརི;

དྷནཉྩ ནཾ ཨལཱབྷེསི, ཏེན ཙཏྟམནོ ཨཧཱུ’’ཏི. –

ཨིདཾ ནནྡིཝིསཱལཛཱཏཀཾ ཝིཏྠཱརེཏྭཱ ཀཐེསི. ཀཐེཏྭཱ ཙ པན སཏྠཱ རཏནཙངྐམཾ ཨབྷིརུཧི, པུརཏོ དྭཱདསཡོཛནིཀཱ པརིསཱ ཨཧོསི ཏཐཱ པཙྪཏོ ཙ ཨུཏྟརཏོ ཙ དཀྑིཎཏོ ཙ. ཨུཛུཀཾ པན ཙཏུཝཱིསཏིཡོཛནིཀཱཡ པརིསཱཡ མཛ྄ཛྷེ བྷགཝཱ ཡམཀཔཱཊིཧཱརིཡཾ ཨཀཱསི.

ཏཾ པཱལི༹ཏོ ཏཱཝ ཨེཝཾ ཝེདིཏབྦཾ (པཊི. མ. ༡.༡༡༦) – ཀཏམཾ ཏཐཱགཏསྶ ཡམཀཔཱཊིཧཱརིཡེ ཉཱཎཾ? ཨིདྷཾ ཏཐཱགཏོ ཡམཀཔཱཊིཧཱརིཡཾ ཀརོཏི ཨསཱདྷཱརཎཾ སཱཝཀེཧི, ཨུཔརིམཀཱཡཏོ ཨགྒིཀྑནྡྷོ པཝཏྟཏི, ཧེཊྛིམཀཱཡཏོ ཨུདཀདྷཱརཱ པཝཏྟཏི. ཧེཊྛིམཀཱཡཏོ ཨགྒིཀྑནྡྷོ པཝཏྟཏི, ཨུཔརིམཀཱཡཏོ ཨུདཀདྷཱརཱ པཝཏྟཏི. པུརཏྠིམཀཱཡཏོ, པཙྪིམཀཱཡཏོ; པཙྪིམཀཱཡཏོ, པུརཏྠིམཀཱཡཏོ; དཀྑིཎཨཀྑིཏོ, ཝཱམཨཀྑིཏོ; ཝཱམཨཀྑིཏོ, དཀྑིཎཨཀྑིཏོ; དཀྑིཎཀཎྞསོཏཏོ, ཝཱམཀཎྞསོཏཏོ; ཝཱམཀཎྞསོཏཏོ, དཀྑིཎཀཎྞསོཏཏོ; དཀྑིཎནཱསིཀཱསོཏཏོ, ཝཱམནཱསིཀཱསོཏཏོ; ཝཱམནཱསིཀཱསོཏཏོ, དཀྑིཎནཱསིཀཱསོཏཏོ; དཀྑིཎཨཾསཀཱུཊཏོ, ཝཱམཨཾསཀཱུཊཏོ; ཝཱམཨཾསཀཱུཊཏོ, དཀྑིཎཨཾསཀཱུཊཏོ; དཀྑིཎཧཏྠཏོ, ཝཱམཧཏྠཏོ; ཝཱམཧཏྠཏོ, དཀྑིཎཧཏྠཏོ; དཀྑིཎཔསྶཏོ, ཝཱམཔསྶཏོ; ཝཱམཔསྶཏོ, དཀྑིཎཔསྶཏོ; དཀྑིཎཔཱདཏོ, ཝཱམཔཱདཏོ; ཝཱམཔཱདཏོ, དཀྑིཎཔཱདཏོ; ཨངྒུལངྒུལེཧི, ཨངྒུལནྟརིཀཱཧི; ཨངྒུལནྟརིཀཱཧི, ཨངྒུལངྒུལེཧི; ཨེཀེཀལོམཀཱུཔཏོ ཨགྒིཀྑནྡྷོ པཝཏྟཏི, ཨེཀེཀལོམཏོ ཨུདཀདྷཱརཱ པཝཏྟཏི. ཨེཀེཀལོམཏོ ཨགྒིཀྑནྡྷོ པཝཏྟཏི, ཨེཀེཀལོམཀཱུཔཏོ ཨུདཀདྷཱརཱ པཝཏྟཏི ཚནྣཾ ཝཎྞཱནཾ ནཱིལཱནཾ པཱིཏཀཱནཾ ལོཧིཏཀཱནཾ ཨོདཱཏཱནཾ མཉྫེཊྛཱནཾ པབྷསྶརཱནཾ. བྷགཝཱ ཙངྐམཏི, བུདྡྷནིམྨིཏོ ཏིཊྛཏི ཝཱ ནིསཱིདཏི ཝཱ སེཡྻཾ ཝཱ ཀཔྤེཏི…པེ… ནིམྨིཏོ སེཡྻཾ ཀཔྤེཏི, བྷགཝཱ ཙངྐམཏི ཝཱ ཏིཊྛཏི ཝཱ ནིསཱིདཏི ཝཱ. ཨིདཾ ཏཐཱགཏསྶ ཡམཀཔཱཊིཧཱརིཡེ ཉཱཎནྟི.

ཨིདཾ པན པཱཊིཧཱརིཡཾ བྷགཝཱ ཏསྨིཾ ཙངྐམེ ཙངྐམིཏྭཱ ཨཀཱསི. ཏསྶ ཏེཛོཀསིཎསམཱཔཏྟིཝསེན ཨུཔརིམཀཱཡཏོ ཨགྒིཀྑནྡྷོ པཝཏྟཏི, ཨཱཔོཀསིཎསམཱཔཏྟིཝསེན ཧེཊྛིམཀཱཡཏོ ཨུདཀདྷཱརཱ པཝཏྟཏི. ན པན ཨུདཀདྷཱརཱཡ པཝཏྟནཊྛཱནཏོ ཨགྒིཀྑནྡྷོ པཝཏྟཏི, ཨགྒིཀྑནྡྷསྶ པཝཏྟནཊྛཱནཏོ ཨུདཀདྷཱརཱ པཝཏྟཏཱིཏི དསྶེཏུཾ ‘‘ཧེཊྛིམཀཱཡཏོ ཨུཔརིམཀཱཡཏོ’’ཏི ཝུཏྟཾ. ཨེསེཝ ནཡོ སབྦཔདེསུ. ཨགྒིཀྑནྡྷོ པནེཏྠ ཨུདཀདྷཱརཱཡ ཨསམྨིསྶོ ཨཧོསི, ཏཐཱ ཨུདཀདྷཱརཱ ཨགྒིཀྑནྡྷེན. ཨུབྷཡམྤི ཀིར ཙེཏཾ ཡཱཝ བྲཧྨལོཀཱ ཨུགྒནྟྭཱ ཙཀྐཝཱལ༹མུཁཝཊྚིཡཾ པཏཏི. ‘‘ཚནྣཾ ཝཎྞཱན’’ནྟི ཝུཏྟཱ པནསྶ ཚབྦཎྞརཾསིཡོ གྷཊེཧི ཨཱསིཉྩམཱནཾ ཝིལཱིནསུཝཎྞཾ ཝིཡ ཡནྟནཱལིཀཏོ ནིཀྑནྟསུཝཎྞརསདྷཱརཱ ཝིཡ ཙ ཨེཀཙཀྐཝཱལ༹གབྦྷཏོ ཨུགྒནྟྭཱ བྲཧྨལོཀཾ ཨཱཧཙྩ པཊིནིཝཏྟིཏྭཱ ཙཀྐཝཱལ༹མུཁཝཊྚིམེཝ གཎྷིཾསུ. ཨེཀཙཀྐཝཱལ༹གབྦྷཾ ཝངྐགོཔཱནསིཀཾ ཝིཡ བོདྷིགྷརཾ ཨཧོསི ཨེཀཱལོཀཾ.

ཏཾདིཝསཾ སཏྠཱ ཙངྐམིཏྭཱ པཱཊིཧཱརིཡཾ ཀརོནྟོ ཨནྟརནྟརཱ མཧཱཛནསྶ དྷམྨཾ ཀཐེསི. ཀཐེནྟོ ཙ ཛནཾ ནིརསྶཱསཾ ཨཀཏྭཱ ཏསྶ ཨསྶཱསཝཱརཾ དེཏི. ཏསྨིཾ ཁཎེ མཧཱཛནོ སཱདྷུཀཱརཾ པཝཏྟེསི. ཏསྶ སཱདྷུཀཱརཔཝཏྟནཀཱལེ སཏྠཱ ཏཱཝམཧཏིཡཱ པརིསཱཡ ཙིཏྟཾ ཨོལོཀེནྟོ ཨེཀེཀསྶ སོལ༹སནྣཾ ཨཱཀཱརཱནཾ ཝསེན ཙིཏྟཱཙཱརཾ ཨཉྙཱསི. ཨེཝཾ ལཧུཀཔརིཝཏྟཾ བུདྡྷཱནཾ ཙིཏྟཾ. ཡོ ཡོ ཡསྨིཉྩ དྷམྨེ ཡསྨིཉྩ པཱཊིཧཱིརེ པསནྣོ, ཏསྶ ཏསྶ ཨཛ྄ཛྷཱསཡཝསེནེཝ དྷམྨཉྩ ཀཐེསི, པཱཊིཧཱིརཉྩ ཨཀཱསི. ཨེཝཾ དྷམྨེ དེསིཡམཱནེ པཱཊིཧཱིརེ ཙ ཀརིཡམཱནེ མཧཱཛནསྶ དྷམྨཱབྷིསམཡོ ཨཧོསི. སཏྠཱ པན ཏསྨིཾ སམཱགམེ ཨཏྟནོ མནཾ གཧེཏྭཱ ཨཉྙཾ པཉྷཾ པུཙྪིཏུཾ སམཏྠཾ ཨདིསྭཱ ནིམྨིཏབུདྡྷཾ མཱཔེསི. ཏེན པུཙྪིཏཾ པཉྷཾ སཏྠཱ ཝིསྶཛྫེསི, སཏྠཱརཱ པུཙྪིཏཾ སོ ཝིསྶཛྫེསི. བྷགཝཏོ ཙངྐམནཀཱལེ ནིམྨིཏོ ཋཱནཱདཱིསུ ཨཉྙཏརཾ ཀཔྤེསི, ནིམྨིཏསྶ ཙངྐམནཀཱལེ བྷགཝཱ ཋཱནཱདཱིསུ ཨཉྙཏརཾ ཀཔྤེསི. ཏམཏྠཾ དསྶེཏུཾ ‘‘ནིམྨིཏོ ཙངྐམཏི ཝཱ’’ཏིཨཱདི ཝུཏྟཾ. ཨེཝཾ ཀརོནྟསྶ སཏྠུ པཱཊིཧཱརིཡཾ དིསྭཱ དྷམྨཀཐཾ སུཏྭཱ ཏསྨིཾ སམཱགམེ ཝཱིསཏིཡཱ པཱཎཀོཊཱིནཾ དྷམྨཱབྷིསམཡོ ཨཧོསི.

སཏྠཱ པཱཊིཧཱིརཾ ཀརོནྟོཝ ‘‘ཀཏྠ ནུ ཁོ ཨཏཱིཏབུདྡྷཱ ཨིདཾ པཱཊིཧཱིརཾ ཀཏྭཱ ཝསྶཾ ཨུཔེནྟཱི’’ཏི ཨཱཝཛྫེཏྭཱ ‘‘ཏཱཝཏིཾསབྷཝནེ ཝསྶཾ ཨུཔགནྟྭཱ མཱཏུ ཨབྷིདྷམྨཔིཊཀཾ དེསེནྟཱི’’ཏི དིསྭཱ དཀྑིཎཔཱདཾ ཨུཀྑིཔིཏྭཱ ཡུགནྡྷརམཏྠཀེ ཋཔེཏྭཱ ཨིཏརཾ པཱདཾ ཨུཀྑིཔིཏྭཱ སིནེརུམཏྠཀེ ཋཔེསི. ཨེཝཾ ཨཊྛསཊྛིཡོཛནསཏསཧསྶཊྛཱནེ ཏཡོ པདཝཱརཱ ཨཧེསུཾ, དྭེ པཱདཚིདྡཱནི. སཏྠཱ པཱདཾ པསཱརེཏྭཱ ཨཀྐམཱིཏི ན སལླཀྑེཏབྦཾ. ཏསྶ ཧི པཱདུཀྑིཔནཀཱལེཡེཝ པབྦཏཱ པཱདམཱུལཾ ཨཱགནྟྭཱ སམྤཊིཙྪིཾསུ, སཏྠཱརཱ ཨཀྐམནཀཱལེ ཏེ པབྦཏཱ ཨུཊྛཱཡ སཀཊྛཱནེཡེཝ ཨཊྛཾསུ. སཀྐོ སཏྠཱརཾ དིསྭཱ ཙིནྟེསི – ‘‘པཎྜུཀམྦལསིལཱཡ མཉྙེ སཏྠཱ ཨིམཾ ཝསྶཱཝཱསཾ ཨུཔེསྶཏི, བཧཱུནཉྩ དེཝཏཱནཾ ཨུཔཀཱརོ བྷཝིསྶཏི, སཏྠརི པནེཏྠ ཝསྶཱཝཱསཾ ཨུཔགཏེ ཨཉྙཱ དེཝཏཱ ཧཏྠམྤི ཋཔེཏུཾ ན སཀྑིསྶནྟི. ཨཡཾ ཁོ པན པཎྜུཀམྦལསིལཱ དཱིགྷཏོ སཊྛིཡོཛནཱ, ཝིཏྠཱརཏོ པཎྞཱསཡོཛནཱ, པུཐུལཏོ པནྣརསཡོཛནཱ, སཏྠརི ནིསིནྣེཔི ཏུཙྪཾ བྷཝིསྶཏཱི’’ཏི. སཏྠཱ ཏསྶ ཨཛ྄ཛྷཱསཡཾ ཝིདིཏྭཱ ཨཏྟནོ སངྒྷཱཊིཾ སིལཱསནཾ པཊིཙྪཱདཡམཱནཾ ཁིཔི. སཀྐོ ཙིནྟེསི – ‘‘ཙཱིཝརཾ ཏཱཝ པཊིཙྪཱདཡམཱནཾ ཁིཔི, སཡཾ པན པརིཏྟཀེ ཋཱནེ ནིསཱིདིསྶཏཱི’’ཏི. སཏྠཱ ཏསྶ ཨཛ྄ཛྷཱསཡཾ ཝིདིཏྭཱ ནཱིཙཔཱིཋཀཾ མཧཱཔཾསུཀཱུལིཀོ ཝིཡ པཎྜུཀམྦལསིལཾ ཨནྟོཙཱིཝརབྷོགེཡེཝ ཀཏྭཱ ནིསཱིདི. མཧཱཛནོཔི ཏཾཁཎཉྙེཝ སཏྠཱརཾ ཨོལོཀེནྟོ ནཱདྡས, ཙནྡསྶ ཨཏྠངྒམིཏཀཱལོ ཝིཡ སཱུརིཡསྶ ཙ ཨཏྠངྒམིཏཀཱལོ ཝིཡ ཨཧོསི. མཧཱཛནོ –

‘‘གཏོ ནུ ཙིཏྟཀཱུཊཾ ཝཱ, ཀེལཱསཾ ཝཱ ཡུགནྡྷརཾ;

ན ནོ དཀྑེམུ སམྦུདྡྷཾ, ལོཀཛེཊྛཾ ནརཱསབྷ’’ནྟི. –

ཨིམཾ གཱཐཾ ཝདནྟོ པརིདེཝི. ཨཔརེ ‘‘སཏྠཱ ནཱམ པཝིཝེཀརཏོ, སོ ‘ཨེཝརཱུཔཱཡ མེ པརིསཱཡ ཨེཝརཱུཔཾ པཱཊིཧཱིརཾ ཀཏ’ནྟི ལཛྫཱཡ ཨཉྙཾ རཊྛཾ ཝཱ ཛནཔདཾ ཝཱ གཏོ བྷཝིསྶཏི, ན དཱནི ཏཾ དཀྑིསྶཱམཱ’’ཏི པརིདེཝནྟཱ ཨིམཾ གཱཐམཱཧཾསུ –

‘‘པཝིཝེཀརཏོ དྷཱིརོ, ནིམཾ ལོཀཾ པུནེཧིཏི;

ན ནོ དཀྑེམུ སམྦུདྡྷཾ, ལོཀཛེཊྛཾ ནརཱསབྷ’’ནྟི.

ཏེ མཧཱམོགྒལླཱནཾ པུཙྪིཾསུ – ‘‘ཀཧཾ, བྷནྟེ, སཏྠཱ’’ཏི? སོ སཡཾ ཛཱནནྟོཔི ‘‘པརེསམྤི གུཎཱ པཱཀཊཱ ཧོནྟཱུ’’ཏི ཨཛ྄ཛྷཱསཡེན ‘‘ཨནུརུདྡྷཾ པུཙྪཐཱ’’ཏི ཨཱཧ. ཏེ ཐེརཾ ཏཐཱ པུཙྪིཾསུ – ‘‘ཀཧཾ, བྷནྟེ, སཏྠཱ’’ཏི? ཏཱཝཏིཾསབྷཝནེ པཎྜུཀམྦལསིལཱཡཾ ཝསྶཾ ཨུཔགནྟྭཱ མཱཏུ ཨབྷིདྷམྨཔིཊཀཾ དེསེཏུཾ གཏོཏི. ‘‘ཀདཱ ཨཱགམིསྶཏི, བྷནྟེ’’ཏི? ‘‘ཏཡོ མཱསེ ཨབྷིདྷམྨཔིཊཀཾ དེསེཏྭཱ མཧཱཔཝཱརཎདིཝསེ’’ཏི. ཏེ ‘‘སཏྠཱརཾ ཨདིསྭཱ ན གམིསྶཱམཱ’’ཏི ཏཏྠེཝ ཁནྡྷཱཝཱརཾ བནྡྷིཾསུ. ཨཱཀཱསམེཝ ཀིར ནེསཾ ཚདནཾ ཨཧོསི. ཏཱཡ ཙ མཧཏིཡཱ པརིསཱཡ སརཱིརནིགྷཾསོ ནཱམ ན པཉྙཱཡི, པཐཝཱི ཝིཝརཾ ཨདཱསི, སབྦཏྠ པརིསུདྡྷམེཝ བྷཱུམིཏལཾ ཨཧོསི.

སཏྠཱ པཋམམེཝ མོགྒལླཱནཏྠེརཾ ཨཝོཙ – ‘‘མོགྒལླཱན, ཏྭཾ ཨེཏིསྶཱཡ པརིསཱཡ དྷམྨཾ དེསེཡྻཱསི, ཙཱུལ༹ཨནཱཐཔིཎྜིཀོ ཨཱཧཱརཾ དསྶཏཱི’’ཏི. ཏསྨཱ ཏཾ ཏེམཱསཾ ཙཱུལ༹ཨནཱཐཔིཎྜིཀོཝ ཏསྶཱ པརིསཱཡ ཡཱཔནཾ ཡཱགུབྷཏྟཾ ཁཱདནཱིཡཾ ཏམྦུལཏེལགནྡྷམཱལཱཔིལནྡྷནཱནི ཙ ཨདཱསི. མཧཱམོགྒལླཱནོ དྷམྨཾ དེསེསི, པཱཊིཧཱརིཡདསྶནཏྠཾ ཨཱགཏཱགཏེཧི པུཊྛཔཉྷེ ཙ ཝིསྶཛྫེསི. སཏྠཱརམྤི མཱཏུ ཨབྷིདྷམྨདེསནཏྠཾ པཎྜུཀམྦལསིལཱཡཾ ཝསྶཾ ཨུཔགཏཾ དསསཧསྶཙཀྐཝཱལ༹དེཝཏཱ པརིཝཱརཡིཾསུ. ཏེན ཝུཏྟཾ –

‘‘ཏཱཝཏིཾསེ ཡདཱ བུདྡྷོ, སིལཱཡཾ པཎྜུཀམྦལེ;

པཱརིཙྪཏྟཀམཱུལམྷི, ཝིཧཱསི པུརིསུཏྟམོ.

‘‘དསསུ ལོཀདྷཱཏཱུསུ, སནྣིཔཏིཏྭཱན དེཝཏཱ;

པཡིརུཔཱསནྟི སམྦུདྡྷཾ, ཝསནྟཾ ནཱགམུདྡྷནི.

‘‘ན ཀོཙི དེཝོ ཝཎྞེན, སམྦུདྡྷསྶ ཝིརོཙཏི;

སབྦེ དེཝེ ཨཏིཀྐམྨ, སམྦུདྡྷོཝ ཝིརོཙཏཱི’’ཏི. (པེ. ཝ. ༣༡༧-༣༡༩);

ཨེཝཾ སབྦཱ དེཝཏཱ ཨཏྟནོ སརཱིརཔྤབྷཱཡ ཨབྷིབྷཝིཏྭཱ ནིསིནྣསྶ པནསྶ མཱཏཱ ཏུསིཏཝིམཱནཏོ ཨཱགནྟྭཱ དཀྑིཎཔསྶེ ནིསཱིདི. ཨིནྡཀོཔི དེཝཔུཏྟོ ཨཱགནྟྭཱ དཀྑིཎཔསྶེཡེཝ ནིསཱིདི, ཨངྐུརོ ཝཱམཔསྶེ ནིསཱིདི. སོ མཧེསཀྑཱསུ དེཝཏཱསུ སནྣིཔཏནྟཱིསུ ཨཔགནྟྭཱ དྭཱདསཡོཛནིཀེ ཋཱནེ ཨོཀཱསཾ ལབྷི, ཨིནྡཀོ ཏཏྠེཝ ནིསཱིདི. སཏྠཱ ཏེ ཨུབྷོཔི ཨོལོཀེཏྭཱ ཨཏྟནོ སཱསནེ དཀྑིཎེཡྻཔུགྒལཱནཾ དིནྣདཱནསྶ མཧཔྥལབྷཱཝཾ ཉཱཔེཏུཀཱམོ ཨེཝམཱཧ – ‘‘ཨངྐུར, ཏཡཱ དཱིགྷམནྟརེ དསཝསྶསཧསྶཔརིམཱཎཀཱལེ དྭཱདསཡོཛནིཀཾ ཨུདྡྷནཔནྟིཾ ཀཏྭཱ མཧཱདཱནཾ དིནྣཾ, ཨིདཱནི མམ སམཱགམཾ ཨཱགནྟྭཱ དྭཱདསཡོཛནིཀེ ཋཱནེ ཨོཀཱསཾ ལབྷི, ཀིཾ ནུ ཁོ ཨེཏྠ ཀཱརཎ’’ནྟི? ཝུཏྟམྤི ཙེཏཾ –

‘‘ཨོལོཀེཏྭཱན སམྦུདྡྷོ, ཨངྐུརཉྩཱཔི ཨིནྡཀཾ;

དཀྑིཎེཡྻཾ སམྦྷཱཝེནྟོ, ཨིདཾ ཝཙནམབྲཝི.

‘‘མཧཱདཱནཾ ཏཡཱ དིནྣཾ, ཨངྐུར དཱིགྷམནྟརེ;

ཨཏིདཱུརེ ནིསིནྣོསི, ཨཱགཙྪ མམ སནྟིཀེ’’ཏི. (པེ. ཝ. ༣༢༡-༣༢༢);

སོ སདྡྷོ པཐཝཱིཏལཾ པཱཔུཎི. སབྦཱཔི ནཾ སཱ པརིསཱ ཨསྶོསི. ཨེཝཾ ཝུཏྟེ –

‘‘ཙོདིཏོ བྷཱཝིཏཏྟེན, ཨངྐུརོ ཨེཏམབྲཝི;

ཀིཾ མཡ྄ཧཾ ཏེན དཱནེན, དཀྑིཎེཡྻེན སུཉྙཏཾ.

‘‘ཨཡཾ སོ ཨིནྡཀོ ཡཀྑོ, དཛྫཱ དཱནཾ པརིཏྟཀཾ;

ཨཏིརོཙཏི ཨམྷེཧི, ཙནྡོ ཏཱརཱགཎེ ཡཐཱ’’ཏི. (པེ. ཝ. ༣༢༣-༣༢༤);

ཏཏྠ དཛྫཱཏི དཏྭཱ. ཨེཝཾ ཝུཏྟེ སཏྠཱ ཨིནྡཀཾ ཨཱཧ – ‘‘ཨིནྡཀ, ཏྭཾ མམ དཀྑིཎཔསྶེ ནིསིནྣོ, ཀསྨཱ ཨནཔགནྟྭཱཝ ནིསཱིདསཱི’’ཏི? སོ ‘‘ཨཧཾ, བྷནྟེ, སུཁེཏྟེ ཨཔྤཀབཱིཛཾ ཝཔནཀསྶཀོ ཝིཡ དཀྑིཎེཡྻསམྤདཾ ཨལཏྠ’’ནྟི དཀྑིཎེཡྻཾ པབྷཱཝེནྟོ ཨཱཧ –

‘‘ཨུཛྫངྒལེ ཡཐཱ ཁེཏྟེ, བཱིཛཾ བཧུམྤི རོཔིཏཾ;

ན ཕལཾ ཝིཔུལཾ ཧོཏི, ནཔི ཏོསེཏི ཀསྶཀཾ.

‘‘ཏཐེཝ དཱནཾ བཧུཀཾ, དུསྶཱིལེསུ པཏིཊྛིཏཾ;

ན ཕལཾ ཝིཔུལཾ ཧོཏི, ནཔི ཏོསེཏི དཱཡཀཾ.

‘‘ཡཐཱཔི བྷདྡཀེ ཁེཏྟེ, བཱིཛཾ ཨཔྤམྤི རོཔིཏཾ;

སམྨཱ དྷཱརཾ པཝེཙྪནྟེ, ཕལཾ ཏོསེཏི ཀསྶཀཾ.

‘‘ཏཐེཝ སཱིལཝནྟེསུ, གུཎཝནྟེསུ ཏཱདིསུ;

ཨཔྤཀམྤི ཀཏཾ ཀཱརཾ, པུཉྙཾ ཧོཏི མཧཔྥལ’’ནྟི. (པེ. ཝ. ༣༢༥-༣༢༨);

ཀིཾ པནེཏསྶ པུབྦཀམྨནྟི? སོ ཀིར ཨནུརུདྡྷཏྠེརསྶ ཨནྟོགཱམཾ པིཎྜཱཡ པཝིཊྛསྶ ཨཏྟནོ ཨཱབྷཏཾ ཀཊཙྪུབྷིཀྑཾ དཱཔེསི. ཏདཱ ཏསྶ པུཉྙཾ ཨངྐུརེན དསཝསྶསཧསྶཱནི དྭཱདསཡོཛནིཀཾ ཨུདྡྷནཔནྟིཾ ཀཏྭཱ དིནྣདཱནཏོ མཧཔྥལཏརཾ ཛཱཏཾ. ཏསྨཱ ཨེཝམཱཧ.

ཨེཝཾ ཝུཏྟེ སཏྠཱ, ‘‘ཨངྐུར, དཱནཾ ནཱམ ཝིཙེཡྻ དཱཏུཾ ཝཊྚཏི, ཨེཝཾ ཏཾ སུཁེཏྟེསུ ཝུཏྟབཱིཛཾ ཝིཡ མཧཔྥལཾ ཧོཏི. ཏྭཾ པན ན ཏཐཱ ཨཀཱསི, ཏེན ཏེ དཱནཾ མཧཔྥལཾ ན ཛཱཏ’’ནྟི ཨིམམཏྠཾ ཝིབྷཱཝེནྟོ –

‘‘ཝིཙེཡྻ དཱནཾ དཱཏབྦཾ, ཡཏྠ དིནྣཾ མཧཔྥལཾ…པེ….

‘‘ཝིཙེཡྻ དཱནཾ སུགཏཔྤསཏྠཾ,

ཡེ དཀྑིཎེཡྻཱ ཨིདྷ ཛཱིཝལོཀེ;

ཨེཏེསུ དིནྣཱནི མཧཔྥལཱནི,

བཱིཛཱནི ཝུཏྟཱནི ཡཐཱ སུཁེཏྟེ’’ཏི. (པེ. ཝ. ༣༢༩-༣༣༠) –

ཝཏྭཱ ཨུཏྟརིམྤི དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ཏིཎདོསཱནི ཁེཏྟཱནི, རཱགདོསཱ ཨཡཾ པཛཱ;

ཏསྨཱ ཧི ཝཱིཏརཱགེསུ, དིནྣཾ ཧོཏི མཧཔྥལཾ.

‘‘ཏིཎདོསཱནི ཁེཏྟཱནི, དོསདོསཱ ཨཡཾ པཛཱ;

ཏསྨཱ ཧི ཝཱིཏདོསེསུ, དིནྣཾ ཧོཏི མཧཔྥལཾ.

‘‘ཏིཎདོསཱནི ཁེཏྟཱནི, མོཧདོསཱ ཨཡཾ པཛཱ;

ཏསྨཱ ཧི ཝཱིཏམོཧེསུ, དིནྣཾ ཧོཏི མཧཔྥལཾ.

‘‘ཏིཎདོསཱནི ཁེཏྟཱནི, ཨིཙྪཱདོསཱ ཨཡཾ པཛཱ;

ཏསྨཱ ཧི ཝིགཏིཙྪེསུ, དིནྣཾ ཧོཏི མཧཔྥལ’’ནྟི.

དེསནཱཝསཱནེ ཨངྐུརོ ཙ ཨིནྡཀོ ཙ སོཏཱཔཏྟིཕལེ པཏིཊྛཧིཾསུ, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཨཐ སཏྠཱ དེཝཔརིསཱཡ མཛ྄ཛྷེ ནིསིནྣོ མཱཏརཾ ཨཱརབྦྷ ‘‘ཀུསལཱ དྷམྨཱ, ཨཀུསལཱ དྷམྨཱ, ཨབྱཱཀཏཱ དྷམྨཱ’’ཏི ཨབྷིདྷམྨཔིཊཀཾ པཊྛཔེསི. ཨེཝཾ ཏཡོ མཱསེ ནིརནྟརཾ ཨབྷིདྷམྨཔིཊཀཾ ཀཐེསི. ཀཐེནྟོ པན བྷིཀྑཱཙཱརཝེལཱཡ ‘‘ཡཱཝ མམཱགམནཱ ཨེཏྟཀཾ ནཱམ དྷམྨཾ དེསེཏཱུ’’ཏི ནིམྨིཏབུདྡྷཾ མཱཔེཏྭཱ ཧིམཝནྟཾ གནྟྭཱ ནཱགལཏཱདནྟཀཊྛཾ ཁཱདིཏྭཱ ཨནོཏཏྟདཧེ མུཁཾ དྷོཝིཏྭཱ ཨུཏྟརཀུརུཏོ པིཎྜཔཱཏཾ ཨཱཧརིཏྭཱ མཧཱསཱལམཱལ༹ཀེ ནིསིནྣོ བྷཏྟཀིཙྩཾ ཨཀཱསི. སཱརིཔུཏྟཏྠེརོ ཏཏྠ གནྟྭཱ སཏྠུ ཝཏྟཾ ཀརོཏི. སཏྠཱ བྷཏྟཀིཙྩཔརིཡོསཱནེ, ‘‘སཱརིཔུཏྟ, ཨཛྫ མཡཱ ཨེཏྟཀོ ནཱམ དྷམྨོ བྷཱསིཏོ, ཏྭཾ ཨཏྟནོ ཨནྟེཝཱསིཀཱནཾ བྷིཀྑཱུནཾ ཝཱཙེཧཱི’’ཏི ཐེརསྶ ཀཐེསི. ཡམཀཔཱཊིཧཱིརེ ཀིར པསཱིདིཏྭཱ པཉྩསཏཱ ཀུལཔུཏྟཱ ཐེརསྶ སནྟིཀེ པབྦཛིཾསུ. ཏེ སནྡྷཱཡ ཐེརཾ ཨེཝམཱཧ. ཝཏྭཱ ཙ པན དེཝལོཀཾ གནྟྭཱ ནིམྨིཏབུདྡྷེན དེསིཏཊྛཱནཏོ པཊྛཱཡ སཡཾ དྷམྨཾ དེསེསི. ཐེརོཔི གནྟྭཱ ཏེསཾ བྷིཀྑཱུནཾ དྷམྨཾ དེསེསི. ཏེ སཏྠརི དེཝལོཀེ ཝིཧརནྟེཡེཝ སཏྟཔཀརཎིཀཱ ཨཧེསུཾ.

ཏེ ཀིར ཀསྶཔབུདྡྷཀཱལེ ཁུདྡཀཝགྒུལིཡོ ཧུཏྭཱ ཨེཀསྨིཾ པབྦྷཱརེ ཨོལམྦནྟཱ དྭིནྣཾ ཐེརཱནཾ ཙངྐམིཏྭཱ ཨབྷིདྷམྨཾ སཛ྄ཛྷཱཡནྟཱནཾ སདྡཾ སུཏྭཱ སརེ ནིམིཏྟཾ ཨགྒཧེསུཾ. ཏེ ‘‘ཨིམེ ཁནྡྷཱ ནཱམ, ཨིམཱ དྷཱཏུཡོ ནཱམཱ’’ཏི ཨཛཱནིཏྭཱ སརེ ནིམིཏྟགཧཎམཏྟེནེཝ ཏཏོ ཙུཏཱ དེཝལོཀེ ནིབྦཏྟཱ, ཨེཀཾ བུདྡྷནྟརཾ དིབྦསམྤཏྟིཾ ཨནུབྷཝིཏྭཱ ཏཏོ ཙཝིཏྭཱ སཱཝཏྠིཡཾ ཀུལགྷརེསུ ནིབྦཏྟཱ. ཡམཀཔཱཊིཧཱིརེ ཨུཔྤནྣཔསཱདཱ ཐེརསྶ སནྟིཀེ པབྦཛིཏྭཱ སབྦཔཋམཾ སཏྟཔཀརཎིཀཱ ཨཧེསུཾ. སཏྠཱཔི ཏེནེཝ ནཱིཧཱརེན ཏཾ ཏེམཱསཾ ཨབྷིདྷམྨཾ དེསེསི. དེསནཱཝསཱནེ ཨསཱིཏིཀོཊིསཧསྶཱནཾ དེཝཏཱནཾ དྷམྨཱབྷིསམཡོ ཨཧོསི, མཧཱམཱཡཱཔི སོཏཱཔཏྟིཕལེ པཏིཊྛཧི.

སཱཔི ཁོ ཚཏྟིཾསཡོཛནཔརིམཎྜལཱ པརིསཱ ‘‘ཨིདཱནི སཏྟམེ དིཝསེ མཧཱཔཝཱརཎཱ བྷཝིསྶཏཱི’’ཏི མཧཱམོགྒལླཱནཏྠེརཾ ཨུཔསངྐམིཏྭཱ ཨཱཧ – ‘‘བྷནྟེ སཏྠུ, ཨོརོཧཎདིཝསཾ སཉྙཱཏུཾ ཝཊྚཏི, ན ཧི མཡཾ སཏྠཱརཾ ཨདིསྭཱ གམིསྶཱམཱ’’ཏི. ཨཱཡསྨཱ མཧཱམོགྒལླཱནོ ཏཾ ཀཐཾ སུཏྭཱ ‘‘སཱདྷཱཝུསོ’’ཏི ཝཏྭཱ ཏཏྠེཝ པཐཝིཡཾ ནིམུགྒོ སིནེརུཔཱདཾ གནྟྭཱ ‘‘མཾ ཨབྷིརུཧནྟཾ པརིསཱ པསྶཏཱུ’’ཏི ཨདྷིཊྛཱཡ མཎིརཏནེན ཨཱཝུཏཾ པཎྜུཀམྦལསུཏྟཾ ཝིཡ པཉྙཱཡམཱནརཱུཔོཝ སིནེརུམཛ྄ཛྷེན ཨབྷིརུཧི. མནུསྶཱཔི ནཾ ‘‘ཨེཀཡོཛནཾ ཨབྷིརུལ༹ྷོ, དྭིཡོཛནཾ ཨབྷིརུལ༹ྷོ’’ཏི ཨོལོཀཡིཾསུ. ཐེརོཔི སཏྠུ པཱདེ སཱིསེན ཨུཀྑིཔནྟོ ཝིཡ ཨབྷིརུཧིཏྭཱ ཝནྡིཏྭཱ ཨེཝམཱཧ – ‘‘བྷནྟེ, པརིསཱ ཏུམྷེ དིསྭཱཝ གནྟུཀཱམཱ, ཀདཱ ཨོརོཧིསྶཐཱ’’ཏི. ‘‘ཀཧཾ པན ཏེ, མོགྒལླཱན, ཛེཊྛབྷཱཏིཀོ སཱརིཔུཏྟོ’’ཏི. ‘‘བྷནྟེ, སངྐསྶནགརེ ཝསྶཾ ཨུཔགཏོ’’ཏི. མོགྒལླཱན, ཨཧཾ ཨིཏོ སཏྟམེ དིཝསེ མཧཱཔཝཱརཎཱཡ སངྐསྶནགརདྭཱརེ ཨོཏརིསྶཱམི, མཾ དཊྛུཀཱམཱ ཏཏྠ ཨཱགཙྪནྟུ, སཱཝཏྠིཏོ སངྐསྶནགརདྭཱརཾ ཏིཾསཡོཛནཱནི, ཨེཏྟཀེ མགྒེ ཀསྶཙི པཱཐེཡྻཀིཙྩཾ ནཏྠི, ཨུཔོསཐིཀཱ ཧུཏྭཱ དྷུརཝིཧཱརཾ དྷམྨསྶཝནཏྠཱཡ གཙྪནྟཱ ཝིཡ ཨཱགཙྪེཡྻཱཐཱཏི ཏེསཾ ཨཱརོཙེཡྻཱསཱིཏི. ཐེརོ ‘‘སཱདྷུ, བྷནྟེ’’ཏི གནྟྭཱ ཏཐཱ ཨཱརོཙེསི.

སཏྠཱ ཝུཊྛཝསྶོ པཝཱརེཏྭཱ སཀྐསྶ ཨཱརོཙེསི – ‘‘མཧཱརཱཛ, མནུསྶཔཐཾ གམིསྶཱམཱི’’ཏི. སཀྐོ སུཝཎྞམཡཾ མཎིམཡཾ རཛཏམཡནྟི ཏཱིཎི སོཔཱནཱནི མཱཔེསི. ཏེསཾ པཱདཱ སངྐསྶནགརདྭཱརེ པཏིཊྛཧིཾསུ, སཱིསཱནི སིནེརུམུདྡྷནི. ཏེསུ དཀྑིཎཔསྶེ སུཝཎྞམཡཾ སོཔཱནཾ དེཝཏཱནཾ ཨཧོསི, ཝཱམཔསྶེ རཛཏམཡཾ སོཔཱནཾ མཧཱབྲཧྨཱནཾ ཨཧོསི, མཛ྄ཛྷེ མཎིམཡཾ སོཔཱནཾ ཏཐཱགཏསྶ ཨཧོསི. སཏྠཱཔི སིནེརུམུདྡྷནི ཋཏྭཱ དེཝོརོཧཎསམཡེ ཡམཀཔཱཊིཧཱརིཡཾ ཀཏྭཱ ཨུདྡྷཾ ཨོལོཀེསི, ཡཱཝ བྲཧྨལོཀཱ ཨེཀངྒཎཱ ཨཧེསུཾ. ཨདྷོ ཨོལོཀེསི, ཡཱཝ ཨཝཱིཙིཏོ ཨེཀངྒཎཾ ཨཧོསི. དིསཱཝིདིསཱ ཨོལོཀེསི, ཨནེཀཱནི ཙཀྐཝཱལ༹སཏསཧསྶཱནི ཨེཀངྒཎཱནི ཨཧེསུཾ. དེཝཱ མནུསྶེ པསྶིཾསུ, མནུསྶཱཔི དེཝེ པསྶིཾསུ, སབྦེ སམྨུཁཱཝ པསྶིཾསུ.

བྷགཝཱ ཚབྦཎྞརཾསིཡོ ཝིསྶཛྫེསི. ཏཾ དིཝསཾ བུདྡྷསིརིཾ ཨོལོཀེཏྭཱ ཚཏྟིཾསཡོཛན པརིམཎྜལཱཡ པརིསཱཡ ཨེཀོཔི བུདྡྷབྷཱཝཾ ཨཔཏྠེནྟོ ནཱམ ནཏྠི. སུཝཎྞསོཔཱནེན དེཝཱ ཨོཏརིཾསུ, རཛཏསོཔཱནེན མཧཱབྲཧྨཱནོ ཨོཏརིཾསུ, མཎིསོཔཱནེན སམྨཱསམྦུདྡྷོ ཨོཏརི. པཉྩསིཁོ གནྡྷབྦདེཝཔུཏྟོ བེལུཝཔཎྜུཝཱིཎཾ ཨཱདཱཡ དཀྑིཎཔསྶེ ཋཏྭཱ སཏྠུ གནྡྷབྦམདྷུརདིབྦཝཱིཎཱཡ སདྡེན པཱུཛཾ ཀརོནྟོ ཨོཏརི, མཱཏལི, སངྒཱཧཀོ ཝཱམཔསྶེ ཋཏྭཱ དིབྦགནྡྷམཱལཱཔུཔྥཾ གཧེཏྭཱ ནམསྶམཱནོ པཱུཛཾ ཀཏྭཱ ཨོཏརི, མཧཱབྲཧྨཱ ཚཏྟཾ དྷཱརེསི, སུཡཱམོ ཝཱལབཱིཛནིཾ དྷཱརེསི. སཏྠཱ ཨིམིནཱ པརིཝཱརེན སདྡྷིཾ ཨོཏརིཏྭཱ སངྐསྶནགརདྭཱརེ པཏིཊྛཧི. སཱརིཔུཏྟཏྠེརོཔི ཨཱགནྟྭཱ སཏྠཱརཾ ཝནྡིཏྭཱ ཡསྨཱ སཱརིཔུཏྟཏྠེརེན ཏཐཱརཱུཔཱཡ བུདྡྷསིརིཡཱ ཨོཏརནྟོ སཏྠཱ ཨིཏོ པུབྦེ ན དིཊྛཔུབྦོ, ཏསྨཱ –

‘‘ན མེ དིཊྛོ ཨིཏོ པུབྦེ, ན སུཏོ ཨུད ཀསྶཙི;

ཨེཝཾ ཝགྒུཝདོ སཏྠཱ, ཏུསིཏཱ གཎིམཱགཏོ’’ཏི. (སུ. ནི. ༩༦༡; མཧཱནི. ༡༩༠) –

ཨཱདཱིཧི ཨཏྟནོ ཏུཊྛིཾ པཀཱསེཏྭཱ, ‘‘བྷནྟེ, ཨཛྫ སབྦེཔི དེཝམནུསྶཱ ཏུམྷཱཀཾ པིཧཡནྟི, པཏྠེནྟཱི’’ཏི ཨཱཧ. ཨཐ ནཾ སཏྠཱ, ‘‘སཱརིཔུཏྟ, ཨེཝརཱུཔེཧི གུཎེཧི སམནྣཱགཏཱ བུདྡྷཱ དེཝམནུསྶཱནཾ པིཡཱ ཧོནྟིཡེཝཱ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༡༨༡.

‘‘ཡེ ཛྷཱནཔསུཏཱ དྷཱིརཱ, ནེཀྑམྨཱུཔསམེ རཏཱ;

དེཝཱཔི ཏེསཾ པིཧཡནྟི, སམྦུདྡྷཱནཾ སཏཱིམཏ’’ནྟི.

ཏཏྠ ཡེ ཛྷཱནཔསུཏཱཏི ལཀྑཎཱུཔནིཛ྄ཛྷཱནཾ ཨཱརམྨཎཱུཔནིཛ྄ཛྷཱནནྟི ཨིམེསུ དྭཱིསུ ཛྷཱནེསུ ཨཱཝཛྫནསམཱཔཛྫནཨདྷིཊྛཱནཝུཊྛཱནཔཙྩཝེཀྑཎེཧི ཡུཏྟཔྤཡུཏྟཱ. ནེཀྑམྨཱུཔསམེ རཏཱཏི ཨེཏྠ པབྦཛྫཱ ནེཀྑམྨནྟི ན གཧེཏབྦཱ, ཀིལེསཝཱུཔསམནིབྦཱནརཏིཾ པན སནྡྷཱཡེཏཾ ཝུཏྟཾ. དེཝཱཔཱིཏི དེཝཱཔི མནུསྶཱཔི ཏེསཾ པིཧཡནྟི པཏྠེནྟི. སཏཱིམཏནྟི ཨེཝརཱུཔགུཎཱནཾ ཏེསཾ སཏིཡཱ སམནྣཱགཏཱནཾ སམྦུདྡྷཱནཾ. ‘‘ཨཧོ ཝཏ མཡཾ བུདྡྷཱ བྷཝེཡྻཱམཱ’’ཏི བུདྡྷབྷཱཝཾ ཨིཙྪམཱནཱ པིཧཡནྟཱིཏི ཨཏྠོ.

དེསནཱཝསཱནེ ཏིཾསམཏྟཱནཾ པཱཎཀོཊཱིནཾ དྷམྨཱབྷིསམཡོ ཨཧོསི, ཐེརསྶ སདྡྷིཝིཧཱརིཀཱ པཉྩསཏབྷིཀྑཱུ ཨརཧཏྟེ པཏིཊྛཧིཾསུ.

སབྦབུདྡྷཱནཾ ཀིར ཨཝིཛཧིཏམེཝ ཡམཀཔཱཊིཧཱིརཾ ཀཏྭཱ དེཝལོཀེ ཝསྶཾ ཝསིཏྭཱ སངྐསྶནགརདྭཱརེ ཨོཏརཎཾ. ཏཏྠ པན དཀྑིཎཔཱདསྶ པཏིཊྛིཏཊྛཱནཾ ཨཙལཙེཏིཡཊྛཱནཾ ནཱམ ཧོཏི. སཏྠཱ ཏཏྠ ཋཏྭཱ པུཐུཛྫནཱདཱིནཾ ཝིསཡེ པཉྷཾ པུཙྪི, པུཐུཛྫནཱ ཨཏྟནོ ཝིསཡེ པཉྷེ ཝིསྶཛྫེཏྭཱ སོཏཱཔནྣཝིསཡེ པཉྷཾ ཝིསྶཛྫེཏུཾ ནཱསཀྑིཾསུ. ཏཐཱ སཀདཱགཱམིཨཱདཱིནཾ ཝིསཡེ སོཏཱཔནྣཱདཡོ, མཧཱམོགྒལླཱནཝིསཡེ སེསམཧཱསཱཝཀཱ, སཱརིཔུཏྟཏྠེརསྶ ཝིསཡེ མཧཱམོགྒལླཱནོ, བུདྡྷཝིསཡེ ཙ སཱརིཔུཏྟོཔི ཝིསྶཛྫེཏུཾ ནཱསཀྑིཡེཝ. སོ པཱཙཱིནདིསཾ ཨཱདིཾ ཀཏྭཱ སབྦདིསཱ ཨོལོཀེསི, སབྦཏྠ ཨེཀངྒཎམེཝ ཨཧོསི. ཨཊྛསུ དིསཱསུ དེཝམནུསྶཱ ཨུདྡྷཾ ཡཱཝ བྲཧྨལོཀཱ ཧེཊྛཱ བྷཱུམཊྛཱ ཙ ཡཀྑནཱགསུཔཎྞཱ ཨཉྫལིཾ པགྒཧེཏྭཱ, ‘‘བྷནྟེ, ཨིདྷ ཏསྶ པཉྷསྶ ཝིསྶཛྫེཏཱ ནཏྠི, ཨེཏྠེཝ ཨུཔདྷཱརེཐཱ’’ཏི ཨཱཧཾསུ. སཏྠཱ སཱརིཔུཏྟོ ཀིལམཏི. ཀིཉྩཱཔི ཧེས –

‘‘ཡེ ཙ སངྑཱཏདྷམྨཱསེ, ཡེ ཙ སེཁཱ པུཐཱུ ཨིདྷ;

ཏེསཾ མེ ནིཔཀོ ཨིརིཡཾ, པུཊྛོ པབྲཱུཧི མཱརིསཱ’’ཏི. (སུ. ནི. ༡༠༤༤; ཙཱུལ༹ནི. ཨཛིཏམཱཎཝཔུཙྪཱནིདྡེས ༧) –

ཨིམཾ བུདྡྷཝིསཡེ པུཊྛཔཉྷཾ སུཏྭཱ ‘སཏྠཱ མཾ སེཁཱསེཁཱནཾ ཨཱགམནཔཊིཔདཾ པུཙྪཏཱི’ཏི པཉྷེ ནིཀྐངྑོ, ཁནྡྷཱདཱིསུ པན ཀཏརེན ནུ ཁོ མུཁེན ཨིམཾ པཊིཔདཾ ཀཐེནྟོ ‘ཨཧཾ སཏྠུ ཨཛ྄ཛྷཱསཡཾ གཎྷིཏུཾ ན སཀྑིསྶཱམཱི’ཏི མམ ཨཛ྄ཛྷཱསཡེ ཀངྑཏི, སོ མཡཱ ནཡེ ཨདིནྣེ ཀཐེཏུཾ ན སཀྑིསྶཏི, ནཡམསྶ དསྶཱམཱིཏི ནཡཾ དསྶེནྟོ ‘‘བྷཱུཏམིདཾ, སཱརིཔུཏྟ, སམནུཔསྶསཱི’’ཏི ཨཱཧ. ཨེཝཾ ཀིརསྶ ཨཧོསི ‘‘སཱརིཔུཏྟོ མམ ཨཛ྄ཛྷཱསཡཾ གཧེཏྭཱ ཀཐེནྟོ ཁནྡྷཝསེན ཀཐེསྶཏཱི’’ཏི. ཐེརསྶ སཧ ནཡདཱནེན སོ པཉྷོ ནཡསཏེན ནཡསཧསྶེན ནཡསཏསཧསྶེན ཨུཔཊྛཱསི. སོ སཏྠཱརཱ དིནྣནཡེ ཋཏྭཱ ཏཾ པཉྷཾ ཀཐེསི. ཋཔེཏྭཱ ཀིར སམྨཱསམྦུདྡྷཾ ཨཉྙོ སཱརིཔུཏྟཏྠེརསྶ པཉྙཾ པཱཔུཎིཏུཾ སམཏྠོ ནཱམ ནཏྠི. ཏེནེཝ ཀིར ཐེརོ སཏྠུ པུརཏོ ཋཏྭཱ སཱིཧནཱདཾ ནདི – ‘‘ཨཧཾ, བྷནྟེ, སཀལཀཔྤམྤི དེཝེ ཝུཊྛེ ‘ཨེཏྟཀཱནི བིནྡཱུནི མཧཱསམུདྡེ པཏིཏཱནི, ཨེཏྟཀཱནི བྷཱུམིཡཾ, ཨེཏྟཀཱནི པབྦཏེ’ཏི གཎེཏྭཱ ལེཁཾ ཨཱརོཔེཏུཾ སམཏྠོ’’ཏི. སཏྠཱཔི ནཾ ‘‘ཛཱནཱམི, སཱརིཔུཏྟ, གཎེཏུཾ སམཏྠབྷཱཝ’’ནྟི ཨཱཧ. ཏསྶ ཨཱཡསྨཏོ པཉྙཱཡ ཨུཔམཱ ནཱམ ནཏྠི. ཏེནེཝཱཧ –

‘‘གངྒཱཡ ཝཱལུཀཱ ཁཱིཡེ, ཨུདཀཾ ཁཱིཡེ མཧཎྞཝེ;

མཧིཡཱ མཏྟིཀཱ ཁཱིཡེ, ན ཁཱིཡེ མམ བུདྡྷིཡཱ’’ཏི.

ཨིདཾ ཝུཏྟཾ ཧོཏི – སཙེ ཧི, བྷནྟེ, བུདྡྷིསམྤནྣལོཀནཱཐ, མཡཱ ཨེཀསྨིཾ པཉྷེ ཝིསྶཛྫིཏེ ཨེཀཾ ཝཱ ཝཱལུཀཾ ཨེཀཾ ཝཱ ཨུདཀབིནྡུཾ ཨེཀཾ ཝཱ པཾསུཁཎྜཾ ཨཁིཔིཏྭཱ པཉྷཱནཾ སཏེན ཝཱ སཧསྶེནཝཱ སཏསཧསྶེན ཝཱ ཝིསྶཛྫིཏེ གངྒཱཡ ཝཱལུཀཱདཱིསུ ཨེཀེཀཾ ཨེཀམནྟེ ཁིཔེཡྻ, ཁིཔྤཏརཾ གངྒཱདཱིསུ ཝཱལུཀཱདཡོ པརིཀྑཡཾ གཙྪེཡྻུཾ, ན ཏྭེཝ མམ པཉྷཱནཾ ཝིསྶཛྫནནྟི. ཨེཝཾ མཧཱཔཉྙོཔི ཧི བྷིཀྑུ བུདྡྷཝིསཡེ པཉྷསྶ ཨནྟཾ ཝཱ ཀོཊིཾ ཝཱ ཨདིསྭཱ སཏྠཱརཱ དིནྣནཡེ ཋཏྭཱཝ པཉྷཾ ཝིསྶཛྫེསི. ཏཾ སུཏྭཱ བྷིཀྑཱུ ཀཐཾ སམུཊྛཱཔེསུཾ – ‘‘ཡཾ པཉྷཾ པུཊྛོ སབྦོཔི ཛནོ ཀཐེཏུཾ ན སཀྑི, ཏཾ དྷམྨསེནཱཔཏི སཱརིཔུཏྟོ ཨེཀཀོཝ ཀཐེསཱི’’ཏི. སཏྠཱ ཏཾ ཀཐཾ སུཏྭཱ ‘‘ན ཨིདཱནེཝ སཱརིཔུཏྟོ ཡཾ པཉྷཾ མཧཱཛནོ ཝིསྶཛྫེཏུཾ ནཱསཀྑི, ཏཾ ཝིསྶཛྫེསི, པུབྦེཔི ཨནེན ཝིསྶཛྫིཏོཡེཝཱ’’ཏི ཝཏྭཱ ཨཏཱིཏཾ ཨཱཧརིཏུཾ –

‘‘པརོསཧསྶམྤི སམཱགཏཱནཾ,

ཀནྡེཡྻུཾ ཏེ ཝསྶསཏཾ ཨཔཉྙཱ;

ཨེཀོཝ སེཡྻོ པུརིསོ སཔཉྙོ,

ཡོ བྷཱསིཏསྶ ཝིཛཱནཱཏི ཨཏྠ’’ནྟི. (ཛཱ. ༡.༡.༩༩) –

ཨིམཾ ཛཱཏཀཾ ཝིཏྠཱརེན ཀཐེསཱིཏི.

དེཝོརོཧཎཝཏྠུ དུཏིཡཾ.

༣. ཨེརཀཔཏྟནཱགརཱཛཝཏྠུ

ཀིཙྪོ མནུསྶཔཊིལཱབྷོཏི ཨིམཾ དྷམྨདེསནཾ སཏྠཱ བཱརཱཎསིཡཾ ཨུཔནིསྶཱཡ སཏྟསིརཱིསཀརུཀྑམཱུལེ ཝིཧརནྟོ ཨེརཀཔཏྟཾ ནཱམ ནཱགརཱཛཾ ཨཱརབྦྷ ཀཐེསི.

སོ ཀིར པུབྦེ ཀསྶཔབུདྡྷསཱསནེ དཧརབྷིཀྑུ ཧུཏྭཱ གངྒཱཡ ནཱཝཾ ཨབྷིརུཡ྄ཧ གཙྪནྟོ ཨེཀསྨིཾ ཨེརཀགུམྦེ ཨེརཀཔཏྟཾ གཧེཏྭཱ ནཱཝཱཡ ཝེགསཱ གཙྪམཱནཱཡཔི ན མུཉྩི, ཨེརཀཔཏྟཾ ཚིཛྫིཏྭཱ གཏཾ. སོ ‘‘ཨཔྤམཏྟཀཾ ཨེཏ’’ནྟི ཨཱཔཏྟིཾ ཨདེསེཏྭཱ ཝཱིསཏི ཝསྶསཧསྶཱནི ཨརཉྙེ སམཎདྷམྨཾ ཀཏྭཱཔི མརཎཀཱལེ ཨེརཀཔཏྟེན གཱིཝཱཡ གཧིཏོ ཝིཡ ཨཱཔཏྟིཾ དེསེཏུཀཱམོཔི ཨཉྙཾ བྷིཀྑུཾ ཨཔསྶམཱནོ ‘‘ཨཔརིསུདྡྷཾ མེ སཱིལ’’ནྟི ཨུཔྤནྣཝིཔྤཊིསཱརོ ཏཏོ ཙཝིཏྭཱ ཨེཀརུཀྑདོཎིཀནཱཝཔྤམཱཎོ ནཱགརཱཛཱ ཧུཏྭཱ ནིབྦཏྟི, ཨེརཀཔཏྟོཏྭེཝསྶ ནཱམཾ ཨཧོསི. སོ ནིབྦཏྟཀྑཎེཡེཝ ཨཏྟབྷཱཝཾ ཨོལོཀེཏྭཱ ‘‘ཨེཏྟཀཾ ནཱམ ཀཱལཾ སམཎདྷམྨཾ ཀཏྭཱ ཨཧེཏུཀཡོནིཡཾ མཎྜཱུཀབྷཀྑཊྛཱནེ ནིབྦཏྟོམྷཱི’’ཏི ཝིཔྤཊིསཱརཱི ཨཧོསི. སོ ཨཔརབྷཱགེ ཨེཀཾ དྷཱིཏརཾ ལབྷིཏྭཱ མཛ྄ཛྷེ གངྒཱཡ ཨུདཀཔིཊྛེ མཧནྟཾ ཕལཾ ཨུཀྑིཔིཏྭཱ དྷཱིཏརཾ ཏསྨིཾ ཋཔེཏྭཱ ནཙྩཱཔེཏྭཱ གཱཡཱཔེསི. ཨེཝཾ ཀིརསྶ ཨཧོསི – ‘‘ཨདྡྷཱ ཨཧཾ ཨིདྷ ཨིམིནཱ ཨུཔཱཡེན བུདྡྷེ ཨུཔྤནྣེ ཏསྶ ཨུཔྤནྣབྷཱཝཾ སུཎིསྶཱམཱི’’ཏི. ཡོ མེ གཱིཏསྶ པཊིགཱིཏཾ ཨཱཧརཏི, ཏསྶ མཧནྟེན ནཱགབྷཝནེན སདྡྷིཾ དྷཱིཏརཾ དསྶཱམཱིཏི ཨནྭཌྜྷམཱསཾ ཨུཔོསཐདིཝསེ ཏཾ དྷཱིཏརཾ ཕཎེ ཋཔེསི. སཱ ཏཏྠ ཋིཏཱ ནཙྩནྟཱི –

‘‘ཀིཾསུ ཨདྷིཔྤཏཱི རཱཛཱ, ཀིཾསུ རཱཛཱ རཛྫིསྶརོ;

ཀཐཾསུ ཝིརཛོ ཧོཏི, ཀཐཾ བཱལོཏི ཝུཙྩཏཱི’’ཏི. –

ཨིམཾ གཱིཏཾ གཱཡཏི.

སཀལཛམྦུདཱིཔཝཱསིནོ ‘‘ནཱགམཱཎཝིཀཾ གཎྷིསྶཱམཱ’’ཏི གནྟྭཱ ཨཏྟནོ ཨཏྟནོ པཉྙཱབལེན པཊིགཱིཏཾ ཀཏྭཱ གཱཡནྟི. སཱ ཏཾ པཊིཀྑིཔཏི. ཏསྶཱ ཨནྭཌྜྷམཱསཾ ཕཎེ ཋཏྭཱ ཨེཝཾ གཱཡནྟིཡཱཝ ཨེཀཾ བུདྡྷནྟརཾ ཝཱིཏིཝཏྟཾ. ཨཐ ཨམྷཱཀཾ སཏྠཱ ལོཀེ ཨུཔྤཛྫིཏྭཱ ཨེཀདིཝསཾ པཙྩཱུསཀཱལེ ལོཀཾ ཝོལོཀེནྟོ ཨེརཀཔཏྟཾ ཨཱདིཾ ཀཏྭཱ ཨུཏྟརམཱཎཝཾ ནཱམ ཨཏྟནོ ཉཱཎཛཱལསྶ ཨནྟོ པཝིཊྛཾ དིསྭཱ ‘‘ཀིཾ ནུ ཁོ བྷཝིསྶཏཱི’’ཏི ཨཱཝཛྫེནྟོ ‘‘ཨཛྫ ཨེརཀཔཏྟསྶ དྷཱིཏརཾ ཕཎེ ཋཔེཏྭཱ ནཙྩཱཔནདིཝསོ, ཨཡཾ ཨུཏྟརམཱཎཝོ མཡཱ དིནྣཾ པཊིགཱིཏཾ གཎྷནྟོཝ སོཏཱཔནྣོ ཧུཏྭཱ ཏཾ ཨཱདཱཡ ནཱགརཱཛསྶ སནྟིཀཾ གམིསྶཏི. སོ ཏཾ སུཏྭཱ ‘བུདྡྷོ ཨུཔྤནྣོ’ཏི ཉཏྭཱ མམ སནྟིཀཾ ཨཱགམིསྶཏི, ཨཧཾ ཏསྨིཾ ཨཱགཏེ མཧཱསམཱགམེ གཱཐཾ ཀཐེསྶཱམི, གཱཐཱཔརིཡོསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ བྷཝིསྶཏཱི’’ཏི ཨདྡས. སོ ཏཏྠ གནྟྭཱ བཱརཱཎསིཏོ ཨཝིདཱུརེ སཏྟ སིརཱིསཀརུཀྑཱ ཨཏྠི, ཏེསུ ཨེཀསྶ མཱུལེ ནིསཱིདི. ཛམྦུདཱིཔཝཱསིནོ གཱིཏཔཊིགཱིཏཾ ཨཱདཱཡ སནྣིཔཏིཾསུ. སཏྠཱ ཨཝིདཱུརེ ཋཱནེ གཙྪནྟཾ ཨུཏྟརམཱཎཝཾ དིསྭཱ ‘‘ཨེཧི, ཨུཏྟརཱ’’ཏི ཨཱཧ. ‘‘ཀིཾ, བྷནྟེ’’ཏི? ‘‘ཨིཏོ ཏཱཝ ཨེཧཱི’’ཏི. ཨཐ ནཾ ཨཱགནྟྭཱ ཝནྡིཏྭཱ ནིསིནྣཾ ཨཱཧ ‘‘ཀཧཾ གཙྪསཱི’’ཏི? ‘‘ཨེརཀཔཏྟསྶ དྷཱིཏུ གཱཡནཊྛཱན’’ནྟི. ‘‘ཛཱནཱསི པན གཱིཏཔཊིགཱིཏ’’ནྟི? ‘‘ཛཱནཱམི, བྷནྟེ’’ཏི. ‘‘ཝདེཧི ཏཱཝ ན’’ནྟི? ཨཐ ནཾ ཨཏྟནོ ཛཱནནནིཡཱམེནེཝ ཝདནྟཾ ‘‘ན ཨུཏྟརཾ ཨེཏཾ པཊིགཱིཏཾ, ཨཧཾ ཏེ པཊིགཱིཏཾ དསྶཱམི, ཨཱདཱཡ ནཾ གམིསྶསཱི’’ཏི. ‘‘སཱདྷུ, བྷནྟེ’’ཏི. ཨཐ ནཾ སཏྠཱ, ཨུཏྟར, ཏྭཾ ནཱགམཱཎཝིཀཱཡ གཱིཏཀཱལེ –

‘‘ཚདྭཱརཱདྷིཔྤཏཱི རཱཛཱ, རཛྫམཱནོ རཛྫིསྶརོ;

ཨརཛྫཾ ཝིརཛོ ཧོཏི, རཛྫཾ བཱལོཏི ཝུཙྩཏཱི’’ཏི. –

ཨིམཾ པཊིགཱིཏཾ གཱཡེཡྻཱསཱིཏི ཨཱཧ.

མཱཎཝིཀཱཡ གཱིཏསྶ ཨཏྠོ – ཀིཾསུ ཨདྷིཔྤཏཱི རཱཛཱཏི ཀིཾ ཨདྷིཔྤཏི རཱཛཱ ནཱམ ཧོཏི? ཀིཾསུ རཱཛཱ རཛྫིསྶརོཏི ཀཐཾ པན རཱཛཱ རཛྫིསྶརོ ནཱམ ཧོཏི? ཀཐཾསུ ཝིརཛོ ཧོཏཱིཏི ཀཐཾ ནུ ཁོ སོ རཱཛཱ ཝིརཛོ ནཱམ ཧོཏཱིཏི?

པཊིགཱིཏསྶ པན ཨཏྠོ – ཚདྭཱརཱདྷིཔྤཏཱི རཱཛཱཏི ཡོ ཚནྣཾ དྭཱརཱནཾ ཨདྷིཔྤཏི, ཨེཀདྭཱརེཔི རཱུཔཱདཱིཧི ཨནབྷིབྷཱུཏོ, ཨཡཾ རཱཛཱ ནཱམ. རཛྫམཱནོ རཛྫིསྶརོཏི ཡོ པན ཏེསུ ཨཱརམྨཎེསུ རཛྫཏི, སོ རཛྫམཱནོ རཛྫིསྶརོ ནཱམ. ཨརཛྫནྟི ཨརཛྫམཱནོ པན ཝིརཛོ ནཱམ ཧོཏི. རཛྫནྟི རཛྫམཱནོ བཱལོཏི ཝུཙྩཏཱིཏི.

ཨེཝམསྶ སཏྠཱ པཊིགཱིཏཾ དཏྭཱ, ཨུཏྟར, ཏཡཱ ཨིམསྨིཾ གཱིཏེ གཱཡིཏེ ཨིམསྶ གཱིཏསྶ ཨིམཾ པཊིགཱིཏཾ གཱཡིསྶཏི –

‘‘ཀེནསྶུ ཝུཡ྄ཧཏི བཱལོ, ཀཐཾ ནུདཏི པཎྜིཏོ;

ཡོགཀྑེམཱི ཀཐཾ ཧོཏི, ཏཾ མེ ཨཀྑཱཧི པུཙྪིཏོ’’ཏི.

ཨཐསྶ ཏྭཾ ཨིདཾ པཊིགཱིཏཾ གཱཡེཡྻཱསི –

‘‘ཨོགྷེན ཝུཡ྄ཧཏི བཱལོ, ཡོགཱ ནུདཏི པཎྜིཏོ;

སབྦཡོགཝིསཾཡུཏྟོ, ཡོགཀྑེམཱིཏི ཝུཙྩཏཱི’’ཏི.

ཏསྶཏྠོ – ‘‘ཀཱམོགྷཱདིནཱ ཙཏུབྦིདྷེན ཨོགྷེན བཱལོ ཝུཡ྄ཧཏི, ཏཾ ཨོགྷཾ པཎྜིཏོ སམྨཔྤདྷཱནསངྑཱཏེན ཡོགེན ནུདཏི. སོ སབྦེཧི ཀཱམཡོགཱདཱིཧི ཝིསཾཡུཏྟོ ཡོགཀྑེམཱི ནཱམ ཝུཙྩཏཱི’’ཏི.

ཨུཏྟརོ ཨིམཾ པཊིགཱིཏཾ གཎྷནྟོཝ སོཏཱཔཏྟིཕལེ པཏིཊྛཧི. སོ སོཏཱཔནྣོ ཧུཏྭཱ ཏཾ གཱཐཾ ཨཱདཱཡ གནྟྭཱ, ‘‘ཨམྦྷོ, མཡཱ གཱིཏཔཊིགཱིཏཾ ཨཱཧཊཾ, ཨོཀཱསཾ མེ དེཐཱ’’ཏི ཝཏྭཱ ནིརནྟརཾ ཋིཏསྶ མཧཱཛནསྶ ཛཎྞུནཱ ཨཀྐམནྟོ ཨགམཱསི. ནཱགམཱཎཝིཀཱ པིཏུ ཕཎེ ཋཏྭཱ ནཙྩམཱནཱ ‘‘ཀིཾསུ ཨདྷིཔྤཏཱི རཱཛཱ’’ཏི གཱིཏཾ གཱཡཏི? ཨུཏྟརོ ‘‘ཚདྭཱརཱདྷིཔྤཏཱི རཱཛཱ’’ཏི པཊིགཱིཏཾ གཱཡི. པུན ནཱགམཱཎཝིཀཱ ‘‘ཀེནསྶུ ཝུཡ྄ཧཏཱི’’ཏི ཏསྶ གཱིཏཾ གཱཡཏི? ཨཐསྶཱ པཊིགཱིཏཾ གཱཡནྟོ ཨུཏྟརོ ‘‘ཨོགྷེན ཝུཡ྄ཧཏཱི’’ཏི ཨིམཾ གཱཐམཱཧ. ནཱགརཱཛཱ ཏཾ སུཏྭཱཝ བུདྡྷསྶ ཨུཔྤནྣབྷཱཝཾ ཉཏྭཱ ‘‘མཡཱ ཨེཀཾ བུདྡྷནྟརཾ ཨེཝརཱུཔཾ པདཾ ནཱམ ན སུཏཔུབྦཾ, ཨུཔྤནྣོ ཝཏ, བྷོ, ལོཀེ བུདྡྷོ’’ཏི ཏུཊྛམཱནསོ ནངྒུཊྛེན ཨུདཀཾ པཧརི, མཧཱཝཱིཙིཡོ ཨུཊྛཧིཾསུ, ཨུབྷོ ཏཱིརཱནི བྷིཛྫིཾསུ. ཨིཏོ ཙིཏོ ཙ ཨུསབྷམཏྟེ ཋཱནེ མནུསྶཱ ཨུདཀེ ནིམུཛྫིཾསུ. སོ ཨེཏྟཀཾ མཧཱཛནཾ ཕཎེ ཋཔེཏྭཱ ཨུཀྑིཔིཏྭཱ ཐལེ པཏིཊྛཔེསི. སོ ཨུཏྟརཾ ཨུཔསངྐམིཏྭཱ ‘‘ཀཧཾ, སཱམི, སཏྠཱ’’ཏི པུཙྪི. ‘‘ཨེཀསྨིཾ རུཀྑམཱུལེ ནིསིནྣོ, མཧཱརཱཛཱ’’ཏི. སོ ‘‘ཨེཧི, སཱམི, གཙྪཱམཱ’’ཏི ཨུཏྟརེན སདྡྷིཾ ཨགམཱསི. མཧཱཛནོཔི ཏེན སདྡྷིཾཡེཝ གཏོ. ནཱགརཱཛཱ གནྟྭཱ ཚབྦཎྞརཾསཱིནཾ ཨནྟརཾ པཝིསིཏྭཱ སཏྠཱརཾ ཝནྡིཏྭཱ རོདམཱནོ ཨཊྛཱསི. ཨཐ ནཾ སཏྠཱ ཨཱཧ – ‘‘ཀིཾ ཨིདཾ, མཧཱརཱཛཱ’’ཏི? ‘‘ཨཧཾ, བྷནྟེ, ཏུམྷཱདིསསྶ བུདྡྷསྶ སཱཝཀོ ཧུཏྭཱ ཝཱིསཏི ཝསྶསཧསྶཱནི སམཎདྷམྨཾ ཨཀཱསིཾ, སོཔི མཾ སམཎདྷམྨོ ནིདྡྷཱརེཏུཾ ནཱསཀྑི. ཨཔྤམཏྟཀཾ ཨེརཀཔཏྟཚིནྡནམཏྟཾ ནིསྶཱཡ ཨཧེཏུཀཔཊིསནྡྷིཾ གཧེཏྭཱ ཨུརེན པརིསཀྐནཊྛཱནེ ནིབྦཏྟོསྨི, ཨེཀཾ བུདྡྷནྟརཾ ནེཝ མནུསྶཏྟཾ ལབྷཱམི, ན སདྡྷམྨསྶཝནཾ, ན ཏུམྷཱདིསསྶ བུདྡྷསྶ དསྶན’’ནྟི སཏྠཱ ཏསྶ ཀཐཾ སུཏྭཱ, ‘‘མཧཱརཱཛ, མནུསྶཏྟཾ ནཱམ དུལླབྷམེཝ, ཏཐཱ སདྡྷམྨསྶཝནཾ, ཏཐཱ བུདྡྷུཔྤཱདོ, ཨིདཾ ཀིཙྪེན ཀསིརེན ལབྦྷཏཱི’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༡༨༢.

‘‘ཀིཙྪོ མནུསྶཔཊིལཱབྷོ, ཀིཙྪཾ མཙྩཱན ཛཱིཝིཏཾ;

ཀིཙྪཾ སདྡྷམྨསྶཝནཾ, ཀིཙྪོ བུདྡྷཱནམུཔྤཱདོ’’ཏི.

ཏསྶཏྠོ – མཧནྟེན ཧི ཝཱཡཱམེན མཧནྟེན ཀུསལེན ལདྡྷཏྟཱ མནུསྶཏྟཔཊིལཱབྷོ ནཱམ ཀིཙྪོ དུལླབྷོ. ནིརནྟརཾ ཀསིཀམྨཱདཱིནི ཀཏྭཱ ཛཱིཝིཏཝུཏྟིཾ གྷཊནཏོཔི པརིཏྟཊྛཱཡིཏཱཡཔི མཙྩཱནཾ ཛཱིཝིཏཾ ཀིཙྪཾ. ཨནེཀེསུཔི ཀཔྤེསུ དྷམྨདེསཀསྶ པུགྒལསྶ དུལླབྷཏཱཡ སདྡྷམྨསྶཝནམྤི ཀིཙྪཾ. མཧནྟེན ཝཱཡཱམེན ཨབྷིནཱིཧཱརསྶ སམིཛ྄ཛྷནཏོ སམིདྡྷཱབྷིནཱིཧཱརསྶ ཙ ཨནེཀེཧིཔི ཀཔྤཀོཊིསཧསྶེཧི དུལླབྷུཔྤཱདཏོ བུདྡྷཱནཾ ཨུཔྤཱདོཔི ཀིཙྪོཡེཝ, ཨཏིཝིཡ དུལླབྷོཏི.

དེསནཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི. ནཱགརཱཛཱཔི ཏཾདིཝསཾ སོཏཱཔཏྟིཕལཾ ལབྷེཡྻ, ཏིརཙྪཱནགཏཏྟཱ པན ནཱལཏྠ. སོ ཡེསུ པཊིསནྡྷིགཧཎཏཙཛཧནཝིསྶཊྛནིདྡོཀྐམནསཛཱཏིཡཱམེཐུནསེཝནཙུཏིསངྑཱཏེསུ པཉྩསུ ཋཱནེསུ ནཱགསརཱིརམེཝ གཧེཏྭཱ ཀིལམནྟི, ཏེསུ ཨཀིལམནབྷཱཝཾ པཏྭཱ མཱཎཝརཱུཔེནེཝ ཝིཙརིཏུཾ ལབྷཏཱིཏི.

ཨེརཀཔཏྟནཱགརཱཛཝཏྠུ ཏཏིཡཾ.

༤. ཨཱནནྡཏྠེརཔཉྷཝཏྠུ

སབྦཔཱཔསྶ ཨཀརཎནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཱནནྡཏྠེརསྶ པཉྷཾ ཨཱརབྦྷ ཀཐེསི.

ཐེརོ ཀིར དིཝཱཊྛཱནེ ནིསིནྣོ ཙིནྟེསི – ‘‘སཏྠཱརཱ སཏྟནྣཾ བུདྡྷཱནཾ མཱཏཱཔིཏརོ ཨཱཡུཔརིཙྪེདོ བོདྷི སཱཝཀསནྣིཔཱཏོ ཨགྒསཱཝཀསནྣིཔཱཏོ ཨགྒསཱཝཀཨུཔཊྛཱཀོཏི ཨིདཾ སབྦཾ ཀཐིཏཾ, ཨུཔོསཐོ པན ཨཀཐིཏོ, ཀིཾ ནུ ཁོ ཏེསམྤི ཨཡམེཝ ཨུཔོསཐོ, ཨཉྙོ’’ཏི? སོ སཏྠཱརཾ ཨུཔསངྐམིཏྭཱ ཏམཏྠཾ པུཙྪི. ཡསྨཱ པན ཏེསཾ བུདྡྷཱནཾ ཀཱལབྷེདོཝ ཨཧོསི, ན ཀཐཱབྷེདོ. ཝིཔསྶཱི སམྨཱསམྦུདྡྷོ ཧི སཏྟམེ སཏྟམེ སཾཝཙྪརེ ཨུཔོསཐཾ ཨཀཱསི. ཨེཀདིཝསཾ དིནྣོཝཱདོཡེཝ ཧིསྶ སཏྟནྣཾ སཾཝཙྪརཱནཾ ཨལཾ ཧོཏི. སིཁཱི ཙེཝ ཝེསྶབྷཱུ ཙ ཚཊྛེ ཚཊྛེ སཾཝཙྪརེ ཨུཔོསཐཾ ཀརིཾསུ, ཀཀུསནྡྷོ ཀོཎཱགམནོ ཙ སཾཝཙྪརེ སཾཝཙྪརེ. ཀསྶཔདསབལོ ཚཊྛེ ཚཊྛེ མཱསེ ཨུཔོསཐཾ ཨཀཱསི. ཨེཀདིཝསཾ དིནྣོཝཱདོ ཨེཝ ཧིསྶ ཚནྣཾ མཱསཱནཾ ཨལཾ ཨཧོསི. ཏསྨཱ སཏྠཱ ཏེསཾ ཨིམཾ ཀཱལབྷེདཾ ཨཱརོཙེཏྭཱ ‘‘ཨོཝཱདགཱཐཱ པན ནེསཾ ཨིམཱཡེཝཱ’’ཏི ཝཏྭཱ སབྦེསཾ ཨེཀམེཝ ཨུཔོསཐཾ ཨཱཝི ཀརོནྟོ ཨིམཱ གཱཐཱ ཨབྷཱསི –

༡༨༣.

‘‘སབྦཔཱཔསྶ ཨཀརཎཾ, ཀུསལསྶ ཨུཔསམྤདཱ;

སཙིཏྟཔརིཡོདཔནཾ, ཨེཏཾ བུདྡྷཱན སཱསནཾ.

༡༨༤.

‘‘ཁནྟཱི པརམཾ ཏཔོ ཏིཏིཀྑཱ,

ནིབྦཱནཾ པརམཾ ཝདནྟི བུདྡྷཱ;

ན ཧི པབྦཛིཏོ པརཱུཔགྷཱཏཱི,

ན སམཎོ ཧོཏི པརཾ ཝིཧེཋཡནྟོ.

༡༨༥.

‘‘ཨནཱུཔཝཱདོ ཨནཱུཔགྷཱཏོ, པཱཏིམོཀྑེ ཙ སཾཝརོ;

མཏྟཉྙུཏཱ ཙ བྷཏྟསྨིཾ, པནྟཉྩ སཡནཱསནཾ;

ཨདྷིཙིཏྟེ ཙ ཨཱཡོགོ, ཨེཏཾ བུདྡྷཱན སཱསན’’ནྟི.

ཏཏྠ སབྦཔཱཔསྶཱཏི སབྦསྶ ཨཀུསལཀམྨསྶ. ཨུཔསམྤདཱཏི ཨབྷིནིཀྑམནཏོ པཊྛཱཡ ཡཱཝ ཨརཧཏྟམགྒཱ ཀུསལསྶ ཨུཔྤཱདནཉྩེཝ ཨུཔྤཱདིཏསྶ ཙ བྷཱཝནཱ. སཙིཏྟཔརིཡོདཔནནྟི པཉྩཧི ནཱིཝརཎེཧི ཨཏྟནོ ཙིཏྟསྶ ཝོདཱཔནཾ. ཨེཏཾ བུདྡྷཱན སཱསནནྟི སབྦབུདྡྷཱནཾ ཨཡམནུསིཊྛི.

ཁནྟཱིཏི ཡཱ ཨེསཱ ཏིཏིཀྑཱསངྑཱཏཱ ཁནྟཱི ནཱམ, ཨིདཾ ཨིམསྨིཾ སཱསནེ པརམཾ ཨུཏྟམཾ ཏཔོ. ནིབྦཱནཾ པརམཾ ཝདནྟི བུདྡྷཱཏི བུདྡྷཱ ཙ པཙྩེཀབུདྡྷཱ ཙ ཨནུབུདྡྷཱ ཙཱཏི ཨིམེ ཏཡོ བུདྡྷཱ ནིབྦཱནཾ ཨུཏྟམནྟཱི ཝདནྟི. ན ཧི པབྦཛིཏོཏི པཱཎིཨཱདཱིཧི པརཾ ཨཔཧནནྟོ ཝིཧེཋེནྟོ པརཱུཔགྷཱཏཱི པབྦཛིཏོ ནཱམ ན ཧོཏི. ན སམཎོཏི ཝུཏྟནཡེནེཝ པརཾ ཝིཧེཋཡནྟོ སམཎོཔི ན ཧོཏིཡེཝ.

ཨནཱུཔཝཱདོཏི ཨནཱུཔཝཱདནཉྩེཝ ཨནཱུཔཝཱདཱཔནཉྩ. ཨནཱུཔགྷཱཏོཏི ཨནཱུཔགྷཱཏནཉྩེཝ ཨནཱུཔགྷཱཏཱཔནཉྩ. པཱཏིམོཀྑེཏི ཛེཊྛཀསཱིལེ. སཾཝརོཏི པིདཧནཾ. མཏྟཉྙུཏཱཏི མཏྟཉྙུབྷཱཝོ པམཱཎཛཱནནཾ. པནྟནྟི ཝིཝིཏྟཾ. ཨདྷིཙིཏྟེཏི ཨཊྛསམཱཔཏྟིསངྑཱཏེ ཨདྷིཙིཏྟེ. ཨཱཡོགོཏི པཡོགཀརཎཾ. ཨེཏནྟི ཨེཏཾ སབྦེསཾ བུདྡྷཱནཾ སཱསནཾ. ཨེཏྠ ཧི ཨནཱུཔཝཱདེན ཝཱཙསིཀཾ སཱིལཾ ཀཐིཏཾ, ཨནཱུཔགྷཱཏེན ཀཱཡིཀསཱིལཾ, ‘‘པཱཏིམོཀྑེ ཙ སཾཝརོ’’ཏི སཱིལཾ ཀཐིཏཾ, ཨནཱུཔགྷཱཏེན ཀཱཡིཀསཱིལཾ, ‘‘པཱཏིམོཀྑེ ཙ སཾཝརོ’’ཏི ཨིམིནཱ པཱཏིམོཀྑསཱིལཉྩེཝ ཨིནྡྲིཡསཾཝརཉྩ, མཏྟཉྙུཏཱཡ ཨཱཛཱིཝཔཱརིསུདྡྷི ཙེཝ པཙྩཡསནྣིསིཏསཱིལཉྩ, པནྟསེནཱསནེན སཔྤཱཡསེནཱསནཾ, ཨདྷིཙིཏྟེན ཨཊྛ སམཱཔཏྟིཡོ. ཨེཝཾ ཨིམཱཡ གཱཐཱཡ ཏིསྶོཔི སིཀྑཱ ཀཐིཏཱ ཨེཝ ཧོནྟཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཱནནྡཏྠེརཔཉྷཝཏྠུ ཙཏུཏྠཾ.

༥. ཨནབྷིརཏབྷིཀྑུཝཏྠུ

ན ཀཧཱཔཎཝསྶེནཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཨནབྷིརཏབྷིཀྑུཾ ཨཱརབྦྷ ཀཐེསི.

སོ ཀིར སཱསནེ པབྦཛིཏྭཱ ལདྡྷཱུཔསམྤདོ ‘‘ཨསུཀཊྛཱནཾ ནཱམ གནྟྭཱ ཨུདྡེསཾ ཨུགྒཎྷཱཧཱི’’ཏི ཨུཔཛ྄ཛྷཱཡེན པེསིཏོ ཏཏྠ ཨགམཱསི. ཨཐསྶ པིཏུནོ རོགོ ཨུཔྤཛྫི. སོ པུཏྟཾ དཊྛུཀཱམོ ཧུཏྭཱ ཏཾ པཀྐོསིཏུཾ སམཏྠཾ ཀཉྩི ཨལབྷིཏྭཱ པུཏྟསོཀེན ཝིཔྤལཔནྟོཡེཝ ཨཱསནྣམརཎོ ཧུཏྭཱ ‘‘ཨིདཾ མེ པུཏྟསྶ པཏྟཙཱིཝརམཱུལཾ ཀརེཡྻཱསཱི’’ཏི ཀཧཱཔཎསཏཾ ཀནིཊྛསྶ ཧཏྠེ དཏྭཱ ཀཱལམཀཱསི. སོ དཧརསྶ ཨཱགཏཀཱལེ པཱདམཱུལེ ནིཔཏིཏྭཱ པཝཊྚེནྟོ རོདིཏྭཱ, ‘‘བྷནྟེ, པིཏཱ ཏེ ཝིཔྤལཔནྟོཝ ཀཱལཀཏོ, མཡ྄ཧཾ པན ཏེན ཀཧཱཔཎསཏཾ ཧཏྠེ ཋཔིཏཾ, ཏེན ཀིཾ ཀརོམཱི’’ཏི ཨཱཧ. དཧརོ ‘‘ན མེ ཀཧཱཔཎེཧི ཨཏྠོ’’ཏི པཊིཀྑིཔིཏྭཱ ཨཔརབྷཱགེ ཙིནྟེསི – ‘‘ཀིཾ མེ པརཀུལེསུ པིཎྜཱཡ ཙརིཏྭཱ ཛཱིཝིཏེན, སཀྐཱ ཏཾ ཀཧཱཔཎསཏཾ ནིསྶཱཡ ཛཱིཝིཏུཾ, ཝིབྦྷམིསྶཱམཱི’’ཏི. སོ ཨནབྷིརཏིཡཱ པཱིལི༹ཏོ ཝིསྶཊྛསཛ྄ཛྷཱཡནཀམྨཊྛཱནོ པཎྜུརོགཱི ཝིཡ ཨཧོསི. ཨཐ ནཾ དཧརསཱམཎེརཱ ‘‘ཀིཾ ཨིད’’ནྟི པུཙྪིཏྭཱ ‘‘ཨུཀྐཎྛིཏོམྷཱི’’ཏི ཝུཏྟེ ཨཱཙརིཡུཔཛ྄ཛྷཱཡཱནཾ ཨཱཙིཀྑིཾསུ. ཨཐ ནཾ ཏེ སཏྠུ སནྟིཀཾ ནེཏྭཱ སཏྠུ དསྶེསུཾ. སཏྠཱ ‘‘སཙྩཾ ཀིར ཏྭཾ ཨུཀྐཎྛིཏོ’’ཏི པུཙྪིཏྭཱ, ‘‘ཨཱམ, བྷནྟེ’’ཏི ཝུཏྟེ ‘‘ཀསྨཱ ཨེཝམཀཱསི, ཨཏྠི པན ཏེ ཀོཙི ཛཱིཝིཏཔཙྩཡོ’’ཏི ཨཱཧ. ‘‘ཨཱམ, བྷནྟེ’’ཏི. ‘‘ཀིཾ ཏེ ཨཏྠཱི’’ཏི? ‘‘ཀཧཱཔཎསཏཾ, བྷནྟེ’’ཏི. ཏེན ཧི ཀཏྠཙི ཏཱཝ སཀྑརཱ ཨཱཧར, གཎེཏྭཱ ཛཱནིསྶཱམ ‘‘སཀྐཱ ཝཱ ཏཱཝཏྟཀེན ཛཱིཝིཏུཾ, ནོ ཝཱ’’ཏི. སོ སཀྑརཱ ཨཱཧརི. ཨཐ ནཾ སཏྠཱ ཨཱཧ – ‘‘པརིབྷོགཏྠཱཡ ཏཱཝ པཎྞཱསཾ ཋཔེཧི, དྭིནྣཾ གོཎཱནཾ ཨཏྠཱཡ ཙཏུཝཱིསཏི, ཨེཏྟཀཾ ནཱམ བཱིཛཏྠཱཡ, ཡུགནངྒལཏྠཱཡ, ཀུདྡཱལཝཱསིཕརསུཨཏྠཱཡཱ’’ཏི ཨེཝཾ གཎིཡམཱནེ ཏཾ ཀཧཱཔཎསཏཾ ནཔྤཧོཏི. ཨཐ ནཾ སཏྠཱ ‘‘བྷིཀྑུ ཏཝ ཀཧཱཔཎཱ ཨཔྤཀཱ, ཀཐཾ ཨེཏེ ནིསྶཱཡ ཏཎྷཾ པཱུརེསྶསི, ཨཏཱིཏེ ཀིར ཙཀྐཝཏྟིརཛྫཾ ཀཱརེཏྭཱ ཨཔྥོཊིཏམཏྟེན དྭཱདསཡོཛནཊྛཱནེ ཀཊིཔྤམཱཎེན རཏནཝསྶཾ ཝསྶཱཔེཏུཾ སམཏྠོ ཡཱཝ ཚཏྟིཾས སཀྐཱ ཙཝནྟི, ཨེཏྟཀཾ ཀཱལཾ དེཝརཛྫཾ ཀཱརེཏྭཱཔི མརཎཀཱལེ ཏཎྷཾ ཨཔཱུརེཏྭཱཝ ཀཱལམཀཱསཱི’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརིཏྭཱ མནྡྷཱཏུཛཱཏཀཾ (ཛཱ. ༡.༣.༢༢) ཝིཏྠཱརེཏྭཱ –

‘‘ཡཱཝཏཱ ཙནྡིམསཱུརིཡཱ པརིཧརནྟི, དིསཱ བྷནྟི ཝིརོཙནཱ;

སབྦེཝ དཱསཱ མནྡྷཱཏུ, ཡེ པཱཎཱ པཐཝིསྶིཏཱ’’ཏི. –

ཨིམིསྶཱ གཱཐཱཡ ཨནནྟརཱ ཨིམཱ དྭེ གཱཐཱ ཨབྷཱསི –

༡༨༦.

‘‘ན ཀཧཱཔཎཝསྶེན, ཏིཏྟི ཀཱམེསུ ཝིཛྫཏི;

ཨཔྤསྶཱདཱ དུཁཱ ཀཱམཱ, ཨིཏི ཝིཉྙཱཡ པཎྜིཏོ.

༡༨༧.

‘‘ཨཔི དིབྦེསུ ཀཱམེསུ, རཏིཾ སོ ནཱདྷིགཙྪཏི;

ཏཎྷཀྑཡརཏོ ཧོཏི, སམྨཱསམྦུདྡྷསཱཝཀོ’’ཏི.

ཏཏྠ ཀཧཱཔཎཝསྶེནཱཏི ཡཾ སོ ཨཔྥོཊེཏྭཱ སཏྟརཏནཝསྶཾ ཝསྶཱཔེསི, ཏཾ ཨིདྷ ཀཧཱཔཎཝསྶནྟི ཝུཏྟཾ. ཏེནཔི ཧི ཝཏྠུཀཱམཀིལེསཀཱམེསུ ཏིཏྟི ནཱམ ནཏྠི. ཨེཝཾ དུཔྤཱུརཱ ཨེསཱ ཏཎྷཱ. ཨཔྤསྶཱདཱཏི སུཔིནསདིསཏཱཡ པརིཏྟསུཁཱ. དུཁཱཏི དུཀྑཀྑནྡྷཱདཱིསུ ཨཱགཏདུཀྑཝསེན པན བཧུདུཀྑཱཝ. ཨིཏི ཝིཉྙཱཡཱཏི ཨེཝམེཏེ ཀཱམེ ཛཱནིཏྭཱ. ཨཔི དིབྦེསཱུཏི སཙེ ཧི དེཝཱནཾ ཨུཔཀཔྤནཀཀཱམེཧི ནིམནྟེཡྻཱཔི ཨཱཡསྨཱ སམིདྡྷི ཝིཡ ཨེཝམྤི ཏེསུ ཀཱམེསུ རཏིཾ ན ཝིནྡཏིཡེཝ. ཏཎྷཀྑཡརཏོཏི ཨརཧཏྟེ ཙེཝ ནིབྦཱནེ ཙ ཨབྷིརཏོ ཧོཏི, ཏཾ པཏྠཡམཱནོ ཝིཧརཏི. སམྨཱསམྦུདྡྷསཱཝཀོཏི སམྨཱསམྦུདྡྷེན དེསིཏསྶ དྷམྨསྶ སཝནེན ཛཱཏོ ཡོགཱཝཙརབྷིཀྑཱུཏི.

དེསནཱཝསཱནེ སོ བྷིཀྑུ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

ཨནབྷིརཏབྷིཀྑུཝཏྠུ པཉྩམཾ.

༦. ཨགྒིདཏྟབྲཱཧྨཎཝཏྠུ

བཧུཾ ཝེ སརཎཾ ཡནྟཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཝཱལིཀརཱསིམྷི ནིསིནྣཾ ཨགྒིདཏྟཾ ནཱམ ཀོསལརཉྙོ པུརོཧིཏཾ ཨཱརབྦྷ ཀཐེསི.

སོ ཀིར མཧཱཀོསལསྶ པུརོཧིཏོ ཨཧོསི. ཨཐ ནཾ པིཏརི ཀཱལཀཏེ རཱཛཱ པསེནདི ཀོསལོ ‘‘པིཏུ མེ པུརོཧིཏོ’’ཏི གཱརཝེན ཏསྨིཾཡེཝ ཋཱནེ ཋཔེཏྭཱ ཏསྶ ཨཏྟནོ ཨུཔཊྛཱནཾ ཨཱགཏཀཱལེ པཙྩུགྒམནཾ ཀརོཏི, ‘‘ཨཱཙརིཡ, ཨིདྷ ནིསཱིདཐཱ’’ཏི སམཱནཱསནཾ དཱཔེསི. སོ ཙིནྟེསི – ‘‘ཨཡཾ རཱཛཱ མཡི ཨཏིཝིཡ གཱརཝཾ ཀརོཏི, ན ཁོ པན རཱཛཱུནཾ ནིཙྩཀཱལམེཝ སཀྐཱ ཙིཏྟཾ གཧེཏུཾ. སམཱནཝཡེནེཝ ཧི སདྡྷིཾ རཛྫསུཁཾ ནཱམ སུཁཾ ཧོཏི, ཨཧཉྩམྷི མཧལླཀོ, པབྦཛིཏུཾ མེ ཡུཏྟ’’ནྟི. སོ རཱཛཱནཾ པབྦཛྫཾ ཨནུཛཱནཱཔེཏྭཱ ནགརེ བྷེརིཾ ཙརཱཔེཏྭཱ སཏྟཱཧེན སབྦཾ ཨཏྟནོ དྷནཾ དཱནམུཁེ ཝིསྶཛྫེཏྭཱ བཱཧིརཀཔབྦཛྫཾ པབྦཛི. ཏཾ ནིསྶཱཡ དས པུརིསསཧསྶཱནི ཨནུཔབྦཛིཾསུ. སོ ཏེཧི སདྡྷིཾ ཨངྒམགདྷཱནཉྩ ཀུརུརཊྛསྶ ཙ ཨནྟརེ ཝཱསཾ ཀཔྤེཏྭཱ ཨིམཾ ཨོཝཱདཾ དེཏི, ‘‘ཏཱཏཱ, ཡསྶ ཀཱམཝིཏཀྐཱདཡོ ཨུཔྤཛྫནྟི, སོ ནདིཏོ ཨེཀེཀཾ ཝཱལུཀཔུཊཾ ཨུདྡྷརིཏྭཱ ཨིམསྨིཾ ཨོཀིརཏཱུ’’ཏི. ཏེ ‘‘སཱདྷཱུ’’ཏི པཊིསྶུཎིཏྭཱ ཀཱམཝིཏཀྐཱདཱིནཾ ཨུཔྤནྣཀཱལེ ཏཐཱ ཀརིཾསུ. ཨཔརེན སམཡེན མཧཱཝཱལུཀརཱསི ཨཧོསི, ཏཾ ཨཧིཚཏྟོ ནཱམ ནཱགརཱཛཱ པཊིགྒཧེསི. ཨངྒམགདྷཝཱསིནོ ཙེཝ ཀུརུརཊྛཝཱསིནོ ཙ མཱསེ མཱསེ ཏེསཾ མཧནྟཾ སཀྐཱརཾ ཨབྷིཧརིཏྭཱ དཱནཾ དེནྟི. ཨཐ ནེསཾ ཨགྒིདཏྟོ ཨིམཾ ཨོཝཱདཾ ཨདཱསི – ‘‘པབྦཏཾ སརཎཾ ཡཱཐ, ཝནཾ སརཎཾ ཡཱཐ, ཨཱརཱམཾ སརཎཾ ཡཱཐ, རུཀྑཾ སརཎཾ ཡཱཐ, ཨེཝཾ སབྦདུཀྑཏོ མུཙྩིསྶཐཱ’’ཏི. ཨཏྟནོ ཨནྟེཝཱསིཀེཔི ཨིམིནཱ ཨོཝཱདེན ཨོཝདི.

བོདྷིསཏྟོཔི ཀཏཱབྷིནིཀྑམནོ སམྨཱསམྦོདྷིཾ པཏྭཱ ཏསྨིཾ སམཡེ སཱཝཏྠིཾ ནིསྶཱཡ ཛེཏཝནེ ཝིཧརནྟོ པཙྩཱུསཀཱལེ ལོཀཾ ཝོལོཀེནྟོ ཨགྒིདཏྟབྲཱཧྨཎཾ སདྡྷིཾ ཨནྟེཝཱསིཀེཧི ཨཏྟནོ ཉཱཎཛཱལསྶ ཨནྟོ པཝིཊྛཾ དིསྭཱ ‘‘སབྦེཔི ཨིམེ ཨརཧཏྟསྶ ཨུཔནིསྶཡསམྤནྣཱ’’ཏི ཉཏྭཱ སཱཡནྷསམཡེ མཧཱམོགྒལླཱནཏྠེརཾ ཨཱཧ – ‘‘མོགྒལླཱན, ཀིཾ པསྶསི ཨགྒིདཏྟབྲཱཧྨཎཾ མཧཱཛནཾ ཨཏིཏྠེ པཀྑནྡཱཔེནྟཾ, གཙྪ ཏེསཾ ཨོཝཱདཾ དེཧཱི’’ཏི. བྷནྟེ, བཧཱུ ཨེཏེ, ཨེཀཀསྶ མཡ྄ཧཾ ཨཝིསཡ྄ཧཱ. སཙེ ཏུམྷེཔི ཨཱགམིསྶཐ, ཝིསཡ྄ཧཱ བྷཝིསྶནྟཱིཏི. མོགྒལླཱན, ཨཧམྤི ཨཱགམིསྶཱམི, ཏྭཾ པུརཏོ ཡཱཧཱིཏི. ཐེརོ པུརཏོ གཙྪནྟོཝ ཙིནྟེསི – ‘‘ཨེཏེ བལཝནྟོ ཙེཝ བཧཱུ ཙ. སཙེ སབྦེསཾ སམཱགམཊྛཱནེ ཀིཉྩི ཀཐེསྶཱམི, སབྦེཔི ཝགྒཝགྒེན ཨུཊྛཧེཡྻུ’’ནྟི ཨཏྟནོ ཨཱནུབྷཱཝེན ཐཱུལཕུསིཏཀཾ དེཝཾ ཝུཊྛཱཔེསི. ཏེ ཐཱུལཕུསིཏཀེསུ པཏནྟེསུ ཨུཊྛཱཡུཊྛཱཡ ཨཏྟནོ ཨཏྟནོ པཎྞསཱལཾ པཝིསིཾསུ. ཐེརོ ཨགྒིདཏྟསྶ བྲཱཧྨཎསྶ པཎྞསཱལདྭཱརེ ཋཏྭཱ ‘‘ཨགྒིདཏྟཱ’’ཏི ཨཱཧ. སོ ཐེརསྶ སདྡཾ སུཏྭཱ ‘‘མཾ ཨིམསྨིཾ ལོཀེ ནཱམེན ཨཱལཔིཏུཾ སམཏྠོ ནཱམ ནཏྠི, ཀོ ནུ ཁོ མཾ ནཱམེན ཨཱལཔཏཱི’’ཏི མཱནཐདྡྷཏཱཡ ‘‘ཀོ ཨེསོ’’ཏི ཨཱཧ. ‘‘ཨཧཾ, བྲཱཧྨཎཱ’’ཏི. ‘‘ཀིཾ ཝདེསཱི’’ཏི? ‘‘ཨཛྫ མེ ཨེཀརཏྟིཾ ཨིདྷ ཝསནཊྛཱནཾ ཏྭཾ ཨཱཙིཀྑཱཧཱི’’ཏི. ‘‘ཨིདྷ ཝསནཊྛཱནཾ ནཏྠི, ཨེཀསྶ ཨེཀཱཝ པཎྞསཱལཱ’’ཏི. ‘‘ཨགྒིདཏྟ, མནུསྶཱ ནཱམ མནུསྶཱནཾ, གཱཝོ གུནྣཾ, པབྦཛིཏཱ པབྦཛིཏཱནཾ སནྟིཀཾ གཙྪནྟི, མཱ ཨེཝཾ ཀརི, དེཧི མེ ཝསནཊྛཱན’’ནྟི. ‘‘ཀིཾ པན ཏྭཾ པབྦཛིཏོ’’ཏི? ‘‘ཨཱམ, པབྦཛིཏོམྷཱི’’ཏི. ‘‘སཙེ པབྦཛིཏོ, ཀཧཾ ཏེ ཁཱརིབྷཎྜཾ, ཀོ པབྦཛིཏཔརིཀྑཱརོ’’ཏི. ‘‘ཨཏྠི མེ པརིཀྑཱརོ, ཝིསུཾ པན ནཾ གཧེཏྭཱ ཝིཙརིཏུཾ དུཀྑནྟི ཨབྦྷནྟརེནེཝ ནཾ གཧེཏྭཱ ཝིཙརཱམི, བྲཱཧྨཎཱ’’ཏི. སོ ‘‘ཏཾ གཧེཏྭཱ ཝིཙརིསྶསཱི’’ཏི ཐེརསྶ ཀུཛ྄ཛྷི. ཨཐ ནཾ སོ ཨཱཧ – ‘‘ཨམྷེ, ཨགྒིདཏྟ, མཱ ཀུཛ྄ཛྷི, ཝསནཊྛཱནཾ མེ ཨཱཙིཀྑཱཧཱི’’ཏི. ནཏྠི ཨེཏྠ ཝསནཊྛཱནནྟི. ཨེཏསྨིཾ པན ཝཱལུཀརཱསིམྷི ཀོ ཝསཏཱིཏི. ཨེཀོ, ནཱགརཱཛཱཏི. ཨེཏཾ མེ དེཧཱིཏི. ན སཀྐཱ དཱཏུཾ, བྷཱརིཡཾ ཨེཏསྶ ཀམྨནྟི. ཧོཏུ, དེཧི མེཏི. ཏེན ཧི ཏྭཾ ཨེཝ ཛཱནཱཧཱིཏི.

ཐེརོ ཝཱལུཀརཱསིཨབྷིམུཁོ པཱཡཱསི. ནཱགརཱཛཱ ཏཾ ཨཱགཙྪནྟཾ དིསྭཱ ‘‘ཨཡཾ སམཎོ ཨིཏོ ཨཱགཙྪཏི, ན ཛཱནཱཏི མཉྙེ མམ ཨཏྠིབྷཱཝཾ, དྷཱུམཱཡིཏྭཱ ནཾ མཱརེསྶཱམཱི’’ཏི དྷཱུམཱཡི. ཐེརོ ‘‘ཨཡཾ ནཱགརཱཛཱ ‘ཨཧམེཝ དྷཱུམཱཡིཏུཾ སཀྐོམི, ཨཉྙེ ན སཀྐོནྟཱི’ཏི མཉྙེ སལླཀྑེཏཱི’’ཏི སཡམྤི དྷཱུམཱཡི. དྭིནྣམྤི སརཱིརཏོ ཨུགྒཏཱ དྷཱུམཱ ཡཱཝ བྲཧྨལོཀཱ ཨུཊྛཧིཾསུ. ཨུབྷོཔི དྷཱུམཱ ཐེརཾ ཨབཱདྷེཏྭཱ ནཱགརཱཛཱནམེཝ བཱདྷེནྟི. ནཱགརཱཛཱ དྷཱུམཝེགཾ སཧིཏུཾ ཨསཀྐོནྟོ པཛྫལི. ཐེརོཔི ཏེཛོདྷཱཏུཾ སམཱཔཛྫིཏྭཱ ཏེན སདྡྷིཾཡེཝ པཛྫལི. ཨགྒིཛཱལཱ ཡཱཝ བྲཧྨལོཀཱ ཨུཊྛཧིཾསུ. ཨུབྷོཔི ཐེརཾ ཨབཱདྷེཏྭཱ ནཱགརཱཛཱནམེཝ བཱདྷཡིཾསུ. ཨཐསྶ སཀལསརཱིརཾ ཨུཀྐཱཧི པདིཏྟཾ ཝིཡ ཨཧོསི. ཨིསིགཎོ ཨོལོཀེཏྭཱ ཙིནྟེསི – ‘‘ནཱགརཱཛཱ, སམཎཾ ཛྷཱཔེཏི, བྷདྡཀོ ཝཏ སམཎོ ཨམྷཱཀཾ ཝཙནཾ ཨསུཏྭཱ ནཊྛོ’’ཏི. ཐེརོ ནཱགརཱཛཱནཾ དམེཏྭཱ ནིབྦིསེཝནཾ ཀཏྭཱ ཝཱལུཀརཱསིམྷི ནིསཱིདི. ནཱགརཱཛཱ ཝཱལུཀརཱསིཾ བྷོགེཧི པརིཀྑིཔིཏྭཱ ཀཱུཊཱགཱརཀུཙྪིཔམཱཎཾ ཕཎཾ མཱཔེཏྭཱ ཐེརསྶ ཨུཔརི དྷཱརེསི.

ཨིསིགཎཱ པཱཏོཝ ‘‘སམཎསྶ མཏབྷཱཝཾ ཝཱ ཨམཏབྷཱཝཾ ཝཱ ཛཱནིསྶཱམཱ’’ཏི ཐེརསྶ སནྟིཀཾ གནྟྭཱ ཏཾ ཝཱལུཀརཱསིམཏྠཀེ ནིསིནྣཾ དིསྭཱ ཨཉྫལིཾ པགྒཡ྄ཧ ཨབྷིཏྠཝནྟཱ ཨཱཧཾསུ – ‘‘སམཎ, ཀཙྩི ནཱགརཱཛེན ན བཱདྷིཏོ’’ཏི. ‘‘ཀིཾ ན པསྶཐ མམ ཨུཔརིཕཎཾ དྷཱརེཏྭཱ ཋིཏ’’ནྟི? ཏེ ‘‘ཨཙྪརིཡཾ ཝཏ བྷོ, སམཎསྶ ཨེཝརཱུཔོ ནཱམ ནཱགརཱཛཱ དམིཏོ’’ཏི ཐེརཾ པརིཝཱརེཏྭཱ ཨཊྛཾསུ. ཏསྨིཾ ཁཎེ སཏྠཱ ཨཱགཏོ. ཐེརོ སཏྠཱརཾ དིསྭཱ ཨུཊྛཱཡ ཝནྡི. ཨཐ ནཾ ཨིསཡོ ཨཱཧཾསུ – ‘‘ཨཡམྤི ཏཡཱ མཧནྟཏརོ’’ཏི. ཨེསོ བྷགཝཱ སཏྠཱ, ཨཧཾ ཨིམསྶ སཱཝཀོཏི. སཏྠཱ ཝཱལུཀརཱསིམཏྠཀེ ནིསཱིདི, ཨིསིགཎོ ‘‘ཨཡཾ ཏཱཝ སཱཝཀསྶ ཨཱནུབྷཱཝོ, ཨིམསྶ པན ཨཱནུབྷཱཝོ ཀཱིདིསོ བྷཝིསྶཏཱི’’ཏི ཨཉྫལིཾ པགྒཡ྄ཧ སཏྠཱརཾ ཨབྷིཏྠཝི. སཏྠཱ ཨགྒིདཏྟཾ ཨཱམནྟེཏྭཱ ཨཱཧ – ‘‘ཨགྒིདཏྟ, ཏྭཾ ཏཝ སཱཝཀཱནཉྩ ཨུཔཊྛཱཀཱནཉྩ ཨོཝཱདཾ དདམཱནོ ཀིནྟི ཝཏྭཱ དེསཱི’’ཏི. ‘‘ཨེཏཾ པབྦཏཾ སརཎཾ གཙྪཐ, ཝནཾ ཨཱརཱམཾ རུཀྑཾ སརཎཾ གཙྪཐ. ཨེཏཱནི ཧི སརཎཾ གཏོ སབྦདུཀྑཱ པམུཙྩཏཱི’’ཏི ཨེཝཾ ཏེསཾ ཨོཝཱདཾ དམྨཱིཏི. སཏྠཱ ‘‘ན ཁོ, ཨགྒིདཏྟ, ཨེཏཱནི སརཎཾ གཏོ སབྦདུཀྑཱ པམུཙྩཏི, བུདྡྷཾ དྷམྨཾ སངྒྷཾ པན སརཎཾ གནྟྭཱ སཀལཝཊྚདུཀྑཱ པམུཙྩཏཱི’’ཏི ཝཏྭཱ ཨིམཱ གཱཐཱ ཨབྷཱསི –

༡༨༨.

‘‘བཧུཾ ཝེ སརཎཾ ཡནྟི, པབྦཏཱནི ཝནཱནི ཙ;

ཨཱརཱམརུཀྑཙེཏྱཱནི, མནུསྶཱ བྷཡཏཛྫིཏཱ.

༡༨༩.

‘‘ནེཏཾ ཁོ སརཎཾ ཁེམཾ, ནེཏཾ སརཎམུཏྟམཾ;

ནེཏཾ སརཎམཱགམྨ, སབྦདུཀྑཱ པམུཙྩཏི.

༡༩༠.

‘‘ཡོ ཙ བུདྡྷཉྩ དྷམྨཉྩ, སངྒྷཉྩ སརཎཾ གཏོ;

ཙཏྟཱརི ཨརིཡསཙྩཱནི, སམྨཔྤཉྙཱཡ པསྶཏི.

༡༩༡.

‘‘དུཀྑཾ དུཀྑསམུཔྤཱདཾ, དུཀྑསྶ ཙ ཨཏིཀྐམཾ;

ཨརིཡཾ ཙཊྛངྒིཀཾ མགྒཾ, དུཀྑཱུཔསམགཱམིནཾ.

༡༩༢.

‘‘ཨེཏཾ ཁོ སརཎཾ ཁེམཾ, ཨེཏཾ སརཎམུཏྟམཾ;

ཨེཏཾ སརཎམཱགམྨ, སབྦདུཀྑཱ པམུཙྩཏཱི’’ཏི.

ཏཏྠ བཧུནྟི བཧུ. པབྦཏཱནཱིཏི ཏཏྠ ཏཏྠ ཨིསིགིལིཝེཔུལླཝེབྷཱརཱདིཀེ པབྦཏེ ཙ མཧཱཝནགོསིངྒསཱལཝནཱདཱིནི ཝནཱནི ཙ ཝེལུ༹ཝནཛཱིཝཀམྦཝནཱདཡོ ཨཱརཱམེ ཙ ཨུདེནཙེཏིཡགོཏམཙེཏིཡཱདཱིནི རུཀྑཙེཏྱཱནི ཙ ཏེ ཏེ མནུསྶཱ ཏེན ཏེན བྷཡེན ཏཛྫིཏཱ བྷཡཏོ མུཙྩིཏུཀཱམཱ པུཏྟལཱབྷཱདཱིནི ཝཱ པཏྠཡམཱནཱ སརཎཾ ཡནྟཱིཏི ཨཏྠོ. ནེཏཾ སརཎནྟི ཨེཏཾ སབྦམྤི སརཎཾ ནེཝ ཁེམཾ ན ཨུཏྟམཾ, ན ཙ ཨེཏཾ པཊིཙྩ ཛཱཏིཨཱདིདྷམྨེསུ སཏྟེསུ ཨེཀོཔི ཛཱཏིཨཱདིཏོ སབྦདུཀྑཱ པམུཙྩཏཱིཏི ཨཏྠོ.

ཡོ ཙཱཏི ཨིདཾ ཨཁེམཾ ཨནུཏྟམཾ སརཎཾ དསྶེཏྭཱ ཁེམཾ ཨུཏྟམཾ སརཎཾ དསྶནཏྠཾ ཨཱརདྡྷཾ. ཏསྶཏྠོ – ཡོ ཙ གཧཊྛོ ཝཱ པབྦཛིཏོ ཝཱ ‘‘ཨིཏིཔི སོ བྷགཝཱ ཨརཧཾ སམྨཱསམྦུདྡྷོ’’ཏིཨཱདིཀཾ བུདྡྷདྷམྨསངྒྷཱནུསྶཏིཀམྨཊྛཱནཾ ནིསྶཱཡ སེཊྛཝསེན བུདྡྷཉྩ དྷམྨཉྩ སངྒྷཉྩ སརཎཾ གཏོ, ཏསྶཔི ཏཾ སརཎགམནཾ ཨཉྙཏིཏྠིཡཝནྡནཱདཱིཧི ཀུཔྤཏི ཙལཏི. ཏསྶ པན ཨཙལབྷཱཝཾ དསྶེཏུཾ མགྒེན ཨཱགཏསརཎམེཝ པཀཱསནྟོ ཙཏྟཱརི ཨརིཡསཙྩཱནི སམྨཔྤཉྙཱཡ པསྶཏཱིཏི ཨཱཧ. ཡོ ཧི ཨེཏེསཾ སཙྩཱནཾ དསྶནཝསེན ཨེཏཱནི སརཎཾ གཏོ, ཨེཏསྶ ཨེཏཾ སརཎཾ ཁེམཉྩ ཨུཏྟམཉྩ, སོ ཙ པུགྒལོ ཨེཏཾ སརཎཾ པཊིཙྩ སཀལསྨཱཔི ཝཊྚདུཀྑཱ པམུཙྩཏི, ཏསྨཱ ཨེཏཾ ཁོ སརཎཾ ཁེམནྟིཨཱདི ཝུཏྟཾ.

དེསནཱཝསཱནེ སབྦེཔི ཏེ ཨིསཡོ སཧ པཊིསམྦྷིདཱཧི ཨརཧཏྟཾ པཏྭཱ སཏྠཱརཾ ཝནྡིཏྭཱ པབྦཛྫཾ ཡཱཙིཾསུ. སཏྠཱཔི ཙཱིཝརགབྦྷཏོ ཧཏྠཾ པསཱརེཏྭཱ ‘‘ཨེཐ བྷིཀྑཝོ, ཙརཐ བྲཧྨཙརིཡ’’ནྟི ཨཱཧ. ཏེ ཏངྑཎེཡེཝ ཨཊྛཔརིཀྑཱརདྷརཱ ཝསྶསཊྛིཀཐེརཱ ཝིཡ ཨཧེསུཾ. སོ ཙ སབྦེསམྤི ཨངྒམགདྷཀུརུརཊྛཝཱསཱིནཾ སཀྐཱརཾ ཨཱདཱཡ ཨཱགམནདིཝསོ ཨཧོསི. ཏེ སཀྐཱརཾ ཨཱདཱཡ ཨཱགཏཱ སབྦེཔི ཏེ ཨིསཡོ པབྦཛིཏེ དིསྭཱ ‘‘ཀིཾ ནུ ཁོ ཨམྷཱཀཾ ཨགྒིདཏྟབྲཱཧྨཎོ མཧཱ, ཨུདཱཧུ སམཎོ གོཏམོ’’ཏི ཙིནྟེཏྭཱ སམཎསྶ གོཏམསྶ ཨཱགཏཏྟཱ ‘‘ཨགྒིདཏྟོཝ མཧཱ’’ཏི མཉྙིཾསུ. སཏྠཱ ཏེསཾ ཨཛ྄ཛྷཱསཡཾ ཨོལོཀེཏྭཱ, ‘‘ཨགྒིདཏྟ, པརིསཱཡ ཀངྑཾ ཚིནྡཱ’’ཏི ཨཱཧ. སོ ‘‘ཨཧམྤི ཨེཏྟཀམེཝ པཙྩཱསཱིསཱམཱི’’ཏི ཨིདྡྷིབལེན སཏྟཀྑཏྟུཾ ཝེཧཱསཾ ཨབྦྷུགྒནྟྭཱ པུནཔྤུནཾ ཨོརུཡ྄ཧ སཏྠཱརཾ ཝནྡིཏྭཱ ‘‘སཏྠཱ མེ, བྷནྟེ, བྷགཝཱ, སཱཝཀོཧམསྨཱི’’ཏི ཝཏྭཱ སཱཝཀཏྟཾ པཀཱསེསཱིཏི.

ཨགྒིདཏྟབྲཱཧྨཎཝཏྠུ ཚཊྛཾ.

༧. ཨཱནནྡཏྠེརཔཉྷཝཏྠུ

དུལླབྷོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཱནནྡཏྠེརསྶ པཉྷཾ ཨཱརབྦྷ ཀཐེསི.

ཐེརོ ཧི ཨེཀདིཝསཾ དིཝཱཊྛཱནེ ནིསིནྣོ ཙིནྟེསི – ‘‘ཧཏྠཱཛཱནཱིཡོ ཚདྡནྟཀུལེ ཝཱ ཨུཔོསཐཀུལེ ཝཱ ཨུཔྤཛྫཏི, ཨསྶཱཛཱནཱིཡོ སིནྡྷཝཀུལེ ཝཱ ཝལཱཧཀསྶརཱཛཀུལེ ཝཱ, ཨུསབྷོ གོཨཱཛནཱིཡོ དཀྑིཎཔཐེཏིཨཱདཱིནི ཝདནྟེན སཏྠཱརཱ ཧཏྠིཨཱཛཱནཱིཡཱདཱིནཾ ཨུཔྤཏྟིཊྛཱནཱདཱིནི ཀཐིཏཱནི, པུརིསཱཛཱནཱིཡོ པན ཀཧཾ ནུ ཁོ ཨུཔྤཛྫཏཱི’’ཏི. སོ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསཱིདིཏྭཱ ཨེཏམཏྠཾ པུཙྪི. སཏྠཱ, ‘‘ཨཱནནྡ, པུརིསཱཛཱནཱིཡོ ནཱམ སབྦཏྠ ནུཔྤཛྫཏི, ཨུཛུཀཏོ པན ཏིཡོཛནསཏཱཡཱམེ ཝིཏྠཱརཏོ ཨཌྜྷཏེཡྻསཏེ ཨཱཝཊྚཏོ ནཝཡོཛནསཏཔྤམཱཎེ མཛ྄ཛྷིམཔདེསཊྛཱནེ ཨུཔྤཛྫཏི. ཨུཔྤཛྫནྟོ ཙ པན ན ཡསྨིཾ ཝཱ ཏསྨིཾ ཝཱ ཀུལེ ཨུཔྤཛྫཏི, ཁཏྟིཡམཧཱསཱལབྲཱཧྨཎམཧཱསཱལཀུལཱནཾ པན ཨཉྙཏརསྨིཾཡེཝ ཨུཔྤཛྫཏཱི’’ཏི ཝཏྭཱ ཨིམཾ གཱཐམཱཧ –

༡༩༣.

‘‘དུལླབྷོ པུརིསཱཛཉྙོ, ན སོ སབྦཏྠ ཛཱཡཏི;

ཡཏྠ སོ ཛཱཡཏཱི དྷཱིརོ, ཏཾ ཀུལཾ སུཁམེདྷཏཱི’’ཏི.

ཏཏྠ དུལླབྷོཏི པུརིསཱཛཉྙོ ཧི དུལླབྷོ, ན ཧཏྠིཨཱཛཱནཱིཡཱདཡོ ཝིཡ སུལབྷོ, སོ སབྦཏྠ པཙྩནྟདེསེ ཝཱ ནཱིཙཀུལེ ཝཱ ན ཛཱཡཏི, མཛ྄ཛྷིམདེསེཔི མཧཱཛནསྶ ཨབྷིཝཱདནཱདིསཀྐཱརཀརཎཊྛཱནེ ཁཏྟིཡབྲཱཧྨཎཀུལཱནཾ ཨཉྙཏརསྨིཾ ཀུལེ ཛཱཡཏི. ཨེཝཾ ཛཱཡམཱནོ ཡཏྠ སོ ཛཱཡཏི དྷཱིརོ ཨུཏྟམཔཉྙོ སམྨཱསམྦུདྡྷོ, ཏཾ ཀུལཾ སུཁམེདྷཏཱིཏི སུཁཔྤཏྟམེཝ ཧོཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཱནནྡཏྠེརཔཉྷཝཏྠུ སཏྟམཾ.

༨. སམྦཧུལབྷིཀྑུཝཏྠུ

སུཁོ བུདྡྷཱནནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལཱནཾ བྷིཀྑཱུནཾ ཀཐཾ ཨཱརབྦྷ ཀཐེསི.

ཨེཀདིཝསཉྷི པཉྩསཏབྷིཀྑཱུ ཨུཔཊྛཱནསཱལཱཡཾ ནིསིནྣཱ, ‘‘ཨཱཝུསོ, ཀིཾ ནུ ཁོ ཨིམསྨིཾ ལོཀེ སུཁ’’ནྟི ཀཐཾ སམུཊྛཱཔེསུཾ? ཏཏྠ ཀེཙི ‘‘རཛྫསུཁསདིསཾ སུཁཾ ནཱམ ནཏྠཱི’’ཏི ཨཱཧཾསུ. ཀེཙི ཀཱམསུཁསདིསཾ, ཀེཙི ‘‘སཱལིམཾསབྷོཛནཱདིསདིསཾ སུཁཾ ནཱམ ནཏྠཱི’’ཏི ཨཱཧཾསུ. སཏྠཱ ཏེསཾ ནིསིནྣཊྛཱནཾ གནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཀིཾ ཀཐེཐ? ཨིདཉྷི སབྦམྤི སུཁཾ ཝཊྚདུཀྑཔརིཡཱཔནྣམེཝ, ཨིམསྨིཾ ལོཀེ བུདྡྷུཔྤཱདོ དྷམྨསྶཝནཾ, སངྒྷསཱམགྒཱི, སམྨོདམཱནབྷཱཝོཏི ཨིདམེཝ སུཁ’’ནྟི ཝཏྭཱ ཨིམཾ གཱཐམཱཧ –

༡༩༤.

‘‘སུཁོ བུདྡྷཱནམུཔྤཱདོ, སུཁཱ སདྡྷམྨདེསནཱ;

སུཁཱ སངྒྷསྶ སཱམགྒཱི, སམགྒཱནཾ ཏཔོ སུཁོ’’ཏི.

ཏཏྠ བུདྡྷཱནམུཔྤཱདོཏི ཡསྨཱ བུདྡྷཱ ཨུཔྤཛྫམཱནཱ མཧཱཛནཾ རཱགཀནྟཱརཱདཱིཧི ཏཱརེནྟི, ཏསྨཱ བུདྡྷཱནཾ ཨུཔྤཱདོ སུཁོ ཨུཏྟམོ. ཡསྨཱ སདྡྷམྨདེསནཾ ཨཱགམྨ ཛཱཏིཨཱདིདྷམྨཱ སཏྟཱ ཛཱཏིཨཱདཱིཧི མུཙྩནྟི, ཏསྨཱ སདྡྷམྨདེསནཱ སུཁཱ. སཱམགྒཱིཏི སམཙིཏྟཏཱ, སཱཔི སུཁཱ ཨེཝ. སམགྒཱནཾ པན ཨེཀཙིཏྟཱནཾ ཡསྨཱ བུདྡྷཝཙནཾ ཝཱ ཨུགྒཎྷིཏུཾ དྷུཏངྒཱནི ཝཱ པརིཧརིཏུཾ སམཎདྷམྨཾ ཝཱ ཀཱཏུཾ སཀྐཱ, ཏསྨཱ སམགྒཱནཾ ཏཔོ སུཁོཏི ཝུཏྟཾ. ཏེནེཝཱཧ – ‘‘ཡཱཝཀཱིཝཉྩ, བྷིཀྑཝེ, བྷིཀྑཱུ སམགྒཱ སནྣིཔཏིསྶནྟི, སམྨགྒཱ ཝུཊྛཧིསྶནྟི, སམགྒཱ སངྒྷཀརཎཱིཡཱནི ཀརིསྶནྟི, ཝུདྡྷིཡེཝ, བྷིཀྑཝེ, བྷིཀྑཱུནཾ པཱཊིཀངྑཱ, ནོ པརིཧཱནཱི’’ཏི (དཱི. ནི. ༢.༡༣༦).

དེསནཱཝསཱནེ ཏེ བྷིཀྑཱུ ཨརཧཏྟེ པཏིཊྛཧིཾསུ, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

སམྦཧུལབྷིཀྑུཝཏྠུ ཨཊྛམཾ.

༩. ཀསྶཔདསབལསྶ སུཝཎྞཙེཏིཡཝཏྠུ

པཱུཛཱརཧེཏི ཨིམཾ དྷམྨདེསནཾ སཏྠཱ ཙཱརིཀཾ ཙརམཱནོ ཀསྶཔདསབལསྶ སུཝཎྞཙེཏིཡཾ ཨཱརབྦྷ ཀཐེསི.

ཏཐཱགཏོ སཱཝཏྠིཏོ ནིཀྑམིཏྭཱ ཨནུཔུབྦེན བཱརཱཎསིཾ གཙྪནྟོ ཨནྟརཱམགྒེ ཏོདེཡྻགཱམསྶ སམཱིཔེ མཧཱབྷིཀྑུསངྒྷཔརིཝཱརོ ཨཉྙཏརཾ དེཝཊྛཱནཾ སམྤཱཔུཎི. ཏཏྲ ནིསིནྣོ སུགཏོ དྷམྨབྷཎྜཱགཱརིཀཾ པེསེཏྭཱ ཨཝིདཱུརེ ཀསིཀམྨཾ ཀརོནྟཾ བྲཱཧྨཎཾ པཀྐོསཱཔེསི. སོ བྲཱཧྨཎོ ཨཱགནྟྭཱ ཏཐཱགཏཾ ཨནབྷིཝནྡིཏྭཱ ཏམེཝ དེཝཊྛཱནཾ ཝནྡིཏྭཱ ཨཊྛཱསི. སུགཏོཔི ‘‘ཨིམཾ པདེསཾ ཀིནྟི མཉྙསི བྲཱཧྨཎཱ’’ཏི ཨཱཧ. ཨམྷཱཀཾ པཝེཎིཡཱ ཨཱགཏཙེཏིཡཊྛཱནནྟི ཝནྡཱམི, བྷོ གོཏམཱཏི. ‘‘ཨིམཾ ཋཱནཾ ཝནྡནྟེན ཏཡཱ སཱདྷུ ཀཏཾ བྲཱཧྨཎཱ’’ཏི སུགཏོ ཏཾ སམྤཧཾསེསི. ཏཾ སུཏྭཱ བྷིཀྑཱུ ‘‘ཀེན ནུ ཁོ ཀཱརཎེན བྷགཝཱ ཨེཝཾ སམྤཧཾསེསཱི’’ཏི སཾསཡཾ སཉྫནེསུཾ. ཏཏོ ཏཐཱགཏོ ཏེསཾ སཾསཡམཔནེཏུཾ མཛ྄ཛྷིམནིཀཱཡེ གྷཊིཀཱརསུཏྟནྟཾ (མ. ནི. ༢.༢༨༢ ཨཱདཡོ) ཝཏྭཱ ཨིདྡྷཱནུབྷཱཝེན ཀསྶཔདསབལསྶ ཡོཛནུབྦེདྷཾ ཀནཀཙེཏིཡཾ ཨཔརཉྩ ཀནཀཙེཏིཡཾ ཨཱཀཱསེ ནིམྨིནིཏྭཱ མཧཱཛནཾ དསྶེཏྭཱ, ‘‘བྲཱཧྨཎ, ཨེཝཾཝིདྷཱནཾ པཱུཛཱརཧཱནཾ པཱུཛཱ ཡུཏྟཏརཱཝཱ’’ཏི ཝཏྭཱ མཧཱཔརིནིབྦཱནསུཏྟེ (དཱི. ནི. ༢.༢༠༦) དསྶིཏནཡེནེཝ བུདྡྷཱདིཀེ ཙཏྟཱརོ ཐཱུཔཱརཧེ པཀཱསེཏྭཱ སརཱིརཙེཏིཡཾ ཨུདྡིསྶཙེཏིཡཾ པརིབྷོགཙེཏིཡནྟི ཏཱིཎི ཙེཏིཡཱནི ཝིསེསཏོ པརིདཱིཔེཏྭཱ ཨིམཱ གཱཐཱ ཨབྷཱསི –

༡༩༥.

‘‘པཱུཛཱརཧེ པཱུཛཡཏོ, བུདྡྷེ ཡདི ཙ སཱཝཀེ;

པཔཉྩསམཏིཀྐནྟེ, ཏིཎྞསོཀཔརིདྡཝེ.

༡༩༦.

‘‘ཏེ ཏཱདིསེ པཱུཛཡཏོ, ནིབྦུཏེ ཨཀུཏོབྷཡེ;

ན སཀྐཱ པུཉྙཾ སངྑཱཏུཾ, ཨིམེཏྟམཔི ཀེནཙཱི’’ཏི. (ཨཔ. ཐེར ༡.༡༠.༡-༢);

ཏཏྠ པཱུཛིཏུཾ ཨརཧཱ པཱུཛཱརཧཱ, པཱུཛིཏུཾ ཡུཏྟཱཏི ཨཏྠོ. པཱུཛཱརཧེ པཱུཛཡཏོཏི ཨབྷིཝཱདནཱདཱིཧི ཙ ཙཏཱུཧི ཙ པཙྩཡེཧི པཱུཛེནྟསྶ. པཱུཛཱརཧེ དསྶེཏི བུདྡྷེཏིཨཱདིནཱ. བུདྡྷེཏི སམྨཱསམྦུདྡྷེ. ཡདཱིཏི ཡདི ཝཱ, ཨཐ ཝཱཏི ཨཏྠོ. ཏཏྠ པཙྩེཀབུདྡྷེཏི ཀཐིཏཾ ཧོཏི, སཱཝཀེ ཙ. པཔཉྩསམཏིཀྐནྟེཏི སམཏིཀྐནྟཏཎྷཱདིཊྛིམཱནཔཔཉྩེ. ཏིཎྞསོཀཔརིདྡཝེཏི ཨཏིཀྐནྟསོཀཔརིདྡཝེ, ཨིམེ དྭེ ཨཏིཀྐནྟེཏི ཨཏྠོ. ཨེཏེཧི པཱུཛཱརཧཏྟཾ དསྶིཏཾ.

ཏེཏི བུདྡྷཱདཡོ. ཏཱདིསེཏི ཝུཏྟགཧཎཝསེན. ནིབྦུཏེཏི རཱགཱདིནིབྦུཏིཡཱ. ནཏྠི ཀུཏོཙི བྷཝཏོ ཝཱ ཨཱརམྨཎཏོ ཝཱ ཨེཏེསཾ བྷཡནྟི ཨཀུཏོབྷཡཱ, ཏེ ཨཀུཏོབྷཡེ. ན སཀྐཱ པུཉྙཾ སངྑཱཏུནྟི པུཉྙཾ གཎེཏུཾ ན སཀྐཱ. ཀཐནྟི ཙེ? ཨིམེཏྟམཔི ཀེནཙཱིཏི ཨིམཾ ཨེཏྟཀཾ, ཨིམཾ ཨེཏྟཀནྟི ཀེནཙཱིཏི ཨཔིསདྡོ ཨིདྷ སམྦནྡྷིཏབྦོ, ཀེནཙི པུགྒལེན མཱནེན ཝཱ. ཏཏྠ པུགྒལེནཱཏི ཏེན བྲཧྨཱདིནཱ. མཱནེནཱཏི ཏིཝིདྷེན མཱནེན ཏཱིརཎེན དྷཱརཎེན པཱུརཎེན ཝཱ. ཏཱིརཎཾ ནཱམ ཨིདཾ ཨེཏྟཀནྟི ནཡཏོ ཏཱིརཎཾ. དྷཱརཎནྟི ཏུལཱཡ དྷཱརཎཾ. པཱུརཎཾ ནཱམ ཨཌྜྷཔསཏཔཏྠནཱལི༹ཀཱདིཝསེན པཱུརཎཾ. ཀེནཙི པུགྒལེན ཨིམེཧི ཏཱིཧི མཱནེཧི བུདྡྷཱདིཀེ པཱུཛཡཏོ པུཉྙཾ ཝིཔཱཀཝསེན གཎེཏུཾ ན སཀྐཱ པརིཡནྟརཧིཏཏོཏི དྭཱིསུ ཋཱནེསུ པཱུཛཡཏོ ཀིཾ དཱནཾ པཋམཾ དྷརམཱནེ བུདྡྷཱདཱི པཱུཛཡཏོ ན སཀྐཱ པུཉྙཾ སངྑཱཏུཾ, པུན ཏེ ཏཱདིསེ ཀིལེསཔརིནིབྦཱནནིམིཏྟེན ཁནྡྷཔརིནིབྦཱནེན ནིབྦུཏེཔི པཱུཛཡཏོ ན སཀྐཱ སངྑཱཏུནྟི བྷེདཱ ཡུཛྫནྟི. ཏེན ཧི ཝིམཱནཝཏྠུམྷི –

‘‘ཏིཊྛནྟེ ནིབྦུཏེ ཙཱཔི, སམེ ཙིཏྟེ སམཾ ཕལཾ;

ཙེཏོཔཎིདྷིཧེཏུ ཧི, སཏྟཱ གཙྪནྟི སུགྒཏི’’ནྟི. (ཝི. ཝ. ༨༠༦);

དེསནཱཝསཱནེ སོ བྲཱཧྨཎོ སོཏཱཔནྣོ ཨཧོསཱིཏི. ཡོཛནིཀཾ ཀནཀཙེཏིཡཾ སཏྟཱཧམཱཀཱསེཝ ཨཊྛཱསི, མཧནྟེན སམཱགམོ ཙཱཧོསི, སཏྟཱཧཾ ཙེཏིཡཾ ནཱནཔྤཀཱརེན པཱུཛེསུཾ. ཏཏོ བྷིནྣལདྡྷིཀཱནཾ ལདྡྷིབྷེདོ ཛཱཏོ, བུདྡྷཱནུབྷཱཝེན ཏཾ ཙེཏིཡཾ སཀཊྛཱནམེཝ གཏཾ, ཏཏྠེཝ ཏཾཁཎེ མཧནྟཾ པཱསཱཎཙེཏིཡཾ ཨཧོསི. ཏསྨིཾ སམཱགམེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསཱིཏི.

ཀསྶཔདསབལསྶ སུཝཎྞཙེཏིཡཝཏྠུ ནཝམཾ.

བུདྡྷཝགྒཝཎྞནཱ ནིཊྛིཏཱ.

ཙུདྡསམོ ཝགྒོ.

པཋམབྷཱཎཝཱརཾ ནིཊྛིཏཾ.

༡༥. སུཁཝགྒོ

༡. ཉཱཨཱཏིཀལཧཝཱུཔསམནཝཏྠུ

སུསུཁཾ ཝཏཱཏི ཨིམཾ དྷམྨདེསནཾ སཏྠཱ སཀྐེསུ ཝིཧརནྟོ ཀལཧཝཱུཔསམནཏྠཾ ཉཱཏཀེ ཨཱརབྦྷ ཀཐེསི.

སཱཀིཡཀོལིཡཱ ཀིར ཀཔིལཝཏྠུནགརསྶ ཙ ཀོལིཡནགརསྶ ཙ ཨནྟརེ རོཧིཎིཾ ནཱམ ནདིཾ ཨེཀེནེཝ ཨཱཝརཎེན བནྡྷཱཔེཏྭཱ སསྶཱནི ཀརོནྟི. ཨཐ ཛེཊྛམཱུལམཱསེ སསྶེསུ མིལཱཡནྟེསུ ཨུབྷཡནགརཝཱསིཀཱནམྤི ཀམྨཀཱརཱ སནྣིཔཏིཾསུ. ཏཏྠ ཀོལིཡནགརཝཱསིནོ ཨཱཧཾསུ – ‘‘ཨིདཾ ཨུདཀཾ ཨུབྷཡཏོ ཧརིཡམཱནཾ ནེཝ ཏུམྷཱཀཾ, ན ཨམྷཱཀཾ པཧོསྶཏི, ཨམྷཱཀཾ པན སསྶཾ ཨེཀཨུདཀེནེཝ ནིཔྥཛྫིསྶཏི, ཨིདཾ ཨུདཀཾ ཨམྷཱཀཾ དེཐཱ’’ཏི. ཨིཏརེཔི ཨཱཧཾསུ – ‘‘ཏུམྷེསུ ཀོཊྛཀེ པཱུརེཏྭཱ ཋིཏེསུ མཡཾ རཏྟསུཝཎྞནཱིལམཎིཀཱལ༹ཀཧཱཔཎེ ཙ གཧེཏྭཱ པཙྪིཔསིབྦཀཱདིཧཏྠཱ ན སཀྑིསྶཱམ ཏུམྷཱཀཾ གྷརདྭཱརེ ཝིཙརིཏུཾ, ཨམྷཱཀམྤི སསྶཾ ཨེཀཨུདཀེནེཝ ནིཔྥཛྫིསྶཏི, ཨིདཾ ཨུདཀཾ ཨམྷཱཀཾ དེཐཱ’’ཏི. ན མཡཾ དསྶཱམཱཏི. མཡམྤི ན དསྶཱམཱཏི ཨེཝཾ ཀཐཾ ཝཌྜྷེཏྭཱ ཨེཀོ ཨུཊྛཱཡ ཨེཀསྶ པཧཱརཾ ཨདཱསི, སོཔི ཨཉྙསྶཱཏི ཨེཝཾ ཨཉྙམཉྙཾ པཧརིཏྭཱ རཱཛཀུལཱནཾ ཛཱཏིཾ གྷཊྚེཏྭཱ ཀལཧཾ ཝཌྜྷཡིཾསུ.

ཀོལིཡཀམྨཀཱརཱ ཝདནྟི – ‘‘ཏུམྷེ ཀཔིལཝཏྠུཝཱསིཀེ གཧེཏྭཱ གཛྫཐ, ཡེ སོཎསིངྒཱལཱདཡོ ཝིཡ ཨཏྟནོ བྷགིནཱིཧི སདྡྷིཾ སཾཝསིཾསུ, ཨེཏེསཾ ཧཏྠིནོ ཙེཝ ཨསྶཱ ཙ ཕལཀཱཝུདྷཱནི ཙ ཨམྷཱཀཾ ཀིཾ ཀརིསྶནྟཱི’’ཏི. སཱཀིཡཀམྨཀཱརཱཔི ཝདནྟི ‘‘ཏུམྷེ ཨིདཱནི ཀུཊྛིནོ དཱརཀེ གཧེཏྭཱ གཛྫཐ, ཡེ ཨནཱཐཱ ནིགྒཏིཀཱ ཏིརཙྪཱནཱ ཝིཡ ཀོལརུཀྑེ ཝསིཾསུ, ཨེཏེསཾ ཧཏྠིནོ ཙ ཨསྶཱ ཙ ཕལཀཱཝུདྷཱནི ཙ ཨམྷཱཀཾ ཀིཾ ཀརིསྶནྟཱི’’ཏི. ཏེ གནྟྭཱ ཏསྨིཾ ཀམྨེ ནིཡུཏྟཱནཾ ཨམཙྩཱནཾ ཀཐཡིཾསུ, ཨམཙྩཱ རཱཛཀུལཱནཾ ཀཐེསུཾ. ཏཏོ སཱཀིཡཱ ‘‘བྷགིནཱིཧི སདྡྷིཾ སཾཝསིཏཀཱནཾ ཐཱམཉྩ བལཉྩ དསྶེསྶཱམཱ’’ཏི ཡུདྡྷསཛྫཱ ནིཀྑམིཾསུ. ཀོལིཡཱཔི ‘‘ཀོལརུཀྑཝཱསཱིནཾ ཐཱམཉྩ བལཉྩ དསྶེསྶཱམཱ’’ཏི ཡུདྡྷསཛྫཱ ནིཀྑམིཾསུ.

སཏྠཱཔི པཙྩཱུསསམཡེ ལོཀཾ ཝོལོཀེནྟོ ཉཱཏཀེ དིསྭཱ ‘‘མཡི ཨགཙྪནྟེ ཨིམེ ནསྶིསྶནྟི, མཡཱ གནྟུཾ ཝཊྚཏཱི’’ཏི ཙིནྟེཏྭཱ ཨེཀཀོཝ ཨཱཀཱསེན གནྟྭཱ རོཧིཎིནདིཡཱ མཛ྄ཛྷེ ཨཱཀཱསེ པལླངྐེན ནིསཱིདི. ཉཱཏཀཱ སཏྠཱརཾ དིསྭཱ ཨཱཝུདྷཱནི ཚཌྜེཏྭཱ ཝནྡིཾསུ. ཨཐ ནེ སཏྠཱ ཨཱཧ – ‘‘ཀིཾ ཀལཧོ ནཱམེས, མཧཱརཱཛཱ’’ཏི? ‘‘ན ཛཱནཱམ, བྷནྟེ’’ཏི. ‘‘ཀོ དཱནི ཛཱནིསྶཏཱི’’ཏི? ཏེ ‘‘ཨུཔརཱཛཱ ཛཱནིསྶཏི, སེནཱཔཏི ཛཱནིསྶཏཱི’’ཏི ཨིམིནཱ ཨུཔཱཡེན ཡཱཝ དཱསཀམྨཀརེ པུཙྪིཏྭཱ, ‘‘བྷནྟེ, ཨུདཀཀལཧོ’’ཏི ཨཱཧཾསུ. ‘‘ཨུདཀཾ ཀིཾ ཨགྒྷཏི, མཧཱརཱཛཱ’’ཏི? ‘‘ཨཔྤགྒྷཾ, བྷནྟེ’’ཏི. ‘‘ཁཏྟིཡཱ ཀིཾ ཨགྒྷནྟི མཧཱརཱཛཱ’’ཏི? ‘‘ཁཏྟིཡཱ ནཱམ ཨནགྒྷཱ, བྷནྟེ’’ཏི. ‘‘ཨཡུཏྟཾ ཏུམྷཱཀཾ ཨཔྤམཏྟཏཾ ཨུདཀཾ ནིསྶཱཡ ཨནགྒྷེ ཁཏྟིཡེ ནཱསེཏུ’’ནྟི. ཏེ ཏུཎྷཱི ཨཧེསུཾ. ཨཐ ཏེ སཏྠཱ ཨཱམནྟེཏྭཱ ‘‘ཀསྨཱ མཧཱརཱཛཱ ཨེཝརཱུཔཾ ཀརོཐ, མཡི ཨསནྟེ ཨཛྫ ལོཧིཏནདཱི པཝཏྟིསྶཏི, ཨཡུཏྟཾ ཝོ ཀཏཾ, ཏུམྷེ པཉྩཧི ཝེརེཧི སཝེརཱ ཝིཧརཐ, ཨཧཾ ཨཝེརོ ཝིཧརཱམི. ཏུམྷེ ཀིལེསཱཏུརཱ ཧུཏྭཱ ཝིཧརཐ, ཨཧཾ ཨནཱཏུརོ. ཏུམྷེ ཀཱམགུཎཔརིཡེསནུསྶུཀྐཱ ཧུཏྭཱ ཝིཧརཐ, ཨཧཾ ཨནུསྶུཀྐོ ཝིཧརཱམཱི’’ཏི ཝཏྭཱ ཨིམཱ གཱཐཱ ཨབྷཱསི –

༡༩༧.

‘‘སུསུཁཾ ཝཏ ཛཱིཝཱམ, ཝེརིནེསུ ཨཝེརིནོ,

ཝེརིནེསུ མནུསྶེསུ, ཝིཧརཱམ ཨཝེརིནོ.

༡༩༨.

‘‘སུསུཁཾ ཝཏ ཛཱིཝཱམ, ཨཱཏུརེསུ ཨནཱཏུརཱ;

ཨཱཏུརེསུ མནུསྶེསུ, ཝིཧརཱམ ཨནཱཏུརཱ.

༡༩༩.

‘‘སུསུཁཾ ཝཏ ཛཱིཝཱམ, ཨུསྶུཀེསུ ཨནུསྶུཀཱ;

ཨུསྶུཀེསུ མནུསྶེསུ, ཝིཧརཱམ ཨནུསྶུཀཱ’’ཏི.

ཏཏྠ སུསུཁནྟི སུཊྛུ སུཁཾ. ཨིདཾ ཝུཏྟཾ ཧོཏི – ཡེ གིཧིནོ སནྡྷིཙྪེདཱདིཝསེན, པབྦཛིཏཱ ཝཱ པན ཝེཛྫཀམྨཱདིཝསེན ཛཱིཝིཏཝུཏྟིཾ ཨུཔྤཱདེཏྭཱ ‘‘སུཁེན ཛཱིཝཱམཱ’’ཏི ཝདནྟི, ཏེཧི མཡམེཝ སུསུཁཾ ཝཏ ཛཱིཝཱམ, ཡེ མཡཾ པཉྩཧི ཝེརཱིཧི ཝེརིནེསུ མནུསྶེསུ ཨཝེརིནོ, ཀིལེསཱཏུརེསུ མནུསྶེསུ ནིཀྐིལེསཏཱཡ ཨནཱཏུརཱ, པཉྩཀཱམགུཎཔརིཡེསནེ ཨུསྶུཀེསུ ཏཱཡ པརིཡེསནཱཡ ཨབྷཱཝེན ཨནུསྶུཀཱཏི. སེསཾ ཨུཏྟཱནཏྠམེཝ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཉཱཏིཀལཧཝཱུཔསམནཝཏྠུ པཋམཾ.

༢. མཱརཝཏྠུ

སུསུཁཾ ཝཏ ཛཱིཝཱམཱཏི ཨིམཾ དྷམྨདེསནཾ སཏྠཱ པཉྩསཱལཱཡ བྲཱཧྨཎགཱམེ ཝིཧརནྟོ མཱརཾ ཨཱརབྦྷ ཀཐེསི.

ཨེཀདིཝསཉྷི སཏྠཱ པཉྩསཏཱནཾ ཀུམཱརིཀཱནཾ སོཏཱཔཏྟིམགྒསྶཱུཔནིསྶཡཾ དིསྭཱ ཏཾ གཱམཾ ཨུཔནིསྶཱཡ ཝིཧཱསི. ཏཱཔི ཀུམཱརིཀཱཡོ ཨེཀསྨིཾ ནཀྑཏྟདིཝསེ ནདིཾ གནྟྭཱ ནྷཏྭཱ ཨལངྐཏཔཊིཡཏྟཱ གཱམཱབྷིམུཁིཡོ པཱཡིཾསུ. སཏྠཱཔི ཏཾ གཱམཾ པཝིསིཏྭཱ པིཎྜཱཡ ཙརཏི. ཨཐ མཱརོ སཀལགཱམཝཱསཱིནཾ སརཱིརེ ཨདྷིམུཙྩིཏྭཱ ཡཐཱ སཏྠཱ ཀཊཙྪུབྷཏྟམཏྟམྤི ན ལབྷཏི, ཨེཝཾ ཀཏྭཱ ཡཐཱདྷོཏེན པཏྟེན ནིཀྑམནྟཾ སཏྠཱརཾ གཱམདྭཱརེ ཋཏྭཱ ཨཱཧ – ‘‘ཨཔི, སམཎ, པིཎྜཔཱཏཾ ལབྷིཏྠཱ’’ཏི. ‘‘ཀིཾ པན ཏྭཾ, པཱཔིམ, ཏཐཱ ཨཀཱསི, ཡཐཱཧཾ པིཎྜཾ ན ལབྷེཡྻ’’ནྟི? ‘‘ཏེན ཧི, བྷནྟེ, པུན པཝིསཐཱ’’ཏི. ཨེཝཾ ཀིརསྶ ཨཧོསི – ‘‘སཙེ པུན པཝིསཏི, སབྦེསཾ སརཱིརེ ཨདྷིམུཙྩིཏྭཱ ཨིམསྶ པུརཏོ པཱཎིཾ པཧརིཏྭཱ ཧསྶཀེལི༹ཾ ཀརིསྶཱམཱི’’ཏི. ཏསྨིཾ ཁཎེ ཏཱ ཀུམཱརིཀཱཡོ གཱམདྭཱརཾ པཏྭཱ སཏྠཱརཾ དིསྭཱ ཝནྡིཏྭཱ ཨེཀམནྟཾ ཨཊྛཾསུ. མཱརོཔི སཏྠཱརཾ ཨཱཧ – ‘‘ཨཔི, བྷནྟེ, པིཎྜཾ ཨལབྷམཱནཱ ཛིགྷཙྪཱདུཀྑེན པཱིལི༹ཏཏྠཱ’’ཏི. སཏྠཱ ‘‘ཨཛྫ མཡཾ, པཱཔིམ, ཀིཉྩི ཨལབྷིཏྭཱཔི ཨཱབྷསྶརལོཀེ མཧཱབྲཧྨཱནོ ཝིཡ པཱིཏིསུཁེནེཝ ཝཱིཏིནཱམེསྶཱམཱ’’ཏི ཝཏྭཱ ཨིམཾ གཱཐམཱཧ –

༢༠༠.

‘‘སུསུཁཾ ཝཏ ཛཱིཝཱམ, ཡེསཾ ནོ ནཏྠི ཀིཉྩནཾ;

པཱིཏིབྷཀྑཱ བྷཝིསྶཱམ, དེཝཱ ཨཱབྷསྶརཱ ཡཐཱ’’ཏི.

ཏཏྠ ཡེསཾ ནོཏི ཡེསཾ ཨམྷཱཀཾ པལིབུཛ྄ཛྷནཏྠེན རཱགཱདཱིསུ ཀིཉྩནེསུ ཨེཀམྤི ཀིཉྩནཾ ནཏྠི. པཱིཏིབྷཀྑཱཏི ཡཐཱ ཨཱབྷསྶརཱ དེཝཱ པཱིཏིབྷཀྑཱ ཧུཏྭཱ པཱིཏིསུཁེནེཝ ཝཱིཏིནཱམེནྟི, ཨེཝཾ མཡམྤི, པཱཔིམ, ཀིཉྩི ཨལབྷིཏྭཱ པཱིཏིབྷཀྑཱ བྷཝིསྶཱམཱཏི ཨཏྠོ.

དེསནཱཝསཱནེ པཉྩསཏཱཔི ཀུམཱརིཀཱཡོ སོཏཱཔཏྟིཕལེ པཏིཊྛཧིཾསཱུཏི.

མཱརཝཏྠུ དུཏིཡཾ.

༣. ཀོསལརཉྙོ པརཱཛཡཝཏྠུ

ཛཡཾ ཝེརནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀོསལརཉྙོ པརཱཛཡཾ ཨཱརབྦྷ ཀཐེསི.

སོ ཀིར ཀཱསིཀགཱམཾ ནིསྶཱཡ བྷཱགིནེཡྻེན ཨཛཱཏསཏྟུནཱ སདྡྷིཾ ཡུཛ྄ཛྷནྟོ ཏེན ཏཡོ ཝཱརེ པརཱཛིཏོ ཏཏིཡཝཱརེ ཙིནྟེསི – ‘‘ཨཧཾ ཁཱིརམུཁམྤི དཱརཀཾ པརཱཛེཏུཾ ནཱསཀྑིཾ, ཀིཾ མེ ཛཱིཝིཏེནཱ’’ཏི. སོ ཨཱཧཱརཱུཔཙྪེདཾ ཀཏྭཱ མཉྩཀེ ནིཔཛྫི. ཨཐསྶ སཱ པཝཏྟི སཀལནགརཾ པཏྠརི. བྷིཀྑཱུ ཏཐཱགཏསྶ ཨཱརོཙེསུཾ – ‘‘བྷནྟེ, རཱཛཱ ཀིར ཀཱསིཀགཱམཀཾ ནིསྶཱཡ ཏཡོ ཝཱརེ པརཱཛིཏོ, སོ ཨིདཱནི པརཱཛིཏྭཱ ཨཱགཏོ ‘ཁཱིརམུཁམྤི དཱརཀཾ པརཱཛེཏུཾ ནཱསཀྑིཾ, ཀིཾ མེ ཛཱིཝིཏེནཱ’ཏི ཨཱཧཱརཱུཔཙྪེདཾ ཀཏྭཱ མཉྩཀེ ནིཔནྣོ’’ཏི. སཏྠཱ ཏེསཾ ཀཐཾ སུཏྭཱ, ‘‘བྷིཀྑཝེ, ཛིནནྟོཔི ཝེརཾ པསཝཏི, པརཱཛིཏོ པན དུཀྑཾ སེཏིཡེཝཱ’’ཏི ཝཏྭཱ ཨིམཾ གཱཐམཱཧ –

༢༠༡.

‘‘ཛཡཾ ཝེརཾ པསཝཏི, དུཀྑཾ སེཏི པརཱཛིཏོ;

ཨུཔསནྟོ སུཁཾ སེཏི, ཧིཏྭཱ ཛཡཔརཱཛཡ’’ནྟི.

ཏཏྠ ཛཡནྟི པརཾ ཛིནནྟོ ཝེརཾ པཊིལབྷཏི. པརཱཛིཏོཏི པརེན པརཱཛིཏོ ‘‘ཀདཱ ནུ ཁོ པཙྩཱམིཏྟསྶ པིཊྛིཾ དཊྛུཾ སཀྑིསྶཱམཱི’’ཏི དུཀྑཾ སེཏི སབྦིརིཡཱཔཐེསུ དུཀྑམེཝ ཝིཧརཏཱིཏི ཨཏྠོ. ཨུཔསནྟོཏི ཨབྦྷནྟརེ ཨུཔསནྟརཱགཱདིཀིལེསོ ཁཱིཎཱསཝོ ཛཡཉྩ པརཱཛཡཉྩ ཧིཏྭཱ སུཁཾ སེཏི, སབྦིརིཡཱཔཐེསུ སུཁམེཝ ཝིཧརཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཀོསལརཉྙོ པརཱཛཡཝཏྠུ ཏཏིཡཾ.

༤. ཨཉྙཏརཀུལདཱརིཀཱཝཏྠུ

ནཏྠི རཱགསམོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ ཀུལདཱརིཀཾ ཨཱརབྦྷ ཀཐེསི.

ཏསྶཱ ཀིར མཱཏཱཔིཏརོ ཨཱཝཱཧཾ ཀཏྭཱ མངྒལདིཝསེ སཏྠཱརཾ ནིམནྟཡིཾསུ. སཏྠཱ བྷིཀྑུསངྒྷཔརིཝུཏོ ཏཏྠ གནྟྭཱ ནིསཱིདི. སཱཔི ཁོ ཝདྷུཀཱ བྷིཀྑུསངྒྷསྶ ཨུདཀཔརིསྶཱཝནཱདཱིནི ཀརོནྟཱི ཨཔརཱཔརཾ སཉྩརཏི. སཱམིཀོཔིསྶཱ ཏཾ ཨོལོཀེནྟོ ཨཊྛཱསི. ཏསྶ རཱགཝསེན ཨོལོཀེནྟསྶ ཨནྟོ ཀིལེསོ སམུདཱཙརི. སོ ཨཉྙཱཎཱབྷིབྷཱུཏོ ནེཝ བུདྡྷཾ ཨུཔཊྛཧི, ན ཨསཱིཏི མཧཱཐེརེ. ཧཏྠཾ པསཱརེཏྭཱ ‘‘ཏཾ ཝདྷུཀཾ གཎྷིསྶཱམཱི’’ཏི པན ཙིཏྟཾ ཨཀཱསི. སཏྠཱ ཏསྶཛ྄ཛྷཱསཡཾ ཨོལོཀེཏྭཱ ཡཐཱ ཏཾ ཨིཏྠིཾ ན པསྶཏི, ཨེཝམཀཱསི. སོ ཨདིསྭཱ སཏྠཱརཾ ཨོལོཀེནྟོ ཨཊྛཱསི. སཏྠཱ ཏསྶ ཨོལོཀེཏྭཱ ཋིཏཀཱལེ ‘‘ཀུམཱརཀ, ན ཧི རཱགགྒིནཱ སདིསོ ཨགྒི ནཱམ, དོསཀལིནཱ སདིསོ ཀལི ནཱམ, ཁནྡྷཔརིཧརཎདུཀྑེན སདིསཾ དུཀྑཾ ནཱམ ཨཏྠི, ནིབྦཱནསུཁསདིསཾ སུཁམྤི ནཏྠིཡེཝཱ’’ཏི ཝཏྭཱ ཨིམཾ གཱཐམཱཧ –

༢༠༢.

‘‘ནཏྠི རཱགསམོ ཨགྒི, ནཏྠི དོསསམོ ཀལི;

ནཏྠི ཁནྡྷསམཱ དུཀྑཱ, ནཏྠི སནྟིཔརཾ སུཁ’’ནྟི.

ཏཏྠ ནཏྠི རཱགསམོཏི དྷཱུམཾ ཝཱ ཛཱལཾ ཝཱ ཨངྒཱརཾ ཝཱ ཨདསྶེཏྭཱ ཨནྟོཡེཝ ཛྷཱཔེཏྭཱ བྷསྨམུཊྛིཾ ཀཱཏུཾ སམཏྠོ རཱགེན སམོ ཨཉྙོ ཨགྒི ནཱམ ནཏྠི. ཀལཱིཏི དོསེན སམོ ཨཔརཱདྷོཔི ནཏྠི. ཁནྡྷསམཱཏི ཁནྡྷེཧི སམཱ. ཡཐཱ པརིཧརིཡམཱནཱ ཁནྡྷཱ དུཀྑཱ, ཨེཝཾ ཨཉྙཾ དུཀྑཾ ནཱམ ནཏྠི. སནྟིཔརནྟི ནིབྦཱནཏོ ཨུཏྟརིཾ ཨཉྙཾ སུཁམྤི ནཏྠི. ཨཉྙཉྷི སུཁཾ སུཁམེཝ, ནིབྦཱནཾ པརམསུཁནྟི ཨཏྠོ.

དེསནཱཝསཱནེ ཀུམཱརིཀཱ ཙ ཀུམཱརཀོ ཙ སོཏཱཔཏྟིཕལེ པཏིཊྛཧིཾསུ. ཏསྨིཾ སམཡེ བྷགཝཱ ཏེསཾ ཨཉྙམཉྙཾ དསྶནཱཀཱརཾ ཨཀཱསཱིཏི.

ཨཉྙཏརཀུལདཱརིཀཱཝཏྠུ ཙཏུཏྠཾ.

༥. ཨེཀཨུཔཱསཀཝཏྠུ

ཛིགྷཙྪཱཏི ཨིམཾ དྷམྨདེསནཾ སཏྠཱ ཨཱལ༹ཝིཡཾ ཝིཧརནྟོ ཨེཀཾ ཨུཔཱསཀཾ ཨཱརབྦྷ ཀཐེསི.

ཨེཀསྨིཉྷི དིཝསེ སཏྠཱ ཛེཏཝནེ གནྡྷཀུཊིཡཾ ནིསིནྣོཝ པཙྩཱུསཀཱལེ ལོཀཾ ཝོལོཀེནྟོ ཨཱལ༹ཝིཡཾ ཨེཀཾ དུགྒཏམནུསྶཾ དིསྭཱ ཏསྶཱུཔནིསྶཡསམྤཏྟིཾ ཉཏྭཱ པཉྩསཏབྷིཀྑུཔརིཝཱརོ ཨཱལ༹ཝིཾ ཨགམཱསི. ཨཱལ༹ཝིཝཱསིནོ སཏྠཱརཾ ནིམནྟཡིཾསུ. སོཔི དུགྒཏམནུསྶོ ‘‘སཏྠཱ ཀིར ཨཱགཏོ’’ཏི སུཏྭཱ ‘‘སཏྠུ སནྟིཀེ དྷམྨཾ སོསྶཱམཱི’’ཏི མནཾ ཨཀཱསི. ཏཾདིཝསམེཝ ཙསྶ ཨེཀོ གོཎོ པལཱཡི. སོ ‘‘ཀིཾ ནུ ཁོ གོཎཾ པརིཡེསིསྶཱམི, ཨུདཱཧུ དྷམྨཾ སུཎཱམཱི’’ཏི ཙིནྟེཏྭཱ ‘‘གོཎཾ པརིཡེསིཏྭཱ པཙྪཱ དྷམྨཾ སོསྶཱམཱི’’ཏི པཱཏོཝ གེཧཱ ནིཀྑམི. ཨཱལ༹ཝིཝཱསིནོཔི བུདྡྷཔྤམུཁཾ བྷིཀྑུསངྒྷཾ ནིསཱིདཱཔེཏྭཱ པརིཝིསིཏྭཱ ཨནུམོདནཏྠཱཡ པཏྟཾ གཎྷིཾསུ. སཏྠཱ ‘‘ཡཾ ནིསྶཱཡ ཨཧཾ ཏིཾསཡོཛནམགྒཾ ཨཱགཏོ, སོ གོཎཾ པརིཡེསིཏུཾ ཨརཉྙཾ པཝིཊྛོ, ཏསྨིཾ ཨཱགཏེཡེཝ དྷམྨཾ དེསེསྶཱམཱི’’ཏི ཏུཎྷཱི ཨཧོསི.

སོཔི མནུསྶོ དིཝཱ གོཎཾ དིསྭཱ གོགཎེ པཀྑིཔིཏྭཱ ‘‘སཙེཔི ཨཉྙཾ ནཏྠི, སཏྠུ ཝནྡནམཏྟམྤི ཀརིསྶཱམཱི’’ཏི ཛིགྷཙྪཱཔཱིལི༹ཏོཔི གེཧཾ གམནཱཡ མནཾ ཨཀཏྭཱ ཝེགེན སཏྠུ སནྟིཀཾ ཨཱགནྟྭཱ སཏྠཱརཾ ཝནྡིཏྭཱ ཨེཀམནྟཾ ཨཊྛཱསི. སཏྠཱ ཏསྶ ཋིཏཀཱལེ དཱནཝེཡྻཱཝཊིཀཾ ཨཱཧ – ‘‘ཨཏྠི ཀིཉྩི བྷིཀྑུསངྒྷསྶ ཨཏིརིཏྟབྷཏྟ’’ནྟི? ‘‘བྷནྟེ, སབྦཾ ཨཏྠཱི’’ཏི. ཏེན ཧི ‘‘ཨིམཾ པརིཝིསཱཧཱི’’ཏི. སོ སཏྠཱརཱ ཝུཏྟཊྛཱནེཡེཝ ཏཾ ནིསཱིདཱཔེཏྭཱ ཡཱགུཁཱདནཱིཡབྷོཛནཱིཡེཧི སཀྐཙྩཾ པརིཝིསི. སོ བྷུཏྟབྷཏྟོ མུཁཾ ཝིཀྑཱལེསི. ཋཔེཏྭཱ ཀིར ཨིམཾ ཋཱནཾ ཏཱིསུ པིཊཀེསུ ཨཉྙཏྠ གཏཱགཏསྶ བྷཏྟཝིཙཱརཎཾ ནཱམ ནཏྠི. ཏསྶ པསྶདྡྷདརཐསྶ ཙིཏྟཾ ཨེཀགྒཾ ཨཧོསི. ཨཐསྶ སཏྠཱ ཨནུཔུབྦིཾ ཀཐཾ ཀཐེཏྭཱ སཙྩཱནི པཀཱསེསི. སོ དེསནཱཝསཱནེ སོཏཱཔཏྟིཕལེ པཏིཊྛཧི. སཏྠཱཔི ཨནུམོདནཾ ཀཏྭཱ ཨུཊྛཱཡཱསནཱ པཀྐཱམི. མཧཱཛནོ སཏྠཱརཾ ཨནུགནྟྭཱ ནིཝཏྟི.

བྷིཀྑཱུ སཏྠཱརཱ སདྡྷིཾ གཙྪནྟཱཡེཝ ཨུཛ྄ཛྷཱཡིཾསུ – ‘‘པསྶཐཱཝུསོ, སཏྠུ ཀམྨཾ, ཨཉྙེསུ དིཝསེསུ ཨེཝརཱུཔཾ ནཏྠི, ཨཛྫ པནེཀཾ མནུསྶཾ དིསྭཱཝ ཡཱགུཨཱདཱིནི ཝིཙཱརེཏྭཱ དཱཔེསཱི’’ཏི. སཏྠཱ ནིཝཏྟིཏྭཱ ཋིཏཀོཝ ‘‘ཀིཾ ཀཐེཐ, བྷིཀྑཝེ’’ཏི པུཙྪིཏྭཱ ཏམཏྠཾ སུཏྭཱ ‘‘ཨཱམ, བྷིཀྑཝེ, ཨཧཾ ཏིཾསཡོཛནཾ ཀནྟཱརཾ ཨཱགཙྪནྟོ ཏསྶ ཨུཔཱསཀསྶཱུཔནིསྶཡཾ དིསྭཱ ཨཱགཏོ, སོ ཨཏིཝིཡ ཛིགྷཙྪིཏོ, པཱཏོཝ པཊྛཱཡ གོཎཾ པརིཡེསནྟོ ཨརཉྙེ ཝིཙརི. ‘ཛིགྷཙྪདུཀྑེན དྷམྨེ དེསིཡམཱནེཔི པཊིཝིཛ྄ཛྷིཏུཾ ན སཀྑིསྶཏཱི’ཏི ཙིནྟེཏྭཱ ཨེཝཾ ཨཀཱསིཾ, ཛིགྷཙྪཱརོགསདིསོ རོགོ ནཱམ ནཏྠཱི’’ཏི ཝཏྭཱ ཨིམཾ གཱཐམཱཧ –

༢༠༣.

‘‘ཛིགྷཙྪཱཔརམཱ རོགཱ, སངྑཱརཔརམཱ དུཁཱ;

ཨེཏཾ ཉཏྭཱ ཡཐཱབྷཱུཏཾ, ནིབྦཱནཾ པརམཾ སུཁ’’ནྟི.

ཏཏྠ ཛིགྷཙྪཱཔརམཱ རོགཱཏི ཡསྨཱ ཨཉྙོ རོགོ སཀིཾ ཏིཀིཙྪིཏོ ཝིནསྶཏི ཝཱ ཏདངྒཝསེན ཝཱ པཧཱིཡཏི, ཛིགྷཙྪཱ པན ནིཙྩཀཱལཾ ཏིཀིཙྪིཏབྦཱཡེཝཱཏི སེསརོགཱནཾ ཨཡཾ པརམཱ ནཱམ. སངྑཱརཱཏི པཉྩ ཁནྡྷཱ. ཨེཏཾ ཉཏྭཱཏི ཛིགྷཙྪཱསམོ རོགོ ནཏྠི, ཁནྡྷཔརིཧརཎསམཾ དུཀྑཾ ནཱམ ནཏྠཱིཏི ཨེཏམཏྠཾ ཡཐཱབྷཱུཏཾ ཉཏྭཱ པཎྜིཏོ ནིབྦཱནཾ སཙྪི ཀརོཏི. ནིབྦཱནཾ པརམཾ སུཁནྟི ཏཉྷི སབྦསུཁཱནཾ པརམཾ ཨུཏྟམཾ སུཁནྟི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨེཀཨུཔཱསཀཝཏྠུ པཉྩམཾ.

༦. པསེནདིཀོསལཝཏྠུ

ཨཱརོགྱཔརམཱ ལཱབྷཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ རཱཛཱནཾ པསེནདིཀོསལཾ ཨཱརབྦྷ ཀཐེསི.

ཨེཀསྨིཉྷི སམཡེ རཱཛཱ ཏཎྜུལདོཎསྶ ཨོདནཾ ཏདུཔིཡེན སཱུཔབྱཉྫནེན བྷུཉྫཏི. ཨེཀདིཝསཾ བྷུཏྟཔཱཏརཱསོ བྷཏྟསམྨདཾ ཨཝིནོདེཏྭཱ སཏྠུ སནྟིཀཾ གནྟྭཱ ཀིལནྟརཱུཔོ ཨིཏོ ཙིཏོ ཙ སམྤརིཝཏྟཏི, ནིདྡཱཡ ཨབྷིབྷཱུཡམཱནོཔི ཨུཛུཀཾ ནིཔཛྫིཏུཾ ཨསཀྐོནྟོ ཨེཀམནྟཾ ནིསཱིདི. ཨཐ ནཾ སཏྠཱ ཨཱཧ – ‘‘ཀིཾ, མཧཱརཱཛ, ཨཝིསྶམིཏྭཱཝ ཨཱགཏོསཱི’’ཏི? ‘‘ཨཱམ, བྷནྟེ, བྷུཏྟཀཱལཏོ པཊྛཱཡ མེ མཧཱདུཀྑཾ ཧོཏཱི’’ཏི. ཨཐ ནཾ སཏྠཱ, ‘‘མཧཱརཱཛ, ཨཏིབཧུབྷོཛནཾ ཨེཝཾ དུཀྑཾ ཧོཏཱི’’ཏི ཝཏྭཱ ཨིམཾ གཱཐམཱཧ –

‘‘མིདྡྷཱི ཡདཱ ཧོཏི མཧགྒྷསོ ཙ,

ནིདྡཱཡིཏཱ སམྤརིཝཏྟསཱཡཱི;

མཧཱཝརཱཧོཝ ནིཝཱཔཔུཊྛོ,

པུནཔྤུནཾ གབྦྷམུཔེཏི མནྡོ’’ཏི. (དྷ. པ. ༣༢༥); –

ཨིམཱཡ གཱཐཱཡ ཨོཝདིཏྭཱ, ‘‘མཧཱརཱཛ, བྷོཛནཾ ནཱམ མཏྟཱཡ བྷུཉྫིཏུཾ ཝཊྚཏི. མཏྟབྷོཛིནོ ཧི སུཁཾ ཧོཏཱི’’ཏི ཨུཏྟརི ཨོཝདནྟོ ཨིམཾ གཱཐམཱཧ –

‘‘མནུཛསྶ སདཱ སཏཱིམཏོ,

མཏྟཾ ཛཱནཏོ ལདྡྷབྷོཛནེ;

ཏནུཀསྶ བྷཝནྟི ཝེདནཱ,

སཎིཀཾ ཛཱིརཏི ཨཱཡུཔཱལཡ’’ནྟི. (སཾ. ནི. ༡.༡༢༤);

རཱཛཱ གཱཐཾ ཨུགྒཎྷིཏུཾ ནཱསཀྑི, སམཱིཔེ ཋིཏཾ པན བྷཱགིནེཡྻཾ, སུདསྶནཾ ནཱམ མཱཎཝཾ ‘‘ཨིམཾ གཱཐཾ ཨུགྒཎྷ, ཏཱཏཱ’’ཏི ཨཱཧ. སོ ཏཾ གཱཐཾ ཨུགྒཎྷིཏྭཱ ‘‘ཀིཾ ཀརོམི, བྷནྟེ’’ཏི སཏྠཱརཾ པུཙྪི. ཨཐ ནཾ སཏྠཱ ཨཱཧ – ‘‘རཉྙོ བྷུཉྫནྟསྶ ཨོསཱནཔིཎྜཀཱལེ ཨིམཾ གཱཐཾ ཝདེཡྻཱསི, རཱཛཱ ཨཏྠཾ སལླཀྑེཏྭཱ ཡཾ པིཎྜཾ ཚཌྜེསྶཏི, ཏསྨིཾ པིཎྜེ སིཏྠགཎནཱཡ རཉྙོ བྷཏྟཔཙནཀཱལེ ཏཏྟཀེ ཏཎྜུལེ ཧརེཡྻཱསཱི’’ཏི. སོ ‘‘སཱདྷུ, བྷནྟེ’’ཏི སཱཡམྤི པཱཏོཔི རཉྙོ བྷུཉྫནྟསྶ ཨོསཱནཔིཎྜཀཱལེ ཏཾ གཱཐཾ ཨུདཱཧརིཏྭཱ ཏེན ཚཌྜིཏཔིཎྜེ སིཏྠགཎནཱཡ ཏཎྜུལེ ཧཱཔེསི. རཱཛཱཔི ཏསྶ གཱཐཾ སུཏྭཱ སཧསྶཾ སཧསྶཾ དཱཔེསི. སོ ཨཔརེན སམཡེན ནཱལི༹ཀོདནཔརམཏཱཡ སཎྛཧིཏྭཱ སུཁཔྤཏྟོ ཏནུསརཱིརོ ཨཧོསི.

ཨཐེཀདིཝསཾ སཏྠུ སནྟིཀཾ གནྟྭཱ སཏྠཱརཾ ཝནྡིཏྭཱ ཨཱཧ – ‘‘བྷནྟེ, ཨིདཱནི མེ སུཁཾ ཛཱཏཾ, མིགམྤི ཨསྶམྤི ཨནུབནྡྷིཏྭཱ གཎྷནསམཏྠོ ཛཱཏོམྷི. པུབྦེ མེ བྷཱགིནེཡྻེན སདྡྷིཾ ཡུདྡྷམེཝ ཧོཏི, ཨིདཱནི ཝཛཱིརཀུམཱརིཾ ནཱམ དྷཱིཏརཾ བྷཱགིནེཡྻསྶ དཏྭཱ སོ གཱམོ ཏསྶཱཡེཝ ནྷཱནཙུཎྞམཱུལཾ ཀཏྭཱ དིནྣོ, ཏེན སདྡྷིཾ ཝིགྒཧོ ཝཱུཔསནྟོ, ཨིམིནཱཔི མེ ཀཱརཎེན སུཁམེཝ ཛཱཏཾ. ཀུལསནྟཀཾ རཱཛམཎིརཏནཾ ནོ གེཧེ པུརིམདིཝསེ ནཊྛཾ, ཏམྤི ཨིདཱནི ཧཏྠཔཏྟཾ ཨཱགཏཾ, ཨིམིནཱཔི མེ ཀཱརཎེན སུཁམེཝ ཛཱཏཾ. ཏུམྷཱཀཾ སཱཝཀེཧི སདྡྷིཾ ཝིསྶཱསཾ ཨིཙྪནྟེན ཉཱཏིདྷཱིཏཱཔི ནོ གེཧེ ཀཏཱ, ཨིམིནཱཔི མེ ཀཱརཎེན སུཁམེཝ ཛཱཏ’’ནྟི. སཏྠཱ ‘‘ཨཱརོགྱཾ ནཱམ, མཧཱརཱཛ, པརམོ ལཱབྷོ, ཡཐཱལདྡྷེན སནྟུཊྛབྷཱཝསདིསམྤི དྷནཾ, ཝིསྶཱསསདིསོ ཙ པརམཱ ཉཱཏི, ནིབྦཱནསདིསཉྩ སུཁཾ ནཱམ ནཏྠཱི’’ཏི ཝཏྭཱ ཨིམཾ གཱཐམཱཧ –

༢༠༤.

‘‘ཨཱརོགྱཔརམཱ ལཱབྷཱ, སནྟུཊྛིཔརམཾ དྷནཾ;

ཝིསྶཱསཔརམཱ ཉཱཏི, ནིབྦཱནཔརམཾ སུཁ’’ནྟི.

ཏཏྠ ཨཱརོགྱཔརམཱ ལཱབྷཱཏི ཨརོགབྷཱཝཔརམཱ ལཱབྷཱ. རོགིནོ ཧི ཝིཛྫམཱནཱཔི ལཱབྷཱ ཨལཱབྷཱཡེཝ, ཏསྨཱ ཨརོགསྶ སབྦལཱབྷཱ ཨཱགཏཱཝ ཧོནྟི. ཏེནེཏཾ ཝུཏྟཾ – ‘‘ཨཱརོགྱཔརམཱ ལཱབྷཱ’’ཏི. སནྟུཊྛིཔརམཾ དྷནནྟི གིཧིནོ ཝཱ པབྦཛིཏསྶ ཝཱ ཡཾ ཨཏྟནཱ ལདྡྷཾ ཨཏྟནོ སནྟཀཾ, ཏེནེཝ ཏུསྶནབྷཱཝོ སནྟུཊྛཱི ནཱམ སེསདྷནེཧི པརམཾ དྷནཾ. ཝིསྶཱསཔརམཱ ཉཱཏཱིཏི མཱཏཱ ཝཱ ཧོཏུ པིཏཱ ཝཱ, ཡེན སདྡྷིཾ ཝིསྶཱསོ ནཏྠི, སོ ཨཉྙཱཏཀོཝ. ཡེན ཨཉྙཱཏཀེན པན སདྡྷིཾ ཝིསྶཱསོ ཨཏྠི, སོ ཨསམྦནྡྷོཔི པརམོ ཨུཏྟམོ ཉཱཏི. ཏེན ཝུཏྟཾ – ‘‘ཝིསྶཱསཔརམཱ ཉཱཏཱི’’ཏི. ནིབྦཱནསདིསཾ པན སུཁཾ ནཱམ ནཏྠི, ཏེནེཝཱཧ – ནིབྦཱནཔརམཾ སུཁནྟི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པསེནདིཀོསལཝཏྠུ ཚཊྛཾ.

༧. ཏིསྶཏྠེརཝཏྠུ

པཝིཝེཀརསནྟི ཨིམཾ དྷམྨདེསནཾ སཏྠཱ ཝེསཱལིཡཾ ཝིཧརནྟོ ཨཉྙཏརཾ བྷིཀྑུཾ ཨཱརབྦྷ ཀཐེསི.

སཏྠཱརཱ ཧི, ‘‘བྷིཀྑཝེ, ཨཧཾ ཨིཏོ ཙཏཱུཧི མཱསེཧི པརིནིབྦཱཡིསྶཱམཱི’’ཏི ཝུཏྟེ སཏྠུ སནྟིཀེ སཏྟ བྷིཀྑུསཏཱནི སནྟཱསཾ ཨཱཔཛྫིཾསུ, ཁཱིཎཱསཝཱནཾ དྷམྨསཾཝེགོ ཨུཔྤཛྫི, པུཐུཛྫནཱ ཨསྶཱུནི སནྡྷཱརེཏུཾ ནཱསཀྑིཾསུ. བྷིཀྑཱུ ཝགྒཱ ཝགྒཱ ཧུཏྭཱ ‘‘ཀིཾ ནུ ཁོ ཀརིསྶཱམཱ’’ཏི མནྟེནྟཱ ཝིཙརནྟི. ཨཐེཀོ ཏིསྶཏྠེརོ ནཱམ བྷིཀྑཱུ ‘‘སཏྠཱ ཀིར ཙཏུམཱསཙྩཡེན པརིནིབྦཱཡིསྶཏི, ཨཧཉྩམྷི ཨཝཱིཏརཱགོ, སཏྠརི དྷརམཱནེཡེཝ མཡཱ ཨརཧཏྟཾ གཎྷིཏུཾ ཝཊྚཏཱི’’ཏི ཙཏཱུསུ ཨིརིཡཱཔཐེསུ ཨེཀཀོཝ ཝིཧཱསི. བྷིཀྑཱུནཾ སནྟིཀེ གམནཾ ཝཱ ཀེནཙི སདྡྷིཾ ཀཐཱསལླཱཔོ ཝཱ ནཏྠི. ཨཐ ནཾ བྷིཀྑཱུ ཨཱཧཾསུ – ‘‘ཨཱཝུསོ, ཏིསྶ ཏསྨཱ ཨེཝཾ ཀརོསཱི’’ཏི. སོ ཏེསཾ ཀཐཾ ན སུཎཱཏི. ཏེ ཏསྶ པཝཏྟིཾ སཏྠུ ཨཱརོཙེཏྭཱ, ‘‘བྷནྟེ, ཏུམྷེསུ ཏིསྶཏྠེརསྶ སིནེཧོ ནཏྠཱི’’ཏི ཨཱཧཾསུ. སཏྠཱ ཏཾ པཀྐོསཱཔེཏྭཱ ‘‘ཀསྨཱ ཏིསྶ ཨེཝཾ ཨཀཱསཱི’’ཏི པུཙྪིཏྭཱ ཏེན ཨཏྟནོ ཨདྷིཔྤཱཡེ ཨཱརོཙིཏེ ‘‘སཱདྷུ, ཏིསྶཱ’’ཏི སཱདྷུཀཱརཾ དཏྭཱ, ‘‘བྷིཀྑཝེ, མཡི སིནེཧོ ཏིསྶསདིསོཝ ཧོཏུ. གནྡྷམཱལཱདཱིཧི པཱུཛཾ ཀརོནྟཱཔི ནེཝ མཾ པཱུཛེནྟི, དྷམྨཱནུདྷམྨཾ པཊིཔཛྫམཱནཱཡེཝ པན མཾ པཱུཛེནྟཱི’’ཏི ཝཏྭཱ ཨིམཾ གཱཐམཱཧ –

༢༠༥.

‘‘པཝིཝེཀརསཾ པིཏྭཱ, རསཾ ཨུཔསམསྶ ཙ;

ནིདྡརོ ཧོཏི ནིཔྤཱཔོ, དྷམྨཔཱིཏིརསཾ པིཝ’’ནྟི.

ཏཏྠ པཝིཝེཀརསནྟི པཝིཝེཀཏོ ཨུཔྤནྣཾ རསཾ, ཨེཀཱིབྷཱཝསུཁནྟི ཨཏྠོ. པིཏྭཱཏི དུཀྑཔརིཉྙཱདཱིནི ཀརོནྟོ ཨཱརམྨཎཏོ སཙྪིཀིརིཡཱཝསེན པིཝིཏྭཱ. ཨུཔསམསྶ ཙཱཏི ཀིལེསཱུཔསམནིབྦཱནསྶ ཙ རསཾ པིཏྭཱ. ནིདྡརོ ཧོཏཱིཏི ཏེན ཨུབྷཡརསཔཱནེན ཁཱིཎཱསཝོ བྷིཀྑུ ཨབྦྷནྟརེ རཱགདརཐཱདཱིནཾ ཨབྷཱཝེན ནིདྡརོ ཙེཝ ནིཔྤཱཔོ ཙ ཧོཏི. རསཾ པིཝནྟི ནཝཝིདྷལོཀུཏྟརདྷམྨཝསེན ཨུཔྤནྣཾ པཱིཏིརསཾ པིཝནྟོཔི ནིདྡརོ ནིཔྤཱཔོ ཙ ཧོཏི.

དེསནཱཝསཱནེ ཏིསྶཏྠེརོ ཨརཧཏྟཾ པཱཔུཎི, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཏིསྶཏྠེརཝཏྠུ སཏྟམཾ.

༨. སཀྐཝཏྠུ

སཱཧུ དསྶནནྟི ཨིམཾ དྷམྨདེསནཾ སཏྠཱ ཝེལུ༹ཝགཱམཀེ ཝིཧརནྟོ སཀྐཾ ཨཱརབྦྷ ཀཐེསི.

ཏཐཱགཏསྶ ཧི ཨཱཡུསངྑཱརེ ཝིསྶཊྛེ ལོཧིཏཔཀྑནྡིཀཱབཱདྷསྶ ཨུཔྤནྣབྷཱཝཾ ཉཏྭཱ སཀྐོ དེཝརཱཛཱ ‘‘མཡཱ སཏྠུ སནྟིཀཾ གནྟྭཱ གིལཱནུཔཊྛཱནཾ ཀཱཏུཾ ཝཊྚཏཱི’’ཏི ཙིནྟེཏྭཱ ཏིགཱཝུཏཔྤམཱཎཾ ཨཏྟབྷཱཝཾ ཝིཛཧིཏྭཱ སཏྠཱརཾ ཨུཔསངྐམིཏྭཱ ཧཏྠེཧི པཱདེ པརིམཛྫི. ཨཐ ནཾ སཏྠཱ ཨཱཧ ‘‘ཀོ ཨེསོ’’ཏི? ‘‘ཨཧཾ, བྷནྟེ, སཀྐོ’’ཏི. ‘‘ཀསྨཱ ཨཱགཏོསཱི’’ཏི? ‘‘ཏུམྷེ གིལཱནེ ཨུཔཊྛཧིཏུཾ, བྷནྟེ’’ཏི. ‘‘སཀྐ, དེཝཱནཾ མནུསྶགནྡྷོ ཡོཛནསཏཏོ པཊྛཱཡ གལེ བདྡྷཀུཎཔཾ ཝིཡ ཧོཏི, གཙྪ ཏྭཾ, ཨཏྠི མེ གིལཱནུཔཊྛཀཱ བྷིཀྑཱུ’’ཏི. ‘‘བྷནྟེ, ཙཏུརཱསཱིཏིཡོཛནསཧསྶམཏྠཀེ ཋིཏོ ཏུམྷཱཀཾ སཱིལགནྡྷཾ གྷཱཡིཏྭཱ ཨཱགཏོ, ཨཧམེཝ ཨུཔཊྛཧིསྶཱམཱི’’ཏི སོ སཏྠུ སརཱིརཝལ༹ཉྫནབྷཱཛནཾ ཨཉྙསྶ ཧཏྠེནཱཔི ཕུསིཏུཾ ཨདཏྭཱ སཱིསེཡེཝ ཋཔེཏྭཱ ནཱིཧརནྟོ མུཁསངྐོཙནམཏྟམྤི ན ཨཀཱསི, གནྡྷབྷཱཛནཾ པརིཧརནྟོ ཝིཡ ཨཧོསི. ཨེཝཾ སཏྠཱརཾ པཊིཛགྒིཏྭཱ སཏྠུ ཕཱསུཀཀཱལེཡེཝ ཨགམཱསི.

བྷིཀྑཱུ ཀཐཾ སམུཊྛཱཔེསུཾ ‘‘ཨཧོ སཏྠརི སཀྐསྶ སིནེཧོ, ཨེཝརཱུཔཾ ནཱམ དིབྦསམྤཏྟིཾ པཧཱཡ མུཁསངྐོཙནམཏྟམྤི ཨཀཏྭཱ གནྡྷབྷཱཛནཾ ནཱིཧརནྟོ ཝིཡ སཏྠུ སརཱིརཝལ༹ཉྫནབྷཱཛནཾ སཱིསེན ནཱིཧརནྟོ ཨུཔཊྛཱནམཀཱསཱི’’ཏི. སཏྠཱ ཏེསཾ ཀཐཾ སུཏྭཱ ཀིཾ ཝདེཐ, བྷིཀྑཝེ, ཨནཙྪརིཡཾ ཨེཏཾ, ཡཾ སཀྐོ དེཝརཱཛཱ མཡི སིནེཧཾ ཀརོཏི. ཨཡཾ སཀྐོ ཧི དེཝརཱཛཱ མཾ ནིསྶཱཡ ཛརསཀྐབྷཱཝཾ ཝིཛཧིཏྭཱ སོཏཱཔནྣོ ཧུཏྭཱ ཏརུཎསཀྐསྶ བྷཱཝཾ པཏྟོ, ཨཧཾ ཧིསྶ མརཎབྷཡཏཛྫིཏསྶ པཉྩསིཁགནྡྷབྦདེཝཔུཏྟཾ པུརཏོ ཀཏྭཱ ཨཱགཏཀཱལེ ཨིནྡསཱལགུཧཱཡཾ དེཝཔརིསཱཡ མཛ྄ཛྷེ ནིསིནྣསྶ –

‘‘པུཙྪ ཝཱསཝ མཾ པཉྷཾ, ཡཾ ཀིཉྩི མནསིཙྪསི;

ཏསྶ ཏསྶེཝ པཉྷསྶ, ཨཧཾ ཨནྟཾ ཀརོམི ཏེ’’ཏི. (དཱི. ནི. ༢.༣༥༦) –

ཝཏྭཱ ཏསྶ ཀངྑཾ ཝིནོདེནྟོ དྷམྨཾ དེསེསིཾ. དེསནཱཝསཱནེ ཙུདྡསནྣཾ པཱཎཀོཊཱིནཾ དྷམྨཱབྷིསམཡོ ཨཧོསི, སཀྐོཔི ཡཐཱནིསིནྣོཝ སོཏཱཔཏྟིཕལཾ པཏྭཱ ཏརུཎསཀྐོ ཛཱཏོ. ཨེཝམསྶཱཧཾ བཧཱུཔཀཱརོ. ཏསྶ མཡི སིནེཧོ ནཱམ ཨནཙྪརིཡོ. བྷིཀྑཝེ, ཨརིཡཱནཉྷི དསྶནམྤི སུཁཾ, ཏེཧི སདྡྷིཾ ཨེཀཊྛཱནེ སནྣིཝཱསོཔི སུཁོ. བཱལེཧི སདྡྷིཾ པན སབྦམེཏཾ དུཀྑནྟི ཝཏྭཱ ཨིམཱ གཱཐཱ ཨབྷཱསི –

༢༠༦.

‘‘སཱཧུ དསྶནམརིཡཱནཾ, སནྣིཝཱསོ སདཱ སུཁོ;

ཨདསྶནེན བཱལཱནཾ, ནིཙྩམེཝ སུཁཱི སིཡཱ.

༢༠༧.

‘‘བཱལསངྒཏཙཱརཱི ཧི, དཱིགྷམདྡྷཱན སོཙཏི;

དུཀྑོ བཱལེཧི སཾཝཱསོ, ཨམིཏྟེནེཝ སབྦདཱ;

དྷཱིརོ ཙ སུཁསཾཝཱསོ, ཉཱཏཱིནཾཝ སམཱགམོ’’.

ཏསྨཱ ཧི –

༢༠༨.

‘‘དྷཱིརཉྩ པཉྙཉྩ བཧུསྶུཏཉྩ,དྷོརཡ྄ཧསཱིལཾ ཝཏཝནྟམརིཡཾ;

ཏཾ ཏཱདིསཾ སཔྤུརིསཾ སུམེདྷཾ,བྷཛེཐ ནཀྑཏྟཔཐཾ ཝ ཙནྡིམཱ’’ཏི.

ཏཏྠ སཱཧཱུཏི སུནྡརཾ བྷདྡཀཾ. སནྣིཝཱསོཏི ན ཀེཝལཉྩ ཏེསཾ དསྶནམེཝ, ཏེཧི སདྡྷིཾ ཨེཀཊྛཱནེ ནིསཱིདནཱདིབྷཱཝོཔི ཏེསཾ ཝཏྟཔཊིཝཏྟཾ ཀཱཏུཾ ལབྷནབྷཱཝོཔི སཱདྷུཡེཝ. བཱལསངྒཏཙཱརཱི ཧཱིཏི ཡོ བཱལེན སཧཙཱརཱི. དཱིགྷམདྡྷཱནནྟི སོ བཱལསཧཱཡེན ‘‘ཨེཧི སནྡྷིཙྪེདཱདཱིནི ཀརོམཱ’’ཏི ཝུཙྩམཱནོ ཏེན སདྡྷིཾ ཨེཀཙྪནྡོ ཧུཏྭཱ ཏཱནི ཀརོནྟོ ཧཏྠཙྪེདཱདཱིནི པཏྭཱ དཱིགྷམདྡྷཱནཾ སོཙཏི. སབྦདཱཏི ཡཐཱ ཨསིཧཏྠེན ཝཱ ཨམིཏྟེན ཨཱསཱིཝིསཱདཱིཧི ཝཱ སདྡྷིཾ ཨེཀཏོ ཝཱསོ ནཱམ ནིཙྩཾ དུཀྑོ, ཏཐེཝ བཱལེཧི སདྡྷིནྟི ཨཏྠོ. དྷཱིརོ ཙ སུཁསཾཝཱསོཏི ཨེཏྠ སུཁོ སཾཝཱསོ ཨེཏེནཱཏི སུཁསཾཝཱསོ, པཎྜིཏེན སདྡྷིཾ ཨེཀཊྛཱནེ སཾཝཱསོ སུཁོཏི ཨཏྠོ. ཀཐཾ? ཉཱཏཱིནཾཝ སམཱགམོཏི ཡཐཱཔི ཉཱཏཱིནཾ སམཱགམོ སུཁོ, ཨེཝཾ སུཁོ.

ཏསྨཱ ཧཱིཏི ཡསྨཱ བཱལེཧི སདྡྷིཾ སཾཝཱསོ དུཀྑོ, པཎྜིཏེན སདྡྷིཾ སུཁོ, ཏསྨཱ ཧི དྷིཏིསམྤནྣཾ དྷཱིརཉྩ, ལོཀིཡལོཀུཏྟརཔཉྙཱསམྤནྣཾ པཉྙཉྩ, ཨཱགམཱདྷིགམསམྤནྣཾ བཧུསྶུཏཉྩ, ཨརཧཏྟཔཱཔནཀསངྑཱཏཱཡ དྷུརཝཧནསཱིལཏཱཡ དྷོརཡ྄ཧསཱིལཾ, སཱིལཝཏེན ཙེཝ དྷུཏངྒཝཏེན ཙ ཝཏཝནྟཾ, ཀིལེསེཧི ཨཱརཀཏཱཡ ཨརིཡཾ, ཏཐཱརཱུཔཾ སཔྤུརིསཾ སོབྷནཔཉྷཾ ཡཐཱ ནིམྨལཾ ནཀྑཏྟཔཐསངྑཱཏཾ ཨཱཀཱསཾ ཙནྡིམཱ བྷཛཏི, ཨེཝཾ བྷཛེཐ པཡིརུཔཱསེཐཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཀྐཝཏྠུ ཨཊྛམཾ.

སུཁཝགྒཝཎྞནཱ ནིཊྛིཏཱ.

པནྣརསམོ ཝགྒོ.

༡༦. པིཡཝགྒོ

༡. ཏཡོཛནཔབྦཛིཏཝཏྠུ

ཨཡོགེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏཡོ པབྦཛིཏེ ཨཱརབྦྷ ཀཐེསི.

སཱཝཏྠིཡཾ ཀིར ཨེཀསྨིཾ ཀུལེ མཱཏཱཔིཏཱུནཾ ཨེཀཔུཏྟཀོ ཨཧོསི པིཡོ མནཱཔོ. སོ ཨེཀདིཝསཾ གེཧེ ནིམནྟིཏཱནཾ བྷིཀྑཱུནཾ ཨནུམོདནཾ ཀརོནྟཱནཾ དྷམྨཀཐཾ སུཏྭཱ པབྦཛིཏུཀཱམོ ཧུཏྭཱ མཱཏཱཔིཏརོ པབྦཛྫཾ ཡཱཙི. ཏེ ནཱནུཛཱནིཾསུ. ཏསྶ ཨེཏདཧོསི – ‘‘ཨཧཾ མཱཏཱཔིཏཱུནཾ ཨཔསྶནྟཱནཾཡེཝ བཧི གནྟྭཱ པབྦཛིསྶཱམཱི’’ཏི. ཨཐསྶ པིཏཱ བཧི ནིཀྑམནྟོ ‘‘ཨིམཾ རཀྑེཡྻཱསཱི’’ཏི མཱཏརཾ པཊིཙྪཱཔེསི, མཱཏཱ བཧི ནིཀྑམནྟཱི པིཏརཾ པཊིཙྪཱཔེསི. ཨཐསྶ ཨེཀདིཝསཾ པིཏརི བཧི གཏེ མཱཏཱ ‘‘པུཏྟཾ རཀྑིསྶཱམཱི’’ཏི ཨེཀཾ དྭཱརབཱཧཾ ནིསྶཱཡ ཨེཀཾ པཱདེཧི ཨུཔྤཱིལེ༹ཏྭཱ ཚམཱཡ ནིསིནྣཱ སུཏྟཾ ཀནྟཏི. སོ ‘‘ཨིམཾ ཝཉྩེཏྭཱ གམིསྶཱམཱི’’ཏི ཙིནྟེཏྭཱ, ‘‘ཨམྨ, ཐོཀཾ ཏཱཝ ཨཔེཧི, སརཱིརཝལཉྫཾ ཀརིསྶཱམཱི’’ཏི ཝཏྭཱ ཏཱཡ པཱདེ སམིཉྫིཏེ ནིཀྑམིཏྭཱ ཝེགེན ཝིཧཱརཾ གནྟྭཱ བྷིཀྑཱུ ཨུཔསངྐམིཏྭཱ ‘‘པབྦཱཛེཐ མཾ, བྷནྟེ’’ཏི ཡཱཙིཏྭཱ ཏེསཾ སནྟིཀེ པབྦཛི.

ཨཐསྶ པིཏཱ ཨཱགནྟྭཱ མཱཏརཾ པུཙྪི – ‘‘ཀཧཾ མེ པུཏྟོ’’ཏི? ‘‘སཱམི, ཨིམསྨིཾ པདེསེ ཨཧོསཱི’’ཏི. སོ ‘‘ཀཧཾ ནུ ཁོ མེ པུཏྟོ’’ཏི ཨོལོཀེནྟོ ཏཾ ཨདིསྭཱ ‘‘ཝིཧཱརཾ གཏོ བྷཝིསྶཏཱི’’ཏི ཝིཧཱརཾ གནྟྭཱ པུཏྟཾ པབྦཛིཏཾ དིསྭཱ ཀནྡིཏྭཱ རོདིཏྭཱ, ‘‘ཏཱཏ, ཀིཾ མཾ ནཱསེསཱི’’ཏི ཝཏྭཱ ‘‘མམ པུཏྟེ པབྦཛིཏེ ཨཧཾ ཨིདཱནི གེཧེ ཀིཾ ཀརིསྶཱམཱི’’ཏི སཡམྤི བྷིཀྑཱུ ཡཱཙིཏྭཱ པབྦཛི. ཨཐསྶ མཱཏཱཔི ‘‘ཀིཾ ནུ ཁོ མེ པུཏྟོ ཙ པཏི ཙ ཙིརཱཡནྟི, ཀཙྩི ཝིཧཱརཾ གནྟྭཱ པབྦཛིཏཱ’’ཏི ཏེ ཨོལོཀེནྟཱི ཝིཧཱརཾ གནྟྭཱ ཨུབྷོཔི པབྦཛིཏེ དིསྭཱ ‘‘ཨིམེསཾ པབྦཛིཏཀཱལེ མམ གེཧེན ཀོ ཨཏྠོ’’ཏི སཡམྤི བྷིཀྑུནིཨུཔསྶཡཾ གནྟྭཱ པབྦཛི. ཏེ པབྦཛིཏྭཱཔི ཝིནཱ བྷཝིཏུཾ ན སཀྐོནྟི, ཝིཧཱརེཔི བྷིཀྑུནིཨུཔསྶཡེཔི ཨེཀཏོཝ ནིསཱིདིཏྭཱ སལླཔནྟཱ དིཝསཾ ཝཱིཏིནཱམེནྟི. ཏེན བྷིཀྑཱུཔི བྷིཀྑཱུནིཡོཔི ཨུབྦཱལ༹ྷཱ ཧོནྟི.

ཨཐེཀདིཝསཾ བྷིཀྑཱུ ནེསཾ ཀིརིཡཾ སཏྠུཾ ཨཱརོཙེསུཾ. སཏྠཱ ཏེ པཀྐོསཱཔེཏྭཱ ‘‘སཙྩཾ ཀིར ཏུམྷེ ཨེཝཾ ཀརོཐཱ’’ཏི པུཙྪིཏྭཱ ‘‘སཙྩ’’ནྟི ཝུཏྟེ ‘‘ཀསྨཱ ཨེཝཾ ཀརོཐ? ན ཧི ཨེས པབྦཛིཏཱནཾ ཡོགོ’’ཏི. ‘‘བྷནྟེ, ཝིནཱ བྷཝིཏུཾ ན སཀྐོམཱ’’ཏི. ‘‘པབྦཛིཏཀཱལཏོ པཊྛཱཡ ཨེཝཾ ཀརཎཾ ཨཡུཏྟཾ. པིཡཱནཉྷི ཨདསྶནཾ, ཨཔྤིཡཱནཉྩ དསྶནཾ དུཀྑམེཝ. ཏསྨཱ སཏྟེསུ ཙ སངྑཱརེསུ ཙ ཀཉྩི པིཡཾ ཝཱ ཨཔྤིཡཾ ཝཱ ཀཱཏུཾ ན ཝཊྚཏཱི’’ཏི ཝཏྭཱ ཨིམཱ གཱཐཱ ཨབྷཱསི –

༢༠༩.

‘‘ཨཡོགེ ཡུཉྫམཏྟཱནཾ, ཡོགསྨིཉྩ ཨཡོཛཡཾ;

ཨཏྠཾ ཧིཏྭཱ པིཡགྒཱཧཱི, པིཧེཏཏྟཱནུཡོགིནཾ.

༢༡༠.

‘‘མཱ པིཡེཧི སམཱགཉྪི, ཨཔྤིཡེཧི ཀུདཱཙནཾ;

པིཡཱནཾ ཨདསྶནཾ དུཀྑཾ, ཨཔྤིཡཱནཉྩ དསྶནཾ.

༢༡༡.

‘‘ཏསྨཱ པིཡཾ ན ཀཡིརཱཐ, པིཡཱཔཱཡོ ཧི པཱཔཀོ;

གནྠཱ ཏེསཾ ན ཝིཛྫནྟི, ཡེསཾ ནཏྠི པིཡཱཔྤིཡ’’ནྟི.

ཏཏྠ ཨཡོགེཏི ཨཡུཉྫིཏབྦེ ཨཡོནིསོམནསིཀཱརེ. ཝེསིཡཱགོཙརཱདིབྷེདསྶ ཧི ཚབྦིདྷསྶ ཨགོཙརསྶ སེཝནཾ ཨིདྷ ཨཡོནིསོམནསིཀཱརོ ནཱམ, ཏསྨིཾ ཨཡོནིསོམནསིཀཱརེ ཨཏྟཱནཾ ཡུཉྫནྟོཏི ཨཏྠོ. ཡོགསྨིནྟི ཏབྦིཔརཱིཏེ ཙ ཡོནིསོམནསིཀཱརེ ཨཡུཉྫནྟོཏི ཨཏྠོ. ཨཏྠཾ ཧིཏྭཱཏི པབྦཛིཏཀཱལཏོ པཊྛཱཡ ཨདྷིསཱིལཱདིསིཀྑཏྟཡཾ ཨཏྠོ ནཱམ, ཏཾ ཨཏྠཾ ཧིཏྭཱ. པིཡགྒཱཧཱིཏི པཉྩཀཱམགུཎསངྑཱཏཾ པིཡམེཝ གཎྷནྟོ. པིཧེཏཏྟཱནུཡོགིནནྟི ཏཱཡ པཊིཔཏྟིཡཱ སཱསནཏོ ཙུཏོ གིཧིབྷཱཝཾ པཏྭཱ པཙྪཱ ཡེ ཨཏྟཱནུཡོགཾ ཨནུཡུཏྟཱ སཱིལཱདཱིནི སམྤཱདེཏྭཱ དེཝམནུསྶཱནཾ སནྟིཀཱ སཀྐཱརཾ ལབྷནྟི, ཏེསཾ པིཧེཏི, ‘‘ཨཧོ ཝཏཱཧམྤི ཨེཝརཱུཔོ ཨསྶ’’ནྟི ཨིཙྪཏཱིཏི ཨཏྠོ.

མཱ པིཡེཧཱིཏི པིཡེཧི སཏྟེཧི ཝཱ སངྑཱརེཧི ཝཱ ཀུདཱཙནཾ ཨེཀཀྑཎེཔི ན སམཱགཙྪེཡྻ, ཏཐཱ ཨཔྤིཡེཧི. ཀིཾ ཀཱརཎཱ? པིཡཱ ནཉྷི ཝིཡོགཝསེན ཨདསྶནཾ ཨཔྤིཡཱནཉྩ ཨུཔསངྐམནཝསེན དསྶནཾ ནཱམ དུཀྑཾ. ཏསྨཱཏི ཡསྨཱ ཨིདཾ ཨུབྷཡམྤི དུཀྑཾ, ཏསྨཱ ཀཉྩི སཏྟཾ ཝཱ སངྑཱརཾ ཝཱ པིཡཾ ནཱམ ན ཀརེཡྻ. པིཡཱཔཱཡོ ཧཱིཏི པིཡེཧི ཨཔཱཡོ ཝིཡོགོ. པཱཔཀོཏི ལཱམཀོ. གནྠཱ ཏེསཾ ན ཝིཛྫནྟཱིཏི ཡེསཾ པིཡཾ ནཏྠི, ཏེསཾ ཨབྷིཛ྄ཛྷཱཀཱཡགནྠོ པཧཱིཡཏི. ཡེསཾ ཨཔྤིཡཾ ནཏྠི, ཏེསཾ བྱཱཔཱདོ ཀཱཡགནྠོ. ཏེསུ པན དྭཱིསུ པཧཱིནེསུ སེསགནྠཱ པཧཱིནཱ ཧོནྟི. ཏསྨཱ པིཡཾ ཝཱ ཨཔྤིཡཾ ཝཱ ན ཀཏྟབྦནྟི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི. ཏེན པན ཏཡོ ཛནཱ ‘‘མཡཾ ཝིནཱ བྷཝིཏུཾ ན སཀྐོམཱ’’ཏི ཝིབྦྷམིཏྭཱ གེཧམེཝ ཨགམིཾསཱུཏི.

ཏཡོཛནཔབྦཛིཏཝཏྠུ པཋམཾ.

༢. ཨཉྙཏརཀུཊུམྦིཀཝཏྠུ

པིཡཏོ ཛཱཡཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ ཀུཊུམྦིཀཾ ཨཱརབྦྷ ཀཐེསི.

སོ ཧི ཨཏྟནོ པུཏྟེ ཀཱལཀཏེ པུཏྟསོཀཱབྷིབྷཱུཏོ ཨཱལཱ༹ཧནཾ གནྟྭཱ རོདཏི, པུཏྟསོཀཾ སནྡྷཱརེཏུཾ ན སཀྐོཏི. སཏྠཱ པཙྩཱུསཀཱལེ ལོཀཾ ཝོལོཀེནྟོ ཏསྶ སོཏཱཔཏྟིམགྒསྶཱུཔནིསྶཡཾ དིསྭཱ པིཎྜཔཱཏཔཊིཀྐནྟོ ཨེཀཾ པཙྪཱསམཎཾ གཧེཏྭཱ ཏསྶ གེཧདྭཱརཾ ཨགམཱསི. སོ སཏྠུ ཨཱགཏབྷཱཝཾ སུཏྭཱ ‘‘མཡཱ སདྡྷིཾ པཊིསནྠཱརཾ ཀཱཏུཀཱམོ བྷཝིསྶཏཱི’’ཏི སཏྠཱརཾ པཝེསེཏྭཱ གེཧམཛ྄ཛྷེ ཨཱསནཾ པཉྙཱཔེཏྭཱ སཏྠརི ནིསིནྣེ ཨཱགནྟྭཱ ཨེཀམནྟཾ ནིསཱིདི. ཨཐ ནཾ སཏྠཱ ‘‘ཀིཾ ནུ ཁོ, ཨུཔཱསཀ, དུཀྑིཏོསཱི’’ཏི པུཙྪིཏྭཱ ཏེན པུཏྟཝིཡོགདུཀྑེ ཨཱརོཙིཏེ, ‘‘ཨུཔཱསཀ, མཱ ཙིནྟཡི, ཨིདཾ མརཎཾ ནཱམ ན ཨེཀསྨིཾཡེཝ ཋཱནེ, ན ཙ ཨེཀསྶེཝ ཧོཏི, ཡཱཝཏཱ པན བྷཝུཔྤཏྟི ནཱམ ཨཏྠི, སབྦསཏྟཱནཾ ཧོཏིཡེཝ. ཨེཀསངྑཱརོཔི ནིཙྩོ ནཱམ ནཏྠི. ཏསྨཱ ‘མརཎདྷམྨཾ མཏཾ, བྷིཛྫནདྷམྨཾ བྷིནྣ’ནྟི ཡོནིསོ པཙྩཝེཀྑིཏབྦཾ, ན སོཙིཏབྦཾ. པོརཱཎཔཎྜིཏཱཔི ཧི པུཏྟསྶ མཏཀཱལེ ‘མརཎདྷམྨཾ མཏཾ, བྷིཛྫནདྷམྨཾ བྷིནྣ’ནྟི སོཀཾ ཨཀཏྭཱ མརཎསྶཏིམེཝ བྷཱཝཡིཾསཱུ’’ཏི ཝཏྭཱ, ‘‘བྷནྟེ, ཀེ ཨེཝམཀཾསུ, ཀདཱ ཙ ཨཀཾསུ, ཨཱཙིཀྑཐ མེ’’ཏི ཡཱཙིཏོ ཏསྶཏྠསྶ པཀཱསནཏྠཾ ཨཏཱིཏཾ ཨཱཧརིཏྭཱ –

‘‘ཨུརགོཝ ཏཙཾ ཛིཎྞཾ, ཧིཏྭཱ གཙྪཏི སཾ ཏནུཾ;

ཨེཝཾ སརཱིརེ ནིབྦྷོགེ, པེཏེ ཀཱལཀཏེ སཏི.

‘‘ཌཡ྄ཧམཱནོ ན ཛཱནཱཏི, ཉཱཏཱིནཾ པརིདེཝིཏཾ;

ཏསྨཱ ཨེཏཾ ན སོཙཱམི, གཏོ སོ ཏསྶ ཡཱ གཏཱི’’ཏི. (ཛཱ. ༡.༥.༡༩-༢༠) –

ཨིམཾ པཉྩཀནིཔཱཏེ ཨུརགཛཱཏཀཾ ཝིཏྠཱརེཏྭཱ ‘‘ཨེཝཾ པུབྦེ པཎྜིཏཱ པིཡཔུཏྟེ ཀཱལཀཏེ ཡཐཱ ཨེཏརཧི ཏྭཾ ཀམྨནྟེ ཝིསྶཛྫེཏྭཱ ནིརཱཧཱརོ རོདནྟོ ཝིཙརསི, ཏཐཱ ཨཝིཙརིཏྭཱ མརཎསྶཏིབྷཱཝནཱབལེན སོཀཾ ཨཀཏྭཱ ཨཱཧཱརཾ པརིབྷུཉྫིཾསུ, ཀམྨནྟཉྩ ཨདྷིཊྛཧིཾསུ. ཏསྨཱ ‘པིཡཔུཏྟོ མེ ཀཱལཀཏོ’ཏི མཱ ཙིནྟཡི. ཨུཔྤཛྫམཱནོ ཧི སོཀོ ཝཱ བྷཡཾ ཝཱ པིཡམེཝ ནིསྶཱཡ ཨུཔྤཛྫཏཱི’’ཏི ཝཏྭཱ ཨིམཾ གཱཐམཱཧ –

༢༡༢.

‘‘པིཡཏོ ཛཱཡཏཱི སོཀོ, པིཡཏོ ཛཱཡཏཱི བྷཡཾ;

པིཡཏོ ཝིཔྤམུཏྟསྶ, ནཏྠི སོཀོ ཀུཏོ བྷཡ’’ནྟི.

ཏཏྠ པིཡཏོཏི ཝཊྚམཱུལཀོ ཧི སོཀོ ཝཱ བྷཡཾ ཝཱ ཨུཔྤཛྫམཱནཾ པིཡམེཝ སཏྟཾ ཝཱ སངྑཱརཾ ཝཱ ནིསྶཱཡ ཨུཔྤཛྫཏི, ཏཏོ པན ཝིཔྤམུཏྟསྶ ཨུབྷཡམྤེཏཾ ནཏྠཱིཏི ཨཏྠོ.

དེསནཱཝསཱནེ ཀུཊུམྦིཀོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཨཉྙཏརཀུཊུམྦིཀཝཏྠུ དུཏིཡཾ.

༣. ཝིསཱཁཱཝཏྠུ

པེམཏོ ཛཱཡཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཝིསཱཁཾ ཨུཔཱསིཀཾ ཨཱརབྦྷ ཀཐེསི.

སཱ ཀིར པུཏྟསྶ དྷཱིཏརཾ སུདཏྟཾ ནཱམ ཀུམཱརིཀཾ ཨཏྟནོ ཋཱནེ ཋཔེཏྭཱ གེཧེ བྷིཀྑུསངྒྷསྶ ཝེཡྻཱཝཙྩཾ ཀཱརེསི. སཱ ཨཔརེན སམཡེན ཀཱལམཀཱསི. སཱ ཏསྶཱ སརཱིརནིཀྑེཔཾ ཀཱརེཏྭཱ སོཀཾ སནྡྷཱརེཏུཾ ཨསཀྐོནྟཱི དུཀྑིནཱི དུམྨནཱ སཏྠུ སནྟིཀཾ གནྟྭཱ ཝནྡིཏྭཱ ཨེཀམནྟཾ ནིསཱིདི. ཨཐ ནཾ སཏྠཱ ‘‘ཀིཾ ནུ ཁོ ཏྭཾ, ཝིསཱཁེ, དུཀྑིནཱི དུམྨནཱ ཨསྶུམུཁཱ རོདམཱནཱ ནིསིནྣཱ’’ཏི ཨཱཧ. སཱ ཏམཏྠཾ ཨཱརོཙེཏྭཱ ‘‘པིཡཱ མེ, བྷནྟེ, སཱ ཀུམཱརིཀཱ ཝཏྟསམྤནྣཱ, ཨིདཱནི ཏཐཱརཱུཔཾ ན པསྶཱམཱི’’ཏི ཨཱཧ. ‘‘ཀིཏྟཀཱ པན, ཝིསཱཁེ, སཱཝཏྠིཡཾ མནུསྶཱ’’ཏི? ‘‘བྷནྟེ, ཏུམྷེཧིཡེཝ མེ ཀཐིཏཾ སཏྟ ཛནཀོཊིཡོ’’ཏི. ‘‘སཙེ པནཱཡཾ ཨེཏྟཀོ ཛནོ ཏཝ ནཏྟཱཡ སདིསོ བྷཝེཡྻ, ཨིཙྪེཡྻཱསི ན’’ནྟི? ‘‘ཨཱམ, བྷནྟེ’’ཏི. ‘‘ཀཏི པན ཛནཱ སཱཝཏྠིཡཾ དེཝསིཀཾ ཀཱལཾ ཀརོནྟཱི’’ཏི? ‘‘བཧཱུ, བྷནྟེ’’ཏི. ‘‘ནནུ ཨེཝཾ, བྷནྟེ, ཏཝ ཨསོཙནཀཱལོ ན བྷཝེཡྻ, རཏྟིནྡིཝཾ རོདནྟཱིཡེཝ ཝིཙརེཡྻཱསཱི’’ཏི. ‘‘ཧོཏུ, བྷནྟེ, ཉཱཏཾ མཡཱ’’ཏི. ཨཐ ནཾ སཏྠཱ ‘‘ཏེན ཧི མཱ སོཙི, སོཀོ ཝཱ བྷཡཾ ཝཱ པེམཏོཝ ཛཱཡཏཱི’’ཏི ཝཏྭཱ ཨིམཾ གཱཐམཱཧ –

༢༡༣.

‘‘པེམཏོ ཛཱཡཏཱི སོཀོ, པེམཏོ ཛཱཡཏཱི བྷཡཾ;

པེམཏོ ཝིཔྤམུཏྟསྶ, ནཏྠི སོཀོ ཀུཏོ བྷཡ’’ནྟི.

ཏཏྠ པེམཏོཏི པུཏྟདྷཱིཏཱདཱིསུ ཀཏཾ པེམམེཝ ནིསྶཱཡ སོཀོ ཛཱཡཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཝིསཱཁཱཝཏྠུ ཏཏིཡཾ.

༤. ལིཙྪཝཱིཝཏྠུ

རཏིཡཱ ཛཱཡཏཱིཏི ཨིམཾ དྷམྨདེསནཾ སཏྠཱ ཝེསཱལིཾ ནིསྶཱཡ ཀཱུཊཱགཱརསཱལཱཡཾ ཝིཧརནྟོ ལིཙྪཝཱི ཨཱརབྦྷ ཀཐེསི.

ཏེ ཀིར ཨེཀསྨིཾ ཚཎདིཝསེ ཨཉྙམཉྙཾ ཨསདིསེཧི ཨལངྐཱརེཧི ཨལངྐརིཏྭཱ ཨུཡྻཱནགམནཏྠཱཡ ནགརཱ ནིཀྑམིཾསུ. སཏྠཱ པིཎྜཱཡ པཝིསནྟོ ཏེ དིསྭཱ བྷིཀྑཱུ ཨཱམནྟེསི – ‘‘པསྶཐ, བྷིཀྑཝེ, ལིཙྪཝཡོ, ཡེཧི དེཝཱ ཏཱཝཏིཾསཱ ན དིཊྛཔུབྦཱ, ཏེ ཨིམེ ཨོལོཀེནྟཱུ’’ཏི ཝཏྭཱ ནགརཾ པཱཝིསི. ཏེཔི ཨུཡྻཱནཾ གཙྪནྟཱ ཨེཀཾ ནགརསོབྷིནིཾ ཨིཏྠིཾ ཨཱདཱཡ གནྟྭཱ ཏཾ ནིསྶཱཡ ཨིསྶཱབྷིབྷཱུཏཱ ཨཉྙམཉྙཾ པཧརིཏྭཱ ལོཧིཏཾ ནདིཾ ཝིཡ པཝཏྟཡིཾསུ. ཨཐ ནེ མཉྩེནཱདཱཡ ཨུཀྑིཔིཏྭཱ ཨཱགམཾསུ. སཏྠཱཔི ཀཏབྷཏྟཀིཙྩོ ནགརཱ ནིཀྑམི. བྷིཀྑཱུཔི ལིཙྪཝཡོ ཏཐཱ ནཱིཡམཱནེ དིསྭཱ སཏྠཱརཾ ཨཱཧཾསུ – ‘‘བྷནྟེ, ལིཙྪཝིརཱཛཱནོ པཱཏོཝ ཨལངྐཏཔཊིཡཏྟཱ དེཝཱ ཝིཡ ནགརཱ ནིཀྑམིཏྭཱ ཨིདཱནི ཨེཀཾ ཨིཏྠིཾ ནིསྶཱཡ ཨིམཾ བྱསནཾ པཏྟཱ’’ཏི. སཏྠཱ, ‘‘བྷིཀྑཝེ, སོཀོ ཝཱ བྷཡཾ ཝཱ ཨུཔྤཛྫམཱནཾ རཏིཾ ནིསྶཱཡ ཨུཔྤཛྫཏིཡེཝཱ’’ཏི ཝཏྭཱ ཨིམཾ གཱཐམཱཧ –

༢༡༤.

‘‘རཏིཡཱ ཛཱཡཏཱི སོཀོ, རཏིཡཱ ཛཱཡཏཱི བྷཡཾ;

རཏིཡཱ ཝིཔྤམུཏྟསྶ, ནཏྠི སོཀོ ཀུཏོ བྷཡ’’ནྟི.

ཏཏྠ རཏིཡཱཏི པཉྩཀཱམགུཎརཏིཏོ, ཏཾ ནིསྶཱཡཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ལིཙྪཝཱིཝཏྠུ ཙཏུཏྠཾ.

༥. ཨནིཏྠིགནྡྷཀུམཱརཝཏྠུ

ཀཱམཏོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨནིཏྠིགནྡྷཀུམཱརཾ ནཱམ ཨཱརབྦྷ ཀཐེསི.

སོ ཀིར བྲཧྨལོཀཱ ཙུཏསཏྟོ སཱཝཏྠིཡཾ མཧཱབྷོགཀུལེ ནིབྦཏྟོ ཛཱཏདིཝསཏོ པཊྛཱཡ ཨིཏྠིསམཱིཔཾ ཨུཔགནྟུཾ ན ཨིཙྪཏི, ཨིཏྠིཡཱ གཡ྄ཧམཱནོ རོདཏི. ཝཏྠཙུམྦཊཀེན ནཾ གཧེཏྭཱ ཐཉྙཾ པཱཡེནྟི. སོ ཝཡཔྤཏྟོ མཱཏཱཔིཏཱུཧི, ‘‘ཏཱཏ, ཨཱཝཱཧཾ ཏེ ཀརིསྶཱམཱ’’ཏི ཝུཏྟེ ‘‘ན མེ ཨིཏྠིཡཱ ཨཏྠོ’’ཏི པཊིཀྑིཔིཏྭཱ པུནཔྤུནཾ ཡཱཙིཡམཱནོ པཉྩསཏེ སུཝཎྞཀཱརེ པཀྐོསཱཔེཏྭཱ རཏྟསུཝཎྞནིཀྑསཧསྶཾ དཱཔེཏྭཱ ཨཏིཝིཡ པཱསཱདིཀཾ གྷནཀོཊྚིམཾ ཨིཏྠིརཱུཔཾ ཀཱརེཏྭཱ པུན མཱཏཱཔིཏཱུཧི, ‘‘ཏཱཏ, ཏཡི ཨཱཝཱཧཾ ཨཀརོནྟེ ཀུལཝཾསོ ན པཏིཊྛཧིསྶཏི, ཀུམཱརིཀཾ ཏེ ཨཱནེསྶཱམཱ’’ཏི ཝུཏྟེ ‘‘ཏེན ཧི སཙེ མེ ཨེཝརཱུཔཾ ཀུམཱརིཀཾ ཨཱནེསྶཐ, ཀརིསྶཱམི ཝོ ཝཙན’’ནྟི ཏཾ སུཝཎྞརཱུཔཀཾ དསྶེཏི. ཨཐསྶ མཱཏཱཔིཏརོ ཨབྷིཉྙཱཏེ བྲཱཧྨཎེ པཀྐོསཱཔེཏྭཱ ‘‘ཨམྷཱཀཾ པུཏྟོ མཧཱཔུཉྙོ, ཨཝསྶཾ ཨིམིནཱ སདྡྷིཾ ཀཏཔུཉྙཱ ཀུམཱརིཀཱ བྷཝིསྶཏི, གཙྪཐ ཨིམཾ སུཝཎྞརཱུཔཀཾ གཧེཏྭཱ ཨེཝརཱུཔཾ ཀུམཱརིཀཾ ཨཱཧརཐཱ’’ཏི པཧིཎིཾསུ. ཏེ ‘‘སཱདྷཱུ’’ཏི ཙཱརིཀཾ ཙརནྟཱ མདྡརཊྛེ སཱགལནགརཾ གཏཱ. ཏསྨིཉྩ ནགརེ ཨེཀཱ སོལ༹སཝསྶུདྡེསིཀཱ ཨབྷིརཱུཔཱ ཀུམཱརིཀཱ ཨཧོསི, ཏཾ མཱཏཱཔིཏརོ སཏྟབྷཱུམིཀསྶ པཱསཱདསྶཱུཔརིམཏལེ པརིཝཱསེསུཾ. ཏེཔི ཁོ བྲཱཧྨཎཱ ‘‘སཙེ ཨིདྷ ཨེཝརཱུཔཱ ཀུམཱརིཀཱ བྷཝིསྶཏི, ཨིམཾ དིསྭཱ ‘ཨཡཾ ཨསུཀསྶ ཀུལསྶ དྷཱིཏཱ ཝིཡ ཨབྷིརཱུཔཱ’ཏི ཝཀྑནྟཱི’’ཏི ཏཾ སུཝཎྞརཱུཔཀཾ ཏིཏྠམགྒེ ཋཔེཏྭཱ ཨེཀམནྟཾ ནིསཱིདིཾསུ.

ཨཐསྶ ཀུམཱརིཀཱཡ དྷཱཏཱི ཏཾ ཀུམཱརིཀཾ ནྷཱཔེཏྭཱ སཡམྤི ནྷཱཡིཏུཀཱམཱ ཧུཏྭཱ ཏིཏྠཾ ཨཱགཏཱ ཏཾ རཱུཔཀཾ དིསྭཱ ‘‘དྷཱིཏཱ མེ’’ཏི སཉྙཱཡ ‘‘དུབྦིནཱིཏཱསི, ཨིདཱནེཝཱཧཾ ནྷཱཔེཏྭཱ ནིཀྑནྟཱ, ཏྭཾ མཡཱ པུརེཏརཾ ཨིདྷཱགཏཱསཱི’’ཏི ཧཏྠེན པཧརིཏྭཱ ཐདྡྷབྷཱཝཉྩེཝ ནིབྦིཀཱརཏཉྩ ཉཏྭཱ ‘‘ཨཧཾ མེ, དྷཱིཏཱཏི སཉྙམཀཱསིཾ, ཀིཾ ནཱམེཏ’’ནྟི ཨཱཧ. ཨཐ ནཾ ཏེ བྲཱཧྨཎཱ ‘‘ཨེཝརཱུཔཱ ཏེ, ཨམྨ, དྷཱིཏཱ’’ཏི པུཙྪིཾསུ. ཨཡཾ མམ དྷཱིཏུ སནྟིཀེ ཀིཾ ཨགྒྷཏཱིཏི? ཏེན ཧི ཏེ དྷཱིཏརཾ ཨམྷཱཀཾ དསྶེཧཱིཏི. སཱ ཏེཧི སདྡྷིཾ གེཧཾ གནྟྭཱ སཱམིཀཱནཾ ཨཱརོཙེསི. ཏེ བྲཱཧྨཎེཧི སདྡྷིཾ ཀཏཔཊིསམྨོདནཱ དྷཱིཏརཾ ཨོཏཱརེཏྭཱ ཧེཊྛཱཔཱསཱདེ སུཝཎྞརཱུཔཀསྶ སནྟིཀེ ཋཔེསུཾ. སུཝཎྞརཱུཔཀཾ ནིཔྤབྷཾ ཨཧོསི, ཀུམཱརིཀཱ སཔྤབྷཱ ཨཧོསི. བྲཱཧྨཎཱ ཏཾ ཏེསཾ དཏྭཱ ཀུམཱརིཀཾ པཊིཙྪཱཔེཏྭཱ གནྟྭཱ ཨནིཏྠིགནྡྷཀུམཱརསྶ མཱཏཱཔིཏཱུནཾ ཨཱརོཙཡིཾསུ. ཏེ ཏུཊྛམཱནསཱ ‘‘གཙྪཐ, ནཾ སཱིགྷཾ ཨཱནེཐཱ’’ཏི མཧནྟེན སཀྐཱརེན པཧིཎིཾསུ.

ཀུམཱརོཔི ཏཾ པཝཏྟིཾ སུཏྭཱ ‘‘ཀཉྩནརཱུཔཏོཔི ཀིར ཨབྷིརཱུཔཏརཱ དཱརིཀཱ ཨཏྠཱི’’ཏི སཝནཝསེནེཝ སིནེཧཾ ཨུཔྤཱདེཏྭཱ ‘‘སཱིགྷཾ ཨཱནེནྟཱུ’’ཏི ཨཱཧ. སཱཔི ཁོ ཡཱནཾ ཨཱརོཔེཏྭཱ ཨཱནཱིཡམཱནཱ ཨཏིསུཁུམཱལཏཱཡ ཡཱནུགྒྷཱཏེན སམུཔྤཱདིཏཝཱཏརོགཱ ཨནྟརཱམགྒེཡེཝ ཀཱལམཀཱསི. ཀུམཱརོཔི ‘‘ཨཱགཏཱ’’ཏི ནིརནྟརཾ པུཙྪཏི, ཏསྶ ཨཏིསིནེཧེན པུཙྪནྟསྶ སཧསཱཝ ཨནཱརོཙེཏྭཱ ཀཏིཔཱཧཾ ཝིཀྑེཔཾ ཀཏྭཱ ཏམཏྠཾ ཨཱརོཙཡིཾསུ. སོ ‘‘ཏཐཱརཱུཔཱཡ ནཱམ ཨིཏྠིཡཱ སདྡྷིཾ སམཱགམཾ ནཱལཏྠ’’ནྟི ཨུཔྤནྣདོམནསྶོ པབྦཏེན ཝིཡ སོཀདུཀྑེན ཨཛ྄ཛྷོཏྠཊོ ཨཧོསི. སཏྠཱ ཏསྶཱུཔནིསྶཡཾ དིསྭཱ པིཎྜཱཡ ཙརནྟོ ཏཾ གེཧདྭཱརཾ ཨགམཱསི. ཨཐསྶ མཱཏཱཔིཏརོ སཏྠཱརཾ ཨནྟོགེཧཾ པཝེསེཏྭཱ སཀྐཙྩཾ པརིཝིསིཾསུ. སཏྠཱ བྷཏྟཀིཙྩཱཝསཱནེ ‘‘ཀཧཾ ཨནིཏྠིགནྡྷཀུམཱརོ’’ཏི པུཙྪི. ‘‘ཨེསོ, བྷནྟེ, ཨཱཧཱརཱུཔཙྪེདཾ ཀཏྭཱ ཨནྟོགབྦྷེ ནིསིནྣོ’’ཏི. ‘‘པཀྐོསཐ ན’’ནྟི. སོ ཨཱགནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདི. སཏྠཱ ‘‘ཀིཾ ནུ ཁོ, ཀུམཱར, བལཝསོཀོ ཨུཔྤནྣོ’’ཏི ཝུཏྟེ, ‘‘ཨཱམ, བྷནྟེ, ‘ཨེཝརཱུཔཱ ནཱམ ཨིཏྠཱི ཨནྟརཱམགྒེ ཀཱལཀཏཱ’ཏི སུཏྭཱ བལཝསོཀོ ཨུཔྤནྣོ, བྷཏྟམྤི མེ ནཙྪཱདེཏཱི’’ཏི. ཨཐ ནཾ སཏྠཱ ‘‘ཛཱནཱསི པན ཏྭཾ, ཀུམཱར, ཀིཾ ཏེ ནིསྶཱཡ སོཀོ ཨུཔྤནྣོ’’ཏི? ‘‘ན ཛཱནཱམི, བྷནྟེ’’ཏི. ‘‘ཀཱམཾ ནིསྶཱཡ, ཀུམཱར, བལཝསོཀོ ཨུཔྤནྣོ, སོཀོ ཝཱ བྷཡཾ ཝཱ ཀཱམཾ ནིསྶཱཡ ཨུཔྤཛྫཏཱི’’ཏི ཝཏྭཱ ཨིམཾ གཱཐམཱཧ –

༢༡༥.

‘‘ཀཱམཏོ ཛཱཡཏཱི སོཀོ, ཀཱམཏོ ཛཱཡཏཱི བྷཡཾ;

ཀཱམཏོ ཝིཔྤམུཏྟསྶ, ནཏྠི སོཀོ ཀུཏོ བྷཡ’’ནྟི.

ཏཏྠ ཀཱམཏོཏི ཝཏྠུཀཱམཀིལེསཀཱམཏོ, དུཝིདྷམྤེཏཾ ཀཱམཾ ནིསྶཱཡཱཏི ཨཏྠོ.

དེསནཱཝསཱནེ ཨནིཏྠིགནྡྷཀུམཱརོ སོཏཱཔཏྟིཕལེ པཏིཊྛཧི.

ཨནིཏྠིགནྡྷཀུམཱརཝཏྠུ པཉྩམཾ.

༦. ཨཉྙཏརབྲཱཧྨཎཝཏྠུ

ཏཎྷཱཡ ཛཱཡཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ བྲཱཧྨཎཾ ཨཱརབྦྷ ཀཐེསི.

སོ ཀིར མིཙྪཱདིཊྛིཀོ ཨེཀདིཝསཾ ནདཱིཏཱིརཾ གནྟྭཱ ཁེཏྟཾ སོདྷེཏི. སཏྠཱ ཏསྶ ཨུཔནིསྶཡསམྤཏྟིཾ དིསྭཱ ཏསྶ སནྟིཀཾ ཨགམཱསི. སོ སཏྠཱརཾ དིསྭཱཔི སཱམཱིཙིཀམྨཾ ཨཀཏྭཱ ཏུཎྷཱི ཨཧོསི. ཨཐ ནཾ སཏྠཱ པུརེཏརཾ ཨཱལཔིཏྭཱ, ‘‘བྲཱཧྨཎ, ཀིཾ ཀརོསཱི’’ཏི ཨཱཧ. ‘‘ཁེཏྟཾ, བྷོ གོཏམ, སོདྷེམཱི’’ཏི. སཏྠཱ ཨེཏྟཀམེཝ ཝཏྭཱ གཏོ. པུནདིཝསེཔི ཏསྶ ཁེཏྟཾ ཀསིཏུཾ ཨཱགཏསྶ སནྟིཀཾ གནྟྭཱ, ‘‘བྲཱཧྨཎ, ཀིཾ ཀརོསཱི’’ཏི པུཙྪིཏྭཱ ‘‘ཁེཏྟཾ ཀསཱམི, བྷོ གོཏམཱ’’ཏི སུཏྭཱ པཀྐཱམི. པུནདིཝསཱདཱིསུཔི ཏཐེཝ གནྟྭཱ པུཙྪིཏྭཱ, ‘‘བྷོ གོཏམ, ཁེཏྟཾ ཝཔཱམི ནིདྡེམི རཀྑཱམཱི’’ཏི སུཏྭཱ པཀྐཱམི. ཨཐ ནཾ ཨེཀདིཝསཾ བྲཱཧྨཎོ ཨཱཧ – ‘‘བྷོ གོཏམ, ཏྭཾ མམ ཁེཏྟསོདྷནདིཝསཏོ པཊྛཱཡ ཨཱགཏོ. སཙེ མེ སསྶཾ སམྤཛྫིསྶཏི, ཏུཡ྄ཧམྤི སཾཝིབྷཱགཾ ཀརིསྶཱམི, ཏུཡ྄ཧཾ ཨདཏྭཱ སཡཾ ན ཁཱདིསྶཱམི, ཨིཏོ དཱནི པཊྛཱཡ ཏྭཾ མམ སཧཱཡོ’’ཏི.

ཨཐསྶ ཨཔརེན སམཡེན སསྶཾ སམྤཛྫི, ཏསྶ ‘‘སམྤནྣཾ མེ སསྶཾ, སྭེ དཱནི ལཱཡཱཔེསྶཱམཱི’’ཏི ལཱཡནཏྠཾ ཀཏྟབྦཀིཙྩསྶ རཏྟིཾ མཧཱམེགྷོ ཝསྶིཏྭཱ སབྦཾ སསྶཾ ཧརི, ཁེཏྟཾ ཏཙྪེཏྭཱ ཋཔིཏསདིསཾ ཨཧོསི. སཏྠཱ པན པཋམདིཝསཾཡེཝ ‘‘ཏཾ སསྶཾ ན སམྤཛྫིསྶཏཱི’’ཏི ཨཉྙཱསི. བྲཱཧྨཎོ པཱཏོཝ ‘‘ཁེཏྟཾ ཨོལོཀེསྶཱམཱི’’ཏི གཏོ ཏུཙྪཾ ཁེཏྟཾ དིསྭཱ ཨུཔྤནྣབལཝསོཀོ ཙིནྟེསི – ‘‘སམཎོ གོཏམོ མམ ཁེཏྟསོདྷནཀཱལཏོ པཊྛཱཡ ཨཱགཏོ, ཨཧམྤི ནཾ ‘ཨིམསྨིཾ སསྶེ ནིཔྥནྣེ ཏུཡ྄ཧམྤི སཾཝིབྷཱགཾ ཀརིསྶཱམི, ཏུཡ྄ཧཾ ཨདཏྭཱ སཡཾ ན ཁཱདིསྶཱམི, ཨིཏོ པཊྛཱཡ དཱནི ཏྭཾ མམ སཧཱཡོ’ཏི ཨཝཙཾ. སོཔི མེ མནོརཐོ མཏྠཀཾ ན པཱཔུཎཱི’’ཏི ཨཱཧཱརཱུཔཙྪེདཾ ཀཏྭཱ མཉྩཀེ ནིཔཛྫི. ཨཐསྶ སཏྠཱ གེཧདྭཱརཾ ཨགམཱསི. སོ སཏྠུ ཨཱགམནཾ སུཏྭཱ ‘‘སཧཱཡཾ མེ ཨཱནེཏྭཱ ཨིདྷ ནིསཱིདཱཔེཐཱ’’ཏི ཨཱཧ. པརིཛནོ ཏཐཱ ཨཀཱསི. སཏྠཱ ནིསཱིདིཏྭཱ ‘‘ཀཧཾ བྲཱཧྨཎོ’’ཏི པུཙྪིཏྭཱ ‘‘གབྦྷེ ནིཔནྣོ’’ཏི ཝུཏྟེ ‘‘པཀྐོསཐ ན’’ནྟི པཀྐོསཱཔེཏྭཱ ཨཱགནྟྭཱ ཨེཀམནྟཾ ནིསིནྣཾ ཨཱཧ ‘‘ཀིཾ, བྲཱཧྨཎཱ’’ཏི? བྷོ གོཏམ, ཏུམྷེ མམ ཁེཏྟསོདྷནདིཝསཏོ པཊྛཱཡ ཨཱགཏཱ, ཨཧམྤི ‘‘སསྶེ ནིཔྥནྣེ ཏུམྷཱཀཾ སཾཝིབྷཱགཾ ཀརིསྶཱམཱི’’ཏི ཨཝཙཾ. སོ མེ མནོརཐོ ཨནིཔྥནྣོ, ཏེན མེ སོཀོ ཨུཔྤནྣོ, བྷཏྟམྤི མེ ནཙྪཱདེཏཱིཏི. ཨཐ ནཾ སཏྠཱ ‘‘ཛཱནཱསི པན, བྲཱཧྨཎ, ཀིཾ ཏེ ནིསྶཱཡ སོཀོ ཨུཔྤནྣོ’’ཏི པུཙྪིཏྭཱ ‘‘ན ཛཱནཱམི, བྷོ གོཏམ, ཏྭཾ པན ཛཱནཱསཱི’’ཏི ཝུཏྟེ, ‘‘ཨཱམ, བྲཱཧྨཎ, ཨུཔྤཛྫམཱནོ སོཀོ ཝཱ བྷཡཾ ཝཱ ཏཎྷཾ ནིསྶཱཡ ཨུཔྤཛྫཏཱི’’ཏི ཝཏྭཱ ཨིམཾ གཱཐམཱཧ –

༢༡༦.

‘‘ཏཎྷཱཡ ཛཱཡཏཱི སོཀོ, ཏཎྷཱཡ ཛཱཡཏཱི བྷཡཾ;

ཏཎྷཱཡ ཝིཔྤམུཏྟསྶ, ནཏྠི སོཀོ ཀུཏོ བྷཡ’’ནྟི.

ཏཏྠ ཏཎྷཱཡཱཏི ཚདྭཱརིཀཱཡ ཏཎྷཱཡ, ཨེཏཾ ཏཎྷཾ ནིསྶཱཡ ཨུཔྤཛྫཏཱིཏི ཨཏྠོ.

དེསནཱཝསཱནེ བྲཱཧྨཎོ སོཏཱཔཏྟིཕལེ པཏིཊྛཧཱིཏི.

ཨཉྙཏརབྲཱཧྨཎཝཏྠུ ཚཊྛཾ.

༧. པཉྩསཏདཱརཀཝཏྠུ

སཱིལདསྶནསམྤནྣནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨནྟརཱམགྒེ པཉྩསཏདཱརཀེ ཨཱརབྦྷ ཀཐེསི.

ཨེཀདིཝསཉྷི སཏྠཱ ཨསཱིཏིམཧཱཐེརེཧི སདྡྷིཾ པཉྩསཏབྷིཀྑུཔརིཝཱརོ རཱཛགཧཾ པིཎྜཱཡ པཝིསནྟོ ཨེཀསྨིཾ ཚཎདིཝསེ པཉྩསཏེ དཱརཀེ པཱུཝཔཙྪིཡོ ཨུཀྑིཔཱཔེཏྭཱ ནགརཱ ནིཀྑམྨ ཨུཡྻཱནཾ གཙྪནྟེ ཨདྡས. ཏེཔི སཏྠཱརཾ ཝནྡིཏྭཱ པཀྐམིཾསུ, ཏེ ཨེཀཾ བྷིཀྑུམྤི ‘‘པཱུཝཾ གཎྷཐཱ’’ཏི ན ཝདིཾསུ. སཏྠཱ ཏེསཾ གཏཀཱལེ བྷིཀྑཱུ ཨཱཧ – ‘‘ཁཱདིསྶཐ, བྷིཀྑཝེ, པཱུཝེ’’ཏི. ‘‘ཀཧཾ བྷནྟེ, པཱུཝཱ’’ཏི? ‘‘ཀིཾ ན པསྶཐ ཏེ དཱརཀེ པཱུཝཔཙྪིཡོ ཨུཀྑིཔཱཔེཏྭཱ ཨཏིཀྐནྟེ’’ཏི? ‘‘བྷནྟེ, ཨེཝརཱུཔཱ ནཱམ དཱརཀཱ ཀསྶཙི པཱུཝཾ ན དེནྟཱི’’ཏི. ‘‘བྷིཀྑཝེ, ཀིཉྩཱཔི ཨེཏེ མཾ ཝཱ ཏུམྷེ ཝཱ པཱུཝེཧི ན ནིམནྟཡིཾསུ, པཱུཝསཱམིཀོ པན བྷིཀྑུ པཙྪཏོ ཨཱགཙྪཏི, པཱུཝེ ཁཱདིཏྭཱཝ གནྟུཾ ཝཊྚཏཱི’’ཏི. བུདྡྷཱནཉྷི ཨེཀཔུགྒལེཔི ཨིསྶཱ ཝཱ དོསོ ཝཱ ནཏྠི, ཏསྨཱ ཨིམཾ ཝཏྭཱ བྷིཀྑུསངྒྷཾ ཨཱདཱཡ ཨེཀསྨིཾ རུཀྑམཱུལེ ཚཱཡཱཡ ནིསཱིདི. དཱརཀཱ མཧཱཀསྶཔཏྠེརཾ པཙྪཏོ ཨཱགཙྪནྟཾ དིསྭཱ ཨུཔྤནྣསིནེཧཱ པཱིཏིཝེགེན པརིཔུཎྞསརཱིརཱ ཧུཏྭཱ པཙྪིཡོ ཨོཏཱརེཏྭཱ ཐེརཾ པཉྩཔཏིཊྛིཏེན ཝནྡིཏྭཱ པཱུཝེ པཙྪཱིཧི སདྡྷིཾཡེཝ ཨུཀྑིཔིཏྭཱ ‘‘གཎྷཐ, བྷནྟེ’’ཏི ཐེརཾ ཝདིཾསུ. ཨཐ ནེ ཐེརོ ཨཱཧ – ‘‘ཨེས སཏྠཱ བྷིཀྑུསངྒྷཾ གཧེཏྭཱ རུཀྑམཱུལེ ནིསིནྣོ, ཏུམྷཱཀཾ དེཡྻདྷམྨཾ ཨཱདཱཡ གནྟྭཱ བྷིཀྑུསངྒྷསྶ སཾཝིབྷཱགཾ ཀརོཐཱ’’ཏི. ཏེ ‘‘སཱདྷུ, བྷནྟེ’’ཏི ནིཝཏྟིཏྭཱ ཐེརེན སདྡྷིཾཡེཝ གནྟྭཱ པཱུཝེ དཏྭཱ ཨོལོཀཡམཱནཱ ཨེཀམནྟེ ཋཏྭཱ པརིབྷོགཱཝསཱནེ ཨུདཀཾ ཨདཾསུ. བྷིཀྑཱུ ཨུཛ྄ཛྷཱཡིཾསུ ‘‘དཱརཀེཧི མུཁོལོཀནེན བྷིཀྑཱ དིནྣཱ, སམྨཱསམྦུདྡྷཾ ཝཱ མཧཱཐེརེ ཝཱ པཱུཝེཧི ཨནཱཔུཙྪིཏྭཱ མཧཱཀསྶཔཏྠེརཾ དིསྭཱ པཙྪཱིཧི སདྡྷིཾཡེཝ ཨཱདཱཡ ཨཱགམིཾསཱུ’’ཏི. སཏྠཱ ཏེསཾ ཀཐཾ སུཏྭཱ, ‘‘བྷིཀྑཝེ, མམ པུཏྟེན མཧཱཀསྶཔེན སདིསོ བྷིཀྑུ དེཝམནུསྶཱནཾ པིཡོ ཧོཏི, ཏེ ཙ ཏསྶ ཙཏུཔཙྩཡེན པཱུཛཾ ཀརོནྟིཡེཝཱ’’ཏི ཝཏྭཱ ཨིམཾ གཱཐམཱཧ –

༢༡༧.

‘‘སཱིལདསྶནསམྤནྣཾ, དྷམྨཊྛཾ སཙྩཝེདིནཾ;

ཨཏྟནོ ཀམྨ ཀུབྦཱནཾ, ཏཾ ཛནོ ཀུརུཏེ པིཡ’’ནྟི.

ཏཏྠ སཱིལདསྶནསམྤནྣནྟི ཙཏུཔཱརིསུདྡྷིསཱིལེན ཙེཝ མགྒཕལསམྤཡུཏྟེན ཙ སམྨཱདསྶནེན སམྤནྣཾ. དྷམྨཊྛནྟི ནཝཝིདྷལོཀུཏྟརདྷམྨེ ཋིཏཾ, སཙྪིཀཏལོཀུཏྟརདྷམྨནྟི ཨཏྠོ. སཙྩཝེདིནནྟི ཙཏུནྣཾ སཙྩཱནཾ སོལ༹སཧཱཀཱརེཧི སཙྪིཀཏཏྟཱ སཙྩཉཱཎེན སཙྩཝེདིནཾ. ཨཏྟནོ ཀམྨ ཀུབྦཱནནྟི ཨཏྟནོ ཀམྨཾ ནཱམ ཏིསྶོ སིཀྑཱ, ཏཱ པཱུརཡམཱནནྟི ཨཏྠོ. ཏཾ ཛནོཏི ཏཾ པུགྒལཾ ལོཀིཡམཧཱཛནོ པིཡཾ ཀརོཏི, དཊྛུཀཱམོ ཝནྡིཏུཀཱམོ པཙྩཡེན པཱུཛེཏུཀཱམོ ཧོཏིཡེཝཱཏི ཨཏྠོ.

དེསནཱཝསཱནེ སབྦེཔི ཏེ དཱརཀཱ སོཏཱཔཏྟིཕལེ པཏིཊྛཧིཾསཱུཏི.

པཉྩསཏདཱརཀཝཏྠུ སཏྟམཾ.

༨. ཨེཀཨནཱགཱམིཏྠེརཝཏྠུ

ཚནྡཛཱཏོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཨནཱགཱམིཏྠེརཾ ཨཱརབྦྷ ཀཐེསི.

ཨེཀདིཝསཉྷི ཏཾ ཐེརཾ སདྡྷིཝིཧཱརིཀཱ པུཙྪིཾསུ – ‘‘ཨཏྠི པན ཝོ, བྷནྟེ, ཝིསེསཱདྷིགམོ’’ཏི. ཐེརོ ‘‘ཨནཱགཱམིཕལཾ ནཱམ གཧཊྛཱཔི པཱཔུཎནྟི, ཨརཧཏྟཾ པཏྟཀཱལེཡེཝ ཏེཧི སདྡྷིཾ ཀཐེསྶཱམཱི’’ཏི ཧརཱཡམཱནོ ཀིཉྩི ཨཀཐེཏྭཱཝ ཀཱལཀཏོ སུདྡྷཱཝཱསདེཝལོཀེ ནིབྦཏྟི. ཨཐསྶ སདྡྷིཝིཧཱརིཀཱ རོདིཏྭཱ པརིདེཝིཏྭཱ སཏྠུ སནྟིཀཾ གནྟྭཱ སཏྠཱརཾ ཝནྡིཏྭཱ རོདནྟཱཝ ཨེཀམནྟཾ ནིསཱིདིཾསུ. ཨཐ ནེ སཏྠཱ ‘‘ཀིཾ, བྷིཀྑཝེ, རོདཐཱ’’ཏི ཨཱཧ. ‘‘ཨུཔཛ྄ཛྷཱཡོ ནོ, བྷནྟེ, ཀཱལཀཏོ’’ཏི. ‘‘ཧོཏུ, བྷིཀྑཝེ, མཱ ཙིནྟཡིཏྠ, དྷུཝདྷམྨོ ནཱམེསོ’’ཏི? ‘‘ཨཱམ, བྷནྟེ, མཡམྤི ཛཱནཱམ, ཨཔིཙ མཡཾ ཨུཔཛ྄ཛྷཱཡཾ ཝིསེསཱདྷིགམཾ པུཙྪིམྷཱ, སོ ཀིཉྩི ཨཀཐེཏྭཱཝ ཀཱལཀཏོ, ཏེནམྷ དུཀྑིཏཱ’’ཏི. སཏྠཱ, ‘‘བྷིཀྑཝེ, མཱ ཙིནྟཡིཏྠ, ཨུཔཛ྄ཛྷཱཡེན ཝོ ཨནཱགཱམིཕལཾ པཏྟཾ, སོ ‘གིཧཱིཔེཏཾ པཱཔུཎནྟི, ཨརཧཏྟཾ པཏྭཱཝ ནེསཾ ཀཐེསྶཱམཱི’ཏི ཧརཱཡནྟོ ཏུམྷཱཀཾ ཀིཉྩི ཨཀཐེཏྭཱ ཀཱལཾ ཀཏྭཱ སུདྡྷཱཝཱསེ ནིབྦཏྟོ, ཨསྶཱསཐ, བྷིཀྑཝེ, ཨུཔཛ྄ཛྷཱཡོ ཝོ ཀཱམེསུ ཨཔྤཊིབདྡྷཙིཏྟཏཾ པཏྟོ’’ཏི ཝཏྭཱ ཨིམཾ གཱཐམཱཧ –

༢༡༨.

‘‘ཚནྡཛཱཏོ ཨནཀྑཱཏེ, མནསཱ ཙ ཕུཊོ སིཡཱ;

ཀཱམེསུ ཙ ཨཔྤཊིབདྡྷཙིཏྟོ, ཨུདྡྷཾསོཏོཏི ཝུཙྩཏཱི’’ཏི.

ཏཏྠ ཚནྡཛཱཏོཏི ཀཏྟུཀཱམཏཱཝསེན ཛཱཏཚནྡོ ཨུསྶཱཧཔཏྟོ. ཨནཀྑཱཏེཏི ནིབྦཱནེ. ཏཉྷི ‘‘ཨསུཀེན ཀཏཾ ཝཱ ནཱིལཱདཱིསུ ཨེཝརཱུཔཾ ཝཱ’’ཏི ཨཝཏྟབྦཏཱཡ ཨནཀྑཱཏཾ ནཱམ. མནསཱ ཙ ཕུཊོ སིཡཱཏི ཧེཊྛིམེཧི ཏཱིཧི མགྒཕལཙིཏྟེཧི ཕུཊོ པཱུརིཏོ བྷཝེཡྻ. ཨཔྤཊིབདྡྷཙིཏྟོཏི ཨནཱགཱམིམགྒཝསེན ཀཱམེསུ ཨཔྤཊིབདྡྷཙིཏྟོ. ཨུདྡྷཾསོཏོཏི ཨེཝརཱུཔོ བྷིཀྑུ ཨཝིཧེསུ ནིབྦཏྟིཏྭཱ ཏཏོ པཊྛཱཡ པཊིསནྡྷིཝསེན ཨཀནིཊྛཾ གཙྪནྟོ ཨུདྡྷཾསོཏོཏི ཝུཙྩཏི, ཏཱདིསོ ཝོ ཨུཔཛ྄ཛྷཱཡོཏི ཨཏྠོ.

དེསནཱཝསཱནེ ཏེ བྷིཀྑཱུ ཨརཧཏྟཕལེ པཏིཊྛཧིཾསུ, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཨེཀཨནཱགཱམིཏྠེརཝཏྠུ ཨཊྛམཾ.

༩. ནནྡིཡཝཏྠུ

ཙིརཔྤཝཱསིནྟི ཨིམཾ དྷམྨདེསནཾ སཏྠཱ ཨིསིཔཏནེ ཝིཧརནྟོ ནནྡིཡཾ ཨཱརབྦྷ ཀཐེསི.

བཱརཱཎསིཡཾ ཀིར སདྡྷཱསམྤནྣསྶ ཀུལསྶ ནནྡིཡོ ནཱམ པུཏྟོ ཨཧོསི, སོ མཱཏཱཔིཏཱུནཾ ཨནུརཱུཔོ སདྡྷཱསམྤནྣོ སངྒྷུཔཊྛཱཀོ ཨཧོསི. ཨཐསྶ མཱཏཱཔིཏརོ ཝཡཔྤཏྟཀཱལེ སམྨུཁགེཧཏོ མཱཏུལདྷཱིཏརཾ རེཝཏིཾ ནཱམ ཨཱནེཏུཀཱམཱ ཨཧེསུཾ. སཱ པན ཨསྶདྡྷཱ ཨདཱནསཱིལཱ, ནནྡིཡོ ཏཾ ན ཨིཙྪི. ཨཐསྶ མཱཏཱ རེཝཏིཾ ཨཱཧ – ‘‘ཨམྨ, ཏྭཾ ཨིམསྨིཾ གེཧེ བྷིཀྑུསངྒྷསྶ ནིསཛྫནཊྛཱནཾ ཨུཔལིམྤིཏྭཱ ཨཱསནཱནི པཉྙཱཔེཧི, ཨཱདྷཱརཀེ ཋཔེཧི, བྷིཀྑཱུནཾ ཨཱགཏཀཱལེ པཏྟཾ གཧེཏྭཱ ནིསཱིདཱཔེཏྭཱ དྷམྨཀརཎེན པཱནཱིཡཾ པརིསྶཱཝེཏྭཱ བྷུཏྟཀཱལེ པཏྟེ དྷོཝ, ཨེཝཾ མེ པུཏྟསྶ ཨཱརཱདྷིཏཱ བྷཝིསྶསཱི’’ཏི. སཱ ཏཐཱ ཨཀཱསི. ཨཐ ནཾ ‘‘ཨོཝཱདཀྑམཱ ཛཱཏཱ’’ཏི པུཏྟསྶ ཨཱརོཙེཏྭཱ ཏེན སཱདྷཱུཏི སམྤཊིཙྪིཏེ དིཝསཾ ཋཔེཏྭཱ ཨཱཝཱཧཾ ཀརིཾསུ.

ཨཐ ནཾ ནནྡིཡོ ཨཱཧ – ‘‘སཙེ བྷིཀྑུསངྒྷཉྩ མཱཏཱཔིཏརོ ཙ མེ ཨུཔཊྛཧིསྶསི, ཨེཝཾ ཨིམསྨིཾ གེཧེ ཝསིཏུཾ ལབྷིསྶསི, ཨཔྤམཏྟཱ ཧོཧཱི’’ཏི. སཱ ‘‘སཱདྷཱུ’’ཏི པཊིསྶུཎིཏྭཱ ཀཏིཔཱཧཾ སདྡྷཱ ཝིཡ ཧུཏྭཱ བྷཏྟཱརཾ ཨུཔཊྛཧནྟཱི དྭེ པུཏྟེ ཝིཛཱཡི. ནནྡིཡསྶཱཔི མཱཏཱཔིཏརོ ཀཱལམཀཾསུ, གེཧེ སབྦིསྶརིཡཾ ཏསྶཱཡེཝ ཨཧོསི. ནནྡིཡོཔི མཱཏཱཔིཏཱུནཾ ཀཱལཀིརིཡཏོ པཊྛཱཡ མཧཱདཱནཔཏི ཧུཏྭཱ བྷིཀྑུསངྒྷསྶ དཱནཾ པཊྛཔེསི. ཀཔཎདྡྷིཀཱདཱིནམྤི གེཧདྭཱརེ པཱཀཝཏྟཾ པཊྛཔེསི. སོ ཨཔརབྷཱགེ སཏྠུ དྷམྨདེསནཾ སུཏྭཱ ཨཱཝཱསདཱནེ ཨཱནིསཾསཾ སལླཀྑེཏྭཱ ཨིསིཔཏནེ མཧཱཝིཧཱརེ ཙཏཱུཧི གབྦྷེཧི པཊིམཎྜིཏཾ ཙཏུསཱལཾ ཀཱརེཏྭཱ མཉྩཔཱིཋཱདཱིནི ཨཏྠརཱཔེཏྭཱ ཏཾ ཨཱཝཱསཾ ནིཡྻཱདེནྟོ བུདྡྷཔྤམུཁསྶ བྷིཀྑུསངྒྷསྶ དཱནཾ དཏྭཱ ཏཐཱགཏསྶ དཀྑིཎོདཀཾ ཨདཱསི. སཏྠུ ཧཏྠེ དཀྑིཎོདཀཔཏིཊྛཱནེན སདྡྷིཾཡེཝ ཏཱཝཏིཾསདེཝལོཀེ སབྦདིསཱསུ དྭཱདསཡོཛནིཀོ ཨུདྡྷཾ ཡོཛནསཏུབྦེདྷོ སཏྟརཏནམཡོ ནཱརཱིགཎསམྤནྣོ དིབྦཔཱསཱདོ ཨུགྒཙྪི.

ཨཐེཀདིཝསེ མཧཱམོགྒལླཱནཏྠེརོ དེཝཙཱརིཀཾ གནྟྭཱ ཏསྶ པཱསཱདསྶ ཨཝིདཱུརེ ཋིཏོ ཨཏྟནོ སནྟིཀེ ཨཱགཏེ དེཝཔུཏྟེ པུཙྪི – ‘‘ཀསྶེསོ ཨཙྪརཱགཎཔརིཝུཏོ དིབྦཔཱསཱདོ ནིབྦཏྟོ’’ཏི. ཨཐསྶ དེཝཔུཏྟཱ ཝིམཱནསཱམིཀཾ ཨཱཙིཀྑནྟཱ ཨཱཧཾསུ – ‘‘བྷནྟེ, ཡེན ནནྡིཡེན ནཱམ གཧཔཏིཔུཏྟེན ཨིསིཔཏནེ སཏྠུ ཝིཧཱརཾ ཀཱརེཏྭཱ དིནྣོ, ཏསྶཏྠཱཡ ཨེཏཾ ཝིམཱནཾ ནིབྦཏྟ’’ནྟི. ཨཙྪརཱསངྒྷོཔི ནཾ དིསྭཱ པཱསཱདཏོ ཨོརོཧིཏྭཱ ཨཱཧ – ‘‘བྷནྟེ, མཡཾ ‘ནནྡིཡསྶ པརིཙཱརིཀཱ བྷཝིསྶཱམཱ’ཏི ཨིདྷ ནིབྦཏྟཱ, ཏཾ པན ཨཔསྶནྟཱི ཨཏིཝིཡ ཨུཀྐཎྛིཏམྷཱ, མཏྟིཀཔཱཏིཾ བྷིནྡིཏྭཱ སུཝཎྞཔཱཏིགཧཎཾ ཝིཡ མནུསྶསམྤཏྟིཾ ཛཧིཏྭཱ དིབྦསམྤཏྟིགཧཎཾ, ཨིདྷཱགམནཏྠཱཡ ནཾ ཝདེཡྻཱཐཱ’’ཏི. ཐེརོ ཏཏོ ཨཱགནྟྭཱ སཏྠཱརཾ ཨུཔསངྐམིཏྭཱ པུཙྪི – ‘‘ནིབྦཏྟཏི ནུ ཁོ, བྷནྟེ, མནུསྶལོཀེ ཋིཏཱནཾཡེཝ ཀཏཀལྱཱཎཱནཾ དིབྦསམྤཏྟཱི’’ཏི. ‘‘མོགྒལླཱན, ནནུ ཏེ དེཝལོཀེ ནནྡིཡསྶ ནིབྦཏྟཱ དིབྦསམྤཏྟི སཱམཾ དིཊྛཱ, ཀསྨཱ མཾ པུཙྪསཱི’’ཏི. ‘‘ཨེཝཾ, བྷནྟེ, ནིབྦཏྟཏཱི’’ཏི.

ཨཐ ནཾ སཏྠཱ ‘‘མོགྒལླཱནཾ ཀིཾ ནཱམེཏཾ ཀཐེསི. ཡཐཱ ཧི ཙིརཔྤཝུཊྛཾ པུཏྟཾ ཝཱ བྷཱཏརཾ ཝཱ ཝིཔྤཝཱསཏོ ཨཱགཙྪནྟཾ གཱམདྭཱརེ ཋིཏོ ཀོཙིདེཝ དིསྭཱ ཝེགེན གེཧཾ ཨཱགནྟྭཱ ‘ཨསུཀོ ནཱམ ཨཱགཏོ’ཏི ཨཱརོཙེཡྻ, ཨཐསྶ ཉཱཏཀཱ ཧཊྛཔཧཊྛཱ ཝེགེན ནིཀྑམིཏྭཱ ‘ཨཱགཏོསི, ཏཱཏ, ཨརོགོསི, ཏཱཏཱ’ཏི ཏཾ ཨབྷིནནྡེཡྻུཾ, ཨེཝམེཝ ཨིདྷ ཀཏཀལྱཱཎཾ ཨིཏྠིཾ ཝཱ པུརིསཾ ཝཱ ཨིམཾ ལོཀཾ ཛཧིཏྭཱ པརལོཀཾ གཏཾ དསཝིདྷཾ དིབྦཔཎྞཱཀཱརཾ ཨཱདཱཡ ‘ཨཧཾ པུརཏོ, ཨཧཾ པུརཏོ’ཏི པཙྩུགྒནྟྭཱ དེཝཏཱ ཨབྷིནནྡནྟཱི’’ཏི ཝཏྭཱ ཨིམཱ གཱཐཱ ཨབྷཱསི –

༢༡༩.

‘‘ཙིརཔྤཝཱསིཾ པུརིསཾ, དཱུརཏོ སོཏྠིམཱགཏཾ;

ཉཱཏིམིཏྟཱ སུཧཛྫཱ ཙ, ཨབྷིནནྡནྟི ཨཱགཏཾ.

༢༢༠.

‘‘ཏཐེཝ ཀཏཔུཉྙམྤི, ཨསྨཱ ལོཀཱ པརཾ གཏཾ;

པུཉྙཱནི པཊིགཎྷནྟི, པིཡཾ ཉཱཏཱིཝ ཨཱགཏ’’ནྟི.

ཏཏྠ ཙིརཔྤཝཱསིནྟི ཙིརཔྤཝུཊྛཾ. དཱུརཏོ སོཏྠིམཱགཏནྟི ཝཎིཛྫཾ ཝཱ རཱཛཔོརིསཾ ཝཱ ཀཏྭཱ ལདྡྷལཱབྷཾ ནིཔྥནྣསམྤཏྟིཾ ཨནུཔདྡཝེན དཱུརཊྛཱནཏོ ཨཱགཏཾ. ཉཱཏིམིཏྟཱ སུཧཛྫཱ ཙཱཏི ཀུལསམྦནྡྷཝསེན ཉཱཏཱི ཙ སནྡིཊྛཱདིབྷཱཝེན མིཏྟཱ ཙ སུཧདཡབྷཱཝེན སུཧཛྫཱ ཙ. ཨབྷིནནྡནྟི ཨཱགཏནྟི ནཾ དིསྭཱ ཨཱགཏནྟི ཝཙནམཏྟེན ཝཱ ཨཉྫལིཀརཎམཏྟེན ཝཱ གེཧསམྤཏྟཾ པན ནཱནཔྤཀཱརཔཎྞཱཀཱརཱབྷིཧརཎཝསེན ཨབྷིནནྡནྟི. ཏཐེཝཱཏི ཏེནེཝཱཀཱརེན ཀཏཔུཉྙམྤི པུགྒལཾ ཨིམསྨཱ ལོཀཱ པརལོཀཾ གཏཾ དིབྦཾ ཨཱཡུཝཎྞསུཁཡསཨཱདྷིཔཏེཡྻཾ, དིབྦཾ རཱུཔསདྡགནྡྷརསཕོཊྛབྦནྟི ཨིམཾ དསཝིདྷཾ པཎྞཱཀཱརཾ ཨཱདཱཡ མཱཏཱཔིཏུཊྛཱནེ ཋིཏཱནི པུཉྙཱནི ཨབྷིནནྡནྟཱནི པཊིགྒཎྷནྟི. པིཡཾ ཉཱཏཱིཝཱཏི ཨིདྷལོཀེ པིཡཉཱཏཀཾ ཨཱགཏཾ སེསཉཱཏཀཱ ཝིཡཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ནནྡིཡཝཏྠུ ནཝམཾ.

པིཡཝགྒཝཎྞནཱ ནིཊྛིཏཱ.

སོལ༹སམོ ཝགྒོ.

༡༧. ཀོདྷཝགྒོ

༡. རོཧིནཱིཁཏྟིཡཀཉྙཱཝཏྠུ

ཀོདྷཾ ཛཧེཏི ཨིམཾ དྷམྨདེསནཾ སཏྠཱ ནིགྲོདྷཱརཱམེ ཝིཧརནྟོ རོཧིནིཾ ནཱམ ཁཏྟིཡཀཉྙཾ ཨཱརབྦྷ ཀཐེསི.

ཨེཀསྨིཾ ཀིར སམཡེ ཨཱཡསྨཱ ཨནུརུདྡྷོ པཉྩསཏེཧི བྷིཀྑཱུཧི སདྡྷིཾ ཀཔིལཝཏྠུཾ ཨགམཱསི. ཨཐསྶ ཉཱཏཀཱ ‘‘ཐེརོ ཨཱགཏོ’’ཏི སུཏྭཱ ཐེརསྶ སནྟིཀཾ ཨགམཾསུ ཋཔེཏྭཱ རོཧིནིཾ ནཱམ ཐེརསྶ བྷགིནིཾ. ཐེརོ ཉཱཏཀེ པུཙྪི ‘‘ཀཧཾ, རོཧིནཱི’’ཏི? ‘‘གེཧེ, བྷནྟེ’’ཏི. ‘‘ཀསྨཱ ཨིདྷ ནཱགཏཱ’’ཏི? ‘‘སརཱིརེ ཏསྶཱ ཚཝིརོགོ ཨུཔྤནྣོཏི ལཛྫཱཡ ནཱགཏཱ, བྷནྟེ’’ཏི. ཐེརོ ‘‘པཀྐོསཐ ན’’ནྟི པཀྐོསཱཔེཏྭཱ པཊཀཉྩུཀཾ པཊིམུཉྩིཏྭཱ ཨཱགཏཾ ཨེཝམཱཧ – ‘‘རོཧིནི, ཀསྨཱ ནཱགཏཱསཱི’’ཏི? ‘‘སརཱིརེ མེ, བྷནྟེ, ཚཝིརོགོ ཨུཔྤནྣོ, ཏསྨཱ ལཛྫཱཡ ནཱགཏཱམྷཱི’’ཏི. ‘‘ཀིཾ པན ཏེ པུཉྙཾ ཀཱཏུཾ ན ཝཊྚཏཱི’’ཏི? ‘‘ཀིཾ ཀརོམི, བྷནྟེ’’ཏི? ‘‘ཨཱསནསཱལཾ ཀཱརེཧཱི’’ཏི. ‘‘ཀིཾ གཧེཏྭཱ’’ཏི? ‘‘ཀིཾ ཏེ པསཱདྷནབྷཎྜཀཾ ནཏྠཱི’’ཏི? ‘‘ཨཏྠི, བྷནྟེ’’ཏི. ‘‘ཀིཾ མཱུལ’’ནྟི? ‘‘དསསཧསྶམཱུལཾ བྷཝིསྶཏཱི’’ཏི. ‘‘ཏེན ཧི ཏཾ ཝིསྶཛྫེཏྭཱ ཨཱསནསཱལཾ ཀཱརེཧཱི’’ཏི. ‘‘ཀོ མེ, བྷནྟེ, ཀཱརེསྶཏཱི’’ཏི? ཐེརོ སམཱིཔེ ཋིཏཉཱཏཀེ ཨོལོཀེཏྭཱ ‘‘ཏུམྷཱཀཾ བྷཱརོ ཧོཏཱུ’’ཏི ཨཱཧ. ‘‘ཏུམྷེ པན, བྷནྟེ, ཀིཾ ཀརིསྶཐཱ’’ཏི? ‘‘ཨཧམྤི ཨིདྷེཝ བྷཝིསྶཱམཱི’’ཏི. ‘‘ཏེན ཧི ཨེཏིསྶཱ དབྦསམྦྷཱརེ ཨཱཧརཐཱ’’ཏི. ཏེ ‘‘སཱདྷུ, བྷནྟེ’’ཏི ཨཱཧརིཾསུ.

ཐེརོ ཨཱསནསཱལཾ སཾཝིདཧནྟོ རོཧིནིཾ ཨཱཧ – ‘‘དྭིབྷཱུམིཀཾ ཨཱསནསཱལཾ ཀཱརེཏྭཱ ཨུཔརི པདརཱནཾ དིནྣཀཱལཏོ པཊྛཱཡ ཧེཊྛཱསཱལཾ ནིབདྡྷཾ སམྨཛྫིཏྭཱ ཨཱསནཱནི པཉྙཱཔེཧི, ནིབདྡྷཾ པཱནཱིཡགྷཊེ ཨུཔཊྛཱཔེཧཱི’’ཏི. སཱ ‘‘སཱདྷུ, བྷནྟེ’’ཏི པསཱདྷནབྷཎྜཀཾ ཝིསྶཛྫེཏྭཱ དྭིབྷཱུམིཀཨཱསནསཱལཾ ཀཱརེཏྭཱ ཨུཔརི པདརཱནཾ དིནྣཀཱལཏོ པཊྛཱཡ ཧེཊྛཱསཱལཾ སམྨཛྫནཱདཱིནི ཨཀཱསི. ནིབདྡྷཾ བྷིཀྑཱུ ནིསཱིདནྟི. ཨཐསྶཱ ཨཱསནསཱལཾ སམྨཛྫནྟིཡཱཝ ཚཝིརོགོ མིལཱཡི. སཱ ཨཱསནསཱལཱཡ ནིཊྛིཏཱཡ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ ཨཱསནསཱལཾ པཱུརེཏྭཱ ནིསིནྣསྶ བུདྡྷཔྤམུཁསྶ བྷིཀྑུསངྒྷསྶ པཎཱིཏཾ ཁཱདནཱིཡཾ བྷོཛནཱིཡཾ ཨདཱསི. སཏྠཱ ཀཏབྷཏྟཀིཙྩོ ‘‘ཀསྶེཏཾ དཱན’’ནྟི པུཙྪི. ‘‘བྷགིནིཡཱ མེ, བྷནྟེ, རོཧིནིཡཱ’’ཏི. ‘‘སཱ པན ཀཧ’’ནྟི? ‘‘གེཧེ, བྷནྟེ’’ཏི. ‘‘པཀྐོསཐ ན’’ནྟི? སཱ ཨཱགནྟུཾ ན ཨིཙྪི. ཨཐ ནཾ སཏྠཱ ཨནིཙྪམཱནམྤི པཀྐོསཱཔེསིཡེཝ. ཨཱགནྟྭཱ ཙ པན ཝནྡིཏྭཱ ནིསིནྣཾ ཨཱཧ – ‘‘རོཧིནི, ཀསྨཱ ནཱགམིཏྠཱ’’ཏི? ‘‘སརཱིརེ མེ, བྷནྟེ, ཚཝིརོགོ ཨཏྠི, ཏེན ལཛྫམཱནཱ ནཱགཏཱམྷཱི’’ཏི. ‘‘ཛཱནཱསི པན ཀིཾ ཏེ ནིསྶཱཡ ཨེས ཨུཔྤནྣོ’’ཏི? ‘‘ན ཛཱནཱམི, བྷནྟེ’’ཏི. ‘‘ཏཝ ཀོདྷཾ ནིསྶཱཡ ཨུཔྤནྣོ ཨེསོ’’ཏི. ‘‘ཀིཾ པན མེ, བྷནྟེ, ཀཏ’’ནྟི? ‘‘ཏེན ཧི སུཎཱཧཱི’’ཏི. ཨཐསྶཱ སཏྠཱ ཨཏཱིཏཾ ཨཱཧརི.

ཨཏཱིཏེ བཱརཱཎསིརཉྙོ ཨགྒམཧེསཱི ཨེཀིསྶཱ རཉྙོ ནཱཊཀིཏྠིཡཱ ཨཱགྷཱཏཾ བནྡྷིཏྭཱ ‘‘དུཀྑམསྶཱ ཨུཔྤཱདེསྶཱམཱི’’ཏི ཙིནྟེཏྭཱ མཧཱཀཙྪུཕལཱནི ཨཱཧརཱཔེཏྭཱ ཏཾ ནཱཊཀིཏྠིཾ ཨཏྟནོ སནྟིཀཾ པཀྐོསཱཔེཏྭཱ ཡཐཱ སཱ ན ཛཱནཱཏི, ཨེཝམསྶཱ སཡནེ ཙེཝ པཱཝཱརཀོཛཝཱདཱིནཉྩ ཨནྟརེསུ ཀཙྪུཙུཎྞཱནི ཋཔཱཔེསི, ཀེལི༹ཾ ཀུརུམཱནཱ ཝིཡ ཏསྶཱ སརཱིརེཔི ཨོཀིརི. ཏཾ ཁཎཾཡེཝ ཏསྶཱ སརཱིརཾ ཨུཔྤཀྐུཔྤཀྐཾ གཎྜཱགཎྜཛཱཏཾ ཨཧོསི. སཱ ཀཎྜུཝནྟཱི གནྟྭཱ སཡནེ ནིཔཛྫི, ཏཏྲཱཔིསྶཱ ཀཙྪུཙུཎྞེཧི ཁཱདིཡམཱནཱཡ ཁརཏརཱ ཝེདནཱ ཨུཔྤཛྫི. ཏདཱ ཨགྒམཧེསཱི རོཧིནཱི ཨཧོསཱིཏི.

སཏྠཱ ཨིམཾ ཨཏཱིཏཾ ཨཱཧརིཏྭཱ, ‘‘རོཧིནི, ཏདཱ ཏཡཱཝེཏཾ ཀམྨཾ ཀཏཾ. ཨཔྤམཏྟཀོཔི ཧི ཀོདྷོ ཝཱ ཨིསྶཱ ཝཱ ཀཱཏུཾ ན ཡུཏྟརཱུཔོ ཨེཝཱ’’ཏི ཝཏྭཱ ཨིམཾ གཱཐམཱཧ –

༢༢༡.

‘‘ཀོདྷཾ ཛཧེ ཝིཔྤཛཧེཡྻ མཱནཾ,

སཾཡོཛནཾ སབྦམཏིཀྐམེཡྻ;

ཏཾ ནཱམརཱུཔསྨིམསཛྫམཱནཾ,

ཨཀིཉྩནཾ ནཱནུཔཏནྟི དུཀྑཱ’’ཏི.

ཏཏྠ ཀོདྷནྟི སབྦཱཀཱརམྤི ཀོདྷཾ ནཝཝིདྷམྤི མཱནཾ ཛཧེཡྻ. སཾཡོཛནནྟི ཀཱམརཱགསཾཡོཛནཱདིཀཾ དསཝིདྷམྤི སབྦསཾཡོཛནཾ ཨཏིཀྐམེཡྻ. ཨསཛྫམཱནནྟི ཨལགྒམཱནཾ. ཡོ ཧི ‘‘མམ རཱུཔཾ མམ ཝེདནཱ’’ཏིཨཱདིནཱ ནཡེན ནཱམརཱུཔཾ པཊིགྒཎྷཱཏི, ཏསྨིཉྩ བྷིཛྫམཱནེ སོཙཏི ཝིཧཉྙཏི, ཨཡཾ ནཱམརཱུཔསྨིཾ སཛྫཏི ནཱམ. ཨེཝཾ ཨགྒཎྷནྟོ ཨཝིཧཉྙནྟོ ན སཛྫཏི ནཱམ. ཏཾ པུགྒལཾ ཨེཝཾ ཨསཛྫམཱནཾ རཱགཱདཱིནཾ ཨབྷཱཝེན ཨཀིཉྩནཾ དུཀྑཱ ནཱམ ནཱནུཔཏནྟཱིཏི ཨཏྠོ. དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི. རོཧིནཱིཔི སོཏཱཔཏྟིཕལེ པཏིཊྛིཏཱ, ཏངྑཎཉྙེཝསྶཱ སརཱིརཾ སུཝཎྞཝཎྞཾ ཨཧོསི.

སཱ ཏཏོ ཙུཏཱ ཏཱཝཏིཾསབྷཝནེ ཙཏུནྣཾ དེཝཔུཏྟཱནཾ སཱིམནྟརེ ནིབྦཏྟིཏྭཱ པཱསཱདིཀཱ རཱུཔསོབྷགྒཔྤཏྟཱ ཨཧོསི. ཙཏྟཱརོཔི དེཝཔུཏྟཱ ཏཾ དིསྭཱ ཨུཔྤནྣསིནེཧཱ ཧུཏྭཱ ‘‘མམ སཱིམཱཡ ཨནྟོ ནིབྦཏྟཱ, མམ སཱིམཱཡ ཨནྟོ ནིབྦཏྟཱ’’ཏི ཝིཝདནྟཱ སཀྐསྶ དེཝརཉྙོ སནྟིཀཾ གནྟྭཱ, ‘‘དེཝ, ཨིམཾ ནོ ནིསྶཱཡ ཨཌྜོ ཨུཔྤནྣོ, ཏཾ ཝིནིཙྪིནཱཐཱ’’ཏི ཨཱཧཾསུ. སཀྐོཔི ཏཾ ཨོལོཀེཏྭཱཝ ཨུཔྤནྣསིནེཧོ ཧུཏྭཱ ཨེཝམཱཧ – ‘‘ཨིམཱཡ ཝོ དིཊྛཀཱལཏོ པཊྛཱཡ ཀཐཾ ཙིཏྟཱནི ཨུཔྤནྣཱནཱི’’ཏི. ཨཐེཀོ ཨཱཧ – ‘‘མམ ཏཱཝ ཨུཔྤནྣཙིཏྟཾ སངྒཱམབྷེརི ཝིཡ སནྣིསཱིདིཏུཾ ནཱསཀྑཱི’’ཏི. དུཏིཡོ ‘‘མམ ཙིཏྟཾ པབྦཏནདཱི ཝིཡ སཱིགྷཾ པཝཏྟཏིཡེཝཱ’’ཏི. ཏཏིཡོ ‘‘མམ ཨིམིསྶཱ དིཊྛཀཱལཏོ པཊྛཱཡ ཀཀྐཊསྶ ཝིཡ ཨཀྑཱིནི ནིཀྑམིཾསཱུ’’ཏི. ཙཏུཏྠོ ‘‘མམ ཙིཏྟཾ ཙེཏིཡེ ཨུསྶཱཔིཏདྷཛོ ཝིཡ ནིཙྩལཾ ཋཱཏུཾ ནཱསཀྑཱི’’ཏི. ཨཐ ནེ སཀྐོ ཨཱཧ – ‘‘ཏཱཏཱ, ཏུམྷཱཀཾ ཏཱཝ ཙིཏྟཱནི པསཡ྄ཧརཱུཔཱནི, ཨཧཾ པན ཨིམཾ ལབྷནྟོ ཛཱིཝིསྶཱམི, ཨལབྷནྟསྶ མེ མརཎཾ བྷཝིསྶཏཱི’’ཏི. དེཝཔུཏྟཱ, ‘‘མཧཱརཱཛ, ཏུམྷཱཀཾ མརཎེན ཨཏྠོ ནཏྠཱི’’ཏི ཏཾ སཀྐསྶ ཝིསྶཛྫེཏྭཱ པཀྐམིཾསུ. སཱ སཀྐསྶ པིཡཱ ཨཧོསི མནཱཔཱ. ‘‘ཨསུཀཀཱིལ༹ཾ ནཱམ གཙྪཱམཱ’’ཏི ཝུཏྟེ སཀྐོ ཏསྶཱ ཝཙནཾ པཊིཀྑིཔིཏུཾ ནཱསཀྑཱིཏི.

རོཧིནཱིཁཏྟིཡཀཉྙཱཝཏྠུ པཋམཾ.

༢. ཨཉྙཏརབྷིཀྑུཝཏྠུ

ཡོ ཝེ ཨུཔྤཏིཏནྟི ཨིམཾ དྷམྨདེསནཾ སཏྠཱ ཨགྒཱལ༹ཝེ ཙེཏིཡེ ཝིཧརནྟོ ཨཉྙཏརཾ བྷིཀྑུཾ ཨཱརབྦྷ ཀཐེསི.

སཏྠཱརཱ ཧི བྷིཀྑུསངྒྷསྶ སེནཱསནེ ཨནུཉྙཱཏེ རཱཛགཧསེཊྛིཨཱདཱིཧི སེནཱསནེསུ ཀརིཡམཱནེསུ ཨེཀོ ཨཱལ༹ཝིཀོ བྷིཀྑུ ཨཏྟནོ སེནཱསནཾ ཀརོནྟོ ཨེཀཾ མནཱཔརུཀྑཾ དིསྭཱ ཚིནྡིཏུཾ ཨཱརབྷི. ཏཏྠ པན ནིབྦཏྟཱ ཨེཀཱ ཏརུཎཔུཏྟཱ དེཝཏཱ པུཏྟཾ ཨངྐེནཱདཱཡ ཋིཏཱ ཡཱཙི ‘‘མཱ མེ, སཱམི, ཝིམཱནཾ ཚིནྡི, ན སཀྑིསྶཱམི པུཏྟཾ ཨཱདཱཡ ཨནཱཝཱསཱ ཝིཙརིཏུ’’ནྟི. སོ ‘‘ཨཧཾ ཨཉྙཏྲ ཨཱིདིསཾ རུཀྑཾ ན ལབྷིསྶཱམཱི’’ཏི ཏསྶཱ ཝཙནཾ ནཱདིཡི. སཱ ‘‘ཨིམམྤི ཏཱཝ དཱརཀཾ ཨོལོཀེཏྭཱ ཨོརམིསྶཏཱི’’ཏི པུཏྟཾ རུཀྑསཱཁཱཡ ཋཔེསི. སོཔི བྷིཀྑུ ཨུཀྑིཔིཏཾ ཕརསུཾ སནྡྷཱརེཏུཾ ཨསཀྐོནྟོ དཱརཀསྶ བཱཧུཾ ཚིནྡི, དེཝཏཱ ཨུཔྤནྣབལཝཀོདྷཱ ‘‘པཧརིཏྭཱ ནཾ མཱརེསྶཱམཱི’’ཏི ཨུབྷོ ཧཏྠེ ཨུཀྑིཔིཏྭཱ ཨེཝཾ ཏཱཝ ཙིནྟེསི – ‘‘ཨཡཾ བྷིཀྑུ སཱིལཝཱ. སཙཱཧཾ ཨིམཾ མཱརེསྶཱམི, ནིརཡགཱམིནཱི བྷཝིསྶཱམི. སེསདེཝཏཱཔི ཨཏྟནོ རུཀྑཾ ཚིནྡནྟེ བྷིཀྑཱུ དིསྭཱ ‘ཨསུཀདེཝཏཱཡ ཨེཝཾ ནཱམ མཱརིཏོ བྷིཀྑཱུ’ཏི མཾ པམཱཎཾ ཀཏྭཱ བྷིཀྑཱུ མཱརེསྶནྟི. ཨཡཉྩ སསཱམིཀོ བྷིཀྑུ, སཱམིཀསྶེཝ ནཾ ཀཐེསྶཱམཱི’’ཏི ཨུཀྑིཏྟཧཏྠེ ཨཔནེཏྭཱ རོདམཱནཱ སཏྠུ སནྟིཀཾ གནྟྭཱ ཝནྡིཏྭཱ ཨེཀམནྟཾ ཨཊྛཱསི. ཨཐ ནཾ སཏྠཱ ‘‘ཀིཾ དེཝཏེ’’ཏི ཨཱཧ. སཱ, ‘‘བྷནྟེ, ཏུམྷཱཀཾ མེ སཱཝཀེན ཨིདཾ ནཱམ ཀཏཾ, ཨཧམྤི ནཾ མཱརེཏུཀཱམཱ ཧུཏྭཱ ཨིདཾ ནཱམ ཙིནྟེཏྭཱ ཨམཱརེཏྭཱཝ ཨིདྷཱགཏཱ’’ཏི སབྦཾ ཏཾ པཝཏྟིཾ ཝིཏྠཱརཏོ ཨཱརོཙེསི.

སཏྠཱ ཏཾ སུཏྭཱ ‘‘སཱདྷུ, སཱདྷུ དེཝཏེ, སཱདྷུ ཏེ ཀཏཾ ཨེཝཾ ཨུགྒཏཾ ཀོཔཾ བྷནྟཾ རཐཾ ཝིཡ ནིགྒཎྷམཱནཱཡཱ’’ཏི ཝཏྭཱ ཨིམཾ གཱཐམཱཧ –

༢༢༢.

‘‘ཡོ ཝེ ཨུཔྤཏིཏཾ ཀོདྷཾ, རཐཾ བྷནྟཾཝ ཝཱརཡེ;

ཏམཧཾ སཱརཐིཾ བྲཱུམི, རསྨིགྒཱཧོ ཨིཏརོ ཛནོ’’ཏི.

ཏཏྠ ཨུཔྤཏིཏནྟི ཨུཔྤནྣཾ. རཐཾ བྷནྟཾ ཝཱཏི ཡཐཱ ནཱམ ཚེཀོ སཱརཐི ཨཏིཝེགེན དྷཱཝནྟཾ རཐཾ ནིགྒཎྷིཏྭཱ ཡཐིཙྪཀཾ ཋཔེཏི, ཨེཝཾ ཡོ པུགྒལོ ཨུཔྤནྣཾ ཀོདྷཾ ཝཱརཡེ ནིགྒཎྷིཏུཾ སཀྐོཏི. ཏམཧནྟི ཏཾ ཨཧཾ སཱརཐིཾ བྲཱུམི. ཨིཏརོ ཛནོཏི ཨིཏརོ པན རཱཛཨུཔརཱཛཱདཱིནཾ རཐསཱརཐིཛནོ རསྨིགྒཱཧོ ནཱམ ཧོཏི, ན ཨུཏྟམསཱརཐཱིཏི.

དེསནཱཝསཱནེ དེཝཏཱ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

དེཝཏཱ པན སོཏཱཔནྣཱ ཧུཏྭཱཔི རོདམཱནཱ ཨཊྛཱསི. ཨཐ ནཾ སཏྠཱ ‘‘ཀིཾ དེཝཏེ’’ཏི པུཙྪིཏྭཱ, ‘‘བྷནྟེ, ཝིམཱནཾ མེ ནཊྛཾ, ཨིདཱནི ཀིཾ ཀརིསྶཱམཱི’’ཏི ཝུཏྟེ, ‘‘ཨལཾ དེཝཏེ, མཱ ཙིནྟཡི, ཨཧཾ ཏེ ཝིམཱནཾ དསྶཱམཱི’’ཏི ཛེཏཝནེ གནྡྷཀུཊིསམཱིཔེ པུརིམདིཝསེ ཙུཏདེཝཏཾ ཨེཀཾ རུཀྑཾ ཨཔདིསནྟོ ‘‘ཨམུཀསྨིཾ ཨོཀཱསེ རུཀྑོ ཝིཝིཏྟོ, ཏཏྠ ཨུཔགཙྪཱ’’ཏི ཨཱཧ. སཱ ཏཏྠ ཨུཔགཉྪི. ཏཏོ པཊྛཱཡ ‘‘བུདྡྷདཏྟིཡཾ ཨིམིསྶཱ ཝིམཱན’’ནྟི མཧེསཀྑདེཝཏཱཔི ཨཱགནྟྭཱ ཏཾ ཙཱལེཏུཾ ནཱསཀྑིཾསུ. སཏྠཱ ཏཾ ཨཏྠུཔྤཏྟིཾ ཀཏྭཱ བྷིཀྑཱུནཾ བྷཱུཏགཱམསིཀྑཱཔདཾ པཉྙཱཔེསཱིཏི.

ཨཉྙཏརབྷིཀྑུཝཏྠུ དུཏིཡཾ.

༣. ཨུཏྟརཱཨུཔཱསིཀཱཝཏྠུ

ཨཀྐོདྷེན ཛིནེ ཀོདྷནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨུཏྟརཱཡ གེཧེ ཀཏབྷཏྟཀིཙྩོ ཨུཏྟརཾ ཨུཔཱསིཀཾ ཨཱརབྦྷ ཀཐེསི.

ཏཏྲཱཡམནུཔུབྦཱི ཀཐཱ – རཱཛགཧེ ཀིར སུམནསེཊྛིཾ ནིསྶཱཡ པུཎྞོ ནཱམ དལིདྡོ བྷཏིཾ ཀཏྭཱ ཛཱིཝཏི. ཏསྶ བྷརིཡཱ ཙ ཨུཏྟརཱ ནཱམ དྷཱིཏཱ ཙཱཏི དྭེཡེཝ གེཧམཱནུསཀཱ. ཨཐེཀདིཝསཾ ‘‘སཏྟཱཧཾ ནཀྑཏྟཾ ཀཱིལི༹ཏབྦ’’ནྟི རཱཛགཧེ གྷོསནཾ ཀརིཾསུ. ཏཾ སུཏྭཱ སུམནསེཊྛི པཱཏོཝ ཨཱགཏཾ པུཎྞཾ ཨཱམནྟེཏྭཱ, ‘‘ཏཱཏ, ཨམྷཱཀཾ པརིཛནོ ནཀྑཏྟཾ ཀཱིལི༹ཏུཀཱམོ, ཏྭཾ ཀིཾ ནཀྑཏྟཾ ཀཱིལི༹སྶསི, ཨུདཱཧུ བྷཏིཾ ཀརིསྶསཱི’’ཏི ཨཱཧ. ‘‘སཱམི, ནཀྑཏྟཾ ནཱམ སདྷནཱནཾ ཧོཏི, མམ པན གེཧེ སྭཱཏནཱཡ ཡཱགུཏཎྜུལམྤི ནཏྠི, ཀིཾ མེ ནཀྑཏྟེན, གོཎེ ལབྷནྟོ ཀསིཏུཾ གམིསྶཱམཱི’’ཏི. ‘‘ཏེན ཧི གོཎེ གཎྷཱཧཱི’’ཏི. སོ བལཝགོཎེ ཙ ནངྒལཉྩ གཧེཏྭཱ, ‘‘བྷདྡེ, ནཱགརཱ ནཀྑཏྟཾ ཀཱིལ༹ནྟི, ཨཧཾ དལིདྡཏཱཡ བྷཏིཾ ཀཱཏུཾ གམིསྶཱམི, མཡ྄ཧམྤི ཏཱཝ ཨཛྫ དྭིགུཎཾ ནིཝཱཔཾ པཙིཏྭཱ བྷཏྟཾ ཨཱཧརེཡྻཱསཱི’’ཏི བྷརིཡཾ ཝཏྭཱ ཁེཏྟཾ ཨགམཱསི.

སཱརིཔུཏྟཏྠེརོཔི སཏྟཱཧཾ ནིརོདྷསམཱཔནྣོ ཏཾ དིཝསཾ ཝུཊྛཱཡ ‘‘ཀསྶ ནུ ཁོ ཨཛྫ མཡཱ སངྒཧཾ ཀཱཏུཾ ཝཊྚཏཱི’’ཏི ཨོལོཀེནྟོ པུཎྞཾ ཨཏྟནོ ཉཱཎཛཱལསྶ ཨནྟོ པཝིཊྛཾ དིསྭཱ ‘‘སདྡྷོ ནུ ཁོ ཨེས, སཀྑིསྶཏི ཝཱ མེ སངྒཧཾ ཀཱཏུ’’ནྟི ཨོལོཀེནྟོ ཏསྶ སདྡྷབྷཱཝཉྩ སངྒཧཾ ཀཱཏུཾ སམཏྠབྷཱཝཉྩ ཏཔྤཙྩཡཱ ཙསྶ མཧཱསམྤཏྟིཔཊིལཱབྷཉྩ ཉཏྭཱ པཏྟཙཱིཝརམཱདཱཡ ཏསྶ ཀསནཊྛཱནཾ གནྟྭཱ ཨཱཝཱཊཏཱིརེ ཨེཀཾ གུམྦཾ ཨོལོཀེནྟོ ཨཊྛཱསི.

པུཎྞོ ཐེརཾ དིསྭཱཝ ཀསིཾ ཋཔེཏྭཱ པཉྩཔཏིཊྛིཏེན ཐེརཾ ཝནྡིཏྭཱ ‘‘དནྟཀཊྛེན ཨཏྠོ བྷཝིསྶཏཱི’’ཏི དནྟཀཊྛཾ ཀཔྤིཡཾ ཀཏྭཱ ཨདཱསི. ཨཐསྶ ཐེརོ པཏྟཉྩ པརིསྶཱཝནཉྩ ནཱིཧརིཏྭཱ ཨདཱསི. སོ ‘‘པཱནཱིཡེན ཨཏྠོ བྷཝིསྶཏཱི’’ཏི ཏཾ ཨཱདཱཡ པཱནཱིཡཾ པརིསྶཱཝེཏྭཱ ཨདཱསི. ཐེརོ ཙིནྟེསི – ‘‘ཨཡཾ པརེསཾ པཙྪིམགེཧེ ཝསཏི. སཙསྶ གེཧདྭཱརཾ གམིསྶཱམི, ཨིམསྶ བྷརིཡཱ མཾ དཊྛུཾ ན ལབྷིསྶཏི. ཡཱཝསྶཱ བྷཏྟཾ ཨཱདཱཡ མགྒཾ པཊིཔཛྫཏི, ཏཱཝ ཨིདྷེཝ བྷཝིསྶཱམཱི’’ཏི. སོ ཏཏྠེཝ ཐོཀཾ ཝཱིཏིནཱམེཏྭཱ ཏསྶ མགྒཱརུལ༹ྷབྷཱཝཾ ཉཏྭཱ ཨནྟོནགརཱབྷིམུཁོ པཱཡཱསི.

སཱ ཨནྟརཱམགྒེ ཐེརཾ དིསྭཱ ཙིནྟེསི – ‘‘ཨཔྤེཀདཱཧཾ དེཡྻདྷམྨེ སཏི ཨཡྻཾ ན པསྶཱམི, ཨཔྤེཀདཱ མེ ཨཡྻཾ པསྶནྟིཡཱ དེཡྻདྷམྨོ ན ཧོཏི. ཨཛྫ པན མེ ཨཡྻོ ཙ དིཊྛོ, དེཡྻདྷམྨོ ཙཱཡཾ ཨཏྠི, ཀརིསྶཏི ནུ ཁོ མེ སངྒཧ’’ནྟི. སཱ བྷཏྟབྷཱཛནཾ ཨོརོཔེཏྭཱ ཐེརཾ པཉྩཔཏིཊྛིཏེན ཝནྡིཏྭཱ, ‘‘བྷནྟེ, ཨིདཾ ལཱུཁཾ ཝཱ པཎཱིཏཾ ཝཱཏི ཨཙིནྟེཏྭཱ དཱསསྶ ཝོ སངྒཧཾ ཀརོཐཱ’’ཏི ཨཱཧ. ཐེརོ པཏྟཾ ཨུཔནཱམེཏྭཱ ཏཱཡ ཨེཀེན ཧཏྠེན བྷཱཛནཾ དྷཱརེཏྭཱ ཨེཀེན ཧཏྠེན ཏཏོ བྷཏྟཾ དདམཱནཱཡ ཨུཔཌྜྷབྷཏྟེ དིནྣེ ‘‘ཨལ’’ནྟི ཧཏྠེན པཏྟཾ པིདཧི. སཱ, ‘‘བྷནྟེ, ཨེཀོཝ པཊིཝིསོ, ན སཀྐཱ དྭིདྷཱ ཀཱཏུཾ. ཏུམྷཱཀཾ དཱསསྶ ཨིདྷལོཀསངྒཧཾ ཨཀཏྭཱ པརལོཀསངྒཧཾ ཀརོཐ, ནིརཝསེསམེཝ དཱཏུཀཱམམྷཱི’’ཏི ཝཏྭཱ སབྦམེཝ ཐེརསྶ པཏྟེ པཏིཊྛཔེཏྭཱ ‘‘ཏུམྷེཧི དིཊྛདྷམྨསྶེཝ བྷཱགཱི ཨསྶ’’ནྟི པཏྠནཾ ཨཀཱསི. ཐེརོ ‘‘ཨེཝཾ ཧོཏཱུ’’ཏི ཝཏྭཱ ཋིཏཀོཝ ཨནུམོདནཾ ཀརིཏྭཱ ཨེཀསྨིཾ ཨུདཀཕཱསུཀཊྛཱནེ ནིསཱིདིཏྭཱ བྷཏྟཀིཙྩམཀཱསི. སཱཔི ནིཝཏྟིཏྭཱ ཏཎྜུལེ པརིཡེསིཏྭཱ བྷཏྟཾ པཙི. པུཎྞོཔི ཨཌྜྷཀརཱིསམཏྟཊྛཱནཾ ཀསིཏྭཱ ཛིགྷཙྪཾ སཧིཏུཾ ཨསཀྐོནྟོ གོཎེ ཝིསྶཛྫེཏྭཱ ཨེཀརུཀྑཙྪཱཡཾ པཝིསིཏྭཱ མགྒཾ ཨོལོཀེནྟོ ནིསཱིདི.

ཨཐསྶ བྷརིཡཱ བྷཏྟཾ ཨཱདཱཡ གཙྪམཱནཱ ཏཾ དིསྭཱཝ ‘‘ཨེས ཛིགྷཙྪཱཡ པཱིལི༹ཏོ མཾ ཨོལོཀེནྟོ ནིསིནྣོ. སཙེ མཾ ‘ཨཏིཝིཡ ཛེ ཙིརཱཡཱི’ཏི ཏཛྫེཏྭཱ པཏོདལཊྛིཡཱ མཾ པཧརིསྶཏི, མཡཱ ཀཏཀམྨཾ ནིརཏྠཀཾ བྷཝིསྶཏི. པཊིཀཙྩེཝསྶ ཨཱརོཙེསྶཱམཱི’’ཏི ཙིནྟེཏྭཱ ཨེཝམཱཧ – ‘‘སཱམི, ཨཛྫེཀདིཝསཾ ཙིཏྟཾ པསཱདེཧི, མཱ མཡཱ ཀཏཀམྨཾ ནིརཏྠཀཾ ཀརི. ཨཧཉྷི པཱཏོཝ ཏེ བྷཏྟཾ ཨཱཧརནྟཱི ཨནྟརཱམགྒེ དྷམྨསེནཱཔཏིཾ དིསྭཱ ཏཝ བྷཏྟཾ ཏསྶ དཏྭཱ པུན གནྟྭཱ བྷཏྟཾ པཙིཏྭཱ ཨཱགཏཱ, པསཱདེཧི, སཱམི, ཙིཏྟ’’ནྟི. སོ ‘‘ཀིཾ ཝདེསི, བྷདྡེ’’ཏི པུཙྪིཏྭཱ པུན ཏམཏྠཾ སུཏྭཱ, ‘‘བྷདྡེ, སཱདྷུ ཝཏ ཏེ ཀཏཾ མམ བྷཏྟཾ ཨཡྻསྶ དདམཱནཱཡ, མཡཱཔིསྶ ཨཛྫ པཱཏོཝ དནྟཀཊྛཉྩ མུཁོདཀཉྩ དིནྣ’’ནྟི པསནྣམཱནསོ ཏཾ ཝཙནཾ ཨབྷིནནྡིཏྭཱ ཨུསྶུརེ ལདྡྷབྷཏྟཏཱཡ ཀིལནྟཀཱཡོ ཏསྶཱ ཨངྐེ སཱིསཾ ཀཏྭཱ ནིདྡཾ ཨོཀྐམི.

ཨཐསྶ པཱཏོཝ ཀསིཏཊྛཱནཾ པཾསུཙུཎྞཾ ཨུཔཱདཱཡ སབྦཾ རཏྟསུཝཎྞཾ ཀཎིཀཱརཔུཔྥརཱསི ཝིཡ སོབྷམཱནཾ ཨཊྛཱསི. སོ པབུདྡྷོ ཨོལོཀེཏྭཱ བྷརིཡཾ ཨཱཧ – ‘‘བྷདྡེ, ཨེཏཾ ཀསིཏཊྛཱནཾ སབྦཾ མམ སུཝཎྞཾ ཧུཏྭཱ པཉྙཱཡཏི, ཀིཾ ནུ ཁོ མེ ཨཏིཨུསྶུརེ ལདྡྷབྷཏྟཏཱཡ ཨཀྑཱིནི བྷམནྟཱི’’ཏི. ‘‘སཱམི, མཡ྄ཧམྤི ཨེཝམེཝ པཉྙཱཡཏཱི’’ཏི. སོ ཨུཊྛཱཡ ཏཏྠ གནྟྭཱ ཨེཀཔིཎྜཾ གཧེཏྭཱ ནངྒལསཱིསེ པཧརིཏྭཱ སུཝཎྞབྷཱཝཾ ཉཏྭཱ ‘‘ཨཧོ ཨཡྻསྶ དྷམྨསེནཱཔཏིསྶ མེ དིནྣདཱནེན ཨཛྫེཝ ཝིཔཱཀོ དསྶིཏོ, ན ཁོ པན སཀྐཱ ཨེཏྟཀཾ དྷནཾ པཊིཙྪཱདེཏྭཱ པརིབྷུཉྫིཏུ’’ནྟི བྷརིཡཱཡ ཨཱབྷཏཾ བྷཏྟཔཱཏིཾ སུཝཎྞསྶ པཱུརེཏྭཱ རཱཛཀུལཾ གནྟྭཱ རཉྙཱ ཀཏོཀཱསོ པཝིསིཏྭཱ རཱཛཱནཾ ཨབྷིཝཱདེཏྭཱ ‘‘ཀིཾ, ཏཱཏཱ’’ཏི ཝུཏྟེ, ‘‘དེཝ, ཨཛྫ མཡཱ ཀསིཏཊྛཱནཾ སབྦཾ སུཝཎྞབྷརིཏམེཝ ཧུཏྭཱ ཋིཏཾ, ཨིདཾ སུཝཎྞཾ ཨཱཧརཱཔེཏུཾ ཝཊྚཏཱི’’ཏི. ‘‘ཀོསི ཏྭ’’ནྟི? ‘‘པུཎྞོ ནཱམ ཨཧ’’ནྟི. ‘‘ཀིཾ པན ཏེ ཨཛྫ ཀཏ’’ནྟི? ‘‘དྷམྨསེནཱཔཏིསྶ མེ ཨཛྫ པཱཏོཝ དནྟཀཊྛཉྩ མུཁོདཀཉྩ དིནྣཾ, བྷརིཡཱཡཔི མེ མཡ྄ཧཾ ཨཱཧརཎབྷཏྟཾ ཏསྶེཝ དིནྣ’’ནྟི.

ཏཾ སུཏྭཱ རཱཛཱ ‘‘ཨཛྫེཝ ཀིར, བྷོ, དྷམྨསེནཱཔཏིསྶ དིནྣདཱནེན ཝིཔཱཀོ དསྶིཏོ’’ཏི ཝཏྭཱ, ‘‘ཏཱཏ, ཀིཾ ཀརོམཱི’’ཏི པུཙྪི. ‘‘བཧཱུནི སཀཊསཧསྶཱནི པཧིཎིཏྭཱ སུཝཎྞཾ ཨཱཧརཱཔེཐཱ’’ཏི. རཱཛཱ སཀཊཱནི པཧིཎི. རཱཛཔུརིསེསུ ‘‘རཉྙོ སནྟཀ’’ནྟི གཎྷནྟེསུ གཧིཏགཧིཏཾ མཏྟིཀཱཝ ཧོཏི. ཏེ གནྟྭཱ རཉྙོ ཨཱརོཙེཏྭཱ ‘‘ཏུམྷེཧི ཀིནྟི ཝཏྭཱ གཧིཏ’’ནྟི. པུཊྛཱ ‘‘ཏུམྷཱཀཾ སནྟཀ’’ནྟི ཨཱཧཾསུ. ན མཡ྄ཧཾ, ཏཱཏཱ, སནྟཀཾ, གཙྪཐ ‘‘པུཎྞསྶ སནྟཀ’’ནྟི ཝཏྭཱ གཎྷཐཱཏི. ཏེ ཏཐཱ ཀརིཾསུ, གཧིཏགཧིཏཾ སུཝཎྞམེཝ ཨཧོསི. སབྦམྤི ཨཱཧརིཏྭཱ རཱཛངྒཎེ རཱསིམཀཾསུ, ཨསཱིཏིཧཏྠུབྦེདྷོ རཱསི ཨཧོསི. རཱཛཱ ནཱགརེ སནྣིཔཱཏེཏྭཱ ‘‘ཨིམསྨིཾ ནགརེ ཨཏྠི ཀསྶཙི ཨེཏྟཀཾ སུཝཎྞ’’ནྟི? ‘‘ནཏྠི, དེཝཱ’’ཏི. ‘‘ཀིཾ པནསྶ དཱཏུཾ ཝཊྚཏཱི’’ཏི? ‘‘སེཊྛིཚཏྟཾ, དེཝཱ’’ཏི. རཱཛཱ ‘‘བཱཧུདྷནསེཊྛི ནཱམ ཧོཏཱུ’’ཏི མཧནྟེན བྷོགེན སདྡྷིཾ ཏསྶ སེཊྛིཚཏྟམདཱསི. ཨཐ ནཾ སོ ཨཱཧ – ‘‘མཡཾ, དེཝ, ཨེཏྟཀཾ ཀཱལཾ པརཀུལེ ཝསིམྷཱ, ཝསནཊྛཱནཾ ནོ དེཐཱ’’ཏི. ‘‘ཏེན ཧི པསྶ, ཨེས གུམྦོ པཉྙཱཡཏི, ཨེཏཾ ཧརཱཔེཏྭཱ གེཧཾ ཀཱརེཧཱི’’ཏི པུརཱཎསེཊྛིསྶ གེཧཊྛཱནཾ ཨཱཙིཀྑི. སོ ཏསྨིཾ ཋཱནེ ཀཏིཔཱཧེནེཝ གེཧཾ ཀཱརཱཔེཏྭཱ གེཧཔྤཝེསནམངྒལཉྩ ཚཏྟམངྒལཉྩ ཨེཀཏོཝ ཀརོནྟོ སཏྟཱཧཾ བུདྡྷཔྤམུཁསྶ བྷིཀྑུསངྒྷསྶ དཱནཾ ཨདཱསི. ཨཐསྶ སཏྠཱ ཨནུམོདནཾ ཀརོནྟོ ཨནུཔུབྦིཾ ཀཐཾ ཀཐེསི. དྷམྨཀཐཱཝསཱནེ པུཎྞསེཊྛི ཙ བྷརིཡཱ ཙསྶ དྷཱིཏཱ ཙ ཨུཏྟརཱཏི ཏཡོ ཛནཱ སོཏཱཔནྣཱ ཨཧེསུཾ.

ཨཔརབྷཱགེ རཱཛགཧསེཊྛི པུཎྞསེཊྛིནོ དྷཱིཏརཾ ཨཏྟནོ པུཏྟསྶ ཝཱརེསི. སོ ‘‘ནཱཧཾ དསྶཱམཱི’’ཏི ཝཏྭཱ ‘‘མཱ ཨེཝཾ ཀརོཏུ, ཨེཏྟཀཾ ཀཱལཾ ཨམྷེ ནིསྶཱཡ ཝསནྟེནེཝ ཏེ སམྤཏྟི ལདྡྷཱ, དེཏུ མེ པུཏྟསྶ དྷཱིཏར’’ནྟི ཝུཏྟེ ‘‘སོ མིཙྪཱདིཊྛིཀོ, མམ དྷཱིཏཱ ཏཱིཧི རཏནེཧི ཝིནཱ ཝཏྟིཏུཾ ན སཀྐོཏི, ནེཝསྶ དྷཱིཏརཾ དསྶཱམཱི’’ཏི ཨཱཧ. ཨཐ ནཾ བཧཱུ སེཊྛིགཎཱདཡོ ཀུལཔུཏྟཱ ‘‘མཱ ཏེན སདྡྷིཾ ཝིསྶཱསཾ བྷིནྡི, དེཧིསྶ དྷཱིཏར’’ནྟི ཡཱཙིཾསུ. སོ ཏེསཾ ཝཙནཾ སམྤཊིཙྪིཏྭཱ ཨཱསཱལ༹ྷིཔུཎྞམཱཡཾ དྷཱིཏརཾ ཨདཱསི. སཱ པཏིཀུལཾ གཏཀཱལཏོ པཊྛཱཡ བྷིཀྑུཾ ཝཱ བྷིཀྑུནིཾ ཝཱ ཨུཔསངྐམིཏུཾ དཱནཾ ཝཱ དཱཏུཾ དྷམྨཾ ཝཱ སོཏུཾ ནཱལཏྠ. ཨེཝཾ ཨཌྜྷཏིཡེསུ མཱསེསུ ཝཱིཏིཝཏྟེསུ སནྟིཀེ ཋིཏཾ པརིཙཱརིཀཾ པུཙྪི – ‘‘ཨིདཱནི ཀིཏྟཀཾ ཨནྟོཝསྶསྶ ཨཝསིཊྛ’’ནྟི? ‘‘ཨཌྜྷམཱསོ, ཨཡྻེ’’ཏི. སཱ པིཏུ སཱསནཾ པཧིཎི ‘‘ཀསྨཱ མཾ ཨེཝརཱུཔེ བནྡྷནཱགཱརེ པཀྑིཔིཾསུ, ཝརཾ མེ ལཀྑཎཱཧཏཾ ཀཏྭཱ པརེསཾ དཱསིཾ སཱཝེཏུཾ. ཨེཝརཱུཔསྶ མིཙྪཱདིཊྛིཀུལསྶ དཱཏུཾ ན ཝཊྚཏི. ཨཱགཏཀཱལཏོ པཊྛཱཡ བྷིཀྑུདསྶནཱདཱིསུ ཨེཀམྤི པུཉྙཾ ཀཱཏུཾ ན ལབྷཱམཱི’’ཏི.

ཨཐསྶཱ པིཏཱ ‘‘དུཀྑིཏཱ ཝཏ མེ དྷཱིཏཱ’’ཏི ཨནཏྟམནཏཾ པཝེདེཏྭཱ པཉྩདས ཀཧཱཔཎསཧསྶཱནི པེསེསི ‘‘ཨིམསྨིཾ ནགརེ སིརིམཱ ནཱམ གཎིཀཱ ཨཏྠི, དེཝསིཀཾ སཧསྶཾ གཎྷཱཏི. ཨིམེཧི ཀཧཱཔཎེཧི ཏཾ ཨཱནེཏྭཱ སཱམིཀསྶ པཱདཔརིཙཱརིཀཾ ཀཏྭཱ སཡཾ པུཉྙཱནི ཀརོཏཱུ’’ཏི. སཱ སིརིམཾ པཀྐོསཱཔེཏྭཱ ‘‘སཧཱཡིཀེ ཨིམེ ཀཧཱཔཎེ གཧེཏྭཱ ཨིམཾ ཨཌྜྷམཱསཾ ཏཝ སཧཱཡཀཾ པརིཙརཱཧཱི’’ཏི ཨཱཧ. སཱ ‘‘སཱདྷཱུ’’ཏི པཊིསྶུཎི. སཱ ཏཾ ཨཱདཱཡ སཱམིཀསྶ སནྟིཀཾ གནྟྭཱ ཏེན སིརིམཾ དིསྭཱ ‘‘ཀིཾ ཨིད’’ནྟི ཝུཏྟེ, ‘‘སཱམི, ཨིམཾ ཨཌྜྷམཱསཾ མམ སཧཱཡིཀཱ ཏུམྷེ པརིཙརཏུ, ཨཧཾ པན ཨིམཾ ཨཌྜྷམཱསཾ དཱནཉྩེཝ དཱཏུཀཱམཱ དྷམྨཉྩ སོཏུཀཱམཱ’’ཏི ཨཱཧ. སོ ཏཾ ཨབྷིརཱུཔཾ ཨིཏྠིཾ དིསྭཱ ཨུཔྤནྣསིནེཧོ ‘‘སཱདྷཱུ’’ཏི སམྤཊིཙྪི.

ཨུཏྟརཱཔི ཁོ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ, ‘‘བྷནྟེ, ཨིམཾ ཨཌྜྷམཱསཾ ཨཉྙཏྠ ཨགནྟྭཱ ཨིདྷེཝ བྷིཀྑཱ གཧེཏབྦཱ’’ཏི སཏྠུ པཊིཉྙཾ གཧེཏྭཱ ‘‘ཨིཏོ དཱནི པཊྛཱཡ ཡཱཝ མཧཱཔཝཱརཎཱ, ཏཱཝ སཏྠཱརཾ ཨུཔཊྛཱཏུཾ དྷམྨཉྩ སོཏུཾ ལབྷིསྶཱམཱི’’ཏི ཏུཊྛམཱནསཱ ‘‘ཨེཝཾ ཡཱགུཾ པཙཐ, ཨེཝཾ པཱུཝེ པཙཐཱ’’ཏི མཧཱནསེ སབྦཀིཙྩཱནི སཾཝིདཧནྟཱི ཝིཙརཏི. ཨཐསྶཱ སཱམིཀོ ‘‘སྭེ པཝཱརཎཱ བྷཝིསྶཏཱི’’ཏི མཧཱནསཱབྷིམུཁོ ཝཱཏཔཱནེ ཋཏྭཱ ‘‘ཀིཾ ནུ ཁོ ཀརོནྟཱི སཱ ཨནྡྷབཱལཱ ཝིཙརཏཱི’’ཏི ཨོལོཀེནྟོ ཏཾ སེཊྛཱིདྷཱིཏརཾ སེདཀིལིནྣཾ ཚཱརིཀཱཡ ཨོཀིཎྞཾ ཨངྒཱརམསིམཀྑིཏཾ ཏཐཱ སཾཝིདཧིཏྭཱ ཝིཙརམཱནཾ དིསྭཱ ‘‘ཨཧོ ཨནྡྷབཱལཱ ཨེཝརཱུཔེ ཋཱནེ ཨིམཾ སིརིསམྤཏྟིཾ ནཱནུབྷཝཏི, ‘མུཎྜཀསམཎེ ཨུཔཊྛཧིསྶཱམཱི’ཏི ཏུཊྛཙིཏྟཱ ཝིཙརཏཱི’’ཏི ཧསིཏྭཱ ཨཔགཉྪི.

ཏསྨིཾ ཨཔགཏེ ཏསྶ སནྟིཀེ ཋིཏཱ སིརིམཱ ‘‘ཀིཾ ནུ ཁོ ཨོལོཀེཏྭཱ ཨེས ཧསཱི’’ཏི ཏེནེཝ ཝཱཏཔཱནེན ཨོལོཀེནྟཱི ཨུཏྟརཾ དིསྭཱ ‘‘ཨིམཾ ཨོལོཀེཏྭཱ ཨིམིནཱ ཧསིཏཾ, ཨདྡྷཱ ཨིམསྶ ཨེཏཱཡ སདྡྷིཾ སནྠཝོ ཨཏྠཱི’’ཏི ཙིནྟེསི. སཱ ཀིར ཨཌྜྷམཱསཾ ཏསྨིཾ གེཧེ བཱཧིརཀཨིཏྠཱི ཧུཏྭཱ ཝསམཱནཱཔི ཏཾ སམྤཏྟིཾ ཨནུབྷཝམཱནཱ ཨཏྟནོ བཱཧིརཀཨིཏྠིབྷཱཝཾ ཨཛཱནིཏྭཱ ‘‘ཨཧཾ གྷརསཱམིནཱི’’ཏི སཉྙམཀཱསི. སཱ ཨུཏྟརཱཡ ཨཱགྷཱཏཾ བནྡྷིཏྭཱ ‘‘དུཀྑམསྶཱ ཨུཔྤཱདེསྶཱམཱི’’ཏི པཱསཱདཱ ཨོརུཡ྄ཧ མཧཱནསཾ པཝིསིཏྭཱ པཱུཝཔཙནཊྛཱནེ པཀྐུཐིཏཾ སཔྤིཾ ཀཊཙྪུནཱ ཨཱདཱཡ ཨུཏྟརཱབྷིམུཁཾ པཱཡཱསི. ཨུཏྟརཱ ཏཾ ཨཱགཙྪནྟིཾ དིསྭཱ ‘‘མམ སཧཱཡིཀཱཡ མཡ྄ཧཾ ཨུཔཀཱརོ ཀཏོ, ཙཀྐཝཱལ༹ཾ ཨཏིསམྦཱདྷཾ, བྲཧྨལོཀོ ཨཏིནཱིཙཀོ, མམ སཧཱཡིཀཱཡ གུཎོཝ མཧནྟོ. ཨཧཉྷི ཨེཏཾ ནིསྶཱཡ དཱནཉྩ དཱཏུཾ དྷམྨཉྩ སོཏུཾ ལབྷིཾ. སཙེ མམ ཨེཏིསྶཱ ཨུཔརི ཀོཔོ ཨཏྠི, ཨིདཾ སཔྤི མཾ དཧཏུ. སཙེ ནཏྠི, མཱ དཧཏཱུ’’ཏི ཏཾ མེཏྟཱཡ ཕརི. ཏཱཡ ཏསྶཱ མཏྠཀེ ཨཱསིཏྟཾ པཀྐུཐིཏསཔྤི སཱིཏུདཀཾ ཝིཡ ཨཧོསི.

ཨཐ ནཾ ‘‘ཨིདཾ སཱིཏལཾ བྷཝིསྶཏཱི’’ཏི ཀཊཙྪུཾ པཱུརེཏྭཱ ཨཱདཱཡ ཨཱགཙྪནྟིཾ ཨུཏྟརཱཡ དཱསིཡོ དིསྭཱ ‘‘ཨཔེཧི དུབྦིནཱིཏེ, ན ཏྭཾ ཨམྷཱཀཾ ཨཡྻཱཡ པཀྐུཐིཏཾ སཔྤིཾ ཨཱསིཉྩིཏུཾ ཨནུཙྪཝིཀཱ’’ཏི སནྟཛྫེནྟིཡོ ཨིཏོ ཙིཏོ ཙ ཨུཊྛཱཡ ཧཏྠེཧི ཙ པཱདེཧི ཙ པོཐེཏྭཱ བྷཱུམིཡཾ པཱཏེསུཾ. ཨུཏྟརཱ ཝཱརེནྟཱིཔི ཝཱརེཏུཾ ནཱསཀྑི. ཨཐསྶཱ ཨུཔརི ཋིཏཱ སབྦཱ དཱསིཡོ པཊིབཱཧིཏྭཱ ‘‘ཀིསྶ ཏེ ཨེཝརཱུཔཾ བྷཱརིཡཾ ཀཏ’’ནྟི སིརིམཾ ཨོཝདིཏྭཱ ཨུཎྷོདཀེན ནྷཱཔེཏྭཱ སཏཔཱཀཏེལེན ཨབྦྷཉྫི. ཏསྨིཾ ཁཎེ སཱ ཨཏྟནོ བཱཧིརཀིཏྠིབྷཱཝཾ ཉཏྭཱ ཙིནྟེསི – ‘‘མཡཱ བྷཱརིཡཾ ཀམྨཾ ཀཏཾ སཱམིཀསྶ ཧསནམཏྟཀཱརཎཱ ཨིམིསྶཱ ཨུཔརི པཀྐུཐིཏཾ སཔྤིཾ ཨཱསིཉྩནྟིཡཱ, ཨཡཾ ‘གཎྷཐ ན’ནྟི དཱསིཡོ ན ཨཱཎཱཔེསི. མཾ ཝིཧེཋནཀཱལེཔི སབྦདཱསིཡོ པཊིབཱཧིཏྭཱ མཡ྄ཧཾ ཀཏྟབྦམེཝ ཨཀཱསི. སཙཱཧཾ ཨིམཾ ན ཁམཱཔེསྶཱམི, མུདྡྷཱ མེ སཏྟདྷཱ ཕལེཡྻཱ’’ཏི ཏསྶཱ པཱདམཱུལེ ནིཔཛྫིཏྭཱ, ‘‘ཨཡྻེ, ཁམཱཧི མེ’’ཏི ཨཱཧ. ཨཧཾ སཔིཏིཀཱ དྷཱིཏཱ, པིཏརི ཁམནྟེ ཁམཱམཱིཏི. ཧོཏུ, ཨཡྻེ, པིཏརཾ ཏེ པུཎྞསེཊྛིཾ ཁམཱཔེསྶཱམཱིཏི. པུཎྞོ མམ ཝཊྚཛནཀཔིཏཱ, ཝིཝཊྚཛནཀེ པིཏརི ཁམནྟེ པནཱཧཾ ཁམིསྶཱམཱིཏི. ཀོ པན ཏེ ཝིཝཊྚཛནཀཔིཏཱཏི? སམྨཱསམྦུདྡྷོཏི. མཡ྄ཧཾ ཏེན སདྡྷིཾ ཝིསྶཱསོ ནཏྠཱིཏི. ཨཧཾ ཀརིསྶཱམི, སཏྠཱ སྭེ བྷིཀྑུསངྒྷཾ ཨཱདཱཡ ཨིདྷཱགམིསྶཏི, ཏྭཾ ཡཐཱལདྡྷཾ སཀྐཱརཾ གཧེཏྭཱ ཨིདྷེཝ ཨཱགནྟྭཱ ཏཾ ཁམཱཔེཧཱིཏི. སཱ ‘‘སཱདྷུ, ཨཡྻེ’’ཏི ཨུཊྛཱཡ ཨཏྟནོ གེཧཾ གནྟྭཱ པཉྩསཏཱ པརིཝཱརིཏྠིཡོ ཨཱཎཱཔེཏྭཱ ནཱནཱཝིདྷཱནི ཁཱདནཱིཡཱནི ཙེཝ སཱུཔེཡྻཱནི ཙ སམྤཱདེཏྭཱ པུནདིཝསེ ཏཾ སཀྐཱརཾ ཨཱདཱཡ ཨུཏྟརཱཡ གེཧཾ ཨཱགནྟྭཱ བུདྡྷཔྤམུཁསྶ བྷིཀྑུསངྒྷསྶ པཏྟེ པཏིཊྛཱཔེཏུཾ ཨཝིསཧནྟཱི ཨཊྛཱསི. ཏཾ སབྦཾ གཧེཏྭཱ ཨུཏྟརཱཝ སཾཝིདཧི. སིརིམཱཔི བྷཏྟཀིཙྩཱཝསཱནེ སདྡྷིཾ པརིཝཱརེན སཏྠུ པཱདམཱུལེ ནིཔཛྫི.

ཨཐ ནཾ སཏྠཱ པུཙྪི – ‘‘ཀོ ཏེ ཨཔརཱདྷོ’’ཏི? བྷནྟེ, མཡཱ ཧིཡྻོ ཨིདཾ ནཱམ ཀཏཾ, ཨཐ མེ སཧཱཡིཀཱ མཾ ཝིཧེཋཡམཱནཱ དཱསིཡོ ནིཝཱརེཏྭཱ མཡ྄ཧཾ ཨུཔཀཱརམེཝ ཨཀཱསི. སཱཧཾ ཨིམིསྶཱ གུཎཾ ཛཱནིཏྭཱ ཨིམཾ ཁམཱཔེསིཾ, ཨཐ མཾ ཨེསཱ ‘‘ཏུམྷེསུ ཁམནྟེསུ ཁམིསྶཱམཱི’’ཏི ཨཱཧ. ‘‘ཨེཝཾ ཀིར ཨུཏྟརེ’’ཏི? ‘‘ཨཱམ, བྷནྟེ, སཱིསེ མེ སཧཱཡིཀཱཡ པཀྐུཐིཏསཔྤི ཨཱསིཏྟ’’ནྟི. ཨཐ ‘‘ཏཡཱ ཀིཾ ཙིནྟིཏ’’ནྟི? ‘‘ཙཀྐཝཱལ༹ཾ ཨཏིསམྦཱདྷཾ, བྲཧྨལོཀོ ཨཏིནཱིཙཀོ, མམ སཧཱཡིཀཱཡ གུཎོཝ མཧནྟོ. ཨཧཉྷི ཨེཏཾ ནིསྶཱཡ དཱནཉྩ དཱཏུཾ དྷམྨཉྩ སོཏུཾ ཨལཏྠཾ, སཙེ མེ ཨིམིསྶཱ ཨུཔརི ཀོཔོ ཨཏྠི, ཨིདཾ མཾ དཧཏུ. ནོ ཙེ, མཱ དཧཏཱུ’’ཏི ཨེཝཾ ཙིནྟེཏྭཱ ཨིམཾ མེཏྟཱཡ ཕརིཾ, བྷནྟེཏི. སཏྠཱ ‘‘སཱདྷུ སཱདྷུ, ཨུཏྟརེ, ཨེཝཾ ཀོདྷཾ ཛིནིཏུཾ ཝཊྚཏི. ཀོདྷོ ཧི ནཱམ ཨཀྐོདྷེན, ཨཀྐོསཀཔརིབྷཱསཀོ ཨནཀྐོསནྟེན ཨཔརིབྷཱསནྟེན, ཐདྡྷམཙྪརཱི ཨཏྟནོ སནྟཀསྶ དཱནེན, མུསཱཝཱདཱི སཙྩཝཙནེན ཛིནིཏབྦོ’’ཏི ཝཏྭཱ ཨིམཾ གཱཐམཱཧ –

༢༢༣.

‘‘ཨཀྐོདྷེན ཛིནེ ཀོདྷཾ, ཨསཱདྷུཾ སཱདྷུནཱ ཛིནེ;

ཛིནེ ཀདརིཡཾ དཱནེན, སཙྩེནཱལིཀཝཱདིན’’ནྟི.

ཏཏྠ ཨཀྐོདྷེནཱཏི ཀོདྷནོ ཧི པུགྒལོ ཨཀྐོདྷེན ཧུཏྭཱ ཛིནིཏབྦོ. ཨསཱདྷུནྟི ཨབྷདྡཀོ བྷདྡཀེན ཧུཏྭཱ ཛིནིཏབྦོ. ཀདརིཡནྟི ཐདྡྷམཙྪརཱི ཨཏྟནོ སནྟཀསྶ ཙཱགཙིཏྟེན ཛིནིཏབྦོ. ཨལིཀཝཱདཱི སཙྩཝཙནེན ཛིནིཏབྦོ. ཏསྨཱ ཨེཝམཱཧ – ‘‘ཨཀྐོདྷེན ཛིནེ ཀོདྷཾ…པེ… སཙྩེནཱལིཀཝཱདིན’’ནྟི.

དེསནཱཝསཱནེ སིརིམཱ སདྡྷིཾ པཉྩསཏཱཧི ཨིཏྠཱིཧི སོཏཱཔཏྟིཕལེ པཏིཊྛཧཱིཏི.

ཨུཏྟརཱཨུཔཱསིཀཱཝཏྠུ ཏཏིཡཾ.

༤. མཧཱམོགྒལླཱནཏྠེརཔཉྷཝཏྠུ

སཙྩཾ བྷཎེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཧཱམོགྒལླཱནཏྠེརསྶ པཉྷཾ ཨཱརབྦྷ ཀཐེསི.

ཨེཀསྨིཉྷི སམཡེ ཐེརོ དེཝཙཱརིཀཾ གནྟྭཱ མཧེསཀྑཱཡ དེཝཏཱཡ ཝིམཱནདྭཱརེ ཋཏྭཱ ཏཾ ཨཏྟནོ སནྟིཀཾ ཨཱགནྟྭཱ ཝནྡིཏྭཱ ཋིཏཾ ཨེཝམཱཧ – ‘‘དེཝཏེ མཧཏཱི ཏེ སམྤཏྟི, ཀིཾ ཀམྨཾ ཀཏྭཱ ཨིམཾ ཨལཏྠཱ’’ཏི? ‘‘མཱ མཾ, བྷནྟེ, པུཙྪཐཱ’’ཏི. དེཝཏཱ ཀིར ཨཏྟནོ པརིཏྟཀམྨེན ལཛྫམཱནཱ ཨེཝཾ ཝདཏི. སཱ པན ཐེརེན ‘‘ཀཐེཧིཡེཝཱ’’ཏི ཝུཙྩམཱནཱ ཨཱཧ – ‘‘བྷནྟེ, མཡཱ ནེཝ དཱནཾ དིནྣཾ, ན པཱུཛཱ ཀཏཱ, ན དྷམྨོ སུཏོ, ཀེཝལཾ སཙྩམཏྟཾ རཀྑིཏ’’ནྟི. ཐེརོ ཨཉྙཱནི ཝིམཱནདྭཱརཱནི གནྟྭཱ ཨཱགཏཱགཏཱ ཨཔརཱཔི དེཝདྷཱིཏརོ པུཙྪི. ཏཱསུཔི ཏཐེཝ ནིགུཧིཏྭཱ ཐེརཾ པཊིབཱཧིཏུཾ ཨསཀྐོནྟཱིསུ ཨེཀཱ ཏཱཝ ཨཱཧ – ‘‘བྷནྟེ, མཡཱ ནེཝ དཱནཱདཱིསུ ཀཏཾ ནཱམ ཨཏྠི, ཨཧཾ པན ཀསྶཔབུདྡྷཀཱལེ པརསྶ དཱསཱི ཨཧོསིཾ, ཏསྶཱ མེ སཱམིཀོ ཨཏིཝིཡ ཙཎྜོ ཕརུསོ, གཧིཏགྒཧིཏེནེཝ ཀཊྛེན ཝཱ ཀལིངྒརེན ཝཱ སཱིསཾ བྷིནྡཏི. སཱཧཾ ཨུཔྤནྣེ ཀོཔེ ‘ཨེས ཏཝ སཱམིཀོ ལཀྑཎཱཧཏཾ ཝཱ ཀཱཏུཾ ནཱསཱདཱིནི ཝཱ ཚིནྡིཏུཾ ཨིསྶརོ, མཱ ཀུཛ྄ཛྷཱི’ཏི ཨཏྟཱནམེཝ པརིབྷཱསེཏྭཱ ཀོཔཾ ནཱམ ན ཨཀཱསིཾ, ཏེན མེ ཨཡཾ སམྤཏྟི ལདྡྷཱ’’ཏི. ཨཔརཱ ཨཱཧ – ‘‘ཨཧཾ, བྷནྟེ, ཨུཙྪུཁེཏྟཾ རཀྑམཱནཱ ཨེཀསྶ བྷིཀྑུནོ ཨུཙྪུཡཊྛིཾ ཨདཱསིཾ’’. ཨཔརཱ ཨེཀཾ ཏིམྦརུསཀཾ ཨདཱསིཾ. ཨཔརཱ ཨེཀཾ ཨེལཱ༹ལུཀཾ ཨདཱསིཾ. ཨཔརཱ ཨེཀཾ ཕཱརུསཀཾ ཨདཱསིཾ. ཨཔརཱ ཨེཀཾ མཱུལམུཊྛིཾ. ཨཔརཱ ‘‘ནིམྦམུཊྛི’’ནྟིཨཱདིནཱ ནཡེན ཨཏྟནཱ ཨཏྟནཱ ཀཏཾ པརིཏྟདཱནཾ ཨཱརོཙེཏྭཱ ‘‘ཨིམིནཱ ཨིམིནཱ ཀཱརཎེན ཨམྷེཧི ཨཡཾ སམྤཏྟི ལདྡྷཱ’’ཏི ཨཱཧཾསུ.

ཐེརོ ཏཱཧི ཀཏཀམྨཾ སུཏྭཱ སཏྠཱརཾ ཨུཔསངྐམིཏྭཱ པུཙྪི – ‘‘སཀྐཱ ནུ ཁོ, བྷནྟེ, སཙྩཀཐནམཏྟེན, ཀོཔནིབྦཱཔནམཏྟེན, ཨཏིཔརིཏྟཀེན ཏིམྦརུསཀཱདིདཱནམཏྟེན དིབྦསམྤཏྟིཾ ལདྡྷུ’’ནྟི. ‘‘ཀསྨཱ མཾ, མོགྒལླཱན, པུཙྪསི, ནནུ ཏེ དེཝཏཱཧི ཨཡཾ ཨཏྠོ ཀཐིཏོ’’ཏི? ‘‘ཨཱམ, བྷནྟེ, ལབྦྷཏི མཉྙེ ཨེཏྟཀེན དིབྦསམྤཏྟཱི’’ཏི. ཨཐ ནཾ སཏྠཱ ‘‘མོགྒལླཱན, སཙྩམཏྟཾ ཀཐེཏྭཱཔི ཀོཔམཏྟཾ ཛཧིཏྭཱཔི པརིཏྟཀཾ དཱནཾ དཏྭཱཔི དེཝལོཀཾ གཙྪཏིཡེཝཱ’’ཏི ཝཏྭཱ ཨིམཾ གཱཐམཱཧ –

༢༢༤.

‘‘སཙྩཾ བྷཎེ ན ཀུཛ྄ཛྷེཡྻ, དཛྫཱ ཨཔྤམྤི ཡཱཙིཏོ;

ཨེཏེཧི ཏཱིཧི ཋཱནེཧི, གཙྪེ དེཝཱན སནྟིཀེ’’ཏི.

ཏཏྠ སཙྩཾ བྷཎེཏི སཙྩཾ དཱིཔེཡྻ ཝོཧརེཡྻ, སཙྩེ པཏིཊྛཧེཡྻཱཏི ཨཏྠོ. ན ཀུཛ྄ཛྷེཡྻཱཏི པརསྶ ན ཀུཛ྄ཛྷེཡྻ. ཡཱཙིཏོཏི ཡཱཙཀཱ ནཱམ སཱིལཝནྟོ པབྦཛིཏཱ. ཏེ ཧི ཀིཉྩཱཔི ‘‘དེཐཱ’’ཏི ཨཡཱཙིཏྭཱཝ གྷརདྭཱརེ ཏིཊྛནྟི, ཨཏྠཏོ པན ཡཱཙནྟིཡེཝ ནཱམ. ཨེཝཾ སཱིལཝནྟེཧི ཡཱཙིཏོ ཨཔྤསྨིཾ དེཡྻདྷམྨེ ཝིཛྫམཱནེ ཨཔྤམཏྟཀམྤི དདེཡྻ. ཨེཏེཧི ཏཱིཧཱིཏི ཨེཏེསུ ཏཱིསུ ཨེཀེནཱཔི ཀཱརཎེན དེཝལོཀཾ གཙྪེཡྻཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཧཱམོགྒལླཱནཏྠེརཔཉྷཝཏྠུ ཙཏུཏྠཾ.

༥. བུདྡྷཔིཏུབྲཱཧྨཎཝཏྠུ

ཨཧིཾསཀཱ ཡེཏི ཨིམཾ དྷམྨདེསནཾ སཏྠཱ སཱཀེཏཾ ནིསྶཱཡ ཨཉྫནཝནེ ཝིཧརནྟོ བྷིཀྑཱུཧི པཊྛཔཉྷཾ ཨཱརབྦྷ ཀཐེསི.

བྷགཝཏོ ཀིར བྷིཀྑུསངྒྷཔརིཝུཏསྶ སཱཀེཏཾ པིཎྜཱཡ པཝིསནཀཱལེ ཨེཀོ སཱཀེཏཝཱསཱི མཧལླཀབྲཱཧྨཎོ ནགརཏོ ནིཀྑམནྟོ ཨནྟརགྷརདྭཱརེ དསབལཾ དིསྭཱ པཱདེསུ ནིཔཏིཏྭཱ གོཔྥཀེསུ དལ༹ྷཾ གཧེཏྭཱ, ‘‘ཏཱཏ, ནནུ ནཱམ པུཏྟེཧི ཛིཎྞཀཱལེ མཱཏཱཔིཏརོ པཊིཛགྒིཏབྦཱ, ཀསྨཱ ཨེཏྟཀཾ ཀཱལཾ ཨམྷཱཀཾ ཨཏྟཱནཾ ན དསྶེསི. མཡཱ ཏཱཝ དིཊྛོསི, མཱཏརམྤི པསྶིཏུཾ ཨེཧཱི’’ཏི སཏྠཱརཾ གཧེཏྭཱ ཨཏྟནོ གེཧཾ ཨགམཱསི. སཏྠཱ ཏཏྠ གནྟྭཱ པཉྙཏྟེ ཨཱསནེ ནིསཱིདི སདྡྷིཾ བྷིཀྑུསངྒྷེན. བྲཱཧྨཎཱིཔི ཨཱགནྟྭཱ སཏྠུ པཱདེསུ ནིཔཏིཏྭཱ, ‘‘ཏཱཏ, ཨེཏྟཀཾ ཀཱལཾ ཀུཧིཾ གཏོསི, ནནུ ནཱམ མཱཏཱཔིཏརོ མཧལླཀཀཱལེ ཨུཔཊྛཱཏབྦཱ’’ཏི ཝཏྭཱ པུཏྟདྷཱིཏརོ ‘‘ཨེཐ བྷཱཏརཾ ཝནྡཐཱ’’ཏི ཝནྡཱཔེསི. ཏེ ཨུབྷོཔི ཏུཊྛམཱནསཱ བུདྡྷཔྤམུཁཾ བྷིཀྑུསངྒྷཾ པརིཝིསིཏྭཱ, ‘‘བྷནྟེ, ཨིདྷེཝ ནིབདྡྷཾ བྷིཀྑཾ གཎྷཐཱ’’ཏི ཝཏྭཱ ‘‘བུདྡྷཱ ནཱམ ཨེཀཊྛཱནེཡེཝ ནིབདྡྷཾ བྷིཀྑཾ ན གཎྷནྟཱི’’ཏི ཝུཏྟེ, ‘‘ཏེན ཧི, བྷནྟེ, ཡེ ཝོ ནིམནྟེཏུཾ ཨཱགཙྪནྟི, ཏེ ཨམྷཱཀཾ སནྟིཀཾ པཧིཎེཡྻཱཐཱ’’ཏི ཨཱཧཾསུ. སཏྠཱ ཏཏོ པཊྛཱཡ ནིམནྟེཏུཾ ཨཱགཏེ ‘‘གནྟྭཱ བྲཱཧྨཎསྶ ཨཱརོཙེཡྻཱཐཱ’’ཏི པེསེསི. ཏེ གནྟྭཱ ‘‘མཡཾ སྭཱཏནཱཡ སཏྠཱརཾ ནིམནྟེམཱ’’ཏི བྲཱཧྨཎཾ ཝདནྟི. བྲཱཧྨཎོ པུནདིཝསེ ཨཏྟནོ གེཧཏོ བྷཏྟབྷཱཛནསཱུཔེཡྻབྷཱཛནཱནི ཨཱདཱཡ སཏྠུ ནིསཱིདནཊྛཱནཾ གཙྪཏི. ཨཉྙཏྲ པན ནིམནྟནེ ཨསཏི སཏྠཱ བྲཱཧྨཎསྶེཝ གེཧེ བྷཏྟཀིཙྩཾ ཀརོཏི. ཏེ ཨུབྷོཔི ཨཏྟནོ དེཡྻདྷམྨཾ ནིཙྩཀཱལཾ ཏཐཱགཏསྶ དེནྟཱ དྷམྨཀཐཾ སུཎནྟཱ ཨནཱགཱམིཕལཾ པཱཔུཎིཾསུ.

བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ, ‘‘ཨཱཝུསོ, བྲཱཧྨཎོ ‘ཏཐཱགཏསྶ སུདྡྷོདནོ པིཏཱ, མཧཱམཱཡཱ མཱཏཱ’ཏི ཛཱནཱཏི, ཛཱནནྟོཝ སདྡྷིཾ བྲཱཧྨཎིཡཱ ཏཐཱགཏཾ ‘ཨམྷཱཀཾ པུཏྟོ’ཏི ཝདཏི, སཏྠཱཔི ཏཐེཝ ཨདྷིཝཱསེཏི. ཀིཾ ནུ ཁོ ཀཱརཎ’’ནྟི? སཏྠཱ ཏེསཾ ཀཐཾ སུཏྭཱ, ‘‘བྷིཀྑཝེ, ཨུབྷོཔི ཏེ ཨཏྟནོ པུཏྟམེཝ པུཏྟོཏི ཝདནྟཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ, བྷིཀྑཝེ, ཨཡཾ བྲཱཧྨཎོ ནིརནྟརཾ པཉྩ ཛཱཏིསཏཱནི མཡ྄ཧཾ པིཏཱ ཨཧོསི, པཉྩ ཛཱཏིསཏཱནི ཙཱུལ༹པིཏཱ, པཉྩ ཛཱཏིསཏཱནི མཧཱཔིཏཱ. སཱཔི མེ བྲཱཧྨཎཱི ནིརནྟརམེཝ པཉྩ ཛཱཏིསཏཱནི མཱཏཱ ཨཧོསི, པཉྩ ཛཱཏིསཏཱནི ཙཱུལ༹མཱཏཱ, པཉྩ ཛཱཏིསཏཱནི མཧཱམཱཏཱ. ཨེཝཱཧཾ དིཡཌྜྷཛཱཏིསཧསྶཾ བྲཱཧྨཎསྶ ཧཏྠེ སཾཝཌྜྷོ, དིཡཌྜྷཛཱཏིསཧསྶཾ བྲཱཧྨཎིཡཱ ཧཏྠེཏི ཏཱིཎི ཛཱཏིསཧསྶཱནི ཏེསཾ པུཏྟབྷཱཝཾ དསྶེཏྭཱ ཨིམཱ གཱཐཱ ཨབྷཱསི –

‘‘ཡསྨིཾ མནོ ནིཝིསཏི, ཙིཏྟཉྩཱཔི པསཱིདཏི;

ཨདིཊྛཔུབྦཀེ པོསེ, ཀཱམཾ ཏསྨིམྤི ཝིསྶསེ. (ཛཱ. ༡.༡.༦༨);

‘‘པུབྦེཝ སནྣིཝཱསེན, པཙྩུཔྤནྣཧིཏེན ཝཱ;

ཨེཝཾ ཏཾ ཛཱཡཏེ པེམཾ, ཨུཔྤལཾཝ ཡཐོདཀེ’’ཏི. (ཛཱ. ༡.༢.༡༧༤);

སཏྠཱ ཏེམཱསམེཝ ཏཾ ཀུལཾ ནིསྶཱཡ ཝིཧཱསི. ཏེ ཨུབྷོཔི ཨརཧཏྟཾ སཙྪིཀཏྭཱ པརིནིབྦཱཡིཾསུ. ཨཐ ནེསཾ མཧཱསཀྐཱརཾ ཀཏྭཱ ཨུབྷོཔི ཨེཀཀཱུཊཱགཱརམེཝ ཨཱརོཔེཏྭཱ ནཱིཧརིཾསུ. སཏྠཱཔི པཉྩསཏབྷིཀྑུཔརིཝཱརོ ཏེཧི སདྡྷིཾཡེཝ ཨཱལཱ༹ཧནཾ ཨགམཱསི. ‘‘བུདྡྷཱནཾ ཀིར མཱཏཱཔིཏརོ’’ཏི མཧཱཛནོ ནིཀྑམི. སཏྠཱཔི ཨཱལཱ༹ཧནསམཱིཔེ ཨེཀཾ སཱལཾ པཝིསིཏྭཱ ཨཊྛཱསི. མནུསྶཱ སཏྠཱརཾ ཝནྡིཏྭཱ ཨེཀམནྟེ ཋཏྭཱ, ‘‘བྷནྟེ, ‘མཱཏཱཔིཏརོ ཝོ ཀཱལཀཏཱ’ཏི མཱ ཙིནྟཡིཏྠཱ’’ཏི སཏྠཱརཱ སདྡྷིཾ པཊིསནྠཱརཾ ཀརོནྟི. སཏྠཱ ཏེ ‘‘མཱ ཨེཝཾ ཨཝཙུཏྠཱ’’ཏི ཨཔྤཊིཀྑིཔིཏྭཱ པརིསཱཡ ཨཱསཡཾ ཨོལོཀེཏྭཱ ཏངྑཎཱནུརཱུཔཾ དྷམྨཾ དེསེནྟོ –

‘‘ཨཔྤཾ ཝཏ ཛཱིཝིཏཾ ཨིདཾ,

ཨོརཾ ཝསྶསཏཱཔི མིཡྻཏི;

ཡོ ཙེཔི ཨཏིཙྩ ཛཱིཝཏི,

ཨཐ སོ ཛརསཱཔི མིཡྻཏཱི’’ཏི. (སུ. ནི. ༨༡༠; མཧཱནི. ༣༩) –

ཨིདཾ ཛརཱསུཏྟཾ ཀཐེསི. དེསནཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི. བྷིཀྑཱུ བྲཱཧྨཎསྶ ཙ བྲཱཧྨཎིཡཱ ཙ པརིནིབྦུཏབྷཱཝཾ ཨཛཱནནྟཱ, ‘‘བྷནྟེ, ཏེསཾ ཀོ ཨབྷིསམྤརཱཡོ’’ཏི པུཙྪིཾསུ. སཏྠཱ, ‘‘བྷིཀྑཝེ, ཨེཝརཱུཔཱནཾ ཨསེཁམུནཱིནཾ ཨབྷིསམྤརཱཡོ ནཱམ ནཏྠི. ཨེཝརཱུཔཱ ཧི ཨཙྩུཏཾ ཨམཏཾ མཧཱནིབྦཱནམེཝ པཱཔུཎནྟཱི’’ཏི ཝཏྭཱ ཨིམཾ གཱཐམཱཧ –

༢༢༥.

‘‘ཨཧིཾསཀཱ ཡེ མུནཡོ, ནིཙྩཾ ཀཱཡེན སཾཝུཏཱ;

ཏེ ཡནྟི ཨཙྩུཏཾ ཋཱནཾ, ཡཏྠ གནྟྭཱ ན སོཙརེ’’ཏི.

ཏཏྠ མུནཡོཏི མོནེཡྻཔཊིཔདཱཡ མགྒཕལཔཏྟཱ ཨསེཁམུནཡོ. ཀཱཡེནཱཏི དེསནཱམཏྟམེཝེཏཾ, ཏཱིཧིཔི དྭཱརེཧི སུསཾཝུཏཱཏི ཨཏྠོ. ཨཙྩུཏནྟི སསྶཏཾ. ཋཱནནྟི ཨཀུཔྤཊྛཱནཾ དྷུཝཊྛཱནཾ. ཡཏྠཱཏི ཡསྨིཾ ནིབྦཱནེ གནྟྭཱ ན སོཙརེ ན སོཙནྟི ན ཝིཧཉྙནྟི, ཏཾ ཋཱནཾ གཙྪནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

བུདྡྷཔིཏུབྲཱཧྨཎཝཏྠུ པཉྩམཾ.

༦. པུཎྞདཱསཱིཝཏྠུ

སདཱ ཛཱགརམཱནཱནནྟི ཨིམཾ དྷམྨདེསནཾ སཏྠཱ གིཛ྄ཛྷཀཱུཊེ ཝིཧརནྟོ པུཎྞཾ ནཱམ རཱཛགཧསེཊྛིནོ དཱསིཾ ཨཱརབྦྷ ཀཐེསི.

ཏསྶཱ ཀིར ཨེཀདིཝསཾ ཀོཊྚནཏྠཱཡ བཧུཝཱིཧིཾ ཨདཾསུ. སཱ རཏྟིམྤི དཱིཔཾ ཛཱལེཏྭཱ ཝཱིཧིཾ ཀོཊྚེནྟཱི ཝིསྶམནཏྠཱཡ སེདཏིནྟེན གཏྟེན བཧིཝཱཏེ ཨཊྛཱསི. ཏསྨིཾ སམཡེ དབྦོ མལླཔུཏྟོ བྷིཀྑཱུནཾ སེནཱསནཔཉྙཱཔཀོ ཨཧོསི. སོ དྷམྨསྶཝནཾ སུཏྭཱ ཨཏྟནོ ཨཏྟནོ སེནཱསནཾ གཙྪནྟཱནཾ བྷིཀྑཱུནཾ ཨངྒུལིཾ ཛཱལེཏྭཱ པུརཏོ པུརཏོ མགྒདེསནཏྠཱཡ གཙྪནྟོ བྷིཀྑཱུནཾ ཨཱལོཀཾ ནིམྨིནི. པུཎྞཱ ཏེནཱལོཀེན པབྦཏེ ཝིཙརནྟེ བྷིཀྑཱུ དིསྭཱ ‘‘ཨཧཾ ཏཱཝ ཨཏྟནོ དུཀྑེན ཨུཔདྡུཏཱ ཨིམཱཡཔི ཝེལཱཡ ནིདྡཾ ན ཨུཔེམི, བྷདྡནྟཱ ཀིཾ ཀཱརཎཱ ན ནིདྡཱཡནྟཱི’’ཏི ཙིནྟེཏྭཱ ‘‘ཨདྡྷཱ ཀསྶཙི བྷིཀྑུནོ ཨཕཱསུཀཾ ཝཱ བྷཝིསྶཏི, དཱིགྷཛཱཏིཀེན ཝཱ ཨུཔདྡཝོ བྷཝིསྶཏཱི’’ཏི སཉྙཾ ཀཏྭཱ པཱཏོཝ ཀུཎྜཀཾ ཨཱདཱཡ ཨུདཀེན ཏེམེཏྭཱ ཧཏྠཏལེ པཱུཝཾ ཀཏྭཱ ཨངྒཱརེསུ པཙིཏྭཱ ཨུཙྪངྒེ ཀཏྭཱ ཏིཏྠམགྒེ ཁཱདིསྶཱམཱིཏི གྷཊཾ ཨཱདཱཡ ཏིཏྠཱབྷིམུཁཱི པཱཡཱསི. སཏྠཱཔི གཱམཾ པིཎྜཱཡ པཝིསིཏུཾ ཏམེཝ མགྒཾ པཊིཔཛྫི.

སཱ སཏྠཱརཾ དིསྭཱ ཙིནྟེསི – ‘‘ཨཉྙེསུ དིཝསེསུ སཏྠརི དིཊྛེཔི མམ དེཡྻདྷམྨོ ན ཧོཏི, དེཡྻདྷམྨེ སཏི སཏྠཱརཾ ན པསྶཱམི, ཨིདཱནི མེ དེཡྻདྷམྨོ ཙ ཨཏྠི, སཏྠཱ ཙ སམྨུཁཱིབྷཱུཏོ. སཙེ ལཱུཁཾ ཝཱ པཎཱིཏཾ ཝཱཏི ཨཙིནྟེཏྭཱ གཎྷེཡྻ, དདེཡྻཱཧཾ ཨིམཾ པཱུཝ’’ནྟི གྷཊཾ ཨེཀམནྟེ ནིཀྑིཔིཏྭཱ སཏྠཱརཾ ཝནྡིཏྭཱ, ‘‘བྷནྟེ, ཨིམཾ ལཱུཁཾ དཱནཾ པཊིགྒཎྷནྟཱ མམ སངྒཧཾ ཀརོཐཱ’’ཏི ཨཱཧ. སཏྠཱ ཨཱནནྡཏྠེརཾ ཨོལོཀེཏྭཱ ཏེན ནཱིཧརིཏྭཱ དིནྣཾ མཧཱརཱཛདཏྟིཡཾ པཏྟཾ ཨུཔནཱམེཏྭཱ པཱུཝཾ གཎྷི. པུཎྞཱཔི ཏཾ སཏྠུ པཏྟེ པཏིཊྛཔེཏྭཱཝ པཉྩཔཏིཊྛིཏེན ཝནྡིཏྭཱ, ‘‘བྷནྟེ, ཏུམྷེཧི དིཊྛདྷམྨོཡེཝ མེ སམིཛ྄ཛྷཏཱུ’’ཏི ཨཱཧ. སཏྠཱ ‘‘ཨེཝཾ ཧོཏཱུ’’ཏི ཋིཏཀོཝ ཨནུམོདནཾ ཨཀཱསི.

པུཎྞཱཔི ཙིནྟེསི – ‘‘ཀིཉྩཱཔི མེ སཏྠཱ སངྒཧཾ ཀརོནྟོ པཱུཝཾ གཎྷི, ན པནིདཾ ཁཱདིསྶཏི. ཨདྡྷཱ པུརཏོ ཀཱཀསྶ ཝཱ སུནཁསྶ ཝཱ དཏྭཱ རཉྙོ ཝཱ རཱཛཔུཏྟསྶ ཝཱ གེཧཾ གནྟྭཱ པཎཱིཏབྷོཛནཾ བྷུཉྫིསྶཏཱི’’ཏི. སཏྠཱཔི ‘‘ཀིཾ ནུ ཁོ ཨེསཱ ཙིནྟེསཱི’’ཏི ཏསྶཱ ཙིཏྟཱཙཱརཾ ཉཏྭཱ ཨཱནནྡཏྠེརཾ ཨོལོཀེཏྭཱ ནིསཱིདནཱཀཱརཾ དསྶེསི. ཐེརོ ཙཱིཝརཾ པཉྙཱཔེཏྭཱ ཨདཱསི. སཏྠཱ བཧིནགརེཡེཝ ནིསཱིདིཏྭཱ བྷཏྟཀིཙྩཾ ཨཀཱསི. དེཝཏཱ སཀལཙཀྐཝཱལ༹གབྦྷེ དེཝམནུསྶཱནཾ ཨུཔཀཔྤནཀཾ ཨོཛཾ མདྷུཔཊལཾ ཝིཡ པཱིལེ༹ཏྭཱ ཏཏྠ པཀྑིཔིཾསུ. པུཎྞཱ ཙ ཨོལོཀེནྟཱི ཨཊྛཱསི. བྷཏྟཀིཙྩཱཝསཱནེ ཐེརོ ཨུདཀཾ ཨདཱསི. སཏྠཱ ཀཏབྷཏྟཀིཙྩོ པུཎྞཾ ཨཱམནྟེཏྭཱ ‘‘ཀསྨཱ ཏྭཾ པུཎྞེ མམ སཱཝཀེ པརིབྷཝསཱི’’ཏི ཨཱཧ. ན པརིབྷཝཱམི, བྷནྟེཏི. ཨཐ ཏཡཱ མམ སཱཝཀེ ཨོལོཀེཏྭཱ ཀིཾ ཀཐིཏནྟི? ‘‘ཨཧཾ ཏཱཝ ཨིམིནཱ དུཀྑུཔདྡཝེན ནིདྡཾ ན ཨུཔེམི, བྷདྡནྟཱ ཀིམཏྠཾ ནིདྡཾ ན ཨུཔེནྟི, ཨདྡྷཱ ཀསྶཙི ཨཕཱསུཀཾ ཝཱ བྷཝིསྶཏི, དཱིགྷཛཱཏིཀེན ཝཱ ཨུཔདྡཝོ བྷཝིསྶཏཱི’’ཏི ཨེཏྟཀཾ མཡཱ, བྷནྟེ, ཙིནྟིཏནྟི. སཏྠཱ ཏསྶཱ ཝཙནཾ སུཏྭཱ ‘‘པུཎྞེ ཏྭཾ ན ཏཱཝ དུཀྑུཔདྡཝེན ནིདྡཱཡསི, མམ སཱཝཀཱ སདཱ ཛཱགརིཡམནུཡུཏྟཏཱཡ ན ནིདྡཱཡནྟཱི’’ཏི ཝཏྭཱ ཨིམཾ གཱཐམཱཧ –

༢༢༦.

‘‘སདཱ ཛཱགརམཱནཱནཾ, ཨཧོརཏྟཱནུསིཀྑིནཾ;

ནིབྦཱནཾ ཨདྷིམུཏྟཱནཾ, ཨཏྠཾ གཙྪནྟི ཨཱསཝཱ’’ཏི.

ཏཏྠ ཨཧོརཏྟཱནུསིཀྑིནནྟི དིཝཱ ཙ རཏྟིཉྩ ཏིསྶོ སིཀྑཱ སིཀྑམཱནཱནཾ. ནིབྦཱནཾ ཨདྷིམུཏྟཱནནྟི ནིབྦཱནཛ྄ཛྷཱསཡཱནཾ. ཨཏྠཾ གཙྪནྟཱིཏི ཨེཝརཱུཔཱནཾ སབྦེཔི ཨཱསཝཱ ཨཏྠཾ ཝིནཱསཾ ནཏྠིབྷཱཝཾ གཙྪནྟཱིཏི ཨཏྠོ.

དེསནཱཝསཱནེ ཡཐཱཋིཏཱ པུཎྞཱ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

སཏྠཱ ཀུཎྜཀཨངྒཱརཔཱུཝེན བྷཏྟཀིཙྩཾ ཀཏྭཱ ཝིཧཱརཾ ཨགམཱསི. བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘དུཀྐརཾ, ཨཱཝུསོ, སམྨཱསམྦུདྡྷེན ཀཏཾ པུཎྞཱཡ དིནྣེན ཀུཎྜཀཨངྒཱརཔཱུཝེན བྷཏྟཀིཙྩཾ ཀརོནྟེནཱ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ, པུབྦེཔི མཡཱ ཨིམཱཡ དིནྣཀུཎྜཀཾ པརིབྷུཏྟམེཝཱ’’ཏི ཝཏྭཱ ཨཏཱིཏཾ ཨཱཧརིཏྭཱ –

‘‘བྷུཏྭཱ ཏིཎཔརིགྷཱསཾ, བྷུཏྭཱ ཨཱཙཱམཀུཎྜཀཾ;

ཨེཏཾ ཏེ བྷོཛནཾ ཨཱསི, ཀསྨཱ དཱནི ན བྷུཉྫསི.

‘‘ཡཏྠ པོསཾ ན ཛཱནནྟི, ཛཱཏིཡཱ ཝིནཡེན ཝཱ;

བཧུཾ ཏཏྠ མཧཱབྲཧྨེ, ཨཔི ཨཱཙཱམཀུཎྜཀཾ.

‘‘ཏྭཉྩ ཁོ མཾ པཛཱནཱསི, ཡཱདིསཱཡཾ ཧཡུཏྟམོ;

ཛཱནནྟོ ཛཱནམཱགམྨ, ན ཏེ བྷཀྑཱམི ཀུཎྜཀ’’ནྟི. (ཛཱ. ༡.༣.༡༠-༡༢) –

ཨིམཾ ཀུཎྜཀསིནྡྷཝཔོཏཀཛཱཏཀཾ ཝིཏྠཱརེཏྭཱ ཀཐེསི.

པུཎྞདཱསཱིཝཏྠུ ཚཊྛཾ.

༧. ཨཏུལཨུཔཱསཀཝཏྠུ

པོརཱཎམེཏནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཏུལཾ ནཱམ ཨུཔཱསཀཾ ཨཱརབྦྷ ཀཐེསི.

སོ ཧི སཱཝཏྠིཝཱསཱི ཨུཔཱསཀོ པཉྩསཏཨུཔཱསཀཔརིཝཱརོ ཨེཀདིཝསཾ ཏེ ཨུཔཱསཀེ ཨཱདཱཡ དྷམྨསྶཝནཏྠཱཡ ཝིཧཱརཾ གནྟྭཱ རེཝཏཏྠེརསྶ སནྟིཀེ དྷམྨཾ སོཏུཀཱམོ ཧུཏྭཱ རེཝཏཏྠེརཾ ཝནྡིཏྭཱ ནིསཱིདི. སོ པནཱཡསྨཱ པཊིསལླཱནཱརཱམོ སཱིཧོ ཝིཡ ཨེཀཙཱརོ, ཏསྨཱ ཏེན སདྡྷིཾ ན ཀིཉྩི ཀཐེསི. སོ ‘‘ཨཡཾ ཐེརོ ན ཀིཉྩི ཀཐེསཱི’’ཏི ཀུདྡྷོ ཨུཊྛཱཡ སཱརིཔུཏྟཏྠེརསྶ སནྟིཀཾ གནྟྭཱ ཨེཀམནྟཾ ཋིཏོ ཐེརེན ‘‘ཀེནཏྠེན ཨཱགཏཏྠཱ’’ཏི ཝུཏྟེ ‘‘ཨཧཾ, བྷནྟེ, ཨིམེ ཨུཔཱསཀེ ཨཱདཱཡ དྷམྨསྶཝནཏྠཱཡ རེཝཏཏྠེརཾ ཨུཔསངྐམིཾ, ཏསྶ མེ ཐེརོ ན ཀིཉྩི ཀཐེསི, སྭཱཧཾ ཏསྶ ཀུཛ྄ཛྷིཏྭཱ ཨིདྷཱགཏོ, དྷམྨཾ མེ ཀཐེཐཱ’’ཏི ཨཱཧ. ཨཐ ཐེརོ ‘‘ཏེན ཧི ཨུཔཱསཀཱ ནིསཱིདཐཱ’’ཏི ཝཏྭཱ བཧུཀཾ ཀཏྭཱ ཨབྷིདྷམྨཀཐཾ ཀཐེསི. ཨུཔཱསཀོཔི ‘‘ཨབྷིདྷམྨཀཐཱ ནཱམ ཨཏིསཎྷཱ, ཐེརོ བཧུཾ ཨབྷིདྷམྨམེཝ ཀཐེསི, ཨམྷཱཀཾ ཨིམིནཱ ཀོ ཨཏྠོ’’ཏི ཀུཛ྄ཛྷིཏྭཱ པརིསཾ ཨཱདཱཡ ཨཱནནྡཏྠེརསྶ སནྟིཀཾ ཨགམཱསི.

ཐེརེནཱཔི ‘‘ཀིཾ ཨུཔཱསཀཱ’’ཏི ཝུཏྟེ, ‘‘བྷནྟེ, མཡཾ དྷམྨསྶཝནཏྠཱཡ རེཝཏཏྠེརཾ ཨུཔསངྐམིམྷཱ, ཏསྶ སནྟིཀེ ཨཱལཱཔསལླཱཔམཏྟམྤི ཨལབྷིཏྭཱ ཀུདྡྷཱ སཱརིཔུཏྟཏྠེརསྶ སནྟིཀཾ ཨགམིམྷཱ, སོཔི ནོ ཨཏིསཎྷཾ བཧུཾ ཨབྷིདྷམྨམེཝ ཀཐེསི, ‘ཨིམིནཱ ཨམྷཱཀཾ ཀོ ཨཏྠོ’ཏི ཨེཏསྶཱཔི ཀུཛ྄ཛྷིཏྭཱ ཨིདྷཱགམིམྷཱ, ཀཐེཧི ནོ, བྷནྟེ, དྷམྨཀཐ’’ནྟི. ཏེན ཧི ནིསཱིདིཏྭཱ སུཎཱཐཱཏི ཐེརོ ཏེསཾ སུཝིཉྙེཡྻཾ ཀཏྭཱ ཨཔྤཀམེཝ དྷམྨཾ ཀཐེསི. ཏེ ཐེརསྶཔི ཀུཛ྄ཛྷིཏྭཱ སཏྠུ སནྟིཀཾ གནྟྭཱ ཝནྡིཏྭཱ ཨེཀམནྟཾ ནིསཱིདིཾསུ, ཨཐ ནེ སཏྠཱ ཨཱཧ – ‘‘ཀསྨཱ ཨུཔཱསཀཱ ཨཱགཏཏྠཱ’’ཏི? ‘‘དྷམྨསྶཝནཱཡ, བྷནྟེ’’ཏི. ‘‘སུཏོ པན ཝོ དྷམྨོ’’ཏི? ‘‘བྷནྟེ, མཡཾ ཨཱདིཏོ རེཝཏཏྠེརཾ ཨུཔསངྐམིམྷཱ, སོ ཨམྷེཧི སདྡྷིཾ ན ཀིཉྩི ཀཐེསི, ཏསྶ ཀུཛ྄ཛྷིཏྭཱ སཱརིཔུཏྟཏྠེརཾ ཨུཔསངྐམིམྷཱ, ཏེན ནོ བཧུ ཨབྷིདྷམྨོ ཀཐིཏོ, ཏཾ ཨསལླཀྑེཏྭཱ ཀུཛ྄ཛྷིཏྭཱ ཨཱནནྡཏྠེརཾ ཨུཔསངྐམིམྷཱ, ཏེན ནོ ཨཔྤམཏྟཀོཝ དྷམྨོ ཀཐིཏོ, ཏསྶཔི ཀུཛ྄ཛྷིཏྭཱ ཨིདྷཱགཏམྷཱ’’ཏི.

སཏྠཱ ཏསྶ ཀཐཾ སུཏྭཱ, ‘‘ཨཏུལ, པོརཱཎཏོ པཊྛཱཡ ཨཱཙིཎྞམེཝེཏཾ, ཏུཎྷཱིབྷཱུཏམྤི བཧུཀཐམྤི མནྡཀཐམྤི གརཧནྟིཡེཝ. ཨེཀནྟཾ གརཧིཏབྦོཡེཝ ཝཱ ཧི པསཾསིཏབྦོཡེཝ ཝཱ ནཏྠི. རཱཛཱནོཔི ཨེཀཙྩེ ནིནྡནྟི, ཨེཀཙྩེ པསཾསནྟི. མཧཱཔཐཝིམྤི ཙནྡིམསཱུརིཡེཔི ཨཱཀཱསཱདཡོཔི ཙཏུཔརིསམཛ྄ཛྷེ ནིསཱིདིཏྭཱ དྷམྨཾ ཀཐེནྟམྤི སམྨཱསམྦུདྡྷཾ ཨེཀཙྩེ གརཧནྟི, ཨེཀཙྩེ པསཾསནྟི. ཨནྡྷབཱལཱནཉྷི ནིནྡཱ ཝཱ པསཾསཱ ཝཱ ཨཔྤམཱཎཱ, པཎྜིཏེན པན མེདྷཱཝིནཱ ནིནྡིཏོ ནིནྡིཏོ ནཱམ, པསཾསིཏོ ཙ པསཾསིཏོ ནཱམ ཧོཏཱི’’ཏི ཝཏྭཱ ཨིམཱ གཱཐཱ ཨབྷཱསི –

༢༢༧.

‘‘པོརཱཎམེཏཾ ཨཏུལ, ནེཏཾ ཨཛྫཏནཱམིཝ;

ནིནྡནྟི ཏུཎྷིམཱསཱིནཾ, ནིནྡནྟི བཧུབྷཱཎིནཾ;

མིཏབྷཱཎིམྤི ནིནྡནྟི, ནཏྠི ལོཀེ ཨནིནྡིཏོ.

༢༢༨.

‘‘ན ཙཱཧུ ན ཙ བྷཝིསྶཏི, ན ཙེཏརཧི ཝིཛྫཏི;

ཨེཀནྟཾ ནིནྡིཏོ པོསོ, ཨེཀནྟཾ ཝཱ པསཾསིཏོ.

༢༢༩.

‘‘ཡཾ ཙེ ཝིཉྙཱུ པསཾསནྟི, ཨནུཝིཙྩ སུཝེ སུཝེ;

ཨཙྪིདྡཝུཏྟིཾ མེདྷཱཝིཾ, པཉྙཱསཱིལསམཱཧིཏཾ.

༢༣༠.

‘‘ནིཀྑཾ ཛམྦོནདསྶེཝ, ཀོ ཏཾ ནིནྡིཏུམརཧཏི;

དེཝཱཔི ནཾ པསཾསནྟི, བྲཧྨུནཱཔི པསཾསིཏོ’’ཏི.

ཏཏྠ པོརཱཎམེཏནྟི པུརཱཎཀཾ ཨེཏཾ. ཨཏུལཱཏི ཏཾ ཨུཔཱསཀཾ ནཱམེན ཨཱལཔཏི. ནེཏཾ ཨཛྫཏནཱམིཝཱཏི ཨིདཾ ནིནྡནཾ ཝཱ པསཾསནཾ ཝཱ ཨཛྫཏནཾ ཨདྷུནཱ ཨུཔྤནྣཾ ཝིཡ ན ཧོཏི. ཏུཎྷིམཱསཱིནནྟི ཀིཾ ཨེསོ མཱུགོ ཝིཡ བདྷིརོ ཝིཡ ཀིཉྩི ཨཛཱནནྟོ ཝིཡ ཏུཎྷཱི ཧུཏྭཱ ནིསིནྣོཏི ནིནྡནྟི. བཧུབྷཱཎིནནྟི ཀིཾ ཨེས ཝཱཏཱཧཏཏཱལཔཎྞཾ ཝིཡ ཏཊཏཊཱཡཏི, ཨིམསྶ ཀཐཱཔརིཡནྟོཡེཝ ནཏྠཱིཏི ནིནྡནྟི. མིཏབྷཱཎིམྤཱིཏི ཀིཾ ཨེས སུཝཎྞཧིརཉྙཾ ཝིཡ ཨཏྟནོ ཝཙནཾ མཉྙམཱནོ ཨེཀཾ ཝཱ དྭེ ཝཱ ཝཏྭཱ ཏུཎྷཱི ཨཧོསཱིཏི ནིནྡནྟི. ཨེཝཾ སབྦཐཱཔི ཨིམསྨིཾ ལོཀེ ཨནིནྡིཏོ ནཱམ ནཏྠཱིཏི ཨཏྠོ. ན ཙཱཧཱུཏི ཨཏཱིཏེཔི ནཱཧོསི, ཨནཱགཏེཔི ན བྷཝིསྶཏི.

ཡཾ ཙེ ཝིཉྙཱུཏི བཱལཱནཾ ནིནྡཱ ཝཱ པསཾསཱ ཝཱ ཨཔྤམཱཎཱ, ཡཾ པན པཎྜིཏཱ དིཝསེ དིཝསེ ཨནུཝིཙྩ ནིནྡཀཱརཎཾ ཝཱ པསཾསཀཱརཎཾ ཝཱ ཛཱནིཏྭཱ པསཾསནྟི, ཨཙྪིདྡཱཡ ཝཱ སིཀྑཱཡ ཨཙྪིདྡཱཡ ཝཱ ཛཱིཝིཏཝུཏྟིཡཱ སམནྣཱགཏཏྟཱ ཨཙྪིདྡཝུཏྟིཾ དྷམྨོཛཔཉྙཱཡ སམནྣཱགཏཏྟཱ མེདྷཱཝིཾ ལོཀིཡལོཀུཏྟརཔཉྙཱཡ ཙེཝ ཙཏུཔཱརིསུདྡྷིསཱིལེན ཙ སམནྣཱགཏཏྟཱ པཉྙཱསཱིལསམཱཧིཏཾ པསཾསནྟི, ཏཾ སུཝཎྞདོསཝིརཧིཏཾ གྷཊྚནམཛྫནཀྑམཾ ཛམྦོནདནིཀྑཾ ཝིཡ ཀོ ནིནྡིཏུམརཧཏཱིཏི ཨཏྠོ. དེཝཱཔཱིཏི དེཝཏཱཔི པཎྜིཏམནུསྶཱཔི ཏཾ བྷིཀྑུཾ ཨུཔཊྛཱཡ ཐོམེནྟི པསཾསནྟི. བྲཧྨུནཱཔཱིཏི ན ཀེཝལཾ དེཝམནུསྶེཧི, དསསཧསྶཙཀྐཝཱལེ༹ མཧཱབྲཧྨུནཱཔི ཨེས པསཾསིཏོཡེཝཱཏི ཨཏྠོ.

དེསནཱཝསཱནེ པཉྩསཏཱཔི ཨུཔཱསཀཱ སོཏཱཔཏྟིཕལེ པཏིཊྛཧིཾསཱུཏི.

ཨཏུལཨུཔཱསཀཝཏྠུ སཏྟམཾ.

༨. ཚབྦགྒིཡཝཏྠུ

ཀཱཡཔྤཀོཔནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཚབྦགྒིཡེ བྷིཀྑཱུ ཨཱརབྦྷ ཀཐེསི.

ཨེཀདིཝསཉྷི སཏྠཱ ཝེལུ༹ཝནེ ཝིཧརནྟོ ཏེསཾ ཚབྦགྒིཡཱནཾ ཨུབྷོཧི ཧཏྠེཧི ཡཊྛིཡོ གཧེཏྭཱ ཀཊྛཔཱདུཀཱ ཨཱརུཡ྄ཧ པིཊྛིཔཱསཱཎེ ཙངྐམནྟཱནཾ ཁཊཁཊཱཏིསདྡཾ སུཏྭཱ, ‘‘ཨཱནནྡ, ཀིཾ སདྡོ ནཱམེསོ’’ཏི པུཙྪིཏྭཱ ‘‘ཚབྦགྒིཡཱནཾ པཱདུཀཱ ཨཱརུཡ྄ཧ ཙངྐམནྟཱནཾ ཁཊཁཊསདྡོ’’ཏི སུཏྭཱ སིཀྑཱཔདཾ པཉྙཱཔེཏྭཱ ‘‘བྷིཀྑུནཱ ནཱམ ཀཱཡཱདཱིནི རཀྑིཏུཾ ཝཊྚཏཱི’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༢༣༡.

‘‘ཀཱཡཔྤཀོཔཾ རཀྑེཡྻ, ཀཱཡེན སཾཝུཏོ སིཡཱ;

ཀཱཡདུཙྩརིཏཾ ཧིཏྭཱ, ཀཱཡེན སུཙརིཏཾ ཙརེ.

༢༣༢.

‘‘ཝཙཱིཔཀོཔཾ རཀྑེཡྻ, ཝཱཙཱཡ སཾཝུཏོ སིཡཱ;

ཝཙཱིདུཙྩརིཏཾ ཧིཏྭཱ, ཝཱཙཱཡ སུཙརིཏཾ ཙརེ.

༢༣༣.

‘‘མནོཔཀོཔཾ རཀྑེཡྻ, མནསཱ སཾཝུཏོ སིཡཱ;

མནོདུཙྩརིཏཾ ཧིཏྭཱ, མནསཱ སུཙརིཏཾ ཙརེ.

༢༣༤.

‘‘ཀཱཡེན སཾཝུཏཱ དྷཱིརཱ, ཨཐོ ཝཱཙཱཡ སཾཝུཏཱ;

མནསཱ སཾཝུཏཱ དྷཱིརཱ, ཏེ ཝེ སུཔརིསཾཝུཏཱ’’ཏི.

ཏཏྠ ཀཱཡཔྤཀོཔནྟི ཏིཝིདྷཾ ཀཱཡདུཙྩརིཏཾ རཀྑེཡྻ. ཀཱཡེན སཾཝུཏོཏི ཀཱཡདྭཱརེ དུཙྩརིཏཔཝེསནཾ ནིཝཱརེཏྭཱ སཾཝུཏོ པིཧིཏདྭཱརོ སིཡཱ. ཡསྨཱ པན ཀཱཡདུཙྩརིཏཾ ཧིཏྭཱ ཀཱཡསུཙརིཏཾ ཙརནྟོ ཨུབྷཡམྤེཏཾ ཀརོཏི, ཏསྨཱ ཀཱཡདུཙྩརིཏཾ ཧིཏྭཱ, ཀཱཡེན སུཙརིཏཾ ཙརེཏི ཝུཏྟཾ. ཨནནྟརགཱཐཱསུཔི ཨེསེཝ ནཡོ. ཀཱཡེན སཾཝུཏཱ དྷཱིརཱཏི ཡེ པཎྜིཏཱ པཱཎཱཏིཔཱཏཱདཱིནི ཨཀརོནྟཱ ཀཱཡེན, མུསཱཝཱདཱདཱིནི ཨཀརོནྟཱ ཝཱཙཱཡ, ཨབྷིཛ྄ཛྷཱདཱིནི ཨསམུཊྛཔེནྟཱ མནསཱ སཾཝུཏཱ, ཏེ ཨིདྷ ལོཀསྨིཾ སུསཾཝུཏཱ སུརཀྑིཏཱ སུགོཔིཏཱ སུཔིཧིཏདྭཱརཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཚབྦགྒིཡཝཏྠུ ཨཊྛམཾ.

ཀོདྷཝགྒཝཎྞནཱ ནིཊྛིཏཱ.

སཏྟརསམོ ཝགྒོ.

༡༨. མལཝགྒོ

༡. གོགྷཱཏཀཔུཏྟཝཏྠུ

པཎྜུཔལཱསོཝ དཱནིསཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ གོགྷཱཏཀཔུཏྟཾ ཨཱརབྦྷ ཀཐེསི.

སཱཝཏྠིཡཾ ཀིརེཀོ གོགྷཱཏཀོ གཱཝོ ཝདྷིཏྭཱ ཝརམཾསཱནི གཧེཏྭཱ པཙཱཔེཏྭཱ པུཏྟདཱརེཧི སདྡྷིཾ ནིསཱིདིཏྭཱ མཾསཉྩ ཁཱདཏི, མཱུལེན ཙ ཝིཀྐིཎིཏྭཱ ཛཱིཝིཀཾ ཀཔྤེསི. སོ ཨེཝཾ པཉྩཔཎྞཱས ཝསྶཱནི གོགྷཱཏཀཀམྨཾ ཀརོནྟོ དྷུརཝིཧཱརེ ཝིཧརནྟསྶ སཏྠུ ཨེཀདིཝསམྤི ཀཊཙྪུམཏྟམྤི ཡཱགུཾ ཝཱ བྷཏྟཾ ཝཱ ན ཨདཱསི. སོ ཙ ཝིནཱ མཾསེན བྷཏྟཾ ན བྷུཉྫཏི. སོ ཨེཀདིཝསཾ དིཝསབྷཱགེ མཾསཾ ཝིཀྐིཎིཏྭཱ ཨཏྟནོ ཨཏྠཱཡ པཙིཏུཾ ཨེཀཾ མཾསཁཎྜཾ བྷརིཡཱཡ དཏྭཱ ནྷཱཡིཏུཾ ཨགམཱསི. ཨཐསྶ སཧཱཡཀོ གེཧཾ གནྟྭཱ བྷརིཡཾ ཨཱཧ – ‘‘ཐོཀཾ མེ ཝིཀྐིཎིཡམཾསཾ དེཧི, གེཧཾ མེ པཱཧུནཀོ ཨཱགཏོ’’ཏི. ནཏྠི ཝིཀྐིཎིཡམཾསཾ, སཧཱཡཀོ ཏེ མཾསཾ ཝིཀྐིཎིཏྭཱ ཨིདཱནི ནྷཱཡིཏུཾ གཏོཏི. མཱ ཨེཝཾ ཀརི, སཙེ མཾསཁཎྜཾ ཨཏྠི, དེཧཱིཏི. སཧཱཡཀསྶ ཏེ ནིཀྑིཏྟམཾསཾ ཋཔེཏྭཱ ཨཉྙཾ ནཏྠཱིཏི. སོ ‘‘སཧཱཡཀསྶ མེ ཨཏྠཱཡ ཋཔིཏམཾསཏོ ཨཉྙཾ མཾསཾ ནཏྠི, སོ ཙ ཝིནཱ མཾསེན ན བྷུཉྫཏི, ནཱཡཾ དསྶཏཱི’’ཏི སཱམཾཡེཝ ཏཾ མཾསཾ གཧེཏྭཱ པཀྐཱམི.

གོགྷཱཏཀོཔི ནྷཏྭཱ ཨཱགཏོ ཏཱཡ ཨཏྟནོ པཀྐཔཎྞེན སདྡྷིཾ ཝཌྜྷེཏྭཱ བྷཏྟེ ཨུཔནཱིཏེ ཨཱཧ ‘‘ཀཧཾ མཾས’’ནྟི? ‘‘ནཏྠི, སཱམཱི’’ཏི. ནནུ ཨཧཾ པཙྩནཏྠཱཡ མཾསཾ དཏྭཱ གཏོཏི. ཏཝ སཧཱཡཀོ ཨཱགནྟྭཱ ‘‘པཱཧུནཀོ མེ ཨཱགཏོ, ཝིཀྐིཎིཡམཾསཾ དེཧཱི’’ཏི ཝཏྭཱ མཡཱ ‘‘སཧཱཡཀསྶ ཏེ ཋཔིཏམཾསཏོ ཨཉྙཾ མཾསཾ ནཏྠི, སོ ཙ ཝིནཱ མཾསེན ན བྷུཉྫཏཱི’’ཏི ཝུཏྟེཔི བལཀྐཱརེན ཏཾ མཾསཾ སཱམཾཡེཝ གཧེཏྭཱ གཏོཏི. ཨཧཾ ཝིནཱ མཾསེན བྷཏྟཾ ན བྷུཉྫཱམི, ཧརཱཧི ནནྟི. ཀིཾ སཀྐཱ ཀཱཏུཾ, བྷུཉྫ, སཱམཱིཏི. སོ ‘‘ནཱཧཾ བྷུཉྫཱམཱི’’ཏི ཏཾ བྷཏྟཾ ཧརཱཔེཏྭཱ སཏྠཾ ཨཱདཱཡ པཙྪཱགེཧེ ཋིཏོ གོཎོ ཨཏྠི, ཏསྶ སནྟིཀཾ གནྟྭཱ མུཁེ ཧཏྠཾ པཀྑིཔིཏྭཱ ཛིཝ྄ཧཾ ནཱིཧརིཏྭཱ སཏྠེན མཱུལེ ཚིནྡིཏྭཱ ཨཱདཱཡ གནྟྭཱ ཨངྒཱརེསུ པཙཱཔེཏྭཱ བྷཏྟམཏྠཀེ ཋཔེཏྭཱ ནིསིནྣོ ཨེཀཾ བྷཏྟཔིཎྜཾ བྷུཉྫིཏྭཱ ཨེཀཾ མཾསཁཎྜཾ མུཁེ ཋཔེསི. ཏངྑཎཉྙེཝསྶ ཛིཝ྄ཧཱ ཚིཛྫིཏྭཱ བྷཏྟཔཱཏིཡཾ པཏི. ཏངྑཎཉྙེཝ ཀམྨསརིཀྑཀཾ ཝིཔཱཀཾ ལབྷི. སོཔི ཁོ གོཎོ ཝིཡ ལོཧིཏདྷཱརཱཡ མུཁཏོ པགྒྷརནྟིཡཱ ཨནྟོགེཧཾ པཝིསིཏྭཱ ཛཎྞུཀེཧི ཝིཙརནྟོ ཝིརཝི.

ཏསྨིཾ སམཡེ གོགྷཱཏཀསྶ པུཏྟོ པིཏརཾ ཨོལོཀེནྟོ སམཱིཔེ ཋིཏོ ཧོཏི. ཨཐ ནཾ མཱཏཱ ཨཱཧ – ‘‘པསྶ, པུཏྟ, ཨིམཾ གོགྷཱཏཀཾ གོཎཾ ཝིཡ གེཧམཛ྄ཛྷེ ཛཎྞུཀེཧི ཝིཙརིཏྭཱ ཝིརཝནྟཾ, ཨིདཾ དུཀྑཾ ཏཝ མཏྠཀེ པཏིསྶཏི, མམམྤི ཨནོལོཀེཏྭཱ ཨཏྟནོ སོཏྠིཾ ཀརོནྟོ པལཱཡསྶཱུ’’ཏི. སོ མརཎབྷཡཏཛྫིཏོ མཱཏརཾ ཝནྡིཏྭཱ པལཱཡི, པལཱཡིཏྭཱ ཙ པན ཏཀྐསིལཾ ཨགམཱསི. གོགྷཱཏཀོཔི གོཎོ ཝིཡ གེཧམཛ྄ཛྷེ ཝིརཝནྟོ ཝིཙརིཏྭཱ ཀཱལཀཏོ ཨཝཱིཙིམྷི ནིབྦཏྟི. གོཎོཔི ཀཱལམཀཱསི. གོགྷཱཏཀཔུཏྟོཔི ཏཀྐསིལཾ གནྟྭཱ སུཝཎྞཀཱརཀམྨཾ ཨུགྒཎྷི. ཨཐསྶཱཙརིཡོ གཱམཾ གཙྪནྟོ ‘‘ཨེཝརཱུཔཾ ནཱམ ཨལངྐཱརཾ ཀརེཡྻཱསཱི’’ཏི ཝཏྭཱ པཀྐཱམི. སོཔི ཏཐཱརཱུཔཾ ཨལངྐཱརཾ ཨཀཱསི. ཨཐསྶཱཙརིཡོ ཨཱགནྟྭཱ ཨལངྐཱརཾ དིསྭཱ ‘‘ཨཡཾ ཡཏྠ ཀཏྠཙི གནྟྭཱ ཛཱིཝིཏུཾ སམཏྠོ’’ཏི ཝཡཔྤཏྟཾ ཨཏྟནོ དྷཱིཏརཾ ཨདཱསི. སོ པུཏྟདྷཱིཏཱཧི ཝཌྜྷི.

ཨཐསྶ པུཏྟཱ ཝཡཔྤཏྟཱ སིཔྤཾ ཨུགྒཎྷིཏྭཱ ཨཔརབྷཱགེ སཱཝཏྠིཡཾ གནྟྭཱ ཏཏྠ གྷརཱཝཱསཾ སཎྛཔེཏྭཱ ཝསནྟཱ སདྡྷཱ པསནྣཱ ཨཧེསུཾ. པིཏཱཔི ནེསཾ ཏཀྐསིལཱཡཾ ཀིཉྩི ཀུསལཾ ཨཀཏྭཱཝ ཛརཾ པཱཔུཎི. ཨཐསྶ པུཏྟཱ ‘‘པིཏཱ ནོ མཧལླཀོ’’ཏི ཨཏྟནོ སནྟིཀཾ པཀྐོསཱཔེཏྭཱ ‘‘པིཏུ ཨཏྠཱཡ དཱནཾ དསྶཱམཱ’’ཏི བུདྡྷཔྤམུཁཾ བྷིཀྑུསངྒྷཾ ནིམནྟཡིཾསུ. ཏེ པུནདིཝསེ ཨནྟོགེཧེ བུདྡྷཔྤམུཁཾ བྷིཀྑུསངྒྷཾ ནིསཱིདཱཔེཏྭཱ སཀྐཙྩཾ པརིཝིསིཏྭཱ བྷཏྟཀིཙྩཱཝསཱནེ སཏྠཱརཾ ཨཱཧཾསུ – ‘‘བྷནྟེ, ཨམྷེཧི ཨིདཾ པིཏུ ཛཱིཝབྷཏྟཾ དིནྣཾ, པིཏུ ནོ ཨནུམོདནཾ ཀརོཐཱ’’ཏི. སཏྠཱ ཏཾ ཨཱམནྟེཏྭཱ, ‘‘ཨུཔཱསཀ, ཏྭཾ མཧལླཀོ པརིཔཀྐསརཱིརོ པཎྜུཔལཱསསདིསོ, ཏཝ པརལོཀགམནཱཡ ཀུསལཔཱཐེཡྻཾ ནཏྠི, ཨཏྟནོ པཏིཊྛཾ ཀརོཧི, པཎྜིཏོ བྷཝ, མཱ བཱལོ’’ཏི ཨནུམོདནཾ ཀརོནྟོ ཨིམཱ དྭེ གཱཐཱ ཨབྷཱསི –

༢༣༥.

‘‘པཎྜུཔལཱསོཝ དཱནིསི,

ཡམཔུརིསཱཔི ཙ ཏེ ཨུཔཊྛིཏཱ;

ཨུཡྻོགམུཁེ ཙ ཏིཊྛསི,

པཱཐེཡྻམྤི ཙ ཏེ ན ཝིཛྫཏི.

༢༣༦.

‘‘སོ ཀརོཧི དཱིཔམཏྟནོ,

ཁིཔྤཾ ཝཱཡམ པཎྜིཏོ བྷཝ;

ནིདྡྷནྟམལོ ཨནངྒཎོ,

དིབྦཾ ཨརིཡབྷཱུམིཾ ཨུཔེཧིསཱི’’ཏི.

ཏཏྠ པཎྜུཔལཱསོཝ དཱནིསཱིཏི, ཨུཔཱསཀ, ཏྭཾ ཨིདཱནི ཚིཛྫིཏྭཱ བྷཱུམིཡཾ པཏིཏཔཎྜུཔལཱསོ ཝིཡ ཨཧོསི. ཡམཔུརིསཱཏི ཡམདཱུཏཱ ཝུཙྩནྟི, ཨིདཾ པན མརཎམེཝ སནྡྷཱཡ ཝུཏྟཾ, མརཎཾ ཏེ པཙྩུཔཊྛིཏནྟི ཨཏྠོ. ཨུཡྻོགམུཁེཏི པརིཧཱནིམུཁེ, ཨཝུཌྜྷིམུཁེ ཙ ཋིཏོསཱིཏི ཨཏྠོ. པཱཐེཡྻནྟི གམིཀསྶ ཏཎྜུལཱདིཔཱཐེཡྻཾ ཝིཡ པརལོཀཾ གཙྪནྟསྶ ཏཝ ཀུསལཔཱཐེཡྻམྤི ནཏྠཱིཏི ཨཏྠོ. སོ ཀརོཧཱིཏི སོ ཏྭཾ སམུདྡེ ནཱཝཱཡ བྷིནྣཱཡ དཱིཔསངྑཱཏཾ པཏིཊྛཾ ཝིཡ ཨཏྟནོ ཀུསལཔཏིཊྛཾ ཀརོཧི. ཀརོནྟོ ཙ ཁིཔྤཾ ཝཱཡམ, སཱིགྷཾ སཱིགྷཾ ཝཱིརིཡཾ ཨཱརབྷ, ཨཏྟནོ ཀུསལཀམྨཔཏིཊྛཀརཎེན པཎྜིཏོ བྷཝ. ཡོ ཧི མརཎམུཁཾ ཨཔྤཏྭཱ ཀཱཏུཾ སམཏྠཀཱལེཝ ཀུསལཾ ཀརོཏི, ཨེས པཎྜིཏོ ནཱམ, ཏཱདིསོ བྷཝ, མཱ ཨནྡྷབཱལོཏི ཨཏྠོ. དིབྦཾ ཨརིཡབྷཱུམིནྟི ཨེཝཾ ཝཱིརིཡཾ ཀརོནྟོ རཱགཱདཱིནཾ མལཱནཾ ནཱིཧཊཏཱཡ ནིདྡྷནྟམལོ ཨངྒཎཱབྷཱཝེན ཨནངྒཎོ ནིཀྐིལེསོ ཧུཏྭཱ པཉྩཝིདྷཾ སུདྡྷཱཝཱསབྷཱུམིཾ པཱཔུཎིསྶསཱིཏི ཨཏྠོ.

དེསནཱཝསཱནེ ཨུཔཱསཀོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཏེ པུནདིཝསཏྠཱཡཔི སཏྠཱརཾ ནིམནྟེཏྭཱ དཱནཾ དཏྭཱ ཀཏབྷཏྟཀིཙྩཾ སཏྠཱརཾ ཨནུམོདནཀཱལེ ཨཱཧཾསུ – ‘‘བྷནྟེ, ཨིདམྤི ཨམྷཱཀཾ པིཏུ ཛཱིཝབྷཏྟམེཝ, ཨིམསྶེཝ ཨནུམོདནཾ ཀརོཐཱ’’ཏི. སཏྠཱ ཏསྶ ཨནུམོདནཾ ཀརོནྟོ ཨིམཱ དྭེ གཱཐཱ ཨབྷཱསི –

༢༣༧.

‘‘ཨུཔནཱིཏཝཡོ ཙ དཱནིསི,

སམྤཡཱཏོསི ཡམསྶ སནྟིཀཾ;

ཝཱསོ ཏེ ནཏྠི ཨནྟརཱ,

པཱཐེཡྻམྤི ཙ ཏེ ན ཝིཛྫཏི.

༢༣༨.

‘‘སོ ཀརོཧི དཱིཔམཏྟནོ,

ཁིཔྤཾ ཝཱཡམ པཎྜིཏོ བྷཝ;

ནིདྡྷནྟམལོ ཨནངྒཎོ,

ན པུན ཛཱཏིཛརཾ ཨུཔེཧིསཱི’’ཏི.

ཏཏྠ ཨུཔནཱིཏཝཡོཏི ཨུཔཱཏི ནིཔཱཏམཏྟཾ, ནཱིཏཝཡོཏི ཝིགཏཝཡོ ཨཏིཀྐནྟཝཡོ, ཏྭཉྩསི དཱནི ཏཡོ ཝཡེ ཨཏིཀྐམིཏྭཱ མརཎམུཁེ ཋིཏོཏི ཨཏྠོ. སམྤཡཱཏོསི ཡམསྶ སནྟིཀནྟི མརཎམུཁཾ གནྟུཾ སཛྫོ ཧུཏྭཱ ཋིཏོསཱིཏི ཨཏྠོ. ཝཱསོ ཏེ ནཏྠི ཨནྟརཱཏི ཡཐཱ མགྒཾ གཙྪནྟཱ ཏཱནི ཏཱནི ཀིཙྩཱནི ཀརོནྟཱ ཨནྟརཱམགྒེ ཝསནྟི, ན ཨེཝཾ པརལོཀཾ གཙྪནྟཱ. ན ཧི སཀྐཱ པརལོཀཾ གཙྪནྟེན ‘‘ཨདྷིཝཱསེཐ ཀཏིཔཱཧཾ, དཱནཾ ཏཱཝ དེམི, དྷམྨཾ ཏཱཝ སུཎཱམཱི’’ཏིཨཱདཱིནི ཝཏྟུཾ. ཨིཏོ པན ཙཝིཏྭཱ པརལོཀེ ནིབྦཏྟོཝ ཧོཏི. ཨིམམཏྠཾ སནྡྷཱཡེཏཾ ཝུཏྟཾ. པཱཐེཡྻནྟི ཨིདཾ ཀིཉྩཱཔི ཧེཊྛཱ ཝུཏྟམེཝ, ཨུཔཱསཀསྶ པན པུནཔྤུནཾ དལ༹ྷཱིཀརཎཏྠཾ ཨིདྷཱཔི སཏྠཱརཱ ཀཐིཏཾ. ཛཱཏིཛརནྟི ཨེཏྠ བྱཱདྷིམརཎཱནིཔི གཧིཏཱནེཝ ཧོནྟི. ཧེཊྛིམགཱཐཱཧི ཙ ཨནཱགཱམིམགྒོ ཀཐིཏོ, ཨིདྷ ཨརཧཏྟམགྒོ ཀཐིཏོ. ཨེཝཾ སནྟེཔི ཡཐཱ ནཱམ རཉྙཱ ཨཏྟནོ མུཁཔམཱཎེན ཀབལ༹ཾ ཝཌྜྷེཏྭཱ པུཏྟསྶ ཨུཔནཱིཏེ སོ ཀུམཱརོ ཨཏྟནོ མུཁཔམཱཎེནེཝ གཎྷཱཏི, ཨེཝམེཝ སཏྠཱརཱ ཨུཔརིམགྒཝསེན དྷམྨེ དེསིཏེཔི ཨུཔཱསཀོ ཨཏྟནོ ཨུཔནིསྶཡཝསེན ཧེཊྛཱ སོཏཱཔཏྟིཕལཾ པཏྭཱ ཨིམིསྶཱ ཨནུམོདནཱཡ ཨཝསཱནེ ཨནཱགཱམིཕལཾ པཏྟོ. སེསཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

གོགྷཱཏཀཔུཏྟཝཏྠུ པཋམཾ.

༢. ཨཉྙཏརབྲཱཧྨཎཝཏྠུ

ཨནུཔུབྦེནཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརབྲཱཧྨཎཾ ཨཱརབྦྷ ཀཐེསི.

སོ ཀིར ཨེཀདིཝསཾ པཱཏོཝ ནིཀྑམིཏྭཱ བྷིཀྑཱུནཾ ཙཱིཝརཔཱརུཔནཊྛཱནེ བྷིཀྑཱུ ཙཱིཝརཾ པཱརུཔནྟེ ཨོལོཀེནྟོ ཨཊྛཱསི. ཏཾ པན ཋཱནཾ ཝིརཱུལ༹ྷཏིཎཾ ཧོཏི. ཨཐེཀསྶ བྷིཀྑུནོ ཙཱིཝརཾ པཱརུཔནྟསྶ ཙཱིཝརཀཎྞོ ཏིཎེསུ པཝཊྚེནྟོ ཨུསྶཱཝབིནྡཱུཧི ཏེམི. བྲཱཧྨཎོ ‘‘ཨིམཾ ཋཱནཾ ཨཔྤཧརིཏཾ ཀཱཏུཾ ཝཊྚཏཱི’’ཏི པུནདིཝསེ ཀུདྡཱལཾ ཨཱདཱཡ གནྟྭཱ ཏཾ ཋཱནཾ ཏཙྪེཏྭཱ ཁལམཎྜལསདིསཾ ཨཀཱསི. པུནདིཝསེཔི ཏཾ ཋཱནཾ ཨཱགནྟྭཱ བྷིཀྑཱུསུ ཙཱིཝརཾ པཱརུཔནྟེསུ ཨེཀསྶ ཙཱིཝརཀཎྞཾ བྷཱུམིཡཾ པཏིཏྭཱ པཾསུམྷི པཝཊྚམཱནཾ དིསྭཱ ‘‘ཨིདྷ ཝཱལུཀཾ ཨོཀིརིཏུཾ ཝཊྚཏཱི’’ཏི ཙིནྟེཏྭཱ ཝཱལུཀཾ ཨཱཧརིཏྭཱ ཨོཀིརི.

ཨཐེཀདིཝསཾ པུརེབྷཏྟཾ ཙཎྜོ ཨཱཏཔོ ཨཧོསི, ཏདཱཔི བྷིཀྑཱུནཾ ཙཱིཝརཾ པཱརུཔནྟཱནཾ གཏྟཏོ སེདེ མུཙྩནྟེ དིསྭཱ ‘‘ཨིདྷ མཡཱ མཎྜཔཾ ཀཱརེཏུཾ ཝཊྚཏཱི’’ཏི ཙིནྟེཏྭཱ མཎྜཔཾ ཀཱརེསི. པུནདིཝསེ པཱཏོཝ ཝསྶཾ ཝསྶི, ཝདྡལིཀཾ ཨཧོསི. ཏདཱཔི བྲཱཧྨཎོ བྷིཀྑཱུ ཨོལོཀེནྟོཝ ཋིཏོ ཏིནྟཙཱིཝརཀེ བྷིཀྑཱུ དིསྭཱ ‘‘ཨེཏྠ མཡཱ སཱལཾ ཀཱརེཏུཾ ཝཊྚཏཱི’’ཏི སཱལཾ ཀཱརེཏྭཱ ‘‘ཨིདཱནི སཱལམཧཾ ཀརིསྶཱམཱི’’ཏི ཙིནྟེཏྭཱ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ ཨནྟོ ཙ བཧི ཙ བྷིཀྑཱུ ནིསཱིདཱཔེཏྭཱ བྷཏྟཀིཙྩཱཝསཱནེ ཨནུམོདནཏྠཱཡ སཏྠུ པཏྟཾ གཧེཏྭཱ, ‘‘བྷནྟེ, ཨཧཾ བྷིཀྑཱུནཾ ཙཱིཝརཔཱརུཔནཀཱལེ ཨིམསྨིཾ ཋཱནེ ཨོལོཀེནྟོ ཋིཏོ ཨིདཉྩིདཉྩ དིསྭཱ ཨིདཉྩིདཉྩ ཀཱརེསི’’ནྟི ཨཱདིཏོ པཊྛཱཡ སབྦཾ ཏཾ པཝཏྟིཾ ཨཱརོཙེསི. སཏྠཱ ཏསྶ ཝཙནཾ སུཏྭཱ, ‘‘བྲཱཧྨཎ, པཎྜིཏཱ ནཱམ ཁཎེ ཁཎེ ཐོཀཾ ཀུསལཾ ཀརོནྟཱ ཨནུཔུབྦེན ཨཏྟནོ ཨཀུསལམལཾ ནཱིཧརནྟིཡེཝཱ’’ཏི ཝཏྭཱ ཨིམཾ གཱཐམཱཧ –

༢༣༩.

‘‘ཨནུཔུབྦེན མེདྷཱཝཱི, ཐོཀཾ ཐོཀཾ ཁཎེ ཁཎེ;

ཀམྨཱརོ རཛཏསྶེཝ, ནིདྡྷམེ མལམཏྟནོ’’ཏི.

ཏཏྠ ཨནུཔུབྦེནཱཏི ཨནུཔཊིཔཱཊིཡཱ. མེདྷཱཝཱིཏི དྷམྨོཛཔཉྙཱཡ སམནྣཱགཏོ. ཁཎེ ཁཎེཏི ཨོཀཱསེ ཨོཀཱསེ ཀུསལཾ ཀརོནྟོ. ཀམྨཱརོ རཛཏསྶེཝཱཏི ཡཐཱ སུཝཎྞཀཱརོ ཨེཀཝཱརམེཝ སུཝཎྞཾ ཏཱཔེཏྭཱ ཀོཊྚེཏྭཱ མལཾ ནཱིཧརིཏྭཱ པིལནྡྷནཝིཀཏིཾ ཀཱཏུཾ ན སཀྐོཏི, པུནཔྤུནཾ ཏཱཔེནྟོ ཀོཊྚེནྟོ པན མལཾ ནཱིཧརཏི, ཏཏོ ཨནེཀཝིདྷཾ པིལནྡྷནཝིཀཏིཾ ཀརོཏི, ཨེཝམེཝ པུནཔྤུནཾ ཀུསལཾ ཀརོནྟོ པཎྜིཏོ ཨཏྟནོ རཱགཱདིམལཾ ནིདྡྷམེཡྻ, ཨེཝཾ ནིདྡྷནྟམལོ ནིཀྐིལེསོཝ ཧོཏཱིཏི ཨཏྠོ.

དེསནཱཝསཱནེ བྲཱཧྨཎོ སོཏཱཔཏྟིཕལེ པཏིཊྛཏི, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཨཉྙཏརབྲཱཧྨཎཝཏྠུ དུཏིཡཾ.

༣. ཏིསྶཏྠེརཝཏྠུ

ཨཡསཱཝ མལནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏིསྶཏྠེརཾ ནཱམ བྷིཀྑུཾ ཨཱརབྦྷ ཀཐེསི.

ཨེཀོ ཀིར སཱཝཏྠིཝཱསཱི ཀུལཔུཏྟོ པབྦཛིཏྭཱ ལདྡྷཱུཔསམྤདོ ཏིསྶཏྠེརོཏི པཉྙཱཡི. སོ ཨཔརབྷཱགེ ཛནཔདཝིཧཱརེ ཝསྶཱུཔགཏོ ཨཊྛཧཏྠཀཾ ཐཱུལསཱཊཀཾ ལབྷིཏྭཱ ཝུཏྠཝསྶོ པཝཱརེཏྭཱ ཏཾ ཨཱདཱཡ གནྟྭཱ བྷགིནིཡཱ ཧཏྠེ ཋཔེསི. སཱ ‘‘ན མེ ཨེསོ སཱཊཀོ བྷཱཏུ ཨནུཙྪཝིཀོ’’ཏི ཏཾ ཏིཁིཎཱཡ ཝཱསིཡཱ ཚིནྡིཏྭཱ ཧཱིརཧཱིརཾ ཀཏྭཱ ཨུདུཀྑལེ ཀོཊྚེཏྭཱ པཝིསེཏྭཱ པོཐེཏྭཱ ཝཊྚེཏྭཱ སུཁུམསུཏྟཾ ཀནྟིཏྭཱ སཱཊཀཾ ཝཱཡཱཔེསི. ཐེརོཔི སུཏྟཉྩེཝ སཱུཙིཡོ ཙ སཾཝིདཧིཏྭཱ ཙཱིཝརཀཱརཀེ དཧརསཱམཎེརེ སནྣིཔཱཏེཏྭཱ བྷགིནིཡཱ སནྟིཀཾ གནྟྭཱ ‘‘ཏཾ མེ སཱཊཀཾ དེཐ, ཙཱིཝརཾ ཀཱརེསྶཱམཱི’’ཏི ཨཱཧ. སཱ ནཝཧཏྠཾ སཱཊཀཾ ནཱིཧརིཏྭཱ ཀནིཊྛབྷཱཏིཀསྶ ཧཏྠེ ཋཔེསི. སོ ཏཾ གཧེཏྭཱ ཝིཏྠཱརེཏྭཱ ཨོལོཀེཏྭཱ ‘‘མམ སཱཊཀོ ཐཱུལོ ཨཊྛཧཏྠོ, ཨཡཾ སུཁུམོ ནཝཧཏྠོ. ནཱཡཾ མམ སཱཊཀོ, ཏུམྷཱཀཾ ཨེས, ན མེ ཨིམིནཱ ཨཏྠོ, ཏམེཝ མེ དེཐཱ’’ཏི ཨཱཧ. ‘‘བྷནྟེ, ཏུམྷཱཀམེཝ ཨེསོ, གཎྷཐ ན’’ནྟི? སོ ནེཝ ཨིཙྪི. ཨཐསྶ ཨཏྟནཱ ཀཏཀིཙྩཾ སབྦཾ ཨཱརོཙེཏྭཱ, ‘‘བྷནྟེ, ཏུམྷཱཀམེཝེས, གཎྷཐ ན’’ནྟི ཨདཱསི. སོ ཏཾ ཨཱདཱཡ ཝིཧཱརཾ གནྟྭཱ ཙཱིཝརཀམྨཾ པཊྛཔེསི.

ཨཐསྶ བྷགིནཱི ཙཱིཝརཀཱརཱནཾ ཨཏྠཱཡ ཡཱགུབྷཏྟཱདཱིནི སམྤཱདེསི. ཙཱིཝརསྶ ནིཊྛིཏདིཝསེ པན ཨཏིརེཀསཀྐཱརཾ ཀཱརེསི. སོ ཙཱིཝརཾ ཨོལོཀེཏྭཱ ཏསྨིཾ ཨུཔྤནྣསིནེཧོ ‘‘སྭེ དཱནི ནཾ པཱརུཔིསྶཱམཱི’’ཏི སཾཧརིཏྭཱ ཙཱིཝརཝཾསེ ཋཔེཏྭཱ ཏཾ རཏྟིཾ བྷུཏྟཱཧཱརཾ ཛིརཱཔེཏུཾ ཨསཀྐོནྟོ ཀཱལཾ ཀཏྭཱ ཏསྨིཾཡེཝ ཙཱིཝརེ ཨཱུཀཱ ཧུཏྭཱ ནིབྦཏྟི. བྷགིནཱིཔིསྶ ཀཱལཀིརིཡཾ སུཏྭཱ བྷིཀྑཱུནཾ པཱདེསུ པཝཏྟམཱནཱ རོདི. བྷིཀྑཱུ ཏསྶ སརཱིརཀིཙྩཾ ཀཏྭཱ གིལཱནུཔཊྛཱཀསྶ ཨབྷཱཝེན སངྒྷསྶེཝ ཏཾ པཱཔུཎཱཏི. ‘‘བྷཱཛེསྶཱམ ན’’ནྟི ཏཾ ཙཱིཝརཾ ནཱིཧརཱཔེསུཾ. སཱ ཨཱུཀཱ ‘‘ཨིམེ མམ སནྟཀཾ ཝིལུམྤནྟཱི’’ཏི ཝིརཝནྟཱི ཨིཏོ ཙིཏོ ཙ སནྡྷཱཝི. སཏྠཱ གནྡྷཀུཊིཡཾ ནིསིནྣོཝ དིབྦཱཡ སོཏདྷཱཏུཡཱ ཏཾ སདྡཾ སུཏྭཱ, ‘‘ཨཱནནྡ, ཏིསྶསྶ ཙཱིཝརཾ ཨབྷཱཛེཏྭཱ སཏྟཱཧཾ ནིཀྑིཔིཏུཾ ཝདེཧཱི’’ཏི ཨཱཧ. ཐེརོ ཏཐཱ ཀཱརེསི. སཱཔི སཏྟམེ དིཝསེ ཀཱལཾ ཀཏྭཱ ཏུསིཏཝིམཱནེ ནིབྦཏྟི. སཏྠཱ ‘‘ཨཊྛམེ དིཝསེ ཏིསྶསྶ ཙཱིཝརཾ བྷཱཛེཏྭཱ གཎྷཐཱ’’ཏི ཨཱཎཱཔེསི. བྷིཀྑཱུ ཏཐཱ ཀརིཾསུ.

བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཀསྨཱ ནུ ཁོ སཏྠཱ ཏིསྶསྶ ཙཱིཝརཾ སཏྟ དིཝསེ ཋཔཱཔེཏྭཱ ཨཊྛམེ དིཝསེ གཎྷིཏུཾ ཨནུཛཱནཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཏིསྶོ ཨཏྟནོ ཙཱིཝརེ ཨཱུཀཱ ཧུཏྭཱ ནིབྦཏྟོ, ཏུམྷེཧི ཏསྨིཾ བྷཱཛིཡམཱནེ ‘ཨིམེ མམ སནྟཀཾ ཝིལུམྤནྟཱི’ཏི ཝིརཝནྟཱི ཨིཏོ ཙིཏོ ཙ དྷཱཝི. སཱ ཏུམྷེཧི ཙཱིཝརེ གཡ྄ཧམཱནེ ཏུམྷེསུ མནཾ པདུསྶིཏྭཱ ནིརཡེ ནིབྦཏྟེཡྻ, ཏེན ཙཱཧཾ ཙཱིཝརཾ ནིཀྑིཔཱཔེསིཾ. ཨིདཱནི པན སཱ ཏུསིཏཝིམཱནེ ནིབྦཏྟཱ, ཏེན ཝོ མཡཱ ཙཱིཝརགཧཎཾ ཨནུཉྙཱཏ’’ནྟི ཝཏྭཱ པུན ཏེཧི ‘‘བྷཱརིཡཱ ཝཏ ཨཡཾ, བྷནྟེ, ཏཎྷཱ ནཱམཱ’’ཏི ཝུཏྟེ ‘‘ཨཱམ, བྷིཀྑཝེ, ཨིམེསཾ སཏྟཱནཾ ཏཎྷཱ ནཱམ བྷཱརིཡཱ. ཡཐཱ ཨཡཏོ མལཾ ཨུཊྛཧིཏྭཱ ཨཡམེཝ ཁཱདཏི ཝིནཱསེཏི ཨཔརིབྷོགཾ ཀརོཏི, ཨེཝམེཝཱཡཾ ཏཎྷཱ ཨིམེསཾ སཏྟཱནཾ ཨབྦྷནྟརེ ཨུཔྤཛྫིཏྭཱ ཏེ སཏྟེ ནིརཡཱདཱིསུ ནིབྦཏྟཱཔེཏི, ཝིནཱསཾ པཱཔེཏཱི’’ཏི ཝཏྭཱ ཨིམཾ གཱཐམཱཧ –

༢༤༠.

‘‘ཨཡསཱཝ མལཾ སམུཊྛིཏཾ,

ཏཏུཊྛཱཡ ཏམེཝ ཁཱདཏི;

ཨེཝཾ ཨཏིདྷོནཙཱརིནཾ,

སཱནི ཀམྨཱནི ནཡནྟི དུགྒཏི’’ནྟི.

ཏཏྠ ཨཡསཱཝཱཏི ཨཡཏོ སམུཊྛིཏཾ. ཏཏུཊྛཱཡཱཏི ཏཏོ ཨུཊྛཱཡ. ཨཏིདྷོནཙཱརིནནྟི དྷོནཱ ཝུཙྩཏི ཙཏྟཱརོ པཙྩཡེ ‘‘ཨིདམཏྠཾ ཨེཏེ’’ཏི པཙྩཝེཀྑིཏྭཱ པརིབྷུཉྫནཔཉྙཱ, ཏཾ ཨཏིཀྐམིཏྭཱ ཙརནྟོ ཨཏིདྷོནཙཱརཱི ནཱམ. ཨིདཾ ཝུཏྟཾ ཧོཏི – ཡཐཱ ཨཡཏོ མལཾ སམུཊྛཱཡ ཏཏོ སམུཊྛིཏཾ ཏམེཝ ཁཱདཏི, ཨེཝམེཝཾ ཙཏུཔཙྩཡེ ཨཔཙྩཝེཀྑིཏྭཱ པརིབྷུཉྫནྟཾ ཨཏིདྷོནཙཱརིནཾ སཱནི ཀམྨཱནི ཨཏྟནི ཋིཏཏྟཱ ཨཏྟནོ སནྟཀཱནེཝ ཏཱནི ཀམྨཱནི དུགྒཏིཾ ནཡནྟཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཏིསྶཏྠེརཝཏྠུ ཏཏིཡཾ.

༤. ལཱལུདཱཡིཏྠེརཝཏྠུ

ཨསཛ྄ཛྷཱཡམལཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ལཱལུདཱཡིཏྠེརཾ ཨཱརབྦྷ ཀཐེསི.

སཱཝཏྠིཡཾ ཀིར པཉྩཀོཊིམཏྟཱ ཨརིཡསཱཝཀཱ ཝསནྟི, དྭེ ཀོཊིམཏྟཱ པུཐུཛྫནཱ ཝསནྟི. ཏེསུ ཨརིཡསཱཝཀཱ པུརེབྷཏྟཾ དཱནཾ དཏྭཱ པཙྪཱབྷཏྟཾ སཔྤིཏེལམདྷུཕཱཎིཏཝཏྠཱདཱིནི གཧེཏྭཱ ཝིཧཱརཾ གནྟྭཱ དྷམྨཀཐཾ སུཎནྟི. དྷམྨཾ སུཏྭཱ གམནཀཱལེ ཙ སཱརིཔུཏྟམོགྒལླཱནཱནཾ གུཎཀཐཾ ཀཐེནྟི. ཨུདཱཡིཏྠེརོ ཏེསཾ ཀཐཾ སུཏྭཱ ‘‘ཨེཏེསཾ ཏཱཝ དྷམྨཾ སུཏྭཱ ཏུམྷེ ཨེཝཾ ཀཐེཐ, མམ དྷམྨཀཐཾ སུཏྭཱ ཀིཾ ནུ ཁོ ན ཀཐེསྶཐཱ’’ཏི ཝདཏི. མནུསྶཱ ཏསྶ ཀཐཾ སུཏྭཱ ‘‘ཨཡཾ ཨེཀོ དྷམྨཀཐིཀོ བྷཝིསྶཏི, ཨིམསྶཔི ཨམྷེཧི དྷམྨཀཐཾ སོཏུཾ ཝཊྚཏཱི’’ཏི ཏེ ཨེཀདིཝསཾ ཐེརཾ ཡཱཙིཏྭཱ, ‘‘བྷནྟེ, ཨཛྫ ཨམྷཱཀཾ དྷམྨསྶཝནདིཝསོ’’ཏི སངྒྷསྶ དཱནཾ དཏྭཱ, ‘‘བྷནྟེ, ཏུམྷེ ཨམྷཱཀཾ དིཝཱ དྷམྨཀཐཾ ཀཐེཡྻཱཐཱ’’ཏི ཨཱཧཾསུ. སོཔི ཏེསཾ ཨདྷིཝཱསེསི.

ཏེཧི དྷམྨསྶཝནཝེལཱཡ ཨཱགནྟྭཱ, ‘‘བྷནྟེ, ནོ དྷམྨཾ ཀཐེཐཱ’’ཏི ཝུཏྟེ ལཱལུདཱཡིཏྠེརོ ཨཱསནེ ནིསཱིདིཏྭཱ ཙིཏྟབཱིཛནིཾ གཧེཏྭཱ ཙཱལེནྟོ ཨེཀམྤི དྷམྨཔདཾ ཨདིསྭཱ ‘‘ཨཧཾ སརབྷཉྙཾ བྷཎིསྶཱམི, ཨཉྙོ དྷམྨཀཐཾ ཀཐེཏཱུ’’ཏི ཝཏྭཱ ཨོཏརི. ཏེ ཨཉྙེན དྷམྨཀཐཾ ཀཐཱཔེཏྭཱ སརབྷཱཎཏྠཱཡ པུན ཏཾ ཨཱསནཾ ཨཱརོཔཡིཾསུ. སོ པུནཔི ཀིཉྩི ཨདིསྭཱ ‘‘ཨཧཾ རཏྟིཾ ཀཐེསྶཱམི, ཨཉྙོ སརབྷཉྙཾ བྷཎཏཱུ’’ཏི ཝཏྭཱ ཨཱསནཱ ཨོཏརི. ཏེ ཨཉྙེན སརབྷཉྙཾ བྷཎཱཔེཏྭཱ པུན རཏྟིཾ ཐེརཾ ཨཱནཡིཾསུ. སོ རཏྟིམྤི ཀིཉྩི ཨདིསྭཱ ‘‘ཨཧཾ པཙྩཱུསཀཱལེ ཀཐེསྶཱམི, རཏྟིཾ ཨཉྙོ ཀཐེཏཱུ’’ཏི ཝཏྭཱ ཨོཏརི. ཏེ ཨཉྙེན རཏྟིཾ ཀཐཱཔེཏྭཱ པུན པཙྩཱུསེ ཏཾ ཨཱནཡིཾསུ. སོ པུནཔི ཀིཉྩི ནཱདྡས. མཧཱཛནོ ལེཌྜུདཎྜཱདཱིནི གཧེཏྭཱ, ‘‘ཨནྡྷབཱལ, ཏྭཾ སཱརིཔུཏྟམོགྒལླཱནཱནཾ ཝཎྞེ ཀཐིཡམཱནེ ཨེཝཉྩེཝཉྩ ཝདེསི, ཨིདཱནི ཀསྨཱ ན ཀཐེསཱི’’ཏི སནྟཛྫེཏྭཱ པལཱཡནྟཾ ཨནུབནྡྷི. སོ པལཱཡནྟོ ཨེཀིསྶཱ ཝཙྩཀུཊིཡཱ པཏི.

མཧཱཛནོ ཀཐཾ སམུཊྛཱཔེསི – ‘‘ཨཛྫ ལཱལུདཱཡཱི སཱརིཔུཏྟམོགྒལླཱནཱནཾ གུཎཀཐཱཡ པཝཏྟམཱནཱཡ ཨུསྶཱུཡནྟོ ཨཏྟནོ དྷམྨཀཐིཀབྷཱཝཾ པཀཱསེཏྭཱ མནུསྶེཧི སཀྐཱརཾ ཀཏྭཱ ‘དྷམྨཾ སུཎོམཱ’ཏི ཝུཏྟེ ཙཏུཀྑཏྟུཾ ཨཱསནེ ནིསཱིདིཏྭཱ ཀཐེཏབྦཡུཏྟཀཾ ཀིཉྩི ཨཔསྶནྟོ ‘ཏྭཾ ཨམྷཱཀཾ ཨཡྻེཧི སཱརིཔུཏྟམོགྒལླཱནཏྠེརེཧི སདྡྷིཾ ཡུགགྒཱཧཾ གཎྷཱསཱི’ཏི ལེཌྜུདཎྜཱདཱིནི གཧེཏྭཱ སནྟཛྫེཏྭཱ པལཱཔིཡམཱནོ ཝཙྩཀུཊིཡཱ པཏིཏོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ, པུབྦེཔི ཨེསོ གཱུཐཀཱུཔེ ནིམུགྒོཡེཝཱ’’ཏི ཝཏྭཱ ཨཏཱིཏཾ ཨཱཧརིཏྭཱ –

‘‘ཙཏུཔྤདོ ཨཧཾ སམྨ, ཏྭམྤི སམྨ ཙཏུཔྤདོ;

ཨེཧི སམྨ ནིཝཏྟསྶུ, ཀིཾ ནུ བྷཱིཏོ པལཱཡསི.

‘‘ཨསུཙིཔཱུཏིལོམོསི, དུགྒནྡྷོ ཝཱསི སཱུཀར;

སཙེ ཡུཛ྄ཛྷིཏུཀཱམོསི, ཛཡཾ སམྨ དདཱམི ཏེ’’ཏི. (ཛཱ. ༡.༢.༥-༦) –

ཨིམཾ ཛཱཏཀཾ ཝིཏྠཱརེཏྭཱ ཀཐེསི. ཏདཱ སཱིཧོ སཱརིཔུཏྟོ ཨཧོསི, སཱུཀརོ ལཱལུདཱཡཱིཏི. སཏྠཱ ཨིམཾ དྷམྨདེསནཾ ཨཱཧརིཏྭཱ, ‘‘བྷིཀྑཝེ, ལཱལུདཱཡིནཱ ཨཔྤམཏྟཀོཝ དྷམྨོ ཨུགྒཧིཏོ, སཛ྄ཛྷཱཡཾ པན ནེཝ ཨཀཱསི, ཀིཉྩི པརིཡཏྟིཾ ཨུགྒཧེཏྭཱ ཏསྶཱ ཨསཛ྄ཛྷཱཡཀརཎཾ མལམེཝཱ’’ཏི ཝཏྭཱ ཨིམཾ གཱཐམཱཧ –

༢༤༡.

‘‘ཨསཛ྄ཛྷཱཡམལཱ མནྟཱ, ཨནུཊྛཱནམལཱ གྷརཱ;

མལཾ ཝཎྞསྶ ཀོསཛྫཾ, པམཱདོ རཀྑཏོ མལ’’ནྟི.

ཏཏྠ ཨསཛ྄ཛྷཱཡམལཱཏི ཡཱཀཱཙི པརིཡཏྟི ཝཱ སིཔྤཾ ཝཱ ཡསྨཱ ཨསཛ྄ཛྷཱཡནྟསྶ ཨནནུཡུཉྫནྟསྶ ཝིནསྶཏི ཝཱ ནིརནྟརཾ ཝཱ ན ཨུཔཊྛཱཏི, ཏསྨཱ ‘‘ཨསཛ྄ཛྷཱཡམལཱ མནྟཱ’’ཏི ཝུཏྟཾ. ཡསྨཱ པན གྷརཱཝཱསཾ ཝསནྟསྶ ཨུཊྛཱཡུཊྛཱཡ ཛིཎྞཔཊིསངྑརཎཱདཱིནི ཨཀརོནྟསྶ གྷརཾ ནཱམ ཝིནསྶཏི, ཏསྨཱ ‘‘ཨནུཊྛཱནམལཱ གྷརཱ’’ཏི ཝུཏྟཾ. ཡསྨཱ གིཧིསྶ ཝཱ པབྦཛིཏསྶ ཝཱ ཀོསཛྫཝསེན སརཱིརཔཊིཛགྒནཾ ཝཱ པརིཀྑཱརཔཊིཛགྒནཾ ཝཱ ཨཀརོནྟསྶ ཀཱཡོ དུབྦཎྞོ ཧོཏི, ཏསྨཱ ‘‘མལཾ ཝཎྞསྶ ཀོསཛྫ’’ནྟི ཝུཏྟཾ. ཡསྨཱ གཱཝོ རཀྑནྟསྶ པམཱདཝསེན ནིདྡཱཡནྟསྶ ཝཱ ཀཱིལ༹ནྟསྶ ཝཱ ཏཱ གཱཝོ ཨཏིཏྠཔཀྑནྡནཱདིནཱ ཝཱ ཝཱལ༹མིགཙོརཱདིཨུཔདྡཝེན ཝཱ པརེསཾ སཱལིཁེཏྟཱདཱིནི ཨོཏརིཏྭཱ ཁཱདནཝསེན ཝིནཱསཾ ཨཱཔཛྫནྟི, སཡམྤི དཎྜཾ ཝཱ པརིབྷཱསཾ ཝཱ པཱཔུཎཱཏི, པབྦཛིཏཾ ཝཱ པན ཚ དྭཱརཱནི ཨརཀྑནྟཾ པམཱདཝསེན ཀིལེསཱ ཨོཏརིཏྭཱ སཱསནཱ ཙཱཝེནྟི, ཏསྨཱ ‘‘པམཱདོ རཀྑཏོ མལ’’ནྟི ཝུཏྟཾ. སོ ཧིསྶ ཝིནཱསཱཝཧནེན མལཊྛཱནིཡཏྟཱ མལནྟི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ལཱལུདཱཡིཏྠེརཝཏྠུ ཙཏུཏྠཾ.

༥. ཨཉྙཏརཀུལཔུཏྟཝཏྠུ

མལིཏྠིཡཱ དུཙྩརིཏནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨཉྙཏརཾ ཀུལཔུཏྟཾ ཨཱརབྦྷ ཀཐེསི.

ཏསྶ ཀིར སམཱནཛཱཏིཀཾ ཀུལཀུམཱརིཀཾ ཨཱནེསུཾ. སཱ ཨཱནཱིཏདིཝསཏོ པཊྛཱཡ ཨཏིཙཱརིནཱི ཨཧོསི. སོ ཀུལཔུཏྟོ ཏསྶཱ ཨཏིཙཱརེན ལཛྫིཏོ ཀསྶཙི སམྨུཁཱིབྷཱཝཾ ཨུཔགནྟུཾ ཨསཀྐོནྟོ བུདྡྷུཔཊྛཱནཱདཱིནི པཙྪིནྡིཏྭཱ ཀཏིཔཱཧཙྩཡེན སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསིནྣོ ‘‘ཀིཾ, ཨུཔཱསཀ, ན དིསྶསཱི’’ཏི ཝུཏྟེ ཏམཏྠཾ ཨཱརོཙེསི. ཨཐ ནཾ སཏྠཱ, ‘‘ཨུཔཱསཀ, པུབྦེཔི མཡཱ ‘ཨིཏྠིཡོ ནཱམ ནདཱིཨཱདིསདིསཱ, ཏཱསུ པཎྜིཏེན ཀོདྷོ ན ཀཱཏབྦོ’ཏི ཝུཏྟཾ, ཏྭཾ པན བྷཝཔཊིཙྪནྣཏྟཱ ན སལླཀྑེསཱི’’ཏི ཝཏྭཱ ཏེན ཡཱཙིཏོ –

‘‘ཡཐཱ ནདཱི ཙ པནྠོ ཙ, པཱནཱགཱརཾ སབྷཱ པཔཱ;

ཨེཝཾ ལོཀིཏྠིཡོ ནཱམ, ཝེལཱ ཏཱསཾ ན ཝིཛྫཏཱི’’ཏི. (ཛཱ. ༡.༡.༦༥; ༡.༡༢.༩) –

ཛཱཏཀཾ ཝིཏྠཱརེཏྭཱ, ‘‘ཨུཔཱསཀ, ཨིཏྠིཡཱ ཧི ཨཏིཙཱརིནིབྷཱཝོ མལཾ, དཱནཾ དེནྟསྶ མཙྪེརཾ མལཾ, ཨིདྷལོཀཔརལོཀེསུ སཏྟཱནཾ ཨཀུསལཀམྨཾ ཝིནཱསནཏྠེན མལཾ, ཨཝིཛྫཱ པན སབྦམལཱནཾ ཨུཏྟམམལ’’ནྟི ཝཏྭཱ ཨིམཱ གཱཐཱ ཨབྷཱསི –

༢༤༢.

‘‘མལིཏྠིཡཱ དུཙྩརིཏཾ, མཙྪེརཾ དདཏོ མལཾ;

མལཱ ཝེ པཱཔཀཱ དྷམྨཱ, ཨསྨིཾ ལོཀེ པརམྷི ཙ.

༢༤༣.

‘‘ཏཏོ མལཱ མལཏརཾ, ཨཝིཛྫཱ པརམཾ མལཾ;

ཨེཏཾ མལཾ པཧནྟྭཱན, ནིམྨལཱ ཧོཐ བྷིཀྑཝོ’’ཏི.

ཏཏྠ དུཙྩརིཏནྟི ཨཏིཙཱརོ. ཨཏིཙཱརིནིཉྷི ཨིཏྠིཾ སཱམིཀོཔི གེཧཱ ནཱིཧརཏི, མཱཏཱཔིཏཱུནཾ སནྟིཀཾ གཏམྤི ‘‘ཏྭཾ ཀུལསྶ ཨགཱརཝབྷཱུཏཱ, ཨཀྑཱིཧིཔི ན དཊྛབྦཱ’’ཏི ཏཾ ནཱིཧརནྟི. སཱ ཨནཱཐཱ ཝིཙརནྟཱི མཧཱདུཀྑཾ པཱཔུཎཱཏི. ཏེནསྶཱ དུཙྩརིཏཾ ‘‘མལ’’ནྟི ཝུཏྟཾ. དདཏོཏི དཱཡཀསྶ. ཡསྶ ཧི ཁེཏྟཀསནཀཱལེ ‘‘ཨིམསྨིཾ ཁེཏྟེ སམྤནྣེ སལཱཀབྷཏྟཱདཱིནི དསྶཱམཱི’’ཏི ཙིནྟེཏྭཱ ནིཔྥནྣེ སསྶེཔི མཙྪེརཾ ཨུཔྤཛྫིཏྭཱ ཙཱགཙིཏྟཾ ནིཝཱརེཏི, སོ མཙྪེརཝསེན ཙཱགཙིཏྟེ ཨཝིརཱུཧནྟེ མནུསྶསམྤཏྟིཾ དིབྦསམྤཏྟིཾ ནིབྦཱནསམྤཏྟིནྟི ཏིསྶོ སམྤཏྟིཡོ ན ལབྷཏི. ཏེན ཝུཏྟཾ – ‘‘མཙྪེརཾ དདཏོ མལ’’ནྟི. སེསེསུཔི ཨེསེཝ ནཡོ. པཱཔཀཱ དྷམྨཱཏི ཨཀུསལདྷམྨཱ པན ཨིདྷལོཀེ ཙ པརལོཀེ ཙ མལམེཝ.

ཏཏོཏི ཧེཊྛཱ ཝུཏྟམལཏོ. མལཏརནྟི ཨཏིརེཀམལཾ ཝོ ཀཐེམཱིཏི ཨཏྠོ. ཨཝིཛྫཱཏི ཨཊྛཝཏྠུཀཾ ཨཉྙཱཎམེཝ པརམཾ མལཾ. པཧནྟྭཱནཱཏི ཨེཏཾ མལཾ ཛཧིཏྭཱ, བྷིཀྑཝེ, ཏུམྷེ ནིམྨལཱ ཧོཐཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཉྙཏརཀུལཔུཏྟཝཏྠུ པཉྩམཾ.

༦. ཙཱུལ༹སཱརིཝཏྠུ

སུཛཱིཝནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཙཱུལ༹སཱརིཾ ནཱམ སཱརིཔུཏྟཏྠེརསྶ སདྡྷིཝིཧཱརིཀཾ ཨཱརབྦྷ ཀཐེསི.

སོ ཀིར ཨེཀདིཝསེ ཝེཛྫཀམྨཾ ཀཏྭཱ པཎཱིཏབྷོཛནཾ ལབྷིཏྭཱ ཨཱདཱཡ ནིཀྑམནྟོ ཨནྟརཱམགྒེ ཐེརཾ དིསྭཱ, ‘‘བྷནྟེ, ཨིདཾ མཡཱ ཝེཛྫཀམྨཾ ཀཏྭཱ ལདྡྷཾ, ཏུམྷེ ཨཉྙཏྠ ཨེཝརཱུཔཾ བྷོཛནཾ ན ལབྷིསྶཐ, ཨིམཾ བྷུཉྫཐ, ཨཧཾ ཏེ ཝེཛྫཀམྨཾ ཀཏྭཱ ནིཙྩཀཱལཾ ཨེཝརཱུཔཾ ཨཱཧཱརཾ ཨཱཧརིསྶཱམཱི’’ཏི ཨཱཧ. ཐེརོ ཏསྶ ཝཙནཾ སུཏྭཱ ཏུཎྷཱིབྷཱུཏོཝ པཀྐཱམི. བྷིཀྑཱུ ཝིཧཱརཾ གནྟྭཱ སཏྠུ ཏམཏྠཾ ཨཱརོཙེསུཾ. སཏྠཱ, ‘‘བྷིཀྑཝེ, ཨཧིརིཀོ ནཱམ པགབྦྷོ ཀཱཀསདིསོ ཧུཏྭཱ ཨེཀཝཱིསཏིཝིདྷཱཡ ཨནེསནཱཡ ཋཏྭཱ སུཁཾ ཛཱིཝཏི, ཧིརིཨོཏྟཔྤསམྤནྣོ པན དུཀྑཾ ཛཱིཝཏཱི’’ཏི ཝཏྭཱ ཨིམཱ གཱཐཱ ཨབྷཱསི –

༢༤༤.

‘‘སུཛཱིཝཾ ཨཧིརིཀེན, ཀཱཀསཱུརེན དྷཾསིནཱ;

པཀྑནྡིནཱ པགབྦྷེན, སཾཀིལིཊྛེན ཛཱིཝིཏཾ.

༢༤༥.

‘‘ཧིརཱིམཏཱ ཙ དུཛྫཱིཝཾ, ནིཙྩཾ སུཙིགཝེསིནཱ;

ཨལཱིནེནཱཔྤགབྦྷེན, སུདྡྷཱཛཱིཝེན པསྶཏཱ’’ཏི.

ཏཏྠ ཨཧིརིཀེནཱཏི ཚིནྣཧིརོཏྟཔྤཀེན. ཨེཝརཱུཔེན ཧི ཨམཱཏརམེཝ ‘‘མཱཏཱ མེ’’ཏི ཨཔིཏཱདཡོ ཨེཝ ཙ ‘‘པིཏཱ མེ’’ཏིཨཱདིནཱ ནཡེན ཝཏྭཱ ཨེཀཝཱིསཏིཝིདྷཱཡ ཨནེསནཱཡ པཏིཊྛཱཡ སུཁེན ཛཱིཝཏུཾ སཀྐཱ. ཀཱཀསཱུརེནཱཏི སཱུརཀཱཀསདིསེན. ཡཐཱ ཧི སཱུརཀཱཀོ ཀུལགྷརེསུ ཡཱགུཨཱདཱིནི གཎྷིཏུཀཱམོ བྷིཏྟིཨཱདཱིསུ ནིསཱིདིཏྭཱ ཨཏྟནོ ཨོལོཀནབྷཱཝཾ ཉཏྭཱ ཨནོལོཀེནྟོ ཝིཡ ཨཉྙཝིཧིཏཀོ ཝིཡ ནིདྡཱཡནྟོ ཝིཡ ཙ ཧུཏྭཱ མནུསྶཱནཾ པམཱདཾ སལླཀྑེཏྭཱ ཨནུཔཏིཏྭཱ ‘‘སཱུསཱུ’’ཏི ཝདནྟེསུཡེཝ བྷཱཛནཏོ མུཁཔཱུརཾ གཧེཏྭཱ པལཱཡཏི, ཨེཝམེཝཾ ཨཧིརིཀཔུགྒལོཔི བྷིཀྑཱུཧི སདྡྷིཾ གཱམཾ པཝིསིཏྭཱ ཡཱགུབྷཏྟཊྛཱནཱདཱིནི ཝཝཏྠཔེཏི. ཏཏྠ བྷིཀྑཱུ པིཎྜཱཡ ཙརིཏྭཱ ཡཱཔནམཏྟཾ ཨཱདཱཡ ཨཱསནསཱལཾ གནྟྭཱ པཙྩཝེཀྑནྟཱ ཡཱགུཾ པིཝིཏྭཱ ཀམྨཊྛཱནཾ མནསི ཀརོནྟི སཛ྄ཛྷཱཡནྟི ཨཱསནསཱལཾ སམྨཛྫནྟི. ཨཡཾ པན ཨཀཏྭཱ གཱམཱབྷིམུཁོཝ ཧོཏི.

སོ ཧི བྷིཀྑཱུཧི ‘‘པསྶཐིམ’’ནྟི ཨོལོཀིཡམཱནོཔི ཨནོལོཀེནྟོ ཝིཡ ཨཉྙཝིཧིཏོ ཝིཡ ནིདྡཱཡནྟོ ཝིཡ གཎྛིཀཾ པཊིམུཉྩནྟོ ཝིཡ ཙཱིཝརཾ སཾཝིདཧནྟོ ཝིཡ ཧུཏྭཱ ‘‘ཨསུཀཾ ནཱམ མེ ཀམྨཾ ཨཏྠཱི’’ཏི ཝདནྟོ ཨུཊྛཱཡཱསནཱ གཱམཾ པཝིསིཏྭཱ པཱཏོཝ ཝཝཏྠཔིཏགེཧེསུ ཨཉྙཏརཾ གེཧཾ ཨུཔསངྐམིཏྭཱ གྷརམཱནུསཀེསུ ཐོཀཾ ཀཝཱཊཾ པིདྷཱཡ དྭཱརེ ནིསཱིདིཏྭཱ ཀནྡནྟེསུཔི ཨེཀེན ཧཏྠེན ཀཝཱཊཾ པཎཱམེཏྭཱ ཨནྟོ པཝིསཏི. ཨཐ ནཾ དིསྭཱ ཨཀཱམཀཱཔི ཨཱསནེ ནིསཱིདཱཔེཏྭཱ ཡཱགུཨཱདཱིསུ ཡཾ ཨཏྠི, ཏཾ དེནྟི. སོ ཡཱཝདཏྠཾ བྷུཉྫིཏྭཱ ཨཝསེསཾ པཏྟེནཱདཱཡ པཀྐམཏི. ཨཡཾ ཀཱཀསཱུརོ ནཱམ. ཨེཝརཱུཔེན ཨཧིརིཀེན སུཛཱིཝནྟི ཨཏྠོ.

དྷཾསིནཱཏི ‘‘ཨསུཀཏྠེརོ ནཱམ ཨཔྤིཙྪོ’’ཏིཨཱདཱིནི ཝདནྟེསུ – ‘‘ཀིཾ པན མཡཾ ན ཨཔྤིཙྪཱ’’ཏིཨཱདིཝཙནེན པརེསཾ གུཎདྷཾསནཏཱཡ དྷཾསིནཱ. ཏཐཱརཱུཔསྶ ཝཙནཾ སུཏྭཱ ‘‘ཨཡམྤི ཨཔྤིཙྪཏཱདིགུཎེ ཡུཏྟོ’’ཏི མཉྙམཱནཱ མནུསྶཱ དཱཏབྦཾ མཉྙནྟི. སོ པན ཏཏོ པཊྛཱཡ ཝིཉྙཱུཔུརིསཱནཾ ཙིཏྟཾ ཨཱརཱདྷེཏུཾ ཨསཀྐོནྟོ ཏམྷཱཔི ལཱབྷཱ པརིཧཱཡཏི. ཨེཝཾ དྷཾསིཔུགྒལོ ཨཏྟནོཔི པརསྶཔི ལཱབྷཾ ནཱསེཏིཡེཝ.

པཀྑནྡིནཱཏི པཀྑནྡཙཱརིནཱ. པརེསཾ ཀིཙྩཱནིཔི ཨཏྟནོ ཀིཙྩཱནི ཝིཡ དསྶེནྟོ པཱཏོཝ བྷིཀྑཱུསུ ཙེཏིཡངྒཎཱདཱིསུ ཝཏྟཾ ཀཏྭཱ ཀམྨཊྛཱནམནསིཀཱརེན ཐོཀཾ ནིསཱིདིཏྭཱ ཨུཊྛཱཡ གཱམཾ པཝིསནྟེསུ མུཁཾ དྷོཝིཏྭཱ པཎྜུཀཱསཱཝཔཱརུཔནཨཀྑིཨཉྫནསཱིསམཀྑནཱདཱིཧི ཨཏྟབྷཱཝཾ མཎྜེཏྭཱ སམྨཛྫནྟོ ཝིཡ དྭེ ཏཡོ སམྨཛྫནིཔཧཱརེ དཏྭཱ དྭཱརཀོཊྛཀཱབྷིམུཁོ ཧོཏི. མནུསྶཱ པཱཏོཝ ‘‘ཙེཏིཡཾ ཝནྡིསྶཱམ, མཱལཱཔཱུཛཾ ཀརིསྶཱམཱ’’ཏི ཨཱགཏཱ ཏཾ དིསྭཱ ‘‘ཨཡཾ ཝིཧཱརོ ཨིམཾ དཧརཾ ནིསྶཱཡ པཊིཛགྒནཾ ལབྷཏི, ཨིམཾ མཱ པམཛྫིཏྠཱ’’ཏི ཝཏྭཱ ཏསྶ དཱཏབྦཾ མཉྙནྟི. ཨེཝརཱུཔེན པཀྑནྡིནཱཔི སུཛཱིཝཾ. པགབྦྷེནཱཏི ཀཱཡཔཱགབྦྷིཡཱདཱིཧི སམནྣཱགཏེན. སཾཀིལིཊྛེན ཛཱིཝིཏནྟི ཨེཝཾ ཛཱིཝིཀཾ ཀཔྤེཏྭཱ ཛཱིཝནྟེན ཧི པུགྒལེན སཾཀིལིཊྛེན ཧུཏྭཱ ཛཱིཝིཏཾ ནཱམ ཧོཏི, ཏཾ དུཛྫཱིཝིཏཾ པཱཔམེཝཱཏི ཨཏྠོ.

ཧིརཱིམཏཱ ཙཱཏི ཧིརོཏྟཔྤསམྤནྣེན པུགྒལེན དུཛྫཱིཝཾ. སོ ཧི ཨམཱཏཱདཡོཝ ‘‘མཱཏཱ མེ’’ཏིཨཱདཱིནི ཨཝཏྭཱ ཨདྷམྨིཀེ པཙྩཡེ གཱུཐཾ ཝིཡ ཛིགུཙྪནྟོ དྷམྨེན སམེན པརིཡེསནྟོ སཔདཱནཾ པིཎྜཱཡ ཙརིཏྭཱ ཛཱིཝིཀཾ ཀཔྤེནྟོ ལཱུཁཾ ཛཱིཝིཀཾ ཛཱིཝཏཱིཏི ཨཏྠོ. སུཙིགཝེསིནཱཏི སུཙཱིནི ཀཱཡཀམྨཱདཱིནི གཝེསནྟེན. ཨལཱིནེནཱཏི ཛཱིཝིཏཝུཏྟིམནལླཱིནེན. སུདྡྷཱཛཱིཝེན པསྶཏཱཏི ཨེཝརཱུཔོ ཧི པུགྒལོ སུདྡྷཱཛཱིཝོ ནཱམ ཧོཏི. ཏེན ཨེཝཾ སུདྡྷཱཛཱིཝེན ཏམེཝ སུདྡྷཱཛཱིཝཾ སཱརཏོ པསྶཏཱ ལཱུཁཛཱིཝིཏཝསེན དུཛྫཱིཝཾ ཧོཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཙཱུལ༹སཱརིཝཏྠུ ཚཊྛཾ.

༧. པཉྩཨུཔཱསཀཝཏྠུ

ཡོ པཱཎནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩ ཨུཔཱསཀེ ཨཱརབྦྷ ཀཐེསི.

ཏེསུ ཧི ཨེཀོ པཱཎཱཏིཔཱཏཱཝེརམཎིསིཀྑཱཔདམེཝ རཀྑཏི, ཨིཏརེ ཨིཏརཱནི. ཏེ ཨེཀདིཝསཾ ‘‘ཨཧཾ དུཀྐརཾ ཀརོམི, དུཀྐརཾ རཀྑཱམཱི’’ཏི ཝིཝཱདཱཔནྣཱ སཏྠུ སནྟིཀཾ གནྟྭཱ ཝནྡིཏྭཱ ཏམཏྠཾ ཨཱརོཙེསུཾ. སཏྠཱ ཏེསཾ ཀཐཾ སུཏྭཱ ཨེཀསཱིལམྤི ཀནིཊྛཀཾ ཨཀཏྭཱ ‘‘སབྦཱནེཝ དུརཀྑཱནཱི’’ཏི ཝཏྭཱ ཨིམཱ གཱཐཱ ཨབྷཱསི –

༢༤༦.

‘‘ཡོ པཱཎམཏིཔཱཏེཏི, མུསཱཝཱདཉྩ བྷཱསཏི;

ལོཀེ ཨདིནྣམཱདིཡཏི, པརདཱརཉྩ གཙྪཏི.

༢༤༧.

‘‘སུརཱམེརཡཔཱནཉྩ, ཡོ ནརོ ཨནུཡུཉྫཏི;

ཨིདྷེཝ མེསོ ལོཀསྨིཾ, མཱུལཾ ཁཎཏི ཨཏྟནོ.

༢༤༨.

‘‘ཨེཝཾ བྷོ པུརིས ཛཱནཱཧི, པཱཔདྷམྨཱ ཨསཉྙཏཱ;

མཱ ཏཾ ལོབྷོ ཨདྷམྨོ ཙ, ཙིརཾ དུཀྑཱཡ རནྡྷཡུ’’ནྟི.

ཏཏྠ ཡོ པཱཎམཏིཔཱཏེཏཱིཏི ཡོ སཱཧཏྠིཀཱདཱིསུ ཚསུ པཡོགེསུ ཨེཀཔཡོགེནཱཔི པརསྶ ཛཱིཝིཏིནྡྲིཡཾ ཨུཔཙྪིནྡཏི. མུསཱཝཱདནྟི པརེསཾ ཨཏྠབྷཉྫནཀཾ མུསཱཝཱདཉྩ བྷཱསཏི. ལོཀེ ཨདིནྣམཱདིཡཏཱིཏི ཨིམསྨིཾ སཏྟལོཀེ ཐེཡྻཱཝཧཱརཱདཱིསུ ཨེཀེནཔི ཨཝཧཱརེན པརཔརིགྒཧིཏཾ ཨཱདིཡཏི. པརདཱརཉྩ གཙྪཏཱིཏི པརསྶ རཀྑིཏགོཔིཏེསུ བྷཎྜེསུ ཨཔརཛ྄ཛྷནྟོ ཨུཔྤཐཙཱརཾ ཙརཏི. སུརཱམེརཡཔཱནནྟི ཡསྶ ཀསྶཙི སུརཱཡ ཙེཝ མེརཡསྶ ཙ པཱནཾ. ཨནུཡུཉྫཏཱིཏི སེཝཏི བཧུལཱིཀརོཏི. མཱུལཾ ཁཎཏཱིཏི ཏིཊྛཏུ པརལོཀོ, སོ པན པུགྒལོ ཨིདྷ ལོཀསྨིཾཡེཝ ཡེན ཁེཏྟཝཏྠུཨཱདིནཱ མཱུལེན པཏིཊྛཔེཡྻ, ཏམྤི ཨཊྛཔེཏྭཱ ཝཱ ཝིསྶཛྫེཏྭཱ ཝཱ སུརཾ པིཝནྟོ ཨཏྟནོ མཱུལཾ ཁཎཏི, ཨནཱཐོ ཀཔཎོ ཧུཏྭཱ ཝིཙརཏི. ཨེཝཾ, བྷོཏི པཉྩདུསྶཱིལྱཀམྨཀཱརཀཾ པུགྒལཾ ཨཱལཔཏི. པཱཔདྷམྨཱཏི ལཱམཀདྷམྨཱ. ཨསཉྙཏཱཏི ཀཱཡསཉྙཏཱདིརཧིཏཱ. ཨཙེཏསཱཏིཔི པཱཋོ, ཨཙིཏྟཀཱཏི ཨཏྠོ. ལོབྷོ ཨདྷམྨོ ཙཱཏི ལོབྷོ ཙེཝ དོསོ ཙ. ཨུབྷཡམྤི ཧེཏཾ ཨཀུསལམེཝ. ཙིརཾ དུཀྑཱཡ རནྡྷཡུནྟི ཙིརཀཱལཾ ནིརཡདུཀྑཱདཱིནཾ ཨཏྠཱཡ ཏཾ ཨེཏེ དྷམྨཱ མཱ རནྡྷེནྟུ མཱ མཏྠེནྟཱུཏི ཨཏྠོ.

དེསནཱཝསཱནེ ཏེ པཉྩ ཨུཔཱསཀཱ སོཏཱཔཏྟིཕལེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

པཉྩཨུཔཱསཀཝཏྠུ སཏྟམཾ.

༨. ཏིསྶདཧརཝཏྠུ

དདཱཏི ཝེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏིསྶདཧརཾ ནཱམ ཨཱརབྦྷ ཀཐེསི.

སོ ཀིར ཨནཱཐཔིཎྜིཀསྶ གཧཔཏིནོ ཝིསཱཁཱཡ ཨུཔཱསིཀཱཡཱཏི པཉྩནྣཾ ཨརིཡསཱཝཀཀོཊཱིནཾ དཱནཾ ནིནྡནྟོ ཝིཙརི, ཨསདིསདཱནམྤི ནིནྡིཡེཝ. ཏེསཾ ཏེསཾ དཱནགྒེ སཱིཏལཾ ལབྷིཏྭཱ ‘‘སཱིཏལ’’ནྟི ནིནྡི, ཨུཎྷཾ ལབྷིཏྭཱ ‘‘ཨུཎྷ’’ནྟི ནིནྡི. ཨཔྤཾ དེནྟེཔི ‘‘ཀིཾ ཨིམེ ཨཔྤམཏྟཀཾ དེནྟཱི’’ཏི ནིནྡི, བཧུཾ དེནྟེཔི ‘‘ཨིམེསཾ གེཧེ ཋཔནཊྛཱནཾ མཉྙེ ནཏྠི, ནནུ ནཱམ བྷིཀྑཱུནཾ ཡཱཔནམཏྟཾ དཱཏབྦཾ, ཨེཏྟཀཾ ཡཱགུབྷཏྟཾ ནིརཏྠཀམེཝ ཝིསྶཛྫཏཱི’’ཏི ནིནྡི. ཨཏྟནོ པན ཉཱཏཀེ ཨཱརབྦྷ ‘‘ཨཧོ ཨམྷཱཀཾ ཉཱཏཀཱནཾ གེཧཾ ཙཏཱུཧི དིསཱཧི ཨཱགཏཱགཏཱནཾ བྷིཀྑཱུནཾ ཨོཔཱནབྷཱུཏ’’ནྟིཨཱདཱིནི ཝཏྭཱ པསཾསཾ པཝཏྟེསི. སོ པནེཀསྶ དོཝཱརིཀསྶ པུཏྟོ ཛནཔདཾ ཝིཙརནྟེཧི ཝཌྜྷཀཱིཧི སདྡྷིཾ ཝིཙརནྟོ སཱཝཏྠིཾ པཏྭཱ པབྦཛིཏོ. ཨཐ ནཾ བྷིཀྑཱུ ཨེཝཾ མནུསྶཱནཾ དཱནཱདཱིནི ནིནྡནྟཾ དིསྭཱ ‘‘པརིགྒཎྷིསྶཱམ ན’’ནྟི ཙིནྟེཏྭཱ, ‘‘ཨཱཝུསོ, ཏཝ ཉཱཏཀཱ ཀཧཾ ཝསནྟཱི’’ཏི པུཙྪིཏྭཱ ‘‘ཨསུཀགཱམེ ནཱམཱ’’ཏི སུཏྭཱཝ ཀཏིཔཡེ དཧརེ པེསེསུཾ. ཏེ ཏཏྠ གནྟྭཱ གཱམཝཱསིཀེཧི ཨཱསནསཱལཱཡ ནིསཱིདཱཔེཏྭཱ ཀཏསཀྐཱརཱ པུཙྪིཾསུ – ‘‘ཨིམམྷཱ གཱམཱ ནིཀྑམིཏྭཱ པབྦཛིཏོ ཏིསྶོ ནཱམ དཧརོ ཨཏྠི. ཏསྶ ཀཏམེ ཉཱཏཀཱ’’ཏི? མནུསྶཱ ‘‘ཨིདྷ ཀུལགེཧཏོ ནིཀྑམིཏྭཱ པབྦཛིཏདཱརཀོ ནཏྠི, ཀིཾ ནུ ཁོ ཨིམེ ཝདནྟཱི’’ཏི ཙིནྟེཏྭཱ, ‘‘བྷནྟེ, ཨེཀོ དོཝཱརིཀཔུཏྟོ ཝཌྜྷཀཱིཧི སདྡྷིཾ ཝིཙརིཏྭཱ པབྦཛིཏོཏི སུཎོམ, ཏཾ སནྡྷཱཡ ཝདེཐ མཉྙེ’’ཏི ཨཱཧཾསུ. དཧརབྷིཀྑཱུ ཏིསྶསྶ ཏཏྠ ཨིསྶརཉཱཏཀཱནཾ ཨབྷཱཝཾ ཉཏྭཱ སཱཝཏྠིཾ གནྟྭཱ ‘‘ཨཀཱརཎམེཝ, བྷནྟེ, ཏིསྶོ ཝིལཔནྟོ ཝིཙརཏཱི’’ཏི ཏཾ པཝཏྟིཾ བྷིཀྑཱུནཾ ཨཱརོཙེསུཾ. བྷིཀྑཱུཔི ཏཾ ཏཐཱགཏསྶ ཨཱརོཙེསུཾ.

སཏྠཱ ‘‘ན, བྷིཀྑཝེ, ཨིདཱནེཝ ཝིཀཏྠེནྟོ ཝིཙརཏི, པུབྦེཔི ཝིཀཏྠཀོཝ ཨཧོསཱི’’ཏི ཝཏྭཱ བྷིཀྑཱུཧི ཡཱཙིཏོ ཨཏཱིཏཾ ཨཱཧརིཏྭཱ –

‘‘བཧུམྤི སོ ཝིཀཏྠེཡྻ, ཨཉྙཾ ཛནཔདཾ གཏོ;

ཨནྭཱགནྟྭཱན དཱུསེཡྻ, བྷུཉྫ བྷོགེ ཀཊཱཧཀཱ’’ཏི. (ཛཱ. ༡.༡.༡༢༥) –

ཨིམཾ ཀཊཱཧཛཱཏཀཾ ཝིཏྠཱརེཏྭཱ, ‘‘བྷིཀྑཝེ, ཡོ ཧི པུགྒལོ པརེཧི ཨཔྤཀེ ཝཱ བཧུཀེ ཝཱ ལཱུཁེ ཝཱ པཎཱིཏེ ཝཱ དིནྣེ ཨཉྙེསཾ ཝཱ དཏྭཱ ཨཏྟནོ ཨདིནྣེ མངྐུ ཧོཏི, ཏསྶ ཛྷཱནཾ ཝཱ ཝིཔསྶནཾ ཝཱ མགྒཕལཱདཱིནི ཝཱ ན ཨུཔྤཛྫནྟཱི’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༢༤༩.

‘‘དདཱཏི ཝེ ཡཐཱསདྡྷཾ, ཡཐཱཔསཱདནཾ ཛནོ;

ཏཏྠ ཡོ ཙ མངྐུ ཧོཏི, པརེསཾ པཱནབྷོཛནེ;

ན སོ དིཝཱ ཝཱ རཏྟིཾ ཝཱ, སམཱདྷིམདྷིགཙྪཏི.

༢༥༠.

‘‘ཡསྶ ཙེཏཾ སམུཙྪིནྣཾ, མཱུལགྷཙྩཾ སམཱུཧཏཾ;

ས ཝེ དིཝཱ ཝཱ རཏྟིཾ ཝཱ, སམཱདྷིམདྷིགཙྪཏཱི’’ཏི.

ཏཏྠ དདཱཏི ཝེ ཡཐཱསདྡྷནྟི ལཱུཁཔཎཱིཏཱདཱིསུ ཡཾཀིཉྩི དེནྟོ ཛནོ ཡཐཱསདྡྷཾ ཨཏྟནོ སདྡྷཱནུརཱུཔམེཝ དེཏི. ཡཐཱཔསཱདནནྟི ཐེརནཝཱདཱིསུ ཙསྶ ཡསྨིཾ ཡསྨིཾ པསཱདོ ཨུཔྤཛྫཏི, ཏསྶ དེནྟོ ཡཐཱཔསཱདནཾ ཨཏྟནོ པསཱདཱནུརཱུཔམེཝ དེཏི. ཏཏྠཱཏི ཏསྨིཾ པརསྶ དཱནེ ‘‘མཡཱ ཨཔྤཾ ཝཱ ལདྡྷཾ, ལཱུཁཾ ཝཱ ལདྡྷ’’ནྟི མངྐུབྷཱཝཾ ཨཱཔཛྫཏི. སམཱདྷིནྟི སོ པུགྒལོ དིཝཱ ཝཱ རཏྟིཾ ཝཱ ཨུཔཙཱརཔྤནཱཝསེན ཝཱ མགྒཕལཝསེན ཝཱ སམཱདྷིཾ ནཱདྷིགཙྪཏི. ཡསྶ ཙེཏནྟི ཡསྶ པུགྒལསྶ ཨེཏཾ ཨེཀེསུ ཋཱནེསུ མངྐུབྷཱཝསངྑཱཏཾ ཨཀུསལཾ སམུཙྪིནྣཾ མཱུལགྷཙྩཾ ཀཏྭཱ ཨརཧཏྟམགྒཉཱཎེན སམཱུཧཏཾ, སོ ཝུཏྟཔྤཀཱརཾ སམཱདྷིཾ ཨདྷིགཙྪཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཏིསྶདཧརཝཏྠུ ཨཊྛམཾ.

༩. པཉྩཨུཔཱསཀཝཏྠུ

ནཏྠི རཱགསམོ ཨགྒཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩ ཨུཔཱསཀེ ཨཱརབྦྷ ཀཐེསི.

ཏེ ཀིར དྷམྨཾ སོཏུཀཱམཱ ཝིཧཱརཾ གནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདིཾསུ. བུདྡྷཱནཉྩ ‘‘ཨཡཾ ཁཏྟིཡོ, ཨཡཾ བྲཱཧྨཎོ, ཨཡཾ ཨཌྜྷོ, ཨཡཾ དུགྒཏོ, ཨིམསྶ ཨུལཱ༹རཾ ཀཏྭཱ དྷམྨཾ དེསེསྶཱམི, ཨིམསྶ ནོ’’ཏི ཙིཏྟཾ ན ཨུཔྤཛྫཏི. ཡཾཀིཉྩི ཨཱརབྦྷ དྷམྨཾ དེསེནྟོ དྷམྨགཱརཝཾ པུརཀྑཏྭཱ ཨཱཀཱསགངྒཾ ཨོཏཱརེནྟོ ཝིཡ དེསེཏི. ཨེཝཾ དེསེནྟསྶ པན ཏཐཱགཏསྶ སནྟིཀེ ནིསིནྣཱནཾ ཏེསཾ ཨེཀོ ནིསིནྣཀོཝ ནིདྡཱཡི, ཨེཀོ ཨངྒུལིཡཱ བྷཱུམིཾ ལིཁནྟོ ནིསཱིདི, ཨེཀོ ཨེཀཾ རུཀྑཾ ཙཱལེནྟོ ནིསཱིདི, ཨེཀོ ཨཱཀཱསཾ ཨུལློཀེནྟོ ནིསཱིདི, ཨེཀོ པན སཀྐཙྩཾ དྷམྨཾ ཨསྶོསི.

ཨཱནནྡཏྠེརོ སཏྠཱརཾ བཱིཛཡམཱནོ ཏེསཾ ཨཱཀཱརཾ ཨོལོཀེནྟོ སཏྠཱརཾ ཨཱཧ – ‘‘བྷནྟེ, ཏུམྷེ ཨིམེསཾ མཧཱམེགྷགཛྫིཏཾ གཛྫནྟཱ ཝིཡ དྷམྨཾ དེསེཐ, ཨེཏེ པན ཏུམྷེསུཔི དྷམྨཾ ཀཐེནྟེསུ ཨིདཉྩིདཉྩ ཀརོནྟཱ ནིསིནྣཱ’’ཏི. ‘‘ཨཱནནྡ, ཏྭཾ ཨེཏེ ན ཛཱནཱསཱི’’ཏི? ‘‘ཨཱམ, ན ཛཱནཱམི, བྷནྟེ’’ཏི. ཨེཏེསུ ཧི ཡོ ཨེས ནིདྡཱཡནྟོ ནིསིནྣོ, ཨེས པཉྩ ཛཱཏིསཏཱནི སཔྤཡོནིཡཾ ནིབྦཏྟིཏྭཱ བྷོགེསུ སཱིསཾ ཋཔེཏྭཱ ནིདྡཱཡི, ཨིདཱནིཔིསྶ ནིདྡཱཡ ཏིཏྟི ནཏྠི, ནཱསྶ ཀཎྞཾ མམ སདྡོ པཝིསཏཱིཏི. ཀིཾ པན, བྷནྟེ, པཊིཔཱཊིཡཱ ཀཐེཐ, ཨུདཱཧུ ཨནྟརནྟརཱཏི. ཨཱནནྡ, ཨེཏསྶ ཧི ཀཱལེན མནུསྶཏྟཾ, ཀཱལེན དེཝཏྟཾ, ཀཱལེན ནཱགཏྟནྟི ཨེཝཾ ཨནྟརནྟརཱ ཨུཔྤཛྫནྟསྶ ཨུཔཔཏྟིཡོ སབྦཉྙུཏཉྙཱཎེནཱཔི ན སཀྐཱ པརིཙྪིནྡིཏུཾ. པཊིཔཱཊིཡཱ པནེས པཉྩ ཛཱཏིསཏཱནི ནཱགཡོནིཡཾ ནིབྦཏྟིཏྭཱ ནིདྡཱཡནྟོཔི ནིདྡཱཡ ཨཏིཏྟོཡེཝ. ཨངྒུལིཡཱ བྷཱུམིཾ ལིཁནྟོ ནིསིནྣཔུརིསོཔི པཉྩ ཛཱཏིསཏཱནི གཎྜུཔྤཱདཡོནིཡཾ ནིབྦཏྟིཏྭཱ བྷཱུམིཾ ཁཎི, ཨིདཱནིཔི བྷཱུམིཾ ཁཎནྟོཝ མམ སདྡཾ ན སུཎཱཏི. ཨེས རུཀྑཾ ཙཱལེནྟོ ནིསིནྣཔུརིསོཔི པཊིཔཱཊིཡཱ པཉྩ ཛཱཏིསཏཱནི མཀྐཊཡོནིཡཾ ནིབྦཏྟི, ཨིདཱནིཔི པུབྦཱཙིཎྞཝསེན རུཀྑཾ ཙཱལེཏིཡེཝ, ནཱསྶ ཀཎྞཾ མམ སདྡོ པཝིསཏི. ཨེས ཨཱཀཱསཾ ཨུལློཀེཏྭཱ ནིསིནྣཔུརིསོཔི པཉྩ ཛཱཏིསཏཱནི ནཀྑཏྟཔཱཋཀོ ཧུཏྭཱ ནིབྦཏྟི, ཨིདཱནི པུབྦཱཙིཎྞཝསེན ཨཛྫཱཔི ཨཱཀཱསམེཝ ཨུལློཀེཏི, ནཱསྶ ཀཎྞཾ མམ སདྡོ པཝིསཏི. ཨེས སཀྐཙྩཾ དྷམྨཾ སུཎནྟོ ནིསིནྣཔུརིསོ པན པཊིཔཱཊིཡཱ པཉྩ ཛཱཏིསཏཱནི ཏིཎྞཾ ཝེདཱནཾ པཱརགཱུ མནྟཛ྄ཛྷཱཡཀབྲཱཧྨཎོ ཧུཏྭཱ ནིབྦཏྟི, ཨིདཱནིཔི མནྟཾ སཾསནྡནྟོ ཝིཡ སཀྐཙྩཾ སུཎཱཏཱིཏི.

‘‘བྷནྟེ, ཏུམྷཱཀཾ དྷམྨདེསནཱ ཚཝིཨཱདཱིནི ཚིནྡིཏྭཱ ཨཊྛིམིཉྫཾ ཨཱཧཙྩ ཏིཊྛཏི, ཀསྨཱ ཨིམེ ཏུམྷེསུཔི དྷམྨཾ དེསེནྟེསུ སཀྐཙྩཾ ན སུཎནྟཱི’’ཏི? ‘‘ཨཱནནྡ, མམ དྷམྨོ སུསྶཝནཱིཡོཏི སཉྙཾ ཀརོསི མཉྙེ’’ཏི. ‘‘ཀིཾ པན, བྷནྟེ, དུསྶཝནཱིཡོ’’ཏི? ‘‘ཨཱམ, ཨཱནནྡཱ’’ཏི. ‘‘ཀསྨཱ, བྷནྟེ’’ཏི? ‘‘ཨཱནནྡ, བུདྡྷོཏི ཝཱ དྷམྨོཏི ཝཱ སངྒྷོཏི ཝཱ པདཾ ཨིམེཧི སཏྟེཧི ཨནེཀེསུཔི ཀཔྤཀོཊིསཏསཧསྶེསུ ཨསུཏཔུབྦཾ. ཡསྨཱ ཨིམཾ དྷམྨཾ སོཏུཾ ན སཀྐོནྟཱ ཨནམཏགྒེ སཾསཱརེ ཨིམེ སཏྟཱ ཨནེཀཝིཧིཏཾ ཏིརཙྪཱནཀཐཾཡེཝ སུཎནྟཱ ཨཱགཏཱ, ཏསྨཱ སུརཱཔཱནཀེལི༹མཎྜལཱདཱིསུ གཱཡནྟཱ ནཙྩནྟཱ ཝིཙརནྟི, དྷམྨཾ སོཏུཾ ན སཀྐོནྟཱི’’ཏི. ‘‘ཀིཾ ནིསྶཱཡ པནེཏེ ན སཀྐོནྟི, བྷནྟེ’’ཏི?

ཨཐསྶ སཏྠཱ, ‘‘ཨཱནནྡ, རཱགཾ ནིསྶཱཡ དོསཾ ནིསྶཱཡ མོཧཾ ནིསྶཱཡ ཏཎྷཾ ནིསྶཱཡ ན སཀྐོནྟི. རཱགགྒིསདིསོ ཨགྒི ནཱམ ནཏྠི, སོ ཚཱརིཀམྤི ཨསེསེཏྭཱ སཏྟེ དཧཏི. ཀིཉྩཱཔི སཏྟསཱུརིཡཔཱཏུབྷཱཝཾ ནིསྶཱཡ ཨུཔྤནྣོ ཀཔྤཝིནཱསཀོ ཨགྒིཔི ཀིཉྩི ཨནཝསེསེཏྭཱཝ ལོཀཾ དཧཏི, སོ པན ཨགྒི ཀདཱཙིཡེཝ དཧཏི. རཱགགྒིནོ ཨདཧནཀཱལོ ནཱམ ནཏྠི, ཏསྨཱ རཱགསམོ ཝཱ ཨགྒི དོསསམོ ཝཱ གཧོ མོཧསམཾ ཝཱ ཛཱལཾ ཏཎྷཱསམཱ ཝཱ ནདཱི ནཱམ ནཏྠཱི’’ཏི ཝཏྭཱ ཨིམཾ གཱཐམཱཧ –

༢༥༡.

‘‘ནཏྠི རཱགསམོ ཨགྒི, ནཏྠི དོསསམོ གཧོ;

ནཏྠི མོཧསམཾ ཛཱལཾ, ནཏྠི ཏཎྷཱསམཱ ནདཱི’’ཏི.

ཏཏྠ རཱགསམོཏི དྷཱུམཱདཱིསུ ཀིཉྩི ཨདསྶེཏྭཱ ཨནྟོཡེཝ ཨུཊྛཱཡ ཛྷཱཔནཝསེན རཱགེན སམོ ཨགྒི ནཱམ ནཏྠི. དོསསམོཏི ཡཀྑགཧཨཛགརགཧཀུམྦྷིལགཧཱདཡོ ཨེཀསྨིཾཡེཝ ཨཏྟབྷཱཝེ གཎྷིཏུཾ སཀྐོནྟི, དོསགཧོ པན སབྦཏྠ ཨེཀནྟམེཝ གཎྷཱཏཱིཏི དོསེན སམོ གཧོ ནཱམ ནཏྠི. མོཧསམནྟི ཨོནནྡྷནཔརིཡོནནྡྷནཊྛེན པན མོཧསམཾ ཛཱལཾ ནཱམ ནཏྠི. ཏཎྷཱསམཱཏི གངྒཱདཱིནཾ ནདཱིནཾ པུཎྞཀཱལོཔི ཨཱུནཀཱལོཔི སུཀྑཀཱལོཔི པཉྙཱཡཏི, ཏཎྷཱཡ པན པུཎྞཀཱལོ ཝཱ སུཀྑཀཱལོ ཝཱ ནཏྠི, ནིཙྩཾ ཨཱུནཱཝ པཉྙཱཡཏཱིཏི དུཔྤཱུརཎཊྛེན ཏཎྷཱཡ སམཱ ནདཱི ནཱམ ནཏྠཱིཏི ཨཏྠོ.

དེསནཱཝསཱནེ སཀྐཙྩཾ དྷམྨཾ སུཎནྟོ ཨུཔཱསཀོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

པཉྩཨུཔཱསཀཝཏྠུ ནཝམཾ.

༡༠. མེཎྜཀསེཊྛིཝཏྠུ

སུདསྶཾ ཝཛྫནྟི ཨིམཾ དྷམྨདེསནཾ སཏྠཱ བྷདྡིཡནགརཾ ནིསྶཱཡ ཛཱཏིཡཱཝནེ ཝིཧརནྟོ མེཎྜཀསེཊྛིཾ ཨཱརབྦྷ ཀཐེསི.

སཏྠཱ ཀིར ཨངྒུཏྟརཱཔེསུ ཙཱརིཀཾ ཙརནྟོ མེཎྜཀསེཊྛིནོ ཙ, བྷརིཡཱཡ ཙསྶ ཙནྡཔདུམཱཡ, པུཏྟསྶ ཙ དྷནཉྩཡསེཊྛིནོ, སུཎིསཱཡ ཙ སུམནདེཝིཡཱ, ནཏྟཱཡ ཙསྶ ཝིསཱཁཱཡ, དཱསསྶ ཙ པུཎྞསྶཱཏི ཨིམེསཾ སོཏཱཔཏྟིཕལཱུཔནིསྶཡཾ དིསྭཱ བྷདྡིཡནགརཾ གནྟྭཱ ཛཱཏིཡཱཝནེ ཝིཧཱསི. མེཎྜཀསེཊྛི སཏྠུ ཨཱགམནཾ ཨསྶོསི. ཀསྨཱ པནེས མེཎྜཀསེཊྛི ནཱམ ཛཱཏོཏི? ཏསྶ ཀིར པཙྪིམགེཧེ ཨཊྛཀརཱིསམཏྟེ ཋཱནེ ཧཏྠིཨསྶཨུསབྷཔམཱཎཱ སུཝཎྞམེཎྜཀཱ པཐཝིཾ བྷིནྡིཏྭཱ པིཊྛིཡཱ པིཊྛིཾ པཧརམཱནཱ ཨུཊྛཧིཾསུ. ཏེསཾ མུཁེསུ པཉྩཝཎྞཱནཾ སུཏྟཱནཾ གེཎྜུཀཱ པཀྑིཏྟཱ ཧོནྟི. སཔྤིཏེལམདྷུཕཱཎིཏཱདཱིཧི ཝཱ ཝཏྠཙྪཱདནཧིརཉྙསུཝཎྞཱདཱིཧི ཝཱ ཨཏྠེ སཏི ཏེསཾ མུཁཏོ གེཎྜུཀེ ཨཔནེནྟི, ཨེཀསྶཱཔི མེཎྜཀསྶ མུཁཏོ ཛམྦུདཱིཔཝཱསཱིནཾ པཧོནཀཾ སཔྤིཏེལམདྷུཕཱཎིཏཝཏྠཙྪཱདནཧིརཉྙསུཝཎྞཾ ནིཀྑམཏི. ཏཏོ པཊྛཱཡ མེཎྜཀསེཊྛཱིཏི པཉྙཱཡི.

ཀིཾ པནསྶ པུབྦཀམྨནྟི? ཝིཔསྶཱིབུདྡྷཀཱལེ ཀིར ཨེས ཨཝརོཛསྶ ནཱམ ཀུཊུམྦིཀསྶ བྷཱགིནེཡྻོ མཱཏུལེན སམཱནནཱམོ ཨཝརོཛོ ནཱམ ཨཧོསི. ཨཐསྶ མཱཏུལོ སཏྠུ གནྡྷཀུཊིཾ ཀཱཏུཾ ཨཱརབྷི. སོ ཏསྶ སནྟིཀཾ གནྟྭཱ, ‘‘མཱཏུལ, ཨུབྷོཔི སཧེཝ ཀརོམཱ’’ཏི ཝཏྭཱ ‘‘ཨཧཾ ཨཉྙེཧི སདྡྷིཾ ཨསཱདྷཱརཎཾ ཀཏྭཱ ཨེཀཀོཝ ཀརིསྶཱམཱི’’ཏི ཏེན པན པཊིཀྑིཏྟཀཱལེ ‘‘ཨིམསྨིཾ ཋཱནེ གནྡྷཀུཊིཡཱ ཀཏཱཡ ཨིམསྨིཾ ནཱམ ཋཱནེ ཀུཉྫརསཱལཾ ནཱམ ལདྡྷུཾ ཝཊྚཏཱི’’ཏི ཙིནྟེཏྭཱ ཨརཉྙཏོ དབྦསམྦྷཱརེ ཨཱཧརཱཔེཏྭཱ ཨེཀཾ ཐམྦྷཾ སུཝཎྞཁཙིཏཾ, ཨེཀཾ རཛཏཁཙིཏཾ, ཨེཀཾ མཎིཁཙིཏཾ, ཨེཀཾ སཏྟརཏནཁཙིཏནྟི ཨེཝཾ ཏུལཱསངྒྷཱཏདྭཱརཀཝཱཊཝཱཏཔཱནགོཔཱནསཱིཚདནིཊྛཀཱ སབྦཱཔི སུཝཎྞཱདིཁཙིཏཱཝ ཀཱརེཏྭཱ གནྡྷཀུཊིཡཱ སམྨུཁཊྛཱནེ ཏཐཱགཏསྶ སཏྟརཏནམཡཾ ཀུཉྫརསཱལཾ ཀཱརེསི. ཏསྶཱ ཨུཔརི གྷནརཏྟསུཝཎྞམཡཱ ཀམྦལཱ པཝཱལ༹མཡཱ སིཁརཐཱུཔིཀཱཡོ ཨཧེསུཾ. ཀུཉྫརསཱལཱཡ མཛ྄ཛྷེ ཋཱནེ རཏནམཎྜཔཾ ཀཱརེཏྭཱ དྷམྨཱསནཾ པཏིཊྛཱཔེསི. ཏསྶ གྷནརཏྟསུཝཎྞམཡཱ པཱདཱ ཨཧེསུཾ, ཏཐཱ ཙཏསྶོ ཨཊནིཡོ. ཙཏྟཱརོ པན སུཝཎྞམེཎྜཀེ ཀཱརཱཔེཏྭཱ ཨཱསནསྶ ཙཏུནྣཾ པཱདཱནཾ ཧེཊྛཱ ཋཔེསི, དྭེ མེཎྜཀེ ཀཱརཱཔེཏྭཱ པཱདཔཱིཋཀཱཡ ཧེཊྛཱ ཋཔེསི, ཚ སུཝཎྞམེཎྜཀེ ཀཱརཱཔེཏྭཱ མཎྜཔཾ པརིཀྑིཔེནྟོ ཋཔེསི. དྷམྨཱསནཾ པཋམཾ སུཏྟམཡེཧི རཛྫུཀེཧི ཝཱཡཱཔེཏྭཱ མཛ྄ཛྷེ སུཝཎྞསུཏྟམཡེཧི ཨུཔརི མུཏྟམཡེཧི སུཏྟེཧི ཝཱཡཱཔེསི. ཏསྶ ཙནྡནམཡོ ཨཔསྶཡོ ཨཧོསི. ཨེཝཾ ཀུཉྫརསཱལཾ ནིཊྛཱཔེཏྭཱ སཱལཱམཧཾ ཀརོནྟོ ཨཊྛསཊྛཱིཧི བྷིཀྑུསཏསཧསྶེཧི སདྡྷིཾ སཏྠཱརཾ ནིམནྟེཏྭཱ ཙཏྟཱརོ མཱསེ དཱནཾ དཏྭཱ ཨོསཱནདིཝསེ ཏིཙཱིཝརཾ ཨདཱསི. ཏཏྠ སངྒྷནཝཀསྶ སཏསཧསྶགྒྷནིཀཾ པཱཔུཎི.

ཨེཝཾ ཝིཔསྶཱིབུདྡྷཀཱལེ པུཉྙཀམྨཾ ཀཏྭཱ ཏཏོ ཙུཏོ དེཝེསུ ཙ མནུསྶེསུ ཙ སཾསརནྟོ ཨིམསྨིཾ བྷདྡཀཔྤེ བཱརཱཎསིཡཾ མཧཱབྷོགཀུལེ ནིབྦཏྟིཏྭཱ བཱརཱཎསིསེཊྛི ནཱམ ཨཧོསི. སོ ཨེཀདིཝསཾ རཱཛཱུཔཊྛཱནཾ གཙྪནྟོ པུརོཧིཏཾ དིསྭཱ ‘‘ཀིཾ, ཨཱཙརིཡ, ནཀྑཏྟམུཧུཏྟཾ, ཨུཔདྷཱརེཐཱ’’ཏི ཨཱཧ. ཨཱམ, ཨུཔདྷཱརེམི, ཀིཾ ཨཉྙཾ ཨམྷཱཀཾ ཀམྨནྟི. ཏེན ཧི ཀཱིདིསཾ ཛནཔདཙཱརིཏྟནྟི? ཨེཀཾ བྷཡཾ བྷཝིསྶཏཱིཏི. ཀིཾ བྷཡཾ ནཱམཱཏི? ཚཱཏཀབྷཡཾ སེཊྛཱིཏི. ཀདཱ བྷཝིསྶཏཱིཏི? ཨིཏོ ཏིཎྞཾ སཾཝཙྪརཱནཾ ཨཙྩཡེནཱཏི. ཏཾ སུཏྭཱ སེཊྛི བཧུཾ ཀསིཀམྨཾ ཀཱརེཏྭཱ གེཧེ ཝིཛྫམཱནདྷནེནཱཔི དྷཉྙམེཝ གཧེཏྭཱ ཨཌྜྷཏེརསཱནི ཀོཊྛསཏཱནི ཀཱརེཏྭཱ སབྦཀོཊྛཀེ ཝཱིཧཱིཧི པརིཔཱུརེསི. ཀོཊྛེསུ ཨཔྤཧོནྟེསུ ཙཱཊིཨཱདཱིནི པཱུརེཏྭཱ ཨཝསེསཾ བྷཱུམིཡཾ ཨཱཝཱཊེ ཀཏྭཱ ནིཁཎི. ནིདྷཱནཱཝསེསཾ མཏྟིཀཱཡ སདྡྷིཾ མདྡིཏྭཱ བྷིཏྟིཡོ ལིམྤཱཔེསི.

སོ ཨཔརེན སམཡེན ཚཱཏཀབྷཡེ སམྤཏྟེ ཡཐཱནིཀྑིཏྟཾ དྷཉྙཾ པརིབྷུཉྫནྟོ ཀོཊྛེསུ ཙ ཙཱཊིཨཱདཱིསུ ཙ ནིཀྑིཏྟདྷཉྙེ པརིཀྑཱིཎེ པརིཛནེ པཀྐོསཱཔེཏྭཱ ཨཱཧ – ‘‘གཙྪཐ, ཏཱཏཱ, པབྦཏཔཱདཾ པཝིསིཏྭཱ ཛཱིཝནྟཱ སུབྷིཀྑཀཱལེ མམ སནྟིཀཾ ཨཱགནྟུཀཱམཱ ཨཱགཙྪཐ, ཨནཱགནྟུཀཱམཱ ཏཏྠ ཏཏྠེཝ ཛཱིཝཐཱ’’ཏི. ཏེ རོདམཱནཱ ཨསྶུམུཁཱ ཧུཏྭཱ སེཊྛིཾ ཝནྡིཏྭཱ ཁམཱཔེཏྭཱ སཏྟཱཧཾ ནིསཱིདིཏྭཱ ཏཐཱ ཨཀཾསུ. ཏསྶ པན སནྟིཀེ ཝེཡྻཱཝཙྩཀརོ ཨེཀོཝ པུཎྞོ ནཱམ དཱསོ ཨོཧཱིཡི, ཏེན སདྡྷིཾ སེཊྛིཛཱཡཱ སེཊྛིཔུཏྟོ སེཊྛིསུཎིསཱཏི པཉྩེཝ ཛནཱ ཨཧེསུཾ. ཏེ བྷཱུམིཡཾ ཨཱཝཱཊེསུ ནིཧིཏདྷཉྙེཔི པརིཀྑཱིཎེ བྷིཏྟིམཏྟིཀཾ པཱཏེཏྭཱ ཏེམེཏྭཱ ཏཏོ ལདྡྷདྷཉྙེན ཡཱཔཡིཾསུ. ཨཐསྶ ཛཱཡཱ ཚཱཏཀེ ཨཝཏྠརནྟེ མཏྟིཀཱཡ ཁཱིཡམཱནཱཡ བྷིཏྟིཔཱདེསུ ཨཝསིཊྛམཏྟིཀཾ པཱཏེཏྭཱ ཏེམེཏྭཱ ཨཌྜྷཱལ༹ྷཀམཏྟཾ ཝཱིཧིཾ ལབྷིཏྭཱ ཀོཊྚེཏྭཱ ཨེཀཾ ཏཎྜུལནཱལི༹ཾ གཧེཏྭཱ ‘‘ཚཱཏཀཀཱལེ ཙོརཱ བཧཱུ ཧོནྟཱི’’ཏི ཙོརབྷཡེན ཨེཀསྨིཾ ཀུཊེ པཀྑིཔིཏྭཱ པིདཧིཏྭཱ བྷཱུམིཡཾ ནིཁཎིཏྭཱ ཋཔེསི. ཨཐ ནཾ སེཊྛི རཱཛཱུཔཊྛཱནཏོ ཨཱགནྟྭཱ ཨཱཧ – ‘‘བྷདྡེ, ཚཱཏོམྷི, ཨཏྠི ཀིཉྩཱི’’ཏི. སཱ ཝིཛྫམཱནཾ ‘‘ནཏྠཱི’’ཏི ཨཝཏྭཱ ‘‘ཨེཀཱ ཏཎྜུལནཱལི༹ ཨཏྠཱི’’ཏི ཨཱཧ. ‘‘ཀཧཾ སཱ’’ཏི? ‘‘ཙོརབྷཡེན མེ ནིཁཎིཏྭཱ ཋཔིཏཱ’’ཏི. ‘‘ཏེན ཧི ནཾ ཨུདྡྷརིཏྭཱ ཀིཉྩི པཙཱཧཱི’’ཏི. ‘‘སཙེ ཡཱགུཾ པཙིསྶཱམི, དྭེ ཝཱརེ ལབྷིསྶཏི. སཙེ བྷཏྟཾ པཙིསྶཱམི, ཨེཀཝཱརམེཝ ལབྷིསྶཏི, ཀིཾ པཙཱམི, སཱམཱི’’ཏི ཨཱཧ. ‘‘ཨམྷཱཀཾ ཨཉྙོ པཙྩཡོ ནཏྠི, བྷཏྟཾ བྷུཉྫིཏྭཱ མརིསྶཱམ, བྷཏྟམེཝ པཙཱཧཱི’’ཏི. སཱ བྷཏྟཾ པཙིཏྭཱ པཉྩ ཀོཊྛཱསེ ཀཏྭཱ སེཊྛིནོ ཀོཊྛཱསཾ ཝཌྜྷེཏྭཱ པུརཏོ ཋཔེསི.

ཏསྨིཾ ཁཎེ གནྡྷམཱདནཔབྦཏེ པཙྩེཀབུདྡྷོ སམཱཔཏྟིཏོ ཝུཊྛཱཏི. ཨནྟོསམཱཔཏྟིཡཾ ཀིར སམཱཔཏྟིབལེན ཛིགྷཙྪཱ ན བཱདྷཏི. སམཱཔཏྟིཏོ ཝུཊྛིཏཱནཾ པན བལཝཏཱི ཧུཏྭཱ ཨུདརཔཊལཾ ཌཡ྄ཧནྟཱི ཝིཡ ཨུཔྤཛྫཏི. ཏསྨཱ ཏེ ལབྷནཊྛཱནཾ ཨོལོཀེཏྭཱ གཙྪནྟི. ཏཾ དིཝསཉྩ ཏེསཾ དཱནཾ དཏྭཱ སེནཱཔཏིཊྛཱནཱདཱིསུ ཨཉྙཏརསམྤཏྟིཾ ལབྷནྟི. ཏསྨཱ སོཔི དིབྦེན ཙཀྑུནཱ ཨོལོཀེནྟོ ‘‘སཀལཛམྦུདཱིཔེ ཚཱཏཀབྷཡཾ ཨུཔྤནྣཾ, སེཊྛིགེཧེ ཙ པཉྩནྣཾ ཛནཱནཾ ནཱལི༹ཀོདནོཝ པཀྐོ, སདྡྷཱ ནུ ཁོ ཨེཏེ, སཀྑིསྶནྟི ཝཱ མམ སངྒཧཾ ཀཱཏུ’’ནྟི ཏེསཾ སདྡྷབྷཱཝཉྩ སངྒཧཾ ཀཱཏུཾ སམཏྠབྷཱཝཉྩ དིསྭཱ པཏྟཙཱིཝརམཱདཱཡ མཧཱསེཊྛིསྶ པུརཏོ དྭཱརེ ཋིཏམེཝ ཨཏྟཱནཾ དསྶེསི. སོ ཏཾ དིསྭཱ པསནྣཙིཏྟོ ‘‘པུབྦེཔི མཡཱ དཱནསྶ ཨདིནྣཏྟཱ ཨེཝརཱུཔཾ ཚཱཏཀཾ དིཊྛཾ, ཨིདཾ ཁོ པན བྷཏྟཾ མཾ ཨེཀདིཝསམེཝ རཀྑེཡྻ. ཨཡྻསྶ པན དིནྣཾ ཨནེཀཱསུ ཀཔྤཀོཊཱིསུ མམ ཧིཏསུཁཱཝཧཾ བྷཝིསྶཏཱི’’ཏི ཏཾ བྷཏྟཔཱཏིཾ ཨཔནེཏྭཱ པཙྩེཀབུདྡྷཾ ཨུཔསངྐམིཏྭཱ པཉྩཔཏིཊྛིཏེན ཝནྡིཏྭཱ གེཧཾ པཝེསེཏྭཱ ཨཱསནེ ནིསིནྣསྶ པཱདེ དྷོཝིཏྭཱ སུཝཎྞཔཱདཔཱིཋེ ཋཔེཏྭཱ བྷཏྟཔཱཏིམཱདཱཡ པཙྩེཀབུདྡྷསྶ པཏྟེ ཨོཀིརི. ཨུཔཌྜྷཱཝསེསེ བྷཏྟེ པཙྩེཀབུདྡྷོ ཧཏྠེན པཏྟཾ པིདཧི. ཨཐ ནཾ, ‘‘བྷནྟེ, ཨེཀཱཡ ཏཎྜུལནཱལི༹ཡཱ པཉྩནྣཾ ཛནཱནཾ པཀྐཨོདནསྶ ཨཡཾ ཨེཀོ ཀོཊྛཱསོ, ཨིམཾ དྭིདྷཱ ཀཱཏུཾ ན སཀྐཱ. མཱ མཡ྄ཧཾ ཨིདྷལོཀེ སངྒཧཾ ཀརོཐ, ཨཧཾ ནིརཝསེསཾ དཱཏུཀཱམོམྷཱི’’ཏི ཝཏྭཱ སབྦཾ བྷཏྟམདཱསི. དཏྭཱ ཙ པན པཏྠནཾ པཊྛཔེསི, ‘‘མཱ, བྷནྟེ, པུན ནིབྦཏྟནིབྦཏྟཊྛཱནེ ཨེཝརཱུཔཾ ཚཱཏཀབྷཡཾ ཨདྡསཾ, ཨིཏོ པཊྛཱཡ སཀལཛམྦུདཱིཔཝཱསཱིནཾ བཱིཛབྷཏྟཾ དཱཏུཾ སམཏྠོ བྷཝེཡྻཾ, སཧཏྠེན ཀམྨཾ ཀཏྭཱ ཛཱིཝིཀཾ ན ཀཔྤེཡྻཾ, ཨཌྜྷཏེརས ཀོཊྛསཏཱནི སོདྷཱཔེཏྭཱ སཱིསཾ ནྷཱཡིཏྭཱ ཏེསཾ དྭཱརེ ནིསཱིདིཏྭཱ ཨུདྡྷཾ ཨོལོཀིཏཀྑཎེཡེཝ མེ རཏྟསཱལིདྷཱརཱ པཏིཏྭཱ སབྦཀོཊྛེ པཱུརེཡྻུཾ. ནིབྦཏྟནིབྦཏྟཊྛཱནེ ཙ ཨཡམེཝ བྷརིཡཱ, ཨཡམེཝ པུཏྟོ, ཨཡམེཝ སུཎིསཱ, ཨཡམེཝ དཱསོ ཧོཏཱུ’’ཏི.

བྷརིཡཱཔིསྶ ‘‘མམ སཱམིཀེ ཛིགྷཙྪཱཡ པཱིལི༹ཡམཱནེ ན སཀྐཱ མཡཱ བྷུཉྫིཏུ’’ནྟི ཙིནྟེཏྭཱ ཨཏྟནོ ཀོཊྛཱསཾ པཙྩེཀབུདྡྷསྶ དཏྭཱ པཏྠནཾ པཊྛཔེསི, ‘‘བྷནྟེ, ཨིདཱནི ནིབྦཏྟནིབྦཏྟཊྛཱནེ ཨེཝརཱུཔཾ ཚཱཏཀབྷཡཾ ན པསྶེཡྻཾ, བྷཏྟཐཱལིཀཾ པུརཏོ ཀཏྭཱ སཀལཛམྦུདཱིཔཝཱསཱིནཾ བྷཏྟཾ དེནྟིཡཱཔི ཙ མེ ཡཱཝ ན ཨུཊྛཧིསྶཱམི, ཏཱཝ གཧིཏགཧིཏཊྛཱནཾ པཱུརིཏམེཝ ཧོཏུ. ཨཡམེཝ སཱམིཀོ, ཨཡམེཝ པུཏྟོ, ཨཡམེཝ སུཎིསཱ, ཨཡམེཝ དཱསོ ཧོཏཱུ’’ཏི. པུཏྟོཔིསྶ ཨཏྟནོ ཀོཊྛཱསཾ པཙྩེཀབུདྡྷསྶ དཏྭཱ པཏྠནཾ པཊྛཔེསི, ‘‘བྷནྟེ, ཨིཏོ པཊྛཱཡ ཨེཝརཱུཔཾ ཚཱཏཀབྷཡཾ ན པསྶེཡྻཾ, ཨེཀཉྩ མེ སཧསྶཐཝིཀཾ གཧེཏྭཱ སཀལཛམྦུདཱིཔཝཱསཱིནཾ ཀཧཱཔཎཾ དེནྟསྶཱཔི ཨཡཾ སཧསྶཐཝིཀཱ པརིཔུཎྞཱཝ ཧོཏུ, ཨིམེཡེཝ མཱཏཱཔིཏརོ ཧོནྟུ, ཨཡཾ བྷརིཡཱ, ཨཡཾ དཱསོ ཧོཏཱུ’’ཏི.

སུཎིསཱཔིསྶ ཨཏྟནོ ཀོཊྛཱསཾ པཙྩེཀབུདྡྷསྶ དཏྭཱ པཏྠནཾ པཊྛཔེསི, ‘‘ཨིཏོ པཊྛཱཡ ཨེཝརཱུཔཾ ཚཱཏཀབྷཡཾ ན པསྶེཡྻཾ, ཨེཀཉྩ མེ དྷཉྙཔིཊཀཾ པུརཏོ ཋཔེཏྭཱ སཀལཛམྦུདཱིཔཝཱསཱིནཾ བཱིཛབྷཏྟཾ དེནྟིཡཱཔི ཁཱིཎབྷཱཝོ མཱ པཉྙཱཡིཏྠ, ནིབྦཏྟནིབྦཏྟཊྛཱནེ ཨིམེཡེཝ སསུརཱ ཧོནྟུ, ཨཡམེཝ སཱམིཀོ, ཨཡམེཝ དཱསོ ཧོཏཱུ’’ཏི. དཱསོཔི ཨཏྟནོ ཀོཊྛཱསཾ པཙྩེཀབུདྡྷསྶ དཏྭཱ པཏྠནཾ པཊྛཔེསི, ‘‘ཨིཏོ པཊྛཱཡ ཨེཝརཱུཔཾ ཚཱཏཀབྷཡཾ ན པསྶེཡྻཾ, སབྦེ ཨིམེ སཱམིཀཱ ཧོནྟུ, ཀསནྟསྶ ཙ མེ ཨིཏོ ཏིསྶོ, ཨེཏྟོ ཏིསྶོ, མཛ྄ཛྷེ ཨེཀཱཏི དཱརུཨམྦཎམཏྟཱ སཏྟ སཏྟ སཱིཏཱཡོ གཙྪནྟཱུ’’ཏི. སོ ཏཾ དིཝསཾ སེནཱཔཏིཊྛཱནཾ པཏྠེཏྭཱ ལདྡྷུཾ སམཏྠོཔི སཱམིཀེསུ སིནེཧེན ‘‘ཨིམེཡེཝ མེ སཱམིཀཱ ཧོནྟཱུ’’ཏི པཏྠནཾ པཊྛཔེསི. པཙྩེཀབུདྡྷོ སབྦེསམྤི ཝཙནཱཝསཱནེ ‘‘ཨེཝཾ ཧོཏཱུ’’ཏི ཝཏྭཱ –

‘‘ཨིཙྪིཏཾ པཏྠིཏཾ ཏུཡ྄ཧཾ, ཁིཔྤམེཝ སམིཛ྄ཛྷཏུ;

སབྦེ པཱུརེནྟུ སངྐཔྤཱ, ཙནྡོ པནྣརསོ ཡཐཱ.

‘‘ཨིཙྪིཏཾ པཏྠིཏཾ ཏུཡ྄ཧཾ, ཁིཔྤམེཝ སམིཛ྄ཛྷཏུ;

སབྦེ པཱུརེནྟུ སངྐཔྤཱ, མཎི ཛོཏིརསོ ཡཐཱ’’ཏི. –

པཙྩེཀབུདྡྷགཱཐཱཧི ཨནུམོདནཾ ཀཏྭཱ ‘‘མཡཱ ཨིམེསཾ ཙིཏྟཾ པསཱདེཏུཾ ཝཊྚཏཱི’’ཏི ཙིནྟེཏྭཱ ‘‘ཡཱཝ གནྡྷམཱདནཔབྦཏཱ ཨིམེ མཾ པསྶནྟཱུ’’ཏི ཨདྷིཊྛཧིཏྭཱ པཀྐཱམི. ཏེཔི ཨོལོཀེཏྭཱཝ ཨཊྛཾསུ. སོ གནྟྭཱ ཏཾ བྷཏྟཾ པཉྩཧི པཙྩེཀབུདྡྷསཏེཧི སདྡྷིཾ སཾཝིབྷཛི. ཏཾ ཏསྶཱནུབྷཱཝེན སབྦེསམྤི པཧོཏི. ཏེ ཨོལོཀེནྟཱཡེཝ ཨཊྛཾསུ.

ཨཏིཀྐནྟེ པན མཛ྄ཛྷནྷིཀེ སེཊྛིབྷརིཡཱ ཨུཀྑལིཾ དྷོཝིཏྭཱ པིདཧིཏྭཱ ཋཔེསི. སེཊྛིཔི ཛིགྷཙྪཱཡ པཱིལི༹ཏོ ནིཔཛྫིཏྭཱ ནིདྡཾ ཨོཀྐམི. སོ སཱཡནྷེ པབུཛ྄ཛྷིཏྭཱ བྷརིཡཾ ཨཱཧ – ‘‘བྷདྡེ, ཨཏིཝིཡ ཚཱཏོམྷི, ཨཏྠི ནུ ཁོ ཨུཀྑལིཡཱ ཏལེ ཛྷཱམཀསིཏྠཱནཱི’’ཏི. སཱ དྷོཝིཏྭཱ ཨུཀྑལིཡཱ ཋཔིཏབྷཱཝཾ ཛཱནནྟཱིཔི ‘‘ནཏྠཱི’’ཏི ཨཝཏྭཱ ‘‘ཨུཀྑལིཾ ཝིཝརིཏྭཱ ཨཱཙིཀྑིསྶཱམཱི’’ཏི ཨུཊྛཱཡ ཨུཀྑལིམཱུལཾ གནྟྭཱ ཨུཀྑལིཾ ཝིཝརི, ཏཱཝདེཝ སུམནམཀུལསདིསཝཎྞསྶ བྷཏྟསྶ པཱུརཱ ཨུཀྑལི པིདྷཱནཾ ཨུཀྑིཔིཏྭཱ ཨཊྛཱསི. སཱ ཏཾ དིསྭཱཝ པཱིཏིཡཱ ཕུཊྛསརཱིརཱ སེཊྛིཾ ཨཱཧ – ‘‘ཨུཊྛེཧི, སཱམི, ཨཧཾ ཨུཀྑལིཾ དྷོཝིཏྭཱ པིདཧིཾ, སཱ པན སུམནམཀུལསདིསཝཎྞསྶ བྷཏྟསྶ པཱུརཱ, པུཉྙཱནི ནཱམ ཀཏྟབྦརཱུཔཱནི, དཱནཾ ནཱམ ཀཏྟབྦཡུཏྟཀཾ. ཨུཊྛེཧི, སཱམི, བྷུཉྫསྶཱུ’’ཏི. སཱ དྭིནྣཾ པིཏཱཔུཏྟཱནཾ བྷཏྟཾ ཨདཱསི. ཏེསུ སུཏྭཱ ཨུཊྛིཏེསུ སུཎིསཱཡ སདྡྷིཾ ནིསཱིདིཏྭཱ བྷུཉྫིཏྭཱ པུཎྞསྶ བྷཏྟཾ ཨདཱསི. གཧིཏགཧིཏཊྛཱནཾ ན ཁཱིཡཏི, ཀཊཙྪུནཱ སཀིཾ གཧིཏཊྛཱནམེཝ པཉྙཱཡཏི. ཏཾདིཝསམེཝ ཀོཊྛཱདཡོ པུབྦེ པཱུརིཏནིཡཱམེནེཝ པུན པཱུརཡིཾསུ. ‘‘སེཊྛིསྶ གེཧེ བྷཏྟཾ ཨུཔྤནྣཾ, བཱིཛབྷཏྟེཧི ཨཏྠིཀཱ ཨཱགནྟྭཱ གཎྷནྟཱུ’’ཏི ནགརེ གྷོསནཾ ཀཱརེསི. མནུསྶཱ ཏསྶ གེཧཏོ བཱིཛབྷཏྟཾ གཎྷིཾསུ. སཀལཛམྦུདཱིཔཝཱསིནོ ཏཾ ནིསྶཱཡ ཛཱིཝིཏཾ ལབྷིཾསུཡེཝ.

སོ ཏཏོ ཙུཏོ དེཝལོཀེ ནིབྦཏྟིཏྭཱ དེཝམནུསྶེསུ སཾསརནྟོ ཨིམསྨིཾ བུདྡྷུཔྤཱདེ བྷདྡིཡནགརེ སེཊྛིཀུལེ ནིབྦཏྟི. བྷརིཡཱཔིསྶ མཧཱབྷོགཀུལེ ནིབྦཏྟིཏྭཱ ཝཡཔྤཏྟཱ ཏསྶེཝ གེཧཾ ཨགམཱསི. ཏསྶ ཏཾ པུབྦཀམྨཾ ནིསྶཱཡ པཙྪཱགེཧེ པུབྦེ ཝུཏྟཔྤཀཱརཱ མེཎྜཀཱ ཨུཊྛཧིཾསུ. པུཏྟོཔི ནེསཾ པུཏྟོཝ, སུཎིསཱ སུཎིསཱཝ, དཱསོ དཱསོཝ ཨཧོསི. ཨཐེཀདིཝསཾ སེཊྛི ཨཏྟནོ པུཉྙཾ ཝཱིམཾསིཏུཀཱམོ ཨཌྜྷཏེརསཱནི ཀོཊྛསཏཱནི སོདྷཱཔེཏྭཱ སཱིསཾ ནྷཱཏོ དྭཱརེ ནིསཱིདིཏྭཱ ཨུདྡྷཾ ཨོལོཀེསི. སབྦཱནིཔི ཝུཏྟཔྤཀཱརཱནཾ རཏྟསཱལཱིནཾ པཱུརཡིཾསུ. སོ སེསཱནམྤི པུཉྙཱནི ཝཱིམཾསིཏུཀཱམོ བྷརིཡཉྩ པུཏྟཱདཡོ ཙ ‘‘ཏུམྷཱཀམྤི པུཉྙཱནི ཝཱིམཾསིསྶཐཱ’’ཏི ཨཱཧ.

ཨཐསྶ བྷརིཡཱ སབྦཱལངྐཱརེཧི ཨལངྐརིཏྭཱ མཧཱཛནསྶ པསྶནྟསྶེཝ ཏཎྜུལེ མིནཱཔེཏྭཱ ཏེཧི བྷཏྟཾ པཙཱཔེཏྭཱ དྭཱརཀོཊྛཀེ པཉྙཏྟཱསནེ ནིསཱིདིཏྭཱ སུཝཎྞཀཊཙྪུཾ ཨཱདཱཡ ‘‘བྷཏྟེན ཨཏྠིཀཱ ཨཱགཙྪནྟཱུ’’ཏི གྷོསཱཔེཏྭཱ ཨཱགཏཱགཏཱནཾ ཨུཔནཱིཏབྷཱཛནཱནི པཱུརེཏྭཱ ཨདཱསི. སཀལདིཝསམྤི དེནྟིཡཱ ཀཊཙྪུནཱ གཧིཏཊྛཱནམེཝ པཉྙཱཡཏི. ཏསྶཱ པན པུརིམབུདྡྷཱནམྤི བྷིཀྑུསངྒྷསྶ ཝཱམཧཏྠེན ཨུཀྑལིཾ དཀྑིཎཧཏྠེན ཀཊཙྪུཾ གཧེཏྭཱ ཨེཝམེཝ པཏྟེ པཱུརེཏྭཱ བྷཏྟསྶ དིནྣཏྟཱ ཝཱམཧཏྠཏལཾ པཱུརེཏྭཱ པདུམལཀྑཎཾ ནིབྦཏྟི, དཀྑིཎཧཏྠཏལཾ པཱུརེཏྭཱ ཙནྡལཀྑཎཾ ནིབྦཏྟི. ཡསྨཱ པན ཝཱམཧཏྠཏོ དྷམྨཀརཎཾ ཨཱདཱཡ བྷིཀྑུསངྒྷསྶ ཨུདཀཾ པརིསྶཱཝེཏྭཱ དདམཱནཱ ཨཔརཱཔརཾ ཝིཙརི, ཏེནསྶཱ དཀྑིཎཔཱདཏལཾ པཱུརེཏྭཱ ཙནྡལཀྑཎཾ ནིབྦཏྟི, ཝཱམཔཱདཏལཾ པཱུརེཏྭཱ པདུམལཀྑཎཾ ནིབྦཏྟི. ཏསྶཱ ཨིམིནཱ ཀཱརཎེན ཙནྡཔདུམཱཏི ནཱམཾ ཀརིཾསུ.

པུཏྟོཔིསྶ སཱིསཾ ནྷཱཏོ སཧསྶཐཝིཀཾ ཨཱདཱཡ ‘‘ཀཧཱཔཎེཧི ཨཏྠིཀཱ ཨཱགཙྪནྟཱུ’’ཏི ཝཏྭཱ ཨཱགཏཱགཏཱནཾ གཧིཏབྷཱཛནཱནི པཱུརེཏྭཱ ཨདཱསི. ཐཝིཀཱཡ ཀཧཱཔཎསཧསྶཾ ཨཧོསིཡེཝ. སུཎིསཱཔིསྶ སབྦཱལངྐཱརེཧི ཨལངྐརིཏྭཱ ཝཱིཧིཔིཊཀཾ ཨཱདཱཡ ཨཱཀཱསངྒཎེ ནིསིནྣཱ ‘‘བཱིཛབྷཏྟེཧི ཨཏྠིཀཱ ཨཱགཙྪནྟཱུ’’ཏི ཝཏྭཱ ཨཱགཏཱགཏཱནཾ གཧིཏབྷཱཛནཱནི པཱུརེཏྭཱ ཨདཱསི. པིཊཀཾ ཡཐཱཔཱུརིཏམེཝ ཨཧོསི. དཱསོཔིསྶ སབྦཱལངྐཱརེཧི ཨལངྐརིཏྭཱ སུཝཎྞཡུགེསུ སུཝཎྞཡོཏྟེཧི གོཎེ ཡོཛེཏྭཱ སུཝཎྞཔཏོདཡཊྛིཾ ཨཱདཱཡ དྭིནྣཾ གོཎཱནཾ གནྡྷཔཉྩངྒུལིཀཱནི དཏྭཱ ཝིསཱཎེསུ སུཝཎྞཀོསཀེ པཊིམུཉྩིཏྭཱ ཁེཏྟཾ གནྟྭཱ པཱཛེསི. ཨིཏོ ཏིསྶོ, ཨེཏྟོ ཏིསྶོ, མཛ྄ཛྷེ ཨེཀཱཏི སཏྟ སཱིཏཱ བྷིཛྫིཏྭཱ ཨགམཾསུ. ཛམྦུདཱིཔཝཱསིནོ བྷཏྟབཱིཛཧིརཉྙསུཝཎྞཱདཱིསུ ཡཐཱརུཙིཏཾ སེཊྛིགེཧཏོཡེཝ གཎྷིཾསུ. ཨིམེ པཉྩ མཧཱཔུཉྙཱ.

ཨེཝཾ མཧཱནུབྷཱཝོ སེཊྛི ‘‘སཏྠཱ ཀིར ཨཱགཏོ’’ཏི སུཏྭཱ ‘‘སཏྠུ པཙྩུགྒམནཾ ཀརིསྶཱམཱི’’ཏི ནིཀྑམནྟོ ཨནྟརཱམགྒེ ཏིཏྠིཡེ དིསྭཱ ཏེཧི ‘‘ཀསྨཱ ཏཾ, གཧཔཏི, ཀིརིཡཝཱདོ སམཱནོ ཨཀིརིཡཝཱདསྶ སམཎསྶ གོཏམསྶ སནྟིཀཾ གཙྪསཱི’’ཏི ནིཝཱརིཡམཱནོཔི ཏེསཾ ཝཙནཾ ཨནཱདིཡིཏྭཱ གནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདི. ཨཐསྶ སཏྠཱ ཨནུཔུབྦིཾ ཀཐཾ ཀཐེསི. སོ དེསནཱཝསཱནེ སོཏཱཔཏྟིཕལཾ པཏྭཱ སཏྠུ ཏིཏྠིཡེཧི ཨཝཎྞཾ ཝཏྭཱ ཨཏྟནོ ནིཝཱརིཏབྷཱཝཾ ཨཱརོཙེསི. ཨཐ ནཾ སཏྠཱ, ‘‘གཧཔཏི, ཨིམེ སཏྟཱ ནཱམ མཧནྟམྤི ཨཏྟནོ དོསཾ ན པསྶནྟི, ཨཝིཛྫམཱནམྤི པརེསཾ དོསཾ ཝིཛྫམཱནཾ ཀཏྭཱ ཏཏྠ ཏཏྠ བྷུསཾ ཝིཡ ཨོཔུནནྟཱི’’ཏི ཝཏྭཱ ཨིམཾ གཱཐམཱཧ –

༢༥༢.

‘‘སུདསྶཾ ཝཛྫམཉྙེསཾ, ཨཏྟནོ པན དུདྡསཾ;

པརེསཉྷི སོ ཝཛྫཱནི, ཨོཔུནཱཏི ཡཐཱ བྷུསཾ;

ཨཏྟནོ པན ཚཱདེཏི, ཀལིཾཝ ཀིཏཝཱ སཋོ’’ཏི.

ཏཏྠ སུདསྶཾ ཝཛྫནྟི པརསྶ ཨཎུམཏྟམྤི ཝཛྫཾ ཁལིཏཾ སུདསྶཾ སུཁེནེཝ པསྶིཏུཾ སཀྐཱ, ཨཏྟནོ པན ཨཏིམཧནྟམྤི དུདྡསཾ. པརེསཾ ཧཱིཏི ཏེནེཝ ཀཱརཎེན སོ པུགྒལོ སངྒྷམཛ྄ཛྷཱདཱིསུ པརེསཾ ཝཛྫཱནི ཨུཙྩཊྛཱནེ ཋཔེཏྭཱ བྷུསཾ ཨོཔུནནྟོ ཝིཡ ཨོཔུནཱཏི. ཀལིཾཝ ཀིཏཝཱ སཋོཏི ཨེཏྠ སཀུཎེསུ ཨཔརཛ྄ཛྷནབྷཱཝེན ཨཏྟབྷཱཝོ ཀལི ནཱམ, སཱཁབྷངྒཱདིཀཾ པཊིཙྪཱདནཾ ཀིཏཝཱ ནཱམ, སཱཀུཎིཀོ སཋོ ནཱམ. ཡཐཱ སཀུཎལུདྡཀོ སཀུཎེ གཧེཏྭཱ མཱརེཏུཀཱམོ ཀིཏཝཱ ཝིཡ ཨཏྟབྷཱཝཾ པཊིཙྪཱདེཏི, ཨེཝཾ ཨཏྟནོ ཝཛྫཾ ཚཱདེཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མེཎྜཀསེཊྛིཝཏྠུ དསམཾ.

༡༡. ཨུཛ྄ཛྷཱནསཉྙིཏྠེརཝཏྠུ

པརཝཛྫཱནུཔསྶིསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨུཛ྄ཛྷཱནསཉྙིཾ ནཱམ ཨེཀཾ ཐེརཾ ཨཱརབྦྷ ཀཐེསི.

སོ ཀིར ‘‘ཨཡཾ ཨེཝཾ ནིཝཱསེཏི, ཨེཝཾ པཱརུཔཏཱི’’ཏི བྷིཀྑཱུནཾ ཨནྟརམེཝ གཝེསནྟོ ཝིཙརཏི. བྷིཀྑཱུ ‘‘ཨསུཀོ ནཱམ, བྷནྟེ, ཐེརོ ཨེཝཾ ཀརོཏཱི’’ཏི སཏྠུ ཨཱརོཙེསུཾ. སཏྠཱ, ‘‘བྷིཀྑཝེ, ཝཏྟསཱིསེ ཋཏྭཱ ཨེཝཾ ཨོཝདནྟོ ཨནནུཔཝཱདོ. ཡོ པན ནིཙྩཾ ཨུཛ྄ཛྷཱནསཉྙིཏཱཡ པརེསཾ ཨནྟརཾ པརིཡེསམཱནོ ཨེཝཾ ཝཏྭཱ ཝིཙརཏི, ཏསྶ ཛྷཱནཱདཱིསུ ཨེཀོཔི ཝིསེསོ ནུཔྤཛྫཏི, ཀེཝལཾ ཨཱསཝཱཡེཝ ཝཌྜྷནྟཱི’’ཏི ཝཏྭཱ ཨིམཾ གཱཐམཱཧ –

༢༥༣.

‘‘པརཝཛྫཱནུཔསྶིསྶ, ནིཙྩཾ ཨུཛ྄ཛྷཱནསཉྙིནོ;

ཨཱསཝཱ ཏསྶ ཝཌྜྷནྟི, ཨཱརཱ སོ ཨཱསཝཀྑཡཱ’’ཏི.

ཏཏྠ ཨུཛ྄ཛྷཱནསཉྙིནོཏི ཨེཝཾ ནིཝཱསེཏབྦཾ ཨེཝཾ པཱརུཔིཏབྦནྟི པརེསཾ ཨནྟརགཝེསིཏཱཡ ཨུཛ྄ཛྷཱནབཧུལསྶ པུགྒལསྶ ཛྷཱནཱདཱིསུ ཨེཀདྷམྨོཔི ན ཝཌྜྷཏི, ཨཐ ཁོ ཨཱསཝཱཝ ཏསྶ ཝཌྜྷནྟི. ཏེནེཝ ཀཱརཎེན སོ ཨརཧཏྟམགྒསངྑཱཏཱ ཨཱསཝཀྑཡཱ ཨཱརཱ དཱུརཾ གཏོཝ ཧོཏཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨུཛ྄ཛྷཱནསཉྙིཏྠེརཝཏྠུ ཨེཀཱདསམཾ.

༡༢. སུབྷདྡཔརིབྦཱཛཀཝཏྠུ

ཨཱཀཱསེཏི ཨིདཾ དྷམྨདེསནཾ སཏྠཱ ཀུསིནཱརཱཡཾ ཨུཔཝཏྟནེ མལླཱནཾ སཱལཝནེ པརིནིབྦཱནམཉྩཀེ ནིཔནྣོ སུབྷདྡཾ པརིབྦཱཛཀཾ ཨཱརབྦྷ ཀཐེསི.

སོ ཀིར ཨཏཱིཏེ ཀནིཊྛབྷཱཏརི ཨེཀསྨིཾ སསྶེ ནཝཀྑཏྟུཾ ཨགྒདཱནཾ དེནྟེ དཱནཾ དཱཏུཾ ཨནིཙྪནྟོ ཨོསཀྐིཏྭཱ ཨཝསཱནེ ཨདཱསི. ཏསྨཱ པཋམབོདྷིཡམྤི མཛ྄ཛྷིམབོདྷིཡམྤི སཏྠཱརཾ དཊྛུཾ ནཱལཏྠ. པཙྪིམབོདྷིཡཾ པན སཏྠུ པརིནིབྦཱནཀཱལེ ‘‘ཨཧཾ ཏཱིསུ པཉྷེསུ ཨཏྟནོ ཀངྑཾ མཧལླཀེ པརིབྦཱཛཀེ པུཙྪིཏྭཱ སམཎཾ གོཏམཾ ‘དཧརོ’ཏི སཉྙཱཡ ན པུཙྪིཾ, ཏསྶ ཙ དཱནི པརིནིབྦཱནཀཱལོ, པཙྪཱ མེ སམཎསྶ གོཏམསྶ ཨཔུཙྪིཏཀཱརཎཱ ཝིཔྤཊིསཱརོ ཨུཔྤཛྫེཡྻཱ’’ཏི སཏྠཱརཾ ཨུཔསངྐམིཏྭཱ ཨཱནནྡཏྠེརེན ནིཝཱརིཡམཱནོཔི སཏྠཱརཱ ཨོཀཱསཾ ཀཏྭཱ, ‘‘ཨཱནནྡ, མཱ སུབྷདྡཾ ནིཝཱརཡི, པུཙྪཏུ མཾ པཉྷ’’ནྟི ཝུཏྟེ ཨནྟོསཱཎིཾ པཝིསིཏྭཱ ཧེཊྛཱམཉྩཀེ ནིསིནྣོ, ‘‘བྷོ སམཎ, ཀིཾ ནུ ཁོ ཨཱཀཱསེ པདཾ ནཱམ ཨཏྠི, ཨིཏོ བཧིདྡྷཱ སམཎོ ནཱམ ཨཏྠི, སངྑཱརཱ སསྶཏཱ ནཱམ ཨཏྠཱི’’ཏི ཨིམེ པཉྷེ པུཙྪི. ཨཐསྶ སཏྠཱ ཏེསཾ ཨབྷཱཝཾ ཨཱཙིཀྑནྟོ ཨིམཱཧི གཱཐཱཧི དྷམྨཾ དེསེསི –

༢༥༤.

‘‘ཨཱཀཱསེཝ པདཾ ནཏྠི, སམཎོ ནཏྠི བཱཧིརེ;

པཔཉྩཱབྷིརཏཱ པཛཱ, ནིཔྤཔཉྩཱ ཏཐཱགཏཱ.

༢༥༥.

‘‘ཨཱཀཱསེཝ པདཾ ནཏྠི, སམཎོ ནཏྠི བཱཧིརེ;

སངྑཱརཱ སསྶཏཱ ནཏྠི, ནཏྠི བུདྡྷཱནམིཉྫིཏ’’ནྟི.

ཏཏྠ པདནྟི ཨིམསྨིཾ ཨཱཀཱསེ ཝཎྞསཎྛཱནཝསེན ཨེཝརཱུཔནྟི པཉྙཱཔེཏབྦཾ ཀསྶཙི པདཾ ནཱམ ནཏྠི. བཱཧིརེཏི མམ སཱསནཏོ བཧིདྡྷཱ མགྒཕལཊྛོ སམཎོ ནཱམ ནཏྠི. པཛཱཏི ཨཡཾ སཏྟལོཀསངྑཱཏཱ པཛཱ ཏཎྷཱདཱིསུ པཔཉྩེསུཡེཝཱབྷིརཏཱ. ནིཔྤཔཉྩཱཏི བོདྷིམཱུལེཡེཝ སབྦཔཔཉྩཱནཾ སམུཙྪིནྣཏྟཱ ནིཔྤཔཉྩཱ ཏཐཱགཏཱ. སངྑཱརཱཏི པཉྩཀྑནྡྷཱ. ཏེསུ ཧི ཨེཀོཔི སསྶཏོ ནཱམ ནཏྠི. ཨིཉྫིཏནྟི བུདྡྷཱནཾ པན ཏཎྷཱམཱནཱདཱིསུ ཨིཉྫིཏེསུ ཡེན སངྑཱརཱ སསྶཏཱཏི གཎྷེཡྻ, ཏཾ ཨེཀཾ ཨིཉྫིཏམྤི ནཱམ ནཏྠཱིཏི ཨཏྠོ.

དེསནཱཝསཱནེ སུབྷདྡོ ཨནཱགཱམིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

སུབྷདྡཔརིབྦཱཛཀཝཏྠུ དྭཱདསམཾ.

མལཝགྒཝཎྞནཱ ནིཊྛིཏཱ.

ཨཊྛཱརསམོ ཝགྒོ.

༡༩. དྷམྨཊྛཝགྒོ

༡. ཝིནིཙྪཡམཧཱམཏྟཝཏྠུ

ན ཏེན ཧོཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཝིནིཙྪཡམཧཱམཏྟེ ཨཱརབྦྷ ཀཐེསི.

ཨེཀདིཝསཉྷི བྷིཀྑཱུ སཱཝཏྠིཡཾ ཨུཏྟརདྭཱརགཱམེ པིཎྜཱཡ ཙརིཏྭཱ པིཎྜཔཱཏཔཊིཀྐནྟཱ ནགརམཛ྄ཛྷེན ཝིཧཱརཾ ཨཱགཙྪནྟི. ཏསྨིཾ ཁཎེ མེགྷོ ཨུཊྛཱཡ པཱཝསྶི. ཏེ སམྨུཁཱགཏཾ ཝིནིཙྪཡསཱལཾ པཝིསིཏྭཱ ཝིནིཙྪཡམཧཱམཏྟེ ལཉྫཾ གཧེཏྭཱ སཱམིཀེ ཨསཱམིཀེ ཀརོནྟེ དིསྭཱ ‘‘ཨཧོ ཨིམེ ཨདྷམྨིཀཱ, མཡཾ པན ‘ཨིམེ དྷམྨེན ཝིནིཙྪཡཾ ཀརོནྟཱི’ཏི སཉྙིནོ ཨཧུམྷཱ’’ཏི ཙིནྟེཏྭཱ ཝསྶེ ཝིགཏེ ཝིཧཱརཾ གནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསིནྣཱ ཏམཏྠཾ ཨཱརོཙེསུཾ. སཏྠཱ ‘‘ན, བྷིཀྑཝེ, ཚནྡཱདིཝསིཀཱ ཧུཏྭཱ སཱཧསེན ཨཏྠཾ ཝིནིཙྪིནནྟཱ དྷམྨཊྛཱ ནཱམ ཧོནྟི, ཨཔརཱདྷཾ པན ཨནུཝིཛྫིཏྭཱ ཨཔརཱདྷཱནུརཱུཔཾ ཨསཱཧསེན ཝིནིཙྪཡཾ ཀརོནྟཱ ཨེཝ དྷམྨཊྛཱ ནཱམ ཧོནྟཱི’’ཏི ཝཏྭཱ ཨིམཱ གཱཐཱ ཨབྷཱསི –

༢༥༦.

‘‘ན ཏེན ཧོཏི དྷམྨཊྛོ, ཡེནཏྠཾ སཱཧསཱ ནཡེ;

ཡོ ཙ ཨཏྠཾ ཨནཏྠཉྩ, ཨུབྷོ ནིཙྪེཡྻ པཎྜིཏོ.

༢༥༧.

‘‘ཨསཱཧསེན དྷམྨེན, སམེན ནཡཏཱི པརེ;

དྷམྨསྶ གུཏྟོ མེདྷཱཝཱི, དྷམྨཊྛོཏི པཝུཙྩཏཱི’’ཏི.

ཏཏྠ ཏེནཱཏི ཨེཏྟཀེནེཝ ཀཱརཎེན. དྷམྨཊྛོཏི རཱཛཱ ཧི ཨཏྟནོ ཀཱཏབྦེ ཝིནིཙྪཡདྷམྨེ ཋིཏོཔི དྷམྨཊྛོ ནཱམ ན ཧོཏི. ཡེནཱཏི ཡེན ཀཱརཎེན. ཨཏྠནྟི ཨོཏིཎྞཾ ཝིནིཙྪིཏབྦཾ ཨཏྠཾ. སཱཧསཱ ནཡེཏི ཚནྡཱདཱིསུ པཏིཊྛིཏོ སཱཧསེན མུསཱཝཱདེན ཝིནིཙྪེཡྻ. ཡོ ཧི ཚནྡེ པཏིཊྛཱཡ ཉཱཏཱིཏི ཝཱ མིཏྟོཏི ཝཱ མུསཱ ཝཏྭཱ ཨསཱམིཀམེཝ སཱམིཀཾ ཀརོཏི, དོསེ པཏིཊྛཱཡ ཨཏྟནོ ཝེརཱིནཾ མུསཱ ཝཏྭཱ སཱམིཀམེཝ ཨསཱམིཀཾ ཀརོཏི, མོཧེ པཏིཊྛཱཡ ལཉྫཾ གཧེཏྭཱ ཝིནིཙྪཡཀཱལེ ཨཉྙཝིཧིཏོ ཝིཡ ཨིཏོ ཙིཏོ ཙ ཨོལོཀེནྟོ མུསཱ ཝཏྭཱ ‘‘ཨིམིནཱ ཛིཏཾ, ཨཡཾ པརཱཛིཏོ’’ཏི པརཾ ནཱིཧརཏི, བྷཡེ པཏིཊྛཱཡ ཀསྶཙིདེཝ ཨིསྶརཛཱཏིཀསྶ པརཱཛཡཾ པཱཔུཎནྟསྶཱཔི ཛཡཾ ཨཱརོཔེཏི, ཨཡཾ སཱཧསེན ཨཏྠཾ ནེཏི ནཱམ. ཨེསོ དྷམྨཊྛོ ནཱམ ན ཧོཏཱིཏི ཨཏྠོ. ཨཏྠཾ ཨནཏྠཉྩཱཏི བྷཱུཏཉྩ ཨབྷཱུཏཉྩ ཀཱརཎཾ. ཨུབྷོ ནིཙྪེཡྻཱཏི ཡོ པན པཎྜིཏོ ཨུབྷོ ཨཏྠཱནཏྠེ ཝིནིཙྪིནིཏྭཱ ཝདཏི. ཨསཱཧསེནཱཏི ཨམུསཱཝཱདེན. དྷམྨེནཱཏི ཝིནིཙྪཡདྷམྨེན, ན ཚནྡཱདིཝསེན. སམེནཱཏི ཨཔརཱདྷཱནུརཱུཔེནེཝ པརེ ནཡཏི, ཛཡཾ ཝཱ པརཱཛཡཾ ཝཱ པཱཔེཏི. དྷམྨསྶ གུཏྟོཏི སོ དྷམྨགུཏྟོ དྷམྨརཀྑིཏོ དྷམྨོཛཔཉྙཱཡ སམནྣཱགཏོ མེདྷཱཝཱི ཝིནིཙྪཡདྷམྨེ ཋིཏཏྟཱ དྷམྨཊྛོཏི པཝུཙྩཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཝིནིཙྪཡམཧཱམཏྟཝཏྠུ པཋམཾ.

༢. ཚབྦགྒིཡཝཏྠུ

ན ཏེན པཎྜིཏོ ཧོཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཚབྦགྒིཡེ ཨཱརབྦྷ ཀཐེསི.

ཏེ ཀིར ཝིཧཱརེཔི གཱམེཔི བྷཏྟགྒཾ ཨཱཀུལཾ ཀརོནྟཱ ཝིཙརནྟི. ཨཐེཀདིཝསེ བྷིཀྑཱུ གཱམེ བྷཏྟཀིཙྩཾ ཀཏྭཱ ཨཱགཏེ དཧརེ སཱམཎེརེ ཙ པུཙྪིཾསུ – ‘‘ཀཱིདིསཾ, ཨཱཝུསོ, བྷཏྟགྒ’’ནྟི? བྷནྟེ, མཱ པུཙྪཐ, ཚབྦགྒིཡཱ ‘‘མཡམེཝ ཝིཡཏྟཱ, མཡམེཝ པཎྜིཏཱ, ཨིམེ པཧརིཏྭཱ སཱིསེ ཀཙཝརཾ ཨཱཀིརིཏྭཱ ནཱིཧརིསྶཱམཱ’’ཏི ཝཏྭཱ ཨམྷེ པིཊྛིཡཾ གཧེཏྭཱ ཀཙཝརཾ ཨོཀིརནྟཱ བྷཏྟགྒཾ ཨཱཀུལཾ ཨཀཾསཱུཏི. བྷིཀྑཱུ སཏྠུ སནྟིཀཾ གནྟྭཱ ཏམཏྠཾ ཨཱརོཙེསུཾ. སཏྠཱ ‘‘ནཱཧཾ, བྷིཀྑཝེ, བཧུཾ བྷཱསིཏྭཱ པརེ ཝིཧེཋཡམཱནཾ ‘པཎྜིཏོ’ཏི ཝདཱམི, ཁེམིནཾ པན ཨཝེརཱིནཾ ཨབྷཡམེཝ པཎྜིཏོཏི ཝདཱམཱི’’ཏི ཝཏྭཱ ཨིམཾ གཱཐམཱཧ –

༢༥༨.

‘‘ན ཏེན པཎྜིཏོ ཧོཏི, ཡཱཝཏཱ བཧུ བྷཱསཏི;

ཁེམཱི ཨཝེརཱི ཨབྷཡོ, པཎྜིཏོཏི པཝུཙྩཏཱི’’ཏི.

ཏཏྠ ཡཱཝཏཱཏི ཡཏྟཀེན ཀཱརཎེན སངྒྷམཛ྄ཛྷཱདཱིསུ བཧུཾ ཀཐེཏི, ཏེན པཎྜིཏོ ནཱམ ན ཧོཏི. ཡོ པན སཡཾ ཁེམཱི པཉྩནྣཾ ཝེརཱནཾ ཨབྷཱཝེན ཨཝེརཱི ནིབྦྷཡོ, ཡཾ ཝཱ ཨཱགམྨ མཧཱཛནསྶ བྷཡཾ ན ཧོཏི, སོ པཎྜིཏོ ནཱམ ཧོཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཚབྦགྒིཡཝཏྠུ དུཏིཡཾ.

༣. ཨེཀུདཱནཁཱིཎཱསཝཏྠེརཝཏྠུ

ན ཏཱཝཏཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀུདཱནཏྠེརཾ ནཱམ ཁཱིཎཱསཝཾ ཨཱརབྦྷ ཀཐེསི.

སོ ཀིར ཨེཀཀོཝ ཨེཀསྨིཾ ཝནསཎྜེ ཝིཧརཏི, ཨེཀམེཝསྶ ཨུདཱནཾ པགུཎཾ –

‘‘ཨདྷིཙེཏསོ ཨཔྤམཛྫཏོ,

མུནིནོ མོནཔཐེསུ སིཀྑཏོ;

སོཀཱ ན བྷཝནྟི ཏཱདིནོ,

ཨུཔསནྟསྶ སདཱ སཏཱིམཏོ’’ཏི. (པཱཙི. ༡༥༣; ཨུདཱ. ༣༧);

སོ ཀིར ཨུཔོསཐདིཝསེསུ སཡམེཝ དྷམྨསྶཝནཾ གྷོསེཏྭཱ ཨིམཾ གཱཐཾ ཝདཏི. པཐཝིཨུནྡྲིཡནསདྡོ ཝིཡ དེཝཏཱནཾ སཱདྷུཀཱརསདྡོ ཧོཏི. ཨཐེཀསྨིཾ ཨུཔོསཐདིཝསེ པཉྩཔཉྩསཏཔརིཝཱརཱ དྭེ ཏིཔིཊཀདྷརཱ བྷིཀྑཱུ ཏསྶ ཝསནཊྛཱནཾ ཨགམཾསུ. སོ ཏེ དིསྭཱཝ ཏུཊྛམཱནསོ ‘‘སཱདྷུ ཝོ ཀཏཾ ཨིདྷ ཨཱགཙྪནྟེཧི, ཨཛྫ མཡཾ ཏུམྷཱཀཾ དྷམྨཾ སུཎིསྶཱམཱ’’ཏི ཨཱཧ. ཨཏྠི པན, ཨཱཝུསོ, ཨིདྷ དྷམྨཾ སོཏུཀཱམཱཏི. ཨཏྠི, བྷནྟེ, ཨཡཾ ཝནསཎྜོ དྷམྨསྶཝནདིཝསེ དེཝཏཱནཾ སཱདྷུཀཱརསདྡེན ཨེཀནིནྣཱདོ ཧོཏཱིཏི. ཏེསུ ཨེཀོ ཏིཔིཊཀདྷརོ དྷམྨཾ ཨོསཱརེསི, ཨེཀོ ཀཐེསི. ཨེཀདེཝཏཱཔི སཱདྷུཀཱརཾ ནཱདཱསི. ཏེ ཨཱཧཾསུ – ‘‘ཏྭཾ, ཨཱཝུསོ, དྷམྨསྶཝནདིཝསེ ཨིམསྨིཾ ཝནསཎྜེ དེཝཏཱ མཧནྟེན སདྡེན སཱདྷུཀཱརཾ དེནྟཱིཏི ཝདེསི, ཀིཾ ནཱམེཏ’’ནྟི. བྷནྟེ, ཨཉྙེསུ དིཝསེསུ སཱདྷུཀཱརསདྡེན ཨེཀནིནྣཱདོ ཨེཝ ཧོཏི, ན ཨཛྫ པན ཛཱནཱམི ‘‘ཀིམེཏ’’ནྟི. ‘‘ཏེན ཧི, ཨཱཝུསོ, ཏྭཾ ཏཱཝ དྷམྨཾ ཀཐེཧཱི’’ཏི. སོ བཱིཛནིཾ གཧེཏྭཱ ཨཱསནེ ནིསིནྣོ ཏམེཝ གཱཐཾ ཝདེསི. དེཝཏཱ མཧནྟེན སདྡེན སཱདྷུཀཱརམདཾསུ. ཨཐ ནེསཾ པརིཝཱརཱ བྷིཀྑཱུ ཨུཛ྄ཛྷཱཡིཾསུ ‘‘ཨིམསྨིཾ ཝནསཎྜེ དེཝཏཱ མུཁོལོཀནེན སཱདྷུཀཱརཾ དདནྟི, ཏིཔིཊཀདྷརབྷིཀྑཱུསུ ཨེཏྟཀཾ བྷཎནྟེསུཔི ཀིཉྩི པསཾསནམཏྟམྤི ཨཝཏྭཱ ཨེཀེན མཧལླཀཏྠེརེན ཨེཀགཱཐཱཡ ཀཐིཏཱཡ མཧཱསདྡེན སཱདྷུཀཱརཾ དདནྟཱི’’ཏི. ཏེཔི ཝིཧཱརཾ གནྟྭཱ སཏྠུ ཏམཏྠཾ ཨཱརོཙེསུཾ.

སཏྠཱ ‘‘ནཱཧཾ, བྷིཀྑཝེ, ཡོ བཧུམྤི ཨུགྒཎྷཏི ཝཱ བྷཱསཏི ཝཱ, ཏཾ དྷམྨདྷརོཏི ཝདཱམི. ཡོ པན ཨེཀམྤི གཱཐཾ ཨུགྒཎྷིཏྭཱ སཙྩཱནི པཊིཝིཛ྄ཛྷཏི, ཨཡཾ དྷམྨདྷརོ ནཱམཱ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༢༥༩.

‘‘ན ཏཱཝཏཱ དྷམྨདྷརོ, ཡཱཝཏཱ བཧུ བྷཱསཏི;

ཡོ ཙ ཨཔྤམྤི སུཏྭཱན, དྷམྨཾ ཀཱཡེན པསྶཏི;

ས ཝེ དྷམྨདྷརོ ཧོཏི, ཡོ དྷམྨཾ ནཔྤམཛྫཏཱི’’ཏི.

ཏཏྠ ཡཱཝཏཱཏི ཡཏྟཀེན ཨུགྒཧཎདྷཱརཎཝཱཙནཱདིནཱ ཀཱརཎེན བཧུཾ བྷཱསཏི, ཏཱཝཏྟཀེན དྷམྨདྷརོ ན ཧོཏི, ཝཾསཱནུརཀྑཀོ པན པཝེཎིཔཱལཀོ ནཱམ ཧོཏི. ཡོ ཙ ཨཔྤམྤཱིཏི ཡོ པན ཨཔྤམཏྟཀམྤི སུཏྭཱ དྷམྨམནྭཱཡ ཨཏྠམནྭཱཡ དྷམྨཱནུདྷམྨཔྤཊིཔནྣོ ཧུཏྭཱ ནཱམཀཱཡེན དུཀྑཱདཱིནི པརིཛཱནནྟོ ཙཏུསཙྩདྷམྨཾ པསྶཏི, ས ཝེ དྷམྨདྷརོ ཧོཏི. ཡོ དྷམྨཾ ནཔྤམཛྫཏཱིཏི ཡོཔི ཨཱརདྡྷཝཱིརིཡོ ཧུཏྭཱ ཨཛྫ ཨཛྫེཝཱཏི པཊིཝེདྷཾ ཨཱཀངྑནྟོ དྷམྨཾ ནཔྤམཛྫཏི, ཨཡམྤི དྷམྨདྷརོཡེཝཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨེཀུདཱནཁཱིཎཱསཝཏྠེརཝཏྠུ ཏཏིཡཾ.

༤. ལཀུཎྜཀབྷདྡིཡཏྠེརཝཏྠུ

ན ཏེན ཐེརོ སོ ཧོཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ལཀུཎྜཀབྷདྡིཡཏྠེརཾ ཨཱརབྦྷ ཀཐེསི.

ཨེཀདིཝསཉྷི ཏསྨིཾ ཐེརེ སཏྠུ ཨུཔཊྛཱནཾ གནྟྭཱ པཀྐནྟམཏྟེ ཏིཾསམཏྟཱ ཨཱརཉྙིཀཱ བྷིཀྑཱུ ཏཾ པསྶནྟཱ ཨེཝ ཨཱགནྟྭཱ སཏྠཱརཾ ཝནྡིཏྭཱ ནིསཱིདིཾསུ. སཏྠཱ ཏེསཾ ཨརཧཏྟཱུཔནིསྶཡཾ དིསྭཱ ཨིམཾ པཉྷཾ པུཙྪི – ‘‘ཨིཏོ གཏཾ ཨེཀཾ ཐེརཾ པསྶཐཱ’’ཏི? ‘‘ན པསྶཱམ, བྷནྟེ’’ཏི. ‘‘ཀིཾ ནུ དིཊྛོ ཝོ’’ཏི? ‘‘ཨེཀཾ, བྷནྟེ, སཱམཎེརཾ པསྶིམྷཱ’’ཏི. ‘‘ན སོ, བྷིཀྑཝེ, སཱམཎེརོ, ཐེརོ ཨེཝ སོ’’ཏི? ‘‘ཨཏིཝིཡ ཁུདྡཀོ, བྷནྟེ’’ཏི. ‘‘ནཱཧཾ, བྷིཀྑཝེ, མཧལླཀབྷཱཝེན ཐེརཱསནེ ནིསིནྣམཏྟཀེན ཐེརོཏི ཝདཱམི. ཡོ པན སཙྩཱནི པཊིཝིཛ྄ཛྷིཏྭཱ མཧཱཛནསྶ ཨཧིཾསཀབྷཱཝེ ཋིཏོ, ཨཡཾ ཐེརོ ནཱམཱ’’ཏི ཝཏྭཱ ཨིམཱ གཱཐཱ ཨབྷཱསི –

༢༦༠.

‘‘ན ཏེན ཐེརོ སོ ཧོཏི, ཡེནསྶ པལིཏཾ སིརོ;

པརིཔཀྐོ ཝཡོ ཏསྶ, མོགྷཛིཎྞོཏི ཝུཙྩཏི.

༢༦༡.

‘‘ཡམྷི སཙྩཉྩ དྷམྨོ ཙ, ཨཧིཾསཱ སཾཡམོ དམོ;

ས ཝེ ཝནྟམལོ དྷཱིརོ, ཐེརོ ཨིཏི པཝུཙྩཏཱི’’ཏི.

ཏཏྠ པརིཔཀྐོཏི པརིཎཏོ, ཝུཌྜྷབྷཱཝཾ པཏྟོཏི ཨཏྠོ. མོགྷཛིཎྞོཏི ཨནྟོ ཐེརཀརཱནཾ དྷམྨཱནཾ ཨབྷཱཝེན ཏུཙྪཛིཎྞོ ནཱམ. ཡམྷི སཙྩཉྩ དྷམྨོ ཙཱཏི ཡམྷི པན པུགྒལེ སོལ༹སཧཱཀཱརེཧི པཊིཝིདྡྷཏྟཱ ཙཏུབྦིདྷཾ སཙྩཾ, ཉཱཎེན སཙྪིཀཏཏྟཱ ནཝཝིདྷོ ལོཀུཏྟརདྷམྨོ ཙ ཨཏྠི. ཨཧིཾསཱཏི ཨཧིཾསནབྷཱཝོ. དེསནཱམཏྟམེཏཾ, ཡམྷི པན ཙཏུབྦིདྷཱཔི ཨཔྤམཉྙཱབྷཱཝནཱ ཨཏྠཱིཏི ཨཏྠོ. སཾཡམོ དམོཏི སཱིལཉྩེཝ ཨིནྡྲིཡསཾཝརོ ཙ. ཝནྟམལོཏི མགྒཉཱཎེན ནཱིཧཊམལོ. དྷཱིརོཏི དྷིཏིསམྤནྣོ. ཐེརོཏི སོ ཨིམེཧི ཐིརབྷཱཝཀཱརཀེཧི སམནྣཱགཏཏྟཱ ཐེརོཏི ཝུཙྩཏཱིཏི ཨཏྠོ.

དེསནཱཝསཱནེ ཏེ བྷིཀྑཱུ ཨརཧཏྟེ པཏིཊྛཧིཾསཱུཏི.

ལཀུཎྜཀབྷདྡིཡཏྠེརཝཏྠུ ཙཏུཏྠཾ.

༥. སམྦཧུལབྷིཀྑུཝཏྠུ

ན ཝཱཀྐརཎམཏྟེནཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ བྷིཀྑཱུ ཨཱརབྦྷ ཀཐེསི.

ཨེཀསྨིཉྷི སམཡེ དཧརེ ཙེཝ སཱམཎེརེ ཙ ཨཏྟནོ དྷམྨཱཙརིཡཱནམེཝ ཙཱིཝརརཛནཱདཱིནི ཝེཡྻཱཝཙྩཱནི ཀརོནྟེ དིསྭཱ ཨེཀཙྩེ ཐེརཱ ཙིནྟཡིཾསུ – ‘‘མཡམྤི བྱཉྫནསམཡེ ཀུསལཱ, ཨམྷཱཀམེཝ ཀིཉྩི ནཏྠི. ཡཾནཱུན མཡཾ སཏྠཱརཾ ཨུཔསངྐམིཏྭཱ ཨེཝཾ ཝདེཡྻཱམ, ‘བྷནྟེ, མཡཾ བྱཉྫནསམཡེ ཀུསལཱ, ཨཉྙེསཾ སནྟིཀེ དྷམྨཾ ཨུགྒཎྷིཏྭཱཔི ཨིམེསཾ སནྟིཀེ ཨསོདྷེཏྭཱ མཱ སཛ྄ཛྷཱཡིཏྠཱཏི དཧརསཱམཎེརེ ཨཱཎཱཔེཐཱ’ཏི. ཨེཝཉྷི ཨམྷཱཀཾ ལཱབྷསཀྐཱརོ ཝཌྜྷིསྶཏཱི’’ཏི. ཏེ སཏྠཱརཾ ཨུཔསངྐམིཏྭཱ ཏཐཱ ཝདིཾསུ.

སཏྠཱ ཏེསཾ ཝཙནཾ སུཏྭཱ ‘‘ཨིམསྨིཾ སཱསནེ པཝེཎིཝསེནེཝ ཨེཝཾ ཝཏྟུཾ ལབྷཏི, ཨིམེ པན ལཱབྷསཀྐཱརེ ནིསྶིཏཱཏི ཉཏྭཱ ཨཧཾ ཏུམྷེ ཝཱཀྐརཎམཏྟེན སཱདྷུརཱུཔཱཏི ན ཝདཱམི. ཡསྶ པནེཏེ ཨིསྶཱདཡོ དྷམྨཱ ཨརཧཏྟམགྒེན སམུཙྪིནྣཱ, ཨེསོ ཨེཝ སཱདྷུརཱུཔོ’’ཏི ཝཏྭཱ ཨིམཱ གཱཐཱ ཨབྷཱསི –

༢༦༢.

‘‘ན ཝཱཀྐརཎམཏྟེན, ཝཎྞཔོཀྑརཏཱཡ ཝཱ;

སཱདྷུརཱུཔོ ནརོ ཧོཏི, ཨིསྶུཀཱི མཙྪརཱི སཋོ.

༢༦༣.

‘‘ཡསྶ ཙེཏཾ སམུཙྪིནྣཾ, མཱུལགྷཙྩཾ སམཱུཧཏཾ;

སཝནྟདོསོ མེདྷཱཝཱི, སཱདྷུརཱུཔོཏི ཝུཙྩཏཱི’’ཏི.

ཏཏྠ ན ཝཱཀྐརཎམཏྟེནཱཏི ཝཙཱིཀརཎམཏྟེན སདྡལཀྑཎསམྤནྣཝཙནམཏྟེན. ཝཎྞཔོཀྑརཏཱཡ ཝཱཏི སརཱིརཝཎྞསྶ མནཱཔབྷཱཝེན ཝཱ. ནརོཏི ཨེཏྟཀེནེཝ ཀཱརཎེན པརལཱབྷཱདཱིསུ ཨིསྶཱམནཀོ པཉྩཝིདྷེན མཙྪེརེན སམནྣཱགཏོ ཀེརཱཊིཀབྷཱཝེན སཋོ ནརོ སཱདྷུརཱུཔོ ན ཧོཏི. ཡསྶ ཙེཏནྟི ཡསྶ ཙ པུགྒལསྶེཏཾ ཨིསྶཱདིདོསཛཱཏཾ ཨརཧཏྟམགྒཉཱཎེན སམཱུལཀཾ ཚིནྣཾ, མཱུལགྷཱཏཾ ཀཏྭཱ སམཱུཧཏཾ, སོ ཝནྟདོསོ དྷམྨོཛཔཉྙཱཡ སམནྣཱགཏོ སཱདྷུརཱུཔོཏི ཝུཙྩཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སམྦཧུལབྷིཀྑུཝཏྠུ པཉྩམཾ.

༦. ཧཏྠཀཝཏྠུ

ན མུཎྜཀེན སམཎོཏི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ ཧཏྠཀཾ ཨཱརབྦྷ ཀཐེསི.

སོ ཀིར ཝཱདཀྑིཏྟོ ‘‘ཏུམྷེ ཨསུཀཝེལཱཡ ཨསུཀཊྛཱནཾ ནཱམ ཨཱགཙྪེཡྻཱཐ, ཝཱདཾ ཀརིསྶཱམཱ’’ཏི ཝཏྭཱ པུརེཏརམེཝ ཏཏྠ གནྟྭཱ ‘‘པསྶཐ, ཏིཏྠིཡཱ མམ བྷཡེན ནཱགཏཱ, ཨེསོཝ པན ནེསཾ པརཱཛཡོ’’ཏིཨཱདཱིནི ཝཏྭཱ ཝཱདཀྑིཏྟོ ཨཉྙེནཉྙཾ པཊིཙརནྟོ ཝིཙརཏི. སཏྠཱ ‘‘ཧཏྠཀོ ཀིར ཨེཝཾ ཀརོཏཱི’’ཏི སུཏྭཱ ཏཾ པཀྐོསཱཔེཏྭཱ ‘‘སཙྩཾ ཀིར ཏྭཾ, ཧཏྠཀ, ཨེཝཾ ཀརོསཱི’’ཏི པུཙྪིཏྭཱ ‘‘སཙྩ’’ནྟི ཝུཏྟེ, ‘‘ཀསྨཱ ཨེཝཾ ཀརོསི? ཨེཝརཱུཔཉྷི མུསཱཝཱདཾ ཀརོནྟོ སཱིསམུཎྜནཱདིམཏྟེནེཝ སམཎོ ནཱམ ན ཧོཏི. ཡོ པན ཨཎཱུནི ཝཱ ཐཱུལཱནི ཝཱ པཱཔཱནི སམེཏྭཱ ཋིཏོ, ཨཡམེཝ སམཎོ’’ཏི ཝཏྭཱ ཨིམཱ གཱཐཱ ཨབྷཱསི –

༢༦༤.

‘‘ན མུཎྜཀེན སམཎོ, ཨབྦཏོ ཨལིཀཾ བྷཎཾ;

ཨིཙྪཱལོབྷསམཱཔནྣོ, སམཎོ ཀིཾ བྷཝིསྶཏི.

༢༦༥.

‘‘ཡོ ཙ སམེཏི པཱཔཱནི, ཨཎུཾ ཐཱུལཱནི སབྦསོ;

སམིཏཏྟཱ ཧི པཱཔཱནཾ, སམཎོཏི པཝུཙྩཏཱི’’ཏི.

ཏཏྠ མུཎྜཀེནཱཏི སཱིསམུཎྜནམཏྟེན. ཨབྦཏོཏི སཱིལཝཏེན ཙ དྷུཏངྒཝཏེན ཙ ཝིརཧིཏོ. ཨལིཀཾ བྷཎནྟི མུསཱཝཱདཾ བྷཎནྟོ ཨསམྤཏྟེསུ ཨཱརམྨཎེསུ ཨིཙྪཱཡ པཏྟེསུ ཙ ལོབྷེན སམནྣཱགཏོ སམཎོ ནཱམ ཀིཾ བྷཝིསྶཏི? སམེཏཱིཏི ཡོ ཙ པརིཏྟཱནི ཝཱ མཧནྟཱནི ཝཱ པཱཔཱནི ཝཱུཔསམེཏི, སོ ཏེསཾ སམིཏཏྟཱ སམཎོཏི པཝུཙྩཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཧཏྠཀཝཏྠུ ཚཊྛཾ.

༧. ཨཉྙཏརབྲཱཧྨཎཝཏྠུ

ན ཏེན བྷིཀྑུ སོ ཧོཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ བྲཱཧྨཎཾ ཨཱརབྦྷ ཀཐེསི.

སོ ཀིར བཱཧིརསམཡེ པབྦཛིཏྭཱ བྷིཀྑཾ ཙརནྟོ ཙིནྟེསི – ‘‘སམཎོ གོཏམོ ཨཏྟནོ སཱཝཀེ བྷིཀྑཱཡ ཙརཎེན ‘བྷིཀྑཱུ’ཏི ཝདཏི, མམྤི ‘བྷིཀྑཱུ’ཏི ཝཏྟུཾ ཝཊྚཏཱི’’ཏི. སོ སཏྠཱརཾ ཨུཔསངྐམིཏྭཱ, ‘‘བྷོ གོཏམ, ཨཧམྤི བྷིཀྑཾ ཙརིཏྭཱ ཛཱིཝཱམི, མམྤི ‘བྷིཀྑཱུ’ཏི ཝདེཧཱི’’ཏི ཨཱཧ. ཨཐ ནཾ སཏྠཱ ‘‘ནཱཧཾ, བྲཱཧྨཎ, བྷིཀྑནམཏྟེན བྷིཀྑཱུཏི ཝདཱམི. ན ཧི ཝིསྶཾ དྷམྨཾ སམཱདཱཡ ཝཏྟནྟོ བྷིཀྑུ ནཱམ ཧོཏི. ཡོ པན སབྦསངྑཱརེསུ སངྑཱཡ ཙརཏི, སོ བྷིཀྑུ ནཱམཱ’’ཏི ཝཏྭཱ ཨིམཱ གཱཐཱ ཨབྷཱསི –

༢༦༦.

‘‘ན ཏེན བྷིཀྑུ སོ ཧོཏི, ཡཱཝཏཱ བྷིཀྑཏེ པརེ;

ཝིསྶཾ དྷམྨཾ སམཱདཱཡ, བྷིཀྑུ ཧོཏི ན ཏཱཝཏཱ.

༢༦༧.

‘‘ཡོདྷ པུཉྙཉྩ པཱཔཉྩ, བཱཧེཏྭཱ བྲཧྨཙརིཡཝཱ;

སངྑཱཡ ལོཀེ ཙརཏི, ས ཝེ བྷིཀྑཱུཏི ཝུཙྩཏཱི’’ཏི.

ཏཏྠ ཡཱཝཏཱཏི ཡཏྟཀེན པརེ བྷིཀྑཏེ, ཏེན བྷིཀྑནམཏྟེན བྷིཀྑུ ནཱམ ན ཧོཏི. ཝིསྶནྟི ཝིསམཾ དྷམྨཾ, ཝིསྶགནྡྷཾ ཝཱ ཀཱཡཀམྨཱདིཀཾ དྷམྨཾ སམཱདཱཡ ཙརནྟོ བྷིཀྑུ ནཱམ ན ཧོཏི. ཡོདྷཱཏི ཡོ ཨིདྷ སཱསནེ ཨུབྷཡམྤེཏཾ པུཉྙཉྩ པཱཔཉྩ མགྒབྲཧྨཙརིཡེན བཱཧེཏྭཱ པནུདིཏྭཱ བྲཧྨཙརིཡཝཱ ཧོཏི. སངྑཱཡཱཏི ཉཱཎེན. ལོཀེཏི ཁནྡྷཱདིལོཀེ ‘‘ཨིམེ ཨཛ྄ཛྷཏྟིཀཱ ཁནྡྷཱ, ཨིམེ བཱཧིརཱ’’ཏི ཨེཝཾ སབྦེཔི དྷམྨེ ཛཱནིཏྭཱ ཙརཏི, སོ ཏེན ཉཱཎེན ཀིལེསཱནཾ བྷིནྣཏྟཱ ‘‘བྷིཀྑཱུ’’ཏི ཝུཙྩཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཉྙཏརབྲཱཧྨཎཝཏྠུ སཏྟམཾ.

༨. ཏིཏྠིཡཝཏྠུ

ན མོནེནཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏིཏྠིཡེ ཨཱརབྦྷ ཀཐེསི.

ཏེ ཀིར བྷུཏྟཊྛཱནེསུ མནུསྶཱནཾ ‘‘ཁེམཾ ཧོཏུ, སུཁཾ ཧོཏུ, ཨཱཡུ ཝཌྜྷཏུ, ཨསུཀཊྛཱནེ ནཱམ ཀལལཾ ཨཏྠི, ཨསུཀཊྛཱནེ ནཱམ ཀཎྚཀོ ཨཏྠི, ཨེཝརཱུཔཾ ཋཱནཾ གནྟུཾ ན ཝཊྚཏཱི’’ཏིཨཱདིནཱ ནཡེན མངྒལཾ ཝཏྭཱ པཀྐམནྟི. བྷིཀྑཱུ པན པཋམབོདྷིཡཾ ཨནུམོདནཱདཱིནཾ ཨནནུཉྙཱཏཀཱལེ བྷཏྟགྒེ མནུསྶཱནཾ ཨནུམོདནཾ ཨཀཏྭཱ པཀྐམནྟི. མནུསྶཱ ‘‘ཏིཏྠིཡཱནཾ སནྟིཀཱ མངྒལཾ སུཎཱམ, བྷདྡནྟཱ པན ཏུཎྷཱིབྷཱུཏཱ པཀྐམནྟཱི’’ཏི ཨུཛ྄ཛྷཱཡིཾསུ. བྷིཀྑཱུ ཏམཏྠཾ སཏྠུ ཨཱརོཙེསུཾ. སཏྠཱ, ‘‘བྷིཀྑཝེ, ཨིཏོ པཊྛཱཡ བྷཏྟགྒཱདཱིསུ ཡཐཱསུཁཾ ཨནུམོདནཾ ཀརོཐ, ཨུཔནིསིནྣཀཐཾ ཀརོཐ, དྷམྨཾ ཀཐེཐཱ’’ཏི ཨནུཛཱནི. ཏེ ཏཐཱ ཀརིཾསུ. མནུསྶཱ ཨནུམོདནཱདཱིནི སུཎནྟཱ ཨུསྶཱཧཔྤཏྟཱ བྷིཀྑཱུ ནིམནྟེཏྭཱ སཀྐཱརཾ ཀརོནྟཱ ཝིཙརནྟི. ཏིཏྠིཡཱ པན ‘‘མཡཾ མུནིནོ མོནཾ ཀརོམ, སམཎསྶ གོཏམསྶ སཱཝཀཱ བྷཏྟགྒཱདཱིསུ མཧཱཀཐཾ ཀཐེནྟཱ ཝིཙརནྟཱི’’ཏི ཨུཛ྄ཛྷཱཡིཾསུ.

སཏྠཱ ཏམཏྠཾ སུཏྭཱ ‘‘ནཱཧཾ, བྷིཀྑཝེ, ཏུཎྷཱིབྷཱཝམཏྟེན ‘མུནཱི’ཏི ཝདཱམི. ཨེཀཙྩེ ཧི ཨཛཱནནྟཱ ན ཀཐེནྟི, ཨེཀཙྩེ ཨཝིསཱརདཏཱཡ, ཨེཀཙྩེ ‘མཱ ནོ ཨིམཾ ཨཏིསཡཏྠཾ ཨཉྙེ ཛཱནིཾསཱུ’ཏི མཙྪེརེན. ཏསྨཱ མོནམཏྟེན མུནི ན ཧོཏི, པཱཔཝཱུཔསམེན པན མུནི ནཱམ ཧོཏཱི’’ཏི ཝཏྭཱ ཨིམཱ གཱཐཱ ཨབྷཱསི –

༢༦༨.

‘‘ན མོནེན མུནཱི ཧོཏི, མཱུལ༹ྷརཱུཔོ ཨཝིདྡསུ;

ཡོ ཙ ཏུལཾཝ པགྒཡ྄ཧ, ཝརམཱདཱཡ པཎྜིཏོ.

༢༦༩.

‘‘པཱཔཱནི པརིཝཛྫེཏི, ས མུནཱི ཏེན སོ མུནི;

ཡོ མུནཱཏི ཨུབྷོ ལོཀེ, མུནི ཏེན པཝུཙྩཏཱི’’ཏི.

ཏཏྠ ན མོནེནཱཏི ཀཱམཉྷི མོནེཡྻཔཊིཔདཱསངྑཱཏེན མགྒཉཱཎམོནེན མུནི ནཱམ ཧོཏི, ཨིདྷ པན ཏུཎྷཱིབྷཱཝཾ སནྡྷཱཡ ‘‘མོནེནཱ’’ཏི ཝུཏྟཾ. མཱུལ༹ྷརཱུཔོཏི ཏུཙྪརཱུཔོ. ཨཝིདྡསཱུཏི ཨཝིཉྙཱུ. ཨེཝརཱུཔོ ཧི ཏུཎྷཱིབྷཱུཏོཔི མུནི ནཱམ ན ཧོཏི. ཨཐ ཝཱ མོནེན མུནི ནཱམ ན ཧོཏི, ཏུཙྪསབྷཱཝོ པན ཨཝིཉྙཱུ ཙ ཧོཏཱིཏི ཨཏྠོ. ཡོ ཙ ཏུལཾཝ པགཡ྄ཧཱཏི ཡཐཱ ཧི ཏུལཾ གཧེཏྭཱ ཋིཏོ ཨཏིརེཀཾ ཙེ ཧོཏི, ཧརཏི. ཨཱུནཾ ཙེ ཧོཏི, པཀྑིཔཏི. ཨེཝམེཝ ཡོ ཨཏིརེཀཾ ཧརནྟོ ཝིཡ པཱཔཾ ཧརཏི པརིཝཛྫེཏི, ཨཱུནཀེ པཀྑིཔནྟོ ཝིཡ ཀུསལཾ པརིཔཱུརེཏི. ཨེཝཉྩ པན ཀརོནྟོ སཱིལསམཱདྷིཔཉྙཱཝིམུཏྟིཝིམུཏྟིཉཱཎདསྶནསངྑཱཏཾ ཝརཾ ཨུཏྟམམེཝ ཨཱདཱཡ པཱཔཱནི ཨཀུསལཀམྨཱནི པརིཝཛྫེཏི. ས མུནཱིཏི སོ མུནི ནཱམཱཏི ཨཏྠོ. ཏེན སོ མུནཱིཏི ཀསྨཱ པན སོ མུནཱིཏི ཙེ? ཡཾ ཧེཊྛཱ ཝུཏྟཀཱརཎཾ, ཏེན སོ མུནཱིཏི ཨཏྠོ. སོ མུནཱཏི ཨུབྷོ ལོཀེཏི ཡོ པུགྒལོ ཨིམསྨིཾ ཁནྡྷཱདིལོཀེ ཏུལཾ ཨཱརོཔེཏྭཱ མིནནྟོ ཝིཡ ‘‘ཨིམེ ཨཛ྄ཛྷཏྟིཀཱ ཁནྡྷཱ, ཨིམེ བཱཧིརཱ’’ཏིཨཱདིནཱ ནཡེན ཨིམེ ཨུབྷོ ཨཏྠེ མུནཱཏི. མུནི ཏེན པཝུཙྩཏཱིཏི ཏེན ཀཱརཎེན མུནཱིཏི ཝུཙྩཏིཡེཝཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཏིཏྠིཡཝཏྠུ ཨཊྛམཾ.

༩. བཱལིསིཀཝཏྠུ

ན ཏེན ཨརིཡོ ཧོཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཨརིཡཾ ནཱམ བཱལིསིཀཾ ཨཱརབྦྷ ཀཐེསི.

ཨེཀདིཝསཉྷི སཏྠཱ ཏསྶ སོཏཱཔཏྟིམགྒསྶཱུཔནིསྶཡཾ དིསྭཱ སཱཝཏྠིཡཱ ཨུཏྟརདྭཱརགཱམེ པིཎྜཱཡ ཙརིཏྭཱ བྷིཀྑུསངྒྷཔརིཝུཏོ ཏཏོ ཨཱགཙྪཏི. ཏསྨིཾ ཁཎེ སོ བཱལིསིཀོ བལིསེན མཙྪེ གཎྷནྟོ བུདྡྷཔྤམུཁཾ བྷིཀྑུསངྒྷཾ དིསྭཱ བལིསཡཊྛིཾ ཚཌྜེཏྭཱ ཨཊྛཱསི. སཏྠཱ ཏསྶ ཨཝིདཱུརེ ཋཱནེ ནིཝཏྟིཏྭཱ ཋིཏོ ‘‘ཏྭཾ ཀིཾ ནཱམོསཱི’’ཏི སཱརིཔུཏྟཏྠེརཱདཱིནཾ ནཱམཱནི པུཙྪི. ཏེཔི ‘‘ཨཧཾ སཱརིཔུཏྟོ ཨཧཾ མོགྒལླཱནོ’’ཏི ཨཏྟནོ ཨཏྟནོ ནཱམཱནི ཀཐཡིཾསུ. བཱལིསིཀོ ཙིནྟེསི – ‘‘སཏྠཱ སབྦེསཾ ནཱམཱནི པུཙྪཏི, མམམྤི ནཱམཾ པུཙྪིསྶཏི མཉྙེ’’ཏི. སཏྠཱ ཏསྶ ཨིཙྪཾ ཉཏྭཱ, ‘‘ཨུཔཱསཀ, ཏྭཾ ཀོ ནཱམོསཱི’’ཏི པུཙྪིཏྭཱ ‘‘ཨཧཾ, བྷནྟེ, ཨརིཡོ ནཱམཱ’’ཏི ཝུཏྟེ ‘‘ན, ཨུཔཱསཀ, ཏཱདིསཱ པཱཎཱཏིཔཱཏིནོ ཨརིཡཱ ནཱམ ཧོནྟི, ཨརིཡཱ པན མཧཱཛནསྶ ཨཧིཾསནབྷཱཝེ ཋིཏཱ’’ཏི ཝཏྭཱ ཨིམཾ གཱཐམཱཧ –

༢༧༠.

‘‘ན ཏེན ཨརིཡོ ཧོཏི, ཡེན པཱཎཱནི ཧིཾསཏི;

ཨཧིཾསཱ སབྦཔཱཎཱནཾ, ཨརིཡོཏི པཝུཙྩཏཱི’’ཏི.

ཏཏྠ ཨཧིཾསཱཏི ཨཧིཾསནེན. ཨིདཾ ཝུཏྟཾ ཧོཏི – ཡེན ཧི པཱཎཱནི ཧིཾསཏི, ན ཏེན ཀཱརཎེན ཨརིཡོ ཧོཏི. ཡོ པན སབྦཔཱཎཱནཾ པཱཎིཨཱདཱིཧི ཨཧིཾསནེན མེཏྟཱདིབྷཱཝནཱཡ པཏིཊྛིཏཏྟཱ ཧིཾསཏོ ཨཱརཱཝ ཋིཏོ, ཨཡཾ ཨརིཡོཏི ཝུཙྩཏཱིཏི ཨཏྠོ.

དེསནཱཝསཱནེ བཱལིསིཀོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

བཱལིསིཀཝཏྠུ ནཝམཾ.

༡༠. སམྦཧུལསཱིལཱདིསམྤནྣབྷིཀྑུཝཏྠུ

ན སཱིལབྦཏམཏྟེནཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ སཱིལཱདིསམྤནྣེ བྷིཀྑཱུ ཨཱརབྦྷ ཀཐེསི.

ཏེསུ ཀིར ཨེཀཙྩཱནཾ ཨེཝཾ ཨཧོསི – ‘‘མཡཾ སམྤནྣསཱིལཱ, མཡཾ དྷུཏངྒདྷརཱ, མཡཾ བཧུསྶུཏཱ, མཡཾ པནྟསེནཱསནཝཱསིནོ, མཡཾ ཛྷཱནལཱབྷིནོ, ན ཨམྷཱཀཾ ཨརཧཏྟཾ དུལླབྷཾ, ཨིཙྪིཏདིཝསེཡེཝ ཨརཧཏྟཾ པཱཔུཎིསྶཱམཱ’’ཏི. ཡེཔི ཏཏྠ ཨནཱགཱམིནོ, ཏེསམྤི ཨེཏདཧོསི – ‘‘ན ཨམྷཱཀཾ ཨིདཱནི ཨརཧཏྟཾ དུལླབྷ’’ནྟི. ཏེ སབྦེཔི ཨེཀདིཝསཾ སཏྠཱརཾ ཨུཔསངྐམིཏྭཱ ཝནྡིཏྭཱ ནིསིནྣཱ ‘‘ཨཔི ནུ ཁོ ཝོ, བྷིཀྑཝེ, པབྦཛིཏཀིཙྩཾ མཏྠཀཾ པཏྟ’’ནྟི སཏྠཱརཱ པུཊྛཱ ཨེཝམཱཧཾསུ – ‘‘བྷནྟེ, མཡཾ ཨེཝརཱུཔཱ ཨེཝརཱུཔཱ ཙ, ཏསྨཱ ‘ཨིཙྪིཏིཙྪིཏཀྑཎེཡེཝ ཨརཧཏྟཾ པཏྟུཾ སམཏྠམྷཱ’ཏི ཙིནྟེཏྭཱ ཝིཧརཱམཱ’’ཏི.

སཏྠཱ ཏེསཾ ཝཙནཾ སུཏྭཱ, ‘‘བྷིཀྑཝེ, བྷིཀྑུནཱ ནཱམ པརིསུདྡྷསཱིལཱདིམཏྟཀེན ཝཱ ཨནཱགཱམིསུཁཔྤཏྟམཏྟཀེན ཝཱ ‘ཨཔྤཀཾ ནོ བྷཝདུཀྑ’ནྟི ཝཏྟུཾ ན ཝཊྚཏི, ཨཱསཝཀྑཡཾ པན ཨཔྤཏྭཱ ‘སུཁིཏོམྷཱི’ཏི ཙིཏྟཾ ན ཨུཔྤཱདེཏབྦ’’ནྟི ཝཏྭཱ ཨིམཱ གཱཐཱ ཨབྷཱསི –

༢༧༡.

‘‘ན སཱིལབྦཏམཏྟེན, བཱཧུསཙྩེན ཝཱ པན;

ཨཐ ཝཱ སམཱདྷིལཱབྷེན, ཝིཝིཏྟསཡནེན ཝཱ.

༢༧༢.

‘‘ཕུསཱམི ནེཀྑམྨསུཁཾ, ཨཔུཐུཛྫནསེཝིཏཾ;

བྷིཀྑུ ཝིསྶཱསམཱཔཱདི, ཨཔྤཏྟོ ཨཱསཝཀྑཡ’’ནྟི.

ཏཏྠ སཱིལབྦཏམཏྟེནཱཏི ཙཏུཔཱརིསུདྡྷིསཱིལམཏྟེན ཝཱ ཏེརསདྷུཏངྒམཏྟེན ཝཱ. བཱཧུསཙྩེན ཝཱཏི ཏིཎྞཾ པིཊཀཱནཾ ཨུགྒཧིཏམཏྟེན ཝཱ. སམཱདྷིལཱབྷེནཱཏི ཨཊྛསམཱཔཏྟིཡཱ ལཱབྷེན. ནེཀྑམྨསུཁནྟི ཨནཱགཱམིསུཁཾ. ཏཾ ཨནཱགཱམིསུཁཾ ཕུསཱམཱིཏི ཨེཏྟཀམཏྟེན ཝཱ. ཨཔུཐུཛྫནསེཝིཏནྟི པུཐུཛྫནེཧི ཨསེཝིཏཾ ཨརིཡསེཝིཏམེཝ. བྷིཀྑཱུཏི ཏེསཾ ཨཉྙཏརཾ ཨཱལཔནྟོ ཨཱཧ. ཝིསྶཱསམཱཔཱདཱིཏི ཝིསྶཱསཾ ན ཨཱཔཛྫེཡྻ. ཨིདཾ ཝུཏྟཾ ཧོཏི – བྷིཀྑུ ཨིམིནཱ སམྤནྣསཱིལཱདིབྷཱཝམཏྟཀེནེཝ ‘‘མཡ྄ཧཾ བྷཝོ ཨཔྤཀོ པརིཏྟཀོ’’ཏི ཨཱསཝཀྑཡསངྑཱཏཾ ཨརཧཏྟཾ ཨཔྤཏྟོ ཧུཏྭཱ བྷིཀྑུ ནཱམ ཝིསྶཱསཾ ནཱཔཛྫེཡྻ. ཡཐཱ ཧི ཨཔྤམཏྟཀོཔི གཱུཐོ དུགྒནྡྷོ ཧོཏི, ཨེཝཾ ཨཔྤམཏྟཀོཔི བྷཝོ དུཀྑོཏི.

དེསནཱཝསཱནེ ཏེ བྷིཀྑཱུ ཨརཧཏྟེ པཏིཊྛཧཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

སམྦཧུལསཱིལཱདིསམྤནྣབྷིཀྑུཝཏྠུ དསམཾ.

དྷམྨཊྛཝགྒཝཎྞནཱ ནིཊྛིཏཱ.

ཨེཀཱུནཝཱིསཏིམོ ཝགྒོ.

༢༠. མགྒཝགྒོ

༡. པཉྩསཏབྷིཀྑུཝཏྠུ

མགྒཱནཊྛངྒིཀོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩསཏེ བྷིཀྑཱུ ཨཱརབྦྷ ཀཐེསི.

ཏེ ཀིར སཏྠརི ཛནཔདཙཱརིཀཾ ཙརིཏྭཱ པུན སཱཝཏྠིཾ ཨཱགཏེ ཨུཔཊྛཱནསཱལཱཡ ནིསཱིདིཏྭཱ ‘‘ཨསུཀགཱམཏོ ཨསུཀགཱམསྶ མགྒོ སམོ, ཨསུཀགཱམསྶ མགྒོ ཝིསམོ, སསཀྑརོ, ཨསཀྑརོ’’ཏིཨཱདིནཱ ནཡེན ཨཏྟནོ ཝིཙརིཏམགྒཾ ཨཱརབྦྷ མགྒཀཐཾ ཀཐེསུཾ. སཏྠཱ ཏེསཾ ཨརཧཏྟསྶཱུཔནིསྶཡཾ དིསྭཱ ཏཾ ཋཱནཾ ཨཱགནྟྭཱ པཉྙཏྟཱསནེ ནིསིནྣོ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཨཡཾ བཱཧིརཀམགྒོ, བྷིཀྑུནཱ ནཱམ ཨརིཡམགྒེ ཀམྨཾ ཀཱཏུཾ ཝཊྚཏི, ཨེཝཉྷི ཀརོནྟོ བྷིཀྑུ སབྦདུཀྑཱ པམུཙྩཏཱི’’ཏི ཝཏྭཱ ཨིམཱ གཱཐཱ ཨབྷཱསི –

༢༧༣.

‘‘མགྒཱནཊྛངྒིཀོ སེཊྛོ, སཙྩཱནཾ ཙཏུརོ པདཱ;

ཝིརཱགོ སེཊྛོ དྷམྨཱནཾ, དྭིཔདཱནཉྩ ཙཀྑུམཱ.

༢༧༤.

‘‘ཨེསེཝ མགྒོ ནཏྠཉྙོ, དསྶནསྶ ཝིསུདྡྷིཡཱ;

ཨེཏཉྷི ཏུམྷེ པཊིཔཛྫཐ, མཱརསྶེཏཾ པམོཧནཾ.

༢༧༥.

‘‘ཨེཏཉྷི ཏུམྷེ པཊིཔནྣཱ, དུཀྑསྶནྟཾ ཀརིསྶཐ;

ཨཀྑཱཏོ ཝོ མཡཱ མགྒོ, ཨཉྙཱཡ སལླཀནྟནཾ.

༢༧༦.

‘‘ཏུམྷེཧི ཀིཙྩམཱཏཔྤཾ, ཨཀྑཱཏཱརོ ཏཐཱགཏཱ;

པཊིཔནྣཱ པམོཀྑནྟི, ཛྷཱཡིནོ མཱརབནྡྷནཱ’’ཏི.

ཏཏྠ མགྒཱནཊྛངྒིཀོཏི ཛངྒྷམགྒཱདཡོ ཝཱ ཧོནྟུ དྭཱསཊྛི དིཊྛིགཏམགྒཱ ཝཱ, ཏེསཾ སབྦེསམྤི མགྒཱནཾ སམྨཱདིཊྛིཨཱདཱིཧི ཨཊྛཧི ཨངྒེཧི མིཙྪཱདིཊྛིཨཱདཱིནཾ ཨཊྛནྣཾ པཧཱནཾ ཀརོནྟོ ནིརོདྷཾ ཨཱརམྨཎཾ ཀཏྭཱ ཙཏཱུསུཔི སཙྩེསུ དུཀྑཔརིཛཱནནཱདིཀིཙྩཾ སཱདྷཡམཱནོ ཨཊྛངྒིཀོ མགྒོ སེཊྛོ ཨུཏྟམོ. སཙྩཱནཾ ཙཏུརོ པདཱཏི ‘‘སཙྩཾ བྷཎེ ན ཀུཛ྄ཛྷེཡྻཱ’’ཏི (དྷ. པ. ༢༢༤) ཨཱགཏཾ ཝཙཱིསཙྩཾ ཝཱ ཧོཏུ, ‘‘སཙྩོ བྲཱཧྨཎོ སཙྩོ ཁཏྟིཡོ’’ཏིཨཱདིབྷེདཾ སམྨུཏིསཙྩཾ ཝཱ ‘‘ཨིདམེཝ སཙྩཾ མོགྷམཉྙ’’ནྟི (དྷ. ས. ༡༡༤༤; མ. ནི. ༢.༡༨༧-༡༨༨) དིཊྛིསཙྩཾ ཝཱ ‘‘དུཀྑཾ ཨརིཡསཙྩ’’ནྟིཨཱདིབྷེདཾ པརམཏྠསཙྩཾ ཝཱ ཧོཏུ, སབྦེསམྤི ཨིམེསཾ སཙྩཱནཾ པརིཛཱནིཏབྦཊྛེན སཙྪིཀཱཏབྦཊྛེན པཧཱཏབྦཊྛེན བྷཱཝེཏབྦཊྛེན ཨེཀཔཊིཝེདྷཊྛེན ཙ ཏཐཔཊིཝེདྷཊྛེན ཙ དུཀྑཾ ཨརིཡསཙྩནྟིཨཱདཡོ ཙཏུརོ པདཱ སེཊྛཱ ནཱམ. ཝིརཱགོ སེཊྛོ དྷམྨཱནནྟི ‘‘ཡཱཝཏཱ, བྷིཀྑཝེ, དྷམྨཱ སངྑཏཱ ཝཱ ཨསངྑཏཱ ཝཱ, ཝིརཱགོ ཏེསཾ ཨགྒམཀྑཱཡཏཱི’’ཏི (ཨིཏིཝུ. ༩༠; ཨ. ནི. ༤.༣༤) ཝཙནཏོ སབྦདྷམྨཱནཾ ནིབྦཱནསངྑཱཏོ ཝིརཱགོ སེཊྛོ. དྭིཔདཱནཉྩ ཙཀྑུམཱཏི སབྦེསཾ དེཝམནུསྶཱདིབྷེདཱནཾ དྭིཔདཱནཾ པཉྩཧི ཙཀྑཱུཧི ཙཀྑུམཱ ཏཐཱགཏོཝ སེཊྛོ. ཙ-སདྡོ སམྤིཎྜནཏྠོ, ཨརཱུཔདྷམྨེ སམྤིཎྜེཏི. ཏསྨཱ ཨརཱུཔདྷམྨཱནམྤི ཏཐཱགཏོ སེཊྛོ ཨུཏྟམོ.

དསྶནསྶ ཝིསུདྡྷིཡཱཏི མགྒཕལདསྶནསྶ ཝིསུདྡྷཏྠཾ ཡོ མཡཱ ‘‘སེཊྛོ’’ཏི ཝུཏྟོ, ཨེསོཝ མགྒོ, ནཏྠཉྙོ. ཨེཏཉྷི ཏུམྷེཏི ཏསྨཱ ཏུམྷེ ཨེཏམེཝ པཊིཔཛྫཐ. མཱརསྶེཏཾ པམོཧནནྟི ཨེཏཾ མཱརམོཧནཾ མཱརམནྠནནྟི ཝུཙྩཏི. དུཀྑསྶནྟནྟི སཀལསྶཔི ཝཊྚདུཀྑསྶ ཨནྟཾ པརིཙྪེདཾ ཀརིསྶཐཱཏི ཨཏྠོ. ཨཉྙཱཡ སལླཀནྟནནྟི རཱགསལླཱདཱིནཾ ཀནྟནཾ ནིམྨཐནཾ ཨབྦཱུཧཎཾ ཨེཏཾ མགྒཾ, མཡཱ ཝིནཱ ཨནུསྶཝཱདཱིཧི ཨཏྟཔཙྩཀྑཏོ ཉཏྭཱཝ ཨཡཾ མགྒོ ཨཀྑཱཏོ, ཨིདཱནི ཏུམྷེཧི ཀིལེསཱནཾ ཨཱཏཱཔནེན ‘‘ཨཱཏཔྤ’’ནྟི སངྑཾ གཏཾ ཏསྶ ཨདྷིགམཏྠཱཡ སམྨཔྤདྷཱནཝཱིརིཡཾ ཀིཙྩཾ ཀརཎཱིཡཾ. ཀེཝལཉྷི ཨཀྑཱཏཱརོཝ ཏཐཱགཏཱ. ཏསྨཱ ཏེཧི ཨཀྑཱཏཝསེན ཡེ པཊིཔནྣཱ དྭཱིཧི ཛྷཱནེཧི ཛྷཱཡིནོ, ཏེ ཏེབྷཱུམཀཝཊྚསངྑཱཏཱ མཱརབནྡྷནཱ པམོཀྑནྟཱིཏི ཨཏྠོ.

དེསནཱཝསཱནེ ཏེ བྷིཀྑཱུ ཨརཧཏྟེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

པཉྩསཏབྷིཀྑུཝཏྠུ པཋམཾ.

༢. ཨནིཙྩལཀྑཎཝཏྠུ

སབྦེ སངྑཱརཱ ཨནིཙྩཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩསཏེ བྷིཀྑཱུ ཨཱརབྦྷ ཀཐེསི.

ཏེ ཀིར སཏྠུ སནྟིཀེ ཀམྨཊྛཱནཾ གཧེཏྭཱ གནྟྭཱ ཨརཉྙེ ཝཱཡམནྟཱཔི ཨརཧཏྟཾ ཨཔྤཏྭཱ ‘‘ཝིསེསེཏྭཱ ཀམྨཊྛཱནཾ ཨུགྒཎྷིསྶཱམཱ’’ཏི སཏྠུ སནྟིཀཾ ཨཱགམིཾསུ. སཏྠཱ ‘‘ཀིཾ ནུ ཁོ ཨིམེསཾ སཔྤཱཡ’’ནྟི ཝཱིམཾསནྟོ ‘‘ཨིམེ ཀསྶཔབུདྡྷཀཱལེ ཝཱིསཏི ཝསྶསཧསྶཱནི ཨནིཙྩལཀྑཎེ ཨནུཡུཉྫིཾསུ, ཏསྨཱ ཨནིཙྩལཀྑཎེནེཝ ཏེསཾ ཨེཀཾ གཱཐཾ དེསེཏུཾ ཝཊྚཏཱི’’ཏི ཙིནྟེཏྭཱ, ‘‘བྷིཀྑཝེ, ཀཱམབྷཝཱདཱིསུ སབྦེཔི སངྑཱརཱ ཧུཏྭཱ ཨབྷཱཝཊྛེན ཨནིཙྩཱ ཨེཝཱ’’ཏི ཝཏྭཱ ཨིམཾ གཱཐམཱཧ –

༢༧༧.

‘‘སབྦེ སངྑཱརཱ ཨནིཙྩཱཏི, ཡདཱ པཉྙཱཡ པསྶཏི;

ཨཐ ནིབྦིནྡཏི དུཀྑེ, ཨེས མགྒོ ཝིསུདྡྷིཡཱ’’ཏི.

ཏཏྠ སབྦེ སངྑཱརཱཏི ཀཱམབྷཝཱདཱིསུ ཨུཔྤནྣཱ ཁནྡྷཱ ཏཏྠ ཏཏྠེཝ ནིརུཛ྄ཛྷནཏོ ཨནིཙྩཱཏི ཡདཱ ཝིཔསྶནཱཔཉྙཱཡ པསྶཏི, ཨཐ ཨིམསྨིཾ ཁནྡྷཔརིཧརཎདུཀྑེ ནིབྦིནྡཏི, ནིབྦིནྡནྟོ དུཀྑཔརིཛཱནནཱདིཝསེན སཙྩཱནི པཊིཝིཛ྄ཛྷཏི. ཨེས མགྒོ ཝིསུདྡྷིཡཱཏི ཝིསུདྡྷཏྠཱཡ ཝོདཱནཏྠཱཡ ཨེས མགྒོཏི ཨཏྠོ.

དེསནཱཝསཱནེ ཏེ བྷིཀྑཱུ ཨརཧཏྟེ པཏིཊྛཧིཾསུ, སམྤཏྟཔརིསཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཨནིཙྩལཀྑཎཝཏྠུ དུཏིཡཾ.

༣. དུཀྑལཀྑཎཝཏྠུ

དུཏིཡགཱཐཱཡཔི ཨེཝརཱུཔམེཝ ཝཏྠུ. ཏདཱ ཧི བྷགཝཱ ཏེསཾ བྷིཀྑཱུནཾ དུཀྑལཀྑཎེ ཀཏཱབྷིཡོགབྷཱཝཾ ཉཏྭཱ, ‘‘བྷིཀྑཝེ, སབྦེཔི ཁནྡྷཱ པཊིཔཱིལ༹ནཊྛེན དུཀྑཱ ཨེཝཱ’’ཏི ཝཏྭཱ ཨིམཾ གཱཐམཱཧ –

༢༧༨.

‘‘སབྦེ སངྑཱརཱ དུཀྑཱཏི, ཡདཱ པཉྙཱཡ པསྶཏི;

ཨཐ ནིབྦིནྡཏི དུཀྑེ, ཨེས མགྒོ ཝིསུདྡྷིཡཱ’’ཏི.

ཏཏྠ དུཀྑཱཏི པཊིཔཱིལ༹ནཊྛེན དུཀྑཱ. སེསཾ པུརིམསདིསམེཝ.

དུཀྑལཀྑཎཝཏྠུ ཏཏིཡཾ.

༤. ཨནཏྟལཀྑཎཝཏྠུ

ཏཏིཡགཱཐཱཡཔི ཨེསེཝ ནཡོ. ཀེཝལཉྷི ཨེཏྠ བྷགཝཱ ཏེསཾ བྷིཀྑཱུནཾ པུབྦེ ཨནཏྟལཀྑཎེ ཨནུཡུཏྟབྷཱཝཾ ཉཏྭཱ, ‘‘བྷིཀྑཝེ, སབྦེཔི ཁནྡྷཱ ཨཝསཝཏྟནཊྛེན ཨནཏྟཱ ཨེཝཱ’’ཏི ཝཏྭཱ ཨིམཾ གཱཐམཱཧ –

༢༧༩.

‘‘སབྦེ དྷམྨཱ ཨནཏྟཱཏི, ཡདཱ པཉྙཱཡ པསྶཏི;

ཨཐ ནིབྦིནྡཏི དུཀྑེ, ཨེས མགྒོ ཝིསུདྡྷིཡཱ’’ཏི.

ཏཏྠ སབྦེ དྷམྨཱཏི པཉྩཀྑནྡྷཱ ཨེཝ ཨདྷིཔྤེཏཱ. ཨནཏྟཱཏི ‘‘མཱ ཛཱིཡནྟུ མཱ མཱིཡནྟཱུ’’ཏི ཝསེ ཝཏྟེཏུཾ ན སཀྐཱཏི ཨཝསཝཏྟནཊྛེན ཨནཏྟཱ ཨཏྟསུཉྙཱ ཨསྶཱམིཀཱ ཨནིསྶརཱཏི ཨཏྠོ. སེསཾ པུརིམསདིསམེཝཱཏི.

ཨནཏྟལཀྑཎཝཏྠུ ཙཏུཏྠཾ.

༥. པདྷཱནཀམྨིཀཏིསྶཏྠེརཝཏྠུ

ཨུཊྛཱནཀཱལམྷཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པདྷཱནཀམྨིཀཏིསྶཏྠེརཾ ཨཱརབྦྷ ཀཐེསི.

སཱཝཏྠིཝཱསིནོ ཀིར པཉྩསཏཱ ཀུལཔུཏྟཱ སཏྠུ སནྟིཀེ པབྦཛིཏྭཱ ཀམྨཊྛཱནཾ གཧེཏྭཱ ཨརཉྙཾ ཨགམཾསུ. ཏེསུ ཨེཀོ ཏཏྠེཝ ཨོཧཱིཡི. ཨཝསེསཱ ཨརཉྙེ སམཎདྷམྨཾ ཀརོནྟཱ ཨརཧཏྟཾ པཏྭཱ ‘‘པཊིལདྡྷགུཎཾ སཏྠུ ཨཱརོཙེསྶཱམཱ’’ཏི པུན སཱཝཏྠིཾ ཨགམཾསུ. ཏེ སཱཝཏྠིཏོ ཡོཛནམཏྟེ ཨེཀསྨིཾ གཱམཀེ པིཎྜཱཡ ཙརནྟེ དིསྭཱ ཨེཀོ ཨུཔཱསཀོ ཡཱགུབྷཏྟཱདཱིཧི པཏིམཱནེཏྭཱ ཨནུམོདནཾ སུཏྭཱ པུནདིཝསཏྠཱཡཔི ནིམནྟེསི. ཏེ ཏདཧེཝ སཱཝཏྠིཾ གནྟྭཱ པཏྟཙཱིཝརཾ པཊིསཱམེཏྭཱ སཱཡནྷསམཡེ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསཱིདིཾསུ. སཏྠཱ ཏེཧི སདྡྷིཾ ཨཏིཝིཡ ཏུཊྛིཾ པཝེདཡམཱནོ པཊིསནྠཱརཾ ཨཀཱསི.

ཨཐ ནེསཾ ཏཏྠ ཨོཧཱིནོ སཧཱཡཀབྷིཀྑུ ཙིནྟེསི – ‘‘སཏྠུ ཨིམེཧི སདྡྷིཾ པཊིསནྠཱརཾ ཀརོནྟསྶ མུཁཾ ནཔྤཧོཏི, མཡ྄ཧཾ པན མགྒཕལཱབྷཱཝེན མཡཱ སདྡྷིཾ ན ཀཐེཏི, ཨཛྫེཝ ཨརཧཏྟཾ པཏྭཱ སཏྠཱརཾ ཨུཔསངྐམིཏྭཱ མཡཱ སདྡྷིཾ ཀཐཱཔེསྶཱམཱི’’ཏི. ཏེཔི བྷིཀྑཱུ, ‘‘བྷནྟེ, མཡཾ ཨཱགམནམགྒེ ཨེཀེན ཨུཔཱསཀེན སྭཱཏནཱཡ ནིམནྟིཏཱ, ཏཏྠ པཱཏོཝ གམིསྶཱམཱ’’ཏི སཏྠཱརཾ ཨཔལོཀེསུཾ. ཨཐ ནེསཾ སཧཱཡཀོ བྷིཀྑུ སབྦརཏྟིཾ ཙངྐམནྟོ ནིདྡཱཝསེན ཙངྐམཀོཊིཡཾ ཨེཀསྨིཾ པཱསཱཎཕལཀེ པཏི, ཨཱུརུཊྛི བྷིཛྫི. སོ མཧཱསདྡེན ཝིརཝི. ཏསྶ ཏེ སཧཱཡཀཱ བྷིཀྑཱུ སདྡཾ སཉྫཱནིཏྭཱ ཨིཏོ ཙིཏོ ཙ ཨུཔདྷཱཝིཾསུ. ཏེསཾ དཱིཔཾ ཛཱལེཏྭཱ ཏསྶ ཀཏྟབྦཀིཙྩཾ ཀརོནྟཱནཾཡེཝ ཨརུཎོ ཨུཊྛཧི, ཏེ ཏཾ གཱམཾ གནྟུཾ ཨོཀཱསཾ ན ལབྷིཾསུ. ཨཐ ནེ སཏྠཱ ཨཱཧ – ‘‘ཀིཾ, བྷིཀྑཝེ, བྷིཀྑཱཙཱརགཱམཾ ན གམིཏྠཱ’’ཏི. ཏེ ‘‘ཨཱམ, བྷནྟེ’’ཏི ཏཾ པཝཏྟིཾ ཨཱརོཙེསུཾ. སཏྠཱ ‘‘ན, བྷིཀྑཝེ, ཨེས ཨིདཱནེཝ ཏུམྷཱཀཾ ལཱབྷནྟརཱཡཾ ཀརོཏི, པུབྦེཔི ཨཀཱསིཡེཝཱ’’ཏི ཝཏྭཱ ཏེཧི ཡཱཙིཏོ ཨཏཱིཏཾ ཨཱཧརིཏྭཱ –

‘‘ཡོ པུབྦེ ཀརཎཱིཡཱནི, པཙྪཱ སོ ཀཱཏུམིཙྪཏི;

ཝརུཎཀཊྛབྷཉྫོཝ, ས པཙྪཱ མནུཏཔྤཏཱི’’ཏི. (ཛཱ. ༡.༡.༧༡) –

ཛཱཏཀཾ ཝིཏྠཱརེསི. ཏདཱ ཀིར ཏེ བྷིཀྑཱུ པཉྩསཏཱ མཱཎཝཀཱ ཨཧེསུཾ, ཀུསཱིཏམཱཎཝཀོ ཨཡཾ བྷིཀྑུ ཨཧོསི, ཨཱཙརིཡོ པན ཏཐཱགཏོཝ ཨཧོསཱིཏི.

སཏྠཱ ཨིམཾ དྷམྨདེསནཾ ཨཱཧརིཏྭཱ, ‘‘བྷིཀྑཝེ, ཡོ ཧི ཨུཊྛཱནཀཱལེ ཨུཊྛཱནཾ ན ཀརོཏི, སཾསནྣསངྐཔྤོ ཧོཏི, ཀུསཱིཏོ སོ ཛྷཱནཱདིབྷེདཾ ཝིསེསཾ ནཱདྷིགཙྪཏཱི’’ཏི ཝཏྭཱ ཨིམཾ གཱཐམཱཧ –

༢༨༠.

‘‘ཨུཊྛཱནཀཱལམྷི ཨནུཊྛཧཱནོ,

ཡུཝཱ བལཱི ཨཱལསིཡཾ ཨུཔེཏོ;

སཾསནྣསངྐཔྤམནོ ཀུསཱིཏོ,

པཉྙཱཡ མགྒཾ ཨལསོ ན ཝིནྡཏཱི’’ཏི.

ཏཏྠ ཨནུཊྛཧཱནོཏི ཨནུཊྛཧནྟོ ཨཝཱཡམནྟོ. ཡུཝཱ བལཱིཏི པཋམཡོབྦནེ ཋིཏོ བལསམྤནྣོཔི ཧུཏྭཱ ཨལསབྷཱཝེན ཨུཔེཏོ ཧོཏི, བྷུཏྭཱ སཡཏི. སཾསནྣསངྐཔྤམནོཏི ཏཱིཧི མིཙྪཱཝིཏཀྐེཧི སུཊྛུ ཨཝསནྣསམྨཱསངྐཔྤཙིཏྟོ. ཀུསཱིཏོཏི ནིབྦཱིརིཡོ. ཨལསོཏི མཧཱཨལསོ པཉྙཱཡ དཊྛབྦཾ ཨརིཡམགྒཾ ཨཔསྶནྟོ ན ཝིནྡཏི, ན པཊིལབྷཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པདྷཱནཀམྨིཀཏིསྶཏྠེརཝཏྠུ པཉྩམཾ.

༦. སཱུཀརཔེཏཝཏྠུ

ཝཱཙཱནུརཀྑཱིཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ སཱུཀརཔེཏཾ ཨཱརབྦྷ ཀཐེསི.

ཨེཀསྨིཉྷི དིཝསེ མཧཱམོགྒལླཱནཏྠེརོ ལཀྑཎཏྠེརེན སདྡྷིཾ གིཛ྄ཛྷཀཱུཊཱ ཨོརོཧནྟོ ཨེཀསྨིཾ པདེསེ སིཏཾ པཱཏྭཱཀཱསི. ‘‘ཀོ ནུ ཁོ, ཨཱཝུསོ, ཧེཏུ སིཏསྶ པཱཏུཀམྨཱཡཱ’’ཏི ལཀྑཎཏྠེརེན པུཊྛོ ‘‘ཨཀཱལོ, ཨཱཝུསོ, ཨིམསྶ པཉྷསྶ, སཏྠུ སནྟིཀེ མཾ པུཙྪེཡྻཱཐཱ’’ཏི ཝཏྭཱ ལཀྑཎཏྠེརེན སདྡྷིཾཡེཝ རཱཛགཧེ པིཎྜཱཡ ཙརིཏྭཱ པིཎྜཔཱཏཔཊིཀྐནྟོ ཝེལུ༹ཝནཾ གནྟྭཱ སཏྠཱརཾ ཝནྡིཏྭཱ ནིསཱིདི. ཨཐ ནཾ ལཀྑཎཏྠེརོ ཏམཏྠཾ པུཙྪི. སོ ཨཱཧ – ‘‘ཨཱཝུསོ, ཨཧཾ ཨེཀཾ པེཏཾ ཨདྡསཾ, ཏསྶ ཏིགཱཝུཏཔྤམཱཎཾ སརཱིརཾ, ཏཾ མནུསྶསརཱིརསདིསཾ. སཱིསཾ པན སཱུཀརསྶ ཝིཡ, ཏསྶ མུཁེ ནངྒུཊྛཾ ཛཱཏཾ, ཏཏོ པུལ༹ཝཱ པགྒྷརནྟི. སྭཱཧཾ ‘ན མེ ཨེཝརཱུཔོ སཏྟོ དིཊྛཔུབྦོ’ཏི ཏཾ དིསྭཱ སིཏཾ པཱཏྭཱཀཱསི’’ནྟི. སཏྠཱ ‘‘ཙཀྑུབྷཱུཏཱ ཝཏ, བྷིཀྑཝེ, མམ སཱཝཀཱ ཝིཧརནྟཱི’’ཏི ཝཏྭཱ ‘‘ཨཧམྤེཏཾ སཏྟཾ བོདྷིམཎྜེཡེཝ ཨདྡསཾ. ‘ཡེ པན མེ ན སདྡཧེཡྻུཾ, ཏེསཾ ཨཧིཏཱཡ ཨསྶཱ’ཏི པརེསཾ ཨནུཀམྤཱཡ ན ཀཐེསིཾ. ཨིདཱནི མོགྒལླཱནཾ སཀྑིཾ ཀཏྭཱ ཀཐེམི. སཙྩཾ, བྷིཀྑཝེ, མོགྒལླཱནོ ཨཱཧཱ’’ཏི ཀཐེསི. ཏཾ སུཏྭཱ བྷིཀྑཱུ སཏྠཱརཾ པུཙྪིཾསུ – ‘‘ཀིཾ པན, བྷནྟེ, ཏསྶ པུབྦཀམྨ’’ནྟི. སཏྠཱ ‘‘ཏེན ཧི, བྷིཀྑཝེ, སུཎཱཐཱ’’ཏི ཨཏཱིཏཾ ཨཱཧརིཏྭཱ ཏསྶ པུབྦཀམྨཾ ཀཐེསི.

ཀསྶཔབུདྡྷཀཱལེ ཀིར ཨེཀསྨིཾ གཱམཀཱཝཱསེ དྭེ ཐེརཱ སམགྒཝཱསཾ ཝསིཾསུ. ཏེསུ ཨེཀོ སཊྛིཝསྶོ, ཨེཀོ ཨེཀཱུནསཊྛིཝསྶོ. ཨེཀཱུནསཊྛིཝསྶོ ཨིཏརསྶ པཏྟཙཱིཝརཾ ཨཱདཱཡ ཝིཙརི, སཱམཎེརོ ཝིཡ སབྦཾ ཝཏྟཔཊིཝཏྟཾ ཨཀཱསི. ཏེསཾ ཨེཀམཱཏུཀུཙྪིཡཾ ཝུཏྠབྷཱཏཱུནཾ ཝིཡ སམགྒཝཱསཾ ཝསནྟཱནཾ ཝསནཊྛཱནཾ ཨེཀོ དྷམྨཀཐིཀོ ཨཱགམི. ཏདཱ ཙ དྷམྨསྶཝནདིཝསོ ཧོཏི. ཐེརཱ ནཾ སངྒཎྷིཏྭཱ ‘‘དྷམྨཀཐཾ ནོ ཀཐེཧི སཔྤུརིསཱ’’ཏི ཨཱཧཾསུ. སོ དྷམྨཀཐཾ ཀཐེསི. ཐེརཱ ‘‘དྷམྨཀཐིཀོ ནོ ལདྡྷོ’’ཏི ཏུཊྛཙིཏྟཱ པུནདིཝསེ ཏཾ ཨཱདཱཡ དྷུརགཱམཾ པིཎྜཱཡ པཝིསིཏྭཱ ཏཏྠ ཀཏབྷཏྟཀིཙྩཱ, ‘‘ཨཱཝུསོ, ཧིཡྻོ ཀཐིཏཊྛཱནཏོཝ ཐོཀཾ དྷམྨཾ ཀཐེཧཱི’’ཏི མནུསྶཱནཾ དྷམྨཾ ཀཐཱཔེསུཾ. མནུསྶཱ དྷམྨཀཐཾ སུཏྭཱ པུནདིཝསཏྠཱཡཔི ནིམནྟཡིཾསུ. ཨེཝཾ སམནྟཱ བྷིཀྑཱཙཱརགཱམེསུ དྭེ དྭེ དིཝསེ ཏཾ ཨཱདཱཡ པིཎྜཱཡ ཙརིཾསུ.

དྷམྨཀཐིཀོ ཙིནྟེསི – ‘‘ཨིམེ དྭེཔི ཨཏིམུདུཀཱ, མཡཱ ཨུབྷོཔེཏེ པལཱཔེཏྭཱ ཨིམསྨིཾ ཝིཧཱརེ ཝསིཏུཾ ཝཊྚཏཱི’’ཏི. སོ སཱཡཾ ཐེརཱུཔཊྛཱནཾ གནྟྭཱ བྷིཀྑཱུནཾ ཨུཊྛཱཡ གཏཀཱལེ ནིཝཏྟིཏྭཱ མཧཱཐེརཾ ཨུཔསངྐམིཏྭཱ, ‘‘བྷནྟེ, ཀིཉྩི ཝཏྟབྦཾ ཨཏྠཱི’’ཏི ཝཏྭཱ ‘‘ཀཐེཧི, ཨཱཝུསོ’’ཏི ཝུཏྟེ ཐོཀཾ ཙིནྟེཏྭཱ, ‘‘བྷནྟེ, ཀཐཱ ནཱམེསཱ མཧཱསཱཝཛྫཱ’’ཏི ཝཏྭཱ ཨཀཐེཏྭཱཝ པཀྐཱམི. ཨནུཐེརསྶཱཔི སནྟིཀཾ གནྟྭཱ ཏཐེཝ ཨཀཱསི. སོ དུཏིཡདིཝསེ ཏཐེཝ ཀཏྭཱ ཏཏིཡདིཝསེ ཏེསཾ ཨཏིཝིཡ ཀོཏུཧལེ ཨུཔྤནྣེ མཧཱཐེརཾ ཨུཔསངྐམིཏྭཱ, ‘‘བྷནྟེ, ཀིཉྩི ཝཏྟབྦཾ ཨཏྠི, ཏུམྷཱཀཾ པན སནྟིཀེ ཝཏྟུཾ ན ཝིསཧཱམཱི’’ཏི ཝཏྭཱ ཐེརེན ‘‘ཧོཏུ, ཨཱཝུསོ, ཀཐེཧཱི’’ཏི ནིཔྤཱིལི༹ཏོ ཨཱཧ – ‘‘ཀིཾ པན, བྷནྟེ, ཨནུཐེརོ ཏུམྷེཧི སདྡྷིཾ སཾབྷོགོ’’ཏི. སཔྤུརིས, ཀིཾ ནཱམེཏཾ ཀཐེསི, མཡཾ ཨེཀམཱཏུཀུཙྪིཡཾ ཝུཏྠཔུཏྟཱ ཝིཡ, ཨམྷེསུ ཨེཀེན ཡཾ ལདྡྷཾ, ཨིཏརེནཱཔི ལདྡྷམེཝ ཧོཏི. མཡཱ ཨེཏསྶ ཨེཏྟཀཾ ཀཱལཾ ཨགུཎོ ནཱམ ན དིཊྛཔུབྦོཏི? ཨེཝཾ, བྷནྟེཏི. ཨཱམཱཝུསོཏི. བྷནྟེ མཾ ཨནུཐེརོ ཨེཝམཱཧ – ‘‘སཔྤུརིས, ཏྭཾ ཀུལཔུཏྟོ, ཨཡཾ མཧཱཐེརོ ལཛྫཱི པེསལོཏི ཨེཏེན སདྡྷིཾ སཾབྷོགཾ ཀརོནྟོ ཨུཔཔརིཀྑིཏྭཱ ཀརེཡྻཱསཱི’’ཏི ཨེཝམེས མཾ ཨཱགཏདིཝསཏོ པཊྛཱཡ ཝདཏཱིཏི.

མཧཱཐེརོ ཏཾ སུཏྭཱཝ ཀུདྡྷམཱནསོ དཎྜཱབྷིཧཏཾ ཀུལཱལབྷཱཛནཾ ཝིཡ བྷིཛྫི. ཨིཏརོཔི ཨུཊྛཱཡ ཨནུཐེརསྶ སནྟིཀཾ གནྟྭཱ ཏཐེཝ ཨཝོཙ, སོཔི ཏཐེཝ བྷིཛྫི. ཏེསུ ཀིཉྩཱཔི ཨེཏྟཀཾ ཀཱལཾ ཨེཀོཔི ཝིསུཾ པིཎྜཱཡ པཝིཊྛཔུབྦོ ནཱམ ནཏྠི, པུནདིཝསེ པན ཝིསུཾ པིཎྜཱཡ པཝིསིཏྭཱ ཨནུཐེརོ པུརེཏརཾ ཨཱགནྟྭཱ ཨུཔཊྛཱནསཱལཱཡ ཨཊྛཱསི, མཧཱཐེརོ པཙྪཱ ཨགམཱསི. ཏཾ དིསྭཱ ཨནུཐེརོ ཙིནྟེསི – ‘‘ཀིཾ ནུ ཁོ ཨིམསྶ པཏྟཙཱིཝརཾ པཊིགྒཧེཏབྦཾ, ཨུདཱཧུ ནོ’’ཏི. སོ ‘‘ན ཨིདཱནི པཊིགྒཧེསྶཱམཱི’’ཏི ཙིནྟེཏྭཱཔི ‘‘ཧོཏུ, ན མཡཱ ཨེཝཾ ཀཏཔུབྦཾ, མཡཱ ཨཏྟནོ ཝཏྟཾ ཧཱཔེཏུཾ ན ཝཊྚཏཱི’’ཏི ཙིཏྟཾ མུདུཀཾ ཀཏྭཱ ཐེརཾ ཨུཔསངྐམིཏྭཱ, ‘‘བྷནྟེ, པཏྟཙཱིཝརཾ དེཐཱ’’ཏི ཨཱཧ. ཨིཏརོ ‘‘གཙྪ, དུབྦིནཱིཏ, ན ཏྭཾ མམ པཏྟཙཱིཝརཾ པཊིགྒཧེཏུཾ ཡུཏྟརཱུཔོ’’ཏི ཨཙྪརཾ པཧརིཏྭཱ ཏེནཔི ‘‘ཨཱམ, བྷནྟེ, ཨཧམྤི ཏུམྷཱཀཾ པཏྟཙཱིཝརཾ ན པཊིགྒཎྷཱམཱིཏི ཙིནྟེསི’’ནྟི ཝུཏྟེ, ‘‘ཨཱཝུསོ ནཝཀ, ཀིཾ ཏྭཾ ཙིནྟེསི, མམ ཨིམསྨིཾ ཝིཧཱརེ ཀོཙི སངྒོ ཨཏྠཱི’’ཏི ཨཱཧ. ཨིཏརོཔི ‘‘ཏུམྷེ པན, བྷནྟེ, ཀིཾ ཨེཝཾ མཉྙཐ ‘མམ ཨིམསྨིཾ ཝིཧཱརེ ཀོཙི སངྒོ ཨཏྠཱི’ཏི, ཨེསོ ཏེ ཝིཧཱརོ’’ཏི ཝཏྭཱ པཏྟཙཱིཝརཾ ཨཱདཱཡ ནིཀྑམི. ཨིཏརོཔི ནིཀྑམི. ཏེ ཨུབྷོཔི ཨེཀམགྒེནཱཔི ཨགནྟྭཱ ཨེཀོ པཙྪིམདྭཱརེན མགྒཾ གཎྷི, ཨེཀོ པུརཏྠིམདྭཱརེན. དྷམྨཀཐིཀོ, ‘‘བྷནྟེ, མཱ ཨེཝཾ ཀརོཐ, མཱ ཨེཝཾ ཀརོཐཱ’’ཏི ཝཏྭཱ ‘‘ཏིཊྛཱཝུསོ’’ཏི ཝུཏྟེ ནིཝཏྟི. སོ པུནདིཝསེ དྷུརགཱམཾ པཝིཊྛོ མནུསྶེཧི, ‘‘བྷནྟེ, བྷདྡནྟཱ ཀུཧི’’ནྟི ཝུཏྟེ, ‘‘ཨཱཝུསོ, མཱ པུཙྪཐ, ཏུམྷཱཀཾ ཀུལུཔཀཱ ཧིཡྻོ ཀལཧཾ ཀཏྭཱ ནིཀྑམིཾསུ, ཨཧཾ ཡཱཙནྟོཔི ནིཝཏྟེཏུཾ ནཱསཀྑི’’ནྟི ཨཱཧ. ཏེསུ བཱལཱ ཏུཎྷཱི ཨཧེསུཾ. པཎྜིཏཱ པན ‘‘ཨམྷེཧི ཨེཏྟཀཾ ཀཱལཾ བྷདྡནྟཱནཾ ཀིཉྩི ཁལིཏཾ ནཱམ ན དིཊྛཔུབྦཾ, ཏེསཾ བྷཡཾ ཨིམཾ ནིསྶཱཡ ཨུཔྤནྣཾ བྷཝིསྶཏཱི’’ཏི དོམནསྶཔྤཏྟཱ ཨཧེསུཾ.

ཏེཔི ཐེརཱ གཏཊྛཱནེ ཙིཏྟསུཁཾ ནཱམ ན ལབྷིཾསུ. མཧཱཐེརོ ཙིནྟེསི – ‘‘ཨཧོ ནཝཀསྶ བྷིཀྑུནོ བྷཱརིཡཾ ཀམྨཾ ཀཏཾ, མུཧུཏྟཾ དིཊྛཾ ནཱམ ཨཱགནྟུཀབྷིཀྑུཾ ཨཱཧ – ‘མཧཱཐེརེན སདྡྷིཾ སཾབྷོགཾ མཱ ཨཀཱསཱི’’’ཏི. ཨིཏརོཔི ཙིནྟེསི – ‘‘ཨཧོ མཧཱཐེརསྶ བྷཱརིཡཾ ཀམྨཾ ཀཏཾ, མུཧུཏྟཾ དིཊྛཾ ནཱམ ཨཱགནྟུཀབྷིཀྑུཾ ཨཱཧ – ‘ཨིམིནཱ སདྡྷིཾ སཾབྷོགཾ མཱ ཨཀཱསཱི’’’ཏི. ཏེསཾ ནེཝ སཛ྄ཛྷཱཡོ ན མནསིཀཱརོ ཨཧོསི. ཏེ ཝསྶསཏཙྩཡེན པཙྪིམདིསཱཡ ཨེཀཾ ཝིཧཱརཾ ཨགམཾསུ. ཏེསཾ ཨེཀམེཝ སེནཱསནཾ པཱཔུཎི. མཧཱཐེརེ པཝིསིཏྭཱ མཉྩཀེ ནིསིནྣེ ཨིཏརོཔི པཱཝིསི. མཧཱཐེརོ ཏཾ དིསྭཱཝ སཉྫཱནིཏྭཱ ཨསྶཱུནི སནྡྷཱརེཏུཾ ནཱསཀྑི. ཨིཏརོཔི མཧཱཐེརཾ སཉྫཱནིཏྭཱ ཨསྶུཔུཎྞེཧི ནེཏྟེཧི ‘‘ཀཐེམི ནུ ཁོ མཱ ཀཐེམཱི’’ཏི ཙིནྟེཏྭཱ ‘‘ན ཏཾ སདྡྷེཡྻརཱུཔ’’ནྟི ཐེརཾ ཝནྡིཏྭཱ ‘‘ཨཧཾ, བྷནྟེ, ཨེཏྟཀཾ ཀཱལཾ ཏུམྷཱཀཾ པཏྟཙཱིཝརཾ གཧེཏྭཱ ཝིཙརིཾ, ཨཔི ནུ ཁོ མེ ཀཱཡདྭཱརཱདཱིསུ ཏུམྷེཧི ཀིཉྩི ཨསཱརུཔྤཾ དིཊྛཔུབྦ’’ནྟི. ‘‘ན དིཊྛཔུབྦཾ, ཨཱཝུསོ’’ཏི. ཨཐ ཀསྨཱ དྷམྨཀཐིཀཾ ཨཝཙུཏྠ ‘‘མཱ ཨེཏེན སདྡྷིཾ སཾབྷོགམཀཱསཱི’’ཏི? ‘‘ནཱཧཾ, ཨཱཝུསོ, ཨེཝཾ ཀཐེམི, ཏཡཱ ཀིར མམ ཨནྟརེ ཨེཝཾ ཝུཏྟ’’ནྟི. ‘‘ཨཧམྤི, བྷནྟེ, ན ཝདཱམཱི’’ཏི. ཏེ ཏསྨིཾ ཁཎེ ‘‘ཏེན ཨམྷེ བྷིནྡིཏུཀཱམེན ཨེཝཾ ཝུཏྟཾ བྷཝིསྶཏཱི’’ཏི ཉཏྭཱ ཨཉྙམཉྙཾ ཨཙྩཡཾ དེསཡིཾསུ. ཏེ ཝསྶསཏཾ ཙིཏྟསྶཱདཾ ཨལབྷནྟཱ ཏཾ དིཝསཾ སམགྒཱ ཧུཏྭཱ ‘‘ཨཱཡཱམ, ནཾ ཏཏོ ཝིཧཱརཱ ནིཀྐཌྜྷིསྶཱམཱ’’ཏི པཀྐམིཏྭཱ ཨནུཔུབྦེན ཏཾ ཝིཧཱརཾ ཨགམཾསུ.

དྷམྨཀཐིཀོཔི ཐེརེ དིསྭཱ པཏྟཙཱིཝརཾ པཊིགྒཧེཏུཾ ཨུཔགཙྪི. ཐེརཱ ‘‘ན ཏྭཾ ཨིམསྨིཾ ཝིཧཱརེ ཝསིཏུཾ ཡུཏྟརཱུཔོ’’ཏི ཨཙྪརཾ པཧརིཾསུ. སོ སཎྛཱཏུཾ ཨསཀྐོནྟོ ཏཱཝདེཝ ནིཀྑམིཏྭཱ པལཱཡི. ཨཐ ནཾ ཝཱིསཏི ཝསྶསཧསྶཱནི ཀཏོ སམཎདྷམྨོ སནྡྷཱརེཏུཾ ནཱསཀྑི, ཏཏོ ཙཝིཏྭཱ ཨཝཱིཙིམྷི ནིབྦཏྟོ ཨེཀཾ བུདྡྷནྟརཾ པཙྩིཏྭཱ ཨིདཱནི གིཛ྄ཛྷཀཱུཊེ ཝུཏྟཔྤཀཱརེན ཨཏྟབྷཱཝེན དུཀྑཾ ཨནུབྷོཏཱིཏི.

སཏྠཱ ཨིདཾ ཏསྶ པུབྦཀམྨཾ ཨཱཧརིཏྭཱ, ‘‘བྷིཀྑཝེ, བྷིཀྑུནཱ ནཱམ ཀཱཡཱདཱིཧི ཨུཔསནྟརཱུཔེན བྷཝིཏབྦ’’ནྟི ཝཏྭཱ ཨིམཾ གཱཐམཱཧ –

༢༨༡.

‘‘ཝཱཙཱནུརཀྑཱི མནསཱ སུསཾཝུཏོ,

ཀཱཡེན ཙ ནཱཀུསལཾ ཀཡིརཱ;

ཨེཏེ ཏཡོ ཀམྨཔཐེ ཝིསོདྷཡེ,

ཨཱརཱདྷཡེ མགྒམིསིཔྤཝེདིཏ’’ནྟི.

ཏསྶཏྠོ – ཙཏུནྣཾ ཝཙཱིདུཙྩརིཏཱནཾ ཝཛྫནེན ཝཱཙཱནུརཀྑཱི ཨབྷིཛ྄ཛྷཱདཱིནཾ ཨནུཔྤཱདནེན མནསཱ ཙ སུཊྛུ སཾཝུཏོ པཱཎཱཏིཔཱཏཱདཡོ པཛཧནྟོ ཀཱཡེན ཙ ཨཀུསལཾ ན ཀཡིརཱ. ཨེཝཾ ཨེཏེ ཏཡོ ཀམྨཔཐེ ཝིསོདྷཡེ. ཨེཝཾ ཝིསོདྷེནྟོ ཧི སཱིལཀྑནྡྷཱདཱིནཾ ཨེསཀེཧི བུདྡྷཱདཱིཧི ཨིསཱིཧི པཝེདིཏཾ ཨཊྛངྒིཀམགྒཾ ཨཱརཱདྷེཡྻཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཱུཀརཔེཏཝཏྠུ ཚཊྛཾ.

༧. པོཊྛིལཏྠེརཝཏྠུ

ཡོགཱ ཝེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པོཊྛིལཾ ནཱམ ཐེརཾ ཨཱརབྦྷ ཀཐེསི.

སོ ཀིར སཏྟནྣམྤི བུདྡྷཱནཾ སཱསནེ ཏེཔིཊཀོ པཉྩནྣཾ བྷིཀྑུསཏཱནཾ དྷམྨཾ ཝཱཙེསི. སཏྠཱ ཙིནྟེསི – ‘‘ཨིམསྶ བྷིཀྑུནོ ‘ཨཏྟནོ དུཀྑནིསྶརཎཾ ཀརིསྶཱམཱི’ཏི ཙིཏྟམྤི ནཏྠི སཾཝེཛེསྶཱམི ན’’ནྟི. ཏཏོ པཊྛཱཡ ཏཾ ཐེརཾ ཨཏྟནོ ཨུཔཊྛཱནཾ ཨཱགཏཀཱལེ ‘‘ཨེཧི, ཏུཙྪཔོཊྛིལ, ཝནྡ, ཏུཙྪཔོཊྛིལ, ནིསཱིད, ཏུཙྪཔོཊྛིལ, ཡཱཧི, ཏུཙྪཔོཊྛིལཱ’’ཏི ཝདཏི. ཨུཊྛཱཡ གཏཀཱལེཔི ‘‘ཏུཙྪཔོཊྛིལོ གཏོ’’ཏི ཝདཏི. སོ ཙིནྟེསི – ‘‘ཨཧཾ སཱཊྛཀཐཱནི ཏཱིཎི པིཊཀཱནི དྷཱརེམི, པཉྩནྣཾ བྷིཀྑུསཏཱནཾ ཨཊྛཱརས མཧཱགཎེ དྷམྨཾ ཝཱཙེམི, ཨཐ པན མཾ སཏྠཱ ཨབྷིཀྑཎཾ, ‘ཏུཙྪཔོཊྛིལཱ’ཏི ཝདེཏི, ཨདྡྷཱ མཾ སཏྠཱ ཛྷཱནཱདཱིནཾ ཨབྷཱཝེན ཨེཝཾ ཝདེཏཱི’’ཏི. སོ ཨུཔྤནྣསཾཝེགོ ‘‘དཱནི ཨརཉྙཾ པཝིསིཏྭཱ སམཎདྷམྨཾ ཀརིསྶཱམཱི’’ཏི སཡམེཝ པཏྟཙཱིཝརཾ སཾཝིདཧིཏྭཱ པཙྩཱུསཀཱལེ སབྦཔཙྪཱ དྷམྨཾ ཨུགྒཎྷིཏྭཱ ནིཀྑམནྟེན བྷིཀྑུནཱ སདྡྷིཾ ནིཀྑམི. པརིཝེཎེ ནིསཱིདིཏྭཱ སཛ྄ཛྷཱཡནྟཱ ནཾ ‘‘ཨཱཙརིཡོ’’ཏི ན སལླཀྑེསུཾ. སོ ཝཱིསཡོཛནསཏམགྒཾ གནྟྭཱ ཨེཀསྨིཾ ཨརཉྙཱཝཱསེ ཏིཾས བྷིཀྑཱུ ཝསནྟི, ཏེ ཨུཔསངྐམིཏྭཱ སངྒྷཏྠེརཾ ཝནྡིཏྭཱ, ‘‘བྷནྟེ, ཨཝསྶཡོ མེ ཧོཐཱ’’ཏི ཨཱཧ. ཨཱཝུསོ, ཏྭཾ དྷམྨཀཐིཀོ, ཨམྷེཧི ནཱམ ཏཾ ནིསྶཱཡ ཀིཉྩི ཛཱནིཏབྦཾ བྷཝེཡྻ, ཀསྨཱ ཨེཝཾ ཝདེསཱིཏི? མཱ, བྷནྟེ, ཨེཝཾ ཀརོཐ, ཨཝསྶཡོ མེ ཧོཐཱཏི. ཏེ པན སབྦེ ཁཱིཎཱསཝཱཝ. ཨཐ ནཾ མཧཱཐེརོ ‘‘ཨིམསྶ ཨུགྒཧཾ ནིསྶཱཡ མཱནོ ཨཏྠིཡེཝཱ’’ཏི ཨནུཐེརསྶ སནྟིཀཾ པཧིཎི. སོཔི ནཾ ཏཐེཝཱཧ. ཨིམིནཱ ནཱིཧཱརེན སབྦེཔི ཏཾ པེསེནྟཱ དིཝཱཊྛཱནེ ནིསཱིདིཏྭཱ སཱུཙིཀམྨཾ ཀརོནྟསྶ སབྦནཝཀསྶ སཏྟཝསྶིཀསཱམཎེརསྶ སནྟིཀཾ པཧིཎིཾསུ. ཨེཝམསྶ མཱནཾ ནཱིཧརིཾསུ.

སོ ནིཧཏམཱནོ སཱམཎེརསྶ སནྟིཀེ ཨཉྫལིཾ པགྒཧེཏྭཱ ‘‘ཨཝསྶཡོ མེ ཧོཧི སཔྤུརིསཱ’’ཏི ཨཱཧ. ཨཧོ, ཨཱཙརིཡ, ཀིཾ ནཱམེཏཾ ཀཐེཐ, ཏུམྷེ མཧལླཀཱ བཧུསྶུཏཱ, ཏུམྷཱཀཾ སནྟིཀེ མཡཱ ཀིཉྩི ཀཱརཎཾ ཛཱནིཏབྦཾ བྷཝེཡྻཱཏི. མཱ ཨེཝཾ ཀརི, སཔྤུརིས, ཧོཧིཡེཝ མེ ཨཝསྶཡོཏི. བྷནྟེ, སཙེཔི ཨོཝཱདཀྑམཱ བྷཝིསྶཐ, བྷཝིསྶཱམི ཝོ ཨཝསྶཡོཏི. ཧོམི, སཔྤུརིས, ཨཧཾ ‘‘ཨགྒིཾ པཝིསཱ’’ཏི ཝུཏྟེ ཨགྒིཾ པཝིསཱམིཡེཝཱཏི. ཨཐ ནཾ སོ ཨཝིདཱུརེ ཨེཀཾ སརཾ དསྶེཏྭཱ, ‘‘བྷནྟེ, ཡཐཱནིཝཏྠཔཱརུཏོཝ ཨིམཾ སརཾ པཝིསཐཱ’’ཏི ཨཱཧ. སོ ཧིསྶ མཧགྒྷཱནཾ དུཔཊྚཙཱིཝརཱནཾ ནིཝཏྠཔཱརུཏབྷཱཝཾ ཉཏྭཱཔི ‘‘ཨོཝཱདཀྑམོ ནུ ཁོ’’ཏི ཝཱིམཾསནྟོ ཨེཝམཱཧ. ཐེརོཔི ཨེཀཝཙནེནེཝ ཨུདཀཾ ཨོཏརི. ཨཐ ནཾ ཙཱིཝརཀཎྞཱནཾ ཏེམིཏཀཱལེ ‘‘ཨེཐ, བྷནྟེ’’ཏི ཝཏྭཱ ཨེཀཝཙནེནེཝ ཨཱགནྟྭཱ ཋིཏཾ ཨཱཧ – ‘‘བྷནྟེ, ཨེཀསྨིཾ ཝམྨིཀེ ཚ ཚིདྡཱནི, ཏཏྠ ཨེཀེན ཚིདྡེན གོདྷཱ ཨནྟོ པཝིཊྛཱ, ཏཾ གཎྷིཏུཀཱམོ ཨིཏརཱནི པཉྩ ཚིདྡཱནི ཐཀེཏྭཱ ཚཊྛཾ བྷིནྡིཏྭཱ པཝིཊྛཚིདྡེནེཝ གཎྷཱཏི, ཨེཝཾ ཏུམྷེཔི ཚདྭཱརིཀེསུ ཨཱརམྨཎེསུ སེསཱནི པཉྩདྭཱརཱནི པིདྷཱཡ མནོདྭཱརེ ཀམྨཾ པཊྛཔེཐཱ’’ཏི. བཧུསྶུཏསྶ བྷིཀྑུནོ ཨེཏྟཀེནེཝ པདཱིཔུཛྫལནཾ ཝིཡ ཨཧོསི. སོ ‘‘ཨེཏྟཀམེཝ ཧོཏུ སཔྤུརིསཱ’’ཏི ཀརཛཀཱཡེ ཉཱཎཾ ཨོཏཱརེཏྭཱ སམཎདྷམྨཾ ཨཱརབྷི.

སཏྠཱ ཝཱིསཡོཛནསཏམཏྠཀེ ནིསིནྣོཝ ཏཾ བྷིཀྑུཾ ཨོལོཀེཏྭཱ ‘‘ཡཐེཝཱཡཾ བྷིཀྑུ བྷཱུརིཔཉྙོ, ཨེཝམེཝཾ ཨནེན ཨཏྟཱནཾ པཏིཊྛཱཔེཏུཾ ཝཊྚཏཱི’’ཏི ཙིནྟེཏྭཱ ཏེན སདྡྷིཾ ཀཐེནྟོ ཝིཡ ཨོབྷཱསཾ ཕརིཏྭཱ ཨིམཾ གཱཐམཱཧ –

༢༨༢.

‘‘ཡོགཱ ཝེ ཛཱཡཏཱི བྷཱུརི, ཨཡོགཱ བྷཱུརིསངྑཡོ;

ཨེཏཾ དྭེདྷཱཔཐཾ ཉཏྭཱ, བྷཝཱཡ ཝིབྷཝཱཡ ཙ;

ཏཐཱཏྟཱནཾ ནིཝེསེཡྻ, ཡཐཱ བྷཱུརི པཝཌྜྷཏཱི’’ཏི.

ཏཏྠ ཡོགཱཏི ཨཊྛཏིཾསཱཡ ཨཱརམྨཎེསུ ཡོནིསོ མནསིཀཱརཱ. བྷཱུརཱིཏི པཐཝཱིསམཱཡ ཝིཏྠཏཱཡ པཉྙཱཡེཏཾ ནཱམཾ. སངྑཡོཏི ཝིནཱསོ. ཨེཏཾ དྭེདྷཱཔཐནྟི ཨེཏཾ ཡོགཉྩ ཨཡོགཉྩ. བྷཝཱཡ ཝིབྷཝཱཡ ཙཱཏི ཝུདྡྷིཡཱ ཙ ཨཝུདྡྷིཡཱ ཙ. ཏཐཱཏི ཡཐཱ ཨཡཾ བྷཱུརིསངྑཱཏཱ པཉྙཱ པཝཌྜྷཏི, ཨེཝཾ ཨཏྟཱནཾ ནིཝེསེཡྻཱཏི ཨཏྠོ.

དེསནཱཝསཱནེ པོཊྛིལཏྠེརོ ཨརཧཏྟེ པཏིཊྛཧཱིཏི.

པོཊྛིལཏྠེརཝཏྠུ སཏྟམཾ.

༨. པཉྩམཧལླཀཏྠེརཝཏྠུ

ཝནཾ ཚིནྡཐཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ མཧལླཀེ བྷིཀྑཱུ ཨཱརབྦྷ ཀཐེསི.

ཏེ ཀིར གིཧིཀཱལེ སཱཝཏྠིཡཾ ཀུཊུམྦིཀཱ མཧདྡྷནཱ ཨཉྙམཉྙསཧཱཡཀཱ ཨེཀཏོ པུཉྙཱནི ཀརོནྟཱ སཏྠུ དྷམྨདེསནཾ སུཏྭཱ ‘‘མཡཾ མཧལླཀཱ, ཀིཾ ནོ གྷརཱཝཱསེནཱ’’ཏི སཏྠཱརཾ པབྦཛྫཾ ཡཱཙིཏྭཱ པབྦཛིཾསུ, མཧལླཀབྷཱཝེན པན དྷམྨཾ པརིཡཱཔུཎིཏུཾ ཨསཀྐོནྟཱ ཝིཧཱརཔརིཡནྟེ པཎྞསཱལཾ ཀཱརེཏྭཱ ཨེཀཏོཝ ཝསིཾསུ. པིཎྜཱཡ ཙརནྟཱཔི ཡེབྷུཡྻེན པུཏྟདཱརསྶེཝ གེཧཾ གནྟྭཱ བྷུཉྫིཾསུ. ཏེསུ ཨེཀསྶ པུརཱཎདུཏིཡིཀཱ མདྷུརཔཱཙིཀཱ ནཱམ, སཱ ཏེསཾ སབྦེསམྤི ཨུཔཀཱརིཀཱ ཨཧོསི. ཀསྨཱ སབྦེཔི ཨཏྟནཱ ལདྡྷཱཧཱརཾ གཧེཏྭཱ ཏསྶཱ ཨེཝ གེཧེ ནིསཱིདིཏྭཱ བྷུཉྫནྟི? སཱཔི ནེསཾ ཡཐཱསནྣིཧིཏཾ སཱུཔབྱཉྫནཾ དེཏི. སཱ ཨཉྙཏརཱབཱདྷེན ཕུཊྛཱ ཀཱལམཀཱསི. ཨཐ ཏེ མཧལླཀཏྠེརཱ སཧཱཡཀསྶ ཐེརསྶ པཎྞསཱལཱཡ སནྣིཔཏིཏྭཱ ཨཉྙམཉྙཾ གཱིཝཱསུ གཧེཏྭཱ ‘‘མདྷུརཔཱཙིཀཱ ཨུཔཱསིཀཱ ཀཱལཀཏཱ’’ཏི ཝིལཔནྟཱ རོདིཾསུ. བྷིཀྑཱུཧི ཙ སམནྟཏོ ཨུཔདྷཱཝིཏྭཱ ‘‘ཀིཾ ཨིདཾ, ཨཱཝུསོ’’ཏི པུཊྛཱ, ‘‘བྷནྟེ, སཧཱཡཀསྶ ནོ པུརཱཎདུཏིཡིཀཱ ཀཱལཀཏཱ, སཱ ཨམྷཱཀཾ ཨཏིཝིཡ ཨུཔཀཱརིཀཱ. ཨིདཱནི ཀུཏོ ཏཐཱརཱུཔིཾ ལབྷིསྶཱམཱཏི ཨིམིནཱ ཀཱརཎེན རོདཱམཱ’’ཏི ཨཱཧཾསུ.

བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ, པུབྦེཔི ཏེ ཀཱཀཡོནིཡཾ ནིབྦཏྟིཏྭཱ སམུདྡཏཱིརེ ཙརམཱནཱ སམུདྡཨཱུམིཡཱ སམུདྡཾ པཝེསེཏྭཱ མཱརིཏཱཡ ཀཱཀིཡཱ རོདིཏྭཱ པརིདེཝིཏྭཱ ཏཾ ནཱིཧརིསྶཱམཱཏི མུཁཏུཎྜཀེཧི མཧཱསམུདྡཾ ཨུསྶིཉྩནྟཱ ཀིལམིཾསཱུ’’ཏི ཨཏཱིཏཾ ཨཱཧརིཏྭཱ –

‘‘ཨཔི ནུ ཧནུཀཱ སནྟཱ, མུཁཉྩ པརིསུསྶཏི;

ཨོརམཱམ ན པཱརེམ, པཱུརཏེཝ མཧོདདྷཱི’’ཏི. (ཛཱ. ༡.༡.༡༤༦);

ཨིམཾ ཀཱཀཛཱཏཀཾ ཝིཏྠཱརེཏྭཱ ཏེ བྷིཀྑཱུ ཨཱམནྟེཏྭཱ, ‘‘བྷིཀྑཝེ, རཱགདོསམོཧཝནཾ ནིསྶཱཡ ཏུམྷེཧི ཨིདཾ དུཀྑཾ པཏྟཾ, ཏཾ ཝནཾ ཚིནྡིཏུཾ ཝཊྚཏི, ཨེཝཾ ནིདྡུཀྑཱ བྷཝིསྶཐཱ’’ཏི ཝཏྭཱ ཨིམཱ གཱཐཱ ཨབྷཱསི –

༢༨༣.

‘‘ཝནཾ ཚིནྡཐ མཱ རུཀྑཾ, ཝནཏོ ཛཱཡཏེ བྷཡཾ;

ཚེཏྭཱ ཝནཉྩ ཝནཐཉྩ, ནིབྦནཱ ཧོཐ བྷིཀྑཝོ.

༢༨༤.

‘‘ཡཱཝ ཧི ཝནཐོ ན ཚིཛྫཏི,

ཨཎུམཏྟོཔི ནརསྶ ནཱརིསུ;

པཊིབདྡྷམནོཝ ཏཱཝ སོ,

ཝཙྪོ ཁཱིརཔཀོཝ མཱཏརཱི’’ཏི.

ཏཏྠ མཱ རུཀྑནྟི སཏྠཱརཱ ཧི ‘‘ཝནཾ ཚིནྡཐཱ’’ཏི ཝུཏྟེ ཏེསཾ ཨཙིརཔབྦཛིཏཱནཾ ‘‘སཏྠཱ ཨམྷེ ཝཱསིཨཱདཱིནི གཧེཏྭཱ ཝནཾ ཚིནྡཱཔེཏཱི’’ཏི རུཀྑཾ ཚིནྡིཏུཀཱམཏཱ ཨུཔྤཛྫི. ཨཐ ནེ ‘‘མཡཱ རཱགཱདིཀིལེསཝནཾ སནྡྷཱཡེཏཾ ཝུཏྟཾ, ན རུཀྑེ’’ཏི པཊིསེདྷེནྟོ ‘‘མཱ རུཀྑ’’ནྟི ཨཱཧ. ཝནཏོཏི ཡཐཱ པཱཀཏིཀཝནཏོ སཱིཧཱདིབྷཡཾ ཛཱཡཏི, ཨེཝཾ ཛཱཏིཨཱདིབྷཡམྤི ཀིལེསཝནཏོ ཛཱཡཏཱིཏི ཨཏྠོ. ཝནཉྩ ཝནཐཉྩཱཏི ཨེཏྠ མཧནྟཱ རུཀྑཱ ཝནཾ ནཱམ, ཁུདྡཀཱ ཏསྨིཾ ཝནེ ཋིཏཏྟཱ ཝནཐཱ ནཱམ. པུབྦུཔྤཏྟིཀརུཀྑཱ ཝཱ ཝནཾ ནཱམ, ཨཔརཱཔརུཔྤཏྟིཀཱ ཝནཐཱ ནཱམ. ཨེཝམེཝ མཧནྟམཧནྟཱ བྷཝཱཀཌྜྷནཀཱ ཀིལེསཱ ཝནཾ ནཱམ, པཝཏྟིཡཾ ཝིཔཱཀདཱཡཀཱ ཝནཐཱ ནཱམ. པུབྦཔྤཏྟིཀཱ ཝནཾ ནཱམ, ཨཔརཱཔརུཔྤཏྟིཀཱ ཝནཐཱ ནཱམ. ཏཾ ཨུབྷཡཾ ཙཏུཏྠམགྒཉཱཎེན ཚིནྡིཏབྦཾ. ཏེནཱཧ – ‘‘ཚེཏྭཱ ཝནཉྩ ཝནཐཉྩ, ནིབྦནཱ ཧོཐ བྷིཀྑཝོ’’ཏི. ནིབྦནཱ ཧོཐཱཏི ནིཀྐིལེསཱ ཧོཐ. ཡཱཝ ཧི ཝནཐོཏི ཡཱཝ ཨེས ཨཎུམཏྟོཔི ཀིལེསཝནཐོ ནརསྶ ནཱརཱིསུ ན ཚིཛྫཏི, ཏཱཝ སོ ཁཱིརཔཀོ ཝཙྪོ མཱཏརི ཝིཡ པཊིབདྡྷམནོ ལགྒཙིཏྟོཝ ཧོཏཱིཏི ཨཏྠོ.

དེསནཱཝསཱནེ པཉྩཔི ཏེ མཧལླཀཏྠེརཱ སོཏཱཔཏྟིཕལེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

པཉྩམཧལླཀཏྠེརཝཏྠུ ཨཊྛམཾ.

༩. སུཝཎྞཀཱརཏྠེརཝཏྠུ

ཨུཙྪིནྡཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཱརིཔུཏྟཏྠེརསྶ སདྡྷིཝིཧཱརིཀཾ ཨཱརབྦྷ ཀཐེསི.

ཨེཀོ ཀིར སུཝཎྞཀཱརཔུཏྟོ ཨབྷིརཱུཔོ སཱརིཔུཏྟཏྠེརསྶ སནྟིཀེ པབྦཛི. ཐེརོ ‘‘ཏརུཎཱནཾ རཱགོ ཨུསྶནྣོ ཧོཏཱི’’ཏི ཙིནྟེཏྭཱ ཏསྶ རཱགཔཊིགྷཱཏཱཡ ཨསུབྷཀམྨཊྛཱནཾ ཨདཱསི. ཏསྶ པན ཏཾ ཨསཔྤཱཡཾ. ཏསྨཱ ཨརཉྙཾ པཝིསིཏྭཱ ཏེམཱསཾ ཝཱཡམནྟོ ཙིཏྟེཀགྒམཏྟམྤི ཨལབྷིཏྭཱ པུན ཐེརསྶ སནྟིཀཾ ཨཱགནྟྭཱ ཐེརེན ‘‘ཨུཔཊྛིཏཾ ཏེ, ཨཱཝུསོ, ཀམྨཊྛཱན’’ནྟི ཝུཏྟེ ཏཾ པཝཏྟིཾ ཨཱརོཙེསི. ཨཐསྶ ཐེརོ ‘‘ཀམྨཊྛཱནཾ ན སམྤཛྫཏཱིཏི ཝོསཱནཾ ཨཱཔཛྫིཏུཾ ན ཝཊྚཏཱི’’ཏི ཝཏྭཱ པུན ཏདེཝ ཀམྨཊྛཱནཾ སཱདྷུཀཾ ཀཐེཏྭཱ ཨདཱསི. སོ དུཏིཡཝཱརེཔི ཀིཉྩི ཝིསེསཾ ནིབྦཏྟེཏུཾ ཨསཀྐོནྟོ ཨཱགནྟྭཱ ཐེརསྶ ཨཱརོཙེསི. ཨཐསྶ ཐེརོཔི སཀཱརཎཾ སཨུཔམཾ ཀཏྭཱ ཏདེཝ ཀམྨཊྛཱནཾ ཨཱཙིཀྑི. སོ པུནཔི ཨཱགནྟྭཱ ཀམྨཊྛཱནསྶ ཨསམྤཛྫནབྷཱཝཾ ཀཐེསི. ཐེརོ ཙིནྟེསི – ‘‘ཀཱརཀོ བྷིཀྑུ ཨཏྟནི ཝིཛྫམཱནེ ཀཱམཙྪནྡཱདཡོ ཝིཛྫམཱནཱཏི ཨཝིཛྫམཱནེ ཨཝིཛྫམཱནཱཏི པཛཱནཱཏི. ཨཡཾ བྷིཀྑུ ཀཱརཀོ, ནོ ཨཀཱརཀོ, པཊིཔནྣོ, ནོ ཨཔྤཊིཔནྣོ, ཨཧཾ པནེཏསྶ ཨཛ྄ཛྷཱསཡཾ ན ཛཱནཱམི, བུདྡྷཝེནེཡྻོ ཨེསོ བྷཝིསྶཏཱི’’ཏི ཏཾ ཨཱདཱཡ སཱཡནྷསམཡེ སཏྠཱརཾ ཨུཔསངྐམིཏྭཱ ‘‘ཨཡཾ, བྷནྟེ, མམ སདྡྷིཝིཧཱརིཀོ, ཨིམསྶ མཡཱ ཨིམིནཱ ཀཱརཎེན ཨིདཾ ནཱམ ཀམྨཊྛཱནཾ དིནྣ’’ནྟི སབྦཾ ཏཾ པཝཏྟིཾ ཨཱརོཙེསི.

ཨཐ ནཾ སཏྠཱ ‘‘ཨཱསཡཱནུསཡཉཱཎཾ ནཱམེཏཾ པཱརམིཡོ པཱུརེཏྭཱ དསསཧསྶིལོཀདྷཱཏུཾ ཨུནྣཱདེཏྭཱ སབྦཉྙུཏཾ པཏྟཱནཾ བུདྡྷཱནཾཡེཝ ཝིསཡོ’’ཏི ཝཏྭཱ ‘‘ཀཏརཀུལཱ ནུ ཁོ ཨེས པབྦཛིཏོ’’ཏི ཨཱཝཛྫེནྟོ ‘‘སུཝཎྞཀཱརཀུལཱ’’ཏི ཉཏྭཱ ཨཏཱིཏེ ཨཏྟབྷཱཝེ ཨོལོཀེནྟོ ཏསྶ སུཝཎྞཀཱརཀུལེཡེཝ པཊིཔཱཊིཡཱ ནིབྦཏྟཱནི པཉྩ ཨཏྟབྷཱཝསཏཱནི དིསྭཱ ‘‘ཨིམིནཱ དཧརེན དཱིགྷརཏྟཾ སུཝཎྞཀཱརཀམྨཾ ཀརོནྟེན ཀཎིཀཱརཔུཔྥཔདུམཔུཔྥཱདཱིནི ཀརིསྶཱམཱིཏི རཏྟསུཝཎྞམེཝ སམྤརིཝཏྟིཏཾ, ཏསྨཱ ཨིམསྶ ཨསུབྷཔཊིཀཱུལཀམྨཊྛཱནཾ ན ཝཊྚཏི, མནཱཔམེཝསྶ ཀམྨཊྛཱནཾ སཔྤཱཡ’’ནྟི ཙིནྟེཏྭཱ, ‘‘སཱརིཔུཏྟ, ཏཡཱ ཀམྨཊྛཱནཾ དཏྭཱ ཙཏྟཱརོ མཱསེ ཀིལམིཏཾ བྷིཀྑུཾ ཨཛྫ པཙྪཱབྷཏྟེཡེཝ ཨརཧཏྟཾ པཏྟཾ པསྶིསྶསི, གཙྪ ཏྭ’’ནྟི ཐེརཾ ཨུཡྻོཛེཏྭཱ ཨིདྡྷིཡཱ ཙཀྐམཏྟཾ སུཝཎྞཔདུམཾ མཱཔེཏྭཱ པཏྟེཧི ཙེཝ ནཱལེཧི ཙ ཨུདཀབིནྡཱུནི མུཉྩནྟཾ ཝིཡ ཀཏྭཱ ‘‘བྷིཀྑུ ཨིམཾ པདུམཾ ཨཱདཱཡ ཝིཧཱརཔཙྩནྟེ ཝཱལུཀརཱསིམྷི ཋཔེཏྭཱ སམྨུཁཊྛཱནེ པལླངྐེན ནིསཱིདིཏྭཱ ‘ལོཧིཏཀཾ ལོཧིཏཀ’ནྟི པརིཀམྨཾ ཀརོཧཱི’’ཏི ཨདཱསི. ཏསྶ སཏྠུཧཏྠཏོ པདུམཾ གཎྷནྟསྶེཝ ཙིཏྟཾ པསཱིདི. སོ ཝིཧཱརཔཙྩནྟཾ གནྟྭཱ ཝཱལུཀཾ ཨུསྶཱཔེཏྭཱ ཏཏྠ པདུམནཱལཾ པཝེསེཏྭཱ སམྨུཁེ པལླངྐེན ནིསིནྣོ ‘‘ལོཧིཏཀཾ ལོཧིཏཀ’’ནྟི པརིཀམྨཾ ཨཱརབྷི. ཨཐསྶ ཏངྑཎཉྙེཝ ནཱིཝརཎཱནི ཝིཀྑམྦྷིཾསུ, ཨུཔཙཱརཛ྄ཛྷཱནཾ ཨུཔྤཛྫི. ཏདནནྟརཾ པཋམཛ྄ཛྷཱནཾ ནིབྦཏྟེཏྭཱ པཉྩཧཱཀཱརེཧི ཝསཱིབྷཱཝཾ པཱཔེཏྭཱ ཡཐཱནིསིནྣོཝ དུཏིཡཛ྄ཛྷཱནཱདཱིནིཔི པཏྭཱ ཝསཱིབྷཱུཏོ ཙཏུཏྠཛ྄ཛྷཱནེན ཛྷཱནཀཱིལ༹ཾ ཀཱིལ༹ནྟོ ནིསཱིདི.

སཏྠཱ ཏསྶ ཛྷཱནཱནཾ ཨུཔྤནྣབྷཱཝཾ ཉཏྭཱ ‘‘སཀྑིསྶཏི ནུ ཁོ ཨེས ཨཏྟནོ དྷམྨཏཱཡ ཨུཏྟརི ཝིསེསཾ ནིབྦཏྟེཏུ’’ནྟི ཨོལོཀེནྟོ ‘‘ན སཀྑིསྶཏཱི’’ཏི ཉཏྭཱ ‘‘ཏཾ པདུམཾ མིལཱཡཏཱུ’’ཏི ཨདྷིཊྛཧི. ཏཾ ཧཏྠེཧི མདྡིཏཔདུམཾ མིལཱཡནྟཾ ཝིཡ ཀཱལ༹ཝཎྞཾ ཨཧོསི. སོ ཛྷཱནཱ ཝུཊྛཱཡ ཏཾ ཨོལོཀེཏྭཱ ‘‘ཀིཾ ནུ ཁོ ཨིམཾ པདུམཾ ཛརཱཡ པཧཊཾ པཉྙཱཡཏི, ཨནུཔཱདིཎྞཀེཔི ཨེཝཾ ཛརཱཡ ཨབྷིབྷུཡྻམཱནེ ཨུཔཱདིཎྞཀེ ཀཐཱཝ ནཏྠི. ཨིདམྤི ཧི ཛརཱ ཨབྷིབྷཝིསྶཏཱི’’ཏི ཨནིཙྩལཀྑཎཾ པསྶི. ཏསྨིཾ པན དིཊྛེ དུཀྑལཀྑཎཉྩ ཨནཏྟལཀྑཎཉྩ དིཊྛམེཝ ཧོཏི. ཏསྶ ཏཡོ བྷཝཱ ཨཱདིཏྟཱ ཝིཡ ཀཎྜེ བདྡྷཀུཎཔཱ ཝིཡ ཙ ཁཱཡིཾསུ. ཏསྨིཾ ཁཎེ ཏསྶ ཨཝིདཱུརེ ཀུམཱརཀཱ ཨེཀཾ སརཾ ཨོཏརིཏྭཱ ཀུམུདཱནི བྷཉྫིཏྭཱ ཐལེ རཱསིཾ ཀརོནྟི. སོ ཛལེ ཙ ཐལེ ཙ ཀུམུདཱནི ཨོལོཀེསི. ཨཐསྶ ཛལེ ཀུམུདཱནི ཨབྷིརཱུཔཱནི ཨུདཀཔགྒྷརནྟཱནི ཝིཡ ཨུཔཊྛཧིཾསུ, ཨིཏརཱནི ཨགྒགྒེསུ པརིམིལཱཏཱནི. སོ ‘‘ཨནུཔཱདིཎྞཀཾ ཛརཱ ཨེཝཾ པཧརཏི, ཨུཔཱདིཎྞཀཾ ཀིཾ པན ན པཧརིསྶཏཱི’’ཏི སུཊྛུཏརཾ ཨནིཙྩལཀྑཎཱདཱིནི ཨདྡས. སཏྠཱ ‘‘པཱཀཊཱིབྷཱུཏཾ ཨིདཱནི ཨིམསྶ བྷིཀྑུནོ ཀམྨཊྛཱན’’ནྟི ཉཏྭཱ གནྡྷཀུཊིཡཾ ནིསིནྣཀོཝ ཨོབྷཱསཾ མུཉྩི, སོ ཏསྶ མུཁཾ པཧརི. ཨཐསྶ ‘‘ཀིཾ ནུ ཁོ ཨེཏ’’ནྟི ཨོལོཀེནྟསྶ སཏྠཱ ཨཱགནྟྭཱ སམྨུཁེ ཋིཏོ ཝིཡ ཨཧོསི. སོ ཨུཊྛཱཡ ཨཉྫལིཾ པགྒཎྷི. ཨཐསྶ སཏྠཱ སཔྤཱཡཾ སལླཀྑེཏྭཱ ཨིམཾ གཱཐམཱཧ –

༢༨༥.

‘‘ཨུཙྪིནྡ སིནེཧམཏྟནོ, ཀུམུདཾ སཱརདིཀཾཝ པཱཎིནཱ;

སནྟིམགྒམེཝ བྲཱུཧཡ, ནིབྦཱནཾ སུགཏེན དེསིཏ’’ནྟི.

ཏཏྠ ཨུཙྪིནྡཱཏི ཨརཧཏྟམགྒེན ཨུཙྪིནྡ. སཱརདིཀནྟི སརདཀཱལེ ནིབྦཏྟཾ. སནྟིམགྒནྟི ནིབྦཱནགཱམིཾ ཨཊྛངྒིཀཾ མགྒཾ. བྲཱུཧཡཱཏི ཝཌྜྷཡ. ནིབྦཱནཉྷི སུགཏེན དེསིཏཾ, ཏསྨཱ ཏསྶ མགྒཾ བྷཱཝེཧཱིཏི ཨཏྠོ.

དེསནཱཝསཱནེ སོ བྷིཀྑུ ཨརཧཏྟེ པཏིཊྛཧི.

སུཝཎྞཀཱརཏྠེརཝཏྠུ ནཝམཾ.

༡༠. མཧཱདྷནཝཱཎིཛཝཏྠུ

ཨིདྷ ཝསྶནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཧཱདྷནཝཱཎིཛཾ ནཱམ ཨཱརབྦྷ ཀཐེསི.

སོ ཀིར བཱརཱཎསིཏོ ཀུསུམྦྷརཏྟཱནཾ ཝཏྠཱནཾ པཉྩ སཀཊསཏཱནི པཱུརེཏྭཱ ཝཎིཛྫཱཡ སཱཝཏྠིཾ ཨཱགཏོ ནདཱིཏཱིརཾ པཏྭཱ ‘‘སྭེ ནདིཾ ཨུཏྟརིསྶཱམཱི’’ཏི ཏཏྠེཝ སཀཊཱནི མོཙེཏྭཱ ཝསི. རཏྟིཾ མཧཱམེགྷོ ཨུཊྛཧིཏྭཱ ཝསྶི. ནདཱི སཏྟཱཧཾ ཨུདཀསྶ པཱུརཱ ཨཊྛཱསི. ནཱགརཱཔི སཏྟཱཧཾ ནཀྑཏྟཾ ཀཱིལི༹ཾསུ. ཀུསུམྦྷརཏྟེཧི ཝཏྠེཧི ཀིཙྩཾ ན ནིཊྛིཏཾ. ཝཱཎིཛོ ཙིནྟེསི – ‘‘ཨཧཾ དཱུརཾ ཨཱགཏོ. སཙེ པུན གམིསྶཱམི, པཔཉྩོ བྷཝིསྶཏི. ཨིདྷེཝ ཝསྶཉྩ ཧེམནྟཉྩ གིམྷཉྩ མམ ཀམྨཾ ཀརོནྟོ ཝསིཏྭཱ ཨིམཱནི ཝིཀྐིཎིསྶཱམཱི’’ཏི. སཏྠཱ ནགརེ པིཎྜཱཡ ཙརནྟོ ཏསྶ ཙིཏྟཾ ཉཏྭཱ སིཏཾ པཱཏུཀརིཏྭཱ ཨཱནནྡཏྠེརེན སིཏཀཱརཎཾ པུཊྛོ ཨཱཧ – ‘‘དིཊྛོ ཏེ, ཨཱནནྡ, མཧཱདྷནཝཱཎིཛོ’’ཏི? ‘‘ཨཱམ, བྷནྟེ’’ཏི. སོ ཨཏྟནོ ཛཱིཝིཏནྟརཱཡཾ ཨཛཱནིཏྭཱ ཨིམཾ སཾཝཙྪརཾ ཨིདྷེཝ ཝསིཏྭཱ བྷཎྜཾ ཝིཀྐིཎིཏུཾ ཙིཏྟམཀཱསཱིཏི. ‘‘ཀིཾ པན ཏསྶ, བྷནྟེ, ཨནྟརཱཡོ བྷཝིསྶཏཱི’’ཏི? སཏྠཱ ‘‘ཨཱམཱནནྡ, སཏྟཱཧམེཝ ཛཱིཝིཏྭཱ སོ མཙྩུམུཁེ པཏིསྶཏཱི’’ཏི ཝཏྭཱ ཨིམཱ གཱཐཱ ཨབྷཱསི –

‘‘ཨཛྫེཝ ཀིཙྩམཱཏཔྤཾ, ཀོ ཛཉྙཱ མརཎཾ སུཝེ;

ན ཧི ནོ སངྒརཾ ཏེན, མཧཱསེནེན མཙྩུནཱ.

‘‘ཨེཝཾ ཝིཧཱརིཾ ཨཱཏཱཔིཾ, ཨཧོརཏྟམཏནྡིཏཾ;

ཏཾ ཝེ བྷདྡེཀརཏྟོཏི, སནྟོ ཨཱཙིཀྑཏེ མུནཱི’’ཏི. (མ. ནི. ༣.༢༧༢);

གཙྪཱམིསྶ, བྷནྟེ, ཨཱརོཙེསྶཱམཱིཏི. ཝིསྶཏྠོ གཙྪཱནནྡཱཏི. ཐེརོ སཀཊཊྛཱནཾ གནྟྭཱ བྷིཀྑཱཡ ཙརི. ཝཱཎིཛོ ཐེརཾ ཨཱཧཱརེན པཏིམཱནེསི. ཨཐ ནཾ ཐེརོ ཨཱཧ – ‘‘ཀིཏྟཀཾ ཀཱལཾ ཨིདྷ ཝསིསྶསཱི’’ཏི? ‘‘བྷནྟེ, ཨཧཾ དཱུརཏོ ཨཱགཏོ’’. སཙེ པུན གམིསྶཱམི, པཔཉྩོ བྷཝིསྶཏི, ཨིམཾ སཾཝཙྪརཾ ཨིདྷ ཝསིཏྭཱ བྷཎྜཾ ཝིཀྐིཎིཏྭཱ གམིསྶཱམཱིཏི. ཨུཔཱསཀ, དུཛྫཱནོ ཛཱིཝིཏནྟརཱཡོ, ཨཔྤམཱདཾ ཀཱཏུཾ ཝཊྚཏཱིཏི. ‘‘ཀིཾ པན, བྷནྟེ, ཨནྟརཱཡོ བྷཝིསྶཏཱི’’ཏི. ‘‘ཨཱམ, ཨུཔཱསཀ, སཏྟཱཧམེཝ ཏེ ཛཱིཝིཏཾ པཝཏྟིསྶཏཱིཏི’’. སོ སཾཝིགྒམཱནསོ ཧུཏྭཱ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ སཏྟཱཧཾ མཧཱདཱནཾ དཏྭཱ ཨནུམོདནཏྠཱཡ པཏྟཾ གཎྷི. ཨཐསྶ སཏྠཱ ཨནུམོདནཾ ཀརོནྟོ, ‘‘ཨུཔཱསཀ, པཎྜིཏེན ནཱམ ‘ཨིདྷེཝ ཝསྶཱདཱིནི ཝསིསྶཱམི, ཨིདཉྩིདཉྩ ཀམྨཾ པཡོཛེསྶཱམཱི’ཏི ཙིནྟེཏུཾ ན ཝཊྚཏི, ཨཏྟནོ པན ཛཱིཝིཏནྟརཱཡམེཝ ཙིནྟེཏུཾ ཝཊྚཏཱི’’ཏི ཝཏྭཱ ཨིམཾ གཱཐམཱཧ –

༢༨༦.

‘‘ཨིདྷ ཝསྶཾ ཝསིསྶཱམི, ཨིདྷ ཧེམནྟགིམྷིསུ;

ཨིཏི བཱལོ ཝིཙིནྟེཏི, ཨནྟརཱཡཾ ན བུཛ྄ཛྷཏཱི’’ཏི.

ཏཏྠ ཨིདྷ ཝསྶནྟི ཨིམསྨིཾ ཋཱནེ ཨིདཉྩིདཉྩ ཀརོནྟོ ཙཏུམཱསཾ ཝསྶཾ ཝསིསྶཱམི. ཧེམནྟགིམྷིསཱུཏི ཧེམནྟགིམྷེསུཔི ‘‘ཙཏྟཱརོ མཱསེ ཨིདཉྩིདཉྩ ཀརོནྟོ ཨིདྷེཝ ཝསིསྶཱམཱི’’ཏི ཨེཝཾ དིཊྛདྷམྨིཀསམྤརཱཡིཀཾ ཨཏྠཾ ཨཛཱནནྟོ བཱལོ ཝིཙིནྟེཏི. ཨནྟརཱཡནྟི ‘‘ཨསུཀསྨིཾ ནཱམ ཀཱལེ ཝཱ དེསེ ཝཱ ཝཡེ ཝཱ མརིསྶཱམཱི’’ཏི ཨཏྟནོ ཛཱིཝིཏནྟརཱཡཾ ན བུཛ྄ཛྷཏཱིཏི.

དེསནཱཝསཱནེ སོ ཝཱཎིཛོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསི. ཝཱཎིཛོཔི སཏྠཱརཾ ཨནུགནྟྭཱ ནིཝཏྟིཏྭཱ ‘‘སཱིསརོགོ ཝིཡ མེ ཨུཔྤནྣོ’’ཏི སཡནེ ནིཔཛྫི, ཏཐཱནིཔནྣོཝ ཀཱལཾ ཀཏྭཱ ཏུསིཏཝིམཱནེ ནིབྦཏྟི.

མཧཱདྷནཝཱཎིཛཝཏྠུ དསམཾ.

༡༡. ཀིསཱགོཏམཱིཝཏྠུ

ཏཾ པུཏྟཔསུསམྨཏྟནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀིསཱགོཏམིཾ ཨཱརབྦྷ ཀཐེསི. ཝཏྠུ སཧསྶཝགྒེ –

‘‘ཡོ ཙ ཝསྶསཏཾ ཛཱིཝེ, ཨཔསྶཾ ཨམཏཾ པདཾ;

ཨེཀཱཧཾ ཛཱིཝིཏཾ སེཡྻོ, པསྶཏོ ཨམཏཾ པད’’ནྟི. (དྷ. པ. ༡༡༤) –

གཱཐཱཝཎྞནཱཡ ཝིཏྠཱརེཏྭཱ ཀཐིཏཾ. ཏདཱ ཧི སཏྠཱ ‘‘ཀིསཱགོཏམི ལདྡྷཱ ཏེ ཨེཀཙྪརམཏྟཱ སིདྡྷཏྠཀཱ’’ཏི ཨཱཧ. ‘‘ན ལདྡྷཱ, བྷནྟེ, སཀལགཱམེ ཛཱིཝནྟེཧི ཀིར མཏཀཱ ཨེཝ བཧུཏརཱ’’ཏི. ཨཐ ནཾ སཏྠཱ ‘‘ཏྭཾ ‘མམེཝ པུཏྟོ མཏོ’ཏི སལླཀྑེསི, དྷུཝདྷམྨོ ཨེས སབྦསཏྟཱནཾ. མཙྩུརཱཛཱ ཧི སབྦསཏྟེ ཨཔརིཔུཎྞཛ྄ཛྷཱསཡེ ཨེཝ མཧོགྷོ ཝིཡ པརིཀཌྜྷམཱནོ ཨཔཱཡསམུདྡེ པཀྑིཔཏཱི’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༢༨༧.

‘‘ཏཾ པུཏྟཔསུསམྨཏྟཾ, བྱཱསཏྟམནསཾ ནརཾ;

སུཏྟཾ གཱམཾ མཧོགྷོཝ, མཙྩུ ཨཱདཱཡ གཙྪཏཱི’’ཏི.

ཏཏྠ ཏཾ པུཏྟཔསུསམྨཏྟནྟི ཏཾ རཱུཔབལཱདིསམྤནྣེ པུཏྟེ ཙ པསཱུ ཙ ལབྷིཏྭཱ ‘‘མམ པུཏྟཱ ཨབྷིརཱུཔཱ བལསམྤནྣཱ པཎྜིཏཱ སབྦཀིཙྩསམཏྠཱ, མམ གོཎཱ ཨབྷིརཱུཔཱ ཨརོགཱ མཧཱབྷཱརཝཧཱ, མམ གཱཝཱི བཧུཁཱིརཱ’’ཏི ཨེཝཾ པུཏྟེཧི ཙ པསཱུཧི ཙ སམྨཏྟཾ ནརཾ. བྱཱསཏྟམནསནྟི ཧིརཉྙསུཝཎྞཱདཱིསུ ཝཱ པཏྟཙཱིཝརཱདཱིསུ ཝཱ ཀིཉྩིདེཝ ལབྷིཏྭཱ ཏཏོ ཨུཏྟརིཏརཾ པཏྠནཏཱཡ ཨཱསཏྟམཱནསཾ ཝཱ, ཙཀྑུཝིཉྙེཡྻཱདཱིསུ ཨཱརམྨཎེསུ ཝུཏྟཔྤཀཱརེསུ ཝཱ པརིཀྑཱརེསུ ཡཾ ཡཾ ལདྡྷཾ ཧོཏི, ཏཏྠ ཏཏྠེཝ ལགྒནཏཱཡ བྱཱསཏྟམཱནསཾ ཝཱ. སུཏྟཾ གཱམནྟི ནིདྡཾ ཨུཔགཏཾ སཏྟནིཀཱཡཾ. མཧོགྷོཝཱཏི ཡཐཱ ཨེཝརཱུཔཾ གཱམཾ གམྦྷཱིརཝིཏྠཏོ མཧནྟོ མཧཱནདཱིནཾ ཨོགྷོ ཨནྟམསོ སུནཁམྤི ཨསེསེཏྭཱ སབྦཾ ཨཱདཱཡ གཙྪཏི, ཨེཝཾ ཝུཏྟཔྤཀཱརཾ ནརཾ མཙྩུ ཨཱདཱཡ གཙྪཏཱིཏི ཨཏྠོ.

དེསནཱཝསཱནེ ཀིསཱགོཏམཱི སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཀིསཱགོཏམཱིཝཏྠུ ཨེཀཱདསམཾ.

༡༢. པཊཱཙཱརཱཝཏྠུ

ན སནྟི པུཏྟཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཊཱཙཱརཾ ཨཱརབྦྷ ཀཐེསི. ཝཏྠུ སཧསྶཝགྒེ –

‘‘ཡོ ཙ ཝསྶསཏཾ ཛཱིཝེ, ཨཔསྶཾ ཨུདཡབྦཡཾ;

ཨེཀཱཧཾ ཛཱིཝིཏཾ སེཡྻོ, པསྶཏོ ཨུདཡབྦཡ’’ནྟི. (དྷ. པ. ༡༡༣) –

གཱཐཱཝཎྞནཱཡ ཝིཏྠཱརེཏྭཱ ཀཐིཏཾ. ཏདཱ པན སཏྠཱ པཊཱཙཱརཾ ཏནུབྷཱུཏསོཀཾ ཉཏྭཱ ‘‘པཊཱཙཱརེ པུཏྟཱདཡོ ནཱམ པརལོཀཾ གཙྪནྟསྶ ཏཱཎཾ ཝཱ ལེཎཾ ཝཱ སརཎཾ ཝཱ བྷཝིཏུཾ ན སཀྐོནྟི, ཏསྨཱ ཝིཛྫམཱནཱཔི ཏེ ན སནྟིཡེཝ. པཎྜིཏེན པན སཱིལཾ ཝིསོདྷེཏྭཱ ཨཏྟནོ ནིབྦཱནགཱམིམགྒམེཝ སོདྷེཏུཾ ཝཊྚཏཱི’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༢༨༨.

‘‘ན སནྟི པུཏྟཱ ཏཱཎཱཡ, ན པིཏཱ ནཱཔི བནྡྷཝཱ;

ཨནྟཀེནཱདྷིཔནྣསྶ, ནཏྠི ཉཱཏཱིསུ ཏཱཎཏཱ.

༢༨༩.

‘‘ཨེཏམཏྠཝསཾ ཉཏྭཱ, པཎྜིཏོ སཱིལསཾཝུཏོ;

ནིབྦཱནགམནཾ མགྒཾ, ཁིཔྤམེཝ ཝིསོདྷཡེ’’ཏི.

ཏཏྠ ཏཱཎཱཡཱཏི ཏཱཎབྷཱཝཱཡ པཏིཊྛཱནཏྠཱཡ. བནྡྷཝཱཏི པུཏྟེ ཙ མཱཏཱཔིཏརོ ཙ ཋཔེཏྭཱ ཨཝསེསཱ ཉཱཏིསུཧཛྫཱ. ཨནྟཀེནཱདྷིཔནྣསྶཱཏི མརཎེན ཨབྷིབྷཱུཏསྶ. པཝཏྟིཡཉྷི པུཏྟཱདཡོ ཨནྣཔཱནཱདིདཱནེན ཙེཝ ཨུཔྤནྣཀིཙྩནིཏྠརཎེན ཙ ཏཱཎཱ ཧུཏྭཱཔི མརཎཀཱལེ ཀེནཙི ཨུཔཱཡེན མརཎཾ པཊིབཱཧིཏུཾ ཨསམཏྠཏཱཡ ཏཱཎཏྠཱཡ ལེཎཏྠཱཡ ན སནྟི ནཱམ. ཏེནེཝ ཝུཏྟཾ – ‘‘ནཏྠི ཉཱཏཱིསུ ཏཱཎཏཱ’’ཏི. ཨེཏམཏྠཝསནྟི ཨེཝཾ ཏེསཾ ཨཉྙམཉྙསྶ ཏཱཎཾ བྷཝིཏུཾ ཨསམཏྠབྷཱཝསངྑཱཏཾ ཀཱརཎཾ ཛཱནིཏྭཱ པཎྜིཏོ ཙཏུཔཱརིསུདྡྷིསཱིལེན སཾཝུཏོ རཀྑིཏགོཔིཏོ ཧུཏྭཱ ནིབྦཱནགམནཾ ཨཊྛངྒིཀཾ མགྒཾ སཱིགྷཾ སཱིགྷཾ ཝིསོདྷེཡྻཱཏི ཨཏྠོ.

དེསནཱཝསཱནེ པཊཱཙཱརཱ སོཏཱཔཏྟིཕལེ པཏིཊྛཧི, ཨཉྙེ ཙ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པཊཱཙཱརཱཝཏྠུ དྭཱདསམཾ.

མགྒཝགྒཝཎྞནཱ ནིཊྛིཏཱ.

ཝཱིསཏིམོ ཝགྒོ.

༢༡. པཀིཎྞཀཝགྒོ

༡. ཨཏྟནོཔུབྦཀམྨཝཏྠུ

མཏྟཱསུཁཔརིཙྩཱགཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨཏྟནོ པུབྦཀམྨཾ ཨཱརབྦྷ ཀཐེསི.

ཨེཀསྨིཉྷི སམཡེ ཝེསཱལཱི ཨིདྡྷཱ ཨཧོསི ཕཱིཏཱ བཧུཛནཱ ཨཱཀིཎྞམནུསྶཱ. ཏཏྠ ཧི ཝཱརེན ཝཱརེན རཛྫཾ ཀཱརེནྟཱནཾ ཁཏྟིཡཱནཾཡེཝ སཏྟསཏཱདྷིཀཱནི སཏྟསཧསྶཱནི སཏྟ ཙ ཁཏྟིཡཱ ཨཧེསུཾ. ཏེསཾ ཝསནཏྠཱཡ ཏཏྟཀཱཡེཝ པཱསཱདཱ ཏཏྟཀཱནེཝ ཀཱུཊཱགཱརཱནི ཨུཡྻཱནེ ཝིཧཱརཏྠཱཡ ཏཏྟཀཱཡེཝ ཨཱརཱམཱ ཙ པོཀྑརཎིཡོ ཙ ཨཧེསུཾ. སཱ ཨཔརེན སམཡེན དུབྦྷིཀྑཱ ཨཧོསི དུསྶསྶཱ. ཏཏྠ ཚཱཏཀབྷཡེན པཋམཾ དུགྒཏམནུསྶཱ ཀཱལམཀཾསུ. ཏེསཾ ཏེསཾ ཏཏྠ ཏཏྠ ཚཌྜིཏཱནཾ ཀུཎཔཱནཾ གནྡྷེན ཨམནུསྶཱ ནགརཾ པཝིསིཾསུ. ཨམནུསྶཱུཔདྡཝེན བཧུཏརཱ ཀཱལམཀཾསུ. ཏེསཾ ཀུཎཔགནྡྷཔཊིཀྐཱུལཏཱཡ སཏྟཱནཾ ཨཧིཝཱཏརོགོ ཨུཔྤཛྫི. ཨེཝཾ དུབྦྷིཀྑབྷཡཾ ཨམནུསྶབྷཡཾ རོགབྷཡནྟི ཏཱིཎི བྷཡཱནི ཨུཔྤཛྫིཾསུ.

ནགརཝཱསིནོ སནྣིཔཏིཏྭཱ རཱཛཱནཾ ཨཱཧཾསུ – ‘‘མཧཱརཱཛ, ཨིམསྨིཾ ནགརེ ཏཱིཎི བྷཡཱནི ཨུཔྤནྣཱནི, ཨིཏོ པུབྦེ ཡཱཝ སཏྟམཱ རཱཛཔརིཝཊྚཱ ཨེཝརཱུཔཾ བྷཡཾ ནཱམ ན ཨུཔྤནྣཔུབྦཾ. ཨདྷམྨིཀརཱཛཱུནཉྷི ཀཱལེ ཨེཝརཱུཔཾ བྷཡཾ ཨུཔྤཛྫཏཱི’’ཏི. རཱཛཱ སནྠཱགཱརེ སབྦེསཾ སནྣིཔཱཏཾ ཀཱརེཏྭཱ ‘‘སཙེ མེ ཨདྷམྨིཀབྷཱཝོ ཨཏྠི, ཏཾ ཝིཙིནཐཱ’’ཏི ཨཱཧ. ཝེསཱལིཝཱསིནོ སབྦཾ པཝེཎི ཝིཙིནནྟཱ རཉྙོ ཀཉྩི དོསཾ ཨདིསྭཱ, ‘‘མཧཱརཱཛ, ནཏྠི ཏེ དོསོ’’ཏི ཝཏྭཱ ‘‘ཀཐཾ ནུ ཁོ ཨིདཾ ཨམྷཱཀཾ བྷཡཾ ཝཱུཔསམཾ གཙྪེཡྻཱ’’ཏི མནྟཡིཾསུ. ཏཏྠ ཨེཀཙྩེཧི ‘‘བལིཀམྨེན ཨཱཡཱཙནཱཡ མངྒལཀིརིཡཱཡཱ’’ཏི ཝུཏྟེ སབྦམྤི ཏཾ ཝིདྷིཾ ཀཏྭཱ པཊིབཱཧིཏུཾ ནཱསཀྑིཾསུ. ཨཐཉྙེ ཨེཝམཱཧཾསུ – ‘‘ཚ སཏྠཱརོ མཧཱནུབྷཱཝཱ, ཏེསུ ཨིདྷཱགཏམཏྟེསུ བྷཡཾ ཝཱུཔསམེཡྻཱ’’ཏི. ཨཔརེ ‘‘སམྨཱསམྦུདྡྷོ ལོཀེ ཨུཔྤནྣོ. སོ ཧི བྷགཝཱ སབྦསཏྟཧིཏཱཡ དྷམྨཾ དེསེཏི, མཧིདྡྷིཀོ མཧཱནུབྷཱཝོ. ཏསྨིཾ ཨིདྷ ཨཱགཏེ ཨིམཱནི བྷཡཱནི ཝཱུཔསམེཡྻུ’’ནྟི ཨཱཧཾསུ. ཏེསཾ ཝཙནཾ སབྦེཔི ཨབྷིནནྡིཏྭཱ ‘‘ཀཧཾ ནུ ཁོ སོ བྷགཝཱ ཨེཏརཧི ཝིཧརཏཱི’’ཏི ཨཱཧཾསུ. ཏདཱ པན སཏྠཱ ཨུཔཀཊྛཱཡ ཝསྶཱུཔནཱཡིཀཱཡ རཉྙོ བིམྦིསཱརསྶ པཊིཉྙཾ དཏྭཱ ཝེལུ༹ཝནེ ཝིཧརཏི. ཏེན ཙ སམཡེན བིམྦིསཱརསམཱགམེ བིམྦིསཱརེན སདྡྷིཾ སོཏཱཔཏྟིཕལཾ པཏྟོ མཧཱལི ནཱམ ལིཙྪཝཱི ཏསྶཾ པརིསཱཡཾ ནིསིནྣོ ཧོཏི.

ཝེསཱལིཝཱསིནོ མཧནྟཾ པཎྞཱཀཱརཾ སཛྫེཏྭཱ རཱཛཱནཾ བིམྦིསཱརཾ སཉྙཱཔེཏྭཱ ‘‘སཏྠཱརཾ ཨིདྷཱནེཐཱ’’ཏི མཧཱལིཉྩེཝ ལིཙྪཝིཾ པུརོཧིཏཔུཏྟཉྩ པཧིཎིཾསུ. ཏེ གནྟྭཱ རཉྙོ པཎྞཱཀཱརཾ དཏྭཱ ཏཾ པཝཏྟིཾ ནིཝེདེཏྭཱ, ‘‘མཧཱརཱཛ, སཏྠཱརཾ ཨམྷཱཀཾ ནགརཾ པེསེཐཱ’’ཏི ཡཱཙིཾསུ. རཱཛཱ ‘‘ཏུམྷེཝ ཛཱནཱཐཱ’’ཏི ན སམྤཊིཙྪི. ཏེ བྷགཝནྟཾ ཨུཔསངྐམིཏྭཱ ཝནྡིཏྭཱ ཡཱཙིཾསུ – ‘‘བྷནྟེ, ཝེསཱལིཡཾ ཏཱིཎི བྷཡཱནི ཨུཔྤནྣཱནི, ཏཱནི ཏུམྷེསུ ཨཱགཏེསུ ཝཱུཔསམིསྶནྟི, ཨེཐ, བྷནྟེ, གཙྪཱམཱ’’ཏི. སཏྠཱ ཏེསཾ ཝཙནཾ སུཏྭཱ ཨཱཝཛྫེནྟོ ‘‘ཝེསཱལིཡཾ རཏནསུཏྟེ (ཁུ. པཱ. ༦.༡ ཨཱདཡོ; སུ. ནི. ༢༢༤ ཨཱདཡོ) ཝུཏྟེ སཱ རཀྑཱ ཙཀྐཝཱལཱ༹ནཾ ཀོཊིསཏསཧསྶཾ ཕརིསྶཏི, སུཏྟཔརིཡོསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ བྷཝིསྶཏི, ཏཱནི ཙ བྷཡཱནི ཝཱུཔསམིསྶནྟཱི’’ཏི ཉཏྭཱ ཏེསཾ ཝཙནཾ སམྤཊིཙྪི.

རཱཛཱ བིམྦིསཱརོ ‘‘སཏྠཱརཱ ཀིར ཝེསཱལིགམནཾ སམྤཊིཙྪིཏ’’ནྟི སུཏྭཱ ནགརེ གྷོསནཾ ཀཱརེཏྭཱ སཏྠཱརཾ ཨུཔསངྐམིཏྭཱ ‘‘ཀིཾ, བྷནྟེ, ཝེསཱལིགམནཾ སམྤཊིཙྪིཏ’’ནྟི པུཙྪིཏྭཱ ‘‘ཨཱམ, མཧཱརཱཛཱ’’ཏི ཝུཏྟེ ‘‘ཏེན ཧི, བྷནྟེ, ཨཱགམེཐ, ཏཱཝ མགྒཾ པཊིཡཱདེསྶཱམཱི’’ཏི ཝཏྭཱ རཱཛགཧསྶ ཙ གངྒཱཡ ཙ ཨནྟརེ པཉྩཡོཛནབྷཱུམིཾ སམཾ ཀཱརེཏྭཱ ཡོཛནེ ཡོཛནེ ཝིཧཱརཾ པཏིཊྛཱཔེཏྭཱ སཏྠུ གམནཀཱལཾ ཨཱརོཙེསི. སཏྠཱ པཉྩཧི བྷིཀྑུསཏེཧི སདྡྷིཾ མགྒཾ པཊིཔཛྫི. རཱཛཱ ཡོཛནནྟརེ ཛཎྞུམཏྟེན ཨོདྷིནཱ པཉྩཝཎྞཱནི པུཔྥཱནི ཨོཀིརཱཔེཏྭཱ དྷཛཔཊཱཀཀདལཱིཨཱདཱིནི ཨུསྶཱཔེཏྭཱ བྷགཝཏོ ཚཏྟཱཏིཚཏྟཾ ཀཏྭཱ དྭེ སེཏཙྪཏྟཱནི ཨེཀམེཀསྶ བྷིཀྑུནོ ཨེཀམེཀཾ སེཏཙྪཏྟཾ ཨུཔརི དྷཱརེཏྭཱ སཔརིཝཱརོ པུཔྥགནྡྷཱདཱིཧི པཱུཛཾ ཀརོནྟོ སཏྠཱརཾ ཨེཀེཀསྨིཾ ཝིཧཱརེ ཝསཱཔེཏྭཱ མཧཱདཱནཱདཱིནི དཏྭཱ པཉྩཧི དིཝསེཧི གངྒཱཏཱིརཾ པཱཔེཏྭཱ ཏཏྠ ནཱཝཾ ཨལངྐརོནྟོ ཝེསཱལིཀཱནཾ སཱསནཾ པེསེསི – ‘‘མགྒཾ པཊིཡཱདེཏྭཱ སཏྠུ པཙྩུགྒམནཾ ཀརོནྟཱུ’’ཏི. ཏེ ‘‘དིགུཎཾ པཱུཛཾ ཀརིསྶཱམཱ’’ཏི ཝེསཱལིཡཱ ཙ གངྒཱཡ ཙ ཨནྟརེ ཏིཡོཛནབྷཱུམིཾ སམཾ ཀཱརེཏྭཱ བྷགཝཏོ ཙཏཱུཧི སེཏཙྪཏྟེཧི ཨེཀམེཀསྶ བྷིཀྑུནོ དྭཱིཧི དྭཱིཧི སེཏཙྪཏྟེཧི ཚཏྟཱཏིཚཏྟཱནི སཛྫེཏྭཱ པཱུཛཾ ཀུརུམཱནཱ ཨཱགནྟྭཱ གངྒཱཏཱིརེ ཨཊྛཾསུ. བིམྦིསཱརོ དྭེ ནཱཝཱ སངྒྷཱཊེཏྭཱ མཎྜཔཾ ཀཱརེཏྭཱ པུཔྥདཱམཱདཱིཧི ཨལངྐཱརཱཔེཏྭཱ སབྦརཏནམཡཾ བུདྡྷཱསནཾ པཉྙཱཔེསི. བྷགཝཱ ཏསྨིཾ ནིསཱིདི. བྷིཀྑཱུཔི ནཱཝཾ ཨབྷིརུཧིཏྭཱ བྷགཝནྟཾ པརིཝཱརེཏྭཱ ནིསཱིདིཾསུ. རཱཛཱ ཨནུགཙྪནྟོ གལཔྤམཱཎཾ ཨུདཀཾ ཨོཏརིཏྭཱ ‘‘ཡཱཝ, བྷནྟེ, བྷགཝཱ ཨཱགཙྪཏི, ཏཱཝཱཧཾ ཨིདྷེཝ གངྒཱཏཱིརེ ཝསིསྶཱམཱི’’ཏི ཝཏྭཱ ནཱཝཾ ཨུཡྻོཛེཏྭཱ ནིཝཏྟི. སཏྠཱ ཡོཛནམཏྟཾ ཨདྡྷཱནཾ གངྒཱཡ གནྟྭཱ ཝེསཱལིཀཱནཾ སཱིམཾ པཱཔུཎི.

ལིཙྪཝཱིརཱཛཱནོ སཏྠཱརཾ པཙྩུགྒནྟྭཱ གལཔྤམཱཎཾ ཨུདཀཾ ཨོཏརིཏྭཱ ནཱཝཾ ཏཱིརཾ ཨུཔནེཏྭཱ སཏྠཱརཾ ནཱཝཱཏོ ཨོཏཱརཡིཾསུ. སཏྠཱརཱ ཨོཏརིཏྭཱ ཏཱིརེ ཨཀྐནྟམཏྟེཡེཝ མཧཱམེགྷོ ཨུཊྛཧིཏྭཱ པོཀྑརཝསྶཾ ཝསྶི. སབྦཏྠ ཛཎྞུཔྤམཱཎཨཱུརུཔྤམཱཎཀཊིཔྤམཱཎཱདཱིནི ཨུདཀཱནི སནྡནྟཱནི སབྦཀུཎཔཱནི གངྒཾ པཝེསཡིཾསུ, པརིསུདྡྷོ བྷཱུམིབྷཱགོ ཨཧོསི. ལིཙྪཝཱིརཱཛཱནོ སཏྠཱརཾ ཡོཛནེ ཡོཛནེ ཝསཱཔེཏྭཱ མཧཱདཱནཾ དཏྭཱ དིགུཎཾ པཱུཛཾ ཀརོནྟཱ ཏཱིཧི དིཝསེཧི ཝེསཱལིཾ ནཡིཾསུ. སཀྐོ དེཝརཱཛཱ དེཝགཎཔརིཝུཏོ ཨཱགམཱསི, མཧེསཀྑཱནཾ དེཝཱནཾ སནྣིཔཱཏེན ཨམནུསྶཱ ཡེབྷུཡྻེན པལཱཡིཾསུ. སཏྠཱ སཱཡཾ ནགརདྭཱརེ ཋཏྭཱ ཨཱནནྡཏྠེརཾ ཨཱམནྟེསི – ‘‘ཨིམཾ, ཨཱནནྡ, རཏནསུཏྟཾ ཨུགྒཎྷིཏྭཱ ལིཙྪཝཱིཀུམཱརེཧི སདྡྷིཾ ཝིཙརནྟོ ཝེསཱལིཡཱ ཏིཎྞཾ པཱཀཱརཱནཾ ཨནྟརེ པརིཏྟཾ ཀརོཧཱི’’ཏི.

ཐེརོ སཏྠཱརཱ དིནྣཾ རཏནསུཏྟཾ ཨུགྒཎྷིཏྭཱ སཏྠུ སེལམཡཔཏྟེན ཨུདཀཾ ཨཱདཱཡ ནགརདྭཱརེ ཋིཏོ པཎིདྷཱནཏོ པཊྛཱཡ ཏཐཱགཏསྶ དས པཱརམིཡོ དས ཨུཔཔཱརམིཡོ དས པརམཏྠཔཱརམིཡོཏི སམཏིཾས པཱརམིཡོ པཉྩ མཧཱཔརིཙྩཱགེ ལོཀཏྠཙརིཡཱ ཉཱཏཏྠཙརིཡཱ བུདྡྷཏྠཙརིཡཱཏི ཏིསྶོ ཙརིཡཱཡོ པཙྪིམབྷཝེ གབྦྷཝོཀྐནྟིཾ ཛཱཏིཾ ཨབྷིནིཀྑམནཾ པདྷཱནཙརིཡཾ བོདྷིཔལླངྐེ མཱརཝིཛཡཾ སབྦཉྙུཏཉྙཱཎཔཊིཝེདྷཾ དྷམྨཙཀྐཔཝཏྟནཾ ནཝལོཀུཏྟརདྷམྨེཏི སབྦེཔིམེ བུདྡྷགུཎེ ཨཱཝཛྫེཏྭཱ ནགརཾ པཝིསིཏྭཱ ཏིཡཱམརཏྟིཾ ཏཱིསུ པཱཀཱརནྟརེསུ པརིཏྟཾ ཀརོནྟོ ཝིཙརི. ཏེན ‘‘ཡཾཀིཉྩཱི’’ཏི ཝུཏྟམཏྟེཡེཝ ཨུདྡྷཾ ཁིཏྟཨུདཀཾ ཨམནུསྶཱནཾ ཨུཔརི པཏི. ‘‘ཡཱནཱིདྷ བྷཱུཏཱནཱི’’ཏི གཱཐཱཀཐནཏོ པཊྛཱཡ རཛཏཝཊཾསཀཱ ཝིཡ ཨུདཀབིནྡཱུནི ཨཱཀཱསེན གནྟྭཱ གིལཱནམནུསྶཱནཾ ཨུཔརི པཏིཾསུ. ཏཱཝདེཝ ཝཱུཔསནྟརོགཱ མནུསྶཱ ཨུཊྛཱཡུཊྛཱཡ ཐེརཾ པརིཝཱརེསུཾ. ‘‘ཡཾཀིཉྩཱི’’ཏི ཝུཏྟཔདཏོ པཊྛཱཡ པན ཨུདཀཕུསིཏེཧི ཕུཊྛཕུཊྛཱ སབྦེ ཨཔལཱཡནྟཱ སངྐཱརཀཱུཊབྷིཏྟིཔདེསཱདིནིསྶིཏཱ ཨམནུསྶཱ ཏེན ཏེན དྭཱརེན པལཱཡིཾསུ. དྭཱརཱནི ཨནོཀཱསཱནི ཨཧེསུཾ. ཏེ ཨོཀཱསཾ ཨལབྷནྟཱ པཱཀཱརཾ བྷིནྡིཏྭཱཔི པལཱཡིཾསུ.

མཧཱཛནོ ནགརམཛ྄ཛྷེ སནྠཱགཱརཾ སབྦགནྡྷེཧི ཨུཔལིམྤེཏྭཱ ཨུཔརི སུཝཎྞཏཱརཀཱདིཝིཙིཏྟཾ ཝིཏཱནཾ བནྡྷིཏྭཱ བུདྡྷཱསནཾ པཉྙཱཔེཏྭཱ སཏྠཱརཾ ཨཱནེསི. སཏྠཱ པཉྙཏྟེ ཨཱསནེ ནིསཱིདི. བྷིཀྑུསངྒྷོཔི ལིཙྪཝཱིགཎོཔི སཏྠཱརཾ པརིཝཱརེཏྭཱ ནིསཱིདི. སཀྐོ དེཝརཱཛཱ དེཝགཎཔརིཝུཏོ པཏིརཱུཔེ ཨོཀཱསེ ཨཊྛཱསི. ཐེརོཔི སཀལནགརཾ ཨནུཝིཙརིཏྭཱ ཝཱུཔསནྟརོགེན མཧཱཛནེན སདྡྷིཾ ཨཱགནྟྭཱ སཏྠཱརཾ ཝནྡིཏྭཱ ནིསཱིདི. སཏྠཱ པརིསཾ ཨོལོཀེཏྭཱ ཏདེཝ རཏནསུཏྟཾ ཨབྷཱསི. དེསནཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི. ཨེཝཾ པུནདིཝསེཔཱིཏི སཏྟཱཧཾ ཏདེཝ རཏནསུཏྟཾ དེསེཏྭཱ སབྦབྷཡཱནཾ ཝཱུཔསནྟབྷཱཝཾ ཉཏྭཱ ལིཙྪཝཱིགཎཾ ཨཱམནྟེཏྭཱ ཝེསཱལིཏོ ནིཀྑམི. ལིཙྪཝཱིརཱཛཱནོ དིགུཎཾ སཀྐཱརཾ ཀརོནྟཱ པུན ཏཱིཧི དིཝསེཧི སཏྠཱརཾ གངྒཱཏཱིརཾ ནཡིཾསུ.

གངྒཱཡ ནིབྦཏྟནཱགརཱཛཱནོ ཙིནྟེསུཾ – ‘‘མནུསྶཱ ཏཐཱགཏསྶ སཀྐཱརཾ ཀརོནྟི, མཡཾ ཀིཾ ན ཀརོམཱ’’ཏི. ཏེ སུཝཎྞརཛཏམཎིམཡཱ ནཱཝཱཡོ མཱཔེཏྭཱ སུཝཎྞརཛཏམཎིམཡེ པལླངྐེ པཉྙཱཔེཏྭཱ པཉྩཝཎྞཔདུམསཉྪནྣཾ ཨུདཀཾ ཀརིཏྭཱ, ‘‘བྷནྟེ, ཨམྷཱཀམྤི ཨནུགྒཧཾ ཀརོཐཱ’’ཏི ཨཏྟནོ ཨཏྟནོ ནཱཝཾ ཨབྷིརུཧཎཏྠཱཡ སཏྠཱརཾ ཡཱཙིཾསུ. ‘‘མནུསྶཱ ཙ ནཱགཱ ཙ ཏཐཱགཏསྶ པཱུཛཾ ཀརོནྟི, མཡཾ པན ཀིཾ ན ཀརོམཱ’’ཏི བྷཱུམཊྛཀདེཝེཔི ཨཱདིཾ ཀཏྭཱ ཡཱཝ ཨཀནིཊྛབྲཧྨལོཀཱ སབྦེ དེཝཱ སཀྐཱརཾ ཀརིཾསུ. ཏཏྠ ནཱགཱ ཡོཛནིཀཱནི ཚཏྟཱཏིཚཏྟཱནི ཨུཀྑིཔིཾསུ. ཨེཝཾ ཧེཊྛཱ ནཱགཱ བྷཱུམིཏལེ རུཀྑགཙྪཔབྦཏཱདཱིསུ བྷཱུམཊྛཀཱ དེཝཏཱ, ཨནྟལིཀྑེ ཨཱཀཱསཊྛདེཝཱཏི ནཱགབྷཝནཾ ཨཱདིཾ ཀཏྭཱ ཙཀྐཝཱལ༹པརིཡནྟེན ཡཱཝ བྲཧྨལོཀཱ ཚཏྟཱཏིཚཏྟཱནི ཨུསྶཱཔིཏཱནི ཨཧེསུཾ. ཚཏྟནྟརེསུ དྷཛཱ, དྷཛནྟརེསུ པཊཱཀཱ, ཏེསཾ ཨནྟརནྟརཱ པུཔྥདཱམཝཱསཙུཎྞདྷུམཱདཱིཧི སཀྐཱརོ ཨཧོསི. སབྦལངྐཱརཔཊིམཎྜིཏཱ དེཝཔུཏྟཱ ཚཎཝེསཾ གཧེཏྭཱ ཨུགྒྷོསཡམཱནཱ ཨཱཀཱསེ ཝིཙརིཾསུ. ཏཡོ ཨེཝ ཀིར སམཱགམཱ མཧནྟཱ ཨཧེསུཾ – ཡམཀཔཱཊིཧཱརིཡསམཱགམོ དེཝོརོཧཎསམཱགམོ ཨཡཾ གངྒོརོཧཎསམཱགམོཏི.

པརཏཱིརེ བིམྦིསཱརོཔི ལིཙྪཝཱིཧི ཀཏསཀྐཱརཏོ དིགུཎཾ སཀྐཱརཾ སཛྫེཏྭཱ བྷགཝཏོ ཨཱགམནཾ ཨུདིཀྑམཱནོ ཨཊྛཱསི. སཏྠཱ གངྒཱཡ ཨུབྷོསུ པསྶེསུ རཱཛཱུནཾ མཧནྟཾ པརིཙྩཱགཾ ཨོལོཀེཏྭཱ ནཱགཱདཱིནཉྩ ཨཛ྄ཛྷཱསཡཾ ཝིདིཏྭཱ ཨེཀེཀཱཡ ནཱཝཱཡ པཉྩཔཉྩབྷིཀྑུསཏཔརིཝཱརཾ ཨེཀེཀཾ ནིམྨིཏབུདྡྷཾ མཱཔེསི. སོ ཨེཀེཀསྶ སེཏཙྪཏྟསྶ ཙེཝ ཀཔྤརུཀྑསྶ ཙ པུཔྥདཱམསྶ ཙ ཧེཊྛཱ ནཱགགཎཔརིཝུཏོ ནིསིནྣོ ཧོཏི. བྷཱུམཊྛཀདེཝཏཱདཱིསུཔི ཨེཀེཀསྨིཾ ཨོཀཱསེ སཔརིཝཱརཾ ཨེཀེཀཾ ནིམྨིཏབུདྡྷཾ མཱཔེསི. ཨེཝཾ སཀལཙཀྐཝཱལ༹གབྦྷེ ཨེཀཱལངྐཱརེ ཨེཀུསྶཝེ ཨེཀཚཎེཡེཝ ཙ ཛཱཏེ སཏྠཱ ནཱགཱནམནུགྒཧཾ ཀརོནྟོ ཨེཀཾ རཏནནཱཝཾ ཨབྷིརུཧི. བྷིཀྑཱུསུཔི ཨེཀེཀོ ཨེཀེཀམེཝ ཨབྷིརུཧི. ནཱགརཱཛཱནོ བུདྡྷཔྤམུཁཾ བྷིཀྑུསངྒྷཾ ནཱགབྷཝནཾ པཝེསེཏྭཱ སབྦརཏྟིཾ སཏྠུ སནྟིཀེ དྷམྨཀཐཾ སུཏྭཱ དུཏིཡདིཝསེ དིབྦེན ཁཱདནཱིཡེན བྷོཛནཱིཡེན བུདྡྷཔྤམུཁཾ བྷིཀྑུསངྒྷཾ པརིཝིསིཾསུ. སཏྠཱ ཨནུམོདནཾ ཀཏྭཱ ནཱགབྷཝནཱ ནིཀྑམིཏྭཱ སཀལཙཀྐཝཱལ༹དེཝཏཱཧི པཱུཛིཡམཱནོ པཉྩཧི ནཱཝཱསཏེཧི གངྒཱནདིཾ ཨཏིཀྐམི.

རཱཛཱ པཙྩུགྒནྟྭཱ སཏྠཱརཾ ནཱཝཱཏོ ཨོཏཱརེཏྭཱ ཨཱགམནཀཱལེ ལིཙྪཝཱིཏི ཀཏསཀྐཱརཏོ དིགུཎཾ སཀྐཱརཾ ཀཏྭཱ པུརིམནཡེནེཝ པཉྩཧི དིཝསེཧི རཱཛགཧཾ ཨབྷིནེསི. དུཏིཡདིཝསེ བྷིཀྑཱུ པིཎྜཔཱཏཔཊིཀྐནྟཱ སཱཡནྷསམཡེ དྷམྨསབྷཱཡཾ སནྣིསིནྣཱ ཀཐཾ སམུཊྛཱཔེསུཾ – ‘‘ཨཧོ བུདྡྷཱནཾ མཧཱནུབྷཱཝོ, ཨཧོ སཏྠརི དེཝམནུསྶཱནཾ པསཱདོ, གངྒཱཡ ནཱམ ཨོརཏོ ཙ པཱརཏོ ཙ ཨཊྛཡོཛནེ མགྒེ བུདྡྷགཏེན པསཱདེན རཱཛཱུཧི སམཏལཾ བྷཱུམིཾ ཀཏྭཱ ཝཱལུཀཱ ཨོཀིཎྞཱ, ཛཎྞུམཏྟེན ཨོདྷིནཱ ནཱནཱཝཎྞཱནི པུཔྥཱནི སནྠཏཱནི, གངྒཱཡ ཨུདཀཾ ནཱགཱནུབྷཱཝེན པཉྩཝཎྞེཧི པདུམེཧི སཉྪནྣཾ, ཡཱཝ ཨཀནིཊྛབྷཝནཱ ཚཏྟཱཏིཚཏྟཱནི ཨུསྶཱཔིཏཱནི, སཀལཙཀྐཝཱལ༹གབྦྷཾ ཨེཀཱལངྐཱརཾ ཨེཀུསྶཝཾ ཝིཡ ཛཱཏ’’ནྟི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨེས པཱུཛཱསཀྐཱརོ མཡ྄ཧཾ བུདྡྷཱནུབྷཱཝེན ནིབྦཏྟོ, ན ནཱགདེཝབྲཧྨཱནུབྷཱཝེན. ཨཏཱིཏེ པན ཨཔྤམཏྟཀཔརིཙྩཱགཱནུབྷཱཝེན ནིབྦཏྟོ’’ཏི ཝཏྭཱ བྷིཀྑཱུཧི ཡཱཙིཏོ ཨཏཱིཏཾ ཨཱཧརི.

ཨཏཱིཏེ ཏཀྐསིལཱཡཾ སངྑོ ནཱམ བྲཱཧྨཎོ ཨཧོསི. ཏསྶ པུཏྟོ སུསཱིམོ ནཱམ མཱཎཝོ སོལ༹སཝསྶུདྡེསིཀོ ཨེཀདིཝསཾ པིཏརཾ ཨུཔསངྐམིཏྭཱ ཨཱཧ – ‘‘ཨིཙྪཱམཧཾ, ཏཱཏ, བཱརཱཎསིཾ གནྟྭཱ མནྟེ ཨཛ྄ཛྷཱཡིཏུ’’ནྟི. ཨཐ ནཾ པིཏཱ ཨཱཧ – ‘‘ཏེན ཧི, ཏཱཏ, ཨསུཀོ ནཱམ བྲཱཧྨཎོ མམ སཧཱཡཀོ, ཏསྶ སནྟིཀཾ གནྟྭཱ ཨདྷཱིཡསྶཱུ’’ཏི. སོ ‘‘སཱདྷཱུ’’ཏི པཊིསྶུཎིཏྭཱ ཨནུཔུབྦེན བཱརཱཎསིཾ གནྟྭཱ ཏཾ བྲཱཧྨཎཾ ཨུཔསངྐམིཏྭཱ པིཏརཱ པཧིཏབྷཱཝམཱཙིཀྑི. ཨཐ ནཾ སོ ‘‘སཧཱཡཀསྶ མེ པུཏྟོ’’ཏི སམྤཊིཙྪིཏྭཱ པཊིཔསྶདྡྷདརཐཾ བྷདྡཀེན དིཝསེན མནྟེ ཝཱཙེཏུམཱརབྷི. སོ ལཧུཉྩ གཎྷནྟོ བཧུཉྩ གཎྷནྟོ ཨཏྟནོ ཨུགྒཧིཏུགྒཧིཏཾ སུཝཎྞབྷཱཛནེ པཀྑིཏྟསཱིཧཏེལམིཝ ཨཝིནསྶམཱནཾ དྷཱརེནྟོ ན ཙིརསྶེཝ ཨཱཙརིཡསྶ སམྨུཁཏོ ཨུགྒཎྷིཏབྦཾ སབྦཾ ཨུགྒཎྷིཏྭཱ སཛ྄ཛྷཱཡཾ ཀརོནྟོ ཨཏྟནོ ཨུགྒཧིཏསིཔྤསྶ ཨཱདིམཛ྄ཛྷམེཝ པསྶཏི, ནོ པརིཡོསཱནཾ.

སོ ཨཱཙརིཡཾ ཨུཔསངྐམིཏྭཱ ‘‘ཨཧཾ ཨིམསྶ སིཔྤསྶ ཨཱདིམཛ྄ཛྷམེཝ པསྶཱམི, ནོ པརིཡོསཱན’’ནྟི ཝཏྭཱ ཨཱཙརིཡེན ‘‘ཨཧམྤི, ཏཱཏ, ན པསྶཱམཱི’’ཏི ཝུཏྟེ ‘‘ཨཐ ཀོ, ཨཱཙརིཡ, པརིཡོསཱནཾ ཛཱནཱཏཱི’’ཏི པུཙྪིཏྭཱ ‘‘ཨིམེ, ཏཱཏ, ཨིསཡོ ཨིསིཔཏནེ ཝིཧརནྟི, ཏེ ཛཱནེཡྻུཾ, ཏེསཾ སནྟིཀཾ ཨུཔསངྐམིཏྭཱ པུཙྪསྶཱུ’’ཏི ཨཱཙརིཡེན ཝུཏྟེ པཙྩེཀབུདྡྷེ ཨུཔསངྐམིཏྭཱ པུཙྪི – ‘‘ཏུམྷེ ཀིར པརིཡོསཱནཾ ཛཱནཱཐཱ’’ཏི? ‘‘ཨཱམ, ཛཱནཱམཱ’’ཏི. ‘‘ཏེན ཧི མེ ཨཱཙིཀྑཐཱ’’ཏི? ‘‘ན མཡཾ ཨཔབྦཛིཏསྶ ཨཱཙིཀྑཱམ. སཙེ ཏེ པརིཡོསཱནེནཏྠོ, པབྦཛསྶཱུ’’ཏི. སོ ‘‘སཱདྷཱུ’’ཏི སམྤཊིཙྪིཏྭཱ ཏེསཾ སནྟིཀེ པབྦཛི. ཨཐསྶ ཏེ ‘‘ཨིདཾ ཏཱཝ སིཀྑསྶཱུ’’ཏི ཝཏྭཱ ‘‘ཨེཝཾ ཏེ ནིཝཱསེཏབྦཾ, ཨེཝཾ པཱརུཔིཏབྦ’’ནྟིཨཱདིནཱ ནཡེན ཨཱབྷིསམཱཙཱརིཀཾ ཨཱཙིཀྑིཾསུ. སོ ཏཏྠ སིཀྑནྟོ ཨུཔནིསྶཡསམྤནྣཏྟཱ ནཙིརསྶེཝ པཙྩེཀསམྦོདྷིཾ ཨབྷིསམྦུཛ྄ཛྷིཏྭཱ སཀལབཱརཱཎསིནགརེ གགནཏལེ པུཎྞཙནྡོ ཝིཡ པཱཀཊོ ལཱབྷགྒཡསགྒཔྤཏྟོ ཨཧོསི, སོ ཨཔྤཱཡུཀསཾཝཏྟནིཀསྶ ཀམྨསྶ ཀཏཏྟཱ ན ཙིརསྶེཝ པརིནིབྦཱཡི. ཨཐསྶ པཙྩེཀབུདྡྷཱ ཙ མཧཱཛནོ ཙ སརཱིརཀིཙྩཾ ཀཏྭཱ དྷཱཏུཡོ ཙ གཧེཏྭཱ ནགརདྭཱརེ ཐཱུཔཾ ཀཱརེསུཾ.

སངྑོཔི བྲཱཧྨཎོ ‘‘པུཏྟོ མེ ཙིརཾ གཏོ, པཝཏྟིམསྶ ཛཱནིསྶཱམཱི’’ཏི ཏཾ དཊྛུཀཱམོ ཏཀྐསིལཱཏོ ནིཀྑམིཏྭཱ ཨནུཔུབྦེན བཱརཱཎསིཾ པཏྭཱ མཧཱཛནཀཱཡཾ སནྣིཔཏིཏཾ དིསྭཱ ‘‘ཨདྡྷཱ ཨིམེསུ ཨེཀོཔི མེ པུཏྟསྶ པཝཏྟིཾ ཛཱནིསྶཏཱི’’ཏི ཨུཔསངྐམིཏྭཱ པུཙྪི – ‘‘སུསཱིམོ ནཱམ མཱཎཝོ ཨིདྷཱགམི, ཨཔི ནུ ཁོ ཏསྶ པཝཏྟིཾ ཛཱནཱཐཱ’’ཏི? ‘‘ཨཱམ, བྲཱཧྨཎ, ཛཱནཱམ, ཨསུཀསྶ བྲཱཧྨཎསྶ སནྟིཀེ ཏཡོ ཝེདེ སཛ྄ཛྷཱཡིཏྭཱ པབྦཛིཏྭཱ པཙྩེཀསམྦོདྷིཾ སཙྪིཀཏྭཱ པརིནིབྦུཏོ, ཨཡམསྶ ཐཱུཔོ པཏིཊྛཱཔིཏོ’’ཏི. སོ བྷཱུམིཾ ཧཏྠེན པཧརིཏྭཱ རོདིཏྭཱ ཀནྡིཏྭཱ ཏཾ ཙེཏིཡངྒཎཾ གནྟྭཱ ཏིཎཱནི ཨུདྡྷརིཏྭཱ ཨུཏྟརསཱཊཀེན ཝཱལུཀཾ ཨཱཧརིཏྭཱ ཙེཏིཡངྒཎེ ཨཱཀིརིཏྭཱ ཀམཎྜལུཏོ ཨུདཀེན པརིཔྥོསིཏྭཱ ཝནཔུཔྥེཧི པཱུཛཾ ཀཏྭཱ སཱཊཀེན པཊཱཀཾ ཨཱརོཔེཏྭཱ ཐཱུཔསྶ ཨུཔརི ཨཏྟནོ ཚཏྟཀཾ བནྡྷིཏྭཱ པཀྐཱམི.

སཏྠཱ ཨིདཾ ཨཏཱིཏཾ ཨཱཧརིཏྭཱ ‘‘ཏདཱ, བྷིཀྑཝེ, ཨཧཾ སངྑོ བྲཱཧྨཎོ ཨཧོསིཾ. མཡཱ སུསཱིམསྶ པཙྩེཀབུདྡྷསྶ ཙེཏིཡངྒཎེ ཏིཎཱནི ཨུདྡྷཊཱནི, ཏསྶ མེ ཀམྨསྶ ནིསྶནྡེན ཨཊྛཡོཛནམགྒཾ ཝིཧཏཁཱཎུཀཀཎྚཀཾ ཀཏྭཱ སུདྡྷཾ སམཏལཾ ཀརིཾསུ. མཡཱ ཏཏྠ ཝཱལུཀཱ ཨོཀིཎྞཱ, ཏསྶ མེ ནིསྶནྡེན ཨཊྛཡོཛནམགྒེ ཝཱལུཀཾ ཨོཀིརིཾསུ. མཡཱ ཏཏྠ ཝནཀུསུམེཧི པཱུཛཱ ཀཏཱ, ཏསྶ མེ ནིསྶནྡེན ཨཊྛཡོཛནམགྒེ ནཱནཱཝཎྞཱནི པུཔྥཱནི ཨོཀིཎྞཱནི, ཨེཀཡོཛནཊྛཱནེ གངྒཱཡ ཨུདཀཾ པཉྩཝཎྞེཧི པདུམེཧི སཉྪནྣཾ. མཡཱ ཏཏྠ ཀམཎྜལུཨུདཀེན བྷཱུམི པརིཔྥོསིཏཱ, ཏསྶ མེ ནིསྶནྡེན ཝེསཱལིཡཾ པོཀྑརཝསྶཾ ཝསྶི. མཡཱ ཏཏྠ པཊཱཀཱ, ཨཱརོཔིཏཱ, ཚཏྟཀཉྩ བདྡྷཾ, ཏསྶ མེ ནིསྶནྡེན ཡཱཝ ཨཀནིཊྛབྷཝནཱ དྷཛཔཊཱཀཚཏྟཱཏིཚཏྟཱདཱིཧི སཀལཙཀྐཝཱལ༹གབྦྷཾ ཨེཀུསྶཝཾ ཝིཡ ཛཱཏཾ. ཨིཏི ཁོ, བྷིཀྑཝེ, ཨེས པཱུཛཱསཀྐཱརོ མཡ྄ཧཾ ནེཝ བུདྡྷཱནུབྷཱཝེན ནིབྦཏྟོ, ན ནཱགདེཝབྲཧྨཱནུབྷཱཝེན, ཨཏཱིཏེ པན ཨཔྤམཏྟཀཔརིཙྩཱགཱནུབྷཱཝེནཱ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༢༩༠.

‘‘མཏྟཱསུཁཔརིཙྩཱགཱ, པསྶེ ཙེ ཝིཔུལཾ སུཁཾ;

ཙཛེ མཏྟཱསུཁཾ དྷཱིརོ, སམྤསྶཾ ཝིཔུལཾ སུཁ’’ནྟི.

ཏཏྠ མཏྟཱསུཁཔརིཙྩཱགཱཏི མཏྟཱསུཁནྟི པམཱཎཡུཏྟཀཾ པརིཏྟསུཁཾ ཝུཙྩཏི, ཏསྶ པརིཙྩཱགེན. ཝིཔུལཾ སུཁནྟི ཨུལཱ༹རཾ སུཁཾ ནིབྦཱནསུཁཾ ཝུཙྩཏི, ཏཾ ཙེ པསྶེཡྻཱཏི ཨཏྠོ. ཨིདཾ ཝུཏྟཾ ཧོཏི – ཨེཀཉྷི བྷོཛནཔཱཏིཾ སཛྫཱཔེཏྭཱ བྷུཉྫནྟསྶ མཏྟཱསུཁཾ ནཱམ ཨུཔྤཛྫཏི, ཏཾ པན པརིཙྩཛིཏྭཱ ཨུཔོསཐཾ ཝཱ ཀརོནྟསྶ དཱནཾ ཝཱ དདནྟསྶ ཝིཔུལཾ ཨུལཱ༹རཾ ནིབྦཱནསུཁཾ ནཱམ ནིབྦཏྟཏི. ཏསྨཱ སཙེ ཨེཝཾ ཏསྶ མཏྟཱསུཁསྶ པརིཙྩཱགཱ ཝིཔུལཾ སུཁཾ པསྶཏི, ཨཐེཏཾ ཝིཔུལཾ སུཁཾ སམྨཱ པསྶནྟོ པཎྜིཏོ ཏཾ མཏྟཱསུཁཾ ཙཛེཡྻཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཏྟནོཔུབྦཀམྨཝཏྠུ པཋམཾ.

༢. ཀུཀྐུཊཨཎྜཁཱདིཀཱཝཏྠུ

པརདུཀྑཱུཔདྷཱནེནཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཀུཀྐུཊཨཎྜཁཱདིཀཾ ཨཱརབྦྷ ཀཐེསི.

སཱཝཏྠིཡཱ ཀིར ཨཝིདཱུརེ པཎྜུརཾ ནཱམ ཨེཀོ གཱམོ, ཏཏྠེཀོ ཀེཝཊྚོ ཝསཏི. སོ སཱཝཏྠིཾ གཙྪནྟོ ཨཙིརཝཏིཡཾ ཀཙྪཔཨཎྜཱནི དིསྭཱ ཏཱནི ཨཱདཱཡ སཱཝཏྠིཾ གནྟྭཱ ཨེཀསྨིཾ གེཧེ པཙཱཔེཏྭཱ ཁཱདནྟོ ཏསྨིཾ གེཧེ ཀུམཱརིཀཱཡཔི ཨེཀཾ ཨཎྜཾ ཨདཱསི. སཱ ཏཾ ཁཱདིཏྭཱ ཏཏོ པཊྛཱཡ ཨཉྙཾ ཁཱདནཱིཡཾ ནཱམ ན ཨིཙྪི. ཨཐསྶཱ མཱཏཱ ཀུཀྐུཊིཡཱ ཝིཛཱཏཊྛཱནཏོ ཨེཀཾ ཨཎྜཾ གཧེཏྭཱ ཨདཱསི. སཱ ཏཾ ཁཱདིཏྭཱ རསཏཎྷཱཡ བདྡྷཱ ཏཏོ པཊྛཱཡ སཡམེཝ ཀུཀྐུཊིཡཱ ཨཎྜཱནི གཧེཏྭཱ ཁཱདཏི. ཀུཀྐུཊཱི ཝིཛཱཏཝིཛཱཏཀཱལེ ཏཾ ཨཏྟནོ ཨཎྜཱནི གཧེཏྭཱ ཁཱདནྟིཾ དིསྭཱ ཏཱཡ ཨུཔདྡུཏཱ ཨཱགྷཱཏཾ བནྡྷིཏྭཱ ‘‘ཨིཏོ དཱནི ཙུཏཱ ཡཀྑིནཱི ཧུཏྭཱ ཏཝ ཛཱཏདཱརཀེ ཁཱདིཏུཾ སམཏྠཱ ཧུཏྭཱ ནིབྦཏྟེཡྻ’’ནྟི པཏྠནཾ པཊྛཔེཏྭཱ ཀཱལཾ ཀཏྭཱ ཏསྨིཾཡེཝ གེཧེ མཛྫཱརཱི ཧུཏྭཱ ནིབྦཏྟི. ཨིཏརཱཔི ཀཱལཾ ཀཏྭཱ ཏཏྠེཝ ཀུཀྐུཊཱི ཧུཏྭཱ ནིབྦཏྟི. ཀུཀྐུཊཱི ཨཎྜཱནི ཝིཛཱཡི, མཛྫཱརཱི ཨཱགནྟྭཱ ཏཱནི ཁཱདིཏྭཱ དུཏིཡམྤི ཏཏིཡམྤི ཁཱདིཡེཝ. ཀུཀྐུཊཱི ‘‘ཏཡོ ཝཱརེ མམ ཨཎྜཱནི ཁཱདིཏྭཱ ཨིདཱནི མམྤི ཁཱདིཏུཀཱམཱསི, ཨིཏོ ཙུཏཱ སཔུཏྟཀཾ ཏཾ ཁཱདིཏུཾ ལབྷེཡྻ’’ནྟི པཏྠནཾ ཀཏྭཱ ཏཏོ ཙུཏཱ དཱིཔིནཱི ཧུཏྭཱ ནིབྦཏྟི. ཨིཏརཱཔི ཀཱལཾ ཀཏྭཱ མིགཱི ཧུཏྭཱ ནིབྦཏྟི. ཏསྶཱ ཝིཛཱཏཀཱལེ དཱིཔིནཱི ཨཱགནྟྭཱ ཏཾ སདྡྷིཾ པུཏྟེཧི ཁཱདི. ཨེཝཾ ཁཱདནྟཱ པཉྩསུ ཨཏྟབྷཱཝསཏེསུ ཨཉྙམཉྙསྶ དུཀྑཾ ཨུཔྤཱདེཏྭཱ ཨཝསཱནེ ཨེཀཱ ཡཀྑིནཱི ཧུཏྭཱ ནིབྦཏྟི, ཨེཀཱ སཱཝཏྠིཡཾ ཀུལདྷཱིཏཱ ཧུཏྭཱ ནིབྦཏྟི. ཨིཏོ པརཾ ‘‘ན ཧི ཝེརེན ཝེརཱནཱི’’ཏི (དྷ. པ. ༥) གཱཐཱཡ ཝུཏྟནཡེནེཝ ཝེདིཏབྦཾ. ཨིདྷ པན སཏྠཱ ‘‘ཝེརཉྷི ཨཝེརེན ཨུཔསམྨཏི, ནོ ཝེརེནཱ’’ཏི ཝཏྭཱ ཨུབྷིནྣམྤི དྷམྨཾ དེསེནྟོ ཨིམཾ གཱཐམཱཧ –

༢༩༡.

‘‘པརདུཀྑཱུཔདྷཱནེན, ཨཏྟནོ སུཁམིཙྪཏི;

ཝེརསཾསགྒསཾསཊྛོ, ཝེརཱ སོ ན པརིམུཙྩཏཱི’’ཏི.

ཏཏྠ པརདུཀྑཱུཔདྷཱནེནཱཏི པརསྨིཾ དུཀྑཱུཔདྷཱནེན, པརསྶ དུཀྑུཔྤཱདནེནཱཏི ཨཏྠོ. ཝེརསཾསགྒསཾསཊྛོཏི ཡོ པུགྒལོ ཨཀྐོསནཔཙྩཀྐོསནཔཧརཎཔཊིཧརཎཱདཱིནཾ ཝསེན ཨཉྙམཉྙཾ ཀཏེན ཝེརསཾསགྒེན སཾསཊྛོ. ཝེརཱ སོ ན པརིམུཙྩཏཱིཏི ནིཙྩཀཱལཾ ཝེརཝསེན དུཀྑམེཝ པཱཔུཎཱཏཱིཏི ཨཏྠོ.

དེསནཱཝསཱནེ ཡཀྑིནཱི སརཎེསུ པཏིཊྛཱཡ པཉྩ སཱིལཱནི སམཱདིཡིཏྭཱ ཝེརཏོ མུཙྩི, ཨིཏརཱཔི སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཀུཀྐུཊཨཎྜཁཱདིཀཱཝཏྠུ དུཏིཡཾ.

༣. བྷདྡིཡབྷིཀྑུཝཏྠུ

ཡཉྷི ཀིཙྩནྟི ཨིམཾ དྷམྨདེསནཾ སཏྠཱ བྷདྡིཡཾ ནིསྶཱཡ ཛཱཏིཡཱཝནེ ཝིཧརནྟོ བྷདྡིཡེ བྷིཀྑཱུ ཨཱརབྦྷ ཀཐེསི.

ཏེ ཀིར པཱདུཀམཎྜནེ ཨུཡྻུཏྟཱ ཨཧེསུཾ. ཡཐཱཧ – ‘‘ཏེན ཁོ པན སམཡེན བྷདྡིཡཱ བྷིཀྑཱུ ཨནེཀཝིཧིཏཾ པཱདུཀམཎྜནཱནུཡོགམནུཡུཏྟཱ ཝིཧརནྟི, ཏིཎཔཱདུཀཾ ཀརོནྟིཔི ཀཱརཱཔེནྟིཔི, མུཉྫཔཱདུཀཾ ཀརོནྟིཔི ཀཱརཱཔེནྟིཔི, པབྦཛཔཱདུཀཾ ཧིནྟཱལཔཱདུཀཾ ཀམལཔཱདུཀཾ ཀམྦལཔཱདུཀཾ ཀརོནྟིཔི ཀཱརཱཔེནྟིཔི, རིཉྩནྟི ཨུདྡེསཾ པརིཔུཙྪཾ ཨདྷིསཱིལཾ ཨདྷིཙིཏྟཾ ཨདྷིཔཉྙ’’ནྟི (མཧཱཝ. ༢༥༡). བྷིཀྑཱུ ཏེསཾ ཏཐཱཀརཎབྷཱཝཾ ཛཱནིཏྭཱ ཨུཛ྄ཛྷཱཡིཏྭཱ སཏྠུ ཨཱརོཙེསུཾ. སཏྠཱ ཏེ བྷིཀྑཱུ གརཧིཏྭཱ, ‘‘བྷིཀྑཝེ, ཏུམྷེ ཨཉྙེན ཀིཙྩེན ཨཱགཏཱ ཨཉྙསྨིཾཡེཝ ཀིཙྩེ ཨུཡྻུཏྟཱ’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༢༩༢.

‘‘ཡཉྷི ཀིཙྩཾ ཨཔཝིདྡྷཾ, ཨཀིཙྩཾ པན ཀརཱིཡཏི;

ཨུནྣལཱ༹ནཾ པམཏྟཱནཾ, ཏེསཾ ཝཌྜྷནྟི ཨཱསཝཱ.

༢༩༣.

‘‘ཡེསཉྩ སུསམཱརདྡྷཱ, ནིཙྩཾ ཀཱཡགཏཱ སཏི;

ཨཀིཙྩཾ ཏེ ན སེཝནྟི, ཀིཙྩེ སཱཏཙྩཀཱརིནོ;

སཏཱནཾ སམྤཛཱནཱནཾ, ཨཏྠཾ གཙྪནྟི ཨཱསཝཱ’’ཏི.

ཏཏྠ ཡཉྷི ཀིཙྩནྟི བྷིཀྑུནོ ཧི པབྦཛིཏཀཱལཏོ པཊྛཱཡ ཨཔརིམཱཎསཱིལཀྑནྡྷགོཔནཾ ཨརཉྙཱཝཱསོ དྷུཏངྒཔརིཧརཎཾ བྷཱཝནཱརཱམཏཱཏི ཨེཝམཱདཱིནི ཀིཙྩཾ ནཱམ. ཨིམེཧི པན ཡཾ ཨཏྟནོ ཀིཙྩཾ, ཏཾ ཨཔཝིདྡྷཾ ཚཌྜིཏཾ. ཨཀིཙྩནྟི བྷིཀྑུནོ ཚཏྟམཎྜནཾ ཨུཔཱཧནམཎྜནཾ པཱདུཀཔཏྟཐཱལཀདྷམྨཀརཎཀཱཡབནྡྷནཨཾསབདྡྷཀམཎྜནཾ ཨཀིཙྩཾ ནཱམ. ཡེཧི ཏཾ ཀཡིརཏི, ཏེསཾ མཱནནལ༹ཾ ཨུཀྑིཔིཏྭཱ ཙརཎེན ཨུནྣལཱ༹ནཾ སཏིཝོསྶགྒེན པམཏྟཱནཾ ཙཏྟཱརོ ཨཱསཝཱ ཝཌྜྷནྟཱིཏི ཨཏྠོ. སུསམཱརདྡྷཱཏི སུཔགྒཧིཏཱ. ཀཱཡགཏཱ སཏཱིཏི ཀཱཡཱནུཔསྶནཱབྷཱཝནཱ. ཨཀིཙྩནྟི ཏེ ཨེཏཾ ཚཏྟམཎྜནཱདིཀཾ ཨཀིཙྩཾ ན སེཝནྟི ན ཀརོནྟཱིཏི ཨཏྠོ. ཀིཙྩེཏི པབྦཛིཏཀཱལཏོ པཊྛཱཡ ཀཏྟབྦེ ཨཔརིམཱཎསཱིལཀྑནྡྷགོཔནཱདིཀེ ཀརཎཱིཡེ. སཱཏཙྩཀཱརིནོཏི སཏཏཀཱརིནོ ཨཊྛིཏཀཱརིནོ. ཏེསཾ སཏིཡཱ ཨཝིཔྤཝཱསེན སཏཱནཾ སཱཏྠཀསམྤཛཉྙཾ སཔྤཱཡསམྤཛཉྙཾ གོཙརསམྤཛཉྙཾ ཨསམྨོཧསམྤཛཉྙནྟི ཙཏཱུཧི སམྤཛཉྙེཧི སམྤཛཱནཱནཾ ཙཏྟཱརོཔི ཨཱསཝཱ ཨཏྠཾ གཙྪནྟི, པརིཀྑཡཾ ཨབྷཱཝཾ གཙྪནྟཱིཏི ཨཏྠོ.

དེསནཱཝསཱནེ ཏེ བྷིཀྑཱུ ཨརཧཏྟེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

བྷདྡིཡཝཏྠུ ཏཏིཡཾ.

༤. ལཀུཎྜཀབྷདྡིཡཏྠེརཝཏྠུ

མཱཏརནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ལཀུཎྜཀབྷདྡིཡཏྠེརཾ ཨཱརབྦྷ ཀཐེསི.

ཨེཀདིཝསཉྷི སམྦཧུལཱ ཨཱགནྟུཀཱ བྷིཀྑཱུ སཏྠཱརཾ དིཝཱཊྛཱནེ ནིསིནྣཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསཱིདིཾསུ. ཏསྨིཾ ཁཎེ ལཀུཎྜཀབྷདྡིཡཏྠེརོ བྷགཝཏོ ཨཝིདཱུརེ ཨཏིཀྐམཏི. སཏྠཱ ཏེསཾ བྷིཀྑཱུནཾ ཙིཏྟཱཙཱརཾ ཉཏྭཱ ཨོལོཀེཏྭཱ ‘‘པསྶཐ, བྷིཀྑཝེ, ཨཡཾ བྷིཀྑུ མཱཏཱཔིཏརོ ཧནྟྭཱ ནིདྡུཀྑོ ཧུཏྭཱ ཡཱཏཱི’’ཏི ཝཏྭཱ ཏེཧི བྷིཀྑཱུཧི ‘‘ཀིཾ ནུ ཁོ སཏྠཱ ཝདཏཱི’’ཏི ཨཉྙམཉྙཾ མུཁཱནི ཨོལོཀེཏྭཱ སཾསཡཔཀྑནྡེཧི, ‘‘བྷནྟེ, ཀིཾ ནཱམེཏཾ ཝདེཐཱ’’ཏི ཝུཏྟེ ཏེསཾ དྷམྨཾ དེསེནྟོ ཨིམཾ གཱཐམཱཧ –

༢༩༤.

‘‘མཱཏརཾ པིཏརཾ ཧནྟྭཱ, རཱཛཱནོ དྭེ ཙ ཁཏྟིཡེ;

རཊྛཾ སཱནུཙརཾ ཧནྟྭཱ, ཨནཱིགྷོ ཡཱཏི བྲཱཧྨཎོ’’ཏི.

ཏཏྠ སཱནུཙརནྟི ཨཱཡསཱདྷཀེན ཨཱཡུཏྟཀེན སཧིཏཾ. ཨེཏྠ ཧི ‘‘ཏཎྷཱ ཛནེཏི པུརིས’’ནྟི (སཾ. ནི. ༡.༥༥-༥༧) ཝཙནཏོ ཏཱིསུ བྷཝེསུ སཏྟཱནཾ ཛནནཏོ ཏཎྷཱ མཱཏཱ ནཱམ. ‘‘ཨཧཾ ཨསུཀསྶ ནཱམ རཉྙོ ཝཱ རཱཛམཧཱམཏྟསྶ ཝཱ པུཏྟོ’’ཏི པིཏརཾ ནིསྶཱཡ ཨསྨིམཱནསྶ ཨུཔྤཛྫནཏོ ཨསྨིམཱནོ པིཏཱ ནཱམ. ལོཀོ ཝིཡ རཱཛཱནཾ ཡསྨཱ སབྦདིཊྛིགཏཱནི དྭེ སསྶཏུཙྪེདདིཊྛིཡོ བྷཛནྟི, ཏསྨཱ དྭེ སསྶཏུཙྪེདདིཊྛིཡོ དྭེ ཁཏྟིཡརཱཛཱནོ ནཱམ. དྭཱདསཱཡཏནཱནི ཝིཏྠཏཊྛེན རཊྛདིསཏྟཱ རཊྛཾ ནཱམ. ཨཱཡསཱདྷཀོ ཨཱཡུཏྟཀཔུརིསོ ཝིཡ ཏནྣིསྶིཏོ ནནྡིརཱགོ ཨནུཙརོ ནཱམ. ཨནཱིགྷོཏི ནིདྡུཀྑོ. བྲཱཧྨཎོཏི ཁཱིཎཱསཝོ. ཨེཏེསཾ ཏཎྷཱདཱིནཾ ཨརཧཏྟམགྒཉཱཎཱསིནཱ ཧཏཏྟཱ ཁཱིཎཱསཝོ ནིདྡུཀྑོ ཧུཏྭཱ ཡཱཏཱིཏི ཨཡམེཏྠཏྠོ.

དེསནཱཝསཱནེ ཏེ བྷིཀྑཱུ ཨརཧཏྟེ པཏིཊྛཧིཾསུ.

དུཏིཡགཱཐཱཡཔི ཝཏྠུ པུརིམསདིསམེཝ. ཏདཱ ཧི སཏྠཱ ལཀུཎྜཀབྷདྡིཡཏྠེརམེཝ ཨཱརབྦྷ ཀཐེསི. ཏེསཾ དྷམྨཾ དེསེནྟོ ཨིམཾ གཱཐམཱཧ –

༢༩༥.

‘‘མཱཏརཾ པིཏརཾ ཧནྟྭཱ, རཱཛཱནོ དྭེ ཙ སོཏྠིཡེ;

ཝེཡགྒྷཔཉྩམཾ ཧནྟྭཱ, ཨནཱིགྷོ ཡཱཏི བྲཱཧྨཎོ’’ཏི.

ཏཏྠ དྭེ ཙ སོཏྠིཡེཏི དྭེ ཙ བྲཱཧྨཎེ. ཨིམིསྶཱ གཱཐཱཡ སཏྠཱ ཨཏྟནོ དྷམྨིསྶརཏཱཡ ཙ དེསནཱཝིདྷིཀུསལཏཱཡ ཙ སསྶཏུཙྪེདདིཊྛིཡོ དྭེ བྲཱཧྨཎརཱཛཱནོ ཙ ཀཏྭཱ ཀཐེསི. ཝེཡགྒྷཔཉྩམནྟི ཨེཏྠ བྱགྒྷཱནུཙརིཏོ སཔྤཊིབྷཡོ དུཔྤཊིཔནྣོ མགྒོ ཝེཡགྒྷོ ནཱམ, ཝིཙིཀིཙྪཱནཱིཝརཎམྤི ཏེན སདིསཏཱཡ ཝེཡགྒྷཾ ནཱམ, ཏཾ པཉྩམཾ ཨསྶཱཏི ནཱིཝརཎཔཉྩཀཾ ཝེཡགྒྷཔཉྩམཾ ནཱམ. ཨིདཉྩ ཝེཡགྒྷཔཉྩམཾ ཨརཧཏྟམགྒཉཱཎཱསིནཱ ནིསྶེསཾ ཧནྟྭཱ ཨནཱིགྷོཝ ཡཱཏི བྲཱཧྨཎོཏི ཨཡམེཏྠཏྠོ. སེསཾ པུརིམསདིསམེཝཱཏི.

ལཀུཎྜཀབྷདྡིཡཏྠེརཝཏྠུ ཙཏུཏྠཾ.

༥. དཱརུསཱཀཊིཀཔུཏྟཝཏྠུ

སུཔྤབུདྡྷནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ དཱརུསཱཀཊིཀསྶ པུཏྟཾ ཨཱརབྦྷ ཀཐེསི.

རཱཛགཧསྨིཉྷི སམྨཱདིཊྛིཀཔུཏྟོ མིཙྪཱདིཊྛིཀཔུཏྟོཏི དྭེ དཱརཀཱ ཨབྷིཀྑཎཾ གུལ༹ཀཱིལ༹ཾ ཀཱིལ༹ནྟི. ཏེསུ སམྨཱདིཊྛིཀཔུཏྟོ གུལ༹ཾ ཁིཔམཱནོ བུདྡྷཱནུསྶཏིཾ ཨཱཝཛྫེཏྭཱ ‘‘ནམོ བུདྡྷསྶཱ’’ཏི ཝཏྭཱ ཝཏྭཱ གུལ༹ཾ ཁིཔཏི. ཨིཏརོ ཏིཏྠིཡགུཎེ ཨུདྡིསིཏྭཱ ‘‘ནམོ ཨརཧནྟཱན’’ནྟི ཝཏྭཱ ཝཏྭཱ ཁིཔཏི. ཏེསུ སམྨཱདིཊྛིཀསྶ པུཏྟོ ཛིནཱཏི, ཨིཏརོ པན པརཱཛཡཏི. སོ ཏསྶ ཀིརིཡཾ དིསྭཱ ‘‘ཨཡཾ ཨེཝཾ ཨནུསྶརིཏྭཱ ཨེཝཾ ཝཏྭཱ གུལ༹ཾ ཁིཔནྟོ མམཾ ཛིནཱཏི, ཨཧམྤི ཨེཝརཱུཔཾ ཀརིསྶཱམཱི’’ཏི བུདྡྷཱནུསྶཏིཡཾ པརིཙཡམཀཱསི. ཨཐེཀདིཝསཾ ཏསྶ པིཏཱ སཀཊཾ ཡོཛེཏྭཱ དཱརཱུནཾ ཨཏྠཱཡ གཙྪནྟོ ཏམྤི དཱརཀཾ ཨཱདཱཡ གནྟྭཱ ཨཊཝིཡཾ དཱརཱུནཾ སཀཊཾ པཱུརེཏྭཱ ཨཱགཙྪནྟོ བཧིནགརེ སུསཱནསཱམནྟེ ཨུདཀཕཱསུཀཊྛཱནེ གོཎེ མོཙེཏྭཱ བྷཏྟཝིསྶགྒམཀཱསི. ཨཐསྶ ཏེ གོཎཱ སཱཡནྷསམཡེ ནགརཾ པཝིསནྟེན གོགཎེན སདྡྷིཾ ནགརམེཝ པཝིསིཾསུ. སཱཀཊིཀོཔི གོཎེ ཨནུབནྡྷནྟོ ནགརཾ པཝིསིཏྭཱ སཱཡཾ གོཎེ དིསྭཱ ཨཱདཱཡ ནིཀྑམནྟོ དྭཱརཾ ན སམྤཱཔུཎི. ཏསྨིཉྷི ཨསམྤཏྟེཡེཝ དྭཱརཾ པིཧིཏཾ.

ཨཐསྶ པུཏྟོ ཨེཀཀོཝ རཏྟིབྷཱགེ སཀཊསྶ ཧེཊྛཱ ནིཔཛྫིཏྭཱ ནིདྡཾ ཨོཀྐམི. རཱཛགཧཾ པན པཀཏིཡཱཔི ཨམནུསྶབཧུལཾ. ཨཡཉྩ སུསཱནསནྟིཀེ ནིཔནྣོ. ཏཏྠ ནཾ དྭེ ཨམནུསྶཱ པསྶིཾསུ. ཨེཀོ སཱསནསྶ པཊིཀཎྜཀོ མིཙྪཱདིཊྛིཀོ, ཨེཀོ སམྨཱདིཊྛིཀོ. ཏེསུ མིཙྪཱདིཊྛིཀོ ཨཱཧ – ‘‘ཨཡཾ ནོ བྷཀྑོ, ཨིམཾ ཁཱདིསྶཱམཱ’’ཏི. ཨིཏརོ ‘‘ཨལཾ མཱ ཏེ རུཙྩཱི’’ཏི ནིཝཱརེཏི. སོ ཏེན ནིཝཱརིཡམཱནོཔི ཏསྶ ཝཙནཾ ཨནཱདིཡིཏྭཱ དཱརཀཾ པཱདེསུ གཧེཏྭཱ ཨཱཀཌྜྷི. སོ བུདྡྷཱནུསྶཏིཡཱ པརིཙིཏཏྟཱ ཏསྨིཾ ཁཎེ ‘‘ནམོ བུདྡྷསྶཱ’’ཏི ཨཱཧ. ཨམནུསྶོ མཧཱབྷཡབྷཱིཏོ པཊིཀྐམིཏྭཱ ཨཊྛཱསི. ཨཐ ནཾ ཨིཏརོ ‘‘ཨམྷེཧི ཨཀིཙྩཾ ཀཏཾ, དཎྜཀམྨཾ ཏསྶ ཀརོམཱ’’ཏི ཝཏྭཱ ཏཾ རཀྑམཱནོ ཨཊྛཱསི. མིཙྪཱདིཊྛིཀོ ནགརཾ པཝིསིཏྭཱ རཉྙོ བྷོཛནཔཱཏིཾ པཱུརེཏྭཱ བྷོཛནཾ ཨཱཧརི. ཨཐ ནཾ ཨུབྷོཔི ཏསྶ མཱཏཱཔིཏརོ ཝིཡ ཧུཏྭཱ ཨུཔཊྛཱཔེཏྭཱ བྷོཛེཏྭཱ ‘‘ཨིམཱནི ཨཀྑརཱནི རཱཛཱཝ པསྶཏུ, མཱ ཨཉྙོ’’ཏི ཏཾ པཝཏྟིཾ པཀཱསེནྟཱ ཡཀྑཱནུབྷཱཝེན བྷོཛནཔཱཏིཡཾ ཨཀྑརཱནི ཚིནྡིཏྭཱ པཱཏིཾ དཱརུསཀཊེ པཀྑིཔིཏྭཱ སབྦརཏྟིཾ ཨཱརཀྑཾ ཀཏྭཱ པཀྐམིཾསུ.

པུནདིཝསེ ‘‘རཱཛཀུལཏོ ཙོརེཧི བྷོཛནབྷཎྜཾ ཨཝཧཊ’’ནྟི ཀོལཱཧལཾ ཀརོནྟཱ དྭཱརཱནི པིདཧིཏྭཱ ཨོལོཀེནྟཱ ཏཏྠ ཨཔསྶནྟཱ ནགརཱ ནིཀྑམིཏྭཱ ཨིཏོ ཙིཏོ ཙ ཨོལོཀེནྟཱ དཱརུསཀཊེ སུཝཎྞཔཱཏིཾ དིསྭཱ ‘‘ཨཡཾ ཙོརོ’’ཏི ཏཾ དཱརཀཾ གཧེཏྭཱ རཉྙོ དསྶེསུཾ. རཱཛཱ ཨཀྑརཱནི དིསྭཱ ‘‘ཀིཾ ཨེཏཾ, ཏཱཏཱ’’ཏི པུཙྪིཏྭཱ ‘‘ནཱཧཾ, དེཝ, ཛཱནཱམི, མཱཏཱཔིཏརོ མེ ཨཱགནྟྭཱ རཏྟིཾ བྷོཛེཏྭཱ རཀྑམཱནཱ ཨཊྛཾསུ, ཨཧམྤི མཱཏཱཔིཏརོ མཾ རཀྑནྟཱིཏི ནིབྦྷཡོཝ ནིདྡཾ ཨུཔགཏོ. ཨེཏྟཀཾ ཨཧཾ ཛཱནཱམཱི’’ཏི. ཨཐསྶ མཱཏཱཔིཏརོཔི ཏཾ ཋཱནཾ ཨཱགམཾསུ. རཱཛཱ ཏཾ པཝཏྟིཾ ཉཏྭཱ ཏེ ཏཡོཔི ཛནེ ཨཱདཱཡ སཏྠུ སནྟིཀཾ གནྟྭཱ སབྦཾ ཨཱརོཙེཏྭཱ ‘‘ཀིཾ ནུ ཁོ, བྷནྟེ, བུདྡྷཱནུསྶཏི ཨེཝ རཀྑཱ ཧོཏི, ཨུདཱཧུ དྷམྨཱནུསྶཏིཨཱདཡོཔཱི’’ཏི པུཙྪི. ཨཐསྶ སཏྠཱ, ‘‘མཧཱརཱཛ, ན ཀེཝལཾ བུདྡྷཱནུསྶཏིཡེཝ རཀྑཱ, ཡེསཾ པན ཚབྦིདྷེན ཙིཏྟཾ སུབྷཱཝིཏཾ, ཏེསཾ ཨཉྙེན རཀྑཱཝརཎེན ཝཱ མནྟོསདྷེཧི ཝཱ ཀིཙྩཾ ནཏྠཱི’’ཏི ཝཏྭཱ ཚ ཋཱནཱནི དསྶེནྟོ ཨིམཱ གཱཐཱ ཨབྷཱསི.

༢༩༦.

‘‘སུཔྤབུདྡྷཾ པབུཛ྄ཛྷནྟི, སདཱ གོཏམསཱཝཀཱ;

ཡེསཾ དིཝཱ ཙ རཏྟོ ཙ, ནིཙྩཾ བུདྡྷགཏཱ སཏི.

༢༩༧.

‘‘སུཔྤབུདྡྷཾ པབུཛ྄ཛྷནྟི, སདཱ གོཏམསཱཝཀཱ;

ཡེསཾ དིཝཱ ཙ རཏྟོ ཙ, ནིཙྩཾ དྷམྨགཏཱ སཏི.

༢༩༨.

‘‘སུཔྤབུདྡྷཾ པབུཛ྄ཛྷནྟི, སདཱ གོཏམསཱཝཀཱ;

ཡེསཾ དིཝཱ ཙ རཏྟོ ཙ, ནིཙྩཾ སངྒྷགཏཱ སཏི.

༢༩༩.

‘‘སུཔྤབུདྡྷཾ པབུཛ྄ཛྷནྟི, སདཱ གོཏམསཱཝཀཱ;

ཡེསཾ དིཝཱ ཙ རཏྟོ ཙ, ནིཙྩཾ ཀཱཡགཏཱ སཏི.

༣༠༠.

‘‘སུཔྤབུདྡྷཾ པབུཛ྄ཛྷནྟི, སདཱ གོཏམསཱཝཀཱ;

ཡེསཾ དིཝཱ ཙ རཏྟོ ཙ, ཨཧིཾསཱཡ རཏོ མནོ.

༣༠༡.

‘‘སུཔྤབུདྡྷཾ པབུཛ྄ཛྷནྟི, སདཱ གོཏམསཱཝཀཱ;

ཡེསཾ དིཝཱ ཙ རཏྟོ ཙ, བྷཱཝནཱཡ རཏོ མནོ’’ཏི.

ཏཏྠ སུཔྤབུདྡྷཾ པབུཛ྄ཛྷནྟཱིཏི བུདྡྷགཏཾ སཏིཾ གཧེཏྭཱ སུཔནྟཱ, གཧེཏྭཱཡེཝ ཙ པབུཛ྄ཛྷནྟཱ སུཔྤབུདྡྷཾ པབུཛ྄ཛྷནྟི ནཱམ. སདཱ གོཏམསཱཝཀཱཏི གོཏམགོཏྟསྶ བུདྡྷསྶ སཝནནྟེ ཛཱཏཏྟཱ ཏསྶེཝ ཨནུསཱསནིཡཱ སཝནཏཱཡ གོཏམསཱཝཀཱ. བུདྡྷགཏཱ སཏཱིཏི ཡེསཾ ‘‘ཨིཏིཔི སོ བྷགཝཱ’’ཏིཨཱདིཔྤབྷེདེ བུདྡྷགུཎེ ཨཱརབྦྷ ཨུཔྤཛྫམཱནཱ སཏི ནིཙྩཀཱལཾ ཨཏྠི, ཏེ སདཱཔི སུཔྤབུདྡྷཾ པབུཛ྄ཛྷནྟཱིཏི ཨཏྠོ. ཏཐཱ ཨསཀྐོནྟཱ པན ཨེཀདིཝསཾ ཏཱིསུ ཀཱལེསུ དྭཱིསུ ཀཱལེསུ ཨེཀསྨིམྤི ཀཱལེ བུདྡྷཱནུསྶཏིཾ མནསི ཀརོནྟཱ སུཔྤབུདྡྷཾ པབུཛ྄ཛྷནྟིཡེཝ ནཱམ. དྷམྨགཏཱ སཏཱིཏི ‘‘སྭཱཁཱཏོ བྷགཝཏཱ དྷམྨོ’’ཏིཨཱདིཔྤབྷེདེ དྷམྨགུཎེ ཨཱརབྦྷ ཨུཔྤཛྫམཱནཱ སཏི. སངྒྷགཏཱ སཏཱིཏི ‘‘སུཔྤཊིཔནྣོ བྷགཝཏོ སཱཝཀསངྒྷོ’’ཏིཨཱདིཔྤབྷེདེ སངྒྷགུཎེ ཨཱརབྦྷ ཨུཔྤཛྫམཱནཱ སཏི. ཀཱཡགཏཱ སཏཱིཏི དྭཏྟིཾསཱཀཱརཝསེན ཝཱ ནཝསིཝཐིཀཱཝསེན ཝཱ ཙཏུདྷཱཏུཝཝཏྠཱནཝསེན ཝཱ ཨཛ྄ཛྷཏྟནཱིལཀསིཎཱདིརཱུཔཛ྄ཛྷཱནཝསེན ཝཱ ཨུཔྤཛྫམཱནཱ སཏི. ཨཧིཾསཱཡ རཏོཏི ‘‘སོ ཀརུཎཱསཧགཏེན ཙེཏསཱ ཨེཀཾ དིསཾ ཕརིཏྭཱ ཝིཧརཏཱི’’ཏི (ཝིབྷ. ༦༤༢) ཨེཝཾ ཝུཏྟཱཡ ཀརུཎཱབྷཱཝནཱཡ རཏོ. བྷཱཝནཱཡཱཏི མེཏྟཱབྷཱཝནཱཡ. ཀིཉྩཱཔི ཧེཊྛཱ ཀརུཎཱབྷཱཝནཱཡ ཝུཏྟཏྟཱ ཨིདྷ སབྦཱཔི ཨཝསེསཱ བྷཱཝནཱ ནཱམ, ཨིདྷ པན མེཏྟཱབྷཱཝནཱཝ ཨདྷིཔྤེཏཱ. སེསཾ པཋམགཱཐཱཡ ཝུཏྟནཡེནེཝ ཝེདིཏབྦཾ.

དེསནཱཝསཱནེ དཱརཀོ སདྡྷིཾ མཱཏཱཔིཏཱུཧི སོཏཱཔཏྟིཕལེ པཏིཊྛཧི. པཙྪཱ པན པབྦཛིཏྭཱ སབྦེཔི ཨརཧཏྟཾ པཱཔུཎིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

དཱརུསཱཀཊིཀཔུཏྟཝཏྠུ པཉྩམཾ.

༦. ཝཛྫིཔུཏྟཀབྷིཀྑུཝཏྠུ

དུཔྤབྦཛྫནྟི ཨིམཾ དྷམྨདེསནཾ སཏྠཱ ཝེསཱལིཾ ནིསྶཱཡ མཧཱཝནེ ཝིཧརནྟོ ཨཉྙཏརཾ ཝཛྫིཔུཏྟཀཾ བྷིཀྑུཾ ཨཱརབྦྷ ཀཐེསི. ཏཾ སནྡྷཱཡ ཝུཏྟཾ – ཨཉྙཏརོ ཝཛྫིཔུཏྟཀོ བྷིཀྑུ ཝེསཱལིཡཾ ཝིཧརཏི ཨཉྙཏརསྨིཾ ཝནསཎྜེ, ཏེན ཁོ པན སམཡེན ཝེསཱལིཡཾ སབྦརཏྟིཚཎོ ཧོཏི. ཨཐ ཁོ སོ བྷིཀྑུ ཝེསཱལིཡཱ ཏཱུརིཡཏཱལི༹ཏཝཱདིཏནིགྒྷོསསདྡཾ སུཏྭཱ པརིདེཝམཱནོ ཏཱཡཾ ཝེལཱཡཾ ཨིམཾ གཱཐཾ ཨབྷཱསི –

‘‘ཨེཀཀཱ མཡཾ ཨརཉྙེ ཝིཧརཱམ,

ཨཔཝིདྡྷཾཝ ཝནསྨིཾ དཱརུཀཾ;

ཨེཏཱདིསིཀཱཡ རཏྟིཡཱ,

ཀོསུ ནཱམམྷེཧི པཱཔིཡོ’’ཏི. (སཾ. ནི. ༡.༢༢༩);

སོ ཀིར ཝཛྫིརཊྛེ རཱཛཔུཏྟོ ཝཱརེན སམྤཏྟཾ རཛྫཾ པཧཱཡ པབྦཛིཏོ ཝེསཱལིཡཾ ཙཱཏུམཧཱརཱཛིཀེཧི སདྡྷིཾ ཨེཀཱབདྡྷཾ ཀཏྭཱ སཀལནགརེ དྷཛཔཊཱཀཱདཱིཧི པཊིམཎྜིཏེ ཀོམུདིཡཱ པུཎྞམཱཡ སབྦརཏྟིཾ ཚཎཝཱརེ ཝཏྟམཱནེ བྷེརིཡཱདཱིནཾ ཏཱུརིཡཱནཾ ཏཱལི༹ཏཱནཾ ནིགྒྷོསཾ ཝཱིཎཱདཱིནཉྩ ཝཱདིཏཱནཾ སདྡཾ སུཏྭཱ ཡཱནི ཝེསཱལིཡཾ སཏྟ རཱཛསཧསྶཱནི སཏྟ རཱཛསཏཱནི སཏྟ རཱཛཱནོ, ཏཏྟཀཱ ཨེཝ ཙ ནེསཾ ཨུཔརཱཛསེནཱཔཏིཨཱདཡོ, ཏེསུ ཨལངྐཏཔཊིཡཏྟེསུ ནཀྑཏྟཀཱིལ༹ནཏྠཱཡ ཝཱིཐིཾ ཨོཏིཎྞེསུ སཊྛིཧཏྠེ མཧཱཙངྐམེ ཙངྐམམཱནོ གགནམཛ྄ཛྷེ ཋིཏཾ པུཎྞཙནྡཾ དིསྭཱ ཙངྐམཀོཊིཡཾ ཕལཀཾ ནིསྶཱཡ ཋིཏོ ཝེཋནཱལངྐཱརཝིརཧིཏཏྟཱ ཝནེ ཚཌྜིཏདཱརུཀཾ ཝིཡ ཨཏྟབྷཱཝཾ ཨོལོཀེཏྭཱ ‘‘ཨཏྠི ནུ ཁོ ཨཉྙོ ཨམྷེཧི ལཱམཀཏརོ’’ཏི ཙིནྟེནྟོ པཀཏིཡཱ ཨཱརཉྙཀཱདིགུཎཡུཏྟོཔི ཏསྨིཾ ཁཎེ ཨནབྷིརཏིཡཱ པཱིལི༹ཏོ ཨེཝམཱཧ. སོ ཏསྨིཾ ཝནསཎྜེ ཨདྷིཝཏྠཱཡ དེཝཏཱཡ ‘‘ཨིམཾ བྷིཀྑུཾ སཾཝེཛེསྶཱམཱི’’ཏི ཨདྷིཔྤཱཡེན –

‘‘ཨེཀཀོཝ ཏྭཾ ཨརཉྙེ ཝིཧརསི, ཨཔཝིདྡྷཾཝ ཝནསྨིཾ དཱརུཀཾ;

ཏསྶ ཏེ བཧུཀཱ པིཧཡནྟི, ནེརཡིཀཱ ཝིཡ སགྒགཱམིན’’ནྟི. (སཾ. ནི. ༡.༢༢༩) –

ཝུཏྟཾ ཨིམཾ གཱཐཾ སུཏྭཱ པུནདིཝསེ སཏྠཱརཾ ཨུཔསངྐམིཏྭཱ ཝནྡིཏྭཱ ནིསཱིདི. སཏྠཱ ཏཾ པཝཏྟིཾ ཉཏྭཱ གྷརཱཝཱསསྶ དུཀྑཏཾ པཀཱསེཏུཀཱམོ པཉྩ དུཀྑཱནི སམོདྷཱནེཏྭཱ ཨིམཾ གཱཐམཱཧ –

༣༠༢.

‘‘དུཔྤབྦཛྫཾ དུརབྷིརམཾ, དུརཱཝཱསཱ གྷརཱ དུཁཱ;

དུཀྑོསམཱནསཾཝཱསོ, དུཀྑཱནུཔཏིཏདྡྷགཱུ;

ཏསྨཱ ན ཙདྡྷགཱུ སིཡཱ, ན ཙ དུཀྑཱནུཔཏིཏོ སིཡཱ’’ཏི.

ཏཏྠ དུཔྤབྦཛྫནྟི ཨཔྤཾ ཝཱ མཧནྟཾ ཝཱ བྷོགཀྑནྡྷཉྩེཝ ཉཱཏིཔརིཝཊྚཉྩ པཧཱཡ ཨིམསྨིཾ སཱསནེ ཨུརཾ དཏྭཱ པབྦཛྫཾ ནཱམ དུཀྑཾ. དུརབྷིརམནྟི ཨེཝཾ པབྦཛིཏེནཱཔི བྷིཀྑཱཙརིཡཱཡ ཛཱིཝིཏཝུཏྟིཾ གྷཊེནྟེན ཨཔརིམཱཎསཱིལཀྑནྡྷགོཔནདྷམྨཱནུདྷམྨཔྤཊིཔཏྟིཔཱུརཎཝསེན ཨབྷིརམིཏུཾ དུཀྑཾ. དུརཱཝཱསཱཏི ཡསྨཱ པན གྷརཾ ཨཱཝསནྟེན རཱཛཱུནཾ རཱཛཀིཙྩཾ, ཨིསྶརཱནཾ ཨིསྶརཀིཙྩཾ ཝཧིཏབྦཾ, པརིཛནཱ ཙེཝ དྷམྨིཀཱ སམཎབྲཱཧྨཎཱ ཙ སངྒཧིཏབྦཱ. ཨེཝཾ སནྟེཔི གྷརཱཝཱསོ ཚིདྡགྷཊོ ཝིཡ མཧཱསམུདྡོ ཝིཡ ཙ དུཔྤཱུརོ. ཏསྨཱ གྷརཱཝཱསཱ ནཱམེཏེ དུརཱཝཱསཱ དུཀྑཱ ཨཱཝསིཏུཾ, ཏེནེཝ ཀཱརཎེན དུཀྑཱཏི ཨཏྠོ. དུཀྑོ སམཱནསཾཝཱསོཏི གིཧིནོ ཝཱ ཧི ཡེ ཛཱཏིགོཏྟཀུལབྷོགེཧི པབྦཛིཏཱ ཝཱ སཱིལཱཙཱརབཱཧུསཙྩཱདཱིཧི སམཱནཱཔི ཧུཏྭཱ ‘‘ཀོསི ཏྭཾ, ཀོསྨི ཨཧ’’ནྟིཨཱདཱིནི ཝཏྭཱ ཨདྷིཀརཎཔསུཏཱ ཧོནྟི, ཏེ ཨསམཱནཱ ནཱམ, ཏེཧི སདྡྷིཾ སཾཝཱསོ དུཀྑོཏི ཨཏྠོ. དུཀྑཱནུཔཏིཏདྡྷགཱུཏི ཡེ ཝཊྚསངྑཱཏཾ ཨདྡྷཱནཾ པཊིཔནྣཏྟཱ ཨདྡྷགཱུ, ཏེ དུཀྑེ ཨནུཔཏིཏཱཝ. ཏསྨཱ ན ཙདྡྷགཱུཏི ཡསྨཱ དུཀྑཱནུཔཏིཏབྷཱཝོཔི དུཀྑོ ཨདྡྷགཱུབྷཱཝོཔི, ཏསྨཱ ཝཊྚསངྑཱཏཾ ཨདྡྷཱནཾ གམནཏཱཡ ཨདྡྷགཱུ ན བྷཝེཡྻ, ཝུཏྟཔྤཀཱརེན དུཀྑེན ཨནུཔཏིཏོཔི ན བྷཝེཡྻཱཏི ཨཏྠོ.

དེསནཱཝསཱནེ སོ བྷིཀྑུ པཉྩསུ ཋཱནེསུ དསྶིཏེ དུཀྑེ ནིབྦིནྡནྟོ པཉྩོརམྦྷཱགིཡཱནི པཉྩ ཨུདྡྷམྦྷཱགིཡཱནི སཾཡོཛནཱནི པདཱལེཏྭཱ ཨརཧཏྟེ པཏིཊྛཧཱིཏི.

ཝཛྫིཔུཏྟཀབྷིཀྑུཝཏྠུ ཚཊྛཾ.

༧. ཙིཏྟགཧཔཏིཝཏྠུ

སདྡྷོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཙིཏྟགཧཔཏིཾ ཨཱརབྦྷ ཀཐེསི. ཝཏྠུ བཱལཝགྒེ ‘‘ཨསནྟཾ བྷཱཝནམིཙྪེཡྻཱ’’ཏི གཱཐཱཝཎྞནཱཡ ཝིཏྠཱརིཏཾ. གཱཐཱཔི ཏཏྠེཝ ཝུཏྟཱ. ཝུཏྟཉྷེཏཾ ཏཏྠ (དྷ. པ. ཨཊྛ. ༡.༧༤) –

‘‘ཀིཾ པན, བྷནྟེ, ཨེཏསྶ ཏུམྷཱཀཾ སནྟིཀཾ ཨཱགཙྪནྟསྶེཝཱཡཾ ལཱབྷསཀྐཱརོ ཨུཔྤཛྫཏི, ཨུདཱཧུ ཨཉྙཏྠ གཙྪནྟསྶཱཔི ཨུཔྤཛྫཏཱི’’ཏི. ‘‘ཨཱནནྡ, མམ སནྟིཀཾ ཨཱགཙྪནྟསྶཱཔི ཨཉྙཏྠ གཙྪནྟསྶཱཔི ཏསྶ ཨུཔྤཛྫཏེཝ. ཨཡཉྷི ཨུཔཱསཀོ སདྡྷོ པསནྣོ སམྤནྣསཱིལོ, ཨེཝརཱུཔོ པུགྒལོ ཡཾ ཡཾ པདེསཾ བྷཛཏི, ཏཏྠ ཏཏྠེཝསྶ ལཱབྷསཀྐཱརོ ནིབྦཏྟཏཱི’’ཏི ཝཏྭཱ ཨིམཾ གཱཐམཱཧ –

༣༠༣.

‘‘སདྡྷོ སཱིལེན སམྤནྣོ, ཡསོབྷོགསམཔྤིཏོ;

ཡཾ ཡཾ པདེསཾ བྷཛཏི, ཏཏྠ ཏཏྠེཝ པཱུཛིཏོ’’ཏི. (དྷ. པ. ཨཊྛ. ༡.༧༤);

ཏཏྠ སདྡྷོཏི ལོཀིཡལོཀུཏྟརསདྡྷཱཡ སམནྣཱགཏོ. སཱིལེནཱཏི ཨཱགཱརིཡསཱིལཾ, ཨནཱགཱརིཡསཱིལནྟི དུཝིདྷཾ སཱིལཾ. ཏེསུ ཨིདྷ ཨཱགཱརིཡསཱིལཾ ཨདྷིཔྤེཏཾ, ཏེན སམནྣཱགཏོཏི ཨཏྠོ. ཡསོབྷོགསམཔྤིཏོཏི ཡཱདིསོ ཨནཱཐཔིཎྜིཀཱདཱིནཾ པཉྩཨུཔཱསཀསཏཔརིཝཱརསངྑཱཏོ ཨཱགཱརིཡཡསོ, ཏཱདིསེནེཝ ཡསེན དྷནདྷཉྙཱདིཀོ ཙེཝ སཏྟཝིདྷཨརིཡདྷནསངྑཱཏོ ཙཱཏི དུཝིདྷོ བྷོགོ, ཏེན སམནྣཱགཏོཏི ཨཏྠོ. ཡཾ ཡཾ པདེསནྟི པུརཏྠིམཱདཱིསུ དིསཱསུ ཨེཝརཱུཔོ ཀུལཔུཏྟོ ཡཾ ཡཾ པདེསཾ བྷཛཏི, ཏཏྠ ཏཏྠ ཨེཝརཱུཔེན ལཱབྷསཀྐཱརེན པཱུཛིཏོཝ ཧོཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཙིཏྟགཧཔཏིཝཏྠུ སཏྟམཾ.

༨. ཙཱུལ༹སུབྷདྡཱཝཏྠུ

དཱུརེ སནྟོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨནཱཐཔིཎྜིཀསྶ དྷཱིཏརཾ ཙཱུལ༹སུབྷདྡཾ ནཱམ ཨཱརབྦྷ ཀཐེསི.

ཨནཱཐཔིཎྜིཀསྶ ཀིར དཧརཀཱལཏོ པཊྛཱཡ ཨུགྒནགརཝཱསཱི ཨུགྒོ ནཱམ སེཊྛིཔུཏྟོ སཧཱཡཀོ ཨཧོསི. ཏེ ཨེཀཱཙརིཡཀུལེ སིཔྤཾ ཨུགྒཎྷནྟཱ ཨཉྙམཉྙཾ ཀཏིཀཾ ཀརིཾསུ ‘‘ཨམྷཱཀཾ ཝཡཔྤཏྟཀཱལེ པུཏྟདྷཱིཏཱསུ ཛཱཏཱསུ ཡོ པུཏྟསྶ དྷཱིཏརཾ ཝཱརེཏི, ཏེན ཏསྶ དྷཱིཏཱ དཱཏབྦཱ’’ཏི. ཏེ ཨུབྷོཔི ཝཡཔྤཏྟཱ ཨཏྟནོ ཨཏྟནོ ནགརེ སེཊྛིཊྛཱནེ པཏིཊྛཧིཾསུ. ཨཐེཀསྨིཾ སམཡེ ཨུགྒསེཊྛི ཝཎིཛྫཾ པཡོཛེནྟོ པཉྩཧི སཀཊསཏེཧི སཱཝཏྠིཾ ཨགམཱསི. ཨནཱཐཔིཎྜིཀོ ཨཏྟནོ དྷཱིཏརཾ ཙཱུལ༹སུབྷདྡཾ ཨཱམནྟེཏྭཱ, ‘‘ཨམྨ, པིཏཱ ཏེ ཨུགྒསེཊྛི ནཱམ ཨཱགཏོ, ཏསྶ ཀཏྟབྦཀིཙྩཾ སབྦཾ ཏཝ བྷཱརོ’’ཏི ཨཱཎཱཔེསི. སཱ ‘‘སཱདྷཱུ’’ཏི པཊིསྶུཎིཏྭཱ ཏསྶ ཨཱགཏདིཝསཏོ པཊྛཱཡ སཧཏྠེནེཝ སཱུཔབྱཉྫནཱདཱིནི སམྤཱདེཏི, མཱལཱགནྡྷཝིལེཔནཱདཱིནི ཨབྷིསངྑརོཏི, བྷོཛནཀཱལེ ཏསྶ ནྷཱནོདཀཾ པཊིཡཱདཱཔེཏྭཱ ནྷཱནཀཱལཏོ པཊྛཱཡ སབྦཀིཙྩཱནི སཱདྷུཀཾ ཀརོཏི.

ཨུགྒསེཊྛི ཏསྶཱ ཨཱཙཱརསམྤཏྟིཾ དིསྭཱ པསནྣཙིཏྟོ ཨེཀདིཝསཾ ཨནཱཐཔིཎྜིཀེན སདྡྷིཾ སུཁཀཐཱཡ སནྣིསིནྣོ ‘‘མཡཾ དཧརཀཱལེ ཨེཝཾ ནཱམ ཀཏིཀཾ ཀརིམྷཱ’’ཏི སཱརེཏྭཱ ཙཱུལ༹སུབྷདྡཾ ཨཏྟནོ པུཏྟསྶཏྠཱཡ ཝཱརེསི. སོ པན པཀཏིཡཱཝ མིཙྪཱདིཊྛིཀོ. ཏསྨཱ དསབལསྶ ཏམཏྠཾ ཨཱརོཙེཏྭཱ སཏྠཱརཱ ཨུགྒསེཊྛིསྶཱུཔནིསྶཡཾ དིསྭཱ ཨནུཉྙཱཏོ བྷརིཡཱཡ སདྡྷིཾ མནྟེཏྭཱ ཏསྶ ཝཙནཾ སམྤཊིཙྪིཏྭཱ དིཝསཾ ཝཝཏྠཔེཏྭཱ དྷཱིཏརཾ ཝིསཱཁཾ དཏྭཱ ཨུཡྻོཛེནྟོ དྷནཉྩཡསེཊྛི ཝིཡ མཧནྟཾ སཀྐཱརཾ ཀཏྭཱ སུབྷདྡཾ ཨཱམནྟེཏྭཱ, ‘‘ཨམྨ, སསུརཀུལེ ཝསནྟིཡཱ ནཱམ ཨནྟོཨགྒི བཧི ན ནཱིཧརིཏབྦོ’’ཏི (ཨ. ནི. ཨཊྛ. ༡.༡.༢༥༩; དྷ. པ. ཨཊྛ. ༡.༥༢ ཝིསཱཁཱཝཏྠུ) དྷནཉྩཡསེཊྛིནཱ ཝིསཱཁཱཡ དིནྣནཡེནེཝ དས ཨོཝཱདེ དཏྭཱ ‘‘སཙེ མེ གཏཊྛཱནེ དྷཱིཏུ དོསོ ཨུཔྤཛྫཏི, ཏུམྷེཧི སོདྷེཏབྦོ’’ཏི ཨཊྛ ཀུཊུམྦིཀེ པཱཊིབྷོགེ གཧེཏྭཱ ཏསྶཱ ཨུཡྻོཛནདིཝསེ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ དཏྭཱ པུརིམབྷཝེ དྷཱིཏརཱ ཀཏཱནཾ སུཙརིཏཱནཾ ཕལཝིབྷཱུཏིཾ ལོཀསྶ པཱཀཊཾ ཀཏྭཱ དསྶེནྟོ ཝིཡ མཧནྟེན སཀྐཱརེན དྷཱིཏརཾ ཨུཡྻོཛེསི. ཏསྶཱ ཨནུཔུབྦེན ཨུགྒནགརཾ པཏྟཀཱལེ སསུརཀུལེན སདྡྷིཾ མཧཱཛནོ པཙྩུགྒམནམཀཱསི.

སཱཔི ཨཏྟནོ སིརིཝིབྷཝཾ པཱཀཊཾ ཀཱཏུཾ ཝིསཱཁཱ ཝིཡ སཀལནགརསྶ ཨཏྟཱནཾ དསྶེནྟཱི རཐེ ཋཏྭཱ ནགརཾ པཝིསིཏྭཱ ནཱགརེཧི པེསིཏེ པཎྞཱཀཱརེ གཧེཏྭཱ ཨནུརཱུཔཝསེན ཏེསཾ ཏེསཾ པེསེནྟཱི སཀལནགརཾ ཨཏྟནོ གུཎེཧི ཨེཀཱབདྡྷམཀཱསི. མངྒལདིཝསཱདཱིསུ པནསྶཱ སསུརོ ཨཙེལཀཱནཾ སཀྐཱརཾ ཀརོནྟོ ‘‘ཨཱགནྟྭཱ ཨམྷཱཀཾ སམཎེ ཝནྡཏཱུ’’ཏི པེསེསི. སཱ ལཛྫཱཡ ནགྒེ པསྶིཏུཾ ཨསཀྐོནྟཱི གནྟུཾ ན ཨིཙྪཏི. སོ པུནཔྤུནཾ པེསེཏྭཱཔི ཏཱཡ པཊིཀྑིཏྟོ ཀུཛ྄ཛྷིཏྭཱ ‘‘ནཱིཧརཐ ན’’ནྟི ཨཱཧ. སཱ ‘‘ན སཀྐཱ མམ ཨཀཱརཎེན དོསཾ ཨཱརོཔེཏུ’’ནྟི ཀུཊུམྦིཀེ པཀྐོསཱཔེཏྭཱ ཏམཏྠཾ ཨཱརོཙེསི. ཏེ ཏསྶཱ ནིདྡོསབྷཱཝཾ ཉཏྭཱ སེཊྛིཾ སཉྙཱཔེསུཾ. སོ ‘‘ཨཡཾ མམ སམཎེ ཨཧིརིཀཱཏི ན ཝནྡཱི’’ཏི བྷརིཡཱཡ ཨཱརོཙེསི. སཱ ‘‘ཀཱིདིསཱ ནུ ཁོ ཨིམིསྶཱ སམཎཱ, ཨཏིཝིཡ ཏེསཾ པསཾསཏཱི’’ཏི ཏཾ པཀྐོསཱཔེཏྭཱ ཨཱཧ –

‘‘ཀཱིདིསཱ སམཎཱ ཏུཡ྄ཧཾ, བཱལ༹ྷཾ ཁོ ནེ པསཾསསི;

ཀིཾསཱིལཱ ཀིཾསམཱཙཱརཱ, ཏཾ མེ ཨཀྑཱཧི པུཙྪིཏཱ’’ཏི. (ཨ. ནི. ཨཊྛ. ༢.༤.༢༤);

ཨཐསྶཱ སུབྷདྡཱ བུདྡྷཱནཉྩེཝ བུདྡྷསཱཝཀཱནཉྩ གུཎེ པཀཱསེནྟཱི –

‘‘སནྟིནྡྲིཡཱ སནྟམཱནསཱ, སནྟཾ ཏེསཾ གཏཾ ཋིཏཾ;

ཨོཀྑིཏྟཙཀྑཱུ མིཏབྷཱཎཱི, ཏཱདིསཱ སམཎཱ མམ. (ཨ. ནི. ཨཊྛ. ༢.༤.༢༤);

‘‘ཀཱཡཀམྨཾ སུཙི ནེསཾ, ཝཱཙཱཀམྨཾ ཨནཱཝིལཾ;

མནོཀམྨཾ སུཝིསུདྡྷཾ, ཏཱདིསཱ སམཎཱ མམ.

‘‘ཝིམལཱ སངྑམུཏྟཱབྷཱ, སུདྡྷཱ ཨནྟརབཱཧིརཱ;

པུཎྞཱ སུདྡྷེཧི དྷམྨེཧི, ཏཱདིསཱ སམཎཱ མམ.

‘‘ལཱབྷེན ཨུནྣཏོ ལོཀོ, ཨལཱབྷེན ཙ ཨོནཏོ;

ལཱབྷཱལཱབྷེན ཨེཀཊྛཱ, ཏཱདིསཱ སམཎཱ མམ.

‘‘ཡསེན ཨུནྣཏོ ལོཀོ, ཨཡསེན ཙ ཨོནཏོ;

ཡསཱཡསེན ཨེཀཊྛཱ, ཏཱདིསཱ སམཎཱ མམ.

‘‘པསཾསཱཡུནྣཏོ ལོཀོ, ནིནྡཱཡཱཔི ཙ ཨོནཏོ;

སམཱ ནིནྡཱཔསཾསཱསུ, ཏཱདིསཱ སམཎཱ མམ.

‘‘སུཁེན ཨུནྣཏོ ལོཀོ, དུཀྑེནཱཔི ཙ ཨོནཏོ;

ཨཀམྤཱ སུཁདུཀྑེསུ, ཏཱདིསཱ སམཎཱ མམཱ’’ཏི. –

ཨེཝམཱདཱིཧི ཝཙནེཧི སསྶུཾ ཏོསེསི.

ཨཐ ནཾ ‘‘སཀྐཱ ཏཝ སམཎེ ཨམྷཱཀམྤི དསྶེཏུ’’ནྟི ཝཏྭཱ ‘‘སཀྐཱ’’ཏི ཝུཏྟེ ‘‘ཏེན ཧི ཡཐཱ མཡཾ ཏེ པསྶཱམ, ཏཐཱ ཀརོཧཱི’’ཏི ཝུཏྟེ སཱ ‘‘སཱདྷཱུ’’ཏི བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ སཛྫེཏྭཱ ཨུཔརིཔཱསཱདཏལེ ཋཏྭཱ ཛེཏཝནཱབྷིམུཁཱི སཀྐཙྩཾ པཉྩཔཏིཊྛིཏེན ཝནྡིཏྭཱ བུདྡྷགུཎེ ཨཱཝཛྫེཏྭཱ གནྡྷཝཱསཔུཔྥདྷུམེཧི པཱུཛཾ ཀཏྭཱ, ‘‘བྷནྟེ, སྭཱཏནཱཡ བུདྡྷཔྤམུཁཾ བྷིཀྑུསངྒྷཾ ནིམནྟེམི, ཨིམིནཱ མེ སཉྙཱཎེན སཏྠཱ ནིམནྟིཏབྷཱཝཾ ཛཱནཱཏཱུ’’ཏི སུམནཔུཔྥཱནཾ ཨཊྛ མུཊྛིཡོ ཨཱཀཱསེ ཁིཔི. པུཔྥཱནི གནྟྭཱ ཙཏུཔརིསམཛ྄ཛྷེ དྷམྨཾ དེསེནྟསྶ སཏྠུནོ ཨུཔརི མཱལཱཝིཏཱནཾ ཧུཏྭཱ ཨཊྛཾསུ. ཏསྨིཾ ཁཎེ ཨནཱཐཔིཎྜིཀོཔི དྷམྨཀཐཾ སུཏྭཱ སྭཱཏནཱཡ སཏྠཱརཾ ནིམནྟེསི. སཏྠཱ ‘‘ཨདྷིཝུཏྠཾ མཡཱ, གཧཔཏི, སྭཱཏནཱཡ བྷཏྟ’’ནྟི ཝཏྭཱ, ‘‘བྷནྟེ, མཡཱ པུརེཏརཾ ཨཱགཏོ ནཏྠི, ཀསྶ ནུ ཁོ ཝོ ཨདྷིཝུཏྠ’’ནྟི ཝུཏྟེ ‘‘ཙཱུལ༹སུབྷདྡཱཡ, གཧཔཏི, ནིམནྟིཏོ’’ཏི ཝཏྭཱ ‘‘ནནུ, བྷནྟེ, ཙཱུལ༹སུབྷདྡཱ དཱུརེ ཝསཏི ཨིཏོ ཝཱིསཏིཡོཛནསཏམཏྠཀེ’’ཏི ཝུཏྟེ, ‘‘ཨཱམ གཧཔཏི, དཱུརེ ཝསནྟཱཔི ཧི སཔྤུརིསཱ ཨབྷིམུཁེ ཋིཏཱ ཝིཡ པཀཱསེནྟཱི’’ཏི ཝཏྭཱ ཨིམཾ གཱཐམཱཧ –

༣༠༤.

‘‘དཱུརེ སནྟོ པཀཱསེནྟི, ཧིམཝནྟོཝ པབྦཏོ;

ཨསནྟེཏྠ ན དིསྶནྟི, རཏྟིཾ ཁིཏྟཱ ཡཐཱ སརཱ’’ཏི.

ཏཏྠ སནྟོཏི རཱགཱདཱིནཾ སནྟཏཱཡ བུདྡྷཱདཡོ སནྟཱ ནཱམ. ཨིདྷ པན པུབྦབུདྡྷེསུ ཀཏཱདྷིཀཱརཱ ཨུསྶནྣཀུསལམཱུལཱ བྷཱཝིཏབྷཱཝནཱ སཏྟཱ སནྟོཏི ཨདྷིཔྤེཏཱ. པཀཱསེནྟཱིཏི དཱུརེ ཋིཏཱཔི བུདྡྷཱནཾ ཉཱཎཔཐཾ ཨཱགཙྪནྟཱ པཱཀཊཱ ཧོནྟི. ཧིམཝནྟོ ཝཱཏི ཡཐཱ ཧི ཏིཡོཛནསཧསྶཝིཏྠཏོ པཉྩཡོཛནསཏུབྦེདྷོ ཙཏུརཱསཱིཏིཡཱ ཀཱུཊསཧསྶེཧི པཊིམཎྜིཏོ ཧིམཝནྟཔབྦཏོ དཱུརེ ཋིཏཱནམྤི ཨབྷིམུཁེ ཋིཏོ ཝིཡ པཀཱསེཏི, ཨེཝཾ པཀཱསེནྟཱིཏི ཨཏྠོ. ཨསནྟེཏྠཱཏི དིཊྛདྷམྨགརུཀཱ ཝིཏིཎྞཔརལོཀཱ ཨཱམིསཙཀྑུཀཱ ཛཱིཝིཀཏྠཱཡ པབྦཛིཏཱ བཱལཔུགྒལཱ ཨསནྟོ ནཱམ, ཏེ ཨེཏྠ བུདྡྷཱནཾ དཀྑིཎསྶ ཛཱཎུམཎྜལསྶ སནྟིཀེ ནིསིནྣཱཔི ན དིསྶནྟི ན པཉྙཱཡནྟི. རཏྟིཾ ཁིཏྟཱཏི རཏྟིཾ ཙཏུརངྒསམནྣཱགཏེ ཨནྡྷཀཱརེ ཁིཏྟསརཱ ཝིཡ ཏཐཱརཱུཔསྶ ཨུཔནིསྶཡབྷཱུཏསྶ པུབྦཧེཏུནོ ཨབྷཱཝེན ན པཉྙཱཡནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཀྐོ དེཝརཱཛཱ ‘‘སཏྠཱརཱ སུབྷདྡཱཡ ནིམནྟནཾ ཨདྷིཝཱསིཏ’’ནྟི ཉཏྭཱ ཝིསྶཀམྨདེཝཔུཏྟཾ ཨཱཎཱཔེསི – ‘‘པཉྩ ཀཱུཊཱགཱརསཏཱནི ནིམྨིནིཏྭཱ སྭེ བུདྡྷཔྤམུཁཾ བྷིཀྑུསངྒྷཾ ཨུགྒནགརཾ ནེཧཱི’’ཏི. སོ པུནདིཝསེ པཉྩསཏཱནི ཀཱུཊཱགཱརཱནི ནིམྨིནིཏྭཱ ཛེཏཝནདྭཱརེ ཨཊྛཱསི. སཏྠཱ ཨུཙྩིནིཏྭཱ ཝིསུདྡྷཁཱིཎཱསཝཱནཾཡེཝ པཉྩསཏཱནི ཨཱདཱཡ སཔརིཝཱརོ ཀཱུཊཱགཱརེསུ ནིསཱིདིཏྭཱ ཨུགྒནགརཾ ཨགམཱསི. ཨུགྒསེཊྛིཔི སཔརིཝཱརོ སུབྷདྡཱཡ དིནྣནཡེནེཝ ཏཐཱགཏསྶ ཨཱགཏམགྒཾ ཨོལོཀེནྟོ སཏྠཱརཾ མཧནྟེན སིརིཝིབྷཝེན ཨཱགཙྪནྟཾ དིསྭཱ པསནྣམཱནསོ མཱལཱདཱིཧི མཧནྟཾ སཀྐཱརཾ ཀརོནྟོ སཔརིཝཱརོ སམྤཊིཙྪིཏྭཱ ཝནྡིཏྭཱ མཧཱདཱནཾ དཏྭཱ པུནཔྤུནཾ ནིམནྟེཏྭཱ སཏྟཱཧཾ མཧཱདཱནཾ ཨདཱསི. སཏྠཱཔིསྶ སཔྤཱཡཾ སལླཀྑེཏྭཱ དྷམྨཾ དེསེསི. ཏཾ ཨཱདིཾ ཀཏྭཱ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི. སཏྠཱ ‘‘ཙཱུལ༹སུབྷདྡཱཡ ཨནུགྒཧཎཏྠཾ ཏྭཾ ཨིདྷེཝ ཧོཧཱི’’ཏི ཨནུརུདྡྷཏྠེརཾ ནིཝཏྟཱཔེཏྭཱ སཱཝཏྠིམེཝ ཨགམཱསི. ཏཏོ པཊྛཱཡ ཏཾ ནགརཾ སདྡྷཱསམྤནྣཾ ཨཧོསཱིཏི.

ཙཱུལ༹སུབྷདྡཱཝཏྠུ ཨཊྛམཾ.

༩. ཨེཀཝིཧཱརིཏྠེརཝཏྠུ

ཨེཀཱསནནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཝིཧཱརིཏྠེརཾ ནཱམ ཨཱརབྦྷ ཀཐེསི.

སོ ཀིར ཐེརོ ཨེཀཀོཝ སེཡྻཾ ཀཔྤེཏི, ཨེཀཀོཝ ནིསཱིདཏི, ཨེཀཀོཝ ཙངྐམཏི, ཨེཀཀོཝ ཏིཊྛཏཱིཏི ཙཏུཔརིསནྟརེ པཱཀཊོ ཨཧོསི. ཨཐ ནཾ བྷིཀྑཱུ, ‘‘བྷནྟེ, ཨེཝརཱུཔོ ནཱམཱཡཾ ཐེརོ’’ཏི ཏཐཱགཏསྶཱརོཙེསུཾ. སཏྠཱ ‘‘སཱདྷུ སཱདྷཱུ’’ཏི ཏསྶ སཱདྷུཀཱརཾ དཏྭཱ ‘‘བྷིཀྑུནཱ ནཱམ པཝིཝིཏྟེན བྷཝིཏབྦ’’ནྟི ཝིཝེཀེ ཨཱནིསཾསཾ ཀཐེཏྭཱ ཨིམཾ གཱཐམཱཧ –

༣༠༥.

‘‘ཨེཀཱསནཾ ཨེཀསེཡྻཾ, ཨེཀོ ཙརམཏནྡིཏོ;

ཨེཀོ དམཡམཏྟཱནཾ, ཝནནྟེ རམིཏོ སིཡཱ’’ཏི.

ཏཏྠ ཨེཀཱསནཾ ཨེཀསེཡྻནྟི བྷིཀྑུསཧསྶམཛ྄ཛྷེཔི མཱུལཀམྨཊྛཱནཾ ཨཝིཛཧིཏྭཱ ཏེནེཝ མནསིཀཱརེན ནིསིནྣསྶ ཨཱསནཾ ཨེཀཱསནཾ ནཱམ. ལོཧཔཱསཱདསདིསེཔི ཙ པཱསཱདེ བྷིཀྑུསཧསྶམཛ྄ཛྷེཔི པཉྙཏྟེ ཝིཙིཏྲཔཙྩཏྠརཎཱུཔདྷཱནེ མཧཱརཧེ སཡནེ སཏིཾ ཨུཔཊྛཔེཏྭཱ དཀྑིཎེན པསྶེན མཱུལཀམྨཊྛཱནམནསིཀཱརེན ནིཔནྣསྶ བྷིཀྑུནོ སེཡྻཱ ཨེཀསེཡྻཱ ནཱམ. ཨེཝརཱུཔཾ ཨེཀཱསནཉྩ ཨེཀསེཡྻཉྩ བྷཛེཐཱཏི ཨཏྠོ. ཨཏནྡིཏོཏི ཛངྒྷབལཾ ནིསྶཱཡ ཛཱིཝིཏཀཔྤནེན ཨཀུསཱིཏོ ཧུཏྭཱ སབྦཱིརིཡཱཔཐེསུ ཨེཀཀོཝ ཙརནྟོཏི ཨཏྠོ. ཨེཀོ དམཡནྟི རཏྟིཊྛཱནཱདཱིསུ ཀམྨཊྛཱནཾ ཨནུཡུཉྫིཏྭཱ མགྒཕལཱདྷིགམཝསེན ཨེཀོཝ ཧུཏྭཱ ཨཏྟཱནཾ དམེནྟོཏི ཨཏྠོ. ཝནནྟེ རམིཏོ སིཡཱཏི ཨེཝཾ ཨཏྟཱནཾ དམེནྟོ ཨིཏྠིཔུརིསསདྡཱདཱིཧི པཝིཝིཏྟེ ཝནནྟེཡེཝ ཨབྷིརམིཏོ བྷཝེཡྻ. ན ཧི སཀྐཱ ཨཱཀིཎྞཝིཧཱརིནཱ ཨེཝཾ ཨཏྟཱནཾ དམེཏུནྟི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ. ཏཏོ པཊྛཱཡ མཧཱཛནོ ཨེཀཝིཧཱརིཀམེཝ པཏྠེསཱིཏི.

ཨེཀཝིཧཱརིཏྠེརཝཏྠུ ནཝམཾ.

པཀིཎྞཀཝགྒཝཎྞནཱ ནིཊྛིཏཱ.

ཨེཀཝཱིསཏིམོ ཝགྒོ.

༢༢. ནིརཡཝགྒོ

༡. སུནྡརཱིཔརིབྦཱཛིཀཱཝཏྠུ

ཨབྷཱུཏཝཱདཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སུནྡརིཾ པརིབྦཱཛིཀཾ ཨཱརབྦྷ ཀཐེསི.

‘‘ཏེན ཁོ པན སམཡེན བྷགཝཱ སཀྐཏོ ཧོཏི གརུཀཏོ མཱནིཏོ པཱུཛིཏོ’’ཏི ཝཏྠུ ཝིཏྠཱརཏོ ཨུདཱནེ (ཨུདཱ. ༣༨) ཨཱགཏམེཝ. ཨཡཾ པནེཏྠ སངྑེཔོ – བྷགཝཏོ ཀིར བྷིཀྑུསངྒྷསྶ ཙ པཉྩནྣཾ མཧཱནདཱིནཾ མཧོགྷསདིསེ ལཱབྷསཀྐཱརེ ཨུཔྤནྣེ ཧཏལཱབྷསཀྐཱརཱ ཨཉྙཏིཏྠིཡཱ སཱུརིཡུགྒམནཀཱལེ ཁཛྫོཔནཀཱ ཝིཡ ནིཔྤབྷཱ ཧུཏྭཱ ཨེཀཏོ སནྣིཔཏིཏྭཱ མནྟཡིཾསུ – ‘‘མཡཾ སམཎསྶ གོཏམསྶ ཨུཔྤནྣཀཱལཏོ པཊྛཱཡ ཧཏལཱབྷསཀྐཱརཱ, ན ནོ ཀོཙི ཨཏྠིབྷཱཝམྤི ཛཱནཱཏི, ཀེན ནུ ཁོ སདྡྷིཾ ཨེཀཏོ ཧུཏྭཱ སམཎསྶ གོཏམསྶ ཨཝཎྞཾ ཨུཔྤཱདེཏྭཱ ལཱབྷསཀྐཱརམསྶ ཨནྟརདྷཱཔེཡྻཱམཱ’’ཏི. ཨཐ ནེསཾ ཨེཏདཧོསི – ‘‘སུནྡརིཡཱ སདྡྷིཾ ཨེཀཏོ ཧུཏྭཱ སཀྐུཎིསྶཱམཱ’’ཏི. ཏེ ཨེཀདིཝསཾ སུནྡརིཾ ཏིཏྠིཡཱརཱམཾ པཝིསིཏྭཱ ཝནྡིཏྭཱ ཋིཏཾ ནཱལཔིཾསུ. སཱ པུནཔྤུནཾ སལླཔནྟཱིཔི པཊིཝཙནཾ ཨལབྷིཏྭཱ ‘‘ཨཔི པནཡྻཱ, ཀེནཙི ཝིཧེཋིཏཏྠཱ’’ཏི པུཙྪི. ‘‘ཀིཾ, བྷགིནི, སམཎཾ གོཏམཾ ཨམྷེ ཝིཧེཋེཏྭཱ ཧཏལཱབྷསཀྐཱརེ ཀཏྭཱ ཝིཙརནྟཾ ན པསྶསཱི’’ཏི? ‘‘མཡཱ ཨེཏྠ ཀིཾ ཀཱཏུཾ ཝཊྚཏཱི’’ཏི? ‘‘ཏྭཾ ཁོསི, བྷགིནི, ཨབྷིརཱུཔཱ སོབྷགྒཔྤཏྟཱ, སམཎསྶ གོཏམསྶ ཨཡསཾ ཨཱརོཔེཏྭཱ མཧཱཛནཾ ཏཝ ཀཐཾ གཱཧཱཔེཏྭཱ ཧཏལཱབྷསཀྐཱརཾ ཀརོཧཱི’’ཏི. སཱ ཏཾ སུཏྭཱ ‘‘སཱདྷཱུ’’ཏི སམྤཊིཙྪིཏྭཱ པཀྐནྟཱ ཏཏོ པཊྛཱཡ མཱལཱགནྡྷཝིལེཔནཀཔྤཱུརཀཊུཀཕལཱདཱིནི གཧེཏྭཱ སཱཡཾ མཧཱཛནསྶ སཏྠུ དྷམྨདེསནཾ སུཏྭཱ ནགརཾ པཝིསནཀཱལེ ཛེཏཝནཱབྷིམུཁཱི གཙྪཏི, ‘‘ཀཧཾ གཙྪསཱི’’ཏི ཙ པུཊྛཱ ‘‘སམཎསྶ གོཏམསྶ སནྟིཀཾ གམིསྶཱམི, ཨཧཉྷི ཏེན སདྡྷིཾ ཨེཀགནྡྷཀུཊིཡཾ ཝསཱམཱི’’ཏི ཝཏྭཱ ཨཉྙཏརསྨིཾ ཏིཏྠིཡཱརཱམེ ཝསིཏྭཱ པཱཏོཝ ཛེཏཝནམགྒཾ ཨོཏརིཏྭཱ ནགརཱབྷིམུཁཱི ཨཱགཙྪནྟཱི ‘‘ཀིཾ, སུནྡརི, ཀཧཾ གཏཱསཱི’’ཏི པུཊྛཱ ‘‘སམཎེན གོཏམེན སདྡྷིཾ ཨེཀགནྡྷཀུཊིཡཾ ཝསིཏྭཱ ཏཾ ཀིལེསརཏིཡཱ རམཱཔེཏྭཱ ཨཱགཏཱམྷཱི’’ཏི ཝདཏི.

ཨཐ ཏེ ཀཏིཔཱཧཙྩཡེན དྷུཏྟཱནཾ ཀཧཱཔཎེ དཏྭཱ ‘‘གཙྪཐ སུནྡརིཾ མཱརེཏྭཱ སམཎསྶ གོཏམསྶ གནྡྷཀུཊིཡཱ སམཱིཔེ མཱལཱཀཙཝརནྟརེ ནིཀྑིཔིཏྭཱ ཨེཐཱ’’ཏི ཝདིཾསུ. ཏེ ཏཐཱ ཨཀཾསུ. ཏཏོ ཏིཏྠིཡཱ ‘‘སུནྡརིཾ ན པསྶཱམཱ’’ཏི ཀོལཱཧལཾ ཀཏྭཱ རཉྙོ ཨཱརོཙེཏྭཱ ‘‘ཀཧཾ ཝོ ཨཱསངྐཱ’’ཏི ཝུཏྟཱ ‘‘ཨིམེསུ དིཝསེསུ ཛེཏཝནེ ཝསཏི, ཏཏྠསྶཱ པཝཏྟིཾ ན ཛཱནཱམཱ’’ཏི ཝཏྭཱ ‘‘ཏེན ཧི གཙྪཐ, ནཾ ཝིཙིནཐཱ’’ཏི རཉྙཱ ཨནུཉྙཱཏཱ ཨཏྟནོ ཨུཔཊྛཱཀེ གཧེཏྭཱ ཛེཏཝནཾ གནྟྭཱ ཝིཙིནནྟཱ མཱལཱཀཙཝརནྟརེ ཏཾ དིསྭཱ མཉྩཀཾ ཨཱརོཔེཏྭཱ ནགརཾ པཝེསེཏྭཱ ‘‘སམཎསྶ གོཏམསྶ སཱཝཀཱ ‘སཏྠཱརཱ ཀཏཾ པཱཔཀམྨཾ པཊིཙྪཱདེསྶཱམཱ’ཏི སུནྡརིཾ མཱརེཏྭཱ མཱལཱཀཙཝརནྟརེ ནིཀྑིཔིཾསཱུ’’ཏི རཉྙོ ཨཱརོཙཡིཾསུ. རཱཛཱ ‘‘ཏེན ཧི གཙྪཐ, ནགརཾ ཨཱཧིཎྜཐཱ’’ཏི ཨཱཧ. ཏེ ནགརཝཱིཐཱིསུ ‘‘པསྶཐ སམཎཱནཾ སཀྱཔུཏྟིཡཱནཾ ཀམྨ’’ནྟིཨཱདཱིནི ཝཏྭཱ པུན རཉྙོ ནིཝེསནདྭཱརཾ ཨཱགམིཾསུ. རཱཛཱ སུནྡརིཡཱ སརཱིརཾ ཨཱམཀསུསཱནེ ཨཊྚཀཾ ཨཱརོཔེཏྭཱ རཀྑཱཔེསི. སཱཝཏྠིཝཱསིནོ ཋཔེཏྭཱ ཨརིཡསཱཝཀེ སེསཱ ཡེབྷུཡྻེན ‘‘པསྶཐ སམཎཱནཾ སཀྱཔུཏྟིཡཱནཾ ཀམྨ’’ནྟིཨཱདཱིནི ཝཏྭཱ ཨནྟོནགརེཔི བཧིནགརེཔི བྷིཀྑཱུ ཨཀྐོསནྟཱ ཝིཙརནྟི. བྷིཀྑཱུ ཏཾ པཝཏྟིཾ ཏཐཱགཏསྶ ཨཱརོཙེསུཾ. སཏྠཱ ‘‘ཏེན ཧི ཏུམྷེཔི ཏེ མནུསྶེ ཨེཝཾ པཊིཙོདེཐཱ’’ཏི ཝཏྭཱ ཨིམཾ གཱཐམཱཧ –

༣༠༦.

‘‘ཨབྷཱུཏཝཱདཱི ནིརཡཾ ཨུཔེཏི,

ཡོ ཝཱཔི ཀཏྭཱ ན ཀརོམིཙཱཧ;

ཨུབྷོཔི ཏེ པེཙྩ སམཱ བྷཝནྟི,

ནིཧཱིནཀམྨཱ མནུཛཱ པརཏྠཱ’’ཏི.

ཏཏྠ ཨབྷཱུཏཝཱདཱིཏི པརསྶ དོསཾ ཨདིསྭཱཝ མུསཱཝཱདཾ ཀཏྭཱ ཏུཙྪེན པརཾ ཨབྦྷཱཙིཀྑནྟོ. ཀཏྭཱཏི ཡོ ཝཱ པན པཱཔཀམྨཾ ཀཏྭཱ ‘‘ནཱཧཾ ཨེཏཾ ཀརོམཱི’’ཏི ཨཱཧ. པེཙྩ སམཱ བྷཝནྟཱིཏི ཏེ ཨུབྷོཔི ཛནཱ པརལོཀཾ གནྟྭཱ ནིརཡཾ ཨུཔགམནེན གཏིཡཱ སམཱ བྷཝནྟི. གཏིཡེཝ ནེསཾ པརིཙྪིནྣཱ, ཨཱཡུ པན ནེསཾ ན པརིཙྪིནྣཾ. བཧུཀཉྷི པཱཔཀམྨཾ ཀཏྭཱ ཙིརཾ ནིརཡེ པཙྩནྟི, པརིཏྟཾ ཀཏྭཱ ཨཔྤམཏྟཀམེཝ ཀཱལཾ. ཡསྨཱ པན ནེསཾ ཨུབྷིནྣམྤི ལཱམཀམེཝ ཀམྨཾ, ཏེན ཝུཏྟཾ – ‘‘ནིཧཱིནཀམྨཱ མནུཛཱ པརཏྠཱ’’ཏི. པརཏྠཱཏི ཨིམསྶ པན པདསྶ པུརཏོ པེཙྩཔདེན སམྦནྡྷོ. པེཙྩ པརཏྠ ཨིཏོ གནྟྭཱ ཏེ ནིཧཱིནཀམྨཱ པརལོཀེ སམཱ བྷཝནྟཱིཏི ཨཏྠོ. དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

རཱཛཱ ‘‘སུནྡརིཡཱ ཨཉྙེཧི མཱརིཏབྷཱཝཾ ཛཱནཱཐཱ’’ཏི པུརིསེ ཨུཡྻོཛེསི. ཨཐ ཏེ དྷུཏྟཱ ཏེཧི ཀཧཱཔཎེཧི སུརཾ པིཝནྟཱ ཨཉྙམཉྙཾ ཀལཧཾ ཀརིཾསུ. ཨེཀོ ཨེཀཾ ཨཱཧ – ‘‘ཏྭཾ སུནྡརིཾ ཨེཀཔྤཧཱརེནེཝ མཱརེཏྭཱ མཱལཱཀཙཝརནྟརེ ནིཀྑིཔིཏྭཱ ཏཏོ ལདྡྷཀཧཱཔཎེཧི སུརཾ པིཝསི, ཧོཏུ ཧོཏཱུ’’ཏི. རཱཛཔུརིསཱ ཏེ དྷུཏྟེ གཧེཏྭཱ རཉྙོ དསྶེསུཾ. ཨཐ ནེ རཱཛཱ ‘‘ཏུམྷེཧི སཱ མཱརིཏཱ’’ཏི པུཙྪི. ‘‘ཨཱམ, དེཝཱ’’ཏི. ‘‘ཀེཧི མཱརཱཔིཏཱ’’ཏི? ‘‘ཨཉྙཏིཏྠིཡེཧི, དེཝཱ’’ཏི. རཱཛཱ ཏིཏྠིཡེ པཀྐོསཱཔེཏྭཱ པུཙྪི. ཏེ ཏཐེཝ ཝདིཾསུ. ཏེན ཧི གཙྪཐ ཏུམྷེ ཨེཝཾ ཝདནྟཱ ནགརཾ ཨཱཧིཎྜཐ – ‘‘ཨཡཾ སུནྡརཱི སམཎསྶ གོཏམསྶ ཨཝཎྞཾ ཨཱརོཔེཏུཀཱམེཧི ཨམྷེཧི མཱརཱཔིཏཱ, ནེཝ སམཎསྶ གོཏམསྶ, ན སཱཝཀཱནཾ དོསོ ཨཏྠི, ཨམྷཱཀམེཝ དོསོ’’ཏི. ཏེ ཏཐཱ ཀརིཾསུ. བཱལམཧཱཛནོ ཏདཱ སདྡཧི, ཏིཏྠིཡཱཔི དྷུཏྟཱཔི པུརིསཝདྷདཎྜཾ པཱཔུཎིཾསུ. ཏཏོ པཊྛཱཡ བུདྡྷཱནཾ སཀྐཱརོ མཧཱ ཨཧོསཱིཏི.

སུནྡརཱིཔརིབྦཱཛིཀཱཝཏྠུ པཋམཾ.

༢. དུཙྩརིཏཕལཔཱིལི༹ཏཝཏྠུ

ཀཱསཱཝཀཎྛཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ དུཙྩརིཏཕལཱནུབྷཱཝེན པཱིལི༹ཏེ སཏྟེ ཨཱརབྦྷ ཀཐེསི.

ཨཱཡསྨཱ ཧི མོགྒལླཱནོ ལཀྑཎཏྠེརེན སདྡྷིཾ གིཛ྄ཛྷཀཱུཊཱ ཨོརོཧནྟོ ཨཊྛིསངྑལིཀཔེཏཱདཱིནཾ ཨཏྟབྷཱཝེ དིསྭཱ སིཏཾ ཀརོནྟོ ལཀྑཎཏྠེརེན སིཏཀཱརཎཾ པུཊྛོ ‘‘ཨཀཱལོ, ཨཱཝུསོ, ཨིམསྶ པཉྷསྶ, ཏཐཱགཏསྶ སནྟིཀེ མཾ པུཙྪེཡྻཱསཱི’’ཏི ཝཏྭཱ ཏཐཱགཏསྶ སནྟིཀེ ཐེརེན པུཊྛོ ཨཊྛིསངྑལིཀཔེཏཱདཱིནཾ དིཊྛབྷཱཝཾ ཨཱཙིཀྑིཏྭཱ ‘‘ཨིདྷཱཧཾ, ཨཱཝུསོ, གིཛ྄ཛྷཀཱུཊཱ པབྦཏཱ ཨོརོཧནྟོ ཨདྡསཾ བྷིཀྑུཾ ཝེཧཱསཾ གཙྪནྟཾ, ཏསྶ སངྒྷཱཊིཔི ཨཱདིཏྟཱ སམྤཛྫལིཏཱ སཛོཏིབྷཱུཏཱ…པེ… ཀཱཡོཔི ཨཱདིཏྟོ’’ཏིཨཱདིནཱ (པཱརཱ. ༢༣༠; སཾ. ནི. ༢.༢༡༨) ནཡེན སདྡྷིཾ པཏྟཙཱིཝརཀཱཡབནྡྷནཱདཱིཧི ཌཡ྄ཧམཱནེ པཉྩ སཧདྷམྨིཀེ ཨཱརོཙེསི. སཏྠཱ ཏེསཾ ཀསྶཔདསབལསྶ སཱསནེ པབྦཛིཏྭཱ པབྦཛྫཱཡ ཨནུརཱུཔཾ ཀཱཏུཾ ཨསཀྐོནྟཱནཾ པཱཔབྷཱཝཾ ཨཱཙིཀྑིཏྭཱ ཏསྨིཾ ཁཎེ ཏཏྠ ནིསིནྣཱནཾ བཧཱུནཾ པཱཔབྷིཀྑཱུནཾ དུཙྩརིཏཀམྨསྶ ཝིཔཱཀཾ དསྶེནྟོ ཨིམཾ གཱཐམཱཧ –

༣༠༧.

‘‘ཀཱསཱཝཀཎྛཱ བཧཝོ, པཱཔདྷམྨཱ ཨསཉྙཏཱ;

པཱཔཱ པཱཔེཧི ཀམྨེཧི, ནིརཡཾ ཏེ ཨུཔཔཛྫརེ’’ཏི.

ཏཏྠ ཀཱསཱཝཀཎྛཱཏི ཀཱསཱཝེན པལིཝེཋིཏཀཎྛཱ. པཱཔདྷམྨཱཏི ལཱམཀདྷམྨཱ. ཨསཉྙཏཱཏི ཀཱཡཱདིསཾཡམརཧིཏཱ, ཏཐཱརཱུཔཱ པཱཔཔུགྒལཱ ཨཏྟནཱ ཀཏེཧི ཨཀུསལཀམྨེཧི ནིརཡཾ ཨུཔཔཛྫནྟི, ཏེ ཏཏྠ པཙྩིཏྭཱ ཏཏོ ཙུཏཱ ཝིཔཱཀཱཝསེསེན པེཏེསུཔི ཨེཝཾ པཙྩནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

དུཙྩརིཏཕལཔཱིལི༹ཏཝཏྠུ དུཏིཡཾ.

༣. ཝགྒུམུདཱཏཱིརིཡབྷིཀྑུཝཏྠུ

སེཡྻོ ཨཡོགུལོ༹ཏི ཨིམཾ དྷམྨདེསནཾ སཏྠཱ ཝེསཱལིཾ ཨུཔནིསྶཱཡ མཧཱཝནེ ཝིཧརནྟོ ཝགྒུམུདཱཏཱིརིཡེ བྷིཀྑཱུ ཨཱརབྦྷ ཀཐེསི. ཝཏྠུ ཨུཏྟརིམནུསྶདྷམྨཔཱརཱཛིཀེ (པཱརཱ. ༡༩༣ ཨཱདཡོ) ཨཱགཏམེཝ.

ཏདཱ ཧི སཏྠཱ ཏེ བྷིཀྑཱུ ‘‘ཀིཾ པན ཏུམྷེ, བྷིཀྑཝེ, ཨུདརསྶཏྠཱཡ གིཧཱིནཾ ཨཉྙམཉྙསྶ ཨུཏྟརིམནུསྶདྷམྨསྶ ཝཎྞཾ བྷཱསིཏྠཱ’’ཏི ཝཏྭཱ ཏེཧི ‘‘ཨཱམ, བྷནྟེ’’ཏི ཝུཏྟེ ཏེ བྷིཀྑཱུ ཨནེཀཔརིཡཱཡེན གརཧིཏྭཱ ཨིམཾ གཱཐམཱཧ –

༣༠༨.

‘‘སེཡྻོ ཨཡོགུལོ༹ བྷུཏྟོ, ཏཏྟོ ཨགྒིསིཁཱུཔམོ;

ཡཉྩེ བྷུཉྫེཡྻ དུསྶཱིལོ, རཊྛཔིཎྜམསཉྙཏོ’’ཏི.

ཏཏྠ ཡཉྩེ བྷུཉྫེཡྻཱཏི ཡཾ དུསྶཱིལོ ནིསྶཱིལཔུགྒལོ ཀཱཡཱདཱིཧི ཨསཉྙཏོ རཊྛཝཱསཱིཧི སདྡྷཱཡ དིནྣཾ རཊྛཔིཎྜཾ ‘‘སམཎོམྷཱི’’ཏི པཊིཛཱནནྟོ གཧེཏྭཱ བྷུཉྫེཡྻ, ཏཏྟོ ཨཱདིཏྟོ ཨགྒིཝཎྞོ ཨཡོགུལོ༹ཝ བྷུཏྟོ སེཡྻོ སུནྡརཏརོ. ཀིཾ ཀཱརཎཱ? ཏཔྤཙྩཡཱ ཧི ཨེཀོཝ ཨཏྟབྷཱཝོ ཛྷཱཡེཡྻ, དུསྶཱིལོ པན སདྡྷཱདེཡྻཾ བྷུཉྫིཏྭཱ ཨནེཀཱནིཔི ཛཱཏིསཏཱནི ནིརཡེ པཙྩེཡྻཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཝགྒུམུདཱཏཱིརིཡབྷིཀྑུཝཏྠུ ཏཏིཡཾ.

༤. ཁེམཀསེཊྛིཔུཏྟཝཏྠུ

ཙཏྟཱརི ཋཱནཱནཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨནཱཐཔིཎྜིཀསྶ བྷཱགིནེཡྻཾ ཁེམཀཾ ནཱམ སེཊྛིཔུཏྟཾ ཨཱརབྦྷ ཀཐེསི.

སོ ཀིར ཨབྷིརཱུཔོ ཨཧོསི, ཡེབྷུཡྻེན ཨིཏྠིཡོ ཏཾ དིསྭཱ རཱགཱབྷིབྷཱུཏཱ སཀབྷཱཝེན སཎྛཱཏུཾ ནཱསཀྑིཾསུ. སོཔི པརདཱརཀམྨཱབྷིརཏོཝ ཨཧོསི. ཨཐ ནཾ རཏྟིཾ རཱཛཔུརིསཱ གཧེཏྭཱ རཉྙོ དསྶེསུཾ. རཱཛཱ མཧཱསེཊྛིསྶ ལཛྫཱམཱིཏི ཏཾ ཀིཉྩི ཨཝཏྭཱ ཝིསྶཛྫཱཔེསི. སོ པན ནེཝ ཝིརམི. ཨཐ ནཾ དུཏིཡམྤི ཏཏིཡམྤི རཱཛཔུརིསཱ གཧེཏྭཱ རཉྙོ དསྶེསུཾ. རཱཛཱ ཝིསྶཛྫཱཔེསིཡེཝ. མཧཱསེཊྛི, ཏཾ པཝཏྟིཾ སུཏྭཱ ཏཾ ཨཱདཱཡ སཏྠུ སནྟིཀཾ གནྟྭཱ ཏཾ པཝཏྟིཾ ཨཱརོཙེཏྭཱ, ‘‘བྷནྟེ, ཨིམསྶ དྷམྨཾ དེསེཐཱ’’ཏི ཨཱཧ. སཏྠཱ ཏསྶ སཾཝེགཀཐཾ ཝཏྭཱ པརདཱརསེཝནཱཡ དོསཾ དསྶེནྟོ ཨིམཱ གཱཐཱ ཨབྷཱསི –

༣༠༩.

‘‘ཙཏྟཱརི ཋཱནཱནི ནརོ པམཏྟོ,

ཨཱཔཛྫཏི པརདཱརཱུཔསེཝཱི;

ཨཔུཉྙལཱབྷཾ ན ནིཀཱམསེཡྻཾ,

ནིནྡཾ ཏཏཱིཡཾ ནིརཡཾ ཙཏུཏྠཾ.

༣༡༠.

‘‘ཨཔུཉྙལཱབྷོ ཙ གཏཱི ཙ པཱཔིཀཱ,

བྷཱིཏསྶ བྷཱིཏཱཡ རཏཱི ཙ ཐོཀིཀཱ;

རཱཛཱ ཙ དཎྜཾ གརུཀཾ པཎེཏི,

ཏསྨཱ ནརོ པརདཱརཾ ན སེཝེ’’ཏི.

ཏཏྠ ཋཱནཱནཱིཏི དུཀྑཀཱརཎཱནི. པམཏྟོཏི སཏིཝོསྶགྒེན སམནྣཱགཏོ. ཨཱཔཛྫཏཱིཏི པཱཔུཎཱཏི. པརདཱརཱུཔསེཝཱིཏི པརདཱརཾ ཨུཔསེཝནྟོ ཨུཔྤཐཙཱརཱི. ཨཔུཉྙལཱབྷནྟི ཨཀུསལལཱབྷཾ. ན ནིཀཱམསེཡྻནྟི ཡཐཱ ཨིཙྪཏི, ཨེཝཾ སེཡྻཾ ཨལབྷིཏྭཱ ཨནིཙྪིཏཾ པརིཏྟཀམེཝ ཀཱལཾ སེཡྻཾ ལབྷཏི. ཨཔུཉྙལཱབྷོ ཙཱཏི ཨེཝཾ ཏསྶ ཨཡཉྩ ཨཔུཉྙལཱབྷོ, ཏེན ཙ ཨཔུཉྙེན ནིརཡསངྑཱཏཱ པཱཔིཀཱ གཏི ཧོཏི. རཏཱི ཙ ཐོཀིཀཱཏི ཡཱ ཏསྶ བྷཱིཏསྶ བྷཱིཏཱཡ ཨིཏྠིཡཱ སདྡྷིཾ རཏི, སཱཔི ཐོཀིཀཱ པརིཏྟཱ ཧོཏི. གརུཀནྟི རཱཛཱ ཙ ཧཏྠཙྪེདཱདིཝསེན གརུཀཾ དཎྜཾ པཎེཏི. ཏསྨཱཏི ཡསྨཱ པརདཱརཾ སེཝནྟོ ཨེཏཱནི ཨཔུཉྙཱདཱིནི པཱཔུཎཱཏི, ཏསྨཱ པརདཱརཾ ན སེཝེཡྻཱཏི ཨཏྠོ.

དེསནཱཝསཱནེ ཁེམཀོ སོཏཱཔཏྟིཕལེ པཏིཊྛཧི. ཏཏོ པཊྛཱཡ མཧཱཛནོ སུཁཾ ཝཱིཏིནཱམེསི. ཀིཾ པནསྶ པུབྦཀམྨནྟི? སོ ཀིར ཀསྶཔབུདྡྷཀཱལེ ཨུཏྟམམལློ ཧུཏྭཱ དྭེ སུཝཎྞཔཊཱཀཱ དསབལསྶ ཀཉྩནཐཱུཔེ ཨཱརོཔེཏྭཱ པཏྠནཾ པཊྛཔེསི ‘‘ཋཔེཏྭཱ ཉཱཏིསཱལོཧིཏིཏྠིཡོ ཨཝསེསཱ མཾ དིསྭཱ རཛྫནྟཱུ’’ཏི. ཨིདམསྶ པུབྦཀམྨནྟི. ཏེན ཏཾ ནིབྦཏྟནིབྦཏྟཊྛཱནེ དིསྭཱ པརེསཾ ཨིཏྠིཡོ སཀབྷཱཝེན སཎྛཱཏུཾ ནཱསཀྑིཾསཱུཏི.

ཁེམཀསེཊྛིཔུཏྟཝཏྠུ ཙཏུཏྠཾ.

༥. དུབྦཙབྷིཀྑུཝཏྠུ

ཀུསོ ཡཐཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ དུབྦཙབྷིཀྑུཾ ཨཱརབྦྷ ཀཐེསི.

ཨེཀོ ཀིར བྷིཀྑུ ཨསཉྩིཙྩ ཨེཀཾ ཏིཎཾ ཚིནྡིཏྭཱ ཀུཀྐུཙྩེ ཨུཔྤནྣེ ཨེཀཾ བྷིཀྑུཾ ཨུཔསངྐམིཏྭཱ, ‘‘ཨཱཝུསོ, ཡོ ཏིཎཾ ཚིནྡཏི, ཏསྶ ཀིཾ ཧོཏཱི’’ཏི ཏཾ ཨཏྟནཱ ཀཏབྷཱཝཾ ཨཱརོཙེཏྭཱ པུཙྪི. ཨཐ ནཾ ཨིཏརོ ‘‘ཏྭཾ ཏིཎསྶ ཚིནྣཀཱརཎཱ ཀིཉྩི ཧོཏཱིཏི སཉྙཾ ཀརོསི, ན ཨེཏྠ ཀིཉྩི ཧོཏི, དེསེཏྭཱ པན མུཙྩཏཱི’’ཏི ཝཏྭཱ སཡམྤི ཨུབྷོཧི ཧཏྠེཧི ཏིཎཾ ལུཉྩིཏྭཱ ཨགྒཧེསི. བྷིཀྑཱུ ཏཾ པཝཏྟིཾ སཏྠུ ཨཱརོཙེསུཾ. སཏྠཱ ཏཾ བྷིཀྑུཾ ཨནེཀཔརིཡཱཡེན ཝིགརཧིཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༣༡༡.

‘‘ཀུསོ ཡཐཱ དུགྒཧིཏོ, ཧཏྠམེཝཱནུཀནྟཏི;

སཱམཉྙཾ དུཔྤརཱམཊྛཾ, ནིརཡཱཡུཔཀཌྜྷཏི.

༣༡༢.

‘‘ཡཾ ཀིཉྩི སིཐིལཾ ཀམྨཾ, སཾཀིལིཊྛཉྩ ཡཾ ཝཏཾ;

སངྐསྶརཾ བྲཧྨཙརིཡཾ, ན ཏཾ ཧོཏི མཧཔྥལཾ.

༣༡༣.

‘‘ཀཡིརཱ ཙེ ཀཡིརཱཐེནཾ, དལ༹ྷམེནཾ པརཀྐམེ;

སིཐིལོ ཧི པརིབྦཱཛོ, བྷིཡྻོ ཨཱཀིརཏེ རཛ’’ནྟི.

ཏཏྠ ཀུསོཏི ཡཾ ཀིཉྩི ཏིཁིཎདྷཱརཾ ཏིཎཾ ཨནྟམསོ ཏཱལཔཎྞམྤི, ཡཐཱ སོ ཀུསོ ཡེན དུགྒཧིཏོ, ཏསྶ ཧཏྠཾ ཨནུཀནྟཏི ཕཱལེཏི, ཨེཝམེཝ སམཎདྷམྨསངྑཱཏཾ སཱམཉྙམྤི ཁཎྜསཱིལཱདིཏཱཡ དུཔྤརཱམཊྛཾ ནིརཡཱཡུཔཀཌྜྷཏི, ནིརཡེ ནིབྦཏྟཱཔེཏཱིཏི ཨཏྠོ. སིཐིལནྟི ཨོལཱིཡིཏྭཱ ཀརཎེན སིཐིལགཱཧཾ ཀཏྭཱ ཀཏཾ ཡཾཀིཉྩི ཀམྨཾ. སཾཀིལིཊྛནྟི ཝེསིཡཱདིཀེསུ ཨགོཙརེསུ ཙརཎེན སཾཀིལིཊྛཾ. སངྐསྶརནྟི སངྐཱཧི སརིཏབྦཾ, ཨུཔོསཐཀིཙྩཱདཱིསུ ཨཉྙཏརཀིཙྩེན སནྣིཔཏིཏམྤི སངྒྷཾ དིསྭཱ ‘‘ཨདྡྷཱ ཨིམེ མམ ཙརིཡཾ ཉཏྭཱ མཾ ཨུཀྑིཔིཏུཀཱམཱཝ སནྣིཔཏིཏཱ’’ཏི ཨེཝཾ ཨཏྟནོ ཨཱསངྐཱཧི སརིཏཾ ཨུསྶངྐིཏཾ པརིསངྐིཏཾ. ན ཏཾ ཧོཏཱིཏི ཏཾ ཨེཝརཱུཔཾ སམཎདྷམྨསངྑཱཏཾ བྲཧྨཙརིཡཾ ཏསྶ པུགྒལསྶ མཧཔྥལཾ ན ཧོཏི, ཏསྶ མཧཔྥལཱབྷཱཝེནེཝ བྷིཀྑདཱཡཀཱནམྤིསྶ ན མཧཔྥལཾ ཧོཏཱིཏི ཨཏྠོ. ཀཡིརཱ ཙེཏི ཏསྨཱ ཡཾ ཀམྨཾ ཀརེཡྻ, ཏཾ ཀརེཡྻཱཐེཝ. དལ༹ྷམེནཾ པརཀྐམེཏི ཐིརཀཏམེཝ ཀཏྭཱ ཨཝཏྟསམཱདཱནོ ཧུཏྭཱ ཨེནཾ ཀཡིརཱ. པརིབྦཱཛོཏི སིཐིལབྷཱཝེན ཀཏོ ཁཎྜཱདིབྷཱཝཔྤཏྟོ སམཎདྷམྨོ. བྷིཡྻོ ཨཱཀིརཏེ རཛནྟི ཨབྦྷནྟརེ ཝིཛྫམཱནཾ རཱགརཛཱདིཾ ཨེཝརཱུཔོ སམཎདྷམྨོ ཨཔནེཏུཾ ན སཀྐོཏི, ཨཐ ཁོ ཏསྶ ཨུཔརི ཨཔརམྤི རཱགརཛཱདིཾ ཨཱཀིརཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ, སོཔི བྷིཀྑུ སཾཝརེ ཋཏྭཱ པཙྪཱ ཝིཔསྶནཾ ཝཌྜྷེཏྭཱ ཨརཧཏྟཾ པཱཔུཎཱིཏི.

དུབྦཙབྷིཀྑུཝཏྠུ པཉྩམཾ.

༦. ཨིསྶཱཔཀཏིཏྠིཝཏྠུ

ཨཀཏནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ ཨིསྶཱཔཀཏཾ ཨིཏྠིཾ ཨཱརབྦྷ ཀཐེསི.

ཏསྶཱ ཀིར སཱམིཀོ ཨེཀཱཡ གེཧདཱསིཡཱ སདྡྷིཾ སནྠཝཾ ཨཀཱསི. སཱ ཨིསྶཱཔཀཏཱ ཏཾ དཱསིཾ ཧཏྠཔཱདེསུ བནྡྷིཏྭཱ ཏསྶཱ ཀཎྞནཱསཾ ཚིནྡིཏྭཱ ཨེཀསྨིཾ གུལ༹ྷགབྦྷེ པཀྑིཔིཏྭཱ དྭཱརཾ པིདཧིཏྭཱ ཏསྶ ཀམྨསྶ ཨཏྟནཱ ཀཏབྷཱཝཾ པཊིཙྪཱདེཏུཾ ‘‘ཨེཧི, ཨཡྻ, ཝིཧཱརཾ གནྟྭཱ དྷམྨཾ སུཎིསྶཱམཱ’’ཏི སཱམིཀཾ ཨཱདཱཡ ཝིཧཱརཾ གནྟྭཱ དྷམྨཾ སུཎནྟཱི ནིསཱིདི. ཨཐསྶཱ ཨཱགནྟུཀཉཱཏཀཱ གེཧཾ ཨཱགནྟྭཱ དྭཱརཾ ཝིཝརིཏྭཱ ཏཾ ཝིཔྤཀཱརཾ དིསྭཱ དཱསིཾ མོཙཡིཾསུ. སཱ ཝིཧཱརཾ གནྟྭཱ ཙཏུཔརིསམཛ྄ཛྷེ ཋིཏཱ ཏམཏྠཾ དསབལསྶ ཨཱརོཙེསི. སཏྠཱ ཏསྶཱ ཝཙནཾ སུཏྭཱ ‘‘དུཙྩརིཏཾ ནཱམ ‘ཨིདཾ མེ ཨཉྙེ ན ཛཱནནྟཱི’ཏི ཨཔྤམཏྟཀམྤི ན ཀཱཏབྦཾ, ཨཉྙསྨིཾ ཨཛཱནནྟེཔི སུཙརིཏམེཝ ཀཱཏབྦཾ. པཊིཙྪཱདེཏྭཱ ཀཏམྤི ཧི དུཙྩརིཏཾ ནཱམ པཙྪཱནུཏཱཔཾ ཀརོཏི, སུཙརིཏཾ པཱམོཛྫམེཝ ཛནེཏཱི’’ཏི ཝཏྭཱ ཨིམཾ གཱཐམཱཧ –

༣༡༤.

‘‘ཨཀཏཾ དུཀྐཊཾ སེཡྻོ, པཙྪཱ ཏཔྤཏི དུཀྐཊཾ;

ཀཏཉྩ སུཀཏཾ སེཡྻོ, ཡཾ ཀཏྭཱ ནཱནུཏཔྤཏཱི’’ཏི.

ཏཏྠ དུཀྐཊནྟི སཱཝཛྫཾ ཨཔཱཡསཾཝཏྟནིཀཾ ཀམྨཾ ཨཀཏམེཝ སེཡྻོ ཝརཾ ཨུཏྟམཾ. པཙྪཱ ཏཔྤཏཱིཏི ཏཉྷི ཨནུསྶརིཏཱནུསྶརིཏཀཱལེ ཏཔྤཏིཡེཝ. སུཀཏནྟི ཨནཝཛྫཾ པན སུཁདཱཡཀཾ སུགཏིསཾཝཏྟནིཀམེཝ ཀམྨཾ ཀཏཾ སེཡྻོ. ཡཾ ཀཏྭཱཏི ཡཾ ཀམྨཾ ཀཏྭཱ པཙྪཱ ཨནུསྶརཎཀཱལེ ན ཏཔྤཏི ནཱནུཏཔྤཏི, སོམནསྶཛཱཏོཝ ཧོཏི, ཏཾ ཀམྨཾ ཝརནྟི ཨཏྠོ.

དེསནཱཝསཱནེ ཨུཔཱསཀོ ཙ སཱ ཙ ཨིཏྠཱི སོཏཱཔཏྟིཕལེ པཏིཊྛཧིཾསུ. ཏཉྩ པན དཱསིཾ ཏཏྠེཝ བྷུཛིསྶཾ ཀཏྭཱ དྷམྨཙཱརིནིཾ ཀརིཾསཱུཏི.

ཨིསྶཱཔཀཏིཏྠིཝཏྠུ ཚཊྛཾ.

༧. སམྦཧུལབྷིཀྑུཝཏྠུ

ནགརཾ ཡཐཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ ཨཱགནྟུཀེ བྷིཀྑཱུ ཨཱརབྦྷ ཀཐེསི.

ཏེ ཀིར ཨེཀསྨིཾ པཙྩནྟེ ཝསྶཾ ཨུཔགནྟྭཱ པཋམམཱསེ སུཁཾ ཝིཧརིཾསུ. མཛ྄ཛྷིམམཱསེ ཙོརཱ ཨཱགནྟྭཱ ཏེསཾ གོཙརགཱམཾ པཧརིཏྭཱ ཀརམརེ གཧེཏྭཱ ཨགམཾསུ. ཏཏོ པཊྛཱཡ མནུསྶཱ ཙོརཱནཾ པཊིབཱཧནཏྠཱཡ ཏཾ པཙྩནྟནགརཾ ཨབྷིསངྑརོནྟཱ ཏེ བྷིཀྑཱུ སཀྐཙྩཾ ཨུཔཊྛཱཏུཾ ཨོཀཱསཾ ན ལབྷིཾསུ. ཏེ ཨཕཱསུཀཾ ཝསྶཾ ཝསིཏྭཱ ཝུཏྠཝསྶཱ སཏྠུ དསྶནཱཡ སཱཝཏྠིཾ གནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདིཾསུ. སཏྠཱ ཏེཧི སདྡྷིཾ ཀཏཔཊིསནྠཱརོ ‘‘ཀིཾ, བྷིཀྑཝེ, སུཁཾ ཝསིཏྠཱ’’ཏི པུཙྪིཏྭཱ, ‘‘བྷནྟེ, མཡཾ པཋམམཱསམེཝ སུཁཾ ཝསིམྷཱ, མཛ྄ཛྷིམམཱསེ ཙོརཱ གཱམཾ པཧརིཾསུ, ཏཏོ པཊྛཱཡ མནུསྶཱ ནགརཾ ཨབྷིསངྑརོནྟཱ སཀྐཙྩཾ ཨུཔཊྛཱཏུཾ ཨོཀཱསཾ ན ལབྷིཾསུ. ཏསྨཱ ཨཕཱསུཀཾ ཝསྶཾ ཝསིམྷཱ’’ཏི ཝུཏྟེ ‘‘ཨལཾ, བྷིཀྑཝེ, མཱ ཙིནྟཡིཏྠ, ཕཱསུཝིཧཱརོ ནཱམ ནིཙྩཀཱལཾ དུལླབྷོ, བྷིཀྑུནཱ ནཱམ ཡཐཱ ཏེ མནུསྶཱ ནགརཾ གོཔཡིཾསུ, ཨེཝཾ ཨཏྟབྷཱཝམེཝ གོཔཡིཏུཾ ཝཊྚཏཱི’’ཏི ཝཏྭཱ ཨིམཾ གཱཐམཱཧ –

༣༡༥.

‘‘ནགརཾ ཡཐཱ པཙྩནྟཾ, གུཏྟཾ སནྟརབཱཧིརཾ;

ཨེཝཾ གོཔེཐ ཨཏྟཱནཾ, ཁཎོ ཝོ མཱ ཨུཔཙྩགཱ;

ཁཎཱཏཱིཏཱ ཧི སོཙནྟི, ནིརཡམྷི སམཔྤིཏཱ’’ཏི.

ཏཏྠ སནྟརབཱཧིརནྟི, བྷིཀྑཝེ, ཡཐཱ ཏེཧི མནུསྶེཧི ཏཾ པཙྩནྟནགརཾ དྭཱརཔཱཀཱརཱདཱིནི ཐིརཱནི ཀརོནྟེཧི སཨནྟརཾ, ཨཊྚཱལཀཔརིཁཱདཱིནི ཐིརཱནི ཀརོནྟེཧི སབཱཧིརནྟི སནྟརབཱཧིརཾ སུགུཏྟཾ ཀཏཾ, ཨེཝཾ ཏུམྷེཔི སཏིཾ ཨུཔཊྛཔེཏྭཱ ཨཛ྄ཛྷཏྟིཀཱནི ཚ དྭཱརཱནི པིདཧིཏྭཱ དྭཱརརཀྑིཀཾ སཏིཾ ཨཝིསྶཛྫེཏྭཱ ཡཐཱ གཡ྄ཧམཱནཱནི བཱཧིརཱནི ཚ ཨཱཡཏནཱནི ཨཛ྄ཛྷཏྟིཀཱནཾ ཨུཔགྷཱཏཱཡ སཾཝཏྟནྟི, ཏཐཱ ཨགྒཧཎེན ཏཱནིཔི ཐིརཱནི ཀཏྭཱ ཏེསཾ ཨཔྤཝེསཱཡ དྭཱརརཀྑིཀཾ སཏིཾ ཨཔྤཧཱཡ ཝིཙརནྟཱ ཨཏྟཱནཾ གོཔེཐཱཏི ཨཏྠོ. ཁཎོ ཝོ མཱ ཨུཔཙྩགཱཏི ཡོ ཧི ཨེཝཾ ཨཏྟཱནཾ ན གོཔེཏི, ཏཾ པུགྒལཾ ཨཡཾ བུདྡྷུཔྤཱདཁཎོ མཛ྄ཛྷིམདེསེ ཨུཔྤཏྟིཁཎོ སམྨཱདིཊྛིཡཱ པཊིལདྡྷཁཎོ ཚནྣཾ ཨཱཡཏནཱནཾ ཨཝེཀལླཁཎོཏི སབྦོཔི ཨཡཾ ཁཎོ ཨཏིཀྐམཏི, སོ ཁཎོ ཏུམྷེ མཱ ཨཏིཀྐམཏུ. ཁཎཱཏཱིཏཱཏི ཡེ ཧི ཏཾ ཁཎཾ ཨཏཱིཏཱ, ཏེ ཙ པུགྒལེ སོ ཙ ཁཎོ ཨཏཱིཏོ, ཏེ ནིརཡམྷི སམཔྤིཏཱ ཧུཏྭཱ ཏཏྠ ནིབྦཏྟིཏྭཱ སོཙནྟཱིཏི ཨཏྠོ.

དེསནཱཝསཱནེ ཏེ བྷིཀྑཱུ ཨུཔྤནྣསཾཝེགཱ ཨརཧཏྟེ པཏིཊྛཧིཾསཱུཏི.

སམྦཧུལབྷིཀྑུཝཏྠུ སཏྟམཾ.

༨. ནིགཎྛཝཏྠུ

ཨལཛྫིཏཱཡེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ནིགཎྛེ ཨཱརབྦྷ ཀཐེསི.

ཨེཀསྨིཉྷི དིཝསེ བྷིཀྑཱུ ནིགཎྛེ དིསྭཱ ཀཐཾ སམུཊྛཱཔེསུཾ, ‘‘ཨཱཝུསོ, སབྦསོ ཨཔྤཊིཙྪནྣེཧི ཨཙེལཀེཧི ཨིམེ ནིགཎྛཱ ཝརཏརཱ, ཡེ ཨེཀཾ པུརིམཔསྶམྤི ཏཱཝ པཊིཙྪཱདེནྟི, སཧིརིཀཱ མཉྙེ ཨེཏེ’’ཏི. ཏཾ སུཏྭཱ ནིགཎྛཱ ‘‘ན མཡཾ ཨེཏེན ཀཱརཎེན པཊིཙྪཱདེམ, པཾསུརཛཱདཡོ པན པུགྒལཱ ཨེཝ, ཛཱིཝིཏིནྡྲིཡཔཊིབདྡྷཱ ཨེཝ, ཏེ ནོ བྷིཀྑཱབྷཱཛནེསུ མཱ པཏིཾསཱུཏི ཨིམིནཱ ཀཱརཎེན པཊིཙྪཱདེམཱ’’ཏི ཝཏྭཱ ཏེཧི སདྡྷིཾ ཝཱདཔཊིཝཱདཝསེན བཧུཾ ཀཐཾ ཀཐེསུཾ. བྷིཀྑཱུ སཏྠཱརཾ ཨུཔསངྐམིཏྭཱ ནིསིནྣཀཱལེ ཏཾ པཝཏྟིཾ ཨཱརོཙེསུཾ. སཏྠཱ, ‘‘བྷིཀྑཝེ, ཨལཛྫིཏབྦེན ལཛྫིཏྭཱ ལཛྫིཏབྦེན ཨལཛྫམཱནཱ ནཱམ དུགྒཏིཔརཱཡཎཱཝ ཧོནྟཱི’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༣༡༦.

‘‘ཨལཛྫིཏཱཡེ ལཛྫནྟི, ལཛྫིཏཱཡེ ན ལཛྫརེ;

མིཙྪཱདིཊྛིསམཱདཱནཱ, སཏྟཱ གཙྪནྟི དུགྒཏིཾ.

༣༡༧.

‘‘ཨབྷཡེ བྷཡདསྶིནོ, བྷཡེ ཙཱབྷཡདསྶིནོ;

མིཙྪཱདིཊྛིསམཱདཱནཱ, སཏྟཱ གཙྪནྟི དུགྒཏི’’ནྟི.

ཏཏྠ ཨལཛྫིཏཱཡེཏི ཨལཛྫིཏབྦེན. བྷིཀྑཱབྷཱཛནཉྷི ཨལཛྫིཏབྦཾ ནཱམ, ཏེ པན ཏཾ པཊིཙྪཱདེཏྭཱ ཝིཙརནྟཱ ཏེན ལཛྫནྟི ནཱམ. ལཛྫིཏཱཡེཏི ཨཔཊིཙྪནྣེན ཧིརིཀོཔཱིནངྒེན ལཛྫིཏབྦེན. ཏེ པན ཏཾ ཨཔཊིཙྪཱདེཏྭཱ ཝིཙརནྟཱ ལཛྫིཏཱཡེ ན ལཛྫནྟི ནཱམ. ཏེན ཏེསཾ ཨལཛྫིཏབྦེན ལཛྫིཏཾ ལཛྫིཏབྦེན ཨལཛྫིཏཾ ཏུཙྪགཧཎབྷཱཝེན ཙ ཨཉྙཐཱགཧཎབྷཱཝེན ཙ མིཙྪཱདིཊྛི ཧོཏི. ཏཾ སམཱདིཡིཏྭཱ ཝིཙརནྟཱ པན ཏེ མིཙྪཱདིཊྛིསམཱདཱནཱ སཏྟཱ ནིརཡཱདིབྷེདཾ དུགྒཏིཾ གཙྪནྟཱིཏི ཨཏྠོ. ཨབྷཡེཏི བྷིཀྑཱབྷཱཛནཾ ནིསྶཱཡ རཱགདོསམོཧམཱནདིཊྛིཀིལེསདུཙྩརིཏབྷཡཱནཾ ཨནུཔྤཛྫནཏོ བྷིཀྑཱབྷཱཛནཾ ཨབྷཡཾ ནཱམ, བྷཡེན ཏཾ པཊིཙྪཱདེནྟཱ པན ཨབྷཡེ བྷཡདསྶིནོ ནཱམ. ཧིརིཀོཔཱིནངྒཾ པན ནིསྶཱཡ རཱགཱདཱིནཾ ཨུཔྤཛྫནཏོ ཏཾ བྷཡཾ ནཱམ, ཏསྶ ཨཔཊིཙྪཱདནེན བྷཡེ ཙཱབྷཡདསྶིནོ. ཏསྶ ཏཾ ཨཡཐཱགཧཎསྶ སམཱདིནྣཏྟཱ མིཙྪཱདིཊྛིསམཱདཱནཱ སཏྟཱ དུགྒཧིཾ གཙྪནྟཱིཏི ཨཏྠོ.

དེསནཱཝསཱནེ བཧཱུ ནིགཎྛཱ སཾཝིགྒམཱནསཱ པབྦཛིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ནིགཎྛཝཏྠུ ཨཊྛམཾ.

༩. ཏིཏྠིཡསཱཝཀཝཏྠུ

ཨཝཛྫེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏིཏྠིཡསཱཝཀེ ཨཱརབྦྷ ཀཐེསི.

ཨེཀསྨིཉྷི སམཡེ ཨཉྙཏིཏྠིཡསཱཝཀཱ ཨཏྟནོ པུཏྟེ སམྨཱདིཊྛིཀཱནཾ ཨུཔཱསཀཱནཾ པུཏྟེཧི སདྡྷིཾ སཔརིཝཱརེ ཀཱིལ༹མཱནེ དིསྭཱ གེཧཾ ཨཱགཏཀཱལེ ‘‘ན ཝོ སམཎཱ སཀྱཔུཏྟིཡཱ ཝནྡིཏབྦཱ, ནཱཔི ཏེསཾ ཝིཧཱརཾ པཝིསིཏབྦ’’ནྟི སཔཐཾ ཀཱརཡིཾསུ. ཏེ ཨེཀདིཝསཾ ཛེཏཝནཝིཧཱརསྶ བཧིདྭཱརཀོཊྛཀསཱམནྟེ ཀཱིལ༹ནྟཱ པིཔཱསིཏཱ ཨཧེསུཾ. ཨཐེཀཾ ཨུཔཱསཀདཱརཀཾ ‘‘ཏྭཾ ཨེཏྠ གནྟྭཱ པཱནཱིཡཾ པིཝིཏྭཱ ཨམྷཱཀམྤི ཨཱཧརཱཧཱི’’ཏི པཧིཎིཾསུ. སོ ཝིཧཱརཾ པཝིསིཏྭཱ སཏྠཱརཾ ཝནྡིཏྭཱ པཱནཱིཡཾ པིཝིཏྭཱ ཏམཏྠཾ ཨཱརོཙེསི. ཨཐ ནཾ སཏྠཱ ‘‘ཏྭམེཝ པཱནཱིཡཾ པིཝིཏྭཱ གནྟྭཱ ཨིཏརེཔི པཱནཱིཡཔིཝནཏྠཱཡ ཨིདྷེཝ པེསེཧཱི’’ཏི ཨཱཧ. སོ ཏཐཱ ཨཀཱསི. ཏེ ཨཱགནྟྭཱ པཱནཱིཡཾ པིཝིཾསུ. སཏྠཱ ཏེ པཀྐོསཱཔེཏྭཱ ཏེསཾ སཔྤཱཡཾ དྷམྨཀཐཾ ཀཐེཏྭཱ ཏེ ཨཙལསདྡྷེ ཀཏྭཱ སརཎེསུ ཙ སཱིལེསུ ཙ པཏིཊྛཱཔེསི. ཏེ སཀཱནི གེཧཱནི གནྟྭཱ ཏམཏྠཾ མཱཏཱཔིཏཱུནཾ ཨཱརོཙེསུཾ. ཨཐ ནེསཾ མཱཏཱཔིཏརོ ‘‘པུཏྟཀཱ ནོ ཝིཔནྣདིཊྛིཀཱ ཛཱཏཱ’’ཏི དོམནསྶཔྤཏྟཱ པརིདེཝིཾསུ. ཨཐ ཏེསཾ ཚེཀཱ སམྦཧུལཱ པཊིཝིསྶཀཱ མནུསྶཱ ཨཱགནྟྭཱ དོམནསྶཝཱུཔསམནཏྠཱཡ དྷམྨཾ ཀཐཡིཾསུ. ཏེ ཏེསཾ ཀཐཾ སུཏྭཱ ‘‘ཨིམེ དཱརཀེ སམཎསྶ གོཏམསྶེཝ ནིཡྻཱདེསྶཱམཱ’’ཏི མཧནྟེན ཉཱཏིགཎེན སདྡྷིཾ ཝིཧཱརཾ ནཡིཾསུ. སཏྠཱ ཏེསཾ ཨཛ྄ཛྷཱསཡཾ ཨོལོཀེཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༣༡༨.

‘‘ཨཝཛྫེ ཝཛྫམཏིནོ, ཝཛྫེ ཙཱཝཛྫདསྶིནོ;

མིཙྪཱདིཊྛིསམཱདཱནཱ, སཏྟཱ གཙྪནྟི དུགྒཏིཾ.

༣༡༩.

‘‘ཝཛྫཉྩ ཝཛྫཏོ ཉཏྭཱ, ཨཝཛྫཉྩ ཨཝཛྫཏོ;

སམྨཱདིཊྛིསམཱདཱནཱ, སཏྟཱ གཙྪནྟི སུགྒཏི’’ནྟི.

ཏཏྠ ཨཝཛྫེཏི དསཝཏྠུཀཱཡ སམྨཱདིཊྛིཡཱ, ཏསྶཱ ཨུཔནིསྶཡབྷཱུཏེ དྷམྨེ ཙ. ཝཛྫམཏིནོཏི ཝཛྫཾ ཨིདནྟི ཨུཔྤནྣམཏིནོ. དསཝཏྠུཀཱཡ མིཙྪཱདིཊྛིཡཱ པན ཏསྶཱ ཨུཔནིསྶཡབྷཱུཏེ དྷམྨེ ཙ ཨཝཛྫདསྶིནོ, ཨེཏིསྶཱ ཨཝཛྫཾ ཝཛྫཏོ ཝཛྫཉྩ ཨཝཛྫཏོ ཉཏྭཱ གཧཎསངྑཱཏཱཡ མིཙྪཱདིཊྛིཡཱ སམཱདིནྣཏྟཱ མིཙྪཱདིཊྛིསམཱདཱནཱ སཏྟཱ དུགྒཏིཾ གཙྪནྟཱིཏི ཨཏྠོ. དུཏིཡགཱཐཱཡ ཝུཏྟཝིཔརིཡཱཡེན ཨཏྠོ ཝེདིཏབྦོ.

དེསནཱཝསཱནེ སབྦེཔི ཏེ ཏཱིསུ སརཎེསུ པཏིཊྛཱཡ ཨཔརཱཔརཾ དྷམྨཾ སུཎནྟཱ སོཏཱཔཏྟིཕལེ པཏིཊྛཧིཾསཱུཏི.

ཏིཏྠིཡསཱཝཀཝཏྠུ ནཝམཾ.

ནིརཡཝགྒཝཎྞནཱ ནིཊྛིཏཱ.

དྭཱཝཱིསཏིམོ ཝགྒོ.

༢༣. ནཱགཝགྒོ

༡. ཨཏྟདནྟཝཏྠུ

ཨཧཾ ནཱགོ ཝཱཏི ཨིམཾ དྷམྨདེསནཾ སཏྠཱ ཀོསམྦིཡཾ ཝིཧརནྟོ ཨཏྟཱནཾ ཨཱརབྦྷ ཀཐེསི. ཝཏྠུ ཨཔྤམཱདཝགྒསྶ ཨཱདིགཱཐཱཝཎྞནཱཡ ཝིཏྠཱརིཏམེཝ. ཝུཏྟཉྷེཏཾ ཏཏྠ (དྷ. པ. ཨཊྛ. ༡.སཱམཱཝཏིཝཏྠུ) –

མཱགཎྜིཡཱ ཏཱསཾ ཀིཉྩི ཀཱཏུཾ ཨསཀྐུཎིཏྭཱ ‘‘སམཎསྶ གོཏམསྶེཝ ཀཏྟབྦཾ ཀརིསྶཱམཱི’’ཏི ནཱགརཱནཾ ལཉྫཾ དཏྭཱ ‘‘སམཎཾ གོཏམཾ ཨནྟོནགརཾ པཝིསིཏྭཱ ཙརནྟཾ དཱསཀམྨཀརཔོརིསེཧི སདྡྷིཾ ཨཀྐོསེཏྭཱ པརིབྷཱསེཏྭཱ པལཱཔེཐཱ’’ཏི ཨཱཎཱཔེསི. མིཙྪཱདིཊྛིཀཱ ཏཱིསུ རཏནེསུ ཨཔྤསནྣཱ ཨནྟོནགརཾ པཝིཊྛཾ སཏྠཱརཾ ཨནུབནྡྷིཏྭཱ ‘‘ཙོརོསི བཱལོསི མཱུལ༹ྷོསི ཐེནོསི ཨོཊྛོསི གོཎོསི གདྲབྷོསི ནེརཡིཀོསི ཏིརཙྪཱནགཏོསི, ནཏྠི ཏུཡ྄ཧཾ སུགཏི, དུགྒཏིཡེཝ ཏུཡ྄ཧཾ པཱཊིཀངྑཱ’’ཏི དསཧི ཨཀྐོསཝཏྠཱུཧི ཨཀྐོསནྟི པརིབྷཱསནྟི. ཏཾ སུཏྭཱ ཨཱཡསྨཱ ཨཱནནྡོ སཏྠཱརཾ ཨེཏདཝོཙ – ‘‘བྷནྟེ, ཨིམེ ནཱགརཱ ཨམྷེ ཨཀྐོསནྟི པརིབྷཱསནྟི, ཨིཏོ ཨཉྙཏྠ གཙྪཱམཱ’’ཏི. ‘‘ཀུཧིཾ, ཨཱནནྡཱ’’ཏི? ‘‘ཨཉྙཾ ནགརཾ, བྷནྟེ’’ཏི. ‘‘ཏཏྠ མནུསྶེསུ ཨཀྐོསནྟེསུ པརིབྷཱསནྟེསུ པུན ཀཏྠ གམིསྶཱམཱནནྡཱ’’ཏི. ‘‘ཏཏོཔི ཨཉྙཾ ནགརཾ, བྷནྟེ’’ཏི. ‘‘ཏཏྠ མནུསྶེསུ ཨཀྐོསནྟེསུ པརིབྷཱསནྟེསུ ཀུཧིཾ གམིསྶཱམཱནནྡཱ’’ཏི. ‘‘ཏཏོཔི ཨཉྙཾ ནགརཾ, བྷནྟེ’’ཏི. ‘‘ཨཱནནྡ, ན ཨེཝཾ ཀཱཏུཾ ཝཊྚཏི, ཡཏྠ ཨདྷིཀརཎཾ ཨུཔྤནྣཾ, ཏཏྠེཝ ཏསྨིཾ ཝཱུཔསནྟེ ཨཉྙཏྠ གནྟུཾ ཝཊྚཏི, ཀེ པན ཏེ, ཨཱནནྡ, ཨཀྐོསནྟཱི’’ཏི. ‘‘བྷནྟེ, དཱསཀམྨཀརེ ཨུཔཱདཱཡ སབྦེ ཨཀྐོསནྟཱི’’ཏི. ‘‘ཨཧཾ, ཨཱནནྡ, སངྒཱམཾ ཨོཏིཎྞཧཏྠིསདིསོ. སངྒཱམཾ ཨོཏིཎྞཧཏྠིནོ ཧི ཙཏཱུཧི དིསཱཧི ཨཱགཏེ སརེ སཧིཏུཾ བྷཱརོ, ཏཐེཝ བཧཱུཧི དུསྶཱིལེཧི ཀཐིཏཀཐཱནཾ སཧནཾ ནཱམ མཡ྄ཧཾ བྷཱརོ’’ཏི ཝཏྭཱ ཨཏྟཱནཾ ཨཱརབྦྷ དྷམྨཾ དེསེནྟོ ཨིམཱ གཱཐཱ ཨབྷཱསི –

༣༢༠.

‘‘ཨཧཾ ནཱགོཝ སངྒཱམེ, ཙཱཔཏོ པཏིཏཾ སརཾ;

ཨཏིཝཱཀྱཾ ཏིཏིཀྑིསྶཾ, དུསྶཱིལོ ཧི བཧུཛྫནོ.

༣༢༡.

‘‘དནྟཾ ནཡནྟི སམིཏིཾ, དནྟཾ རཱཛཱབྷིརཱུཧཏི;

དནྟོ སེཊྛོ མནུསྶེསུ, ཡོཏིཝཱཀྱཾ ཏིཏིཀྑཏི.

༣༢༢.

‘‘ཝརམསྶཏརཱ དནྟཱ, ཨཱཛཱནཱིཡཱ ཙ སིནྡྷཝཱ;

ཀུཉྫརཱ ཙ མཧཱནཱགཱ, ཨཏྟདནྟོ ཏཏོ ཝར’’ནྟི.

ཏཏྠ ནཱགོཝཱཏི ཧཏྠཱི ཝིཡ. ཙཱཔཏོ པཏིཏནྟི དྷནུཏོ མུཏྟཾ. ཨཏིཝཱཀྱནྟི ཨཊྛཨནརིཡཝོཧཱརཝསེན པཝཏྟཾ ཝཱིཏིཀྐམཝཙནཾ. ཏིཏིཀྑིསྶནྟི ཡཐཱ སངྒཱམཱཝཙརོ སུདནྟོ མཧཱནཱགོ ཁམོ སཏྟིཔཧཱརཱདཱིནི ཙཱཔཏོ མུཙྩིཏྭཱ ཨཏྟནི པཏིཏེ སརེ ཨཝིཧཉྙམཱནོ ཏིཏིཀྑཏི, ཨེཝམེཝ ཨེཝརཱུཔཾ ཨཏིཝཱཀྱཾ ཏིཏིཀྑིསྶཾ, སཧིསྶཱམཱིཏི ཨཏྠོ. དུསྶཱིལོ ཧཱིཏི ཨཡཉྷི ལོཀིཡམཧཱཛནོ བཧུདུསྶཱིལོ ཨཏྟནོ ཨཏྟནོ རུཙིཝསེན ཝཱཙཾ ནིཙྪཱརེཏྭཱ གྷཊྚེནྟོ ཙརཏི, ཏཏྠ ཨདྷིཝཱསནཾ ཨཛ྄ཛྷུཔེཀྑནམེཝ མམ བྷཱརོ. སམིཏིནྟི ཨུཡྻཱནཀཱིལ༹མཎྜལཱདཱིསུ མཧཱཛནམཛ྄ཛྷཾ གཙྪནྟཱ དནྟམེཝ གོཎཛཱཏིཾ ཝཱ ཨསྶཛཱཏིཾ ཝཱ ཡཱནེ ཡོཛེཏྭཱ ནཡནྟི. རཱཛཱཏི ཏཐཱརཱུཔེཧེཝ ཝཱཧནེཧི གཙྪནྟོ རཱཛཱཔི དནྟམེཝ ཨབྷིརཱུཧཏི. མནུསྶེསཱུཏི མནུསྶེསུཔི ཙཏཱུཧི ཨརིཡམགྒེཧི དནྟོ ནིབྦིསེཝནོཝ སེཊྛོ. ཡོཏིཝཱཀྱནྟི ཡོ ཨེཝརཱུཔཾ ཨཏིཀྐམཝཙནཾ པུནཔྤུནཾ ཝུཙྩམཱནམྤི ཏིཏིཀྑཏི ན པཊིཔྥརཏི ན ཝིཧཉྙཏི, ཨེཝརཱུཔོ དནྟོ སེཊྛོཏི ཨཏྠོ.

ཨསྶཏརཱཏི ཝལ༹ཝཱཡ གདྲབྷེན ཛཱཏཱ. ཨཱཛཱནཱིཡཱཏི ཡཾ ཨསྶདམསཱརཐི ཀཱརཎཾ ཀཱརེཏི, ཏསྶ ཁིཔྤཾ ཛཱནནསམཏྠཱ. སིནྡྷཝཱཏི སིནྡྷཝརཊྛེ ཛཱཏཱ ཨསྶཱ. མཧཱནཱགཱཏི ཀུཉྫརསངྑཱཏཱ མཧཱཧཏྠིནོ. ཨཏྟདནྟོཏི ཨེཏེ ཨསྶཏརཱ ཙ སིནྡྷཝཱ ཙ ཀུཉྫརཱ ཙ དནྟཱཝ ཝརཾ, ན ཨདནྟཱ. ཡོ པན ཙཏཱུཧི ཨརིཡམགྒེཧི ཨཏྟནོ དནྟཏཱཡ ཨཏྟདནྟོ ནིབྦིསེཝནོ, ཨཡཾ ཏཏོཔི ཝརཾ, སབྦེཧིཔི ཨེཏེཧི ཨུཏྟརིཏརོཏི ཨཏྠོ.

དེསནཱཝསཱནེ ལཉྫཾ གཧེཏྭཱ ཝཱིཐིསིངྒྷཱཊཀཱདཱིསུ ཋཏྭཱ ཨཀྐོསནྟོ པརིབྷཱསནྟོ སབྦོཔི སོ མཧཱཛནོ སོཏཱཔཏྟིཕལཱདཱིནི པཱཔུཎཱིཏི.

ཨཏྟདནྟཝཏྠུ པཋམཾ.

༢. ཧཏྠཱཙརིཡཔུབྦཀབྷིཀྑུཝཏྠུ

ན ཧི ཨེཏེཧཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཧཏྠཱཙརིཡཔུབྦཀཾ བྷིཀྑུཾ ཨཱརབྦྷ ཀཐེསི.

སོ ཀིར ཨེཀདིཝསཾ ཨཙིརཝཏཱིནདཱིཏཱིརེ ཧཏྠིདམཀཾ ‘‘ཨེཀཾ ཧཏྠིཾ དམེསྶཱམཱི’’ཏི ཨཏྟནཱ ཨིཙྪིཏཾ ཀཱརཎཾ སིཀྑཱཔེཏུཾ ཨསཀྐོནྟཾ དིསྭཱ སམཱིཔེ ཋིཏེ བྷིཀྑཱུ ཨཱམནྟེཏྭཱ ཨཱཧ – ‘‘ཨཱཝུསོ, སཙེ ཨཡཾ ཧཏྠཱཙརིཡོ ཨིམཾ ཧཏྠིཾ ཨསུཀཊྛཱནེ ནཱམ ཝིཛ྄ཛྷེཡྻ, ཁིཔྤམེཝ ཨིམཾ ཀཱརཎཾ སིཀྑཱཔེཡྻཱ’’ཏི. སོ ཏསྶ ཀཐཾ སུཏྭཱ ཏཐཱ ཀཏྭཱ ཏཾ ཧཏྠིཾ སུདནྟཾ དམེསི. ཏེ བྷིཀྑཱུ ཏཾ པཝཏྟིཾ སཏྠུ ཨཱརོཙེསུཾ. སཏྠཱ ཏཾ བྷིཀྑུཾ པཀྐོསཱཔེཏྭཱ ‘‘སཙྩཾ ཀིར ཏཡཱ ཨེཝཾ ཝུཏྟ’’ནྟི པུཙྪིཏྭཱ ‘‘སཙྩཾ, བྷནྟེ’’ཏི ཝུཏྟེ ཝིགརཧིཏྭཱ ‘‘ཀིཾ ཏེ, མོགྷཔུརིས, ཧཏྠིཡཱནེན ཝཱ ཨཉྙེན ཝཱ དནྟེན. ན ཧི ཨེཏེཧི ཡཱནེཧི ཨགཏཔུབྦཾ ཋཱནཾ གནྟུཾ སམཏྠཱ ནཱམ ཨཏྠི, ཨཏྟནཱ པན སུདནྟེན སཀྐཱ ཨགཏཔུབྦཾ ཋཱནཾ གནྟུཾ, ཏསྨཱ ཨཏྟཱནམེཝ དམེཧི, ཀིཾ ཏེ ཨེཏེསཾ དམནེནཱ’’ཏི ཝཏྭཱ ཨིམཾ གཱཐམཱཧ –

༣༢༣.

‘‘ན ཧི ཨེཏེཧི ཡཱནེཧི, གཙྪེཡྻ ཨགཏཾ དིསཾ;

ཡཐཱཏྟནཱ སུདནྟེན, དནྟོ དནྟེན གཙྪཏཱི’’ཏི.

ཏསྶཏྠོ – ཡཱནི ཏཱནི ཧཏྠིཡཱནཱདཱིནི ཡཱནཱནི, ན ཧི ཨེཏེཧི ཡཱནེཧི ཀོཙི པུགྒལོ སུཔིནནྟེནཔི ཨགཏཔུབྦཏྟཱ ‘‘ཨགཏ’’ནྟི སངྑཱཏཾ ནིབྦཱནདིསཾ ཏཐཱ གཙྪེཡྻ, ཡཐཱ པུབྦབྷཱགེ ཨིནྡྲིཡདམེན ཨཔརབྷཱགེ ཨརིཡམགྒབྷཱཝནཱཡ སུདནྟེན དནྟོ ནིབྦིསེཝནོ སཔྤཉྙོ པུགྒལོ ཏཾ ཨགཏཔུབྦཾ དིསཾ གཙྪཏི, དནྟབྷཱུམིཾ པཱཔུཎཱཏི. ཏསྨཱ ཨཏྟདམནམེཝ ཏཏོ ཝརནྟི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཧཏྠཱཙརིཡཔུབྦཀབྷིཀྑུཝཏྠུ དུཏིཡཾ.

༣. པརིཛིཎྞབྲཱཧྨཎཔུཏྟཝཏྠུ

དྷནཔཱལོཏི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ ཨཉྙཏརསྶ པརིཛིཎྞབྲཱཧྨཎསྶ པུཏྟེ ཨཱརབྦྷ ཀཐེསི.

སཱཝཏྠིཡཾ ཀིརེཀོ བྲཱཧྨཎོ ཨཊྛསཏསཧསྶཝིབྷཝོ ཝཡཔྤཏྟཱནཾ ཙཏུནྣཾ པུཏྟཱནཾ ཨཱཝཱཧཾ ཀཏྭཱ ཙཏྟཱརི སཏསཧསྶཱནི ཨདཱསི. ཨཐསྶ བྲཱཧྨཎིཡཱ ཀཱལཀཏཱཡ པུཏྟཱ སམྨནྟཡིཾསུ – ‘‘སཙེ ཨཡཾ ཨཉྙཾ བྲཱཧྨཎིཾ ཨཱནེསྶཏི, ཏསྶཱ ཀུཙྪིཡཾ ནིབྦཏྟཱནཾ ཝསེན ཀུལསནྟཀཾ བྷིཛྫིསྶཏི, ཧནྡ ནཾ མཡཾ སངྒཎྷིསྶཱམཱ’’ཏི ཏེ ཏཾ པཎཱིཏེཧི གྷཱསཙྪཱདནཱདཱིཧི ཨུཔཊྛཧནྟཱ ཧཏྠཔཱདསམྦཱཧནཱདཱིནི ཀརོནྟཱ ཨུཔཊྛཧིཏྭཱ ཨེཀདིཝསམསྶ དིཝཱ ནིདྡཱཡིཏྭཱ ཝུཊྛིཏསྶ ཧཏྠཔཱདེ སམྦཱཧནྟཱ པཱཊིཡེཀྐཾ གྷརཱཝཱསེ ཨཱདཱིནཝཾ ཝཏྭཱ ‘‘མཡཾ ཏུམྷེ ཨིམིནཱ ནཱིཧཱརེན ཡཱཝཛཱིཝཾ ཨུཔཊྛཧིསྶཱམ, སེསདྷནམྤི ནོ དེཐཱ’’ཏི ཡཱཙིཾསུ. བྲཱཧྨཎོ པུན ཨེཀེཀསྶ སཏསཧསྶཾ དཏྭཱ ཨཏྟནོ ནིཝཏྠཔཱརུཔནམཏྟཾ ཋཔེཏྭཱ སབྦཾ ཨུཔབྷོགཔརིབྷོགཾ ཙཏྟཱརོ ཀོཊྛཱསེ ཀཏྭཱ ནིཡྻཱདེསི. ཏཾ ཛེཊྛཔུཏྟོ ཀཏིཔཱཧཾ ཨུཔཊྛཧི. ཨཐ ནཾ ཨེཀདིཝསཾ ནྷཏྭཱ ཨཱགཙྪནྟཾ དྭཱརཀོཊྛཀེ ཋཏྭཱ སུཎྷཱ ཨེཝམཱཧ – ‘‘ཀིཾ ཏཡཱ ཛེཊྛཔུཏྟསྶ སཏཾ ཝཱ སཧསྶཾ ཝཱ ཨཏིརེཀཾ དིནྣཾ ཨཏྠི, ནནུ སབྦེསཾ དྭེ དྭེ སཏསཧསྶཱནི དིནྣཱནི, ཀིཾ སེསཔུཏྟཱནཾ གྷརསྶ མགྒཾ ན ཛཱནཱསཱི’’ཏི. སོཔི ‘‘ནསྶ ཝསལཱི’’ཏི ཀུཛ྄ཛྷིཏྭཱ ཨཉྙསྶ གྷརཾ ཨགམཱསི. ཏཏོཔི ཀཏིཔཱཧཙྩཡེན ཨིམིནཱཝ ཨུཔཱཡེན པལཱཔིཏོ ཨཉྙསྶཱཏི ཨེཝཾ ཨེཀགྷརམྤི པཝེསནཾ ཨལབྷམཱནོ པཎྜརངྒཔབྦཛྫཾ པབྦཛིཏྭཱ བྷིཀྑཱཡ ཙརནྟོ ཀཱལཱནམཙྩཡེན ཛརཱཛིཎྞོ དུབྦྷོཛནདུཀྑསེཡྻཱཧི མིལཱཏསརཱིརོ བྷིཀྑཱཡ ཙརནྟོ ཨཱགམྨ པཱིཋིཀཱཡ ནིཔནྣོ ནིདྡཾ ཨོཀྐམིཏྭཱ ཨུཊྛཱཡ ནིསིནྣོ ཨཏྟཱནཾ ཨོལོཀེཏྭཱ པུཏྟེསུ ཨཏྟནོ པཏིཊྛཾ ཨཔསྶནྟོ ཙིནྟེསི – ‘‘སམཎོ ཀིར གོཏམོ ཨབྦྷཱཀུཊིཀོ ཨུཏྟཱནམུཁོ སུཁསམྦྷཱསོ པཊིསནྠཱརཀུསལོ, སཀྐཱ སམཎཾ གོཏམཾ ཨུཔསངྐམིཏྭཱ པཊིསནྠཱརཾ ལབྷིཏུ’’ནྟི. སོ ནིཝཱསནཔཱརུཔནཾ སཎྛཱཔེཏྭཱ བྷིཀྑབྷཱཛནཾ གཧེཏྭཱ དཎྜམཱདཱཡ བྷགཝཏོ སནྟིཀཾ ཨགམཱསི. ཝུཏྟམྤི ཙེཏཾ (སཾ. ནི. ༡.༢༠༠) –

ཨཐ ཁོ ཨཉྙཏརོ བྲཱཧྨཎམཧཱསཱལོ ལཱུཁོ ལཱུཁཔཱཝུརཎོ ཡེན བྷགཝཱ ཏེནུཔསངྐམི, ཨུཔསངྐམིཏྭཱ ཨེཀམནྟཾ ནིསཱིདི. སཏྠཱ ཨེཀམནྟཾ ནིསིནྣེན ཏེན སདྡྷིཾ པཊིསནྠཱརཾ ཀཏྭཱ ཨེཏདཝོཙ – ‘‘ཀིནྣུ ཏྭཾ, བྲཱཧྨཎ, ལཱུཁོ ལཱུཁཔཱཝུརཎོ’’ཏི. ཨིདྷ མེ, བྷོ གོཏམ, ཙཏྟཱརོ པུཏྟཱ, ཏེ མཾ དཱརེཧི སཾཔུཙྪ གྷརཱ ནིཀྑཱམེནྟཱིཏི. ཏེན ཧི ཏྭཾ, བྲཱཧྨཎ, ཨིམཱ གཱཐཱཡོ པརིཡཱཔུཎིཏྭཱ སབྷཱཡཾ མཧཱཛནཀཱཡེ སནྣིཔཏིཏེ པུཏྟེསུ ཙ སནྣིསིནྣེསུ བྷཱསསྶུ –

‘‘ཡེཧི ཛཱཏེཧི ནནྡིསྶཾ, ཡེསཉྩ བྷཝམིཙྪིསཾ;

ཏེ མཾ དཱརེཧི སཾཔུཙྪ, སཱཝ ཝཱརེནྟི སཱུཀརཾ.

‘‘ཨསནྟཱ ཀིར མཾ ཛམྨཱ, ཏཱཏ ཏཱཏཱཏི བྷཱསརེ;

རཀྑསཱ པུཏྟརཱུཔེན, ཏེ ཛཧནྟི ཝཡོགཏཾ.

‘‘ཨསྶོཝ ཛིཎྞོ ནིབྦྷོགོ, ཁཱདནཱ ཨཔནཱིཡཏི;

བཱལཀཱནཾ པིཏཱ ཐེརོ, པརཱགཱརེསུ བྷིཀྑཏི.

‘‘དཎྜོཝ ཀིར མེ སེཡྻོ, ཡཉྩེ པུཏྟཱ ཨནསྶཝཱ;

ཙཎྜམྤི གོཎཾ ཝཱརེཏི, ཨཐོ ཙཎྜམྤི ཀུཀྐུརཾ.

‘‘ཨནྡྷཀཱརེ པུརེ ཧོཏི, གམྦྷཱིརེ གཱདྷམེདྷཏི;

དཎྜསྶ ཨཱནུབྷཱཝེན, ཁལིཏྭཱ པཏིཏིཊྛཏཱི’’ཏི. (སཾ. ནི. ༡.༢༠༠);

སོ བྷགཝཏོ སནྟིཀེ ཏཱ གཱཐཱཡོ ཨུགྒཎྷིཏྭཱ ཏཐཱརཱུཔེ བྲཱཧྨཎཱནཾ སམཱགམདིཝསེ སབྦཱལངྐཱརཔཊིམཎྜིཏེསུ པུཏྟེསུ ཏཾ སབྷཾ ཨོགཱཧིཏྭཱ བྲཱཧྨཎཱནཾ མཛ྄ཛྷེ མཧཱརཧེསུ ཨཱསནེསུ ནིསིནྣེསུ ‘‘ཨཡཾ མེ ཀཱལོ’’ཏི སབྷཱཡ མཛ྄ཛྷེ པཝིསིཏྭཱ ཧཏྠཾ ཨུཀྑིཔིཏྭཱ ‘‘ཨཧཾ, བྷོ, ཏུམྷཱཀཾ གཱཐཱཡོ བྷཱསིཏུཀཱམོ, སུཎིསྶཐཱ’’ཏི ཝཏྭཱ ‘‘བྷཱསསྶུ, བྲཱཧྨཎ, སུཎོམཱ’’ཏི ཝུཏྟེ ཋིཏཀོཝ ཨབྷཱསི. ཏེན ཙ སམཡེན མནུསྶཱནཾ ཝཏྟཾ ཧོཏི ‘‘ཡོ མཱཏཱཔིཏཱུནཾ སནྟཀཾ ཁཱདནྟོ མཱཏཱཔིཏརོ ན པོསེཏི, སོ མཱརེཏབྦོ’’ཏི. ཏསྨཱ ཏེ བྲཱཧྨཎཔུཏྟཱ པིཏུ པཱདེསུ པཏིཏྭཱ ‘‘ཛཱིཝིཏཾ ནོ, ཏཱཏ, དེཐཱ’’ཏི ཡཱཙིཾསུ. སོ པིཏུ ཧདཡམུདུཏཱཡ ‘‘མཱ མེ, བྷོ, པུཏྟཀེ ཝིནཱསཡིཏྠ, པོསེསྶནྟི མ’’ནྟི ཨཱཧ. ཨཐསྶ པུཏྟེ མནུསྶཱ ཨཱཧཾསུ – ‘‘སཙེ, བྷོ, ཨཛྫ པཊྛཱཡ པིཏརཾ ན སམྨཱ པཊིཛགྒིསྶཐ, གྷཱཏེསྶཱམ ཝོ’’ཏི. ཏེ བྷཱིཏཱ པིཏརཾ པཱིཋེ ནིསཱིདཱཔེཏྭཱ སཡཾ ཨུཀྑིཔིཏྭཱ གེཧཾ ནེཏྭཱ སརཱིརཾ ཏེལེན ཨབྦྷཉྫིཏྭཱ ཨུབྦཊྚེཏྭཱ གནྡྷཙུཎྞཱདཱིཧི ནྷཱཔེཏྭཱ བྲཱཧྨཎིཡོ པཀྐོསཱཔེཏྭཱ ‘‘ཨཛྫ པཊྛཱཡ ཨམྷཱཀཾ པིཏརཾ སམྨཱ པཊིཛགྒཐ, སཙེ ཏུམྷེ པམཱདཾ ཨཱཔཛྫིསྶཐ, ནིགྒཎྷིསྶཱམ ཝོ’’ཏི ཝཏྭཱ པཎཱིཏབྷོཛནཾ བྷོཛེསུཾ.

བྲཱཧྨཎོ སུབྷོཛནཉྩ སུཁསེཡྻཉྩ ཨཱགམྨ ཀཏིཔཱཧཙྩཡེན སཉྫཱཏབལོ པཱིཎིནྡྲིཡོ ཨཏྟབྷཱཝཾ ཨོལོཀེཏྭཱ ‘‘ཨཡཾ མེ སམྤཏྟི སམཎཾ གོཏམཾ ནིསྶཱཡ ལདྡྷཱ’’ཏི པཎྞཱཀཱརཏྠཱཡ ཨེཀཾ དུསྶཡུགཾ ཨཱདཱཡ བྷགཝཏོ སནྟིཀཾ གནྟྭཱ ཀཏཔཊིསནྠཱརོ ཨེཀམནྟཾ ནིསིནྣོ ཏཾ དུསྶཡུགཾ བྷགཝཏོ པཱདམཱུལེ ཋཔེཏྭཱ ‘‘མཡཾ, བྷོ གོཏམ, བྲཱཧྨཎཱ ནཱམ ཨཱཙརིཡསྶ ཨཱཙརིཡདྷནཾ པརིཡེསཱམ, པཊིགྒཎྷཱཏུ མེ བྷཝཾ གོཏམོ ཨཱཙརིཡོ ཨཱཙརིཡདྷན’’ནྟི ཨཱཧ. བྷགཝཱ ཏསྶ ཨནུཀམྤཱཡ ཏཾ པཊིགྒཧེཏྭཱ དྷམྨཾ དེསེསི. དེསནཱཝསཱནེ བྲཱཧྨཎོ སརཎེསུ པཏིཊྛཱཡ ཨེཝམཱཧ – ‘‘བྷོ གོཏམ, མཡ྄ཧཾ པུཏྟེཧི ཙཏྟཱརི དྷུཝབྷཏྟཱནི དིནྣཱནི, ཏཏོ ཨཧཾ དྭེ ཏུམྷཱཀཾ དམྨཱི’’ཏི. ཨཐ ནཾ སཏྠཱ ‘‘ཀལྱཱཎཾ, བྲཱཧྨཎ, མཡཾ པན རུཙྩནཊྛཱནམེཝ གམིསྶཱམཱ’’ཏི ཝཏྭཱ ཨུཡྻོཛེསི. བྲཱཧྨཎོ གྷརཾ གནྟྭཱ པུཏྟེ ཨཱཧ – ‘‘ཏཱཏཱ, སམཎོ གོཏམོ མཡ྄ཧཾ སཧཱཡོ, ཏསྶ མེ དྭེ དྷུཝབྷཏྟཱནི དིནྣཱནི, ཏུམྷེ ཏསྨིཾ སམྤཏྟེ མཱ པམཛྫིཏྠཱ’’ཏི. ཏེ ‘‘སཱདྷཱུ’’ཏི སམྤཊིཙྪིཾསུ.

སཏྠཱ པུནདིཝསེ པིཎྜཱཡ ཙརནྟོ ཛེཊྛཔུཏྟསྶ གྷརདྭཱརཾ ཨགམཱསི. སོ སཏྠཱརཾ དིསྭཱ པཏྟམཱདཱཡ གྷརཾ པཝེསེཏྭཱ མཧཱརཧེ པལླངྐེ ནིསཱིདཱཔེཏྭཱ པཎཱིཏབྷོཛནམདཱསི. སཏྠཱ པུནདིཝསེ ཨིཏརསྶ ཨིཏརསྶཱཏི པཊིཔཱཊིཡཱ སབྦེསཾ གྷརཱནི ཨགམཱསི. སབྦེ ཏེ ཏཐེཝ སཀྐཱརཾ ཨཀཾསུ. ཨེཀདིཝསཾ ཛེཊྛཔུཏྟོ མངྒལེ པཙྩུཔཊྛིཏེ པིཏརཾ ཨཱཧ – ‘‘ཏཱཏ, ཀསྶ མངྒལཾ དེམཱ’’ཏི? ‘‘ནཱཧཾ ཨཉྙེ ཛཱནཱམི, སམཎོ གོཏམོ མཡ྄ཧཾ སཧཱཡོ’’ཏི. ‘‘ཏེན ཧི ཏཾ སྭཱཏནཱཡ པཉྩཧི བྷིཀྑུསཏེཧི སདྡྷིཾ ནིམནྟེཐཱ’’ཏི. བྲཱཧྨཎོ ཏཐཱ ཨཀཱསི. སཏྠཱ པུནདིཝསེ སཔརིཝཱརོ ཏསྶ གེཧཾ ཨགམཱསི. སོ ཧརིཏུཔལིཏྟེ སབྦཱལངྐཱརཔཊིམཎྜིཏེ གེཧེ བུདྡྷཔྤམུཁཾ བྷིཀྑུསངྒྷཾ ནིསཱིདཱཔེཏྭཱ ཨཔྤོདཀམདྷུཔཱཡསེན ཙེཝ པཎཱིཏེན ཁཱདནཱིཡེན ཙ པརིཝིསི. ཨནྟརཱབྷཏྟསྨིཾཡེཝ བྲཱཧྨཎསྶ ཙཏྟཱརོ པུཏྟཱ སཏྠུ སནྟིཀེ ནིསཱིདིཏྭཱ ཨཱཧཾསུ – ‘‘བྷོ གོཏམ, མཡཾ ཨམྷཱཀཾ པིཏརཾ པཊིཛགྒཱམ ན པམཛྫཱམ, པསྶཐིམསྶ ཨཏྟབྷཱཝ’’ནྟི.

སཏྠཱ ‘‘ཀལྱཱཎཾ ཝོ ཀཏཾ, མཱཏཱཔིཏུཔོསནཾ ནཱམ པོརཱཎཀཔཎྜིཏཱནཾ ཨཱཙིཎྞམེཝཱ’’ཏི ཝཏྭཱ ‘‘ཏསྶ ནཱགསྶ ཝིཔྤཝཱསེན, ཝིརཱུལ༹ྷཱ སལླཀཱི ཙ ཀུཊཛཱ ཙཱ’’ཏི ཨིམཾ ཨེཀཱདསནིཔཱཏེ མཱཏུཔོསཀནཱགརཱཛཛཱཏཀཾ (ཙརིཡཱ. ༢.༡ ཨཱདཡོ; ཛཱ. ༡.༡༡.༡ ཨཱདཡོ) ཝིཏྠཱརེན ཀཐེཏྭཱ ཨིམཾ གཱཐཾ ཨབྷཱསི –

༣༢༤.

‘‘དྷནཔཱལོ ནཱམ ཀུཉྫརོ,

ཀཊུཀབྷེདནོ དུནྣིཝཱརཡོ;

བདྡྷོ ཀབལ༹ཾ ན བྷུཉྫཏི,

སུམརཏི ནཱགཝནསྶ ཀུཉྫརོ’’ཏི.

ཏཏྠ དྷནཔཱལོ ནཱམཱཏི ཏདཱ ཀཱསིཀརཉྙཱ ཧཏྠཱཙརིཡཾ པེསེཏྭཱ རམཎཱིཡེ ནཱགཝནེ གཱཧཱཔིཏསྶ ཧཏྠིནོ ཨེཏཾ ནཱམཾ. ཀཊུཀབྷེདནོཏི ཏིཁིཎམདོ. ཧཏྠཱིནཉྷི མདཀཱལེ ཀཎྞཙཱུལི༹ཀཱ པབྷིཛྫནྟི, པཀཏིཡཱཔི ཧཏྠིནོ ཏསྨིཾ ཀཱལེ ཨངྐུསེ ཝཱ ཀུནྟཏོམརེ ཝཱ ན གཎེནྟི, ཙཎྜཱ བྷཝནྟི. སོ པན ཨཏིཙཎྜོཡེཝ. ཏེན ཝུཏྟཾ – ཀཊུཀབྷེདནོ དུནྣིཝཱརཡོཏི. བདྡྷོ ཀབལ༹ཾ ན བྷུཉྫཏཱིཏི སོ བདྡྷོ ཧཏྠིསཱལཾ པན ནེཏྭཱ ཝིཙིཏྲསཱཎིཡཱ པརིཀྑིཔཱཔེཏྭཱ ཀཏགནྡྷཔརིབྷཎྜཱཡ ཨུཔརི བདྡྷཝིཙིཏྲཝིཏཱནཱཡ བྷཱུམིཡཱ ཋཔིཏོ རཉྙཱ རཱཛཱརཧེན ནཱནགྒརསེན བྷོཛནེན ཨུཔཊྛཱཔིཏོཔི ཀིཉྩི བྷུཉྫིཏུཾ ན ཨིཙྪི, ཏམཏྠཾ སནྡྷཱཡ ‘‘བདྡྷོ ཀབལ༹ཾ ན བྷུཉྫཏཱི’’ཏི ཝུཏྟཾ. སུམརཏི ནཱགཝནསྶཱཏི སོ རམཎཱིཡཾ མེ ཝསནཊྛཱནནྟི ནཱགཝནཾ སརཏི. ‘‘མཱཏཱ པན མེ ཨརཉྙེ པུཏྟཝིཡོགེན དུཀྑཔྤཏྟཱ ཨཧོསི, མཱཏཱཔིཏུཨུཔཊྛཱནདྷམྨོ ན མེ པཱུརཏི, ཀིཾ མེ ཨིམིནཱ བྷོཛནེནཱ’’ཏི དྷམྨིཀཾ མཱཏཱཔིཏུཨུཔཊྛཱནདྷམྨམེཝ སརི. ཏཾ པན ཡསྨཱ ཏསྨིཾ ནཱགཝནེཡེཝ ཋིཏོ སཀྐཱ པཱུརེཏུཾ, ཏེན ཝུཏྟཾ – སུམརཏི ནཱགཝནསྶ ཀུཉྫརོཏི. སཏྠརི ཨིམཾ ཨཏྟནོ པུབྦཙརིཡཾ ཨཱནེཏྭཱ ཀཐེནྟེ ཀཐེནྟེཡེཝ སབྦེཔི ཏེ ཨསྶུདྷཱརཱ པཝཏྟེཏྭཱ མུདུཧདཡཱ ཨོཧིཏསོཏཱ བྷཝིཾསུ. ཨཐ ནེསཾ བྷགཝཱ སཔྤཱཡཾ ཝིདིཏྭཱ སཙྩཱནི པཀཱསེཏྭཱ དྷམྨཾ དེསེསི.

དེསནཱཝསཱནེ སདྡྷིཾ པུཏྟེཧི ཙེཝ སུཎིསཱཧི ཙ བྲཱཧྨཎོ སོཏཱཔཏྟིཕལེ པཏིཊྛཧཱིཏི.

པརིཛིཎྞབྲཱཧྨཎཔུཏྟཝཏྠུ ཏཏིཡཾ.

༤. པསེནདིཀོསལཝཏྠུ

མིདྡྷཱི ཡདཱ ཧོཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ རཱཛཱནཾ པསེནདིཀོསལཾ ཨཱརབྦྷ ཀཐེསི.

ཨེཀསྨིཉྷི སམཡེ རཱཛཱ ཏཎྜུལདོཎསྶ ཨོདནཾ ཏདུཔིཡེན སཱུཔབྱཉྫནེན བྷུཉྫཏི. སོ ཨེཀདིཝསཾ བྷུཏྟཔཱཏརཱསོ བྷཏྟསམྨདཾ ཨཝིནོདེཏྭཱཝ སཏྠུ སནྟིཀཾ གནྟྭཱ ཀིལནྟརཱུཔོ ཨིཏོ ཙིཏོ ཙ སམྤརིཝཏྟཏི, ནིདྡཱཡ ཨབྷིབྷུཡྻམཱནོཔི ཨུཛུཀཾ ནིཔཛྫིཏུཾ ཨསཀྐོནྟོ ཨེཀམནྟཾ ནིསཱིདི. ཨཐ ནཾ སཏྠཱ ཨཱཧ – ‘‘ཀིཾ, མཧཱརཱཛ, ཨཝིསྶམིཏྭཱཝ ཨཱགཏོསཱི’’ཏི? ‘‘ཨཱམ, བྷནྟེ, བྷུཏྟཀཱལཏོ པཊྛཱཡ མེ མཧཱདུཀྑཾ ཧོཏཱི’’ཏི. ཨཐ ནཾ སཏྠཱ, ‘‘མཧཱརཱཛ, ཨཏིབཧུབྷོཛནཾ ཨེཝཾ དུཀྑཾ ཧོཏཱི’’ཏི ཝཏྭཱ ཨིམཾ གཱཐམཱཧ –

༣༢༥.

‘‘མིདྡྷཱི ཡདཱ ཧོཏི མཧགྒྷསོ ཙ,

ནིདྡཱཡིཏཱ སམྤརིཝཏྟསཱཡཱི;

མཧཱཝརཱཧོཝ ནིཝཱཔཔུཊྛོ,

པུནཔྤུནཾ གབྦྷམུཔེཏི མནྡོ’’ཏི.

ཏཏྠ མིདྡྷཱིཏི ཐིནམིདྡྷཱབྷིབྷཱུཏོ. མཧགྒྷསོ ཙཱཏི མཧཱབྷོཛནོ ཨཱཧརཧཏྠཀཨལཾསཱཊཀཏཏྲཝཊྚཀཀཱཀམཱསཀབྷུཏྟཝམིཏཀཱནཾ ཨཉྙཏརོ ཝིཡ. ནིཝཱཔཔུཊྛོཏི ཀུཎྜཀཱདིནཱ སཱུཀརབྷཏྟེན པུཊྛོ. གྷརསཱུཀརོ ཧི དཧརཀཱལཏོ པཊྛཱཡ པོསིཡམཱནོ ཐཱུལསརཱིརཀཱལེ གེཧཱ བཧི ནིཀྑམིཏུཾ ཨལབྷནྟོ ཧེཊྛཱམཉྩཱདཱིསུ སམྤརིཝཏྟིཏྭཱ ཨསྶསནྟོ པསྶསནྟོ སཡཏེཝ. ཨིདཾ ཝུཏྟཾ ཧོཏི – ཡདཱ པུརིསོ མིདྡྷཱི ཙ ཧོཏི མཧགྒྷསོ ཙ, ནིཝཱཔཔུཊྛོ མཧཱཝརཱཧོ ཝིཡ ཙ ཨཉྙེན ཨིརིཡཱཔཐེན ཡཱཔེཏུཾ ཨསཀྐོནྟོ ནིདྡཱཡནསཱིལོ སམྤརིཝཏྟསཱཡཱི, ཏདཱ སོ ‘‘ཨནིཙྩཾ དུཀྑཾ ཨནཏྟཱ’’ཏི ཏཱིཎི ལཀྑཎཱནི མནསིཀཱཏུཾ ན སཀྐོཏི. ཏེསཾ ཨམནསིཀཱརཱ མནྡཔཉྙོ པུནཔྤུནཾ གབྦྷམུཔེཏི, གབྦྷཝཱསཏོ ན པརིམུཙྩཏཱིཏི. དེསནཱཝསཱནེ སཏྠཱ རཉྙོ ཨུཔཀཱརཝསེན –

‘‘མནུཛསྶ སདཱ སཏཱིམཏོ, མཏྟཾ ཛཱནཏོ ལདྡྷབྷོཛནེ;

ཏནུཀསྶ བྷཝནྟི ཝེདནཱ, སཎིཀཾ ཛཱིརཏི ཨཱཡུ པཱལཡ’’ནྟི. (སཾ. ནི. ༡.༡༢༤);

ཨིམཾ གཱཐཾ ཝཏྭཱ ཨུཏྟརམཱཎཝཾ ཨུགྒཎྷཱཔེཏྭཱ ‘‘ཨིམཾ གཱཐཾ རཉྙོ བྷོཛནཝེལཱཡ པཝེདེཡྻཱསི, ཨིམིནཱ ཨུཔཱཡེན བྷོཛནཾ པརིཧཱཔེཡྻཱསཱི’’ཏི ཨུཔཱཡཾ ཨཱཙིཀྑི, སོ ཏཐཱ ཨཀཱསི. རཱཛཱ ཨཔརེན སམཡེན ནཱལི༹ཀོདནཔརམཏཱཡ སཎྛིཏོ སུསལླཧུཀསརཱིརོ སུཁཔྤཏྟོ སཏྠརི ཨུཔྤནྣཝིསྶཱསོ སཏྟཱཧཾ ཨསདིསདཱནཾ པཝཏྟེསི. དཱནཱནུམོདནཱཡ མཧཱཛནོ མཧནྟཾ ཝིསེསཾ པཱཔུཎཱིཏི.

པསེནདིཀོསལཝཏྠུ ཙཏུཏྠཾ.

༥. སཱནུསཱམཎེརཝཏྠུ

ཨིདཾ པུརེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཱནུཾ ནཱམ སཱམཎེརཾ ཨཱརབྦྷ ཀཐེསི.

སོ ཀིར ཨེཀིསྶཱ ཨུཔཱསིཀཱཡ ཨེཀཔུཏྟཀོ ཨཧོསི. ཨཐ ནཾ སཱ དཧརཀཱལེཡེཝ པབྦཱཛེསི. སོ པབྦཛིཏཀཱལཏོ པཊྛཱཡ སཱིལཝཱ ཨཧོསི ཝཏྟསམྤནྣོ, ཨཱཙརིཡུཔཛ྄ཛྷཱཡཨཱགནྟུཀཱནཾ ཝཏྟཾ ཀཏམེཝ ཧོཏི. མཱསསྶ ཨཊྛམེ དིཝསེ པཱཏོཝ ཨུཊྛཱཡ ཨུདཀམཱལ༹ཀེ ཨུདཀཾ ཨུཔཊྛཱཔེཏྭཱ དྷམྨསྶཝནགྒཾ སམྨཛྫིཏྭཱ ཨཱསནཾ པཉྙཱཔེཏྭཱ དཱིཔཾ ཛཱལེཏྭཱ མདྷུརསྶརེན དྷམྨསྶཝནཾ གྷོསེཏི. བྷིཀྑཱུ ཏསྶ ཐཱམཾ ཉཏྭཱ ‘‘སརབྷཉྙཾ བྷཎ སཱམཎེརཱ’’ཏི ཨཛ྄ཛྷེསནྟི. སོ ‘‘མཡ྄ཧཾ ཧདཡཝཱཏོ རུཛཏི, ཀཱཡོ ཝཱ བཱདྷཏཱི’’ཏི ཀིཉྩི པཙྩཱཧཱརཾ ཨཀཏྭཱ དྷམྨཱསནཾ ཨབྷིརཱུཧིཏྭཱ ཨཱཀཱསགངྒཾ ཨོཏཱརེནྟོ ཝིཡ སརབྷཉྙཾ ཝཏྭཱ ཨོཏརནྟོ ‘‘མཡ྄ཧཾ མཱཏཱཔིཏཱུནཾ ཨིམསྨིཾ སརབྷཉྙེ པཏྟིཾ དམྨཱི’’ཏི ཝདཏི. ཏསྶ མནུསྶཱ མཱཏཱཔིཏརོ པཏྟིཡཱ དིནྣབྷཱཝཾ ན ཛཱནནྟི. ཨནནྟརཏྟབྷཱཝེ པནསྶ མཱཏཱ ཡཀྑིནཱི ཧུཏྭཱ ནིབྦཏྟཱ, སཱ དེཝཏཱཧི སདྡྷིཾ ཨཱགནྟྭཱ དྷམྨཾ སུཏྭཱ ‘‘སཱམཎེརེན དིནྣཔཏྟིཾ ཨནུམོདཱམི, ཏཱཏཱ’’ཏི ཝདཏི. ‘‘སཱིལསམྤནྣོ ཙ ནཱམ བྷིཀྑུ སདེཝཀསྶ ལོཀསྶ པིཡོ ཧོཏཱི’’ཏི ཏསྨིཾ སཱམཎེརེ དེཝཏཱ སལཛྫཱ སགཱརཝཱ མཧཱབྲཧྨཱནཾ ཝིཡ ཨགྒིཀྑནྡྷཾ ཝིཡ ཙ ནཾ མཉྙནྟི. སཱམཎེརེ གཱརཝེན ཏཉྩ ཡཀྑིནིཾ གརུཀཾ ཀཏྭཱ པསྶནྟི. ཏཱ དྷམྨསྶཝནཡཀྑསམཱགམཱདཱིསུ ‘‘སཱནུམཱཏཱ སཱནུམཱཏཱ’’ཏི ཡཀྑིནིཡཱ ཨགྒཱསནཾ ཨགྒོདཀཾ ཨགྒཔིཎྜཾ དེནྟི. མཧེསཀྑཱཔི ཡཀྑཱ ཏཾ དིསྭཱ མགྒཱ ཨོཀྐམནྟི, ཨཱསནཱ ཝུཊྛཧནྟི.

ཨཐ ཁོ སཱམཎེརོ ཝུཌྜྷིམནྭཱཡ པརིཔཀྐིནྡྲིཡོ ཨནབྷིརཏིཡཱ པཱིལི༹ཏོ ཨནབྷིརཏིཾ ཝིནོདེཏུཾ ཨསཀྐོནྟོ པརུལ༹ྷཀེསནཁོ ཀིལིཊྛནིཝཱསནཔཱརུཔནོ ཀསྶཙི ཨནཱརོཙེཏྭཱ པཏྟཙཱིཝརམཱདཱཡ ཨེཀཀོཝ མཱཏུགྷརཾ ཨགམཱསི. ཨུཔཱསིཀཱ པུཏྟཾ དིསྭཱ ཝནྡིཏྭཱ ཨཱཧ – ‘‘ཀིཾ, ཏཱཏ, ཏྭཾ པུབྦེ ཨཱཙརིཡུཔཛ྄ཛྷཱཡེཧི ཝཱ དཧརསཱམཎེརེཧི ཝཱ སདྡྷིཾ ཨིདྷཱགཙྪསི, ཀསྨཱ ཨེཀཀོཝ ཨཛྫ ཨཱགཏོསཱི’’ཏི? སོ ཨུཀྐཎྛིཏབྷཱཝཾ ཨཱརོཙེསི. སཱ ཨུཔཱསིཀཱ ནཱནཔྤཀཱརེན གྷརཱཝཱསེ ཨཱདཱིནཝཾ དསྶེཏྭཱ པུཏྟཾ ཨོཝདམཱནཱཔི སཉྙཱཔེཏུཾ ཨསཀྐོནྟཱི ‘‘ཨཔྤེཝ ནཱམ ཨཏྟནོ དྷམྨཏཱཡཔི སལླཀྑེཡྻཱ’’ཏི ཨནུཡྻོཛེཏྭཱ ‘‘ཏིཊྛ, ཏཱཏ, ཡཱཝ ཏེ ཡཱགུབྷཏྟཾ སམྤཱདེམི, ཡཱགུཾ པིཝིཏྭཱ ཀཏབྷཏྟཀིཙྩསྶ ཏེ མནཱཔཱནི ཝཏྠཱནི ནཱིཧརིཏྭཱ དསྶཱམཱི’’ཏི ཝཏྭཱ ཨཱསནཾ པཉྙཱཔེཏྭཱ ཨདཱསི. ནིསཱིདི སཱམཎེརོ. ཨུཔཱསིཀཱ མུཧུཏྟེནེཝ ཡཱགུཁཛྫཀཾ སམྤཱདེཏྭཱ ཨདཱསི. ཨཐ ‘‘བྷཏྟཾ སམྤཱདེསྶཱམཱི’’ཏི ཨཝིདཱུརེ ནིསིནྣཱ ཏཎྜུལེ དྷོཝཏི. ཏསྨིཾ སམཡེ སཱ ཡཀྑིནཱི ‘‘ཀཧཾ ནུ ཁོ སཱམཎེརོ, ཀཙྩི བྷིཀྑཱཧཱརཾ ལབྷཏི, ནོ’’ཏི ཨཱཝཛྫམཱནཱ ཏསྶ ཝིབྦྷམིཏུཀཱམཏཱཡ ནིསིནྣབྷཱཝཾ ཉཏྭཱ ‘‘སཱམཎེརོ མེ མཧེསཀྑཱནཾ དེཝཏཱནཾ ཨནྟརེ ལཛྫཾ ཨུཔྤཱདེཡྻ, གཙྪཱམིསྶ ཝིབྦྷམནེ ཨནྟརཱཡཾ ཀརིསྶཱམཱི’’ཏི ཨཱགནྟྭཱ ཏསྶ སརཱིརེ ཨདྷིམུཙྩིཏྭཱ གཱིཝཾ པརིཝཏྟེཏྭཱ ཁེལེ༹ན པགྒྷརནྟེན བྷཱུམིཡཾ ནིཔཏི. ཨུཔཱསིཀཱ པུཏྟསྶ ཏཾ ཝིཔྤཀཱརཾ དིསྭཱ ཝེགེན གནྟྭཱ པུཏྟཾ ཨཱལིངྒེཏྭཱ ཨཱུརཱུསུ ནིཔཛྫཱཔེསི. སཀལགཱམཝཱསིནོ ཨཱགནྟྭཱ བལིཀམྨཱདཱིནི ཀརིཾསུ. ཨུཔཱསིཀཱ པན པརིདེཝམཱནཱ ཨིམཱ གཱཐཱ ཨབྷཱསི –

‘‘ཙཱཏུདྡསིཾ པཉྩདསིཾ, ཡཱ ཙ པཀྑསྶ ཨཊྛམཱི;

པཱཊིཧཱརིཡཔཀྑཉྩ, ཨཊྛངྒསུསམཱགཏཾ.

‘‘ཨུཔོསཐཾ ཨུཔཝསནྟི, བྲཧྨཙརིཡཾ ཙརནྟི ཡེ;

ན ཏེཧི ཡཀྑཱ ཀཱིལ༹ནྟི, ཨིཏི མེ ཨརཧཏཾ སུཏཾ;

སཱ དཱནི ཨཛྫ པསྶཱམི, ཡཀྑཱ ཀཱིལ༹ནྟི སཱནུནཱ’’ཏི. (སཾ. ནི. ༡.༢༣༩);

ཨུཔཱསིཀཱཡ ཝཙནཾ སུཏྭཱ –

‘‘ཙཱཏུདྡསིཾ པཉྩདསིཾ, ཡཱ ཙ པཀྑསྶ ཨཊྛམཱི;

པཱཊིཧཱརིཡཔཀྑཉྩ, ཨཊྛངྒསུསམཱགཏཾ.

‘‘ཨུཔོསཐཾ ཨུཔཝསནྟི, བྲཧྨཙརིཡཾ ཙརནྟི ཡེ;

ན ཏེཧི ཡཀྑཱ ཀཱིལ༹ནྟི, སཱཧུ ཏེ ཨརཧཏཾ སུཏ’’ནྟི. (སཾ. ནི. ༡.༢༣༩) –

ཝཏྭཱ ཨཱཧ –

‘‘སཱནུཾ པབུདྡྷཾ ཝཛྫཱསི, ཡཀྑཱནཾ ཝཙནཾ ཨིདཾ;

མཱཀཱསི པཱཔཀཾ ཀམྨཾ, ཨཱཝི ཝཱ ཡདི ཝཱ རཧོ.

‘‘སཙེ ཙ པཱཔཀཾ ཀམྨཾ, ཀརིསྶསི ཀརོསི ཝཱ;

ན ཏེ དུཀྑཱ པམུཏྱཏྠི, ཨུཔྤཙྩཱཔི པལཱཡཏོ’’ཏི. (སཾ. ནི. ༡.༢༣༩);

ཨེཝཾ པཱཔཀཾ ཀམྨཾ ཀཏྭཱ སཀུཎསྶ ཝིཡ ཨུཔྤཏིཏྭཱ པལཱཡཏོཔི ཏེ མོཀྑོ ནཏྠཱིཏི ཝཏྭཱ སཱ ཡཀྑིནཱི སཱམཎེརཾ མུཉྩི. སོ ཨཀྑཱིནི ཨུམྨཱིལེཏྭཱ མཱཏརཾ ཀེསེ ཝིཀིརིཡ ཨསྶསནྟིཾ པསྶསནྟིཾ རོདམཱནཾ སཀལགཱམཝཱསིནོ ཙ སནྣིཔཏིཏེ དིསྭཱ ཨཏྟནོ ཡཀྑེན གཧིཏབྷཱཝཾ ཨཛཱནནྟོ ‘‘ཨཧཾ པུབྦེ པཱིཋེ ནིསིནྣོ, མཱཏཱ མེ ཨཝིདཱུརེ ནིསཱིདིཏྭཱ ཏཎྜུལེ དྷོཝི, ཨིདཱནི པནམྷི བྷཱུམིཡཾ ནིཔནྣོ, ཀིཾ ནུ ཁོ ཨེཏ’’ནྟི ནིཔནྣཀོཝ མཱཏརཾ ཨཱཧ –

‘‘མཏཾ ཝཱ ཨམྨ རོདནྟི, ཡོ ཝཱ ཛཱིཝཾ ན དིསྶཏི;

ཛཱིཝནྟཾ ཨམྨ པསྶནྟཱི, ཀསྨཱ མཾ ཨམྨ རོདསཱི’’ཏི. (ཐེརགཱ. ༤༤; སཾ. ནི. ༡.༢༣༩);

ཨཐསྶ མཱཏཱ ཝཏྠུཀཱམཀིལེསཀཱམེ པཧཱཡ པབྦཛིཏསྶ པུན ཝིབྦྷམནཏྠཾ ཨཱགམནེ ཨཱདཱིནཝཾ དསྶེནྟཱི ཨཱཧ –

‘‘མཏཾ ཝཱ པུཏྟ རོདནྟི, ཡོ ཝཱ ཛཱིཝཾ ན དིསྶཏི;

ཡོ ཙ ཀཱམེ ཙཛིཏྭཱན, པུནརཱགཙྪཏེ ཨིདྷ;

ཏཾ ཝཱཔི པུཏྟ རོདནྟི, པུན ཛཱིཝཾ མཏོ ཧི སོ’’ཏི. (སཾ. ནི. ༡.༢༣༩);

ཨེཝཉྩ པན ཝཏྭཱ གྷརཱཝཱསཾ ཀུཀྐུལ༹སདིསཉྩེཝ ནརཀསདིསཉྩ ཀཏྭཱ གྷརཱཝཱསེ ཨཱདཱིནཝཾ དསྶེནྟཱི པུན ཨཱཧ –

‘‘ཀུཀྐུལཱ༹ ཨུབྦྷཏོ ཏཱཏ, ཀུཀྐུལ༹ཾ པཏིཏུམིཙྪསི;

ནརཀཱ ཨུབྦྷཏོ ཏཱཏ, ནརཀཾ པཏིཏུམིཙྪསཱི’’ཏི. (སཾ. ནི. ༡.༢༣༩);

ཨཐ ནཾ, ‘‘པུཏྟ, བྷདྡཾ ཏཝ ཧོཏུ, མཡཱ པན ‘ཨཡཾ ནོ པུཏྟཀོ ཌཡ྄ཧམཱནོ’ཏི གེཧཱ བྷཎྜཾ ཝིཡ ནཱིཧརིཏྭཱ བུདྡྷསཱསནེ པབྦཱཛིཏོ, གྷརཱཝཱསེ པུན ཌཡ྄ཧིཏུཾ ཨིཙྪསི. ཨབྷིདྷཱཝཐ པརིཏྟཱཡཐ ནོཏི ཨིམམཏྠཾ ཀསྶ ཨུཛ྄ཛྷཱཔཡཱམ ཀཾ ནིཛ྄ཛྷཱཔཡཱམཱ’’ཏི དཱིཔེཏུཾ ཨིམཾ གཱཐམཱཧ –

‘‘ཨབྷིདྷཱཝཐ བྷདྡནྟེ, ཀསྶ ཨུཛ྄ཛྷཱཔཡཱམསེ;

ཨཱདིཏྟཱ ནཱིཧཏཾ བྷཎྜཾ, པུན ཌཡ྄ཧིཏུམིཙྪསཱི’’ཏི. (སཾ. ནི. ༡.༢༣༩);

སོ མཱཏརི ཀཐེནྟིཡཱ ཀཐེནྟིཡཱ སལླཀྑེཏྭཱ ‘‘ནཏྠི མཡ྄ཧཾ གིཧིབྷཱཝེན ཨཏྠོ’’ཏི ཨཱཧ. ཨཐསྶ མཱཏཱ ‘‘སཱདྷུ, ཏཱཏཱ’’ཏི ཏུཊྛཱ པཎཱིཏབྷོཛནཾ བྷོཛེཏྭཱ ‘‘ཀཏིཝསྶོསི, ཏཱཏཱ’’ཏི པུཙྪིཏྭཱ པརིཔུཎྞཝསྶབྷཱཝཾ ཉཏྭཱ ཏིཙཱིཝརཾ པཊིཡཱདེསི. སོ པརིཔུཎྞཔཏྟཙཱིཝརོ ཨུཔསམྤདཾ ལབྷི. ཨཐསྶ ཨཙིརཱུཔསམྤནྣསྶ སཏྠཱ ཙིཏྟནིགྒཧེ ཨུསྶཱཧཾ ཛནེནྟོ ‘‘ཙིཏྟཾ ནཱམེཏཾ ནཱནཱརམྨཎེསུ དཱིགྷརཏྟཾ ཙཱརིཀཾ ཙརནྟཾ ཨནིགྒཎྷནྟསྶ སོཏྠིབྷཱཝོ ནཱམ ནཏྠི, ཏསྨཱ ཨངྐུསེན མཏྟཧཏྠིནོ ཝིཡ ཙིཏྟསྶ ནིགྒཎྷནེ ཡོགོ ཀརཎཱིཡོ’’ཏི ཝཏྭཱ ཨིམཾ གཱཐམཱཧ –

༣༢༦.

‘‘ཨིདཾ པུརེ ཙིཏྟམཙཱརི ཙཱརིཀཾ,

ཡེནིཙྪཀཾ ཡཏྠཀཱམཾ ཡཐཱསུཁཾ;

ཏདཛྫཧཾ ནིགྒཧེསྶཱམི ཡོནིསོ,

ཧཏྠིཔྤབྷིནྣཾ ཝིཡ ཨངྐུསགྒཧོ’’ཏི.

ཏསྶཏྠོ – ཨིདཾ ཙིཏྟཾ ནཱམ ཨིཏོ པུབྦེ རཱུཔཱདཱིསུ ཙ ཨཱརམྨཎེསུ རཱགཱདཱིནཾ ཡེན ཀཱརཎེན ཨིཙྪཏི, ཡཏྠེཝསྶ ཀཱམོ ཨུཔྤཛྫཏི, ཏསྶ ཝསེན ཡཏྠ ཀཱམཾ ཡཐཱརུཙི ཙརནྟསྶ སུཁཾ ཧོཏི, ཏཐེཝ ཝིཙརཎཏོ ཡཐཱསུཁཾ དཱིགྷརཏྟཾ ཙཱརིཀཾ ཙརི, ཏཾ ཨཛྫ ཨཧཾ པབྷིནྣཾ མཏྟཧཏྠིཾ ཧཏྠཱཙརིཡསངྑཱཏོ ཚེཀོ ཨངྐུསགྒཧོ ཨངྐུསེན ཝིཡ ཡོནིསོམནསིཀཱརེན ནིགྒཧེསྶཱམི, ནཱསྶ ཝཱིཏིཀྐམིཏུཾ དསྶཱམཱིཏི.

དེསནཱཝསཱནེ སཱནུནཱ སདྡྷིཾ དྷམྨསྶཝནཱཡ ཨུཔསངྐམནྟཱནཾ བཧཱུནཾ དེཝཏཱནཾ དྷམྨཱབྷིསམཡོ ཨཧོསི. སོཔཱཡསྨཱ ཏེཔིཊཀཾ བུདྡྷཝཙནཾ ཨུགྒཎྷིཏྭཱ མཧཱདྷམྨཀཐིཀོ ཧུཏྭཱ ཝཱིསཝསྶསཏཾ ཋཏྭཱ སཀལཛམྦུདཱིཔཾ སངྑོབྷེཏྭཱ པརིནིབྦཱཡཱིཏི.

སཱནུསཱམཎེརཝཏྠུ པཉྩམཾ.

༦. པཱཝེཡྻཀཧཏྠིཝཏྠུ

ཨཔྤམཱདརཏཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀོསལརཉྙོ པཱཝེཡྻཀཾ ནཱམ ཧཏྠིཾ ཨཱརབྦྷ ཀཐེསི.

སོ ཀིར ཧཏྠཱི ཏརུཎཀཱལེ མཧཱབལོ ཧུཏྭཱ ཨཔརེན སམཡེན ཛརཱཝཱཏཝེགབྦྷཱཧཏོ ཧུཏྭཱ ཨེཀཾ མཧནྟཾ སརཾ ཨོརུཡ྄ཧ ཀལལེ ལགྒིཏྭཱ ཨུཏྟརིཏུཾ ནཱསཀྑི. མཧཱཛནོ ཏཾ དིསྭཱ ‘‘ཨེཝརཱུཔོཔི ནཱམ ཧཏྠཱི ཨིམཾ དུབྦལབྷཱཝཾ པཏྟོ’’ཏི ཀཐཾ སམུཊྛཱཔེསི. རཱཛཱ ཏཾ པཝཏྟིཾ སུཏྭཱ ཧཏྠཱཙརིཡཾ ཨཱཎཱཔེསི – ‘‘གཙྪ, ཨཱཙརིཡ, ཏཾ ཧཏྠིཾ ཀལལཏོ ཨུདྡྷརཱཧཱི’’ཏི. སོ གནྟྭཱ ཏསྨིཾ ཋཱནེ སངྒཱམསཱིསཾ དསྶེཏྭཱ སངྒཱམབྷེརིཾ ཨཱཀོཊཱཔེསི. མཱནཛཱཏིཀོ ཧཏྠཱི ཝེགེནུཊྛཱཡ ཐལེ པཏིཊྛཧི. བྷིཀྑཱུ ཏཾ ཀཱརཎཾ དིསྭཱ སཏྠུ ཨཱརོཙེསུཾ. སཏྠཱ ‘‘ཏེན, བྷིཀྑཝེ, ཧཏྠིནཱ པཀཏིཔངྐདུགྒཏོ ཨཏྟཱ ཨུདྡྷཊོ, ཏུམྷེ པན ཀིལེསདུགྒེ པཀྑནྡཱ. ཏསྨཱ ཡོནིསོ པདཧིཏྭཱ ཏུམྷེཔི ཏཏོ ཨཏྟཱནཾ ཨུདྡྷརཐཱ’’ཏི ཝཏྭཱ ཨིམཾ གཱཐམཱཧ –

༣༢༧.

‘‘ཨཔྤམཱདརཏཱ ཧོཐ, སཙིཏྟམནུརཀྑཐ;

དུགྒཱ ཨུདྡྷརཐཏྟཱནཾ, པངྐེ སནྣོཝ ཀུཉྫརོ’’ཏི.

ཏཏྠ ཨཔྤམཱདརཏཱཏི སཏིཡཱ ཨཝིཔྤཝཱསེ ཨབྷིརཏཱ ཧོཐ. སཙིཏྟནྟི རཱུཔཱདཱིསུ ཨཱརམྨཎེསུ ཨཏྟནོ ཙིཏྟཾ ཡཐཱ ཝཱིཏིཀྐམཾ ན ཀརོཏི, ཨེཝཾ རཀྑཐ. དུགྒཱཏི ཡཐཱ སོ པངྐེ སནྣོ ཀུཉྫརོ ཧཏྠེཧི ཙ པཱདེཧི ཙ ཝཱཡཱམཾ ཀཏྭཱ པངྐདུགྒཏོ ཨཏྟཱནཾ ཨུདྡྷརིཏྭཱ ཐལེ པཏིཊྛིཏོ, ཨེཝཾ ཏུམྷེཔི ཀིལེསདུགྒཏོ ཨཏྟཱནཾ ཨུདྡྷརཐ, ནིབྦཱནཐལེ པཏིཊྛཱཔེཐཱཏི ཨཏྠོ.

དེསནཱཝསཱནེ ཏེ བྷིཀྑཱུ ཨརཧཏྟེ པཏིཊྛཧིཾསཱུཏི.

པཱཝེཡྻཀཧཏྠིཝཏྠུ ཚཊྛཾ.

༧. སམྦཧུལབྷིཀྑུཝཏྠུ

སཙེ ལབྷེཐཱཏི ཨིམཾ དྷམྨདེསནཾ སཏྠཱ པཱལིལེཡྻཀཾ ནིསྶཱཡ རཀྑིཏཝནསཎྜེ ཝིཧརནྟོ སམྦཧུལེ བྷིཀྑཱུ ཨཱརབྦྷ ཀཐེསི. ཝཏྠུ ཡམཀཝགྒེ ‘‘པརེ ཙ ན ཝིཛཱནནྟཱི’’ཏི གཱཐཱཝཎྞནཱཡ ཨཱགཏམེཝ. ཝུཏྟཉྷེཏཾ (དྷ. པ. ཨཊྛ. ༡.༥ ཀོསམྦཀཝཏྠུ) –

ཏཐཱགཏསྶ ཏཏྠ ཧཏྠིནཱགེན ཨུཔཊྛིཡམཱནསྶ ཝསནབྷཱཝོ སཀལཛམྦུདཱིཔེ པཱཀཊོ ཨཧོསི. སཱཝཏྠིནགརཏོ ‘‘ཨནཱཐཔིཎྜིཀོ ཝིསཱཁཱ མཧཱཨུཔཱསིཀཱ’’ཏི ཨེཝམཱདཱིནི མཧཱཀུལཱནི ཨཱནནྡཏྠེརསྶ སཱསནཾ པཧིཎིཾསུ ‘‘སཏྠཱརཾ ནོ, བྷནྟེ, དསྶེཐཱ’’ཏི. དིསཱཝཱསིནོཔི པཉྩསཏཱ བྷིཀྑཱུ ཝུཊྛཝསྶཱ ཨཱནནྡཏྠེརཾ ཨུཔསངྐམིཏྭཱ ‘‘ཙིརསྶུཏཱ ནོ, ཨཱཝུསོ ཨཱནནྡ, བྷགཝཏོ སམྨུཁཱ དྷམྨཱི ཀཐཱ, སཱདྷུ མཡཾ, ཨཱཝུསོ ཨཱནནྡ, ལབྷེཡྻཱམ བྷགཝཏོ སམྨུཁཱ དྷམྨིཾ ཀཐཾ སཝནཱཡཱ’’ཏི ཡཱཙིཾསུ. ཐེརོ ཏེ བྷིཀྑཱུ ཨཱདཱཡ ཏཏྠ གནྟྭཱ ‘‘ཏེམཱསཾ ཨེཀཝིཧཱརིནོ ཏཐཱགཏསྶ སནྟིཀཾ ཨེཏྟཀེཧི བྷིཀྑཱུཧི སདྡྷིཾ ཨུཔསངྐམནཾ ཨཡུཏྟ’’ནྟི ཙིནྟེཏྭཱ ཏེ བྷིཀྑཱུ བཧི ཋཔེཏྭཱ ཨེཀཀོཝ སཏྠཱརཾ ཨུཔསངྐམི. པཱལིལེཡྻཀོ ཏཾ དིསྭཱ དཎྜམཱདཱཡ པཀྑནྡི. ཏཾ སཏྠཱ ཨོལོཀེཏྭཱ ‘‘ཨཔེཧི, ཨཔེཧི, པཱལིལེཡྻཀ, མཱ ཝཱརཡི, བུདྡྷུཔཊྛཱཀོ ཨེསོ’’ཏི ཨཱཧ. སོ ཏཏྠེཝ དཎྜཾ ཚཌྜེཏྭཱ པཏྟཙཱིཝརཔཊིགྒཧཎཾ ཨཱཔུཙྪི. ཐེརོ ནཱདཱསི. ནཱགོ ‘‘སཙེ ཨུགྒཧིཏཝཏྟོ བྷཝིསྶཏི, སཏྠུ ནིསཱིདནཔཱསཱཎཕལཀེ ཨཏྟནོ པརིཀྑཱརཾ ན ཋཔེསྶཏཱི’’ཏི ཙིནྟེསི. ཐེརོ པཏྟཙཱིཝརཾ བྷཱུམིཡཾ ཋཔེསི. ཝཏྟསམྤནྣཱ ཧི གརཱུནཾ ཨཱསནེ ཝཱ སཡནེ ཝཱ ཨཏྟནོ པརིཀྑཱརཾ ན ཋཔེནྟི.

ཐེརོ སཏྠཱརཾ ཝནྡིཏྭཱ ཨེཀམནྟཾ ནིསཱིདི. སཏྠཱ ‘‘ཨེཀཀོཝ ཨཱགཏོསཱི’’ཏི པུཙྪིཏྭཱ པཉྩཧི བྷིཀྑུསཏེཧི ཨཱགཏབྷཱཝཾ སུཏྭཱ ‘‘ཀཧཾ པན ཏེ’’ཏི པུཙྪིཏྭཱ ‘‘ཏུམྷཱཀཾ ཙིཏྟཾ ཨཛཱནནྟོ བཧི ཋཔེཏྭཱ ཨཱགཏོམྷཱི’’ཏི ཝུཏྟེ ‘‘པཀྐོསཱཧི ནེ’’ཏི ཨཱཧ. ཐེརོ ཏཐཱ ཨཀཱསི. སཏྠཱ ཏེཧི བྷིཀྑཱུཧི སདྡྷིཾ པཊིསནྠཱརཾ ཀཏྭཱ ཏེཧི བྷིཀྑཱུཧི, ‘‘བྷནྟེ, བྷགཝཱ བུདྡྷསུཁུམཱལོ ཙེཝ ཁཏྟིཡསུཁུམཱལོ ཙ, ཏུམྷེཧི ཏེམཱསཾ ཨེཀཀེཧི ཏིཊྛནྟེཧི ནིསཱིདནྟེཧི ཙ དུཀྐརཾ ཀཏཾ, ཝཏྟཔཊིཝཏྟཀཱརཀོཔི མུཁོདཀཱདིདཱཡཀོཔི ནཱཧོསི མཉྙེ’’ཏི ཝུཏྟེ, ‘‘བྷིཀྑཝེ, པཱལིལེཡྻཀཧཏྠིནཱ མམ སབྦཀིཙྩཱནི ཀཏཱནི. ཨེཝརཱུཔཉྷི སཧཱཡཾ ལབྷནྟེན ཨེཀཀོཝ ཝསིཏུཾ ཡུཏྟཾ, ཨལབྷནྟསྶ ཨེཀཙཱརིཀབྷཱཝོཝ སེཡྻོ’’ཏི ཝཏྭཱ ནཱགཝགྒེ ཨིམཱ གཱཐཱ ཨབྷཱསི –

༣༢༨.

‘‘སཙེ ལབྷེཐ ནིཔཀཾ སཧཱཡཾ,

སདྡྷིཾཙརཾ སཱདྷུཝིཧཱརི དྷཱིརཾ;

ཨབྷིབྷུཡྻ སབྦཱནི པརིསྶཡཱནི,

ཙརེཡྻ ཏེནཏྟམནོ སཏཱིམཱ.

༣༢༩.

‘‘ནོ ཙེ ལབྷེཐ ནིཔཀཾ སཧཱཡཾ,

སདྡྷིཾཙརཾ སཱདྷུཝིཧཱརི དྷཱིརཾ;

རཱཛཱཝ རཊྛཾ ཝིཛིཏཾ པཧཱཡ,

ཨེཀོ ཙརེ མཱཏངྒརཉྙེཝ ནཱགོ.

༣༣༠.

‘‘ཨེཀསྶ ཙརིཏཾ སེཡྻོ,

ནཏྠི བཱལེ སཧཱཡཏཱ;

ཨེཀོ ཙརེ ན ཙ པཱཔཱནི ཀཡིརཱ,

ཨཔྤོསྶུཀྐོ མཱཏངྒརཉྙེཝ ནཱགོ’’ཏི.

ཏཏྠ ནིཔཀནྟི ནེཔཀྐཔཉྙཱཡ སམནྣཱགཏཾ. སཱདྷུཝིཧཱརི དྷཱིརནྟི བྷདྡཀཝིཧཱརིཾ པཎྜིཏཾ. པརིསྶཡཱནཱིཏི ཏཱདིསཾ མེཏྟཱཝིཧཱརིཾ སཧཱཡཾ ལབྷནྟོ སཱིཧབྱགྒྷཱདཡོ པཱཀཊཔརིསྶཡེ ཙ རཱགབྷཡདོསབྷཡམོཧབྷཡཱདཡོ པཊིཙྪནྣཔརིསྶཡེ ཙཱཏི སབྦེཝ པརིསྶཡེ ཨབྷིབྷཝིཏྭཱ ཏེན སདྡྷིཾ ཨཏྟམནོ ཨུཔཊྛིཏསཏཱི ཧུཏྭཱ ཙརེཡྻ, ཝིཧརེཡྻཱཏི ཨཏྠོ.

རཱཛཱཝ རཊྛནྟི རཊྛཾ ཧིཏྭཱ གཏོ མཧཱཛནཀརཱཛཱ ཝིཡ. ཨིདཾ ཝུཏྟཾ ཧོཏི – ཡཐཱ ཝིཛིཏབྷཱུམིཔདེསོ རཱཛཱ ‘‘ཨིདཾ རཛྫཾ ནཱམ མཧནྟཾ པམཱདཊྛཱནཾ, ཀིཾ མེ རཛྫེན ཀཱརིཏེནཱ’’ཏི ཝིཛིཏཾ རཊྛཾ པཧཱཡ ཨེཀཀོཝ མཧཱརཉྙཾ པཝིསིཏྭཱ ཏཱཔསཔབྦཛྫཾ པབྦཛིཏྭཱ ཙཏཱུསུ ཨིརིཡཱཔཐེསུ ཨེཀཀོཝ ཙརཏི, ཨེཝཾ ཨེཀཀོཝ ཙརེཡྻཱཏི. མཱཏངྒརཉྙེཝ ནཱགོཏི ཡཐཱ ཙ ‘‘ཨཧཾ ཁོ ཨཱཀིཎྞོ ཝིཧརཱམི ཧཏྠཱིཧི ཧཏྠིནཱིཧི ཧཏྠིཀལ༹བྷེཧི ཧཏྠིཙྪཱཔེཧི, ཚིནྣགྒཱནི ཙེཝ ཏིཎཱནི ཁཱདཱམི, ཨོབྷགྒོབྷགྒཉྩ མེ སཱཁཱབྷངྒཾ ཁཱདནྟི, ཨཱཝིལཱནི ཙ པཱནཱིཡཱནི པིཝཱམི, ཨོགཱཧཱ ཙ མེ ཨུཏྟིཎྞསྶ ཧཏྠིནིཡོ ཀཱཡཾ ཨུཔནིགྷཾསནྟིཡོ གཙྪནྟི, ཡཾནཱུནཱཧཾ ཨེཀཀོཝ གཎམྷཱ ཝཱུཔཀཊྛོ ཝིཧརེཡྻ’’ནྟི (མཧཱཝ. ༤༦༧; ཨུདཱ. ༣༥) ཨེཝཾ པཊིསཉྩིཀྑིཏྭཱ གམནཏོ མཱཏངྒོཏི ལདྡྷནཱམོ ཨིམསྨིཾ ཨརཉྙེ ཨཡཾ ཧཏྠིནཱགོ ཡཱུཐཾ པཧཱཡ སབྦིརིཡཱཔཐེསུ ཨེཀཀོཝ སུཁཾ ཙརཏི, ཨེཝམྤི ཨེཀོཝ ཙརེཡྻཱཏི ཨཏྠོ.

ཨེཀསྶཱཏི པབྦཛིཏསྶ ཧི པབྦཛིཏཀཱལཏོ པཊྛཱཡ ཨེཀཱིབྷཱཝཱབྷིརཏསྶ ཨེཀཀསྶེཝ ཙརིཏཾ སེཡྻོ. ནཏྠི བཱལེ སཧཱཡཏཱཏི ཙཱུལ༹སཱིལཾ མཛ྄ཛྷིམསཱིལཾ མཧཱསཱིལཾ དས ཀཐཱཝཏྠཱུནི ཏེརས དྷུཏངྒགུཎཱནི ཝིཔསྶནཱཉཱཎཾ ཙཏྟཱརོ མགྒཱ ཙཏྟཱརི ཕལཱནི ཏིསྶོ ཝིཛྫཱ ཚ ཨབྷིཉྙཱ ཨམཏམཧཱནིབྦཱནནྟི ཨཡཉྷི སཧཱཡཏཱ ནཱམ. སཱ བཱལེ ནིསྶཱཡ ཨདྷིགནྟུཾ ན སཀྐཱཏི ནཏྠི བཱལེ སཧཱཡཏཱ. ཨེཀོཏི ཨིམིནཱ ཀཱརཎེན སབྦིརིཡཱཔཐེསུ ཨེཀཀོཝ ཙརེཡྻ, ཨཔྤམཏྟཀཱནིཔི ན ཙ པཱཔཱནི ཀཡིརཱ. ཡཐཱ སོ ཨཔྤོསྶུཀྐོ ནིརཱལཡོ ཨིམསྨིཾ ཨརཉྙེ མཱཏངྒནཱགོ ཨིཙྪིཏིཙྪིཏཊྛཱནེ སུཁཾ ཙརཏི, ཨེཝཾ ཨེཀཀོཝ ཧུཏྭཱ ཙརེཡྻ, ཨཔྤམཏྟཀཱནིཔི ན ཙ པཱཔཱནི ཀརེཡྻཱཏི ཨཏྠོ. ཏསྨཱ ཏུམྷེཧི པཏིརཱུཔཾ སཧཱཡཾ ཨལབྷནྟེཧི ཨེཀཙཱརཱིཧེཝ བྷཝིཏབྦནྟི ཨིམམཏྠཾ དསྶེནྟོ སཏྠཱ ཏེསཾ བྷིཀྑཱུནཾ ཨིམཾ དྷམྨདེསནཾ དེསེསི.

དེསནཱཝསཱནེ པཉྩསཏཱཔི ཏེ བྷིཀྑཱུ ཨརཧཏྟེ པཏིཊྛཧིཾསཱུཏི.

སམྦཧུལབྷིཀྑུཝཏྠུ སཏྟམཾ.

༨. མཱརཝཏྠུ

ཨཏྠམྷཱིཏི ཨིམཾ དྷམྨདེསནཾ སཏྠཱ ཧིམཝནྟཔདེསེ ཨརཉྙཀུཊིཀཱཡཾ ཝིཧརནྟོ མཱརཾ ཨཱརབྦྷ ཀཐེསི.

ཏསྨིཾ ཀིར ཀཱལེ རཱཛཱནོ མནུསྶེ པཱིལེ༹ཏྭཱ རཛྫཾ ཀཱརེནྟི. ཨཐ བྷགཝཱ ཨདྷམྨིཀརཱཛཱུནཾ རཛྫེ དཎྜཀརཎཔཱིལི༹ཏེ མནུསྶེ དིསྭཱ ཀཱརུཉྙེན ཨེཝཾ ཙིནྟེསི – ‘‘སཀྐཱ ནུ ཁོ རཛྫཾ ཀཱརེཏུཾ ཨཧནཾ ཨགྷཱཏཡཾ, ཨཛིནཾ ཨཛཱཔཡཾ, ཨསོཙཾ ཨསོཙཱཔཡཾ དྷམྨེནཱ’’ཏི, མཱརོ པཱཔིམཱ ཏཾ བྷགཝཏོ པརིཝིཏཀྐཾ ཉཏྭཱ ‘‘སམཎོ གོཏམོ ‘སཀྐཱ ནུ ཁོ རཛྫཾ ཀཱརེཏུ’ནྟི ཙིནྟེསི, ཨིདཱནི རཛྫཾ ཀཱརེཏུཀཱམོ བྷཝིསྶཏི, རཛྫཉྩ ནཱམེཏཾ པམཱདཊྛཱནཾ, ཏཾ ཀཱརེནྟེ སཀྐཱ ཨོཀཱསཾ ལབྷིཏུཾ, གཙྪཱམི ཨུསྶཱཧམསྶ ཛནེསྶཱམཱི’’ཏི ཙིནྟེཏྭཱ སཏྠཱརཾ ཨུཔསངྐམིཏྭཱ ཨཱཧ – ‘‘ཀཱརེཏུ, བྷནྟེ, བྷགཝཱ རཛྫཾ, ཀཱརེཏུ སུགཏོ རཛྫཾ ཨཧནཾ ཨགྷཱཏཡཾ, ཨཛིནཾ ཨཛཱཔཡཾ, ཨསོཙཾ ཨསོཙཱཔཡཾ དྷམྨེནཱ’’ཏི. ཨཐ ནཾ སཏྠཱ ‘‘ཀིཾ པན མེ ཏྭཾ, པཱཔིམ, པསྶསི, ཡཾ མཾ ཏྭཾ ཨེཝཾ ཝདེསཱི’’ཏི ཝཏྭཱ ‘‘བྷགཝཏཱ ཁོ, བྷནྟེ, ཙཏྟཱརོ ཨིདྡྷིཔཱདཱ སུབྷཱཝིཏཱ. ཨཱཀངྑམཱནོ ཧི བྷགཝཱ ཧིམཝནྟཾ པབྦཏརཱཛཾ ‘སུཝཎྞ’ནྟི ཨདྷིམུཙྩེཡྻ, ཏཉྩ སུཝཎྞམེཝ ཨསྶ, ཨཧམྤི ཁོ དྷནེན དྷནཀརཎཱིཡཾ ཀརིསྶཱམི, ཏུམྷེ དྷམྨེན རཛྫཾ ཀཱརེསྶཐཱ’’ཏི ཏེན ཝུཏྟེ –

‘‘པབྦཏསྶ སུཝཎྞསྶ, ཛཱཏརཱུཔསྶ ཀེཝལོ;

དྭིཏྟཱཝ ནཱལམེཀསྶ, ཨིཏི ཝིདྭཱ སམཉྩརེ.

‘‘ཡོ དུཀྑམདཀྑི ཡཏོནིདཱནཾ,

ཀཱམེསུ སོ ཛནྟུ ཀཐཾ ནམེཡྻ;

ཨུཔདྷིཾ ཝིདིཏྭཱ སངྒོཏི ལོཀེ,

ཏསྶེཝ ཛནྟུ ཝིནཡཱཡ སིཀྑེ’’ཏི. (སཾ. ནི. ༡.༡༥༦) –

ཨིམཱཧི གཱཐཱཧི སཾཝེཛེཏྭཱ ‘‘ཨཉྙོ ཨེཝ ཁོ, པཱཔིམ, ཏཝ ཨོཝཱདོ, ཨཉྙོ མམ, ཏཡཱ སདྡྷིཾ དྷམྨསཾསནྡནཱ ནཱམ ནཏྠི, ཨཧཉྷི ཨེཝཾ ཨོཝདཱམཱི’’ཏི ཝཏྭཱ ཨིམཱ གཱཐཱ ཨབྷཱསི –

༣༣༡.

‘‘ཨཏྠམྷི ཛཱཏམྷི སུཁཱ སཧཱཡཱ,

ཏུཊྛཱི སུཁཱ ཡཱ ཨིཏརཱིཏརེན;

པུཉྙཾ སུཁཾ ཛཱིཝིཏསངྑཡམྷི,

སབྦསྶ དུཀྑསྶ སུཁཾ པཧཱནཾ.

༣༣༢.

‘‘སུཁཱ མཏྟེཡྻཏཱ ལོཀེ,

ཨཐོ པེཏྟེཡྻཏཱ སུཁཱ;

སུཁཱ སཱམཉྙཏཱ ལོཀེ,

ཨཐོ བྲཧྨཉྙཏཱ སུཁཱ.

༣༣༣.

‘‘སུཁཾ ཡཱཝ ཛརཱསཱིལཾ, སུཁཱ སདྡྷཱ པཏིཊྛིཏཱ;

སུཁོ པཉྙཱཡ པཊིལཱབྷོ, པཱཔཱནཾ ཨཀརཎཾ སུཁ’’ནྟི.

ཏཏྠ ཨཏྠམྷཱིཏི པབྦཛིཏསྶཱཔི ཧི ཙཱིཝརཀརཎཱདིཀེ ཝཱ ཨདྷིཀརཎཝཱུཔསམཱདིཀེ ཝཱ གིཧིནོཔི ཀསིཀམྨཱདིཀེ ཝཱ བལཝཔཀྑསནྣིསྶིཏེཧི ཨབྷིབྷཝནཱདིཀེ ཝཱ ཀིཙྩེ ཨུཔྤནྣེ ཡེ ཏཾ ཀིཙྩཾ ནིཔྥཱདེཏུཾ ཝཱ ཝཱུཔསམེཏུཾ ཝཱ སཀྐོནྟི, ཨེཝརཱུཔཱ སུཁཱ སཧཱཡཱཏི ཨཏྠོ. ཏུཊྛཱི སུཁཱཏི ཡསྨཱ པན གིཧིནོཔི སཀེན ཨསནྟུཊྛཱ སནྡྷིཙྪེདཱདཱིནི ཨཱརབྷནྟི, པབྦཛིཏཱཔི ནཱནཔྤཀཱརཾ ཨནེསནཾ. ཨིཏི ཏེ སུཁཾ ན ཝིནྡནྟིཡེཝ. ཏསྨཱ ཡཱ ཨིཏརཱིཏརེན པརིཏྟེན ཝཱ ཝིཔུལེན ཝཱ ཨཏྟནོ སནྟཀེན སནྟུཊྛི, ཨཡམེཝ སུཁཱཏི ཨཏྠོ. པུཉྙནྟི མརཎཀཱལེ པན ཡཐཱཛ྄ཛྷཱསཡེན པཏྠརིཏྭཱ ཀཏཔུཉྙཀམྨམེཝ སུཁཾ. སབྦསྶཱཏི སཀལསྶཔི པན ཝཊྚདུཀྑསྶ པཧཱནསངྑཱཏཾ ཨརཧཏྟམེཝ ཨིམསྨིཾ ལོཀེ སུཁཾ ནཱམ.

མཏྟེཡྻཏཱཏི མཱཏརི སམྨཱ པཊིཔཏྟི. པེཏྟེཡྻཏཱཏི པིཏརི སམྨཱ པཊིཔཏྟི. ཨུབྷཡེནཔི མཱཏཱཔིཏཱུནཾ ཨུཔཊྛཱནམེཝ ཀཐིཏཾ. མཱཏཱཔིཏརོ ཧི པུཏྟཱནཾ ཨནུཔཊྛཧནབྷཱཝཾ ཉཏྭཱ ཨཏྟནོ སནྟཀཾ བྷཱུམིཡཾ ཝཱ ནིདཧནྟི, པརེསཾ ཝཱ ཝིསྶཛྫེནྟི, ‘‘མཱཏཱཔིཏརོ ན ཨུཔཊྛཧནྟཱི’’ཏི ནེསཾ ནིནྡཱཔི ཝཌྜྷཏི, ཀཱཡསྶ བྷེདཱ གཱུཐནིརཡེཔི ནིབྦཏྟནྟི. ཡེ པན མཱཏཱཔིཏརོ སཀྐཙྩཾ ཨུཔཊྛཧནྟི, ཏེ ཏེསཾ སནྟཀཾ དྷནམྤི པཱཔུཎནྟི, པསཾསམྤི ལབྷནྟི, ཀཱཡསྶ བྷེདཱ སགྒེ ནིབྦཏྟནྟི. ཏསྨཱ ཨུབྷཡམྤེཏཾ སུཁནྟི ཝུཏྟཾ. སཱམཉྙཏཱཏི པབྦཛིཏེསུ སམྨཱ པཊིཔཏྟི. བྲཧྨཉྙཏཱཏི བཱཧིཏཔཱཔེསུ བུདྡྷཔཙྩེཀབུདྡྷསཱཝཀེསུ སམྨཱ པཊིཔཏྟིཡེཝ. ཨུབྷཡེནཔི ཏེསཾ ཙཏཱུཧི པཙྩཡེཧི པཊིཛགྒནབྷཱཝོ ཀཐིཏོ, ཨིདམྤི ལོཀེ སུཁཾ ནཱམ ཀཐིཀཾ.

སཱིལནྟི མཎིཀུཎྜལརཏྟཝཏྠཱདཡོ ཧི ཨལངྐཱརཱ ཏསྨིཾ ཏསྨིཾ ཝཡེ ཋིཏཱནཾཡེཝ སོབྷནྟི. ན དཧརཱནཾ ཨལངྐཱརོ མཧལླཀཀཱལེ, མཧལླཀཱནཾ ཝཱ ཨལངྐཱརོ དཧརཀཱལེ སོབྷཏི, ‘‘ཨུམྨཏྟཀོ ཨེས མཉྙེ’’ཏི གརཧུཔྤཱདནེན པན དོསམེཝ ཛནེཏི. པཉྩསཱིལདསསཱིལཱདིབྷེདཾ པན སཱིལཾ དཧརསྶཱཔི མཧལླཀསྶཱཔི སབྦཝཡེསུ སོབྷཏིཡེཝ, ‘‘ཨཧོ ཝཏཱཡཾ སཱིལཝཱ’’ཏི པསཾསུཔྤཱདནེན སོམནསྶམེཝ ཨཱཝཧཏི. ཏེན ཝུཏྟཾ – སུཁཾ ཡཱཝ ཛརཱ སཱིལནྟི. སདྡྷཱ པཏིཊྛིཏཱཏི ལོཀིཡལོཀུཏྟརཏོ དུཝིདྷཱཔི སདྡྷཱ ནིཙྩལཱ ཧུཏྭཱ པཏིཊྛིཏཱ. སུཁོ པཉྙཱཡ པཊིལཱབྷོཏི ལོཀིཡལོཀུཏྟརཔཉྙཱཡ པཊིལཱབྷོ སུཁོ. པཱཔཱནཾ ཨཀརཎནྟི སེཏུགྷཱཏཝསེན པན པཱཔཱནཾ ཨཀརཎཾ ཨིམསྨིཾ ལོཀེ སུཁནྟི ཨཏྠོ.

དེསནཱཝསཱནེ བཧཱུནཾ དེཝཏཱནཾ དྷམྨཱབྷིསམཡོ ཨཧོསཱིཏི.

མཱརཝཏྠུ ཨཊྛམཾ.

ནཱགཝགྒཝཎྞནཱ ནིཊྛིཏཱ.

ཏེཝཱིསཏིམོ ཝགྒོ.

༢༤. ཏཎྷཱཝགྒོ

༡. ཀཔིལམཙྪཝཏྠུ

མནུཛསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀཔིལམཙྪཾ ཨཱརབྦྷ ཀཐེསི.

ཨཏཱིཏེ ཀིར ཀསྶཔབྷགཝཏོ པརིནིབྦུཏཀཱལེ དྭེ ཀུལབྷཱཏརོ ནིཀྑམིཏྭཱ སཱཝཀཱནཾ སནྟིཀེ པབྦཛིཾསུ. ཏེསུ ཛེཊྛོ སཱགཏོ ནཱམ ཨཧོསི, ཀནིཊྛོ ཀཔིལོ ནཱམ. མཱཏཱ པན ནེསཾ སཱདྷིནཱི ནཱམ, ཀནིཊྛབྷགིནཱི ཏཱཔནཱ ནཱམ. ཏཱཔི བྷིཀྑུནཱིསུ པབྦཛིཾསུ. ཨེཝཾ ཏེསུ པབྦཛིཏེསུ ཨུབྷོ བྷཱཏརོ ཨཱཙརིཡུཔཛ྄ཛྷཱཡཱནཾ ཝཏྟཔཊིཝཏྟཾ ཀཏྭཱ ཝིཧརནྟཱ ཨེཀདིཝསཾ, ‘‘བྷནྟེ, ཨིམསྨིཾ སཱསནེ ཀཏི དྷུརཱནཱི’’ཏི པུཙྪིཏྭཱ ‘‘གནྠདྷུརཾ ཝིཔསྶནཱདྷུརཉྩཱཏི དྭེ དྷུརཱནཱི’’ཏི སུཏྭཱ ཛེཊྛོ ‘‘ཝིཔསྶནཱདྷུརཾ པཱུརེསྶཱམཱི’’ཏི པཉྩ ཝསྶཱནི ཨཱཙརིཡུཔཛ྄ཛྷཱཡཱནཾ སནྟིཀེ ཝསིཏྭཱ ཡཱཝ ཨརཧཏྟཱ ཀམྨཊྛཱནཾ གཧེཏྭཱ ཨརཉྙཾ པཝིསིཏྭཱ ཝཱཡམནྟོ ཨརཧཏྟཾ པཱཔུཎི. ཀནིཊྛོ ‘‘ཨཧཾ ཏཱཝ ཏརུཎོ, ཝུཌྜྷཀཱལེ ཝིཔསྶནཱདྷུརཾ པཱུརེསྶཱམཱི’’ཏི གནྠདྷུརཾ པཊྛཔེཏྭཱ ཏཱིཎི པིཊཀཱནི ཨུགྒཎྷི. ཏསྶ པརིཡཏྟིཾ ནིསྶཱཡ མཧཱཔརིཝཱརོ, པརིཝཱརཾ ནིསྶཱཡ ལཱབྷོ ཨུདཔཱདི. སོ བཱཧུསཙྩམདེན མཏྟོ ལཱབྷཏཎྷཱཡ ཨབྷིབྷཱུཏོ ཨཏིཔཎྜིཏམཱནིཏཱཡ པརེཧི ཝུཏྟཾ ཀཔྤིཡམྤི ‘‘ཨཀཔྤིཡ’’ནྟི ཝདེཏི, ཨཀཔྤིཡམྤི ‘‘ཀཔྤིཡ’’ནྟི ཝདེཏི, སཱཝཛྫམྤི ‘‘ཨནཝཛྫ’’ནྟི, ཨནཝཛྫམྤི ‘‘སཱཝཛྫ’’ནྟི. སོ པེསལེཧི བྷིཀྑཱུཧི ‘‘མཱ, ཨཱཝུསོ ཀཔིལ, ཨེཝཾ ཨཝཙཱ’’ཏི ཝཏྭཱ དྷམྨཉྩ ཝིནཡཉྩ དསྶེཏྭཱ ཨོཝདིཡམཱནོཔི ‘‘ཏུམྷེ ཀིཾ ཛཱནཱཐ, རིཏྟམུཊྛིསདིསཱ’’ཏིཨཱདཱིནི ཝཏྭཱ ཁུཾསེནྟོ ཝམྦྷེནྟོ ཙརཏི. ཨཐསྶ བྷཱཏུ སཱགཏཏྠེརསྶཱཔི བྷིཀྑཱུ ཏམཏྠཾ ཨཱརོཙེསུཾ. སོཔི ནཾ ཨུཔསངྐམིཏྭཱ, ‘‘ཨཱཝུསོ ཀཔིལ, ཏུམྷཱདིསཱནཉྷི སམྨཱཔཊིཔཏྟི སཱསནསྶ ཨཱཡུ ནཱམ, ཏསྨཱ པཊིཔཏྟིཾ པཧཱཡ ཀཔྤིཡཱདཱིནི པཊིབཱཧནྟོ མཱ ཨེཝཾ ཨཝཙཱ’’ཏི ཨོཝདི. སོ ཏསྶཔི ཝཙནཾ ནཱདིཡི. ཨེཝཾ སནྟེཔི ཐེརོ དྭཏྟིཀྑཏྟུཾ ཨོཝདིཏྭཱ ཨོཝཱདཾ ཨགཎྷནྟཾ ‘‘ནཱཡཾ མམ ཝཙནཾ ཀརོཏཱི’’ཏི ཉཏྭཱ ‘‘ཏེན, ཨཱཝུསོ, པཉྙཱཡིསྶསི སཀེན ཀམྨེནཱ’’ཏི ཝཏྭཱ པཀྐཱམི. ཏཏོ པཊྛཱཡ ནཾ ཨཉྙེ པེསལཱ བྷིཀྑཱུ ཚཌྜཡིཾསུ.

སོ དུརཱཙཱརོ ཧུཏྭཱ དུརཱཙཱརཔརིཝུཏོ ཝིཧརནྟོ ཨེཀདིཝསཾ ཨུཔོསཐགྒེ ‘‘པཱཏིམོཀྑཾ ཨུདྡིསིསྶཱམཱི’’ཏི བཱིཛནིཾ ཨཱདཱཡ དྷམྨཱསནེ ནིསཱིདིཏྭཱ ‘‘ཝཏྟཏི, ཨཱཝུསོ, ཨེཏྠ སནྣིཔཏིཏཱནཾ བྷིཀྑཱུནཾ པཱཏིམོཀྑ’’ནྟི པུཙྪིཏྭཱ ‘‘ཀོ ཨཏྠོ ཨིམསྶ པཊིཝཙནེན དིནྣེནཱ’’ཏི ཏུཎྷཱིབྷཱུཏེ བྷིཀྑཱུ དིསྭཱ, ‘‘ཨཱཝུསོ, དྷམྨོ ཝཱ ཝིནཡོ ཝཱ ནཏྠི, པཱཏིམོཀྑེན སུཏེན ཝཱ ཨསུཏེན ཝཱ ཀོ ཨཏྠོ’’ཏི ཝཏྭཱ ཨཱསནཱ ཝུཊྛཧི. ཨེཝཾ སོ ཀསྶཔསྶ བྷགཝཏོ པརིཡཏྟིསཱསནཾ ཨོསཀྐཱཔེསི. སཱགཏཏྠེརོཔི ཏདཧེཝ པརིནིབྦཱཡི. ཀཔིལོ ཨཱཡུཔརིཡོསཱནེ ཨཝཱིཙིམྷི མཧཱནིརཡེ ནིབྦཏྟི. སཱཔིསྶ མཱཏཱ ཙ བྷགིནཱི ཙ ཏསྶེཝ དིཊྛཱནུགཏིཾ ཨཱཔཛྫིཏྭཱ པེསལེ བྷིཀྑཱུ ཨཀྐོསིཏྭཱ པརིབྷཱསིཏྭཱ ཏཏྠེཝ ནིབྦཏྟིཾསུ.

ཏསྨིཾ པན ཀཱལེ པཉྩསཏཱ པུརིསཱ གཱམགྷཱཏཀཱདཱིནི ཀཏྭཱ ཙོརིཀཱཡ ཛཱིཝནྟཱ ཛནཔདམནུསྶེཧི ཨནུབདྡྷཱ པལཱཡམཱནཱ ཨརཉྙཾ པཝིསིཏྭཱ ཏཏྠ ཀིཉྩི པཊིསརཎཾ ཨཔསྶནྟཱ ཨཉྙཏརཾ ཨཱརཉྙིཀཾ བྷིཀྑུཾ དིསྭཱ ཝནྡིཏྭཱ ‘‘པཊིསརཎཾ ནོ, བྷནྟེ, ཧོཐཱ’’ཏི ཝདིཾསུ. ཐེརོ ‘‘ཏུམྷཱཀཾ སཱིལསདིསཾ པཊིསརཎཾ ནཱམ ནཏྠི, སབྦེཔི པཉྩསཱིལཱནི སམཱདིཡཐཱ’’ཏི ཨཱཧ. ཏེ ‘‘སཱདྷཱུ’’ཏི སམྤཊིཙྪིཏྭཱ སཱིལཱནི སམཱདིཡིཾསུ. ཨཐ ནེ ཐེརོ ཨོཝདི – ‘‘ཨིདཱནི ཏུམྷེ སཱིལཝནྟཱ, ཛཱིཝིཏཧེཏུཔི ཝོ ནེཝ སཱིལཾ ཨཏིཀྐམིཏབྦཾ, ན མནོཔདོསོ ཀཱཏབྦོ’’ཏི. ཏེ ‘‘སཱདྷཱུ’’ཏི སམྤཊིཙྪིཾསུ. ཨཐ ནེ ཛནཔདམནུསྶཱ ཏཾ ཋཱནཾ པཏྭཱ ཨིཏོ ཙིཏོ ཙ པརིཡེསམཱནཱ ཏེ ཙོརེ དིསྭཱ སབྦེ ཏེ ཛཱིཝིཏཱ ཝོརོཔེསུཾ. ཏེ ཀཱལཾ ཀཏྭཱ དེཝལོཀེ ནིབྦཏྟིཾསུ, ཙོརཛེཊྛཀོ ཛེཊྛཀདེཝཔུཏྟོ ཨཧོསི.

ཏེ ཨནུལོམཔཊིལོམཝསེན ཨེཀཾ བུདྡྷནྟརཾ དེཝལོཀེ སཾསརིཏྭཱ ཨིམསྨིཾ བུདྡྷུཔྤཱདེ སཱཝཏྠིནགརདྭཱརེ པཉྩསཏཀུལིཀེ ཀེཝཊྚགཱམེ ནིབྦཏྟིཾསུ. ཛེཊྛཀདེཝཔུཏྟོ ཀེཝཊྚཛེཊྛཀསྶ གེཧེ པཊིསནྡྷིཾ གཎྷི, ཨིཏརེ ཨིཏརེསུ. ཨེཝཾ ཏེསཾ ཨེཀདིཝསེཡེཝ པཊིསནྡྷིགཧཎཉྩ མཱཏུཀུཙྪིཏོ ནིཀྑམནཉྩ ཨཧོསི. ཀེཝཊྚཛེཊྛཀོ ‘‘ཨཏྠི ནུ ཁོ ཨིམསྨིཾ གཱམེ ཨཉྙེཔི དཱརཀཱ ཨཛྫ ཛཱཏཱ’’ཏི པརིཡེསཱཔེཏྭཱ ཏེསཾ ཛཱཏབྷཱཝཾ ཉཏྭཱ ‘‘ཨེཏེ མམ པུཏྟསྶ སཧཱཡཀཱ བྷཝིསྶནྟཱི’’ཏི སབྦེསཾ པོསཱཝནིཀཾ དཱཔེསི. ཏེ སབྦེཔི སཧཔཾསུཀཱིལ༹ཀཱ སཧཱཡཀཱ ཧུཏྭཱ ཨནུཔུབྦེན ཝཡཔྤཏྟཱ ཨཧེསུཾ. ཏེསཾ ཀེཝཊྚཛེཊྛཀཔུཏྟོཝ ཡསཏོ ཙ ཏེཛཏོ ཙ ཨགྒཔུརིསོ ཨཧོསི.

ཀཔིལོཔི ཨེཀཾ བུདྡྷནྟརཾ ནིརཡེ པཙྩིཏྭཱ ཝིཔཱཀཱཝསེསེན ཏསྨིཾ ཀཱལེ ཨཙིརཝཏིཡཱ སུཝཎྞཝཎྞོ དུགྒནྡྷམུཁོ མཙྪོ ཧུཏྭཱ ནིབྦཏྟི. ཨཐེཀདིཝསཾ ཏེ སཧཱཡཀཱ ‘‘མཙྪེ བནྡྷིསྶཱམཱ’’ཏི ཛཱལཱདཱིནི གཧེཏྭཱ ནདིཡཱ ཁིཔིཾསུ. ཨཐ ནེསཾ ཨནྟོཛཱལཾ སོ མཙྪོ པཱཝིསི. ཏཾ དིསྭཱ སབྦེ ཀེཝཊྚགཱམཝཱསིནོ ཨུཙྩཱསདྡམཀཾསུ – ‘‘པུཏྟཱ ནོ པཋམཾ མཙྪེ བནྡྷནྟཱ སུཝཎྞམཙྪཾ བནྡྷིཾསུ, ཨིདཱནི ནོ རཱཛཱ བཧུདྷནཾ དསྶཏཱི’’ཏི. ཏེཔི ཁོ སཧཱཡཀཱ མཙྪཾ ནཱཝཱཡ པཀྑིཔིཏྭཱ ནཱཝཾ ཨུཀྑིཔིཏྭཱ རཉྙོ སནྟིཀཾ ཨགམཾསུ. རཉྙཱཔི ཏཾ དིསྭཱཝ ‘‘ཀིཾ ཨེཏ’’ནྟི ཝུཏྟེ ‘‘མཙྪོ, དེཝཱ’’ཏི ཨཱཧཾསུ. རཱཛཱ སུཝཎྞཝཎྞཾ མཙྪཾ དིསྭཱ ‘‘སཏྠཱ ཨེཏསྶ སུཝཎྞཝཎྞཀཱརཎཾ ཛཱནིསྶཏཱི’’ཏི མཙྪཾ གཱཧཱཔེཏྭཱ བྷགཝཏོ སནྟིཀཾ ཨགམཱསི. མཙྪེན མུཁེ ཝིཝཊམཏྟེཡེཝ སཀལཛེཏཝནཾ ཨཏིཝིཡ དུགྒནྡྷཾ ཨཧོསི. རཱཛཱ སཏྠཱརཾ པུཙྪི – ‘‘ཀསྨཱ, བྷནྟེ, མཙྪོ སུཝཎྞཝཎྞོ ཛཱཏོ, ཀསྨཱ ཙསྶ མུཁཏོ དུགྒནྡྷོ ཝཱཡཏཱི’’ཏི?

ཨཡཾ, མཧཱརཱཛ, ཀསྶཔབྷགཝཏོ པཱཝཙནེ ཀཔིལོ ནཱམ བྷིཀྑུ ཨཧོསི བཧུསྶུཏོ མཧཱཔརིཝཱརོ ལཱབྷཏཎྷཱཡ ཨབྷིབྷཱུཏོ ཨཏྟནོ ཝཙནཾ ཨགཎྷནྟཱནཾ ཨཀྐོསཀཔརིབྷཱསཀོ, ཏསྶ ཙ བྷགཝཏོ སཱསནཾ ཨོསཀྐཱཔེསི, སོ ཏེན ཀམྨེན ཨཝཱིཙིམྷི ནིབྦཏྟིཏྭཱ ཝིཔཱཀཱཝསེསེན ཨིདཱནི མཙྪོ ཧུཏྭཱ ཛཱཏོ. ཡཾ པན སོ དཱིགྷརཏྟཾ བུདྡྷཝཙནཾ ཝཱཙེསི, བུདྡྷསྶ ཙ གུཎཾ ཀཐེསི, ཏསྶ ནིསྶནྡེན ཨིམཾ སུཝཎྞཝཎྞཾ པཊིལབྷི. ཡཾ བྷིཀྑཱུནཾ ཨཀྐོསཀཔརིབྷཱསཀོ ཨཧོསི, ཏེནསྶ མུཁཏོ དུགྒནྡྷོ ཝཱཡཏི. ‘‘ཀཐཱཔེམི ནཾ, མཧཱརཱཛཱ’’ཏི? ‘‘ཀཐཱཔེཐ, བྷནྟེ’’ཏི. ཨཐ ནཾ སཏྠཱ པུཙྪི – ‘‘ཏྭཾསི ཀཔིལོ’’ཏི? ‘‘ཨཱམ, བྷནྟེ, ཨཧཾ ཀཔིལོ’’ཏི. ‘‘ཀུཏོ ཨཱགཏོསཱི’’ཏི? ‘‘ཨཝཱིཙིམཧཱནིརཡཏོ, བྷནྟེ’’ཏི. ‘‘ཛེཊྛབྷཱཏིཀོ ཏེ སཱགཏོ ཀུཧིཾ གཏོ’’ཏི? ‘‘པརིནིབྦུཏོ, བྷནྟེ’’ཏི. ‘‘མཱཏཱ པན ཏེ སཱདྷིནཱི ཀཧ’’ནྟི? ‘‘མཧཱནིརཡེ ནིབྦཏྟཱ, བྷནྟེ’’ཏི. ‘‘ཀནིཊྛབྷགིནཱི ཙ ཏེ ཏཱཔནཱ ཀཧ’’ནྟི? ‘‘མཧཱནིརཡེ ནིབྦཏྟཱ, བྷནྟེ’’ཏི. ‘‘ཨིདཱནི ཏྭཾ ཀཧཾ གམིསྶསཱི’’ཏི? ‘‘ཨཝཱིཙིམཧཱནིརཡམེཝ, བྷནྟེ’’ཏི ཝཏྭཱ ཝིཔྤཊིསཱརཱབྷིབྷཱུཏོ ནཱཝཾ སཱིསེན པཧརིཏྭཱ ཏཱཝདེཝ ཀཱལཾ ཀཏྭཱ ནིརཡེ ནིབྦཏྟི. མཧཱཛནོ སཾཝིགྒོ ཨཧོསི ལོམཧཊྛཛཱཏོ.

ཨཐ བྷགཝཱ ཏསྨིཾ ཁཎེ སནྣིཔཏིཏཱཡ པརིསཱཡ ཙིཏྟཱཙཱརཾ ཨོལོཀེཏྭཱ ཏངྑཎཱནུརཱུཔཾ དྷམྨཾ དེསེཏུཾ ‘‘དྷམྨཙརིཡཾ བྲཧྨཙརིཡཾ, ཨེཏདཱཧུ ཝསུཏྟམ’’ནྟི སུཏྟནིཔཱཏེ (སུ. ནི. ༢༧༦) ཀཔིལསུཏྟཾ ཀཐེཏྭཱ ཨིམཱ གཱཐཱ ཨབྷཱསི –

༣༣༤.

‘‘མནུཛསྶ པམཏྟཙཱརིནོ, ཏཎྷཱ ཝཌྜྷཏི མཱལུཝཱ ཝིཡ;

སོ པླཝཏཱི ཧུརཱ ཧུརཾ, ཕལམིཙྪཾཝ ཝནསྨི ཝཱནརོ.

༣༣༥.

‘‘ཡཾ ཨེསཱ སཧཏེ ཛམྨཱི, ཏཎྷཱ ལོཀེ ཝིསཏྟིཀཱ;

སོཀཱ ཏསྶ པཝཌྜྷནྟི, ཨབྷིཝཊྛཾཝ བཱིརཎཾ.

༣༣༦.

‘‘ཡོ ཙེཏཾ སཧཏེ ཛམྨིཾ, ཏཎྷཾ ལོཀེ དུརཙྩཡཾ;

སོཀཱ ཏམྷཱ པཔཏནྟི, ཨུདབིནྡུཝ པོཀྑརཱ.

༣༣༧.

‘‘ཏཾ ཝོ ཝདཱམི བྷདྡཾ ཝོ, ཡཱཝནྟེཏྠ སམཱགཏཱ;

ཏཎྷཱཡ མཱུལཾ ཁཎཐ, ཨུསཱིརཏྠོཝ བཱིརཎཾ;

མཱ ཝོ ནལ༹ཾཝ སོཏོཝ, མཱརོ བྷཉྫི པུནཔྤུན’’ནྟི.

ཏཏྠ པམཏྟཙཱརིནོཏི སཏིཝོསྶགྒལཀྑཎེན པམཱདེན པམཏྟཙཱརིསྶ པུགྒལསྶ ནེཝ ཛྷཱནཾ ན ཝིཔསྶནཱ ན མགྒཕལཱནི ཝཌྜྷནྟི. ཡཐཱ པན རུཀྑཾ སཾསིབྦནྟཱི པརིཡོནནྡྷནྟཱི ཏསྶ ཝིནཱསཱཡ མཱལུཝཱལཏཱ ཝཌྜྷཏི, ཨེཝམསྶ ཚ དྭཱརཱནི ནིསྶཱཡ པུནཔྤུནཾ ཨུཔྤཛྫནཏོ ཏཎྷཱ ཝཌྜྷཏཱིཏི ཨཏྠོ. སོ པླཝཏཱི ཧུརཱ ཧུརནྟི སོ ཏཎྷཱཝསིཀོ པུགྒལོ བྷཝེ བྷཝེ ཨུཔླཝཏི དྷཱཝཏི. ཡཐཱ ཀིཾ ཝིཡཱཏི? ཕལམིཙྪཾཝ ཝནསྨི ཝཱནརོ, ཡཐཱ རུཀྑཕལཾ ཨིཙྪནྟོ ཝཱནརོ ཝནསྨིཾ དྷཱཝཏི, ཏསྶ ཏསྶ རུཀྑསྶ སཱཁཾ གཎྷཱཏི, ཏཾ མུཉྩིཏྭཱ ཨཉྙཾ གཎྷཱཏི, ཏམྤི མུཉྩིཏྭཱ ཨཉྙཾ གཎྷཱཏི, ‘‘སཱཁཾ ཨལབྷིཏྭཱ སནྣིསིནྣོ’’ཏི ཝཏྟབྦཏཾ ནཱཔཛྫཏི, ཨེཝམེཝ ཏཎྷཱཝསིཀོ པུགྒལོ ཧུརཱ ཧུརཾ དྷཱཝནྟོ ‘‘ཨཱརམྨཎཾ ཨལབྷིཏྭཱ ཏཎྷཱཡ ཨཔཝཏྟཾ པཏྟོ’’ཏི ཝཏྟབྦཏཾ ནཱཔཛྫཏི.

ཡནྟི ཡཾ པུགྒལཾ ཨེསཱ ལཱམཀབྷཱཝེན ཛམྨཱི ཝིསཱཧཱརཏཱཡ ཝིསཔུཔྥཏཱཡ ཝིསཕལཏཱཡ ཝིསཔརིབྷོགཏཱཡ རཱུཔཱདཱིསུ ཝིསཏྟཏཱཡ ཨཱསཏྟཏཱཡ ཝིསཏྟིཀཱཏི སངྑྱཾ གཏཱ ཚདྭཱརིཀཏཎྷཱ ཨབྷིབྷཝཏི. ཡཐཱ ནཱམ ཝསྶཱནེ པུནཔྤུནཾ ཝསྶནྟེན དེཝེན ཨབྷིཝཊྛཾ བཱིརཎཏིཎཾ ཝཌྜྷཏི, ཨེཝཾ ཏསྶ པུགྒལསྶ ཨནྟོ ཝཊྚམཱུལཀཱ སོཀཱ ཨབྷིཝཌྜྷནྟཱིཏི ཨཏྠོ.

དུརཙྩཡནྟི ཡོ པན པུགྒལོ ཨེཝཾ ཝུཏྟཔྤཀཱརཾ ཨཏིཀྐམིཏུཾ པཛཧིཏུཾ དུཀྐརཏཱཡ དུརཙྩཡཾ ཏཎྷཾ སཧཏི ཨབྷིབྷཝཏི, ཏམྷཱ པུགྒལཱ ཝཊྚམཱུལཀཱ སོཀཱ པཔཏནྟི. ཡཐཱ ནཱམ པོཀྑརེ པདུམཔཏྟེ པཏིཏཾ ཨུདཀབིནྡུ ན པཏིཊྛཱཏི, ཨེཝཾ ན པཏིཊྛཧནྟཱིཏི ཨཏྠོ.

ཏཾ ཝོ ཝདཱམཱིཏི ཏེན ཀཱརཎེན ཨཧཾ ཏུམྷེ ཝདཱམི. བྷདྡཾ ཝོཏི བྷདྡཾ ཏུམྷཱཀཾ ཧོཏུ, མཱ ཨཧཾ ཀཔིལོ ཝིཡ ཝིནཱསཾ པཱཔུཎཐཱཏི ཨཏྠོ. མཱུལནྟི ཨིམིསྶཱ ཚདྭཱརིཀཏཎྷཱཡ ཨརཧཏྟམགྒཉཱཎེན མཱུལཾ ཁཎཐ. ཀིཾ ཝིཡཱཏི? ཨུསཱིརཏྠོཝ བཱིརཎཾ, ཡཐཱ ཨུསཱིརེན ཨཏྠིཀོ པུརིསོ མཧནྟེན ཀུདཱལེན བཱིརཎཾ ཁཎཏི, ཨེཝམསྶཱ མཱུལཾ ཁཎཐཱཏི ཨཏྠོ. མཱ ཝོ ནལ༹ཾཝ སོཏོཝ, མཱརོ བྷཉྫི པུནཔྤུནནྟི མཱ ཏུམྷེ ནདཱིསོཏེ ཛཱཏཾ ནལ༹ཾ མཧཱཝེགེན ཨཱགཏོ ནདཱིསོཏོ ཝིཡ ཀིལེསམཱརོ མརཎམཱརོ དེཝཔུཏྟམཱརོ ཙ པུནཔྤུནཾ བྷཉྫཏཱུཏི ཨཏྠོ.

དེསནཱཝསཱནེ པཉྩསཏཱཔི ཀེཝཊྚཔུཏྟཱ སཾཝེགཾ ཨཱཔཛྫིཏྭཱ དུཀྑསྶནྟཀིརིཡཾ པཏྠཡམཱནཱ སཏྠུ སནྟིཀེ པབྦཛིཏྭཱ ན ཙིརསྶེཝ དུཀྑསྶནྟཾ ཀཏྭཱ སཏྠཱརཱ སདྡྷིཾ ཨཱནེཉྫཝིཧཱརསམཱཔཏྟིདྷམྨཔརིབྷོགེན ཨེཀཔརིབྷོགཱ ཨཧེསུནྟི.

ཀཔིལམཙྪཝཏྠུ པཋམཾ.

༢. སཱུཀརཔོཏིཀཱཝཏྠུ

ཡཐཱཔི མཱུལེཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ གཱུཐསཱུཀརཔོཏིཀཾ ཨཱརབྦྷ ཀཐེསི.

ཨེཀསྨིཾ ཀིར སམཡེ སཏྠཱ རཱཛགཧཾ པིཎྜཱཡ པཝིསནྟོ ཨེཀཾ སཱུཀརཔོཏིཀཾ དིསྭཱ སིཏཾ པཱཏྭཱཀཱསི. ཏསྶ སིཏཾ ཀརོནྟསྶ མུཁཝིཝརནིགྒཏཾ དནྟོབྷཱསམཎྜལཾ དིསྭཱ ཨཱནནྡཏྠེརོ ‘‘ཀོ ནུ ཁོ, བྷནྟེ, ཧེཏུ སིཏསྶ པཱཏུཀམྨཱཡཱ’’ཏི སིཏཀཱརཎཾ པུཙྪི. ཨཐ ནཾ སཏྠཱ ཨཱཧ – ‘‘པསྶསེཏཾ, ཨཱནནྡ, སཱུཀརཔོཏིཀ’’ནྟི? ‘‘ཨཱམ, བྷནྟེ’’ཏི. ཨེསཱ ཀཀུསནྡྷསྶ བྷགཝཏོ སཱསནེ ཨེཀཱཡ ཨཱསནསཱལཱཡ སཱམནྟཱ ཀུཀྐུཊཱི ཨཧོསི. སཱ ཨེཀསྶ ཡོགཱཝཙརསྶ ཝིཔསྶནཱཀམྨཊྛཱནཾ སཛ྄ཛྷཱཡནྟསྶ དྷམྨགྷོསཾ སུཏྭཱ ཏཏོ ཙུཏཱ རཱཛཀུལེ ནིབྦཏྟིཏྭཱ ཨུབྦརཱི ནཱམ རཱཛདྷཱིཏཱ ཨཧོསི. སཱ ཨཔརབྷཱགེ སརཱིརཝལཉྫཊྛཱནཾ པཝིཊྛཱ པུལ༹ཝཀརཱསིཾ དིསྭཱ ཏཏྠ པུལ༹ཝཀསཉྙཾ ཨུཔྤཱདེཏྭཱ པཋམཾ ཛྷཱནཾ པཊིལབྷི. སཱ ཏཏྠ ཡཱཝཏཱཡུཀཾ ཋཏྭཱ ཏཏོ ཙུཏཱ བྲཧྨལོཀེ ནིབྦཏྟི. ཏཏོ ཙཝིཏྭཱ པུན གཏིཝསེན ཨཱལུལམཱནཱ ཨིདཱནི སཱུཀརཡོནིཡཾ ནིབྦཏྟི, ཨིདཾ ཀཱརཎཾ དིསྭཱ མཡཱ སིཏཾ པཱཏུཀཏནྟི. ཏཾ སུཏྭཱ ཨཱནནྡཏྠེརཔྤམུཁཱ བྷིཀྑཱུ མཧནྟཾ སཾཝེགཾ པཊིལབྷིཾསུ. སཏྠཱ ཏེསཾ སཾཝེགཾ ཨུཔྤཱདེཏྭཱ བྷཝཏཎྷཱཡ ཨཱདཱིནཝཾ པཀཱསེནྟོ ཨནྟརཝཱིཐིཡཾ ཋིཏཀོཝ ཨིམཱ གཱཐཱ ཨབྷཱསི –

༣༣༨.

‘‘ཡཐཱཔི མཱུལེ ཨནུཔདྡཝེ དལ༹ྷེ,

ཚིནྣོཔི རུཀྑོ པུནརེཝ རཱུཧཏི;

ཨེཝམྤི ཏཎྷཱནུསཡེ ཨནཱུཧཏེ,

ནིབྦཏྟཏཱི དུཀྑམིདཾ པུནཔྤུནཾ.

༣༣༩.

‘‘ཡསྶ ཚཏྟིཾསཏི སོཏཱ, མནཱཔསཝནཱ བྷུསཱ;

མཧཱཝཧནྟི དུདྡིཊྛིཾ, སངྐཔྤཱ རཱགནིསྶིཏཱ.

༣༤༠.

‘‘སཝནྟི སབྦདྷི སོཏཱ, ལཏཱ ཨུཔྤཛྫ ཏིཊྛཏི;

ཏཉྩ དིསྭཱ ལཏཾ ཛཱཏཾ, མཱུལཾ པཉྙཱཡ ཚིནྡཐ.

༣༤༡.

‘‘སརིཏཱནི སིནེཧིཏཱནི ཙ,

སོམནསྶཱནི ཧོནྟི ཛནྟུནོ;

ཏེ སཱཏསིཏཱ སུཁེསིནོ,

ཏེ ཝེ ཛཱཏིཛརཱུཔགཱ ནརཱ.

༣༤༢.

‘‘ཏསིཎཱཡ པུརཀྑཏཱ པཛཱ,

པརིསཔྤནྟི སསོཝ བནྡྷིཏོ;

སཾཡོཛནསངྒསཏྟཀཱ,

དུཀྑམུཔེནྟི པུནཔྤུནཾ ཙིརཱཡ.

༣༤༣.

‘‘ཏསིཎཱཡ པུརཀྑཏཱ པཛཱ,

པརིསཔྤནྟི སསོཝ བནྡྷིཏོ;

ཏསྨཱ ཏསིཎཾ ཝིནོདཡེ,

ཨཱཀངྑནྟ ཝིརཱགམཏྟནོ’’ཏི.

ཏཏྠ མཱུལེཏི ཡསྶ རུཀྑསྶ ཙཏཱུསུ དིསཱསུ ཙཏུདྷཱ ཧེཊྛཱ ཙ ཨུཛུཀམེཝ གཏེ པཉྩཝིདྷམཱུལེ ཚེདནཕཱལནཔཱཙནཝིཛ྄ཛྷནཱདཱིནཾ ཀེནཙི ཨུཔདྡཝེན ཨནུཔདྡཝེ ཐིརཔཏྟཏཱཡ དལ༹ྷེ སོ རུཀྑོ ཨུཔརིཙྪིནྣོཔི སཱཁཱནཾ ཝསེན པུནདེཝ རཱུཧཏི, ཨེཝམེཝ ཚདྭཱརིཀཱཡ ཏཎྷཱཡ ཨནུསཡེ ཨརཧཏྟམགྒཉཱཎེན ཨནུཧཏེ ཨསམུཙྪིནྣེ ཏསྨིཾ ཏསྨིཾ བྷཝེ ཛཱཏིཨཱདིབྷེདཾ ཨིདཾ དུཀྑཾ པུནཔྤུནཾ ནིབྦཏྟཏིཡེཝཱཏི ཨཏྠོ.

ཡསྶཱཏི ཡསྶ པུགྒལསྶ ‘‘ཨིཏི ཨཛ྄ཛྷཏྟིཀསྶཱུཔཱདཱཡ ཨཊྛཱརས ཏཎྷཱཝིཙརིཏཱནི བཱཧིརསྶཱུཔཱདཱཡ ཨཊྛཱརས ཏཎྷཱཝིཙརིཏཱནཱི’’ཏི ཨིམེསཾ ཏཎྷཱཝིཙརིཏཱནཾ ཝསེན ཚཏྟིཾསཏིཡཱ སོཏེཧི སམནྣཱགཏཱ མནཱཔེསུ རཱུཔཱདཱིསུ ཨཱསཝཏི པཝཏྟཏཱིཏི མནཱཔསཝནཱ ཏཎྷཱ བྷུསཱ བལཝཏཱི ཧོཏི, ཏཾ པུགྒལཾ ཝིཔནྣཉཱཎཏཱཡ དུདྡིཊྛིཾ པུནཔྤུནཾ ཨུཔྤཛྫནཏོ མཧནྟབྷཱཝེན མཧཱ ཧུཏྭཱ ཛྷཱནཾ ཝཱ ཝིཔསྶནཾ ཝཱ ཨནིསྶཱཡ རཱགནིསྶིཏཱ སངྐཔྤཱ ཝཧནྟཱིཏི ཨཏྠོ.

སཝནྟི སབྦདྷི སོཏཱཏི ཨིམེ ཏཎྷཱསོཏཱ ཙཀྑུདྭཱརཱདཱིནཾ ཝསེན སབྦེསུ རཱུཔཱདཱིསུ ཨཱརམྨཎེསུ སཝནཏོ, སབྦཱཔི རཱུཔཏཎྷཱ…པེ… དྷམྨཏཎྷཱཏི སབྦབྷཝེསུ ཝཱ སཝནཏོ སབྦདྷི སཝནྟི ནཱམ. ལཏཱཏི པལིཝེཋནཊྛེན སཾསིབྦནཊྛེན ཙ ལཏཱ ཝིཡཱཏི ལཏཱ. ཨུཔྤཛྫ ཏིཊྛཏཱིཏི ཚཧི དྭཱརེཧི ཨུཔྤཛྫིཏྭཱ རཱུཔཱདཱིསུ ཨཱརམྨཎེསུ ཏིཊྛཏི. ཏཉྩ དིསྭཱཏི ཏཾ པན ཏཎྷཱལཏཾ ‘‘ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏཱི’’ཏི ཛཱཏཊྛཱནཝསེན དིསྭཱ. པཉྙཱཡཱཏི སཏྠེན ཝནེ ཛཱཏཾ ལཏཾ ཝིཡ མགྒཔཉྙཱཡ མཱུལེ ཚིནྡཐཱཏི ཨཏྠོ.

སརིཏཱནཱིཏི ཨནུསཊཱནི པཡཱཏཱནི. སིནེཧིཏཱནཱིཏི ཙཱིཝརཱདཱིསུ པཝཏྟསིནེཧཝསེན སིནེཧིཏཱནི ཙ, ཏཎྷཱསིནེཧམཀྑིཏཱནཱིཏི ཨཏྠོ. སོམནསྶཱནཱིཏི ཏཎྷཱཝསིཀསྶ ཛནྟུནོ ཨེཝརཱུཔཱནི སོམནསྶཱནི བྷཝནྟི. ཏེ སཱཏསིཏཱཏི ཏེ ཏཎྷཱཝསིཀཱ པུགྒལཱ སཱཏནིསྶིཏཱ སུཁནིསྶིཏཱ ཙ ཧུཏྭཱ སུཁེསིནོ སུཁཔརིཡེསིནོ བྷཝནྟི. ཏེ ཝེཏི ཡེ ཨེཝརཱུཔཱ ནརཱ, ཏེ ཛཱཏིཛརཱབྱཱདྷིམརཎཱནི ཨུཔགཙྪནྟིཡེཝཱཏི ཛཱཏིཛརཱུཔགཱ ནཱམ ཧོནྟི. པཛཱཏི ཨིམེ སཏྟཱ ཏཱསཀརཎེན ཏསིཎཱཏི སངྑྱཾ གཏཱཡ ཏཎྷཱཡ པུརཀྑཏཱ པརིཝཱརིཏཱ ཧུཏྭཱ.

བནྡྷིཏོཏི ལུདྡེན ཨརཉྙེ བདྡྷོ སསོ ཝིཡ པརིསཔྤནྟི བྷཱཡནྟི. སཾཡོཛནསངྒསཏྟཀཱཏི དསཝིདྷེན སཾཡོཛནསངྒེན ཙེཝ སཏྟཝིདྷེན རཱགསངྒཱདིནཱ ཙ སཏྟཱ བདྡྷཱ ཏསྨིཾ ཝཱ ལགྒཱ ཧུཏྭཱ. ཙིརཱཡཱཏི ཙིརཾ དཱིགྷམདྡྷཱནཾ པུནཔྤུནཾ ཛཱཏིཨཱདིཀཾ དུཀྑཾ ཨུཔགཙྪནྟཱིཏི ཨཏྠོ. ཏསྨཱཏི ཡསྨཱ ཏསིཎཱཡ པུརཀྑཏཱ པལིཝེཋིཏཱ སཏྟཱ, ཏསྨཱ ཨཏྟནོ ཝིརཱགཾ རཱགཱདིཝིགམཾ ནིབྦཱནཾ པཏྠེནྟོ ཨཱཀངྐམཱནོ བྷིཀྑུ ཨརཧཏྟམགྒེནེཏཾ ཏསིཎཾ ཝིནོདཡེ པནུདིཏྭཱ ནཱིཧརིཏྭཱ ཚཌྜེཡྻཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ.

སཱཔི ཁོ སཱུཀརཔོཏིཀཱ ཏཏོ ཙཝིཏྭཱ སུཝཎྞབྷཱུམིཡཾ རཱཛཀུལེ ནིབྦཏྟི, ཏཏོ ཙུཏཱ བཱརཱཎསིཡཾ, ཏཏོ ཙུཏཱ སུཔྤཱརཀཔཊྚནེ ཨསྶཝཱཎིཛགེཧེ ནིབྦཏྟི, ཏཏོ ཙུཏཱ ཀཱཝཱིརཔཊྚནེ ནཱཝིཀསྶ གེཧེ ནིབྦཏྟི, ཏཏོ ཙུཏཱ ཨནུརཱདྷཔུརེ ཨིསྶརཀུལགེཧེ ནིབྦཏྟི, ཏཏོ ཙུཏཱ ཏསྶེཝ དཀྑིཎདིསཱཡ བྷོཀྐནྟགཱམེ སུམནསྶ ནཱམ ཀུཊུམྦིཀསྶ དྷཱིཏཱ ནཱམེན སུམནཱ ཨེཝ ཧུཏྭཱ ནིབྦཏྟི. ཨཐསྶཱ པིཏཱ ཏསྨིཾ གཱམེ ཚཌྜིཏེ དཱིགྷཝཱཔིརཊྛཾ གནྟྭཱ མཧཱམུནིགཱམེ ནཱམ ཝསི. ཏཏྠ ནཾ དུཊྛགཱམཎིརཉྙོ ཨམཙྩོ ལཀུཎྜཀཨཏིམྦརོ ནཱམ ཀེནཙིདེཝ ཀརཎཱིཡེན གཏོ དིསྭཱ མཧནྟཾ མངྒལཾ ཀཏྭཱ ཨཱདཱཡ མཧཱཔུཎྞགཱམཾ གཏོ. ཨཐ ནཾ ཀོཊིཔབྦཏམཧཱཝིཧཱརཝཱསཱི མཧཱཨནུརུདྡྷཏྠེརོ ནཱམ ཏཏྠ པིཎྜཱཡ ཙརིཏྭཱ ཏསྶཱ གེཧདྭཱརེ ཋིཏོ དིསྭཱ བྷིཀྑཱུཧི སདྡྷིཾ ཀཐེསི, ‘‘ཨཱཝུསོ, སཱུཀརཔོཏིཀཱ ནཱམ ལཀུཎྜཀཨཏིམྦརམཧཱམཏྟསྶ བྷརིཡབྷཱཝཾ པཏྟཱ, ཨཧོ ཨཙྪརིཡ’’ནྟི. སཱ ཏཾ ཀཐཾ སུཏྭཱ ཨཏཱིཏབྷཝེ ཨུགྒྷཱཊེཏྭཱ ཛཱཏིསྶརཉཱཎཾ པཊིལབྷི. ཏངྑཎཉྙེཝ ཨུཔྤནྣསཾཝེགཱ སཱམིཀཾ ཡཱཙིཏྭཱ མཧནྟེན ཨིསྶརིཡེན པཉྩབལཀཏྠེརཱིནཾ སནྟིཀེ པབྦཛིཏྭཱ ཏིསྶམཧཱཝིཧཱརེ མཧཱསཏིཔཊྛཱནསུཏྟཀཐཾ སུཏྭཱ སོཏཱཔཏྟིཕལེ པཏིཊྛཧི. པཙྪཱ དམིལ༹མདྡནེ ཀཏེ ཉཱཏཱིནཾ ཝསནཊྛཱནཾ བྷོཀྐནྟགཱམམེཝ གནྟྭཱ ཏཏྠ ཝསནྟཱི ཀལླམཧཱཝིཧཱརེ ཨཱསཱིཝིསོཔམསུཏྟནྟཾ སུཏྭཱ ཨརཧཏྟཾ པཱཔུཎི.

སཱ པརིནིབྦཱནདིཝསེ བྷིཀྑུབྷིཀྑུནཱིཧི པུཙྪིཏཱ བྷིཀྑུནིསངྒྷསྶ སབྦཾ ཨིམཾ པཝཏྟིཾ ནིརནྟརཾ ཀཐེཏྭཱ སནྣིཔཏིཏསྶ བྷིཀྑུསངྒྷསྶ མཛ྄ཛྷེ མཎྜལཱརཱམཝཱསིནཱ དྷམྨཔདབྷཱཎཀམཧཱཏིསྶཏྠེརེན སདྡྷིཾ སཾསནྡིཏྭཱ ‘‘ཨཧཾ པུབྦེ མནུསྶཡོནིཡཾ ནིབྦཏྟིཏྭཱ ཏཏོ ཙུཏཱ ཀུཀྐུཊཱི ཧུཏྭཱ ཏཏྠ སེནསྶ སནྟིཀཱ སཱིསཙྪེདཾ པཏྭཱ རཱཛགཧེ ནིབྦཏྟཱ, པརིབྦཱཛིཀཱསུ པབྦཛིཏྭཱ པཋམཛ྄ཛྷཱནབྷཱུམིཡཾ ནིབྦཏྟིཏྭཱ ཏཏོ ཙུཏཱ སེཊྛིཀུལེ ནིབྦཏྟཱ ནཙིརསྶེཝ ཙཝིཏྭཱ སཱུཀརཡོནིཾ གནྟྭཱ ཏཏོ ཙུཏཱ སུཝཎྞབྷཱུམིཾ, ཏཏོ ཙུཏཱ བཱརཱཎསིཾ, ཏཏོ ཙུཏཱ སུཔྤཱརཀཔཊྚནཾ, ཏཏོ ཙུཏཱ ཀཱཝཱིརཔཊྚནཾ, ཏཏོ ཙུཏཱ ཨནུརཱདྷཔུརཾ, ཏཏོ ཙུཏཱ བྷོཀྐནྟགཱམ’’ནྟི ཨེཝཾ སམཝིསམེ ཏེརས ཨཏྟབྷཱཝེ པཏྭཱ ‘‘ཨིདཱནི ཨུཀྐཎྛིཏྭཱ པབྦཛིཏྭཱ ཨརཧཏྟཾ པཏྟཱ, སབྦེཔི ཨཔྤམཱདེན སམྤཱདེཐཱ’’ཏི ཝཏྭཱ ཙཏསྶོ པརིསཱ སཾཝེཛེཏྭཱ པརིནིབྦཱཡཱིཏི.

སཱུཀརཔོཏིཀཱཝཏྠུ དུཏིཡཾ.

༣. ཝིབྦྷནྟབྷིཀྑུཝཏྠུ

ཡོ ནིབྦནཐོཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨེཀཾ ཝིབྦྷནྟཀཾ བྷིཀྑུཾ ཨཱརབྦྷ ཀཐེསི.

ཨེཀོ ཀིར མཧཱཀསྶཔཏྠེརསྶ སདྡྷིཝིཧཱརིཀོ ཧུཏྭཱ ཙཏྟཱརི ཛྷཱནཱནི ཨུཔྤཱདེཏྭཱཔི ཨཏྟནོ མཱཏུལསྶ སུཝཎྞཀཱརསྶ གེཧེ ཝིསབྷཱགཱརམྨཎཾ དིསྭཱ ཏཏྠ པཊིབདྡྷཙིཏྟོ ཝིབྦྷམི. ཨཐ ནཾ མནུསྶཱ ཨལསབྷཱཝེན ཀམྨཾ ཀཱཏུཾ ཨནིཙྪནྟཾ གེཧཱ ནཱིཧརིཾསུ. སོ པཱཔམིཏྟསཾསགྒེན ཙོརཀམྨེན ཛཱིཝིཀཾ ཀཔྤེནྟོ ཝིཙརི. ཨཐ ནཾ ཨེཀདིཝསཾ གཧེཏྭཱ པཙྪཱབཱཧཾ གཱལ༹ྷབནྡྷནཾ བནྡྷིཏྭཱ ཙཏུཀྐེ ཙཏུཀྐེ ཀསཱཧི ཏཱལེ༹ནྟཱ ཨཱགྷཱཏནཾ ནཡིཾསུ. ཐེརོ པིཎྜཱཡ ཙརིཏུཾ པཝིསནྟོ ཏཾ དཀྑིཎེན དྭཱརེན ནཱིཧརིཡམཱནཾ དིསྭཱ བནྡྷནཾ སིཐིལཾ ཀཱརེཏྭཱ ‘‘པུབྦེ ཏཡཱ པརིཙིཏཀམྨཊྛཱནཾ པུན ཨཱཝཛྫེཧཱི’’ཏི ཨཱཧ. སོ ཏེན ཨོཝཱདེན སཏུཔྤཱདཾ ལབྷིཏྭཱ པུན ཙཏུཏྠཛ྄ཛྷཱནཾ ནིབྦཏྟེསི. ཨཐ ནཾ ‘‘ཨཱགྷཱཏནཾ ནེཏྭཱ གྷཱཏེསྶཱམཱ’’ཏི སཱུལེ ཨུཏྟཱསེསུཾ. སོ ན བྷཱཡཏི ན སནྟསཏི. ཨཐསྶ ཏསྨིཾ ཏསྨིཾ དིསཱབྷཱགེ ཋིཏཱ མནུསྶཱ ཨསིསཏྟིཏོམརཱདཱིནི ཨཱཝུདྷཱནི ཨུཀྑིཔིཏྭཱཔི ཏཾ ཨསནྟསནྟམེཝ དིསྭཱ ‘‘པསྶཐ, བྷོ, ཨིམཾ པུརིསཾ, ཨནེཀསཏཱནཉྷི ཨཱཝུདྷཧཏྠཱནཾ པུརིསཱནཾ མཛ྄ཛྷེ ནེཝ ཚམྦྷཏི ན ཝེདྷཏི, ཨཧོ ཨཙྪརིཡ’’ནྟི ཨཙྪརིཡབྦྷུཏཛཱཏཱ མཧཱནཱདཾ ནདིཏྭཱ རཉྙོ ཏཾ པཝཏྟིཾ ཨཱརོཙེསུཾ. རཱཛཱ ཏཾ ཀཱརཎཾ སུཏྭཱ ‘‘ཝིསྶཛྫེཐ ན’’ནྟི ཨཱཧ. སཏྠུ སནྟིཀམྤི གནྟྭཱ ཏམཏྠཾ ཨཱརོཙཡིཾསུ. སཏྠཱ ཨོབྷཱསཾ ཕརིཏྭཱ ཏསྶ དྷམྨཾ དེསེནྟོ ཨིམཾ གཱཐམཱཧ –

༣༤༤.

‘‘ཡོ ནིབྦནཐོ ཝནཱདྷིམུཏྟོ,

ཝནམུཏྟོ ཝནམེཝ དྷཱཝཏི;

ཏཾ པུགྒལམེཐ པསྶཐ,

མུཏྟོ བནྡྷནམེཝ དྷཱཝཏཱི’’ཏི.

ཏསྶཏྠོ – ཡོ པུགྒལོ གིཧིབྷཱཝེ ཨཱལཡསངྑཱཏཾ ཝནཐཾ ཚཌྜེཏྭཱ པབྦཛིཏཏཱཡ ནིབྦནཐོ དིབྦཝིཧཱརསངྑཱཏེ ཏཔོཝནེ ཨདྷིམུཏྟོ གྷརཱཝཱསབནྡྷནསངྑཱཏཱ ཏཎྷཱཝནཱ མུཏྟོ ཧུཏྭཱ པུན གྷརཱཝཱསབནྡྷནསངྑཱཏཾ ཏཎྷཱཝནམེཝ དྷཱཝཏི, ཨེཐ ཏཾ པུགྒལཾ པསྶཐ, ཨེསོ གྷརཱཝཱསབནྡྷནཏོ མུཏྟོ གྷརཱཝཱསབནྡྷནམེཝ དྷཱཝཏཱིཏི.

ཨིམཾ པན དེསནཾ སུཏྭཱ སོ རཱཛཔུརིསཱནཾ ཨནྟརེ སཱུལགྒེ ནིསིནྣོཝ ཨུདཡབྦཡཾ པཊྛཔེཏྭཱ ཏིལཀྑཎཾ ཨཱརོཔེཏྭཱ སངྑཱརེ སམྨསནྟོ སོཏཱཔཏྟིཕལཾ པཏྭཱ སམཱཔཏྟིསུཁཾ ཨནུབྷཝནྟོ ཝེཧཱསཾ ཨུཔྤཏིཏྭཱ ཨཱཀཱསེནེཝ སཏྠུ སནྟིཀཾ གནྟྭཱ སཏྠཱརཾ ཝནྡིཏྭཱ སརཱཛིཀཱཡ པརིསཱཡ མཛ྄ཛྷེཡེཝ ཨརཧཏྟཾ པཱཔུཎཱིཏི.

ཝིབྦྷནྟབྷིཀྑུཝཏྠུ ཏཏིཡཾ.

༤. བནྡྷནཱགཱརཝཏྠུ

ན ཏཾ དལ༹ྷནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ བནྡྷནཱགཱརཾ ཨཱརབྦྷ ཀཐེསི.

ཨེཀསྨིཾ ཀིར ཀཱལེ བཧཱུ སནྡྷིཙྪེདཀཔནྠགྷཱཏཀམནུསྶགྷཱཏཀེ ཙོརེ ཨཱནེཏྭཱ ཀོསལརཉྙོ དསྶཡིཾསུ. ཏེ རཱཛཱ ཨནྡུབནྡྷནརཛྫུབནྡྷནསངྑལིཀབནྡྷནེཧི བནྡྷཱཔེསི. ཏིཾསམཏྟཱཔི ཁོ ཛཱནཔདཱ བྷིཀྑཱུ སཏྠཱརཾ དཊྛུཀཱམཱ ཨཱགནྟྭཱ དིསྭཱ ཝནྡིཏྭཱ པུནདིཝསེ སཱཝཏྠིཾ པིཎྜཱཡ ཙརནྟཱ བནྡྷནཱགཱརཾ གནྟྭཱ ཏེ ཙོརེ དིསྭཱ པིཎྜཔཱཏཔཊིཀྐནྟཱ སཱཡནྷསམཡེ ཏཐཱགཏཾ ཨུཔསངྐམིཏྭཱ, ‘‘བྷནྟེ, ཨཛྫ ཨམྷེཧི པིཎྜཱཡ ཙརནྟེཧི བནྡྷནཱགཱརེ བཧཱུ ཙོརཱ ཨནྡུབནྡྷནཱདཱིཧི བདྡྷཱ མཧཱདུཀྑཾ ཨནུབྷཝནྟཱ དིཊྛཱ, ཏེ ཏཱནི བནྡྷནཱནི ཚིནྡིཏྭཱ པལཱཡིཏུཾ ན སཀྐོནྟི, ཨཏྠི ནུ ཁོ, བྷནྟེ, ཏེཧི བནྡྷནེཧི ཐིརཏརཾ ཨཉྙཾ བནྡྷནཾ ནཱམཱ’’ཏི པུཙྪིཾསུ. སཏྠཱ, ‘‘བྷིཀྑཝེ, ཀིཾ བནྡྷནཱནི ནཱམེཏཱནི, ཡཾ པནེཏཾ དྷནདྷཉྙཔུཏྟདཱརཱདཱིསུ ཏཎྷཱསངྑཱཏཾ ཀིལེསབནྡྷནཾ, ཨེཏཾ ཨེཏེཧི སཏགུཎེན སཧསྶགུཎེན སཏསཧསྶགུཎེན ཐིརཏརཾ, ཨེཝཾ མཧནྟམྤི པནེཏཾ དུཙྪིནྡནིཡཾ བནྡྷནཾ པོརཱཎཀཔཎྜིཏཱ ཚིནྡིཏྭཱ ཧིམཝནྟཾ པཝིསིཏྭཱ པབྦཛིཾསཱུ’’ཏི ཝཏྭཱ ཨཏཱིཏཾ ཨཱཧརི –

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨེཀསྨིཾ དུགྒཏགཧཔཏིཀུལེ ནིབྦཏྟི. ཏསྶ ཝཡཔྤཏྟསྶ པིཏཱ ཀཱལམཀཱསི. སོ བྷཏིཾ ཀཏྭཱ མཱཏརཾ པོསེསི. ཨཐསྶ མཱཏཱ ཨནིཙྪམཱནསྶེཝ ཨེཀཾ ཀུལདྷཱིཏརཾ གེཧེ ཀཏྭཱ ཨཔརབྷཱགེ ཀཱལམཀཱསི. བྷརིཡཱཡཔིསྶ ཀུཙྪིཡཾ གབྦྷོ པཏིཊྛཧི. སོ གབྦྷསྶ པཏིཊྛིཏབྷཱཝཾ ཨཛཱནནྟོཝ, ‘‘བྷདྡེ, ཏྭཾ བྷཏིཾ ཀཏྭཱ ཛཱིཝ, ཨཧཾ པབྦཛིསྶཱམཱི’’ཏི ཨཱཧ. ‘‘སཱམི, ནནུ གབྦྷོ མེ པཏིཊྛིཏོ, མཡི ཝིཛཱཏཱཡ དཱརཀཾ དིསྭཱ པབྦཛིསྶསཱི’’ཏི ཨཱཧ. སོ ‘‘སཱདྷཱུ’’ཏི སམྤཊིཙྪིཏྭཱ ཏསྶཱ ཝིཛཱཏཀཱལེ, ‘‘བྷདྡེ, ཏྭཾ སོཏྠིནཱ ཝིཛཱཏཱ, ཨིདཱནི ཨཧཾ པབྦཛིསྶཱམཱི’’ཏི ཨཱཔུཙྪི. ཨཐ ནཾ སཱ ‘‘པུཏྟསྶ ཏཱཝ ཐནཔཱནཏོ ཨཔགམནཀཱལཾ ཨཱགམེཧཱི’’ཏི ཝཏྭཱ པུན གབྦྷཾ གཎྷི. སོ ཙིནྟེསི – ‘‘ཨིམཾ སམྤཊིཙྪཱཔེཏྭཱ གནྟུཾ ན སཀྐཱ, ཨིམིསྶཱ ཨནཱཙིཀྑིཏྭཱཝ པལཱཡིཏྭཱ པབྦཛིསྶཱམཱི’’ཏི. སོ ཏསྶཱ ཨནཱཙིཀྑིཏྭཱཝ རཏྟིབྷཱགེ ཨུཊྛཱཡ པལཱཡི. ཨཐ ནཾ ནགརགུཏྟིཀཱ ཨགྒཧེསུཾ. སོ ‘‘ཨཧཾ, སཱམི, མཱཏུཔོསཀོ ནཱམ, ཝིསྶཛྫེཐ མ’’ནྟི ཨཏྟཱནཾ ཝིསྶཛྫཱཔེཏྭཱ ཨེཀསྨིཾ ཋཱནེ ཝསིཏྭཱ ཨིསིཔབྦཛྫཾ པབྦཛིཏྭཱ ཨབྷིཉྙཱསམཱཔཏྟིཡོ ལབྷིཏྭཱ ཛྷཱནཀཱིལཱ༹ཡ ཀཱིལ༹ནྟོ ཝིཧཱསི. སོ ཏཏྠ ཝསནྟོཡེཝ ‘‘ཨེཝརཱུཔམྤི ནཱམ མེ དུཙྪིནྡནིཡཾ པུཏྟདཱརབནྡྷནཾ ཀིལེསབནྡྷནཾ ཚིནྣ’’ནྟི ཨིམཾ ཨུདཱནཾ ཨུདཱནེསི.

སཏྠཱ ཨིམཾ ཨཏཱིཏཾ ཨཱཧརིཏྭཱ ཏེན ཨུདཱནིཏཾ ཨུདཱནཾ པཀཱསེནྟོ ཨིམཱ གཱཐཱ ཨབྷཱསི –

༣༤༥.

‘‘ན ཏཾ དལ༹ྷཾ བནྡྷནམཱཧུ དྷཱིརཱ,

ཡདཱཡསཾ དཱརུཛཔབྦཛཉྩ;

སཱརཏྟརཏྟཱ མཎིཀུཎྜལེསུ,

པུཏྟེསུ དཱརེསུ ཙ ཡཱ ཨཔེཀྑཱ.

༣༤༦.

‘‘ཨེཏཾ དལ༹ྷཾ བནྡྷནམཱཧུ དྷཱིརཱ,

ཨོཧཱརིནཾ སིཐིལཾ དུཔྤམུཉྩཾ;

ཨེཏམྤི ཚེཏྭཱན པརིབྦཛནྟི,

ཨནཔེཀྑིནོ ཀཱམསུཁཾ པཧཱཡཱ’’ཏི.

ཏཏྠ དྷཱིརཱཏི བུདྡྷཱདཡོ པཎྜིཏཔུརིསཱ ཡཾ སངྑལིཀསངྑཱཏཾ ཨཡསཱ ནིབྦཏྟཾ ཨཱཡསཾ, ཨནྡུབནྡྷནསངྑཱཏཾ དཱརུཛཾ, ཡཉྩ པབྦཛཏིཎེཧི ཝཱ ཨཉྙེཧི ཝཱ ཝཱཀཱདཱིཧི རཛྫུཾ ཀཏྭཱ ཀཏཾ རཛྫུབནྡྷནཾ, ཏཾ ཨསིཨཱདཱིཧི ཚིནྡིཏུཾ སཀྐུཎེཡྻབྷཱཝེན ཐིརནྟི ན ཝདནྟཱིཏི ཨཏྠོ. སཱརཏྟརཏྟཱཏི སཱརཏྟཱ ཧུཏྭཱ རཏྟཱ, བཧལཏརརཱགརཏྟཱཏི ཨཏྠོ. མཎིཀུཎྜལེསཱུཏི མཎཱིསུ ཙེཝ ཀུཎྜལེསུ ཙ, མཎིཝིཙིཏྟེསུ ཝཱ ཀུཎྜལེསུ. ཨེཏཾ དལ༹ྷནྟི ཡེ མཎིཀུཎྜལེསུ སཱརཏྟརཏྟཱ, ཏེསཾ སོ རཱགོ ཙ ཡཱ པུཏྟདཱརེསུ ཨཔེཀྑཱ ཏཎྷཱ, ཨེཏཾ ཀིལེསམཡཾ བནྡྷནཉྩ པཎྜིཏཔུརིསཱ དལ༹ྷནྟི ཝདནྟི. ཨོཧཱརིནནྟི ཨཱཀཌྜྷིཏྭཱ ཙཏཱུསུ ཨཔཱཡེསུ པཱཏནཏོ ཨཝཧརཏི ཧེཊྛཱ ཧརཏཱིཏི ཨོཧཱརིནཾ. སིཐིལནྟི བནྡྷནཊྛཱནེ ཚཝིཙམྨམཾསཱནི ན ཚིནྡཏི, ལོཧིཏཾ ན ནཱིཧརཏི, བནྡྷནབྷཱཝམྤི ཨཛཱནཱཔེཏྭཱ ཐལཔཐཛལཔཐཱདཱིསུ ཀམྨཱནི ཀཱཏུཾ དེཏཱིཏི སིཐིལཾ. དུཔྤམུཉྩནྟི ལོབྷཝསེན ཧི ཨེཀཝཱརམྤི ཨུཔྤནྣཾ ཀིལེསབནྡྷནཾ དཊྛཊྛཱནཏོ ཀཙྪཔོ ཝིཡ དུམྨོཙིཡཾ ཧོཏཱིཏི དུཔྤམུཉྩཾ. ཨེཏམྤི ཚེཏྭཱནཱཏི ཨེཏཾ དལ༹ྷམྤི ཀིལེསབནྡྷནཾ ཉཱཎཁགྒེན ཚིནྡིཏྭཱ ཨནཔེཀྑིནོ ཧུཏྭཱ ཀཱམསུཁཾ པཧཱཡ པརིབྦཛནྟི, པཀྐམནྟི པབྦཛནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

བནྡྷནཱགཱརཝཏྠུ ཙཏུཏྠཾ.

༥. ཁེམཱཐེརཱིཝཏྠུ

ཡེ རཱགརཏྟཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཁེམཾ ནཱམ རཉྙོ བིམྦིསཱརསྶ ཨགྒམཧེསིཾ ཨཱརབྦྷ ཀཐེསི.

སཱ ཀིར པདུམུཏྟརཔཱདམཱུལེ པཏྠིཏཔཏྠནཱ ཨཏིཝིཡ ཨབྷིརཱུཔཱ པཱསཱདིཀཱ ཨཧོསི. ‘‘སཏྠཱ ཀིར རཱུཔསྶ དོསཾ ཀཐེཏཱི’’ཏི སུཏྭཱ པན སཏྠུ སནྟིཀཾ གནྟུཾ ན ཨིཙྪི. རཱཛཱ ཏསྶཱ རཱུཔམདམཏྟབྷཱཝཾ ཉཏྭཱ ཝེལུ༹ཝནཝཎྞནཱཔཊིསཾཡུཏྟཱནི གཱིཏཱནི ཀཱརེཏྭཱ ནཊཱདཱིནཾ དཱཔེསི. ཏེསཾ ཏཱནི གཱཡནྟཱནཾ སདྡཾ སུཏྭཱ ཏསྶཱ ཝེལུ༹ཝནཾ ཨདིཊྛཔུབྦཾ ཝིཡ ཨསུཏཔུབྦཾ ཝིཡ ཙ ཨཧོསི. སཱ ‘‘ཀཏརཾ ཨུཡྻཱནཾ སནྡྷཱཡ གཱཡཐཱ’’ཏི པུཙྪིཏྭཱ, ‘‘དེཝཱི, ཏུམྷཱཀཾ ཝེལུ༹ཝནུཡྻཱནམེཝཱ’’ཏི ཝུཏྟེ ཨུཡྻཱནཾ གནྟུཀཱམཱ ཨཧོསི. སཏྠཱ ཏསྶཱ ཨཱགམནཾ ཉཏྭཱ པརིསམཛ྄ཛྷེ ནིསཱིདིཏྭཱ དྷམྨཾ དེསེནྟོཝ ཏཱལཝཎྚཾ ཨཱདཱཡ ཨཏྟནོ པསྶེ ཋཏྭཱ བཱིཛམཱནཾ ཨབྷིརཱུཔཾ ཨིཏྠིཾ ནིམྨིནི. ཁེམཱ, དེཝཱིཔི པཝིསམཱནཱཝ ཏཾ ཨིཏྠིཾ དིསྭཱ ཙིནྟེསི – ‘‘སམྨཱསམྦུདྡྷོ རཱུཔསྶ དོསཾ ཀཐེཏཱིཏི ཝདནྟི, ཨཡཉྩསྶ སནྟིཀེ ཨིཏྠཱི བཱིཛཡམཱནཱ ཋིཏཱ, ནཱཧཾ ཨིམིསྶཱ ཀལབྷཱགམྤི ཨུཔེམི, ན མཡཱ ཨཱིདིསཾ ཨིཏྠིརཱུཔཾ དིཊྛཔུབྦཾ, སཏྠཱརཾ ཨབྷཱུཏེན ཨབྦྷཱཙིཀྑནྟི མཉྙེ’’ཏི ཙིནྟེཏྭཱ ཏཐཱགཏསྶ ཀཐཱསདྡམྤི ཨནིསཱམེཏྭཱ ཏམེཝ ཨིཏྠིཾ ཨོལོཀཡམཱནཱ ཨཊྛཱསི. སཏྠཱ ཏསྶཱ ཏསྨིཾ རཱུཔེ ཨུཔྤནྣབཧུམཱནཏཾ ཉཏྭཱ ཏཾ རཱུཔཾ པཋམཝཡཱདིཝསེན དསྶེཏྭཱ ཧེཊྛཱ ཝུཏྟནཡེནེཝ པརིཡོསཱནེ ཨཊྛིམཏྟཱཝསཱནཾ ཀཏྭཱ དསྶེསི. ཁེམཱ ཏཾ དིསྭཱ ‘‘ཨེཝརཱུཔམྤི ནཱམེཏཾ རཱུཔཾ མུཧུཏྟེནེཝ ཁཡཝཡཾ སམྤཏྟཾ, ནཏྠི ཝཏ ཨིམསྨིཾ རཱུཔེ སཱརོ’’ཏི ཙིནྟེསི. སཏྠཱ ཏསྶཱ ཙིཏྟཱཙཱརཾ ཨོལོཀེཏྭཱ, ‘‘ཁེམེ, ཏྭཾ ‘ཨིམསྨིཾ རཱུཔེ སཱརོ ཨཏྠཱི’ཏི ཙིནྟེསི, པསྶ དཱནིསྶ ཨསཱརབྷཱཝ’’ནྟི ཝཏྭཱ ཨིམཾ གཱཐམཱཧ –

‘‘ཨཱཏུརཾ ཨསུཙིཾ པཱུཏིཾ, པསྶ ཁེམེ སམུསྶཡཾ;

ཨུགྒྷརནྟཾ པགྒྷརནྟཾ, བཱལཱནཾ ཨབྷིཔཏྠིཏ’’ནྟི. (ཨཔ. ཐེརཱི ༢.༢.༣༥༤);

སཱ གཱཐཱཔརིཡོསཱནེ སོཏཱཔཏྟིཕལེ པཏིཊྛཧི. ཨཐ ནཾ སཏྠཱ, ‘‘ཁེམེ, ཨིམེ སཏྟཱ རཱགརཏྟཱ དོསཔདུཊྛཱ མོཧམཱུལ༹ྷཱ ཨཏྟནོ ཏཎྷཱསོཏཾ སམཏིཀྐམིཏུཾ ན སཀྐོནྟི, ཏཏྠེཝ ལགྒནྟཱི’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༣༤༧.

‘‘ཡེ རཱགརཏྟཱནུཔཏནྟི སོཏཾ,

སཡཾ ཀཏཾ མཀྐཊཀོཝ ཛཱལཾ;

ཨེཏམྤི ཚེཏྭཱན ཝཛནྟི དྷཱིརཱ,

ཨནཔེཀྑིནོ སབྦདུཀྑཾ པཧཱཡཱ’’ཏི.

ཏཏྠ མཀྐཊཀོཝ ཛཱལནྟི ཡཐཱ ནཱམ མཀྐཊཀོ སུཏྟཛཱལཾ ཀཏྭཱ མཛ྄ཛྷེ ཋཱནེ ནཱབྷིམཎྜལེ ནིཔནྣོ པརིཡནྟེ པཏིཏཾ པཊངྒཾ ཝཱ མཀྑིཀཾ ཝཱ ཝེགེན གནྟྭཱ ཝིཛ྄ཛྷིཏྭཱ ཏསྶ རསཾ པིཝིཏྭཱ པུན གནྟྭཱ ཏསྨིཾཡེཝ ཋཱནེ ནིཔཛྫཏི, ཨེཝམེཝ ཡེ སཏྟཱ རཱགརཏྟཱ དོསཔདུཊྛཱ མོཧམཱུལ༹ྷཱ སཡཾཀཏཾ ཏཎྷཱསོཏཾ ཨནུཔཏནྟི, ཏེ ཏཾ སམཏིཀྐམིཏུཾ ན སཀྐོནྟི, ཨེཝཾ དུརཏིཀྐམཾ. ཨེཏམྤི ཚེཏྭཱན ཝཛནྟི དྷཱིརཱཏི པཎྜིཏཱ ཨེཏཾ བནྡྷནཾ ཚེཏྭཱ ཨནཔེཀྑིནོ ནིརཱལཡཱ ཧུཏྭཱ ཨརཧཏྟམགྒེན སབྦདུཀྑཾ པཧཱཡ ཝཛནྟི, གཙྪནྟཱིཏི ཨཏྠོ.

དེསནཱཝསཱནེ ཁེམཱ ཨརཧཏྟེ པཏིཊྛཧི, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསི. སཏྠཱ རཱཛཱནཾ ཨཱཧ – ‘‘མཧཱརཱཛ, ཁེམཱཡ པབྦཛིཏུཾ ཝཱ པརིནིབྦཱཡིཏུཾ ཝཱ ཝཊྚཏཱི’’ཏི. བྷནྟེ, པབྦཱཛེཐ ནཾ, ཨལཾ པརིནིབྦཱནེནཱཏི. སཱ པབྦཛིཏྭཱ ཨགྒསཱཝིཀཱ ཨཧོསཱིཏི.

ཁེམཱཐེརཱིཝཏྠུ པཉྩམཾ.

༦. ཨུགྒསེནཝཏྠུ

མུཉྩ པུརེཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨུགྒསེནཾ ཨཱརབྦྷ ཀཐེསི.

པཉྩསཏཱ ཀིར ནཊཱ སཾཝཙྪརེ ཝཱ ཚམཱསེ ཝཱ པཏྟེ རཱཛགཧཾ གནྟྭཱ རཉྙོ སཏྟཱཧཾ སམཛྫཾ ཀཏྭཱ བཧུཾ ཧིརཉྙསུཝཎྞཾ ལབྷནྟི, ཨནྟརནྟརེ ཨུཀྑེཔདཱཡཱནཾ པརིཡནྟོ ནཏྠི. མཧཱཛནོ མཉྩཱཏིམཉྩཱདཱིསུ ཋཏྭཱ སམཛྫཾ ཨོལོཀེསི. ཨཐེཀཱ ལངྒྷིཀདྷཱིཏཱ ཝཾསཾ ཨབྷིརུཡ྄ཧ ཏསྶ ཨུཔརི པརིཝཏྟིཏྭཱ ཏསྶ པརིཡནྟེ ཨཱཀཱསེ ཙངྐམམཱནཱ ནཙྩཏི ཙེཝ གཱཡཏི ཙ. ཏསྨིཾ སམཡེ ཨུགྒསེནོ ནཱམ སེཊྛིཔུཏྟོ སཧཱཡཀེན སདྡྷིཾ མཉྩཱཏིམཉྩེ ཋིཏོ ཏཾ ཨོལོཀེཏྭཱ ཏསྶཱ ཧཏྠཔཱདཝིཀྑེཔཱདཱིསུ ཨུཔྤནྣསིནེཧོ གེཧཾ གནྟྭཱ ‘‘ཏཾ ལབྷནྟོ ཛཱིཝིསྶཱམི, ཨལབྷནྟསྶ མེ ཨིདྷེཝ མརཎ’’ནྟི ཨཱཧཱརཱུཔཙྪེདཾ ཀཏྭཱ མཉྩཀེ ནིཔཛྫི. མཱཏཱཔིཏཱུཧི, ‘‘ཏཱཏ, ཀིཾ ཏེ རུཛྫཏཱི’’ཏི པུཙྪིཏོཔི ‘‘ཏཾ མེ ནཊདྷཱིཏརཾ ལབྷནྟསྶ ཛཱིཝིཏཾ ཨཏྠི, ཨལབྷནྟསྶ མེ ཨིདྷེཝ མརཎ’’ནྟི ཝཏྭཱ, ‘‘ཏཱཏ, མཱ ཨེཝཾ ཀརི, ཨཉྙཾ ཏེ ཨམྷཱཀཾ ཀུལསྶ ཙ བྷོགཱནཉྩ ཨནུརཱུཔཾ ཀུམཱརིཀཾ ཨཱནེསྶཱམཱ’’ཏི ཝུཏྟེཔི ཏཐེཝ ཝཏྭཱ ནིཔཛྫི. ཨཐསྶ པིཏཱ བཧུཾ ཡཱཙིཏྭཱཔི ཏཾ སཉྙཱཔེཏུཾ ཨསཀྐོནྟོ ཏསྶ སཧཱཡཾ པཀྐོསཱཔེཏྭཱ ཀཧཱཔཎསཧསྶཾ དཏྭཱ ‘‘ཨིམེ ཀཧཱཔཎེ གཧེཏྭཱ ཨཏྟནོ དྷཱིཏརཾ མཡ྄ཧཾ པུཏྟསྶ དེཏཱུ’’ཏི པཧིཎི. སོ ‘‘ནཱཧཾ ཀཧཱཔཎེ གཧེཏྭཱ དེམི, སཙེ པན སོ ཨིམཾ ཨལབྷིཏྭཱ ཛཱིཝིཏུཾ ན སཀྐོཏི, ཏེན ཧི ཨམྷེཧི སདྡྷིཾཡེཝ ཝིཙརཏུ, དསྶཱམིསྶ དྷཱིཏར’’ནྟི ཨཱཧ. མཱཏཱཔིཏརོ པུཏྟསྶ ཏམཏྠཾ ཨཱརོཙེསུཾ. སོ ‘‘ཨཧཾ ཏེཧི སདྡྷིཾ ཝིཙརིསྶཱམཱི’’ཏི ཝཏྭཱ ཡཱཙནྟཱནམྤི ཏེསཾ ཀཐཾ ཨནཱདིཡིཏྭཱ ནིཀྑམིཏྭཱ ནཱཊཀསྶ སནྟིཀཾ ཨགམཱསི. སོ ཏསྶ དྷཱིཏརཾ དཏྭཱ ཏེན སདྡྷིཾཡེཝ གཱམནིགམརཱཛདྷཱནཱིསུ སིཔྤཾ དསྶེནྟོ ཝིཙརི.

སཱཔི ཏེན སདྡྷིཾ སཾཝཱསམནྭཱཡ ནཙིརསྶེཝ པུཏྟཾ ལབྷིཏྭཱ ཀཱིལཱ༹པཡམཱནཱ ‘‘སཀཊགོཔཀསྶ པུཏྟ, བྷཎྜཧཱརཀསྶ པུཏྟ, ཀིཉྩི ཨཛཱནཀསྶ པུཏྟཱ’’ཏི ཝདཏི. སོཔི ནེསཾ སཀཊཔརིཝཏྟཀཾ ཀཏྭཱ ཋིཏཊྛཱནེ གོཎཱནཾ ཏིཎཾ ཨཱཧརཏི, སིཔྤདསྶནཊྛཱནེ ལདྡྷབྷཎྜཀཾ ཨུཀྑིཔིཏྭཱ ཧརཏི. ཏདེཝ ཀིར སནྡྷཱཡ སཱ ཨིཏྠཱི པུཏྟཾ ཀཱིལཱ༹པཡམཱནཱ ཏཐཱ ཝདཏི. སོ ཨཏྟཱནཾ ཨཱརབྦྷ ཏསྶཱ གཱཡནབྷཱཝཾ ཉཏྭཱ ཏཾ པུཙྪི – ‘‘མཾ སནྡྷཱཡ ཀཐེསཱི’’ཏི? ‘‘ཨཱམ, ཏཾ སནྡྷཱཡཱ’’ཏི. ‘‘ཨེཝཾ སནྟེ ཨཧཾ པལཱཡིསྶཱམཱི’’ཏི. སཱ ‘‘ཀིཾ པན མཡ྄ཧཾ ཏཡཱ པལཱཡིཏེན ཝཱ ཨཱགཏེན ཝཱ’’ཏི པུནཔྤུནཾ ཏདེཝ གཱིཏཾ གཱཡཏི. སཱ ཀིར ཨཏྟནོ རཱུཔསམྤཏྟིཉྩེཝ དྷནལཱབྷཉྩ ནིསྶཱཡ ཏཾ ཀིསྨིཉྩི ན མཉྙཏི. སོ ‘‘ཀིཾ ནུ ཁོ ནིསྶཱཡ ཨིམིསྶཱ ཨཡཾ མཱནོ’’ཏི ཙིནྟེནྟོ ‘‘སིཔྤཾ ནིསྶཱཡཱ’’ཏི ཉཏྭཱ ‘‘ཧོཏུ, སིཔྤཾ ཨུགྒཎྷིསྶཱམཱི’’ཏི སསུརཾ ཨུཔསངྐམིཏྭཱ ཏསྶ ཛཱནནཀསིཔྤཾ ཨུགྒཎྷིཏྭཱ གཱམནིགམཱདཱིསུ སིཔྤཾ དསྶེནྟོ ཨནུཔུབྦེན རཱཛགཧཾ ཨཱགནྟྭཱ ‘‘ཨིཏོ སཏྟམེ དིཝསེ ཨུགྒསེནོ སེཊྛིཔུཏྟོ ནགརཝཱསཱིནཾ སིཔྤཾ དསྶེསྶཏཱི’’ཏི ཨཱརོཙཱཔེསི.

ནགརཝཱསིནོ མཉྩཱཏིམཉྩཱདཡོ བནྡྷཱཔེཏྭཱ སཏྟམེ དིཝསེ སནྣིཔཏིཾསུ. སོཔི སཊྛིཧཏྠཾ ཝཾསཾ ཨབྷིརུཡ྄ཧ ཏསྶ མཏྠཀེ ཨཊྛཱསི. ཏཾ དིཝསཾ སཏྠཱ པཙྩཱུསཀཱལེ ལོཀཾ ཝོལོཀེནྟོ ཏཾ ཨཏྟནོ ཉཱཎཛཱལསྶ ཨནྟོ པཝིཊྛཾ དིསྭཱ ‘‘ཀིཾ ནུ ཁོ བྷཝིསྶཏཱི’’ཏི ཨཱཝཛྫེནྟོ ‘‘སྭེ སེཊྛིཔུཏྟོ སིཔྤཾ དསྶེསྶཱམཱིཏི ཝཾསམཏྠཀེ ཋསྶཏི, ཏསྶ དསྶནཏྠཾ མཧཱཛནོ སནྣིཔཏིསྶཏི. ཏཏྲ ཨཧཾ ཙཏུཔྤདིཀཾ གཱཐཾ དེསེསྶཱམི, ཏཾ སུཏྭཱ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ བྷཝིསྶཏི, ཨུགྒསེནོཔི ཨརཧཏྟེ པཏིཊྛཧིསྶཏཱི’’ཏི ཨཉྙཱསི. སཏྠཱ པུནདིཝསེ ཀཱལཾ སལླཀྑེཏྭཱ བྷིཀྑུསངྒྷཔརིཝུཏོ རཱཛགཧཾ པིཎྜཱཡ པཱཝིསི. ཨུགྒསེནོཔི སཏྠརི ཨནྟོནགརཾ ཨཔཝིཊྛེཡེཝ ཨུནྣཱདནཏྠཱཡ མཧཱཛནསྶ ཨངྒུལིསཉྙཾ དཏྭཱ ཝཾསམཏྠཀེ པཏིཊྛཱཡ ཨཱཀཱསེཡེཝ སཏྟ ཝཱརེ པརིཝཏྟིཏྭཱ ཨོརུཡ྄ཧ ཝཾསམཏྠཀེ ཨཊྛཱསི. ཏསྨིཾ ཁཎེ སཏྠཱ ནགརཾ པཝིསནྟོ ཡཐཱ ཏཾ པརིསཱ ན ཨོལོཀེཏི, ཨེཝཾ ཀཏྭཱ ཨཏྟཱནམེཝ ཨོལོཀཱཔེསི. ཨུགྒསེནོ པརིསཾ ཨོལོཀེཏྭཱ ‘‘ན མཾ པརིསཱ ཨོལོཀེཏཱི’’ཏི དོམནསྶཔྤཏྟོ ‘‘ཨིདཾ མཡཱ སཾཝཙྪརེ ཀཏྟབྦཾ སིཔྤཾ, སཏྠརི ནགརཾ པཝིསནྟེ པརིསཱ མཾ ཨནོལོཀེཏྭཱ སཏྠཱརམེཝ ཨོལོཀེཏི, མོགྷཾ ཝཏ མེ སིཔྤདསྶནཾ ཛཱཏ’’ནྟི ཙིནྟེསི.

སཏྠཱ ཏསྶ ཙིཏྟཾ ཉཏྭཱ མཧཱམོགྒལླཱནཾ ཨཱམནྟེཏྭཱ ‘‘གཙྪ, མོགྒལླཱན, སེཊྛིཔུཏྟཾ ཝདེཧི ‘སིཔྤཾ ཀིར དསྶེཏཱུ’’’ཏི ཨཱཧ. ཐེརོ གནྟྭཱ ཝཾསསྶ ཧེཊྛཱ ཋིཏོ སེཊྛིཔུཏྟཾ ཨཱམནྟེཏྭཱ ཨིམཾ གཱཐམཱཧ –

‘‘ཨིངྒྷ པསྶ ནཊཔུཏྟ, ཨུགྒསེན མཧབྦལ;

ཀརོཧི རངྒཾ པརིསཱཡ, ཧཱསཡསྶུ མཧཱཛན’’ནྟི.

སོ ཐེརསྶ ཀཐཾ སུཏྭཱ ཏུཊྛམཱནསོ ཧུཏྭཱ ‘‘སཏྠཱ མཉྙེ མམ སིཔྤཾ པསྶིཏུཀཱམོ’’ཏི ཝཾསམཏྠཀེ ཋིཏཀོཝ ཨིམཾ གཱཐམཱཧ –

‘‘ཨིངྒྷ པསྶ མཧཱཔཉྙ, མོགྒལླཱན མཧིདྡྷིཀ;

ཀརོམི རངྒཾ པརིསཱཡ, ཧཱསཡཱམི མཧཱཛན’’ནྟི.

ཨེཝཉྩ པན ཝཏྭཱ ཝཾསམཏྠཀཏོ ཝེཧཱསཾ ཨབྦྷུགྒནྟྭཱ ཨཱཀཱསེཝ ཙུདྡསཀྑཏྟུཾ པརིཝཏྟིཏྭཱ ཨོརུཡ྄ཧ ཝཾསམཏྠཀེཝ ཨཊྛཱསི. ཨཐ ནཾ སཏྠཱ, ‘‘ཨུགྒསེན, པཎྜིཏེན ནཱམ ཨཏཱིཏཱནཱགཏཔཙྩུཔྤནྣེསུ ཁནྡྷེསུ ཨཱལཡཾ པཧཱཡ ཛཱཏིཨཱདཱིཧི མུཙྩིཏུཾ ཝཊྚཏཱི’’ཏི ཝཏྭཱ ཨིམཾ གཱཐམཱཧ –

༣༤༨.

‘‘མུཉྩ པུརེ མུཉྩ པཙྪཏོ,

མཛ྄ཛྷེ མུཉྩ བྷཝསྶ པཱརགཱུ;

སབྦཏྠ ཝིམུཏྟམཱནསོ,

ན པུནཾ ཛཱཏིཛརཾ ཨུཔེཧིསཱི’’ཏི.

ཏཏྠ མུཉྩ པུརེཏི ཨཏཱིཏེསུ ཁནྡྷེསུ ཨཱལཡཾ ནིཀནྟིཾ ཨཛ྄ཛྷོསཱནཾ པཏྠནཾ པརིཡུཊྛཱནཾ གཱཧཾ པརཱམཱསཾ ཏཎྷཾ མུཉྩ. པཙྪཏོཏི ཨནཱགཏེསུཔི ཁནྡྷེསུ ཨཱལཡཱདཱིནི མུཉྩ. མཛ྄ཛྷེཏི པཙྩུཔྤནྣེསུཔི ཏཱནི མུཉྩ. བྷཝསྶ པཱརགཱུཏི ཨེཝཾ སནྟེ ཏིཝིདྷསྶཱཔི བྷཝསྶ ཨབྷིཉྙཱཔརིཉྙཱཔཧཱནབྷཱཝནཱསཙྪིཀིརིཡཝསེན པཱརགཱུ པཱརངྒཏོ ཧུཏྭཱ ཁནྡྷདྷཱཏུཨཱཡཏནཱདིབྷེདེ སབྦསངྑཏེ ཝིམུཏྟམཱནསོ ཝིཧརནྟོ པུན ཛཱཏིཛརཱམརཎཱནི ན ཨུཔགཙྪཏཱིཏི ཨཏྠོ.

དེསནཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི. སེཊྛིཔུཏྟོཔི ཝཾསམཏྠཀེ ཋིཏཀོཝ སཧ པཊིསམྦྷིདཱཧི ཨརཧཏྟཾ པཏྭཱ ཝཾསཏོ ཨོརུཡ྄ཧ སཏྠུ སནྟིཀཾ ཨཱགནྟྭཱ པཉྩཔཏིཊྛིཏེན སཏྠཱརཾ ཝནྡིཏྭཱ པབྦཛྫཾ ཡཱཙི. ཨཐ ནཾ སཏྠཱ དཀྑིཎཧཏྠཾ པསཱརེཏྭཱ ‘‘ཨེཧི བྷིཀྑཱུ’’ཏི ཨཱཧ. སོ ཏཱཝདེཝ ཨཊྛཔརིཀྑཱརདྷརོ སཊྛིཝསྶིཀཏྠེརོ ཝིཡ ཨཧོསི. ཨཐ ནཾ བྷིཀྑཱུ, ‘‘ཨཱཝུསོ ཨུགྒསེན, སཊྛིཧཏྠསྶ ཏེ ཝཾསསྶ མཏྠཀཏོ ཨོཏརནྟསྶ བྷཡཾ ནཱམ ནཱཧོསཱི’’ཏི པུཙྪིཏྭཱ ‘‘ནཏྠི མེ, ཨཱཝུསོ, བྷཡ’’ནྟི ཝུཏྟེ སཏྠུ ཨཱརོཙེསུཾ, ‘‘བྷནྟེ, ཨུགྒསེནོ ‘ན བྷཱཡཱམཱི’ཏི ཝདཏི, ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི. སཏྠཱ ‘‘ན, བྷིཀྑཝེ, མམ པུཏྟེན ཨུགྒསེནེན སདིསཱ ཚིནྣསཾཡོཛནཱ བྷིཀྑཱུ བྷཱཡནྟི, ན ཏསནྟཱི’’ཏི ཝཏྭཱ བྲཱཧྨཎཝགྒེ ཨིམཾ གཱཐམཱཧ –

‘‘སབྦསཾཡོཛནཾ ཚེཏྭཱ, ཡོ ཝེ ན པརིཏསྶཏི;

སངྒཱཏིགཾ ཝིསཾཡུཏྟཾ, ཏམཧཾ བྲཱུམི བྲཱཧྨཎ’’ནྟི. (དྷ. པ. ༣༩༧; སུ. ནི. ༦༢༦);

དེསནཱཝསཱནེ བཧཱུནཾ དྷམྨཱབྷིསམཡོ ཨཧོསི. པུནེཀདིཝསཾ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཀིཾ ནུ ཁོ, ཨཱཝུསོ, ཨེཝཾ ཨརཧཏྟཱུཔནིསྶཡསམྤནྣསྶ བྷིཀྑུནོ ནཊདྷཱིཏརཾ ནིསྶཱཡ ནཊེཧི སདྡྷིཾ ཝིཙརཎཀཱརཎཾ, ཀིཾ ཨརཧཏྟཱུཔནིསྶཡཀཱརཎ’’ནྟི? སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཨུབྷཡམྤེཏཾ ཨིམིནཱ ཨེཝ ཀཏ’’ནྟི ཝཏྭཱ ཏམཏྠཾ པཀཱསེཏུཾ ཨཏཱིཏཾ ཨཱཧརི.

ཨཏཱིཏེ ཀིར ཀསྶཔདསབལསྶ སུཝཎྞཙེཏིཡེ ཀརིཡམཱནེ བཱརཱཎསིཝཱསིནོ ཀུལཔུཏྟཱ བཧུཾ ཁཱདནཱིཡབྷོཛནཱིཡཾ ཡཱནཀེསུ ཨཱརོཔེཏྭཱ ‘‘ཧཏྠཀམྨཾ ཀརིསྶཱམཱ’’ཏི ཙེཏིཡཊྛཱནཾ གཙྪནྟཱ ཨནྟརཱམགྒེ ཨེཀཾ ཐེརཾ པིཎྜཱཡ པཝིསནྟཾ པསྶིཾསུ. ཨཐེཀཱ ཀུལདྷཱིཏཱ ཐེརཾ ཨོལོཀེཏྭཱ སཱམིཀཾ ཨཱཧ – ‘‘སཱམི, ཨཡྻོ, པིཎྜཱཡ པཝིསཏི, ཡཱནཀེ ཙ ནོ བཧུཾ ཁཱདནཱིཡཾ བྷོཛནཱིཡཾ, པཏྟམསྶ ཨཱཧར, བྷིཀྑཾ དསྶཱམཱ’’ཏི. སོ ཏཾ པཏྟཾ ཨཱཧརིཏྭཱ ཁཱདནཱིཡབྷོཛནཱིཡསྶ པཱུརེཏྭཱ ཐེརསྶ ཧཏྠེ པཏིཊྛཔེཏྭཱ ཨུབྷོཔི པཏྠནཾ ཀརིཾསུ, ‘‘བྷནྟེ, ཏུམྷེཧི དིཊྛདྷམྨསྶེཝ བྷཱགིནོ བྷཝེཡྻཱམཱ’’ཏི. སོཔི ཐེརོ ཁཱིཎཱསཝོཝ, ཏསྨཱ ཨོལོཀེནྟོ ཏེསཾ པཏྠནཱཡ སམིཛ྄ཛྷནབྷཱཝཾ ཉཏྭཱ སིཏཾ ཨཀཱསི. ཏཾ དིསྭཱ སཱ ཨིཏྠཱི སཱམིཀཾ ཨཱཧ – ‘‘ཨམྷཱཀཾ, ཨཡྻོ, སིཏཾ ཀརོཏི, ཨེཀོ ནཊཀཱརཀོ བྷཝིསྶཏཱི’’ཏི. སཱམིཀོཔིསྶཱ ‘‘ཨེཝཾ བྷཝིསྶཏི, བྷདྡེ’’ཏི ཝཏྭཱ པཀྐཱམི. ཨིདཾ ཏེསཾ པུབྦཀམྨཾ. ཏེ ཏཏྠ ཡཱཝཏཱཡུཀཾ ཋཏྭཱ དེཝལོཀེ ནིབྦཏྟིཏྭཱ ཏཏོ ཙཝིཏྭཱ སཱ ཨིཏྠཱི ནཊགེཧེ ནིབྦཏྟི, པུརིསོ སེཊྛིགེཧེ. སོ ‘‘ཨེཝཾ, བྷདྡེ, བྷཝིསྶཏཱི’’ཏི ཏསྶཱ པཊིཝཙནསྶ དིནྣཏྟཱ ནཊེཧི སདྡྷིཾ ཝིཙརི. ཁཱིཎཱསཝཏྠེརསྶ དིནྣཔིཎྜཔཱཏཾ ནིསྶཱཡ ཨརཧཏྟཾ པཱཔུཎི. སཱཔི ནཊདྷཱིཏཱ ‘‘ཡཱ མེ སཱམིཀསྶ གཏི, མཡ྄ཧམྤི སཱ ཨེཝ གཏཱི’’ཏི པབྦཛིཏྭཱ ཨརཧཏྟེ པཏིཊྛཧཱིཏི.

ཨུགྒསེནཝཏྠུ ཚཊྛཾ.

༧. ཙཱུལ༹དྷནུགྒཧཔཎྜིཏཝཏྠུ

ཝིཏཀྐམཐིཏསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཙཱུལ༹དྷནུགྒཧཔཎྜིཏཾ ཨཱརབྦྷ ཀཐེསི.

ཨེཀོ ཀིར དཧརབྷིཀྑུ སལཱཀགྒེ ཨཏྟནོ པཏྟསལཱཀཾ གཧེཏྭཱ སལཱཀཡཱགུཾ ཨཱདཱཡ ཨཱསནསཱལཾ གནྟྭཱ པིཝི. ཏཏྠ ཨུདཀཾ ཨལབྷིཏྭཱ ཨུདཀཏྠཱཡ ཨེཀཾ གྷརཾ ཨགམཱསི. ཏཏྠ ཏཾ ཨེཀཱ ཀུམཱརིཀཱ དིསྭཱཝ ཨུཔྤནྣསིནེཧཱ, ‘‘བྷནྟེ, པུན པཱནཱིཡེན ཨཏྠེ སཏི ཨིདྷེཝ ཨཱགཙྪེཡྻཱཐཱ’’ཏི ཨཱཧ. སོ ཏཏོ པཊྛཱཡ ཡདཱ པཱནཱིཡཾ ན ལབྷཏི, ཏདཱ ཏཏྠེཝ གཙྪཏི. སཱཔིསྶ པཏྟཾ གཧེཏྭཱ པཱནཱིཡཾ དེཏི. ཨེཝཾ གཙྪནྟེ ཀཱལེ ཡཱགུམྤི དཏྭཱ པུནེཀདིཝསཾ ཏཏྠེཝ ནིསཱིདཱཔེཏྭཱ བྷཏྟཾ ཨདཱསི. སནྟིཀེ ཙསྶ ནིསཱིདིཏྭཱ, ‘‘བྷནྟེ, ཨིམསྨིཾ གེཧེ ན ཀིཉྩི ནཏྠི ནཱམ, ཀེཝལཾ མཡཾ ཝིཙརཎཀམནུསྶམེཝ ན ལབྷཱམཱ’’ཏི ཀཐཾ སམུཊྛཱཔེསི. སོ ཀཐིཔཱཧེནེཝ ཏསྶཱ ཀཐཾ སུཏྭཱ ཨུཀྐཎྛི. ཨཐ ནཾ ཨེཀདིཝསཾ ཨཱགནྟུཀཱ བྷིཀྑཱུ དིསྭཱ ‘‘ཀསྨཱ ཏྭཾ, ཨཱཝུསོ, ཀིསོ ཨུཔྤཎྜུཔཎྜུཀཛཱཏོསཱི’’ཏི པུཙྪིཏྭཱ ‘‘ཨུཀྐཎྛིཏོམྷི, ཨཱཝུསོ’’ཏི ཝུཏྟེ ཨཱཙརིཡུཔཛ྄ཛྷཱཡཱནཾ སནྟིཀཾ ནཡིཾསུ. ཏེཔི ནཾ སཏྠུ སནྟིཀཾ ནེཏྭཱ ཏམཏྠཾ ཨཱརོཙེསུཾ. སཏྠཱ ‘‘སཙྩཾ ཀིར ཏྭཾ, བྷིཀྑུ, ཨུཀྐཎྛིཏོསཱི’’ཏི པུཙྪིཏྭཱ ‘‘སཙྩ’’ནྟི ཝུཏྟེ ‘‘ཀསྨཱ ཏྭཾ མཱདིསསྶ ཨཱརདྡྷཝཱིརིཡསྶ བུདྡྷསྶ སཱསནེ པབྦཛིཏྭཱ ‘སོཏཱཔནྣོ’ཏི ཝཱ ‘སཀདཱགཱམཱི’ཏི ཝཱ ཨཏྟཱནཾ ཨཝདཱཔེཏྭཱ ‘ཨུཀྐཎྛིཏོ’ཏི ཝདཱཔེསི, བྷཱརིཡཾ ཏེ ཀམྨཾ ཀཏ’’ནྟི ཝཏྭཱ ‘‘ཀིཾ ཀཱརཎཱ ཨུཀྐཎྛིཏོསཱི’’ཏི པུཙྪི. ‘‘བྷནྟེ, ཨེཀཱ མཾ ཨིཏྠཱི ཨེཝམཱཧཱ’’ཏི ཝུཏྟེ, ‘‘བྷིཀྑུ, ཨནཙྪརིཡཾ ཨེཏཾ ཏསྶཱ ཀིརིཡཾ. སཱ ཧི པུབྦེ སཀལཛམྦུདཱིཔེ ཨགྒདྷནུགྒཧཔཎྜིཏཾ པཧཱཡ ཏཾམུཧུཏྟདིཊྛཀེ ཨེཀསྨིཾ སིནེཧཾ ཨུཔྤཱདེཏྭཱ ཏཾ ཛཱིཝིཏཀྑཡཾ པཱཔེསཱི’’ཏི ཝཏྭཱ ཏསྶཏྠསྶ པཀཱསནཏྠཾ བྷིཀྑཱུཧི ཡཱཙིཏོ –

ཨཏཱིཏེ ཙཱུལ༹དྷནུགྒཧཔཎྜིཏཀཱལེ ཏཀྐསིལཱཡཾ དིསཱཔཱམོཀྑསྶ ཨཱཙརིཡསྶ སནྟིཀེ སིཔྤཾ ཨུགྒཧེཏྭཱ ཏེན ཏུཊྛེན དིནྣཾ དྷཱིཏརཾ ཨཱདཱཡ བཱརཱཎསིཾ གཙྪནྟསྶ ཨེཀསྨིཾ ཨཊཝིམུཁེ ཨེཀཱུནཔཉྙཱསཱཡ ཀཎྜེཧི ཨེཀཱུནཔཉྙཱསཙོརེ མཱརེཏྭཱ ཀཎྜེསུ ཁཱིཎེསུ ཙོརཛེཊྛཀཾ གཧེཏྭཱ བྷཱུམིཡཾ པཱཏེཏྭཱ, ‘‘བྷདྡེ, ཨསིཾ ཨཱཧརཱ’’ཏི ཝུཏྟེ ཏཱཡ ཏངྑཎཾ དིཊྛཙོརེ སིནེཧཾ ཀཏྭཱ ཙོརསྶ ཧཏྠེ ཨསིཐརུཾ ཋཔེཏྭཱ ཙོརེན དྷནུགྒཧཔཎྜིཏསྶ མཱརིཏབྷཱཝཾ ཨཱཝིཀཏྭཱ ཙོརེན ཙ ཏཾ ཨཱདཱཡ གཙྪནྟེན ‘‘མམྤི ཨེསཱ ཨཉྙཾ དིསྭཱ ཨཏྟནོ སཱམིཀཾ ཝིཡ མཱརཱཔེསྶཏི, ཀིཾ མེ ཨིམཱཡཱ’’ཏི ཨེཀཾ ནདིཾ དིསྭཱ ཨོརིམཏཱིརེ ཏཾ ཋཔེཏྭཱ ཏསྶཱ བྷཎྜཀཾ ཨཱདཱཡ ‘‘ཏྭཾ ཨིདྷེཝ ཧོཧི, ཡཱཝཱཧཾ བྷཎྜིཀཾ ཨུཏྟཱརེམཱི’’ཏི ཏཏྠེཝ ཏཾ པཧཱཡ གམནབྷཱཝཉྩ ཨཱཝིཀཏྭཱ –

‘‘སབྦཾ བྷཎྜཾ སམཱདཱཡ, པཱརཾ ཏིཎྞོསི བྲཱཧྨཎ;

པཙྩཱགཙྪ ལཧུཾ ཁིཔྤཾ, མམྤི ཏཱརེཧི དཱནིཏོ.

‘‘ཨསནྠུཏཾ མཾ ཙིརསནྠུཏེན,

ནིམཱིནི བྷོཏཱི ཨདྡྷུཝཾ དྷུཝེན;

མཡཱཔི བྷོཏཱི ནིམིནེཡྻ ཨཉྙཾ,

ཨིཏོ ཨཧཾ དཱུརཏརཾ གམིསྶཾ.

‘‘ཀཱཡཾ ཨེལ༹གལཱགུམྦེ, ཀརོཏི ཨཧུཧཱསིཡཾ;

ནཡཱིདྷ ནཙྩཾ ཝཱ གཱིཏཾ ཝཱ, ཏཱལ༹ཾ ཝཱ སུསམཱཧིཏཾ;

ཨནམྷིཀཱལེ སུསོཎི, ཀིཾ ནུ ཛགྒྷསི སོབྷནེ.

‘‘སིངྒཱལ བཱལ དུམྨེདྷ, ཨཔྤཔཉྙོསི ཛམྦུཀ;

ཛཱིནོ མཙྪཉྩ པེསིཉྩ, ཀཔཎོ ཝིཡ ཛྷཱཡསི.

‘‘སུདསྶཾ ཝཛྫམཉྙེསཾ, ཨཏྟནོ པན དུདྡསཾ;

ཛཱིནཱ པཏིཉྩ ཛཱརཉྩ, མཉྙེ ཏྭཉྙེཝ ཛྷཱཡསི.

‘‘ཨེཝམེཏཾ མིགརཱཛ, ཡཐཱ བྷཱསསི ཛམྦུཀ;

སཱ ནཱུནཱཧཾ ཨིཏོ གནྟྭཱ, བྷཏྟུ ཧེསྶཾ ཝསཱནུགཱ.

‘‘ཡོ ཧརེ མཏྟིཀཾ ཐཱལཾ, ཀཾསཐཱལམྤི སོ ཧརེ;

ཀཏཉྩེཝ ཏཡཱ པཱཔཾ, པུནཔེཝཾ ཀརིསྶསཱི’’ཏི. (ཛཱ. ༡.༥.༡༢༨-༡༣༤) –

ཨིམཾ པཉྩཀནིཔཱཏེ ཙཱུལ༹དྷནུགྒཧཛཱཏཀཾ ཝིཏྠཱརེཏྭཱ ‘‘ཏདཱ ཙཱུལ༹དྷནུགྒཧཔཎྜིཏོ ཏྭཾ ཨཧོསི, སཱ ཨིཏྠཱི ཨེཏརཧི ཨཡཾ ཀུམཱརིཀཱ, སིངྒཱལརཱུཔེན ཨཱགནྟྭཱ ཏསྶཱ ནིགྒཧཀཱརཀོ སཀྐོ དེཝརཱཛཱ ཨཧམེཝཱ’’ཏི ཝཏྭཱ ‘‘ཨེཝཾ སཱ ཨིཏྠཱི ཏཾམུཧུཏྟདིཊྛཀེ ཨེཀསྨིཾ སིནེཧེན སཀལཛམྦུདཱིཔེ ཨགྒཔཎྜིཏཾ ཛཱིཝིཏཱ ཝོརོཔེསི, ཏཾ ཨིཏྠིཾ ཨཱརབྦྷ ཨུཔྤནྣཾ ཏཝ ཏཎྷཾ ཚིནྡིཏྭཱ ཝིཧརཱཧི བྷིཀྑཱུ’’ཏི ཏཾ ཨོཝདིཏྭཱ ཨུཏྟརིམྤི དྷམྨཾ དེསེནྟོ ཨིམཱ དྭེ གཱཐཱ ཨབྷཱསི –

༣༤༩.

‘‘ཝིཏཀྐམཐིཏསྶ ཛནྟུནོ,

ཏིབྦརཱགསྶ སུབྷཱནུཔསྶིནོ;

བྷིཡྻོ ཏཎྷཱ པཝཌྜྷཏི,

ཨེས ཁོ དལ༹ྷཾ ཀརོཏི བནྡྷནཾ.

༣༥༠.

‘‘ཝིཏཀྐཱུཔསམེ ཙ ཡོ རཏོ,

ཨསུབྷཾ བྷཱཝཡཏེ སདཱ སཏོ;

ཨེས ཁོ བྱནྟི ཀཱཧིཏི,

ཨེས ཚེཙྪཏི མཱརབནྡྷན’’ནྟི.

ཏཏྠ ཝིཏཀྐམཐིཏསྶཱཏི ཀཱམཝིཏཀྐཱདཱིཧི ཝིཏཀྐེཧི ནིམྨཐིཏསྶ. ཏིབྦརཱགསྶཱཏི བཧལརཱགསྶ. སུབྷཱནུཔསྶིནོཏི ཨིཊྛཱརམྨཎེ སུབྷནིམིཏྟགཱཧཱདིཝསེན ཝིསྶཊྛམཱནསཏཱཡ སུབྷནྟི ཨནུཔསྶནྟསྶ. ཏཎྷཱཏི ཨེཝརཱུཔསྶ ཛྷཱནཱདཱིསུ ཨེཀམྤི ན ཝཌྜྷཏི, ཨཐ ཁོ ཚདྭཱརིཀཱ ཏཎྷཱཡེཝ བྷིཡྻོ ཝཌྜྷཏི. ཨེས ཁོཏི ཨེསོ པུགྒལོ ཏཎྷཱབནྡྷནཾ དལ༹ྷཾ སུཐིརཾ ཀརོཏི. ཝིཏཀྐཱུཔསམེཏི མིཙྪཱཝིཏཀྐཱདཱིནཾ ཝཱུཔསམསངྑཱཏེ དསསུ ཨསུབྷེསུ པཋམཛ྄ཛྷཱནེ. སདཱ སཏོཏི ཡོ ཨེཏྠ ཨབྷིརཏོ ཧུཏྭཱ ནིཙྩཾ ཨུཔཊྛིཏསཏིཏཱཡ སཏོ ཏཾ ཨསུབྷཛྷཱནཾ བྷཱཝེཏི. བྱནྟི ཀཱཧིཏཱིཏི ཨེས བྷིཀྑུ ཏཱིསུ བྷཝེསུ ཨུཔྤཛྫནཀཾ ཏཎྷཾ ཝིགཏནྟཾ ཀརིསྶཏི. མཱརབནྡྷནནྟི ཨེསོ ཏེབྷཱུམཀཝཊྚསངྑཱཏཾ མཱརབནྡྷནམྤི ཚིནྡིསྶཏཱིཏི ཨཏྠོ.

དེསནཱཝསཱནེ སོ བྷིཀྑུ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཙཱུལ༹དྷནུགྒཧཔཎྜིཏཝཏྠུ སཏྟམཾ.

༨. མཱརཝཏྠུ

ནིཊྛངྒཏོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཱརཾ ཨཱརབྦྷ ཀཐེསི.

ཨེཀདིཝསཉྷི ཝིཀཱལེ སམྦཧུལཱ ཐེརཱ ཛེཏཝནཝིཧཱརཾ པཝིསིཏྭཱ རཱཧུལཏྠེརསྶ ཝསནཊྛཱནཾ གནྟྭཱ ཏཾ ཨུཊྛཱཔེསུཾ. སོ ཨཉྙཏྠ ཝསནཊྛཱནཾ ཨཔསྶནྟོ ཏཐཱགཏསྶ གནྡྷཀུཊིཡཱ པམུཁེ ནིཔཛྫི. ཏདཱ སོ ཨཱཡསྨཱ ཨརཧཏྟཾ པཏྟོ ཨཝསྶིཀོཝ ཧོཏི. མཱརོ ཝསཝཏྟིབྷཝནེ ཋིཏོཡེཝ ཏཾ ཨཱཡསྨནྟཾ གནྡྷཀུཊིཔམུཁེ ནིཔནྣཾ དིསྭཱ ཙིནྟེསི – ‘‘སམཎསྶ གོཏམསྶ རུཛནཀཨངྒུལཱི བཧི ནིཔནྣོ, སཡཾ ཨནྟོགནྡྷཀུཊིཡཾ ནིཔནྣོ, ཨངྒུལིཡཱ པཱིལི༹ཡམཱནཱཡ སཡམྤི པཱིལི༹ཏོ བྷཝིསྶཏཱི’’ཏི. སོ མཧནྟཾ ཧཏྠིརཱཛཝཎྞཾ ཨབྷིནིམྨིནིཏྭཱ ཨཱགམྨ སོཎྜཱཡ ཐེརསྶ མཏྠཀཾ པརིཀྑིཔིཏྭཱ མཧནྟེན སདྡེན ཀོཉྩནཱདཾ རཝི. སཏྠཱ གནྡྷཀུཊིཡཾ ནིསིནྣོཝ ཏསྶ མཱརབྷཱཝཾ ཉཏྭཱ, ‘‘མཱར, ཏཱདིསཱནཾ སཏསཧསྶེནཱཔི མམ པུཏྟསྶ བྷཡཾ ཨུཔྤཱདེཏུཾ ན སཀྐཱ. པུཏྟོ ཧི མེ ཨསནྟཱསཱི ཝཱིཏཏཎྷོ མཧཱཝཱིརིཡོ མཧཱཔཉྙོ’’ཏི ཝཏྭཱ ཨིམཱ གཱཐཱ ཨབྷཱསི –

༣༥༡.

‘‘ནིཊྛངྒཏོ ཨསནྟཱསཱི, ཝཱིཏཏཎྷོ ཨནངྒཎོ;

ཨཙྪིནྡི བྷཝསལླཱནི, ཨནྟིམོཡཾ སམུསྶཡོ.

༣༥༢.

‘‘ཝཱིཏཏཎྷོ ཨནཱདཱནོ, ནིརུཏྟིཔདཀོཝིདོ;

ཨཀྑརཱནཾ སནྣིཔཱཏཾ, ཛཉྙཱ པུབྦཱཔརཱནི ཙ;

ས ཝེ ཨནྟིམསཱརཱིརོ,

མཧཱཔཉྙོ མཧཱཔུརིསོཏི ཝུཙྩཏཱི’’ཏི.

ཏཏྠ ནིཊྛངྒཏོཏི ཨིམསྨིཾ སཱསནེ པབྦཛིཏཱནཾ ཨརཧཏྟཾ ནིཊྛཾ ནཱམ, ཏཾ གཏོ པཏྟོཏི ཨཏྠོ. ཨསནྟཱསཱིཏི ཨབྦྷནྟརེ རཱགསནྟཱསཱདཱིནཾ ཨབྷཱཝེན ཨསནྟསནཀོ. ཨཙྪིནྡི བྷཝསལླཱནཱིཏི སབྦཱནིཔི བྷཝགཱམཱིནི སལླཱནི ཨཙྪིནྡི. སམུསྶཡོཏི ཨཡཾ ཨེཏསྶ ཨནྟིམོ དེཧོ.

ཨནཱདཱནོཏི ཁནྡྷཱདཱིསུ ནིགྒཧཎོ. ནིརུཏྟིཔདཀོཝིདོཏི ནིརུཏྟིཡཉྩ སེསཔདེསུ ཙཱཏི ཙཏཱུསུཔི པཊིསམྦྷིདཱསུ ཚེཀོཏི ཨཏྠོ. ཨཀྑརཱནཾ སནྣིཔཱཏཾ, ཛཉྙཱ པུབྦཱཔརཱནི ཙཱཏི ཨཀྑརཱནཾ སནྣིཔཱཏསངྑཱཏཾ ཨཀྑརཔིཎྜཉྩ ཛཱནཱཏི, པུབྦཀྑརེན ཨཔརཀྑརཾ, ཨཔརཀྑརེན པུབྦཀྑརཉྩ ཛཱནཱཏི. པུབྦཀྑརེན ཨཔརཀྑརཾ ཛཱནཱཏི ནཱམ – ཨཱདིམྷི པཉྙཱཡམཱནེ མཛ྄ཛྷཔརིཡོསཱནེསུ ཨཔཉྙཱཡམཱནེསུཔི ‘‘ཨིམེསཾ ཨཀྑརཱནཾ ཨིདཾ མཛ྄ཛྷཾ, ཨིདཾ པརིཡོསཱན’’ནྟི ཛཱནཱཏི. ཨཔརཀྑརེན པུབྦཀྑརཾ ཛཱནཱཏི ནཱམ – ཨནྟེ པཉྙཱཡམཱནེ ཨཱདིམཛ྄ཛྷེསུ ཨཔཉྙཱཡམཱནེསུ ‘‘ཨིམེསཾ ཨཀྑརཱནཾ ཨིདཾ མཛ྄ཛྷཾ, ཨཡཾ ཨཱདཱི’’ཏི ཛཱནཱཏི. མཛ྄ཛྷེ པཉྙཱཡམཱནེཔི ‘‘ཨིམེསཾ ཨཀྑརཱནཾ ཨཡཾ ཨཱདི, ཨཡཾ ཨནྟོ’’ཏི ཛཱནཱཏི. ཨེཝཾ མཧཱཔཉྙོ. ས ཝེ ཨནྟིམསཱརཱིརོཏི ཨེས ཀོཊིཡཾ ཋིཏསརཱིརོ, མཧནྟཱནཾ ཨཏྠདྷམྨནིརུཏྟིཔཊིབྷཱནཱནཾ སཱིལཀྑནྡྷཱདཱིནཉྩ པརིགྒཱཧིཀཱཡ པཉྙཱཡ སམནྣཱགཏཏྟཱ མཧཱཔཉྙོ, ‘‘ཝིམུཏྟཙིཏྟཏྟཱ ཁྭཱཧཾ, སཱརིཔུཏྟ, མཧཱཔུརིསོཏི ཝདཱམཱི’’ཏི (སཾ. ནི. ༥.༣༧༧) ཝཙནཏོ ཝིམུཏྟཙིཏྟཏཱཡ ཙ མཧཱཔུརིསོཏི ཝུཙྩཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ. མཱརོཔི པཱཔིམཱ ‘‘ཛཱནཱཏི མཾ སམཎོ གོཏམོ’’ཏི ཏཏྠེཝནྟརདྷཱཡཱིཏི.

མཱརཝཏྠུ ཨཊྛམཾ.

༩. ཨུཔཀཱཛཱིཝཀཝཏྠུ

སབྦཱབྷིབྷཱུཏི ཨིམཾ དྷམྨདེསནཾ སཏྠཱ ཨནྟརཱམགྒེ ཨུཔཀཾ ཨཱཛཱིཝཀཾ ཨཱརབྦྷ ཀཐེསི.

ཨེཀསྨིཉྷི སམཡེ སཏྠཱ པཏྟསབྦཉྙུཏཉྙཱཎོ བོདྷིམཎྜེ སཏྟསཏྟཱཧཾ ཝཱིཏིནཱམེཏྭཱ ཨཏྟནོ པཏྟཙཱིཝརམཱདཱཡ དྷམྨཙཀྐཔཝཏྟནཏྠཾ བཱརཱཎསིཾ སནྡྷཱཡ ཨཊྛཱརསཡོཛནམགྒཾ པཊིཔནྣོ ཨནྟརཱམགྒེ ཨུཔཀཾ ཨཱཛཱིཝཀཾ ཨདྡས. སོཔི སཏྠཱརཾ དིསྭཱ ‘‘ཝིཔྤསནྣཱནི ཁོ ཏེ, ཨཱཝུསོ, ཨིནྡྲིཡཱནི, པརིསུདྡྷོ ཚཝིཝཎྞོ པརིཡོདཱཏོ, ཀཾསི ཏྭཾ, ཨཱཝུསོ, ཨུདྡིསྶ པབྦཛིཏོ, ཀོ ཝཱ ཏེ སཏྠཱ, ཀསྶ ཝཱ ཏྭཾ དྷམྨཾ རོཙེསཱི’’ཏི པུཙྪི. ཨཐསྶ སཏྠཱ ‘‘མཡ྄ཧཾ ཨུཔཛ྄ཛྷཱཡོ ཝཱ ཨཱཙརིཡོ ཝཱ ནཏྠཱི’’ཏི ཝཏྭཱ ཨིམཾ གཱཐམཱཧ –

༣༥༣.

‘‘སབྦཱབྷིབྷཱུ སབྦཝིདཱུཧམསྨི,

སབྦེསུ དྷམྨེསུ ཨནཱུཔལིཏྟོ;

སབྦཉྫཧོ ཏཎྷཀྑཡེ ཝིམུཏྟོ,

སཡཾ ཨབྷིཉྙཱཡ ཀམུདྡིསེཡྻ’’ནྟི.

ཏཏྠ སབྦཱབྷིབྷཱུཏི སབྦེསཾ ཏེབྷཱུམཀདྷམྨཱནཾ ཨབྷིབྷཝནཏོ སབྦཱབྷིབྷཱུ. སབྦཝིདཱུཏི ཝིདིཏསབྦཙཏུབྷཱུམཀདྷམྨོ. སབྦེསུ དྷམྨེསཱུཏི སབྦེསུཔི ཏེབྷཱུམཀདྷམྨེསུ ཏཎྷཱདིཊྛཱིཧི ཨནཱུཔལིཏྟོ. སབྦཉྫཧོཏི སབྦེ ཏེབྷཱུམཀདྷམྨེ ཛཧིཏྭཱ ཋིཏོ. ཏཎྷཀྑཡེ ཝིམུཏྟོཏི ཏཎྷཀྑཡནྟེ ཨུཔྤཱདིཏེ ཏཎྷཀྑཡསངྑཱཏེ ཨརཧཏྟེ ཨསེཁཱཡ ཝིམུཏྟིཡཱ ཝིམུཏྟོ. སཡཾ ཨབྷིཉྙཱཡཱཏི ཨབྷིཉྙེཡྻཱདིབྷེདེ དྷམྨེ སཡམེཝ ཛཱནིཏྭཱ. ཀམུདྡིསེཡྻནྟི ‘‘ཨཡཾ མེ ཨུཔཛ྄ཛྷཱཡོ ཝཱ ཨཱཙརིཡོ ཝཱ’’ཏི ཀཾ ནཱམ ཨུདྡིསེཡྻནྟི.

དེསནཱཝསཱནེ ཨུཔཀོ ཨཱཛཱིཝཀོ ཏཐཱགཏསྶ ཝཙནཾ ནེཝཱབྷིནནྡི, ན པཊིཀྐོསི. སཱིསཾ པན ཙཱལེཏྭཱ ཛིཝ྄ཧཾ ནིལླཱལེ༹ཏྭཱ ཨེཀཔདིཀམགྒཾ གཧེཏྭཱ ཨཉྙཏརཾ ལུདྡཀནིཝཱསནཊྛཱནཾ ཨགམཱསཱིཏི.

ཨུཔཀཱཛཱིཝཀཝཏྠུ ནཝམཾ.

༡༠. སཀྐཔཉྷཝཏྠུ

སབྦདཱནནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཀྐཾ དེཝརཱཛཱནཾ ཨཱརབྦྷ ཀཐེསི.

ཨེཀསྨིཉྷི སམཡེ ཏཱཝཏིཾསདེཝལོཀེ དེཝཏཱ སནྣིཔཏིཏྭཱ ཙཏྟཱརོ པཉྷེ སམུཊྛཱཔེསུཾ ‘‘ཀཏརཾ དཱནཾ ནུ ཁོ དཱནེསུ, ཀཏརོ རསོ རསེསུ, ཀཏརཱ རཏི རཏཱིསུ ཛེཊྛཀཱ, ཏཎྷཀྑཡོཝ ཀསྨཱ ཛེཊྛཀོཏི ཝུཙྩཏཱི’’ཏི? ཏེ པཉྷེ ཨེཀཱ དེཝཏཱཔི ཝིནིཙྪིཏུཾ ནཱསཀྑི. ཨེཀོ པན དེཝོ ཨེཀཾ དེཝཾ, སོཔི ཨཔརནྟི ཨེཝཾ ཨཉྙམཉྙཾ པུཙྪནྟཱ དསསུ ཙཀྐཝཱལ༹སཧསྶེསུ དྭཱདས སཾཝཙྪརཱནི ཝིཙརིཾསུ. ཨེཏྟཀེནཱཔི ཀཱལེན པཉྷཱནཾ ཨཏྠཾ ཨདིསྭཱ དསསཧསྶཙཀྐཝཱལ༹དེཝཏཱ སནྣིཔཏིཏྭཱ ཙཏུནྣཾ མཧཱརཱཛཱནཾ སནྟིཀཾ གནྟྭཱ ‘‘ཀིཾ, ཏཱཏཱ, མཧཱདེཝཏཱསནྣིཔཱཏོ’’ཏི ཝུཏྟེ ‘‘ཙཏྟཱརོ པཉྷེ སམུཊྛཱཔེཏྭཱ ཝིནིཙྪིཏུཾ ཨསཀྐོནྟཱ ཏུམྷཱཀཾ སནྟིཀཾ ཨཱགཏམྷཱ’’ཏི. ‘‘ཀིཾ པཉྷཾ ནཱམེཏཾ, ཏཱཏཱ’’ཏི. ‘‘དཱནརསརཏཱིསུ ཀཏམཱ དཱནརསརཏཱི ནུ ཁོ སེཊྛཱ, ཏཎྷཀྑཡོཝ ཀསྨཱ སེཊྛོ’’ཏི ཨིམེ པཉྷེ ཝིནིཙྪིཏུཾ ཨསཀྐོནྟཱ ཨཱགཏམྷཱཏི. ཏཱཏཱ, མཡམྤི ཨིམེསཾ ཨཏྠེ ན ཛཱནཱམ, ཨམྷཱཀཾ པན རཱཛཱ ཛནསཧསྶེན ཙིནྟིཏེ ཨཏྠེ ཙིནྟེཏྭཱ ཏངྑཎེནེཝ ཛཱནཱཏི, སོ ཨམྷེཧི པཉྙཱཡ ཙ པུཉྙེན ཙ ཝིསིཊྛོ, ཨེཐ, ཏསྶ སནྟིཀཾ གཙྪཱམཱཏི ཏམེཝ དེཝགཎཾ ཨཱདཱཡ སཀྐསྶ དེཝརཉྙོ སནྟིཀཾ གནྟྭཱ ཏེནཱཔི ‘‘ཀིཾ, ཏཱཏཱ, མཧནྟོ དེཝསནྣིཔཱཏོ’’ཏི ཝུཏྟེ ཏམཏྠཾ ཨཱརོཙེསུཾ. ‘‘ཏཱཏཱ, ཨིམེསཾ པཉྷཱནཾ ཨཏྠཾ ཨཉྙོཔི ཛཱནིཏུཾ ན སཀྐོཏི, བུདྡྷཝིསཡཱ ཧེཏེ. སཏྠཱ པནེཏརཧི ཀཧཾ ཝིཧརཏཱི’’ཏི པུཙྪིཏྭཱ ‘‘ཛེཏཝནེ’’ཏི སུཏྭཱ ‘‘ཨེཐ, ཏསྶ སནྟིཀཾ གམིསྶཱམཱ’’ཏི དེཝགཎེན སདྡྷིཾ རཏྟིབྷཱགེ སཀལཾ ཛེཏཝནཾ ཨོབྷཱསེཏྭཱ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ཋིཏོ ‘‘ཀིཾ, མཧཱརཱཛ, མཧཏཱ དེཝསངྒྷེན ཨཱགཏོསཱི’’ཏི ཝུཏྟེ, ‘‘བྷནྟེ, དེཝགཎེན ཨིམེ ནཱམ པཉྷཱ སམུཊྛཱཔིཏཱ, ཨཉྙོ ཨིམེསཾ ཨཏྠཾ ཛཱནིཏུཾ སམཏྠོ ནཱམ ནཏྠི, ཨིམེསཾ ནོ ཨཏྠཾ པཀཱསེཐཱ’’ཏི ཨཱཧ.

སཏྠཱ ‘‘སཱདྷུ མཧཱརཱཛ, མཡཱ ཧི པཱརམིཡོ པཱུརེཏྭཱ མཧཱཔརིཙྩཱགེ པརིཙྩཛིཏྭཱ ཏུམྷཱདིསཱནཾ ཀངྑཙྪེདནཏྠམེཝ སབྦཉྙུཏཉྙཱཎཾ པཊིཝིདྡྷཾ, ཏཡཱ པུཙྪིཏཔཉྷེསུ ཧི སབྦདཱནཱནཾ དྷམྨདཱནཾ སེཊྛཾ, སབྦརསཱནཾ དྷམྨརསོ སེཊྛོ, སབྦརཏཱིནཾ དྷམྨརཏི སེཊྛཱ, ཏཎྷཀྑཡོ པན ཨརཧཏྟཾ སམྤཱཔཀཏྟཱ སེཊྛོཡེཝཱ’’ཏི ཝཏྭཱ ཨིམཾ གཱཐམཱཧ –

༣༥༤.

‘‘སབྦདཱནཾ དྷམྨདཱནཾ ཛིནཱཏི,

སབྦརསཾ དྷམྨརསོ ཛིནཱཏི;

སབྦརཏིཾ དྷམྨརཏི ཛིནཱཏི,

ཏཎྷཀྑཡོ སབྦདུཀྑཾ ཛིནཱཏཱི’’ཏི.

ཏཏྠ སབྦདཱནཾ དྷམྨདཱནནྟི སཙེཔི ཧི ཙཀྐཝཱལ༹གབྦྷེ ཡཱཝ བྲཧྨལོཀཱ ནིརནྟརཾ ཀཏྭཱ སནྣིསིནྣཱནཾ བུདྡྷཔཙྩེཀབུདྡྷཁཱིཎཱསཝཱནཾ ཀདལིགབྦྷསདིསཱནི ཙཱིཝརཱནི དདེཡྻ, ཏསྨིཾ སམཱགམེ ཙཏུཔྤདིཀཱཡ གཱཐཱཡ ཀཏཱནུམོདནཱཝ སེཊྛཱ. ཏཉྷི དཱནཾ ཏསྶཱ གཱཐཱཡ སོལ༹སིཾ ཀལཾ ནཱགྒྷཏི. ཨེཝཾ དྷམྨསྶ དེསནཱཔི ཝཱཙནམྤི སཝནམྤི མཧནྟཾ. ཡེན ཙ པུགྒལེན བཧཱུནཾ ཏཾ དྷམྨསྶཝནཾ ཀཱརིཏཾ, ཏསྶེཝ ཨཱནིསཾསོ མཧཱ. ཏཐཱརཱུཔཱཡ ཨེཝ པརིསཱཡ པཎཱིཏཔིཎྜཔཱཏསྶ པཏྟེ པཱུརེཏྭཱ དིནྣདཱནཏོཔི སཔྤིཏེལཱདཱིནཾ པཏྟེ པཱུརེཏྭཱ དིནྣབྷེསཛྫདཱནཏོཔི མཧཱཝིཧཱརསདིསཱནཾ ཝིཧཱརཱནཉྩ ལོཧཔཱསཱདསདིསཱནཉྩ པཱསཱདཱནཾ ཨནེཀཱནི སཏསཧསྶཱནི ཀཱརེཏྭཱ དིནྣསེནཱསནདཱནཏོཔི ཨནཱཐཔིཎྜིཀཱདཱིཧི ཝིཧཱརེ ཨཱརབྦྷ ཀཏཔརིཙྩཱགཏོཔི ཨནྟམསོ ཙཏུཔྤདིཀཱཡ གཱཐཱཡ ཨནུམོདནཱཝསེནཱཔི པཝཏྟིཏཾ དྷམྨདཱནམེཝ ཝརཾ སེཊྛཾ. ཀིཾ ཀཱརཎཱ? ཨེཝརཱུཔཱནི ཧི པུཉྙཱནི ཀརོནྟཱ དྷམྨཾ སུཏྭཱཝ ཀརོནྟི, ནོ ཨསུཏྭཱ. སཙེ ཧི ཨིམེ སཏྟཱ དྷམྨཾ ན སུཎེཡྻུཾ, ཨུལུ༹ངྐམཏྟཾ ཡཱགུམྤི ཀཊཙྪུམཏྟཾ བྷཏྟམྤི ན དདེཡྻུཾ. ཨིམིནཱ ཀཱརཎེན སབྦདཱནེཧི དྷམྨདཱནམེཝ སེཊྛཾ. ཨཔིཙ ཋཔེཏྭཱ བུདྡྷེ ཙ པཙྩེཀབུདྡྷེ ཙ སཀལཀཔྤཾ དེཝེ ཝསྶནྟེ ཨུདཀབིནྡཱུནི གཎེཏུཾ སམཏྠཱཡ པཉྙཱཡ སམནྣཱགཏཱ སཱརིཔུཏྟཱདཡོཔི ཨཏྟནོ དྷམྨཏཱཡ སོཏཱཔཏྟིཕལཱདཱིནི ཨདྷིགནྟུཾ ནཱསཀྑིཾསུ, ཨསྶཛིཏྠེརཱདཱིཧི ཀཐིཏདྷམྨཾ སུཏྭཱ སོཏཱཔཏྟིཕལཾ སཙྪིཀརིཾསུ, སཏྠུ དྷམྨདེསནཱཡ སཱཝཀཔཱརམཱིཉཱཎཾ སཙྪིཀརིཾསུ. ཨིམིནཱཔི ཀཱརཎེན, མཧཱརཱཛ, དྷམྨདཱནམེཝ སེཊྛཾ. ཏེན ཝུཏྟཾ – ‘‘སབྦདཱནཾ དྷམྨདཱནཾ ཛིནཱཏཱི’’ཏི.

སབྦེ པན གནྡྷརསཱདཡོཔི རསཱ ཨུཀྐཾསཏོ དེཝཏཱནཾ སུདྷཱབྷོཛནརསོཔི སཾསཱརཝཊྚེ པཱཏེཏྭཱ དུཀྑཱནུབྷཝནསྶེཝ པཙྩཡོ. ཡོ པནེས སཏྟཏིཾསབོདྷིཔཀྑིཡདྷམྨསངྑཱཏོ ཙ ནཝལོཀུཏྟརདྷམྨསངྑཱཏོ ཙ དྷམྨརསོ, ཨཡམེཝ སབྦརསཱནཾ སེཊྛོ. ཏེན ཝུཏྟཾ – ‘‘སབྦརསཾ དྷམྨརསོ ཛིནཱཏཱི’’ཏི. ཡཱཔེསཱ པུཏྟརཏིདྷཱིཏུརཏིདྷནརཏིཨིཏྠིརཏིནཙྩགཱིཏཝཱདིཏཱདིརཏིཔབྷེདཱ ཙ ཨནེཀཔྤབྷེདཱ རཏཱི, སཱཔི སཾསཱརཝཊྚེ པཱཏེཏྭཱ དུཀྑཱནུབྷཝནསྶེཝ པཙྩཡོ. ཡཱ པནེསཱ དྷམྨཾ ཀཐེནྟསྶ ཝཱ སུཎནྟསྶ ཝཱ ཝཱཙེནྟསྶ ཝཱ ཨནྟོ ཨུཔྤཛྫམཱནཱ པཱིཏི ཨུདགྒབྷཱཝཾ ཛནེཏི, ཨསྶཱུནི པཝཏྟེཏི, ལོམཧཾསཾ ཛནེཏི, སཱཡཾ སཾསཱརཝཊྚསྶ ཨནྟཾ ཀཏྭཱ ཨརཧཏྟཔརིཡོསཱནཱ ཧོཏི. ཏསྨཱ སབྦརཏཱིནཾ ཨེཝརཱུཔཱ དྷམྨརཏིཡེཝ སེཊྛཱ. ཏེན ཝུཏྟཾ – ‘‘སབྦརཏིཾ དྷམྨརཏི ཛིནཱཏཱི’’ཏི ཏཎྷཀྑཡོ པན ཏཎྷཱཡ ཁཡནྟེ ཨུཔྤནྣཾ ཨརཧཏྟཾ སཀལསྶཔི ཝཊྚདུཀྑསྶ ཨབྷིབྷཝནཏོ སབྦསེཊྛམེཝ. ཏེན ཝུཏྟཾ – ‘‘ཏཎྷཀྑཡོ སབྦདུཀྑཾ ཛིནཱཏཱི’’ཏི.

ཨེཝཾ སཏྠརི ཨིམིསྶཱ གཱཐཱཡ ཨཏྠཾ ཀཐེནྟེཡེཝ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི. སཀྐོཔི སཏྠུ དྷམྨཀཐཾ སུཏྭཱ སཏྠཱརཾ ཝནྡིཏྭཱ ཨེཝམཱཧ – ‘‘བྷནྟེ, ཨེཝཾཛེཊྛཀེ ནཱམ དྷམྨདཱནེ ཀིམཏྠཾ ཨམྷཱཀཾ པཏྟིཾ ན དཱཔེཐ, ཨིཏོ པཊྛཱཡ ནོ བྷིཀྑུསངྒྷསྶ ཀཐེཏྭཱ པཏྟིཾ དཱཔེཐ, བྷནྟེ’’ཏི. སཏྠཱ ཏསྶ ཝཙནཾ སུཏྭཱ བྷིཀྑུསངྒྷཾ སནྣིཔཱཏེཏྭཱ, ‘‘བྷིཀྑཝེ, ཨཛྫཱདིཾ ཀཏྭཱ མཧཱདྷམྨསྶཝནཾ ཝཱ པཱཀཏིཀདྷམྨསྶཝནཾ ཝཱ ཨུཔནིསིནྣཀཐཾ ཝཱ ཨནྟམསོ ཨནུམོདནམྤི ཀཐེཏྭཱ སབྦསཏྟཱནཾ པཏྟིཾ དདེཡྻཱཐཱ’’ཏི ཨཱཧ.

སཀྐཔཉྷཝཏྠུ དསམཾ.

༡༡. ཨཔུཏྟཀསེཊྛིཝཏྠུ

ཧནནྟི བྷོགཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཔུཏྟཀསེཊྛིཾ ནཱམ ཨཱརབྦྷ ཀཐེསི.

ཏསྶ ཀིར ཀཱལཀིརིཡཾ སུཏྭཱ རཱཛཱ པསེནདི ཀོསལོ ‘‘ཨཔུཏྟཀཾ སཱཔཏེཡྻཾ ཀསྶ པཱཔུཎཱཏཱི’’ཏི པུཙྪིཏྭཱ ‘‘རཉྙོ’’ཏི སུཏྭཱ སཏྟཧི དིཝསེཧི ཏསྶ གེཧཏོ དྷནཾ རཱཛཀུལཾ ཨབྷིཧརཱཔེཏྭཱ སཏྠུ སནྟིཀཾ ཨུཔསངྐམིཏྭཱ ‘‘ཧནྡ ཀུཏོ ནུ ཏྭཾ, མཧཱརཱཛ, ཨཱགཙྪསི དིཝཱདིཝསྶཱ’’ཏི ཝུཏྟེ ‘‘ཨིདྷ, བྷནྟེ, སཱཝཏྠིཡཾ སེཊྛི, གཧཔཏི, ཀཱལཀཏོ, ཏམཧཾ ཨཔུཏྟཀཾ སཱཔཏེཡྻཾ རཱཛནྟེཔུརཾ ཨབྷིཧརིཏྭཱ ཨཱགཙྪཱམཱི’’ཏི ཨཱཧ. སབྦཾ སུཏྟེ (སཾ. ནི. ༡.༡༣༠) ཨཱགཏནཡེནེཝ ཝེདིཏབྦཾ.

སོ ཀིར སུཝཎྞཔཱཏིཡཱ ནཱནགྒརསབྷོཛནེ ཨུཔནཱིཏེ ‘‘ཨེཝརཱུཔཾ ནཱམ མནུསྶཱ བྷུཉྫནྟི, ཀིཾ ཏུམྷེ མཡཱ སདྡྷིཾ ཨིམསྨིཾ གེཧེ ཀེལི༹ཾ ཀརོཐཱ’’ཏི བྷོཛནེ ཨུཔཊྛིཏེ ལེཌྜུདཎྜཱདཱིཧི པཧརིཏྭཱ པལཱཔེཏྭཱ ‘‘ཨིདཾ མནུསྶཱནཾ བྷོཛན’’ནྟི ཀཎཱཛཀཾ བྷུཉྫཏི བིལ༹ངྒདུཏིཡཾ. ཝཏྠཡཱནཚཏྟེསུཔི མནཱཔེསུ ཨུཔཊྛཱཔིཏེསུ ཏེ མནུསྶེ ལེཌྜུདཎྜཱདཱིཧི པཧརནྟོ པལཱཔེཏྭཱ སཱཎཱནི དྷཱརེཏི, ཛཛྫརརཐཀེན ཡཱཏི པཎྞཚཏྟཀེན དྷཱརིཡམཱནེནཱཏི ཨེཝཾ རཉྙཱ ཨཱརོཙིཏེ སཏྠཱ ཏསྶ པུབྦཀམྨཾ ཀཐེསི.

བྷཱུཏཔུབྦཾ སོ, མཧཱརཱཛ, སེཊྛི, གཧཔཏི, ཏགརསིཁིཾ ནཱམ པཙྩེཀབུདྡྷཾ པིཎྜཔཱཏེན པཊིཔཱདེསི. ‘‘དེཐ སམཎསྶ པིཎྜ’’ནྟི ཝཏྭཱ སོ ཨུཊྛཱཡཱསནཱ པཀྐཱམི. ཏསྨིཾ ཀིར ཨསྶདྡྷེ བཱལེ ཨེཝཾ ཝཏྭཱ པཀྐནྟེ ཏསྶ བྷརིཡཱ སདྡྷཱ པསནྣཱ ‘‘ཙིརསྶཾ ཝཏ མེ ཨིམསྶ མུཁཏོ ‘དེཧཱི’ཏི ཝཙནཾ སུཏཾ, ཨཛྫ མམ མནོརཐཾ པཱུརེནྟཱི པིཎྜཔཱཏཾ དསྶཱམཱི’’ཏི པཙྩེཀབུདྡྷསྶ པཏྟཾ གཧེཏྭཱ པཎཱིཏབྷོཛནསྶ པཱུརེཏྭཱ ཨདཱསི. སོཔི ནིཝཏྟམཱནོ ཏཾ དིསྭཱ ‘‘ཀིཾ, སམཎ, ཀིཉྩི ཏེ ལདྡྷ’’ནྟི པཏྟཾ གཧེཏྭཱ པཎཱིཏཔིཎྜཔཱཏཾ དིསྭཱ ཝིཔྤཊིསཱརཱི ཧུཏྭཱ ཨེཝཾ ཙིནྟེསི – ‘‘ཝརམེཏཾ པིཎྜཔཱཏཾ དཱསཱ ཝཱ ཀམྨཀརཱ ཝཱ བྷུཉྫེཡྻུཾ. ཏེ ཧི ཨིམཾ བྷུཉྫིཏྭཱ མཡ྄ཧཾ ཀམྨཾ ཀརིསྶནྟི, ཨཡཾ པན གནྟྭཱ བྷུཉྫིཏྭཱ ནིདྡཱཡིསྶཏི, ནཊྛོ མེ སོ པིཎྜཔཱཏོ’’ཏི. སོ བྷཱཏུ ཙ པན ཨེཀཔུཏྟཀཾ སཱཔཏེཡྻསྶ ཀཱརཎཱ ཛཱིཝིཏཱ ཝོརོཔེསི. སོ ཀིརསྶ ཨངྒུལིཾ གཧེཏྭཱ ཝིཙརནྟོ ‘‘ཨིདཾ མཡ྄ཧཾ པིཏུསནྟཀཾ ཡཱནཀཾ, ཨཡཾ ཏསྶ གོཎོ’’ཏིཨཱདཱིནི ཨཱཧ. ཨཐ ནཾ སོ སེཊྛི ‘‘ཨིདཱནི ཏཱཝེས ཨེཝཾ ཝདེཏི, ཨིམསྶ པན ཝུཌྜྷིཔྤཏྟཀཱལེ ཨིམསྨིཾ གེཧེ བྷོགེ ཀོ རཀྑིསྶཏཱི’’ཏི ཏཾ ཨརཉྙཾ ནེཏྭཱ ཨེཀསྨིཾ གཙྪམཱུལེ གཱིཝཱཡ གཧེཏྭཱ མཱུལཀནྡཾ ཝིཡ གཱིཝཾ ཕཱལེཏྭཱ མཱརེཏྭཱ ཏཏྠེཝ ཚཌྜེསི. ཨིདམསྶ པུབྦཀམྨཾ. ཏེན ཝུཏྟཾ –

‘‘ཡཾ ཁོ སོ, མཧཱརཱཛ, སེཊྛི, གཧཔཏི, ཏགརསིཁིཾ པཙྩེཀབུདྡྷཾ པིཎྜཔཱཏེན པཊིཔཱདེསི, ཏསྶ ཀམྨསྶ ཝིཔཱཀེན སཏྟཀྑཏྟུཾ སུགཏིཾ སགྒཾ ལོཀཾ ཨུཔཔཛྫི, ཏསྶེཝ ཀམྨསྶ ཝིཔཱཀཱཝསེསེན ཨིམིསྶཱཡེཝ སཱཝཏྠིཡཱ སཏྟཀྑཏྟུཾ སེཊྛིཏྟཾ ཀཱརེསི. ཡཾ ཁོ སོ, མཧཱརཱཛ, སེཊྛི, གཧཔཏི, དཏྭཱ པཙྪཱ ཝིཔྤཊིསཱརཱི ཨཧོསི ‘ཝརམེཏཾ པིཎྜཔཱཏཾ དཱསཱ ཝཱ ཀམྨཀརཱ ཝཱ བྷུཉྫེཡྻུ’ནྟི, ཏསྶ ཀམྨསྶ ཝིཔཱཀེན ནཱསྶུལཱ༹རཱཡ བྷཏྟབྷོགཱཡ ཙིཏྟཾ ནམཏི, ནཱསྶུལཱ༹རཱཡ ཝཏྠབྷོགཱཡ, ནཱསྶུལཱ༹རཱཡ ཡཱནབྷོགཱཡ, ནཱསྶུལཱ༹རཱནཾ པཉྩནྣཾ ཀཱམགུཎཱནཾ བྷོགཱཡ ཙིཏྟཾ ནམཏི. ཡཾ ཁོ སོ, མཧཱརཱཛ, སེཊྛི, གཧཔཏི, བྷཱཏུ ཙ པན ཨེཀཔུཏྟཾ སཱཔཏེཡྻསྶ ཀཱརཎཱ ཛཱིཝིཏཱ ཝོརོཔེསི, ཏསྶ ཀམྨསྶ ཝིཔཱཀེན བཧཱུནི ཝསྶསཏཱནི བཧཱུནི ཝསྶསཧསྶཱནི བཧཱུནི ཝསྶསཏསཧསྶཱནི ནིརཡེ པཙྩིཏྠ, ཏསྶེཝ ཀམྨསྶ ཝིཔཱཀཱཝསེསེན ཨིདཾ སཏྟམཾ ཨཔུཏྟཀཾ སཱཔཏེཡྻཾ རཱཛཀོསཾ པཝེསེཏི. ཏསྶ ཁོ པན, མཧཱརཱཛ, སེཊྛིསྶ གཧཔཏིསྶ པུརཱཎཉྩ པུཉྙཾ པརིཀྑཱིཎཾ, ནཝཉྩ པུཉྙཾ ཨནུཔཙིཏཾ. ཨཛྫ པན, མཧཱརཱཛ, སེཊྛི, གཧཔཏི, མཧཱརོརུཝེ ནིརཡེ པཙྩཏཱི’’ཏི (སཾ. ནི. ༡.༡༣༡).

རཱཛཱ སཏྠུ ཝཙནཾ སུཏྭཱ ‘‘ཨཧོ, བྷནྟེ, བྷཱརིཡཾ ཀམྨཾ, ཨེཏྟཀེ ནཱམ བྷོགེ ཝིཛྫམཱནེ ནེཝ ཨཏྟནཱ པརིབྷུཉྫི, ན ཏུམྷཱདིསེ བུདྡྷེ དྷུརཝིཧཱརེ ཝིཧརནྟེ པུཉྙཀམྨཾ ཨཀཱསཱི’’ཏི ཨཱཧ. སཏྠཱ ‘‘ཨེཝམེཏཾ, མཧཱརཱཛ, དུམྨེདྷཔུགྒལཱ ནཱམ བྷོགེ ལབྷིཏྭཱ ནིབྦཱནཾ ན གཝེསནྟི, བྷོགེ ནིསྶཱཡ ཨུཔྤནྣཏཎྷཱ པནེཏེ དཱིགྷརཏྟཾ ཧནཏཱི’’ཏི ཝཏྭཱ ཨིམཾ གཱཐམཱཧ –

༣༥༥.

‘‘ཧནནྟི བྷོགཱ དུམྨེདྷཾ, ནོ ཙ པཱརགཝེསིནོ;

བྷོགཏཎྷཱཡ དུམྨེདྷོ, ཧནྟི ཨཉྙེཝ ཨཏྟན’’ནྟི.

ཏཏྠ ནོ ཙ པཱརགཝེསིནོཏི ཡེ པན ནིབྦཱནཔཱརགཝེསིནོ པུགྒལཱ, ན ཏེ བྷོགཱ ཧནནྟི. ཨཉྙེཝ ཨཏྟནནྟི བྷོགེ ནིསྶཱཡ ཨུཔྤནྣཱཡ ཏཎྷཱཡ དུཔྤཉྙོ པུགྒལོ པརེ ཝིཡ ཨཏྟཱནམེཝ ཧནཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཔུཏྟཀསེཊྛིཝཏྠུ ཨེཀཱདསམཾ.

༡༢. ཨངྐུརཝཏྠུ

ཏིཎདོསཱནཱིཏི ཨིམཾ དྷམྨདེསནཾ སཏྠཱ པཎྜུཀམྦལསིལཱཡཾ ཝིཧརནྟོ ཨངྐུརཾ ཨཱརབྦྷ ཀཐེསི. ཝཏྠུ ‘‘ཡེ ཛྷཱནཔྤསུཏཱ དྷཱིརཱ’’ཏི (དྷ. པ. ༡༨༡) གཱཐཱཡ ཝིཏྠཱརིཏམེཝ. ཝུཏྟཉྷེཏཾ ཏཏྠ ཨིནྡཀཾ ཨཱརབྦྷ. སོ ཀིར ཨནུརུདྡྷཏྠེརསྶ ཨནྟོགཱམཾ པིཎྜཱཡ པཝིཊྛསྶ ཨཏྟནོ ཨཱབྷཏཾ ཀཊཙྪུམཏྟཀཾ བྷིཀྑཾ དཱཔེསི. ཏདསྶ པུཉྙཾ ཨངྐུརེན དསཝསྶསཧསྶཱནི དྭཱདསཡོཛནིཀཾ ཨུདྡྷནཔནྟིཾ ཀཏྭཱ དིནྣདཱནཏོ མཧཔྥལཏརཾ ཛཱཏཾ. ཏསྨཱ ཨེཝམཱཧ. ཨེཝཾ ཝུཏྟེ སཏྠཱ, ‘‘ཨངྐུར, དཱནཾ ནཱམ ཝིཙེཡྻ དཱཏུཾ ཝཊྚཏི, ཨེཝཾ ཏཾ སུཁེཏྟེ སུཝུཏྟབཱིཛཾ ཝིཡ མཧཔྥལཾ ཧོཏི. ཏྭཾ པན ཏཐཱ ནཱཀཱསི, ཏེན ཏེ དཱནཾ ན མཧཔྥལཾ ཛཱཏ’’ནྟི ཨིམམཏྠཾ ཝིབྷཱཝེནྟོ –

‘‘ཝིཙེཡྻ དཱནཾ དཱཏབྦཾ, ཡཏྠ དིནྣཾ མཧཔྥལཾ;

ཝིཙེཡྻ དཱནཾ སུགཏཔྤསཏྠཾ,

ཡེ དཀྑིཎེཡྻཱ ཨིདྷ ཛཱིཝལོཀེ;

ཨེཏེསུ དིནྣཱནི མཧཔྥལཱནི,

བཱིཛཱནི ཝུཏྟཱནི ཡཐཱསུཁེཏྟེ’’ཏི. (པེ. ཝ. ༣༢༩) –

ཝཏྭཱ ཨུཏྟརིམྤི དྷམྨཾ དེསེནྟོ ཨིམཱ གཱཐཱ ཨབྷཱསི –

༣༥༦.

‘‘ཏིཎདོསཱནི ཁེཏྟཱནི, རཱགདོསཱ ཨཡཾ པཛཱ;

ཏསྨཱ ཧི ཝཱིཏརཱགེསུ, དིནྣཾ ཧོཏི མཧཔྥལཾ.

༣༥༧.

‘‘ཏིཎདོསཱནི ཁེཏྟཱནི, དོསདོསཱ ཨཡཾ པཛཱ;

ཏསྨཱ ཧི ཝཱིཏདོསེསུ, དིནྣཾ ཧོཏི མཧཔྥལཾ.

༣༥༨.

‘‘ཏིཎདོསཱནི ཁེཏྟཱནི, མོཧདོསཱ ཨཡཾ པཛཱ;

ཏསྨཱ ཧི ཝཱིཏམོཧེསུ, དིནྣཾ ཧོཏི མཧཔྥལཾ.

༣༥༩.

‘‘ཏིཎདོསཱནི ཁེཏྟཱནི, ཨིཙྪཱདོསཱ ཨཡཾ པཛཱ;

ཏསྨཱ ཧི ཝིགཏིཙྪེསུ, དིནྣཾ ཧོཏི མཧཔྥལ’’ནྟི.

ཏཏྠ ཏིཎདོསཱནཱིཏི སཱམཱཀཱདཱིནི ཏིཎཱནི ཨུཊྛཧནྟཱནི པུབྦཎྞཱཔརཎྞཱནི ཁེཏྟཱནི དཱུསེནྟི, ཏེན ཏཱནི ན བཧུཕལཱནི ཧོནྟི. ཨེཝཾ སཏྟཱནམྤི ཨནྟོ རཱགོ ཨུཔྤཛྫནྟོ སཏྟེ དཱུསེཏི, ཏེན ཏེསུ དིནྣཾ མཧཔྥལཾ ན ཧོཏི. ཁཱིཎཱསཝེསུ དིནྣཾ པན མཧཔྥལཾ ཧོཏི. ཏེན ཝུཏྟཾ –

‘‘ཏིཎདོསཱནི ཁེཏྟཱནི, རཱགདོསཱ ཨཡཾ པཛཱ;

ཏསྨཱ ཧི ཝཱིཏརཱགེསུ, དིནྣཾ ཧོཏི མཧཔྥལ’’ནྟི. –

སེསགཱཐཱསུཔི ཨེསེཝ ནཡོ.

དེསནཱཝསཱནེ ཨངྐུརོ ཙ ཨིནྡཀོ ཙ སོཏཱཔཏྟིཕལེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཨངྐུརཝཏྠུ དྭཱདསམཾ.

ཏཎྷཱཝགྒཝཎྞནཱ ནིཊྛིཏཱ.

ཙཏུཝཱིསཏིམོ ཝགྒོ.

༢༥. བྷིཀྑུཝགྒོ

༡. པཉྩབྷིཀྑུཝཏྠུ

ཙཀྑུནཱ སཾཝརོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩ བྷིཀྑཱུ ཨཱརབྦྷ ཀཐེསི.

ཏེསུ ཀིར ཨེཀེཀོ ཙཀྑུདྭཱརཱདཱིསུ པཉྩསུ དྭཱརེསུ ཨེཀེཀམེཝ རཀྑི. ཨཐེཀདིཝསཾ སནྣིཔཏིཏྭཱ ‘‘ཨཧཾ དུརཀྑཾ རཀྑཱམི, ཨཧཾ དུརཀྑཾ རཀྑཱམཱི’’ཏི ཝིཝདིཏྭཱ ‘‘སཏྠཱརཾ པུཙྪིཏྭཱ ཨིམམཏྠཾ ཛཱནིསྶཱམཱ’’ཏི སཏྠཱརཾ ཨུཔསངྐམིཏྭཱ, ‘‘བྷནྟེ, མཡཾ ཙཀྑུདྭཱརཱདཱིནི རཀྑནྟཱ ཨཏྟནོ ཨཏྟནོ རཀྑནདྭཱརམེཝ དུརཀྑནྟི མཉྙཱམ, ཀོ ནུ ཁོ ཨམྷེསུ དུརཀྑཾ རཀྑཏཱི’’ཏི པུཙྪིཾསུ. སཏྠཱ ཨེཀཾ བྷིཀྑུམྤི ཨནོསཱདེཏྭཱ, ‘‘བྷིཀྑཝེ, སབྦཱནི པེཏཱནི དུརཀྑཱནེཝ, ཨཔི ཙ ཁོ པན ཏུམྷེ ན ཨིདཱནེཝ པཉྩསུ ཋཱནེསུ ཨསཾཝུཏཱ, པུབྦེཔི ཨསཾཝུཏཱ, ཨསཾཝུཏཏྟཱཡེཝ ཙ པཎྜིཏཱནཾ ཨོཝཱདེ ཨཝཏྟིཏྭཱ ཛཱིཝིཏཀྑཡཾ པཱཔུཎིཏྠཱ’’ཏི ཝཏྭཱ ‘‘ཀདཱ, བྷནྟེ’’ཏི ཏེཧི ཡཱཙིཏོ ཨཏཱིཏེ ཏཀྐསིལཛཱཏཀསྶ ཝཏྠུཾ ཝིཏྠཱརེཏྭཱ རཀྑསཱིནཾ ཝསེན རཱཛཀུལེ ཛཱིཝིཏཀྑཡཾ པཏྟེ པཏྟཱབྷིསེཀེན མཧཱསཏྟེན སེཏཙྪཏྟསྶ ཧེཊྛཱ རཱཛཱསནེ ནིསིནྣེན ཨཏྟནོ སིརིསམྤཏྟིཾ ཨོལོཀེཏྭཱ ‘‘ཝཱིརིཡཾ ནཱམེཏཾ སཏྟེཧི ཀཏྟབྦམེཝཱ’’ཏི ཨུདཱནཝསེན ཨུདཱནིཏཾ –

‘‘ཀུསལཱུཔདེསེ དྷིཏིཡཱ དལ༹ྷཱཡ ཙ,

ཨནིཝཏྟིཏཏྟཱབྷཡབྷཱིརུཏཱཡ ཙ;

ན རཀྑསཱིནཾ ཝསམཱགམིམྷསེ,

ས སོཏྠིབྷཱཝོ མཧཏཱ བྷཡེན མེ’’ཏི. (ཛཱ. ༡.༡.༡༣༢) –

ཨིམཾ གཱཐཾ དསྶེཏྭཱ ‘‘ཏདཱཔི ཏུམྷེཝ པཉྩ ཛནཱ ཏཀྐསིལཱཡཾ རཛྫགཧཎཏྠཱཡ ནིཀྑནྟཾ མཧཱསཏྟཾ ཨཱཝུདྷཧཏྠཱ པརིཝཱརེཏྭཱ མགྒཾ གཙྪནྟཱ ཨནྟརཱམགྒེ རཀྑསཱིཧི ཙཀྑུདྭཱརཱདིཝསེན ཨུཔནཱིཏེསུ རཱུཔཱརམྨཎཱདཱིསུ ཨསཾཝུཏཱ པཎྜིཏསྶ ཨོཝཱདེ ཨཝཏྟིཏྭཱ ཨོལཱིཡནྟཱ རཀྑསཱིཧི ཁཱདིཏཱ ཛཱིཝིཏཀྑཡཾ པཱཔུཎིཏྠ. ཏེསུ པན ཨཱརམྨཎེསུ སུསཾཝུཏོ པིཊྛིཏོ པིཊྛིཏོ ཨནུབནྡྷནྟིཾ དེཝཝཎྞིཾ ཡཀྑིནིཾ ཨནཱདིཡིཏྭཱ སོཏྠིནཱ ཏཀྐསིལཾ གནྟྭཱ རཛྫཾ པཏྟོ རཱཛཱ ཨཧམེཝཱ’’ཏི ཛཱཏཀཾ སམོདྷཱནེཏྭཱ, ‘‘བྷིཀྑཝེ, བྷིཀྑུནཱ ནཱམ སབྦཱནི དྭཱརཱནི སཾཝརིཏབྦཱནི. ཨེཏཱནི ཧི སཾཝརནྟོ ཨེཝ སབྦདུཀྑཱ པམུཙྩཏཱི’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༣༦༠.

‘‘ཙཀྑུནཱ སཾཝརོ སཱདྷུ, སཱདྷུ སོཏེན སཾཝརོ;

གྷཱནེན སཾཝརོ སཱདྷུ, སཱདྷུ ཛིཝ྄ཧཱཡ སཾཝརོ.

༣༦༡.

‘‘ཀཱཡེན སཾཝརོ སཱདྷུ, སཱདྷུ ཝཱཙཱཡ སཾཝརོ;

མནསཱ སཾཝརོ སཱདྷུ, སཱདྷུ སབྦཏྠ སཾཝརོ;

སབྦཏྠ སཾཝུཏོ བྷིཀྑུ, སབྦདུཀྑཱ པམུཙྩཏཱི’’ཏི.

ཏཏྠ ཙཀྑུནཱཏི ཡདཱ ཧི བྷིཀྑུནོ ཙཀྑུདྭཱརེ རཱུཔཱརམྨཎཾ ཨཱཔཱཐམཱགཙྪཏི, ཏདཱ ཨིཊྛཱརམྨཎེ ཨརཛྫནྟསྶ ཨནིཊྛཱརམྨཎེ ཨདུསྶནྟསྶ ཨསམཔེཀྑནེན མོཧཾ ཨནུཔྤཱདེནྟསྶ ཏསྨིཾ དྭཱརེ སཾཝརོ ཐཀནཾ པིདཧནཾ གུཏྟི ཀཏཱ ནཱམ ཧོཏི. ཏསྶ སོ ཨེཝརཱུཔོ ཙཀྑུནཱ སཾཝརོ སཱདྷུ. ཨེས ནཡོ སོཏདྭཱརཱདཱིསུཔི. ཙཀྑུདྭཱརཱདཱིསུཡེཝ པན སཾཝརོ ཝཱ ཨསཾཝརོ ཝཱ ནུཔྤཛྫཏི, པརཏོ པན ཛཝནཝཱིཐིཡཾ ཨེས ལབྦྷཏི. ཏདཱ ཧི ཨསཾཝརོ ཨུཔྤཛྫནྟོ ཨསྶདྡྷཱ ཨཀྑནྟི ཀོསཛྫཾ མུཊྛསཙྩཾ ཨཉྙཱཎནྟི ཨཀུསལཝཱིཐིཡཾ ཨཡཾ པཉྩཝིདྷོ ལབྦྷཏི. སཾཝརོ ཨུཔྤཛྫནྟོ སདྡྷཱ ཁནྟི ཝཱིརིཡཾ སཏི ཉཱཎནྟི ཀུསལཝཱིཐིཡཾ ཨཡཾ པཉྩཝིདྷོ ལབྦྷཏི.

ཀཱཡེན སཾཝརོཏི ཨེཏྠ པན པསཱདཀཱཡོཔི ཙོཔནཀཱཡོཔི ལབྦྷཏི. ཨུབྷཡམྤི པནེཏཾ ཀཱཡདྭཱརམེཝ. ཏཏྠ པསཱདདྭཱརེ སཾཝརཱསཾཝརོ ཀཐིཏོཝ. ཙོཔནདྭཱརེཔི ཏཾཝཏྠུཀཱ པཱཎཱཏིཔཱཏཨདིནྣཱདཱནཀཱམེསུམིཙྪཱཙཱརཱ. ཏེཧི པན སདྡྷིཾ ཨཀུསལཝཱིཐིཡཾ ཨུཔྤཛྫནྟེཧི ཏཾ དྭཱརཾ ཨསཾཝུཏཾ ཧོཏི, ཀུསལཝཱིཐིཡཾ ཨུཔྤཛྫནྟེཧི པཱཎཱཏིཔཱཏཱཝེརམཎིཨཱདཱིཧི སཾཝུཏཾ. སཱདྷུ ཝཱཙཱཡཱཏི ཨེཏྠཱཔི ཙོཔནཝཱཙཱཔི ཝཱཙཱ. ཏཱཡ སདྡྷིཾ ཨུཔྤཛྫནྟེཧི མུསཱཝཱདཱདཱིཧི ཏཾ དྭཱརཾ ཨསཾཝུཏཾ ཧོཏི, མུསཱཝཱདཱཝེརམཎིཨཱདཱིཧི སཾཝུཏཾ. མནསཱ སཾཝརོཏི ཨེཏྠཱཔི ཛཝནམནཏོ ཨཉྙེན མནེན སདྡྷིཾ ཨབྷིཛ྄ཛྷཱདཡོ ནཏྠི. མནོདྭཱརེ པན ཛཝནཀྑཎེ ཨུཔྤཛྫམཱནེཧི ཨབྷིཛ྄ཛྷཱདཱིཧི ཏཾ དྭཱརཾ ཨསཾཝུཏཾ ཧོཏི, ཨནབྷིཛ྄ཛྷཱདཱིཧི སཾཝུཏཾ ཧོཏི. སཱདྷུ སབྦཏྠཱཏི ཏེསུ ཙཀྑུདྭཱརཱདཱིསུ སབྦེསུཔི སཾཝརོ སཱདྷུ. ཨེཏྟཱཝཏཱ ཧི ཨཊྛ སཾཝརདྭཱརཱནི ཨཊྛ ཙ ཨསཾཝརདྭཱརཱནི ཀཐིཏཱནི. ཏེསུ ཨཊྛསུ ཨསཾཝརདྭཱརེསུ ཋིཏོ བྷིཀྑུ སཀལཝཊྚམཱུལཀདུཀྑཏོ ན མུཙྩཏི, སཾཝརདྭཱརེསུ པན ཋིཏོ སབྦསྨཱཔི ཝཊྚམཱུལཀདུཀྑཱ མུཙྩཏི. ཏེན ཝུཏྟཾ – ‘‘སབྦཏྠ སཾཝུཏོ བྷིཀྑུ, སབྦདུཀྑཱ པམུཙྩཏཱི’’ཏི.

དེསནཱཝསཱནེ ཏེ པཉྩ བྷིཀྑཱུ སོཏཱཔཏྟིཕལེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

པཉྩབྷིཀྑུཝཏྠུ པཋམཾ.

༢. ཧཾསགྷཱཏཀབྷིཀྑུཝཏྠུ

ཧཏྠསཾཡཏོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཧཾསགྷཱཏཀཾ བྷིཀྑུཾ ཨཱརབྦྷ ཀཐེསི.

སཱཝཏྠིཝཱསིནོ ཀིར དྭེ སཧཱཡཀཱ བྷིཀྑཱུསུ པབྦཛིཏྭཱ ལདྡྷཱུཔསམྤདཱ ཡེབྷུཡྻེན ཨེཀཏོ ཝིཙརནྟི. ཏེ ཨེཀདིཝསཾ ཨཙིརཝཏིཾ གནྟྭཱ ནྷཏྭཱ ཨཱཏཔེ ཏཔྤམཱནཱ སཱརཎཱིཡཀཐཾ ཀཐེནྟཱ ཨཊྛཾསུ. ཏསྨིཾ ཁཎེ དྭེ ཧཾསཱ ཨཱཀཱསེན གཙྪནྟི. ཨཐེཀོ དཧརབྷིཀྑུ སཀྑརཾ གཧེཏྭཱ ‘‘ཨེཀསྶ ཧཾསཔོཏཀསྶ ཨཀྑིཾ པཧརིསྶཱམཱི’’ཏི ཨཱཧ, ཨིཏརོ ‘‘ན སཀྑིསྶཱམཱི’’ཏི ཨཱཧ. ཏིཊྛཏུ ཨིམསྨིཾ པསྶེ ཨཀྑི, པརཔསྶེ ཨཀྑིཾ པཧརིསྶཱམཱིཏི. ཨིདམྤི ན སཀྑིསྶསིཡེཝཱཏི. ‘‘ཏེན ཧི ཨུཔདྷཱརེཧཱི’’ཏི དུཏིཡཾ སཀྑརཾ གཧེཏྭཱ ཧཾསསྶ པཙྪཱབྷཱགེ ཁིཔི, ཧཾསོ སཀྑརསདྡཾ སུཏྭཱ ནིཝཏྟིཏྭཱ ཨོལོཀེསི. ཨཐ ནཾ ཨིཏརཾ ཝཊྚསཀྑརཾ གཧེཏྭཱ པརཔསྶེ ཨཀྑིམྷི པཧརིཏྭཱ ཨོརིམཀྑིནཱ ནིཀྑཱམེསི. ཧཾསོ ཝིརཝནྟོ པརིཝཏྟིཏྭཱ ཏེསཾ པཱདམཱུལེཡེཝ པཏི. ཏཏྠ ཏཏྠ ཋིཏཱ བྷིཀྑཱུ དིསྭཱ, ‘‘ཨཱཝུསོ, བུདྡྷསཱསནེ པབྦཛིཏྭཱ ཨནནུཙྪཝིཀཾ ཝོ ཀཏཾ པཱཎཱཏིཔཱཏཾ ཀརོནྟེཧཱི’’ཏི ཝཏྭཱ ཏེ ཨཱདཱཡ གནྟྭཱ ཏཐཱགཏསྶ དསྶེསུཾ.

སཏྠཱ ‘‘སཙྩཾ ཀིར ཏཡཱ བྷིཀྑུ པཱཎཱཏིཔཱཏོ ཀཏོ’’ཏི པུཙྪིཏྭཱ ‘‘སཙྩཾ, བྷནྟེ’’ཏི ཝུཏྟེ ‘‘བྷིཀྑུ ཀསྨཱ ཨེཝརཱུཔེ ནིཡྻཱནིཀསཱསནེ པབྦཛིཏྭཱ ཨེཝམཀཱསི, པོརཱཎཀཔཎྜིཏཱ ཨནུཔྤནྣེ བུདྡྷེ ཨགཱརམཛ྄ཛྷེ ཝསམཱནཱ ཨཔྤམཏྟཀེསུཔི ཋཱནེསུ ཀུཀྐུཙྩཾ ཀརིཾསུ, ཏྭཾ པན ཨེཝརཱུཔེ བུདྡྷསཱསནེ པབྦཛིཏྭཱ ཀུཀྐུཙྩམཏྟམྤི ན ཨཀཱསཱི’’ཏི ཝཏྭཱ ཏེཧི ཡཱཙིཏོ ཨཏཱིཏཾ ཨཱཧརི.

ཨཏཱིཏེ ཀུརུརཊྛེ ཨིནྡཔཏྟནགརེ དྷནཉྩཡེ རཛྫཾ ཀཱརེནྟེ བོདྷིསཏྟོ ཏསྶ ཨགྒམཧེསིཡཱ ཀུཙྪིསྨིཾ པཊིསནྡྷིཾ གཧེཏྭཱ ཨནུཔུབྦེན ཝིཉྙུཏཾ པཏྟོ ཏཀྐསིལཱཡཾ སིཔྤཱནི ཨུགྒཧེཏྭཱ པིཏརཱ ཨུཔརཛྫེ པཏིཊྛཱཔིཏོ ཨཔརབྷཱགེ པིཏུ ཨཙྩཡེན རཛྫཾ པཏྭཱ དས རཱཛདྷམྨེ ཨཀོཔེནྟོ ཀུརུདྷམྨེ ཝཏྟིཏྠ. ཀུརུདྷམྨོ ནཱམ པཉྩསཱིལཱནི, ཏཱནི བོདྷིསཏྟོ པརིསུདྡྷཱནི ཀཏྭཱ རཀྑི. ཡཐཱ ཙ བོདྷིསཏྟོ, ཨེཝམསྶ མཱཏཱ ཨགྒམཧེསཱི ཀནིཊྛབྷཱཏཱ ཨུཔརཱཛཱ པུརོཧིཏོ བྲཱཧྨཎོ རཛྫུགཱཧཀོ ཨམཙྩོ སཱརཐི སེཊྛི དོཎམཱཔཀོ མཧཱམཏྟོ དོཝཱརིཀོ ནགརསོབྷིནཱི ཝཎྞདཱསཱིཏི ཨེཝམེཏེསུ ཨེཀཱདསསུ ཛནེསུ ཀུརུདྷམྨཾ རཀྑནྟེསུ ཀལིངྒརཊྛེ དནྟཔུརནགརེ ཀལིངྒེ རཛྫཾ ཀཱརེནྟེ ཏསྨིཾ རཊྛེ དེཝོ ན ཝསྶི. མཧཱསཏྟསྶ པན ཨཉྫནསནྣིབྷོ ནཱམ མངྒལཧཏྠཱི མཧཱཔུཉྙོ ཧོཏི. རཊྛཝཱསིནོ ‘‘ཏསྨིཾ ཨཱནཱིཏེ དེཝོ ཝསྶིསྶཏཱི’’ཏི སཉྙཱཡ རཉྙོ ཨཱརོཙཡིཾསུ. རཱཛཱ ཏསྶ ཧཏྠིསྶ ཨཱནཡནཏྠཱཡ བྲཱཧྨཎེ པཧིཎི. ཏེ གནྟྭཱ མཧཱསཏྟཾ ཧཏྠིཾ ཡཱཙིཾསུ. སཏྠཱ ཏེསཾ ཡཱཙནཀཱརཎཾ དསྶེཏུཾ ཨཱཧ –

‘‘ཏཝ སདྡྷཉྩ སཱིལཉྩ, ཝིདིཏྭཱན ཛནཱདྷིཔ;

ཝཎྞཾ ཨཉྫནཝཎྞེན, ཀལིངྒསྨིཾ ནིམིམྷསེ’’ཏི. (ཛཱ. ༡.༣.༧༦) –

ཨིམཾ ཏིཀནིཔཱཏེ ཛཱཏཀཾ ཀཐེསི. ཧཏྠིམྷི པན ཨཱནཱིཏེཔི དེཝེ ཨཝསྶནྟེ ‘‘སོ རཱཛཱ ཀུརུདྷམྨཾ རཀྑཏི, ཏེནསྶ རཊྛེ དེཝོ ཝསྶཏཱི’’ཏི སཉྙཱཡ ‘‘ཡཾ སོ ཀུརུདྷམྨཾ རཀྑཏི, ཏཾ སུཝཎྞཔཊྚེ ལིཁིཏྭཱ ཨཱནེཐཱ’’ཏི པུན ཀཱལིངྒོ བྲཱཧྨཎེ ཙ ཨམཙྩེ ཙ པེསེསི. ཏེསུ གནྟྭཱ ཡཱཙནྟེསུ རཱཛཱནཾ ཨཱདིཾ ཀཏྭཱ སབྦེཔི ཏེ ཨཏྟནོ ཨཏྟནོ སཱིལེསུ ཀིཉྩི ཀུཀྐུཙྩམཏྟཾ ཀཏྭཱ ‘‘ཨཔརིསུདྡྷཾ ནོ སཱིལ’’ནྟི པཊིཀྑིཔིཏྭཱཔི ‘‘ན ཨེཏྟཱཝཏཱ སཱིལབྷེདོ ཧོཏཱི’’ཏི ཏེཧི པུནཔྤུནཾ ཡཱཙིཏཱ ཨཏྟནོ ཨཏྟནོ སཱིལཱནི ཀཐཡིཾསུ. ཀཱལིངྒོ སུཝཎྞཔཊྚེ ལིཁཱཔེཏྭཱ ཨཱབྷཏཾ ཀུརུདྷམྨཾ དིསྭཱཝ སམཱདཱཡ སཱདྷུཀཾ པཱུརེསི. ཏསྶ རཊྛེ དེཝོ པཱཝསྶི, རཊྛཾ ཁེམཾ སུབྷིཀྑཾ ཨཧོསི. སཏྠཱ ཨིམཾ ཨཏཱིཏཾ ཨཱཧརིཏྭཱ –

‘‘གཎིཀཱ ཨུཔྤལཝཎྞཱ, པུཎྞོ དོཝཱརིཀོ ཏདཱ;

རཛྫུགཱཧོ ཙ ཀཙྩཱནོ, དོཎམཱཔཀོ ཙ ཀོལིཏོ.

‘‘སཱརིཔུཏྟོ ཏདཱ སེཊྛཱི, ཨནུརུདྡྷོ ཙ སཱརཐཱི;

བྲཱཧྨཎོ ཀསྶཔོ ཐེརོ, ཨུཔརཱཛཱནནྡཔཎྜིཏོ.

‘‘མཧེསཱི རཱཧུལམཱཏཱ, མཱཡཱདེཝཱི ཛནེཏྟིཀཱ;

ཀུརུརཱཛཱ བོདྷིསཏྟོ, ཨེཝཾ དྷཱརེཐ ཛཱཏཀ’’ནྟི. –

ཛཱཏཀཾ སམོདྷཱནེཏྭཱ ‘‘བྷིཀྑུ ཨེཝཾ པུབྦེཔི པཎྜིཏཱ ཨཔྤམཏྟཀེཔི ཀུཀྐུཙྩེ ཨུཔྤནྣེ ཨཏྟནོ སཱིལབྷེདེ ཨཱསངྐཾ ཀརིཾསུ, ཏྭཾ པན མཱདིསསྶ བུདྡྷསྶ སཱསནེ པབྦཛིཏྭཱ པཱཎཱཏིཔཱཏཾ ཀརོནྟོ ཨཏིབྷཱརིཡཾ ཀམྨམཀཱསི, བྷིཀྑུནཱ ནཱམ ཧཏྠེཧི པཱདེཧི ཝཱཙཱཡ ཙ སཾཡཏེན བྷཝིཏབྦ’’ནྟི ཝཏྭཱ ཨིམཾ གཱཐམཱཧ –

༣༦༢.

‘‘ཧཏྠསཾཡཏོ པཱདསཾཡཏོ,

ཝཱཙཱསཾཡཏོ སཾཡཏུཏྟམོ;

ཨཛ྄ཛྷཏྟརཏོ སམཱཧིཏོ,

ཨེཀོ སནྟུསིཏོ ཏམཱཧུ བྷིཀྑུ’’ནྟི.

ཏཏྠ ཧཏྠསཾཡཏོཏི ཧཏྠཀཱིལཱ༹པནཱདཱིནཾ ཝཱ ཧཏྠེན པརེསཾ པཧརཎཱདཱིནཾ ཝཱ ཨབྷཱཝེན ཧཏྠསཾཡཏོ. དུཏིཡཔདེཔི ཨེསེཝ ནཡོ. ཝཱཙཱཡ པན མུསཱཝཱདཱདཱིནཾ ཨཀརཎཏོ ཝཱཙཱཡ སཾཡཏོ. སཾཡཏུཏྟམོཏི སཾཡཏཏྟབྷཱཝོ, ཀཱཡཙལནསཱིསུཀྑིཔནབྷམུཀཝིཀཱརཱདཱིནཾ ཨཀཱརཀོཏི ཨཏྠོ. ཨཛ྄ཛྷཏྟརཏོཏི གོཙརཛ྄ཛྷཏྟསངྑཱཏཱཡ ཀམྨཊྛཱནབྷཱཝནཱཡ རཏོ. སམཱཧིཏོཏི སུཊྛུ ཋཔིཏོ. ཨེཀོ སནྟུསིཏོཏི ཨེཀཝིཧཱརཱི ཧུཏྭཱ སུཊྛུ ཏུསིཏོ ཝིཔསྶནཱཙཱརཏོ པཊྛཱཡ ཨཏྟནོ ཨདྷིགམེན ཏུཊྛམཱནསོ. པུཐུཛྫནཀལྱཱཎཀཉྷི ཨཱདིཾ ཀཏྭཱ སབྦེཔི སེཁཱ ཨཏྟནོ ཨདྷིགམེན སནྟུསྶནྟཱིཏི སནྟུསིཏཱ, ཨརཧཱ པན ཨེཀནྟསནྟུསིཏོཝ. ཏཾ སནྡྷཱཡེཏཾ ཝུཏྟཾ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཧཾསགྷཱཏཀབྷིཀྑུཝཏྠུ དུཏིཡཾ.

༣. ཀོཀཱལིཀཝཏྠུ

ཡོ མུཁསཾཡཏོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀོཀཱལིཀཾ ཨཱརབྦྷ ཀཐེསི. ཝཏྠུ ‘‘ཨཐ ཁོ ཀོཀཱལིཀོ བྷིཀྑུ ཡེན བྷགཝཱ ཏེནུཔསངྐམཱི’’ཏི སུཏྟེ (སཾ. ནི. ༡.༡༨༡; སུ. ནི. ཀོཀཱལིཀསུཏྟ; ཨ. ནི. ༡༠.༨༩) ཨཱགཏམེཝ. ཨཏྠོཔིསྶ ཨཊྛཀཐཱཡ ཝུཏྟནཡེནེཝ ཝེདིཏབྦོ.

ཀོཀཱལིཀེ པན པདུམནིརཡེ ཨུཔྤནྣེ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཨཧོ ཀོཀཱལིཀོ བྷིཀྑུ ཨཏྟནོ མུཁཾ ནིསྶཱཡ ཝིནཱསཾ པཏྟོ, དྭེ ཨགྒསཱཝཀེ ཨཀྐོསནྟསྶེཝ ཧིསྶ པཐཝཱི ཝིཝརཾ ཨདཱསཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ, པུབྦེཔི ཀོཀཱལིཀོ བྷིཀྑུ ཨཏྟནོ མུཁམེཝ ནིསྶཱཡ ནཊྛོ’’ཏི ཝཏྭཱ ཏམཏྠཾ སོཏུཀཱམེཧི བྷིཀྑཱུཧི ཡཱཙིཏོ ཏསྶ པཀཱསནཏྠཾ ཨཏཱིཏཾ ཨཱཧརི.

ཨཏཱིཏེ ཧིམཝནྟཔདེསེ ཨེཀསྨིཾ སརེ ཀཙྪཔོ ཝསཏི. དྭེ ཧཾསཔོཏཀཱ གོཙརཱཡ ཙརནྟཱ ཏེན སདྡྷིཾ ཝིསྶཱསཾ ཀཏྭཱ དལ༹ྷཝིསྶཱསིཀཱ ཧུཏྭཱ ཨེཀདིཝསཾ ཀཙྪཔཾ པུཙྪིཾསུ – ‘‘སམྨ, ཨམྷཱཀཾ ཧིམཝནྟེ ཙིཏྟཀཱུཊཔབྦཏཏལེ ཀཉྩནགུཧཱཡ ཝསནཊྛཱནཾ, རམཎིཡོ པདེསོ, གཙྪིསྶསི ཨམྷེཧི སདྡྷི’’ནྟི. ‘‘སམྨ, ཨཧཾ ཀཐཾ གམིསྶཱམཱི’’ཏི? ‘‘མཡཾ ཏཾ ནེསྶཱམ, སཙེ མུཁཾ རཀྑིཏུཾ སཀྑིསྶསཱི’’ཏི. ‘‘རཀྑིསྶཱམི, སམྨཱ གཧེཏྭཱ མཾ གཙྪཐཱ’’ཏི. ཏེ ‘‘སཱདྷཱུ’’ཏི ཝཏྭཱ ཨེཀཾ དཎྜཀཾ ཀཙྪཔེན ཌཾསཱཔེཏྭཱ སཡཾ ཏསྶ ཨུབྷོ ཀོཊིཡོ ཌཾསིཏྭཱ ཨཱཀཱསཾ པཀྑནྡིཾསུ. ཏཾ ཏཐཱ ཧཾསེཧི ནཱིཡམཱནཾ གཱམདཱརཀཱ དིསྭཱ ‘‘དྭེ ཧཾསཱ ཀཙྪཔཾ དཎྜེན ཧརནྟཱི’’ཏི ཨཱཧཾསུ. ཀཙྪཔོ ‘‘ཡདི མཾ སཧཱཡཀཱ ནེནྟི, ཏུམྷཱཀཾ ཨེཏྠ ཀིཾ ཧོཏི དུཊྛཙེཊཀཱ’’ཏི ཝཏྟུཀཱམོ ཧཾསཱནཾ སཱིགྷཝེགཏཱཡ བཱརཱཎསིནགརེ རཱཛནིཝེསནསྶ ཨུཔརིབྷཱགཾ སམྤཏྟཀཱལེ དཊྛཊྛཱནཏོ དཎྜཀཾ ཝིསྶཛྫེཏྭཱ ཨཱཀཱསངྒཎེ པཏིཏྭཱ དྭེདྷཱ བྷིཛྫི. སཏྠཱ ཨིམཾ ཨཏཱིཏཾ ཨཱཧརིཏྭཱ –

‘‘ཨཝདྷཱི ཝཏ ཨཏྟཱནཾ, ཀཙྪཔོ བྱཱཧརཾ གིརཾ;

སུགྒཧཱིཏསྨིཾ ཀཊྛསྨིཾ, ཝཱཙཱཡ སཀིཡཱཝདྷཱི.

‘‘ཨེཏམྤི དིསྭཱ ནརཝཱིརིཡསེཊྛ,

ཝཱཙཾ པམུཉྩེ ཀུསལཾ ནཱཏིཝེལཾ;

པསྶསི བཧུབྷཱཎེན, ཀཙྪཔཾ བྱསནཾ གཏ’’ནྟི. (ཛཱ. ༡.༢.༡༢༩-༡༣༠);

ཨིམཾ དུཀནིཔཱཏེ བཧུབྷཱཎིཛཱཏཀཾ ཝིཏྠཱརེཏྭཱ, ‘‘བྷིཀྑཝེ, བྷིཀྑུནཱ ནཱམ མུཁསཾཡཏེན སམཙཱརིནཱ ཨནུདྡྷཏེན ནིབྦུཏཙིཏྟེན བྷཝིཏབྦ’’ནྟི ཝཏྭཱ ཨིམཾ གཱཐམཱཧ –

༣༦༣.

‘‘ཡོ མུཁསཾཡཏོ བྷིཀྑུ, མནྟབྷཱཎཱི ཨནུདྡྷཏོ;

ཨཏྠཾ དྷམྨཉྩ དཱིཔེཏི, མདྷུརཾ ཏསྶ བྷཱསིཏ’’ནྟི.

ཏཏྠ མུཁསཾཡཏོཏི དཱསཙཎྜཱལཱདཡོཔི ‘‘ཏྭཾ དུཛྫཱཏོ, ཏྭཾ དུསྶཱིལོ’’ཏིཨཱདཱིནཾ ཨཝཙནཏཱཡ མུཁེན སཾཡཏོ. མནྟབྷཱཎཱིཏི མནྟཱ ཝུཙྩཏི པཉྙཱ, ཏཱཡ བྷཎནསཱིལོ. ཨནུདྡྷཏོཏི ནིབྦུཏཙིཏྟོ. ཨཏྠཾ དྷམྨཉྩ དཱིཔེཏཱིཏི བྷཱསིཏཏྠཉྩེཝ དེསནཱདྷམྨཉྩ ཀཐེཏི. མདྷུརནྟི ཨེཝརཱུཔསྶ བྷིཀྑུནོ བྷཱསིཏཾ མདྷུརཾ ནཱམ. ཡོ པན ཨཏྠམེཝ སམྤཱདེཏི, ན པཱལི༹ཾ, པཱལི༹ཾཡེཝ སམྤཱདེཏི, ན ཨཏྠཾ, ཨུབྷཡཾ ཝཱ པན ན སམྤཱདེཏི, ཏསྶ བྷཱསིཏཾ མདྷུརཾ ནཱམ ན ཧོཏཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཀོཀཱལིཀཝཏྠུ ཏཏིཡཾ.

༤. དྷམྨཱརཱམཏྠེརཝཏྠུ

དྷམྨཱརཱམོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ དྷམྨཱརཱམཏྠེརཾ ཨཱརབྦྷ ཀཐེསི.

སཏྠཱརཱ ཀིར ‘‘ཨིཏོ མེ ཙཏུམཱསཙྩཡེན པརིནིབྦཱནཾ བྷཝིསྶཏཱི’’ཏི ཨཱརོཙིཏེ ཨནེཀསཧསྶཱ བྷིཀྑཱུ སཏྠཱརཾ པརིཝཱརེཏྭཱ ཝིཙརིཾསུ. ཏཏྠ པུཐུཛྫནཱ བྷིཀྑཱུ ཨསྶཱུནི སནྡྷཱརེཏུཾ ནཱསཀྑིཾསུ, ཁཱིཎཱསཝཱནཾ དྷམྨསཾཝེགོ ཨུཔྤཛྫི. སབྦེཔི ‘‘ཀིཾ ནུ ཁོ ཀརིསྶཱམཱ’’ཏི ཝགྒབནྡྷནེན ཝིཙརནྟི. ཨེཀོ པན དྷམྨཱརཱམོ ནཱམ བྷིཀྑུ བྷིཀྑཱུནཾ སནྟིཀཾ ན ཨུཔསངྐམཏི. བྷིཀྑཱུཧི ‘‘ཀིཾ, ཨཱཝུསོ’’ཏི ཝུཙྩམཱནོ པཊིཝཙནམྤི ཨདཏྭཱ ‘‘སཏྠཱ ཀིར ཙཏུམཱསཙྩཡེན པརིནིབྦཱཡིསྶཏི, ཨཧཉྩམྷི ཨཝཱིཏརཱགོ, སཏྠརི དྷརམཱནེཡེཝ ཝཱཡམིཏྭཱ ཨརཧཏྟཾ པཱཔུཎིསྶཱམཱི’’ཏི ཨེཀཀོཝ ཝིཧརནྟོ སཏྠཱརཱ དེསིཏཾ དྷམྨཾ ཨཱཝཛྫེཏི ཙིནྟེཏི ཨནུསྶརཏི. བྷིཀྑཱུ ཏཐཱགཏསྶ ཨཱརོཙེསུཾ – ‘‘བྷནྟེ, དྷམྨཱརཱམསྶ ཏུམྷེསུ སིནེཧམཏྟམྤི ནཏྠི, ‘སཏྠཱ ཀིར པརིནིབྦཱཡིསྶཏི, ཀིཾ ནུ ཁོ ཀརིསྶཱམཱ’ཏི ཨམྷེཧི སདྡྷིཾ སམྨནྟནམཏྟམྤི ན ཀརོཏཱི’’ཏི. སཏྠཱ ཏཾ པཀྐོསཱཔེཏྭཱ ‘‘སཙྩཾ ཀིར ཏྭཾ ཨེཝཾ ཀརོསཱི’’ཏི པུཙྪི. ‘‘སཙྩཾ, བྷནྟེ’’ཏི. ‘‘ཀིཾ ཀཱརཎཱ’’ཏི? ཏུམྷེ ཀིར ཙཏུམཱསཙྩཡེན པརིནིབྦཱཡིསྶཐ, ཨཧཉྩམྷི ཨཝཱིཏརཱགོ, ཏུམྷེསུ དྷརནྟེསུཡེཝ ཝཱཡམིཏྭཱ ཨརཧཏྟཾ པཱཔུཎིསྶཱམཱིཏི ཏུམྷེཧི དེསིཏཾ དྷམྨཾ ཨཱཝཛྫཱམི ཙིནྟེམི ཨནུསྶརཱམཱིཏི.

སཏྠཱ ‘‘སཱདྷུ སཱདྷཱུ’’ཏི ཏསྶ སཱདྷུཀཱརཾ དཏྭཱ, ‘‘བྷིཀྑཝེ, ཨཉྙེནཱཔི མཡི སིནེཧཝནྟེན བྷིཀྑུནཱ ནཱམ དྷམྨཱརཱམསདིསེནེཝ བྷཝིཏབྦཾ. ན ཧི མཡ྄ཧཾ མཱལཱགནྡྷཱདཱིཧི པཱུཛཾ ཀརོནྟཱ མམ པཱུཛཾ ཀརོནྟི ནཱམ, དྷམྨཱནུདྷམྨཾ པཊིཔཛྫནྟཱཡེཝ པན མཾ པཱུཛེནྟི ནཱམཱ’’ཏི ཝཏྭཱ ཨིམཾ གཱཐམཱཧ –

༣༦༤.

‘‘དྷམྨཱརཱམོ དྷམྨརཏོ, དྷམྨཾ ཨནུཝིཙིནྟཡཾ;

དྷམྨཾ ཨནུསྶརཾ བྷིཀྑུ, སདྡྷམྨཱ ན པརིཧཱཡཏཱི’’ཏི.

ཏཏྠ ནིཝཱསནཊྛེན སམཐཝིཔསྶནཱདྷམྨོ ཨཱརཱམོ ཨསྶཱཏི དྷམྨཱརཱམོ. ཏསྨིཾཡེཝ དྷམྨེ རཏོཏི དྷམྨརཏོ. ཏསྶེཝ དྷམྨསྶ པུནཔྤུནཾ ཝིཙིནྟནཏཱཡ དྷམྨཾ ཨནུཝིཙིནྟཡཾ, ཏཾ དྷམྨཾ ཨཱཝཛྫེནྟོ མནསིཀརོནྟོཏི ཨཏྠོ. ཨནུསྶརནྟི ཏམེཝ དྷམྨཾ ཨནུསྶརནྟོ. སདྡྷམྨཱཏི ཨེཝརཱུཔོ བྷིཀྑུ སཏྟཏིཾསབྷེདཱ བོདྷིཔཀྑིཡདྷམྨཱ ནཝཝིདྷལོཀུཏྟརདྷམྨཱ ཙ ན པརིཧཱཡཏཱིཏི ཨཏྠོ.

དེསནཱཝསཱནེ སོ བྷིཀྑུ ཨརཧཏྟེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

དྷམྨཱརཱམཏྠེརཝཏྠུ ཙཏུཏྠཾ.

༥. ཝིཔཀྑསེཝཀབྷིཀྑུཝཏྠུ

སལཱབྷནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨཉྙཏརཾ ཝིཔཀྑསེཝཀཾ བྷིཀྑུཾ ཨཱརབྦྷ ཀཐེསི.

ཏསྶ ཀིརེཀོ དེཝདཏྟཔཀྑིཀོ བྷིཀྑུ སཧཱཡོ ཨཧོསི. སོ ཏཾ བྷིཀྑཱུཧི སདྡྷིཾ པིཎྜཱཡ ཙརིཏྭཱ ཀཏབྷཏྟཀིཙྩཾ ཨཱགཙྪནྟཾ དིསྭཱ ‘‘ཀུཧིཾ གཏོསཱི’’ཏི པུཙྪི. ‘‘ཨསུཀཊྛཱནཾ ནཱམ པིཎྜཱཡ ཙརིཏུ’’ནྟི. ‘‘ལདྡྷོ ཏེ པིཎྜཔཱཏོ’’ཏི? ‘‘ཨཱམ, ལདྡྷོ’’ཏི. ‘‘ཨིདྷ ཨམྷཱཀཾ མཧཱལཱབྷསཀྐཱརོ, ཀཏིཔཱཧཾ ཨིདྷེཝ ཧོཧཱི’’ཏི. སོ ཏསྶ ཝཙནེན ཀཏིཔཱཧཾ ཏཏྠ ཝསིཏྭཱ སཀཊྛཱནམེཝ ཨགམཱསི. ཨཐ ནཾ བྷིཀྑཱུ ‘‘ཨཡཾ, བྷནྟེ, དེཝདཏྟསྶ ཨུཔྤནྣལཱབྷསཀྐཱརཾ པརིབྷུཉྫཏི, དེཝདཏྟསྶ པཀྑིཀོ ཨེསོ’’ཏི ཏཐཱགཏསྶ ཨཱརོཙེསུཾ. སཏྠཱ ཏཾ པཀྐོསཱཔེཏྭཱ ‘‘སཙྩཾ ཀིར ཏྭཾ ཨེཝམཀཱསཱི’’ཏི པུཙྪི. ‘‘ཨཱམ, བྷནྟེ, ཨཧཾ ཏཏྠ ཨེཀཾ དཧརཾ ནིསྶཱཡ ཀཏིཔཱཧཾ ཝསིཾ, ན ཙ པན དེཝདཏྟསྶ ལདྡྷིཾ རོཙེམཱི’’ཏི. ཨཐ ནཾ བྷགཝཱ ‘‘ཀིཉྩཱཔི ཏྭཾ ལདྡྷིཾ ན རོཙེསི, དིཊྛདིཊྛཀཱནཾཡེཝ པན ལདྡྷིཾ རོཙེནྟོ ཝིཡ ཝིཙརསི. ན ཏྭཾ ཨིདཱནེཝ ཨེཝཾ ཀརོསི, པུབྦེཔི ཨེཝརཱུཔོཡེཝཱ’’ཏི ཝཏྭཱ ‘‘ཨིདཱནི ཏཱཝ, བྷནྟེ, ཨམྷེཧི སཱམཾ དིཊྛོ, པུབྦེ པནེས ཀེསཾ ལདྡྷིཾ རོཙེནྟོ ཝིཡ ཝིཙརི, ཨཱཙིཀྑཐ ནོ’’ཏི བྷིཀྑཱུཧི ཡཱཙིཏོ ཨཏཱིཏཾ ཨཱཧརིཏྭཱ –

‘‘པུརཱཎཙོརཱན ཝཙོ ནིསམྨ,

མཧིལཱ༹མུཁོ པོཐཡམནྭཙཱརཱི;

སུསཉྙཏཱནཉྷི ཝཙོ ནིསམྨ,

གཛུཏྟམོ སབྦགུཎེསུ ཨཊྛཱ’’ཏི. (ཛཱ. ༡.༡.༢༦) –

ཨིམཾ མཧིལཱ༹མུཁཛཱཏཀཾ ཝིཏྠཱརེཏྭཱ, ‘‘བྷིཀྑཝེ, བྷིཀྑུནཱ ནཱམ སཀལཱབྷེནེཝ སནྟུཊྛེན བྷཝིཏབྦཾ, པརལཱབྷཾ པཏྠེཏུཾ ན ཝཊྚཏི. པརལཱབྷཾ པཏྠེནྟསྶ ཧི ཛྷཱནཝིཔསྶནཱམགྒཕལེསུ ཨེཀདྷམྨོཔི ནུཔྤཛྫཏི, སཀལཱབྷསནྟུཊྛསྶེཝ པན ཛྷཱནཱདཱིནི ཨུཔྤཛྫནྟཱི’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༣༦༥.

‘‘སལཱབྷཾ ནཱཏིམཉྙེཡྻ, ནཱཉྙེསཾ པིཧཡཾ ཙརེ;

ཨཉྙེསཾ པིཧཡཾ བྷིཀྑུ, སམཱདྷིཾ ནཱདྷིགཙྪཏི.

༣༦༦.

‘‘ཨཔྤལཱབྷོཔི ཙེ བྷིཀྑུ, སལཱབྷཾ ནཱཏིམཉྙཏི;

ཏཾ ཝེ དེཝཱ པསཾསནྟི, སུདྡྷཱཛཱིཝིཾ ཨཏནྡིཏ’’ནྟི.

ཏཏྠ སལཱབྷནྟི ཨཏྟནོ ཨུཔྤཛྫནཀལཱབྷཾ. སཔདཱནཙཱརཉྷི པརིཝཛྫེཏྭཱ ཨནེསནཱཡ ཛཱིཝིཀཾ ཀཔྤེནྟོ སལཱབྷཾ ཨཏིམཉྙཏི ཧཱིལེ༹ཏི ཛིགུཙྪཏི ནཱམ. ཏསྨཱ ཨེཝཾ ཨཀརཎེན སལཱབྷཾ ནཱཏིམཉྙེཡྻ. ཨཉྙེསཾ པིཧཡནྟི ཨཉྙེསཾ ལཱབྷཾ པཏྠེནྟོ ན ཙརེཡྻཱཏི ཨཏྠོ. སམཱདྷིཾ ནཱདྷིགཙྪཏཱིཏི ཨཉྙེསཉྷི ལཱབྷཾ པིཧཡནྟོ ཏེསཾ ཙཱིཝརཱདིཀརཎེ ཨུསྶུཀྐཾ ཨཱཔནྣོ བྷིཀྑུ ཨཔྤནཱསམཱདྷིཾ ཝཱ ཨུཔཙཱརསམཱདྷིཾ ཝཱ ནཱདྷིགཙྪཏི. སལཱབྷཾ ནཱཏིམཉྙཏཱིཏི ཨཔྤལཱབྷོཔི སམཱནོ ཨུཙྩནཱིཙཀུལེ པཊིཔཱཊིཡཱ སཔདཱནཾ ཙརནྟོ བྷིཀྑུ སལཱབྷཾ ནཱཏིམཉྙཏི ནཱམ. ཏཾ ཝེཏི ཏཾ ཨེཝརཱུཔཾ བྷིཀྑུཾ སཱརཛཱིཝིཏཏཱཡ སུདྡྷཱཛཱིཝིཾ ཛངྒྷབལཾ ནིསྶཱཡ ཛཱིཝིཏཀཔྤནེན ཨཀུསཱིཏཏཱཡ ཨཏནྡིཏཾ དེཝཱ པསཾསནྟི ཐོམེནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཝིཔཀྑསེཝཀབྷིཀྑུཝཏྠུ པཉྩམཾ.

༦. པཉྩགྒདཱཡཀབྲཱཧྨཎཝཏྠུ

སབྦསོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩགྒདཱཡཀཾ ནཱམ བྲཱཧྨཎཾ ཨཱརབྦྷ ཀཐེསི.

སོ ཀིར སསྶེ ཁེཏྟེ ཋིཏཀཱལེཡེཝ ཁེཏྟགྒཾ ནཱམ དེཏི, ཁལཀཱལེ ཁལགྒཾ ནཱམ དེཏི, ཁལབྷཎྜཀཱལེ ཁལབྷཎྜགྒཾ ནཱམ དེཏི, ཨུཀྑལིཀཀཱལེ ཀུམྦྷགྒཾ ནཱམ དེཏི, པཱཏིཡཾ ཝཌྜྷིཏཀཱལེ པཱཏགྒཾ ནཱམ དེཏཱིཏི ཨིམཱནི པཉྩ ཨགྒདཱནཱནི དེཏི, སམྤཏྟསྶ ཨདཏྭཱ ནཱམ ན བྷུཉྫཏི. ཏེནསྶ པཉྩགྒདཱཡཀོཏྭེཝ ནཱམཾ ཨཧོསི. སཏྠཱ ཏསྶ ཙ བྲཱཧྨཎིཡཱ ཙསྶ ཏིཎྞཾ ཕལཱནཾ ཨུཔནིསྶཡཾ དིསྭཱ བྲཱཧྨཎསྶ བྷོཛནཝེལཱཡཾ གནྟྭཱ དྭཱརེ ཨཊྛཱསི. སོཔི དྭཱརཔམུཁེ ཨནྟོགེཧཱབྷིམུཁོ ནིསཱིདིཏྭཱ བྷུཉྫཏི, སཏྠཱརཾ དྭཱརེ ཋིཏཾ ན པསྶཏི. བྲཱཧྨཎཱི པན ཏཾ པརིཝིསམཱནཱ སཏྠཱརཾ དིསྭཱ ཙིནྟེསི – ‘‘ཨཡཾ བྲཱཧྨཎོ པཉྩསུ ཋཱནེསུ ཨགྒཾ དཏྭཱ བྷུཉྫཏི, ཨིདཱནི ཙ སམཎོ གོཏམོ ཨཱགནྟྭཱ དྭཱརེ ཋིཏོ. སཙེ བྲཱཧྨཎོ ཨེཏཾ དིསྭཱ ཨཏྟནོ བྷཏྟཾ ཧརིཏྭཱ དསྶཏི, པུནཔཱཧཾ པཙིཏུཾ ན སཀྑིསྶཱམཱི’’ཏི. སཱ ‘‘ཨེཝཾ ཨཡཾ སམཎཾ གོཏམཾ ན པསྶིསྶཏཱི’’ཏི སཏྠུ པིཊྛིཾ དཏྭཱ ཏསྶ པཙྪཏོ ཏཾ པཊིཙྪཱདེནྟཱི ཨོནམིཏྭཱ པུཎྞཙནྡཾ པཱཎིནཱ པཊིཙྪཱདེནྟཱི ཝིཡ ཨཊྛཱསི. ཏཐཱ ཋིཏཱ ཨེཝ ཙ པན ‘‘གཏོ ནུ ཁོ ནོ’’ཏི སཏྠཱརཾ ཨཌྜྷཀྑིཀེན ཨོལོཀེསི. སཏྠཱ ཏཏྠེཝ ཨཊྛཱསི. བྲཱཧྨཎསྶ པན སཝནབྷཡེན ‘‘ཨཏིཙྪཐཱ’’ཏི ན ཝདེཏི, ཨོསཀྐིཏྭཱ པན སཎིཀམེཝ ‘‘ཨཏིཙྪཐཱ’’ཏི ཨཱཧ. སཏྠཱ ‘‘ན གམིསྶཱམཱི’’ཏི སཱིསཾ ཙཱལེསི. ལོཀགརུནཱ བུདྡྷེན ‘‘ན གམིསྶཱམཱི’’ཏི སཱིསེ ཙཱལིཏེ སཱ སནྡྷཱརེཏུཾ ཨསཀྐོནྟཱི མཧཱཧསིཏཾ ཧསི. ཏསྨིཾ ཁཎེ སཏྠཱ གེཧཱབྷིམུཁཾ ཨོབྷཱསཾ མུཉྩི. བྲཱཧྨཎོཔི པིཊྛིཾ དཏྭཱ ནིསིནྣོཡེཝ བྲཱཧྨཎིཡཱ ཧསིཏསདྡཾ སུཏྭཱ ཚབྦཎྞཱནཉྩ རསྨཱིནཾ ཨོབྷཱསཾ ཨོལོཀེཏྭཱ སཏྠཱརཾ ཨདྡས. བུདྡྷཱ ཧི ནཱམ གཱམེ ཝཱ ཨརཉྙེ ཝཱ ཧེཏུསམྤནྣཱནཾ ཨཏྟཱནཾ ཨདསྶེཏྭཱ ན པཀྐམནྟི. བྲཱཧྨཎོཔི སཏྠཱརཾ དིསྭཱ, ‘‘བྷོཏི ནཱསིཏོམྷི ཏཡཱ, རཱཛཔུཏྟཾ ཨཱགནྟྭཱ དྭཱརེ ཋིཏཾ མཡ྄ཧཾ ཨནཱཙིཀྑནྟིཡཱ བྷཱརིཡཾ ཏེ ཀམྨཾ ཀཏ’’ནྟི ཝཏྭཱ ཨཌྜྷབྷུཏྟཾ བྷོཛནཔཱཏིཾ ཨཱདཱཡ སཏྠུ སནྟིཀཾ གནྟྭཱ, ‘‘བྷོ གོཏམ, ཨཧཾ པཉྩསུ ཋཱནེསུ ཨགྒཾ དཏྭཱཝ བྷུཉྫཱམི, ཨིཏོ ཙ མེ མཛ྄ཛྷེ བྷིནྡིཏྭཱ ཨེཀོཝ བྷཏྟཀོཊྛཱསོ བྷུཏྟོ, ཨེཀོ ཀོཊྛཱསོ ཨཝསིཊྛོ, པཊིགྒཎྷིསྶསི མེ ཨིདཾ བྷཏྟ’’ནྟི. སཏྠཱ ‘‘ན མེ ཏཝ ཨུཙྪིཊྛབྷཏྟེན ཨཏྠོ’’ཏི ཨཝཏྭཱ, ‘‘བྲཱཧྨཎ, ཨགྒམྤི མཡ྄ཧམེཝ ཨནུཙྪཝིཀཾ, མཛ྄ཛྷེ བྷིནྡིཏྭཱ ཨཌྜྷབྷུཏྟབྷཏྟམྤི, ཙརིམཀབྷཏྟཔིཎྜོཔི མཡ྄ཧམེཝ ཨནུཙྪཝིཀོ. མཡཉྷི, བྲཱཧྨཎ, པརདཏྟཱུཔཛཱིཝིཔེཏསདིསཱ’’ཏི ཝཏྭཱ ཨིམཾ གཱཐམཱཧ –

‘‘ཡདགྒཏོ མཛ྄ཛྷཏོ སེསཏོ ཝཱ,

པིཎྜཾ ལབྷེཐ པརདཏྟཱུཔཛཱིཝཱི;

ནཱལཾ ཐུཏུཾ ནོཔི ནིཔཙྩཝཱདཱི,

ཏཾ ཝཱཔི དྷཱིརཱ མུནི ཝེདཡནྟཱི’’ཏི. (སུ. ནི. ༢༡༩);

བྲཱཧྨཎོ ཏཾ སུཏྭཱཝ པསནྣཙིཏྟོ ཧུཏྭཱ ‘‘ཨཧོ ཨཙྪརིཡཾ, དཱིཔསཱམིཀོ ནཱམ རཱཛཔུཏྟོ ‘ན མེ ཏཝ ཨུཙྪིཊྛབྷཏྟེན ཨཏྠོ’ཏི ཨཝཏྭཱ ཨེཝཾ ཝཀྑཏཱི’’ཏི དྭཱརེ ཋིཏཀོཝ སཏྠཱརཾ པཉྷཾ པུཙྪི – ‘‘བྷོ གོཏམ, ཏུམྷེ ཨཏྟནོ སཱཝཀེ བྷིཀྑཱུཏི ཝདཐ, ཀིཏྟཱཝཏཱ བྷིཀྑུ ནཱམ ཧོཏཱི’’ཏི. སཏྠཱ ‘‘ཀཐཾརཱུཔཱ ནུ ཁོ ཨིམསྶ དྷམྨདེསནཱ སཔྤཱཡཱ’’ཏི ཨུཔདྷཱརེནྟོ ‘‘ཨིམེ དྭེཔི ཛནཱ ཀསྶཔབུདྡྷཀཱལེ ‘ནཱམརཱུཔ’ནྟི ཝདནྟཱནཾ ཀཐཾ སུཎིཾསུ, ནཱམརཱུཔཾ ཨཝིསྶཛྫིཏྭཱཝ ནེསཾ དྷམྨཾ དེསེཏུཾ ཝཊྚཏཱི’’ཏི, ‘‘བྲཱཧྨཎ, ནཱམེ ཙ རཱུཔེ ཙ ཨརཛྫནྟོ ཨསཛྫནྟོ ཨསོཙནྟོ བྷིཀྑུ ནཱམ ཧོཏཱི’’ཏི ཝཏྭཱ ཨིམཾ གཱཐམཱཧ –

༣༦༧.

‘‘སབྦསོ ནཱམརཱུཔསྨིཾ, ཡསྶ ནཏྠི མམཱཡིཏཾ;

ཨསཏཱ ཙ ན སོཙཏི, ས ཝེ བྷིཀྑཱུཏི ཝུཙྩཏཱི’’ཏི.

ཏཏྠ སབྦསོཏི སབྦསྨིམྤི ཝེདནཱདཱིནཾ ཙཏུནྣཾ, རཱུཔཀྑནྡྷསྶ ཙཱཏི པཉྩནྣཾ ཁནྡྷཱནཾ ཝསེན པཝཏྟེ ནཱམརཱུཔེ. མམཱཡིཏནྟི ཡསྶ ཨཧནྟི ཝཱ མམནྟི ཝཱ གཱཧོ ནཏྠི. ཨསཏཱ ཙ ན སོཙཏཱིཏི ཏསྨིཉྩ ནཱམརཱུཔེ ཁཡཝཡཾ པཏྟེ ‘‘མམ རཱུཔཾ ཁཱིཎཾ…པེ… མམ ཝིཉྙཱཎཾ ཁཱིཎ’’ནྟི ན སོཙཏི ན ཝིཧཉྙཏི, ‘‘ཁཡཝཡདྷམྨཾ མེ ཁཱིཎ’’ནྟི པསྶཏི. ས ཝེཏི སོ ཨེཝརཱུཔོ ཝིཛྫམཱནེཔི ནཱམརཱུཔེ མམཱཡིཏརཧིཏོཔི ཨསཏཱཔི ཏེན ཨསོཙནྟོ བྷིཀྑཱུཏི ཝུཙྩཏཱིཏི ཨཏྠོ.

དེསནཱཝསཱནེ ཨུབྷོཔི ཛཡམྤཏིཀཱ ཨནཱགཱམིཕལེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

པཉྩགྒདཱཡཀབྲཱཧྨཎཝཏྠུ ཚཊྛཾ.

༧. སམྦཧུལབྷིཀྑུཝཏྠུ

མེཏྟཱཝིཧཱརཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ བྷིཀྑཱུ ཨཱརབྦྷ ཀཐེསི.

ཨེཀསྨིཉྷི སམཡེ ཨཱཡསྨནྟེ མཧཱཀཙྩཱནེ ཨཝནྟིཛནཔདེ ཀུརརགྷརཾ ནིསྶཱཡ པཝཏྟཔབྦཏེ ཝིཧརནྟེ སོཎོ ནཱམ ཀོཊིཀཎྞོ ཨུཔཱསཀོ ཐེརསྶ དྷམྨཀཐཱཡ པསཱིདིཏྭཱ ཐེརསྶ སནྟིཀེ པབྦཛིཏུཀཱམོ ཐེརེན ‘‘དུཀྐརཾ ཁོ, སོཎ, ཡཱཝཛཱིཝཾ ཨེཀབྷཏྟཾ ཨེཀསེཡྻཾ བྲཧྨཙརིཡ’’ནྟི ཝཏྭཱ དྭེ ཝཱརེ པཊིཀྑིཏྟོཔི པབྦཛྫཱཡ ཨཏིཝིཡ ཨུསྶཱཧཛཱཏོ ཏཏིཡཝཱརེ ཐེརཾ ཡཱཙིཏྭཱ པབྦཛིཏྭཱ ཨཔྤབྷིཀྑུཀཏྟཱ དཀྑིཎཱཔཐེ ཏིཎྞཾ ཝསྶཱནཾ ཨཙྩཡེན ལདྡྷཱུཔསམྤདོ སཏྠཱརཾ སམྨུཁཱ དཊྛུཀཱམོ ཧུཏྭཱ ཨུཔཛ྄ཛྷཱཡཾ ཨཱཔུཙྪིཏྭཱ ཏེན དིནྣཾ སཱསནཾ གཧེཏྭཱ ཨནུཔུབྦེན ཛེཏཝནཾ གནྟྭཱ སཏྠཱརཾ ཝནྡིཏྭཱ ཀཏཔཊིསནྠཱརོ སཏྠཱརཱ ཨེཀགནྡྷཀུཊིཡཾཡེཝ ཨནུཉྙཱཏསེནཱསནོ བཧུདེཝ རཏྟིཾ ཨཛ྄ཛྷོཀཱསེ ཝཱིཐིནཱམེཏྭཱ རཏྟིབྷཱགེ གནྡྷཀུཊིཾ པཝིསིཏྭཱ ཨཏྟནོ པཏྟསེནཱསནེ ཏཾ རཏྟིབྷཱགཾ ཝཱིཏིནཱམེཏྭཱ པཙྩཱུསསམཡེ སཏྠཱརཱ ཨཛ྄ཛྷིཊྛོ སོལ༹ས ཨཊྛཀཝགྒིཀཱནི (སུ. ནི. ༧༧༢ ཨཱདཡོ) སབྦཱནེཝ སརབྷཉྙེན ཨབྷཎི. ཨཐསྶ བྷགཝཱ སརབྷཉྙཔརིཡོསཱནེ ཨབྦྷཱནུམོདེནྟོ – ‘‘སཱདྷུ སཱདྷུ, བྷིཀྑཱུ’’ཏི སཱདྷུཀཱརཾ ཨདཱསི. སཏྠཱརཱ དིནྣསཱདྷུཀཱརཾ སུཏྭཱ བྷཱུམཊྛཀདེཝཱ ནཱགཱ སུཔཎྞཱཏི ཨེཝཾ ཡཱཝ བྲཧྨལོཀཱ ཨེཀསཱདྷུཀཱརམེཝ ཨཧོསི.

ཏསྨིཾ ཁཎེ ཛེཏཝནཏོ ཝཱིསཡོཛནསཏམཏྠཀེ ཀུརརགྷརནགརེ ཐེརསྶ མཱཏུ མཧཱཨུཔཱསིཀཱཡ གེཧེ ཨདྷིཝཏྠཱ དེཝཏཱཔི མཧནྟེན སདྡེན སཱདྷུཀཱརམདཱསི. ཨཐ ནཾ ཨུཔཱསིཀཱ ཨཱཧ – ‘‘ཀོ ཨེས སཱདྷུཀཱརཾ དེཏཱི’’ཏི? ཨཧཾ, བྷགིནཱིཏི. ཀོསི ཏྭནྟི? ཏཝ གེཧེ ཨདྷིཝཏྠཱ, དེཝཏཱཏི. ཏྭཾ ཨིཏོ པུབྦེ མཡ྄ཧཾ སཱདྷུཀཱརཾ ཨདཏྭཱ ཨཛྫ ཀསྨཱ དེསཱིཏི? ནཱཧཾ ཏུཡ྄ཧཾ སཱདྷུཀཱརཾ དམྨཱིཏི. ཨཐ ཀསྶ ཏེ སཱདྷུཀཱརོ དིནྣོཏི? ཏཝ པུཏྟསྶ ཀོཊིཀཎྞསྶ སོཎཏྠེརསྶཱཏི. ཀིཾ མེ པུཏྟེན ཀཏནྟི? པུཏྟོ ཏེ ཨཛྫ སཏྠཱརཱ སདྡྷིཾ ཨེཀགནྡྷཀུཊིཡཾ ཝསིཏྭཱ དྷམྨཾ དེསེསི, སཏྠཱ ཏཝ པུཏྟསྶ དྷམྨཾ སུཏྭཱ པསནྣོ སཱདྷུཀཱརམདཱསི. ཏེནསྶ མཡཱཔི སཱདྷུཀཱརོ དིནྣོ. སམྨཱསམྦུདྡྷསྶ ཧི སཱདྷུཀཱརཾ སམྤཊིཙྪིཏྭཱ བྷཱུམཊྛཀདེཝེ ཨཱདིཾ ཀཏྭཱ ཡཱཝ བྲཧྨལོཀཱ ཨེཀསཱདྷུཀཱརམེཝ ཛཱཏནྟི. ཀིཾ པན, སཱམི, མམ པུཏྟེན སཏྠུ དྷམྨོ ཀཐིཏོ, སཏྠཱརཱ མམ པུཏྟསྶ ཀཐིཏོཏི? ཏཝ པུཏྟེན སཏྠུ ཀཐིཏོཏི. ཨེཝཾ དེཝཏཱཡ ཀཐེནྟིཡཱཝ ཨུཔཱསིཀཱཡ པཉྩཝཎྞཱ པཱིཏི ཨུཔྤཛྫིཏྭཱ སཀལསརཱིརཾ ཕརི.

ཨཐསྶཱ ཨེཏདཧོསི – ‘‘སཙེ མེ པུཏྟོ སཏྠཱརཱ སདྡྷིཾ ཨེཀགནྡྷཀུཊིཡཾ ཝསིཏྭཱ སཏྠུ དྷམྨཾ ཀཐེཏུཾ སཀྑི, མཡ྄ཧམྤི ཀཐེཏུཾ སཀྑིསྶཏིཡེཝ. པུཏྟསྶ ཨཱགཏཀཱལེ དྷམྨསྶཝནཾ ཀཱརེཏྭཱ དྷམྨཀཐཾ སུཎིསྶཱམཱི’’ཏི. སོཎཏྠེརོཔི ཁོ སཏྠཱརཱ སཱདྷུཀཱརེ དིནྣེ ‘‘ཨཡཾ མེ ཨུཔཛ྄ཛྷཱཡེན དིནྣསཱསནཾ ཨཱརོཙེཏུཾ ཀཱལོ’’ཏི བྷགཝནྟཾ པཙྩནྟིམེསུ ཛནཔདེསུ ཝིནཡདྷརཔཉྩམེན གཎེན ཨུཔསམྤདཾ ཨཱདིཾ ཀཏྭཱ (མཧཱཝ. ༢༥༩) པཉྩ ཝརེ ཡཱཙིཏྭཱ ཀཏིཔཱཧཾ སཏྠུ སནྟིཀེཡེཝ ཝསིཏྭཱ ‘‘ཨུཔཛ྄ཛྷཱཡཾ པསྶིསྶཱམཱི’’ཏི སཏྠཱརཾ ཨཱཔུཙྪིཏྭཱ ཛེཏཝནཱ ནིཀྑམིཏྭཱ ཨནུཔུབྦེན ཨུཔཛ྄ཛྷཱཡསྶ སནྟིཀཾ ཨགམཱསི.

ཐེརོ པུནདིཝསེ ཏཾ ཨཱདཱཡ པིཎྜཱཡ ཙརནྟོ མཱཏུ ཨུཔཱསིཀཱཡ གེཧདྭཱརཾ ཨགམཱསི. སཱཔི པུཏྟཾ དིསྭཱ ཏུཊྛམཱནསཱ ཝནྡིཏྭཱ སཀྐཙྩཾ པརིཝིསིཏྭཱ པུཙྪི – ‘‘སཙྩཾ ཀིར ཏྭཾ, ཏཱཏ, སཏྠཱརཱ སདྡྷིཾ ཨེཀགནྡྷཀུཊིཡཾ ཝསིཏྭཱ སཏྠུ དྷམྨཀཐཾ ཀཐེསཱི’’ཏི. ‘‘ཨུཔཱསིཀེ, ཏུཡ྄ཧཾ ཀེན ཨིདཾ ཀཐིཏ’’ནྟི? ‘‘ཏཱཏ, ཨིམསྨིཾ གེཧེ ཨདྷིཝཏྠཱ དེཝཏཱ མཧནྟེན སདྡེན སཱདྷུཀཱརཾ དཏྭཱ མཡཱ ‘ཀོ ཨེསོ’ཏི ཝུཏྟེ ‘ཨཧ’ནྟི ཝཏྭཱ ཨེཝཉྩ ཨེཝཉྩ ཀཐེསི. ཏཾ སུཏྭཱ མཡ྄ཧཾ ཨེཏདཧོསི – ‘སཙེ མེ པུཏྟོ སཏྠུ དྷམྨཀཐཾ ཀཐེསི, མཡ྄ཧམྤི ཀཐེཏུཾ སཀྑིསྶཏཱི’ཏི. ཨཐ ནཾ ཨཱཧ – ‘ཏཱཏ, ཡཏོ ཏཡཱ སཏྠུ སམྨུཁཱ དྷམྨོ ཀཐིཏོ, མཡ྄ཧམྤི ཀཐེཏུཾ སཀྑིསྶསི ཨེཝ. ཨསུཀདིཝསེ ནཱམ དྷམྨསྶཝནཾ ཀཱརེཏྭཱ ཏཝ དྷམྨཾ སུཎིསྶཱམི, ཏཱཏཱ’’’ཏི. སོ ཨདྷིཝཱསེསི. ཨུཔཱསིཀཱ བྷིཀྑུསངྒྷསྶ དཱནཾ དཏྭཱ པཱུཛཾ ཀཏྭཱ ‘‘པུཏྟསྶ མེ དྷམྨཀཐཾ སུཎིསྶཱམཱི’’ཏི ཨེཀམེཝ དཱསིཾ གེཧརཀྑིཀཾ ཋཔེཏྭཱ སབྦཾ པརིཛནཾ ཨཱདཱཡ ཨནྟོནགརེ དྷམྨསྶཝནཏྠཱཡ ཀཱརིཏེ མཎྜཔེ ཨལངྐཏདྷམྨཱསནཾ ཨབྷིརུཡ྄ཧ དྷམྨཾ དེསེནྟསྶ པུཏྟསྶ དྷམྨཀཐཾ སོཏུཾ ཨགམཱསི.

ཏསྨིཾ པན ཀཱལེ ནཝསཏཱ ཙོརཱ ཏསྶཱ ཨུཔཱསིཀཱཡ གེཧེ ཨོཏཱརཾ ཨོལོཀེནྟཱ ཝིཙརནྟི. ཏསྶཱ པན གེཧཾ སཏྟཧི པཱཀཱརེཧི པརིཀྑིཏྟཾ སཏྟདྭཱརཀོཊྛཀཡུཏྟཾ, ཏཏྠ ཏེསུ ཏེསུ ཋཱནེསུ ཙཎྜསུནཁེ བནྡྷིཏྭཱ ཋཔཡིཾསུ. ཨནྟོགེཧེ ཚདནསྶ ཨུདཀཔཱཏཊྛཱནེ པན པརིཁཾ ཁཎིཏྭཱ ཏིཔུནཱ པཱུརཡིཾསུ. ཏཾ དིཝཱ ཨཱཏཔེན ཝིལཱིནཾ པཀྐུཐིཏཾ ཝིཡ ཏིཊྛཏི, རཏྟིཾ ཀཋིནཾ ཀཀྑལ༹ཾ ཧུཏྭཱ ཏིཊྛཏི. ཏསྶཱནནྟརཱ མཧནྟཱནི ཨཡསངྒྷཱཊཀཱནི ནིརནྟརཾ བྷཱུམིཡཾ ཨོདཧིཾསུ. ཨིཏི ཨིམཉྩཱརཀྑཾ ཨུཔཱསིཀཱཡ ཙ ཨནྟོགེཧེ ཋིཏབྷཱཝཾ པཊིཙྩ ཏེ ཙོརཱ ཨོཀཱསཾ ཨལབྷནྟཱ ཏཾ དིཝསཾ ཏསྶཱ གཏབྷཱཝཾ ཉཏྭཱ ཨུམངྒཾ བྷིནྡིཏྭཱ ཏིཔུཔརིཁཱཡ ཙ ཨཡསངྒྷཱཊཀཱནཉྩ ཧེཊྛཱབྷཱགེནེཝ གེཧཾ པཝིསིཏྭཱ ཙོརཛེཊྛཀཾ ཏསྶཱ སནྟིཀཾ པཧིཎིཾསུ ‘‘སཙེ སཱ ཨམྷཱཀཾ ཨིདྷ པཝིཊྛབྷཱཝཾ སུཏྭཱ ནིཝཏྟིཏྭཱ གེཧཱབྷིམུཁཱི ཨཱགཙྪཏི, ཨསིནཱ ནཾ པཧརིཏྭཱ མཱརེཐཱ’’ཏི. སོ གནྟྭཱ ཏསྶཱ སནྟིཀེ ཨཊྛཱསི.

ཙོརཱཔི ཨནྟོགེཧེ དཱིཔཾ ཛཱལེཏྭཱ ཀཧཱཔཎགབྦྷདྭཱརཾ ཝིཝརིཾསུ. སཱ དཱསཱི ཙོརེ དིསྭཱ ཨུཔཱསིཀཱཡ སནྟིཀཾ གནྟྭཱ, ‘‘ཨཡྻེ, བཧཱུ ཙོརཱ གེཧཾ པཝིསིཏྭཱ ཀཧཱཔཎགབྦྷདྭཱརཾ ཝིཝརིཾསཱུ’’ཏི ཨཱརོཙེསི. ‘‘ཙོརཱ ཨཏྟནཱ དིཊྛཀཧཱཔཎེ ཧརནྟུ, ཨཧཾ མམ པུཏྟསྶ དྷམྨཀཐཾ སུཎཱམི, མཱ མེ དྷམྨསྶ ཨནྟརཱཡཾ ཀརི, གེཧཾ གཙྪཱ’’ཏི ཏཾ པཧིཎི. ཙོརཱཔི ཀཧཱཔཎགབྦྷཾ ཏུཙྪཾ ཀཏྭཱ རཛཏགབྦྷཾ ཝིཝརིཾསུ. སཱ པུནཔི གནྟྭཱ ཏམཏྠཾ ཨཱརོཙེསི. ཨུཔཱསིཀཱཔི ‘‘ཙོརཱ ཨཏྟནཱ ཨིཙྪིཏཾ ཧརནྟུ, མཱ མེ ཨནྟརཱཡཾ ཀརཱི’’ཏི པུན ཏཾ པཧིཎི. ཙོརཱ རཛཏགབྦྷམྤི ཏུཙྪཾ ཀཏྭཱ སུཝཎྞགབྦྷཾ ཝིཝརིཾསུ. སཱ པུནཔི གནྟྭཱ ཨུཔཱསིཀཱཡ ཏམཏྠཾ ཨཱརོཙེསི. ཨཐ ནཾ ཨུཔཱསིཀཱ ཨཱམནྟེཏྭཱ, ‘‘བྷོཏི ཛེ ཏྭཾ ཨནེཀཝཱརཾ མམ སནྟིཀཾ ཨཱགཏཱ, ‘ཙོརཱ ཡཐཱརུཙིཏཾ ཧརནྟུ, ཨཧཾ མམ པུཏྟསྶ དྷམྨཀཐཾ སུཎཱམི, མཱ མེ ཨནྟརཱཡཾ ཀརཱི’ཏི མཡཱ ཝུཏྟཱཔི མམ ཀཐཾ ཨནཱདིཡིཏྭཱ པུནཔྤུནཾ ཨཱགཙྪསིཡེཝ. སཙེ ཨིདཱནི ཏྭཾ ཨཱགཙྪིསྶསི, ཛཱནིསྶཱམི ཏེ ཀཏྟབྦཾ, གེཧམེཝ གཙྪཱ’’ཏི པཧིཎི.

ཙོརཛེཊྛཀོ ཏསྶཱ ཀཐཾ སུཏྭཱ ‘‘ཨེཝརཱུཔཱཡ ཨིཏྠིཡཱ སནྟཀཾ ཧརནྟཱནཾ ཨསནི པཏིཏྭཱ མཏྠཀཾ བྷིནྡེཡྻཱ’’ཏི ཙོརཱནཾ སནྟིཀཾ གནྟྭཱ ‘‘སཱིགྷཾ ཨུཔཱསིཀཱཡ སནྟཀཾ པཊིཔཱཀཏིཀཾ ཀརོཐཱ’’ཏི ཨཱཧ. ཏེ ཀཧཱཔཎེཧི ཀཧཱཔཎགབྦྷཾ, རཛཏསུཝཎྞེཧི རཛཏསུཝཎྞགབྦྷེ པུན པཱུརཡིཾསུ. དྷམྨཏཱ ཀིརེསཱ, ཡཾ དྷམྨོ དྷམྨཙཱརིནཾ རཀྑཏི. ཏེནེཝཱཧ –

‘‘དྷམྨོ ཧཝེ རཀྑཏི དྷམྨཙཱརིཾ,

དྷམྨོ སུཙིཎྞོ སུཁམཱཝཧཱཏི;

ཨེསཱནིསཾསོ དྷམྨེ སུཙིཎྞེ,

ན དུགྒཏིཾ གཙྪཏི དྷམྨཙཱརཱི’’ཏི. (ཐེརགཱ. ༣༠༣; ཛཱ. ༡.༡༠.༡༠༢);

ཙོརཱཔི གནྟྭཱ དྷམྨསྶཝནཊྛཱནེ ཨཊྛཾསུ. ཐེརོཔི དྷམྨཾ ཀཐེཏྭཱ ཝིབྷཱཏཱཡ རཏྟིཡཱ ཨཱསནཱ ཨོཏརི. ཏསྨིཾ ཁཎེ ཙོརཛེཊྛཀོ ཨུཔཱསིཀཱཡ པཱདམཱུལེ ནིཔཛྫིཏྭཱ ‘‘ཁམཱཧི མེ, ཨཡྻེ’’ཏི ཨཱཧ. ‘‘ཀིཾ ཨིདཾ, ཏཱཏཱ’’ཏི? ‘‘ཨཧཉྷི ཏུམྷེསུ ཨཱགྷཱཏཾ ཀཏྭཱ ཏུམྷེ མཱརེཏུཀཱམོ ཨཊྛཱསི’’ནྟི. ‘‘ཏེན ཧི ཏེ, ཏཱཏ, ཁམཱམཱི’’ཏི. སེསཙོརཱཔི ཏཐེཝ ཝཏྭཱ, ‘‘ཏཱཏཱ, ཁམཱམཱི’’ཏི ཝུཏྟེ ཨཱཧཾསུ – ‘‘ཨཡྻེ, སཙེ ནོ ཁམཐ, པུཏྟསྶ ཝོ སནྟིཀེ ཨམྷཱཀཾ པབྦཛྫཾ དཱཔེཐཱ’’ཏི. སཱ པུཏྟཾ ཝནྡིཏྭཱ ཨཱཧ – ‘‘ཏཱཏ, ཨིམེ ཙོརཱ མམ གུཎེསུ ཏུམྷཱཀཉྩ དྷམྨཀཐཱཡ པསནྣཱ པབྦཛྫཾ ཡཱཙནྟི, པབྦཱཛེཐ ནེ’’ཏི. ཐེརོ ‘‘སཱདྷཱུ’’ཏི ཝཏྭཱ ཏེཧི ནིཝཏྠཝཏྠཱནཾ དསཱནི ཚིནྡཱཔེཏྭཱ ཏམྦམཏྟིཀཱཡ རཛཱཔེཏྭཱ ཏེ པབྦཱཛེཏྭཱ སཱིལེསུ པཏིཊྛཱཔེསི. ཨུཔསམྤནྣཀཱལེ ཙ ནེསཾ ཨེཀེཀསྶ ཝིསུཾ ཝིསུཾ ཀམྨཊྛཱནམདཱསི. ཏེ ནཝསཏཱ བྷིཀྑཱུ ཝིསུཾ ཝིསུཾ ནཝསཏཀམྨཊྛཱནཱནི གཧེཏྭཱ ཨེཀཾ པབྦཏཾ ཨབྷིརུཡ྄ཧ ཏསྶ ཏསྶ རུཀྑསྶ ཚཱཡཱཡ ནིསཱིདིཏྭཱ སམཎདྷམྨཾ ཀརིཾསུ.

སཏྠཱ ཝཱིསཡོཛནསཏམཏྠཀེ ཛེཏཝནམཧཱཝིཧཱརེ ནིསིནྣོཝ ཏེ བྷིཀྑཱུ ཨོལོཀེཏྭཱ ཏེསཾ ཙརིཡཝསེན དྷམྨདེསནཾ ཝཝཏྠཱཔེཏྭཱ ཨོབྷཱསཾ ཕརིཏྭཱ སམྨུཁེ ནིསཱིདིཏྭཱ ཀཐེནྟོ ཝིཡ ཨིམཱ གཱཐཱ ཨབྷཱསི –

༣༦༨.

‘‘མེཏྟཱཝིཧཱརཱི ཡོ བྷིཀྑུ, པསནྣོ བུདྡྷསཱསནེ;

ཨདྷིགཙྪེ པདཾ སནྟཾ, སངྑཱརཱུཔསམཾ སུཁཾ.

༣༦༩.

‘‘སིཉྩ བྷིཀྑུ ཨིམཾ ནཱཝཾ, སིཏྟཱ ཏེ ལཧུམེསྶཏི;

ཚེཏྭཱ རཱགཉྩ དོསཉྩ, ཏཏོ ནིབྦཱནམེཧིསི.

༣༧༠.

‘‘པཉྩ ཚིནྡེ པཉྩ ཛཧེ, པཉྩ ཙུཏྟརི བྷཱཝཡེ;

པཉྩསངྒཱཏིགོ བྷིཀྑུ, ཨོགྷཏིཎྞོཏི ཝུཙྩཏི.

༣༧༡.

‘‘ཛྷཱཡ བྷིཀྑུ མཱ པམཱདོ,

མཱ ཏེ ཀཱམགུཎེ རམེསྶུ ཙིཏྟཾ;

མཱ ལོཧགུལ༹ཾ གིལཱི པམཏྟོ,

མཱ ཀནྡཱི དུཀྑམིདནྟི དཡ྄ཧམཱནོ.

༣༧༢.

‘‘ནཏྠི ཛྷཱནཾ ཨཔཉྙསྶ, པཉྙཱ ནཏྠི ཨཛྷཱཡཏོ;

ཡམྷི ཛྷཱནཉྩ པཉྙཱ ཙ, ས ཝེ ནིབྦཱནསནྟིཀེ.

༣༧༣.

‘‘སུཉྙཱགཱརཾ པཝིཊྛསྶ, སནྟཙིཏྟསྶ བྷིཀྑུནོ;

ཨམཱནུསཱི རཏཱི ཧོཏི, སམྨཱ དྷམྨཾ ཝིཔསྶཏོ.

༣༧༤.

‘‘ཡཏོ ཡཏོ སམྨསཏི, ཁནྡྷཱནཾ ཨུདཡབྦཡཾ;

ལབྷཏཱི པཱིཏིཔཱམོཛྫཾ, ཨམཏཾ ཏཾ ཝིཛཱནཏཾ.

༣༧༥.

‘‘ཏཏྲཱཡམཱདི བྷཝཏི, ཨིདྷ པཉྙསྶ བྷིཀྑུནོ;

ཨིནྡྲིཡགུཏྟི སནྟུཊྛི, པཱཏིམོཀྑེ ཙ སཾཝརོ.

༣༧༦.

‘‘མིཏྟེ བྷཛསྶུ ཀལྱཱཎེ, སུདྡྷཱཛཱིཝེ ཨཏནྡིཏེ;

པཊིསནྠཱརཝུཏྱསྶ, ཨཱཙཱརཀུསལོ སིཡཱ;

ཏཏོ པཱམོཛྫབཧུལོ, དུཀྑསྶནྟཾ ཀརིསྶཏཱི’’ཏི.

ཏཏྠ མེཏྟཱཝིཧཱརཱིཏི མེཏྟཱཀམྨཊྛཱནེ ཀམྨཾ ཀརོནྟོཔི མེཏྟཱཝསེན ཏིཀཙཏུཀྐཛ྄ཛྷཱནེ ནིབྦཏྟེཏྭཱ ཋིཏོཔི མེཏྟཱཝིཧཱརཱིཡེཝ ནཱམ. པསནྣོཏི ཡོ པན བུདྡྷསཱསནེ པསནྣོ ཧོཏི, པསཱདཾ རོཙེཏིཡེཝཱཏི ཨཏྠོ. པདཾ སནྟནྟི ནིབྦཱནསྶེཏཾ ནཱམཾ. ཨེཝརཱུཔོ ཧི བྷིཀྑུ སནྟཾ ཀོཊྛཱསཾ སབྦསངྑཱརཱནཾ ཨུཔསནྟཏཱཡ སངྑཱརཱུཔསམཾ, པརམསུཁཏཱཡ སུཁནྟི ལདྡྷནཱམཾ ནིབྦཱནཾ ཨདྷིགཙྪཏི, ཝིནྡཏིཡེཝཱཏི ཨཏྠོ.

སིཉྩ བྷིཀྑུ ཨིམཾ ནཱཝནྟི བྷིཀྑུ ཨིམཾ ཨཏྟབྷཱཝསངྑཱཏཾ ནཱཝཾ མིཙྪཱཝིཏཀྐོདཀཾ ཚཌྜེནྟོ སིཉྩ. སིཏྟཱ ཏེ ལཧུམེསྶཏཱིཏི ཡཐཱ ཧི མཧཱསམུདྡེ ཨུདཀསྶེཝ བྷརིཏཱ ནཱཝཱ ཚིདྡཱནི པིདཧིཏྭཱ ཨུདཀསྶ སིཏྟཏཱཡ སིཏྟཱ སལླཧུཀཱ ཧུཏྭཱ མཧཱསམུདྡེ ཨནོསཱིདིཏྭཱ སཱིགྷཾ སུཔཊྚནཾ གཙྪཏི, ཨེཝཾ ཏཝཱཔི ཨཡཾ མིཙྪཱཝིཏཀྐོདཀབྷརིཏཱ ཨཏྟབྷཱཝནཱཝཱ ཙཀྑུདྭཱརཱདིཚིདྡཱནི སཾཝརེན པིདཧིཏྭཱ ཨུཔྤནྣསྶ མིཙྪཱཝིཏཀྐོདཀསྶ སིཏྟཏཱཡ སིཏྟཱ སལླཧུཀཱ སཾསཱརཝཊྚེ ཨནོསཱིདིཏྭཱ སཱིགྷཾ ནིབྦཱནཾ གམིསྶཏི. ཚེཏྭཱཏི རཱགདོསབནྡྷནཱནི ཚིནྡ. ཨེཏཱནི ཧི ཚིནྡིཏྭཱ ཨརཧཏྟཔྤཏྟོ ཏཏོ ཨཔརབྷཱགེ ཨནུཔཱདིསེསནིབྦཱནམེཝ ཨེཧིསི, གམིསྶསཱིཏི ཨཏྠོ.

པཉྩ ཚིནྡེཏི ཧེཊྛཱཨཔཱཡསམྤཱཔཀཱནི པཉྩོརམྦྷཱགིཡསཾཡོཛནཱནི པཱདེ བདྡྷརཛྫུཾ པུརིསོ སཏྠེན ཝིཡ ཧེཊྛཱམགྒཏྟཡེན ཚིནྡེཡྻ. པཉྩ ཛཧེཏི ཨུཔརིདེཝལོཀསམྤཱཔཀཱནི པཉྩུདྡྷམྦྷཱགིཡསཾཡོཛནཱནི པུརིསོ གཱིཝཱཡ བདྡྷརཛྫུཀཾ ཝིཡ ཨརཧཏྟམགྒེན ཛཧེཡྻ པཛཧེཡྻ, ཚིནྡེཡྻཱཏི ཨཏྠོ. པཉྩ ཙུཏྟརི བྷཱཝཡེཏི ཨུདྡྷམྦྷཱགིཡསཾཡོཛནཱནཾ པཧཱནཏྠཱཡ སདྡྷཱདཱིནི པཉྩིནྡྲིཡཱནི ཨུཏྟརི བྷཱཝེཡྻ. པཉྩསངྒཱཏིགོཏི ཨེཝཾ སནྟེ པཉྩནྣཾ རཱགདོསམོཧམཱནདིཊྛིསངྒཱནཾ ཨཏིཀྐམནེན པཉྩསངྒཱཏིགོ བྷིཀྑུ ཨོགྷཏིཎྞོཏི ཝུཙྩཏི, ཙཏྟཱརོ ཨོགྷེ ཏིཎྞོཡེཝཱཏི ཝུཙྩཏཱིཏི ཨཏྠོ.

ཛྷཱཡ བྷིཀྑཱུཏི བྷིཀྑུ ཏྭཾ དྭིནྣཾ ཛྷཱནཱནཾ ཝསེན ཛྷཱཡ ཙེཝ, ཀཱཡཀམྨཱདཱིསུ ཙ ཨཔྤམཏྟཝིཧཱརིཏཱཡ མཱ པམཛྫི. རམེསྶཱུཏི པཉྩཝིདྷེ ཙ ཀཱམགུཎེ ཏེ ཙིཏྟཾ མཱ རམེསྶུ. མཱ ལོཧགུལ༹ནྟི སཏིཝོསྶགྒལཀྑཎེན ཧི པམཱདེན པམཏྟཱ ནིརཡེ ཏཏྟཾ ལོཧགུལ༹ཾ གིལནྟི, ཏེན ཏཾ ཝདཱམི ‘‘མཱ པམཏྟོ ཧུཏྭཱ ལོཧགུལ༹ཾ གིལི, མཱ ནིརཡེ ཌཡ྄ཧམཱནོ ‘དུཀྑམིད’ནྟི ཀནྡཱི’’ཏི ཨཏྠོ.

ནཏྠི ཛྷཱནནྟི ཛྷཱནུཔྤཱདིཀཱཡ ཝཱཡཱམཔཉྙཱཡ ཨཔཉྙསྶ ཛྷཱནཾ ནཱམ ནཏྠི. པཉྙཱ ནཏྠཱིཏི ཨཛྷཱཡནྟསྶ ‘‘སམཱཧིཏོ བྷིཀྑུ ཡཐཱབྷཱུཏཾ ཛཱནཱཏི པསྶཏཱི’’ཏི ཝུཏྟལཀྑཎཱ པཉྙཱ ནཏྠི. ཡམྷི ཛྷཱནཉྩ པཉྙཱ ཙཱཏི ཡམྷི པུགྒལེ ཨིདཾ ཨུབྷཡམྤི ཨཏྠི, སོ ནིབྦཱནསྶ སནྟིཀེ ཋིཏོཡེཝཱཏི ཨཏྠོ.

སུཉྙཱགཱརཾ པཝིཊྛསྶཱཏི ཀིསྨིཉྩིདེཝ ཝིཝིཏྟོཀཱསེ ཀམྨཊྛཱནཾ ཨཝིཛཧིཏྭཱ ཀམྨཊྛཱནམནསིཀཱརེན ནིསིནྣསྶ. སནྟཙིཏྟསྶཱཏི ནིབྦུཏཙིཏྟསྶ. སམྨཱཏི ཧེཏུནཱ ཀཱརཎེན དྷམྨཾ ཝིཔསྶནྟསྶ ཝིཔསྶནཱསངྑཱཏཱ ཨམཱནུསཱི རཏི ཨཊྛསམཱཔཏྟིསངྑཱཏཱ དིབྦཱཔི རཏི ཧོཏི ཨུཔྤཛྫཏཱིཏི ཨཏྠོ.

ཡཏོ ཡཏོ སམྨསཏཱིཏི ཨཊྛཏིཾསཱཡ ཨཱརམྨཎེསུ ཀམྨཾ ཀརོནྟོ ཡེན ཡེནཱཀཱརེན, པུརེབྷཏྟཱདཱིསུ ཝཱ ཀཱལེསུ ཡསྨིཾ ཡསྨིཾ ཨཏྟནཱ ཨབྷིརུཙིཏེ ཀཱལེ, ཨབྷིརུཙིཏེ ཝཱ ཀམྨཊྛཱནེ ཀམྨཾ ཀརོནྟོ སམྨསཏི. ཨུདཡབྦཡནྟི པཉྩནྣཾ ཁནྡྷཱནཾ པཉྩཝཱིསཏིཡཱ ལཀྑཎེཧི ཨུདཡཾ, པཉྩཝཱིསཏིཡཱ ཨེཝ ཙ ལཀྑཎེཧི ཝཡཾ. པཱིཏིཔཱམོཛྫནྟི ཨེཝཾ ཁནྡྷཱནཾ ཨུདཡབྦཡཾ སམྨསནྟོ དྷམྨཔཱིཏིཾ དྷམྨཔཱམོཛྫཉྩ ལབྷཏི. ཨམཏནྟི ཏཾ སཔྤཙྩཡེ ནཱམརཱུཔེ པཱཀཊེ ཧུཏྭཱ ཨུཔཊྛཧནྟེ ཨུཔྤནྣཾ པཱིཏིཔཱམོཛྫཾ ཨམཏནིབྦཱནསམྤཱཔཀཏྟཱ ཝིཛཱནཏཾ པཎྜིཏཱནཾ ཨམཏམེཝཱཏི ཨཏྠོ.

ཏཏྲཱཡམཱདི བྷཝཏཱིཏི ཏཏྲ ཨཡཾ ཨཱདི, ཨིདཾ པུབྦཊྛཱནཾ ཧོཏི. ཨིདྷ པཉྙསྶཱཏི ཨིམསྨིཾ སཱསནེ པཎྜིཏབྷིཀྑུནོ. ཨིདཱནི ‘‘ཏཾ ཨཱདཱི’’ཏི ཝུཏྟཾ པུབྦཊྛཱནཾ དསྶེནྟོ ཨིནྡྲིཡགུཏྟཱིཏིཨཱདིམཱཧ. ཙཏུཔཱརིསུདྡྷིསཱིལཉྷི པུབྦཊྛཱནཾ ནཱམ. ཏཏྠ ཨིནྡྲིཡགུཏྟཱིཏི ཨིནྡྲིཡསཾཝརོ. སནྟུཊྛཱིཏི ཙཏུཔཙྩཡསནྟོསོ. ཏེན ཨཱཛཱིཝཔཱརིསུདྡྷི ཙེཝ པཙྩཡསནྣིསྶིཏཉྩ སཱིལཾ ཀཐིཏཾ. པཱཏིམོཀྑེཏི པཱཏིམོཀྑསངྑཱཏེ ཛེཊྛཀསཱིལེ པརིཔཱུརཀཱརིཏཱ ཀཐིཏཱ.

མིཏྟེ བྷཛསྶུ ཀལྱཱཎེཏི ཝིསྶཊྛཀམྨནྟེ ཨཔཏིརཱུཔསཧཱཡེ ཝཛྫེཏྭཱ སཱདྷུཛཱིཝིཏཱཡ སུདྡྷཱཛཱིཝེ ཛངྒྷབལཾ ནིསྶཱཡ ཛཱིཝིཀཀཔྤནཱཡ ཨཀུསཱིཏེ ཨཏནྡིཏེ ཀལྱཱཎམིཏྟེ བྷཛསྶུ, སེཝསྶཱུཏི ཨཏྠོ. པཊིསནྠཱརཝུཏྱསྶཱཏི ཨཱམིསཔཊིསནྠཱརེན ཙ དྷམྨཔཊིསནྠཱརེན ཙ སམྤནྣཝུཏྟིཏཱཡ པཊིསནྠཱརཝུཏྟི ཨསྶ, པཊིསནྠཱརསྶ ཀཱརཀཱ བྷཝེཡྻཱཏི ཨཏྠོ. ཨཱཙཱརཀུསལོཏི སཱིལམྤི ཨཱཙཱརོ, ཝཏྟཔཊིཝཏྟམྤི ཨཱཙཱརོ. ཏཏྠ ཀུསལོ སིཡཱ, ཚེཀོ བྷཝེཡྻཱཏི ཨཏྠོ. ཏཏོ པཱམོཛྫབཧུལོཏི ཏཏོ པཊིསནྠཱརཝུཏྟིཏོ ཙ ཨཱཙཱརཀོསལླཏོ ཙ ཨུཔྤནྣེན དྷམྨཔཱམོཛྫེན པཱམོཛྫབཧུལོ ཧུཏྭཱ ཏཾ སཀལསྶཱཔི ཝཊྚདུཀྑསྶ ཨནྟཾ ཀརིསྶཏཱིཏི ཨཏྠོ.

ཨེཝཾ སཏྠཱརཱ དེསིཏཱསུ ཨིམཱསུ གཱཐཱསུ ཨེཀམེཀིསྶཱཡ གཱཐཱཡ པརིཡོསཱནེ ཨེཀམེཀཾ བྷིཀྑུསཏཾ ནིསིནྣནིསིནྣཊྛཱནེཡེཝ སཧ པཊིསམྦྷིདཱཧི ཨརཧཏྟཾ པཏྭཱ ཝེཧཱསཾ ཨབྦྷུགྒནྟྭཱ སབྦེཔི ཏེ བྷིཀྑཱུ ཨཱཀཱསེནེཝ ཝཱིསཡོཛནསཏིཀཾ ཀནྟཱརཾ ཨཏིཀྐམིཏྭཱ ཏཐཱགཏསྶ སུཝཎྞཝཎྞཾ སརཱིརཾ ཝཎྞེནྟཱ ཐོམེནྟཱ པཱདེ ཝནྡིཾསཱུཏི.

སམྦཧུལབྷིཀྑུཝཏྠུ སཏྟམཾ.

༨. པཉྩསཏབྷིཀྑུཝཏྠུ

ཝསྶིཀཱ ཝིཡ པུཔྥཱནཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩསཏེ བྷིཀྑཱུ ཨཱརབྦྷ ཀཐེསི.

ཏེ ཀིར སཏྠུ སནྟིཀེ ཀམྨཊྛཱནཾ གཧེཏྭཱ ཨརཉྙེ སམཎདྷམྨཾ ཀརོནྟཱ པཱཏོཝ པུཔྥིཏཱནི ཝསྶིཀཔུཔྥཱནི སཱཡཾ ཝཎྚཏོ མུཙྩནྟཱནི དིསྭཱ ‘‘པུཔྥཱནཾ ཝཎྚེཧི མུཙྩནཏོ མཡཾ པཋམཏརཾ རཱགཱདཱིཧི མུཙྩིསྶཱམཱ’’ཏི ཝཱཡམིཾསུ. སཏྠཱ ཏེ བྷིཀྑཱུ ཨོལོཀེཏྭཱ, ‘‘བྷིཀྑཝེ, བྷིཀྑུནཱ ནཱམ ཝཎྚཏོ མུཙྩནཔུཔྥེན ཝིཡ དུཀྑཏོ མུཙྩིཏུཾ ཝཱཡམིཏབྦམེཝཱ’’ཏི ཝཏྭཱ གནྡྷཀུཊིཡཾ ནིསིནྣོཝ ཨཱལོཀཾ ཕརིཏྭཱ ཨིམཾ གཱཐམཱཧ –

༣༧༧.

‘‘ཝསྶིཀཱ ཝིཡ པུཔྥཱནི, མདྡཝཱནི པམུཉྩཏི;

ཨེཝཾ རཱགཉྩ དོསཉྩ, ཝིཔྤམུཉྩེཐ བྷིཀྑཝོ’’ཏི.

ཏཏྠ ཝསྶིཀཱཏི སུམནཱ. མདྡཝཱནཱིཏི མིལཱཏཱནི. ཨིདཾ ཝུཏྟཾ ཧོཏི – ཡཐཱ ཝསྶིཀཱ ཧིཡྻོ པུཔྥིཏཔུཔྥཱནི པུནདིཝསེ པུརཱཎབྷཱུཏཱནི མུཉྩཏི, ཝཎྚཏོ ཝིསྶཛྫེཏི, ཨེཝཾ ཏུམྷེཔི རཱགཱདཡོ དོསེ ཝིཔྤམུཉྩེཐཱཏི.

དེསནཱཝསཱནེ སབྦེཔི ཏེ བྷིཀྑཱུ ཨརཧཏྟེ པཏིཊྛཧིཾསཱུཏི.

པཉྩསཏབྷིཀྑུཝཏྠུ ཨཊྛམཾ.

༩. སནྟཀཱཡཏྠེརཝཏྠུ

སནྟཀཱཡོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སནྟཀཱཡཏྠེརཾ ནཱམ ཨཱརབྦྷ ཀཐེསི.

ཏསྶ ཀིར ཧཏྠཔཱདཀུཀྐུཙྩཾ ནཱམ ནཱཧོསི, ཀཱཡཝིཛམྦྷནརཧིཏོ སནྟཨཏྟབྷཱཝོཝ ཨཧོསི. སོ ཀིར སཱིཧཡོནིཏོ ཨཱགཏོ ཐེརོ. སཱིཧཱ ཀིར ཨེཀདིཝསཾ གོཙརཾ གཧེཏྭཱ རཛཏསུཝཎྞམཎིཔཝཱལ༹གུཧཱནཾ ཨཉྙཏརཾ པཝིསིཏྭཱ མནོསིལཱཏལེ ཧརིཏཱལཙུཎྞེསུ སཏྟཱཧཾ ནིཔཛྫིཏྭཱ སཏྟམེ དིཝསེ ཨུཊྛཱཡ ནིཔནྣཊྛཱནཾ ཨོལོཀེཏྭཱ སཙེ ནངྒུཊྛསྶ ཝཱ ཀཎྞཱནཾ ཝཱ ཧཏྠཔཱདཱནཾ ཝཱ ཙལིཏཏྟཱ མནོསིལཱཧརིཏཱལཙུཎྞཱནཾ ཝིཔྤཀིཎྞཏཾ པསྶནྟི, ‘‘ན ཏེ ཨིདཾ ཛཱཏིཡཱ ཝཱ གོཏྟསྶ ཝཱ པཏིརཱུཔ’’ནྟི པུན སཏྟཱཧཾ ནིརཱཧཱརཱ ནིཔཛྫནྟི, ཙུཎྞཱནཾ པན ཝིཔྤཀིཎྞབྷཱཝེ ཨསཏི ‘‘ཨིདཾ ཏེ ཛཱཏིགོཏྟཱནཾ ཨནུཙྪཝིཀ’’ནྟི ཨཱསཡཱ ནིཀྑམིཏྭཱ ཝིཛམྦྷིཏྭཱ དིསཱ ཨནུཝིལོཀེཏྭཱ ཏིཀྑཏྟུཾ སཱིཧནཱདཾ ནདིཏྭཱ གོཙརཱཡ པཀྐམནྟི. ཨེཝརཱུཔཱཡ སཱིཧཡོནིཡཱ ཨཱགཏོ ཨཡཾ བྷིཀྑུ. ཏསྶ ཀཱཡསམཱཙཱརཾ དིསྭཱ བྷིཀྑཱུ སཏྠུ ཨཱརོཙེསུཾ – ‘‘ན ནོ, བྷནྟེ, སནྟཀཱཡཏྠེརསདིསོ བྷིཀྑུ དིཊྛཔུབྦོ. ཨིམསྶ ཧི ནིསིནྣཊྛཱནེ ཧཏྠཙལནཾ ཝཱ པཱདཙལནཾ ཝཱ ཀཱཡཝིཛམྦྷིཏཱ ཝཱ ནཏྠཱི’’ཏི. ཏཾ སུཏྭཱ སཏྠཱ, ‘‘བྷིཀྑཝེ, བྷིཀྑུནཱ ནཱམ སནྟཀཱཡཏྠེརེན ཝིཡ ཀཱཡཱདཱིཧི ཨུཔསནྟེནེཝ བྷཝིཏབྦ’’ནྟི ཝཏྭཱ ཨིམཾ གཱཐམཱཧ –

༣༧༨.

‘‘སནྟཀཱཡོ སནྟཝཱཙོ, སནྟཝཱ སུསམཱཧིཏོ;

ཝནྟལོཀཱམིསོ བྷིཀྑུ, ཨུཔསནྟོཏི ཝུཙྩཏཱི’’ཏི.

ཏཏྠ སནྟཀཱཡོཏི པཱཎཱཏིཔཱཏཱདཱིནཾ ཨབྷཱཝེན སནྟཀཱཡོ, མུསཱཝཱདཱདཱིནཾ ཨབྷཱཝེན སནྟཝཱཙོ, ཨབྷིཛ྄ཛྷཱདཱིནཾ ཨབྷཱཝེན སནྟཝཱ, ཀཱཡཱདཱིནཾ ཏིཎྞམྤི སུཊྛུ སམཱཧིཏཏྟཱ སུསམཱཧིཏོ, ཙཏཱུཧི མགྒེཧི ལོཀཱམིསསྶ ཝནྟཏཱཡ ཝནྟལོཀཱམིསོ བྷིཀྑུ ཨབྦྷནྟརེ རཱགཱདཱིནཾ ཨུཔསནྟཏཱཡ ཨུཔསནྟོཏི ཝུཙྩཏཱིཏི ཨཏྠོ.

དེསནཱཝསཱནེ སོ ཐེརོ ཨརཧཏྟེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

སནྟཀཱཡཏྠེརཝཏྠུ ནཝམཾ.

༡༠. ནངྒལཀུལཏྠེརཝཏྠུ

ཨཏྟནཱ ཙོདཡཏྟཱནནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ནངྒལཀུལཏྠེརཾ ཨཱརབྦྷ ཀཐེསི.

ཨེཀོ ཀིར དུགྒཏམནུསྶོ པརེསཾ བྷཏིཾ ཀཏྭཱ ཛཱིཝཏི, ཏཾ ཨེཀོ བྷིཀྑུ པིལོཏིཀཁཎྜནིཝཏྠཾ ནངྒལཾ ཨུཀྑིཔིཏྭཱ གཙྪནྟཾ དིསྭཱ ཨེཝམཱཧ – ‘‘ཀིཾ པན ཏེ ཨེཝཾ ཛཱིཝནཏོ པབྦཛིཏུཾ ན ཝར’’ནྟི. ཀོ མཾ, བྷནྟེ, ཨེཝཾ ཛཱིཝནྟཾ པབྦཱཛེསྶཏཱིཏི? སཙེ པབྦཛིསྶསི, ཨཧཾ ཏཾ པབྦཱཛེསྶཱམཱིཏི. སཱདྷུ བྷནྟེ, སཙེ མཾ པབྦཱཛེསྶཐ, པབྦཛིསྶཱམཱིཏི. ཨཐ ནཾ སོ ཐེརོ ཛེཏཝནཾ ནེཏྭཱ སཧཏྠེན, ནྷཱཔེཏྭཱ མཱལ༹ཀེ ཋཔེཏྭཱ པབྦཱཛེཏྭཱ ནིཝཏྠཔིལོཏིཀཁཎྜེན སདྡྷིཾ ནངྒལཾ མཱལ༹ཀསཱིམཱཡམེཝ རུཀྑསཱཁཱཡཾ ཋཔཱཔེསི. སོ ཨུཔསམྤནྣཀཱལེཔི ནངྒལཀུལཏྠེརོཏྭེཝ པཉྙཱཡི. སོ བུདྡྷཱནཾ ཨུཔྤནྣལཱབྷསཀྐཱརཾ ནིསྶཱཡ ཛཱིཝནྟོ ཨུཀྐཎྛིཏྭཱ ཨུཀྐཎྛིཏཾ ཝིནོདེཏུཾ ཨསཀྐོནྟོ ‘‘ན དཱནི སདྡྷཱདེཡྻཱནི ཀཱསཱཡཱནི པརིདཧིཏྭཱ གམིསྶཱམཱི’’ཏི ཏཾ རུཀྑམཱུལཾ གནྟྭཱ ཨཏྟནཱཝ ཨཏྟཱནཾ ཨོཝདི – ‘‘ཨཧིརིཀ, ནིལླཛྫ, ཨིདཾ ནིཝཱསེཏྭཱ ཝིབྦྷམིཏྭཱ བྷཏིཾ ཀཏྭཱ ཛཱིཝིཏུཀཱམོ ཛཱཏོ’’ཏི. ཏསྶེཝཾ ཨཏྟཱནཾ ཨོཝདནྟསྶེཝ ཙིཏྟཾ ཏནུཀབྷཱཝཾ གཏཾ. སོ ནིཝཏྟིཏྭཱ པུན ཀཏིཔཱཧཙྩཡེན ཨུཀྐཎྛིཏྭཱ ཏཐེཝ ཨཏྟཱནཾ ཨོཝདི, པུནསྶ ཙིཏྟཾ ནིཝཏྟི. སོ ཨིམིནཱཝ ནཱིཧཱརེན ཨུཀྐཎྛིཏཨུཀྐཎྛིཏཀཱལེ ཏཏྠ གནྟྭཱ ཨཏྟཱནཾ ཨོཝདི. ཨཐ ནཾ བྷིཀྑཱུ ཏཏྠ ཨབྷིཎྷཾ གཙྪནྟཾ དིསྭཱ, ‘‘ཨཱཝུསོ, ནངྒལཏྠེར ཀསྨཱ ཨེཏྠ གཙྪསཱི’’ཏི པུཙྪིཾསུ. སོ ‘‘ཨཱཙརིཡསྶ སནྟིཀཾ གཙྪཱམི, བྷནྟེ’’ཏི ཝཏྭཱ ཀཏིཔཱཧེནེཝ ཨརཧཏྟཾ པཱཔུཎི.

བྷིཀྑཱུ ཏེན སདྡྷིཾ ཀེལི༹ཾ ཀརོནྟཱ ཨཱཧཾསུ – ‘‘ཨཱཝུསོ ནངྒལཏྠེར, ཏཝ ཝིཙརཎམགྒོ ཨཝལ༹ཉྫོ ཝིཡ ཛཱཏོ, ཨཱཙརིཡསྶ སནྟིཀཾ ན གཙྪསི མཉྙེ’’ཏི. ཨཱམ, བྷནྟེ, མཡཾ སཾསགྒེ སཏི ཨགམིམྷཱ, ཨིདཱནི པན སོ སཾསགྒོ ཚིནྣོ, ཏེན ན གཙྪཱམཱཏི. ཏཾ སུཏྭཱ བྷིཀྑཱུ ‘‘ཨེས ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི སཏྠུ ཏམཏྠཾ ཨཱརོཙེསུཾ. སཏྠཱ ‘‘ཨཱམ, བྷིཀྑཝེ, མམ པུཏྟོ ཨཏྟནཱཝ ཨཏྟཱནཾ ཙོདེཏྭཱ པབྦཛིཏཀིཙྩསྶ མཏྠཀཾ པཏྟོ’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༣༧༩.

‘‘ཨཏྟནཱ ཙོདཡཏྟཱནཾ, པཊིམཾསེཐ ཨཏྟནཱ;

སོ ཨཏྟགུཏྟོ སཏིམཱ, སུཁཾ བྷིཀྑུ ཝིཧཱཧིསི.

༣༨༠.

‘‘ཨཏྟཱ ཧི ཨཏྟནོ ནཱཐོ, ཀོ ཧི ནཱཐོ པརོ སིཡཱ;

ཨཏྟཱ ཧི ཨཏྟནོ གཏི;

ཏསྨཱ སཾཡམམཏྟཱནཾ, ཨསྶཾ བྷདྲཾཝ ཝཱཎིཛོ’’ཏི.

ཏཏྠ ཙོདཡཏྟཱནནྟི ཨཏྟནཱཝ ཨཏྟཱནཾ ཙོདཡ སཱརཡ. པཊིམཾསེཐཱཏི ཨཏྟནཱཝ ཨཏྟཱནཾ པརིཝཱིམཾསཐ. སོཏི སོ ཏྭཾ, བྷིཀྑུ, ཨེཝཾ སནྟེ ཨཏྟནཱཝ གུཏྟཏཱཡ ཨཏྟགུཏྟོ, ཨུཔཊྛིཏསཏིཏཱཡ སཏིམཱ ཧུཏྭཱ སབྦིརིཡཱཔཐེསུ སུཁཾ ཝིཧརིསྶསཱིཏི ཨཏྠོ.

ནཱཐོཏི ཨཝསྶཡོ པཏིཊྛཱ. ཀོ ཧི ནཱཐོ པརོཏི ཡསྨཱ པརསྶ ཨཏྟབྷཱཝེ པཏིཊྛཱཡ ཀུསལཾ ཝཱ ཀཏྭཱ སགྒཔརཱཡཎེན མགྒཾ ཝཱ བྷཱཝེཏྭཱ སཙྪིཀཏཕལེན བྷཝིཏུཾ ན སཀྐཱ, ཏསྨཱ ཀོ ཧི ནཱམ པརོ ནཱཐོ བྷཝེཡྻཱཏི ཨཏྠོ. ཏསྨཱཏི ཡསྨཱ ཨཏྟཱཝ ཨཏྟནོ གཏི པཏིཊྛཱ སརཎཾ, ཏསྨཱ ཡཐཱ བྷདྲཾ ཨསྶཱཛཱནཱིཡཾ ནིསྶཱཡ ལཱབྷཾ པཏྠཡནྟོ ཝཱཎིཛོ ཏསྶ ཝིསམཊྛཱནཙཱརཾ པཙྪིནྡིཏྭཱ དིཝསསྶ ཏིཀྑཏྟུཾ ནཧཱཔེནྟོ བྷོཛེནྟོ སཾཡམེཏི པཊིཛགྒཏི, ཨེཝཾ ཏྭམྤི ཨནུཔྤནྣསྶ ཨཀུསལསྶ ཨུཔྤཱདཾ ནིཝཱརེནྟོ སཏིསམྨོསེན ཨུཔྤནྣཾ ཨཀུསལཾ པཛཧནྟོ ཨཏྟཱནཾ སཾཡམ གོཔཡ, ཨེཝཾ སནྟེ པཋམཛ྄ཛྷཱནཾ ཨཱདིཾ ཀཏྭཱ ལོཀིཡལོཀུཏྟརཝིསེསཾ ཨདྷིགམིསྶསཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ནངྒལཀུལཏྠེརཝཏྠུ དསམཾ.

༡༡. ཝཀྐལིཏྠེརཝཏྠུ

པཱམོཛྫབཧུལོཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཝཀྐལིཏྠེརཾ ཨཱརབྦྷ ཀཐེསི.

སོ ཀིརཱཡསྨཱ སཱཝཏྠིཡཾ བྲཱཧྨཎཀུལེ ནིབྦཏྟིཏྭཱ ཝཡཔྤཏྟོ པིཎྜཱཡ པཝིཊྛཾ ཏཐཱགཏཾ དིསྭཱ སཏྠུ སརཱིརསམྤཏྟིཾ ཨོལོཀེཏྭཱ སརཱིརསམྤཏྟིདསྶནེན ཨཏིཏྟོ ‘‘ཨེཝཱཧཾ ནིཙྩཀཱལཾ ཏཐཱགཏཾ དཊྛུཾ ལབྷིསྶཱམཱི’’ཏི སཏྠུ སནྟིཀེ པབྦཛིཏྭཱ ཡཏྠ ཋིཏེན སཀྐཱ དསབལཾ པསྶིཏུཾ, ཏཏྠ ཋིཏོ སཛ྄ཛྷཱཡཀམྨཊྛཱནམནསིཀཱརཱདཱིནི པཧཱཡ སཏྠཱརཾ ཨོལོཀེནྟོཝ ཝིཙརཏི. སཏྠཱ ཏསྶ ཉཱཎཔརིཔཱཀཾ ཨཱགམེནྟོ ཀིཉྩི ཨཝཏྭཱ ‘‘ཨིདཱནིསྶ ཉཱཎཾ པརིཔཱཀཾ གཏ’’ནྟི ཉཏྭཱ ‘‘ཀིཾ ཏེ, ཝཀྐལི, ཨིམིནཱ པཱུཏིཀཱཡེན དིཊྛེན, ཡོ ཁོ, ཝཀྐལི, དྷམྨཾ པསྶཏི, སོ མཾ པསྶཏི. ཡོ མཾ པསྶཏི, སོ དྷམྨཾ པསྶཏཱི’’ཏི (སཾ. ནི. ༣.༨༧) ཝཏྭཱ ཨོཝདི. སོ ཨེཝཾ ཨོཝདིཏོཔི སཏྠུ དསྶནཾ པཧཱཡ ནེཝ ཨཉྙཏྠ གནྟུཾ སཀྐོཏི. ཨཐ ནཾ སཏྠཱ ‘‘ནཱཡཾ བྷིཀྑུ སཾཝེགཾ ཨལབྷིཏྭཱ བུཛ྄ཛྷིསྶཏཱི’’ཏི ཨུཔཀཊྛཱཡ ཝསྶཱུཔནཱཡིཀཱཡ རཱཛགཧཾ གནྟྭཱ ཝསྶཱུཔནཱཡིཀདིཝསེ ‘‘ཨཔེཧི, ཝཀྐལི, ཨཔེཧི, ཝཀྐལཱི’’ཏི པཎཱམེསི. སོ ‘‘ན མཾ སཏྠཱ ཨཱལཔཏཱི’’ཏི ཏེམཱསཾ སཏྠུ སམྨུཁེ ཋཱཏུཾ ཨསཀྐོནྟོ ‘‘ཀིཾ མཡ྄ཧཾ ཛཱིཝིཏེན, པབྦཏཱ ཨཏྟཱནཾ པཱཏེསྶཱམཱི’’ཏི གིཛ྄ཛྷཀཱུཊཾ ཨབྷིརུཧི.

སཏྠཱ ཏསྶ ཀིལམནབྷཱཝཾ ཉཏྭཱ ‘‘ཨཡཾ བྷིཀྑུ མམ སནྟིཀཱ ཨསྶཱསཾ ཨལབྷནྟོ མགྒཕལཱནཾ ཨུཔནིསྶཡཾ ནཱསེཡྻཱ’’ཏི ཨཏྟཱནཾ དསྶེཏུཾ ཨོབྷཱསཾ མུཉྩི. ཨཐསྶ སཏྠུ དིཊྛཀཱལཏོ པཊྛཱཡ ཏཱཝམཧནྟོཔི སོཀོ པཧཱིཡི. སཏྠཱ སུཀྑཏལཱ༹ཀཾ ཨོགྷེན པཱུརེནྟོ ཝིཡ ཐེརསྶ བལཝཔཱིཏིཔཱམོཛྫཾ ཨུཔྤཱདེཏུཾ ཨིམཾ གཱཐམཱཧ –

༣༨༡.

‘‘པཱམོཛྫབཧུལོ བྷིཀྑུ, པསནྣོ བུདྡྷསཱསནེ;

ཨདྷིགཙྪེ པདཾ སནྟཾ, སངྑཱརཱུཔསམཾ སུཁ’’ནྟི.

ཏསྶཏྠོ – པཀཏིཡཱཔི པཱམོཛྫབཧུལོ བྷིཀྑུ བུདྡྷསཱསནེ པསཱདཾ རོཙེཏི, སོ ཨེཝཾ པསནྣོ བུདྡྷསཱསནེ སནྟཾ པདཾ སངྑཱརཱུཔསམཾ སུཁནྟི ལདྡྷནཱམཾ ནིབྦཱནཾ ཨདྷིགཙྪེཡྻཱཏི. ཨིམཉྩ པན གཱཐཾ ཝཏྭཱ སཏྠཱ ཝཀྐལིཏྠེརསྶ ཧཏྠཾ པསཱརེཏྭཱ –

‘‘ཨེཧི ཝཀྐལི མཱ བྷཱཡི, ཨོལོཀེཧི ཏཐཱགཏཾ;

ཨཧཾ ཏཾ ཨུདྡྷརིསྶཱམི, པངྐེ སནྣཾཝ ཀུཉྫརཾ.

‘‘ཨེཧི ཝཀྐལི མཱ བྷཱཡི, ཨོལོཀེཧི ཏཐཱགཏཾ;

ཨཧཾ ཏཾ མོཙཡིསྶཱམི, རཱཧུགྒཧཾཝ སཱུརིཡཾ.

‘‘ཨེཧི ཝཀྐལི མཱ བྷཱཡི, ཨོལོཀེཧི ཏཐཱགཏཾ;

ཨཧཾ ཏཾ མོཙཡིསྶཱམི, རཱཧུགྒཧཾཝ ཙནྡིམ’’ནྟི. –

ཨིམཱ གཱཐཱ ཨབྷཱསི. སོ ‘‘དསབལོ མེ དིཊྛོ, ཨེཧཱིཏི ཙ ཨཝ྄ཧཱནམྤི ལདྡྷ’’ནྟི བལཝཔཱིཏིཾ ཨུཔྤཱདེཏྭཱ ‘‘ཀུཏོ ནུ ཁོ གནྟབྦ’’ནྟི གམནམགྒཾ ཨཔསྶནྟོ དསབལསྶ སམྨུཁེ ཨཱཀཱསེ ཨུཔྤཏིཏྭཱ པཋམཔཱདེ པབྦཏེ ཋིཏེཡེཝ སཏྠཱརཱ ཝུཏྟགཱཐཱ ཨཱཝཛྫེནྟོ ཨཱཀཱསེཡེཝ པཱིཏིཾ ཝིཀྑམྦྷེཏྭཱ སཧ པཊིསམྦྷིདཱཧི ཨརཧཏྟཾ པཏྭཱ ཏཐཱགཏཾ ཝནྡམཱནོཝ ཨོཏརིཏྭཱ སཏྠུ སནྟིཀེ ཨཊྛཱསི. ཨཐ ནཾ སཏྠཱ ཨཔརབྷཱགེ སདྡྷཱདྷིམུཏྟཱནཾ ཨགྒཊྛཱནེ ཋཔེསཱིཏི.

ཝཀྐལིཏྠེརཝཏྠུ ཨེཀཱདསམཾ.

༡༢. སུམནསཱམཎེརཝཏྠུ

ཡོ ཧཝེཏི ཨིམཾ དྷམྨདེསནཾ སཏྠཱ པུབྦཱརཱམེ ཝིཧརནྟོ སུམནསཱམཎེརཾ ཨཱརབྦྷ ཀཐེསི. ཏཏྲཱཡཾ ཨནུཔུབྦཱི ཀཐཱ –

པདུམུཏྟརབུདྡྷཀཱལསྨིཉྷི ཨེཀོ ཀུལཔུཏྟོ སཏྠཱརཱ ཙཏུཔརིསམཛ྄ཛྷེ ཨེཀཾ བྷིཀྑུཾ དིབྦཙཀྑུཀཱནཾ ཨགྒཊྛཱནེ ཋཔེནྟཾ དིསྭཱ ཏཾ སམྤཏྟིཾ པཏྠཡམཱནོ སཏྠཱརཾ ནིམནྟེཏྭཱ སཏྟཱཧཾ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ དཏྭཱ, ‘‘བྷནྟེ, ཨཧམྤི ཨནཱགཏེ ཨེཀསྶ བུདྡྷསྶ སཱསནེ དིབྦཙཀྑུཀཱནཾ ཨགྒོ བྷཝེཡྻ’’ནྟི པཏྠནཾ ཋཔེསི. སཏྠཱ ཀཔྤསཏསཧསྶཾ ཨོལོཀེནྟོ ཏསྶ པཏྠནཱཡ སམིཛ྄ཛྷནབྷཱཝཾ ཝིདིཏྭཱ ‘‘ཨིཏོ ཀཔྤསཏསཧསྶམཏྠཀེ གོཏམབུདྡྷསཱསནེ དིབྦཙཀྑུཀཱནཾ ཨགྒོ ཨནུརུདྡྷོ ནཱམ བྷཝིསྶསཱི’’ཏི བྱཱཀཱསི. སོ ཏཾ བྱཱཀརཎཾ སུཏྭཱ སྭེ པཏྟབྦཾ ཝིཡ ཏཾ སམྤཏྟིཾ མཉྙམཱནོ པརིནིབྦུཏེ སཏྠརི བྷིཀྑཱུ དིབྦཙཀྑུཔརིཀམྨཾ པུཙྪིཏྭཱ སཏྟཡོཛནིཀཾ ཀཉྩནཐཱུཔཾ པརིཀྑིཔིཏྭཱ ཨནེཀཱནི དཱིཔརུཀྑསཧསྶཱནི ཀཱརེཏྭཱ དཱིཔཔཱུཛཾ ཀཏྭཱ ཏཏོ ཙུཏོ དེཝལོཀེ ནིབྦཏྟིཏྭཱ དེཝམནུསྶེསུ ཀཔྤསཏསཧསྶཱནི སཾསརིཏྭཱ ཨིམསྨིཾ ཀཔྤེ བཱརཱཎསིཡཾ དལིདྡཀུལེ ནིབྦཏྟོ སུམནསེཊྛིཾ ནིསྶཱཡ ཏསྶ ཏིཎཧཱརཀོ ཧུཏྭཱ ཛཱིཝིཀཾ ཀཔྤེསི. ཨནྣབྷཱརོཏིསྶ ནཱམཾ ཨཧོསི. སུམནསེཊྛཱིཔི ཏསྨིཾ ནགརེ ནིཙྩཀཱལཾ མཧཱདཱནཾ དེཏི.

ཨཐེཀདིཝསཾ ཨུཔརིཊྛོ ནཱམ པཙྩེཀབུདྡྷོ གནྡྷམཱདནེ ནིརོདྷསམཱཔཏྟིཏོ ཝུཊྛཱཡ ‘‘ཀསྶ ནུ ཁོ ཨཛྫ ཨནུགྒཧཾ ཀརིསྶཱམཱི’’ཏི ཙིནྟེཏྭཱ ‘‘ཨཛྫ མཡཱ ཨནྣབྷཱརསྶ ཨནུགྒཧཾ ཀཱཏུཾ ཝཊྚཏི, ཨིདཱནི ཙ སོ ཨཊཝིཏོ ཏིཎཾ ཨཱདཱཡ གེཧཾ ཨཱགམིསྶཏཱི’’ཏི ཉཏྭཱ པཏྟཙཱིཝརམཱདཱཡ ཨིདྡྷིཡཱ གནྟྭཱ ཨནྣབྷཱརསྶ སམྨུཁེ པཙྩུཊྛཱསི. ཨནྣབྷཱརོ ཏཾ ཏུཙྪཔཏྟཧཏྠཾ དིསྭཱ ‘‘ཨཔི, བྷནྟེ, བྷིཀྑཾ ལབྷིཏྠཱ’’ཏི པུཙྪིཏྭཱ ‘‘ལབྷིསྶཱམ མཧཱཔུཉྙཱ’’ཏི ཝུཏྟེ ‘‘ཏེན ཧི, བྷནྟེ, ཐོཀཾ ཨཱགམེཐཱ’’ཏི ཏིཎཀཱཛཾ ཚཌྜེཏྭཱ ཝེགེན གེཧཾ གནྟྭཱ, ‘‘བྷདྡེ, མཡ྄ཧཾ ཋཔིཏབྷཱགབྷཏྟཾ ཨཏྠི, ནཏྠཱི’’ཏི བྷརིཡཾ པུཙྪིཏྭཱ ‘‘ཨཏྠི, སཱམཱི’’ཏི ཝུཏྟེ ཝེགེན པཙྩཱགནྟྭཱ པཙྩེཀབུདྡྷསྶ པཏྟཾ ཨཱདཱཡ ‘‘མཡ྄ཧཾ དཱཏུཀཱམཏཱཡ སཏི དེཡྻདྷམྨོ ན ཧོཏི, དེཡྻདྷམྨེ སཏི པཊིགྒཱཧཀཾ ན ལབྷཱམི. ཨཛྫ པན མེ པཊིགྒཱཧཀོ ཙ དིཊྛོ, དེཡྻདྷམྨོ ཙ ཨཏྠི, ལཱབྷཱ ཝཏ མེ’’ཏི གེཧཾ གནྟྭཱ བྷཏྟཾ པཏྟེ པཀྑིཔཱཔེཏྭཱ པཙྩཱཧརིཏྭཱ པཙྩེཀབུདྡྷསྶ ཧཏྠེ པཏིཊྛཔེཏྭཱ –

‘‘ཨིམིནཱ པན དཱནེན, མཱ མེ དཱལིདྡིཡཾ ཨཧུ;

ནཏྠཱིཏི ཝཙནཾ ནཱམ, མཱ ཨཧོསི བྷཝཱབྷཝེ. –

བྷནྟེ ཨེཝརཱུཔཱ དུཛྫཱིཝིཏཱ མུཙྩེཡྻཾ, ནཏྠཱིཏི པདམེཝ ན སུཎེཡྻ’’ནྟི པཏྠནཾ ཋཔེསི. པཙྩེཀབུདྡྷོ ‘‘ཨེཝཾ ཧོཏུ མཧཱཔུཉྙཱ’’ཏི ཝཏྭཱ ཨནུམོདནཾ ཀཏྭཱ པཀྐཱམི.

སུམནསེཊྛིནོཔི ཚཏྟེ ཨདྷིཝཏྠཱ དེཝཏཱ ‘‘ཨཧོ དཱནཾ པརམདཱནཾ, ཨུཔརིཊྛེ སུཔཏིཊྛིཏ’’ནྟི ཝཏྭཱ ཏིཀྑཏྟུཾ སཱདྷུཀཱརམདཱསི. ཨཐ ནཾ སེཊྛི ‘‘ཀིཾ མཾ ཨེཏྟཀཾ ཀཱལཾ དཱནཾ དདམཱནཾ ན པསྶསཱི’’ཏི ཨཱཧ. ནཱཧཾ ཏཝ དཱནཾ ཨཱརབྦྷ སཱདྷུཀཱརཾ དེམི, ཨནྣབྷཱརེན པན ཨུཔརིཊྛསྶ དིནྣཔིཎྜཔཱཏེ པསཱིདིཏྭཱ མཡཱ ཨེས སཱདྷུཀཱརོ པཝཏྟིཏོཏི. སོ ‘‘ཨཙྪརིཡཾ ཝཏ, བྷོ, ཨཧཾ ཨེཏྟཀཾ ཀཱལཾ དཱནཾ དདནྟོ དེཝཏཾ སཱདྷུཀཱརཾ དཱཔེཏུཾ ནཱསཀྑིཾ, ཨནྣབྷཱརོ མཾ ནིསྶཱཡ ཛཱིཝནྟོ ཨེཀཔིཎྜཔཱཏེནེཝ སཱདྷུཀཱརཾ དཱཔེསི, ཏསྶ དཱནེ ཨནུཙྪཝིཀཾ ཀཏྭཱ ཏཾ པིཎྜཔཱཏཾ མམ སནྟཀཾ ཀརིསྶཱམཱི’’ཏི ཙིནྟེཏྭཱ ཏཾ པཀྐོསཱཔེཏྭཱ ‘‘ཨཛྫ ཏཡཱ ཀསྶཙི ཀིཉྩི དིནྣ’’ནྟི པུཙྪི. ‘‘ཨཱམ, སཱམི, ཨུཔརིཊྛཔཙྩེཀབུདྡྷསྶ མེ ཨཛྫ བྷཱགབྷཏྟཾ དིནྣ’’ནྟི. ‘‘ཧནྡ, བྷོ, ཀཧཱཔཎཾ གཧེཏྭཱ ཨེཏཾ མཡ྄ཧཾ པིཎྜཔཱཏཾ དེཧཱི’’ཏི? ‘‘ན དེམི, སཱམཱི’’ཏི. སོ ཡཱཝ སཧསྶཾ ཝཌྜྷེསི, ཨིཏརོ སཧསྶེནཱཔི ནཱདཱསི. ཨཐ ནཾ ‘‘ཧོཏུ, བྷོ, ཡདི པིཎྜཔཱཏཾ ན དེསི, སཧསྶཾ གཧེཏྭཱ པཏྟིཾ མེ དེཧཱི’’ཏི ཨཱཧ. སོ ‘‘ཨཡྻེན སདྡྷིཾ མནྟེཏྭཱ ཛཱནིསྶཱམཱི’’ཏི ཝེགེན པཙྩེཀབུདྡྷཾ སམྤཱཔུཎིཏྭཱ, ‘‘བྷནྟེ སུམནསེཊྛི, སཧསྶཾ དཏྭཱ ཏུམྷཱཀཾ པིཎྜཔཱཏེ པཏྟིཾ ཡཱཙཏི, ཀིཾ ཀརོམཱི’’ཏི པུཙྪི.

ཨཐསྶ སོ ཨུཔམཾ ཨཱཧརི ‘‘སེཡྻཐཱཔི, པཎྜིཏ, ཀུལསཏིཀེ གཱམེ ཨེཀསྨིཾ གྷརེ དཱིཔཾ ཛཱལེཡྻ, སེསཱ ཨཏྟནོ ཏེལེན ཝཊྚིཾ ཏེམེཏྭཱ ཛཱལཱཔེཏྭཱ གཎྷེཡྻུཾ, པུརིམཔདཱིཔསྶ པབྷཱ ཨཏྠཱིཏི ཝཏྟབྦཱ ནཏྠཱི’’ཏི. ཨཏིརེཀཏརཱ, བྷནྟེ, པབྷཱ ཧོཏཱིཏི. ཨེཝམེཝཾ པཎྜིཏ ཨུལུ༹ངྐཡཱགུ ཝཱ ཧོཏུ, ཀཊཙྪུབྷིཀྑཱ ཝཱ, ཨཏྟནོ པིཎྜཔཱཏེ པརེསཾ པཏྟིཾ དེནྟསྶ ཡཏྟཀཱནཾ དེཏི, ཏཏྟཀཾ ཝཌྜྷཏི. ཏྭཉྷི ཨེཀམེཝ པིཎྜཔཱཏཾ ཨདཱསི, སེཊྛིསྶ པན པཏྟིཡཱ དིནྣཱཡ དྭེ པིཎྜཔཱཏཱ ཧོནྟི ཨེཀོ ཏཝ, ཨེཀོ ཏསྶཱཏི.

སོ ‘‘སཱདྷུ, བྷནྟེ’’ཏི ཏཾ ཨབྷིཝཱདེཏྭཱ སེཊྛིསྶ སནྟིཀཾ གནྟྭཱ ‘‘གཎྷ, སཱམི, པཏྟི’’ནྟི ཨཱཧ. ཏེན ཧི ཨིམེ ཀཧཱཔཎེ གཎྷཱཏི. ནཱཧཾ པིཎྜཔཱཏཾ ཝིཀྐིཎཱམི, སདྡྷཱཡ ཏེ པཏྟིཾ དམྨཱིཏི. ‘‘ཏྭཾ སདྡྷཱཡ དེསི, ཨཧམྤི ཏཝ གུཎེ པཱུཛེམི, གཎྷ, ཏཱཏ, ཨིཏོ པཊྛཱཡ ཙ པན མཱ སཧཏྠཱ ཀམྨམཀཱསི, ཝཱིཐིཡཾ གྷརཾ མཱཔེཏྭཱ ཝས. ཡེན ཙ ཏེ ཨཏྠོ ཧོཏི, སབྦཾ མམ སནྟིཀཱ གཎྷཱཧཱི’’ཏི ཨཱཧ. ནིརོདྷཱ ཝུཊྛིཏསྶ པན དིནྣཔིཎྜཔཱཏོ ཏདཧེཝ ཝིཔཱཀཾ དེཏི. ཏསྨཱ རཱཛཱཔི ཏཾ པཝཏྟིཾ སུཏྭཱ ཨནྣབྷཱརཾ པཀྐོསཱཔེཏྭཱ པཏྟིཾ གཧེཏྭཱ མཧནྟཾ བྷོགཾ དཏྭཱ ཏསྶ སེཊྛིཊྛཱནཾ དཱཔེསི.

སོ སུམནསེཊྛིསྶ སཧཱཡཀོ ཧུཏྭཱ ཡཱཝཛཱིཝཾ པུཉྙཱནི ཀཏྭཱ ཏཏོ ཙུཏོ དེཝལོཀེ ནིབྦཏྟིཏྭཱ དེཝམནུསྶེསུ སཾསརནྟོ ཨིམསྨིཾ བུདྡྷུཔྤཱདེ ཀཔིལཝཏྠུནགརེ ཨམིཏོདནསྶ སཀྐསྶ གེཧེ པཊིསནྡྷིཾ གཎྷི, ཨནུརུདྡྷོཏིསྶ ནཱམཾ ཨཀཾསུ. སོ མཧཱནཱམསཀྐསྶ ཀནིཊྛབྷཱཏཱ, སཏྠུ ཙཱུལ༹པིཏུ པུཏྟོ པརམསུཁུམཱལོ མཧཱཔུཉྙོ ཨཧོསི. ཨེཀདིཝསཾ ཀིར ཚསུ ཁཏྟིཡེསུ པཱུཝེ ལཀྑཾ ཀཏྭཱ གུལེ༹ཧི ཀཱིལ༹ནྟེསུ ཨནུརུདྡྷོ པརཱཛིཏོ པཱུཝཱནཾ ཨཏྠཱཡ མཱཏུ སནྟིཀཾ པཧིཎི. སཱ མཧནྟཾ སུཝཎྞཐཱལཾ པཱུརེཏྭཱ པཱུཝེ པེསེསི. པཱུཝེ ཁཱདིཏྭཱ པུན ཀཱིལ༹ནྟོ པརཱཛིཏོ ཏཐེཝ པཧིཎི. ཨེཝཾ ཏིཀྑཏྟུཾ པཱུཝེསུ ཨཱཧཊེསུ ཙཏུཏྠེ ཝཱརེ མཱཏཱ ‘‘ཨིདཱནི པཱུཝཱ ནཏྠཱི’’ཏི པཧིཎི. ཏསྶཱ ཝཙནཾ སུཏྭཱ ‘‘ནཏྠཱི’’ཏི པདསྶ ཨསུཏཔུབྦཏཱཡ ‘‘ནཏྠིཔཱུཝཱ ནཱམ ཨིདཱནི བྷཝིསྶནྟཱི’’ཏི སཉྙཾ ཀཏྭཱ ‘‘གཙྪ ནཏྠིཔཱུཝེ ཨཱཧརཱ’’ཏི པེསེསི. ཨཐསྶ མཱཏཱ ‘‘ནཏྠིཔཱུཝེ ཀིར, ཨཡྻེ, དེཐཱ’’ཏི ཝུཏྟེ ‘‘མམ པུཏྟེན ནཏྠཱིཏི པདཾ ན སུཏཔུབྦཾ, ཀཐཾ ནུ ཁོ ནཏྠིབྷཱཝཾ ཛཱནཱཔེཡྻ’’ནྟི སུཝཎྞཔཱཏིཾ དྷོཝིཏྭཱ ཨཔརཱཡ སུཝཎྞཔཱཏིཡཱ པཊིཀུཛྫིཏྭཱ ‘‘ཧནྡ, ཏཱཏ, ཨིམཾ མམ པུཏྟསྶ དེཧཱི’’ཏི པཧིཎི. ཏསྨིཾ ཁཎེ ནགརཔརིགྒཱཧིཀཱ དེཝཏཱ ‘‘ཨམྷཱཀཾ སཱམིནཱ ཨནྣབྷཱརཀཱལེ ཨུཔརིཊྛསྶ པཙྩེཀབུདྡྷསྶ བྷཱགབྷཏྟཾ དཏྭཱ ‘ནཏྠཱིཏི པདམེཝ ན སུཎེཡྻ’ནྟི པཏྠནཱ ནཱམ ཋཔིཏཱ. སཙེ མཡཾ ཏམཏྠཾ ཉཏྭཱ ཨཛ྄ཛྷུཔེཀྑེཡྻཱམ, མུདྡྷཱཔི ནོ སཏྟདྷཱ ཕལེཡྻཱ’’ཏི ཙིནྟེཏྭཱ དིབྦཔཱུཝེཧི པཱཏིཾ པཱུརཡིཾསུ. སོ པུརིསོ པཱཏིཾ ཨཱཧརིཏྭཱ ཏསྶ སནྟིཀེ ཋཔེཏྭཱ ཝིཝརི. ཏེསཾ གནྡྷོ སཀལནགརཾ ཕརི. པཱུཝོ པན མུཁེ ཋཔིཏམཏྟོཝ སཏྟརསཧརཎིསཧསྶཱནི ཕརིཏྭཱ ཨཊྛཱསི.

ཨནུརུདྡྷོཔི ཙིནྟེསི – ‘‘ན མཾ མཉྙེ ཨིཏོ པུབྦེ མཱཏཱ པིཡཱཡཏི. ན ཧི མེ ཨཉྙདཱ ཏཱཡ ནཏྠིཔཱུཝཱ ནཱམ པཀྐཔུབྦཱ’’ཏི. སོ གནྟྭཱ མཱཏརཾ ཨེཝམཱཧ – ‘‘ཨམྨ, ནཱཧཾ ཏཝ པིཡོ’’ཏི. ཏཱཏ, ཀིཾ ཝདེསི, མམ ཨཀྑཱིཧིཔི ཧདཡམཾསཏོཔི ཏྭཾ པིཡཏརོཏི. སཙཱཧཾ, ཨམྨ, ཏཝ པིཡོ, ཀསྨཱ མམ པུབྦེ ཨེཝརཱུཔེ ནཏྠིཔཱུཝེ ནཱམ ན ཨདཱསཱིཏི. སཱ ཏཾ པུརིསཾ པུཙྪི – ‘‘ཏཱཏ, ཀིཉྩི པཱཏིཡཾ ཨཧོསཱི’’ཏི. ཨཱམ, ཨཡྻེ, པཱུཝཱནཾ པཱཏི པརིཔུཎྞཱ ཨཧོསི, ན མེ ཨེཝརཱུཔཱ དིཊྛཔུབྦཱཏི. སཱ ཙིནྟེསི – ‘‘པུཏྟོ མེ ཀཏཔུཉྙོ, དེཝཏཱཧིསྶ དིབྦཔཱུཝཱ པཧིཏཱ བྷཝིསྶནྟཱི’’ཏི. སོཔི མཱཏརཾ ཨཱཧ – ‘‘ཨམྨ, ན མཡཱ ཨེཝརཱུཔཱ པཱུཝཱ ཁཱདིཏཔུབྦཱ, ཨིཏོ པཊྛཱཡ མེ ནཏྠིཔཱུཝམེཝ པཙེཡྻཱསཱི’’ཏི. སཱ ཏཏོ པཊྛཱཡ ཏེན ‘‘པཱུཝེ ཁཱདིཏུཀཱམོམྷཱི’’ཏི ཝུཏྟཀཱལེ སུཝཎྞཔཱཏིཾ དྷོཝིཏྭཱ ཨཉྙཱཡ པཱཏིཡཱ པཊིཀུཛྫིཏྭཱ པཧིཎཏི, དེཝཏཱ པཱཏིཾ པཱུརེནྟི. ཨེཝཾ སོ ཨགཱརམཛ྄ཛྷེ ཝསནྟོ ནཏྠཱིཏི པདསྶ ཨཏྠཾ ཨཛཱནིཏྭཱ དིབྦཔཱུཝེཡེཝ པརིབྷུཉྫི.

སཏྠུ པན པརིཝཱརཏྠཾ ཀུལཔཊིཔཱཊིཡཱ སཱཀིཡཀུམཱརེསུ པབྦཛནྟེསུ མཧཱནཱམེན སཀྐེན, ‘‘ཏཱཏ, ཨམྷཱཀཾ ཀུལཱ ཀོཙི པབྦཛིཏོ ནཏྠི, ཏཡཱ ཝཱ པབྦཛིཏབྦཾ, མཡཱ ཝཱ’’ཏི ཝུཏྟེ སོ ཨཱཧ – ‘‘ཨཧཾ ཨཏིསུཁུམཱལོ པབྦཛིཏུཾ ན སཀྑིསྶཱམཱི’’ཏི. ཏེན ཧི ཀམྨནྟཾ ཨུགྒཎྷ, ཨཧཾ པབྦཛིསྶཱམཱིཏི. ཀོ ཨེས ཀམྨནྟོ ནཱམཱཏི? སོ ཧི བྷཏྟསྶ ཨུཊྛཱནཊྛཱནམྤི ན ཛཱནཱཏི, ཀམྨནྟཾ ཀིམེཝ ཛཱནིསྶཏི, ཏསྨཱ ཨེཝམཱཧ. ཨེཀདིཝསཉྷི ཨནུརུདྡྷོ བྷདྡིཡོ ཀིམིལོཏི ཏཡོ ཛནཱ ‘‘བྷཏྟཾ ནཱམ ཀཧཾ ཨུཊྛཱཏཱི’’ཏི མནྟཡིཾསུ. ཏེསུ ཀིམིལོ ‘‘ཀོཊྛེསུ ཨུཊྛཱཏཱི’’ཏི ཨཱཧ. སོ ཀིརེཀདིཝསཾ ཝཱིཧཱི ཀོཊྛམྷི པཀྑིཔནྟེ ཨདྡས, ཏསྨཱ ‘‘ཀོཊྛེ བྷཏྟཾ ཨུཔྤཛྫཏཱི’’ཏི སཉྙཱཡ ཨེཝམཱཧ. ཨཐ ནཾ བྷདྡིཡོ ‘‘ཏྭཾ ན ཛཱནཱསཱི’’ཏི ཝཏྭཱ ‘‘བྷཏྟཾ ནཱམ ཨུཀྑལིཡཾ ཨུཊྛཱཏཱི’’ཏི ཨཱཧ. སོ ཀིརེཀདིཝསཾ ཨུཀྑལིཏོ བྷཏྟཾ ཝཌྜྷེནྟེ དིསྭཱ ‘‘ཨེཏྠེཝེཏཾ ཨུཔྤཛྫཏཱི’’ཏི སཉྙམཀཱསི, ཏསྨཱ ཨེཝམཱཧ. ཨནུརུདྡྷོ ཏེ ཨུབྷོཔི ‘‘ཏུམྷེ ན ཛཱནཱཐཱ’’ཏི ཝཏྭཱ ‘‘བྷཏྟཾ ནཱམ རཏནུབྦེདྷམཀུལཱ༹ཡ མཧཱསུཝཎྞཔཱཏིཡཾ ཨུཊྛཱཏཱི’’ཏི ཨཱཧ. ཏེན ཀིར ནེཝ ཝཱིཧིཾ ཀོཊྚེནྟཱ, ན བྷཏྟཾ པཙནྟཱ དིཊྛཔུབྦཱ, སུཝཎྞཔཱཏིཡཾ ཝཌྜྷེཏྭཱ པུརཏོ ཋཔིཏབྷཏྟམེཝ པསྶཏི, ཏསྨཱ ‘‘པཱཏིཡཾཡེཝེཏཾ ཨུཔྤཛྫཏཱི’’ཏི སཉྙམཀཱསི, ཏསྨཱ ཨེཝམཱཧ. ཨེཝཾ བྷཏྟུཊྛཱནཊྛཱནམྤི ཨཛཱནནྟོ མཧཱཔུཉྙོ ཀུལཔུཏྟོ ཀམྨནྟེ ཀིཾ ཛཱནིསྶཏི.

སོ ‘‘ཨེཧི ཁོ ཏེ, ཨནུརུདྡྷ, གྷརཱཝཱསཏྠཾ ཨནུསཱསིསྶཱམི, པཋམཾ ཁེཏྟཾ ཀསཱཔེཏབྦ’’ནྟིཨཱདིནཱ ནཡེན བྷཱཏརཱ ཝུཏྟཱནཾ ཀམྨནྟཱནཾ ཨཔརིཡནྟབྷཱཝཾ སུཏྭཱ ‘‘ན མེ གྷརཱཝཱསེན ཨཏྠོ’’ཏི མཱཏརཾ ཨཱཔུཙྪིཏྭཱ བྷདྡིཡཔམུཁེཧི པཉྩཧི སཱཀིཡཀུམཱརེཧི སདྡྷིཾ ནིཀྑམིཏྭཱ ཨནུཔིཡམྦཝནེ སཏྠཱརཾ ཨུཔསངྐམིཏྭཱ པབྦཛི. པབྦཛིཏྭཱ ཙ པན སམྨཱཔཊིཔདཾ པཊིཔནྣོ ཨནུཔུབྦེན ཏིསྶོ ཝིཛྫཱ སཙྪིཀཏྭཱ དིབྦེན ཙཀྑུནཱ ཨེཀཱསནེ ནིསིནྣོཝ ཧཏྠཏལེ ཋཔིཏཨཱམལཀཱནི ཝིཡ སཧསྶལོཀདྷཱཏུཡོ ཨོལོཀནསམཏྠོ ཧུཏྭཱ –

‘‘པུབྦེནིཝཱསཾ ཛཱནཱམི, དིབྦཙཀྑུ ཝིསོདྷིཏཾ;

ཏེཝིཛྫོ ཨིདྡྷིཔཏྟོམྷི, ཀཏཾ བུདྡྷསྶ སཱསན’’ནྟི. (ཐེརགཱ. ༣༣༢, ༥༦༢) –

ཨུདཱནཾ ཨུདཱནེཏྭཱ ‘‘ཀིཾ ནུ ཁོ མེ ཀཏྭཱ ཨཡཾ སམྤཏྟི ལདྡྷཱ’’ཏི ཨོལོཀེནྟོ ‘‘པདུམུཏྟརཔཱདམཱུལེ པཏྠནཾ ཋཔེསི’’ནྟི ཉཏྭཱ པུན ‘‘སཾསཱརེ སཾསརནྟོ ཨསུཀསྨིཾ ནཱམ ཀཱལེ བཱརཱཎསིཡཾ སུམནསེཊྛིཾ ནིསྶཱཡ ཛཱིཝནྟོ ཨནྣབྷཱརོ ནཱམ ཨཧོསི’’ནྟིཔི ཉཏྭཱ –

‘‘ཨནྣབྷཱརོ པུརེ ཨཱསིཾ, དལིདྡོ ཏིཎཧཱརཀོ;

པིཎྜཔཱཏོ མཡཱ དིནྣོ, ཨུཔརིཊྛསྶ ཏཱདིནོ’’ཏི. –

ཨཱཧ. ཨཐསྶ ཨེཏདཧོསི – ‘‘ཡོ སོ ཏདཱ མཡཱ ཨུཔརིཊྛསྶ དིནྣཔིཎྜཔཱཏཏོ ཀཧཱཔཎེ དཏྭཱ པཏྟིཾ ཨགྒཧེསི, མམ སཧཱཡཀོ སུམནསེཊྛི ཀཧཾ ནུ ཁོ སོ ཨེཏརཧི ནིབྦཏྟོ’’ཏི. ཨཐ ནཾ ‘‘ཝིཉྫྷཱཊཝིཡཾ པབྦཏཔཱདེ མུཎྜནིགམོ ནཱམ ཨཏྠི, ཏཏྠ མཧཱམུཎྜསྶ ནཱམ ཨུཔཱསཀསྶ མཧཱསུམནོ ཙཱུལ༹སུམནོཏི དྭེ པུཏྟཱ, ཏེསུ སོ ཙཱུལ༹སུམནོ ཧུཏྭཱ ནིབྦཏྟོ’’ཏི ཨདྡས. དིསྭཱ ཙ པན ཙིནྟེསི – ‘‘ཨཏྠི ནུ ཁོ ཏཏྠ མཡི གཏེ ཨུཔཀཱརོ, ནཏྠཱི’’ཏི. སོ ཨུཔདྷཱརེནྟོ ཨིདཾ ཨདྡས ‘‘སོ ཏཏྠ མཡི གཏེ སཏྟཝསྶིཀོཝ ནིཀྑམིཏྭཱ པབྦཛིསྶཏི, ཁུརགྒེཡེཝ ཙ ཨརཧཏྟཾ པཱཔུཎིསྶཏཱི’’ཏི. དིསྭཱ ཙ པན ཨུཔཀཊྛེ ཨནྟོཝསྶེ ཨཱཀཱསེན གནྟྭཱ གཱམདྭཱརེ ཨོཏརི. མཧཱམུཎྜོ པན ཨུཔཱསཀོ ཐེརསྶ པུབྦེཔི ཝིསྶཱསིཀོ ཨེཝ. སོ ཐེརཾ པིཎྜཔཱཏཀཱལེ ཙཱིཝརཾ པཱརུཔནྟཾ དིསྭཱ པུཏྟཾ མཧཱསུམནཾ ཨཱཧ – ‘‘ཏཱཏ, ཨཡྻོ, མེ ཨནུརུདྡྷཏྠེརོ ཨཱགཏོ, ཡཱཝསྶ ཨཉྙོ ཀོཙི པཏྟཾ ན གཎྷཱཏི, ཏཱཝསྶ གནྟྭཱ པཏྟཾ གཎྷ, ཨཧཾ ཨཱསནཾ པཉྙཱཔེསྶཱམཱི’’ཏི. སོ ཏཐཱ ཨཀཱསི. ཨུཔཱསཀོ ཐེརཾ ཨནྟོནིཝེསནེ སཀྐཙྩཾ པརིཝིསིཏྭཱ ཏེམཱསཾ ཝསནཏྠཱཡ པཊིཉྙཾ གཎྷི, ཐེརོཔི ཨདྷིཝཱསེསི.

ཨཐ ནཾ ཨེཀདིཝསཾ པཊིཛགྒནྟོ ཝིཡ ཏེམཱསཾ པཊིཛགྒིཏྭཱ མཧཱཔཝཱརཎཱཡ ཏིཙཱིཝརཉྩེཝ གུལ༹ཏེལཏཎྜུལཱདཱིནི ཙ ཨཱཧརིཏྭཱ ཐེརསྶ པཱདམཱུལེ ཋཔེཏྭཱ ‘‘གཎྷཐ, བྷནྟེ’’ཏི ཨཱཧ. ‘‘ཨལཾ, ཨུཔཱསཀ, ན མེ ཨིམིནཱ ཨཏྠོ’’ཏི. ‘‘ཏེན ཧི, བྷནྟེ, ཝསྶཱཝཱསིཀལཱབྷོ ནཱམེས, གཎྷཐ ན’’ནྟི? ‘‘ན གཎྷཱམི, ཨུཔཱསཀཱ’’ཏི. ‘‘ཀིམཏྠཾ ན གཎྷཐ, བྷནྟེ’’ཏི? ‘‘མཡ྄ཧཾ སནྟིཀེ ཀཔྤིཡཀཱརཀོ སཱམཎེརོཔི ནཏྠཱི’’ཏི. ‘‘ཏེན ཧི, བྷནྟེ, མམ པུཏྟོ མཧཱསུམནོ སཱམཎེརོ བྷཝིསྶཏཱི’’ཏི. ‘‘ན མེ, ཨུཔཱསཀ, མཧཱསུམནེནཏྠོ’’ཏི. ‘‘ཏེན ཧི, བྷནྟེ, ཙཱུལ༹སུམནཾ པབྦཱཛེཐཱ’’ཏི. ཐེརོ ‘‘སཱདྷཱུ’’ཏི སམྤཊིཙྪིཏྭཱ ཙཱུལ༹སུམནཾ པབྦཱཛེསི. སོ ཁུརགྒེཡེཝ ཨརཧཏྟཾ པཱཔུཎི. ཐེརོ ཏེན སདྡྷིཾ ཨཌྜྷམཱསམཏྟཾ ཏཏྠེཝ ཝསིཏྭཱ ‘‘སཏྠཱརཾ པསྶིསྶཱམཱི’’ཏི ཏསྶ ཉཱཏཀེ ཨཱཔུཙྪིཏྭཱ ཨཱཀཱསེནེཝ གནྟྭཱ ཧིམཝནྟཔདེསེ ཨརཉྙཀུཊིཀཱཡ ཨོཏརི.

ཐེརོ པན པཀཏིཡཱཔི ཨཱརདྡྷཝཱིརིཡོ, ཏསྶ ཏཏྠ པུབྦརཏྟཱཔརརཏྟཾ ཙངྐམནྟསྶ ཨུདརཝཱཏོ སམུཊྛཧི. ཨཐ ནཾ ཀིལནྟརཱུཔཾ དིསྭཱ སཱམཎེརོ པུཙྪི – ‘‘བྷནྟེ, ཀིཾ ཝོ རུཛྫཏཱི’’ཏི? ‘‘ཨུདརཝཱཏོ མེ སམུཊྛིཏོ’’ཏི. ‘‘ཨཉྙདཱཔི སམུཊྛིཏཔུབྦོ, བྷནྟེ’’ཏི? ‘‘ཨཱམཱཝུསོ’’ཏི. ‘‘ཀེན ཕཱསུཀཾ ཧོཏི, བྷནྟེ’’ཏི? ‘‘ཨནོཏཏྟཏོ པཱནཱིཡེ ལདྡྷེ ཕཱསུཀཾ ཧོཏི, ཨཱཝུསོ’’ཏི. ‘‘ཏེན ཧི, བྷནྟེ, ཨཱཧརཱམཱི’’ཏི. ‘‘སཀྑིསྶསི སཱམཎེརཱ’’ཏི? ‘‘ཨཱམ, བྷནྟེ’’ཏི. ཏེན ཧི ཨནོཏཏྟེ པནྣགོ ནཱམ ནཱགརཱཛཱ མཾ ཛཱནཱཏི, ཏསྶ ཨཱཙིཀྑིཏྭཱ བྷེསཛྫཏྠཱཡ ཨེཀཾ པཱནཱིཡཝཱརཀཾ ཨཱཧརཱཏི. སོ སཱདྷཱུཏི ཨུཔཛ྄ཛྷཱཡཾ ཝནྡིཏྭཱ ཝེཧཱསཾ ཨབྦྷུགྒནྟྭཱ པཉྩཡོཛནསཏཾ ཋཱནཾ ཨགམཱསི. ཏཾ དིཝསཾ པན ནཱགརཱཛཱ ནཱགནཱཊཀཔརིཝུཏོ ཨུདཀཀཱིལ༹ཾ ཀཱིལི༹ཏུཀཱམོ ཧོཏི. སོ སཱམཎེརཾ ཨཱགཙྪནྟཾ དིསྭཱཝ ཀུཛ྄ཛྷི, ‘‘ཨཡཾ མུཎྜཀསམཎོ ཨཏྟནོ པཱདཔཾསུཾ མམ མཏྠཀེ ཨོཀིརནྟོ ཝིཙརཏི, ཨནོཏཏྟེ པཱནཱིཡཏྠཱཡ ཨཱགཏོ བྷཝིསྶཏི, ན དཱནིསྶ པཱནཱིཡཾ དསྶཱམཱི’’ཏི པཎྞཱསཡོཛནིཀཾ ཨནོཏཏྟདཧཾ མཧཱཔཱཏིཡཱ ཨུཀྑལིཾ པིདཧནྟོ ཝིཡ ཕཎེན པིདཧིཏྭཱ ནིཔཛྫི. སཱམཎེརོ ནཱགརཱཛསྶ ཨཱཀཱརཾ ཨོལོཀེཏྭཱཝ ‘‘ཀུདྡྷོ ཨཡ’’ནྟི ཉཏྭཱ ཨིམཾ གཱཐམཱཧ –

‘‘སུཎོཧི མེ ནཱགརཱཛ, ཨུགྒཏེཛ མཧབྦལ;

དེཧི མེ པཱནཱིཡགྷཊཾ, བྷེསཛྫཏྠམྷི ཨཱགཏོ’’ཏི.

ཏཾ སུཏྭཱ ནཱགརཱཛཱ ཨིམཾ གཱཐམཱཧ –

‘‘པུརཏྠིམསྨིཾ དིསཱབྷཱགེ, གངྒཱ ནཱམ མཧཱནདཱི;

མཧཱསམུདྡམཔྤེཏི, ཏཏོ ཏྭཾ པཱནཱིཡཾ ཧརཱ’’ཏི.

ཏཾ སུཏྭཱ སཱམཎེརོ ‘‘ཨཡཾ ནཱགརཱཛཱ ཨཏྟནོ ཨིཙྪཱཡ ན དསྶཏི, ཨཧཾ བལཀྐཱརཾ ཀཏྭཱ ཨཱནུབྷཱཝཾ ཛཱནཱཔེཏྭཱ ཨིམཾ ཨབྷིབྷཝིཏྭཱཝ པཱནཱིཡཾ གཎྷིསྶཱམཱི’’ཏི ཙིནྟེཏྭཱ, ‘‘མཧཱརཱཛ, ཨུཔཛ྄ཛྷཱཡོ མཾ ཨནོཏཏྟཏོཝ པཱནཱིཡཾ ཨཱཧརཱཔེཏི, ཏེནཱཧཾ ཨིདམེཝ ཧརིསྶཱམི, ཨཔེཧི, མཱ མཾ ཝཱརེཧཱི’’ཏི ཝཏྭཱ ཨིམཾ གཱཐམཱཧ –

‘‘ཨིཏོཝ པཱནཱིཡཾ ཧཱསྶཾ, ཨིམིནཱཝམྷི ཨཏྠིཀོ;

ཡདི ཏེ ཐཱམབལཾ ཨཏྠི, ནཱགརཱཛ ནིཝཱརཡཱ’’ཏི.

ཨཐ ནཾ ནཱགརཱཛཱ ཨཱཧ –

‘‘སཱམཎེར སཙེ ཨཏྠི, ཏཝ ཝིཀྐམ པོརིསཾ;

ཨབྷིནནྡཱམི ཏེ ཝཱཙཾ, ཧརསྶུ པཱནཱིཡཾ མམཱ’’ཏི.

ཨཐ ནཾ སཱམཎེརོ ‘‘ཨེཝཾ, མཧཱརཱཛ, ཧརཱམཱི’’ཏི ཝཏྭཱ ‘‘ཡདི སཀྐོནྟོ ཧརཱཧཱི’’ཏི ཝུཏྟེ – ‘‘ཏེན ཧི སུཊྛུ ཛཱནསྶཱུ’’ཏི ཏིཀྑཏྟུཾ པཊིཉྙཾ གཧེཏྭཱ ‘‘བུདྡྷསཱསནསྶ ཨཱནུབྷཱཝཾ དསྶེཏྭཱ མཡཱ པཱནཱིཡཾ ཧརིཏུཾ ཝཊྚཏཱི’’ཏི ཙིནྟེཏྭཱ ཨཱཀཱསཊྛདེཝཏཱནཾ ཏཱཝ སནྟིཀཾ ཨགམཱསི. ཏཱ ཨཱགནྟྭཱ ཝནྡིཏྭཱ ‘‘ཀིཾ, བྷནྟེ’’ཏི ཝཏྭཱ ཨཊྛཾསུ. ‘‘ཨེཏསྨིཾ ཨནོཏཏྟདཧཔིཊྛེ པནྣགནཱགརཱཛེན སདྡྷིཾ མམ སངྒཱམོ བྷཝིསྶཏི, ཏཏྠ གནྟྭཱ ཛཡཔརཱཛཡཾ ཨོལོཀེཐཱ’’ཏི ཨཱཧ. སོ ཨེཏེནེཝ ནཱིཧཱརེན ཙཏྟཱརོ ལོཀཔཱལེ སཀྐསུཡཱམསནྟུསིཏཔརནིམྨིཏཝསཝཏྟཱི ཙ ཨུཔསངྐམིཏྭཱ ཏམཏྠཾ ཨཱརོཙེསི. ཏཏོ པརཾ པཊིཔཱཊིཡཱ ཡཱཝ བྲཧྨལོཀཾ གནྟྭཱ ཏཏྠ ཏཏྠ བྲཧྨེཧི ཨཱགནྟྭཱ ཝནྡིཏྭཱ ཋིཏེཧི ‘‘ཀིཾ, བྷནྟེ’’ཏི པུཊྛོ ཏམཏྠཾ ཨཱརོཙེསི. ཨེཝཾ སོ ཨསཉྙེ ཙ ཨརཱུཔིབྲཧྨཱནོ ཙ ཋཔེཏྭཱ སབྦཏྠ མུཧུཏྟེནེཝ ཨཱཧིཎྜིཏྭཱ ཨཱརོཙེསི. ཏསྶ ཝཙནཾ སུཏྭཱ སབྦཱཔི དེཝཏཱ ཨནོཏཏྟདཧཔིཊྛེ ནཱལི༹ཡཾ པཀྑིཏྟཱནི པིཊྛཙུཎྞཱནི ཝིཡ ཨཱཀཱསཾ ནིརནྟརཾ པཱུརེཏྭཱ སནྣིཔཏིཾསུ. སནྣིཔཏིཏེ དེཝསངྒྷེ སཱམཎེརོ ཨཱཀཱསེ ཋཏྭཱ ནཱགརཱཛཾ ཨཱཧ –

‘‘སུཎོཧི མེ ནཱགརཱཛ, ཨུགྒཏེཛ མཧབྦལ;

དེཧི མེ པཱནཱིཡགྷཊཾ, བྷེསཛྫཏྠམྷི ཨཱགཏོ’’ཏི.

ཨཐ ནཾ ནཱགོ ཨཱཧ –

‘‘སཱམཎེར སཙེ ཨཏྠི, ཏཝ ཝིཀྐམ པོརིསཾ;

ཨབྷིནནྡཱམི ཏེ ཝཱཙཾ, ཧརསྶུ པཱནཱིཡཾ མམཱ’’ཏི.

སོ ཏིཀྑཏྟུཾ ནཱགརཱཛསྶ པཊིཉྙཾ གཧེཏྭཱ ཨཱཀཱསེ ཋིཏཀོཝ དྭཱདསཡོཛནིཀཾ བྲཧྨཏྟབྷཱཝཾ མཱཔེཏྭཱ ཨཱཀཱསཏོ ཨོརུཡ྄ཧ ནཱགརཱཛསྶ ཕཎེ ཨཀྐམིཏྭཱ ཨདྷོམུཁཾ ནིཔྤཱིལེ༹སི, ཏཱཝདེཝ བལཝཏཱ པུརིསེན ཨཀྐནྟཨལླཙམྨཾ ཝིཡ ནཱགརཱཛསྶ ཕཎེ ཨཀྐནྟམཏྟེ ཨོགལིཏྭཱ དབྦིམཏྟཱ ཕཎཔུཊཀཱ ཨཧེསུཾ. ནཱགརཱཛསྶ ཕཎེཧི མུཏྟམུཏྟཊྛཱནཏོ ཏཱལཀྑནྡྷཔམཱཎཱ ཨུདཀཝཊྚིཡོ ཨུགྒཉྪིཾསུ. སཱམཎེརོ ཨཱཀཱསེཡེཝ པཱནཱིཡཝཱརཀཾ པཱུརེསི. དེཝསངྒྷོ སཱདྷུཀཱརམདཱསི. ཨཐ ནཱགརཱཛཱ ལཛྫིཏྭཱ སཱམཎེརསྶ ཀུཛ྄ཛྷི, ཛཡཀུསུམཝཎྞཱནིསྶ ཨཀྑཱིནི ཨཧེསུཾ. སོ ‘‘ཨཡཾ མཾ དེཝསངྒྷཾ སནྣིཔཱཏེཏྭཱ པཱནཱིཡཾ གཧེཏྭཱ ལཛྫཱཔེསི, ཨེཏཾ གཧེཏྭཱ མུཁེ ཧཏྠཾ པཀྑིཔིཏྭཱ ཧདཡམཾསཾ ཝཱསྶ མདྡཱམི, པཱདེ ཝཱ ནཾ གཧེཏྭཱ པཱརགངྒཱཡཾ ཁིཔཱམཱི’’ཏི ཝེགེན ཨནུབནྡྷི. ཨནུབནྡྷནྟོཔི ནཾ པཱཔུཎིཏུཾ ནཱསཀྑིཡེཝ. སཱམཎེརོ གནྟྭཱ ཨུཔཛ྄ཛྷཱཡསྶ ཧཏྠེ པཱནཱིཡཾ ཋཔེཏྭཱ ‘‘པིཝཐ, བྷནྟེ’’ཏི ཨཱཧ. ནཱགརཱཛཱཔི པཙྪཏོ ཨཱགནྟྭཱ, ‘‘བྷནྟེ ཨནུརུདྡྷ, སཱམཎེརོ མཡཱ ཨདིནྣམེཝ པཱནཱིཡཾ གཧེཏྭཱ ཨཱགཏོ, མཱ པིཝིཏྠཱ’’ཏི ཨཱཧ. ཨེཝཾ ཀིར སཱམཎེརཱཏི. ‘‘པིཝཐ, བྷནྟེ, ཨིམིནཱ མེ དིནྣཾ པཱནཱིཡཾ ཨཱཧཊ’’ནྟི ཨཱཧ. ཐེརོ ‘‘ཁཱིཎཱསཝསཱམཎེརསྶ མུསཱཀཐནཾ ནཱམ ནཏྠཱི’’ཏི ཉཏྭཱ པཱནཱིཡཾ པིཝི. ཏངྑཎཉྙེཝསྶ ཨཱབཱདྷོ པཊིཔསྶམྦྷི. པུན ནཱགོ ཐེརཾ ཨཱཧ – ‘‘བྷནྟེ, སཱམཎེརེནམྷི སབྦཾ དེཝགཎཾ སནྣིཔཱཏེཏྭཱ ལཛྫཱཔིཏོ, ཨཧམསྶ ཧདཡཾ ཝཱ ཕཱལེསྶཱམི, པཱདེ ཝཱ ནཾ གཧེཏྭཱ པཱརགངྒཱཡ ཁིཔིསྶཱམཱི’’ཏི. མཧཱརཱཛ, སཱམཎེརོ མཧཱནུབྷཱཝོ, ཏུམྷེ སཱམཎེརེན སདྡྷིཾ སངྒཱམེཏུཾ ན སཀྑིསྶཐ, ཁམཱཔེཏྭཱ ནཾ གཙྪཐཱཏི. སོ སཡམྤི སཱམཎེརསྶ ཨཱནུབྷཱཝཾ ཛཱནཱཏིཡེཝ, ལཛྫཱཡ པན ཨནུབནྡྷིཏྭཱ ཨཱགཏོ. ཨཐ ནཾ ཐེརསྶ ཝཙནེན ཁམཱཔེཏྭཱ ཏེན སདྡྷིཾ མིཏྟསནྠཝཾ ཀཏྭཱ ‘‘ཨིཏོ པཊྛཱཡ ཨནོཏཏྟཨུདཀེན ཨཏྠེ སཏི ཏུམྷཱཀཾ ཨཱགམནཀིཙྩཾ ནཏྠི, མཡ྄ཧཾ པཧིཎེཡྻཱཐ, ཨཧམེཝ ཨཱཧརིཏྭཱ དསྶཱམཱི’’ཏི ཝཏྭཱ པཀྐཱམི.

ཐེརོཔི སཱམཎེརཾ ཨཱདཱཡ པཱཡཱསི. སཏྠཱ ཐེརསྶ ཨཱགམནབྷཱཝཾ ཉཏྭཱ མིགཱརམཱཏུཔཱསཱདེ ཐེརསྶ ཨཱགམནཾ ཨོལོཀེནྟོ ནིསཱིདི. བྷིཀྑཱུཔི ཐེརཾ ཨཱགཙྪནྟཾ དིསྭཱ པཙྩུགྒནྟྭཱ པཏྟཙཱིཝརཾ པཊིགྒཧེསུཾ. ཨཐེཀཙྩེ སཱམཎེརཾ སཱིསེཔི ཀཎྞེསུཔི བཱཧཱཡམྤི གཧེཏྭཱ སཉྩཱལེཏྭཱ ‘‘ཀིཾ, སཱམཎེར ཙཱུལ༹ཀནིཊྛ, ན ཨུཀྐཎྛིཏོསཱི’’ཏི ཨཱཧཾསུ. སཏྠཱ ཏེསཾ ཀིརིཡཾ དིསྭཱ ཙིནྟེསི – ‘‘བྷཱརིཡཾ ཝཏིམེསཾ བྷིཀྑཱུནཾ ཀམྨཾ ཨཱསཱིཝིསཾ གཱིཝཱཡ གཎྷནྟཱ ཝིཡ སཱམཎེརཾ གཎྷནྟི, ནཱསྶ ཨཱནུབྷཱཝཾ ཛཱནནྟི, ཨཛྫ མཡཱ སུམནསཱམཎེརསྶ གུཎཾ པཱཀཊཾ ཀཱཏུཾ ཝཊྚཏཱི’’ཏི. ཐེརོཔི ཨཱགནྟྭཱ སཏྠཱརཾ ཝནྡིཏྭཱ ནིསཱིདི. སཏྠཱ ཏེན སདྡྷིཾ པཊིསནྠཱརཾ ཀཏྭཱ ཨཱནནྡཏྠེརཾ ཨཱམནྟེསི – ‘‘ཨཱནནྡ, ཨནོཏཏྟཨུདཀེནམྷི པཱདེ དྷོཝིཏུཀཱམོ, སཱམཎེརཱནཾ གྷཊཾ དཏྭཱ པཱནཱིཡཾ ཨཱཧརཱཔེཧཱི’’ཏི. ཐེརོ ཝིཧཱརེ པཉྩམཏྟཱནི སཱམཎེརསཏཱནི སནྣིཔཱཏེསི. ཏེསུ སུམནསཱམཎེརོ སབྦནཝཀོ ཨཧོསི. ཐེརོ སབྦམཧལླཀཾ སཱམཎེརཾ ཨཱཧ – ‘‘སཱམཎེར, སཏྠཱ ཨནོཀཏྟདཧཨུདཀེན པཱདེ དྷོཝིཏུཀཱམོ, གྷཊཾ ཨཱདཱཡ གནྟྭཱ པཱནཱིཡཾ ཨཱཧརཱ’’ཏི. སོ ‘‘ན སཀྐོམི, བྷནྟེ’’ཏི ན ཨིཙྪི. ཐེརོ སེསེཔི པཊིཔཱཊིཡཱ པུཙྪི, ཏེཔི ཏཐེཝ ཝཏྭཱ པཊིཀྑིཔིཾསུ. ‘‘ཀིཾ པནེཏྠ ཁཱིཎཱསཝསཱམཎེརཱ ནཏྠཱི’’ཏི? ཨཏྠི, ཏེ པན ‘‘ནཱཡཾ ཨམྷཱཀཾ བདྡྷོ མཱལཱཔུཊོ, སུམནསཱམཎེརསྶེཝ བདྡྷོ’’ཏི ན ཨིཙྪིཾསུ, པུཐུཛྫནཱ པན ཨཏྟནོ ཨསམཏྠཏཱཡེཝ ན ཨིཙྪིཾསུ. པརིཡོསཱནེ པན སུམནསྶ ཝཱརེ སམྤཏྟེ, ‘‘སཱམཎེར, སཏྠཱ ཨནོཏཏྟདཧཨུདཀེན པཱདེ དྷོཝིཏུཀཱམོ, ཀུཊཾ ཨཱདཱཡ ཀིར ཨུདཀཾ ཨཱཧརཱ’’ཏི ཨཱཧ. སོ ‘‘སཏྠརི ཨཱཧརཱཔེནྟེ ཨཱཧརིསྶཱམཱི’’ཏི སཏྠཱརཾ ཝནྡིཏྭཱ, ‘‘བྷནྟེ, ཨནོཏཏྟཏོ ཀིར མཾ ཨུདཀཾ ཨཱཧཱརཱཔེཐཱ’’ཏི ཨཱཧ. ‘‘ཨཱམ, སུམནཱ’’ཏི. སོ ཝིསཱཁཱཡ ཀཱརིཏེསུ གྷནསུཝཎྞཀོཊྚིམེསུ སེནཱསནཀུཊེསུ ཨེཀཾ སཊྛིཀུཊཨུདཀགཎྷནཀཾ མཧཱགྷཊཾ ཧཏྠེན གཧེཏྭཱ ‘‘ཨིམིནཱ མེ ཨུཀྑིཔིཏྭཱ ཨཾསཀཱུཊེ ཋཔིཏེན ཨཏྠོ ནཏྠཱི’’ཏི ཨོལམྦཀཾ ཀཏྭཱ ཝེཧཱསཾ ཨབྦྷུགྒནྟྭཱ ཧིམཝནྟཱབྷིམུཁོ པཀྑནྡི.

ནཱགརཱཛཱ སཱམཎེརཾ དཱུརཏོཝ ཨཱགཙྪནྟཾ དིསྭཱ པཙྩུགྒནྟྭཱ ཀུཊཾ ཨཾསཀཱུཊེན ཨཱདཱཡ, ‘‘བྷནྟེ, ཏུམྷེ མཱདིསེ དཱསེ ཝིཛྫམཱནེ ཀསྨཱ སཡཾ ཨཱགཏཱ, ཨུདཀེནཏྠེ སཏི ཀསྨཱ སཱསནམཏྟམྤི ན པཧིཎཐཱ’’ཏི ཀུཊེན ཨུདཀཾ ཨཱདཱཡ སཡཾ ཨུཀྑིཔིཏྭཱ ‘‘པུརཏོ ཧོཐ, བྷནྟེ, ཨཧམེཝ ཨཱཧརིསྶཱམཱི’’ཏི ཨཱཧ. ‘‘ཏིཊྛཐ ཏུམྷེ, མཧཱརཱཛ, ཨཧམེཝ སམྨཱསམྦུདྡྷེན ཨཱཎཏྟོ’’ཏི ནཱགརཱཛཱནཾ ནིཝཏྟཱཔེཏྭཱ ཀུཊཾ མུཁཝཊྚིཡཾ ཧཏྠེན གཧེཏྭཱ ཨཱཀཱསེནཱགཉྪི. ཨཐ ནཾ སཏྠཱ ཨཱགཙྪནྟཾ ཨོལོཀེཏྭཱ བྷིཀྑཱུ ཨཱམནྟེསི – ‘‘པསྶཐ, བྷིཀྑཝེ, སཱམཎེརསྶ ལཱིལཾ, ཨཱཀཱསེ ཧཾསརཱཛཱ ཝིཡ སོབྷཏཱི’’ཏི ཨཱཧ. སོཔི པཱནཱིཡགྷཊཾ ཋཔེཏྭཱ སཏྠཱརཾ ཝནྡིཏྭཱ ཨཊྛཱསི. ཨཐ ནཾ སཏྠཱ ཨཱཧ – ‘‘ཀཏིཝསྶོསི ཏྭཾ, སུམནཱ’’ཏི? ‘‘སཏྟཝསྶོམྷི, བྷནྟེཏི. ‘‘ཏེན ཧི, སུམན, ཨཛྫ པཊྛཱཡ བྷིཀྑུ ཧོཧཱི’’ཏི ཝཏྭཱ དཱཡཛྫཨུཔསམྤདཾ ཨདཱསི. དྭེཡེཝ ཀིར སཱམཎེརཱ སཏྟཝསྶིཀཱ ཨུཔསམྤདཾ ལབྷིཾསུ – ཨཡཉྩ སུམནོ སོཔཱཀོ ཙཱཏི.

ཨེཝཾ ཏསྨིཾ ཨུཔསམྤནྣེ དྷམྨསབྷཱཡཾ ཀཐཾ སམུཊྛཱཔེསུཾ, ‘‘ཨཙྪརིཡཾ ཨཱཝུསོ, ཨེཝརཱུཔོ ཧི ནཱམ དཧརསཱམཎེརསྶ ཨཱནུབྷཱཝོ ཧོཏི, ན ནོ ཨིཏོ པུབྦེ ཨེཝརཱུཔོ ཨཱནུབྷཱཝོ དིཊྛཔུབྦོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, མམ སཱསནེ དཧརོཔི སམྨཱ པཊིཔནྣོ ཨེཝརཱུཔཾ སམྤཏྟིཾ ལབྷཏིཡེཝཱ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༣༨༢.

‘‘ཡོ ཧཝེ དཧརོ བྷིཀྑུ, ཡུཉྫཏི བུདྡྷསཱསནེ;

སོམཾ ལོཀཾ པབྷཱསེཏི, ཨབྦྷཱ མུཏྟོཝ ཙནྡིམཱ’’ཏི.

ཏཏྠ ཡུཉྫཏཱིཏི གྷཊཏི ཝཱཡམཏི. པབྷཱསེཏཱིཏི སོ བྷིཀྑུ ཨཏྟནོ ཨརཧཏྟམགྒཉཱཎེན ཨབྦྷཱདཱིཧི མུཏྟོ ཙནྡིམཱ ཝིཡ ལོཀཾ ཁནྡྷཱདིབྷེདཾ ལོཀཾ ཨོབྷཱསེཏི, ཨེཀཱལོཀཾ ཀརོཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སུམནསཱམཎེརཝཏྠུ དྭཱདསམཾ.

བྷིཀྑུཝགྒཝཎྞནཱ ནིཊྛིཏཱ.

པཉྩཝཱིསཏིམོ ཝགྒོ.

༢༦. བྲཱཧྨཎཝགྒོ

༡. པསཱདབཧུལབྲཱཧྨཎཝཏྠུ

ཚིནྡ སོཏནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པསཱདབཧུལཾ བྲཱཧྨཎཾ ཨཱརབྦྷ ཀཐེསི.

སོ ཀིར བྲཱཧྨཎོ བྷགཝཏོ དྷམྨདེསནཾ སུཏྭཱ པསནྣཙིཏྟོ ཨཏྟནོ གེཧེ སོལ༹སམཏྟཱནཾ བྷིཀྑཱུནཾ ནིཙྩབྷཏྟཾ པཊྛཔེཏྭཱ བྷིཀྑཱུནཾ ཨཱགཏཝེལཱཡ པཏྟཾ གཧེཏྭཱ ‘‘ཨཱགཙྪནྟུ བྷོནྟོ ཨརཧནྟོ, ནིསཱིདནྟུ བྷོནྟོ ཨརཧནྟོ’’ཏི ཡཾཀིཉྩི ཝདནྟོ ཨརཧནྟཝཱདཔཊིསཾཡུཏྟམེཝ ཝདཏི. ཏེསུ པུཐུཛྫནཱ ‘‘ཨཡཾ ཨམྷེསུ ཨརཧནྟསཉྙཱི’’ཏི ཙིནྟཡིཾསུ, ཁཱིཎཱསཝཱ ‘‘ཨཡཾ ནོ ཁཱིཎཱསཝབྷཱཝཾ ཛཱནཱཏཱི’’ཏི. ཨེཝཾ ཏེ སབྦེཔི ཀུཀྐུཙྩཱཡནྟཱ ཏསྶ གེཧཾ ནཱགམིཾསུ. སོ དུཀྑཱི དུམྨནོ ‘‘ཀིནྣུ ཁོ, ཨཡྻཱ, ནཱགཙྪནྟཱི’’ཏི ཝིཧཱརཾ གནྟྭཱ སཏྠཱརཾ ཝནྡིཏྭཱ ཏམཏྠཾ ཨཱརོཙེསི. སཏྠཱ བྷིཀྑཱུ ཨཱམནྟེཏྭཱ ‘‘ཀིཾ ཨེཏཾ, བྷིཀྑཝེ’’ཏི པུཙྪིཏྭཱ ཏེཧི ཏསྨིཾ ཨཏྠེ ཨཱརོཙིཏེ ‘‘སཱདིཡཐ པན ཏུམྷེ, བྷིཀྑཝེ, ཨརཧནྟཝཱད’’ནྟི ཨཱཧ. ‘‘ན སཱདིཡཱམ མཡཾ, བྷནྟེ’’ཏི. ‘‘ཨེཝཾ སནྟེ མནུསྶཱནཾ ཨེཏཾ པསཱདབྷཉྙཾ, ཨནཱཔཏྟི, བྷིཀྑཝེ, པསཱདབྷཉྙེ, ཨཔི ཙ ཁོ པན བྲཱཧྨཎསྶ ཨརཧནྟེསུ ཨདྷིམཏྟཾ པེམཾ, ཏསྨཱ ཏུམྷེཧིཔི ཏཎྷཱསོཏཾ ཚེཏྭཱ ཨརཧཏྟམེཝ པཏྟུཾ ཡུཏྟ’’ནྟི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༣༨༣.

‘‘ཚིནྡ སོཏཾ པརཀྐམྨ, ཀཱམེ པནུད བྲཱཧྨཎ;

སངྑཱརཱནཾ ཁཡཾ ཉཏྭཱ, ཨཀཏཉྙཱུསི བྲཱཧྨཎཱ’’ཏི.

ཏཏྠ པརཀྐམྨཱཏི ཏཎྷཱསོཏཾ ནཱམ ན ཨཔྤམཏྟཀེན ཝཱཡཱམེན ཚིནྡིཏུཾ སཀྐཱ, ཏསྨཱ ཉཱཎསམྤཡུཏྟེན མཧནྟེན པརཀྐམེན པརཀྐམིཏྭཱ ཏཾ སོཏཾ ཚིནྡ. ཨུབྷོཔི ཀཱམེ པནུད ནཱིཧར. བྲཱཧྨཎཱཏི ཁཱིཎཱསཝཱནཾ ཨཱལཔནམེཏཾ. སངྑཱརཱནནྟི པཉྩནྣཾ ཁནྡྷཱནཾ ཁཡཾ ཛཱནིཏྭཱ. ཨཀཏཉྙཱུཏི ཨེཝཾ སནྟེ ཏྭཾ སུཝཎྞཱདཱིསུ ཀེནཙི ཨཀཏསྶ ནིབྦཱནསྶ ཛཱནནཏོ ཨཀཏཉྙཱུ ནཱམ ཧོསཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པསཱདབཧུལབྲཱཧྨཎཝཏྠུ པཋམཾ.

༢. སམྦཧུལབྷིཀྑུཝཏྠུ

ཡདཱ དྭཡེསཱུཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ བྷིཀྑཱུ ཨཱརབྦྷ ཀཐེསི.

ཨེཀདིཝསཉྷི ཏིཾསམཏྟཱ དིསཱཝཱསིཀཱ བྷིཀྑཱུ ཨཱགནྟྭཱ སཏྠཱརཾ ཝནྡིཏྭཱ ནིསཱིདིཾསུ. སཱརིཔུཏྟཏྠེརོ ཏེསཾ ཨརཧཏྟསྶ ཨུཔནིསྶཡཾ དིསྭཱ སཏྠཱརཾ ཨུཔསངྐམིཏྭཱ ཋིཏཀོཝ ཨིམཾ པཉྷཾ པུཙྪི – ‘‘བྷནྟེ, དྭེ དྷམྨཱཏི ཝུཙྩནྟི, ཀཏམེ ནུ ཁོ དྭེ དྷམྨཱ’’ཏི? ཨཐ ནཾ སཏྠཱ ‘‘དྭེ དྷམྨཱཏི ཁོ, སཱརིཔུཏྟ, སམཐཝིཔསྶནཱ ཝུཙྩནྟཱི’’ཏི ཝཏྭཱ ཨིམཾ གཱཐམཱཧ –

༣༨༤.

‘‘ཡདཱ དྭཡེསུ དྷམྨེསུ, པཱརགཱུ ཧོཏི བྲཱཧྨཎོ;

ཨཐསྶ སབྦེ སཾཡོགཱ, ཨཏྠཾ གཙྪནྟི ཛཱནཏོ’’ཏི.

ཏཏྠ ཡདཱཏི ཡསྨིཾ ཀཱལེ དྭིདྷཱ ཋིཏེསུ སམཐཝིཔསྶནཱདྷམྨེསུ ཨབྷིཉྙཱཔཱརགཱདིཝསེན ཨཡཾ ཁཱིཎཱསཝོ པཱརགཱུ ཧོཏི, ཨཐསྶ ཝཊྚསྨིཾ སཾཡོཛནསམཏྠཱ སབྦེ ཀཱམཡོགཱདཡོ སཾཡོགཱ ཨེཝཾ ཛཱནནྟསྶ ཨཏྠཾ པརིཀྑཡཾ གཙྪནྟཱིཏི ཨཏྠོ.

དེསནཱཝསཱནེ སབྦེཔི ཏེ བྷིཀྑཱུ ཨརཧཏྟེ པཏིཊྛཧིཾསཱུཏི.

སམྦཧུལབྷིཀྑུཝཏྠུ དུཏིཡཾ.

༣. མཱརཝཏྠུ

ཡསྶ པཱརནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཱརཾ ཨཱརབྦྷ ཀཐེསི.

སོ ཀིརེཀསྨིཾ དིཝསེ ཨཉྙཏརོ པུརིསོ ཝིཡ ཧུཏྭཱ སཏྠཱརཾ ཨུཔསངྐམིཏྭཱ པུཙྪི – ‘‘བྷནྟེ, པཱརཾ པཱརནྟི ཝུཙྩཏི, ཀིནྣུ ཁོ ཨེཏཾ པཱརཾ ནཱམཱ’’ཏི. སཏྠཱ ‘‘མཱརོ ཨཡ’’ནྟི ཝིདིཏྭཱ, ‘‘པཱཔིམ, ཀིཾ ཏཝ པཱརེན, ཏཉྷི ཝཱིཏརཱགེཧི པཏྟབྦ’’ནྟི ཝཏྭཱ ཨིམཾ གཱཐམཱཧ –

༣༨༥.

‘‘ཡསྶ པཱརཾ ཨཔཱརཾ ཝཱ, པཱརཱཔཱརཾ ན ཝིཛྫཏི;

ཝཱིཏདྡརཾ ཝིསཾཡུཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ པཱརནྟི ཨཛ྄ཛྷཏྟིཀཱནི ཚ ཨཱཡཏནཱནི. ཨཔཱརནྟི བཱཧིརཱནི ཚ ཨཱཡཏནཱནི. པཱརཱཔཱརནྟི ཏདུབྷཡཾ. ན ཝིཛྫཏཱིཏི ཡསྶ སབྦམྤེཏཾ ‘‘ཨཧ’’ནྟི ཝཱ ‘‘མམ’’ནྟི ཝཱ གཧཎཱབྷཱཝེན ནཏྠི, ཏཾ ཀིལེསདརཐཱནཾ ཝིགམེན ཝཱིཏདྡརཾ སབྦཀིལེསེཧི ཝིསཾཡུཏྟཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཱརཝཏྠུ ཏཏིཡཾ.

༤. ཨཉྙཏརབྲཱཧྨཎཝཏྠུ

ཛྷཱཡིནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ བྲཱཧྨཎཾ ཨཱརབྦྷ ཀཐེསི.

སོ ཀིར ཙིནྟེསི – ‘‘སཏྠཱ ཨཏྟནོ སཱཝཀེ, ‘བྲཱཧྨཎཱ’ཏི ཝདཏི, ཨཧཉྩམྷི ཛཱཏིགོཏྟེན བྲཱཧྨཎོ, མམྤི ནུ ཁོ ཨེཝཾ ཝཏྟུཾ ཝཊྚཏཱི’’ཏི. སོ སཏྠཱརཾ ཨུཔསངྐམིཏྭཱ ཏམཏྠཾ པུཙྪི. སཏྠཱ ‘‘ནཱཧཾ ཛཱཏིགོཏྟམཏྟེན བྲཱཧྨཎཾ ཝདཱམི, ཨུཏྟམཏྠཾ ཨརཧཏྟཾ ཨནུཔྤཏྟམེཝ པནེཝཾ ཝདཱམཱི’’ཏི ཝཏྭཱ ཨིམཾ གཱཐམཱཧ –

༣༨༦.

‘‘ཛྷཱཡིཾ ཝིརཛམཱསཱིནཾ, ཀཏཀིཙྩམནཱསཝཾ;

ཨུཏྟམཏྠམནུཔྤཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཛྷཱཡིནྟི དུཝིདྷེན ཛྷཱནེན ཛྷཱཡནྟཾ ཀཱམརཛེན ཝིརཛཾ ཝནེ ཨེཀཀམཱསཱིནཾ ཙཏཱུཧི མགྒེཧི སོལ༹སནྣཾ ཀིཙྩཱནཾ ཀཏཏྟཱ ཀཏཀིཙྩཾ ཨཱསཝཱནཾ ཨབྷཱཝེན ཨནཱསཝཾ ཨུཏྟམཏྠཾ ཨརཧཏྟཾ ཨནུཔྤཏྟཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ སོ བྲཱཧྨཎོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཨཉྙཏརབྲཱཧྨཎཝཏྠུ ཙཏུཏྠཾ.

༥. ཨཱནནྡཏྠེརཝཏྠུ

དིཝཱ ཏཔཏཱིཏི ཨིམཾ དྷམྨདེསནཾ སཏྠཱ མིགཱརམཱཏུཔཱསཱདེ ཝིཧརནྟོ ཨཱནནྡཏྠེརཾ ཨཱརབྦྷ ཀཐེསི.

པསེནདི ཀོསལོ ཀིར མཧཱཔཝཱརཎཱཡ སབྦཱབྷརཎཔཊིམཎྜིཏོ གནྡྷམཱལཱདཱིནི ཨཱདཱཡ ཝིཧཱརཾ ཨགམཱསི. ཏསྨིཾ ཁཎེ ཀཱལུ༹དཱཡིཏྠེརོ ཛྷཱནཾ སམཱཔཛྫིཏྭཱ པརིསཔརིཡནྟེ ནིསིནྣོ ཧོཏི, ནཱམམེཝ པནསྶེཏཾ, སརཱིརཾ སུཝཎྞཝཎྞཾ. ཏསྨིཾ པན ཁཎེ ཙནྡོ ཨུགྒཙྪཏི, སཱུརིཡོ ཨཏྠམེཏི. ཨཱནནྡཏྠེརོ ཨཏྠམེནྟསྶ ཙ སཱུརིཡསྶ ཨུགྒཙྪནྟསྶ ཙ ཙནྡསྶ ཨོབྷཱསཾ ཨོལོཀེནྟོ རཉྙོ སརཱིརོབྷཱསཾ ཐེརསྶ སརཱིརོབྷཱསཾ ཏཐཱགཏསྶ ཙ སརཱིརོབྷཱསཾ ཨོལོཀེསི. ཏཏྠ སབྦོབྷཱསེ ཨཏིཀྐམིཏྭཱ སཏྠཱཝ ཝིརོཙཏི. ཐེརོ སཏྠཱརཾ ཝནྡིཏྭཱ, ‘‘བྷནྟེ, ཨཛྫ མམ ཨིམེ ཨོབྷཱསེ ཨོལོཀེནྟསྶ ཏུམྷཱཀམེཝ ཨོབྷཱསོ རུཙྩཏི. ཏུམྷཱཀཉྷི སརཱིརཾ སབྦོབྷཱསེ ཨཏིཀྐམིཏྭཱ ཝིརོཙཏཱི’’ཏི ཨཱཧ. ཨཐ ནཾ སཏྠཱ, ‘‘ཨཱནནྡ, སཱུརིཡོ ནཱམ དིཝཱ ཝིརོཙཏི, ཙནྡོ རཏྟིཾ, རཱཛཱ ཨལངྐཏཀཱལེཡེཝ, ཁཱིཎཱསཝེ གཎསངྒཎིཀཾ པཧཱཡ ཨནྟོསམཱཔཏྟིཡཾཡེཝ ཝིརོཙཏི, བུདྡྷཱ པན རཏྟིམྤི དིཝཱཔི པཉྩཝིདྷེན ཏེཛེན ཝིརོཙནྟཱི’’ཏི ཝཏྭཱ ཨིམཾ གཱཐམཱཧ –

༣༨༧.

‘‘དིཝཱ ཏཔཏི ཨཱདིཙྩོ, རཏྟིམཱབྷཱཏི ཙནྡིམཱ;

སནྣདྡྷོ ཁཏྟིཡོ ཏཔཏི, ཛྷཱཡཱི ཏཔཏི བྲཱཧྨཎོ;

ཨཐ སབྦམཧོརཏྟིཾ, བུདྡྷོ ཏཔཏི ཏེཛསཱ’’ཏི.

ཏཏྠ དིཝཱ ཏཔཏཱིཏི དིཝཱ ཝིརོཙཏི, རཏྟིཾ པནསྶ གཏམགྒོཔི ན པཉྙཱཡཏི. ཙནྡིམཱཏི ཙནྡོཔི ཨབྦྷཱདཱིཧི ཝིམུཏྟོ རཏྟིམེཝ ཝིརོཙཏི, ནོ དིཝཱ. སནྣདྡྷོཏི སུཝཎྞམཎིཝིཙིཏྟེཧི སབྦཱབྷརཎེཧི པཊིམཎྜིཏོ ཙཏུརངྒིནིཡཱ སེནཱཡ པརིཀྑིཏྟོཝ རཱཛཱ ཝིརོཙཏི, ན ཨཉྙཱཏཀཝེསེན ཋིཏོ. ཛྷཱཡཱིཏི ཁཱིཎཱསཝོ པན གཎཾ ཝིནོདེཏྭཱ ཛྷཱཡནྟོཝ ཝིརོཙཏི. ཏེཛསཱཏི སམྨཱསམྦུདྡྷོ པན སཱིལཏེཛེན དུསྶཱིལྱཏེཛཾ, གུཎཏེཛེན ནིགྒུཎཏེཛཾ, པཉྙཱཏེཛེན དུཔྤཉྙཏེཛཾ, པུཉྙཏེཛེན ཨཔུཉྙཏེཛཾ, དྷམྨཏེཛེན ཨདྷམྨཏེཛཾ པརིཡཱདིཡིཏྭཱ ཨིམིནཱ པཉྩཝིདྷེན ཏེཛསཱ ནིཙྩཀཱལམེཝ ཝིརོཙཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཱནནྡཏྠེརཝཏྠུ པཉྩམཾ.

༦. ཨཉྙཏརབྲཱཧྨཎཔབྦཛིཏཝཏྠུ

བཱཧིཏཔཱཔོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ བྲཱཧྨཎཔབྦཛིཏཾ ཨཱརབྦྷ ཀཐེསི.

ཨེཀོ ཀིར བྲཱཧྨཎོ བཱཧིརཀཔབྦཛྫཱཡ པབྦཛིཏྭཱ ‘‘སམཎོ གོཏམོ ཨཏྟནོ སཱཝཀེ ‘པབྦཛིཏཱ’ཏི ཝདཏི, ཨཧཉྩམྷི པབྦཛིཏོ, མམྤི ཁོ ཨེཝཾ ཝཏྟུཾ ཝཊྚཏཱི’’ཏི ཙིནྟེཏྭཱ སཏྠཱརཾ ཨུཔསངྐམིཏྭཱ ཨེཏམཏྠཾ པུཙྪི. སཏྠཱ ‘‘ནཱཧཾ ཨེཏྟཀེན ‘པབྦཛིཏོ’ཏི ཝདཱམི, ཀིལེསམལཱནཾ པན པབྦཱཛིཏཏྟཱ པབྦཛིཏོ ནཱམ ཧོཏཱི’’ཏི ཝཏྭཱ ཨིམཾ གཱཐམཱཧ –

༣༨༨.

‘‘བཱཧིཏཔཱཔོཏི བྲཱཧྨཎོ, སམཙརིཡཱ སམཎོཏི ཝུཙྩཏི;

པབྦཱཛཡམཏྟནོ མལཾ, ཏསྨཱ པབྦཛིཏོཏི ཝུཙྩཏཱི’’ཏི.

ཏཏྠ སམཙརིཡཱཏི སབྦཱཀུསལཱནི སམེཏྭཱ ཙརཎེན. ཏསྨཱཏི ཡསྨཱ བཱཧིཏཔཱཔཏཱཡ བྲཱཧྨཎོ, ཨཀུསལཱནི སམེཏྭཱ ཙརཎེན སམཎོཏི ཝུཙྩཏི, ཏསྨཱ ཡོ ཨཏྟནོ རཱགཱདིམལཾ པབྦཱཛཡནྟོ ཝིནོདེནྟོ ཙརཏི, སོཔི ཏེན པབྦཱཛནེན པབྦཛིཏོཏི ཝུཙྩཏཱིཏི ཨཏྠོ.

དེསནཱཝསཱནེ སོ བྲཱཧྨཎཔབྦཛིཏོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཨཉྙཏརབྲཱཧྨཎཔབྦཛིཏཝཏྠུ ཚཊྛཾ.

༧. སཱརིཔུཏྟཏྠེརཝཏྠུ

ན བྲཱཧྨཎསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཱརིཔུཏྟཏྠེརཾ ཨཱརབྦྷ ཀཐེསི.

ཨེཀསྨིཾ ཀིར ཋཱནེ སམྦཧུལཱ མནུསྶཱ ‘‘ཨཧོ ཨམྷཱཀཾ, ཨཡྻོ, ཁནྟིབལེན སམནྣཱགཏོ, ཨཉྙེསུ ཨཀྐོསནྟེསུ ཝཱ པཧརནྟེསུ ཝཱ ཀོཔམཏྟམྤི ནཏྠཱི’’ཏི ཐེརསྶ གུཎེ ཀཐཡིཾསུ. ཨཐེཀོ མིཙྪཱདིཊྛིཀོ བྲཱཧྨཎོ ‘‘ཀོ ཨེས ན ཀུཛ྄ཛྷཏཱི’’ཏི པུཙྪི. ‘‘ཨམྷཱཀཾ ཐེརོ’’ཏི. ‘‘ནཾ ཀུཛ྄ཛྷཱཔེནྟོ ན བྷཝིསྶཏཱི’’ཏི? ‘‘ནཏྠེཏཾ, བྲཱཧྨཎཱ’’ཏི. ‘‘ཏེན ཧི ཨཧཾ ནཾ ཀུཛ྄ཛྷཱཔེསྶཱམཱི’’ཏི? ‘‘སཙེ སཀྐོསི, ཀུཛ྄ཛྷཱཔེཧཱི’’ཏི. སོ ‘‘ཧོཏུ, ཛཱནིསྶཱམིསྶ ཀཏྟབྦ’’ནྟི ཐེརཾ བྷིཀྑཱཡ པཝིཊྛཾ དིསྭཱ པཙྪཱབྷཱགེན གནྟྭཱ པིཊྛིམཛ྄ཛྷེ མཧནྟཾ པཱཎིཔྤཧཱརམདཱསི. ཐེརོ ‘‘ཀིཾ ནཱམེཏ’’ནྟི ཨནོལོཀེཏྭཱཝ གཏོ. བྲཱཧྨཎསྶ སཀལསརཱིརེ ཌཱཧོ ཨུཔྤཛྫི. སོ ‘‘ཨཧོ གུཎསམྤནྣོ, ཨཡྻོ’’ཏི ཐེརསྶ པཱདམཱུལེ ནིཔཛྫིཏྭཱ ‘‘ཁམཐ མེ, བྷནྟེ’’ཏི ཝཏྭཱ ‘‘ཀིཾ ཨེཏ’’ནྟི ཙ ཝུཏྟེ ‘‘ཨཧཾ ཝཱིམཾསནཏྠཱཡ ཏུམྷེ པཧརི’’ནྟི ཨཱཧ. ‘‘ཧོཏུ ཁམཱམི ཏེ’’ཏི. ‘‘སཙེ མེ, བྷནྟེ, ཁམཐ, མམ གེཧེཡེཝ ནིསཱིདིཏྭཱ བྷིཀྑཾ གཎྷཐཱ’’ཏི ཐེརསྶ པཏྟཾ གཎྷི, ཐེརོཔི པཏྟཾ ཨདཱསི. བྲཱཧྨཎོ ཐེརཾ གེཧཾ ནེཏྭཱ པརིཝིསི.

མནུསྶཱ ཀུཛ྄ཛྷིཏྭཱ ‘‘ཨིམིནཱ ཨམྷཱཀཾ ནིརཔརཱདྷོ ཨཡྻོ པཧཊོ, དཎྜེནཔིསྶ མོཀྑོ ནཏྠི, ཨེཏྠེཝ ནཾ མཱརེསྶཱམཱ’’ཏི ལེཌྜུདཎྜཱདིཧཏྠཱ བྲཱཧྨཎསྶ གེཧདྭཱརེ ཨཊྛཾསུ. ཐེརོ ཨུཊྛཱཡ གཙྪནྟོ བྲཱཧྨཎསྶ ཧཏྠེ པཏྟཾ ཨདཱསི. མནུསྶཱ ཏཾ ཐེརེན སདྡྷིཾ གཙྪནྟཾ དིསྭཱ, ‘‘བྷནྟེ, ཏུམྷཱཀཾ པཏྟཾ གཧེཏྭཱ བྲཱཧྨཎཾ ནིཝཏྟེཐཱ’’ཏི ཨཱཧཾསུ. ཀིཾ ཨེཏཾ ཨུཔཱསཀཱཏི? བྲཱཧྨཎེན ཏུམྷེ པཧཊཱ, མཡམསྶ ཀཏྟབྦཾ ཛཱནིསྶཱམཱཏི. ཀིཾ པན ཏུམྷེ ཨིམིནཱ པཧཊཱ, ཨུདཱཧུ ཨཧནྟི? ཏུམྷེ, བྷནྟེཏི. ‘‘མཾ ཨེས པཧརིཏྭཱ ཁམཱཔེསི, གཙྪཐ ཏུམྷེ’’ཏི མནུསྶེ ཨུཡྻོཛེཏྭཱ བྲཱཧྨཎཾ ནིཝཏྟཱཔེཏྭཱ ཐེརོ ཝིཧཱརམེཝ གཏོ. བྷིཀྑཱུ ཨུཛ྄ཛྷཱཡིཾསུ ‘‘ཀིཾ ནཱམེཏཾ སཱརིཔུཏྟཏྠེརོ ཡེན བྲཱཧྨཎེན པཧཊོ, ཏསྶེཝ གེཧེ ནིསཱིདིཏྭཱ བྷིཀྑཾ གཧེཏྭཱ ཨཱགཏོ. ཐེརསྶ པཧཊཀཱལཏོ པཊྛཱཡ ཨིདཱནི སོ ཀསྶ ལཛྫིསྶཏི, ཨཝསེསེ པོཐེནྟོ ཝིཙརིསྶཏཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, བྲཱཧྨཎོ བྲཱཧྨཎཾ པཧརནྟོ ནཱམ ནཏྠི, གིཧིབྲཱཧྨཎེན པན སམཎབྲཱཧྨཎོ པཧཊོ བྷཝིསྶཏི, ཀོདྷོ ནཱམེས ཨནཱགཱམིམགྒེན སམུགྒྷཱཏཾ གཙྪཏཱི’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

༣༨༩.

‘‘ན བྲཱཧྨཎསྶ པཧརེཡྻ, ནཱསྶ མུཉྩེཐ བྲཱཧྨཎོ;

དྷཱི བྲཱཧྨཎསྶ ཧནྟཱརཾ, ཏཏོ དྷཱི ཡསྶ མུཉྩཏི.

༣༩༠.

‘‘ན བྲཱཧྨཎསྶེཏདཀིཉྩི སེཡྻོ, ཡདཱ ནིསེདྷོ མནསོ པིཡེཧི;

ཡཏོ ཡཏོ ཧིཾསམནོ ནིཝཏྟཏི, ཏཏོ ཏཏོ སམྨཏིམེཝ དུཀྑ’’ནྟི.

ཏཏྠ པཧརེཡྻཱཏི ‘‘ཁཱིཎཱསཝབྲཱཧྨཎོཧམསྨཱི’’ཏི ཛཱནནྟོ ཁཱིཎཱསཝསྶ ཝཱ ཨཉྙཏརསྶ ཝཱ ཛཱཏིབྲཱཧྨཎསྶ ན པཧརེཡྻ. ནཱསྶ མུཉྩེཐཱཏི སོཔི པཧཊོ ཁཱིཎཱསཝབྲཱཧྨཎོ ཨསྶ པཧརིཏྭཱ ཋིཏསྶ ཝེརཾ ན མུཉྩེཐ, ཏསྨིཾ ཀོཔཾ ན ཀརེཡྻཱཏི ཨཏྠོ. དྷཱི བྲཱཧྨཎསྶཱཏི ཁཱིཎཱསཝབྲཱཧྨཎསྶ ཧནྟཱརཾ གརཧཱམི. ཏཏོ དྷཱིཏི ཡོ པན ཏཾ པཧརནྟཾ པཊིཔཧརནྟོ ཏསྶ ཨུཔརི ཝེརཾ མུཉྩཏི, ཏཾ ཏཏོཔི གརཧཱམིཡེཝ.

ཨེཏདཀིཉྩི སེཡྻོཏི ཡཾ ཁཱིཎཱསཝསྶ ཨཀྐོསནྟཾ ཝཱ ཨཔཙྩཀྐོསནཾ, པཧརནྟཾ ཝཱ ཨཔྤཊིཔཧརཎཾ, ཨེཏཾ ཏསྶ ཁཱིཎཱསཝབྲཱཧྨཎསྶ ན ཀིཉྩི སེཡྻོ, ཨཔྤམཏྟཀཾ སེཡྻོ ན ཧོཏི, ཨདྷིམཏྟམེཝ སེཡྻོཏི ཨཏྠོ. ཡདཱ ནིསེདྷོ མནསོ པིཡེཧཱིཏི ཀོདྷནསྶ ཧི ཀོདྷུཔྤཱདོཝ མནསོ པིཡོ ནཱམ. ཀོདྷོ ཧི པནེས མཱཏཱཔིཏཱུསུཔི བུདྡྷཱདཱིསུཔི ཨཔརཛ྄ཛྷཏི. ཏསྨཱ ཡོ ཨསྶ ཏེཧི མནསོ ནིསེདྷོ ཀོདྷཝསེན ཨུཔྤཛྫམཱནསྶ ཙིཏྟསྶ ནིགྒཧོ, ཨེཏཾ ན ཀིཉྩི སེཡྻོཏི ཨཏྠོ. ཧིཾསམནོཏི ཀོདྷམནོ. སོ ཏསྶ ཡཏོ ཡཏོ ཝཏྠུཏོ ཨནཱགཱམིམགྒེན སམུགྒྷཱཏཾ གཙྪནྟོ ནིཝཏྟཏི. ཏཏོ ཏཏོཏི ཏཏོ ཏཏོ ཝཏྠུཏོ སཀལམྤི ཝཊྚདུཀྑཾ ནིཝཏྟཏིཡེཝཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཱརིཔུཏྟཏྠེརཝཏྠུ སཏྟམཾ.

༨. མཧཱཔཛཱཔཏིགོཏམཱིཝཏྠུ

ཡསྶ ཀཱཡེན ཝཱཙཱཡཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཧཱཔཛཱཔཏིཾ གོཏམིཾ ཨཱརབྦྷ ཀཐེསི.

བྷགཝཏཱ ཧི ཨནུཔྤནྣེ ཝཏྠུསྨིཾ པཉྙཏྟེ ཨཊྛ གརུདྷམྨེ མཎྜནཀཛཱཏིཡོ པུརིསོ སུརབྷིཔུཔྥདཱམཾ ཝིཡ སིརསཱ སམྤཊིཙྪིཏྭཱ སཔརིཝཱརཱ མཧཱཔཛཱཔཏི གོཏམཱི ཨུཔསམྤདཾ ལབྷི, ཨཉྙོ ཏསྶཱ ཨུཔཛ྄ཛྷཱཡོ ཝཱ ཨཱཙརིཡོ ཝཱ ནཏྠི. ཨེཝཾ ལདྡྷཱུཔསམྤདཾ ཐེརིཾ ཨཱརབྦྷ ཨཔརེན སམཡེན ཀཐཾ སམུཊྛཱཔེསུཾ ‘‘མཧཱཔཛཱཔཏིཡཱ གོཏམིཡཱ ཨཱཙརིཡུཔཛ྄ཛྷཱཡཱ ན པཉྙཱཡནྟི, སཧཏྠེནེཝ ཀཱསཱཡཱནི གཎྷཱི’’ཏི. ཨེཝཉྩ པན ཝཏྭཱ བྷིཀྑུནིཡོ ཀུཀྐུཙྩཱཡནྟིཡོ ཏཱཡ སདྡྷིཾ ནེཝ ཨུཔོསཐཾ ན པཝཱརཎཾ ཀརོནྟི, ཏཱ གནྟྭཱ ཏཐཱགཏསྶཔི ཏམཏྠཾ ཨཱརོཙེསུཾ. སཏྠཱ ཏཱསཾ ཀཐཾ སུཏྭཱ ‘‘མཡཱ མཧཱཔཛཱཔཏིཡཱ གོཏམིཡཱ ཨཊྛ གརུདྷམྨཱ དིནྣཱ, ཨཧམེཝསྶཱཙརིཡོ, ཨཧམེཝ ཨུཔཛ྄ཛྷཱཡོ. ཀཱཡདུཙྩརིཏཱདིཝིརཧིཏེསུ ཁཱིཎཱསཝེསུ ཀུཀྐུཙྩཾ ནཱམ ན ཀཱཏབྦ’’ནྟི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༣༩༡.

‘‘ཡསྶ ཀཱཡེན ཝཱཙཱཡ, མནསཱ ནཏྠི དུཀྐཊཾ;

སཾཝུཏཾ ཏཱིཧི ཋཱནེཧི, ཏམཧཾ བྲཱུམི བྲཱཧྨཎ’’ནྟི.

ཏཏྠ དུཀྐཊནྟི སཱཝཛྫཾ དུཀྑུདྲཡཾ ཨཔཱཡསཾཝཏྟནིཀཾ ཀམྨཾ. ཏཱིཧི ཋཱནེཧཱིཏི ཨེཏེཧི ཀཱཡཱདཱིཧི ཏཱིཧི ཀཱརཎེཧི ཀཱཡདུཙྩརིཏཱདིཔཝེསནིཝཱརཎཏྠཱཡ དྭཱརཾ པིཧིཏཾ, ཏཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཧཱཔཛཱཔཏིགོཏམཱིཝཏྠུ ཨཊྛམཾ.

༩. སཱརིཔུཏྟཏྠེརཝཏྠུ

ཡམྷཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཱརིཔུཏྟཏྠེརཾ ཨཱརབྦྷ ཀཐེསི.

སོ ཀིརཱཡསྨཱ ཨསྶཛིཏྠེརསྶ སནྟིཀེ དྷམྨཾ སུཏྭཱ སོཏཱཔཏྟིཕལཾ པཏྟཀཱལཏོ པཊྛཱཡ ‘‘ཡསྶཾ དིསཱཡཾ ཐེརོ ཝསཏཱི’’ཏི སུཎཱཏི, ཏཏོ ཨཉྫལིཾ པགྒཡ྄ཧ ཏཏོཝ སཱིསཾ ཀཏྭཱ ནིཔཛྫཏི. བྷིཀྑཱུ ‘‘མིཙྪཱདིཊྛིཀོ སཱརིཔུཏྟོ, ཨཛྫཱཔི དིསཱ ནམསྶམཱནོ ཝིཙརཏཱི’’ཏི ཏམཏྠཾ ཏཐཱགཏསྶ ཨཱརོཙེསུཾ. སཏྠཱ ཐེརཾ པཀྐོསཱཔེཏྭཱ ‘‘སཙྩཾ ཀིར ཏྭཾ, སཱརིཔུཏྟ, དིསཱ ནམསྶནྟོ ཝིཙརསཱི’’ཏི པུཙྪིཏྭཱ, ‘‘བྷནྟེ, མམ དིསཱ ནམསྶནབྷཱཝཾ ཝཱ ཨནམསྶནབྷཱཝཾ ཝཱ ཏུམྷེཝ ཛཱནཱཐཱ’’ཏི ཝུཏྟེ ‘‘ན, བྷིཀྑཝེ, སཱརིཔུཏྟོ དིསཱ ནམསྶཏི, ཨསྶཛིཏྠེརསྶ པན སནྟིཀཱ དྷམྨཾ སུཏྭཱ སོཏཱཔཏྟིཕལཾ པཏྟཏཱཡ ཨཏྟནོ ཨཱཙརིཡཾ ནམསྶཏི. ཡཉྷི ཨཱཙརིཡཾ ནིསྶཱཡ བྷིཀྑུ དྷམྨཾ ཝིཛཱནཱཏི, ཏེན སོ བྲཱཧྨཎེན ཨགྒི ཝིཡ སཀྐཙྩཾ ནམསྶིཏབྦོཡེཝཱ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༣༩༢.

‘‘ཡམྷཱ དྷམྨཾ ཝིཛཱནེཡྻ, སམྨཱསམྦུདྡྷདེསིཏཾ;

སཀྐཙྩཾ ཏཾ ནམསྶེཡྻ, ཨགྒིཧུཏྟཾཝ བྲཱཧྨཎོ’’ཏི.

ཏཏྠ ཨགྒིཧུཏྟཾཝཱཏི ཡཐཱ བྲཱཧྨཎོ ཨགྒིཧུཏྟཾ སམྨཱ པརིཙརཎེན ཙེཝ ཨཉྫལིཀམྨཱདཱིཧི ཙ སཀྐཙྩཾ ནམསྶཏི, ཨེཝཾ ཡམྷཱ ཨཱཙརིཡཱ ཏཐཱགཏཔཝེདིཏཾ དྷམྨཾ ཝིཛཱནེཡྻ, ཏཾ སཀྐཙྩཾ ནམསྶེཡྻཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཱརིཔུཏྟཏྠེརཝཏྠུ ནཝམཾ.

༡༠. ཛཊིལབྲཱཧྨཎཝཏྠུ

ན ཛཊཱཧཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཛཊིལབྲཱཧྨཎཾ ཨཱརབྦྷ ཀཐེསི.

སོ ཀིར ‘‘ཨཧཾ མཱཏིཏོ ཙ པིཏིཏོ ཙ སུཛཱཏོ བྲཱཧྨཎཀུལེ ནིབྦཏྟོ. སཙེ སམཎོ གོཏམོ ཨཏྟནོ སཱཝཀེ བྲཱཧྨཎཱཏི ཝདཏི, མམྤི ནུ ཁོ ཏཐཱ ཝཏྟུཾ ཝཊྚཏཱི’’ཏི སཏྠུ སནྟིཀཾ གནྟྭཱ ཏམཏྠཾ པུཙྪི. ཨཐ ནཾ སཏྠཱ ‘‘ནཱཧཾ, བྲཱཧྨཎ, ཛཊཱམཏྟེན, ན ཛཱཏིགོཏྟམཏྟེན བྲཱཧྨཎཾ ཝདཱམི, པཊིཝིདྡྷསཙྩམེཝ པནཱཧཾ བྲཱཧྨཎོཏི ཝདཱམཱི’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༣༩༣.

‘‘ན ཛཊཱཧི ན གོཏྟེན, ན ཛཙྩཱ ཧོཏི བྲཱཧྨཎོ;

ཡམྷི སཙྩཉྩ དྷམྨོ ཙ, སོ སུཙཱི སོ ཙ བྲཱཧྨཎོ’’ཏི.

ཏཏྠ སཙྩནྟི ཡསྨིཾ པུགྒལེ ཙཏྟཱརི སཙྩཱནི སོལ༹སཧཱཀཱརེཧི པཊིཝིཛ྄ཛྷིཏྭཱ ཋིཏཾ སཙྩཉཱཎཉྩེཝ ནཝཝིདྷོ ཙ ལོཀུཏྟརདྷམྨོ ཨཏྠི, སོ སུཙི, སོ བྲཱཧྨཎོ ཙཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཛཊིལབྲཱཧྨཎཝཏྠུ དསམཾ.

༡༡. ཀུཧཀབྲཱཧྨཎཝཏྠུ

ཀིཾ ཏེཏི ཨིམཾ དྷམྨདེསནཾ སཏྠཱ ཀཱུཊཱགཱརསཱལཱཡཾ ཝིཧརནྟོ ཨེཀཾ ཝགྒུལིཝཏཾ ཀུཧཀབྲཱཧྨཎཾ ཨཱརབྦྷ ཀཐེསི.

སོ ཀིར ཝེསཱལིནགརདྭཱརེ ཨེཀཾ ཀཀུདྷརུཀྑཾ ཨཱརུཡ྄ཧ དྭཱིཧི པཱདེཧི རུཀྑསཱཁཾ གཎྷིཏྭཱ ཨདྷོསིརོ ཨོལམྦནྟོ ‘‘ཀཔིལཱནཾ མེ སཏཾ དེཐ, ཀཧཱཔཎེ དེཐ, པརིཙཱརིཀཾ དེཐ, ནོ ཙེ དསྶཐ, ཨིཏོ པཏིཏྭཱ མརནྟོ ནགརཾ ཨནགརཾ ཀརིསྶཱམཱི’’ཏི ཝདཏི. ཏཐཱགཏསྶ བྷིཀྑུསངྒྷཔརིཝུཏསྶ ནགརཾ པཝིསནཀཱལེ བྷིཀྑཱུ ཏཾ བྲཱཧྨཎཾ དིསྭཱ ནིཀྑམནཀཱལེཔི ནཾ ཏཐེཝ ཨོལམྦནྟཾ པསྶིཾསུ. ནཱགརཱཔི ‘‘ཨཡཾ པཱཏོཝ པཊྛཱཡ ཨེཝཾ ཨོལམྦནྟོ པཏིཏྭཱ མརནྟོ ནགརཾ ཨནགརཾ ཀརེཡྻཱ’’ཏི ཙིནྟེཏྭཱ ནགརཝིནཱསབྷཱིཏཱ ‘‘ཡཾ སོ ཡཱཙཏི, སབྦཾ དེམཱ’’ཏི པཊིསྶུཎིཏྭཱ ཨདཾསུ. སོ ཨོཏརིཏྭཱ སབྦཾ གཧེཏྭཱ ཨགམཱསི. བྷིཀྑཱུ ཝིཧཱརཱུཔཙཱརེ ཏཾ གཱཝིཾ ཝིཡ ཝིརཝིཏྭཱ གཙྪནྟཾ དིསྭཱ སཉྫཱནིཏྭཱ ‘‘ལདྡྷཾ ཏེ, བྲཱཧྨཎ, ཡཐཱཔཏྠིཏ’’ནྟི པུཙྪིཏྭཱ ‘‘ཨཱམ, ལདྡྷཾ མེ’’ཏི སུཏྭཱ ཨནྟོཝིཧཱརཾ གནྟྭཱ ཏཐཱགཏསྶ ཏམཏྠཾ ཨཱརོཙེསུཾ. སཏྠཱ ‘‘ན, བྷིཀྑཝེ, ཨིདཱནེཝ སོ ཀུཧཀཙོརོ, པུབྦེཔི ཀུཧཀཙོརོཡེཝ ཨཧོསི. ཨིདཱནི པནེས བཱལཛནཾ ཝཉྩེཏི, ཏདཱ པན པཎྜིཏེ ཝཉྩེཏུཾ ནཱསཀྑཱི’’ཏི ཝཏྭཱ ཏེཧི ཡཱཙིཏོ ཨཏཱིཏམཱཧརི.

ཨཏཱིཏེ ཨེཀཾ ཀཱསིཀགཱམཾ ནིསྶཱཡ ཨེཀོ ཀུཧཀཏཱཔསོ ཝཱསཾ ཀཔྤེསི. ཏཾ ཨེཀཾ ཀུལཾ པཊིཛགྒི. དིཝཱ ཨུཔྤནྣཁཱདནཱིཡབྷོཛནཱིཡཏོ ཨཏྟནོ པུཏྟཱནཾ ཝིཡ ཏསྶཔི ཨེཀཾ ཀོཊྛཱསཾ དེཏི, སཱཡཾ ཨུཔྤནྣཀོཊྛཱསཾ ཋཔེཏྭཱ དུཏིཡདིཝསེ དེཏི. ཨཐེཀདིཝསཾ སཱཡཾ གོདྷམཾསཾ ལབྷིཏྭཱ སཱདྷུཀཾ པཙིཏྭཱ ཏཏོ ཀོཊྛཱསཾ ཋཔེཏྭཱ དུཏིཡདིཝསེ ཏསྶ ཨདཾསུ. ཏཱཔསོ མཾསཾ ཁཱདིཏྭཱཝ རསཏཎྷཱཡ བདྡྷོ ‘‘ཀིཾ མཾསཾ ནཱམེཏ’’ནྟི པུཙྪིཏྭཱ ‘‘གོདྷམཾས’’ནྟི སུཏྭཱ བྷིཀྑཱཡ ཙརིཏྭཱ སཔྤིདདྷིཀཊུཀབྷཎྜཱདཱིནི གཧེཏྭཱ པཎྞསཱལཾ གནྟྭཱ ཨེཀམནྟཾ ཋཔེསི. པཎྞསཱལཱཡ པན ཨཝིདཱུརེ ཨེཀསྨིཾ ཝམྨིཀེ གོདྷརཱཛཱ ཝིཧརཏི. སོ ཀཱལེན ཀཱལཾ ཏཱཔསཾ ཝནྡིཏུཾ ཨཱགཙྪཏི. ཏཾདིཝསཾ པནེས ‘‘ཏཾ ཝདྷིསྶཱམཱི’’ཏི དཎྜཾ པཊིཙྪཱདེཏྭཱ ཏསྶ ཝམྨིཀསྶ ཨཝིདཱུརེ ཋཱནེ ནིདྡཱཡནྟོ ཝིཡ ནིསཱིདི. གོདྷརཱཛཱ ཝམྨིཀཏོ ནིཀྑམིཏྭཱ ཏསྶ སནྟིཀཾ ཨཱགཙྪནྟོཝ ཨཱཀཱརཾ སལླཀྑེཏྭཱ ‘‘ན མེ ཨཛྫ ཨཱཙརིཡསྶ ཨཱཀཱརོ རུཙྩཏཱི’’ཏི ཏཏོཝ ནིཝཏྟི. ཏཱཔསོ ཏསྶ ནིཝཏྟནབྷཱཝཾ ཉཏྭཱ ཏསྶ མཱརཎཏྠཱཡ དཎྜཾ ཁིཔི, དཎྜོ ཝིརཛ྄ཛྷིཏྭཱ གཏོ. གོདྷརཱཛཱཔི དྷམྨིཀཾ པཝིསིཏྭཱ ཏཏོ སཱིསཾ ནཱིཧརིཏྭཱ ཨཱགཏམགྒཾ ཨོལོཀེནྟོ ཏཱཔསཾ ཨཱཧ –

‘‘སམཎཾ ཏཾ མཉྙམཱནོ, ཨུཔགཙྪིམསཉྙཏཾ;

སོ མཾ དཎྜེན པཱཧཱསི, ཡཐཱ ཨསམཎོ ཏཐཱ.

‘‘ཀིཾ ཏེ ཛཊཱཧི དུམྨེདྷ, ཀིཾ ཏེ ཨཛིནསཱཊིཡཱ;

ཨབྦྷནྟརཾ ཏེ གཧནཾ, བཱཧིརཾ པརིམཛྫསཱི’’ཏི. (ཛཱ. ༡.༤.༩༧-༩༨);

ཨཐ ནཾ ཏཱཔསོ ཨཏྟནོ སནྟཀེན པལོབྷེཏུཾ ཨེཝམཱཧ –

‘‘ཨེཧི གོདྷ ནིཝཏྟསྶུ, བྷུཉྫ སཱལཱིནམོདནཾ;

ཏེལཾ ལོཎཉྩ མེ ཨཏྠི, པཧཱུཏཾ མཡ྄ཧ པིཔྥལཱི’’ཏི. (ཛཱ. ༡.༤.༩༩);

ཏཾ སུཏྭཱ གོདྷརཱཛཱ ‘‘ཡཐཱ ཡཐཱ ཏྭཾ ཀཐེསི, ཏཐཱ ཏཐཱ མེ པལཱཡིཏུཀཱམཏཱཝ ཧོཏཱི’’ཏི ཝཏྭཱ ཨིམཾ གཱཐམཱཧ –

‘‘ཨེས བྷིཡྻོ པཝེཀྑཱམི, ཝམྨིཀཾ སཏཔོརིསཾ;

ཏེལཾ ལོཎཉྩ ཀིཏྟེསི, ཨཧིཏཾ མཡ྄ཧ པིཔྥལཱི’’ཏི. (ཛཱ. ༡.༤.༡༠༠);

ཨེཝཉྩ པན ཝཏྭཱ ‘‘ཨཧཾ ཨེཏྟཀཾ ཀཱལཾ ཏཡི སམཎསཉྙཾ ཨཀཱསིཾ, ཨིདཱནི པན ཏེ མཾ པཧརིཏུཀཱམཏཱཡ དཎྜོ ཁིཏྟོ, ཏསྶ ཁིཏྟཀཱལེཡེཝ ཨསམཎོ ཛཱཏོ. ཀིཾ ཏཱདིསསྶ དུཔྤཉྙསྶ པུགྒལསྶ ཛཊཱཧི, ཀིཾ སཁུརེན ཨཛིནཙམྨེན. ཨབྦྷནྟརཉྷི ཏེ གཧནཾ, ཀེཝལཾ བཱཧིརམེཝ པརིམཛྫསཱི’’ཏི ཨཱཧ. སཏྠཱ ཨིམཾ ཨཏཱིཏཾ ཨཱཧརིཏྭཱ ‘‘ཏདཱ ཨེས ཀུཧཀོ ཏཱཔསོ ཨཧོསི, གོདྷརཱཛཱ པན ཨཧམེཝཱ’’ཏི ཝཏྭཱ ཛཱཏཀཾ སམོདྷཱནེཏྭཱ ཏདཱ གོདྷཔཎྜིཏེན ཏསྶ ནིགྒཧིཏཀཱརཎཾ དསྶེནྟོ ཨིམཾ གཱཐམཱཧ –

༣༩༤.

‘‘ཀིཾ ཏེ ཛཊཱཧི དུམྨེདྷ, ཀིཾ ཏེ ཨཛིནསཱཊིཡཱ;

ཨབྦྷནྟརཾ ཏེ གཧནཾ, བཱཧིརཾ པརིམཛྫསཱི’’ཏི. (ཛཱ. ༡.༤.༩༨);

ཏཏྠ ཀིཾ ཏེ ཛཊཱཧཱིཏི ཨམྦྷོ དུཔྤཉྙ ཏཝ བདྡྷཱཧིཔི ཨིམཱཧི ཛཊཱཧི སཁུརཱཡ ནིཝཏྠཱཡཔི ཨིམཱཡ ཨཛིནཙམྨསཱཊིཀཱཡ ཙ ཀིམཏྠོཏི. ཨབྦྷནྟརནྟི ཨབྦྷནྟརཉྷི ཏེ རཱགཱདིཀིལེསགཧནཾ, ཀེཝལཾ ཧཏྠིལཎྜཾ ཨསྶལཎྜཾ ཝིཡ མཊྛཾ བཱཧིརཾ པརིམཛྫསཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཀུཧཀབྲཱཧྨཎཝཏྠུ ཨེཀཱདསམཾ.

༡༢. ཀིསཱགོཏམཱིཝཏྠུ

པཾསུཀཱུལདྷརནྟི ཨིམཾ དྷམྨདེསནཾ སཏྠཱ གིཛ྄ཛྷཀཱུཊེ པབྦཏེ ཝིཧརནྟོ ཀིསཱགོཏམིཾ ཨཱརབྦྷ ཀཐེསི.

ཏདཱ ཀིར སཀྐོ པཋམཡཱམཱཝསཱནེ དེཝཔརིསཱཡ སདྡྷིཾ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟེ སཱརཎཱིཡདྷམྨཀཐཾ སུཎནྟོ ནིསཱིདི. ཏསྨིཾ ཁཎེ ཀིསཱགོཏམཱི ‘‘སཏྠཱརཾ པསྶིསྶཱམཱི’’ཏི ཨཱཀཱསེནཱགནྟྭཱ སཀྐཾ དིསྭཱ ནིཝཏྟི. སོ ཏཾ ཝནྡིཏྭཱ ནིཝཏྟནྟིཾ དིསྭཱ སཏྠཱརཾ པུཙྪི – ‘‘ཀཱ ནཱམེསཱ, བྷནྟེ, ཨཱགཙྪམཱནཱཝ ཏུམྷེ དིསྭཱ ནིཝཏྟཏཱི’’ཏི? སཏྠཱ ‘‘ཀིསཱགོཏམཱི ནཱམེསཱ, མཧཱརཱཛ, མམ དྷཱིཏཱ པཾསུཀཱུལིཀཏྠེརཱིནཾ ཨགྒཱ’’ཏི ཝཏྭཱ ཨིམཾ གཱཐམཱཧ –

༣༩༥.

‘‘པཾསུཀཱུལདྷརཾ ཛནྟུཾ, ཀིསཾ དྷམནིསནྠཏཾ;

ཨེཀཾ ཝནསྨིཾ ཛྷཱཡནྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཀིསནྟི པཾསུཀཱུལིཀཱ ཧི ཨཏྟནོ ཨནུརཱུཔཾ པཊིཔདཾ པཱུརེནྟཱ ཨཔྤམཾསལོཧིཏཱ ཙེཝ ཧོནྟི དྷམནིསནྠཏགཏྟཱ ཙ, ཏསྨཱ ཨེཝམཱཧ. ཨེཀཾ ཝནསྨིནྟི ཝིཝིཏྟཊྛཱནེ ཨེཀཀཾ ཝནསྨིཾ ཛྷཱཡནྟཾ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཀིསཱགོཏམཱིཝཏྠུ དྭཱདསམཾ.

༡༣. ཨེཀབྲཱཧྨཎཝཏྠུ

ན ཙཱཧནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ བྲཱཧྨཎཾ ཨཱརབྦྷ ཀཐེསི.

སོ ཀིར ‘‘སམཎོ གོཏམོ ཨཏྟནོ སཱཝཀེ བྲཱཧྨཎཱཏི ཝདཏི ཨཧཉྩམྷི བྲཱཧྨཎཡོནིཡཾ ནིབྦཏྟོ, མམྤི ནུ ཁོ ཨེཝཾ ཝཏྟུཾ ཝཊྚཏཱི’’ཏི སཏྠཱརཾ ཨུཔསངྐམིཏྭཱ ཏམཏྠཾ པུཙྪི. ཨཐ ནཾ སཏྠཱ ‘‘ནཱཧཾ, བྲཱཧྨཎ, བྲཱཧྨཎཡོནིཡཾ ནིབྦཏྟམཏྟེནེཝཾ ཝདཱམི, ཡོ པན ཨཀིཉྩནོ ཨགཧཎོ, ཏམཧཾ བྲཱཧྨཎཾ ཝདཱམཱི’’ཏི ཝཏྭཱ ཨིམཾ གཱཐམཱཧ –

༣༩༦.

‘‘ན ཙཱཧཾ བྲཱཧྨཎཾ བྲཱུམི, ཡོནིཛཾ མཏྟིསམྦྷཝཾ;

བྷོཝཱདི ནཱམ སོ ཧོཏི, སཙེ ཧོཏི སཀིཉྩནོ;

ཨཀིཉྩནཾ ཨནཱདཱནཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཡོནིཛནྟི ཡོནིཡཾ ཛཱཏཾ. མཏྟིསམྦྷཝནྟི བྲཱཧྨཎིཡཱ མཱཏུ སནྟཀེ ཨུདརསྨིཾ སམྦྷཱུཏཾ. བྷོཝཱདཱིཏི སོ པན ཨཱམནྟནཱདཱིསུ ‘‘བྷོ, བྷོ’’ཏི ཝཏྭཱ ཝིཙརནྟོ བྷོཝཱདི ནཱམ ཧོཏི, སཙེ རཱགཱདཱིཧི ཀིཉྩནེཧི སཀིཉྩནོ. ཨཧཾ པན རཱགཱདཱིཧི ཨཀིཉྩནཾ ཙཏཱུཧི ཨུཔཱདཱནེཧི ཨནཱདཱནཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ སོ བྲཱཧྨཎོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཨེཀབྲཱཧྨཎཝཏྠུ ཏེརསམཾ.

༡༤. ཨུགྒསེནསེཊྛིཔུཏྟཝཏྠུ

སབྦསཾཡོཛནནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨུགྒསེནཾ ནཱམ སེཊྛིཔུཏྟཾ ཨཱརབྦྷ ཀཐེསི. ཝཏྠུ ‘‘མུཉྩ པུརེ མུཉྩ པཙྪཏོ’’ཏི (དྷ. པ. ༣༤༨) གཱཐཱཝཎྞནཱཡ ཝིཏྠཱརིཏམེཝ.

ཏདཱ ཧི སཏྠཱ, ‘‘བྷནྟེ, ཨུགྒསེནོ ‘ན བྷཱཡཱམཱི’ཏི ཝདཏི, ཨབྷཱུཏེན མཉྙེ ཨཉྙཾ བྱཱཀརོཏཱི’’ཏི བྷིཀྑཱུཧི ཝུཏྟེ, ‘‘བྷིཀྑཝེ, མམ པུཏྟསདིསཱ ཚིནྣསཾཡོཛནཱ ན བྷཱཡནྟིཡེཝཱ’’ཏི ཝཏྭཱ ཨིམཾ གཱཐམཱཧ –

༣༩༧.

‘‘སབྦསཾཡོཛནཾ ཚེཏྭཱ, ཡོ ཝེ ན པརིཏསྶཏི;

སངྒཱཏིགཾ ཝིསཾཡུཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ སབྦསཾཡོཛནནྟི དསཝིདྷསཾཡོཛནཾ. ན པརིཏསྶཏཱིཏི ཏཎྷཱཡ ན བྷཱཡཏི. ཏམཧནྟི ཏཾ ཨཧཾ རཱགཱདཱིནཾ སངྒཱནཾ ཨཏཱིཏཏྟཱ སངྒཱཏིགཾ, ཙཏུནྣམྤི ཡོགཱནཾ ཨབྷཱཝེན ཝིསཾཡུཏྟཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨུགྒསེནསེཊྛིཔུཏྟཝཏྠུ ཙུདྡསམཾ.

༡༥. དྭེབྲཱཧྨཎཝཏྠུ

ཚེཏྭཱ ནདྡྷིནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ དྭེ བྲཱཧྨཎེ ཨཱརབྦྷ ཀཐེསི.

ཏེསུ ཀིརེཀསྶ ཙཱུལ༹རོཧིཏོ ནཱམ གོཎོ ཨཧོསི, ཨེཀསྶ མཧཱརོཧིཏོ ནཱམ. ཏེ ཨེཀདིཝསཾ ‘‘ཏཝ གོཎོ བལཝཱ, མམ གོཎོ བལཝཱ’’ཏི ཝིཝདིཏྭཱ ‘‘ཀིཾ ནོ ཝིཝཱདེན, པཱཛེཏྭཱ ཛཱནིསྶཱམཱ’’ཏི ཨཙིརཝཏཱིཏཱིརེ སཀཊཾ ཝཱལུཀཱཡ པཱུརེཏྭཱ གོཎེ ཡོཛཡིཾསུ. ཏསྨིཾ ཁཎེ བྷིཀྑཱུཔི ནྷཱཡིཏུཾ ཏཏྠ གཏཱ ཧོནྟི. བྲཱཧྨཎཱ གོཎེ པཱཛེསུཾ. སཀཊཾ ནིཙྩལཾ ཨཊྛཱསི, ནདྡྷིཝརཏྟཱ པན ཚིཛྫིཾསུ. བྷིཀྑཱུ དིསྭཱ ཝིཧཱརཾ གནྟྭཱ ཏམཏྠཾ སཏྠུ ཨཱརོཙཡིཾསུ. སཏྠཱ, ‘‘བྷིཀྑཝེ, བཱཧིརཱ ཨེཏཱ ནདྡྷིཝརཏྟཱ, ཡོ ཀོཙི ཨེཏཱ ཚིནྡཏེཝ, བྷིཀྑུནཱ པན ཨཛ྄ཛྷཏྟིཀཾ ཀོདྷནདྡྷིཉྩེཝ ཏཎྷཱཝརཏྟཉྩ ཚིནྡིཏུཾ ཝཊྚཏཱི’’ཏི ཝཏྭཱ ཨིམཾ གཱཐམཱཧ –

༣༩༨.

‘‘ཚེཏྭཱ ནདྡྷིཾ ཝརཏྟཉྩ, སནྡཱནཾ སཧནུཀྐམཾ;

ཨུཀྑིཏྟཔལིགྷཾ བུདྡྷཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ནདྡྷིནྟི ནཡ྄ཧནབྷཱཝེན པཝཏྟཾ ཀོདྷཾ. ཝརཏྟནྟི བནྡྷནབྷཱཝེན པཝཏྟཾ ཏཎྷཾ. སནྡཱནཾ སཧནུཀྐམནྟི ཨནུསཡཱནུཀྐམསཧིཏཾ དྭཱསཊྛིདིཊྛིསནྡཱནཾ, ཨིདཾ སབྦམྤི ཚིནྡིཏྭཱ ཋིཏཾ ཨཝིཛྫཱཔལིགྷསྶ ཨུཀྑིཏྟཏྟཱ ཨུཀྑིཏྟཔལིགྷཾ, ཙཏུནྣཾ སཙྩཱནཾ བུདྡྷཏྟཱ བུདྡྷཾ ཏཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ པཉྩསཏཱ བྷིཀྑཱུ ཨརཧཏྟེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

དྭེབྲཱཧྨཎཝཏྠུ པནྣརསམཾ.

༡༦. ཨཀྐོསཀབྷཱརདྭཱཛཝཏྠུ

ཨཀྐོསནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨཀྐོསཀབྷཱརདྭཱཛཾ ཨཱརབྦྷ ཀཐེསི.

ཏསྶ ཧི བྷཱཏུ བྷཱརདྭཱཛསྶ དྷནཉྫཱནཱི ནཱམ བྲཱཧྨཎཱི སོཏཱཔནྣཱ ཨཧོསི. སཱ ཁཱིཔིཏྭཱཔི ཀཱསིཏྭཱཔི པཀྑལིཏྭཱཔི ‘‘ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶཱ’’ཏི ཨིམཾ ཨུདཱནཾ ཨུདཱནེསི. སཱ ཨེཀདིཝསཾ བྲཱཧྨཎཔརིཝེསནཱཡ པཝཏྟམཱནཱཡ པཀྑལིཏྭཱ ཏཐེཝ མཧཱསདྡེན ཨུདཱནཾ ཨུདཱནེསི. བྲཱཧྨཎོ ཀུཛ྄ཛྷིཏྭཱ ‘‘ཨེཝམེཝཱཡཾ ཝསལཱི ཡཏྠ ཝཱ ཏཏྠ ཝཱ པཀྑལིཏྭཱ ཏསྶ མུཎྜཀསྶ སམཎཀསྶ ཝཎྞཾ བྷཱསཏཱི’’ཏི ཝཏྭཱ ‘‘ཨིདཱནི ཏེ, ཝསལི, གནྟྭཱ ཏསྶ སཏྠུནོ ཝཱདཾ ཨཱརོཔེསྶཱམཱི’’ཏི ཨཱཧ. ཨཐ ནཾ སཱ ‘‘གཙྪ, བྲཱཧྨཎ, ནཱཧཾ ཏཾ པསྶཱམི, ཡོ ཏསྶ བྷགཝཏོ ཝཱདཾ ཨཱརོཔེཡྻ, ཨཔི ཙ གནྟྭཱ ཏཾ བྷགཝནྟཾ པཉྷཾ པུཙྪསྶཱུ’’ཏི ཨཱཧ. སོ སཏྠུ སནྟིཀཾ གནྟྭཱ ཨཝནྡིཏྭཱཝ ཨེཀམནྟཾ ཋིཏོ པཉྷཾ པུཙྪནྟོ ཨིམཾ གཱཐམཱཧ –

‘‘ཀིཾསུ ཚེཏྭཱ སུཁཾ སེཏི, ཀིཾསུ ཚེཏྭཱ ན སོཙཏི;

ཀིསྶསྶུ ཨེཀདྷམྨསྶ, ཝདྷཾ རོཙེསི གོཏམཱ’’ཏི. (སཾ. ནི. ༡.༡༨༧);

ཨཐསྶ པཉྷཾ བྱཱཀརོནྟོ སཏྠཱ ཨིམཾ གཱཐམཱཧ –

‘‘ཀོདྷཾ ཚེཏྭཱ སུཁཾ སེཏི, ཀོདྷཾ ཚེཏྭཱ ན སོཙཏི;

ཀོདྷསྶ ཝིསམཱུལསྶ, མདྷུརགྒསྶ བྲཱཧྨཎ;

ཝདྷཾ ཨརིཡཱ པསཾསནྟི, ཏཉྷི ཚེཏྭཱ ན སོཙཏཱི’’ཏི. (སཾ. ནི. ༡.༡༨༧);

སོ སཏྠརི པསཱིདིཏྭཱ པབྦཛིཏྭཱ ཨརཧཏྟཾ པཱཔུཎི. ཨཐསྶ ཀནིཊྛོ ཨཀྐོསཀབྷཱརདྭཱཛོ ‘‘བྷཱཏཱ ཀིར མེ པབྦཛིཏོ’’ཏི སུཏྭཱ ཀུདྡྷོ ཨཱགནྟྭཱ སཏྠཱརཾ ཨསབྦྷཱཧི ཕརུསཱཧི ཝཱཙཱཧི ཨཀྐོསི. སོཔི སཏྠཱརཱ ཨཏིཐཱིནཾ ཁཱདནཱིཡཱདིདཱནཨོཔམྨེན སཉྙཏྟོ སཏྠརི པསནྣོ པབྦཛིཏྭཱ ཨརཧཏྟཾ པཱཔུཎི. ཨཔརེཔིསྶ སུནྡརིཀབྷཱརདྭཱཛོ བིལིངྒཀབྷཱརདྭཱཛོཏི དྭེ ཀནིཊྛབྷཱཏརོ སཏྠཱརཾ ཨཀྐོསནྟཱཝ སཏྠཱརཱ ཝིནཱིཏཱ པབྦཛིཏྭཱ ཨརཧཏྟཾ པཱཔུཎིཾསུ.

ཨཐེཀདིཝསཾ དྷམྨསབྷཱཡཾ ཀཐཾ སམུཊྛཱཔེསུཾ, ‘‘ཨཱཝུསོ, ཨཙྪརིཡཱ ཝཏ བུདྡྷགུཎཱ, ཙཏཱུསུ ནཱམ བྷཱཏིཀེསུ ཨཀྐོསནྟེསུ སཏྠཱ ཀིཉྩི ཨཝཏྭཱ ཏེསཾཡེཝ པཏིཊྛཱ ཛཱཏོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཨཧཾ མམ ཁནྟིབལེན སམནྣཱགཏཏྟཱ དུཊྛེསུ ཨདུསྶནྟོ མཧཱཛནསྶ པཏིཊྛཱ ཧོམིཡེཝཱ’’ཏི ཝཏྭཱ ཨིམཾ གཱཐམཱཧ –

༣༩༩.

‘‘ཨཀྐོསཾ ཝདྷབནྡྷཉྩ, ཨདུཊྛོ ཡོ ཏིཏིཀྑཏི;

ཁནྟཱིབལཾ བལཱནཱིཀཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཨདུཊྛོཏི ཨེཏཾ དསཧི ཨཀྐོསཝཏྠཱུཧི ཨཀྐོསཉྩ པཱཎིཨཱདཱིཧི པོཐནཉྩ ཨནྡུབནྡྷནཱདཱིཧི བནྡྷནཉྩ ཡོ ཨཀུདྡྷམཱནསོ ཧུཏྭཱ ཨདྷིཝཱསེཏི, ཁནྟིབལེན སམནྣཱགཏཏྟཱ ཁནྟིབལཾ, པུནཔྤུནཾ ཨུཔྤཏྟིཡཱ ཨནཱིཀབྷཱུཏེན ཏེནེཝ ཁནྟིབལེན སམནྣཱགཏཏྟཱ བལཱནཱིཀཾ ཏཾ ཨེཝརཱུཔཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཀྐོསཀབྷཱརདྭཱཛཝཏྠུ སོལ༹སམཾ.

༡༧. སཱརིཔུཏྟཏྠེརཝཏྠུ

ཨཀྐོདྷནནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ སཱརིཔུཏྟཏྠེརཾ ཨཱརབྦྷ ཀཐེསི.

ཏདཱ ཀིར ཐེརོ པཉྩཧི བྷིཀྑུསཏེཧི སདྡྷིཾ པིཎྜཱཡ ཙརནྟོ ནཱལཀགཱམེ མཱཏུ གྷརདྭཱརཾ ཨགམཱསི. ཨཐ ནཾ སཱ ནིསཱིདཱཔེཏྭཱ པརིཝིསམཱནཱ ཨཀྐོསི – ‘‘ཨམྦྷོ, ཨུཙྪིཊྛཁཱདཀ ཨུཙྪིཊྛཀཉྫིཡཾ ཨལབྷིཏྭཱ པརགྷརེསུ ཨུལུ༹ངྐཔིཊྛེན གྷཊྚིཏཀཉྫིཡཾ པརིབྷུཉྫིཏུཾ ཨསཱིཏིཀོཊིདྷནཾ པཧཱཡ པབྦཛིཏོསི, ནཱསིཏམྷཱ ཏཡཱ, བྷུཉྫཱཧི དཱནཱི’’ཏི. བྷིཀྑཱུནམྤི བྷཏྟཾ དདམཱནཱ ‘‘ཏུམྷེཧི མམ པུཏྟོ ཨཏྟནོ ཙཱུལུ༹པཊྛཱཀོ ཀཏོ, ཨིདཱནི བྷུཉྫཐཱ’’ཏི ཝདེཏི. ཐེརོ བྷིཀྑཾ གཧེཏྭཱ ཝིཧཱརམེཝ ཨགམཱསི. ཨཐཱཡསྨཱ རཱཧུལོ སཏྠཱརཾ པིཎྜཔཱཏེན ཨཱཔུཙྪི. ཨཐ ནཾ སཏྠཱ ཨཱཧ – ‘‘རཱཧུལ, ཀཧཾ གམིཏྠཱ’’ཏི? ‘‘ཨཡྻིཀཱཡ གཱམཾ, བྷནྟེ’’ཏི. ‘‘ཀིཾ པན ཏེ ཨཡྻིཀཱཡ ཨུཔཛ྄ཛྷཱཡོ ཝུཏྟོ’’ཏི? ‘‘ཨཡྻིཀཱཡ མེ, བྷནྟེ, ཨུཔཛ྄ཛྷཱཡོ ཨཀྐུཊྛོ’’ཏི. ‘‘ཀིནྟི ཝཏྭཱ’’ཏི? ‘‘ཨིདཾ ནཱམ, བྷནྟེ’’ཏི. ‘‘ཨུཔཛ྄ཛྷཱཡེན པན ཏེ ཀིཾ ཝུཏྟ’’ནྟི? ‘‘ན ཀིཉྩི, བྷནྟེ’’ཏི. ཏཾ སུཏྭཱ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ, ‘‘ཨཱཝུསོ, ཨཙྪརིཡཱ ཝཏ སཱརིཔུཏྟཏྠེརསྶ གུཎཱ, ཨེཝཾནཱམསྶ མཱཏརི ཨཀྐོསནྟིཡཱ ཀོདྷམཏྟམྤི ནཱཧོསཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཁཱིཎཱསཝཱ ནཱམ ཨཀྐོདྷནཱཝ ཧོནྟཱི’’ཏི ཝཏྭཱ ཨིམཾ གཱཐམཱཧ –

༤༠༠.

‘‘ཨཀྐོདྷནཾ ཝཏཝནྟཾ, སཱིལཝནྟཾ ཨནུསྶདཾ;

དནྟཾ ཨནྟིམསཱརཱིརཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཝཏཝནྟནྟི དྷུཏཝཏེན, སམནྣཱགཏཾ ཙཏུཔཱརིསུདྡྷིསཱིལེན སཱིལཝནྟཾ, ཏཎྷཱཨུསྶདཱབྷཱཝེན ཨནུསྶདཾ , ཚལི༹ནྡྲིཡདམནེན དནྟཾ, ཀོཊིཡཾ ཋིཏེན ཨཏྟབྷཱཝེན ཨནྟིམསརཱིརཾ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཱརིཔུཏྟཏྠེརཝཏྠུ སཏྟརསམཾ.

༡༨. ཨུཔྤལཝཎྞཱཐེརཱིཝཏྠུ

ཝཱརི པོཀྑརཔཏྟེཝཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨུཔྤལཝཎྞཐེརིཾ ཨཱརབྦྷ ཀཐེསི. ཝཏྠུ ‘‘མདྷུཝཱ མཉྙཏི བཱལོ’’ཏི གཱཐཱཝཎྞནཱཡ (དྷ. པ. ༦༩) ཝིཏྠཱརིཏམེཝ. ཝུཏྟཉྷི ཏཏྠ (དྷ. པ. ཨཊྛ. ༡.༦༩) –

ཨཔརེན སམཡེན མཧཱཛནོ དྷམྨསབྷཱཡཾ ཀཐཾ སམུཊྛཱཔེསི ‘‘ཁཱིཎཱསཝཱཔི མཉྙེ ཀཱམསུཁཾ སཱདིཡནྟི, ཀཱམཾ སེཝནྟི, ཀིཾ ན སེཝིསྶནྟི. ན ཧེཏེ ཀོལཱ༹པརུཀྑཱ, ན ཙ ཝམྨིཀཱ, ཨལླམཾསསརཱིརཱཝ, ཏསྨཱ ཨེཏེཔི ཀཱམསུཁཾ སཱདིཡནྟཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཁཱིཎཱསཝཱ ཀཱམསུཁཾ སཱདིཡནྟི, ན ཀཱམཾ སེཝནྟི. ཡཐཱ ཧི པདུམཔཏྟེ པཏིཏཾ ཨུདཀབིནྡུ ན ལིམྤཏི ན སཎྛཱཏི, ཝིནིཝཏྟིཏྭཱ པན པཏཏེཝ. ཡཐཱ ཙ ཨཱརགྒེ སཱསཔོ ན ཨུཔལིམྤཏི ན སཎྛཱཏི, ཝིནིཝཏྟིཏྭཱ པཏཏེཝ, ཨེཝཾ ཁཱིཎཱསཝསྶ ཙིཏྟེ དུཝིདྷོཔི ཀཱམོ ན ལིམྤཏི ན སཎྛཱཏཱི’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

༤༠༡.

‘‘ཝཱརི པོཀྑརཔཏྟེཝ, ཨཱརགྒེརིཝ སཱསཔོ;

ཡོ ན ལིམྤཏི ཀཱམེསུ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཡོ ན ལིམྤཏཱིཏི ཨེཝམེཝཾ ཡོ ཨབྦྷནྟརེ དུཝིདྷེཔི ཀཱམེ ན ཨུཔལིམྤཏི, ཏསྨིཾ ཀཱམེ ན སཎྛཱཏི, ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨུཔྤལཝཎྞཱཐེརཱིཝཏྠུ ཨཊྛཱརསམཾ.

༡༩. ཨཉྙཏརབྲཱཧྨཎཝཏྠུ

ཡོ དུཀྑསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ བྲཱཧྨཎཾ ཨཱརབྦྷ ཀཐེསི.

ཏསྶ ཀིརེཀོ དཱསོ ཨཔཉྙཏྟེ སིཀྑཱཔདེ པལཱཡིཏྭཱ པབྦཛིཏྭཱ ཨརཧཏྟཾ པཱཔུཎི. བྲཱཧྨཎོ ཏཾ ཨོལོཀེནྟོ ཨདིསྭཱ ཨེཀདིཝསཾ སཏྠཱརཱ སདྡྷིཾ པིཎྜཱཡ པཝིསནྟཾ དྭཱརནྟརེ དིསྭཱ ཙཱིཝརཾ དལ༹ྷཾ ཨགྒཧེསི. སཏྠཱ ནིཝཏྟིཏྭཱ ‘‘ཀིཾ ཨིདཾ, བྲཱཧྨཎཱ’’ཏི པུཙྪི. དཱསོ མེ, བྷོ གོཏམཱཏི. པནྣབྷཱརོ ཨེས, བྲཱཧྨཎཱཏི. ‘‘པནྣབྷཱརོ’’ཏི ཙ ཝུཏྟེ བྲཱཧྨཎོ ‘‘ཨརཧཱ’’ཏི སལླཀྑེསི. ཏསྨཱ པུནཔི ཏེན ‘‘ཨེཝཾ, བྷོ གོཏམཱ’’ཏི ཝུཏྟེ སཏྠཱ ‘‘ཨཱམ, བྲཱཧྨཎ, པནྣབྷཱརོ’’ཏི ཝཏྭཱ ཨིམཾ གཱཐམཱཧ –

༤༠༢.

‘‘ཡོ དུཀྑསྶ པཛཱནཱཏི, ཨིདྷེཝ ཁཡམཏྟནོ;

པནྣབྷཱརཾ ཝིསཾཡུཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ དུཀྑསྶཱཏི ཁནྡྷདུཀྑསྶ. པནྣབྷཱརནྟི ཨོཧིཏཁནྡྷབྷཱརཾ ཙཏཱུཧི ཡོགེཧི སབྦཀིལེསེཧི ཝཱ ཝིསཾཡུཏྟཾ ཏམཧཾ བྲཱཧྨཎཾ ཝདཱམཱིཏི ཨཏྠོ. དེསནཱཝསཱནེ སོ བྲཱཧྨཎོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཨཉྙཏརབྲཱཧྨཎཝཏྠུ ཨེཀཱུནཝཱིསཏིམཾ.

༢༠. ཁེམཱབྷིཀྑུནཱིཝཏྠུ

གམྦྷཱིརཔཉྙནྟི ཨིམཾ དྷམྨདེསནཾ སཏྠཱ གིཛ྄ཛྷཀཱུཊེ ཝིཧརནྟོ ཁེམཾ ནཱམ བྷིཀྑུནིཾ ཨཱརབྦྷ ཀཐེསི.

ཨེཀདིཝསཉྷི པཋམཡཱམསམནནྟརེ སཀྐོ དེཝརཱཛཱ པརིསཱཡ སདྡྷིཾ ཨཱགནྟྭཱ སཏྠུ སནྟིཀེ སཱརཎཱིཡདྷམྨཀཐཾ སུཎནྟོ ནིསཱིདི. ཏསྨིཾ ཁཎེ ཁེམཱ བྷིཀྑུནཱི ‘‘སཏྠཱརཾ པསྶིསྶཱམཱི’’ཏི ཨཱགནྟྭཱ སཀྐཾ དིསྭཱ ཨཱཀཱསེ ཋིཏཱཝ སཏྠཱརཾ ཝནྡིཏྭཱ ནིཝཏྟི. སཀྐོ ཏཾ དིསྭཱ ‘‘ཀོ ཨེསཱ, བྷནྟེ, ཨཱགཙྪམཱནཱ ཨཱཀཱསེ ཋིཏཱཝ སཏྠཱརཾ ཝནྡིཏྭཱ ནིཝཏྟཱི’’ཏི པུཙྪི. སཏྠཱ ‘‘ཨེསཱ, མཧཱརཱཛ, མམ དྷཱིཏཱ ཁེམཱ ནཱམ མཧཱཔཉྙཱ མགྒཱམགྒཀོཝིདཱ’’ཏི ཝཏྭཱ ཨིམཾ གཱཐམཱཧ –

༤༠༣.

‘‘གམྦྷཱིརཔཉྙཾ མེདྷཱཝིཾ, མགྒཱམགྒསྶ ཀོཝིདཾ;

ཨུཏྟམཏྠམནུཔྤཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ གབྦྷཱིརཔཉྙནྟི གམྦྷཱིརེསུ ཁནྡྷཱདཱིསུ པཝཏྟཱཡ པཉྙཱཡ སམནྣཱགཏཾ དྷམྨོཛཔཉྙཱཡ སམནྣཱགཏཾ མེདྷཱཝིཾ ‘‘ཨཡཾ དུགྒཏིཡཱ མགྒོ, ཨཡཾ སུགཏིཡཱ མགྒོ, ཨཡཾ ནིབྦཱནསྶ མགྒོ, ཨཡཾ ཨམགྒོ’’ཏི ཨེཝཾ མགྒེ ཙ ཨམགྒེ ཙ ཚེཀཏཱཡ མགྒཱམགྒསྶ ཀོཝིདཾ ཨརཧཏྟསངྑཱཏཾ ཨུཏྟམཏྠཾ ཨནུཔྤཏྟཾ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཁེམཱབྷིཀྑུནིཝཏྠུ ཝཱིསཏིམཾ.

༢༡. པབྦྷཱརཝཱསཱིཏིསྶཏྠེརཝཏྠུ

ཨསཾསཊྛནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པབྦྷཱརཝཱསཱིཏིསྶཏྠེརཾ ཨཱརབྦྷ ཀཐེསི.

སོ ཀིར སཏྠུ སནྟིཀེ ཀམྨཊྛཱནཾ གཧེཏྭཱ ཨརཉྙཾ པཝིསིཏྭཱ སཔྤཱཡཾ སེནཱསནཾ ཨོལོཀེནྟོ ཨེཀཾ ལེཎཔབྦྷཱརཾ པཱཔུཎི, སམྤཏྟཀྑཎེཡེཝསྶ ཙིཏྟཾ ཨེཀགྒཏཾ ལབྷི. སོ ‘‘ཨཧཾ ཨིདྷ ཝསནྟོ པབྦཛིཏཀིཙྩཾ ནིཔྥཱདེཏུཾ སཀྑིསྶཱམཱི’’ཏི ཙིནྟེསི. ལེཎེཔི ཨདྷིཝཏྠཱ དེཝཏཱ ‘‘སཱིལཝཱ བྷིཀྑུ ཨཱགཏོ, ཨིམིནཱ སདྡྷིཾ ཨེཀཊྛཱནེ ཝསིཏུཾ དུཀྑཾ. ཨཡཾ པན ཨིདྷ ཨེཀརཏྟིམེཝ ཝསིཏྭཱ པཀྐམིསྶཏཱི’’ཏི ཙིནྟེཏྭཱ པུཏྟེ ཨཱདཱཡ ནིཀྑམི. ཐེརོ པུནདིཝསེ པཱཏོཝ གོཙརགཱམཾ པིཎྜཱཡ པཱཝིསི. ཨཐ ནཾ ཨེཀཱ ཨུཔཱསིཀཱ དིསྭཱཝ པུཏྟསིནེཧཾ པཊིལབྷིཏྭཱ གེཧེ ནིསཱིདཱཔེཏྭཱ བྷོཛེཏྭཱ ཨཏྟཱནཾ ནིསྶཱཡ ཏེམཱསཾ ཝསནཏྠཱཡ ཡཱཙི. སོཔི ‘‘སཀྐཱ མཡཱ ཨིམཾ ནིསྶཱཡ བྷཝནིསྶརཎཾ ཀཱཏུ’’ནྟི ཨདྷིཝཱསེཏྭཱ ཏམེཝ ལེཎཾ ཨགམཱསི. དེཝཏཱ ཏཾ ཨཱགཙྪནྟཾ དིསྭཱ ‘‘ཨདྡྷཱ ཀེནཙི ནིམནྟིཏོ བྷཝིསྶཏི, སྭེ ཝཱ པརསུཝེ ཝཱ གམིསྶཏཱི’’ཏི ཙིནྟེསི.

ཨེཝཾ ཨཌྜྷམཱསམཏྟེ ཨཏིཀྐནྟེ ‘‘ཨཡཾ ཨིདྷེཝ མཉྙེ ཨནྟོཝསྶཾ ཝསིསྶཏི, སཱིལཝཏཱ པན སདྡྷིཾ ཨེཀཊྛཱནེ པུཏྟཀེཧི སདྡྷིཾ ཝསིཏུཾ དུཀྐརཾ, ཨིམཉྩ ‘ནིཀྑམཱ’ཏི ཝཏྟུཾ ན སཀྐཱ, ཨཏྠི ནུ ཁོ ཨིམསྶ སཱིལེ ཁལིཏ’’ནྟི དིབྦེན ཙཀྑུནཱ ཨོལོཀེནྟཱི ཨུཔསམྤདམཱལ༹ཀཏོ པཊྛཱཡ ཏསྶ སཱིལེ ཁལིཏཾ ཨདིསྭཱ ‘‘པརིསུདྡྷམསྶ སཱིལཾ, ཀིཉྩིདེཝསྶ ཀཏྭཱ ཨཡསཾ ཨུཔྤཱདེསྶཱམཱི’’ཏི ཏསྶ ཨུཔཊྛཱཀཀུལེ ཨུཔཱསིཀཱཡ ཛེཊྛཔུཏྟསྶ སརཱིརེ ཨདྷིམུཙྩིཏྭཱ གཱིཝཾ པརིཝཏྟེསི. ཏསྶ ཨཀྑཱིནི ནིཀྑམིཾསུ, མུཁཏོ ཁེལོ༹ པགྒྷརི. ཨུཔཱསིཀཱ ཏཾ དིསྭཱ ‘‘ཀིཾ ཨིད’’ནྟི ཝིརཝི. ཨཐ ནཾ དེཝཏཱ ཨདིསྶམཱནརཱུཔཱ ཨེཝམཱཧ – ‘‘མཡཱ ཨེས གཧིཏོ, བལིཀམྨེནཔི མེ ཨཏྠོ ནཏྠི, ཏུམྷཱཀཾ པན ཀུལཱུཔཀཾ ཐེརཾ ལཊྛིམདྷུཀཾ ཡཱཙིཏྭཱ ཏེན ཏེལཾ པཙིཏྭཱ ཨིམསྶ ནཏྠུཀམྨཾ དེཐ, ཨེཝཱཧཾ ཨིམཾ མུཉྩིསྶཱམཱི’’ཏི. ནསྶཏུ ཝཱ ཨེས མརཏུ ཝཱ, ན སཀྑིསྶཱམཧཾ ཨཡྻཾ ལཊྛིམདྷུཀཾ ཡཱཙིཏུནྟི. སཙེ ལཊྛིམདྷུཀཾ ཡཱཙིཏུཾ ན སཀྐོཐ, ནཱསིཀཱཡསྶ ཧིངྒུཙུཎྞཾ པཀྑིཔིཏུཾ ཝདེཐཱཏི. ཨིདམྤི ཝཏྟུཾ ན སཀྐོམཱཏི. ཏེན ཧིསྶ པཱདདྷོཝནཨུདཀཾ ཨཱདཱཡ སཱིསེ ཨཱསིཉྩཐཱཏི. ཨུཔཱསིཀཱ ‘‘སཀྐཱ ཨིདཾ ཀཱཏུ’’ནྟི ཝེལཱཡ ཨཱགཏཾ ཐེརཾ ནིསཱིདཱཔེཏྭཱ ཡཱགུཁཛྫཀཾ དཏྭཱ ཨནྟརབྷཏྟེ ནིསིནྣསྶ པཱདེ དྷོཝིཏྭཱ ཨུདཀཾ གཧེཏྭཱ, ‘‘བྷནྟེ, ཨིདཾ ཨུདཀཾ དཱརཀསྶ སཱིསེ ཨཱསིཉྩཱམཱ’’ཏི ཨཱཔུཙྪིཏྭཱ ‘‘ཏེན ཧི ཨཱསིཉྩཐཱ’’ཏི ཝུཏྟེ ཏཐཱ ཨཀཱསི. སཱ དེཝཏཱ ཏཱཝདེཝ ཏཾ མུཉྩིཏྭཱ གནྟྭཱ ལེཎདྭཱརེ ཨཊྛཱསི.

ཐེརོཔི བྷཏྟཀིཙྩཱཝསཱནེ ཨུཊྛཱཡཱསནཱ ཨཝིསྶཊྛཀམྨཊྛཱནཏཱཡ དྭཏྟིཾསཱཀཱརཾ སཛ྄ཛྷཱཡནྟོཝ པཀྐཱམི. ཨཐ ནཾ ལེཎདྭཱརཾ པཏྟཀཱལེ སཱ དེཝཏཱ ‘‘མཧཱཝེཛྫ མཱ ཨིདྷ པཝིསཱ’’ཏི ཨཱཧ. སོ ཏཏྠེཝ ཋཏྭཱ ‘‘ཀཱསི ཏྭ’’ནྟི ཨཱཧ. ཨཧཾ ཨིདྷ ཨདྷིཝཏྠཱ དེཝཏཱཏི. ཐེརོ ‘‘ཨཏྠི ནུ ཁོ མཡཱ ཝེཛྫཀམྨསྶ ཀཏཊྛཱན’’ནྟི ཨུཔསམྤདམཱལ༹ཀཏོ པཊྛཱཡ ཨོལོཀེནྟོ ཨཏྟནོ སཱིལེ ཏིལཀཾ ཝཱ ཀཱལ༹ཀཾ ཝཱ ཨདིསྭཱ ‘‘ཨཧཾ མཡཱ ཝེཛྫཀམྨསྶ ཀཏཊྛཱནཾ ན པསྶཱམི, ཀསྨཱ ཨེཝཾ ཝདེསཱི’’ཏི ཨཱཧ. ན པསྶསཱིཏི. ཨཱམ, ན པསྶཱམཱིཏི? ཨཱཙིཀྑཱམི ཏེཏི. ཨཱམ, ཨཱཙིཀྑཱཧཱིཏི. ཏིཊྛཏུ ཏཱཝ དཱུརེ ཀཏཾ, ཨཛྫེཝ ཏཡཱ ཨམནུསྶགཧིཏསྶ ཨུཔཊྛཱཀཔུཏྟསྶ པཱདདྷོཝནཨུདཀཾ སཱིསེ ཨཱསིཏྟཾ, ནཱསིཏྟནྟི? ཨཱམ, ཨཱསིཏྟནྟི. ཀིཾ ཨེཏཾ ན པསྶསཱིཏི? ཨེཏཾ སནྡྷཱཡ ཏྭཾ ཝདེསཱིཏི? ཨཱམ, ཨེཏཾ སནྡྷཱཡ ཝདཱམཱིཏི. ཐེརོ ཙིནྟེསི – ‘‘ཨཧོ ཝཏ མེ སམྨཱ པཎིཧིཏོ ཨཏྟཱ, སཱསནསྶ ཨནུརཱུཔཾ ཝཏ མེ ཙརིཏཾ, དེཝཏཱཔི མམ ཙཏུཔཱརིསུདྡྷིསཱིལེ ཏིལཀཾ ཝཱ ཀཱལ༹ཀཾ ཝཱ ཨདིསྭཱ དཱརཀསྶ སཱིསེ ཨཱསིཏྟཔཱདདྷོཝནམཏྟཾ ཨདྡསཱ’’ཏི ཏསྶ སཱིལཾ ཨཱརབྦྷ བལཝཔཱིཏི ཨུཔྤཛྫི. སོ ཏཾ ཝིཀྑམྦྷེཏྭཱ པཱདུདྡྷཱརམྤི ཨཀཏྭཱ ཏཏྠེཝ ཨརཧཏྟཾ པཏྭཱ ‘‘མཱདིསཾ པརིསུདྡྷཾ སམཎཾ དཱུསེཏྭཱ མཱ ཨིདྷ ཝནསཎྜེ ཝསི, ཏྭམེཝ ནིཀྑམཱཧཱི’’ཏི དེཝཏཾ ཨོཝདནྟོ ཨིམཾ ཨུདཱནཾ ཨུདཱནེསི –

‘‘ཝིསུདྡྷོ ཝཏ མེ ཝཱསོ, ནིམྨལཾ མཾ ཏཔསྶིནཾ;

མཱ ཏྭཾ ཝིསུདྡྷཾ དཱུསེསི, ནིཀྑམ པཝནཱ ཏུཝ’’ནྟི.

སོ ཏཏྠེཝ ཏེམཱསཾ ཝསིཏྭཱ ཝུཏྠཝསྶོ སཏྠུ སནྟིཀཾ གནྟྭཱ བྷིཀྑཱུཧི ‘‘ཀིཾ, ཨཱཝུསོ, པབྦཛིཏཀིཙྩཾ ཏེ མཏྠཀཾ པཱཔིཏ’’ནྟི པུཊྛོ ཏསྨིཾ ལེཎེ ཝསྶཱུཔགམནཏོ པཊྛཱཡ སབྦཾ ཏཾ པཝཏྟིཾ བྷིཀྑཱུནཾ ཨཱརོཙེཏྭཱ, ‘‘ཨཱཝུསོ, ཏྭཾ དེཝཏཱཡ ཨེཝཾ ཝུཙྩམཱནོ ན ཀུཛ྄ཛྷཱི’’ཏི ཝུཏྟེ ‘‘ན ཀུཛ྄ཛྷི’’ནྟི ཨཱཧ. བྷིཀྑཱུ ཏཐཱགཏསྶ ཨཱརོཙེསུཾ, ‘‘བྷནྟེ, ཨཡཾ བྷིཀྑུ ཨཉྙཾ བྱཱཀརོཏི, དེཝཏཱཡ ཨིདཾ ནཱམ ཝུཙྩམཱནོཔི ན ཀུཛ྄ཛྷིནྟི ཝདཏཱི’’ཏི. སཏྠཱ ཏེསཾ ཀཐཾ སུཏྭཱ ‘‘ནེཝ, བྷིཀྑཝེ, མམ པུཏྟོ ཀུཛ྄ཛྷཏི, ཨེཏསྶ གིཧཱིཧི ཝཱ པབྦཛིཏེཧི ཝཱ སཾསགྒོ ནཱམ ནཏྠི, ཨསཾསཊྛོ ཨེས ཨཔྤིཙྪོ སནྟུཊྛོ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༤༠༤.

‘‘ཨསཾསཊྛཾ གཧཊྛེཧི, ཨནཱགཱརེཧི ཙཱུབྷཡཾ;

ཨནོཀསཱརིམཔྤིཙྪཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཨསཾསཊྛནྟི དསྶནསཝནསམུལླཔནཔརིབྷོགཀཱཡསཾསགྒཱནཾ ཨབྷཱཝེན ཨསཾསཊྛཾ. ཨུབྷཡནྟི གིཧཱིཧི ཙ ཨནཱགཱརེཧི ཙཱཏི ཨུབྷཡེཧིཔི ཨསཾསཊྛཾ. ཨནོཀསཱརིནྟི ཨནཱལཡཙཱརིཾ ཏཾ ཨེཝརཱུཔཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པབྦྷཱརཝཱསཱིཏིསྶཏྠེརཝཏྠུ ཨེཀཝཱིསཏིམཾ.

༢༢. ཨཉྙཏརབྷིཀྑུཝཏྠུ

ནིདྷཱཡ དཎྜནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ བྷིཀྑུཾ ཨཱརབྦྷ ཀཐེསི.

སོ ཀིར སཏྠུ སནྟིཀེ ཀམྨཊྛཱནཾ གཧེཏྭཱ ཨརཉྙེ ཝཱཡམནྟོ ཨརཧཏྟཾ པཏྭཱ ‘‘པཊིལདྡྷགུཎཾ སཏྠུ ཨཱརོཙེསྶཱམཱི’’ཏི ཏཏོ ནིཀྑམི. ཨཐ ནཾ ཨེཀསྨིཾ གཱམེ ཨེཀཱ ཨིཏྠཱི སཱམིཀེན སདྡྷིཾ ཀལཧཾ ཀཏྭཱ ཏསྨིཾ བཧི ནིཀྑནྟེ ‘‘ཀུལགྷརཾ གམིསྶཱམཱི’’ཏི མགྒཾ པཊིཔནྣཱ ཨནྟརཱམགྒེ དིསྭཱ ‘‘ཨིམཾ ཐེརཾ ནིསྶཱཡ གམིསྶཱམཱི’’ཏི པིཊྛིཏོ པིཊྛིཏོ ཨནུབནྡྷི. ཐེརོ པན ཏཾ ན པསྶཏི. ཨཐསྶཱ སཱམིཀོ གེཧཾ ཨཱགཏོ ཏཾ ཨདིསྭཱ ‘‘ཀུལགཱམཾ གཏཱ བྷཝིསྶཏཱི’’ཏི ཨནུབནྡྷནྟོ ཏཾ དིསྭཱ ‘‘ན སཀྐཱ ཨིམཱཡ ཨེཀིཀཱཡ ཨིམཾ ཨཊཝིཾ པཊིཔཛྫིཏུཾ, ཀཾ ནུ ཁོ ནིསྶཱཡ གཙྪཏཱི’’ཏི ཨོལོཀེནྟོ ཐེརཾ དིསྭཱ ‘‘ཨཡཾ ཨིམཾ གཎྷིཏྭཱ ནིཀྑནྟོ བྷཝིསྶཏཱི’’ཏི ཙིནྟེཏྭཱ ཐེརཾ སནྟཛྫེསི. ཨཐ ནཾ སཱ ཨིཏྠཱི ‘‘ནེཝ མཾ ཨེས བྷདནྟོ པསྶཏི, ན ཨཱལཔཏི, མཱ ནཾ ཀིཉྩི ཨཝཙཱ’’ཏི ཨཱཧ. སོ ‘‘ཀིཾ པན ཏྭཾ ཨཏྟཱནཾ གཧེཏྭཱ གཙྪནྟཾ མམ ཨཱཙིཀྑིསྶསི, ཏུཡ྄ཧམེཝ ཨནུཙྪཝིཀཾ ཨིམསྶ ཀརིསྶཱམཱི’’ཏི ཨུཔྤནྣཀོདྷོ ཨིཏྠིཡཱ ཨཱགྷཱཏེན ཐེརཾ པོཐེཏྭཱ ཏཾ ཨཱདཱཡ ནིཝཏྟི. ཐེརསྶ སཀལསརཱིརཾ སཉྫཱཏགཎྜཾ ཨཧོསི. ཨཐསྶ ཝིཧཱརཾ གཏཀཱལེ བྷིཀྑཱུ སརཱིརཾ སམྦཱཧནྟཱ གཎྜེ དིསྭཱ ‘‘ཀིཾ ཨིད’’ནྟི པུཙྪིཾསུ. སོ ཏེསཾ ཏམཏྠཾ ཨཱརོཙེསི. ཨཐ ནཾ བྷིཀྑཱུ, ‘‘ཨཱཝུསོ, ཏསྨིཾ པུརིསེ ཨེཝཾ པཧརནྟེ ཏྭཾ ཀིཾ ཨཝཙ, ཀིཾ ཝཱ ཏེ ཀོདྷོ ཨུཔྤནྣོ’’ཏི. ‘‘ན མེ, ཨཱཝུསོ, ཀོདྷོ ཨུཔྤཛྫཱི’’ཏི ཝུཏྟེ སཏྠུ སནྟིཀཾ གནྟྭཱ ཏམཏྠཾ ཨཱརོཙེཏྭཱ, ‘‘བྷནྟེ, ཨེས བྷིཀྑུ ‘ཀོདྷོ ཏེ ཨུཔྤཛྫཏཱི’ཏི ཝུཙྩམཱནོ ‘ན མེ, ཨཱཝུསོ, ཀོདྷོ ཨུཔྤཛྫཏཱི’ཏི ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི ཨཱརོཙེསུཾ. སཏྠཱ ཏེསཾ ཀཐཾ སུཏྭཱ, ‘‘བྷིཀྑཝེ, ཁཱིཎཱསཝཱ ནཱམ ནིཧིཏདཎྜཱ, ཏེ པཧརནྟེསུཔི ཀོདྷཾ ན ཀརོནྟིཡེཝཱ’’ཏི ཝཏྭཱ ཨིམཾ གཱཐམཱཧ –

༤༠༥.

‘‘ནིདྷཱཡ དཎྜཾ བྷཱུཏེསུ, ཏསེསུ ཐཱཝརེསུ ཙ;

ཡོ ན ཧནྟི ན གྷཱཏེཏི, ཏམཧཾ བྲཱུམི བྲཱཧྨཎ’’ནྟི.

ཏཏྠ ནིདྷཱཡཱཏི ནིཀྑིཔིཏྭཱ ཨོརོཔེཏྭཱ. ཏསེསུ ཐཱཝརེསུ ཙཱཏི ཏཎྷཱཏཱསེན ཏསེསུ, ཏཎྷཱཨབྷཱཝེན ཐིརཏཱཡ ཐཱཝརེསུ ཙ. ཡོ ན ཧནྟཱིཏི ཡོ ཨེཝཾ སབྦསཏྟེསུ ཝིགཏཔཊིགྷཏཱཡ ནིཀྑིཏྟདཎྜོ ནེཝ ཀཉྩི སཡཾ ཧནཏི, ན ཨཉྙེ གྷཱཏེཏི, ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཉྙཏརབྷིཀྑུཝཏྠུ བཱཝཱིསཏིམཾ.

༢༣. སཱམཎེརཱནཾ ཝཏྠུ

ཨཝིརུདྡྷནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཙཏྟཱརོ སཱམཎེརེ ཨཱརབྦྷ ཀཐེསི.

ཨེཀཱ ཀིར བྲཱཧྨཎཱི ཙཏུནྣཾ བྷིཀྑཱུནཾ ཨུདྡེསབྷཏྟཾ སཛྫེཏྭཱ བྲཱཧྨཎཾ ཨཱཧ – ‘‘ཝིཧཱརཾ གནྟྭཱ ཙཏྟཱརོ མཧལླཀབྲཱཧྨཎེ ཨུདྡིསཱཔེཏྭཱ ཨཱནེཧཱི’’ཏི. སོ ཝིཧཱརཾ གནྟྭཱ ‘‘ཙཏྟཱརོ མེ བྲཱཧྨཎེ ཨུདྡིསིཏྭཱ དེཐཱ’’ཏི ཨཱཧ. ཏསྶ སཾཀིཙྩོ པཎྜིཏོ སོཔཱཀོ རེཝཏོཏི སཏྟཝསྶིཀཱ ཙཏྟཱརོ ཁཱིཎཱསཝསཱམཎེརཱ པཱཔུཎིཾསུ. བྲཱཧྨཎཱི མཧཱརཧཱནི ཨཱསནཱནི པཉྙཱཔེཏྭཱ ཋིཏཱ སཱམཎེརེ དིསྭཱཝ ཀུཔིཏཱ ཨུདྡྷནེ པཀྑིཏྟལོཎཾ ཝིཡ ཏཊཏཊཱཡམཱནཱ ‘‘ཏྭཾ ཝིཧཱརཾ གནྟྭཱ ཨཏྟནོ ནཏྟུམཏྟེཔི ཨཔྤཧོནྟེ ཙཏྟཱརོ ཀུམཱརཀེ གཧེཏྭཱ ཨཱགཏོསཱི’’ཏི ཝཏྭཱ ཏེསཾ ཏེསུ ཨཱསནེསུ ནིསཱིདིཏུཾ ཨདཏྭཱ ནཱིཙཔཱིཋཀཱནི ཨཏྠརིཏྭཱ ‘‘ཨེཏེསུ ནིསཱིདཐཱ’’ཏི ཝཏྭཱ ‘‘གཙྪ, བྲཱཧྨཎ, མཧལླཀེ ཨོལོཀེཏྭཱ ཨཱནེཧཱི’’ཏི ཨཱཧ. བྲཱཧྨཎོ ཝིཧཱརཾ གནྟྭཱ སཱརིཔུཏྟཏྠེརཾ དིསྭཱ ‘‘ཨེཐ, ཨམྷཱཀཾ གེཧཾ གམིསྶཱམཱ’’ཏི ཨཱནེསི. ཐེརོ ཨཱགནྟྭཱ སཱམཎེརེ དིསྭཱ ‘‘ཨིམེཧི བྲཱཧྨཎེཧི བྷཏྟཾ ལདྡྷ’’ནྟི པུཙྪིཏྭཱ ‘‘ན ལདྡྷ’’ནྟི ཝུཏྟེ ཙཏུནྣམེཝ བྷཏྟསྶ པཊིཡཏྟབྷཱཝཾ ཉཏྭཱ ‘‘ཨཱཧར མེ པཏྟ’’ནྟི པཏྟཾ གཧེཏྭཱ པཀྐཱམི. བྲཱཧྨཎཱིཔི ‘‘ཀིཾ ཨིམིནཱ ཝུཏྟ’’ནྟི པུཙྪིཏྭཱ ‘‘ཨེཏེསཾ ནིསིནྣཱནཾ བྲཱཧྨཎཱནཾ ལདྡྷུཾ ཝཊྚཏི, ཨཱཧར མེ པཏྟ’’ནྟི ཨཏྟནོ པཏྟཾ གཧེཏྭཱ གཏོ, ན བྷུཉྫིཏུཀཱམོ བྷཝིསྶཏི, སཱིགྷཾ གནྟྭཱ ཨཉྙཾ ཨོལོཀེཏྭཱ ཨཱནེཧཱིཏི. བྲཱཧྨཎོ གནྟྭཱ མཧཱམོགྒལླཱནཏྠེརཾ དིསྭཱ ཏཐེཝ ཝཏྭཱ ཨཱནེསི. སོཔི སཱམཎེརེ དིསྭཱ ཏཐེཝ ཝཏྭཱ པཏྟཾ གཧེཏྭཱ པཀྐཱམི. ཨཐ ནཾ བྲཱཧྨཎཱི ཨཱཧ – ‘‘ཨེཏེ ན བྷུཉྫིཏུཀཱམཱ, བྲཱཧྨཎཝཱདཀཾ གནྟྭཱ ཨེཀཾ མཧལླཀབྲཱཧྨཎཾ ཨཱནེཧཱི’’ཏི.

སཱམཎེརཱཔི པཱཏོཝ པཊྛཱཡ ཀིཉྩི ཨལབྷམཱནཱ ཛིགྷཙྪཱཡ པཱིལི༹ཏཱ ནིསཱིདིཾསུ. ཨཐ ནེསཾ གུཎཏེཛེན སཀྐསྶ ཨཱསནཾ ཨུཎྷཱཀཱརཾ དསྶེསི. སོ ཨཱཝཛྫེནྟོ ཏེསཾ པཱཏོཝ པཊྛཱཡ ནིསིནྣཱནཾ ཀིལནྟབྷཱཝཾ ཉཏྭཱ ‘‘མཡཱ ཏཏྠ གནྟུཾ ཝཊྚཏཱི’’ཏི ཛརཱཛིཎྞོ མཧལླཀབྲཱཧྨཎོ ཧུཏྭཱ ཏསྨིཾ བྲཱཧྨཎཝཱདཀེ བྲཱཧྨཎཱནཾ ཨགྒཱསནེ ནིསཱིདི. བྲཱཧྨཎོ ཏཾ དིསྭཱ ‘‘ཨིདཱནི མེ བྲཱཧྨཎཱི ཨཏྟམནཱ བྷཝིསྶཏཱི’’ཏི ཨེཧི གེཧཾ གམིསྶཱམཱ’’ཏི ཏཾ ཨཱདཱཡ གེཧཾ ཨགམཱསི. བྲཱཧྨཎཱི ཏཾ དིསྭཱཝ ཏུཊྛཙིཏྟཱ དྭཱིསུ ཨཱསནེསུ ཨཏྠརཎཾ ཨེཀསྨིཾཡེཝ ཨཏྠརིཏྭཱ, ‘‘ཨཡྻ, ཨིདྷ ནིསཱིདཱཧཱི’’ཏི ཨཱཧ. སཀྐོ གེཧཾ པཝིསིཏྭཱ ཙཏྟཱརོ སཱམཎེརེ པཉྩཔཏིཊྛིཏེན ཝནྡིཏྭཱ ཏེསཾ ཨཱསནཔརིཡནྟེ བྷཱུམིཡཾ པལླངྐེན ནིསཱིདི. ཨཐ ནཾ དིསྭཱ བྲཱཧྨཎཱི བྲཱཧྨཎཾ ཨཱཧ – ‘‘ཨཧོ ཏེ ཨཱནཱིཏོ བྲཱཧྨཎོ, ཨེཏམྤི ཨུམྨཏྟཀཾ གཧེཏྭཱ ཨཱགཏོསི, ཨཏྟནོ ནཏྟུམཏྟེ ཝནྡནྟོ ཝིཙརཏི, ཀིཾ ཨིམིནཱ, ནཱིཧརཱཧི ན’’ནྟི. སོ ཁནྡྷེཔི ཧཏྠེཔི ཀཙྪཱཡཔི གཧེཏྭཱ ནིཀྐཌྜྷིཡམཱནོ ཨུཊྛཱཏུམྤི ན ཨིཙྪཏི. ཨཐ ནཾ བྲཱཧྨཎཱི ‘‘ཨེཧི, བྲཱཧྨཎ, ཏྭཾ ཨེཀསྨིཾ ཧཏྠེ གཎྷ, ཨཧཾ ཨེཀསྨིཾ ཧཏྠེ གཎྷིསྶཱམཱི’’ཏི ཨུབྷོཔི དྭཱིསུ ཧཏྠེསུ གཧེཏྭཱ པིཊྛིཡཾ པོཐེནྟཱ གེཧདྭཱརཏོ བཧི ཨཀཾསུ. སཀྐོཔི ནིསིནྣཊྛཱནེཡེཝ ནིསིནྣོ ཧཏྠཾ པརིཝཏྟེསི. ཏེ ནིཝཏྟིཏྭཱ ཏཾ ནིསིནྣམེཝ དིསྭཱ བྷཱིཏརཝཾ རཝནྟཱ ཝིསྶཛྫེསུཾ. ཏསྨིཾ ཁཎེ སཀྐོ ཨཏྟནོ སཀྐབྷཱཝཾ ཛཱནཱཔེསི. ཨཐ ནེསཾ ཨཱཧཱརཾ ཨདཾསུ. པཉྩཔི ཛནཱ ཨཱཧཱརཾ གཧེཏྭཱ ཨེཀོ ཀཎྞིཀཱམཎྜལཾ ཝིནིཝིཛ྄ཛྷིཏྭཱ, ཨེཀོ ཚདནསྶ པུརིམབྷཱགཾ, ཨེཀོ པཙྪིམབྷཱགཾ, ཨེཀོ པཐཝིཡཾ ནིམུཛྫིཏྭཱ, སཀྐོཔི ཨེཀེན ཋཱནེན ནིཀྑམཱིཏི ཨེཝཾ པཉྩདྷཱ ཨགམཾསུ. ཏཏོ པཊྛཱཡ ཙ པན ཏཾ གེཧཾ པཉྩཚིདྡགེཧཾ ཀིར ནཱམ ཛཱཏཾ.

སཱམཎེརེཔི ཝིཧཱརཾ གཏཀཱལེ བྷིཀྑཱུ, ‘‘ཨཱཝུསོ, ཀཱིདིས’’ནྟི པུཙྪིཾསུ. མཱ ནོ པུཙྪིཏྠ, ཨམྷཱཀཾ དིཊྛཀཱལཏོ པཊྛཱཡ བྲཱཧྨཎཱི ཀོདྷཱབྷིབྷཱུཏཱ པཉྙཏྟཱསནེསུ ནོ ནིསཱིདིཏུམྤི ཨདཏྭཱ ‘‘སཱིགྷཾ སཱིགྷཾ མཧལླཀབྲཱཧྨཎཾ ཨཱནེཧཱི’’ཏི ཨཱཧ. ཨམྷཱཀཾ ཨུཔཛ྄ཛྷཱཡོ ཨཱགནྟྭཱ ཨམྷེ དིསྭཱ ‘‘ཨིམེསཾ ནིསིནྣབྲཱཧྨཎཱནཾ ལདྡྷུཾ ཝཊྚཏཱི’’ཏི པཏྟཾ ཨཱཧརཱཔེཏྭཱ ནིཀྑམི. ‘‘ཨཉྙཾ མཧལླཀཾ བྲཱཧྨཎཾ ཨཱནེསཱི’’ཏི ཝུཏྟེ བྲཱཧྨཎོ མཧཱམོགྒལླཱནཏྠེརཾ ཨཱནེསི, སོཔི ཨམྷེ དིསྭཱ ཏཐེཝ ཝཏྭཱ པཀྐཱམི. ཨཐ བྲཱཧྨཎཱི ‘‘ན ཨེཏེ བྷུཉྫིཏུཀཱམཱ, གཙྪ བྲཱཧྨཎཝཱདཀཏོ ཨེཀཾ མཧལླཀབྲཱཧྨཎཾ ཨཱནེཧཱི’’ཏི བྲཱཧྨཎཾ པཧིཎི. སོ ཏཏྠ གནྟྭཱ བྲཱཧྨཎཝེསེན ཨཱགཏཾ སཀྐཾ ཨཱནེསི, ཏསྶ ཨཱགཏཀཱལེ ཨམྷཱཀཾ ཨཱཧཱརཾ ཨདཾསཱུཏི. ཨེཝཾ ཀརོནྟཱནཾ པན ཏེསཾ ཏུམྷེ ན ཀུཛ྄ཛྷིཏྠཱཏི? ན ཀུཛ྄ཛྷིམྷཱཏི. བྷིཀྑཱུ ཏཾ སུཏྭཱ སཏྠུ ཨཱརོཙེསུཾ – ‘‘བྷནྟེ, ཨིམེ ‘ན ཀུཛ྄ཛྷིམྷཱ’ཏི ཨབྷཱུཏཾ ཝཏྭཱ ཨཉྙཾ བྱཱཀརོནྟཱི’’ཏི. སཏྠཱ, ‘‘བྷིཀྑཝེ, ཁཱིཎཱསཝཱ ནཱམ ཝིརུདྡྷེསུཔི ན ཝིརུཛ྄ཛྷནྟིཡེཝཱ’’ཏི ཝཏྭཱ ཨིམཾ གཱཐམཱཧ –

༤༠༦.

‘‘ཨཝིརུདྡྷཾ ཝིརུདྡྷེསུ, ཨཏྟདཎྜེསུ ནིབྦུཏཾ;

སཱདཱནེསུ ཨནཱདཱནཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཨཝིརུདྡྷནྟི ཨཱགྷཱཏཝསེན ཝིརུདྡྷེསུཔི ལོཀིཡམཧཱཛནེསུ ཨཱགྷཱཏཱབྷཱཝེན ཨཝིརུདྡྷཾ. ཧཏྠགཏེ དཎྜེ ཝཱ སཏྠེ ཝཱ ཨཝིཛྫམཱནེཔི པརེསཾ པཧཱརདཱནཏོ ཨཝིརཏཏྟཱ ཨཏྟདཎྜེསུ ཛནེསུ ནིབྦུཏཾ ནིཀྑིཏྟདཎྜཾ, པཉྩནྣཾ ཁནྡྷཱནཾ ཨཧཾ མམནྟི གཧིཏཏྟཱ སཱདཱནེསུ ཏསྶ གཧཎསྶ ཨབྷཱཝེན ཨནཱདཱནཾ ཏཾ ཨེཝརཱུཔཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཱམཎེརཱནཾ ཝཏྠུ ཏེཝཱིསཏིམཾ.

༢༤. མཧཱཔནྠཀཏྠེརཝཏྠུ

ཡསྶ རཱགོ ཙཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ མཧཱཔནྠཀཾ ཨཱརབྦྷ ཀཐེསི.

སོ ཧཱཡསྨཱ ཙཱུལ༹པནྠཀཾ ཙཏཱུཧི མཱསེཧི ཨེཀཾ གཱཐཾ པགུཎཾ ཀཱཏུཾ ཨསཀྐོནྟཾ ‘‘ཏྭཾ སཱསནེ ཨབྷབྦོ, གིཧིབྷོགཱཔི པརིཧཱིནོ, ཀིཾ ཏེ ཨིདྷ ཝཱསེན, ཨིཏོ ནིཀྑམཱ’’ཏི ཝིཧཱརཱ ནིཀྐཌྜྷིཏྭཱ དྭཱརཾ ཐཀེསི. བྷིཀྑཱུ ཀཐཾ སམུཊྛཱཔེསུཾ, ‘‘ཨཱཝུསོ, མཧཱཔནྠཀཏྠེརེན ཨིདཾ ནཱམ ཀཏཾ, ཁཱིཎཱསཝཱནམྤི མཉྙེ ཀོདྷོ ཨུཔྤཛྫཏཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཁཱིཎཱསཝཱནཾ རཱགཱདཡོ ཀིལེསཱ ཨཏྠི, མམ པུཏྟེན ཨཏྠཔུརེཀྑཱརཏཱཡ ཙེཝ དྷམྨཔུརེཀྑཱརཏཱཡ ཙ ཀཏ’’ནྟི ཝཏྭཱ ཨིམཾ གཱཐམཱཧ –

༤༠༧.

‘‘ཡསྶ རཱགོ ཙ དོསོ ཙ, མཱནོ མཀྑོ ཙ པཱཏིཏོ;

སཱསཔོརིཝ ཨཱརགྒཱ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཨཱརགྒཱཏི ཡསྶེཏེ རཱགཱདཡོ ཀིལེསཱ, ཨཡཉྩ པརགུཎམཀྑནལཀྑཎོ མཀྑོ ཨཱརགྒཱ སཱསཔོ ཝིཡ པཱཏིཏོ, ཡཐཱ སཱསཔོ ཨཱརགྒེ ན སནྟིཊྛཏི, ཨེཝཾ ཙིཏྟེ ན སནྟིཊྛཏི, ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཧཱཔནྠཀཏྠེརཝཏྠུ ཙཏུཝཱིསཏིམཾ.

༢༥. པིལིནྡཝཙྪཏྠེརཝཏྠུ

ཨཀཀྐསནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ པིལིནྡཝཙྪཏྠེརཾ ཨཱརབྦྷ ཀཐེསི.

སོ ཀིརཱཡསྨཱ ‘‘ཨེཧི, ཝསལི, ཡཱཧི, ཝསལཱི’’ཏིཨཱདཱིནི ཝདནྟོ གིཧཱིཔི པབྦཛིཏེཔི ཝསལིཝཱདེནེཝ སམུདཱཙརཏི. ཨཐེཀདིཝསཾ སམྦཧུལཱ བྷིཀྑཱུ སཏྠུ ཨཱརོཙེསུཾ – ‘‘ཨཱཡསྨཱ, བྷནྟེ, པིལིནྡཝཙྪོ བྷིཀྑཱུ ཝསལིཝཱདེན སམུདཱཙརཏཱི’’ཏི. སཏྠཱ ཏཾ པཀྐོསཱཔེཏྭཱ ‘‘སཙྩཾ ཀིར ཏྭཾ པིལིནྡཝཙྪ བྷིཀྑཱུ ཝསལིཝཱདེན སམུདཱཙརསཱི’’ཏི པུཙྪིཏྭཱ ‘‘ཨེཝཾ, བྷནྟེ’’ཏི ཝུཏྟེ ཏསྶཱཡསྨཏོ པུབྦེནིཝཱསཾ མནསིཀརིཏྭཱ ‘‘མཱ ཁོ ཏུམྷེ, བྷིཀྑཝེ, ཝཙྪསྶ བྷིཀྑུནོ ཨུཛ྄ཛྷཱཡིཏྠ, ན, བྷིཀྑཝེ, ཝཙྪོ དོསནྟརོ བྷིཀྑཱུ ཝསལིཝཱདེན སམུདཱཙརཏི, ཝཙྪསྶ, བྷིཀྑཝེ, བྷིཀྑུནོ པཉྩ ཛཱཏིསཏཱནི ཨབྦོཀིཎྞཱནི སབྦཱནི ཏཱནི བྲཱཧྨཎཀུལེ པཙྩཱཛཱཏཱནི, སོ ཏསྶ དཱིགྷརཏྟཾ ཝསལིཝཱདོ སམུདཱཙིཎྞོ, ཁཱིཎཱསཝསྶ ནཱམ ཀཀྐསཾ ཕརུསཾ པརེསཾ མམྨགྷཊྚནཝཙནམེཝ ནཏྠི. ཨཱཙིཎྞཝསེན ཧི མམ པུཏྟོ ཨེཝཾ ཀཐེཏཱི’’ཏི ཝཏྭཱ ཨིམཾ གཱཐམཱཧ –

༤༠༨.

‘‘ཨཀཀྐསཾ ཝིཉྙཱཔནིཾ, གིརཾ སཙྩམུདཱིརཡེ;

ཡཱཡ ནཱབྷིསཛེ ཀཉྩི, ཏམཧཾ བྲཱུམི བྲཱཧྨཎ’’ནྟི.

ཏཏྠ ཨཀཀྐསནྟི ཨཕརུསཾ. ཝིཉྙཱཔནིནྟི ཨཏྠཝིཉྙཱཔནིཾ. སཙྩནྟི བྷཱུཏཏྠཾ. ནཱབྷིསཛེཏི ཡཱཡ གིརཱཡ ཨཉྙཾ ཀུཛ྄ཛྷཱཔནཝསེན ན ལགྒཱཔེཡྻ, ཁཱིཎཱསཝོ ནཱམ ཨེཝརཱུཔམེཝ གིརཾ བྷཱསེཡྻ, ཏསྨཱ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པིལིནྡཝཙྪཏྠེརཝཏྠུ པཉྩཝཱིསཏིམཾ.

༢༦. ཨཉྙཏརཏྠེརཝཏྠུ

ཡོདྷ དཱིགྷནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཏྠེརཾ ཨཱརབྦྷ ཀཐེསི.

སཱཝཏྠིཡཾ ཀིརེཀོ མིཙྪཱདིཊྛིཀོ བྲཱཧྨཎོ སརཱིརགནྡྷགཧཎབྷཡེན ཨུཏྟརསཱཊཀཾ ཨཔནེཏྭཱ ཨེཀམནྟེ ཋཔེཏྭཱ གེཧདྭཱརཱབྷིམུཁོ ནིསཱིདི. ཨཐེཀོ ཁཱིཎཱསཝོ བྷཏྟཀིཙྩཾ ཀཏྭཱ ཝིཧཱརཾ གཙྪནྟོ ཏཾ སཱཊཀཾ དིསྭཱ ཨིཏོ ཙིཏོ ཙ ཨོལོཀེཏྭཱ ཀཉྩི ཨཔསྶནྟོ ‘‘ནིསྶཱམིཀོ ཨཡ’’ནྟི པཾསུཀཱུལཾ ཨདྷིཊྛཧིཏྭཱ གཎྷི. ཨཐ ནཾ བྲཱཧྨཎོ དིསྭཱ ཨཀྐོསནྟོ ཨུཔསངྐམིཏྭཱ ‘‘མུཎྜཀ, སམཎ, མམ སཱཊཀཾ གཎྷསཱི’’ཏི ཨཱཧ. ཏཝེསོ, བྲཱཧྨཎཱཏི. ཨཱམ, སམཎཱཏི. ‘‘མཡཱ ཀཉྩི ཨཔསྶནྟེན པཾསུཀཱུལསཉྙཱཡ གཧིཏོ, གཎྷ ན’’ནྟི ཏསྶ དཏྭཱ ཝིཧཱརཾ གནྟྭཱ བྷིཀྑཱུནཾ ཏམཏྠཾ ཨཱརོཙེསི. ཨཐསྶ ཝཙནཾ སུཏྭཱ བྷིཀྑཱུ ཏེན སདྡྷིཾ ཀེལི༹ཾ ཀརོནྟཱ ‘‘ཀིཾ ནུ ཁོ, ཨཱཝུསོ, སཱཊཀོ དཱིགྷོ རསྶོ ཐཱུལོ སཎྷོ’’ཏི. ཨཱཝུསོ, དཱིགྷོ ཝཱ ཧོཏུ རསྶོ ཝཱ ཐཱུལོ ཝཱ སཎྷོ ཝཱ, ནཏྠི མཡ྄ཧཾ ཏསྨིཾ ཨཱལཡོ, པཾསུཀཱུལསཉྙཱཡ ནཾ གཎྷིནྟི. ཏཾ སུཏྭཱ བྷིཀྑཱུ ཏཐཱགཏསྶ ཨཱརོཙེསུཾ – ‘‘ཨེས, བྷནྟེ, བྷིཀྑུ ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི. སཏྠཱ ‘‘བྷཱུཏཾ, བྷིཀྑཝེ, ཨེས ཀཐེཏི, ཁཱིཎཱསཝཱ ནཱམ པརེསཾ སནྟཀཾ ན གཎྷནྟཱི’’ཏི ཝཏྭཱ ཨིམཾ གཱཐམཱཧ –

༤༠༩.

‘‘ཡོདྷ དཱིགྷཾ ཝ རསྶཾ ཝཱ, ཨཎུཾ ཐཱུལཾ སུབྷཱསུབྷཾ;

ལོཀེ ཨདིནྣཾ ནཱདིཡཏི, ཏམཧཾ བྲཱུམི བྲཱཧྨཎ’’ནྟི.

ཏསྶཏྠོ – སཱཊཀཱབྷརཎཱདཱིསུ དཱིགྷཾ ཝཱ རསྶཾ ཝཱ མཎིམུཏྟཱདཱིསུ ཨཎུཾ ཝཱ ཐཱུལཾ ཝཱ མཧགྒྷཨཔྤགྒྷཝསེན སུབྷཾ ཝཱ ཨསུབྷཾ ཝཱ ཡོ པུགྒལོ ཨིམསྨིཾ ལོཀེ པརཔརིགྒཧིཏཾ ནཱདིཡཏི, ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཉྙཏརཏྠེརཝཏྠུ ཚབྦཱིསཏིམཾ.

༢༧. སཱརིཔུཏྟཏྠེརཝཏྠུ

ཨཱསཱ ཡསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཱརིཔུཏྟཏྠེརཾ ཨཱརབྦྷ ཀཐེསི.

ཐེརོ ཀིར པཉྩབྷིཀྑུསཏཔརིཝཱརོ ཛནཔདེ ཨེཀཾ ཝིཧཱརཾ གནྟྭཱ ཝསྶཾ ཨུཔགཉྪི. མནུསྶཱ ཐེརཾ དིསྭཱ བཧུཾ ཝསྶཱཝཱསིཀཾ པཊིསྶུཎིཾསུ. ཐེརོ པཝཱརེཏྭཱ སབྦསྨིཾ ཝསྶཱཝཱསིཀེ ཨསམྤཏྟེཡེཝ སཏྠུ སནྟིཀཾ གཙྪནྟོ བྷིཀྑཱུ ཨཱཧ – ‘‘དཧརཱནཉྩེཝ སཱམཎེརཱནཉྩ མནུསྶེཧི ཝསྶཱཝཱསིཀེ ཨཱཧཊེ གཧེཏྭཱ པེསེཡྻཱཐ, ཋཔེཏྭཱ ཝཱ སཱསནཾ པཧིཎེཡྻཱཐཱ’’ཏི. ཨེཝཾ ཝཏྭཱ ཙ པན སཏྠུ སནྟིཀཾ ཨགམཱསི. བྷིཀྑཱུ ཀཐཾ སམུཊྛཱཔེསུཾ ‘‘ཨཛྫཱཔི མཉྙེ སཱརིཔུཏྟཏྠེརསྶ ཏཎྷཱ ཨཏྠིཡེཝ. ཏཐཱ ཧི མནུསྶེཧི ཝསྶཱཝཱསིཀེ དིནྣེ ཨཏྟནོ སདྡྷིཝིཧཱརིཀཱནཾ ‘ཝསྶཱཝཱསིཀཾ པེསེཡྻཱཐ, ཋཔེཏྭཱ ཝཱ སཱསནཾ པཧིཎེཡྻཱཐཱ’ཏི བྷིཀྑཱུནཾ ཝཏྭཱ ཨཱགཏོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, མམ པུཏྟསྶ ཏཎྷཱ ཨཏྠི, མནུསྶཱནཾ པན པུཉྙཏོ དཧརསཱམཎེརཱནཉྩ དྷམྨིཀལཱབྷཏོ པརིཧཱནི མཱ ཨཧོསཱིཏི ཏེནེཝཾ ཀཐིཏ’’ནྟི ཝཏྭཱ ཨིམཾ གཱཐམཱཧ –

༤༡༠.

‘‘ཨཱསཱ ཡསྶ ན ཝིཛྫནྟི, ཨསྨིཾ ལོཀེ པརམྷི ཙ;

ནིརཱསཱསཾ ཝིསཾཡུཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཨཱསཱཏི ཏཎྷཱ. ནིརཱསཱསནྟི ནིཏྟཎྷཾ. ཝིསཾཡུཏྟནྟི སབྦཀིལེསེཧི ཝིསཾཡུཏྟཾ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཱརིཔུཏྟཏྠེརཝཏྠུ སཏྟཝཱིསཏིམཾ.

༢༨. མཧཱམོགྒལླཱནཏྠེརཝཏྠུ

ཡསྶཱལཡཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཧཱམོགྒལླཱནཏྠེརཾ ཨཱརབྦྷ ཀཐེསི. ཝཏྠུ པུརིམསདིསམེཝ. ཨིདྷ པན སཏྠཱ མོགྒལླཱནཏྠེརསྶ ནིཏྟཎྷབྷཱཝཾ ཝཏྭཱ ཨིམཾ གཱཐམཱཧ –

༤༡༡.

‘‘ཡསྶཱལཡཱ ན ཝིཛྫནྟི, ཨཉྙཱཡ ཨཀཐཾཀཐཱི;

ཨམཏོགདྷམནུཔྤཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཨཱལཡཱཏི ཏཎྷཱ. ཨཉྙཱཡ ཨཀཐཾཀཐཱིཏི ཨཊྛ ཝཏྠཱུནི ཡཐཱབྷཱུཏཾ ཛཱནིཏྭཱ ཨཊྛཝཏྠུཀཱཡ ཝིཙིཀིཙྪཱཡ ནིབྦིཙིཀིཙྪོ. ཨམཏོགདྷམནུཔྤཏྟནྟི ཨམཏཾ ནིབྦཱནཾ ཨོགཱཧེཏྭཱ ཨནུཔྤཏྟཾ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཧཱམོགྒལླཱནཏྠེརཝཏྠུ ཨཊྛཝཱིསཏིམཾ.

༢༩. རེཝཏཏྠེརཝཏྠུ

ཡོདྷ པུཉྙཉྩཱཏི ཨིམཾ དྷམྨདེསནཾ སཏྠཱ པུབྦཱརཱམེ ཝིཧརནྟོ རེཝཏཏྠེརཾ ཨཱརབྦྷ ཀཐེསི. ཝཏྠུ ‘‘གཱམེ ཝཱ ཡདི ཝཱརཉྙེ’’ཏི (དྷ. པ. ༩༨) གཱཐཱཝཎྞནཱཡ ཝིཏྠཱརིཏམེཝ. ཝུཏྟཉྷི ཏཏྠ (དྷ. པ. ཨཊྛ. ༡.༩༨) –

པུན ཨེཀདིཝསཾ བྷིཀྑཱུ ཀཐཾ སམུཊྛཱཔེསུཾ ‘‘ཨཧོ སཱམཎེརསྶ ལཱབྷོ, ཨཧོ པུཉྙཾ, ཡེན ཨེཀཀེན པཉྩནྣཾ བྷིཀྑུསཏཱནཾ པཉྩཀཱུཊཱགཱརསཏཱནི ཀཏཱནཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, མཡ྄ཧཾ པུཏྟསྶ ནེཝ པུཉྙཾ ཨཏྠི, ན པཱཔཾ, ཨུབྷཡམསྶ པཧཱིན’’ནྟི ཝཏྭཱ ཨིམཾ གཱཐམཱཧ –

༤༡༢.

‘‘ཡོདྷ པུཉྙཉྩ པཱཔཉྩ, ཨུབྷོ སངྒམུཔཙྩགཱ;

ཨསོཀཾ ཝིརཛཾ སུདྡྷཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཨུབྷོཏི དྭེཔི པུཉྙཱནི ཙ པཱཔཱནི ཙ ཚཌྜེཏྭཱཏི ཨཏྠོ. སངྒནྟི རཱགཱདིབྷེདཾ སངྒཾ. ཨུཔཙྩགཱཏི ཨཏིཀྐནྟོ. ཝཊྚམཱུལཀསོཀཱབྷཱཝེན ཨསོཀཾ ཨབྦྷནྟརེ རཱགརཛཱདཱིནཾ ཨབྷཱཝེན ཝིརཛཾ ནིརུཔཀྐིལེསཏཱཡ སུདྡྷཾ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

རེཝཏཏྠེརཝཏྠུ ཨེཀཱུནཏིཾསཏིམཾ.

༣༠. ཙནྡཱབྷཏྠེརཝཏྠུ

ཙནྡཾ ཝཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཙནྡཱབྷཏྠེརཾ ཨཱརབྦྷ ཀཐེསི.

ཏཏྲཱཡཾ ཨནུཔུབྦཱི ཀཐཱ – ཨཏཱིཏེ ཨེཀོ བཱརཱཎསིཝཱསཱི ཝཱཎིཛོ ‘‘པཙྩནྟཾ གནྟྭཱ ཙནྡནཾ ཨཱཧརིསྶཱམཱི’’ཏི བཧཱུནི ཝཏྠཱབྷརཎཱདཱིནི གཧེཏྭཱ པཉྩཧི སཀཊསཏེཧི པཙྩནྟཾ གནྟྭཱ གཱམདྭཱརེ ནིཝཱསཾ གཧེཏྭཱ ཨཊཝིཡཾ གོཔཱལདཱརཀེ པུཙྪི – ‘‘ཨིམསྨིཾ གཱམེ པབྦཏཔཱདཀམྨིཀོ ཀོཙི མནུསྶོ ཨཏྠཱི’’ཏི? ‘‘ཨཱམ, ཨཏྠཱི’’ཏི. ‘‘ཀོ ནཱམེསོ’’ཏི? ‘‘ཨསུཀོ ནཱམཱ’’ཏི. ‘‘བྷརིཡཱཡ པནསྶ པུཏྟཱནཾ ཝཱ ཀིཾནཱམ’’ནྟི? ‘‘ཨིདཉྩིདཉྩཱ’’ཏི. ‘‘ཀཧཾ པནསྶ ཋཱནེ གེཧ’’ནྟི? ‘‘ཨསུཀཊྛཱནེ ནཱམཱ’’ཏི. སོ ཏེཧི དིནྣསཉྙཱཡ སུཁཡཱནཀེ ནིསཱིདིཏྭཱ ཏསྶ གེཧདྭཱརཾ གནྟྭཱ ཡཱནཱ ཨོརུཡ྄ཧ གེཧཾ པཝིསིཏྭཱ ‘‘ཨསུཀནཱམེ’’ཏི ཏཾ ཨིཏྠིཾ པཀྐོསི. སཱ ‘‘ཨེཀོ ནོ ཉཱཏཀོ བྷཝིསྶཏཱི’’ཏི ཝེགེནཱགནྟྭཱ ཨཱསནཾ པཉྙཱཔེསི. སོ ཏཏྠ ནིསཱིདིཏྭཱ ནཱམཾ ཝཏྭཱ ‘‘མམ སཧཱཡོ ཀཧ’’ནྟི པུཙྪི. ‘‘ཨརཉྙཾ གཏོ, སཱམཱི’’ཏི. ‘‘མམ པུཏྟོ ཨསུཀོ ནཱམ, མམ དྷཱིཏཱ ཨསུཀཱ ནཱམ ཀཧ’’ནྟི སབྦེསཾ ནཱམཾ ཀིཏྟེནྟོཝ པུཙྪིཏྭཱ ‘‘ཨིམཱནི ནེསཾ ཝཏྠཱབྷརཎཱནི དདེཡྻཱསི, སཧཱཡསྶཱཔི མེ ཨཊཝིཏོ ཨཱགཏཀཱལེ ཨིདཾ ཝཏྠཱབྷརཎཾ དདེཡྻཱསཱི’’ཏི ཨདཱསི. སཱ ཏསྶ ཨུལཱ༹རཾ སཀྐཱརཾ ཀཏྭཱ སཱམིཀསྶ ཨཱགཏཀཱལེ ‘‘སཱམི, ཨིམིནཱ ཨཱགཏཀཱལཏོ པཊྛཱཡ སབྦེསཾ ནཱམཾ ཝཏྭཱ ཨིདཉྩིདཉྩ དིནྣ’’ནྟི ཨཱཧ. སོཔིསྶ ཀཏྟབྦཡུཏྟཀཾ ཀརི.

ཨཐ ནཾ སཱཡཾ སཡནེ ནིསིནྣོ པུཙྪི – ‘‘སམྨ, པབྦཏཔཱདེ ཙརནྟེན ཏེ ཀིཾ བཧུཾ དིཊྛཔུབྦ’’ནྟི? ‘‘ཨཉྙཾ ན པསྶཱམི, རཏྟསཱཁཱ པན མེ བཧཱུ རུཀྑཱ དིཊྛཱ’’ཏི. ‘‘བཧཱུ རུཀྑཱ’’ཏི? ‘‘ཨཱམ, བཧཱུ’’ཏི. ཏེན ཧི ཏེ ཨམྷཱཀཾ དསྶེཧཱིཏི ཏེན སདྡྷིཾ གནྟྭཱ རཏྟཙནྡནརུཀྑེ ཚིནྡིཏྭཱ པཉྩ སཀཊསཏཱནི པཱུརེཏྭཱ ཨཱགཙྪནྟོ ཏཾ ཨཱཧ – ‘‘སམྨ, བཱརཱཎསིཡཾ ཨསུཀཊྛཱནེ ནཱམ མམ གེཧཾ, ཀཱལེན ཀཱལཾ མམ སནྟིཀཾ ཨཱགཙྪེཡྻཱསི, ཨཉྙེན ཙ མེ པཎྞཱཀཱརེན ཨཏྠོ ནཏྠི, རཏྟསཱཁརུཀྑེ ཨེཝ ཨཱཧརེཡྻཱསཱི’’ཏི. སོ ‘‘སཱདྷཱུ’’ཏི ཝཏྭཱ ཀཱལེན ཀཱལཾ ཏསྶ སནྟིཀཾ ཨཱགཙྪནྟོ རཏྟཙནྡནམེཝ ཨཱཧརཏི, སོཔིསྶ བཧུདྷནཾ དེཏི.

ཏཏོ ཨཔརེན སམཡེན པརིནིབྦུཏེ ཀསྶཔདསབལེ པཏིཊྛིཏེ ཀཉྩནཐཱུཔེ སོ པུརིསོ བཧུཾ ཙནྡནཾ ཨཱདཱཡ བཱརཱཎསིཾ ཨགམཱསི. ཨཐསྶ སོ སཧཱཡཀོ ཝཱཎིཛོ བཧུཾ ཙནྡནཾ པིསཱཔེཏྭཱ པཱཏིཾ པཱུརེཏྭཱ ‘‘ཨེཧི, སམྨ, ཡཱཝ བྷཏྟཾ པཙཏི, ཏཱཝ ཙེཏིཡཀརཎཊྛཱནཾ གནྟྭཱ ཨཱགམིསྶཱམཱ’’ཏི ཏཾ ཨཱདཱཡ ཏཏྠ གནྟྭཱ ཙནྡནཔཱུཛཾ ཨཀཱསི. སོཔིསྶ པཙྩནྟཝཱསཱི སཧཱཡཀོ ཙེཏིཡཀུཙྪིཡཾ ཙནྡནེན ཙནྡམཎྜལཾ ཨཀཱསི. ཨེཏྟཀམེཝསྶ པུབྦཀམྨཾ.

སོ ཏཏོ ཙུཏོ དེཝལོཀེ ནིབྦཏྟིཏྭཱ ཨེཀཾ བུདྡྷནྟརཾ ཏཏྠ ཁེཔེཏྭཱ ཨིམསྨིཾ བུདྡྷུཔྤཱདེ རཱཛགཧནགརེ བྲཱཧྨཎམཧཱསཱལཀུལེ ནིབྦཏྟི. ཏསྶ ནཱབྷིམཎྜལཏོ ཙནྡམཎྜལསདིསཱ པབྷཱ ཨུཊྛཧི, ཏེནསྶ ཙནྡཱབྷོཏྭེཝ ནཱམཾ ཀརིཾསུ. ཙེཏིཡེ ཀིརསྶ ཙནྡམཎྜལཀརཎནིསྶནྡོ ཨེས. བྲཱཧྨཎཱ ཙིནྟཡིཾསུ – ‘‘སཀྐཱ ཨམྷེཧི ཨིམཾ གཧེཏྭཱ ལོཀཾ ཁཱདིཏུ’’ནྟི. ཏཾ ཡཱནེ ནིསཱིདཱཔེཏྭཱ ‘‘ཡོ ཨིམསྶ སརཱིརཾ ཧཏྠེན པརཱམསཏི, སོ ཨེཝརཱུཔཾ ནཱམ ཨིསྶརིཡསམྤཏྟིཾ ལབྷཏཱི’’ཏི ཝཏྭཱ ཝིཙརིཾསུ. སཏཾ ཝཱ སཧསྶཾ ཝཱ དདམཱནཱ ཨེཝ ཏསྶ སརཱིརཾ ཧཏྠེན ཕུསིཏུཾ ལབྷནྟི. ཏེ ཨེཝཾ ཨནུཝིཙརནྟཱ སཱཝཏྠིཾ ཨནུཔྤཏྟཱ ནགརསྶ ཙ ཝིཧཱརསྶ ཙ ཨནྟརཱ ནིཝཱསཾ གཎྷིཾསུ. སཱཝཏྠིཡམྤི པཉྩཀོཊིམཏྟཱ ཨརིཡསཱཝཀཱ པུརེབྷཏྟཾ དཱནཾ དཏྭཱ པཙྪཱབྷཏྟཾ གནྡྷམཱལཝཏྠབྷེསཛྫཱདིཧཏྠཱ དྷམྨསྶཝནཱཡ གཙྪནྟི. བྲཱཧྨཎཱ ཏེ དིསྭཱ ‘‘ཀཧཾ གཙྪཐཱ’’ཏི པུཙྪིཾསུ. སཏྠུ སནྟིཀཾ དྷམྨསྶཝནཱཡཱཏི. ཨེཐ ཏཏྠ གནྟྭཱ ཀིཾ ཀརིསྶཐ, ཨམྷཱཀཾ ཙནྡཱབྷསྶ བྲཱཧྨཎསྶ ཨཱནུབྷཱཝསདིསོ ཨཱནུབྷཱཝོ ནཏྠི. ཨེཏསྶ ཧི སརཱིརཾ ཕུསནྟཱ ཨིདཾ ནཱམ ལབྷནྟི, ཨེཐ པསྶཐ ནནྟི. ཏུམྷཱཀཾ ཙནྡཱབྷསྶ བྲཱཧྨཎསྶ ཀོ ཨཱནུབྷཱཝོ ནཱམ, ཨམྷཱཀཾ སཏྠཱཡེཝ མཧཱནུབྷཱཝོཏི. ཏེ ཨཉྙམཉྙཾ སཉྙཱཔེཏུཾ ཨསཀྐོནྟཱ ‘‘ཝིཧཱརཾ གནྟྭཱ ཙནྡཱབྷསྶ ཝཱ ཨམྷཱཀཾ ཝཱ སཏྠུ ཨཱནུབྷཱཝཾ ཛཱནིསྶཱམཱ’’ཏི ཏཾ གཧེཏྭཱ ཝིཧཱརཾ ཨགམཾསུ.

སཏྠཱ ཏསྨིཾ ཨཏྟནོ སནྟིཀཾ ཨུཔསངྐམནྟེཡེཝ ཙནྡཱབྷཱཡ ཨནྟརདྷཱནཾ ཨཀཱསི. སོ སཏྠུ སནྟིཀེ ཨངྒཱརཔཙྪིཡཾ ཀཱཀོ ཝིཡ ཨཧོསི. ཨཐ ནཾ ཨེཀམནྟཾ ནཡིཾསུ, ཨཱབྷཱ པཊིཔཱཀཏིཀཱ ཨཧོསི. པུན སཏྠུ སནྟིཀཾ ཨཱནཡིཾསུ, ཨཱབྷཱ ཏཐེཝ ཨནྟརདྷཱཡི. ཨེཝཾ ཏིཀྑཏྟུཾ གནྟྭཱ ཨནྟརདྷཱཡམཱནཾ ཨཱབྷཾ དིསྭཱ ཙནྡཱབྷོ ཙིནྟེསི – ‘‘ཨཡཾ ཨཱབྷཱཡ ཨནྟརདྷཱནམནྟཾ ཛཱནཱཏི མཉྙེ’’ཏི. སོ སཏྠཱརཾ པུཙྪི – ‘‘ཀིཾ ནུ ཁོ ཨཱབྷཱཡ ཨནྟརདྷཱནམནྟཾ ཛཱནཱཐཱ’’ཏི? ཨཱམ, ཛཱནཱམཱིཏི. ཏེན ཧི མེ དེཐཱཏི. ན སཀྐཱ ཨཔབྦཛིཏསྶ དཱཏུནྟི. སོ བྲཱཧྨཎེ ཨཱཧ – ‘‘ཨེཏསྨིཾ མནྟེ གཧིཏེ ཨཧཾ སཀལཛམྦུདཱིཔེ ཛེཊྛཀོ བྷཝིསྶཱམི, ཏུམྷེ ཨེཏྠེཝ ཧོཐ, ཨཧཾ པབྦཛིཏྭཱ ཀཏིཔཱཧེནེཝ མནྟཾ གཎྷིསྶཱམཱི’’ཏི. སོ སཏྠཱརཾ པབྦཛྫཾ ཡཱཙིཏྭཱ ཨུཔསམྤཛྫི. ཨཐསྶ དྭཏྟིཾསཱཀཱརཾ ཨཱཙིཀྑི. སོ ‘‘ཀིཾ ཨིད’’ནྟི པུཙྪི. ཨིདཾ མནྟསྶ པརིཀམྨཾ སཛ྄ཛྷཱཡིཏུཾ ཝཊྚཏཱིཏི. བྲཱཧྨཎཱཔི ཨནྟརནྟརཱ ཨཱགནྟྭཱ ‘‘གཧིཏོ ཏེ མནྟོ’’ཏི པུཙྪནྟི. ན ཏཱཝ གཎྷཱམཱིཏི. སོ ཀཏིཔཱཧེནེཝ ཨརཧཏྟཾ པཏྭཱ བྲཱཧྨཎེཧི ཨཱགནྟྭཱ པུཙྪིཏཀཱལེ ‘‘ཡཱཐ ཏུམྷེ, ཨིདཱནཱཧཾ ཨནཱགམནདྷམྨོ ཛཱཏོ’’ཏི ཨཱཧ. བྷིཀྑཱུ ཏཐཱགཏསྶ ཨཱརོཙེསུཾ – ‘‘ཨཡཾ, བྷནྟེ, ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི. སཏྠཱ ‘‘ཁཱིཎཱསཝོ ཨིདཱནི, བྷིཀྑཝེ, མམ པུཏྟོ ཙནྡཱབྷོ, བྷཱུཏམེཝེས ཀཐེཏཱི’’ཏི ཝཏྭཱ ཨིམཾ གཱཐམཱཧ –

༤༡༣.

‘‘ཙནྡཾཝ ཝིམལཾ སུདྡྷཾ, ཝིཔྤསནྣམནཱཝིལཾ;

ནནྡཱིབྷཝཔརིཀྑཱིཎཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཝིམལནྟི ཨབྦྷཱདིམལརཧིཏཾ. སུདྡྷནྟི ནིརུཔཀྐིལེསཾ. ཝིཔྤསནྣནྟི པསནྣཙིཏྟཾ. ཨནཱཝིལནྟི ཀིལེསཱཝིལཏྟརཧིཏཾ. ནནྡཱིབྷཝཔརིཀྑཱིཎནྟི ཏཱིསུ བྷཝེསུ པརིཀྑཱིཎཏཎྷཾ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཙནྡཱབྷཏྠེརཝཏྠུ ཏིཾསཏིམཾ.

༣༡. སཱིཝལིཏྠེརཝཏྠུ

ཡོ ཨིམནྟི ཨིམཾ དྷམྨདེསནཾ སཏྠཱ ཀུཎྜཀོལིཡཾ ནིསྶཱཡ ཀུཎྜདྷཱནཝནེ ཝིཧརནྟོ སཱིཝལིཏྠེརཾ ཨཱརབྦྷ ཀཐེསི.

ཨེཀསྨིཉྷི སམཡེ སུཔྤཝཱསཱ ནཱམ ཀོལིཡདྷཱིཏཱ སཏྟཝསྶཱནི གབྦྷཾ དྷཱརེཏྭཱ སཏྟཱཧཾ མཱུལ༹ྷགབྦྷཱ དུཀྑཱཧི ཏིབྦཱཧི ཀཊུཀཱཧི ཝེདནཱཧི ཕུཊྛཱ ‘‘སམྨཱསམྦུདྡྷོ ཝཏ སོ བྷགཝཱ, ཡོ ཨིམསྶ ཨེཝརཱུཔསྶ དུཀྑསྶ པཧཱནཱཡ དྷམྨཾ དེསེཏི. སུཔྤཊིཔནྣོ ཝཏ ཏསྶ བྷགཝཏོ སཱཝཀསངྒྷོ, ཡོ ཨིམསྶ ཨེཝརཱུཔསྶ དུཀྑསྶ པཧཱནཱཡ པཊིཔནྣོ. སུསུཁཾ ཝཏ ཏཾ ནིབྦཱནཾ, ཡཐིདཾ ཨེཝརཱུཔཾ དུཀྑཾ ན སཾཝིཛྫཏཱི’’ཏི (ཨུདཱ. ༡༨) ཨིམེཧི ཏཱིཧི ཝིཏཀྐེཧི ཏཾ དུཀྑཾ ཨདྷིཝཱསེནྟཱི སཱམིཀཾ སཏྠུ སནྟིཀཾ པེསེཏྭཱ ཏེན ཏསྶཱ ཝཙནེན སཏྠུ ཝནྡནཱཡ ཨཱརོཙིཏཱཡ ‘‘སུཁིནཱི ཧོཏུ སུཔྤཝཱསཱ ཀོལིཡདྷཱིཏཱ, ཨརོགཱ ཨརོགཾ པུཏྟཾ ཝིཛཱཡཏཱུ’’ཏི སཏྠཱརཱ ཝུཏྟཀྑཎེཡེཝ སུཁིནཱི ཨརོགཱ ཨརོགཾ པུཏྟཾ ཝིཛཱཡིཏྭཱ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ སཏྟཱཧཾ མཧཱདཱནཾ ཨདཱསི. པུཏྟོཔིསྶཱ ཛཱཏདིཝསཏོ པཊྛཱཡ དྷམྨཀརཎཾ ཨཱདཱཡ སངྒྷསྶ ཨུདཀཾ པརིསྶཱཝེསི. སོ ཨཔརབྷཱགེ ནིཀྑམིཏྭཱ པབྦཛིཏོ ཨརཧཏྟཾ པཱཔུཎི.

ཨཐེཀདིཝསཾ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘པསྶཐཱཝུསོ, ཨེཝརཱུཔོ ནཱམ ཨརཧཏྟསྶ ཨུཔནིསྶཡསམྤནྣོ བྷིཀྑུ ཨེཏྟཀཾ ཀཱལཾ མཱཏུཀུཙྪིསྨིཾ དུཀྑཾ ཨནུབྷོསི, ཀིམངྒཾ པན ཨཉྙེ, བཧུཾ ཝཏ ཨིམིནཱ དུཀྑཾ ནིཏྠིཎྞ’’ནྟི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ཨཱམ, བྷིཀྑཝེ, མམ པུཏྟོ ཨེཏྟཀཱ དུཀྑཱ མུཙྩིཏྭཱ ཨིདཱནི ནིབྦཱནཾ སཙྪིཀཏྭཱ ཝིཧརཏཱི’’ཏི ཝཏྭཱ ཨིམཾ གཱཐམཱཧ –

༤༡༤.

‘‘ཡོམཾ པལིཔཐཾ དུགྒཾ, སཾསཱརཾ མོཧམཙྩགཱ;

ཏིཎྞོ པཱརངྒཏོ ཛྷཱཡཱི, ཨནེཛོ ཨཀཐཾཀཐཱི;

ཨནུཔཱདཱཡ ནིབྦུཏོ, ཏམཧཾ བྲཱུམི བྲཱཧྨཎ’’ནྟི.

ཏསྶཏྠོ – ཡོ བྷིཀྑུ ཨིམཾ རཱགཔལིཔཐཉྩེཝ ཀིལེསདུགྒཉྩ སཾསཱརཝཊྚཉྩ ཙཏུནྣཾ ཨརིཡསཙྩཱནཾ ཨཔྤཊིཝིཛ྄ཛྷནཀམོཧཉྩ ཨཏཱིཏོ, ཙཏྟཱརོ ཨོགྷེ ཏིཎྞོ ཧུཏྭཱ པཱརཾ ཨནུཔྤཏྟོ, དུཝིདྷེན ཛྷཱནེན ཛྷཱཡཱི, ཏཎྷཱཡ ཨབྷཱཝེན ཨནེཛོ, ཀཐཾཀཐཱཡ ཨབྷཱཝེན ཨཀཐཾཀཐཱི, ཨུཔཱདཱནཱནཾ ཨབྷཱཝེན ཨནུཔཱདིཡིཏྭཱ ཀིལེསནིབྦཱནེན ནིབྦུཏོ, ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཱིཝལིཏྠེརཝཏྠུ ཨེཀཏིཾསཏིམཾ.

༣༢. སུནྡརསམུདྡཏྠེརཝཏྠུ

ཡོདྷ ཀཱམེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སུནྡརསམུདྡཏྠེརཾ ཨཱརབྦྷ ཀཐེསི.

སཱཝཏྠིཡཾ ཀིརེཀོ ཀུལཔུཏྟོ སུནྡརསམུདྡཀུམཱརོ ནཱམ ཙཏྟཱལཱིསཀོཊིཝིབྷཝེ མཧཱཀུལེ ནིབྦཏྟོ. སོ ཨེཀདིཝསཾ པཙྪཱབྷཏྟཾ གནྡྷམཱལཱདིཧཏྠཾ མཧཱཛནཾ དྷམྨསྶཝནཏྠཱཡ ཛེཏཝནཾ གཙྪནྟཾ དིསྭཱ ‘‘ཀཧཾ གཙྪཐཱ’’ཏི པུཙྪིཏྭཱ ‘‘སཏྠུ སནྟིཀཾ དྷམྨསྶཝནཏྠཱཡཱ’’ཏི ཝུཏྟེ ‘‘ཨཧམྤི གམིསྶཱམཱི’’ཏི ཝཏྭཱ ཏེན སདྡྷིཾ གནྟྭཱ པརིསཔརིཡནྟེ ནིསཱིདི. སཏྠཱ ཏསྶ ཨཱསཡཾ ཝིདིཏྭཱ ཨནུཔུབྦིཾ ཀཐཾ ཀཐེསི. སོ ‘‘ན སཀྐཱ ཨགཱརཾ ཨཛ྄ཛྷཱཝསནྟེན སངྑལིཁིཏཾ བྲཧྨཙརིཡཾ ཙརིཏུ’’ནྟི སཏྠུ དྷམྨཀཐཾ ནིསྶཱཡ པབྦཛྫཱཡ ཛཱཏུསྶཱཧོ པརིསཱཡ པཀྐནྟཱཡ སཏྠཱརཾ པབྦཛྫཾ ཡཱཙིཏྭཱ ‘‘མཱཏཱཔིཏཱུཧི ཨནནུཉྙཱཏཾ ཏཐཱགཏཱ ན པབྦཱཛེནྟཱི’’ཏི སུཏྭཱ གེཧཾ གནྟྭཱ རཊྛཔཱལཀུལཔུཏྟཱདཡོ ཝིཡ མཧནྟེན ཝཱཡཱམེན མཱཏཱཔིཏརོ ཨནུཛཱནཱཔེཏྭཱ སཏྠུ སནྟིཀེ པབྦཛིཏྭཱ ལདྡྷཱུཔསམྤདོ ‘‘ཀིཾ མེ ཨིདྷ ཝཱསེནཱ’’ཏི ཏཏོ ནིཀྑམིཏྭཱ རཱཛགཧཾ གནྟྭཱ པིཎྜཱཡ ཙརནྟོ ཝཱིཏིནཱམེསི.

ཨཐེཀདིཝསཾ སཱཝཏྠིཡཾ ཏསྶ མཱཏཱཔིཏརོ ཨེཀསྨིཾ ཚཎདིཝསེ མཧནྟེན སིརིསོབྷགྒེན ཏསྶ སཧཱཡཀཀུམཱརཀེ ཀཱིལ༹མཱནེ དིསྭཱ ‘‘ཨམྷཱཀཾ པུཏྟསྶ ཨིདཾ དུལླབྷཾ ཛཱཏ’’ནྟི པརིདེཝིཾསུ. ཏསྨིཾ ཁཎེ ཨེཀཱ གཎིཀཱ ཏཾ ཀུལཾ གནྟྭཱ ཏསྶ མཱཏརཾ རོདམཱནཾ ནིསིནྣཾ དིསྭཱ ‘‘ཨམྨ, ཀིཾ ཀཱརཎཱ རོདསཱི’’ཏི པུཙྪི. ‘‘པུཏྟཾ ཨནུསྶརིཏྭཱ རོདཱམཱི’’ཏི. ‘‘ཀཧཾ པན སོ, ཨམྨཱ’’ཏི? ‘‘བྷིཀྑཱུསུ པབྦཛིཏོ’’ཏི. ‘‘ཀིཾ ཨུཔྤབྦཱཛེཏུཾ ན ཝཊྚཏཱི’’ཏི? ‘‘ཝཊྚཏི, ན པན ཨིཙྪཏི, ཨིཏོ ནིཀྑམིཏྭཱ རཱཛགཧཾ གཏོ’’ཏི. ‘‘སཙཱཧཾ ཏཾ ཨུཔྤབྦཱཛེཡྻཾ, ཀིཾ མེ ཀརེཡྻཱཐཱ’’ཏི? ‘‘ཨིམསྶ ཏེ ཀུལསྶ ཀུཊུམྦསཱམིནིཾ ཀརེཡྻཱམཱ’’ཏི. ཏེན ཧི མེ པརིབྦཡཾ དེཐཱཏི པརིབྦཡཾ གཧེཏྭཱ མཧནྟེན པརིཝཱརེན རཱཛགཧཾ གནྟྭཱ ཏསྶ པིཎྜཱཡ ཙརཎཝཱིཐིཾ སལླཀྑེཏྭཱ ཏཏྠེཀཾ ནིཝཱསགེཧཾ གཧེཏྭཱ པཱཏོཝ པཎཱིཏཾ ཨཱཧཱརཾ པཊིཡཱདེཏྭཱ ཐེརསྶ པིཎྜཱཡ པཝིཊྛཀཱལེ བྷིཀྑཾ དཏྭཱ ཀཏིཔཱཧཙྩཡེན, ‘‘བྷནྟེ, ཨིདྷེཝ ནིསཱིདིཏྭཱ བྷཏྟཀིཙྩཾ ཀརོཐཱ’’ཏི པཏྟཾ གཎྷི. སོ པཏྟམདཱསི.

ཨཐ ནཾ པཎཱིཏེན ཨཱཧཱརེན པརིཝིསིཏྭཱ, ‘‘བྷནྟེ, ཨིདྷེཝ པིཎྜཱཡ ཙརིཏུཾ ཕཱསུཀ’’ནྟི ཝཏྭཱ ཀཏིཔཱཧཾ ཨཱལིནྡེ ནིསཱིདཱཔེཏྭཱ བྷོཛེཏྭཱ དཱརཀེ པཱུཝེཧི སངྒཎྷིཏྭཱ ‘‘ཨེཐ ཏུམྷེ ཐེརསྶ ཨཱགཏཀཱལེ མཡི ཝཱརེནྟིཡཱཔི ཨིདྷཱགནྟྭཱ རཛཾ ཨུཊྛཱཔེཡྻཱཐཱ’’ཏི ཨཱཧ. ཏེ པུནདིཝསེ ཐེརསྶ བྷོཛནཝེལཱཡ ཏཱཡ ཝཱརིཡམཱནཱཔི རཛཾ ཨུཊྛཱཔེསུཾ. སཱ པུནདིཝསེ, ‘‘བྷནྟེ, དཱརཀཱ ཝཱརིཡམཱནཱཔི མམ ཝཙནཾ ཨསུཎིཏྭཱ ཨིདྷ རཛཾ ཨུཊྛཱཔེནྟི, ཨནྟོགེཧེ ནིསཱིདཐཱ’’ཏི ཨནྟོ ནིསཱིདཱཔེཏྭཱ ཀཏིཔཱཧཾ བྷོཛེསི. པུན དཱརཀེ སངྒཎྷིཏྭཱ ‘‘ཏུམྷེ མཡཱ ཝཱརིཡམཱནཱཔི ཐེརསྶ བྷོཛནཀཱལེ མཧཱསདྡཾ ཀརེཡྻཱཐཱ’’ཏི ཨཱཧ. ཏེ ཏཐཱ ཀརིཾསུ. སཱ པུནདིཝསེ, ‘‘བྷནྟེ, ཨིམསྨིཾ ཋཱནེ ཨཏིཝིཡ མཧཱསདྡོ ཧོཏི, དཱརཀཱ མཡཱ ཝཱརིཡམཱནཱཔི ཝཙནཾ ན གཎྷནྟི, ཨུཔརིཔཱསཱདེཡེཝ ནིསཱིདཐཱ’’ཏི ཝཏྭཱ ཐེརེན ཨདྷིཝཱསིཏེ ཐེརཾ པུརཏོ ཀཏྭཱ པཱསཱདཾ ཨབྷིརུཧནྟཱི དྭཱརཱནི པིདཧམཱནཱཝ པཱསཱདཾ ཨབྷིརུཧི. ཐེརོ ཨུཀྐཊྛསཔདཱནཙཱརིཀོ སམཱནོཔི རསཏཎྷཱཡ བདྡྷོ ཏསྶཱ ཝཙནེན སཏྟབྷཱུམིཀཾ པཱསཱདཾ ཨབྷིརུཧི.

སཱ ཐེརཾ ནིསཱིདཱཔེཏྭཱ ‘‘ཙཏྟཱལཱིསཱཡ ཁལུ, སམྨ, པུཎྞམུཁ ཋཱནེཧི ཨིཏྠཱི པུརིསཾ ཨཙྩཱཝདཏི ཝིཛམྦྷཏི ཝིནམཏི གིལསཏི ཝིལཛྫཏི ནཁེན ནཁཾ གྷཊྚེཏི, པཱདེན པཱདཾ ཨཀྐམཏི, ཀཊྛེན པཐཝིཾ ཝིལིཁཏི, དཱརཀཾ ཨུལླངྒྷེཏི ཨོལངྒྷེཏི, ཀཱིལ༹ཏི ཀཱིལཱ༹པེཏི, ཙུམྦཏི ཙུམྦཱཔེཏི, བྷུཉྫཏི བྷུཉྫཱཔེཏི, དདཱཏི ཨཱཡཱཙཏི, ཀཏམནུཀརོཏི, ཨུཙྩཾ བྷཱསཏི, ནཱིཙཾ བྷཱསཏི, ཨཝིཙྩཾ བྷཱསཏི, ཝིཝིཙྩཾ བྷཱསཏི, ནཙྩེན གཱིཏེན ཝཱདིཏེན རོདིཏེན ཝིལསིཏེན ཝིབྷཱུསིཏེན ཛགྒྷཏི, པེཀྑཏི, ཀཊིཾ ཙཱལེཏི, གུཡ྄ཧབྷཎྜཀཾ ཙཱལེཏི, ཨཱུརུཾ ཝིཝརཏི, ཨཱུརུཾ པིདཧཏི, ཐནཾ དསྶེཏི, ཀཙྪཾ དསྶེཏི, ནཱབྷིཾ དསྶེཏི, ཨཀྑིཾ ནིཁཎཏི, བྷམུཀཾ ཨུཀྑིཔཏི, ཨོཊྛཾ པལིཁཏི, ཛིཝ྄ཧཾ ནིལླཱལེཏི, དུསྶཾ མུཉྩཏི, དུསྶཾ བནྡྷཏི, སིརསཾ མུཉྩཏི, སིརསཾ བནྡྷཏཱི’’ཏི (ཛཱ. ༢.༢༡.༣༠༠) ཨེཝཾ ཨཱགཏཾ ཨིཏྠིཀུཏྟཾ ཨིཏྠིལཱིལཾ དསྶེཏྭཱ ཏསྶ པུརཏོ ཋིཏཱ ཨིམཾ གཱཐམཱཧ –

‘‘ཨལཏྟཀཀཏཱ པཱདཱ, པཱདུཀཱརུཡ྄ཧ ཝེསིཡཱ;

ཏུཝམྤི དཧརོ མམ, ཨཧམྤི དཧརཱ ཏཝ;

ཨུབྷོཔི པབྦཛིསྶཱམ, ཛིཎྞཱ དཎྜཔརཱཡཎཱ’’ཏི. (ཐེརགཱ. ༤༥༩, ༤༦༢);

ཐེརསྶ ‘‘ཨཧོ ཝཏ མེ བྷཱརིཡཾ ཨནུཔདྷཱརེཏྭཱ ཀཏཀམྨ’’ནྟི མཧཱསཾཝེགོ ཨུདཔཱདི. ཏསྨིཾ ཁཎེ སཏྠཱ པཉྩཙཏྟཱལཱིསཡོཛནམཏྠཀེ ཛེཏཝནེ ནིསིནྣོཝ ཏཾ ཀཱརཎཾ དིསྭཱ སིཏཾ པཱཏྭཱཀཱསི. ཨཐ ནཾ ཨཱནནྡཏྠེརོ པུཙྪི – ‘‘བྷནྟེ, ཀོ ནུ ཁོ ཧེཏུ, ཀོ པཙྩཡོ སིཏསྶ པཱཏུཀམྨཱཡཱ’’ཏི. ཨཱནནྡ, རཱཛགཧནགརེ སཏྟབྷཱུམིཀཔཱསཱདཏལེ སུནྡརསམུདྡསྶ ཙ བྷིཀྑུནོ གཎིཀཱཡ ཙ སངྒཱམོ ཝཏྟཏཱིཏི. ཀསྶ ནུ ཁོ, བྷནྟེ, ཛཡོ བྷཝིསྶཏི, ཀསྶ པརཱཛཡོཏི? སཏྠཱ, ‘‘ཨཱནནྡ, སུནྡརསམུདྡསྶ ཛཡོ བྷཝིསྶཏི, གཎིཀཱཡ པརཱཛཡོ’’ཏི ཐེརསྶ ཛཡཾ པཀཱསེཏྭཱ ཏཏྠ ནིསིནྣཀོཝ ཨོབྷཱསཾ ཕརིཏྭཱ ‘‘བྷིཀྑུ ཨུབྷོཔི ཀཱམེ ནིརཔེཀྑོ པཛཧཱ’’ཏི ཝཏྭཱ ཨིམཾ གཱཐམཱཧ –

༤༡༥.

‘‘ཡོདྷ ཀཱམེ པཧནྟྭཱན, ཨནཱགཱརོ པརིབྦཛེ;

ཀཱམབྷཝཔརིཀྑཱིཎཾ, ཏམཧཾ བྲཱུམི བྲཱཧྨཎ’’ནྟི.

ཏསྶཏྠོ – ཡོ པུགྒལོ ཨིདྷ ལོཀེ ཨུབྷོཔི ཀཱམེ ཧིཏྭཱ ཨནཱགཱརོ ཧུཏྭཱ པརིབྦཛཏི, ཏཾ པརིཀྑཱིཎཀཱམཉྩེཝ པརིཀྑཱིཎབྷཝཉྩ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ སོ ཐེརོ ཨརཧཏྟཾ པཏྭཱ ཨིདྡྷིབལེན ཝེཧཱསཾ ཨབྦྷུགྒནྟྭཱ ཀཎྞིཀཱམཎྜལཾ ཝིནིཝིཛ྄ཛྷིཏྭཱ སཏྠུ སརཱིརཾ ཐོམེནྟོཡེཝ ཨཱགནྟྭཱ སཏྠཱརཾ ཝནྡི. དྷམྨསབྷཱཡམྤི ཀཐཾ སམུཊྛཱཔེསུཾ, ‘‘ཨཱཝུསོ, ཛིཝ྄ཧཱཝིཉྙེཡྻཾ རསཾ ནིསྶཱཡ མནཾ ནཊྛོ སུནྡརསམུདྡཏྠེརོ, སཏྠཱ པནསྶ ཨཝསྶཡོ ཛཱཏོ’’ཏི. སཏྠཱ ཏཾ ཀཐཾ སུཏྭཱ ‘‘ན, བྷིཀྑཝེ, ཨིདཱནེཝ, པུབྦེཔཱཧཾ ཨེཏསྶ རསཏཎྷཱཡ བདྡྷམནསྶ ཨཝསྶཡོ ཛཱཏོཡེཝཱ’’ཏི ཝཏྭཱ ཏེཧི ཡཱཙིཏོ ཏསྶཏྠསྶ པཀཱསནཏྠཾ ཨཏཱིཏཾ ཨཱཧརིཏྭཱ –

‘‘ན ཀིརཏྠི རསེཧི པཱཔིཡོ,

ཨཱཝཱསེཧི ཝཱ སནྠཝེཧི ཝཱ;

ཝཱཏམིགཾ གཧནནིསྶིཏཾ,

ཝསམཱནེསི རསེཧི སཉྫཡོ’’ཏི. (ཛཱ. ༡.༡.༡༤) –

ཨེཀཀནིཔཱཏེ ཨིམཾ ཝཱཏམིགཛཱཏཀཾ ཝིཏྠཱརེཏྭཱ ‘‘ཏདཱ སུནྡརསམུདྡོ ཝཱཏམིགོ ཨཧོསི, ཨིམཾ པན གཱཐཾ ཝཏྭཱ ཏསྶ ཝིསྶཛྫཱཔེཏཱ རཉྙོ མཧཱམཙྩོ ཨཧམེཝཱ’’ཏི ཛཱཏཀཾ སམོདྷཱནེསཱིཏི.

སུནྡརསམུདྡཏྠེརཝཏྠུ བཏྟིཾསཏིམཾ.

༣༣. ཛཊིལཏྠེརཝཏྠུ

ཡོདྷ ཏཎྷནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཛཊིལཏྠེརཾ ཨཱརབྦྷ ཀཐེསི.

ཏཏྲཱཡཾ ཨནུཔུབྦཱི ཀཐཱ – ཨཏཱིཏེ ཀིར བཱརཱཎསིཡཾ དྭེ བྷཱཏརོ ཀུཊུམྦིཀཱ མཧནྟཾ ཨུཙྪུཁེཏྟཾ ཀཱརེསུཾ. ཨཐེཀདིཝསཾ ཀནིཊྛབྷཱཏཱ ཨུཙྪུཁེཏྟཾ གནྟྭཱ ‘‘ཨེཀཾ ཛེཊྛབྷཱཏིཀསྶ དསྶཱམི, ཨེཀཾ མཡ྄ཧཾ བྷཝིསྶཏཱི’’ཏི དྭེ ཨུཙྪུཡཊྛིཡོ རསསྶ ཨནིཀྑམནཏྠཱཡ ཚིནྣཊྛཱནེ བནྡྷིཏྭཱ གཎྷི. ཏདཱ ཀིར ཨུཙྪཱུནཾ ཡནྟེན པཱིལ༹ནཀིཙྩཾ ནཏྠི, ཨགྒེ ཝཱ མཱུལེ ཝཱ ཚིནྡིཏྭཱ ཨུཀྑིཏྟཀཱལེ དྷམྨཀརཎཏོ ཨུདཀཾ ཝིཡ སཡམེཝ རསོ ནིཀྑམཏི. ཏསྶ པན ཁེཏྟཏོ ཨུཙྪུཡཊྛིཡོ གཧེཏྭཱ ཨཱགམནཀཱལེ གནྡྷམཱདནེ པཙྩེཀབུདྡྷོ སམཱཔཏྟིཏོ ཝུཊྛཱཡ ‘‘ཀསྶ ནུ ཁོ ཨཛྫ ཨནུགྒཧཾ ཀརིསྶཱམཱི’’ཏི ཨུཔདྷཱརེནྟོ ཏཾ ཨཏྟནོ ཉཱཎཛཱལེ པཝིཊྛཾ དིསྭཱ སངྒཧཾ ཀཱཏུཾ སམཏྠབྷཱཝཉྩ ཉཏྭཱ པཏྟཙཱིཝརཾ ཨཱདཱཡ ཨིདྡྷིཡཱ ཨཱགནྟྭཱ ཏསྶ པུརཏོ ཨཊྛཱསི. སོ ཏཾ དིསྭཱཝ པསནྣཙིཏྟོ ཨུཏྟརསཱཊཀཾ ཨུཙྩཏརེ བྷཱུམིཔདེསེ ཨཏྠརིཏྭཱ, ‘‘བྷནྟེ, ཨིདྷ ནིསཱིདཐཱ’’ཏི པཙྩེཀབུདྡྷཾ ནིསཱིདཱཔེཏྭཱ ‘‘པཏྟཾ ཨུཔནཱམེཐཱ’’ཏི ཨུཙྪུཡཊྛིཡཱ བནྡྷནཊྛཱནཾ མོཙེཏྭཱ པཏྟསྶ ཨུཔརི ཨཀཱསི, རསོ ཨོཏརིཏྭཱ པཏྟཾ པཱུརེསི. པཙྩེཀབུདྡྷེན ཏསྨིཾ རསེ པཱིཏེ ‘‘སཱདྷུཀཾ ཝཏ མེ ཨཡྻེན རསོ པཱིཏོ. སཙེ མེ ཛེཊྛབྷཱཏིཀོ མཱུལཾ ཨཱཧརཱཔེསྶཏི, མཱུལཾ དསྶཱམི. སཙེ པཏྟིཾ ཨཱཧརཱཔེསྶཏི, པཏྟིཾ དསྶཱམཱི’’ཏི ཙིནྟེཏྭཱ, ‘‘བྷནྟེ, པཏྟཾ མེ ཨུཔནཱམེཐཱ’’ཏི དུཏིཡམྤི ཨུཙྪུཡཊྛིཾ མོཙེཏྭཱ རསཾ ཨདཱསི. ‘‘བྷཱཏཱ མེ ཨུཙྪུཁེཏྟཏོ ཨཉྙཾ ཨུཙྪུཾ ཨཱཧརིཏྭཱ ཁཱདིསྶཏཱི’’ཏི ཨེཏྟཀམྤི ཀིརསྶ ཝཉྩནཙིཏྟཾ ནཱཧོསི. པཙྩེཀབུདྡྷོ པན པཋམཾ ཨུཙྪུརསསྶ པཱིཏཏྟཱ ཏཾ ཨུཙྪུརསཾ ཨཉྙེཧིཔི སདྡྷིཾ སཾཝིབྷཛིཏུཀཱམོ ཧུཏྭཱ གཧེཏྭཱཝ ནིསཱིདི. སོ ཏསྶ ཨཱཀཱརཾ ཉཏྭཱ པཉྩཔཏིཊྛིཏེན ཝནྡིཏྭཱ, ‘‘བྷནྟེ, ཡོ ཨཡཾ མཡཱ དིནྣོ ཨགྒརསོ, ཨིམསྶ ནིསྶནྡེན དེཝམནུསྶེསུ སམྤཏྟིཾ ཨནུབྷཝིཏྭཱ པརིཡོསཱནེ ཏུམྷེཧི པཏྟདྷམྨམེཝ པཱཔུཎེཡྻ’’ནྟི པཏྠནཾ པཊྛཔེསི. པཙྩེཀབུདྡྷོཔིསྶ ‘‘ཨེཝཾ ཧོཏཱུ’’ཏི ཝཏྭཱ ‘‘ཨིཙྪིཏཾ པཏྠིཏཾ ཏུཡ྄ཧ’’ནྟི དྭཱིཧི གཱཐཱཧི ཨནུམོདནཾ ཀཏྭཱ ཡཐཱ སོ པསྶཏི, ཨེཝཾ ཨདྷིཊྛཧིཏྭཱ ཨཱཀཱསེན གནྡྷམཱདནཾ གནྟྭཱ པཉྩནྣཾ པཙྩེཀབུདྡྷསཏཱནཾ ཏཾ རསཾ ཨདཱསི.

སོ ཏཾ པཱཊིཧཱརིཡཾ དིསྭཱ བྷཱཏུ སནྟིཀཾ གནྟྭཱ ‘‘ཀཧཾ གཏོསཱི’’ཏི ཝུཏྟེ ‘‘ཨུཙྪུཁེཏྟཾ ཨོལོཀེཏུཾ གཏོམྷཱི’’ཏི. ‘‘ཀིཾ ཏཱདིསེན ཨུཙྪུཁེཏྟཾ གཏེན, ནནུ ནཱམ ཨེཀཾ ཝཱ དྭེ ཝཱ ཨུཙྪུཡཊྛིཡོ ཨཱདཱཡ ཨཱགནྟབྦཾ བྷཝེཡྻཱ’’ཏི བྷཱཏརཱ ཝུཏྟོ – ‘‘ཨཱམ, བྷཱཏིཀ, དྭེ མེ ཨུཙྪུཡཊྛིཡོ གཧིཏཱ, ཨེཀཾ པན པཙྩེཀབུདྡྷཾ དིསྭཱ མམ ཨུཙྪུཡཊྛིཏོ རསཾ དཏྭཱ ‘མཱུལཾ ཝཱ པཏྟིཾ ཝཱ དསྶཱམཱི’ཏི ཏུམྷཱཀམྤི མེ ཨུཙྪུཡཊྛིཏོ རསོ དིནྣོ, ཀིཾ ནུ ཁོ ཏསྶ མཱུལཾ གཎྷིསྶཐ, ཨུདཱཧུ པཏྟི’’ནྟི ཨཱཧ. ‘‘ཀིཾ པན པཙྩེཀབུདྡྷེན ཀཏ’’ནྟི? ‘‘མམ ཨུཙྪུཡཊྛིཏོ རསཾ པིཝིཏྭཱ ཏུམྷཱཀཾ ཨུཙྪུཡཊྛིཏོ རསཾ ཨཱདཱཡ ཨཱཀཱསེན གནྡྷམཱདནཾ གནྟྭཱ པཉྩསཏཱནཾ པཙྩེཀབུདྡྷཱནཾ ཨདཱསཱི’’ཏི. སོ ཏསྨིཾ ཀཐེནྟེཡེཝ ནིརནྟརཾ པཱིཏིཡཱ ཕུཊྛསརཱིརོ ཧུཏྭཱ ‘‘ཏེན མེ པཙྩེཀབུདྡྷེན དིཊྛདྷམྨསྶེཝ ཨདྷིགམོ བྷཝེཡྻཱ’’ཏི པཏྠནཾ ཨཀཱསི. ཨེཝཾ ཀནིཊྛེན ཏིསྶོ སམྤཏྟིཡོ པཏྠིཏཱ, ཛེཊྛེན པན ཨེཀཔདེནེཝ ཨརཧཏྟཾ པཏྠིཏནྟི ཨིདཾ ཏེསཾ པུབྦཀམྨཾ.

ཏེ ཡཱཝཏཱཡུཀཾ ཋཏྭཱ ཏཏོ ཙུཏཱ དེཝལོཀེ ནིབྦཏྟིཏྭཱ ཨེཀཾ བུདྡྷནྟརཾ ཁེཔཡིཾསུ. ཏེསཾ དེཝལོཀེ ཋིཏཀཱལེཡེཝ ཝིཔསྶཱི སམྨཱསམྦུདྡྷོ ལོཀེ ཨུཔྤཛྫི. ཏེཔི དེཝལོཀཏོ ཙཝིཏྭཱ བནྡྷུམཏིཡཱ ཨེཀསྨིཾ ཀུལགེཧེ ཛེཊྛོ ཛེཊྛོཝ, ཀནིཊྛོ ཀནིཊྛོཝ ཧུཏྭཱ པཊིསནྡྷིཾ གཎྷིཾསུ. ཏེསུ ཛེཊྛསྶ སེནོཏི ནཱམཾ ཨཀཾསུ, ཀནིཊྛསྶ ཨཔརཱཛིཏོཏི. ཏེསུ ཝཡཔྤཏྟཀཱལེ ཀུཊུམྦཾ སཎྛཱཔེཏྭཱ ཝིཧརནྟེསུ ‘‘བུདྡྷརཏནཾ ལོཀེ ཨུཔྤནྣཾ, དྷམྨརཏནཾ, སངྒྷརཏནཾ, དཱནཱནི དེཐ, པུཉྙཱནི ཀརོཐ, ཨཛྫ ཨཊྛམཱི, ཨཛྫ ཙཱཏུདྡསཱི, ཨཛྫ པནྣརསཱི, ཨུཔོསཐཾ ཀརོཐ, དྷམྨཾ སུཎཱཐཱ’’ཏི དྷམྨགྷོསཀསྶ བནྡྷུམཏཱིནགརེ གྷོསནཾ སུཏྭཱ མཧཱཛནཾ པུརེབྷཏྟཾ དཱནཾ དཏྭཱ པཙྪཱབྷཏྟཾ དྷམྨསྶཝནཱཡ གཙྪནྟཾ དིསྭཱ སེནཀུཊུམྦིཀོ ‘‘ཀཧཾ གཙྪཐཱ’’ཏི པུཙྪིཏྭཱ ‘‘སཏྠུ སནྟིཀཾ དྷམྨསྶཝནཱཡཱ’’ཏི ཝུཏྟེ ‘‘ཨཧམྤི གམིསྶཱམཱི’’ཏི ཏེཧི སདྡྷིཾཡེཝ གནྟྭཱ པརིསཔརིཡནྟེ ནིསཱིདི.

སཏྠཱ ཏསྶ ཨཛ྄ཛྷཱསཡཾ ཝིདིཏྭཱ ཨནུཔུབྦིཾ ཀཐཾ ཀཐེསི. སོ སཏྠུ དྷམྨཾ སུཏྭཱ པབྦཛྫཱཡ ཨུསྶཱཧཛཱཏོ སཏྠཱརཾ པབྦཛྫཾ ཡཱཙི. ཨཐ ནཾ སཏྠཱ ‘‘ཨཏྠི པན ཏེ ཨཔལོཀེཏབྦཱ ཉཱཏཀཱ’’ཏི པུཙྪི. ཨཏྠི, བྷནྟེཏི. ཏེན ཧི ཨཔལོཀེཏྭཱ ཨེཧཱིཏི. སོ ཀནིཊྛསྶ སནྟིཀཾ གནྟྭཱ ‘‘ཡཾ ཨིམསྨིཾ ཀུལེ སཱཔཏེཡྻཾ, ཏཾ སབྦཾ ཏཝ ཧོཏཱུ’’ཏི ཨཱཧ. ཏུམྷེ པན, སཱམཱིཏི. ཨཧཾ སཏྠུ སནྟིཀེ པབྦཛིསྶཱམཱིཏི. སཱམི ཀིཾ ཝདེཐ, ཨཧཾ མཱཏརི མཏཱཡ མཱཏརཾ ཝིཡ, པིཏརི མཏེ པིཏརཾ ཝིཡ ཏུམྷེ ཨལཏྠཾ, ཨིདཾ ཀུལཾ མཧཱབྷོགཾ, གེཧེ ཋིཏེནེཝ སཀྐཱ པུཉྙཱནི ཀཱཏུཾ, མཱ ཨེཝཾ ཀརིཏྠཱཏི. མཡཱ སཏྠུ སནྟིཀེ དྷམྨོ སུཏོ, ན སཀྐཱ ཏཾ ཨགཱརམཛ྄ཛྷེ ཋིཏེན པཱུརེཏུཾ, པབྦཛིསྶཱམེཝཱཧཾ, ཏྭཾ ནིཝཏྟཱཧཱིཏི. ཨེཝཾ སོ ཀནིཊྛཾ ནིཝཏྟཱཔེཏྭཱ སཏྠུ སནྟིཀེ པབྦཛིཏྭཱ ལདྡྷཱུཔསམྤདོ ན ཙིརསྶེཝ ཨརཧཏྟཾ པཱཔུཎི. ཀནིཊྛོཔི ‘‘བྷཱཏུ པབྦཛིཏསཀྐཱརཾ ཀརིསྶཱམཱི’’ཏི སཏྟཱཧཾ བུདྡྷཔྤམུཁསྶ བྷིཀྑུསངྒྷསྶ དཱནཾ དཏྭཱ བྷཱཏརཾ ཝནྡིཏྭཱ ཨཱཧ – ‘‘བྷནྟེ, ཏུམྷེཧི ཨཏྟནོ བྷཝནིསྶརཎཾ ཀཏཾ, ཨཧཾ པན པཉྩཧི ཀཱམགུཎེཧི བདྡྷོ ནིཀྑམིཏྭཱ པབྦཛིཏུཾ ན སཀྐོམི, མཡ྄ཧཾ གེཧེ ཋིཏསྶེཝ ཨནུཙྪཝིཀཾ མཧནྟཾ པུཉྙཀམྨཾ ཨཱཙིཀྑཐཱ’’ཏི. ཨཐ ནཾ ཐེརོ ‘‘སཱདྷུ སཱདྷུ, པཎྜིཏ, སཏྠུ གནྡྷཀུཊིཾ ཀརོཧཱི’’ཏི ཨཱཧ. སོ ‘‘སཱདྷཱུ’’ཏི སམྤཊིཙྪིཏྭཱ ནཱནཱདཱརཱུནི ཨཱཧརཱཔེཏྭཱ ཐམྦྷཱདཱིནཾ ཨཏྠཱཡ ཏཙྪཱཔེཏྭཱ ཨེཀཾ སུཝཎྞཁཙིཏཾ, ཨེཀཾ རཛཏཁཙིཏཾ, ཨེཀཾ མཎིཁཙིཏནྟི སབྦཱནི སཏྟརཏནཁཙིཏཱནི ཀཱརེཏྭཱ ཏེཧི གནྡྷཀུཊིཾ ཀཱརེཏྭཱ སཏྟརཏནཁཙིཏཱཧེཝ ཚདནིཊྛཀཱཧི ཚཱདཱཔེསི. གནྡྷཀུཊིཡཱ ཀརཎཀཱལེཡེཝ པན ཏཾ ཨཏྟནཱ སམཱནནཱམཀོ ཨཔརཱཛིཏོཡེཝ ནཱམ བྷཱགིནེཡྻོ ཨུཔསངྐམིཏྭཱ ‘‘ཨཧམྤི ཀརིསྶཱམི, མཡ྄ཧམྤི པཏྟིཾ དེཐ མཱཏུལཱ’’ཏི ཨཱཧ. ན དེམི, ཏཱཏ, ཨཉྙེཧི ཨསཱདྷཱརཎཾ ཀརིསྶཱམཱིཏི. སོ བཧུམྤི ཡཱཙིཏྭཱ པཏྟིཾ ཨལབྷམཱནོ ‘‘གནྡྷཀུཊིཡཱ པུརཏོ ཀུཉྫརསཱལཾ ལདྡྷུཾ ཝཊྚཏཱི’’ཏི སཏྟརཏནམཡཾ ཀུཉྫརསཱལཾ ཀཱརེསི. སོ ཨིམསྨིཾ བུདྡྷུཔྤཱདེ མེཎྜཀསེཊྛི ཧུཏྭཱ ནིབྦཏྟི.

གནྡྷཀུཊིཡཾ པན སཏྟརཏནམཡཱནི ཏཱིཎི མཧཱཝཱཏཔཱནཱནི ཨཧེསུཾ. ཏེསཾ ཨབྷིམུཁེ ཧེཊྛཱ སུདྷཱཔརིཀམྨཀཏཱ ཏིསྶོ པོཀྑརཎིཡོ ཀཱརེཏྭཱ ཙཏུཛྫཱཏིཀགནྡྷོདཀསྶ པཱུརེཏྭཱ ཨཔརཱཛིཏོ, གཧཔཏི, པཉྩཝཎྞཱནི ཀུསུམཱནི རོཔཱཔེསི ཏཐཱགཏསྶ ཨནྟོ ནིསིནྣཀཱལེ ཝཱཏཝེགེན སམུཊྛིཏཱཧི རེཎུཝཊྚཱིཧི སརཱིརསྶ ཨོཀིརཎཏྠཾ. གནྡྷཀུཊིཐཱུཔིཀཱཡ ཀཔལླཾ རཏྟསུཝཎྞམཡཾ ཨཧོསི, པཝཱལ༹མཡཱ སིཁརཱ, ཧེཊྛཱ མཎིམཡཱ ཚདནིཊྛཀཱ. ཨིཏི སཱ ནཙྩནྟོ ཝིཡ མོརོ སོབྷམཱནཱ ཨཊྛཱསི. སཏྟསུ པན རཏནེསུ ཀོཊྚེཏབྦཡུཏྟཀཾ ཀོཊྚེཏྭཱ ཨིཏརཾ སཀལམེཝ གཧེཏྭཱ ཛཎྞུམཏྟེན ཨོདྷིནཱ གནྡྷཀུཊིཾ པརིཀྑིཔིཏྭཱ པརིཝེཎཾ པཱུརེསི.

ཨེཝཾ གནྡྷཀུཊིཾ ནིཊྛཱཔེཏྭཱ ཨཔརཱཛིཏོ, གཧཔཏི, བྷཱཏིཀཏྠེརཾ ཨུཔསངྐམིཏྭཱ ཨཱཧ – ‘‘བྷནྟེ, ནིཊྛིཏཱ གནྡྷཀུཊི, པརིབྷོགམསྶཱ པཙྩཱསཱིསཱམི, པརིབྷོགེན ཀིར མཧནྟཾ པུཉྙཾ ཧོཏཱི’’ཏི. སོ སཏྠཱརཾ ཨུཔསངྐམིཏྭཱ, ‘‘བྷནྟེ, ཨིམིནཱ ཀིར ཝོ ཀུཊུམྦིཀེན གནྡྷཀུཊི ཀཱརིཏཱ, ཨིདཱནི པན པརིབྷོགཾ པཙྩཱསཱིསཏཱི’’ཏི ཨཱཧ. སཏྠཱ ཨུཊྛཱཡཱསནཱ གནྡྷཀུཊིཨབྷིམུཁཾ གནྟྭཱ གནྡྷཀུཊིཾ པརིཀྑིཔིཏྭཱ པརིཀྑིཏྟརཏནརཱསིཾ ཨོལོཀེནྟོ དྭཱརཀོཊྛཀེ ཨཊྛཱསི. ཨཐ ནཾ ཀུཊུམྦིཀོ ‘‘པཝིསཐ, བྷནྟེ’’ཏི ཨཱཧ. སཏྠཱ ཏཏྠེཝ ཋཏྭཱ ཏཏིཡཝཱརེ ཏསྶ བྷཱཏིཀཏྠེརཾ ཨོལོཀེསི. སོ ཨོལོཀིཏཱཀཱརེནེཝ ཉཏྭཱ ཀནིཊྛབྷཱཏརཾ ཨཱཧ – ‘‘ཨེཧི, ཏཱཏ, ‘མམེཝ རཀྑཱ བྷཝིསྶཏི, ཏུམྷེ ཡཐཱསུཁཾ ཝསཐཱ’ཏི སཏྠཱརཾ ཝདེཧཱི’’ཏི. སོ ཏསྶ ཝཙནཾ སུཏྭཱ སཏྠཱརཾ པཉྩཔཏིཊྛིཏེན ཝནྡིཏྭཱ, ‘‘བྷནྟེ, ཡཐཱ མནུསྶཱ རུཀྑམཱུལེ པཝིསིཏྭཱ ཨནཔེཀྑཱ པཀྐམནྟི, ཡཐཱ ཝཱ ནདིཾ ཏརིཏྭཱ ཨུལུ༹མྤཾ ཨནཔེཀྑཱ པརིཙྩཛནྟི, ཨེཝཾ ཨནཔེཀྑཱ ཧུཏྭཱ ཏུམྷེ ཝསཐཱ’’ཏི ཨཱཧ. ཀིམཏྠཾ པན སཏྠཱ ཨཊྛཱསི? ཨེཝཾ ཀིརསྶ ཨཧོསི – ‘‘བུདྡྷཱནཾ སནྟིཀཾ པུརེབྷཏྟམྤི པཙྪཱབྷཏྟམྤི བཧཱུ ཨཱགཙྪནྟི, ཏེསུ རཏནཱནི ཨཱདཱཡ པཀྐམནྟེསུ ན སཀྐཱ ཨམྷེཧི ཝཱརེཏུཾ, པརིཝེཎམྷི ཨེཏྟཀེ རཏནེ ཝོཀིཎྞེ ཨཏྟནོ ཨུཔཊྛཱཀེ ཧརནྟེཔི ན ཝཱརེཏཱིཏི ཀུཊུམྦིཀོ མཡི ཨཱགྷཱཏཾ ཀཏྭཱ ཨཔཱཡཱུཔགོ བྷཝེཡྻཱ’’ཏི ཨིམིནཱ ཀཱརཎེན ཨཊྛཱསི. ཏེན པན, ‘‘བྷནྟེ, མམེཝ རཀྑཱ བྷཝིསྶཏི, ཏུམྷེ ཝསཐཱ’’ཏི ཝུཏྟེ པཱཝིསི.

ཀུཊུམྦིཀོ སམནྟཱ རཀྑཾ ཋཔེཏྭཱ མནུསྶེ ཨཱཧ – ‘‘ཏཱཏཱ, ཨུཙྪངྒེན ཝཱ པཙྪིཔསིབྦཀེཧི ཝཱ ཨཱདཱཡ གཙྪནྟེ ཝཱརེཡྻཱཐ, ཧཏྠེན གཧེཏྭཱ གཙྪནྟེ པན མཱ ཝཱརཡིཏྠཱ’’ཏི. ཨནྟོནགརེཔི ཨཱརོཙཱཔེསི ‘‘མཡཱ གནྡྷཀུཊིཔརིཝེཎེ སཏྟ རཏནཱནི ཨོཀིཎྞཱནི, སཏྠུ སནྟིཀེ དྷམྨཾ སུཏྭཱ གཙྪནྟཱ དུགྒཏམནུསྶཱ ཨུབྷོ ཧཏྠེ པཱུརེཏྭཱ གཎྷནྟུ, སུཁིཏཱཔི ཨེཀེན གཎྷནྟཱུ’’ཏི. ཨེཝཾ ཀིརསྶ ཨཧོསི ‘‘སདྡྷཱ ཏཱཝ དྷམྨཾ སོཏུཀཱམཱ གམིསྶནྟིཡེཝ, ཨསྶདྡྷཱཔི པན དྷནལོབྷེན གནྟྭཱ དྷམྨཾ སུཏྭཱ དུཀྑཏོ མུཙྩིསྶནྟཱི’’ཏི. ཏསྨཱ ཛནསངྒཧཏྠཱཡ ཨེཝཾ ཨཱརོཙཱཔེསི. མཧཱཛནོ ཏེན ཝུཏྟནིཡཱམེནེཝ རཏནཱནི གཎྷི. སཀིཾ ཨོཀིཎྞརཏནེསུ ཁཱིཎེསུ ཡཱཝཏཏིཡཾ ཛཎྞུམཏྟེན ཨོདྷིནཱ ཨོཀིརཱཔེསིཡེཝ. སཏྠུ པན པཱདམཱུལེ ཏིཔུསམཏྟཾ ཨནགྒྷཾ མཎིརཏནཾ ཋཔེསི. ཨེཝཾ ཀིརསྶ ཨཧོསི – ‘‘སཏྠུ སརཱིརཏོ སུཝཎྞཝཎྞཱཡ པབྷཱཡ སདྡྷིཾ མཎིཔབྷཾ ཨོལོཀེནྟཱནཾ ཏིཏྟི ནཱམ ན བྷཝིསྶཏཱི’’ཏི. ཏསྨཱ ཨེཝམཀཱསི. མཧཱཛནོཔི ཨཏིཏྟོཝ ཨོལོཀེསི.

ཨཐེཀདིཝསཾ ཨེཀོ མིཙྪཱདིཊྛིཀབྲཱཧྨཎོ ‘‘སཏྠུ ཀིར པཱདམཱུལེ མཧགྒྷཾ མཎིརཏནཾ ནིཀྑིཏྟཾ, ཧརིསྶཱམི ན’’ནྟི ཝིཧཱརཾ གནྟྭཱ སཏྠཱརཾ ཝནྡིཏུཾ ཨཱགཏསྶ མཧཱཛནསྶ ཨནྟརེན པཱཝིསི. ཀུཊུམྦིཀོ ཏསྶ པཝིསནཱཀཱརེནེཝ ‘‘མཎིཾ གཎྷིཏུཀཱམོ’’ཏི སལླཀྑེཏྭཱ ‘‘ཨཧོ ཝཏ ན གཎྷེཡྻཱ’’ཏི ཙིནྟེསི. སོཔི སཏྠཱརཾ ཝནྡནྟོ ཝིཡ པཱདམཱུལེ ཧཏྠཾ ཨུཔནཱམེཏྭཱ མཎིཾ གཧེཏྭཱ ཨོཝཊྚིཀཱཡ ཀཏྭཱ པཀྐཱམི. ཀུཊུམྦིཀོ ཏསྨིཾ ཙིཏྟཾ པསཱདེཏུཾ ནཱསཀྑི. སོ དྷམྨཀཐཱཝསཱནེ སཏྠཱརཾ ཨུཔསངྐམིཏྭཱ ཨཱཧ – ‘‘བྷནྟེ, མཡཱ ཏིཀྑཏྟུཾ གནྡྷཀུཊིཾ པརིཀྑིཔིཏྭཱ ཛཎྞུམཏྟེན ཨོདྷིནཱ སཏྟ རཏནཱནི ཨོཀིཎྞཱནི, ཏཱནི མེ གཎྷནྟེསུ ཨཱགྷཱཏོ ནཱམ ནཱཧོསི, ཙིཏྟཾ བྷིཡྻོ བྷིཡྻོ པསཱིདིཡེཝ. ཨཛྫ པན ‘ཨཧོ ཝཏཱཡཾ བྲཱཧྨཎོ མཎིཾ ན གཎྷེཡྻཱ’ཏི ཙིནྟེཏྭཱ ཏསྨིཾ མཎིཾ ཨཱདཱཡ གཏེ ཙིཏྟཾ པསཱདེཏུཾ ནཱསཀྑི’’ནྟི. སཏྠཱ ཏསྶ ཝཙནཾ སུཏྭཱ ‘‘ནནུ, ཨུཔཱསཀ, ཨཏྟནོ སནྟཀཾ པརེཧི ཨནཱཧརཎཱིཡཾ ཀཱཏུཾ སཀྐོསཱི’’ཏི ནཡཾ ཨདཱསི. སོ སཏྠཱརཱ དིནྣནཡེ ཋཏྭཱ སཏྠཱརཾ ཝནྡིཏྭཱ ‘‘ཨཛྫ ཨཱདིཾ ཀཏྭཱ མམ སནྟཀཾ དསིཀསུཏྟམཏྟམྤི མཾ ཨབྷིབྷཝིཏྭཱ ཨནེཀསཏཱཔི རཱཛཱནོ ཝཱ ཙོརཱ ཝཱ གཎྷིཏུཾ སམཏྠཱ ནཱམ མཱ ཧོནྟུ, ཨགྒིནཱཔི མམ སནྟཀཾ མཱ ཌཡ྄ཧཏུ, ཨུདཀེནཔི མཱ ཝུཡ྄ཧཏཱུ’’ཏི པཏྠནཾ ཨཀཱསི. སཏྠཱཔིསྶ ‘‘ཨེཝཾ ཧོཏཱུ’’ཏི ཨནུམོདནཾ ཨཀཱསི. སོ གནྡྷཀུཊིམཧཾ ཀརོནྟོ ཨཊྛསཊྛིཡཱ བྷིཀྑུསཏསཧསྶཱནཾ ཨནྟོཝིཧཱརེཡེཝ ནཝ མཱསེ མཧཱདཱནཾ དཏྭཱ དཱནཔརིཡོསཱནེ སབྦེསཾ ཏིཙཱིཝརཾ ཨདཱསི. སངྒྷནཝཀསྶ ཙཱིཝརསཱཊཀཱ སཧསྶགྒྷནཀཱ ཨཧེསུཾ.

སོ ཨེཝཾ ཡཱཝཏཱཡུཀཾ པུཉྙཱནི ཀརིཏྭཱ ཏཏོ ཙུཏོ དེཝལོཀེ ནིབྦཏྟིཏྭཱ ཨེཏྟཀཾ ཀཱལཾ དེཝམནུསྶེསུ སཾསརིཏྭཱ ཨིམསྨིཾ བུདྡྷུཔྤཱདེ རཱཛགཧེ ཨེཀསྨིཾ སེཊྛིཀུལེ པཊིསནྡྷིཾ གཧེཏྭཱ ཨཌྜྷམཱསཱདྷིཀེ ནཝ མཱསེ མཱཏུཀུཙྪིཡཾ ཝསི. ཛཱཏདིཝསེ པནསྶ སཀལནགརེ སབྦཱཝུདྷཱནི པཛྫལིཾསུ, སབྦེསཾ ཀཱཡརཱུལ༹ྷཱནི ཨཱབྷརཎཱནིཔི པཛྫལིཏཱནི ཝིཡ ཨོབྷཱསཾ མུཉྩིཾསུ, ནགརཾ ཨེཀཔཛྫོཏཾ ཨཧོསི. སེཊྛིཔི པཱཏོཝ རཱཛཱུཔཊྛཱནཾ ཨགམཱསི. ཨཐ ནཾ རཱཛཱ པུཙྪི – ‘‘ཨཛྫ སབྦཱཝུདྷཱནི པཛྫལིཾསུ, ནགརཾ ཨེཀཔཛྫོཏཾ ཛཱཏཾ, ཛཱནཱསི ནུ ཁོ ཨེཏྠ ཀཱརཎ’’ནྟི? ‘‘ཛཱནཱམི, དེཝཱ’’ཏི. ‘‘ཀིཾ, སེཊྛཱི’’ཏི? ‘‘མམ གེཧེ ཏུམྷཱཀཾ དཱསོ ཛཱཏོ, ཏསྶ པུཉྙཏེཛེནེཝཾ ཨཧོསཱི’’ཏི. ‘‘ཀིཾ ནུ ཁོ ཙོརོ བྷཝིསྶཏཱི’’ཏི? ‘‘ནཏྠེཏཾ, དེཝ, པུཉྙཝཱ སཏྟོ ཀཏཱབྷིནཱིཧཱརོ’’ཏི. ‘‘ཏེན ཧི ནཾ སམྨཱ པོསེཏུཾ ཝཊྚཏི, ཨིདམསྶ ཁཱིརམཱུལཾ ཧོཏཱུ’’ཏི དེཝསིཀཾ སཧསྶཾ པཊྛཔེསི. ཨཐསྶ ནཱམགཧཎདིཝསེ སཀལནགརསྶ ཨེཀཔཛྫོཏབྷཱུཏཏྟཱ ཛོཏིཀོཏྭེཝ ནཱམཾ ཀརིཾསུ.

ཨཐསྶ ཝཡཔྤཏྟཀཱལེ གེཧཀརཎཏྠཱཡ བྷཱུམིཏལེ སོདྷིཡམཱནེ སཀྐསྶ བྷཝནཾ ཨུཎྷཱཀཱརཾ དསྶེསི. སཀྐོ ‘‘ཀིཾ ནུ ཁོ ཨིད’’ནྟི ཨུཔདྷཱརཡམཱནོ ‘‘ཛོཏིཀསྶ གེཧཊྛཱནཾ གཎྷནྟཱི’’ཏི ཉཏྭཱ ‘‘ནཱཡཾ ཨེཏེཧི ཀཏགེཧེ ཝསིསྶཏི, མཡཱཔེཏྠ གནྟུཾ ཝཊྚཏཱི’’ཏི ཝཌྜྷཀཱིཝེསེན ཏཏྠ གནྟྭཱ ‘‘ཀིཾ ཀརོཐཱ’’ཏི ཨཱཧ. ‘‘ཛོཏིཀསྶ གེཧཊྛཱནཾ གཎྷཱམཱ’’ཏི. ‘‘ཨཔེཐ, ནཱཡཾ ཏུམྷེཧི ཀཏགེཧེ ཝསིསྶཏཱི’’ཏི ཝཏྭཱ སོལ༹སཀརཱིསམཏྟཾ བྷཱུམིཔདེསཾ ཨོལོཀེསི, སོ ཏཱཝདེཝ ཀསིཎམཎྜལཾ ཝིཡ སམོ ཨཧོསི. པུན ‘‘ཨིམསྨིཾ ཋཱནེ པཐཝིཾ བྷིནྡིཏྭཱ སཏྟརཏནམཡོ སཏྟབྷཱུམིཀཔཱསཱདོ ཨུཊྛཧཏཱུ’’ཏི ཙིནྟེཏྭཱ ཨོལོཀེསི, ཏཱཝདེཝ ཏཐཱརཱུཔོ པཱསཱདོ ཨུཊྛཧི. པུན ‘‘ཨིམཾ པརིཀྑིཔིཏྭཱ སཏྟརཏནམཡཱ སཏྟ པཱཀཱརཱ ཨུཊྛཧནྟཱུ’’ཏི ཙིནྟེཏྭཱ ཨོལོཀེསི, ཏཐཱརཱུཔཱ པཱཀཱརཱ ཨུཊྛཧིཾསུ. ཨཐ ‘‘ནེསཾ པརིཡནྟེ ཀཔྤརུཀྑཱ ཨུཊྛཧནྟཱུ’’ཏི ཙིནྟེཏྭཱ ཨོལོཀེསི, ཏཐཱརཱུཔཱ ཀཔྤརུཀྑཱ ཨུཊྛཧིཾསུ. ‘‘པཱསཱདསྶ ཙཏཱུསུ ཀཎྞེསུ ཙཏསྶོ ནིདྷིཀུམྦྷིཡོ ཨུཊྛཧནྟཱུ’’ཏི ཙིནྟེཏྭཱ ཨོལོཀེསི, སབྦཾ ཏཐེཝ ཨཧོསི. ནིདྷིཀུམྦྷཱིསུ པན ཨེཀཱ ཡོཛནིཀཱ ཨཧོསི, ཨེཀཱ ཏིགཱཝུཏིཀཱ, ཨེཀཱ ཨཌྜྷཡོཛནིཀཱ, ཨེཀཱ གཱཝུཏཔྤམཱཎཱ. བོདྷིསཏྟསྶ ནིབྦཏྟནིདྷིཀུམྦྷཱིནཾ པན ཨེཀམུཁཔྤམཱཎཾ ཨཧོསི, ཧེཊྛཱ པཐཝཱིཔརིཡནྟཱཝ ཨཧེསུཾ. ཛོཏིཀསྶ ནིབྦཏྟནིདྷིཀུམྦྷཱིནཾ མུཁཔརིམཱཎཾ ན ཀཐིཏཾ, སབྦཱ མུཁཚིནྣཏཱལཕལཾ ཝིཡ པརིཔུཎྞཱཝ ཨུཊྛཧིཾསུ. པཱསཱདསྶ ཙཏཱུསུ ཀཎྞེསུ ཏརུཎཏཱལཀྑནྡྷཔྤམཱཎཱ ཙཏསྶོ སུཝཎྞམཡཱ ཨུཙྪུཡཊྛིཡོ ནིབྦཏྟིཾསུ. ཏཱསཾ མཎིམཡཱནི པཏྟཱནི, སོཝཎྞམཡཱནི ཁནྡྷཱནི ཨཧེསུཾ. པུབྦཀམྨསྶ དསྶནཏྠཾ ཀིརེཏཱནི, ནིབྦཏྟིཾསུ.

སཏྟསུ དྭཱརཀོཊྛཀེསུ སཏྟ ཡཀྑཱ ཨཱརཀྑཾ གཎྷིཾསུ. པཋམེ དྭཱརཀོཊྛཀེ ཡམཀོལཱི༹ ནཱམ ཡཀྑོ ཨཏྟནོ པརིཝཱརེན ཡཀྑསཧསྶེན སདྡྷིཾ ཨཱརཀྑཾ གཎྷི, དུཏིཡེ ཨུཔྤལོ ནཱམ ཨཏྟནོ པརིཝཱརཡཀྑཱནཾ དྭཱིཧི སཧསྶེཧི སདྡྷིཾ, ཏཏིཡེ ཝཛིརོ ནཱམ ཏཱིཧི སཧསྶེཧི སདྡྷིཾ, ཙཏུཏྠེ ཝཛིརབཱཧུ ནཱམ ཙཏཱུཧི སཧསྶེཧི སདྡྷིཾ, པཉྩམེ ཀསཀནྡོ ནཱམ པཉྩཧི སཧསྶེཧི སདྡྷིཾ, ཚཊྛེ ཀཊཏྠོ ནཱམ ཚཧི སཧསྶེཧི སདྡྷིཾ, སཏྟམེ དིསཱམུཁོ ནཱམ སཏྟཧི སཧསྶེཧི སདྡྷིཾ ཨཱརཀྑཾ གཎྷི. ཨེཝཾ པཱསཱདསྶ ཨནྟོ ཙ བཧི ཙ གཱལ༹ྷརཀྑཱ ཨཧོསི. ‘‘ཛོཏིཀསྶ ཀིར སཏྟརཏནམཡོ སཏྟབྷཱུམིཀཔཱསཱདོ ཨུཊྛིཏོ, སཏྟ པཱཀཱརཱ སཏྟདྭཱརཀོཊྛཀཱ ཙཏསྶོ ནིདྷིཀུམྦྷིཡོ ཨུཊྛིཏཱ’’ཏི སུཏྭཱ བིམྦིསཱརོ རཱཛཱ སེཊྛིཙྪཏྟཾ པཧིཎི. སོ ཛོཏིཀསེཊྛི ནཱམ ཨཧོསི.

ཏེན པན སདྡྷིཾ ཀཏཔུཉྙཀམྨཱ ཨིཏྠཱི ཨུཏྟརཀུརཱུསུ ནིབྦཏྟི. ཨཐ ནཾ དེཝཏཱ ཏཏོ ཨཱནེཏྭཱ སིརིགབྦྷེ ནིསཱིདཱཔེསུཾ. སཱ ཨཱགཙྪམཱནཱ ཨེཀཾ ཏཎྜུལནཱལི༹ཾ ཏཡོ ཙ ཛོཏིཔཱསཱཎེ གཎྷི. ཏེསཾ ཡཱཝཛཱིཝཾ ཏཱཡེཝ ཏཎྜུལནཱལི༹ཡཱ བྷཏྟཾ ཨཧོསི. སཙེ ཀིར ཏེ སཀཊསཏམྤི ཏཎྜུལཱནཾ པཱུརེཏུཀཱམཱ ཧོནྟི, སཱ ཏཎྜུལནཱལི༹ ནཱལི༹ཡེཝ ཧུཏྭཱ ཏིཊྛཏི. བྷཏྟཔཙནཀཱལེ ཏཎྜུལེ ཨུཀྑལིཡཾ པཀྑིཔིཏྭཱ ཏེསཾ པཱསཱཎཱནཾ ཨུཔརི ཋཔེཏི, པཱསཱཎཱ ཏཱཝདེཝ པཛྫལིཏྭཱ བྷཏྟེ པཀྐམཏྟེ ནིབྦཱཡནྟི. ཏེནེཝ སཉྙཱཎེན བྷཏྟསྶ པཀྐབྷཱཝཾ ཛཱནནྟི. སཱུཔེཡྻཱདིཔཙནཀཱལེཔི ཨེསེཝ ནཡོ. ཨེཝཾ ཏེསཾ ཛོཏིཔཱསཱཎེཧི ཨཱཧཱརོ པཙྩཏི. མཎིཨཱལོཀེན ཙ ཝསནྟི, ཨགྒིསྶ ཝཱ དཱིཔསྶ ཝཱ ཨོབྷཱསཾ ནེཝ ཛཱནིཾསུ. ‘‘ཛོཏིཀསྶ ཀིར ཨེཝརཱུཔཱ སམྤཏྟཱི’’ཏི སཀལཛམྦུདཱིཔེ པཱཀཊོ ཨཧོསི. མཧཱཛནོ ཡཱནཱདཱིནི ཡོཛེཏྭཱ དསྶནཏྠཱཡ ཨཱགཙྪཏི. ཛོཏིཀསེཊྛི ཨཱགཏཱགཏཱནཾ ཨུཏྟརཀུརུཏཎྜུལཱནཾ བྷཏྟཾ པཙཱཔེཏྭཱ དཱཔེསི. ‘‘ཀཔྤརུཀྑེཧི ཝཏྠཱནི གཎྷནྟུ, ཨཱབྷརཎཱནི གཎྷནྟཱུ’’ཏི ཨཱཎཱཔེསི. ‘‘གཱཝུཏིཀནིདྷིཀུམྦྷིཡཱ མུཁཾ ཝིཝརཱཔེཏྭཱ ཡཱཔནམཏྟཾ དྷནཾ གཎྷནྟཱུ’’ཏི ཨཱཎཱཔེསི. སཀལཛམྦུདཱིཔཝཱསིཀེསུ དྷནཾ གཧེཏྭཱ གཙྪནྟེསུ ནིདྷིཀུམྦྷིཡཱ ཨངྒུལིམཏྟམྤི ཨཱུནཾ ནཱཧོསི. གནྡྷཀུཊིཔརིཝེཎེ ཝཱལུཀཾ ཀཏྭཱ ཨོཀིཎྞརཏནཱནཾ ཀིརསྶ ཨེསོ ནིསྶནྡོ.

ཨེཝཾ མཧཱཛནེ ཝཏྠཱབྷརཎཱནི ཙེཝ དྷནཉྩ ཡདིཙྪཀཾ ཨཱདཱཡ གཙྪནྟེ བིམྦིསཱརོ ཏསྶ པཱསཱདཾ དཊྛུཀཱམོཔི མཧཱཛནེ ཨཱགཙྪནྟེ ཨོཀཱསཾ ནཱལཏྠ. ཨཔརབྷཱགེ ཡདིཙྪཀཾ ཨཱདཱཡ གཏཏྟཱ མནུསྶེསུ མནྡཱིབྷཱུཏེསུ རཱཛཱ ཛོཏིཀསྶ པིཏརཾ ཨཱཧ – ‘‘ཏཝ པུཏྟསྶ པཱསཱདཾ དཊྛུཀཱམམྷཱ’’ཏི. སོ ‘‘སཱདྷུ, དེཝཱ’’ཏི ཝཏྭཱ གནྟྭཱ པུཏྟསྶ ཀཐེསི – ‘‘ཏཱཏ, རཱཛཱ ཏེ པཱསཱདཾ དཊྛུཀཱམོ’’ཏི. ‘‘སཱདྷུ, ཏཱཏ, ཨཱགཙྪཏཱུ’’ཏི. རཱཛཱ མཧནྟེན པརིཝཱརེན ཏཏྠ ཨགམཱསི. པཋམདྭཱརཀོཊྛཀེ སམྨཛྫིཏྭཱ ཀཙཝརཚཌྜིཀཱ དཱསཱི རཉྙོ ཧཏྠཾ ཨདཱསི, རཱཛཱ ‘‘སེཊྛིཛཱཡཱ’’ཏི སཉྙཱཡ ལཛྫམཱནོ ཏསྶཱ བཱཧཱཡ ཧཏྠཾ ན ཋཔེསི. ཨེཝཾ སེསདྭཱརཀོཊྛཀེསུཔི དཱསིཡོ ‘‘སེཊྛིབྷརིཡཱཡོ’’ཏི མཉྙམཱནོ ཏཱསཾ བཱཧཱཡ ཧཏྠཾ ན ཋཔེསི. ཛོཏིཀོ ཨཱགནྟྭཱ རཱཛཱནཾ པཙྩུགྒནྟྭཱ ཝནྡིཏྭཱ པཙྪཏོ ཧུཏྭཱ ‘‘པུརཏོ ཡཱཐ, དེཝཱ’’ཏི ཨཱཧ. རཉྙོ མཎིཔཐཝཱི སཏཔོརིསཔཔཱཏོ ཝིཡ ཧུཏྭཱ ཨུཔཊྛཧི. སོ ‘‘ཨིམིནཱ མམ གཧཎཏྠཱཡ ཨོཔཱཏོ ཁཎིཏོ’’ཏི མཉྙམཱནོ པཱདཾ ནིཀྑིཔིཏུཾ ན ཝིསཧི. ཛོཏིཀོ ‘‘ནཱཡཾ, དེཝ, ཨོཔཱཏོ, མམ པཙྪཏོ ཨཱགཙྪཐཱ’’ཏི པུརཏོ ཨཧོསི. རཱཛཱ ཏེན ཨཀྐནྟཀཱལེ བྷཱུམིཾ ཨཀྐམིཏྭཱ ཧེཊྛིམཏལཏོ པཊྛཱཡ པཱསཱདཾ ཨོལོཀེནྟོ ཝིཙརི. ཏདཱ ཨཛཱཏསཏྟུཀུམཱརོཔི པིཏུ ཨངྒུལིཾ གཧེཏྭཱ ཝིཙརནྟོ ཙིནྟེསི – ‘‘ཨཧོ ཨནྡྷབཱལོ མམ པིཏཱ, གཧཔཏིཀེ ནཱམ སཏྟརཏནམཡེ པཱསཱདེ ཝསནྟེ ཨེས རཱཛཱ ཧུཏྭཱ དཱརུམཡེ གེཧེ ཝསཏི, ཨཧཾ དཱནི རཱཛཱ ཧུཏྭཱ ཨིམསྶ ཨིམསྨིཾ པཱསཱདེ ཝསིཏུཾ ན དསྶཱམཱི’’ཏི.

རཉྙོཔི ཨུཔརིམཏལཱནི ཨབྷིརུཧནྟསྶེཝ པཱཏརཱསཝེལཱ ཛཱཏཱ. སོ སེཊྛིཾ ཨཱམནྟེཏྭཱ, ‘‘མཧཱསེཊྛི, ཨིདྷེཝ པཱཏརཱསཾ བྷུཉྫིསྶཱམཱ’’ཏི. ཛཱནཱམི, དེཝ, སཛྫིཏོ དེཝསྶཱཧཱརོཏི. སོ སོལ༹སཧི གནྡྷོདཀགྷཊེཧི ནྷཏྭཱ རཏནམཡེ སེཊྛིསྶ ནིསཱིདནམཎྜཔེ པཉྙཏྟེ ཏསྶེཝ ནིསཱིདནཔལླངྐེ ནིསཱིདི. ཨཐསྶ ཧཏྠདྷོཝནཱུདཀཾ དཏྭཱ སཏསཧསྶགྒྷནིཀཱཡ སུཝཎྞཔཱཏིཡཱ ཀིལིནྣཔཱཡཱསཾ ཝཌྜྷེཏྭཱ པུརཏོ ཋཔཡིཾསུ. རཱཛཱ ‘‘བྷོཛན’’ནྟི སཉྙཱཡ བྷུཉྫིཏུཾ ཨཱརབྷི. སེཊྛི ‘‘ནཡིདཾ, དེཝ, བྷོཛནཾ, ཀིལིནྣཔཱཡཱསོ ཨེསོ’’ཏི ཨཉྙིསྶཱ སུཝཎྞཔཱཏིཡཱ བྷོཛནཾ ཝཌྜྷེཏྭཱ པུརིམཔཱཏིཡཾ ཋཔཡིཾསུ. ཏཏོ ཨུཊྛིཏཨུཏུནཱ ཀིར ཏཾ བྷུཉྫིཏུཾ སུཁཾ ཧོཏི. རཱཛཱ མདྷུརབྷོཛནཾ བྷུཉྫནྟོ པམཱཎཾ ན ཨཉྙཱསི. ཨཐ ནཾ སེཊྛི ཝནྡིཏྭཱ ཨཉྫལིཾ པགྒཡ྄ཧ ‘‘ཨལཾ, དེཝ, ཨེཏྟཀམེཝ ཧོཏུ, ཨིཏོ ཨུཏྟརིཾ ཛིརཱཔེཏུཾ ན སཀྐཱ’’ཏི ཨཱཧ. ཨཐ ནཾ རཱཛཱ ཨཱཧ – ‘‘ཀིཾ, གཧཔཏི, གརུཀཾ ཀཏྭཱ ཀཐེསི ཨཏྟནོ བྷཏྟ’’ནྟི? དེཝ, ནཏྠེཏཾ, ཏུམྷཱཀཾ སབྦསྶཱཔི ཧི བལཀཱཡསྶ ཨིདམེཝ བྷཏྟཾ ཨིདཾ སུཔེཡྻཾ. ཨཔི ཙ ཁོ ཨཧཾ ཨཡསསྶ བྷཱཡཱམཱིཏི. ཀིཾ ཀཱརཎཱཏི? སཙེ དེཝསྶ ཀཱཡཱལསིཡམཏྟཾ བྷཝེཡྻ, ‘‘ཧིཡྻོ རཉྙཱ སེཊྛིསྶ གེཧེ བྷཏྟཾ བྷུཏྟཾ, སེཊྛིནཱ ཀིཉྩི ཀཏཾ བྷཝིསྶཏཱི’’ཏི ཝཙནསྶ བྷཱཡཱམི, དེཝཱཏི. ཏེན ཧི བྷཏྟཾ ཧར, ཨུདཀཾ ཨཱཧརཱཏི. རཉྙོ བྷཏྟཀིཙྩཱཝསཱནེ སབྦོ རཱཛཔརིཝཱརོ ཏདེཝ བྷཏྟཾ པརིབྷུཉྫི.

རཱཛཱ སུཁཀཐཱཡ ནིསིནྣོ སེཊྛིཾ ཨཱམནྟེཏྭཱ, ‘‘ཀིཾ ཨིམསྨིཾ གེཧེ སེཊྛིབྷརིཡཱ ནཏྠཱི’’ཏི ཨཱཧ? ‘‘ཨཱམ ཨཏྠི, དེཝཱ’’ཏི. ‘‘ཀཧཾ སཱ’’ཏི? ‘‘སིརིགབྦྷེ ནིསིནྣཱ, དེཝསྶ ཨཱགཏབྷཱཝཾ ན ཛཱནཱཏཱི’’ཏི. ཀིཉྩཱཔི ཧི པཱཏོཝ རཱཛཱ སཔརིཝཱརོ ཨཱགཏོ, སཱ པནསྶ ཨཱགཏབྷཱཝཾ ན ཛཱནཱཏེཝ. ཏཏོ སེཊྛི ‘‘རཱཛཱ མེ བྷརིཡཾ དཊྛུཀཱམོ’’ཏི ཏསྶཱ སནྟིཀཾ གནྟྭཱ ‘‘རཱཛཱ ཨཱགཏོ, ཀིཾ ཏཝ རཱཛཱནཾ དཊྛུཾ ན ཝཊྚཏཱི’’ཏི ཨཱཧ. སཱ ནིཔནྣཀཱཝ ‘‘ཀོ ཨེས, སཱམི, རཱཛཱ ནཱམཱ’’ཏི ཝཏྭཱ ‘‘རཱཛཱ ནཱམ ཨམྷཱཀཾ ཨིསྶརོ’’ཏི ཝུཏྟེ ཨནཏྟམནཏཾ པཝེདེནྟཱི ‘‘དུཀྐཊཱནི ཝཏ ནོ པུཉྙཀམྨཱནི, ཡེསཾ ནོ ཨིསྶརོཔི ཨཏྠི. ཨསྶདྡྷཱཡ ནཱམ པུཉྙཀམྨཱནི ཀཏྭཱ མཡཾ སམྤཏྟིཾ པཱཔུཎིཏྭཱ ཨཉྙསྶ ཨིསྶརིཡཊྛཱནེ ནིབྦཏྟམྷཱ. ཨདྡྷཱ ཨམྷེཧི ཨསདྡཧིཏྭཱ དཱནཾ དིནྣཾ བྷཝིསྶཏི, ཏསྶེཏཾ ཕལ’’ནྟི ཝཏྭཱ ‘‘ཀིཾ དཱནི ཀརོམི, སཱམཱི’’ཏི ཨཱཧ. ཏཱལཝཎྚཾ ཨཱདཱཡ ཨཱགནྟྭཱ རཱཛཱནཾ བཱིཛཱཧཱིཏི. ཏསྶཱ ཏཱལཝཎྚཾ ཨཱདཱཡ ཨཱགནྟྭཱ རཱཛཱནཾ བཱིཛེནྟིཡཱ རཉྙོ ཝེཋནསྶ གནྡྷཝཱཏོ ཨཀྑཱིནི པཧརི, ཨཐསྶཱ ཨཀྑཱིཧི ཨསྶུདྷཱརཱ པཝཏྟིཾསུ. ཏཾ དིསྭཱ རཱཛཱ སེཊྛིཾ ཨཱཧ – ‘‘མཧཱསེཊྛི, མཱཏུགཱམོ ནཱམ ཨཔྤབུདྡྷིཀོ, ‘རཱཛཱ མེ སཱམིཀསྶ སམྤཏྟིཾ གཎྷེཡྻཱ’ཏི བྷཡེན རོདཏི མཉྙེ, ཨསྶཱསེཧི ནཾ ‘ན མེ ཏཝ སམྤཏྟིཡཱ ཨཏྠོ’’’ཏི. ན ཨེསཱ, དེཝ, རོདཏཱིཏི. ཨཐ ཀིཾ ཨེཏནྟི? ཏུམྷཱཀཾ ཝེཋནགནྡྷེནསྶཱ ཨསྶཱུནི པཝཏྟིཾསུ. ཨཡཉྷི དཱིཔོབྷཱསཾ ཝཱ ཨགྒིཨོབྷཱསཾ ཝཱ ཨདིསྭཱ མཎིཨཱལོཀེནེཝ བྷུཉྫཏི ཙ ནིསཱིདཏི ཙ ནིཔཛྫཏི ཙ, དེཝོ པན དཱིཔཱལོཀེན ནིསིནྣོ བྷཝིསྶཏཱིཏི? ཨཱམ, སེཊྛཱིཏི. ཏེན ཧི, དེཝ, ཨཛྫ པཊྛཱཡ མཎིཨཱལོཀེན ནིསཱིདཐཱཏི མཧནྟཾ ཏིཔུསམཏྟཾ ཨནགྒྷཾ མཎིརཏནཾ ཨདཱསི. རཱཛཱ གེཧཾ ཨོལོཀེཏྭཱ ‘‘མཧཏཱི ཝཏ ཛོཏིཀསྶ སམྤཏྟཱི’’ཏི ཝཏྭཱ ཨགམཱསི. ཨཡཾ ཏཱཝ ཛོཏིཀསྶ ཨུཔྤཏྟི.

ཨིདཱནི ཛཊིལསྶ ཨུཔྤཏྟི ཝེདིཏབྦཱ – བཱརཱཎསིཡཉྷི ཨེཀཱ སེཊྛིདྷཱིཏཱ ཨབྷིརཱུཔཱ ཨཧོསི, ཏཾ པནྣརསསོལ༹སཝསྶུདྡེསིཀཀཱལེ རཀྑཎཏྠཱཡ ཨེཀཾ དཱསིཾ དཏྭཱ སཏྟབྷཱུམིཀསྶ པཱསཱདསྶ ཨུཔརིམཏལེ སིརིགབྦྷེ ཝཱསཡིཾསུ. ཏཾ ཨེཀདིཝསཾ ཝཱཏཔཱནཾ ཝིཝརིཏྭཱ བཧི ཨོལོཀཡམཱནཾ ཨཱཀཱསེན གཙྪནྟོ ཨེཀོ ཝིཛྫཱདྷརོ དིསྭཱ ཨུཔྤནྣསིནེཧོ ཝཱཏཔཱནེན པཝིསིཏྭཱ ཏཱཡ སདྡྷིཾ སནྠཝམཀཱསི. སཱ ཏེན སདྡྷིཾ སཾཝཱསམནྭཱཡ ན ཙིརསྶེཝ གབྦྷཾ པཊིལབྷི. ཨཐ ནཾ སཱ དཱསཱི དིསྭཱ, ‘‘ཨམྨ, ཀིཾ ཨིད’’ནྟི ཝཏྭཱ ‘‘ཧོཏུ མཱ ཀསྶཙི ཨཱཙིཀྑཱི’’ཏི ཏཱཡ ཝུཏྟཱ བྷཡེན ཏུཎྷཱི ཨཧོསི. སཱཔི དསམཱསཙྩཡེན པུཏྟཾ ཝིཛཱཡིཏྭཱ ནཝབྷཱཛནཾ ཨཱཧརཱཔེཏྭཱ ཏཏྠ ཏཾ དཱརཀཾ ནིཔཛྫཱཔེཏྭཱ ཏཾ བྷཱཛནཾ པིདཧིཏྭཱ ཨུཔརི པུཔྥདཱམཱནི ཋཔེཏྭཱ ‘‘ཨིམཾ སཱིསེན ཨུཀྑིཔིཏྭཱ གངྒཱཡ ཝིསྶཛྫེཧི, ‘ཀིཾ ཨིད’ནྟི ཙ པུཊྛཱ ‘ཨཡྻཱཡ མེ བལིཀམྨ’ནྟི ཝདེཡྻཱསཱི’’ཏི དཱསིཾ ཨཱཎཱཔེསི. སཱ ཏཐཱ ཨཀཱསི.

ཧེཊྛཱགངྒཱཡམྤི དྭེ ཨིཏྠིཡོ ནྷཱཡམཱནཱ ཏཾ བྷཱཛནཾ ཨུདཀེནཱཧརིཡམཱནཾ དིསྭཱ ཨེཀཱ ‘‘མཡ྄ཧེཏཾ བྷཱཛན’’ནྟི ཨཱཧ. ཨེཀཱ ‘‘ཡཾ ཨེཏསྶ ཨནྟོ, ཏཾ མཡ྄ཧ’’ནྟི ཝཏྭཱ བྷཱཛནེ སམྤཏྟེ ཏཾ ཨཱདཱཡ ཐལེ ཋཔེཏྭཱ ཝིཝརིཏྭཱ དཱརཀཾ དིསྭཱ ཨེཀཱ ‘‘མམ བྷཱཛནནྟི ཝུཏྟཏཱཡ དཱརཀོ མམེཝ ཧོཏཱི’’ཏི ཨཱཧ. ཨེཀཱ ‘‘ཡཾ བྷཱཛནསྶ ཨནྟོ, ཏཾ མམེཝ ཧོཏཱུཏི ཝུཏྟཏཱཡ མམ དཱརཀོ’’ཏི ཨཱཧ. ཏཱ ཝིཝདམཱནཱ ཝིནིཙྪཡཊྛཱནཾ གནྟྭཱ ཏམཏྠཾ ཨཱརོཙེཏྭཱ ཨམཙྩེསུ ཝིནིཙྪིཏུཾ ཨསཀྐོནྟེསུ རཉྙོ སནྟིཀཾ ཨགམཾསུ. རཱཛཱ ཏཱསཾ ཝཙནཾ སུཏྭཱ ‘‘ཏྭཾ དཱརཀཾ གཎྷ, ཏྭཾ བྷཱཛནཾ གཎྷཱ’’ཏི ཨཱཧ. ཡཱཡ པན དཱརཀོ ལདྡྷོ, སཱ མཧཱཀཙྩཱནཏྠེརསྶ ཨུཔཊྛཱཡིཀཱ ཨཧོསི. ཏསྨཱ སཱ དཱརཀཾ ‘‘ཨིམཾ ཐེརསྶ སནྟིཀེ པབྦཱཛེསྶཱམཱི’’ཏི པོསེསི. ཏསྶ ཛཱཏདིཝསེ གབྦྷམལསྶ དྷོཝིཏྭཱ ཨནཔནཱིཏཏཱཡ ཀེསཱ ཛཊིཏཱ ཧུཏྭཱ ཨཊྛཾསུ, ཏེནསྶ ཛཊིལོཏྭེཝ ནཱམཾ ཀརིཾསུ. ཏསྶ པདསཱ ཝིཙརཎཀཱལེ ཐེརོ ཏཾ གེཧཾ པིཎྜཱཡ པཱཝིསི. ཨུཔཱསིཀཱ ཐེརཾ ནིསཱིདཱཔེཏྭཱ ཨཱཧཱརམདཱསི. ཐེརོ དཱརཀཾ དིསྭཱ ‘‘ཀིཾ ཨུཔཱསིཀེ དཱརཀོ ལདྡྷོ’’ཏི པུཙྪི. ‘‘ཨཱམ, བྷནྟེ, ཨིམཱཧཾ དཱརཀཾ ཏུམྷཱཀཾ སནྟིཀེ པབྦཱཛེསྶཱམཱིཏི པོསེསིཾ, པབྦཱཛེཐ ན’’ནྟི ཨདཱསི. ཐེརོ ‘‘སཱདྷཱུ’’ཏི ཨཱདཱཡ ཏཾ གཙྪནྟོ ‘‘ཨཏྠི ནུ ཁོ ཨིམསྶ གིཧིསམྤཏྟིཾ ཨནུབྷཝིཏུཾ པུཉྙཀམྨ’’ནྟི ཨོལོཀེནྟོ ‘‘མཧཱཔུཉྙོ སཏྟོ མཧཱསམྤཏྟིཾ ཨནུབྷཝིསྶཏི, དཧརོ ཨེས ཏཱཝ, ཉཱཎམྤིསྶ པརིཔཱཀཾ ན གཙྪཏཱི’’ཏི ཙིནྟེཏྭཱ ཏཾ ཨཱདཱཡ ཏཀྐསིལཱཡཾ ཨེཀསྶ ཨུཔཊྛཱཀསྶ གེཧཾ ཨགམཱསི.

སོ ཐེརཾ ཝནྡིཏྭཱ ཋིཏོ ཏཾ དཱརཀཾ དིསྭཱ ‘‘དཱརཀོ ཝོ, བྷནྟེ, ལདྡྷོ’’ཏི པུཙྪི. ཨཱམ, ཨུཔཱསཀ, པབྦཛིསྶཏི, དཧརོ ཏཱཝ, ཏཝེཝ སནྟིཀེ ཧོཏཱུཏི. སོ ‘‘སཱདྷུ, བྷནྟེ’’ཏི ཏཾ པུཏྟཊྛཱནེ ཋཔེཏྭཱ པཊིཛགྒི. ཏསྶ པན གེཧེ དྭཱདས ཝསྶཱནི བྷཎྜཀཾ ཨུསྶནྣཾ ཧོཏི. སོ གཱམནྟརཾ གཙྪནྟོ སབྦམྤི ཏཾ བྷཎྜཾ ཨཱཔཎཾ ཧརིཏྭཱ དཱརཀཾ ཨཱཔཎེ ནིསཱིདཱཔེཏྭཱ ཏསྶ ཏསྶ བྷཎྜཀསྶ མཱུལཾ ཨཱཙིཀྑིཏྭཱ ‘‘ཨིདཉྩ ཨིདཉྩ ཨེཏྟཀཾ ནཱམ དྷནཾ གཧེཏྭཱ དདེཡྻཱསཱི’’ཏི ཝཏྭཱ པཀྐཱམི. ཏཾདིཝསཾ ནགརཔརིགྒཱཧིཀཱ དེཝཏཱ ཨནྟམསོ མརིཙཛཱིརཀམཏྟེནཱཔི ཨཏྠིཀེ ཏསྶེཝ ཨཱཔཎཱབྷིམུཁེ ཀརིཾསུ. སོ དྭཱདས ཝསྶཱནི ཨུསྶནྣཾ བྷཎྜཀཾ ཨེཀདིཝསེནེཝ ཝིཀྐིཎི. ཀུཊུམྦིཀོ ཨཱགནྟྭཱ ཨཱཔཎེ ཀིཉྩི ཨདིསྭཱ ‘‘སབྦཾ ཏེ, ཏཱཏ, བྷཎྜཀཾ ནཱསིཏ’’ནྟི ཨཱཧ. ན ནཱསེམི, སབྦཾ ཏུམྷེཧི ཝུཏྟནཡེནེཝ ཝིཀྐིཎིཾ, ཨིདཾ ཨསུཀསྶ མཱུལཾ, ཨིདཾ ཨསུཀསྶཱཏི. ཀུཊུམྦིཀོ པསཱིདིཏྭཱ ‘‘ཨནགྒྷོ པུརིསོ, ཡཏྠ ཀཏྠཙི ཛཱིཝིཏུཾ སམཏྠོ’’ཏི ཨཏྟནོ གེཧེ ཝཡཔྤཏྟཾ དྷཱིཏརཾ ཏསྶ དཏྭཱ ‘‘གེཧམསྶ ཀརོཐཱ’’ཏི པུརིསེ ཨཱཎཱཔེཏྭཱ ནིཊྛིཏེ གེཧེ ‘‘གཙྪཐ, ཏུམྷེ ཨཏྟནོ གེཧེ ཝསཐཱ’’ཏི ཨཱཧ.

ཨཐསྶ གེཧཔཝིསནཀཱལེ ཨེཀེན པཱདེན ཨུམྨཱརེ ཨཀྐནྟམཏྟེ གེཧསྶ པཙྪིམབྷཱགེ བྷཱུམིཾ བྷིནྡིཏྭཱ ཨསཱིཏིཧཏྠོ སུཝཎྞཔབྦཏོ ཨུཊྛཧི. རཱཛཱ ‘‘ཛཊིལཀུམཱརསྶ ཀིར གེཧེ བྷཱུམིཾ བྷིནྡིཏྭཱ སུཝཎྞཔབྦཏོ ཨུཊྛིཏོ’’ཏི སུཏྭཱཝ ཏསྶ སེཊྛིཙྪཏྟཾ པེསེསི. སོ ཛཊིལསེཊྛི ནཱམ ཨཧོསི. ཏསྶ ཏཡོ པུཏྟཱ ཨཧེསུཾ. སོ ཏེསཾ ཝཡཔྤཏྟཀཱལེ པབྦཛྫཱཡ ཙིཏྟཾ ཨུཔྤཱདེཏྭཱ ‘‘སཙེ ཨམྷེཧི སམཱནབྷོགཾ སེཊྛིཀུལཾ བྷཝིསྶཏི, པབྦཛིཏུཾ དསྶནྟི. ནོ ཙེ, ན དསྶནྟི. ཨཏྠི ནུ ཁོ ཛམྦུདཱིཔེ ཨམྷེཧི སམཱནབྷོགཾ ཀུལ’’ནྟི ཝཱིམཾསནཏྠཱཡ སུཝཎྞམཡཾ ཨིཊྛཀཾ སུཝཎྞམཡཾ པཏོདལཊྛིཾ སུཝཎྞམཡཾ པཱདུཀཉྩ ཀཱརཱཔེཏྭཱ པུརིསཱནཾ ཧཏྠེ དཏྭཱ ‘‘གཙྪཐ, ཨིམཱནི ཨཱདཱཡ ཀིཉྩིདེཝ ཨོལོཀཡམཱནཱ ཝིཡ ཛམྦུདཱིཔཏལེ ཝིཙརིཏྭཱ ཨམྷེཧི སམཱནབྷོགསྶ སེཊྛིཀུལསྶ ཨཏྠིབྷཱཝཾ ཝཱ ནཏྠིབྷཱཝཾ ཝཱ ཉཏྭཱ ཨཱགཙྪཐཱ’’ཏི པཧིཎི.

ཏེ ཙཱརིཀཾ ཙརནྟཱ བྷདྡིཡནགརཾ པཱཔུཎིཾསུ. ཨཐ ནེ མེཎྜཀསེཊྛི དིསྭཱ, ‘‘ཏཱཏཱ, ཀིཾ ཀརོནྟཱ ཝིཙརཐཱ’’ཏི པུཙྪིཏྭཱ ‘‘ཨེཀཾ ཨོལོཀེནྟཱ ཝིཙརཱམཱ’’ཏི ཝུཏྟེ ‘‘ཨིམེསཾ ཨིམཱནི གཧེཏྭཱ ཀིཉྩིདེཝ ཨོལོཀེཏུཾ ཝིཙརཎཀིཙྩཾ ནཏྠི, རཊྛཾ པརིགྒཎྷམཱནཱ ཝིཙརནྟཱི’’ཏི ཉཏྭཱ, ‘‘ཏཱཏཱ, ཨམྷཱཀཾ པཙྪིམགེཧཾ པཝིསིཏྭཱ ཨོལོཀེཐཱ’’ཏི ཨཱཧ. ཏེ ཏཏྠ ཨཊྛཀརཱིསམཏྟེ ཋཱནེ ཧཏྠིཨསྶཨུསབྷཔྤམཱཎེ པིཊྛིཡཱ པིཊྛིཾ ཨཱཧཙྩ པཐཝིཾ བྷིནྡིཏྭཱ ཨུཊྛིཏེ ཧེཊྛཱ ཝུཏྟཔྤཀཱརེ སུཝཎྞམེཎྜཀེ དིསྭཱ ཏེསཾ ཨནྟརནྟརཱ ཝིཙརིཏྭཱ ནིཀྑམིཾསུ. ཨཐ ནེ སེཊྛི, ‘‘ཏཱཏཱ, ཡཾ ཨོལོཀེནྟཱ ཝིཙརཐ, དིཊྛོ ཝོ སོ’’ཏི པུཙྪིཏྭཱ ‘‘པསྶཱམ, སཱམཱི’’ཏི ཝུཏྟེ ‘‘ཏེན ཧི གཙྪཐཱ’’ཏི ཨུཡྻོཛེསི. ཏེ ཏཏོཝ གནྟྭཱ ཨཏྟནོ སེཊྛིནཱ ‘‘ཀིཾ, ཏཱཏཱ, དིཊྛཾ ཝོ ཨམྷཱཀཾ སམཱནབྷོགཾ སེཊྛིཀུལ’’ནྟི ཝུཏྟེ, ‘‘སཱམི, ཏུམྷཱཀཾ ཀིཾ ཨཏྠི, བྷདྡིཡནགརེ མེཎྜཀསེཊྛིནོ ཨེཝརཱུཔོ ནཱམ ཝིབྷཝོ’’ཏི སབྦཾ ཏཾ པཝཏྟིཾ ཨཱཙིཀྑིཾསུ. ཏཾ སུཏྭཱ སེཊྛི ཨཏྟམནོ ཧུཏྭཱ ‘‘ཨེཀཾ ཏཱཝ སེཊྛིཀུལཾ ལདྡྷཾ, ཨཔརམྤི ནུ ཁོ ཨཏྠཱི’’ཏི སཏསཧསྶགྒྷནིཀཾ ཀམྦལཾ དཏྭཱ ‘‘གཙྪཐ, ཏཱཏཱ, ཨཉྙམྤི. སེཊྛིཀུལཾ ཝིཙིནཐཱ’’ཏི པཧིཎི.

ཏེ རཱཛགཧཾ གནྟྭཱ ཛོཏིཀསེཊྛིསྶ གེཧཏོ ཨཝིདཱུརེ དཱརུརཱསིཾ ཀཏྭཱ ཨགྒིཾ དཏྭཱ ཨཊྛཾསུ. ‘‘ཀིཾ ཨིད’’ནྟི པུཊྛཀཱལེ ཙ ‘‘ཨེཀཾ ནོ མཧགྒྷཀམྦལཾ ཝིཀྐིཎནྟཱནཾ ཀཡིཀོ ནཏྠི, གཧེཏྭཱ ཝིཙརནྟཱཔི ཙོརཱནཾ བྷཱཡཱམ, ཏེན ཏཾ ཛྷཱཔེཏྭཱ གམིསྶཱམཱ’’ཏི ཝདིཾསུ. ཨཐ ནེ ཛོཏིཀསེཊྛི དིསྭཱ ‘‘ཨིམེ ཀིཾ ཀརོནྟཱི’’ཏི པུཙྪིཏྭཱ ཏམཏྠཾ སུཏྭཱ པཀྐོསཱཔེཏྭཱ ‘‘ཀིཾ ཨགྒྷནཀོ ཀམྦལོ’’ཏི པུཙྪི. ‘‘སཏསཧསྶགྒྷནཀོ’’ཏི ཝུཏྟེ སཏསཧསྶཾ དཱཔེཏྭཱ ‘‘དྭཱརཀོཊྛཀཾ སམྨཛྫིཏྭཱ ཀཙཝརཚཌྜིཀཱཡ དཱསིཡཱ དེཐཱ’’ཏི ཏེསཾཡེཝ ཧཏྠེ པཧིཎི. སཱ ཀམྦལཾ གཧེཏྭཱ རོདམཱནཱ སཱམིཀསྶ སནྟིཀཾ ཨཱགནྟྭཱ ‘‘ཀིཾ མཾ, སཱམི, ཨཔརཱདྷེ སཏི པཧརིཏུཾ ན ཝཊྚཏི, ཀསྨཱ མེ ཨེཝརཱུཔཾ ཐཱུལཀམྦལཾ པཧིཎིཏྠ, ཀཐཱཧཾ ཨིམཾ ནིཝཱསེསྶཱམི ཝཱ པཱརུཔིསྶཱམི ཝཱ’’ཏི. ནཱཧཾ ཏཝ ཨེཏདཏྠཱཡ པཧིཎིཾ, ཨེཏཾ པན པལིཝེཋེཏྭཱ ཏཝ སཡནཔཱདམཱུལེ ཋཔེཏྭཱ ནིཔཛྫནཀཱལེ གནྡྷོདཀེན དྷོཏཱནཾ པཱདཱནཾ པུཉྪནཏྠཱཡ ཏེ པཧིཎིཾ, ཀིཾ ཨེཏམྤི ཀཱཏུཾ ན སཀྐོསཱིཏི. སཱ ‘‘ཨེཏཾ པན ཀཱཏུཾ སཀྑིསྶཱམཱི’’ཏི གཧེཏྭཱ ཨགམཱསི. ཏེ ཙ པུརིསཱ ཏཾ ཀཱརཎཾ དིསྭཱ ཨཏྟནོ སེཊྛིསྶ སནྟིཀཾ གནྟྭཱ ‘‘ཀིཾ, ཏཱཏཱ, དིཊྛཾ ཝོ སེཊྛིཀུལ’’ནྟི ཝུཏྟེ, ‘‘སཱམི, ཀིཾ ཏུམྷཱཀཾ ཨཏྠི, རཱཛགཧནགརེ ཛོཏིཀསེཊྛིསྶ ཨེཝརཱུཔཱ ནཱམ སམྤཏྟཱི’’ཏི སབྦཾ གེཧསམྤཏྟིཾ ཨཱརོཙེཏྭཱ ཏཾ པཝཏྟིཾ ཨཱཙིཀྑིཾསུ. སེཊྛི ཏེསཾ ཝཙནཾ སུཏྭཱ ཏུཊྛམཱནསོ ‘‘ཨིདཱནི པབྦཛིཏུཾ ལབྷིསྶཱམཱི’’ཏི རཉྙོ སནྟིཀཾ གནྟྭཱ ‘‘པབྦཛིཏུཀཱམོམྷི, དེཝཱ’’ཏི ཨཱཧ. སཱདྷུ, མཧཱསེཊྛི, པབྦཛཱཧཱིཏི. སོ གེཧཾ གནྟྭཱ པུཏྟེ པཀྐོསཱཔེཏྭཱ སུཝཎྞདཎྜཾ ཝཛིརཀུདྡཱལཾ ཛེཊྛཔུཏྟསྶ ཧཏྠེ ཋཔེཏྭཱ, ‘‘ཏཱཏ, པཙྪིམགེཧེ སུཝཎྞཔབྦཏཏོ སུཝཎྞཔིཎྜཾ ཨུདྡྷརཱཧཱི’’ཏི ཨཱཧ. སོ ཀུདྡཱལཾ ཨཱདཱཡ གནྟྭཱ སུཝཎྞཔབྦཏཾ པཧརི, པིཊྛིཔཱསཱཎེ པཧཊཀཱལོ ཝིཡ ཨཧོསི. ཏསྶ ཧཏྠཏོ ཀུདྡཱལཾ གཧེཏྭཱ མཛ྄ཛྷིམཔུཏྟསྶ ཧཏྠེ དཏྭཱ པཧིཎི, ཏསྶཔི སུཝཎྞཔབྦཏཾ པཧརནྟསྶ པིཊྛིཔཱསཱཎེ པཧཊཀཱལོ ཝིཡ ཨཧོསི. ཨཐ ནཾ ཀནིཊྛཔུཏྟསྶ ཧཏྠེ དཏྭཱ པཧིཎི, ཏསྶ ཏཾ གཧེཏྭཱ པཧརནྟསྶ ཀོཊྚེཏྭཱ རཱསིཀཏཱཡ མཏྟིཀཱཡ པཧཊཀཱལོ ཝིཡ ཨཧོསི. ཨཐ ནཾ སེཊྛི ‘‘ཨེཧི, ཏཱཏ, ཨལཾ ཨེཏྟཀེནཱ’’ཏི ཝཏྭཱ ཨིཏརེ དྭེ ཛེཊྛབྷཱཏིཀེ པཀྐོསཱཔེཏྭཱ ‘‘ཨཡཾ སུཝཎྞཔབྦཏོ ན ཏུམྷཱཀཾ ནིབྦཏྟོ, མཡ྄ཧཉྩ ཀནིཊྛསྶ ཙ ནིབྦཏྟོ, ཨིམིནཱ སདྡྷིཾ ཨེཀཏོ ཧུཏྭཱ པརིབྷུཉྫཐཱ’’ཏི ཨཱཧ. ཀསྨཱ པན སོ ཏེསམེཝ ནིབྦཏྟཏི, ཀསྨཱ ཙ ཛཊིལོ ཛཱཏཀཱལེ ཨུདཀེ པཱཏིཏོཏི? ཨཏྟནོ ཀཏཀམྨེནེཝ.

ཀསྶཔསམྨཱསམྦུདྡྷསྶ ཧི ཙེཏིཡེ ཀརིཡམཱནེ ཨེཀོ ཁཱིཎཱསཝོ ཙེཏིཡཊྛཱནཾ གནྟྭཱ ཨོལོཀེཏྭཱ, ‘‘ཏཱཏཱ, ཀསྨཱ ཙེཏིཡསྶ ཨུཏྟརེན མུཁཾ ན ཨུཊྛཧཏཱི’’ཏི པུཙྪི. ‘‘སུཝཎྞཾ ནཔྤཧོཏཱི’’ཏི ཨཱཧཾསུ. ཨཧཾ ཨནྟོགཱམཾ པཝིསིཏྭཱ སམཱདཔེསྶཱམི, ཏུམྷེ ཨཱདརེན ཀམྨཾ ཀརོཐཱཏི. སོ ཨེཝཾ ཝཏྭཱ ནགརཾ པཝིསིཏྭཱ, ‘‘ཨམྨཱ, ཏཱཏཱ, ཏུམྷཱཀཾ ཙེཏིཡསྶ ཨེཀསྨིཾ མུཁེ སུཝཎྞཾ ནཔྤཧོཏི, སུཝཎྞཾ ཛཱནཱཐཱ’’ཏི མཧཱཛནཾ སམཱདཔེནྟོ སུཝཎྞཀཱརཀུལཾ ཨགམཱསི. སུཝཎྞཀཱརོཔི ཏངྑཎེཡེཝ བྷརིཡཱཡ སདྡྷིཾ ཀལཧཾ ཀརོནྟོ ནིསིནྣོ ཧོཏི. ཨཐ ནཾ ཐེརོ ‘‘ཙེཏིཡེ ཏུམྷེཧི གཧིཏམུཁསྶ སུཝཎྞཾ ནཔྤཧོཏི, ཏཾ ཛཱནིཏུཾ ཝཊྚཏཱི’’ཏི ཨཱཧ. སོ བྷརིཡཱཡ ཀོཔེན ‘‘ཏཝ སཏྠཱརཾ ཨུདཀེ ཁིཔིཏྭཱ གཙྪཱ’’ཏི ཨཱཧ. ཨཐ ནཾ སཱ ‘‘ཨཏིསཱཧསིཀཀམྨཾ ཏེ ཀཏཾ, མམ ཀུདྡྷེན ཏེ ཨཧམེཝ ཨཀྐོསིཏབྦཱ ཝཱ པཧརིཏབྦཱ ཝཱ, ཀསྨཱ ཨཏཱིཏཱནཱགཏཔཙྩུཔྤནྣེསུ བུདྡྷེསུ ཝེརམཀཱསཱི’’ཏི ཨཱཧ. སུཝཎྞཀཱརོ ཏཱཝདེཝ སཾཝེགཔྤཏྟོ ཧུཏྭཱ ‘‘ཁམཐ མེ, བྷནྟེ’’ཏི ཝཏྭཱ ཐེརསྶ པཱདམཱུལེ ནིཔཛྫི. ཏཱཏ, ཨཧཾ ཏཡཱ ན ཀིཉྩི ཝུཏྟོ, སཏྠཱརཾ ཁམཱཔེཧཱིཏི. ཀིནྟི ཀཏྭཱ ཁམཱཔེམི, བྷནྟེཏི. སུཝཎྞཔུཔྥཱནཾ ཏཡོ ཀུམྦྷེ ཀཏྭཱ ཨནྟོདྷཱཏུནིདྷཱནེ པཀྑིཔིཏྭཱ ཨལླཝཏྠོ ཨལླཀེསོ ཧུཏྭཱ ཁམཱཔེཧི, ཏཱཏཱཏི.

སོ ‘‘སཱདྷུ, བྷནྟེ’’ཏི ཝཏྭཱ སུཝཎྞཔུཔྥཱནི ཀརོནྟོ ཏཱིསུ པུཏྟེསུ ཛེཊྛཔུཏྟཾ པཀྐོསཱཔེཏྭཱ ‘‘ཨེཧི, ཏཱཏ, ཨཧཾ སཏྠཱརཾ ཝེརཝཙནེན ཨཝཙཾ, ཏསྨཱ ཨིམཱནི པུཔྥཱནི ཀཏྭཱ དྷཱཏུནིདྷཱནེ པཀྑིཔིཏྭཱ ཁམཱཔེསྶཱམི, ཏྭམྤི ཁོ མེ སཧཱཡོ ཧོཧཱི’’ཏི ཨཱཧ. སོ ‘‘ན ཏྭཾ མཡཱ ཝེརཝཙནཾ ཝདཱཔིཏོ, ཏྭཾཡེཝ ཀརོཧཱི’’ཏི ཀཱཏུཾ ན ཨིཙྪི. མཛ྄ཛྷིམཔུཏྟཾ པཀྐོསིཏྭཱ ཏཐེཝཱཧ, སོཔི ཏཐེཝ ཝཏྭཱ ཀཱཏུཾ ན ཨིཙྪི. ཀནིཊྛཾ པཀྐོསིཏྭཱ ཏཐེཝཱཧ, སོ ‘‘པིཏུ ཨུཔྤནྣཀིཙྩཾ ནཱམ པུཏྟསྶ བྷཱརོ’’ཏི ཝཏྭཱ པིཏུསཧཱཡོ ཧུཏྭཱ པུཔྥཱནི ཨཀཱསི. སུཝཎྞཀཱརོ ཝིདཏྠིཔྤམཱཎཱནཾ པུཔྥཱནཾ ཏཡོ ཀུམྦྷེ ནིཊྛཱཔེཏྭཱ དྷཱཏུནིདྷཱནེ པཀྑིཔིཏྭཱ ཨལླཝཏྠོ ཨལླཀེསོ སཏྠཱརཾ ཁམཱཔེསི. ཨིཏི སོ སཏྟཀྑཏྟུཾ ཛཱཏཀཱལེ ཨུདཀེ པཱཏནཾ ལབྷི. ཨཡཾ པནསྶ ཀོཊིཡཾ ཋིཏོ ཨཏྟབྷཱཝོ. ཨིདྷཱཔི ཏསྶེཝ ནིསྶནྡེན ཨུདཀེ པཱཏིཏོ. ཡེ པནསྶ དྭེ ཛེཊྛབྷཱཏིཀཱ པུཏྟཱ སུཝཎྞཔུཔྥཱནཾ ཀརཎཀཱལེ སཧཱཡཱ བྷཝིཏུཾ ན ཨིཙྪིཾསུ, ཏེསཾ ཏེན ཀཱརཎེན སུཝཎྞཔབྦཏོ ན ནིབྦཏྟི, ཛཊིལསྶ ཙེཝ ཀནིཊྛཔུཏྟསྶ ཙ ཨེཀཏོ ཀཏབྷཱཝེན ནིབྦཏྟི. ཨིཏི སོ པུཏྟེ ཨནུསཱསིཏྭཱ སཏྠུ སནྟིཀེ པབྦཛིཏྭཱ ཀཏིཔཱཧེནེཝ ཨརཧཏྟཾ པཱཔུཎི. སཏྠཱ ཨཔརེན སམཡེན པཉྩཧི བྷིཀྑུསཏེཧི སདྡྷིཾ པིཎྜཱཡ ཙརནྟོ ཏསྶ པུཏྟཱནཾ གེཧདྭཱརཾ ཨགམཱསི, ཏེ བུདྡྷཔྤམུཁསྶ བྷིཀྑུསངྒྷསྶ ཨཌྜྷམཱསཾ བྷིཀྑཱདཱནཾ ཨདཾསུ.

བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཨཛྫཱཔི ཏེ, ཨཱཝུསོ ཛཊིལ, ཨསཱིཏིཧཏྠེ སུཝཎྞཔབྦཏེ ཙ པུཏྟེསུ ཙ ཏཎྷཱ ཨཏྠཱི’’ཏི. ‘‘ན མེ, ཨཱཝུསོ, ཨེཏེསུ ཏཎྷཱ ཝཱ མཱནོ ཝཱ ཨཏྠཱི’’ཏི. ཏེ ‘‘ཨཡཾ ཛཊིལཏྠེརོ ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི ཝདིཾསུ. སཏྠཱ ཏེསཾ ཀཐཾ སུཏྭཱ ‘‘ན, བྷིཀྑཝེ, མམ པུཏྟསྶ ཏེསུ ཏཎྷཱ ཝཱ མཱནོ ཝཱ ཨཏྠཱི’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༤༡༦.

‘‘ཡོདྷ ཏཎྷཾ པཧནྟྭཱན, ཨནཱགཱརོ པརིབྦཛེ;

ཏཎྷཱབྷཝཔརིཀྑཱིཎཾ, ཏམཧཾ བྲཱུམི བྲཱཧྨཎ’’ནྟི.

ཏསྶཏྠོ – ཡོ ཨིདྷ ལོཀེ ཚདྭཱརིཀཾ ཏཎྷཾ ཝཱ མཱནཾ ཝཱ ཛཧིཏྭཱ གྷརཱཝཱསེན ཨནཏྠིཀོ ཨནཱགཱརོ ཧུཏྭཱ པརིབྦཛཏི, ཏཎྷཱཡ ཙེཝ བྷཝསྶ ཙ པརིཀྑཱིཎཏྟཱ ཏཎྷཱབྷཝཔརིཀྑཱིཎཾ ཏམཧཾ བྲཱཧྨཎཾ ཝདཱམཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཛཊིལཏྠེརཝཏྠུ ཏེཏྟིཾསཏིམཾ.

༣༤. ཛོཏིཀཏྠེརཝཏྠུ

ཡོདྷ ཏཎྷནྟི པུན ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཛོཏིཀཏྠེརཾ ཨཱརབྦྷ ཀཐེསི.

ཨཛཱཏསཏྟུཀུམཱརོ ཧི དེཝདཏྟེན སདྡྷིཾ ཨེཀཏོ ཧུཏྭཱ པིཏརཾ གྷཱཏེཏྭཱ རཛྫེ པཏིཊྛིཏོ ‘‘ཛོཏིཀསེཊྛིསྶ མཧཱཔཱསཱདཾ གཎྷིསྶཱམཱི’’ཏི ཡུདྡྷསཛྫོ ནིཀྑམིཏྭཱ མཎིཔཱཀཱརེ སཔརིཝཱརསྶ ཨཏྟནོ ཚཱཡཾ དིསྭཱ ‘‘གཧཔཏིཀོ ཡུདྡྷསཛྫོ ཧུཏྭཱ བལཾ ཨཱདཱཡ ནིཀྑནྟོ’’ཏི སལླཀྑེཏྭཱ ཨུཔགནྟུཾ ན ཝིསཧི. སེཊྛིཔི ཏཾ དིཝསཾ ཨུཔོསཐིཀོ ཧུཏྭཱ པཱཏོཝ བྷུཏྟཔཱཏརཱསོ ཝིཧཱརཾ གནྟྭཱ སཏྠུ སནྟིཀེ དྷམྨཾ སུཎནྟོ ནིསིནྣོ ཧོཏི. པཋམེ དྭཱརཀོཊྛཀེ ཨཱརཀྑཾ གཧེཏྭཱ ཋིཏོ པན ཡམཀོལི༹ ནཱམ ཡཀྑོ ཏཾ དིསྭཱ ‘‘ཀཧཾ གཙྪསཱི’’ཏི སཔརིཝཱརཾ ཝིདྡྷཾསེཏྭཱ དིསཱཝིདིསཱསུ ཨནུབནྡྷི. རཱཛཱ ཝིཧཱརམེཝ ཨགམཱསི.

ཨཐ ནཾ སེཊྛི དིསྭཱཝ ‘‘ཀིཾ, དེཝཱ’’ཏི ཝཏྭཱ ཨུཊྛཱཡཱསནཱ ཨཊྛཱསི. གཧཔཏི, ཀིཾ ཏྭཾ ཏཝ པུརིསེ ‘‘མཡཱ སདྡྷིཾ ཡུཛ྄ཛྷཐཱ’’ཏི ཨཱཎཱཔེཏྭཱ ཨིདྷཱགམྨ དྷམྨཾ སུཎནྟོ ཝིཡ ནིསིནྣོཏི. ཀིཾ པན དེཝོ མམ གེཧཾ གཎྷིཏུཾ གཏོཏི? ཨཱམ, གཏོམྷཱིཏི. མམ ཨནིཙྪཱཡ མམ གེཧཾ གཎྷིཏུཾ རཱཛསཧསྶམྤི ན སཀྐོཏི, དེཝཱཏི. སོ ‘‘ཀིཾ པན ཏྭཾ རཱཛཱ བྷཝིསྶསཱི’’ཏི ཀུཛ྄ཛྷི. ནཱཧཾ རཱཛཱ, མམ སནྟཀཾ པན དསིཀསུཏྟམྤི མམ ཨནིཙྪཱཡ རཱཛཱུཧི ཝཱ ཙོརེཧི ཝཱ གཧེཏུཾ ན སཀྐཱཏི. ཀིཾ པནཱཧཾ ཏཝ རུཙིཡཱ གཎྷིསྶཱམཱིཏི? ཏེན ཧི, དེཝ, ཨིམཱ མེ དསསུ ཨངྒུལཱིསུ ཝཱིསཏི མུདྡིཀཱ, ཨིམཱཧཾ ཏུམྷཱཀཾ ན དེམི. སཙེ སཀྐོཐ, གཎྷཐཱཏི. སོ པན རཱཛཱ བྷཱུམིཡཾ ཨུཀྐུཊིཀཾ ནིསཱིདིཏྭཱ ཨུལླངྒྷནྟོ ཨཊྛཱརསཧཏྠཾ ཋཱནཾ ཨབྷིརུཧཏི, ཋཏྭཱ ཨུལླངྒྷནྟོ ཨསཱིཏིཧཏྠཾ ཋཱནཾ ཨབྷིརུཧཏི. ཨེཝཾམཧཱབལོ སམཱནོཔི ཨིཏོ ཙིཏོ ཙ པརིཝཏྟེནྟོ ཨེཀཾ མུདྡིཀམྤི ཀཌྜྷིཏུཾ ནཱསཀྑི. ཨཐ ནཾ སེཊྛི ‘‘སཱཊཀཾ པཏྠར, དེཝཱ’’ཏི ཝཏྭཱ ཨངྒུལིཡོ ཨུཛུཀཱ ཨཀཱསི, ཝཱིསཏིཔི མུདྡིཀཱ ནིཀྑམིཾསུ. ཨཐ ནཾ སེཊྛི ‘‘ཨེཝཾ, དེཝ, མམ སནྟཀཾ མམ ཨནིཙྪཱཡ ན སཀྐཱ གཎྷིཏུ’’ནྟི ཝཏྭཱ རཉྙོ ཀིརིཡཱཡ ཨུཔྤནྣསཾཝེགོ ‘‘པབྦཛིཏུཾ མེ ཨནུཛཱན, དེཝཱ’’ཏི ཨཱཧ. སོ ‘‘ཨིམསྨིཾ པབྦཛིཏེ སུཁཾ པཱསཱདཾ གཎྷིསྶཱམཱི’’ཏི ཙིནྟེཏྭཱ ཨེཀཝཙནེནེཝ ‘‘ཏྭཾ པབྦཛཱཧཱི’’ཏི ཨཱཧ. སོ སཏྠུ སནྟིཀེ པབྦཛིཏྭཱ ན ཙིརསྶེཝ ཨརཧཏྟཾ པཏྭཱ ཛོཏིཀཏྠེརོ ནཱམ ཨཧོསི. ཏསྶ ཨརཧཏྟཾ པཏྟཀྑཎེཡེཝ སབྦཱཔི སཱ སམྤཏྟི ཨནྟརདྷཱཡི, ཏམྤིསྶ སཏུལཀཱཡིཾ ནཱམ བྷརིཡཾ དེཝཏཱ ཨུཏྟརཀུརུམེཝ ནཡིཾསུ.

ཨཐེཀདིཝསཾ བྷིཀྑཱུ ཏཾ ཨཱམནྟེཏྭཱ, ‘‘ཨཱཝུསོ ཛོཏིཀ, ཏསྨིཾ པན ཏེ པཱསཱདེ ཝཱ ཨིཏྠིཡཱ ཝཱ ཏཎྷཱ ཨཏྠཱི’’ཏི པུཙྪིཏྭཱ ‘‘ནཏྠཱཝུསོ’’ཏི ཝུཏྟེ སཏྠུ ཨཱརོཙེསུཾ – ‘‘ཨཡཾ, བྷནྟེ, ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི. སཏྠཱ ‘‘ནཏྠེཝ, བྷིཀྑཝེ, མམ པུཏྟསྶ ཏསྨིཾ ཏཎྷཱ’’ཏི ཝཏྭཱ ཨིམཾ གཱཐམཱཧ –

༤༡༦.

‘‘ཡོདྷ ཏཎྷཾ པཧནྟྭཱན, ཨནཱགཱརོ པརིབྦཛེ;

ཏཎྷཱབྷཝཔརིཀྑཱིཎཾ, ཏམཧཾ བྲཱུམི བྲཱཧྨཎ’’ནྟི.

ཨིམིསྶཱ གཱཐཱཡཏྠོ ཧེཊྛཱ ཛཊིལཏྠེརཝཏྠུམྷི ཝུཏྟནཡེནེཝ ཝེདིཏབྦོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཛོཏིཀཏྠེརཝཏྠུ ཙཏུཏིཾསཏིམཾ.

༣༥. ནཊཔུཏྟཀཏྠེརཝཏྠུ

ཧིཏྭཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨེཀཾ ནཊཔུཏྟཀཾ ཨཱརབྦྷ ཀཐེསི.

སོ ཀིར ཨེཀཾ ནཊཀཱིལ༹ཾ ཀཱིལ༹ཡམཱནོ ཝིཙརནྟོ སཏྠུ དྷམྨཀཐཾ སུཏྭཱ པབྦཛིཏྭཱ ཨརཧཏྟཾ པཱཔུཎི. ཏསྨིཾ བུདྡྷཔྤམུཁེན བྷིཀྑུསངྒྷེན སདྡྷིཾ པིཎྜཱཡ པཝིསནྟེ བྷིཀྑཱུ ཨེཀཾ ནཊཔུཏྟཾ ཀཱིལ༹ནྟཾ དིསྭཱ, ‘‘ཨཱཝུསོ, ཨེས ཏཡཱ ཀཱིལི༹ཏཀཱིལི༹ཏཾ ཀཱིལ༹ཏི, ཨཏྠི ནུ ཁོ ཏེ ཨེཏྠ སིནེཧོ’’ཏི པུཙྪིཏྭཱ ‘‘ནཏྠཱི’’ཏི ཝུཏྟེ ‘‘ཨཡཾ, བྷནྟེ, ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི ཨཱཧཾསུ. སཏྠཱ ཏེསཾ ཀཐཾ སུཏྭཱ, ‘‘བྷིཀྑཝེ, མམ པུཏྟོ སབྦཡོགེ ཨཏིཀྐནྟོ’’ཏི ཝཏྭཱ ཨིམཾ གཱཐམཱཧ –

༤༡༧.

‘‘ཧིཏྭཱ མཱནུསཀཾ ཡོགཾ, དིབྦཾ ཡོགཾ ཨུཔཙྩགཱ;

སབྦཡོགཝིསཾཡུཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ མཱནུསཀཾ ཡོགནྟི མཱནུསཀཾ ཨཱཡུཉྩེཝ པཉྩ ཀཱམགུཎེ ཙ. དིབྦཡོགེཔི ཨེསེཝ ནཡོ. ཨུཔཙྩགཱཏི ཡོ མཱནུསཀཾ ཡོགཾ ཧིཏྭཱ དིབྦཾ ཡོགཾ ཨཏིཀྐནྟོ, ཏཾ སབྦེཧི ཙཏཱུཧིཔི ཡོགེཧི ཝིསཾཡུཏྟཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ནཊཔུཏྟཀཏྠེརཝཏྠུ པཉྩཏིཾསཏིམཾ.

༣༦. ནཊཔུཏྟཀཏྠེརཝཏྠུ

ཧིཏྭཱ རཏིཉྩཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨེཀཾ ནཊཔུཏྟཀཾཡེཝ ཨཱརབྦྷ ཀཐེསི. ཝཏྠུ པུརིམསདིསམེཝ. ཨིདྷ པན སཏྠཱ, ‘‘བྷིཀྑཝེ, མམ པུཏྟོ རཏིཉྩ ཨརཏིཉྩ པཧཱཡ ཋིཏོ’’ཏི ཝཏྭཱ ཨིམཾ གཱཐམཱཧ –

༤༡༨.

‘‘ཧིཏྭཱ རཏིཉྩ ཨརཏིཉྩ, སཱིཏིབྷཱུཏཾ ནིརཱུཔདྷིཾ;

སབྦལོཀཱབྷིབྷུཾ ཝཱིརཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ རཏིནྟི པཉྩཀཱམགུཎརཏིཾ. ཨརཏིནྟི ཨརཉྙཝཱསེ ཨུཀྐཎྛིཏཏྟཾ. སཱིཏིབྷཱུཏནྟི ནིབྦུཏཾ. ནིརཱུཔདྷིནྟི ནིརུཔཀྐིལེསཾ. ཝཱིརནྟི ཏཾ ཨེཝརཱུཔཾ སབྦཾ ཁནྡྷལོཀཾ ཨབྷིབྷཝིཏྭཱ ཋིཏཾ ཝཱིརིཡཝནྟཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ནཊཔུཏྟཀཏྠེརཝཏྠུ ཚཏྟིཾསཏིམཾ.

༣༧. ཝངྒཱིསཏྠེརཝཏྠུ

ཙུཏིཾ ཡོ ཝེདཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཝངྒཱིསཏྠེརཾ ཨཱརབྦྷ ཀཐེསི.

རཱཛགཧེ ཀིརེཀོ བྲཱཧྨཎོ ཝངྒཱིསོ ནཱམ མཏམནུསྶཱནཾ སཱིསཾ ཨཱཀོཊེཏྭཱ ‘‘ཨིདཾ ནིརཡེ ནིབྦཏྟསྶ སཱིསཾ, ཨིདཾ ཏིརཙྪཱནཡོནིཡཾ, ཨིདཾ པེཏྟིཝིསཡེ, ཨིདཾ མནུསྶལོཀེ, ཨིདཾ དེཝལོཀེ ནིབྦཏྟསྶ སཱིས’’ནྟི ཛཱནཱཏི. བྲཱཧྨཎཱ ‘‘སཀྐཱ ཨིམཾ ནིསྶཱཡ ལོཀཾ ཁཱདིཏུ’’ནྟི ཙིནྟེཏྭཱ ཏཾ དྭེ རཏྟཝཏྠཱནི པརིདཧཱཔེཏྭཱ ཨཱདཱཡ ཛནཔདཾ ཙརནྟཱ མནུསྶེ ཝདནྟི ‘‘ཨེསོ ཝངྒཱིསོ ནཱམ བྲཱཧྨཎོ མཏམནུསྶཱནཾ སཱིསཾ ཨཱཀོཊེཏྭཱ ནིབྦཏྟཊྛཱནཾ ཛཱནཱཏི, ཨཏྟནོ ཉཱཏཀཱནཾ ནིབྦཏྟཊྛཱནཾ པུཙྪཐཱ’’ཏི. མནུསྶཱ ཡཐཱབལཾ དསཔི ཀཧཱཔཎེ ཝཱིསཏིཔི སཏམྤི དཏྭཱ ཉཱཏཀཱནཾ ནིབྦཏྟཊྛཱནཾ པུཙྪནྟི. ཏེ ཨནུཔུབྦེན སཱཝཏྠིཾ པཏྭཱ ཛེཏཝནསྶ ཨཝིདཱུརེ ནིཝཱསཾ གཎྷིཾསུ. ཏེ བྷུཏྟཔཱཏརཱསཱ མཧཱཛནཾ གནྡྷམཱལཱདིཧཏྠཾ དྷམྨསྶཝནཱཡ གཙྪནྟཾ དིསྭཱ ‘‘ཀཧཾ གཙྪཐཱ’’ཏི པུཙྪིཏྭཱ ‘‘ཝིཧཱརཾ དྷམྨསྶཝནཱཡཱ’’ཏི ཝུཏྟེ ‘‘ཏཏྠ གནྟྭཱ ཀིཾ ཀརིསྶཐ, ཨམྷཱཀཾ ཝངྒཱིསབྲཱཧྨཎེན སདིསོ ནཱམ ནཏྠི, མཏམནུསྶཱནཾ སཱིསཾ ཨཱཀོཊེཏྭཱ ནིབྦཏྟཊྛཱནཾ ཛཱནཱཏི, ཉཱཏཀཱནཾ ནིབྦཏྟཊྛཱནཾ པུཙྪཐཱ’’ཏི ཨཱཧཾསུ. ཏེ ‘‘ཝངྒཱིསོ ཀིཾ ཛཱནཱཏི, ཨམྷཱཀཾ སཏྠཱརཱ སདིསོ ནཱམ ནཏྠཱི’’ཏི ཝཏྭཱ ཨིཏརེཧིཔི ‘‘ཝངྒཱིསསདིསོ ནཏྠཱི’’ཏི ཝུཏྟེ ཀཐཾ ཝཌྜྷེཏྭཱ ‘‘ཨེཐ, དཱནི ཝོ ཝངྒཱིསསྶ ཝཱ ཨམྷཱཀཾ ཝཱ སཏྠུ ཛཱནནབྷཱཝཾ ཛཱནིསྶཱམཱ’’ཏི ཏེ ཨཱདཱཡ ཝིཧཱརཾ ཨགམཾསུ. སཏྠཱ ཏེསཾ ཨཱགམནབྷཱཝཾ ཉཏྭཱ ནིརཡེ ཏིརཙྪཱནཡོནིཡཾ མནུསྶལོཀེ དེཝལོཀེཏི ཙཏཱུསུ ཋཱནེསུ ནིབྦཏྟཱནཾ ཙཏྟཱརི སཱིསཱནི, ཁཱིཎཱསཝསཱིསཉྩཱཏི པཉྩ སཱིསཱནི ཨཱཧརཱཔེཏྭཱ པཊིཔཱཊིཡཱ ཋཔེཏྭཱ ཨཱགཏཀཱལེ ཝངྒཱིསཾ པུཙྪི – ‘‘ཏྭཾ ཀིར སཱིསཾ ཨཱཀོཊེཏྭཱ མཏཀཱནཾ ནིབྦཏྟཊྛཱནཾ ཛཱནཱསཱི’’ཏི? ‘‘ཨཱམ, ཛཱནཱམཱི’’ཏི. ‘‘ཨིདཾ ཀསྶ སཱིས’’ནྟི? སོ ཏཾ ཨཱཀོཊེཏྭཱ ‘‘ནིརཡེ ནིབྦཏྟསྶཱ’’ཏི ཨཱཧ. ཨཐསྶ སཏྠཱ ‘‘སཱདྷུ སཱདྷཱུ’’ཏི སཱདྷུཀཱརཾ དཏྭཱ ཨིཏརཱནིཔི ཏཱིཎི སཱིསཱནི པུཙྪིཏྭཱ ཏེན ཨཝིརཛ྄ཛྷིཏྭཱ ཝུཏྟཝུཏྟཀྑཎེ ཏཐེཝ ཏསྶ སཱདྷུཀཱརཾ དཏྭཱ པཉྩམཾ སཱིསཾ དསྶེཏྭཱ ‘‘ཨིདཾ ཀསྶ སཱིས’’ནྟི པུཙྪི, སོ ཏམྤི ཨཱཀོཊེཏྭཱ ནིབྦཏྟཊྛཱནཾ ན ཛཱནཱཏི.

ཨཐ ནཾ སཏྠཱ ‘‘ཀིཾ, ཝངྒཱིས, ན ཛཱནཱསཱི’’ཏི ཝཏྭཱ, ‘‘ཨཱམ, ན ཛཱནཱམཱི’’ཏི ཝུཏྟེ ‘‘ཨཧཾ ཛཱནཱམཱི’’ཏི ཨཱཧ. ཨཐ ནཾ ཝངྒཱིསོ ཡཱཙི ‘‘དེཐ མེ ཨིམཾ མནྟ’’ནྟི. ན སཀྐཱ ཨཔབྦཛིཏསྶ དཱཏུནྟི. སོ ‘‘ཨིམསྨིཾ མནྟེ གཧིཏེ སཀལཛམྦུདཱིཔེ ཨཧཾ ཛེཊྛཀོ བྷཝིསྶཱམཱི’’ཏི ཙིནྟེཏྭཱ ཏེ བྲཱཧྨཎེ ‘‘ཏུམྷེ ཏཏྠེཝ ཀཏིཔཱཧཾ ཝསཐ, ཨཧཾ པབྦཛིསྶཱམཱི’’ཏི ཨུཡྻོཛེཏྭཱ སཏྠུ སནྟིཀེ པབྦཛིཏྭཱ ལདྡྷཱུཔསམྤདོ ཝངྒཱིསཏྠེརོ ནཱམ ཨཧོསི. ཨཐསྶ སཏྠཱ དྭཏྟིཾསཱཀཱརཀམྨཊྛཱནཾ དཏྭཱ ‘‘མནྟསྶ པརིཀམྨཾ སཛ྄ཛྷཱཡཱཧཱི’’ཏི ཨཱཧ. སོ ཏཾ སཛ྄ཛྷཱཡནྟོ ཨནྟརནྟརཱ བྲཱཧྨཎེཧི ‘‘གཧིཏོ ཏེ མནྟོ’’ཏི པུཙྪིཡམཱནོ ‘‘ཨཱགམེཐ ཏཱཝ, གཎྷཱམཱི’’ཏི ཝཏྭཱ ཀཏིཔཱཧེནེཝ ཨརཧཏྟཾ པཏྭཱ པུན བྲཱཧྨཎེཧི པུཊྛོ ‘‘ཨབྷབྦོ དཱནཱཧཾ, ཨཱཝུསོ, གནྟུ’’ནྟི ཨཱཧ. ཏཾ སུཏྭཱ བྷིཀྑཱུ ‘‘ཨཡཾ, བྷནྟེ, ཨབྷཱུཏེན ཨཉྙཾ བྱཱཀརོཏཱི’’ཏི སཏྠུ ཨཱརོཙེསུཾ. སཏྠཱ ‘‘མཱ, བྷིཀྑཝེ, ཨེཝཾ ཨཝཙུཏྠ, ཨིདཱནི, བྷིཀྑཝེ, མམ པུཏྟོ ཙུཏིཔཊིསནྡྷིཀུསལོ ཛཱཏོ’’ཏི ཝཏྭཱ ཨིམཱ གཱཐཱ ཨབྷཱསི –

༤༡༩.

‘‘ཙུཏིཾ ཡོ ཝེདི སཏྟཱནཾ, ཨུཔཔཏྟིཉྩ སབྦསོ;

ཨསཏྟཾ སུགཏཾ བུདྡྷཾ, ཏམཧཾ བྲཱུམི བྲཱཧྨཎཾ.

༤༢༠.

‘‘ཡསྶ གཏིཾ ན ཛཱནནྟི, དེཝཱ གནྡྷབྦམཱནུསཱ;

ཁཱིཎཱསཝཾ ཨརཧནྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཡོ ཝེདཱིཏི ཡོ སཏྟཱནཾ སབྦཱཀཱརེན ཙུཏིཉྩ པཊིསནྡྷིཉྩ པཱཀཊཾ ཀཏྭཱ ཛཱནཱཏི, ཏམཧཾ ཨལགྒཏཱཡ ཨསཏྟཾ, པཊིཔཏྟིཡཱ སུཊྛུ གཏཏྟཱ སུགཏཾ, ཙཏུནྣཾ སཙྩཱནཾ བུདྡྷཏཱཡ བུདྡྷཾ བྲཱཧྨཎཾ ཝདཱམཱིཏི ཨཏྠོ. ཡསྶཱཏི ཡསྶེཏེ དེཝཱདཡོ གཏིཾ ན ཛཱནནྟི, ཏམཧཾ ཨཱསཝཱནཾ ཁཱིཎཏཱཡ ཁཱིཎཱསཝཾ, ཀིལེསེཧི ཨཱརཀཏྟཱ ཨརཧནྟཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཝངྒཱིསཏྠེརཝཏྠུ སཏྟཏིཾསཏིམཾ.

༣༨. དྷམྨདིནྣཏྠེརཱིཝཏྠུ

ཡསྶཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ དྷམྨདིནྣཾ ནཱམ བྷིཀྑུནིཾ ཨཱརབྦྷ ཀཐེསི.

ཨེཀདིཝསཉྷི ཏསྶཱ གིཧིཀཱལེ སཱམིཀོ ཝིསཱཁོ ཨུཔཱསཀོ སཏྠུ སནྟིཀེ དྷམྨཾ སུཏྭཱ ཨནཱགཱམིཕལཾ པཏྭཱ ཙིནྟེསི – ‘‘མཡཱ སབྦཾ སཱཔཏེཡྻཾ དྷམྨདིནྣཾ པཊིཙྪཱཔེཏུཾ ཝཊྚཏཱི’’ཏི. སོ ཏཏོ པུབྦེ ཨཱགཙྪནྟོ དྷམྨདིནྣཾ ཝཱཏཔཱནེན ཨོལོཀེནྟིཾ དིསྭཱ སིཏཾ ཀརོཏི. ཏཾ དིཝསཾ པན ཝཱཏཔཱནེན ཋིཏཾ ཨནོལོཀེནྟོཝ ཨགམཱསི. སཱ ‘‘ཀིཾ ནུ ཁོ ཨིད’’ནྟི ཙིནྟེཏྭཱ ‘‘ཧོཏུ, བྷོཛནཀཱལེ ཛཱནིསྶཱམཱི’’ཏི བྷོཛནཝེལཱཡ བྷཏྟཾ ཨུཔནཱམེསི. སོ ཨཉྙེསུ དིཝསེསུ ‘‘ཨེཧི, ཨེཀཏོ བྷུཉྫཱམཱ’’ཏི ཝདཏི, ཏཾ དིཝསཾ པན ཏུཎྷཱིབྷཱུཏོཝ བྷུཉྫི. སཱ ‘‘ཀེནཙིདེཝ ཀཱརཎེན ཀུཔིཏོ བྷཝིསྶཏཱི’’ཏི ཙིནྟེསི. ཨཐ ནཾ ཝིསཱཁོ སུཁནིསིནྣཝེལཱཡ ཏཾ པཀྐོསིཏྭཱ ‘‘དྷམྨདིནྣེ ཨིམསྨིཾ གེཧེ སབྦཾ སཱཔཏེཡྻཾ པཊིཙྪཱཧཱི’’ཏི ཨཱཧ. སཱ ‘‘ཀུདྡྷཱ ནཱམ སཱཔཏེཡྻཾ ན པཊིཙྪཱཔེནྟི, ཀིཾ ནུ ཁོ ཨེཏ’’ནྟི ཙིནྟེཏྭཱ ‘‘ཏུམྷེ པན, སཱམཱི’’ཏི ཨཱཧ. ཨཧཾ ཨིཏོ པཊྛཱཡ ན ཀིཉྩི ཝིཙཱརེམཱིཏི. ཏུམྷེཧི ཚཌྜིཏཾ ཁེལ༹ཾ ཀོ པཊིཙྪིསྶཏི, ཨེཝཾ སནྟེ མམ པབྦཛྫཾ ཨནུཛཱནཱཐཱཏི. སོ ‘‘སཱདྷུ, བྷདྡེ’’ཏི སམྤཊིཙྪིཏྭཱ མཧནྟེན སཀྐཱརེན ཏཾ བྷིཀྑུནཱིཨུཔསྶཡཾ ནེཏྭཱ པབྦཱཛེསི. སཱ ལདྡྷཱུཔསམྤདཱ དྷམྨདིནྣཏྠེརཱི ནཱམ ཨཧོསི.

སཱ པཝིཝེཀཀཱམཏཱཡ བྷིཀྑུནཱིཧི སདྡྷིཾ ཛནཔདཾ གནྟྭཱ ཏཏྠ ཝིཧརནྟཱི ན ཙིརསྶེཝ སཧ པཊིསམྦྷིདཱཧི ཨརཧཏྟཾ པཏྭཱ ‘‘ཨིདཱནི མཾ ནིསྶཱཡ ཉཱཏིཛནཱ པུཉྙཱནི ཀརིསྶནྟཱི’’ཏི པུནདེཝ རཱཛགཧཾ པཙྩཱགཉྪི. ཨུཔཱསཀོ ཏསྶཱ ཨཱགཏབྷཱཝཾ སུཏྭཱ ‘‘ཀེན ནུ ཁོ ཀཱརཎེན ཨཱགཏཱ’’ཏི བྷིཀྑུནཱིཨུཔསྶཡཾ གནྟྭཱ ཐེརིཾ ཝནྡིཏྭཱ ཨེཀམནྟཾ ནིསིནྣོ ‘‘ཨུཀྐཎྛིཏཱ ནུ ཁོསི, ཨཡྻེཏི ཝཏྟུཾ ཨཔྤཏིརཱུཔཾ, པཉྷམེཀཾ ནཾ པུཙྪིསྶཱམཱི’’ཏི ཙིནྟེཏྭཱ སོཏཱཔཏྟིམགྒེ པཉྷཾ པུཙྪི, སཱ ཏཾ ཝིསྶཛྫེསི. ཨུཔཱསཀོ ཏེནེཝ ཨུཔཱཡེན སེསམགྒེསུཔི པཉྷཾ པུཙྪིཏྭཱ ཨཏིཀྐམྨ པཉྷསྶ པུཊྛཀཱལེ ཏཱཡ ‘‘ཨཙྩཡཱསི, ཨཱཝུསོ, ཝིསཱཁཱ’’ཏི ཝཏྭཱ ‘‘ཨཱཀངྑམཱནོ སཏྠཱརཾ ཨུཔསངྐམིཏྭཱ ཨིམཾ པཉྷཾ པུཙྪེཡྻཱསཱི’’ཏི ཝུཏྟེ ཐེརིཾ ཝནྡིཏྭཱ ཨུཊྛཱཡཱསནཱ སཏྠུ སནྟིཀཾ གནྟྭཱ ཏཾ ཀཐཱསལླཱཔཾ སབྦཾ བྷགཝཏོ ཨཱརོཙེསི. སཏྠཱ ‘‘སུཀཐིཏཾ མམ དྷཱིཏཱཡ དྷམྨདིནྣཱཡ, ཨཧམྤེཏཾ པཉྷཾ ཝིསྶཛྫེནྟོ ཨེཝམེཝ ཝིསྶཛྫེཡྻ’’ནྟི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༤༢༡.

‘‘ཡསྶ པུརེ ཙ པཙྪཱ ཙ, མཛ྄ཛྷེ ཙ ནཏྠི ཀིཉྩནཾ;

ཨཀིཉྩནཾ ཨནཱདཱནཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ པུརེཏི ཨཏཱིཏེསུ ཁནྡྷེསུ. པཙྪཱཏི ཨནཱགཏེསུ ཁནྡྷེསུ. མཛ྄ཛྷེཏི པཙྩུཔྤནྣེསུ ཁནྡྷེསུ. ནཏྠི ཀིཉྩནནྟི ཡསྶེཏེསུ ཋཱནེསུ ཏཎྷཱགཱཧསངྑཱཏཾ ཀིཉྩནཾ ནཏྠི, ཏམཧཾ རཱགཀིཉྩནཱདཱིཧི ཨཀིཉྩནཾ ཀསྶཙི གཧཎསྶ ཨབྷཱཝེན ཨནཱདཱནཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

དྷམྨདིནྣཏྠེརཱིཝཏྠུ ཨཊྛཏིཾསཏིམཾ.

༣༩. ཨངྒུལིམཱལཏྠེརཝཏྠུ

ཨུསབྷནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨངྒུལིམཱལཏྠེརཾ ཨཱརབྦྷ ཀཐེསི. ཝཏྠུ ‘‘ན ཝེ ཀདརིཡཱ དེཝལོཀཾ ཝཛནྟཱི’’ཏི (དྷ. པ. ༡༧༧) གཱཐཱཝཎྞནཱཡ ཝུཏྟམེཝ. ཝུཏྟཉྷི ཏཏྠ –

བྷིཀྑཱུ ཨངྒུལིམཱལཾ པུཙྪིཾསུ – ‘‘ཀིཾ ནུ ཁོ, ཨཱཝུསོ ཨངྒུལིམཱལ, དུཊྛཧཏྠིཾ ཚཏྟཾ དྷཱརེཏྭཱ ཋིཏཾ དིསྭཱ བྷཱཡཱི’’ཏི? ‘‘ན བྷཱཡིཾ, ཨཱཝུསོ’’ཏི. ཏེ སཏྠཱརཾ ཨུཔསངྐམིཏྭཱ ཨཱཧཾསུ – ‘‘ཨངྒུལིམཱལོ, བྷནྟེ, ཨཉྙཾ བྱཱཀརོཏཱི’’ཏི. སཏྠཱ ‘‘ན, བྷིཀྑཝེ, མམ པུཏྟོ ཨངྒུལིམཱལོ བྷཱཡཏི. ཁཱིཎཱསཝཨུསབྷཱནཉྷི ཨནྟརེ ཛེཊྛཀཨུསབྷཱ མམ པུཏྟསདིསཱ བྷིཀྑཱུ ན བྷཱཡནྟཱི’’ཏི ཝཏྭཱ ཨིམཾ གཱཐམཱཧ –

༤༢༢.

‘‘ཨུསབྷཾ པཝརཾ ཝཱིརཾ, མཧེསིཾ ཝིཛིཏཱཝིནཾ;

ཨནེཛཾ ནྷཱཏཀཾ བུདྡྷཾ, ཏམཧཾ བྲཱུམི བྲཱཧྨཎ’’ནྟི.

ཏསྶཏྠོ – ཨཙྪམྦྷིཏཊྛེན ཨུསབྷསདིསཏཱཡ ཨུསབྷཾ ཨུཏྟམཊྛེན པཝརཾ ཝཱིརིཡསམྤཏྟིཡཱ ཝཱིརཾ མཧནྟཱནཾ སཱིལཀྑནྡྷཱདཱིནཾ ཨེསིཏཏྟཱ མཧེསིཾ ཏིཎྞཾ མཱརཱནཾ ཝིཛིཏཏྟཱ ཝིཛིཏཱཝིནཾ ནྷཱཏཀིལེསཏཱཡ ནྷཱཏཀཾ ཙཏུསཙྩབུདྡྷཏཱཡ བུདྡྷཾ ཏཾ ཨེཝརཱུཔཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨངྒུལིམཱལཏྠེརཝཏྠུ ཨེཀཱུནཙཏྟཱལཱིསཾ.

༤༠. དེཝཧིཏབྲཱཧྨཎཝཏྠུ

པུབྦེནིཝཱསནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ དེཝཧིཏབྲཱཧྨཎསྶ པཉྷཾ ཨཱརབྦྷ ཀཐེསི.

ཨེཀསྨིཉྷི སམཡེ བྷགཝཱ ཝཱཏརོགེན ཨཱབཱདྷིཀོ ཧུཏྭཱ ཨུཔཝཱཎཏྠེརཾ ཨུཎྷོདཀཏྠཱཡ དེཝཧིཏབྲཱཧྨཎསྶ སནྟིཀཾ པཧིཎི. སོ གནྟྭཱ སཏྠུ ཨཱབཱདྷིཀབྷཱཝཾ ཨཱཙིཀྑིཏྭཱ ཨུཎྷོདཀཾ ཡཱཙི, ཏཾ སུཏྭཱ བྲཱཧྨཎོ ཏུཊྛམཱནསོ ཧུཏྭཱ ‘‘ལཱབྷཱ ཝཏ མེ, ཡཾ མམ སནྟིཀཾ སམྨཱསམྦུདྡྷོ ཨུཎྷོདཀསྶཏྠཱཡ སཱཝཀཾ པཧིཎཱི’’ཏི ཨུཎྷོདཀསྶ ཀཱཛཾ པུརིསེན གཱཧཱཔེཏྭཱ ཕཱཎིཏསྶ ཙ པུཊཾ ཨུཔཝཱཎཏྠེརསྶ པཱདཱསི. ཐེརོ ཏཾ གཱཧཱཔེཏྭཱ ཝིཧཱརཾ གནྟྭཱ སཏྠཱརཾ ཨུཎྷོདཀེན ནྷཱཔེཏྭཱ ཨུཎྷོདཀེན ཕཱཎིཏཾ ཨཱལོལེ༹ཏྭཱ བྷགཝཏོ པཱདཱསི, ཏསྶ ཏངྑཎེཡེཝ སོ ཨཱབཱདྷོ པཊིཔསྶམྦྷི. བྲཱཧྨཎོ ཙིནྟེསི – ‘‘ཀསྶ ནུ ཁོ དེཡྻདྷམྨོ དིནྣོ མཧཔྥལོ ཧོཏི, སཏྠཱརཾ པུཙྪིསྶཱམཱི’’ཏི སོ སཏྠུ སནྟིཀཾ གནྟྭཱ ཏམཏྠཾ པུཙྪནྟོ ཨིམཾ གཱཐམཱཧ –

‘‘ཀཏྠ དཛྫཱ དེཡྻདྷམྨཾ, ཀཏྠ དིནྣཾ མཧཔྥལཾ;

ཀཐཉྷི ཡཛམཱནསྶ, ཀཐཾ ཨིཛ྄ཛྷཏི དཀྑིཎཱ’’ཏི. (སཾ. ནི. ༡.༡༩༩);

ཨཐསྶ སཏྠཱ ‘‘ཨེཝརཱུཔསྶ བྲཱཧྨཎསྶ དིནྣཾ མཧཔྥལཾ ཧོཏཱི’’ཏི ཝཏྭཱ བྲཱཧྨཎཾ པཀཱསེནྟོ ཨིམཾ གཱཐམཱཧ –

༤༢༣.

‘‘པུབྦེནིཝཱསཾ ཡོ ཝེདི, སགྒཱཔཱཡཉྩ པསྶཏི;

ཨཐོ ཛཱཏིཀྑཡཾ པཏྟོ, ཨབྷིཉྙཱཝོསིཏོ མུནི; (སཾ. ནི. ༡.༡༩༩);

སབྦཝོསིཏཝོསཱནཾ, ཏམཧཾ བྲཱུམི བྲཱཧྨཎ’’ནྟི.

ཏསྶཏྠོ – ཡོ པུབྦེནིཝཱསཾ པཱཀཊཾ ཀཏྭཱ ཛཱནཱཏི, ཚབྦཱིསཏིདེཝལོཀབྷེདཾ སགྒཉྩ ཙཏུབྦིདྷཾ ཨཔཱཡཉྩ དིབྦཙཀྑུནཱ པསྶཏི, ཨཐོ ཛཱཏིཀྑཡསངྑཱཏཾ ཨརཧཏྟཾ པཏྟོ, ཨབྷིཉྙེཡྻཾ དྷམྨཾ ཨབྷིཛཱནིཏྭཱ པརིཉྙེཡྻཾ པརིཛཱནིཏྭཱ པཧཱཏབྦཾ པཧཱཡ སཙྪིཀཱཏབྦཾ སཙྪིཀཏྭཱ ཝོསིཀོ ནིཊྛཱནཾ པཏྟོ, ཝུསིཏཝོསཱནཾ ཝཱ པཏྟོ, ཨཱསཝཀྑཡཔཉྙཱཡ མོནབྷཱཝཾ པཏྟཏྟཱ མུནི, ཏམཧཾ སབྦེསཾ ཀིལེསཱནཾ ཝོསཱནཾ ཨརཧཏྟམགྒཉཱཎཾ བྲཧྨཙརིཡཝཱསཾ ཝུཏྠབྷཱཝེན སབྦཝོསིཏཝོསཱནཾ བྲཱཧྨཎཾ ཝདཱམཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ. བྲཱཧྨཎོཔི པསནྣམཱནསོ སརཎེསུ པཏིཊྛཱཡ ཨུཔཱསཀཏྟཾ པཝེདེསཱིཏི.

དེཝཧིཏབྲཱཧྨཎཝཏྠུ ཙཏྟཱལཱིསཾ.

བྲཱཧྨཎཝགྒཝཎྞནཱ ནིཊྛིཏཱ.

ཚབྦཱིསཏིམོ ཝགྒོ.

ནིགམནཀཐཱ

ཨེཏྟཱཝཏཱ སབྦཔཋམེ ཡམཀཝགྒེ ཙུདྡས ཝཏྠཱུནི, ཨཔྤམཱདཝགྒེ ནཝ, ཙིཏྟཝགྒེ ནཝ, པུཔྥཝགྒེ དྭཱདས, བཱལཝགྒེ པནྣརས, པཎྜིཏཝགྒེ ཨེཀཱདས, ཨརཧནྟཝགྒེ དས, སཧསྶཝགྒེ ཙུདྡས, པཱཔཝགྒེ དྭཱདས, དཎྜཝགྒེ ཨེཀཱདས, ཛརཱཝགྒེ ནཝ, ཨཏྟཝགྒེ དས, ལོཀཝགྒེ ཨེཀཱདས, བུདྡྷཝགྒེ ནཝ, སུཁཝགྒེ ཨཊྛ, པིཡཝགྒེ ནཝ, ཀོདྷཝགྒེ ཨཊྛ, མལཝགྒེ དྭཱདས, དྷམྨཊྛཝགྒེ དས, མགྒཝགྒེ དྭཱདས, པཀིཎྞཀཝགྒེ ནཝ, ནིརཡཝགྒེ ནཝ, ནཱགཝགྒེ ཨཊྛ, ཏཎྷཱཝགྒེ དྭཱདས, བྷིཀྑུཝགྒེ དྭཱདས, བྲཱཧྨཎཝགྒེ ཙཏྟཱལཱིསཱཏི པཉྩཱདྷིཀཱནི ཏཱིཎི ཝཏྠུསཏཱནི པཀཱསེཏྭཱ ནཱཏིསངྑེཔནཱཏིཝིཏྠཱརཝསེན ཨུཔརཙིཏཱ དྭཱསཏྟཏིབྷཱཎཝཱརཔམཱཎཱ དྷམྨཔདསྶ ཨཏྠཝཎྞནཱ ནིཊྛིཏཱཏི.

པཏྟཾ དྷམྨཔདཾ ཡེན, དྷམྨརཱཛེནནུཏྟརཾ;

གཱཐཱ དྷམྨཔདེ ཏེན, བྷཱསིཏཱ ཡཱ མཧེསིནཱ.

སཏེཝཱིསཱ ཙཏུསྶཏཱ, ཙཏུསཙྩཝིབྷཱཝིནཱ;

སཏཏྟཡཉྷི ཝཏྠཱུནཾ, པཉྩཱདྷིཀཱ སམུཊྛིཏཱ.

ཝིཧཱརེ ཨདྷིརཱཛེན, ཀཱརིཏམྷི ཀཏཉྙུནཱ;

པཱསཱདེ སིརིཀཱུཊསྶ, རཉྙོ ཝིཧརཏཱ མཡཱ.

ཨཏྠབྱཉྫནསམྤནྣཾ, ཨཏྠཱཡ ཙ ཧིཏཱཡ ཙ;

ལོཀསྶ ལོཀནཱཐསྶ, སདྡྷམྨཊྛིཏིཀམྱཏཱ.

ཏཱསཾ ཨཊྛཀཐཾ ཨེཏཾ, ཀརོནྟེན སུནིམྨལཾ;

དྭཱསཏྟཏིཔམཱཎཱཡ, བྷཱཎཝཱརེཧི པཱལི༹ཡཱ.

ཡཾ པཏྟཾ ཀུསལཾ ཏེན, ཀུསལཱ སབྦཔཱཎིནཾ;

སབྦེ ཨིཛ྄ཛྷནྟུ སངྐཔྤཱ, ལབྷནྟུ མདྷུརཾ ཕལནྟི.

པརམཝིསུདྡྷསདྡྷཱབུདྡྷིཝཱིརིཡཔཊིམཎྜིཏེན སཱིལཱཙཱརཛྫཝམདྡཝཱདིགུཎསམུདཡསམུདིཏེན སཀསམཡསམཡནྟརགཧནཛ྄ཛྷོགཱཧཎསམཏྠེན པཉྙཱཝེཡྻཏྟིཡསམནྣཱགཏེན ཏིཔིཊཀཔརིཡཏྟིཔྤབྷེདེ སཱཊྛཀཐེ སཏྠུསཱསནེ ཨཔྤཊིཧཏཉཱཎཔྤབྷཱཝེན མཧཱཝེཡྻཱཀརཎེན ཀརཎསམྤཏྟིཛནིཏསུཁཝིནིགྒཏམདྷུརོདཱརཝཙནལཱཝཎྞཡུཏྟེན ཡུཏྟམུཏྟཝཱདིནཱ ཝཱདཱིཝརེན མཧཱཀཝིནཱ པབྷིནྣཔཊིསམྦྷིདཱཔརིཝཱརེ ཚལ༹བྷིཉྙཱཔཊིསམྦྷིདཱདིཔྤབྷེདགུཎཔཊིམཎྜིཏེ ཨུཏྟརིམནུསྶདྷམྨེ སུཔྤཏིཊྛིཏབུདྡྷཱིནཾ ཐེརཝཾསཔྤདཱིཔཱནཾ ཐེརཱནཾ མཧཱཝིཧཱརཝཱསཱིནཾ ཝཾསཱལངྐཱརབྷཱུཏེན ཝིཔུལཝིསུདྡྷབུདྡྷིནཱ བུདྡྷགྷོསོཏི གརཱུཧི གཧིཏནཱམདྷེཡྻེན ཐེརེན ཀཏཱཡཾ དྷམྨཔདཊྛཀཐཱ –

ཏཱཝ ཏིཊྛཏུ ལོཀསྨིཾ, ལོཀནིཏྠརཎེསིནཾ;

དསྶེནྟཱི ཀུལཔུཏྟཱནཾ, ནཡཾ སདྡྷཱདིབུདྡྷིཡཱ.

ཡཱཝ བུདྡྷོཏི ནཱམམྤི, སུདྡྷཙིཏྟསྶ ཏཱདིནོ;

ལོཀམྷི ལོཀཛེཊྛསྶ, པཝཏྟཏི མཧེསིནོཏི.

ཨིཏི ཏེཝཱིསཱདྷིཀཙཏུསཏགཱཐཱཔཉྩཱདྷིཀཏིསཏཝཏྠུཔཊིམཎྜིཏཱ

ཚབྦཱིསཏིཝགྒསམནྣཱགཏཱ དྷམྨཔདཝཎྞནཱ སམཏྟཱ.

དྷམྨཔད-ཨཊྛཀཐཱ སབྦཱཀཱརེན ནིཊྛིཏཱ.