ཨཊྛཀཐཱ > སུཏྟཔིཊཀ (ཨཊྛཀཐཱ) > ཁུདྡཀནིཀཱཡ (ཨཊྛཀཐཱ)

ཝིཔསྶིདསབལསྶ ཀཱལསྨིཉྷི མཧཱཨེཀསཱཊཀབྲཱཧྨཎོ ནཱམ ཨཧོསི, ཨཡཾ པན ཨེཏརཧི སཱཝཏྠིཡཾ ཙཱུལེ༹ཀསཱཊཀོ ནཱམ. ཏསྶ ཧི ཨེཀོ ནིཝཱསནསཱཊཀོ ཨཧོསི, བྲཱཧྨཎིཡཱཔི ཨེཀོ. ཨུབྷིནྣམྤི ཨེཀམེཝ པཱརུཔནཾ, བཧི གམནཀཱལེ བྲཱཧྨཎོ ཝཱ བྲཱཧྨཎཱི ཝཱ ཏཾ པཱརུཔཏི. ཨཐེཀདིཝསཾ ¶ ཝིཧཱརེ དྷམྨསྶཝནེ གྷོསིཏེ བྲཱཧྨཎོ ཨཱཧ – ‘‘བྷོཏི དྷམྨསྶཝནཾ གྷོསིཏཾ, ཀིཾ དིཝཱ དྷམྨསྶཝནཾ གམིསྶསི, ཨུདཱཧུ རཏྟིཾ. པཱརུཔནསྶ ཧི ཨབྷཱཝེན ན སཀྐཱ ཨམྷེཧི ཨེཀཏོ གནྟུ’’ནྟི. བྲཱཧྨཎཱི, ‘‘སཱམི, ཨཧཾ དིཝཱ གམིསྶཱམཱི’’ཏི སཱཊཀཾ པཱརུཔིཏྭཱ ཨགམཱསི. བྲཱཧྨཎོ དིཝསབྷཱགཾ གེཧེ ཝཱིཏིནཱམེཏྭཱ རཏྟིཾ གནྟྭཱ སཏྠུ པུརཏོ ནིསིནྣོཝ དྷམྨཾ ཨསྶོསི. ཨཐསྶ སརཱིརཾ ཕརམཱནཱ པཉྩཝཎྞཱ པཱིཏི ཨུཔྤཛྫི. སོ སཏྠཱརཾ པཱུཛིཏུཀཱམོ ཧུཏྭཱ ‘‘སཙེ ཨིམཾ སཱཊཀཾ ¶ དསྶཱམི, ནེཝ བྲཱཧྨཎིཡཱ, ན མཡ྄ཧཾ པཱརུཔནཾ བྷཝིསྶཏཱི’’ཏི ཙིནྟེསི. ཨཐསྶ མཙྪེརཙིཏྟཱནཾ སཧསྶཾ ཨུཔྤཛྫི, པུནེཀཾ སདྡྷཱཙིཏྟཾ ཨུཔྤཛྫི. ཏཾ ¶ ཨབྷིབྷཝིཏྭཱ པུན མཙྪེརསཧསྶཾ ཨུཔྤཛྫི. ཨིཏིསྶ བལཝམཙྪེརཾ བནྡྷིཏྭཱ གཎྷནྟཾ ཝིཡ སདྡྷཱཙིཏྟཾ པཊིབཱཧཏིཡེཝ. ཏསྶ ‘‘དསྶཱམི, ན དསྶཱམཱི’’ཏི ཙིནྟེནྟསྶེཝ པཋམཡཱམོ ཨཔགཏོ, མཛ྄ཛྷིམཡཱམོ སམྤཏྟོ. ཏསྨིམྤི དཱཏུཾ ནཱསཀྑི. པཙྪིམཡཱམེ སམྤཏྟེ སོ ཙིནྟེསི – ‘‘མམ སདྡྷཱཙིཏྟེན མཙྪེརཙིཏྟེན ཙ སདྡྷིཾ ཡུཛ྄ཛྷནྟསྶེཝ དྭེ ཡཱམཱ ཝཱིཏིཝཏྟཱ, ཨིདཾ མམ ཨེཏྟཀཾ མཙྪེརཙིཏྟཾ ཝཌྜྷམཱནཾ ཙཏཱུཧི ཨཔཱཡེཧི སཱིསཾ ཨུཀྑིཔིཏུཾ ན དསྶཏི, དསྶཱམི ན’’ནྟི. སོ མཙྪེརསཧསྶཾ ཨབྷིབྷཝིཏྭཱ སདྡྷཱཙིཏྟཾ པུརེཙཱརིཀཾ ཀཏྭཱ སཱཊཀཾ ཨཱདཱཡ སཏྠུ པཱདམཱུལེ ཋཔེཏྭཱ ‘‘ཛིཏཾ མེ, ཛིཏཾ མེ’’ཏི ཏིཀྑཏྟུཾ མཧཱསདྡམཀཱསི.

རཱཛཱ པསེནདི ཀོསལོ དྷམྨཾ སུཎནྟོ ཏཾ སདྡཾ སུཏྭཱ ‘‘པུཙྪཐ ནཾ, ཀིཾ ཀིར ཏེན ཛིཏ’’ནྟི ཨཱཧ. སོ རཱཛཔུརིསེཧི པུཙྪིཏོ ཏམཏྠཾ ཨཱརོཙེསི. ཏཾ སུཏྭཱ རཱཛཱ ‘‘དུཀྐརཾ ཀཏཾ བྲཱཧྨཎེན, སངྒཧམསྶ ཀརིསྶཱམཱི’’ཏི ཨེཀཾ སཱཊཀཡུགཾ དཱཔེསི. སོ ཏམྤི ཏཐཱགཏསྶེཝ ཨདཱསི. པུན རཱཛཱ དྭེ ཙཏྟཱརི ཨཊྛ སོལ༹སཱཏི དྭིགུཎཾ ཀཏྭཱ དཱཔེསི. སོ ཏཱནིཔི ཏཐཱགཏསྶེཝ ཨདཱསི. ཨཐསྶ རཱཛཱ དྭཏྟིཾས ཡུགཱནི དཱཔེསི. བྲཱཧྨཎོ ‘‘ཨཏྟནོ ཨགྒཧེཏྭཱ ལདྡྷཾ ལདྡྷཾ ཝིསྶཛྫེསིཡེཝཱ’’ཏི ཝཱདམོཙནཏྠཾ ཏཏོ ཨེཀཾ ཡུགཾ ཨཏྟནོ, ཨེཀཾ བྲཱཧྨཎིཡཱཏི དྭེ ཡུགཱནི གཧེཏྭཱ ཏིཾས ཡུགཱནི ཏཐཱགཏསྶེཝ ཨདཱསི. རཱཛཱ པན ཏསྨིཾ སཏྟཀྑཏྟུམྤི དདནྟེ པུན དཱཏུཀཱམོཡེཝ ཨཧོསི. པུབྦེ མཧཱཨེཀསཱཊཀོ ཙཏུསཊྛིཡཱ སཱཊཀཡུགེསུ དྭེ ཨགྒཧེསི, ཨཡཾ པན དྭཏྟིཾསཱཡ ¶ ལདྡྷཀཱལེ དྭེ ཨགྒཧེསི. རཱཛཱ པུརིསེ ཨཱཎཱཔེསི – ‘‘དུཀྐརཾ བྷཎེ བྲཱཧྨཎེན ཀཏཾ, ཨནྟེཔུརེ མམ དྭེ ཀམྦལཱནི ཨཱཧརཱཔེཡྻཱཐཱ’’ཏི. ཏེ ཏཐཱ ཀརིཾསུ. རཱཛཱ སཏསཧསྶགྒྷནཀེ དྭེ ཀམྦལེ དཱཔེསི. བྲཱཧྨཎོ ‘‘ན ཨིམེ མམ སརཱིརེ ཨུཔཡོགཾ ཨརཧནྟི, བུདྡྷསཱསནསྶེཝ ཨེཏེ ཨནུཙྪཝིཀཱ’’ཏི ཨེཀཾ ཀམྦལཾ ཨནྟོགནྡྷཀུཊིཡཾ སཏྠུ སཡནསྶ ཨུཔརི ཝིཏཱནཾ ཀཏྭཱ བནྡྷི, ཨེཀཾ ཨཏྟནོ གྷརེ ནིབདྡྷཾ བྷུཉྫནྟསྶ བྷིཀྑུནོ བྷཏྟཀིཙྩཊྛཱནེ ཝིཏཱནཾ ཀཏྭཱ བནྡྷི. རཱཛཱ སཱཡནྷསམཡེ ¶ སཏྠུ སནྟིཀཾ གནྟྭཱ ཏཾ ཀམྦལཾ སཉྫཱནིཏྭཱ, ‘‘བྷནྟེ, ཀེན པཱུཛཱ ཀཏཱ’’ཏི པུཙྪིཏྭཱ ‘‘ཨེཀསཱཊཀེནཱ’’ཏི ཝུཏྟེ ‘‘བྲཱཧྨཎོ མམ ¶ པསཱདཊྛཱནེཡེཝ པསཱིདཏཱི’’ཏི ཝཏྭཱ ‘‘ཙཏྟཱརོ ཧཏྠཱི ཙཏྟཱརོ ཨསྶེ ཙཏྟཱརི ཀཧཱཔཎསཧསྶཱནི ཙཏསྶོ ཨིཏྠིཡོ ཙཏསྶོ དཱསིཡོ ཙཏྟཱརོ པུརིསེ ཙཏུརོ གཱམཝརེ’’ཏི ཨེཝཾ ཡཱཝ སབྦསཏཱ ཙཏྟཱརི ཙཏྟཱརི ཀཏྭཱ སབྦཙཏུཀྐཾ ནཱམ ཨསྶ དཱཔེསི.

བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ – ‘‘ཨཧོ ཨཙྪརིཡཾ ཙཱུལེ༹ཀསཱཊཀསྶ ཀམྨཾ, ཏཾམུཧུཏྟམེཝ སབྦཙཏུཀྐཾ ལབྷི, ཨིདཱནི ཀཏེན ཀལྱཱཎཀམྨེན ཨཛྫམེཝ ཝིཔཱཀོ དིནྣོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, སཙཱཡཾ ཨེཀསཱཊཀོ པཋམཡཱམེ མཡ྄ཧཾ དཱཏུཾ ཨསཀྑིསྶ, སབྦསོལ༹སཀཾ ཨལབྷིསྶ. སཙེ མཛ྄ཛྷིམཡཱམེ ཨསཀྑིསྶ, སབྦཊྛཀཾ ཨལབྷིསྶ ¶ . བལཝཔཙྪིམཡཱམེ དིནྣཏྟཱ པནེས སབྦཙཏུཀྐཾ ལབྷི. ཀལྱཱཎཀམྨཾ ཀརོནྟེན ཧི ཨུཔྤནྣཾ ཙིཏྟཾ ཨཧཱཔེཏྭཱ ཏངྑཎཉྙེཝ ཀཱཏབྦཾ. དནྡྷཾ ཀཏཾ ཀུསལཉྷི སམྤཏྟིཾ དདམཱནཾ དནྡྷམེཝ དདཱཏི, ཏསྨཱ ཙིཏྟུཔྤཱདསམནནྟརམེཝ ཀལྱཱཎཀམྨཾ ཀཱཏབྦ’’ནྟི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཨབྷིཏྠརེཐ ཀལྱཱཎེ, པཱཔཱ ཙིཏྟཾ ནིཝཱརཡེ;

དནྡྷཉྷི ཀརོཏོ པུཉྙཾ, པཱཔསྨིཾ རམཏཱི མནོ’’ཏི.

ཏཏྠ ཨབྷིཏྠརེཐཱཏི ཏུརིཏཏུརིཏཾ སཱིགྷསཱིགྷཾ ཀརེཡྻཱཏི ཨཏྠོ. གིཧིནཱ ཝཱ ཧི ‘‘སལཱཀབྷཏྟདཱནཱདཱིསུ ཀིཉྩིདེཝ ཀུསལཾ ཀརིསྶཱམཱི’’ཏི ཙིཏྟེ ཨུཔྤནྣེ ཡཐཱ ཨཉྙེ ཨོཀཱསཾ ན ལབྷནྟི, ཨེཝཾ ‘‘ཨཧཾ པུརེ, ཨཧཾ པུརེ’’ཏི ཏུརིཏཏུརིཏམེཝ ཀཱཏབྦཾ. པབྦཛིཏེན ཝཱ ཨུཔཛ྄ཛྷཱཡཝཏྟཱདཱིནི ཀརོནྟེན ཨཉྙསྶ ཨོཀཱསཾ ཨདཏྭཱ ‘‘ཨཧཾ པུརེ, ཨཧཾ པུརེ’’ཏི ཏུརིཏཏུརིཏམེཝ ཀཱཏབྦཾ. པཱཔཱ ཙིཏྟནྟི ཀཱཡདུཙྩརིཏཱདིཔཱཔཀམྨཏོ ཝཱ ཨཀུསལཙིཏྟུཔྤཱདཏོ ཝཱ སབྦཐཱམེན ཙིཏྟཾ ནིཝཱརཡེ. དནྡྷཉྷི ཀརོཏོཏི ཡོ པན ‘‘དསྶཱམི, ན དསྶཱམི སམྤཛྫིསྶཏི ནུ ཁོ མེ, ནོ’’ཏི ཨེཝཾ ཙིཀྑལླམགྒེན གཙྪནྟོ ཝིཡ དནྡྷཾ པུཉྙཾ ཀརོཏི, ཏསྶ ཨེཀསཱཊཀསྶ ཝིཡ ¶ མཙྪེརསཧསྶཾ པཱཔཾ ཨོཀཱསཾ ལབྷཏི. ཨཐསྶ པཱཔསྨིཾ རམཏཱི མནོ, ཀུསལཀམྨཀརཎཀཱལེཡེཝ ཧི ཙིཏྟཾ ཀུསལེ རམཏི, ཏཏོ མུཙྩིཏྭཱ པཱཔནིནྣམེཝ ཧོཏཱིཏི.

གཱཐཱཔརིཡོསཱནེ ¶ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པཱཔཉྩ ¶ པུརིསོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སེཡྻསཀཏྠེརཾ ཨཱརབྦྷ ཀཐེསི.

སོ ཧི ལཱལུ༹དཱཡིཏྠེརསྶ སདྡྷིཝིཧཱརིཀོ, ཨཏྟནོ ཨནབྷིརཏིཾ ཏསྶ ཨཱརོཙེཏྭཱ ཏེན པཋམསངྒྷཱདིསེསཀམྨེ སམཱདཔིཏོ ཨུཔྤནྣུཔྤནྣཱཡ ཨནབྷིརཏིཡཱ ཏཾ ཀམྨམཀཱསི (པཱརཱ. ༢༣༤). སཏྠཱ ཏསྶ ཀིརིཡཾ སུཏྭཱ ཏཾ པཀྐོསཱཔེཏྭཱ ‘‘ཨེཝཾ ཀིར ཏྭཾ ཀརོསཱི’’ཏི པུཙྪིཏྭཱ ‘‘ཨཱམ, བྷནྟེ’’ཏི ཝུཏྟེ ‘‘ཀསྨཱ བྷཱརིཡཾ ཀམྨཾ ཨཀཱསི, ཨནནུཙྪཝིཀཾ མོགྷཔུརིསཱ’’ཏི ནཱནཔྤཀཱརཏོ གརཧིཏྭཱ སིཀྑཱཔདཾ པཉྙཱཔེཏྭཱ ‘‘ཨེཝརཱུཔཉྷི ཀམྨཾ དིཊྛདྷམྨེཔི སམྤརཱཡེཔི དུཀྑསཾཝཏྟནིཀམེཝ ཧོཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘པཱཔཉྩེ པུརིསོ ཀཡིརཱ, ན ནཾ ཀཡིརཱ པུནཔྤུནཾ;

ན ཏམྷི ཚནྡཾ ཀཡིརཱཐ, དུཀྑོ པཱཔསྶ ཨུཙྩཡོ’’ཏི.

ཏསྶཏྠོ – སཙེ པུརིསོ སཀིཾ པཱཔཀམྨཾ ཀརེཡྻ, ཏངྑཎེཡེཝ པཙྩཝེཀྑིཏྭཱ ‘‘ཨིདཾ ཨཔྤཏིརཱུཔཾ ཨོལཱ༹རིཀ’’ནྟི ན ནཾ ཀཡིརཱ པུནཔྤུནཾ. ཡོཔི ཏམྷི ཚནྡོ ¶ ཝཱ རུཙི ཝཱ ཨུཔྤཛྫེཡྻ, ཏམྤི ཝིནོདེཏྭཱ ན ཀཡིརཱཐེཝ. ཀིཾ ཀཱརཎཱ? དུཀྑོ པཱཔསྶ ཨུཙྩཡོ. པཱཔསྶ ཧི ཨུཙྩཡོ ཝུཌྜྷི ཨིདྷལོཀེཔི སམྤརཱཡེཔི དུཀྑམེཝ ཨཱཝཧཏཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པུཉྙཉྩེཏི ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ལཱཛདེཝདྷཱིཏརཾ ཨཱརབྦྷ ཀཐེསི. ཝཏྠུ རཱཛགཧེ སམུཊྛིཏཾ.

ཨཱཡསྨཱ ¶ ཧི མཧཱཀསྶཔོ པིཔྤལིགུཧཱཡཾ ཝིཧརནྟོ ཛྷཱནཾ སམཱཔཛྫིཏྭཱ སཏྟམེ དིཝསེ ཝུཊྛཱཡ དིབྦེན ཙཀྑུནཱ བྷིཀྑཱཙཱརཊྛཱནཾ ཨོལོཀེནྟོ ཨེཀཾ སཱལིཁེཏྟཔཱལིཀཾ ཨིཏྠིཾ སཱལིསཱིསཱནི གཧེཏྭཱ ལཱཛེ ཀུརུམཱནཾ དིསྭཱ ‘‘སདྡྷཱ ནུ ཁོ, ཨསྶདྡྷཱ’’ཏི ཝཱིམཾསིཏྭཱ ‘‘སདྡྷཱ’’ཏི ཉཏྭཱ ‘‘སཀྑིསྶཏི ནུ ཁོ མེ སངྒཧཾ ཀཱཏུཾ, ནོ’’ཏི ཨུཔདྷཱརེནྟོ ‘‘ཝིསཱརདཱ ཀུལདྷཱིཏཱ མམ སངྒཧཾ ཀརིསྶཏི, ཀཏྭཱ ཙ པན མཧཱསམྤཏྟིཾ ལབྷིསྶཏཱི’’ཏི ཉཏྭཱ ཙཱིཝརཾ པཱརུཔིཏྭཱ པཏྟམཱདཱཡ སཱལིཁེཏྟསམཱིཔེཡེཝ ཨཊྛཱསི. ཀུལདྷཱིཏཱ ཐེརཾ དིསྭཱཝ པསནྣཙིཏྟཱ པཉྩཝཎྞཱཡ པཱིཏིཡཱ ཕུཊྛསརཱིརཱ ‘‘ཏིཊྛཐ, བྷནྟེ’’ཏི ཝཏྭཱ ལཱཛེ ཨཱདཱཡ ཝེགེན གནྟྭཱ ཐེརསྶ པཏྟེ ཨཱཀིརིཏྭཱ པཉྩཔཏིཊྛིཏེན ཝནྡིཏྭཱ, ‘‘བྷནྟེ, ཏུམྷེཧི དིཊྛདྷམྨསྶ བྷཱགིནཱི ཨསྶ’’ནྟི པཏྠནཾ ཨཀཱསི. ཐེརོ ‘‘ཨེཝཾ ཧོཏཱུ’’ཏི ཨནུམོདནམཀཱསི. སཱཔི ཐེརཾ ཝནྡིཏྭཱ ཨཏྟནཱ དིནྣདཱནཾ ཨཱཝཛྫམཱནཱ ནིཝཏྟི. ཏཱཡ ཙ པན ཀེདཱརམརིཡཱདཱཡ ¶ གམནམགྒེ ཨེཀསྨིཾ བིལེ གྷོརཝིསོ སཔྤོ ནིཔཛྫི. སོ ཐེརསྶ ཀཱསཱཡཔཊིཙྪནྣཾ ཛངྒྷཾ ཌཾསིཏུཾ ནཱསཀྑི. ཨིཏརཱ དཱནཾ ཨཱཝཛྫམཱནཱ ནིཝཏྟནྟཱི ཏཾ པདེསཾ པཱཔུཎི. སཔྤོ བིལཱ ནིཀྑམིཏྭཱ ཏཾ ཌཾསིཏྭཱ ཏཏྠེཝ པཱཏེསི. སཱ པསནྣཙིཏྟེན ཀཱལཾ ཀཏྭཱ ཏཱཝཏིཾསབྷཝནེ ཏིཾསཡོཛནིཀེ ཀནཀཝིམཱནེ སུཏྟཔྤབུདྡྷཱ ཝིཡ སབྦཱལངྐཱརཔཊིམཎྜིཏེན ཏིགཱཝུཏེན ཨཏྟབྷཱཝེན ནིབྦཏྟི. སཱ དྭཱདསཡོཛནིཀཾ ཨེཀཾ དིབྦཝཏྠཾ ནིཝཱསེཏྭཱ ཨེཀཾ པཱརུཔིཏྭཱ ཨཙྪརཱསཧསྶཔརིཝུཏཱ པུབྦཀམྨཔཀཱསནཏྠཱཡ སུཝཎྞལཱཛབྷརིཏེན ཨོལམྦཀེན སུཝཎྞསརཀེན པཊིམཎྜིཏེ ཝིམཱནདྭཱརེ ཋིཏཱ ཨཏྟནོ སམྤཏྟིཾ ཨོལོཀེཏྭཱ ‘‘ཀིཾ ནུ ཁོ མེ ཀཏྭཱ ཨཡཾ སམྤཏྟི ལདྡྷཱ’’ཏི དིབྦེན ཙཀྑུནཱ ཨུཔདྷཱརེནྟཱི ‘‘ཨཡྻསྶ མེ མཧཱཀསྶཔཏྠེརསྶ དིནྣལཱཛནིསྶནྡེན སཱ ལདྡྷཱ’’ཏི ཨཉྙཱསི.

སཱ ཨེཝཾ པརིཏྟཀེན ཀམྨེན ཨེཝརཱུཔཾ སམྤཏྟིཾ ལབྷིཏྭཱ ‘‘ན དཱནི མཡཱ པམཛྫིཏུཾ ཝཊྚཏི, ཨཡྻསྶ ཝཏྟཔཊིཝཏྟཾ ཀཏྭཱ ཨིམཾ སམྤཏྟིཾ ཐཱཝརཾ ཀརིསྶཱམཱི’’ཏི ཙིནྟེཏྭཱ པཱཏོཝ ཀནཀམཡཾ སམྨཛྫནིཉྩེཝ ཀཙཝརཚཌྜནཀཉྩ པཙྪིཾ ¶ ཨཱདཱཡ གནྟྭཱ ཐེརསྶ པརིཝེཎཾ སམྨཛྫིཏྭཱ པཱནཱིཡཔརིབྷོཛནཱིཡཾ ཨུཔཊྛཱཔེསི. ཐེརོ ཏཾ དིསྭཱ ‘‘ཀེནཙི དཧརེན ཝཱ སཱམཎེརེན ཝཱ ཝཏྟཾ ཀཏཾ བྷཝིསྶཏཱི’’ཏི སལླཀྑེསི. སཱ དུཏིཡདིཝསེཔི ཏཐེཝ ཨཀཱསི, ཐེརོཔི ཏཐེཝ སལླཀྑེསི. ཏཏིཡདིཝསེ པན ཐེརོ ཏསྶཱ སམྨཛྫནིསདྡཾ ¶ སུཏྭཱ ཏཱལཙྪིདྡཱདཱིཧི ཙ པཝིཊྛཾ སརཱིརོབྷཱསཾ དིསྭཱ དྭཱརཾ ཝིཝརིཏྭཱ ‘‘ཀོ ཨེས སམྨཛྫཏཱི’’ཏི པུཙྪི. ‘‘ཨཧཾ, བྷནྟེ, ཏུམྷཱཀཾ ཨུཔཊྛཱཡིཀཱ ལཱཛདེཝདྷཱིཏཱ’’ཏི. ‘‘ནནུ མཡ྄ཧཾ ཨེཝཾནཱམིཀཱ ཨུཔཊྛཱཡིཀཱ ནཱམ ནཏྠཱི’’ཏི. ‘‘ཨཧཾ, བྷནྟེ, སཱལིཁེཏྟཾ རཀྑམཱནཱ ལཱཛེ དཏྭཱ པསནྣཙིཏྟཱ ནིཝཏྟནྟཱི སཔྤེན དཊྛཱ ཀཱལཾ ཀཏྭཱ ཏཱཝཏིཾསདེཝལོཀེ ཨུཔྤནྣཱ, མཡཱ ཨཡྻཾ ནིསྶཱཡ ཨཡཾ སམྤཏྟི ལདྡྷཱ, ཨིདཱནིཔི ཏུམྷཱཀཾ ཝཏྟཔཊིཝཏྟཾ ཀཏྭཱ ‘སམྤཏྟིཾ ཐཱཝརཾ ཀརིསྶཱམཱི’ཏི ཨཱགཏཱམྷི, བྷནྟེ’’ཏི. ‘‘ཧིཡྻོཔི པརེཔི ཏཡཱཝེཏཾ ¶ ཋཱནཾ སམྨཛྫིཏཾ, ཏཡཱཝ པཱནཱིཡབྷོཛནཱིཡཾ ཨུཔཊྛཱཔིཏ’’ནྟི. ‘‘ཨཱམ, བྷནྟེ’’ཏི. ‘‘ཨཔེཧི དེཝདྷཱིཏེ, ཏཡཱ ཀཏཾ ཝཏྟཾ ཀཏཾཝ ཧོཏུ, ཨིཏོ པཊྛཱཡ ཨིམཾ ཋཱནཾ མཱ ཨཱགམཱི’’ཏི. ‘‘བྷནྟེ, མཱ མཾ ནཱསེཐ, ཏུམྷཱཀཾ ཝཏྟཾ ཀཏྭཱ སམྤཏྟིཾ མེ ཐིརཾ ཀཱཏུཾ དེཐཱ’’ཏི. ‘‘ཨཔེཧི དེཝདྷཱིཏེ, མཱ མཾ ཨནཱགཏེ ཙིཏྟབཱིཛནིཾ གཧེཏྭཱ ནིསིནྣེཧི དྷམྨཀཐིཀེཧི ‘མཧཱཀསྶཔཏྠེརསྶ ཀིར ཨེཀཱ དེཝདྷཱིཏཱ ཨཱགནྟྭཱ ཝཏྟཔཊིཝཏྟཾ ཀཏྭཱ པཱནཱིཡཔརིབྷོཛནཱིཡཾ ཨུཔཊྛཱཔེསཱི’ཏི ཝཏྟབྦཏཾ ཀརི, ཨིཏོ པཊྛཱཡ ཨིདྷ མཱ ཨཱགམི, པཊིཀྐམཱ’’ཏི. སཱ ‘‘མཱ མཾ, བྷནྟེ, ནཱསེཐཱ’’ཏི པུནཔྤུནཾ ཡཱཙིཡེཝ. ཐེརོ ‘‘ནཱཡཾ མམ ཝཙནཾ སུཎཱཏཱི’’ཏི ཙིནྟེཏྭཱ ‘‘ཏུཝཾ པམཱཎཾ ན ཛཱནཱསཱི’’ཏི ཨཙྪརཾ པཧརི. སཱ ཏཏྠ སཎྛཱཏུཾ ཨསཀྐོནྟཱི ཨཱཀཱསེ ཨུཔྤཏིཏྭཱ ཨཉྫལིཾ པགྒཡ྄ཧ, ‘‘བྷནྟེ, མཡཱ ལདྡྷསམྤཏྟིཾ མཱ ནཱསེཐ, ཐཱཝརཾ ཀཱཏུཾ དེཐཱ’’ཏི རོདནྟཱི ཨཱཀཱསེ ཨཊྛཱསི.

སཏྠཱ ཛེཏཝནེ གནྡྷཀུཊིཡཾ ནིསིནྣོཝ ¶ ཏསྶཱ རོདིཏསདྡཾ སུཏྭཱ ཨོབྷཱསཾ ཕརིཏྭཱ དེཝདྷཱིཏཱཡ སམྨུཁེ ནིསཱིདིཏྭཱ ཀཐེནྟོ ཝིཡ ‘‘དེཝདྷཱིཏེ མམ པུཏྟསྶ ཀསྶཔསྶ སཾཝརཀརཎམེཝ བྷཱརོ, པུཉྙཏྠིཀཱནཾ པན ‘ཨཡཾ ནོ ཨཏྠོ’ཏི སལླཀྑེཏྭཱ པུཉྙཀརཎམེཝ བྷཱརོ. པུཉྙཀརཎཉྷི ཨིདྷ ཙེཝ སམྤརཱཡེ ཙ སུཁམེཝཱ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘པུཉྙཉྩེ ¶ པུརིསོ ཀཡིརཱ, ཀཡིརཱ ནཾ པུནཔྤུནཾ;

ཏམྷི ཚནྡཾ ཀཡིརཱཐ, སུཁོ པུཉྙསྶ ཨུཙྩཡོ’’ཏི.

ཏསྶཏྠོ – སཙེ པུརིསོ པུཉྙཾ ཀརེཡྻ, ‘‘ཨེཀཝཱརཾ མེ པུཉྙཾ ཀཏཾ, ཨལཾ ཨེཏྟཱཝཏཱ’’ཏི ཨནོརམིཏྭཱ པུནཔྤུནཾ ཀརོཐེཝ. ཏསྶ ཨཀརཎཀྑཎེཔི ཏམྷི པུཉྙེ ཚནྡཾ རུཙིཾ ཨུསྶཱཧཾ ཀརོཐེཝ. ཀིཾ ཀཱརཎཱ? སུཁོ པུཉྙསྶ ཨུཙྩཡོ. པུཉྙསྶ ཧི ཨུཙྩཡོ ཝུཌྜྷི ཨིདྷལོཀཔརལོཀསུཁཱཝཧནཏོ སུཁོཏི.

དེསནཱཝསཱནེ དེཝདྷཱིཏཱ པཉྩཙཏྟཱལཱིསཡོཛནམཏྠཀེ ཋིཏཱཝ སོཏཱཔཏྟིཕལཾ པཱཔུཎཱིཏི.

པཱཔོཔི ¶ པསྶཏཱི བྷདྲནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨནཱཐཔིཎྜིཀཾ ཨཱརབྦྷ ཀཐེསི.

ཨནཱཐཔིཎྜིཀོ ¶ ཧི ཝིཧཱརམེཝ ཨུདྡིསྶ ཙཏུཔཎྞཱསཀོཊིདྷནཾ བུདྡྷསཱསནེ ཝིཀིརིཏྭཱ སཏྠརི ཛེཏཝནེ ཝིཧརནྟེ དེཝསིཀཾ ཏཱིཎི མཧཱཨུཔཊྛཱནཱནི གཙྪཏི, གཙྪནྟོ ཙ ‘‘ཀིཾ ནུ ཁོ ཨཱདཱཡ ཨཱགཏོཏི སཱམཎེརཱ ཝཱ དཧརཱ ཝཱ ཧཏྠམྤི མེ ཨོལོཀེཡྻུ’’ནྟི ཏུཙྪཧཏྠོ ནཱམ ན གཏཔུབྦོ. པཱཏོཝ གཙྪནྟོ ཡཱགུཾ གཱཧཱཔེཏྭཱཝ གཙྪཏི, ཀཏཔཱཏརཱསོ སཔྤིནཝནཱིཏཱདཱིནི བྷེསཛྫཱནི. སཱཡནྷསམཡེ མཱལཱགནྡྷཝིལེཔནཝཏྠཱདཱིནི གཱཧཱཔེཏྭཱ གཙྪཏི. ཨེཝཾ ནིཙྩཀཱལམེཝ དིཝསེ དིཝསེ དཱནཾ དཏྭཱ སཱིལཾ རཀྑཏི. ཨཔརབྷཱགེ དྷནཾ པརིཀྑཡཾ གཙྪཏི. ཝོཧཱརཱུཔཛཱིཝིནོཔིསྶ ཧཏྠཏོ ཨཊྛཱརསཀོཊིདྷནཾ ཨིཎཾ གཎྷིཾསུ, ཀུལསནྟཀཱཔིསྶ ཨཊྛཱརསཧིརཉྙཀོཊིཡོ, ནདཱིཏཱིརེ ནིདཧིཏྭཱ ཋཔིཏཱ ཨུདཀེན ཀཱུལེ བྷིནྣེ མཧཱསམུདྡཾ པཝིསིཾསུ. ཨེཝམསྶ ཨནུཔུབྦེན དྷནཾ པརིཀྑཡཾ ཨགམཱསི. སོ ཨེཝཾབྷཱུཏོཔི སངྒྷསྶ དཱནཾ དེཏིཡེཝ, པཎཱིཏཾ པན ཀཏྭཱ དཱཏུཾ ན སཀྐོཏི.

སོ ཨེཀདིཝསཾ སཏྠཱརཱ ‘‘དཱིཡཏི པན ཏེ, གཧཔཏི, ཀུལེ དཱན’’ནྟི ཝུཏྟེ ‘‘དཱིཡཏི, བྷནྟེ, ཏཉྩ ཁོ ཀཎཱཛཀཾ བིལངྒདུཏིཡ’’ནྟི ཨཱཧ. ཨཐ ནཾ ¶ སཏྠཱ, ‘‘གཧཔཏི, ‘ལཱུཁཾ དཱནཾ དེམཱི’ཏི མཱ ཙིནྟཡི. ཙིཏྟསྨིཉྷི པཎཱིཏེ བུདྡྷཱདཱིནཾ དིནྣདཱནཾ ལཱུཁཾ ནཱམ ནཏྠི, ཨཔིཙ ཏྭཾ ཨཊྛནྣཾ ཨརིཡཔུགྒལཱནཾ དཱནཾ དེསི, ཨཧཾ པན ཝེལཱམཀཱལེ སཀལཛམྦུདཱིཔཾ ཨུནྣངྒལཾ ཀཏྭཱ མཧཱདཱནཾ ¶ པཝཏྟཡམཱནོཔི ཏིསརཎགཏམྤི ཀཉྩི ནཱལཏྠཾ, དཀྑིཎེཡྻཱ ནཱམ ཨེཝཾ དུལླབྷཱ. ཏསྨཱ ‘ལཱུཁཾ མེ དཱན’ནྟི མཱ ཙིནྟཡཱི’’ཏི ཝཏྭཱ ཝེལཱམསུཏྟམསྶ (ཨ. ནི. ༩.༢༠) ཀཐེསི. ཨཐསྶ དྭཱརཀོཊྛཀེ ཨདྷིཝཏྠཱ དེཝཏཱ སཏྠརི ཙེཝ སཏྠུསཱཝཀེསུ ཙ གེཧཾ པཝིསནྟེསུ ཏེསཾ ཏེཛེན སཎྛཱཏུཾ ཨསཀྐོནྟཱི, ‘‘ཡཐཱ ཨིམེ ཨིམཾ གེཧཾ ན པཝིསནྟི, ཏཐཱ གཧཔཏིཾ པརིབྷིནྡིསྶཱམཱི’’ཏི ཏཾ ཝཏྟུཀཱམཱཔི ཨིསྶརཀཱལེ ཀིཉྩི ཝཏྟུཾ ནཱསཀྑི, ཨིདཱནི ‘‘པནཱཡཾ དུགྒཏོ གཎྷིསྶཏི མེ ཝཙན’’ནྟི རཏྟིབྷཱགེ སེཊྛིསྶ སིརིགབྦྷཾ པཝིསིཏྭཱ ཨཱཀཱསེ ཨཊྛཱསི. ཨཐ སེཊྛི ནཾ དིསྭཱ ‘‘ཀོ ཨེསོ’’ཏི ཨཱཧ. ཨཧཾ ཏེ མཧཱསེཊྛི ཙཏུཏྠདྭཱརཀོཊྛཀེ ཨདྷིཝཏྠཱ དེཝཏཱ, ཏུཡ྄ཧཾ ཨོཝཱདདཱནཏྠཱཡ ཨཱགཏཱཏི. ཏེན ཧི ཨོཝདེཧཱིཏི. མཧཱསེཊྛི ཏཡཱ པཙྪིམཀཱལཾ ཨནོལོཀེཏྭཱཝ སམཎསྶ གོཏམསྶ སཱསནེ བཧུཾ དྷནཾ ཝིཔྤཀིཎྞཾ, ཨིདཱནི དུགྒཏོ ཧུཏྭཱཔི ཏཾ ན མུཉྩསིཡེཝ, ཨེཝཾ ཝཏྟམཱནོ ཀཏིཔཱཧེནེཝ གྷཱསཙྪཱདནམཏྟམྤི ན ལབྷིསྶསི ¶ , ཀིཾ ཏེ སམཎེན གོཏམེན, ཨཏིཔརིཙྩཱགཏོ ཨོརམིཏྭཱ ཀམྨནྟེ པཡོཛེནྟོ ཀུཊུམྦཾ སཎྛཱཔེཧཱིཏི. ཨཡཾ མེ ཏཡཱ དིནྣཨོཝཱདོཏི. ཨཱམ, སེཊྛཱིཏི. གཙྪ, ནཱཧཾ ཏཱདིསཱིནཾ སཏེནཔི སཧསྶེནཔི སཏསཧསྶེནཔི ¶ སཀྐཱ ཀམྤེཏུཾ, ཨཡུཏྟཾ ཏེ ཝུཏྟཾ, ཀཾ ཏཡཱ མམ གེཧེ ཝསམཱནཱཡ, སཱིགྷཾ སཱིགྷཾ མེ གྷརཱ ནིཀྑམཱཧཱིཏི. སཱ སོཏཱཔནྣསྶ ཨརིཡསཱཝཀསྶ ཝཙནཾ སུཏྭཱ ཋཱཏུཾ ཨསཀྐོནྟཱི དཱརཀེ ཨཱདཱཡ ནིཀྑམི, ནིཀྑམིཏྭཱ ཙ པན ཨཉྙཏྠ ཝསནཊྛཱནཾ ཨལབྷམཱནཱ ‘‘སེཊྛིཾ ཁམཱཔེཏྭཱ ཏཏྠེཝ ཝསིསྶཱམཱི’’ཏི ནགརཔརིགྒཱཧཀཾ དེཝཔུཏྟཾ ཨུཔསངྐམིཏྭཱ ཨཏྟནཱ ཀཏཱཔརཱདྷཾ ཨཱཙིཀྑིཏྭཱ ‘‘ཨེཧི, མཾ སེཊྛིསྶ སནྟིཀཾ ནེཏྭཱ ཁམཱཔེཏྭཱ ཝསནཊྛཱནཾ དཱཔེཧཱི’’ཏི ཨཱཧ. སོ ‘‘ཨཡུཏྟཾ ཏཡཱ ཝུཏྟཾ, ནཱཧཾ ཏསྶ སནྟིཀཾ གནྟུཾ ཨུསྶཧཱམཱི’’ཏི ཏཾ པཊིཀྑིཔི. སཱ ཙཏུནྣཾ མཧཱརཱཛཱནཾ སནྟིཀཾ གནྟྭཱ ཏེཧིཔི པཊིཀྑིཏྟཱ སཀྐཾ དེཝརཱཛཱནཾ ཨུཔསངྐམིཏྭཱ ཏཾ པཝཏྟིཾ ཨཱཙིཀྑིཏྭཱ, ‘‘ཨཧཾ, དེཝ, ཝསནཊྛཱནཾ ཨལབྷམཱནཱ དཱརཀེ ¶ ཧཏྠེན གཧེཏྭཱ ཨནཱཐཱ ཝིཙརཱམི, ཝསནཊྛཱནཾ མེ དཱཔེཧཱི’’ཏི སུཊྛུཏརཾ ཡཱཙི.

ཨཐ ནཾ སོ ‘‘ཨཧམྤི ཏཝ ཀཱརཎཱ སེཊྛིཾ ཝཏྟུཾ ན སཀྑིསྶཱམི, ཨེཀཾ པན ཏེ ཨུཔཱཡཾ ཀཐེསྶཱམཱི’’ཏི ཨཱཧ. སཱདྷུ, དེཝ, ཀཐེཧཱིཏི. གཙྪ, སེཊྛིནོ ཨཱཡུཏྟཀཝེསཾ གཧེཏྭཱ སེཊྛིསྶ ཧཏྠཏོ པཎྞཾ ཨཱརོཔེཏྭཱ ཝོཧཱརཱུཔཛཱིཝཱིཧི གཧིཏཾ ཨཊྛཱརསཀོཊིདྷནཾ ཨཏྟནོ ཨཱནུབྷཱཝེན སོདྷེཏྭཱ ཏུཙྪགབྦྷེ པཱུརེཏྭཱ མཧཱསམུདྡཾ ¶ པཝིཊྛཾ ཨཊྛཱརསཀོཊིདྷནཾ ཨཏྠི, ཨཉྙམྤི ཨསུཀཊྛཱནེ ནཱམ ཨསྶཱམིཀཾ ཨཊྛཱརསཀོཊིདྷནཾ ཨཏྠི, ཏཾ སབྦཾ སཾཧརིཏྭཱ ཏསྶ ཏུཙྪགབྦྷེ པཱུརེཏྭཱ དཎྜཀམྨཾ ཀཏྭཱ ཁམཱཔེཧཱིཏི. སཱ ‘‘སཱདྷུ, དེཝཱ’’ཏི ཝུཏྟནཡེནེཝ ཏཾ སབྦཾ ཀཏྭཱ པུན ཏསྶ སིརིགབྦྷཾ ཨོབྷཱསཡམཱནཱ ཨཱཀཱསེ ཋཏྭཱ ‘‘ཀོ ཨེསོ’’ཏི ཝུཏྟེ ཨཧཾ ཏེ ཙཏུཏྠདྭཱརཀོཊྛཀེ ཨདྷིཝཏྠཱ ཨནྡྷབཱལདེཝཏཱ, མཡཱ ཨནྡྷབཱལཏཱཡ ཡཾ ཏུམྷཱཀཾ སནྟིཀེ ཀཐིཏཾ, ཏཾ མེ ཁམཐ. སཀྐསྶ ཧི མེ ཝཙནེན ཙཏུཔཎྞཱསཀོཊིདྷནཾ སཾཧརིཏྭཱ ཏུཙྪགབྦྷཔཱུརཎཾ དཎྜཀམྨཾ ཀཏཾ, ཝསནཊྛཱནཾ ཨལབྷམཱནཱ ཀིལམཱམཱིཏི. ཨནཱཐཔིཎྜིཀོ ཙིནྟེསི – ‘‘ཨཡཾ དེཝཏཱ ‘དཎྜཀམྨཉྩ མེ ཀཏ’ནྟི ཝདཏི, ཨཏྟནོ ཙ དོསཾ པཊིཛཱནཱཏི, སམྨཱསམྦུདྡྷསྶ ནཾ དསྶེསྶཱམཱི’’ཏི. སོ ཏཾ སཏྠུ སནྟིཀཾ ནེཏྭཱ ཏཱཡ ཀཏཀམྨཾ སབྦཾ ཨཱརོཙེསི. དེཝཏཱ སཏྠུ པཱདེསུ སིརསཱ ནིཔཏིཏྭཱ, ‘‘བྷནྟེ, ཡཾ མཡཱ ཨནྡྷབཱལཏཱཡ ཏུམྷཱཀཾ གུཎེ ཨཛཱནིཏྭཱ པཱཔཀཾ ཝཙནཾ ཝུཏྟཾ, ཏཾ མེ ཁམཐཱ’’ཏི སཏྠཱརཾ ཁམཱཔེཏྭཱ མཧཱསེཊྛིཾ ཁམཱཔེསི. སཏྠཱ ཀལྱཱཎཔཱཔཀཱནཾ ཀམྨཱནཾ ཝིཔཱཀཝསེན སེཊྛིཉྩེཝ དེཝཏཉྩ ཨོཝདནྟོ ‘‘ཨིདྷ, གཧཔཏི, པཱཔཔུགྒལོཔི ཡཱཝ པཱཔཾ ན པཙྩཏི, ཏཱཝ བྷདྲམྤི པསྶཏི. ཡདཱ པནསྶ པཱཔཾ པཙྩཏི, ཏདཱ པཱཔམེཝ པསྶཏི. བྷདྲཔུགྒལོཔི ཡཱཝ བྷདྲཾ ན པཙྩཏི, ཏཱཝ པཱཔཱནི པསྶཏི. ཡདཱ པནསྶ ¶ བྷདྲཾ པཙྩཏི, ཏདཱ བྷདྲམེཝ ¶ པསྶཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘པཱཔོཔི པསྶཏཱི བྷདྲཾ, ཡཱཝ པཱཔཾ ན པཙྩཏི;

ཡདཱ ཙ པཙྩཏཱི པཱཔཾ, ཨཐ པཱཔོ པཱཔཱནི པསྶཏི.

‘‘བྷདྲོཔི པསྶཏཱི པཱཔཾ, ཡཱཝ བྷདྲཾ ན པཙྩཏི;

ཡདཱ ཙ པཙྩཏཱི བྷདྲཾ, ཨཐ བྷདྲོ བྷདྲཱནི པསྶཏཱི’’ཏི.

ཏཏྠ ¶ པཱཔོཏི ཀཱཡདུཙྩརིཏཱདིནཱ པཱཔཀམྨེན ཡུཏྟཔུགྒལོ. སོཔི ཧི པུརིམསུཙརིཏཱནུབྷཱཝེན ནིབྦཏྟཾ སུཁཾ ཨནུབྷཝམཱནོ བྷདྲམྤི པསྶཏི. ཡཱཝ པཱཔཾ ན པཙྩཏཱིཏི ཡཱཝསྶ ཏཾ པཱཔཀམྨཾ དིཊྛདྷམྨེ ཝཱ སམྤརཱཡེ ཝཱ ཝིཔཱཀཾ ན དེཏི. ཡདཱ པནསྶ ཏཾ དིཊྛདྷམྨེ ཝཱ སམྤརཱཡེ ཝཱ ཝིཔཱཀཾ དེཏི, ཨཐ དིཊྛདྷམྨེ ཝིཝིདྷཱ ཀམྨཀཱརཎཱ, སམྤརཱཡེ ཙ ཨཔཱཡདུཀྑཾ ཨནུབྷོནྟོ སོ པཱཔོ པཱཔཱནིཡེཝ པསྶཏི. དུཏིཡགཱཐཱཡཔི ཀཱཡསུཙརིཏཱདིནཱ བྷདྲཀམྨེན ཡུཏྟོ བྷདྲོ. སོཔི ཧི པུརིམདུཙྩརིཏཱནུབྷཱཝེན ནིབྦཏྟཾ དུཀྑཾ ཨནུབྷཝམཱནོ པཱཔཾ པསྶཏི. ཡཱཝ བྷདྲཾ ན པཙྩཏཱིཏི ཡཱཝསྶ ཏཾ བྷདྲཾ ཀམྨཾ དིཊྛདྷམྨེ ཝཱ སམྤརཱཡེ ཝཱ ཝིཔཱཀཾ ན དེཏི. ཡདཱ པན ཏཾ ཝིཔཱཀཾ དེཏི, ཨཐ དིཊྛདྷམྨེ ལཱབྷསཀྐཱརཱདིསུཁཾ, སམྤརཱཡེ ཙ དིབྦསམྤཏྟིསུཁཾ ཨནུབྷཝམཱནོ སོ བྷདྲོ བྷདྲཱནིཡེཝ པསྶཏཱིཏི.

དེསནཱཝསཱནེ ¶ སཱ དེཝཏཱ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

མཱཝམཉྙེཐ པཱཔསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཨསཉྙཏཔརིཀྑཱརཾ བྷིཀྑུཾ ཨཱརབྦྷ ཀཐེསི.

སོ ཀིར ཡཾ ཀིཉྩི མཉྩཔཱིཋཱདིབྷེདཾ པརིཀྑཱརཾ བཧི པརིབྷུཉྫིཏྭཱ ཏཏྠེཝ ཚཌྜེཏི. པརིཀྑཱརོ ¶ ཝསྶེནཔི ཨཱཏཔེནཔི ཨུཔཙིཀཱདཱིཧིཔི ཝིནསྶཏི. སོ བྷིཀྑཱུཧི ‘‘ནནུ, ཨཱཝུསོ, པརིཀྑཱརོ ནཱམ པཊིསཱམིཏབྦོ’’ཏི ཝུཏྟེ ‘‘ཨཔྤཀཾ མཡཱ ཀཏཾ, ཨཱཝུསོ, ཨེཏཾ, ན ཨེཏསྶ ཙིཏྟཾ ཨཏྠི, ན པིཏྟ’’ནྟི ཝཏྭཱ ཏཐེཝ ཀརོཏི. བྷིཀྑཱུ ཏསྶ ཀིརིཡཾ སཏྠུ ཨཱརོཙེསུཾ. སཏྠཱ ཏཾ པཀྐོསཱཔེཏྭཱ ‘‘སཙྩཾ ཀིར ཏྭཾ བྷིཀྑུ ཨེཝཾ ཀརོསཱི’’ཏི པུཙྪི. སོ སཏྠཱརཱ པུཙྪིཏོཔི ‘‘ཀིཾ ཨེཏཾ བྷགཝཱ ཨཔྤཀཾ མཡཱ ཀཏཾ, ན ཏསྶ ཙིཏྟཾ ཨཏྠི, ནཱསྶ པིཏྟ’’ནྟི ཏཐེཝ ཨཝམཉྙནྟོ ཨཱཧ. ཨཐ ནཾ སཏྠཱ ‘‘བྷིཀྑཱུཧི ཨེཝཾ ཀཱཏུཾ ན ཝཊྚཏི, པཱཔཀམྨཾ ནཱམ ‘ཨཔྤཀ’ནྟི ན ཨཝམཉྙིཏབྦཾ. ཨཛ྄ཛྷོཀཱསེ ཋཔིཏཉྷི ཝིཝཊམུཁཾ བྷཱཛནཾ དེཝེ ཝསྶནྟེ ¶ ཀིཉྩཱཔི ཨེཀབིནྡུནཱ ན པཱུརཏི, པུནཔྤུནཾ ¶ ཝསྶནྟེ པན པཱུརཏེཝ, ཨེཝམེཝཾ པཱཔཾ ཀརོནྟོ པུགྒལོ ཨནུཔུབྦེན མཧནྟཾ པཱཔརཱསིཾ ཀརོཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘མཱཝམཉྙེཐ པཱཔསྶ, ན མནྡཾ ཨཱགམིསྶཏི;

ཨུདབིནྡུནིཔཱཏེན, ཨུདཀུམྦྷོཔི པཱུརཏི;

བཱལོ པཱུརཏི པཱཔསྶ, ཐོཀཾ ཐོཀམྤི ཨཱཙིན’’ནྟི.

ཏཏྠ མཱཝམཉྙེཐཱཏི ན ཨཝཛཱནེཡྻ. པཱཔསྶཱཏི པཱཔཾ. ན མནྡཾ ཨཱགམིསྶཏཱིཏི ‘‘ཨཔྤམཏྟཀཾ མེ པཱཔཀཾ ཀཏཾ, ཀདཱ ཨེཏཾ ཝིཔཙྩིསྶཏཱི’’ཏི ཨེཝཾ པཱཔཾ ནཱཝཛཱནེཡྻཱཏི ཨཏྠོ. ཨུདཀུམྦྷོཔཱིཏི དེཝེ ཝསྶནྟེ མུཁཾ ཝིཝརིཏྭཱ ཋཔིཏཾ ཡཾ ཀིཉྩི ཀུལཱལབྷཱཛནཾ ཡཐཱ ཏཾ ཨེཀེཀསྶཱཔི ཨུདཀབིནྡུནོ ནིཔཱཏེན ཨནུཔུབྦེན པཱུརཏི, ཨེཝཾ བཱལཔུགྒལོ ཐོཀཾ ཐོཀམྤི པཱཔཾ ཨཱཙིནནྟོ ཀརོནྟོ ཝཌྜྷེནྟོ པཱཔསྶ པཱུརཏིཡེཝཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ. སཏྠཱཔི ‘‘ཨཛ྄ཛྷོཀཱསེ སེཡྻཾ སནྠརིཏྭཱ པཊིཔཱཀཏིཀཾ ཨཀརོནྟོ ཨིམཾ ནཱམ ཨཱཔཏྟིམཱཔཛྫཏཱི’’ཏི (པཱཙི. ༡༠༨-༡༡༠) སིཀྑཱཔདཾ པཉྙཱཔེསཱིཏི.

ཨསཉྙཏཔརིཀྑཱརབྷིཀྑུཝཏྠུ པཉྩམཾ.

མཱཝམཉྙེཐ ¶ ¶ པུཉྙསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ བིལཱ༹ལཔཱདཀསེཊྛིཾ ཨཱརབྦྷ ཀཐེསི.

ཨེཀསྨིཉྷི སམཡེ སཱཝཏྠིཝཱསིནོ ཝགྒབནྡྷནེན བུདྡྷཔྤམུཁསྶ བྷིཀྑུསངྒྷསྶ དཱནཾ དེནྟི. ཨཐེཀདིཝསཾ སཏྠཱ ཨནུམོདནཾ ཀརོནྟོ ཨེཝམཱཧ –

‘‘ཨུཔཱསཀཱ ཨིདྷེཀཙྩོ ཨཏྟནཱཝ དཱནཾ དེཏི, པརཾ ན སམཱདཔེཏི. སོ ནིབྦཏྟནིབྦཏྟཊྛཱནེ བྷོགསམྤདཾ ལབྷཏི, ནོ པརིཝཱརསམྤདཾ. ཨེཀཙྩོ ཨཏྟནཱ དཱནཾ ན དེཏི, པརཾ སམཱདཔེཏི. སོ ¶ ནིབྦཏྟནིབྦཏྟཊྛཱནེ པརིཝཱརསམྤདཾ ལབྷཏི, ནོ བྷོགསམྤདཾ. ཨེཀཙྩོ ཨཏྟནཱ ཙ ན དེཏི, པརཉྩ ན སམཱདཔེཏི. སོ ནིབྦཏྟནིབྦཏྟཊྛཱནེ ནེཝ བྷོགསམྤདཾ ལབྷཏི, ན པརིཝཱརསམྤདཾ, ཝིགྷཱསཱདོ ཧུཏྭཱ ཝིཙརཏི. ཨེཀཙྩོ ཨཏྟནཱ ཙ དེཏི, པརཉྩ སམཱདཔེཏི. སོ ནིབྦཏྟནིབྦཏྟཊྛཱནེ བྷོགསམྤདཉྩེཝ ལབྷཏི, པརིཝཱརསམྤདཉྩཱ’’ཏི.

ཨཐེཀོ པཎྜིཏཔུརིསོ ཏཾ དྷམྨདེསནཾ སུཏྭཱ ‘‘ཨཧོ ཨཙྪརིཡམིདཾ ཀཱརཎཾ, ཨཧཾ དཱནི ཨུབྷཡསམྤཏྟིསཾཝཏྟནིཀཾ ཀམྨཾ ཀརིསྶཱམཱི’’ཏི ཙིནྟེཏྭཱ སཏྠཱརཾ ཨུཊྛཱཡ གམནཀཱལེ ཨཱཧ – ‘‘བྷནྟེ, སྭེ ཨམྷཱཀཾ བྷིཀྑཾ གཎྷཐཱ’’ཏི. ཀིཏྟཀེཧི པན ཏེ བྷིཀྑཱུཧི ཨཏྠོཏི? སབྦབྷིཀྑཱུཧི, བྷནྟེཏི. སཏྠཱ ཨདྷིཝཱསེསི ¶ . སོཔི གཱམཾ པཝིསིཏྭཱ, ‘‘ཨམྨཏཱཏཱ, མཡཱ སྭཱཏནཱཡ བུདྡྷཔྤམུཁོ བྷིཀྑུསངྒྷོ ནིམནྟིཏོ, ཡོ ཡཏྟཀཱནཾ བྷིཀྑཱུནཾ སཀྐོཏི, སོ ཏཏྟཀཱནཾ ཡཱགུཨཱདཱིནཾ ཨཏྠཱཡ ཏཎྜུལཱདཱིནི དེཏུ, ཨེཀསྨིཾ ཋཱནེ པཙཱཔེཏྭཱ དཱནཾ དསྶཱམཱ’’ཏི ཨུགྒྷོསེནྟོ ཝིཙརི.

ཨཐ ནཾ ཨེཀོ སེཊྛི ཨཏྟནོ ཨཱཔཎདྭཱརཾ སམྤཏྟཾ དིསྭཱ ‘‘ཨཡཾ ཨཏྟནོ པཧོནཀེ བྷིཀྑཱུ ཨནིམནྟེཏྭཱ པན སཀལགཱམཾ སམཱདཔེནྟོ ཝིཙརཏཱི’’ཏི ཀུཛ྄ཛྷིཏྭཱ ‘‘ཏཡཱ གཧིཏབྷཱཛནཾ ཨཱཧརཱ’’ཏི ཏཱིཧི ཨངྒུལཱིཧི གཧེཏྭཱ ཐོཀེ ཏཎྜུལེ ཨདཱསི, ཏཐཱ མུགྒེ, ཏཐཱ མཱསེཏི. སོ ཏཏོ པཊྛཱཡ བིལཱ༹ལཔཱདཀསེཊྛི ནཱམ ཛཱཏོ, སཔྤིཕཱཎིཏཱདཱིནི དེནྟོཔི ཀརཎྜཾ ཀུཊེ པཀྑིཔིཏྭཱ ཨེཀཏོ ཀོཎཾ ཀཏྭཱ བིནྡུཾ བིནྡུཾ པགྒྷརཱཡནྟོ ཐོཀཐོཀམེཝ ཨདཱསི. ཨུཔཱསཀོ ཨཝསེསེཧི དིནྣཾ ཨེཀཏོ ཀཏྭཱ ཨིམིནཱ དིནྣཾ ཝིསུཾཡེཝ ཨགྒཧེསི. སོ སེཊྛི ཏསྶ ཀིརིཡཾ ¶ དིསྭཱ ‘‘ཀིཾ ནུ ཁོ ཨེས མཡཱ དིནྣཾ ཝིསུཾ གཎྷཱཏཱི’’ཏི ཙིནྟེཏྭཱ ཏསྶ པཙྪཏོ པཙྪཏོ ཨེཀཾ ཙཱུལུ༹པཊྛཱཀཾ པཧིཎི ‘‘གཙྪ, ཡཾ ཨེས ཀརོཏི, ཏཾ ཛཱནཱཧཱི’’ཏི. སོ གནྟྭཱ ‘‘སེཊྛིསྶ མཧཔྥལཾ ཧོཏཱུ’’ཏི ཡཱགུབྷཏྟཔཱུཝཱནཾ ཨཏྠཱཡ ཨེཀཾ དྭེ ཏཎྜུལེ པཀྑིཔིཏྭཱ མུགྒམཱསེཔི ཏེལཕཱཎིཏཱདིབིནྡཱུནིཔི སབྦབྷཱཛནེསུ པཀྑིཔི. ཙཱུལུ༹པཊྛཱཀོ གནྟྭཱ སེཊྛིསྶ ཨཱརོཙེསི ¶ . ཏཾ སུཏྭཱ སེཊྛི ཙིནྟེསི – ‘‘སཙེ མེ སོ པརིསམཛ྄ཛྷེ ཨཝཎྞཾ བྷཱསིསྶཏི, མམ ནཱམེ གཧིཏམཏྟེཡེཝ ནཾ པཧརིཏྭཱ མཱརེསྶཱམཱི’’ཏི ནིཝཱསནནྟརེ ཚུརིཀཾ བནྡྷིཏྭཱ པུནདིཝསེ གནྟྭཱ བྷཏྟགྒེ ཨཊྛཱསི. སོ པུརིསོ བུདྡྷཔྤམུཁཾ བྷིཀྑུསངྒྷཾ པརིཝིསིཏྭཱ ¶ བྷགཝནྟཾ ཨཱཧ – ‘‘བྷནྟེ, མཡཱ མཧཱཛནཾ སམཱདཔེཏྭཱ ཨིམཾ དཱནཾ དིནྣཾ, ཏཏྠ སམཱདཔིཏམནུསྶཱ ཨཏྟནོ ཨཏྟནོ བལེན བཧཱུནིཔི ཐོཀཱནིཔི ཏཎྜུལཱདཱིནི ཨདཾསུ, ཏེསཾ སབྦེསཾ མཧཔྥལཾ ཧོཏཱུ’’ཏི. ཏཾ སུཏྭཱ སོ སེཊྛི ཙིནྟེསི – ‘‘ཨཧཾ ‘ཨསུཀེན ནཱམ ཨཙྪརཱཡ གཎྷིཏྭཱ ཏཎྜུལཱདཱིནི དིནྣཱནཱིཏི མམ ནཱམེ གཧིཏམཏྟེ ཨིམཾ མཱརེསྶཱམཱི’ཏི ཨཱགཏོ, ཨཡཾ པན སབྦསངྒཱཧིཀཾ ཀཏྭཱ ‘ཡེཧིཔི ནཱལི༹ཨཱདཱིཧི མིནིཏྭཱ དིནྣཾ, ཡེཧིཔི ཨཙྪརཱཡ གཧེཏྭཱ དིནྣཾ, སབྦེསཾ མཧཔྥལཾ ཧོཏཱུ’ཏི ཝདཏི. སཙཱཧཾ ཨེཝརཱུཔཾ ན ཁམཱཔེསྶཱམི, དེཝདཎྜོ མམ མཏྠཀེ པཏིསྶཏཱི’’ཏི. སོ ཏསྶ པཱདམཱུལེ ནིཔཛྫིཏྭཱ ‘‘ཁམཱཧི མེ, སཱམཱི’’ཏི ཨཱཧ. ‘‘ཀིཾ ཨིད’’ནྟི ཙ ཏེན ཝུཏྟེ སབྦཾ ཏཾ པཝཏྟིཾ ཨཱརོཙེསི. ཏཾ ཀིརིཡཾ དིསྭཱ སཏྠཱ ‘‘ཀིཾ ཨིད’’ནྟི དཱནཝེཡྻཱཝཊིཀཾ པུཙྪི. སོ ཨཏཱིཏདིཝསཏོ པཊྛཱཡ སབྦཾ ཏཾ པཝཏྟིཾ ཨཱརོཙེསི. ཨཐ ནཾ སཏྠཱ ‘‘ཨེཝཾ ཀིར སེཊྛཱི’’ཏི པུཙྪིཏྭཱ, ‘‘ཨཱམ, བྷནྟེ’’ཏི ཝུཏྟེ, ‘‘ཨུཔཱསཀ, པུཉྙཾ ནཱམ ‘ཨཔྤཀ’ནྟི ན ཨཝམཉྙིཏབྦཾ, མཱདིསསྶ བུདྡྷཔྤམུཁསྶ ¶ བྷིཀྑུསངྒྷསྶ དཱནཾ དཏྭཱ ‘ཨཔྤཀ’ནྟི ན ཨཝམཉྙིཏབྦཾ. པཎྜིཏམནུསྶཱ ཧི པུཉྙཾ ཀརོནྟཱ ཝིཝཊབྷཱཛནཾ ཝིཡ ཨུདཀེན ཨནུཀྐམེན པུཉྙེན པཱུརནྟིཡེཝཱ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘མཱཝམཉྙེཐ པུཉྙསྶ, ན མནྡཾ ཨཱགམིསྶཏི;

ཨུདབིནྡུནིཔཱཏེན, ཨུདཀུམྦྷོཔི པཱུརཏི;

དྷཱིརོ པཱུརཏི པུཉྙསྶ, ཐོཀཾ ཐོཀམྤི ཨཱཙིན’’ནྟི.

ཏསྶཏྠོ – པཎྜིཏམནུསྶོ པུཉྙཾ ཀཏྭཱ ‘‘ཨཔྤཀམཏྟཾ མཡཱ ཀཏཾ, ན མནྡཾ ཝིཔཱཀཝསེན ཨཱགམིསྶཏི, ཨེཝཾ པརིཏྟཀཾ ཀམྨཾ ཀཧཾ མཾ དཀྑིསྶཏི, ཨཧཾ ཝཱ ཏཾ ཀཧཾ དཀྑིསྶཱམི, ཀདཱ ཨེཏཾ ཝིཔཙྩིསྶཏཱི’’ཏི ཨེཝཾ པུཉྙཾ མཱཝམཉྙེཐ ན ཨཝཛཱནེཡྻ. ཡཐཱ ཧི ནིརནྟརཾ ཨུདབིནྡུནིཔཱཏེན ཝིཝརིཏྭཱ ཋཔིཏཾ ཀུལཱལབྷཱཛནཾ པཱུརཏི, ཨེཝཾ དྷཱིརོ པཎྜིཏཔུརིསོ ཐོཀཾ ཐོཀམྤི པུཉྙཾ ཨཱཙིནནྟོ པུཉྙསྶ པཱུརཏཱིཏི.

དེསནཱཝསཱནེ ¶ སོ སེཊྛི སོཏཱཔཏྟིཕལཾ པཱཔུཎི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

ཝཱཎིཛོཝཱཏི ¶ ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཧཱདྷནཝཱཎིཛཾ ཨཱརབྦྷ ཀཐེསི.

ཏསྶ ཀིར ཝཱཎིཛསྶ གེཧེ པཉྩསཏཱ ཙོརཱ ཨོཏཱརཾ གཝེསམཱནཱ ཨོཏཱརཾ ན ལབྷིཾསུ. ཨཔརེན སམཡེན ཝཱཎིཛོ པཉྩ སཀཊསཏཱནི བྷཎྜསྶ པཱུརེཏྭཱ བྷིཀྑཱུནཾ ཨཱརོཙཱཔེསི – ‘‘ཨཧཾ ཨསུཀཊྛཱནཾ ནཱམ ཝཱཎིཛྫཏྠཱཡ གཙྪཱམི, ཡེ, ཨཡྻཱ, ཏཾ ཋཱནཾ གནྟུཀཱམཱ, ཏེ ནིཀྑམནྟུ, མགྒེ བྷིཀྑཱཡ ན ཀིལམིསྶནྟཱི’’ཏི. ཏཾ སུཏྭཱ པཉྩསཏཱ བྷིཀྑཱུ ཏེན སདྡྷིཾ མགྒཾ པཊིཔཛྫིཾསུ. ཏེཔི ཙོརཱ ‘‘སོ ཀིར ཝཱཎིཛོ ནིཀྑནྟོ’’ཏི གནྟྭཱ ཨཊཝིཡཾ ཨཊྛཾསུ. ཝཱཎིཛོཔི གནྟྭཱ ཨཊཝིམུཁེ ཨེཀསྨིཾ གཱམེ ཝཱསཾ ཀཏྭཱ དྭེ ཏཡོཔི དིཝསེ གོཎསཀཊཱདཱིནི སཾཝིདཧི, ཏེསཾ པན བྷིཀྑཱུནཾ ནིབདྡྷཾ བྷིཀྑཾ དེཏིཡེཝ. ཙོརཱ ཏསྨིཾ ཨཏིཙིརཱཡནྟེ ‘‘གཙྪ, ཏསྶ ནིཀྑམནདིཝསཾ ཉཏྭཱ ཨེཧཱི’’ཏི ཨེཀཾ པུརིསཾ པཧིཎིཾསུ. སོ ཏཾ གཱམཾ གནྟྭཱ ཨེཀཾ སཧཱཡཀཾ པུཙྪི – ‘‘ཀདཱ ཝཱཎིཛོ ནིཀྑམིསྶཏཱི’’ཏི. སོ ‘‘དྭཱིཧཏཱིཧཙྩཡེནཱ’’ཏི ཝཏྭཱ ‘‘ཀིམཏྠཾ པན པུཙྪསཱི’’ཏི ཨཱཧ. ཨཐསྶ སོ ‘‘མཡཾ པཉྩསཏཱ ཙོརཱ ཨེཏསྶཏྠཱཡ ཨཊཝིཡཾ ཋིཏཱ’’ཏི ཨཱཙིཀྑི. ཨིཏརོ ‘‘ཏེན ཧི གཙྪ, སཱིགྷཾ ནིཀྑམིསྶཏཱི’’ཏི ཏཾ ཨུཡྻོཛེཏྭཱ, ‘‘ཀིཾ ¶ ནུ ཁོ ཙོརེ ཝཱརེམི, ཨུདཱཧུ ཝཱཎིཛ’’ནྟི ཙིནྟེཏྭཱ, ‘‘ཀིཾ མེ ཙོརེཧི, ཝཱཎིཛཾ ནིསྶཱཡ པཉྩསཏཱ བྷིཀྑཱུ ཛཱིཝནྟི, ཝཱཎིཛསྶ སཉྙཾ དསྶཱམཱི’’ཏི སོ ཏསྶ སནྟིཀཾ གནྟྭཱ ‘‘ཀདཱ གམིསྶཐཱ’’ཏི པུཙྪིཏྭཱ ‘‘ཏཏིཡདིཝསེ’’ཏི ཝུཏྟེ མཡ྄ཧཾ ཝཙནཾ ཀརོཐ, ཨཊཝིཡཾ ཀིར ཏུམྷཱཀཾ ཨཏྠཱཡ པཉྩསཏཱ ཙོརཱ ཋིཏཱ, མཱ ཏཱཝ གམིཏྠཱཏི. ཏྭཾ ཀཐཾ ཛཱནཱསཱིཏི? ཏེསཾ ཨནྟརེ མམ སཧཱཡོ ཨཏྠི, ཏསྶ མེ ཀཐཱཡ ཉཱཏནྟི. ‘‘ཏེན ཧི ‘ཀིཾ མེ ཨེཏྟོ གཏེནཱ’ཏི ནིཝཏྟིཏྭཱ གེཧམེཝ གམིསྶཱམཱི’’ཏི ཨཱཧ. ཏསྨིཾ ཙིརཱཡནྟེ པུན ཏེཧི ཙོརེཧི པེསིཏོ པུརིསོ ཨཱགནྟྭཱ ཏཾ སཧཱཡཀཾ པུཙྪིཏྭཱ ཏཾ པཝཏྟིཾ སུཏྭཱ ‘‘ནིཝཏྟིཏྭཱ གེཧམེཝ ཀིར གམིསྶཏཱི’’ཏི གནྟྭཱ ཙོརཱནཾ ཨཱརོཙེསི. ཏཾ སུཏྭཱ ཙོརཱ ཏཏོ ནིཀྑམིཏྭཱ ཨིཏརསྨིཾ མགྒེ ཨཊྛཾསུ, ཏསྨིཾ ཙིརཡནྟེ པུནཔི ཏེ ཙོརཱ ཏསྶ སནྟིཀཾ པུརིསཾ པེསེསུཾ. སོ ཏེསཾ ཏཏྠ ཋིཏབྷཱཝཾ ཉཏྭཱ པུན ཝཱཎིཛསྶ ཨཱརོཙེསི. ཝཱཎིཛོ ¶ ‘‘ཨིདྷཱཔི མེ ཝེཀལླཾ ནཏྠི, ཨེཝཾ སནྟེ ¶ ནེཝ ཨེཏྟོ གམིསྶཱམི, ན ཨིཏོ, ཨིདྷེཝ བྷཝིསྶཱམཱི’’ཏི བྷིཀྑཱུནཾ ¶ སནྟིཀཾ གནྟྭཱ ཨཱཧ – ‘‘བྷནྟེ, ཙོརཱ ཀིར མཾ ཝིལུམྤིཏུཀཱམཱ མགྒེ ཋིཏཱ, ‘པུན ནིཝཏྟིསྶཏཱི’ཏི སུཏྭཱ ཨིཏརསྨིཾ མགྒེ ཋིཏཱ, ཨཧཾ ཨེཏྟོ ཝཱ ཨིཏོ ཝཱ ཨགནྟྭཱ ཐོཀཾ ཨིདྷེཝ བྷཝིསྶཱམི, བྷདནྟཱ ཨིདྷེཝ ཝསིཏུཀཱམཱ ཝསནྟུ, གནྟུཀཱམཱ ཨཏྟནོ རུཙིཾ ཀརོནྟཱུ’’ཏི. བྷིཀྑཱུ ‘‘ཨེཝཾ སནྟེ མཡཾ ནིཝཏྟིསྶཱམཱ’’ཏི ཝཱཎིཛཾ ཨཱཔུཙྪིཏྭཱ པུནདེཝ སཱཝཏྠིཾ གནྟྭཱ སཏྠཱརཾ ཝནྡིཏྭཱ ནིསཱིདིཾསུ. སཏྠཱ ‘‘ཀིཾ, བྷིཀྑཝེ, མཧཱདྷནཝཱཎིཛེན སདྡྷིཾ ན གམིཏྠཱ’’ཏི པུཙྪིཏྭཱ ‘‘ཨཱམ, བྷནྟེ, མཧཱདྷནཝཱཎིཛསྶ ཝིལུམྤནཏྠཱཡ དྭཱིསུཔི མགྒེསུ ཙོརཱ པརིཡུཊྛིཾསུ, ཏེན སོ ཏཏྠེཝ ཋིཏོ, མཡཾ པན ཏཾ ཨཱཔུཙྪིཏྭཱ ཨཱགཏཱ’’ཏི ཝུཏྟེ, ‘‘བྷིཀྑཝེ, མཧཱདྷནཝཱཎིཛོ ཙོརཱནཾ ཨཏྠིཏཱཡ མགྒཾ པརིཝཛྫཏི, ཛཱིཝིཏུཀཱམོ ཝིཡ པུརིསོ ཧལཱཧལཾ ཝིསཾ པརིཝཛྫེཏི, བྷིཀྑུནཱཔི ‘ཏཡོ བྷཝཱ ཙོརེཧི པརིཡུཊྛིཏམགྒསདིསཱ’ཏི ཉཏྭཱ པཱཔཾ པརིཝཛྫེཏུཾ ཝཊྚཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཝཱཎིཛོཝ བྷཡཾ མགྒཾ, ཨཔྤསཏྠོ མཧདྡྷནོ;

ཝིསཾ ཛཱིཝིཏུཀཱམོཝ, པཱཔཱནི པརིཝཛྫཡེ’’ཏི.

ཏཏྠ བྷཡནྟི བྷཱཡིཏབྦཾ, ཙོརེཧི པརིཡུཊྛིཏཏྟཱ སཔྤཊིབྷཡནྟི ཨཏྠོ. ཨིདཾ ཝུཏྟཾ ཧོཏི – ཡཐཱ མཧཱདྷནཝཱཎིཛོ ¶ ཨཔྤསཏྠོ སཔྤཊིབྷཡཾ མགྒཾ, ཡཐཱ ཙ ཛཱིཝིཏུཀཱམོ ཧལཱཧལཾ ཝིསཾ པརིཝཛྫེཏི, ཨེཝཾ པཎྜིཏོ བྷིཀྑུ ཨཔྤམཏྟཀཱནིཔི པཱཔཱནི པརིཝཛྫེཡྻཱཏི.

དེསནཱཝསཱནེ ཏེ བྷིཀྑཱུ སཧ པཊིསམྦྷིདཱཧི ཨརཧཏྟཾ པཱཔུཎིཾསུ, སམྤཏྟམཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

པཱཎིམྷི ཙེཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཀུཀྐུཊམིཏྟཾ ནཱམ ནེསཱདཾ ཨཱརབྦྷ ཀཐེསི.

རཱཛགཧེ ¶ ཀིར ཨེཀཱ སེཊྛིདྷཱིཏཱ ཝཡཔྤཏྟཱ སཏྟབྷཱུམིཀཔཱསཱདསྶ ཨུཔརི སིརིགབྦྷེ ཨཱརཀྑཎཏྠཱཡ ¶ ཨེཀཾ པརིཙཱརིཀཾ དཏྭཱ མཱཏཱཔིཏཱུཧི ཝཱསིཡམཱནཱ ཨེཀདིཝསཾ སཱཡནྷསམཡེ ཝཱཏཔཱནེན ཨནྟརཝཱིཐིཾ ཨོལོཀེནྟཱི པཉྩ པཱསསཏཱནི པཉྩ སཱུལསཏཱནི ཨཱདཱཡ མིགེ ཝདྷིཏྭཱ ཛཱིཝམཱནཾ ཨེཀཾ ཀུཀྐུཊམིཏྟཾ ནཱམ ནེསཱདཾ པཉྩ མིགསཏཱནི ཝདྷིཏྭཱ ཏེསཾ མཾསེན མཧཱསཀཊཾ པཱུརེཏྭཱ སཀཊདྷུརེ ནིསཱིདིཏྭཱ མཾསཝིཀྐིཎནཏྠཱཡ ནགརཾ པཝིསནྟཾ དིསྭཱ ཏསྨིཾ པཊིབདྡྷཙིཏྟཱ པརིཙཱརིཀཱཡ ཧཏྠེ པཎྞཱཀཱརཾ དཏྭཱ ‘‘གཙྪ, ཨེཏསྶ པཎྞཱཀཱརཾ དཏྭཱ གམནཀཱལཾ ཉཏྭཱ ཨེཧཱི’’ཏི པེསེསི. སཱ གནྟྭཱ ཏསྶ པཎྞཱཀཱརཾ དཏྭཱ པུཙྪི – ‘‘ཀདཱ གམིསྶསཱི’’ཏི? སོ ‘‘ཨཛྫ མཾསཾ ཝིཀྐིཎིཏྭཱ པཱཏོཝ ཨསུཀདྭཱརེན ནཱམ ¶ ནིཀྑམིཏྭཱ གམིསྶཱམཱི’’ཏི ཨཱཧ. སཱ ཏེན ཀཐིཏཀཐཾ སུཏྭཱ ཨཱགནྟྭཱ ཏསྶཱ ཨཱརོཙེསི. སེཊྛིདྷཱིཏཱ ཨཏྟནཱ གཧེཏབྦཡུཏྟཀཾ ཝཏྠཱབྷརཎཛཱཏཾ སཾཝིདཧིཏྭཱ པཱཏོཝ མལིནཝཏྠཾ ནིཝཱསེཏྭཱ ཀུཊཾ ཨཱདཱཡ དཱསཱིཧི སདྡྷིཾ ཨུདཀཏིཏྠཾ གཙྪནྟཱི ཝིཡ ནིཀྑམིཏྭཱ ཏཾ ཋཱནཾ གནྟྭཱ ཏསྶཱགམནཾ ཨོལོཀེནྟཱི ཨཊྛཱསི. སོཔི པཱཏོཝ སཀཊཾ པཱཛེནྟོ ནིཀྑམི. སཱ ཏསྶ པཙྪཏོ པཙྪཏོ པཱཡཱསི. སོ ཏཾ དིསྭཱ ‘‘ཨཧཾ ཏཾ ‘ཨསུཀསྶ ནཱམ དྷཱིཏཱ’ཏི ན ཛཱནཱམི, མཱ མཾ ཨནུབནྡྷི, ཨམྨཱ’’ཏི ཨཱཧ. ན མཾ ཏྭཾ པཀྐོསསི, ཨཧཾ ཨཏྟནོ དྷམྨཏཱཡ ཨཱགཙྪཱམི, ཏྭཾ ཏུཎྷཱི ཧུཏྭཱ ཨཏྟནོ སཀཊཾ པཱཛེཧཱིཏི. སོ པུནཔྤུནཾ ཏཾ ནིཝཱརེཏིཡེཝ. ཨཐ ནཾ སཱ ཨཱཧ – ‘‘སཱམི, སིརཱི ནཱམ ཨཏྟནོ སནྟིཀཾ ཨཱགཙྪནྟཱི ནིཝཱརེཏུཾ ན ཝཊྚཏཱི’’ཏི. སོ ཏསྶཱ ནིསྶཾསཡེན ཨཱགམནཀཱརཎཾ ཉཏྭཱ ཏཾ སཀཊཾ ཨཱརོཔེཏྭཱ ཨགམཱསི. ཏསྶཱ མཱཏཱཔིཏརོ ཨིཏོ ཙིཏོ ཙ པརིཡེསཱཔེཏྭཱ ཨཔསྶནྟཱ ‘‘མཏཱ བྷཝིསྶཏཱི’’ཏི མཏཀབྷཏྟཾ ཀརིཾསུ. སཱཔི ཏེན སདྡྷིཾ སཾཝཱསམནྭཱཡ པཊིཔཱཊིཡཱ སཏྟ པུཏྟེ ཝིཛཱཡིཏྭཱ ཏེ ཝཡཔྤཏྟེ གྷརབནྡྷནེན བནྡྷི.

ཨཐེཀདིཝསཾ སཏྠཱ པཙྩཱུསསམཡེ ལོཀཾ ཝོལོཀེནྟོ ཀུཀྐུཊམིཏྟཾ སཔུཏྟཾ སསུཎིསཾ ཨཏྟནོ ཉཱཎཛཱལསྶ ཨནྟོ པཝིཊྛཾ དིསྭཱ, ‘‘ཀིཾ ནུ ཁོ ཨེཏ’’ནྟི ཨུཔདྷཱརེནྟོ ཏེསཾ པནྣརསནྣམྤི སོཏཱཔཏྟིམགྒསྶ ཨུཔནིསྶཡཾ དིསྭཱ པཱཏོཝ པཏྟཙཱིཝརཾ ཨཱདཱཡ ཏསྶ པཱསཊྛཱནཾ ཨགམཱསི ¶ . ཏཾ དིཝསཾ པཱསེ བདྡྷོ ཨེཀམིགོཔི ནཱཧོསི. སཏྠཱ ¶ ཏསྶ པཱསམཱུལེ པདཝལཉྫཾ དསྶེཏྭཱ པུརཏོ ཨེཀསྶ གུམྦསྶ ཧེཊྛཱ ཚཱཡཱཡཾ ནིསཱིདི. ཀུཀྐུཊམིཏྟོ པཱཏོཝ དྷནུཾ ཨཱདཱཡ པཱསཊྛཱནཾ གནྟྭཱ ཨཱདིཏོ པཊྛཱཡ པཱསེ ཨོལོཀཡམཱནོ པཱསེ བདྡྷཾ ཨེཀམྤི མིགཾ ཨདིསྭཱ སཏྠུ པདཝལཉྫཾ ཨདྡས. ཨཐསྶ ཨེཏདཧོསི – ‘‘ཀོ མཡ྄ཧཾ བདྡྷམིགེ མོཙེནྟོ ཝིཙརཏཱི’’ཏི. སོ སཏྠརི ཨཱགྷཱཏཾ བནྡྷིཏྭཱ གཙྪནྟོ གུམྦམཱུལེ ནིསིནྣཾ སཏྠཱརཾ དིསྭཱ, ‘‘ཨིམིནཱ མམ མིགཱ མོཙིཏཱ བྷཝིསྶནྟི, མཱརེསྶཱམི ན’’ནྟི དྷནུཾ ཨཱཀཌྜྷི. སཏྠཱ དྷནུཾ ཨཱཀཌྜྷིཏུཾ དཏྭཱ ཝིསྶཛྫེཏུཾ ནཱདཱསི. སོ སརཾ ཝིསྶཛྫེཏུམྤི ཨོརོཔེཏུམྤི ཨསཀྐོནྟོ ཕཱསུཀཱཧི བྷིཛྫནྟཱིཧི ¶ ཝིཡ མུཁཏོ ཁེལེ༹ན པགྒྷརནྟེན ཀིལནྟརཱུཔོ ཨཊྛཱསི. ཨཐསྶ པུཏྟཱ གེཧཾ གནྟྭཱ ‘‘པིཏཱ ནོ ཙིརཱཡཏི, ཀིཾ ནུ ཁོ ཨེཏ’’ནྟི ཝཏྭཱ ‘‘གཙྪཐ, ཏཱཏཱ, པིཏུ སནྟིཀ’’ནྟི མཱཏརཱ པེསིཏཱ དྷནཱུནི ཨཱདཱཡ གནྟྭཱ པིཏརཾ ཏཐཱཋིཏཾ དིསྭཱ ‘‘ཨཡཾ ནོ པིཏུ པཙྩཱམིཏྟོ བྷཝིསྶཏཱི’’ཏི སཏྟཔི ཛནཱ དྷནཱུནི ཨཱཀཌྜྷིཏྭཱ བུདྡྷཱནུབྷཱཝེན ཡཐཱ ནེསཾ པིཏཱ ཋིཏོ, ཏཐེཝ ཨཊྛཾསུ. ཨཐ ནེསཾ མཱཏཱ ‘‘ཀིཾ ནུ ཁོ མེ པུཏྟཱཔི ཙིརཱཡནྟཱི’’ཏི ཝཏྭཱ སཏྟཧི སུཎིསཱཧི སདྡྷིཾ གནྟྭཱ ཏེ ཏཐཱཋིཏེ དིསྭཱ ‘‘ཀསྶ ནུ ཁོ ཨིམེ དྷནཱུནི ཨཱཀཌྜྷིཏྭཱ ཋིཏཱ’’ཏི ཨོལོཀེནྟཱི སཏྠཱརཾ དིསྭཱ བཱཧཱ པགྒཡ྄ཧ – ‘‘མཱ མེ པིཏརཾ ནཱསེཐ, མཱ མེ པིཏརཾ ནཱསེཐཱ’’ཏི མཧཱསདྡམཀཱསི. ཀུཀྐུཊམིཏྟོ ཏཾ སདྡཾ སུཏྭཱ ཙིནྟེསི – ‘‘ནཊྛོ ཝཏམྷི, སསུརོ ཀིར མེ ཨེས, ཨཧོ མཡཱ བྷཱརིཡཾ ¶ ཀམྨཾ ཀཏ’’ནྟི. པུཏྟཱཝིསྶ ‘‘ཨཡྻཀོ ཀིར ནོ ཨེས, ཨཧོ བྷཱརིཡཾ ཀམྨཾ ཀཏ’’ནྟི ཙིནྟཡིཾསུ. ཀུཀྐུཊམིཏྟོ ‘‘ཨཡཾ སསུརོ མེ’’ཏི མེཏྟཙིཏྟཾ ཨུཔཊྛཔེསི, པུཏྟཱཔིསྶ ‘‘ཨཡྻཀོ ནོ’’ཏི མེཏྟཙིཏྟཾ ཨུཔཊྛཔེསུཾ. ཨཐ ཏེ ནེསཾ མཱཏཱ སེཊྛིདྷཱིཏཱ ‘‘ཁིཔྤཾ དྷནཱུནི ཚཌྜེཏྭཱ པིཏརཾ མེ ཁམཱཔེཐཱ’’ཏི ཨཱཧ.

སཏྠཱ ཏེསཾ མུདུཙིཏྟཏཾ ཉཏྭཱ དྷནུཾ ཨོཏཱརེཏུཾ ཨདཱསི. ཏེ སབྦེ སཏྠཱརཾ ཝནྡིཏྭཱ ‘‘ཁམཐ ནོ, བྷནྟེ’’ཏི ཁམཱཔེཏྭཱ ཨེཀམནྟཾ ནིསཱིདིཾསུ. ཨཐ ནེསཾ སཏྠཱ ཨནུཔུབྦིཾ ཀཐཾ ཀཐེསི. དེསནཱཝསཱནེ ཀུཀྐུཊམིཏྟོ སདྡྷིཾ པུཏྟེཧི ཙེཝ སུཎིསཱཧི ཙ ཨཏྟཔཉྩདསམོ སོཏཱཔཏྟིཕལེ པཏིཊྛཧི. སཏྠཱ པིཎྜཱཡ ཙརིཏྭཱ པཙྪཱབྷཏྟཾ ཝིཧཱརཾ ཨགམཱསི. ཨཐ ནཾ ཨཱནནྡཏྠེརོ པུཙྪི – ‘‘བྷནྟེ, ཀཧཾ གམིཏྠཱ’’ཏི. ཀུཀྐུཊམིཏྟསྶ སནྟིཀཾ ¶ , ཨཱནནྡཱཏི. པཱཎཱཏིཔཱཏཀམྨསྶ ཝོ, བྷནྟེ, ཨཀཱརཀོ ཀཏོཏི. ཨཱམཱནནྡ, སོ ཨཏྟཔཉྩདསམོ ཨཙལསདྡྷཱཡ པཏིཊྛཱཡ ཏཱིསུ རཏནེསུ ནིཀྐངྑོ ཧུཏྭཱ པཱཎཱཏིཔཱཏཀམྨསྶ ཨཀཱརཀོ ཛཱཏོཏི. བྷིཀྑཱུ ཨཱཧཾསུ – ‘‘ནནུ, བྷནྟེ, བྷརིཡཱཔིསྶ ཨཏྠཱི’’ཏི. ཨཱམ, བྷིཀྑཝེ, སཱ ཀུལགེཧེ ཀུམཱརིཀཱ ཧུཏྭཱ སོཏཱཔཏྟིཕལཾ པཏྟཱཏི. བྷིཀྑཱུ ཀཐཾ སམུཊྛཱཔེསུཾ ‘‘ཀུཀྐུཊམིཏྟསྶ ཀིར བྷརིཡཱ ཀུམཱརིཀཀཱལེ ཨེཝ སོཏཱཔཏྟིཕལཾ པཏྭཱ ཏསྶ གེཧཾ གནྟྭཱ སཏྟ པུཏྟེ ལབྷི, སཱ ཨེཏྟཀཾ ཀཱལཾ སཱམིཀེན ‘དྷནུཾ ཨཱཧར, སརེ ཨཱཧར, སཏྟིཾ ཨཱཧར, སཱུལཾ ཨཱཧར, ཛཱལཾ ཨཱཧརཱ’ཏི ཝུཙྩམཱནཱ ཏཱནི ཨདཱསི. སོཔི ཏཱཡ དིནྣཱནི ཨཱདཱཡ གནྟྭཱ པཱཎཱཏིཔཱཏཾ ཀརོཏི, ཀིཾ ནུ ཁོ སོཏཱཔནྣཱཔི པཱཎཱཏིཔཱཏཾ ཀརོནྟཱི’’ཏི. སཏྠཱ ¶ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘ན, བྷིཀྑཝེ, སོཏཱཔནྣཱ པཱཎཱཏིཔཱཏཾ ཀརོནྟི, སཱ པན ‘སཱམིཀསྶ ཝཙནཾ ཀརོམཱི’ཏི ཏཐཱ ཨཀཱསི. ‘ཨིདཾ གཧེཏྭཱ ཨེས གནྟྭཱ པཱཎཱཏིཔཱཏཾ ཀརོཏཱུ’ཏི ཏསྶཱ ཙིཏྟཾ ནཏྠི. པཱཎིཏལསྨིཉྷི ཝཎེ ཨསཏི ཝིསཾ གཎྷནྟསྶ ཏཾ ཝིསཾ ཨནུཌཧིཏུཾ ན སཀྐོཏི, ཨེཝམེཝཾ ཨཀུསལཙེཏནཱཡ ཨབྷཱཝེན ¶ པཱཔཾ ཨཀརོནྟསྶ དྷནུཨཱདཱིནི ནཱིཧརིཏྭཱ དདཏོཔི པཱཔཾ ནཱམ ན ཧོཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘པཱཎིམྷི ཙེ ཝཎོ ནཱསྶ, ཧརེཡྻ པཱཎིནཱ ཝིསཾ;

ནཱབྦཎཾ ཝིསམནྭེཏི, ནཏྠི པཱཔཾ ཨཀུབྦཏོ’’ཏི.

ཏཏྠ ནཱསྶཱཏི ན བྷཝེཡྻ. ཧརེཡྻཱཏི ཧརིཏུཾ སཀྐུཎེཡྻ. ཀིཾ ཀཱརཎཱ? ཡསྨཱ ནཱབྦཎཾ ཝིསམནྭེཏི ཨཝཎཉྷི པཱཎིཾ ཝིསཾ ཨནྭེཏུཾ ན སཀྐོཏི, ཨེཝམེཝ དྷནུཨཱདཱིནི ནཱིཧརིཏྭཱ དེནྟསྶཱཔི ཨཀུསལཙེཏནཱཡ ཨབྷཱཝེན པཱཔཾ ཨཀུབྦཏོ པཱཔཾ ནཱམ ནཏྠི, ཨཝཎཾ པཱཎིཾ ཝིསཾ ཝིཡ ནཱསྶ ཙིཏྟཾ པཱཔཾ ཨནུགཙྪཏཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཔརེན སམཡེན བྷིཀྑཱུ ཀཐཾ སམུཊྛཱཔེསུཾ – ‘‘ཀོ ནུ ཁོ ཀུཀྐུཊམིཏྟསྶ སཔུཏྟསྶ སསུཎིསསྶ སོཏཱཔཏྟིམགྒསྶཱུཔནིསྶཡོ, ཀེན ཀཱརཎེན ནེསཱདཀུལེ ནིབྦཏྟོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ ¶ , ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ¶ ཝུཏྟེ, བྷིཀྑཝེ, ཨཏཱིཏེ ཀསྶཔདསབལསྶ དྷཱཏུཙེཏིཡཾ སཾཝིདཧནྟཱ ཨེཝམཱཧཾསུ – ‘‘ཀིཾ ནུ ཁོ ཨིམསྶ ཙེཏིཡསྶ མཏྟིཀཱ བྷཝིསྶཏི, ཀིཾ ཨུདཀ’’ནྟི. ཨཐ ནེསཾ ཨེཏདཧོསི – ‘‘ཧརིཏཱལམནོསིལཱ མཏྟིཀཱ བྷཝིསྶཏི, ཏིལཏེལཾ ཨུདཀ’’ནྟི. ཏེ ཧརིཏཱལམནོསིལཱ ཀོཊྚེཏྭཱ ཏིལཏེལེན སཾསནྡིཏྭཱ ཨིཊྛཀཱཡ གྷཊེཏྭཱ སུཝཎྞེན ཁཙིཏྭཱ ཨནྟོ ཙིནིཾསུ, བཧིམུཁེ པན ཨེཀགྒྷནསུཝཎྞཨིཊྛཀཱཝ ཨཧེསུཾ. ཨེཀེཀཱ སཏསཧསྶགྒྷནིཀཱ ཨཧོསི. ཏེ ཡཱཝ དྷཱཏུནིདྷཱནཱ ཙེཏིཡེ ནིཊྛིཏེ ཙིནྟཡིཾསུ – ‘‘དྷཱཏུནིདྷཱནཀཱལེ བཧུནཱ དྷནེན ཨཏྠོ, ཀཾ ནུ ཁོ ཛེཊྛཀཾ ཀརོམཱ’’ཏི.

ཨཐེཀོ གཱམཝཱསིཀོ སེཊྛི ‘‘ཨཧཾ ཛེཊྛཀོ བྷཝིསྶཱམཱི’’ཏི དྷཱཏུནིདྷཱནེ ཨེཀཾ ཧིརཉྙཀོཊིཾ པཀྑིཔི. ཏཾ དིསྭཱ རཊྛཝཱསིནོ ‘‘ཨཡཾ ནགརསེཊྛི དྷནམེཝ སཾཧརཏི, ཨེཝརཱུཔེ ཙེཏིཡེ ཛེཊྛཀོ བྷཝིཏུཾ ན སཀྐོཏི, གཱམཝཱསཱི པན ཀོཊིདྷནཾ པཀྑིཔིཏྭཱ ཛེཊྛཀོ ཛཱཏོ’’ཏི ཨུཛ྄ཛྷཱཡིཾསུ. སོ ཏེསཾ ཀཐཾ སུཏྭཱ ‘‘ཨཧཾ དྭེ ཀོཊིཡོ དཏྭཱ ཛེཊྛཀོ བྷཝིསྶཱམཱི’’ཏི དྭེ ཀོཊིཡོ ཨདཱསི. ཨིཏརོ ‘‘ཨཧམེཝ ཛེཊྛཀོ བྷཝིསྶཱམཱི’’ཏི ཏིསྶོ ཀོཊིཡོ ཨདཱསི. ཨེཝཾ ཝཌྜྷེཏྭཱ ཝཌྜྷེཏྭཱ ནགརཝཱསཱི ཨཊྛ ཀོཊིཡོ ཨདཱསི. གཱམཝཱསིནོ པན ¶ གེཧེ ནཝཀོཊིདྷནམེཝ ཨཏྠི, ནགརཝཱསིནོ ཙཏྟཱལཱིསཀོཊིདྷནཾ. ཏསྨཱ གཱམཝཱསཱི ཙིནྟེསི – ‘‘སཙཱཧཾ ནཝ ཀོཊིཡོ དསྶཱམི, ཨཡཾ ‘དས ¶ ཀོཊིཡོ དསྶཱམཱི’ཏི ཝཀྑཏི, ཨཐ མེ ནིདྡྷནབྷཱཝོ པཉྙཱཡིསྶཏཱི’’ཏི. སོ ཨེཝམཱཧ – ‘‘ཨཧཾ ཨེཏྟཀཉྩ དྷནཾ དསྶཱམི, སཔུཏྟདཱརོ ཙ ཙེཏིཡསྶ དཱསོ བྷཝིསྶཱམཱི’’ཏི སཏྟ པུཏྟེ སཏྟ སུཎིསཱཡོ བྷརིཡཉྩ གཧེཏྭཱ ཨཏྟནཱ སདྡྷིཾ ཙེཏིཡསྶ ནིཡྻཱདེསི. རཊྛཝཱསིནོ ‘‘དྷནཾ ནཱམ སཀྐཱ ཨུཔྤཱདེཏུཾ, ཨཡཾ པན སཔུཏྟདཱརོ ཨཏྟཱནཾ ནིཡྻཱདེསི, ཨཡམེཝ ཛེཊྛཀོ ཧོཏཱུ’’ཏི ཏཾ ཛེཊྛཀཾ ཀརིཾསུ. ཨིཏི ཏེ སོལ༹སཔི ཛནཱ ཙེཏིཡསྶ དཱསཱ ཨཧེསུཾ. རཊྛཝཱསིནོ པན ཏེ བྷུཛིསྶེ ཨཀཾསུ. ཨེཝཾ སནྟེཔི ཙེཏིཡམེཝ པཊིཛགྒིཏྭཱ ཡཱཝཏཱཡུཀཾ ཋཏྭཱ ཏཏོ ཙུཏཱ དེཝལོཀེ ནིབྦཏྟིཾསུ. ཏེསུ ཨེཀཾ བུདྡྷནྟརཾ དེཝལོཀེ ཝསནྟེསུ ཨིམསྨིཾ བུདྡྷུཔྤཱདེ བྷརིཡཱ ཏཏོ ཙཝིཏྭཱ རཱཛགཧེ ¶ སེཊྛིནོ དྷཱིཏཱ ཧུཏྭཱ ནིབྦཏྟི. སཱ ཀུམཱརིཀཱཝ ཧུཏྭཱ སོཏཱཔཏྟིཕལཾ པཱཔུཎི. ཨདིཊྛསཙྩསྶ པན པཊིསནྡྷི ནཱམ བྷཱརིཡཱཏི ཏསྶཱ སཱམིཀོ སམྤརིཝཏྟམཱནོ གནྟྭཱ ནེསཱདཀུལེ ནིབྦཏྟི. ཏསྶ སཧ དསྶནེནེཝ སེཊྛིདྷཱིཏརཾ པུབྦསིནེཧོ ཨཛ྄ཛྷོཏྠརི. ཝུཏྟམྤི ཙེཏཾ –

‘‘པུབྦེཝ སནྣིཝཱསེན, པཙྩུཔྤནྣཧིཏེན ཝཱ;

ཨེཝཾ ཏཾ ཛཱཡཏེ པེམཾ, ཨུཔྤལཾཝ ཡཐོདཀེ’’ཏི. (ཛཱ. ༡.༢.༡༧༤);

སཱ པུབྦསིནེཧེནེཝ ནེསཱདཀུལཾ ཨགམཱསི. པུཏྟཱཔིསྶཱ དེཝལོཀཱ ཙཝིཏྭཱ ཏསྶཱ ཨེཝ ཀུཙྪིསྨིཾ པཊིསནྡྷིཾ གཎྷིཾསུ, སུཎིསཱཡོཔིསྶཱ ཏཏྠ ཏཏྠ ནིབྦཏྟིཏྭཱ ཝཡཔྤཏྟཱ ¶ ཏེསཾཡེཝ གེཧཾ ཨགམཾསུ. ཨེཝཾ ཏེ སབྦེཔི ཏདཱ ཙེཏིཡཾ པཊིཛགྒིཏྭཱ ཏསྶ ཀམྨསྶཱནུབྷཱཝེན སོཏཱཔཏྟིཕལཾ པཏྟཱཏི.

ཡོ ཨཔྤདུཊྛསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀོཀཾ ནཱམ སུནཁལུདྡཀཾ ཨཱརབྦྷ ཀཐེསི.

སོ ཀིར ཨེཀདིཝསཾ པུབྦཎྷསམཡེ དྷནུཾ ཨཱདཱཡ སུནཁཔརིཝུཏོ ཨརཉྙཾ གཙྪནྟོ ཨནྟརཱམགྒེ ཨེཀཾ པིཎྜཱཡ པཝིསནྟཾ བྷིཀྑུཾ དིསྭཱ ཀུཛ྄ཛྷིཏྭཱ ‘‘ཀཱལ༹ཀཎྞི མེ དིཊྛོ, ཨཛྫ ¶ ཀིཉྩི ན ལབྷིསྶཱམཱི’’ཏི ཙིནྟེཏྭཱ པཀྐཱམི. ཐེརོཔི གཱམེ པིཎྜཱཡ ཙརིཏྭཱ ཀཏབྷཏྟཀིཙྩོ པུན ཝིཧཱརཾ པཱཡཱསི. ཨིཏརོཔི ཨརཉྙེ ཝིཙརིཏྭཱ ཀིཉྩི ཨལབྷིཏྭཱ པཙྩཱགཙྪནྟོ པུན ཐེརཾ དིསྭཱ ‘‘ཨཛྫཱཧཾ ཨིམཾ ཀཱལ༹ཀཎྞིཾ དིསྭཱ ཨརཉྙཾ གཏོ ཀིཉྩི ན ལབྷིཾ, ཨིདཱནི མེ པུནཔི ཨབྷིམུཁོ ཛཱཏོ, སུནཁེཧི ནཾ ཁཱདཱཔེསྶཱམཱི’’ཏི སཉྙཾ དཏྭཱ སུནཁེ ཝིསྶཛྫེསི. ཐེརོཔི ‘‘མཱ ཨེཝཾ ཀརི ཨུཔཱསཀཱ’’ཏི ཡཱཙི. སོ ‘‘ཨཛྫཱཧཾ ཏཝ སམྨུཁཱིབྷཱུཏཏྟཱ ཀིཉྩི ནཱལཏྠཾ, པུནཔི མེ སམྨུཁཱིབྷཱཝམཱགཏོསི, ཁཱདཱཔེསྶཱམེཝ ཏ’’ནྟི ཝཏྭཱ སུནཁེ ཨུཡྻོཛེསི. ཐེརོ ཝེགེན ཨེཀཾ རུཀྑཾ ཨབྷིརུཧིཏྭཱ པུརིསཔྤམཱཎེ ཋཱནེ ནིསཱིདི. སུནཁཱ ¶ རུཀྑཾ ¶ པརིཝཱརེསུཾ. ལུདྡཀོ གནྟྭཱ ‘‘རུཀྑཾ ཨབྷིརུཧཏོཔི ཏེ མོཀྑོ ནཏྠཱི’’ཏི ཏཾ སརཏུཎྜེན པཱདཏལེ ཝིཛ྄ཛྷི. ཐེརོ ‘‘མཱ ཨེཝཾ ཀརོཧཱི’’ཏི ཏཾ ཡཱཙིཡེཝ. ཨིཏརོ ཏསྶ ཡཱཙནཾ ཨནཱདིཡིཏྭཱ པུནཔྤུནཾ ཝིཛ྄ཛྷིཡེཝ. ཐེརོ ཨེཀསྨིཾ པཱདཏལེ ཝིཛ྄ཛྷིཡམཱནེ ཏཾ ཨུཀྑིཔིཏྭཱ དུཏིཡཾ པཱདཾ ཨོལམྦིཏྭཱ ཏསྨིཾ ཝིཛ྄ཛྷིཡམཱནེ ཏམྤི ཨུཀྑིཔཏི, ཨེཝམསྶ སོ ཡཱཙནཾ ཨནཱདིཡིཏྭཱཝ དྭེཔི པཱདཏལཱནི ཝིཛ྄ཛྷིཡེཝ. ཐེརསྶ སརཱིརཾ ཨུཀྐཱཧི ཨཱདིཏྟཾ ཝིཡ ཨཧོསི. སོ ཝེདནཱནུཝཏྟིཀོ ཧུཏྭཱ སཏིཾ པཙྩུཔཊྛཱཔེཏུཾ ནཱསཀྑི, པཱརུཏཙཱིཝརཾ བྷསྶནྟམྤི ན སལླཀྑེསི. ཏཾ པཏམཱནཾ ཀོཀཾ སཱིསཏོ པཊྛཱཡ པརིཀྑིཔནྟམེཝ པཏི. སུནཁཱ ‘‘ཐེརོ པཏིཏོ’’ཏི སཉྙཱཡ ཙཱིཝརནྟརཾ པཝིསིཏྭཱ ཨཏྟནོ སཱམིཀཾ ལུཉྫིཏྭཱ ཁཱདནྟཱ ཨཊྛིམཏྟཱཝསེསཾ ཀརིཾསུ. སུནཁཱ ཙཱིཝརནྟརཏོ ནིཀྑམིཏྭཱ བཧི ཨཊྛཾསུ.

ཨཐ ནེསཾ ཐེརོ ཨེཀཾ སུཀྑདཎྜཀཾ བྷཉྫིཏྭཱ ཁིཔི. སུནཁཱ ཐེརཾ དིསྭཱ ‘‘སཱམིཀོཝ ཨམྷེཧི ཁཱདིཏོ’’ཏི ཉཏྭཱ ཨརཉྙཾ པཝིསིཾསུ. ཐེརོ ཀུཀྐུཙྩཾ ཨུཔྤཱདེསི ‘‘མམ ཙཱིཝརནྟརཾ པཝིསིཏྭཱ ཨེས ནཊྛོ, ཨརོགཾ ནུ ཁོ མེ སཱིལ’’ནྟི. སོ རུཀྑཱ ཨོཏརིཏྭཱ སཏྠུ སནྟིཀཾ གནྟྭཱ ཨཱདིཏོ པཊྛཱཡ སབྦཾ ཏཾ པཝཏྟིཾ ཨཱརོཙེཏྭཱ – ‘‘བྷནྟེ, མམ ཙཱིཝརཾ ནིསྶཱཡ ¶ སོ ཨུཔཱསཀོ ནཊྛོ, ཀཙྩི མེ ཨརོགཾ སཱིལཾ, ཨཏྠི མེ སམཎབྷཱཝོ’’ཏི པུཙྪི. སཏྠཱ ཏསྶ ཝཙནཾ སུཏྭཱ ‘‘བྷིཀྑུ ཨརོགཾ ཏེ སཱིལཾ, ཨཏྠི ཏེ སམཎབྷཱཝོ, སོ ཨཔྤདུཊྛསྶ པདུསྶིཏྭཱ ཝིནཱསཾ པཏྟོ, ན ཀེཝལཉྩ ཨིདཱནེཝ, ཨཏཱིཏེཔི ཨཔྤདུཊྛཱནཾ པདུསྶིཏྭཱ ཝིནཱསཾ པཏྟོཡེཝཱ’’ཏི ཝཏྭཱ ཏམཏྠཾ པཀཱསེནྟོ ཨཏཱིཏཾ ཨཱཧརི –

ཨཏཱིཏེ ཀིརེཀོ ཝེཛྫོ ཝེཛྫཀམྨཏྠཱཡ གཱམཾ ཝིཙརིཏྭཱ ཀིཉྩི ཀམྨཾ ཨལབྷིཏྭཱ ཚཱཏཛ྄ཛྷཏྟོ ནིཀྑམིཏྭཱ གཱམདྭཱརེ སམྦཧུལེ ཀུམཱརཀེ ཀཱིལ༹ནྟེ དིསྭཱ ‘‘ཨིམེ སཔྤེན ཌཾསཱཔེཏྭཱ ཏིཀིཙྪིཏྭཱ ཨཱཧཱརཾ ལབྷིསྶཱམཱི’’ཏི ཨེཀསྨིཾ རུཀྑབིལེ སཱིསཾ ནིཧརིཏྭཱ ནིཔནྣཾ སཔྤཾ དསྶེཏྭཱ, ‘‘ཨམྦྷོ, ཀུམཱརཀཱ ཨེསོ སཱལི༹ཀཔོཏཀོ, གཎྷཐ ན’’ནྟི ཨཱཧ. ཨཐེཀོ ཀུམཱརཀོ ¶ སཔྤཾ གཱིཝཱཡཾ དལ༹ྷཾ གཧེཏྭཱ ནཱིཧརིཏྭཱ ཏསྶ སཔྤབྷཱཝཾ ཉཏྭཱ ཝིརཝནྟོ ཨཝིདཱུརེ ཋིཏསྶ ཝེཛྫསྶ མཏྠཀེ ཁིཔི. སཔྤོ ཝེཛྫསྶ ཁནྡྷཊྛིཀཾ པརིཀྑིཔིཏྭཱ དལ༹ྷཾ ཌཾསིཏྭཱ ཏཏྠེཝ ཛཱིཝིཏཀྑཡཾ པཱཔེསི, ཨེཝམེས ཀོཀོ སུནཁལུདྡཀོ པུབྦེཔི ཨཔྤདུཊྛསྶ པདུསྶིཏྭཱ ཝིནཱསཾ པཏྟོཡེཝཱཏི.

སཏྠཱ ¶ ཨིམཾ ཨཏཱིཏཾ ཨཱཧརིཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཡོ ཨཔྤདུཊྛསྶ ནརསྶ དུསྶཏི, སུདྡྷསྶ པོསསྶ ཨནངྒཎསྶ;

ཏམེཝ བཱལཾ པཙྩེཏི པཱཔཾ, སུཁུམོ རཛོ པཊིཝཱཏཾཝ ཁིཏྟོ’’ཏི.

ཏཏྠ ¶ ཨཔྤདུཊྛསྶཱཏི ཨཏྟནོ ཝཱ སབྦསཏྟཱནཾ ཝཱ ཨདུཊྛསྶ. ནརསྶཱཏི སཏྟསྶ. དུསྶཏཱིཏི ཨཔརཛ྄ཛྷཏི. སུདྡྷསྶཱཏི ནིརཔརཱདྷསྶེཝ. པོསསྶཱཏི ཨིདམྤི ཨཔརེནཱཀཱརེན སཏྟཱདྷིཝཙནམེཝ. ཨནངྒཎསྶཱཏི ནིཀྐིལེསསྶ. པཙྩེཏཱིཏི པཏིཨེཏི. པཊིཝཱཏནྟི ཡཐཱ ཨེཀེན པུརིསེན པཊིཝཱཏེ ཋིཏཾ པཧརིཏུཀཱམཏཱཡ ཁིཏྟོ སུཁུམོ རཛོཏི ཏམེཝ པུརིསཾ པཙྩེཏི, ཏསྶེཝ ཨུཔརི པཏཏི, ཨེཝམེཝ ཡོ པུགྒལོ ཨཔདུཊྛསྶ པུརིསསྶ པཱཎིཔྤཧརཱདཱིནི དདནྟོ པདུསྶཏི, ཏམེཝ བཱལཾ དིཊྛེཝ དྷམྨེ, སམྤརཱཡེ ཝཱ ནིརཡཱདཱིསུ ཝིཔཙྩམཱནཾ ཏཾ པཱཔཾ ཝིཔཱཀདུཀྑཝསེན པཙྩེཏཱིཏི ཨཏྠོ.

དེསནཱཝསཱནེ སོ བྷིཀྑུ ཨརཧཏྟེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

༡༠. མཎིཀཱརཀུལཱུཔཀཏིསྶཏྠེརཝཏྠུ

གབྦྷམེཀེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཎིཀཱརཀུལཱུཔཀཾ ཏིསྶཏྠེརཾ ཨཱརབྦྷ ཀཐེསི.

སོ ཀིར ཐེརོ ཨེཀསྶ མཎིཀཱརསྶ ཀུལེ དྭཱདས ཝསྶཱནི བྷུཉྫི. ཏསྨིཾ ཀུལེ ཛཡམྤཏིཀཱ མཱཏཱཔིཏུཊྛཱནེ ཋཏྭཱ ཐེརཾ པཊིཛགྒིཾསུ. ཨཐེཀདིཝསཾ སོ མཎིཀཱརོ ཐེརསྶ པུརཏོ མཾསཾ ཚིནྡནྟོ ནིསིནྣོ ཧོཏི. ཏསྨིཾ ཁཎེ རཱཛཱ པསེནདི ཀོསལོ ཨེཀཾ མཎིརཏནཾ ‘‘ཨིམཾ ¶ དྷོཝིཏྭཱ ཝིཛ྄ཛྷིཏྭཱ པཧིཎཏཱུ’’ཏི པེསེསི. མཎིཀཱརོ སལོཧིཏེནེཝ ¶ ཧཏྠེན ཏཾ པཊིགྒཧེཏྭཱ པེལཱ༹ཡ ཨུཔརི ཋཔེཏྭཱ ¶ ཧཏྠདྷོཝནཏྠཾ ཨནྟོ པཱཝིསི. ཏསྨིཾ པན གེཧེ པོསཱཝནིཡཀོཉྩསཀུཎོ ཨཏྠི. སོ ལོཧིཏགནྡྷེན མཾསསཉྙཱཡ ཏཾ མཎིཾ ཐེརསྶ པསྶནྟསྶེཝ གིལི. མཎིཀཱརོ ཨཱགནྟྭཱ མཎིཾ ཨཔསྶནྟོ ‘‘མཎི ཀེན གཧིཏོ’’ཏི བྷརིཡཉྩ པུཏྟཀེ ཙ པཊིཔཱཊིཡཱ པུཙྪིཏྭཱ ཏེཧི ‘‘ན གཎྷཱམཱ’’ཏི ཝུཏྟེ ‘‘ཐེརེན གཧིཏོ བྷཝིསྶཏཱི’’ཏི. ཙིནྟེཏྭཱ བྷརིཡཱཡ སདྡྷིཾ མནྟེསི – ‘‘ཐེརེན མཎི གཧིཏོ བྷཝིསྶཏཱི’’ཏི. སཱ, སཱམི, མཱ ཨེཝཾ ཨཝཙ, ཨེཏྟཀཾ ཀཱལཾ མཡཱ ཐེརསྶ ན ཀིཉྩི ཝཛྫཾ དིཊྛཔུབྦཾ, ན སོ མཎིཾ གཎྷཱཏཱིཏི. མཎིཀཱརོ ཐེརཾ པུཙྪི – ‘‘བྷནྟེ, ཨིམསྨིཾ ཋཱནེ མཎིརཏནཾ ཏུམྷེཧི གཧིཏ’’ནྟི. ན གཎྷཱམི, ཨུཔཱསཀཱཏི. བྷནྟེ, ན ཨིདྷ ཨཉྙོ ཨཏྠི, ཏུམྷེཧིཡེཝ གཧིཏོ བྷཝིསྶཏི, དེཐ མེ མཎིརཏནནྟི. སོ ཏསྨིཾ ཨསམྤཊིཙྪནྟེ པུན བྷརིཡཾ ཨཱཧ – ‘‘ཐེརེནེཝ མཎི གཧིཏོ, པཱིལེ༹ཏྭཱ ནཾ པུཙྪིསྶཱམཱི’’ཏི. སཱ, སཱམི, མཱ ནོ ནཱསཡི, ཝརཾ ཨམྷེཧི དཱསབྱཾ ཨུཔགནྟུཾ, ན ཙ ཐེརཾ ཨེཝརཱུཔཾ ཝཏྟུནྟི. སོ ‘‘སབྦེཝ མཡཾ དཱསཏྟཾ ཨུཔགཙྪནྟཱ མཎིམཱུལཾ ན ཨགྒྷཱམཱ’’ཏི རཛྫུཾ གཧེཏྭཱ ཐེརསྶ སཱིསཾ ཝེཋེཏྭཱ དཎྜེན ¶ གྷཊྚེསི. ཐེརསྶ སཱིསཏོ ཙ ཀཎྞནཱསཱཧི ཙ ལོཧིཏཾ པགྒྷརི, ཨཀྑཱིནི ནིཀྑམནཱཀཱརཔྤཏྟཱནི ཨཧེསུཾ, སོ ཝེདནཱཔམཏྟོ བྷཱུམིཡཾ པཏི. ཀོཉྩོ ལོཧིཏགནྡྷེནཱ གནྟྭཱ ལོཧིཏཾ པིཝི. ཨཐ ནཾ མཎིཀཱརོ ཐེརེ ཨུཔྤནྣཀོདྷཝེགེན ‘‘ཏྭཾ ཀིཾ ཀརོསཱི’’ཏི པཱདེན པཧརིཏྭཱ ཁིཔི. སོ ཨེཀཔྤཧཱརེནེཝ མརིཏྭཱ ཨུཏྟཱནོ ཨཧོསི.

ཐེརོ ཏཾ དིསྭཱ, ཨུཔཱསཀ, སཱིསེ ཝེཋནཾ ཏཱཝ མེ སིཐིལཾ ཀཏྭཱ ཨིམཾ ཀོཉྩཾ ཨོལོཀེཧི ‘‘མཏོ ཝཱ, ནོ ཝཱ’’ཏི. ཨཐ ནཾ སོ ཨཱཧ – ‘‘ཨེསོ ཝིཡ ཏྭམྤི མརིསྶསཱི’’ཏི. ཨུཔཱསཀ, ཨིམིནཱ སོ མཎི གིལིཏོ, སཙེ ཨཡཾ ན ཨམརིསྶཱ, ན ཏེ ཨཧཾ མརནྟོཔི མཎིཾ ཨཱཙིཀྑིསྶནྟི. སོ ཏསྶ ཨུདརཾ ཕཱལེཏྭཱ མཎིཾ དིསྭཱ པཝེདྷེནྟོ སཾཝིགྒམཱནསོ ཐེརསྶ པཱདམཱུལེ ནིཔཛྫིཏྭཱ ‘‘ཁམཐ, མེ, བྷནྟེ, ཨཛཱནནྟེན མཡཱ ཀཏ’’ནྟི ཨཱཧ. ཨུཔཱསཀ, ནེཝ ཏུཡ྄ཧཾ དོསོ ཨཏྠི, ན མཡ྄ཧཾ, ཝཊྚསྶེཝེས དོསོ, ཁམཱམི ཏེཏི. བྷནྟེ, སཙེ མེ ཁམཐ, པཀཏིནིཡཱམེནེཝ མེ གེཧེ ནིསཱིདིཏྭཱ བྷིཀྑཾ གཎྷཐཱཏི. ‘‘ཨུཔཱསཀ, ན དཱནཱཧཾ ཨིཏོ པཊྛཱཡ པརེསཾ ¶ གེཧསྶ ཨནྟོཚདནཾ པཝིསིསྶཱམི, ཨནྟོགེཧཔཝེསནསྶེཝ ཧི ¶ ཨཡཾ དོསོ, ཨིཏོ པཊྛཱཡ པཱདེསུ ཨཱཝཧནྟེསུ གེཧདྭཱརེ ཋིཏོཝ བྷིཀྑཾ གཎྷིསྶཱམཱི’’ཏི ཝཏྭཱ དྷུཏངྒཾ སམཱདཱཡ ཨིམཾ གཱཐམཱཧ –

‘‘པཙྩཏི ¶ མུནིནོ བྷཏྟཾ, ཐོཀཾ ཐོཀཾ ཀུལེ ཀུལེ;

པིཎྜིཀཱཡ ཙརིསྶཱམི, ཨཏྠི ཛངྒྷབལཾ མམཱ’’ཏི. (ཐེརགཱ. ༢༤༨) –

ཨིདཉྩ པན ཝཏྭཱ ཐེརོ ཏེནེཝ བྱཱདྷིནཱ ན ཙིརསྶེཝ པརིནིབྦཱཡི. ཀོཉྩོ མཎིཀཱརསྶ བྷརིཡཱཡ ཀུཙྪིསྨིཾ པཊིསནྡྷིཾ གཎྷི. མཎིཀཱརོ ཀཱལཾ ཀཏྭཱ ནིརཡེ ནིབྦཏྟི. མཎིཀཱརསྶ བྷརིཡཱ ཐེརེ མུདུཙིཏྟཏཱཡ ཀཱལཾ ཀཏྭཱ དེཝལོཀེ ནིབྦཏྟི. བྷིཀྑཱུ སཏྠཱརཾ ཏེསཾ ཨབྷིསམྤརཱཡཾ པུཙྪིཾསུ. སཏྠཱ, ‘‘བྷིཀྑཝེ, ཨིདྷེཀཙྩེ གབྦྷེ ནིབྦཏྟནྟི, ཨེཀཙྩེ པཱཔཀཱརིནོ ནིརཡེ ནིབྦཏྟནྟི, ཨེཀཙྩེ ཀཏཀལྱཱཎཱ དེཝལོཀེ ནིབྦཏྟནྟི, ཨནཱསཝཱ པན པརིནིབྦཱཡནྟཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘གབྦྷམེཀེ ཨུཔྤཛྫནྟི, ནིརཡཾ པཱཔཀམྨིནོ;

སགྒཾ སུགཏིནོ ཡནྟི, པརིནིབྦནྟི ཨནཱསཝཱ’’ཏི.

ཏཏྠ གབྦྷནྟི ཨིདྷ མནུསྶགབྦྷོཝ ཨདྷིཔྤེཏོ. སེསམེཏྠ ཨུཏྟཱནཏྠམེཝ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཎིཀཱརཀུལཱུཔཀཏིསྶཏྠེརཝཏྠུ དསམཾ.

ན ¶ ཨནྟལིཀྑེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏཡོ ཛནེ ཨཱརབྦྷ ཀཐེསི.

སཏྠརི ཀིར ཛེཏཝནེ ཝིཧརནྟེ སམྦཧུལཱ བྷིཀྑཱུ སཏྠུ དསྶནཏྠཱཡ ཨཱགཙྪནྟཱ ཨེཀཾ གཱམཾ པིཎྜཱཡ པཝིསིཾསུ. གཱམཝཱསིནོ ཏེ སམྤཏྟེ ཨཱདཱཡ ཨཱསནསཱལཱཡ ནིསཱིདཱཔེཏྭཱ ཡཱགུཁཛྫཀཾ དཏྭཱ པིཎྜཔཱཏཝེལཾ ཨཱགམཡམཱནཱ དྷམྨཾ སུཎནྟཱ ནིསཱིདིཾསུ. ཏསྨིཾ ཁཎེ བྷཏྟཾ ¶ པཙིཏྭཱ སཱུཔབྱཉྫནཾ དྷཱུཔཡམཱནཱཡ ཨེཀིསྶཱ ཨིཏྠིཡཱ བྷཱཛནཏོ ཨགྒིཛཱལཱ ཨུཊྛཧིཏྭཱ ཚདནཾ གཎྷི. ཏཏོ ཨེཀཾ ཏིཎཀརལ༹ཾ ཨུཊྛཧིཏྭཱ ཛལམཱནཾ ཨཱཀཱསཾ པཀྑནྡི. ཏསྨིཾ ཁཎེ ཨེཀོ ཀཱཀོ ཨཱཀཱསེན གཙྪནྟོ ཏཏྠ གཱིཝཾ པཝེསེཏྭཱ ཏིཎཝལླིཝེཋིཏོ ཛྷཱཡིཏྭཱ གཱམམཛ྄ཛྷེ པཏི ¶ . བྷིཀྑཱུ ཏཾ དིསྭཱ ‘‘ཨཧོ བྷཱརིཡཾ ཀམྨཾ, པསྶཐཱཝུསོ, ཀཱཀེན པཏྟཾ ཝིཔྤཀཱརཾ, ཨིམིནཱ ཀཏཀམྨཾ ཨཉྙཏྲ སཏྠཱརཱ ཀོ ཛཱནིསྶཏི, སཏྠཱརམསྶ ཀམྨཾ པུཙྪིསྶཱམཱ’’ཏི ཙིནྟེཏྭཱ པཀྐམིཾསུ.

ཨཔརེསམྤི བྷིཀྑཱུནཾ སཏྠུ དསྶནཏྠཱཡ ནཱཝཾ ཨབྷིརུཡ྄ཧ གཙྪནྟཱནཾ ནཱཝཱ སམུདྡེ ནིཙྩལཱ ཨཊྛཱསི. མནུསྶཱ ‘‘ཀཱལ༹ཀཎྞིནཱ ཨེཏྠ བྷཝིཏབྦ’’ནྟི སལཱཀཾ ཝིཙཱརེསུཾ. ནཱཝིཀསྶ ཙ བྷརིཡཱ པཋམཝཡེ ཋིཏཱ དསྶནཱིཡཱ པཱསཱདིཀཱ, སལཱཀཱ ཏསྶཱ པཱཔུཎི. ‘‘སལཱཀཾ པུན ཝིཙཱརེཐཱ’’ཏི ཝཏྭཱ ཡཱཝཏཏིཡཾ ཝིཙཱརེསུཾ, ཏིཀྑཏྟུམྤི ཏསྶཱ ¶ ཨེཝ པཱཔུཎི. མནུསྶཱ ‘‘ཀིཾ, སཱམཱི’’ཏི ནཱཝིཀསྶ མུཁཾ ཨོལོཀེསུཾ. ནཱཝིཀོ ‘‘ན སཀྐཱ ཨེཀིསྶཱ ཨཏྠཱཡ མཧཱཛནཾ ནཱསེཏུཾ, ཨུདཀེ ནཾ ཁིཔཐཱ’’ཏི ཨཱཧ. སཱ གཧེཏྭཱ ཨུདཀེ ཁིཔིཡམཱནཱ མརཎབྷཡཏཛྫིཏཱ ཝིརཝཾ ཨཀཱསི. ཏཾ སུཏྭཱ ནཱཝིཀོ ཀོ ཨཏྠོ ཨིམིསྶཱ ཨཱབྷརཎེཧི ནཊྛེཧི, སབྦཱབྷརཎཱནི ཨོམུཉྩིཏྭཱ ཨེཀཾ པིལོཏིཀཾ ནིཝཱསཱཔེཏྭཱ ཚཌྜེཐ ནཾ, ཨཧཾ པནེཏཾ ཨུདཀཔིཊྛེ པླཝམཱནཾ དཊྛུཾ ན སཀྑིསྶཱམཱི ཏསྨཱ ཡཐཱ ནཾ ཨཧཾ ན པསྶཱམི, ཏཐཱ ཨེཀཾ ཝཱལུཀཀུཊཾ གཱིཝཱཡ བནྡྷིཏྭཱ སམུདྡེ ཁིཔཐཱཏི. ཏེ ཏཐཱ ཀརིཾསུ. ཏམྤི པཏིཏཊྛཱནེཡེཝ མཙྪཀཙྪཔཱ ཝིལུམྤིཾསུ. བྷིཀྑཱུ ཏཾ པཝཏྟིཾ ཉཏྭཱ ‘‘ཋཔེཏྭཱ སཏྠཱརཾ ཀོ ཨཉྙོ ཨེཏིསྶཱ ཨིཏྠིཡཱ ཀཏཀམྨཾ ཛཱནིསྶཏི, སཏྠཱརཾ ཏསྶཱ ཀམྨཾ པུཙྪིསྶཱམཱ’’ཏི ཨིཙྪིཏཊྛཱནཾ པཏྭཱ ནཱཝཱཏོ ཨོརུཡ྄ཧ པཀྐམིཾསུ.

ཨཔརེཔི སཏྟ བྷིཀྑཱུ སཏྠུ དསྶནཏྠཱཡ གཙྪནྟཱ སཱཡཾ ཨེཀཾ ཝིཧཱརཾ པཝིསིཏྭཱ ཝསནཊྛཱནཾ པུཙྪིཾསུ. ཨེཀསྨིཉྩ ལེཎེ སཏྟ མཉྩཱ ཧོནྟི. ཏེསཾ ཏདེཝ ལབྷིཏྭཱ ཏཏྠ ནིཔནྣཱནཾ རཏྟིབྷཱགེ ཀཱུཊཱགཱརམཏྟོ པཱསཱཎོ པཝཊྚམཱནོ ཨཱགནྟྭཱ ལེཎདྭཱརཾ པིདཧི. ནེཝཱསིཀཱ བྷིཀྑཱུ ‘‘མཡཾ ཨིམཾ ལེཎཾ ཨཱགནྟུཀབྷིཀྑཱུནཾ པཱཔཡིམྷཱ, ཨཡཉྩ མཧཱཔཱསཱཎོ ལེཎདྭཱརཾ པིདཧནྟོ ཨཊྛཱསི, ཨཔནེསྶཱམ ¶ ན’’ནྟི སམནྟཱ སཏྟཧི གཱམེཧི ¶ མནུསྶེ སནྣིཔཱཏེཏྭཱ ཝཱཡམནྟཱཔི ཋཱནཱ ཙཱལེཏུཾ ནཱསཀྑིཾསུ. ཨནྟོ པཝིཊྛབྷིཀྑཱུཔི ཝཱཡམིཾསུཡེཝ. ཨེཝཾ སནྟེཔི སཏྟཱཧཾ པཱསཱཎཾ ཙཱལེཏུཾ ནཱསཀྑིཾསུ. ཨཱགནྟུཀཱ སཏྟཱཧཾ ཚཱཏཛ྄ཛྷཏྟཱ མཧཱདུཀྑཾ ཨནུབྷཝིཾསུ. སཏྟམེ དིཝསེ པཱསཱཎོ སཡམེཝ པཝཊྚིཏྭཱ ཨཔགཏོ. བྷིཀྑཱུ ནིཀྑམིཏྭཱ ‘‘ཨམྷཱཀཾ ཨིམཾ པཱཔཾ ཨཉྙཏྲ སཏྠཱརཱ ཀོ ཛཱནིསྶཏི, སཏྠཱརཾ པུཙྪིསྶཱམཱ’’ཏི ཙིནྟེཏྭཱ པཀྐམིཾསུ. ཏེ པུརིམེཧི སདྡྷིཾ ཨནྟརཱམགྒེ སམཱགནྟྭཱ སབྦེ ཨེཀཏོཝ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསིནྣཱ སཏྠཱརཱ ཀཏཔཊིསནྠཱརཱ ཨཏྟནཱ ཨཏྟནཱ དིཊྛཱནུབྷཱུཏཱནི ཀཱརཎཱནི པཊིཔཱཊིཡཱ པུཙྪིཾསུ.

སཏྠཱཔི ¶ ཏེསཾ པཊིཔཱཊིཡཱ ཨེཝཾ བྱཱཀཱསི – ‘‘བྷིཀྑཝེ, སོ ཏཱཝ ཀཱཀོ ཨཏྟནཱ ཀཏཀམྨམེཝ ཨནུབྷོསི. ཨཏཱིཏཀཱལེ ཧི བཱརཱཎསིཡཾ ཨེཀོ ཀསྶཀོ ཨཏྟནོ གོཎཾ དམེནྟོ དམེཏུཾ ནཱསཀྑི. སོ ཧིསྶ གོཎོ ཐོཀཾ གནྟྭཱ ནིཔཛྫི, པོཐེཏྭཱ ཨུཊྛཱཔིཏོཔི ཐོཀཾ གནྟྭཱ པུནཔི ཏཐེཝ ནིཔཛྫི. སོ ཝཱཡམིཏྭཱ ཏཾ དམེཏུཾ ཨསཀྐོནྟོ ཀོདྷཱབྷིབྷཱུཏོ ཧུཏྭཱ ‘ཨིཏོ ¶ དཱནི པཊྛཱཡ སུཁཾ ནིཔཛྫིསྶསཱི’ཏི པལཱལཔིཎྜཾ ཝིཡ ཀརོནྟོ པལཱལེན ཏསྶ གཱིཝཾ པལིཝེཋེཏྭཱ ཨགྒིམདཱསི, གོཎོ ཏཏྠེཝ ཛྷཱཡིཏྭཱ མཏོ. ཏདཱ, བྷིཀྑཝེ, ཏེན ཀཱཀེན ཏཾ པཱཔཀམྨཾ ཀཏཾ. སོ ཏསྶ ཝིཔཱཀེན དཱིགྷརཏྟཾ ནིརཡེ པཙྩིཏྭཱ ཝིཔཱཀཱཝསེསེན སཏྟཀྑཏྟུཾ ཀཱཀཡོནིཡཾ ནིབྦཏྟིཏྭཱ ཨེཝམེཝ ཨཱཀཱསེ ཛྷཱཡིཏྭཱཝ མཏོ’’ཏི.

སཱཔི, བྷིཀྑཝེ, ཨིཏྠཱི ཨཏྟནཱ ཀཏཀམྨམེཝ ཨནུབྷོསི. སཱ ཧི ཨཏཱིཏེ བཱརཱཎསིཡཾ ཨེཀསྶ གཧཔཏིཀསྶ བྷརིཡཱ ཨུདཀཧརཎཀོཊྚནཔཙནཱདཱིནི སབྦཀིཙྩཱནི སཧཏྠེནེཝ ཨཀཱསི. ཏསྶཱ ཨེཀོ སུནཁོ ཏཾ གེཧེ སབྦཀིཙྩཱནི ཀུརུམཱནཾ ཨོལོཀེནྟོཝ ནིསཱིདཏི. ཁེཏྟེ བྷཏྟཾ ཧརནྟིཡཱ དཱརུཔཎྞཱདཱིནཾ ཝཱ ཨཏྠཱཡ ཨརཉྙཾ གཙྪནྟིཡཱ ཏཱཡ སདྡྷིཾཡེཝ གཙྪཏི. ཏཾ དིསྭཱ དཧརམནུསྶཱ ‘‘ཨམྦྷོ ནིཀྑནྟོ སུནཁལུདྡཀོ, ཨཛྫ མཡཾ མཾསེན བྷུཉྫིསྶཱམཱ’’ཏི ཨུཔྤཎྜེནྟི. སཱ ཏེསཾ ཀཐཱཡ མངྐུ ཧུཏྭཱ སུནཁཾ ལེཌྜུདཎྜཱདཱིཧི པཧརིཏྭཱ པལཱཔེཏི, སུནཁོ ནིཝཏྟིཏྭཱ པུན ཨནུབནྡྷཏི. སོ ཀིརསྶཱ ཏཏིཡེ ཨཏྟབྷཱཝེ བྷཏྟཱ ཨཧོསི, ཏསྨཱ སིནེཧཾ ཚིནྡིཏུཾ ན སཀྐོཏི. ཀིཉྩཱཔི ཧི ཨནམཏགྒེ སཾསཱརེ ཛཱཡཱ ཝཱ པཏི ཝཱ ཨབྷཱུཏཔུབྦཱ ནཱམ ནཏྠི, ཨཝིདཱུརེ པན ཨཏྟབྷཱཝེ ཉཱཏཀེསུ ཨདྷིམཏྟོ སིནེཧོ ¶ ཧོཏི, ཏསྨཱ ¶ སོ སུནཁོ ཏཾ ཝིཛཧིཏུཾ ན སཀྐོཏི. སཱ ཏསྶ ཀུཛ྄ཛྷིཏྭཱ ཁེཏྟཾ སཱམིཀསྶ ཡཱགུཾ ཧརམཱནཱ རཛྫུཾ ཨུཙྪངྒེ ཋཔེཏྭཱ ཨགམཱསི, སུནཁོ ཏཱཡེཝ སདྡྷིཾ གཏོ. སཱ སཱམིཀསྶ ཡཱགུཾ དཏྭཱ ཏུཙྪཀུཊཾ ཨཱདཱཡ ཨེཀཾ ཨུདཀཊྛཱནཾ གནྟྭཱ ཀུཊཾ ཝཱལུཀཱཡ པཱུརེཏྭཱ སམཱིཔེ ཨོལོཀེཏྭཱ ཋིཏསྶ སུནཁསྶ སདྡམཀཱསི. སུནཁོ ‘‘ཙིརསྶཾ ཝཏ མེ ཨཛྫ མདྷུརཀཐཱ ལདྡྷཱ’’ཏི ནངྒུཊྛཾ ཙཱལེནྟོ ཏཾ ཨུཔསངྐམི. སཱ ཏཾ གཱིཝཱཡཾ དལ༹ྷཾ གཧེཏྭཱ ཨེཀཱཡ རཛྫུཀོཊིཡཱ ཀུཊཾ བནྡྷིཏྭཱ ཨེཀཾ རཛྫུཀོཊིཾ སུནཁསྶ གཱིཝཱཡཾ བནྡྷིཏྭཱ ཀུཊཾ ཨུདཀཱབྷིམུཁཾ པཝཊྚེསི. སུནཁོ ཀུཊཾ ཨནུབནྡྷནྟོ ཨུདཀེ པཏིཏྭཱ ཏཏྠེཝ ཀཱལམཀཱསི. སཱ ཏསྶ ཀམྨསྶ ཝིཔཱཀེན དཱིགྷརཏྟཾ ནིརཡེ པཙྩིཏྭཱ ཝིཔཱཀཱཝསེསེན ཨཏྟབྷཱཝསཏེ ཝཱལུཀཀུཊཾ གཱིཝཱཡཾ བནྡྷིཏྭཱ ཨུདཀེ པཀྑིཏྟཱ ཀཱལམཀཱསཱིཏི.

ཏུམྷེཧིཔི, བྷིཀྑཝེ, ཨཏྟནཱ ཀཏཀམྨམེཝ ཨནུབྷཱུཏཾ. ཨཏཱིཏསྨིཉྷི བཱརཱཎསིཝཱསིནོ སཏྟ གོཔཱལཀདཱརཀཱ ཨེཀསྨིཾ ཨཊཝིཔདེསེ སཏྟཱཧཝཱརེན གཱཝིཡོ ཝིཙརནྟཱ ཨེཀདིཝསཾ གཱཝིཡོ ¶ ཝིཙཱརེཏྭཱ ཨཱགཙྪནྟཱ ཨེཀཾ མཧཱགོདྷཾ དིསྭཱ ཨནུབནྡྷིཾསུ. གོདྷཱ པལཱཡིཏྭཱ ཨེཀཾ ཝམྨིཀཾ པཱཝིསི. ཏསྶ པན ཝམྨིཀསྶ སཏྟ ཚིདྡཱནི, དཱརཀཱ ‘‘མཡཾ དཱནི གཧེཏུཾ ན སཀྑིསྶཱམ, སྭེ ཨཱགནྟྭཱ གཎྷིསྶཱམཱ’’ཏི ཨེཀེཀོ ཨེཀེཀཾ སཱཁབྷངྒམུཊྛིཾ ཨཱདཱཡ སཏྟཔི ཛནཱ སཏྟ ཚིདྡཱནི པིདཧིཏྭཱ པཀྐམིཾསུ ¶ . ཏེ པུནདིཝསེ ཏཾ གོདྷཾ ཨམནསིཀཏྭཱ ཨཉྙསྨིཾ པདེསེ གཱཝིཡོ ཝིཙཱརེཏྭཱ སཏྟམེ དིཝསེ གཱཝིཡོ ཨཱདཱཡ གཙྪནྟཱ ཏཾ ཝམྨིཀཾ དིསྭཱ སཏིཾ པཊིལབྷིཏྭཱ ‘‘ཀཱ ནུ ཁོ ཏསྶཱ གོདྷཱཡ པཝཏྟཱི’’ཏི ཨཏྟནཱ ཨཏྟནཱ པིདཧིཏཱནི ཚིདྡཱནི ཝིཝརིཾསུ. གོདྷཱ ཛཱིཝིཏེ ནིརཱལཡཱ ཧུཏྭཱ ཨཊྛིཙམྨཱཝསེསཱ པཝེདྷམཱནཱ ནིཀྑམི. ཏེ ཏཾ དིསྭཱ ཨནུཀམྤཾ ཀཏྭཱ ‘‘མཱ ནཾ མཱརེཐ, སཏྟཱཧཾ ཚིནྣབྷཏྟཱ ཛཱཏཱ’’ཏི ཏསྶཱ པིཊྛིཾ པརིམཛྫིཏྭཱ ‘‘སུཁེན གཙྪཱཧཱི’’ཏི ཝིསྶཛྫེསུཾ. ཏེ གོདྷཱཡ ཨམཱརིཏཏྟཱ ནིརཡེ ཏཱཝ ན པཙྩིཾསུ. ཏེ པན སཏྟ ཛནཱ ཨེཀཏོ ཧུཏྭཱ ཙུདྡསསུ ཨཏྟབྷཱཝེསུ སཏྟ སཏྟ དིཝསཱནི ཚིནྣབྷཏྟཱ ཨཧེསུཾ. ཏདཱ, བྷིཀྑཝེ, ཏུམྷེཧི སཏྟཧི གོཔཱལཀེཧི ཧུཏྭཱ ཏཾ ཀམྨཾ ཀཏནྟི. ཨེཝཾ སཏྠཱ ཏེཧི པུཊྛཔུཊྛཾ པཉྷཾ བྱཱཀཱསི.

ཨཐེཀོ ¶ བྷིཀྑུ སཏྠཱརཾ ཨཱཧ – ‘‘ཀིཾ པན, བྷནྟེ, པཱཔཀམྨཾ ཀཏྭཱ ཨཱཀཱསེ ཨུཔྤཏིཏསྶཔི སམུདྡཾ པཀྑནྡསྶཱཔི པབྦཏནྟརཾ པཝིཊྛསྶཱཔི མོཀྑོ ནཏྠཱི’’ཏི. སཏྠཱ ‘‘ཨེཝམེཏཾ, བྷིཀྑཝེ, ཨཱཀཱསཱདཱིསུཔི ཨེཀཔདེསོཔི ནཏྠི, ཡཏྠ ཋིཏོ པཱཔཀམྨཏོ མུཙྩེཡྻཱ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ན ¶ ཨནྟལིཀྑེ ན སམུདྡམཛ྄ཛྷེ, ན པབྦཏཱནཾ ཝིཝརཾ པཝིསྶ;

ན ཝིཛྫཏཱི སོ ཛགཏིཔྤདེསོ, ཡཏྠཊྛིཏོ མུཙྩེཡྻ པཱཔཀམྨཱ’’ཏི.

ཏསྶཏྠོ – སཙེ ཧི ཀོཙི ‘‘ཨིམིནཱ ཨུཔཱཡེན པཱཔཀམྨཏོ མུཙྩིསྶཱམཱི’’ཏི ཨནྟལིཀྑེ ཝཱ ནིསཱིདེཡྻ, ཙཏུརཱསཱིཏིཡོཛནསཧསྶགམྦྷཱིརཾ མཧཱསམུདྡཾ ཝཱ པཝིསེཡྻ, པབྦཏནྟརེ ཝཱ ནིསཱིདེཡྻ, ནེཝ པཱཔཀམྨཏོ མུཙྩེཡྻ. པུརཏྠིམཱདཱིསུ ཛགཏིཔདེསེསུ པཐཝཱིབྷཱགེསུ ན སོ ཝཱལགྒམཏྟོཔི ཨོཀཱསོ ཨཏྠི, ཡཏྠ ཋིཏོ པཱཔཀམྨཏོ མུཙྩིཏུཾ སཀྐུཎེཡྻཱཏི.

དེསནཱཝསཱནེ ཏེ བྷིཀྑཱུ སོཏཱཔཏྟིཕལཱདཱིནི པཱཔུཎིཾསུ, སམྤཏྟམཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ན ¶ ཨནྟལིཀྑེཏི ཨིམཾ དྷམྨདེསནཾ སཏྠཱ ནིགྲོདྷཱརཱམེ ཝིཧརནྟོ སུཔྤབུདྡྷཾ སཀྐཾ ཨཱརབྦྷ ཀཐེསི.

སོ ཀིར ‘‘ཨཡཾ མམ དྷཱིཏརཾ ཚཌྜེཏྭཱ ནིཀྑནྟོ ཙ, མམ པུཏྟཾ པབྦཱཛེཏྭཱ ཏསྶ ཝེརིཊྛཱནེ ཋིཏོ ཙཱ’’ཏི ¶ ཨིམེཧི དྭཱིཧི ཀཱརཎེཧི སཏྠརི ཨཱགྷཱཏཾ བནྡྷིཏྭཱ ཨེཀདིཝསཾ ‘‘ན དཱནིསྶ ནིམནྟནཊྛཱནཾ གནྟྭཱ བྷུཉྫིཏུཾ དསྶཱམཱི’’ཏི གམནམགྒཾ པིདཧིཏྭཱ ཨནྟརཝཱིཐིཡཾ སུརཾ པིཝནྟོ ནིསཱིདི. ཨཐསྶ སཏྠརི བྷིཀྑུསངྒྷཔརིཝུཏེ ཏཾ ཋཱནཾ ཨཱགཏེ ‘‘སཏྠཱ ཨཱགཏོ’’ཏི ཨཱརོཙེསུཾ ¶ . སོ ཨཱཧ – ‘‘པུརཏོ གཙྪཱཏི ཏསྶ ཝདེཐ, ནཱཡཾ མཡཱ མཧལླཀཏརོ, ནཱསྶ མགྒཾ དསྶཱམཱི’’ཏི པུནཔྤུནཾ ཝུཙྩམཱནོཔི ཏཐེཝ ཝཏྭཱ ནིསཱིདི. སཏྠཱ མཱཏུལསྶ སནྟིཀཱ མགྒཾ ཨལབྷིཏྭཱ ཏཏོ ནིཝཏྟི. སོཔི ཨེཀཾ ཙརཔུརིསཾ པེསེསི ‘‘གཙྪ, ཏསྶ ཀཐཾ སུཏྭཱ ཨེཧཱི’’ཏི. སཏྠཱཔི ནིཝཏྟནྟོ སིཏཾ ཀཏྭཱ ཨཱནནྡཏྠེརེན ‘‘ཀོ ནུ ཁོ, བྷནྟེ, སིཏསྶ པཱཏུཀམྨསྶ པཙྩཡོ’’ཏི པུཊྛོ ཨཱཧ – ‘‘པསྶསི, ཨཱནནྡ, སུཔྤབུདྡྷ’’ནྟི. པསྶཱམི, བྷནྟེཏི. བྷཱརིཡཾ ཏེན ཀམྨཾ ཀཏཾ མཱདིསསྶ བུདྡྷསྶ མགྒཾ ཨདེནྟེན, ཨིཏོ སཏྟམེ དིཝསེ ཧེཊྛཱཔཱསཱདེ སོཔཱནཔཱདམཱུལེ པཐཝིཾ པཝིསིསྶཏཱིཏི. ཙརཔུརིསོ ཏཾ ཀཐཾ སུཏྭཱ སུཔྤབུདྡྷསྶ སནྟིཀཾ གནྟྭཱ ‘‘ཀིཾ མམ བྷཱགིནེཡྻེན ནིཝཏྟནྟེན ཝུཏྟ’’ནྟི པུཊྛོ ཡཐཱསུཏཾ ཨཱརོཙེསི. སོ ཏསྶ ཝཙནཾ སུཏྭཱ ‘‘ན དཱནི མམ བྷཱགིནེཡྻསྶ ཀཐཱཡ དོསོ ཨཏྠི, ཨདྡྷཱ ཡཾ སོ ཝདཏི, ཏཾ ཏཐེཝ ཧོཏི. ཨེཝཾ སནྟེཔི ནཾ ཨིདཱནི ¶ མུསཱཝཱདེན ནིགྒཎྷིསྶཱམི. སོ ཧི མཾ ‘སཏྟམེ དིཝསེ པཐཝིཾ པཝིསིསྶཏཱི’ཏི ཨནིཡམེན ཨཝཏྭཱ ‘ཧེཊྛཱཔཱསཱདེ སོཔཱནཔཱདམཱུལེ པཐཝིཾ པཝིསིསྶཏཱི’’’ཏི ཨཱཧ. ‘‘ཨིཏོ དཱནི པཊྛཱཡཱཧཾ ཏཾ ཋཱནཾ ན གམིསྶཱམི, ཨཐ ནཾ ཏསྨིཾ ཋཱནེ པཐཝིཾ ཨཔཝིསིཏྭཱ མུསཱཝཱདེན ནིགྒཎྷིསྶཱམཱི’’ཏི ཨཏྟནོ ཨུཔབྷོགཛཱཏཾ སབྦཾ སཏྟབྷཱུམིཀཔཱསཱདསྶ ཨུཔརི ཨཱརོཔེཏྭཱ སོཔཱནཾ ཧརཱཔེཏྭཱ དྭཱརཾ པིདཧཱཔེཏྭཱ ཨེཀེཀསྨིཾ དྭཱརེ དྭེ དྭེ མལླེ ཋཔེཏྭཱ ‘‘སཙཱཧཾ པམཱདེན ཧེཊྛཱ ཨོརོཧིཏུཀཱམོ ཧོམི, ནིཝཱརེཡྻཱཐ མ’’ནྟི ཝཏྭཱ སཏྟམེ པཱསཱདཏལེ སིརིགབྦྷེ ནིསཱིདི. སཏྠཱ ཏཾ པཝཏྟིཾ སུཏྭཱ, ‘‘བྷིཀྑཝེ, སུཔྤབུདྡྷོ ན ཀེཝལཾ པཱསཱདཏལེ ཝེཧཱསཾ ཨུཔྤཏིཏྭཱ ཨཱཀཱསེ ཝཱ ནིསཱིདཏུ, ནཱཝཱཡ ཝཱ སམུདྡཾ པཀྑནྡཏུ, པབྦཏནྟརཾ ཝཱ པཝིསཏུ, བུདྡྷཱནཾ ཀཐཱཡ དྭིདྷཱབྷཱཝོ ནཱམ ནཏྠི, མཡཱ ཝུཏྟཊྛཱནེཡེཝ སོ པཐཝིཾ པཝིསིསྶཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ན ¶ ཨནྟལིཀྑེ ན སམུདྡམཛ྄ཛྷེ, ན པབྦཏཱནཾ ཝིཝརཾ པཝིསྶ;

ན ཝིཛྫཏཱི སོ ཛགཏིཔྤདེསོ, ཡཏྠཊྛིཏཾ ནཔྤསཧེཡྻ མཙྩཱུ’’ཏི.

ཏཏྠ ¶ ཡཏྠ ཋིཏཾ ནཔྤསཧེཡྻ, མཙྩཱུཏི ཡསྨིཾ པདེསེ ཋིཏཾ མརཎཾ ནཔྤསཧེཡྻ ནཱབྷིབྷཝེཡྻ, ཀེསགྒམཏྟོཔི ¶ པཐཝིཔྤདེསོ ནཏྠི. སེསཾ པུརིམསདིསམེཝཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཏྟམེ དིཝསེ སཏྠུ བྷིཀྑཱཙཱརམགྒསྶ ནིརུདྡྷཝེལཱཡ ཧེཊྛཱཔཱསཱདེ སུཔྤབུདྡྷསྶ མངྒལསྶོ ཨུདྡཱམོ ཧུཏྭཱ ཏཾ ཏཾ བྷིཏྟིཾ པཧརི. སོ ཨུཔརི ནིསིནྣོཝསྶ སདྡཾ སུཏྭཱ ‘‘ཀིམེཏ’’ནྟི པུཙྪི. ‘‘མངྒལསྶོ ཨུདྡཱམོ’’ཏི. སོ པནསྶོ སུཔྤབུདྡྷཾ དིསྭཱཝ སནྣིསཱིདཏི. ཨཐ ནཾ སོ གཎྷིཏུཀཱམོ ཧུཏྭཱ ནིསིནྣཊྛཱནཱ ཨུཊྛཱཡ དྭཱརཱབྷིམུཁོ ཨཧོསི, དྭཱརཱནི སཡམེཝ ཝིཝཊཱནི, སོཔཱནཾ སཀཊྛཱནེཡེཝ ཋིཏཾ. དྭཱརེ ཋིཏཱ མལླཱ ཏཾ གཱིཝཱཡཾ གཧེཏྭཱ ཧེཊྛཱབྷིམུཁཾ ཁིཔིཾསུ. ཨེཏེནུཔཱཡེན སཏྟསུཔི ཏལེསུ དྭཱརཱནི སཡམེཝ ཝིཝཊཱནི, སོཔཱནཱནི ཡཐཱཋཱནེ ཋིཏཱནི. ཏཏྠ ཏཏྠ མལླཱ ཏཾ གཱིཝཱཡམེཝ གཧེཏྭཱ ཧེཊྛཱབྷིམུཁཾ ཁིཔིཾསུ. ཨཐ ནཾ ཧེཊྛཱཔཱསཱདེ སོཔཱནཔཱདམཱུལཾ སམྤཏྟམེཝ མཧཱཔཐཝཱི ཝིཝརམཱནཱ བྷིཛྫིཏྭཱ སམྤཊིཙྪི, སོ གནྟྭཱ ཨཝཱིཙིམྷི ནིབྦཏྟཱིཏི.

སབྦེ ¶ ¶ ¶ ཏསནྟཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཚབྦགྒིཡེ བྷིཀྑཱུ ཨཱརབྦྷ ཀཐེསི.

ཨེཀསྨིཉྷི སམཡེ སཏྟརསཝགྒིཡེཧི སེནཱསནེ པཊིཛགྒིཏེ ཚབྦགྒིཡཱ བྷིཀྑཱུ ‘‘ནིཀྑམཐ, མཡཾ མཧལླཀཏརཱ, ཨམྷཱཀཾ ཨེཏཾ པཱཔུཎཱཏཱི’’ཏི ཝཏྭཱ ཏེཧི ‘‘ན མཡཾ དསྶཱམ, ཨམྷེཧི པཋམཾ པཊིཛགྒིཏ’’ནྟི ཝུཏྟེ ཏེ བྷིཀྑཱུ པཧརིཾསུ. སཏྟརསཝགྒིཡཱ མརཎབྷཡཏཛྫིཏཱ མཧཱཝིརཝཾ ཝིརཝིཾསུ. སཏྠཱ ཏེསཾ སདྡཾ སུཏྭཱ ‘‘ཀིཾ ཨིད’’ནྟི པུཙྪིཏྭཱ ‘‘ཨིདཾ ནཱམཱ’’ཏི ཨཱརོཙིཏེ ‘‘ན, བྷིཀྑཝེ, ཨིཏོ པཊྛཱཡ བྷིཀྑུནཱ ནཱམ ཨེཝཾ ཀཏྟབྦཾ, ཡོ ཀརོཏི, སོ ཨིམཾ ནཱམ ཨཱཔཏྟིཾ ཨཱཔཛྫཏཱི’’ཏི པཧཱརདཱནསིཀྑཱཔདཾ (པཱཙི. ༤༤༩ ཨཱདཡོ) པཉྙཱཔེཏྭཱ, ‘‘བྷིཀྑཝེ, བྷིཀྑུནཱ ནཱམ ‘ཡཐཱ ཨཧཾ, ཏཐེཝ ཨཉྙེཔི དཎྜསྶ ཏསནྟི, མཙྩུནོ བྷཱཡནྟཱི’ཏི ཉཏྭཱ པརོ ན པཧརིཏབྦོ, ན གྷཱཏེཏབྦོ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘སབྦེ ཏསནྟི དཎྜསྶ, སབྦེ བྷཱཡནྟི མཙྩུནོ;

ཨཏྟཱནཾ ཨུཔམཾ ཀཏྭཱ, ན ཧནེཡྻ ན གྷཱཏཡེ’’ཏི.

ཏཏྠ ¶ སབྦེ ཏསནྟཱིཏི སབྦེཔི སཏྟཱ ཨཏྟནི དཎྜེ པཏནྟེ ཏསྶ དཎྜསྶ ཏསནྟི. མཙྩུནོཏི མརཎསྶཱཔི བྷཱཡནྟིཡེཝ. ཨིམིསྶཱ ཙ དེསནཱཡ བྱཉྫནཾ ནིརཝསེསཾ, ཨཏྠོ པན སཱཝསེསོ. ཡཐཱ ཧི རཉྙཱ ‘‘སབྦེ སནྣིཔཏནྟཱུ’’ཏི བྷེརིཡཱ ཙརཱཔིཏཱཡཔི རཱཛམཧཱམཏྟེ ཋཔེཏྭཱ སེསཱ སནྣིཔཏནྟི, ཨེཝམིདྷ ‘‘སབྦེ ཏསནྟཱི’’ཏི ཝུཏྟེཔི ཧཏྠཱཛཱནེཡྻོ ཨསྶཱཛཱནེཡྻོ ཨུསབྷཱཛཱནེཡྻོ ཁཱིཎཱསཝོཏི ཨིམེ ཙཏྟཱརོ ཋཔེཏྭཱ ཨཝསེསཱཝ ཏསནྟཱིཏི ཝེདིཏབྦཱ. ཨིམེསུ ཧི ཁཱིཎཱསཝོ སཀྐཱཡདིཊྛིཡཱ པཧཱིནཏྟཱ མརཎཀསཏྟཾ ཨཔསྶནྟོ ན བྷཱཡཏི, ཨིཏརེ ཏཡོ སཀྐཱཡདིཊྛིཡཱ ¶ བལཝཏྟཱ ཨཏྟནོ པཊིཔཀྑབྷཱུཏཾ སཏྟཾ ཨཔསྶནྟཱ ན བྷཱཡནྟཱིཏི. ན ཧནེཡྻ ན གྷཱཏཡེཏི ཡཐཱ ཨཧཾ ¶ , ཨེཝཾ ཨཉྙེཔི སཏྟཱཏི ནེཝ པརཾ པཧརེཡྻ ན པཧརཱཔེཡྻཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སབྦེ ཏསནྟཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཚབྦགྒིཡེ བྷིཀྑཱུ ཨཱརབྦྷ ཀཐེསི.

ཏེཡེཝ ¶ ཨེཀསྨིཉྷི སམཡེ ཏེནེཝ ཀཱརཎེན པུརིམསིཀྑཱཔདེ སཏྟརསཝགྒིཡེ པཧརིཾསུ. ཏེནེཝ ཀཱརཎེན ཏེསཾ ཏལསཏྟིཀཾ ཨུགྒིརིཾསུ. ཨིདྷཱཔི སཏྠཱ ཏེསཾ སདྡཾ སུཏྭཱ ‘‘ཀིཾ ཨིད’’ནྟི པུཙྪིཏྭཱ ‘‘ཨིདཾ ནཱམཱ’’ཏི ཨཱརོཙིཏེ ‘‘ན, བྷིཀྑཝེ, ཨིཏོ པཊྛཱཡ བྷིཀྑུནཱ ནཱམ ཨེཝཾ ཀཏྟབྦཾ, ཡོ ཀརོཏི, སོ ཨིམཾ ནཱམ ཨཱཔཏྟིཾ ཨཱཔཛྫཏཱི’’ཏི ཏལསཏྟིཀསིཀྑཱཔདཾ (པཱཙི. ༤༥༤ ཨཱདཡོ) པཉྙཱཔེཏྭཱ, ‘‘བྷིཀྑཝེ, བྷིཀྑུནཱ ནཱམ ‘ཡཐཱ ཨཧཾ, ཏཐེཝ ཨཉྙེཔི དཎྜསྶ ཏསནྟི, ཡཐཱ ཙ མཡ྄ཧཾ, ཏཐེཝ ནེསཾ ཛཱིཝིཏཾ པིཡ’ནྟི ཉཏྭཱ པརོ ན པཧརིཏབྦོ ན གྷཱཊེཏབྦོ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘སབྦེ ཏསནྟི དཎྜསྶ, སབྦེསཾ ཛཱིཝིཏཾ པིཡཾ;

ཨཏྟཱནཾ ཨུཔམཾ ཀཏྭཱ, ན ཧནེཡྻ ན གྷཱཏཡེ’’ཏི.

ཏཏྠ སབྦེསཾ ཛཱིཝིཏཾ པིཡནྟི ཁཱིཎཱསཝཾ ཋཔེཏྭཱ སེསསཏྟཱནཾ ཛཱིཝིཏཾ པིཡཾ མདྷུརཾ, ཁཱིཎཱསཝོ པན ཛཱིཝིཏེ ཝཱ མརཎེ ཝཱ ཨུཔེཀྑཀོཝ ཧོཏི. སེསཾ པུརིམསདིསམེཝཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སུཁཀཱམཱནི ¶ ¶ བྷཱུཏཱནཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ ཀུམཱརཀེ ཨཱརབྦྷ ཀཐེསི.

ཨེཀསྨིཉྷི ¶ སམཡེ སཏྠཱ སཱཝཏྠིཡཾ པིཎྜཱཡ པཝིསནྟོ ཨནྟརཱམགྒེ སམྦཧུལེ ཀུམཱརཀེ ཨེཀཾ གྷརསཔྤཛཱཏིཀཾ ཨཧིཾ དཎྜཀེན པཧརནྟེ དིསྭཱ ‘‘ཀུམཱརཀཱ ཀིཾ ཀརོཐཱ’’ཏི པུཙྪིཏྭཱ ‘‘ཨཧིཾ, བྷནྟེ, དཎྜཀེན པཧརཱམཱ’’ཏི ཝུཏྟེ ‘‘ཀིཾ ཀཱརཎཱ’’ཏི པུན པུཙྪིཏྭཱ ‘‘ཌཾསནབྷཡེན, བྷནྟེ’’ཏི ཝུཏྟེ ‘‘ཏུམྷེ ‘ཨཏྟནོ སུཁཾ ཀརིསྶཱམཱ’ཏི ཨིམཾ པཧརནྟཱ ནིབྦཏྟནིབྦཏྟཊྛཱནེ སུཁལཱབྷིནོ ན བྷཝིསྶཐ. ཨཏྟནོ སུཁཾ པཏྠེནྟེན ཧི པརཾ པཧརིཏུཾ ན ཝཊྚཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘སུཁཀཱམཱནི བྷཱུཏཱནི, ཡོ དཎྜེན ཝིཧིཾསཏི;

ཨཏྟནོ སུཁམེསཱནོ, པེཙྩ སོ ན ལབྷཏེ སུཁཾ.

‘‘སུཁཀཱམཱནི བྷཱུཏཱནི, ཡོ དཎྜེན ན ཧིཾསཏི;

ཨཏྟནོ སུཁམེསཱནོ, པེཙྩ སོ ལབྷཏེ སུཁ’’ནྟི.

ཏཏྠ ཡོ དཎྜེནཱཏི ཡོ པུགྒལོ དཎྜེན ཝཱ ལེཌྜུཨཱདཱིཧི ཝཱ ཝིཧེཋེཏི. པེཙྩ སོ ན ལབྷཏེ སུཁནྟི སོ པུགྒལོ པརལོཀེ མནུསྶསུཁཾ ཝཱ དིབྦསུཁཾ ཝཱ པརམཏྠབྷཱུཏཾ ཝཱ ནིབྦཱནསུཁཾ ན ལབྷཏི. དུཏིཡགཱཐཱཡ པེཙྩ སོ ལབྷཏེཏི སོ པུགྒལོ པརལོཀེ ཝུཏྟཔྤཀཱརཾ ཏིཝིདྷམྤི སུཁཾ ལབྷཏཱིཏི ཨཏྠོ.

དེསནཱཝསཱནེ པཉྩསཏཱཔི ཏེ ཀུམཱརཀཱ སོཏཱཔཏྟིཕལེ པཏིཊྛཧིཾསཱུཏི.

མཱཝོཙ ¶ ཕརུསཾ ཀཉྩཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀོཎྜདྷཱནཏྠེརཾ ཨཱརབྦྷ ཀཐེསི.

ཏསྶ ¶ ¶ ཀིར པབྦཛིཏདིཝསཏོ པཊྛཱཡ ཨེཀཾ ཨིཏྠིརཱུཔཾ ཐེརེན སདྡྷིཾཡེཝ ཝིཙརཏི. ཏཾ ཐེརོ ན པསྶཏི, མཧཱཛནོ པན པསྶཏི. ཨནྟོགཱམཾ པིཎྜཱཡ ཙརཏོཔིསྶ མནུསྶཱ ཨེཀཾ བྷིཀྑཾ དཏྭཱ, ‘‘བྷནྟེ, ཨཡཾ ཏུམྷཱཀཾ ཧོཏུ, ཨཡཾ པན ཏུམྷཱཀཾ སཧཱཡིཀཱཡཱ’’ཏི ཝཏྭཱ དུཏིཡམྤི དདནྟི.

ཀིཾ ཏསྶ པུབྦཀམྨནྟི? ཀསྶཔསམྨཱསམྦུདྡྷཀཱལེ ཀིར དྭེ སཧཱཡཀཱ བྷིཀྑཱུ ཨེཀམཱཏུཀུཙྪིཏོ ནིཀྑནྟསདིསཱ ཨཏིཝིཡ སམགྒཱ ཨཧེསུཾ. དཱིགྷཱཡུཀབུདྡྷཀཱལེ ཙ ཨནུསཾཝཙྪརཾ ཝཱ ཨནུཚམཱསཾ ཝཱ བྷིཀྑཱུ ཨུཔོསཐཏྠཱཡ སནྣིཔཏནྟི. ཏསྨཱ ཏེཔི ‘‘ཨུཔོསཐགྒཾ གམིསྶཱམཱ’’ཏི ཝསནཊྛཱནཱ ནིཀྑམིཾསུ. ཏེ ཨེཀཱ ཏཱཝཏིཾསབྷཝནེ ནིབྦཏྟདེཝཏཱ དིསྭཱ ‘‘ཨིམེ བྷིཀྑཱུ ཨཏིཝིཡ སམགྒཱ, སཀྐཱ ནུ ཁོ ཨིམེ བྷིནྡིཏུ’’ནྟི ཙིནྟེཏྭཱ ཨཏྟནོ བཱལཏཱཡ ཙིནྟིཏསམནནྟརམེཝ ཨཱགནྟྭཱ ཏེསུ ཨེཀེན, ‘‘ཨཱཝུསོ, མུཧུཏྟཾ ཨཱགམེཧི, སརཱིརཀིཙྩེནམྷི ཨཏྠིཀོ’’ཏི ཝུཏྟེ སཱ དེཝཏཱ ཨེཀཾ མནུསྶིཏྠིཝཎྞཾ ¶ མཱཔེཏྭཱ ཐེརསྶ གཙྪནྟརཾ པཝིསིཏྭཱ ནིཀྑམནཀཱལེ ཨེཀེན ཧཏྠེན ཀེསཀལཱཔཾ, ཨེཀེན ནིཝཱསནཾ སཎྛཱཔཡམཱནཱ ཏསྶ པིཊྛིཏོ ནིཀྑམི. སོ ཏཾ ན པསྶཏི, ཏམཱགམཡམཱནོ པན པུརཏོ ཋིཏབྷིཀྑུ ནིཝཏྟིཏྭཱ ཨོལོཀཡམཱནོ ཏཾ ཏཐཱ ཀཏྭཱ ནིཀྑམནྟཾ པསྶི. སཱ ཏེན དིཊྛབྷཱཝཾ ཉཏྭཱ ཨནྟརདྷཱཡི. ཨིཏརོ ཏཾ བྷིཀྑུཾ ཨཏྟནོ སནྟིཀཾ ཨཱགཏཀཱལེ ཨཱཧ – ‘‘ཨཱཝུསོ, སཱིལཾ ཏེ བྷིནྣ’’ནྟི. ‘‘ནཏྠཱཝུསོ, མཡ྄ཧཾ ཨེཝརཱུཔ’’ནྟི. ཨིདཱནེཝ ཏེ མཡཱ པཙྪཏོ ནིཀྑམམཱནཱ ཏརུཎཨིཏྠཱི ཨིདཾ ནཱམ ཀརོནྟཱི དིཊྛཱ, ཏྭཾ ‘‘ནཏྠི མཡ྄ཧཾ ཨེཝརཱུཔ’’ནྟི ཀིཾ ཝདེསཱིཏི. སོ ཨསནིཡཱ མཏྠཀེ ཨཝཏྠཊོ ཝིཡ མཱ མཾ, ཨཱཝུསོ, ནཱསེཧི, ནཏྠི མཡ྄ཧཾ ཨེཝརཱུཔནྟི. ཨིཏརོ ‘‘མཡཱ སཱམཾ ཨཀྑཱིཧི དིཊྛཾ, ཀིཾ ཏཝ སདྡཧིསྶཱམཱི’’ཏི དཎྜཀོ ཝིཡ བྷིཛྫིཏྭཱ པཀྐཱམི, ཨུཔོསཐགྒེཔི ‘‘ནཱཧཾ ཨིམིནཱ སདྡྷིཾ ཨུཔོསཐཾ ཀརིསྶཱམཱི’’ཏི ནིསཱིདི. ཨིཏརོ ‘‘མཡ྄ཧཾ, བྷནྟེ, སཱིལེ ཨཎུམཏྟམྤི ཀཱལ༹ཾ ནཏྠཱི’’ཏི བྷིཀྑཱུནཾ ཀཐེསི. སོཔི ‘‘མཡཱ སཱམཾ དིཊྛ’’ནྟི ཨཱཧ. དེཝཏཱ ཏཾ ཏེན སདྡྷིཾ ཨུཔོསཐཾ ཀཱཏུཾ ཨནིཙྪནྟཾ དིསྭཱ ‘‘བྷཱརིཡཾ མཡཱ ཀམྨཾ ཀཏ’’ནྟི ཙིནྟེཏྭཱ – ‘‘བྷནྟེ, མཡ྄ཧཾ ཨཡྻསྶ སཱིལབྷེདོ ནཏྠི, མཡཱ པན ཝཱིམཾསནཝསེནེཏཾ ཀཏཾ, ཀརོཐ ཏེན ¶ སདྡྷིཾ ཨུཔོསཐ’’ནྟི ཨཱཧ. སོ ཏསྶཱ ཨཱཀཱསེ ཋཏྭཱ ཀཐེནྟིཡཱ སདྡཧིཏྭཱ ཨུཔོསཐཾ ཨཀཱསི ¶ , ན པན ཐེརེ པུབྦེ ཝིཡ མུདུཙིཏྟོ ཨཧོསི. ཨེཏྟཀཾ དེཝཏཱཡ པུབྦཀམྨཾ.

ཨཱཡུཔརིཡོསཱནེ པན ཏེ ཐེརཱ ཡཐཱསུཁཾ དེཝལོཀེ ནིབྦཏྟིཾསུ. དེཝཏཱ ཨཔཱིཙིམྷི ནིབྦཏྟིཏྭཱ ཨེཀཾ བུདྡྷནྟརཾ ཏཏྠ པཙྩིཏྭཱ ཨིམསྨིཾ བུདྡྷུཔྤཱདེ སཱཝཏྠིཡཾ ནིབྦཏྟིཏྭཱ ཝུདྡྷིམནྭཱཡ སཱསནེ པབྦཛིཏྭཱ ཨུཔསམྤདཾ ལབྷི. ཏསྶ པབྦཛིཏདིཝསཏོ པཊྛཱཡ ཏཾ ཨིཏྠིརཱུཔཾ ¶ ཏཐེཝ པཉྙཱཡི. ཏེནེཝསྶ ཀོཎྜདྷཱནཏྠེརོཏི ནཱམཾ ཀརིཾསུ. ཏཾ ཏཐཱཝིཙརནྟཾ དིསྭཱ བྷིཀྑཱུ ཨནཱཐཔིཎྜིཀཾ ཨཱཧཾསུ – ‘‘མཧཱསེཊྛི, ཨིམཾ དུསྶཱིལཾ ཏཝ ཝིཧཱརཱ ནཱིཧར. ཨིམཉྷི ནིསྶཱཡ སེསབྷིཀྑཱུནཾ ཨཡསོ ཨུཔྤཛྫིསྶཏཱི’’ཏི. ཀིཾ པན, བྷནྟེ, སཏྠཱ ཝིཧཱརེ ནཏྠཱིཏི? ཨཏྠི ཨུཔཱསཀཱཏི. ཏེན ཧི, བྷནྟེ, སཏྠཱཝ ཛཱནིསྶཏཱིཏི. བྷིཀྑཱུ གནྟྭཱ ཝིསཱཁཱཡཔི ཏཐེཝ ཀཐེསུཾ. སཱཔི ནེསཾ ཏཐེཝ པཊིཝཙནཾ ཨདཱསི.

བྷིཀྑཱུཔི ཏེཧི ཨསམྤཊིཙྪིཏཝཙནཱ རཉྙོ ཨཱརོཙེསུཾ – ‘‘མཧཱརཱཛ, ཀོཎྜདྷཱནཏྠེརོ ཨེཀཾ ཨིཏྠིཾ གཧེཏྭཱ ཝིཙརནྟོ སབྦེསཾ ཨཡསཾ ཨུཔྤཱདེསི, ཏཾ ཏུམྷཱཀཾ ཝིཛིཏཱ ནཱིཧརཐཱ’’ཏི. ‘‘ཀཧཾ པན སོ, བྷནྟེ’’ཏི? ‘‘ཝིཧཱརེ, མཧཱརཱཛཱ’’ཏི. ‘‘ཀཏརསྨིཾ སེནཱསནེ ཝིཧརཏཱི’’ཏི? ‘‘ཨསུཀསྨིཾ ནཱམཱ’’ཏི. ‘‘ཏེན ཧི གཙྪཐ, ཨཧཾ ཏཾ གཎྷིསྶཱམཱི’’ཏི སོ སཱཡནྷསམཡེ ཝིཧཱརཾ གནྟྭཱ ཏཾ སེནཱསནཾ པུརིསེཧི པརིཀྑིཔཱཔེཏྭཱ ཐེརསྶ ཝསནཊྛཱནཱབྷིམུཁོ ཨགམཱསི. ཐེརོ མཧཱསདྡཾ སུཏྭཱ ཝིཧཱརཱ ནིཀྑམིཏྭཱ པམུཁེ ཨཊྛཱསི. ཏམྤིསྶ ཨིཏྠིརཱུཔཾ ¶ པིཊྛིཔསྶེ ཋིཏཾ རཱཛཱ ཨདྡས. ཐེརོ རཉྙོ ཨཱགམནཾ ཉཏྭཱ ཝིཧཱརཾ ཨབྷིརུཧིཏྭཱ ནིསཱིདི. རཱཛཱ ཐེརཾ ན ཝནྡི, ཏམྤི ཨིཏྠིཾ ནཱདྡས. སོ དྭཱརནྟརེཔི ཧེཊྛཱམཉྩེཔི ཨོལོཀེནྟོ ཨདིསྭཱཝ ཐེརཾ ཨཱཧ – ‘‘བྷནྟེ, ཨིམསྨིཾ ཋཱནེ ཨེཀཾ ཨིཏྠིཾ ཨདྡསཾ, ཀཧཾ སཱ’’ཏི? ‘‘ན པསྶཱམི, མཧཱརཱཛཱ’’ཏི. ‘‘ཨིདཱནི མཡཱ ཏུམྷཱཀཾ པིཊྛིཔསྶེ ཋིཏཱ དིཊྛཱ’’ཏི ཝུཏྟེཔི ‘‘ཨཧཾ ན པསྶཱམི’’ཙྩེཝཱཧ. རཱཛཱ ‘‘ཀིཾ ནུ ཁོ ཨེཏ’’ནྟི ཙིནྟེཏྭཱ, ‘‘བྷནྟེ, ཨིཏོ ཏཱཝ ནིཀྑམཐཱ’’ཏི ཨཱཧ. ཐེརེ ནིཀྑམིཏྭཱ པམུཁེ ཋིཏེ པུན སཱ ཐེརསྶ པིཊྛིཔསྶེ ཨཊྛཱསི. རཱཛཱ ཏཾ དིསྭཱ པུན ཨུཔརིཏལཾ ཨབྷིརུཧི, ཏསྶ ཨཱགཏབྷཱཝཾ ཉཏྭཱ ཐེརོ ནིསཱིདི. པུན རཱཛཱ ཏཾ སབྦཊྛཱནེསུ ཨོལོཀེནྟོཔི ཨདིསྭཱ, ‘‘བྷནྟེ, ཀཧཾ སཱ ཨིཏྠཱི’’ཏི པུན ཐེརཾ ¶ པུཙྪི. ནཱཧཾ པསྶཱམི མཧཱརཱཛཱཏི. ‘‘ཀིཾ ཀཐེཐ, བྷནྟེ, མཡཱ ཨིདཱནེཝ ཏུམྷཱཀཾ པིཊྛིཔསྶེ ཋིཏཱ དིཊྛཱ’’ཏི ཨཱཧ. ཨཱམ, མཧཱརཱཛ, མཧཱཛནོཔི ‘‘མེ པཙྪཏོ པཙྪཏོ ཨིཏྠཱི ཝིཙརཏཱི’’ཏི ཝདཏི, ཨཧཾ པན ན པསྶཱམཱིཏི ¶ . རཱཛཱ ‘‘པཊིརཱུཔཀེན བྷཝིཏབྦ’’ནྟི སལླཀྑེཏྭཱ པུན ཐེརཾ, ‘‘བྷནྟེ, ཨིཏོ ཏཱཝ ཨོཏརཐཱ’’ཏི ཝཏྭཱ ཐེརེ ཨོཏརིཏྭཱ པམུཁེ ཋིཏེ པུན ཏཾ ཏསྶ པིཊྛིཔསྶེ ཋིཏཾ དིསྭཱ ཨུཔརིཏལཾ ཨབྷིརུཧི. པུན ནཱདྡས. སོ པུན ཐེརཾ པུཙྪིཏྭཱ ཏེན ‘‘ན པསྶཱམི’’ཙྩེཝ ཝུཏྟེ ‘‘པཊིརཱུཔཀམེཝེཏ’’ནྟི ནིཊྛཾ གནྟྭཱ ཐེརཾ ཨཱཧ – ‘‘བྷནྟེ, ཨེཝརཱུཔེ སཾཀིལེསེ ཏུམྷཱཀཾ པིཊྛིཏོ ཝིཙརནྟེ ཨཉྙོ ཀོཙི ཏུམྷཱཀཾ བྷིཀྑཾ ན དསྶཏི, ནིབདྡྷཾ མམ གེཧཾ པཝིསཐ, ཨཧམེཝ ཙཏཱུཧི པཙྩཡེཧི ཨུཔཊྛཧིསྶཱམཱི’’ཏི ཐེརཾ ནིམནྟེཏྭཱ པཀྐཱམི.

བྷིཀྑཱུ ‘‘པསྶཐཱཝུསོ, རཉྙོ པཱཔཀིརིཡཾ, ‘ཨེཏཾ ཝིཧཱརཏོ ནཱིཧརཱ’ཏི ཝུཏྟེ ཨཱགནྟྭཱ ཙཏཱུཧི ¶ པཙྩཡེཧི ནིམནྟེཏྭཱ གཏོ’’ཏི ཨུཛ྄ཛྷཱཡིཾསུ. ཏམྤི ཐེརཾ ཨཱཧཾསུ – ‘‘ཨམྦྷོ, དུསྶཱིལ, ཨིདཱནིསི རཱཛཀོཎྜོ ཛཱཏོ’’ཏི. སོཔི པུབྦེ བྷིཀྑཱུ ཀིཉྩི ཝཏྟུཾ ཨསཀྐོནྟོ ‘‘ཏུམྷེ དུསྶཱིལཱ, ཏུམྷེ ཀོཎྜཱ, ཏུམྷེ ཨིཏྠིཾ གཧེཏྭཱ ཝིཙརཐཱ’’ཏི ཨཱཧ. ཏེ གནྟྭཱ སཏྠུ ཨཱརོཙེསུཾ – ‘‘བྷནྟེ, ཀོཎྜདྷཱནཏྠེརོ ཨམྷེཧི ཝུཏྟོ ཨམྷེ ‘དུསྶཱིལཱ’ཏིཨཱདཱིནི ཝཏྭཱ ཨཀྐོསཏཱི’’ཏི. སཏྠཱ ཏཾ པཀྐོསཱཔེཏྭཱ པུཙྪི – ‘‘སཙྩཾ ཀིར ཏྭཾ, བྷིཀྑུ, ཨེཝཾ ཝདེསཱི’’ཏི? ‘‘སཙྩཾ, བྷནྟེ’’ཏི. ‘‘ཀིཾ ཀཱརཎཱ’’ཏི? ‘‘མཡཱ སདྡྷིཾ ཀཐིཏཀཱརཎཱ’’ཏི. ‘‘ཏུམྷེ, བྷིཀྑཝེ, ཨིམིནཱ སདྡྷིཾ ཀསྨཱ ཀཐེཐཱ’’ཏི. ‘‘ཨིམསྶ པཙྪཏོ ཨིཏྠིཾ ཝིཙརནྟིཾ དིསྭཱ, བྷནྟེ’’ཏི. ‘‘ཨིམེ ཀིར ཏཡཱ སདྡྷིཾ ཨིཏྠིཾ ཝིཙརནྟིཾ དིསྭཱ ཝདནྟི, ཏྭཾ ཀསྨཱ ཀཐེསི ¶ , ཨེཏེ ཏཱཝ དིསྭཱ ཀཐེནྟི. ཏྭཾ ཨདིསྭཱཝ ཨིམེཧི སདྡྷིཾ ཀསྨཱ ཀཐེསི, ནནུ པུབྦེ ཏཝེཝ པཱཔིཀཾ དིཊྛིཾ ནིསྶཱཡ ཨིདཾ ཛཱཏཾ, ཨིདཱནི ཀསྨཱ པུན པཱཔིཀཾ དིཊྛིཾ གཎྷཱསཱི’’ཏི. བྷིཀྑཱུ ‘‘ཀིཾ པན, བྷནྟེ, ཨིམིནཱ པུབྦེ ཀཏ’’ནྟི པུཙྪིཾསུ. ཨཐ ནེསཾ སཏྠཱ ཏསྶ པུབྦཀམྨཾ ཀཐེཏྭཱ ‘‘བྷིཀྑུ ཨིདཾ པཱཔཀམྨཾ ནིསྶཱཡ ཏྭཾ ཨིམཾ ཝིཔྤཀཱརཾ པཏྟོ, ཨིདཱནི ཏེ པུན ཏཐཱརཱུཔཾ པཱཔིཀཾ དིཊྛིཾ གཧེཏུཾ ན ཡུཏྟཾ, མཱ པུན བྷིཀྑཱུཧི སདྡྷིཾ ཀིཉྩི ཀཐེཧི, ནིསྶདྡོ མུཁཝཊྚིཡཾ ཚིནྣཀཾསཐཱལསདིསོ ཧོཧི, ཨེཝཾ ཀརོནྟོ ནིབྦཱནཔྤཏྟོ ནཱམ བྷཝིསྶཏཱི’’ཏི ¶ ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘མཱཝོཙ ཕརུསཾ ཀཉྩི, ཝུཏྟཱ པཊིཝདེཡྻུ ཏཾ;

དུཀྑཱ ཧི སཱརམྦྷཀཐཱ, པཊིདཎྜཱ ཕུསེཡྻུ ཏཾ.

‘‘སཙེ ནེརེསི ཨཏྟཱནཾ, ཀཾསོ ཨུཔཧཏོ ཡཐཱ;

ཨེས པཏྟོསི ནིབྦཱནཾ, སཱརམྦྷོ ཏེ ན ཝིཛྫཏཱི’’ཏི.

ཏཏྠ མཱཝོཙ ཕརུསཾ ཀཉྩཱིཏི ཀཉྩི ཨེཀཔུགྒལམྤི ཕརུསཾ མཱ ཨཝཙ. ཝུཏྟཱཏི ཏཡཱ པརེ ‘‘དུསྶཱིལཱ’’ཏི ཝུཏྟཱ, ཏམྤི ཏཐེཝ པཊིཝདེཡྻུཾ. སཱརམྦྷཀཐཱཏི ཨེསཱ ཀརཎུཏྟརཱ ཡུགགྒཱཧཀཐཱ ནཱམ དུཀྑཱ. པཊིདཎྜཱཏི ཀཱཡདཎྜཱདཱིཧི ¶ པརཾ པཧརནྟསྶ ཏཱདིསཱ པཊིདཎྜཱ ཙ ཏཝ མཏྠཀེ པཏེཡྻུཾ. སཙེ ནེརེསཱིཏི སཙེ ཨཏྟཱནཾ ནིཙྩལཾ ཀཱཏུཾ སཀྑིསྶསི. ཀཾསོ ཨུཔཧཏོ ཡཐཱཏི མུཁཝཊྚིཡཾ ཚིནྡིཏྭཱ ཏལམཏྟཾ ཀཏྭཱ ཋཔིཏཀཾསཐཱལཾ ཝིཡ. ཏཉྷི ཧཏྠཔཱདེཧི ཝཱ དཎྜཀེན ཝཱ པཧཊམྤི སདྡཾ ན ཀརོཏི, ཨེས པཏྟོསཱིཏི སཙེ ཨེཝརཱུཔོ བྷཝིཏུཾ སཀྑིསྶསི, ཨིམཾ པཊིཔདཾ པཱུརཡམཱནོ ཨིདཱནི ཨཔྤཏྟོཔི ཨེསོ ནིབྦཱནཔྤཏྟོ ནཱམ. སཱརམྦྷོ ཏེ ན ཝིཛྫཏཱིཏི ཨེཝཾ སནྟེ ཙ པན ‘‘ཏྭཾ དུསྶཱིལོ, ཏུམྷེ དུསྶཱིལཱ’’ཏིཨེཝམཱདིཀོ ཨུཏྟརཀརཎཝཱཙཱལཀྑཎོ སཱརམྦྷོཔི ཏེ ན ཝིཛྫཏི, ན བྷཝིསྶཏིཡེཝཱཏི ཨཏྠོ.

དེསནཱཝསཱནེ ¶ བཧཱུ སོཏཱཔཏྟིཕལཱདཱིནི པཱཔུཎིཾསུ, ཀོཎྜདྷཱནཏྠེརོཔི སཏྠཱརཱ དིནྣཨོཝཱདེ ཋཏྭཱ ཨརཧཏྟཾ པཱཔུཎི, ན ཙིརསྶེཝ ཨཱཀཱསེ ཨུཔྤཏིཏྭཱ པཋམཾ སལཱཀཾ གཎྷཱིཏི.

ཡཐཱ དཎྜེནཱཏི ཨིམཾ དྷམྨདེསནཾ སཏྠཱ པུབྦཱརཱམེ ཝིཧརནྟོ ཝིསཱཁཱདཱིནཾ ཨུཔཱསིཀཱནཾ ཨུཔོསཐཀམྨཾ ཨཱརབྦྷ ཀཐེསི.

སཱཝཏྠིཡཾ ¶ ¶ ཀིར ཨེཀསྨིཾ མཧཱཨུཔོསཐདིཝསེ པཉྩསཏམཏྟཱ ཨིཏྠིཡོ ཨུཔོསཐིཀཱ ཧུཏྭཱ ཝིཧཱརཾ ཨགམིཾསུ. ཝིསཱཁཱ ཏཱསུ མཧལླཀིཏྠིཡོ ཨུཔསངྐམིཏྭཱ པུཙྪི, ‘‘ཨམྨཱ, ཀིམཏྠཾ ཨུཔོསཐིཀཱ ཛཱཏཏྠཱ’’ཏི. ཏཱཧི ‘‘དིབྦསམྤཏྟིཾ པཏྠེཏྭཱ’’ཏི ཝུཏྟེ མཛ྄ཛྷིམིཏྠིཡོ པུཙྪི, ཏཱཧི ‘‘སཔཏྟིཝཱསཱ མུཙྩནཏྠཱཡཱ’’ཏི ཝུཏྟེ ཏརུཎིཏྠིཡོ པུཙྪི, ཏཱཧི ‘‘པཋམགབྦྷེ པུཏྟཔཊིལཱབྷཏྠཱཡཱ’’ཏི ཝུཏྟེ ཀུམཱརིཀཱཡོ པུཙྪི, ཏཱཧི ‘‘ཏརུཎབྷཱཝེཡེཝ པཏིཀུལགམནཏྠཱཡཱ’’ཏི ཝུཏྟེ ཏཾ སབྦམྤི ཏཱསཾ ཀཐཾ སུཏྭཱ ཏཱ ཨཱདཱཡ སཏྠུ སནྟིཀཾ གནྟྭཱ པཊིཔཱཊིཡཱ ཨཱརོཙེསི. ཏཾ སུཏྭཱ སཏྠཱ ‘‘ཝིསཱཁེ ཨིམེསཾ སཏྟཱནཾ ཛཱཏིཨཱདཡོ ནཱམ དཎྜཧཏྠཀགོཔཱལཀསདིསཱ, ཛཱཏི ཛརཱཡ སནྟིཀཾ, ཛརཱ བྱཱདྷིནོ སནྟིཀཾ, བྱཱདྷི མརཎསྶ སནྟིཀཾ པེསེཏྭཱ མརཎཾ ཀུཋཱརིཡཱ ཚིནྡནྟཱ ཝིཡ ཛཱིཝིཏཾ ཚིནྡཏི, ཨེཝཾ སནྟེཔི ཝིཝཊྚཾ པཏྠེནྟཱ ནཱམ ནཏྠི, ཝཊྚམེཝ པན པཏྠེནྟཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཡཐཱ དཎྜེན གོཔཱལོ, གཱཝོ པཱཛེཏི གོཙརཾ;

ཨེཝཾ ཛརཱ ཙ མཙྩུ ཙ, ཨཱཡུཾ པཱཛེནྟི པཱཎིན’’ནྟི.

ཏཏྠ པཱཛེཏཱིཏི ཚེཀོ གོཔཱལོ ཀེདཱརནྟརཾ པཝིསནྟིཡོ གཱཝོ དཎྜེན ནིཝཱརེཏྭཱ ཏེནེཝ པོཐེནྟོ སུལབྷཏིཎོདཀཾ ¶ གོཙརཾ ནེཏི. ཨཱཡུཾ པཱཛེནྟཱིཏི ཛཱིཝིཏིནྡྲིཡཾ ཚིནྡནྟི ཁེཔེནྟི. གོཔཱལཀོ ཝིཡ ཧི ཛརཱ ཙ མཙྩུ ཙ, གོགཎོ ཝིཡ ཛཱིཝིཏིནྡྲིཡཾ, གོཙརབྷཱུམི ཝིཡ མརཎཾ. ཏཏྠ ཛཱཏི ཏཱཝ སཏྟཱནཾ ཛཱིཝིཏིནྡྲིཡཾ ཛརཱཡ སནྟིཀཾ པེསེསི, ཛརཱ བྱཱདྷིནོ སནྟིཀཾ ¶ , བྱཱདྷི མརཎསྶ སནྟིཀཾ. ཏམེཝ མརཎཾ ཀུཋཱརིཡཱ ཚེདཾ ཝིཡ ཚིནྡིཏྭཱ གཙྪཏཱིཏི ཨིདམེཏྠ ཨོཔམྨསམྤཊིཔཱདནཾ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཐ ¶ པཱཔཱནི ཀམྨཱནཱིཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨཛགརཔེཏཾ ཨཱརབྦྷ ཀཐེསི.

ཨེཀསྨིཉྷི སམཡེ མཧཱམོགྒལླཱནཏྠེརོ ལཀྑཎཏྠེརེན སདྡྷིཾ གིཛ྄ཛྷཀཱུཊཏོ ཨོཏརནྟོ དིབྦེན ཙཀྑུནཱ པཉྩཝཱིསཏིཡོཛནིཀཾ ཨཛགརཔེཏཾ ནཱམ ཨདྡས. ཏསྶ སཱིསཏོ ཨགྒིཛཱལཱ ཨུཊྛཧིཏྭཱ པརིཡནྟཾ གཙྪནྟི, པརིཡནྟཏོ ཨུཊྛཧིཏྭཱ སཱིསཾ གཙྪནྟི, ཨུབྷཡཏོ ཨུཊྛཧིཏྭཱ མཛ྄ཛྷེ ཨོཏརནྟི. ཐེརོ ཏཾ དིསྭཱ སིཏཾ པཱཏྭཱཀཱསི. ལཀྑཎཏྠེརེན སིཏཀཱརཎཾ པུཊྛོ ‘‘ཨཀཱལོ, ཨཱཝུསོ, ཨིམསྶ པཉྷསྶ ཝེཡྻཱཀརཎཱཡ, སཏྠུ སནྟིཀེ མཾ པུཙྪེཡྻཱསཱི’’ཏི ¶ ཝཏྭཱ རཱཛགཧེ པིཎྜཱཡ ཙརིཏྭཱ སཏྠུ སནྟིཀཾ གཏཀཱལེ ལཀྑཎཏྠེརེན པུཊྛོ ཨཱཧ – ‘‘ཏཏྲཱཧཾ, ཨཱཝུསོ, ཨེཀཾ པེཏཾ ཨདྡསཾ, ཏསྶ ཨེཝརཱུཔོ ནཱམ ཨཏྟབྷཱཝོ, ཨཧཾ ཏཾ དིསྭཱ ‘ན ཝཏ མེ ཨེཝརཱུཔོ ཨཏྟབྷཱཝོ དིཊྛཔུབྦོ’ཏི སིཏཾ པཱཏྭཱཀཱསི’’ནྟི. སཏྠཱ ‘‘ཙཀྑུབྷཱུཏཱ ཝཏ, བྷིཀྑཝེ, སཱཝཀཱ ཝིཧརནྟཱི’’ཏིཨཱདཱིནི (པཱརཱ. ༢༢༨; སཾ. ནི. ༢.༢༠༢) ཝདནྟོ ཐེརསྶ ཀཐཾ པཏིཊྛཱཔེཏྭཱ ‘‘མཡཱཔི ཨེསོ, བྷིཀྑཝེ, པེཏོ བོདྷིམཎྜེཡེཝ དིཊྛོ, ‘ཡེ ཙ པན མེ ཝཙནཾ ན སདྡཧེཡྻུཾ, ཏེསཾ ཏཾ ཨཧིཏཱཡ ཨསྶཱ’ཏི ན ཀཐེསིཾ, ཨིདཱནི མོགྒལླཱནཾ སཀྑིཾ ལབྷིཏྭཱ ཀཐེམཱི’’ཏི ཝཏྭཱ བྷིཀྑཱུཧི ཏསྶ པུབྦཀམྨཾ པུཊྛོ བྱཱཀཱསི –

ཀསྶཔབུདྡྷཀཱལེ ཀིར སུམངྒལསེཊྛི ནཱམ སུཝཎྞིཊྛཀཱཧི བྷཱུམིཾ སནྠརིཏྭཱ ཝཱིསཏིཨུསབྷཊྛཱནེ ཏཏྟཀེནེཝ དྷནེན ཝིཧཱརཾ ཀཱརེཏྭཱ ཏཱཝཏྟཀེནེཝ ཝིཧཱརམཧཾ ཀཱརེསི. སོ ཨེཀདིཝསཾ པཱཏོཝ སཏྠུ སནྟིཀཾ གཙྪནྟོ ནགརདྭཱརེ ཨེཀིསྶཱ སཱལཱཡ ཀཱསཱཝཾ སསཱིསཾ པཱརུཔིཏྭཱ ཀལལམཀྑིཏེཧི པཱདེཧི ནིཔནྣཾ ཨེཀཾ ཙོརཾ དིསྭཱ ‘‘ཨཡཾ ཀལལམཀྑིཏཔཱདོ རཏྟིཾ ཝིཙརིཏྭཱ དིཝཱ ནིཔནྣམནུསྶོ བྷཝིསྶཏཱི’’ཏི ཨཱཧ. ཙོརོ མུཁཾ ཝིཝརིཏྭཱ སེཊྛིཾ དིསྭཱ ¶ ‘‘ཧོཏུ, ཛཱནིསྶཱམི ཏེ ཀཏྟབྦ’’ནྟི ཨཱགྷཱཏཾ བནྡྷིཏྭཱ སཏྟཀྑཏྟུཾ ཁེཏྟཾ ཛྷཱཔེསི, སཏྟཀྑཏྟུཾ ཝཛེ གུནྣཾ པཱདེ ཚིནྡི, སཏྟཀྑཏྟུཾ གེཧཾ ཛྷཱཔེསི, སོ ཨེཏྟཀེནཱཔི ཀོཔཾ ནིབྦཱཔེཏུཾ ཨསཀྐོནྟོ ཏསྶ ཙཱུལཱུ༹པཊྛཱཀེན སདྡྷིཾ མིཏྟསནྠཝཾ ཀཏྭཱ ‘‘ཀིཾ ¶ ¶ ཏེ སེཊྛིནོ པིཡ’’ནྟི པུཊྛོ ‘‘གནྡྷཀུཊིཏོ ཨཉྙཾ ཏསྶ པིཡཏརཾ ནཏྠཱི’’ཏི སུཏྭཱ ‘‘ཧོཏུ, གནྡྷཀུཊིཾ ཛྷཱཔེཏྭཱ ཀོཔཾ ནིབྦཱཔེསྶཱམཱི’’ཏི སཏྠརི པིཎྜཱཡ པཝིཊྛེ པཱནཱིཡཔརིབྷོཛནཱིཡགྷཊེ བྷིནྡིཏྭཱ གནྡྷཀུཊིཡཾ ཨགྒིཾ ཨདཱསི. སེཊྛི ‘‘གནྡྷཀུཊི ཀིར ཛྷཱཡཏཱི’’ཏི སུཏྭཱ ཨཱགཙྪནྟོ ཛྷཱམཀཱལེ ཨཱགནྟྭཱ གནྡྷཀུཊིཾ ཛྷཱམཾ ཨོལོཀེནྟོ ཝཱལགྒམཏྟམྤི དོམནསྶཾ ཨཀཏྭཱ ཝཱམབཱཧུཾ སམཉྫིཏྭཱ དཀྑིཎེན ཧཏྠེན མཧཱཨཔྥོཊནཾ ཨཔྥོཊེསི. ཨཐ ནཾ སམཱིཔེ ཋིཏཱ པུཙྪིཾསུ – ‘‘ཀསྨཱ, སཱམི, ཨེཏྟཀཾ དྷནཾ ཝིསྶཛྫེཏྭཱ ཀཏགནྡྷཀུཊིཡཱ ཛྷཱམཀཱལེ ཨཔྥོཊེསཱི’’ཏི? སོ ཨཱཧ – ‘‘ཨེཏྟཀཾ མེ, ཏཱཏཱ, ཨགྒིཨཱདཱིཧི ཨསཱདྷཱརཎེ བུདྡྷསྶ སཱསནེ དྷནཾ ནིདཧིཏུཾ ལདྡྷཾ, ‘པུནཔི ཨེཏྟཀཾ དྷནཾ ཝིསྶཛྫེཏྭཱ སཏྠུ གནྡྷཀུཊིཾ ཀཱཏུཾ ལབྷིསྶཱམཱི’ཏི ཏུཊྛམཱནསོ ཨཔྥོཊེསི’’ནྟི. སོ པུན ཏཏྟཀཾ དྷནཾ ཝིསྶཛྫེཏྭཱ གནྡྷཀུཊིཾ ཀཱརེཏྭཱ ཝཱིསཏིསཧསྶབྷིཀྑུཔརིཝཱརསྶ སཏྠུནོ དཱནཾ ཨདཱསི. ཏཾ དིསྭཱ ཙོརོ ཙིནྟེསི – ‘‘ཨཧཾ ཨིམཾ ཨམཱརེཏྭཱ མངྐུཀཱཏུཾ ན སཀྑིསྶཱམི, ཧོཏུ, མཱརེསྶཱམི ན’’ནྟི ནིཝཱསནནྟརེ ཚུརིཀཾ བནྡྷིཏྭཱ སཏྟཱཧཾ ཝིཧཱརེ ཝིཙརནྟོཔི ཨོཀཱསཾ ན ལབྷི. མཧཱསེཊྛིཔི སཏྟ དིཝསཱནི བུདྡྷཔྤམུཁསྶ བྷིཀྑུསངྒྷསྶ དཱནཾ དཏྭཱ སཏྠཱརཾ ཝནྡིཏྭཱ ཨཱཧ – ‘‘བྷནྟེ, མམ ཨེཀེན པུརིསེན སཏྟཀྑཏྟུཾ ¶ ཁེཏྟཾ ཛྷཱཔིཏཾ, སཏྟཀྑཏྟུཾ ཝཛེ གུནྣཾ པཱདཱ ཚིནྣཱ, སཏྟཀྑཏྟུཾ གེཧཾ ཛྷཱཔིཏཾ, ཨིདཱནི གནྡྷཀུཊིཔི ཏེནེཝ ཛྷཱཔིཏཱ བྷཝིསྶཏི, ཨཧཾ ཨིམསྨིཾ དཱནེ པཋམཾ པཏྟིཾ ཏསྶ དམྨཱི’’ཏི.

ཏཾ སུཏྭཱ ཙོརོ ‘‘བྷཱརིཡཾ ཝཏ མེ ཀམྨཾ ཀཏཾ, ཨེཝཾ ཨཔརཱདྷཀཱརཀེ མཡི ཨིམསྶ ཀོཔམཏྟམྤི ནཏྠི, ཨིམསྨིམྤི དཱནེ མཡ྄ཧམེཝ པཋམཾ པཏྟིཾ དེཏི, ཨཧཾ ཨིམསྨིཾ དུབྦྷཱམི, ཨེཝརཱུཔཾ མེ པུརིསཾ ཨཁམཱཔེནྟསྶ དེཝདཎྜོཔི མེ མཏྠཀེ པཏེཡྻཱ’’ཏི གནྟྭཱ སེཊྛིསྶ པཱདམཱུལེ ནིཔཛྫིཏྭཱ ‘‘ཁམཱཧི མེ, སཱམཱི’’ཏི ཝཏྭཱ ‘‘ཀིཾ ཨིད’’ནྟི ཝུཏྟེ, ‘‘སཱམི, ཨེཝཾ ཨཡུཏྟཀཾ ཀམྨཾ མཡཱ ཀཏཾ, ཏསྶ མེ ཁམཱཧཱི’’ཏི ཨཱཧ. ཨཐ ནཾ སེཊྛི ‘‘ཏཡཱ མེ ཨིདཉྩིདཉྩ ཀཏ’’ནྟི སབྦཾ པུཙྪིཏྭཱ ‘‘ཨཱམ, མཡཱ ཀཏ’’ནྟི ཝུཏྟེ, ‘‘ཏྭཾ མཡཱ ན དིཊྛཔུབྦོ, ཀསྨཱ མེ ཀུཛ྄ཛྷིཏྭཱ ཨེཝམཀཱསཱི’’ཏི པུཙྪི. སོ ཨེཀདིཝསཾ ནགརཱ ནིཀྑནྟེན ཏེན ཝུཏྟཝཙནཾ སཱརེཏྭཱ ‘‘ཨིམིནཱ མེ ཀཱརཎེན ཀོཔོ ཨུཔྤཱདིཏོ’’ཏི ཨཱཧ. སེཊྛི ཨཏྟནཱ ཝུཏྟཾ སརིཏྭཱ ‘‘ཨཱམ, ཏཱཏ, ཝུཏྟཾ མཡཱ ¶ , ཏཾ མེ ཁམཱཧཱི’’ཏི ཙོརཾ ཁམཱཔེཏྭཱ ‘‘ཨུཊྛེཧི, ཏཱཏ, ཁམཱམི ཏེ, གཙྪ, ཏཱཏཱ’’ཏི ཨཱཧ. སཙེ མེ, སཱམི, ཁམསི, སཔུཏྟདཱརཾ མཾ གེཧེ དཱསཾ ཀརོཧཱིཏི. ཏཱཏ, ཏྭཾ མཡཱ ཨེཏྟཀེ ཀཐིཏེ ཨེཝརཱུཔཾ ཚེདནཾ ཨཀཱསི, གེཧེ ¶ ཝསནྟེན པན ¶ སདྡྷིཾ ན སཀྐཱ ཀིཉྩི ཀཐེཏུཾ, ན མེ ཏཡཱ གེཧེ ཝསནྟེན ཀིཙྩཾ ཨཏྠི, ཁམཱམི ཏེ, གཙྪ, ཏཱཏཱཏི. ཙོརོ ཏཾ ཀམྨཾ ཀཏྭཱ ཨཱཡུཔརིཡོསཱནེ ཨཝཱིཙིམྷི ནིབྦཏྟོ དཱིགྷརཏྟཾ ཏཏྠ པཙྩིཏྭཱ ཝིཔཱཀཱཝསེསེན ཨིདཱནི གིཛ྄ཛྷཀཱུཊེ པབྦཏེ པཙྩཏཱིཏི.

ཨེཝཾ སཏྠཱ ཏསྶ པུབྦཀམྨཾ ཀཐེཏྭཱ, ‘‘བྷིཀྑཝེ, བཱལཱ ནཱམ པཱཔཱནི ཀམྨཱནི ཀརོནྟཱ ན བུཛ྄ཛྷནྟི, པཙྪཱ པན ཨཏྟནཱ ཀཏཀམྨེཧི ཌཡ྄ཧམཱནཱ ཨཏྟནཱཝ ཨཏྟནོ དཱཝགྒིསདིསཱཝ ཧོནྟཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཨཐ པཱཔཱནི ཀམྨཱནི, ཀརཾ བཱལོ ན བུཛ྄ཛྷཏི;

སེཧི ཀམྨེཧི དུམྨེདྷོ, ཨགྒིཌཌྜྷོཝ ཏཔྤཏཱི’’ཏི.

ཏཏྠ ཨཐ པཱཔཱནཱིཏི ན ཀེཝལཾ བཱལོ ཀོདྷཝསེན པཱཔཱནི ཀརོཏི, ཀརོནྟོཔི པན ན བུཛ྄ཛྷཏཱིཏི ཨཏྠོ. པཱཔཾ ཀརོནྟོ ཙ ‘‘པཱཔཾ ཀརོམཱི’’ཏི ཨབུཛ྄ཛྷནཀོ ནཱམ ནཏྠི. ‘‘ཨིམསྶ ཀམྨསྶ ཨེཝརཱུཔོ ནཱམ ཝིཔཱཀོ’’ཏི ཨཛཱནནཏཱཡ ‘‘ན བུཛ྄ཛྷཏཱི’’ཏི ཝུཏྟཾ. སེཧཱིཏི སོ ཏེཧི ཨཏྟནོ སནྟཀེཧི ཀམྨེཧི དུམྨེདྷོ ནིཔྤཉྙོ པུགྒལོ ནིརཡེ ནིབྦཏྟིཏྭཱ ཨགྒིཌཌྜྷོཝ ཏཔྤཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡོ ¶ དཎྜེནཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ མཧཱམོགྒལླཱནཏྠེརཾ ཨཱརབྦྷ ཀཐེསི.

ཨེཀསྨིཉྷི སམཡེ ཏིཏྠིཡཱ སནྣིཔཏིཏྭཱ མནྟེསུཾ – ‘‘ཛཱནཱཐཱཝུསོ, ‘ཀེན ཀཱརཎེན སམཎསྶ གོཏམསྶ ལཱབྷསཀྐཱརོ མཧཱ ཧུཏྭཱ ནིབྦཏྟོ’ཏི ¶ . མཡཾ ན ཛཱནཱམ, ཏུམྷེ པན ཛཱནཱཐཱཏི. ཨཱམ, ཛཱནཱམ, མཧཱམོགྒལླཱནཾ ནཱམ ཨེཀཾ ནིསྶཱཡ ཨུཔྤནྣོ. སོ ཧི དེཝལོཀཾ གནྟྭཱ དེཝཏཱཧི ཀཏཀམྨཾ པུཙྪིཏྭཱ ཨཱགནྟྭཱ མནུསྶཱནཾ ཀཐེཏི ‘ཨིདཾ ནཱམ ཀཏྭཱ ཨེཝརཱུཔཾ སམྤཏྟིཾ ¶ ལབྷནྟཱི’ཏི. ནིརཡེ ནིབྦཏྟཱནམྤི ཀམྨཾ པུཙྪིཏྭཱ ཨཱགནྟྭཱ མནུསྶཱནཾ ཀཐེཏི ‘ཨིདཾ ནཱམ ཀཏྭཱ ཨེཝརཱུཔཾ དུཀྑཾ ཨནུབྷཝནྟཱི’ཏི. མནུསྶཱ ཏསྶ ཀཐཾ སུཏྭཱ མཧནྟཾ ལཱབྷསཀྐཱརཾ ཨབྷིཧརནྟི, སཙེ ཏཾ མཱརེཏུཾ སཀྑིསྶཱམ, སོ ལཱབྷསཀྐཱརོ ཨམྷཱཀཾ ནིབྦཏྟིསྶཏཱི’’ཏི. ཏེ ‘‘ཨཏྠེཀོ ཨུཔཱཡོ’’ཏི སབྦེ ཨེཀཙྪནྡཱ ཧུཏྭཱ ‘‘ཡཾཀིཉྩི ཀཏྭཱ ཏཾ མཱརཱཔེསྶཱམཱ’’ཏི ཨཏྟནོ ཨུཔཊྛཱཀེ སམཱདཔེཏྭཱ ཀཧཱཔཎསཧསྶཾ ལབྷིཏྭཱ པུརིསགྷཱཏཀམྨཾ ཀཏྭཱ ཙརནྟེ ཙོརེ པཀྐོསཱཔེཏྭཱ ‘‘མཧཱམོགྒལླཱནཏྠེརོ ནཱམ ཀཱལ༹སིལཱཡཾ ཝསཏི, ཏཏྠ གནྟྭཱ ཏཾ མཱརེཐཱ’’ཏི ཏེསཾ ཀཧཱཔཎེ ཨདཾསུ. ཙོརཱ དྷནལོབྷེན སམྤཊིཙྪིཏྭཱ ‘‘ཐེརཾ མཱརེསྶཱམཱ’’ཏི གནྟྭཱ ཏསྶ ཝསནཊྛཱནཾ པརིཝཱརེསུཾ. ཐེརོ ཏེཧི པརིཀྑིཏྟབྷཱཝཾ ཉཏྭཱ ཀུཉྩིཀཙྪིདྡེན ནིཀྑམིཏྭཱ པཀྐཱམི. ཏེ ཙོརཱ ཏཾ དིཝསཾ ཐེརཾ ཨདིསྭཱ པུནེཀདིཝསཾ གནྟྭཱ པརིཀྑིཔིཾསུ. ཐེརོ ¶ ཉཏྭཱ ཀཎྞིཀཱམཎྜལཾ བྷིནྡིཏྭཱ ཨཱཀཱསཾ པཀྑནྡི. ཨེཝཾ ཏེ པཋམམཱསེཔི མཛ྄ཛྷིམམཱསེཔི ཐེརཾ གཧེཏུཾ ནཱསཀྑིཾསུ. པཙྪིམམཱསེ པན སམྤཏྟེ ཐེརོ ཨཏྟནཱ ཀཏཀམྨསྶ ཨཱཀཌྜྷནབྷཱཝཾ ཉཏྭཱ ན ཨཔགཙྪི. ཙོརཱ གནྟྭཱ ཐེརཾ གཧེཏྭཱ ཏཎྜུལཀཎམཏྟཱནིསྶ ཨཊྛཱིནི ཀརོནྟཱ བྷིནྡིཾསུ. ཨཐ ནཾ ‘‘མཏོ’’ཏི སཉྙཱཡ ཨེཀསྨིཾ གུམྦཔིཊྛེ ཁིཔིཏྭཱ པཀྐམིཾསུ.

ཐེརོ ‘‘སཏྠཱརཾ པསྶིཏྭཱཝ པརིནིབྦཱཡིསྶཱམཱི’’ཏི ཨཏྟབྷཱཝཾ ཛྷཱནཝེཋནེན ཝེཋེཏྭཱ ཐིརཾ ཀཏྭཱ ཨཱཀཱསེན སཏྠུ སནྟིཀཾ གནྟྭཱ སཏྠཱརཾ ཝནྡིཏྭཱ, ‘‘བྷནྟེ, པརིནིབྦཱཡིསྶཱམཱི’’ཏི ཨཱཧ. ‘‘པརིནིབྦཱཡིསྶསི, མོགྒལླཱནཱ’’ཏི? ‘‘ཨཱམ, བྷནྟེ’’ཏི. ‘‘ཀཏྠ གནྟྭཱ’’ཏི? ‘‘ཀཱལ༹སིལཱཔདེསཾ, བྷནྟེ’’ཏི. ཏེན ཧི, མོགྒལླཱན, མཡ྄ཧཾ དྷམྨཾ ཀཐེཏྭཱ ཡཱཧི. ཏཱདིསསྶ ཧི མེ སཱཝཀསྶ ཨིདཱནི དསྶནཾ ནཏྠཱིཏི. སོ ‘‘ཨེཝཾ ཀརིསྶཱམི, བྷནྟེ’’ཏི སཏྠཱརཾ ཝནྡིཏྭཱ ཨཱཀཱསཾ ཨུཔྤཏིཏྭཱ པརིནིབྦཱནདིཝསེ སཱརིཔུཏྟཏྠེརོ ཝིཡ ནཱནཔྤཀཱརཱ ཨིདྡྷིཡོ ཀཏྭཱ དྷམྨཾ ཀཐེཏྭཱ སཏྠཱརཾ ཝནྡིཏྭཱ ¶ ཀཱལ༹སིལཱཊཝིཾ གནྟྭཱ པརིནིབྦཱཡི. ‘‘ཐེརཾ ཀིར ཙོརཱ མཱརེསུ’’ནྟི ཨཡམྤི ཀཐཱ སཀལཛམྦུདཱིཔེ པཏྠརི. རཱཛཱ ཨཛཱཏསཏྟུ ཙོརེ པརིཡེསནཏྠཱཡ ཙརཔུརིསེ པཡོཛེསི. ཏེསུཔི ཙོརེསུ སུརཱཔཱནེ སུརཾ པིཝནྟེསུ ཨེཀོ ཨེཀསྶ པིཊྛིཾ པཧརིཏྭཱ པཱཏེསི. སོ ཏཾ སནྟེཛྫེཏྭཱ ‘‘ཨམྦྷོ དུབྦིནཱིཏ, ཏྭཾ ཀསྨཱ མེ པིཊྛིཾ པཱཏེསཱི’’ཏི ¶ ཨཱཧ. ཀིཾ པན ཧརེ དུཊྛཙོར, ཏཡཱ མཧཱམོགྒལླཱནཏྠེརོ པཋམཾ པཧཊོཏི? ཀིཾ པན མཡཱ པཧཊབྷཱཝཾ ཏྭཾ ན ཛཱནཱསཱིཏི? ཨིཏི ནེསཾ ‘‘མཡཱ པཧཊོ, མཡཱ པཧཊོ’’ཏི ཝདནྟཱནཾ ཝཙནཾ སུཏྭཱ ཏེ ཙརཔུརིསཱ ཏེ སབྦེ ཙོརེ གཧེཏྭཱ རཉྙོ ཨཱརོཙེསུཾ. རཱཛཱ ཙོརེ པཀྐོསཱཔེཏྭཱ པུཙྪི – ‘‘ཏུམྷེཧི ཐེརོ མཱརིཏོ’’ཏི? ‘‘ཨཱམ, དེཝཱ’’ཏི. ‘‘ཀེན ཏུམྷེ ཨུཡྻོཛིཏཱ’’ཏི? ‘‘ནགྒསམཎཀེཧི, དེཝཱ’’ཏི. རཱཛཱ པཉྩསཏེ ནགྒསམཎཀེ གཱཧཱཔེཏྭཱ པཉྩསཏེཧི ཙོརེཧི སདྡྷིཾ རཱཛངྒཎེ ནཱབྷིཔྤམཱཎེསུ ཨཱཝཱཊེསུ ནིཁཎཱཔེཏྭཱ པལཱལེཧི པཊིཙྪཱདཱཔེཏྭཱ ཨགྒིཾ དཱཔེསི ¶ . ཨཐ ནེསཾ ཛྷཱམབྷཱཝཾ ཉཏྭཱ ཨཡནངྒལེཧི ཀསཱཔེཏྭཱ སབྦེ ཁཎྜཱཁཎྜིཀཾ ཀཱརཱཔེསི.

བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ – ‘‘མཧཱམོགྒལླཱནཏྠེརོ ཨཏྟནོ ཨནནུརཱུཔམེཝ མརཎཾ པཏྟོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, མོགྒལླཱནོ ཨིམསྶེཝ ཨཏྟབྷཱཝསྶ ཨནནུརཱུཔཾ མརཎཾ པཏྟོ, པུབྦེ པན ཏེན ཀཏསྶ ཀམྨསྶ ཨནུརཱུཔམེཝ མརཎཾ པཏྟོ’’ཏི ཝཏྭཱ ‘‘ཀིཾ པནསྶ, བྷནྟེ, པུབྦཀམྨ’’ནྟི པུཊྛོ ཝིཏྠཱརེཏྭཱ ཀཐེསི –

ཨཏཱིཏེ ¶ ཀིར བཱརཱཎསིཝཱསཱི ཨེཀོ ཀུལཔུཏྟོ སཡམེཝ ཀོཊྚནཔཙནཱདཱིནི ཀམྨཱནི ཀརོནྟོ མཱཏཱཔིཏརོ པཊིཛགྒི. ཨཐསྶ མཱཏཱཔིཏརོ ནཾ, ‘‘ཏཱཏ, ཏྭཾ ཨེཀཀོཝ གེཧེ ཙ ཨརཉྙེ ཙ ཀམྨཾ ཀརོནྟོ ཀིལམསི, ཨེཀཾ ཏེ ཀུམཱརིཀཾ ཨཱནེསྶཱམཱ’’ཏི ཝཏྭཱ, ‘‘ཨམྨཏཱཏཱ, ན མཡ྄ཧཾ ཨེཝརཱུཔཱཡཏྠོ, ཨཧཾ ཡཱཝ ཏུམྷེ ཛཱིཝཐ, ཏཱཝ ཝོ སཧཏྠཱ ཨུཔཊྛཧིསྶཱམཱི’’ཏི ཏེན པཊིཀྑིཏྟཱ པུནཔྤུནཾ ཏཾ ཡཱཙིཏྭཱ ཀུམཱརིཀཾ ཨཱནཡིཾསུ. སཱ ཀཏིཔཱཧམེཝ ཏེ ཨུཔཊྛཧིཏྭཱ པཙྪཱ ཏེསཾ དསྶནམྤི ཨནིཙྪནྟཱི ‘‘ན སཀྐཱ ཏཝ མཱཏཱཔིཏཱུཧི སདྡྷིཾ ཨེཀཊྛཱནེ ཝསིཏུ’’ནྟི ཨུཛ྄ཛྷཱཡིཏྭཱ ཏསྨིཾ ¶ ཨཏྟནོ ཀཐཾ ཨགྒཎྷནྟེ ཏསྶ བཧིགཏཀཱལེ མཀཙིཝཱཀཁཎྜཱནི ཙ ཡཱགུཕེཎཉྩ གཧེཏྭཱ ཏཏྠ ཏཏྠ ཨཱཀིརིཏྭཱ ཏེནཱགནྟྭཱ ‘‘ཀིཾ ཨིད’’ནྟི པུཊྛཱ ཨཱཧ – ‘‘ཨིམེསཾ ཨནྡྷམཧལླཀཱནཾ ཨེཏཾ ཀམྨཾ, སབྦཾ གེཧཾ ཀིལིཊྛཾ ཀརོནྟཱ ཝིཙརནྟི, ན སཀྐཱ ཨེཏེཧི སདྡྷིཾ ཨེཀཊྛཱནེ ཝསིཏུ’’ནྟི. ཨེཝཾ ཏཱཡ ནཾ པུནཔྤུནཾ ཀཐཡམཱནཱཡ ཨེཝརཱུཔོཔི པཱུརིཏཔཱརམཱི སཏྟོ མཱཏཱཔིཏཱུཧི སདྡྷིཾ བྷིཛྫི. སོ ‘‘ཧོཏུ, ཛཱནིསྶཱམི ནེསཾ ཀཏྟབྦ’’ནྟི ཏེ བྷོཛེཏྭཱ, ‘‘ཨམྨཏཱཏཱ, ཨསུཀཊྛཱནེ ནཱམ ཏུམྷཱཀཾ ¶ ཉཱཏཀཱ ཨཱགམནཾ པཙྩཱསཱིསནྟི, ཏཏྠ གམིསྶཱམཱ’’ཏི ཏེ ཡཱནཀཾ ཨཱརོཔེཏྭཱ ཨཱདཱཡ གཙྪནྟོ ཨཊཝིམཛ྄ཛྷཾ པཏྟཀཱལེ, ‘‘ཏཱཏ, རསྨིཡོ གཎྷཱཐ, གཱཝོ པཏོདསཉྙཱཡ གམིསྶནྟི, ཨིམསྨིཾ ཋཱནེ ཙོརཱ ཝསནྟི, ཨཧཾ ཨོཏརཱམཱི’’ཏི པིཏུ ཧཏྠེ རསྨིཡོ དཏྭཱ ཨོཏརིཏྭཱ གཙྪནྟོ སདྡཾ པརིཝཏྟེཏྭཱ ཙོརཱནཾ ཨུཊྛིཏསདྡམཀཱསི. མཱཏཱཔིཏརོ སདྡཾ སུཏྭཱ ‘‘ཙོརཱ ཨུཊྛིཏཱ’’ཏི སཉྙཱཡ, ‘‘ཏཱཏ, མཡཾ མཧལླཀཱ, ཏྭཾ ཨཏྟཱནམེཝ རཀྑཱཧཱི’’ཏི ཨཱཧཾསུ. སོ མཱཏཱཔིཏརོ ཏཐཱཝིརཝནྟེཔི ཙོརསདྡཾ ཀརོནྟོ ཀོཊྚེཏྭཱ མཱརེཏྭཱ ཨཊཝིཡཾ ཁིཔིཏྭཱ པཙྩཱགམི.

སཏྠཱ ཨིདཾ ཏསྶ པུབྦཀམྨཾ ཀཐེཏྭཱ, ‘‘བྷིཀྑཝེ, མོགྒལླཱནོ ཨེཏྟཀཾ ཀམྨཾ ཀཏྭཱ ཨནེཀཝསྶསཏསཧསྶཱནི ¶ ནིརཡེ པཙྩིཏྭཱ ཝིཔཱཀཱཝསེསེན ཨཏྟབྷཱཝསཏེ ཨེཝམེཝ ཀོཊྚེཏྭཱ སཾཙུཎྞིཏོ མརཎཾ པཏྟོ. ཨེཝཾ མོགྒལླཱནེན ཨཏྟནོ ཀམྨཱནུརཱུཔམེཝ མརཎཾ ལདྡྷཾ, པཉྩཧི ཙོརསཏེཧི སདྡྷིཾ ལབྷིཾསུ. ཨཔྤདུཊྛེསུ ཧི པདུསྶནྟོ དསཧི ཀཱརཎེཧི ཨནཡབྱསནཾ པཱཔུཎཱཏིཡེཝཱ’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ཡོ ¶ དཎྜེན ཨདཎྜེསུ, ཨཔྤདུཊྛེསུ དུསྶཏི;

དསནྣམཉྙཏརཾ ཋཱནཾ, ཁིཔྤམེཝ ནིགཙྪཏི.

‘‘ཝེདནཾ ཕརུསཾ ཛཱནིཾ, སརཱིརསྶ ཝ བྷེདནཾ;

གརུཀཾ ཝཱཔི ཨཱབཱདྷཾ, ཙིཏྟཀྑེཔཾ ཝ པཱཔུཎེ.

‘‘རཱཛཏོ ¶ ཝཱ ཨུཔསགྒཾ, ཨབྦྷཀྑཱནཾ ཝ དཱརུཎཾ;

པརིཀྑཡཾ ཝ ཉཱཏཱིནཾ, བྷོགཱནཾ ཝ པབྷངྒུརཾ.

‘‘ཨཐ ཝཱསྶ ཨགཱརཱནི, ཨགྒི ཌཧཏི པཱཝཀོ;

ཀཱཡསྶ བྷེདཱ དུཔྤཉྙོ, ནིརཡཾ སོཔཔཛྫཏཱི’’ཏི.

ཏཏྠ ཨདཎྜེསཱུཏི ཀཱཡདཎྜཱདིརཧིཏེསུ ཁཱིཎཱསཝེསུ. ཨཔྤདུཊྛེསཱུཏི པརེསུ ཝཱ ཨཏྟནི ཝཱ ནིརཔརཱདྷེསུ. དསནྣམཉྙཏརཾ ཋཱནནྟི དསསུ དུཀྑཀཱརཎེསུ ཨཉྙཏརཾ ཀཱརཎཾ. ཝེདནནྟི སཱིསརོགཱདིབྷེདཾ ཕརུསཾ ཝེདནཾ. ཛཱནིནྟི ཀིཙྪཱདྷིགཏསྶ དྷནསྶ ཛཱནིཾ. བྷེདནནྟི ཧཏྠཙྪེདཱདིཀཾ སརཱིརབྷེདནཾ. གརུཀནྟི པཀྑཧཏཨེཀཙཀྑུཀཔཱིཋསཔྤིཀུཎཱིབྷཱཝཀུཊྛརོགཱདིབྷེདཾ གརུཀཱབཱདྷཾ ཝཱ. ཙིཏྟཀྑེཔནྟི ཨུམྨཱདཾ. ཨུཔསགྒནྟི ཡསཝིལོཔསེནཱཔཏིཊྛཱནཱདིཨཙྪིནྡནཱདིཀཾ རཱཛཏོ ཨུཔསགྒཾ ཝཱ. ཨབྦྷཀྑཱནནྟི ¶ ཨདིཊྛཨསུཏཨཙིནྟིཏཔུབྦཾ ‘‘ཨིདཾ སནྡྷིཙྪེདཱདིཀམྨཾ, ཨིདཾ ཝཱ རཱཛཱཔརཱདྷིཏཀམྨཾ ཏཡཱ ཀཏ’’ནྟི ཨེཝརཱུཔཾ དཱརུཎཾ ཨབྦྷཀྑཱནཾ ཝཱ. པརིཀྑཡཾ ཝ ཉཱཏཱིནནྟི ཨཏྟནོ ཨཝསྶཡོ བྷཝིཏུཾ སམཏྠཱནཾ ཉཱཏཱིནཾ པརིཀྑཡཾ ཝཱ. པབྷངྒུརནྟི པབྷངྒུབྷཱཝཾ པཱུཏིབྷཱཝཾ. ཡཾ ཧིསྶ གེཧེ དྷཉྙཾ, ཏཾ པཱུཏིབྷཱཝཾ ཨཱཔཛྫཏི, སུཝཎྞཾ ཨངྒཱརབྷཱཝཾ, མུཏྟཱ ཀཔྤཱསཊྛིབྷཱཝཾ, ཀཧཱཔཎཾ ཀཔཱལཁཎྜཱདིབྷཱཝཾ, དྭིཔདཙཏུཔྤདཱ ཀཱཎཀུཎཱདིབྷཱཝནྟི ཨཏྠོ. ཨགྒི ཌཧཏཱིཏི ཨེཀསཾཝཙྪརེ དྭཏྟིཀྑཏྟུཾ ཨཉྙསྨིཾ ཌཱཧཀེ ཨཝིཛྫམཱནེཔི ཨསནིཨགྒི ཝཱ པཏིཏྭཱ ཌཧཏི, ཨཏྟནོཝ དྷམྨཏཱཡ ཨུཊྛིཏོ པཱཝཀོ ཝཱ ཌཧཏིཡེཝ. ནིརཡནྟི དིཊྛེཝ དྷམྨེ ཨིམེསཾ ¶ དསནྣཾ ཋཱནཱནཾ ཨཉྙཏརཾ པཏྭཱཔི ཨེཀཾསེན སམྤརཱཡེ པཏྟབྦཾ དསྶེཏུཾ ‘‘ནིརཡཾ སོཔཔཛྫཏཱི’’ཏི ཝུཏྟཾ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ན ¶ ནགྒཙརིཡཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ བཧུབྷཎྜིཀཾ བྷིཀྑུཾ ཨཱརབྦྷ ཀཐེསི.

སཱཝཏྠིཝཱསཱི ¶ ཀིརེཀོ ཀུཊུམྦིཀོ བྷརིཡཱཡ ཀཱལཀཏཱཡ པབྦཛི. སོ པབྦཛནྟོ ཨཏྟནོ པརིཝེཎཉྩ ཨགྒིསཱལཉྩ བྷཎྜགབྦྷཉྩ ཀཱརེཏྭཱ སབྦམྤི བྷཎྜགབྦྷཾ སཔྤིམདྷུཏེལཱདཱིཧི པཱུརེཏྭཱ པབྦཛི, པབྦཛིཏྭཱ ཙ པན ཨཏྟནོ དཱསེ པཀྐོསཱཔེཏྭཱ ཡཐཱརུཙིཀཾ ཨཱཧཱརཾ པཙཱཔེཏྭཱ བྷུཉྫཏི. བཧུབྷཎྜོ ཙ བཧུཔརིཀྑཱརོ ཙ ཨཧོསི. རཏྟིཾ ཨཉྙཾ ནིཝཱསནཔཱརུཔནཾ ཧོཏི, དིཝཱ ཨཉྙཾ ནིཝཱསནཔཱརུཔནཾ ཧོཏི, དིཝཱ ཨཉྙཾ ཝིཧཱརཔཙྩནྟེ ཝསཏི. ཏསྶེཀདིཝསཾ ཙཱིཝརཔཙྩཏྠརཎཱནི སུཀྑཱཔེནྟསྶ སེནཱསནཙཱརིཀཾ ཨཱཧིཎྜནྟཱ བྷིཀྑཱུ པསྶིཏྭཱ ‘‘ཀསྶིམཱནི, ཨཱཝུསོ’’ཏི པུཙྪིཏྭཱ ‘‘མཡ྄ཧ’’ནྟི ཝུཏྟེ, ‘‘ཨཱཝུསོ, བྷགཝཏཱ ཏིཙཱིཝརཱནི ཨནུཉྙཱཏཱནི, ཏྭཉྩ པན ཨེཝཾ ཨཔྤིཙྪསྶ བུདྡྷསྶ སཱསནེ པབྦཛིཏྭཱ ཨེཝཾ བཧུཔརིཀྑཱརོ ཛཱཏོ’’ཏི ཏཾ སཏྠུ སནྟིཀཾ ནེཏྭཱ, ‘‘བྷནྟེ ¶ , ཨཡཾ བྷིཀྑུ ཨཏིབཧུབྷཎྜོ’’ཏི ཨཱརོཙེསུཾ. སཏྠཱ ‘‘སཙྩཾ ཀིར ཏཾ བྷིཀྑཱུ’’ཏི པུཙྪིཏྭཱ ‘‘སཙྩཾ, བྷནྟེ’’ཏི ཝུཏྟེ ཨཱཧ – ‘‘ཀསྨཱ པན ཏྭཾ, བྷིཀྑུ, མཡཱ ཨཔྤིཙྪཏཱཡ དྷམྨེ དེསིཏེ ཨེཝཾ བཧུབྷཎྜོ ཛཱཏོ’’ཏི. སོ ཏཱཝཏྟཀེནེཝ ཀུཔིཏོ ‘‘ཨིམིནཱ དཱནི ནཱིཧཱརེན ཙརིསྶཱམཱི’’ཏི པཱརུཔནཾ ཚཌྜེཏྭཱ པརིསམཛ྄ཛྷེ ཨེཀཙཱིཝརོ ཨཊྛཱསི. ཨཐ ནཾ སཏྠཱ ཨུཔཏྠམྦྷཡམཱནོ ནནུ ཏྭཾ བྷིཀྑུ པུབྦེ ཧིརོཏྟཔྤགཝེསཀོ དཀརཀྑསཀཱལེཔི ཧིརོཏྟཔྤཾ གཝེསམཱནོ དྭཱདས ཝསྶཱནི ཝིཧཱསི, ཀསྨཱ ཨིདཱནི ཨེཝཾ གརུཀེ བུདྡྷསཱསནེ པབྦཛིཏྭཱ ཙཏུཔརིསམཛ྄ཛྷེ པཱརུཔནཾ ཚཌྜེཏྭཱ ཧིརོཏྟཔྤཾ པཧཱཡ ཋིཏོསཱིཏི. སོ སཏྠུ ཝཙནཾ སུཏྭཱ ཧིརོཏྟཔྤཾ པཙྩུཔཊྛཱཔེཏྭཱ ཏཾ ཙཱིཝརཾ པཱརུཔིཏྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདི. བྷིཀྑཱུ ཏསྶ ཨཏྠསྶ ཨཱཝིབྷཱཝཏྠཾ བྷགཝནྟཾ ཡཱཙིཾསུ. བྷགཝཱ ཨཏཱིཏཾ ཨཱཧརིཏྭཱ ཀཐེསི –

ཨཏཱིཏེ ¶ ཀིར བཱརཱཎསིརཉྙོ ཨགྒམཧེསིཡཱ ཀུཙྪིསྨིཾ བོདྷིསཏྟོ པཊིསནྡྷིཾ གཎྷི. ཏསྶ ནཱམགྒཧཎདིཝསེ མཧིཾསཀུམཱརོཏི ནཱམཾ ཀརིཾསུ. ཏསྶ ཀནིཊྛབྷཱཏཱ ཙནྡཀུམཱརོ ནཱམ ཨཧོསི. ཏེསཾ མཱཏརི ཀཱལཀཏཱཡ རཱཛཱ ཨཉྙཾ ཨགྒམཧེསིཊྛཱནེ ཋཔེསི. སཱཔི པུཏྟཾ ཝིཛཱཡི, སཱུརིཡཀུམཱརོཏིསྶ ནཱམཾ ཀརིཾསུ. ཏཾ དིསྭཱ རཱཛཱ ཏུཊྛོ ‘‘པུཏྟསྶ ཏེ ཝརཾ དམྨཱི’’ཏི ཨཱཧ. སཱཔི ཁོ, ‘‘དེཝ, ཨིཙྪིཏཀཱལེ གཎྷིསྶཱམཱི’’ཏི ཝཏྭཱ པུཏྟསྶ ཝཡཔྤཏྟཀཱལེ ¶ རཱཛཱནཾ ཨཱཧ – ‘‘དེཝེན མཡ྄ཧཾ པུཏྟསྶ ཛཱཏཀཱལེ ཝརོ དིནྣོ, ཨིདཱནི མེ པུཏྟསྶ རཛྫཾ དེཧཱི’’ཏི ¶ . རཱཛཱ ‘‘མམ དྭེ པུཏྟཱ ཨགྒིཀྑནྡྷཱ ཝིཡ ཛལནྟཱ ཝིཙརནྟི, ན སཀྐཱ ཏསྶ རཛྫཾ དཱཏུ’’ནྟི པཊིཀྑིཔིཏྭཱཔི ཏཾ པུནཔྤུནཾ ཡཱཙམཱནམེཝ དིསྭཱ ‘‘ཨཡཾ མེ པུཏྟཱནཾ ཨནཏྠམྤི ཀརེཡྻཱ’’ཏི པུཏྟེ པཀྐོསཱཔེཏྭཱ, ‘‘ཏཱཏཱ, ཨཧཾ སཱུརིཡཀུམཱརསྶ ཛཱཏཀཱལེ ཝརཾ ཨདཱསིཾ, ཨིདཱནིསྶ མཱཏཱ རཛྫཾ ཡཱཙཏི, ཨཧཾ ཏསྶ ན དཱཏུཀཱམོ, ཏསྶ མཱཏཱ ཏུམྷཱཀཾ ཨནཏྠམྤི ཀརེཡྻ, གཙྪཐ ཏུམྷེ, ཨརཉྙེ ཝསིཏྭཱ མམཙྩཡེནཱགནྟྭཱ རཛྫཾ གཎྷཐཱ’’ཏི ཨུཡྻོཛེསི. ཏེ པིཏརཾ ཝནྡིཏྭཱ པཱསཱདཱ ཨོཏརནྟེ རཱཛངྒཎེ ཀཱིལ༹མཱནོ སཱུརིཡཀུམཱརོ དིསྭཱ ཏཾ ཀཱརཎཾ ཉཏྭཱ ཏེཧི སདྡྷིཾ ནིཀྑམི. ཏེསཾ ཧིམཝནྟཾ པཝིཊྛཀཱལེ བོདྷིསཏྟོ མགྒཱ ཨོཀྐམྨ ཨཉྙཏརསྨིཾ རུཀྑམཱུལེ ནིསཱིདིཏྭཱ སཱུརིཡཀུམཱརཾ ཨཱཧ – ‘‘ཏཱཏ, ཨེཏཾ སརཾ གནྟྭཱ ནྷཏྭཱ ཙ པིཝིཏྭཱ ཙ ཨམྷཱཀམྤི པདུམིནིཔཎྞེཧི ཨུདཀཾ ཨཱཧརཱ’’ཏི. སོ པན སརོ ཝེསྶཝཎྞསྶ སནྟིཀཱ ཨེཀེན དཀརཀྑསེན ལདྡྷོ ཧོཏི. ཝེསྶཝཎྞོ ཙ ཏཾ ཨཱཧ – ‘‘ཋཔེཏྭཱ དེཝདྷམྨཛཱནནཀེ ཡེ ཙ ཨཉྙེ ཨིམཾ སརཾ ཨོཏརནྟི, ཏེ ཁཱདིཏུཾ ལབྷསཱི’’ཏི. ཏཏོ པཊྛཱཡ སོ ཏཾ སརཾ ཨོཏིཎྞོཏིཎྞེ དེཝདྷམྨེ པུཙྪིཏྭཱ ཨཛཱནནྟེ ཁཱདཏི, སཱུརིཡཀུམཱརོཔི ¶ ཏཾ སརཾ ཨཝཱིམཾསིཏྭཱཝ ཨོཏརི, ཏེན ཙ ‘‘དེཝདྷམྨེ ཛཱནཱསཱི’’ཏི པུཙྪིཏོ ‘‘དེཝདྷམྨཱ ནཱམ ཙནྡིམསཱུརིཡཱ’’ཏི ཨཱཧ. ཨཐ ནཾ ‘‘ཏྭཾ དེཝདྷམྨེ ན ཛཱནཱསཱི’’ཏི ཨུདཀཾ པཝེསེཏྭཱ ཨཏྟནོ བྷཝནེ ཋཔེསི. བོདྷིསཏྟོཔི ཏཾ ཙིརཱཡནྟཾ དིསྭཱ ཙནྡཀུམཱརཾ པེསེསི. སོཔི ཏེན ‘‘དེཝདྷམྨེ ཛཱནཱསཱི’’ཏི པུཙྪིཏོ ‘‘དེཝདྷམྨཱ ནཱམ ཙཏསྶོ དིསཱ’’ཏི ཨཱཧ. དཀརཀྑསོ ཏམྤི ཨུདཀཾ པཝེསེཏྭཱ ཏཏྠེཝ ཋཔེསི.

བོདྷིསཏྟོ ཏསྨིམྤི ཙིརཱཡནྟེ ‘‘ཨནྟརཱཡེན བྷཝིཏབྦ’’ནྟི སཡཾ གནྟྭཱ དྭིནྣམྤི ཨོཏརཎཔདཾཡེཝ དིསྭཱ ‘‘ཨཡཾ སརོ རཀྑསཔརིགྒཧིཏོ’’ཏི ཉཏྭཱ ཁགྒཾ སནྣཡ྄ཧིཏྭཱ དྷནུཾ གཧེཏྭཱ ཨཊྛཱསི. རཀྑསོ ཏཾ ཨནོཏརནྟཾ དིསྭཱ ཝནཀམྨིཀཔུརིསཝེསེནཱགནྟྭཱ ཨཱཧ – ‘‘བྷོ པུརིས, ཏྭཾ མགྒཀིལནྟོ, ཀསྨཱ ཨིམཾ སརཾ ཨོཏརིཏྭཱ ནྷཏྭཱ ཙ པིཝིཏྭཱ ཙ བྷིསམུལཱལཾ ཁཱདིཏྭཱ པུཔྥཱནི པིལནྡྷིཏྭཱ ན གཙྪསཱི’’ཏི. བོདྷིསཏྟོ ཏཾ དིསྭཱཝ ‘‘ཨེས སོ ཡཀྑོ’’ཏི ཉཏྭཱ ‘‘ཏཡཱ མེ བྷཱཏརོ གཧིཏཱ’’ཏི ཨཱཧ. ཨཱམ, མཡཱ གཧིཏཱཏི. ཀིཾ ཀཱརཎཱཏི? ཨཧཾ ཨིམཾ སརཾ ཨོཏིཎྞོཏིཎྞེ ལབྷཱམཱིཏི ¶ . ཀིཾ པན སབྦེཝ ལབྷསཱིཏི? དེཝདྷམྨཛཱནནཀེ ¶ ཋཔེཏྭཱ ཨཝསེསེ ལབྷཱམཱིཏི. ཨཏྠི པན ཏེ དེཝདྷམྨེཧི ཨཏྠོཏི? ཨཱམ, ཨཏྠཱིཏི. ཨཧཾ ཀཐེསྶཱམཱིཏི. ཏེན ཧི ཀཐེཧཱིཏི. ན སཀྐཱ ཀིལིཊྛེན གཏྟེན ཀཐེཏུནྟི. ཡཀྑོ བོདྷིསཏྟཾ ¶ ནྷཱཔེཏྭཱ པཱནཱིཡཾ པཱཡེཏྭཱ ཨལངྐརིཏྭཱ ཨལངྐཏམཎྜཔམཛ྄ཛྷེ པལླངྐཾ ཨཱརོཔེཏྭཱ སཡམསྶ པཱདམཱུལེ ནིསཱིདི. ཨཐ ནཾ བོདྷིསཏྟོ ‘‘སཀྐཙྩཾ སུཎཱཧཱི’’ཏི ཝཏྭཱ ཨིམཾ གཱཐམཱཧ –

‘‘ཧིརིཨོཏྟཔྤསམྤནྣཱ, སུཀྐདྷམྨསམཱཧིཏཱ;

སནྟོ སཔྤུརིསཱ ལོཀེ, དེཝདྷམྨཱཏི ཝུཙྩརེ’’ཏི. (ཛཱ. ༡.༡.༦);

ཡཀྑོ ཨིམཾ དྷམྨདེསནཾ སུཏྭཱ པསནྣོ བོདྷིསཏྟཾ ཨཱཧ – ‘‘པཎྜིཏ, ཨཧཾ ཏེ པསནྣོ, ཨེཀཾ བྷཱཏརཾ དམྨི, ཀཏརཾ ཨཱནེམཱི’’ཏི? ‘‘ཀནིཊྛཾ ཨཱནེཧཱི’’ཏི. པཎྜིཏ, ཏྭཾ ཀེཝལཾ དེཝདྷམྨེ ཛཱནཱསིཡེཝ, ན པན ཏེསུ ཝཏྟསཱིཏི. ཀིཾ ཀཱརཎཱཏི? ཡསྨཱ ཛེཊྛཾ ཋཔེཏྭཱ ཀནིཊྛཾ ཨཱཧརཱཔེནྟོ ཛེཊྛཱཔཙཱཡིཀཀམྨཾ ན ཀརོསཱིཏི, དེཝདྷམྨེ ཙཱཧཾ ཡཀྑ ཛཱནཱམི, ཏེསུ ཙ ཝཏྟཱམི. མཡཉྷི ཨེཏཾ ནིསྶཱཡ ཨིམཾ ཨརཉྙཾ པཝིཊྛཱ. ཨེཏསྶ ཧི ཨཏྠཱཡ ཨམྷཱཀཾ པིཏརཾ ཨེཏསྶ མཱཏཱ རཛྫཾ ཡཱཙི, ཨམྷཱཀཾ པན པིཏཱ ཏཾ ཝརཾ ཨདཏྭཱ ཨམྷཱཀཾ ཨནུརཀྑཎཏྠཱཡ ཨརཉྙེ ཝཱསཾ ཨནུཛཱནི, སོ ཀུམཱརོ ཨནིཝཏྟིཏྭཱ ཨམྷེཧི སདྡྷིཾ ཨཱགཏོ. ‘‘ཏཾ ཨརཉྙེ ཨེཀོ ཡཀྑོ ཁཱདཱི’’ཏི ཝུཏྟེཔི ན ཀོཙི སདྡཧིསྶཏི. ཏེནཱཧཾ གརཧབྷཡབྷཱིཏོ ཏམེཝཱཧརཱཔེམཱིཏི. ཡཀྑོ བོདྷིསཏྟསྶ པསཱིདིཏྭཱ ‘‘སཱདྷུ པཎྜིཏ, ཏྭམེཝ དེཝདྷམྨེ ཛཱནཱསི, དེཝདྷམྨེསུ ཙ ཝཏྟསཱི’’ཏི དྭེ བྷཱཏརོ ཨཱནེཏྭཱ ཨདཱསི. ཨཐ ནཾ བོདྷིསཏྟོ ཡཀྑབྷཱཝེ ཨཱདཱིནཝཾ ཀཐེཏྭཱ པཉྩསུ སཱིལེསུ པཏིཊྛཱཔེསི. སོ ཏེན སུསཾཝིཧིཏཱརཀྑོ ཏསྨིཾ ཨརཉྙེ ཝསིཏྭཱ པིཏརི ཀཱལཀཏེ ཡཀྑཾ ཨཱདཱཡ བཱརཱཎསིཾ གནྟྭཱ ¶ རཛྫཾ གཧེཏྭཱ ཙནྡཀུམཱརསྶ ཨུཔརཛྫཾ, སཱུརིཡཀུམཱརསྶ སེནཱཔཏིཊྛཱནཾ དཏྭཱ ཡཀྑསྶ རམཎཱིཡེ ཋཱནེ ཨཱཡཏནཾ ཀཱརཱཔེཏྭཱ ཡཐཱ སོ ལཱབྷགྒཔྤཏྟོ ཧོཏི, ཏཐཱ ཨཀཱསི.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི ‘‘ཏདཱ རཀྑསོ བཧུབྷཎྜིཀབྷིཀྑུ ཨཧོསི, སཱུརིཡཀུམཱརོ ཨཱནནྡོ, ཙནྡཀུམཱརོ སཱརིཔུཏྟོ, མཧིཾསཀུམཱརོ པན ཨཧམེཝཱ’’ཏི. ཨེཝཾ སཏྠཱ ཛཱཏཀཾ ཀཐེཏྭཱ ‘‘ཨེཝཾ ཏྭཾ, བྷིཀྑུ, པུབྦེ དེཝདྷམྨེ གཝེསམཱནོ ཧིརིཨོཏྟཔྤསམྤནྣོ ཝིཙརིཏྭཱ ཨིདཱནི ཙཏུཔརིསམཛ྄ཛྷེ ཨིམིནཱ ནཱིཧཱརེན ཋཏྭཱ མམ པུརཏོ ‘ཨཔྤིཙྪོམྷཱི’ཏི ཝདནྟོ ཨཡུཏྟཾ ཨཀཱསི. ན ཧི སཱཊཀཔཊིཀྑེཔཱདིམཏྟེན སམཎོ ནཱམ ཧོཏཱི’’ཏི ཝཏྭཱ ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ན ¶ ནགྒཙརིཡཱ ན ཛཊཱ ན པངྐཱ, ནཱནཱསཀཱ ཐཎྜིལསཱཡིཀཱ ཝཱ;

རཛོཛལླཾ ཨུཀྐུཊིཀཔྤདྷཱནཾ, སོདྷེནྟི མཙྩཾ ཨཝིཏིཎྞཀངྑ’’ནྟི.

ཏཏྠ ནཱནཱསཀཱཏི ན ཨནསཀཱ, བྷཏྟཔཊིཀྑེཔཀཱཏི ཨཏྠོ. ཐཎྜིལསཱཡིཀཱཏི བྷཱུམིསཡནཱ. རཛོཛལླནྟི ཀདྡམལེཔནཱཀཱརེན སརཱིརེ སནྣིཧིཏརཛོ ¶ . ཨུཀྐུཊིཀཔྤདྷཱནནྟི ཨུཀྐུཊིཀབྷཱཝེན ཨཱརདྡྷཝཱིརིཡཾ. ཨིདཾ ཝུཏྟཾ ཧོཏི – ཡོ ཧི མཙྩོ ‘‘ཨེཝཾ ཨཧཾ ལོཀནིསྶརཎསངྑཱཏཾ སུདྡྷིཾ པཱཔུཎིསྶཱམཱི’’ཏི ཨིམེསུ ནགྒཙརིཡཱདཱིསུ ཡཾ ཀིཉྩི སམཱདཱཡ ཝཏྟེཡྻ, སོ ཀེཝལཾ མིཙྪཱདསྶནཉྩེཝ ཝཌྜྷེཡྻ, ཀིལམཐསྶ ཙ བྷཱགཱི ཨསྶ. ན ཧི ཨེཏཱནི སུསམཱདིནྣཱནིཔི ཨཊྛཝཏྠུཀཱཡ ཀངྑཱཡ ཨཝིཏིཎྞབྷཱཝེན ཨཝིཏིཎྞཀངྑཾ མཙྩཾ སོདྷེནྟཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨལངྐཏོ ཙེཔཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སནྟཏིམཧཱམཏྟཾ ཨཱརབྦྷ ཀཐེསི.

སོ ཧི ཨེཀསྨིཾ ཀཱལེ རཉྙོ པསེནདིཀོསལསྶ པཙྩནྟཾ ཀུཔིཏཾ ཝཱུཔསམེཏྭཱ ཨཱགཏོ. ཨཐསྶ རཱཛཱ ཏུཊྛོ སཏྟ དིཝསཱནི རཛྫཾ དཏྭཱ ཨེཀཾ ¶ ནཙྩགཱིཏཀུསལཾ ཨིཏྠིཾ ཨདཱསི. སོ སཏྟ དིཝསཱནི སུརཱམདམཏྟོ ཧུཏྭཱ སཏྟམེ དིཝསེ སབྦཱལངྐཱརཔཊིམཎྜིཏོ ཧཏྠིཀྑནྡྷཝརགཏོ ནྷཱནཏིཏྠཾ གཙྪནྟོ སཏྠཱརཾ པིཎྜཱཡ པཝིསནྟཾ དྭཱརནྟརེ དིསྭཱ ཧཏྠིཀྑནྡྷཝརགཏོཝ སཱིསཾ ཙཱལེཏྭཱ ཝནྡིཏྭཱ པཀྐཱམི. སཏྠཱ སིཏཾ ཀཏྭཱ ‘‘ཀོ ནུ ཁོ, བྷནྟེ, སིཏཔཱཏུཀརཎེ ཧེཏཱུ’’ཏི ¶ ཨཱནནྡཏྠེརེན པུཊྛོ སིཏཀཱརཎཾ ཨཱཙིཀྑནྟོ ཨཱཧ – ‘‘པསྶཱནནྡ, སནྟཏིམཧཱམཏྟཾ, ཨཛྫ སབྦཱབྷརཎཔཊིམཎྜིཏོཝ མམ སནྟིཀཾ ཨཱགནྟྭཱ ཙཏུཔྤདིཀགཱཐཱཝསཱནེ ཨརཧཏྟཾ པཏྭཱ སཏྟཏཱལམཏྟེ ཨཱཀཱསེ ནིསཱིདིཏྭཱ པརིནིབྦཱཡིསྶཏཱི’’ཏི. མཧཱཛནོ ཐེརེན སདྡྷིཾ ཀཐེནྟསྶ སཏྠུ ཝཙནཾ ཨསྶོསི. ཏཏྠ མིཙྪཱདིཊྛིཀཱ ཙིནྟཡིཾསུ – ‘‘པསྶཐ སམཎསྶ གོཏམསྶ ཀིརིཡཾ, མུཁཔྤཏྟམེཝ བྷཱསཏི, ཨཛྫ ཀིར ཨེས ཨེཝཾ སུརཱམདམཏྟོ ཡཐཱལངྐཏོཝ ཨེཏསྶ སནྟིཀེ དྷམྨཾ སུཏྭཱ པརིནིབྦཱཡིསྶཏི, ཨཛྫེཝ ཏཾ མུསཱཝཱདེན ནིགྒཎྷིསྶཱམཱ’’ཏི. སམྨཱདིཊྛིཀཱ ¶ ཙིནྟེསུཾ – ‘‘ཨཧོ བུདྡྷཱནཾ མཧཱནུབྷཱཝཏཱ, ཨཛྫ བུདྡྷལཱིལ༹ཉྩེཝ སནྟཏིམཧཱམཏྟལཱིལ༹ཉྩ དཊྛུཾ ལབྷིསྶཱམཱ’’ཏི.

སནྟཏིམཧཱམཏྟོཔི ནྷཱནཏིཏྠེ དིཝསབྷཱགཾ ཨུདཀཀཱིལ༹ཾ ཀཱིལི༹ཏྭཱ ཨུཡྻཱནཾ གནྟྭཱ ཨཱཔཱནབྷཱུམིཡཾ ནིསཱིདི. སཱཔི ཨིཏྠཱི རངྒམཛ྄ཛྷཾ ཨོཏརིཏྭཱ ནཙྩགཱིཏཾ དསྶེཏུཾ ཨཱརབྷི. ཏསྶཱ སརཱིརལཱིལཱ༹ཡ དསྶནཏྠཾ སཏྟཱཧཾ ཨཔྤཱཧཱརཏཱཡ ཏཾ དིཝསཾ ནཙྩགཱིཏཾ དསྶཡམཱནཱཡ ཨནྟོཀུཙྪིཡཾ སཏྠཀཝཱཏཱ སམུཊྛཱཡ ཧདཡམཾསཾ ཀནྟིཏྭཱ ཨགམཾསུ. སཱ ཏངྑཎཉྙེཝ མུཁེན ཙེཝ ཨཀྑཱིཧི ཙ ཝིཝཊེཧི ཀཱལམཀཱསི. སནྟཏིམཧཱམཏྟོ ‘‘ཨུཔདྷཱརེཐ ན’’ནྟི ཝཏྭཱ ‘‘ནིརུདྡྷཱ, སཱམཱི’’ཏི ཙ ཝུཏྟམཏྟེཡེཝ ¶ བལཝསོཀེན ཨབྷིབྷཱུཏོ ཏངྑཎཉྙེཝསྶ སཏྟཱཧཾ པཱིཏསུརཱ ཏཏྟཀཔཱལེ ཨུདཀབིནྡུ ཝིཡ པརིཀྑཡཾ ཨགམཱསི. སོ ‘‘ན མེ ཨིམཾ སོཀཾ ཨཉྙེ ནིབྦཱཔེཏུཾ སཀྑིསྶནྟི ཨཉྙཏྲ ཏཐཱགཏེནཱ’’ཏི བལཀཱཡཔརིཝུཏོ སཱཡནྷསམཡེ སཏྠུ སནྟིཀཾ གནྟྭཱ ཝནྡིཏྭཱ ཨེཝམཱཧ – ‘‘བྷནྟེ, ‘ཨེཝརཱུཔོ མེ སོཀོ ཨུཔྤནྣོ, ཏཾ མེ ཏུམྷེ ནིབྦཱཔེཏུཾ སཀྑིསྶཐཱ’ཏི ཨཱགཏོམྷི, པཊིསརཎཾ མེ ཧོཐཱ’’ཏི. ཨཐ ནཾ སཏྠཱ ‘‘སོཀཾ ནིབྦཱཔེཏུཾ སམཏྠསྶེཝ སནྟིཀཾ ཨཱགཏོསི. ཨིམིསྶཱ ཧི ཨིཏྠིཡཱ ཨིམིནཱཝ ཨཱཀཱརེན མཏཀཱལེ ¶ ཏཝ རོདནྟསྶ པགྒྷརིཏཨསྶཱུནི ཙཏུནྣཾ མཧཱསམུདྡཱནཾ ཨུདཀཏོ ཨཏིརེཀཏརཱནཱི’’ཏི ཝཏྭཱ ཨིམཾ གཱཐམཱཧ –

‘‘ཡཾ པུབྦེ ཏཾ ཝིསོསེཧི, པཙྪཱ ཏེ མཱཧུ ཀིཉྩནཾ;

མཛ྄ཛྷེ ཙེ ནོ གཧེསྶསི, ཨུཔསནྟོ ཙརིསྶསཱི’’ཏི. (སུ. ནི. ༩༥༥, ༡༡༠༥; ཙཱུལ༹ནི. ཛཏུཀཎྞིམཱཎཝཔུཙྪཱནིདྡེས ༦༨);

གཱཐཱཔརིཡོསཱནེ སནྟཏིམཧཱམཏྟོ ཨརཧཏྟཾ པཏྭཱ ཨཏྟནོ ཨཱཡུསངྑཱརཾ ཨོལོཀེནྟོ ཏསྶ ཨཔྤཝཏྟནབྷཱཝཾ ཉཏྭཱ སཏྠཱརཾ ཨཱཧ – ‘‘བྷནྟེ, པརིནིབྦཱནཾ མེ ཨནུཛཱནཱཐཱ’’ཏི. སཏྠཱ ཏེན ཀཏཀམྨཾ ཛཱནནྟོཔི ‘‘མུསཱཝཱདེན ནིགྒཎྷནཏྠཾ སནྣིཔཏིཏཱ མིཙྪཱདིཊྛིཀཱ ཨོཀཱསཾ ན ལབྷིསྶནྟི, ‘བུདྡྷལཱིལ༹ཉྩེཝ སནྟཏིམཧཱམཏྟལཱིལ༹ཉྩ པསྶིསྶཱམཱ’ཏི སནྣིཔཏིཏཱ སམྨཱདིཊྛིཀཱ ཨིམིནཱ ཀཏཀམྨཾ སུཏྭཱ པུཉྙེསུ ཨཱདརཾ ཀརིསྶནྟཱི’’ཏི ¶ སལླཀྑེཏྭཱ ‘‘ཏེན ཧི ཏཡཱ ཀཏཀམྨཾ མཡ྄ཧཾ ཀཐེཧི, ཀཐེནྟོ ཙ བྷཱུམིཡཾ ཋིཏོ ཨཀཐེཏྭཱ སཏྟཏཱལམཏྟེ ཨཱཀཱསེ ཋིཏོ ཀཐེཧཱི’’ཏི ཨཱཧ. སོ ‘‘སཱདྷུ, བྷནྟེ’’ཏི སཏྠཱརཾ ཝནྡིཏྭཱ ཨེཀཏཱལཔྤམཱཎཾ ཨུགྒམྨ ཨོརོཧིཏྭཱ པུན སཏྠཱརཾ ཝནྡིཏྭཱ ཨུགྒཙྪནྟོ པཊིཔཱཊིཡཱ སཏྟཏཱལཔྤམཱཎེ ཨཱཀཱསེ པལླངྐེན ནིསཱིདིཏྭཱ ‘‘སུཎཱཐ མེ, བྷནྟེ, པུབྦཀམྨ’’ནྟི ཝཏྭཱ ཨཱཧ –

ཨིཏོ ¶ ཨེཀནཝུཏིཀཔྤེ ཝིཔསྶཱིསམྨཱསམྦུདྡྷཀཱལེ ཨཧཾ བནྡྷུམཏིནགརེ ཨེཀསྨིཾ ཀུལེ ནིབྦཏྟིཏྭཱ ཙིནྟེསིཾ – ‘‘ཀིཾ ནུ ཁོ པརེསཾ ཚེདཾ ཝཱ པཱིལ༹ཾ ཝཱ ཨཀརཎཀམྨ’’ནྟི ཨུཔདྷཱརེནྟོ དྷམྨགྷོསཀཀམྨཾ དིསྭཱ ཏཏོ པཊྛཱཡ ཏཾ ཀམྨཾ ཀརོནྟོ མཧཱཛནཾ སམཱདཔེཏྭཱ ‘‘པུཉྙཱནི ཀརོཐ, ཨུཔོསཐདིཝསེསུ ཨུཔོསཐཾ སམཱདིཡཐ, དཱནཾ དེཐ, དྷམྨཾ སུཎཱཐ, བུདྡྷརཏནཱདཱིཧི སདིསཾ ཨཉྙཾ ནཱམ ནཏྠི, ཏིཎྞཾ རཏནཱནཾ སཀྐཱརཾ ཀརོཐཱ’’ཏི ཨུགྒྷོསེནྟོ ཝིཙརཱམི. ཏསྶ མཡ྄ཧཾ སདྡཾ སུཏྭཱ བུདྡྷཔིཏཱ བནྡྷུམཏིམཧཱརཱཛཱ མཾ པཀྐོསཱཔེཏྭཱ, ‘‘ཏཱཏ, ཀིཾ ཀརོནྟོ ཝིཙརསཱི’’ཏི པུཙྪིཏྭཱ, ‘‘དེཝ, ཏིཎྞཾ རཏནཱནཾ གུཎཾ པཀཱསེཏྭཱ མཧཱཛནཾ པུཉྙཀམྨེསུ སམཱདཔེནྟོ ཝིཙརཱམཱི’’ཏི ཝུཏྟེ, ‘‘ཀཏྠ ནིསིནྣོ ཝིཙརསཱི’’ཏི མཾ པུཙྪིཏྭཱ ‘‘པདསཱཝ, དེཝཱ’’ཏི ¶ མཡཱ ཝུཏྟེ, ‘‘ཏཱཏ, ན ཏྭཾ ཨེཝཾ ཝིཙརིཏུཾ ཨརཧསི, ཨིམཾ པུཔྥདཱམཾ པིལནྡྷིཏྭཱ ཨསྶཔིཊྛེ ནིསིནྣོཝ ཝིཙརཱ’’ཏི མཡ྄ཧཾ མུཏྟཱདཱམསདིསཾ པུཔྥདཱམཾ དཏྭཱ དནྟཾ ཨསྶཾ ཨདཱསི. ཨཐ མཾ རཉྙཱ དིནྣཔརིཧཱརེན ཏཐེཝ ཨུགྒྷོསེཏྭཱ ¶ ཝིཙརནྟཾ པུན རཱཛཱ པཀྐོསཱཔེཏྭཱ, ‘‘ཏཱཏ, ཀིཾ ཀརོནྟོ ཝིཙརསཱི’’ཏི པུཙྪིཏྭཱ ‘‘ཏདེཝ, དེཝཱ’’ཏི ཝུཏྟེ, ‘‘ཏཱཏ, ཨསྶོཔི ཏེ ནཱནུཙྪཝིཀོ, ཨིདྷ ནིསཱིདིཏྭཱ ཝིཙརཱ’’ཏི ཙཏུསིནྡྷཝཡུཏྟརཐཾ ཨདཱསི. ཏཏིཡཝཱརེཔི མེ རཱཛཱ སདྡཾ སུཏྭཱ པཀྐོསཱཔེཏྭཱ, ‘‘ཏཱཏ, ཀིཾ ཀརོནྟོ ཝིཙརསཱི’’ཏི པུཙྪིཏྭཱ ‘‘ཏདེཝ, དེཝཱ’’ཏི ཝུཏྟེ, ‘‘ཏཱཏ, རཐོཔི ཏེ ནཱནུཙྪཝིཀོ’’ཏི མཡ྄ཧཾ མཧནྟཾ བྷོགཀྑནྡྷཾ མཧཱཔསཱདྷནཉྩ དཏྭཱ ཨེཀཉྩ ཧཏྠིཾ ཨདཱསི. སྭཱཧཾ སབྦཱབྷརཎཔཊིམཎྜིཏོ ཧཏྠིཀྑནྡྷེ ནིསིནྣོ ཨསཱིཏི ཝསྶསཧསྶཱནི དྷམྨགྷོསཀཀམྨཾ ཨཀཱསིཾ, ཏསྶ མེ ཨེཏྟཀཾ ཀཱལཾ ཀཱཡཏོ ཙནྡནགནྡྷོ ཝཱཡཏི, མུཁཏོ ཨུཔྤལགནྡྷོ ཝཱཡཏི. ཨིདཾ མཡཱ ཀཏཀམྨནྟི.

ཨེཝཾ སོ ཨཏྟནོ པུབྦཀམྨཾ ཀཐེཏྭཱ ཨཱཀཱསེ ནིསིནྣོཝ ཏེཛོདྷཱཏུཾ སམཱཔཛྫིཏྭཱ པརིནིབྦཱཡི. སརཱིརེ ཨགྒིཛཱལཱ ཨུཊྛཧིཏྭཱ མཾསལོཧིཏཾ ཛྷཱཔེསི, སུམནཔུཔྥཱནི ཝིཡ དྷཱཏུཡོ ཨཝསིསྶིཾསུ. སཏྠཱ སུདྡྷཝཏྠཾ པསཱརེསི, དྷཱཏུཡོ ¶ ཏཏྠ པཏིཾསུ. ཏཱ པཏྟེ པཀྑིཔིཏྭཱ ཙཏུམཧཱཔཐེ ཐཱུཔཾ ཀཱརེསི ‘‘མཧཱཛནོ ཝནྡིཏྭཱ པུཉྙབྷཱགཱི བྷཝིསྶཏཱི’’ཏི. བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ, ‘‘ཨཱཝུསོ, སནྟཏིམཧཱམཏྟོ གཱཐཱཝསཱནེ ཨརཧཏྟཾ པཏྭཱ ཨལངྐཏཔཊིཡཏྟོཡེཝ ཨཱཀཱསེ ནིསཱིདིཏྭཱ པརིནིབྦུཏོ, ཀིཾ ནུ ཁོ ཨེཏཾ ‘སམཎོ’ཏི ཝཏྟུཾ ཝཊྚཏི ཨུདཱཧུ བྲཱཧྨཎོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, མམ པུཏྟཾ ‘སམཎོ’ཏིཔི ཝཏྟུཾ ཝཊྚཏི, ‘བྲཱཧྨཎོ’ཏིཔི ཝཏྟུཾ ཝཊྚཏིཡེཝཱ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

སོ བྲཱཧྨཎོ སོ སམཎོ ས བྷིཀྑཱུ’’ཏི.

ཏཏྠ ཨལངྐཏོཏི ཝཏྠཱབྷརཎེཧི པཊིམཎྜིཏོ. ཏསྶཏྠོ – ཝཏྠཱལངྐཱརཱདཱིཧི ཨལངྐཏོ ཙེཔི པུགྒལོ ཀཱཡཱདཱིཧི སམཾ ཙརེཡྻ, རཱགཱདིཝཱུཔསམེན སནྟོ ཨིནྡྲིཡདམནེན དནྟོ ཙཏུམགྒནིཡམེན ནིཡཏོ སེཊྛཙརིཡཱཡ ¶ བྲཧྨཙཱརཱི ཀཱཡདཎྜཱདཱིནཾ ཨོརོཔིཏཏཱཡ སབྦེསུ བྷཱུཏེསུ ནིདྷཱཡ དཎྜཾ. སོ ཨེཝརཱུཔོ བཱཧིཏཔཱཔཏྟཱ ¶ བྲཱཧྨཎོཏིཔི སམིཏཔཱཔཏྟཱ སམཎོཏིཔི བྷིནྣཀིལེསཏྟཱ བྷིཀྑཱུཏིཔི ཝཏྟབྦོཡེཝཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཧིརཱིནིསེདྷོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པིལོཏིཀཏྠེརཾ ཨཱརབྦྷ ཀཐེསི.

ཨེཀསྨིཉྷི སམཡེ ཨཱནནྡཏྠེརོ ཨེཀཾ པིལོཏིཀཁཎྜནིཝཏྠཾ ཀཔཱལཾ ཨཱདཱཡ བྷིཀྑཱཡ ཙརནྟཾ དཱརཀཾ དིསྭཱ ‘‘ཀིཾ ཏེ ཨེཝཾ ཝིཙརིཏྭཱ ཛཱིཝནཏོ པབྦཛྫཱ ན ཨུཏྟརིཏརཱ’’ཏི ཝཏྭཱ, ‘‘བྷནྟེ, ཀོ མཾ པབྦཱཛེསྶཏཱི’’ཏི ཝུཏྟེ ‘‘ཨཧཾ པབྦཱཛེསྶཱམཱི’’ཏི ཏཾ ཨཱདཱཡ གནྟྭཱ སཧཏྠཱ ནྷཱཔེཏྭཱ ཀམྨཊྛཱནཾ དཏྭཱ པབྦཱཛེསི. ཏཉྩ པན ནིཝཏྠཔིལོཏིཀཁཎྜཾ པསཱརེཏྭཱ ཨོལོཀེནྟོ པརིསྶཱཝནཀརཎམཏྟམྤི གཡ྄ཧཱུཔགཾ ཀཉྩི པདེསཾ ཨདིསྭཱ ཀཔཱལེན སདྡྷིཾ ཨེཀིསྶཱ རུཀྑསཱཁཱཡ ཋཔེསི. སོ པབྦཛིཏྭཱ ལདྡྷཱུཔསམྤདོ བུདྡྷཱནཾ ཨུཔྤནྣལཱབྷསཀྐཱརཾ པརིབྷུཉྫམཱནོ མཧགྒྷཱནི ཙཱིཝརཱནི ཨཙྪཱདེཏྭཱ ཝིཙརནྟོ ཐཱུལསརཱིརོ ཧུཏྭཱ ཨུཀྐཎྛིཏྭཱ ‘‘ཀིཾ མེ ཛནསྶ སདྡྷཱདེཡྻཾ ནིཝཱསེཏྭཱ ཝིཙརཎེན, ཨཏྟནོ པིལོཏིཀམེཝ ནིཝཱསེསྶཱམཱི’’ཏི ཏཾ ཋཱནཾ གནྟྭཱ པིལོཏིཀཾ གཧེཏྭཱ ‘‘ཨཧིརིཀ ¶ ནིལླཛྫ ཨེཝརཱུཔཱནཾ ཝཏྠཱནཾ ཨཙྪཱདནཊྛཱནཾ པཧཱཡ ཨིམཾ པིལོཏིཀཁཎྜཾ ནིཝཱསེཏྭཱ ཀཔཱལཧཏྠོ བྷིཀྑཱཡ ཙརིཏུཾ གཙྪསཱི’’ཏི ཏཾ ཨཱརམྨཎཾ ཀཏྭཱ ཨཏྟནཱཝ ཨཏྟཱནཾ ཨོཝདི, ཨོཝདནྟསྶེཝ པནསྶ ཙིཏྟཾ སནྣིསཱིདི. སོ ཏཾ པིལོཏིཀཾ ཏཏྠེཝ པཊིསཱམེཏྭཱ ནིཝཏྟིཏྭཱ ཝིཧཱརམེཝ གཏོ. སོ ཀཏིཔཱཧཙྩཡེན པུནཔི ཨུཀྐཎྛིཏྭཱ ཏཐེཝ ཝཏྭཱ ནིཝཏྟི, པུནཔི ཏཐེཝཱཏི. ཏཾ ཨེཝཾ ཨཔརཱཔརཾ ཝིཙརནྟཾ དིསྭཱ བྷིཀྑཱུ ¶ ‘‘ཀཧཾ ¶ , ཨཱཝུསོ, གཙྪསཱི’’ཏི པུཙྪནྟི. སོ ‘‘ཨཱཙརིཡསྶ སནྟིཀཾ གཙྪཱམཱཝུསོ’’ཏི ཝཏྭཱ ཨེཏེནེཝ ནཱིཧཱརེན ཨཏྟནོ པིལོཏིཀཁཎྜམེཝ ཨཱརམྨཎཾ ཀཏྭཱ ཨཏྟཱནཾ ནིསེདྷེཏྭཱ ཀཏིཔཱཧེནེཝ ཨརཧཏྟཾ པཱཔུཎི. བྷིཀྑཱུ ཨཱཧཾསུ – ‘‘ཀིཾ, ཨཱཝུསོ, ན དཱནི ཨཱཙརིཡསྶ སནྟིཀཾ གཙྪསི, ནནུ ཨཡཾ ཏེ ཝིཙརཎམགྒོ’’ཏི. ཨཱཝུསོ, ཨཱཙརིཡེན སདྡྷིཾ སཾསགྒེ སཏི གཏོམྷི, ཨིདཱནི པན མེ ཚིནྣོ སཾསགྒོ, ཏེནསྶ སནྟིཀཾ ན གཙྪཱམཱིཏི. བྷིཀྑཱུ ཏཐཱགཏསྶ ཨཱརོཙེསུཾ – ‘‘བྷནྟེ, པིལོཏིཀཏྠེརོ ཨཉྙཾ བྱཱཀརོཏཱི’’ཏི. ཀིམཱཧ, བྷིཀྑཝེཏི? ཨིདཾ ནཱམ, བྷནྟེཏི. ཏཾ སུཏྭཱ སཏྠཱ ‘‘ཨཱམ, བྷིཀྑཝེ, མམ པུཏྟོ སཾསགྒེ སཏི ཨཱཙརིཡསྶ སནྟིཀཾ གཏོ, ཨིདཱནི པནསྶ སཾསགྒོ ཚིནྣོ, ཨཏྟནཱཝ ཨཏྟཱནཾ ནིསེདྷེཏྭཱ ཨརཧཏྟཾ པཏྟོ’’ཏི ཝཏྭཱ ཨིམཱ གཱཐཱ ཨབྷཱསི –

‘‘ཧིརཱིནིསེདྷོ པུརིསོ, ཀོཙི ལོཀསྨིཾ ཝིཛྫཏི;

ཡོ ནིདྡཾ ཨཔབོདྷེཏི, ཨསྶོ བྷདྲོ ཀསཱམིཝ.

ཏཏྠ ཨནྟོ ཨུཔྤནྣཾ ཨཀུསལཝིཏཀྐཾ ཧིརིཡཱ ནིསེདྷེཏཱིཏི ཧིརཱིནིསེདྷོ. ཀོཙི ལོཀསྨིནྟི ཨེཝརཱུཔོ པུགྒལོ དུལླབྷོ, ཀོཙིདེཝ ལོཀསྨིཾ ཝིཛྫཏི. ཡོ ནིདྡནྟི ཨཔྤམཏྟོ སམཎདྷམྨཾ ཀརོནྟོ ཨཏྟནོ ཨུཔྤནྣཾ ནིདྡཾ ཨཔཧརནྟོ བུཛ྄ཛྷཏཱིཏི ཨཔབོདྷེཏི. ཀསཱམིཝཱཏི ཡཐཱ བྷདྲོ ཨསྶོ ཨཏྟནི པཏམཱནཾ ཀསཾ ཨཔཧརཏི, ཨཏྟནི པཏིཏུཾ ན དེཏི. ཡོ ཨེཝཾ ནིདྡཾ ཨཔབོདྷེཏི, སོ དུལླབྷོཏི ཨཏྠོ.

དུཏིཡགཱཐཱཡ ཨཡཾ སངྑེཔཏྠོ – ‘‘བྷིཀྑཝེ, ཡཐཱ བྷདྲོ ཨསྶོ པམཱདམཱགམྨ ཀསཱཡ ནིཝིཊྛོ, ཨཧམྤི ནཱམ ཀསཱཡ པཧཊོ’’ཏི ཨཔརབྷཱགེ ཨཱཏཔྤཾ ཀརོཏི, ཨེཝཾ ཏུམྷེཔི ཨཱཏཱཔིནོ སཾཝེགིནོ བྷཝཐ ¶ , ཨེཝཾབྷཱུཏཱ ལོཀིཡལོཀུཏྟརཱཡ དུཝིདྷཱཡ སདྡྷཱཡ ཙ ཙཏུཔཱརིསུདྡྷིསཱིལེན ཙ ཀཱཡིཀཙེཏསིཀཝཱིརིཡེན ཙ ཨཊྛསམཱཔཏྟིསམཱདྷིནཱ ཙ ཀཱརཎཱཀཱརཎཛཱནནལཀྑཎེན ¶ དྷམྨཝིནིཙྪཡེན ཙ སམནྣཱགཏཱ ཧུཏྭཱ ཏིསྶནྣཾ ཝཱ ཨཊྛནྣཾ ཝཱ ཝིཛྫཱནཾ, པཉྩདསནྣཉྩ ཙརཎཱནཾ སམྤཏྟིཡཱ སམྤནྣཝིཛྫཱཙརཎཱ ¶ . ཨུཔཊྛིཏསཏིཏཱཡ པཏིསྶཏཱ ཧུཏྭཱ ཨིདཾ ཨནཔྤཀཾ ཝཊྚདུཀྑཾ པཛཧིསྶཐཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨུདཀཉྷི ནཡནྟཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སུཁསཱམཎེརཾ ཨཱརབྦྷ ཀཐེསི.

ཨཏཱིཏསྨིཉྷི བཱརཱཎསིསེཊྛིནོ གནྡྷཀུམཱརོ ནཱམ པུཏྟོ ཨཧོསི. རཱཛཱ ཏསྶ པིཏརི ཀཱལཀཏེ ཏཾ པཀྐོསཱཔེཏྭཱ སམསྶཱསེཏྭཱ མཧནྟེན སཀྐཱརེན ཏསྶེཝ སེཊྛིཊྛཱནཾ ཨདཱསི. སོ ཏཏོ པཊྛཱཡ གནྡྷསེཊྛཱིཏི པཉྙཱཡི. ཨཐསྶ བྷཎྜཱགཱརིཀོ དྷནགབྦྷདྭཱརཾ ཝིཝརིཏྭཱ, ‘‘སཱམི, ཨིདཾ ཏེ ཨེཏྟཀཾ པིཏུ དྷནཾ, ཨེཏྟཀཾ པིཏཱམཧཱདཱིན’’ནྟི ནཱིཧརིཏྭཱ དསྶེསི. སོ ཏཾ དྷནརཱསིཾ ཨོལོཀེཏྭཱ ཨཱཧ – ‘‘ཀིཾ པན ཏེ ཨིམཾ དྷནཾ གཧེཏྭཱ ན གམིཾསཱུ’’ཏི. ‘‘སཱམི, དྷནཾ གཧེཏྭཱ གཏཱ ནཱམ ནཏྠི. ཨཏྟནཱ ཀཏཾ ཀུསལཱཀུསལམེཝ ཧི ཨཱདཱཡ སཏྟཱ གཙྪནྟཱི’’ཏི. སོ ཙིནྟེསི – ‘‘ཏེ བཱལཏཱཡ དྷནཾ སཎྛཱཔེཏྭཱ པཧཱཡ གཏཱ, ཨཧཾ པནེཏཾ གཧེཏྭཱཝ གམིསྶཱམཱི’’ཏི. ཨེཝཾ པན ཙིནྟེནྟོ ‘‘དཱནཾ ཝཱ དསྶཱམི, པཱུཛཾ ¶ ཝཱ ཀརིསྶཱམཱི’’ཏི ཨཙིནྟེཏྭཱ ‘‘ཨིདཾ སབྦཾ ཁཱདིཏྭཱཝ གམིསྶཱམཱི’’ཏི ཙིནྟེསི. སོ སཏསཧསྶཾ ཝིསྶཛྫེཏྭཱ ཕལིཀམཡཾ ནྷཱནཀོཊྛཀཾ ཀཱརེསི, སཏསཧསྶཾ དཏྭཱ ཕལིཀམཡམེཝ ནྷཱནཕལཀཾ, སཏསཧསྶཾ དཏྭཱ ནིསཱིདནཔལླངྐཾ, སཏསཧསྶཾ དཏྭཱ བྷོཛནཔཱཏིཾ, སཏསཧསྶམེཝ དཏྭཱ བྷོཛནཊྛཱནེ མཎྜཔཾ ཀཱརཱཔེསི, སཏསཧསྶཾ དཏྭཱ བྷོཛནཔཱཏིཡཱ ཨཱསིཏྟཀཱུཔདྷཱནཾ ཀཱརེསི, སཏསཧསྶེནེཝ གེཧེ ¶ སཱིཧཔཉྫརཾ སཎྛཱཔེསི, ཨཏྟནོ པཱཏརཱསཏྠཱཡ སཧསྶཾ ཨདཱསི, སཱཡམཱསཏྠཱཡཔི སཧསྶམེཝ. པུཎྞམདིཝསེ པན བྷོཛནཏྠཱཡ སཏསཧསྶཾ དཱཔེསི, ཏཾ བྷཏྟཾ བྷུཉྫནདིཝསེ སཏསཧསྶཾ ཝིསྶཛྫེཏྭཱ ནགརཾ ཨལངྐརིཏྭཱ བྷེརིཾ ཙརཱཔེསི – ‘‘གནྡྷསེཊྛིསྶ ཀིར བྷཏྟབྷུཉྫནཱཀཱརཾ ཨོལོཀེནྟཱུ’’ཏི.

མཧཱཛནོ ¶ མཉྩཱཏིམཉྩེ བནྡྷིཏྭཱ སནྣིཔཏི. སོཔི སཏསཧསྶགྒྷནཀེ ནྷཱནཀོཊྛཀེ སཏསཧསྶགྒྷནཀེ ཕལཀེ ནིསཱིདིཏྭཱ སོལ༹སཧི གནྡྷོདཀགྷཊེཧི ནྷཏྭཱ ཏཾ སཱིཧཔཉྫརཾ ཝིཝརིཏྭཱ ཏསྨིཾ པལླངྐེ ནིསཱིདི. ཨཐསྶ ཏསྨིཾ ཨཱསིཏྟཀཱུཔདྷཱནེ ཏཾ པཱཏིཾ ཋཔེཏྭཱ སཏསཧསྶགྒྷནཀཾ བྷོཛནཾ ཝཌྜྷེསུཾ. སོ ནཱཊཀཔརིཝུཏོ ཨེཝརཱུཔཱཡ སམྤཏྟིཡཱ ཏཾ བྷོཛནཾ བྷུཉྫཏི. ཨཔརེན སམཡེན ཨེཀོ གཱམིཀམནུསྶོ ཨཏྟནོ པརིབྦཡཱཧརཎཏྠཾ དཱརུཨཱདཱིནི ཡཱནཀེ པཀྑིཔིཏྭཱ ནགརཾ གནྟྭཱ སཧཱཡཀསྶ གེཧེ ནིཝཱསཾ གཎྷི. ཏདཱ པན པུཎྞམདིཝསོ ¶ ཧོཏི. ‘‘གནྡྷསེཊྛིནོ བྷུཉྫནལཱིལ༹ཾ ཨོལོཀེནྟཱུ’’ཏི ནགརེ བྷེརིཾ ཙརཱཔེསི. ཨཐ ནཾ སཧཱཡཀོ ཨཱཧ – ‘‘སམྨ, གནྡྷསེཊྛིནོ ཏེ བྷུཉྫནལཱིལ༹ཾ དིཊྛཔུབྦ’’ནྟི. ‘‘ན དིཊྛཔུབྦཾ, སམྨཱ’’ཏི. ‘‘ཏེན ཧི ཨེཧི, གཙྪཱམ, ཨཡཾ ནགརེ བྷེརཱི ཙརཏི, ཨེཏསྶ མཧཱསམྤཏྟིཾ པསྶཱམཱ’’ཏི ནགརཝཱསཱི ཛནཔདཝཱསིཾ གཧེཏྭཱ ཨགམཱསི. མཧཱཛནོཔི མཉྩཱཏིམཉྩེ ཨབྷིརུཧིཏྭཱ པསྶཏི. གཱམཝཱསཱི བྷཏྟགནྡྷཾ གྷཱཡིཏྭཱཝ ནགརཝཱསིཾ ཨཱཧ – ‘‘མཡ྄ཧཾ ཨེཏཱཡ པཱཏིཡཱ བྷཏྟཔིཎྜེ པིཔཱསཱ ཛཱཏཱ’’ཏི. སམྨ, མཱ ཨེཏཾ པཏྠཡི, ན སཀྐཱ ལདྡྷུནྟི. སམྨ, ཨལབྷནྟོ ན ཛཱིཝིསྶཱམཱིཏི. སོ ཏཾ པཊིབཱཧིཏུཾ ཨསཀྐོནྟོ པརིསཔརིཡནྟེ ཋཏྭཱ ‘‘པཎམཱམི ཏེ, སཱམཱི’’ཏི ཏིཀྑཏྟུཾ མཧཱསདྡཾ ནིཙྪཱརེཏྭཱ ‘‘ཀོ ཨེསོ’’ཏི ཝུཏྟེ ཨཧཾ, སཱམཱིཏི. ‘‘ཀིམེཏ’’ནྟི. ‘‘ཨཡཾ ཨེཀོ གཱམཝཱསཱི ཏུམྷཱཀཾ པཱཏིཡཾ བྷཏྟཔིཎྜེ པིཔཱསཾ ཨུཔཱདེསི, ཨེཀཾ བྷཏྟཔིཎྜཾ དཱཔེཐཱ’’ཏི. ‘‘ན སཀྐཱ ལདྡྷུ’’ནྟི. ‘‘ཀིཾ, སམྨ, སུཏཾ ཏེ’’ཏི? ‘‘སུཏཾ མེ, ཨཔིཙ ལབྷནྟོ ཛཱིཝིསྶཱམི, ཨལབྷནྟསྶ མེ མརཎཾ བྷཝིསྶཏཱི’’ཏི. སོ པུནཔི ཝིརཝི – ‘‘ཨཡཾ ཀིར, སཱམི, ཨལབྷནྟོ མརིསྶཏི, ཛཱིཝིཏམསྶ དེཐཱ’’ཏི. ཨམྦྷོ བྷཏྟཔིཎྜོ ནཱམ སཏམྤི ཨགྒྷཏི, སཏདྭཡམྤི ཨགྒྷཏི. ཡོ ཡོ ཡཱཙཏི, ཏསྶ ཏསྶ དདམཱནོ ཨཧཾ ¶ ཀིཾ བྷུཉྫིསྶཱམཱིཏི? སཱམི, ཨཡཾ ཨལབྷནྟོ མརིསྶཏི, ཛཱིཝིཏམསྶ དེཐཱཏི. ན སཀྐཱཝ མུདྷཱ ལདྡྷུཾ, ཡདི པན ¶ ཨལབྷནྟོ ན ཛཱིཝཏི, ཏཱིཎི སཾཝཙྪརཱནི མམ གེཧེ བྷཏིཾ ཀརོཏུ, ཨེཝམསྶ བྷཏྟཔཱཏིཾ དཱཔེསྶཱམཱིཏི. གཱམཝཱསཱི ཏཾ སུཏྭཱ ‘‘ཨེཝཾ ཧོཏུ, སམྨཱ’’ཏི སཧཱཡཀཾ ཝཏྭཱ པུཏྟདཱརཾ པཧཱཡ ‘‘བྷཏྟཔཱཏིཨཏྠཱཡ ཏཱིཎི སཾཝཙྪརཱནི བྷཏིཾ ཀརིསྶཱམཱི’’ཏི སེཊྛིསྶ གེཧཾ པཱཝིསི. སོ བྷཏིཾ ཀརོནྟོ སབྦཀིཙྩཱནི སཀྐཙྩཾ ཨཀཱསི. གེཧེ ཝཱ ཨརཉྙེ ཝཱ རཏྟིཾ ཝཱ དིཝཱ ཝཱ སབྦཱནི ཀཏྟབྦཀམྨཱནི ཀཏཱནེཝ པཉྙཱཡིཾསུ. ‘‘བྷཏྟབྷཏིཀོ’’ཏི ཙ ཝུཏྟེ སཀལནགརེཔི པཉྙཱཡི. ཨཐསྶ དིཝསེ པརིཔུཎྞེ བྷཏྟཝེཡྻཱཝཊིཀོ ‘‘བྷཏྟབྷཏིཀསྶ, སཱམི, དིཝསོ པུཎྞོ, དུཀྐརཾ ཏེན ཀཏཾ ཏཱིཎི སཾཝཙྪརཱནི བྷཏིཾ ཀརོནྟེན, ཨེཀམྤི ཀམྨཾ ན ཀོཔིཏཔུབྦ’’ནྟི ཨཱཧ.

ཨཐསྶ སེཊྛི ཨཏྟནོ སཱཡཔཱཏརཱསཏྠཱཡ དྭེ སཧསྶཱནི, ཏསྶ པཱཏརཱསཏྠཱཡ སཧསྶནྟི ཏཱིཎི ¶ སཧསྶཱནི དཱཔེཏྭཱ ཨཱཧ – ‘‘ཨཛྫ མཡ྄ཧཾ ཀཏྟབྦཾ པརིཧཱརཾ ཏསྶེཝ ཀརོཐཱ’’ཏི. ཝཏྭཱ ཙ པན ཋཔེཏྭཱ ཨེཀཾ ཙིནྟཱམཎིཾ ནཱམ པིཡབྷརིཡཾ ཨཝསེསཛནམྤི ‘‘ཨཛྫ ཏམེཝ པརིཝཱརེཐཱ’’ཏི ཝཏྭཱ སབྦསམྤཏྟིཾ ཏསྶ ནིཡྻཱདེསི. སོ སེཊྛིནོ ནྷཱནོདཀེན ཏསྶེཝ ཀོཊྛཀེ ཏསྨིཾ ཕལཀེ ནིསིནྣོ ནྷཏྭཱ ཏསྶེཝ ནིཝཱསནསཱཊཀེ ¶ ནིཝཱསེཏྭཱ ཏསྶེཝ པལླངྐེ ནིསཱིདི. སེཊྛིཔི ནགརེ བྷེརིཾ ཙརཱཔེསི – ‘‘བྷཏྟབྷཏིཀོ གནྡྷསེཊྛིསྶ གེཧེ ཏཱིཎི སཾཝཙྪརཱནི བྷཏིཾ ཀཏྭཱ པཱཏིཾ ལབྷི, ཏསྶ བྷུཉྫནསམྤཏྟིཾ ཨོལོཀེནྟཱུ’’ཏི. མཧཱཛནོ མཉྩཱཏིམཉྩེ ཨབྷིརུཧིཏྭཱ པསྶཏི, གཱམཝཱསིསྶ ཨོལོཀིཏོལོཀིཏཊྛཱནཾ ཀམྤནཱཀཱརཔྤཏྟཾ ཨཧོསི. ནཱཊཀཱ པརིཝཱརེཏྭཱ ཨཊྛསུཾ, ཏསྶ པུརཏོ བྷཏྟཔཱཏིཾ ཝཌྜྷེཏྭཱ ཋཔཡིཾསུ. ཨཐསྶ ཧཏྠདྷོཝནཝེལཱཡ གནྡྷམཱདནེ ཨེཀོ པཙྩེཀབུདྡྷོ སཏྟམེ དིཝསེ སམཱཔཏྟིཏོ ཝུཊྛཱཡ ‘‘ཀཏྠ ནུ ཁོ ཨཛྫ བྷིཀྑཱཙཱརཏྠཱཡ གཙྪཱམཱི’’ཏི ཨུཔདྷཱརེནྟོ བྷཏྟབྷཏིཀཾ ཨདྡས. ཨཐ སོ ‘‘ཨཡཾ ཏཱིཎི སཾཝཙྪརཱནི བྷཏིཾ ཀཏྭཱ བྷཏྟཔཱཏིཾ ལབྷི, ཨཏྠི ནུ ཁོ ཨེཏསྶ སདྡྷཱ, ནཏྠཱི’’ཏི ཨུཔདྷཱརེནྟོ ‘‘ཨཏྠཱི’’ཏི ཉཏྭཱ ‘‘སདྡྷཱཔི ཨེཀཙྩེ སངྒཧཾ ཀཱཏུཾ ན སཀྐོནྟི, སཀྑིསྶཏི ནུ ཁོ མེ སངྒཧཾ ཀཱཏུ’’ནྟི ཙིནྟེཏྭཱ ‘‘སཀྑིསྶཏི ཙེཝ མམ ཙ སངྒཧཀརཎཾ ནིསྶཱཡ མཧཱསམྤཏྟིཾ ལབྷིསྶཏཱི’’ཏི ¶ ཉཏྭཱ ཙཱིཝརཾ པཱརུཔིཏྭཱ པཏྟམཱདཱཡ ཝེཧཱསཾ ཨབྦྷུགྒནྟྭཱ པརིསནྟརེན གནྟྭཱ ཏསྶ པུརཏོ ཋིཏམེཝ ཨཏྟཱནཾ དསྶེསི.

སོ པཙྩེཀབུདྡྷཾ དིསྭཱ ཙིནྟེསི – ‘‘ཨཧཾ པུབྦེ ཨདིནྣབྷཱཝེན ཨེཀིསྶཱ བྷཏྟཔཱཏིཡཱ ཨཏྠཱཡ ཏཱིཎི སཾཝཙྪརཱནི པརགེཧེ བྷཏིཾ ཨཀཱསིཾ, ཨིདཱནི མེ ཨིདཾ བྷཏྟཾ ཨེཀཾ རཏྟིནྡིཝཾ རཀྑེཡྻ, སཙེ པན ནཾ ཨཡྻསྶ དསྶཱམི, ཨནེཀཱནིཔི ཀཔྤཀོཊིསཧསྶཱནི རཀྑིསྶཏི ¶ , ཨཡྻསྶེཝ ནཾ དསྶཱམཱི’’ཏི. སོ ཏཱིཎི སཾཝཙྪརཱནི བྷཏིཾ ཀཏྭཱ ལདྡྷབྷཏྟཔཱཏིཏོ ཨེཀཔིཎྜམྤི མུཁེ ཨཊྛཔེཏྭཱ ཏཎྷཾ ཝིནོདེཏྭཱ སཡམེཝ པཱཏིཾ ཨུཀྑིཔིཏྭཱ པཙྩེཀབུདྡྷསྶ སནྟིཀཾ གནྟྭཱ པཱཏིཾ ཨཉྙསྶ ཧཏྠེ དཏྭཱ པཉྩཔཏིཊྛིཏེན ཝནྡིཏྭཱ པཱཏིཾ ཝཱམཧཏྠེན གཧེཏྭཱ དཀྑིཎཧཏྠེན ཏསྶ པཏྟེ བྷཏྟཾ ཨཱཀིརི. པཙྩེཀབུདྡྷོ བྷཏྟསྶ ཨུཔཌྜྷསེསཀཱལེ པཏྟཾ ཧཏྠེན པིདཧི. ཨཐ ནཾ སོ ཨཱཧ – ‘‘བྷནྟེ, ཨེཀོཝ པཊིཝིསོ ན སཀྐཱ དྭིདྷཱ ཀཱཏུཾ, མཱ མཾ ཨིདྷལོཀེན སངྒཎྷཐ, པརལོཀེན སངྒཧམེཝ ཀརོཐ, སཱཝསེསཾ ཨཀཏྭཱ ནིརཝསེསམེཝ དསྶཱམཱི’’ཏི. ཨཏྟནོ ཧི ཐོཀམྤི ཨནཝསེསེཏྭཱ དིནྣཾ ནིརཝསེསདཱནཾ ནཱམ, ཏཾ མཧཔྥལཾ ཧོཏི. སོ ཏཐཱ ཀརོནྟོ སབྦཾ དཏྭཱ པུན ཝནྡིཏྭཱ ཨཱཧ – ‘‘བྷནྟེ, ཨེཀཾ བྷཏྟཔཱཏིཾ ནིསྶཱཡ ཏཱིཎི སཾཝཙྪརཱནི མེ པརགེཧེ བྷཏིཾ ཀརོནྟེན དུཀྑཾ ཨནུབྷཱུཏཾ, ཨིདཱནི མེ ནིབྦཏྟནིབྦཏྟཊྛཱནེ སུཁམེཝ ཧོཏུ, ཏུམྷེཧི དིཊྛདྷམྨསྶེཝ བྷཱགཱི ཨསྶ’’ནྟི. པཙྩེཀབུདྡྷོ ‘‘ཨེཝཾ ཧོཏུ, ཙིནྟཱམཎི ཝིཡ ཏེ སབྦཀཱམདདོ མནོསངྐཔྤཱ པུཎྞཙནྡོ ཝིཡ པཱུརེནྟཱུ’’ཏི ཨནུམོདནཾ ཀརོནྟོ –

‘‘ཨིཙྪིཏཾ ¶ པཏྠིཏཾ ཏུཡ྄ཧཾ, སབྦམེཝ སམིཛ྄ཛྷཏུ;

སབྦེ པཱུརེནྟུ སངྐཔྤཱ, ཙནྡོ པནྣརསོ ཡཐཱ.

‘‘ཨིཙྪིཏཾ པཏྠིཀཾ ཏུཡ྄ཧཾ, ཁིཔྤམེཝ སམིཛ྄ཛྷཏུ;

སབྦེ པཱུརེནྟུ སངྐཔྤཱ, མཎི ཛོཏིརསོ ཡཐཱ’’ཏི. –

ཝཏྭཱ ¶ ‘‘ཨཡཾ མཧཱཛནོ ཡཱཝ གནྡྷམཱདནཔབྦཏགམནཱ མཾ པསྶནྟོ ཏིཊྛཏཱུ’’ཏི ཨདྷིཊྛཱཡ ཨཱཀཱསེན གནྡྷམཱདནཾ ཨགམཱསི.

མཧཱཛནོཔི ¶ ནཾ པསྶནྟོཝ ཨཊྛཱསི. སོ ཏཏྠ གནྟྭཱ ཏཾ པིཎྜཔཱཏཾ པཉྩསཏཱནཾ པཙྩེཀབུདྡྷཱནཾ ཝིབྷཛིཏྭཱ ཨདཱསི. སབྦེ ཨཏྟནོ པཧོནཀཾ གཎྷིཾསུ. ‘‘ཨཔྤོ པིཎྜཔཱཏོ ཀཐཾ པཧོསཱི’’ཏི ན ཙིནྟེཏབྦཾ. ཙཏྟཱརི ཧི ཨཙིནྟེཡྻཱནི (ཨ. ནི. ༤.༧༧) ཝུཏྟཱནི, ཏཏྲཱཡཾ པཙྩེཀབུདྡྷཝིསཡོཏི. མཧཱཛནོ པཙྩེཀབུདྡྷཱནཾ པིཎྜཔཱཏཾ ཝིབྷཛིཏྭཱ དིཡྻམཱནཾ དིསྭཱ སཱདྷུཀཱརསཧསྶཱནི པཝཏྟེསི, ཨསནིསཏནིཔཱཀསདྡོ ཝིཡ ཨཧོསི. ཏཾ སུཏྭཱ གནྡྷསེཊྛི ཙིནྟེསི – ‘‘བྷཏྟབྷཏིཀོ མཡཱ དིནྣསམྤཏྟིཾ དྷཱརེཏུཾ ནཱསཀྑི མཉྙེ, ཏེནཱཡཾ མཧཱཛནོ པརིཧཱསཾ ཀརོནྟོ སནྣིཔཏིཏོ ནདཏཱི’’ཏི. སོ ཏཔྤཝཏྟིཛཱནནཏྠཾ མནུསྶེ པེསེསི. ཏེ ཨཱགནྟྭཱ ‘‘སམྤཏྟིདྷཱརཀཱ ནཱམ, སཱམི, ཨེཝཾ ཧོནྟཱུ’’ཏི ཝཏྭཱ ཏཾ པཝཏྟིཾ ཨཱརོཙེསུཾ. སེཊྛི ཏཾ སུཏྭཱཝ པཉྩཝཎྞཱཡ པཱིཏིཡཱ ཕུཊྛསརཱིརོ ཧུཏྭཱ ‘‘ཨཧོ དུཀྐརཾ ཏེན ཀཏཾ, ཨཧཾ ཨེཏྟཀཾ ཀཱལཾ ཨེཝརཱུཔཱཡ སམྤཏྟིཡཱ ཋིཏོ ཀིཉྩི དཱཏུཾ ནཱསཀྑི’’ནྟི ཏཾ པཀྐོསཱཔེཏྭཱ ‘‘སཙྩཾ ཀིར ཏཡཱ ཨིདཾ ནཱམ ཀཏ’’ནྟི པུཙྪིཏྭཱ ‘‘ཨཱམ, སཱམཱི’’ཏི ཝུཏྟེ, ‘‘ཧནྡ, སཧསྶཾ གཧེཏྭཱ ཏཝ དཱནེ མཡ྄ཧམྤི པཏྟིཾ དེཧཱི’’ཏི ཨཱཧ. སོ ཏཐཱ ཨཀཱསི. སེཊྛིཔིསྶ སབྦཾ ཨཏྟནོ སནྟཀཾ མཛ྄ཛྷེ བྷིནྡིཏྭཱ ཨདཱསི.

ཙཏསྶོ ཧི སམྤདཱ ནཱམ – ཝཏྠུསམྤདཱ, པཙྩཡསམྤདཱ, ཙེཏནཱསམྤདཱ, གུཎཱཏིརེཀསམྤདཱཏི. ཏཏྠ ནིརོདྷསམཱཔཏྟིརཧོ ¶ ཨརཧཱ ཝཱ ཨནཱགཱམཱི ཝཱ དཀྑིཎེཡྻོ ཝཏྠུསམྤདཱ ནཱམ. པཙྩཡཱནཾ དྷམྨེན སམེན ཨུཔྤཏྟི པཙྩཡསམྤདཱ ནཱམ. དཱནཏོ པུབྦེ དཱནཀཱལེ པཙྪཱ བྷཱགེཏི ཏཱིསུ ཀཱལེསུ ཙེཏནཱཡ སོམནསྶསཧགཏཉཱཎསམྤཡུཏྟབྷཱཝོ ཙེཏནཱསམྤདཱ ནཱམ. དཀྑིཎེཡྻསྶ སམཱཔཏྟིཏོ ཝུཊྛིཏབྷཱཝོ གུཎཱཏིརེཀསམྤདཱ ནཱམཱཏི. ཨིམསྶ ཙ ཁཱིཎཱསཝོ པཙྩེཀབུདྡྷོ དཀྑིཎེཡྻཱ, བྷཏིཾ ཀཏྭཱ ལདྡྷབྷཱཝེན པཙྩཡོ དྷམྨཏོ ཨུཔྤནྣོ, ཏཱིསུ ཀཱལེསུ པརིསུདྡྷཱ ཙེཏནཱ, སམཱཔཏྟིཏོ ཝུཊྛིཏམཏྟོ པཙྩེཀབུདྡྷོ གུཎཱཏིརེཀོཏི ཙཏསྶོཔི ¶ སམྤདཱ ནིཔྥནྣཱ. ཨེཏཱསཾ ཨཱནུབྷཱཝེན དིཊྛེཝ དྷམྨེ མཧཱསམྤཏྟིཾ པཱཔུཎནྟི. ཏསྨཱ སོ སེཊྛིནོ སནྟིཀཱ སམྤཏྟིཾ ལབྷི. ཨཔརབྷཱགེ ¶ ཙ རཱཛཱཔི ཨིམིནཱ ཀཏཀམྨཾ སུཏྭཱ ཏཾ པཀྐོསཱཔེཏྭཱ སཧསྶཾ དཏྭཱ པཏྟིཾ གཧེཏྭཱ ཏུཊྛམཱནསོ མཧནྟཾ བྷོགཀྑནྡྷཾ དཏྭཱ སེཊྛིཊྛཱནཾ ཨདཱསི. བྷཏྟབྷཏིཀསེཊྛཱིཏིསྶ ནཱམཾ ཨཀཱསི. སོ གནྡྷསེཊྛིནཱ སདྡྷིཾ སཧཱཡོ ཧུཏྭཱ ཨེཀཏོ ཁཱདནྟོ པིཝནྟོ ཡཱཝཏཱཡུཀཾ ཋཏྭཱ ཏཏོ ཙུཏོ དེཝལོཀེ ནིབྦཏྟིཏྭཱ ཨེཀཾ བུདྡྷནྟརཾ དིབྦསམྤཏྟིཾ ཨནུབྷཝིཏྭཱ ཨིམསྨིཾ བུདྡྷུཔྤཱདེ སཱཝཏྠིཡཾ སཱརིཔུཏྟཏྠེརསྶཱུཔཊྛཱཀཀུལེ ¶ པཊིསནྡྷིཾ གཎྷི. ཨཐསྶ མཱཏཱ ལདྡྷགབྦྷཔརིཧཱརཱ ཀཏིཔཱཧཙྩཡེན ‘‘ཨཧོ ཝཏཱཧཾ པཉྩསཏེཧི བྷིཀྑཱུཧི སདྡྷིཾ སཱརིཔུཏྟཏྠེརསྶ སཏརསབྷོཛནཾ དཏྭཱ ཀཱསཱཡཝཏྠནིཝཏྠཱ སུཝཎྞསརཀཾ ཨཱདཱཡ ཨཱསནཔརིཡནྟེ ནིསིནྣཱ ཏེསཾ བྷིཀྑཱུནཾ ཨུཙྪིཊྛཱཝསེསཀཾ པརིབྷུཉྫེཡྻ’’ནྟི དོཧལི༹ནཱི ཧུཏྭཱ ཏཐེཝ ཀཏྭཱ དོཧལ༹ཾ པཊིཝིནོདེསི. སཱ སེསམངྒལེསུཔི ཏཐཱརཱུཔམེཝ དཱནཾ དཏྭཱ པུཏྟཾ ཝིཛཱཡིཏྭཱ ནཱམགྒཧཎདིཝསེ ‘‘པུཏྟསྶ མེ, བྷནྟེ, སིཀྑཱཔདཱནི དེཐཱ’’ཏི ཐེརཾ ཨཱཧ. ཐེརོ ‘‘ཀིམསྶ ནཱམ’’ནྟི པུཙྪི. ‘‘བྷནྟེ, པུཏྟསྶ མེ པཊིསནྡྷིགྒཧཎཏོ པཊྛཱཡ ཨིམསྨིཾ གེཧེ ཀསྶཙི དུཀྑཾ ནཱམ ན བྷཱུཏཔུབྦཾ, ཏེནེཝསྶ སུཁཀུམཱརོཏི ནཱམཾ བྷཝིསྶཏཱི’’ཏི ཝུཏྟེ ཏདེཝསྶ ནཱམཾ གཧེཏྭཱ སིཀྑཱཔདཱནི ཨདཱསི.

ཏདཱ ཨེཝཉྩསྶ མཱཏུ ‘‘ནཱཧཾ མམ པུཏྟསྶ ཨཛ྄ཛྷཱསཡཾ བྷིནྡིསྶཱམཱི’’ཏི ཙིཏྟཾ ཨུཔྤཛྫི. སཱ ཏསྶ ཀཎྞཝིཛ྄ཛྷནམངྒལཱདཱིསུཔི ཏཐེཝ དཱནཾ ཨདཱསི. ཀུམཱརོཔི སཏྟཝསྶིཀཀཱལེ ‘‘ཨིཙྪཱམཧཾ, ཨམྨ, ཐེརསྶ སནྟིཀེ པབྦཛིཏུ’’ནྟི ཨཱཧ. སཱ ‘‘སཱདྷུ, ཏཱཏ, ནཱཧཾ ཏཝ ཨཛ྄ཛྷཱསཡཾ བྷིནྡིསྶཱམཱི’’ཏི ཐེརཾ ནིམནྟེཏྭཱ བྷོཛེཏྭཱ, ‘‘བྷནྟེ, པུཏྟོ མེ པབྦཛིཏུཾ ཨིཙྪཏི, ཨིམཱཧཾ སཱཡནྷསམཡེ ཝིཧཱརཾ ཨཱནེསྶཱམཱི’’ཏི ཐེརཾ ཨུཡྻོཛེཏྭཱ ཉཱཏཀེ སནྣིཔཱཏེཏྭཱ ‘‘པུཏྟསྶ མེ གིཧིཀཱལེ ཀཏྟབྦཾ ཀིཙྩཾ ཨཛྫེཝ ཀརིསྶཱམཱ’’ཏི ཝཏྭཱ པུཏྟཾ ཨལངྐརིཏྭཱ མཧནྟེན སིརིསོབྷགྒེན ཝིཧཱརཾ ནེཏྭཱ ཐེརསྶ ནིཡྻཱདེསི. ཐེརོཔི ཏཾ, ‘‘ཏཱཏ, པབྦཛྫཱ ནཱམ དུཀྐརཱ ¶ , སཀྑིསྶསི ཨབྷིརམིཏུ’’ནྟི ཝཏྭཱ ‘‘ཀརིསྶཱམི ཝོ, བྷནྟེ, ཨོཝཱད’’ནྟི ཝུཏྟེ ཀམྨཊྛཱནཾ དཏྭཱ པབྦཱཛེསི. མཱཏཱཔིཏརོཔིསྶ པབྦཛྫཱཡ སཀྐཱརཾ ཀརོནྟཱ ཨནྟོཝིཧཱརེཡེཝ སཏྟཱཧཾ བུདྡྷཔྤམུཁསྶ བྷིཀྑུསངྒྷསྶ སཏརསབྷོཛནཾ དཏྭཱ སཱཡཾ ཨཏྟནོ གེཧཾ ཨགམཾསུ. ཨཊྛམེ དིཝསེ སཱརིཔུཏྟཏྠེརོ བྷིཀྑུསངྒྷེ གཱམཾ པཝིཊྛེ ཝིཧཱརེ ཀཏྟབྦཀིཙྩཾ ཀཏྭཱ སཱམཎེརཾ པཏྟཙཱིཝརཾ གཱཧཱཔེཏྭཱ ¶ གཱམཾ པིཎྜཱཡ པཱཝིསི. སཱམཎེརོ ཨནྟརཱམགྒེ མཱཏིཀཱདཱིནི དིསྭཱ པཎྜིཏསཱམཎེརོ ཝིཡ པུཙྪི. ཐེརོཔི ཏསྶ ཏཐེཝ བྱཱཀཱསི. སཱམཎེརོ ཏཱནི ཀཱརཎཱནི སུཏྭཱ ‘‘སཙེ ཏུམྷེ ཨཏྟནོ པཏྟཙཱིཝརཾ གཎྷེཡྻཱཐ, ཨཧཾ ནིཝཏྟེཡྻ’’ནྟི ཝཏྭཱ ཐེརེན ཏསྶ ཨཛ྄ཛྷཱསཡཾ ཨབྷིནྡིཏྭཱ, ‘‘སཱམཎེར, དེཧི མམ པཏྟཙཱིཝར’’ནྟི ¶ པཏྟཙཱིཝརེ གཧིཏེ ཐེརཾ ཝནྡིཏྭཱ ནིཝཏྟམཱནོ, ‘‘བྷནྟེ, མཡ྄ཧཾ ཨཱཧཱརཾ ཨཱཧརམཱནོ སཏརསབྷོཛནཾ ཨཱཧརེཡྻཱཐཱ’’ཏི ཨཱཧ. ཀུཏོ ཏཾ ལབྷིསྶཱམཱིཏི? ཨཏྟནོ པུཉྙེན ཨལབྷནྟོ མམ པུཉྙེན ལབྷིསྶཐ, བྷནྟེཏི. ཨཐསྶ ཐེརོ ཀུཉྩིཀཾ དཏྭཱ གཱམཾ པིཎྜཱཡ པཱཝིསི. སོཔི ཝིཧཱརཾ ཨཱགནྟྭཱ ཐེརསྶ གབྦྷཾ ཝིཝརིཏྭཱ པཝིསིཏྭཱ དྭཱརཾ པིདྷཱཡ ཨཏྟནོ ཀཱཡེ ཉཱཎཾ ཨོཏཱརེཏྭཱ ནིསཱིདི.

ཏསྶ གུཎཏེཛེན སཀྐསྶ ཨཱསནཾ ཨུཎྷཱཀཱརཾ དསྶེསི. སཀྐོ ‘‘ཀིཾ ནུ ཁོ ཨེཏ’’ནྟི ཨོལོཀེནྟོ སཱམཎེརཾ དིསྭཱ ‘‘སུཁསཱམཎེརོ ཨཏྟནོ ཨུཔཛ྄ཛྷཱཡསྶ པཏྟཙཱིཝརཾ དཏྭཱ ‘སམཎདྷམྨཾ ཀརིསྶཱམཱི’ཏི ནིཝཏྟོ, མཡཱ ཏཏྠ གནྟུཾ ཝཊྚཏཱི’’ཏི ཙིནྟེཏྭཱ ཙཏྟཱརོ མཧཱརཱཛེ པཀྐོསཱཔེཏྭཱ ‘‘གཙྪཐ, ཏཱཏཱ, ཝིཧཱརསྶཱུཔཝནེ དུསྶདྡཀེ ¶ སཀུཎེ པལཱཔེཐཱ’’ཏི ཨུཡྻོཛེསི. ཏེ ཏཐཱ ཀཏྭཱ སཱམནྟཱ ཨཱརཀྑཾ གཎྷིཾསུ. ཙནྡིམསཱུརིཡེ ‘‘ཨཏྟནོ ཝིམཱནཱནི གཧེཏྭཱ ཏིཊྛཐཱ’’ཏི ཨཱཎཱཔེསི. ཏེཔི ཏཐཱ ཀརིཾསུ. སཡམྤི ཨཱཝིཉྪནཊྛཱནེ ཨཱརཀྑཾ གཎྷི. ཝིཧཱརོ སནྣིསིནྣོ ནིརཝོ ཨཧོསི. སཱམཎེརོ ཨེཀགྒཙིཏྟེན ཝིཔསྶནཾ ཝཌྜྷེཏྭཱ ཏཱིཎི མགྒཕལཱནི པཱཔུཎི. ཐེརོ ‘‘སཱམཎེརེན ‘སཏརསབྷོཛནཾ ཨཱཧརེཡྻཱཐཱ’ཏི ཝུཏྟཾ, ཀསྶ ནུ ཁོ གྷརེ སཀྐཱ ལདྡྷུ’’ནྟི ཨོལོཀེནྟོ ཨེཀཾ ཨཛ྄ཛྷཱསཡསམྤནྣཾ ཨུཔཊྛཱཀཏུལཾ དིསྭཱ ཏཏྠ གནྟྭཱ, ‘‘བྷནྟེ, སཱདྷུ ཝོ ཀཏཾ ཨཛྫ ཨིདྷཱགཙྪནྟེཧཱི’’ཏི ཏེཧི ཏུཊྛམཱནསེཧི པཏྟཾ གཧེཏྭཱ ནིསཱིདཱཔེཏྭཱ ཡཱགུཁཛྫཀཾ དཏྭཱ ཡཱཝ བྷཏྟཀཱལཾ དྷམྨཀཐཾ ཡཱཙིཏོ ཏེསཾ སཱརཎཱིཡདྷམྨཀཐཾ ཀཐེཏྭཱ ཀཱལཾ སལླཀྑེཏྭཱ དེསནཾ ནིཊྛཱཔེསི. ཨཐསྶ སཏརསབྷོཛནཾ དཏྭཱ ཏཾ ཨཱདཱཡ གནྟུཀཱམཾ ཐེརཾ དིསྭཱ ‘‘བྷུཉྫཐ, བྷནྟེ, ཨཔརམྤི ཏེ དསྶཱམཱ’’ཏི ཐེརཾ བྷོཛེཏྭཱ པུན པཏྟཔཱུརཾ ཨདཾསུ. ཐེརོ ཏཾ ཨཱདཱཡ ‘‘སཱམཎེརོ མེ ཚཱཏོ’’ཏི ཏུརིཏཏུརིཏོ ¶ ཝིཧཱརཾ པཱཡཱསི. ཏཾ དིཝསཾ སཏྠཱ པཱཏོཝ ནིཀྑམིཏྭཱ གནྡྷཀུཊིཡཾ ནིསིནྣོཝ ཨཱཝཛྫེསི – ‘‘ཨཛྫ སུཁསཱམཎེརོ ཨུཔཛ྄ཛྷཱཡསྶ པཏྟཙཱིཝརཾ དཏྭཱ ‘སམཎདྷམྨཾ ཀརིསྶཱམཱི’ཏི ནིཝཏྟོ, ནིཔྥནྣཾ ནུ ཁོ ཏསྶ ཀིཙྩ’’ནྟི. སོ ཏིཎྞཾཡེཝ མགྒཕལཱནཾ པཏྟབྷཱཝཾ དིསྭཱ ཨུཏྟརིཔི ཨུཔདྷཱརེནྟོ ‘‘སཀྑིསྶཏཱཡཾ ཨཛྫ ཨརཧཏྟཾ པཱཔུཎིཏུཾ ¶ , སཱརིཔུཏྟོ པན ‘སཱམཎེརོ མེ ཚཱཏོ’ཏི ཝེགེན བྷཏྟཾ ཨཱདཱཡ ནིཀྑམཏི, སཙེ ཨིམསྨིཾ ཨརཧཏྟཾ ཨཔྤཏྟེ བྷཏྟཾ ཨཱཧརིསྶཏི, ཨིམསྶ ཨནྟརཱཡོ བྷཝིསྶཏི, མཡཱ གནྟྭཱ དྭཱརཀོཊྛཀེ ཨཱརཀྑཾ གཎྷིཏུཾ ཝཊྚཏཱི’’ཏི ཙིནྟེཏྭཱ གནྡྷཀུཊིཏོ ནིཀྑམིཏྭཱ དྭཱརཀོཊྛཀེ ཋཏྭཱ ཨཱརཀྑཾ གཎྷི.

ཐེརོཔི བྷཏྟཾ ཨཱཧརི. ཨཐ ནཾ ཧེཊྛཱ ཝུཏྟནཡེནེཝ ཙཏྟཱརོ པཉྷེ པུཙྪི. པཉྷཝིསྶཛྫནཱཝསཱནེ སཱམཎེརོ ཨརཧཏྟཾ པཱཔུཎི. སཏྠཱ ཐེརཾ ཨཱམནྟེཏྭཱ ‘‘གཙྪ, སཱརིཔུཏྟ, སཱམཎེརསྶ ¶ ཏེ བྷཏྟཾ དེཧཱི’’ཏི ཨཱཧ. ཐེརོ གནྟྭཱ དྭཱརཾ ཨཱཀོཊེསི. སཱམཎེརོཔི ནིཀྑམིཏྭཱ ཨུཔཛ྄ཛྷཱཡསྶ ཝཏྟཾ ཀཏྭཱ ‘‘བྷཏྟཀིཙྩཾ ཀརོཧཱི’’ཏི ཝུཏྟེ ཐེརསྶ བྷཏྟེན ཨནཏྠིཀབྷཱཝཾ ཉཏྭཱ སཏྟཝསྶིཀཀུམཱརོ ཏངྑཎཉྙེཝ ཨརཧཏྟཾ པཏྟོ ནཱིཙཱསནཊྛཱནཾ པཙྩཝེཀྑནྟོ བྷཏྟཀིཙྩཾ ཀཏྭཱ པཏྟཾ དྷོཝི. ཏསྨིཾ ཀཱལེ ཙཏྟཱརོ མཧཱརཱཛཱནོ ཨཱརཀྑཾ ཝིསྶཛྫེསུཾ. ཙནྡིམསཱུརིཡཱཔི ཝིམཱནཱནི མུཉྩིཾསུ. སཀྐོཔི ཨཱཝིཉྪནཊྛཱནེ ཨཱརཀྑཾ ཝིསྶཛྫེསི. སཱུརིཡོ ནབྷམཛ྄ཛྷཾ ཨཏིཀྐནྟོཡེཝ པཉྙཱཡི. བྷིཀྑཱུ ‘‘སཱཡནྷོ པཉྙཱཡཏི, སཱམཎེརེན ཙ ཨིདཱནེཝ བྷཏྟཀིཙྩཾ ཀཏཾ, ཀིཾ ནུ ཁོ ཨཛྫ པུབྦཎྷོ བལཝཱ ཛཱཏོ, སཱཡནྷོ མནྡོ’’ཏི ཝདིཾསུ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ, ‘‘བྷནྟེ, ཨཛྫ པུབྦཎྷོ བལཝཱ ཛཱཏོ, སཱཡནྷོ མནྡོ, སཱམཎེརེན ¶ ཙ ཨིདཱནེཝ བྷཏྟཀིཙྩཾ ཀཏཾ, ཨཐ ཙ པན སཱུརིཡོ ནབྷམཛ྄ཛྷཾ ཨཏིཀྐནྟོཡེཝ པཉྙཱཡཏཱི’’ཏི ཝུཏྟེ, ‘‘བྷིཀྑཝེ, ཨེཝམེཝཾ ཧོཏི པུཉྙཝནྟཱནཾ སམཎདྷམྨཀརཎཀཱལེ. ཨཛྫ ཧི ཙཏྟཱརོ མཧཱརཱཛཱནོ སཱམནྟཱ ཨཱརཀྑཾ གཎྷིཾསུ, ཙནྡིམསཱུརིཡཱ ཝིམཱནཱནི གཧེཏྭཱ ཨཊྛཾསུ, སཀྐོ ཨཱཝིཉྪནཀེ ཨཱརཀྑཾ གཎྷི, ཨཧམྤི དྭཱརཀོཊྛཀེ ཨཱརཀྑཾ གཎྷིཾ, ཨཛྫ སུཁསཱམཎེརོ མཱཏིཀཱཡ ཨུདཀཾ ཧརནྟེ, ཨུསུཀཱརེ ཨུསུཾ ཨུཛུཾ ཀརོནྟེ ¶ , ཏཙྪཀེ ཙཀྐཱདཱིནི ཀརོནྟེ དིསྭཱ ཨཏྟཱནཾ དམེཏྭཱ ཨརཧཏྟཾ པཏྟོ’’ཏི ཝཏྭཱ ཨིམཾ གཱཐམཱཧ –

‘‘ཨུདཀཉྷི ནཡནྟི ནེཏྟིཀཱ, ཨུསུཀཱརཱ ནམཡནྟི ཏེཛནཾ;

དཱརུཾ ནམཡནྟི ཏཙྪཀཱ, ཨཏྟཱནཾ དམཡནྟི སུབྦཏཱ’’ཏི.

ཏཏྠ སུབྦཏཱཏི སུཝདཱ, སུཁེན ཨོཝདིཏབྦཱ ཨནུསཱསིཏབྦཱཏི ཨཏྠོ. སེསཾ ཧེཊྛཱ ཝུཏྟནཡམེཝ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཀོ ¶ ¶ ¶ ནུ ཧཱསོ ཀིམཱནནྡོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཝིསཱཁཱཡ སཧཱཡིཀཱཡོ ཨཱརབྦྷ ཀཐེསི.

སཱཝཏྠིཡཾ ཀིར པཉྩསཏཱ ཀུལཔུཏྟཱ ‘‘ཨེཝཾ ཨིམཱ ཨཔྤམཱདཝིཧཱརིནིཡོ བྷཝིསྶནྟཱི’’ཏི ཨཏྟནོ ཨཏྟནོ བྷརིཡཱཡོ ཝིསཱཁཾ མཧཱཨུཔཱསིཀཾ སམྤཊིཙྪཱཔེསུཾ. ཏཱ ཨུཡྻཱནཾ ཝཱ ཝིཧཱརཾ ཝཱ གཙྪནྟིཡོ ཏཱཡ སདྡྷིཾཡེཝ གཙྪནྟི. ཏཱ ཨེཀསྨིཾ ཀཱལེ ‘‘སཏྟཱཧཾ སུརཱཚཎོ བྷཝིསྶཏཱི’’ཏི ཚཎེ སངྒྷུཊྛེ ཨཏྟནོ ཨཏྟནོ སཱམིཀཱནཾ སུརཾ པཊིཡཱདེསུཾ. ཏེ སཏྟཱཧཾ སུརཱཚཎཾ ཀཱིལི༹ཏྭཱ ཨཊྛམེ དིཝསེ ཀམྨནྟབྷེརིཡཱ ནིཀྑནྟཱཡ ཀམྨནྟེ ཨགམཾསུ. ཏཱཔི ཨིཏྠིཡོ ‘‘མཡཾ སཱམིཀཱནཾ སམྨུཁཱ སུརཾ པཱཏུཾ ན ལབྷིམྷཱ, ཨཝསེསཱ སུརཱ ཙ ཨཏྠི, ཨིདཾ ཡཐཱ ཏེ ན ཛཱནནྟི, ཏཐཱ པིཝིསྶཱམཱ’’ཏི ཝིསཱཁཱཡ སནྟིཀཾ གནྟྭཱ ‘‘ཨིཙྪཱམ, ཨཡྻེ, ཨུཡྻཱནཾ དཊྛུ’’ནྟི ཝཏྭཱ ‘‘སཱདྷུ, ཨམྨཱ, ཏེན ཧི ཀཏྟབྦཀིཙྩཱནི ཀཏྭཱ ནིཀྑམཐཱ’’ཏི ཝུཏྟེ ཏཱཡ སདྡྷིཾ གནྟྭཱ པཊིཙྪནྣཱཀཱརེན ¶ སུརཾ ནཱིཧརཱཔེཏྭཱ ཨུཡྻཱནེ པིཝིཏྭཱ མཏྟཱ ཝིཙརིཾསུ. ཝིསཱཁཱཔི ‘‘ཨཡུཏྟཾ ཨིམཱཧི ཀཏཾ, ཨིདཱནི མཾ ‘སམཎསྶ གོཏམསྶ སཱཝིཀཱ ཝིསཱཁཱ སུརཾ པིཝིཏྭཱ ཝིཙརཏཱི’ཏི ཏིཏྠིཡཱཔི གརཧིསྶནྟཱི’’ཏི ཙིནྟེཏྭཱ ཏཱ ཨིཏྠིཡོ ཨཱཧ – ‘‘ཨམྨཱ ཨཡུཏྟཾ ཝོ ཀཏཾ, མམཔི ཨཡསོ ཨུཔྤཱདིཏོ, སཱམིཀཱཔི ཝོ ཀུཛ྄ཛྷིསྶནྟི, ཨིདཱནི ཀིཾ ཀརིསྶཐཱ’’ཏི. གིལཱནཱལཡཾ དསྶཡིསྶཱམ, ཨཡྻེཏི. ཏེན ཧི པཉྙཱཡིསྶཐ སཀེན ཀམྨེནཱཏི. ཏཱ གེཧཾ གནྟྭཱ གིལཱནཱལཡཾ ཀརིཾསུ. ཨཐ ཏཱསཾ སཱམིཀཱ ‘‘ཨིཏྠནྣཱམཱ ཙ ཨིཏྠནྣཱམཱ ཙ ཀཧ’’ནྟི པུཙྪིཏྭཱ ‘‘གིལཱནཱ’’ཏི སུཏྭཱ ‘‘ཨདྡྷཱ ཨེཏཱཧི ཨཝསེསསུརཱ པཱིཏཱ བྷཝིསྶནྟཱི’’ཏི སལླཀྑེཏྭཱ ཏཱ པོཐེཏྭཱ ཨནཡབྱསནཾ པཱཔེསུཾ. ཏཱ ཨཔརསྨིམྤི ཚཎཝཱརེ ཏཐེཝ སུརཾ པིཝིཏུཀཱམཱ ཝིསཱཁཾ ཨུཔསངྐམིཏྭཱ, ‘‘ཨཡྻེ, ཨུཡྻཱནཾ ནོ ནེཧཱི’’ཏི ཝཏྭཱ ‘‘པུབྦེཔི མེ ཏུམྷེཧི ཨཡསོ ཨུཔྤཱདིཏོ, གཙྪཐ, ན ཝོ ཨཧཾ ནེསྶཱམཱི’’ཏི ཏཱཡ པཊིཀྑིཏྟཱ ‘‘ཨིདཱནི ཨེཝཾ ན ཀརིསྶཱམཱ’’ཏི སམྨནྟཡིཏྭཱ པུན ཏཾ ཨུཔསངྐམིཏྭཱ ཨཱཧཾསུ, ‘‘ཨཡྻེ ¶ , བུདྡྷཔཱུཛཾ ཀཱཏུཀཱམཱམྷཱ, ཝིཧཱརཾ ནོ ནེཧཱི’’ཏི. ཨིདཱནི ཨམྨཱ ཡུཛྫཏི, གཙྪཐ, པརིཝཙྪཾ ཀརོཐཱཏི. ཏཱ ཙངྐོཊཀེཧི གནྡྷམཱལཱདཱིནི གཱཧཱཔེཏྭཱ སུརཱཔུཎྞེ མུཊྛིཝཱརཀེ ¶ ཧཏྠེཧི ཨོལམྦེཏྭཱ མཧཱཔཊེ པཱརུཔིཏྭཱ ཝིསཱཁཾ ཨུཔསངྐམིཏྭཱ ཏཱཡ སདྡྷིཾ ཝིཧཱརཾ པཝིསམཱནཱ ཨེཀམནྟཾ གནྟྭཱ མུཊྛིཝཱརཀེཧེཝ སུརཾ པིཝིཏྭཱ ཝཱརཀེ ཚཌྜེཏྭཱ དྷམྨསབྷཱཡཾ སཏྠུ པུརཏོ ནིསཱིདིཾསུ ¶ .

ཝིསཱཁཱ ‘‘ཨིམཱསཾ, བྷནྟེ, དྷམྨཾ ཀཐེཐཱ’’ཏི ཨཱཧ. ཏཱཔི མདཝེགེན ཀམྤམཱནསརཱིརཱ ‘‘ཨིཙྩཱམ, གཱཡཱམཱ’’ཏི ཙིཏྟཾ ཨུཔྤཱདེསུཾ. ཨཐེཀཱ མཱརཀཱཡིཀཱ དེཝཏཱ ‘‘ཨིམཱསཾ སརཱིརེ ཨདྷིམུཙྩིཏྭཱ སམཎསྶ གོཏམསྶ པུརཏོ ཝིཔྤཀཱརཾ དསྶེསྶཱམཱི’’ཏི ཙིནྟེཏྭཱ ཏཱསཾ སརཱིརེ ཨདྷིམུཙྩི. ཏཱསུ ཨེཀཙྩཱ སཏྠུ པུརཏོ པཱཎིཾ པཧརིཏྭཱ ཧསིཏུཾ, ཨེཀཙྩཱ ནཙྩིཏུཾ ཨཱརབྷིཾསུ. སཏྠཱ ‘‘ཀིཾ ཨིད’’ནྟི ཨཱཝཛྫེནྟོ ཏཾ ཀཱརཎཾ ཉཏྭཱ ‘‘ན ཨིདཱནི མཱརཀཱཡིཀཱནཾ ཨོཏཱརཾ ལབྷིཏུཾ དསྶཱམི. ན ཧི མཡཱ ཨེཏྟཀཾ ཀཱལཾ པཱརམིཡོ པཱུརེནྟེན མཱརཀཱཡིཀཱནཾ ཨོཏཱརལཱབྷཏྠཱཡ པཱུརིཏཱ’’ཏི ཏཱ སཾཝེཛེཏུཾ བྷམུཀལོམཏོ རསྨིཡོ ཝིསྶཛྫེསི, ཏཱཝདེཝ ཨནྡྷཀཱརཏིམིསཱ ཨཧོསི. ཏཱ བྷཱིཏཱ ཨཧེསུཾ མརཎབྷཡཏཛྫིཏཱ. ཏེན ཏཱསཾ ཀུཙྪིཡཾ སུརཱ ཛཱིརི. སཏྠཱ ནིསིནྣཔལླངྐེ ཨནྟརཧིཏོ སིནེརུམུདྡྷནི ཋཏྭཱ ཨུཎྞཱལོམཏོ རསྨིཾ ཝིསྶཛྫེསི, ཏངྑཎཾཡེཝ ཙནྡསཧསྶུགྒམནཾ ཝིཡ ཨཧོསི. ཨཐ སཏྠཱ ཏཱ ཨིཏྠིཡོ ཨཱམནྟེཏྭཱ ‘‘ཏུམྷེཧི མམ སནྟིཀཾ ཨཱགཙྪམཱནཱཧི པམཏྟཱཧི ཨཱགནྟུཾ ན ཝཊྚཏི. ཏུམྷཱཀཉྷི པམཱདེནེཝ མཱརཀཱཡིཀཱ དེཝཏཱ ཨོཏཱརཾ ལབྷིཏྭཱ ཏུམྷེ ཧསཱདཱིནཾ ཨཀརཎཊྛཱནེ ཧསཱདཱིནི ཀཱརཱཔེསི, ཨིདཱནི ཏུམྷེཧི རཱགཱདཱིནཾ ¶ ཨགྒཱིནཾ ནིབྦཱཔནཏྠཱཡ ཨུསྶཱཧཾ ཀཱཏུཾ ཝཊྚཏཱི’’ཏི ཝཏྭཱ ཨིམཾ གཱཐམཱཧ –

‘‘ཀོ ནུ ཧཱསོ ཀིམཱནནྡོ, ནིཙྩཾ པཛྫལིཏེ སཏི;

ཨནྡྷཀཱརེན ཨོནདྡྷཱ, པདཱིཔཾ ན གཝེསཐཱ’’ཏི.

ཏཏྠ ཨཱནནྡོཏི ཏུཊྛི. ཨིདཾ ཝུཏྟཾ ཧོཏི – ཨིམསྨིཾ ལོཀསནྣིཝཱསེ རཱགཱདཱིཧི ཨེཀཱདསཧི ཨགྒཱིཧི ནིཙྩཾ པཛྫལིཏེ སཏི ཀོ ནུ ཏུམྷཱཀཾ ཧཱསོ ཝཱ ¶ ཏུཊྛི ཝཱ? ནནུ ཨེས ཨཀཏྟབྦརཱུཔོཡེཝ. ཨཊྛཝཏྠུཀེན ཧི ཨཝིཛྫཱནྡྷཀཱརེན ཨོནདྡྷཱ ཏུམྷེ ཏསྶེཝ ཨནྡྷཀཱརསྶ ཝིདྷམནཏྠཱཡ ཀིཾ ཀཱརཎཱ ཉཱཎཔྤདཱིཔཾ ན གཝེསཐ ན ཀརོཐཱཏི.

དེསནཱཝསཱནེ པཉྩསཏཱཔི ཏཱ ཨིཏྠིཡོ སོཏཱཔཏྟིཕལེ པཏིཊྛཧིཾསུ.

སཏྠཱ ཏཱསཾ ཨཙལསདྡྷཱཡ པཏིཊྛིཏབྷཱཝཾ ཉཏྭཱ སིནེརུམཏྠཀཱ ཨོཏརིཏྭཱ བུདྡྷཱསནེ ནིསཱིདི. ཨཐ ནཾ ཝིསཱཁཱ ཨཱཧ – ‘‘བྷནྟེ, སུརཱ ནཱམེསཱ པཱཔིཀཱ. ཨེཝརཱུཔཱ ཧི ནཱམ ཨིམཱ ¶ ཨིཏྠིཡོ ཏུམྷཱདིསསྶ བུདྡྷསྶ པུརཏོ ནིསཱིདིཏྭཱ ཨིརིཡཱཔཐམཏྟམྤི སཎྛཱཔེཏུཾ ཨསཀྐོནྟིཡོ ཨུཊྛཱཡ པཱཎིཾ པཧརིཏྭཱ ཧསནགཱིཏནཙྩཱདཱིནི ཨཱརབྷིཾསཱུ’’ཏི. སཏྠཱ ‘‘ཨཱམ, ཝིསཱཁེ, པཱཔིཀཱ ཨེཝ ཨེསཱ སུརཱ ནཱམ. ཨེཏཉྷི ནིསྶཱཡ ཨནེཀེ སཏྟཱ ཨནཡབྱསནཾ པཏྟཱ’’ཏི ཝཏྭཱ ‘‘ཀདཱ པནེསཱ, བྷནྟེ, ཨུཔྤནྣཱ’’ཏི ཝུཏྟེ ཏསྶཱ ཨུཔྤཏྟིཾ ཝིཏྠཱརེན ཀཐེཏུཾ ཨཏཱིཏཾ ཨཱཧརིཏྭཱ ཀུམྦྷཛཱཏཀཾ (ཛཱ. ༡.༡༦.༣༣ ཨཱདཡོ) ཀཐེསཱིཏི.

པསྶ ¶ ཙིཏྟཀཏནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ སིརིམཾ ཨཱརབྦྷ ཀཐེསི.

སཱ ཀིར རཱཛགཧེ ཨབྷིརཱུཔཱ གཎིཀཱ. ཨེཀསྨིཾ པན ཨནྟོཝསྶེ སུམནསེཊྛིཔུཏྟསྶ བྷརིཡཱཡ པུཎྞཀསེཊྛིསྶ དྷཱིཏཱཡ ཨུཏྟརཱཡ ནཱམ ཨུཔཱསིཀཱཡ ཨཔརཛ྄ཛྷིཏྭཱ ཏཾ པསཱདེཏུཀཱམཱ ཏསྶཱ གེཧེ བྷིཀྑུསངྒྷེན སདྡྷིཾ ཀཏབྷཏྟཀིཙྩཾ སཏྠཱརཾ ཁམཱཔེཏྭཱ ཏཾ དིཝསཾ དསབལསྶ བྷཏྟཱནུམོདནཾ སུཏྭཱ –

‘‘ཨཀྐོདྷེན ཛིནེ ཀོདྷཾ, ཨསཱདྷུཾ སཱདྷུནཱ ཛིནེ;

ཛིནེ ཀདརིཡཾ དཱནེན, སཙྩེནཱལིཀཝཱདིན’’ནྟི. (ཛཱ. ༡.༢.༢; དྷ. པ. ༢༢༣) –

གཱཐཱཔརིཡོསཱནེ ¶ སོཏཱཔཏྟིཕལཾ པཱཔུཎི. ཨཡམེཏྠ སངྑེཔོ, ཝིཏྠཱརཀཐཱ པན ཀོདྷཝགྒེ ཨནུམོདནགཱཐཱཝཎྞནཱཡམེཝ ཨཱཝིབྷཝིསྶཏི. ཨེཝཾ སོཏཱཔཏྟིཕལཾ པཏྟཱ པན སིརིམཱ དསབལཾ ནིམནྟེཏྭཱ པུནདིཝསེ མཧཱདཱནཾ དཏྭཱ སངྒྷསྶ ཨཊྛཀབྷཏྟཾ ནིབདྡྷཾ དཱཔེསི. ཨཱདིཏོ པཊྛཱཡ ནིབདྡྷཾ ཨཊྛ བྷིཀྑཱུ གེཧཾ གཙྪནྟི. ‘‘སཔྤིཾ གཎྷཐ, ཁཱིརཾ གཎྷཐཱ’’ཏིཨཱདཱིནི ཝཏྭཱ ཏེསཾ པཏྟེ པཱུརེཏི. ཨེཀེན ལདྡྷཾ ཏིཎྞམྤི ཙཏུནྣམྤི པཧོཏི. དེཝསིཀཾ སོལ༹སཀཧཱཔཎཔརིབྦཡེན པིཎྜཔཱཏོ དཱིཡཏི. ཨཐེཀདིཝསཾ ཨེཀོ བྷིཀྑུ ཏསྶཱ གེཧེ ཨཊྛཀབྷཏྟཾ བྷུཉྫིཏྭཱ ཏིཡོཛནམཏྠཀེ ཨེཀཾ ཝིཧཱརཾ ཨགམཱསི. ཨཐ ནཾ སཱཡཾ ཐེརུཔཊྛཱནེ ནིསིནྣཾ པུཙྪིཾསུ – ‘‘ཨཱཝུསོ, ཀཧཾ བྷིཀྑཾ ¶ གཧེཏྭཱ ཨཱགཏོསཱི’’ཏི. སིརིམཱཡ ཨཊྛཀབྷཏྟཾ མེ བྷུཏྟནྟི. མནཱཔཾ ཀཏྭཱ དེཏི, ཨཱཝུསོཏི. ‘‘ན སཀྐཱ ཏསྶཱ བྷཏྟཾ ཝཎྞེཏུཾ, ཨཏིཝིཡ པཎཱིཏཾ ཀཏྭཱ དེཏི, ཨེཀེན ¶ ལདྡྷཾ ཏིཎྞམྤི ཙཏུནྣམྤི པཧོཏི, ཏསྶཱ པན དེཡྻདྷམྨཏོཔི དསྶནམེཝ ཨུཏྟརིཏརཾ. སཱ ཧི ཨིཏྠཱི ཨེཝརཱུཔཱ ཙ ཨེཝརཱུཔཱ ཙཱ’’ཏི ཏསྶཱ གུཎེ ཝཎྞེསི.

ཨཐེཀོ བྷིཀྑུ ཏསྶཱ གུཎཀཐཾ སུཏྭཱ ཨདསྶནེནེཝ སིནེཧཾ ཨུཔྤཱདེཏྭཱ ‘‘མཡཱ གནྟྭཱ ཏཾ དཊྛུཾ ཝཊྚཏཱི’’ཏི ཨཏྟནོ ཝསྶགྒཾ ཀཐེཏྭཱ ཏཾ བྷིཀྑུཾ ཋིཏིཀཾ པུཙྪིཏྭཱ ‘‘སྭེ, ཨཱཝུསོ, ཏསྨིཾ གེཧེ ཏྭཾ སངྒྷཏྠེརོ ཧུཏྭཱ ཨཊྛཀབྷཏྟཾ ལབྷིསྶསཱི’’ཏི སུཏྭཱ ཏངྑཎཉྙེཝ པཏྟཙཱིཝརཾ ཨཱདཱཡ པཀྐནྟོཔི པཱཏོཝ ཨརུཎེ ཨུགྒཏེ སལཱཀགྒཾ པཝིསིཏྭཱ ཋིཏོ སངྒྷཏྠེརོ ཧུཏྭཱ ཏསྶཱ གེཧེ ཨཊྛཀབྷཏྟཾ ལབྷི. ཡོ པན བྷིཀྑུ ཧིཡྻོ བྷུཉྫིཏྭཱ པཀྐཱམི, ཏསྶ གཏཝེལཱཡམེཝ ཨསྶཱ སརཱིརེ རོགོ ཨུཔྤཛྫི. ཏསྨཱ སཱ ཨཱབྷརཎཱནི ཨོམུཉྩིཏྭཱ ནིཔཛྫི. ཨཐསྶཱ དཱསིཡོ ཨཊྛཀབྷཏྟཾ ལབྷིཏྭཱ ཨཱགཏེ བྷིཀྑཱུ དིསྭཱ ཨཱརོཙེསུཾ. སཱ སཧཏྠཱ པཏྟེ གཧེཏྭཱ ནིསཱིདཱཔེཏུཾ ཝཱ པརིཝིསིཏུཾ ཝཱ ཨསཀྐོནྟཱི དཱསིཡོ ཨཱཎཱཔེསི – ‘‘ཨམྨཱ པཏྟེ གཧེཏྭཱ, ཨཡྻེ, ནིསཱིདཱཔེཏྭཱ ཡཱགུཾ པཱཡེཏྭཱ ཁཛྫཀཾ དཏྭཱ བྷཏྟཝེལཱཡ ¶ པཏྟེ པཱུརེཏྭཱ དེཐཱ’’ཏི. ཏཱ ‘‘སཱདྷུ, ཨཡྻེ’’ཏི བྷིཀྑཱུ པཝེསེཏྭཱ ཡཱགུཾ པཱཡེཏྭཱ ཁཛྫཀཾ དཏྭཱ བྷཏྟཝེལཱཡ བྷཏྟསྶ པཏྟེ པཱུརེཏྭཱ ཏསྶཱ ཨཱརོཙཡིཾསུ. སཱ ‘‘མཾ པརིགྒཧེཏྭཱ ནེཐ, ཨཡྻེ, ཝནྡིསྶཱམཱི’’ཏི ཝཏྭཱ ཏཱཧི པརིགྒཧེཏྭཱ བྷིཀྑཱུནཾ སནྟིཀཾ ནཱིཏཱ ཝེདྷམཱནེན སརཱིརེན བྷིཀྑཱུ ཝནྡི. སོ བྷིཀྑུ ཏཾ ཨོལོཀེཏྭཱ ¶ ཙིནྟེསི – ‘‘གིལཱནཱཡ ཏཱཝ ཨེཝརཱུཔཱ ཨཡཾ ཨེཏིསྶཱ རཱུཔསོབྷཱ, ཨརོགཀཱལེ པན སབྦཱབྷརཎཔཊིམཎྜིཏཱཡ ཨིམིསྶཱ ཀཱིདིསཱི རཱུཔསམྤཏྟཱི’’ཏི. ཨཐསྶ ཨནེཀཝསྶཀོཊིསནྣིཙིཏོ ཀིལེསོ སམུདཱཙརི, སོ ཨཉྙཱཎཱི ཧུཏྭཱ བྷཏྟཾ བྷུཉྫིཏུཾ ཨསཀྐོནྟོ པཏྟམཱདཱཡ ཝིཧཱརཾ གནྟྭཱ པཏྟཾ པིདྷཱཡ ཨེཀམནྟེ ཋཔེཏྭཱ ཙཱིཝརཾ པཏྠརིཏྭཱ ནིཔཛྫི.

ཨཐ ནཾ ཨེཀོ སཧཱཡཀོ བྷིཀྑུ ཡཱཙནྟོཔི བྷོཛེཏུཾ ནཱསཀྑི. སོ ཚིནྣབྷཏྟོ ཨཧོསི. ཏཾ དིཝསམེཝ སཱཡནྷསམཡེ སིརིམཱ ཀཱལམཀཱསི. རཱཛཱ སཏྠུ སཱསནཾ པེསེསི – ‘‘བྷནྟེ, ཛཱིཝཀསྶ ཀནིཊྛབྷགིནཱི, སིརིམཱ, ཀཱལམཀཱསཱི’’ཏི. སཏྠཱ ཏཾ སུཏྭཱ རཉྙོ སཱསནཾ པཧིཎི ‘‘སིརིམཱཡ ཛྷཱཔནཀིཙྩཾ ནཏྠི, ཨཱམཀསུསཱནེ ཏཾ ཡཐཱ ཀཱཀསུནཁཱདཡོ ན ཁཱདནྟི, ཏཐཱ ནིཔཛྫཱཔེཏྭཱ རཀྑཱཔེཐཱ’’ཏི. རཱཛཱཔི ཏཐཱ ཨཀཱསི. པཊིཔཱཊིཡཱ ཏཡོ དིཝསཱ ཨཏིཀྐནྟཱ, ཙཏུཏྠེ དིཝསེ སརཱིརཾ ཨུདྡྷུམཱཡི, ནཝཧི ཝཎམུཁེཧི པུལ༹ཝཱ པགྒྷརིཾསུ ¶ , སཀལསརཱིརཾ བྷིནྣཾ སཱལིབྷཏྟཙཱཊི ཝིཡ ཨཧོསི. རཱཛཱ ནགརེ བྷེརིཾ ཙརཱཔེསི – ‘‘ཋཔེཏྭཱ གེཧརཀྑཀེ དཱརཀེ སིརིམཱཡ དསྶནཏྠཾ ཨནཱགཙྪནྟཱནཾ ཨཊྛ ཀཧཱཔཎཱནི དཎྜོ’’ཏི. སཏྠུ སནྟི ཀཉྩ པེསེསི – ‘‘བུདྡྷཔྤམུཁོ ཀིར བྷིཀྑུསངྒྷོ སིརིམཱཡ དསྶནཏྠཾ ཨཱགཙྪཏཱུ’’ཏི. སཏྠཱ བྷིཀྑཱུནཾ ཨཱརོཙེསི – ‘‘སིརིམཱཡ དསྶནཏྠཾ གམིསྶཱམཱ’’ཏི. སོཔི དཧརབྷིཀྑུ ཙཏྟཱརོ ¶ དིཝསེ ཀསྶཙི ཝཙནཾ ཨགྒཧེཏྭཱ ཚིནྣབྷཏྟོཝ ནིཔཛྫི. པཏྟེ བྷཏྟཾ པཱུཏིཀཾ ཛཱཏཾ, པཏྟེ མལཾ ཨུཊྛཧི. ཨཐ ནཾ སོ སཧཱཡཀོ བྷིཀྑུ ཨུཔསངྐམིཏྭཱ, ‘‘ཨཱཝུསོ, སཏྠཱ སིརིམཱཡ དསྶནཏྠཾ གཙྪཏཱི’’ཏི ཨཱཧ. སོ ཏཐཱ ཚཱཏཛ྄ཛྷཏྟོཔི ‘‘སིརིམཱ’’ཏི ཝུཏྟཔདེཡེཝ སཧསཱ ཨུཊྛཧིཏྭཱ ‘‘ཀིཾ བྷཎསཱི’’ཏི ཨཱཧ. ‘‘སཏྠཱ སིརིམཾ དཊྛུཾ གཙྪཏི, ཏྭམྤི གམིསྶསཱི’’ཏི ཝུཏྟེ, ‘‘ཨཱམ, གམིསྶཱམཱི’’ཏི བྷཏྟཾ ཚཌྜེཏྭཱ པཏྟཾ དྷོཝིཏྭཱ ཐཝིཀཱཡ པཀྑིཔིཏྭཱ བྷིཀྑུསངྒྷེན སདྡྷིཾ ཨགམཱསི. སཏྠཱ བྷིཀྑུསངྒྷཔརིཝུཏོ ཨེཀཔསྶེ ཨཊྛཱསི, བྷིཀྑུནིསངྒྷོཔི རཱཛཔརིསཱཔི ཨུཔཱསཀཔརིསཱཔི ཨུཔཱསིཀཱཔརིསཱཔི ཨེཀེཀཔསྶེ ཨཊྛཾསུ ¶ .

སཏྠཱ རཱཛཱནཾ པུཙྪི – ‘‘ཀཱ ཨེསཱ, མཧཱརཱཛོ’’ཏི. བྷནྟེ, ཛཱིཝཀསྶ བྷགིནཱི, སིརིམཱ, ནཱམཱཏི. སིརིམཱ, ཨེསཱཏི. ཨཱམ, བྷནྟེཏི. ཏེན ¶ ཧི ནགརེ བྷེརིཾ ཙརཱཔེཧི ‘‘སཧསྶཾ དཏྭཱ སིརིམཾ གཎྷནྟཱུ’’ཏི. རཱཛཱ ཏཐཱ ཀཱརེསི. ཨེཀོཔི ‘ཧ’ནྟི ཝཱ ‘ཧུ’ནྟི ཝཱ ཝདནྟོ ནཱམ ནཱཧོསི. རཱཛཱ སཏྠུ ཨཱརོཙེསི – ‘‘ན གཎྷནྟི, བྷནྟེ’’ཏི. ཏེན ཧི, མཧཱརཱཛ, ཨགྒྷཾ ཨོཧཱརེཧཱིཏི. རཱཛཱ ‘‘པཉྩསཏཱནི དཏྭཱ གཎྷནྟཱུ’’ཏི བྷེརིཾ ཙརཱཔེཏྭཱ ཀཉྩི གཎྷནཀཾ ཨདིསྭཱ ‘‘ཨཌྜྷཏེཡྻཱནི སཏཱནི, དྭེ སཏཱནི, སཏཾ, པཎྞཱསཾ, པཉྩཝཱིསཏི ཀཧཱཔཎེ, དས ཀཧཱཔཎེ, པཉྩ ཀཧཱཔཎེ, ཨེཀཾ ཀཧཱཔཎཾ ཨཌྜྷཾ, པཱདཾ, མཱསཀཾ, ཀཱཀཎིཀཾ དཏྭཱ སིརིམཾ གཎྷནྟཱུ’’ཏི བྷེརིཾ ཙརཱཔེསི. ཀོཙི ཏཾ ན ཨིཙྪི. ‘‘མུདྷཱཔི གཎྷནྟཱུ’’ཏི བྷེརིཾ ཙརཱཔེསི. ‘ཧ’ནྟི ཝཱ ‘ཧུ’ནྟི ཝཱ ཝདནྟོ ནཱམ ནཱཧོསི. རཱཛཱ ‘‘མུདྷཱཔི, བྷནྟེ, གཎྷནྟོ ནཱམ ནཏྠཱི’’ཏི ཨཱཧ. སཏྠཱ ‘‘པསྶཐ, བྷིཀྑཝེ, མཧཱཛནསྶ པིཡཾ མཱཏུགཱམཾ, ཨིམསྨིཾཡེཝ ནགརེ སཧསྶཾ དཏྭཱ པུབྦེ ཨེཀདིཝསཾ ལབྷིཾསུ, ཨིདཱནི མུདྷཱ གཎྷནྟོཔི ནཏྠི, ཨེཝརཱུཔཾ ནཱམ ¶ རཱུཔཾ ཁཡཝཡཔྤཏྟཾ, པསྶཐ, བྷིཀྑཝེ, ཨཱཏུརཾ ཨཏྟབྷཱཝ’’ནྟི ཝཏྭཱ ཨིམཾ གཱཐམཱཧ –

‘‘པསྶ ཙིཏྟཀཏཾ བིམྦཾ, ཨརུཀཱཡཾ སམུསྶིཏཾ;

ཨཱཏུརཾ བཧུསངྐཔྤཾ, ཡསྶ ནཏྠི དྷུཝཾ ཋིཏཱི’’ཏི.

ཏཏྠ ཙིཏྟཀཏནྟི ཀཏཙིཏྟཾ, ཝཏྠཱབྷརཎམཱལཱལཏྟཀཱདཱིཧི ཝིཙིཏྟནྟི ཨཏྠོ. བིམྦནྟི དཱིགྷཱདིཡུཏྟཊྛཱནེསུ དཱིགྷཱདཱིཧི ཨངྒཔཙྩངྒེཧི སཎྛིཏཾ ཨཏྟབྷཱཝཾ. ཨརུཀཱཡནྟི ནཝནྣཾ ཝཎམུཁཱནཾ ཝསེན ཨརུབྷཱུཏཾ ཀཱཡཾ. སམུསྶིཏནྟི ཏཱིཧི ཨཊྛིསཏེཧི སམུསྶིཏཾ. ཨཱཏུརནྟི སབྦཀཱལཾ ཨིརིཡཱཔཐཱདཱིཧི པརིཧརིཏབྦཏཱཡ ནིཙྩགིལཱནཾ. བཧུསངྐཔྤནྟི མཧཱཛནེན བཧུདྷཱ སངྐཔྤིཏཾ. ཡསྶ ནཏྠི དྷུཝཾ ཋིཏཱིཏི ཡསྶ དྷུཝབྷཱཝོ ཝཱ ཋིཏིབྷཱཝོ ཝཱ ནཏྠི, ཨེཀནྟེན བྷེདནཝིཀིརཎཝིདྡྷཾསནདྷམྨམེཝེཏཾ, ཨིམཾ པསྶཐཱཏི ཨཏྠོ.

དེསནཱཝསཱནེ ¶ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི, སོཔི བྷིཀྑུ སོཏཱཔཏྟིཕལེ པཏིཊྛཧཱིཏི.

པརིཛིཎྞམིདནྟི ¶ ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨུཏྟརཱཐེརིཾ ནཱམ བྷིཀྑུནིཾ ཨཱརབྦྷ ཀཐེསི.

ཐེརཱི ཀིར ཝཱིསཝསྶསཏིཀཱ ཛཱཏིཡཱ པིཎྜཱཡ ཙརིཏྭཱ ལདྡྷཔིཎྜཔཱཏཱ ཨནྟརཝཱིཐིཡཾ ཨེཀཾ བྷིཀྑུཾ དིསྭཱ པིཎྜཔཱཏེན ཨཱཔུཙྪིཏྭཱ ཏསྶ ཨཔཊིཀྑིཔིཏྭཱ གཎྷནྟསྶ སབྦཾ དཏྭཱ ནིརཱཧཱརཱ ཨཧོསི. ཨེཝཾ དུཏིཡེཔི ཏཏིཡེཔི དིཝསེ ཏསྶེཝ བྷིཀྑུནོ ཏསྨིཾཡེཝ ཋཱནེ བྷཏྟཾ དཏྭཱ ནིརཱཧཱརཱ ཨཧོསི, ཙཏུཏྠེ དིཝསེ པན པིཎྜཱཡ ཙརནྟཱི ཨེཀསྨིཾ སམྦཱདྷཊྛཱནེ སཏྠཱརཾ དིསྭཱ པཊིཀྐམནྟཱི ཨོལམྦནྟཾ ཨཏྟནོ ཙཱིཝརཀཎྞཾ ཨཀྐམིཏྭཱ སཎྛཱཏུཾ ཨསཀྐོནྟཱི པརིཝཏྟིཏྭཱ པཏི. སཏྠཱ ཏསྶཱ སནྟིཀཾ གནྟྭཱ, ‘‘བྷགིནི, པརིཛིཎྞོ ཏེ ཨཏྟབྷཱཝོ ན ཙིརསྶེཝ བྷིཛྫིསྶཏཱི’’ཏི ཝཏྭཱ ཨིམཾ གཱཐམཱཧ –

‘‘པརིཛིཎྞམིདཾ རཱུཔཾ, རོགནཱིལ༹ཾ པབྷངྒུརཾ;

བྷིཛྫཏི པཱུཏིསནྡེཧོ, མརཎནྟཉྷི ཛཱིཝིཏ’’ནྟི.

ཏསྶཏྠོ – བྷགིནི ཨིདཾ ཏཝ སརཱིརསངྑཱཏཾ རཱུཔཾ མཧལླཀབྷཱཝེན པརིཛིཎྞཾ, ཏཉྩ ཁོ སབྦརོགཱནཾ ནིཝཱསཊྛཱནཊྛེན རོགནཱིལ༹ཾ, ཡཐཱ ཁོ པན ཏརུཎོཔི སིངྒཱལོ ‘‘ཛརསིངྒཱལོ’’ཏི ཝུཙྩཏི, ཏརུཎཱཔི གལོ༹ཙཱིལཏཱ ‘‘པཱུཏིལཏཱ’’ཏི ¶ ཝུཙྩཏི, ཨེཝཾ ཏདཧུཛཱཏཾ སུཝཎྞཝཎྞམྤི སམཱནཾ ནིཙྩཾ པགྒྷརཎཊྛེན པཱུཏིཏཱཡ པབྷངྒུརཾ, སོ ཨེས པཱུཏིཀོ སམཱནོ ཏཝ དེཧོ བྷིཛྫཏི, ན ཙིརསྶེཝ བྷིཛྫིསྶཏཱིཏི ཝེདིཏབྦོ. ཀིཾ ཀཱརཎཱ? མརཎནྟཉྷི ཛཱིཝིཏཾ ཡསྨཱ སབྦསཏྟཱནཾ ཛཱིཝིཏཾ མརཎཔརིཡོསཱནམེཝཱཏི ཝུཏྟཾ ཧོཏི.

དེསནཱཝསཱནེ སཱ ཐེརཱི སོཏཱཔཏྟིཕལཾ པཏྟཱ, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཡཱནིམཱནཱིཏི ¶ ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ ཨདྷིམཱནིཀེ བྷིཀྑཱུ ཨཱརབྦྷ ཀཐེསི.

པཉྩསཏཱ ཀིར བྷིཀྑཱུ སཏྠུ སནྟིཀེ ཀམྨཊྛཱནཾ གཧེཏྭཱ ཨརཉྙཾ པཝིསིཏྭཱ གྷཊེནྟཱ ཝཱཡམནྟཱ ཛྷཱནཾ ནིབྦཏྟེཏྭཱ ‘‘ཀིལེསཱནཾ ཨསམུདཱཙཱརེན པབྦཛིཏཀིཙྩཾ ནོ ནིཔྥནྣཾ, ཨཏྟནཱ པཊིལདྡྷགུཎཾ སཏྠུ ཨཱརོཙེསྶཱམཱ’’ཏི ཨཱགམིཾསུ. སཏྠཱ ཏེསཾ བཧིདྭཱརཀོཊྛཀཾ པཏྟཀཱལེཡེཝ ཨཱནནྡཏྠེརཾ ཨཱཧ – ‘‘ཨཱནནྡ, ཨེཏེསཾ བྷིཀྑཱུནཾ པཝིསིཏྭཱ མཡཱ དིཊྛེན ཀམྨཾ ནཏྠི, ཨཱམཀསུསཱནཾ ¶ གནྟྭཱ ཏཏོ ཨཱགནྟྭཱ མཾ པསྶནྟཱུ’’ཏི. ཐེརོ གནྟྭཱ ཏེསཾ ཏམཏྠཾ ཨཱརོཙེསི. ཏེ ‘‘ཀིཾ ཨམྷཱཀཾ ཨཱམཀསུསཱནེནཱ’’ཏི ཨཝཏྭཱཝ ‘‘དཱིགྷདསྶིནཱ བུདྡྷེན ཀཱརཎཾ དིཊྛཾ བྷཝིསྶཏཱི’’ཏི ཨཱམཀསུསཱནཾ གནྟྭཱ ཏཏྠ ཀུཎཔཱནི པསྶནྟཱ ཨེཀཱཧདྭཱིཧཔཏིཏེསུ ཀུཎཔེསུ ཨཱགྷཱཏཾ པཊིལབྷིཏྭཱ ཏཾ ཁཎཾ པཏིཏེསུ ཨལླསརཱིརེསུ རཱགཾ ཨུཔྤཱདཡིཾསུ, ཏསྨིཾ ཁཎེ ཨཏྟནོ སཀིལེསབྷཱཝཾ ཛཱནིཾསུ. སཏྠཱ གནྡྷཀུཊིཡཾ ནིསིནྣོཝ ཨོབྷཱསཾ ཕརིཏྭཱ ཏེསཾ བྷིཀྑཱུནཾ སམྨུཁེ ཀཐེནྟོ ཝིཡ ‘‘ནཔྤཏིརཱུཔཾ ནུ ཁོ, བྷིཀྑཝེ, ཏུམྷཱཀཾ ཨེཝརཱུཔཾ ཨཊྛིསངྒྷཱཏཾ དིསྭཱ རཱགརཏིཾ ཨུཔྤཱདེཏུ’’ནྟི ཝཏྭཱ ཨིམཾ གཱཐམཱཧ –

‘‘ཡཱནིམཱནི ཨཔཏྠཱནི, ཨལཱབཱུནེཝ སཱརདེ;

ཀཱཔོཏཀཱནི ཨཊྛཱིནི, ཏཱནི དིསྭཱན ཀཱ རཏཱི’’ཏི.

ཏཏྠ ཨཔཏྠཱནཱིཏི ཚཌྜིཏཱནི. སཱརདེཏི སརདཀཱལེ ཝཱཏཱཏཔཔཧཏཱནི ཏཏྠ ཏཏྠ ཝིཔྤཀིཎྞཨལཱབཱུནི ཝིཡ. ཀཱཔོཏཀཱནཱིཏི ཀཔོཏཀཝཎྞཱནི. ཏཱནི དིསྭཱནཱཏི ཏཱནི ཨེཝརཱུཔཱནི ཨཊྛཱིནི དིསྭཱ ཏུམྷཱཀཾ ཀཱ རཏི, ནནུ ཨཔྤམཏྟཀམྤི ཀཱམརཏིཾ ཀཱཏུཾ ན ཝཊྚཏིཡེཝཱཏི ཨཏྠོ.

དེསནཱཝསཱནེ ཏེ བྷིཀྑཱུ ཡཐཱཋིཏཱཝ ཨརཧཏྟཾ པཏྭཱ བྷགཝནྟཾ ཨབྷིཏྠཝམཱནཱ ཨཱགནྟྭཱ ཝནྡིཾསཱུཏི.

སམྦཧུལཨདྷིམཱནིཀབྷིཀྑུཝཏྠུ ཙཏུཏྠཾ.

༥. ཛནཔདཀལྱཱཎཱི རཱུཔནནྡཱཐེརཱིཝཏྠུ

ཨཊྛཱིནཾ ¶ ¶ ¶ ནགརཾ ཀཏནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཛནཔདཀལྱཱཎིཾ རཱུཔནནྡཱཐེརིཾ ཨཱརབྦྷ ཀཐེསི.

སཱ ཀིར ཨེཀདིཝསཾ ཙིནྟེསི – ‘‘མཡ྄ཧཾ ཛེཊྛབྷཱཏིཀོ རཛྫསིརིཾ པཧཱཡ པབྦཛིཏྭཱ ལོཀེ ཨགྒཔུགྒལོ བུདྡྷོ ཛཱཏོ, པུཏྟོཔིསྶ རཱཧུལཀུམཱརོ པབྦཛིཏོ, བྷཏྟཱཔི མེ པབྦཛིཏོ, མཱཏཱཔི མེ པབྦཛིཏཱ, ཨཧམྤི ཨེཏྟཀེ ཉཱཏིཛནེ པབྦཛིཏེ གེཧེ ཀིཾ ཀརིསྶཱམི, པབྦཛིསྶཱམཱ’’ཏི. སཱ བྷིཀྑུནུཔསྶཡཾ གནྟྭཱ པབྦཛི ཉཱཏིསིནེཧེནེཝ, ནོ སདྡྷཱཡ, ཨབྷིརཱུཔཏཱཡ པན རཱུཔནནྡཱཏི པཉྙཱཡི. ‘‘སཏྠཱ ཀིར ‘རཱུཔཾ ཨནིཙྩཾ དུཀྑཾ ཨནཏྟཱ, ཝེདནཱ… སཉྙཱ… སངྑཱརཱ… ཝིཉྙཱཎཾ ཨནིཙྩཾ དུཀྑཾ ཨནཏྟཱ’ཏི ཝདེཏཱི’’ཏི སུཏྭཱ སཱ ཨེཝཾ དསྶནཱིཡེ པཱསཱདིཀེ མམཔི རཱུཔེ དོསཾ ཀཐེཡྻཱཏི སཏྠུ སམྨུཁཱིབྷཱཝཾ ན གཙྪཏི. སཱཝཏྠིཝཱསིནོ པཱཏོཝ དཱནཾ དཏྭཱ སམཱདིནྣུཔོསཐཱ སུདྡྷུཏྟརཱསངྒཱ གནྡྷམཱལཱདིཧཏྠཱ སཱཡནྷསམཡེ ཛེཏཝནེ སནྣིཔཏིཏྭཱ དྷམྨཾ སུཎནྟི. བྷིཀྑུནིསངྒྷོཔི སཏྠུ དྷམྨདེསནཱཡ ཨུཔྤནྣཙྪནྡོ ཝིཧཱརཾ གནྟྭཱ དྷམྨཾ སུཎཱཏི. དྷམྨཾ སུཏྭཱ ནགརཾ པཝིསནྟོ སཏྠུ གུཎཀཐཾ ཀཐེནྟོཝ པཝིསཏི.

ཙཏུཔྤམཱཎིཀེ ཧི ལོཀསནྣིཝཱསེ ཨཔྤཀཱཝ ཏེ སཏྟཱ, ཡེསཾ ཏཐཱགཏཾ པསྶནྟཱནཾ པསཱདོ ན ཨུཔྤཛྫཏི. རཱུཔཔྤམཱཎིཀཱཔི ཧི ཏཐཱགཏསྶ ལཀྑཎཱནུབྱཉྫནཔཊིམཎྜིཏཾ སུཝཎྞཝཎྞཾ སརཱིརཾ དིསྭཱ པསཱིདནྟི, གྷོསཔྤམཱཎིཀཱཔི ¶ ཨནེཀཱནི ཛཱཏིསཏཱནི ནིསྶཱཡ པཝཏྟཾ སཏྠུ གུཎགྷོསཉྩེཝ ཨཊྛངྒསམནྣཱགཏཾ དྷམྨདེསནཱགྷོསཉྩ སུཏྭཱ པསཱིདནྟི, ལཱུཁཔྤམཱཎིཀཱཔིསྶ ཙཱིཝརཱདིལཱུཁཏཾ པཊིཙྩ པསཱིདནྟི, དྷམྨཔྤམཱཎིཀཱཔི ‘‘ཨེཝརཱུཔཾ དསབལསྶ སཱིལཾ, ཨེཝརཱུཔོ སམཱདྷི, ཨེཝརཱུཔཱ པཉྙཱ, བྷགཝཱ སཱིལཱདཱིཧི གུཎེཧི ཨསམོ ཨཔྤཊིཔུགྒལོ’’ཏི པསཱིདནྟི. ཏེསཾ ཏཐཱགཏསྶ གུཎཾ ཀཐེནྟཱནཾ མུཁཾ ནཔྤཧོཏི. རཱུཔནནྡཱ བྷིཀྑུནཱིནཉྩེཝ ཨུཔཱསིཀཱནཉྩ སནྟིཀཱ ཏཐཱགཏསྶ གུཎཀཐཾ སུཏྭཱ ཙིནྟེསི – ‘‘ཨཏིཝིཡ མེ བྷཱཏིཀསྶ ཝཎྞཾ ཀཐེནྟིཡེཝ. ཨེཀདིཝསམྤི མེ རཱུཔེ དོསཾ ཀཐེནྟོ ཀིཏྟཀཾ ཀཐེསྶཏི. ཡཾནཱུནཱཧཾ བྷིཀྑུནཱིཧི སདྡྷིཾ གནྟྭཱ ཨཏྟཱནཾ ཨདསྶེཏྭཱཝ ཏཐཱགཏཾ པསྶིཏྭཱ དྷམྨམསྶ སུཎིཏྭཱ ཨཱགཙྪེཡྻ’’ནྟི. སཱ ‘‘ཨཧམྤི ཨཛྫ དྷམྨསྶཝནཾ གམིསྶཱམཱི’’ཏི བྷིཀྑུནཱིནཾ ¶ ཨཱརོཙེསི.

བྷིཀྑུནིཡོ ¶ ‘‘ཙིརསྶཾ ཝཏ རཱུཔནནྡཱཡ སཏྠུ ཨུཔཊྛཱནཾ གནྟུཀཱམཏཱ ཨུཔྤནྣཱ, ཨཛྫ སཏྠཱ ¶ ཨིམཾ ནིསྶཱཡ ཝིཙིཏྲདྷམྨདེསནཾ ནཱནཱནཡཾ དེསེསྶཏཱི’’ཏི ཏུཊྛམཱནསཱ ཏཾ ཨཱདཱཡ ནིཀྑམིཾསུ. སཱ ནིཀྑནྟཀཱལཏོ པཊྛཱཡ ‘‘ཨཧཾ ཨཏྟཱནཾ ནེཝ དསྶེསྶཱམཱི’’ཏི ཙིནྟེསི. སཏྠཱ ‘‘ཨཛྫ རཱུཔནནྡཱ མཡ྄ཧཾ ཨུཔཊྛཱནཾ ཨཱགམིསྶཏི, ཀཱིདིསཱི ནུ ཁོ ཏསྶཱ དྷམྨདེསནཱ སཔྤཱཡཱ’’ཏི ཙིནྟེཏྭཱ ‘‘རཱུཔགརུཀཱ ཨེསཱ ཨཏྟབྷཱཝེ བལཝསིནེཧཱ, ཀཎྚཀེན ཀཎྚཀུདྡྷརཎཾ ཝིཡ རཱུཔེནེཝསྶཱ རཱུཔམདནིམྨདནཾ སཔྤཱཡ’’ནྟི སནྣིཊྛཱནཾ ཀཏྭཱ ཏསྶཱ ཝིཧཱརཾ པཝིསནསམཡེ ཨེཀཾ པན ཨབྷིརཱུཔཾ ཨིཏྠིཾ སོལ༹སཝསྶུདྡེསིཀཾ རཏྟཝཏྠནིཝཏྠཾ སབྦཱབྷརཎཔཊིམཎྜིཏཾ བཱིཛནིཾ གཧེཏྭཱ ཨཏྟནོ སནྟིཀེ ཋཏྭཱ བཱིཛཡམཱནཾ ཨིདྡྷིབལེན ཨབྷིནིམྨིནི. ཏཾ ཁོ པན ཨིཏྠིཾ སཏྠཱ ཙེཝ པསྶཏི རཱུཔནནྡཱ ཙ. སཱ བྷིཀྑུནཱིཧི སདྡྷིཾ ཝིཧཱརཾ པཝིསིཏྭཱ བྷིཀྑུནཱིནཾ པིཊྛིཔསྶེ ཋཏྭཱ པཉྩཔཏིཊྛིཏེན སཏྠཱརཾ ཝནྡིཏྭཱ བྷིཀྑུནཱིནཾ ཨནྟརེ ནིསིནྣཱ པཱདནྟཏོ པཊྛཱཡ སཏྠཱརཾ ཨོལོཀེནྟཱི ལཀྑཎཝིཙིཏྟཾ ཨནུབྱཉྫནསམུཛྫལཾ བྱཱམཔྤབྷཱཔརིཀྑིཏྟཾ སཏྠུ སརཱིརཾ དིསྭཱ པུཎྞཙནྡསསྶིརིཀཾ མུཁཾ ཨོལོཀེནྟཱི སམཱིཔེ ཋིཏཾ ཨིཏྠིརཱུཔཾ ཨདྡས ¶ . སཱ ཏཾ ཨོལོཀེཏྭཱ ཨཏྟབྷཱཝཾ ཨོལོཀེནྟཱི སུཝཎྞརཱཛཧཾསིཡཱ པུརཏོ ཀཱཀཱིསདིསཾ ཨཏྟཱནཾ ཨཝམཉྙི. ཨིདྡྷིམཡརཱུཔཾ དིཊྛཀཱལཏོ པཊྛཱཡེཝ ཧི ཏསྶཱ ཨཀྑཱིནི བྷམིཾསུ. སཱ ‘‘ཨཧོ ཨིམིསྶཱ ཀེསཱ སོབྷནཱ, ཨཧོ ནལཱཊཾ སོབྷན’’ནྟི སབྦེསཾ སཱརཱིརཔྤདེསཱནཾ རཱུཔསིརིཡཱ སམཱཀཌྜྷིཏཙིཏྟཱ ཏསྨིཾ རཱུཔེ བལཝསིནེཧཱ ཨཧོསི.

སཏྠཱ ཏསྶཱ ཏཏྠ ཨབྷིརཏིཾ ཉཏྭཱ དྷམྨཾ དེསེནྟོཝ ཏཾ རཱུཔཾ སོལ༹སཝསྶུདྡེསིཀབྷཱཝཾ ཨཏིཀྐམིཏྭཱ ཝཱིསཏིཝསྶུདྡེསིཀཾ ཀཏྭཱ དསྶེསི. རཱུཔནནྡཱ ཨོལོཀེཏྭཱ ‘‘ན ཝཏིདཾ རཱུཔཾ པུརིམསདིས’’ནྟི ཐོཀཾ ཝིརཏྟཙིཏྟཱ ཨཧོསི. སཏྠཱ ཨནུཀྐམེནེཝ ཏསྶཱ ཨིཏྠིཡཱ སཀིཾ ཝིཛཱཏཝཎྞཾ མཛ྄ཛྷིམིཏྠིཝཎྞཾ ཛརཱཛིཎྞམཧལླིཀིཏྠིཝཎྞཉྩ དསྶེསི. སཱཔི ཨནུཔུབྦེནེཝ ‘‘ཨིདམྤི ཨནྟརཧིཏཾ, ཨིདམྤི ཨནྟརཧིཏ’’ནྟི ཛརཱཛིཎྞཀཱལེ ཏཾ ཝིརཛྫམཱནཱ ཁཎྜདནྟིཾ པལིཏསིརཾ ཨོབྷགྒཾ གོཔཱནསིཝངྐཾ དཎྜཔརཱཡཎཾ པཝེདྷམཱནཾ དིསྭཱ ཨཏིཝིཡ ཝིརཛྫི. ཨཐ སཏྠཱ ཏཾ བྱཱདྷིནཱ ཨབྷིབྷཱུཏཾ ཀཏྭཱ དསྶེསི. སཱ ཏངྑཎཉྙེཝ དཎྜཉྩ ཏཱལཝཎྚཉྩ ཚཌྜེཏྭཱ མཧཱཝིརཝཾ ¶ ཝིརཝམཱནཱ བྷཱུམིཡཾ པཏིཏྭཱ སཀེ མུཏྟཀརཱིསེ ནིམུགྒཱ ཨཔརཱཔརཾ པརིཝཏྟི. རཱུཔནནྡཱ ཏམྤི ¶ དིསྭཱ ཨཏིཝིཡ ཝིརཛྫི. སཏྠཱཔི ཏསྶཱ ཨིཏྠིཡཱ མརཎཾ དསྶེསི. སཱ ཏངྑཎཾཡེཝ ཨུདྡྷུམཱཏཀབྷཱཝཾ ཨཱཔཛྫི, ནཝཧི ཝཎམུཁེཧི པུབྦཝཊྚིཡོ ཙེཝ པུལ༹ཝཱ ཙ པགྒྷརིཾསུ, ཀཱཀཱདཡོ སནྣིཔཏིཏྭཱ ཝིལུམྤིཾསུ. རཱུཔནནྡཱཔི ཏཾ ཨོལོཀེཏྭཱ ‘‘ཨཡཾ ཨིཏྠཱི ཨིམསྨིཾཡེཝ ཋཱནེ ཛརཾ པཏྟཱ, བྱཱདྷིཾ པཏྟཱ, མརཎཾ པཏྟཱ, ཨིམསྶཱཔི མེ ཨཏྟབྷཱཝསྶ ཨེཝམེཝ ཛརཱབྱཱདྷིམརཎཱནི ཨཱགམིསྶནྟཱི’’ཏི ཨཏྟབྷཱཝཾ ཨནིཙྩཏོ པསྶི. ཨནིཙྩཏོ དིཊྛཏྟཱ ཨེཝ པན དུཀྑཏོ ཨནཏྟཏོ དིཊྛོཡེཝ ཧོཏི. ཨཐསྶཱ ཏཡོ བྷཝཱ ཨཱདིཏྟཱ གེཧཱ ཝིཡ གཱིཝཱཡ བདྡྷཀུཎཔཾ ཝིཡ ཙ ¶ ཨུཔཊྛཧིཾསུ, ཀམྨཊྛཱནཱབྷིམུཁཾ ཙིཏྟཾ པཀྑནྡི. སཏྠཱ ཏཱཡ ཨནིཙྩཏོ དིཊྛབྷཱཝཾ ཉཏྭཱ ‘‘སཀྑིསྶཏི ནུ ཁོ སཡམེཝ ཨཏྟནོ པཏིཊྛཾ ཀཱཏུ’’ནྟི ཨོལོཀེནྟོ ‘‘ན སཀྑིསྶཏི, བཧིདྡྷཱ པཙྩཡཾ ལདྡྷུཾ ཝཊྚཏཱི’’ཏི ཙིནྟེཏྭཱ ཏསྶཱ སཔྤཱཡཝསེན དྷམྨཾ དེསེནྟོ ཨཱཧ –

‘‘ཨཱཏུརཾ ཨསུཙིཾ པཱུཏིཾ, པསྶ ནནྡེ སམུསྶཡཾ;

ཨུགྒྷརནྟཾ པགྒྷརནྟཾ, བཱལཱནཾ ཨབྷིཔཏྠིཏཾ.

‘‘ཡཐཱ ཨིདཾ ཏཐཱ ཨེཏཾ, ཡཐཱ ཨེཏཾ ཏཐཱ ཨིདཾ;

དྷཱཏུཏོ སུཉྙཏོ པསྶ, མཱ ལོཀཾ པུནརཱགམི;

བྷཝེ ཚནྡཾ ཝིརཱཛེཏྭཱ, ཨུཔསནྟོ ཙརིསྶཏཱི’’ཏི. –

ཨིཏྠཾ ¶ སུདཾ བྷགཝཱ ནནྡཾ བྷིཀྑུནིཾ ཨཱརབྦྷ ཨིམཱ གཱཐཱཡོ ཨབྷཱསིཏྠཱཏི. ནནྡཱ དེསནཱནུསཱརེན ཉཱཎཾ པེསེཏྭཱ སོཏཱཔཏྟིཕལཾ པཱཔུཎི. ཨཐསྶཱ ཨུཔརི ཏིཎྞཾ མགྒཕལཱནཾ ཝིཔསྶནཱཔརིཝཱསཏྠཱཡ སུཉྙཏཱཀམྨཊྛཱནཾ ཀཐེཏུཾ, ‘‘ནནྡེ, མཱ ‘ཨིམསྨིཾ སརཱིརེ སཱརོ ཨཏྠཱི’ཏི སཉྙཾ ཀརི. ཨཔྤམཏྟཀོཔི ཧི ཨེཏྠ སཱརོ ནཏྠི, ཏཱིཎི ཨཊྛིསཏཱནི ཨུསྶཱཔེཏྭཱ ཀཏཾ ཨཊྛིནགརམེཏ’’ནྟི ཝཏྭཱ ཨིམཾ གཱཐམཱཧ –

‘‘ཨཊྛཱིནཾ ནགརཾ ཀཏཾ, མཾསལོཧིཏལེཔནཾ;

ཡཏྠ ཛརཱ ཙ མཙྩུ ཙ, མཱནོ མཀྑོ ཙ ཨོཧིཏོ’’ཏི.

ཏསྶཏྠོ – ཡཐེཝ ཧི པུབྦཎྞཱཔརཎྞཱདཱིནཾ ཨོདཧནཏྠཱཡ ཀཊྛཱནི ཨུསྶཱཔེཏྭཱ ཝལླཱིཧི བནྡྷིཏྭཱ མཏྟིཀཱཡ ཝིལིམྤེཏྭཱ ནགརསངྑཱཏཾ བཧིདྡྷཱ གེཧཾ ¶ ཀརོནྟི, ཨེཝམིདཾ ཨཛ྄ཛྷཏྟིཀམྤི ཏཱིཎི ཨཊྛིསཏཱནི ཨུསྶཱཔེཏྭཱ ནྷཱརུཝིནདྡྷཾ མཾསལོཧིཏལེཔནཾ ཏཙཔཊིཙྪནྣཾ ཛཱིརཎལཀྑཎཱཡ ཛརཱཡ མརཎལཀྑཎསྶ མཙྩུནོ ཨཱརོཧསམྤདཱདཱིནི པཊིཙྩ མཉྙནལཀྑཎསྶ མཱནསྶ སུཀཏཀཱརཎཝིནཱསནལཀྑཎསྶ མཀྑསྶ ཙ ཨོདཧནཏྠཱཡ ¶ ནགརཾ ཀཏཾ. ཨེཝརཱུཔོ ཨེཝ ཧི ཨེཏྠ ཀཱཡིཀཙེཏསིཀོ ཨཱབཱདྷོ ཨོཧིཏོ, ཨིཏོ ཨུདྡྷཾ ཀིཉྩི གཡ྄ཧཱུཔགཾ ནཏྠཱིཏི.

དེསནཱཝསཱནེ སཱ ཐེརཱི ཨརཧཏྟཾ པཱཔུཎི, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཛནཔདཀལྱཱཎཱི རཱུཔནནྡཱཐེརཱིཝཏྠུ པཉྩམཾ.

ཛཱིརནྟི ¶ ཝེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མལླིཀཾ དེཝིཾ ཨཱརབྦྷ ཀཐེསི.

སཱ ཀིར ཨེཀདིཝསཾ ནྷཱནཀོཊྛཀཾ པཝིཊྛཱ མུཁཾ དྷོཝིཏྭཱ ཨོནཏསརཱིརཱ ཛངྒྷཾ དྷོཝིཏུཾ ཨཱརབྷི. ཏཱཡ ཙ སདྡྷིཾཡེཝ པཝིཊྛོ ཨེཀོ ཝལླབྷསུནཁོ ཨཏྠི. སོ ཏཾ ཏཐཱ ཨོནཏཾ དིསྭཱ ཨསདྡྷམྨསནྠཝཾ ཀཱཏུཾ ཨཱརབྷི. སཱ ཕསྶཾ སཱདིཡནྟཱི ཨཊྛཱསི. རཱཛཱཔི ཨུཔརིཔཱསཱདེ ཝཱཏཔཱནེན ཨོལོཀེནྟོ ཏཾ དིསྭཱ ཏཏོ ཨཱགཏཀཱལེ ‘‘ནསྶ, ཝསལི, ཀསྨཱ ཨེཝརཱུཔམཀཱསཱི’’ཏི ཨཱཧ. ཀིཾ མཡཱ ཀཏཾ, དེཝཱཏི. སུནཁེན སདྡྷིཾ སནྠཝོཏི. ནཏྠེཏཾ, དེཝཱཏི. མཡཱ སཱམཾ དིཊྛཾ, ནཱཧཾ ཏཝ སདྡཧིསྶཱམི, ནསྶ, ཝསལཱིཏི. ‘‘མཧཱརཱཛ, ཡོ ཀོཙི ཨིམཾ ཀོཊྛཀཾ པཝིཊྛོ ཨིམིནཱ ཝཱཏཔཱནེན ཨོལོཀེནྟསྶ ཨེཀོཝ དྭིདྷཱ པཉྙཱཡཏཱི’’ཏི ཨབྷཱུཏཾ ཀཐེསི. དེཝ, སཙེ མེ སདྡཧསི, ཨེཏཾ ཀོཊྛཀཾ པཝིས, ཨཧཾ ཏཾ ཨིམིནཱ ཝཱཏཔཱནེན ¶ ཨོལོཀེསྶཱམཱིཏི. རཱཛཱ མཱུལ༹ྷདྷཱཏུཀོ ཏསྶཱ ཝཙནཾ སདྡཧིཏྭཱ ཀོཊྛཀཾ པཱཝིསི. སཱཔི ཁོ དེཝཱི ཝཱཏཔཱནེ ཋཏྭཱ ཨོལོཀེནྟཱི ‘‘ཨནྡྷབཱལ, མཧཱརཱཛ, ཀིཾ ནཱམེཏཾ, ཨཛིཀཱཡ སདྡྷིཾ སནྠཝཾ ཀརོསཱི’’ཏི ཨཱཧ. ‘‘ནཱཧཾ, བྷདྡེ, ཨེཝརཱུཔཾ ཀརོམཱི’’ཏི ཙ ཝུཏྟེཔི ‘‘མཡཱ སཱམཾ དིཊྛཾ, ནཱཧཾ ཏཝ སདྡཧིསྶཱམཱི’’ཏི ཨཱཧ.

ཏཾ ¶ སུཏྭཱ རཱཛཱ ‘‘ཨདྡྷཱ ཨིམཾ ཀོཊྛཀཾ པཝིཊྛོ ཨེཀོཝ དྭིདྷཱ པཉྙཱཡཏཱི’’ཏི སདྡཧི. མལླིཀཱ ཙིནྟེསི – ‘‘ཨཡཾ རཱཛཱ ཨནྡྷབཱལཏཱཡ མཡཱ ཝཉྩིཏོ, པཱཔཾ མེ ཀཏཾ, ཨཡཉྩ མེ ཨབྷཱུཏེན ཨབྦྷཱཙིཀྑིཏོ, ཨིདཾ མེ ཀམྨཾ སཏྠཱཔི ཛཱནིསྶཏི, དྭེ ཨགྒསཱཝཀཱཔི ཨསཱིཏི མཧཱསཱཝཀཱཔི ཛཱནིསྶནྟི, ཨཧོ ཝཏ མེ བྷཱརིཡཾ ཀམྨཾ ཀཏ’’ནྟི. ཨཡཾ ཀིར རཉྙོ ཨསདིསདཱནེ སཧཱཡིཀཱ ཨཧོསི. ཏཏྠ ཙ ཨེཀདིཝསཾ ཀཏཔརིཙྩཱགོ དྷནསྶ ཙུདྡསཀོཊིཨགྒྷནཀོ ཨཧོསི. ཏཐཱགཏསྶ སེཏཙྪཏྟཾ ནིསཱིདནཔལླངྐོ ཨཱདྷཱརཀོ པཱདཔཱིཋནྟི ཨིམཱནི པན ཙཏྟཱརི ཨནགྒྷཱནེཝ ཨཧེསུཾ. སཱ མརཎཀཱལེ ཨེཝརཱུཔཾ མཧཱཔརིཙྩཱགཾ ནཱནུསྶརིཏྭཱ ཏདེཝ པཱཔཀམྨཾ ཨནུསྶརནྟཱི ཀཱལཾ ཀཏྭཱ ཨཝཱིཙིམྷི ནིབྦཏྟི. རཉྙོ པན སཱ ཨཏིཝིཡ པིཡཱ ཨཧོསི. སོ བལཝསོཀཱབྷིབྷཱུཏོ ཏསྶཱ སརཱིརཀིཙྩཾ ཀཱརེཏྭཱ ‘‘ནིབྦཏྟཊྛཱནམསྶཱ པུཙྪིསྶཱམཱི’’ཏི སཏྠུ སནྟིཀཾ ཨགམཱསི. སཏྠཱ ཡཐཱ སོ ཨཱགཏཀཱརཎཾ ན སརཏི, ཏཐཱ ཨཀཱསི. སོ སཏྠུ སནྟིཀེ སཱརཎཱིཡདྷམྨཀཐཾ ¶ སུཏྭཱ གེཧཾ པཝིཊྛཀཱལེ སརིཏྭཱ ‘‘ཨཧཾ བྷཎེ མལླིཀཱཡ ནིབྦཏྟཊྛཱནཾ པུཙྪིསྶཱམཱིཏི སཏྠུ སནྟིཀཾ གནྟྭཱ པམུཊྛོ, སྭེ པུན པུཙྪིསྶཱམཱི’’ཏི པུནདིཝསེཔི ཨགམཱསི. སཏྠཱཔི པཊིཔཱཊིཡཱ སཏྟ དིཝསཱནི ཡཐཱ སོ ན སརཏི ¶ , ཏཐཱ ཨཀཱསི. སཱཔི སཏྟཱཧམེཝ ནིརཡེ པཙྩིཏྭཱ ཨཊྛམེ དིཝསེ ཏཏོ ཙུཏཱ ཏུསིཏབྷཝནེ ནིབྦཏྟི. ཀསྨཱ པནསྶ སཏྠཱ ཨསརཎབྷཱཝཾ ཨཀཱསཱིཏི? སཱ ཀིར ཏསྶ ཨཏིཝིཡ པིཡཱ ཨཧོསི མནཱཔཱ, ཏསྨཱ ཏསྶཱ ནིརཡེ ནིབྦཏྟབྷཱཝཾ སུཏྭཱ ‘‘སཙེ ཨེཝརཱུཔཱ སདྡྷཱསམྤནྣཱ ནིརཡེ ནིབྦཏྟཱ, དཱནཾ དཏྭཱ ཀིཾ ཀརིསྶཱམཱི’’ཏི མིཙྪཱདིཊྛིཾ གཧེཏྭཱ པཉྩནྣཾ བྷིཀྑུསཏཱནཾ གེཧེ པཝཏྟཾ ནིཙྩབྷཏྟཾ ཧརཱཔེཏྭཱ ནིརཡེ ནིབྦཏྟེཡྻ, ཏེནསྶ སཏྠཱ སཏྟཱཧཾ ཨསརཎབྷཱཝཾ ཀཏྭཱ ཨཊྛམེ དིཝསེ པིཎྜཱཡ ཙརནྟོ སཡམེཝ རཱཛཀུལདྭཱརཾ ཨགམཱསི.

རཱཛཱ ‘‘སཏྠཱ ཨཱགཏོ’’ཏི སུཏྭཱ ནིཀྑམིཏྭཱ པཏྟཾ ཨཱདཱཡ པཱསཱདཾ ཨབྷིརུཧིཏུཾ ཨཱརབྷི. སཏྠཱ པན རཐསཱལཱཡ ནིསཱིདིཏུཾ ཨཱཀཱརཾ དསྶེསི. རཱཛཱ སཏྠཱརཾ ཏཏྠེཝ ནིསཱིདཱཔེཏྭཱ ཡཱགུཁཛྫཀེན པཊིམཱནེཏྭཱ ཝནྡིཏྭཱ ནིསིནྣོཝ ཨཧཾ, བྷནྟེ, མལླིཀཱཡ དེཝིཡཱ ནིབྦཏྟཊྛཱནཾ པུཙྪིསྶཱམཱིཏི གནྟྭཱ པམུཊྛོ, ཀཏྠ ནུ ཁོ སཱ, བྷནྟེ, ནིབྦཏྟཱཏི. ཏུསིཏབྷཝནེ, མཧཱརཱཛཱཏི, བྷནྟེ, ཏཱཡ ཏུསིཏབྷཝནེ ཨནིབྦཏྟནྟིཡཱ ཀོ ཨཉྙོ ནིབྦཏྟིསྶཏི ¶ , བྷནྟེ, ནཏྠི ཏཱཡ སདིསཱ ཨིཏྠཱི. ཏསྶཱ ཧི ནིསིནྣཊྛཱནཱདཱིསུ ‘‘སྭེ ཏཐཱགཏསྶ ¶ ཨིདཾ དསྶཱམི, ཨིདཾ ཀརིསྶཱམཱི’’ཏི དཱནསཾཝིདྷཱནཾ ཋཔེཏྭཱ ཨཉྙཾ ཀིཙྩམེཝ ནཏྠི, བྷནྟེ, ཏསྶཱ པརལོཀཾ གཏཀཱལཏོ པཊྛཱཡ སརཱིརཾ མེ ན ཝཧཏཱིཏི. ཨཐ ནཾ སཏྠཱ ‘‘མཱ ཙིནྟཡི, མཧཱརཱཛ, སབྦེསཾ དྷུཝདྷམྨོ ཨཡ’’ནྟི ཝཏྭཱ ‘‘ཨཡཾ, མཧཱརཱཛ, རཐོ ཀསྶཱ’’ཏི པུཙྪི. ཏཾ སུཏྭཱ རཱཛཱ སིརསྨིཾ ཨཉྫལིཾ པཏིཊྛཱཔེཏྭཱ ‘‘པིཏཱམཧསྶ མེ, བྷནྟེ’’ཏི ཨཱཧ. ‘‘ཨཡཾ ཀསྶཱ’’ཏི? ‘‘པིཏུ མེ, བྷནྟེ’’ཏི. ‘‘ཨཡཾ པན རཐོ ཀསྶཱ’’ཏི? ‘‘མམ, བྷནྟེ’’ཏི. ཨེཝཾ ཝུཏྟེ སཏྠཱ, ‘‘མཧཱརཱཛ, ཏཝ པིཏཱམཧསྶ རཐོ ཏེནེཝཱཀཱརེན ཏཝ པིཏུ རཐཾ ན པཱཔུཎི, ཏཝ པིཏུ རཐོ ཏཝ རཐཾ ན པཱཔུཎི, ཨེཝརཱུཔསྶ ནཱམ ཀཊྛཀལིངྒརསྶཱཔི ཛརཱ ཨཱགཙྪཏི, ཀིམངྒཾ པན ཨཏྟབྷཱཝསྶ. མཧཱརཱཛ, སཔྤུརིསདྷམྨསྶེཝ ཧི ཛརཱ ནཏྠི, སཏྟཱ པན ཨཛཱིརཀཱ ནཱམ ནཏྠཱི’’ཏི ཝཏྭཱ ཨིམཾ གཱཐམཱཧ –

ཏཏྠ ཝེཏི ནིཔཱཏོ. སུཙིཏྟཱཏི སཏྟཧི རཏནེཧི ཨཔརེཧི ཙ རཐཱལངྐཱརེཧི སུཊྛུ ཙིཏྟིཏཱ རཱཛཱུནཾ རཐཱཔི ཛཱིརནྟི. སརཱིརམྤཱིཏི ན ཀེཝལཾ རཐཱ ཨེཝ, ཨིདཾ སུཔྤཊིཛགྒིཏཾ ¶ སརཱིརམྤི ཁཎྜིཙྩཱདཱིནི ¶ པཱཔུཎནྟཾ ཛརཾ ཨུཔེཏི. སཏཉྩཱཏི བུདྡྷཱདཱིནཾ པན སནྟཱནཾ ནཝཝིདྷོ ལོཀུཏྟརདྷམྨོ ཙ ཀིཉྩི ཨུཔགྷཱཏཾ ན ཨུཔེཏཱིཏི ན ཛརཾ ཨུཔེཏི ནཱམ. པཝེདཡནྟཱིཏི ཨེཝཾ སནྟོ བུདྡྷཱདཡོ སབྦྷི པཎྜིཏེཧི སདྡྷིཾ ཀཐེནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཔྤསྶུཏཱཡནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ལཱལུ༹དཱཡིཏྠེརཾ ཨཱརབྦྷ ཀཐེསི.

སོ ¶ ཀིར མངྒལཾ ཀརོནྟཱནཾ གེཧཾ གནྟྭཱ ‘‘ཏིརོཀུཊྚེསུ ཏིཊྛནྟཱི’’ཏིཨཱདིནཱ (ཁུ. པཱ. ༧.༡; པེ. ཝ. ༡༤) ནཡེན ཨཝམངྒལཾ ཀཐེཏི, ཨཝམངྒལཾ ཀརོནྟཱནཾ གེཧཾ གནྟྭཱ ཏིརོཀུཊྚཱདཱིསུ ཀཐེཏབྦེསུ ‘‘དཱནཉྩ དྷམྨཙརིཡཱ ཙཱ’’ཏིཨཱདིནཱ (ཁུ. པཱ. ༥.༧; སུ. ནི. ༢༦༦) ནཡེན མངྒལགཱཐཱ ཝཱ ‘‘ཡཾ ཀིཉྩི ཝིཏྟཾ ཨིདྷ ཝཱ ཧུརཾ ཝཱ’’ཏི རཏནསུཏྟཾ (ཁུ. པཱ. ༦.༣; སུ. ནི. ༢༢༦) ཝཱ ཀཐེཏི. ཨེཝཾ ཏེསུ ཏེསུ ཋཱནེསུ ‘‘ཨཉྙཾ ཀཐེསྶཱམཱི’’ཏི ཨཉྙཾ ཀཐེནྟོཔི ‘‘ཨཉྙཾ ཀཐེམཱི’’ཏི ན ཛཱནཱཏི. བྷིཀྑཱུ ཏསྶ ཀཐཾ སུཏྭཱ སཏྠུ ཨཱརོཙེསུཾ – ‘‘ཀིཾ, བྷནྟེ, ལཱལུ༹དཱཡིསྶ མངྒལཱམངྒལཊྛཱནེསུ གམནེན, ཨཉྙསྨིཾ ཀཐེཏབྦེ ཨཉྙམེཝ ¶ ཀཐེཏཱི’’ཏི. སཏྠཱ ‘‘ན, བྷིཀྑཝེ, ཨིདཱནེཝེས ཨེཝཾ ཀཐེཏི, པུབྦེཔི ཨཉྙསྨིཾ ཀཐེཏབྦེ ཨཉྙམེཝ ཀཐེསཱི’’ཏི ཝཏྭཱ ཨཏཱིཏཾ ཨཱཧརི –

ཨཏཱིཏེ ཀིར བཱརཱཎསིཡཾ ཨགྒིདཏྟསྶ ནཱམ བྲཱཧྨཎསྶ པུཏྟོ སོམདཏྟཀུམཱརོ ནཱམ རཱཛཱནཾ ཨུཔཊྛཧི. སོ རཉྙཱ པིཡོ ཨཧོསི མནཱཔོ. བྲཱཧྨཎོ པན ཀསིཀམྨཾ ནིསྶཱཡ ཛཱིཝཏི. ཏསྶ དྭེཡེཝ གོཎཱ ཨཧེསུཾ. ཏེསུ ཨེཀོ མཏོ. བྲཱཧྨཎོ པུཏྟཾ ཨཱཧ – ‘‘ཏཱཏ, སོམདཏྟ, རཱཛཱནཾ མེ ཡཱཙིཏྭཱ ཨེཀཾ གོཎཾ ཨཱཧརཱ’’ཏི. སོམདཏྟོ ‘‘སཙཱཧཾ རཱཛཱནཾ ཡཱཙིསྶཱམི, ལཧུབྷཱཝོ མེ པཉྙཱཡིསྶཏཱི’’ཏི ཙིནྟེཏྭཱ ‘‘ཏུམྷེཡེཝ, ཏཱཏ, རཱཛཱནཾ ཡཱཙཐཱ’’ཏི ཝཏྭཱ ‘‘ཏེན ཧི, ཏཱཏ, མཾ གཧེཏྭཱ ཡཱཧཱི’’ཏི ཝུཏྟོ ཙིནྟེསི – ‘‘ཨཡཾ བྲཱཧྨཎོ དནྡྷཔཉྙོ ཨབྷིཀྐམཱདིཝཙནམཏྟམྤི ན ཛཱནཱཏི, ཨཉྙསྨིཾ ཝཏྟབྦེ ཨཉྙམེཝ ཝདཏི, སིཀྑཱཔེཏྭཱ པན ནཾ ནེསྶཱམཱི’’ཏི. སོ ཏཾ ཨཱདཱཡ བཱིརཎཏྠམྦྷཀཾ ནཱམ སུསཱནཾ གནྟྭཱ ཏིཎཀལཱཔེ བནྡྷིཏྭཱ ‘‘ཨཡཾ ¶ རཱཛཱ, ཨཡཾ ཨུཔརཱཛཱ, ཨཡཾ སེནཱཔཏཱི’’ཏི ནཱམཱནི ཀཏྭཱ པཊིཔཱཊིཡཱ པིཏུ དསྶེཏྭཱ ‘‘ཏུམྷེཧི རཱཛཀུལཾ གནྟྭཱ ཨེཝཾ ཨབྷིཀྐམིཏབྦཾ, ཨེཝཾ པཊིཀྐམིཏབྦཾ, ཨེཝཾ ནཱམ རཱཛཱ ཝཏྟབྦོ, ཨེཝཾ ནཱམ ཨུཔརཱཛཱ, རཱཛཱནཾ པན ཨུཔསངྐམིཏྭཱ ‘ཛཡཏུ བྷཝཾ, མཧཱརཱཛཱ’ཏི ཝཏྭཱ ཨེཝཾ ཋཏྭཱ ཨིམཾ ¶ གཱཐཾ ཝཏྭཱ གོཎཾ ཡཱཙེཡྻཱཐཱ’’ཏི གཱཐཾ ཨུགྒཎྷཱཔེསི –

‘‘དྭེ མེ གོཎཱ མཧཱརཱཛ, ཡེཧི ཁེཏྟཾ ཀསཱམསེ;

ཏེསུ ཨེཀོ མཏོ དེཝ, དུཏིཡཾ དེཧི ཁཏྟིཡཱ’’ཏི.

སོ ཧི སཾཝཙྪརམཏྟེན ཏཾ གཱཐཾ པགུཎཾ ཀཏྭཱ པགུཎབྷཱཝཾ པུཏྟསྶ ཨཱརོཙེཏྭཱ ‘‘ཏེན ཧི, ཏཱཏ, ཀཉྩིདེཝ པཎྞཱཀཱརཾ ཨཱདཱཡ ཨཱགཙྪཐ, ཨཧཾ ¶ པུརིམཏརཾ གནྟྭཱ རཉྙོ སནྟིཀེ ཋསྶཱམཱི’’ཏི ཝུཏྟེ ‘‘སཱདྷུ, ཏཱཏཱ’’ཏི པཎྞཱཀཱརཾ གཧེཏྭཱ སོམདཏྟསྶ རཉྙོ སནྟིཀེ ཋིཏཀཱལེ ཨུསྶཱཧཔྤཏྟོ རཱཛཀུལཾ གནྟྭཱ རཉྙཱ ཏུཊྛཙིཏྟེན ཀཏཔཊིསམྨོདནོ, ‘‘ཏཱཏ, ཙིརསྶཾ ཝཏ ཨཱགཏཏྠ, ཨིདམཱསནཾ ནིསཱིདིཏྭཱ ཝདཐ, ཡེནཏྠོ’’ཏི ཝུཏྟེ ཨིམཾ གཱཐམཱཧ –

‘‘དྭེ མེ གོཎཱ མཧཱརཱཛ, ཡེཧི ཁེཏྟཾ ཀསཱམསེ;

ཏེསུ ཨེཀོ མཏོ དེཝ, དུཏིཡཾ གཎྷ ཁཏྟིཡཱ’’ཏི.

རཉྙཱ ‘‘ཀིཾ ཝདེསི, ཏཱཏ, པུན ཝདེཧཱི’’ཏི ཝུཏྟེཔི ཏམེཝ གཱཐཾ ཨཱཧ. རཱཛཱ ཏེན ཝིརཛ྄ཛྷིཏྭཱ ཀཐིཏབྷཱཝཾ ཉཏྭཱ སིཏཾ ཀཏྭཱ, ‘‘སོམདཏྟ, ཏུམྷཱཀཾ གེཧེ བཧཱུ མཉྙེ གོཎཱ’’ཏི ཝཏྭཱ ‘‘ཏུམྷེཧི དིནྣཱ བཧཱུ བྷཝིསྶནྟི, དེཝཱ’’ཏི ཝུཏྟེ བོདྷིསཏྟསྶ ཏུསྶིཏྭཱ བྲཱཧྨཎསྶ སོལ༹ས གོཎེ ཨལངྐཱརབྷཎྜཀཾ ནིཝཱསགཱམཉྩསྶ བྲཧྨདེཡྻཾ དཏྭཱ མཧནྟེན ཡསེན བྲཱཧྨཎཾ ཨུཡྻོཛེསཱིཏི.

སཏྠཱ ཨིམཾ དྷམྨདེསནཾ ཨཱཧརིཏྭཱ ‘‘ཏདཱ རཱཛཱ ཨཱནནྡོ ཨཧོསི, བྲཱཧྨཎོ ལཱལུ༹དཱཡཱི, སོམདཏྟོ པན ཨཧམེཝཱ’’ཏི ཛཱཏཀཾ ¶ སམོདྷཱནེཏྭཱ ‘‘ན, བྷིཀྑཝེ, ཨིདཱནེཝ, པུབྦེཔེས ཨཏྟནོ ཨཔྤསྶུཏཏཱཡ ཨཉྙསྨིཾ ཝཏྟབྦེ ཨཉྙམེཝ ཝདཏི. ཨཔྤསྶུཏཔུརིསོ ཧི བལིབདྡསདིསོ ནཱམ ཧོཏཱི’’ཏི ཝཏྭཱ ཨིམཾ གཱཐམཱཧ –

‘‘ཨཔྤསྶུཏཱཡཾ པུརིསོ, བལིབདྡོཝ ཛཱིརཏི;

མཾསཱནི ཏསྶ ཝཌྜྷནྟི, པཉྙཱ ཏསྶ ན ཝཌྜྷཏཱི’’ཏི.

ཏཏྠ ¶ ཨཔྤསྶུཏཱཡནྟི ཨེཀསྶ ཝཱ དྭིནྣཾ ཝཱ པཎྞཱསཀཱནཾ. ཨཐ ཝཱ པན ཝགྒཱནཾ སབྦནྟིམེན པརིཙྪེདེན ཨེཀསྶ ཝཱ དྭིནྣཾ ཝཱ སུཏྟནྟཱནཾ ཝཱཔི ཨབྷཱཝེན ཨཔྤསྶུཏོ ཨཡཾ. ཀམྨཊྛཱནཾ པན ཨུགྒཧེཏྭཱ ཨནུཡུཉྫནྟོ བཧུསྶུཏོཝ. བལིབདྡོཝ ཛཱིརཏཱིཏི ཡཐཱ ཧི བལིབདྡོ ཛཱིརམཱནོ ཝཌྜྷམཱནོ ནེཝ མཱཏུ, ན པིཏུ, ན སེསཉཱཏཀཱནཾ ཨཏྠཱཡ ཝཌྜྷཏི, ཨཐ ཁོ ནིརཏྠཀམེཝ ཛཱིརཏི, ཨེཝམེཝཾ ཨཡམྤི ན ཨུཔཛ྄ཛྷཱཡཝཏྟཾ ཀརོཏི, ན ཨཱཙརིཡཝཏྟཾ, ན ཨཱགནྟུཀཝཏྟཱདཱིནི, ན བྷཱཝནཱརཱམཏཾ ཨནུཡུཉྫཏི, ནིརཏྠཀམེཝ ཛཱིརཏི, མཾསཱནི ཏསྶ ཝཌྜྷནྟཱིཏི ཡཐཱ བལིབདྡསྶ ‘‘ཡུགནངྒལཱདཱིནི ཝཧིཏུཾ ཨསམཏྠོ ཨེསོ’’ཏི ཨརཉྙེ ཝིསྶཊྛསྶ ཏཏྠེཝ ཝིཙརནྟསྶ ¶ ཁཱདནྟསྶ པིཝནྟསྶ མཾསཱནི ཝཌྜྷནྟི, ཨེཝམེཝ ཨིམསྶཱཔི ཨུཔཛ྄ཛྷཱཡཱདཱིཧི ཝིསྶཊྛསྶ སངྒྷཾ ནིསྶཱཡ ཙཏྟཱརོ པཙྩཡེ ལབྷིཏྭཱ ཨུདྡྷཝིརེཙནཱདཱིནི ཀཏྭཱ ཀཱཡཾ པོསེནྟསྶ ¶ མཾསཱནི ཝཌྜྷནྟི, ཐཱུལསརཱིརོ ཧུཏྭཱ ཝིཙརཏི. པཉྙཱ ཏསྶཱཏི ལོཀིཡལོཀུཏྟརཱ པནསྶ པཉྙཱ ཨེཀངྒུལམཏྟཱཔི ན ཝཌྜྷཏི, ཨརཉྙེ པན གཙྪལཏཱདཱིནི ཝིཡ ཚ དྭཱརཱནི ནིསྶཱཡ ཏཎྷཱ ཙེཝ ནཝཝིདྷམཱནོ ཙ ཝཌྜྷཏཱིཏི ཨཏྠོ.

དེསནཱཝསཱནེ མཧཱཛནོ སོཏཱཔཏྟིཕལཱདཱིནི པཱཔུཎཱིཏི.

ཨནེཀཛཱཏིསཾསཱརནྟི ཨིམཾ དྷམྨདེསནཾ སཏྠཱ བོདྷིརུཀྑམཱུལེ ནིསིནྣོ ཨུདཱནཝསེན ཨུདཱནེཏྭཱ ཨཔརབྷཱགེ ཨཱནནྡཏྠེརེན པུཊྛོ ཀཐེསི.

སོ ཧི བོདྷིརུཀྑམཱུལེ ནིསིནྣོ སཱུརིཡེ ཨནཏྠངྒཏེཡེཝ མཱརབལཾ ཝིདྡྷཾསེཏྭཱ པཋམཡཱམེ པུབྦེནིཝཱསཔཊིཙྪཱདཀཾ ཏམཾ པདཱལེཏྭཱ མཛ྄ཛྷིམཡཱམེ དིབྦཙཀྑུཾ ཝིསོདྷེཏྭཱ པཙྪིམཡཱམེ སཏྟེསུ ཀཱརུཉྙཏཾ པཊིཙྩ པཙྩཡཱཀཱརེ ཉཱཎཾ ཨོཏཱརེཏྭཱ ཏཾ ཨནུལོམཔཊིལོམཝསེན སམྨསནྟོ ཨརུཎུགྒམནཝེལཱཡ སམྨཱསམྦོདྷིཾ ཨབྷིསམྦུཛ྄ཛྷིཏྭཱ ཨནེཀེཧི བུདྡྷསཏསཧསྶེཧི ཨཝིཛཧིཏཾ ཨུདཱནཾ ཨུདཱནེནྟོ ཨིམཱ གཱཐཱ ཨབྷཱསི –

‘‘ཨནེཀཛཱཏིསཾསཱརཾ, སནྡྷཱཝིསྶཾ ཨནིབྦིསཾ;

གཧཀཱརཾ གཝེསནྟོ, དུཀྑཱ ཛཱཏི པུནཔྤུནཾ.

‘‘གཧཀཱརཀ ¶ ¶ དིཊྛོསི, པུན གེཧཾ ན ཀཱཧསི;

སབྦཱ ཏེ ཕཱསུཀཱ བྷགྒཱ, གཧཀཱུཊཾ ཝིསངྑཏཾ;

ཝིསངྑཱརགཏཾ ཙིཏྟཾ, ཏཎྷཱནཾ ཁཡམཛ྄ཛྷགཱ’’ཏི.

ཏཏྠ གཧཀཱརཾ གཝེསནྟོཏི ཨཧཾ ཨིམསྶ ཨཏྟབྷཱཝསངྑཱཏསྶ གེཧསྶ ཀཱརཀཾ ཏཎྷཱཝཌྜྷཀིཾ གཝེསནྟོ ཡེན ཉཱཎེན སཀྐཱ ཏཾ དཊྛུཾ ¶ , ཏསྶ བོདྷིཉཱཎསྶཏྠཱཡ དཱིཔངྐརཔཱདམཱུལེ ཀཏཱབྷིནཱིཧཱརོ ཨེཏྟཀཾ ཀཱལཾ ཨནེཀཛཱཏིསཾསཱརཾ ཨནེཀཛཱཏིསཏསཧསྶསངྑཱཏཾ ཨིམཾ སཾསཱརཝཊྚཾ ཨནིབྦིསཾ ཏཾ ཉཱཎཾ ཨཝིནྡནྟོ ཨལབྷནྟོཡེཝ སནྡྷཱཝིསྶཾ སཾསརིཾ, ཨཔརཱཔརཾ ཨནུཝིཙརིནྟི ཨཏྠོ. དུཀྑཱ ཛཱཏི པུནཔྤུནནྟི ཨིདཾ གཧཀཱརཀགཝེསནསྶ ཀཱརཎཝཙནཾ. ཡསྨཱ ཛརཱབྱཱདྷིམརཎམིསྶིཏཱཡ ཛཱཏི ནཱམེསཱ པུནཔྤུནཾ ཨུཔགནྟུཾ དུཀྑཱ, ན ཙ སཱ ཏསྨིཾ ཨདིཊྛེ ནིཝཏྟཏི. ཏསྨཱ ཏཾ གཝེསནྟོ སནྡྷཱཝིསྶནྟི ཨཏྠོ. དིཊྛོསཱིཏི སབྦཉྙུཏཉྙཱཎཾ པཊིཝིཛ྄ཛྷནྟེན མཡཱ ཨིདཱནི དིཊྛོསི. པུན གེཧནྟི པུན ཨིམསྨིཾ སཾསཱརཝཊྚེ ཨཏྟབྷཱཝསངྑཱཏཾ མམ གེཧཾ ན ཀཱཧསི. སབྦཱ ཏེ ཕཱསུཀཱ བྷགྒཱཏི ཏཝ སབྦཱ ཨཝསེསཱ ཀིལེསཕཱསུཀཱ མཡཱ བྷགྒཱ. གཧཀཱུཊཾ ཝིསངྑཏནྟི ཨིམསྶ ཏཡཱ ཀཏསྶ ཨཏྟབྷཱཝགེཧསྶ ཨཝིཛྫཱསངྑཱཏཾ ¶ ཀཎྞིཀམཎྜལམྤི མཡཱ ཝིདྡྷཾསིཏཾ. ཝིསངྑཱརགཏཾ ཙིཏྟནྟི ཨིདཱནི མམ ཙིཏྟཾ ཝིསངྑཱརཾ ནིབྦཱནཾ ཨཱརམྨཎཀརཎཝསེན གཏཾ ཨནུཔཝིཊྛཾ. ཏཎྷཱནཾ ཁཡམཛ྄ཛྷགཱཏི ཏཎྷཱནཾ ཁཡསངྑཱཏཾ ཨརཧཏྟཾ ཨདྷིགཏོསྨཱིཏི.

ཨཙརིཏྭཱཏི ཨིམཾ དྷམྨདེསནཾ སཏྠཱ ཨིསིཔཏནེ མིགདཱཡེ ཝིཧརནྟོ མཧཱདྷནསེཊྛིཔུཏྟཾ ཨཱརབྦྷ ཀཐེསི.

སོ ཀིར བཱརཱཎསིཡཾ ཨསཱིཏིཀོཊིཝིབྷཝེ ཀུལེ ནིབྦཏྟི. ཨཐསྶ མཱཏཱཔིཏརོ ཙིནྟེསུཾ – ‘‘ཨམྷཱཀཾ ཀུལེ མཧཱབྷོགཀྑནྡྷོ, པུཏྟསྶ ནོ ཧཏྠེ ཋཔེཏྭཱ ཡཐཱསུཁཾ པརིབྷོགཾ ཀརིསྶཱམ, ཨཉྙེན ཀམྨེན ཀིཙྩཾ ནཏྠཱི’’ཏི. ཏཾ ནཙྩགཱིཏཝཱདིཏམཏྟམེཝ སིཀྑཱཔེསུཾ. ཏསྨིཾཡེཝ ནགརེ ཨཉྙསྨིཾ ཨསཱིཏིཀོཊིཝིབྷཝེ ཀུལེ ཨེཀཱ དྷཱིཏཱཔི ནིབྦཏྟི. ཏསྶཱཔི མཱཏཱཔིཏརོ ཏཐེཝ ཙིནྟེཏྭཱ ཏཾ ནཙྩགཱིཏཝཱདིཏམཏྟམེཝ སིཀྑཱཔེསུཾ. ཏེསཾ ཝཡཔྤཏྟཱནཾ ཨཱཝཱཧཝིཝཱཧོ ཨཧོསི. ཨཐ ནེསཾ ཨཔརབྷཱགེ མཱཏཱཔིཏརོ ཀཱལམཀཾསུ. དྭེཨསཱིཏིཀོཊིདྷནཾ ཨེཀསྨིཾཡེཝ ¶ གེཧེ ཨཧོསི. སེཊྛིཔུཏྟོ དིཝསསྶ ཏིཀྑཏྟུཾ རཉྙོ ¶ ཨུཔཊྛཱནཾ གཙྪཏི. ཨཐ ཏསྨིཾ ནགརེ དྷུཏྟཱ ཙིནྟེསུཾ – ‘‘སཙཱཡཾ སེཊྛིཔུཏྟོ སུརཱསོཎྜོ བྷཝིསྶཏི, ཨམྷཱཀཾ ཕཱསུཀཾ བྷཝིསྶཏི, ཨུགྒཎྷཱཔེམ ནཾ སུརཱསོཎྜབྷཱཝ’’ནྟི. ཏེ སུརཾ ཨཱདཱཡ ཁཛྫཀམཾསེ ཙེཝ ལོཎསཀྑརཱ ¶ ཙ དུསྶནྟེ བནྡྷིཏྭཱ མཱུལཀནྡེ གཧེཏྭཱ ཏསྶ རཱཛཀུལཏོ ཨཱགཙྪནྟསྶ མགྒཾ ཨོལོཀཡམཱནཱ ནིསཱིདིཏྭཱ ཏཾ ཨཱགཙྪནྟཾ དིསྭཱ སུརཾ པིཝིཏྭཱ ལོཎསཀྑརཾ མུཁེ ཁིཔིཏྭཱ མཱུལཀནྡཾ ཌཾསིཏྭཱ ‘‘ཝསྶསཏཾ ཛཱིཝ སཱམི, སེཊྛིཔུཏྟ, ཏཾ ནིསྶཱཡ མཡཾ ཁཱདནཔིཝནསམཏྠཱ བྷཝེཡྻཱམཱ’’ཏི ཨཱཧཾསུ. སོ ཏེསཾ ཝཙནཾ སུཏྭཱ པཙྪཏོ ཨཱགཙྪནྟཾ ཙཱུལཱུ༹པཊྛཱཀཾ པུཙྪི – ‘‘ཀིཾ ཨེཏེ པིཝནྟཱི’’ཏི. ཨེཀཾ པཱནཀཾ, སཱམཱིཏི. མནཱཔཛཱཏིཀཾ ཨེཏནྟི. སཱམི, ཨིམསྨིཾ ཛཱིཝལོཀེ ཨིམིནཱ སདིསཾ པཱཏབྦཡུཏྟཀཾ ནཱམ ནཏྠཱིཏི. སོ ‘‘ཨེཝཾ སནྟེ མཡཱཔི པཱཏུཾ ཝཊྚཏཱི’’ཏི ཐོཀཾ ཐོཀཾ ཨཱཧརཱཔེཏྭཱ པིཝཏི. ཨཐསྶ ནཙིརསྶེཝ ཏེ དྷུཏྟཱ པིཝནབྷཱཝཾ ཉཏྭཱ ཏཾ པརིཝཱརཡིཾསུ. གཙྪནྟེ ཀཱལེ པརིཝཱརོ མཧཱ ཨཧོསི. སོ སཏེནཔི སཏདྭཡེནཔི སུརཾ ཨཱཧརཱཔེཏྭཱ པིཝནྟོ ཨིམིནཱ ཨནུཀྐམེནེཝ ནིསིནྣཊྛཱནཱདཱིསུ ཀཧཱཔཎརཱསིཾ ཋཔེཏྭཱ སུརཾ པིཝནྟོ ‘‘ཨིམིནཱ མཱལཱ ཨཱཧརཐ, ཨིམིནཱ གནྡྷེ, ཨཡཾ ཛནོ ཛུཏེ ཚེཀོ, ཨཡཾ ནཙྩེ, ཨཡཾ གཱིཏེ, ཨཡཾ ཝཱདིཏེ. ཨིམསྶ སཧསྶཾ དེཐ, ཨིམསྶ དྭེ སཧསྶཱནཱི’’ཏི ཨེཝཾ ཝིཀིརནྟོ ནཙིརསྶེཝ ཨཏྟནོ སནྟཀཾ ཨསཱིཏིཀོཊིདྷནཾ ཁེཔེཏྭཱ ‘‘ཁཱིཎཾ ཏེ, སཱམི, དྷན’’ནྟི ཝུཏྟེ ཀིཾ བྷརིཡཱཡ མེ སནྟཀཾ ནཏྠཱིཏི. ཨཏྠི, སཱམཱིཏི ¶ . ཏེན ཧི ཏཾ ཨཱཧརཐཱཏི. ཏམྤི ཏཐེཝ ཁེཔེཏྭཱ ཨནུཔུབྦེན ཁེཏྟཨཱརཱམུཡྻཱནཡོགྒཱདིཀམྤི ཨནྟམསོ བྷཱཛནབྷཎྜཀམྤི ཨཏྠརཎཔཱཝུརཎནིསཱིདནམྤི སབྦཾ ཨཏྟནོ སནྟཀཾ ཝིཀྐིཎིཏྭཱ ཁཱདི. ཨཐ ནཾ མཧལླཀཀཱལེ ཡེཧིསྶ ཀུལསནྟཀཾ གེཧཾ ཝིཀྐིཎིཏྭཱ གཧིཏཾ, ཏེ ཏཾ གེཧཱ ནཱིཧརིཾསུ. སོ བྷརིཡཾ ཨཱདཱཡ པརཛནསྶ གེཧབྷིཏྟིཾ ནིསྶཱཡ ཝསནྟོ ཀཔཱལཁཎྜཾ ཨཱདཱཡ བྷིཀྑཱཡ ཙརིཏྭཱ ཛནསྶ ཨུཙྪིཊྛཀཾ བྷུཉྫིཏུཾ ཨཱརབྷི.

ཨཐ ནཾ ཨེཀདིཝསཾ ཨཱསནསཱལཱཡ དྭཱརེ ཋཏྭཱ དཧརསཱམཎེརེཧི དིཡྻམཱནཾ ཨུཙྪིཊྛཀབྷོཛནཾ པཊིགྒཎྷནྟཾ དིསྭཱ སཏྠཱ སིཏཾ པཱཏྭཱཀཱསི. ཨཐ ནཾ ཨཱནནྡཏྠེརོ སིཏཀཱརཎཾ པུཙྪི. སཏྠཱ སིཏཀཱརཎཾ ཀཐེནྟོ ‘‘པསྶཱནནྡ, ཨིམཾ མཧཱདྷནསེཊྛིཔུཏྟཾ ཨིམསྨིཾ ནགརེ དྭེཨསཱིཏིཀོཊིདྷནཾ ¶ ཁེཔེཏྭཱ བྷརིཡཾ ཨཱདཱཡ བྷིཀྑཱཡ ཙརནྟཾ. སཙེ ཧི ཨཡཾ པཋམཝཡེ བྷོགེ ཨཁེཔེཏྭཱ ཀམྨནྟེ པཡོཛཡིསྶ, ཨིམསྨིཾཡེཝ ནགརེ ཨགྒསེཊྛི ཨབྷཝིསྶ. སཙེ པན ནིཀྑམིཏྭཱ པབྦཛིསྶ, ཨརཧཏྟཾ པཱཔུཎིསྶ, བྷརིཡཱཔིསྶ ཨནཱགཱམིཕལེ པཏིཊྛཧིསྶ. སཙེ མཛ྄ཛྷིམཝཡེ བྷོགེ ཨཁེཔེཏྭཱ ཀམྨནྟེ པཡོཛཡིསྶ, དུཏིཡསེཊྛི ཨབྷཝིསྶ, ནིཀྑམིཏྭཱ པབྦཛནྟོ ཨནཱགཱམཱི ཨབྷཝིསྶ. བྷརིཡཱཔིསྶ སཀདཱགཱམིཕལེ པཏིཊྛཧིསྶ. སཙེ པཙྪིམཝཡེ བྷོགེ ཨཁེཔེཏྭཱ ཀམྨནྟེ པཡོཛཡིསྶ, ཏཏིཡསེཊྛི ཨབྷཝིསྶ, ནིཀྑམིཏྭཱ པབྦཛནྟོཔི ¶ སཀདཱགཱམཱི ཨབྷཝིསྶ ¶ , བྷརིཡཱཔིསྶ སོཏཱཔཏྟིཕལེ པཏིཊྛཧིསྶ. ཨིདཱནི པནེས གིཧིབྷོགཏོཔི པརིཧཱིནོ སཱམཉྙཏོཔི. པརིཧཱཡིཏྭཱ ཙ པན སུཀྑཔལླལེ ཀོཉྩསཀུཎོ ཝིཡ ཛཱཏོ’’ཏི ཝཏྭཱ ཨིམཱ གཱཐཱ ཨབྷཱསི –

‘‘ཨཙརིཏྭཱ བྲཧྨཙརིཡཾ, ཨལདྡྷཱ ཡོབྦནེ དྷནཾ;

ཛིཎྞཀོཉྩཱཝ ཛྷཱཡནྟི, ཁཱིཎམཙྪེཝ པལླལེ.

‘‘ཨཙརིཏྭཱ བྲཧྨཙརིཡཾ, ཨལདྡྷཱ ཡོབྦནེ དྷནཾ;

སེནྟི ཙཱཔཱཏིཁཱིཎཱཝ, པུརཱཎཱནི ཨནུཏྠུན’’ནྟི.

ཏཏྠ ཨཙརིཏྭཱཏི བྲཧྨཙརིཡཝཱསཾ ཨཝསིཏྭཱ. ཡོབྦནེཏི ཨནུཔྤནྣེ ཝཱ བྷོགེ ཨུཔྤཱདེཏུཾ ཨུཔྤནྣེ ཝཱ བྷོགེ རཀྑིཏུཾ སམཏྠཀཱལེ དྷནམྤི ཨལབྷིཏྭཱ. ཁཱིཎམཙྪེཏི ཏེ ཨེཝརཱུཔཱ བཱལཱ ཨུདཀསྶ ཨབྷཱཝཱ ཁཱིཎམཙྪེ པལླལེ པརིཀྑཱིཎཔཏྟཱ ཛིཎྞཀོཉྩཱ ཝིཡ ཨཝཛྷཱཡནྟི. ཨིདཾ ཝུཏྟཾ ཧོཏི – པལླལེ ཨུདཀསྶ ཨབྷཱཝོ ཝིཡ ཧི ཨིམེསཾ ཝསནཊྛཱནསྶ ཨབྷཱཝོ, མཙྪཱནཾ ཁཱིཎབྷཱཝོ ཝིཡ ཨིམེསཾ བྷོགཱནཾ ཨབྷཱཝོ, ཁཱིཎཔཏྟཱནཾ ཀོཉྩཱནཾ ཨུཔྤཏིཏྭཱ གམནཱབྷཱཝོ ཝིཡ ཨིམེསཾ ཨིདཱནི ཛལཐལཔཐཱདཱིཧི བྷོགེ སཎྛཱཔེཏུཾ ཨསམཏྠབྷཱཝོ. ཏསྨཱ ཏེ ཁཱིཎཔཏྟཱ ཀོཉྩཱ ཝིཡ ཨེཏྠེཝ བཛ྄ཛྷིཏྭཱ ཨཝཛྷཱཡནྟཱིཏི. ཙཱཔཱཏིཁཱིཎཱཝཱཏི ཙཱཔཏོ ཨཏིཁཱིཎཱ, ཙཱཔཱ ཝིནིམུཏྟཱཏི ཨཏྠོ. ཨིདཾ ཝུཏྟཾ ཧོཏི – ཡཐཱ ཙཱཔཱ ཝིནིམུཏྟཱ སརཱ ཡཐཱཝེགཾ གནྟྭཱ པཏིཏཱ, ཏཾ གཧེཏྭཱ ཨུཀྑིཔནྟེ ¶ ཨསཏི ཏཏྠེཝ ཨུཔཙིཀཱནཾ བྷཏྟཾ ཧོནྟི, ཨེཝཾ ཨིམེཔི ཏཡོ ¶ ཝཡེ ཨཏིཀྐནྟཱ ཨིདཱནི ཨཏྟཱནཾ ཨུདྡྷརིཏུཾ ཨསམཏྠཏཱཡ མརཎཾ ཨུཔགམིསྶནྟི. ཏེན ཝུཏྟཾ – ‘‘སེནྟི ཙཱཔཱཏིཁཱིཎཱཝཱ’’ཏི. པུརཱཎཱནི ཨནུཏྠུནནྟི ‘‘ཨིཏི ཨམྷེཧི ཁཱདིཏཾ ཨིཏི པཱིཏ’’ནྟི པུབྦེ ཀཏཱནི ཁཱདིཏཔིཝིཏནཙྩགཱིཏཝཱདིཏཱདཱིནི ཨནུཏྠུནནྟཱ སོཙནྟཱ ཨནུསོཙནྟཱ སེནྟཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཏྟཱནཉྩེཏི ¶ ¶ ¶ ཨིམཾ དྷམྨདེསནཾ སཏྠཱ བྷེསཀལཱ༹ཝནེ ཝིཧརནྟོ བོདྷིརཱཛཀུམཱརཾ ཨཱརབྦྷ ཀཐེསི.

སོ ཀིར པཐཝཱིཏལེ ཨཉྙེཧི པཱསཱདེཧི ཨསདིསརཱུཔཾ ཨཱཀཱསེ ཨུཔྤཏམཱནཾ ཝིཡ ཀོཀནུདཾ ནཱམ པཱསཱདཾ ཀཱརེཏྭཱ ཝཌྜྷཀིཾ པུཙྪི – ‘‘ཀིཾ ཏཡཱ ཨཉྙཏྠཱཔི ཨེཝརཱུཔོ པཱསཱདོ ཀཏཔུབྦོ, ཨུདཱཧུ པཋམསིཔྤམེཝ ཏེ ཨིད’’ནྟི. ‘‘པཋམསིཔྤམེཝ, དེཝཱ’’ཏི ཙ ཝུཏྟེ ཙིནྟེསི – ‘‘སཙེ ཨཡཾ ཨཉྙསྶཔི ཨེཝརཱུཔཾ པཱསཱདཾ ཀརིསྶཏི, ཨཡཾ པཱསཱདོ ཨནཙྪརིཡོ བྷཝིསྶཏི. ཨིམཾ མཡཱ མཱརེཏུཾ ཝཱ ཧཏྠཔཱདེ ཝཱསྶ ཚིནྡིཏུཾ ཨཀྑཱིནི ཝཱ ཨུཔྤཱཊེཏུཾ ཝཊྚཏི, ཨེཝཾ ཨཉྙསྶ པཱསཱདཾ ན ཀརིསྶཏཱི’’ཏི. སོ ཏམཏྠཾ ཨཏྟནོ པིཡསཧཱཡཀསྶ སཉྫཱིཝཀཔུཏྟསྶ ནཱམ མཱཎཝཀསྶ ཀཐེསི. སོ ཙིནྟེསི – ‘‘ནིསྶཾསཡཾ ཨེས ཝཌྜྷཀིཾ ནཱསེསྶཏི, ཨནགྒྷོ སིཔྤཱི, སོ མཡི པསྶནྟེ མཱ ནསྶཏུ, སཉྙམསྶ དསྶཱམཱི’’ཏི. སོ ཏཾ ཨུཔསངྐམིཏྭཱ ‘‘པཱསཱདེ ཏེ ཀམྨཾ ནིཊྛིཏཾ, ནོ’’ཏི པུཙྪིཏྭཱ ‘‘ནིཊྛིཏ’’ནྟི ཝུཏྟེ ‘‘རཱཛཀུམཱརོ ཏཾ ནཱསེཏུཀཱམོ ཨཏྟཱནཾ རཀྑེཡྻཱསཱི’’ཏི ཨཱཧ ¶ . ཝཌྜྷཀཱིཔི ‘‘བྷདྡཀཾ ཏེ, སཱམི, ཀཏཾ མམ ཨཱརོཙེནྟེན, ཨཧམེཏྠ ཀཏྟབྦཾ ཛཱནིསྶཱམཱི’’ཏི ཝཏྭཱ ‘‘ཀིཾ, སམྨ, ཨམྷཱཀཾ པཱསཱདེ ཀམྨཾ ནིཊྛིཏ’’ནྟི རཱཛཀུམཱརེན པུཊྛོ ‘‘ན ཏཱཝ, དེཝ, ནིཊྛིཏཾ, བཧུ ཨཝསིཊྛ’’ནྟི ཨཱཧ. ཀིཾ ཀམྨཾ ནཱམ ཨཝསིཊྛནྟི? པཙྪཱ, དེཝ, ཨཱཙིཀྑིསྶཱམི, དཱརཱུནི ཏཱཝ ཨཱཧརཱཔེཐཱཏི. ཀིཾ དཱརཱུནི ནཱམཱཏི? ནིསྶཱརཱནི སུཀྑདཱརཱུནི, དེཝཱཏི. སོ ཨཱཧརཱཔེཏྭཱ ཨདཱསི. ཨཐ ནཾ ཨཱཧ – ‘‘དེཝ, ཏེ ཨིཏོ པཊྛཱཡ མམ སནྟིཀཾ ནཱགནྟབྦཾ. ཀིཾ ཀཱརཎཱ? སུཁུམཀམྨཾ ཀརོནྟསྶ ཧི ཨཉྙེཧི སདྡྷིཾ སལླཔནྟསྶ མེ ཀམྨཝིཀྑེཔོ ཧོཏི, ཨཱཧཱརཝེལཱཡཾ པན མེ བྷརིཡཱཝ ཨཱཧཱརཾ ཨཱཧརིསྶཏཱི’’ཏི. རཱཛཀུམཱརོཔི ‘‘སཱདྷཱུ’’ཏི པཊིསྶུཎི. སོཔི ཨེཀསྨིཾ གབྦྷེ ནིསཱིདིཏྭཱ ཏཱནི དཱརཱུནི ཏཙྪེཏྭཱ ཨཏྟནོ པུཏྟདཱརསྶ ཨནྟོ ནིསཱིདནཡོགྒཾ གརུལ༹སཀུཎཾ ཀཏྭཱ ཨཱཧཱརཝེལཱཡ པན བྷརིཡཾ ཨཱཧ – ‘‘གེཧེ ཝིཛྫམཱནཀཾ སབྦཾ ཝིཀྐིཎིཏྭཱ ཧིརཉྙསུཝཎྞཾ ¶ གཎྷཱཧཱི’’ཏི. རཱཛཀུམཱརོཔི ཝཌྜྷཀིསྶ ཨནིཀྑམནཏྠཱཡ གེཧཾ པརིཀྑིཔིཏྭཱ ཨཱརཀྑཾ ཋཔེསི. ཝཌྜྷཀཱིཔི ¶ སཀུཎསྶ ནིཊྛིཏཀཱལེ ‘‘ཨཛྫ སབྦེཔི དཱརཀེ གཧེཏྭཱ ཨཱགཙྪེཡྻཱསཱི’’ཏི བྷརིཡཾ ཝཏྭཱ བྷུཏྟཔཱཏརཱསོ པུཏྟདཱརཾ སཀུཎསྶ ཀུཙྪིཡཾ ནིསཱིདཱཔེཏྭཱ ཝཱཏཔཱནེན ནིཀྑམིཏྭཱ པལཱཡི. སོ ཏེསཾ, ‘‘དེཝ, ཝཌྜྷཀཱི པལཱཡཏཱི’’ཏི ཀནྡནྟཱནཾཡེཝ གནྟྭཱ ཧིམཝནྟེ ཨོཏརིཏྭཱ ཨེཀཾ ནགརཾ མཱཔེཏྭཱ ཀཊྛཝཱཧནརཱཛཱ ནཱམ ཛཱཏོ.

རཱཛཀུམཱརོཔི ¶ ‘‘པཱསཱདམཧཾ ཀརིསྶཱམཱི’’ཏི སཏྠཱརཾ ནིམནྟེཏྭཱ པཱསཱདེ ཙཏུཛྫཱཏིཡགནྡྷེཧི པརིབྷཎྜིཀཾ ཀཏྭཱ པཋམཨུམྨཱརཏོ པཊྛཱཡ ཙེལཔཊིཀཾ པཏྠརི. སོ ཀིར ཨཔུཏྟཀོ, ཏསྨཱ ‘‘སཙཱཧཾ པུཏྟཾ ཝཱ དྷཱིཏརཾ ཝཱ ལཙྪཱམི, སཏྠཱ ཨིམཾ ཨཀྐམིསྶཏཱི’’ཏི ཙིནྟེཏྭཱ པཏྠརི. སོ སཏྠརི ཨཱགཏེ སཏྠཱརཾ པཉྩཔཏིཊྛིཏེན ཝནྡིཏྭཱ པཏྟཾ གཧེཏྭཱ ‘‘པཝིསཐ, བྷནྟེ’’ཏི ཨཱཧ. སཏྠཱ ན པཱཝིསི, སོ དུཏིཡམྤི ཏཏིཡམྤི ཡཱཙི. སཏྠཱ ཨཔཝིསིཏྭཱཝ ཨཱནནྡཏྠེརཾ ཨོལོཀེསི. ཐེརོ ཨོལོཀིཏསཉྙཱཡེཝ ཝཏྠཱནཾ ཨནཀྐམནབྷཱཝཾ ཉཏྭཱ ཏཾ ‘‘སཾཧརཏུ, རཱཛཀུམཱར, དུསྶཱནི, ན བྷགཝཱ ཙེལཔཊིཀཾ ཨཀྐམིསྶཏི, པཙྪིམཛནཏཾ ཏཐཱགཏོ ཨོལོཀེཏཱི’’ཏི དུསྶཱནི སཾཧརཱཔེསི. སོ དུསྶཱནི སཾཧརིཏྭཱ སཏྠཱརཾ ཨནྟོནིཝེསནཾ པཝེསཏྭཱ ཡཱགུཁཛྫཀེན སམྨཱནེཏྭཱ ཨེཀམནྟཾ ནིསིནྣོ ཝནྡིཏྭཱ ཨཱཧ – ‘‘བྷནྟེ, ཨཧཾ ཏུམྷཱཀཾ ཨུཔཀཱརཀོ ཏིཀྑཏྟུཾ སརཎཾ གཏོ, ཀུཙྪིགཏོ ཙ ཀིརམྷི ཨེཀཝཱརཾ སརཎཾ གཏོ, དུཏིཡཾ ཏརུཎདཱརཀཀཱལེ, ཏཏིཡཾ ཝིཉྙུབྷཱཝཾ པཏྟཀཱལེ. ཏསྶ མེ ཀསྨཱ ཙེལཔཊིཀཾ ན ཨཀྐམིཏྠཱ’’ཏི? ‘‘ཀིཾ པན ཏྭཾ, ཀུམཱར, ཙིནྟེཏྭཱ ཙེལཱནི ཨཏྠརཱི’’ཏི? ‘‘སཙེ པུཏྟཾ ཝཱ དྷཱིཏརཾ ཝཱ ལཙྪཱམི, སཏྠཱ མེ ཙེལཔཊིཀཾ ཨཀྐམིསྶཏཱི’’ཏི ཨིདཾ ཙིནྟེཏྭཱ, བྷནྟེཏི. ཏེནེཝཱཧཾ ཏཾ ན ཨཀྐམིནྟི. ‘‘ཀིཾ པནཱཧཾ, བྷནྟེ, པུཏྟཾ ¶ ཝཱ དྷཱིཏརཾ ཝཱ ནེཝ ལཙྪཱམཱི’’ཏི? ‘‘ཨཱམ, ཀུམཱརཱ’’ཏི. ‘‘ཀིཾ ཀཱརཎཱ’’ཏི? ‘‘པུརིམཀཨཏྟབྷཱཝེ ཛཱཡཱཡ སདྡྷིཾ པམཱདཾ ཨཱཔནྣཏྟཱ’’ཏི. ‘‘ཀསྨིཾ ཀཱལེ, བྷནྟེ’’ཏི? ཨཐསྶ སཏྠཱ ཨཏཱིཏཾ ཨཱཧརིཏྭཱ དསྶེསི –

ཨཏཱིཏེ ཀིར ཨནེཀསཏཱ མནུསྶཱ མཧཏིཡཱ ནཱཝཱཡ སམུདྡཾ པཀྑནྡིཾསུ. ནཱཝཱ སམུདྡམཛ྄ཛྷེ བྷིཛྫི. དྭེ ཛཡམྤཏིཀཱ ཨེཀཾ ཕལཀཾ གཧེཏྭཱ ཨནྟརདཱིཔཀཾ པཝིསིཾསུ, སེསཱ སབྦེ ཏཏྠེཝ མརིཾསུ. ཏསྨིཾ ཁོ པན དཱིཔཀེ ¶ མཧཱསཀུཎསངྒྷོ ཝསཏི. ཏེ ཨཉྙཾ ཁཱདིཏབྦཀཾ ཨདིསྭཱ ཚཱཏཛ྄ཛྷཏྟཱ སཀུཎཨཎྜཱནི ཨངྒཱརེསུ པཙིཏྭཱ ཁཱདིཾསུ, ཏེསུ ཨཔྤཧོནྟེསུ སཀུཎཙྪཱཔེ གཧེཏྭཱ ཁཱདིཾསུ. ཨེཝཾ པཋམཝཡེཔི མཛ྄ཛྷིམཝཡེཔི པཙྪིམཝཡེཔི ཁཱདིཾསུཡེཝ. ཨེཀསྨིམྤི ཝཡེ ཨཔྤམཱདཾ ནཱཔཛྫིཾསུ, ཨེཀོཔི ཙ ནེསཾ ཨཔྤམཱདཾ ནཱཔཛྫི.

སཏྠཱ ཨིདཾ ཏསྶ པུབྦཀམྨཾ དསྶེཏྭཱ ‘‘སཙེ ཧི ཏྭཾ, ཀུམཱར, ཏདཱ ཨེཀསྨིམྤི ཝཡེ བྷརིཡཱཡ ¶ སདྡྷིཾ ཨཔྤམཱདཾ ཨཱཔཛྫིསྶ, ཨེཀསྨིམྤི ཝཡེ པུཏྟོ ཝཱ དྷཱིཏཱ ཝཱ ཨུཔྤཛྫེཡྻ. སཙེ པན ཝོ ཨེཀོཔི ཨཔྤམཏྟོ ཨབྷཝིསྶ, ཏཾ པཊིཙྩ པུཏྟོ ཝཱ དྷཱིཏཱ ཝཱ ཨུཔྤཛྫིསྶ. ཀུམཱར, ཨཏྟཱནཉྷི པིཡཾ མཉྙམཱནེན ཏཱིསུཔི ཝཡེསུ ཨཔྤམཏྟེན ཨཏྟཱ རཀྑིཏབྦོ, ཨེཝཾ ཨསཀྐོནྟེན ཨེཀཝཡེཔི རཀྑིཏབྦོཡེཝཱ’’ཏི ཝཏྭཱ ཨིམཾ གཱཐམཱཧ –

‘‘ཨཏྟཱནཉྩེ པིཡཾ ཛཉྙཱ, རཀྑེཡྻ ནཾ སུརཀྑིཏཾ;

ཏིཎྞཾ ཨཉྙཏརཾ ཡཱམཾ, པཊིཛགྒེཡྻ པཎྜིཏོ’’ཏི.

ཏཏྠ ¶ ཡཱམནྟི སཏྠཱ ཨཏྟནོ དྷམྨིསྶརཏཱཡ དེསནཱཀུསལཏཱཡ ཙ ཨིདྷ ཏིཎྞཾ ཝཡཱནཾ ཨཉྙཏརཾ ཝཡཾ ཡཱམནྟི ཀཏྭཱ དེསེསི, ཏསྨཱ ཨེཝམེཏྠ ཨཏྠོ ཝེདིཏབྦོ. སཙེ ཨཏྟཱནཾ པིཡཾ ཛཱནེཡྻ, རཀྑེཡྻ ནཾ སུརཀྑིཏནྟི ཡཐཱ སོ སུརཀྑིཏོ ཧོཏི, ཨེཝཾ ནཾ རཀྑེཡྻ. ཏཏྠ སཙེ གཱིཧཱི སམཱནོ ‘‘ཨཏྟཱནཾ རཀྑིསྶཱམཱི’’ཏི ཨུཔརིཔཱསཱདཏལེ སུསཾཝུཏཾ གབྦྷཾ པཝིསིཏྭཱ སམྤནྣཱརཀྑོ ཧུཏྭཱ ཝསནྟོཔི, པབྦཛིཏོ ཧུཏྭཱ སུསཾཝུཏེ པིཧིཏདྭཱརཝཱཏཔཱནེ ལེཎེ ཝིཧརནྟོཔི ཨཏྟཱནཾ ན རཀྑཏིཡེཝ. གིཧཱི པན སམཱནོ ཡཐཱབལཾ དཱནསཱིལཱདཱིནི པུཉྙཱནི ཀརོནྟོ, པབྦཛིཏོ ཝཱ པན ཝཏྟཔཊིཝཏྟཔརིཡཏྟིམནསིཀཱརེསུ ཨུསྶུཀྐཾ ཨཱཔཛྫནྟོ ཨཏྟཱནཾ རཀྑཏི ནཱམ. ཨེཝཾ ཏཱིསུ ཝཡེསུ ཨསཀྐོནྟོ ཨཉྙཏརསྨིམྤི ཝཡེ པཎྜིཏཔུརིསོ ཨཏྟཱནཾ པཊིཛགྒཏིཡེཝ. སཙེ ཧི གིཧིབྷཱུཏོ པཋམཝཡེ ཁིཌྜཱཔསུཏཏཱཡ ཀུསལཾ ཀཱཏུཾ ན སཀྐོཏི, མཛ྄ཛྷིམཝཡེ ཨཔྤམཏྟེན ཧུཏྭཱ ཀུསལཾ ཀཱཏབྦཾ. སཙེ མཛ྄ཛྷིམཝཡེ པུཏྟདཱརཾ པོསེནྟོ ཀུསལཾ ཀཱཏུཾ ན སཀྐོཏི, པཙྪིམཝཡེ ཀཱཏབྦམེཝ. ཨེཝམྤི ཀརོནྟེན ཨཏྟཱ པཊིཛགྒིཏོཝ ཧོཏི. ཨེཝཾ ཨཀརོནྟསྶ པན ཨཏྟཱ པིཡོ ནཱམ ན ཧོཏི, ཨཔཱཡཔརཱཡཎམེཝ ནཾ ཀརོཏི. སཙེ པན ¶ པབྦཛིཏོ པཋམཝཡེ སཛ྄ཛྷཱཡཾ ཀརོནྟོ དྷཱརེནྟོ ཝཱཙེནྟོ ཝཏྟཔཊིཝཏྟཾ ཀརོནྟོ པམཱདཾ ཨཱཔཛྫཏི, མཛ྄ཛྷིམཝཡེ ཨཔྤམཏྟེན སམཎདྷམྨོ ¶ ཀཱཏབྦོ. སཙེ པཋམཝཡེ ཨུགྒཧིཏཔརིཡཏྟིཡཱ ཨཊྛཀཐཾ ཝིནིཙྪཡཾ ཀཱརཎཱཀཱརཎཉྩ པུཙྪནྟོ མཛ྄ཛྷིམཝཡེ པམཱདཾ ཨཱཔཛྫཏི, པཙྪིམཝཡེ ཨཔྤམཏྟེན སམཎདྷམྨོ ཀཱཏབྦོཡེཝ. ཨེཝམྤི ཀརོནྟེན ཨཏྟཱ པཊིཛགྒིཏོཝ ཧོཏི. ཨེཝཾ ཨཀརོནྟསྶ པན ཨཏྟཱ པིཡོ ནཱམ ན ཧོཏི, པཙྪཱནུཏཱཔེནེཝ ནཾ ཏཱཔེཏཱིཏི.

དེསནཱཝསཱནེ བོདྷིརཱཛཀུམཱརོ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

ཨཏྟཱནམེཝ ¶ པཋམནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨུཔནནྡཾ སཀྱཔུཏྟཾ ཨཱརབྦྷ ཀཐེསི.

སོ ཀིར ཐེརོ དྷམྨཀཐཾ ཀཐེཏུཾ ཚེཀོ. ཏསྶ ཨཔྤིཙྪཏཱདིཔཊིསཾཡུཏྟཾ དྷམྨཀཐཾ སུཏྭཱ བཧཱུ བྷིཀྑུ ཏཾ ཏིཙཱིཝརེཧི པཱུཛེཏྭཱ དྷུཏངྒཱནི སམཱདིཡིཾསུ. ཏེཧི ཝིསྶཊྛཔརིཀྑཱརེ སོཡེཝ གཎྷི. སོ ཨེཀསྨིཾ ཨནྟོཝསྶེ ཨུཔཀཊྛེ ཛནཔདཾ ཨགམཱསི. ཨཐ ནཾ ཨེཀསྨིཾ ཝིཧཱརེ དཧརསཱམཎེརཱ དྷམྨཀཐིཀཔེམེན, ‘‘བྷནྟེ, ཨིདྷ ཝསྶཾ ཨུཔེཐཱ’’ཏི ཝདིཾསུ. ‘‘ཨིདྷ ཀིཏྟཀཾ ཝསྶཱཝཱསིཀཾ ལབྦྷཏཱི’’ཏི པུཙྪིཏྭཱ ཏེཧི ‘‘ཨེཀེཀོ སཱཊཀོ’’ཏི ཝུཏྟེ ཏཏྠ ཨུཔཱཧནཱ ཋཔེཏྭཱ ཨཉྙཾ ཝིཧཱརཾ ཨགམཱསི ¶ . དུཏིཡཾ ཝིཧཱརཾ གནྟྭཱ ‘‘ཨིདྷ ཀིཾ ལབྦྷཏཱི’’ཏི པུཙྪིཏྭཱ ‘‘དྭེ སཱཊཀཱ’’ཏི ཝུཏྟེ ཀཏྟརཡཊྛིཾ ཋཔེསི. ཏཏིཡཾ ཝིཧཱརཾ གནྟྭཱ ‘‘ཨིདྷ ཀིཾ ལབྦྷཏཱི’’ཏི པུཙྪིཏྭཱ ‘‘ཏཡོ སཱཊཀཱ’’ཏི ཝུཏྟེ ཏཏྠ ཨུདཀཏུམྦཾ ཋཔེསི. ཙཏུཏྠཾ ཝིཧཱརཾ གནྟྭཱ ‘‘ཨིདྷ ཀིཾ ལབྦྷཏཱི’’ཏི པུཙྪིཏྭཱ ‘‘ཙཏྟཱརོ སཱཊཀཱ’’ཏི ཝུཏྟེ ‘‘སཱདྷུ ཨིདྷ ཝསིསྶཱམཱི’’ཏི ཏཏྠ ཝསྶཾ ཨུཔགནྟྭཱ གཧཊྛཱནཉྩེཝ བྷིཀྑཱུནཉྩ དྷམྨཀཐཾ ཀཐེསི. ཏེ ནཾ བཧཱུཧི ཝཏྠེཧི ཙེཝ ཙཱིཝརེཧི ཙ པཱུཛེསུཾ. སོ ཝུཊྛཝསྶོ ཨིཏརེསུཔི ཝིཧཱརེསུ སཱསནཾ པེསེཏྭཱ ‘‘མཡཱ པརིཀྑཱརསྶ ཋཔིཏཏྟཱ ཝསྶཱཝཱསིཀཾ ལདྡྷབྦཾ, ཏཾ མེ པཧིཎནྟཱུ’’ཏི སབྦཾ ཨཱཧརཱཔེཏྭཱ ཡཱནཀཾ པཱུརེཏྭཱ པཱཡཱསི.

ཨཐེཀསྨིཾ ¶ ཝིཧཱརེ དྭེ དཧརབྷིཀྑཱུ དྭེ སཱཊཀེ ཨེཀཉྩ ཀམྦལཾ ལབྷིཏྭཱ ‘‘ཏུཡ྄ཧཾ སཱཊཀཱ ཧོནྟུ, མཡ྄ཧཾ ཀམྦལོ’’ཏི བྷཱཛེཏུཾ ཨསཀྐོནྟཱ མགྒསམཱིཔེ ནིསཱིདིཏྭཱ ཝིཝདནྟི. ཏེ ཏཾ ཐེརཾ ཨཱགཙྪནྟཾ དིསྭཱ, ‘‘བྷནྟེ, ཏུམྷེ ནོ བྷཱཛེཏྭཱ དེཐཱ’’ཏི ཝདིཾསུ. ཏུམྷེཡེཝ བྷཱཛེཐཱཏི. ན སཀྐོམ, བྷནྟེ, ཏུམྷེཡེཝ ནོ བྷཱཛེཏྭཱ དེཐཱཏི. ཏེན ཧི མམ ཝཙནེ ཋསྶཐཱཏི. ཨཱམ, ཋསྶཱམཱཏི. ‘‘ཏེན ཧི སཱདྷཱུ’’ཏི ཏེསཾ དྭེ སཱཊཀེ དཏྭཱ ‘‘ཨཡཾ དྷམྨཀཐཾ ཀཐེནྟཱནཾ ཨམྷཱཀཾ པཱརུཔནཱརཧོ’’ཏི མཧགྒྷཾ ཀམྦལཾ ཨཱདཱཡ པཀྐཱམི. དཧརབྷིཀྑཱུ ཝིཔྤཊིསཱརིནོ ཧུཏྭཱ སཏྠུ སནྟིཀཾ གནྟྭཱ ཏམཏྠཾ ཨཱརོཙེསུཾ. སཏྠཱ ‘‘ན, བྷིཀྑཝེ, ཨིདཱནེཝ ཏུམྷཱཀཾ སནྟཀཾ ¶ གཧེཏྭཱ ཏུམྷེ ཝིཔྤཊིསཱརིནོ ཀརོཏི, པུབྦེཔི ཨཀཱསིཡེཝཱ’’ཏི ཝཏྭཱ ཨཏཱིཏཾ ཨཱཧརི –

ཨཏཱིཏསྨིཾ ཨནུཏཱིརཙཱརཱི ཙ གམྦྷཱིརཙཱརཱི ཙཱཏི དྭེ ཨུདྡཱ མཧནྟཾ རོཧིཏམཙྪཾ ལབྷིཏྭཱ ‘‘མཡ྄ཧཾ སཱིསཾ ཧོཏུ, ཏཝ ནངྒུཊྛ’’ནྟི ཝིཝཱདཱཔནྣཱ བྷཱཛེཏུཾ ཨསཀྐོནྟཱ ཨེཀཾ སིངྒཱལཾ དིསྭཱ ཨཱཧཾསུ – ‘‘མཱཏུལ, ཨིམཾ ནོ བྷཱཛེཏྭཱ དེཧཱི’’ཏི. ཨཧཾ རཉྙཱ ཝིནིཙྪཡཊྛཱནེ ཋཔིཏོ, ཏཏྠ ཙིརཾ ¶ ནིསཱིདིཏྭཱ ཛངྒྷཝིཧཱརཏྠཱཡ ཨཱགཏོམྷི, ཨིདཱནི མེ ཨོཀཱསོ ནཏྠཱིཏི. མཱཏུལ, མཱ ཨེཝཾ ཀརོཐ, བྷཱཛེཏྭཱ ཨེཝ ནོ དེཐཱཏི. མམ ཝཙནེ ཋསྶཐཱཏི. ཋསྶཱམ, མཱཏུལཱཏི. ‘‘ཏེན ཧི སཱདྷཱུ’’ཏི སོ སཱིསཾ ཚིནྡིཏྭཱ ཨེཀམནྟེ ཨཀཱསི, ནངྒུཊྛཾ ཨེཀམནྟེ. ཀཏྭཱ ཙ པན, ‘‘ཏཱཏཱ, ཡེན ཝོ ཨནུཏཱིརེ ཙརིཏཾ, སོ ནངྒུཊྛཾ གཎྷཱཏུ. ཡེན གམྦྷཱིརེ ཙརིཏཾ, ཏསྶ སཱིསཾ ཧོཏུ. ཨཡཾ པན མཛ྄ཛྷིམོ ཁཎྜོ མམ ཝིནིཙྪཡདྷམྨེ ཋིཏསྶ བྷཝིསྶཏཱི’’ཏི ཏེ སཉྙཱཔེནྟོ –

‘‘ཨནུཏཱིརཙཱརི ནངྒུཊྛཾ, སཱིསཾ གམྦྷཱིརཙཱརིནོ;

ཨཙྩཱཡཾ མཛ྄ཛྷིམོ ཁཎྜོ, དྷམྨཊྛསྶ བྷཝིསྶཏཱི’’ཏི. (ཛཱ. ༡.༧.༣༣) –

ཨིམཾ གཱཐཾ ཝཏྭཱ མཛ྄ཛྷིམཁཎྜཾ ཨཱདཱཡ པཀྐཱམི. ཏེཔི ཝིཔྤཊིསཱརིནོ ཏཾ ཨོལོཀེཏྭཱ ཨཊྛཾསུ.

སཏྠཱ ཨིམཾ ཨཏཱིཏཾ དསྶེཏྭཱ ‘‘ཨེཝམེས ཨཏཱིཏེཔི ཏུམྷེ ཝིཔྤཊིསཱརིནོ ཨཀཱསིཡེཝཱ’’ཏི ཏེ བྷིཀྑཱུ སཉྙཱཔེཏྭཱ ཨུཔནནྡཾ གརཧནྟོ, ‘‘བྷིཀྑཝེ ¶ , པརཾ ཨོཝདནྟེན ནཱམ པཋམམེཝ ཨཏྟཱ པཏིརཱུཔེ པཏིཊྛཱཔེཏབྦོ’’ཏི ཝཏྭཱ ཨིམཾ གཱཐམཱཧ –

‘‘ཨཏྟཱནམེཝ པཋམཾ, པཏིརཱུཔེ ནིཝེསཡེ;

ཨཐཉྙམནུསཱསེཡྻ, ན ཀིལིསྶེཡྻ པཎྜིཏོ’’ཏི.

ཏཏྠ ¶ པཏིརཱུཔེ ནིཝེསཡེཏི ཨནུཙྪཝིཀེ གུཎེ པཏིཊྛཱཔེཡྻ. ཨིདཾ ཝུཏྟཾ ཧོཏི – ཡོ ཨཔྤིཙྪཏཱདིགུཎེཧི ཝཱ ཨརིཡཝཾསཔཊིཔདཱདཱིཧི ཝཱ པརཾ ཨནུསཱསིཏུཀཱམོ, སོ ཨཏྟཱནམེཝ པཋམཾ ཏསྨིཾ གུཎེ པཏིཊྛཱཔེཡྻ. ཨེཝཾ པཏིཊྛཱཔེཏྭཱ ཨཐཉྙཾ ཏེཧི གུཎེཧི ཨནུསཱསེཡྻ. ཨཏྟཱནཉྷི ཏཏྠ ཨནིཝེསེཏྭཱ ཀེཝལཾ པརམེཝ ཨནུསཱསམཱནོ པརཏོ ནིནྡཾ ལབྷིཏྭཱ ཀིལིསྶཏི ནཱམ, ཏཏྠ ཨཏྟཱནཾ ནིཝེསེཏྭཱ ཨནུསཱསམཱནོ པརཏོ པསཾསཾ ལབྷཏི, ཏསྨཱ ན ཀིལིསྶཏི ནཱམ. ཨེཝཾ ཀརོནྟོ པཎྜིཏོ ན ཀིལིསྶེཡྻཱཏི.

དེསནཱཝསཱནེ ཏེ བྷིཀྑཱུ སོཏཱཔཏྟིཕལེ པཏིཊྛཧིཾསུ, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཨུཔནནྡསཀྱཔུཏྟཏྠེརཝཏྠུ དུཏིཡཾ.

ཨཏྟཱནཉྩེཏི ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པདྷཱནིཀཏིསྶཏྠེརཾ ཨཱརབྦྷ ཀཐེསི.

སོ ཀིར སཏྠུ སནྟིཀེ ཀམྨཊྛཱནཾ གཧེཏྭཱ པཉྩསཏེ བྷིཀྑཱུ ཨཱདཱཡ ཨརཉྙེ ཝསྶཾ ཨུཔགནྟྭཱ, ‘‘ཨཱཝུསོ, དྷརམཱནཀསྶ བུདྡྷསྶ སནྟིཀེ ཝོ ཀམྨཊྛཱནཾ གཧིཏཾ, ཨཔྤམཏྟཱཝ སམཎདྷམྨཾ ཀརོཐཱ’’ཏི ཨོཝདིཏྭཱ སཡཾ གནྟྭཱ ནིཔཛྫིཏྭཱ སུཔཏི. ཏེ བྷིཀྑཱུ པཋམཡཱམེ ཙངྐམིཏྭཱ མཛ྄ཛྷིམཡཱམེ ཝིཧཱརཾ པཝིསནྟི. སོ ནིདྡཱཡིཏྭཱ པབུདྡྷཀཱལེ ཏེསཾ སནྟིཀཾ གནྟྭཱ ‘‘ཀིཾ ཏུམྷེ ‘ནིཔཛྫིཏྭཱ ནིདྡཱཡིསྶཱམཱ’ཏི ཨཱགཏཱ, སཱིགྷཾ ནིཀྑམིཏྭཱ ¶ སམཎདྷམྨཾ ཀརོཐཱ’’ཏི ཝཏྭཱ སཡཾ གནྟྭཱ ཏཐེཝ སུཔཏི. ཨིཏརེ མཛ྄ཛྷིམཡཱམེ བཧི ཙངྐམིཏྭཱ པཙྪིམཡཱམེ ཝིཧཱརཾ པཝིསནྟི. སོ པུནཔི པབུཛ྄ཛྷིཏྭཱ ཏེསཾ སནྟིཀཾ གནྟྭཱ ཏེ ཝིཧཱརཱ ནཱིཧརིཏྭཱ སཡཾ པུན གནྟྭཱ ཏཐེཝ སུཔཏི. ཏསྨིཾ ནིཙྩཀཱལཾ ཨེཝཾ ཀརོནྟེ ཏེ བྷིཀྑཱུ སཛ྄ཛྷཱཡཾ ཝཱ ཀམྨཊྛཱནཾ ¶ ཝཱ མནསིཀཱཏུཾ ནཱསཀྑིཾསུ, ཙིཏྟཾ ཨཉྙཐཏྟཾ ཨགམཱསི. ཏེ ‘‘ཨམྷཱཀཾ ཨཱཙརིཡོ ཨཏིཝིཡ ཨཱརདྡྷཝཱིརིཡོ, པརིགྒཎྷིསྶཱམ ན’’ནྟི པརིགྒཎྷནྟཱ ཏསྶ ཀིརིཡཾ དིསྭཱ ‘‘ནཊྛམྷཱ, ཨཱཝུསོ, ཨཱཙརིཡོ ནོ ཏུཙྪརཝཾ རཝཏཱི’’ཏི ཝདིཾསུ. ཏེསཾ ཨཏིཝིཡ ནིདྡཱཡ ཀིལམནྟཱནཾ ཨེཀབྷིཀྑུཔི ཝིསེསཾ ནིབྦཏྟེཏུཾ ནཱསཀྑི. ཏེ ཝུཊྛཝསྶཱ སཏྠུ སནྟིཀཾ གནྟྭཱ སཏྠཱརཱ ཀཏཔཊིསནྠཱརཱ ‘‘ཀིཾ, བྷིཀྑཝེ, ཨཔྤམཏྟཱ ཧུཏྭཱ སམཎདྷམྨཾ ཀརིཏྠཱ’’ཏི པུཙྪིཏཱ ཏམཏྠཾ ཨཱརོཙེསུཾ. སཏྠཱ ‘‘ན, བྷིཀྑཝེ, ཨིདཱནེཝ, པུབྦེཔེས ཏུམྷཱཀཾ ཨནྟརཱཡམཀཱསིཡེཝཱ’’ཏི ཝཏྭཱ ཏེཧི ཡཱཙིཏོ –

‘‘ཨམཱཏཱཔིཏརསཾཝཌྜྷོ, ཨནཱཙེརཀུལེ ཝསཾ;

ནཱཡཾ ཀཱལཾ ཨཀཱལཾ ཝཱ, ཨབྷིཛཱནཱཏི ཀུཀྐུཊོ’’ཏི. (ཛཱ. ༡.༡.༡༡༩) –

ཨིམཾ ཨཀཱལརཱཝིཀུཀྐུཊཛཱཏཀཾ ཝིཏྠཱརེཏྭཱ ཀཐེསི. ‘‘ཏདཱ ཧི སོ ཀུཀྐུཊོ ཨཡཾ པདྷཱནིཀཏིསྶཏྠེརོ ཨཧོསི, ཨིམེ པཉྩ སཏཱ བྷིཀྑཱུ ཏེ མཱཎཝཱ ཨཧེསུཾ, དིསཱཔཱམོཀྑོ ཨཱཙརིཡོ ཨཧམེཝཱ’’ཏི སཏྠཱ ཨིམཾ ཛཱཏཀཾ ཝིཏྠཱརེཏྭཱ, ‘‘བྷིཀྑཝེ, པརཾ ཨོཝདནྟེན ནཱམ ཨཏྟཱ སུདནྟོ ཀཱཏབྦོ. ཨེཝཾ ཨོཝདནྟོ ཧི ¶ སུདནྟོ ཧུཏྭཱ དམེཏི ནཱམཱ’’ཏི ཝཏྭཱ ཨིམཾ གཱཐམཱཧ –

‘‘ཨཏྟཱནཉྩེ ¶ ཏཐཱ ཀཡིརཱ, ཡཐཱཉྙམནུསཱསཏི;

སུདནྟོ ཝཏ དམེཐ, ཨཏྟཱ ཧི ཀིར དུདྡམོ’’ཏི.

ཏསྶཏྠོ – ཡོ ཧི བྷིཀྑུ ‘‘པཋམཡཱམཱདཱིསུ ཙངྐམིཏབྦ’’ནྟི ཝཏྭཱ པརཾ ཨོཝདཏི, སཡཾ ཙངྐམནཱདཱིནི ཨདྷིཊྛཧནྟོ ཨཏྟཱནཉྩེ ཏཐཱ ཀཡིརཱ, ཡཐཱཉྙམནུསཱསཏི, ཨེཝཾ སནྟེ སུདནྟོ ཝཏ དམེཐཱཏི ཡེན གུཎེན པརཾ ཨནུསཱསཏི, ཏེན ཨཏྟནཱ སུདནྟོ ཧུཏྭཱ དམེཡྻ. ཨཏྟཱ ཧི ཀིར དུདྡམོཏི ཨཡཉྷི ཨཏྟཱ ནཱམ དུདྡམོ. ཏསྨཱ ཡཐཱ སོ སུདནྟོ ཧོཏི, ཏཐཱ དམེཏབྦོཏི.

དེསནཱཝསཱནེ པཉྩ སཏཱཔི ཏེ བྷིཀྑཱུ ཨརཧཏྟཾ པཱཔུཎིཾསཱུཏི.

ཨཏྟཱ ¶ ཧི ཨཏྟནོ ནཱཐོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀུམཱརཀསྶཔཏྠེརསྶ མཱཏརཾ ཨཱརབྦྷ ཀཐེསི.

སཱ ཀིར རཱཛགཧནགརེ སེཊྛིདྷཱིཏཱ ཝིཉྙུཏཾ པཏྟཀཱལཏོ པཊྛཱཡ པབྦཛྫཾ ཡཱཙི. ཨཐ སཱ པུནཔྤུནཾ ཡཱཙམཱནཱཔི མཱཏཱཔིཏཱུནཾ སནྟིཀཱ པབྦཛྫཾ ཨལབྷིཏྭཱ ཝཡཔྤཏྟཱ ¶ པཏིཀུལཾ གནྟྭཱ པཏིདེཝཏཱ ཧུཏྭཱ ཨགཱརཾ ཨཛ྄ཛྷཱཝསི. ཨཐསྶཱ ན ཙིརསྶེཝ ཀུཙྪིསྨིཾ གབྦྷོ པཏིཊྛཧི. སཱ གབྦྷསྶ པཏིཊྛིཏབྷཱཝཾ ཨཛཱནིཏྭཱཝ སཱམིཀཾ ཨཱརཱདྷེཏྭཱ པབྦཛྫཾ ཡཱཙི. ཨཐ ནཾ སོ མཧནྟེན སཀྐཱརེན བྷིཀྑུནུཔསྶཡཾ ནེཏྭཱ ཨཛཱནནྟོ དེཝདཏྟཔཀྑིཀཱནཾ བྷིཀྑུནཱིནཾ སནྟིཀེ པབྦཱཛེསི. ཨཔརེན སམཡེན བྷིཀྑུནིཡོ ཏསྶཱ གབྦྷིནིབྷཱཝཾ ཉཏྭཱ ཏཱཧི ‘‘ཀིཾ ཨིད’’ནྟི ཝུཏྟཱ ནཱཧཾ, ཨཡྻེ, ཛཱནཱམི ‘‘ཀིམེཏཾ’’, སཱིལཾ ཝཏ མེ ཨརོགམེཝཱཏི. བྷིཀྑུནིཡོ ཏཾ དེཝདཏྟསྶ སནྟིཀཾ ནེཏྭཱ ‘‘ཨཡཾ བྷིཀྑུནཱི སདྡྷཱཔབྦཛིཏཱ, ཨིམིསྶཱ མཡཾ གབྦྷསྶ པཏིཊྛིཏབྷཱཝཾ ཛཱནཱམ, ཀཱལཾ ན ཛཱནཱམ, ཀིཾ དཱནི ཀརོམཱ’’ཏི པུཙྪིཾསུ. དེཝདཏྟོ ‘‘མཱ མཡ྄ཧཾ ཨོཝཱདཀཱརིཀཱནཾ བྷིཀྑུནཱིནཾ ཨཡསོ ཨུཔྤཛྫཏཱུ’’ཏི ཨེཏྟཀམེཝ ཙིནྟེཏྭཱ ‘‘ཨུཔྤབྦཱཛེཐ ན’’ནྟི ཨཱཧ. ཏཾ སུཏྭཱ སཱ དཧརཱ མཱ མཾ, ཨཡྻེ, ནཱསེཐ, ནཱཧཾ དེཝདཏྟཾ ཨུདྡིསྶ པབྦཛིཏཱ, ཨེཐ, མཾ སཏྠུ སནྟིཀཾ ཛེཏཝནཾ ནེཐཱཏི. ཏཱ ཏཾ ཨཱདཱཡ ཛེཏཝནཾ གནྟྭཱ སཏྠུ ¶ ཨཱརོཙེསུཾ. སཏྠཱ ‘‘ཏསྶཱ གིཧིཀཱལེ གབྦྷོ པཏིཊྛིཏོ’’ཏི ཛཱནནྟོཔི པརཝཱདམོཙནཏྠཾ རཱཛཱནཾ པསེནདིཀོསལཾ མཧཱཨནཱཐཔིཎྜིཀཾ ཙཱུལ༹ཨནཱཐཔིཎྜིཀཾ ཝིསཱཁཱཨུཔཱསིཀཾ ཨཉྙཱནི ཙ མཧཱཀུལཱནི པཀྐོསཱཔེཏྭཱ ཨུཔཱལིཏྠེརཾ ཨཱཎཱཔེསི – ‘‘གཙྪ, ཨིམིསྶཱ དཧརཱཡ བྷིཀྑུནིཡཱ ཙཏུཔརིསམཛ྄ཛྷེ ཀམྨཾ པརིསོདྷེཧཱི’’ཏི. ཐེརོ རཉྙོ པུརཏོ ཝིསཱཁཾ པཀྐོསཱཔེཏྭཱ ཏཾ ཨདྷིཀརཎཾ པཊིཙྪཱཔེསི. སཱ སཱཎིཔཱཀཱརཾ པརིཀྑིཔཱཔེཏྭཱ ཨནྟོསཱཎིཡཾ ཏསྶཱ ཧཏྠཔཱདནཱབྷིཨུདརཔརིཡོསཱནཱནི ¶ ཨོལོཀེཏྭཱ མཱསདིཝསེ སམཱནེཏྭཱ ‘‘གིཧིབྷཱཝེ ཨིམཱཡ གབྦྷོ ལདྡྷོ’’ཏི ཉཏྭཱ ཐེརསྶ ཏམཏྠཾ ཨཱརོཙེསི. ཨཐསྶཱ ཐེརོ པརིསམཛ྄ཛྷེ པརིསུདྡྷབྷཱཝཾ པཏིཊྛཱཔེསི. སཱ ཨཔརེན སམཡེན པདུམུཏྟརབུདྡྷསྶ པཱདམཱུལེ པཏྠིཏཔཏྠནཾ མཧཱནུབྷཱཝཾ པུཏྟཾ ཝིཛཱཡི.

ཨཐེཀདིཝསཾ ¶ རཱཛཱ བྷིཀྑུནུཔསྶཡསམཱིཔེན གཙྪནྟོ དཱརཀསདྡཾ སུཏྭཱ ‘‘ཀིཾ ཨིད’’ནྟི པུཙྪིཏྭཱ, ‘‘དེཝ, ཨེཀིསྶཱ བྷིཀྑུནིཡཱ པུཏྟོ ཛཱཏོ, ཏསྶེས སདྡོ’’ཏི ཝུཏྟེ ཏཾ ཀུམཱརཾ ཨཏྟནོ གྷརཾ ནེཏྭཱ དྷཱཏཱིནཾ ཨདཱསི. ནཱམགྒཧཎདིཝསེ ཙསྶ ཀསྶཔོཏི ནཱམཾ ཀཏྭཱ ཀུམཱརཔརིཧཱརེན ཝཌྜྷིཏཏྟཱ ཀུམཱརཀསྶཔོཏི སཉྫཱནིཾསུ. སོ ཀཱིལཱ༹མཎྜལེ དཱརཀེ པཧརིཏྭཱ ‘‘ནིམྨཱཏཱཔིཏིཀེནམྷཱ པཧཊཱ’’ཏི ཝུཏྟེ རཱཛཱནཾ ཨུཔསངྐམིཏྭཱ, ‘‘དེཝ, མཾ ‘ནིམྨཱཏཱཔིཏིཀོ’ཏི ཝདནྟི, མཱཏརཾ མེ ཨཱཙིཀྑཐཱ’’ཏི པུཙྪིཏྭཱ རཉྙཱ དྷཱཏིཡོ དསྶེཏྭཱ ‘‘ཨིམཱ ཏེ མཱཏརོ’’ཏི ཝུཏྟེ ‘‘ན ཨེཏྟིཀཱ མེ མཱཏརོ, ཨེཀཱཡ མེ མཱཏརཱ བྷཝིཏབྦཾ, ཏཾ མེ ཨཱཙིཀྑཐཱ’’ཏི ཨཱཧ. རཱཛཱ ‘‘ན སཀྐཱ ཨིམཾ ཝཉྩེཏུ’’ནྟི ཙིནྟེཏྭཱ, ཏཱཏ, ཏཝ མཱཏཱ བྷིཀྑུནཱི, ཏྭཾ མཡཱ བྷིཀྑུནུཔསྶཡཱ ཨཱནཱིཏོཏི. སོ ཏཱཝཏཀེནེཝ སམུཔྤནྣསཾཝེགོ ཧུཏྭཱ, ‘‘ཏཱཏ, པབྦཱཛེཐ མ’’ནྟི ཨཱཧ. རཱཛཱ ‘‘སཱདྷུ, ཏཱཏཱ’’ཏི ཏཾ མཧནྟེན སཀྐཱརེན སཏྠུ སནྟིཀེ པབྦཱཛེསི. སོ ལདྡྷཱུཔསམྤདོ ཀུམཱརཀསྶཔཏྠེརོཏི པཉྙཱཡི. སོ སཏྠུ སནྟིཀེ ཀམྨཊྛཱནཾ གཧེཏྭཱ ཨརཉྙཾ པཝིསིཏྭཱ ཝཱཡམིཏྭཱ ཝིསེསཾ ནིབྦཏྟེཏུཾ ཨསཀྐོནྟོ ‘‘པུན ཀམྨཊྛཱནཾ ཝིསེསེཏྭཱ གཧེསྶཱམཱི’’ཏི སཏྠུ སནྟིཀཾ གནྟྭཱ ཨནྡྷཝནེ ཝིཧཱསི.

ཨཐ ནཾ ཀསྶཔབུདྡྷཀཱལེ ཨེཀཏོ སམཎདྷམྨཾ ཀཏྭཱ ཨནཱགཱམིཕལཾ པཏྭཱ བྲཧྨལོཀེ ནིབྦཏྟབྷིཀྑུ བྲཧྨལོཀཏོ ཨཱགནྟྭཱ པནྣརས པཉྷེ པུཙྪིཏྭཱ ¶ ‘‘ཨིམེ པཉྷེ ཋཔེཏྭཱ སཏྠཱརཾ ཨཉྙོ བྱཱཀཱཏུཾ སམཏྠོ ནཱམ ནཏྠི, གཙྪ, སཏྠུ སནྟིཀེ ཨིམེསཾ ཨཏྠཾ ཨུགྒཎྷཱ’’ཏི ཨུཡྻོཛེསི. སོ ཏཐཱ ཀཏྭཱ པཉྷཝིསྶཛྫནཱཝསཱནེ ཨརཧཏྟཾ པཱཔུཎི. ཏསྶ པན ནིཀྑནྟདིཝསཏོ པཊྛཱཡ དྭཱདས ཝསྶཱནི མཱཏུབྷིཀྑུནིཡཱ ཨཀྑཱིཧི ཨསྶཱུནི པཝཏྟིཾསུ. སཱ པུཏྟཝིཡོགདུཀྑིཏཱ ཨསྶུཏིནྟེནེཝ མུཁེན བྷིཀྑཱཡ ཙརམཱནཱ ཨནྟརཝཱིཐིཡཾ ཐེརཾ དིསྭཱཝ, ‘‘པུཏྟ ¶ , པུཏྟཱ’’ཏི ཝིརཝནྟཱི ཏཾ གཎྷིཏུཾ ཨུཔདྷཱཝམཱནཱ པརིཝཏྟིཏྭཱ པཏི. སཱ ཐནེཧི ཁཱིརཾ མུཉྩནྟེཧི ཨུཊྛཧིཏྭཱ ཨལླཙཱིཝརཱ གནྟྭཱ ཐེརཾ གཎྷི. སོ ཙིནྟེསི – ‘‘སཙཱཡཾ མམ སནྟིཀཱ མདྷུརཝཙནཾ ལབྷིསྶཏི, ཝིནསྶིསྶཏི. ཐདྡྷམེཝ ཀཏྭཱ ཨིམཱཡ སདྡྷིཾ སལླཔིསྶཱམཱི’’ཏི. ཨཐ ནཾ ཨཱཧ – ‘‘ཀིཾ ཀརོནྟཱི ཝིཙརསི, སིནེཧམཏྟམྤི ཚིནྡིཏུཾ ན སཀྐོསཱི’’ཏི. སཱ ‘‘ཨཧོ ཀཀྑལཱ༹ ཐེརསྶ ¶ ཀཐཱ’’ཏི ཙིནྟེཏྭཱ ‘‘ཀིཾ ཝདེསི, ཏཱཏཱ’’ཏི ཝཏྭཱ པུནཔི ཏེན ཏཐེཝ ཝུཏྟཱ ཙིནྟེསི – ‘‘ཨཧཾ ཨིམསྶ ཀཱརཎཱ དྭཱདས ཝསྶཱནི ཨསྶཱུནི སནྡྷཱརེཏུཾ ན སཀྐོམི, ཨཡཾ པནེཝཾ ཐདྡྷཧདཡོ, ཀིཾ མེ ཨིམིནཱ’’ཏི པུཏྟསིནེཧཾ ཚིནྡིཏྭཱ ཏཾདིཝསམེཝ ཨརཧཏྟཾ པཱཔུཎི.

ཨཔརེན སམཡེན དྷམྨསབྷཱཡཾ ཀཐཾ སམུཊྛཱཔེསུཾ – ‘‘ཨཱཝུསོ, དེཝདཏྟེན ཨེཝཾ ཨུཔནིསྶཡསམྤནྣོ ཀུམཱརཀསྶཔོ ཙ ཐེརཱི ཙ ནཱསིཏཱ, སཏྠཱ པན ཏེསཾ པཏིཊྛཱ ཛཱཏོ, ཨཧོ བུདྡྷཱ ནཱམ ལོཀཱནུཀམྤཀཱ’’ཏི ¶ . སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ ཨཧཾ ཨིམེསཾ པཙྩཡོ པཏིཊྛཱ ཛཱཏོ, པུབྦེཔི ནེསཾ ཨཧཾ པཏིཊྛཱ ཨཧོསིཾཡེཝཱ’’ཏི ཝཏྭཱ –

‘‘ནིགྲོདྷམེཝ སེཝེཡྻ, ན སཱཁམུཔསཾཝསེ;

ནིགྲོདྷསྨིཾ མཏཾ སེཡྻོ, ཡཉྩེ སཱཁསྨི ཛཱིཝིཏ’’ནྟི. (ཛཱ. ༡.༡.༡༢; ༡.༡༠.༨༡) –

ཨིམཾ ནིགྲོདྷཛཱཏཀཾ ཝིཏྠཱརེན ཀཐེཏྭཱ ‘‘ཏདཱ སཱཁམིགོ དེཝདཏྟོ ཨཧོསི, པརིསཱཔིསྶ དེཝདཏྟཔརིསཱ, ཝཱརཔྤཏྟཱ མིགདྷེནུ ཐེརཱི ཨཧོསི, པུཏྟོ ཀུམཱརཀསྶཔོ, གབྦྷིནཱིམིགིཡཱ ཛཱིཝིཏཾ པརིཙྩཛིཏྭཱ གཏོ ནིགྲོདྷམིགརཱཛཱ པན ཨཧམེཝཱ’’ཏི ཛཱཏཀཾ སམོདྷཱནེཏྭཱ པུཏྟསིནེཧཾ ཚིནྡིཏྭཱ ཐེརིཡཱ ཨཏྟནཱཝ ཨཏྟནོ པཏིཊྛཱནཀཏབྷཱཝཾ པཀཱསེནྟོ, ‘‘བྷིཀྑཝེ, ཡསྨཱ པརསྶ ཨཏྟནི ཋིཏེན སགྒཔརཱཡཎེན ཝཱ མགྒཔརཱཡཎེན ཝཱ བྷཝིཏུཾ ན སཀྐཱ, ཏསྨཱ ཨཏྟཱཝ ཨཏྟནོ ནཱཐོ, པརོ ཀིཾ ཀརིསྶཏཱི’’ཏི ཝཏྭཱ ཨིམཾ གཱཐམཱཧ –

‘‘ཨཏྟཱ ཧི ཨཏྟནོ ནཱཐོ, ཀོ ཧི ནཱཐོ པརོ སིཡཱ;

ཨཏྟནཱ ཧི སུདནྟེན, ནཱཐཾ ལབྷཏི དུལླབྷ’’ནྟི.

ཏཏྠ ནཱཐོཏི པཏིཊྛཱ. ཨིདཾ ཝུཏྟཾ ཧོཏི – ཡསྨཱ ཨཏྟནི ཋིཏེན ཨཏྟསམྤནྣེན ཀུསལཾ ཀཏྭཱ ¶ སགྒཾ ཝཱ པཱཔུཎིཏུཾ, མགྒཾ ཝཱ བྷཱཝེཏུཾ, ཕལཾ ཝཱ སཙྪིཀཱཏུཾ སཀྐཱ ¶ . ཏསྨཱ ཧི ཨཏྟཱཝ ཨཏྟནོ པཏིཊྛཱ ཧོཏི, པརོ ཀོ ནཱམ ཀསྶ པཏིཊྛཱ སིཡཱ. ཨཏྟནཱ ཨེཝ ཧི སུདནྟེན ནིབྦིསེཝནེན ¶ ཨརཧཏྟཕལསངྑཱཏཾ དུལླབྷཾ ནཱཐཾ ལབྷཏི. ཨརཧཏྟཉྷི སནྡྷཱཡ ཨིདྷ ‘‘ནཱཐཾ ལབྷཏི དུལླབྷ’’ནྟི ཝུཏྟཾ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཀུམཱརཀསྶཔམཱཏུཐེརཱིཝཏྠུ ཙཏུཏྠཾ.

ཨཏྟནཱ ཧི ཀཏཾ པཱཔནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ མཧཱཀཱལཾ ནཱམ སོཏཱཔནྣཨུཔཱསཀཾ ཨཱརབྦྷ ཀཐེསི.

སོ ཀིར མཱསསྶ ཨཊྛདིཝསེསུ ཨུཔོསཐིཀོ ཧུཏྭཱ ཝིཧཱརེ སབྦརཏྟིཾ དྷམྨཀཐཾ སུཎཱཏི. ཨཐ རཏྟིཾ ཙོརཱ ཨེཀསྨིཾ གེཧེ སནྡྷིཾ ཚིནྡིཏྭཱ བྷཎྜཀཾ གཧེཏྭཱ ལོཧབྷཱཛནསདྡེན པབུདྡྷེཧི སཱམིཀེཧི ཨནུབདྡྷཱ གཧིཏབྷཎྜཾ ཚཌྜེཏྭཱ པལཱཡིཾསུ. སཱམིཀཱཔི ཏེ ཨནུབནྡྷིཾསུཡེཝ, ཏེ དིསཱ པཀྑནྡིཾསུ. ཨེཀོ པན ཝིཧཱརམགྒཾ གཧེཏྭཱ མཧཱཀཱལསྶ རཏྟིཾ དྷམྨཀཐཾ སུཏྭཱ པཱཏོཝ པོཀྑརཎིཏཱིརེ མུཁཾ དྷོཝནྟསྶ པུརཏོ བྷཎྜིཀཾ ཚཌྜེཏྭཱ པལཱཡི. ཙོརེ ཨནུབནྡྷིཏྭཱ ཨཱགཏམནུསྶཱ བྷཎྜིཀཾ དིསྭཱ ‘‘ཏྭཾ ནོ གེཧསནྡྷིཾ ཚིནྡིཏྭཱ བྷཎྜིཀཾ ཧརིཏྭཱ དྷམྨཾ སུཎནྟོ ཝིཡ ཝིཙརསཱི’’ཏི ¶ ཏཾ གཧེཏྭཱ པོཐེཏྭཱ མཱརེཏྭཱ ཚཌྜེཏྭཱ ཨགམིཾསུ. ཨཐ ནཾ པཱཏོཝ པཱནཱིཡགྷཊཾ ཨཱདཱཡ གཏཱ དཧརསཱམཎེརཱ དིསྭཱ ‘‘ཝིཧཱརེ དྷམྨཀཐཾ སུཏྭཱ སཡིཏཨུཔཱསཀོ ཨཡུཏྟཾ མརཎཾ ལབྷཏཱི’’ཏི ཝཏྭཱ སཏྠུ ཨཱརོཙེསུཾ. སཏྠཱ ‘‘ཨཱམ, བྷིཀྑཝེ, ཨིམསྨིཾ ཨཏྟབྷཱཝེ ཀཱལེན ཨཔྤཏིརཱུཔཾ མརཎཾ ལདྡྷཾ, པུབྦེ ཀཏཀམྨསྶ པན ཏེན ཡུཏྟམེཝ ལདྡྷ’’ནྟི ཝཏྭཱ ཏེཧི ཡཱཙིཏོ ཏསྶ པུབྦཀམྨཾ ཀཐེསི –

ཨཏཱིཏེ ཀིར བཱརཱཎསིརཉྙོ ཝིཛིཏེ ཨེཀསྶ པཙྩནྟགཱམསྶ ཨཊཝིམུཁེ ཙོརཱ པཧརནྟི. རཱཛཱ ཨཊཝིམུཁེ ཨེཀཾ རཱཛབྷཊཾ ཋཔེསི, སོ བྷཏིཾ གཧེཏྭཱ མནུསྶེ ཨོརཏོ པཱརཾ ནེཏི, པཱརཏོ ཨོརཾ ཨཱནེཏི. ཨཐེཀོ མནུསྶོ ཨབྷིརཱུཔཾ ཨཏྟནོ བྷརིཡཾ ཙཱུལ༹ཡཱནཀཾ ཨཱརོཔེཏྭཱ ¶ ཏཾ ཋཱནཾ ཨགམཱསི. རཱཛབྷཊོ ཏཾ ཨིཏྠིཾ དིསྭཱཝ སཉྫཱཏསིནེཧོ ཏེན ‘‘ཨཊཝིཾ ནོ ¶ , སཱམི, ཨཏིཀྐཱམེཧཱི’’ཏི ཝུཏྟེཔི ‘‘ཨིདཱནི ཝིཀཱལོ, པཱཏོཝ ཨཏིཀྐཱམེསྶཱམཱི’’ཏི ཨཱཧ. སོ སཀཱལོ, སཱམི, ཨིདཱནེཝ ནོ ནེཧཱིཏི. ནིཝཏྟ, བྷོ, ཨམྷཱཀཾཡེཝ གེཧེ ཨཱཧཱརོ ཙ ནིཝཱསོ ཙ བྷཝིསྶཏཱིཏི. སོ ནེཝ ནིཝཏྟིཏུཾ ཨིཙྪི. ཨིཏརོ པུརིསཱནཾ སཉྙཾ དཏྭཱ ཡཱནཀཾ ནིཝཏྟཱཔེཏྭཱ ཨནིཙྪནྟསྶེཝ དྭཱརཀོཊྛཀེ ནིཝཱསཾ དཏྭཱ ཨཱཧཱརཾ པཊིཡཱདཱཔེསི. ཏསྶ པན གེཧེ ཨེཀཾ མཎིརཏནཾ ཨཏྠི. སོ ཏཾ ཏསྶ ཡཱནཀནྟརེ པཀྑིཔཱཔེཏྭཱ པཙྩཱུསཀཱལེ ཙོརཱནཾ པཝིཊྛསདྡཾ ཀཱརེསི. ཨཐསྶ པུརིསཱ ‘‘མཎིརཏནཾ, སཱམི, ཙོརེཧི ཧཊ’’ནྟི ཨཱརོཙེསུཾ. སོ གཱམདྭཱརེསུ ཨཱརཀྑཾ ཋཔེཏྭཱ ‘‘ཨནྟོགཱམཏོ ནིཀྑམནྟེ ཝིཙིནཐཱ’’ཏི ཨཱཧ. ཨིཏརོཔི པཱཏོཝ ཡཱནཀཾ ཡོཛེཏྭཱ ¶ པཱཡཱསི. ཨཐསྶ ཡཱནཀཾ སོདྷེནྟཱ ཨཏྟནཱ ཋཔིཏཾ མཎིརཏནཾ དིསྭཱ སནྟཛྫེཏྭཱ ‘‘ཏྭཾ མཎིཾ གཧེཏྭཱ པལཱཡསཱི’’ཏི པོཐེཏྭཱ ‘‘གཧིཏོ ནོ, སཱམི, ཙོརོ’’ཏི གཱམབྷོཛཀསྶ དསྶེསུཾ. སོ ‘‘བྷཏཀསྶ ཝཏ མེ གེཧེ ནིཝཱསཾ དཏྭཱ བྷཏྟཾ དིནྣཾ, མཎིཾ གཧེཏྭཱ གཏོ, གཎྷཐ ནཾ པཱཔཔུརིས’’ནྟི པོཐཱཔེཏྭཱ མཱརེཏྭཱ ཚཌྜཱཔེསི. ཨིདཾ ཏསྶ པུབྦཀམྨཾ. སོ ཏཏོ ཙུཏོ ཨཝཱིཙིམྷི ནིབྦཏྟིཏྭཱ ཏཏྠ དཱིགྷརཏྟཾ པཙྩིཏྭཱ ཝིཔཱཀཱཝསེསེན ཨཏྟབྷཱཝསཏེ ཏཐེཝ པོཐིཏོ མརཎཾ པཱཔུཎི.

ཨེཝཾ སཏྠཱ མཧཱཀཱལསྶ པུབྦཀམྨཾ དསྶེཏྭཱ, ‘‘བྷིཀྑཝེ, ཨེཝཾ ཨིམེ སཏྟེ ཨཏྟནཱ ཀཏཔཱཔཀམྨམེཝ ཙཏཱུསུ ཨཔཱཡེསུ ཨབྷིམཏྠཏཱི’’ཏི ཝཏྭཱ ཨིམཾ གཱཐམཱཧ –

‘‘ཨཏྟནཱ ཧི ཀཏཾ པཱཔཾ, ཨཏྟཛཾ ཨཏྟསམྦྷཝཾ;

ཨབྷིམཏྠཏི དུམྨེདྷཾ, ཝཛིརཾཝསྨམཡཾ མཎི’’ནྟི.

ཏཏྠ ཝཛིརཾཝསྨམཡཾ མཎིནྟི ཝཛིརཾཝ ཨསྨམཡཾ མཎིཾ. ཨིདཾ ཝུཏྟཾ ཧོཏི – ཡཐཱ པཱསཱཎམཡཾ པཱསཱཎསམྦྷཝཾ ཝཛིརཾ ཏམེཝ ཨསྨམཡཾ མཎིཾ ཨཏྟནོ ཨུཊྛཱནཊྛཱནསངྑཱཏཾ པཱསཱཎམཎིཾ ཁཱདིཏྭཱ ཚིདྡཾ ཚིདྡཾ ཁཎྜཾ ཁཎྜཾ ཀཏྭཱ ཨཔརིབྷོགཾ ཀརོཏི, ཨེཝམེཝ ཨཏྟནཱ ཀཏཾ ཨཏྟནི ཛཱཏཾ ཨཏྟསམྦྷཝཾ ¶ ¶ པཱཔཾ དུམྨེདྷཾ ནིཔྤཉྙཾ པུགྒལཾ ཙཏཱུསུ ཨཔཱཡེསུ ཨབྷིམཏྠཏི ཀནྟཏི ཝིདྡྷཾསེཏཱིཏི.

དེསནཱཝསཱནེ སམྤཏྟབྷིཀྑཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡསྶ ¶ ཨཙྩནྟདུསྶཱིལྱནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ དེཝདཏྟཾ ཨཱརབྦྷ ཀཐེསི.

ཨེཀསྨིཉྷི དིཝསེ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ – ‘‘ཨཱཝུསོ, དེཝདཏྟོ དུསྶཱིལོ པཱཔདྷམྨོ དུསྶཱིལྱཀཱརཎེན ཝཌྜྷིཏཱཡ ཏཎྷཱཡ ཨཛཱཏསཏྟུཾ སངྒཎྷིཏྭཱ མཧནྟཾ ལཱབྷསཀྐཱརཾ ནིབྦཏྟེཏྭཱ ཨཛཱཏསཏྟུཾ པིཏུཝདྷེ སམཱདཔེཏྭཱ ཏེན སདྡྷིཾ ཨེཀཏོ ཧུཏྭཱ ནཱནཔྤཀཱརེན ཏཐཱགཏསྶ ཝདྷཱཡ པརིསཀྐཏཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ, པུབྦེཔི དེཝདཏྟོ ནཱནཔྤཀཱརེན མཡ྄ཧཾ ཝདྷཱཡ པརིསཀྐཏཱི’’ཏི ཝཏྭཱ ཀུརུངྒམིགཛཱཏཀཱདཱིནི (ཛཱ. ༡.༢.༡༡༡-༢) ཀཐེཏྭཱ, ‘‘བྷིཀྑཝེ, ཨཙྩནྟདུསྶཱིལཔུགྒལཾ ནཱམ དུསྶཱིལྱཀཱརཎཱ ཨུཔྤནྣཱ ཏཎྷཱ མཱལུཝཱ ཝིཡ སཱལཾ པརིཡོནནྡྷིཏྭཱ སམྦྷཉྫམཱནཱ ནིརཡཱདཱིསུ པཀྑིཔཏཱི’’ཏི ཝཏྭཱ ཨིམཾ གཱཐཱམཱཧ –

‘‘ཡསྶ ¶ ཨཙྩནྟདུསྶཱིལྱཾ, མཱལུཝཱ སཱལམིཝོཏྠཏཾ;

ཀརོཏི སོ ཏཐཏྟཱནཾ, ཡཐཱ ནཾ ཨིཙྪཏཱི དིསོ’’ཏི.

ཏཏྠ ཨཙྩནྟདུསྶཱིལྱནྟི ཨེཀནྟདུསྶཱིལབྷཱཝོ. གིཧཱི ཝཱ ཛཱཏིཏོ པཊྛཱཡ དས ཨཀུསལཀམྨཔཐེ ཀརོནྟོ, པབྦཛིཏོ ཝཱ ཨུཔསམྤནྣདིཝསཏོ པཊྛཱཡ གརུཀཱཔཏྟིཾ ཨཱཔཛྫམཱནོ ཨཙྩནྟདུསྶཱིལོ ནཱམ. ཨིདྷ པན ཡོ དྭཱིསུ ཏཱིསུ ཨཏྟབྷཱཝེསུ དུསྶཱིལོ, ཨེཏསྶ གཏིཡཱ ཨཱགཏཾ དུསྶཱིལབྷཱཝཾ སནྡྷཱཡེཏཾ ཝུཏྟཾ. དུསྶཱིལབྷཱཝོཏི ཙེཏྠ དུསྶཱིལསྶ ཚ ¶ དྭཱརཱནི ནིསྶཱཡ ཨུཔྤནྣཱ ཏཎྷཱ ཝེདིཏབྦཱ. མཱལུཝཱ སཱལམིཝོཏྠཏནྟི ཡསྶ པུགྒལསྶ ཏཾ ཏཎྷཱསངྑཱཏཾ དུསྶཱིལྱཾ ཡཐཱ ནཱམ མཱལུཝཱ སཱལཾ ཨོཏྠརནྟཱི དེཝེ ཝསྶནྟེ པཏྟེཧི ཨུདཀཾ སམྤཊིཙྪིཏྭཱ སམྦྷཉྫནཝསེན སབྦཏྠཀམེཝ པརིཡོནནྡྷཏི, ཨེཝཾ ཨཏྟབྷཱཝཾ ཨོཏྠཏཾ པརིཡོནནྡྷིཏྭཱ ཋིཏཾ. སོ མཱལུཝཱཡ སམྦྷཉྫིཏྭཱ བྷཱུམིཡཾ པཱཏིཡམཱནོ རུཀྑོ ཝིཡ ཏཱཡ དུསྶཱིལྱསངྑཱཏཱཡ ཏཎྷཱཡ སམྦྷཉྫིཏྭཱ ཨཔཱཡེསུ པཱཏིཡམཱནོ, ཡཐཱ ནཾ ཨནཏྠཀཱམོ དིསོ ཨིཙྪཏི, ཏཐཱ ཨཏྟཱནཾ ཀརོཏི ནཱམཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སུཀརཱནཱིཏི ¶ ¶ ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ སངྒྷབྷེདཔརིསཀྐནཾ ཨཱརབྦྷ ཀཐེསི.

ཨེཀདིཝསཉྷི དེཝདཏྟོ སངྒྷབྷེདཱཡ པརིསཀྐནྟོ ཨཱཡསྨནྟཾ ཨཱནནྡཾ པིཎྜཱཡ ཙརནྟཾ དིསྭཱ ཨཏྟནོ ཨདྷིཔྤཱཡཾ ཨཱརོཙེསི. ཏཾ སུཏྭཱ ཐེརོ སཏྠུ སནྟིཀཾ གནྟྭཱ བྷགཝནྟཾ ཨེཏདཝོཙ – ‘‘ཨིདྷཱཧཾ, བྷནྟེ, པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ རཱཛགཧཾ པིཎྜཱཡ པཱཝིསིཾ. ཨདྡསཱ ཁོ མཾ, བྷནྟེ, དེཝདཏྟོ རཱཛགཧེ པིཎྜཱཡ ཙརནྟཾ. དིསྭཱ ཡེནཱཧཾ ཏེནུཔསངྐམི, ཨུཔསངྐམིཏྭཱ མཾ ཨེཏདཝོཙ – ‘ཨཛྫཏགྒེ དཱནཱཧཾ, ཨཱཝུསོ ཨཱནནྡ, ཨཉྙཏྲེཝ བྷགཝཏཱ ཨཉྙཏྲ བྷིཀྑུསངྒྷེན ཨུཔོསཐཾ ཀརིསྶཱམི སངྒྷཀམྨཉྩཱ’ཏི. ཨཛྫ བྷགཝཱ དེཝདཏྟོ སངྒྷཾ བྷིནྡིསྶཏི, ཨུཔོསཐཉྩ ཀརིསྶཏི སངྒྷཀམྨཱནི ཙཱ’’ཏི. ཨེཝཾ ཝུཏྟེ སཏྠཱ –

‘‘སུཀརཾ སཱདྷུནཱ སཱདྷུ, སཱདྷུ པཱཔེན དུཀྐརཾ;

པཱཔཾ པཱཔེན སུཀརཾ, པཱཔམརིཡེཧི དུཀྐར’’ནྟི. (ཨུདཱ. ༤༨) –

ཨིམཾ ¶ ཨུདཱནཾ ཨུདཱནེཏྭཱ, ‘‘ཨཱནནྡ, ཨཏྟནོ ཨཧིཏཀམྨཾ ནཱམ སུཀརཾ, ཧིཏཀམྨམེཝ དུཀྐར’’ནྟི ཝཏྭཱ ཨིམཾ གཱཐམཱཧ –

‘‘སུཀརཱནི ཨསཱདྷཱུནི, ཨཏྟནོ ཨཧིཏཱནི ཙ;

ཡཾ ཝེ ཧིཏཉྩ སཱདྷུཉྩ, ཏཾ ཝེ པརམདུཀྐར’’ནྟི.

ཏསྶཏྠོ – ཡཱནི ཀམྨཱནི ཨསཱདྷཱུནི སཱཝཛྫཱནི ཨཔཱཡསཾཝཏྟནིཀཏྟཱཡེཝ ཨཏྟནོ ཨཧིཏཱནི ཙ ཧོནྟི, ཏཱནི སུཀརཱནི ¶ . ཡཾ པན སུགཏིསཾཝཏྟནིཀཏྟཱ ཨཏྟནོ ཧིཏཉྩ ཨནཝཛྫཏྠེན སཱདྷུཉྩ སུགཏིསཾཝཏྟནིཀཉྩེཝ ནིབྦཱནསཾཝཏྟནིཀཉྩ ཀམྨཾ, ཏཾ པཱཙཱིནནིནྣཱཡ གངྒཱཡ ཨུབྦཏྟེཏྭཱ པཙྪཱམུཁཀརཎཾ ཝིཡ ཨཏིདུཀྐརནྟི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡོ ¶ སཱསནནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀཱལཏྠེརཾ ཨཱརབྦྷ ཀཐེསི.

སཱཝཏྠིཡཾ ཀིརེཀཱ ཨིཏྠཱི མཱཏུཊྛཱནེ ཋཏྭཱ ཏཾ ཐེརཾ ཨུཔཊྛཧི. ཏསྶཱ པཊིཝིསྶཀགེཧེ མནུསྶཱ སཏྠུ སནྟིཀེ དྷམྨཾ སུཏྭཱ ཨཱགནྟྭཱ ‘‘ཨཧོ བུདྡྷཱ ནཱམ ཨཙྪརིཡཱ, ཨཧོ དྷམྨདེསནཱ མདྷུརཱ’’ཏི པསཾསནྟི. སཱ ཨིཏྠཱི ཏེསཾ ཀཐཾ སུཏྭཱ, ‘‘བྷནྟེ, ཨཧམྤི སཏྠུ དྷམྨདེསནཾ སོཏུཀཱམཱ’’ཏི ཏསྶ ཨཱརོཙེསི. སོ ‘‘ཏཏྠ མཱ གམཱི’’ཏི ཏཾ ནིཝཱརེསི. སཱ པུནདིཝསེ པུནདིཝསེཔཱིཏི ཡཱཝཏཏིཡཾ ཏེན ནིཝཱརིཡམཱནཱཔི སོཏུཀཱམཱཝ ཨཧོསི. ཀསྨཱ སོ པནེཏཾ ནིཝཱརེསཱིཏི? ཨེཝཾ ཀིརསྶ ཨཧོསི – ‘‘སཏྠུ སནྟིཀེ དྷམྨཾ སུཏྭཱ མཡི བྷིཛྫིསྶཏཱི’’ཏི. སཱ ཨེཀདིཝསཾ པཱཏོཝ བྷུཏྟཔཱཏརཱསཱ ཨུཔོསཐཾ སམཱདིཡིཏྭཱ, ‘‘ཨམྨ, སཱདྷུཀཾ ཨཡྻཾ པརིཝིསེཡྻཱསཱི’’ཏི དྷཱིཏརཾ ཨཱཎཱཔེཏྭཱ ཝིཧཱརཾ ཨགམཱསི. དྷཱིཏཱཔིསྶཱ ཏཾ བྷིཀྑུཾ ཨཱགཏཀཱལེ པརིཝིསིཏྭཱ ‘‘ཀུཧིཾ མཧཱཨུཔཱསིཀཱ’’ཏི ཝུཏྟཱ ‘‘དྷམྨསྶཝནཱཡ ¶ ཝིཧཱརཾ གཏཱ’’ཏི ཨཱཧ. སོ ཏཾ ¶ སུཏྭཱཝ ཀུཙྪིཡཾ ཨུཊྛིཏེན ཌཱཧེན སནྟཔྤམཱནོ ‘‘ཨིདཱནི སཱ མཡི བྷིནྣཱ’’ཏི ཝེགེན གནྟྭཱ སཏྠུ སནྟིཀེ དྷམྨཾ སུཎམཱནཾ དིསྭཱ སཏྠཱརཾ ཨཱཧ, ‘‘བྷནྟེ, ཨཡཾ ཨིཏྠཱི དནྡྷཱ སུཁུམཾ དྷམྨཀཐཾ ན ཛཱནཱཏི, ཨིམིསྶཱ ཁནྡྷཱདིཔཊིསཾཡུཏྟཾ སུཁུམཾ དྷམྨཀཐཾ ཨཀཐེཏྭཱ དཱནཀཐཾ ཝཱ སཱིལཀཐཾ ཝཱ ཀཐེཏུཾ ཝཊྚཏཱི’’ཏི. སཏྠཱ ཏསྶཛ྄ཛྷཱསཡཾ ཝིདིཏྭཱ ‘‘ཏྭཾ དུཔྤཉྙོ པཱཔིཀཾ དིཊྛིཾ ནིསྶཱཡ བུདྡྷཱནཾ སཱསནཾ པཊིཀྐོསསི. ཨཏྟགྷཱཏཱཡེཝ ཝཱཡམསཱི’’ཏི ཝཏྭཱ ཨིམཾ གཱཐམཱཧ –

‘‘ཡོ སཱསནཾ ཨརཧཏཾ, ཨརིཡཱནཾ དྷམྨཛཱིཝིནཾ;

པཊིཀྐོསཏི དུམྨེདྷོ, དིཊྛིཾ ནིསྶཱཡ པཱཔིཀཾ;

ཕལཱནི ཀཊྛཀསྶེཝ, ཨཏྟགྷཱཏཱཡ ཕལླཏཱི’’ཏི.

ཏསྶཏྠོ – ཡོ དུམྨེདྷོ པུགྒལོ ཨཏྟནོ སཀྐཱརཧཱནིབྷཡེན པཱཔིཀཾ དིཊྛིཾ ནིསྶཱཡ ‘‘དྷམྨཾ ཝཱ སོསྶཱམ, དཱནཾ ཝཱ དསྶཱམཱ’’ཏི ཝདནྟེ པཊིཀྐོསནྟོ ཨརཧཏཾ ཨརིཡཱནཾ དྷམྨཛཱིཝིནཾ བུདྡྷཱནཾ སཱསནཾ པཊིཀྐོསཏི, ཏསྶ ཏཾ པཊིཀྐོསནཾ སཱ ཙ པཱཔིཀཱ དིཊྛི ཝེལུ༹སངྑཱཏསྶ ཀཊྛཀསྶ ཕལཱནི ཝིཡ ཧོཏི. ཏསྨཱ ཡཐཱ ཀཊྛཀོ ཕལཱནི གཎྷནྟོ ཨཏྟགྷཱཏཱཡ ཕལླཏི, ཨཏྟནོ གྷཱཏཏྠམེཝ ཕལཏི, ཨེཝཾ སོཔི ཨཏྟགྷཱཏཱཡ ཕལླཏཱིཏི. ཝུཏྟམྤི ཙེཏཾ –

‘‘ཕལཾ ¶ ཝེ ཀདལིཾ ཧནྟི, ཕལཾ ཝེལུ༹ཾ ཕལཾ ནལ༹ཾ;

སཀྐཱརོ ཀཱཔུརིསཾ ཧནྟི, གབྦྷོ ཨསྶཏརིཾ ཡཐཱ’’ཏི. (ཙཱུལ༹ཝ. ༣༣༥; ཨ. ནི. ༤.༦༨);

དེསནཱཝསཱནེ ཨུཔཱསིཀཱ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

ཨཏྟནཱ ¶ ¶ ཧི ཀཏནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཙཱུལ༹ཀཱལཾ ཨུཔཱསཀཾ ཨཱརབྦྷ ཀཐེསི.

ཨེཀདིཝསཉྷི མཧཱཀཱལཝཏྠུསྨིཾ ཝུཏྟནཡེནེཝ ཨུམངྒཙོརཱ སཱམིཀེཧི ཨནུབདྡྷཱ རཏྟིཾ ཝིཧཱརེ དྷམྨཀཐཾ སུཏྭཱ པཱཏོཝ ཝིཧཱརཱ ནིཀྑམིཏྭཱ སཱཝཏྠིཾ ཨཱགཙྪནྟསྶ ཏསྶ ཨུཔཱསཀསྶ པུརཏོ བྷཎྜིཀཾ ཚཌྜེཏྭཱ པལཱཡིཾསུ. མནུསྶཱ ཏཾ དིསྭཱ ‘‘ཨཡཾ རཏྟིཾ ཙོརཀམྨཾ ཀཏྭཱ དྷམྨཾ སུཎནྟོ ཝིཡ ཙརཏི, གཎྷཐ ན’’ནྟི ཏཾ པོཐཡིཾསུ. ཀུམྦྷདཱསིཡོ ཨུདཀཏིཏྠཾ གཙྪམཱནཱ ཏཾ དིསྭཱ ‘‘ཨཔེཐ, སཱམི, ནཱཡཾ ཨེཝརཱུཔཾ ཀརོཏཱི’’ཏི ཏཾ མོཙེསུཾ. སོ ཝིཧཱརཾ གནྟྭཱ, ‘‘བྷནྟེ, ཨཧམྷི མནུསྶེཧི ནཱསིཏོ, ཀུམྦྷདཱསིཡོ མེ ནིསྶཱཡ ཛཱིཝིཏཾ ལདྡྷ’’ནྟི བྷིཀྑཱུནཾ ཨཱརོཙེསི. བྷིཀྑཱུ ཏཐཱགཏསྶ ཏམཏྠཾ ཨཱརོཙེསུཾ. སཏྠཱ ཏེསཾ ཀཐཾ སུཏྭཱ, ‘‘བྷིཀྑཝེ, ཙཱུལ༹ཀཱལཨུཔཱསཀོ ཀུམྦྷདཱསིཡོ ཙེཝ ནིསྶཱཡ, ཨཏྟནོ ཙ ཨཀརཎབྷཱཝེན ཛཱིཝིཏཾ ལབྷི. ཨིམེ ཧི ནཱམ སཏྟཱ ཨཏྟནཱ པཱཔཀམྨཾ ཀཏྭཱ ནིརཡཱདཱིསུ ཨཏྟནཱཝ ཀིལིསྶནྟི, ཀུསལཾ ཀཏྭཱ པན སུགཏིཉྩེཝ ནིབྦཱནཉྩ གཙྪནྟཱ ཨཏྟནཱཝ ཝིསུཛ྄ཛྷནྟཱི’’ཏི ཝཏྭཱ ཨིམཾ གཱཐམཱཧ –

‘‘ཨཏྟནཱ ཧི ཀཏཾ པཱཔཾ, ཨཏྟནཱ སཾཀིལིསྶཏི;

ཨཏྟནཱ ཨཀཏཾ པཱཔཾ, ཨཏྟནཱཝ ཝིསུཛ྄ཛྷཏི;

སུདྡྷཱི ཨསུདྡྷི པཙྩཏྟཾ, ནཱཉྙོ ཨཉྙཾ ཝིསོདྷཡེ’’ཏི.

ཏསྶཏྠོ ¶ – ཡེན ཨཏྟནཱ ཨཀུསལཀམྨཾ ཀཏཾ ཧོཏི, སོ ཙཏཱུསུ ཨཔཱཡེསུ དུཀྑཾ ཨནུབྷཝནྟོ ¶ ཨཏྟནཱཝ སཾཀིལིསྶཏི. ཡེན པན ཨཏྟནཱ ཨཀཏཾ པཱཔཾ, སོ སུགཏིཉྩེཝ ནིབྦཱནཉྩ གཙྪནྟོ ཨཏྟནཱཝ ཝིསུཛ྄ཛྷཏི. ཀུསལཀམྨསངྑཱཏཱ སུདྡྷི ཨཀུསལཀམྨསངྑཱཏཱ ཙ ཨསུདྡྷི པཙྩཏྟཾ ཀཱརཀསཏྟཱནཾ ཨཏྟནིཡེཝ ཝིཔཙྩཏི. ཨཉྙོ པུགྒལོ ཨཉྙཾ པུགྒལཾ ན ཝིསོདྷཡེ ནེཝ ཝིསོདྷེཏི, ན ཀིལེསེཏཱིཏི ཝུཏྟཾ ཧོཏི.

དེསནཱཝསཱནེ ¶ ཙཱུལ༹ཀཱལོ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

ཨཏྟདཏྠནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཏྟདཏྠཏྠེརཾ ཨཱརབྦྷ ཀཐེསི.

སཏྠཱརཱ ཧི པརིནིབྦཱནཀཱལེ, ‘‘བྷིཀྑཝེ, ཨཧཾ ཨིཏོ ཙཏུམཱསཙྩཡེན པརིནིབྦཱཡིསྶཱམཱི’’ཏི ཝུཏྟེ ཨུཔྤནྣསཾཝེགཱ སཏྟསཏཱ པུཐུཛྫནཱ བྷིཀྑཱུ སཏྠུ སནྟིཀཾ ཨཝིཛཧིཏྭཱ ‘‘ཀིཾ ནུ ཁོ, ཨཱཝུསོ, ཀརིསྶཱམཱ’’ཏི སམྨནྟཡམཱནཱ ཝིཙརནྟི. ཨཏྟདཏྠཏྠེརོ པན ཙིནྟེསི – ‘‘སཏྠཱ ཀིར ཙཏུམཱསཙྩཡེན པརིནིབྦཱཡིསྶཏི, ཨཧཉྩམྷི ཨཝཱིཏརཱགོ, སཏྠརི དྷརམཱནེཡེཝ ཨརཧཏྟཏྠཱཡ ཝཱཡམིསྶཱམཱི’’ཏི. སོ བྷིཀྑཱུནཾ སནྟིཀཾ ན གཙྪཏི. ཨཐ ནཾ བྷིཀྑཱུ ‘‘ཀསྨཱ, ཨཱཝུསོ, ཏྭཾ ནེཝ ཨམྷཱཀཾ སནྟིཀཾ ཨཱགཙྪསི, ན ཀིཉྩི མནྟེསཱི’’ཏི ཝཏྭཱ སཏྠུ སནྟིཀཾ ནེཏྭཱ ‘‘ཨཡཾ, བྷནྟེ, ཨེཝཾ ནཱམ ཀརོཏཱི’’ཏི ཨཱརོཙཡིཾསུ. སོ སཏྠཱརཱཔི ‘‘ཀསྨཱ ཨེཝཾ ཀརོསཱི’’ཏི ཝུཏྟེ ‘‘ཏུམྷེ ཀིར, བྷནྟེ, ཙཏུམཱསཙྩཡེན ¶ པརིནིབྦཱཡིསྶཐ, ཨཧཾ ཏུམྷེསུ དྷརནྟེསུཡེཝ ཨརཧཏྟཔྤཏྟིཡཱ ཝཱཡམིསྶཱམཱི’’ཏི. སཏྠཱ ཏསྶ སཱདྷུཀཱརཾ དཏྭཱ, ‘‘བྷིཀྑཝེ, ཡསྶ མཡི སིནེཧོ ཨཏྠི, ཏེན ཨཏྟདཏྠེན ཝིཡ བྷཝིཏུཾ ཝཊྚཏི. ན ཧི གནྡྷཱདཱིཧི པཱུཛེནྟཱ མཾ པཱུཛེནྟི, དྷམྨཱནུདྷམྨཔཊིཔཏྟིཡཱ པན མཾ པཱུཛེནྟི. ཏསྨཱ ཨཉྙེནཔི ཨཏྟདཏྠསདིསེནེཝ བྷཝིཏབྦ’’ནྟི ཝཏྭཱ ཨིམཾ གཱཐམཱཧ –

‘‘ཨཏྟདཏྠཾ པརཏྠེན, བཧུནཱཔི ན ཧཱཔཡེ;

ཨཏྟདཏྠམབྷིཉྙཱཡ, སདཏྠཔསུཏོ སིཡཱ’’ཏི.

ཏསྶཏྠོ – གིཧིབྷཱུཏཱ ཏཱཝ ཀཱཀཎིཀམཏྟམྤི ཨཏྟནོ ཨཏྠཾ སཧསྶམཏྟེནཱཔི པརསྶ ཨཏྠེན ¶ ན ཧཱཔཡེ. ཀཱཀཎིཀམཏྟེནཱཔི ཧིསྶ ཨཏྟདཏྠོཝ ཁཱདནཱིཡཾ ཝཱ བྷོཛནཱིཡཾ ཝཱ ནིཔྥཱདེཡྻ, ན པརཏྠོ. ཨིདཾ ¶ པན ཨེཝཾ ཨཀཐེཏྭཱ ཀམྨཊྛཱནསཱིསེན ཀཐིཏཾ, ཏསྨཱ ‘‘ཨཏྟདཏྠཾ ན ཧཱཔེམཱི’’ཏི བྷིཀྑུནཱ ནཱམ སངྒྷསྶ ཨུཔྤནྣཾ ཙེཏིཡཔཊིསངྑརཎཱདིཀིཙྩཾ ཝཱ ཨུཔཛ྄ཛྷཱཡཱདིཝཏྟཾ ཝཱ ན ཧཱཔེཏབྦཾ. ཨཱབྷིསམཱཙཱརིཀཝཏྟཉྷི པཱུརེནྟོཡེཝ ཨརིཡཕལཱདཱིནི སཙྪིཀརོཏི, ཏསྨཱ ཨཡམྤི ཨཏྟདཏྠོཝ. ཡོ པན ཨཙྩཱརདྡྷཝིཔསྶཀོ ‘‘ཨཛྫ ཝཱ སུཝེ ཝཱ’’ཏི པཊིཝེདྷཾ པཏྠཡམཱནོ ཝིཙརཏི, ཏེན ཨུཔཛ྄ཛྷཱཡཝཏྟཱདཱིནིཔི ཧཱཔེཏྭཱ ཨཏྟནོ ཀིཙྩམེཝ ཀཱཏབྦཾ. ཨེཝརཱུཔཉྷི ཨཏྟདཏྠམབྷིཉྙཱཡ ‘‘ཨཡཾ མེ ཨཏྟནོ ཨཏྠོ’’ཏི སལླཀྑེཏྭཱ ¶ , སདཏྠཔསུཏོ སིཡཱཏི ཏསྨིཾ སཀེ ཨཏྠེ ཨུཡྻུཏྟཔཡུཏྟོ བྷཝེཡྻཱཏི.

དེསནཱཝསཱནེ སོ ཐེརོ ཨརཧཏྟེ པཏིཊྛཧི, སམྤཏྟབྷིཀྑཱུནམྤི སཱཏྠིཀཱ དྷམྨདེསནཱ ཨཧོསཱིཏི.

ཧཱིནཾ ¶ ¶ ¶ དྷམྨནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ དཧརབྷིཀྑུཾ ཨཱརབྦྷ ཀཐེསི.

ཨཉྙཏརོ ཀིར ཐེརོ དཧརབྷིཀྑུནཱ སདྡྷིཾ པཱཏོཝ ཝིསཱཁཱཡ གེཧཾ ཨགམཱསི. ཝིསཱཁཱཡ གེཧེ པཉྩསཏཱནཾ བྷིཀྑཱུནཾ དྷུཝཡཱགུ ནིཙྩཔཉྙཏྟཱ ཧོཏི. ཐེརོ ཏཏྠ ཡཱགུཾ པིཝིཏྭཱ དཧརབྷིཀྑུཾ ནིསཱིདཱཔེཏྭཱ སཡཾ ཨཉྙཾ གེཧཾ ཨགམཱསི. ཏེན ཙ སམཡེན ཝིསཱཁཱཡ པུཏྟསྶ དྷཱིཏཱ ཨཡྻིཀཱཡ ཋཱནེ ཋཏྭཱ བྷིཀྑཱུནཾ ཝེཡྻཱཝཙྩཾ ཀརོཏི. སཱ ཏསྶ དཧརསྶ ཨུདཀཾ པརིསྶཱཝེནྟཱི ཙཱཊིཡཾ ཨཏྟནོ མུཁནིམིཏྟཾ དིསྭཱ ཧསི, དཧརོཔི ཏཾ ཨོལོཀེཏྭཱ ཧསི. སཱ ཏཾ ཧསམཱནཾ དིསྭཱ ‘‘ཚིནྣསཱིསོ ཧསཏཱི’’ཏི ཨཱཧ. ཨཐ ནཾ དཧརོ ‘‘ཏྭཾ ཚིནྣསཱིསཱ, མཱཏཱཔིཏརོཔི ཏེ ཚིནྣསཱིསཱ’’ཏི ཨཀྐོསི. སཱ རོདམཱནཱ མཧཱནསེ ཨཡྻིཀཱཡ སནྟིཀཾ གནྟྭཱ ‘‘ཀིཾ ཨིདཾ, ཨམྨཱ’’ཏི ཝུཏྟེ ཏམཏྠཾ ཨཱརོཙེསི. སཱ དཧརསྶ སནྟིཀཾ ཨཱགནྟྭཱ, ‘‘བྷནྟེ, མཱ ཀུཛ྄ཛྷི, ན ཨེཏཾ ཚིནྣཀེསནཁསྶ ཚིནྣནིཝཱསནཔཱརུཔནསྶ ¶ མཛ྄ཛྷེ ཚིནྣཀཔཱལཾ ཨཱདཱཡ བྷིཀྑཱཡ ཙརནྟསྶ ཨཡྻསྶ ཨགརུཀ’’ནྟི ཨཱཧ. དཧརོ ཨཱམ, ཨུཔཱསིཀེ, ཏྭཾ མམ ཚིནྣཀེསཱདིབྷཱཝཾ ཛཱནཱསི, ཨིམིསྶཱ མཾ ‘‘ཚིནྣསཱིསོ’’ཏི ཀཏྭཱ ཨཀྐོསིཏུཾ ཝཊྚིསྶཏཱིཏི. ཝིསཱཁཱ ནེཝ དཧརཾ སཉྙཱཔེཏུཾ ཨསཀྑི, ནཔི དཱརིཀཾ. ཏསྨིཾ ཁཎེ ཐེརོ ཨཱགནྟྭཱ ‘‘ཀིམིདཾ ཨུཔཱསིཀེ’’ཏི པུཙྪིཏྭཱ ཏམཏྠཾ སུཏྭཱ དཧརཾ ཨོཝདནྟོ ཨཱཧ – ‘‘ཨཔེཧི, ཨཱཝུསོ, ནཱཡཾ ཚིནྣཀེསནཁཝཏྠསྶ མཛ྄ཛྷེ ཚིནྣཀཔཱལཾ ཨཱདཱཡ བྷིཀྑཱཡ ཙརནྟསྶ ཨཀྐོསོ, ཏུཎྷཱི ཧོཧཱི’’ཏི. ཨཱམ, བྷནྟེ, ཀིཾ ཏུམྷེ ཨཏྟནོ ཨུཔཊྛཱཡིཀཾ ཨཏཛྫེཏྭཱ མཾ ཏཛྫེཐ, མཾ ‘‘ཚིནྣསཱིསོ’’ཏི ཨཀྐོསིཏུཾ ཝཊྚིསྶཏཱིཏི. ཏསྨིཾ ཁཎེ སཏྠཱ ཨཱགནྟྭཱ ‘‘ཀིཾ ཨིད’’ནྟི པུཙྪི. ཝིསཱཁཱ ཨཱདིཏོ པཊྛཱཡ ཏཾ པཝཏྟིཾ ཨཱརོཙེསི. སཏྠཱ ཏསྶ དཧརསྶ སོཏཱཔཏྟིཕལཱུཔནིསྶཡཾ དིསྭཱ ‘‘མཡཱ ཨིམཾ དཧརཾ ཨནུཝཏྟིཏུཾ ཝཊྚཏཱི’’ཏི ཙིནྟེཏྭཱ ཝིསཱཁཾ ཨཱཧ – ‘‘ཀིཾ པན ཝིསཱཁེ ཏཝ དཱརིཀཱཡ ཚིནྣཀེསཱདིམཏྟཀེནེཝ མམ སཱཝཀེ ¶ ཚིནྣསཱིསེ ཀཏྭཱ ཨཀྐོསིཏུཾ ཝཊྚཏཱི’’ཏི? དཧརོ ཏཱཝདེཝ ཨུཊྛཱཡ ཨཉྫལིཾ པགྒཧེཏྭཱ ¶ , ‘‘བྷནྟེ, ཨེཏཾ པཉྷཾ ཏུམྷེཝ སུཊྛུ ཛཱནཱཐ, ཨམྷཱཀཾ ཨུཔཛ྄ཛྷཱཡོ ཙ ཨུཔཱསིཀཱ ཙ སུཊྛུ ན ཛཱནནྟཱི’’ཏི ཨཱཧ. སཏྠཱ དཧརསྶ ཨཏྟནོ ཨནུཀུལབྷཱཝཾ ཉཏྭཱ ‘‘ཀཱམགུཎཾ ཨཱརབྦྷ ཧསནབྷཱཝོ ནཱམ ཧཱིནོ དྷམྨོ, ཧཱིནཉྩ ནཱམ དྷམྨཾ སེཝིཏུཾ པམཱདེན སདྡྷིཾ སཾཝསིཏུཾ ན ཝཊྚཏཱི’’ཏི ཝཏྭཱ ཨིམཾ གཱཐམཱཧ –

‘‘ཧཱིནཾ ¶ དྷམྨཾ ན སེཝེཡྻ, པམཱདེན ན སཾཝསེ;

མིཙྪཱདིཊྛིཾ ན སེཝེཡྻ, ན སིཡཱ ལོཀཝཌྜྷནོ’’ཏི.

ཏཏྠ ཧཱིནཾ དྷམྨནྟི པཉྩཀཱམགུཎཾ དྷམྨཾ. སོ ཧི ཧཱིནོ དྷམྨོ ན ཨནྟམསོ ཨོཊྛགོཎཱདཱིཧིཔི པཊིསེཝིཏབྦོ. ཧཱིནེསུ ཙ ནིརཡཱདཱིསུ ཋཱནེསུ ནིབྦཏྟཱཔེཏཱིཏི ཧཱིནོ ནཱམ, ཏཾ ན སེཝེཡྻ. པམཱདེནཱཏི སཏིཝོསྶགྒལཀྑཎེན པམཱདེནཱཔི ན སཾཝསེ. ན སེཝེཡྻཱཏི མིཙྪཱདིཊྛིམྤི ན གཎྷེཡྻ. ལོཀཝཌྜྷནོཏི ཡོ ཧི ཨེཝཾ ཀརོཏི, སོ ལོཀཝཌྜྷནོ ནཱམ ཧོཏི. ཏསྨཱ ཨེཝཾ ཨཀརཎེན ན སིཡཱ ལོཀཝཌྜྷནོཏི.

དེསནཱཝསཱནེ སོ དཧརོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཨུཏྟིཊྛེཏི ཨིམཾ དྷམྨདེསནཾ སཏྠཱ ནིགྲོདྷཱརཱམེ ཝིཧརནྟོ པིཏརཾ ཨཱརབྦྷ ཀཐེསི.

ཨེཀསྨིཉྷི སམཡེ སཏྠཱ པཋམགམནེན ཀཔིལཔུརཾ གནྟྭཱ ཉཱཏཱིཧི ཀཏཔཙྩུགྒམནོ ནིགྲོདྷཱརཱམཾ པཏྭཱ ཉཱཏཱིནཾ མཱནབྷིནྡནཏྠཱཡ ཨཱཀཱསེ རཏནཙངྐམཾ མཱཔེཏྭཱ ཏཏྠ ཙངྐམནྟོ དྷམྨཾ དེསེསི. ཉཱཏཱི པསནྣཙིཏྟཱ སུདྡྷོདནམཧཱརཱཛཱནཾ ཨཱདིཾ ཀཏྭཱ ཝནྡིཾསུ. ཏསྨིཾ ཉཱཏིསམཱགམེ པོཀྑརཝསྶཾ ཝསྶི. ཏཾ ཨཱརབྦྷ མཧཱཛནེན ཀཐཱཡ ¶ སམུཊྛཱཔིཏཱཡ ‘‘ན, བྷིཀྑཝེ, ཨིདཱནེཝ, པུབྦེཔི མཡ྄ཧཾ ཉཱཏིསམཱགམེ པོཀྑརཝསྶཾ ཝསྶིཡེཝཱ’’ཏི ¶ ཝཏྭཱ ཝེསྶནྟརཛཱཏཀཾ (ཛཱ. ༢.༢༢.༡༦༥༥ ཨཱདཡོ) ཀཐེསི. དྷམྨདེསནཾ སུཏྭཱ པཀྐམནྟེསུ ཉཱཏཱིསུ ཨེཀོཔི སཏྠཱརཾ ན ནིམནྟེསི. རཱཛཱཔི ‘‘མཡ྄ཧཾ པུཏྟོ མམ གེཧཾ ཨནཱགནྟྭཱ ཀཧཾ གམིསྶཏཱི’’ཏི ཨནིམནྟེཏྭཱཝ ཨགམཱསི. གནྟྭཱ ཙ པན གེཧེ ཝཱིསཏིཡཱ བྷིཀྑུསཧསྶཱནཾ ཡཱགུཨཱདཱིནི པཊིཡཱདཱཔེཏྭཱ ཨཱསནཱནི ¶ པཉྙཱཔེསི. པུནདིཝསེ སཏྠཱ པིཎྜཱཡ པཝིསནྟོ ‘‘ཀིཾ ནུ ཁོ ཨཏཱིཏབུདྡྷཱ པིཏུ ནགརཾ པཏྭཱ ཨུཛུཀམེཝ ཉཱཏིཀུལཾ པཝིསིཾསུ, ཨུདཱཧུ པཊིཔཱཊིཡཱ པིཎྜཱཡ ཙརིཾསཱུ’’ཏི ཨཱཝཛྫེནྟོ ‘‘པཊིཔཱཊིཡཱ ཙརིཾསཱུ’’ཏི དིསྭཱ པཋམགེཧཏོ པཊྛཱཡ པིཎྜཱཡ ཙརནྟོ པཱཡཱསི. རཱཧུལམཱཏཱ པཱསཱདཏལེ ནིསིནྣཱཝ དིསྭཱ ཏཾ པཝཏྟིཾ རཉྙོ ཨཱརོཙེསི. རཱཛཱ སཱཊཀཾ སཎྛཱཔེནྟོ ཝེགེན ནིཀྑམིཏྭཱ སཏྠཱརཾ ཝནྡིཏྭཱ – ‘‘པུཏྟ, ཀསྨཱ མཾ ནཱསེསི, ཨཏིཝིཡ ཏེ པིཎྜཱཡ ཙརནྟེན ལཛྫཱ ཨུཔྤཱདིཏཱ, ཡུཏྟཾ ནཱམ ཝོ ཨིམསྨིཾཡེཝ ནགརེ སུཝཎྞསིཝིཀཱདཱིཧི ཝིཙརིཏྭཱ པིཎྜཱཡ ཙརིཏུཾ, ཀིཾ མཾ ལཛྫཱཔེསཱི’’ཏི? ‘‘ནཱཧཾ ཏཾ, མཧཱརཱཛ, ལཛྫཱཔེམི, ཨཏྟནོ པན ཀུལཝཾསཾ ཨནུཝཏྟཱམཱི’’ཏི. ‘‘ཀིཾ པན, ཏཱཏ, པིཎྜཱཡ ཙརིཏྭཱ ཛཱིཝནཝཾསོ མམ ཝཾསོ’’ཏི? ‘‘ནེསོ, མཧཱརཱཛ, ཏཝ ཝཾསོ, མམ པནེསོ ཝཾསོ. ཨནེཀཱནི ཧི བུདྡྷསཧསྶཱནི པིཎྜཱཡ ཙརིཏྭཱཝ ཛཱིཝིཾསཱུ’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ཨུཏྟིཊྛེ ནཔྤམཛྫེཡྻ, དྷམྨཾ སུཙརིཏཾ ཙརེ;

དྷམྨཙཱརཱི སུཁཾ སེཏི, ཨསྨིཾ ལོཀེ པརམྷི ཙ.

‘‘དྷམྨཾ ཙརེ སུཙརིཏཾ, ན ནཾ དུཙྩརིཏཾ ཙརེ;

དྷམྨཙཱརཱི སུཁཾ སེཏི, ཨསྨིཾ ལོཀེ པརམྷི ཙཱ’’ཏི.

ཏཏྠ ¶ ཨུཏྟིཊྛེཏི ཨུཊྛཧིཏྭཱ པརེསཾ གྷརདྭཱརེ ཋཏྭཱ གཧེཏབྦཔིཎྜེ. ནཔྤམཛྫེཡྻཱཏི པིཎྜཙཱརིཀཝཏྟཉྷི ཧཱཔེཏྭཱ པཎཱིཏབྷོཛནཱནི པརིཡེསནྟོ ཨུཏྟིཊྛེ པམཛྫཏི ནཱམ, སཔདཱནཾ པིཎྜཱཡ ཙརནྟོ པན ན པམཛྫཏི ནཱམ. ཨེཝཾ ཀརོནྟོ ཨུཏྟིཊྛེ ནཔྤམཛྫེཡྻ. དྷམྨནྟི ཨནེསནཾ པཧཱཡ ¶ སཔདཱནཾ ཙརནྟོ ཏམེཝ བྷིཀྑཱཙརིཡདྷམྨཾ སུཙརིཏཾ ཙརེ. སུཁཾ སེཏཱིཏི དེསནཱམཏྟམེཏཾ, ཨེཝཾ པནེཏཾ བྷིཀྑཱཙརིཡདྷམྨཾ ཙརནྟོ དྷམྨཙཱརཱི ཨིདྷ ལོཀེ ཙཏཱུཧི ཨིརིཡཱཔཐེཧི སུཁཾ ཝིཧརཏཱིཏི ཨཏྠོ. ན ནཾ དུཙྩརིཏནྟི ཝེསིཡཱདིབྷེདེ ཨགོཙརེ ཙརནྟོ བྷིཀྑཱཙརིཡདྷམྨཾ དུཙྩརིཏཾ ཙརཏི ནཱམ. ཨེཝཾ ཨཙརིཏྭཱ དྷམྨཾ ཙརེ སུཙརིཏཾ, ན ནཾ དུཙྩརིཏཾ ཙརེ. སེསཾ ཝུཏྟཏྠམེཝ.

དེསནཱཝསཱནེ རཱཛཱ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཡཐཱ ¶ པུབྦུལ༹ཀནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩསཏེ ཝིཔསྶཀེ བྷིཀྑཱུ ཨཱརབྦྷ ཀཐེསི.

ཏེ ཀིར སཏྠུ སནྟིཀེ ཀམྨཊྛཱནཾ གཧེཏྭཱ ཨརཉྙཾ པཝིསིཏྭཱ གྷཊེནྟཱ ཝཱཡམནྟཱ ཨཔྤཝིསེསཱ ‘‘ཝིསེསེཏྭཱ ཀམྨཊྛཱནཾ གཧེསྶཱམཱ’’ཏི སཏྠུ སནྟིཀཾ ཨཱགཙྪནྟཱ ཨནྟརཱམགྒེ མརཱིཙིཀམྨཊྛཱནཾ བྷཱཝེནྟཱཝ ཨཱགམིཾསུ ¶ . ཏེསཾ ཝིཧཱརཾ པཝིཊྛཀྑཎེཡེཝ དེཝོ ཝསྶི. ཏེ ཏཏྠ ཏཏྠ པམུཁེསུ ཋཏྭཱ དྷཱརཱཝེགེན ཨུཊྛཧིཏྭཱ བྷིཛྫནྟེ པུབྦལ༹ཀེ དིསྭཱ ‘‘ཨཡམྤི ཨཏྟབྷཱཝོ ཨུཔྤཛྫིཏྭཱ བྷིཛྫནཏྠེན པུབྦུལ༹ཀསདིསོཡེཝཱ’’ཏི ཨཱརམྨཎཾ གཎྷིཾསུ. སཏྠཱ གནྡྷཀུཊིཡཾ ནིསིནྣོཝ ཏེ བྷིཀྑཱུ ཨོལོཀེཏྭཱ ཏེཧི སདྡྷིཾ ཀཐེནྟོ ཝིཡ ཨོབྷཱསཾ ཕརིཏྭཱ ཨིམཾ གཱཐམཱཧ –

‘‘ཡཐཱ པུབྦུལ༹ཀཾ པསྶེ, ཡཐཱ པསྶེ མརཱིཙིཀཾ;

ཨེཝཾ ལོཀཾ ཨཝེཀྑནྟཾ, མཙྩུརཱཛཱ ན པསྶཏཱི’’ཏི.

ཏཏྠ མརཱིཙིཀནྟི མཡཱུཁཾ. ཏེ ཧི དཱུརཏོཝ གེཧསཎྛཱནཱདིཝསེན ཨུཔཊྛིཏཱཔི ཨུཔགཙྪནྟཱནཾ ཨགཡ྄ཧཱུཔགཱ རིཏྟཀཱ ཏུཙྪཀཱཝ. ཏསྨཱ ཡཐཱ ཨུཔྤཛྫིཏྭཱ ¶ བྷིཛྫནཏྠེན པུབྦུལ༹ཀཾ རིཏྟཏུཙྪཱདིབྷཱཝེནེཝ པསྶེཡྻ, ཨེཝཾ ཁནྡྷཱདིལོཀཾ ཨཝེཀྑནྟཾ མཙྩུརཱཛཱ ན པསྶཏཱིཏི ཨཏྠོ.

དེསནཱཝསཱནེ ཏེ བྷིཀྑཱུ ཋིཏཊྛཱནེཡེཝ ཨརཧཏྟཾ པཱཔུཎིཾསཱུཏི.

ཨེཐ པསྶཐིམཾ ལོཀནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨབྷཡརཱཛཀུམཱརཾ ཨཱརབྦྷ ཀཐེསི.

ཏསྶ ཀིར པཙྩནྟཾ ཝཱུཔསམེཏྭཱ ཨཱགཏསྶ པིཏཱ བིམྦིསཱརོ ཏུསྶིཏྭཱ ཨེཀཾ ནཙྩགཱིཏཀུསལཾ ¶ ནཱཊཀིཏྠིཾ དཏྭཱ ¶ སཏྟཱཧཾ རཛྫམདཱསི. སོ སཏྟཱཧཾ གེཧཱ བཧི ཨནིཀྑནྟོཝ རཛྫསིརིཾ ཨནུབྷཝིཏྭཱ ཨཊྛམེ དིཝསེ ནདཱིཏིཏྠཾ གནྟྭཱ ནྷཏྭཱ ཨུཡྻཱནཾ པཝིསིཏྭཱ སནྟཏིམཧཱམཏྟོ ཝིཡ ཏསྶཱ ཨིཏྠིཡཱ ནཙྩགཱིཏཾ པསྶནྟོ ནིསཱིདི. སཱཔི ཏངྑཎཉྙེཝ སནྟཏིམཧཱམཏྟསྶ ནཱཊཀིཏྠཱི ཝིཡ སཏྠཀཝཱཏཱནཾ ཝསེན ཀཱལམཀཱསི. ཀུམཱརོ ཏསྶཱ ཀཱལཀིརིཡཱཡ ཨུཔྤནྣསོཀོ ‘‘ན མེ ཨིམཾ སོཀཾ ཋཔེཏྭཱ སཏྠཱརཾ ཨཉྙོ ནིབྦཱཔེཏུཾ སཀྑིསྶཏཱི’’ཏི སཏྠཱརཾ ཨུཔསངྐམིཏྭཱ, ‘‘བྷནྟེ, སོཀཾ མེ ནིབྦཱཔེཐཱ’’ཏི ཨཱཧ. སཏྠཱ ཏཾ སམསྶཱསེཏྭཱ ‘‘ཏཡཱ ཧི, ཀུམཱར, ཨིམིསྶཱ ཨིཏྠིཡཱ ཨེཝམེཝ མཏཀཱལེ རོདནྟེན པཝཏྟིཏཱནཾ ཨསྶཱུནཾ ཨནམཏགྒེ སཾསཱརེ པམཱཎཾ ནཏྠཱི’’ཏི ཝཏྭཱ ཏཱཡ དེསནཱཡ སོཀསྶ ཏནུབྷཱཝཾ ཉཏྭཱ, ‘‘ཀུམཱར, མཱ སོཙི, བཱལཛནཱནཾ སཾསཱིདནཊྛཱནམེཏ’’ནྟི ཝཏྭཱ ཨིམཾ གཱཐམཱཧ –

‘‘ཨེཐ པསྶཐིམཾ ལོཀཾ, ཙིཏྟཾ རཱཛརཐཱུཔམཾ;

ཡཏྠ བཱལཱ ཝིསཱིདནྟི, ནཏྠི སངྒོ ཝིཛཱནཏ’’ནྟི.

ཏཏྠ ཏེ པསྶཐཱཏི རཱཛཀུམཱརམེཝ སནྡྷཱཡཱཧ. ཨིམཾ ལོཀནྟི ཨིམཾ ཁནྡྷལོཀཱདིསངྑཱཏཾ ཨཏྟབྷཱཝཾ. ཙིཏྟནྟི སཏྟརཏནཱདིཝིཙིཏྟཾ རཱཛརཐཾ ཝིཡ ཝཏྠཱལངྐཱརཱདིཙིཏྟིཏཾ. ཡཏྠ བཱལཱཏི ཡསྨིཾ ཨཏྟབྷཱཝེ བཱལཱ ཨེཝཾ ¶ ཝིསཱིདནྟི. ཝིཛཱནཏནྟི ཝིཛཱནནྟཱནཾ པཎྜིཏཱནཾ ཨེཏྠ རཱགསངྒཱདཱིསུ ཨེཀོཔི སངྒོ ནཏྠཱིཏི ཨཏྠོ.

དེསནཱཝསཱནེ རཱཛཀུམཱརོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཡོ ¶ ཙ པུབྦེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྨཛྫནཏྠེརཾ ཨཱརབྦྷ ཀཐེསི.

སོ ཀིར པཱཏོ ཝཱ སཱཡཾ ཝཱཏི ཝེལཾ པམཱཎཾ ཨཀཏྭཱ ཨབྷིཀྑཎཾ སམྨཛྫནྟོཝ ཝིཙརཏི. སོ ཨེཀདིཝསཾ སམྨཛྫནིཾ གཧེཏྭཱ དིཝཱཊྛཱནེ ནིསིནྣསྶ རེཝཏཏྠེརསྶ སནྟིཀཾ གནྟྭཱ ‘‘ཨཡཾ མཧཱཀུསཱིཏོ ཛནསྶ སདྡྷཱདེཡྻཾ བྷུཉྫིཏྭཱ ཨཱགནྟྭཱ ནིསཱིདཏི, ཀིཾ ནཱམེཏསྶ སམྨཛྫནིཾ ¶ གཧེཏྭཱ ཨེཀཾ ཋཱནཾ སམྨཛྫིཏུཾ ན ཝཊྚཏཱི’’ཏི ཨཱཧ. ཐེརོ ‘‘ཨོཝཱདམསྶ དསྶཱམཱི’’ཏི ཙིནྟེཏྭཱ ཨེཧཱཝུསོཏི. ཀིཾ, བྷནྟེཏི? གཙྪ ནྷཏྭཱ ཨེཧཱིཏི. སོ ཏཐཱ ཨཀཱསི. ཨཐ ནཾ ཐེརོ ཨེཀམནྟཾ ནིསཱིདཱཔེཏྭཱ ཨོཝདནྟོ ཨཱཧ – ‘‘ཨཱཝུསོ, བྷིཀྑུནཱ ནཱམ ན སབྦཀཱལཾ སམྨཛྫནྟེན ཝིཙརིཏུཾ ཝཊྚཏི, པཱཏོ ཨེཝ པན སམྨཛྫིཏྭཱ པིཎྜཱཡ ཙརིཏྭཱ པིཎྜཔཱཏཔཊིཀྐནྟེན ཨཱགནྟྭཱ རཏྟིཊྛཱནེ ཝཱ དིཝཱཊྛཱནེ ཝཱ ནིསིནྣེན དྭཏྟིཾསཱཀཱརཾ སཛ྄ཛྷཱཡིཏྭཱ ཨཏྟབྷཱཝེ ཁཡཝཡཾ པཊྛཔེཏྭཱ སཱཡནྷེ ཨུཊྛཱཡ སམྨཛྫིཏུཾ ཝཊྚཏི, ནིཙྩཀཱལཾ ཨསམྨཛྫིཏྭཱ ཨཏྟནོཔི ནཱམ ཨོཀཱསོ ཀཱཏབྦོ’’ཏི. སོ ཐེརསྶ ཨོཝཱདེ ཋཏྭཱ ན ཙིརསྶེཝ ཨརཧཏྟཾ པཱཔུཎི. ཏཾ ཏཾ ཋཱནཾ ཨུཀླཱཔཾ ཨཧོསི. ཨཐ ནཾ བྷིཀྑཱུ ཨཱཧཾསུ – ‘‘ཨཱཝུསོ སམྨཛྫནཏྠེར, ཏཾ ཏཾ ཋཱནཾ ཨུཀླཱཔཾ ཀསྨཱ ན སམྨཛྫསཱི’’ཏི? ‘‘བྷནྟེ, མཡཱ པམཱདཀཱལེ ཨེཝཾ ཀཏཾ, ཨིདཱནཱམྷི ཨཔྤམཏྟོ’’ཏི. བྷིཀྑཱུ ‘‘ཨཡཾ ཐེརོ ཨཉྙཾ བྱཱཀརོཏཱི’’ཏི སཏྠུ ཨཱརོཙེསུཾ. སཏྠཱ ‘‘ཨཱམ, བྷིཀྑཝེ, མམ པུཏྟོ པུབྦེ པམཱདཀཱལེ སམྨཛྫནྟོ ཝིཙརི, ཨིདཱནི པན མགྒཕལསུཁེན ཝཱིཏིནཱམེནྟོ ན སམྨཛྫཏཱི’’ཏི ཝཏྭཱ ཨིམཾ གཱཐམཱཧ –

‘‘ཡོ ¶ ¶ ཙ པུབྦེ པམཛྫིཏྭཱ, པཙྪཱ སོ ནཔྤམཛྫཏི;

སོམཾ ལོཀཾ པབྷཱསེཏི, ཨབྦྷཱ མུཏྟོཝ ཙནྡིམཱ’’ཏི.

ཏསྶཏྠོ – ཡོ པུགྒལོ པུབྦེ ཝཏྟཔཊིཝཏྟཀརཎེན ཝཱ སཛ྄ཛྷཱཡཱདཱིཧི ཝཱ པམཛྫིཏྭཱ པཙྪཱ མགྒཕལསུཁེན ཝཱིཏིནཱམེནྟོ ནཔྤམཛྫཏི, སོ ཨབྦྷཱདཱིཧི མུཏྟོ ཙནྡོཝ ཨོཀཱསལོཀཾ མགྒཉཱཎེན ཨིམཾ ཁནྡྷཱདིལོཀཾ ཨོབྷཱསེཏི, ཨེཀཱལོཀཾ ཀརོཏཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡསྶ པཱཔནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨངྒུལིམཱལཏྠེརཾ ཨཱརབྦྷ ཀཐེསི. ཝཏྠུ ཨངྒུལིམཱལསུཏྟནྟཝསེནེཝ (མ. ནི. ༢.༣༤༧ ཨཱདཡོ) ཝེདིཏབྦཾ.

ཐེརོ ¶ པན སཏྠུ སནྟིཀེ པབྦཛིཏྭཱ ཨརཧཏྟཾ པཱཔུཎི. ཨཐ ཁོ ཨཱཡསྨཱ ཨངྒུལིམཱལོ རཧོགཏོ པཊིསལླཱིནོ ཝིམུཏྟིསུཁཔཊིསཾཝེདཱི. ཏཱཡཾ ཝེལཱཡཾ ཨིམཾ ཨུདཱནཾ ཨུདཱནེསི –

‘‘ཡོ ཙ པུབྦེ པམཛྫིཏྭཱ, པཙྪཱ སོ ནཔྤམཛྫཏི;

སོམཾ ལོཀཾ པབྷཱསེཏི, ཨབྦྷཱ མུཏྟོཝ ཙནྡིམཱ’’ཏི. –

ཨཱདིནཱ ནཡེན ཨུདཱནཾ ཨུདཱནེཏྭཱ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦུཏོ. བྷིཀྑཱུ ‘‘ཀཧཾ ནུ ཁོ, ཨཱཝུསོ, ཐེརོ ཨུཔྤནྣོ’’ཏི དྷམྨསབྷཱཡཾ ཀཐཾ སམུཊྛཱཔེསུཾ? སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ ¶ སནྣིསིནྣཱ’’ཏི པུཙྪིཏྭཱ, ‘‘བྷནྟེ, ཨངྒུལིམཱལཏྠེརསྶ ནིབྦཏྟཊྛཱནཀཐཱཡཱ’’ཏི ཝུཏྟེ ‘‘པརིནིབྦུཏོ ཙ, བྷིཀྑཝེ, མམ པུཏྟོ’’ཏི. ‘‘བྷནྟེ, ཨེཏྟཀེ མནུསྶེ མཱརེཏྭཱ པརིནིབྦུཏོ’’ཏི? ‘‘ཨཱམ, བྷིཀྑཝེ, སོ པུབྦེ ཨེཀཾ ཀལྱཱཎམིཏྟཾ ཨལབྷིཏྭཱ ཨེཏྟཀཾ པཱཔམཀཱསི, པཙྪཱ པན ཀལྱཱཎམིཏྟཔཙྩཡཾ ལབྷིཏྭཱ ཨཔྤམཏྟོ ཨཧོསི. ཏེནསྶ ཏཾ པཱཔཀམྨཾ ཀུསལེན པིཧིཏ’’ནྟི ཝཏྭཱ ཨིམཾ གཱཐམཱཧ –

‘‘ཡསྶ ¶ པཱཔཾ ཀཏཾ ཀམྨཾ, ཀུསལེན པིདྷཱིཡཏི;

སོམཾ ལོཀཾ པབྷཱསེཏི, ཨབྦྷཱ མུཏྟོཝ ཙནྡིམཱ’’ཏི.

ཏཏྠ ཀུསལེནཱཏི ཨརཧཏྟམགྒཾ སནྡྷཱཡ ཝུཏྟཾ. སེསཾ ཨུཏྟཱནཏྠམེཝཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨནྡྷབྷཱུཏོཏི ཨིམཾ དྷམྨདེསནཾ སཏྠཱ ཨགྒཱལ༹ཝེ ཙེཏིཡེ ཝིཧརནྟོ ཨེཀཾ པེསཀཱརདྷཱིཏརཾ ཨཱརབྦྷ ཀཐེསི.

ཨེཀདིཝསཉྷི ཨཱལ༹ཝིཝཱསིནོ སཏྠརི ཨཱལ༹ཝིཾ སམྤཏྟེ ནིམནྟེཏྭཱ དཱནཾ ཨདཾསུ. སཏྠཱ བྷཏྟཀིཙྩཱཝསཱནེ ཨནུམོདནཾ ཀརོནྟོ ‘‘ཨདྡྷུཝཾ མེ ཛཱིཝིཏཾ, དྷུཝཾ མེ མརཎཾ, ཨཝསྶཾ མཡཱ མརིཏབྦམེཝ ¶ , མརཎཔརིཡོསཱནཾ མེ ཛཱིཝིཏཾ, ཛཱིཝིཏམེཝ ཨནིཡཏཾ, མརཎཾ ནིཡཏནྟི ¶ ཨེཝཾ མརཎསྶཏིཾ བྷཱཝེཐ. ཡེསཉྷི མརཎསྶཏི ཨབྷཱཝིཏཱ, ཏེ པཙྪིམེ ཀཱལེ ཨཱསཱིཝིསཾ དིསྭཱ བྷཱིཏཨདཎྜཔུརིསོ ཝིཡ སནྟཱསཔྤཏྟཱ བྷེརཝརཝཾ རཝནྟཱ ཀཱལཾ ཀརོནྟི. ཡེསཾ པན མརཎསྶཏི བྷཱཝིཏཱ, ཏེ དཱུརཏོཝ ཨཱསཱིཝིསཾ དིསྭཱ དཎྜཀེན གཧེཏྭཱ ཚཌྜེཏྭཱ ཋིཏཔུརིསོ ཝིཡ པཙྪིམེ ཀཱལེ ན སནྟསནྟི, ཏསྨཱ མརཎསྶཏི བྷཱཝེཏབྦཱ’’ཏི ཨཱཧ. ཏཾ དྷམྨདེསནཾ སུཏྭཱ ཨཝསེསཛནཱ སཀིཙྩཔྤསུཏཱཝ ཨཧེསུཾ. ཨེཀཱ པན སོལ༹སཝསྶུདྡེསིཀཱ པེསཀཱརདྷཱིཏཱ ‘‘ཨཧོ བུདྡྷཱནཾ ཀཐཱ ནཱམ ཨཙྪརིཡཱ, མཡཱ པན མརཎསྶཏིཾ བྷཱཝེཏུཾ ཝཊྚཏཱི’’ཏི རཏྟིནྡིཝཾ མརཎསྶཏིམེཝ བྷཱཝེསི. སཏྠཱཔི ཏཏོ ནིཀྑམིཏྭཱ ཛེཏཝནཾ ཨགམཱསི. སཱཔི ཀུམཱརིཀཱ ཏཱིཎི ཝསྶཱནི མརཎསྶཏིཾ བྷཱཝེསིཡེཝ.

ཨཐེཀདིཝསཾ སཏྠཱ པཙྩཱུསསམཡེ ལོཀཾ ཨོལོཀེནྟོ ཏཾ ཀུམཱརིཀཾ ཨཏྟནོ ཉཱཎཛཱལསྶ ཨནྟོཔཝིཊྛཾ དིསྭཱ ‘‘ཀིཾ ནུ ཁོ བྷཝིསྶཏཱི’’ཏི ཨུཔདྷཱརེནྟོ ‘‘ཨིམཱཡ ཀུམཱརིཀཱཡ མམ དྷམྨདེསནཱཡ སུཏདིཝསཏོ པཊྛཱཡ ཏཱིཎི ཝསྶཱནི མརཎསྶཏི བྷཱཝིཏཱ, ཨིདཱནཱཧཾ ཏཏྠ གནྟྭཱ ཨིམཾ ཀུམཱརིཀཾ ཙཏྟཱརོ པཉྷེ པུཙྪིཏྭཱ ཏཱཡ ཝིསྶཛྫེནྟིཡཱ ¶ ཙཏཱུསུ ཋཱནེསུ སཱདྷུཀཱརཾ དཏྭཱ ཨིམཾ གཱཐཾ བྷཱསིསྶཱམི. སཱ གཱཐཱཝསཱནེ སོཏཱཔཏྟིཕལེ པཏིཊྛཧིསྶཏི, ཏཾ ནིསྶཱཡ མཧཱཛནསྶཱཔི སཱཏྠིཀཱ དྷམྨདེསནཱ བྷཝིསྶཏཱི’’ཏི ཉཏྭཱ པཉྩསཏབྷིཀྑུཔརིཝཱརོ ཛེཏཝནཱ ནིཀྑམིཏྭཱ ཨནུཔུབྦེན ཨགྒཱལ༹ཝཝིཧཱརཾ ཨགམཱསི. ཨཱལ༹ཝིཝཱསིནོ ‘‘སཏྠཱ ཨཱགཏོ’’ཏི སུཏྭཱ ཏཾ ཝིཧཱརཾ གནྟྭཱ ནིམནྟཡིཾསུ. ཏདཱ སཱཔི ཀུམཱརིཀཱ སཏྠུ ཨཱགམནཾ སུཏྭཱ ‘‘ཨཱགཏོ ཀིར མཡ྄ཧཾ པིཏཱ, སཱམི, ཨཱཙརིཡོ པུཎྞཙནྡམུཁོ མཧཱགོཏམབུདྡྷོ’’ཏི ཏུཊྛམཱནསཱ ‘‘ཨིཏོ མེ ཏིཎྞཾ སཾཝཙྪརཱནཾ མཏྠཀེ སུཝཎྞཝཎྞོ སཏྠཱ དིཊྛཔུབྦོ, ཨིདཱནིསྶ སུཝཎྞཝཎྞཾ ¶ སརཱིརཾ དཊྛུཾ མདྷུརོཛཉྩ ཝརདྷམྨཾ སོཏུཾ ལབྷིསྶཱམཱི’’ཏི ཙིནྟེསི. པིཏཱ པནསྶཱ སཱལཾ གཙྪནྟོ ཨཱཧ – ‘‘ཨམྨ, པརསནྟཀོ མེ སཱཊཀོ ཨཱརོཔིཏོ, ཏསྶ ཝིདཏྠིམཏྟཾ ཨནིཊྛིཏཾ, ཏཾ ཨཛྫ ནིཊྛཱཔེསྶཱམི, སཱིགྷཾ མེ ཏསརཾ ཝཊྚེཏྭཱ ཨཱཧརེཡྻཱསཱི’’ཏི. སཱ ཙིནྟེསི – ‘‘ཨཧཾ སཏྠུ དྷམྨཾ སོཏུཀཱམཱ, པིཏཱ ཙ མཾ ཨེཝཾ ཨཱཧ. ཀིཾ ནུ ཁོ སཏྠུ དྷམྨཾ སུཎཱམི, ཨུདཱཧུ པིཏུ ཏསརཾ ཝཊྚེཏྭཱ ཧརཱམཱི’’ཏི? ཨཐསྶཱ ཨེཏདཧོསི ‘‘པིཏཱ མཾ ཏསརེ ཨནཱཧརིཡམཱནེ པོཐེཡྻཔི པཧརེཡྻཔི, ཏསྨཱ ཏསརཾ ཝཊྚེཏྭཱ ཏསྶ དཏྭཱ པཙྪཱ དྷམྨཾ སོསྶཱམཱི’’ཏི པཱིཋཀེ ནིསཱིདིཏྭཱ ཏསརཾ ཝཊྚེསི.

ཨཱལ༹ཝིཝཱསིནོཔི སཏྠཱརཾ པརིཝིསིཏྭཱ པཏྟཾ གཧེཏྭཱ ཨནུམོདནཏྠཱཡ ཨཊྛཾསུ. སཏྠཱ ‘‘ཡམཧཾ ཀུལདྷཱིཏརཾ ནིསྶཱཡ ཏིཾསཡོཛནམགྒཾ ཨཱགཏོ, སཱ ཨཛྫཱཔི ཨོཀཱསཾ ན ལབྷཏི. ཏཱཡ ¶ ཨོཀཱསེ ལདྡྷེ ཨནུམོདནཾ ཀརིསྶཱམཱི’’ཏི ཏུཎྷཱིབྷཱུཏོ ཨཧོསི. ཨེཝཾ ཏུཎྷཱིབྷཱུཏམྤི སཏྠཱརཾ སདེཝཀེ ལོཀེ ཀོཙི ཀིཉྩི ཝཏྟུཾ ན ཝིསཧཏི. སཱཔི ཁོ ཀུམཱརིཀཱ ཏསརཾ ཝཊྚེཏྭཱ པཙྪིཡཾ ཋཔེཏྭཱ པིཏུ སནྟིཀཾ གཙྪམཱནཱ པརིསཔརིཡནྟེ ཋཏྭཱ སཏྠཱརཾ ཨོལོཀཡམཱནཱཝ ཨཊྛཱསི. སཏྠཱཔི གཱིཝཾ ཨུཀྑིཔིཏྭཱ ཏཾ ཨོལོཀེསི. སཱ ཨོལོཀིཏཱཀཱརེནེཝ ཨཉྙཱསི – ‘‘སཏྠཱ ཨེཝརཱུཔཱཡ པརིསཱཡ མཛ྄ཛྷེ ནིསཱིདིཏྭཱཝ མཾ ཨོལོཀེནྟོ མམཱགམནཾ པཙྩཱསཱིསཏི, ཨཏྟནོ སནྟིཀཾ ཨཱགམནམེཝ པཙྩཱསཱིསཏཱི’’ཏི. སཱ ཏསརཔཙྪིཾ ཋཔེཏྭཱ སཏྠུ ¶ སནྟིཀཾ ཨགམཱསི. ཀསྨཱ པན ནཾ སཏྠཱ ཨོལོཀེསཱིཏི? ཨེཝཾ ཀིརསྶ ཨཧོསི ‘‘ཨེསཱ ཨེཏྟོཝ གཙྪམཱནཱ པུཐུཛྫནཀཱལཀིརིཡཾ ¶ ཀཏྭཱ ཨནིཡཏགཏིཀཱ བྷཝིསྶཏི, མམ སནྟིཀཾ ཨཱགནྟྭཱ གཙྪམཱནཱ སོཏཱཔཏྟིཕལཾ པཏྭཱ ནིཡཏགཏིཀཱ ཧུཏྭཱ ཏུསིཏཝིམཱནེ ནིབྦཏྟིསྶཏཱི’’ཏི. ཏསྶཱ ཀིར ཏཾ དིཝསཾ མརཎཏོ མུཏྟི ནཱམ ནཏྠི. སཱ ཨོལོཀིཏསཉྙཱཎེནེཝ སཏྠཱརཾ ཨུཔསངྐམིཏྭཱ ཚབྦཎྞརཾསཱིནཾ ཨནྟརཾ པཝིསིཏྭཱ ཝནྡིཏྭཱ ཨེཀམནྟཾ ཨཊྛཱསི. ཏཐཱརཱུཔཱཡ པརིསཱཡ མཛ྄ཛྷེ ནིསཱིདིཏྭཱ ཏུཎྷཱིབྷཱུཏཾ སཏྠཱརཾ ཝནྡིཏྭཱ ཋིཏཀྑཎེཡེཝ ཏཾ ཨཱཧ – ‘‘ཀུམཱརིཀེ, ཀུཏོ ཨཱགཙྪསཱི’’ཏི? ‘‘ན ཛཱནཱམི, བྷནྟེ’’ཏི. ‘‘ཀཏྠ གམིསྶསཱི’’ཏི? ‘‘ན ཛཱནཱམི, བྷནྟེ’’ཏི. ‘‘ན ཛཱནཱསཱི’’ཏི? ‘‘ཛཱནཱམི, བྷནྟེ’’ཏི. ‘‘ཛཱནཱསཱི’’ཏི? ‘‘ན ཛཱནཱམི, བྷནྟེ’’ཏི. ཨིཏི ནཾ སཏྠཱ ཙཏྟཱརོ པཉྷེ པུཙྪི. མཧཱཛནོ ཨུཛ྄ཛྷཱཡི – ‘‘ཨམྦྷོ, པསྶཐ, ཨཡཾ པེསཀཱརདྷཱིཏཱ སམྨཱསམྦུདྡྷེན སདྡྷིཾ ཨིཙྪིཏིཙྪིཏཾ ཀཐེསི, ནནུ ནཱམ ཨིམཱཡ ‘ཀུཏོ ཨཱགཙྪསཱི’ཏི ཝུཏྟེ ‘པེསཀཱརགེཧཏོ’ཏི ཝཏྟབྦཾ. ‘ཀཧཾ གཙྪསཱི’ཏི ཝུཏྟེ ‘པེསཀཱརསཱལ’ནྟི ཝཏྟབྦཾ སིཡཱ’’ཏི.

སཏྠཱ མཧཱཛནཾ ནིསྶདྡཾ ཀཏྭཱ, ‘‘ཀུམཱརིཀེ, ཏྭཾ ཀུཏོ ཨཱགཙྪསཱི’’ཏི ཝུཏྟེ ‘‘ཀསྨཱ ན ཛཱནཱམཱིཏི ཝདེསཱི’’ཏི པུཙྪི. བྷནྟེ, ཏུམྷེ མམ པེསཀཱརགེཧཏོ ཨཱགཏབྷཱཝཾ ཛཱནཱཐ, ‘‘ཀུཏོ ཨཱགཏཱསཱི’’ཏི པུཙྪནྟཱ པན ‘‘ཀུཏོ ཨཱགནྟྭཱ ཨིདྷ ནིབྦཏྟཱསཱི’’ཏི པུཙྪཐ. ཨཧཾ པན ན ཛཱནཱམི ‘‘ཀུཏོ ཙ ཨཱགནྟྭཱ ཨིདྷ ནིབྦཏྟཱམྷཱི’’ཏི. ཨཐསྶཱ སཏྠཱ ‘‘སཱདྷུ སཱདྷུ, ཀུམཱརིཀེ, མཡཱ པུཙྪིཏཔཉྷོཝ ཏཡཱ ཝིསྶཛྫིཏོ’’ཏི པཋམཾ སཱདྷུཀཱརཾ ¶ དཏྭཱ ཨུཏྟརིམྤི པུཙྪི – ‘‘ཀཏྠ གམིསྶསཱིཏི པུན པུཊྛཱ ཀསྨཱ ‘ན ཛཱནཱམཱི’ཏི ཝདེསཱི’’ཏི? བྷནྟེ, ཏུམྷེ མཾ ཏསརཔཙྪིཾ གཧེཏྭཱ པེསཀཱརསཱལཾ གཙྪནྟིཾ ཛཱནཱཐ, ‘‘ཨིཏོ གནྟྭཱ ཀཏྠ ནིབྦཏྟིསྶསཱི’’ཏི པུཙྪཐ. ཨཧཉྩ ཨིཏོ ཙུཏཱ ན ཛཱནཱམི ‘‘ཀཏྠ གནྟྭཱ ནིབྦཏྟིསྶཱམཱི’’ཏི. ཨཐསྶཱ སཏྠཱ ‘‘མཡཱ པུཙྪིཏཔཉྷོཡེཝ ཏཡཱ ཝིསྶཛྫིཏོ’’ཏི དུཏིཡཾ སཱདྷུཀཱརཾ དཏྭཱ ཨུཏྟརིམྤི པུཙྪི – ‘‘ཨཐ ཀསྨཱ ‘ན ཛཱནཱསཱི’ཏི པུཊྛཱ ‘ཛཱནཱམཱི’ཏི ཝདེསཱི’’ཏི? ‘‘མརཎབྷཱཝཾ ཛཱནཱམི, བྷནྟེ, ཏསྨཱ ཨེཝཾ ཝདེམཱི’’ཏི. ཨཐསྶཱ སཏྠཱ ‘‘མཡཱ པུཙྪིཏཔཉྷོཡེཝ ཏཡཱ ཝིསྶཛྫིཏོ’’ཏི ཏཏིཡཾ ¶ སཱདྷུཀཱརཾ དཏྭཱ ཨུཏྟརིམྤི པུཙྪི – ‘‘ཨཐ ཀསྨཱ ‘ཛཱནཱསཱི’ཏི པུཊྛཱ ‘ན ཛཱནཱམཱི’ཏི ཝདེསཱི’’ཏི. མམ མརཎབྷཱཝམེཝ ཨཧཾ ཛཱནཱམི, བྷནྟེ, ‘‘རཏྟིནྡིཝཔུབྦཎྷཱདཱིསུ པན ཨསུཀཀཱལེ ནཱམ མརིསྶཱམཱི’’ཏི ན ¶ ཛཱནཱམི, ཏསྨཱ ཨེཝཾ ཝདེམཱིཏི. ཨཐསྶཱ སཏྠཱ ‘‘མཡཱ པུཙྪིཏཔཉྷོཡེཝ ཏཡཱ ཝིསྶཛྫིཏོ’’ཏི ཙཏུཏྠཾ སཱདྷུཀཱརཾ དཏྭཱ པརིསཾ ཨཱམནྟེཏྭཱ ‘‘ཨེཏྟཀཾ ནཱམ ཏུམྷེ ཨིམཱཡ ཀཐིཏཾ ན ཛཱནཱཐ, ཀེཝལཾ ཨུཛ྄ཛྷཱཡཐེཝ. ཡེསཉྷི པཉྙཱཙཀྑུ ནཏྠི, ཏེ ཨནྡྷཱ ཨེཝ ¶ . ཡེསཾ པཉྙཱཙཀྑུ ཨཏྠི, ཏེ ཨེཝ ཙཀྑུམནྟོ’’ཏི ཝཏྭཱ ཨིམཾ གཱཐམཱཧ –

‘‘ཨནྡྷབྷཱུཏོ ཨཡཾ ལོཀོ, ཏནུཀེཏྠ ཝིཔསྶཏི;

སཀུཎོ ཛཱལམུཏྟོཝ, ཨཔྤོ སགྒཱཡ གཙྪཏཱི’’ཏི.

ཏཏྠ ཨནྡྷབྷཱུཏོ ཨཡཾ ལོཀོཏི ཨཡཾ ལོཀིཡམཧཱཛནོ པཉྙཱཙཀྑུནོ ཨབྷཱཝེན ཨནྡྷབྷཱུཏོ. ཏནུཀེཏྠཱཏི ཏནུཀོ ཨེཏྠ, ན བཧུ ཛནོ ཨནིཙྩཱདིཝསེན ཝིཔསྶཏི. ཛཱལམུཏྟོཝཱཏི ཡཐཱ ཚེཀེན སཱཀུཎིཀེན ཛཱལེན ཨོཏྠརིཏྭཱ གཡ྄ཧམཱནེསུ ཝཊྚཀེསུ ཀོཙིདེཝ ཛཱལཏོ མུཙྩཏི. སེསཱ ཨནྟོཛཱལམེཝ པཝིསནྟི. ཏཐཱ མརཎཛཱལེན ཨོཏྠཊེསུ སཏྟེསུ བཧཱུ ཨཔཱཡགཱམིནོ ཧོནྟི, ཨཔྤོ ཀོཙིདེཝ སཏྟོ སགྒཱཡ གཙྪཏི, སུགཏིཾ ཝཱ ནིབྦཱནཾ ཝཱ པཱཔུཎཱཏཱིཏི ཨཏྠོ.

དེསནཱཝསཱནེ ཀུམཱརིཀཱ སོཏཱཔཏྟིཕལེ པཏིཊྛཧི, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

སཱཔི ཏསརཔཙྪིཾ གཧེཏྭཱ པིཏུ སནྟིཀཾ ཨགམཱསི, སོཔི ནིསིནྣཀོཝ ནིདྡཱཡི. ཏསྶཱ ཨསལླཀྑེཏྭཱཝ ཏསརཔཙྪིཾ ཨུཔནཱམེནྟིཡཱ ཏསརཔཙྪི ཝེམཀོཊིཡཾ པཊིཧཉྙིཏྭཱ སདྡཾ ཀུརུམཱནཱ པཏི. སོ པབུཛ྄ཛྷིཏྭཱ གཧིཏནིམིཏྟེནེཝ ཝེམཀོཊིཾ ཨཱཀཌྜྷི. ཝེམཀོཊི གནྟྭཱ ཏཾ ¶ ཀུམཱརིཀཾ ཨུརེ པཧརི, སཱ ཏཏྠེཝ ཀཱལཾ ཀཏྭཱ ཏུསིཏབྷཝནེ ནིབྦཏྟི. ཨཐསྶཱ པིཏཱ ཏཾ ཨོལོཀེནྟོ སཀལསརཱིརེན ལོཧིཏམཀྑིཏེན པཏིཏྭཱ མཏཾ ཨདྡས. ཨཐསྶ མཧཱསོཀོ ཨུཔྤཛྫི. སོ ‘‘ན མམ སོཀཾ ཨཉྙོ ནིབྦཱཔེཏུཾ སཀྑིསྶཏཱི’’ཏི རོདནྟོ སཏྠུ སནྟིཀཾ གནྟྭཱ ཏམཏྠཾ ཨཱརོཙེཏྭཱ, ‘‘བྷནྟེ, སོཀཾ མེ ནིབྦཱཔེཐཱ’’ཏི ཨཱཧ. སཏྠཱ ཏཾ སམསྶཱསེཏྭཱ ‘‘མཱ སོཙི, ཨུཔཱསཀ. ཨནམཏགྒསྨིཉྷི སཾསཱརེ ཏཝ ཨེཝམེཝ དྷཱིཏུ མརཎཀཱལེ པགྒྷརིཏཨསྶུ ཙཏུནྣཾ མཧཱསམུདྡཱནཾ ཨུདཀཏོ ཨཏིརེཀཏར’’ནྟི ཝཏྭཱ ཨནམཏགྒཀཐཾ ¶ ཀཐེསི ¶ . སོ ཏནུབྷཱུཏསོཀོ སཏྠཱརཾ པབྦཛྫཾ ཡཱཙིཏྭཱ ལདྡྷཱུཔསམྤདོ ན ཙིརསྶེཝ ཨརཧཏྟཾ པཱཔུཎཱིཏི.

ཧཾསཱདིཙྩཔཐེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏིཾས བྷིཀྑཱུ ཨཱརབྦྷ ཀཐེསི.

ཨེཀསྨིཉྷི དིཝསེ ཏིཾསམཏྟཱ དིསཱཝཱསིཀཱ བྷིཀྑཱུ སཏྠཱརཾ ཨུཔསངྐམིཾསུ. ཨཱནནྡཏྠེརོ སཏྠུ ཝཏྟཀརཎཝེལཱཡ ཨཱགནྟྭཱ ཏེ བྷིཀྑཱུ དིསྭཱ ‘‘སཏྠཱརཱ ཨིམེཧི སདྡྷིཾ པཊིསནྠཱརེ ཀཏེ ཝཏྟཾ ཀརིསྶཱམཱི’’ཏི དྭཱརཀོཊྛཀེ ¶ ཨཊྛཱསི. སཏྠཱཔི ཏེཧི སདྡྷིཾ པཊིསནྠཱརཾ ཀཏྭཱ ཏེསཾ སཱརཎཱིཡདྷམྨཾ ཀཐེསི. ཏཾ སུཏྭཱ ཏེ སབྦེཔི ཨརཧཏྟཾ པཏྭཱ ཨུཔྤཏིཏྭཱ ཨཱཀཱསེན ཨགམིཾསུ. ཨཱནནྡཏྠེརོ ཏེསུ ཙིརཱཡནྟེསུ སཏྠཱརཾ ཨུཔསངྐམིཏྭཱ, ‘‘བྷནྟེ, ཨིདཱནེཝ ཏིཾསམཏྟཱ བྷིཀྑཱུ ཨཱགཏཱ, ཏེ ཀུཧི’’ནྟི པུཙྪི. ‘‘གཏཱ, ཨཱནནྡཱ’’ཏི. ‘‘ཀཏརེན མགྒེན, བྷནྟེ’’ཏི? ‘‘ཨཱཀཱསེནཱནནྡཱ’’ཏི. ‘‘ཀིཾ པན ཏེ, བྷནྟེ, ཁཱིཎཱསཝཱ’’ཏི? ‘‘ཨཱམཱནནྡ, མམ སནྟིཀེ དྷམྨཾ སུཏྭཱ ཨརཧཏྟཾ པཏྟཱ’’ཏི. ཏསྨིཾ པན ཁཎེ ཨཱཀཱསེན ཧཾསཱ ཨཱགམིཾསུ. སཏྠཱ ‘‘ཡསྶ ཁོ པནཱནནྡ, ཙཏྟཱརོ ཨིདྡྷིཔཱདཱ སུབྷཱཝིཏཱ, སོ ཧཾསཱ ཝིཡ ཨཱཀཱསེན གཙྪཏཱི’’ཏི ཝཏྭཱ ཨིམཾ གཱཐམཱཧ –

‘‘ཧཾསཱདིཙྩཔཐེ ཡནྟི, ཨཱཀཱསེ ཡནྟི ཨིདྡྷིཡཱ;

ནཱིཡནྟི དྷཱིརཱ ལོཀམྷཱ, ཛེཏྭཱ མཱརཾ སཝཱཧིནི’’ནྟི.

ཏསྶཏྠོ – ཨིམེ ཧཾསཱ ཨཱདིཙྩཔཐེ ཨཱཀཱསེ གཙྪནྟི. ཡེསཾ ཨིདྡྷིཔཱདཱ སུབྷཱཝིཏཱ, ཏེཔི ཨཱཀཱསེ ཡནྟི ཨིདྡྷིཡཱ. དྷཱིརཱ པཎྜིཏཱ སཝཱཧིནིཾ མཱརཾ ཛེཏྭཱ ཨིམམྷཱ ཝཊྚལོཀཱ ནཱིཡནྟི, ནིབྦཱནཾ པཱཔུཎནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨེཀཾ ¶ ¶ ¶ དྷམྨནྟི དྷམྨདེསནཾ སཏྠཱ ཛེཏཝནེ ཝིཧརནྟོ ཙིཉྩམཱཎཝིཀཾ ཨཱརབྦྷ ཀཐེསི.

པཋམབོདྷིཡཉྷི དསབལསྶ པུཐུབྷཱུཏེསུ སཱཝཀེསུ ཨཔྤམཱཎེསུ དེཝམནུསྶེསུ ཨརིཡབྷཱུམིཾ ཨོཀྐནྟེསུ པཏྠཊེ གུཎསམུདཡེ མཧཱལཱབྷསཀྐཱརོ ཨུདཔཱདི. ཏིཏྠིཡཱ སཱུརིཡུགྒམནེ ཁཛྫོཔནཀསདིསཱ ཨཧེསུཾ ཧཏལཱབྷསཀྐཱརཱ. ཏེ ཨནྟརཝཱིཐིཡཾ ཋཏྭཱ ‘‘ཀིཾ སམཎོ གོཏམོཝ བུདྡྷོ, མཡམྤི བུདྡྷཱ, ཀིཾ ཏསྶེཝ དིནྣཾ མཧཔྥལཾ, ཨམྷཱཀམྤི དིནྣཾ མཧཔྥལམེཝ, ཨམྷཱཀམྤི དེཐ སཀྐརོཐཱ’’ཏི ཨེཝཾ མནུསྶེ ཝིཉྙཱཔེནྟཱཔི ལཱབྷསཀྐཱརཾ ཨལབྷིཏྭཱ རཧོ སནྣིཔཏིཏྭཱ ‘‘ཀེན ནུ ཁོ ཨུཔཱཡེན སམཎསྶ གོཏམསྶ མནུསྶཱནཾ ཨནྟརེ ཨཝཎྞཾ ཨུཔྤཱདེཏྭཱ ལཱབྷསཀྐཱརཾ ནཱསེཡྻཱམཱ’’ཏི ཙིནྟཡིཾསུ.

ཏདཱ སཱཝཏྠིཡཾ ཙིཉྩམཱཎཝིཀཱ ནཱམེཀཱ པརིབྦཱཛིཀཱ ཨུཏྟམརཱུཔདྷརཱ སོབྷགྒཔྤཏྟཱ དེཝཙྪརཱ ཝིཡ. ཨསྶཱ སརཱིརཏོ རསྨིཡོ ནིཙྪརནྟི. ཨཐེཀོ ཁརམནྟཱི ཨེཝམཱཧ – ‘‘ཙིཉྩམཱཎཝིཀཾ པཊིཙྩ སམཎསྶ གོཏམསྶ ཨཝཎྞཾ ཨུཔྤཱདེཏྭཱ ལཱབྷསཀྐཱརཾ ནཱསེསྶཱམཱ’’ཏི. ཏེ ‘‘ཨཏྠེཀོ ཨུཔཱཡོ’’ཏི སམྤཊིཙྪིཾསུ. ཨཐ སཱ ཏིཏྠིཡཱརཱམཾ གནྟྭཱ ཝནྡིཏྭཱ ཨཊྛཱསི, ཏིཏྠིཡཱ ཏཱཡ སདྡྷིཾ ན ཀཐེསུཾ. སཱ ‘‘ཀོ ནུ ཁོ མེ དོསོ’’ཏི ཡཱཝཏཏིཡཾ ‘‘ཝནྡཱམི, ཨཡྻཱ’’ཏི ཝཏྭཱ, ‘‘ཨཡྻཱ, ཀོ ནུ ཁོ མེ དོསོ, ཀིཾ མཡཱ སདྡྷིཾ ན ཀཐེཐཱ’’ཏི ཨཱཧ. ‘‘བྷགིནི, སམཎཾ གོཏམཾ ཨམྷེ ཝིཧེཋཡནྟཾ ཧཏལཱབྷསཀྐཱརེ ¶ ཀཏྭཱ ཝིཙརནྟཾ ན ཛཱནཱསཱི’’ཏི? ‘‘ན ཛཱནཱམི, ཨཡྻཱ, ཀིཾ པནེཏྠ མཡཱ ཀཏྟབྦ’’ནྟི. ‘‘སཙེ ཏྭཾ, བྷགིནི, ཨམྷཱཀཾ སུཁམིཙྪསི, ཨཏྟཱནཾ པཊིཙྩ སམཎསྶ གོཏམསྶ ཨཝཎྞཾ ཨུཔྤཱདེཏྭཱ ལཱབྷསཀྐཱརཾ ནཱསེཧཱི’’ཏི.

སཱ ‘‘སཱདྷུ, ཨཡྻཱ, མཡ྄ཧཾཝེསོ བྷཱརོ, མཱ ཙིནྟཡིཏྠཱ’’ཏི ཝཏྭཱ པཀྐམིཏྭཱ ཨིཏྠིམཱཡཱསུ ཀུསལཏཱཡ ཏཏོ པཊྛཱཡ སཱཝཏྠིཝཱསཱིནཾ དྷམྨཀཐཾ སུཏྭཱ ཛེཏཝནཱ ནིཀྑམནསམཡེ ཨིནྡགོཔཀཝཎྞཾ པཊཾ པཱརུཔིཏྭཱ གནྡྷམཱལཱདིཧཏྠཱ ཛེཏཝནཱབྷིམུཁཱི གཙྪཏི. ‘‘ཨིམཱཡ ཝེལཱཡ ཀུཧིཾ གཙྪསཱི’’ཏི ཝུཏྟེ, ‘‘ཀིཾ ཏུམྷཱཀཾ མམ གམནཊྛཱནེནཱ’’ཏི ཝཏྭཱ ཛེཏཝནསམཱིཔེ ཏིཏྠིཡཱརཱམེ ཝསིཏྭཱ པཱཏོཝ ‘‘ཨགྒཝནྡནཾ ཝནྡིསྶཱམཱ’’ཏི ནགརཱ ནིཀྑམནྟེ ཨུཔཱསཀཛནེ ¶ ཛེཏཝནསྶ ཨནྟོཝུཊྛཱ ཝིཡ ཧུཏྭཱ ནགརཾ པཝིསཏི. ‘‘ཀུཧིཾ ཝུཊྛཱསཱི’’ཏི ཝུཏྟེ, ‘‘ཀིཾ ཏུམྷཱཀཾ མམ ཝུཊྛཊྛཱནེནཱ’’ཏི ཝཏྭཱ མཱསདྡྷམཱསཙྩཡེན པུཙྪིཡམཱནཱ ཛེཏཝནེ སམཎེན གོཏམེན སདྡྷིཾ ཨེཀགནྡྷཀུཊིཡཱ ཝུཊྛཱམྷཱིཏི. པུཐུཛྫནཱནཾ ¶ ‘‘སཙྩཾ ནུ ཁོ ཨེཏཾ, ནོ’’ཏི ཀངྑཾ ཨུཔྤཱདེཏྭཱ ཏེམཱསཙཏུམཱསཙྩཡེན པིལོཏིཀཱཧི ཨུདརཾ ཝེཋེཏྭཱ གབྦྷིནིཝཎྞཾ དསྶེཏྭཱ ཨུཔརི རཏྟཔཊཾ པཱརུཔིཏྭཱ ‘‘སམཎཾ གོཏམཾ པཊིཙྩ གབྦྷོ ཨུཔྤནྣོ’’ཏི ཨནྡྷབཱལེ སདྡཧཱཔེཏྭཱ ཨཊྛནཝམཱསཙྩཡེན ཨུདརེ དཱརུམཎྜལིཀཾ བནྡྷིཏྭཱ ཨུཔརི པཊཾ པཱརུཔིཏྭཱ ¶ ཧཏྠཔཱདཔིཊྛིཡོ གོཧནུཀེན ཀོཊྚཱཔེཏྭཱ ཨུསྶདེ དསྶེཏྭཱ ཀིལནྟིནྡྲིཡཱ ཧུཏྭཱ སཱཡནྷསམཡེ ཏཐཱགཏེ ཨལངྐཏདྷམྨཱསནེ ནིསཱིདིཏྭཱ དྷམྨཾ དེསེནྟེ དྷམྨསབྷཾ གནྟྭཱ ཏཐཱགཏསྶ པུརཏོ ཋཏྭཱ, ‘‘མཧཱསམཎ, མཧཱཛནསྶ ཏཱཝ དྷམྨཾ དེསེསི, མདྷུརོ ཏེ སདྡོ, སམྥུསིཏཾ དནྟཱཝརཎཾ. ཨཧཾ པན ཏཾ པཊིཙྩ གབྦྷཾ ལབྷིཏྭཱ པརིཔུཎྞགབྦྷཱ ཛཱཏཱ, ནེཝ མེ སཱུཏིགྷརཾ ཛཱནཱསི, སཔྤིཏེལཱདཱིནི སཡཾ ཨཀརོནྟོ ཨུཔཊྛཱཀཱནམྤི ཨཉྙཏརཾ ཀོསལརཱཛཱནཾ ཝཱ ཨནཱཐཔིཎྜིཀཾ ཝཱ ཝིསཱཁཾ ཨུཔཱསིཀཾ ཝཱ ‘ཨིམིསྶཱ ཙིཉྩམཱཎཝིཀཱཡ ཀཏྟབྦཡུཏྟཀཾ ཀརོཧཱི’ཏི ན ཝདེསི, ཨབྷིརམིཏུཾཡེཝ ཛཱནཱསི, གབྦྷཔརིཧཱརཾ ན ཛཱནཱསཱི’’ཏི གཱུཐཔིཎྜཾ གཧེཏྭཱ ཙནྡམཎྜལཾ དཱུསེཏུཾ ཝཱཡམནྟཱི ཝིཡ པརིསམཛ྄ཛྷེ ཏཐཱགཏཾ ཨཀྐོསི. ཏཐཱགཏོ དྷམྨཀཐཾ ཋཔེཏྭཱ སཱིཧོ ཝིཡ ཨབྷིནདནྟོ, ‘‘བྷགིནི, ཏཡཱ ཀཐིཏསྶ ཏཐབྷཱཝཾ ཝཱ ཝིཏཐབྷཱཝཾ ཝཱ ཨཧམེཝ ཙ ཏྭཉྩ ཛཱནཱམཱ’’ཏི ཨཱཧ. ‘‘ཨཱམ, མཧཱསམཎ, ཏཡཱ ཙ མཡཱ ཙ ཉཱཏབྷཱཝེནེཏཾ ཛཱཏ’’ནྟི.

ཏསྨིཾ ཁཎེ སཀྐསྶ ཨཱསནཾ ཨུཎྷཱཀཱརཾ དསྶེསི. སོ ཨཱཝཛྫམཱནོ ‘‘ཙིཉྩམཱཎཝིཀཱ ཏཐཱགཏཾ ཨབྷཱུཏེན ཨཀྐོསཏཱི’’ཏི ཉཏྭཱ ‘‘ཨིདཾ ཝཏྠུཾ སོདྷེསྶཱམཱི’’ཏི ཙཏཱུཧི དེཝཔུཏྟེཧི སདྡྷིཾ ཨཱགམི. དེཝཔུཏྟཱ མཱུསིཀཔོཏཀཱ ཧུཏྭཱ དཱརུམཎྜལིཀསྶ བནྡྷནརཛྫུཀེ ཨེཀཔྤཧཱརེནེཝ ཚིནྡིཾསུ, པཱརུཏཔཊཾ ཝཱཏོ ཨུཀྑིཔི, དཱརུམཎྜལིཀཾ པཏམཱནཾ ཏསྶཱ པཱདཔིཊྛིཡཾ པཏི ¶ , ཨུབྷོ ཨགྒཔཱདཱ ཚིཛྫིཾསུ. མནུསྶཱ ‘‘དྷཱི ཀཱལ༹ཀཎྞི, སམྨཱསམྦུདྡྷཾ ཨཀྐོསཱི’’ཏི སཱིསེ ཁེལ༹ཾ པཱཏེཏྭཱ ལེཌྜུདཎྜཱདིཧཏྟཱ ཛེཏཝནཱ ནཱིཧརིཾསུ. ཨཐསྶཱ ཏཐཱགཏསྶ ཙཀྑུཔཐཾ ཨཏིཀྐནྟཀཱལེ མཧཱཔཐཝཱི བྷིཛྫིཏྭཱ ¶ ཝིཝརམདཱསི, ཨཝཱིཙིཏོ ཨགྒིཛཱལཱ ཨུཊྛཧི. སཱ ཀུལདཏྟིཡཾ ཀམྦལཾ པཱརུཔམཱནཱ ཝིཡ གནྟྭཱ ཨཝཱིཙིམྷི ནིབྦཏྟི. ཨཉྙཏིཏྠིཡཱནཾ ལཱབྷསཀྐཱརོ པརིཧཱཡི, དསབལསྶ བྷིཡྻོསོམཏྟཱཡ ཝཌྜྷི. པུནདིཝསེ དྷམྨསབྷཱཡཾ ཀཐཾ སམུཊྛཱཔེསུཾ, ‘‘ཨཱཝུསོ, ཙིཉྩམཱཎཝིཀཱ ཨེཝཾ ཨུལཱ༹རགུཎཾ ཨགྒདཀྑིཎེཡྻཾ སམྨཱསམྦུདྡྷཾ ཨབྷཱུཏེན ཨཀྐོསིཏྭཱ མཧཱཝིནཱསཾ པཏྟཱ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ, པུབྦེཔི ཨེསཱ མཾ ཨབྷཱུཏེན ཨཀྐོསིཏྭཱ ཝིནཱསཾ པཏྟཱཡེཝཱ’’ཏི ཝཏྭཱ –

‘‘ནཱདཊྛཱ པརཏོ དོསཾ, ཨཎུཾ ཐཱུལཱནི སབྦསོ;

ཨིསྶརོ པཎཡེ དཎྜཾ, སཱམཾ ཨཔྤཊིཝེཀྑིཡཱ’’ཏི. –

ཨིམཾ ¶ དྭཱདསནིཔཱཏེ མཧཱཔདུམཛཱཏཀཾ (ཛཱ. ༡.༡༢.༡༠༦) ཝིཏྠཱརེཏྭཱ ཀཐེསི –

ཏདཱ ཀིརེསཱ མཧཱཔདུམཀུམཱརསྶ བོདྷིསཏྟསྶ མཱཏུ སཔཏྟཱི རཉྙོ ཨགྒམཧེསཱི ཧུཏྭཱ མཧཱསཏྟཾ ཨསདྡྷམྨེན ནིམནྟེཏྭཱ ཏསྶ མནཾ ཨལབྷིཏྭཱ ཨཏྟནཱཝ ཨཏྟནི ཝིཔྤཀཱརཾ ཀཏྭཱ གིལཱནཱལཡཾ དསྶེཏྭཱ ‘‘ཏཝ པུཏྟོ མཾ ཨནིཙྪནྟིཾ ཨིམཾ ཝིཔྤཀཱརཾ པཱཔེསཱི’’ཏི ¶ རཉྙོ ཨཱརོཙེསི. རཱཛཱ ཀུདྡྷོ མཧཱསཏྟཾ ཙོརཔཔཱཏེ ཁིཔི. ཨཐ ནཾ པབྦཏཀུཙྪིཡཾ ཨདྷིཝཏྠཱ དེཝཏཱ པཊིགྒཧེཏྭཱ ནཱགརཱཛསྶ ཕཎགབྦྷེ པཏིཊྛཔེསི. ནཱགརཱཛཱ ཏཾ ནཱགབྷཝནཾ ནེཏྭཱ ཨུཔཌྜྷརཛྫེན སམྨཱནེསི. སོ ཏཏྠ སཾཝཙྪརཾ ཝསིཏྭཱ པབྦཛིཏུཀཱམོ ཧིམཝནྟཔྤདེསཾ པཏྭཱ པབྦཛིཏྭཱ ཛྷཱནཱབྷིཉྙཱཡོ ནིབྦཏྟེསི. ཨཐ ནཾ ཨེཀོ ཝནཙརཀོ དིསྭཱ རཉྙོ ཨཱརོཙེསི. རཱཛཱ ཏསྶ སནྟིཀཾ གནྟྭཱ ཀཏཔཊིསནྠཱརོ སབྦཾ ཏཾ པཝཏྟིཾ ཉཏྭཱ མཧཱསཏྟཾ རཛྫེན ནིམནྟེཏྭཱ ཏེན ‘‘མཡ྄ཧཾ རཛྫེན ཀིཙྩཾ ནཏྠི, ཏྭཾ པན དས རཱཛདྷམྨེ ཨཀོཔེཏྭཱ ཨགཏིགམནཾ པཧཱཡ དྷམྨེན རཛྫཾ ཀཱརེཧཱི’’ཏི ཨོཝདིཏོ ཨུཊྛཱཡཱསནཱ རོདིཏྭཱ ནགརཾ གཙྪནྟོ ཨནྟརཱམགྒེ ཨམཙྩེ པུཙྪི – ‘‘ཨཧཾ ཀཾ ནིསྶཱཡ ཨེཝཾ ཨཱཙཱརསམྤནྣེན པུཏྟེན ཝིཡོགཾ པཏྟོ’’ཏི? ‘‘ཨགྒམཧེསིཾ ནིསྶཱཡ, དེཝཱ’’ཏི. རཱཛཱ ཏཾ ཨུདྡྷཾཔཱདཾ གཧེཏྭཱ ཙོརཔཔཱཏེ ཁིཔཱཔེཏྭཱ ནགརཾ པཝིསིཏྭཱ དྷམྨེན རཛྫཾ ཀཱརེསི. ཏདཱ མཧཱཔདུམཀུམཱརོ སཏྠཱ ཨཧོསི, མཱཏུ སཔཏྟཱི ཙིཉྩམཱཎཝིཀཱཏི.

སཏྠཱ ¶ ཨིམམཏྠཾ པཀཱསེཏྭཱ, ‘‘བྷིཀྑཝེ, ཨེཀཾ དྷམྨཉྷི སཙྩཝཙནཾ པཧཱཡ མུསཱཝཱདེ པཏིཊྛིཏཱནཾ ཝིསྶཊྛཔརལོཀཱནཾ ཨཀཏྟབྦཔཱཔཀམྨཾ ནཱམ ནཏྠཱི’’ཏི ཝཏྭཱ ཨིམཾ གཱཐམཱཧ –

‘‘ཨེཀཾ དྷམྨཾ ཨཏཱིཏསྶ, མུསཱཝཱདིསྶ ཛནྟུནོ;

ཝིཏིཎྞཔརལོཀསྶ, ནཏྠི པཱཔཾ ཨཀཱརིཡ’’ནྟི.

ཏཏྠ ཨེཀཾ དྷམྨནྟི སཙྩཾ. མུསཱཝཱདིསྶཱཏི ཡསྶ དསསུ ཝཙནེསུ ཨེཀམྤི སཙྩཾ ནཏྠི, ཨེཝརཱུཔསྶ མུསཱཝཱདིནོ ¶ . ཝིཏིཎྞཔརལོཀསྶཱཏི ཝིསྶཊྛཔརལོཀསྶ. ཨེཝརཱུཔོ ཧི མནུསྶསམྤཏྟིཾ དེཝསམྤཏྟིཾ ཨཝསཱནེ ནིབྦཱནསམྤཏྟིནྟི ཨིམཱ ཏིསྶོཔི སམྤཏྟིཡོ ན པསྶཏི. ནཏྠི པཱཔནྟི ཏསྶ ཨེཝརཱུཔསྶ ཨིདཾ ནཱམ པཱཔཾ ཨཀཏྟབྦནྟི ནཏྠི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ན ¶ ཝེ ཀདརིཡཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨསདིསདཱནཾ ཨཱརབྦྷ ཀཐེསི.

ཨེཀསྨིཉྷི སམཡེ སཏྠཱ ཙཱརིཀཾ ཙརིཏྭཱ པཉྩསཏབྷིཀྑུཔརིཝཱརོ ཛེཏཝནཾ པཱཝིསི. རཱཛཱ ཝིཧཱརཾ གནྟྭཱ སཏྠཱརཾ ནིམནྟེཏྭཱ པུནདིཝསེ ཨཱགནྟུཀདཱནཾ སཛྫེཏྭཱ ‘‘དཱནཾ མེ པསྶནྟཱུ’’ཏི ནཱགརེ པཀྐོསི. ནཱགརཱ ཨཱགནྟྭཱ རཉྙོ དཱནཾ དིསྭཱ པུནདིཝསེ སཏྠཱརཾ ནིམནྟེཏྭཱ དཱནཾ སཛྫེཏྭཱ ‘‘ཨམྷཱཀམྤི དཱནཾ, དེཝོ, པསྶཏཱུ’’ཏི རཉྙོ པཧིཎིཾསུ. རཱཛཱ ཏེསཾ དཱནཾ དིསྭཱ ‘‘ཨིམེཧི མམ དཱནཏོ ཨུཏྟརིཏརཾ ཀཏཾ, པུན དཱནཾ ཀརིསྶཱམཱི’’ཏི པུནདིཝསེཔི དཱནཾ སཛྫེསི. ནཱགརཱཔི ཏཾ དིསྭཱ པུནདིཝསེ སཛྫཡིཾསུ. ཨེཝཾ ནེཝ རཱཛཱ ནཱགརེ པརཱཛེཏུཾ སཀྐོཏི, ན ¶ ནཱགརཱ རཱཛཱནཾ. ཨཐ ཚཊྛེ ཝཱརེ ནཱགརཱ སཏགུཎཾ སཧསྶགུཎཾ ཝཌྜྷེཏྭཱ ཡཐཱ ན སཀྐཱ ཧོཏི ‘‘ཨིདཾ ནཱམ ཨིམེསཾ དཱནེ ནཏྠཱི’’ཏི ཝཏྟུཾ, ཨེཝཾ དཱནཾ སཛྫཡིཾསུ. རཱཛཱ ཏཾ དིསྭཱ ‘‘སཙཱཧཾ ཨིམེསཾ དཱནཏོ ཨུཏྟརིཏརཾ ཀཱཏུཾ ན སཀྑིསྶཱམི, ཀིཾ མེ ཛཱིཝིཏེནཱ’’ཏི ཨུཔཱཡཾ ཙིནྟེནྟོ ནིཔཛྫི. ཨཐ ནཾ མལླིཀཱ ¶ དེཝཱི ཨུཔསངྐམིཏྭཱ, ‘‘ཀསྨཱ, མཧཱརཱཛ, ཨེཝཾ ནིཔནྣོསི, ཀེན ཏེ ཨིནྡྲིཡཱནི ཀིལནྟཱནི ཝིཡཱ’’ཏི པུཙྪི. རཱཛཱ ཨཱཧ – ‘‘ན དཱནི ཏྭཾ, དེཝི, ཛཱནཱསཱི’’ཏི. ‘‘ན ཛཱནཱམི, དེཝཱ’’ཏི. སོ ཏསྶཱ ཏམཏྠཾ ཨཱརོཙེསི.

ཨཐ ནཾ མལླིཀཱ ཨཱཧ – ‘‘དེཝ, མཱ ཙིནྟཡི, ཀཧཾ ཏཡཱ པཐཝིསྶརོ རཱཛཱ ནཱགརེཧི པརཱཛིཡམཱནོ དིཊྛཔུབྦོ ཝཱ སུཏཔུབྦོ ཝཱ, ཨཧཾ ཏེ དཱནཾ སཾཝིདཧིསྶཱམཱི’’ཏི. ཨིཏིསྶ ཨསདིསདཱནཾ སཾཝིདཧིཏུཀཱམཏཱཡ ཨེཝཾ ཝཏྭཱ, མཧཱརཱཛ, སཱལཀལྱཱཎིཔདརེཧི པཉྩནྣཾ བྷིཀྑུསཏཱནཾ ཨནྟོ ཨཱཝཊྚེ ནིསཱིདནམཎྜཔཾ ཀཱརེཧི, སེསཱ བཧིཨཱཝཊྚེ ནིསཱིདིསྶནྟི. པཉྩ སེཏཙྪཏྟསཏཱནི ཀཱརེཧི, ཏཱནི གཧེཏྭཱ པཉྩསཏཱ ཧཏྠཱི པཉྩནྣཾ བྷིཀྑུསཏཱནཾ མཏྠཀེ དྷཱརཡམཱནཱ ཋསྶནྟི. ཨཊྛ ཝཱ དས ཝཱ རཏྟསུཝཎྞནཱཝཱཡོ ཀཱརེཧི, ཏཱ མཎྜཔམཛ྄ཛྷེ བྷཝིསྶནྟི. དྭིནྣཾ དྭིནྣཾ བྷིཀྑཱུནཾ ཨནྟརེ ཨེཀེཀཱ ཁཏྟིཡདྷཱིཏཱ ནིསཱིདིཏྭཱ གནྡྷེ པིསིསྶཏི, ཨེཀེཀཱ ཁཏྟིཡདྷཱིཏཱ བཱིཛནཾ ཨཱདཱཡ དྭེ དྭེ བྷིཀྑཱུ བཱིཛམཱནཱ ཋསྶཏི, སེསཱ ཁཏྟིཡདྷཱིཏརོ པིསེ པིསེ གནྡྷེ ཧརིཏྭཱ ¶ སུཝཎྞནཱཝཱསུ པཀྑིཔིསྶནྟི, ཏཱསུ ཨེཀཙྩཱ ཁཏྟིཡདྷཱིཏརོ ནཱིལུཔྤལཀལཱཔེ གཧེཏྭཱ སུཝཎྞནཱཝཱསུ པཀྑིཏྟགནྡྷེ ཨཱལོལེ༹ཏྭཱ ཝཱསཾ གཱཧཱཔེསྶནྟི. ནཱགརཱནཉྷིནེཝ ཁཏྟིཡདྷཱིཏརོ ཨཏྠི, ན སེཏཙྪཏྟཱནི, ན ཧཏྠིནོ ཙ. ཨིམེཧི ཀཱརཎེཧི ནཱགརཱ ¶ པརཱཛིསྶནྟི, ཨེཝཾ ཀརོཧི, མཧཱརཱཛཱཏི. རཱཛཱ ‘‘སཱདྷུ, དེཝི, ཀལྱཱཎཾ ཏེ ཀཐིཏ’’ནྟི ཏཱཡ ཀཐིཏནིཡཱམེན སབྦཾ ཀཱརེསི. ཨེཀསྶ པན བྷིཀྑུནོ ཨེཀོ ཧཏྠི ནཔྤཧོསི. ཨཐ རཱཛཱ མལླིཀཾ ཨཱཧ – ‘‘བྷདྡེ, ཨེཀསྶ བྷིཀྑུནོ ཨེཀོ ཧཏྠི ནཔྤཧོཏི, ཀིཾ ཀརིསྶཱམཱ’’ཏི. ‘‘ཀིཾ, དེཝ, པཉྩ ཧཏྠིསཏཱནི ནཏྠཱི’’ཏི? ‘‘ཨཏྠི, དེཝི, ཨཝསེསཱ དུཊྛཧཏྠིནོ, ཏེ བྷིཀྑཱུ དིསྭཱཝ ཝེརམྦྷཝཱཏཱ ཝིཡ ཙཎྜཱ ཧོནྟཱི’’ཏི. ‘‘དེཝ, ཨཧཾ ཨེཀསྶ དུཊྛཧཏྠིཔོཏཀསྶ ཚཏྟཾ གཧེཏྭཱ ཏིཊྛནཊྛཱནཾ ཛཱནཱམཱི’’ཏི. ‘‘ཀཏྠ ནཾ ཋཔེསྶཱམཱ’’ཏི? ‘‘ཨཡྻསྶ ཨངྒུལིམཱལསྶ སནྟིཀེ’’ཏི. རཱཛཱ ཏཐཱ ཀཱརེསི. ཧཏྠིཔོཏཀོ ཝཱལདྷིཾ ཨནྟརསཏྠིམྷི པཀྑིཔིཏྭཱ ཨུབྷོ ཀཎྞེ པཱཏེཏྭཱ ཨཀྑཱིནི ནིམིལེཏྭཱ ཨཊྛཱསི. མཧཱཛནོ ‘‘ཨེཝརཱུཔསྶ ནཱམ ཙཎྜཧཏྠིནོ ཨཡམཱཀཱརོ’’ཏི ཧཏྠིམེཝ ཨོལོཀེསི.

རཱཛཱ བུདྡྷཔྤམུཁཾ བྷིཀྑུསངྒྷཾ པརིཝིསིཏྭཱ སཏྠཱརཾ ཝནྡིཏྭཱ, ‘‘བྷནྟེ, ཡཾ ཨིམསྨིཾ དཱནགྒེ ཀཔྤིཡབྷཎྜཾ ཝཱ ཨཀཔྤིཡབྷཎྜཾ ཝཱ, སབྦཾ ཏཾ ཏུམྷཱཀམེཝ དམྨཱི’’ཏི ཨཱཧ ¶ . ཏསྨིཾ ¶ པན དཱནེ ཨེཀདིཝསེནེཝ པརིཙྩཏྟཾ ཙུདྡསཀོཊིདྷནཾ ཧོཏི. སཏྠུ པན སེཏཙྪཏྟཾ ནིསཱིདནཔལླངྐོ ཨཱདྷཱརཀོ པཱདཔཱིཋིཀཱཏི ཙཏྟཱརི ཨནགྒྷཱནེཝ. པུན ཨེཝརཱུཔཾ ཀཏྭཱ བུདྡྷཱནཾ དཱནཾ ནཱམ དཱཏུཾ སམཏྠོ ནཱཧོསི, ཏེནེཝ ཏཾ ‘‘ཨསདིསདཱན’’ནྟི པཉྙཱཡི. ཏཾ ཀིར སབྦབུདྡྷཱནཾ ཨེཀཝཱརཾ ཧོཏིཡེཝ, སབྦེསཾ པན ཨིཏྠཱིཡེཝ སཾཝིདཧཏི. རཉྙོ པན ཀཱལོ༹ ཙ ཛུཎྷོ ཙཱཏི དྭེ ཨམཙྩཱ ཨཧེསུཾ. ཏེསུ ཀཱལོ༹ ཙིནྟེསི – ‘‘ཨཧོ རཱཛཀུལསྶ པརིཧཱནི, ཨེཀདིཝསེནེཝ ཙུདྡསཀོཊིདྷནཾ ཁཡཾ གཙྪཏི, ཨིམེ ཨིམཾ དཱནཾ བྷུཉྫིཏྭཱ གནྟྭཱ ནིཔནྣཱ ནིདྡཱཡིསྶནྟི, ཨཧོ ནཊྛཾ རཱཛཀུལ’’ནྟི. ཛུཎྷོ ཙིནྟེསི – ‘‘ཨཧོ རཉྙོ དཱནཾ སུདིནྣཾ. ན ཧི སཀྐཱ རཱཛབྷཱཝེ ཨཊྛིཏེན ཨེཝརཱུཔཾ དཱནཾ དཱཏུཾ, སབྦསཏྟཱནཾ པཏྟིཾ ཨདེནྟོ ནཱམ ནཏྠི, ཨཧཾ པནིདཾ དཱནཾ ཨནུམོདཱམཱི’’ཏི.

སཏྠུ བྷཏྟཀིཙྩཱཝསཱནེ རཱཛཱ ཨནུམོདནཏྠཱཡ པཏྟཾ གཎྷི. སཏྠཱ ཙིནྟེསི – ‘‘རཉྙཱ མཧོགྷཾ པཝཏྟེནྟེན ཝིཡ མཧཱདཱནཾ དིནྣཾ, ཨསཀྑི ནུ ཁོ མཧཱཛནོ ཙིཏྟཾ པསཱདེཏུཾ, ཨུདཱཧུ ནོ’’ཏི. སོ ཏེསཾ ཨམཙྩཱནཾ ཙིཏྟཱཙཱརཾ ཉཏྭཱ ‘‘སཙེ རཉྙོ དཱནཱནུཙྪཝིཀཾ ཨནུམོདནཾ ཀརིསྶཱམི, ཀཱལ༹སྶ མུདྡྷཱ སཏྟདྷཱ ཕལིསྶཏི, ཛུཎྷོ སོཏཱཔཏྟིཕལེ པཏིཊྛཧིསྶཏཱི’’ཏི ཉཏྭཱ ཀཱལེ༹ ཨནུཀམྤཾ པཊིཙྩ ཨེཝརཱུཔཾ དཱནཾ དཏྭཱ ཋིཏསྶ རཉྙོ ཙཏུཔྤདིཀཾ གཱཐམེཝ ཝཏྭཱ ཨུཊྛཱཡཱསནཱ ཝིཧཱརཾ གཏོ. བྷིཀྑཱུ ¶ ཨངྒུལིམཱལཾ པུཙྪིཾསུ – ‘‘ན ཀིཾ ནུ ཁོ, ཨཱཝུསོ, དུཊྛཧཏྠིཾ ཚཏྟཾ དྷཱརེཏྭཱ ཋིཏཾ དིསྭཱ བྷཱཡཱི’’ཏི? ‘‘ན བྷཱཡིཾ, ཨཱཝུསོ’’ཏི. ཏེ སཏྠཱརཾ ཨུཔསངྐམིཏྭཱ ཨཱཧཾསུ – ‘‘ཨངྒུལིམཱལོ, བྷནྟེ, ཨཉྙཾ བྱཱཀརོསཱི’’ཏི. སཏྠཱ ‘‘ན, བྷིཀྑཝེ ¶ , ཨངྒུལིམཱལོ བྷཱཡཏི. ཁཱིཎཱསཝཨུསབྷཱནཉྷི ཨནྟརེ ཛེཊྛཀཨུསབྷཱ མམ པུཏྟསདིསཱ བྷིཀྑཱུ ན བྷཱཡནྟཱི’’ཏི ཝཏྭཱ བྲཱཧྨཎཝགྒེ ཨིམཾ གཱཐམཱཧ –

‘‘ཨུསབྷཾ པཝརཾ ཝཱིརཾ, མཧེསིཾ ཝིཛིཏཱཝིནཾ;

ཨནེཛཾ ནྷཱཏཀཾ བུདྡྷཾ, ཏམཧཾ བྲཱུམི བྲཱཧྨཎ’’ནྟི. (དྷ. པ. ༤༢༢; སུ. ནི. ༦༥༡);

རཱཛཱཔི དོམནསྶཔྤཏྟོ ‘‘ཨེཝརཱུཔཱཡ ནཱམ པརིསཱཡ དཱནཾ དཏྭཱ ཋིཏསྶ མཡ྄ཧཾ ཨནུཙྪཝིཀཾ ཨནུམོདནཾ ཨཀཏྭཱ གཱཐམེཝ ཝཏྭཱ སཏྠཱ ཨུཊྛཱཡཱསནཱ གཏོ. མཡཱ སཏྠུ ཨནུཙྪཝིཀཾ དཱནཾ ཨཀཏྭཱ ཨནནུཙྪཝིཀཾ ཀཏཾ བྷཝིསྶཏི ¶ , ཀཔྤིཡབྷཎྜཾ ཨདཏྭཱ ཨཀཔྤིཡབྷཎྜཾ ཝཱ དིནྣཾ བྷཝིསྶཏི, སཏྠཱརཱ མེ ཀུཔིཏེན བྷཝིཏབྦཾ. ཨེཝཉྷི ཨསདིསདཱནཾ ནཱམ, དཱནཱནུརཱུཔཾ ཨནུམོདནཾ ཀཱཏུཾ ཝཊྚཏཱི’’ཏི ཝིཧཱརཾ གནྟྭཱ སཏྠཱརཾ ཝནྡིཏྭཱ ཨེཏདཝོཙ – ‘‘ཀིཾ ནུ ཁོ མེ, བྷནྟེ, དཱཏབྦཡུཏྟཀཾ དཱནཾ ན དིནྣཾ, ཨུདཱཧུ དཱནཱནུརཱུཔཾ ཀཔྤིཡབྷཎྜཾ ཨདཏྭཱ ཨཀཔྤིཡབྷཎྜམེཝ དིནྣ’’ནྟི. ‘‘ཀིམེཏཾ ¶ , མཧཱརཱཛཱ’’ཏི? ‘‘ན མེ ཏུམྷེཧི དཱནཱནུཙྪཝིཀཱ ཨནུམོདནཱ ཀཏཱ’’ཏི? ‘‘མཧཱརཱཛ, ཨནུཙྪཝིཀམེཝ ཏེ དཱནཾ དིནྣཾ. ཨེཏཉྷི ཨསདིསདཱནཾ ནཱམ, ཨེཀསྶ བུདྡྷསྶ ཨེཀཝཱརམེཝ སཀྐཱ དཱཏུཾ, པུན ཨེཝརཱུཔཾ ནཱམ དཱནཾ དུདྡད’’ནྟི. ‘‘ཨཐ ཀསྨཱ, བྷནྟེ, མེ དཱནཱནུརཱུཔཾ ཨནུམོདནཾ ན ཀརིཏྠཱ’’ཏི? ‘‘པརིསཱཡ ཨསུདྡྷཏྟཱ, མཧཱརཱཛཱ’’ཏི. ‘‘ཀོ ནུ ཁོ, བྷནྟེ, པརིསཱཡ དོསོ’’ཏི? ཨཐསྶ སཏྠཱ དྭིནྣམྤི ཨམཙྩཱནཾ ཙིཏྟཱཙཱརཾ ཨཱརོཙེཏྭཱ ཀཱལེ༹ ཨནུཀམྤཾ པཊིཙྩ ཨནུམོདནཱཡ ཨཀཏབྷཱཝཾ ཨཱཙིཀྑི. རཱཛཱ ‘‘སཙྩཾ ཀིར ཏེ, ཀཱལ༹, ཨེཝཾ ཙིནྟིཏ’’ནྟི པུཙྪིཏྭཱ ‘‘སཙྩ’’ནྟི ཝུཏྟེ ‘‘ཏཝ སནྟཀཾ ཨགྒཧེཏྭཱ མམ པུཏྟདཱརེཧི སདྡྷིཾ མཡི ཨཏྟནོ སནྟཀཾ དེནྟེ ཏུཡ྄ཧཾ ཀཱ པཱིལཱ༹. གཙྪ, བྷོ, ཡཾ ཏེ མཡཱ དིནྣཾ, ཏཾ དིནྣམེཝ ཧོཏུ, རཊྛཏོ པན མེ ནིཀྑམཱ’’ཏི ཏཾ རཊྛཱ ནཱིཧརིཏྭཱ ཛུཎྷཾ པཀྐོསཱཔེཏྭཱ ‘‘སཙྩཾ ཀིར ཏེ ཨེཝཾ ཙིནྟིཏ’’ནྟི པུཙྪིཏྭཱ ‘‘སཙྩ’’ནྟི ཝུཏྟེ, ‘‘སཱདྷུ, མཱཏུལ, པསནྣོསྨི, ཏྭཾ མམ པརིཛནཾ གཧེཏྭཱ མཡཱ དིནྣནིཡཱམེནེཝ སཏྟ དིཝསཱནི དཱནཾ དེཧཱི’’ཏི སཏྟཱཧཾ རཛྫཾ ནིཡྻཱདེཏྭཱ སཏྠཱརཾ ཨཱཧ – ‘‘པསྶཐ, བྷནྟེ, བཱལསྶ ཀརཎཾ, མཡཱ ཨེཝཾ དིནྣདཱནེ པཧཱརམདཱསཱི’’ཏི. སཏྠཱ ‘‘ཨཱམ, མཧཱརཱཛ, བཱལཱ ནཱམ པརསྶ དཱནཾ ཨནབྷིནནྡིཏྭཱ དུགྒཏིཔརཱཡཎཱ ཧོནྟི, དྷཱིརཱ པན པརེསམྤི དཱནཾ ཨནུམོདིཏྭཱ སགྒཔརཱཡཎཱ ཨེཝ ཧོནྟཱི’’ཏི ཝཏྭཱ ཨིམཾ གཱཐམཱཧ –

‘‘ན ¶ ཝེ ཀདརིཡཱ དེཝལོཀཾ ཝཛནྟི, བཱལཱ ཧཝེ ནཔྤསཾསནྟི དཱནཾ;

དྷཱིརོ ཙ དཱནཾ ཨནུམོདམཱནོ, ཏེནེཝ སོ ཧོཏི སུཁཱི པརཏྠཱ’’ཏི.

ཏཏྠ ¶ ཀདརིཡཱཏི ཐདྡྷམཙྪརིནོ. བཱལཱཏི ཨིདྷལོཀཔརལོཀཾ ཨཛཱནནཀཱ. དྷཱིརོཏི པཎྜིཏོ. སུཁཱི པརཏྠཱཏི ཏེནེཝ སོ དཱནཱནུམོདནཔུཉྙེན པརལོཀེ དིབྦསམྤཏྟིཾ ཨནུབྷཝམཱནོ སུཁཱི ཧོཏཱིཏི.

དེསནཱཝསཱནེ ¶ ཛུཎྷོ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསི, ཛུཎྷོཔི སོཏཱཔནྣོ ཧུཏྭཱ སཏྟཱཧཾ རཉྙཱ དིནྣནིཡཱམེནེཝ དཱནཾ ཨདཱསཱིཏི.

པཐབྱཱ ཨེཀརཛྫེནཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀཱལཾ ནཱམ ཨནཱཐཔིཎྜིཀསྶ པུཏྟཾ ཨཱརབྦྷ ཀཐེསི.

སོ ཀིར ཏཐཱཝིདྷསྶ སདྡྷཱསམྤནྣསྶ སེཊྛིནོ པུཏྟོ ཧུཏྭཱ ནེཝ སཏྠུ སནྟིཀཾ གནྟུཾ, ན གེཧཾ ཨཱགཏཀཱལེ དཊྛུཾ, ན དྷམྨཾ སོཏུཾ, ན སངྒྷསྶ ཝེཡྻཱཝཙྩཾ ཀཱཏུཾ ཨིཙྪཏི. པིཏརཱ ‘‘མཱ ཨེཝཾ, ཏཱཏ, ཀརཱི’’ཏི ཝུཏྟོཔི ཏསྶ ཝཙནཾ ན སུཎཱཏི. ཨཐསྶ པིཏཱ ཙིནྟེསི – ‘‘ཨཡཾ ཨེཝརཱུཔཾ དིཊྛིཾ གཧེཏྭཱ ཝིཙརནྟོ ཨཝཱིཙིཔརཱཡཎོ བྷཝིསྶཏི, ན ཁོ པནེཏཾ པཏིརཱུཔཾ, ཡཾ མཡི པསྶནྟེ མམ པུཏྟོ ནིརཡཾ གཙྪེཡྻ. ཨིམསྨིཾ ཁོ པན ལོཀེ དྷནདཱནེན ཨབྷིཛྫནཀསཏྟོ ནཱམ ནཏྠི, དྷནེན ནཾ བྷིནྡིསྶཱམཱི’’ཏི. ཨཐ ནཾ ཨཱཧ – ‘‘ཏཱཏ, ཨུཔོསཐིཀོ ཧུཏྭཱ ཝིཧཱརཾ གནྟྭཱ དྷམྨཾ སུཏྭཱ ཨེཧི, ཀཧཱཔཎསཏཾ ཏེ ¶ དསྶཱམཱི’’ཏི. དསྶཐ, ཏཱཏཱཏི. དསྶཱམི, པུཏྟཱཏི. སོ ཡཱཝཏཏིཡཾ པཊིཉྙཾ གཧེཏྭཱ ཨུཔོསཐིཀོ ཧུཏྭཱ ཝིཧཱརཾ ཨགམཱསི. དྷམྨསྶཝནེན པནསྶ ཀིཙྩཾ ནཏྠི, ཡཐཱཕཱསུཀཊྛཱནེ སཡིཏྭཱ པཱཏོཝ གེཧཾ ཨགམཱསི. ཨཐསྶ པིཏཱ ‘‘པུཏྟོ མེ ཨུཔོསཐིཀོ ཨཧོསི, སཱིགྷམསྶ ཡཱགུཨཱདཱིནི ཨཱཧརཐཱ’’ཏི ཝཏྭཱ དཱཔེསི. སོ ‘‘ཀཧཱཔཎེ ཨགྒཧེཏྭཱ ན བྷུཉྫིསྶཱམཱི’’ཏི ཨཱཧཊཱཧཊཾ པཊིཀྑིཔི. ཨཐསྶ པིཏཱ པཱིལ༹ཾ ཨསཧནྟོ ཀཧཱཔཎབྷཎྜཾ དཱཔེསི. སོ ཏཾ ཧཏྠེན གཧེཏྭཱཝ ཨཱཧཱརཾ པརིབྷུཉྫི.

ཨཐ ¶ ནཾ པུནདིཝསེ སེཊྛི, ‘‘ཏཱཏ, ཀཧཱཔཎསཧསྶཾ ཏེ དསྶཱམི, སཏྠུ པུརཏོ ཋཏྭཱ ཨེཀཾ དྷམྨཔདཾ ཨུགྒཎྷིཏྭཱ ཨཱགཙྪེཡྻཱསཱི’’ཏི པེསེསི. སོཔི ཝིཧཱརཾ གནྟྭཱ སཏྠུ པུརཏོ ཋཏྭཱཝ ཨེཀམེཝ པདཾ ཨུགྒཎྷིཏྭཱ པལཱཡིཏུཀཱམོ ཨཧོསི. ཨཐསྶ སཏྠཱ ཨསལླཀྑཎཱཀཱརཾ ཨཀཱསི. སོ ཏཾ པདཾ ཨསལླཀྑེཏྭཱ ཨུཔརིཔདཾ ཨུགྒཎྷིསྶཱམཱིཏི ཋཏྭཱ ཨསྶོསིཡེཝ ¶ . ཨུགྒཎྷིསྶཱམཱིཏི སུཎནྟོཝ ཀིར སཀྐཙྩཾ སུཎཱཏི ནཱམ. ཨེཝཉྩ ཀིར སུཎནྟཱནཾ དྷམྨོ སོཏཱཔཏྟིམགྒཱདཡོ དེཏི. སོཔི ཨུགྒཎྷིསྶཱམཱིཏི སུཎཱཏི, སཏྠཱཔིསྶ ཨསལླཀྑཎཱཀཱརཾ ཀརོཏི. སོ ‘‘ཨུཔརིཔདཾ ཨུགྒཎྷིསྶཱམཱི’’ཏི ཋཏྭཱ སུཎནྟོཝ སོཏཱཔཏྟིཕལེ པཏིཊྛཱསི.

སོ པུནདིཝསེ བུདྡྷཔྤམུཁེན བྷིཀྑུསངྒྷེན སདྡྷིཾཡེཝ སཱཝཏྠིཾ པཱཝིསི. མཧཱསེཊྛི ཏཾ དིསྭཱ ‘‘ཨཛྫ ¶ མམ པུཏྟསྶ ཨཱཀཱརོ རུཙྩཏཱི’’ཏི ཙིནྟེསི. ཏསྶཔི ཨེཏདཧོསི – ‘‘ཨཧོ ཝཏ མེ པིཏཱ ཨཛྫ སཏྠུ སནྟིཀེ ཀཧཱཔཎེ ན དདེཡྻ, ཀཧཱཔཎཀཱརཎཱ མཡ྄ཧཾ ཨུཔོསཐིཀབྷཱཝཾ པཊིཙྪཱདེཡྻཱ’’ཏི. སཏྠཱ པནསྶ ཧིཡྻོཝ ཀཧཱཔཎསྶ ཀཱརཎཱ ཨུཔོསཐིཀབྷཱཝཾ ཨཉྙཱསི. མཧཱསེཊྛི, བུདྡྷཔྤམུཁསྶ བྷིཀྑུསངྒྷསྶ ཡཱགུཾ དཱཔེཏྭཱ པུཏྟསྶཔི དཱཔེསི. སོ ནིསཱིདིཏྭཱ ཏུཎྷཱིབྷཱུཏོཝ ཡཱགུཾ པིཝི, ཁཱདནཱིཡཾ ཁཱདི, བྷཏྟཾ བྷུཉྫི. མཧཱསེཊྛི སཏྠུ བྷཏྟཀིཙྩཱཝསཱནེ པུཏྟསྶ པུརཏོ སཧསྶབྷཎྜིཀཾ ཋཔཱཔེཏྭཱ, ‘‘ཏཱཏ, མཡཱ ཏེ ‘སཧསྶཾ དསྶཱམཱི’ཏི ཝཏྭཱ ཨུཔོསཐཾ སམཱདཱཔེཏྭཱ ཝིཧཱརཾ པཧིཏོ. ཨིདཾ ཏེ སཧསྶ’’ནྟི ཨཱཧ. སོ སཏྠུ པུརཏོ ཀཧཱཔཎེ དིཡྻམཱནེ དིསྭཱ ལཛྫནྟོ ‘‘ཨལཾ མེ ཀཧཱཔཎེཧཱི’’ཏི ཝཏྭཱ, ‘‘གཎྷ, ཏཱཏཱ’’ཏི ཝུཙྩམཱནོཔི ན གཎྷི. ཨཐསྶ པིཏཱ སཏྠཱརཾ ཝནྡིཏྭཱ, ‘‘བྷནྟེ, ཨཛྫ མེ པུཏྟསྶ ཨཱཀཱརོ རུཙྩཏཱི’’ཏི ཝཏྭཱ ‘‘ཀིཾ, མཧཱསེཊྛཱི’’ཏི ཝུཏྟེ ‘‘མཡཱ ཨེས པུརིམདིཝསེ ‘ཀཧཱཔཎསཏཾ ཏེ དསྶཱམཱི’ཏི ཝཏྭཱ ཝིཧཱརཾ པེསིཏོ. པུནདིཝསེ ཀཧཱཔཎེ ཨགྒཧེཏྭཱ བྷུཉྫིཏུཾ ན ཨིཙྪི, ཨཛྫ པན དིཡྻམཱནེཔི ཀཧཱཔཎེ ན ཨིཙྪཏཱི’’ཏི ཨཱཧ. སཏྠཱ ‘‘ཨཱམ, མཧཱསེཊྛི, ཨཛྫ ཏཝ པུཏྟསྶ ཙཀྐཝཏྟིསམྤཏྟིཏོཔི དེཝལོཀབྲཧྨལོཀསམྤཏྟཱིཧིཔི སོཏཱཔཏྟིཕལམེཝ ཝར’’ནྟི ཝཏྭཱ ཨིམཾ གཱཐམཱཧ –

‘‘པཐབྱཱ ཨེཀརཛྫེན, སགྒསྶ གམནེན ཝཱ;

སབྦལོཀཱདྷིཔཙྩེན, སོཏཱཔཏྟིཕལཾ ཝར’’ནྟི.

ཏཏྠ པཐབྱཱ ཨེཀརཛྫེནཱཏི ཙཀྐཝཏྟིརཛྫེན. སགྒསྶ གམནེན ཝཱཏི ཚབྦཱིསཏིཝིདྷསྶ སགྒསྶ ¶ ཨདྷིགམནེན. སབྦལོཀཱདྷིཔཙྩེནཱཏི ན ཨེཀསྨིཾ ཨེཏྟཀེ ¶ ལོཀེ ནཱགསུཔཎྞཝེམཱནིཀཔེཏེཧི སདྡྷིཾ, སབྦསྨིཾ ལོཀེ ཨཱདྷིཔཙྩེན. སོཏཱཔཏྟིཕལཾ ཝརནྟི ཡསྨཱ ཨེཏྟཀེ ཋཱནེ ¶ རཛྫཾ ཀཱརེཏྭཱཔི ནིརཡཱདཱིཧི ཨམུཏྟོཝ ཧོཏི, སོཏཱཔནྣོ པན པིཧིཏཱཔཱཡདྭཱརོ ཧུཏྭཱ སབྦདུབྦལོཔི ཨཊྛམེ བྷཝེ ན ནིབྦཏྟཏི, ཏསྨཱ སོཏཱཔཏྟིཕལམེཝ ཝརཾ ཨུཏྟམནྟི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨནཱཐཔིཎྜཀཔུཏྟཀཱལཝཏྠུ ཨེཀཱདསམཾ.

ཡསྶ ¶ ¶ ¶ ཛིཏནྟི ཨིམཾ དྷམྨདེསནཾ སཏྠཱ བོདྷིམཎྜེ ཝིཧརནྟོ མཱརདྷཱིཏརོ ཨཱརབྦྷ ཀཐེསི. དེསནཾ པན སཱཝཏྠིཡཾ སམུཊྛཱཔེཏྭཱ པུན ཀུརུརཊྛེ མཱགཎྜིཡབྲཱཧྨཎསྶ ཀཐེསི.

ཀུརུརཊྛེ ཀིར མཱགཎྜིཡབྲཱཧྨཎསྶ དྷཱིཏཱ མཱགཎྜིཡཱཡེཝ ནཱམ ཨཧོསི ཨུཏྟམརཱུཔདྷརཱ. ཏཾ པཏྠཡམཱནཱ ཨནེཀབྲཱཧྨཎམཧཱསཱལཱ ཙེཝ ཁཏྟིཡམཧཱསཱལཱ ཙ ‘‘དྷཱིཏརཾ ནོ དེཏཱུ’’ཏི མཱགཎྜིཡསྶ པཧིཎིཾསུ. སོཔི ‘‘ན ཏུམྷེ མཡ྄ཧཾ དྷཱིཏུ ཨནུཙྪཝིཀཱ’’ཏི སབྦེ པཊིཀྑིཔཏེཝ. ཨཐེཀདིཝསཾ སཏྠཱ པཙྩཱུསསམཡེ ལོཀཾ ཝོལོཀེནྟོ ཨཏྟནོ ཉཱཎཛཱལསྶ ཨནྟོ པཝིཊྛཾ མཱགཎྜིཡབྲཱཧྨཎཾ དིསྭཱ ‘‘ཀིཾ ནུ ཁོ བྷཝིསྶཏཱི’’ཏི ཨུཔདྷཱརེནྟོ བྲཱཧྨཎསྶ ཙ བྲཱཧྨཎིཡཱ ཙ ཏིཎྞཾ མགྒཕལཱནཾ ཨུཔནིསྶཡཾ ཨདྡས. བྲཱཧྨཎོཔི བཧིགཱམེ ནིབདྡྷཾ ཨགྒིཾ པརིཙརཏི. སཏྠཱ པཱཏོཝ པཏྟཙཱིཝརམཱདཱཡ ཏཾ ཋཱནཾ ཨགམཱསི. བྲཱཧྨཎོ སཏྠུ རཱུཔསིརིཾ ཨོལོཀེནྟོ ‘‘ཨིམསྨིཾ ལོཀེ ཨིམིནཱ སདིསོ པུརིསོ ནཱམ ནཏྠི, ཨཡཾ མཡ྄ཧཾ ¶ དྷཱིཏུ ཨནུཙྪཝིཀོ, ཨིམསྶ མེ དྷཱིཏརཾ དསྶཱམཱ’’ཏི ཙིནྟེཏྭཱ སཏྠཱརཾ ཨཱཧ – ‘‘སམཎ, མམ ཨེཀཱ དྷཱིཏཱ ཨཏྠི, ཨཧཾ ཏསྶཱ ཨནུཙྪཝིཀཾ པུརིསཾ ཨཔསྶནྟོ ཏཾ ན ཀསྶཙི ཨདཱསིཾ, ཏྭཾ པནསྶཱ ཨནུཙྪཝིཀོ, ཨཧཾ ཏེ དྷཱིཏརཾ པཱདཔརིཙཱརིཀཾ ཀཏྭཱ དཱཏུཀཱམོ, ཡཱཝ ནཾ ཨཱནེམི, ཏཱཝ ཨིདྷེཝ ཏིཊྛཱཧཱི’’ཏི. སཏྠཱ ཏསྶ ཀཐཾ སུཏྭཱ ནེཝ ཨབྷིནནྡི, ན པཊིཀྐོསི.

བྲཱཧྨཎོཔི གེཧཾ གནྟྭཱ བྲཱཧྨཎིཾ ཨཱཧ – ‘‘བྷོཏི, ཨཛྫ མེ དྷཱིཏུ ཨནུཙྪཝིཀོ པུརིསོ དིཊྛོ, ཏསྶ ནཾ དསྶཱམཱ’’ཏི དྷཱིཏརཾ ཨལངྐཱརཱཔེཏྭཱ ཨཱདཱཡ བྲཱཧྨཎིཡཱ སདྡྷིཾ ཏཾ ཋཱནཾ ཨགམཱསི. མཧཱཛནོཔི ཀུཏཱུཧལཛཱཏོ ནིཀྑམི. སཏྠཱ བྲཱཧྨཎེན ཝུཏྟཊྛཱནེ ཨཊྛཏྭཱ ཏཏྠ པདཙེཏིཡཾ དསྶེཏྭཱ ཨཉྙསྨིཾ ཋཱནེ ཨཊྛཱསི. བུདྡྷཱནཾ ཀིར པདཙེཏིཡཾ ‘‘ཨིདཾ ཨསུཀོ ནཱམ པསྶཏཱུ’’ཏི ཨདྷིཊྛཧིཏྭཱ ཨཀྐནྟཊྛཱནེཡེཝ པཉྙཱཡཏི, སེསཊྛཱནེ ཏཾ པསྶནྟོ ནཱམ ནཏྠི. བྲཱཧྨཎོ ཨཏྟནཱ སདྡྷིཾ ¶ གཙྪམཱནཱཡ བྲཱཧྨཎིཡཱ ‘‘ཀཧཾ སོ’’ཏི པུཊྛོ ‘‘ཨིམསྨིཾ ཋཱནེ ཏིཊྛཱཧཱིཏི ཏཾ ཨཝཙ’’ནྟི ཨོལོཀེནྟོ པདཝལཉྫཾ དིསྭཱ ‘‘ཨིདམསྶ པད’’ནྟི དསྶེསི. སཱ ལཀྑཎམནྟཀུསལཏཱཡ ¶ ‘‘ན ཨིདཾ, བྲཱཧྨཎ, ཀཱམབྷོགིནོ པད’’ནྟི ཝཏྭཱ བྲཱཧྨཎེན, ‘‘བྷོཏི, ཏྭཾ ཨུདཀཔཱཏིམྷི སུསུམཱརཾ པསྶསི, མཡཱ སོ སམཎོ དིཊྛོ ‘དྷཱིཏརཾ ཏེ དསྶཱམཱི’ཏི ཝུཏྟོ, ཏེནཱཔི ཨདྷིཝཱསིཏ’’ནྟི ཝུཏྟེ, ‘‘བྲཱཧྨཎ, ཀིཉྩཱཔི ཏྭཾ ཨེཝཾ ཝདེསི, ཨིདཾ པན ནིཀྐིལེསསྶེཝ པད’’ནྟི ཝཏྭཱ ཨིམཾ གཱཐམཱཧ –

‘‘རཏྟསྶ ¶ ཧི ཨུཀྐུཊིཀཾ པདཾ བྷཝེ,

ཝིཝཊྚཙྪདསྶ ཨིདམཱིདིསཾ པད’’ནྟི. (ཝིསུདྡྷི. ༡.༤༥; ཨ. ནི. ཨཊྛ. ༡.༡.༢༦༠-༢༦༡; དྷ. པ. ཨཊྛ. ༡.སཱམཱཝཏཱིཝཏྠུ);

ཨཐ ནཾ བྲཱཧྨཎོ, ‘‘བྷོཏི, མཱ ཝིརཝི, ཏུཎྷཱིབྷཱུཏཱཝ ཨེཧཱི’’ཏི གཙྪནྟོ སཏྠཱརཾ དིསྭཱ ‘‘ཨཡཾ སོ པུརིསོ’’ཏི ཏསྶཱ དསྶེཏྭཱ སཏྠཱརཾ ཨུཔསངྐམིཏྭཱ, ‘‘སམཎ, དྷཱིཏརཾ ཏེ དསྶཱམཱི’’ཏི ཨཱཧ. སཏྠཱ ‘‘ན མེ ཏཝ དྷཱིཏཱཡ ཨཏྠོ’’ཏི ཨཝཏྭཱ, ‘‘བྲཱཧྨཎ, ཨེཀཾ ཏེ ཀཱརཎཾ ཀཐེསྶཱམི, སུཎིསྶསཱི’’ཏི ཝཏྭཱ ‘‘ཀཐེཧི, བྷོ སམཎ, སུཎིསྶཱམཱི’’ཏི ཝུཏྟེ ཨབྷིནིཀྑམནཏོ པཊྛཱཡ ཨཏཱིཏཾ ཨཱཧརིཏྭཱ དསྶེསི.

ཏཏྲཱཡཾ སངྑེཔཀཐཱ – མཧཱསཏྟོ རཛྫསིརིཾ པཧཱཡ ཀཎྚཀཾ ཨཱརུཡ྄ཧ ཚནྣསཧཱཡོ ཨབྷིནིཀྑམནྟོ ནགརདྭཱརེ ཋིཏེན མཱརེན ‘‘སིདྡྷཏྠ, ནིཝཏྟ, ཨིཏོ ཏེ སཏྟམེ དིཝསེ ཙཀྐརཏནཾ པཱཏུབྷཝིསྶཏཱི’’ཏི ཝུཏྟེ, ‘‘ཨཧམེཏཾ, མཱར, ཛཱནཱམི, ན མེ ཏེནཏྠོ’’ཏི ཨཱཧ. ཨཐ ཀིམཏྠཱཡ ནིཀྑམསཱིཏི? སབྦཉྙུཏཉྙཱཎཏྠཱཡཱཏི. ‘‘ཏེན ཧི སཙེ ཨཛྫཏོ པཊྛཱཡ ཀཱམཝིཏཀྐཱདཱིནཾ ཨེཀམྤི ཝིཏཀྐཾ ཝིཏཀྐེསྶསི, ཛཱནིསྶཱམི ཏེ ཀཏྟབྦ’’ནྟི ཨཱཧ. སོ ཏཏོ པཊྛཱཡ ཨོཏཱརཱཔེཀྑོ སཏྟ ཝསྶཱནི མཧཱསཏྟཾ ཨནུབནྡྷི.

སཏྠཱཔི ཚབྦསྶཱནི དུཀྐརཀཱརིཀཾ ཙརིཏྭཱ པཙྩཏྟཔུརིསཀཱརཾ ནིསྶཱཡ བོདྷིམཱུལེ སབྦཉྙུཏཉྙཱཎཾ པཊིཝིཛ྄ཛྷིཏྭཱ ཝིམུཏྟིསུཁཾ པཊིསཾཝེདཡམཱནོ པཉྩམསཏྟཱཧེ ཨཛཔཱལནིགྲོདྷམཱུལེ ནིསཱིདི. ཏསྨིཾ སམཡེ མཱརོ ‘‘ཨཧཾ ¶ ཨེཏྟཀཾ ཀཱལཾ ཨནུབནྡྷིཏྭཱ ཨོཏཱརཱཔེཀྑོཔི ¶ ཨིམསྶ ཀིཉྩི ཁལིཏཾ ནཱདྡསཾ, ཨཏིཀྐནྟོ ཨིདཱནི ཨེས མམ ཝིསཡ’’ནྟི དོམནསྶཔྤཏྟོ མཧཱམགྒེ ནིསཱིདི. ཨཐསྶ ཏཎྷཱ ཨརཏཱི རགཱཏི ཨིམཱ ཏིསྶོ དྷཱིཏརོ ‘‘པིཏཱ ནོ ན པཉྙཱཡཏི, ཀཧཾ ནུ ཁོ ཨེཏརཧཱི’’ཏི ཨོལོཀཡམཱནཱ ཏཾ ཏཐཱ ནིསིནྣཾ དིསྭཱ ཨུཔསངྐམིཏྭཱ ‘‘ཀསྨཱ ¶ , ཏཱཏ, དུཀྑཱི དུམྨནོསཱི’’ཏི པུཙྪིཾསུ. སོ ཏཱསཾ ཏམཏྠཾ ཨཱརོཙེསི. ཨཐ ནཾ ཏཱ ཨཱཧཾསུ – ‘‘ཏཱཏ, མཱ ཙིནྟཡི, མཡཾ ཏཾ ཨཏྟནོ ཝསེ ཀཏྭཱ ཨཱནེསྶཱམཱ’’ཏི. ‘‘ན སཀྐཱ ཨམྨཱ, ཨེས ཀེནཙི ཝསེ ཀཱཏུནྟི. ‘‘ཏཱཏ, མཡཾ ཨིཏྠིཡོ ནཱམ ཨིདཱནེཝ ནཾ རཱགཔཱསཱདཱིཧི བནྡྷིཏྭཱ ཨཱནེསྶཱམ, ཏུམྷེ མཱ ཙིནྟཡིཏྠཱ’’ཏི སཏྠཱརཾ ཨུཔསངྐམིཏྭཱ ‘‘པཱདེ ཏེ, སམཎ, པརིཙཱརེམཱ’’ཏི ཨཱཧཾསུ. སཏྠཱ ནེཝ ཏཱསཾ ཝཙནཾ མནསཱཀཱསི, ན ཨཀྑཱིནི ཨུམྨཱིལེཏྭཱ ཨོལོཀེསི.

པུན མཱརདྷཱིཏརོ ‘‘ཨུཙྩཱཝཙཱ ཁོ པུརིསཱནཾ ཨདྷིཔྤཱཡཱ, ཀེསཉྩི ཀུམཱརིཀཱསུ པེམཾ ཧོཏི, ཀེསཉྩི པཋམཝཡེ ཋིཏཱསུ, ཀེསཉྩི མཛ྄ཛྷིམཝཡེ ཋིཏཱསུ, ཀེསཉྩི པཙྪིམཝཡེ ཋིཏཱསུ, ནཱནཔྤཀཱརེཧི ཏཾ པལོབྷེསྶཱམཱ’’ཏི ཨེཀེཀཱ ཀུམཱརིཀཝཎྞཱདིཝསེན སཏཾ སཏཾ ཨཏྟབྷཱཝེ ཨབྷིནིམྨིནིཏྭཱ ཀུམཱརིཡོ, ཨཝིཛཱཏཱ, སཀིཾ ཝིཛཱཏཱ, དུཝིཛཱཏཱ, མཛ྄ཛྷིམིཏྠིཡོ, མཧལླཀིཏྠིཡོ ཙ ཧུཏྭཱ ཚཀྑཏྟུཾ བྷགཝནྟཾ ཨུཔསངྐམིཏྭཱ ‘‘པཱདེ ཏེ, སམཎ, པརིཙཱརེམཱ’’ཏི ཨཱཧཾསུ. ཏམྤི བྷགཝཱ ན མནསཱཀཱསི ཡཐཱ ཏཾ ཨནུཏྟརེ ཨུཔདྷིསངྑཡེ ཝིམུཏྟོཏི. ཨཐ སཏྠཱ ¶ ཨེཏྟཀེནཔི ཏཱ ཨནུགཙྪནྟིཡོ ‘‘ཨཔེཐ, ཀིཾ དིསྭཱ ཨེཝཾ ཝཱཡམཐ, ཨེཝརཱུཔཾ ནཱམ ཝཱིཏརཱགཱནཾ པུརཏོ ཀཱཏུཾ ན ཝཊྚཏི. ཏཐཱགཏསྶ པན རཱགཱདཡོ པཧཱིནཱ. ཀེན ཏཾ ཀཱརཎེན ཨཏྟནོ ཝསཾ ནེསྶཐཱ’’ཏི ཝཏྭཱ ཨིམཱ གཱཐཱ ཨབྷཱསི –

ཏཏྠ ཡསྶ ཛིཏཾ ནཱཝཛཱིཡཏཱིཏི ཡསྶ སམྨཱསམྦུདྡྷསྶ ཏེན ཏེན མགྒེན ཛིཏཾ རཱགཱདིཀིལེསཛཱཏཾ པུན ཨསམུདཱཙརཎཏོ ནཱཝཛཱིཡཏི, དུཛྫིཏཾ ནཱམ ན ཧོཏི. ནོཡཱཏཱིཏི ན ཨུཡྻཱཏི, ཡསྶ ཛིཏཾ ཀིལེསཛཱཏཾ རཱགཱདཱིསུ ཀོཙི ཨེཀོ ཀིལེསོཔི ལོཀེ པཙྪཏོ ཝཏྟཱི ནཱམ ¶ ན ཧོཏི, ནཱནུབནྡྷཏཱིཏི ཨཏྠོ. ཨནནྟགོཙརནྟི ཨནནྟཱརམྨཎསྶ སབྦཉྙུཏཉྙཱཎསྶ ཝསེན ཨཔརིཡནྟ གོཙརཾ. ཀེན པདེནཱཏི ཡསྶ ཧི རཱགཔདཱདཱིསུ ཨེཀཔདམྤི ཨཏྠི, ཏཾ ཏུམྷེ ཏེན པདེན ནེསྶཐ. བུདྡྷསྶ པན ཨེཀཔདམྤི ¶ ནཏྠི, ཏཾ ཨཔདཾ བུདྡྷཾ ཏུམྷེ ཀེན པདེན ནེསྶཐ.

དུཏིཡགཱཐཱཡ ཏཎྷཱ ནཱམེསཱ སཾསིབྦིཏཔརིཡོནནྡྷནཊྛེན ཛཱལམསྶཱ ཨཏྠཱིཏིཔི ཛཱལཀཱརིཀཱཏིཔི ཛཱལཱུཔམཱཏིཔི ཛཱལིནཱི. རཱུཔཱདཱིསུ ཨཱརམྨཎེསུ ཝིསཏྟཏཱཡ ཝིསཏྟམནཏཱཡ ཝིསཱཧརཏཱཡ ཝིསཔུཔྥཏཱཡ ཝིསཕལཏཱཡ ཝིསཔརིབྷོགཏཱཡ ཝིསཏྟིཀཱ. སཱ ཨེཝརཱུཔཱ ཏཎྷཱ ཡསྶ ཀུཧིཉྩི བྷཝེ ནེཏུཾ ནཏྠི, ཏཾ ཏུམྷེ ཨཔདཾ བུདྡྷཾ ཀེན པདེན ནེསྶཐཱཏི ཨཏྠོ.

དེསནཱཝསཱནེ བཧཱུནཾ དེཝཏཱནཾ དྷམྨཱབྷིསམཡོ ཨཧོསི. མཱརདྷཱིཏརོཔི ཏཏྠེཝ ཨནྟརདྷཱཡིཾསུ.

སཏྠཱ ཨིམཾ དྷམྨདེསནཾ ཨཱཧརིཏྭཱ, ‘‘མཱགཎྜིཡ, ཨཧཾ པུབྦེ ཨིམཱ ཏིསྶོ མཱརདྷཱིཏརོ ཨདྡསཾ སེམྷཱདཱིཧི ཨཔལིབུདྡྷེན སུཝཎྞཀྑནྡྷསདིསེན ཨཏྟབྷཱཝེན སམནྣཱགཏཱ, ཏདཱཔི མེཐུནསྨིཾ ཚནྡོ ནཱཧོསིཡེཝ. ཏཝ དྷཱིཏུ སརཱིརཾ དྭཏྟིཾསཱཀཱརཀུཎཔཔརིཔཱུརཾ བཧིཝིཙིཏྟོ ཝིཡ ཨསུཙིགྷཊོ. སཙེ ཧི མམ པཱདོ ཨསུཙིམཀྑིཏོ བྷཝེཡྻ, ཨཡཉྩ ཨུམྨཱརཊྛཱནེ ཏིཊྛེཡྻ, ཏཐཱཔིསྶཱ སརཱིརེ ཨཧཾ པཱདེ ན ཕུསེཡྻ’’ནྟི ཝཏྭཱ ཨིམཾ གཱཐམཱཧ –

པཱདཱཔི ནཾ སམྥུསིཏུཾ ན ཨིཙྪེ’’ཏི. (སུ. ནི. ༨༤༡; མཧཱནི. ༧༠);

དེསནཱཝསཱནེ ཨུབྷོཔི ཛཡམྤཏིཀཱ ཨནཱགཱམིཕལེ པཏིཊྛཧིཾསཱུཏི.

ཡེ ¶ ཛྷཱནཔསུཏཱ དྷཱིརཱཏི ཨིམཾ དྷམྨདེསནཾ སཏྠཱ སངྐསྶནགརདྭཱརེ བཧཱུ དེཝམནུསྶེ ཨཱརབྦྷ ཀཐེསི. དེསནཱ པན རཱཛགཧེ སམུཊྛིཏཱ.

ཨེཀསྨིཉྷི སམཡེ རཱཛགཧསེཊྛི པརིསྶཡམོཙནཏྠཉྩེཝ པམཱདེན གལིཏཱནཾ ཨཱབྷརཎཱདཱིནཾ རཀྑཎཏྠཉྩ ཛཱལཀརཎྜཀཾ པརིཀྑིཔཱཔེཏྭཱ གངྒཱཡ ཨུདཀཀཱིལ༹ཾ ཀཱིལི༹. ཨཐེཀོ རཏྟཙནྡནརུཀྑོ གངྒཱཡ ཨུཔརིཏཱིརེ ཛཱཏོ གངྒོདཀེན དྷོཏམཱུལོ པཏིཏྭཱ ཏཏྠ ཏཏྠ པཱསཱཎེསུ སཾབྷཛྫམཱནོ ཝིཔྤཀིརི. ཏཏོ ཨེཀཱ གྷཊཔྤམཱཎཱ གྷཊིཀཱ པཱསཱཎེཧི གྷཾསིཡམཱནཱ ཨུདཀཨཱུམཱིཧི པོཐིཡམཱནཱ མཊྛཱ ཧུཏྭཱ ཨནུཔུབྦེན ཝུཡ྄ཧམཱནཱ སེཝཱལཔརིཡོནདྡྷཱ ཨཱགནྟྭཱ ཏསྶ ཛཱལེ ལགྒི. སེཊྛི ‘‘ཀིམེཏ’’ནྟི ཝཏྭཱ ‘‘རུཀྑགྷཊིཀཱ’’ཏི སུཏྭཱ ཏཾ ཨཱཧརཱཔེཏྭཱ ‘‘ཀིཾ ནཱམེཏ’’ནྟི ཨུཔདྷཱརཎཏྠཾ ཝཱསིཀཎྞེན ཏཙྪཱཔེསི. ཏཱཝདེཝ ཨལཏྟཀཝཎྞཾ རཏྟཙནྡནཾ ¶ པཉྙཱཡི. སེཊྛི པན ནེཝ སམྨཱདིཊྛི ན མིཙྪཱདིཊྛི, མཛ྄ཛྷཏྟདྷཱཏུཀོ. སོ ཙིནྟེསི – ‘‘མཡ྄ཧཾ གེཧེ རཏྟཙནྡནཾ བཧུ, ཀིཾ ནུ ཁོ ཨིམིནཱ ཀརིསྶཱམཱི’’ཏི. ཨཐསྶ ཨེཏདཧོསི – ‘‘ཨིམསྨིཾ ལོཀེ ‘མཡཾ ཨརཧནྟོ མཡཾ ཨརཧནྟོ’ཏི ཝཏྟཱརོ བཧཱུ, ཨཧཾ ཨེཀཾ ཨརཧནྟམྤི ན པསྶཱམི. གེཧེ བྷམཾ ཡོཛེཏྭཱ པཏྟཾ ལིཁཱཔེཏྭཱ སིཀྐཱཡ ཋཔེཏྭཱ ཝེལུ༹པརམྤརཱཡ སཊྛིཧཏྠམཏྟེ ཨཱཀཱསེ ཨོལམྦཱཔེཏྭཱ ‘སཙེ ཨརཧཱ ཨཏྠི, ཨིམཾ ཨཱཀཱསེནཱགནྟྭཱ གཎྷཱཏཱུ’ཏི ཝཀྑཱམི. ཡོ ཏཾ གཧེསྶཏི, ཏཾ སཔུཏྟདཱརོ སརཎཾ གམིསྶཱམཱི’’ཏི. སོ ཙིནྟིཏནིཡཱམེནེཝ པཏྟཾ ལིཁཱཔེཏྭཱ ཝེལུ༹པརམྤརཱཡ ཨུསྶཱཔེཏྭཱ ‘‘ཡོ ཨིམསྨིཾ ལོཀེ ཨརཧཱ, སོ ཨཱཀཱསེནཱགནྟྭཱ ཨིམཾ པཏྟཾ གཎྷཱཏཱུ’’ཏི ཨཱཧ.

ཚ ¶ སཏྠཱརོ ‘‘ཨམྷཱཀཾ ཨེས ཨནུཙྪཝིཀོ, ཨམྷཱཀམེཝ ནཾ དེཧཱི’’ཏི ཝདིཾསུ. སོ ‘‘ཨཱཀཱསེནཱགནྟྭཱ གཎྷཐཱ’’ཏི ཨཱཧ. ཨཐ ཚཊྛེ དིཝསེ ནིགཎྛོ ནཱཊཔུཏྟོ ཨནྟེཝཱསིཀེ པེསེསི – ‘‘གཙྪཐ, སེཊྛིཾ ཨེཝཾ ཝདེཐ – ‘ཨམྷཱཀཾ ཨཱཙརིཡསྶེཝ ཨནུཙྪཝིཀོཡཾ, མཱ ཨཔྤམཏྟཀསྶ ཀཱརཎཱ ཨཱཀཱསེནཱགམནཾ ཀརི, དེཧི ཀིར མེ ཏཾ པཏྟ’’’ནྟི ¶ . ཏེ གནྟྭཱ སེཊྛིཾ ཏཐཱ ཝདིཾསུ. སེཊྛི ‘‘ཨཱཀཱསེནཱགནྟྭཱ གཎྷིཏུཾ སམཏྠོཝ གཎྷཱཏཱུ’’ཏི ཨཱཧ. ནཱཊཔུཏྟོ སཡཾ གནྟུཀཱམོ ཨནྟེཝཱསིཀཱནཾ སཉྙཾ ཨདཱསི – ‘‘ཨཧཾ ཨེཀཾ ཧཏྠཉྩ པཱདཉྩ ཨུཀྑིཔིཏྭཱ ཨུཔྤཏིཏུཀཱམོ ཝིཡ བྷཝིསྶཱམི, ཏུམྷེ མཾ, ‘ཨཱཙརིཡ, ཀིཾ ཀརོཐ, དཱརུམཡཔཏྟསྶ ཀཱརཎཱ པཊིཙྪནྣཾ ཨརཧཏྟགུཎཾ མཧཱཛནསྶ མཱ དསྶཡིཏྠཱ’ཏི ཝཏྭཱ མཾ ཧཏྠེསུ ཙ པཱདེསུ ཙ གཧེཏྭཱ ཨཱཀཌྜྷནྟཱ བྷཱུམིཡཾ པཱཏེཡྻཱཐཱ’’ཏི. སོ ཏཏྠ གནྟྭཱ སེཊྛིཾ ཨཱཧ, ‘‘མཧཱསེཊྛི, མཡ྄ཧཾ ཨཡཾ པཏྟོ ཨནུཙྪཝིཀོ, ཨཉྙེསཾ ནཱནུཙྪཝིཀོ, མཱ ཏེ ཨཔྤམཏྟཀསྶ ཀཱརཎཱ མམ ཨཱཀཱསེ ཨུཔྤཏནཾ ¶ རུཙྩི, དེཧི མེ པཏྟ’’ནྟི. བྷནྟེ, ཨཱཀཱསེ ཨུཔྤཏིཏྭཱཝ གཎྷཐཱཏི. ཏཏོ ནཱཊཔུཏྟོ ‘‘ཏེན ཧི ཨཔེཐ ཨཔེཐཱ’’ཏི ཨནྟེཝཱསིཀེ ཨཔནེཏྭཱ ‘‘ཨཱཀཱསེ ཨུཔྤཏིསྶཱམཱི’’ཏི ཨེཀཾ ཧཏྠཉྩ པཱདཉྩ ཨུཀྑིཔི. ཨཐ ནཾ ཨནྟེཝཱསིཀཱ, ‘‘ཨཱཙརིཡ, ཀིཾ ནཱམེཏཾ ཀརོཐ, ཚཝསྶ ལཱམཀསྶ དཱརུམཡཔཏྟསྶ ཀཱརཎཱ པཊིཙྪནྣགུཎེན མཧཱཛནསྶ དསྶིཏེན ཀོ ཨཏྠོ’’ཏི ཏཾ ཧཏྠཔཱདེསུ གཧེཏྭཱ ཨཱཀཌྜྷིཏྭཱ བྷཱུམིཡཾ པཱཏེསུཾ. སོ སེཊྛིཾ ཨཱཧ – ‘‘ཨིམེ, མཧཱསེཊྛི, ཨུཔྤཏིཏུཾ ན དེནྟི, དེཧི མེ པཏྟ’’ནྟི. ཨུཔྤཏིཏྭཱ གཎྷཐ, བྷནྟེཏི. ཨེཝཾ ཏིཏྠིཡཱ ཚ དིཝསཱནི ཝཱཡམིཏྭཱཔི ཏཾ པཏྟཾ ན ལབྷིཾསུཡེཝ.

སཏྟམེ དིཝསེ ཨཱཡསྨཏོ མཧཱམོགྒལླཱནསྶ ཙ ཨཱཡསྨཏོ པིཎྜོལབྷཱརདྭཱཛསྶ ཙ ‘‘རཱཛགཧེ པིཎྜཱཡ ཙརིསྶཱམཱ’’ཏི གནྟྭཱ ཨེཀསྨིཾ པིཊྛིཔཱསཱཎེ ཋཏྭཱ ཙཱིཝརཾ པཱརུཔནཀཱལེ ¶ དྷུཏྟཀཱ ཀཐཾ སམུཊྛཱཔེསུཾ ‘‘ཨམྦྷོ པུབྦེ ཚ སཏྠཱརོ ལོཀེ ‘མཡཾ ཨརཧནྟམྷཱ’ཏི ཝིཙརིཾསུ., རཱཛགཧསེཊྛིནོ པན ཨཛྫ སཏྟམོ དིཝསོ པཏྟཾ ཨུསྶཱཔེཏྭཱ ‘སཙེ ཨརཧཱ ཨཏྠི, ཨཱཀཱསེནཱགནྟྭཱ གཎྷཱཏཱུ’ཏི ཝདནྟསྶ, ཨེཀོཔི ‘ཨཧཾ ཨརཧཱ’ཏི ཨཱཀཱསེ ཨུཔྤཏནྟོ ནཏྠི. ཨཛྫ ནོ ལོཀེ ཨརཧནྟཱནཾ ནཏྠིབྷཱཝོ ཉཱཏོ’’ཏི. ཏཾ ཀཐཾ སུཏྭཱ ཨཱཡསྨཱ ¶ མཧཱམོགྒལླཱནོ ཨཱཡསྨནྟཾ པིཎྜོལབྷཱརདྭཱཛཾ ཨཱཧ – ‘‘སུཏཾ ཏེ, ཨཱཝུསོ བྷཱརདྭཱཛ, ཨིམེསཾ ཝཙནཾ, ཨིམེ བུདྡྷསྶ སཱསནཾ པརིགྒཎྷནྟཱ ཝིཡ ཝདནྟི. ཏྭཉྩ མཧིདྡྷིཀོ མཧཱནུབྷཱཝོ, གཙྪ ཏཾ པཏྟཾ ཨཱཀཱསེན གནྟྭཱ གཎྷཱཧཱི’’ཏི. ཨཱཝུསོ མཧཱམོགྒལླཱན, ཏྭཾ ཨིདྡྷིམནྟཱནཾ ཨགྒོ, ཏྭཾ ཨེཏཾ གཎྷཱཧི, ཏཡི པན ཨགྒཎྷནྟེ ཨཧཾ གཎྷིསྶཱམཱིཏི. ‘‘གཎྷཱཝུསོ’’ཏི ཝུཏྟེ ཨཱཡསྨཱ པིཎྜོལབྷཱརདྭཱཛོ ཨབྷིཉྙཱཔཱདཀཾ ཙཏུཏྠཛ྄ཛྷཱནཾ སམཱཔཛྫིཏྭཱ ཨུཊྛཱཡ ཏིགཱཝུཏཾ པིཊྛིཔཱསཱཎཾ པཱདནྟེན པཊིཙྪཱདེནྟོ ཏུལཔིཙུ ཝིཡ ཨཱཀཱསེ ཨུཊྛཱཔེཏྭཱ རཱཛགཧནགརསྶ ཨུཔརི སཏྟཀྑཏྟུཾ ཨནུཔརིཡཱཡི. སོ ཏིགཱཝུཏཔམཱཎསྶ ནགརསྶ པིདྷཱནཾ ཝིཡ པཉྙཱཡི. ནགརཝཱསིནོ ‘‘པཱསཱཎོ ནོ ཨཝཏྠརིཏྭཱ གཎྷཱཏཱི’’ཏི བྷཱིཏཱ སུཔྤཱདཱིནི མཏྠཀེ ཀཏྭཱ ཏཏྠ ཏཏྠ ནིལཱིཡིཾསུ ¶ . སཏྟམེ ཝཱརེ ཐེརོ པིཊྛིཔཱསཱཎཾ བྷིནྡིཏྭཱ ཨཏྟཱནཾ དསྶེསི. མཧཱཛནོ ཐེརཾ དིསྭཱ, ‘‘བྷནྟེ པིཎྜོལབྷཱརདྭཱཛ, ཏཝ པཱསཱཎཾ དལ༹ྷཾ ཀཏྭཱ གཎྷ, མཱ ནོ སབྦེ ནཱསཡཱི’’ཏི. ཐེརོ པཱསཱཎཾ པཱདནྟེན ཁིཔིཏྭཱ ཝིསྶཛྫེསི. སོ གནྟྭཱ ཡཐཱཋཱནེཡེཝ པཏིཊྛཱསི. ཐེརོ སེཊྛིསྶ གེཧམཏྠཀེ ཨཊྛཱསི. ཏཾ དིསྭཱ སེཊྛི ཨུརེན ནིཔཛྫིཏྭཱ ‘‘ཨོཏརཐ སཱམཱི’’ཏི ཝཏྭཱ ཨཱཀཱསཏོ ཨོཏིཎྞཾ ཐེརཾ ནིསཱིདཱཔེཏྭཱ པཏྟཾ ཨོཏཱརཱཔེཏྭཱ ཙཏུམདྷུརཔུཎྞཾ ཀཏྭཱ ཐེརསྶ ཨདཱསི. ཐེརོ པཏྟཾ གཧེཏྭཱ ཝིཧཱརཱབྷིམུཁོ པཱཡཱསི. ཨཐསྶ ཡེ ཨརཉྙགཏཱ ཝཱ སུཉྙཱགཱརགཏཱ ཝཱ ཏཾ པཱཊིཧཱརིཡཾ ནཱདྡསཾསུ. ཏེ སནྣིཔཏིཏྭཱ, ‘‘བྷནྟེ, ཨམྷཱཀམྤི པཱཊིཧཱརིཡཾ དསྶེཧཱི’’ཏི ཐེརཾ ཨནུབནྡྷིཾསུ. སོ ཏེསཾ ཏེསཾ པཱཊིཧཱརིཡཾ དསྶེཏྭཱ ཝིཧཱརཾ ཨགམཱསི.

སཏྠཱ ¶ ཏཾ ཨནུབནྡྷིཏྭཱ ཨུནྣཱདེནྟསྶ མཧཱཛནསྶ སདྡཾ སུཏྭཱ, ‘‘ཨཱནནྡ, ཀསྶེསོ སདྡོ’’ཏི པུཙྪིཏྭཱ, ‘‘བྷནྟེ, པིཎྜོལབྷཱརདྭཱཛེན ཨཱཀཱསེ ཨུཔྤཏིཏྭཱ ཙནྡནཔཏྟོ གཧིཏོ, ཏསྶ སནྟིཀེ ཨེསོ སདྡོ’’ཏི སུཏྭཱ བྷཱརདྭཱཛཾ པཀྐོསཱཔེཏྭཱ ‘‘སཙྩཾ ཀིར ཏཡཱ ཨེཝཾ ཀཏ’’ནྟི པུཙྪིཏྭཱ ‘‘སཙྩཾ, བྷནྟེ’’ཏི ཝུཏྟེ, ‘‘ཀསྨཱ ཏེ, བྷཱརདྭཱཛ, ཨེཝཾ ཀཏ’’ནྟི ཐེརཾ གརཧིཏྭཱ ཏཾ པཏྟཾ ཁཎྜཱཁཎྜཾ བྷེདཱཔེཏྭཱ བྷིཀྑཱུནཾ ཨཉྫནཔིསནཏྠཱཡ དཱཔེཏྭཱ པཱཊིཧཱརིཡསྶ ཨཀརཎཏྠཱཡ སཱཝཀཱནཾ སིཀྑཱཔདཾ (ཙཱུལ༹ཝ. ༢༥༢) པཉྙཱཔེསི.

ཏིཏྠིཡཱ ¶ ¶ ‘‘སམཎོ ཀིར གོཏམོ ཏཾ པཏྟཾ བྷེདཱཔེཏྭཱ པཱཊིཧཱརིཡསྶ ཨཀརཎཏྠཱཡ སཱཝཀཱནཾ སིཀྑཱཔདཾ པཉྙཱཔེསཱི’’ཏི སུཏྭཱ ‘‘སམཎསྶ གོཏམསྶ སཱཝཀཱ པཉྙཏྟཾ སིཀྑཱཔདཾ ཛཱིཝིཏཧེཏུཔི ནཱཏིཀྐམནྟི, སམཎོཔི གོཏམོ ཏཾ རཀྑིསྶཏེཝ. ཨིདཱནི ཨམྷེཧི ཨོཀཱསོ ལདྡྷོ’’ཏི ནགརཝཱིཐཱིསུ ཨཱརོཙེནྟཱ ཝིཙརིཾསུ ‘‘མཡཾ ཨཏྟནོ གུཎཾ རཀྑནྟཱ པུབྦེ དཱརུམཡཔཏྟསྶ ཀཱརཎཱ ཨཏྟནོ གུཎཾ མཧཱཛནསྶ ན དསྶཡིམྷཱ, སམཎསྶ གོཏམསྶ སཱཝཀཱ པཏྟཀམཏྟསྶ ཀཱརཎཱ ཨཏྟནོ གུཎཾ མཧཱཛནསྶ དསྶེསུཾ. སམཎོ གོཏམོ ཨཏྟནོ པཎྜིཏཏཱཡ པཏྟཾ བྷེདཱཔེཏྭཱ སིཀྑཱཔདཾ པཉྙཱཔེསི, ཨིདཱནི མཡཾ ཏེནེཝ སདྡྷིཾ པཱཊིཧཱརིཡཾ ཀརིསྶཱམཱ’’ཏི.

རཱཛཱ བིམྦིསཱརོ ཏཾ ཀཐཾ སུཏྭཱ སཏྠུ སནྟིཀཾ གནྟྭཱ ‘‘ཏུམྷེཧི ཀིར, བྷནྟེ, པཱཊིཧཱརིཡསྶ ཨཀརཎཏྠཱཡ སཱཝཀཱནཾ སིཀྑཱཔདཾ པཉྙཏྟ’’ནྟི? ‘‘ཨཱམ, མཧཱརཱཛཱ’’ཏི. ཨིདཱནི ཏིཏྠིཡཱ ‘‘ཏུམྷེཧི སདྡྷིཾ པཱཊིཧཱརིཡཾ ཀརིསྶཱམཱ’’ཏི ཝདནྟི, ཀིཾ ཨིདཱནི ཀརིསྶཐཱཏི? ‘‘ཏེསུ ཀརོནྟེསུ ཀརིསྶཱམི, མཧཱརཱཛཱ’’ཏི. ནནུ ཏུམྷེཧི སིཀྑཱཔདཾ པཉྙཏྟནྟི. ནཱཧཾ, མཧཱརཱཛ, ཨཏྟནོ སིཀྑཱཔདཾ པཉྙཱཔེསིཾ, ཏཾ མམེཝ སཱཝཀཱནཾ པཉྙཏྟནྟི. ཏུམྷེ ཋཔེཏྭཱ ཨཉྙཏྠ སིཀྑཱཔདཾ པཉྙཏྟཾ ནཱམ ཧོཏི, བྷནྟེཏི. ཏེན ཧི, མཧཱརཱཛ, ཏམེཝེཏྠ པཊིཔུཙྪཱམི, ‘‘ཨཏྠི པན ཏེ, མཧཱརཱཛ, ཝིཛིཏེ ཨུཡྻཱན’’ནྟི. ‘‘ཨཏྠི, བྷནྟེ’’ཏི. ‘‘སཙེ ཏེ, མཧཱརཱཛ, ཨུཡྻཱནེ མཧཱཛནོ ཨམྦཱདཱིནི ཁཱདེཡྻ, ཀིམསྶ ཀཏྟབྦ’’ནྟི? ‘‘དཎྜོ, བྷནྟེ’’ཏི. ‘‘ཏྭཾ པན ཁཱདིཏུཾ ལབྷསཱི’’ཏི? ‘‘ཨཱམ, བྷནྟེ, མཡ྄ཧཾ དཎྜོ ནཏྠི, ཨཧཾ ཨཏྟནོ སནྟཀཾ ཁཱདིཏུཾ ལབྷཱམཱི’’ཏི. ‘‘མཧཱརཱཛ, ཡཐཱ ཏཝ ¶ ཏིཡོཛནསཏིཀེ རཛྫེ ཨཱཎཱ པཝཏྟཏི, ཨཏྟནོ ཨུཡྻཱནེ ཨམྦཱདཱིནི ཁཱདནྟསྶ དཎྜོ ནཏྠི, ཨཉྙེསཾ ཨཏྠི, ཨེཝཾ མམཔི ཙཀྐཝཱལ༹ཀོཊིསཏསཧསྶེ ཨཱཎཱ པཝཏྟཏི, ཨཏྟནོ སིཀྑཱཔདཔཉྙཏྟིཡཱ ཨཏིཀྐམོ ནཱམ ནཏྠི, ཨཉྙེསཾ པན ཨཏྠི, ཀརིསྶཱམཧཾ པཱཊིཧཱརིཡ’’ནྟི. ཏིཏྠིཡཱ ཏཾ ཀཐཾ སུཏྭཱ ‘‘ཨིདཱནམྷཱ ནཊྛཱ, སམཎེན ཀིར གོཏམེན སཱཝཀཱནཾཡེཝ ¶ སིཀྑཱཔདཾ པཉྙཏྟཾ, ན ཨཏྟནོ. སཡམེཝ ཀིར པཱཊིཧཱརིཡཾ ཀཏྟུཀཱམོ, ཀིཾ ནུ ཁོ ཀརོམཱ’’ཏི མནྟཡིཾསུ.

རཱཛཱ སཏྠཱརཾ པུཙྪི – ‘‘བྷནྟེ, ཀདཱ པཱཊིཧཱརིཡཾ ཀརིསྶཐཱ’’ཏི. ‘‘ཨིཏོ ཙཏུམཱསཙྩཡེན ཨཱསཱལ༹ྷིཔུཎྞམཱཡཾ, མཧཱརཱཛཱ’’ཏི. ‘‘ཀཏྠ ཀརིསྶཐ, བྷནྟེ’’ཏི ¶ ? ‘‘སཱཝཏྠིཾ ནིསྶཱཡ, མཧཱརཱཛཱ’’ཏི. ‘‘ཀསྨཱ པན སཏྠཱ ཨེཝཾ དཱུརཊྛཱནཾ ཨཔདིསཱི’’ཏི? ‘‘ཡསྨཱ ཏཾ སབྦབུདྡྷཱནཾ མཧཱཔཱཊིཧཱརིཡཀརཎཊྛཱནཾ, ཨཔིཙ མཧཱཛནསྶ སནྣིཔཱཏནཏྠཱཡཔི དཱུརཊྛཱནམེཝ ཨཔདིསཱི’’ཏི. ཏིཏྠིཡཱ ཏཾ ཀཐཾ སུཏྭཱ ‘‘ཨིཏོ ཀིར ཙཏུནྣཾ མཱསཱནཾ ཨཙྩཡེན སམཎོ གོཏམོ སཱཝཏྠིཡཾ པཱཊིཧཱརིཡཾ ཀརིསྶཏི, ཨིདཱནི ཏཾ ཨམུཉྩིཏྭཱཝ ཨནུབནྡྷིསྶཱམ, མཧཱཛནོ ཨམྷེ དིསྭཱ ‘ཀིཾ ཨིད’ནྟི པུཙྪིསྶཏི. ཨཐསྶ ཝཀྑཱམ ‘མཡཾ སམཎེན གོཏམེན སདྡྷིཾ པཱཊིཧཱརིཡཾ ཀརིསྶཱམཱ’ཏི ཝདིམྷཱ. སོ པལཱཡཏི, མཡམསྶ པལཱཡིཏུཾ ཨདཏྭཱ ཨནུབནྡྷཱམཱ’’ཏི. སཏྠཱ རཱཛགཧེ པིཎྜཱཡ ཙརིཏྭཱ ནིཀྑམི. ཏིཏྠིཡཱཔིསྶ པཙྪཏོཝ ནིཀྑམིཏྭཱ བྷཏྟཀིཙྩཊྛཱནེ ཝསནྟི. ཝསིཏཊྛཱནེ པུནདིཝསེ པཱཏརཱསཾ ཀརོནྟི. ཏེ མནུསྶེཧི ‘‘ཀིམིད’’ནྟི པུཙྪིཏཱ ཧེཊྛཱ ཙིནྟིཏནིཡཱམེནེཝ ཨཱརོཙེསུཾ ¶ . མཧཱཛནོཔི ‘‘པཱཊིཧཱརིཡཾ པསྶིསྶཱམཱ’’ཏི ཨནུབནྡྷི.

སཏྠཱ ཨནུཔུབྦེན སཱཝཏྠིཾ པཱཔུཎི. ཏིཏྠིཡཱཔི ཏེན སདྡྷིཾཡེཝ གནྟྭཱ ཨུཔཊྛཱཀེ སམཱདཔེཏྭཱ སཏསཧསྶཾ ལབྷིཏྭཱ ཁདིརཐམྦྷེཧི མཎྜཔཾ ཀཱརེཏྭཱ ནཱིལུཔྤལེཧི ཚཱདཱཔེཏྭཱ ‘‘ཨིདྷ པཱཊིཧཱརིཡཾ ཀརིསྶཱམཱ’’ཏི ནིསཱིདིཾསུ. རཱཛཱ པསེནདི ཀོསལོ སཏྠཱརཾ ཨུཔསངྐམིཏྭཱ, ‘‘བྷནྟེ, ཏིཏྠིཡེཧི མཎྜཔོ ཀཱརིཏོ, ཨཧམྤི ཏུམྷཱཀཾ མཎྜཔཾ ཀརིསྶཱམཱི’’ཏི. ‘‘ཨལཾ, མཧཱརཱཛ, ཨཏྠི མཡ྄ཧཾ མཎྜཔཀཱརཀོ’’ཏི. ‘‘བྷནྟེ, མཾ ཋཔེཏྭཱ ཀོ ཨཉྙོ ཀཱཏུཾ སཀྑིསྶཏཱི’’ཏི? ‘‘སཀྐོ, དེཝརཱཛཱ’’ཏི. ‘‘ཀཧཾ པན, བྷནྟེ, པཱཊིཧཱརིཡཾ ཀརིསྶཐཱ’’ཏི? ‘‘ཀཎྜམྦརུཀྑམཱུལེ, མཧཱརཱཛཱ’’ཏི. ཏིཏྠིཡཱ ‘‘ཨམྦརུཀྑམཱུལེ ཀིར པཱཊིཧཱརིཡཾ ཀརིསྶཏཱི’’ཏི སུཏྭཱ ཨཏྟནོ ཨུཔཊྛཱཀཱནཾ ཨཱརོཙེཏྭཱ ཡོཛནབྦྷནྟརེ ཋཱནེ ཨནྟམསོ ཏདཧུཛཱཏམྤི ཨམྦཔོཏཀཾ ཨུཔྤཱཊེཏྭཱ ཨརཉྙེ ཁིཔཱཔེསུཾ.

སཏྠཱ ཨཱསཱལ༹ྷིཔུཎྞམདིཝསེ ཨནྟོནགརཾ པཱཝིསི. རཉྙོཔི ཨུཡྻཱནཔཱལོ ཀཎྜོ ནཱམ ཨེཀཾ པིངྒལཀིཔིལླིཀེཧི ཀཏཔཏྟཔུཊསྶ ཨནྟརེ མཧནྟཾ ཨམྦཔཀྐཾ དིསྭཱ ཏསྶ གནྡྷརསལོབྷེན སམྤཏནྟེ ཝཱཡསེ པལཱཔེཏྭཱ རཉྙོ ཁཱདནཏྠཱཡ ཨཱདཱཡ གཙྪནྟོ ཨནྟརཱམགྒེ སཏྠཱརཾ དིསྭཱ ཙིནྟེསི – ‘‘རཱཛཱ ཨིམཾ ཨམྦཾ ཁཱདིཏྭཱ མཡ྄ཧཾ ཨཊྛ ཝཱ སོལ༹ས ཝཱ ཀཧཱཔཎེ དདེཡྻ, ཏཾ མེ ཨེཀཏྟབྷཱཝེཔི ¶ ཛཱིཝིཏཝུཏྟིཡཱ ནཱལཾ. སཙེ པནཱཧཾ སཏྠུ ཨིམཾ ¶ དསྶཱམི, ཨཝསྶཾ ཏཾ མེ དཱིགྷཀཱལཾ ཧིཏཱཝཧཾ བྷཝིསྶཏཱི’’ཏི. སོ ཏཾ ཨམྦཔཀྐཾ སཏྠུ ཨུཔནཱམེསི. སཏྠཱ ཨཱནནྡཏྠེརཾ ཨོལོཀེསི ¶ . ཨཐསྶ ཐེརོ ཙཏུམཧཱརཱཛདཏྟིཡཾ པཏྟཾ ནཱིཧརིཏྭཱ ཧཏྠེ ཋཔེསི. སཏྠཱ པཏྟཾ ཨུཔནཱམེཏྭཱ ཨམྦཔཀྐཾ པཊིགྒཧེཏྭཱ ཏཏྠེཝ ནིསཱིདནཱཀཱརཾ དསྶེསི. ཐེརོ ཙཱིཝརཾ པཉྙཱཔེཏྭཱ ཨདཱསི. ཨཐསྶ ཏསྨིཾ ནིསིནྣེ ཐེརོ པཱནཱིཡཾ པརིསྶཱཝེཏྭཱ ཨམྦཔཀྐཾ མདྡིཏྭཱ པཱནཀཾ ཀཏྭཱ ཨདཱསི. སཏྠཱ ཨམྦཔཱནཀཾ པིཝིཏྭཱ ཀཎྜཾ ཨཱཧ – ‘‘ཨིམཾ ཨམྦཊྛིཾ ཨིདྷེཝ པཾསུཾ ཝིཡཱུཧིཏྭཱ རོཔེཧཱི’’ཏི. སོ ཏཐཱ ཨཀཱསི. སཏྠཱ ཏསྶ ཨུཔརི ཧཏྠཾ དྷོཝི. ཧཏྠེ དྷོཝིཏམཏྟེཡེཝ ནངྒལསཱིསམཏྟཀྑནྡྷོ ཧུཏྭཱ ཨུབྦེདྷེན པཎྞཱསཧཏྠོ ཨམྦརུཀྑོ ཨུཊྛཧི. ཙཏཱུསུ དིསཱསུ ཨེཀེཀཱ, ཨུདྡྷཾ ཨེཀཱཏི པཉྩ མཧཱསཱཁཱ པཎྞཱསཧཏྠཱ ཨཧེསུཾ. སོ ཏཱཝདེཝ པུཔྥཕལསཉྪནྣོ ཧུཏྭཱ ཨེཀེཀསྨིཾ ཋཱནེ པརིཔཀྐཨམྦཔིཎྜིདྷརོ ཨཧོསི. པཙྪཏོ ཨཱགཙྪནྟཱ བྷིཀྑཱུ ཨམྦཔཀྐཱནི ཁཱདནྟཱ ཨེཝ ཨཱགམིཾསུ. རཱཛཱ ‘‘ཨེཝརཱུཔོ ཀིར ཨམྦརུཀྑོ ཨུཊྛིཏོ’’ཏི སུཏྭཱ ‘‘མཱ ནཾ ཀོཙི ཚིནྡཱི’’ཏི ཨཱརཀྑཾ ཋཔེསི. སོ པན ཀཎྜེན རོཔིཏཏྟཱ ཀཎྜམྦརུཀྑོཏྭེཝ པཉྙཱཡི. དྷུཏྟཀཱཔི ཨམྦཔཀྐཱནི ཁཱདིཏྭཱ ‘‘ཧརེ དུཊྛཏིཏྠིཡཱ ‘སམཎོ ཀིར གོཏམོ ཀཎྜམྦརུཀྑམཱུལེ པཱཊིཧཱརིཡཾ ཀརིསྶཏཱི’ཏི ཏུམྷེཧི ཡོཛནབྦྷནྟརེ ཏདཧུཛཱཏཱཔི ཨམྦཔོཏཀཱ ¶ ཨུཔྤཱཊཱཔིཏཱ, ཀཎྜམྦོ ནཱམ ཨཡ’’ནྟི ཝཏྭཱ ཏེ ཨུཙྪིཊྛཨམྦཊྛཱིཧི པཧརིཾསུ.

སཀྐོ ཝཱཏཝལཱཧཀཾ དེཝཔུཏྟཾ ཨཱཎཱཔེསི ‘‘ཏིཏྠིཡཱནཾ མཎྜཔཾ ཝཱཏེཧི ཨུཔྤཱཊེཏྭཱ ཨུཀྐཱརབྷཱུམིཡཾ ཁིཔཱཔེཧཱི’’ཏི. སོ ཏཐཱ ཨཀཱསི. སཱུརིཡམྤི དེཝཔུཏྟཾ ཨཱཎཱཔེསི ‘‘སཱུརིཡམཎྜལཾ ནིཀཌྜྷནྟོ ཏཱཔེཧཱི’’ཏི. སོ ཏཐཱ ཨཀཱསི. པུན ཝཱཏཝལཱཧཀཾ ཨཱཎཱཔེསི ‘‘ཝཱཏམཎྜལཾ ཨུཊྛཱཔེནྟོ ཡཱཧཱི’’ཏི. སོ ཏཐཱ ཀརོནྟོ ཏིཏྠིཡཱནཾ པགྒྷརིཏསེདསརཱིརེ རཛོཝཊྚིཡཱ ཨོཀིརི. ཏེ ཏམྦམཏྟིཀསདིསཱ ཨཧེསུཾ. ཝསྶཝལཱཧཀམྤི ཨཱཎཱཔེསི ‘‘མཧནྟཱནི བིནྡཱུནི པཱཏེཧཱི’’ཏི. སོ ཏཐཱ ཨཀཱསི. ཨཐ ནེསཾ ཀཱཡོ ཀབརགཱཝིསདིསོ ཨཧོསི. ཏེ ནིགཎྛཱ ལཛྫམཱནཱ ཧུཏྭཱ སམྨུཁསམྨུཁཊྛཱནེནེཝ པལཱཡིཾསུ. ཨེཝཾ པལཱཡནྟེསུ པུརཱཎཀསྶཔསྶ ཨུཔཊྛཱཀོ ཨེཀོ ཀསྶཀོ ‘‘ཨིདཱནི མེ ཨཡྻཱནཾ པཱཊིཧཱརིཡཀརཎཝེལཱ, གནྟྭཱ པཱཊིཧཱརིཡཾ པསྶིསྶཱམཱི’’ཏི གོཎེ ཝིསྶཛྫེཏྭཱ པཱཏོཝ ཨཱབྷཏཾ ཡཱགུཀུཊཉྩེཝ ཡོཏྟཀཉྩ གཧེཏྭཱ ཨཱགཙྪནྟོ པུརཱཎཾ ཏཐཱ པལཱཡནྟཾ དིསྭཱ, བྷནྟེ ¶ , ཨཛྫ ‘ཨཡྻཱནཾ པཱཊིཧཱརིཡཾ པསྶིསྶཱམཱི’ཏི ཨཱགཙྪཱམི, ཏུམྷེ ཀཧཾ གཙྪཐཱ’’ཏི. ཀིཾ ཏེ པཱཊིཧཱརིཡེན, ཨིམཾ ཀུཊཉྩ ¶ ཡོཏྟཉྩ དེཧཱིཏི. སོ ཏེན དིནྣཾ ཀུཊཉྩ ཡོཏྟཉྩ ཨཱདཱཡ ནདཱིཏཱིརཾ གནྟྭཱ ཀུཊཾ ཡོཏྟེན ཨཏྟནོ གཱིཝཱཡ བནྡྷིཏྭཱ ལཛྫནྟོ ཀིཉྩི ཨཀཐེཏྭཱ རཧདེ པཏིཏྭཱ ཨུདཀཔུབྦུལེ༹ ཨུཊྛཱཔེནྟོ ཀཱལཾ ཀཏྭཱ ཨཝཱིཙིམྷི ནིབྦཏྟི.

སཀྐོ ¶ ཨཱཀཱསེ རཏནཙངྐམཾ མཱཔེསི. ཏསྶ ཨེཀཱ ཀོཊི པཱཙཱིནཙཀྐཝཱལ༹མུཁཝཊྚིཡཾ ཨཧོསི, ཨེཀཱ པཙྪིམཙཀྐཝཱལ༹མུཁཝཊྚིཡཾ. སཏྠཱ སནྣིཔཏིཏཱཡ ཚཏྟིཾསཡོཛནིཀཱཡ པརིསཱཡ ཝཌྜྷམཱནཀཙྪཱཡཱཡ ‘‘ཨིདཱནི པཱཊིཧཱརིཡཀརཎཝེལཱ’’ཏི གནྡྷཀུཊིཏོ ནིཀྑམིཏྭཱ པམུཁེ ཨཊྛཱསི. ཨཐ ནཾ གྷརཎཱི ནཱམ ཨིདྡྷིམནྟཱི ཨེཀཱ ཨནཱགཱམིཨུཔཱསིཀཱ ཨུཔསངྐམིཏྭཱ, ‘‘བྷནྟེ, མཱདིསཱཡ དྷཱིཏརི ཝིཛྫམཱནཱཡ ཏུམྷཱཀཾ ཀིལམནཀིཙྩཾ ནཏྠི, ཨཧཾ པཱཊིཧཱརིཡཾ ཀརིསྶཱམཱི’’ཏི ཨཱཧ. ‘‘ཀཐཾ ཏྭཾ ཀརིསྶསི, གྷརཎཱི’’ཏི? ‘‘བྷནྟེ, ཨེཀསྨིཾ ཙཀྐཝཱལ༹གབྦྷེ མཧཱཔཐཝིཾ ཨུདཀཾ ཀཏྭཱ ཨུདཀསཀུཎིཀཱ ཝིཡ ནིམུཛྫིཏྭཱ པཱཙཱིནཙཀྐཝཱལ༹མུཁཝཊྚིཡཾ ཨཏྟཱནཾ དསྶེསྶཱམི, ཏཐཱ པཙྪིམཨུཏྟརདཀྑིཎཙཀྐཝཱལ༹མུཁཝཊྚིཡཾ, ཏཐཱ མཛ྄ཛྷེ’’. མཧཱཛནོ མཾ དིསྭཱ ‘‘ཀཱ ཨེསཱ’’ཏི ཝུཏྟེ ཝཀྑཏི ‘‘གྷརཎཱི ནཱམེསཱ, ཨཡཾ ཏཱཝ ཨེཀིསྶཱ ཨིཏྠིཡཱ ཨཱནུབྷཱཝོ, བུདྡྷཱནུབྷཱཝོ པན ཀཱིདིསོ བྷཝིསྶཏཱི’’ཏི ¶ . ཨེཝཾ ཏིཏྠིཡཱ ཏུམྷེ ཨདིསྭཱཝ པལཱཡིསྶནྟཱིཏི. ཨཐ ནཾ སཏྠཱ ‘‘ཛཱནཱམི ཏེ གྷརཎཱི ཨེཝརཱུཔཾ པཱཊིཧཱརིཡཾ ཀཱཏུཾ སམཏྠབྷཱཝཾ, ན པནཱཡཾ ཏཝཏྠཱཡ བདྡྷོ མཱལཱཔུཊོ’’ཏི ཝཏྭཱ པཊིཀྑིཔི. སཱ ‘‘ན མེ སཏྠཱ ཨནུཛཱནཱཏི, ཨདྡྷཱ མཡཱ ཨུཏྟརིཏརཾ པཱཊིཧཱརིཡཾ ཀཱཏུཾ སམཏྠོ ཨཉྙོ ཨཏྠཱི’’ཏི ཨེཀམནྟཾ ཨཊྛཱསི. སཏྠཱཔི ‘‘ཨེཝམེཝ ཏེསཾ གུཎོ པཱཀཊོ བྷཝིསྶཏཱིཏི ཨེཝཾ ཚཏྟིཾསཡོཛནིཀཱཡ པརིསཱཡ མཛ྄ཛྷེ སཱིཧནཱདཾ ནདིསྶཏཱི’’ཏི མཉྙམཱནོ ཨཔརེཔི པུཙྪི – ‘‘ཏུམྷེ ཀཐཾ པཱཊིཧཱརིཡཾ ཀརིསྶཐཱ’’ཏི. ཏེ ‘‘ཨེཝཉྩ ཨེཝཉྩ ཀརིསྶཱམ, བྷནྟེ’’ཏི སཏྠུ པུརཏོ ཋིཏཱཝ སཱིཧནཱདཾ ནདིཾསུ. ཏེསུ ཀིར ཙཱུལ༹ཨནཱཐཔིཎྜིཀོ ‘‘མཱདིསེ ཨནཱགཱམིཨུཔཱསཀེ པུཏྟེ ཝིཛྫམཱནེ སཏྠུ ཀིལམནཀིཙྩཾ ནཏྠཱི’’ཏི ཙིནྟེཏྭཱ ‘‘ཨཧཾ, བྷནྟེ, པཱཊིཧཱརིཡཾ ཀརིསྶཱམཱི’’ཏི ཝཏྭཱ ‘‘ཀཐཾ ཀརིསྶསཱི’’ཏི པུཊྛོ ‘‘ཨཧཾ, བྷནྟེ, དྭཱདསཡོཛནིཀཾ བྲཧྨཏྟབྷཱཝཾ ནིམྨིནིཏྭཱ ཨིམིསྶཱ པརིསཱཡ མཛ྄ཛྷེ མཧཱམེགྷགཛྫིཏསདིསེན སདྡེན བྲཧྨཨཔྥོཊནཾ ནཱམ ཨཔྥོཊེསྶཱམཱི’’ཏི. མཧཱཛནོ ‘‘ཀིཾ ནཱམེསོ སདྡོ’’ཏི པུཙྪིཏྭཱ ‘‘ཙཱུལ༹ཨནཱཐཔིཎྜིཀསྶ ཀིར ¶ བྲཧྨཨཔྥོཊནསདྡོ ནཱམཱ’’ཏི ཝཀྑཏི. ཏིཏྠིཡཱ ‘‘གཧཔཏིཀསྶ ཀིར ཏཱཝ ཨེསོ ཨཱནུབྷཱཝོ, བུདྡྷཱནུབྷཱཝོ ཀཱིདིསོ བྷཝིསྶཏཱི’’ཏི ཏུམྷེ ཨདིསྭཱཝ པལཱཡིསྶནྟཱིཏི. སཏྠཱ ‘‘ཛཱནཱམི ཏེ ཨཱནུབྷཱཝ’’ནྟི ཏསྶཔི ཏཐེཝ ཝཏྭཱ པཱཊིཧཱརིཡཀརཎཾ ནཱནུཛཱནི.

ཨཐེཀཱ པཊིསམྦྷིདཔྤཏྟཱ སཏྟཝསྶིཀཱ ¶ ཙཱིརསཱམཎེརཱི ཀིར ནཱམ སཏྠཱརཾ ཝནྡིཏྭཱ ‘‘ཨཧཾ, བྷནྟེ, པཱཊིཧཱརིཡཾ ཀརིསྶཱམཱི’’ཏི ཨཱཧ. ‘‘ཀཐཾ ཀརིསྶསི ཙཱིརེ’’ཏི? ‘‘བྷནྟེ, སིནེརུཉྩ ཙཀྐཝཱལ༹པབྦཏཉྩ ཧིམཝནྟཉྩ ཨཱཧརིཏྭཱ ཨིམསྨིཾ ཋཱནེ པཊིཔཱཊིཡཱ ཋཔེཏྭཱ ཨཧཾ ཧཾསསཀུཎཱི ཝིཡ ཏཏོ ཏཏོ ནིཀྑམིཏྭཱ ཨསཛྫམཱནཱ གམིསྶཱམི, མཧཱཛནོ མཾ དིསྭཱ ‘ཀཱ ཨེསཱ’ཏི པུཙྪིཏྭཱ ‘ཙཱིརསཱམཎེརཱི’ཏི ཝཀྑཏི. ཏིཏྠིཡཱ ‘སཏྟཝསྶིཀཱཡ ཏཱཝ སཱམཎེརིཡཱ ¶ ཨཡམཱནུབྷཱཝོ, བུདྡྷཱནུབྷཱཝོ ཀཱིདིསོ བྷཝིསྶཏཱི’ཏི ཏུམྷེ ཨདིསྭཱཝ པལཱཡིསྶནྟཱི’’ཏི. ཨིཏོ པརཾ ཨེཝརཱུཔཱནི ཝཙནཱནི ཝུཏྟཱནུསཱརེནེཝ ཝེདིཏབྦཱནི. ཏསྶཱཔི བྷགཝཱ ‘‘ཛཱནཱམི ཏེ ཨཱནུབྷཱཝ’’ནྟི ཝཏྭཱ པཱཊིཧཱརིཡཀརཎཾ ནཱནུཛཱནི. ཨཐེཀོ པཊིསམྦྷིདཔྤཏྟོ ཁཱིཎཱསཝོ ཙུནྡསཱམཎེརོ ནཱམ ཛཱཏིཡཱ སཏྟཝསྶིཀོ སཏྠཱརཾ ཝནྡིཏྭཱ ‘‘ཨཧཾ བྷགཝཱ པཱཊིཧཱརིཡཾ ཀརིསྶཱམཱི’’ཏི ཝཏྭཱ ‘‘ཀཐཾ ཀརིསྶསཱི’’ཏི པུཊྛོ ཨཱཧ – ‘‘ཨཧཾ, བྷནྟེ, ཛམྦུདཱིཔསྶ དྷཛབྷཱུཏཾ མཧཱཛམྦུརུཀྑཾ ཁནྡྷེ གཧེཏྭཱ ཙཱལེཏྭཱ མཧཱཛམྦུཔེསིཡོ ཨཱཧརིཏྭཱ ཨིམཾ པརིསཾ ཁཱདཱཔེསྶཱམི, པཱརིཙྪཏྟཀཀུསུམཱནི ཙ ཨཱཧརིཏྭཱ ཏུམྷེ ཝནྡིསྶཱམཱི’’ཏི. སཏྠཱ ‘‘ཛཱནཱམི ཏེ ཨཱནུབྷཱཝ’’ནྟི ཏསྶ པཱཊིཧཱརིཡཀརཎཾ པཊིཀྑིཔི.

ཨཐ ཨུཔྤལཝཎྞཱ ཐེརཱི སཏྠཱརཾ ཝནྡིཏྭཱ ‘‘ཨཧཾ, བྷནྟེ, པཱཊིཧཱརིཡཾ ཀརིསྶཱམཱི’’ཏི ཝཏྭཱ ‘‘ཀཐཾ ཀརིསྶསཱི’’ཏི པུཊྛཱ ཨཱཧ – ‘‘ཨཧཾ, བྷནྟེ, སམནྟཱ དྭཱདསཡོཛནིཀཾ པརིསཾ དསྶེཏྭཱ ཨཱཝཊྚཏོ ཚཏྟིཾསཡོཛནཱཡ པརིསཱཡ པརིཝུཏོ ཙཀྐཝཏྟིརཱཛཱ ཧུཏྭཱ ཨཱགནྟྭཱ ཏུམྷེ ཝནྡིསྶཱམཱི’’ཏི ¶ . སཏྠཱ ‘‘ཛཱནཱམི ཏེ ཨཱནུབྷཱཝ’’ནྟི ཏསྶཱཔི པཱཊིཧཱརིཡཀརཎཾ པཊིཀྑིཔི. ཨཐ མཧཱམོགྒལླཱནཏྠེརོ བྷགཝནྟཾ ཝནྡིཏྭཱ ‘‘ཨཧཾ, བྷནྟེ, པཱཊིཧཱརིཡཾ ཀརིསྶཱམཱི’’ཏི ཝཏྭཱ ‘‘ཀཐཾ ཀརིསྶསཱི’’ཏི པུཊྛོ ཨཱཧ – ‘‘ཨཧཾ, བྷནྟེ, སིནེརུཔབྦཏརཱཛཱནཾ དནྟནྟརེ ཋཔེཏྭཱ མཱསསཱསཔབཱིཛཾ ཝིཡ ཁཱདིསྶཱམཱི’’ཏི. ‘‘ཨཉྙཾ ཀིཾ ཀརིསྶསཱི’’ཏི? ‘‘ཨིམཾ མཧཱཔཐཝིཾ ཀཊསཱརཀཾ ཝིཡ སཾཝེལླིཏྭཱ ཨངྒུལནྟརེ ནིཀྑིཔིསྶཱམཱི’’ཏི. ‘‘ཨཉྙཾ ཀིཾ ཀརིསྶསཱི’’ཏི? ‘‘མཧཱཔཐཝིཾ ཀུལཱལཙཀྐཾ ཝིཡ པརིཝཏྟེཏྭཱ མཧཱཛནཾ པཐཝོཛཾ ¶ ཁཱདཱཔེསྶཱམཱི’’ཏི. ‘‘ཨཉྙཾ ཀིཾ ཀརིསྶསཱི’’ཏི? ‘‘ཝཱམཧཏྠེ པཐཝིཾ ཀཏྭཱ ཨིམེ སཏྟེ དཀྑིཎཧཏྠེན ཨཉྙསྨིཾ དཱིཔེ ཋཔེསྶཱམཱི’’ཏི. ‘‘ཨཉྙཾ ཀིཾ ཀརིསྶསཱི’’ཏི? ‘‘སིནེརུཾ ཚཏྟདཎྜཾ ཝིཡ ཀཏྭཱ མཧཱཔཐཝིཾ ཨུཀྑིཔིཏྭཱ ཏསྶུཔརི ཋཔེཏྭཱ ཚཏྟཧཏྠོ བྷིཀྑུ ཝིཡ ཨེཀཧཏྠེནཱདཱཡ ཨཱཀཱསེ ཙངྐམིསྶཱམཱི’’ཏི. སཏྠཱ ‘‘ཛཱནཱམི ཏེ ཨཱནུབྷཱཝ’’ནྟི ཏསྶཔི པཱཊིཧཱརིཡཀརཎཾ ནཱནུཛཱནི. སོ ‘‘ཛཱནཱཏི མཉྙེ སཏྠཱ མཡཱ ཨུཏྟརིཏརཾ པཱཊིཧཱརིཡཾ ཀཱཏུཾ སམཏྠ’’ནྟི ཨེཀམནྟཾ ཨཊྛཱསི.

ཨཐ ནཾ སཏྠཱ ‘‘ནཱཡཾ མོགྒལླཱནཾ ཏཝཏྠཱཡ བདྡྷོ བཱལཱཔུཊོ. ཨཧཉྷི ཨསམདྷུརོ, མམ དྷུརཾ ཨཉྙོ ཝཧིཏུཾ སམཏྠོ ནཱམ ནཏྠི. ཨནཙྪརིཡམེཏཾ, ཡཾ ཨིདཱནི མམ དྷུརཾ ཝཧིཏུཾ སམཏྠོ ནཱམ བྷཝེཡྻ. ཨཧེཏུཀཏིརཙྪཱནཡོནིཡཾ ནིབྦཏྟཀཱལེཔི མམ དྷུརཾ ཨཉྙོ ཝཧིཏུཾ སམཏྠོ ནཱམ ནཱཧོསིཡེཝཱ’’ཏི ཝཏྭཱ ‘‘ཀདཱ ¶ པན, བྷནྟེ’’ཏི ཐེརེན པུཊྛོ ཨཏཱིཏཾ ཨཱཧརིཏྭཱ –

‘‘ཡཏོ ¶ ཡཏོ གརུ དྷུརཾ, ཡཏོ གམྦྷཱིརཝཏྟནཱི;

ཏདཱསྶུ ཀཎྷཾ ཡུཉྫནྟི, སྭཱསྶུ ཏཾ ཝཧཏེ དྷུར’’ནྟི. –

ཨིདཾ ཀཎྷཨུསབྷཛཱཏཀཾ (ཛཱ. ༡.༡.༢༩) ཝིཏྠཱརེཏྭཱ པུན ཏམེཝ ཝཏྠུཾ ཝིསེསེཏྭཱ དསྶེནྟོ –

‘‘མནུཉྙམེཝ བྷཱསེཡྻ, ནཱམནུཉྙཾ ཀུདཱཙནཾ;

མནུཉྙཾ བྷཱསམཱནསྶ, གརུཾ བྷཱརཾ ཨུདདྡྷརི;

དྷནཉྩ ནཾ ཨལཱབྷེསི, ཏེན ཙཏྟམནོ ཨཧཱུ’’ཏི. –

ཨིདཾ ནནྡིཝིསཱལཛཱཏཀཾ ཝིཏྠཱརེཏྭཱ ཀཐེསི. ཀཐེཏྭཱ ཙ པན སཏྠཱ རཏནཙངྐམཾ ཨབྷིརུཧི, པུརཏོ དྭཱདསཡོཛནིཀཱ པརིསཱ ཨཧོསི ཏཐཱ པཙྪཏོ ཙ ཨུཏྟརཏོ ཙ དཀྑིཎཏོ ཙ. ཨུཛུཀཾ པན ཙཏུཝཱིསཏིཡོཛནིཀཱཡ པརིསཱཡ མཛ྄ཛྷེ བྷགཝཱ ཡམཀཔཱཊིཧཱརིཡཾ ཨཀཱསི.

ཏཾ པཱལི༹ཏོ ཏཱཝ ཨེཝཾ ཝེདིཏབྦཾ (པཊི. མ. ༡.༡༡༦) – ཀཏམཾ ཏཐཱགཏསྶ ཡམཀཔཱཊིཧཱརིཡེ ཉཱཎཾ? ཨིདྷཾ ཏཐཱགཏོ ཡམཀཔཱཊིཧཱརིཡཾ ཀརོཏི ཨསཱདྷཱརཎཾ སཱཝཀེཧི, ཨུཔརིམཀཱཡཏོ ཨགྒིཀྑནྡྷོ པཝཏྟཏི, ཧེཊྛིམཀཱཡཏོ ¶ ཨུདཀདྷཱརཱ པཝཏྟཏི ¶ . ཧེཊྛིམཀཱཡཏོ ཨགྒིཀྑནྡྷོ པཝཏྟཏི, ཨུཔརིམཀཱཡཏོ ཨུདཀདྷཱརཱ པཝཏྟཏི. པུརཏྠིམཀཱཡཏོ, པཙྪིམཀཱཡཏོ; པཙྪིམཀཱཡཏོ, པུརཏྠིམཀཱཡཏོ; དཀྑིཎཨཀྑིཏོ, ཝཱམཨཀྑིཏོ; ཝཱམཨཀྑིཏོ, དཀྑིཎཨཀྑིཏོ; དཀྑིཎཀཎྞསོཏཏོ, ཝཱམཀཎྞསོཏཏོ; ཝཱམཀཎྞསོཏཏོ, དཀྑིཎཀཎྞསོཏཏོ; དཀྑིཎནཱསིཀཱསོཏཏོ, ཝཱམནཱསིཀཱསོཏཏོ; ཝཱམནཱསིཀཱསོཏཏོ, དཀྑིཎནཱསིཀཱསོཏཏོ; དཀྑིཎཨཾསཀཱུཊཏོ, ཝཱམཨཾསཀཱུཊཏོ; ཝཱམཨཾསཀཱུཊཏོ, དཀྑིཎཨཾསཀཱུཊཏོ; དཀྑིཎཧཏྠཏོ, ཝཱམཧཏྠཏོ; ཝཱམཧཏྠཏོ, དཀྑིཎཧཏྠཏོ; དཀྑིཎཔསྶཏོ, ཝཱམཔསྶཏོ; ཝཱམཔསྶཏོ, དཀྑིཎཔསྶཏོ; དཀྑིཎཔཱདཏོ, ཝཱམཔཱདཏོ; ཝཱམཔཱདཏོ, དཀྑིཎཔཱདཏོ; ཨངྒུལངྒུལེཧི, ཨངྒུལནྟརིཀཱཧི; ཨངྒུལནྟརིཀཱཧི, ཨངྒུལངྒུལེཧི; ཨེཀེཀལོམཀཱུཔཏོ ཨགྒིཀྑནྡྷོ པཝཏྟཏི, ཨེཀེཀལོམཏོ ཨུདཀདྷཱརཱ པཝཏྟཏི. ཨེཀེཀལོམཏོ ཨགྒིཀྑནྡྷོ པཝཏྟཏི, ཨེཀེཀལོམཀཱུཔཏོ ཨུདཀདྷཱརཱ པཝཏྟཏི ཚནྣཾ ཝཎྞཱནཾ ནཱིལཱནཾ པཱིཏཀཱནཾ ལོཧིཏཀཱནཾ ཨོདཱཏཱནཾ མཉྫེཊྛཱནཾ པབྷསྶརཱནཾ. བྷགཝཱ ཙངྐམཏི, བུདྡྷནིམྨིཏོ ཏིཊྛཏི ཝཱ ནིསཱིདཏི ཝཱ སེཡྻཾ ཝཱ ཀཔྤེཏི…པེ… ནིམྨིཏོ སེཡྻཾ ཀཔྤེཏི, བྷགཝཱ ཙངྐམཏི ཝཱ ཏིཊྛཏི ཝཱ ནིསཱིདཏི ཝཱ. ཨིདཾ ཏཐཱགཏསྶ ཡམཀཔཱཊིཧཱརིཡེ ཉཱཎནྟི.

ཨིདཾ ¶ པན པཱཊིཧཱརིཡཾ བྷགཝཱ ཏསྨིཾ ཙངྐམེ ཙངྐམིཏྭཱ ཨཀཱསི. ཏསྶ ཏེཛོཀསིཎསམཱཔཏྟིཝསེན ཨུཔརིམཀཱཡཏོ ཨགྒིཀྑནྡྷོ པཝཏྟཏི, ཨཱཔོཀསིཎསམཱཔཏྟིཝསེན ཧེཊྛིམཀཱཡཏོ ¶ ཨུདཀདྷཱརཱ པཝཏྟཏི. ན པན ཨུདཀདྷཱརཱཡ པཝཏྟནཊྛཱནཏོ ཨགྒིཀྑནྡྷོ པཝཏྟཏི, ཨགྒིཀྑནྡྷསྶ པཝཏྟནཊྛཱནཏོ ཨུདཀདྷཱརཱ པཝཏྟཏཱིཏི དསྶེཏུཾ ‘‘ཧེཊྛིམཀཱཡཏོ ཨུཔརིམཀཱཡཏོ’’ཏི ཝུཏྟཾ. ཨེསེཝ ནཡོ སབྦཔདེསུ. ཨགྒིཀྑནྡྷོ པནེཏྠ ཨུདཀདྷཱརཱཡ ཨསམྨིསྶོ ཨཧོསི, ཏཐཱ ཨུདཀདྷཱརཱ ཨགྒིཀྑནྡྷེན. ཨུབྷཡམྤི ཀིར ཙེཏཾ ཡཱཝ བྲཧྨལོཀཱ ཨུགྒནྟྭཱ ཙཀྐཝཱལ༹མུཁཝཊྚིཡཾ པཏཏི. ‘‘ཚནྣཾ ཝཎྞཱན’’ནྟི ཝུཏྟཱ པནསྶ ཚབྦཎྞརཾསིཡོ གྷཊེཧི ཨཱསིཉྩམཱནཾ ཝིལཱིནསུཝཎྞཾ ཝིཡ ཡནྟནཱལིཀཏོ ནིཀྑནྟསུཝཎྞརསདྷཱརཱ ཝིཡ ཙ ཨེཀཙཀྐཝཱལ༹གབྦྷཏོ ཨུགྒནྟྭཱ བྲཧྨལོཀཾ ཨཱཧཙྩ པཊིནིཝཏྟིཏྭཱ ¶ ཙཀྐཝཱལ༹མུཁཝཊྚིམེཝ གཎྷིཾསུ. ཨེཀཙཀྐཝཱལ༹གབྦྷཾ ཝངྐགོཔཱནསིཀཾ ཝིཡ བོདྷིགྷརཾ ཨཧོསི ཨེཀཱལོཀཾ.

ཏཾདིཝསཾ སཏྠཱ ཙངྐམིཏྭཱ པཱཊིཧཱརིཡཾ ཀརོནྟོ ཨནྟརནྟརཱ མཧཱཛནསྶ དྷམྨཾ ཀཐེསི. ཀཐེནྟོ ཙ ཛནཾ ནིརསྶཱསཾ ཨཀཏྭཱ ཏསྶ ཨསྶཱསཝཱརཾ དེཏི. ཏསྨིཾ ཁཎེ མཧཱཛནོ སཱདྷུཀཱརཾ པཝཏྟེསི. ཏསྶ སཱདྷུཀཱརཔཝཏྟནཀཱལེ སཏྠཱ ཏཱཝམཧཏིཡཱ པརིསཱཡ ཙིཏྟཾ ཨོལོཀེནྟོ ཨེཀེཀསྶ སོལ༹སནྣཾ ཨཱཀཱརཱནཾ ཝསེན ཙིཏྟཱཙཱརཾ ཨཉྙཱསི. ཨེཝཾ ལཧུཀཔརིཝཏྟཾ བུདྡྷཱནཾ ཙིཏྟཾ ¶ . ཡོ ཡོ ཡསྨིཉྩ དྷམྨེ ཡསྨིཉྩ པཱཊིཧཱིརེ པསནྣོ, ཏསྶ ཏསྶ ཨཛ྄ཛྷཱསཡཝསེནེཝ དྷམྨཉྩ ཀཐེསི, པཱཊིཧཱིརཉྩ ཨཀཱསི. ཨེཝཾ དྷམྨེ དེསིཡམཱནེ པཱཊིཧཱིརེ ཙ ཀརིཡམཱནེ མཧཱཛནསྶ དྷམྨཱབྷིསམཡོ ཨཧོསི. སཏྠཱ པན ཏསྨིཾ སམཱགམེ ཨཏྟནོ མནཾ གཧེཏྭཱ ཨཉྙཾ པཉྷཾ པུཙྪིཏུཾ སམཏྠཾ ཨདིསྭཱ ནིམྨིཏབུདྡྷཾ མཱཔེསི. ཏེན པུཙྪིཏཾ པཉྷཾ སཏྠཱ ཝིསྶཛྫེསི, སཏྠཱརཱ པུཙྪིཏཾ སོ ཝིསྶཛྫེསི. བྷགཝཏོ ཙངྐམནཀཱལེ ནིམྨིཏོ ཋཱནཱདཱིསུ ཨཉྙཏརཾ ཀཔྤེསི, ནིམྨིཏསྶ ཙངྐམནཀཱལེ བྷགཝཱ ཋཱནཱདཱིསུ ཨཉྙཏརཾ ཀཔྤེསི. ཏམཏྠཾ དསྶེཏུཾ ‘‘ནིམྨིཏོ ཙངྐམཏི ཝཱ’’ཏིཨཱདི ཝུཏྟཾ. ཨེཝཾ ཀརོནྟསྶ སཏྠུ པཱཊིཧཱརིཡཾ དིསྭཱ དྷམྨཀཐཾ སུཏྭཱ ཏསྨིཾ སམཱགམེ ཝཱིསཏིཡཱ པཱཎཀོཊཱིནཾ དྷམྨཱབྷིསམཡོ ཨཧོསི.

སཏྠཱ པཱཊིཧཱིརཾ ཀརོནྟོཝ ‘‘ཀཏྠ ནུ ཁོ ཨཏཱིཏབུདྡྷཱ ཨིདཾ པཱཊིཧཱིརཾ ཀཏྭཱ ཝསྶཾ ཨུཔེནྟཱི’’ཏི ཨཱཝཛྫེཏྭཱ ‘‘ཏཱཝཏིཾསབྷཝནེ ཝསྶཾ ཨུཔགནྟྭཱ མཱཏུ ཨབྷིདྷམྨཔིཊཀཾ དེསེནྟཱི’’ཏི དིསྭཱ དཀྑིཎཔཱདཾ ཨུཀྑིཔིཏྭཱ ཡུགནྡྷརམཏྠཀེ ཋཔེཏྭཱ ཨིཏརཾ པཱདཾ ཨུཀྑིཔིཏྭཱ སིནེརུམཏྠཀེ ཋཔེསི. ཨེཝཾ ཨཊྛསཊྛིཡོཛནསཏསཧསྶཊྛཱནེ ཏཡོ པདཝཱརཱ ཨཧེསུཾ, དྭེ པཱདཚིདྡཱནི. སཏྠཱ པཱདཾ པསཱརེཏྭཱ ཨཀྐམཱིཏི ན སལླཀྑེཏབྦཾ. ཏསྶ ཧི པཱདུཀྑིཔནཀཱལེཡེཝ པབྦཏཱ པཱདམཱུལཾ ¶ ཨཱགནྟྭཱ སམྤཊིཙྪིཾསུ, སཏྠཱརཱ ཨཀྐམནཀཱལེ ཏེ པབྦཏཱ ཨུཊྛཱཡ སཀཊྛཱནེཡེཝ ཨཊྛཾསུ. སཀྐོ སཏྠཱརཾ ¶ དིསྭཱ ཙིནྟེསི – ‘‘པཎྜུཀམྦལསིལཱཡ མཉྙེ སཏྠཱ ཨིམཾ ཝསྶཱཝཱསཾ ཨུཔེསྶཏི, བཧཱུནཉྩ དེཝཏཱནཾ ཨུཔཀཱརོ བྷཝིསྶཏི, སཏྠརི པནེཏྠ ཝསྶཱཝཱསཾ ཨུཔགཏེ ཨཉྙཱ དེཝཏཱ ཧཏྠམྤི ཋཔེཏུཾ ན སཀྑིསྶནྟི. ཨཡཾ ཁོ ¶ པན པཎྜུཀམྦལསིལཱ དཱིགྷཏོ སཊྛིཡོཛནཱ, ཝིཏྠཱརཏོ པཎྞཱསཡོཛནཱ, པུཐུལཏོ པནྣརསཡོཛནཱ, སཏྠརི ནིསིནྣེཔི ཏུཙྪཾ བྷཝིསྶཏཱི’’ཏི. སཏྠཱ ཏསྶ ཨཛ྄ཛྷཱསཡཾ ཝིདིཏྭཱ ཨཏྟནོ སངྒྷཱཊིཾ སིལཱསནཾ པཊིཙྪཱདཡམཱནཾ ཁིཔི. སཀྐོ ཙིནྟེསི – ‘‘ཙཱིཝརཾ ཏཱཝ པཊིཙྪཱདཡམཱནཾ ཁིཔི, སཡཾ པན པརིཏྟཀེ ཋཱནེ ནིསཱིདིསྶཏཱི’’ཏི. སཏྠཱ ཏསྶ ཨཛ྄ཛྷཱསཡཾ ཝིདིཏྭཱ ནཱིཙཔཱིཋཀཾ མཧཱཔཾསུཀཱུལིཀོ ཝིཡ པཎྜུཀམྦལསིལཾ ཨནྟོཙཱིཝརབྷོགེཡེཝ ཀཏྭཱ ནིསཱིདི. མཧཱཛནོཔི ཏཾཁཎཉྙེཝ སཏྠཱརཾ ཨོལོཀེནྟོ ནཱདྡས, ཙནྡསྶ ཨཏྠངྒམིཏཀཱལོ ཝིཡ སཱུརིཡསྶ ཙ ཨཏྠངྒམིཏཀཱལོ ཝིཡ ཨཧོསི. མཧཱཛནོ –

‘‘གཏོ ནུ ཙིཏྟཀཱུཊཾ ཝཱ, ཀེལཱསཾ ཝཱ ཡུགནྡྷརཾ;

ན ནོ དཀྑེམུ སམྦུདྡྷཾ, ལོཀཛེཊྛཾ ནརཱསབྷ’’ནྟི. –

ཨིམཾ ¶ གཱཐཾ ཝདནྟོ པརིདེཝི. ཨཔརེ ‘‘སཏྠཱ ནཱམ པཝིཝེཀརཏོ, སོ ‘ཨེཝརཱུཔཱཡ མེ པརིསཱཡ ཨེཝརཱུཔཾ པཱཊིཧཱིརཾ ཀཏ’ནྟི ལཛྫཱཡ ཨཉྙཾ རཊྛཾ ཝཱ ཛནཔདཾ ཝཱ གཏོ བྷཝིསྶཏི, ན དཱནི ཏཾ དཀྑིསྶཱམཱ’’ཏི པརིདེཝནྟཱ ཨིམཾ གཱཐམཱཧཾསུ –

‘‘པཝིཝེཀརཏོ དྷཱིརོ, ནིམཾ ལོཀཾ པུནེཧིཏི;

ན ནོ དཀྑེམུ སམྦུདྡྷཾ, ལོཀཛེཊྛཾ ནརཱསབྷ’’ནྟི.

ཏེ མཧཱམོགྒལླཱནཾ པུཙྪིཾསུ – ‘‘ཀཧཾ, བྷནྟེ, སཏྠཱ’’ཏི? སོ སཡཾ ཛཱནནྟོཔི ‘‘པརེསམྤི གུཎཱ པཱཀཊཱ ཧོནྟཱུ’’ཏི ཨཛ྄ཛྷཱསཡེན ‘‘ཨནུརུདྡྷཾ པུཙྪཐཱ’’ཏི ཨཱཧ. ཏེ ཐེརཾ ཏཐཱ པུཙྪིཾསུ – ‘‘ཀཧཾ, བྷནྟེ, སཏྠཱ’’ཏི? ཏཱཝཏིཾསབྷཝནེ པཎྜུཀམྦལསིལཱཡཾ ཝསྶཾ ཨུཔགནྟྭཱ མཱཏུ ཨབྷིདྷམྨཔིཊཀཾ དེསེཏུཾ གཏོཏི. ‘‘ཀདཱ ཨཱགམིསྶཏི, བྷནྟེ’’ཏི? ‘‘ཏཡོ མཱསེ ཨབྷིདྷམྨཔིཊཀཾ དེསེཏྭཱ མཧཱཔཝཱརཎདིཝསེ’’ཏི. ཏེ ‘‘སཏྠཱརཾ ཨདིསྭཱ ན གམིསྶཱམཱ’’ཏི ཏཏྠེཝ ཁནྡྷཱཝཱརཾ བནྡྷིཾསུ. ཨཱཀཱསམེཝ ཀིར ནེསཾ ཚདནཾ ཨཧོསི. ཏཱཡ ཙ མཧཏིཡཱ པརིསཱཡ སརཱིརནིགྷཾསོ ནཱམ ན པཉྙཱཡི, པཐཝཱི ཝིཝརཾ ཨདཱསི, སབྦཏྠ པརིསུདྡྷམེཝ བྷཱུམིཏལཾ ཨཧོསི.

སཏྠཱ པཋམམེཝ མོགྒལླཱནཏྠེརཾ ཨཝོཙ – ‘‘མོགྒལླཱན, ཏྭཾ ཨེཏིསྶཱཡ པརིསཱཡ དྷམྨཾ དེསེཡྻཱསི, ཙཱུལ༹ཨནཱཐཔིཎྜིཀོ ཨཱཧཱརཾ དསྶཏཱི’’ཏི. ཏསྨཱ ¶ ཏཾ ཏེམཱསཾ ཙཱུལ༹ཨནཱཐཔིཎྜིཀོཝ ཏསྶཱ ¶ པརིསཱཡ ཡཱཔནཾ ཡཱགུབྷཏྟཾ ¶ ཁཱདནཱིཡཾ ཏམྦུལཏེལགནྡྷམཱལཱཔིལནྡྷནཱནི ཙ ཨདཱསི. མཧཱམོགྒལླཱནོ དྷམྨཾ དེསེསི, པཱཊིཧཱརིཡདསྶནཏྠཾ ཨཱགཏཱགཏེཧི པུཊྛཔཉྷེ ཙ ཝིསྶཛྫེསི. སཏྠཱརམྤི མཱཏུ ཨབྷིདྷམྨདེསནཏྠཾ པཎྜུཀམྦལསིལཱཡཾ ཝསྶཾ ཨུཔགཏཾ དསསཧསྶཙཀྐཝཱལ༹དེཝཏཱ པརིཝཱརཡིཾསུ. ཏེན ཝུཏྟཾ –

‘‘ཏཱཝཏིཾསེ ཡདཱ བུདྡྷོ, སིལཱཡཾ པཎྜུཀམྦལེ;

པཱརིཙྪཏྟཀམཱུལམྷི, ཝིཧཱསི པུརིསུཏྟམོ.

‘‘དསསུ ལོཀདྷཱཏཱུསུ, སནྣིཔཏིཏྭཱན དེཝཏཱ;

པཡིརུཔཱསནྟི སམྦུདྡྷཾ, ཝསནྟཾ ནཱགམུདྡྷནི.

‘‘ན ཀོཙི དེཝོ ཝཎྞེན, སམྦུདྡྷསྶ ཝིརོཙཏི;

སབྦེ དེཝེ ཨཏིཀྐམྨ, སམྦུདྡྷོཝ ཝིརོཙཏཱི’’ཏི. (པེ. ཝ. ༣༡༧-༣༡༩);

ཨེཝཾ སབྦཱ དེཝཏཱ ཨཏྟནོ སརཱིརཔྤབྷཱཡ ཨབྷིབྷཝིཏྭཱ ནིསིནྣསྶ པནསྶ མཱཏཱ ཏུསིཏཝིམཱནཏོ ཨཱགནྟྭཱ དཀྑིཎཔསྶེ ནིསཱིདི. ཨིནྡཀོཔི དེཝཔུཏྟོ ཨཱགནྟྭཱ དཀྑིཎཔསྶེཡེཝ ནིསཱིདི, ཨངྐུརོ ཝཱམཔསྶེ ནིསཱིདི. སོ མཧེསཀྑཱསུ དེཝཏཱསུ སནྣིཔཏནྟཱིསུ ཨཔགནྟྭཱ དྭཱདསཡོཛནིཀེ ཋཱནེ ཨོཀཱསཾ ལབྷི, ཨིནྡཀོ ཏཏྠེཝ ནིསཱིདི. སཏྠཱ ཏེ ཨུབྷོཔི ཨོལོཀེཏྭཱ ཨཏྟནོ སཱསནེ དཀྑིཎེཡྻཔུགྒལཱནཾ དིནྣདཱནསྶ མཧཔྥལབྷཱཝཾ ཉཱཔེཏུཀཱམོ ཨེཝམཱཧ – ‘‘ཨངྐུར, ཏཡཱ དཱིགྷམནྟརེ དསཝསྶསཧསྶཔརིམཱཎཀཱལེ དྭཱདསཡོཛནིཀཾ ཨུདྡྷནཔནྟིཾ ཀཏྭཱ མཧཱདཱནཾ ¶ དིནྣཾ, ཨིདཱནི མམ སམཱགམཾ ཨཱགནྟྭཱ དྭཱདསཡོཛནིཀེ ཋཱནེ ཨོཀཱསཾ ལབྷི, ཀིཾ ནུ ཁོ ཨེཏྠ ཀཱརཎ’’ནྟི? ཝུཏྟམྤི ཙེཏཾ –

‘‘ཨོལོཀེཏྭཱན སམྦུདྡྷོ, ཨངྐུརཉྩཱཔི ཨིནྡཀཾ;

དཀྑིཎེཡྻཾ སམྦྷཱཝེནྟོ, ཨིདཾ ཝཙནམབྲཝི.

‘‘མཧཱདཱནཾ ¶ ཏཡཱ དིནྣཾ, ཨངྐུར དཱིགྷམནྟརེ;

ཨཏིདཱུརེ ནིསིནྣོསི, ཨཱགཙྪ མམ སནྟིཀེ’’ཏི. (པེ. ཝ. ༣༢༡-༣༢༢);

སོ སདྡྷོ པཐཝཱིཏལཾ པཱཔུཎི. སབྦཱཔི ནཾ སཱ པརིསཱ ཨསྶོསི. ཨེཝཾ ཝུཏྟེ –

‘‘ཙོདིཏོ ¶ བྷཱཝིཏཏྟེན, ཨངྐུརོ ཨེཏམབྲཝི;

ཀིཾ མཡ྄ཧཾ ཏེན དཱནེན, དཀྑིཎེཡྻེན སུཉྙཏཾ.

‘‘ཨཡཾ སོ ཨིནྡཀོ ཡཀྑོ, དཛྫཱ དཱནཾ པརིཏྟཀཾ;

ཨཏིརོཙཏི ཨམྷེཧི, ཙནྡོ ཏཱརཱགཎེ ཡཐཱ’’ཏི. (པེ. ཝ. ༣༢༣-༣༢༤);

ཏཏྠ དཛྫཱཏི དཏྭཱ. ཨེཝཾ ཝུཏྟེ སཏྠཱ ཨིནྡཀཾ ཨཱཧ – ‘‘ཨིནྡཀ, ཏྭཾ མམ དཀྑིཎཔསྶེ ནིསིནྣོ, ཀསྨཱ ཨནཔགནྟྭཱཝ ནིསཱིདསཱི’’ཏི? སོ ‘‘ཨཧཾ, བྷནྟེ, སུཁེཏྟེ ཨཔྤཀབཱིཛཾ ཝཔནཀསྶཀོ ཝིཡ དཀྑིཎེཡྻསམྤདཾ ཨལཏྠ’’ནྟི དཀྑིཎེཡྻཾ པབྷཱཝེནྟོ ཨཱཧ –

‘‘ཨུཛྫངྒལེ ཡཐཱ ཁེཏྟེ, བཱིཛཾ བཧུམྤི རོཔིཏཾ;

ན ཕལཾ ཝིཔུལཾ ཧོཏི, ནཔི ཏོསེཏི ཀསྶཀཾ.

‘‘ཏཐེཝ དཱནཾ བཧུཀཾ, དུསྶཱིལེསུ པཏིཊྛིཏཾ;

ན ཕལཾ ཝིཔུལཾ ཧོཏི, ནཔི ཏོསེཏི དཱཡཀཾ.

‘‘ཡཐཱཔི ¶ བྷདྡཀེ ཁེཏྟེ, བཱིཛཾ ཨཔྤམྤི རོཔིཏཾ;

སམྨཱ དྷཱརཾ པཝེཙྪནྟེ, ཕལཾ ཏོསེཏི ཀསྶཀཾ.

‘‘ཏཐེཝ སཱིལཝནྟེསུ, གུཎཝནྟེསུ ཏཱདིསུ;

ཨཔྤཀམྤི ཀཏཾ ཀཱརཾ, པུཉྙཾ ཧོཏི མཧཔྥལ’’ནྟི. (པེ. ཝ. ༣༢༥-༣༢༨);

ཀིཾ པནེཏསྶ པུབྦཀམྨནྟི? སོ ཀིར ཨནུརུདྡྷཏྠེརསྶ ཨནྟོགཱམཾ པིཎྜཱཡ པཝིཊྛསྶ ཨཏྟནོ ཨཱབྷཏཾ ཀཊཙྪུབྷིཀྑཾ དཱཔེསི. ཏདཱ ཏསྶ པུཉྙཾ ཨངྐུརེན དསཝསྶསཧསྶཱནི དྭཱདསཡོཛནིཀཾ ཨུདྡྷནཔནྟིཾ ཀཏྭཱ དིནྣདཱནཏོ མཧཔྥལཏརཾ ཛཱཏཾ. ཏསྨཱ ཨེཝམཱཧ.

ཨེཝཾ ཝུཏྟེ སཏྠཱ, ‘‘ཨངྐུར, དཱནཾ ནཱམ ཝིཙེཡྻ དཱཏུཾ ཝཊྚཏི, ཨེཝཾ ཏཾ སུཁེཏྟེསུ ཝུཏྟབཱིཛཾ ཝིཡ མཧཔྥལཾ ཧོཏི. ཏྭཾ པན ན ཏཐཱ ཨཀཱསི, ཏེན ཏེ དཱནཾ མཧཔྥལཾ ན ཛཱཏ’’ནྟི ཨིམམཏྠཾ ཝིབྷཱཝེནྟོ –

‘‘ཝིཙེཡྻ ¶ ¶ དཱནཾ དཱཏབྦཾ, ཡཏྠ དིནྣཾ མཧཔྥལཾ…པེ….

བཱིཛཱནི ཝུཏྟཱནི ཡཐཱ སུཁེཏྟེ’’ཏི. (པེ. ཝ. ༣༢༩-༣༣༠) –

ཝཏྭཱ ཨུཏྟརིམྤི དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ཏིཎདོསཱནི ཁེཏྟཱནི, རཱགདོསཱ ཨཡཾ པཛཱ;

ཏསྨཱ ཧི ཝཱིཏརཱགེསུ, དིནྣཾ ཧོཏི མཧཔྥལཾ.

‘‘ཏིཎདོསཱནི ཁེཏྟཱནི, དོསདོསཱ ཨཡཾ པཛཱ;

ཏསྨཱ ཧི ཝཱིཏདོསེསུ, དིནྣཾ ཧོཏི མཧཔྥལཾ.

‘‘ཏིཎདོསཱནི ཁེཏྟཱནི, མོཧདོསཱ ཨཡཾ པཛཱ;

ཏསྨཱ ཧི ཝཱིཏམོཧེསུ, དིནྣཾ ཧོཏི མཧཔྥལཾ.

‘‘ཏིཎདོསཱནི ¶ ཁེཏྟཱནི, ཨིཙྪཱདོསཱ ཨཡཾ པཛཱ;

ཏསྨཱ ཧི ཝིགཏིཙྪེསུ, དིནྣཾ ཧོཏི མཧཔྥལ’’ནྟི.

དེསནཱཝསཱནེ ཨངྐུརོ ཙ ཨིནྡཀོ ཙ སོཏཱཔཏྟིཕལེ པཏིཊྛཧིཾསུ, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཨཐ སཏྠཱ དེཝཔརིསཱཡ མཛ྄ཛྷེ ནིསིནྣོ མཱཏརཾ ཨཱརབྦྷ ‘‘ཀུསལཱ དྷམྨཱ, ཨཀུསལཱ དྷམྨཱ, ཨབྱཱཀཏཱ དྷམྨཱ’’ཏི ཨབྷིདྷམྨཔིཊཀཾ པཊྛཔེསི. ཨེཝཾ ཏཡོ མཱསེ ནིརནྟརཾ ཨབྷིདྷམྨཔིཊཀཾ ཀཐེསི. ཀཐེནྟོ པན བྷིཀྑཱཙཱརཝེལཱཡ ‘‘ཡཱཝ མམཱགམནཱ ཨེཏྟཀཾ ནཱམ དྷམྨཾ དེསེཏཱུ’’ཏི ནིམྨིཏབུདྡྷཾ མཱཔེཏྭཱ ཧིམཝནྟཾ གནྟྭཱ ནཱགལཏཱདནྟཀཊྛཾ ཁཱདིཏྭཱ ཨནོཏཏྟདཧེ མུཁཾ དྷོཝིཏྭཱ ཨུཏྟརཀུརུཏོ པིཎྜཔཱཏཾ ཨཱཧརིཏྭཱ མཧཱསཱལམཱལ༹ཀེ ནིསིནྣོ བྷཏྟཀིཙྩཾ ཨཀཱསི. སཱརིཔུཏྟཏྠེརོ ཏཏྠ གནྟྭཱ སཏྠུ ཝཏྟཾ ཀརོཏི. སཏྠཱ བྷཏྟཀིཙྩཔརིཡོསཱནེ, ‘‘སཱརིཔུཏྟ ¶ , ཨཛྫ མཡཱ ཨེཏྟཀོ ནཱམ དྷམྨོ བྷཱསིཏོ, ཏྭཾ ཨཏྟནོ ཨནྟེཝཱསིཀཱནཾ བྷིཀྑཱུནཾ ཝཱཙེཧཱི’’ཏི ཐེརསྶ ཀཐེསི. ཡམཀཔཱཊིཧཱིརེ ཀིར པསཱིདིཏྭཱ པཉྩསཏཱ ཀུལཔུཏྟཱ ཐེརསྶ སནྟིཀེ ¶ པབྦཛིཾསུ. ཏེ སནྡྷཱཡ ཐེརཾ ¶ ཨེཝམཱཧ. ཝཏྭཱ ཙ པན དེཝལོཀཾ གནྟྭཱ ནིམྨིཏབུདྡྷེན དེསིཏཊྛཱནཏོ པཊྛཱཡ སཡཾ དྷམྨཾ དེསེསི. ཐེརོཔི གནྟྭཱ ཏེསཾ བྷིཀྑཱུནཾ དྷམྨཾ དེསེསི. ཏེ སཏྠརི དེཝལོཀེ ཝིཧརནྟེཡེཝ སཏྟཔཀརཎིཀཱ ཨཧེསུཾ.

ཏེ ཀིར ཀསྶཔབུདྡྷཀཱལེ ཁུདྡཀཝགྒུལིཡོ ཧུཏྭཱ ཨེཀསྨིཾ པབྦྷཱརེ ཨོལམྦནྟཱ དྭིནྣཾ ཐེརཱནཾ ཙངྐམིཏྭཱ ཨབྷིདྷམྨཾ སཛ྄ཛྷཱཡནྟཱནཾ སདྡཾ སུཏྭཱ སརེ ནིམིཏྟཾ ཨགྒཧེསུཾ. ཏེ ‘‘ཨིམེ ཁནྡྷཱ ནཱམ, ཨིམཱ དྷཱཏུཡོ ནཱམཱ’’ཏི ཨཛཱནིཏྭཱ སརེ ནིམིཏྟགཧཎམཏྟེནེཝ ཏཏོ ཙུཏཱ དེཝལོཀེ ནིབྦཏྟཱ, ཨེཀཾ བུདྡྷནྟརཾ དིབྦསམྤཏྟིཾ ཨནུབྷཝིཏྭཱ ཏཏོ ཙཝིཏྭཱ སཱཝཏྠིཡཾ ཀུལགྷརེསུ ནིབྦཏྟཱ. ཡམཀཔཱཊིཧཱིརེ ཨུཔྤནྣཔསཱདཱ ཐེརསྶ སནྟིཀེ པབྦཛིཏྭཱ སབྦཔཋམཾ སཏྟཔཀརཎིཀཱ ཨཧེསུཾ. སཏྠཱཔི ཏེནེཝ ནཱིཧཱརེན ཏཾ ཏེམཱསཾ ཨབྷིདྷམྨཾ དེསེསི. དེསནཱཝསཱནེ ཨསཱིཏིཀོཊིསཧསྶཱནཾ དེཝཏཱནཾ དྷམྨཱབྷིསམཡོ ཨཧོསི, མཧཱམཱཡཱཔི སོཏཱཔཏྟིཕལེ པཏིཊྛཧི.

སཱཔི ¶ ཁོ ཚཏྟིཾསཡོཛནཔརིམཎྜལཱ པརིསཱ ‘‘ཨིདཱནི སཏྟམེ དིཝསེ མཧཱཔཝཱརཎཱ བྷཝིསྶཏཱི’’ཏི མཧཱམོགྒལླཱནཏྠེརཾ ཨུཔསངྐམིཏྭཱ ཨཱཧ – ‘‘བྷནྟེ སཏྠུ, ཨོརོཧཎདིཝསཾ སཉྙཱཏུཾ ཝཊྚཏི, ན ཧི མཡཾ སཏྠཱརཾ ཨདིསྭཱ གམིསྶཱམཱ’’ཏི. ཨཱཡསྨཱ མཧཱམོགྒལླཱནོ ཏཾ ཀཐཾ སུཏྭཱ ‘‘སཱདྷཱཝུསོ’’ཏི ཝཏྭཱ ཏཏྠེཝ པཐཝིཡཾ ནིམུགྒོ སིནེརུཔཱདཾ གནྟྭཱ ‘‘མཾ ཨབྷིརུཧནྟཾ པརིསཱ པསྶཏཱུ’’ཏི ཨདྷིཊྛཱཡ མཎིརཏནེན ཨཱཝུཏཾ པཎྜུཀམྦལསུཏྟཾ ཝིཡ པཉྙཱཡམཱནརཱུཔོཝ སིནེརུམཛ྄ཛྷེན ཨབྷིརུཧི. མནུསྶཱཔི ནཾ ‘‘ཨེཀཡོཛནཾ ཨབྷིརུལ༹ྷོ, དྭིཡོཛནཾ ཨབྷིརུལ༹ྷོ’’ཏི ཨོལོཀཡིཾསུ. ཐེརོཔི སཏྠུ པཱདེ སཱིསེན ཨུཀྑིཔནྟོ ཝིཡ ཨབྷིརུཧིཏྭཱ ཝནྡིཏྭཱ ཨེཝམཱཧ – ‘‘བྷནྟེ, པརིསཱ ཏུམྷེ དིསྭཱཝ གནྟུཀཱམཱ, ཀདཱ ཨོརོཧིསྶཐཱ’’ཏི. ‘‘ཀཧཾ པན ཏེ, མོགྒལླཱན, ཛེཊྛབྷཱཏིཀོ སཱརིཔུཏྟོ’’ཏི. ‘‘བྷནྟེ, སངྐསྶནགརེ ཝསྶཾ ཨུཔགཏོ’’ཏི. མོགྒལླཱན, ཨཧཾ ཨིཏོ སཏྟམེ དིཝསེ མཧཱཔཝཱརཎཱཡ སངྐསྶནགརདྭཱརེ ཨོཏརིསྶཱམི, མཾ དཊྛུཀཱམཱ ཏཏྠ ཨཱགཙྪནྟུ, སཱཝཏྠིཏོ སངྐསྶནགརདྭཱརཾ ཏིཾསཡོཛནཱནི, ཨེཏྟཀེ མགྒེ ཀསྶཙི པཱཐེཡྻཀིཙྩཾ ནཏྠི, ཨུཔོསཐིཀཱ ཧུཏྭཱ དྷུརཝིཧཱརཾ དྷམྨསྶཝནཏྠཱཡ ¶ གཙྪནྟཱ ཝིཡ ཨཱགཙྪེཡྻཱཐཱཏི ཏེསཾ ཨཱརོཙེཡྻཱསཱིཏི. ཐེརོ ‘‘སཱདྷུ, བྷནྟེ’’ཏི གནྟྭཱ ཏཐཱ ཨཱརོཙེསི.

སཏྠཱ ¶ ཝུཊྛཝསྶོ པཝཱརེཏྭཱ སཀྐསྶ ཨཱརོཙེསི – ‘‘མཧཱརཱཛ, མནུསྶཔཐཾ གམིསྶཱམཱི’’ཏི ¶ . སཀྐོ སུཝཎྞམཡཾ མཎིམཡཾ རཛཏམཡནྟི ཏཱིཎི སོཔཱནཱནི མཱཔེསི. ཏེསཾ པཱདཱ སངྐསྶནགརདྭཱརེ པཏིཊྛཧིཾསུ, སཱིསཱནི སིནེརུམུདྡྷནི. ཏེསུ དཀྑིཎཔསྶེ སུཝཎྞམཡཾ སོཔཱནཾ དེཝཏཱནཾ ཨཧོསི, ཝཱམཔསྶེ རཛཏམཡཾ སོཔཱནཾ མཧཱབྲཧྨཱནཾ ཨཧོསི, མཛ྄ཛྷེ མཎིམཡཾ སོཔཱནཾ ཏཐཱགཏསྶ ཨཧོསི. སཏྠཱཔི སིནེརུམུདྡྷནི ཋཏྭཱ དེཝོརོཧཎསམཡེ ཡམཀཔཱཊིཧཱརིཡཾ ཀཏྭཱ ཨུདྡྷཾ ཨོལོཀེསི, ཡཱཝ བྲཧྨལོཀཱ ཨེཀངྒཎཱ ཨཧེསུཾ. ཨདྷོ ཨོལོཀེསི, ཡཱཝ ཨཝཱིཙིཏོ ཨེཀངྒཎཾ ཨཧོསི. དིསཱཝིདིསཱ ཨོལོཀེསི, ཨནེཀཱནི ཙཀྐཝཱལ༹སཏསཧསྶཱནི ཨེཀངྒཎཱནི ཨཧེསུཾ. དེཝཱ མནུསྶེ པསྶིཾསུ, མནུསྶཱཔི དེཝེ པསྶིཾསུ, སབྦེ སམྨུཁཱཝ པསྶིཾསུ.

བྷགཝཱ ཚབྦཎྞརཾསིཡོ ཝིསྶཛྫེསི. ཏཾ དིཝསཾ བུདྡྷསིརིཾ ཨོལོཀེཏྭཱ ཚཏྟིཾསཡོཛན པརིམཎྜལཱཡ པརིསཱཡ ཨེཀོཔི བུདྡྷབྷཱཝཾ ཨཔཏྠེནྟོ ནཱམ ནཏྠི. སུཝཎྞསོཔཱནེན དེཝཱ ཨོཏརིཾསུ, རཛཏསོཔཱནེན མཧཱབྲཧྨཱནོ ཨོཏརིཾསུ, མཎིསོཔཱནེན སམྨཱསམྦུདྡྷོ ཨོཏརི. པཉྩསིཁོ གནྡྷབྦདེཝཔུཏྟོ བེལུཝཔཎྜུཝཱིཎཾ ཨཱདཱཡ དཀྑིཎཔསྶེ ཋཏྭཱ སཏྠུ གནྡྷབྦམདྷུརདིབྦཝཱིཎཱཡ སདྡེན པཱུཛཾ ཀརོནྟོ ཨོཏརི, མཱཏལི, སངྒཱཧཀོ ཝཱམཔསྶེ ¶ ཋཏྭཱ དིབྦགནྡྷམཱལཱཔུཔྥཾ གཧེཏྭཱ ནམསྶམཱནོ པཱུཛཾ ཀཏྭཱ ཨོཏརི, མཧཱབྲཧྨཱ ཚཏྟཾ དྷཱརེསི, སུཡཱམོ ཝཱལབཱིཛནིཾ དྷཱརེསི. སཏྠཱ ཨིམིནཱ པརིཝཱརེན སདྡྷིཾ ཨོཏརིཏྭཱ སངྐསྶནགརདྭཱརེ པཏིཊྛཧི. སཱརིཔུཏྟཏྠེརོཔི ཨཱགནྟྭཱ སཏྠཱརཾ ཝནྡིཏྭཱ ཡསྨཱ སཱརིཔུཏྟཏྠེརེན ཏཐཱརཱུཔཱཡ བུདྡྷསིརིཡཱ ཨོཏརནྟོ སཏྠཱ ཨིཏོ པུབྦེ ན དིཊྛཔུབྦོ, ཏསྨཱ –

‘‘ན མེ དིཊྛོ ཨིཏོ པུབྦེ, ན སུཏོ ཨུད ཀསྶཙི;

ཨེཝཾ ཝགྒུཝདོ སཏྠཱ, ཏུསིཏཱ གཎིམཱགཏོ’’ཏི. (སུ. ནི. ༩༦༡; མཧཱནི. ༡༩༠) –

ཨཱདཱིཧི ¶ ཨཏྟནོ ཏུཊྛིཾ པཀཱསེཏྭཱ, ‘‘བྷནྟེ, ཨཛྫ སབྦེཔི དེཝམནུསྶཱ ཏུམྷཱཀཾ པིཧཡནྟི, པཏྠེནྟཱི’’ཏི ཨཱཧ. ཨཐ ནཾ སཏྠཱ, ‘‘སཱརིཔུཏྟ, ཨེཝརཱུཔེཧི གུཎེཧི སམནྣཱགཏཱ བུདྡྷཱ དེཝམནུསྶཱནཾ པིཡཱ ཧོནྟིཡེཝཱ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཡེ ཛྷཱནཔསུཏཱ དྷཱིརཱ, ནེཀྑམྨཱུཔསམེ རཏཱ;

དེཝཱཔི ཏེསཾ པིཧཡནྟི, སམྦུདྡྷཱནཾ སཏཱིམཏ’’ནྟི.

ཏཏྠ ཡེ ཛྷཱནཔསུཏཱཏི ལཀྑཎཱུཔནིཛ྄ཛྷཱནཾ ཨཱརམྨཎཱུཔནིཛ྄ཛྷཱནནྟི ཨིམེསུ དྭཱིསུ ཛྷཱནེསུ ཨཱཝཛྫནསམཱཔཛྫནཨདྷིཊྛཱནཝུཊྛཱནཔཙྩཝེཀྑཎེཧི ¶ ཡུཏྟཔྤཡུཏྟཱ. ནེཀྑམྨཱུཔསམེ རཏཱཏི ¶ ཨེཏྠ པབྦཛྫཱ ནེཀྑམྨནྟི ན གཧེཏབྦཱ, ཀིལེསཝཱུཔསམནིབྦཱནརཏིཾ པན སནྡྷཱཡེཏཾ ཝུཏྟཾ. དེཝཱཔཱིཏི དེཝཱཔི མནུསྶཱཔི ཏེསཾ པིཧཡནྟི པཏྠེནྟི. སཏཱིམཏནྟི ཨེཝརཱུཔགུཎཱནཾ ཏེསཾ སཏིཡཱ སམནྣཱགཏཱནཾ སམྦུདྡྷཱནཾ. ‘‘ཨཧོ ཝཏ མཡཾ བུདྡྷཱ བྷཝེཡྻཱམཱ’’ཏི བུདྡྷབྷཱཝཾ ཨིཙྪམཱནཱ པིཧཡནྟཱིཏི ཨཏྠོ.

དེསནཱཝསཱནེ ཏིཾསམཏྟཱནཾ པཱཎཀོཊཱིནཾ དྷམྨཱབྷིསམཡོ ཨཧོསི, ཐེརསྶ སདྡྷིཝིཧཱརིཀཱ པཉྩསཏབྷིཀྑཱུ ཨརཧཏྟེ པཏིཊྛཧིཾསུ.

སབྦབུདྡྷཱནཾ ཀིར ཨཝིཛཧིཏམེཝ ཡམཀཔཱཊིཧཱིརཾ ཀཏྭཱ དེཝལོཀེ ཝསྶཾ ཝསིཏྭཱ སངྐསྶནགརདྭཱརེ ཨོཏརཎཾ. ཏཏྠ པན དཀྑིཎཔཱདསྶ པཏིཊྛིཏཊྛཱནཾ ཨཙལཙེཏིཡཊྛཱནཾ ནཱམ ཧོཏི. སཏྠཱ ཏཏྠ ཋཏྭཱ པུཐུཛྫནཱདཱིནཾ ཝིསཡེ པཉྷཾ པུཙྪི, པུཐུཛྫནཱ ཨཏྟནོ ཝིསཡེ པཉྷེ ཝིསྶཛྫེཏྭཱ སོཏཱཔནྣཝིསཡེ པཉྷཾ ཝིསྶཛྫེཏུཾ ནཱསཀྑིཾསུ. ཏཐཱ སཀདཱགཱམིཨཱདཱིནཾ ཝིསཡེ སོཏཱཔནྣཱདཡོ, མཧཱམོགྒལླཱནཝིསཡེ སེསམཧཱསཱཝཀཱ, སཱརིཔུཏྟཏྠེརསྶ ཝིསཡེ མཧཱམོགྒལླཱནོ, བུདྡྷཝིསཡེ ¶ ཙ སཱརིཔུཏྟོཔི ཝིསྶཛྫེཏུཾ ནཱསཀྑིཡེཝ. སོ པཱཙཱིནདིསཾ ཨཱདིཾ ཀཏྭཱ སབྦདིསཱ ཨོལོཀེསི, སབྦཏྠ ཨེཀངྒཎམེཝ ཨཧོསི. ཨཊྛསུ དིསཱསུ དེཝམནུསྶཱ ཨུདྡྷཾ ཡཱཝ བྲཧྨལོཀཱ ཧེཊྛཱ བྷཱུམཊྛཱ ཙ ཡཀྑནཱགསུཔཎྞཱ ཨཉྫལིཾ པགྒཧེཏྭཱ, ‘‘བྷནྟེ, ཨིདྷ ཏསྶ པཉྷསྶ ཝིསྶཛྫེཏཱ ནཏྠི, ཨེཏྠེཝ ཨུཔདྷཱརེཐཱ’’ཏི ཨཱཧཾསུ. སཏྠཱ སཱརིཔུཏྟོ ཀིལམཏི. ཀིཉྩཱཔི ཧེས –

‘‘ཡེ ¶ ཙ སངྑཱཏདྷམྨཱསེ, ཡེ ཙ སེཁཱ པུཐཱུ ཨིདྷ;

ཏེསཾ མེ ནིཔཀོ ཨིརིཡཾ, པུཊྛོ པབྲཱུཧི མཱརིསཱ’’ཏི. (སུ. ནི. ༡༠༤༤; ཙཱུལ༹ནི. ཨཛིཏམཱཎཝཔུཙྪཱནིདྡེས ༧) –

ཨིམཾ བུདྡྷཝིསཡེ པུཊྛཔཉྷཾ སུཏྭཱ ‘སཏྠཱ མཾ སེཁཱསེཁཱནཾ ཨཱགམནཔཊིཔདཾ པུཙྪཏཱི’ཏི པཉྷེ ནིཀྐངྑོ, ཁནྡྷཱདཱིསུ པན ཀཏརེན ནུ ཁོ མུཁེན ཨིམཾ པཊིཔདཾ ཀཐེནྟོ ‘ཨཧཾ སཏྠུ ཨཛ྄ཛྷཱསཡཾ གཎྷིཏུཾ ན སཀྑིསྶཱམཱི’ཏི མམ ཨཛ྄ཛྷཱསཡེ ཀངྑཏི, སོ མཡཱ ནཡེ ཨདིནྣེ ཀཐེཏུཾ ན སཀྑིསྶཏི, ནཡམསྶ དསྶཱམཱིཏི ནཡཾ དསྶེནྟོ ‘‘བྷཱུཏམིདཾ, སཱརིཔུཏྟ, སམནུཔསྶསཱི’’ཏི ཨཱཧ. ཨེཝཾ ཀིརསྶ ཨཧོསི ‘‘སཱརིཔུཏྟོ མམ ཨཛ྄ཛྷཱསཡཾ གཧེཏྭཱ ཀཐེནྟོ ཁནྡྷཝསེན ¶ ཀཐེསྶཏཱི’’ཏི. ཐེརསྶ སཧ ནཡདཱནེན སོ པཉྷོ ནཡསཏེན ནཡསཧསྶེན ནཡསཏསཧསྶེན ¶ ཨུཔཊྛཱསི. སོ སཏྠཱརཱ དིནྣནཡེ ཋཏྭཱ ཏཾ པཉྷཾ ཀཐེསི. ཋཔེཏྭཱ ཀིར སམྨཱསམྦུདྡྷཾ ཨཉྙོ སཱརིཔུཏྟཏྠེརསྶ པཉྙཾ པཱཔུཎིཏུཾ སམཏྠོ ནཱམ ནཏྠི. ཏེནེཝ ཀིར ཐེརོ སཏྠུ པུརཏོ ཋཏྭཱ སཱིཧནཱདཾ ནདི – ‘‘ཨཧཾ, བྷནྟེ, སཀལཀཔྤམྤི དེཝེ ཝུཊྛེ ‘ཨེཏྟཀཱནི བིནྡཱུནི མཧཱསམུདྡེ པཏིཏཱནི, ཨེཏྟཀཱནི བྷཱུམིཡཾ, ཨེཏྟཀཱནི པབྦཏེ’ཏི གཎེཏྭཱ ལེཁཾ ཨཱརོཔེཏུཾ སམཏྠོ’’ཏི. སཏྠཱཔི ནཾ ‘‘ཛཱནཱམི, སཱརིཔུཏྟ, གཎེཏུཾ སམཏྠབྷཱཝ’’ནྟི ཨཱཧ. ཏསྶ ཨཱཡསྨཏོ པཉྙཱཡ ཨུཔམཱ ནཱམ ནཏྠི. ཏེནེཝཱཧ –

‘‘གངྒཱཡ ཝཱལུཀཱ ཁཱིཡེ, ཨུདཀཾ ཁཱིཡེ མཧཎྞཝེ;

མཧིཡཱ མཏྟིཀཱ ཁཱིཡེ, ན ཁཱིཡེ མམ བུདྡྷིཡཱ’’ཏི.

ཨིདཾ ཝུཏྟཾ ཧོཏི – སཙེ ཧི, བྷནྟེ, བུདྡྷིསམྤནྣལོཀནཱཐ, མཡཱ ཨེཀསྨིཾ པཉྷེ ཝིསྶཛྫིཏེ ཨེཀཾ ཝཱ ཝཱལུཀཾ ཨེཀཾ ཝཱ ཨུདཀབིནྡུཾ ཨེཀཾ ཝཱ པཾསུཁཎྜཾ ཨཁིཔིཏྭཱ པཉྷཱནཾ སཏེན ཝཱ སཧསྶེནཝཱ སཏསཧསྶེན ཝཱ ཝིསྶཛྫིཏེ གངྒཱཡ ཝཱལུཀཱདཱིསུ ཨེཀེཀཾ ཨེཀམནྟེ ཁིཔེཡྻ, ཁིཔྤཏརཾ གངྒཱདཱིསུ ཝཱལུཀཱདཡོ པརིཀྑཡཾ གཙྪེཡྻུཾ, ན ཏྭེཝ མམ པཉྷཱནཾ ཝིསྶཛྫནནྟི. ཨེཝཾ མཧཱཔཉྙོཔི ཧི བྷིཀྑུ བུདྡྷཝིསཡེ པཉྷསྶ ¶ ཨནྟཾ ཝཱ ཀོཊིཾ ཝཱ ཨདིསྭཱ སཏྠཱརཱ དིནྣནཡེ ཋཏྭཱཝ པཉྷཾ ཝིསྶཛྫེསི. ཏཾ སུཏྭཱ བྷིཀྑཱུ ཀཐཾ སམུཊྛཱཔེསུཾ – ‘‘ཡཾ པཉྷཾ པུཊྛོ སབྦོཔི ཛནོ ཀཐེཏུཾ ན སཀྑི, ཏཾ དྷམྨསེནཱཔཏི སཱརིཔུཏྟོ ཨེཀཀོཝ ཀཐེསཱི’’ཏི. སཏྠཱ ཏཾ ཀཐཾ སུཏྭཱ ‘‘ན ཨིདཱནེཝ སཱརིཔུཏྟོ ཡཾ པཉྷཾ མཧཱཛནོ ཝིསྶཛྫེཏུཾ ནཱསཀྑི ¶ , ཏཾ ཝིསྶཛྫེསི, པུབྦེཔི ཨནེན ཝིསྶཛྫིཏོཡེཝཱ’’ཏི ཝཏྭཱ ཨཏཱིཏཾ ཨཱཧརིཏུཾ –

ཡོ བྷཱསིཏསྶ ཝིཛཱནཱཏི ཨཏྠ’’ནྟི. (ཛཱ. ༡.༡.༩༩) –

ཀིཙྪོ ¶ མནུསྶཔཊིལཱབྷོཏི ཨིམཾ དྷམྨདེསནཾ སཏྠཱ བཱརཱཎསིཡཾ ཨུཔནིསྶཱཡ སཏྟསིརཱིསཀརུཀྑམཱུལེ ཝིཧརནྟོ ཨེརཀཔཏྟཾ ནཱམ ནཱགརཱཛཾ ཨཱརབྦྷ ཀཐེསི.

སོ ཀིར པུབྦེ ཀསྶཔབུདྡྷསཱསནེ དཧརབྷིཀྑུ ཧུཏྭཱ གངྒཱཡ ནཱཝཾ ཨབྷིརུཡ྄ཧ གཙྪནྟོ ¶ ཨེཀསྨིཾ ཨེརཀགུམྦེ ཨེརཀཔཏྟཾ གཧེཏྭཱ ནཱཝཱཡ ཝེགསཱ གཙྪམཱནཱཡཔི ན མུཉྩི, ཨེརཀཔཏྟཾ ཚིཛྫིཏྭཱ གཏཾ. སོ ‘‘ཨཔྤམཏྟཀཾ ཨེཏ’’ནྟི ཨཱཔཏྟིཾ ཨདེསེཏྭཱ ཝཱིསཏི ཝསྶསཧསྶཱནི ཨརཉྙེ སམཎདྷམྨཾ ཀཏྭཱཔི མརཎཀཱལེ ཨེརཀཔཏྟེན གཱིཝཱཡ གཧིཏོ ཝིཡ ཨཱཔཏྟིཾ དེསེཏུཀཱམོཔི ཨཉྙཾ བྷིཀྑུཾ ཨཔསྶམཱནོ ‘‘ཨཔརིསུདྡྷཾ མེ སཱིལ’’ནྟི ཨུཔྤནྣཝིཔྤཊིསཱརོ ཏཏོ ཙཝིཏྭཱ ཨེཀརུཀྑདོཎིཀནཱཝཔྤམཱཎོ ནཱགརཱཛཱ ཧུཏྭཱ ནིབྦཏྟི, ཨེརཀཔཏྟོཏྭེཝསྶ ནཱམཾ ཨཧོསི. སོ ནིབྦཏྟཀྑཎེཡེཝ ཨཏྟབྷཱཝཾ ཨོལོཀེཏྭཱ ‘‘ཨེཏྟཀཾ ནཱམ ཀཱལཾ སམཎདྷམྨཾ ཀཏྭཱ ཨཧེཏུཀཡོནིཡཾ མཎྜཱུཀབྷཀྑཊྛཱནེ ནིབྦཏྟོམྷཱི’’ཏི ཝིཔྤཊིསཱརཱི ཨཧོསི. སོ ཨཔརབྷཱགེ ཨེཀཾ དྷཱིཏརཾ ལབྷིཏྭཱ མཛ྄ཛྷེ གངྒཱཡ ཨུདཀཔིཊྛེ མཧནྟཾ ཕལཾ ཨུཀྑིཔིཏྭཱ དྷཱིཏརཾ ཏསྨིཾ ཋཔེཏྭཱ ནཙྩཱཔེཏྭཱ གཱཡཱཔེསི. ཨེཝཾ ཀིརསྶ ཨཧོསི – ‘‘ཨདྡྷཱ ཨཧཾ ཨིདྷ ཨིམིནཱ ཨུཔཱཡེན བུདྡྷེ ཨུཔྤནྣེ ཏསྶ ཨུཔྤནྣབྷཱཝཾ སུཎིསྶཱམཱི’’ཏི. ཡོ མེ གཱིཏསྶ པཊིགཱིཏཾ ཨཱཧརཏི ¶ , ཏསྶ མཧནྟེན ནཱགབྷཝནེན སདྡྷིཾ དྷཱིཏརཾ དསྶཱམཱིཏི ཨནྭཌྜྷམཱསཾ ཨུཔོསཐདིཝསེ ཏཾ དྷཱིཏརཾ ཕཎེ ཋཔེསི. སཱ ཏཏྠ ཋིཏཱ ནཙྩནྟཱི –

‘‘ཀིཾསུ ཨདྷིཔྤཏཱི རཱཛཱ, ཀིཾསུ རཱཛཱ རཛྫིསྶརོ;

ཀཐཾསུ ཝིརཛོ ཧོཏི, ཀཐཾ བཱལོཏི ཝུཙྩཏཱི’’ཏི. –

སཀལཛམྦུདཱིཔཝཱསིནོ ‘‘ནཱགམཱཎཝིཀཾ གཎྷིསྶཱམཱ’’ཏི གནྟྭཱ ཨཏྟནོ ཨཏྟནོ པཉྙཱབལེན པཊིགཱིཏཾ ཀཏྭཱ གཱཡནྟི. སཱ ཏཾ པཊིཀྑིཔཏི. ཏསྶཱ ཨནྭཌྜྷམཱསཾ ཕཎེ ཋཏྭཱ ཨེཝཾ གཱཡནྟིཡཱཝ ཨེཀཾ བུདྡྷནྟརཾ ཝཱིཏིཝཏྟཾ. ཨཐ ཨམྷཱཀཾ སཏྠཱ ལོཀེ ཨུཔྤཛྫིཏྭཱ ཨེཀདིཝསཾ པཙྩཱུསཀཱལེ ལོཀཾ ཝོལོཀེནྟོ ཨེརཀཔཏྟཾ ཨཱདིཾ ཀཏྭཱ ཨུཏྟརམཱཎཝཾ ནཱམ ཨཏྟནོ ཉཱཎཛཱལསྶ ཨནྟོ པཝིཊྛཾ དིསྭཱ ‘‘ཀིཾ ནུ ཁོ བྷཝིསྶཏཱི’’ཏི ཨཱཝཛྫེནྟོ ‘‘ཨཛྫ ཨེརཀཔཏྟསྶ དྷཱིཏརཾ ཕཎེ ཋཔེཏྭཱ ནཙྩཱཔནདིཝསོ, ཨཡཾ ཨུཏྟརམཱཎཝོ མཡཱ དིནྣཾ པཊིགཱིཏཾ གཎྷནྟོཝ ¶ སོཏཱཔནྣོ ཧུཏྭཱ ཏཾ ཨཱདཱཡ ནཱགརཱཛསྶ སནྟིཀཾ གམིསྶཏི. སོ ཏཾ སུཏྭཱ ‘བུདྡྷོ ཨུཔྤནྣོ’ཏི ཉཏྭཱ མམ སནྟིཀཾ ཨཱགམིསྶཏི, ཨཧཾ ཏསྨིཾ ཨཱགཏེ མཧཱསམཱགམེ གཱཐཾ ཀཐེསྶཱམི, གཱཐཱཔརིཡོསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ བྷཝིསྶཏཱི’’ཏི ཨདྡས. སོ ཏཏྠ གནྟྭཱ བཱརཱཎསིཏོ ཨཝིདཱུརེ སཏྟ སིརཱིསཀརུཀྑཱ ཨཏྠི, ཏེསུ ཨེཀསྶ མཱུལེ ནིསཱིདི. ཛམྦུདཱིཔཝཱསིནོ གཱིཏཔཊིགཱིཏཾ ཨཱདཱཡ སནྣིཔཏིཾསུ. སཏྠཱ ཨཝིདཱུརེ ཋཱནེ གཙྪནྟཾ ཨུཏྟརམཱཎཝཾ དིསྭཱ ‘‘ཨེཧི, ཨུཏྟརཱ’’ཏི ཨཱཧ. ‘‘ཀིཾ, བྷནྟེ’’ཏི? ‘‘ཨིཏོ ཏཱཝ ཨེཧཱི’’ཏི. ཨཐ ནཾ ཨཱགནྟྭཱ ཝནྡིཏྭཱ ནིསིནྣཾ ཨཱཧ ‘‘ཀཧཾ གཙྪསཱི’’ཏི? ‘‘ཨེརཀཔཏྟསྶ དྷཱིཏུ གཱཡནཊྛཱན’’ནྟི. ‘‘ཛཱནཱསི པན གཱིཏཔཊིགཱིཏ’’ནྟི? ‘‘ཛཱནཱམི, བྷནྟེ’’ཏི. ‘‘ཝདེཧི ཏཱཝ ན’’ནྟི? ཨཐ ནཾ ཨཏྟནོ ཛཱནནནིཡཱམེནེཝ ཝདནྟཾ ‘‘ན ཨུཏྟརཾ ཨེཏཾ པཊིགཱིཏཾ, ཨཧཾ ཏེ པཊིགཱིཏཾ དསྶཱམི, ཨཱདཱཡ ¶ ནཾ གམིསྶསཱི’’ཏི. ‘‘སཱདྷུ, བྷནྟེ’’ཏི. ཨཐ ནཾ སཏྠཱ, ཨུཏྟར, ཏྭཾ ནཱགམཱཎཝིཀཱཡ གཱིཏཀཱལེ –

‘‘ཚདྭཱརཱདྷིཔྤཏཱི རཱཛཱ, རཛྫམཱནོ རཛྫིསྶརོ;

ཨརཛྫཾ ཝིརཛོ ཧོཏི, རཛྫཾ བཱལོཏི ཝུཙྩཏཱི’’ཏི. –

ཨིམཾ པཊིགཱིཏཾ གཱཡེཡྻཱསཱིཏི ཨཱཧ.

མཱཎཝིཀཱཡ ¶ གཱིཏསྶ ཨཏྠོ – ཀིཾསུ ཨདྷིཔྤཏཱི རཱཛཱཏི ཀིཾ ཨདྷིཔྤཏི རཱཛཱ ནཱམ ཧོཏི? ཀིཾསུ རཱཛཱ རཛྫིསྶརོཏི ཀཐཾ པན རཱཛཱ རཛྫིསྶརོ ནཱམ ཧོཏི? ཀཐཾསུ ཝིརཛོ ཧོཏཱིཏི ཀཐཾ ནུ ཁོ སོ རཱཛཱ ཝིརཛོ ནཱམ ཧོཏཱིཏི?

པཊིགཱིཏསྶ པན ཨཏྠོ – ཚདྭཱརཱདྷིཔྤཏཱི རཱཛཱཏི ཡོ ཚནྣཾ དྭཱརཱནཾ ཨདྷིཔྤཏི, ཨེཀདྭཱརེཔི རཱུཔཱདཱིཧི ཨནབྷིབྷཱུཏོ, ཨཡཾ རཱཛཱ ནཱམ. རཛྫམཱནོ རཛྫིསྶརོཏི ཡོ པན ཏེསུ ཨཱརམྨཎེསུ རཛྫཏི, སོ རཛྫམཱནོ རཛྫིསྶརོ ནཱམ. ཨརཛྫནྟི ཨརཛྫམཱནོ པན ཝིརཛོ ནཱམ ཧོཏི. རཛྫནྟི རཛྫམཱནོ བཱལོཏི ཝུཙྩཏཱིཏི.

ཨེཝམསྶ སཏྠཱ པཊིགཱིཏཾ དཏྭཱ, ཨུཏྟར, ཏཡཱ ཨིམསྨིཾ གཱིཏེ གཱཡིཏེ ཨིམསྶ གཱིཏསྶ ཨིམཾ པཊིགཱིཏཾ གཱཡིསྶཏི –

‘‘ཀེནསྶུ ¶ ཝུཡ྄ཧཏི བཱལོ, ཀཐཾ ནུདཏི པཎྜིཏོ;

ཡོགཀྑེམཱི ཀཐཾ ཧོཏི, ཏཾ མེ ཨཀྑཱཧི པུཙྪིཏོ’’ཏི.

ཨཐསྶ ཏྭཾ ཨིདཾ པཊིགཱིཏཾ གཱཡེཡྻཱསི –

‘‘ཨོགྷེན ཝུཡ྄ཧཏི བཱལོ, ཡོགཱ ནུདཏི པཎྜིཏོ;

སབྦཡོགཝིསཾཡུཏྟོ, ཡོགཀྑེམཱིཏི ཝུཙྩཏཱི’’ཏི.

ཏསྶཏྠོ – ‘‘ཀཱམོགྷཱདིནཱ ཙཏུབྦིདྷེན ཨོགྷེན བཱལོ ཝུཡ྄ཧཏི, ཏཾ ཨོགྷཾ པཎྜིཏོ སམྨཔྤདྷཱནསངྑཱཏེན ཡོགེན ¶ ནུདཏི. སོ སབྦེཧི ཀཱམཡོགཱདཱིཧི ཝིསཾཡུཏྟོ ཡོགཀྑེམཱི ནཱམ ཝུཙྩཏཱི’’ཏི.

ཨུཏྟརོ ཨིམཾ པཊིགཱིཏཾ གཎྷནྟོཝ སོཏཱཔཏྟིཕལེ པཏིཊྛཧི. སོ སོཏཱཔནྣོ ཧུཏྭཱ ཏཾ གཱཐཾ ཨཱདཱཡ གནྟྭཱ, ‘‘ཨམྦྷོ, མཡཱ གཱིཏཔཊིགཱིཏཾ ཨཱཧཊཾ, ཨོཀཱསཾ མེ དེཐཱ’’ཏི ཝཏྭཱ ནིརནྟརཾ ཋིཏསྶ མཧཱཛནསྶ ཛཎྞུནཱ ཨཀྐམནྟོ ཨགམཱསི. ནཱགམཱཎཝིཀཱ པིཏུ ཕཎེ ཋཏྭཱ ནཙྩམཱནཱ ‘‘ཀིཾསུ ཨདྷིཔྤཏཱི རཱཛཱ’’ཏི གཱིཏཾ གཱཡཏི? ཨུཏྟརོ ‘‘ཚདྭཱརཱདྷིཔྤཏཱི རཱཛཱ’’ཏི པཊིགཱིཏཾ གཱཡི. པུན ནཱགམཱཎཝིཀཱ ‘‘ཀེནསྶུ ཝུཡ྄ཧཏཱི’’ཏི ཏསྶ གཱིཏཾ གཱཡཏི? ཨཐསྶཱ པཊིགཱིཏཾ གཱཡནྟོ ཨུཏྟརོ ‘‘ཨོགྷེན ཝུཡ྄ཧཏཱི’’ཏི ཨིམཾ གཱཐམཱཧ. ནཱགརཱཛཱ ཏཾ སུཏྭཱཝ བུདྡྷསྶ ཨུཔྤནྣབྷཱཝཾ ཉཏྭཱ ‘‘མཡཱ ཨེཀཾ བུདྡྷནྟརཾ ཨེཝརཱུཔཾ པདཾ ནཱམ ན སུཏཔུབྦཾ, ཨུཔྤནྣོ ཝཏ, བྷོ, ལོཀེ ¶ བུདྡྷོ’’ཏི ཏུཊྛམཱནསོ ནངྒུཊྛེན ཨུདཀཾ པཧརི, མཧཱཝཱིཙིཡོ ཨུཊྛཧིཾསུ, ཨུབྷོ ཏཱིརཱནི བྷིཛྫིཾསུ. ཨིཏོ ཙིཏོ ཙ ཨུསབྷམཏྟེ ཋཱནེ མནུསྶཱ ཨུདཀེ ནིམུཛྫིཾསུ. སོ ཨེཏྟཀཾ མཧཱཛནཾ ཕཎེ ཋཔེཏྭཱ ཨུཀྑིཔིཏྭཱ ཐལེ པཏིཊྛཔེསི. སོ ཨུཏྟརཾ ཨུཔསངྐམིཏྭཱ ‘‘ཀཧཾ, སཱམི, སཏྠཱ’’ཏི པུཙྪི. ‘‘ཨེཀསྨིཾ རུཀྑམཱུལེ ནིསིནྣོ, མཧཱརཱཛཱ’’ཏི. སོ ‘‘ཨེཧི, སཱམི, གཙྪཱམཱ’’ཏི ཨུཏྟརེན སདྡྷིཾ ཨགམཱསི. མཧཱཛནོཔི ཏེན སདྡྷིཾཡེཝ གཏོ. ནཱགརཱཛཱ གནྟྭཱ ཚབྦཎྞརཾསཱིནཾ ཨནྟརཾ པཝིསིཏྭཱ སཏྠཱརཾ ཝནྡིཏྭཱ རོདམཱནོ ཨཊྛཱསི. ཨཐ ནཾ སཏྠཱ ཨཱཧ – ‘‘ཀིཾ ཨིདཾ, མཧཱརཱཛཱ’’ཏི? ‘‘ཨཧཾ, བྷནྟེ, ཏུམྷཱདིསསྶ བུདྡྷསྶ སཱཝཀོ ཧུཏྭཱ ཝཱིསཏི ཝསྶསཧསྶཱནི སམཎདྷམྨཾ ¶ ཨཀཱསིཾ, སོཔི མཾ སམཎདྷམྨོ ནིདྡྷཱརེཏུཾ ནཱསཀྑི. ཨཔྤམཏྟཀཾ ཨེརཀཔཏྟཚིནྡནམཏྟཾ ནིསྶཱཡ ཨཧེཏུཀཔཊིསནྡྷིཾ གཧེཏྭཱ ཨུརེན པརིསཀྐནཊྛཱནེ ནིབྦཏྟོསྨི, ཨེཀཾ བུདྡྷནྟརཾ ནེཝ མནུསྶཏྟཾ ལབྷཱམི, ན སདྡྷམྨསྶཝནཾ, ན ཏུམྷཱདིསསྶ བུདྡྷསྶ དསྶན’’ནྟི སཏྠཱ ཏསྶ ཀཐཾ སུཏྭཱ, ‘‘མཧཱརཱཛ, མནུསྶཏྟཾ ནཱམ དུལླབྷམེཝ, ཏཐཱ སདྡྷམྨསྶཝནཾ ¶ , ཏཐཱ བུདྡྷུཔྤཱདོ, ཨིདཾ ཀིཙྪེན ཀསིརེན ལབྦྷཏཱི’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཀིཙྪོ མནུསྶཔཊིལཱབྷོ, ཀིཙྪཾ མཙྩཱན ཛཱིཝིཏཾ;

ཀིཙྪཾ སདྡྷམྨསྶཝནཾ, ཀིཙྪོ བུདྡྷཱནམུཔྤཱདོ’’ཏི.

ཏསྶཏྠོ – མཧནྟེན ཧི ཝཱཡཱམེན མཧནྟེན ཀུསལེན ལདྡྷཏྟཱ མནུསྶཏྟཔཊིལཱབྷོ ནཱམ ཀིཙྪོ དུལླབྷོ. ནིརནྟརཾ ཀསིཀམྨཱདཱིནི ཀཏྭཱ ཛཱིཝིཏཝུཏྟིཾ གྷཊནཏོཔི པརིཏྟཊྛཱཡིཏཱཡཔི མཙྩཱནཾ ཛཱིཝིཏཾ ཀིཙྪཾ. ཨནེཀེསུཔི ཀཔྤེསུ དྷམྨདེསཀསྶ པུགྒལསྶ དུལླབྷཏཱཡ སདྡྷམྨསྶཝནམྤི ཀིཙྪཾ. མཧནྟེན ཝཱཡཱམེན ཨབྷིནཱིཧཱརསྶ སམིཛ྄ཛྷནཏོ སམིདྡྷཱབྷིནཱིཧཱརསྶ ཙ ཨནེཀེཧིཔི ཀཔྤཀོཊིསཧསྶེཧི དུལླབྷུཔྤཱདཏོ བུདྡྷཱནཾ ཨུཔྤཱདོཔི ཀིཙྪོཡེཝ, ཨཏིཝིཡ དུལླབྷོཏི.

དེསནཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི. ནཱགརཱཛཱཔི ཏཾདིཝསཾ སོཏཱཔཏྟིཕལཾ ལབྷེཡྻ, ཏིརཙྪཱནགཏཏྟཱ པན ནཱལཏྠ. སོ ཡེསུ པཊིསནྡྷིགཧཎཏཙཛཧནཝིསྶཊྛནིདྡོཀྐམནསཛཱཏིཡཱམེཐུནསེཝནཙུཏིསངྑཱཏེསུ ¶ པཉྩསུ ཋཱནེསུ ནཱགསརཱིརམེཝ ¶ གཧེཏྭཱ ཀིལམནྟི, ཏེསུ ཨཀིལམནབྷཱཝཾ པཏྭཱ མཱཎཝརཱུཔེནེཝ ཝིཙརིཏུཾ ལབྷཏཱིཏི.

སབྦཔཱཔསྶ ཨཀརཎནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཱནནྡཏྠེརསྶ པཉྷཾ ཨཱརབྦྷ ཀཐེསི.

ཐེརོ ཀིར དིཝཱཊྛཱནེ ནིསིནྣོ ཙིནྟེསི – ‘‘སཏྠཱརཱ སཏྟནྣཾ བུདྡྷཱནཾ མཱཏཱཔིཏརོ ཨཱཡུཔརིཙྪེདོ བོདྷི སཱཝཀསནྣིཔཱཏོ ཨགྒསཱཝཀསནྣིཔཱཏོ ཨགྒསཱཝཀཨུཔཊྛཱཀོཏི ཨིདཾ སབྦཾ ཀཐིཏཾ, ཨུཔོསཐོ པན ཨཀཐིཏོ, ཀིཾ ནུ ཁོ ཏེསམྤི ཨཡམེཝ ཨུཔོསཐོ, ཨཉྙོ’’ཏི? སོ སཏྠཱརཾ ཨུཔསངྐམིཏྭཱ ཏམཏྠཾ པུཙྪི. ཡསྨཱ པན ཏེསཾ བུདྡྷཱནཾ ཀཱལབྷེདོཝ ཨཧོསི, ན ཀཐཱབྷེདོ. ཝིཔསྶཱི སམྨཱསམྦུདྡྷོ ཧི སཏྟམེ སཏྟམེ སཾཝཙྪརེ ཨུཔོསཐཾ ཨཀཱསི. ཨེཀདིཝསཾ དིནྣོཝཱདོཡེཝ ¶ ཧིསྶ སཏྟནྣཾ སཾཝཙྪརཱནཾ ཨལཾ ཧོཏི. སིཁཱི ཙེཝ ཝེསྶབྷཱུ ཙ ཚཊྛེ ཚཊྛེ སཾཝཙྪརེ ཨུཔོསཐཾ ཀརིཾསུ, ཀཀུསནྡྷོ ཀོཎཱགམནོ ཙ སཾཝཙྪརེ སཾཝཙྪརེ. ཀསྶཔདསབལོ ཚཊྛེ ཚཊྛེ མཱསེ ཨུཔོསཐཾ ཨཀཱསི. ཨེཀདིཝསཾ དིནྣོཝཱདོ ཨེཝ ཧིསྶ ཚནྣཾ མཱསཱནཾ ཨལཾ ཨཧོསི. ཏསྨཱ སཏྠཱ ཏེསཾ ཨིམཾ ཀཱལབྷེདཾ ¶ ཨཱརོཙེཏྭཱ ‘‘ཨོཝཱདགཱཐཱ པན ནེསཾ ཨིམཱཡེཝཱ’’ཏི ཝཏྭཱ སབྦེསཾ ཨེཀམེཝ ཨུཔོསཐཾ ཨཱཝི ཀརོནྟོ ཨིམཱ གཱཐཱ ཨབྷཱསི –

‘‘སབྦཔཱཔསྶ ཨཀརཎཾ, ཀུསལསྶ ཨུཔསམྤདཱ;

སཙིཏྟཔརིཡོདཔནཾ, ཨེཏཾ བུདྡྷཱན སཱསནཾ.

‘‘ཨནཱུཔཝཱདོ ¶ ཨནཱུཔགྷཱཏོ, པཱཏིམོཀྑེ ཙ སཾཝརོ;

མཏྟཉྙུཏཱ ཙ བྷཏྟསྨིཾ, པནྟཉྩ སཡནཱསནཾ;

ཨདྷིཙིཏྟེ ཙ ཨཱཡོགོ, ཨེཏཾ བུདྡྷཱན སཱསན’’ནྟི.

ཏཏྠ སབྦཔཱཔསྶཱཏི སབྦསྶ ཨཀུསལཀམྨསྶ. ཨུཔསམྤདཱཏི ཨབྷིནིཀྑམནཏོ པཊྛཱཡ ཡཱཝ ཨརཧཏྟམགྒཱ ཀུསལསྶ ཨུཔྤཱདནཉྩེཝ ཨུཔྤཱདིཏསྶ ཙ བྷཱཝནཱ. སཙིཏྟཔརིཡོདཔནནྟི པཉྩཧི ནཱིཝརཎེཧི ཨཏྟནོ ཙིཏྟསྶ ཝོདཱཔནཾ. ཨེཏཾ བུདྡྷཱན སཱསནནྟི སབྦབུདྡྷཱནཾ ཨཡམནུསིཊྛི.

ཁནྟཱིཏི ཡཱ ཨེསཱ ཏིཏིཀྑཱསངྑཱཏཱ ཁནྟཱི ནཱམ, ཨིདཾ ཨིམསྨིཾ སཱསནེ པརམཾ ཨུཏྟམཾ ཏཔོ. ནིབྦཱནཾ པརམཾ ཝདནྟི བུདྡྷཱཏི བུདྡྷཱ ཙ པཙྩེཀབུདྡྷཱ ཙ ཨནུབུདྡྷཱ ཙཱཏི ཨིམེ ཏཡོ བུདྡྷཱ ནིབྦཱནཾ ཨུཏྟམནྟཱི ཝདནྟི. ན ཧི པབྦཛིཏོཏི པཱཎིཨཱདཱིཧི པརཾ ཨཔཧནནྟོ ཝིཧེཋེནྟོ པརཱུཔགྷཱཏཱི པབྦཛིཏོ ནཱམ ན ཧོཏི. ན སམཎོཏི ཝུཏྟནཡེནེཝ པརཾ ཝིཧེཋཡནྟོ སམཎོཔི ན ཧོཏིཡེཝ ¶ .

ཨནཱུཔཝཱདོཏི ཨནཱུཔཝཱདནཉྩེཝ ཨནཱུཔཝཱདཱཔནཉྩ. ཨནཱུཔགྷཱཏོཏི ཨནཱུཔགྷཱཏནཉྩེཝ ཨནཱུཔགྷཱཏཱཔནཉྩ ¶ . པཱཏིམོཀྑེཏི ཛེཊྛཀསཱིལེ. སཾཝརོཏི པིདཧནཾ. མཏྟཉྙུཏཱཏི མཏྟཉྙུབྷཱཝོ པམཱཎཛཱནནཾ. པནྟནྟི ཝིཝིཏྟཾ. ཨདྷིཙིཏྟེཏི ཨཊྛསམཱཔཏྟིསངྑཱཏེ ཨདྷིཙིཏྟེ. ཨཱཡོགོཏི པཡོགཀརཎཾ. ཨེཏནྟི ཨེཏཾ སབྦེསཾ བུདྡྷཱནཾ སཱསནཾ. ཨེཏྠ ཧི ཨནཱུཔཝཱདེན ཝཱཙསིཀཾ སཱིལཾ ཀཐིཏཾ, ཨནཱུཔགྷཱཏེན ཀཱཡིཀསཱིལཾ, ‘‘པཱཏིམོཀྑེ ཙ སཾཝརོ’’ཏི སཱིལཾ ཀཐིཏཾ, ཨནཱུཔགྷཱཏེན ཀཱཡིཀསཱིལཾ, ‘‘པཱཏིམོཀྑེ ཙ སཾཝརོ’’ཏི ཨིམིནཱ པཱཏིམོཀྑསཱིལཉྩེཝ ཨིནྡྲིཡསཾཝརཉྩ, མཏྟཉྙུཏཱཡ ཨཱཛཱིཝཔཱརིསུདྡྷི ཙེཝ པཙྩཡསནྣིསིཏསཱིལཉྩ, པནྟསེནཱསནེན སཔྤཱཡསེནཱསནཾ, ཨདྷིཙིཏྟེན ཨཊྛ སམཱཔཏྟིཡོ. ཨེཝཾ ཨིམཱཡ གཱཐཱཡ ཏིསྶོཔི སིཀྑཱ ཀཐིཏཱ ཨེཝ ཧོནྟཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ན ¶ ཀཧཱཔཎཝསྶེནཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཨནབྷིརཏབྷིཀྑུཾ ཨཱརབྦྷ ཀཐེསི.

སོ ཀིར སཱསནེ པབྦཛིཏྭཱ ལདྡྷཱུཔསམྤདོ ‘‘ཨསུཀཊྛཱནཾ ནཱམ གནྟྭཱ ཨུདྡེསཾ ཨུགྒཎྷཱཧཱི’’ཏི ཨུཔཛ྄ཛྷཱཡེན པེསིཏོ ཏཏྠ ཨགམཱསི. ཨཐསྶ པིཏུནོ རོགོ ཨུཔྤཛྫི. སོ པུཏྟཾ དཊྛུཀཱམོ ཧུཏྭཱ ཏཾ པཀྐོསིཏུཾ སམཏྠཾ ཀཉྩི ¶ ཨལབྷིཏྭཱ པུཏྟསོཀེན ཝིཔྤལཔནྟོཡེཝ ཨཱསནྣམརཎོ ཧུཏྭཱ ‘‘ཨིདཾ མེ པུཏྟསྶ པཏྟཙཱིཝརམཱུལཾ ཀརེཡྻཱསཱི’’ཏི ཀཧཱཔཎསཏཾ ཀནིཊྛསྶ ཧཏྠེ དཏྭཱ ཀཱལམཀཱསི. སོ དཧརསྶ ཨཱགཏཀཱལེ པཱདམཱུལེ ནིཔཏིཏྭཱ པཝཊྚེནྟོ རོདིཏྭཱ, ‘‘བྷནྟེ, པིཏཱ ཏེ ཝིཔྤལཔནྟོཝ ཀཱལཀཏོ, མཡ྄ཧཾ པན ཏེན ཀཧཱཔཎསཏཾ ཧཏྠེ ཋཔིཏཾ, ཏེན ཀིཾ ཀརོམཱི’’ཏི ཨཱཧ. དཧརོ ‘‘ན མེ ཀཧཱཔཎེཧི ཨཏྠོ’’ཏི པཊིཀྑིཔིཏྭཱ ཨཔརབྷཱགེ ཙིནྟེསི – ‘‘ཀིཾ མེ པརཀུལེསུ པིཎྜཱཡ ཙརིཏྭཱ ཛཱིཝིཏེན, སཀྐཱ ཏཾ ཀཧཱཔཎསཏཾ ནིསྶཱཡ ཛཱིཝིཏུཾ, ཝིབྦྷམིསྶཱམཱི’’ཏི. སོ ཨནབྷིརཏིཡཱ པཱིལི༹ཏོ ཝིསྶཊྛསཛ྄ཛྷཱཡནཀམྨཊྛཱནོ པཎྜུརོགཱི ཝིཡ ཨཧོསི. ཨཐ ནཾ དཧརསཱམཎེརཱ ‘‘ཀིཾ ཨིད’’ནྟི པུཙྪིཏྭཱ ‘‘ཨུཀྐཎྛིཏོམྷཱི’’ཏི ཝུཏྟེ ཨཱཙརིཡུཔཛ྄ཛྷཱཡཱནཾ ཨཱཙིཀྑིཾསུ. ཨཐ ནཾ ཏེ སཏྠུ སནྟིཀཾ ནེཏྭཱ སཏྠུ དསྶེསུཾ. སཏྠཱ ‘‘སཙྩཾ ཀིར ཏྭཾ ཨུཀྐཎྛིཏོ’’ཏི པུཙྪིཏྭཱ, ‘‘ཨཱམ, བྷནྟེ’’ཏི ཝུཏྟེ ‘‘ཀསྨཱ ཨེཝམཀཱསི, ཨཏྠི པན ཏེ ¶ ཀོཙི ཛཱིཝིཏཔཙྩཡོ’’ཏི ཨཱཧ. ‘‘ཨཱམ, བྷནྟེ’’ཏི. ‘‘ཀིཾ ཏེ ཨཏྠཱི’’ཏི? ‘‘ཀཧཱཔཎསཏཾ, བྷནྟེ’’ཏི. ཏེན ཧི ཀཏྠཙི ཏཱཝ སཀྑརཱ ཨཱཧར, གཎེཏྭཱ ཛཱནིསྶཱམ ‘‘སཀྐཱ ཝཱ ཏཱཝཏྟཀེན ཛཱིཝིཏུཾ, ནོ ཝཱ’’ཏི. སོ སཀྑརཱ ཨཱཧརི. ཨཐ ནཾ སཏྠཱ ཨཱཧ – ‘‘པརིབྷོགཏྠཱཡ ཏཱཝ པཎྞཱསཾ ཋཔེཧི, དྭིནྣཾ གོཎཱནཾ ཨཏྠཱཡ ཙཏུཝཱིསཏི, ཨེཏྟཀཾ ནཱམ བཱིཛཏྠཱཡ, ཡུགནངྒལཏྠཱཡ, ཀུདྡཱལཝཱསིཕརསུཨཏྠཱཡཱ’’ཏི ཨེཝཾ གཎིཡམཱནེ ཏཾ ཀཧཱཔཎསཏཾ ནཔྤཧོཏི. ཨཐ ནཾ སཏྠཱ ‘‘བྷིཀྑུ ཏཝ ཀཧཱཔཎཱ ཨཔྤཀཱ, ཀཐཾ ཨེཏེ ནིསྶཱཡ ཏཎྷཾ པཱུརེསྶསི, ཨཏཱིཏེ ཀིར ཙཀྐཝཏྟིརཛྫཾ ཀཱརེཏྭཱ ཨཔྥོཊིཏམཏྟེན ¶ དྭཱདསཡོཛནཊྛཱནེ ཀཊིཔྤམཱཎེན རཏནཝསྶཾ ཝསྶཱཔེཏུཾ སམཏྠོ ཡཱཝ ཚཏྟིཾས སཀྐཱ ཙཝནྟི, ཨེཏྟཀཾ ཀཱལཾ དེཝརཛྫཾ ཀཱརེཏྭཱཔི མརཎཀཱལེ ¶ ཏཎྷཾ ཨཔཱུརེཏྭཱཝ ཀཱལམཀཱསཱི’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརིཏྭཱ མནྡྷཱཏུཛཱཏཀཾ (ཛཱ. ༡.༣.༢༢) ཝིཏྠཱརེཏྭཱ –

‘‘ཡཱཝཏཱ ཙནྡིམསཱུརིཡཱ པརིཧརནྟི, དིསཱ བྷནྟི ཝིརོཙནཱ;

སབྦེཝ དཱསཱ མནྡྷཱཏུ, ཡེ པཱཎཱ པཐཝིསྶིཏཱ’’ཏི. –

ཨིམིསྶཱ གཱཐཱཡ ཨནནྟརཱ ཨིམཱ དྭེ གཱཐཱ ཨབྷཱསི –

‘‘ན ཀཧཱཔཎཝསྶེན, ཏིཏྟི ཀཱམེསུ ཝིཛྫཏི;

ཨཔྤསྶཱདཱ དུཁཱ ཀཱམཱ, ཨིཏི ཝིཉྙཱཡ པཎྜིཏོ.

‘‘ཨཔི དིབྦེསུ ཀཱམེསུ, རཏིཾ སོ ནཱདྷིགཙྪཏི;

ཏཎྷཀྑཡརཏོ ཧོཏི, སམྨཱསམྦུདྡྷསཱཝཀོ’’ཏི.

ཏཏྠ ཀཧཱཔཎཝསྶེནཱཏི ཡཾ སོ ཨཔྥོཊེཏྭཱ སཏྟརཏནཝསྶཾ ཝསྶཱཔེསི, ཏཾ ཨིདྷ ཀཧཱཔཎཝསྶནྟི ཝུཏྟཾ. ཏེནཔི ཧི ཝཏྠུཀཱམཀིལེསཀཱམེསུ ཏིཏྟི ནཱམ ནཏྠི. ཨེཝཾ དུཔྤཱུརཱ ཨེསཱ ཏཎྷཱ. ཨཔྤསྶཱདཱཏི སུཔིནསདིསཏཱཡ པརིཏྟསུཁཱ. དུཁཱཏི དུཀྑཀྑནྡྷཱདཱིསུ ཨཱགཏདུཀྑཝསེན པན བཧུདུཀྑཱཝ. ཨིཏི ཝིཉྙཱཡཱཏི ཨེཝམེཏེ ཀཱམེ ཛཱནིཏྭཱ. ཨཔི དིབྦེསཱུཏི སཙེ ཧི དེཝཱནཾ ཨུཔཀཔྤནཀཀཱམེཧི ནིམནྟེཡྻཱཔི ཨཱཡསྨཱ སམིདྡྷི ¶ ཝིཡ ཨེཝམྤི ཏེསུ ཀཱམེསུ རཏིཾ ན ཝིནྡཏིཡེཝ. ཏཎྷཀྑཡརཏོཏི ཨརཧཏྟེ ཙེཝ ནིབྦཱནེ ཙ ཨབྷིརཏོ ཧོཏི, ཏཾ པཏྠཡམཱནོ ཝིཧརཏི. སམྨཱསམྦུདྡྷསཱཝཀོཏི སམྨཱསམྦུདྡྷེན དེསིཏསྶ དྷམྨསྶ སཝནེན ཛཱཏོ ཡོགཱཝཙརབྷིཀྑཱུཏི.

དེསནཱཝསཱནེ ¶ སོ བྷིཀྑུ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

བཧུཾ ཝེ སརཎཾ ཡནྟཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཝཱལིཀརཱསིམྷི ནིསིནྣཾ ཨགྒིདཏྟཾ ནཱམ ཀོསལརཉྙོ པུརོཧིཏཾ ཨཱརབྦྷ ཀཐེསི.

སོ ¶ ཀིར མཧཱཀོསལསྶ པུརོཧིཏོ ཨཧོསི. ཨཐ ནཾ པིཏརི ཀཱལཀཏེ རཱཛཱ པསེནདི ཀོསལོ ‘‘པིཏུ མེ པུརོཧིཏོ’’ཏི གཱརཝེན ཏསྨིཾཡེཝ ཋཱནེ ཋཔེཏྭཱ ཏསྶ ཨཏྟནོ ཨུཔཊྛཱནཾ ཨཱགཏཀཱལེ པཙྩུགྒམནཾ ཀརོཏི, ‘‘ཨཱཙརིཡ, ཨིདྷ ནིསཱིདཐཱ’’ཏི སམཱནཱསནཾ དཱཔེསི. སོ ཙིནྟེསི – ‘‘ཨཡཾ རཱཛཱ མཡི ཨཏིཝིཡ གཱརཝཾ ཀརོཏི, ན ཁོ པན རཱཛཱུནཾ ནིཙྩཀཱལམེཝ སཀྐཱ ཙིཏྟཾ གཧེཏུཾ. སམཱནཝཡེནེཝ ཧི སདྡྷིཾ རཛྫསུཁཾ ནཱམ སུཁཾ ཧོཏི, ཨཧཉྩམྷི མཧལླཀོ, པབྦཛིཏུཾ མེ ཡུཏྟ’’ནྟི. སོ རཱཛཱནཾ པབྦཛྫཾ ཨནུཛཱནཱཔེཏྭཱ ནགརེ བྷེརིཾ ཙརཱཔེཏྭཱ སཏྟཱཧེན སབྦཾ ཨཏྟནོ ¶ དྷནཾ དཱནམུཁེ ཝིསྶཛྫེཏྭཱ བཱཧིརཀཔབྦཛྫཾ པབྦཛི. ཏཾ ནིསྶཱཡ དས པུརིསསཧསྶཱནི ཨནུཔབྦཛིཾསུ. སོ ཏེཧི སདྡྷིཾ ཨངྒམགདྷཱནཉྩ ཀུརུརཊྛསྶ ཙ ཨནྟརེ ཝཱསཾ ཀཔྤེཏྭཱ ཨིམཾ ཨོཝཱདཾ དེཏི, ‘‘ཏཱཏཱ, ཡསྶ ཀཱམཝིཏཀྐཱདཡོ ཨུཔྤཛྫནྟི, སོ ནདིཏོ ཨེཀེཀཾ ཝཱལུཀཔུཊཾ ཨུདྡྷརིཏྭཱ ཨིམསྨིཾ ཨོཀིརཏཱུ’’ཏི. ཏེ ‘‘སཱདྷཱུ’’ཏི པཊིསྶུཎིཏྭཱ ཀཱམཝིཏཀྐཱདཱིནཾ ཨུཔྤནྣཀཱལེ ཏཐཱ ཀརིཾསུ. ཨཔརེན སམཡེན མཧཱཝཱལུཀརཱསི ཨཧོསི, ཏཾ ཨཧིཚཏྟོ ནཱམ ནཱགརཱཛཱ པཊིགྒཧེསི. ཨངྒམགདྷཝཱསིནོ ཙེཝ ཀུརུརཊྛཝཱསིནོ ཙ མཱསེ མཱསེ ཏེསཾ མཧནྟཾ སཀྐཱརཾ ཨབྷིཧརིཏྭཱ དཱནཾ དེནྟི. ཨཐ ནེསཾ ཨགྒིདཏྟོ ཨིམཾ ཨོཝཱདཾ ཨདཱསི – ‘‘པབྦཏཾ སརཎཾ ཡཱཐ, ཝནཾ སརཎཾ ཡཱཐ, ཨཱརཱམཾ སརཎཾ ཡཱཐ, རུཀྑཾ སརཎཾ ཡཱཐ, ཨེཝཾ སབྦདུཀྑཏོ མུཙྩིསྶཐཱ’’ཏི. ཨཏྟནོ ཨནྟེཝཱསིཀེཔི ཨིམིནཱ ཨོཝཱདེན ཨོཝདི.

བོདྷིསཏྟོཔི ཀཏཱབྷིནིཀྑམནོ སམྨཱསམྦོདྷིཾ པཏྭཱ ཏསྨིཾ སམཡེ སཱཝཏྠིཾ ནིསྶཱཡ ཛེཏཝནེ ཝིཧརནྟོ པཙྩཱུསཀཱལེ ལོཀཾ ཝོལོཀེནྟོ ཨགྒིདཏྟབྲཱཧྨཎཾ སདྡྷིཾ ཨནྟེཝཱསིཀེཧི ཨཏྟནོ ཉཱཎཛཱལསྶ ཨནྟོ པཝིཊྛཾ དིསྭཱ ‘‘སབྦེཔི ཨིམེ ཨརཧཏྟསྶ ཨུཔནིསྶཡསམྤནྣཱ’’ཏི ཉཏྭཱ སཱཡནྷསམཡེ མཧཱམོགྒལླཱནཏྠེརཾ ཨཱཧ – ‘‘མོགྒལླཱན, ཀིཾ པསྶསི ཨགྒིདཏྟབྲཱཧྨཎཾ མཧཱཛནཾ ¶ ཨཏིཏྠེ པཀྑནྡཱཔེནྟཾ, གཙྪ ཏེསཾ ཨོཝཱདཾ དེཧཱི’’ཏི. བྷནྟེ, བཧཱུ ཨེཏེ, ཨེཀཀསྶ མཡ྄ཧཾ ཨཝིསཡ྄ཧཱ. སཙེ ¶ ཏུམྷེཔི ཨཱགམིསྶཐ, ཝིསཡ྄ཧཱ བྷཝིསྶནྟཱིཏི. མོགྒལླཱན, ཨཧམྤི ཨཱགམིསྶཱམི, ཏྭཾ པུརཏོ ཡཱཧཱིཏི. ཐེརོ པུརཏོ གཙྪནྟོཝ ཙིནྟེསི – ‘‘ཨེཏེ བལཝནྟོ ཙེཝ བཧཱུ ཙ. སཙེ སབྦེསཾ སམཱགམཊྛཱནེ ཀིཉྩི ¶ ཀཐེསྶཱམི, སབྦེཔི ཝགྒཝགྒེན ཨུཊྛཧེཡྻུ’’ནྟི ཨཏྟནོ ཨཱནུབྷཱཝེན ཐཱུལཕུསིཏཀཾ དེཝཾ ཝུཊྛཱཔེསི. ཏེ ཐཱུལཕུསིཏཀེསུ པཏནྟེསུ ཨུཊྛཱཡུཊྛཱཡ ཨཏྟནོ ཨཏྟནོ པཎྞསཱལཾ པཝིསིཾསུ. ཐེརོ ཨགྒིདཏྟསྶ བྲཱཧྨཎསྶ པཎྞསཱལདྭཱརེ ཋཏྭཱ ‘‘ཨགྒིདཏྟཱ’’ཏི ཨཱཧ. སོ ཐེརསྶ སདྡཾ སུཏྭཱ ‘‘མཾ ཨིམསྨིཾ ལོཀེ ནཱམེན ཨཱལཔིཏུཾ སམཏྠོ ནཱམ ནཏྠི, ཀོ ནུ ཁོ མཾ ནཱམེན ཨཱལཔཏཱི’’ཏི མཱནཐདྡྷཏཱཡ ‘‘ཀོ ཨེསོ’’ཏི ཨཱཧ. ‘‘ཨཧཾ, བྲཱཧྨཎཱ’’ཏི. ‘‘ཀིཾ ཝདེསཱི’’ཏི? ‘‘ཨཛྫ མེ ཨེཀརཏྟིཾ ཨིདྷ ཝསནཊྛཱནཾ ཏྭཾ ཨཱཙིཀྑཱཧཱི’’ཏི. ‘‘ཨིདྷ ཝསནཊྛཱནཾ ནཏྠི, ཨེཀསྶ ཨེཀཱཝ པཎྞསཱལཱ’’ཏི. ‘‘ཨགྒིདཏྟ, མནུསྶཱ ནཱམ མནུསྶཱནཾ, གཱཝོ གུནྣཾ, པབྦཛིཏཱ པབྦཛིཏཱནཾ སནྟིཀཾ གཙྪནྟི, མཱ ཨེཝཾ ཀརི, དེཧི མེ ཝསནཊྛཱན’’ནྟི. ‘‘ཀིཾ པན ཏྭཾ པབྦཛིཏོ’’ཏི? ‘‘ཨཱམ, པབྦཛིཏོམྷཱི’’ཏི. ‘‘སཙེ པབྦཛིཏོ, ཀཧཾ ཏེ ཁཱརིབྷཎྜཾ, ཀོ པབྦཛིཏཔརིཀྑཱརོ’’ཏི. ‘‘ཨཏྠི མེ པརིཀྑཱརོ, ཝིསུཾ པན ནཾ གཧེཏྭཱ ཝིཙརིཏུཾ དུཀྑནྟི ཨབྦྷནྟརེནེཝ ནཾ གཧེཏྭཱ ཝིཙརཱམི, བྲཱཧྨཎཱ’’ཏི. སོ ‘‘ཏཾ གཧེཏྭཱ ཝིཙརིསྶསཱི’’ཏི ཐེརསྶ ཀུཛ྄ཛྷི. ཨཐ ནཾ སོ ཨཱཧ – ‘‘ཨམྷེ, ཨགྒིདཏྟ, མཱ ཀུཛ྄ཛྷི, ཝསནཊྛཱནཾ མེ ཨཱཙིཀྑཱཧཱི’’ཏི. ནཏྠི ཨེཏྠ ཝསནཊྛཱནནྟི. ཨེཏསྨིཾ པན ཝཱལུཀརཱསིམྷི ཀོ ཝསཏཱིཏི. ཨེཀོ, ནཱགརཱཛཱཏི. ཨེཏཾ མེ དེཧཱིཏི. ན སཀྐཱ དཱཏུཾ, བྷཱརིཡཾ ¶ ཨེཏསྶ ཀམྨནྟི. ཧོཏུ, དེཧི མེཏི. ཏེན ཧི ཏྭཾ ཨེཝ ཛཱནཱཧཱིཏི.

ཐེརོ ཝཱལུཀརཱསིཨབྷིམུཁོ པཱཡཱསི. ནཱགརཱཛཱ ཏཾ ཨཱགཙྪནྟཾ དིསྭཱ ‘‘ཨཡཾ སམཎོ ཨིཏོ ཨཱགཙྪཏི, ན ཛཱནཱཏི མཉྙེ མམ ཨཏྠིབྷཱཝཾ, དྷཱུམཱཡིཏྭཱ ནཾ མཱརེསྶཱམཱི’’ཏི དྷཱུམཱཡི. ཐེརོ ‘‘ཨཡཾ ནཱགརཱཛཱ ‘ཨཧམེཝ དྷཱུམཱཡིཏུཾ སཀྐོམི, ཨཉྙེ ན སཀྐོནྟཱི’ཏི མཉྙེ སལླཀྑེཏཱི’’ཏི སཡམྤི དྷཱུམཱཡི. དྭིནྣམྤི སརཱིརཏོ ཨུགྒཏཱ དྷཱུམཱ ཡཱཝ བྲཧྨལོཀཱ ཨུཊྛཧིཾསུ. ཨུབྷོཔི དྷཱུམཱ ཐེརཾ ཨབཱདྷེཏྭཱ ནཱགརཱཛཱནམེཝ བཱདྷེནྟི. ནཱགརཱཛཱ དྷཱུམཝེགཾ སཧིཏུཾ ཨསཀྐོནྟོ པཛྫལི. ཐེརོཔི ཏེཛོདྷཱཏུཾ སམཱཔཛྫིཏྭཱ ཏེན སདྡྷིཾཡེཝ པཛྫལི. ཨགྒིཛཱལཱ ཡཱཝ བྲཧྨལོཀཱ ཨུཊྛཧིཾསུ. ཨུབྷོཔི ཐེརཾ ཨབཱདྷེཏྭཱ ནཱགརཱཛཱནམེཝ བཱདྷཡིཾསུ. ཨཐསྶ སཀལསརཱིརཾ ཨུཀྐཱཧི པདིཏྟཾ ཝིཡ ཨཧོསི. ཨིསིགཎོ ཨོལོཀེཏྭཱ ཙིནྟེསི – ‘‘ནཱགརཱཛཱ, སམཎཾ ཛྷཱཔེཏི, བྷདྡཀོ ཝཏ སམཎོ ཨམྷཱཀཾ ཝཙནཾ ཨསུཏྭཱ ནཊྛོ’’ཏི. ཐེརོ ནཱགརཱཛཱནཾ ¶ དམེཏྭཱ ནིབྦིསེཝནཾ ཀཏྭཱ ཝཱལུཀརཱསིམྷི ནིསཱིདི. ནཱགརཱཛཱ ཝཱལུཀརཱསིཾ བྷོགེཧི པརིཀྑིཔིཏྭཱ ཀཱུཊཱགཱརཀུཙྪིཔམཱཎཾ ཕཎཾ མཱཔེཏྭཱ ཐེརསྶ ཨུཔརི དྷཱརེསི.

ཨིསིགཎཱ ¶ པཱཏོཝ ‘‘སམཎསྶ མཏབྷཱཝཾ ཝཱ ཨམཏབྷཱཝཾ ཝཱ ཛཱནིསྶཱམཱ’’ཏི ཐེརསྶ སནྟིཀཾ གནྟྭཱ ཏཾ ཝཱལུཀརཱསིམཏྠཀེ ནིསིནྣཾ དིསྭཱ ཨཉྫལིཾ པགྒཡ྄ཧ ཨབྷིཏྠཝནྟཱ ཨཱཧཾསུ – ‘‘སམཎ, ཀཙྩི ནཱགརཱཛེན ན བཱདྷིཏོ’’ཏི. ‘‘ཀིཾ ན པསྶཐ མམ ཨུཔརིཕཎཾ དྷཱརེཏྭཱ ཋིཏ’’ནྟི? ཏེ ‘‘ཨཙྪརིཡཾ ཝཏ བྷོ, སམཎསྶ ཨེཝརཱུཔོ ¶ ནཱམ ནཱགརཱཛཱ དམིཏོ’’ཏི ཐེརཾ པརིཝཱརེཏྭཱ ཨཊྛཾསུ. ཏསྨིཾ ཁཎེ སཏྠཱ ཨཱགཏོ. ཐེརོ སཏྠཱརཾ དིསྭཱ ཨུཊྛཱཡ ཝནྡི. ཨཐ ནཾ ཨིསཡོ ཨཱཧཾསུ – ‘‘ཨཡམྤི ཏཡཱ མཧནྟཏརོ’’ཏི. ཨེསོ བྷགཝཱ སཏྠཱ, ཨཧཾ ཨིམསྶ སཱཝཀོཏི. སཏྠཱ ཝཱལུཀརཱསིམཏྠཀེ ནིསཱིདི, ཨིསིགཎོ ‘‘ཨཡཾ ཏཱཝ སཱཝཀསྶ ཨཱནུབྷཱཝོ, ཨིམསྶ པན ཨཱནུབྷཱཝོ ཀཱིདིསོ བྷཝིསྶཏཱི’’ཏི ཨཉྫལིཾ པགྒཡ྄ཧ སཏྠཱརཾ ཨབྷིཏྠཝི. སཏྠཱ ཨགྒིདཏྟཾ ཨཱམནྟེཏྭཱ ཨཱཧ – ‘‘ཨགྒིདཏྟ, ཏྭཾ ཏཝ སཱཝཀཱནཉྩ ཨུཔཊྛཱཀཱནཉྩ ཨོཝཱདཾ དདམཱནོ ཀིནྟི ཝཏྭཱ དེསཱི’’ཏི. ‘‘ཨེཏཾ པབྦཏཾ སརཎཾ གཙྪཐ, ཝནཾ ཨཱརཱམཾ རུཀྑཾ སརཎཾ གཙྪཐ. ཨེཏཱནི ཧི སརཎཾ གཏོ སབྦདུཀྑཱ པམུཙྩཏཱི’’ཏི ཨེཝཾ ཏེསཾ ཨོཝཱདཾ དམྨཱིཏི. སཏྠཱ ‘‘ན ཁོ, ཨགྒིདཏྟ, ཨེཏཱནི སརཎཾ གཏོ སབྦདུཀྑཱ པམུཙྩཏི, བུདྡྷཾ དྷམྨཾ སངྒྷཾ པན སརཎཾ གནྟྭཱ སཀལཝཊྚདུཀྑཱ པམུཙྩཏཱི’’ཏི ཝཏྭཱ ཨིམཱ གཱཐཱ ཨབྷཱསི –

‘‘བཧུཾ ཝེ སརཎཾ ཡནྟི, པབྦཏཱནི ཝནཱནི ཙ;

ཨཱརཱམརུཀྑཙེཏྱཱནི, མནུསྶཱ བྷཡཏཛྫིཏཱ.

‘‘ནེཏཾ ཁོ སརཎཾ ཁེམཾ, ནེཏཾ སརཎམུཏྟམཾ;

ནེཏཾ སརཎམཱགམྨ, སབྦདུཀྑཱ པམུཙྩཏི.

‘‘ཡོ ཙ བུདྡྷཉྩ དྷམྨཉྩ, སངྒྷཉྩ སརཎཾ གཏོ;

ཙཏྟཱརི ཨརིཡསཙྩཱནི, སམྨཔྤཉྙཱཡ པསྶཏི.

‘‘དུཀྑཾ དུཀྑསམུཔྤཱདཾ, དུཀྑསྶ ཙ ཨཏིཀྐམཾ;

ཨརིཡཾ ཙཊྛངྒིཀཾ མགྒཾ, དུཀྑཱུཔསམགཱམིནཾ.

‘‘ཨེཏཾ ¶ ¶ ཁོ སརཎཾ ཁེམཾ, ཨེཏཾ སརཎམུཏྟམཾ;

ཨེཏཾ སརཎམཱགམྨ, སབྦདུཀྑཱ པམུཙྩཏཱི’’ཏི.

ཏཏྠ བཧུནྟི བཧུ. པབྦཏཱནཱིཏི ཏཏྠ ཏཏྠ ཨིསིགིལིཝེཔུལླཝེབྷཱརཱདིཀེ པབྦཏེ ཙ མཧཱཝནགོསིངྒསཱལཝནཱདཱིནི ¶ ཝནཱནི ཙ ཝེལུ༹ཝནཛཱིཝཀམྦཝནཱདཡོ ཨཱརཱམེ ཙ ཨུདེནཙེཏིཡགོཏམཙེཏིཡཱདཱིནི རུཀྑཙེཏྱཱནི ཙ ཏེ ཏེ མནུསྶཱ ཏེན ཏེན བྷཡེན ཏཛྫིཏཱ བྷཡཏོ མུཙྩིཏུཀཱམཱ པུཏྟལཱབྷཱདཱིནི ཝཱ པཏྠཡམཱནཱ སརཎཾ ཡནྟཱིཏི ཨཏྠོ. ནེཏཾ སརཎནྟི ཨེཏཾ སབྦམྤི སརཎཾ ནེཝ ཁེམཾ ན ཨུཏྟམཾ, ན ཙ ཨེཏཾ པཊིཙྩ ཛཱཏིཨཱདིདྷམྨེསུ སཏྟེསུ ཨེཀོཔི ཛཱཏིཨཱདིཏོ སབྦདུཀྑཱ པམུཙྩཏཱིཏི ཨཏྠོ.

ཡོ ཙཱཏི ཨིདཾ ཨཁེམཾ ཨནུཏྟམཾ སརཎཾ དསྶེཏྭཱ ཁེམཾ ཨུཏྟམཾ སརཎཾ དསྶནཏྠཾ ཨཱརདྡྷཾ. ཏསྶཏྠོ – ཡོ ཙ གཧཊྛོ ཝཱ པབྦཛིཏོ ཝཱ ‘‘ཨིཏིཔི སོ བྷགཝཱ ཨརཧཾ སམྨཱསམྦུདྡྷོ’’ཏིཨཱདིཀཾ བུདྡྷདྷམྨསངྒྷཱནུསྶཏིཀམྨཊྛཱནཾ ནིསྶཱཡ སེཊྛཝསེན བུདྡྷཉྩ དྷམྨཉྩ སངྒྷཉྩ སརཎཾ གཏོ, ཏསྶཔི ཏཾ སརཎགམནཾ ཨཉྙཏིཏྠིཡཝནྡནཱདཱིཧི ཀུཔྤཏི ཙལཏི. ཏསྶ པན ཨཙལབྷཱཝཾ དསྶེཏུཾ མགྒེན ཨཱགཏསརཎམེཝ པཀཱསནྟོ ཙཏྟཱརི ཨརིཡསཙྩཱནི སམྨཔྤཉྙཱཡ པསྶཏཱིཏི ཨཱཧ. ཡོ ཧི ཨེཏེསཾ སཙྩཱནཾ དསྶནཝསེན ཨེཏཱནི སརཎཾ ¶ གཏོ, ཨེཏསྶ ཨེཏཾ སརཎཾ ཁེམཉྩ ཨུཏྟམཉྩ, སོ ཙ པུགྒལོ ཨེཏཾ སརཎཾ པཊིཙྩ སཀལསྨཱཔི ཝཊྚདུཀྑཱ པམུཙྩཏི, ཏསྨཱ ཨེཏཾ ཁོ སརཎཾ ཁེམནྟིཨཱདི ཝུཏྟཾ.

དེསནཱཝསཱནེ སབྦེཔི ཏེ ཨིསཡོ སཧ པཊིསམྦྷིདཱཧི ཨརཧཏྟཾ པཏྭཱ སཏྠཱརཾ ཝནྡིཏྭཱ པབྦཛྫཾ ཡཱཙིཾསུ. སཏྠཱཔི ཙཱིཝརགབྦྷཏོ ཧཏྠཾ པསཱརེཏྭཱ ‘‘ཨེཐ བྷིཀྑཝོ, ཙརཐ བྲཧྨཙརིཡ’’ནྟི ཨཱཧ. ཏེ ཏངྑཎེཡེཝ ཨཊྛཔརིཀྑཱརདྷརཱ ཝསྶསཊྛིཀཐེརཱ ཝིཡ ཨཧེསུཾ. སོ ཙ སབྦེསམྤི ཨངྒམགདྷཀུརུརཊྛཝཱསཱིནཾ སཀྐཱརཾ ཨཱདཱཡ ཨཱགམནདིཝསོ ཨཧོསི. ཏེ སཀྐཱརཾ ཨཱདཱཡ ཨཱགཏཱ སབྦེཔི ཏེ ཨིསཡོ པབྦཛིཏེ དིསྭཱ ‘‘ཀིཾ ནུ ཁོ ཨམྷཱཀཾ ཨགྒིདཏྟབྲཱཧྨཎོ མཧཱ, ཨུདཱཧུ སམཎོ གོཏམོ’’ཏི ཙིནྟེཏྭཱ སམཎསྶ གོཏམསྶ ཨཱགཏཏྟཱ ‘‘ཨགྒིདཏྟོཝ མཧཱ’’ཏི མཉྙིཾསུ. སཏྠཱ ཏེསཾ ཨཛ྄ཛྷཱསཡཾ ཨོལོཀེཏྭཱ, ‘‘ཨགྒིདཏྟ, པརིསཱཡ ཀངྑཾ ཚིནྡཱ’’ཏི ཨཱཧ. སོ ‘‘ཨཧམྤི ཨེཏྟཀམེཝ ¶ པཙྩཱསཱིསཱམཱི’’ཏི ཨིདྡྷིབལེན སཏྟཀྑཏྟུཾ ཝེཧཱསཾ ཨབྦྷུགྒནྟྭཱ པུནཔྤུནཾ ཨོརུཡ྄ཧ སཏྠཱརཾ ཝནྡིཏྭཱ ‘‘སཏྠཱ མེ, བྷནྟེ, བྷགཝཱ, སཱཝཀོཧམསྨཱི’’ཏི ཝཏྭཱ སཱཝཀཏྟཾ པཀཱསེསཱིཏི.

དུལླབྷོཏི ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཱནནྡཏྠེརསྶ པཉྷཾ ཨཱརབྦྷ ཀཐེསི.

ཐེརོ ཧི ཨེཀདིཝསཾ དིཝཱཊྛཱནེ ནིསིནྣོ ཙིནྟེསི – ‘‘ཧཏྠཱཛཱནཱིཡོ ¶ ཚདྡནྟཀུལེ ཝཱ ཨུཔོསཐཀུལེ ཝཱ ཨུཔྤཛྫཏི, ཨསྶཱཛཱནཱིཡོ སིནྡྷཝཀུལེ ཝཱ ཝལཱཧཀསྶརཱཛཀུལེ ཝཱ, ཨུསབྷོ གོཨཱཛནཱིཡོ དཀྑིཎཔཐེཏིཨཱདཱིནི ཝདནྟེན སཏྠཱརཱ ཧཏྠིཨཱཛཱནཱིཡཱདཱིནཾ ཨུཔྤཏྟིཊྛཱནཱདཱིནི ཀཐིཏཱནི, པུརིསཱཛཱནཱིཡོ པན ཀཧཾ ནུ ཁོ ཨུཔྤཛྫཏཱི’’ཏི. སོ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསཱིདིཏྭཱ ཨེཏམཏྠཾ པུཙྪི. སཏྠཱ, ‘‘ཨཱནནྡ, པུརིསཱཛཱནཱིཡོ ནཱམ སབྦཏྠ ནུཔྤཛྫཏི, ཨུཛུཀཏོ པན ཏིཡོཛནསཏཱཡཱམེ ཝིཏྠཱརཏོ ཨཌྜྷཏེཡྻསཏེ ཨཱཝཊྚཏོ ནཝཡོཛནསཏཔྤམཱཎེ མཛ྄ཛྷིམཔདེསཊྛཱནེ ཨུཔྤཛྫཏི. ཨུཔྤཛྫནྟོ ཙ པན ན ཡསྨིཾ ཝཱ ཏསྨིཾ ཝཱ ཀུལེ ཨུཔྤཛྫཏི, ཁཏྟིཡམཧཱསཱལབྲཱཧྨཎམཧཱསཱལཀུལཱནཾ པན ཨཉྙཏརསྨིཾཡེཝ ཨུཔྤཛྫཏཱི’’ཏི ཝཏྭཱ ཨིམཾ གཱཐམཱཧ –

‘‘དུལླབྷོ པུརིསཱཛཉྙོ, ན སོ སབྦཏྠ ཛཱཡཏི;

ཡཏྠ སོ ཛཱཡཏཱི དྷཱིརོ, ཏཾ ཀུལཾ སུཁམེདྷཏཱི’’ཏི.

ཏཏྠ དུལླབྷོཏི པུརིསཱཛཉྙོ ཧི དུལླབྷོ, ན ཧཏྠིཨཱཛཱནཱིཡཱདཡོ ཝིཡ སུལབྷོ, སོ སབྦཏྠ པཙྩནྟདེསེ ཝཱ ནཱིཙཀུལེ ཝཱ ན ཛཱཡཏི, མཛ྄ཛྷིམདེསེཔི མཧཱཛནསྶ ཨབྷིཝཱདནཱདིསཀྐཱརཀརཎཊྛཱནེ ཁཏྟིཡབྲཱཧྨཎཀུལཱནཾ ཨཉྙཏརསྨིཾ ཀུལེ ཛཱཡཏི. ཨེཝཾ ཛཱཡམཱནོ ཡཏྠ སོ ཛཱཡཏི དྷཱིརོ ཨུཏྟམཔཉྙོ སམྨཱསམྦུདྡྷོ ¶ , ཏཾ ཀུལཾ སུཁམེདྷཏཱིཏི སུཁཔྤཏྟམེཝ ཧོཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སུཁོ ¶ ¶ བུདྡྷཱནནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལཱནཾ བྷིཀྑཱུནཾ ཀཐཾ ཨཱརབྦྷ ཀཐེསི.

ཨེཀདིཝསཉྷི པཉྩསཏབྷིཀྑཱུ ཨུཔཊྛཱནསཱལཱཡཾ ནིསིནྣཱ, ‘‘ཨཱཝུསོ, ཀིཾ ནུ ཁོ ཨིམསྨིཾ ལོཀེ སུཁ’’ནྟི ཀཐཾ སམུཊྛཱཔེསུཾ? ཏཏྠ ཀེཙི ‘‘རཛྫསུཁསདིསཾ སུཁཾ ནཱམ ནཏྠཱི’’ཏི ཨཱཧཾསུ. ཀེཙི ཀཱམསུཁསདིསཾ, ཀེཙི ‘‘སཱལིམཾསབྷོཛནཱདིསདིསཾ སུཁཾ ནཱམ ནཏྠཱི’’ཏི ཨཱཧཾསུ. སཏྠཱ ཏེསཾ ནིསིནྣཊྛཱནཾ གནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཀིཾ ཀཐེཐ? ཨིདཉྷི སབྦམྤི སུཁཾ ཝཊྚདུཀྑཔརིཡཱཔནྣམེཝ, ཨིམསྨིཾ ལོཀེ བུདྡྷུཔྤཱདོ དྷམྨསྶཝནཾ, སངྒྷསཱམགྒཱི, སམྨོདམཱནབྷཱཝོཏི ཨིདམེཝ སུཁ’’ནྟི ཝཏྭཱ ཨིམཾ གཱཐམཱཧ –

‘‘སུཁོ བུདྡྷཱནམུཔྤཱདོ, སུཁཱ སདྡྷམྨདེསནཱ;

སུཁཱ སངྒྷསྶ སཱམགྒཱི, སམགྒཱནཾ ཏཔོ སུཁོ’’ཏི.

ཏཏྠ བུདྡྷཱནམུཔྤཱདོཏི ཡསྨཱ བུདྡྷཱ ཨུཔྤཛྫམཱནཱ མཧཱཛནཾ རཱགཀནྟཱརཱདཱིཧི ཏཱརེནྟི, ཏསྨཱ བུདྡྷཱནཾ ཨུཔྤཱདོ སུཁོ ཨུཏྟམོ. ཡསྨཱ ¶ སདྡྷམྨདེསནཾ ཨཱགམྨ ཛཱཏིཨཱདིདྷམྨཱ སཏྟཱ ཛཱཏིཨཱདཱིཧི མུཙྩནྟི, ཏསྨཱ སདྡྷམྨདེསནཱ སུཁཱ. སཱམགྒཱིཏི སམཙིཏྟཏཱ, སཱཔི སུཁཱ ཨེཝ. སམགྒཱནཾ པན ཨེཀཙིཏྟཱནཾ ཡསྨཱ བུདྡྷཝཙནཾ ཝཱ ཨུགྒཎྷིཏུཾ དྷུཏངྒཱནི ཝཱ པརིཧརིཏུཾ སམཎདྷམྨཾ ཝཱ ཀཱཏུཾ སཀྐཱ, ཏསྨཱ སམགྒཱནཾ ཏཔོ སུཁོཏི ཝུཏྟཾ. ཏེནེཝཱཧ – ‘‘ཡཱཝཀཱིཝཉྩ, བྷིཀྑཝེ, བྷིཀྑཱུ སམགྒཱ སནྣིཔཏིསྶནྟི, སམྨགྒཱ ཝུཊྛཧིསྶནྟི, སམགྒཱ སངྒྷཀརཎཱིཡཱནི ཀརིསྶནྟི, ཝུདྡྷིཡེཝ, བྷིཀྑཝེ, བྷིཀྑཱུནཾ པཱཊིཀངྑཱ, ནོ པརིཧཱནཱི’’ཏི (དཱི. ནི. ༢.༡༣༦).

དེསནཱཝསཱནེ ཏེ བྷིཀྑཱུ ཨརཧཏྟེ པཏིཊྛཧིཾསུ, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

པཱུཛཱརཧེཏི ¶ ¶ ཨིམཾ དྷམྨདེསནཾ སཏྠཱ ཙཱརིཀཾ ཙརམཱནོ ཀསྶཔདསབལསྶ སུཝཎྞཙེཏིཡཾ ཨཱརབྦྷ ཀཐེསི.

ཏཐཱགཏོ སཱཝཏྠིཏོ ནིཀྑམིཏྭཱ ཨནུཔུབྦེན བཱརཱཎསིཾ གཙྪནྟོ ཨནྟརཱམགྒེ ཏོདེཡྻགཱམསྶ སམཱིཔེ མཧཱབྷིཀྑུསངྒྷཔརིཝཱརོ ཨཉྙཏརཾ དེཝཊྛཱནཾ སམྤཱཔུཎི. ཏཏྲ ནིསིནྣོ སུགཏོ དྷམྨབྷཎྜཱགཱརིཀཾ པེསེཏྭཱ ཨཝིདཱུརེ ཀསིཀམྨཾ ཀརོནྟཾ བྲཱཧྨཎཾ པཀྐོསཱཔེསི ¶ . སོ བྲཱཧྨཎོ ཨཱགནྟྭཱ ཏཐཱགཏཾ ཨནབྷིཝནྡིཏྭཱ ཏམེཝ དེཝཊྛཱནཾ ཝནྡིཏྭཱ ཨཊྛཱསི. སུགཏོཔི ‘‘ཨིམཾ པདེསཾ ཀིནྟི མཉྙསི བྲཱཧྨཎཱ’’ཏི ཨཱཧ. ཨམྷཱཀཾ པཝེཎིཡཱ ཨཱགཏཙེཏིཡཊྛཱནནྟི ཝནྡཱམི, བྷོ གོཏམཱཏི. ‘‘ཨིམཾ ཋཱནཾ ཝནྡནྟེན ཏཡཱ སཱདྷུ ཀཏཾ བྲཱཧྨཎཱ’’ཏི སུགཏོ ཏཾ སམྤཧཾསེསི. ཏཾ སུཏྭཱ བྷིཀྑཱུ ‘‘ཀེན ནུ ཁོ ཀཱརཎེན བྷགཝཱ ཨེཝཾ སམྤཧཾསེསཱི’’ཏི སཾསཡཾ སཉྫནེསུཾ. ཏཏོ ཏཐཱགཏོ ཏེསཾ སཾསཡམཔནེཏུཾ མཛ྄ཛྷིམནིཀཱཡེ གྷཊིཀཱརསུཏྟནྟཾ (མ. ནི. ༢.༢༨༢ ཨཱདཡོ) ཝཏྭཱ ཨིདྡྷཱནུབྷཱཝེན ཀསྶཔདསབལསྶ ཡོཛནུབྦེདྷཾ ཀནཀཙེཏིཡཾ ཨཔརཉྩ ཀནཀཙེཏིཡཾ ཨཱཀཱསེ ནིམྨིནིཏྭཱ མཧཱཛནཾ དསྶེཏྭཱ, ‘‘བྲཱཧྨཎ, ཨེཝཾཝིདྷཱནཾ པཱུཛཱརཧཱནཾ པཱུཛཱ ཡུཏྟཏརཱཝཱ’’ཏི ཝཏྭཱ མཧཱཔརིནིབྦཱནསུཏྟེ (དཱི. ནི. ༢.༢༠༦) དསྶིཏནཡེནེཝ བུདྡྷཱདིཀེ ཙཏྟཱརོ ཐཱུཔཱརཧེ པཀཱསེཏྭཱ སརཱིརཙེཏིཡཾ ཨུདྡིསྶཙེཏིཡཾ པརིབྷོགཙེཏིཡནྟི ཏཱིཎི ཙེཏིཡཱནི ཝིསེསཏོ པརིདཱིཔེཏྭཱ ཨིམཱ གཱཐཱ ཨབྷཱསི –

‘‘པཱུཛཱརཧེ པཱུཛཡཏོ, བུདྡྷེ ཡདི ཙ སཱཝཀེ;

པཔཉྩསམཏིཀྐནྟེ, ཏིཎྞསོཀཔརིདྡཝེ.

‘‘ཏེ ཏཱདིསེ པཱུཛཡཏོ, ནིབྦུཏེ ཨཀུཏོབྷཡེ;

ན སཀྐཱ པུཉྙཾ སངྑཱཏུཾ, ཨིམེཏྟམཔི ཀེནཙཱི’’ཏི. (ཨཔ. ཐེར ༡.༡༠.༡-༢);

ཏཏྠ པཱུཛིཏུཾ ཨརཧཱ པཱུཛཱརཧཱ, པཱུཛིཏུཾ ཡུཏྟཱཏི ཨཏྠོ. པཱུཛཱརཧེ པཱུཛཡཏོཏི ཨབྷིཝཱདནཱདཱིཧི ཙ ཙཏཱུཧི ཙ པཙྩཡེཧི ¶ པཱུཛེནྟསྶ. པཱུཛཱརཧེ དསྶེཏི བུདྡྷེཏིཨཱདིནཱ. བུདྡྷེཏི སམྨཱསམྦུདྡྷེ. ཡདཱིཏི ཡདི ཝཱ, ཨཐ ཝཱཏི ཨཏྠོ. ཏཏྠ པཙྩེཀབུདྡྷེཏི ཀཐིཏཾ ཧོཏི, སཱཝཀེ ཙ. པཔཉྩསམཏིཀྐནྟེཏི སམཏིཀྐནྟཏཎྷཱདིཊྛིམཱནཔཔཉྩེ. ཏིཎྞསོཀཔརིདྡཝེཏི ¶ ཨཏིཀྐནྟསོཀཔརིདྡཝེ ¶ , ཨིམེ དྭེ ཨཏིཀྐནྟེཏི ཨཏྠོ. ཨེཏེཧི པཱུཛཱརཧཏྟཾ དསྶིཏཾ.

ཏེཏི བུདྡྷཱདཡོ. ཏཱདིསེཏི ཝུཏྟགཧཎཝསེན. ནིབྦུཏེཏི རཱགཱདིནིབྦུཏིཡཱ. ནཏྠི ཀུཏོཙི བྷཝཏོ ཝཱ ཨཱརམྨཎཏོ ཝཱ ཨེཏེསཾ བྷཡནྟི ཨཀུཏོབྷཡཱ, ཏེ ཨཀུཏོབྷཡེ. ན སཀྐཱ པུཉྙཾ སངྑཱཏུནྟི པུཉྙཾ གཎེཏུཾ ན སཀྐཱ. ཀཐནྟི ཙེ? ཨིམེཏྟམཔི ཀེནཙཱིཏི ཨིམཾ ཨེཏྟཀཾ, ཨིམཾ ཨེཏྟཀནྟི ཀེནཙཱིཏི ཨཔིསདྡོ ཨིདྷ སམྦནྡྷིཏབྦོ, ཀེནཙི པུགྒལེན མཱནེན ཝཱ. ཏཏྠ པུགྒལེནཱཏི ཏེན བྲཧྨཱདིནཱ. མཱནེནཱཏི ཏིཝིདྷེན མཱནེན ཏཱིརཎེན དྷཱརཎེན པཱུརཎེན ཝཱ. ཏཱིརཎཾ ནཱམ ཨིདཾ ཨེཏྟཀནྟི ནཡཏོ ཏཱིརཎཾ. དྷཱརཎནྟི ཏུལཱཡ དྷཱརཎཾ. པཱུརཎཾ ནཱམ ཨཌྜྷཔསཏཔཏྠནཱལི༹ཀཱདིཝསེན པཱུརཎཾ. ཀེནཙི པུགྒལེན ཨིམེཧི ཏཱིཧི མཱནེཧི བུདྡྷཱདིཀེ པཱུཛཡཏོ པུཉྙཾ ཝིཔཱཀཝསེན གཎེཏུཾ ན སཀྐཱ པརིཡནྟརཧིཏཏོཏི དྭཱིསུ ཋཱནེསུ པཱུཛཡཏོ ཀིཾ དཱནཾ པཋམཾ དྷརམཱནེ བུདྡྷཱདཱི པཱུཛཡཏོ ན སཀྐཱ པུཉྙཾ སངྑཱཏུཾ, པུན ཏེ ཏཱདིསེ ཀིལེསཔརིནིབྦཱནནིམིཏྟེན ཁནྡྷཔརིནིབྦཱནེན ནིབྦུཏེཔི པཱུཛཡཏོ ན སཀྐཱ སངྑཱཏུནྟི བྷེདཱ ཡུཛྫནྟི. ཏེན ཧི ཝིམཱནཝཏྠུམྷི –

‘‘ཏིཊྛནྟེ ¶ ནིབྦུཏེ ཙཱཔི, སམེ ཙིཏྟེ སམཾ ཕལཾ;

ཙེཏོཔཎིདྷིཧེཏུ ཧི, སཏྟཱ གཙྪནྟི སུགྒཏི’’ནྟི. (ཝི. ཝ. ༨༠༦);

དེསནཱཝསཱནེ སོ བྲཱཧྨཎོ སོཏཱཔནྣོ ཨཧོསཱིཏི. ཡོཛནིཀཾ ཀནཀཙེཏིཡཾ སཏྟཱཧམཱཀཱསེཝ ཨཊྛཱསི, མཧནྟེན སམཱགམོ ཙཱཧོསི, སཏྟཱཧཾ ཙེཏིཡཾ ནཱནཔྤཀཱརེན པཱུཛེསུཾ. ཏཏོ བྷིནྣལདྡྷིཀཱནཾ ལདྡྷིབྷེདོ ཛཱཏོ, བུདྡྷཱནུབྷཱཝེན ཏཾ ཙེཏིཡཾ སཀཊྛཱནམེཝ གཏཾ, ཏཏྠེཝ ཏཾཁཎེ མཧནྟཾ པཱསཱཎཙེཏིཡཾ ཨཧོསི. ཏསྨིཾ སམཱགམེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསཱིཏི.

ཀསྶཔདསབལསྶ སུཝཎྞཙེཏིཡཝཏྠུ ནཝམཾ.

སུསུཁཾ ¶ ¶ ¶ ཝཏཱཏི ཨིམཾ དྷམྨདེསནཾ སཏྠཱ སཀྐེསུ ཝིཧརནྟོ ཀལཧཝཱུཔསམནཏྠཾ ཉཱཏཀེ ཨཱརབྦྷ ཀཐེསི.

སཱཀིཡཀོལིཡཱ ཀིར ཀཔིལཝཏྠུནགརསྶ ཙ ཀོལིཡནགརསྶ ཙ ཨནྟརེ རོཧིཎིཾ ནཱམ ནདིཾ ཨེཀེནེཝ ཨཱཝརཎེན བནྡྷཱཔེཏྭཱ སསྶཱནི ཀརོནྟི. ཨཐ ཛེཊྛམཱུལམཱསེ སསྶེསུ མིལཱཡནྟེསུ ཨུབྷཡནགརཝཱསིཀཱནམྤི ཀམྨཀཱརཱ སནྣིཔཏིཾསུ. ཏཏྠ ཀོལིཡནགརཝཱསིནོ ཨཱཧཾསུ – ‘‘ཨིདཾ ཨུདཀཾ ཨུབྷཡཏོ ཧརིཡམཱནཾ ནེཝ ཏུམྷཱཀཾ, ན ཨམྷཱཀཾ པཧོསྶཏི, ཨམྷཱཀཾ པན སསྶཾ ཨེཀཨུདཀེནེཝ ནིཔྥཛྫིསྶཏི, ཨིདཾ ཨུདཀཾ ཨམྷཱཀཾ དེཐཱ’’ཏི. ཨིཏརེཔི ཨཱཧཾསུ – ‘‘ཏུམྷེསུ ཀོཊྛཀེ པཱུརེཏྭཱ ཋིཏེསུ མཡཾ རཏྟསུཝཎྞནཱིལམཎིཀཱལ༹ཀཧཱཔཎེ ཙ གཧེཏྭཱ པཙྪིཔསིབྦཀཱདིཧཏྠཱ ན སཀྑིསྶཱམ ཏུམྷཱཀཾ གྷརདྭཱརེ ཝིཙརིཏུཾ, ཨམྷཱཀམྤི སསྶཾ ཨེཀཨུདཀེནེཝ ¶ ནིཔྥཛྫིསྶཏི, ཨིདཾ ཨུདཀཾ ཨམྷཱཀཾ དེཐཱ’’ཏི. ན མཡཾ དསྶཱམཱཏི. མཡམྤི ན དསྶཱམཱཏི ཨེཝཾ ཀཐཾ ཝཌྜྷེཏྭཱ ཨེཀོ ཨུཊྛཱཡ ཨེཀསྶ པཧཱརཾ ཨདཱསི, སོཔི ཨཉྙསྶཱཏི ཨེཝཾ ཨཉྙམཉྙཾ པཧརིཏྭཱ རཱཛཀུལཱནཾ ཛཱཏིཾ གྷཊྚེཏྭཱ ཀལཧཾ ཝཌྜྷཡིཾསུ.

ཀོལིཡཀམྨཀཱརཱ ཝདནྟི – ‘‘ཏུམྷེ ཀཔིལཝཏྠུཝཱསིཀེ གཧེཏྭཱ གཛྫཐ, ཡེ སོཎསིངྒཱལཱདཡོ ཝིཡ ཨཏྟནོ བྷགིནཱིཧི སདྡྷིཾ སཾཝསིཾསུ, ཨེཏེསཾ ཧཏྠིནོ ཙེཝ ཨསྶཱ ཙ ཕལཀཱཝུདྷཱནི ཙ ཨམྷཱཀཾ ཀིཾ ཀརིསྶནྟཱི’’ཏི. སཱཀིཡཀམྨཀཱརཱཔི ཝདནྟི ‘‘ཏུམྷེ ཨིདཱནི ཀུཊྛིནོ དཱརཀེ གཧེཏྭཱ གཛྫཐ, ཡེ ཨནཱཐཱ ནིགྒཏིཀཱ ཏིརཙྪཱནཱ ཝིཡ ཀོལརུཀྑེ ཝསིཾསུ, ཨེཏེསཾ ཧཏྠིནོ ཙ ཨསྶཱ ཙ ཕལཀཱཝུདྷཱནི ཙ ཨམྷཱཀཾ ཀིཾ ཀརིསྶནྟཱི’’ཏི. ཏེ གནྟྭཱ ཏསྨིཾ ཀམྨེ ནིཡུཏྟཱནཾ ཨམཙྩཱནཾ ཀཐཡིཾསུ, ཨམཙྩཱ རཱཛཀུལཱནཾ ཀཐེསུཾ. ཏཏོ སཱཀིཡཱ ‘‘བྷགིནཱིཧི སདྡྷིཾ སཾཝསིཏཀཱནཾ ཐཱམཉྩ བལཉྩ དསྶེསྶཱམཱ’’ཏི ཡུདྡྷསཛྫཱ ནིཀྑམིཾསུ. ཀོལིཡཱཔི ‘‘ཀོལརུཀྑཝཱསཱིནཾ ཐཱམཉྩ བལཉྩ དསྶེསྶཱམཱ’’ཏི ཡུདྡྷསཛྫཱ ནིཀྑམིཾསུ.

སཏྠཱཔི ¶ ¶ པཙྩཱུསསམཡེ ལོཀཾ ཝོལོཀེནྟོ ཉཱཏཀེ དིསྭཱ ‘‘མཡི ཨགཙྪནྟེ ཨིམེ ནསྶིསྶནྟི, མཡཱ གནྟུཾ ཝཊྚཏཱི’’ཏི ཙིནྟེཏྭཱ ཨེཀཀོཝ ཨཱཀཱསེན གནྟྭཱ རོཧིཎིནདིཡཱ མཛ྄ཛྷེ ཨཱཀཱསེ པལླངྐེན ནིསཱིདི. ཉཱཏཀཱ སཏྠཱརཾ དིསྭཱ ¶ ཨཱཝུདྷཱནི ཚཌྜེཏྭཱ ཝནྡིཾསུ. ཨཐ ནེ སཏྠཱ ཨཱཧ – ‘‘ཀིཾ ཀལཧོ ནཱམེས, མཧཱརཱཛཱ’’ཏི? ‘‘ན ཛཱནཱམ, བྷནྟེ’’ཏི. ‘‘ཀོ དཱནི ཛཱནིསྶཏཱི’’ཏི? ཏེ ‘‘ཨུཔརཱཛཱ ཛཱནིསྶཏི, སེནཱཔཏི ཛཱནིསྶཏཱི’’ཏི ཨིམིནཱ ཨུཔཱཡེན ཡཱཝ དཱསཀམྨཀརེ པུཙྪིཏྭཱ, ‘‘བྷནྟེ, ཨུདཀཀལཧོ’’ཏི ཨཱཧཾསུ. ‘‘ཨུདཀཾ ཀིཾ ཨགྒྷཏི, མཧཱརཱཛཱ’’ཏི? ‘‘ཨཔྤགྒྷཾ, བྷནྟེ’’ཏི. ‘‘ཁཏྟིཡཱ ཀིཾ ཨགྒྷནྟི མཧཱརཱཛཱ’’ཏི? ‘‘ཁཏྟིཡཱ ནཱམ ཨནགྒྷཱ, བྷནྟེ’’ཏི. ‘‘ཨཡུཏྟཾ ཏུམྷཱཀཾ ཨཔྤམཏྟཏཾ ཨུདཀཾ ནིསྶཱཡ ཨནགྒྷེ ཁཏྟིཡེ ནཱསེཏུ’’ནྟི. ཏེ ཏུཎྷཱི ཨཧེསུཾ. ཨཐ ཏེ སཏྠཱ ཨཱམནྟེཏྭཱ ‘‘ཀསྨཱ མཧཱརཱཛཱ ཨེཝརཱུཔཾ ཀརོཐ, མཡི ཨསནྟེ ཨཛྫ ལོཧིཏནདཱི པཝཏྟིསྶཏི, ཨཡུཏྟཾ ཝོ ཀཏཾ, ཏུམྷེ པཉྩཧི ཝེརེཧི སཝེརཱ ཝིཧརཐ, ཨཧཾ ཨཝེརོ ཝིཧརཱམི. ཏུམྷེ ཀིལེསཱཏུརཱ ཧུཏྭཱ ཝིཧརཐ, ཨཧཾ ཨནཱཏུརོ. ཏུམྷེ ཀཱམགུཎཔརིཡེསནུསྶུཀྐཱ ཧུཏྭཱ ཝིཧརཐ, ཨཧཾ ཨནུསྶུཀྐོ ཝིཧརཱམཱི’’ཏི ཝཏྭཱ ཨིམཱ གཱཐཱ ཨབྷཱསི –

‘‘སུསུཁཾ ཝཏ ཛཱིཝཱམ, ཝེརིནེསུ ཨཝེརིནོ,

ཝེརིནེསུ མནུསྶེསུ, ཝིཧརཱམ ཨཝེརིནོ.

‘‘སུསུཁཾ ཝཏ ཛཱིཝཱམ, ཨཱཏུརེསུ ཨནཱཏུརཱ;

ཨཱཏུརེསུ མནུསྶེསུ, ཝིཧརཱམ ཨནཱཏུརཱ.

‘‘སུསུཁཾ ཝཏ ཛཱིཝཱམ, ཨུསྶུཀེསུ ཨནུསྶུཀཱ;

ཨུསྶུཀེསུ མནུསྶེསུ, ཝིཧརཱམ ཨནུསྶུཀཱ’’ཏི.

ཏཏྠ ¶ སུསུཁནྟི སུཊྛུ སུཁཾ. ཨིདཾ ཝུཏྟཾ ཧོཏི – ཡེ གིཧིནོ སནྡྷིཙྪེདཱདིཝསེན, པབྦཛིཏཱ ཝཱ པན ཝེཛྫཀམྨཱདིཝསེན ཛཱིཝིཏཝུཏྟིཾ ཨུཔྤཱདེཏྭཱ ‘‘སུཁེན ཛཱིཝཱམཱ’’ཏི ཝདནྟི, ཏེཧི མཡམེཝ སུསུཁཾ ཝཏ ཛཱིཝཱམ, ཡེ མཡཾ པཉྩཧི ཝེརཱིཧི ཝེརིནེསུ མནུསྶེསུ ཨཝེརིནོ, ཀིལེསཱཏུརེསུ མནུསྶེསུ ནིཀྐིལེསཏཱཡ ཨནཱཏུརཱ, པཉྩཀཱམགུཎཔརིཡེསནེ ཨུསྶུཀེསུ ཏཱཡ པརིཡེསནཱཡ ཨབྷཱཝེན ཨནུསྶུཀཱཏི. སེསཾ ཨུཏྟཱནཏྠམེཝ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སུསུཁཾ ¶ ¶ ཝཏ ཛཱིཝཱམཱཏི ཨིམཾ དྷམྨདེསནཾ སཏྠཱ པཉྩསཱལཱཡ བྲཱཧྨཎགཱམེ ཝིཧརནྟོ མཱརཾ ཨཱརབྦྷ ཀཐེསི.

ཨེཀདིཝསཉྷི སཏྠཱ པཉྩསཏཱནཾ ཀུམཱརིཀཱནཾ སོཏཱཔཏྟིམགྒསྶཱུཔནིསྶཡཾ དིསྭཱ ཏཾ གཱམཾ ཨུཔནིསྶཱཡ ཝིཧཱསི. ཏཱཔི ཀུམཱརིཀཱཡོ ཨེཀསྨིཾ ནཀྑཏྟདིཝསེ ནདིཾ གནྟྭཱ ནྷཏྭཱ ཨལངྐཏཔཊིཡཏྟཱ གཱམཱབྷིམུཁིཡོ པཱཡིཾསུ. སཏྠཱཔི ཏཾ གཱམཾ པཝིསིཏྭཱ པིཎྜཱཡ ཙརཏི. ཨཐ མཱརོ སཀལགཱམཝཱསཱིནཾ སརཱིརེ ཨདྷིམུཙྩིཏྭཱ ¶ ཡཐཱ སཏྠཱ ཀཊཙྪུབྷཏྟམཏྟམྤི ན ལབྷཏི, ཨེཝཾ ཀཏྭཱ ཡཐཱདྷོཏེན པཏྟེན ནིཀྑམནྟཾ སཏྠཱརཾ གཱམདྭཱརེ ཋཏྭཱ ཨཱཧ – ‘‘ཨཔི, སམཎ, པིཎྜཔཱཏཾ ལབྷིཏྠཱ’’ཏི. ‘‘ཀིཾ པན ཏྭཾ, པཱཔིམ, ཏཐཱ ཨཀཱསི, ཡཐཱཧཾ པིཎྜཾ ན ལབྷེཡྻ’’ནྟི? ‘‘ཏེན ཧི, བྷནྟེ, པུན པཝིསཐཱ’’ཏི. ཨེཝཾ ཀིརསྶ ཨཧོསི – ‘‘སཙེ པུན པཝིསཏི, སབྦེསཾ སརཱིརེ ཨདྷིམུཙྩིཏྭཱ ཨིམསྶ པུརཏོ པཱཎིཾ པཧརིཏྭཱ ཧསྶཀེལི༹ཾ ཀརིསྶཱམཱི’’ཏི. ཏསྨིཾ ཁཎེ ཏཱ ཀུམཱརིཀཱཡོ གཱམདྭཱརཾ པཏྭཱ སཏྠཱརཾ དིསྭཱ ཝནྡིཏྭཱ ཨེཀམནྟཾ ཨཊྛཾསུ. མཱརོཔི སཏྠཱརཾ ཨཱཧ – ‘‘ཨཔི, བྷནྟེ, པིཎྜཾ ཨལབྷམཱནཱ ཛིགྷཙྪཱདུཀྑེན པཱིལི༹ཏཏྠཱ’’ཏི. སཏྠཱ ‘‘ཨཛྫ མཡཾ, པཱཔིམ, ཀིཉྩི ཨལབྷིཏྭཱཔི ཨཱབྷསྶརལོཀེ མཧཱབྲཧྨཱནོ ཝིཡ པཱིཏིསུཁེནེཝ ཝཱིཏིནཱམེསྶཱམཱ’’ཏི ཝཏྭཱ ཨིམཾ གཱཐམཱཧ –

‘‘སུསུཁཾ ཝཏ ཛཱིཝཱམ, ཡེསཾ ནོ ནཏྠི ཀིཉྩནཾ;

པཱིཏིབྷཀྑཱ བྷཝིསྶཱམ, དེཝཱ ཨཱབྷསྶརཱ ཡཐཱ’’ཏི.

ཏཏྠ ཡེསཾ ནོཏི ཡེསཾ ཨམྷཱཀཾ པལིབུཛ྄ཛྷནཏྠེན རཱགཱདཱིསུ ཀིཉྩནེསུ ཨེཀམྤི ཀིཉྩནཾ ནཏྠི. པཱིཏིབྷཀྑཱཏི ཡཐཱ ཨཱབྷསྶརཱ དེཝཱ པཱིཏིབྷཀྑཱ ཧུཏྭཱ པཱིཏིསུཁེནེཝ ཝཱིཏིནཱམེནྟི, ཨེཝཾ མཡམྤི, པཱཔིམ, ཀིཉྩི ཨལབྷིཏྭཱ པཱིཏིབྷཀྑཱ བྷཝིསྶཱམཱཏི ཨཏྠོ.

དེསནཱཝསཱནེ ¶ པཉྩསཏཱཔི ཀུམཱརིཀཱཡོ སོཏཱཔཏྟིཕལེ པཏིཊྛཧིཾསཱུཏི.

ཛཡཾ ¶ ¶ ཝེརནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀོསལརཉྙོ པརཱཛཡཾ ཨཱརབྦྷ ཀཐེསི.

སོ ཀིར ཀཱསིཀགཱམཾ ནིསྶཱཡ བྷཱགིནེཡྻེན ཨཛཱཏསཏྟུནཱ སདྡྷིཾ ཡུཛ྄ཛྷནྟོ ཏེན ཏཡོ ཝཱརེ པརཱཛིཏོ ཏཏིཡཝཱརེ ཙིནྟེསི – ‘‘ཨཧཾ ཁཱིརམུཁམྤི དཱརཀཾ པརཱཛེཏུཾ ནཱསཀྑིཾ, ཀིཾ མེ ཛཱིཝིཏེནཱ’’ཏི. སོ ཨཱཧཱརཱུཔཙྪེདཾ ཀཏྭཱ མཉྩཀེ ནིཔཛྫི. ཨཐསྶ སཱ པཝཏྟི སཀལནགརཾ པཏྠརི. བྷིཀྑཱུ ཏཐཱགཏསྶ ཨཱརོཙེསུཾ – ‘‘བྷནྟེ, རཱཛཱ ཀིར ཀཱསིཀགཱམཀཾ ནིསྶཱཡ ཏཡོ ཝཱརེ པརཱཛིཏོ, སོ ཨིདཱནི པརཱཛིཏྭཱ ཨཱགཏོ ‘ཁཱིརམུཁམྤི དཱརཀཾ པརཱཛེཏུཾ ནཱསཀྑིཾ, ཀིཾ མེ ཛཱིཝིཏེནཱ’ཏི ཨཱཧཱརཱུཔཙྪེདཾ ཀཏྭཱ མཉྩཀེ ནིཔནྣོ’’ཏི. སཏྠཱ ཏེསཾ ཀཐཾ སུཏྭཱ, ‘‘བྷིཀྑཝེ, ཛིནནྟོཔི ཝེརཾ པསཝཏི, པརཱཛིཏོ པན དུཀྑཾ སེཏིཡེཝཱ’’ཏི ཝཏྭཱ ཨིམཾ གཱཐམཱཧ –

‘‘ཛཡཾ ཝེརཾ པསཝཏི, དུཀྑཾ སེཏི པརཱཛིཏོ;

ཨུཔསནྟོ སུཁཾ སེཏི, ཧིཏྭཱ ཛཡཔརཱཛཡ’’ནྟི.

ཏཏྠ ཛཡནྟི པརཾ ཛིནནྟོ ཝེརཾ པཊིལབྷཏི. པརཱཛིཏོཏི པརེན པརཱཛིཏོ ‘‘ཀདཱ ནུ ཁོ པཙྩཱམིཏྟསྶ པིཊྛིཾ དཊྛུཾ སཀྑིསྶཱམཱི’’ཏི དུཀྑཾ སེཏི སབྦིརིཡཱཔཐེསུ ¶ དུཀྑམེཝ ཝིཧརཏཱིཏི ཨཏྠོ. ཨུཔསནྟོཏི ཨབྦྷནྟརེ ཨུཔསནྟརཱགཱདིཀིལེསོ ཁཱིཎཱསཝོ ཛཡཉྩ པརཱཛཡཉྩ ཧིཏྭཱ སུཁཾ སེཏི, སབྦིརིཡཱཔཐེསུ སུཁམེཝ ཝིཧརཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ནཏྠི རཱགསམོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ ཀུལདཱརིཀཾ ཨཱརབྦྷ ཀཐེསི.

ཏསྶཱ ¶ ¶ ཀིར མཱཏཱཔིཏརོ ཨཱཝཱཧཾ ཀཏྭཱ མངྒལདིཝསེ སཏྠཱརཾ ནིམནྟཡིཾསུ. སཏྠཱ བྷིཀྑུསངྒྷཔརིཝུཏོ ཏཏྠ གནྟྭཱ ནིསཱིདི. སཱཔི ཁོ ཝདྷུཀཱ བྷིཀྑུསངྒྷསྶ ཨུདཀཔརིསྶཱཝནཱདཱིནི ཀརོནྟཱི ཨཔརཱཔརཾ སཉྩརཏི. སཱམིཀོཔིསྶཱ ཏཾ ཨོལོཀེནྟོ ཨཊྛཱསི. ཏསྶ རཱགཝསེན ཨོལོཀེནྟསྶ ཨནྟོ ཀིལེསོ སམུདཱཙརི. སོ ཨཉྙཱཎཱབྷིབྷཱུཏོ ནེཝ བུདྡྷཾ ཨུཔཊྛཧི, ན ཨསཱིཏི མཧཱཐེརེ. ཧཏྠཾ པསཱརེཏྭཱ ‘‘ཏཾ ཝདྷུཀཾ གཎྷིསྶཱམཱི’’ཏི པན ཙིཏྟཾ ཨཀཱསི. སཏྠཱ ཏསྶཛ྄ཛྷཱསཡཾ ཨོལོཀེཏྭཱ ཡཐཱ ཏཾ ཨིཏྠིཾ ན པསྶཏི, ཨེཝམཀཱསི. སོ ཨདིསྭཱ སཏྠཱརཾ ཨོལོཀེནྟོ ཨཊྛཱསི. སཏྠཱ ཏསྶ ཨོལོཀེཏྭཱ ཋིཏཀཱལེ ‘‘ཀུམཱརཀ, ན ཧི རཱགགྒིནཱ སདིསོ ཨགྒི ནཱམ ¶ , དོསཀལིནཱ སདིསོ ཀལི ནཱམ, ཁནྡྷཔརིཧརཎདུཀྑེན སདིསཾ དུཀྑཾ ནཱམ ཨཏྠི, ནིབྦཱནསུཁསདིསཾ སུཁམྤི ནཏྠིཡེཝཱ’’ཏི ཝཏྭཱ ཨིམཾ གཱཐམཱཧ –

‘‘ནཏྠི རཱགསམོ ཨགྒི, ནཏྠི དོསསམོ ཀལི;

ནཏྠི ཁནྡྷསམཱ དུཀྑཱ, ནཏྠི སནྟིཔརཾ སུཁ’’ནྟི.

ཏཏྠ ནཏྠི རཱགསམོཏི དྷཱུམཾ ཝཱ ཛཱལཾ ཝཱ ཨངྒཱརཾ ཝཱ ཨདསྶེཏྭཱ ཨནྟོཡེཝ ཛྷཱཔེཏྭཱ བྷསྨམུཊྛིཾ ཀཱཏུཾ སམཏྠོ རཱགེན སམོ ཨཉྙོ ཨགྒི ནཱམ ནཏྠི. ཀལཱིཏི དོསེན སམོ ཨཔརཱདྷོཔི ནཏྠི. ཁནྡྷསམཱཏི ཁནྡྷེཧི སམཱ. ཡཐཱ པརིཧརིཡམཱནཱ ཁནྡྷཱ དུཀྑཱ, ཨེཝཾ ཨཉྙཾ དུཀྑཾ ནཱམ ནཏྠི. སནྟིཔརནྟི ནིབྦཱནཏོ ཨུཏྟརིཾ ཨཉྙཾ སུཁམྤི ནཏྠི. ཨཉྙཉྷི སུཁཾ སུཁམེཝ, ནིབྦཱནཾ པརམསུཁནྟི ཨཏྠོ.

དེསནཱཝསཱནེ ཀུམཱརིཀཱ ཙ ཀུམཱརཀོ ཙ སོཏཱཔཏྟིཕལེ པཏིཊྛཧིཾསུ. ཏསྨིཾ སམཡེ བྷགཝཱ ཏེསཾ ཨཉྙམཉྙཾ དསྶནཱཀཱརཾ ཨཀཱསཱིཏི.

ཛིགྷཙྪཱཏི ཨིམཾ དྷམྨདེསནཾ སཏྠཱ ཨཱལ༹ཝིཡཾ ཝིཧརནྟོ ཨེཀཾ ཨུཔཱསཀཾ ཨཱརབྦྷ ཀཐེསི.

ཨེཀསྨིཉྷི ¶ དིཝསེ སཏྠཱ ཛེཏཝནེ གནྡྷཀུཊིཡཾ ནིསིནྣོཝ ¶ པཙྩཱུསཀཱལེ ལོཀཾ ཝོལོཀེནྟོ ¶ ཨཱལ༹ཝིཡཾ ཨེཀཾ དུགྒཏམནུསྶཾ དིསྭཱ ཏསྶཱུཔནིསྶཡསམྤཏྟིཾ ཉཏྭཱ པཉྩསཏབྷིཀྑུཔརིཝཱརོ ཨཱལ༹ཝིཾ ཨགམཱསི. ཨཱལ༹ཝིཝཱསིནོ སཏྠཱརཾ ནིམནྟཡིཾསུ. སོཔི དུགྒཏམནུསྶོ ‘‘སཏྠཱ ཀིར ཨཱགཏོ’’ཏི སུཏྭཱ ‘‘སཏྠུ སནྟིཀེ དྷམྨཾ སོསྶཱམཱི’’ཏི མནཾ ཨཀཱསི. ཏཾདིཝསམེཝ ཙསྶ ཨེཀོ གོཎོ པལཱཡི. སོ ‘‘ཀིཾ ནུ ཁོ གོཎཾ པརིཡེསིསྶཱམི, ཨུདཱཧུ དྷམྨཾ སུཎཱམཱི’’ཏི ཙིནྟེཏྭཱ ‘‘གོཎཾ པརིཡེསིཏྭཱ པཙྪཱ དྷམྨཾ སོསྶཱམཱི’’ཏི པཱཏོཝ གེཧཱ ནིཀྑམི. ཨཱལ༹ཝིཝཱསིནོཔི བུདྡྷཔྤམུཁཾ བྷིཀྑུསངྒྷཾ ནིསཱིདཱཔེཏྭཱ པརིཝིསིཏྭཱ ཨནུམོདནཏྠཱཡ པཏྟཾ གཎྷིཾསུ. སཏྠཱ ‘‘ཡཾ ནིསྶཱཡ ཨཧཾ ཏིཾསཡོཛནམགྒཾ ཨཱགཏོ, སོ གོཎཾ པརིཡེསིཏུཾ ཨརཉྙཾ པཝིཊྛོ, ཏསྨིཾ ཨཱགཏེཡེཝ དྷམྨཾ དེསེསྶཱམཱི’’ཏི ཏུཎྷཱི ཨཧོསི.

སོཔི མནུསྶོ དིཝཱ གོཎཾ དིསྭཱ གོགཎེ པཀྑིཔིཏྭཱ ‘‘སཙེཔི ཨཉྙཾ ནཏྠི, སཏྠུ ཝནྡནམཏྟམྤི ཀརིསྶཱམཱི’’ཏི ཛིགྷཙྪཱཔཱིལི༹ཏོཔི གེཧཾ གམནཱཡ མནཾ ཨཀཏྭཱ ཝེགེན སཏྠུ སནྟིཀཾ ཨཱགནྟྭཱ སཏྠཱརཾ ཝནྡིཏྭཱ ཨེཀམནྟཾ ཨཊྛཱསི. སཏྠཱ ཏསྶ ཋིཏཀཱལེ དཱནཝེཡྻཱཝཊིཀཾ ཨཱཧ – ‘‘ཨཏྠི ཀིཉྩི བྷིཀྑུསངྒྷསྶ ཨཏིརིཏྟབྷཏྟ’’ནྟི? ‘‘བྷནྟེ, སབྦཾ ཨཏྠཱི’’ཏི. ཏེན ཧི ‘‘ཨིམཾ པརིཝིསཱཧཱི’’ཏི. སོ སཏྠཱརཱ ཝུཏྟཊྛཱནེཡེཝ ཏཾ ནིསཱིདཱཔེཏྭཱ ཡཱགུཁཱདནཱིཡབྷོཛནཱིཡེཧི སཀྐཙྩཾ པརིཝིསི. སོ བྷུཏྟབྷཏྟོ མུཁཾ ཝིཀྑཱལེསི. ཋཔེཏྭཱ ཀིར ཨིམཾ ཋཱནཾ ཏཱིསུ པིཊཀེསུ ཨཉྙཏྠ གཏཱགཏསྶ ¶ བྷཏྟཝིཙཱརཎཾ ནཱམ ནཏྠི. ཏསྶ པསྶདྡྷདརཐསྶ ཙིཏྟཾ ཨེཀགྒཾ ཨཧོསི. ཨཐསྶ སཏྠཱ ཨནུཔུབྦིཾ ཀཐཾ ཀཐེཏྭཱ སཙྩཱནི པཀཱསེསི. སོ དེསནཱཝསཱནེ སོཏཱཔཏྟིཕལེ པཏིཊྛཧི. སཏྠཱཔི ཨནུམོདནཾ ཀཏྭཱ ཨུཊྛཱཡཱསནཱ པཀྐཱམི. མཧཱཛནོ སཏྠཱརཾ ཨནུགནྟྭཱ ནིཝཏྟི.

བྷིཀྑཱུ སཏྠཱརཱ སདྡྷིཾ གཙྪནྟཱཡེཝ ཨུཛ྄ཛྷཱཡིཾསུ – ‘‘པསྶཐཱཝུསོ, སཏྠུ ཀམྨཾ, ཨཉྙེསུ དིཝསེསུ ཨེཝརཱུཔཾ ནཏྠི, ཨཛྫ པནེཀཾ མནུསྶཾ དིསྭཱཝ ཡཱགུཨཱདཱིནི ཝིཙཱརེཏྭཱ དཱཔེསཱི’’ཏི. སཏྠཱ ནིཝཏྟིཏྭཱ ཋིཏཀོཝ ‘‘ཀིཾ ཀཐེཐ, བྷིཀྑཝེ’’ཏི པུཙྪིཏྭཱ ཏམཏྠཾ སུཏྭཱ ‘‘ཨཱམ, བྷིཀྑཝེ, ཨཧཾ ཏིཾསཡོཛནཾ ཀནྟཱརཾ ཨཱགཙྪནྟོ ཏསྶ ཨུཔཱསཀསྶཱུཔནིསྶཡཾ དིསྭཱ ཨཱགཏོ, སོ ཨཏིཝིཡ ཛིགྷཙྪིཏོ, པཱཏོཝ པཊྛཱཡ གོཎཾ པརིཡེསནྟོ ¶ ཨརཉྙེ ཝིཙརི. ‘ཛིགྷཙྪདུཀྑེན དྷམྨེ དེསིཡམཱནེཔི པཊིཝིཛ྄ཛྷིཏུཾ ན སཀྑིསྶཏཱི’ཏི ཙིནྟེཏྭཱ ཨེཝཾ ཨཀཱསིཾ, ཛིགྷཙྪཱརོགསདིསོ རོགོ ནཱམ ནཏྠཱི’’ཏི ཝཏྭཱ ཨིམཾ གཱཐམཱཧ –

‘‘ཛིགྷཙྪཱཔརམཱ རོགཱ, སངྑཱརཔརམཱ དུཁཱ;

ཨེཏཾ ཉཏྭཱ ཡཐཱབྷཱུཏཾ, ནིབྦཱནཾ པརམཾ སུཁ’’ནྟི.

ཏཏྠ ¶ ཛིགྷཙྪཱཔརམཱ རོགཱཏི ཡསྨཱ ཨཉྙོ རོགོ སཀིཾ ཏིཀིཙྪིཏོ ཝིནསྶཏི ཝཱ ཏདངྒཝསེན ཝཱ པཧཱིཡཏི ¶ , ཛིགྷཙྪཱ པན ནིཙྩཀཱལཾ ཏིཀིཙྪིཏབྦཱཡེཝཱཏི སེསརོགཱནཾ ཨཡཾ པརམཱ ནཱམ. སངྑཱརཱཏི པཉྩ ཁནྡྷཱ. ཨེཏཾ ཉཏྭཱཏི ཛིགྷཙྪཱསམོ རོགོ ནཏྠི, ཁནྡྷཔརིཧརཎསམཾ དུཀྑཾ ནཱམ ནཏྠཱིཏི ཨེཏམཏྠཾ ཡཐཱབྷཱུཏཾ ཉཏྭཱ པཎྜིཏོ ནིབྦཱནཾ སཙྪི ཀརོཏི. ནིབྦཱནཾ པརམཾ སུཁནྟི ཏཉྷི སབྦསུཁཱནཾ པརམཾ ཨུཏྟམཾ སུཁནྟི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཱརོགྱཔརམཱ ལཱབྷཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ རཱཛཱནཾ པསེནདིཀོསལཾ ཨཱརབྦྷ ཀཐེསི.

ཨེཀསྨིཉྷི སམཡེ རཱཛཱ ཏཎྜུལདོཎསྶ ཨོདནཾ ཏདུཔིཡེན སཱུཔབྱཉྫནེན བྷུཉྫཏི. ཨེཀདིཝསཾ བྷུཏྟཔཱཏརཱསོ བྷཏྟསམྨདཾ ཨཝིནོདེཏྭཱ སཏྠུ སནྟིཀཾ གནྟྭཱ ཀིལནྟརཱུཔོ ཨིཏོ ཙིཏོ ཙ སམྤརིཝཏྟཏི, ནིདྡཱཡ ཨབྷིབྷཱུཡམཱནོཔི ཨུཛུཀཾ ནིཔཛྫིཏུཾ ཨསཀྐོནྟོ ཨེཀམནྟཾ ནིསཱིདི. ཨཐ ནཾ སཏྠཱ ཨཱཧ – ‘‘ཀིཾ, མཧཱརཱཛ, ཨཝིསྶམིཏྭཱཝ ཨཱགཏོསཱི’’ཏི? ‘‘ཨཱམ, བྷནྟེ, བྷུཏྟཀཱལཏོ པཊྛཱཡ མེ མཧཱདུཀྑཾ ཧོཏཱི’’ཏི. ཨཐ ནཾ སཏྠཱ, ‘‘མཧཱརཱཛ ¶ , ཨཏིབཧུབྷོཛནཾ ཨེཝཾ དུཀྑཾ ཧོཏཱི’’ཏི ཝཏྭཱ ཨིམཾ གཱཐམཱཧ –

པུནཔྤུནཾ གབྦྷམུཔེཏི མནྡོ’’ཏི. (དྷ. པ. ༣༢༥); –

ཨིམཱཡ གཱཐཱཡ ཨོཝདིཏྭཱ, ‘‘མཧཱརཱཛ, བྷོཛནཾ ནཱམ མཏྟཱཡ བྷུཉྫིཏུཾ ཝཊྚཏི. མཏྟབྷོཛིནོ ཧི སུཁཾ ཧོཏཱི’’ཏི ཨུཏྟརི ཨོཝདནྟོ ཨིམཾ གཱཐམཱཧ –

སཎིཀཾ ཛཱིརཏི ཨཱཡུཔཱལཡ’’ནྟི. (སཾ. ནི. ༡.༡༢༤);

རཱཛཱ གཱཐཾ ཨུགྒཎྷིཏུཾ ནཱསཀྑི, སམཱིཔེ ཋིཏཾ པན བྷཱགིནེཡྻཾ, སུདསྶནཾ ནཱམ མཱཎཝཾ ‘‘ཨིམཾ གཱཐཾ ཨུགྒཎྷ, ཏཱཏཱ’’ཏི ཨཱཧ. སོ ཏཾ གཱཐཾ ཨུགྒཎྷིཏྭཱ ‘‘ཀིཾ ཀརོམི, བྷནྟེ’’ཏི སཏྠཱརཾ པུཙྪི. ཨཐ ནཾ སཏྠཱ ཨཱཧ – ‘‘རཉྙོ བྷུཉྫནྟསྶ ཨོསཱནཔིཎྜཀཱལེ ཨིམཾ གཱཐཾ ཝདེཡྻཱསི, རཱཛཱ ཨཏྠཾ སལླཀྑེཏྭཱ ཡཾ པིཎྜཾ ཚཌྜེསྶཏི, ཏསྨིཾ པིཎྜེ སིཏྠགཎནཱཡ རཉྙོ བྷཏྟཔཙནཀཱལེ ཏཏྟཀེ ཏཎྜུལེ ཧརེཡྻཱསཱི’’ཏི. སོ ‘‘སཱདྷུ, བྷནྟེ’’ཏི སཱཡམྤི པཱཏོཔི རཉྙོ བྷུཉྫནྟསྶ ཨོསཱནཔིཎྜཀཱལེ ཏཾ གཱཐཾ ཨུདཱཧརིཏྭཱ ཏེན ཚཌྜིཏཔིཎྜེ སིཏྠགཎནཱཡ ཏཎྜུལེ ཧཱཔེསི. རཱཛཱཔི ཏསྶ གཱཐཾ སུཏྭཱ སཧསྶཾ སཧསྶཾ དཱཔེསི ¶ . སོ ཨཔརེན སམཡེན ནཱལི༹ཀོདནཔརམཏཱཡ སཎྛཧིཏྭཱ སུཁཔྤཏྟོ ཏནུསརཱིརོ ཨཧོསི.

ཨཐེཀདིཝསཾ སཏྠུ སནྟིཀཾ གནྟྭཱ སཏྠཱརཾ ཝནྡིཏྭཱ ཨཱཧ – ‘‘བྷནྟེ, ཨིདཱནི མེ སུཁཾ ཛཱཏཾ, མིགམྤི ཨསྶམྤི ཨནུབནྡྷིཏྭཱ གཎྷནསམཏྠོ ཛཱཏོམྷི. པུབྦེ མེ བྷཱགིནེཡྻེན སདྡྷིཾ ཡུདྡྷམེཝ ཧོཏི, ཨིདཱནི ཝཛཱིརཀུམཱརིཾ ནཱམ དྷཱིཏརཾ བྷཱགིནེཡྻསྶ དཏྭཱ སོ གཱམོ ཏསྶཱཡེཝ ནྷཱནཙུཎྞམཱུལཾ ཀཏྭཱ དིནྣོ, ཏེན སདྡྷིཾ ཝིགྒཧོ ཝཱུཔསནྟོ, ཨིམིནཱཔི མེ ཀཱརཎེན སུཁམེཝ ཛཱཏཾ. ཀུལསནྟཀཾ རཱཛམཎིརཏནཾ ནོ གེཧེ པུརིམདིཝསེ ¶ ནཊྛཾ, ཏམྤི ཨིདཱནི ཧཏྠཔཏྟཾ ཨཱགཏཾ, ཨིམིནཱཔི མེ ཀཱརཎེན སུཁམེཝ ཛཱཏཾ. ཏུམྷཱཀཾ སཱཝཀེཧི སདྡྷིཾ ཝིསྶཱསཾ ཨིཙྪནྟེན ཉཱཏིདྷཱིཏཱཔི ནོ གེཧེ ཀཏཱ, ཨིམིནཱཔི མེ ཀཱརཎེན སུཁམེཝ ཛཱཏ’’ནྟི. སཏྠཱ ‘‘ཨཱརོགྱཾ ནཱམ, མཧཱརཱཛ, པརམོ ལཱབྷོ, ཡཐཱལདྡྷེན སནྟུཊྛབྷཱཝསདིསམྤི དྷནཾ, ཝིསྶཱསསདིསོ ཙ པརམཱ ཉཱཏི, ནིབྦཱནསདིསཉྩ སུཁཾ ནཱམ ནཏྠཱི’’ཏི ཝཏྭཱ ཨིམཾ གཱཐམཱཧ –

‘‘ཨཱརོགྱཔརམཱ ལཱབྷཱ, སནྟུཊྛིཔརམཾ དྷནཾ;

ཝིསྶཱསཔརམཱ ཉཱཏི, ནིབྦཱནཔརམཾ སུཁ’’ནྟི.

ཏཏྠ ¶ ཨཱརོགྱཔརམཱ ལཱབྷཱཏི ཨརོགབྷཱཝཔརམཱ ལཱབྷཱ. རོགིནོ ཧི ཝིཛྫམཱནཱཔི ལཱབྷཱ ཨལཱབྷཱཡེཝ, ཏསྨཱ ཨརོགསྶ སབྦལཱབྷཱ ཨཱགཏཱཝ ཧོནྟི. ཏེནེཏཾ ཝུཏྟཾ – ‘‘ཨཱརོགྱཔརམཱ ལཱབྷཱ’’ཏི. སནྟུཊྛིཔརམཾ དྷནནྟི གིཧིནོ ཝཱ པབྦཛིཏསྶ ཝཱ ཡཾ ཨཏྟནཱ ལདྡྷཾ ¶ ཨཏྟནོ སནྟཀཾ, ཏེནེཝ ཏུསྶནབྷཱཝོ སནྟུཊྛཱི ནཱམ སེསདྷནེཧི པརམཾ དྷནཾ. ཝིསྶཱསཔརམཱ ཉཱཏཱིཏི མཱཏཱ ཝཱ ཧོཏུ པིཏཱ ཝཱ, ཡེན སདྡྷིཾ ཝིསྶཱསོ ནཏྠི, སོ ཨཉྙཱཏཀོཝ. ཡེན ཨཉྙཱཏཀེན པན སདྡྷིཾ ཝིསྶཱསོ ཨཏྠི, སོ ཨསམྦནྡྷོཔི པརམོ ཨུཏྟམོ ཉཱཏི. ཏེན ཝུཏྟཾ – ‘‘ཝིསྶཱསཔརམཱ ཉཱཏཱི’’ཏི. ནིབྦཱནསདིསཾ པན སུཁཾ ནཱམ ནཏྠི, ཏེནེཝཱཧ – ནིབྦཱནཔརམཾ སུཁནྟི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པཝིཝེཀརསནྟི ཨིམཾ དྷམྨདེསནཾ སཏྠཱ ཝེསཱལིཡཾ ཝིཧརནྟོ ཨཉྙཏརཾ བྷིཀྑུཾ ཨཱརབྦྷ ཀཐེསི.

སཏྠཱརཱ ཧི, ‘‘བྷིཀྑཝེ, ཨཧཾ ཨིཏོ ཙཏཱུཧི མཱསེཧི པརིནིབྦཱཡིསྶཱམཱི’’ཏི ཝུཏྟེ སཏྠུ སནྟིཀེ སཏྟ བྷིཀྑུསཏཱནི སནྟཱསཾ ཨཱཔཛྫིཾསུ, ཁཱིཎཱསཝཱནཾ ¶ དྷམྨསཾཝེགོ ཨུཔྤཛྫི, པུཐུཛྫནཱ ཨསྶཱུནི སནྡྷཱརེཏུཾ ནཱསཀྑིཾསུ. བྷིཀྑཱུ ¶ ཝགྒཱ ཝགྒཱ ཧུཏྭཱ ‘‘ཀིཾ ནུ ཁོ ཀརིསྶཱམཱ’’ཏི མནྟེནྟཱ ཝིཙརནྟི. ཨཐེཀོ ཏིསྶཏྠེརོ ནཱམ བྷིཀྑཱུ ‘‘སཏྠཱ ཀིར ཙཏུམཱསཙྩཡེན པརིནིབྦཱཡིསྶཏི, ཨཧཉྩམྷི ཨཝཱིཏརཱགོ, སཏྠརི དྷརམཱནེཡེཝ མཡཱ ཨརཧཏྟཾ གཎྷིཏུཾ ཝཊྚཏཱི’’ཏི ཙཏཱུསུ ཨིརིཡཱཔཐེསུ ཨེཀཀོཝ ཝིཧཱསི. བྷིཀྑཱུནཾ སནྟིཀེ གམནཾ ཝཱ ཀེནཙི སདྡྷིཾ ཀཐཱསལླཱཔོ ཝཱ ནཏྠི. ཨཐ ནཾ བྷིཀྑཱུ ཨཱཧཾསུ – ‘‘ཨཱཝུསོ, ཏིསྶ ཏསྨཱ ཨེཝཾ ཀརོསཱི’’ཏི. སོ ཏེསཾ ཀཐཾ ན སུཎཱཏི. ཏེ ཏསྶ པཝཏྟིཾ སཏྠུ ཨཱརོཙེཏྭཱ, ‘‘བྷནྟེ, ཏུམྷེསུ ཏིསྶཏྠེརསྶ སིནེཧོ ནཏྠཱི’’ཏི ཨཱཧཾསུ. སཏྠཱ ཏཾ པཀྐོསཱཔེཏྭཱ ‘‘ཀསྨཱ ཏིསྶ ཨེཝཾ ཨཀཱསཱི’’ཏི པུཙྪིཏྭཱ ཏེན ཨཏྟནོ ཨདྷིཔྤཱཡེ ཨཱརོཙིཏེ ‘‘སཱདྷུ, ཏིསྶཱ’’ཏི སཱདྷུཀཱརཾ དཏྭཱ, ‘‘བྷིཀྑཝེ, མཡི སིནེཧོ ཏིསྶསདིསོཝ ཧོཏུ. གནྡྷམཱལཱདཱིཧི པཱུཛཾ ཀརོནྟཱཔི ནེཝ མཾ པཱུཛེནྟི, དྷམྨཱནུདྷམྨཾ པཊིཔཛྫམཱནཱཡེཝ པན མཾ པཱུཛེནྟཱི’’ཏི ཝཏྭཱ ཨིམཾ གཱཐམཱཧ –

‘‘པཝིཝེཀརསཾ པིཏྭཱ, རསཾ ཨུཔསམསྶ ཙ;

ནིདྡརོ ཧོཏི ནིཔྤཱཔོ, དྷམྨཔཱིཏིརསཾ པིཝ’’ནྟི.

ཏཏྠ ¶ པཝིཝེཀརསནྟི པཝིཝེཀཏོ ཨུཔྤནྣཾ རསཾ, ཨེཀཱིབྷཱཝསུཁནྟི ཨཏྠོ. པིཏྭཱཏི དུཀྑཔརིཉྙཱདཱིནི ཀརོནྟོ ཨཱརམྨཎཏོ སཙྪིཀིརིཡཱཝསེན པིཝིཏྭཱ. ཨུཔསམསྶ ¶ ཙཱཏི ཀིལེསཱུཔསམནིབྦཱནསྶ ཙ རསཾ པིཏྭཱ. ནིདྡརོ ཧོཏཱིཏི ཏེན ཨུབྷཡརསཔཱནེན ཁཱིཎཱསཝོ བྷིཀྑུ ཨབྦྷནྟརེ རཱགདརཐཱདཱིནཾ ཨབྷཱཝེན ནིདྡརོ ཙེཝ ནིཔྤཱཔོ ཙ ཧོཏི. རསཾ པིཝནྟི ནཝཝིདྷལོཀུཏྟརདྷམྨཝསེན ཨུཔྤནྣཾ པཱིཏིརསཾ པིཝནྟོཔི ནིདྡརོ ནིཔྤཱཔོ ཙ ཧོཏི.

དེསནཱཝསཱནེ ཏིསྶཏྠེརོ ཨརཧཏྟཾ པཱཔུཎི, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

སཱཧུ ¶ དསྶནནྟི ཨིམཾ དྷམྨདེསནཾ སཏྠཱ ཝེལུ༹ཝགཱམཀེ ཝིཧརནྟོ སཀྐཾ ཨཱརབྦྷ ཀཐེསི.

ཏཐཱགཏསྶ ཧི ཨཱཡུསངྑཱརེ ཝིསྶཊྛེ ལོཧིཏཔཀྑནྡིཀཱབཱདྷསྶ ཨུཔྤནྣབྷཱཝཾ ཉཏྭཱ སཀྐོ དེཝརཱཛཱ ‘‘མཡཱ སཏྠུ སནྟིཀཾ གནྟྭཱ གིལཱནུཔཊྛཱནཾ ཀཱཏུཾ ཝཊྚཏཱི’’ཏི ཙིནྟེཏྭཱ ཏིགཱཝུཏཔྤམཱཎཾ ཨཏྟབྷཱཝཾ ཝིཛཧིཏྭཱ སཏྠཱརཾ ཨུཔསངྐམིཏྭཱ ཧཏྠེཧི པཱདེ པརིམཛྫི. ཨཐ ནཾ སཏྠཱ ཨཱཧ ‘‘ཀོ ཨེསོ’’ཏི? ‘‘ཨཧཾ, བྷནྟེ, སཀྐོ’’ཏི. ‘‘ཀསྨཱ ཨཱགཏོསཱི’’ཏི? ‘‘ཏུམྷེ གིལཱནེ ཨུཔཊྛཧིཏུཾ, བྷནྟེ’’ཏི. ‘‘སཀྐ, དེཝཱནཾ མནུསྶགནྡྷོ ཡོཛནསཏཏོ པཊྛཱཡ གལེ བདྡྷཀུཎཔཾ ཝིཡ ཧོཏི ¶ , གཙྪ ཏྭཾ, ཨཏྠི མེ གིལཱནུཔཊྛཀཱ བྷིཀྑཱུ’’ཏི. ‘‘བྷནྟེ, ཙཏུརཱསཱིཏིཡོཛནསཧསྶམཏྠཀེ ཋིཏོ ཏུམྷཱཀཾ སཱིལགནྡྷཾ གྷཱཡིཏྭཱ ཨཱགཏོ, ཨཧམེཝ ཨུཔཊྛཧིསྶཱམཱི’’ཏི སོ སཏྠུ སརཱིརཝལ༹ཉྫནབྷཱཛནཾ ཨཉྙསྶ ཧཏྠེནཱཔི ཕུསིཏུཾ ཨདཏྭཱ སཱིསེཡེཝ ཋཔེཏྭཱ ནཱིཧརནྟོ མུཁསངྐོཙནམཏྟམྤི ན ཨཀཱསི, གནྡྷབྷཱཛནཾ པརིཧརནྟོ ཝིཡ ཨཧོསི. ཨེཝཾ སཏྠཱརཾ པཊིཛགྒིཏྭཱ སཏྠུ ཕཱསུཀཀཱལེཡེཝ ཨགམཱསི.

བྷིཀྑཱུ ཀཐཾ སམུཊྛཱཔེསུཾ ‘‘ཨཧོ སཏྠརི སཀྐསྶ སིནེཧོ, ཨེཝརཱུཔཾ ནཱམ དིབྦསམྤཏྟིཾ པཧཱཡ མུཁསངྐོཙནམཏྟམྤི ཨཀཏྭཱ གནྡྷབྷཱཛནཾ ནཱིཧརནྟོ ཝིཡ སཏྠུ སརཱིརཝལ༹ཉྫནབྷཱཛནཾ སཱིསེན ནཱིཧརནྟོ ཨུཔཊྛཱནམཀཱསཱི’’ཏི. སཏྠཱ ཏེསཾ ཀཐཾ སུཏྭཱ ཀིཾ ཝདེཐ, བྷིཀྑཝེ, ཨནཙྪརིཡཾ ཨེཏཾ, ཡཾ སཀྐོ དེཝརཱཛཱ མཡི སིནེཧཾ ཀརོཏི. ཨཡཾ སཀྐོ ཧི དེཝརཱཛཱ མཾ ནིསྶཱཡ ཛརསཀྐབྷཱཝཾ ཝིཛཧིཏྭཱ སོཏཱཔནྣོ ཧུཏྭཱ ཏརུཎསཀྐསྶ བྷཱཝཾ པཏྟོ, ཨཧཾ ཧིསྶ ¶ མརཎབྷཡཏཛྫིཏསྶ པཉྩསིཁགནྡྷབྦདེཝཔུཏྟཾ པུརཏོ ཀཏྭཱ ཨཱགཏཀཱལེ ཨིནྡསཱལགུཧཱཡཾ དེཝཔརིསཱཡ མཛ྄ཛྷེ ནིསིནྣསྶ –

‘‘པུཙྪ ཝཱསཝ མཾ པཉྷཾ, ཡཾ ཀིཉྩི མནསིཙྪསི;

ཏསྶ ཏསྶེཝ པཉྷསྶ, ཨཧཾ ཨནྟཾ ཀརོམི ཏེ’’ཏི. (དཱི. ནི. ༢.༣༥༦) –

ཝཏྭཱ ¶ ཏསྶ ཀངྑཾ ཝིནོདེནྟོ དྷམྨཾ དེསེསིཾ. དེསནཱཝསཱནེ ཙུདྡསནྣཾ པཱཎཀོཊཱིནཾ དྷམྨཱབྷིསམཡོ ཨཧོསི, སཀྐོཔི ཡཐཱནིསིནྣོཝ སོཏཱཔཏྟིཕལཾ པཏྭཱ ཏརུཎསཀྐོ ཛཱཏོ. ཨེཝམསྶཱཧཾ བཧཱུཔཀཱརོ. ཏསྶ མཡི སིནེཧོ ནཱམ ཨནཙྪརིཡོ. བྷིཀྑཝེ, ཨརིཡཱནཉྷི དསྶནམྤི ¶ སུཁཾ, ཏེཧི སདྡྷིཾ ཨེཀཊྛཱནེ སནྣིཝཱསོཔི སུཁོ. བཱལེཧི སདྡྷིཾ པན སབྦམེཏཾ དུཀྑནྟི ཝཏྭཱ ཨིམཱ གཱཐཱ ཨབྷཱསི –

‘‘སཱཧུ དསྶནམརིཡཱནཾ, སནྣིཝཱསོ སདཱ སུཁོ;

ཨདསྶནེན བཱལཱནཾ, ནིཙྩམེཝ སུཁཱི སིཡཱ.

‘‘བཱལསངྒཏཙཱརཱི ཧི, དཱིགྷམདྡྷཱན སོཙཏི;

དུཀྑོ བཱལེཧི སཾཝཱསོ, ཨམིཏྟེནེཝ སབྦདཱ;

དྷཱིརོ ཙ སུཁསཾཝཱསོ, ཉཱཏཱིནཾཝ སམཱགམོ’’.

‘‘དྷཱིརཉྩ པཉྙཉྩ བཧུསྶུཏཉྩ,དྷོརཡ྄ཧསཱིལཾ ཝཏཝནྟམརིཡཾ;

ཏཾ ཏཱདིསཾ སཔྤུརིསཾ སུམེདྷཾ,བྷཛེཐ ནཀྑཏྟཔཐཾ ཝ ཙནྡིམཱ’’ཏི.

ཏཏྠ སཱཧཱུཏི སུནྡརཾ བྷདྡཀཾ. སནྣིཝཱསོཏི ན ཀེཝལཉྩ ཏེསཾ དསྶནམེཝ, ཏེཧི སདྡྷིཾ ཨེཀཊྛཱནེ ནིསཱིདནཱདིབྷཱཝོཔི ཏེསཾ ཝཏྟཔཊིཝཏྟཾ ཀཱཏུཾ ལབྷནབྷཱཝོཔི སཱདྷུཡེཝ. བཱལསངྒཏཙཱརཱི ཧཱིཏི ཡོ བཱལེན སཧཙཱརཱི. དཱིགྷམདྡྷཱནནྟི སོ བཱལསཧཱཡེན ‘‘ཨེཧི སནྡྷིཙྪེདཱདཱིནི ཀརོམཱ’’ཏི ཝུཙྩམཱནོ ཏེན སདྡྷིཾ ཨེཀཙྪནྡོ ཧུཏྭཱ ཏཱནི ཀརོནྟོ ཧཏྠཙྪེདཱདཱིནི པཏྭཱ དཱིགྷམདྡྷཱནཾ སོཙཏི. སབྦདཱཏི ཡཐཱ ཨསིཧཏྠེན ཝཱ ཨམིཏྟེན ཨཱསཱིཝིསཱདཱིཧི ཝཱ སདྡྷིཾ ཨེཀཏོ ¶ ཝཱསོ ནཱམ ནིཙྩཾ དུཀྑོ, ཏཐེཝ བཱལེཧི སདྡྷིནྟི ཨཏྠོ. དྷཱིརོ ཙ སུཁསཾཝཱསོཏི ཨེཏྠ ¶ སུཁོ སཾཝཱསོ ཨེཏེནཱཏི སུཁསཾཝཱསོ, པཎྜིཏེན སདྡྷིཾ ཨེཀཊྛཱནེ སཾཝཱསོ སུཁོཏི ཨཏྠོ. ཀཐཾ? ཉཱཏཱིནཾཝ སམཱགམོཏི ཡཐཱཔི ཉཱཏཱིནཾ སམཱགམོ སུཁོ, ཨེཝཾ སུཁོ.

ཏསྨཱ ཧཱིཏི ཡསྨཱ བཱལེཧི སདྡྷིཾ སཾཝཱསོ དུཀྑོ, པཎྜིཏེན སདྡྷིཾ སུཁོ, ཏསྨཱ ཧི དྷིཏིསམྤནྣཾ དྷཱིརཉྩ, ལོཀིཡལོཀུཏྟརཔཉྙཱསམྤནྣཾ པཉྙཉྩ ¶ , ཨཱགམཱདྷིགམསམྤནྣཾ བཧུསྶུཏཉྩ, ཨརཧཏྟཔཱཔནཀསངྑཱཏཱཡ དྷུརཝཧནསཱིལཏཱཡ དྷོརཡ྄ཧསཱིལཾ, སཱིལཝཏེན ཙེཝ དྷུཏངྒཝཏེན ཙ ཝཏཝནྟཾ, ཀིལེསེཧི ཨཱརཀཏཱཡ ཨརིཡཾ, ཏཐཱརཱུཔཾ སཔྤུརིསཾ སོབྷནཔཉྷཾ ཡཐཱ ནིམྨལཾ ནཀྑཏྟཔཐསངྑཱཏཾ ཨཱཀཱསཾ ཙནྡིམཱ བྷཛཏི, ཨེཝཾ བྷཛེཐ པཡིརུཔཱསེཐཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཡོགེཏི ¶ ¶ ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏཡོ པབྦཛིཏེ ཨཱརབྦྷ ཀཐེསི.

སཱཝཏྠིཡཾ ཀིར ཨེཀསྨིཾ ཀུལེ མཱཏཱཔིཏཱུནཾ ཨེཀཔུཏྟཀོ ཨཧོསི པིཡོ མནཱཔོ. སོ ཨེཀདིཝསཾ གེཧེ ནིམནྟིཏཱནཾ བྷིཀྑཱུནཾ ཨནུམོདནཾ ཀརོནྟཱནཾ དྷམྨཀཐཾ སུཏྭཱ པབྦཛིཏུཀཱམོ ཧུཏྭཱ མཱཏཱཔིཏརོ པབྦཛྫཾ ཡཱཙི. ཏེ ནཱནུཛཱནིཾསུ. ཏསྶ ཨེཏདཧོསི – ‘‘ཨཧཾ མཱཏཱཔིཏཱུནཾ ཨཔསྶནྟཱནཾཡེཝ བཧི གནྟྭཱ པབྦཛིསྶཱམཱི’’ཏི. ཨཐསྶ པིཏཱ བཧི ནིཀྑམནྟོ ‘‘ཨིམཾ རཀྑེཡྻཱསཱི’’ཏི མཱཏརཾ པཊིཙྪཱཔེསི, མཱཏཱ བཧི ནིཀྑམནྟཱི པིཏརཾ པཊིཙྪཱཔེསི. ཨཐསྶ ཨེཀདིཝསཾ པིཏརི བཧི གཏེ མཱཏཱ ‘‘པུཏྟཾ རཀྑིསྶཱམཱི’’ཏི ཨེཀཾ དྭཱརབཱཧཾ ནིསྶཱཡ ཨེཀཾ པཱདེཧི ཨུཔྤཱིལེ༹ཏྭཱ ཚམཱཡ ནིསིནྣཱ སུཏྟཾ ཀནྟཏི. སོ ‘‘ཨིམཾ ཝཉྩེཏྭཱ གམིསྶཱམཱི’’ཏི ཙིནྟེཏྭཱ, ‘‘ཨམྨ, ཐོཀཾ ཏཱཝ ཨཔེཧི, སརཱིརཝལཉྫཾ ཀརིསྶཱམཱི’’ཏི ཝཏྭཱ ཏཱཡ པཱདེ སམིཉྫིཏེ ནིཀྑམིཏྭཱ ཝེགེན ཝིཧཱརཾ གནྟྭཱ བྷིཀྑཱུ ཨུཔསངྐམིཏྭཱ ‘‘པབྦཱཛེཐ མཾ, བྷནྟེ’’ཏི ¶ ཡཱཙིཏྭཱ ཏེསཾ སནྟིཀེ པབྦཛི.

ཨཐསྶ པིཏཱ ཨཱགནྟྭཱ མཱཏརཾ པུཙྪི – ‘‘ཀཧཾ མེ པུཏྟོ’’ཏི? ‘‘སཱམི, ཨིམསྨིཾ པདེསེ ཨཧོསཱི’’ཏི. སོ ‘‘ཀཧཾ ནུ ཁོ མེ པུཏྟོ’’ཏི ཨོལོཀེནྟོ ཏཾ ཨདིསྭཱ ‘‘ཝིཧཱརཾ གཏོ བྷཝིསྶཏཱི’’ཏི ཝིཧཱརཾ གནྟྭཱ པུཏྟཾ པབྦཛིཏཾ དིསྭཱ ཀནྡིཏྭཱ རོདིཏྭཱ, ‘‘ཏཱཏ, ཀིཾ མཾ ནཱསེསཱི’’ཏི ཝཏྭཱ ‘‘མམ པུཏྟེ པབྦཛིཏེ ཨཧཾ ཨིདཱནི གེཧེ ཀིཾ ཀརིསྶཱམཱི’’ཏི སཡམྤི བྷིཀྑཱུ ཡཱཙིཏྭཱ པབྦཛི. ཨཐསྶ མཱཏཱཔི ‘‘ཀིཾ ནུ ཁོ མེ པུཏྟོ ཙ པཏི ཙ ཙིརཱཡནྟི, ཀཙྩི ཝིཧཱརཾ གནྟྭཱ པབྦཛིཏཱ’’ཏི ཏེ ཨོལོཀེནྟཱི ཝིཧཱརཾ གནྟྭཱ ཨུབྷོཔི པབྦཛིཏེ དིསྭཱ ‘‘ཨིམེསཾ པབྦཛིཏཀཱལེ མམ གེཧེན ཀོ ཨཏྠོ’’ཏི སཡམྤི བྷིཀྑུནིཨུཔསྶཡཾ གནྟྭཱ པབྦཛི. ཏེ པབྦཛིཏྭཱཔི ཝིནཱ བྷཝིཏུཾ ན སཀྐོནྟི, ཝིཧཱརེཔི བྷིཀྑུནིཨུཔསྶཡེཔི ཨེཀཏོཝ ནིསཱིདིཏྭཱ སལླཔནྟཱ དིཝསཾ ཝཱིཏིནཱམེནྟི. ཏེན བྷིཀྑཱུཔི བྷིཀྑཱུནིཡོཔི ཨུབྦཱལ༹ྷཱ ཧོནྟི.

ཨཐེཀདིཝསཾ ¶ ¶ བྷིཀྑཱུ ནེསཾ ཀིརིཡཾ སཏྠུཾ ཨཱརོཙེསུཾ. སཏྠཱ ཏེ པཀྐོསཱཔེཏྭཱ ‘‘སཙྩཾ ཀིར ཏུམྷེ ཨེཝཾ ཀརོཐཱ’’ཏི པུཙྪིཏྭཱ ‘‘སཙྩ’’ནྟི ཝུཏྟེ ‘‘ཀསྨཱ ཨེཝཾ ཀརོཐ? ན ཧི ཨེས པབྦཛིཏཱནཾ ཡོགོ’’ཏི. ‘‘བྷནྟེ, ཝིནཱ བྷཝིཏུཾ ན སཀྐོམཱ’’ཏི. ‘‘པབྦཛིཏཀཱལཏོ པཊྛཱཡ ཨེཝཾ ཀརཎཾ ཨཡུཏྟཾ. པིཡཱནཉྷི ཨདསྶནཾ, ཨཔྤིཡཱནཉྩ དསྶནཾ དུཀྑམེཝ. ཏསྨཱ སཏྟེསུ ཙ སངྑཱརེསུ ཙ ཀཉྩི པིཡཾ ཝཱ ཨཔྤིཡཾ ཝཱ ཀཱཏུཾ ན ཝཊྚཏཱི’’ཏི ཝཏྭཱ ཨིམཱ གཱཐཱ ཨབྷཱསི –

‘‘ཨཡོགེ ཡུཉྫམཏྟཱནཾ, ཡོགསྨིཉྩ ཨཡོཛཡཾ;

ཨཏྠཾ ཧིཏྭཱ པིཡགྒཱཧཱི, པིཧེཏཏྟཱནུཡོགིནཾ.

‘‘མཱ ¶ པིཡེཧི སམཱགཉྪི, ཨཔྤིཡེཧི ཀུདཱཙནཾ;

པིཡཱནཾ ཨདསྶནཾ དུཀྑཾ, ཨཔྤིཡཱནཉྩ དསྶནཾ.

‘‘ཏསྨཱ པིཡཾ ན ཀཡིརཱཐ, པིཡཱཔཱཡོ ཧི པཱཔཀོ;

གནྠཱ ཏེསཾ ན ཝིཛྫནྟི, ཡེསཾ ནཏྠི པིཡཱཔྤིཡ’’ནྟི.

ཏཏྠ ཨཡོགེཏི ཨཡུཉྫིཏབྦེ ཨཡོནིསོམནསིཀཱརེ. ཝེསིཡཱགོཙརཱདིབྷེདསྶ ཧི ཚབྦིདྷསྶ ཨགོཙརསྶ སེཝནཾ ཨིདྷ ཨཡོནིསོམནསིཀཱརོ ནཱམ, ཏསྨིཾ ཨཡོནིསོམནསིཀཱརེ ཨཏྟཱནཾ ཡུཉྫནྟོཏི ཨཏྠོ. ཡོགསྨིནྟི ཏབྦིཔརཱིཏེ ཙ ཡོནིསོམནསིཀཱརེ ཨཡུཉྫནྟོཏི ཨཏྠོ. ཨཏྠཾ ཧིཏྭཱཏི པབྦཛིཏཀཱལཏོ པཊྛཱཡ ཨདྷིསཱིལཱདིསིཀྑཏྟཡཾ ཨཏྠོ ནཱམ, ཏཾ ཨཏྠཾ ཧིཏྭཱ. པིཡགྒཱཧཱིཏི པཉྩཀཱམགུཎསངྑཱཏཾ པིཡམེཝ གཎྷནྟོ. པིཧེཏཏྟཱནུཡོགིནནྟི ཏཱཡ པཊིཔཏྟིཡཱ སཱསནཏོ ཙུཏོ གིཧིབྷཱཝཾ པཏྭཱ པཙྪཱ ཡེ ཨཏྟཱནུཡོགཾ ཨནུཡུཏྟཱ སཱིལཱདཱིནི སམྤཱདེཏྭཱ དེཝམནུསྶཱནཾ སནྟིཀཱ སཀྐཱརཾ ལབྷནྟི, ཏེསཾ པིཧེཏི, ‘‘ཨཧོ ཝཏཱཧམྤི ཨེཝརཱུཔོ ཨསྶ’’ནྟི ཨིཙྪཏཱིཏི ཨཏྠོ.

མཱ པིཡེཧཱིཏི པིཡེཧི སཏྟེཧི ཝཱ སངྑཱརེཧི ཝཱ ཀུདཱཙནཾ ཨེཀཀྑཎེཔི ན སམཱགཙྪེཡྻ, ཏཐཱ ཨཔྤིཡེཧི. ཀིཾ ཀཱརཎཱ? པིཡཱ ནཉྷི ཝིཡོགཝསེན ཨདསྶནཾ ཨཔྤིཡཱནཉྩ ཨུཔསངྐམནཝསེན དསྶནཾ ནཱམ དུཀྑཾ. ཏསྨཱཏི ཡསྨཱ ཨིདཾ ཨུབྷཡམྤི དུཀྑཾ, ཏསྨཱ ཀཉྩི སཏྟཾ ཝཱ སངྑཱརཾ ཝཱ པིཡཾ ནཱམ ན ཀརེཡྻ. པིཡཱཔཱཡོ ཧཱིཏི པིཡེཧི ¶ ཨཔཱཡོ ཝིཡོགོ ¶ . པཱཔཀོཏི ལཱམཀོ. གནྠཱ ཏེསཾ ན ཝིཛྫནྟཱིཏི ཡེསཾ པིཡཾ ནཏྠི, ཏེསཾ ཨབྷིཛ྄ཛྷཱཀཱཡགནྠོ ¶ པཧཱིཡཏི. ཡེསཾ ཨཔྤིཡཾ ནཏྠི, ཏེསཾ བྱཱཔཱདོ ཀཱཡགནྠོ. ཏེསུ པན དྭཱིསུ པཧཱིནེསུ སེསགནྠཱ པཧཱིནཱ ཧོནྟི. ཏསྨཱ པིཡཾ ཝཱ ཨཔྤིཡཾ ཝཱ ན ཀཏྟབྦནྟི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི. ཏེན པན ཏཡོ ཛནཱ ‘‘མཡཾ ཝིནཱ བྷཝིཏུཾ ན སཀྐོམཱ’’ཏི ཝིབྦྷམིཏྭཱ གེཧམེཝ ཨགམིཾསཱུཏི.

པིཡཏོ ཛཱཡཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ ཀུཊུམྦིཀཾ ཨཱརབྦྷ ཀཐེསི.

སོ ཧི ཨཏྟནོ པུཏྟེ ཀཱལཀཏེ པུཏྟསོཀཱབྷིབྷཱུཏོ ཨཱལཱ༹ཧནཾ གནྟྭཱ རོདཏི, པུཏྟསོཀཾ སནྡྷཱརེཏུཾ ན སཀྐོཏི. སཏྠཱ པཙྩཱུསཀཱལེ ལོཀཾ ཝོལོཀེནྟོ ཏསྶ སོཏཱཔཏྟིམགྒསྶཱུཔནིསྶཡཾ དིསྭཱ པིཎྜཔཱཏཔཊིཀྐནྟོ ཨེཀཾ པཙྪཱསམཎཾ གཧེཏྭཱ ཏསྶ གེཧདྭཱརཾ ཨགམཱསི. སོ སཏྠུ ཨཱགཏབྷཱཝཾ སུཏྭཱ ‘‘མཡཱ སདྡྷིཾ པཊིསནྠཱརཾ ཀཱཏུཀཱམོ བྷཝིསྶཏཱི’’ཏི སཏྠཱརཾ པཝེསེཏྭཱ གེཧམཛ྄ཛྷེ ཨཱསནཾ པཉྙཱཔེཏྭཱ སཏྠརི ནིསིནྣེ ཨཱགནྟྭཱ ཨེཀམནྟཾ ནིསཱིདི. ཨཐ ནཾ སཏྠཱ ‘‘ཀིཾ ནུ ཁོ, ཨུཔཱསཀ, དུཀྑིཏོསཱི’’ཏི པུཙྪིཏྭཱ ཏེན པུཏྟཝིཡོགདུཀྑེ ཨཱརོཙིཏེ, ‘‘ཨུཔཱསཀ, མཱ ཙིནྟཡི, ཨིདཾ མརཎཾ ནཱམ ན ཨེཀསྨིཾཡེཝ ¶ ཋཱནེ, ན ཙ ཨེཀསྶེཝ ཧོཏི, ཡཱཝཏཱ པན བྷཝུཔྤཏྟི ནཱམ ཨཏྠི, སབྦསཏྟཱནཾ ཧོཏིཡེཝ. ཨེཀསངྑཱརོཔི ནིཙྩོ ནཱམ ནཏྠི. ཏསྨཱ ‘མརཎདྷམྨཾ མཏཾ, བྷིཛྫནདྷམྨཾ བྷིནྣ’ནྟི ཡོནིསོ པཙྩཝེཀྑིཏབྦཾ, ན སོཙིཏབྦཾ. པོརཱཎཔཎྜིཏཱཔི ཧི པུཏྟསྶ མཏཀཱལེ ‘མརཎདྷམྨཾ མཏཾ, བྷིཛྫནདྷམྨཾ བྷིནྣ’ནྟི སོཀཾ ཨཀཏྭཱ མརཎསྶཏིམེཝ བྷཱཝཡིཾསཱུ’’ཏི ཝཏྭཱ, ‘‘བྷནྟེ, ཀེ ཨེཝམཀཾསུ, ཀདཱ ཙ ཨཀཾསུ, ཨཱཙིཀྑཐ མེ’’ཏི ཡཱཙིཏོ ཏསྶཏྠསྶ པཀཱསནཏྠཾ ཨཏཱིཏཾ ཨཱཧརིཏྭཱ –

‘‘ཨུརགོཝ ¶ ཏཙཾ ཛིཎྞཾ, ཧིཏྭཱ གཙྪཏི སཾ ཏནུཾ;

ཨེཝཾ སརཱིརེ ནིབྦྷོགེ, པེཏེ ཀཱལཀཏེ སཏི.

‘‘ཌཡ྄ཧམཱནོ ¶ ན ཛཱནཱཏི, ཉཱཏཱིནཾ པརིདེཝིཏཾ;

ཏསྨཱ ཨེཏཾ ན སོཙཱམི, གཏོ སོ ཏསྶ ཡཱ གཏཱི’’ཏི. (ཛཱ. ༡.༥.༡༩-༢༠) –

ཨིམཾ པཉྩཀནིཔཱཏེ ཨུརགཛཱཏཀཾ ཝིཏྠཱརེཏྭཱ ‘‘ཨེཝཾ པུབྦེ པཎྜིཏཱ པིཡཔུཏྟེ ཀཱལཀཏེ ཡཐཱ ཨེཏརཧི ཏྭཾ ཀམྨནྟེ ཝིསྶཛྫེཏྭཱ ནིརཱཧཱརོ རོདནྟོ ཝིཙརསི, ཏཐཱ ཨཝིཙརིཏྭཱ མརཎསྶཏིབྷཱཝནཱབལེན སོཀཾ ཨཀཏྭཱ ཨཱཧཱརཾ པརིབྷུཉྫིཾསུ, ཀམྨནྟཉྩ ཨདྷིཊྛཧིཾསུ ¶ . ཏསྨཱ ‘པིཡཔུཏྟོ མེ ཀཱལཀཏོ’ཏི མཱ ཙིནྟཡི. ཨུཔྤཛྫམཱནོ ཧི སོཀོ ཝཱ བྷཡཾ ཝཱ པིཡམེཝ ནིསྶཱཡ ཨུཔྤཛྫཏཱི’’ཏི ཝཏྭཱ ཨིམཾ གཱཐམཱཧ –

‘‘པིཡཏོ ཛཱཡཏཱི སོཀོ, པིཡཏོ ཛཱཡཏཱི བྷཡཾ;

པིཡཏོ ཝིཔྤམུཏྟསྶ, ནཏྠི སོཀོ ཀུཏོ བྷཡ’’ནྟི.

ཏཏྠ པིཡཏོཏི ཝཊྚམཱུལཀོ ཧི སོཀོ ཝཱ བྷཡཾ ཝཱ ཨུཔྤཛྫམཱནཾ པིཡམེཝ སཏྟཾ ཝཱ སངྑཱརཾ ཝཱ ནིསྶཱཡ ཨུཔྤཛྫཏི, ཏཏོ པན ཝིཔྤམུཏྟསྶ ཨུབྷཡམྤེཏཾ ནཏྠཱིཏི ཨཏྠོ.

དེསནཱཝསཱནེ ཀུཊུམྦིཀོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

པེམཏོ ཛཱཡཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཝིསཱཁཾ ཨུཔཱསིཀཾ ཨཱརབྦྷ ཀཐེསི.

སཱ ཀིར པུཏྟསྶ དྷཱིཏརཾ སུདཏྟཾ ནཱམ ཀུམཱརིཀཾ ཨཏྟནོ ཋཱནེ ཋཔེཏྭཱ གེཧེ བྷིཀྑུསངྒྷསྶ ཝེཡྻཱཝཙྩཾ ཀཱརེསི. སཱ ཨཔརེན སམཡེན ཀཱལམཀཱསི. སཱ ཏསྶཱ སརཱིརནིཀྑེཔཾ ཀཱརེཏྭཱ སོཀཾ སནྡྷཱརེཏུཾ ཨསཀྐོནྟཱི དུཀྑིནཱི དུམྨནཱ སཏྠུ སནྟིཀཾ གནྟྭཱ ཝནྡིཏྭཱ ཨེཀམནྟཾ ¶ ནིསཱིདི. ཨཐ ནཾ སཏྠཱ ‘‘ཀིཾ ནུ ཁོ ཏྭཾ, ཝིསཱཁེ, དུཀྑིནཱི དུམྨནཱ ཨསྶུམུཁཱ ¶ རོདམཱནཱ ནིསིནྣཱ’’ཏི ¶ ཨཱཧ. སཱ ཏམཏྠཾ ཨཱརོཙེཏྭཱ ‘‘པིཡཱ མེ, བྷནྟེ, སཱ ཀུམཱརིཀཱ ཝཏྟསམྤནྣཱ, ཨིདཱནི ཏཐཱརཱུཔཾ ན པསྶཱམཱི’’ཏི ཨཱཧ. ‘‘ཀིཏྟཀཱ པན, ཝིསཱཁེ, སཱཝཏྠིཡཾ མནུསྶཱ’’ཏི? ‘‘བྷནྟེ, ཏུམྷེཧིཡེཝ མེ ཀཐིཏཾ སཏྟ ཛནཀོཊིཡོ’’ཏི. ‘‘སཙེ པནཱཡཾ ཨེཏྟཀོ ཛནོ ཏཝ ནཏྟཱཡ སདིསོ བྷཝེཡྻ, ཨིཙྪེཡྻཱསི ན’’ནྟི? ‘‘ཨཱམ, བྷནྟེ’’ཏི. ‘‘ཀཏི པན ཛནཱ སཱཝཏྠིཡཾ དེཝསིཀཾ ཀཱལཾ ཀརོནྟཱི’’ཏི? ‘‘བཧཱུ, བྷནྟེ’’ཏི. ‘‘ནནུ ཨེཝཾ, བྷནྟེ, ཏཝ ཨསོཙནཀཱལོ ན བྷཝེཡྻ, རཏྟིནྡིཝཾ རོདནྟཱིཡེཝ ཝིཙརེཡྻཱསཱི’’ཏི. ‘‘ཧོཏུ, བྷནྟེ, ཉཱཏཾ མཡཱ’’ཏི. ཨཐ ནཾ སཏྠཱ ‘‘ཏེན ཧི མཱ སོཙི, སོཀོ ཝཱ བྷཡཾ ཝཱ པེམཏོཝ ཛཱཡཏཱི’’ཏི ཝཏྭཱ ཨིམཾ གཱཐམཱཧ –

‘‘པེམཏོ ཛཱཡཏཱི སོཀོ, པེམཏོ ཛཱཡཏཱི བྷཡཾ;

པེམཏོ ཝིཔྤམུཏྟསྶ, ནཏྠི སོཀོ ཀུཏོ བྷཡ’’ནྟི.

ཏཏྠ པེམཏོཏི པུཏྟདྷཱིཏཱདཱིསུ ཀཏཾ པེམམེཝ ནིསྶཱཡ སོཀོ ཛཱཡཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

རཏིཡཱ ཛཱཡཏཱིཏི ཨིམཾ དྷམྨདེསནཾ སཏྠཱ ཝེསཱལིཾ ནིསྶཱཡ ཀཱུཊཱགཱརསཱལཱཡཾ ཝིཧརནྟོ ལིཙྪཝཱི ཨཱརབྦྷ ཀཐེསི.

ཏེ ¶ ཀིར ཨེཀསྨིཾ ཚཎདིཝསེ ཨཉྙམཉྙཾ ཨསདིསེཧི ཨལངྐཱརེཧི ཨལངྐརིཏྭཱ ཨུཡྻཱནགམནཏྠཱཡ ནགརཱ ནིཀྑམིཾསུ. སཏྠཱ པིཎྜཱཡ པཝིསནྟོ ཏེ དིསྭཱ བྷིཀྑཱུ ཨཱམནྟེསི – ‘‘པསྶཐ, བྷིཀྑཝེ, ལིཙྪཝཡོ, ཡེཧི དེཝཱ ཏཱཝཏིཾསཱ ན དིཊྛཔུབྦཱ, ཏེ ཨིམེ ཨོལོཀེནྟཱུ’’ཏི ཝཏྭཱ ནགརཾ པཱཝིསི. ཏེཔི ཨུཡྻཱནཾ གཙྪནྟཱ ཨེཀཾ ནགརསོབྷིནིཾ ཨིཏྠིཾ ཨཱདཱཡ གནྟྭཱ ཏཾ ནིསྶཱཡ ཨིསྶཱབྷིབྷཱུཏཱ ཨཉྙམཉྙཾ པཧརིཏྭཱ ལོཧིཏཾ ¶ ནདིཾ ཝིཡ པཝཏྟཡིཾསུ. ཨཐ ནེ མཉྩེནཱདཱཡ ཨུཀྑིཔིཏྭཱ ཨཱགམཾསུ. སཏྠཱཔི ཀཏབྷཏྟཀིཙྩོ ནགརཱ ནིཀྑམི. བྷིཀྑཱུཔི ལིཙྪཝཡོ ཏཐཱ ནཱིཡམཱནེ དིསྭཱ སཏྠཱརཾ ཨཱཧཾསུ – ‘‘བྷནྟེ, ལིཙྪཝིརཱཛཱནོ ¶ པཱཏོཝ ཨལངྐཏཔཊིཡཏྟཱ དེཝཱ ཝིཡ ནགརཱ ནིཀྑམིཏྭཱ ཨིདཱནི ཨེཀཾ ཨིཏྠིཾ ནིསྶཱཡ ཨིམཾ བྱསནཾ པཏྟཱ’’ཏི. སཏྠཱ, ‘‘བྷིཀྑཝེ, སོཀོ ཝཱ བྷཡཾ ཝཱ ཨུཔྤཛྫམཱནཾ རཏིཾ ནིསྶཱཡ ཨུཔྤཛྫཏིཡེཝཱ’’ཏི ཝཏྭཱ ཨིམཾ གཱཐམཱཧ –

‘‘རཏིཡཱ ཛཱཡཏཱི སོཀོ, རཏིཡཱ ཛཱཡཏཱི བྷཡཾ;

རཏིཡཱ ཝིཔྤམུཏྟསྶ, ནཏྠི སོཀོ ཀུཏོ བྷཡ’’ནྟི.

ཏཏྠ རཏིཡཱཏི པཉྩཀཱམགུཎརཏིཏོ, ཏཾ ནིསྶཱཡཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཀཱམཏོཏི ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨནིཏྠིགནྡྷཀུམཱརཾ ནཱམ ཨཱརབྦྷ ཀཐེསི.

སོ ཀིར བྲཧྨལོཀཱ ཙུཏསཏྟོ སཱཝཏྠིཡཾ མཧཱབྷོགཀུལེ ནིབྦཏྟོ ཛཱཏདིཝསཏོ པཊྛཱཡ ཨིཏྠིསམཱིཔཾ ཨུཔགནྟུཾ ན ཨིཙྪཏི, ཨིཏྠིཡཱ གཡ྄ཧམཱནོ རོདཏི. ཝཏྠཙུམྦཊཀེན ནཾ གཧེཏྭཱ ཐཉྙཾ པཱཡེནྟི. སོ ཝཡཔྤཏྟོ མཱཏཱཔིཏཱུཧི, ‘‘ཏཱཏ, ཨཱཝཱཧཾ ཏེ ཀརིསྶཱམཱ’’ཏི ཝུཏྟེ ‘‘ན མེ ཨིཏྠིཡཱ ཨཏྠོ’’ཏི པཊིཀྑིཔིཏྭཱ པུནཔྤུནཾ ཡཱཙིཡམཱནོ པཉྩསཏེ སུཝཎྞཀཱརེ པཀྐོསཱཔེཏྭཱ རཏྟསུཝཎྞནིཀྑསཧསྶཾ དཱཔེཏྭཱ ཨཏིཝིཡ པཱསཱདིཀཾ གྷནཀོཊྚིམཾ ཨིཏྠིརཱུཔཾ ཀཱརེཏྭཱ པུན མཱཏཱཔིཏཱུཧི, ‘‘ཏཱཏ, ཏཡི ཨཱཝཱཧཾ ཨཀརོནྟེ ཀུལཝཾསོ ན པཏིཊྛཧིསྶཏི, ཀུམཱརིཀཾ ཏེ ཨཱནེསྶཱམཱ’’ཏི ཝུཏྟེ ‘‘ཏེན ཧི སཙེ མེ ཨེཝརཱུཔཾ ཀུམཱརིཀཾ ཨཱནེསྶཐ, ཀརིསྶཱམི ཝོ ཝཙན’’ནྟི ཏཾ སུཝཎྞརཱུཔཀཾ དསྶེཏི. ཨཐསྶ མཱཏཱཔིཏརོ ཨབྷིཉྙཱཏེ བྲཱཧྨཎེ པཀྐོསཱཔེཏྭཱ ‘‘ཨམྷཱཀཾ པུཏྟོ མཧཱཔུཉྙོ, ཨཝསྶཾ ཨིམིནཱ སདྡྷིཾ ཀཏཔུཉྙཱ ¶ ཀུམཱརིཀཱ བྷཝིསྶཏི, གཙྪཐ ཨིམཾ སུཝཎྞརཱུཔཀཾ གཧེཏྭཱ ཨེཝརཱུཔཾ ཀུམཱརིཀཾ ཨཱཧརཐཱ’’ཏི པཧིཎིཾསུ. ཏེ ‘‘སཱདྷཱུ’’ཏི ཙཱརིཀཾ ཙརནྟཱ མདྡརཊྛེ སཱགལནགརཾ གཏཱ. ཏསྨིཉྩ ནགརེ ཨེཀཱ སོལ༹སཝསྶུདྡེསིཀཱ ཨབྷིརཱུཔཱ ཀུམཱརིཀཱ ཨཧོསི, ཏཾ མཱཏཱཔིཏརོ སཏྟབྷཱུམིཀསྶ པཱསཱདསྶཱུཔརིམཏལེ ¶ ¶ པརིཝཱསེསུཾ. ཏེཔི ཁོ བྲཱཧྨཎཱ ‘‘སཙེ ཨིདྷ ཨེཝརཱུཔཱ ཀུམཱརིཀཱ བྷཝིསྶཏི, ཨིམཾ དིསྭཱ ‘ཨཡཾ ཨསུཀསྶ ཀུལསྶ དྷཱིཏཱ ཝིཡ ཨབྷིརཱུཔཱ’ཏི ཝཀྑནྟཱི’’ཏི ཏཾ སུཝཎྞརཱུཔཀཾ ཏིཏྠམགྒེ ཋཔེཏྭཱ ཨེཀམནྟཾ ནིསཱིདིཾསུ.

ཨཐསྶ ཀུམཱརིཀཱཡ དྷཱཏཱི ཏཾ ཀུམཱརིཀཾ ནྷཱཔེཏྭཱ སཡམྤི ནྷཱཡིཏུཀཱམཱ ཧུཏྭཱ ཏིཏྠཾ ཨཱགཏཱ ཏཾ རཱུཔཀཾ དིསྭཱ ‘‘དྷཱིཏཱ མེ’’ཏི སཉྙཱཡ ‘‘དུབྦིནཱིཏཱསི, ཨིདཱནེཝཱཧཾ ནྷཱཔེཏྭཱ ནིཀྑནྟཱ, ཏྭཾ མཡཱ པུརེཏརཾ ཨིདྷཱགཏཱསཱི’’ཏི ཧཏྠེན པཧརིཏྭཱ ཐདྡྷབྷཱཝཉྩེཝ ནིབྦིཀཱརཏཉྩ ཉཏྭཱ ‘‘ཨཧཾ མེ, དྷཱིཏཱཏི སཉྙམཀཱསིཾ, ཀིཾ ནཱམེཏ’’ནྟི ཨཱཧ. ཨཐ ནཾ ཏེ བྲཱཧྨཎཱ ‘‘ཨེཝརཱུཔཱ ཏེ, ཨམྨ, དྷཱིཏཱ’’ཏི པུཙྪིཾསུ. ཨཡཾ མམ དྷཱིཏུ སནྟིཀེ ཀིཾ ཨགྒྷཏཱིཏི? ཏེན ཧི ཏེ དྷཱིཏརཾ ཨམྷཱཀཾ དསྶེཧཱིཏི. སཱ ཏེཧི སདྡྷིཾ གེཧཾ གནྟྭཱ སཱམིཀཱནཾ ཨཱརོཙེསི. ཏེ བྲཱཧྨཎེཧི སདྡྷིཾ ཀཏཔཊིསམྨོདནཱ དྷཱིཏརཾ ཨོཏཱརེཏྭཱ ཧེཊྛཱཔཱསཱདེ སུཝཎྞརཱུཔཀསྶ སནྟིཀེ ཋཔེསུཾ. སུཝཎྞརཱུཔཀཾ ནིཔྤབྷཾ ཨཧོསི, ཀུམཱརིཀཱ སཔྤབྷཱ ཨཧོསི. བྲཱཧྨཎཱ ཏཾ ཏེསཾ དཏྭཱ ཀུམཱརིཀཾ པཊིཙྪཱཔེཏྭཱ གནྟྭཱ ཨནིཏྠིགནྡྷཀུམཱརསྶ མཱཏཱཔིཏཱུནཾ ཨཱརོཙཡིཾསུ. ཏེ ཏུཊྛམཱནསཱ ‘‘གཙྪཐ, ནཾ སཱིགྷཾ ཨཱནེཐཱ’’ཏི མཧནྟེན སཀྐཱརེན པཧིཎིཾསུ.

ཀུམཱརོཔི ཏཾ པཝཏྟིཾ སུཏྭཱ ‘‘ཀཉྩནརཱུཔཏོཔི ཀིར ཨབྷིརཱུཔཏརཱ དཱརིཀཱ ཨཏྠཱི’’ཏི སཝནཝསེནེཝ སིནེཧཾ ཨུཔྤཱདེཏྭཱ ‘‘སཱིགྷཾ ཨཱནེནྟཱུ’’ཏི ¶ ཨཱཧ. སཱཔི ཁོ ཡཱནཾ ཨཱརོཔེཏྭཱ ཨཱནཱིཡམཱནཱ ཨཏིསུཁུམཱལཏཱཡ ཡཱནུགྒྷཱཏེན སམུཔྤཱདིཏཝཱཏརོགཱ ཨནྟརཱམགྒེཡེཝ ཀཱལམཀཱསི. ཀུམཱརོཔི ‘‘ཨཱགཏཱ’’ཏི ནིརནྟརཾ པུཙྪཏི, ཏསྶ ཨཏིསིནེཧེན པུཙྪནྟསྶ སཧསཱཝ ཨནཱརོཙེཏྭཱ ཀཏིཔཱཧཾ ཝིཀྑེཔཾ ཀཏྭཱ ཏམཏྠཾ ཨཱརོཙཡིཾསུ. སོ ‘‘ཏཐཱརཱུཔཱཡ ནཱམ ཨིཏྠིཡཱ སདྡྷིཾ སམཱགམཾ ནཱལཏྠ’’ནྟི ཨུཔྤནྣདོམནསྶོ པབྦཏེན ཝིཡ སོཀདུཀྑེན ཨཛ྄ཛྷོཏྠཊོ ¶ ཨཧོསི. སཏྠཱ ཏསྶཱུཔནིསྶཡཾ དིསྭཱ པིཎྜཱཡ ཙརནྟོ ཏཾ གེཧདྭཱརཾ ཨགམཱསི. ཨཐསྶ མཱཏཱཔིཏརོ སཏྠཱརཾ ཨནྟོགེཧཾ པཝེསེཏྭཱ སཀྐཙྩཾ པརིཝིསིཾསུ. སཏྠཱ བྷཏྟཀིཙྩཱཝསཱནེ ‘‘ཀཧཾ ཨནིཏྠིགནྡྷཀུམཱརོ’’ཏི པུཙྪི. ‘‘ཨེསོ, བྷནྟེ, ཨཱཧཱརཱུཔཙྪེདཾ ཀཏྭཱ ཨནྟོགབྦྷེ ནིསིནྣོ’’ཏི. ‘‘པཀྐོསཐ ན’’ནྟི. སོ ཨཱགནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདི. སཏྠཱ ‘‘ཀིཾ ནུ ཁོ, ཀུམཱར, བལཝསོཀོ ཨུཔྤནྣོ’’ཏི ཝུཏྟེ, ‘‘ཨཱམ, བྷནྟེ, ‘ཨེཝརཱུཔཱ ནཱམ ཨིཏྠཱི ཨནྟརཱམགྒེ ཀཱལཀཏཱ’ཏི སུཏྭཱ བལཝསོཀོ ཨུཔྤནྣོ, བྷཏྟམྤི མེ ནཙྪཱདེཏཱི’’ཏི. ཨཐ ནཾ སཏྠཱ ‘‘ཛཱནཱསི པན ཏྭཾ, ཀུམཱར, ཀིཾ ཏེ ནིསྶཱཡ སོཀོ ཨུཔྤནྣོ’’ཏི? ‘‘ན ཛཱནཱམི, བྷནྟེ’’ཏི. ‘‘ཀཱམཾ ནིསྶཱཡ, ཀུམཱར, བལཝསོཀོ ཨུཔྤནྣོ, སོཀོ ཝཱ བྷཡཾ ཝཱ ཀཱམཾ ནིསྶཱཡ ཨུཔྤཛྫཏཱི’’ཏི ཝཏྭཱ ཨིམཾ གཱཐམཱཧ –

‘‘ཀཱམཏོ ¶ ཛཱཡཏཱི སོཀོ, ཀཱམཏོ ཛཱཡཏཱི བྷཡཾ;

ཀཱམཏོ ཝིཔྤམུཏྟསྶ, ནཏྠི སོཀོ ཀུཏོ བྷཡ’’ནྟི.

ཏཏྠ ¶ ཀཱམཏོཏི ཝཏྠུཀཱམཀིལེསཀཱམཏོ, དུཝིདྷམྤེཏཾ ཀཱམཾ ནིསྶཱཡཱཏི ཨཏྠོ.

དེསནཱཝསཱནེ ཨནིཏྠིགནྡྷཀུམཱརོ སོཏཱཔཏྟིཕལེ པཏིཊྛཧི.

ཏཎྷཱཡ ཛཱཡཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ བྲཱཧྨཎཾ ཨཱརབྦྷ ཀཐེསི.

སོ ཀིར མིཙྪཱདིཊྛིཀོ ཨེཀདིཝསཾ ནདཱིཏཱིརཾ གནྟྭཱ ཁེཏྟཾ སོདྷེཏི. སཏྠཱ ཏསྶ ཨུཔནིསྶཡསམྤཏྟིཾ དིསྭཱ ཏསྶ སནྟིཀཾ ཨགམཱསི. སོ སཏྠཱརཾ དིསྭཱཔི སཱམཱིཙིཀམྨཾ ཨཀཏྭཱ ཏུཎྷཱི ཨཧོསི. ཨཐ ནཾ སཏྠཱ པུརེཏརཾ ཨཱལཔིཏྭཱ, ‘‘བྲཱཧྨཎ, ཀིཾ ཀརོསཱི’’ཏི ཨཱཧ. ‘‘ཁེཏྟཾ, བྷོ གོཏམ, སོདྷེམཱི’’ཏི. སཏྠཱ ཨེཏྟཀམེཝ ཝཏྭཱ གཏོ. པུནདིཝསེཔི ཏསྶ ཁེཏྟཾ ཀསིཏུཾ ཨཱགཏསྶ སནྟིཀཾ གནྟྭཱ, ‘‘བྲཱཧྨཎ, ཀིཾ ཀརོསཱི’’ཏི པུཙྪིཏྭཱ ‘‘ཁེཏྟཾ ཀསཱམི, བྷོ གོཏམཱ’’ཏི སུཏྭཱ པཀྐཱམི. པུནདིཝསཱདཱིསུཔི ཏཐེཝ གནྟྭཱ པུཙྪིཏྭཱ, ‘‘བྷོ གོཏམ, ཁེཏྟཾ ཝཔཱམི ནིདྡེམི རཀྑཱམཱི’’ཏི ¶ སུཏྭཱ པཀྐཱམི. ཨཐ ནཾ ཨེཀདིཝསཾ བྲཱཧྨཎོ ཨཱཧ – ‘‘བྷོ གོཏམ, ཏྭཾ མམ ཁེཏྟསོདྷནདིཝསཏོ པཊྛཱཡ ཨཱགཏོ. སཙེ མེ སསྶཾ སམྤཛྫིསྶཏི, ཏུཡ྄ཧམྤི སཾཝིབྷཱགཾ ཀརིསྶཱམི, ཏུཡ྄ཧཾ ཨདཏྭཱ སཡཾ ན ཁཱདིསྶཱམི, ཨིཏོ དཱནི པཊྛཱཡ ཏྭཾ མམ སཧཱཡོ’’ཏི.

ཨཐསྶ ཨཔརེན སམཡེན སསྶཾ སམྤཛྫི ¶ , ཏསྶ ‘‘སམྤནྣཾ མེ སསྶཾ, སྭེ དཱནི ལཱཡཱཔེསྶཱམཱི’’ཏི ལཱཡནཏྠཾ ཀཏྟབྦཀིཙྩསྶ རཏྟིཾ མཧཱམེགྷོ ཝསྶིཏྭཱ སབྦཾ སསྶཾ ཧརི, ཁེཏྟཾ ཏཙྪེཏྭཱ ཋཔིཏསདིསཾ ཨཧོསི. སཏྠཱ པན པཋམདིཝསཾཡེཝ ‘‘ཏཾ སསྶཾ ན སམྤཛྫིསྶཏཱི’’ཏི ཨཉྙཱསི. བྲཱཧྨཎོ པཱཏོཝ ‘‘ཁེཏྟཾ ཨོལོཀེསྶཱམཱི’’ཏི གཏོ ཏུཙྪཾ ཁེཏྟཾ དིསྭཱ ཨུཔྤནྣབལཝསོཀོ ཙིནྟེསི – ‘‘སམཎོ གོཏམོ མམ ཁེཏྟསོདྷནཀཱལཏོ པཊྛཱཡ ཨཱགཏོ ¶ , ཨཧམྤི ནཾ ‘ཨིམསྨིཾ སསྶེ ནིཔྥནྣེ ཏུཡ྄ཧམྤི སཾཝིབྷཱགཾ ཀརིསྶཱམི, ཏུཡ྄ཧཾ ཨདཏྭཱ སཡཾ ན ཁཱདིསྶཱམི, ཨིཏོ པཊྛཱཡ དཱནི ཏྭཾ མམ སཧཱཡོ’ཏི ཨཝཙཾ. སོཔི མེ མནོརཐོ མཏྠཀཾ ན པཱཔུཎཱི’’ཏི ཨཱཧཱརཱུཔཙྪེདཾ ཀཏྭཱ མཉྩཀེ ནིཔཛྫི. ཨཐསྶ སཏྠཱ གེཧདྭཱརཾ ཨགམཱསི. སོ སཏྠུ ཨཱགམནཾ སུཏྭཱ ‘‘སཧཱཡཾ མེ ཨཱནེཏྭཱ ཨིདྷ ནིསཱིདཱཔེཐཱ’’ཏི ཨཱཧ. པརིཛནོ ཏཐཱ ཨཀཱསི. སཏྠཱ ནིསཱིདིཏྭཱ ‘‘ཀཧཾ བྲཱཧྨཎོ’’ཏི པུཙྪིཏྭཱ ‘‘གབྦྷེ ནིཔནྣོ’’ཏི ཝུཏྟེ ‘‘པཀྐོསཐ ན’’ནྟི པཀྐོསཱཔེཏྭཱ ཨཱགནྟྭཱ ཨེཀམནྟཾ ནིསིནྣཾ ཨཱཧ ‘‘ཀིཾ, བྲཱཧྨཎཱ’’ཏི? བྷོ གོཏམ, ཏུམྷེ མམ ཁེཏྟསོདྷནདིཝསཏོ པཊྛཱཡ ཨཱགཏཱ, ཨཧམྤི ‘‘སསྶེ ནིཔྥནྣེ ཏུམྷཱཀཾ སཾཝིབྷཱགཾ ཀརིསྶཱམཱི’’ཏི ཨཝཙཾ. སོ མེ མནོརཐོ ཨནིཔྥནྣོ, ཏེན མེ སོཀོ ཨུཔྤནྣོ, བྷཏྟམྤི མེ ནཙྪཱདེཏཱིཏི. ཨཐ ནཾ སཏྠཱ ‘‘ཛཱནཱསི པན, བྲཱཧྨཎ, ཀིཾ ཏེ ནིསྶཱཡ སོཀོ ཨུཔྤནྣོ’’ཏི པུཙྪིཏྭཱ ‘‘ན ཛཱནཱམི, བྷོ གོཏམ, ཏྭཾ པན ཛཱནཱསཱི’’ཏི ཝུཏྟེ, ‘‘ཨཱམ, བྲཱཧྨཎ, ཨུཔྤཛྫམཱནོ སོཀོ ཝཱ བྷཡཾ ཝཱ ཏཎྷཾ ནིསྶཱཡ ཨུཔྤཛྫཏཱི’’ཏི ཝཏྭཱ ཨིམཾ གཱཐམཱཧ –

‘‘ཏཎྷཱཡ ¶ ཛཱཡཏཱི སོཀོ, ཏཎྷཱཡ ཛཱཡཏཱི བྷཡཾ;

ཏཎྷཱཡ ཝིཔྤམུཏྟསྶ, ནཏྠི སོཀོ ཀུཏོ བྷཡ’’ནྟི.

ཏཏྠ ཏཎྷཱཡཱཏི ཚདྭཱརིཀཱཡ ཏཎྷཱཡ, ཨེཏཾ ཏཎྷཾ ནིསྶཱཡ ཨུཔྤཛྫཏཱིཏི ཨཏྠོ.

དེསནཱཝསཱནེ བྲཱཧྨཎོ སོཏཱཔཏྟིཕལེ པཏིཊྛཧཱིཏི.

སཱིལདསྶནསམྤནྣནྟི ¶ ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨནྟརཱམགྒེ པཉྩསཏདཱརཀེ ཨཱརབྦྷ ཀཐེསི.

ཨེཀདིཝསཉྷི སཏྠཱ ཨསཱིཏིམཧཱཐེརེཧི སདྡྷིཾ པཉྩསཏབྷིཀྑུཔརིཝཱརོ རཱཛགཧཾ པིཎྜཱཡ པཝིསནྟོ ཨེཀསྨིཾ ཚཎདིཝསེ པཉྩསཏེ དཱརཀེ པཱུཝཔཙྪིཡོ ཨུཀྑིཔཱཔེཏྭཱ ནགརཱ ནིཀྑམྨ ཨུཡྻཱནཾ གཙྪནྟེ ཨདྡས. ཏེཔི སཏྠཱརཾ ཝནྡིཏྭཱ པཀྐམིཾསུ, ཏེ ཨེཀཾ བྷིཀྑུམྤི ‘‘པཱུཝཾ གཎྷཐཱ’’ཏི ¶ ན ཝདིཾསུ. སཏྠཱ ཏེསཾ གཏཀཱལེ བྷིཀྑཱུ ཨཱཧ – ‘‘ཁཱདིསྶཐ, བྷིཀྑཝེ, པཱུཝེ’’ཏི. ‘‘ཀཧཾ བྷནྟེ, པཱུཝཱ’’ཏི? ‘‘ཀིཾ ན པསྶཐ ཏེ དཱརཀེ པཱུཝཔཙྪིཡོ ཨུཀྑིཔཱཔེཏྭཱ ཨཏིཀྐནྟེ’’ཏི? ‘‘བྷནྟེ, ཨེཝརཱུཔཱ ནཱམ དཱརཀཱ ཀསྶཙི པཱུཝཾ ན དེནྟཱི’’ཏི. ‘‘བྷིཀྑཝེ, ཀིཉྩཱཔི ཨེཏེ མཾ ཝཱ ཏུམྷེ ཝཱ པཱུཝེཧི ན ནིམནྟཡིཾསུ, པཱུཝསཱམིཀོ པན བྷིཀྑུ པཙྪཏོ ཨཱགཙྪཏི, པཱུཝེ ཁཱདིཏྭཱཝ གནྟུཾ ཝཊྚཏཱི’’ཏི. བུདྡྷཱནཉྷི ¶ ཨེཀཔུགྒལེཔི ཨིསྶཱ ཝཱ དོསོ ཝཱ ནཏྠི, ཏསྨཱ ཨིམཾ ཝཏྭཱ བྷིཀྑུསངྒྷཾ ཨཱདཱཡ ཨེཀསྨིཾ རུཀྑམཱུལེ ཚཱཡཱཡ ནིསཱིདི. དཱརཀཱ མཧཱཀསྶཔཏྠེརཾ པཙྪཏོ ཨཱགཙྪནྟཾ དིསྭཱ ཨུཔྤནྣསིནེཧཱ པཱིཏིཝེགེན པརིཔུཎྞསརཱིརཱ ཧུཏྭཱ པཙྪིཡོ ཨོཏཱརེཏྭཱ ཐེརཾ པཉྩཔཏིཊྛིཏེན ཝནྡིཏྭཱ པཱུཝེ པཙྪཱིཧི སདྡྷིཾཡེཝ ཨུཀྑིཔིཏྭཱ ‘‘གཎྷཐ, བྷནྟེ’’ཏི ཐེརཾ ཝདིཾསུ. ཨཐ ནེ ཐེརོ ཨཱཧ – ‘‘ཨེས སཏྠཱ བྷིཀྑུསངྒྷཾ གཧེཏྭཱ རུཀྑམཱུལེ ནིསིནྣོ, ཏུམྷཱཀཾ དེཡྻདྷམྨཾ ཨཱདཱཡ གནྟྭཱ བྷིཀྑུསངྒྷསྶ སཾཝིབྷཱགཾ ཀརོཐཱ’’ཏི. ཏེ ‘‘སཱདྷུ, བྷནྟེ’’ཏི ནིཝཏྟིཏྭཱ ཐེརེན སདྡྷིཾཡེཝ གནྟྭཱ པཱུཝེ དཏྭཱ ཨོལོཀཡམཱནཱ ཨེཀམནྟེ ཋཏྭཱ པརིབྷོགཱཝསཱནེ ཨུདཀཾ ཨདཾསུ. བྷིཀྑཱུ ཨུཛ྄ཛྷཱཡིཾསུ ‘‘དཱརཀེཧི མུཁོལོཀནེན བྷིཀྑཱ དིནྣཱ, སམྨཱསམྦུདྡྷཾ ཝཱ མཧཱཐེརེ ཝཱ པཱུཝེཧི ཨནཱཔུཙྪིཏྭཱ མཧཱཀསྶཔཏྠེརཾ དིསྭཱ པཙྪཱིཧི སདྡྷིཾཡེཝ ཨཱདཱཡ ཨཱགམིཾསཱུ’’ཏི. སཏྠཱ ཏེསཾ ཀཐཾ སུཏྭཱ, ‘‘བྷིཀྑཝེ, མམ པུཏྟེན མཧཱཀསྶཔེན སདིསོ བྷིཀྑུ དེཝམནུསྶཱནཾ པིཡོ ཧོཏི, ཏེ ཙ ཏསྶ ཙཏུཔཙྩཡེན པཱུཛཾ ཀརོནྟིཡེཝཱ’’ཏི ཝཏྭཱ ཨིམཾ གཱཐམཱཧ –

‘‘སཱིལདསྶནསམྤནྣཾ, དྷམྨཊྛཾ སཙྩཝེདིནཾ;

ཨཏྟནོ ཀམྨ ཀུབྦཱནཾ, ཏཾ ཛནོ ཀུརུཏེ པིཡ’’ནྟི.

ཏཏྠ ¶ ¶ སཱིལདསྶནསམྤནྣནྟི ཙཏུཔཱརིསུདྡྷིསཱིལེན ཙེཝ མགྒཕལསམྤཡུཏྟེན ཙ སམྨཱདསྶནེན སམྤནྣཾ. དྷམྨཊྛནྟི ནཝཝིདྷལོཀུཏྟརདྷམྨེ ཋིཏཾ, སཙྪིཀཏལོཀུཏྟརདྷམྨནྟི ཨཏྠོ. སཙྩཝེདིནནྟི ཙཏུནྣཾ སཙྩཱནཾ སོལ༹སཧཱཀཱརེཧི སཙྪིཀཏཏྟཱ སཙྩཉཱཎེན སཙྩཝེདིནཾ. ཨཏྟནོ ཀམྨ ཀུབྦཱནནྟི ཨཏྟནོ ཀམྨཾ ནཱམ ཏིསྶོ སིཀྑཱ, ཏཱ པཱུརཡམཱནནྟི ཨཏྠོ. ཏཾ ཛནོཏི ཏཾ པུགྒལཾ ལོཀིཡམཧཱཛནོ པིཡཾ ཀརོཏི, དཊྛུཀཱམོ ཝནྡིཏུཀཱམོ པཙྩཡེན པཱུཛེཏུཀཱམོ ཧོཏིཡེཝཱཏི ཨཏྠོ.

དེསནཱཝསཱནེ སབྦེཔི ཏེ དཱརཀཱ སོཏཱཔཏྟིཕལེ པཏིཊྛཧིཾསཱུཏི.

ཚནྡཛཱཏོཏི ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཨནཱགཱམིཏྠེརཾ ཨཱརབྦྷ ཀཐེསི.

ཨེཀདིཝསཉྷི ཏཾ ཐེརཾ སདྡྷིཝིཧཱརིཀཱ པུཙྪིཾསུ – ‘‘ཨཏྠི པན ཝོ, བྷནྟེ, ཝིསེསཱདྷིགམོ’’ཏི. ཐེརོ ‘‘ཨནཱགཱམིཕལཾ ནཱམ གཧཊྛཱཔི པཱཔུཎནྟི, ཨརཧཏྟཾ པཏྟཀཱལེཡེཝ ཏེཧི སདྡྷིཾ ཀཐེསྶཱམཱི’’ཏི ཧརཱཡམཱནོ ཀིཉྩི ཨཀཐེཏྭཱཝ ཀཱལཀཏོ སུདྡྷཱཝཱསདེཝལོཀེ ནིབྦཏྟི. ཨཐསྶ སདྡྷིཝིཧཱརིཀཱ རོདིཏྭཱ པརིདེཝིཏྭཱ སཏྠུ སནྟིཀཾ གནྟྭཱ སཏྠཱརཾ ཝནྡིཏྭཱ རོདནྟཱཝ ཨེཀམནྟཾ ནིསཱིདིཾསུ. ཨཐ ¶ ནེ སཏྠཱ ‘‘ཀིཾ, བྷིཀྑཝེ, རོདཐཱ’’ཏི ཨཱཧ. ‘‘ཨུཔཛ྄ཛྷཱཡོ ནོ, བྷནྟེ, ཀཱལཀཏོ’’ཏི. ‘‘ཧོཏུ, བྷིཀྑཝེ, མཱ ཙིནྟཡིཏྠ, དྷུཝདྷམྨོ ནཱམེསོ’’ཏི? ‘‘ཨཱམ, བྷནྟེ, མཡམྤི ཛཱནཱམ, ཨཔིཙ མཡཾ ཨུཔཛ྄ཛྷཱཡཾ ཝིསེསཱདྷིགམཾ པུཙྪིམྷཱ, སོ ཀིཉྩི ཨཀཐེཏྭཱཝ ཀཱལཀཏོ, ཏེནམྷ དུཀྑིཏཱ’’ཏི. སཏྠཱ, ‘‘བྷིཀྑཝེ, མཱ ཙིནྟཡིཏྠ, ཨུཔཛ྄ཛྷཱཡེན ཝོ ཨནཱགཱམིཕལཾ པཏྟཾ, སོ ‘གིཧཱིཔེཏཾ པཱཔུཎནྟི, ཨརཧཏྟཾ པཏྭཱཝ ནེསཾ ཀཐེསྶཱམཱི’ཏི ཧརཱཡནྟོ ཏུམྷཱཀཾ ཀིཉྩི ཨཀཐེཏྭཱ ཀཱལཾ ཀཏྭཱ སུདྡྷཱཝཱསེ ནིབྦཏྟོ, ཨསྶཱསཐ, བྷིཀྑཝེ, ཨུཔཛ྄ཛྷཱཡོ ཝོ ཀཱམེསུ ཨཔྤཊིབདྡྷཙིཏྟཏཾ པཏྟོ’’ཏི ཝཏྭཱ ཨིམཾ གཱཐམཱཧ –

‘‘ཚནྡཛཱཏོ ¶ ཨནཀྑཱཏེ, མནསཱ ཙ ཕུཊོ སིཡཱ;

ཀཱམེསུ ཙ ཨཔྤཊིབདྡྷཙིཏྟོ, ཨུདྡྷཾསོཏོཏི ཝུཙྩཏཱི’’ཏི.

ཏཏྠ ཚནྡཛཱཏོཏི ཀཏྟུཀཱམཏཱཝསེན ཛཱཏཚནྡོ ཨུསྶཱཧཔཏྟོ. ཨནཀྑཱཏེཏི ནིབྦཱནེ. ཏཉྷི ‘‘ཨསུཀེན ཀཏཾ ཝཱ ནཱིལཱདཱིསུ ཨེཝརཱུཔཾ ཝཱ’’ཏི ཨཝཏྟབྦཏཱཡ ཨནཀྑཱཏཾ ནཱམ. མནསཱ ཙ ཕུཊོ སིཡཱཏི ཧེཊྛིམེཧི ཏཱིཧི མགྒཕལཙིཏྟེཧི ཕུཊོ པཱུརིཏོ བྷཝེཡྻ. ཨཔྤཊིབདྡྷཙིཏྟོཏི ཨནཱགཱམིམགྒཝསེན ཀཱམེསུ ཨཔྤཊིབདྡྷཙིཏྟོ. ཨུདྡྷཾསོཏོཏི ཨེཝརཱུཔོ བྷིཀྑུ ཨཝིཧེསུ ¶ ནིབྦཏྟིཏྭཱ ཏཏོ པཊྛཱཡ པཊིསནྡྷིཝསེན ཨཀནིཊྛཾ གཙྪནྟོ ཨུདྡྷཾསོཏོཏི ཝུཙྩཏི, ཏཱདིསོ ཝོ ཨུཔཛ྄ཛྷཱཡོཏི ཨཏྠོ.

དེསནཱཝསཱནེ ཏེ བྷིཀྑཱུ ཨརཧཏྟཕལེ པཏིཊྛཧིཾསུ, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཙིརཔྤཝཱསིནྟི ¶ ཨིམཾ དྷམྨདེསནཾ སཏྠཱ ཨིསིཔཏནེ ཝིཧརནྟོ ནནྡིཡཾ ཨཱརབྦྷ ཀཐེསི.

བཱརཱཎསིཡཾ ཀིར སདྡྷཱསམྤནྣསྶ ཀུལསྶ ནནྡིཡོ ནཱམ པུཏྟོ ཨཧོསི, སོ མཱཏཱཔིཏཱུནཾ ཨནུརཱུཔོ སདྡྷཱསམྤནྣོ སངྒྷུཔཊྛཱཀོ ཨཧོསི. ཨཐསྶ མཱཏཱཔིཏརོ ཝཡཔྤཏྟཀཱལེ སམྨུཁགེཧཏོ མཱཏུལདྷཱིཏརཾ རེཝཏིཾ ནཱམ ཨཱནེཏུཀཱམཱ ཨཧེསུཾ. སཱ པན ཨསྶདྡྷཱ ཨདཱནསཱིལཱ, ནནྡིཡོ ཏཾ ན ཨིཙྪི. ཨཐསྶ མཱཏཱ རེཝཏིཾ ཨཱཧ – ‘‘ཨམྨ, ཏྭཾ ཨིམསྨིཾ གེཧེ བྷིཀྑུསངྒྷསྶ ནིསཛྫནཊྛཱནཾ ཨུཔལིམྤིཏྭཱ ཨཱསནཱནི པཉྙཱཔེཧི, ཨཱདྷཱརཀེ ཋཔེཧི, བྷིཀྑཱུནཾ ཨཱགཏཀཱལེ པཏྟཾ གཧེཏྭཱ ནིསཱིདཱཔེཏྭཱ དྷམྨཀརཎེན པཱནཱིཡཾ པརིསྶཱཝེཏྭཱ བྷུཏྟཀཱལེ པཏྟེ དྷོཝ, ཨེཝཾ མེ པུཏྟསྶ ཨཱརཱདྷིཏཱ བྷཝིསྶསཱི’’ཏི. སཱ ཏཐཱ ཨཀཱསི. ཨཐ ནཾ ‘‘ཨོཝཱདཀྑམཱ ཛཱཏཱ’’ཏི པུཏྟསྶ ཨཱརོཙེཏྭཱ ཏེན སཱདྷཱུཏི སམྤཊིཙྪིཏེ དིཝསཾ ཋཔེཏྭཱ ཨཱཝཱཧཾ ཀརིཾསུ ¶ .

ཨཐ ¶ ནཾ ནནྡིཡོ ཨཱཧ – ‘‘སཙེ བྷིཀྑུསངྒྷཉྩ མཱཏཱཔིཏརོ ཙ མེ ཨུཔཊྛཧིསྶསི, ཨེཝཾ ཨིམསྨིཾ གེཧེ ཝསིཏུཾ ལབྷིསྶསི, ཨཔྤམཏྟཱ ཧོཧཱི’’ཏི. སཱ ‘‘སཱདྷཱུ’’ཏི པཊིསྶུཎིཏྭཱ ཀཏིཔཱཧཾ སདྡྷཱ ཝིཡ ཧུཏྭཱ བྷཏྟཱརཾ ཨུཔཊྛཧནྟཱི དྭེ པུཏྟེ ཝིཛཱཡི. ནནྡིཡསྶཱཔི མཱཏཱཔིཏརོ ཀཱལམཀཾསུ, གེཧེ སབྦིསྶརིཡཾ ཏསྶཱཡེཝ ཨཧོསི. ནནྡིཡོཔི མཱཏཱཔིཏཱུནཾ ཀཱལཀིརིཡཏོ པཊྛཱཡ མཧཱདཱནཔཏི ཧུཏྭཱ བྷིཀྑུསངྒྷསྶ དཱནཾ པཊྛཔེསི. ཀཔཎདྡྷིཀཱདཱིནམྤི གེཧདྭཱརེ པཱཀཝཏྟཾ པཊྛཔེསི. སོ ཨཔརབྷཱགེ སཏྠུ དྷམྨདེསནཾ སུཏྭཱ ཨཱཝཱསདཱནེ ཨཱནིསཾསཾ སལླཀྑེཏྭཱ ཨིསིཔཏནེ མཧཱཝིཧཱརེ ཙཏཱུཧི གབྦྷེཧི པཊིམཎྜིཏཾ ཙཏུསཱལཾ ཀཱརེཏྭཱ མཉྩཔཱིཋཱདཱིནི ཨཏྠརཱཔེཏྭཱ ཏཾ ཨཱཝཱསཾ ནིཡྻཱདེནྟོ བུདྡྷཔྤམུཁསྶ བྷིཀྑུསངྒྷསྶ དཱནཾ དཏྭཱ ཏཐཱགཏསྶ དཀྑིཎོདཀཾ ཨདཱསི. སཏྠུ ཧཏྠེ དཀྑིཎོདཀཔཏིཊྛཱནེན སདྡྷིཾཡེཝ ཏཱཝཏིཾསདེཝལོཀེ སབྦདིསཱསུ དྭཱདསཡོཛནིཀོ ཨུདྡྷཾ ཡོཛནསཏུབྦེདྷོ སཏྟརཏནམཡོ ནཱརཱིགཎསམྤནྣོ དིབྦཔཱསཱདོ ཨུགྒཙྪི.

ཨཐེཀདིཝསེ མཧཱམོགྒལླཱནཏྠེརོ དེཝཙཱརིཀཾ གནྟྭཱ ཏསྶ པཱསཱདསྶ ཨཝིདཱུརེ ཋིཏོ ཨཏྟནོ སནྟིཀེ ཨཱགཏེ དེཝཔུཏྟེ པུཙྪི – ‘‘ཀསྶེསོ ཨཙྪརཱགཎཔརིཝུཏོ དིབྦཔཱསཱདོ ནིབྦཏྟོ’’ཏི. ཨཐསྶ དེཝཔུཏྟཱ ཝིམཱནསཱམིཀཾ ཨཱཙིཀྑནྟཱ ཨཱཧཾསུ – ‘‘བྷནྟེ, ཡེན ནནྡིཡེན ནཱམ གཧཔཏིཔུཏྟེན ཨིསིཔཏནེ ¶ སཏྠུ ཝིཧཱརཾ ཀཱརེཏྭཱ དིནྣོ, ཏསྶཏྠཱཡ ཨེཏཾ ཝིམཱནཾ ནིབྦཏྟ’’ནྟི ¶ . ཨཙྪརཱསངྒྷོཔི ནཾ དིསྭཱ པཱསཱདཏོ ཨོརོཧིཏྭཱ ཨཱཧ – ‘‘བྷནྟེ, མཡཾ ‘ནནྡིཡསྶ པརིཙཱརིཀཱ བྷཝིསྶཱམཱ’ཏི ཨིདྷ ནིབྦཏྟཱ, ཏཾ པན ཨཔསྶནྟཱི ཨཏིཝིཡ ཨུཀྐཎྛིཏམྷཱ, མཏྟིཀཔཱཏིཾ བྷིནྡིཏྭཱ སུཝཎྞཔཱཏིགཧཎཾ ཝིཡ མནུསྶསམྤཏྟིཾ ཛཧིཏྭཱ དིབྦསམྤཏྟིགཧཎཾ, ཨིདྷཱགམནཏྠཱཡ ནཾ ཝདེཡྻཱཐཱ’’ཏི. ཐེརོ ཏཏོ ཨཱགནྟྭཱ སཏྠཱརཾ ཨུཔསངྐམིཏྭཱ པུཙྪི – ‘‘ནིབྦཏྟཏི ནུ ཁོ, བྷནྟེ, མནུསྶལོཀེ ཋིཏཱནཾཡེཝ ཀཏཀལྱཱཎཱནཾ དིབྦསམྤཏྟཱི’’ཏི. ‘‘མོགྒལླཱན, ནནུ ཏེ དེཝལོཀེ ནནྡིཡསྶ ནིབྦཏྟཱ དིབྦསམྤཏྟི སཱམཾ དིཊྛཱ, ཀསྨཱ མཾ པུཙྪསཱི’’ཏི. ‘‘ཨེཝཾ, བྷནྟེ, ནིབྦཏྟཏཱི’’ཏི.

ཨཐ ནཾ སཏྠཱ ‘‘མོགྒལླཱནཾ ཀིཾ ནཱམེཏཾ ཀཐེསི. ཡཐཱ ཧི ཙིརཔྤཝུཊྛཾ པུཏྟཾ ཝཱ བྷཱཏརཾ ཝཱ ཝིཔྤཝཱསཏོ ཨཱགཙྪནྟཾ གཱམདྭཱརེ ཋིཏོ ཀོཙིདེཝ ¶ དིསྭཱ ཝེགེན གེཧཾ ཨཱགནྟྭཱ ‘ཨསུཀོ ནཱམ ཨཱགཏོ’ཏི ཨཱརོཙེཡྻ, ཨཐསྶ ཉཱཏཀཱ ཧཊྛཔཧཊྛཱ ཝེགེན ནིཀྑམིཏྭཱ ‘ཨཱགཏོསི, ཏཱཏ, ཨརོགོསི, ཏཱཏཱ’ཏི ཏཾ ཨབྷིནནྡེཡྻུཾ, ཨེཝམེཝ ཨིདྷ ཀཏཀལྱཱཎཾ ཨིཏྠིཾ ཝཱ པུརིསཾ ཝཱ ཨིམཾ ལོཀཾ ཛཧིཏྭཱ པརལོཀཾ གཏཾ དསཝིདྷཾ དིབྦཔཎྞཱཀཱརཾ ཨཱདཱཡ ‘ཨཧཾ པུརཏོ ¶ , ཨཧཾ པུརཏོ’ཏི པཙྩུགྒནྟྭཱ དེཝཏཱ ཨབྷིནནྡནྟཱི’’ཏི ཝཏྭཱ ཨིམཱ གཱཐཱ ཨབྷཱསི –

‘‘ཙིརཔྤཝཱསིཾ པུརིསཾ, དཱུརཏོ སོཏྠིམཱགཏཾ;

ཉཱཏིམིཏྟཱ སུཧཛྫཱ ཙ, ཨབྷིནནྡནྟི ཨཱགཏཾ.

‘‘ཏཐེཝ ཀཏཔུཉྙམྤི, ཨསྨཱ ལོཀཱ པརཾ གཏཾ;

པུཉྙཱནི པཊིགཎྷནྟི, པིཡཾ ཉཱཏཱིཝ ཨཱགཏ’’ནྟི.

ཏཏྠ ཙིརཔྤཝཱསིནྟི ཙིརཔྤཝུཊྛཾ. དཱུརཏོ སོཏྠིམཱགཏནྟི ཝཎིཛྫཾ ཝཱ རཱཛཔོརིསཾ ཝཱ ཀཏྭཱ ལདྡྷལཱབྷཾ ནིཔྥནྣསམྤཏྟིཾ ཨནུཔདྡཝེན དཱུརཊྛཱནཏོ ཨཱགཏཾ. ཉཱཏིམིཏྟཱ སུཧཛྫཱ ཙཱཏི ཀུལསམྦནྡྷཝསེན ཉཱཏཱི ཙ སནྡིཊྛཱདིབྷཱཝེན མིཏྟཱ ཙ སུཧདཡབྷཱཝེན སུཧཛྫཱ ཙ. ཨབྷིནནྡནྟི ཨཱགཏནྟི ནཾ དིསྭཱ ཨཱགཏནྟི ཝཙནམཏྟེན ཝཱ ཨཉྫལིཀརཎམཏྟེན ཝཱ གེཧསམྤཏྟཾ པན ནཱནཔྤཀཱརཔཎྞཱཀཱརཱབྷིཧརཎཝསེན ཨབྷིནནྡནྟི. ཏཐེཝཱཏི ཏེནེཝཱཀཱརེན ཀཏཔུཉྙམྤི པུགྒལཾ ཨིམསྨཱ ལོཀཱ པརལོཀཾ གཏཾ དིབྦཾ ཨཱཡུཝཎྞསུཁཡསཨཱདྷིཔཏེཡྻཾ, དིབྦཾ རཱུཔསདྡགནྡྷརསཕོཊྛབྦནྟི ཨིམཾ དསཝིདྷཾ པཎྞཱཀཱརཾ ཨཱདཱཡ མཱཏཱཔིཏུཊྛཱནེ ཋིཏཱནི པུཉྙཱནི ཨབྷིནནྡནྟཱནི ¶ པཊིགྒཎྷནྟི. པིཡཾ ཉཱཏཱིཝཱཏི ཨིདྷལོཀེ པིཡཉཱཏཀཾ ཨཱགཏཾ སེསཉཱཏཀཱ ཝིཡཱཏི ཨཏྠོ.

དེསནཱཝསཱནེ ¶ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཀོདྷཾ ¶ ¶ ¶ ཛཧེཏི ཨིམཾ དྷམྨདེསནཾ སཏྠཱ ནིགྲོདྷཱརཱམེ ཝིཧརནྟོ རོཧིནིཾ ནཱམ ཁཏྟིཡཀཉྙཾ ཨཱརབྦྷ ཀཐེསི.

ཨེཀསྨིཾ ཀིར སམཡེ ཨཱཡསྨཱ ཨནུརུདྡྷོ པཉྩསཏེཧི བྷིཀྑཱུཧི སདྡྷིཾ ཀཔིལཝཏྠུཾ ཨགམཱསི. ཨཐསྶ ཉཱཏཀཱ ‘‘ཐེརོ ཨཱགཏོ’’ཏི སུཏྭཱ ཐེརསྶ སནྟིཀཾ ཨགམཾསུ ཋཔེཏྭཱ རོཧིནིཾ ནཱམ ཐེརསྶ བྷགིནིཾ. ཐེརོ ཉཱཏཀེ པུཙྪི ‘‘ཀཧཾ, རོཧིནཱི’’ཏི? ‘‘གེཧེ, བྷནྟེ’’ཏི. ‘‘ཀསྨཱ ཨིདྷ ནཱགཏཱ’’ཏི? ‘‘སརཱིརེ ཏསྶཱ ཚཝིརོགོ ཨུཔྤནྣོཏི ལཛྫཱཡ ནཱགཏཱ, བྷནྟེ’’ཏི. ཐེརོ ‘‘པཀྐོསཐ ན’’ནྟི པཀྐོསཱཔེཏྭཱ པཊཀཉྩུཀཾ པཊིམུཉྩིཏྭཱ ཨཱགཏཾ ཨེཝམཱཧ – ‘‘རོཧིནི, ཀསྨཱ ནཱགཏཱསཱི’’ཏི? ‘‘སརཱིརེ མེ, བྷནྟེ, ཚཝིརོགོ ཨུཔྤནྣོ, ཏསྨཱ ལཛྫཱཡ ནཱགཏཱམྷཱི’’ཏི. ‘‘ཀིཾ པན ཏེ པུཉྙཾ ཀཱཏུཾ ན ཝཊྚཏཱི’’ཏི? ‘‘ཀིཾ ཀརོམི, བྷནྟེ’’ཏི? ‘‘ཨཱསནསཱལཾ ཀཱརེཧཱི’’ཏི. ‘‘ཀིཾ ¶ གཧེཏྭཱ’’ཏི? ‘‘ཀིཾ ཏེ པསཱདྷནབྷཎྜཀཾ ནཏྠཱི’’ཏི? ‘‘ཨཏྠི, བྷནྟེ’’ཏི. ‘‘ཀིཾ མཱུལ’’ནྟི? ‘‘དསསཧསྶམཱུལཾ བྷཝིསྶཏཱི’’ཏི. ‘‘ཏེན ཧི ཏཾ ཝིསྶཛྫེཏྭཱ ཨཱསནསཱལཾ ཀཱརེཧཱི’’ཏི. ‘‘ཀོ མེ, བྷནྟེ, ཀཱརེསྶཏཱི’’ཏི? ཐེརོ སམཱིཔེ ཋིཏཉཱཏཀེ ཨོལོཀེཏྭཱ ‘‘ཏུམྷཱཀཾ བྷཱརོ ཧོཏཱུ’’ཏི ཨཱཧ. ‘‘ཏུམྷེ པན, བྷནྟེ, ཀིཾ ཀརིསྶཐཱ’’ཏི? ‘‘ཨཧམྤི ཨིདྷེཝ བྷཝིསྶཱམཱི’’ཏི. ‘‘ཏེན ཧི ཨེཏིསྶཱ དབྦསམྦྷཱརེ ཨཱཧརཐཱ’’ཏི. ཏེ ‘‘སཱདྷུ, བྷནྟེ’’ཏི ཨཱཧརིཾསུ.

ཐེརོ ཨཱསནསཱལཾ སཾཝིདཧནྟོ རོཧིནིཾ ཨཱཧ – ‘‘དྭིབྷཱུམིཀཾ ཨཱསནསཱལཾ ཀཱརེཏྭཱ ཨུཔརི པདརཱནཾ དིནྣཀཱལཏོ པཊྛཱཡ ཧེཊྛཱསཱལཾ ནིབདྡྷཾ སམྨཛྫིཏྭཱ ཨཱསནཱནི པཉྙཱཔེཧི, ནིབདྡྷཾ པཱནཱིཡགྷཊེ ཨུཔཊྛཱཔེཧཱི’’ཏི. སཱ ‘‘སཱདྷུ, བྷནྟེ’’ཏི པསཱདྷནབྷཎྜཀཾ ཝིསྶཛྫེཏྭཱ དྭིབྷཱུམིཀཨཱསནསཱལཾ ཀཱརེཏྭཱ ཨུཔརི པདརཱནཾ དིནྣཀཱལཏོ པཊྛཱཡ ཧེཊྛཱསཱལཾ སམྨཛྫནཱདཱིནི ཨཀཱསི. ནིབདྡྷཾ བྷིཀྑཱུ ནིསཱིདནྟི. ཨཐསྶཱ ཨཱསནསཱལཾ སམྨཛྫནྟིཡཱཝ ཚཝིརོགོ མིལཱཡི. སཱ ཨཱསནསཱལཱཡ ནིཊྛིཏཱཡ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ ཨཱསནསཱལཾ པཱུརེཏྭཱ ¶ ནིསིནྣསྶ བུདྡྷཔྤམུཁསྶ ¶ བྷིཀྑུསངྒྷསྶ པཎཱིཏཾ ཁཱདནཱིཡཾ བྷོཛནཱིཡཾ ཨདཱསི. སཏྠཱ ཀཏབྷཏྟཀིཙྩོ ‘‘ཀསྶེཏཾ དཱན’’ནྟི པུཙྪི. ‘‘བྷགིནིཡཱ མེ, བྷནྟེ, རོཧིནིཡཱ’’ཏི. ‘‘སཱ པན ཀཧ’’ནྟི? ‘‘གེཧེ, བྷནྟེ’’ཏི. ‘‘པཀྐོསཐ ན’’ནྟི? སཱ ཨཱགནྟུཾ ན ཨིཙྪི. ཨཐ ནཾ སཏྠཱ ཨནིཙྪམཱནམྤི པཀྐོསཱཔེསིཡེཝ. ཨཱགནྟྭཱ ཙ པན ཝནྡིཏྭཱ ¶ ནིསིནྣཾ ཨཱཧ – ‘‘རོཧིནི, ཀསྨཱ ནཱགམིཏྠཱ’’ཏི? ‘‘སརཱིརེ མེ, བྷནྟེ, ཚཝིརོགོ ཨཏྠི, ཏེན ལཛྫམཱནཱ ནཱགཏཱམྷཱི’’ཏི. ‘‘ཛཱནཱསི པན ཀིཾ ཏེ ནིསྶཱཡ ཨེས ཨུཔྤནྣོ’’ཏི? ‘‘ན ཛཱནཱམི, བྷནྟེ’’ཏི. ‘‘ཏཝ ཀོདྷཾ ནིསྶཱཡ ཨུཔྤནྣོ ཨེསོ’’ཏི. ‘‘ཀིཾ པན མེ, བྷནྟེ, ཀཏ’’ནྟི? ‘‘ཏེན ཧི སུཎཱཧཱི’’ཏི. ཨཐསྶཱ སཏྠཱ ཨཏཱིཏཾ ཨཱཧརི.

ཨཏཱིཏེ བཱརཱཎསིརཉྙོ ཨགྒམཧེསཱི ཨེཀིསྶཱ རཉྙོ ནཱཊཀིཏྠིཡཱ ཨཱགྷཱཏཾ བནྡྷིཏྭཱ ‘‘དུཀྑམསྶཱ ཨུཔྤཱདེསྶཱམཱི’’ཏི ཙིནྟེཏྭཱ མཧཱཀཙྪུཕལཱནི ཨཱཧརཱཔེཏྭཱ ཏཾ ནཱཊཀིཏྠིཾ ཨཏྟནོ སནྟིཀཾ པཀྐོསཱཔེཏྭཱ ཡཐཱ སཱ ན ཛཱནཱཏི, ཨེཝམསྶཱ སཡནེ ཙེཝ པཱཝཱརཀོཛཝཱདཱིནཉྩ ཨནྟརེསུ ཀཙྪུཙུཎྞཱནི ཋཔཱཔེསི, ཀེལི༹ཾ ཀུརུམཱནཱ ཝིཡ ཏསྶཱ སརཱིརེཔི ཨོཀིརི. ཏཾ ཁཎཾཡེཝ ཏསྶཱ སརཱིརཾ ཨུཔྤཀྐུཔྤཀྐཾ གཎྜཱགཎྜཛཱཏཾ ཨཧོསི. སཱ ཀཎྜུཝནྟཱི གནྟྭཱ སཡནེ ནིཔཛྫི, ཏཏྲཱཔིསྶཱ ཀཙྪུཙུཎྞེཧི ཁཱདིཡམཱནཱཡ ཁརཏརཱ ཝེདནཱ ཨུཔྤཛྫི. ཏདཱ ཨགྒམཧེསཱི རོཧིནཱི ཨཧོསཱིཏི.

སཏྠཱ ཨིམཾ ཨཏཱིཏཾ ཨཱཧརིཏྭཱ, ‘‘རོཧིནི, ཏདཱ ཏཡཱཝེཏཾ ཀམྨཾ ཀཏཾ. ཨཔྤམཏྟཀོཔི ཧི ཀོདྷོ ཝཱ ཨིསྶཱ ཝཱ ཀཱཏུཾ ན ཡུཏྟརཱུཔོ ཨེཝཱ’’ཏི ཝཏྭཱ ཨིམཾ གཱཐམཱཧ –

ཏཏྠ ¶ ཀོདྷནྟི སབྦཱཀཱརམྤི ཀོདྷཾ ནཝཝིདྷམྤི མཱནཾ ཛཧེཡྻ. སཾཡོཛནནྟི ཀཱམརཱགསཾཡོཛནཱདིཀཾ དསཝིདྷམྤི སབྦསཾཡོཛནཾ ཨཏིཀྐམེཡྻ. ཨསཛྫམཱནནྟི ཨལགྒམཱནཾ. ཡོ ཧི ‘‘མམ རཱུཔཾ མམ ཝེདནཱ’’ཏིཨཱདིནཱ ནཡེན ནཱམརཱུཔཾ པཊིགྒཎྷཱཏི, ཏསྨིཉྩ བྷིཛྫམཱནེ སོཙཏི ཝིཧཉྙཏི ¶ , ཨཡཾ ནཱམརཱུཔསྨིཾ སཛྫཏི ནཱམ. ཨེཝཾ ཨགྒཎྷནྟོ ཨཝིཧཉྙནྟོ ན སཛྫཏི ནཱམ. ཏཾ པུགྒལཾ ཨེཝཾ ཨསཛྫམཱནཾ རཱགཱདཱིནཾ ཨབྷཱཝེན ཨཀིཉྩནཾ ¶ དུཀྑཱ ནཱམ ནཱནུཔཏནྟཱིཏི ཨཏྠོ. དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི. རོཧིནཱིཔི སོཏཱཔཏྟིཕལེ པཏིཊྛིཏཱ, ཏངྑཎཉྙེཝསྶཱ སརཱིརཾ སུཝཎྞཝཎྞཾ ཨཧོསི.

སཱ ཏཏོ ཙུཏཱ ཏཱཝཏིཾསབྷཝནེ ཙཏུནྣཾ དེཝཔུཏྟཱནཾ སཱིམནྟརེ ནིབྦཏྟིཏྭཱ པཱསཱདིཀཱ རཱུཔསོབྷགྒཔྤཏྟཱ ཨཧོསི. ཙཏྟཱརོཔི དེཝཔུཏྟཱ ཏཾ དིསྭཱ ཨུཔྤནྣསིནེཧཱ ཧུཏྭཱ ‘‘མམ སཱིམཱཡ ཨནྟོ ནིབྦཏྟཱ, མམ སཱིམཱཡ ཨནྟོ ནིབྦཏྟཱ’’ཏི ཝིཝདནྟཱ སཀྐསྶ དེཝརཉྙོ སནྟིཀཾ གནྟྭཱ, ‘‘དེཝ, ཨིམཾ ནོ ནིསྶཱཡ ཨཌྜོ ཨུཔྤནྣོ, ཏཾ ཝིནིཙྪིནཱཐཱ’’ཏི ཨཱཧཾསུ. སཀྐོཔི ཏཾ ཨོལོཀེཏྭཱཝ ཨུཔྤནྣསིནེཧོ ཧུཏྭཱ ཨེཝམཱཧ – ‘‘ཨིམཱཡ ཝོ དིཊྛཀཱལཏོ པཊྛཱཡ ཀཐཾ ཙིཏྟཱནི ཨུཔྤནྣཱནཱི’’ཏི. ཨཐེཀོ ཨཱཧ – ‘‘མམ ཏཱཝ ཨུཔྤནྣཙིཏྟཾ སངྒཱམབྷེརི ཝིཡ སནྣིསཱིདིཏུཾ ནཱསཀྑཱི’’ཏི. དུཏིཡོ ‘‘མམ ཙིཏྟཾ པབྦཏནདཱི ཝིཡ སཱིགྷཾ པཝཏྟཏིཡེཝཱ’’ཏི ¶ . ཏཏིཡོ ‘‘མམ ཨིམིསྶཱ དིཊྛཀཱལཏོ པཊྛཱཡ ཀཀྐཊསྶ ཝིཡ ཨཀྑཱིནི ནིཀྑམིཾསཱུ’’ཏི. ཙཏུཏྠོ ‘‘མམ ཙིཏྟཾ ཙེཏིཡེ ཨུསྶཱཔིཏདྷཛོ ཝིཡ ནིཙྩལཾ ཋཱཏུཾ ནཱསཀྑཱི’’ཏི. ཨཐ ནེ སཀྐོ ཨཱཧ – ‘‘ཏཱཏཱ, ཏུམྷཱཀཾ ཏཱཝ ཙིཏྟཱནི པསཡ྄ཧརཱུཔཱནི, ཨཧཾ པན ཨིམཾ ལབྷནྟོ ཛཱིཝིསྶཱམི, ཨལབྷནྟསྶ མེ མརཎཾ བྷཝིསྶཏཱི’’ཏི. དེཝཔུཏྟཱ, ‘‘མཧཱརཱཛ, ཏུམྷཱཀཾ མརཎེན ཨཏྠོ ནཏྠཱི’’ཏི ཏཾ སཀྐསྶ ཝིསྶཛྫེཏྭཱ པཀྐམིཾསུ. སཱ སཀྐསྶ པིཡཱ ཨཧོསི མནཱཔཱ. ‘‘ཨསུཀཀཱིལ༹ཾ ནཱམ གཙྪཱམཱ’’ཏི ཝུཏྟེ སཀྐོ ཏསྶཱ ཝཙནཾ པཊིཀྑིཔིཏུཾ ནཱསཀྑཱིཏི.

ཡོ ཝེ ཨུཔྤཏིཏནྟི ཨིམཾ དྷམྨདེསནཾ སཏྠཱ ཨགྒཱལ༹ཝེ ཙེཏིཡེ ཝིཧརནྟོ ཨཉྙཏརཾ བྷིཀྑུཾ ཨཱརབྦྷ ཀཐེསི.

སཏྠཱརཱ ¶ ཧི བྷིཀྑུསངྒྷསྶ སེནཱསནེ ཨནུཉྙཱཏེ རཱཛགཧསེཊྛིཨཱདཱིཧི སེནཱསནེསུ ཀརིཡམཱནེསུ ཨེཀོ ཨཱལ༹ཝིཀོ བྷིཀྑུ ཨཏྟནོ སེནཱསནཾ ཀརོནྟོ ཨེཀཾ མནཱཔརུཀྑཾ ¶ དིསྭཱ ཚིནྡིཏུཾ ཨཱརབྷི. ཏཏྠ པན ནིབྦཏྟཱ ཨེཀཱ ཏརུཎཔུཏྟཱ དེཝཏཱ པུཏྟཾ ཨངྐེནཱདཱཡ ཋིཏཱ ཡཱཙི ‘‘མཱ མེ, སཱམི, ཝིམཱནཾ ཚིནྡི, ན སཀྑིསྶཱམི པུཏྟཾ ཨཱདཱཡ ཨནཱཝཱསཱ ཝིཙརིཏུ’’ནྟི. སོ ¶ ‘‘ཨཧཾ ཨཉྙཏྲ ཨཱིདིསཾ རུཀྑཾ ན ལབྷིསྶཱམཱི’’ཏི ཏསྶཱ ཝཙནཾ ནཱདིཡི. སཱ ‘‘ཨིམམྤི ཏཱཝ དཱརཀཾ ཨོལོཀེཏྭཱ ཨོརམིསྶཏཱི’’ཏི པུཏྟཾ རུཀྑསཱཁཱཡ ཋཔེསི. སོཔི བྷིཀྑུ ཨུཀྑིཔིཏཾ ཕརསུཾ སནྡྷཱརེཏུཾ ཨསཀྐོནྟོ དཱརཀསྶ བཱཧུཾ ཚིནྡི, དེཝཏཱ ཨུཔྤནྣབལཝཀོདྷཱ ‘‘པཧརིཏྭཱ ནཾ མཱརེསྶཱམཱི’’ཏི ཨུབྷོ ཧཏྠེ ཨུཀྑིཔིཏྭཱ ཨེཝཾ ཏཱཝ ཙིནྟེསི – ‘‘ཨཡཾ བྷིཀྑུ སཱིལཝཱ. སཙཱཧཾ ཨིམཾ མཱརེསྶཱམི, ནིརཡགཱམིནཱི བྷཝིསྶཱམི. སེསདེཝཏཱཔི ཨཏྟནོ རུཀྑཾ ཚིནྡནྟེ བྷིཀྑཱུ དིསྭཱ ‘ཨསུཀདེཝཏཱཡ ཨེཝཾ ནཱམ མཱརིཏོ བྷིཀྑཱུ’ཏི མཾ པམཱཎཾ ཀཏྭཱ བྷིཀྑཱུ མཱརེསྶནྟི. ཨཡཉྩ སསཱམིཀོ བྷིཀྑུ, སཱམིཀསྶེཝ ནཾ ཀཐེསྶཱམཱི’’ཏི ཨུཀྑིཏྟཧཏྠེ ཨཔནེཏྭཱ རོདམཱནཱ སཏྠུ སནྟིཀཾ གནྟྭཱ ཝནྡིཏྭཱ ཨེཀམནྟཾ ཨཊྛཱསི. ཨཐ ནཾ སཏྠཱ ‘‘ཀིཾ དེཝཏེ’’ཏི ཨཱཧ. སཱ, ‘‘བྷནྟེ, ཏུམྷཱཀཾ མེ སཱཝཀེན ཨིདཾ ནཱམ ཀཏཾ, ཨཧམྤི ནཾ མཱརེཏུཀཱམཱ ཧུཏྭཱ ཨིདཾ ནཱམ ཙིནྟེཏྭཱ ཨམཱརེཏྭཱཝ ཨིདྷཱགཏཱ’’ཏི སབྦཾ ཏཾ པཝཏྟིཾ ཝིཏྠཱརཏོ ཨཱརོཙེསི.

སཏྠཱ ཏཾ སུཏྭཱ ‘‘སཱདྷུ, ¶ སཱདྷུ དེཝཏེ, སཱདྷུ ཏེ ཀཏཾ ཨེཝཾ ཨུགྒཏཾ ཀོཔཾ བྷནྟཾ རཐཾ ཝིཡ ནིགྒཎྷམཱནཱཡཱ’’ཏི ཝཏྭཱ ཨིམཾ གཱཐམཱཧ –

‘‘ཡོ ཝེ ཨུཔྤཏིཏཾ ཀོདྷཾ, རཐཾ བྷནྟཾཝ ཝཱརཡེ;

ཏམཧཾ སཱརཐིཾ བྲཱུམི, རསྨིགྒཱཧོ ཨིཏརོ ཛནོ’’ཏི.

ཏཏྠ ཨུཔྤཏིཏནྟི ཨུཔྤནྣཾ. རཐཾ བྷནྟཾ ཝཱཏི ཡཐཱ ནཱམ ཚེཀོ སཱརཐི ཨཏིཝེགེན དྷཱཝནྟཾ རཐཾ ནིགྒཎྷིཏྭཱ ཡཐིཙྪཀཾ ཋཔེཏི, ཨེཝཾ ཡོ པུགྒལོ ཨུཔྤནྣཾ ཀོདྷཾ ཝཱརཡེ ནིགྒཎྷིཏུཾ སཀྐོཏི. ཏམཧནྟི ཏཾ ཨཧཾ སཱརཐིཾ བྲཱུམི. ཨིཏརོ ཛནོཏི ཨིཏརོ པན རཱཛཨུཔརཱཛཱདཱིནཾ རཐསཱརཐིཛནོ རསྨིགྒཱཧོ ནཱམ ཧོཏི, ན ཨུཏྟམསཱརཐཱིཏི.

དེསནཱཝསཱནེ ¶ དེཝཏཱ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

དེཝཏཱ པན སོཏཱཔནྣཱ ཧུཏྭཱཔི རོདམཱནཱ ཨཊྛཱསི. ཨཐ ནཾ སཏྠཱ ‘‘ཀིཾ དེཝཏེ’’ཏི པུཙྪིཏྭཱ, ‘‘བྷནྟེ, ཝིམཱནཾ མེ ནཊྛཾ, ཨིདཱནི ཀིཾ ཀརིསྶཱམཱི’’ཏི ཝུཏྟེ, ‘‘ཨལཾ དེཝཏེ, མཱ ཙིནྟཡི, ཨཧཾ ཏེ ཝིམཱནཾ དསྶཱམཱི’’ཏི ཛེཏཝནེ གནྡྷཀུཊིསམཱིཔེ པུརིམདིཝསེ ཙུཏདེཝཏཾ ཨེཀཾ རུཀྑཾ ཨཔདིསནྟོ ‘‘ཨམུཀསྨིཾ ཨོཀཱསེ རུཀྑོ ཝིཝིཏྟོ, ཏཏྠ ཨུཔགཙྪཱ’’ཏི ཨཱཧ. སཱ ཏཏྠ ¶ ཨུཔགཉྪི. ཏཏོ པཊྛཱཡ ‘‘བུདྡྷདཏྟིཡཾ ཨིམིསྶཱ ཝིམཱན’’ནྟི མཧེསཀྑདེཝཏཱཔི ཨཱགནྟྭཱ ¶ ཏཾ ཙཱལེཏུཾ ནཱསཀྑིཾསུ. སཏྠཱ ཏཾ ཨཏྠུཔྤཏྟིཾ ཀཏྭཱ བྷིཀྑཱུནཾ བྷཱུཏགཱམསིཀྑཱཔདཾ པཉྙཱཔེསཱིཏི.

ཨཀྐོདྷེན ཛིནེ ཀོདྷནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨུཏྟརཱཡ གེཧེ ཀཏབྷཏྟཀིཙྩོ ཨུཏྟརཾ ཨུཔཱསིཀཾ ཨཱརབྦྷ ཀཐེསི.

ཏཏྲཱཡམནུཔུབྦཱི ཀཐཱ – རཱཛགཧེ ཀིར སུམནསེཊྛིཾ ནིསྶཱཡ པུཎྞོ ནཱམ དལིདྡོ བྷཏིཾ ཀཏྭཱ ཛཱིཝཏི. ཏསྶ བྷརིཡཱ ཙ ཨུཏྟརཱ ནཱམ དྷཱིཏཱ ཙཱཏི དྭེཡེཝ གེཧམཱནུསཀཱ. ཨཐེཀདིཝསཾ ‘‘སཏྟཱཧཾ ནཀྑཏྟཾ ཀཱིལི༹ཏབྦ’’ནྟི རཱཛགཧེ གྷོསནཾ ཀརིཾསུ. ཏཾ སུཏྭཱ སུམནསེཊྛི པཱཏོཝ ཨཱགཏཾ པུཎྞཾ ཨཱམནྟེཏྭཱ, ‘‘ཏཱཏ, ཨམྷཱཀཾ པརིཛནོ ནཀྑཏྟཾ ཀཱིལི༹ཏུཀཱམོ, ཏྭཾ ཀིཾ ནཀྑཏྟཾ ཀཱིལི༹སྶསི, ཨུདཱཧུ བྷཏིཾ ཀརིསྶསཱི’’ཏི ཨཱཧ. ‘‘སཱམི, ནཀྑཏྟཾ ནཱམ སདྷནཱནཾ ཧོཏི, མམ པན གེཧེ སྭཱཏནཱཡ ཡཱགུཏཎྜུལམྤི ནཏྠི, ཀིཾ མེ ནཀྑཏྟེན, གོཎེ ལབྷནྟོ ཀསིཏུཾ གམིསྶཱམཱི’’ཏི. ‘‘ཏེན ཧི གོཎེ གཎྷཱཧཱི’’ཏི. སོ བལཝགོཎེ ཙ ནངྒལཉྩ གཧེཏྭཱ, ‘‘བྷདྡེ, ནཱགརཱ ནཀྑཏྟཾ ཀཱིལ༹ནྟི, ཨཧཾ དལིདྡཏཱཡ བྷཏིཾ ཀཱཏུཾ གམིསྶཱམི, མཡ྄ཧམྤི ཏཱཝ ཨཛྫ དྭིགུཎཾ ¶ ནིཝཱཔཾ པཙིཏྭཱ བྷཏྟཾ ཨཱཧརེཡྻཱསཱི’’ཏི བྷརིཡཾ ཝཏྭཱ ཁེཏྟཾ ཨགམཱསི.

སཱརིཔུཏྟཏྠེརོཔི ¶ སཏྟཱཧཾ ནིརོདྷསམཱཔནྣོ ཏཾ དིཝསཾ ཝུཊྛཱཡ ‘‘ཀསྶ ནུ ཁོ ཨཛྫ མཡཱ སངྒཧཾ ཀཱཏུཾ ཝཊྚཏཱི’’ཏི ཨོལོཀེནྟོ པུཎྞཾ ཨཏྟནོ ཉཱཎཛཱལསྶ ཨནྟོ པཝིཊྛཾ དིསྭཱ ‘‘སདྡྷོ ནུ ཁོ ཨེས, སཀྑིསྶཏི ཝཱ མེ སངྒཧཾ ཀཱཏུ’’ནྟི ཨོལོཀེནྟོ ཏསྶ སདྡྷབྷཱཝཉྩ སངྒཧཾ ཀཱཏུཾ སམཏྠབྷཱཝཉྩ ཏཔྤཙྩཡཱ ཙསྶ མཧཱསམྤཏྟིཔཊིལཱབྷཉྩ ཉཏྭཱ པཏྟཙཱིཝརམཱདཱཡ ཏསྶ ཀསནཊྛཱནཾ གནྟྭཱ ཨཱཝཱཊཏཱིརེ ཨེཀཾ གུམྦཾ ཨོལོཀེནྟོ ཨཊྛཱསི.

པུཎྞོ ཐེརཾ དིསྭཱཝ ཀསིཾ ཋཔེཏྭཱ པཉྩཔཏིཊྛིཏེན ཐེརཾ ཝནྡིཏྭཱ ‘‘དནྟཀཊྛེན ཨཏྠོ བྷཝིསྶཏཱི’’ཏི དནྟཀཊྛཾ ཀཔྤིཡཾ ཀཏྭཱ ཨདཱསི. ཨཐསྶ ཐེརོ པཏྟཉྩ པརིསྶཱཝནཉྩ ནཱིཧརིཏྭཱ ¶ ཨདཱསི. སོ ‘‘པཱནཱིཡེན ཨཏྠོ བྷཝིསྶཏཱི’’ཏི ཏཾ ཨཱདཱཡ པཱནཱིཡཾ པརིསྶཱཝེཏྭཱ ཨདཱསི. ཐེརོ ཙིནྟེསི – ‘‘ཨཡཾ པརེསཾ པཙྪིམགེཧེ ཝསཏི. སཙསྶ གེཧདྭཱརཾ གམིསྶཱམི, ཨིམསྶ བྷརིཡཱ མཾ དཊྛུཾ ན ལབྷིསྶཏི. ཡཱཝསྶཱ བྷཏྟཾ ཨཱདཱཡ མགྒཾ པཊིཔཛྫཏི, ཏཱཝ ཨིདྷེཝ བྷཝིསྶཱམཱི’’ཏི. སོ ཏཏྠེཝ ཐོཀཾ ཝཱིཏིནཱམེཏྭཱ ཏསྶ མགྒཱརུལ༹ྷབྷཱཝཾ ཉཏྭཱ ཨནྟོནགརཱབྷིམུཁོ པཱཡཱསི.

སཱ ཨནྟརཱམགྒེ ཐེརཾ དིསྭཱ ཙིནྟེསི – ‘‘ཨཔྤེཀདཱཧཾ དེཡྻདྷམྨེ སཏི ¶ ཨཡྻཾ ན པསྶཱམི, ཨཔྤེཀདཱ མེ ཨཡྻཾ པསྶནྟིཡཱ དེཡྻདྷམྨོ ན ཧོཏི. ཨཛྫ པན མེ ཨཡྻོ ཙ དིཊྛོ, དེཡྻདྷམྨོ ཙཱཡཾ ཨཏྠི, ཀརིསྶཏི ནུ ཁོ མེ སངྒཧ’’ནྟི. སཱ བྷཏྟབྷཱཛནཾ ཨོརོཔེཏྭཱ ཐེརཾ པཉྩཔཏིཊྛིཏེན ཝནྡིཏྭཱ, ‘‘བྷནྟེ, ཨིདཾ ལཱུཁཾ ཝཱ པཎཱིཏཾ ཝཱཏི ཨཙིནྟེཏྭཱ དཱསསྶ ཝོ སངྒཧཾ ཀརོཐཱ’’ཏི ཨཱཧ. ཐེརོ པཏྟཾ ཨུཔནཱམེཏྭཱ ཏཱཡ ཨེཀེན ཧཏྠེན བྷཱཛནཾ དྷཱརེཏྭཱ ཨེཀེན ཧཏྠེན ཏཏོ བྷཏྟཾ དདམཱནཱཡ ཨུཔཌྜྷབྷཏྟེ དིནྣེ ‘‘ཨལ’’ནྟི ཧཏྠེན པཏྟཾ པིདཧི. སཱ, ‘‘བྷནྟེ, ཨེཀོཝ པཊིཝིསོ, ན སཀྐཱ དྭིདྷཱ ཀཱཏུཾ. ཏུམྷཱཀཾ དཱསསྶ ཨིདྷལོཀསངྒཧཾ ཨཀཏྭཱ པརལོཀསངྒཧཾ ཀརོཐ, ནིརཝསེསམེཝ དཱཏུཀཱམམྷཱི’’ཏི ཝཏྭཱ སབྦམེཝ ཐེརསྶ པཏྟེ པཏིཊྛཔེཏྭཱ ‘‘ཏུམྷེཧི དིཊྛདྷམྨསྶེཝ བྷཱགཱི ཨསྶ’’ནྟི པཏྠནཾ ཨཀཱསི. ཐེརོ ‘‘ཨེཝཾ ཧོཏཱུ’’ཏི ཝཏྭཱ ཋིཏཀོཝ ཨནུམོདནཾ ཀརིཏྭཱ ཨེཀསྨིཾ ཨུདཀཕཱསུཀཊྛཱནེ ནིསཱིདིཏྭཱ བྷཏྟཀིཙྩམཀཱསི. སཱཔི ནིཝཏྟིཏྭཱ ཏཎྜུལེ པརིཡེསིཏྭཱ བྷཏྟཾ པཙི. པུཎྞོཔི ཨཌྜྷཀརཱིསམཏྟཊྛཱནཾ ཀསིཏྭཱ ཛིགྷཙྪཾ སཧིཏུཾ ཨསཀྐོནྟོ གོཎེ ཝིསྶཛྫེཏྭཱ ཨེཀརུཀྑཙྪཱཡཾ པཝིསིཏྭཱ མགྒཾ ཨོལོཀེནྟོ ནིསཱིདི.

ཨཐསྶ ¶ བྷརིཡཱ བྷཏྟཾ ཨཱདཱཡ གཙྪམཱནཱ ཏཾ དིསྭཱཝ ‘‘ཨེས ཛིགྷཙྪཱཡ པཱིལི༹ཏོ མཾ ཨོལོཀེནྟོ ནིསིནྣོ. སཙེ མཾ ¶ ‘ཨཏིཝིཡ ཛེ ཙིརཱཡཱི’ཏི ཏཛྫེཏྭཱ པཏོདལཊྛིཡཱ མཾ པཧརིསྶཏི, མཡཱ ཀཏཀམྨཾ ནིརཏྠཀཾ བྷཝིསྶཏི. པཊིཀཙྩེཝསྶ ཨཱརོཙེསྶཱམཱི’’ཏི ཙིནྟེཏྭཱ ཨེཝམཱཧ – ‘‘སཱམི, ཨཛྫེཀདིཝསཾ ཙིཏྟཾ པསཱདེཧི, མཱ མཡཱ ཀཏཀམྨཾ ནིརཏྠཀཾ ཀརི. ཨཧཉྷི པཱཏོཝ ཏེ བྷཏྟཾ ཨཱཧརནྟཱི ཨནྟརཱམགྒེ དྷམྨསེནཱཔཏིཾ དིསྭཱ ཏཝ བྷཏྟཾ ཏསྶ དཏྭཱ པུན གནྟྭཱ བྷཏྟཾ པཙིཏྭཱ ཨཱགཏཱ, པསཱདེཧི, སཱམི, ཙིཏྟ’’ནྟི. སོ ‘‘ཀིཾ ཝདེསི, བྷདྡེ’’ཏི པུཙྪིཏྭཱ པུན ཏམཏྠཾ སུཏྭཱ, ‘‘བྷདྡེ, སཱདྷུ ཝཏ ཏེ ཀཏཾ མམ བྷཏྟཾ ཨཡྻསྶ དདམཱནཱཡ, མཡཱཔིསྶ ཨཛྫ པཱཏོཝ དནྟཀཊྛཉྩ མུཁོདཀཉྩ དིནྣ’’ནྟི པསནྣམཱནསོ ཏཾ ཝཙནཾ ཨབྷིནནྡིཏྭཱ ཨུསྶུརེ ལདྡྷབྷཏྟཏཱཡ ཀིལནྟཀཱཡོ ཏསྶཱ ཨངྐེ སཱིསཾ ཀཏྭཱ ནིདྡཾ ཨོཀྐམི.

ཨཐསྶ ¶ པཱཏོཝ ཀསིཏཊྛཱནཾ པཾསུཙུཎྞཾ ཨུཔཱདཱཡ སབྦཾ རཏྟསུཝཎྞཾ ཀཎིཀཱརཔུཔྥརཱསི ཝིཡ སོབྷམཱནཾ ཨཊྛཱསི. སོ པབུདྡྷོ ཨོལོཀེཏྭཱ བྷརིཡཾ ཨཱཧ – ‘‘བྷདྡེ, ཨེཏཾ ཀསིཏཊྛཱནཾ སབྦཾ མམ སུཝཎྞཾ ཧུཏྭཱ པཉྙཱཡཏི, ཀིཾ ནུ ཁོ མེ ཨཏིཨུསྶུརེ ལདྡྷབྷཏྟཏཱཡ ཨཀྑཱིནི བྷམནྟཱི’’ཏི. ‘‘སཱམི, མཡ྄ཧམྤི ཨེཝམེཝ པཉྙཱཡཏཱི’’ཏི. སོ ཨུཊྛཱཡ ཏཏྠ གནྟྭཱ ཨེཀཔིཎྜཾ གཧེཏྭཱ ནངྒལསཱིསེ པཧརིཏྭཱ སུཝཎྞབྷཱཝཾ ཉཏྭཱ ¶ ‘‘ཨཧོ ཨཡྻསྶ དྷམྨསེནཱཔཏིསྶ མེ དིནྣདཱནེན ཨཛྫེཝ ཝིཔཱཀོ དསྶིཏོ, ན ཁོ པན སཀྐཱ ཨེཏྟཀཾ དྷནཾ པཊིཙྪཱདེཏྭཱ པརིབྷུཉྫིཏུ’’ནྟི བྷརིཡཱཡ ཨཱབྷཏཾ བྷཏྟཔཱཏིཾ སུཝཎྞསྶ པཱུརེཏྭཱ རཱཛཀུལཾ གནྟྭཱ རཉྙཱ ཀཏོཀཱསོ པཝིསིཏྭཱ རཱཛཱནཾ ཨབྷིཝཱདེཏྭཱ ‘‘ཀིཾ, ཏཱཏཱ’’ཏི ཝུཏྟེ, ‘‘དེཝ, ཨཛྫ མཡཱ ཀསིཏཊྛཱནཾ སབྦཾ སུཝཎྞབྷརིཏམེཝ ཧུཏྭཱ ཋིཏཾ, ཨིདཾ སུཝཎྞཾ ཨཱཧརཱཔེཏུཾ ཝཊྚཏཱི’’ཏི. ‘‘ཀོསི ཏྭ’’ནྟི? ‘‘པུཎྞོ ནཱམ ཨཧ’’ནྟི. ‘‘ཀིཾ པན ཏེ ཨཛྫ ཀཏ’’ནྟི? ‘‘དྷམྨསེནཱཔཏིསྶ མེ ཨཛྫ པཱཏོཝ དནྟཀཊྛཉྩ མུཁོདཀཉྩ དིནྣཾ, བྷརིཡཱཡཔི མེ མཡ྄ཧཾ ཨཱཧརཎབྷཏྟཾ ཏསྶེཝ དིནྣ’’ནྟི.

ཏཾ སུཏྭཱ རཱཛཱ ‘‘ཨཛྫེཝ ཀིར, བྷོ, དྷམྨསེནཱཔཏིསྶ དིནྣདཱནེན ཝིཔཱཀོ དསྶིཏོ’’ཏི ཝཏྭཱ, ‘‘ཏཱཏ, ཀིཾ ཀརོམཱི’’ཏི པུཙྪི. ‘‘བཧཱུནི སཀཊསཧསྶཱནི པཧིཎིཏྭཱ སུཝཎྞཾ ཨཱཧརཱཔེཐཱ’’ཏི. རཱཛཱ སཀཊཱནི པཧིཎི. རཱཛཔུརིསེསུ ‘‘རཉྙོ སནྟཀ’’ནྟི གཎྷནྟེསུ གཧིཏགཧིཏཾ མཏྟིཀཱཝ ཧོཏི. ཏེ གནྟྭཱ རཉྙོ ཨཱརོཙེཏྭཱ ‘‘ཏུམྷེཧི ཀིནྟི ¶ ཝཏྭཱ གཧིཏ’’ནྟི. པུཊྛཱ ‘‘ཏུམྷཱཀཾ སནྟཀ’’ནྟི ཨཱཧཾསུ. ན མཡ྄ཧཾ, ཏཱཏཱ, སནྟཀཾ, གཙྪཐ ‘‘པུཎྞསྶ སནྟཀ’’ནྟི ¶ ཝཏྭཱ གཎྷཐཱཏི. ཏེ ཏཐཱ ཀརིཾསུ, གཧིཏགཧིཏཾ སུཝཎྞམེཝ ཨཧོསི. སབྦམྤི ཨཱཧརིཏྭཱ རཱཛངྒཎེ རཱསིམཀཾསུ, ཨསཱིཏིཧཏྠུབྦེདྷོ རཱསི ཨཧོསི. རཱཛཱ ནཱགརེ སནྣིཔཱཏེཏྭཱ ‘‘ཨིམསྨིཾ ནགརེ ཨཏྠི ཀསྶཙི ཨེཏྟཀཾ སུཝཎྞ’’ནྟི? ‘‘ནཏྠི, དེཝཱ’’ཏི. ‘‘ཀིཾ པནསྶ དཱཏུཾ ཝཊྚཏཱི’’ཏི? ‘‘སེཊྛིཚཏྟཾ, དེཝཱ’’ཏི. རཱཛཱ ‘‘བཱཧུདྷནསེཊྛི ནཱམ ཧོཏཱུ’’ཏི མཧནྟེན བྷོགེན སདྡྷིཾ ཏསྶ སེཊྛིཚཏྟམདཱསི. ཨཐ ནཾ སོ ཨཱཧ – ‘‘མཡཾ, དེཝ, ཨེཏྟཀཾ ཀཱལཾ པརཀུལེ ཝསིམྷཱ, ཝསནཊྛཱནཾ ནོ དེཐཱ’’ཏི. ‘‘ཏེན ཧི པསྶ, ཨེས གུམྦོ པཉྙཱཡཏི, ཨེཏཾ ཧརཱཔེཏྭཱ གེཧཾ ཀཱརེཧཱི’’ཏི པུརཱཎསེཊྛིསྶ གེཧཊྛཱནཾ ཨཱཙིཀྑི. སོ ཏསྨིཾ ཋཱནེ ཀཏིཔཱཧེནེཝ གེཧཾ ཀཱརཱཔེཏྭཱ གེཧཔྤཝེསནམངྒལཉྩ ཚཏྟམངྒལཉྩ ཨེཀཏོཝ ཀརོནྟོ སཏྟཱཧཾ བུདྡྷཔྤམུཁསྶ བྷིཀྑུསངྒྷསྶ དཱནཾ ཨདཱསི. ཨཐསྶ སཏྠཱ ཨནུམོདནཾ ཀརོནྟོ ཨནུཔུབྦིཾ ཀཐཾ ཀཐེསི. དྷམྨཀཐཱཝསཱནེ པུཎྞསེཊྛི ཙ བྷརིཡཱ ཙསྶ དྷཱིཏཱ ཙ ཨུཏྟརཱཏི ཏཡོ ཛནཱ སོཏཱཔནྣཱ ཨཧེསུཾ.

ཨཔརབྷཱགེ ¶ རཱཛགཧསེཊྛི པུཎྞསེཊྛིནོ དྷཱིཏརཾ ཨཏྟནོ པུཏྟསྶ ཝཱརེསི. སོ ‘‘ནཱཧཾ དསྶཱམཱི’’ཏི ཝཏྭཱ ‘‘མཱ ཨེཝཾ ཀརོཏུ, ཨེཏྟཀཾ ཀཱལཾ ཨམྷེ ནིསྶཱཡ ཝསནྟེནེཝ ¶ ཏེ སམྤཏྟི ལདྡྷཱ, དེཏུ མེ པུཏྟསྶ དྷཱིཏར’’ནྟི ཝུཏྟེ ‘‘སོ མིཙྪཱདིཊྛིཀོ, མམ དྷཱིཏཱ ཏཱིཧི རཏནེཧི ཝིནཱ ཝཏྟིཏུཾ ན སཀྐོཏི, ནེཝསྶ དྷཱིཏརཾ དསྶཱམཱི’’ཏི ཨཱཧ. ཨཐ ནཾ བཧཱུ སེཊྛིགཎཱདཡོ ཀུལཔུཏྟཱ ‘‘མཱ ཏེན སདྡྷིཾ ཝིསྶཱསཾ བྷིནྡི, དེཧིསྶ དྷཱིཏར’’ནྟི ཡཱཙིཾསུ. སོ ཏེསཾ ཝཙནཾ སམྤཊིཙྪིཏྭཱ ཨཱསཱལ༹ྷིཔུཎྞམཱཡཾ དྷཱིཏརཾ ཨདཱསི. སཱ པཏིཀུལཾ གཏཀཱལཏོ པཊྛཱཡ བྷིཀྑུཾ ཝཱ བྷིཀྑུནིཾ ཝཱ ཨུཔསངྐམིཏུཾ དཱནཾ ཝཱ དཱཏུཾ དྷམྨཾ ཝཱ སོཏུཾ ནཱལཏྠ. ཨེཝཾ ཨཌྜྷཏིཡེསུ མཱསེསུ ཝཱིཏིཝཏྟེསུ སནྟིཀེ ཋིཏཾ པརིཙཱརིཀཾ པུཙྪི – ‘‘ཨིདཱནི ཀིཏྟཀཾ ཨནྟོཝསྶསྶ ཨཝསིཊྛ’’ནྟི? ‘‘ཨཌྜྷམཱསོ, ཨཡྻེ’’ཏི. སཱ པིཏུ སཱསནཾ པཧིཎི ‘‘ཀསྨཱ མཾ ཨེཝརཱུཔེ བནྡྷནཱགཱརེ པཀྑིཔིཾསུ, ཝརཾ མེ ལཀྑཎཱཧཏཾ ཀཏྭཱ ¶ པརེསཾ དཱསིཾ སཱཝེཏུཾ. ཨེཝརཱུཔསྶ མིཙྪཱདིཊྛིཀུལསྶ དཱཏུཾ ན ཝཊྚཏི. ཨཱགཏཀཱལཏོ པཊྛཱཡ བྷིཀྑུདསྶནཱདཱིསུ ཨེཀམྤི པུཉྙཾ ཀཱཏུཾ ན ལབྷཱམཱི’’ཏི.

ཨཐསྶཱ པིཏཱ ‘‘དུཀྑིཏཱ ཝཏ མེ དྷཱིཏཱ’’ཏི ཨནཏྟམནཏཾ པཝེདེཏྭཱ པཉྩདས ཀཧཱཔཎསཧསྶཱནི པེསེསི ‘‘ཨིམསྨིཾ ནགརེ སིརིམཱ ནཱམ གཎིཀཱ ཨཏྠི, དེཝསིཀཾ སཧསྶཾ གཎྷཱཏི. ཨིམེཧི ཀཧཱཔཎེཧི ཏཾ ཨཱནེཏྭཱ སཱམིཀསྶ པཱདཔརིཙཱརིཀཾ ཀཏྭཱ སཡཾ པུཉྙཱནི ཀརོཏཱུ’’ཏི ¶ . སཱ སིརིམཾ པཀྐོསཱཔེཏྭཱ ‘‘སཧཱཡིཀེ ཨིམེ ཀཧཱཔཎེ གཧེཏྭཱ ཨིམཾ ཨཌྜྷམཱསཾ ཏཝ སཧཱཡཀཾ པརིཙརཱཧཱི’’ཏི ཨཱཧ. སཱ ‘‘སཱདྷཱུ’’ཏི པཊིསྶུཎི. སཱ ཏཾ ཨཱདཱཡ སཱམིཀསྶ སནྟིཀཾ གནྟྭཱ ཏེན སིརིམཾ དིསྭཱ ‘‘ཀིཾ ཨིད’’ནྟི ཝུཏྟེ, ‘‘སཱམི, ཨིམཾ ཨཌྜྷམཱསཾ མམ སཧཱཡིཀཱ ཏུམྷེ པརིཙརཏུ, ཨཧཾ པན ཨིམཾ ཨཌྜྷམཱསཾ དཱནཉྩེཝ དཱཏུཀཱམཱ དྷམྨཉྩ སོཏུཀཱམཱ’’ཏི ཨཱཧ. སོ ཏཾ ཨབྷིརཱུཔཾ ཨིཏྠིཾ དིསྭཱ ཨུཔྤནྣསིནེཧོ ‘‘སཱདྷཱུ’’ཏི སམྤཊིཙྪི.

ཨུཏྟརཱཔི ཁོ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ, ‘‘བྷནྟེ, ཨིམཾ ཨཌྜྷམཱསཾ ཨཉྙཏྠ ཨགནྟྭཱ ཨིདྷེཝ བྷིཀྑཱ གཧེཏབྦཱ’’ཏི སཏྠུ པཊིཉྙཾ གཧེཏྭཱ ‘‘ཨིཏོ དཱནི པཊྛཱཡ ཡཱཝ མཧཱཔཝཱརཎཱ, ཏཱཝ སཏྠཱརཾ ཨུཔཊྛཱཏུཾ དྷམྨཉྩ སོཏུཾ ལབྷིསྶཱམཱི’’ཏི ཏུཊྛམཱནསཱ ‘‘ཨེཝཾ ཡཱགུཾ པཙཐ, ཨེཝཾ པཱུཝེ པཙཐཱ’’ཏི མཧཱནསེ སབྦཀིཙྩཱནི སཾཝིདཧནྟཱི ཝིཙརཏི. ཨཐསྶཱ སཱམིཀོ ‘‘སྭེ པཝཱརཎཱ བྷཝིསྶཏཱི’’ཏི མཧཱནསཱབྷིམུཁོ ཝཱཏཔཱནེ ཋཏྭཱ ‘‘ཀིཾ ནུ ཁོ ཀརོནྟཱི སཱ ཨནྡྷབཱལཱ ཝིཙརཏཱི’’ཏི ཨོལོཀེནྟོ ཏཾ སེཊྛཱིདྷཱིཏརཾ སེདཀིལིནྣཾ ཚཱརིཀཱཡ ཨོཀིཎྞཾ ཨངྒཱརམསིམཀྑིཏཾ ཏཐཱ སཾཝིདཧིཏྭཱ ཝིཙརམཱནཾ དིསྭཱ ‘‘ཨཧོ ཨནྡྷབཱལཱ ཨེཝརཱུཔེ ཋཱནེ ཨིམཾ སིརིསམྤཏྟིཾ ¶ ནཱནུབྷཝཏི, ‘མུཎྜཀསམཎེ ཨུཔཊྛཧིསྶཱམཱི’ཏི ཏུཊྛཙིཏྟཱ ཝིཙརཏཱི’’ཏི ཧསིཏྭཱ ཨཔགཉྪི.

ཏསྨིཾ ཨཔགཏེ ¶ ཏསྶ སནྟིཀེ ཋིཏཱ སིརིམཱ ‘‘ཀིཾ ནུ ཁོ ཨོལོཀེཏྭཱ ཨེས ཧསཱི’’ཏི ཏེནེཝ ཝཱཏཔཱནེན ཨོལོཀེནྟཱི ཨུཏྟརཾ དིསྭཱ ‘‘ཨིམཾ ཨོལོཀེཏྭཱ ཨིམིནཱ ཧསིཏཾ, ཨདྡྷཱ ཨིམསྶ ཨེཏཱཡ སདྡྷིཾ སནྠཝོ ཨཏྠཱི’’ཏི ཙིནྟེསི. སཱ ཀིར ཨཌྜྷམཱསཾ ཏསྨིཾ གེཧེ བཱཧིརཀཨིཏྠཱི ཧུཏྭཱ ཝསམཱནཱཔི ཏཾ སམྤཏྟིཾ ཨནུབྷཝམཱནཱ ཨཏྟནོ བཱཧིརཀཨིཏྠིབྷཱཝཾ ཨཛཱནིཏྭཱ ‘‘ཨཧཾ གྷརསཱམིནཱི’’ཏི སཉྙམཀཱསི. སཱ ¶ ཨུཏྟརཱཡ ཨཱགྷཱཏཾ བནྡྷིཏྭཱ ‘‘དུཀྑམསྶཱ ཨུཔྤཱདེསྶཱམཱི’’ཏི པཱསཱདཱ ཨོརུཡ྄ཧ མཧཱནསཾ པཝིསིཏྭཱ པཱུཝཔཙནཊྛཱནེ པཀྐུཐིཏཾ སཔྤིཾ ཀཊཙྪུནཱ ཨཱདཱཡ ཨུཏྟརཱབྷིམུཁཾ པཱཡཱསི. ཨུཏྟརཱ ཏཾ ཨཱགཙྪནྟིཾ དིསྭཱ ‘‘མམ སཧཱཡིཀཱཡ མཡ྄ཧཾ ཨུཔཀཱརོ ཀཏོ, ཙཀྐཝཱལ༹ཾ ཨཏིསམྦཱདྷཾ, བྲཧྨལོཀོ ཨཏིནཱིཙཀོ, མམ སཧཱཡིཀཱཡ གུཎོཝ མཧནྟོ. ཨཧཉྷི ཨེཏཾ ནིསྶཱཡ དཱནཉྩ དཱཏུཾ དྷམྨཉྩ སོཏུཾ ལབྷིཾ. སཙེ མམ ཨེཏིསྶཱ ཨུཔརི ཀོཔོ ཨཏྠི, ཨིདཾ སཔྤི མཾ དཧཏུ. སཙེ ནཏྠི, མཱ དཧཏཱུ’’ཏི ཏཾ མེཏྟཱཡ ཕརི. ཏཱཡ ཏསྶཱ མཏྠཀེ ཨཱསིཏྟཾ པཀྐུཐིཏསཔྤི སཱིཏུདཀཾ ཝིཡ ཨཧོསི.

ཨཐ ནཾ ‘‘ཨིདཾ སཱིཏལཾ ¶ བྷཝིསྶཏཱི’’ཏི ཀཊཙྪུཾ པཱུརེཏྭཱ ཨཱདཱཡ ཨཱགཙྪནྟིཾ ཨུཏྟརཱཡ དཱསིཡོ དིསྭཱ ‘‘ཨཔེཧི དུབྦིནཱིཏེ, ན ཏྭཾ ཨམྷཱཀཾ ཨཡྻཱཡ པཀྐུཐིཏཾ སཔྤིཾ ཨཱསིཉྩིཏུཾ ཨནུཙྪཝིཀཱ’’ཏི སནྟཛྫེནྟིཡོ ཨིཏོ ཙིཏོ ཙ ཨུཊྛཱཡ ཧཏྠེཧི ཙ པཱདེཧི ཙ པོཐེཏྭཱ བྷཱུམིཡཾ པཱཏེསུཾ. ཨུཏྟརཱ ཝཱརེནྟཱིཔི ཝཱརེཏུཾ ནཱསཀྑི. ཨཐསྶཱ ཨུཔརི ཋིཏཱ སབྦཱ དཱསིཡོ པཊིབཱཧིཏྭཱ ‘‘ཀིསྶ ཏེ ཨེཝརཱུཔཾ བྷཱརིཡཾ ཀཏ’’ནྟི སིརིམཾ ཨོཝདིཏྭཱ ཨུཎྷོདཀེན ནྷཱཔེཏྭཱ སཏཔཱཀཏེལེན ཨབྦྷཉྫི. ཏསྨིཾ ཁཎེ སཱ ཨཏྟནོ བཱཧིརཀིཏྠིབྷཱཝཾ ཉཏྭཱ ཙིནྟེསི – ‘‘མཡཱ བྷཱརིཡཾ ཀམྨཾ ཀཏཾ སཱམིཀསྶ ཧསནམཏྟཀཱརཎཱ ཨིམིསྶཱ ཨུཔརི པཀྐུཐིཏཾ སཔྤིཾ ཨཱསིཉྩནྟིཡཱ, ཨཡཾ ‘གཎྷཐ ན’ནྟི དཱསིཡོ ན ཨཱཎཱཔེསི. མཾ ཝིཧེཋནཀཱལེཔི སབྦདཱསིཡོ པཊིབཱཧིཏྭཱ མཡ྄ཧཾ ཀཏྟབྦམེཝ ཨཀཱསི. སཙཱཧཾ ཨིམཾ ན ཁམཱཔེསྶཱམི, མུདྡྷཱ མེ སཏྟདྷཱ ཕལེཡྻཱ’’ཏི ཏསྶཱ པཱདམཱུལེ ནིཔཛྫིཏྭཱ, ‘‘ཨཡྻེ, ཁམཱཧི མེ’’ཏི ཨཱཧ. ཨཧཾ སཔིཏིཀཱ དྷཱིཏཱ, པིཏརི ཁམནྟེ ཁམཱམཱིཏི. ཧོཏུ, ཨཡྻེ, པིཏརཾ ཏེ ¶ པུཎྞསེཊྛིཾ ཁམཱཔེསྶཱམཱིཏི. པུཎྞོ མམ ཝཊྚཛནཀཔིཏཱ, ཝིཝཊྚཛནཀེ པིཏརི ཁམནྟེ པནཱཧཾ ཁམིསྶཱམཱིཏི. ཀོ པན ཏེ ཝིཝཊྚཛནཀཔིཏཱཏི? སམྨཱསམྦུདྡྷོཏི. མཡ྄ཧཾ ཏེན སདྡྷིཾ ཝིསྶཱསོ ནཏྠཱིཏི. ཨཧཾ ཀརིསྶཱམི, སཏྠཱ སྭེ བྷིཀྑུསངྒྷཾ ཨཱདཱཡ ཨིདྷཱགམིསྶཏི, ཏྭཾ ཡཐཱལདྡྷཾ སཀྐཱརཾ གཧེཏྭཱ ཨིདྷེཝ ཨཱགནྟྭཱ ཏཾ ཁམཱཔེཧཱིཏི. སཱ ‘‘སཱདྷུ, ཨཡྻེ’’ཏི ཨུཊྛཱཡ ཨཏྟནོ ¶ གེཧཾ གནྟྭཱ པཉྩསཏཱ པརིཝཱརིཏྠིཡོ ཨཱཎཱཔེཏྭཱ ནཱནཱཝིདྷཱནི ཁཱདནཱིཡཱནི ཙེཝ སཱུཔེཡྻཱནི ཙ སམྤཱདེཏྭཱ པུནདིཝསེ ཏཾ སཀྐཱརཾ ཨཱདཱཡ ¶ ཨུཏྟརཱཡ གེཧཾ ཨཱགནྟྭཱ བུདྡྷཔྤམུཁསྶ བྷིཀྑུསངྒྷསྶ པཏྟེ པཏིཊྛཱཔེཏུཾ ཨཝིསཧནྟཱི ཨཊྛཱསི. ཏཾ སབྦཾ གཧེཏྭཱ ཨུཏྟརཱཝ སཾཝིདཧི. སིརིམཱཔི བྷཏྟཀིཙྩཱཝསཱནེ སདྡྷིཾ པརིཝཱརེན སཏྠུ པཱདམཱུལེ ནིཔཛྫི.

ཨཐ ནཾ སཏྠཱ པུཙྪི – ‘‘ཀོ ཏེ ཨཔརཱདྷོ’’ཏི? བྷནྟེ, མཡཱ ཧིཡྻོ ཨིདཾ ནཱམ ཀཏཾ, ཨཐ མེ སཧཱཡིཀཱ མཾ ཝིཧེཋཡམཱནཱ དཱསིཡོ ནིཝཱརེཏྭཱ མཡ྄ཧཾ ཨུཔཀཱརམེཝ ཨཀཱསི. སཱཧཾ ཨིམིསྶཱ གུཎཾ ཛཱནིཏྭཱ ཨིམཾ ཁམཱཔེསིཾ, ཨཐ མཾ ཨེསཱ ‘‘ཏུམྷེསུ ཁམནྟེསུ ཁམིསྶཱམཱི’’ཏི ཨཱཧ. ‘‘ཨེཝཾ ཀིར ཨུཏྟརེ’’ཏི? ‘‘ཨཱམ, བྷནྟེ, སཱིསེ མེ སཧཱཡིཀཱཡ པཀྐུཐིཏསཔྤི ཨཱསིཏྟ’’ནྟི. ཨཐ ‘‘ཏཡཱ ཀིཾ ཙིནྟིཏ’’ནྟི? ‘‘ཙཀྐཝཱལ༹ཾ ¶ ཨཏིསམྦཱདྷཾ, བྲཧྨལོཀོ ཨཏིནཱིཙཀོ, མམ སཧཱཡིཀཱཡ གུཎོཝ མཧནྟོ. ཨཧཉྷི ཨེཏཾ ནིསྶཱཡ དཱནཉྩ དཱཏུཾ དྷམྨཉྩ སོཏུཾ ཨལཏྠཾ, སཙེ མེ ཨིམིསྶཱ ཨུཔརི ཀོཔོ ཨཏྠི, ཨིདཾ མཾ དཧཏུ. ནོ ཙེ, མཱ དཧཏཱུ’’ཏི ཨེཝཾ ཙིནྟེཏྭཱ ཨིམཾ མེཏྟཱཡ ཕརིཾ, བྷནྟེཏི. སཏྠཱ ‘‘སཱདྷུ སཱདྷུ, ཨུཏྟརེ, ཨེཝཾ ཀོདྷཾ ཛིནིཏུཾ ཝཊྚཏི. ཀོདྷོ ཧི ནཱམ ཨཀྐོདྷེན, ཨཀྐོསཀཔརིབྷཱསཀོ ཨནཀྐོསནྟེན ཨཔརིབྷཱསནྟེན, ཐདྡྷམཙྪརཱི ཨཏྟནོ སནྟཀསྶ དཱནེན, མུསཱཝཱདཱི སཙྩཝཙནེན ཛིནིཏབྦོ’’ཏི ཝཏྭཱ ཨིམཾ གཱཐམཱཧ –

‘‘ཨཀྐོདྷེན ཛིནེ ཀོདྷཾ, ཨསཱདྷུཾ སཱདྷུནཱ ཛིནེ;

ཛིནེ ཀདརིཡཾ དཱནེན, སཙྩེནཱལིཀཝཱདིན’’ནྟི.

ཏཏྠ ཨཀྐོདྷེནཱཏི ཀོདྷནོ ཧི པུགྒལོ ཨཀྐོདྷེན ཧུཏྭཱ ཛིནིཏབྦོ. ཨསཱདྷུནྟི ཨབྷདྡཀོ བྷདྡཀེན ཧུཏྭཱ ཛིནིཏབྦོ. ཀདརིཡནྟི ཐདྡྷམཙྪརཱི ཨཏྟནོ སནྟཀསྶ ཙཱགཙིཏྟེན ཛིནིཏབྦོ. ཨལིཀཝཱདཱི སཙྩཝཙནེན ¶ ཛིནིཏབྦོ. ཏསྨཱ ཨེཝམཱཧ – ‘‘ཨཀྐོདྷེན ཛིནེ ཀོདྷཾ…པེ… སཙྩེནཱལིཀཝཱདིན’’ནྟི.

དེསནཱཝསཱནེ སིརིམཱ སདྡྷིཾ པཉྩསཏཱཧི ཨིཏྠཱིཧི སོཏཱཔཏྟིཕལེ པཏིཊྛཧཱིཏི.

སཙྩཾ ¶ ¶ བྷཎེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཧཱམོགྒལླཱནཏྠེརསྶ པཉྷཾ ཨཱརབྦྷ ཀཐེསི.

ཨེཀསྨིཉྷི སམཡེ ཐེརོ དེཝཙཱརིཀཾ གནྟྭཱ མཧེསཀྑཱཡ དེཝཏཱཡ ཝིམཱནདྭཱརེ ཋཏྭཱ ཏཾ ཨཏྟནོ སནྟིཀཾ ཨཱགནྟྭཱ ཝནྡིཏྭཱ ཋིཏཾ ཨེཝམཱཧ – ‘‘དེཝཏེ མཧཏཱི ཏེ སམྤཏྟི, ཀིཾ ཀམྨཾ ཀཏྭཱ ཨིམཾ ཨལཏྠཱ’’ཏི? ‘‘མཱ མཾ, བྷནྟེ, པུཙྪཐཱ’’ཏི. དེཝཏཱ ཀིར ཨཏྟནོ པརིཏྟཀམྨེན ལཛྫམཱནཱ ཨེཝཾ ཝདཏི. སཱ པན ཐེརེན ‘‘ཀཐེཧིཡེཝཱ’’ཏི ཝུཙྩམཱནཱ ཨཱཧ – ‘‘བྷནྟེ, མཡཱ ནེཝ དཱནཾ དིནྣཾ, ན པཱུཛཱ ཀཏཱ, ན དྷམྨོ སུཏོ, ཀེཝལཾ སཙྩམཏྟཾ རཀྑིཏ’’ནྟི. ཐེརོ ཨཉྙཱནི ཝིམཱནདྭཱརཱནི ¶ གནྟྭཱ ཨཱགཏཱགཏཱ ཨཔརཱཔི དེཝདྷཱིཏརོ པུཙྪི. ཏཱསུཔི ཏཐེཝ ནིགུཧིཏྭཱ ཐེརཾ པཊིབཱཧིཏུཾ ཨསཀྐོནྟཱིསུ ཨེཀཱ ཏཱཝ ཨཱཧ – ‘‘བྷནྟེ, མཡཱ ནེཝ དཱནཱདཱིསུ ཀཏཾ ནཱམ ཨཏྠི, ཨཧཾ པན ཀསྶཔབུདྡྷཀཱལེ པརསྶ དཱསཱི ཨཧོསིཾ, ཏསྶཱ མེ སཱམིཀོ ཨཏིཝིཡ ཙཎྜོ ཕརུསོ, གཧིཏགྒཧིཏེནེཝ ཀཊྛེན ཝཱ ཀལིངྒརེན ཝཱ སཱིསཾ བྷིནྡཏི. སཱཧཾ ཨུཔྤནྣེ ཀོཔེ ‘ཨེས ཏཝ སཱམིཀོ ལཀྑཎཱཧཏཾ ཝཱ ཀཱཏུཾ ནཱསཱདཱིནི ཝཱ ཚིནྡིཏུཾ ཨིསྶརོ, མཱ ཀུཛ྄ཛྷཱི’ཏི ཨཏྟཱནམེཝ པརིབྷཱསེཏྭཱ ཀོཔཾ ནཱམ ན ཨཀཱསིཾ, ཏེན མེ ཨཡཾ སམྤཏྟི ལདྡྷཱ’’ཏི. ཨཔརཱ ཨཱཧ – ‘‘ཨཧཾ, བྷནྟེ, ཨུཙྪུཁེཏྟཾ རཀྑམཱནཱ ཨེཀསྶ བྷིཀྑུནོ ཨུཙྪུཡཊྛིཾ ཨདཱསིཾ’’. ཨཔརཱ ཨེཀཾ ཏིམྦརུསཀཾ ཨདཱསིཾ. ཨཔརཱ ཨེཀཾ ཨེལཱ༹ལུཀཾ ཨདཱསིཾ. ཨཔརཱ ཨེཀཾ ཕཱརུསཀཾ ¶ ཨདཱསིཾ. ཨཔརཱ ཨེཀཾ མཱུལམུཊྛིཾ. ཨཔརཱ ‘‘ནིམྦམུཊྛི’’ནྟིཨཱདིནཱ ནཡེན ཨཏྟནཱ ཨཏྟནཱ ཀཏཾ པརིཏྟདཱནཾ ཨཱརོཙེཏྭཱ ‘‘ཨིམིནཱ ཨིམིནཱ ཀཱརཎེན ཨམྷེཧི ཨཡཾ སམྤཏྟི ལདྡྷཱ’’ཏི ཨཱཧཾསུ.

ཐེརོ ཏཱཧི ཀཏཀམྨཾ སུཏྭཱ སཏྠཱརཾ ཨུཔསངྐམིཏྭཱ པུཙྪི – ‘‘སཀྐཱ ནུ ཁོ, བྷནྟེ, སཙྩཀཐནམཏྟེན, ཀོཔནིབྦཱཔནམཏྟེན, ཨཏིཔརིཏྟཀེན ཏིམྦརུསཀཱདིདཱནམཏྟེན དིབྦསམྤཏྟིཾ ལདྡྷུ’’ནྟི. ‘‘ཀསྨཱ མཾ, མོགྒལླཱན, པུཙྪསི, ནནུ ཏེ དེཝཏཱཧི ཨཡཾ ཨཏྠོ ཀཐིཏོ’’ཏི? ‘‘ཨཱམ, བྷནྟེ, ལབྦྷཏི མཉྙེ ཨེཏྟཀེན དིབྦསམྤཏྟཱི’’ཏི. ཨཐ ནཾ སཏྠཱ ‘‘མོགྒལླཱན, སཙྩམཏྟཾ ཀཐེཏྭཱཔི ཀོཔམཏྟཾ ཛཧིཏྭཱཔི པརིཏྟཀཾ དཱནཾ དཏྭཱཔི དེཝལོཀཾ གཙྪཏིཡེཝཱ’’ཏི ཝཏྭཱ ཨིམཾ གཱཐམཱཧ –

‘‘སཙྩཾ ¶ ¶ བྷཎེ ན ཀུཛ྄ཛྷེཡྻ, དཛྫཱ ཨཔྤམྤི ཡཱཙིཏོ;

ཨེཏེཧི ཏཱིཧི ཋཱནེཧི, གཙྪེ དེཝཱན སནྟིཀེ’’ཏི.

ཏཏྠ སཙྩཾ བྷཎེཏི སཙྩཾ དཱིཔེཡྻ ཝོཧརེཡྻ, སཙྩེ པཏིཊྛཧེཡྻཱཏི ཨཏྠོ. ན ཀུཛ྄ཛྷེཡྻཱཏི པརསྶ ན ཀུཛ྄ཛྷེཡྻ ¶ . ཡཱཙིཏོཏི ཡཱཙཀཱ ནཱམ སཱིལཝནྟོ པབྦཛིཏཱ. ཏེ ཧི ཀིཉྩཱཔི ‘‘དེཐཱ’’ཏི ཨཡཱཙིཏྭཱཝ གྷརདྭཱརེ ཏིཊྛནྟི, ཨཏྠཏོ པན ཡཱཙནྟིཡེཝ ནཱམ. ཨེཝཾ སཱིལཝནྟེཧི ཡཱཙིཏོ ཨཔྤསྨིཾ དེཡྻདྷམྨེ ཝིཛྫམཱནེ ཨཔྤམཏྟཀམྤི དདེཡྻ. ཨེཏེཧི ཏཱིཧཱིཏི ཨེཏེསུ ཏཱིསུ ཨེཀེནཱཔི ཀཱརཎེན དེཝལོཀཾ གཙྪེཡྻཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཧཱམོགྒལླཱནཏྠེརཔཉྷཝཏྠུ ཙཏུཏྠཾ.

ཨཧིཾསཀཱ ཡེཏི ཨིམཾ དྷམྨདེསནཾ སཏྠཱ སཱཀེཏཾ ནིསྶཱཡ ཨཉྫནཝནེ ཝིཧརནྟོ བྷིཀྑཱུཧི པཊྛཔཉྷཾ ཨཱརབྦྷ ཀཐེསི.

བྷགཝཏོ ཀིར བྷིཀྑུསངྒྷཔརིཝུཏསྶ སཱཀེཏཾ པིཎྜཱཡ པཝིསནཀཱལེ ཨེཀོ སཱཀེཏཝཱསཱི མཧལླཀབྲཱཧྨཎོ ནགརཏོ ནིཀྑམནྟོ ཨནྟརགྷརདྭཱརེ དསབལཾ དིསྭཱ པཱདེསུ ནིཔཏིཏྭཱ གོཔྥཀེསུ དལ༹ྷཾ གཧེཏྭཱ, ‘‘ཏཱཏ, ནནུ ནཱམ པུཏྟེཧི ཛིཎྞཀཱལེ མཱཏཱཔིཏརོ པཊིཛགྒིཏབྦཱ, ཀསྨཱ ཨེཏྟཀཾ ཀཱལཾ ཨམྷཱཀཾ ཨཏྟཱནཾ ན དསྶེསི. མཡཱ ཏཱཝ དིཊྛོསི, མཱཏརམྤི པསྶིཏུཾ ཨེཧཱི’’ཏི སཏྠཱརཾ གཧེཏྭཱ ཨཏྟནོ གེཧཾ ཨགམཱསི. སཏྠཱ ཏཏྠ གནྟྭཱ པཉྙཏྟེ ཨཱསནེ ནིསཱིདི སདྡྷིཾ བྷིཀྑུསངྒྷེན. བྲཱཧྨཎཱིཔི ཨཱགནྟྭཱ སཏྠུ ¶ པཱདེསུ ནིཔཏིཏྭཱ, ‘‘ཏཱཏ, ཨེཏྟཀཾ ཀཱལཾ ཀུཧིཾ གཏོསི, ནནུ ནཱམ མཱཏཱཔིཏརོ མཧལླཀཀཱལེ ཨུཔཊྛཱཏབྦཱ’’ཏི ཝཏྭཱ པུཏྟདྷཱིཏརོ ‘‘ཨེཐ བྷཱཏརཾ ཝནྡཐཱ’’ཏི ཝནྡཱཔེསི. ཏེ ཨུབྷོཔི ཏུཊྛམཱནསཱ བུདྡྷཔྤམུཁཾ བྷིཀྑུསངྒྷཾ པརིཝིསིཏྭཱ, ‘‘བྷནྟེ, ཨིདྷེཝ ནིབདྡྷཾ བྷིཀྑཾ གཎྷཐཱ’’ཏི ཝཏྭཱ ‘‘བུདྡྷཱ ནཱམ ཨེཀཊྛཱནེཡེཝ ནིབདྡྷཾ བྷིཀྑཾ ན གཎྷནྟཱི’’ཏི ཝུཏྟེ, ‘‘ཏེན ཧི, བྷནྟེ, ཡེ ཝོ ནིམནྟེཏུཾ ཨཱགཙྪནྟི, ཏེ ཨམྷཱཀཾ སནྟིཀཾ པཧིཎེཡྻཱཐཱ’’ཏི ཨཱཧཾསུ. སཏྠཱ ཏཏོ ¶ པཊྛཱཡ ནིམནྟེཏུཾ ཨཱགཏེ ‘‘གནྟྭཱ བྲཱཧྨཎསྶ ཨཱརོཙེཡྻཱཐཱ’’ཏི པེསེསི. ཏེ གནྟྭཱ ‘‘མཡཾ སྭཱཏནཱཡ སཏྠཱརཾ ནིམནྟེམཱ’’ཏི བྲཱཧྨཎཾ ¶ ཝདནྟི. བྲཱཧྨཎོ པུནདིཝསེ ཨཏྟནོ གེཧཏོ བྷཏྟབྷཱཛནསཱུཔེཡྻབྷཱཛནཱནི ཨཱདཱཡ སཏྠུ ནིསཱིདནཊྛཱནཾ གཙྪཏི. ཨཉྙཏྲ པན ནིམནྟནེ ཨསཏི སཏྠཱ བྲཱཧྨཎསྶེཝ གེཧེ བྷཏྟཀིཙྩཾ ཀརོཏི. ཏེ ཨུབྷོཔི ཨཏྟནོ དེཡྻདྷམྨཾ ནིཙྩཀཱལཾ ཏཐཱགཏསྶ དེནྟཱ དྷམྨཀཐཾ སུཎནྟཱ ཨནཱགཱམིཕལཾ པཱཔུཎིཾསུ.

བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ, ‘‘ཨཱཝུསོ, བྲཱཧྨཎོ ‘ཏཐཱགཏསྶ སུདྡྷོདནོ པིཏཱ, མཧཱམཱཡཱ མཱཏཱ’ཏི ཛཱནཱཏི, ཛཱནནྟོཝ སདྡྷིཾ བྲཱཧྨཎིཡཱ ཏཐཱགཏཾ ‘ཨམྷཱཀཾ པུཏྟོ’ཏི ཝདཏི, སཏྠཱཔི ¶ ཏཐེཝ ཨདྷིཝཱསེཏི. ཀིཾ ནུ ཁོ ཀཱརཎ’’ནྟི? སཏྠཱ ཏེསཾ ཀཐཾ སུཏྭཱ, ‘‘བྷིཀྑཝེ, ཨུབྷོཔི ཏེ ཨཏྟནོ པུཏྟམེཝ པུཏྟོཏི ཝདནྟཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ, བྷིཀྑཝེ, ཨཡཾ བྲཱཧྨཎོ ནིརནྟརཾ པཉྩ ཛཱཏིསཏཱནི མཡ྄ཧཾ པིཏཱ ཨཧོསི, པཉྩ ཛཱཏིསཏཱནི ཙཱུལ༹པིཏཱ, པཉྩ ཛཱཏིསཏཱནི མཧཱཔིཏཱ. སཱཔི མེ བྲཱཧྨཎཱི ནིརནྟརམེཝ པཉྩ ཛཱཏིསཏཱནི མཱཏཱ ཨཧོསི, པཉྩ ཛཱཏིསཏཱནི ཙཱུལ༹མཱཏཱ, པཉྩ ཛཱཏིསཏཱནི མཧཱམཱཏཱ. ཨེཝཱཧཾ དིཡཌྜྷཛཱཏིསཧསྶཾ བྲཱཧྨཎསྶ ཧཏྠེ སཾཝཌྜྷོ, དིཡཌྜྷཛཱཏིསཧསྶཾ བྲཱཧྨཎིཡཱ ཧཏྠེཏི ཏཱིཎི ཛཱཏིསཧསྶཱནི ཏེསཾ པུཏྟབྷཱཝཾ དསྶེཏྭཱ ཨིམཱ གཱཐཱ ཨབྷཱསི –

‘‘ཡསྨིཾ མནོ ནིཝིསཏི, ཙིཏྟཉྩཱཔི པསཱིདཏི;

ཨདིཊྛཔུབྦཀེ པོསེ, ཀཱམཾ ཏསྨིམྤི ཝིསྶསེ. (ཛཱ. ༡.༡.༦༨);

‘‘པུབྦེཝ སནྣིཝཱསེན, པཙྩུཔྤནྣཧིཏེན ཝཱ;

ཨེཝཾ ཏཾ ཛཱཡཏེ པེམཾ, ཨུཔྤལཾཝ ཡཐོདཀེ’’ཏི. (ཛཱ. ༡.༢.༡༧༤);

སཏྠཱ ཏེམཱསམེཝ ཏཾ ཀུལཾ ནིསྶཱཡ ཝིཧཱསི. ཏེ ཨུབྷོཔི ཨརཧཏྟཾ སཙྪིཀཏྭཱ པརིནིབྦཱཡིཾསུ. ཨཐ ནེསཾ མཧཱསཀྐཱརཾ ཀཏྭཱ ཨུབྷོཔི ཨེཀཀཱུཊཱགཱརམེཝ ཨཱརོཔེཏྭཱ ནཱིཧརིཾསུ. སཏྠཱཔི པཉྩསཏབྷིཀྑུཔརིཝཱརོ ཏེཧི སདྡྷིཾཡེཝ ཨཱལཱ༹ཧནཾ ཨགམཱསི. ‘‘བུདྡྷཱནཾ ཀིར མཱཏཱཔིཏརོ’’ཏི མཧཱཛནོ ནིཀྑམི. སཏྠཱཔི ཨཱལཱ༹ཧནསམཱིཔེ ཨེཀཾ སཱལཾ ¶ པཝིསིཏྭཱ ཨཊྛཱསི. མནུསྶཱ སཏྠཱརཾ ཝནྡིཏྭཱ ¶ ཨེཀམནྟེ ཋཏྭཱ, ‘‘བྷནྟེ, ‘མཱཏཱཔིཏརོ ཝོ ཀཱལཀཏཱ’ཏི མཱ ཙིནྟཡིཏྠཱ’’ཏི སཏྠཱརཱ སདྡྷིཾ པཊིསནྠཱརཾ ཀརོནྟི. སཏྠཱ ཏེ ‘‘མཱ ཨེཝཾ ཨཝཙུཏྠཱ’’ཏི ཨཔྤཊིཀྑིཔིཏྭཱ པརིསཱཡ ཨཱསཡཾ ཨོལོཀེཏྭཱ ཏངྑཎཱནུརཱུཔཾ དྷམྨཾ དེསེནྟོ –

ཨཐ སོ ཛརསཱཔི མིཡྻཏཱི’’ཏི. (སུ. ནི. ༨༡༠; མཧཱནི. ༣༩) –

ཨིདཾ ཛརཱསུཏྟཾ ཀཐེསི. དེསནཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི. བྷིཀྑཱུ བྲཱཧྨཎསྶ ཙ བྲཱཧྨཎིཡཱ ཙ པརིནིབྦུཏབྷཱཝཾ ཨཛཱནནྟཱ, ‘‘བྷནྟེ, ཏེསཾ ཀོ ཨབྷིསམྤརཱཡོ’’ཏི པུཙྪིཾསུ. སཏྠཱ, ‘‘བྷིཀྑཝེ, ཨེཝརཱུཔཱནཾ ཨསེཁམུནཱིནཾ ཨབྷིསམྤརཱཡོ ནཱམ ནཏྠི. ཨེཝརཱུཔཱ ཧི ཨཙྩུཏཾ ཨམཏཾ མཧཱནིབྦཱནམེཝ པཱཔུཎནྟཱི’’ཏི ཝཏྭཱ ཨིམཾ གཱཐམཱཧ –

‘‘ཨཧིཾསཀཱ ཡེ མུནཡོ, ནིཙྩཾ ཀཱཡེན སཾཝུཏཱ;

ཏེ ཡནྟི ཨཙྩུཏཾ ཋཱནཾ, ཡཏྠ གནྟྭཱ ན སོཙརེ’’ཏི.

ཏཏྠ ¶ མུནཡོཏི མོནེཡྻཔཊིཔདཱཡ མགྒཕལཔཏྟཱ ཨསེཁམུནཡོ. ཀཱཡེནཱཏི དེསནཱམཏྟམེཝེཏཾ, ཏཱིཧིཔི དྭཱརེཧི སུསཾཝུཏཱཏི ཨཏྠོ. ཨཙྩུཏནྟི སསྶཏཾ. ཋཱནནྟི ཨཀུཔྤཊྛཱནཾ དྷུཝཊྛཱནཾ. ཡཏྠཱཏི ཡསྨིཾ ནིབྦཱནེ གནྟྭཱ ན སོཙརེ ན སོཙནྟི ན ཝིཧཉྙནྟི, ཏཾ ཋཱནཾ གཙྪནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སདཱ ཛཱགརམཱནཱནནྟི ཨིམཾ དྷམྨདེསནཾ སཏྠཱ གིཛ྄ཛྷཀཱུཊེ ཝིཧརནྟོ པུཎྞཾ ནཱམ རཱཛགཧསེཊྛིནོ དཱསིཾ ཨཱརབྦྷ ཀཐེསི.

ཏསྶཱ ¶ ཀིར ཨེཀདིཝསཾ ཀོཊྚནཏྠཱཡ བཧུཝཱིཧིཾ ཨདཾསུ. སཱ རཏྟིམྤི དཱིཔཾ ཛཱལེཏྭཱ ཝཱིཧིཾ ཀོཊྚེནྟཱི ཝིསྶམནཏྠཱཡ སེདཏིནྟེན གཏྟེན བཧིཝཱཏེ ཨཊྛཱསི. ཏསྨིཾ སམཡེ དབྦོ མལླཔུཏྟོ ¶ བྷིཀྑཱུནཾ སེནཱསནཔཉྙཱཔཀོ ¶ ཨཧོསི. སོ དྷམྨསྶཝནཾ སུཏྭཱ ཨཏྟནོ ཨཏྟནོ སེནཱསནཾ གཙྪནྟཱནཾ བྷིཀྑཱུནཾ ཨངྒུལིཾ ཛཱལེཏྭཱ པུརཏོ པུརཏོ མགྒདེསནཏྠཱཡ གཙྪནྟོ བྷིཀྑཱུནཾ ཨཱལོཀཾ ནིམྨིནི. པུཎྞཱ ཏེནཱལོཀེན པབྦཏེ ཝིཙརནྟེ བྷིཀྑཱུ དིསྭཱ ‘‘ཨཧཾ ཏཱཝ ཨཏྟནོ དུཀྑེན ཨུཔདྡུཏཱ ཨིམཱཡཔི ཝེལཱཡ ནིདྡཾ ན ཨུཔེམི, བྷདྡནྟཱ ཀིཾ ཀཱརཎཱ ན ནིདྡཱཡནྟཱི’’ཏི ཙིནྟེཏྭཱ ‘‘ཨདྡྷཱ ཀསྶཙི བྷིཀྑུནོ ཨཕཱསུཀཾ ཝཱ བྷཝིསྶཏི, དཱིགྷཛཱཏིཀེན ཝཱ ཨུཔདྡཝོ བྷཝིསྶཏཱི’’ཏི སཉྙཾ ཀཏྭཱ པཱཏོཝ ཀུཎྜཀཾ ཨཱདཱཡ ཨུདཀེན ཏེམེཏྭཱ ཧཏྠཏལེ པཱུཝཾ ཀཏྭཱ ཨངྒཱརེསུ པཙིཏྭཱ ཨུཙྪངྒེ ཀཏྭཱ ཏིཏྠམགྒེ ཁཱདིསྶཱམཱིཏི གྷཊཾ ཨཱདཱཡ ཏིཏྠཱབྷིམུཁཱི པཱཡཱསི. སཏྠཱཔི གཱམཾ པིཎྜཱཡ པཝིསིཏུཾ ཏམེཝ མགྒཾ པཊིཔཛྫི.

སཱ སཏྠཱརཾ དིསྭཱ ཙིནྟེསི – ‘‘ཨཉྙེསུ དིཝསེསུ སཏྠརི དིཊྛེཔི མམ དེཡྻདྷམྨོ ན ཧོཏི, དེཡྻདྷམྨེ སཏི སཏྠཱརཾ ན པསྶཱམི, ཨིདཱནི མེ དེཡྻདྷམྨོ ཙ ཨཏྠི, སཏྠཱ ཙ སམྨུཁཱིབྷཱུཏོ. སཙེ ལཱུཁཾ ཝཱ པཎཱིཏཾ ཝཱཏི ཨཙིནྟེཏྭཱ གཎྷེཡྻ, དདེཡྻཱཧཾ ཨིམཾ པཱུཝ’’ནྟི གྷཊཾ ཨེཀམནྟེ ནིཀྑིཔིཏྭཱ སཏྠཱརཾ ཝནྡིཏྭཱ, ‘‘བྷནྟེ ¶ , ཨིམཾ ལཱུཁཾ དཱནཾ པཊིགྒཎྷནྟཱ མམ སངྒཧཾ ཀརོཐཱ’’ཏི ཨཱཧ. སཏྠཱ ཨཱནནྡཏྠེརཾ ཨོལོཀེཏྭཱ ཏེན ནཱིཧརིཏྭཱ དིནྣཾ མཧཱརཱཛདཏྟིཡཾ པཏྟཾ ཨུཔནཱམེཏྭཱ པཱུཝཾ གཎྷི. པུཎྞཱཔི ཏཾ སཏྠུ པཏྟེ པཏིཊྛཔེཏྭཱཝ པཉྩཔཏིཊྛིཏེན ཝནྡིཏྭཱ, ‘‘བྷནྟེ, ཏུམྷེཧི དིཊྛདྷམྨོཡེཝ མེ སམིཛ྄ཛྷཏཱུ’’ཏི ཨཱཧ. སཏྠཱ ‘‘ཨེཝཾ ཧོཏཱུ’’ཏི ཋིཏཀོཝ ཨནུམོདནཾ ཨཀཱསི.

པུཎྞཱཔི ཙིནྟེསི – ‘‘ཀིཉྩཱཔི མེ སཏྠཱ སངྒཧཾ ཀརོནྟོ པཱུཝཾ གཎྷི, ན པནིདཾ ཁཱདིསྶཏི. ཨདྡྷཱ པུརཏོ ཀཱཀསྶ ཝཱ སུནཁསྶ ཝཱ དཏྭཱ རཉྙོ ཝཱ རཱཛཔུཏྟསྶ ཝཱ གེཧཾ གནྟྭཱ པཎཱིཏབྷོཛནཾ བྷུཉྫིསྶཏཱི’’ཏི. སཏྠཱཔི ‘‘ཀིཾ ནུ ཁོ ཨེསཱ ཙིནྟེསཱི’’ཏི ཏསྶཱ ཙིཏྟཱཙཱརཾ ཉཏྭཱ ཨཱནནྡཏྠེརཾ ཨོལོཀེཏྭཱ ནིསཱིདནཱཀཱརཾ དསྶེསི. ཐེརོ ཙཱིཝརཾ པཉྙཱཔེཏྭཱ ཨདཱསི. སཏྠཱ བཧིནགརེཡེཝ ནིསཱིདིཏྭཱ བྷཏྟཀིཙྩཾ ཨཀཱསི. དེཝཏཱ སཀལཙཀྐཝཱལ༹གབྦྷེ དེཝམནུསྶཱནཾ ཨུཔཀཔྤནཀཾ ཨོཛཾ མདྷུཔཊལཾ ཝིཡ པཱིལེ༹ཏྭཱ ¶ ཏཏྠ པཀྑིཔིཾསུ. པུཎྞཱ ཙ ཨོལོཀེནྟཱི ཨཊྛཱསི. བྷཏྟཀིཙྩཱཝསཱནེ ཐེརོ ཨུདཀཾ ཨདཱསི. སཏྠཱ ཀཏབྷཏྟཀིཙྩོ པུཎྞཾ ཨཱམནྟེཏྭཱ ‘‘ཀསྨཱ ཏྭཾ པུཎྞེ མམ ¶ སཱཝཀེ པརིབྷཝསཱི’’ཏི ཨཱཧ. ན པརིབྷཝཱམི, བྷནྟེཏི. ཨཐ ཏཡཱ མམ སཱཝཀེ ཨོལོཀེཏྭཱ ཀིཾ ཀཐིཏནྟི? ‘‘ཨཧཾ ཏཱཝ ཨིམིནཱ དུཀྑུཔདྡཝེན ནིདྡཾ ན ཨུཔེམི, བྷདྡནྟཱ ཀིམཏྠཾ ནིདྡཾ ན ཨུཔེནྟི, ཨདྡྷཱ ཀསྶཙི ཨཕཱསུཀཾ ཝཱ བྷཝིསྶཏི, དཱིགྷཛཱཏིཀེན ཝཱ ཨུཔདྡཝོ བྷཝིསྶཏཱི’’ཏི ཨེཏྟཀཾ མཡཱ, བྷནྟེ, ཙིནྟིཏནྟི. སཏྠཱ ཏསྶཱ ཝཙནཾ སུཏྭཱ ‘‘པུཎྞེ ཏྭཾ ན ཏཱཝ དུཀྑུཔདྡཝེན ནིདྡཱཡསི, མམ སཱཝཀཱ སདཱ ཛཱགརིཡམནུཡུཏྟཏཱཡ ན ནིདྡཱཡནྟཱི’’ཏི ཝཏྭཱ ཨིམཾ གཱཐམཱཧ –

‘‘སདཱ ¶ ཛཱགརམཱནཱནཾ, ཨཧོརཏྟཱནུསིཀྑིནཾ;

ནིབྦཱནཾ ཨདྷིམུཏྟཱནཾ, ཨཏྠཾ གཙྪནྟི ཨཱསཝཱ’’ཏི.

ཏཏྠ ཨཧོརཏྟཱནུསིཀྑིནནྟི དིཝཱ ཙ རཏྟིཉྩ ཏིསྶོ སིཀྑཱ སིཀྑམཱནཱནཾ. ནིབྦཱནཾ ཨདྷིམུཏྟཱནནྟི ནིབྦཱནཛ྄ཛྷཱསཡཱནཾ. ཨཏྠཾ གཙྪནྟཱིཏི ཨེཝརཱུཔཱནཾ སབྦེཔི ཨཱསཝཱ ཨཏྠཾ ཝིནཱསཾ ནཏྠིབྷཱཝཾ གཙྪནྟཱིཏི ཨཏྠོ.

དེསནཱཝསཱནེ ཡཐཱཋིཏཱ པུཎྞཱ སོཏཱཔཏྟིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

སཏྠཱ ཀུཎྜཀཨངྒཱརཔཱུཝེན བྷཏྟཀིཙྩཾ ཀཏྭཱ ཝིཧཱརཾ ཨགམཱསི. བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘དུཀྐརཾ ¶ , ཨཱཝུསོ, སམྨཱསམྦུདྡྷེན ཀཏཾ པུཎྞཱཡ དིནྣེན ཀུཎྜཀཨངྒཱརཔཱུཝེན བྷཏྟཀིཙྩཾ ཀརོནྟེནཱ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ, པུབྦེཔི མཡཱ ཨིམཱཡ དིནྣཀུཎྜཀཾ པརིབྷུཏྟམེཝཱ’’ཏི ཝཏྭཱ ཨཏཱིཏཾ ཨཱཧརིཏྭཱ –

‘‘བྷུཏྭཱ ཏིཎཔརིགྷཱསཾ, བྷུཏྭཱ ཨཱཙཱམཀུཎྜཀཾ;

ཨེཏཾ ཏེ བྷོཛནཾ ཨཱསི, ཀསྨཱ དཱནི ན བྷུཉྫསི.

‘‘ཡཏྠ པོསཾ ན ཛཱནནྟི, ཛཱཏིཡཱ ཝིནཡེན ཝཱ;

བཧུཾ ཏཏྠ མཧཱབྲཧྨེ, ཨཔི ཨཱཙཱམཀུཎྜཀཾ.

‘‘ཏྭཉྩ ¶ ཁོ མཾ པཛཱནཱསི, ཡཱདིསཱཡཾ ཧཡུཏྟམོ;

ཛཱནནྟོ ཛཱནམཱགམྨ, ན ཏེ བྷཀྑཱམི ཀུཎྜཀ’’ནྟི. (ཛཱ. ༡.༣.༡༠-༡༢) –

ཨིམཾ ཀུཎྜཀསིནྡྷཝཔོཏཀཛཱཏཀཾ ཝིཏྠཱརེཏྭཱ ཀཐེསི.

པོརཱཎམེཏནྟི ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཏུལཾ ནཱམ ཨུཔཱསཀཾ ཨཱརབྦྷ ཀཐེསི.

སོ ཧི སཱཝཏྠིཝཱསཱི ཨུཔཱསཀོ པཉྩསཏཨུཔཱསཀཔརིཝཱརོ ཨེཀདིཝསཾ ¶ ཏེ ཨུཔཱསཀེ ཨཱདཱཡ དྷམྨསྶཝནཏྠཱཡ ཝིཧཱརཾ གནྟྭཱ རེཝཏཏྠེརསྶ སནྟིཀེ དྷམྨཾ སོཏུཀཱམོ ཧུཏྭཱ རེཝཏཏྠེརཾ ཝནྡིཏྭཱ ནིསཱིདི. སོ པནཱཡསྨཱ པཊིསལླཱནཱརཱམོ སཱིཧོ ཝིཡ ཨེཀཙཱརོ, ཏསྨཱ ཏེན སདྡྷིཾ ན ཀིཉྩི ཀཐེསི. སོ ‘‘ཨཡཾ ཐེརོ ན ཀིཉྩི ཀཐེསཱི’’ཏི ཀུདྡྷོ ཨུཊྛཱཡ སཱརིཔུཏྟཏྠེརསྶ སནྟིཀཾ གནྟྭཱ ཨེཀམནྟཾ ཋིཏོ ཐེརེན ‘‘ཀེནཏྠེན ཨཱགཏཏྠཱ’’ཏི ཝུཏྟེ ‘‘ཨཧཾ, བྷནྟེ, ཨིམེ ཨུཔཱསཀེ ཨཱདཱཡ དྷམྨསྶཝནཏྠཱཡ རེཝཏཏྠེརཾ ཨུཔསངྐམིཾ, ཏསྶ མེ ཐེརོ ན ཀིཉྩི ཀཐེསི, སྭཱཧཾ ཏསྶ ཀུཛ྄ཛྷིཏྭཱ ཨིདྷཱགཏོ, དྷམྨཾ མེ ཀཐེཐཱ’’ཏི ཨཱཧ. ཨཐ ཐེརོ ‘‘ཏེན ཧི ཨུཔཱསཀཱ ནིསཱིདཐཱ’’ཏི ཝཏྭཱ བཧུཀཾ ཀཏྭཱ ཨབྷིདྷམྨཀཐཾ ཀཐེསི. ཨུཔཱསཀོཔི ‘‘ཨབྷིདྷམྨཀཐཱ ནཱམ ཨཏིསཎྷཱ, ཐེརོ བཧུཾ ཨབྷིདྷམྨམེཝ ཀཐེསི, ཨམྷཱཀཾ ཨིམིནཱ ཀོ ཨཏྠོ’’ཏི ཀུཛ྄ཛྷིཏྭཱ པརིསཾ ཨཱདཱཡ ཨཱནནྡཏྠེརསྶ སནྟིཀཾ ཨགམཱསི.

ཐེརེནཱཔི ‘‘ཀིཾ ཨུཔཱསཀཱ’’ཏི ཝུཏྟེ, ‘‘བྷནྟེ, མཡཾ དྷམྨསྶཝནཏྠཱཡ རེཝཏཏྠེརཾ ཨུཔསངྐམིམྷཱ, ཏསྶ སནྟིཀེ ཨཱལཱཔསལླཱཔམཏྟམྤི ཨལབྷིཏྭཱ ཀུདྡྷཱ སཱརིཔུཏྟཏྠེརསྶ སནྟིཀཾ ཨགམིམྷཱ, སོཔི ནོ ཨཏིསཎྷཾ བཧུཾ ཨབྷིདྷམྨམེཝ ཀཐེསི, ‘ཨིམིནཱ ཨམྷཱཀཾ ཀོ ཨཏྠོ’ཏི ཨེཏསྶཱཔི ཀུཛ྄ཛྷིཏྭཱ ཨིདྷཱགམིམྷཱ, ཀཐེཧི ནོ, བྷནྟེ, དྷམྨཀཐ’’ནྟི. ཏེན ཧི ནིསཱིདིཏྭཱ སུཎཱཐཱཏི ཐེརོ ཏེསཾ སུཝིཉྙེཡྻཾ ཀཏྭཱ ཨཔྤཀམེཝ ¶ དྷམྨཾ ཀཐེསི. ཏེ ཐེརསྶཔི ཀུཛ྄ཛྷིཏྭཱ སཏྠུ སནྟིཀཾ གནྟྭཱ ཝནྡིཏྭཱ ཨེཀམནྟཾ ནིསཱིདིཾསུ, ཨཐ ནེ སཏྠཱ ཨཱཧ – ‘‘ཀསྨཱ ¶ ཨུཔཱསཀཱ ཨཱགཏཏྠཱ’’ཏི? ‘‘དྷམྨསྶཝནཱཡ, བྷནྟེ’’ཏི. ‘‘སུཏོ པན ཝོ དྷམྨོ’’ཏི? ‘‘བྷནྟེ, མཡཾ ཨཱདིཏོ རེཝཏཏྠེརཾ ཨུཔསངྐམིམྷཱ, སོ ཨམྷེཧི སདྡྷིཾ ན ཀིཉྩི ཀཐེསི, ཏསྶ ཀུཛ྄ཛྷིཏྭཱ སཱརིཔུཏྟཏྠེརཾ ཨུཔསངྐམིམྷཱ, ཏེན ནོ བཧུ ཨབྷིདྷམྨོ ཀཐིཏོ, ཏཾ ཨསལླཀྑེཏྭཱ ཀུཛ྄ཛྷིཏྭཱ ཨཱནནྡཏྠེརཾ ཨུཔསངྐམིམྷཱ, ཏེན ནོ ཨཔྤམཏྟཀོཝ དྷམྨོ ཀཐིཏོ, ཏསྶཔི ཀུཛ྄ཛྷིཏྭཱ ཨིདྷཱགཏམྷཱ’’ཏི.

སཏྠཱ ཏསྶ ཀཐཾ སུཏྭཱ, ‘‘ཨཏུལ, པོརཱཎཏོ པཊྛཱཡ ཨཱཙིཎྞམེཝེཏཾ, ཏུཎྷཱིབྷཱུཏམྤི བཧུཀཐམྤི མནྡཀཐམྤི གརཧནྟིཡེཝ. ཨེཀནྟཾ གརཧིཏབྦོཡེཝ ཝཱ ཧི པསཾསིཏབྦོཡེཝ ཝཱ ནཏྠི ¶ . རཱཛཱནོཔི ཨེཀཙྩེ ནིནྡནྟི, ཨེཀཙྩེ པསཾསནྟི. མཧཱཔཐཝིམྤི ཙནྡིམསཱུརིཡེཔི ཨཱཀཱསཱདཡོཔི ཙཏུཔརིསམཛ྄ཛྷེ ནིསཱིདིཏྭཱ དྷམྨཾ ཀཐེནྟམྤི སམྨཱསམྦུདྡྷཾ ཨེཀཙྩེ གརཧནྟི, ཨེཀཙྩེ པསཾསནྟི. ཨནྡྷབཱལཱནཉྷི ནིནྡཱ ཝཱ པསཾསཱ ཝཱ ཨཔྤམཱཎཱ, པཎྜིཏེན པན མེདྷཱཝིནཱ ནིནྡིཏོ ནིནྡིཏོ ནཱམ, པསཾསིཏོ ཙ པསཾསིཏོ ནཱམ ཧོཏཱི’’ཏི ཝཏྭཱ ཨིམཱ གཱཐཱ ཨབྷཱསི –

‘‘པོརཱཎམེཏཾ ¶ ཨཏུལ, ནེཏཾ ཨཛྫཏནཱམིཝ;

ནིནྡནྟི ཏུཎྷིམཱསཱིནཾ, ནིནྡནྟི བཧུབྷཱཎིནཾ;

མིཏབྷཱཎིམྤི ནིནྡནྟི, ནཏྠི ལོཀེ ཨནིནྡིཏོ.

‘‘ན ཙཱཧུ ན ཙ བྷཝིསྶཏི, ན ཙེཏརཧི ཝིཛྫཏི;

ཨེཀནྟཾ ནིནྡིཏོ པོསོ, ཨེཀནྟཾ ཝཱ པསཾསིཏོ.

‘‘ཡཾ ཙེ ཝིཉྙཱུ པསཾསནྟི, ཨནུཝིཙྩ སུཝེ སུཝེ;

ཨཙྪིདྡཝུཏྟིཾ མེདྷཱཝིཾ, པཉྙཱསཱིལསམཱཧིཏཾ.

‘‘ནིཀྑཾ ཛམྦོནདསྶེཝ, ཀོ ཏཾ ནིནྡིཏུམརཧཏི;

དེཝཱཔི ནཾ པསཾསནྟི, བྲཧྨུནཱཔི པསཾསིཏོ’’ཏི.

ཏཏྠ པོརཱཎམེཏནྟི པུརཱཎཀཾ ཨེཏཾ. ཨཏུལཱཏི ཏཾ ཨུཔཱསཀཾ ནཱམེན ཨཱལཔཏི. ནེཏཾ ཨཛྫཏནཱམིཝཱཏི ཨིདཾ ནིནྡནཾ ཝཱ པསཾསནཾ ཝཱ ཨཛྫཏནཾ ¶ ཨདྷུནཱ ཨུཔྤནྣཾ ཝིཡ ན ཧོཏི. ཏུཎྷིམཱསཱིནནྟི ཀིཾ ཨེསོ མཱུགོ ཝིཡ བདྷིརོ ཝིཡ ཀིཉྩི ཨཛཱནནྟོ ཝིཡ ཏུཎྷཱི ཧུཏྭཱ ནིསིནྣོཏི ནིནྡནྟི. བཧུབྷཱཎིནནྟི ཀིཾ ཨེས ཝཱཏཱཧཏཏཱལཔཎྞཾ ཝིཡ ཏཊཏཊཱཡཏི, ཨིམསྶ ཀཐཱཔརིཡནྟོཡེཝ ནཏྠཱིཏི ནིནྡནྟི. མིཏབྷཱཎིམྤཱིཏི ཀིཾ ¶ ཨེས སུཝཎྞཧིརཉྙཾ ཝིཡ ཨཏྟནོ ཝཙནཾ མཉྙམཱནོ ཨེཀཾ ཝཱ དྭེ ཝཱ ཝཏྭཱ ཏུཎྷཱི ཨཧོསཱིཏི ནིནྡནྟི. ཨེཝཾ སབྦཐཱཔི ཨིམསྨིཾ ལོཀེ ཨནིནྡིཏོ ནཱམ ནཏྠཱིཏི ཨཏྠོ. ན ཙཱཧཱུཏི ཨཏཱིཏེཔི ནཱཧོསི, ཨནཱགཏེཔི ན བྷཝིསྶཏི.

ཡཾ ཙེ ཝིཉྙཱུཏི བཱལཱནཾ ནིནྡཱ ཝཱ པསཾསཱ ཝཱ ཨཔྤམཱཎཱ, ཡཾ པན པཎྜིཏཱ དིཝསེ དིཝསེ ཨནུཝིཙྩ ནིནྡཀཱརཎཾ ཝཱ པསཾསཀཱརཎཾ ཝཱ ཛཱནིཏྭཱ པསཾསནྟི, ཨཙྪིདྡཱཡ ཝཱ སིཀྑཱཡ ¶ ཨཙྪིདྡཱཡ ཝཱ ཛཱིཝིཏཝུཏྟིཡཱ སམནྣཱགཏཏྟཱ ཨཙྪིདྡཝུཏྟིཾ དྷམྨོཛཔཉྙཱཡ སམནྣཱགཏཏྟཱ མེདྷཱཝིཾ ལོཀིཡལོཀུཏྟརཔཉྙཱཡ ཙེཝ ཙཏུཔཱརིསུདྡྷིསཱིལེན ཙ སམནྣཱགཏཏྟཱ པཉྙཱསཱིལསམཱཧིཏཾ པསཾསནྟི, ཏཾ སུཝཎྞདོསཝིརཧིཏཾ གྷཊྚནམཛྫནཀྑམཾ ཛམྦོནདནིཀྑཾ ཝིཡ ཀོ ནིནྡིཏུམརཧཏཱིཏི ཨཏྠོ. དེཝཱཔཱིཏི དེཝཏཱཔི པཎྜིཏམནུསྶཱཔི ཏཾ བྷིཀྑུཾ ཨུཔཊྛཱཡ ཐོམེནྟི པསཾསནྟི. བྲཧྨུནཱཔཱིཏི ན ཀེཝལཾ དེཝམནུསྶེཧི, དསསཧསྶཙཀྐཝཱལེ༹ མཧཱབྲཧྨུནཱཔི ཨེས པསཾསིཏོཡེཝཱཏི ཨཏྠོ.

དེསནཱཝསཱནེ པཉྩསཏཱཔི ཨུཔཱསཀཱ སོཏཱཔཏྟིཕལེ པཏིཊྛཧིཾསཱུཏི.

ཀཱཡཔྤཀོཔནྟི ¶ ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཚབྦགྒིཡེ བྷིཀྑཱུ ཨཱརབྦྷ ཀཐེསི.

ཨེཀདིཝསཉྷི སཏྠཱ ཝེལུ༹ཝནེ ཝིཧརནྟོ ཏེསཾ ཚབྦགྒིཡཱནཾ ཨུབྷོཧི ཧཏྠེཧི ཡཊྛིཡོ གཧེཏྭཱ ཀཊྛཔཱདུཀཱ ཨཱརུཡ྄ཧ པིཊྛིཔཱསཱཎེ ཙངྐམནྟཱནཾ ཁཊཁཊཱཏིསདྡཾ སུཏྭཱ, ‘‘ཨཱནནྡ, ཀིཾ སདྡོ ནཱམེསོ’’ཏི པུཙྪིཏྭཱ ¶ ‘‘ཚབྦགྒིཡཱནཾ པཱདུཀཱ ཨཱརུཡ྄ཧ ཙངྐམནྟཱནཾ ཁཊཁཊསདྡོ’’ཏི སུཏྭཱ སིཀྑཱཔདཾ པཉྙཱཔེཏྭཱ ‘‘བྷིཀྑུནཱ ནཱམ ཀཱཡཱདཱིནི རཀྑིཏུཾ ཝཊྚཏཱི’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ཀཱཡཔྤཀོཔཾ རཀྑེཡྻ, ཀཱཡེན སཾཝུཏོ སིཡཱ;

ཀཱཡདུཙྩརིཏཾ ཧིཏྭཱ, ཀཱཡེན སུཙརིཏཾ ཙརེ.

‘‘ཝཙཱིཔཀོཔཾ རཀྑེཡྻ, ཝཱཙཱཡ སཾཝུཏོ སིཡཱ;

ཝཙཱིདུཙྩརིཏཾ ཧིཏྭཱ, ཝཱཙཱཡ སུཙརིཏཾ ཙརེ.

‘‘མནོཔཀོཔཾ རཀྑེཡྻ, མནསཱ སཾཝུཏོ སིཡཱ;

མནོདུཙྩརིཏཾ ཧིཏྭཱ, མནསཱ སུཙརིཏཾ ཙརེ.

‘‘ཀཱཡེན ¶ སཾཝུཏཱ དྷཱིརཱ, ཨཐོ ཝཱཙཱཡ སཾཝུཏཱ;

མནསཱ སཾཝུཏཱ དྷཱིརཱ, ཏེ ཝེ སུཔརིསཾཝུཏཱ’’ཏི.

ཏཏྠ ཀཱཡཔྤཀོཔནྟི ཏིཝིདྷཾ ཀཱཡདུཙྩརིཏཾ རཀྑེཡྻ. ཀཱཡེན སཾཝུཏོཏི ཀཱཡདྭཱརེ དུཙྩརིཏཔཝེསནཾ ནིཝཱརེཏྭཱ སཾཝུཏོ པིཧིཏདྭཱརོ སིཡཱ. ཡསྨཱ པན ¶ ཀཱཡདུཙྩརིཏཾ ཧིཏྭཱ ཀཱཡསུཙརིཏཾ ཙརནྟོ ཨུབྷཡམྤེཏཾ ཀརོཏི, ཏསྨཱ ཀཱཡདུཙྩརིཏཾ ཧིཏྭཱ, ཀཱཡེན སུཙརིཏཾ ཙརེཏི ཝུཏྟཾ. ཨནནྟརགཱཐཱསུཔི ཨེསེཝ ནཡོ. ཀཱཡེན སཾཝུཏཱ དྷཱིརཱཏི ཡེ པཎྜིཏཱ པཱཎཱཏིཔཱཏཱདཱིནི ཨཀརོནྟཱ ཀཱཡེན, མུསཱཝཱདཱདཱིནི ཨཀརོནྟཱ ཝཱཙཱཡ, ཨབྷིཛ྄ཛྷཱདཱིནི ཨསམུཊྛཔེནྟཱ མནསཱ སཾཝུཏཱ, ཏེ ཨིདྷ ལོཀསྨིཾ སུསཾཝུཏཱ སུརཀྑིཏཱ སུགོཔིཏཱ སུཔིཧིཏདྭཱརཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པཎྜུཔལཱསོཝ ¶ ¶ ¶ དཱནིསཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ གོགྷཱཏཀཔུཏྟཾ ཨཱརབྦྷ ཀཐེསི.

སཱཝཏྠིཡཾ ཀིརེཀོ གོགྷཱཏཀོ གཱཝོ ཝདྷིཏྭཱ ཝརམཾསཱནི གཧེཏྭཱ པཙཱཔེཏྭཱ པུཏྟདཱརེཧི སདྡྷིཾ ནིསཱིདིཏྭཱ མཾསཉྩ ཁཱདཏི, མཱུལེན ཙ ཝིཀྐིཎིཏྭཱ ཛཱིཝིཀཾ ཀཔྤེསི. སོ ཨེཝཾ པཉྩཔཎྞཱས ཝསྶཱནི གོགྷཱཏཀཀམྨཾ ཀརོནྟོ དྷུརཝིཧཱརེ ཝིཧརནྟསྶ སཏྠུ ཨེཀདིཝསམྤི ཀཊཙྪུམཏྟམྤི ཡཱགུཾ ཝཱ བྷཏྟཾ ཝཱ ན ཨདཱསི. སོ ཙ ཝིནཱ མཾསེན བྷཏྟཾ ན བྷུཉྫཏི. སོ ཨེཀདིཝསཾ དིཝསབྷཱགེ མཾསཾ ཝིཀྐིཎིཏྭཱ ཨཏྟནོ ཨཏྠཱཡ པཙིཏུཾ ཨེཀཾ མཾསཁཎྜཾ བྷརིཡཱཡ དཏྭཱ ནྷཱཡིཏུཾ ཨགམཱསི. ཨཐསྶ སཧཱཡཀོ གེཧཾ གནྟྭཱ བྷརིཡཾ ཨཱཧ – ‘‘ཐོཀཾ མེ ཝིཀྐིཎིཡམཾསཾ དེཧི, གེཧཾ ¶ མེ པཱཧུནཀོ ཨཱགཏོ’’ཏི. ནཏྠི ཝིཀྐིཎིཡམཾསཾ, སཧཱཡཀོ ཏེ མཾསཾ ཝིཀྐིཎིཏྭཱ ཨིདཱནི ནྷཱཡིཏུཾ གཏོཏི. མཱ ཨེཝཾ ཀརི, སཙེ མཾསཁཎྜཾ ཨཏྠི, དེཧཱིཏི. སཧཱཡཀསྶ ཏེ ནིཀྑིཏྟམཾསཾ ཋཔེཏྭཱ ཨཉྙཾ ནཏྠཱིཏི. སོ ‘‘སཧཱཡཀསྶ མེ ཨཏྠཱཡ ཋཔིཏམཾསཏོ ཨཉྙཾ མཾསཾ ནཏྠི, སོ ཙ ཝིནཱ མཾསེན ན བྷུཉྫཏི, ནཱཡཾ དསྶཏཱི’’ཏི སཱམཾཡེཝ ཏཾ མཾསཾ གཧེཏྭཱ པཀྐཱམི.

གོགྷཱཏཀོཔི ནྷཏྭཱ ཨཱགཏོ ཏཱཡ ཨཏྟནོ པཀྐཔཎྞེན སདྡྷིཾ ཝཌྜྷེཏྭཱ བྷཏྟེ ཨུཔནཱིཏེ ཨཱཧ ‘‘ཀཧཾ མཾས’’ནྟི? ‘‘ནཏྠི, སཱམཱི’’ཏི. ནནུ ཨཧཾ པཙྩནཏྠཱཡ མཾསཾ དཏྭཱ གཏོཏི. ཏཝ སཧཱཡཀོ ཨཱགནྟྭཱ ‘‘པཱཧུནཀོ མེ ཨཱགཏོ, ཝིཀྐིཎིཡམཾསཾ དེཧཱི’’ཏི ཝཏྭཱ མཡཱ ‘‘སཧཱཡཀསྶ ཏེ ཋཔིཏམཾསཏོ ཨཉྙཾ མཾསཾ ནཏྠི, སོ ཙ ཝིནཱ མཾསེན ན བྷུཉྫཏཱི’’ཏི ཝུཏྟེཔི བལཀྐཱརེན ཏཾ མཾསཾ སཱམཾཡེཝ གཧེཏྭཱ གཏོཏི. ཨཧཾ ཝིནཱ མཾསེན བྷཏྟཾ ན བྷུཉྫཱམི, ཧརཱཧི ནནྟི. ཀིཾ སཀྐཱ ཀཱཏུཾ, བྷུཉྫ, སཱམཱིཏི. སོ ‘‘ནཱཧཾ བྷུཉྫཱམཱི’’ཏི ཏཾ བྷཏྟཾ ཧརཱཔེཏྭཱ སཏྠཾ ཨཱདཱཡ པཙྪཱགེཧེ ཋིཏོ གོཎོ ཨཏྠི, ཏསྶ སནྟིཀཾ གནྟྭཱ མུཁེ ཧཏྠཾ པཀྑིཔིཏྭཱ ཛིཝ྄ཧཾ ནཱིཧརིཏྭཱ སཏྠེན མཱུལེ ¶ ཚིནྡིཏྭཱ ཨཱདཱཡ གནྟྭཱ ཨངྒཱརེསུ པཙཱཔེཏྭཱ བྷཏྟམཏྠཀེ ¶ ཋཔེཏྭཱ ནིསིནྣོ ཨེཀཾ བྷཏྟཔིཎྜཾ བྷུཉྫིཏྭཱ ཨེཀཾ མཾསཁཎྜཾ མུཁེ ཋཔེསི. ཏངྑཎཉྙེཝསྶ ¶ ཛིཝ྄ཧཱ ཚིཛྫིཏྭཱ བྷཏྟཔཱཏིཡཾ པཏི. ཏངྑཎཉྙེཝ ཀམྨསརིཀྑཀཾ ཝིཔཱཀཾ ལབྷི. སོཔི ཁོ གོཎོ ཝིཡ ལོཧིཏདྷཱརཱཡ མུཁཏོ པགྒྷརནྟིཡཱ ཨནྟོགེཧཾ པཝིསིཏྭཱ ཛཎྞུཀེཧི ཝིཙརནྟོ ཝིརཝི.

ཏསྨིཾ སམཡེ གོགྷཱཏཀསྶ པུཏྟོ པིཏརཾ ཨོལོཀེནྟོ སམཱིཔེ ཋིཏོ ཧོཏི. ཨཐ ནཾ མཱཏཱ ཨཱཧ – ‘‘པསྶ, པུཏྟ, ཨིམཾ གོགྷཱཏཀཾ གོཎཾ ཝིཡ གེཧམཛ྄ཛྷེ ཛཎྞུཀེཧི ཝིཙརིཏྭཱ ཝིརཝནྟཾ, ཨིདཾ དུཀྑཾ ཏཝ མཏྠཀེ པཏིསྶཏི, མམམྤི ཨནོལོཀེཏྭཱ ཨཏྟནོ སོཏྠིཾ ཀརོནྟོ པལཱཡསྶཱུ’’ཏི. སོ མརཎབྷཡཏཛྫིཏོ མཱཏརཾ ཝནྡིཏྭཱ པལཱཡི, པལཱཡིཏྭཱ ཙ པན ཏཀྐསིལཾ ཨགམཱསི. གོགྷཱཏཀོཔི གོཎོ ཝིཡ གེཧམཛ྄ཛྷེ ཝིརཝནྟོ ཝིཙརིཏྭཱ ཀཱལཀཏོ ཨཝཱིཙིམྷི ནིབྦཏྟི. གོཎོཔི ཀཱལམཀཱསི. གོགྷཱཏཀཔུཏྟོཔི ཏཀྐསིལཾ གནྟྭཱ སུཝཎྞཀཱརཀམྨཾ ཨུགྒཎྷི. ཨཐསྶཱཙརིཡོ གཱམཾ གཙྪནྟོ ‘‘ཨེཝརཱུཔཾ ནཱམ ཨལངྐཱརཾ ཀརེཡྻཱསཱི’’ཏི ཝཏྭཱ པཀྐཱམི. སོཔི ཏཐཱརཱུཔཾ ཨལངྐཱརཾ ཨཀཱསི. ཨཐསྶཱཙརིཡོ ཨཱགནྟྭཱ ཨལངྐཱརཾ དིསྭཱ ‘‘ཨཡཾ ཡཏྠ ཀཏྠཙི གནྟྭཱ ཛཱིཝིཏུཾ སམཏྠོ’’ཏི ཝཡཔྤཏྟཾ ཨཏྟནོ དྷཱིཏརཾ ཨདཱསི. སོ པུཏྟདྷཱིཏཱཧི ཝཌྜྷི.

ཨཐསྶ པུཏྟཱ ཝཡཔྤཏྟཱ སིཔྤཾ ཨུགྒཎྷིཏྭཱ ཨཔརབྷཱགེ སཱཝཏྠིཡཾ གནྟྭཱ ཏཏྠ གྷརཱཝཱསཾ སཎྛཔེཏྭཱ ཝསནྟཱ སདྡྷཱ པསནྣཱ ཨཧེསུཾ. པིཏཱཔི ནེསཾ ཏཀྐསིལཱཡཾ ཀིཉྩི ཀུསལཾ ཨཀཏྭཱཝ ཛརཾ ¶ པཱཔུཎི. ཨཐསྶ པུཏྟཱ ‘‘པིཏཱ ནོ མཧལླཀོ’’ཏི ཨཏྟནོ སནྟིཀཾ པཀྐོསཱཔེཏྭཱ ‘‘པིཏུ ཨཏྠཱཡ དཱནཾ དསྶཱམཱ’’ཏི བུདྡྷཔྤམུཁཾ བྷིཀྑུསངྒྷཾ ནིམནྟཡིཾསུ. ཏེ པུནདིཝསེ ཨནྟོགེཧེ བུདྡྷཔྤམུཁཾ བྷིཀྑུསངྒྷཾ ནིསཱིདཱཔེཏྭཱ སཀྐཙྩཾ པརིཝིསིཏྭཱ བྷཏྟཀིཙྩཱཝསཱནེ སཏྠཱརཾ ཨཱཧཾསུ – ‘‘བྷནྟེ, ཨམྷེཧི ཨིདཾ པིཏུ ཛཱིཝབྷཏྟཾ དིནྣཾ, པིཏུ ནོ ཨནུམོདནཾ ཀརོཐཱ’’ཏི. སཏྠཱ ཏཾ ཨཱམནྟེཏྭཱ, ‘‘ཨུཔཱསཀ, ཏྭཾ མཧལླཀོ པརིཔཀྐསརཱིརོ པཎྜུཔལཱསསདིསོ, ཏཝ པརལོཀགམནཱཡ ཀུསལཔཱཐེཡྻཾ ནཏྠི, ཨཏྟནོ པཏིཊྛཾ ཀརོཧི, པཎྜིཏོ བྷཝ, མཱ བཱལོ’’ཏི ཨནུམོདནཾ ཀརོནྟོ ཨིམཱ དྭེ གཱཐཱ ཨབྷཱསི –

དིབྦཾ ཨརིཡབྷཱུམིཾ ཨུཔེཧིསཱི’’ཏི.

ཏཏྠ པཎྜུཔལཱསོཝ དཱནིསཱིཏི, ཨུཔཱསཀ, ཏྭཾ ཨིདཱནི ཚིཛྫིཏྭཱ བྷཱུམིཡཾ པཏིཏཔཎྜུཔལཱསོ ཝིཡ ཨཧོསི. ཡམཔུརིསཱཏི ཡམདཱུཏཱ ཝུཙྩནྟི, ཨིདཾ པན མརཎམེཝ སནྡྷཱཡ ཝུཏྟཾ, མརཎཾ ཏེ པཙྩུཔཊྛིཏནྟི ཨཏྠོ. ཨུཡྻོགམུཁེཏི པརིཧཱནིམུཁེ, ཨཝུཌྜྷིམུཁེ ཙ ཋིཏོསཱིཏི ཨཏྠོ. པཱཐེཡྻནྟི གམིཀསྶ ཏཎྜུལཱདིཔཱཐེཡྻཾ ¶ ཝིཡ པརལོཀཾ གཙྪནྟསྶ ཏཝ ཀུསལཔཱཐེཡྻམྤི ནཏྠཱིཏི ཨཏྠོ. སོ ཀརོཧཱིཏི སོ ཏྭཾ སམུདྡེ ནཱཝཱཡ བྷིནྣཱཡ དཱིཔསངྑཱཏཾ པཏིཊྛཾ ཝིཡ ཨཏྟནོ ཀུསལཔཏིཊྛཾ ཀརོཧི. ཀརོནྟོ ཙ ཁིཔྤཾ ཝཱཡམ, སཱིགྷཾ སཱིགྷཾ ཝཱིརིཡཾ ཨཱརབྷ, ཨཏྟནོ ཀུསལཀམྨཔཏིཊྛཀརཎེན པཎྜིཏོ བྷཝ. ཡོ ཧི མརཎམུཁཾ ཨཔྤཏྭཱ ཀཱཏུཾ སམཏྠཀཱལེཝ ཀུསལཾ ཀརོཏི, ཨེས པཎྜིཏོ ནཱམ, ཏཱདིསོ བྷཝ, མཱ ཨནྡྷབཱལོཏི ཨཏྠོ. དིབྦཾ ཨརིཡབྷཱུམིནྟི ཨེཝཾ ཝཱིརིཡཾ ཀརོནྟོ རཱགཱདཱིནཾ མལཱནཾ ནཱིཧཊཏཱཡ ནིདྡྷནྟམལོ ཨངྒཎཱབྷཱཝེན ཨནངྒཎོ ནིཀྐིལེསོ ཧུཏྭཱ པཉྩཝིདྷཾ སུདྡྷཱཝཱསབྷཱུམིཾ པཱཔུཎིསྶསཱིཏི ཨཏྠོ.

དེསནཱཝསཱནེ ཨུཔཱསཀོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཏེ པུནདིཝསཏྠཱཡཔི སཏྠཱརཾ ནིམནྟེཏྭཱ དཱནཾ དཏྭཱ ཀཏབྷཏྟཀིཙྩཾ སཏྠཱརཾ ཨནུམོདནཀཱལེ ཨཱཧཾསུ – ‘‘བྷནྟེ, ཨིདམྤི ཨམྷཱཀཾ པིཏུ ཛཱིཝབྷཏྟམེཝ, ཨིམསྶེཝ ཨནུམོདནཾ ཀརོཐཱ’’ཏི. སཏྠཱ ཏསྶ ཨནུམོདནཾ ཀརོནྟོ ཨིམཱ དྭེ གཱཐཱ ཨབྷཱསི –

ཏཏྠ ཨུཔནཱིཏཝཡོཏི ཨུཔཱཏི ནིཔཱཏམཏྟཾ, ནཱིཏཝཡོཏི ཝིགཏཝཡོ ཨཏིཀྐནྟཝཡོ, ཏྭཉྩསི དཱནི ཏཡོ ཝཡེ ཨཏིཀྐམིཏྭཱ མརཎམུཁེ ཋིཏོཏི ཨཏྠོ. སམྤཡཱཏོསི ཡམསྶ སནྟིཀནྟི མརཎམུཁཾ གནྟུཾ སཛྫོ ཧུཏྭཱ ཋིཏོསཱིཏི ཨཏྠོ. ཝཱསོ ཏེ ནཏྠི ཨནྟརཱཏི ཡཐཱ མགྒཾ གཙྪནྟཱ ཏཱནི ཏཱནི ཀིཙྩཱནི ཀརོནྟཱ ཨནྟརཱམགྒེ ཝསནྟི, ན ཨེཝཾ པརལོཀཾ གཙྪནྟཱ. ན ཧི སཀྐཱ པརལོཀཾ གཙྪནྟེན ‘‘ཨདྷིཝཱསེཐ ཀཏིཔཱཧཾ, དཱནཾ ཏཱཝ དེམི, དྷམྨཾ ཏཱཝ སུཎཱམཱི’’ཏིཨཱདཱིནི ཝཏྟུཾ. ཨིཏོ པན ཙཝིཏྭཱ པརལོཀེ ནིབྦཏྟོཝ ཧོཏི. ཨིམམཏྠཾ སནྡྷཱཡེཏཾ ཝུཏྟཾ. པཱཐེཡྻནྟི ཨིདཾ ཀིཉྩཱཔི ཧེཊྛཱ ཝུཏྟམེཝ, ཨུཔཱསཀསྶ པན པུནཔྤུནཾ དལ༹ྷཱིཀརཎཏྠཾ ཨིདྷཱཔི སཏྠཱརཱ ཀཐིཏཾ. ཛཱཏིཛརནྟི ཨེཏྠ ¶ བྱཱདྷིམརཎཱནིཔི གཧིཏཱནེཝ ཧོནྟི. ཧེཊྛིམགཱཐཱཧི ཙ ཨནཱགཱམིམགྒོ ཀཐིཏོ, ཨིདྷ ཨརཧཏྟམགྒོ ཀཐིཏོ. ཨེཝཾ སནྟེཔི ཡཐཱ ནཱམ རཉྙཱ ཨཏྟནོ མུཁཔམཱཎེན ཀབལ༹ཾ ཝཌྜྷེཏྭཱ པུཏྟསྶ ཨུཔནཱིཏེ སོ ཀུམཱརོ ཨཏྟནོ མུཁཔམཱཎེནེཝ གཎྷཱཏི, ཨེཝམེཝ སཏྠཱརཱ ཨུཔརིམགྒཝསེན དྷམྨེ དེསིཏེཔི ཨུཔཱསཀོ ཨཏྟནོ ཨུཔནིསྶཡཝསེན ཧེཊྛཱ སོཏཱཔཏྟིཕལཾ པཏྭཱ ཨིམིསྶཱ ཨནུམོདནཱཡ ཨཝསཱནེ ཨནཱགཱམིཕལཾ པཏྟོ. སེསཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

ཨནུཔུབྦེནཱཏི ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརབྲཱཧྨཎཾ ཨཱརབྦྷ ཀཐེསི.

སོ ཀིར ཨེཀདིཝསཾ པཱཏོཝ ནིཀྑམིཏྭཱ བྷིཀྑཱུནཾ ཙཱིཝརཔཱརུཔནཊྛཱནེ བྷིཀྑཱུ ཙཱིཝརཾ པཱརུཔནྟེ ཨོལོཀེནྟོ ཨཊྛཱསི. ཏཾ པན ཋཱནཾ ཝིརཱུལ༹ྷཏིཎཾ ཧོཏི. ཨཐེཀསྶ བྷིཀྑུནོ ཙཱིཝརཾ པཱརུཔནྟསྶ ཙཱིཝརཀཎྞོ ཏིཎེསུ པཝཊྚེནྟོ ཨུསྶཱཝབིནྡཱུཧི ཏེམི. བྲཱཧྨཎོ ‘‘ཨིམཾ ཋཱནཾ ¶ ཨཔྤཧརིཏཾ ཀཱཏུཾ ཝཊྚཏཱི’’ཏི པུནདིཝསེ ཀུདྡཱལཾ ཨཱདཱཡ གནྟྭཱ ཏཾ ཋཱནཾ ཏཙྪེཏྭཱ ཁལམཎྜལསདིསཾ ཨཀཱསི. པུནདིཝསེཔི ཏཾ ཋཱནཾ ཨཱགནྟྭཱ བྷིཀྑཱུསུ ཙཱིཝརཾ པཱརུཔནྟེསུ ཨེཀསྶ ¶ ཙཱིཝརཀཎྞཾ བྷཱུམིཡཾ པཏིཏྭཱ པཾསུམྷི པཝཊྚམཱནཾ དིསྭཱ ‘‘ཨིདྷ ཝཱལུཀཾ ཨོཀིརིཏུཾ ཝཊྚཏཱི’’ཏི ཙིནྟེཏྭཱ ཝཱལུཀཾ ཨཱཧརིཏྭཱ ཨོཀིརི.

ཨཐེཀདིཝསཾ པུརེབྷཏྟཾ ཙཎྜོ ཨཱཏཔོ ཨཧོསི, ཏདཱཔི བྷིཀྑཱུནཾ ཙཱིཝརཾ པཱརུཔནྟཱནཾ གཏྟཏོ སེདེ མུཙྩནྟེ དིསྭཱ ‘‘ཨིདྷ མཡཱ མཎྜཔཾ ཀཱརེཏུཾ ཝཊྚཏཱི’’ཏི ཙིནྟེཏྭཱ མཎྜཔཾ ཀཱརེསི. པུནདིཝསེ པཱཏོཝ ཝསྶཾ ཝསྶི, ཝདྡལིཀཾ ཨཧོསི. ཏདཱཔི བྲཱཧྨཎོ བྷིཀྑཱུ ཨོལོཀེནྟོཝ ཋིཏོ ཏིནྟཙཱིཝརཀེ བྷིཀྑཱུ དིསྭཱ ‘‘ཨེཏྠ མཡཱ སཱལཾ ཀཱརེཏུཾ ཝཊྚཏཱི’’ཏི སཱལཾ ཀཱརེཏྭཱ ‘‘ཨིདཱནི སཱལམཧཾ ཀརིསྶཱམཱི’’ཏི ཙིནྟེཏྭཱ བུདྡྷཔྤམུཁཾ བྷིཀྑུསངྒྷཾ ¶ ནིམནྟེཏྭཱ ཨནྟོ ཙ བཧི ཙ བྷིཀྑཱུ ནིསཱིདཱཔེཏྭཱ བྷཏྟཀིཙྩཱཝསཱནེ ཨནུམོདནཏྠཱཡ སཏྠུ པཏྟཾ གཧེཏྭཱ, ‘‘བྷནྟེ, ཨཧཾ བྷིཀྑཱུནཾ ཙཱིཝརཔཱརུཔནཀཱལེ ཨིམསྨིཾ ཋཱནེ ཨོལོཀེནྟོ ཋིཏོ ཨིདཉྩིདཉྩ དིསྭཱ ཨིདཉྩིདཉྩ ཀཱརེསི’’ནྟི ཨཱདིཏོ པཊྛཱཡ སབྦཾ ཏཾ པཝཏྟིཾ ཨཱརོཙེསི. སཏྠཱ ཏསྶ ཝཙནཾ སུཏྭཱ, ‘‘བྲཱཧྨཎ, པཎྜིཏཱ ནཱམ ཁཎེ ཁཎེ ཐོཀཾ ཀུསལཾ ཀརོནྟཱ ཨནུཔུབྦེན ཨཏྟནོ ཨཀུསལམལཾ ནཱིཧརནྟིཡེཝཱ’’ཏི ཝཏྭཱ ཨིམཾ གཱཐམཱཧ –

‘‘ཨནུཔུབྦེན མེདྷཱཝཱི, ཐོཀཾ ཐོཀཾ ཁཎེ ཁཎེ;

ཀམྨཱརོ རཛཏསྶེཝ, ནིདྡྷམེ མལམཏྟནོ’’ཏི.

ཏཏྠ ཨནུཔུབྦེནཱཏི ཨནུཔཊིཔཱཊིཡཱ. མེདྷཱཝཱིཏི དྷམྨོཛཔཉྙཱཡ སམནྣཱགཏོ. ཁཎེ ཁཎེཏི ཨོཀཱསེ ཨོཀཱསེ ཀུསལཾ ཀརོནྟོ. ཀམྨཱརོ རཛཏསྶེཝཱཏི ཡཐཱ སུཝཎྞཀཱརོ ཨེཀཝཱརམེཝ སུཝཎྞཾ ཏཱཔེཏྭཱ ཀོཊྚེཏྭཱ མལཾ ནཱིཧརིཏྭཱ པིལནྡྷནཝིཀཏིཾ ཀཱཏུཾ ན སཀྐོཏི ¶ , པུནཔྤུནཾ ཏཱཔེནྟོ ཀོཊྚེནྟོ པན མལཾ ནཱིཧརཏི, ཏཏོ ཨནེཀཝིདྷཾ པིལནྡྷནཝིཀཏིཾ ཀརོཏི, ཨེཝམེཝ པུནཔྤུནཾ ཀུསལཾ ཀརོནྟོ པཎྜིཏོ ཨཏྟནོ རཱགཱདིམལཾ ནིདྡྷམེཡྻ, ཨེཝཾ ནིདྡྷནྟམལོ ནིཀྐིལེསོཝ ཧོཏཱིཏི ཨཏྠོ.

དེསནཱཝསཱནེ ¶ བྲཱཧྨཎོ སོཏཱཔཏྟིཕལེ པཏིཊྛཏི, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསཱིཏི.

ཨཡསཱཝ ¶ མལནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏིསྶཏྠེརཾ ནཱམ བྷིཀྑུཾ ཨཱརབྦྷ ཀཐེསི.

ཨེཀོ ཀིར སཱཝཏྠིཝཱསཱི ཀུལཔུཏྟོ པབྦཛིཏྭཱ ལདྡྷཱུཔསམྤདོ ཏིསྶཏྠེརོཏི པཉྙཱཡི. སོ ཨཔརབྷཱགེ ཛནཔདཝིཧཱརེ ཝསྶཱུཔགཏོ ཨཊྛཧཏྠཀཾ ཐཱུལསཱཊཀཾ ལབྷིཏྭཱ ཝུཏྠཝསྶོ པཝཱརེཏྭཱ ཏཾ ཨཱདཱཡ གནྟྭཱ བྷགིནིཡཱ ཧཏྠེ ཋཔེསི. སཱ ‘‘ན མེ ཨེསོ སཱཊཀོ བྷཱཏུ ཨནུཙྪཝིཀོ’’ཏི ཏཾ ཏིཁིཎཱཡ ཝཱསིཡཱ ཚིནྡིཏྭཱ ཧཱིརཧཱིརཾ ཀཏྭཱ ཨུདུཀྑལེ ཀོཊྚེཏྭཱ པཝིསེཏྭཱ པོཐེཏྭཱ ཝཊྚེཏྭཱ སུཁུམསུཏྟཾ ཀནྟིཏྭཱ སཱཊཀཾ ཝཱཡཱཔེསི. ཐེརོཔི སུཏྟཉྩེཝ སཱུཙིཡོ ཙ སཾཝིདཧིཏྭཱ ཙཱིཝརཀཱརཀེ དཧརསཱམཎེརེ སནྣིཔཱཏེཏྭཱ བྷགིནིཡཱ སནྟིཀཾ གནྟྭཱ ‘‘ཏཾ ¶ མེ སཱཊཀཾ དེཐ, ཙཱིཝརཾ ཀཱརེསྶཱམཱི’’ཏི ཨཱཧ. སཱ ནཝཧཏྠཾ སཱཊཀཾ ནཱིཧརིཏྭཱ ཀནིཊྛབྷཱཏིཀསྶ ཧཏྠེ ཋཔེསི. སོ ཏཾ གཧེཏྭཱ ཝིཏྠཱརེཏྭཱ ཨོལོཀེཏྭཱ ‘‘མམ སཱཊཀོ ཐཱུལོ ཨཊྛཧཏྠོ, ཨཡཾ སུཁུམོ ནཝཧཏྠོ. ནཱཡཾ མམ སཱཊཀོ, ཏུམྷཱཀཾ ཨེས, ན མེ ཨིམིནཱ ཨཏྠོ, ཏམེཝ མེ དེཐཱ’’ཏི ཨཱཧ. ‘‘བྷནྟེ, ཏུམྷཱཀམེཝ ཨེསོ, གཎྷཐ ན’’ནྟི? སོ ནེཝ ཨིཙྪི. ཨཐསྶ ཨཏྟནཱ ཀཏཀིཙྩཾ སབྦཾ ཨཱརོཙེཏྭཱ, ‘‘བྷནྟེ, ཏུམྷཱཀམེཝེས, གཎྷཐ ན’’ནྟི ཨདཱསི. སོ ཏཾ ཨཱདཱཡ ཝིཧཱརཾ གནྟྭཱ ཙཱིཝརཀམྨཾ པཊྛཔེསི.

ཨཐསྶ ¶ བྷགིནཱི ཙཱིཝརཀཱརཱནཾ ཨཏྠཱཡ ཡཱགུབྷཏྟཱདཱིནི སམྤཱདེསི. ཙཱིཝརསྶ ནིཊྛིཏདིཝསེ པན ཨཏིརེཀསཀྐཱརཾ ཀཱརེསི. སོ ཙཱིཝརཾ ཨོལོཀེཏྭཱ ཏསྨིཾ ཨུཔྤནྣསིནེཧོ ‘‘སྭེ དཱནི ནཾ པཱརུཔིསྶཱམཱི’’ཏི སཾཧརིཏྭཱ ཙཱིཝརཝཾསེ ཋཔེཏྭཱ ཏཾ རཏྟིཾ བྷུཏྟཱཧཱརཾ ཛིརཱཔེཏུཾ ཨསཀྐོནྟོ ཀཱལཾ ཀཏྭཱ ཏསྨིཾཡེཝ ཙཱིཝརེ ཨཱུཀཱ ཧུཏྭཱ ནིབྦཏྟི. བྷགིནཱིཔིསྶ ཀཱལཀིརིཡཾ སུཏྭཱ བྷིཀྑཱུནཾ པཱདེསུ པཝཏྟམཱནཱ རོདི. བྷིཀྑཱུ ཏསྶ སརཱིརཀིཙྩཾ ཀཏྭཱ གིལཱནུཔཊྛཱཀསྶ ཨབྷཱཝེན སངྒྷསྶེཝ ཏཾ པཱཔུཎཱཏི. ‘‘བྷཱཛེསྶཱམ ན’’ནྟི ཏཾ ཙཱིཝརཾ ནཱིཧརཱཔེསུཾ. སཱ ཨཱུཀཱ ‘‘ཨིམེ མམ སནྟཀཾ ཝིལུམྤནྟཱི’’ཏི ཝིརཝནྟཱི ཨིཏོ ཙིཏོ ཙ སནྡྷཱཝི. སཏྠཱ གནྡྷཀུཊིཡཾ ནིསིནྣོཝ དིབྦཱཡ སོཏདྷཱཏུཡཱ ཏཾ སདྡཾ སུཏྭཱ, ‘‘ཨཱནནྡ, ཏིསྶསྶ ཙཱིཝརཾ ཨབྷཱཛེཏྭཱ སཏྟཱཧཾ ནིཀྑིཔིཏུཾ ཝདེཧཱི’’ཏི ཨཱཧ. ཐེརོ ཏཐཱ ཀཱརེསི. སཱཔི སཏྟམེ དིཝསེ ཀཱལཾ ཀཏྭཱ ཏུསིཏཝིམཱནེ ནིབྦཏྟི. སཏྠཱ ¶ ‘‘ཨཊྛམེ དིཝསེ ཏིསྶསྶ ཙཱིཝརཾ བྷཱཛེཏྭཱ གཎྷཐཱ’’ཏི ཨཱཎཱཔེསི. བྷིཀྑཱུ ཏཐཱ ཀརིཾསུ.

བྷིཀྑཱུ ¶ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཀསྨཱ ནུ ཁོ སཏྠཱ ཏིསྶསྶ ཙཱིཝརཾ སཏྟ དིཝསེ ཋཔཱཔེཏྭཱ ཨཊྛམེ དིཝསེ གཎྷིཏུཾ ཨནུཛཱནཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཏིསྶོ ཨཏྟནོ ཙཱིཝརེ ཨཱུཀཱ ཧུཏྭཱ ནིབྦཏྟོ, ཏུམྷེཧི ཏསྨིཾ བྷཱཛིཡམཱནེ ‘ཨིམེ མམ སནྟཀཾ ཝིལུམྤནྟཱི’ཏི ཝིརཝནྟཱི ཨིཏོ ཙིཏོ ཙ དྷཱཝི. སཱ ཏུམྷེཧི ཙཱིཝརེ གཡ྄ཧམཱནེ ཏུམྷེསུ མནཾ པདུསྶིཏྭཱ ནིརཡེ ནིབྦཏྟེཡྻ, ཏེན ཙཱཧཾ ཙཱིཝརཾ ནིཀྑིཔཱཔེསིཾ. ཨིདཱནི པན སཱ ཏུསིཏཝིམཱནེ ནིབྦཏྟཱ, ཏེན ཝོ མཡཱ ཙཱིཝརགཧཎཾ ཨནུཉྙཱཏ’’ནྟི ཝཏྭཱ པུན ཏེཧི ‘‘བྷཱརིཡཱ ཝཏ ཨཡཾ, བྷནྟེ, ཏཎྷཱ ནཱམཱ’’ཏི ཝུཏྟེ ‘‘ཨཱམ, བྷིཀྑཝེ, ཨིམེསཾ སཏྟཱནཾ ཏཎྷཱ ནཱམ བྷཱརིཡཱ. ཡཐཱ ཨཡཏོ མལཾ ཨུཊྛཧིཏྭཱ ཨཡམེཝ ཁཱདཏི ཝིནཱསེཏི ཨཔརིབྷོགཾ ཀརོཏི, ཨེཝམེཝཱཡཾ ཏཎྷཱ ཨིམེསཾ སཏྟཱནཾ ཨབྦྷནྟརེ ཨུཔྤཛྫིཏྭཱ ཏེ སཏྟེ ནིརཡཱདཱིསུ ནིབྦཏྟཱཔེཏི, ཝིནཱསཾ པཱཔེཏཱི’’ཏི ཝཏྭཱ ཨིམཾ གཱཐམཱཧ –

སཱནི ཀམྨཱནི ནཡནྟི དུགྒཏི’’ནྟི.

ཏཏྠ ¶ ¶ ཨཡསཱཝཱཏི ཨཡཏོ སམུཊྛིཏཾ. ཏཏུཊྛཱཡཱཏི ཏཏོ ཨུཊྛཱཡ. ཨཏིདྷོནཙཱརིནནྟི དྷོནཱ ཝུཙྩཏི ཙཏྟཱརོ པཙྩཡེ ‘‘ཨིདམཏྠཾ ཨེཏེ’’ཏི པཙྩཝེཀྑིཏྭཱ པརིབྷུཉྫནཔཉྙཱ, ཏཾ ཨཏིཀྐམིཏྭཱ ཙརནྟོ ཨཏིདྷོནཙཱརཱི ནཱམ. ཨིདཾ ཝུཏྟཾ ཧོཏི – ཡཐཱ ཨཡཏོ མལཾ སམུཊྛཱཡ ཏཏོ སམུཊྛིཏཾ ཏམེཝ ཁཱདཏི, ཨེཝམེཝཾ ཙཏུཔཙྩཡེ ཨཔཙྩཝེཀྑིཏྭཱ པརིབྷུཉྫནྟཾ ཨཏིདྷོནཙཱརིནཾ སཱནི ཀམྨཱནི ཨཏྟནི ཋིཏཏྟཱ ཨཏྟནོ སནྟཀཱནེཝ ཏཱནི ཀམྨཱནི དུགྒཏིཾ ནཡནྟཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨསཛ྄ཛྷཱཡམལཱཏི ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ལཱལུདཱཡིཏྠེརཾ ཨཱརབྦྷ ཀཐེསི.

སཱཝཏྠིཡཾ ཀིར པཉྩཀོཊིམཏྟཱ ཨརིཡསཱཝཀཱ ཝསནྟི, དྭེ ཀོཊིམཏྟཱ པུཐུཛྫནཱ ཝསནྟི. ཏེསུ ཨརིཡསཱཝཀཱ པུརེབྷཏྟཾ ¶ དཱནཾ དཏྭཱ པཙྪཱབྷཏྟཾ སཔྤིཏེལམདྷུཕཱཎིཏཝཏྠཱདཱིནི གཧེཏྭཱ ཝིཧཱརཾ གནྟྭཱ དྷམྨཀཐཾ སུཎནྟི. དྷམྨཾ སུཏྭཱ གམནཀཱལེ ཙ སཱརིཔུཏྟམོགྒལླཱནཱནཾ གུཎཀཐཾ ཀཐེནྟི. ཨུདཱཡིཏྠེརོ ཏེསཾ ཀཐཾ སུཏྭཱ ‘‘ཨེཏེསཾ ཏཱཝ དྷམྨཾ སུཏྭཱ ཏུམྷེ ཨེཝཾ ཀཐེཐ, མམ དྷམྨཀཐཾ སུཏྭཱ ཀིཾ ནུ ཁོ ན ཀཐེསྶཐཱ’’ཏི ཝདཏི. མནུསྶཱ ཏསྶ ཀཐཾ སུཏྭཱ ‘‘ཨཡཾ ཨེཀོ དྷམྨཀཐིཀོ བྷཝིསྶཏི, ཨིམསྶཔི ཨམྷེཧི དྷམྨཀཐཾ སོཏུཾ ཝཊྚཏཱི’’ཏི ཏེ ཨེཀདིཝསཾ ཐེརཾ ཡཱཙིཏྭཱ, ‘‘བྷནྟེ, ཨཛྫ ཨམྷཱཀཾ དྷམྨསྶཝནདིཝསོ’’ཏི སངྒྷསྶ དཱནཾ དཏྭཱ, ‘‘བྷནྟེ, ཏུམྷེ ཨམྷཱཀཾ དིཝཱ དྷམྨཀཐཾ ཀཐེཡྻཱཐཱ’’ཏི ཨཱཧཾསུ. སོཔི ཏེསཾ ཨདྷིཝཱསེསི.

ཏེཧི དྷམྨསྶཝནཝེལཱཡ ཨཱགནྟྭཱ, ‘‘བྷནྟེ, ནོ དྷམྨཾ ཀཐེཐཱ’’ཏི ཝུཏྟེ ལཱལུདཱཡིཏྠེརོ ཨཱསནེ ནིསཱིདིཏྭཱ ཙིཏྟབཱིཛནིཾ གཧེཏྭཱ ¶ ཙཱལེནྟོ ཨེཀམྤི དྷམྨཔདཾ ཨདིསྭཱ ‘‘ཨཧཾ སརབྷཉྙཾ བྷཎིསྶཱམི, ཨཉྙོ དྷམྨཀཐཾ ཀཐེཏཱུ’’ཏི ཝཏྭཱ ཨོཏརི. ཏེ ཨཉྙེན དྷམྨཀཐཾ ཀཐཱཔེཏྭཱ སརབྷཱཎཏྠཱཡ པུན ཏཾ ཨཱསནཾ ཨཱརོཔཡིཾསུ. སོ པུནཔི ཀིཉྩི ཨདིསྭཱ ‘‘ཨཧཾ རཏྟིཾ ཀཐེསྶཱམི, ཨཉྙོ སརབྷཉྙཾ བྷཎཏཱུ’’ཏི ཝཏྭཱ ཨཱསནཱ ཨོཏརི. ཏེ ཨཉྙེན སརབྷཉྙཾ བྷཎཱཔེཏྭཱ པུན རཏྟིཾ ཐེརཾ ཨཱནཡིཾསུ. སོ རཏྟིམྤི ཀིཉྩི ཨདིསྭཱ ‘‘ཨཧཾ པཙྩཱུསཀཱལེ ཀཐེསྶཱམི, རཏྟིཾ ཨཉྙོ ཀཐེཏཱུ’’ཏི ཝཏྭཱ ཨོཏརི. ཏེ ཨཉྙེན རཏྟིཾ ཀཐཱཔེཏྭཱ ¶ པུན པཙྩཱུསེ ཏཾ ཨཱནཡིཾསུ. སོ པུནཔི ཀིཉྩི ནཱདྡས. མཧཱཛནོ ལེཌྜུདཎྜཱདཱིནི གཧེཏྭཱ, ‘‘ཨནྡྷབཱལ, ཏྭཾ སཱརིཔུཏྟམོགྒལླཱནཱནཾ ཝཎྞེ ཀཐིཡམཱནེ ཨེཝཉྩེཝཉྩ ཝདེསི, ཨིདཱནི ཀསྨཱ ན ཀཐེསཱི’’ཏི སནྟཛྫེཏྭཱ པལཱཡནྟཾ ཨནུབནྡྷི. སོ པལཱཡནྟོ ཨེཀིསྶཱ ཝཙྩཀུཊིཡཱ པཏི.

མཧཱཛནོ ཀཐཾ སམུཊྛཱཔེསི – ‘‘ཨཛྫ ལཱལུདཱཡཱི སཱརིཔུཏྟམོགྒལླཱནཱནཾ གུཎཀཐཱཡ པཝཏྟམཱནཱཡ ཨུསྶཱུཡནྟོ ཨཏྟནོ དྷམྨཀཐིཀབྷཱཝཾ པཀཱསེཏྭཱ མནུསྶེཧི སཀྐཱརཾ ཀཏྭཱ ‘དྷམྨཾ སུཎོམཱ’ཏི ཝུཏྟེ ཙཏུཀྑཏྟུཾ ཨཱསནེ ནིསཱིདིཏྭཱ ཀཐེཏབྦཡུཏྟཀཾ ཀིཉྩི ཨཔསྶནྟོ ‘ཏྭཾ ཨམྷཱཀཾ ¶ ཨཡྻེཧི སཱརིཔུཏྟམོགྒལླཱནཏྠེརེཧི སདྡྷིཾ ཡུགགྒཱཧཾ གཎྷཱསཱི’ཏི ལེཌྜུདཎྜཱདཱིནི གཧེཏྭཱ སནྟཛྫེཏྭཱ པལཱཔིཡམཱནོ ཝཙྩཀུཊིཡཱ པཏིཏོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ, པུབྦེཔི ཨེསོ གཱུཐཀཱུཔེ ནིམུགྒོཡེཝཱ’’ཏི ཝཏྭཱ ཨཏཱིཏཾ ཨཱཧརིཏྭཱ –

‘‘ཙཏུཔྤདོ ཨཧཾ སམྨ, ཏྭམྤི སམྨ ཙཏུཔྤདོ;

ཨེཧི སམྨ ནིཝཏྟསྶུ, ཀིཾ ནུ བྷཱིཏོ པལཱཡསི.

‘‘ཨསུཙིཔཱུཏིལོམོསི, དུགྒནྡྷོ ཝཱསི སཱུཀར;

སཙེ ཡུཛ྄ཛྷིཏུཀཱམོསི, ཛཡཾ སམྨ དདཱམི ཏེ’’ཏི. (ཛཱ. ༡.༢.༥-༦) –

ཨིམཾ ¶ ཛཱཏཀཾ ཝིཏྠཱརེཏྭཱ ཀཐེསི. ཏདཱ སཱིཧོ སཱརིཔུཏྟོ ཨཧོསི, སཱུཀརོ ལཱལུདཱཡཱིཏི. སཏྠཱ ཨིམཾ དྷམྨདེསནཾ ཨཱཧརིཏྭཱ, ‘‘བྷིཀྑཝེ, ལཱལུདཱཡིནཱ ཨཔྤམཏྟཀོཝ དྷམྨོ ཨུགྒཧིཏོ, སཛ྄ཛྷཱཡཾ པན ནེཝ ¶ ཨཀཱསི, ཀིཉྩི པརིཡཏྟིཾ ཨུགྒཧེཏྭཱ ཏསྶཱ ཨསཛ྄ཛྷཱཡཀརཎཾ མལམེཝཱ’’ཏི ཝཏྭཱ ཨིམཾ གཱཐམཱཧ –

‘‘ཨསཛ྄ཛྷཱཡམལཱ མནྟཱ, ཨནུཊྛཱནམལཱ གྷརཱ;

མལཾ ཝཎྞསྶ ཀོསཛྫཾ, པམཱདོ རཀྑཏོ མལ’’ནྟི.

ཏཏྠ ཨསཛ྄ཛྷཱཡམལཱཏི ཡཱཀཱཙི པརིཡཏྟི ཝཱ སིཔྤཾ ཝཱ ཡསྨཱ ཨསཛ྄ཛྷཱཡནྟསྶ ཨནནུཡུཉྫནྟསྶ ཝིནསྶཏི ཝཱ ནིརནྟརཾ ཝཱ ན ཨུཔཊྛཱཏི, ཏསྨཱ ‘‘ཨསཛ྄ཛྷཱཡམལཱ མནྟཱ’’ཏི ཝུཏྟཾ. ཡསྨཱ པན གྷརཱཝཱསཾ ཝསནྟསྶ ཨུཊྛཱཡུཊྛཱཡ ཛིཎྞཔཊིསངྑརཎཱདཱིནི ཨཀརོནྟསྶ གྷརཾ ནཱམ ཝིནསྶཏི, ཏསྨཱ ‘‘ཨནུཊྛཱནམལཱ གྷརཱ’’ཏི ཝུཏྟཾ. ཡསྨཱ གིཧིསྶ ཝཱ པབྦཛིཏསྶ ཝཱ ཀོསཛྫཝསེན སརཱིརཔཊིཛགྒནཾ ཝཱ པརིཀྑཱརཔཊིཛགྒནཾ ཝཱ ཨཀརོནྟསྶ ཀཱཡོ དུབྦཎྞོ ཧོཏི, ཏསྨཱ ‘‘མལཾ ཝཎྞསྶ ཀོསཛྫ’’ནྟི ཝུཏྟཾ. ཡསྨཱ གཱཝོ རཀྑནྟསྶ པམཱདཝསེན ནིདྡཱཡནྟསྶ ཝཱ ཀཱིལ༹ནྟསྶ ཝཱ ཏཱ གཱཝོ ཨཏིཏྠཔཀྑནྡནཱདིནཱ ¶ ཝཱ ཝཱལ༹མིགཙོརཱདིཨུཔདྡཝེན ཝཱ པརེསཾ སཱལིཁེཏྟཱདཱིནི ཨོཏརིཏྭཱ ཁཱདནཝསེན ཝིནཱསཾ ཨཱཔཛྫནྟི, སཡམྤི དཎྜཾ ཝཱ པརིབྷཱསཾ ཝཱ པཱཔུཎཱཏི, པབྦཛིཏཾ ཝཱ པན ཚ དྭཱརཱནི ཨརཀྑནྟཾ པམཱདཝསེན ཀིལེསཱ ཨོཏརིཏྭཱ སཱསནཱ ཙཱཝེནྟི, ཏསྨཱ ‘‘པམཱདོ རཀྑཏོ མལ’’ནྟི ཝུཏྟཾ. སོ ཧིསྶ ཝིནཱསཱཝཧནེན མལཊྛཱནིཡཏྟཱ མལནྟི ཨཏྠོ.

དེསནཱཝསཱནེ ¶ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མལིཏྠིཡཱ དུཙྩརིཏནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨཉྙཏརཾ ཀུལཔུཏྟཾ ཨཱརབྦྷ ཀཐེསི.

ཏསྶ ཀིར སམཱནཛཱཏིཀཾ ཀུལཀུམཱརིཀཾ ཨཱནེསུཾ. སཱ ཨཱནཱིཏདིཝསཏོ པཊྛཱཡ ཨཏིཙཱརིནཱི ཨཧོསི. སོ ཀུལཔུཏྟོ ཏསྶཱ ཨཏིཙཱརེན ལཛྫིཏོ ཀསྶཙི སམྨུཁཱིབྷཱཝཾ ཨུཔགནྟུཾ ཨསཀྐོནྟོ ¶ བུདྡྷུཔཊྛཱནཱདཱིནི ¶ པཙྪིནྡིཏྭཱ ཀཏིཔཱཧཙྩཡེན སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསིནྣོ ‘‘ཀིཾ, ཨུཔཱསཀ, ན དིསྶསཱི’’ཏི ཝུཏྟེ ཏམཏྠཾ ཨཱརོཙེསི. ཨཐ ནཾ སཏྠཱ, ‘‘ཨུཔཱསཀ, པུབྦེཔི མཡཱ ‘ཨིཏྠིཡོ ནཱམ ནདཱིཨཱདིསདིསཱ, ཏཱསུ པཎྜིཏེན ཀོདྷོ ན ཀཱཏབྦོ’ཏི ཝུཏྟཾ, ཏྭཾ པན བྷཝཔཊིཙྪནྣཏྟཱ ན སལླཀྑེསཱི’’ཏི ཝཏྭཱ ཏེན ཡཱཙིཏོ –

‘‘ཡཐཱ ནདཱི ཙ པནྠོ ཙ, པཱནཱགཱརཾ སབྷཱ པཔཱ;

ཨེཝཾ ལོཀིཏྠིཡོ ནཱམ, ཝེལཱ ཏཱསཾ ན ཝིཛྫཏཱི’’ཏི. (ཛཱ. ༡.༡.༦༥; ༡.༡༢.༩) –

ཛཱཏཀཾ ཝིཏྠཱརེཏྭཱ, ‘‘ཨུཔཱསཀ, ཨིཏྠིཡཱ ཧི ཨཏིཙཱརིནིབྷཱཝོ མལཾ, དཱནཾ དེནྟསྶ མཙྪེརཾ མལཾ, ཨིདྷལོཀཔརལོཀེསུ སཏྟཱནཾ ཨཀུསལཀམྨཾ ཝིནཱསནཏྠེན མལཾ, ཨཝིཛྫཱ པན སབྦམལཱནཾ ཨུཏྟམམལ’’ནྟི ཝཏྭཱ ཨིམཱ གཱཐཱ ཨབྷཱསི –

‘‘མལིཏྠིཡཱ དུཙྩརིཏཾ, མཙྪེརཾ དདཏོ མལཾ;

མལཱ ཝེ པཱཔཀཱ དྷམྨཱ, ཨསྨིཾ ལོཀེ པརམྷི ཙ.

‘‘ཏཏོ མལཱ མལཏརཾ, ཨཝིཛྫཱ པརམཾ མལཾ;

ཨེཏཾ མལཾ པཧནྟྭཱན, ནིམྨལཱ ཧོཐ བྷིཀྑཝོ’’ཏི.

ཏཏྠ ¶ ¶ དུཙྩརིཏནྟི ཨཏིཙཱརོ. ཨཏིཙཱརིནིཉྷི ཨིཏྠིཾ སཱམིཀོཔི གེཧཱ ནཱིཧརཏི, མཱཏཱཔིཏཱུནཾ སནྟིཀཾ གཏམྤི ‘‘ཏྭཾ ཀུལསྶ ཨགཱརཝབྷཱུཏཱ, ཨཀྑཱིཧིཔི ན དཊྛབྦཱ’’ཏི ཏཾ ནཱིཧརནྟི. སཱ ཨནཱཐཱ ཝིཙརནྟཱི མཧཱདུཀྑཾ པཱཔུཎཱཏི. ཏེནསྶཱ དུཙྩརིཏཾ ‘‘མལ’’ནྟི ཝུཏྟཾ. དདཏོཏི དཱཡཀསྶ. ཡསྶ ཧི ཁེཏྟཀསནཀཱལེ ‘‘ཨིམསྨིཾ ཁེཏྟེ སམྤནྣེ སལཱཀབྷཏྟཱདཱིནི དསྶཱམཱི’’ཏི ཙིནྟེཏྭཱ ནིཔྥནྣེ སསྶེཔི མཙྪེརཾ ཨུཔྤཛྫིཏྭཱ ཙཱགཙིཏྟཾ ནིཝཱརེཏི, སོ མཙྪེརཝསེན ཙཱགཙིཏྟེ ཨཝིརཱུཧནྟེ མནུསྶསམྤཏྟིཾ དིབྦསམྤཏྟིཾ ནིབྦཱནསམྤཏྟིནྟི ཏིསྶོ སམྤཏྟིཡོ ན ལབྷཏི. ཏེན ཝུཏྟཾ – ‘‘མཙྪེརཾ དདཏོ མལ’’ནྟི. སེསེསུཔི ཨེསེཝ ནཡོ. པཱཔཀཱ དྷམྨཱཏི ཨཀུསལདྷམྨཱ པན ཨིདྷལོཀེ ཙ པརལོཀེ ཙ མལམེཝ.

ཏཏོཏི ཧེཊྛཱ ཝུཏྟམལཏོ. མལཏརནྟི ཨཏིརེཀམལཾ ཝོ ཀཐེམཱིཏི ཨཏྠོ. ཨཝིཛྫཱཏི ¶ ཨཊྛཝཏྠུཀཾ ཨཉྙཱཎམེཝ པརམཾ མལཾ. པཧནྟྭཱནཱཏི ¶ ཨེཏཾ མལཾ ཛཧིཏྭཱ, བྷིཀྑཝེ, ཏུམྷེ ནིམྨལཱ ཧོཐཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སུཛཱིཝནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཙཱུལ༹སཱརིཾ ནཱམ སཱརིཔུཏྟཏྠེརསྶ སདྡྷིཝིཧཱརིཀཾ ཨཱརབྦྷ ཀཐེསི.

སོ ཀིར ཨེཀདིཝསེ ཝེཛྫཀམྨཾ ཀཏྭཱ པཎཱིཏབྷོཛནཾ ལབྷིཏྭཱ ཨཱདཱཡ ནིཀྑམནྟོ ཨནྟརཱམགྒེ ཐེརཾ དིསྭཱ, ‘‘བྷནྟེ, ཨིདཾ མཡཱ ཝེཛྫཀམྨཾ ཀཏྭཱ ལདྡྷཾ, ཏུམྷེ ཨཉྙཏྠ ཨེཝརཱུཔཾ བྷོཛནཾ ན ལབྷིསྶཐ, ཨིམཾ བྷུཉྫཐ, ཨཧཾ ཏེ ཝེཛྫཀམྨཾ ཀཏྭཱ ནིཙྩཀཱལཾ ཨེཝརཱུཔཾ ཨཱཧཱརཾ ཨཱཧརིསྶཱམཱི’’ཏི ཨཱཧ. ཐེརོ ཏསྶ ཝཙནཾ སུཏྭཱ ཏུཎྷཱིབྷཱུཏོཝ པཀྐཱམི. བྷིཀྑཱུ ཝིཧཱརཾ གནྟྭཱ སཏྠུ ཏམཏྠཾ ཨཱརོཙེསུཾ. སཏྠཱ, ‘‘བྷིཀྑཝེ, ཨཧིརིཀོ ནཱམ པགབྦྷོ ཀཱཀསདིསོ ཧུཏྭཱ ཨེཀཝཱིསཏིཝིདྷཱཡ ཨནེསནཱཡ ཋཏྭཱ སུཁཾ ཛཱིཝཏི, ཧིརིཨོཏྟཔྤསམྤནྣོ པན དུཀྑཾ ཛཱིཝཏཱི’’ཏི ཝཏྭཱ ཨིམཱ གཱཐཱ ཨབྷཱསི –

‘‘སུཛཱིཝཾ ¶ ཨཧིརིཀེན, ཀཱཀསཱུརེན དྷཾསིནཱ;

པཀྑནྡིནཱ པགབྦྷེན, སཾཀིལིཊྛེན ཛཱིཝིཏཾ.

‘‘ཧིརཱིམཏཱ ¶ ཙ དུཛྫཱིཝཾ, ནིཙྩཾ སུཙིགཝེསིནཱ;

ཨལཱིནེནཱཔྤགབྦྷེན, སུདྡྷཱཛཱིཝེན པསྶཏཱ’’ཏི.

ཏཏྠ ཨཧིརིཀེནཱཏི ཚིནྣཧིརོཏྟཔྤཀེན. ཨེཝརཱུཔེན ཧི ཨམཱཏརམེཝ ‘‘མཱཏཱ མེ’’ཏི ཨཔིཏཱདཡོ ཨེཝ ཙ ‘‘པིཏཱ མེ’’ཏིཨཱདིནཱ ནཡེན ཝཏྭཱ ཨེཀཝཱིསཏིཝིདྷཱཡ ཨནེསནཱཡ པཏིཊྛཱཡ སུཁེན ཛཱིཝཏུཾ སཀྐཱ. ཀཱཀསཱུརེནཱཏི སཱུརཀཱཀསདིསེན. ཡཐཱ ཧི སཱུརཀཱཀོ ཀུལགྷརེསུ ཡཱགུཨཱདཱིནི གཎྷིཏུཀཱམོ བྷིཏྟིཨཱདཱིསུ ནིསཱིདིཏྭཱ ཨཏྟནོ ཨོལོཀནབྷཱཝཾ ཉཏྭཱ ཨནོལོཀེནྟོ ཝིཡ ཨཉྙཝིཧིཏཀོ ཝིཡ ¶ ནིདྡཱཡནྟོ ཝིཡ ཙ ཧུཏྭཱ མནུསྶཱནཾ པམཱདཾ སལླཀྑེཏྭཱ ཨནུཔཏིཏྭཱ ‘‘སཱུསཱུ’’ཏི ཝདནྟེསུཡེཝ བྷཱཛནཏོ མུཁཔཱུརཾ གཧེཏྭཱ པལཱཡཏི, ཨེཝམེཝཾ ཨཧིརིཀཔུགྒལོཔི བྷིཀྑཱུཧི སདྡྷིཾ གཱམཾ པཝིསིཏྭཱ ཡཱགུབྷཏྟཊྛཱནཱདཱིནི ཝཝཏྠཔེཏི. ཏཏྠ བྷིཀྑཱུ པིཎྜཱཡ ཙརིཏྭཱ ཡཱཔནམཏྟཾ ཨཱདཱཡ ཨཱསནསཱལཾ གནྟྭཱ པཙྩཝེཀྑནྟཱ ཡཱགུཾ པིཝིཏྭཱ ཀམྨཊྛཱནཾ མནསི ཀརོནྟི སཛ྄ཛྷཱཡནྟི ཨཱསནསཱལཾ སམྨཛྫནྟི. ཨཡཾ པན ཨཀཏྭཱ གཱམཱབྷིམུཁོཝ ཧོཏི.

སོ ཧི བྷིཀྑཱུཧི ‘‘པསྶཐིམ’’ནྟི ཨོལོཀིཡམཱནོཔི ཨནོལོཀེནྟོ ཝིཡ ཨཉྙཝིཧིཏོ ཝིཡ ནིདྡཱཡནྟོ ཝིཡ གཎྛིཀཾ པཊིམུཉྩནྟོ ¶ ཝིཡ ཙཱིཝརཾ སཾཝིདཧནྟོ ཝིཡ ཧུཏྭཱ ‘‘ཨསུཀཾ ནཱམ མེ ཀམྨཾ ཨཏྠཱི’’ཏི ཝདནྟོ ཨུཊྛཱཡཱསནཱ གཱམཾ པཝིསིཏྭཱ པཱཏོཝ ཝཝཏྠཔིཏགེཧེསུ ཨཉྙཏརཾ གེཧཾ ཨུཔསངྐམིཏྭཱ གྷརམཱནུསཀེསུ ཐོཀཾ ཀཝཱཊཾ པིདྷཱཡ དྭཱརེ ནིསཱིདིཏྭཱ ཀནྡནྟེསུཔི ཨེཀེན ཧཏྠེན ཀཝཱཊཾ པཎཱམེཏྭཱ ཨནྟོ པཝིསཏི. ཨཐ ནཾ དིསྭཱ ཨཀཱམཀཱཔི ཨཱསནེ ནིསཱིདཱཔེཏྭཱ ཡཱགུཨཱདཱིསུ ཡཾ ཨཏྠི, ཏཾ དེནྟི. སོ ཡཱཝདཏྠཾ བྷུཉྫིཏྭཱ ཨཝསེསཾ པཏྟེནཱདཱཡ པཀྐམཏི. ཨཡཾ ཀཱཀསཱུརོ ནཱམ. ཨེཝརཱུཔེན ཨཧིརིཀེན སུཛཱིཝནྟི ཨཏྠོ.

དྷཾསིནཱཏི ‘‘ཨསུཀཏྠེརོ ནཱམ ཨཔྤིཙྪོ’’ཏིཨཱདཱིནི ཝདནྟེསུ – ‘‘ཀིཾ པན མཡཾ ན ཨཔྤིཙྪཱ’’ཏིཨཱདིཝཙནེན པརེསཾ གུཎདྷཾསནཏཱཡ དྷཾསིནཱ. ཏཐཱརཱུཔསྶ ཝཙནཾ སུཏྭཱ ‘‘ཨཡམྤི ཨཔྤིཙྪཏཱདིགུཎེ ཡུཏྟོ’’ཏི མཉྙམཱནཱ མནུསྶཱ དཱཏབྦཾ མཉྙནྟི. སོ པན ཏཏོ པཊྛཱཡ ཝིཉྙཱུཔུརིསཱནཾ ¶ ཙིཏྟཾ ཨཱརཱདྷེཏུཾ ཨསཀྐོནྟོ ཏམྷཱཔི ལཱབྷཱ པརིཧཱཡཏི. ཨེཝཾ དྷཾསིཔུགྒལོ ཨཏྟནོཔི པརསྶཔི ལཱབྷཾ ནཱསེཏིཡེཝ.

པཀྑནྡིནཱཏི པཀྑནྡཙཱརིནཱ. པརེསཾ ཀིཙྩཱནིཔི ཨཏྟནོ ཀིཙྩཱནི ཝིཡ དསྶེནྟོ པཱཏོཝ བྷིཀྑཱུསུ ཙེཏིཡངྒཎཱདཱིསུ ཝཏྟཾ ཀཏྭཱ ཀམྨཊྛཱནམནསིཀཱརེན ཐོཀཾ ¶ ནིསཱིདིཏྭཱ ཨུཊྛཱཡ གཱམཾ པཝིསནྟེསུ མུཁཾ དྷོཝིཏྭཱ པཎྜུཀཱསཱཝཔཱརུཔནཨཀྑིཨཉྫནསཱིསམཀྑནཱདཱིཧི ཨཏྟབྷཱཝཾ མཎྜེཏྭཱ སམྨཛྫནྟོ ཝིཡ དྭེ ཏཡོ སམྨཛྫནིཔཧཱརེ དཏྭཱ དྭཱརཀོཊྛཀཱབྷིམུཁོ ཧོཏི. མནུསྶཱ པཱཏོཝ ‘‘ཙེཏིཡཾ ཝནྡིསྶཱམ, མཱལཱཔཱུཛཾ ཀརིསྶཱམཱ’’ཏི ¶ ཨཱགཏཱ ཏཾ དིསྭཱ ‘‘ཨཡཾ ཝིཧཱརོ ཨིམཾ དཧརཾ ནིསྶཱཡ པཊིཛགྒནཾ ལབྷཏི, ཨིམཾ མཱ པམཛྫིཏྠཱ’’ཏི ཝཏྭཱ ཏསྶ དཱཏབྦཾ མཉྙནྟི. ཨེཝརཱུཔེན པཀྑནྡིནཱཔི སུཛཱིཝཾ. པགབྦྷེནཱཏི ཀཱཡཔཱགབྦྷིཡཱདཱིཧི སམནྣཱགཏེན. སཾཀིལིཊྛེན ཛཱིཝིཏནྟི ཨེཝཾ ཛཱིཝིཀཾ ཀཔྤེཏྭཱ ཛཱིཝནྟེན ཧི པུགྒལེན སཾཀིལིཊྛེན ཧུཏྭཱ ཛཱིཝིཏཾ ནཱམ ཧོཏི, ཏཾ དུཛྫཱིཝིཏཾ པཱཔམེཝཱཏི ཨཏྠོ.

ཧིརཱིམཏཱ ཙཱཏི ཧིརོཏྟཔྤསམྤནྣེན པུགྒལེན དུཛྫཱིཝཾ. སོ ཧི ཨམཱཏཱདཡོཝ ‘‘མཱཏཱ མེ’’ཏིཨཱདཱིནི ཨཝཏྭཱ ཨདྷམྨིཀེ པཙྩཡེ གཱུཐཾ ཝིཡ ཛིགུཙྪནྟོ དྷམྨེན སམེན པརིཡེསནྟོ སཔདཱནཾ པིཎྜཱཡ ཙརིཏྭཱ ཛཱིཝིཀཾ ཀཔྤེནྟོ ལཱུཁཾ ཛཱིཝིཀཾ ཛཱིཝཏཱིཏི ཨཏྠོ. སུཙིགཝེསིནཱཏི སུཙཱིནི ཀཱཡཀམྨཱདཱིནི གཝེསནྟེན. ཨལཱིནེནཱཏི ཛཱིཝིཏཝུཏྟིམནལླཱིནེན. སུདྡྷཱཛཱིཝེན པསྶཏཱཏི ¶ ཨེཝརཱུཔོ ཧི པུགྒལོ སུདྡྷཱཛཱིཝོ ནཱམ ཧོཏི. ཏེན ཨེཝཾ སུདྡྷཱཛཱིཝེན ཏམེཝ སུདྡྷཱཛཱིཝཾ སཱརཏོ པསྶཏཱ ལཱུཁཛཱིཝིཏཝསེན དུཛྫཱིཝཾ ཧོཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡོ པཱཎནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩ ཨུཔཱསཀེ ཨཱརབྦྷ ཀཐེསི.

ཏེསུ ཧི ཨེཀོ པཱཎཱཏིཔཱཏཱཝེརམཎིསིཀྑཱཔདམེཝ རཀྑཏི, ཨིཏརེ ཨིཏརཱནི. ཏེ ཨེཀདིཝསཾ ‘‘ཨཧཾ དུཀྐརཾ ཀརོམི, དུཀྐརཾ རཀྑཱམཱི’’ཏི ཝིཝཱདཱཔནྣཱ སཏྠུ སནྟིཀཾ གནྟྭཱ ཝནྡིཏྭཱ ¶ ཏམཏྠཾ ཨཱརོཙེསུཾ. སཏྠཱ ཏེསཾ ཀཐཾ སུཏྭཱ ཨེཀསཱིལམྤི ཀནིཊྛཀཾ ཨཀཏྭཱ ‘‘སབྦཱནེཝ དུརཀྑཱནཱི’’ཏི ཝཏྭཱ ཨིམཱ གཱཐཱ ཨབྷཱསི –

‘‘ཡོ པཱཎམཏིཔཱཏེཏི, མུསཱཝཱདཉྩ བྷཱསཏི;

ལོཀེ ཨདིནྣམཱདིཡཏི, པརདཱརཉྩ གཙྪཏི.

‘‘སུརཱམེརཡཔཱནཉྩ ¶ ¶ , ཡོ ནརོ ཨནུཡུཉྫཏི;

ཨིདྷེཝ མེསོ ལོཀསྨིཾ, མཱུལཾ ཁཎཏི ཨཏྟནོ.

‘‘ཨེཝཾ བྷོ པུརིས ཛཱནཱཧི, པཱཔདྷམྨཱ ཨསཉྙཏཱ;

མཱ ཏཾ ལོབྷོ ཨདྷམྨོ ཙ, ཙིརཾ དུཀྑཱཡ རནྡྷཡུ’’ནྟི.

ཏཏྠ ཡོ པཱཎམཏིཔཱཏེཏཱིཏི ཡོ སཱཧཏྠིཀཱདཱིསུ ཚསུ པཡོགེསུ ཨེཀཔཡོགེནཱཔི པརསྶ ཛཱིཝིཏིནྡྲིཡཾ ཨུཔཙྪིནྡཏི. མུསཱཝཱདནྟི པརེསཾ ཨཏྠབྷཉྫནཀཾ མུསཱཝཱདཉྩ བྷཱསཏི. ལོཀེ ཨདིནྣམཱདིཡཏཱིཏི ཨིམསྨིཾ སཏྟལོཀེ ཐེཡྻཱཝཧཱརཱདཱིསུ ཨེཀེནཔི ཨཝཧཱརེན པརཔརིགྒཧིཏཾ ཨཱདིཡཏི. པརདཱརཉྩ གཙྪཏཱིཏི པརསྶ རཀྑིཏགོཔིཏེསུ བྷཎྜེསུ ཨཔརཛ྄ཛྷནྟོ ཨུཔྤཐཙཱརཾ ཙརཏི. སུརཱམེརཡཔཱནནྟི ཡསྶ ཀསྶཙི སུརཱཡ ཙེཝ མེརཡསྶ ཙ པཱནཾ. ཨནུཡུཉྫཏཱིཏི སེཝཏི བཧུལཱིཀརོཏི. མཱུལཾ ཁཎཏཱིཏི ཏིཊྛཏུ པརལོཀོ, སོ པན པུགྒལོ ཨིདྷ ལོཀསྨིཾཡེཝ ཡེན ཁེཏྟཝཏྠུཨཱདིནཱ མཱུལེན པཏིཊྛཔེཡྻ, ཏམྤི ཨཊྛཔེཏྭཱ ཝཱ ཝིསྶཛྫེཏྭཱ ཝཱ སུརཾ པིཝནྟོ ཨཏྟནོ མཱུལཾ ཁཎཏི, ཨནཱཐོ ཀཔཎོ ཧུཏྭཱ ཝིཙརཏི. ཨེཝཾ, བྷོཏི པཉྩདུསྶཱིལྱཀམྨཀཱརཀཾ པུགྒལཾ ཨཱལཔཏི. པཱཔདྷམྨཱཏི ལཱམཀདྷམྨཱ. ཨསཉྙཏཱཏི ཀཱཡསཉྙཏཱདིརཧིཏཱ. ཨཙེཏསཱཏིཔི པཱཋོ, ཨཙིཏྟཀཱཏི ཨཏྠོ. ལོབྷོ ཨདྷམྨོ ཙཱཏི ལོབྷོ ཙེཝ དོསོ ཙ. ཨུབྷཡམྤི ཧེཏཾ ཨཀུསལམེཝ. ཙིརཾ དུཀྑཱཡ རནྡྷཡུནྟི ཙིརཀཱལཾ ནིརཡདུཀྑཱདཱིནཾ ཨཏྠཱཡ ¶ ཏཾ ཨེཏེ དྷམྨཱ མཱ རནྡྷེནྟུ མཱ མཏྠེནྟཱུཏི ཨཏྠོ.

དེསནཱཝསཱནེ ཏེ པཉྩ ཨུཔཱསཀཱ སོཏཱཔཏྟིཕལེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

དདཱཏི ¶ ཝེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏིསྶདཧརཾ ནཱམ ཨཱརབྦྷ ཀཐེསི.

སོ ¶ ཀིར ཨནཱཐཔིཎྜིཀསྶ གཧཔཏིནོ ཝིསཱཁཱཡ ཨུཔཱསིཀཱཡཱཏི པཉྩནྣཾ ཨརིཡསཱཝཀཀོཊཱིནཾ དཱནཾ ནིནྡནྟོ ཝིཙརི, ཨསདིསདཱནམྤི ནིནྡིཡེཝ. ཏེསཾ ཏེསཾ དཱནགྒེ སཱིཏལཾ ལབྷིཏྭཱ ‘‘སཱིཏལ’’ནྟི ནིནྡི, ཨུཎྷཾ ལབྷིཏྭཱ ‘‘ཨུཎྷ’’ནྟི ནིནྡི. ཨཔྤཾ དེནྟེཔི ‘‘ཀིཾ ཨིམེ ཨཔྤམཏྟཀཾ དེནྟཱི’’ཏི ནིནྡི, བཧུཾ དེནྟེཔི ‘‘ཨིམེསཾ གེཧེ ཋཔནཊྛཱནཾ མཉྙེ ནཏྠི, ནནུ ནཱམ བྷིཀྑཱུནཾ ཡཱཔནམཏྟཾ དཱཏབྦཾ, ཨེཏྟཀཾ ཡཱགུབྷཏྟཾ ནིརཏྠཀམེཝ ཝིསྶཛྫཏཱི’’ཏི ནིནྡི. ཨཏྟནོ པན ཉཱཏཀེ ཨཱརབྦྷ ‘‘ཨཧོ ཨམྷཱཀཾ ཉཱཏཀཱནཾ གེཧཾ ཙཏཱུཧི དིསཱཧི ཨཱགཏཱགཏཱནཾ བྷིཀྑཱུནཾ ཨོཔཱནབྷཱུཏ’’ནྟིཨཱདཱིནི ཝཏྭཱ པསཾསཾ ¶ པཝཏྟེསི. སོ པནེཀསྶ དོཝཱརིཀསྶ པུཏྟོ ཛནཔདཾ ཝིཙརནྟེཧི ཝཌྜྷཀཱིཧི སདྡྷིཾ ཝིཙརནྟོ སཱཝཏྠིཾ པཏྭཱ པབྦཛིཏོ. ཨཐ ནཾ བྷིཀྑཱུ ཨེཝཾ མནུསྶཱནཾ དཱནཱདཱིནི ནིནྡནྟཾ དིསྭཱ ‘‘པརིགྒཎྷིསྶཱམ ན’’ནྟི ཙིནྟེཏྭཱ, ‘‘ཨཱཝུསོ, ཏཝ ཉཱཏཀཱ ཀཧཾ ཝསནྟཱི’’ཏི པུཙྪིཏྭཱ ‘‘ཨསུཀགཱམེ ནཱམཱ’’ཏི སུཏྭཱཝ ཀཏིཔཡེ དཧརེ པེསེསུཾ. ཏེ ཏཏྠ གནྟྭཱ གཱམཝཱསིཀེཧི ཨཱསནསཱལཱཡ ནིསཱིདཱཔེཏྭཱ ཀཏསཀྐཱརཱ པུཙྪིཾསུ – ‘‘ཨིམམྷཱ གཱམཱ ནིཀྑམིཏྭཱ པབྦཛིཏོ ཏིསྶོ ནཱམ དཧརོ ཨཏྠི. ཏསྶ ཀཏམེ ཉཱཏཀཱ’’ཏི? མནུསྶཱ ‘‘ཨིདྷ ཀུལགེཧཏོ ནིཀྑམིཏྭཱ པབྦཛིཏདཱརཀོ ནཏྠི, ཀིཾ ནུ ཁོ ཨིམེ ཝདནྟཱི’’ཏི ཙིནྟེཏྭཱ, ‘‘བྷནྟེ, ཨེཀོ དོཝཱརིཀཔུཏྟོ ཝཌྜྷཀཱིཧི སདྡྷིཾ ཝིཙརིཏྭཱ པབྦཛིཏོཏི སུཎོམ, ཏཾ སནྡྷཱཡ ཝདེཐ མཉྙེ’’ཏི ཨཱཧཾསུ. དཧརབྷིཀྑཱུ ཏིསྶསྶ ཏཏྠ ཨིསྶརཉཱཏཀཱནཾ ཨབྷཱཝཾ ཉཏྭཱ སཱཝཏྠིཾ གནྟྭཱ ‘‘ཨཀཱརཎམེཝ, བྷནྟེ, ཏིསྶོ ཝིལཔནྟོ ཝིཙརཏཱི’’ཏི ཏཾ པཝཏྟིཾ བྷིཀྑཱུནཾ ཨཱརོཙེསུཾ. བྷིཀྑཱུཔི ཏཾ ཏཐཱགཏསྶ ཨཱརོཙེསུཾ.

སཏྠཱ ‘‘ན, བྷིཀྑཝེ, ཨིདཱནེཝ ཝིཀཏྠེནྟོ ཝིཙརཏི, པུབྦེཔི ཝིཀཏྠཀོཝ ཨཧོསཱི’’ཏི ཝཏྭཱ བྷིཀྑཱུཧི ཡཱཙིཏོ ཨཏཱིཏཾ ཨཱཧརིཏྭཱ –

‘‘བཧུམྤི སོ ཝིཀཏྠེཡྻ, ཨཉྙཾ ཛནཔདཾ གཏོ;

ཨནྭཱགནྟྭཱན དཱུསེཡྻ, བྷུཉྫ བྷོགེ ཀཊཱཧཀཱ’’ཏི. (ཛཱ. ༡.༡.༡༢༥) –

ཨིམཾ ཀཊཱཧཛཱཏཀཾ ཝིཏྠཱརེཏྭཱ, ‘‘བྷིཀྑཝེ, ཡོ ཧི པུགྒལོ པརེཧི ཨཔྤཀེ ཝཱ བཧུཀེ ཝཱ ལཱུཁེ ཝཱ པཎཱིཏེ ཝཱ དིནྣེ ཨཉྙེསཾ ཝཱ དཏྭཱ ཨཏྟནོ ¶ ཨདིནྣེ མངྐུ ཧོཏི, ཏསྶ ཛྷཱནཾ ¶ ཝཱ ¶ ཝིཔསྶནཾ ཝཱ མགྒཕལཱདཱིནི ཝཱ ན ཨུཔྤཛྫནྟཱི’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘དདཱཏི ཝེ ཡཐཱསདྡྷཾ, ཡཐཱཔསཱདནཾ ཛནོ;

ཏཏྠ ཡོ ཙ མངྐུ ཧོཏི, པརེསཾ པཱནབྷོཛནེ;

ན སོ དིཝཱ ཝཱ རཏྟིཾ ཝཱ, སམཱདྷིམདྷིགཙྪཏི.

‘‘ཡསྶ ཙེཏཾ སམུཙྪིནྣཾ, མཱུལགྷཙྩཾ སམཱུཧཏཾ;

ས ཝེ དིཝཱ ཝཱ རཏྟིཾ ཝཱ, སམཱདྷིམདྷིགཙྪཏཱི’’ཏི.

ཏཏྠ དདཱཏི ཝེ ཡཐཱསདྡྷནྟི ལཱུཁཔཎཱིཏཱདཱིསུ ཡཾཀིཉྩི དེནྟོ ཛནོ ཡཐཱསདྡྷཾ ཨཏྟནོ སདྡྷཱནུརཱུཔམེཝ དེཏི. ཡཐཱཔསཱདནནྟི ཐེརནཝཱདཱིསུ ཙསྶ ཡསྨིཾ ཡསྨིཾ པསཱདོ ཨུཔྤཛྫཏི, ཏསྶ དེནྟོ ཡཐཱཔསཱདནཾ ཨཏྟནོ པསཱདཱནུརཱུཔམེཝ དེཏི. ཏཏྠཱཏི ཏསྨིཾ པརསྶ དཱནེ ‘‘མཡཱ ཨཔྤཾ ཝཱ ལདྡྷཾ, ལཱུཁཾ ཝཱ ལདྡྷ’’ནྟི མངྐུབྷཱཝཾ ཨཱཔཛྫཏི. སམཱདྷིནྟི སོ པུགྒལོ དིཝཱ ཝཱ རཏྟིཾ ཝཱ ཨུཔཙཱརཔྤནཱཝསེན ཝཱ མགྒཕལཝསེན ཝཱ སམཱདྷིཾ ནཱདྷིགཙྪཏི. ཡསྶ ཙེཏནྟི ཡསྶ པུགྒལསྶ ཨེཏཾ ཨེཀེསུ ཋཱནེསུ མངྐུབྷཱཝསངྑཱཏཾ ཨཀུསལཾ སམུཙྪིནྣཾ མཱུལགྷཙྩཾ ཀཏྭཱ ཨརཧཏྟམགྒཉཱཎེན སམཱུཧཏཾ, སོ ཝུཏྟཔྤཀཱརཾ སམཱདྷིཾ ཨདྷིགཙྪཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ནཏྠི ¶ རཱགསམོ ཨགྒཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩ ཨུཔཱསཀེ ཨཱརབྦྷ ཀཐེསི.

ཏེ ཀིར དྷམྨཾ སོཏུཀཱམཱ ཝིཧཱརཾ གནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདིཾསུ. བུདྡྷཱནཉྩ ‘‘ཨཡཾ ཁཏྟིཡོ, ཨཡཾ བྲཱཧྨཎོ, ཨཡཾ ཨཌྜྷོ, ཨཡཾ དུགྒཏོ, ཨིམསྶ ཨུལཱ༹རཾ ཀཏྭཱ དྷམྨཾ དེསེསྶཱམི, ཨིམསྶ ནོ’’ཏི ཙིཏྟཾ ན ཨུཔྤཛྫཏི. ཡཾཀིཉྩི ཨཱརབྦྷ དྷམྨཾ དེསེནྟོ དྷམྨགཱརཝཾ ¶ པུརཀྑཏྭཱ ཨཱཀཱསགངྒཾ ¶ ཨོཏཱརེནྟོ ཝིཡ དེསེཏི. ཨེཝཾ དེསེནྟསྶ པན ཏཐཱགཏསྶ སནྟིཀེ ནིསིནྣཱནཾ ཏེསཾ ཨེཀོ ནིསིནྣཀོཝ ནིདྡཱཡི, ཨེཀོ ཨངྒུལིཡཱ བྷཱུམིཾ ལིཁནྟོ ནིསཱིདི, ཨེཀོ ཨེཀཾ རུཀྑཾ ཙཱལེནྟོ ནིསཱིདི, ཨེཀོ ཨཱཀཱསཾ ཨུལློཀེནྟོ ནིསཱིདི, ཨེཀོ པན སཀྐཙྩཾ དྷམྨཾ ཨསྶོསི.

ཨཱནནྡཏྠེརོ སཏྠཱརཾ བཱིཛཡམཱནོ ཏེསཾ ཨཱཀཱརཾ ཨོལོཀེནྟོ སཏྠཱརཾ ཨཱཧ – ‘‘བྷནྟེ, ཏུམྷེ ཨིམེསཾ མཧཱམེགྷགཛྫིཏཾ གཛྫནྟཱ ཝིཡ དྷམྨཾ དེསེཐ, ཨེཏེ པན ཏུམྷེསུཔི དྷམྨཾ ཀཐེནྟེསུ ཨིདཉྩིདཉྩ ཀརོནྟཱ ནིསིནྣཱ’’ཏི. ‘‘ཨཱནནྡ, ཏྭཾ ཨེཏེ ན ཛཱནཱསཱི’’ཏི? ‘‘ཨཱམ, ན ཛཱནཱམི, བྷནྟེ’’ཏི. ཨེཏེསུ ཧི ཡོ ཨེས ནིདྡཱཡནྟོ ནིསིནྣོ, ཨེས པཉྩ ཛཱཏིསཏཱནི སཔྤཡོནིཡཾ ནིབྦཏྟིཏྭཱ བྷོགེསུ སཱིསཾ ཋཔེཏྭཱ ནིདྡཱཡི, ཨིདཱནིཔིསྶ ནིདྡཱཡ ཏིཏྟི ནཏྠི, ནཱསྶ ཀཎྞཾ ¶ མམ སདྡོ པཝིསཏཱིཏི. ཀིཾ པན, བྷནྟེ, པཊིཔཱཊིཡཱ ཀཐེཐ, ཨུདཱཧུ ཨནྟརནྟརཱཏི. ཨཱནནྡ, ཨེཏསྶ ཧི ཀཱལེན མནུསྶཏྟཾ, ཀཱལེན དེཝཏྟཾ, ཀཱལེན ནཱགཏྟནྟི ཨེཝཾ ཨནྟརནྟརཱ ཨུཔྤཛྫནྟསྶ ཨུཔཔཏྟིཡོ སབྦཉྙུཏཉྙཱཎེནཱཔི ན སཀྐཱ པརིཙྪིནྡིཏུཾ. པཊིཔཱཊིཡཱ པནེས པཉྩ ཛཱཏིསཏཱནི ནཱགཡོནིཡཾ ནིབྦཏྟིཏྭཱ ནིདྡཱཡནྟོཔི ནིདྡཱཡ ཨཏིཏྟོཡེཝ. ཨངྒུལིཡཱ བྷཱུམིཾ ལིཁནྟོ ནིསིནྣཔུརིསོཔི པཉྩ ཛཱཏིསཏཱནི གཎྜུཔྤཱདཡོནིཡཾ ནིབྦཏྟིཏྭཱ བྷཱུམིཾ ཁཎི, ཨིདཱནིཔི བྷཱུམིཾ ཁཎནྟོཝ མམ སདྡཾ ན སུཎཱཏི. ཨེས རུཀྑཾ ཙཱལེནྟོ ནིསིནྣཔུརིསོཔི པཊིཔཱཊིཡཱ པཉྩ ཛཱཏིསཏཱནི མཀྐཊཡོནིཡཾ ནིབྦཏྟི, ཨིདཱནིཔི པུབྦཱཙིཎྞཝསེན རུཀྑཾ ཙཱལེཏིཡེཝ, ནཱསྶ ཀཎྞཾ མམ སདྡོ པཝིསཏི. ཨེས ཨཱཀཱསཾ ཨུལློཀེཏྭཱ ནིསིནྣཔུརིསོཔི པཉྩ ཛཱཏིསཏཱནི ནཀྑཏྟཔཱཋཀོ ཧུཏྭཱ ནིབྦཏྟི, ཨིདཱནི པུབྦཱཙིཎྞཝསེན ཨཛྫཱཔི ཨཱཀཱསམེཝ ཨུལློཀེཏི, ནཱསྶ ཀཎྞཾ མམ སདྡོ པཝིསཏི. ཨེས སཀྐཙྩཾ དྷམྨཾ སུཎནྟོ ནིསིནྣཔུརིསོ པན པཊིཔཱཊིཡཱ པཉྩ ཛཱཏིསཏཱནི ཏིཎྞཾ ཝེདཱནཾ པཱརགཱུ མནྟཛ྄ཛྷཱཡཀབྲཱཧྨཎོ ཧུཏྭཱ ནིབྦཏྟི, ཨིདཱནིཔི མནྟཾ སཾསནྡནྟོ ཝིཡ སཀྐཙྩཾ སུཎཱཏཱིཏི.

‘‘བྷནྟེ, ཏུམྷཱཀཾ དྷམྨདེསནཱ ཚཝིཨཱདཱིནི ཚིནྡིཏྭཱ ཨཊྛིམིཉྫཾ ཨཱཧཙྩ ཏིཊྛཏི, ཀསྨཱ ཨིམེ ཏུམྷེསུཔི དྷམྨཾ དེསེནྟེསུ སཀྐཙྩཾ ན སུཎནྟཱི’’ཏི? ‘‘ཨཱནནྡ, མམ དྷམྨོ སུསྶཝནཱིཡོཏི སཉྙཾ ཀརོསི མཉྙེ’’ཏི. ‘‘ཀིཾ པན, བྷནྟེ, དུསྶཝནཱིཡོ’’ཏི? ‘‘ཨཱམ, ཨཱནནྡཱ’’ཏི. ‘‘ཀསྨཱ, བྷནྟེ’’ཏི ¶ ? ‘‘ཨཱནནྡ, བུདྡྷོཏི ¶ ཝཱ དྷམྨོཏི ཝཱ སངྒྷོཏི ཝཱ པདཾ ཨིམེཧི སཏྟེཧི ཨནེཀེསུཔི ཀཔྤཀོཊིསཏསཧསྶེསུ ཨསུཏཔུབྦཾ. ཡསྨཱ ཨིམཾ དྷམྨཾ སོཏུཾ ན སཀྐོནྟཱ ཨནམཏགྒེ སཾསཱརེ ཨིམེ སཏྟཱ ཨནེཀཝིཧིཏཾ ཏིརཙྪཱནཀཐཾཡེཝ སུཎནྟཱ ཨཱགཏཱ, ཏསྨཱ ¶ སུརཱཔཱནཀེལི༹མཎྜལཱདཱིསུ གཱཡནྟཱ ནཙྩནྟཱ ཝིཙརནྟི, དྷམྨཾ སོཏུཾ ན སཀྐོནྟཱི’’ཏི. ‘‘ཀིཾ ནིསྶཱཡ པནེཏེ ན སཀྐོནྟི, བྷནྟེ’’ཏི?

ཨཐསྶ སཏྠཱ, ‘‘ཨཱནནྡ, རཱགཾ ནིསྶཱཡ དོསཾ ནིསྶཱཡ མོཧཾ ནིསྶཱཡ ཏཎྷཾ ནིསྶཱཡ ན སཀྐོནྟི. རཱགགྒིསདིསོ ཨགྒི ནཱམ ནཏྠི, སོ ཚཱརིཀམྤི ཨསེསེཏྭཱ སཏྟེ དཧཏི. ཀིཉྩཱཔི སཏྟསཱུརིཡཔཱཏུབྷཱཝཾ ནིསྶཱཡ ཨུཔྤནྣོ ཀཔྤཝིནཱསཀོ ཨགྒིཔི ཀིཉྩི ཨནཝསེསེཏྭཱཝ ལོཀཾ དཧཏི, སོ པན ཨགྒི ཀདཱཙིཡེཝ དཧཏི. རཱགགྒིནོ ཨདཧནཀཱལོ ནཱམ ནཏྠི, ཏསྨཱ རཱགསམོ ཝཱ ཨགྒི དོསསམོ ཝཱ གཧོ མོཧསམཾ ཝཱ ཛཱལཾ ཏཎྷཱསམཱ ཝཱ ནདཱི ནཱམ ནཏྠཱི’’ཏི ཝཏྭཱ ཨིམཾ གཱཐམཱཧ –

‘‘ནཏྠི རཱགསམོ ཨགྒི, ནཏྠི དོསསམོ གཧོ;

ནཏྠི མོཧསམཾ ཛཱལཾ, ནཏྠི ཏཎྷཱསམཱ ནདཱི’’ཏི.

ཏཏྠ རཱགསམོཏི དྷཱུམཱདཱིསུ ཀིཉྩི ཨདསྶེཏྭཱ ཨནྟོཡེཝ ཨུཊྛཱཡ ཛྷཱཔནཝསེན རཱགེན སམོ ཨགྒི ནཱམ ནཏྠི. དོསསམོཏི ཡཀྑགཧཨཛགརགཧཀུམྦྷིལགཧཱདཡོ ཨེཀསྨིཾཡེཝ ཨཏྟབྷཱཝེ གཎྷིཏུཾ སཀྐོནྟི, དོསགཧོ པན སབྦཏྠ ཨེཀནྟམེཝ གཎྷཱཏཱིཏི དོསེན སམོ ¶ གཧོ ནཱམ ནཏྠི. མོཧསམནྟི ཨོནནྡྷནཔརིཡོནནྡྷནཊྛེན པན མོཧསམཾ ཛཱལཾ ནཱམ ནཏྠི. ཏཎྷཱསམཱཏི གངྒཱདཱིནཾ ནདཱིནཾ པུཎྞཀཱལོཔི ཨཱུནཀཱལོཔི སུཀྑཀཱལོཔི པཉྙཱཡཏི, ཏཎྷཱཡ པན པུཎྞཀཱལོ ཝཱ སུཀྑཀཱལོ ཝཱ ནཏྠི, ནིཙྩཾ ཨཱུནཱཝ པཉྙཱཡཏཱིཏི དུཔྤཱུརཎཊྛེན ཏཎྷཱཡ སམཱ ནདཱི ནཱམ ནཏྠཱིཏི ཨཏྠོ.

དེསནཱཝསཱནེ སཀྐཙྩཾ དྷམྨཾ སུཎནྟོ ཨུཔཱསཀོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

སུདསྶཾ ¶ ཝཛྫནྟི ཨིམཾ དྷམྨདེསནཾ སཏྠཱ བྷདྡིཡནགརཾ ནིསྶཱཡ ཛཱཏིཡཱཝནེ ཝིཧརནྟོ མེཎྜཀསེཊྛིཾ ཨཱརབྦྷ ཀཐེསི.

སཏྠཱ ¶ ཀིར ཨངྒུཏྟརཱཔེསུ ཙཱརིཀཾ ཙརནྟོ མེཎྜཀསེཊྛིནོ ཙ, བྷརིཡཱཡ ཙསྶ ཙནྡཔདུམཱཡ, པུཏྟསྶ ཙ དྷནཉྩཡསེཊྛིནོ, སུཎིསཱཡ ཙ སུམནདེཝིཡཱ, ནཏྟཱཡ ཙསྶ ཝིསཱཁཱཡ, དཱསསྶ ཙ པུཎྞསྶཱཏི ཨིམེསཾ སོཏཱཔཏྟིཕལཱུཔནིསྶཡཾ དིསྭཱ བྷདྡིཡནགརཾ གནྟྭཱ ཛཱཏིཡཱཝནེ ཝིཧཱསི. མེཎྜཀསེཊྛི སཏྠུ ཨཱགམནཾ ཨསྶོསི. ཀསྨཱ ¶ པནེས མེཎྜཀསེཊྛི ནཱམ ཛཱཏོཏི? ཏསྶ ཀིར པཙྪིམགེཧེ ཨཊྛཀརཱིསམཏྟེ ཋཱནེ ཧཏྠིཨསྶཨུསབྷཔམཱཎཱ སུཝཎྞམེཎྜཀཱ པཐཝིཾ བྷིནྡིཏྭཱ པིཊྛིཡཱ པིཊྛིཾ པཧརམཱནཱ ཨུཊྛཧིཾསུ. ཏེསཾ མུཁེསུ པཉྩཝཎྞཱནཾ སུཏྟཱནཾ གེཎྜུཀཱ པཀྑིཏྟཱ ཧོནྟི. སཔྤིཏེལམདྷུཕཱཎིཏཱདཱིཧི ཝཱ ཝཏྠཙྪཱདནཧིརཉྙསུཝཎྞཱདཱིཧི ཝཱ ཨཏྠེ སཏི ཏེསཾ མུཁཏོ གེཎྜུཀེ ཨཔནེནྟི, ཨེཀསྶཱཔི མེཎྜཀསྶ མུཁཏོ ཛམྦུདཱིཔཝཱསཱིནཾ པཧོནཀཾ སཔྤིཏེལམདྷུཕཱཎིཏཝཏྠཙྪཱདནཧིརཉྙསུཝཎྞཾ ནིཀྑམཏི. ཏཏོ པཊྛཱཡ མེཎྜཀསེཊྛཱིཏི པཉྙཱཡི.

ཀིཾ པནསྶ པུབྦཀམྨནྟི? ཝིཔསྶཱིབུདྡྷཀཱལེ ཀིར ཨེས ཨཝརོཛསྶ ནཱམ ཀུཊུམྦིཀསྶ བྷཱགིནེཡྻོ མཱཏུལེན སམཱནནཱམོ ཨཝརོཛོ ནཱམ ཨཧོསི. ཨཐསྶ མཱཏུལོ སཏྠུ གནྡྷཀུཊིཾ ཀཱཏུཾ ཨཱརབྷི. སོ ཏསྶ སནྟིཀཾ གནྟྭཱ, ‘‘མཱཏུལ, ཨུབྷོཔི སཧེཝ ཀརོམཱ’’ཏི ཝཏྭཱ ‘‘ཨཧཾ ཨཉྙེཧི སདྡྷིཾ ཨསཱདྷཱརཎཾ ཀཏྭཱ ཨེཀཀོཝ ཀརིསྶཱམཱི’’ཏི ཏེན པན པཊིཀྑིཏྟཀཱལེ ‘‘ཨིམསྨིཾ ཋཱནེ གནྡྷཀུཊིཡཱ ཀཏཱཡ ཨིམསྨིཾ ནཱམ ཋཱནེ ཀུཉྫརསཱལཾ ནཱམ ལདྡྷུཾ ཝཊྚཏཱི’’ཏི ཙིནྟེཏྭཱ ཨརཉྙཏོ དབྦསམྦྷཱརེ ཨཱཧརཱཔེཏྭཱ ཨེཀཾ ཐམྦྷཾ སུཝཎྞཁཙིཏཾ, ཨེཀཾ རཛཏཁཙིཏཾ, ཨེཀཾ མཎིཁཙིཏཾ, ཨེཀཾ སཏྟརཏནཁཙིཏནྟི ཨེཝཾ ཏུལཱསངྒྷཱཏདྭཱརཀཝཱཊཝཱཏཔཱནགོཔཱནསཱིཚདནིཊྛཀཱ སབྦཱཔི སུཝཎྞཱདིཁཙིཏཱཝ ཀཱརེཏྭཱ གནྡྷཀུཊིཡཱ སམྨུཁཊྛཱནེ ཏཐཱགཏསྶ སཏྟརཏནམཡཾ ཀུཉྫརསཱལཾ ཀཱརེསི. ཏསྶཱ ཨུཔརི གྷནརཏྟསུཝཎྞམཡཱ ཀམྦལཱ པཝཱལ༹མཡཱ སིཁརཐཱུཔིཀཱཡོ ཨཧེསུཾ. ཀུཉྫརསཱལཱཡ ¶ མཛ྄ཛྷེ ཋཱནེ ¶ རཏནམཎྜཔཾ ཀཱརེཏྭཱ དྷམྨཱསནཾ པཏིཊྛཱཔེསི. ཏསྶ གྷནརཏྟསུཝཎྞམཡཱ པཱདཱ ཨཧེསུཾ, ཏཐཱ ཙཏསྶོ ཨཊནིཡོ. ཙཏྟཱརོ པན སུཝཎྞམེཎྜཀེ ཀཱརཱཔེཏྭཱ ཨཱསནསྶ ཙཏུནྣཾ པཱདཱནཾ ཧེཊྛཱ ཋཔེསི, དྭེ མེཎྜཀེ ཀཱརཱཔེཏྭཱ པཱདཔཱིཋཀཱཡ ཧེཊྛཱ ཋཔེསི, ཚ སུཝཎྞམེཎྜཀེ ཀཱརཱཔེཏྭཱ མཎྜཔཾ པརིཀྑིཔེནྟོ ཋཔེསི. དྷམྨཱསནཾ པཋམཾ སུཏྟམཡེཧི རཛྫུཀེཧི ཝཱཡཱཔེཏྭཱ མཛ྄ཛྷེ སུཝཎྞསུཏྟམཡེཧི ཨུཔརི མུཏྟམཡེཧི སུཏྟེཧི ཝཱཡཱཔེསི. ཏསྶ ཙནྡནམཡོ ཨཔསྶཡོ ཨཧོསི. ཨེཝཾ ཀུཉྫརསཱལཾ ནིཊྛཱཔེཏྭཱ སཱལཱམཧཾ ཀརོནྟོ ཨཊྛསཊྛཱིཧི བྷིཀྑུསཏསཧསྶེཧི སདྡྷིཾ སཏྠཱརཾ ནིམནྟེཏྭཱ ཙཏྟཱརོ མཱསེ དཱནཾ དཏྭཱ ཨོསཱནདིཝསེ ཏིཙཱིཝརཾ ཨདཱསི. ཏཏྠ སངྒྷནཝཀསྶ སཏསཧསྶགྒྷནིཀཾ པཱཔུཎི.

ཨེཝཾ ¶ ཝིཔསྶཱིབུདྡྷཀཱལེ པུཉྙཀམྨཾ ཀཏྭཱ ཏཏོ ཙུཏོ དེཝེསུ ཙ མནུསྶེསུ ཙ སཾསརནྟོ ཨིམསྨིཾ བྷདྡཀཔྤེ བཱརཱཎསིཡཾ མཧཱབྷོགཀུལེ ནིབྦཏྟིཏྭཱ བཱརཱཎསིསེཊྛི ནཱམ ཨཧོསི. སོ ཨེཀདིཝསཾ རཱཛཱུཔཊྛཱནཾ གཙྪནྟོ པུརོཧིཏཾ དིསྭཱ ‘‘ཀིཾ, ཨཱཙརིཡ, ནཀྑཏྟམུཧུཏྟཾ, ཨུཔདྷཱརེཐཱ’’ཏི ཨཱཧ. ཨཱམ, ཨུཔདྷཱརེམི, ཀིཾ ཨཉྙཾ ཨམྷཱཀཾ ཀམྨནྟི. ཏེན ཧི ཀཱིདིསཾ ཛནཔདཙཱརིཏྟནྟི? ཨེཀཾ བྷཡཾ ¶ བྷཝིསྶཏཱིཏི. ཀིཾ བྷཡཾ ནཱམཱཏི? ཚཱཏཀབྷཡཾ སེཊྛཱིཏི. ཀདཱ བྷཝིསྶཏཱིཏི? ཨིཏོ ཏིཎྞཾ སཾཝཙྪརཱནཾ ཨཙྩཡེནཱཏི. ཏཾ སུཏྭཱ སེཊྛི བཧུཾ ཀསིཀམྨཾ ཀཱརེཏྭཱ གེཧེ ཝིཛྫམཱནདྷནེནཱཔི དྷཉྙམེཝ གཧེཏྭཱ ཨཌྜྷཏེརསཱནི ཀོཊྛསཏཱནི ཀཱརེཏྭཱ སབྦཀོཊྛཀེ ཝཱིཧཱིཧི པརིཔཱུརེསི. ཀོཊྛེསུ ཨཔྤཧོནྟེསུ ཙཱཊིཨཱདཱིནི པཱུརེཏྭཱ ཨཝསེསཾ བྷཱུམིཡཾ ཨཱཝཱཊེ ཀཏྭཱ ནིཁཎི. ནིདྷཱནཱཝསེསཾ མཏྟིཀཱཡ སདྡྷིཾ མདྡིཏྭཱ བྷིཏྟིཡོ ལིམྤཱཔེསི.

སོ ཨཔརེན སམཡེན ཚཱཏཀབྷཡེ སམྤཏྟེ ཡཐཱནིཀྑིཏྟཾ དྷཉྙཾ པརིབྷུཉྫནྟོ ཀོཊྛེསུ ཙ ཙཱཊིཨཱདཱིསུ ཙ ནིཀྑིཏྟདྷཉྙེ པརིཀྑཱིཎེ པརིཛནེ པཀྐོསཱཔེཏྭཱ ཨཱཧ – ‘‘གཙྪཐ, ཏཱཏཱ, པབྦཏཔཱདཾ པཝིསིཏྭཱ ཛཱིཝནྟཱ སུབྷིཀྑཀཱལེ མམ སནྟིཀཾ ཨཱགནྟུཀཱམཱ ཨཱགཙྪཐ, ཨནཱགནྟུཀཱམཱ ཏཏྠ ཏཏྠེཝ ཛཱིཝཐཱ’’ཏི. ཏེ རོདམཱནཱ ཨསྶུམུཁཱ ཧུཏྭཱ སེཊྛིཾ ཝནྡིཏྭཱ ཁམཱཔེཏྭཱ སཏྟཱཧཾ ནིསཱིདིཏྭཱ ཏཐཱ ཨཀཾསུ. ཏསྶ པན སནྟིཀེ ¶ ཝེཡྻཱཝཙྩཀརོ ཨེཀོཝ པུཎྞོ ནཱམ དཱསོ ཨོཧཱིཡི, ཏེན སདྡྷིཾ སེཊྛིཛཱཡཱ སེཊྛིཔུཏྟོ སེཊྛིསུཎིསཱཏི པཉྩེཝ ཛནཱ ཨཧེསུཾ. ཏེ བྷཱུམིཡཾ ¶ ཨཱཝཱཊེསུ ནིཧིཏདྷཉྙེཔི པརིཀྑཱིཎེ བྷིཏྟིམཏྟིཀཾ པཱཏེཏྭཱ ཏེམེཏྭཱ ཏཏོ ལདྡྷདྷཉྙེན ཡཱཔཡིཾསུ. ཨཐསྶ ཛཱཡཱ ཚཱཏཀེ ཨཝཏྠརནྟེ མཏྟིཀཱཡ ཁཱིཡམཱནཱཡ བྷིཏྟིཔཱདེསུ ཨཝསིཊྛམཏྟིཀཾ པཱཏེཏྭཱ ཏེམེཏྭཱ ཨཌྜྷཱལ༹ྷཀམཏྟཾ ཝཱིཧིཾ ལབྷིཏྭཱ ཀོཊྚེཏྭཱ ཨེཀཾ ཏཎྜུལནཱལི༹ཾ གཧེཏྭཱ ‘‘ཚཱཏཀཀཱལེ ཙོརཱ བཧཱུ ཧོནྟཱི’’ཏི ཙོརབྷཡེན ཨེཀསྨིཾ ཀུཊེ པཀྑིཔིཏྭཱ པིདཧིཏྭཱ བྷཱུམིཡཾ ནིཁཎིཏྭཱ ཋཔེསི. ཨཐ ནཾ སེཊྛི རཱཛཱུཔཊྛཱནཏོ ཨཱགནྟྭཱ ཨཱཧ – ‘‘བྷདྡེ, ཚཱཏོམྷི, ཨཏྠི ཀིཉྩཱི’’ཏི. སཱ ཝིཛྫམཱནཾ ‘‘ནཏྠཱི’’ཏི ཨཝཏྭཱ ‘‘ཨེཀཱ ཏཎྜུལནཱལི༹ ཨཏྠཱི’’ཏི ཨཱཧ. ‘‘ཀཧཾ སཱ’’ཏི? ‘‘ཙོརབྷཡེན མེ ནིཁཎིཏྭཱ ཋཔིཏཱ’’ཏི. ‘‘ཏེན ཧི ནཾ ཨུདྡྷརིཏྭཱ ཀིཉྩི པཙཱཧཱི’’ཏི. ‘‘སཙེ ཡཱགུཾ པཙིསྶཱམི, དྭེ ཝཱརེ ལབྷིསྶཏི. སཙེ བྷཏྟཾ པཙིསྶཱམི, ཨེཀཝཱརམེཝ ལབྷིསྶཏི, ཀིཾ པཙཱམི, སཱམཱི’’ཏི ཨཱཧ. ‘‘ཨམྷཱཀཾ ཨཉྙོ པཙྩཡོ ནཏྠི, བྷཏྟཾ བྷུཉྫིཏྭཱ མརིསྶཱམ, བྷཏྟམེཝ པཙཱཧཱི’’ཏི. སཱ བྷཏྟཾ པཙིཏྭཱ པཉྩ ཀོཊྛཱསེ ཀཏྭཱ སེཊྛིནོ ཀོཊྛཱསཾ ཝཌྜྷེཏྭཱ པུརཏོ ཋཔེསི.

ཏསྨིཾ ཁཎེ གནྡྷམཱདནཔབྦཏེ པཙྩེཀབུདྡྷོ སམཱཔཏྟིཏོ ¶ ཝུཊྛཱཏི. ཨནྟོསམཱཔཏྟིཡཾ ཀིར སམཱཔཏྟིབལེན ཛིགྷཙྪཱ ན བཱདྷཏི. སམཱཔཏྟིཏོ ཝུཊྛིཏཱནཾ པན བལཝཏཱི ཧུཏྭཱ ཨུདརཔཊལཾ ¶ ཌཡ྄ཧནྟཱི ཝིཡ ཨུཔྤཛྫཏི. ཏསྨཱ ཏེ ལབྷནཊྛཱནཾ ཨོལོཀེཏྭཱ གཙྪནྟི. ཏཾ དིཝསཉྩ ཏེསཾ དཱནཾ དཏྭཱ སེནཱཔཏིཊྛཱནཱདཱིསུ ཨཉྙཏརསམྤཏྟིཾ ལབྷནྟི. ཏསྨཱ སོཔི དིབྦེན ཙཀྑུནཱ ཨོལོཀེནྟོ ‘‘སཀལཛམྦུདཱིཔེ ཚཱཏཀབྷཡཾ ཨུཔྤནྣཾ, སེཊྛིགེཧེ ཙ པཉྩནྣཾ ཛནཱནཾ ནཱལི༹ཀོདནོཝ པཀྐོ, སདྡྷཱ ནུ ཁོ ཨེཏེ, སཀྑིསྶནྟི ཝཱ མམ སངྒཧཾ ཀཱཏུ’’ནྟི ཏེསཾ སདྡྷབྷཱཝཉྩ སངྒཧཾ ཀཱཏུཾ སམཏྠབྷཱཝཉྩ དིསྭཱ པཏྟཙཱིཝརམཱདཱཡ མཧཱསེཊྛིསྶ པུརཏོ དྭཱརེ ཋིཏམེཝ ཨཏྟཱནཾ དསྶེསི. སོ ཏཾ དིསྭཱ པསནྣཙིཏྟོ ‘‘པུབྦེཔི མཡཱ དཱནསྶ ཨདིནྣཏྟཱ ཨེཝརཱུཔཾ ཚཱཏཀཾ དིཊྛཾ, ཨིདཾ ཁོ པན བྷཏྟཾ མཾ ཨེཀདིཝསམེཝ རཀྑེཡྻ. ཨཡྻསྶ པན དིནྣཾ ཨནེཀཱསུ ཀཔྤཀོཊཱིསུ མམ ཧིཏསུཁཱཝཧཾ བྷཝིསྶཏཱི’’ཏི ཏཾ བྷཏྟཔཱཏིཾ ཨཔནེཏྭཱ པཙྩེཀབུདྡྷཾ ཨུཔསངྐམིཏྭཱ པཉྩཔཏིཊྛིཏེན ཝནྡིཏྭཱ གེཧཾ པཝེསེཏྭཱ ཨཱསནེ ནིསིནྣསྶ ¶ པཱདེ དྷོཝིཏྭཱ སུཝཎྞཔཱདཔཱིཋེ ཋཔེཏྭཱ བྷཏྟཔཱཏིམཱདཱཡ པཙྩེཀབུདྡྷསྶ པཏྟེ ཨོཀིརི. ཨུཔཌྜྷཱཝསེསེ བྷཏྟེ པཙྩེཀབུདྡྷོ ཧཏྠེན པཏྟཾ ¶ པིདཧི. ཨཐ ནཾ, ‘‘བྷནྟེ, ཨེཀཱཡ ཏཎྜུལནཱལི༹ཡཱ པཉྩནྣཾ ཛནཱནཾ པཀྐཨོདནསྶ ཨཡཾ ཨེཀོ ཀོཊྛཱསོ, ཨིམཾ དྭིདྷཱ ཀཱཏུཾ ན སཀྐཱ. མཱ མཡ྄ཧཾ ཨིདྷལོཀེ སངྒཧཾ ཀརོཐ, ཨཧཾ ནིརཝསེསཾ དཱཏུཀཱམོམྷཱི’’ཏི ཝཏྭཱ སབྦཾ བྷཏྟམདཱསི. དཏྭཱ ཙ པན པཏྠནཾ པཊྛཔེསི, ‘‘མཱ, བྷནྟེ, པུན ནིབྦཏྟནིབྦཏྟཊྛཱནེ ཨེཝརཱུཔཾ ཚཱཏཀབྷཡཾ ཨདྡསཾ, ཨིཏོ པཊྛཱཡ སཀལཛམྦུདཱིཔཝཱསཱིནཾ བཱིཛབྷཏྟཾ དཱཏུཾ སམཏྠོ བྷཝེཡྻཾ, སཧཏྠེན ཀམྨཾ ཀཏྭཱ ཛཱིཝིཀཾ ན ཀཔྤེཡྻཾ, ཨཌྜྷཏེརས ཀོཊྛསཏཱནི སོདྷཱཔེཏྭཱ སཱིསཾ ནྷཱཡིཏྭཱ ཏེསཾ དྭཱརེ ནིསཱིདིཏྭཱ ཨུདྡྷཾ ཨོལོཀིཏཀྑཎེཡེཝ མེ རཏྟསཱལིདྷཱརཱ པཏིཏྭཱ སབྦཀོཊྛེ པཱུརེཡྻུཾ. ནིབྦཏྟནིབྦཏྟཊྛཱནེ ཙ ཨཡམེཝ བྷརིཡཱ, ཨཡམེཝ པུཏྟོ, ཨཡམེཝ སུཎིསཱ, ཨཡམེཝ དཱསོ ཧོཏཱུ’’ཏི.

བྷརིཡཱཔིསྶ ‘‘མམ སཱམིཀེ ཛིགྷཙྪཱཡ པཱིལི༹ཡམཱནེ ན སཀྐཱ མཡཱ བྷུཉྫིཏུ’’ནྟི ཙིནྟེཏྭཱ ཨཏྟནོ ཀོཊྛཱསཾ པཙྩེཀབུདྡྷསྶ དཏྭཱ པཏྠནཾ པཊྛཔེསི, ‘‘བྷནྟེ, ཨིདཱནི ནིབྦཏྟནིབྦཏྟཊྛཱནེ ཨེཝརཱུཔཾ ཚཱཏཀབྷཡཾ ན པསྶེཡྻཾ, བྷཏྟཐཱལིཀཾ ¶ པུརཏོ ཀཏྭཱ སཀལཛམྦུདཱིཔཝཱསཱིནཾ བྷཏྟཾ དེནྟིཡཱཔི ཙ མེ ཡཱཝ ན ཨུཊྛཧིསྶཱམི, ཏཱཝ གཧིཏགཧིཏཊྛཱནཾ པཱུརིཏམེཝ ཧོཏུ. ཨཡམེཝ སཱམིཀོ, ཨཡམེཝ པུཏྟོ, ཨཡམེཝ སུཎིསཱ, ཨཡམེཝ དཱསོ ཧོཏཱུ’’ཏི. པུཏྟོཔིསྶ ཨཏྟནོ ཀོཊྛཱསཾ པཙྩེཀབུདྡྷསྶ དཏྭཱ པཏྠནཾ པཊྛཔེསི, ‘‘བྷནྟེ, ཨིཏོ པཊྛཱཡ ཨེཝརཱུཔཾ ཚཱཏཀབྷཡཾ ན པསྶེཡྻཾ, ཨེཀཉྩ མེ སཧསྶཐཝིཀཾ གཧེཏྭཱ སཀལཛམྦུདཱིཔཝཱསཱིནཾ ཀཧཱཔཎཾ དེནྟསྶཱཔི ཨཡཾ སཧསྶཐཝིཀཱ པརིཔུཎྞཱཝ ཧོཏུ, ཨིམེཡེཝ མཱཏཱཔིཏརོ ཧོནྟུ, ཨཡཾ བྷརིཡཱ, ཨཡཾ དཱསོ ཧོཏཱུ’’ཏི.

སུཎིསཱཔིསྶ ¶ ཨཏྟནོ ཀོཊྛཱསཾ པཙྩེཀབུདྡྷསྶ དཏྭཱ པཏྠནཾ པཊྛཔེསི, ‘‘ཨིཏོ པཊྛཱཡ ཨེཝརཱུཔཾ ཚཱཏཀབྷཡཾ ན པསྶེཡྻཾ, ཨེཀཉྩ མེ དྷཉྙཔིཊཀཾ པུརཏོ ཋཔེཏྭཱ སཀལཛམྦུདཱིཔཝཱསཱིནཾ བཱིཛབྷཏྟཾ དེནྟིཡཱཔི ཁཱིཎབྷཱཝོ མཱ པཉྙཱཡིཏྠ, ནིབྦཏྟནིབྦཏྟཊྛཱནེ ཨིམེཡེཝ སསུརཱ ཧོནྟུ, ཨཡམེཝ སཱམིཀོ, ཨཡམེཝ དཱསོ ཧོཏཱུ’’ཏི. དཱསོཔི ཨཏྟནོ ཀོཊྛཱསཾ པཙྩེཀབུདྡྷསྶ དཏྭཱ པཏྠནཾ པཊྛཔེསི ¶ , ‘‘ཨིཏོ པཊྛཱཡ ཨེཝརཱུཔཾ ཚཱཏཀབྷཡཾ ན པསྶེཡྻཾ, སབྦེ ཨིམེ སཱམིཀཱ ཧོནྟུ, ཀསནྟསྶ ཙ མེ ཨིཏོ ཏིསྶོ, ཨེཏྟོ ཏིསྶོ, མཛ྄ཛྷེ ཨེཀཱཏི དཱརུཨམྦཎམཏྟཱ སཏྟ སཏྟ སཱིཏཱཡོ གཙྪནྟཱུ’’ཏི. སོ ཏཾ དིཝསཾ སེནཱཔཏིཊྛཱནཾ པཏྠེཏྭཱ ལདྡྷུཾ སམཏྠོཔི སཱམིཀེསུ ¶ སིནེཧེན ‘‘ཨིམེཡེཝ མེ སཱམིཀཱ ཧོནྟཱུ’’ཏི པཏྠནཾ པཊྛཔེསི. པཙྩེཀབུདྡྷོ སབྦེསམྤི ཝཙནཱཝསཱནེ ‘‘ཨེཝཾ ཧོཏཱུ’’ཏི ཝཏྭཱ –

‘‘ཨིཙྪིཏཾ པཏྠིཏཾ ཏུཡ྄ཧཾ, ཁིཔྤམེཝ སམིཛ྄ཛྷཏུ;

སབྦེ པཱུརེནྟུ སངྐཔྤཱ, ཙནྡོ པནྣརསོ ཡཐཱ.

‘‘ཨིཙྪིཏཾ པཏྠིཏཾ ཏུཡ྄ཧཾ, ཁིཔྤམེཝ སམིཛ྄ཛྷཏུ;

སབྦེ པཱུརེནྟུ སངྐཔྤཱ, མཎི ཛོཏིརསོ ཡཐཱ’’ཏི. –

པཙྩེཀབུདྡྷགཱཐཱཧི ཨནུམོདནཾ ཀཏྭཱ ‘‘མཡཱ ཨིམེསཾ ཙིཏྟཾ པསཱདེཏུཾ ཝཊྚཏཱི’’ཏི ཙིནྟེཏྭཱ ‘‘ཡཱཝ གནྡྷམཱདནཔབྦཏཱ ཨིམེ མཾ པསྶནྟཱུ’’ཏི ཨདྷིཊྛཧིཏྭཱ པཀྐཱམི. ཏེཔི ཨོལོཀེཏྭཱཝ ཨཊྛཾསུ. སོ གནྟྭཱ ཏཾ བྷཏྟཾ པཉྩཧི པཙྩེཀབུདྡྷསཏེཧི སདྡྷིཾ སཾཝིབྷཛི. ཏཾ ཏསྶཱནུབྷཱཝེན སབྦེསམྤི པཧོཏི. ཏེ ཨོལོཀེནྟཱཡེཝ ཨཊྛཾསུ.

ཨཏིཀྐནྟེ པན མཛ྄ཛྷནྷིཀེ སེཊྛིབྷརིཡཱ ཨུཀྑལིཾ དྷོཝིཏྭཱ པིདཧིཏྭཱ ཋཔེསི. སེཊྛིཔི ཛིགྷཙྪཱཡ པཱིལི༹ཏོ ནིཔཛྫིཏྭཱ ནིདྡཾ ཨོཀྐམི. སོ སཱཡནྷེ པབུཛ྄ཛྷིཏྭཱ བྷརིཡཾ ཨཱཧ – ‘‘བྷདྡེ, ཨཏིཝིཡ ཚཱཏོམྷི, ཨཏྠི ནུ ཁོ ཨུཀྑལིཡཱ ཏལེ ཛྷཱམཀསིཏྠཱནཱི’’ཏི. སཱ དྷོཝིཏྭཱ ཨུཀྑལིཡཱ ཋཔིཏབྷཱཝཾ ཛཱནནྟཱིཔི ‘‘ནཏྠཱི’’ཏི ཨཝཏྭཱ ‘‘ཨུཀྑལིཾ ཝིཝརིཏྭཱ ཨཱཙིཀྑིསྶཱམཱི’’ཏི ཨུཊྛཱཡ ཨུཀྑལིམཱུལཾ གནྟྭཱ ཨུཀྑལིཾ ཝིཝརི, ཏཱཝདེཝ སུམནམཀུལསདིསཝཎྞསྶ བྷཏྟསྶ པཱུརཱ ཨུཀྑལི པིདྷཱནཾ ཨུཀྑིཔིཏྭཱ ཨཊྛཱསི. སཱ ཏཾ དིསྭཱཝ པཱིཏིཡཱ ཕུཊྛསརཱིརཱ སེཊྛིཾ ཨཱཧ – ‘‘ཨུཊྛེཧི, སཱམི, ཨཧཾ ཨུཀྑལིཾ དྷོཝིཏྭཱ པིདཧིཾ, སཱ པན སུམནམཀུལསདིསཝཎྞསྶ བྷཏྟསྶ ¶ པཱུརཱ, པུཉྙཱནི ནཱམ ཀཏྟབྦརཱུཔཱནི, དཱནཾ ནཱམ ཀཏྟབྦཡུཏྟཀཾ. ཨུཊྛེཧི, སཱམི, བྷུཉྫསྶཱུ’’ཏི. སཱ དྭིནྣཾ པིཏཱཔུཏྟཱནཾ བྷཏྟཾ ཨདཱསི. ཏེསུ སུཏྭཱ ¶ ཨུཊྛིཏེསུ སུཎིསཱཡ སདྡྷིཾ ནིསཱིདིཏྭཱ བྷུཉྫིཏྭཱ པུཎྞསྶ བྷཏྟཾ ཨདཱསི. གཧིཏགཧིཏཊྛཱནཾ ན ཁཱིཡཏི, ཀཊཙྪུནཱ སཀིཾ གཧིཏཊྛཱནམེཝ པཉྙཱཡཏི. ཏཾདིཝསམེཝ ཀོཊྛཱདཡོ པུབྦེ པཱུརིཏནིཡཱམེནེཝ པུན པཱུརཡིཾསུ. ‘‘སེཊྛིསྶ གེཧེ བྷཏྟཾ ཨུཔྤནྣཾ, བཱིཛབྷཏྟེཧི ཨཏྠིཀཱ ཨཱགནྟྭཱ གཎྷནྟཱུ’’ཏི ནགརེ ¶ གྷོསནཾ ཀཱརེསི. མནུསྶཱ ཏསྶ གེཧཏོ བཱིཛབྷཏྟཾ གཎྷིཾསུ. སཀལཛམྦུདཱིཔཝཱསིནོ ཏཾ ནིསྶཱཡ ཛཱིཝིཏཾ ལབྷིཾསུཡེཝ.

སོ ཏཏོ ཙུཏོ དེཝལོཀེ ནིབྦཏྟིཏྭཱ དེཝམནུསྶེསུ སཾསརནྟོ ཨིམསྨིཾ བུདྡྷུཔྤཱདེ བྷདྡིཡནགརེ སེཊྛིཀུལེ ནིབྦཏྟི. བྷརིཡཱཔིསྶ མཧཱབྷོགཀུལེ ནིབྦཏྟིཏྭཱ ཝཡཔྤཏྟཱ ཏསྶེཝ གེཧཾ ཨགམཱསི. ཏསྶ ཏཾ པུབྦཀམྨཾ ནིསྶཱཡ པཙྪཱགེཧེ པུབྦེ ཝུཏྟཔྤཀཱརཱ མེཎྜཀཱ ཨུཊྛཧིཾསུ. པུཏྟོཔི ནེསཾ པུཏྟོཝ, སུཎིསཱ སུཎིསཱཝ, དཱསོ དཱསོཝ ཨཧོསི. ཨཐེཀདིཝསཾ སེཊྛི ཨཏྟནོ པུཉྙཾ ཝཱིམཾསིཏུཀཱམོ ཨཌྜྷཏེརསཱནི ཀོཊྛསཏཱནི སོདྷཱཔེཏྭཱ སཱིསཾ ནྷཱཏོ དྭཱརེ ནིསཱིདིཏྭཱ ཨུདྡྷཾ ཨོལོཀེསི. སབྦཱནིཔི ཝུཏྟཔྤཀཱརཱནཾ ¶ རཏྟསཱལཱིནཾ པཱུརཡིཾསུ. སོ སེསཱནམྤི པུཉྙཱནི ཝཱིམཾསིཏུཀཱམོ བྷརིཡཉྩ པུཏྟཱདཡོ ཙ ‘‘ཏུམྷཱཀམྤི པུཉྙཱནི ཝཱིམཾསིསྶཐཱ’’ཏི ཨཱཧ.

ཨཐསྶ བྷརིཡཱ སབྦཱལངྐཱརེཧི ཨལངྐརིཏྭཱ མཧཱཛནསྶ པསྶནྟསྶེཝ ཏཎྜུལེ མིནཱཔེཏྭཱ ཏེཧི བྷཏྟཾ པཙཱཔེཏྭཱ དྭཱརཀོཊྛཀེ པཉྙཏྟཱསནེ ནིསཱིདིཏྭཱ སུཝཎྞཀཊཙྪུཾ ཨཱདཱཡ ‘‘བྷཏྟེན ཨཏྠིཀཱ ཨཱགཙྪནྟཱུ’’ཏི གྷོསཱཔེཏྭཱ ཨཱགཏཱགཏཱནཾ ཨུཔནཱིཏབྷཱཛནཱནི པཱུརེཏྭཱ ཨདཱསི. སཀལདིཝསམྤི དེནྟིཡཱ ཀཊཙྪུནཱ གཧིཏཊྛཱནམེཝ པཉྙཱཡཏི. ཏསྶཱ པན པུརིམབུདྡྷཱནམྤི བྷིཀྑུསངྒྷསྶ ཝཱམཧཏྠེན ཨུཀྑལིཾ དཀྑིཎཧཏྠེན ཀཊཙྪུཾ གཧེཏྭཱ ཨེཝམེཝ པཏྟེ པཱུརེཏྭཱ བྷཏྟསྶ དིནྣཏྟཱ ཝཱམཧཏྠཏལཾ པཱུརེཏྭཱ པདུམལཀྑཎཾ ནིབྦཏྟི, དཀྑིཎཧཏྠཏལཾ པཱུརེཏྭཱ ཙནྡལཀྑཎཾ ནིབྦཏྟི. ཡསྨཱ པན ཝཱམཧཏྠཏོ དྷམྨཀརཎཾ ཨཱདཱཡ བྷིཀྑུསངྒྷསྶ ཨུདཀཾ པརིསྶཱཝེཏྭཱ དདམཱནཱ ཨཔརཱཔརཾ ཝིཙརི, ཏེནསྶཱ དཀྑིཎཔཱདཏལཾ པཱུརེཏྭཱ ཙནྡལཀྑཎཾ ནིབྦཏྟི, ཝཱམཔཱདཏལཾ པཱུརེཏྭཱ པདུམལཀྑཎཾ ནིབྦཏྟི. ཏསྶཱ ཨིམིནཱ ཀཱརཎེན ཙནྡཔདུམཱཏི ནཱམཾ ཀརིཾསུ.

པུཏྟོཔིསྶ སཱིསཾ ནྷཱཏོ སཧསྶཐཝིཀཾ ¶ ཨཱདཱཡ ‘‘ཀཧཱཔཎེཧི ཨཏྠིཀཱ ཨཱགཙྪནྟཱུ’’ཏི ཝཏྭཱ ཨཱགཏཱགཏཱནཾ གཧིཏབྷཱཛནཱནི པཱུརེཏྭཱ ཨདཱསི. ཐཝིཀཱཡ ཀཧཱཔཎསཧསྶཾ ཨཧོསིཡེཝ. སུཎིསཱཔིསྶ སབྦཱལངྐཱརེཧི ཨལངྐརིཏྭཱ ཝཱིཧིཔིཊཀཾ ཨཱདཱཡ ཨཱཀཱསངྒཎེ ནིསིནྣཱ ‘‘བཱིཛབྷཏྟེཧི ཨཏྠིཀཱ ཨཱགཙྪནྟཱུ’’ཏི ཝཏྭཱ ཨཱགཏཱགཏཱནཾ གཧིཏབྷཱཛནཱནི པཱུརེཏྭཱ ཨདཱསི. པིཊཀཾ ¶ ཡཐཱཔཱུརིཏམེཝ ཨཧོསི. དཱསོཔིསྶ ¶ སབྦཱལངྐཱརེཧི ཨལངྐརིཏྭཱ སུཝཎྞཡུགེསུ སུཝཎྞཡོཏྟེཧི གོཎེ ཡོཛེཏྭཱ སུཝཎྞཔཏོདཡཊྛིཾ ཨཱདཱཡ དྭིནྣཾ གོཎཱནཾ གནྡྷཔཉྩངྒུལིཀཱནི དཏྭཱ ཝིསཱཎེསུ སུཝཎྞཀོསཀེ པཊིམུཉྩིཏྭཱ ཁེཏྟཾ གནྟྭཱ པཱཛེསི. ཨིཏོ ཏིསྶོ, ཨེཏྟོ ཏིསྶོ, མཛ྄ཛྷེ ཨེཀཱཏི སཏྟ སཱིཏཱ བྷིཛྫིཏྭཱ ཨགམཾསུ. ཛམྦུདཱིཔཝཱསིནོ བྷཏྟབཱིཛཧིརཉྙསུཝཎྞཱདཱིསུ ཡཐཱརུཙིཏཾ སེཊྛིགེཧཏོཡེཝ གཎྷིཾསུ. ཨིམེ པཉྩ མཧཱཔུཉྙཱ.

ཨེཝཾ མཧཱནུབྷཱཝོ སེཊྛི ‘‘སཏྠཱ ཀིར ཨཱགཏོ’’ཏི སུཏྭཱ ‘‘སཏྠུ པཙྩུགྒམནཾ ཀརིསྶཱམཱི’’ཏི ནིཀྑམནྟོ ཨནྟརཱམགྒེ ཏིཏྠིཡེ དིསྭཱ ཏེཧི ‘‘ཀསྨཱ ཏཾ, གཧཔཏི, ཀིརིཡཝཱདོ སམཱནོ ཨཀིརིཡཝཱདསྶ སམཎསྶ གོཏམསྶ སནྟིཀཾ གཙྪསཱི’’ཏི ནིཝཱརིཡམཱནོཔི ཏེསཾ ཝཙནཾ ཨནཱདིཡིཏྭཱ གནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདི ¶ . ཨཐསྶ སཏྠཱ ཨནུཔུབྦིཾ ཀཐཾ ཀཐེསི. སོ དེསནཱཝསཱནེ སོཏཱཔཏྟིཕལཾ པཏྭཱ སཏྠུ ཏིཏྠིཡེཧི ཨཝཎྞཾ ཝཏྭཱ ཨཏྟནོ ནིཝཱརིཏབྷཱཝཾ ཨཱརོཙེསི. ཨཐ ནཾ སཏྠཱ, ‘‘གཧཔཏི, ཨིམེ སཏྟཱ ནཱམ མཧནྟམྤི ཨཏྟནོ དོསཾ ན པསྶནྟི, ཨཝིཛྫམཱནམྤི པརེསཾ དོསཾ ཝིཛྫམཱནཾ ཀཏྭཱ ཏཏྠ ཏཏྠ བྷུསཾ ཝིཡ ཨོཔུནནྟཱི’’ཏི ཝཏྭཱ ཨིམཾ གཱཐམཱཧ –

‘‘སུདསྶཾ ཝཛྫམཉྙེསཾ, ཨཏྟནོ པན དུདྡསཾ;

པརེསཉྷི སོ ཝཛྫཱནི, ཨོཔུནཱཏི ཡཐཱ བྷུསཾ;

ཨཏྟནོ པན ཚཱདེཏི, ཀལིཾཝ ཀིཏཝཱ སཋོ’’ཏི.

ཏཏྠ སུདསྶཾ ཝཛྫནྟི པརསྶ ཨཎུམཏྟམྤི ཝཛྫཾ ཁལིཏཾ སུདསྶཾ སུཁེནེཝ པསྶིཏུཾ སཀྐཱ, ཨཏྟནོ པན ཨཏིམཧནྟམྤི དུདྡསཾ. པརེསཾ ཧཱིཏི ཏེནེཝ ཀཱརཎེན སོ པུགྒལོ སངྒྷམཛ྄ཛྷཱདཱིསུ པརེསཾ ཝཛྫཱནི ཨུཙྩཊྛཱནེ ཋཔེཏྭཱ བྷུསཾ ཨོཔུནནྟོ ཝིཡ ཨོཔུནཱཏི. ཀལིཾཝ ཀིཏཝཱ སཋོཏི ཨེཏྠ སཀུཎེསུ ཨཔརཛ྄ཛྷནབྷཱཝེན ཨཏྟབྷཱཝོ ཀལི ནཱམ, སཱཁབྷངྒཱདིཀཾ པཊིཙྪཱདནཾ ཀིཏཝཱ ནཱམ, སཱཀུཎིཀོ སཋོ ནཱམ. ཡཐཱ སཀུཎལུདྡཀོ སཀུཎེ གཧེཏྭཱ མཱརེཏུཀཱམོ ཀིཏཝཱ ཝིཡ ¶ ཨཏྟབྷཱཝཾ པཊིཙྪཱདེཏི, ཨེཝཾ ཨཏྟནོ ཝཛྫཾ ཚཱདེཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པརཝཛྫཱནུཔསྶིསྶཱཏི ¶ ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨུཛ྄ཛྷཱནསཉྙིཾ ནཱམ ཨེཀཾ ཐེརཾ ཨཱརབྦྷ ཀཐེསི.

སོ ཀིར ‘‘ཨཡཾ ཨེཝཾ ནིཝཱསེཏི, ཨེཝཾ པཱརུཔཏཱི’’ཏི བྷིཀྑཱུནཾ ཨནྟརམེཝ གཝེསནྟོ ཝིཙརཏི. བྷིཀྑཱུ ‘‘ཨསུཀོ ནཱམ, བྷནྟེ, ཐེརོ ཨེཝཾ ཀརོཏཱི’’ཏི སཏྠུ ཨཱརོཙེསུཾ. སཏྠཱ, ‘‘བྷིཀྑཝེ, ཝཏྟསཱིསེ ཋཏྭཱ ཨེཝཾ ཨོཝདནྟོ ཨནནུཔཝཱདོ. ཡོ པན ནིཙྩཾ ཨུཛ྄ཛྷཱནསཉྙིཏཱཡ པརེསཾ ཨནྟརཾ པརིཡེསམཱནོ ཨེཝཾ ཝཏྭཱ ཝིཙརཏི, ཏསྶ ཛྷཱནཱདཱིསུ ཨེཀོཔི ཝིསེསོ ནུཔྤཛྫཏི, ཀེཝལཾ ཨཱསཝཱཡེཝ ཝཌྜྷནྟཱི’’ཏི ཝཏྭཱ ཨིམཾ གཱཐམཱཧ –

‘‘པརཝཛྫཱནུཔསྶིསྶ, ནིཙྩཾ ཨུཛ྄ཛྷཱནསཉྙིནོ;

ཨཱསཝཱ ཏསྶ ཝཌྜྷནྟི, ཨཱརཱ སོ ཨཱསཝཀྑཡཱ’’ཏི.

ཏཏྠ ¶ ཨུཛ྄ཛྷཱནསཉྙིནོཏི ཨེཝཾ ནིཝཱསེཏབྦཾ ཨེཝཾ པཱརུཔིཏབྦནྟི པརེསཾ ཨནྟརགཝེསིཏཱཡ ཨུཛ྄ཛྷཱནབཧུལསྶ པུགྒལསྶ ཛྷཱནཱདཱིསུ ཨེཀདྷམྨོཔི ན ཝཌྜྷཏི, ཨཐ ཁོ ཨཱསཝཱཝ ཏསྶ ཝཌྜྷནྟི. ཏེནེཝ ཀཱརཎེན སོ ཨརཧཏྟམགྒསངྑཱཏཱ ཨཱསཝཀྑཡཱ ཨཱརཱ དཱུརཾ གཏོཝ ཧོཏཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨུཛ྄ཛྷཱནསཉྙིཏྠེརཝཏྠུ ཨེཀཱདསམཾ.

ཨཱཀཱསེཏི ཨིདཾ དྷམྨདེསནཾ སཏྠཱ ཀུསིནཱརཱཡཾ ཨུཔཝཏྟནེ མལླཱནཾ སཱལཝནེ པརིནིབྦཱནམཉྩཀེ ནིཔནྣོ སུབྷདྡཾ པརིབྦཱཛཀཾ ཨཱརབྦྷ ཀཐེསི.

སོ ཀིར ཨཏཱིཏེ ཀནིཊྛབྷཱཏརི ཨེཀསྨིཾ སསྶེ ནཝཀྑཏྟུཾ ཨགྒདཱནཾ དེནྟེ དཱནཾ དཱཏུཾ ཨནིཙྪནྟོ ཨོསཀྐིཏྭཱ ཨཝསཱནེ ཨདཱསི. ཏསྨཱ པཋམབོདྷིཡམྤི མཛ྄ཛྷིམབོདྷིཡམྤི སཏྠཱརཾ དཊྛུཾ ནཱལཏྠ. པཙྪིམབོདྷིཡཾ པན སཏྠུ པརིནིབྦཱནཀཱལེ ‘‘ཨཧཾ ཏཱིསུ པཉྷེསུ ཨཏྟནོ ཀངྑཾ མཧལླཀེ ¶ པརིབྦཱཛཀེ ¶ པུཙྪིཏྭཱ སམཎཾ གོཏམཾ ‘དཧརོ’ཏི སཉྙཱཡ ན པུཙྪིཾ ¶ , ཏསྶ ཙ དཱནི པརིནིབྦཱནཀཱལོ, པཙྪཱ མེ སམཎསྶ གོཏམསྶ ཨཔུཙྪིཏཀཱརཎཱ ཝིཔྤཊིསཱརོ ཨུཔྤཛྫེཡྻཱ’’ཏི སཏྠཱརཾ ཨུཔསངྐམིཏྭཱ ཨཱནནྡཏྠེརེན ནིཝཱརིཡམཱནོཔི སཏྠཱརཱ ཨོཀཱསཾ ཀཏྭཱ, ‘‘ཨཱནནྡ, མཱ སུབྷདྡཾ ནིཝཱརཡི, པུཙྪཏུ མཾ པཉྷ’’ནྟི ཝུཏྟེ ཨནྟོསཱཎིཾ པཝིསིཏྭཱ ཧེཊྛཱམཉྩཀེ ནིསིནྣོ, ‘‘བྷོ སམཎ, ཀིཾ ནུ ཁོ ཨཱཀཱསེ པདཾ ནཱམ ཨཏྠི, ཨིཏོ བཧིདྡྷཱ སམཎོ ནཱམ ཨཏྠི, སངྑཱརཱ སསྶཏཱ ནཱམ ཨཏྠཱི’’ཏི ཨིམེ པཉྷེ པུཙྪི. ཨཐསྶ སཏྠཱ ཏེསཾ ཨབྷཱཝཾ ཨཱཙིཀྑནྟོ ཨིམཱཧི གཱཐཱཧི དྷམྨཾ དེསེསི –

‘‘ཨཱཀཱསེཝ པདཾ ནཏྠི, སམཎོ ནཏྠི བཱཧིརེ;

པཔཉྩཱབྷིརཏཱ པཛཱ, ནིཔྤཔཉྩཱ ཏཐཱགཏཱ.

‘‘ཨཱཀཱསེཝ པདཾ ནཏྠི, སམཎོ ནཏྠི བཱཧིརེ;

སངྑཱརཱ སསྶཏཱ ནཏྠི, ནཏྠི བུདྡྷཱནམིཉྫིཏ’’ནྟི.

ཏཏྠ པདནྟི ཨིམསྨིཾ ཨཱཀཱསེ ཝཎྞསཎྛཱནཝསེན ཨེཝརཱུཔནྟི པཉྙཱཔེཏབྦཾ ཀསྶཙི པདཾ ནཱམ ནཏྠི. བཱཧིརེཏི མམ སཱསནཏོ བཧིདྡྷཱ མགྒཕལཊྛོ སམཎོ ནཱམ ནཏྠི. པཛཱཏི ཨཡཾ སཏྟལོཀསངྑཱཏཱ པཛཱ ཏཎྷཱདཱིསུ པཔཉྩེསུཡེཝཱབྷིརཏཱ. ནིཔྤཔཉྩཱཏི བོདྷིམཱུལེཡེཝ སབྦཔཔཉྩཱནཾ སམུཙྪིནྣཏྟཱ ནིཔྤཔཉྩཱ ¶ ཏཐཱགཏཱ. སངྑཱརཱཏི པཉྩཀྑནྡྷཱ. ཏེསུ ཧི ཨེཀོཔི སསྶཏོ ནཱམ ནཏྠི. ཨིཉྫིཏནྟི བུདྡྷཱནཾ པན ཏཎྷཱམཱནཱདཱིསུ ཨིཉྫིཏེསུ ཡེན སངྑཱརཱ སསྶཏཱཏི གཎྷེཡྻ, ཏཾ ཨེཀཾ ཨིཉྫིཏམྤི ནཱམ ནཏྠཱིཏི ཨཏྠོ.

དེསནཱཝསཱནེ སུབྷདྡོ ཨནཱགཱམིཕལེ པཏིཊྛཧི, སམྤཏྟཔརིསཱཡཔི སཱཏྠིཀཱ དྷམྨདེསནཱ ཨཧོསཱིཏི.

ན ¶ ¶ ¶ ཏེན ཧོཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཝིནིཙྪཡམཧཱམཏྟེ ཨཱརབྦྷ ཀཐེསི.

ཨེཀདིཝསཉྷི བྷིཀྑཱུ སཱཝཏྠིཡཾ ཨུཏྟརདྭཱརགཱམེ པིཎྜཱཡ ཙརིཏྭཱ པིཎྜཔཱཏཔཊིཀྐནྟཱ ནགརམཛ྄ཛྷེན ཝིཧཱརཾ ཨཱགཙྪནྟི. ཏསྨིཾ ཁཎེ མེགྷོ ཨུཊྛཱཡ པཱཝསྶི. ཏེ སམྨུཁཱགཏཾ ཝིནིཙྪཡསཱལཾ པཝིསིཏྭཱ ཝིནིཙྪཡམཧཱམཏྟེ ལཉྫཾ གཧེཏྭཱ སཱམིཀེ ཨསཱམིཀེ ཀརོནྟེ དིསྭཱ ‘‘ཨཧོ ཨིམེ ཨདྷམྨིཀཱ, མཡཾ པན ‘ཨིམེ དྷམྨེན ཝིནིཙྪཡཾ ཀརོནྟཱི’ཏི སཉྙིནོ ཨཧུམྷཱ’’ཏི ཙིནྟེཏྭཱ ཝསྶེ ཝིགཏེ ཝིཧཱརཾ གནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསིནྣཱ ཏམཏྠཾ ཨཱརོཙེསུཾ. སཏྠཱ ‘‘ན, བྷིཀྑཝེ, ཚནྡཱདིཝསིཀཱ ཧུཏྭཱ སཱཧསེན ཨཏྠཾ ཝིནིཙྪིནནྟཱ དྷམྨཊྛཱ ནཱམ ཧོནྟི, ཨཔརཱདྷཾ པན ཨནུཝིཛྫིཏྭཱ ¶ ཨཔརཱདྷཱནུརཱུཔཾ ཨསཱཧསེན ཝིནིཙྪཡཾ ཀརོནྟཱ ཨེཝ དྷམྨཊྛཱ ནཱམ ཧོནྟཱི’’ཏི ཝཏྭཱ ཨིམཱ གཱཐཱ ཨབྷཱསི –

‘‘ན ཏེན ཧོཏི དྷམྨཊྛོ, ཡེནཏྠཾ སཱཧསཱ ནཡེ;

ཡོ ཙ ཨཏྠཾ ཨནཏྠཉྩ, ཨུབྷོ ནིཙྪེཡྻ པཎྜིཏོ.

‘‘ཨསཱཧསེན དྷམྨེན, སམེན ནཡཏཱི པརེ;

དྷམྨསྶ གུཏྟོ མེདྷཱཝཱི, དྷམྨཊྛོཏི པཝུཙྩཏཱི’’ཏི.

ཏཏྠ ཏེནཱཏི ཨེཏྟཀེནེཝ ཀཱརཎེན. དྷམྨཊྛོཏི རཱཛཱ ཧི ཨཏྟནོ ཀཱཏབྦེ ཝིནིཙྪཡདྷམྨེ ཋིཏོཔི དྷམྨཊྛོ ནཱམ ན ཧོཏི. ཡེནཱཏི ཡེན ཀཱརཎེན. ཨཏྠནྟི ཨོཏིཎྞཾ ཝིནིཙྪིཏབྦཾ ཨཏྠཾ. སཱཧསཱ ནཡེཏི ཚནྡཱདཱིསུ པཏིཊྛིཏོ སཱཧསེན མུསཱཝཱདེན ཝིནིཙྪེཡྻ. ཡོ ཧི ཚནྡེ པཏིཊྛཱཡ ཉཱཏཱིཏི ཝཱ མིཏྟོཏི ཝཱ མུསཱ ཝཏྭཱ ཨསཱམིཀམེཝ སཱམིཀཾ ཀརོཏི, དོསེ པཏིཊྛཱཡ ཨཏྟནོ ཝེརཱིནཾ མུསཱ ཝཏྭཱ སཱམིཀམེཝ ཨསཱམིཀཾ ཀརོཏི, མོཧེ པཏིཊྛཱཡ ལཉྫཾ གཧེཏྭཱ ¶ ཝིནིཙྪཡཀཱལེ ¶ ཨཉྙཝིཧིཏོ ཝིཡ ཨིཏོ ཙིཏོ ཙ ཨོལོཀེནྟོ མུསཱ ཝཏྭཱ ‘‘ཨིམིནཱ ཛིཏཾ, ཨཡཾ པརཱཛིཏོ’’ཏི ¶ པརཾ ནཱིཧརཏི, བྷཡེ པཏིཊྛཱཡ ཀསྶཙིདེཝ ཨིསྶརཛཱཏིཀསྶ པརཱཛཡཾ པཱཔུཎནྟསྶཱཔི ཛཡཾ ཨཱརོཔེཏི, ཨཡཾ སཱཧསེན ཨཏྠཾ ནེཏི ནཱམ. ཨེསོ དྷམྨཊྛོ ནཱམ ན ཧོཏཱིཏི ཨཏྠོ. ཨཏྠཾ ཨནཏྠཉྩཱཏི བྷཱུཏཉྩ ཨབྷཱུཏཉྩ ཀཱརཎཾ. ཨུབྷོ ནིཙྪེཡྻཱཏི ཡོ པན པཎྜིཏོ ཨུབྷོ ཨཏྠཱནཏྠེ ཝིནིཙྪིནིཏྭཱ ཝདཏི. ཨསཱཧསེནཱཏི ཨམུསཱཝཱདེན. དྷམྨེནཱཏི ཝིནིཙྪཡདྷམྨེན, ན ཚནྡཱདིཝསེན. སམེནཱཏི ཨཔརཱདྷཱནུརཱུཔེནེཝ པརེ ནཡཏི, ཛཡཾ ཝཱ པརཱཛཡཾ ཝཱ པཱཔེཏི. དྷམྨསྶ གུཏྟོཏི སོ དྷམྨགུཏྟོ དྷམྨརཀྑིཏོ དྷམྨོཛཔཉྙཱཡ སམནྣཱགཏོ མེདྷཱཝཱི ཝིནིཙྪཡདྷམྨེ ཋིཏཏྟཱ དྷམྨཊྛོཏི པཝུཙྩཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ན ཏེན པཎྜིཏོ ཧོཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཚབྦགྒིཡེ ཨཱརབྦྷ ཀཐེསི.

ཏེ ཀིར ཝིཧཱརེཔི གཱམེཔི བྷཏྟགྒཾ ཨཱཀུལཾ ཀརོནྟཱ ¶ ཝིཙརནྟི. ཨཐེཀདིཝསེ བྷིཀྑཱུ གཱམེ བྷཏྟཀིཙྩཾ ཀཏྭཱ ཨཱགཏེ དཧརེ སཱམཎེརེ ཙ པུཙྪིཾསུ – ‘‘ཀཱིདིསཾ, ཨཱཝུསོ, བྷཏྟགྒ’’ནྟི? བྷནྟེ, མཱ པུཙྪཐ, ཚབྦགྒིཡཱ ‘‘མཡམེཝ ཝིཡཏྟཱ, མཡམེཝ པཎྜིཏཱ, ཨིམེ པཧརིཏྭཱ སཱིསེ ཀཙཝརཾ ཨཱཀིརིཏྭཱ ནཱིཧརིསྶཱམཱ’’ཏི ཝཏྭཱ ཨམྷེ པིཊྛིཡཾ གཧེཏྭཱ ཀཙཝརཾ ཨོཀིརནྟཱ བྷཏྟགྒཾ ཨཱཀུལཾ ཨཀཾསཱུཏི. བྷིཀྑཱུ སཏྠུ སནྟིཀཾ གནྟྭཱ ཏམཏྠཾ ཨཱརོཙེསུཾ. སཏྠཱ ‘‘ནཱཧཾ, བྷིཀྑཝེ, བཧུཾ བྷཱསིཏྭཱ པརེ ཝིཧེཋཡམཱནཾ ‘པཎྜིཏོ’ཏི ཝདཱམི, ཁེམིནཾ པན ཨཝེརཱིནཾ ཨབྷཡམེཝ པཎྜིཏོཏི ཝདཱམཱི’’ཏི ཝཏྭཱ ཨིམཾ གཱཐམཱཧ –

‘‘ན ཏེན པཎྜིཏོ ཧོཏི, ཡཱཝཏཱ བཧུ བྷཱསཏི;

ཁེམཱི ཨཝེརཱི ཨབྷཡོ, པཎྜིཏོཏི པཝུཙྩཏཱི’’ཏི.

ཏཏྠ ¶ ཡཱཝཏཱཏི ཡཏྟཀེན ཀཱརཎེན སངྒྷམཛ྄ཛྷཱདཱིསུ བཧུཾ ཀཐེཏི, ཏེན པཎྜིཏོ ནཱམ ན ཧོཏི ¶ . ཡོ པན སཡཾ ཁེམཱི པཉྩནྣཾ ཝེརཱནཾ ཨབྷཱཝེན ཨཝེརཱི ནིབྦྷཡོ ¶ , ཡཾ ཝཱ ཨཱགམྨ མཧཱཛནསྶ བྷཡཾ ན ཧོཏི, སོ པཎྜིཏོ ནཱམ ཧོཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ན ཏཱཝཏཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀུདཱནཏྠེརཾ ནཱམ ཁཱིཎཱསཝཾ ཨཱརབྦྷ ཀཐེསི.

སོ ཀིར ཨེཀཀོཝ ཨེཀསྨིཾ ཝནསཎྜེ ཝིཧརཏི, ཨེཀམེཝསྶ ཨུདཱནཾ པགུཎཾ –

ཨུཔསནྟསྶ སདཱ སཏཱིམཏོ’’ཏི. (པཱཙི. ༡༥༣; ཨུདཱ. ༣༧);

སོ ཀིར ཨུཔོསཐདིཝསེསུ སཡམེཝ དྷམྨསྶཝནཾ གྷོསེཏྭཱ ཨིམཾ གཱཐཾ ཝདཏི. པཐཝིཨུནྡྲིཡནསདྡོ ཝིཡ དེཝཏཱནཾ སཱདྷུཀཱརསདྡོ ཧོཏི. ཨཐེཀསྨིཾ ཨུཔོསཐདིཝསེ པཉྩཔཉྩསཏཔརིཝཱརཱ དྭེ ཏིཔིཊཀདྷརཱ བྷིཀྑཱུ ཏསྶ ཝསནཊྛཱནཾ ཨགམཾསུ. སོ ཏེ དིསྭཱཝ ཏུཊྛམཱནསོ ‘‘སཱདྷུ ཝོ ཀཏཾ ཨིདྷ ཨཱགཙྪནྟེཧི, ཨཛྫ མཡཾ ¶ ཏུམྷཱཀཾ དྷམྨཾ སུཎིསྶཱམཱ’’ཏི ཨཱཧ. ཨཏྠི པན, ཨཱཝུསོ, ཨིདྷ དྷམྨཾ སོཏུཀཱམཱཏི. ཨཏྠི, བྷནྟེ, ཨཡཾ ཝནསཎྜོ དྷམྨསྶཝནདིཝསེ དེཝཏཱནཾ སཱདྷུཀཱརསདྡེན ཨེཀནིནྣཱདོ ཧོཏཱིཏི. ཏེསུ ཨེཀོ ཏིཔིཊཀདྷརོ དྷམྨཾ ཨོསཱརེསི, ཨེཀོ ཀཐེསི. ཨེཀདེཝཏཱཔི སཱདྷུཀཱརཾ ནཱདཱསི. ཏེ ཨཱཧཾསུ – ‘‘ཏྭཾ, ཨཱཝུསོ, དྷམྨསྶཝནདིཝསེ ཨིམསྨིཾ ཝནསཎྜེ དེཝཏཱ མཧནྟེན སདྡེན སཱདྷུཀཱརཾ དེནྟཱིཏི ཝདེསི, ཀིཾ ནཱམེཏ’’ནྟི. བྷནྟེ, ཨཉྙེསུ དིཝསེསུ སཱདྷུཀཱརསདྡེན ཨེཀནིནྣཱདོ ཨེཝ ཧོཏི, ན ཨཛྫ པན ¶ ཛཱནཱམི ‘‘ཀིམེཏ’’ནྟི. ‘‘ཏེན ཧི, ཨཱཝུསོ, ཏྭཾ ཏཱཝ དྷམྨཾ ཀཐེཧཱི’’ཏི. སོ ¶ བཱིཛནིཾ གཧེཏྭཱ ཨཱསནེ ནིསིནྣོ ཏམེཝ གཱཐཾ ཝདེསི. དེཝཏཱ མཧནྟེན སདྡེན སཱདྷུཀཱརམདཾསུ. ཨཐ ནེསཾ པརིཝཱརཱ བྷིཀྑཱུ ཨུཛ྄ཛྷཱཡིཾསུ ‘‘ཨིམསྨིཾ ཝནསཎྜེ དེཝཏཱ མུཁོལོཀནེན སཱདྷུཀཱརཾ དདནྟི, ཏིཔིཊཀདྷརབྷིཀྑཱུསུ ཨེཏྟཀཾ བྷཎནྟེསུཔི ཀིཉྩི པསཾསནམཏྟམྤི ཨཝཏྭཱ ཨེཀེན མཧལླཀཏྠེརེན ཨེཀགཱཐཱཡ ཀཐིཏཱཡ མཧཱསདྡེན སཱདྷུཀཱརཾ དདནྟཱི’’ཏི. ཏེཔི ཝིཧཱརཾ གནྟྭཱ སཏྠུ ཏམཏྠཾ ཨཱརོཙེསུཾ.

སཏྠཱ ¶ ‘‘ནཱཧཾ, བྷིཀྑཝེ, ཡོ བཧུམྤི ཨུགྒཎྷཏི ཝཱ བྷཱསཏི ཝཱ, ཏཾ དྷམྨདྷརོཏི ཝདཱམི. ཡོ པན ཨེཀམྤི གཱཐཾ ཨུགྒཎྷིཏྭཱ སཙྩཱནི པཊིཝིཛ྄ཛྷཏི, ཨཡཾ དྷམྨདྷརོ ནཱམཱ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ན ཏཱཝཏཱ དྷམྨདྷརོ, ཡཱཝཏཱ བཧུ བྷཱསཏི;

ཡོ ཙ ཨཔྤམྤི སུཏྭཱན, དྷམྨཾ ཀཱཡེན པསྶཏི;

ས ཝེ དྷམྨདྷརོ ཧོཏི, ཡོ དྷམྨཾ ནཔྤམཛྫཏཱི’’ཏི.

ཏཏྠ ཡཱཝཏཱཏི ཡཏྟཀེན ཨུགྒཧཎདྷཱརཎཝཱཙནཱདིནཱ ཀཱརཎེན བཧུཾ བྷཱསཏི, ཏཱཝཏྟཀེན དྷམྨདྷརོ ན ཧོཏི, ཝཾསཱནུརཀྑཀོ པན པཝེཎིཔཱལཀོ ནཱམ ཧོཏི. ཡོ ཙ ཨཔྤམྤཱིཏི ཡོ པན ཨཔྤམཏྟཀམྤི སུཏྭཱ དྷམྨམནྭཱཡ ཨཏྠམནྭཱཡ དྷམྨཱནུདྷམྨཔྤཊིཔནྣོ ཧུཏྭཱ ནཱམཀཱཡེན དུཀྑཱདཱིནི པརིཛཱནནྟོ ཙཏུསཙྩདྷམྨཾ པསྶཏི, ས ཝེ དྷམྨདྷརོ ཧོཏི. ཡོ དྷམྨཾ ནཔྤམཛྫཏཱིཏི ཡོཔི ཨཱརདྡྷཝཱིརིཡོ ཧུཏྭཱ ཨཛྫ ཨཛྫེཝཱཏི པཊིཝེདྷཾ ཨཱཀངྑནྟོ དྷམྨཾ ནཔྤམཛྫཏི, ཨཡམྤི དྷམྨདྷརོཡེཝཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨེཀུདཱནཁཱིཎཱསཝཏྠེརཝཏྠུ ཏཏིཡཾ.

ན ¶ ཏེན ཐེརོ སོ ཧོཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ལཀུཎྜཀབྷདྡིཡཏྠེརཾ ཨཱརབྦྷ ཀཐེསི.

ཨེཀདིཝསཉྷི ¶ ¶ ཏསྨིཾ ཐེརེ སཏྠུ ཨུཔཊྛཱནཾ གནྟྭཱ པཀྐནྟམཏྟེ ཏིཾསམཏྟཱ ཨཱརཉྙིཀཱ བྷིཀྑཱུ ཏཾ པསྶནྟཱ ཨེཝ ཨཱགནྟྭཱ སཏྠཱརཾ ཝནྡིཏྭཱ ནིསཱིདིཾསུ. སཏྠཱ ཏེསཾ ཨརཧཏྟཱུཔནིསྶཡཾ དིསྭཱ ཨིམཾ པཉྷཾ པུཙྪི – ‘‘ཨིཏོ གཏཾ ཨེཀཾ ཐེརཾ པསྶཐཱ’’ཏི? ‘‘ན པསྶཱམ, བྷནྟེ’’ཏི. ‘‘ཀིཾ ནུ དིཊྛོ ཝོ’’ཏི? ‘‘ཨེཀཾ, བྷནྟེ, སཱམཎེརཾ པསྶིམྷཱ’’ཏི. ‘‘ན སོ, བྷིཀྑཝེ, སཱམཎེརོ, ཐེརོ ཨེཝ སོ’’ཏི? ‘‘ཨཏིཝིཡ ཁུདྡཀོ, བྷནྟེ’’ཏི. ‘‘ནཱཧཾ, བྷིཀྑཝེ, མཧལླཀབྷཱཝེན ཐེརཱསནེ ནིསིནྣམཏྟཀེན ཐེརོཏི ཝདཱམི. ཡོ པན སཙྩཱནི པཊིཝིཛ྄ཛྷིཏྭཱ མཧཱཛནསྶ ཨཧིཾསཀབྷཱཝེ ཋིཏོ, ཨཡཾ ཐེརོ ནཱམཱ’’ཏི ཝཏྭཱ ཨིམཱ གཱཐཱ ཨབྷཱསི –

‘‘ན ཏེན ཐེརོ སོ ཧོཏི, ཡེནསྶ པལིཏཾ སིརོ;

པརིཔཀྐོ ཝཡོ ཏསྶ, མོགྷཛིཎྞོཏི ཝུཙྩཏི.

‘‘ཡམྷི སཙྩཉྩ དྷམྨོ ཙ, ཨཧིཾསཱ སཾཡམོ དམོ;

ས ཝེ ཝནྟམལོ དྷཱིརོ, ཐེརོ ཨིཏི པཝུཙྩཏཱི’’ཏི.

ཏཏྠ ¶ པརིཔཀྐོཏི པརིཎཏོ, ཝུཌྜྷབྷཱཝཾ པཏྟོཏི ཨཏྠོ. མོགྷཛིཎྞོཏི ཨནྟོ ཐེརཀརཱནཾ དྷམྨཱནཾ ཨབྷཱཝེན ཏུཙྪཛིཎྞོ ནཱམ. ཡམྷི སཙྩཉྩ དྷམྨོ ཙཱཏི ཡམྷི པན པུགྒལེ སོལ༹སཧཱཀཱརེཧི པཊིཝིདྡྷཏྟཱ ཙཏུབྦིདྷཾ སཙྩཾ, ཉཱཎེན སཙྪིཀཏཏྟཱ ནཝཝིདྷོ ལོཀུཏྟརདྷམྨོ ཙ ཨཏྠི. ཨཧིཾསཱཏི ཨཧིཾསནབྷཱཝོ. དེསནཱམཏྟམེཏཾ, ཡམྷི པན ཙཏུབྦིདྷཱཔི ཨཔྤམཉྙཱབྷཱཝནཱ ཨཏྠཱིཏི ཨཏྠོ. སཾཡམོ དམོཏི སཱིལཉྩེཝ ཨིནྡྲིཡསཾཝརོ ཙ. ཝནྟམལོཏི མགྒཉཱཎེན ནཱིཧཊམལོ. དྷཱིརོཏི དྷིཏིསམྤནྣོ. ཐེརོཏི སོ ཨིམེཧི ཐིརབྷཱཝཀཱརཀེཧི སམནྣཱགཏཏྟཱ ཐེརོཏི ཝུཙྩཏཱིཏི ཨཏྠོ.

དེསནཱཝསཱནེ ཏེ བྷིཀྑཱུ ཨརཧཏྟེ པཏིཊྛཧིཾསཱུཏི.

ན ¶ ཝཱཀྐརཎམཏྟེནཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ བྷིཀྑཱུ ཨཱརབྦྷ ཀཐེསི.

ཨེཀསྨིཉྷི ¶ སམཡེ དཧརེ ཙེཝ སཱམཎེརེ ཙ ཨཏྟནོ དྷམྨཱཙརིཡཱནམེཝ ཙཱིཝརརཛནཱདཱིནི ཝེཡྻཱཝཙྩཱནི ཀརོནྟེ དིསྭཱ ཨེཀཙྩེ ཐེརཱ ཙིནྟཡིཾསུ – ‘‘མཡམྤི བྱཉྫནསམཡེ ཀུསལཱ, ཨམྷཱཀམེཝ ཀིཉྩི ནཏྠི. ཡཾནཱུན ¶ མཡཾ སཏྠཱརཾ ཨུཔསངྐམིཏྭཱ ཨེཝཾ ཝདེཡྻཱམ, ‘བྷནྟེ, མཡཾ བྱཉྫནསམཡེ ཀུསལཱ, ཨཉྙེསཾ སནྟིཀེ དྷམྨཾ ཨུགྒཎྷིཏྭཱཔི ཨིམེསཾ སནྟིཀེ ཨསོདྷེཏྭཱ མཱ སཛ྄ཛྷཱཡིཏྠཱཏི དཧརསཱམཎེརེ ཨཱཎཱཔེཐཱ’ཏི. ཨེཝཉྷི ཨམྷཱཀཾ ལཱབྷསཀྐཱརོ ཝཌྜྷིསྶཏཱི’’ཏི. ཏེ སཏྠཱརཾ ཨུཔསངྐམིཏྭཱ ཏཐཱ ཝདིཾསུ.

སཏྠཱ ཏེསཾ ཝཙནཾ སུཏྭཱ ‘‘ཨིམསྨིཾ སཱསནེ པཝེཎིཝསེནེཝ ཨེཝཾ ཝཏྟུཾ ལབྷཏི, ཨིམེ པན ལཱབྷསཀྐཱརེ ནིསྶིཏཱཏི ཉཏྭཱ ཨཧཾ ཏུམྷེ ཝཱཀྐརཎམཏྟེན སཱདྷུརཱུཔཱཏི ན ཝདཱམི. ཡསྶ པནེཏེ ཨིསྶཱདཡོ དྷམྨཱ ཨརཧཏྟམགྒེན སམུཙྪིནྣཱ, ཨེསོ ཨེཝ སཱདྷུརཱུཔོ’’ཏི ཝཏྭཱ ཨིམཱ གཱཐཱ ཨབྷཱསི –

‘‘ན ཝཱཀྐརཎམཏྟེན, ཝཎྞཔོཀྑརཏཱཡ ཝཱ;

སཱདྷུརཱུཔོ ནརོ ཧོཏི, ཨིསྶུཀཱི མཙྪརཱི སཋོ.

‘‘ཡསྶ ཙེཏཾ སམུཙྪིནྣཾ, མཱུལགྷཙྩཾ སམཱུཧཏཾ;

སཝནྟདོསོ མེདྷཱཝཱི, སཱདྷུརཱུཔོཏི ཝུཙྩཏཱི’’ཏི.

ཏཏྠ ན ཝཱཀྐརཎམཏྟེནཱཏི ཝཙཱིཀརཎམཏྟེན སདྡལཀྑཎསམྤནྣཝཙནམཏྟེན. ཝཎྞཔོཀྑརཏཱཡ ཝཱཏི སརཱིརཝཎྞསྶ མནཱཔབྷཱཝེན ཝཱ. ནརོཏི ཨེཏྟཀེནེཝ ཀཱརཎེན པརལཱབྷཱདཱིསུ ཨིསྶཱམནཀོ པཉྩཝིདྷེན མཙྪེརེན སམནྣཱགཏོ ཀེརཱཊིཀབྷཱཝེན ¶ སཋོ ནརོ སཱདྷུརཱུཔོ ན ཧོཏི. ཡསྶ ཙེཏནྟི ཡསྶ ཙ པུགྒལསྶེཏཾ ཨིསྶཱདིདོསཛཱཏཾ ཨརཧཏྟམགྒཉཱཎེན སམཱུལཀཾ ཚིནྣཾ, མཱུལགྷཱཏཾ ཀཏྭཱ སམཱུཧཏཾ ¶ , སོ ཝནྟདོསོ དྷམྨོཛཔཉྙཱཡ སམནྣཱགཏོ སཱདྷུརཱུཔོཏི ཝུཙྩཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ན ¶ མུཎྜཀེན སམཎོཏི ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ ཧཏྠཀཾ ཨཱརབྦྷ ཀཐེསི.

སོ ཀིར ཝཱདཀྑིཏྟོ ‘‘ཏུམྷེ ཨསུཀཝེལཱཡ ཨསུཀཊྛཱནཾ ནཱམ ཨཱགཙྪེཡྻཱཐ, ཝཱདཾ ཀརིསྶཱམཱ’’ཏི ཝཏྭཱ པུརེཏརམེཝ ཏཏྠ གནྟྭཱ ‘‘པསྶཐ, ཏིཏྠིཡཱ མམ བྷཡེན ནཱགཏཱ, ཨེསོཝ པན ནེསཾ པརཱཛཡོ’’ཏིཨཱདཱིནི ཝཏྭཱ ཝཱདཀྑིཏྟོ ཨཉྙེནཉྙཾ པཊིཙརནྟོ ཝིཙརཏི. སཏྠཱ ‘‘ཧཏྠཀོ ཀིར ཨེཝཾ ཀརོཏཱི’’ཏི སུཏྭཱ ཏཾ པཀྐོསཱཔེཏྭཱ ‘‘སཙྩཾ ¶ ཀིར ཏྭཾ, ཧཏྠཀ, ཨེཝཾ ཀརོསཱི’’ཏི པུཙྪིཏྭཱ ‘‘སཙྩ’’ནྟི ཝུཏྟེ, ‘‘ཀསྨཱ ཨེཝཾ ཀརོསི? ཨེཝརཱུཔཉྷི མུསཱཝཱདཾ ཀརོནྟོ སཱིསམུཎྜནཱདིམཏྟེནེཝ སམཎོ ནཱམ ན ཧོཏི. ཡོ པན ཨཎཱུནི ཝཱ ཐཱུལཱནི ཝཱ པཱཔཱནི སམེཏྭཱ ཋིཏོ, ཨཡམེཝ སམཎོ’’ཏི ཝཏྭཱ ཨིམཱ གཱཐཱ ཨབྷཱསི –

‘‘ན མུཎྜཀེན སམཎོ, ཨབྦཏོ ཨལིཀཾ བྷཎཾ;

ཨིཙྪཱལོབྷསམཱཔནྣོ, སམཎོ ཀིཾ བྷཝིསྶཏི.

‘‘ཡོ ཙ སམེཏི པཱཔཱནི, ཨཎུཾ ཐཱུལཱནི སབྦསོ;

སམིཏཏྟཱ ཧི པཱཔཱནཾ, སམཎོཏི པཝུཙྩཏཱི’’ཏི.

ཏཏྠ མུཎྜཀེནཱཏི སཱིསམུཎྜནམཏྟེན. ཨབྦཏོཏི སཱིལཝཏེན ཙ དྷུཏངྒཝཏེན ཙ ཝིརཧིཏོ. ཨལིཀཾ བྷཎནྟི མུསཱཝཱདཾ བྷཎནྟོ ཨསམྤཏྟེསུ ཨཱརམྨཎེསུ ཨིཙྪཱཡ པཏྟེསུ ཙ ལོབྷེན སམནྣཱགཏོ སམཎོ ནཱམ ཀིཾ བྷཝིསྶཏི? སམེཏཱིཏི ཡོ ཙ པརིཏྟཱནི ཝཱ ¶ མཧནྟཱནི ཝཱ པཱཔཱནི ཝཱུཔསམེཏི, སོ ཏེསཾ སམིཏཏྟཱ སམཎོཏི པཝུཙྩཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ན ¶ ¶ ཏེན བྷིཀྑུ སོ ཧོཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ བྲཱཧྨཎཾ ཨཱརབྦྷ ཀཐེསི.

སོ ཀིར བཱཧིརསམཡེ པབྦཛིཏྭཱ བྷིཀྑཾ ཙརནྟོ ཙིནྟེསི – ‘‘སམཎོ གོཏམོ ཨཏྟནོ སཱཝཀེ བྷིཀྑཱཡ ཙརཎེན ‘བྷིཀྑཱུ’ཏི ཝདཏི, མམྤི ‘བྷིཀྑཱུ’ཏི ཝཏྟུཾ ཝཊྚཏཱི’’ཏི. སོ སཏྠཱརཾ ཨུཔསངྐམིཏྭཱ, ‘‘བྷོ གོཏམ, ཨཧམྤི བྷིཀྑཾ ཙརིཏྭཱ ཛཱིཝཱམི, མམྤི ‘བྷིཀྑཱུ’ཏི ཝདེཧཱི’’ཏི ཨཱཧ. ཨཐ ནཾ སཏྠཱ ‘‘ནཱཧཾ, བྲཱཧྨཎ, བྷིཀྑནམཏྟེན བྷིཀྑཱུཏི ཝདཱམི. ན ཧི ཝིསྶཾ དྷམྨཾ སམཱདཱཡ ཝཏྟནྟོ བྷིཀྑུ ནཱམ ཧོཏི. ཡོ པན སབྦསངྑཱརེསུ སངྑཱཡ ཙརཏི, སོ བྷིཀྑུ ནཱམཱ’’ཏི ཝཏྭཱ ཨིམཱ གཱཐཱ ཨབྷཱསི –

‘‘ན ཏེན བྷིཀྑུ སོ ཧོཏི, ཡཱཝཏཱ བྷིཀྑཏེ པརེ;

ཝིསྶཾ དྷམྨཾ སམཱདཱཡ, བྷིཀྑུ ཧོཏི ན ཏཱཝཏཱ.

‘‘ཡོདྷ པུཉྙཉྩ པཱཔཉྩ, བཱཧེཏྭཱ བྲཧྨཙརིཡཝཱ;

སངྑཱཡ ལོཀེ ཙརཏི, ས ཝེ བྷིཀྑཱུཏི ཝུཙྩཏཱི’’ཏི.

ཏཏྠ ¶ ཡཱཝཏཱཏི ཡཏྟཀེན པརེ བྷིཀྑཏེ, ཏེན བྷིཀྑནམཏྟེན བྷིཀྑུ ནཱམ ན ཧོཏི. ཝིསྶནྟི ཝིསམཾ དྷམྨཾ, ཝིསྶགནྡྷཾ ཝཱ ཀཱཡཀམྨཱདིཀཾ དྷམྨཾ སམཱདཱཡ ཙརནྟོ བྷིཀྑུ ནཱམ ན ཧོཏི. ཡོདྷཱཏི ཡོ ཨིདྷ སཱསནེ ཨུབྷཡམྤེཏཾ པུཉྙཉྩ པཱཔཉྩ མགྒབྲཧྨཙརིཡེན བཱཧེཏྭཱ པནུདིཏྭཱ བྲཧྨཙརིཡཝཱ ཧོཏི. སངྑཱཡཱཏི ཉཱཎེན. ལོཀེཏི ཁནྡྷཱདིལོཀེ ‘‘ཨིམེ ཨཛ྄ཛྷཏྟིཀཱ ཁནྡྷཱ, ཨིམེ བཱཧིརཱ’’ཏི ཨེཝཾ སབྦེཔི དྷམྨེ ཛཱནིཏྭཱ ¶ ཙརཏི, སོ ཏེན ཉཱཎེན ཀིལེསཱནཾ བྷིནྣཏྟཱ ‘‘བྷིཀྑཱུ’’ཏི ཝུཙྩཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ན ¶ མོནེནཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏིཏྠིཡེ ཨཱརབྦྷ ཀཐེསི.

ཏེ ཀིར བྷུཏྟཊྛཱནེསུ མནུསྶཱནཾ ‘‘ཁེམཾ ཧོཏུ, སུཁཾ ¶ ཧོཏུ, ཨཱཡུ ཝཌྜྷཏུ, ཨསུཀཊྛཱནེ ནཱམ ཀལལཾ ཨཏྠི, ཨསུཀཊྛཱནེ ནཱམ ཀཎྚཀོ ཨཏྠི, ཨེཝརཱུཔཾ ཋཱནཾ གནྟུཾ ན ཝཊྚཏཱི’’ཏིཨཱདིནཱ ནཡེན མངྒལཾ ཝཏྭཱ པཀྐམནྟི. བྷིཀྑཱུ པན པཋམབོདྷིཡཾ ཨནུམོདནཱདཱིནཾ ཨནནུཉྙཱཏཀཱལེ བྷཏྟགྒེ མནུསྶཱནཾ ཨནུམོདནཾ ཨཀཏྭཱ པཀྐམནྟི. མནུསྶཱ ‘‘ཏིཏྠིཡཱནཾ སནྟིཀཱ མངྒལཾ སུཎཱམ, བྷདྡནྟཱ པན ཏུཎྷཱིབྷཱུཏཱ པཀྐམནྟཱི’’ཏི ཨུཛ྄ཛྷཱཡིཾསུ. བྷིཀྑཱུ ཏམཏྠཾ སཏྠུ ཨཱརོཙེསུཾ. སཏྠཱ, ‘‘བྷིཀྑཝེ, ཨིཏོ པཊྛཱཡ བྷཏྟགྒཱདཱིསུ ཡཐཱསུཁཾ ཨནུམོདནཾ ཀརོཐ, ཨུཔནིསིནྣཀཐཾ ཀརོཐ, དྷམྨཾ ཀཐེཐཱ’’ཏི ཨནུཛཱནི. ཏེ ཏཐཱ ཀརིཾསུ. མནུསྶཱ ཨནུམོདནཱདཱིནི སུཎནྟཱ ཨུསྶཱཧཔྤཏྟཱ བྷིཀྑཱུ ནིམནྟེཏྭཱ སཀྐཱརཾ ཀརོནྟཱ ཝིཙརནྟི. ཏིཏྠིཡཱ པན ‘‘མཡཾ མུནིནོ མོནཾ ཀརོམ, སམཎསྶ གོཏམསྶ སཱཝཀཱ བྷཏྟགྒཱདཱིསུ མཧཱཀཐཾ ཀཐེནྟཱ ཝིཙརནྟཱི’’ཏི ཨུཛ྄ཛྷཱཡིཾསུ.

སཏྠཱ ཏམཏྠཾ སུཏྭཱ ‘‘ནཱཧཾ, བྷིཀྑཝེ, ཏུཎྷཱིབྷཱཝམཏྟེན ‘མུནཱི’ཏི ཝདཱམི. ཨེཀཙྩེ ཧི ཨཛཱནནྟཱ ན ¶ ཀཐེནྟི, ཨེཀཙྩེ ཨཝིསཱརདཏཱཡ, ཨེཀཙྩེ ‘མཱ ནོ ཨིམཾ ཨཏིསཡཏྠཾ ཨཉྙེ ཛཱནིཾསཱུ’ཏི མཙྪེརེན. ཏསྨཱ མོནམཏྟེན མུནི ན ཧོཏི, པཱཔཝཱུཔསམེན པན མུནི ནཱམ ཧོཏཱི’’ཏི ཝཏྭཱ ཨིམཱ གཱཐཱ ཨབྷཱསི –

‘‘ན མོནེན མུནཱི ཧོཏི, མཱུལ༹ྷརཱུཔོ ཨཝིདྡསུ;

ཡོ ཙ ཏུལཾཝ པགྒཡ྄ཧ, ཝརམཱདཱཡ པཎྜིཏོ.

‘‘པཱཔཱནི ¶ པརིཝཛྫེཏི, ས མུནཱི ཏེན སོ མུནི;

ཡོ མུནཱཏི ཨུབྷོ ལོཀེ, མུནི ཏེན པཝུཙྩཏཱི’’ཏི.

ཏཏྠ ན མོནེནཱཏི ཀཱམཉྷི མོནེཡྻཔཊིཔདཱསངྑཱཏེན མགྒཉཱཎམོནེན མུནི ནཱམ ཧོཏི, ཨིདྷ པན ཏུཎྷཱིབྷཱཝཾ སནྡྷཱཡ ‘‘མོནེནཱ’’ཏི ཝུཏྟཾ. མཱུལ༹ྷརཱུཔོཏི ཏུཙྪརཱུཔོ. ཨཝིདྡསཱུཏི ཨཝིཉྙཱུ. ཨེཝརཱུཔོ ཧི ཏུཎྷཱིབྷཱུཏོཔི མུནི ནཱམ ན ཧོཏི. ཨཐ ཝཱ མོནེན མུནི ནཱམ ན ཧོཏི, ཏུཙྪསབྷཱཝོ པན ཨཝིཉྙཱུ ཙ ཧོཏཱིཏི ཨཏྠོ. ཡོ ཙ ཏུལཾཝ པགཡ྄ཧཱཏི ཡཐཱ ཧི ཏུལཾ ¶ གཧེཏྭཱ ཋིཏོ ཨཏིརེཀཾ ཙེ ཧོཏི, ཧརཏི. ཨཱུནཾ ཙེ ཧོཏི ¶ , པཀྑིཔཏི. ཨེཝམེཝ ཡོ ཨཏིརེཀཾ ཧརནྟོ ཝིཡ པཱཔཾ ཧརཏི པརིཝཛྫེཏི, ཨཱུནཀེ པཀྑིཔནྟོ ཝིཡ ཀུསལཾ པརིཔཱུརེཏི. ཨེཝཉྩ པན ཀརོནྟོ སཱིལསམཱདྷིཔཉྙཱཝིམུཏྟིཝིམུཏྟིཉཱཎདསྶནསངྑཱཏཾ ཝརཾ ཨུཏྟམམེཝ ཨཱདཱཡ པཱཔཱནི ཨཀུསལཀམྨཱནི པརིཝཛྫེཏི. ས མུནཱིཏི སོ མུནི ནཱམཱཏི ཨཏྠོ. ཏེན སོ མུནཱིཏི ཀསྨཱ པན སོ མུནཱིཏི ཙེ? ཡཾ ཧེཊྛཱ ཝུཏྟཀཱརཎཾ, ཏེན སོ མུནཱིཏི ཨཏྠོ. སོ མུནཱཏི ཨུབྷོ ལོཀེཏི ཡོ པུགྒལོ ཨིམསྨིཾ ཁནྡྷཱདིལོཀེ ཏུལཾ ཨཱརོཔེཏྭཱ མིནནྟོ ཝིཡ ‘‘ཨིམེ ཨཛ྄ཛྷཏྟིཀཱ ཁནྡྷཱ, ཨིམེ བཱཧིརཱ’’ཏིཨཱདིནཱ ནཡེན ཨིམེ ཨུབྷོ ཨཏྠེ མུནཱཏི. མུནི ཏེན པཝུཙྩཏཱིཏི ཏེན ཀཱརཎེན མུནཱིཏི ཝུཙྩཏིཡེཝཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ན ཏེན ཨརིཡོ ཧོཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཨརིཡཾ ནཱམ བཱལིསིཀཾ ཨཱརབྦྷ ཀཐེསི.

ཨེཀདིཝསཉྷི ¶ སཏྠཱ ཏསྶ སོཏཱཔཏྟིམགྒསྶཱུཔནིསྶཡཾ དིསྭཱ སཱཝཏྠིཡཱ ཨུཏྟརདྭཱརགཱམེ པིཎྜཱཡ ཙརིཏྭཱ བྷིཀྑུསངྒྷཔརིཝུཏོ ཏཏོ ཨཱགཙྪཏི. ཏསྨིཾ ཁཎེ སོ བཱལིསིཀོ བལིསེན མཙྪེ གཎྷནྟོ བུདྡྷཔྤམུཁཾ བྷིཀྑུསངྒྷཾ དིསྭཱ བལིསཡཊྛིཾ ཚཌྜེཏྭཱ ཨཊྛཱསི. སཏྠཱ ཏསྶ ཨཝིདཱུརེ ¶ ཋཱནེ ནིཝཏྟིཏྭཱ ཋིཏོ ‘‘ཏྭཾ ཀིཾ ནཱམོསཱི’’ཏི སཱརིཔུཏྟཏྠེརཱདཱིནཾ ནཱམཱནི པུཙྪི. ཏེཔི ‘‘ཨཧཾ སཱརིཔུཏྟོ ཨཧཾ མོགྒལླཱནོ’’ཏི ཨཏྟནོ ཨཏྟནོ ནཱམཱནི ཀཐཡིཾསུ. བཱལིསིཀོ ཙིནྟེསི – ‘‘སཏྠཱ སབྦེསཾ ནཱམཱནི པུཙྪཏི, མམམྤི ནཱམཾ པུཙྪིསྶཏི མཉྙེ’’ཏི. སཏྠཱ ཏསྶ ཨིཙྪཾ ཉཏྭཱ, ‘‘ཨུཔཱསཀ, ཏྭཾ ཀོ ནཱམོསཱི’’ཏི པུཙྪིཏྭཱ ‘‘ཨཧཾ, བྷནྟེ, ཨརིཡོ ནཱམཱ’’ཏི ཝུཏྟེ ‘‘ན, ཨུཔཱསཀ, ཏཱདིསཱ པཱཎཱཏིཔཱཏིནོ ཨརིཡཱ ནཱམ ཧོནྟི, ཨརིཡཱ པན མཧཱཛནསྶ ཨཧིཾསནབྷཱཝེ ཋིཏཱ’’ཏི ཝཏྭཱ ཨིམཾ གཱཐམཱཧ –

‘‘ན ཏེན ཨརིཡོ ཧོཏི, ཡེན པཱཎཱནི ཧིཾསཏི;

ཨཧིཾསཱ སབྦཔཱཎཱནཾ, ཨརིཡོཏི པཝུཙྩཏཱི’’ཏི.

ཏཏྠ ¶ ¶ ཨཧིཾསཱཏི ཨཧིཾསནེན. ཨིདཾ ཝུཏྟཾ ཧོཏི – ཡེན ཧི པཱཎཱནི ཧིཾསཏི, ན ཏེན ཀཱརཎེན ཨརིཡོ ཧོཏི. ཡོ པན སབྦཔཱཎཱནཾ པཱཎིཨཱདཱིཧི ཨཧིཾསནེན མེཏྟཱདིབྷཱཝནཱཡ པཏིཊྛིཏཏྟཱ ཧིཾསཏོ ཨཱརཱཝ ཋིཏོ, ཨཡཾ ཨརིཡོཏི ཝུཙྩཏཱིཏི ཨཏྠོ.

དེསནཱཝསཱནེ བཱལིསིཀོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

༡༠. སམྦཧུལསཱིལཱདིསམྤནྣབྷིཀྑུཝཏྠུ

ན སཱིལབྦཏམཏྟེནཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ སཱིལཱདིསམྤནྣེ བྷིཀྑཱུ ཨཱརབྦྷ ཀཐེསི.

ཏེསུ ཀིར ཨེཀཙྩཱནཾ ཨེཝཾ ཨཧོསི – ‘‘མཡཾ སམྤནྣསཱིལཱ, མཡཾ དྷུཏངྒདྷརཱ, མཡཾ བཧུསྶུཏཱ, མཡཾ པནྟསེནཱསནཝཱསིནོ, མཡཾ ཛྷཱནལཱབྷིནོ, ན ཨམྷཱཀཾ ཨརཧཏྟཾ དུལླབྷཾ, ཨིཙྪིཏདིཝསེཡེཝ ཨརཧཏྟཾ པཱཔུཎིསྶཱམཱ’’ཏི. ཡེཔི ཏཏྠ ཨནཱགཱམིནོ, ཏེསམྤི ཨེཏདཧོསི – ‘‘ན ཨམྷཱཀཾ ཨིདཱནི ཨརཧཏྟཾ དུལླབྷ’’ནྟི. ཏེ སབྦེཔི ཨེཀདིཝསཾ སཏྠཱརཾ ཨུཔསངྐམིཏྭཱ ¶ ཝནྡིཏྭཱ ནིསིནྣཱ ‘‘ཨཔི ནུ ཁོ ཝོ, བྷིཀྑཝེ, པབྦཛིཏཀིཙྩཾ མཏྠཀཾ པཏྟ’’ནྟི སཏྠཱརཱ པུཊྛཱ ཨེཝམཱཧཾསུ – ‘‘བྷནྟེ, མཡཾ ཨེཝརཱུཔཱ ཨེཝརཱུཔཱ ཙ, ཏསྨཱ ‘ཨིཙྪིཏིཙྪིཏཀྑཎེཡེཝ ཨརཧཏྟཾ པཏྟུཾ སམཏྠམྷཱ’ཏི ཙིནྟེཏྭཱ ཝིཧརཱམཱ’’ཏི.

སཏྠཱ ¶ ཏེསཾ ཝཙནཾ སུཏྭཱ, ‘‘བྷིཀྑཝེ, བྷིཀྑུནཱ ནཱམ པརིསུདྡྷསཱིལཱདིམཏྟཀེན ཝཱ ཨནཱགཱམིསུཁཔྤཏྟམཏྟཀེན ཝཱ ‘ཨཔྤཀཾ ནོ བྷཝདུཀྑ’ནྟི ཝཏྟུཾ ན ཝཊྚཏི, ཨཱསཝཀྑཡཾ པན ཨཔྤཏྭཱ ‘སུཁིཏོམྷཱི’ཏི ཙིཏྟཾ ན ཨུཔྤཱདེཏབྦ’’ནྟི ཝཏྭཱ ཨིམཱ གཱཐཱ ཨབྷཱསི –

‘‘ན སཱིལབྦཏམཏྟེན, བཱཧུསཙྩེན ཝཱ པན;

ཨཐ ཝཱ སམཱདྷིལཱབྷེན, ཝིཝིཏྟསཡནེན ཝཱ.

‘‘ཕུསཱམི ¶ ནེཀྑམྨསུཁཾ, ཨཔུཐུཛྫནསེཝིཏཾ;

བྷིཀྑུ ཝིསྶཱསམཱཔཱདི, ཨཔྤཏྟོ ཨཱསཝཀྑཡ’’ནྟི.

ཏཏྠ སཱིལབྦཏམཏྟེནཱཏི ཙཏུཔཱརིསུདྡྷིསཱིལམཏྟེན ཝཱ ཏེརསདྷུཏངྒམཏྟེན ཝཱ. བཱཧུསཙྩེན ཝཱཏི ཏིཎྞཾ པིཊཀཱནཾ ཨུགྒཧིཏམཏྟེན ཝཱ. སམཱདྷིལཱབྷེནཱཏི ཨཊྛསམཱཔཏྟིཡཱ ལཱབྷེན. ནེཀྑམྨསུཁནྟི ¶ ཨནཱགཱམིསུཁཾ. ཏཾ ཨནཱགཱམིསུཁཾ ཕུསཱམཱིཏི ཨེཏྟཀམཏྟེན ཝཱ. ཨཔུཐུཛྫནསེཝིཏནྟི པུཐུཛྫནེཧི ཨསེཝིཏཾ ཨརིཡསེཝིཏམེཝ. བྷིཀྑཱུཏི ཏེསཾ ཨཉྙཏརཾ ཨཱལཔནྟོ ཨཱཧ. ཝིསྶཱསམཱཔཱདཱིཏི ཝིསྶཱསཾ ན ཨཱཔཛྫེཡྻ. ཨིདཾ ཝུཏྟཾ ཧོཏི – བྷིཀྑུ ཨིམིནཱ སམྤནྣསཱིལཱདིབྷཱཝམཏྟཀེནེཝ ‘‘མཡ྄ཧཾ བྷཝོ ཨཔྤཀོ པརིཏྟཀོ’’ཏི ཨཱསཝཀྑཡསངྑཱཏཾ ཨརཧཏྟཾ ཨཔྤཏྟོ ཧུཏྭཱ བྷིཀྑུ ནཱམ ཝིསྶཱསཾ ནཱཔཛྫེཡྻ. ཡཐཱ ཧི ཨཔྤམཏྟཀོཔི གཱུཐོ དུགྒནྡྷོ ཧོཏི, ཨེཝཾ ཨཔྤམཏྟཀོཔི བྷཝོ དུཀྑོཏི.

དེསནཱཝསཱནེ ཏེ བྷིཀྑཱུ ཨརཧཏྟེ པཏིཊྛཧཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

སམྦཧུལསཱིལཱདིསམྤནྣབྷིཀྑུཝཏྠུ དསམཾ.

མགྒཱནཊྛངྒིཀོཏི ¶ ¶ ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩསཏེ བྷིཀྑཱུ ཨཱརབྦྷ ཀཐེསི.

ཏེ ཀིར སཏྠརི ཛནཔདཙཱརིཀཾ ཙརིཏྭཱ པུན སཱཝཏྠིཾ ཨཱགཏེ ཨུཔཊྛཱནསཱལཱཡ ནིསཱིདིཏྭཱ ‘‘ཨསུཀགཱམཏོ ཨསུཀགཱམསྶ མགྒོ སམོ, ཨསུཀགཱམསྶ མགྒོ ཝིསམོ, སསཀྑརོ, ཨསཀྑརོ’’ཏིཨཱདིནཱ ནཡེན ཨཏྟནོ ཝིཙརིཏམགྒཾ ཨཱརབྦྷ མགྒཀཐཾ ཀཐེསུཾ. སཏྠཱ ཏེསཾ ཨརཧཏྟསྶཱུཔནིསྶཡཾ དིསྭཱ ཏཾ ཋཱནཾ ཨཱགནྟྭཱ པཉྙཏྟཱསནེ ནིསིནྣོ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཨཡཾ བཱཧིརཀམགྒོ, བྷིཀྑུནཱ ནཱམ ཨརིཡམགྒེ ཀམྨཾ ཀཱཏུཾ ཝཊྚཏི, ཨེཝཉྷི ཀརོནྟོ བྷིཀྑུ སབྦདུཀྑཱ པམུཙྩཏཱི’’ཏི ཝཏྭཱ ཨིམཱ གཱཐཱ ཨབྷཱསི –

‘‘མགྒཱནཊྛངྒིཀོ ¶ སེཊྛོ, སཙྩཱནཾ ཙཏུརོ པདཱ;

ཝིརཱགོ སེཊྛོ དྷམྨཱནཾ, དྭིཔདཱནཉྩ ཙཀྑུམཱ.

‘‘ཨེསེཝ མགྒོ ནཏྠཉྙོ, དསྶནསྶ ཝིསུདྡྷིཡཱ;

ཨེཏཉྷི ཏུམྷེ པཊིཔཛྫཐ, མཱརསྶེཏཾ པམོཧནཾ.

‘‘ཨེཏཉྷི ཏུམྷེ པཊིཔནྣཱ, དུཀྑསྶནྟཾ ཀརིསྶཐ;

ཨཀྑཱཏོ ཝོ མཡཱ མགྒོ, ཨཉྙཱཡ སལླཀནྟནཾ.

‘‘ཏུམྷེཧི ཀིཙྩམཱཏཔྤཾ, ཨཀྑཱཏཱརོ ཏཐཱགཏཱ;

པཊིཔནྣཱ པམོཀྑནྟི, ཛྷཱཡིནོ མཱརབནྡྷནཱ’’ཏི.

ཏཏྠ ¶ མགྒཱནཊྛངྒིཀོཏི ཛངྒྷམགྒཱདཡོ ཝཱ ཧོནྟུ དྭཱསཊྛི དིཊྛིགཏམགྒཱ ཝཱ, ཏེསཾ སབྦེསམྤི མགྒཱནཾ སམྨཱདིཊྛིཨཱདཱིཧི ཨཊྛཧི ཨངྒེཧི མིཙྪཱདིཊྛིཨཱདཱིནཾ ཨཊྛནྣཾ པཧཱནཾ ཀརོནྟོ ནིརོདྷཾ ཨཱརམྨཎཾ ཀཏྭཱ ཙཏཱུསུཔི སཙྩེསུ དུཀྑཔརིཛཱནནཱདིཀིཙྩཾ སཱདྷཡམཱནོ ཨཊྛངྒིཀོ མགྒོ སེཊྛོ ¶ ཨུཏྟམོ. སཙྩཱནཾ ཙཏུརོ པདཱཏི ‘‘སཙྩཾ བྷཎེ ན ཀུཛ྄ཛྷེཡྻཱ’’ཏི ¶ (དྷ. པ. ༢༢༤) ཨཱགཏཾ ཝཙཱིསཙྩཾ ཝཱ ཧོཏུ, ‘‘སཙྩོ བྲཱཧྨཎོ སཙྩོ ཁཏྟིཡོ’’ཏིཨཱདིབྷེདཾ སམྨུཏིསཙྩཾ ཝཱ ‘‘ཨིདམེཝ སཙྩཾ མོགྷམཉྙ’’ནྟི (དྷ. ས. ༡༡༤༤; མ. ནི. ༢.༡༨༧-༡༨༨) དིཊྛིསཙྩཾ ཝཱ ‘‘དུཀྑཾ ཨརིཡསཙྩ’’ནྟིཨཱདིབྷེདཾ པརམཏྠསཙྩཾ ཝཱ ཧོཏུ, སབྦེསམྤི ཨིམེསཾ སཙྩཱནཾ པརིཛཱནིཏབྦཊྛེན སཙྪིཀཱཏབྦཊྛེན པཧཱཏབྦཊྛེན བྷཱཝེཏབྦཊྛེན ཨེཀཔཊིཝེདྷཊྛེན ཙ ཏཐཔཊིཝེདྷཊྛེན ཙ དུཀྑཾ ཨརིཡསཙྩནྟིཨཱདཡོ ཙཏུརོ པདཱ སེཊྛཱ ནཱམ. ཝིརཱགོ སེཊྛོ དྷམྨཱནནྟི ‘‘ཡཱཝཏཱ, བྷིཀྑཝེ, དྷམྨཱ སངྑཏཱ ཝཱ ཨསངྑཏཱ ཝཱ, ཝིརཱགོ ཏེསཾ ཨགྒམཀྑཱཡཏཱི’’ཏི (ཨིཏིཝུ. ༩༠; ཨ. ནི. ༤.༣༤) ཝཙནཏོ སབྦདྷམྨཱནཾ ནིབྦཱནསངྑཱཏོ ཝིརཱགོ སེཊྛོ. དྭིཔདཱནཉྩ ཙཀྑུམཱཏི སབྦེསཾ དེཝམནུསྶཱདིབྷེདཱནཾ དྭིཔདཱནཾ པཉྩཧི ཙཀྑཱུཧི ཙཀྑུམཱ ཏཐཱགཏོཝ སེཊྛོ. ཙ-སདྡོ སམྤིཎྜནཏྠོ, ཨརཱུཔདྷམྨེ སམྤིཎྜེཏི. ཏསྨཱ ཨརཱུཔདྷམྨཱནམྤི ཏཐཱགཏོ སེཊྛོ ཨུཏྟམོ.

དསྶནསྶ ཝིསུདྡྷིཡཱཏི མགྒཕལདསྶནསྶ ཝིསུདྡྷཏྠཾ ཡོ མཡཱ ‘‘སེཊྛོ’’ཏི ཝུཏྟོ, ཨེསོཝ མགྒོ, ནཏྠཉྙོ. ཨེཏཉྷི ཏུམྷེཏི ཏསྨཱ ཏུམྷེ ཨེཏམེཝ པཊིཔཛྫཐ. མཱརསྶེཏཾ པམོཧནནྟི ཨེཏཾ མཱརམོཧནཾ མཱརམནྠནནྟི ¶ ཝུཙྩཏི. དུཀྑསྶནྟནྟི སཀལསྶཔི ཝཊྚདུཀྑསྶ ཨནྟཾ པརིཙྪེདཾ ཀརིསྶཐཱཏི ཨཏྠོ. ཨཉྙཱཡ སལླཀནྟནནྟི རཱགསལླཱདཱིནཾ ཀནྟནཾ ནིམྨཐནཾ ཨབྦཱུཧཎཾ ཨེཏཾ མགྒཾ, མཡཱ ཝིནཱ ཨནུསྶཝཱདཱིཧི ཨཏྟཔཙྩཀྑཏོ ཉཏྭཱཝ ཨཡཾ མགྒོ ཨཀྑཱཏོ, ཨིདཱནི ཏུམྷེཧི ཀིལེསཱནཾ ཨཱཏཱཔནེན ‘‘ཨཱཏཔྤ’’ནྟི སངྑཾ གཏཾ ཏསྶ ཨདྷིགམཏྠཱཡ སམྨཔྤདྷཱནཝཱིརིཡཾ ཀིཙྩཾ ཀརཎཱིཡཾ. ཀེཝལཉྷི ཨཀྑཱཏཱརོཝ ཏཐཱགཏཱ. ཏསྨཱ ཏེཧི ཨཀྑཱཏཝསེན ཡེ པཊིཔནྣཱ དྭཱིཧི ཛྷཱནེཧི ཛྷཱཡིནོ, ཏེ ཏེབྷཱུམཀཝཊྚསངྑཱཏཱ མཱརབནྡྷནཱ པམོཀྑནྟཱིཏི ཨཏྠོ.

དེསནཱཝསཱནེ ཏེ བྷིཀྑཱུ ཨརཧཏྟེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

སབྦེ ¶ ¶ ¶ སངྑཱརཱ ཨནིཙྩཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩསཏེ བྷིཀྑཱུ ཨཱརབྦྷ ཀཐེསི.

ཏེ ཀིར སཏྠུ སནྟིཀེ ཀམྨཊྛཱནཾ གཧེཏྭཱ གནྟྭཱ ཨརཉྙེ ཝཱཡམནྟཱཔི ཨརཧཏྟཾ ཨཔྤཏྭཱ ‘‘ཝིསེསེཏྭཱ ཀམྨཊྛཱནཾ ཨུགྒཎྷིསྶཱམཱ’’ཏི སཏྠུ སནྟིཀཾ ཨཱགམིཾསུ. སཏྠཱ ‘‘ཀིཾ ནུ ཁོ ཨིམེསཾ སཔྤཱཡ’’ནྟི ཝཱིམཾསནྟོ ‘‘ཨིམེ ཀསྶཔབུདྡྷཀཱལེ ཝཱིསཏི ཝསྶསཧསྶཱནི ཨནིཙྩལཀྑཎེ ཨནུཡུཉྫིཾསུ, ཏསྨཱ ཨནིཙྩལཀྑཎེནེཝ ཏེསཾ ཨེཀཾ གཱཐཾ དེསེཏུཾ ཝཊྚཏཱི’’ཏི ཙིནྟེཏྭཱ, ‘‘བྷིཀྑཝེ, ཀཱམབྷཝཱདཱིསུ སབྦེཔི སངྑཱརཱ ཧུཏྭཱ ཨབྷཱཝཊྛེན ཨནིཙྩཱ ཨེཝཱ’’ཏི ཝཏྭཱ ཨིམཾ གཱཐམཱཧ –

‘‘སབྦེ སངྑཱརཱ ཨནིཙྩཱཏི, ཡདཱ པཉྙཱཡ པསྶཏི;

ཨཐ ནིབྦིནྡཏི དུཀྑེ, ཨེས མགྒོ ཝིསུདྡྷིཡཱ’’ཏི.

ཏཏྠ སབྦེ སངྑཱརཱཏི ཀཱམབྷཝཱདཱིསུ ཨུཔྤནྣཱ ཁནྡྷཱ ཏཏྠ ཏཏྠེཝ ནིརུཛ྄ཛྷནཏོ ཨནིཙྩཱཏི ཡདཱ ཝིཔསྶནཱཔཉྙཱཡ པསྶཏི, ཨཐ ཨིམསྨིཾ ཁནྡྷཔརིཧརཎདུཀྑེ ནིབྦིནྡཏི, ནིབྦིནྡནྟོ དུཀྑཔརིཛཱནནཱདིཝསེན སཙྩཱནི པཊིཝིཛ྄ཛྷཏི. ཨེས མགྒོ ཝིསུདྡྷིཡཱཏི ཝིསུདྡྷཏྠཱཡ ཝོདཱནཏྠཱཡ ཨེས མགྒོཏི ཨཏྠོ.

དེསནཱཝསཱནེ ¶ ཏེ བྷིཀྑཱུ ཨརཧཏྟེ པཏིཊྛཧིཾསུ, སམྤཏྟཔརིསཱནམྤི སཱཏྠིཀཱ དྷམྨདེསནཱ ཨཧོསཱིཏི.

དུཏིཡགཱཐཱཡཔི ཨེཝརཱུཔམེཝ ཝཏྠུ. ཏདཱ ཧི བྷགཝཱ ཏེསཾ བྷིཀྑཱུནཾ དུཀྑལཀྑཎེ ཀཏཱབྷིཡོགབྷཱཝཾ ཉཏྭཱ, ‘‘བྷིཀྑཝེ, སབྦེཔི ཁནྡྷཱ པཊིཔཱིལ༹ནཊྛེན དུཀྑཱ ཨེཝཱ’’ཏི ཝཏྭཱ ཨིམཾ གཱཐམཱཧ –

‘‘སབྦེ ¶ ¶ སངྑཱརཱ དུཀྑཱཏི, ཡདཱ པཉྙཱཡ པསྶཏི;

ཨཐ ནིབྦིནྡཏི དུཀྑེ, ཨེས མགྒོ ཝིསུདྡྷིཡཱ’’ཏི.

ཏཏྠ དུཀྑཱཏི པཊིཔཱིལ༹ནཊྛེན དུཀྑཱ. སེསཾ པུརིམསདིསམེཝ.

ཏཏིཡགཱཐཱཡཔི ཨེསེཝ ནཡོ. ཀེཝལཉྷི ཨེཏྠ བྷགཝཱ ཏེསཾ བྷིཀྑཱུནཾ པུབྦེ ཨནཏྟལཀྑཎེ ཨནུཡུཏྟབྷཱཝཾ ཉཏྭཱ, ‘‘བྷིཀྑཝེ, སབྦེཔི ཁནྡྷཱ ཨཝསཝཏྟནཊྛེན ཨནཏྟཱ ཨེཝཱ’’ཏི ཝཏྭཱ ཨིམཾ གཱཐམཱཧ –

‘‘སབྦེ ¶ དྷམྨཱ ཨནཏྟཱཏི, ཡདཱ པཉྙཱཡ པསྶཏི;

ཨཐ ནིབྦིནྡཏི དུཀྑེ, ཨེས མགྒོ ཝིསུདྡྷིཡཱ’’ཏི.

ཏཏྠ སབྦེ དྷམྨཱཏི པཉྩཀྑནྡྷཱ ཨེཝ ཨདྷིཔྤེཏཱ. ཨནཏྟཱཏི ‘‘མཱ ཛཱིཡནྟུ མཱ མཱིཡནྟཱུ’’ཏི ཝསེ ཝཏྟེཏུཾ ན སཀྐཱཏི ཨཝསཝཏྟནཊྛེན ཨནཏྟཱ ཨཏྟསུཉྙཱ ཨསྶཱམིཀཱ ཨནིསྶརཱཏི ཨཏྠོ. སེསཾ པུརིམསདིསམེཝཱཏི.

ཨུཊྛཱནཀཱལམྷཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པདྷཱནཀམྨིཀཏིསྶཏྠེརཾ ཨཱརབྦྷ ཀཐེསི.

སཱཝཏྠིཝཱསིནོ ཀིར པཉྩསཏཱ ཀུལཔུཏྟཱ སཏྠུ སནྟིཀེ པབྦཛིཏྭཱ ཀམྨཊྛཱནཾ གཧེཏྭཱ ཨརཉྙཾ ཨགམཾསུ. ཏེསུ ཨེཀོ ཏཏྠེཝ ཨོཧཱིཡི. ཨཝསེསཱ ཨརཉྙེ སམཎདྷམྨཾ ཀརོནྟཱ ཨརཧཏྟཾ པཏྭཱ ‘‘པཊིལདྡྷགུཎཾ སཏྠུ ཨཱརོཙེསྶཱམཱ’’ཏི པུན སཱཝཏྠིཾ ཨགམཾསུ. ཏེ སཱཝཏྠིཏོ ཡོཛནམཏྟེ ¶ ཨེཀསྨིཾ གཱམཀེ པིཎྜཱཡ ཙརནྟེ དིསྭཱ ཨེཀོ ཨུཔཱསཀོ ཡཱགུབྷཏྟཱདཱིཧི པཏིམཱནེཏྭཱ ཨནུམོདནཾ སུཏྭཱ པུནདིཝསཏྠཱཡཔི ནིམནྟེསི. ཏེ ཏདཧེཝ སཱཝཏྠིཾ ¶ གནྟྭཱ པཏྟཙཱིཝརཾ པཊིསཱམེཏྭཱ སཱཡནྷསམཡེ ¶ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསཱིདིཾསུ. སཏྠཱ ཏེཧི སདྡྷིཾ ཨཏིཝིཡ ཏུཊྛིཾ པཝེདཡམཱནོ པཊིསནྠཱརཾ ཨཀཱསི.

ཨཐ ནེསཾ ཏཏྠ ཨོཧཱིནོ སཧཱཡཀབྷིཀྑུ ཙིནྟེསི – ‘‘སཏྠུ ཨིམེཧི སདྡྷིཾ པཊིསནྠཱརཾ ཀརོནྟསྶ མུཁཾ ནཔྤཧོཏི, མཡ྄ཧཾ པན མགྒཕལཱབྷཱཝེན མཡཱ སདྡྷིཾ ན ཀཐེཏི, ཨཛྫེཝ ཨརཧཏྟཾ པཏྭཱ སཏྠཱརཾ ཨུཔསངྐམིཏྭཱ མཡཱ སདྡྷིཾ ཀཐཱཔེསྶཱམཱི’’ཏི. ཏེཔི བྷིཀྑཱུ, ‘‘བྷནྟེ, མཡཾ ཨཱགམནམགྒེ ཨེཀེན ཨུཔཱསཀེན སྭཱཏནཱཡ ནིམནྟིཏཱ, ཏཏྠ པཱཏོཝ གམིསྶཱམཱ’’ཏི སཏྠཱརཾ ཨཔལོཀེསུཾ. ཨཐ ནེསཾ སཧཱཡཀོ བྷིཀྑུ སབྦརཏྟིཾ ཙངྐམནྟོ ནིདྡཱཝསེན ཙངྐམཀོཊིཡཾ ཨེཀསྨིཾ པཱསཱཎཕལཀེ པཏི, ཨཱུརུཊྛི བྷིཛྫི. སོ མཧཱསདྡེན ཝིརཝི. ཏསྶ ཏེ སཧཱཡཀཱ བྷིཀྑཱུ སདྡཾ སཉྫཱནིཏྭཱ ཨིཏོ ཙིཏོ ཙ ཨུཔདྷཱཝིཾསུ. ཏེསཾ དཱིཔཾ ཛཱལེཏྭཱ ཏསྶ ཀཏྟབྦཀིཙྩཾ ཀརོནྟཱནཾཡེཝ ཨརུཎོ ཨུཊྛཧི, ཏེ ཏཾ གཱམཾ གནྟུཾ ཨོཀཱསཾ ན ལབྷིཾསུ. ཨཐ ནེ སཏྠཱ ཨཱཧ – ‘‘ཀིཾ, བྷིཀྑཝེ, བྷིཀྑཱཙཱརགཱམཾ ན གམིཏྠཱ’’ཏི. ཏེ ‘‘ཨཱམ, བྷནྟེ’’ཏི ཏཾ པཝཏྟིཾ ཨཱརོཙེསུཾ. སཏྠཱ ‘‘ན, བྷིཀྑཝེ, ཨེས ¶ ཨིདཱནེཝ ཏུམྷཱཀཾ ལཱབྷནྟརཱཡཾ ཀརོཏི, པུབྦེཔི ཨཀཱསིཡེཝཱ’’ཏི ཝཏྭཱ ཏེཧི ཡཱཙིཏོ ཨཏཱིཏཾ ཨཱཧརིཏྭཱ –

‘‘ཡོ པུབྦེ ཀརཎཱིཡཱནི, པཙྪཱ སོ ཀཱཏུམིཙྪཏི;

ཝརུཎཀཊྛབྷཉྫོཝ, ས པཙྪཱ མནུཏཔྤཏཱི’’ཏི. (ཛཱ. ༡.༡.༧༡) –

ཛཱཏཀཾ ཝིཏྠཱརེསི. ཏདཱ ཀིར ཏེ བྷིཀྑཱུ པཉྩསཏཱ མཱཎཝཀཱ ཨཧེསུཾ, ཀུསཱིཏམཱཎཝཀོ ཨཡཾ བྷིཀྑུ ཨཧོསི, ཨཱཙརིཡོ པན ཏཐཱགཏོཝ ཨཧོསཱིཏི.

སཏྠཱ ཨིམཾ དྷམྨདེསནཾ ཨཱཧརིཏྭཱ, ‘‘བྷིཀྑཝེ, ཡོ ཧི ཨུཊྛཱནཀཱལེ ཨུཊྛཱནཾ ན ཀརོཏི, སཾསནྣསངྐཔྤོ ཧོཏི, ཀུསཱིཏོ སོ ཛྷཱནཱདིབྷེདཾ ཝིསེསཾ ནཱདྷིགཙྪཏཱི’’ཏི ཝཏྭཱ ཨིམཾ གཱཐམཱཧ –

པཉྙཱཡ མགྒཾ ཨལསོ ན ཝིནྡཏཱི’’ཏི.

ཏཏྠ ¶ ¶ ཨནུཊྛཧཱནོཏི ཨནུཊྛཧནྟོ ཨཝཱཡམནྟོ. ཡུཝཱ བལཱིཏི པཋམཡོབྦནེ ཋིཏོ བལསམྤནྣོཔི ཧུཏྭཱ ¶ ཨལསབྷཱཝེན ཨུཔེཏོ ཧོཏི, བྷུཏྭཱ སཡཏི. སཾསནྣསངྐཔྤམནོཏི ཏཱིཧི མིཙྪཱཝིཏཀྐེཧི སུཊྛུ ཨཝསནྣསམྨཱསངྐཔྤཙིཏྟོ. ཀུསཱིཏོཏི ནིབྦཱིརིཡོ. ཨལསོཏི མཧཱཨལསོ པཉྙཱཡ དཊྛབྦཾ ཨརིཡམགྒཾ ཨཔསྶནྟོ ན ཝིནྡཏི, ན པཊིལབྷཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པདྷཱནཀམྨིཀཏིསྶཏྠེརཝཏྠུ པཉྩམཾ.

ཝཱཙཱནུརཀྑཱིཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ སཱུཀརཔེཏཾ ཨཱརབྦྷ ཀཐེསི.

ཨེཀསྨིཉྷི དིཝསེ མཧཱམོགྒལླཱནཏྠེརོ ལཀྑཎཏྠེརེན སདྡྷིཾ གིཛ྄ཛྷཀཱུཊཱ ཨོརོཧནྟོ ཨེཀསྨིཾ པདེསེ སིཏཾ པཱཏྭཱཀཱསི. ‘‘ཀོ ནུ ཁོ, ཨཱཝུསོ, ཧེཏུ སིཏསྶ པཱཏུཀམྨཱཡཱ’’ཏི ལཀྑཎཏྠེརེན པུཊྛོ ‘‘ཨཀཱལོ, ཨཱཝུསོ, ཨིམསྶ པཉྷསྶ, སཏྠུ སནྟིཀེ མཾ པུཙྪེཡྻཱཐཱ’’ཏི ཝཏྭཱ ལཀྑཎཏྠེརེན ¶ སདྡྷིཾཡེཝ རཱཛགཧེ པིཎྜཱཡ ཙརིཏྭཱ པིཎྜཔཱཏཔཊིཀྐནྟོ ཝེལུ༹ཝནཾ གནྟྭཱ སཏྠཱརཾ ཝནྡིཏྭཱ ནིསཱིདི. ཨཐ ནཾ ལཀྑཎཏྠེརོ ཏམཏྠཾ པུཙྪི. སོ ཨཱཧ – ‘‘ཨཱཝུསོ, ཨཧཾ ཨེཀཾ པེཏཾ ཨདྡསཾ, ཏསྶ ཏིགཱཝུཏཔྤམཱཎཾ སརཱིརཾ, ཏཾ མནུསྶསརཱིརསདིསཾ. སཱིསཾ པན སཱུཀརསྶ ཝིཡ, ཏསྶ མུཁེ ནངྒུཊྛཾ ཛཱཏཾ, ཏཏོ པུལ༹ཝཱ པགྒྷརནྟི. སྭཱཧཾ ‘ན མེ ཨེཝརཱུཔོ སཏྟོ དིཊྛཔུབྦོ’ཏི ཏཾ དིསྭཱ སིཏཾ པཱཏྭཱཀཱསི’’ནྟི. སཏྠཱ ‘‘ཙཀྑུབྷཱུཏཱ ཝཏ, བྷིཀྑཝེ, མམ སཱཝཀཱ ཝིཧརནྟཱི’’ཏི ཝཏྭཱ ‘‘ཨཧམྤེཏཾ སཏྟཾ བོདྷིམཎྜེཡེཝ ཨདྡསཾ. ‘ཡེ པན མེ ན སདྡཧེཡྻུཾ, ཏེསཾ ཨཧིཏཱཡ ཨསྶཱ’ཏི པརེསཾ ཨནུཀམྤཱཡ ན ཀཐེསིཾ. ཨིདཱནི མོགྒལླཱནཾ སཀྑིཾ ཀཏྭཱ ཀཐེམི. སཙྩཾ, བྷིཀྑཝེ, མོགྒལླཱནོ ཨཱཧཱ’’ཏི ཀཐེསི. ཏཾ སུཏྭཱ བྷིཀྑཱུ སཏྠཱརཾ པུཙྪིཾསུ – ‘‘ཀིཾ ¶ པན, བྷནྟེ, ཏསྶ པུབྦཀམྨ’’ནྟི. སཏྠཱ ‘‘ཏེན ཧི, བྷིཀྑཝེ, སུཎཱཐཱ’’ཏི ཨཏཱིཏཾ ཨཱཧརིཏྭཱ ཏསྶ པུབྦཀམྨཾ ཀཐེསི.

ཀསྶཔབུདྡྷཀཱལེ ཀིར ཨེཀསྨིཾ གཱམཀཱཝཱསེ དྭེ ཐེརཱ སམགྒཝཱསཾ ཝསིཾསུ. ཏེསུ ཨེཀོ སཊྛིཝསྶོ, ཨེཀོ ཨེཀཱུནསཊྛིཝསྶོ ¶ . ཨེཀཱུནསཊྛིཝསྶོ ཨིཏརསྶ པཏྟཙཱིཝརཾ ཨཱདཱཡ ཝིཙརི, སཱམཎེརོ ཝིཡ སབྦཾ ཝཏྟཔཊིཝཏྟཾ ཨཀཱསི. ཏེསཾ ཨེཀམཱཏུཀུཙྪིཡཾ ཝུཏྠབྷཱཏཱུནཾ ཝིཡ སམགྒཝཱསཾ ¶ ཝསནྟཱནཾ ཝསནཊྛཱནཾ ཨེཀོ དྷམྨཀཐིཀོ ཨཱགམི. ཏདཱ ཙ དྷམྨསྶཝནདིཝསོ ཧོཏི. ཐེརཱ ནཾ སངྒཎྷིཏྭཱ ‘‘དྷམྨཀཐཾ ནོ ཀཐེཧི སཔྤུརིསཱ’’ཏི ཨཱཧཾསུ. སོ དྷམྨཀཐཾ ཀཐེསི. ཐེརཱ ‘‘དྷམྨཀཐིཀོ ནོ ལདྡྷོ’’ཏི ཏུཊྛཙིཏྟཱ པུནདིཝསེ ཏཾ ཨཱདཱཡ དྷུརགཱམཾ པིཎྜཱཡ པཝིསིཏྭཱ ཏཏྠ ཀཏབྷཏྟཀིཙྩཱ, ‘‘ཨཱཝུསོ, ཧིཡྻོ ཀཐིཏཊྛཱནཏོཝ ཐོཀཾ དྷམྨཾ ཀཐེཧཱི’’ཏི མནུསྶཱནཾ དྷམྨཾ ཀཐཱཔེསུཾ. མནུསྶཱ དྷམྨཀཐཾ སུཏྭཱ པུནདིཝསཏྠཱཡཔི ནིམནྟཡིཾསུ. ཨེཝཾ སམནྟཱ བྷིཀྑཱཙཱརགཱམེསུ དྭེ དྭེ དིཝསེ ཏཾ ཨཱདཱཡ པིཎྜཱཡ ཙརིཾསུ.

དྷམྨཀཐིཀོ ཙིནྟེསི – ‘‘ཨིམེ དྭེཔི ཨཏིམུདུཀཱ, མཡཱ ཨུབྷོཔེཏེ པལཱཔེཏྭཱ ཨིམསྨིཾ ཝིཧཱརེ ཝསིཏུཾ ཝཊྚཏཱི’’ཏི. སོ སཱཡཾ ཐེརཱུཔཊྛཱནཾ གནྟྭཱ བྷིཀྑཱུནཾ ཨུཊྛཱཡ གཏཀཱལེ ནིཝཏྟིཏྭཱ མཧཱཐེརཾ ཨུཔསངྐམིཏྭཱ, ‘‘བྷནྟེ, ཀིཉྩི ཝཏྟབྦཾ ཨཏྠཱི’’ཏི ཝཏྭཱ ‘‘ཀཐེཧི, ཨཱཝུསོ’’ཏི ཝུཏྟེ ཐོཀཾ ཙིནྟེཏྭཱ, ‘‘བྷནྟེ, ཀཐཱ ནཱམེསཱ མཧཱསཱཝཛྫཱ’’ཏི ཝཏྭཱ ཨཀཐེཏྭཱཝ པཀྐཱམི. ཨནུཐེརསྶཱཔི སནྟིཀཾ གནྟྭཱ ཏཐེཝ ཨཀཱསི. སོ དུཏིཡདིཝསེ ཏཐེཝ ཀཏྭཱ ཏཏིཡདིཝསེ ཏེསཾ ཨཏིཝིཡ ¶ ཀོཏུཧལེ ཨུཔྤནྣེ མཧཱཐེརཾ ཨུཔསངྐམིཏྭཱ, ‘‘བྷནྟེ, ཀིཉྩི ཝཏྟབྦཾ ཨཏྠི, ཏུམྷཱཀཾ པན སནྟིཀེ ཝཏྟུཾ ན ཝིསཧཱམཱི’’ཏི ཝཏྭཱ ཐེརེན ‘‘ཧོཏུ, ཨཱཝུསོ, ཀཐེཧཱི’’ཏི ནིཔྤཱིལི༹ཏོ ཨཱཧ – ‘‘ཀིཾ པན, བྷནྟེ, ཨནུཐེརོ ཏུམྷེཧི སདྡྷིཾ སཾབྷོགོ’’ཏི. སཔྤུརིས, ཀིཾ ནཱམེཏཾ ཀཐེསི, མཡཾ ཨེཀམཱཏུཀུཙྪིཡཾ ཝུཏྠཔུཏྟཱ ཝིཡ, ཨམྷེསུ ཨེཀེན ཡཾ ལདྡྷཾ, ཨིཏརེནཱཔི ལདྡྷམེཝ ཧོཏི. མཡཱ ཨེཏསྶ ཨེཏྟཀཾ ཀཱལཾ ཨགུཎོ ནཱམ ན དིཊྛཔུབྦོཏི? ཨེཝཾ, བྷནྟེཏི. ཨཱམཱཝུསོཏི. བྷནྟེ མཾ ཨནུཐེརོ ཨེཝམཱཧ – ‘‘སཔྤུརིས, ཏྭཾ ཀུལཔུཏྟོ, ཨཡཾ མཧཱཐེརོ ལཛྫཱི པེསལོཏི ཨེཏེན སདྡྷིཾ སཾབྷོགཾ ཀརོནྟོ ¶ ཨུཔཔརིཀྑིཏྭཱ ཀརེཡྻཱསཱི’’ཏི ཨེཝམེས མཾ ཨཱགཏདིཝསཏོ པཊྛཱཡ ཝདཏཱིཏི.

མཧཱཐེརོ ཏཾ སུཏྭཱཝ ཀུདྡྷམཱནསོ དཎྜཱབྷིཧཏཾ ཀུལཱལབྷཱཛནཾ ཝིཡ བྷིཛྫི. ཨིཏརོཔི ཨུཊྛཱཡ ཨནུཐེརསྶ སནྟིཀཾ གནྟྭཱ ཏཐེཝ ཨཝོཙ, སོཔི ཏཐེཝ བྷིཛྫི. ཏེསུ ཀིཉྩཱཔི ཨེཏྟཀཾ ཀཱལཾ ཨེཀོཔི ཝིསུཾ པིཎྜཱཡ པཝིཊྛཔུབྦོ ནཱམ ནཏྠི, པུནདིཝསེ པན ཝིསུཾ པིཎྜཱཡ པཝིསིཏྭཱ ཨནུཐེརོ པུརེཏརཾ ཨཱགནྟྭཱ ཨུཔཊྛཱནསཱལཱཡ ཨཊྛཱསི, མཧཱཐེརོ པཙྪཱ ཨགམཱསི. ཏཾ དིསྭཱ ཨནུཐེརོ ཙིནྟེསི – ‘‘ཀིཾ ནུ ཁོ ཨིམསྶ པཏྟཙཱིཝརཾ པཊིགྒཧེཏབྦཾ, ཨུདཱཧུ ནོ’’ཏི. སོ ‘‘ན ¶ ཨིདཱནི པཊིགྒཧེསྶཱམཱི’’ཏི ཙིནྟེཏྭཱཔི ‘‘ཧོཏུ, ན མཡཱ ཨེཝཾ ཀཏཔུབྦཾ, མཡཱ ཨཏྟནོ ཝཏྟཾ ཧཱཔེཏུཾ ན ཝཊྚཏཱི’’ཏི ཙིཏྟཾ མུདུཀཾ ཀཏྭཱ ཐེརཾ ཨུཔསངྐམིཏྭཱ, ‘‘བྷནྟེ, པཏྟཙཱིཝརཾ དེཐཱ’’ཏི ཨཱཧ. ཨིཏརོ ‘‘གཙྪ, དུབྦིནཱིཏ, ན ཏྭཾ མམ པཏྟཙཱིཝརཾ པཊིགྒཧེཏུཾ ཡུཏྟརཱུཔོ’’ཏི ཨཙྪརཾ པཧརིཏྭཱ ཏེནཔི ‘‘ཨཱམ, བྷནྟེ, ཨཧམྤི ཏུམྷཱཀཾ པཏྟཙཱིཝརཾ ན པཊིགྒཎྷཱམཱིཏི ¶ ཙིནྟེསི’’ནྟི ཝུཏྟེ, ‘‘ཨཱཝུསོ ནཝཀ, ཀིཾ ཏྭཾ ཙིནྟེསི, མམ ཨིམསྨིཾ ཝིཧཱརེ ཀོཙི སངྒོ ཨཏྠཱི’’ཏི ཨཱཧ. ཨིཏརོཔི ‘‘ཏུམྷེ པན, བྷནྟེ, ཀིཾ ཨེཝཾ མཉྙཐ ‘མམ ཨིམསྨིཾ ཝིཧཱརེ ཀོཙི སངྒོ ཨཏྠཱི’ཏི, ཨེསོ ཏེ ཝིཧཱརོ’’ཏི ཝཏྭཱ པཏྟཙཱིཝརཾ ཨཱདཱཡ ནིཀྑམི. ཨིཏརོཔི ནིཀྑམི. ཏེ ཨུབྷོཔི ཨེཀམགྒེནཱཔི ཨགནྟྭཱ ཨེཀོ པཙྪིམདྭཱརེན མགྒཾ གཎྷི, ཨེཀོ པུརཏྠིམདྭཱརེན. དྷམྨཀཐིཀོ, ‘‘བྷནྟེ, མཱ ཨེཝཾ ཀརོཐ, མཱ ཨེཝཾ ཀརོཐཱ’’ཏི ཝཏྭཱ ‘‘ཏིཊྛཱཝུསོ’’ཏི ཝུཏྟེ ནིཝཏྟི. སོ པུནདིཝསེ དྷུརགཱམཾ པཝིཊྛོ མནུསྶེཧི, ‘‘བྷནྟེ, བྷདྡནྟཱ ཀུཧི’’ནྟི ཝུཏྟེ, ‘‘ཨཱཝུསོ, མཱ པུཙྪཐ, ཏུམྷཱཀཾ ¶ ཀུལུཔཀཱ ཧིཡྻོ ཀལཧཾ ཀཏྭཱ ནིཀྑམིཾསུ, ཨཧཾ ཡཱཙནྟོཔི ནིཝཏྟེཏུཾ ནཱསཀྑི’’ནྟི ཨཱཧ. ཏེསུ བཱལཱ ཏུཎྷཱི ཨཧེསུཾ. པཎྜིཏཱ པན ‘‘ཨམྷེཧི ཨེཏྟཀཾ ཀཱལཾ བྷདྡནྟཱནཾ ཀིཉྩི ཁལིཏཾ ནཱམ ན དིཊྛཔུབྦཾ, ཏེསཾ བྷཡཾ ཨིམཾ ནིསྶཱཡ ཨུཔྤནྣཾ བྷཝིསྶཏཱི’’ཏི དོམནསྶཔྤཏྟཱ ཨཧེསུཾ.

ཏེཔི ཐེརཱ གཏཊྛཱནེ ཙིཏྟསུཁཾ ནཱམ ན ལབྷིཾསུ. མཧཱཐེརོ ཙིནྟེསི – ‘‘ཨཧོ ནཝཀསྶ བྷིཀྑུནོ བྷཱརིཡཾ ཀམྨཾ ཀཏཾ, མུཧུཏྟཾ དིཊྛཾ ནཱམ ཨཱགནྟུཀབྷིཀྑུཾ ཨཱཧ – ‘མཧཱཐེརེན སདྡྷིཾ སཾབྷོགཾ མཱ ཨཀཱསཱི’’’ཏི. ཨིཏརོཔི ཙིནྟེསི – ‘‘ཨཧོ མཧཱཐེརསྶ བྷཱརིཡཾ ཀམྨཾ ཀཏཾ, མུཧུཏྟཾ དིཊྛཾ ནཱམ ཨཱགནྟུཀབྷིཀྑུཾ ཨཱཧ – ‘ཨིམིནཱ སདྡྷིཾ སཾབྷོགཾ མཱ ཨཀཱསཱི’’’ཏི. ཏེསཾ ¶ ནེཝ སཛ྄ཛྷཱཡོ ན མནསིཀཱརོ ཨཧོསི. ཏེ ཝསྶསཏཙྩཡེན པཙྪིམདིསཱཡ ཨེཀཾ ཝིཧཱརཾ ཨགམཾསུ. ཏེསཾ ཨེཀམེཝ སེནཱསནཾ པཱཔུཎི. མཧཱཐེརེ པཝིསིཏྭཱ མཉྩཀེ ནིསིནྣེ ཨིཏརོཔི པཱཝིསི. མཧཱཐེརོ ཏཾ དིསྭཱཝ སཉྫཱནིཏྭཱ ཨསྶཱུནི སནྡྷཱརེཏུཾ ནཱསཀྑི. ཨིཏརོཔི མཧཱཐེརཾ སཉྫཱནིཏྭཱ ཨསྶུཔུཎྞེཧི ནེཏྟེཧི ‘‘ཀཐེམི ནུ ཁོ མཱ ཀཐེམཱི’’ཏི ཙིནྟེཏྭཱ ‘‘ན ཏཾ སདྡྷེཡྻརཱུཔ’’ནྟི ཐེརཾ ཝནྡིཏྭཱ ‘‘ཨཧཾ, བྷནྟེ, ཨེཏྟཀཾ ¶ ཀཱལཾ ཏུམྷཱཀཾ པཏྟཙཱིཝརཾ གཧེཏྭཱ ཝིཙརིཾ, ཨཔི ནུ ཁོ མེ ཀཱཡདྭཱརཱདཱིསུ ཏུམྷེཧི ཀིཉྩི ཨསཱརུཔྤཾ དིཊྛཔུབྦ’’ནྟི. ‘‘ན དིཊྛཔུབྦཾ, ཨཱཝུསོ’’ཏི. ཨཐ ཀསྨཱ དྷམྨཀཐིཀཾ ཨཝཙུཏྠ ‘‘མཱ ཨེཏེན སདྡྷིཾ སཾབྷོགམཀཱསཱི’’ཏི? ‘‘ནཱཧཾ, ཨཱཝུསོ, ཨེཝཾ ཀཐེམི, ཏཡཱ ཀིར མམ ཨནྟརེ ཨེཝཾ ཝུཏྟ’’ནྟི. ‘‘ཨཧམྤི, བྷནྟེ, ན ཝདཱམཱི’’ཏི. ཏེ ཏསྨིཾ ཁཎེ ‘‘ཏེན ཨམྷེ བྷིནྡིཏུཀཱམེན ཨེཝཾ ཝུཏྟཾ བྷཝིསྶཏཱི’’ཏི ཉཏྭཱ ཨཉྙམཉྙཾ ཨཙྩཡཾ དེསཡིཾསུ. ཏེ ཝསྶསཏཾ ཙིཏྟསྶཱདཾ ཨལབྷནྟཱ ཏཾ དིཝསཾ སམགྒཱ ཧུཏྭཱ ‘‘ཨཱཡཱམ, ནཾ ཏཏོ ཝིཧཱརཱ ནིཀྐཌྜྷིསྶཱམཱ’’ཏི པཀྐམིཏྭཱ ཨནུཔུབྦེན ཏཾ ཝིཧཱརཾ ཨགམཾསུ.

དྷམྨཀཐིཀོཔི ཐེརེ དིསྭཱ པཏྟཙཱིཝརཾ པཊིགྒཧེཏུཾ ཨུཔགཙྪི. ཐེརཱ ‘‘ན ཏྭཾ ཨིམསྨིཾ ཝིཧཱརེ ཝསིཏུཾ ཡུཏྟརཱུཔོ’’ཏི ཨཙྪརཾ པཧརིཾསུ. སོ སཎྛཱཏུཾ ཨསཀྐོནྟོ ཏཱཝདེཝ ནིཀྑམིཏྭཱ ¶ པལཱཡི. ཨཐ ནཾ ཝཱིསཏི ཝསྶསཧསྶཱནི ཀཏོ སམཎདྷམྨོ སནྡྷཱརེཏུཾ ནཱསཀྑི, ཏཏོ ཙཝིཏྭཱ ཨཝཱིཙིམྷི ནིབྦཏྟོ ཨེཀཾ བུདྡྷནྟརཾ པཙྩིཏྭཱ ཨིདཱནི གིཛ྄ཛྷཀཱུཊེ ཝུཏྟཔྤཀཱརེན ཨཏྟབྷཱཝེན དུཀྑཾ ཨནུབྷོཏཱིཏི.

སཏྠཱ ཨིདཾ ཏསྶ པུབྦཀམྨཾ ཨཱཧརིཏྭཱ, ‘‘བྷིཀྑཝེ, བྷིཀྑུནཱ ནཱམ ཀཱཡཱདཱིཧི ཨུཔསནྟརཱུཔེན བྷཝིཏབྦ’’ནྟི ཝཏྭཱ ཨིམཾ གཱཐམཱཧ –

‘‘ཝཱཙཱནུརཀྑཱི ¶ མནསཱ སུསཾཝུཏོ,

ཨཱརཱདྷཡེ མགྒམིསིཔྤཝེདིཏ’’ནྟི.

ཏསྶཏྠོ – ཙཏུནྣཾ ཝཙཱིདུཙྩརིཏཱནཾ ཝཛྫནེན ཝཱཙཱནུརཀྑཱི ཨབྷིཛ྄ཛྷཱདཱིནཾ ཨནུཔྤཱདནེན མནསཱ ཙ སུཊྛུ སཾཝུཏོ པཱཎཱཏིཔཱཏཱདཡོ པཛཧནྟོ ཀཱཡེན ¶ ཙ ཨཀུསལཾ ན ཀཡིརཱ. ཨེཝཾ ཨེཏེ ཏཡོ ཀམྨཔཐེ ཝིསོདྷཡེ. ཨེཝཾ ཝིསོདྷེནྟོ ཧི སཱིལཀྑནྡྷཱདཱིནཾ ཨེསཀེཧི བུདྡྷཱདཱིཧི ཨིསཱིཧི པཝེདིཏཾ ཨཊྛངྒིཀམགྒཾ ཨཱརཱདྷེཡྻཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡོགཱ ཝེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པོཊྛིལཾ ནཱམ ཐེརཾ ཨཱརབྦྷ ཀཐེསི.

སོ ཀིར སཏྟནྣམྤི བུདྡྷཱནཾ སཱསནེ ཏེཔིཊཀོ པཉྩནྣཾ བྷིཀྑུསཏཱནཾ དྷམྨཾ ཝཱཙེསི. སཏྠཱ ཙིནྟེསི ¶ – ‘‘ཨིམསྶ བྷིཀྑུནོ ‘ཨཏྟནོ དུཀྑནིསྶརཎཾ ཀརིསྶཱམཱི’ཏི ཙིཏྟམྤི ནཏྠི སཾཝེཛེསྶཱམི ན’’ནྟི. ཏཏོ པཊྛཱཡ ཏཾ ཐེརཾ ཨཏྟནོ ཨུཔཊྛཱནཾ ཨཱགཏཀཱལེ ‘‘ཨེཧི, ཏུཙྪཔོཊྛིལ, ཝནྡ, ཏུཙྪཔོཊྛིལ, ནིསཱིད, ཏུཙྪཔོཊྛིལ, ཡཱཧི, ཏུཙྪཔོཊྛིལཱ’’ཏི ཝདཏི. ཨུཊྛཱཡ གཏཀཱལེཔི ‘‘ཏུཙྪཔོཊྛིལོ གཏོ’’ཏི ཝདཏི. སོ ཙིནྟེསི – ‘‘ཨཧཾ སཱཊྛཀཐཱནི ཏཱིཎི ¶ པིཊཀཱནི དྷཱརེམི, པཉྩནྣཾ བྷིཀྑུསཏཱནཾ ཨཊྛཱརས མཧཱགཎེ དྷམྨཾ ཝཱཙེམི, ཨཐ པན མཾ སཏྠཱ ཨབྷིཀྑཎཾ, ‘ཏུཙྪཔོཊྛིལཱ’ཏི ཝདེཏི, ཨདྡྷཱ མཾ སཏྠཱ ཛྷཱནཱདཱིནཾ ཨབྷཱཝེན ཨེཝཾ ཝདེཏཱི’’ཏི. སོ ཨུཔྤནྣསཾཝེགོ ‘‘དཱནི ཨརཉྙཾ པཝིསིཏྭཱ སམཎདྷམྨཾ ཀརིསྶཱམཱི’’ཏི སཡམེཝ པཏྟཙཱིཝརཾ སཾཝིདཧིཏྭཱ པཙྩཱུསཀཱལེ སབྦཔཙྪཱ དྷམྨཾ ཨུགྒཎྷིཏྭཱ ནིཀྑམནྟེན བྷིཀྑུནཱ སདྡྷིཾ ནིཀྑམི. པརིཝེཎེ ནིསཱིདིཏྭཱ སཛ྄ཛྷཱཡནྟཱ ནཾ ‘‘ཨཱཙརིཡོ’’ཏི ན སལླཀྑེསུཾ. སོ ཝཱིསཡོཛནསཏམགྒཾ གནྟྭཱ ཨེཀསྨིཾ ཨརཉྙཱཝཱསེ ཏིཾས བྷིཀྑཱུ ཝསནྟི, ཏེ ཨུཔསངྐམིཏྭཱ སངྒྷཏྠེརཾ ཝནྡིཏྭཱ, ‘‘བྷནྟེ, ཨཝསྶཡོ མེ ཧོཐཱ’’ཏི ཨཱཧ. ཨཱཝུསོ, ཏྭཾ དྷམྨཀཐིཀོ, ཨམྷེཧི ནཱམ ¶ ཏཾ ནིསྶཱཡ ཀིཉྩི ཛཱནིཏབྦཾ བྷཝེཡྻ, ཀསྨཱ ཨེཝཾ ཝདེསཱིཏི? མཱ, བྷནྟེ, ཨེཝཾ ཀརོཐ, ཨཝསྶཡོ མེ ཧོཐཱཏི. ཏེ པན སབྦེ ཁཱིཎཱསཝཱཝ. ཨཐ ནཾ མཧཱཐེརོ ‘‘ཨིམསྶ ཨུགྒཧཾ ནིསྶཱཡ མཱནོ ཨཏྠིཡེཝཱ’’ཏི ཨནུཐེརསྶ སནྟིཀཾ པཧིཎི. སོཔི ནཾ ཏཐེཝཱཧ. ཨིམིནཱ ¶ ནཱིཧཱརེན སབྦེཔི ཏཾ པེསེནྟཱ དིཝཱཊྛཱནེ ནིསཱིདིཏྭཱ སཱུཙིཀམྨཾ ཀརོནྟསྶ སབྦནཝཀསྶ སཏྟཝསྶིཀསཱམཎེརསྶ སནྟིཀཾ པཧིཎིཾསུ. ཨེཝམསྶ མཱནཾ ནཱིཧརིཾསུ.

སོ ནིཧཏམཱནོ སཱམཎེརསྶ སནྟིཀེ ཨཉྫལིཾ པགྒཧེཏྭཱ ‘‘ཨཝསྶཡོ མེ ཧོཧི སཔྤུརིསཱ’’ཏི ཨཱཧ. ཨཧོ, ཨཱཙརིཡ, ཀིཾ ནཱམེཏཾ ཀཐེཐ, ཏུམྷེ མཧལླཀཱ བཧུསྶུཏཱ, ཏུམྷཱཀཾ སནྟིཀེ མཡཱ ཀིཉྩི ཀཱརཎཾ ཛཱནིཏབྦཾ བྷཝེཡྻཱཏི. མཱ ཨེཝཾ ཀརི, སཔྤུརིས, ཧོཧིཡེཝ མེ ཨཝསྶཡོཏི. བྷནྟེ, སཙེཔི ཨོཝཱདཀྑམཱ བྷཝིསྶཐ, བྷཝིསྶཱམི ཝོ ཨཝསྶཡོཏི. ཧོམི, སཔྤུརིས, ཨཧཾ ‘‘ཨགྒིཾ པཝིསཱ’’ཏི ཝུཏྟེ ཨགྒིཾ པཝིསཱམིཡེཝཱཏི. ཨཐ ནཾ སོ ཨཝིདཱུརེ ཨེཀཾ སརཾ དསྶེཏྭཱ, ‘‘བྷནྟེ, ཡཐཱནིཝཏྠཔཱརུཏོཝ ཨིམཾ སརཾ པཝིསཐཱ’’ཏི ཨཱཧ. སོ ཧིསྶ མཧགྒྷཱནཾ དུཔཊྚཙཱིཝརཱནཾ ནིཝཏྠཔཱརུཏབྷཱཝཾ ཉཏྭཱཔི ‘‘ཨོཝཱདཀྑམོ ¶ ནུ ཁོ’’ཏི ཝཱིམཾསནྟོ ཨེཝམཱཧ. ཐེརོཔི ཨེཀཝཙནེནེཝ ཨུདཀཾ ཨོཏརི. ཨཐ ནཾ ཙཱིཝརཀཎྞཱནཾ ཏེམིཏཀཱལེ ‘‘ཨེཐ, བྷནྟེ’’ཏི ཝཏྭཱ ཨེཀཝཙནེནེཝ ཨཱགནྟྭཱ ཋིཏཾ ཨཱཧ – ‘‘བྷནྟེ, ཨེཀསྨིཾ ཝམྨིཀེ ཚ ཚིདྡཱནི, ཏཏྠ ཨེཀེན ཚིདྡེན གོདྷཱ ཨནྟོ པཝིཊྛཱ, ཏཾ གཎྷིཏུཀཱམོ ཨིཏརཱནི པཉྩ ཚིདྡཱནི ཐཀེཏྭཱ ཚཊྛཾ བྷིནྡིཏྭཱ པཝིཊྛཚིདྡེནེཝ གཎྷཱཏི, ཨེཝཾ ཏུམྷེཔི ཚདྭཱརིཀེསུ ཨཱརམྨཎེསུ སེསཱནི པཉྩདྭཱརཱནི པིདྷཱཡ མནོདྭཱརེ ཀམྨཾ པཊྛཔེཐཱ’’ཏི. བཧུསྶུཏསྶ བྷིཀྑུནོ ཨེཏྟཀེནེཝ པདཱིཔུཛྫལནཾ ཝིཡ ཨཧོསི. སོ ‘‘ཨེཏྟཀམེཝ ཧོཏུ སཔྤུརིསཱ’’ཏི ཀརཛཀཱཡེ ཉཱཎཾ ཨོཏཱརེཏྭཱ སམཎདྷམྨཾ ཨཱརབྷི.

སཏྠཱ ཝཱིསཡོཛནསཏམཏྠཀེ ནིསིནྣོཝ ཏཾ བྷིཀྑུཾ ཨོལོཀེཏྭཱ ‘‘ཡཐེཝཱཡཾ བྷིཀྑུ བྷཱུརིཔཉྙོ ¶ , ཨེཝམེཝཾ ཨནེན ཨཏྟཱནཾ པཏིཊྛཱཔེཏུཾ ཝཊྚཏཱི’’ཏི ཙིནྟེཏྭཱ ཏེན སདྡྷིཾ ཀཐེནྟོ ཝིཡ ཨོབྷཱསཾ ཕརིཏྭཱ ཨིམཾ གཱཐམཱཧ –

‘‘ཡོགཱ ཝེ ཛཱཡཏཱི བྷཱུརི, ཨཡོགཱ བྷཱུརིསངྑཡོ;

ཨེཏཾ དྭེདྷཱཔཐཾ ཉཏྭཱ, བྷཝཱཡ ཝིབྷཝཱཡ ཙ;

ཏཐཱཏྟཱནཾ ནིཝེསེཡྻ, ཡཐཱ བྷཱུརི པཝཌྜྷཏཱི’’ཏི.

ཏཏྠ ¶ ¶ ཡོགཱཏི ཨཊྛཏིཾསཱཡ ཨཱརམྨཎེསུ ཡོནིསོ མནསིཀཱརཱ. བྷཱུརཱིཏི པཐཝཱིསམཱཡ ཝིཏྠཏཱཡ པཉྙཱཡེཏཾ ནཱམཾ. སངྑཡོཏི ཝིནཱསོ. ཨེཏཾ དྭེདྷཱཔཐནྟི ཨེཏཾ ཡོགཉྩ ཨཡོགཉྩ. བྷཝཱཡ ཝིབྷཝཱཡ ཙཱཏི ཝུདྡྷིཡཱ ཙ ཨཝུདྡྷིཡཱ ཙ. ཏཐཱཏི ཡཐཱ ཨཡཾ བྷཱུརིསངྑཱཏཱ པཉྙཱ པཝཌྜྷཏི, ཨེཝཾ ཨཏྟཱནཾ ནིཝེསེཡྻཱཏི ཨཏྠོ.

དེསནཱཝསཱནེ པོཊྛིལཏྠེརོ ཨརཧཏྟེ པཏིཊྛཧཱིཏི.

ཝནཾ ཚིནྡཐཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ མཧལླཀེ བྷིཀྑཱུ ཨཱརབྦྷ ཀཐེསི.

ཏེ ཀིར གིཧིཀཱལེ སཱཝཏྠིཡཾ ཀུཊུམྦིཀཱ མཧདྡྷནཱ ཨཉྙམཉྙསཧཱཡཀཱ ཨེཀཏོ པུཉྙཱནི ཀརོནྟཱ སཏྠུ དྷམྨདེསནཾ སུཏྭཱ ‘‘མཡཾ མཧལླཀཱ, ཀིཾ ནོ གྷརཱཝཱསེནཱ’’ཏི སཏྠཱརཾ པབྦཛྫཾ ཡཱཙིཏྭཱ པབྦཛིཾསུ, མཧལླཀབྷཱཝེན པན དྷམྨཾ པརིཡཱཔུཎིཏུཾ ཨསཀྐོནྟཱ ཝིཧཱརཔརིཡནྟེ པཎྞསཱལཾ ཀཱརེཏྭཱ ཨེཀཏོཝ ཝསིཾསུ. པིཎྜཱཡ ཙརནྟཱཔི ཡེབྷུཡྻེན པུཏྟདཱརསྶེཝ ¶ གེཧཾ གནྟྭཱ བྷུཉྫིཾསུ. ཏེསུ ཨེཀསྶ པུརཱཎདུཏིཡིཀཱ མདྷུརཔཱཙིཀཱ ནཱམ, སཱ ཏེསཾ སབྦེསམྤི ཨུཔཀཱརིཀཱ ཨཧོསི. ཀསྨཱ སབྦེཔི ཨཏྟནཱ ལདྡྷཱཧཱརཾ གཧེཏྭཱ ཏསྶཱ ཨེཝ གེཧེ ནིསཱིདིཏྭཱ བྷུཉྫནྟི? སཱཔི ནེསཾ ཡཐཱསནྣིཧིཏཾ སཱུཔབྱཉྫནཾ དེཏི. སཱ ཨཉྙཏརཱབཱདྷེན ཕུཊྛཱ ཀཱལམཀཱསི. ཨཐ ཏེ མཧལླཀཏྠེརཱ སཧཱཡཀསྶ ཐེརསྶ པཎྞསཱལཱཡ སནྣིཔཏིཏྭཱ ཨཉྙམཉྙཾ གཱིཝཱསུ གཧེཏྭཱ ‘‘མདྷུརཔཱཙིཀཱ ཨུཔཱསིཀཱ ཀཱལཀཏཱ’’ཏི ཝིལཔནྟཱ རོདིཾསུ ¶ . བྷིཀྑཱུཧི ཙ སམནྟཏོ ཨུཔདྷཱཝིཏྭཱ ‘‘ཀིཾ ཨིདཾ, ཨཱཝུསོ’’ཏི པུཊྛཱ, ‘‘བྷནྟེ, སཧཱཡཀསྶ ནོ པུརཱཎདུཏིཡིཀཱ ཀཱལཀཏཱ, སཱ ཨམྷཱཀཾ ཨཏིཝིཡ ཨུཔཀཱརིཀཱ. ཨིདཱནི ཀུཏོ ཏཐཱརཱུཔིཾ ལབྷིསྶཱམཱཏི ཨིམིནཱ ཀཱརཎེན རོདཱམཱ’’ཏི ཨཱཧཾསུ.

བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ¶ ‘‘ན, བྷིཀྑཝེ, ཨིདཱནེཝ, པུབྦེཔི ཏེ ཀཱཀཡོནིཡཾ ནིབྦཏྟིཏྭཱ སམུདྡཏཱིརེ ཙརམཱནཱ སམུདྡཨཱུམིཡཱ སམུདྡཾ པཝེསེཏྭཱ ¶ མཱརིཏཱཡ ཀཱཀིཡཱ རོདིཏྭཱ པརིདེཝིཏྭཱ ཏཾ ནཱིཧརིསྶཱམཱཏི མུཁཏུཎྜཀེཧི མཧཱསམུདྡཾ ཨུསྶིཉྩནྟཱ ཀིལམིཾསཱུ’’ཏི ཨཏཱིཏཾ ཨཱཧརིཏྭཱ –

‘‘ཨཔི ནུ ཧནུཀཱ སནྟཱ, མུཁཉྩ པརིསུསྶཏི;

ཨོརམཱམ ན པཱརེམ, པཱུརཏེཝ མཧོདདྷཱི’’ཏི. (ཛཱ. ༡.༡.༡༤༦);

ཨིམཾ ཀཱཀཛཱཏཀཾ ཝིཏྠཱརེཏྭཱ ཏེ བྷིཀྑཱུ ཨཱམནྟེཏྭཱ, ‘‘བྷིཀྑཝེ, རཱགདོསམོཧཝནཾ ནིསྶཱཡ ཏུམྷེཧི ཨིདཾ དུཀྑཾ པཏྟཾ, ཏཾ ཝནཾ ཚིནྡིཏུཾ ཝཊྚཏི, ཨེཝཾ ནིདྡུཀྑཱ བྷཝིསྶཐཱ’’ཏི ཝཏྭཱ ཨིམཱ གཱཐཱ ཨབྷཱསི –

‘‘ཝནཾ ཚིནྡཐ མཱ རུཀྑཾ, ཝནཏོ ཛཱཡཏེ བྷཡཾ;

ཚེཏྭཱ ཝནཉྩ ཝནཐཉྩ, ནིབྦནཱ ཧོཐ བྷིཀྑཝོ.

ཏཏྠ ¶ མཱ རུཀྑནྟི སཏྠཱརཱ ཧི ‘‘ཝནཾ ཚིནྡཐཱ’’ཏི ཝུཏྟེ ཏེསཾ ཨཙིརཔབྦཛིཏཱནཾ ‘‘སཏྠཱ ཨམྷེ ཝཱསིཨཱདཱིནི གཧེཏྭཱ ཝནཾ ཚིནྡཱཔེཏཱི’’ཏི རུཀྑཾ ཚིནྡིཏུཀཱམཏཱ ཨུཔྤཛྫི. ཨཐ ནེ ‘‘མཡཱ རཱགཱདིཀིལེསཝནཾ སནྡྷཱཡེཏཾ ཝུཏྟཾ, ན རུཀྑེ’’ཏི པཊིསེདྷེནྟོ ‘‘མཱ རུཀྑ’’ནྟི ཨཱཧ. ཝནཏོཏི ཡཐཱ པཱཀཏིཀཝནཏོ སཱིཧཱདིབྷཡཾ ཛཱཡཏི, ཨེཝཾ ཛཱཏིཨཱདིབྷཡམྤི ཀིལེསཝནཏོ ཛཱཡཏཱིཏི ཨཏྠོ. ཝནཉྩ ཝནཐཉྩཱཏི ཨེཏྠ མཧནྟཱ རུཀྑཱ ཝནཾ ¶ ནཱམ, ཁུདྡཀཱ ཏསྨིཾ ཝནེ ཋིཏཏྟཱ ཝནཐཱ ནཱམ. པུབྦུཔྤཏྟིཀརུཀྑཱ ཝཱ ཝནཾ ནཱམ, ཨཔརཱཔརུཔྤཏྟིཀཱ ཝནཐཱ ནཱམ. ཨེཝམེཝ མཧནྟམཧནྟཱ བྷཝཱཀཌྜྷནཀཱ ཀིལེསཱ ཝནཾ ནཱམ, པཝཏྟིཡཾ ཝིཔཱཀདཱཡཀཱ ཝནཐཱ ནཱམ. པུབྦཔྤཏྟིཀཱ ཝནཾ ནཱམ, ཨཔརཱཔརུཔྤཏྟིཀཱ ཝནཐཱ ནཱམ. ཏཾ ཨུབྷཡཾ ཙཏུཏྠམགྒཉཱཎེན ཚིནྡིཏབྦཾ. ཏེནཱཧ – ‘‘ཚེཏྭཱ ཝནཉྩ ཝནཐཉྩ, ནིབྦནཱ ཧོཐ བྷིཀྑཝོ’’ཏི. ནིབྦནཱ ཧོཐཱཏི ནིཀྐིལེསཱ ཧོཐ. ཡཱཝ ཧི ཝནཐོཏི ཡཱཝ ཨེས ཨཎུམཏྟོཔི ཀིལེསཝནཐོ ནརསྶ ནཱརཱིསུ ན ཚིཛྫཏི ¶ , ཏཱཝ སོ ཁཱིརཔཀོ ཝཙྪོ མཱཏརི ཝིཡ པཊིབདྡྷམནོ ལགྒཙིཏྟོཝ ཧོཏཱིཏི ཨཏྠོ.

དེསནཱཝསཱནེ ¶ པཉྩཔི ཏེ མཧལླཀཏྠེརཱ སོཏཱཔཏྟིཕལེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཨུཙྪིནྡཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཱརིཔུཏྟཏྠེརསྶ སདྡྷིཝིཧཱརིཀཾ ཨཱརབྦྷ ཀཐེསི.

ཨེཀོ ཀིར སུཝཎྞཀཱརཔུཏྟོ ཨབྷིརཱུཔོ སཱརིཔུཏྟཏྠེརསྶ སནྟིཀེ པབྦཛི. ཐེརོ ‘‘ཏརུཎཱནཾ རཱགོ ཨུསྶནྣོ ཧོཏཱི’’ཏི ཙིནྟེཏྭཱ ཏསྶ རཱགཔཊིགྷཱཏཱཡ ཨསུབྷཀམྨཊྛཱནཾ ཨདཱསི. ཏསྶ པན ཏཾ ཨསཔྤཱཡཾ. ཏསྨཱ ཨརཉྙཾ པཝིསིཏྭཱ ཏེམཱསཾ ཝཱཡམནྟོ ཙིཏྟེཀགྒམཏྟམྤི ཨལབྷིཏྭཱ པུན ཐེརསྶ སནྟིཀཾ ཨཱགནྟྭཱ ཐེརེན ‘‘ཨུཔཊྛིཏཾ ཏེ, ཨཱཝུསོ, ཀམྨཊྛཱན’’ནྟི ཝུཏྟེ ཏཾ པཝཏྟིཾ ཨཱརོཙེསི. ཨཐསྶ ཐེརོ ‘‘ཀམྨཊྛཱནཾ ན སམྤཛྫཏཱིཏི ཝོསཱནཾ ཨཱཔཛྫིཏུཾ ན ཝཊྚཏཱི’’ཏི ཝཏྭཱ པུན ཏདེཝ ཀམྨཊྛཱནཾ སཱདྷུཀཾ ཀཐེཏྭཱ ཨདཱསི. སོ དུཏིཡཝཱརེཔི ཀིཉྩི ཝིསེསཾ ནིབྦཏྟེཏུཾ ཨསཀྐོནྟོ ཨཱགནྟྭཱ ཐེརསྶ ཨཱརོཙེསི. ཨཐསྶ ཐེརོཔི སཀཱརཎཾ སཨུཔམཾ ¶ ཀཏྭཱ ཏདེཝ ཀམྨཊྛཱནཾ ཨཱཙིཀྑི. སོ པུནཔི ཨཱགནྟྭཱ ཀམྨཊྛཱནསྶ ཨསམྤཛྫནབྷཱཝཾ ཀཐེསི. ཐེརོ ཙིནྟེསི – ‘‘ཀཱརཀོ བྷིཀྑུ ཨཏྟནི ཝིཛྫམཱནེ ཀཱམཙྪནྡཱདཡོ ཝིཛྫམཱནཱཏི ཨཝིཛྫམཱནེ ཨཝིཛྫམཱནཱཏི པཛཱནཱཏི. ཨཡཾ བྷིཀྑུ ཀཱརཀོ, ནོ ཨཀཱརཀོ, པཊིཔནྣོ, ནོ ཨཔྤཊིཔནྣོ, ཨཧཾ པནེཏསྶ ཨཛ྄ཛྷཱསཡཾ ན ཛཱནཱམི, བུདྡྷཝེནེཡྻོ ཨེསོ བྷཝིསྶཏཱི’’ཏི ཏཾ ཨཱདཱཡ སཱཡནྷསམཡེ སཏྠཱརཾ ཨུཔསངྐམིཏྭཱ ‘‘ཨཡཾ, བྷནྟེ ¶ , མམ སདྡྷིཝིཧཱརིཀོ, ཨིམསྶ མཡཱ ཨིམིནཱ ཀཱརཎེན ཨིདཾ ནཱམ ཀམྨཊྛཱནཾ དིནྣ’’ནྟི སབྦཾ ཏཾ པཝཏྟིཾ ཨཱརོཙེསི.

ཨཐ ནཾ སཏྠཱ ‘‘ཨཱསཡཱནུསཡཉཱཎཾ ནཱམེཏཾ པཱརམིཡོ པཱུརེཏྭཱ དསསཧསྶིལོཀདྷཱཏུཾ ཨུནྣཱདེཏྭཱ སབྦཉྙུཏཾ པཏྟཱནཾ བུདྡྷཱནཾཡེཝ ཝིསཡོ’’ཏི ¶ ཝཏྭཱ ‘‘ཀཏརཀུལཱ ནུ ཁོ ཨེས པབྦཛིཏོ’’ཏི ཨཱཝཛྫེནྟོ ‘‘སུཝཎྞཀཱརཀུལཱ’’ཏི ཉཏྭཱ ཨཏཱིཏེ ཨཏྟབྷཱཝེ ཨོལོཀེནྟོ ཏསྶ སུཝཎྞཀཱརཀུལེཡེཝ པཊིཔཱཊིཡཱ ནིབྦཏྟཱནི པཉྩ ཨཏྟབྷཱཝསཏཱནི དིསྭཱ ‘‘ཨིམིནཱ དཧརེན དཱིགྷརཏྟཾ སུཝཎྞཀཱརཀམྨཾ ཀརོནྟེན ཀཎིཀཱརཔུཔྥཔདུམཔུཔྥཱདཱིནི ཀརིསྶཱམཱིཏི རཏྟསུཝཎྞམེཝ སམྤརིཝཏྟིཏཾ, ཏསྨཱ ཨིམསྶ ཨསུབྷཔཊིཀཱུལཀམྨཊྛཱནཾ ན ཝཊྚཏི, མནཱཔམེཝསྶ ཀམྨཊྛཱནཾ སཔྤཱཡ’’ནྟི ཙིནྟེཏྭཱ, ‘‘སཱརིཔུཏྟ, ཏཡཱ ཀམྨཊྛཱནཾ དཏྭཱ ཙཏྟཱརོ མཱསེ ཀིལམིཏཾ བྷིཀྑུཾ ཨཛྫ པཙྪཱབྷཏྟེཡེཝ ཨརཧཏྟཾ པཏྟཾ པསྶིསྶསི, གཙྪ ཏྭ’’ནྟི ཐེརཾ ཨུཡྻོཛེཏྭཱ ཨིདྡྷིཡཱ ཙཀྐམཏྟཾ ¶ སུཝཎྞཔདུམཾ མཱཔེཏྭཱ པཏྟེཧི ཙེཝ ནཱལེཧི ཙ ཨུདཀབིནྡཱུནི མུཉྩནྟཾ ཝིཡ ཀཏྭཱ ‘‘བྷིཀྑུ ཨིམཾ པདུམཾ ཨཱདཱཡ ཝིཧཱརཔཙྩནྟེ ཝཱལུཀརཱསིམྷི ཋཔེཏྭཱ སམྨུཁཊྛཱནེ པལླངྐེན ནིསཱིདིཏྭཱ ‘ལོཧིཏཀཾ ལོཧིཏཀ’ནྟི པརིཀམྨཾ ཀརོཧཱི’’ཏི ཨདཱསི. ཏསྶ སཏྠུཧཏྠཏོ པདུམཾ གཎྷནྟསྶེཝ ཙིཏྟཾ པསཱིདི. སོ ཝིཧཱརཔཙྩནྟཾ གནྟྭཱ ཝཱལུཀཾ ཨུསྶཱཔེཏྭཱ ཏཏྠ པདུམནཱལཾ པཝེསེཏྭཱ སམྨུཁེ པལླངྐེན ནིསིནྣོ ‘‘ལོཧིཏཀཾ ལོཧིཏཀ’’ནྟི པརིཀམྨཾ ཨཱརབྷི. ཨཐསྶ ཏངྑཎཉྙེཝ ནཱིཝརཎཱནི ཝིཀྑམྦྷིཾསུ, ཨུཔཙཱརཛ྄ཛྷཱནཾ ཨུཔྤཛྫི. ཏདནནྟརཾ པཋམཛ྄ཛྷཱནཾ ནིབྦཏྟེཏྭཱ པཉྩཧཱཀཱརེཧི ཝསཱིབྷཱཝཾ པཱཔེཏྭཱ ཡཐཱནིསིནྣོཝ དུཏིཡཛ྄ཛྷཱནཱདཱིནིཔི པཏྭཱ ཝསཱིབྷཱུཏོ ཙཏུཏྠཛ྄ཛྷཱནེན ཛྷཱནཀཱིལ༹ཾ ཀཱིལ༹ནྟོ ནིསཱིདི.

སཏྠཱ ཏསྶ ཛྷཱནཱནཾ ཨུཔྤནྣབྷཱཝཾ ཉཏྭཱ ‘‘སཀྑིསྶཏི ནུ ཁོ ཨེས ཨཏྟནོ དྷམྨཏཱཡ ཨུཏྟརི ཝིསེསཾ ནིབྦཏྟེཏུ’’ནྟི ཨོལོཀེནྟོ ‘‘ན སཀྑིསྶཏཱི’’ཏི ཉཏྭཱ ‘‘ཏཾ པདུམཾ མིལཱཡཏཱུ’’ཏི ཨདྷིཊྛཧི. ཏཾ ཧཏྠེཧི མདྡིཏཔདུམཾ མིལཱཡནྟཾ ཝིཡ ཀཱལ༹ཝཎྞཾ ཨཧོསི. སོ ཛྷཱནཱ ཝུཊྛཱཡ ཏཾ ཨོལོཀེཏྭཱ ‘‘ཀིཾ ནུ ཁོ ཨིམཾ པདུམཾ ཛརཱཡ པཧཊཾ པཉྙཱཡཏི, ཨནུཔཱདིཎྞཀེཔི ཨེཝཾ ཛརཱཡ ཨབྷིབྷུཡྻམཱནེ ཨུཔཱདིཎྞཀེ ཀཐཱཝ ནཏྠི. ཨིདམྤི ཧི ཛརཱ ཨབྷིབྷཝིསྶཏཱི’’ཏི ཨནིཙྩལཀྑཎཾ པསྶི ¶ . ཏསྨིཾ པན དིཊྛེ དུཀྑལཀྑཎཉྩ ཨནཏྟལཀྑཎཉྩ དིཊྛམེཝ ཧོཏི. ཏསྶ ཏཡོ བྷཝཱ ཨཱདིཏྟཱ ཝིཡ ཀཎྜེ བདྡྷཀུཎཔཱ ཝིཡ ཙ ཁཱཡིཾསུ. ཏསྨིཾ ཁཎེ ཏསྶ ཨཝིདཱུརེ ཀུམཱརཀཱ ཨེཀཾ སརཾ ཨོཏརིཏྭཱ ཀུམུདཱནི བྷཉྫིཏྭཱ ཐལེ རཱསིཾ ཀརོནྟི. སོ ཛལེ ཙ ཐལེ ཙ ཀུམུདཱནི ཨོལོཀེསི. ཨཐསྶ ཛལེ ཀུམུདཱནི ཨབྷིརཱུཔཱནི ཨུདཀཔགྒྷརནྟཱནི ཝིཡ ཨུཔཊྛཧིཾསུ, ཨིཏརཱནི ཨགྒགྒེསུ པརིམིལཱཏཱནི ¶ ¶ . སོ ‘‘ཨནུཔཱདིཎྞཀཾ ཛརཱ ཨེཝཾ པཧརཏི, ཨུཔཱདིཎྞཀཾ ཀིཾ པན ན པཧརིསྶཏཱི’’ཏི སུཊྛུཏརཾ ཨནིཙྩལཀྑཎཱདཱིནི ཨདྡས. སཏྠཱ ‘‘པཱཀཊཱིབྷཱུཏཾ ཨིདཱནི ཨིམསྶ བྷིཀྑུནོ ཀམྨཊྛཱན’’ནྟི ཉཏྭཱ གནྡྷཀུཊིཡཾ ནིསིནྣཀོཝ ཨོབྷཱསཾ མུཉྩི, སོ ཏསྶ མུཁཾ པཧརི. ཨཐསྶ ‘‘ཀིཾ ནུ ཁོ ཨེཏ’’ནྟི ཨོལོཀེནྟསྶ སཏྠཱ ཨཱགནྟྭཱ སམྨུཁེ ཋིཏོ ཝིཡ ཨཧོསི. སོ ཨུཊྛཱཡ ཨཉྫལིཾ པགྒཎྷི. ཨཐསྶ སཏྠཱ སཔྤཱཡཾ སལླཀྑེཏྭཱ ཨིམཾ གཱཐམཱཧ –

‘‘ཨུཙྪིནྡ སིནེཧམཏྟནོ, ཀུམུདཾ སཱརདིཀཾཝ པཱཎིནཱ;

སནྟིམགྒམེཝ བྲཱུཧཡ, ནིབྦཱནཾ སུགཏེན དེསིཏ’’ནྟི.

ཏཏྠ ཨུཙྪིནྡཱཏི ཨརཧཏྟམགྒེན ཨུཙྪིནྡ. སཱརདིཀནྟི སརདཀཱལེ ནིབྦཏྟཾ. སནྟིམགྒནྟི ནིབྦཱནགཱམིཾ ¶ ཨཊྛངྒིཀཾ མགྒཾ. བྲཱུཧཡཱཏི ཝཌྜྷཡ. ནིབྦཱནཉྷི སུགཏེན དེསིཏཾ, ཏསྨཱ ཏསྶ མགྒཾ བྷཱཝེཧཱིཏི ཨཏྠོ.

དེསནཱཝསཱནེ སོ བྷིཀྑུ ཨརཧཏྟེ པཏིཊྛཧི.

ཨིདྷ ཝསྶནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཧཱདྷནཝཱཎིཛཾ ནཱམ ཨཱརབྦྷ ཀཐེསི.

སོ ཀིར བཱརཱཎསིཏོ ཀུསུམྦྷརཏྟཱནཾ ཝཏྠཱནཾ པཉྩ སཀཊསཏཱནི པཱུརེཏྭཱ ཝཎིཛྫཱཡ སཱཝཏྠིཾ ཨཱགཏོ ནདཱིཏཱིརཾ པཏྭཱ ‘‘སྭེ ནདིཾ ཨུཏྟརིསྶཱམཱི’’ཏི ཏཏྠེཝ སཀཊཱནི མོཙེཏྭཱ ཝསི. རཏྟིཾ མཧཱམེགྷོ ཨུཊྛཧིཏྭཱ ཝསྶི. ནདཱི སཏྟཱཧཾ ཨུདཀསྶ པཱུརཱ ཨཊྛཱསི. ནཱགརཱཔི སཏྟཱཧཾ ནཀྑཏྟཾ ཀཱིལི༹ཾསུ. ཀུསུམྦྷརཏྟེཧི ཝཏྠེཧི ཀིཙྩཾ ན ནིཊྛིཏཾ. ཝཱཎིཛོ ཙིནྟེསི – ‘‘ཨཧཾ དཱུརཾ ཨཱགཏོ. སཙེ པུན གམིསྶཱམི, པཔཉྩོ བྷཝིསྶཏི. ཨིདྷེཝ ཝསྶཉྩ ཧེམནྟཉྩ གིམྷཉྩ ¶ མམ ཀམྨཾ ཀརོནྟོ ཝསིཏྭཱ ཨིམཱནི ཝིཀྐིཎིསྶཱམཱི’’ཏི. སཏྠཱ ནགརེ པིཎྜཱཡ ཙརནྟོ ཏསྶ ཙིཏྟཾ ཉཏྭཱ སིཏཾ པཱཏུཀརིཏྭཱ ཨཱནནྡཏྠེརེན སིཏཀཱརཎཾ པུཊྛོ ཨཱཧ – ‘‘དིཊྛོ ¶ ཏེ, ཨཱནནྡ, མཧཱདྷནཝཱཎིཛོ’’ཏི? ‘‘ཨཱམ, བྷནྟེ’’ཏི. སོ ཨཏྟནོ ཛཱིཝིཏནྟརཱཡཾ ཨཛཱནིཏྭཱ ¶ ཨིམཾ སཾཝཙྪརཾ ཨིདྷེཝ ཝསིཏྭཱ བྷཎྜཾ ཝིཀྐིཎིཏུཾ ཙིཏྟམཀཱསཱིཏི. ‘‘ཀིཾ པན ཏསྶ, བྷནྟེ, ཨནྟརཱཡོ བྷཝིསྶཏཱི’’ཏི? སཏྠཱ ‘‘ཨཱམཱནནྡ, སཏྟཱཧམེཝ ཛཱིཝིཏྭཱ སོ མཙྩུམུཁེ པཏིསྶཏཱི’’ཏི ཝཏྭཱ ཨིམཱ གཱཐཱ ཨབྷཱསི –

‘‘ཨཛྫེཝ ཀིཙྩམཱཏཔྤཾ, ཀོ ཛཉྙཱ མརཎཾ སུཝེ;

ན ཧི ནོ སངྒརཾ ཏེན, མཧཱསེནེན མཙྩུནཱ.

‘‘ཨེཝཾ ཝིཧཱརིཾ ཨཱཏཱཔིཾ, ཨཧོརཏྟམཏནྡིཏཾ;

ཏཾ ཝེ བྷདྡེཀརཏྟོཏི, སནྟོ ཨཱཙིཀྑཏེ མུནཱི’’ཏི. (མ. ནི. ༣.༢༧༢);

གཙྪཱམིསྶ, བྷནྟེ, ཨཱརོཙེསྶཱམཱིཏི. ཝིསྶཏྠོ གཙྪཱནནྡཱཏི. ཐེརོ སཀཊཊྛཱནཾ གནྟྭཱ བྷིཀྑཱཡ ཙརི. ཝཱཎིཛོ ཐེརཾ ཨཱཧཱརེན པཏིམཱནེསི. ཨཐ ནཾ ཐེརོ ཨཱཧ – ‘‘ཀིཏྟཀཾ ཀཱལཾ ཨིདྷ ཝསིསྶསཱི’’ཏི? ‘‘བྷནྟེ, ཨཧཾ དཱུརཏོ ཨཱགཏོ’’. སཙེ པུན གམིསྶཱམི, པཔཉྩོ བྷཝིསྶཏི, ཨིམཾ སཾཝཙྪརཾ ཨིདྷ ཝསིཏྭཱ བྷཎྜཾ ཝིཀྐིཎིཏྭཱ གམིསྶཱམཱིཏི. ཨུཔཱསཀ, དུཛྫཱནོ ཛཱིཝིཏནྟརཱཡོ, ཨཔྤམཱདཾ ཀཱཏུཾ ཝཊྚཏཱིཏི. ‘‘ཀིཾ པན, བྷནྟེ, ཨནྟརཱཡོ བྷཝིསྶཏཱི’’ཏི. ‘‘ཨཱམ, ཨུཔཱསཀ, སཏྟཱཧམེཝ ཏེ ཛཱིཝིཏཾ པཝཏྟིསྶཏཱིཏི’’ ¶ . སོ སཾཝིགྒམཱནསོ ཧུཏྭཱ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ སཏྟཱཧཾ མཧཱདཱནཾ དཏྭཱ ཨནུམོདནཏྠཱཡ པཏྟཾ གཎྷི. ཨཐསྶ སཏྠཱ ཨནུམོདནཾ ཀརོནྟོ, ‘‘ཨུཔཱསཀ, པཎྜིཏེན ནཱམ ‘ཨིདྷེཝ ཝསྶཱདཱིནི ཝསིསྶཱམི, ཨིདཉྩིདཉྩ ཀམྨཾ པཡོཛེསྶཱམཱི’ཏི ཙིནྟེཏུཾ ན ཝཊྚཏི, ཨཏྟནོ པན ཛཱིཝིཏནྟརཱཡམེཝ ཙིནྟེཏུཾ ཝཊྚཏཱི’’ཏི ཝཏྭཱ ཨིམཾ གཱཐམཱཧ –

‘‘ཨིདྷ ཝསྶཾ ཝསིསྶཱམི, ཨིདྷ ཧེམནྟགིམྷིསུ;

ཨིཏི བཱལོ ཝིཙིནྟེཏི, ཨནྟརཱཡཾ ན བུཛ྄ཛྷཏཱི’’ཏི.

ཏཏྠ ཨིདྷ ཝསྶནྟི ཨིམསྨིཾ ཋཱནེ ཨིདཉྩིདཉྩ ཀརོནྟོ ཙཏུམཱསཾ ཝསྶཾ ཝསིསྶཱམི. ཧེམནྟགིམྷིསཱུཏི ཧེམནྟགིམྷེསུཔི ‘‘ཙཏྟཱརོ མཱསེ ཨིདཉྩིདཉྩ ཀརོནྟོ ཨིདྷེཝ ཝསིསྶཱམཱི’’ཏི ཨེཝཾ དིཊྛདྷམྨིཀསམྤརཱཡིཀཾ ཨཏྠཾ ཨཛཱནནྟོ བཱལོ ཝིཙིནྟེཏི. ཨནྟརཱཡནྟི ‘‘ཨསུཀསྨིཾ ནཱམ ཀཱལེ ཝཱ དེསེ ཝཱ ཝཡེ ཝཱ མརིསྶཱམཱི’’ཏི ཨཏྟནོ ཛཱིཝིཏནྟརཱཡཾ ན བུཛ྄ཛྷཏཱིཏི.

དེསནཱཝསཱནེ ¶ སོ ཝཱཎིཛོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསི ¶ . ཝཱཎིཛོཔི སཏྠཱརཾ ཨནུགནྟྭཱ ནིཝཏྟིཏྭཱ ‘‘སཱིསརོགོ ཝིཡ མེ ཨུཔྤནྣོ’’ཏི སཡནེ ནིཔཛྫི, ཏཐཱནིཔནྣོཝ ཀཱལཾ ཀཏྭཱ ཏུསིཏཝིམཱནེ ནིབྦཏྟི.

ཏཾ ¶ པུཏྟཔསུསམྨཏྟནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀིསཱགོཏམིཾ ཨཱརབྦྷ ཀཐེསི. ཝཏྠུ སཧསྶཝགྒེ –

‘‘ཡོ ཙ ཝསྶསཏཾ ཛཱིཝེ, ཨཔསྶཾ ཨམཏཾ པདཾ;

ཨེཀཱཧཾ ཛཱིཝིཏཾ སེཡྻོ, པསྶཏོ ཨམཏཾ པད’’ནྟི. (དྷ. པ. ༡༡༤) –

གཱཐཱཝཎྞནཱཡ ཝིཏྠཱརེཏྭཱ ཀཐིཏཾ. ཏདཱ ཧི སཏྠཱ ‘‘ཀིསཱགོཏམི ལདྡྷཱ ཏེ ཨེཀཙྪརམཏྟཱ སིདྡྷཏྠཀཱ’’ཏི ཨཱཧ. ‘‘ན ལདྡྷཱ, བྷནྟེ, སཀལགཱམེ ཛཱིཝནྟེཧི ཀིར མཏཀཱ ཨེཝ བཧུཏརཱ’’ཏི. ཨཐ ནཾ སཏྠཱ ‘‘ཏྭཾ ‘མམེཝ པུཏྟོ མཏོ’ཏི སལླཀྑེསི, དྷུཝདྷམྨོ ཨེས སབྦསཏྟཱནཾ. མཙྩུརཱཛཱ ཧི སབྦསཏྟེ ཨཔརིཔུཎྞཛ྄ཛྷཱསཡེ ཨེཝ མཧོགྷོ ཝིཡ པརིཀཌྜྷམཱནོ ཨཔཱཡསམུདྡེ པཀྑིཔཏཱི’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཏཾ པུཏྟཔསུསམྨཏྟཾ, བྱཱསཏྟམནསཾ ནརཾ;

སུཏྟཾ གཱམཾ མཧོགྷོཝ, མཙྩུ ཨཱདཱཡ གཙྪཏཱི’’ཏི.

ཏཏྠ ཏཾ པུཏྟཔསུསམྨཏྟནྟི ཏཾ རཱུཔབལཱདིསམྤནྣེ པུཏྟེ ཙ པསཱུ ཙ ལབྷིཏྭཱ ‘‘མམ པུཏྟཱ ¶ ཨབྷིརཱུཔཱ བལསམྤནྣཱ པཎྜིཏཱ སབྦཀིཙྩསམཏྠཱ, མམ གོཎཱ ཨབྷིརཱུཔཱ ཨརོགཱ མཧཱབྷཱརཝཧཱ, མམ གཱཝཱི བཧུཁཱིརཱ’’ཏི ཨེཝཾ པུཏྟེཧི ཙ པསཱུཧི ཙ སམྨཏྟཾ ནརཾ. བྱཱསཏྟམནསནྟི ཧིརཉྙསུཝཎྞཱདཱིསུ ཝཱ པཏྟཙཱིཝརཱདཱིསུ ཝཱ ཀིཉྩིདེཝ ལབྷིཏྭཱ ཏཏོ ཨུཏྟརིཏརཾ པཏྠནཏཱཡ ཨཱསཏྟམཱནསཾ ཝཱ, ཙཀྑུཝིཉྙེཡྻཱདཱིསུ ཨཱརམྨཎེསུ ཝུཏྟཔྤཀཱརེསུ ཝཱ པརིཀྑཱརེསུ ཡཾ ཡཾ ལདྡྷཾ ཧོཏི, ཏཏྠ ཏཏྠེཝ ལགྒནཏཱཡ བྱཱསཏྟམཱནསཾ ¶ ཝཱ. སུཏྟཾ གཱམནྟི ནིདྡཾ ཨུཔགཏཾ སཏྟནིཀཱཡཾ. མཧོགྷོཝཱཏི ཡཐཱ ཨེཝརཱུཔཾ གཱམཾ གམྦྷཱིརཝིཏྠཏོ མཧནྟོ མཧཱནདཱིནཾ ཨོགྷོ ¶ ཨནྟམསོ སུནཁམྤི ཨསེསེཏྭཱ སབྦཾ ཨཱདཱཡ གཙྪཏི, ཨེཝཾ ཝུཏྟཔྤཀཱརཾ ནརཾ མཙྩུ ཨཱདཱཡ གཙྪཏཱིཏི ཨཏྠོ.

དེསནཱཝསཱནེ ཀིསཱགོཏམཱི སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ན ¶ སནྟི པུཏྟཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཊཱཙཱརཾ ཨཱརབྦྷ ཀཐེསི. ཝཏྠུ སཧསྶཝགྒེ –

‘‘ཡོ ཙ ཝསྶསཏཾ ཛཱིཝེ, ཨཔསྶཾ ཨུདཡབྦཡཾ;

ཨེཀཱཧཾ ཛཱིཝིཏཾ སེཡྻོ, པསྶཏོ ཨུདཡབྦཡ’’ནྟི. (དྷ. པ. ༡༡༣) –

གཱཐཱཝཎྞནཱཡ ཝིཏྠཱརེཏྭཱ ཀཐིཏཾ. ཏདཱ པན སཏྠཱ པཊཱཙཱརཾ ཏནུབྷཱུཏསོཀཾ ཉཏྭཱ ‘‘པཊཱཙཱརེ པུཏྟཱདཡོ ནཱམ པརལོཀཾ གཙྪནྟསྶ ཏཱཎཾ ཝཱ ལེཎཾ ཝཱ སརཎཾ ཝཱ བྷཝིཏུཾ ན སཀྐོནྟི, ཏསྨཱ ཝིཛྫམཱནཱཔི ཏེ ན སནྟིཡེཝ. པཎྜིཏེན པན སཱིལཾ ཝིསོདྷེཏྭཱ ཨཏྟནོ ནིབྦཱནགཱམིམགྒམེཝ སོདྷེཏུཾ ཝཊྚཏཱི’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ན སནྟི པུཏྟཱ ཏཱཎཱཡ, ན པིཏཱ ནཱཔི བནྡྷཝཱ;

ཨནྟཀེནཱདྷིཔནྣསྶ, ནཏྠི ཉཱཏཱིསུ ཏཱཎཏཱ.

‘‘ཨེཏམཏྠཝསཾ ཉཏྭཱ, པཎྜིཏོ སཱིལསཾཝུཏོ;

ནིབྦཱནགམནཾ མགྒཾ, ཁིཔྤམེཝ ཝིསོདྷཡེ’’ཏི.

ཏཏྠ ཏཱཎཱཡཱཏི ཏཱཎབྷཱཝཱཡ པཏིཊྛཱནཏྠཱཡ. བནྡྷཝཱཏི པུཏྟེ ཙ མཱཏཱཔིཏརོ ཙ ཋཔེཏྭཱ ཨཝསེསཱ ཉཱཏིསུཧཛྫཱ. ཨནྟཀེནཱདྷིཔནྣསྶཱཏི མརཎེན ཨབྷིབྷཱུཏསྶ. པཝཏྟིཡཉྷི པུཏྟཱདཡོ ཨནྣཔཱནཱདིདཱནེན ¶ ཙེཝ ཨུཔྤནྣཀིཙྩནིཏྠརཎེན ཙ ཏཱཎཱ ཧུཏྭཱཔི མརཎཀཱལེ ཀེནཙི ཨུཔཱཡེན ¶ མརཎཾ ¶ པཊིབཱཧིཏུཾ ཨསམཏྠཏཱཡ ཏཱཎཏྠཱཡ ལེཎཏྠཱཡ ན སནྟི ནཱམ. ཏེནེཝ ཝུཏྟཾ – ‘‘ནཏྠི ཉཱཏཱིསུ ཏཱཎཏཱ’’ཏི. ཨེཏམཏྠཝསནྟི ཨེཝཾ ཏེསཾ ཨཉྙམཉྙསྶ ཏཱཎཾ བྷཝིཏུཾ ཨསམཏྠབྷཱཝསངྑཱཏཾ ཀཱརཎཾ ཛཱནིཏྭཱ པཎྜིཏོ ཙཏུཔཱརིསུདྡྷིསཱིལེན སཾཝུཏོ རཀྑིཏགོཔིཏོ ཧུཏྭཱ ནིབྦཱནགམནཾ ཨཊྛངྒིཀཾ མགྒཾ སཱིགྷཾ སཱིགྷཾ ཝིསོདྷེཡྻཱཏི ཨཏྠོ.

དེསནཱཝསཱནེ པཊཱཙཱརཱ སོཏཱཔཏྟིཕལེ པཏིཊྛཧི, ཨཉྙེ ཙ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཏྟཱསུཁཔརིཙྩཱགཱཏི ¶ ¶ ¶ ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨཏྟནོ པུབྦཀམྨཾ ཨཱརབྦྷ ཀཐེསི.

ཨེཀསྨིཉྷི སམཡེ ཝེསཱལཱི ཨིདྡྷཱ ཨཧོསི ཕཱིཏཱ བཧུཛནཱ ཨཱཀིཎྞམནུསྶཱ. ཏཏྠ ཧི ཝཱརེན ཝཱརེན རཛྫཾ ཀཱརེནྟཱནཾ ཁཏྟིཡཱནཾཡེཝ སཏྟསཏཱདྷིཀཱནི སཏྟསཧསྶཱནི སཏྟ ཙ ཁཏྟིཡཱ ཨཧེསུཾ. ཏེསཾ ཝསནཏྠཱཡ ཏཏྟཀཱཡེཝ པཱསཱདཱ ཏཏྟཀཱནེཝ ཀཱུཊཱགཱརཱནི ཨུཡྻཱནེ ཝིཧཱརཏྠཱཡ ཏཏྟཀཱཡེཝ ཨཱརཱམཱ ཙ པོཀྑརཎིཡོ ཙ ཨཧེསུཾ. སཱ ཨཔརེན སམཡེན དུབྦྷིཀྑཱ ཨཧོསི དུསྶསྶཱ. ཏཏྠ ཚཱཏཀབྷཡེན པཋམཾ དུགྒཏམནུསྶཱ ཀཱལམཀཾསུ. ཏེསཾ ཏེསཾ ཏཏྠ ཏཏྠ ཚཌྜིཏཱནཾ ཀུཎཔཱནཾ གནྡྷེན ཨམནུསྶཱ ནགརཾ པཝིསིཾསུ. ཨམནུསྶཱུཔདྡཝེན བཧུཏརཱ ཀཱལམཀཾསུ. ཏེསཾ ¶ ཀུཎཔགནྡྷཔཊིཀྐཱུལཏཱཡ སཏྟཱནཾ ཨཧིཝཱཏརོགོ ཨུཔྤཛྫི. ཨེཝཾ དུབྦྷིཀྑབྷཡཾ ཨམནུསྶབྷཡཾ རོགབྷཡནྟི ཏཱིཎི བྷཡཱནི ཨུཔྤཛྫིཾསུ.

ནགརཝཱསིནོ སནྣིཔཏིཏྭཱ རཱཛཱནཾ ཨཱཧཾསུ – ‘‘མཧཱརཱཛ, ཨིམསྨིཾ ནགརེ ཏཱིཎི བྷཡཱནི ཨུཔྤནྣཱནི, ཨིཏོ པུབྦེ ཡཱཝ སཏྟམཱ རཱཛཔརིཝཊྚཱ ཨེཝརཱུཔཾ བྷཡཾ ནཱམ ན ཨུཔྤནྣཔུབྦཾ. ཨདྷམྨིཀརཱཛཱུནཉྷི ཀཱལེ ཨེཝརཱུཔཾ བྷཡཾ ཨུཔྤཛྫཏཱི’’ཏི. རཱཛཱ སནྠཱགཱརེ སབྦེསཾ སནྣིཔཱཏཾ ཀཱརེཏྭཱ ‘‘སཙེ མེ ཨདྷམྨིཀབྷཱཝོ ཨཏྠི, ཏཾ ཝིཙིནཐཱ’’ཏི ཨཱཧ. ཝེསཱལིཝཱསིནོ སབྦཾ པཝེཎི ཝིཙིནནྟཱ རཉྙོ ཀཉྩི དོསཾ ཨདིསྭཱ, ‘‘མཧཱརཱཛ, ནཏྠི ཏེ དོསོ’’ཏི ཝཏྭཱ ‘‘ཀཐཾ ནུ ཁོ ཨིདཾ ཨམྷཱཀཾ བྷཡཾ ཝཱུཔསམཾ གཙྪེཡྻཱ’’ཏི མནྟཡིཾསུ. ཏཏྠ ཨེཀཙྩེཧི ‘‘བལིཀམྨེན ཨཱཡཱཙནཱཡ མངྒལཀིརིཡཱཡཱ’’ཏི ཝུཏྟེ སབྦམྤི ཏཾ ཝིདྷིཾ ཀཏྭཱ པཊིབཱཧིཏུཾ ནཱསཀྑིཾསུ. ཨཐཉྙེ ཨེཝམཱཧཾསུ – ‘‘ཚ སཏྠཱརོ མཧཱནུབྷཱཝཱ, ཏེསུ ཨིདྷཱགཏམཏྟེསུ བྷཡཾ ཝཱུཔསམེཡྻཱ’’ཏི. ཨཔརེ ‘‘སམྨཱསམྦུདྡྷོ ལོཀེ ཨུཔྤནྣོ. སོ ཧི བྷགཝཱ སབྦསཏྟཧིཏཱཡ དྷམྨཾ དེསེཏི, མཧིདྡྷིཀོ ¶ མཧཱནུབྷཱཝོ. ཏསྨིཾ ཨིདྷ ཨཱགཏེ ཨིམཱནི ¶ བྷཡཱནི ཝཱུཔསམེཡྻུ’’ནྟི ཨཱཧཾསུ. ཏེསཾ ཝཙནཾ སབྦེཔི ཨབྷིནནྡིཏྭཱ ‘‘ཀཧཾ ནུ ཁོ སོ བྷགཝཱ ཨེཏརཧི ཝིཧརཏཱི’’ཏི ཨཱཧཾསུ ¶ . ཏདཱ པན སཏྠཱ ཨུཔཀཊྛཱཡ ཝསྶཱུཔནཱཡིཀཱཡ རཉྙོ བིམྦིསཱརསྶ པཊིཉྙཾ དཏྭཱ ཝེལུ༹ཝནེ ཝིཧརཏི. ཏེན ཙ སམཡེན བིམྦིསཱརསམཱགམེ བིམྦིསཱརེན སདྡྷིཾ སོཏཱཔཏྟིཕལཾ པཏྟོ མཧཱལི ནཱམ ལིཙྪཝཱི ཏསྶཾ པརིསཱཡཾ ནིསིནྣོ ཧོཏི.

ཝེསཱལིཝཱསིནོ མཧནྟཾ པཎྞཱཀཱརཾ སཛྫེཏྭཱ རཱཛཱནཾ བིམྦིསཱརཾ སཉྙཱཔེཏྭཱ ‘‘སཏྠཱརཾ ཨིདྷཱནེཐཱ’’ཏི མཧཱལིཉྩེཝ ལིཙྪཝིཾ པུརོཧིཏཔུཏྟཉྩ པཧིཎིཾསུ. ཏེ གནྟྭཱ རཉྙོ པཎྞཱཀཱརཾ དཏྭཱ ཏཾ པཝཏྟིཾ ནིཝེདེཏྭཱ, ‘‘མཧཱརཱཛ, སཏྠཱརཾ ཨམྷཱཀཾ ནགརཾ པེསེཐཱ’’ཏི ཡཱཙིཾསུ. རཱཛཱ ‘‘ཏུམྷེཝ ཛཱནཱཐཱ’’ཏི ན སམྤཊིཙྪི. ཏེ བྷགཝནྟཾ ཨུཔསངྐམིཏྭཱ ཝནྡིཏྭཱ ཡཱཙིཾསུ – ‘‘བྷནྟེ, ཝེསཱལིཡཾ ཏཱིཎི བྷཡཱནི ཨུཔྤནྣཱནི, ཏཱནི ཏུམྷེསུ ཨཱགཏེསུ ཝཱུཔསམིསྶནྟི, ཨེཐ, བྷནྟེ, གཙྪཱམཱ’’ཏི. སཏྠཱ ཏེསཾ ཝཙནཾ སུཏྭཱ ཨཱཝཛྫེནྟོ ‘‘ཝེསཱལིཡཾ རཏནསུཏྟེ (ཁུ. པཱ. ༦.༡ ཨཱདཡོ; སུ. ནི. ༢༢༤ ཨཱདཡོ) ཝུཏྟེ སཱ རཀྑཱ ཙཀྐཝཱལཱ༹ནཾ ཀོཊིསཏསཧསྶཾ ཕརིསྶཏི, སུཏྟཔརིཡོསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ¶ བྷཝིསྶཏི, ཏཱནི ཙ བྷཡཱནི ཝཱུཔསམིསྶནྟཱི’’ཏི ཉཏྭཱ ཏེསཾ ཝཙནཾ སམྤཊིཙྪི.

རཱཛཱ བིམྦིསཱརོ ‘‘སཏྠཱརཱ ཀིར ཝེསཱལིགམནཾ སམྤཊིཙྪིཏ’’ནྟི སུཏྭཱ ནགརེ གྷོསནཾ ཀཱརེཏྭཱ སཏྠཱརཾ ཨུཔསངྐམིཏྭཱ ‘‘ཀིཾ, བྷནྟེ, ཝེསཱལིགམནཾ སམྤཊིཙྪིཏ’’ནྟི པུཙྪིཏྭཱ ‘‘ཨཱམ, མཧཱརཱཛཱ’’ཏི ཝུཏྟེ ‘‘ཏེན ཧི, བྷནྟེ, ཨཱགམེཐ, ཏཱཝ མགྒཾ པཊིཡཱདེསྶཱམཱི’’ཏི ཝཏྭཱ རཱཛགཧསྶ ཙ གངྒཱཡ ཙ ཨནྟརེ པཉྩཡོཛནབྷཱུམིཾ སམཾ ཀཱརེཏྭཱ ཡོཛནེ ཡོཛནེ ཝིཧཱརཾ པཏིཊྛཱཔེཏྭཱ སཏྠུ གམནཀཱལཾ ཨཱརོཙེསི. སཏྠཱ པཉྩཧི བྷིཀྑུསཏེཧི སདྡྷིཾ མགྒཾ པཊིཔཛྫི. རཱཛཱ ཡོཛནནྟརེ ཛཎྞུམཏྟེན ཨོདྷིནཱ པཉྩཝཎྞཱནི པུཔྥཱནི ཨོཀིརཱཔེཏྭཱ དྷཛཔཊཱཀཀདལཱིཨཱདཱིནི ཨུསྶཱཔེཏྭཱ བྷགཝཏོ ཚཏྟཱཏིཚཏྟཾ ཀཏྭཱ དྭེ སེཏཙྪཏྟཱནི ཨེཀམེཀསྶ བྷིཀྑུནོ ཨེཀམེཀཾ སེཏཙྪཏྟཾ ཨུཔརི དྷཱརེཏྭཱ སཔརིཝཱརོ པུཔྥགནྡྷཱདཱིཧི པཱུཛཾ ཀརོནྟོ སཏྠཱརཾ ཨེཀེཀསྨིཾ ཝིཧཱརེ ཝསཱཔེཏྭཱ མཧཱདཱནཱདཱིནི དཏྭཱ པཉྩཧི དིཝསེཧི གངྒཱཏཱིརཾ པཱཔེཏྭཱ ཏཏྠ ¶ ནཱཝཾ ཨལངྐརོནྟོ ཝེསཱལིཀཱནཾ སཱསནཾ པེསེསི – ‘‘མགྒཾ པཊིཡཱདེཏྭཱ སཏྠུ པཙྩུགྒམནཾ ཀརོནྟཱུ’’ཏི. ཏེ ‘‘དིགུཎཾ པཱུཛཾ ཀརིསྶཱམཱ’’ཏི ཝེསཱལིཡཱ ཙ གངྒཱཡ ཙ ཨནྟརེ ཏིཡོཛནབྷཱུམིཾ ¶ སམཾ ཀཱརེཏྭཱ བྷགཝཏོ ཙཏཱུཧི སེཏཙྪཏྟེཧི ཨེཀམེཀསྶ བྷིཀྑུནོ དྭཱིཧི དྭཱིཧི སེཏཙྪཏྟེཧི ཚཏྟཱཏིཚཏྟཱནི སཛྫེཏྭཱ པཱུཛཾ ཀུརུམཱནཱ ཨཱགནྟྭཱ གངྒཱཏཱིརེ ཨཊྛཾསུ. བིམྦིསཱརོ དྭེ ནཱཝཱ སངྒྷཱཊེཏྭཱ མཎྜཔཾ ཀཱརེཏྭཱ པུཔྥདཱམཱདཱིཧི ཨལངྐཱརཱཔེཏྭཱ སབྦརཏནམཡཾ བུདྡྷཱསནཾ པཉྙཱཔེསི. བྷགཝཱ ཏསྨིཾ ནིསཱིདི. བྷིཀྑཱུཔི ནཱཝཾ ཨབྷིརུཧིཏྭཱ བྷགཝནྟཾ པརིཝཱརེཏྭཱ ནིསཱིདིཾསུ. རཱཛཱ ཨནུགཙྪནྟོ གལཔྤམཱཎཾ ཨུདཀཾ ཨོཏརིཏྭཱ ‘‘ཡཱཝ, བྷནྟེ, བྷགཝཱ ¶ ཨཱགཙྪཏི, ཏཱཝཱཧཾ ཨིདྷེཝ གངྒཱཏཱིརེ ཝསིསྶཱམཱི’’ཏི ཝཏྭཱ ནཱཝཾ ཨུཡྻོཛེཏྭཱ ནིཝཏྟི. སཏྠཱ ཡོཛནམཏྟཾ ཨདྡྷཱནཾ གངྒཱཡ གནྟྭཱ ཝེསཱལིཀཱནཾ སཱིམཾ པཱཔུཎི.

ལིཙྪཝཱིརཱཛཱནོ སཏྠཱརཾ པཙྩུགྒནྟྭཱ གལཔྤམཱཎཾ ཨུདཀཾ ཨོཏརིཏྭཱ ནཱཝཾ ཏཱིརཾ ཨུཔནེཏྭཱ སཏྠཱརཾ ནཱཝཱཏོ ཨོཏཱརཡིཾསུ. སཏྠཱརཱ ཨོཏརིཏྭཱ ཏཱིརེ ཨཀྐནྟམཏྟེཡེཝ མཧཱམེགྷོ ཨུཊྛཧིཏྭཱ པོཀྑརཝསྶཾ ཝསྶི. སབྦཏྠ ཛཎྞུཔྤམཱཎཨཱུརུཔྤམཱཎཀཊིཔྤམཱཎཱདཱིནི ཨུདཀཱནི སནྡནྟཱནི སབྦཀུཎཔཱནི གངྒཾ པཝེསཡིཾསུ, པརིསུདྡྷོ བྷཱུམིབྷཱགོ ཨཧོསི. ལིཙྪཝཱིརཱཛཱནོ སཏྠཱརཾ ཡོཛནེ ཡོཛནེ ཝསཱཔེཏྭཱ མཧཱདཱནཾ དཏྭཱ དིགུཎཾ པཱུཛཾ ཀརོནྟཱ ཏཱིཧི དིཝསེཧི ¶ ཝེསཱལིཾ ནཡིཾསུ. སཀྐོ དེཝརཱཛཱ དེཝགཎཔརིཝུཏོ ཨཱགམཱསི, མཧེསཀྑཱནཾ དེཝཱནཾ སནྣིཔཱཏེན ཨམནུསྶཱ ཡེབྷུཡྻེན པལཱཡིཾསུ. སཏྠཱ སཱཡཾ ནགརདྭཱརེ ཋཏྭཱ ཨཱནནྡཏྠེརཾ ཨཱམནྟེསི – ‘‘ཨིམཾ, ཨཱནནྡ, རཏནསུཏྟཾ ཨུགྒཎྷིཏྭཱ ལིཙྪཝཱིཀུམཱརེཧི སདྡྷིཾ ཝིཙརནྟོ ཝེསཱལིཡཱ ཏིཎྞཾ པཱཀཱརཱནཾ ཨནྟརེ པརིཏྟཾ ཀརོཧཱི’’ཏི.

ཐེརོ སཏྠཱརཱ དིནྣཾ རཏནསུཏྟཾ ཨུགྒཎྷིཏྭཱ སཏྠུ སེལམཡཔཏྟེན ཨུདཀཾ ཨཱདཱཡ ནགརདྭཱརེ ཋིཏོ པཎིདྷཱནཏོ པཊྛཱཡ ཏཐཱགཏསྶ དས པཱརམིཡོ དས ཨུཔཔཱརམིཡོ དས པརམཏྠཔཱརམིཡོཏི སམཏིཾས པཱརམིཡོ པཉྩ མཧཱཔརིཙྩཱགེ ལོཀཏྠཙརིཡཱ ཉཱཏཏྠཙརིཡཱ བུདྡྷཏྠཙརིཡཱཏི ཏིསྶོ ཙརིཡཱཡོ པཙྪིམབྷཝེ གབྦྷཝོཀྐནྟིཾ ཛཱཏིཾ ཨབྷིནིཀྑམནཾ པདྷཱནཙརིཡཾ བོདྷིཔལླངྐེ མཱརཝིཛཡཾ སབྦཉྙུཏཉྙཱཎཔཊིཝེདྷཾ དྷམྨཙཀྐཔཝཏྟནཾ ¶ ནཝལོཀུཏྟརདྷམྨེཏི སབྦེཔིམེ བུདྡྷགུཎེ ཨཱཝཛྫེཏྭཱ ནགརཾ པཝིསིཏྭཱ ཏིཡཱམརཏྟིཾ ཏཱིསུ པཱཀཱརནྟརེསུ པརིཏྟཾ ཀརོནྟོ ཝིཙརི. ཏེན ‘‘ཡཾཀིཉྩཱི’’ཏི ཝུཏྟམཏྟེཡེཝ ཨུདྡྷཾ ཁིཏྟཨུདཀཾ ཨམནུསྶཱནཾ ཨུཔརི པཏི. ‘‘ཡཱནཱིདྷ བྷཱུཏཱནཱི’’ཏི གཱཐཱཀཐནཏོ པཊྛཱཡ རཛཏཝཊཾསཀཱ ཝིཡ ཨུདཀབིནྡཱུནི ཨཱཀཱསེན གནྟྭཱ གིལཱནམནུསྶཱནཾ ཨུཔརི པཏིཾསུ. ཏཱཝདེཝ ཝཱུཔསནྟརོགཱ མནུསྶཱ ཨུཊྛཱཡུཊྛཱཡ ཐེརཾ པརིཝཱརེསུཾ ¶ . ‘‘ཡཾཀིཉྩཱི’’ཏི ཝུཏྟཔདཏོ པཊྛཱཡ པན ཨུདཀཕུསིཏེཧི ཕུཊྛཕུཊྛཱ སབྦེ ཨཔལཱཡནྟཱ སངྐཱརཀཱུཊབྷིཏྟིཔདེསཱདིནིསྶིཏཱ ཨམནུསྶཱ ཏེན ཏེན དྭཱརེན པལཱཡིཾསུ. དྭཱརཱནི ཨནོཀཱསཱནི ཨཧེསུཾ. ཏེ ཨོཀཱསཾ ཨལབྷནྟཱ པཱཀཱརཾ བྷིནྡིཏྭཱཔི པལཱཡིཾསུ.

མཧཱཛནོ ནགརམཛ྄ཛྷེ སནྠཱགཱརཾ སབྦགནྡྷེཧི ཨུཔལིམྤེཏྭཱ ཨུཔརི སུཝཎྞཏཱརཀཱདིཝིཙིཏྟཾ ཝིཏཱནཾ བནྡྷིཏྭཱ བུདྡྷཱསནཾ པཉྙཱཔེཏྭཱ སཏྠཱརཾ ཨཱནེསི. སཏྠཱ པཉྙཏྟེ ཨཱསནེ ནིསཱིདི. བྷིཀྑུསངྒྷོཔི ལིཙྪཝཱིགཎོཔི སཏྠཱརཾ པརིཝཱརེཏྭཱ ནིསཱིདི. སཀྐོ དེཝརཱཛཱ དེཝགཎཔརིཝུཏོ པཏིརཱུཔེ ཨོཀཱསེ ཨཊྛཱསི. ཐེརོཔི སཀལནགརཾ ཨནུཝིཙརིཏྭཱ ཝཱུཔསནྟརོགེན མཧཱཛནེན སདྡྷིཾ ¶ ཨཱགནྟྭཱ སཏྠཱརཾ ཝནྡིཏྭཱ ནིསཱིདི. སཏྠཱ པརིསཾ ཨོལོཀེཏྭཱ ཏདེཝ རཏནསུཏྟཾ ཨབྷཱསི. དེསནཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི. ཨེཝཾ པུནདིཝསེཔཱིཏི སཏྟཱཧཾ ཏདེཝ རཏནསུཏྟཾ དེསེཏྭཱ སབྦབྷཡཱནཾ ཝཱུཔསནྟབྷཱཝཾ ཉཏྭཱ ལིཙྪཝཱིགཎཾ ཨཱམནྟེཏྭཱ ཝེསཱལིཏོ ནིཀྑམི. ལིཙྪཝཱིརཱཛཱནོ དིགུཎཾ སཀྐཱརཾ ཀརོནྟཱ པུན ཏཱིཧི དིཝསེཧི སཏྠཱརཾ གངྒཱཏཱིརཾ ནཡིཾསུ.

གངྒཱཡ ནིབྦཏྟནཱགརཱཛཱནོ ཙིནྟེསུཾ – ‘‘མནུསྶཱ ཏཐཱགཏསྶ ¶ སཀྐཱརཾ ཀརོནྟི, མཡཾ ཀིཾ ན ཀརོམཱ’’ཏི. ཏེ སུཝཎྞརཛཏམཎིམཡཱ ནཱཝཱཡོ མཱཔེཏྭཱ སུཝཎྞརཛཏམཎིམཡེ པལླངྐེ པཉྙཱཔེཏྭཱ པཉྩཝཎྞཔདུམསཉྪནྣཾ ཨུདཀཾ ཀརིཏྭཱ, ‘‘བྷནྟེ, ཨམྷཱཀམྤི ཨནུགྒཧཾ ཀརོཐཱ’’ཏི ཨཏྟནོ ཨཏྟནོ ནཱཝཾ ཨབྷིརུཧཎཏྠཱཡ སཏྠཱརཾ ཡཱཙིཾསུ. ‘‘མནུསྶཱ ཙ ནཱགཱ ཙ ཏཐཱགཏསྶ པཱུཛཾ ཀརོནྟི, མཡཾ པན ཀིཾ ན ཀརོམཱ’’ཏི བྷཱུམཊྛཀདེཝེཔི ཨཱདིཾ ཀཏྭཱ ཡཱཝ ཨཀནིཊྛབྲཧྨལོཀཱ སབྦེ དེཝཱ སཀྐཱརཾ ཀརིཾསུ. ཏཏྠ ནཱགཱ ཡོཛནིཀཱནི ཚཏྟཱཏིཚཏྟཱནི ཨུཀྑིཔིཾསུ. ཨེཝཾ ཧེཊྛཱ ནཱགཱ ¶ བྷཱུམིཏལེ རུཀྑགཙྪཔབྦཏཱདཱིསུ བྷཱུམཊྛཀཱ དེཝཏཱ, ཨནྟལིཀྑེ ཨཱཀཱསཊྛདེཝཱཏི ནཱགབྷཝནཾ ཨཱདིཾ ཀཏྭཱ ཙཀྐཝཱལ༹པརིཡནྟེན ཡཱཝ བྲཧྨལོཀཱ ཚཏྟཱཏིཚཏྟཱནི ཨུསྶཱཔིཏཱནི ཨཧེསུཾ. ཚཏྟནྟརེསུ དྷཛཱ, དྷཛནྟརེསུ པཊཱཀཱ, ཏེསཾ ཨནྟརནྟརཱ པུཔྥདཱམཝཱསཙུཎྞདྷུམཱདཱིཧི སཀྐཱརོ ཨཧོསི. སབྦལངྐཱརཔཊིམཎྜིཏཱ དེཝཔུཏྟཱ ཚཎཝེསཾ གཧེཏྭཱ ཨུགྒྷོསཡམཱནཱ ཨཱཀཱསེ ཝིཙརིཾསུ. ཏཡོ ཨེཝ ཀིར སམཱགམཱ མཧནྟཱ ཨཧེསུཾ – ཡམཀཔཱཊིཧཱརིཡསམཱགམོ དེཝོརོཧཎསམཱགམོ ཨཡཾ གངྒོརོཧཎསམཱགམོཏི.

པརཏཱིརེ བིམྦིསཱརོཔི ལིཙྪཝཱིཧི ཀཏསཀྐཱརཏོ དིགུཎཾ སཀྐཱརཾ སཛྫེཏྭཱ ¶ བྷགཝཏོ ཨཱགམནཾ ཨུདིཀྑམཱནོ ཨཊྛཱསི. སཏྠཱ གངྒཱཡ ཨུབྷོསུ པསྶེསུ རཱཛཱུནཾ མཧནྟཾ པརིཙྩཱགཾ ཨོལོཀེཏྭཱ ནཱགཱདཱིནཉྩ ཨཛ྄ཛྷཱསཡཾ ཝིདིཏྭཱ ཨེཀེཀཱཡ ནཱཝཱཡ པཉྩཔཉྩབྷིཀྑུསཏཔརིཝཱརཾ ཨེཀེཀཾ ནིམྨིཏབུདྡྷཾ མཱཔེསི. སོ ཨེཀེཀསྶ སེཏཙྪཏྟསྶ ཙེཝ ཀཔྤརུཀྑསྶ ཙ པུཔྥདཱམསྶ ཙ ཧེཊྛཱ ནཱགགཎཔརིཝུཏོ ནིསིནྣོ ཧོཏི. བྷཱུམཊྛཀདེཝཏཱདཱིསུཔི ཨེཀེཀསྨིཾ ཨོཀཱསེ སཔརིཝཱརཾ ཨེཀེཀཾ ནིམྨིཏབུདྡྷཾ མཱཔེསི. ཨེཝཾ སཀལཙཀྐཝཱལ༹གབྦྷེ ཨེཀཱལངྐཱརེ ཨེཀུསྶཝེ ཨེཀཚཎེཡེཝ ཙ ཛཱཏེ སཏྠཱ ནཱགཱནམནུགྒཧཾ ཀརོནྟོ ཨེཀཾ རཏནནཱཝཾ ཨབྷིརུཧི. བྷིཀྑཱུསུཔི ཨེཀེཀོ ཨེཀེཀམེཝ ཨབྷིརུཧི. ནཱགརཱཛཱནོ བུདྡྷཔྤམུཁཾ བྷིཀྑུསངྒྷཾ ནཱགབྷཝནཾ པཝེསེཏྭཱ སབྦརཏྟིཾ སཏྠུ སནྟིཀེ དྷམྨཀཐཾ སུཏྭཱ དུཏིཡདིཝསེ དིབྦེན ཁཱདནཱིཡེན བྷོཛནཱིཡེན བུདྡྷཔྤམུཁཾ བྷིཀྑུསངྒྷཾ པརིཝིསིཾསུ. སཏྠཱ ཨནུམོདནཾ ཀཏྭཱ ནཱགབྷཝནཱ ནིཀྑམིཏྭཱ སཀལཙཀྐཝཱལ༹དེཝཏཱཧི པཱུཛིཡམཱནོ པཉྩཧི ནཱཝཱསཏེཧི གངྒཱནདིཾ ཨཏིཀྐམི.

རཱཛཱ ¶ པཙྩུགྒནྟྭཱ སཏྠཱརཾ ནཱཝཱཏོ ཨོཏཱརེཏྭཱ ཨཱགམནཀཱལེ ལིཙྪཝཱིཏི ཀཏསཀྐཱརཏོ དིགུཎཾ སཀྐཱརཾ ཀཏྭཱ པུརིམནཡེནེཝ པཉྩཧི དིཝསེཧི རཱཛགཧཾ ཨབྷིནེསི. དུཏིཡདིཝསེ ¶ བྷིཀྑཱུ པིཎྜཔཱཏཔཊིཀྐནྟཱ སཱཡནྷསམཡེ དྷམྨསབྷཱཡཾ སནྣིསིནྣཱ ཀཐཾ སམུཊྛཱཔེསུཾ – ‘‘ཨཧོ བུདྡྷཱནཾ མཧཱནུབྷཱཝོ, ཨཧོ སཏྠརི དེཝམནུསྶཱནཾ པསཱདོ, གངྒཱཡ ནཱམ ཨོརཏོ ¶ ཙ པཱརཏོ ཙ ཨཊྛཡོཛནེ མགྒེ བུདྡྷགཏེན པསཱདེན རཱཛཱུཧི སམཏལཾ བྷཱུམིཾ ཀཏྭཱ ཝཱལུཀཱ ཨོཀིཎྞཱ, ཛཎྞུམཏྟེན ཨོདྷིནཱ ནཱནཱཝཎྞཱནི པུཔྥཱནི སནྠཏཱནི, གངྒཱཡ ཨུདཀཾ ནཱགཱནུབྷཱཝེན པཉྩཝཎྞེཧི པདུམེཧི སཉྪནྣཾ, ཡཱཝ ཨཀནིཊྛབྷཝནཱ ཚཏྟཱཏིཚཏྟཱནི ཨུསྶཱཔིཏཱནི, སཀལཙཀྐཝཱལ༹གབྦྷཾ ཨེཀཱལངྐཱརཾ ཨེཀུསྶཝཾ ཝིཡ ཛཱཏ’’ནྟི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨེས པཱུཛཱསཀྐཱརོ མཡ྄ཧཾ བུདྡྷཱནུབྷཱཝེན ནིབྦཏྟོ, ན ནཱགདེཝབྲཧྨཱནུབྷཱཝེན. ཨཏཱིཏེ པན ཨཔྤམཏྟཀཔརིཙྩཱགཱནུབྷཱཝེན ནིབྦཏྟོ’’ཏི ཝཏྭཱ བྷིཀྑཱུཧི ཡཱཙིཏོ ཨཏཱིཏཾ ཨཱཧརི.

ཨཏཱིཏེ ཏཀྐསིལཱཡཾ སངྑོ ནཱམ བྲཱཧྨཎོ ཨཧོསི. ཏསྶ པུཏྟོ སུསཱིམོ ནཱམ མཱཎཝོ སོལ༹སཝསྶུདྡེསིཀོ ཨེཀདིཝསཾ པིཏརཾ ཨུཔསངྐམིཏྭཱ ཨཱཧ – ‘‘ཨིཙྪཱམཧཾ, ཏཱཏ, བཱརཱཎསིཾ གནྟྭཱ མནྟེ ཨཛ྄ཛྷཱཡིཏུ’’ནྟི. ཨཐ ནཾ པིཏཱ ཨཱཧ – ‘‘ཏེན ཧི, ཏཱཏ, ཨསུཀོ ནཱམ བྲཱཧྨཎོ མམ ¶ སཧཱཡཀོ, ཏསྶ སནྟིཀཾ གནྟྭཱ ཨདྷཱིཡསྶཱུ’’ཏི. སོ ‘‘སཱདྷཱུ’’ཏི པཊིསྶུཎིཏྭཱ ཨནུཔུབྦེན བཱརཱཎསིཾ གནྟྭཱ ཏཾ བྲཱཧྨཎཾ ཨུཔསངྐམིཏྭཱ པིཏརཱ པཧིཏབྷཱཝམཱཙིཀྑི. ཨཐ ནཾ སོ ‘‘སཧཱཡཀསྶ མེ པུཏྟོ’’ཏི སམྤཊིཙྪིཏྭཱ པཊིཔསྶདྡྷདརཐཾ བྷདྡཀེན དིཝསེན མནྟེ ཝཱཙེཏུམཱརབྷི. སོ ལཧུཉྩ གཎྷནྟོ བཧུཉྩ གཎྷནྟོ ཨཏྟནོ ཨུགྒཧིཏུགྒཧིཏཾ སུཝཎྞབྷཱཛནེ པཀྑིཏྟསཱིཧཏེལམིཝ ཨཝིནསྶམཱནཾ དྷཱརེནྟོ ན ཙིརསྶེཝ ཨཱཙརིཡསྶ སམྨུཁཏོ ཨུགྒཎྷིཏབྦཾ སབྦཾ ཨུགྒཎྷིཏྭཱ སཛ྄ཛྷཱཡཾ ཀརོནྟོ ཨཏྟནོ ཨུགྒཧིཏསིཔྤསྶ ཨཱདིམཛ྄ཛྷམེཝ པསྶཏི, ནོ པརིཡོསཱནཾ.

སོ ཨཱཙརིཡཾ ཨུཔསངྐམིཏྭཱ ‘‘ཨཧཾ ཨིམསྶ སིཔྤསྶ ཨཱདིམཛ྄ཛྷམེཝ པསྶཱམི, ནོ པརིཡོསཱན’’ནྟི ཝཏྭཱ ཨཱཙརིཡེན ‘‘ཨཧམྤི, ཏཱཏ, ན པསྶཱམཱི’’ཏི ཝུཏྟེ ‘‘ཨཐ ཀོ, ཨཱཙརིཡ, པརིཡོསཱནཾ ཛཱནཱཏཱི’’ཏི པུཙྪིཏྭཱ ‘‘ཨིམེ, ཏཱཏ, ཨིསཡོ ཨིསིཔཏནེ ཝིཧརནྟི, ཏེ ཛཱནེཡྻུཾ, ཏེསཾ སནྟིཀཾ ཨུཔསངྐམིཏྭཱ པུཙྪསྶཱུ’’ཏི ཨཱཙརིཡེན ཝུཏྟེ པཙྩེཀབུདྡྷེ ཨུཔསངྐམིཏྭཱ པུཙྪི – ‘‘ཏུམྷེ ཀིར པརིཡོསཱནཾ ཛཱནཱཐཱ’’ཏི? ‘‘ཨཱམ, ཛཱནཱམཱ’’ཏི. ‘‘ཏེན ཧི མེ ཨཱཙིཀྑཐཱ’’ཏི? ‘‘ན མཡཾ ཨཔབྦཛིཏསྶ ཨཱཙིཀྑཱམ. སཙེ ཏེ པརིཡོསཱནེནཏྠོ ¶ , པབྦཛསྶཱུ’’ཏི ¶ . སོ ‘‘སཱདྷཱུ’’ཏི སམྤཊིཙྪིཏྭཱ ¶ ཏེསཾ སནྟིཀེ པབྦཛི. ཨཐསྶ ཏེ ‘‘ཨིདཾ ཏཱཝ སིཀྑསྶཱུ’’ཏི ཝཏྭཱ ‘‘ཨེཝཾ ཏེ ནིཝཱསེཏབྦཾ, ཨེཝཾ པཱརུཔིཏབྦ’’ནྟིཨཱདིནཱ ནཡེན ཨཱབྷིསམཱཙཱརིཀཾ ཨཱཙིཀྑིཾསུ. སོ ཏཏྠ སིཀྑནྟོ ཨུཔནིསྶཡསམྤནྣཏྟཱ ནཙིརསྶེཝ པཙྩེཀསམྦོདྷིཾ ཨབྷིསམྦུཛ྄ཛྷིཏྭཱ སཀལབཱརཱཎསིནགརེ གགནཏལེ པུཎྞཙནྡོ ཝིཡ པཱཀཊོ ལཱབྷགྒཡསགྒཔྤཏྟོ ཨཧོསི, སོ ཨཔྤཱཡུཀསཾཝཏྟནིཀསྶ ཀམྨསྶ ཀཏཏྟཱ ན ཙིརསྶེཝ པརིནིབྦཱཡི. ཨཐསྶ པཙྩེཀབུདྡྷཱ ཙ མཧཱཛནོ ཙ སརཱིརཀིཙྩཾ ཀཏྭཱ དྷཱཏུཡོ ཙ གཧེཏྭཱ ནགརདྭཱརེ ཐཱུཔཾ ཀཱརེསུཾ.

སངྑོཔི བྲཱཧྨཎོ ‘‘པུཏྟོ མེ ཙིརཾ གཏོ, པཝཏྟིམསྶ ཛཱནིསྶཱམཱི’’ཏི ཏཾ དཊྛུཀཱམོ ཏཀྐསིལཱཏོ ནིཀྑམིཏྭཱ ཨནུཔུབྦེན བཱརཱཎསིཾ པཏྭཱ མཧཱཛནཀཱཡཾ སནྣིཔཏིཏཾ དིསྭཱ ‘‘ཨདྡྷཱ ཨིམེསུ ཨེཀོཔི མེ པུཏྟསྶ པཝཏྟིཾ ཛཱནིསྶཏཱི’’ཏི ཨུཔསངྐམིཏྭཱ པུཙྪི – ‘‘སུསཱིམོ ནཱམ མཱཎཝོ ཨིདྷཱགམི, ཨཔི ནུ ཁོ ཏསྶ པཝཏྟིཾ ཛཱནཱཐཱ’’ཏི? ‘‘ཨཱམ, བྲཱཧྨཎ, ཛཱནཱམ, ཨསུཀསྶ བྲཱཧྨཎསྶ སནྟིཀེ ཏཡོ ཝེདེ སཛ྄ཛྷཱཡིཏྭཱ པབྦཛིཏྭཱ པཙྩེཀསམྦོདྷིཾ སཙྪིཀཏྭཱ པརིནིབྦུཏོ, ཨཡམསྶ ཐཱུཔོ པཏིཊྛཱཔིཏོ’’ཏི. སོ བྷཱུམིཾ ཧཏྠེན པཧརིཏྭཱ རོདིཏྭཱ ཀནྡིཏྭཱ ¶ ཏཾ ཙེཏིཡངྒཎཾ གནྟྭཱ ཏིཎཱནི ཨུདྡྷརིཏྭཱ ཨུཏྟརསཱཊཀེན ཝཱལུཀཾ ཨཱཧརིཏྭཱ ཙེཏིཡངྒཎེ ཨཱཀིརིཏྭཱ ཀམཎྜལུཏོ ཨུདཀེན པརིཔྥོསིཏྭཱ ཝནཔུཔྥེཧི པཱུཛཾ ཀཏྭཱ སཱཊཀེན པཊཱཀཾ ཨཱརོཔེཏྭཱ ཐཱུཔསྶ ཨུཔརི ཨཏྟནོ ཚཏྟཀཾ བནྡྷིཏྭཱ པཀྐཱམི.

སཏྠཱ ཨིདཾ ཨཏཱིཏཾ ཨཱཧརིཏྭཱ ‘‘ཏདཱ, བྷིཀྑཝེ, ཨཧཾ སངྑོ བྲཱཧྨཎོ ཨཧོསིཾ. མཡཱ སུསཱིམསྶ པཙྩེཀབུདྡྷསྶ ཙེཏིཡངྒཎེ ཏིཎཱནི ཨུདྡྷཊཱནི, ཏསྶ མེ ཀམྨསྶ ནིསྶནྡེན ཨཊྛཡོཛནམགྒཾ ཝིཧཏཁཱཎུཀཀཎྚཀཾ ཀཏྭཱ སུདྡྷཾ སམཏལཾ ཀརིཾསུ. མཡཱ ཏཏྠ ཝཱལུཀཱ ཨོཀིཎྞཱ, ཏསྶ མེ ནིསྶནྡེན ཨཊྛཡོཛནམགྒེ ཝཱལུཀཾ ཨོཀིརིཾསུ. མཡཱ ཏཏྠ ཝནཀུསུམེཧི པཱུཛཱ ཀཏཱ, ཏསྶ མེ ནིསྶནྡེན ཨཊྛཡོཛནམགྒེ ནཱནཱཝཎྞཱནི པུཔྥཱནི ཨོཀིཎྞཱནི, ཨེཀཡོཛནཊྛཱནེ གངྒཱཡ ཨུདཀཾ པཉྩཝཎྞེཧི པདུམེཧི སཉྪནྣཾ. མཡཱ ཏཏྠ ཀམཎྜལུཨུདཀེན བྷཱུམི པརིཔྥོསིཏཱ, ཏསྶ མེ ནིསྶནྡེན ཝེསཱལིཡཾ པོཀྑརཝསྶཾ ཝསྶི. མཡཱ ཏཏྠ པཊཱཀཱ, ཨཱརོཔིཏཱ, ཚཏྟཀཉྩ བདྡྷཾ, ཏསྶ མེ ནིསྶནྡེན ཡཱཝ ཨཀནིཊྛབྷཝནཱ དྷཛཔཊཱཀཚཏྟཱཏིཚཏྟཱདཱིཧི སཀལཙཀྐཝཱལ༹གབྦྷཾ ཨེཀུསྶཝཾ ཝིཡ ¶ ཛཱཏཾ. ཨིཏི ཁོ, བྷིཀྑཝེ, ཨེས པཱུཛཱསཀྐཱརོ མཡ྄ཧཾ ནེཝ བུདྡྷཱནུབྷཱཝེན ནིབྦཏྟོ, ན ནཱགདེཝབྲཧྨཱནུབྷཱཝེན, ཨཏཱིཏེ པན ཨཔྤམཏྟཀཔརིཙྩཱགཱནུབྷཱཝེནཱ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘མཏྟཱསུཁཔརིཙྩཱགཱ ¶ ¶ , པསྶེ ཙེ ཝིཔུལཾ སུཁཾ;

ཙཛེ མཏྟཱསུཁཾ དྷཱིརོ, སམྤསྶཾ ཝིཔུལཾ སུཁ’’ནྟི.

ཏཏྠ མཏྟཱསུཁཔརིཙྩཱགཱཏི མཏྟཱསུཁནྟི པམཱཎཡུཏྟཀཾ པརིཏྟསུཁཾ ཝུཙྩཏི, ཏསྶ པརིཙྩཱགེན. ཝིཔུལཾ སུཁནྟི ཨུལཱ༹རཾ སུཁཾ ནིབྦཱནསུཁཾ ཝུཙྩཏི, ཏཾ ཙེ པསྶེཡྻཱཏི ཨཏྠོ. ཨིདཾ ཝུཏྟཾ ཧོཏི – ཨེཀཉྷི བྷོཛནཔཱཏིཾ སཛྫཱཔེཏྭཱ བྷུཉྫནྟསྶ མཏྟཱསུཁཾ ནཱམ ཨུཔྤཛྫཏི, ཏཾ པན པརིཙྩཛིཏྭཱ ཨུཔོསཐཾ ཝཱ ཀརོནྟསྶ དཱནཾ ཝཱ དདནྟསྶ ཝིཔུལཾ ཨུལཱ༹རཾ ནིབྦཱནསུཁཾ ནཱམ ནིབྦཏྟཏི. ཏསྨཱ སཙེ ཨེཝཾ ཏསྶ མཏྟཱསུཁསྶ པརིཙྩཱགཱ ཝིཔུལཾ སུཁཾ པསྶཏི, ཨཐེཏཾ ཝིཔུལཾ སུཁཾ སམྨཱ པསྶནྟོ པཎྜིཏོ ཏཾ མཏྟཱསུཁཾ ཙཛེཡྻཱཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པརདུཀྑཱུཔདྷཱནེནཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཀུཀྐུཊཨཎྜཁཱདིཀཾ ཨཱརབྦྷ ཀཐེསི.

སཱཝཏྠིཡཱ ཀིར ཨཝིདཱུརེ པཎྜུརཾ ནཱམ ཨེཀོ གཱམོ, ཏཏྠེཀོ ཀེཝཊྚོ ཝསཏི. སོ སཱཝཏྠིཾ གཙྪནྟོ ཨཙིརཝཏིཡཾ ཀཙྪཔཨཎྜཱནི དིསྭཱ ཏཱནི ཨཱདཱཡ སཱཝཏྠིཾ གནྟྭཱ ཨེཀསྨིཾ གེཧེ པཙཱཔེཏྭཱ ཁཱདནྟོ ཏསྨིཾ གེཧེ ཀུམཱརིཀཱཡཔི ¶ ཨེཀཾ ཨཎྜཾ ཨདཱསི. སཱ ཏཾ ཁཱདིཏྭཱ ཏཏོ པཊྛཱཡ ཨཉྙཾ ཁཱདནཱིཡཾ ནཱམ ན ཨིཙྪི. ཨཐསྶཱ མཱཏཱ ཀུཀྐུཊིཡཱ ཝིཛཱཏཊྛཱནཏོ ཨེཀཾ ཨཎྜཾ གཧེཏྭཱ ཨདཱསི. སཱ ཏཾ ཁཱདིཏྭཱ རསཏཎྷཱཡ བདྡྷཱ ཏཏོ པཊྛཱཡ སཡམེཝ ཀུཀྐུཊིཡཱ ཨཎྜཱནི གཧེཏྭཱ ཁཱདཏི. ཀུཀྐུཊཱི ཝིཛཱཏཝིཛཱཏཀཱལེ ཏཾ ཨཏྟནོ ཨཎྜཱནི གཧེཏྭཱ ¶ ཁཱདནྟིཾ དིསྭཱ ཏཱཡ ཨུཔདྡུཏཱ ཨཱགྷཱཏཾ བནྡྷིཏྭཱ ‘‘ཨིཏོ དཱནི ཙུཏཱ ཡཀྑིནཱི ཧུཏྭཱ ཏཝ ཛཱཏདཱརཀེ ཁཱདིཏུཾ སམཏྠཱ ཧུཏྭཱ ནིབྦཏྟེཡྻ’’ནྟི པཏྠནཾ པཊྛཔེཏྭཱ ཀཱལཾ ཀཏྭཱ ཏསྨིཾཡེཝ གེཧེ མཛྫཱརཱི ཧུཏྭཱ ནིབྦཏྟི. ཨིཏརཱཔི ཀཱལཾ ཀཏྭཱ ཏཏྠེཝ ཀུཀྐུཊཱི ཧུཏྭཱ ནིབྦཏྟི. ཀུཀྐུཊཱི ཨཎྜཱནི ཝིཛཱཡི, མཛྫཱརཱི ཨཱགནྟྭཱ ཏཱནི ཁཱདིཏྭཱ དུཏིཡམྤི ཏཏིཡམྤི ཁཱདིཡེཝ. ཀུཀྐུཊཱི ‘‘ཏཡོ ཝཱརེ མམ ཨཎྜཱནི ཁཱདིཏྭཱ ཨིདཱནི མམྤི ཁཱདིཏུཀཱམཱསི ¶ , ཨིཏོ ཙུཏཱ སཔུཏྟཀཾ ཏཾ ཁཱདིཏུཾ ལབྷེཡྻ’’ནྟི པཏྠནཾ ཀཏྭཱ ཏཏོ ཙུཏཱ དཱིཔིནཱི ཧུཏྭཱ ནིབྦཏྟི. ཨིཏརཱཔི ཀཱལཾ ཀཏྭཱ མིགཱི ཧུཏྭཱ ནིབྦཏྟི. ཏསྶཱ ཝིཛཱཏཀཱལེ དཱིཔིནཱི ཨཱགནྟྭཱ ཏཾ སདྡྷིཾ པུཏྟེཧི ཁཱདི. ཨེཝཾ ཁཱདནྟཱ པཉྩསུ ཨཏྟབྷཱཝསཏེསུ ཨཉྙམཉྙསྶ དུཀྑཾ ཨུཔྤཱདེཏྭཱ ཨཝསཱནེ ཨེཀཱ ཡཀྑིནཱི ཧུཏྭཱ ནིབྦཏྟི, ཨེཀཱ སཱཝཏྠིཡཾ ཀུལདྷཱིཏཱ ཧུཏྭཱ ནིབྦཏྟི. ཨིཏོ པརཾ ‘‘ན ཧི ཝེརེན ཝེརཱནཱི’’ཏི (དྷ. པ. ༥) གཱཐཱཡ ཝུཏྟནཡེནེཝ ཝེདིཏབྦཾ. ཨིདྷ པན སཏྠཱ ‘‘ཝེརཉྷི ཨཝེརེན ཨུཔསམྨཏི, ནོ ཝེརེནཱ’’ཏི ཝཏྭཱ ཨུབྷིནྣམྤི དྷམྨཾ དེསེནྟོ ཨིམཾ གཱཐམཱཧ –

‘‘པརདུཀྑཱུཔདྷཱནེན, ཨཏྟནོ སུཁམིཙྪཏི;

ཝེརསཾསགྒསཾསཊྛོ, ཝེརཱ སོ ན པརིམུཙྩཏཱི’’ཏི.

ཏཏྠ ¶ པརདུཀྑཱུཔདྷཱནེནཱཏི པརསྨིཾ དུཀྑཱུཔདྷཱནེན, པརསྶ དུཀྑུཔྤཱདནེནཱཏི ཨཏྠོ. ཝེརསཾསགྒསཾསཊྛོཏི ཡོ པུགྒལོ ཨཀྐོསནཔཙྩཀྐོསནཔཧརཎཔཊིཧརཎཱདཱིནཾ ཝསེན ཨཉྙམཉྙཾ ཀཏེན ཝེརསཾསགྒེན སཾསཊྛོ. ཝེརཱ སོ ན པརིམུཙྩཏཱིཏི ནིཙྩཀཱལཾ ཝེརཝསེན དུཀྑམེཝ པཱཔུཎཱཏཱིཏི ཨཏྠོ.

དེསནཱཝསཱནེ ཡཀྑིནཱི སརཎེསུ པཏིཊྛཱཡ པཉྩ སཱིལཱནི སམཱདིཡིཏྭཱ ཝེརཏོ མུཙྩི, ཨིཏརཱཔི སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཡཉྷི ¶ ཀིཙྩནྟི ཨིམཾ དྷམྨདེསནཾ སཏྠཱ བྷདྡིཡཾ ནིསྶཱཡ ཛཱཏིཡཱཝནེ ཝིཧརནྟོ བྷདྡིཡེ བྷིཀྑཱུ ཨཱརབྦྷ ཀཐེསི.

ཏེ ཀིར པཱདུཀམཎྜནེ ཨུཡྻུཏྟཱ ཨཧེསུཾ. ཡཐཱཧ – ‘‘ཏེན ཁོ པན སམཡེན བྷདྡིཡཱ བྷིཀྑཱུ ཨནེཀཝིཧིཏཾ པཱདུཀམཎྜནཱནུཡོགམནུཡུཏྟཱ ཝིཧརནྟི, ཏིཎཔཱདུཀཾ ཀརོནྟིཔི ཀཱརཱཔེནྟིཔི, མུཉྫཔཱདུཀཾ ཀརོནྟིཔི ཀཱརཱཔེནྟིཔི, པབྦཛཔཱདུཀཾ ཧིནྟཱལཔཱདུཀཾ ཀམལཔཱདུཀཾ ཀམྦལཔཱདུཀཾ ཀརོནྟིཔི ཀཱརཱཔེནྟིཔི, རིཉྩནྟི ཨུདྡེསཾ པརིཔུཙྪཾ ཨདྷིསཱིལཾ ཨདྷིཙིཏྟཾ ཨདྷིཔཉྙ’’ནྟི ¶ (མཧཱཝ. ༢༥༡). བྷིཀྑཱུ ཏེསཾ ཏཐཱཀརཎབྷཱཝཾ ཛཱནིཏྭཱ ཨུཛ྄ཛྷཱཡིཏྭཱ ¶ སཏྠུ ཨཱརོཙེསུཾ. སཏྠཱ ཏེ བྷིཀྑཱུ གརཧིཏྭཱ, ‘‘བྷིཀྑཝེ, ཏུམྷེ ཨཉྙེན ཀིཙྩེན ཨཱགཏཱ ཨཉྙསྨིཾཡེཝ ཀིཙྩེ ཨུཡྻུཏྟཱ’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ཡཉྷི ཀིཙྩཾ ཨཔཝིདྡྷཾ, ཨཀིཙྩཾ པན ཀརཱིཡཏི;

ཨུནྣལཱ༹ནཾ པམཏྟཱནཾ, ཏེསཾ ཝཌྜྷནྟི ཨཱསཝཱ.

‘‘ཡེསཉྩ སུསམཱརདྡྷཱ, ནིཙྩཾ ཀཱཡགཏཱ སཏི;

ཨཀིཙྩཾ ཏེ ན སེཝནྟི, ཀིཙྩེ སཱཏཙྩཀཱརིནོ;

སཏཱནཾ སམྤཛཱནཱནཾ, ཨཏྠཾ གཙྪནྟི ཨཱསཝཱ’’ཏི.

ཏཏྠ ཡཉྷི ཀིཙྩནྟི བྷིཀྑུནོ ཧི པབྦཛིཏཀཱལཏོ པཊྛཱཡ ཨཔརིམཱཎསཱིལཀྑནྡྷགོཔནཾ ཨརཉྙཱཝཱསོ དྷུཏངྒཔརིཧརཎཾ བྷཱཝནཱརཱམཏཱཏི ཨེཝམཱདཱིནི ཀིཙྩཾ ནཱམ. ཨིམེཧི པན ཡཾ ཨཏྟནོ ཀིཙྩཾ, ཏཾ ཨཔཝིདྡྷཾ ཚཌྜིཏཾ. ཨཀིཙྩནྟི བྷིཀྑུནོ ཚཏྟམཎྜནཾ ཨུཔཱཧནམཎྜནཾ པཱདུཀཔཏྟཐཱལཀདྷམྨཀརཎཀཱཡབནྡྷནཨཾསབདྡྷཀམཎྜནཾ ཨཀིཙྩཾ ནཱམ. ཡེཧི ཏཾ ཀཡིརཏི, ཏེསཾ མཱནནལ༹ཾ ཨུཀྑིཔིཏྭཱ ཙརཎེན ཨུནྣལཱ༹ནཾ སཏིཝོསྶགྒེན པམཏྟཱནཾ ཙཏྟཱརོ ཨཱསཝཱ ཝཌྜྷནྟཱིཏི ཨཏྠོ. སུསམཱརདྡྷཱཏི སུཔགྒཧིཏཱ. ཀཱཡགཏཱ སཏཱིཏི ཀཱཡཱནུཔསྶནཱབྷཱཝནཱ. ཨཀིཙྩནྟི ཏེ ཨེཏཾ ཚཏྟམཎྜནཱདིཀཾ ཨཀིཙྩཾ ན སེཝནྟི ན ཀརོནྟཱིཏི ཨཏྠོ. ཀིཙྩེཏི པབྦཛིཏཀཱལཏོ པཊྛཱཡ ཀཏྟབྦེ ཨཔརིམཱཎསཱིལཀྑནྡྷགོཔནཱདིཀེ ཀརཎཱིཡེ. སཱཏཙྩཀཱརིནོཏི སཏཏཀཱརིནོ ཨཊྛིཏཀཱརིནོ. ཏེསཾ སཏིཡཱ ཨཝིཔྤཝཱསེན སཏཱནཾ ¶ སཱཏྠཀསམྤཛཉྙཾ ¶ སཔྤཱཡསམྤཛཉྙཾ གོཙརསམྤཛཉྙཾ ཨསམྨོཧསམྤཛཉྙནྟི ཙཏཱུཧི སམྤཛཉྙེཧི སམྤཛཱནཱནཾ ཙཏྟཱརོཔི ཨཱསཝཱ ཨཏྠཾ གཙྪནྟི, པརིཀྑཡཾ ཨབྷཱཝཾ གཙྪནྟཱིཏི ཨཏྠོ.

མཱཏརནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ལཀུཎྜཀབྷདྡིཡཏྠེརཾ ཨཱརབྦྷ ཀཐེསི.

ཨེཀདིཝསཉྷི ¶ སམྦཧུལཱ ཨཱགནྟུཀཱ བྷིཀྑཱུ སཏྠཱརཾ དིཝཱཊྛཱནེ ནིསིནྣཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསཱིདིཾསུ. ཏསྨིཾ ཁཎེ ལཀུཎྜཀབྷདྡིཡཏྠེརོ བྷགཝཏོ ཨཝིདཱུརེ ཨཏིཀྐམཏི. སཏྠཱ ཏེསཾ བྷིཀྑཱུནཾ ཙིཏྟཱཙཱརཾ ཉཏྭཱ ཨོལོཀེཏྭཱ ‘‘པསྶཐ, བྷིཀྑཝེ, ཨཡཾ བྷིཀྑུ མཱཏཱཔིཏརོ ཧནྟྭཱ ནིདྡུཀྑོ ཧུཏྭཱ ཡཱཏཱི’’ཏི ཝཏྭཱ ཏེཧི བྷིཀྑཱུཧི ‘‘ཀིཾ ནུ ཁོ སཏྠཱ ཝདཏཱི’’ཏི ཨཉྙམཉྙཾ མུཁཱནི ཨོལོཀེཏྭཱ སཾསཡཔཀྑནྡེཧི, ‘‘བྷནྟེ, ཀིཾ ནཱམེཏཾ ཝདེཐཱ’’ཏི ཝུཏྟེ ཏེསཾ དྷམྨཾ དེསེནྟོ ཨིམཾ གཱཐམཱཧ –

‘‘མཱཏརཾ པིཏརཾ ཧནྟྭཱ, རཱཛཱནོ དྭེ ཙ ཁཏྟིཡེ;

རཊྛཾ སཱནུཙརཾ ཧནྟྭཱ, ཨནཱིགྷོ ཡཱཏི བྲཱཧྨཎོ’’ཏི.

ཏཏྠ ¶ སཱནུཙརནྟི ཨཱཡསཱདྷཀེན ཨཱཡུཏྟཀེན སཧིཏཾ. ཨེཏྠ ཧི ‘‘ཏཎྷཱ ཛནེཏི པུརིས’’ནྟི (སཾ. ནི. ༡.༥༥-༥༧) ཝཙནཏོ ཏཱིསུ བྷཝེསུ སཏྟཱནཾ ཛནནཏོ ཏཎྷཱ མཱཏཱ ནཱམ. ‘‘ཨཧཾ ཨསུཀསྶ ནཱམ རཉྙོ ཝཱ རཱཛམཧཱམཏྟསྶ ཝཱ པུཏྟོ’’ཏི པིཏརཾ ནིསྶཱཡ ཨསྨིམཱནསྶ ཨུཔྤཛྫནཏོ ཨསྨིམཱནོ པིཏཱ ནཱམ. ལོཀོ ཝིཡ རཱཛཱནཾ ཡསྨཱ སབྦདིཊྛིགཏཱནི དྭེ སསྶཏུཙྪེདདིཊྛིཡོ བྷཛནྟི, ཏསྨཱ དྭེ སསྶཏུཙྪེདདིཊྛིཡོ དྭེ ཁཏྟིཡརཱཛཱནོ ནཱམ. དྭཱདསཱཡཏནཱནི ཝིཏྠཏཊྛེན རཊྛདིསཏྟཱ རཊྛཾ ནཱམ. ཨཱཡསཱདྷཀོ ¶ ཨཱཡུཏྟཀཔུརིསོ ཝིཡ ཏནྣིསྶིཏོ ནནྡིརཱགོ ཨནུཙརོ ནཱམ. ཨནཱིགྷོཏི ནིདྡུཀྑོ. བྲཱཧྨཎོཏི ཁཱིཎཱསཝོ. ཨེཏེསཾ ཏཎྷཱདཱིནཾ ཨརཧཏྟམགྒཉཱཎཱསིནཱ ཧཏཏྟཱ ཁཱིཎཱསཝོ ནིདྡུཀྑོ ཧུཏྭཱ ཡཱཏཱིཏི ཨཡམེཏྠཏྠོ.

དེསནཱཝསཱནེ ཏེ བྷིཀྑཱུ ཨརཧཏྟེ པཏིཊྛཧིཾསུ.

དུཏིཡགཱཐཱཡཔི ཝཏྠུ པུརིམསདིསམེཝ. ཏདཱ ཧི སཏྠཱ ལཀུཎྜཀབྷདྡིཡཏྠེརམེཝ ཨཱརབྦྷ ཀཐེསི. ཏེསཾ དྷམྨཾ དེསེནྟོ ཨིམཾ གཱཐམཱཧ –

‘‘མཱཏརཾ པིཏརཾ ཧནྟྭཱ, རཱཛཱནོ དྭེ ཙ སོཏྠིཡེ;

ཝེཡགྒྷཔཉྩམཾ ཧནྟྭཱ, ཨནཱིགྷོ ཡཱཏི བྲཱཧྨཎོ’’ཏི.

ཏཏྠ དྭེ ཙ སོཏྠིཡེཏི དྭེ ཙ བྲཱཧྨཎེ. ཨིམིསྶཱ གཱཐཱཡ སཏྠཱ ཨཏྟནོ དྷམྨིསྶརཏཱཡ ཙ དེསནཱཝིདྷིཀུསལཏཱཡ ཙ སསྶཏུཙྪེདདིཊྛིཡོ དྭེ བྲཱཧྨཎརཱཛཱནོ ¶ ཙ ཀཏྭཱ ཀཐེསི. ཝེཡགྒྷཔཉྩམནྟི ཨེཏྠ བྱགྒྷཱནུཙརིཏོ སཔྤཊིབྷཡོ དུཔྤཊིཔནྣོ མགྒོ ཝེཡགྒྷོ ནཱམ, ཝིཙིཀིཙྪཱནཱིཝརཎམྤི ¶ ཏེན སདིསཏཱཡ ཝེཡགྒྷཾ ནཱམ, ཏཾ པཉྩམཾ ཨསྶཱཏི ནཱིཝརཎཔཉྩཀཾ ཝེཡགྒྷཔཉྩམཾ ནཱམ. ཨིདཉྩ ཝེཡགྒྷཔཉྩམཾ ཨརཧཏྟམགྒཉཱཎཱསིནཱ ནིསྶེསཾ ཧནྟྭཱ ཨནཱིགྷོཝ ཡཱཏི བྲཱཧྨཎོཏི ཨཡམེཏྠཏྠོ. སེསཾ པུརིམསདིསམེཝཱཏི.

སུཔྤབུདྡྷནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ དཱརུསཱཀཊིཀསྶ པུཏྟཾ ཨཱརབྦྷ ཀཐེསི.

རཱཛགཧསྨིཉྷི སམྨཱདིཊྛིཀཔུཏྟོ མིཙྪཱདིཊྛིཀཔུཏྟོཏི དྭེ དཱརཀཱ ཨབྷིཀྑཎཾ གུལ༹ཀཱིལ༹ཾ ཀཱིལ༹ནྟི. ཏེསུ སམྨཱདིཊྛིཀཔུཏྟོ གུལ༹ཾ ཁིཔམཱནོ བུདྡྷཱནུསྶཏིཾ ཨཱཝཛྫེཏྭཱ ‘‘ནམོ བུདྡྷསྶཱ’’ཏི ཝཏྭཱ ཝཏྭཱ གུལ༹ཾ ཁིཔཏི. ཨིཏརོ ཏིཏྠིཡགུཎེ ཨུདྡིསིཏྭཱ ‘‘ནམོ ཨརཧནྟཱན’’ནྟི ཝཏྭཱ ཝཏྭཱ ཁིཔཏི. ཏེསུ སམྨཱདིཊྛིཀསྶ ¶ པུཏྟོ ཛིནཱཏི, ཨིཏརོ པན པརཱཛཡཏི. སོ ཏསྶ ཀིརིཡཾ དིསྭཱ ‘‘ཨཡཾ ¶ ཨེཝཾ ཨནུསྶརིཏྭཱ ཨེཝཾ ཝཏྭཱ གུལ༹ཾ ཁིཔནྟོ མམཾ ཛིནཱཏི, ཨཧམྤི ཨེཝརཱུཔཾ ཀརིསྶཱམཱི’’ཏི བུདྡྷཱནུསྶཏིཡཾ པརིཙཡམཀཱསི. ཨཐེཀདིཝསཾ ཏསྶ པིཏཱ སཀཊཾ ཡོཛེཏྭཱ དཱརཱུནཾ ཨཏྠཱཡ གཙྪནྟོ ཏམྤི དཱརཀཾ ཨཱདཱཡ གནྟྭཱ ཨཊཝིཡཾ དཱརཱུནཾ སཀཊཾ པཱུརེཏྭཱ ཨཱགཙྪནྟོ བཧིནགརེ སུསཱནསཱམནྟེ ཨུདཀཕཱསུཀཊྛཱནེ གོཎེ མོཙེཏྭཱ བྷཏྟཝིསྶགྒམཀཱསི. ཨཐསྶ ཏེ གོཎཱ སཱཡནྷསམཡེ ནགརཾ པཝིསནྟེན གོགཎེན སདྡྷིཾ ནགརམེཝ པཝིསིཾསུ. སཱཀཊིཀོཔི གོཎེ ཨནུབནྡྷནྟོ ནགརཾ པཝིསིཏྭཱ སཱཡཾ གོཎེ དིསྭཱ ཨཱདཱཡ ནིཀྑམནྟོ དྭཱརཾ ན སམྤཱཔུཎི. ཏསྨིཉྷི ཨསམྤཏྟེཡེཝ དྭཱརཾ པིཧིཏཾ.

ཨཐསྶ པུཏྟོ ཨེཀཀོཝ རཏྟིབྷཱགེ སཀཊསྶ ཧེཊྛཱ ནིཔཛྫིཏྭཱ ནིདྡཾ ཨོཀྐམི. རཱཛགཧཾ པན པཀཏིཡཱཔི ཨམནུསྶབཧུལཾ. ཨཡཉྩ སུསཱནསནྟིཀེ ནིཔནྣོ. ཏཏྠ ནཾ དྭེ ཨམནུསྶཱ པསྶིཾསུ. ཨེཀོ སཱསནསྶ པཊིཀཎྜཀོ མིཙྪཱདིཊྛིཀོ, ཨེཀོ སམྨཱདིཊྛིཀོ. ཏེསུ མིཙྪཱདིཊྛིཀོ ཨཱཧ – ‘‘ཨཡཾ ནོ བྷཀྑོ, ཨིམཾ ཁཱདིསྶཱམཱ’’ཏི. ཨིཏརོ ‘‘ཨལཾ མཱ ཏེ རུཙྩཱི’’ཏི ནིཝཱརེཏི. སོ ཏེན ནིཝཱརིཡམཱནོཔི ཏསྶ ཝཙནཾ ཨནཱདིཡིཏྭཱ དཱརཀཾ པཱདེསུ གཧེཏྭཱ ཨཱཀཌྜྷི. སོ བུདྡྷཱནུསྶཏིཡཱ པརིཙིཏཏྟཱ ¶ ཏསྨིཾ ཁཎེ ‘‘ནམོ བུདྡྷསྶཱ’’ཏི ཨཱཧ. ཨམནུསྶོ ¶ མཧཱབྷཡབྷཱིཏོ པཊིཀྐམིཏྭཱ ཨཊྛཱསི. ཨཐ ནཾ ཨིཏརོ ‘‘ཨམྷེཧི ཨཀིཙྩཾ ཀཏཾ, དཎྜཀམྨཾ ཏསྶ ཀརོམཱ’’ཏི ཝཏྭཱ ཏཾ རཀྑམཱནོ ཨཊྛཱསི. མིཙྪཱདིཊྛིཀོ ནགརཾ པཝིསིཏྭཱ རཉྙོ བྷོཛནཔཱཏིཾ པཱུརེཏྭཱ བྷོཛནཾ ཨཱཧརི. ཨཐ ནཾ ཨུབྷོཔི ཏསྶ མཱཏཱཔིཏརོ ཝིཡ ཧུཏྭཱ ཨུཔཊྛཱཔེཏྭཱ བྷོཛེཏྭཱ ‘‘ཨིམཱནི ཨཀྑརཱནི རཱཛཱཝ པསྶཏུ, མཱ ཨཉྙོ’’ཏི ཏཾ པཝཏྟིཾ པཀཱསེནྟཱ ཡཀྑཱནུབྷཱཝེན བྷོཛནཔཱཏིཡཾ ཨཀྑརཱནི ཚིནྡིཏྭཱ པཱཏིཾ དཱརུསཀཊེ པཀྑིཔིཏྭཱ སབྦརཏྟིཾ ཨཱརཀྑཾ ཀཏྭཱ པཀྐམིཾསུ.

པུནདིཝསེ ‘‘རཱཛཀུལཏོ ཙོརེཧི བྷོཛནབྷཎྜཾ ཨཝཧཊ’’ནྟི ཀོལཱཧལཾ ཀརོནྟཱ དྭཱརཱནི པིདཧིཏྭཱ ཨོལོཀེནྟཱ ཏཏྠ ཨཔསྶནྟཱ ནགརཱ ནིཀྑམིཏྭཱ ཨིཏོ ཙིཏོ ཙ ཨོལོཀེནྟཱ དཱརུསཀཊེ སུཝཎྞཔཱཏིཾ དིསྭཱ ‘‘ཨཡཾ ཙོརོ’’ཏི ཏཾ དཱརཀཾ གཧེཏྭཱ རཉྙོ དསྶེསུཾ. རཱཛཱ ཨཀྑརཱནི དིསྭཱ ‘‘ཀིཾ ཨེཏཾ, ཏཱཏཱ’’ཏི པུཙྪིཏྭཱ ‘‘ནཱཧཾ ¶ , དེཝ, ཛཱནཱམི, མཱཏཱཔིཏརོ མེ ཨཱགནྟྭཱ རཏྟིཾ བྷོཛེཏྭཱ རཀྑམཱནཱ ཨཊྛཾསུ, ཨཧམྤི མཱཏཱཔིཏརོ མཾ རཀྑནྟཱིཏི ནིབྦྷཡོཝ ནིདྡཾ ཨུཔགཏོ. ཨེཏྟཀཾ ཨཧཾ ཛཱནཱམཱི’’ཏི. ཨཐསྶ མཱཏཱཔིཏརོཔི ཏཾ ཋཱནཾ ཨཱགམཾསུ. རཱཛཱ ཏཾ པཝཏྟིཾ ཉཏྭཱ ཏེ ཏཡོཔི ཛནེ ཨཱདཱཡ ¶ སཏྠུ སནྟིཀཾ གནྟྭཱ སབྦཾ ཨཱརོཙེཏྭཱ ‘‘ཀིཾ ནུ ཁོ, བྷནྟེ, བུདྡྷཱནུསྶཏི ཨེཝ རཀྑཱ ཧོཏི, ཨུདཱཧུ དྷམྨཱནུསྶཏིཨཱདཡོཔཱི’’ཏི པུཙྪི. ཨཐསྶ སཏྠཱ, ‘‘མཧཱརཱཛ, ན ཀེཝལཾ བུདྡྷཱནུསྶཏིཡེཝ རཀྑཱ, ཡེསཾ པན ཚབྦིདྷེན ཙིཏྟཾ སུབྷཱཝིཏཾ, ཏེསཾ ཨཉྙེན རཀྑཱཝརཎེན ཝཱ མནྟོསདྷེཧི ཝཱ ཀིཙྩཾ ནཏྠཱི’’ཏི ཝཏྭཱ ཚ ཋཱནཱནི དསྶེནྟོ ཨིམཱ གཱཐཱ ཨབྷཱསི.

‘‘སུཔྤབུདྡྷཾ པབུཛ྄ཛྷནྟི, སདཱ གོཏམསཱཝཀཱ;

ཡེསཾ དིཝཱ ཙ རཏྟོ ཙ, ནིཙྩཾ བུདྡྷགཏཱ སཏི.

‘‘སུཔྤབུདྡྷཾ པབུཛ྄ཛྷནྟི, སདཱ གོཏམསཱཝཀཱ;

ཡེསཾ དིཝཱ ཙ རཏྟོ ཙ, ནིཙྩཾ དྷམྨགཏཱ སཏི.

‘‘སུཔྤབུདྡྷཾ པབུཛ྄ཛྷནྟི, སདཱ གོཏམསཱཝཀཱ;

ཡེསཾ དིཝཱ ཙ རཏྟོ ཙ, ནིཙྩཾ སངྒྷགཏཱ སཏི.

‘‘སུཔྤབུདྡྷཾ པབུཛ྄ཛྷནྟི, སདཱ གོཏམསཱཝཀཱ;

ཡེསཾ དིཝཱ ཙ རཏྟོ ཙ, ནིཙྩཾ ཀཱཡགཏཱ སཏི.

‘‘སུཔྤབུདྡྷཾ ¶ པབུཛ྄ཛྷནྟི, སདཱ གོཏམསཱཝཀཱ;

ཡེསཾ དིཝཱ ཙ རཏྟོ ཙ, ཨཧིཾསཱཡ རཏོ མནོ.

‘‘སུཔྤབུདྡྷཾ པབུཛ྄ཛྷནྟི, སདཱ གོཏམསཱཝཀཱ;

ཡེསཾ དིཝཱ ཙ རཏྟོ ཙ, བྷཱཝནཱཡ རཏོ མནོ’’ཏི.

ཏཏྠ སུཔྤབུདྡྷཾ པབུཛ྄ཛྷནྟཱིཏི བུདྡྷགཏཾ སཏིཾ གཧེཏྭཱ སུཔནྟཱ, གཧེཏྭཱཡེཝ ཙ པབུཛ྄ཛྷནྟཱ སུཔྤབུདྡྷཾ པབུཛ྄ཛྷནྟི ནཱམ. སདཱ གོཏམསཱཝཀཱཏི གོཏམགོཏྟསྶ བུདྡྷསྶ སཝནནྟེ ཛཱཏཏྟཱ ཏསྶེཝ ¶ ཨནུསཱསནིཡཱ སཝནཏཱཡ གོཏམསཱཝཀཱ. བུདྡྷགཏཱ སཏཱིཏི ཡེསཾ ‘‘ཨིཏིཔི སོ བྷགཝཱ’’ཏིཨཱདིཔྤབྷེདེ བུདྡྷགུཎེ ཨཱརབྦྷ ཨུཔྤཛྫམཱནཱ སཏི ནིཙྩཀཱལཾ ཨཏྠི, ཏེ སདཱཔི སུཔྤབུདྡྷཾ པབུཛ྄ཛྷནྟཱིཏི ཨཏྠོ. ཏཐཱ ཨསཀྐོནྟཱ པན ཨེཀདིཝསཾ ¶ ཏཱིསུ ཀཱལེསུ དྭཱིསུ ཀཱལེསུ ཨེཀསྨིམྤི ཀཱལེ བུདྡྷཱནུསྶཏིཾ མནསི ཀརོནྟཱ སུཔྤབུདྡྷཾ པབུཛ྄ཛྷནྟིཡེཝ ནཱམ. དྷམྨགཏཱ སཏཱིཏི ‘‘སྭཱཁཱཏོ བྷགཝཏཱ དྷམྨོ’’ཏིཨཱདིཔྤབྷེདེ དྷམྨགུཎེ ཨཱརབྦྷ ཨུཔྤཛྫམཱནཱ སཏི. སངྒྷགཏཱ སཏཱིཏི ‘‘སུཔྤཊིཔནྣོ བྷགཝཏོ སཱཝཀསངྒྷོ’’ཏིཨཱདིཔྤབྷེདེ སངྒྷགུཎེ ཨཱརབྦྷ ཨུཔྤཛྫམཱནཱ སཏི. ཀཱཡགཏཱ སཏཱིཏི དྭཏྟིཾསཱཀཱརཝསེན ཝཱ ནཝསིཝཐིཀཱཝསེན ཝཱ ཙཏུདྷཱཏུཝཝཏྠཱནཝསེན ཝཱ ཨཛ྄ཛྷཏྟནཱིལཀསིཎཱདིརཱུཔཛ྄ཛྷཱནཝསེན ཝཱ ཨུཔྤཛྫམཱནཱ སཏི. ཨཧིཾསཱཡ རཏོཏི ‘‘སོ ཀརུཎཱསཧགཏེན ཙེཏསཱ ཨེཀཾ དིསཾ ཕརིཏྭཱ ཝིཧརཏཱི’’ཏི (ཝིབྷ. ༦༤༢) ཨེཝཾ ཝུཏྟཱཡ ཀརུཎཱབྷཱཝནཱཡ རཏོ. བྷཱཝནཱཡཱཏི མེཏྟཱབྷཱཝནཱཡ. ཀིཉྩཱཔི ཧེཊྛཱ ཀརུཎཱབྷཱཝནཱཡ ཝུཏྟཏྟཱ ཨིདྷ སབྦཱཔི ཨཝསེསཱ བྷཱཝནཱ ནཱམ, ཨིདྷ པན མེཏྟཱབྷཱཝནཱཝ ཨདྷིཔྤེཏཱ. སེསཾ པཋམགཱཐཱཡ ཝུཏྟནཡེནེཝ ཝེདིཏབྦཾ.

དེསནཱཝསཱནེ དཱརཀོ སདྡྷིཾ མཱཏཱཔིཏཱུཧི སོཏཱཔཏྟིཕལེ ¶ པཏིཊྛཧི. པཙྪཱ པན པབྦཛིཏྭཱ སབྦེཔི ཨརཧཏྟཾ པཱཔུཎིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

དུཔྤབྦཛྫནྟི ཨིམཾ དྷམྨདེསནཾ སཏྠཱ ཝེསཱལིཾ ནིསྶཱཡ མཧཱཝནེ ཝིཧརནྟོ ཨཉྙཏརཾ ཝཛྫིཔུཏྟཀཾ བྷིཀྑུཾ ཨཱརབྦྷ ཀཐེསི. ཏཾ སནྡྷཱཡ ཝུཏྟཾ – ཨཉྙཏརོ ཝཛྫིཔུཏྟཀོ བྷིཀྑུ ཝེསཱལིཡཾ ¶ ཝིཧརཏི ཨཉྙཏརསྨིཾ ཝནསཎྜེ, ཏེན ཁོ པན སམཡེན ཝེསཱལིཡཾ སབྦརཏྟིཚཎོ ཧོཏི. ཨཐ ཁོ སོ བྷིཀྑུ ཝེསཱལིཡཱ ཏཱུརིཡཏཱལི༹ཏཝཱདིཏནིགྒྷོསསདྡཾ སུཏྭཱ པརིདེཝམཱནོ ཏཱཡཾ ཝེལཱཡཾ ཨིམཾ གཱཐཾ ཨབྷཱསི –

ཀོསུ ནཱམམྷེཧི པཱཔིཡོ’’ཏི. (སཾ. ནི. ༡.༢༢༩);

སོ ¶ ཀིར ཝཛྫིརཊྛེ རཱཛཔུཏྟོ ཝཱརེན སམྤཏྟཾ རཛྫཾ པཧཱཡ པབྦཛིཏོ ཝེསཱལིཡཾ ཙཱཏུམཧཱརཱཛིཀེཧི སདྡྷིཾ ཨེཀཱབདྡྷཾ ¶ ཀཏྭཱ སཀལནགརེ དྷཛཔཊཱཀཱདཱིཧི པཊིམཎྜིཏེ ཀོམུདིཡཱ པུཎྞམཱཡ སབྦརཏྟིཾ ཚཎཝཱརེ ཝཏྟམཱནེ བྷེརིཡཱདཱིནཾ ཏཱུརིཡཱནཾ ཏཱལི༹ཏཱནཾ ནིགྒྷོསཾ ཝཱིཎཱདཱིནཉྩ ཝཱདིཏཱནཾ སདྡཾ སུཏྭཱ ཡཱནི ཝེསཱལིཡཾ སཏྟ རཱཛསཧསྶཱནི སཏྟ རཱཛསཏཱནི སཏྟ རཱཛཱནོ, ཏཏྟཀཱ ཨེཝ ཙ ནེསཾ ཨུཔརཱཛསེནཱཔཏིཨཱདཡོ, ཏེསུ ཨལངྐཏཔཊིཡཏྟེསུ ནཀྑཏྟཀཱིལ༹ནཏྠཱཡ ཝཱིཐིཾ ཨོཏིཎྞེསུ སཊྛིཧཏྠེ མཧཱཙངྐམེ ཙངྐམམཱནོ གགནམཛ྄ཛྷེ ཋིཏཾ པུཎྞཙནྡཾ དིསྭཱ ཙངྐམཀོཊིཡཾ ཕལཀཾ ནིསྶཱཡ ཋིཏོ ཝེཋནཱལངྐཱརཝིརཧིཏཏྟཱ ཝནེ ཚཌྜིཏདཱརུཀཾ ཝིཡ ཨཏྟབྷཱཝཾ ཨོལོཀེཏྭཱ ‘‘ཨཏྠི ནུ ཁོ ཨཉྙོ ཨམྷེཧི ལཱམཀཏརོ’’ཏི ཙིནྟེནྟོ པཀཏིཡཱ ཨཱརཉྙཀཱདིགུཎཡུཏྟོཔི ཏསྨིཾ ཁཎེ ཨནབྷིརཏིཡཱ པཱིལི༹ཏོ ཨེཝམཱཧ. སོ ཏསྨིཾ ཝནསཎྜེ ཨདྷིཝཏྠཱཡ དེཝཏཱཡ ‘‘ཨིམཾ བྷིཀྑུཾ སཾཝེཛེསྶཱམཱི’’ཏི ཨདྷིཔྤཱཡེན –

‘‘ཨེཀཀོཝ ཏྭཾ ཨརཉྙེ ཝིཧརསི, ཨཔཝིདྡྷཾཝ ཝནསྨིཾ དཱརུཀཾ;

ཏསྶ ཏེ བཧུཀཱ པིཧཡནྟི, ནེརཡིཀཱ ཝིཡ སགྒགཱམིན’’ནྟི. (སཾ. ནི. ༡.༢༢༩) –

ཝུཏྟཾ ཨིམཾ གཱཐཾ སུཏྭཱ པུནདིཝསེ སཏྠཱརཾ ཨུཔསངྐམིཏྭཱ ཝནྡིཏྭཱ ནིསཱིདི. སཏྠཱ ཏཾ པཝཏྟིཾ ཉཏྭཱ གྷརཱཝཱསསྶ ¶ དུཀྑཏཾ པཀཱསེཏུཀཱམོ པཉྩ དུཀྑཱནི སམོདྷཱནེཏྭཱ ཨིམཾ གཱཐམཱཧ –

‘‘དུཔྤབྦཛྫཾ དུརབྷིརམཾ, དུརཱཝཱསཱ གྷརཱ དུཁཱ;

དུཀྑོསམཱནསཾཝཱསོ, དུཀྑཱནུཔཏིཏདྡྷགཱུ;

ཏསྨཱ ན ཙདྡྷགཱུ སིཡཱ, ན ཙ དུཀྑཱནུཔཏིཏོ སིཡཱ’’ཏི.

ཏཏྠ ¶ དུཔྤབྦཛྫནྟི ཨཔྤཾ ཝཱ མཧནྟཾ ཝཱ བྷོགཀྑནྡྷཉྩེཝ ཉཱཏིཔརིཝཊྚཉྩ པཧཱཡ ཨིམསྨིཾ སཱསནེ ཨུརཾ དཏྭཱ པབྦཛྫཾ ནཱམ དུཀྑཾ. དུརབྷིརམནྟི ཨེཝཾ པབྦཛིཏེནཱཔི བྷིཀྑཱཙརིཡཱཡ ཛཱིཝིཏཝུཏྟིཾ གྷཊེནྟེན ཨཔརིམཱཎསཱིལཀྑནྡྷགོཔནདྷམྨཱནུདྷམྨཔྤཊིཔཏྟིཔཱུརཎཝསེན ཨབྷིརམིཏུཾ དུཀྑཾ. དུརཱཝཱསཱཏི ཡསྨཱ པན གྷརཾ ཨཱཝསནྟེན རཱཛཱུནཾ རཱཛཀིཙྩཾ, ཨིསྶརཱནཾ ཨིསྶརཀིཙྩཾ ཝཧིཏབྦཾ, པརིཛནཱ ཙེཝ དྷམྨིཀཱ སམཎབྲཱཧྨཎཱ ཙ སངྒཧིཏབྦཱ. ཨེཝཾ སནྟེཔི གྷརཱཝཱསོ ཚིདྡགྷཊོ ཝིཡ མཧཱསམུདྡོ ཝིཡ ཙ དུཔྤཱུརོ. ཏསྨཱ གྷརཱཝཱསཱ ¶ ནཱམེཏེ དུརཱཝཱསཱ དུཀྑཱ ཨཱཝསིཏུཾ, ཏེནེཝ ཀཱརཎེན དུཀྑཱཏི ཨཏྠོ. དུཀྑོ སམཱནསཾཝཱསོཏི གིཧིནོ ཝཱ ཧི ཡེ ཛཱཏིགོཏྟཀུལབྷོགེཧི ¶ པབྦཛིཏཱ ཝཱ སཱིལཱཙཱརབཱཧུསཙྩཱདཱིཧི སམཱནཱཔི ཧུཏྭཱ ‘‘ཀོསི ཏྭཾ, ཀོསྨི ཨཧ’’ནྟིཨཱདཱིནི ཝཏྭཱ ཨདྷིཀརཎཔསུཏཱ ཧོནྟི, ཏེ ཨསམཱནཱ ནཱམ, ཏེཧི སདྡྷིཾ སཾཝཱསོ དུཀྑོཏི ཨཏྠོ. དུཀྑཱནུཔཏིཏདྡྷགཱུཏི ཡེ ཝཊྚསངྑཱཏཾ ཨདྡྷཱནཾ པཊིཔནྣཏྟཱ ཨདྡྷགཱུ, ཏེ དུཀྑེ ཨནུཔཏིཏཱཝ. ཏསྨཱ ན ཙདྡྷགཱུཏི ཡསྨཱ དུཀྑཱནུཔཏིཏབྷཱཝོཔི དུཀྑོ ཨདྡྷགཱུབྷཱཝོཔི, ཏསྨཱ ཝཊྚསངྑཱཏཾ ཨདྡྷཱནཾ གམནཏཱཡ ཨདྡྷགཱུ ན བྷཝེཡྻ, ཝུཏྟཔྤཀཱརེན དུཀྑེན ཨནུཔཏིཏོཔི ན བྷཝེཡྻཱཏི ཨཏྠོ.

དེསནཱཝསཱནེ སོ བྷིཀྑུ པཉྩསུ ཋཱནེསུ དསྶིཏེ དུཀྑེ ནིབྦིནྡནྟོ པཉྩོརམྦྷཱགིཡཱནི པཉྩ ཨུདྡྷམྦྷཱགིཡཱནི སཾཡོཛནཱནི པདཱལེཏྭཱ ཨརཧཏྟེ པཏིཊྛཧཱིཏི.

སདྡྷོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཙིཏྟགཧཔཏིཾ ཨཱརབྦྷ ཀཐེསི. ཝཏྠུ བཱལཝགྒེ ‘‘ཨསནྟཾ བྷཱཝནམིཙྪེཡྻཱ’’ཏི ¶ གཱཐཱཝཎྞནཱཡ ཝིཏྠཱརིཏཾ. གཱཐཱཔི ཏཏྠེཝ ཝུཏྟཱ. ཝུཏྟཉྷེཏཾ ཏཏྠ (དྷ. པ. ཨཊྛ. ༡.༧༤) –

‘‘ཀིཾ པན, བྷནྟེ, ཨེཏསྶ ཏུམྷཱཀཾ སནྟིཀཾ ཨཱགཙྪནྟསྶེཝཱཡཾ ལཱབྷསཀྐཱརོ ཨུཔྤཛྫཏི, ཨུདཱཧུ ཨཉྙཏྠ གཙྪནྟསྶཱཔི ཨུཔྤཛྫཏཱི’’ཏི. ‘‘ཨཱནནྡ, མམ སནྟིཀཾ ཨཱགཙྪནྟསྶཱཔི ཨཉྙཏྠ གཙྪནྟསྶཱཔི ཏསྶ ཨུཔྤཛྫཏེཝ. ཨཡཉྷི ཨུཔཱསཀོ སདྡྷོ པསནྣོ སམྤནྣསཱིལོ, ཨེཝརཱུཔོ པུགྒལོ ཡཾ ཡཾ པདེསཾ བྷཛཏི, ཏཏྠ ཏཏྠེཝསྶ ལཱབྷསཀྐཱརོ ནིབྦཏྟཏཱི’’ཏི ཝཏྭཱ ཨིམཾ གཱཐམཱཧ –

‘‘སདྡྷོ ¶ སཱིལེན སམྤནྣོ, ཡསོབྷོགསམཔྤིཏོ;

ཡཾ ཡཾ པདེསཾ བྷཛཏི, ཏཏྠ ཏཏྠེཝ པཱུཛིཏོ’’ཏི. (དྷ. པ. ཨཊྛ. ༡.༧༤);

ཏཏྠ ¶ སདྡྷོཏི ལོཀིཡལོཀུཏྟརསདྡྷཱཡ སམནྣཱགཏོ. སཱིལེནཱཏི ཨཱགཱརིཡསཱིལཾ, ཨནཱགཱརིཡསཱིལནྟི དུཝིདྷཾ སཱིལཾ. ཏེསུ ཨིདྷ ཨཱགཱརིཡསཱིལཾ ཨདྷིཔྤེཏཾ, ཏེན སམནྣཱགཏོཏི ཨཏྠོ. ཡསོབྷོགསམཔྤིཏོཏི ཡཱདིསོ ཨནཱཐཔིཎྜིཀཱདཱིནཾ པཉྩཨུཔཱསཀསཏཔརིཝཱརསངྑཱཏོ ཨཱགཱརིཡཡསོ, ཏཱདིསེནེཝ ཡསེན དྷནདྷཉྙཱདིཀོ ཙེཝ སཏྟཝིདྷཨརིཡདྷནསངྑཱཏོ ཙཱཏི དུཝིདྷོ བྷོགོ, ཏེན སམནྣཱགཏོཏི ཨཏྠོ. ཡཾ ཡཾ པདེསནྟི པུརཏྠིམཱདཱིསུ ¶ དིསཱསུ ཨེཝརཱུཔོ ཀུལཔུཏྟོ ཡཾ ཡཾ པདེསཾ བྷཛཏི, ཏཏྠ ཏཏྠ ཨེཝརཱུཔེན ལཱབྷསཀྐཱརེན པཱུཛིཏོཝ ཧོཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

དཱུརེ སནྟོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨནཱཐཔིཎྜིཀསྶ དྷཱིཏརཾ ཙཱུལ༹སུབྷདྡཾ ནཱམ ཨཱརབྦྷ ཀཐེསི.

ཨནཱཐཔིཎྜིཀསྶ ཀིར དཧརཀཱལཏོ པཊྛཱཡ ཨུགྒནགརཝཱསཱི ཨུགྒོ ནཱམ སེཊྛིཔུཏྟོ སཧཱཡཀོ ཨཧོསི. ཏེ ཨེཀཱཙརིཡཀུལེ སིཔྤཾ ཨུགྒཎྷནྟཱ ཨཉྙམཉྙཾ ཀཏིཀཾ ཀརིཾསུ ‘‘ཨམྷཱཀཾ ཝཡཔྤཏྟཀཱལེ པུཏྟདྷཱིཏཱསུ ཛཱཏཱསུ ཡོ པུཏྟསྶ དྷཱིཏརཾ ཝཱརེཏི, ཏེན ཏསྶ དྷཱིཏཱ དཱཏབྦཱ’’ཏི. ཏེ ཨུབྷོཔི ཝཡཔྤཏྟཱ ཨཏྟནོ ཨཏྟནོ ནགརེ སེཊྛིཊྛཱནེ པཏིཊྛཧིཾསུ. ཨཐེཀསྨིཾ སམཡེ ཨུགྒསེཊྛི ཝཎིཛྫཾ པཡོཛེནྟོ པཉྩཧི སཀཊསཏེཧི སཱཝཏྠིཾ ཨགམཱསི. ཨནཱཐཔིཎྜིཀོ ཨཏྟནོ དྷཱིཏརཾ ཙཱུལ༹སུབྷདྡཾ ཨཱམནྟེཏྭཱ, ‘‘ཨམྨ, པིཏཱ ཏེ ཨུགྒསེཊྛི ནཱམ ཨཱགཏོ, ཏསྶ ཀཏྟབྦཀིཙྩཾ སབྦཾ ཏཝ བྷཱརོ’’ཏི ཨཱཎཱཔེསི. སཱ ‘‘སཱདྷཱུ’’ཏི པཊིསྶུཎིཏྭཱ ཏསྶ ཨཱགཏདིཝསཏོ པཊྛཱཡ སཧཏྠེནེཝ སཱུཔབྱཉྫནཱདཱིནི སམྤཱདེཏི, མཱལཱགནྡྷཝིལེཔནཱདཱིནི ཨབྷིསངྑརོཏི ¶ , བྷོཛནཀཱལེ ཏསྶ ནྷཱནོདཀཾ པཊིཡཱདཱཔེཏྭཱ ནྷཱནཀཱལཏོ པཊྛཱཡ སབྦཀིཙྩཱནི སཱདྷུཀཾ ཀརོཏི.

ཨུགྒསེཊྛི ¶ ¶ ཏསྶཱ ཨཱཙཱརསམྤཏྟིཾ དིསྭཱ པསནྣཙིཏྟོ ཨེཀདིཝསཾ ཨནཱཐཔིཎྜིཀེན སདྡྷིཾ སུཁཀཐཱཡ སནྣིསིནྣོ ‘‘མཡཾ དཧརཀཱལེ ཨེཝཾ ནཱམ ཀཏིཀཾ ཀརིམྷཱ’’ཏི སཱརེཏྭཱ ཙཱུལ༹སུབྷདྡཾ ཨཏྟནོ པུཏྟསྶཏྠཱཡ ཝཱརེསི. སོ པན པཀཏིཡཱཝ མིཙྪཱདིཊྛིཀོ. ཏསྨཱ དསབལསྶ ཏམཏྠཾ ཨཱརོཙེཏྭཱ སཏྠཱརཱ ཨུགྒསེཊྛིསྶཱུཔནིསྶཡཾ དིསྭཱ ཨནུཉྙཱཏོ བྷརིཡཱཡ སདྡྷིཾ མནྟེཏྭཱ ཏསྶ ཝཙནཾ སམྤཊིཙྪིཏྭཱ དིཝསཾ ཝཝཏྠཔེཏྭཱ དྷཱིཏརཾ ཝིསཱཁཾ དཏྭཱ ཨུཡྻོཛེནྟོ དྷནཉྩཡསེཊྛི ཝིཡ མཧནྟཾ སཀྐཱརཾ ཀཏྭཱ སུབྷདྡཾ ཨཱམནྟེཏྭཱ, ‘‘ཨམྨ, སསུརཀུལེ ཝསནྟིཡཱ ནཱམ ཨནྟོཨགྒི བཧི ན ནཱིཧརིཏབྦོ’’ཏི (ཨ. ནི. ཨཊྛ. ༡.༡.༢༥༩; དྷ. པ. ཨཊྛ. ༡.༥༢ ཝིསཱཁཱཝཏྠུ) དྷནཉྩཡསེཊྛིནཱ ཝིསཱཁཱཡ དིནྣནཡེནེཝ དས ཨོཝཱདེ དཏྭཱ ‘‘སཙེ མེ གཏཊྛཱནེ དྷཱིཏུ དོསོ ཨུཔྤཛྫཏི, ཏུམྷེཧི སོདྷེཏབྦོ’’ཏི ཨཊྛ ཀུཊུམྦིཀེ པཱཊིབྷོགེ གཧེཏྭཱ ཏསྶཱ ཨུཡྻོཛནདིཝསེ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ དཏྭཱ པུརིམབྷཝེ དྷཱིཏརཱ ཀཏཱནཾ སུཙརིཏཱནཾ ཕལཝིབྷཱུཏིཾ ལོཀསྶ པཱཀཊཾ ཀཏྭཱ དསྶེནྟོ ཝིཡ མཧནྟེན སཀྐཱརེན དྷཱིཏརཾ ཨུཡྻོཛེསི. ཏསྶཱ ཨནུཔུབྦེན ཨུགྒནགརཾ པཏྟཀཱལེ སསུརཀུལེན སདྡྷིཾ ¶ མཧཱཛནོ པཙྩུགྒམནམཀཱསི.

སཱཔི ཨཏྟནོ སིརིཝིབྷཝཾ པཱཀཊཾ ཀཱཏུཾ ཝིསཱཁཱ ཝིཡ སཀལནགརསྶ ཨཏྟཱནཾ དསྶེནྟཱི རཐེ ཋཏྭཱ ནགརཾ པཝིསིཏྭཱ ནཱགརེཧི པེསིཏེ པཎྞཱཀཱརེ གཧེཏྭཱ ཨནུརཱུཔཝསེན ཏེསཾ ཏེསཾ པེསེནྟཱི སཀལནགརཾ ཨཏྟནོ གུཎེཧི ཨེཀཱབདྡྷམཀཱསི. མངྒལདིཝསཱདཱིསུ པནསྶཱ སསུརོ ཨཙེལཀཱནཾ སཀྐཱརཾ ཀརོནྟོ ‘‘ཨཱགནྟྭཱ ཨམྷཱཀཾ སམཎེ ཝནྡཏཱུ’’ཏི པེསེསི. སཱ ལཛྫཱཡ ནགྒེ པསྶིཏུཾ ཨསཀྐོནྟཱི གནྟུཾ ན ཨིཙྪཏི. སོ པུནཔྤུནཾ པེསེཏྭཱཔི ཏཱཡ པཊིཀྑིཏྟོ ཀུཛ྄ཛྷིཏྭཱ ‘‘ནཱིཧརཐ ན’’ནྟི ཨཱཧ. སཱ ‘‘ན སཀྐཱ མམ ཨཀཱརཎེན དོསཾ ཨཱརོཔེཏུ’’ནྟི ཀུཊུམྦིཀེ པཀྐོསཱཔེཏྭཱ ཏམཏྠཾ ཨཱརོཙེསི. ཏེ ཏསྶཱ ནིདྡོསབྷཱཝཾ ཉཏྭཱ སེཊྛིཾ སཉྙཱཔེསུཾ. སོ ‘‘ཨཡཾ མམ སམཎེ ཨཧིརིཀཱཏི ན ཝནྡཱི’’ཏི བྷརིཡཱཡ ཨཱརོཙེསི. སཱ ‘‘ཀཱིདིསཱ ནུ ཁོ ཨིམིསྶཱ སམཎཱ, ཨཏིཝིཡ ཏེསཾ པསཾསཏཱི’’ཏི ཏཾ པཀྐོསཱཔེཏྭཱ ཨཱཧ –

‘‘ཀཱིདིསཱ སམཎཱ ཏུཡ྄ཧཾ, བཱལ༹ྷཾ ཁོ ནེ པསཾསསི;

ཀིཾསཱིལཱ ཀིཾསམཱཙཱརཱ, ཏཾ མེ ཨཀྑཱཧི པུཙྪིཏཱ’’ཏི. (ཨ. ནི. ཨཊྛ. ༢.༤.༢༤);

ཨཐསྶཱ ¶ སུབྷདྡཱ བུདྡྷཱནཉྩེཝ བུདྡྷསཱཝཀཱནཉྩ གུཎེ པཀཱསེནྟཱི –

‘‘སནྟིནྡྲིཡཱ ¶ སནྟམཱནསཱ, སནྟཾ ཏེསཾ གཏཾ ཋིཏཾ;

ཨོཀྑིཏྟཙཀྑཱུ མིཏབྷཱཎཱི, ཏཱདིསཱ སམཎཱ མམ. (ཨ. ནི. ཨཊྛ. ༢.༤.༢༤);

‘‘ཀཱཡཀམྨཾ སུཙི ནེསཾ, ཝཱཙཱཀམྨཾ ཨནཱཝིལཾ;

མནོཀམྨཾ སུཝིསུདྡྷཾ, ཏཱདིསཱ སམཎཱ མམ.

‘‘ཝིམལཱ ¶ སངྑམུཏྟཱབྷཱ, སུདྡྷཱ ཨནྟརབཱཧིརཱ;

པུཎྞཱ སུདྡྷེཧི དྷམྨེཧི, ཏཱདིསཱ སམཎཱ མམ.

‘‘ལཱབྷེན ཨུནྣཏོ ལོཀོ, ཨལཱབྷེན ཙ ཨོནཏོ;

ལཱབྷཱལཱབྷེན ཨེཀཊྛཱ, ཏཱདིསཱ སམཎཱ མམ.

‘‘ཡསེན ཨུནྣཏོ ལོཀོ, ཨཡསེན ཙ ཨོནཏོ;

ཡསཱཡསེན ཨེཀཊྛཱ, ཏཱདིསཱ སམཎཱ མམ.

‘‘པསཾསཱཡུནྣཏོ ལོཀོ, ནིནྡཱཡཱཔི ཙ ཨོནཏོ;

སམཱ ནིནྡཱཔསཾསཱསུ, ཏཱདིསཱ སམཎཱ མམ.

‘‘སུཁེན ཨུནྣཏོ ལོཀོ, དུཀྑེནཱཔི ཙ ཨོནཏོ;

ཨཀམྤཱ སུཁདུཀྑེསུ, ཏཱདིསཱ སམཎཱ མམཱ’’ཏི. –

ཨེཝམཱདཱིཧི ཝཙནེཧི སསྶུཾ ཏོསེསི.

ཨཐ ནཾ ‘‘སཀྐཱ ཏཝ སམཎེ ཨམྷཱཀམྤི དསྶེཏུ’’ནྟི ཝཏྭཱ ‘‘སཀྐཱ’’ཏི ཝུཏྟེ ‘‘ཏེན ཧི ཡཐཱ མཡཾ ཏེ པསྶཱམ, ཏཐཱ ཀརོཧཱི’’ཏི ཝུཏྟེ སཱ ‘‘སཱདྷཱུ’’ཏི བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ སཛྫེཏྭཱ ཨུཔརིཔཱསཱདཏལེ ཋཏྭཱ ཛེཏཝནཱབྷིམུཁཱི སཀྐཙྩཾ པཉྩཔཏིཊྛིཏེན ཝནྡིཏྭཱ བུདྡྷགུཎེ ཨཱཝཛྫེཏྭཱ གནྡྷཝཱསཔུཔྥདྷུམེཧི པཱུཛཾ ཀཏྭཱ, ‘‘བྷནྟེ, སྭཱཏནཱཡ བུདྡྷཔྤམུཁཾ བྷིཀྑུསངྒྷཾ ནིམནྟེམི, ཨིམིནཱ མེ སཉྙཱཎེན སཏྠཱ ནིམནྟིཏབྷཱཝཾ ཛཱནཱཏཱུ’’ཏི ¶ སུམནཔུཔྥཱནཾ ཨཊྛ མུཊྛིཡོ ཨཱཀཱསེ ཁིཔི. པུཔྥཱནི གནྟྭཱ ཙཏུཔརིསམཛ྄ཛྷེ དྷམྨཾ ¶ དེསེནྟསྶ སཏྠུནོ ཨུཔརི མཱལཱཝིཏཱནཾ ཧུཏྭཱ ཨཊྛཾསུ. ཏསྨིཾ ཁཎེ ཨནཱཐཔིཎྜིཀོཔི དྷམྨཀཐཾ སུཏྭཱ སྭཱཏནཱཡ སཏྠཱརཾ ནིམནྟེསི. སཏྠཱ ‘‘ཨདྷིཝུཏྠཾ མཡཱ, གཧཔཏི, སྭཱཏནཱཡ བྷཏྟ’’ནྟི ཝཏྭཱ, ‘‘བྷནྟེ, མཡཱ པུརེཏརཾ ཨཱགཏོ ནཏྠི, ཀསྶ ནུ ཁོ ཝོ ཨདྷིཝུཏྠ’’ནྟི ཝུཏྟེ ‘‘ཙཱུལ༹སུབྷདྡཱཡ, གཧཔཏི, ནིམནྟིཏོ’’ཏི ¶ ཝཏྭཱ ‘‘ནནུ, བྷནྟེ, ཙཱུལ༹སུབྷདྡཱ དཱུརེ ཝསཏི ཨིཏོ ཝཱིསཏིཡོཛནསཏམཏྠཀེ’’ཏི ཝུཏྟེ, ‘‘ཨཱམ གཧཔཏི, དཱུརེ ཝསནྟཱཔི ཧི སཔྤུརིསཱ ཨབྷིམུཁེ ཋིཏཱ ཝིཡ པཀཱསེནྟཱི’’ཏི ཝཏྭཱ ཨིམཾ གཱཐམཱཧ –

‘‘དཱུརེ སནྟོ པཀཱསེནྟི, ཧིམཝནྟོཝ པབྦཏོ;

ཨསནྟེཏྠ ན དིསྶནྟི, རཏྟིཾ ཁིཏྟཱ ཡཐཱ སརཱ’’ཏི.

ཏཏྠ སནྟོཏི རཱགཱདཱིནཾ སནྟཏཱཡ བུདྡྷཱདཡོ སནྟཱ ནཱམ. ཨིདྷ པན པུབྦབུདྡྷེསུ ཀཏཱདྷིཀཱརཱ ཨུསྶནྣཀུསལམཱུལཱ བྷཱཝིཏབྷཱཝནཱ སཏྟཱ སནྟོཏི ཨདྷིཔྤེཏཱ. པཀཱསེནྟཱིཏི དཱུརེ ཋིཏཱཔི བུདྡྷཱནཾ ཉཱཎཔཐཾ ཨཱགཙྪནྟཱ པཱཀཊཱ ཧོནྟི. ཧིམཝནྟོ ཝཱཏི ཡཐཱ ཧི ཏིཡོཛནསཧསྶཝིཏྠཏོ པཉྩཡོཛནསཏུབྦེདྷོ ཙཏུརཱསཱིཏིཡཱ ¶ ཀཱུཊསཧསྶེཧི པཊིམཎྜིཏོ ཧིམཝནྟཔབྦཏོ དཱུརེ ཋིཏཱནམྤི ཨབྷིམུཁེ ཋིཏོ ཝིཡ པཀཱསེཏི, ཨེཝཾ པཀཱསེནྟཱིཏི ཨཏྠོ. ཨསནྟེཏྠཱཏི དིཊྛདྷམྨགརུཀཱ ཝིཏིཎྞཔརལོཀཱ ཨཱམིསཙཀྑུཀཱ ཛཱིཝིཀཏྠཱཡ པབྦཛིཏཱ བཱལཔུགྒལཱ ཨསནྟོ ནཱམ, ཏེ ཨེཏྠ བུདྡྷཱནཾ དཀྑིཎསྶ ཛཱཎུམཎྜལསྶ སནྟིཀེ ནིསིནྣཱཔི ན དིསྶནྟི ན པཉྙཱཡནྟི. རཏྟིཾ ཁིཏྟཱཏི རཏྟིཾ ཙཏུརངྒསམནྣཱགཏེ ཨནྡྷཀཱརེ ཁིཏྟསརཱ ཝིཡ ཏཐཱརཱུཔསྶ ཨུཔནིསྶཡབྷཱུཏསྶ པུབྦཧེཏུནོ ཨབྷཱཝེན ན པཉྙཱཡནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཀྐོ དེཝརཱཛཱ ‘‘སཏྠཱརཱ སུབྷདྡཱཡ ནིམནྟནཾ ཨདྷིཝཱསིཏ’’ནྟི ཉཏྭཱ ཝིསྶཀམྨདེཝཔུཏྟཾ ཨཱཎཱཔེསི – ‘‘པཉྩ ཀཱུཊཱགཱརསཏཱནི ནིམྨིནིཏྭཱ སྭེ བུདྡྷཔྤམུཁཾ བྷིཀྑུསངྒྷཾ ཨུགྒནགརཾ ནེཧཱི’’ཏི. སོ པུནདིཝསེ པཉྩསཏཱནི ཀཱུཊཱགཱརཱནི ནིམྨིནིཏྭཱ ཛེཏཝནདྭཱརེ ཨཊྛཱསི. སཏྠཱ ཨུཙྩིནིཏྭཱ ཝིསུདྡྷཁཱིཎཱསཝཱནཾཡེཝ པཉྩསཏཱནི ཨཱདཱཡ སཔརིཝཱརོ ཀཱུཊཱགཱརེསུ ནིསཱིདིཏྭཱ ཨུགྒནགརཾ ཨགམཱསི. ཨུགྒསེཊྛིཔི སཔརིཝཱརོ སུབྷདྡཱཡ དིནྣནཡེནེཝ ཏཐཱགཏསྶ ཨཱགཏམགྒཾ ཨོལོཀེནྟོ སཏྠཱརཾ མཧནྟེན སིརིཝིབྷཝེན ¶ ཨཱགཙྪནྟཾ དིསྭཱ པསནྣམཱནསོ མཱལཱདཱིཧི མཧནྟཾ སཀྐཱརཾ ཀརོནྟོ སཔརིཝཱརོ སམྤཊིཙྪིཏྭཱ ཝནྡིཏྭཱ མཧཱདཱནཾ དཏྭཱ པུནཔྤུནཾ ནིམནྟེཏྭཱ སཏྟཱཧཾ མཧཱདཱནཾ ཨདཱསི. སཏྠཱཔིསྶ སཔྤཱཡཾ སལླཀྑེཏྭཱ ¶ དྷམྨཾ ¶ དེསེསི. ཏཾ ཨཱདིཾ ཀཏྭཱ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི. སཏྠཱ ‘‘ཙཱུལ༹སུབྷདྡཱཡ ཨནུགྒཧཎཏྠཾ ཏྭཾ ཨིདྷེཝ ཧོཧཱི’’ཏི ཨནུརུདྡྷཏྠེརཾ ནིཝཏྟཱཔེཏྭཱ སཱཝཏྠིམེཝ ཨགམཱསི. ཏཏོ པཊྛཱཡ ཏཾ ནགརཾ སདྡྷཱསམྤནྣཾ ཨཧོསཱིཏི.

ཨེཀཱསནནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཝིཧཱརིཏྠེརཾ ནཱམ ཨཱརབྦྷ ཀཐེསི.

སོ ཀིར ཐེརོ ཨེཀཀོཝ སེཡྻཾ ཀཔྤེཏི, ཨེཀཀོཝ ནིསཱིདཏི, ཨེཀཀོཝ ཙངྐམཏི, ཨེཀཀོཝ ཏིཊྛཏཱིཏི ཙཏུཔརིསནྟརེ པཱཀཊོ ཨཧོསི. ཨཐ ནཾ བྷིཀྑཱུ, ‘‘བྷནྟེ, ཨེཝརཱུཔོ ནཱམཱཡཾ ཐེརོ’’ཏི ཏཐཱགཏསྶཱརོཙེསུཾ. སཏྠཱ ‘‘སཱདྷུ སཱདྷཱུ’’ཏི ¶ ཏསྶ སཱདྷུཀཱརཾ དཏྭཱ ‘‘བྷིཀྑུནཱ ནཱམ པཝིཝིཏྟེན བྷཝིཏབྦ’’ནྟི ཝིཝེཀེ ཨཱནིསཾསཾ ཀཐེཏྭཱ ཨིམཾ གཱཐམཱཧ –

‘‘ཨེཀཱསནཾ ཨེཀསེཡྻཾ, ཨེཀོ ཙརམཏནྡིཏོ;

ཨེཀོ དམཡམཏྟཱནཾ, ཝནནྟེ རམིཏོ སིཡཱ’’ཏི.

ཏཏྠ ཨེཀཱསནཾ ཨེཀསེཡྻནྟི བྷིཀྑུསཧསྶམཛ྄ཛྷེཔི མཱུལཀམྨཊྛཱནཾ ཨཝིཛཧིཏྭཱ ཏེནེཝ མནསིཀཱརེན ནིསིནྣསྶ ཨཱསནཾ ཨེཀཱསནཾ ནཱམ. ལོཧཔཱསཱདསདིསེཔི ཙ པཱསཱདེ བྷིཀྑུསཧསྶམཛ྄ཛྷེཔི པཉྙཏྟེ ཝིཙིཏྲཔཙྩཏྠརཎཱུཔདྷཱནེ མཧཱརཧེ སཡནེ སཏིཾ ཨུཔཊྛཔེཏྭཱ དཀྑིཎེན པསྶེན མཱུལཀམྨཊྛཱནམནསིཀཱརེན ནིཔནྣསྶ བྷིཀྑུནོ སེཡྻཱ ཨེཀསེཡྻཱ ནཱམ. ཨེཝརཱུཔཾ ཨེཀཱསནཉྩ ཨེཀསེཡྻཉྩ བྷཛེཐཱཏི ཨཏྠོ. ཨཏནྡིཏོཏི ཛངྒྷབལཾ ནིསྶཱཡ ཛཱིཝིཏཀཔྤནེན ཨཀུསཱིཏོ ཧུཏྭཱ སབྦཱིརིཡཱཔཐེསུ ཨེཀཀོཝ ཙརནྟོཏི ཨཏྠོ. ཨེཀོ དམཡནྟི རཏྟིཊྛཱནཱདཱིསུ ¶ ཀམྨཊྛཱནཾ ཨནུཡུཉྫིཏྭཱ མགྒཕལཱདྷིགམཝསེན ཨེཀོཝ ཧུཏྭཱ ཨཏྟཱནཾ དམེནྟོཏི ཨཏྠོ. ཝནནྟེ རམིཏོ སིཡཱཏི ཨེཝཾ ཨཏྟཱནཾ དམེནྟོ ཨིཏྠིཔུརིསསདྡཱདཱིཧི པཝིཝིཏྟེ ཝནནྟེཡེཝ ཨབྷིརམིཏོ བྷཝེཡྻ. ན ཧི སཀྐཱ ཨཱཀིཎྞཝིཧཱརིནཱ ཨེཝཾ ཨཏྟཱནཾ དམེཏུནྟི ཨཏྠོ.

དེསནཱཝསཱནེ ¶ ¶ བཧཱུ སོཏཱཔཏྟིཕལཱདཱིནི པཱཔུཎིཾསུ. ཏཏོ པཊྛཱཡ མཧཱཛནོ ཨེཀཝིཧཱརིཀམེཝ པཏྠེསཱིཏི.

ཨབྷཱུཏཝཱདཱིཏི ¶ ¶ ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སུནྡརིཾ པརིབྦཱཛིཀཾ ཨཱརབྦྷ ཀཐེསི.

‘‘ཏེན ཁོ པན སམཡེན བྷགཝཱ སཀྐཏོ ཧོཏི གརུཀཏོ མཱནིཏོ པཱུཛིཏོ’’ཏི ཝཏྠུ ཝིཏྠཱརཏོ ཨུདཱནེ (ཨུདཱ. ༣༨) ཨཱགཏམེཝ. ཨཡཾ པནེཏྠ སངྑེཔོ – བྷགཝཏོ ཀིར བྷིཀྑུསངྒྷསྶ ཙ པཉྩནྣཾ མཧཱནདཱིནཾ མཧོགྷསདིསེ ལཱབྷསཀྐཱརེ ཨུཔྤནྣེ ཧཏལཱབྷསཀྐཱརཱ ཨཉྙཏིཏྠིཡཱ སཱུརིཡུགྒམནཀཱལེ ཁཛྫོཔནཀཱ ཝིཡ ནིཔྤབྷཱ ཧུཏྭཱ ཨེཀཏོ སནྣིཔཏིཏྭཱ མནྟཡིཾསུ – ‘‘མཡཾ སམཎསྶ གོཏམསྶ ཨུཔྤནྣཀཱལཏོ པཊྛཱཡ ཧཏལཱབྷསཀྐཱརཱ, ན ནོ ཀོཙི ཨཏྠིབྷཱཝམྤི ཛཱནཱཏི, ཀེན ནུ ཁོ སདྡྷིཾ ཨེཀཏོ ཧུཏྭཱ སམཎསྶ གོཏམསྶ ཨཝཎྞཾ ཨུཔྤཱདེཏྭཱ ལཱབྷསཀྐཱརམསྶ ཨནྟརདྷཱཔེཡྻཱམཱ’’ཏི. ཨཐ ནེསཾ ཨེཏདཧོསི – ‘‘སུནྡརིཡཱ སདྡྷིཾ ཨེཀཏོ ཧུཏྭཱ སཀྐུཎིསྶཱམཱ’’ཏི. ཏེ ཨེཀདིཝསཾ སུནྡརིཾ ཏིཏྠིཡཱརཱམཾ པཝིསིཏྭཱ ཝནྡིཏྭཱ ཋིཏཾ ནཱལཔིཾསུ. སཱ པུནཔྤུནཾ ¶ སལླཔནྟཱིཔི པཊིཝཙནཾ ཨལབྷིཏྭཱ ‘‘ཨཔི པནཡྻཱ, ཀེནཙི ཝིཧེཋིཏཏྠཱ’’ཏི པུཙྪི. ‘‘ཀིཾ, བྷགིནི, སམཎཾ གོཏམཾ ཨམྷེ ཝིཧེཋེཏྭཱ ཧཏལཱབྷསཀྐཱརེ ཀཏྭཱ ཝིཙརནྟཾ ན པསྶསཱི’’ཏི? ‘‘མཡཱ ཨེཏྠ ཀིཾ ཀཱཏུཾ ཝཊྚཏཱི’’ཏི? ‘‘ཏྭཾ ཁོསི, བྷགིནི, ཨབྷིརཱུཔཱ སོབྷགྒཔྤཏྟཱ, སམཎསྶ གོཏམསྶ ཨཡསཾ ཨཱརོཔེཏྭཱ མཧཱཛནཾ ཏཝ ཀཐཾ གཱཧཱཔེཏྭཱ ཧཏལཱབྷསཀྐཱརཾ ཀརོཧཱི’’ཏི. སཱ ཏཾ སུཏྭཱ ‘‘སཱདྷཱུ’’ཏི སམྤཊིཙྪིཏྭཱ པཀྐནྟཱ ཏཏོ པཊྛཱཡ མཱལཱགནྡྷཝིལེཔནཀཔྤཱུརཀཊུཀཕལཱདཱིནི གཧེཏྭཱ སཱཡཾ མཧཱཛནསྶ སཏྠུ དྷམྨདེསནཾ སུཏྭཱ ནགརཾ པཝིསནཀཱལེ ཛེཏཝནཱབྷིམུཁཱི གཙྪཏི, ‘‘ཀཧཾ གཙྪསཱི’’ཏི ཙ པུཊྛཱ ‘‘སམཎསྶ གོཏམསྶ སནྟིཀཾ གམིསྶཱམི, ཨཧཉྷི ཏེན སདྡྷིཾ ཨེཀགནྡྷཀུཊིཡཾ ཝསཱམཱི’’ཏི ཝཏྭཱ ཨཉྙཏརསྨིཾ ཏིཏྠིཡཱརཱམེ ཝསིཏྭཱ པཱཏོཝ ཛེཏཝནམགྒཾ ཨོཏརིཏྭཱ ནགརཱབྷིམུཁཱི ཨཱགཙྪནྟཱི ‘‘ཀིཾ, སུནྡརི, ཀཧཾ གཏཱསཱི’’ཏི པུཊྛཱ ‘‘སམཎེན གོཏམེན སདྡྷིཾ ཨེཀགནྡྷཀུཊིཡཾ ཝསིཏྭཱ ཏཾ ཀིལེསརཏིཡཱ རམཱཔེཏྭཱ ཨཱགཏཱམྷཱི’’ཏི ཝདཏི.

ཨཐ ¶ ¶ ཏེ ཀཏིཔཱཧཙྩཡེན ¶ དྷུཏྟཱནཾ ཀཧཱཔཎེ དཏྭཱ ‘‘གཙྪཐ སུནྡརིཾ མཱརེཏྭཱ སམཎསྶ གོཏམསྶ གནྡྷཀུཊིཡཱ སམཱིཔེ མཱལཱཀཙཝརནྟརེ ནིཀྑིཔིཏྭཱ ཨེཐཱ’’ཏི ཝདིཾསུ. ཏེ ཏཐཱ ཨཀཾསུ. ཏཏོ ཏིཏྠིཡཱ ‘‘སུནྡརིཾ ན པསྶཱམཱ’’ཏི ཀོལཱཧལཾ ཀཏྭཱ རཉྙོ ཨཱརོཙེཏྭཱ ‘‘ཀཧཾ ཝོ ཨཱསངྐཱ’’ཏི ཝུཏྟཱ ‘‘ཨིམེསུ དིཝསེསུ ཛེཏཝནེ ཝསཏི, ཏཏྠསྶཱ པཝཏྟིཾ ན ཛཱནཱམཱ’’ཏི ཝཏྭཱ ‘‘ཏེན ཧི གཙྪཐ, ནཾ ཝིཙིནཐཱ’’ཏི རཉྙཱ ཨནུཉྙཱཏཱ ཨཏྟནོ ཨུཔཊྛཱཀེ གཧེཏྭཱ ཛེཏཝནཾ གནྟྭཱ ཝིཙིནནྟཱ མཱལཱཀཙཝརནྟརེ ཏཾ དིསྭཱ མཉྩཀཾ ཨཱརོཔེཏྭཱ ནགརཾ པཝེསེཏྭཱ ‘‘སམཎསྶ གོཏམསྶ སཱཝཀཱ ‘སཏྠཱརཱ ཀཏཾ པཱཔཀམྨཾ པཊིཙྪཱདེསྶཱམཱ’ཏི སུནྡརིཾ མཱརེཏྭཱ མཱལཱཀཙཝརནྟརེ ནིཀྑིཔིཾསཱུ’’ཏི རཉྙོ ཨཱརོཙཡིཾསུ. རཱཛཱ ‘‘ཏེན ཧི གཙྪཐ, ནགརཾ ཨཱཧིཎྜཐཱ’’ཏི ཨཱཧ. ཏེ ནགརཝཱིཐཱིསུ ‘‘པསྶཐ སམཎཱནཾ སཀྱཔུཏྟིཡཱནཾ ཀམྨ’’ནྟིཨཱདཱིནི ཝཏྭཱ པུན རཉྙོ ནིཝེསནདྭཱརཾ ཨཱགམིཾསུ. རཱཛཱ སུནྡརིཡཱ སརཱིརཾ ཨཱམཀསུསཱནེ ཨཊྚཀཾ ཨཱརོཔེཏྭཱ རཀྑཱཔེསི. སཱཝཏྠིཝཱསིནོ ཋཔེཏྭཱ ཨརིཡསཱཝཀེ སེསཱ ཡེབྷུཡྻེན ‘‘པསྶཐ སམཎཱནཾ སཀྱཔུཏྟིཡཱནཾ ཀམྨ’’ནྟིཨཱདཱིནི ཝཏྭཱ ཨནྟོནགརེཔི བཧིནགརེཔི བྷིཀྑཱུ ¶ ཨཀྐོསནྟཱ ཝིཙརནྟི. བྷིཀྑཱུ ཏཾ པཝཏྟིཾ ཏཐཱགཏསྶ ཨཱརོཙེསུཾ. སཏྠཱ ‘‘ཏེན ཧི ཏུམྷེཔི ཏེ མནུསྶེ ཨེཝཾ པཊིཙོདེཐཱ’’ཏི ཝཏྭཱ ཨིམཾ གཱཐམཱཧ –

ཏཏྠ ཨབྷཱུཏཝཱདཱིཏི པརསྶ དོསཾ ཨདིསྭཱཝ མུསཱཝཱདཾ ཀཏྭཱ ཏུཙྪེན པརཾ ཨབྦྷཱཙིཀྑནྟོ. ཀཏྭཱཏི ཡོ ཝཱ པན པཱཔཀམྨཾ ཀཏྭཱ ‘‘ནཱཧཾ ཨེཏཾ ཀརོམཱི’’ཏི ཨཱཧ. པེཙྩ སམཱ བྷཝནྟཱིཏི ཏེ ཨུབྷོཔི ཛནཱ པརལོཀཾ གནྟྭཱ ནིརཡཾ ཨུཔགམནེན གཏིཡཱ སམཱ བྷཝནྟི. གཏིཡེཝ ནེསཾ པརིཙྪིནྣཱ, ཨཱཡུ པན ནེསཾ ན པརིཙྪིནྣཾ. བཧུཀཉྷི པཱཔཀམྨཾ ཀཏྭཱ ཙིརཾ ནིརཡེ པཙྩནྟི, པརིཏྟཾ ཀཏྭཱ ཨཔྤམཏྟཀམེཝ ཀཱལཾ. ཡསྨཱ པན ནེསཾ ཨུབྷིནྣམྤི ¶ ལཱམཀམེཝ ཀམྨཾ, ཏེན ཝུཏྟཾ – ‘‘ནིཧཱིནཀམྨཱ མནུཛཱ པརཏྠཱ’’ཏི. པརཏྠཱཏི ཨིམསྶ པན པདསྶ པུརཏོ པེཙྩཔདེན སམྦནྡྷོ. པེཙྩ པརཏྠ ཨིཏོ གནྟྭཱ ཏེ ནིཧཱིནཀམྨཱ པརལོཀེ སམཱ བྷཝནྟཱིཏི ཨཏྠོ. དེསནཱཝསཱནེ ¶ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

རཱཛཱ ‘‘སུནྡརིཡཱ ཨཉྙེཧི མཱརིཏབྷཱཝཾ ཛཱནཱཐཱ’’ཏི པུརིསེ ཨུཡྻོཛེསི. ཨཐ ཏེ དྷུཏྟཱ ཏེཧི ¶ ཀཧཱཔཎེཧི སུརཾ པིཝནྟཱ ཨཉྙམཉྙཾ ཀལཧཾ ཀརིཾསུ. ཨེཀོ ཨེཀཾ ཨཱཧ – ‘‘ཏྭཾ སུནྡརིཾ ཨེཀཔྤཧཱརེནེཝ མཱརེཏྭཱ མཱལཱཀཙཝརནྟརེ ནིཀྑིཔིཏྭཱ ཏཏོ ལདྡྷཀཧཱཔཎེཧི སུརཾ པིཝསི, ཧོཏུ ཧོཏཱུ’’ཏི. རཱཛཔུརིསཱ ཏེ དྷུཏྟེ གཧེཏྭཱ རཉྙོ དསྶེསུཾ. ཨཐ ནེ རཱཛཱ ‘‘ཏུམྷེཧི སཱ མཱརིཏཱ’’ཏི པུཙྪི. ‘‘ཨཱམ, དེཝཱ’’ཏི. ‘‘ཀེཧི མཱརཱཔིཏཱ’’ཏི? ‘‘ཨཉྙཏིཏྠིཡེཧི, དེཝཱ’’ཏི. རཱཛཱ ཏིཏྠིཡེ པཀྐོསཱཔེཏྭཱ པུཙྪི. ཏེ ཏཐེཝ ཝདིཾསུ. ཏེན ཧི གཙྪཐ ཏུམྷེ ཨེཝཾ ཝདནྟཱ ནགརཾ ཨཱཧིཎྜཐ – ‘‘ཨཡཾ སུནྡརཱི སམཎསྶ གོཏམསྶ ཨཝཎྞཾ ཨཱརོཔེཏུཀཱམེཧི ཨམྷེཧི མཱརཱཔིཏཱ, ནེཝ སམཎསྶ གོཏམསྶ, ན སཱཝཀཱནཾ དོསོ ཨཏྠི, ཨམྷཱཀམེཝ དོསོ’’ཏི. ཏེ ཏཐཱ ཀརིཾསུ. བཱལམཧཱཛནོ ཏདཱ སདྡཧི, ཏིཏྠིཡཱཔི དྷུཏྟཱཔི པུརིསཝདྷདཎྜཾ པཱཔུཎིཾསུ. ཏཏོ པཊྛཱཡ བུདྡྷཱནཾ སཀྐཱརོ མཧཱ ཨཧོསཱིཏི.

ཀཱསཱཝཀཎྛཱཏི ¶ ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ དུཙྩརིཏཕལཱནུབྷཱཝེན པཱིལི༹ཏེ སཏྟེ ཨཱརབྦྷ ཀཐེསི.

ཨཱཡསྨཱ ཧི མོགྒལླཱནོ ལཀྑཎཏྠེརེན སདྡྷིཾ གིཛ྄ཛྷཀཱུཊཱ ཨོརོཧནྟོ ཨཊྛིསངྑལིཀཔེཏཱདཱིནཾ ཨཏྟབྷཱཝེ དིསྭཱ སིཏཾ ཀརོནྟོ ལཀྑཎཏྠེརེན སིཏཀཱརཎཾ པུཊྛོ ‘‘ཨཀཱལོ, ཨཱཝུསོ, ཨིམསྶ པཉྷསྶ, ཏཐཱགཏསྶ སནྟིཀེ མཾ པུཙྪེཡྻཱསཱི’’ཏི ཝཏྭཱ ཏཐཱགཏསྶ སནྟིཀེ ཐེརེན པུཊྛོ ཨཊྛིསངྑལིཀཔེཏཱདཱིནཾ དིཊྛབྷཱཝཾ ཨཱཙིཀྑིཏྭཱ ‘‘ཨིདྷཱཧཾ, ཨཱཝུསོ, གིཛ྄ཛྷཀཱུཊཱ པབྦཏཱ ཨོརོཧནྟོ ཨདྡསཾ བྷིཀྑུཾ ཝེཧཱསཾ ¶ གཙྪནྟཾ, ཏསྶ སངྒྷཱཊིཔི ཨཱདིཏྟཱ སམྤཛྫལིཏཱ སཛོཏིབྷཱུཏཱ…པེ… ཀཱཡོཔི ཨཱདིཏྟོ’’ཏིཨཱདིནཱ (པཱརཱ. ༢༣༠; སཾ. ནི. ༢.༢༡༨) ནཡེན སདྡྷིཾ པཏྟཙཱིཝརཀཱཡབནྡྷནཱདཱིཧི ཌཡ྄ཧམཱནེ པཉྩ སཧདྷམྨིཀེ ཨཱརོཙེསི. སཏྠཱ ཏེསཾ ཀསྶཔདསབལསྶ སཱསནེ པབྦཛིཏྭཱ པབྦཛྫཱཡ ཨནུརཱུཔཾ ཀཱཏུཾ ཨསཀྐོནྟཱནཾ པཱཔབྷཱཝཾ ཨཱཙིཀྑིཏྭཱ ཏསྨིཾ ཁཎེ ཏཏྠ ནིསིནྣཱནཾ བཧཱུནཾ པཱཔབྷིཀྑཱུནཾ དུཙྩརིཏཀམྨསྶ ཝིཔཱཀཾ དསྶེནྟོ ཨིམཾ གཱཐམཱཧ –

‘‘ཀཱསཱཝཀཎྛཱ བཧཝོ, པཱཔདྷམྨཱ ཨསཉྙཏཱ;

པཱཔཱ པཱཔེཧི ཀམྨེཧི, ནིརཡཾ ཏེ ཨུཔཔཛྫརེ’’ཏི.

ཏཏྠ ¶ ¶ ཀཱསཱཝཀཎྛཱཏི ཀཱསཱཝེན པལིཝེཋིཏཀཎྛཱ. པཱཔདྷམྨཱཏི ལཱམཀདྷམྨཱ. ཨསཉྙཏཱཏི ཀཱཡཱདིསཾཡམརཧིཏཱ, ཏཐཱརཱུཔཱ པཱཔཔུགྒལཱ ཨཏྟནཱ ཀཏེཧི ཨཀུསལཀམྨེཧི ནིརཡཾ ཨུཔཔཛྫནྟི, ཏེ ཏཏྠ པཙྩིཏྭཱ ཏཏོ ཙུཏཱ ཝིཔཱཀཱཝསེསེན པེཏེསུཔི ཨེཝཾ པཙྩནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

དུཙྩརིཏཕལཔཱིལི༹ཏཝཏྠུ དུཏིཡཾ.

སེཡྻོ ཨཡོགུལོ༹ཏི ཨིམཾ དྷམྨདེསནཾ སཏྠཱ ཝེསཱལིཾ ཨུཔནིསྶཱཡ མཧཱཝནེ ཝིཧརནྟོ ཝགྒུམུདཱཏཱིརིཡེ བྷིཀྑཱུ ཨཱརབྦྷ ཀཐེསི. ཝཏྠུ ཨུཏྟརིམནུསྶདྷམྨཔཱརཱཛིཀེ (པཱརཱ. ༡༩༣ ཨཱདཡོ) ཨཱགཏམེཝ.

ཏདཱ ཧི སཏྠཱ ཏེ བྷིཀྑཱུ ‘‘ཀིཾ པན ཏུམྷེ, བྷིཀྑཝེ, ཨུདརསྶཏྠཱཡ གིཧཱིནཾ ཨཉྙམཉྙསྶ ཨུཏྟརིམནུསྶདྷམྨསྶ ཝཎྞཾ བྷཱསིཏྠཱ’’ཏི ཝཏྭཱ ཏེཧི ‘‘ཨཱམ, བྷནྟེ’’ཏི ཝུཏྟེ ཏེ བྷིཀྑཱུ ཨནེཀཔརིཡཱཡེན གརཧིཏྭཱ ཨིམཾ གཱཐམཱཧ –

‘‘སེཡྻོ ¶ ཨཡོགུལོ༹ བྷུཏྟོ, ཏཏྟོ ཨགྒིསིཁཱུཔམོ;

ཡཉྩེ བྷུཉྫེཡྻ དུསྶཱིལོ, རཊྛཔིཎྜམསཉྙཏོ’’ཏི.

ཏཏྠ ¶ ཡཉྩེ བྷུཉྫེཡྻཱཏི ཡཾ དུསྶཱིལོ ནིསྶཱིལཔུགྒལོ ཀཱཡཱདཱིཧི ཨསཉྙཏོ རཊྛཝཱསཱིཧི སདྡྷཱཡ དིནྣཾ རཊྛཔིཎྜཾ ‘‘སམཎོམྷཱི’’ཏི པཊིཛཱནནྟོ གཧེཏྭཱ བྷུཉྫེཡྻ, ཏཏྟོ ཨཱདིཏྟོ ཨགྒིཝཎྞོ ཨཡོགུལོ༹ཝ བྷུཏྟོ སེཡྻོ སུནྡརཏརོ. ཀིཾ ཀཱརཎཱ? ཏཔྤཙྩཡཱ ཧི ཨེཀོཝ ཨཏྟབྷཱཝོ ཛྷཱཡེཡྻ, དུསྶཱིལོ པན སདྡྷཱདེཡྻཾ བྷུཉྫིཏྭཱ ཨནེཀཱནིཔི ཛཱཏིསཏཱནི ནིརཡེ པཙྩེཡྻཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཝགྒུམུདཱཏཱིརིཡབྷིཀྑུཝཏྠུ ཏཏིཡཾ.

ཙཏྟཱརི ¶ ཋཱནཱནཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨནཱཐཔིཎྜིཀསྶ བྷཱགིནེཡྻཾ ཁེམཀཾ ནཱམ སེཊྛིཔུཏྟཾ ཨཱརབྦྷ ཀཐེསི.

སོ ཀིར ཨབྷིརཱུཔོ ཨཧོསི, ཡེབྷུཡྻེན ཨིཏྠིཡོ ཏཾ དིསྭཱ རཱགཱབྷིབྷཱུཏཱ སཀབྷཱཝེན སཎྛཱཏུཾ ནཱསཀྑིཾསུ. སོཔི པརདཱརཀམྨཱབྷིརཏོཝ ཨཧོསི. ཨཐ ནཾ རཏྟིཾ རཱཛཔུརིསཱ གཧེཏྭཱ རཉྙོ དསྶེསུཾ. རཱཛཱ མཧཱསེཊྛིསྶ ལཛྫཱམཱིཏི ཏཾ ཀིཉྩི ཨཝཏྭཱ ཝིསྶཛྫཱཔེསི. སོ པན ནེཝ ཝིརམི ¶ . ཨཐ ནཾ དུཏིཡམྤི ཏཏིཡམྤི རཱཛཔུརིསཱ གཧེཏྭཱ རཉྙོ དསྶེསུཾ. རཱཛཱ ཝིསྶཛྫཱཔེསིཡེཝ. མཧཱསེཊྛི, ཏཾ པཝཏྟིཾ སུཏྭཱ ཏཾ ཨཱདཱཡ སཏྠུ སནྟིཀཾ གནྟྭཱ ཏཾ པཝཏྟིཾ ཨཱརོཙེཏྭཱ, ‘‘བྷནྟེ, ཨིམསྶ དྷམྨཾ དེསེཐཱ’’ཏི ཨཱཧ. སཏྠཱ ཏསྶ སཾཝེགཀཐཾ ཝཏྭཱ པརདཱརསེཝནཱཡ དོསཾ དསྶེནྟོ ཨིམཱ གཱཐཱ ཨབྷཱསི –

ཏཏྠ ཋཱནཱནཱིཏི དུཀྑཀཱརཎཱནི. པམཏྟོཏི སཏིཝོསྶགྒེན སམནྣཱགཏོ. ཨཱཔཛྫཏཱིཏི པཱཔུཎཱཏི. པརདཱརཱུཔསེཝཱིཏི པརདཱརཾ ཨུཔསེཝནྟོ ཨུཔྤཐཙཱརཱི. ཨཔུཉྙལཱབྷནྟི ཨཀུསལལཱབྷཾ. ན ནིཀཱམསེཡྻནྟི ཡཐཱ ཨིཙྪཏི, ཨེཝཾ སེཡྻཾ ཨལབྷིཏྭཱ ཨནིཙྪིཏཾ པརིཏྟཀམེཝ ཀཱལཾ སེཡྻཾ ལབྷཏི. ཨཔུཉྙལཱབྷོ ཙཱཏི ཨེཝཾ ཏསྶ ཨཡཉྩ ཨཔུཉྙལཱབྷོ, ཏེན ཙ ཨཔུཉྙེན ནིརཡསངྑཱཏཱ པཱཔིཀཱ གཏི ཧོཏི. རཏཱི ཙ ཐོཀིཀཱཏི ཡཱ ཏསྶ བྷཱིཏསྶ བྷཱིཏཱཡ ཨིཏྠིཡཱ སདྡྷིཾ རཏི, སཱཔི ཐོཀིཀཱ པརིཏྟཱ ཧོཏི. གརུཀནྟི རཱཛཱ ཙ ཧཏྠཙྪེདཱདིཝསེན གརུཀཾ དཎྜཾ ¶ པཎེཏི. ཏསྨཱཏི ཡསྨཱ པརདཱརཾ སེཝནྟོ ཨེཏཱནི ཨཔུཉྙཱདཱིནི པཱཔུཎཱཏི, ཏསྨཱ པརདཱརཾ ན སེཝེཡྻཱཏི ཨཏྠོ.

དེསནཱཝསཱནེ ¶ ཁེམཀོ སོཏཱཔཏྟིཕལེ པཏིཊྛཧི. ཏཏོ པཊྛཱཡ མཧཱཛནོ སུཁཾ ཝཱིཏིནཱམེསི. ཀིཾ པནསྶ པུབྦཀམྨནྟི? སོ ཀིར ཀསྶཔབུདྡྷཀཱལེ ཨུཏྟམམལློ ཧུཏྭཱ དྭེ སུཝཎྞཔཊཱཀཱ དསབལསྶ ཀཉྩནཐཱུཔེ ཨཱརོཔེཏྭཱ པཏྠནཾ པཊྛཔེསི ‘‘ཋཔེཏྭཱ ཉཱཏིསཱལོཧིཏིཏྠིཡོ ཨཝསེསཱ མཾ དིསྭཱ རཛྫནྟཱུ’’ཏི. ཨིདམསྶ པུབྦཀམྨནྟི. ཏེན ཏཾ ནིབྦཏྟནིབྦཏྟཊྛཱནེ དིསྭཱ པརེསཾ ཨིཏྠིཡོ སཀབྷཱཝེན སཎྛཱཏུཾ ནཱསཀྑིཾསཱུཏི.

ཀུསོ ཡཐཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ དུབྦཙབྷིཀྑུཾ ཨཱརབྦྷ ཀཐེསི.

ཨེཀོ ཀིར བྷིཀྑུ ཨསཉྩིཙྩ ཨེཀཾ ཏིཎཾ ཚིནྡིཏྭཱ ཀུཀྐུཙྩེ ཨུཔྤནྣེ ཨེཀཾ བྷིཀྑུཾ ཨུཔསངྐམིཏྭཱ, ‘‘ཨཱཝུསོ, ཡོ ཏིཎཾ ཚིནྡཏི, ཏསྶ ཀིཾ ཧོཏཱི’’ཏི ཏཾ ཨཏྟནཱ ཀཏབྷཱཝཾ ཨཱརོཙེཏྭཱ པུཙྪི. ཨཐ ནཾ ཨིཏརོ ‘‘ཏྭཾ ¶ ཏིཎསྶ ཚིནྣཀཱརཎཱ ཀིཉྩི ཧོཏཱིཏི སཉྙཾ ཀརོསི, ན ཨེཏྠ ཀིཉྩི ཧོཏི, དེསེཏྭཱ པན མུཙྩཏཱི’’ཏི ཝཏྭཱ སཡམྤི ¶ ཨུབྷོཧི ཧཏྠེཧི ཏིཎཾ ལུཉྩིཏྭཱ ཨགྒཧེསི. བྷིཀྑཱུ ཏཾ པཝཏྟིཾ སཏྠུ ཨཱརོཙེསུཾ. སཏྠཱ ཏཾ བྷིཀྑུཾ ཨནེཀཔརིཡཱཡེན ཝིགརཧིཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ཀུསོ ཡཐཱ དུགྒཧིཏོ, ཧཏྠམེཝཱནུཀནྟཏི;

སཱམཉྙཾ དུཔྤརཱམཊྛཾ, ནིརཡཱཡུཔཀཌྜྷཏི.

‘‘ཡཾ ཀིཉྩི སིཐིལཾ ཀམྨཾ, སཾཀིལིཊྛཉྩ ཡཾ ཝཏཾ;

སངྐསྶརཾ བྲཧྨཙརིཡཾ, ན ཏཾ ཧོཏི མཧཔྥལཾ.

‘‘ཀཡིརཱ ¶ ཙེ ཀཡིརཱཐེནཾ, དལ༹ྷམེནཾ པརཀྐམེ;

སིཐིལོ ཧི པརིབྦཱཛོ, བྷིཡྻོ ཨཱཀིརཏེ རཛ’’ནྟི.

ཏཏྠ ཀུསོཏི ཡཾ ཀིཉྩི ཏིཁིཎདྷཱརཾ ཏིཎཾ ཨནྟམསོ ཏཱལཔཎྞམྤི, ཡཐཱ སོ ཀུསོ ཡེན དུགྒཧིཏོ, ཏསྶ ཧཏྠཾ ཨནུཀནྟཏི ཕཱལེཏི, ཨེཝམེཝ སམཎདྷམྨསངྑཱཏཾ སཱམཉྙམྤི ཁཎྜསཱིལཱདིཏཱཡ དུཔྤརཱམཊྛཾ ནིརཡཱཡུཔཀཌྜྷཏི, ནིརཡེ ནིབྦཏྟཱཔེཏཱིཏི ཨཏྠོ. སིཐིལནྟི ཨོལཱིཡིཏྭཱ ཀརཎེན སིཐིལགཱཧཾ ཀཏྭཱ ཀཏཾ ཡཾཀིཉྩི ཀམྨཾ. སཾཀིལིཊྛནྟི ¶ ཝེསིཡཱདིཀེསུ ཨགོཙརེསུ ཙརཎེན སཾཀིལིཊྛཾ. སངྐསྶརནྟི སངྐཱཧི སརིཏབྦཾ, ཨུཔོསཐཀིཙྩཱདཱིསུ ཨཉྙཏརཀིཙྩེན སནྣིཔཏིཏམྤི སངྒྷཾ དིསྭཱ ‘‘ཨདྡྷཱ ཨིམེ མམ ཙརིཡཾ ཉཏྭཱ མཾ ཨུཀྑིཔིཏུཀཱམཱཝ སནྣིཔཏིཏཱ’’ཏི ཨེཝཾ ཨཏྟནོ ཨཱསངྐཱཧི སརིཏཾ ཨུསྶངྐིཏཾ པརིསངྐིཏཾ. ན ཏཾ ཧོཏཱིཏི ཏཾ ཨེཝརཱུཔཾ སམཎདྷམྨསངྑཱཏཾ བྲཧྨཙརིཡཾ ཏསྶ པུགྒལསྶ མཧཔྥལཾ ན ཧོཏི, ཏསྶ མཧཔྥལཱབྷཱཝེནེཝ བྷིཀྑདཱཡཀཱནམྤིསྶ ན མཧཔྥལཾ ཧོཏཱིཏི ཨཏྠོ. ཀཡིརཱ ཙེཏི ཏསྨཱ ཡཾ ཀམྨཾ ཀརེཡྻ, ཏཾ ཀརེཡྻཱཐེཝ. དལ༹ྷམེནཾ པརཀྐམེཏི ཐིརཀཏམེཝ ཀཏྭཱ ཨཝཏྟསམཱདཱནོ ཧུཏྭཱ ཨེནཾ ཀཡིརཱ. པརིབྦཱཛོཏི སིཐིལབྷཱཝེན ཀཏོ ཁཎྜཱདིབྷཱཝཔྤཏྟོ སམཎདྷམྨོ. བྷིཡྻོ ཨཱཀིརཏེ རཛནྟི ཨབྦྷནྟརེ ཝིཛྫམཱནཾ རཱགརཛཱདིཾ ཨེཝརཱུཔོ སམཎདྷམྨོ ཨཔནེཏུཾ ན སཀྐོཏི, ཨཐ ཁོ ཏསྶ ཨུཔརི ཨཔརམྤི རཱགརཛཱདིཾ ཨཱཀིརཏཱིཏི ཨཏྠོ.

དེསནཱཝསཱནེ ¶ བཧཱུ སོཏཱཔཏྟིཕལཱདཱིནི པཱཔུཎིཾསུ, སོཔི བྷིཀྑུ སཾཝརེ ཋཏྭཱ པཙྪཱ ཝིཔསྶནཾ ཝཌྜྷེཏྭཱ ཨརཧཏྟཾ པཱཔུཎཱིཏི.

ཨཀཏནྟི ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ ཨིསྶཱཔཀཏཾ ཨིཏྠིཾ ཨཱརབྦྷ ཀཐེསི.

ཏསྶཱ ཀིར སཱམིཀོ ཨེཀཱཡ གེཧདཱསིཡཱ སདྡྷིཾ སནྠཝཾ ཨཀཱསི. སཱ ཨིསྶཱཔཀཏཱ ཏཾ དཱསིཾ ཧཏྠཔཱདེསུ བནྡྷིཏྭཱ ཏསྶཱ ཀཎྞནཱསཾ ཚིནྡིཏྭཱ ཨེཀསྨིཾ གུལ༹ྷགབྦྷེ པཀྑིཔིཏྭཱ དྭཱརཾ པིདཧིཏྭཱ ཏསྶ ཀམྨསྶ ཨཏྟནཱ ཀཏབྷཱཝཾ པཊིཙྪཱདེཏུཾ ‘‘ཨེཧི, ཨཡྻ, ཝིཧཱརཾ གནྟྭཱ དྷམྨཾ ¶ སུཎིསྶཱམཱ’’ཏི སཱམིཀཾ ཨཱདཱཡ ཝིཧཱརཾ གནྟྭཱ དྷམྨཾ སུཎནྟཱི ནིསཱིདི. ཨཐསྶཱ ཨཱགནྟུཀཉཱཏཀཱ གེཧཾ ཨཱགནྟྭཱ དྭཱརཾ ཝིཝརིཏྭཱ ཏཾ ཝིཔྤཀཱརཾ དིསྭཱ དཱསིཾ མོཙཡིཾསུ. སཱ ཝིཧཱརཾ གནྟྭཱ ཙཏུཔརིསམཛ྄ཛྷེ ཋིཏཱ ཏམཏྠཾ དསབལསྶ ཨཱརོཙེསི. སཏྠཱ ཏསྶཱ ཝཙནཾ སུཏྭཱ ‘‘དུཙྩརིཏཾ ནཱམ ‘ཨིདཾ མེ ཨཉྙེ ན ཛཱནནྟཱི’ཏི ཨཔྤམཏྟཀམྤི ན ཀཱཏབྦཾ, ཨཉྙསྨིཾ ཨཛཱནནྟེཔི སུཙརིཏམེཝ ཀཱཏབྦཾ. པཊིཙྪཱདེཏྭཱ ཀཏམྤི ཧི དུཙྩརིཏཾ ནཱམ པཙྪཱནུཏཱཔཾ ཀརོཏི, སུཙརིཏཾ པཱམོཛྫམེཝ ཛནེཏཱི’’ཏི ཝཏྭཱ ཨིམཾ གཱཐམཱཧ –

‘‘ཨཀཏཾ དུཀྐཊཾ སེཡྻོ, པཙྪཱ ཏཔྤཏི དུཀྐཊཾ;

ཀཏཉྩ སུཀཏཾ སེཡྻོ, ཡཾ ཀཏྭཱ ནཱནུཏཔྤཏཱི’’ཏི.

ཏཏྠ དུཀྐཊནྟི སཱཝཛྫཾ ཨཔཱཡསཾཝཏྟནིཀཾ ཀམྨཾ ཨཀཏམེཝ སེཡྻོ ཝརཾ ཨུཏྟམཾ. པཙྪཱ ཏཔྤཏཱིཏི ¶ ཏཉྷི ཨནུསྶརིཏཱནུསྶརིཏཀཱལེ ཏཔྤཏིཡེཝ. སུཀཏནྟི ཨནཝཛྫཾ པན སུཁདཱཡཀཾ སུགཏིསཾཝཏྟནིཀམེཝ ཀམྨཾ ཀཏཾ སེཡྻོ. ཡཾ ཀཏྭཱཏི ཡཾ ཀམྨཾ ཀཏྭཱ པཙྪཱ ཨནུསྶརཎཀཱལེ ན ཏཔྤཏི ནཱནུཏཔྤཏི, སོམནསྶཛཱཏོཝ ཧོཏི, ཏཾ ཀམྨཾ ཝརནྟི ཨཏྠོ.

དེསནཱཝསཱནེ ཨུཔཱསཀོ ཙ སཱ ཙ ཨིཏྠཱི སོཏཱཔཏྟིཕལེ པཏིཊྛཧིཾསུ. ཏཉྩ པན དཱསིཾ ཏཏྠེཝ བྷུཛིསྶཾ ཀཏྭཱ དྷམྨཙཱརིནིཾ ཀརིཾསཱུཏི.

ནགརཾ ¶ ཡཐཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ ཨཱགནྟུཀེ བྷིཀྑཱུ ཨཱརབྦྷ ཀཐེསི.

ཏེ ཀིར ཨེཀསྨིཾ པཙྩནྟེ ཝསྶཾ ཨུཔགནྟྭཱ པཋམམཱསེ སུཁཾ ཝིཧརིཾསུ. མཛ྄ཛྷིམམཱསེ ཙོརཱ ཨཱགནྟྭཱ ཏེསཾ གོཙརགཱམཾ པཧརིཏྭཱ ཀརམརེ གཧེཏྭཱ ཨགམཾསུ. ཏཏོ པཊྛཱཡ མནུསྶཱ ཙོརཱནཾ པཊིབཱཧནཏྠཱཡ ཏཾ པཙྩནྟནགརཾ ཨབྷིསངྑརོནྟཱ ཏེ བྷིཀྑཱུ སཀྐཙྩཾ ཨུཔཊྛཱཏུཾ ཨོཀཱསཾ ན ལབྷིཾསུ. ཏེ ཨཕཱསུཀཾ ཝསྶཾ ཝསིཏྭཱ ཝུཏྠཝསྶཱ སཏྠུ དསྶནཱཡ སཱཝཏྠིཾ ¶ གནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདིཾསུ. སཏྠཱ ཏེཧི སདྡྷིཾ ཀཏཔཊིསནྠཱརོ ‘‘ཀིཾ, བྷིཀྑཝེ ¶ , སུཁཾ ཝསིཏྠཱ’’ཏི པུཙྪིཏྭཱ, ‘‘བྷནྟེ, མཡཾ པཋམམཱསམེཝ སུཁཾ ཝསིམྷཱ, མཛ྄ཛྷིམམཱསེ ཙོརཱ གཱམཾ པཧརིཾསུ, ཏཏོ པཊྛཱཡ མནུསྶཱ ནགརཾ ཨབྷིསངྑརོནྟཱ སཀྐཙྩཾ ཨུཔཊྛཱཏུཾ ཨོཀཱསཾ ན ལབྷིཾསུ. ཏསྨཱ ཨཕཱསུཀཾ ཝསྶཾ ཝསིམྷཱ’’ཏི ཝུཏྟེ ‘‘ཨལཾ, བྷིཀྑཝེ, མཱ ཙིནྟཡིཏྠ, ཕཱསུཝིཧཱརོ ནཱམ ནིཙྩཀཱལཾ དུལླབྷོ, བྷིཀྑུནཱ ནཱམ ཡཐཱ ཏེ མནུསྶཱ ནགརཾ གོཔཡིཾསུ, ཨེཝཾ ཨཏྟབྷཱཝམེཝ གོཔཡིཏུཾ ཝཊྚཏཱི’’ཏི ཝཏྭཱ ཨིམཾ གཱཐམཱཧ –

‘‘ནགརཾ ཡཐཱ པཙྩནྟཾ, གུཏྟཾ སནྟརབཱཧིརཾ;

ཨེཝཾ གོཔེཐ ཨཏྟཱནཾ, ཁཎོ ཝོ མཱ ཨུཔཙྩགཱ;

ཁཎཱཏཱིཏཱ ཧི སོཙནྟི, ནིརཡམྷི སམཔྤིཏཱ’’ཏི.

ཏཏྠ སནྟརབཱཧིརནྟི, བྷིཀྑཝེ, ཡཐཱ ཏེཧི མནུསྶེཧི ཏཾ པཙྩནྟནགརཾ དྭཱརཔཱཀཱརཱདཱིནི ཐིརཱནི ཀརོནྟེཧི སཨནྟརཾ, ཨཊྚཱལཀཔརིཁཱདཱིནི ཐིརཱནི ཀརོནྟེཧི སབཱཧིརནྟི སནྟརབཱཧིརཾ སུགུཏྟཾ ཀཏཾ, ཨེཝཾ ཏུམྷེཔི སཏིཾ ཨུཔཊྛཔེཏྭཱ ཨཛ྄ཛྷཏྟིཀཱནི ཚ དྭཱརཱནི པིདཧིཏྭཱ དྭཱརརཀྑིཀཾ སཏིཾ ཨཝིསྶཛྫེཏྭཱ ཡཐཱ གཡ྄ཧམཱནཱནི བཱཧིརཱནི ཚ ཨཱཡཏནཱནི ཨཛ྄ཛྷཏྟིཀཱནཾ ཨུཔགྷཱཏཱཡ སཾཝཏྟནྟི, ཏཐཱ ཨགྒཧཎེན ཏཱནིཔི ཐིརཱནི ཀཏྭཱ ¶ ཏེསཾ ཨཔྤཝེསཱཡ དྭཱརརཀྑིཀཾ སཏིཾ ཨཔྤཧཱཡ ཝིཙརནྟཱ ཨཏྟཱནཾ གོཔེཐཱཏི ཨཏྠོ. ཁཎོ ཝོ མཱ ཨུཔཙྩགཱཏི ཡོ ཧི ཨེཝཾ ཨཏྟཱནཾ ན གོཔེཏི, ཏཾ པུགྒལཾ ཨཡཾ བུདྡྷུཔྤཱདཁཎོ མཛ྄ཛྷིམདེསེ ཨུཔྤཏྟིཁཎོ སམྨཱདིཊྛིཡཱ པཊིལདྡྷཁཎོ ཚནྣཾ ཨཱཡཏནཱནཾ ཨཝེཀལླཁཎོཏི སབྦོཔི ཨཡཾ ཁཎོ ¶ ཨཏིཀྐམཏི, སོ ཁཎོ ཏུམྷེ མཱ ཨཏིཀྐམཏུ. ཁཎཱཏཱིཏཱཏི ཡེ ཧི ཏཾ ཁཎཾ ཨཏཱིཏཱ, ཏེ ཙ པུགྒལེ སོ ཙ ཁཎོ ཨཏཱིཏོ, ཏེ ནིརཡམྷི སམཔྤིཏཱ ཧུཏྭཱ ཏཏྠ ནིབྦཏྟིཏྭཱ སོཙནྟཱིཏི ཨཏྠོ.

དེསནཱཝསཱནེ ཏེ བྷིཀྑཱུ ཨུཔྤནྣསཾཝེགཱ ཨརཧཏྟེ པཏིཊྛཧིཾསཱུཏི.

ཨལཛྫིཏཱཡེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ནིགཎྛེ ཨཱརབྦྷ ཀཐེསི.

ཨེཀསྨིཉྷི ¶ དིཝསེ བྷིཀྑཱུ ནིགཎྛེ དིསྭཱ ཀཐཾ སམུཊྛཱཔེསུཾ, ‘‘ཨཱཝུསོ, སབྦསོ ཨཔྤཊིཙྪནྣེཧི ཨཙེལཀེཧི ཨིམེ ནིགཎྛཱ ཝརཏརཱ, ཡེ ཨེཀཾ པུརིམཔསྶམྤི ཏཱཝ པཊིཙྪཱདེནྟི, སཧིརིཀཱ མཉྙེ ཨེཏེ’’ཏི. ཏཾ སུཏྭཱ ནིགཎྛཱ ‘‘ན མཡཾ ཨེཏེན ཀཱརཎེན པཊིཙྪཱདེམ, པཾསུརཛཱདཡོ ¶ པན པུགྒལཱ ཨེཝ, ཛཱིཝིཏིནྡྲིཡཔཊིབདྡྷཱ ཨེཝ, ཏེ ནོ བྷིཀྑཱབྷཱཛནེསུ མཱ པཏིཾསཱུཏི ཨིམིནཱ ཀཱརཎེན པཊིཙྪཱདེམཱ’’ཏི ཝཏྭཱ ཏེཧི སདྡྷིཾ ཝཱདཔཊིཝཱདཝསེན བཧུཾ ཀཐཾ ཀཐེསུཾ. བྷིཀྑཱུ སཏྠཱརཾ ཨུཔསངྐམིཏྭཱ ནིསིནྣཀཱལེ ཏཾ པཝཏྟིཾ ཨཱརོཙེསུཾ. སཏྠཱ, ‘‘བྷིཀྑཝེ, ཨལཛྫིཏབྦེན ལཛྫིཏྭཱ ལཛྫིཏབྦེན ཨལཛྫམཱནཱ ནཱམ དུགྒཏིཔརཱཡཎཱཝ ཧོནྟཱི’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ཨལཛྫིཏཱཡེ ལཛྫནྟི, ལཛྫིཏཱཡེ ན ལཛྫརེ;

མིཙྪཱདིཊྛིསམཱདཱནཱ, སཏྟཱ གཙྪནྟི དུགྒཏིཾ.

‘‘ཨབྷཡེ བྷཡདསྶིནོ, བྷཡེ ཙཱབྷཡདསྶིནོ;

མིཙྪཱདིཊྛིསམཱདཱནཱ, སཏྟཱ གཙྪནྟི དུགྒཏི’’ནྟི.

ཏཏྠ ཨལཛྫིཏཱཡེཏི ཨལཛྫིཏབྦེན. བྷིཀྑཱབྷཱཛནཉྷི ཨལཛྫིཏབྦཾ ནཱམ, ཏེ པན ཏཾ པཊིཙྪཱདེཏྭཱ ཝིཙརནྟཱ ཏེན ལཛྫནྟི ནཱམ. ལཛྫིཏཱཡེཏི ཨཔཊིཙྪནྣེན ཧིརིཀོཔཱིནངྒེན ལཛྫིཏབྦེན. ཏེ པན ཏཾ ཨཔཊིཙྪཱདེཏྭཱ ཝིཙརནྟཱ ¶ ལཛྫིཏཱཡེ ན ལཛྫནྟི ནཱམ. ཏེན ཏེསཾ ཨལཛྫིཏབྦེན ¶ ལཛྫིཏཾ ལཛྫིཏབྦེན ཨལཛྫིཏཾ ཏུཙྪགཧཎབྷཱཝེན ཙ ཨཉྙཐཱགཧཎབྷཱཝེན ཙ མིཙྪཱདིཊྛི ཧོཏི. ཏཾ སམཱདིཡིཏྭཱ ཝིཙརནྟཱ པན ཏེ མིཙྪཱདིཊྛིསམཱདཱནཱ སཏྟཱ ནིརཡཱདིབྷེདཾ དུགྒཏིཾ གཙྪནྟཱིཏི ཨཏྠོ. ཨབྷཡེཏི བྷིཀྑཱབྷཱཛནཾ ནིསྶཱཡ རཱགདོསམོཧམཱནདིཊྛིཀིལེསདུཙྩརིཏབྷཡཱནཾ ཨནུཔྤཛྫནཏོ བྷིཀྑཱབྷཱཛནཾ ཨབྷཡཾ ནཱམ, བྷཡེན ཏཾ པཊིཙྪཱདེནྟཱ པན ཨབྷཡེ བྷཡདསྶིནོ ནཱམ. ཧིརིཀོཔཱིནངྒཾ པན ནིསྶཱཡ རཱགཱདཱིནཾ ཨུཔྤཛྫནཏོ ཏཾ བྷཡཾ ནཱམ, ཏསྶ ཨཔཊིཙྪཱདནེན བྷཡེ ཙཱབྷཡདསྶིནོ. ཏསྶ ཏཾ ཨཡཐཱགཧཎསྶ སམཱདིནྣཏྟཱ མིཙྪཱདིཊྛིསམཱདཱནཱ སཏྟཱ དུགྒཧིཾ གཙྪནྟཱིཏི ཨཏྠོ.

དེསནཱཝསཱནེ བཧཱུ ནིགཎྛཱ སཾཝིགྒམཱནསཱ པབྦཛིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཨཝཛྫེཏི ¶ ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཏིཏྠིཡསཱཝཀེ ཨཱརབྦྷ ཀཐེསི.

ཨེཀསྨིཉྷི སམཡེ ཨཉྙཏིཏྠིཡསཱཝཀཱ ཨཏྟནོ པུཏྟེ སམྨཱདིཊྛིཀཱནཾ ཨུཔཱསཀཱནཾ པུཏྟེཧི སདྡྷིཾ སཔརིཝཱརེ ཀཱིལ༹མཱནེ དིསྭཱ གེཧཾ ཨཱགཏཀཱལེ ‘‘ན ཝོ སམཎཱ སཀྱཔུཏྟིཡཱ ཝནྡིཏབྦཱ, ནཱཔི ཏེསཾ ཝིཧཱརཾ པཝིསིཏབྦ’’ནྟི སཔཐཾ ཀཱརཡིཾསུ. ཏེ ཨེཀདིཝསཾ ཛེཏཝནཝིཧཱརསྶ བཧིདྭཱརཀོཊྛཀསཱམནྟེ ཀཱིལ༹ནྟཱ པིཔཱསིཏཱ ཨཧེསུཾ. ཨཐེཀཾ ཨུཔཱསཀདཱརཀཾ ‘‘ཏྭཾ ཨེཏྠ གནྟྭཱ པཱནཱིཡཾ པིཝིཏྭཱ ཨམྷཱཀམྤི ཨཱཧརཱཧཱི’’ཏི པཧིཎིཾསུ. སོ ཝིཧཱརཾ པཝིསིཏྭཱ སཏྠཱརཾ ཝནྡིཏྭཱ པཱནཱིཡཾ པིཝིཏྭཱ ཏམཏྠཾ ཨཱརོཙེསི. ཨཐ ནཾ སཏྠཱ ‘‘ཏྭམེཝ པཱནཱིཡཾ པིཝིཏྭཱ གནྟྭཱ ཨིཏརེཔི པཱནཱིཡཔིཝནཏྠཱཡ ཨིདྷེཝ པེསེཧཱི’’ཏི ཨཱཧ. སོ ཏཐཱ ཨཀཱསི. ཏེ ཨཱགནྟྭཱ པཱནཱིཡཾ པིཝིཾསུ. སཏྠཱ ཏེ པཀྐོསཱཔེཏྭཱ ཏེསཾ སཔྤཱཡཾ དྷམྨཀཐཾ ཀཐེཏྭཱ ཏེ ཨཙལསདྡྷེ ཀཏྭཱ སརཎེསུ ཙ སཱིལེསུ ཙ པཏིཊྛཱཔེསི. ཏེ སཀཱནི གེཧཱནི གནྟྭཱ ཏམཏྠཾ མཱཏཱཔིཏཱུནཾ ཨཱརོཙེསུཾ ¶ ¶ . ཨཐ ནེསཾ མཱཏཱཔིཏརོ ‘‘པུཏྟཀཱ ནོ ཝིཔནྣདིཊྛིཀཱ ཛཱཏཱ’’ཏི དོམནསྶཔྤཏྟཱ པརིདེཝིཾསུ. ཨཐ ཏེསཾ ཚེཀཱ སམྦཧུལཱ པཊིཝིསྶཀཱ མནུསྶཱ ཨཱགནྟྭཱ དོམནསྶཝཱུཔསམནཏྠཱཡ དྷམྨཾ ཀཐཡིཾསུ. ཏེ ཏེསཾ ཀཐཾ སུཏྭཱ ‘‘ཨིམེ དཱརཀེ སམཎསྶ གོཏམསྶེཝ ནིཡྻཱདེསྶཱམཱ’’ཏི མཧནྟེན ཉཱཏིགཎེན སདྡྷིཾ ཝིཧཱརཾ ནཡིཾསུ. སཏྠཱ ཏེསཾ ཨཛ྄ཛྷཱསཡཾ ཨོལོཀེཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ཨཝཛྫེ ཝཛྫམཏིནོ, ཝཛྫེ ཙཱཝཛྫདསྶིནོ;

མིཙྪཱདིཊྛིསམཱདཱནཱ, སཏྟཱ གཙྪནྟི དུགྒཏིཾ.

‘‘ཝཛྫཉྩ ཝཛྫཏོ ཉཏྭཱ, ཨཝཛྫཉྩ ཨཝཛྫཏོ;

སམྨཱདིཊྛིསམཱདཱནཱ, སཏྟཱ གཙྪནྟི སུགྒཏི’’ནྟི.

ཏཏྠ ཨཝཛྫེཏི དསཝཏྠུཀཱཡ སམྨཱདིཊྛིཡཱ, ཏསྶཱ ཨུཔནིསྶཡབྷཱུཏེ དྷམྨེ ཙ. ཝཛྫམཏིནོཏི ཝཛྫཾ ཨིདནྟི ཨུཔྤནྣམཏིནོ. དསཝཏྠུཀཱཡ མིཙྪཱདིཊྛིཡཱ པན ཏསྶཱ ཨུཔནིསྶཡབྷཱུཏེ དྷམྨེ ཙ ཨཝཛྫདསྶིནོ, ཨེཏིསྶཱ ཨཝཛྫཾ ཝཛྫཏོ ཝཛྫཉྩ ཨཝཛྫཏོ ཉཏྭཱ ¶ གཧཎསངྑཱཏཱཡ མིཙྪཱདིཊྛིཡཱ སམཱདིནྣཏྟཱ མིཙྪཱདིཊྛིསམཱདཱནཱ སཏྟཱ དུགྒཏིཾ གཙྪནྟཱིཏི ཨཏྠོ. དུཏིཡགཱཐཱཡ ཝུཏྟཝིཔརིཡཱཡེན ཨཏྠོ ཝེདིཏབྦོ.

དེསནཱཝསཱནེ ¶ སབྦེཔི ཏེ ཏཱིསུ སརཎེསུ པཏིཊྛཱཡ ཨཔརཱཔརཾ དྷམྨཾ སུཎནྟཱ སོཏཱཔཏྟིཕལེ པཏིཊྛཧིཾསཱུཏི.

ཨཧཾ ¶ ¶ ¶ ནཱགོ ཝཱཏི ཨིམཾ དྷམྨདེསནཾ སཏྠཱ ཀོསམྦིཡཾ ཝིཧརནྟོ ཨཏྟཱནཾ ཨཱརབྦྷ ཀཐེསི. ཝཏྠུ ཨཔྤམཱདཝགྒསྶ ཨཱདིགཱཐཱཝཎྞནཱཡ ཝིཏྠཱརིཏམེཝ. ཝུཏྟཉྷེཏཾ ཏཏྠ (དྷ. པ. ཨཊྛ. ༡.སཱམཱཝཏིཝཏྠུ) –

མཱགཎྜིཡཱ ཏཱསཾ ཀིཉྩི ཀཱཏུཾ ཨསཀྐུཎིཏྭཱ ‘‘སམཎསྶ གོཏམསྶེཝ ཀཏྟབྦཾ ཀརིསྶཱམཱི’’ཏི ནཱགརཱནཾ ལཉྫཾ དཏྭཱ ‘‘སམཎཾ གོཏམཾ ཨནྟོནགརཾ པཝིསིཏྭཱ ཙརནྟཾ དཱསཀམྨཀརཔོརིསེཧི སདྡྷིཾ ཨཀྐོསེཏྭཱ པརིབྷཱསེཏྭཱ པལཱཔེཐཱ’’ཏི ཨཱཎཱཔེསི. མིཙྪཱདིཊྛིཀཱ ཏཱིསུ རཏནེསུ ཨཔྤསནྣཱ ཨནྟོནགརཾ པཝིཊྛཾ སཏྠཱརཾ ཨནུབནྡྷིཏྭཱ ‘‘ཙོརོསི བཱལོསི མཱུལ༹ྷོསི ཐེནོསི ཨོཊྛོསི གོཎོསི གདྲབྷོསི ནེརཡིཀོསི ཏིརཙྪཱནགཏོསི, ནཏྠི ཏུཡ྄ཧཾ ¶ སུགཏི, དུགྒཏིཡེཝ ཏུཡ྄ཧཾ པཱཊིཀངྑཱ’’ཏི དསཧི ཨཀྐོསཝཏྠཱུཧི ཨཀྐོསནྟི པརིབྷཱསནྟི. ཏཾ སུཏྭཱ ཨཱཡསྨཱ ཨཱནནྡོ སཏྠཱརཾ ཨེཏདཝོཙ – ‘‘བྷནྟེ, ཨིམེ ནཱགརཱ ཨམྷེ ཨཀྐོསནྟི པརིབྷཱསནྟི, ཨིཏོ ཨཉྙཏྠ གཙྪཱམཱ’’ཏི. ‘‘ཀུཧིཾ, ཨཱནནྡཱ’’ཏི? ‘‘ཨཉྙཾ ནགརཾ, བྷནྟེ’’ཏི. ‘‘ཏཏྠ མནུསྶེསུ ཨཀྐོསནྟེསུ པརིབྷཱསནྟེསུ པུན ཀཏྠ གམིསྶཱམཱནནྡཱ’’ཏི. ‘‘ཏཏོཔི ཨཉྙཾ ནགརཾ, བྷནྟེ’’ཏི. ‘‘ཏཏྠ མནུསྶེསུ ཨཀྐོསནྟེསུ པརིབྷཱསནྟེསུ ཀུཧིཾ གམིསྶཱམཱནནྡཱ’’ཏི. ‘‘ཏཏོཔི ཨཉྙཾ ནགརཾ, བྷནྟེ’’ཏི. ‘‘ཨཱནནྡ, ན ཨེཝཾ ཀཱཏུཾ ཝཊྚཏི, ཡཏྠ ཨདྷིཀརཎཾ ཨུཔྤནྣཾ, ཏཏྠེཝ ཏསྨིཾ ཝཱུཔསནྟེ ཨཉྙཏྠ གནྟུཾ ཝཊྚཏི, ཀེ པན ཏེ, ཨཱནནྡ, ཨཀྐོསནྟཱི’’ཏི. ‘‘བྷནྟེ, དཱསཀམྨཀརེ ཨུཔཱདཱཡ སབྦེ ཨཀྐོསནྟཱི’’ཏི. ‘‘ཨཧཾ, ཨཱནནྡ, སངྒཱམཾ ཨོཏིཎྞཧཏྠིསདིསོ. སངྒཱམཾ ཨོཏིཎྞཧཏྠིནོ ཧི ཙཏཱུཧི དིསཱཧི ཨཱགཏེ སརེ སཧིཏུཾ བྷཱརོ, ཏཐེཝ བཧཱུཧི དུསྶཱིལེཧི ཀཐིཏཀཐཱནཾ སཧནཾ ནཱམ ¶ མཡ྄ཧཾ བྷཱརོ’’ཏི ཝཏྭཱ ཨཏྟཱནཾ ཨཱརབྦྷ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ཨཧཾ ནཱགོཝ སངྒཱམེ, ཙཱཔཏོ པཏིཏཾ སརཾ;

ཨཏིཝཱཀྱཾ ཏིཏིཀྑིསྶཾ, དུསྶཱིལོ ཧི བཧུཛྫནོ.

‘‘དནྟཾ ¶ ¶ ནཡནྟི སམིཏིཾ, དནྟཾ རཱཛཱབྷིརཱུཧཏི;

དནྟོ སེཊྛོ མནུསྶེསུ, ཡོཏིཝཱཀྱཾ ཏིཏིཀྑཏི.

‘‘ཝརམསྶཏརཱ དནྟཱ, ཨཱཛཱནཱིཡཱ ཙ སིནྡྷཝཱ;

ཀུཉྫརཱ ཙ མཧཱནཱགཱ, ཨཏྟདནྟོ ཏཏོ ཝར’’ནྟི.

ཏཏྠ ནཱགོཝཱཏི ཧཏྠཱི ཝིཡ. ཙཱཔཏོ པཏིཏནྟི དྷནུཏོ མུཏྟཾ. ཨཏིཝཱཀྱནྟི ཨཊྛཨནརིཡཝོཧཱརཝསེན པཝཏྟཾ ཝཱིཏིཀྐམཝཙནཾ. ཏིཏིཀྑིསྶནྟི ཡཐཱ སངྒཱམཱཝཙརོ སུདནྟོ མཧཱནཱགོ ཁམོ སཏྟིཔཧཱརཱདཱིནི ཙཱཔཏོ མུཙྩིཏྭཱ ཨཏྟནི པཏིཏེ སརེ ཨཝིཧཉྙམཱནོ ཏིཏིཀྑཏི, ཨེཝམེཝ ཨེཝརཱུཔཾ ཨཏིཝཱཀྱཾ ཏིཏིཀྑིསྶཾ, སཧིསྶཱམཱིཏི ཨཏྠོ. དུསྶཱིལོ ཧཱིཏི ཨཡཉྷི ལོཀིཡམཧཱཛནོ བཧུདུསྶཱིལོ ཨཏྟནོ ཨཏྟནོ རུཙིཝསེན ཝཱཙཾ ནིཙྪཱརེཏྭཱ གྷཊྚེནྟོ ཙརཏི, ཏཏྠ ཨདྷིཝཱསནཾ ཨཛ྄ཛྷུཔེཀྑནམེཝ མམ བྷཱརོ. སམིཏིནྟི ཨུཡྻཱནཀཱིལ༹མཎྜལཱདཱིསུ མཧཱཛནམཛ྄ཛྷཾ གཙྪནྟཱ ¶ དནྟམེཝ གོཎཛཱཏིཾ ཝཱ ཨསྶཛཱཏིཾ ཝཱ ཡཱནེ ཡོཛེཏྭཱ ནཡནྟི. རཱཛཱཏི ཏཐཱརཱུཔེཧེཝ ཝཱཧནེཧི གཙྪནྟོ རཱཛཱཔི དནྟམེཝ ཨབྷིརཱུཧཏི. མནུསྶེསཱུཏི མནུསྶེསུཔི ཙཏཱུཧི ཨརིཡམགྒེཧི དནྟོ ནིབྦིསེཝནོཝ སེཊྛོ. ཡོཏིཝཱཀྱནྟི ཡོ ཨེཝརཱུཔཾ ཨཏིཀྐམཝཙནཾ པུནཔྤུནཾ ཝུཙྩམཱནམྤི ཏིཏིཀྑཏི ན པཊིཔྥརཏི ན ཝིཧཉྙཏི, ཨེཝརཱུཔོ དནྟོ སེཊྛོཏི ཨཏྠོ.

ཨསྶཏརཱཏི ཝལ༹ཝཱཡ གདྲབྷེན ཛཱཏཱ. ཨཱཛཱནཱིཡཱཏི ཡཾ ཨསྶདམསཱརཐི ཀཱརཎཾ ཀཱརེཏི, ཏསྶ ཁིཔྤཾ ཛཱནནསམཏྠཱ. སིནྡྷཝཱཏི སིནྡྷཝརཊྛེ ཛཱཏཱ ཨསྶཱ. མཧཱནཱགཱཏི ཀུཉྫརསངྑཱཏཱ མཧཱཧཏྠིནོ. ཨཏྟདནྟོཏི ཨེཏེ ཨསྶཏརཱ ཙ སིནྡྷཝཱ ཙ ཀུཉྫརཱ ཙ དནྟཱཝ ཝརཾ, ན ཨདནྟཱ. ཡོ པན ཙཏཱུཧི ཨརིཡམགྒེཧི ཨཏྟནོ དནྟཏཱཡ ཨཏྟདནྟོ ནིབྦིསེཝནོ, ཨཡཾ ཏཏོཔི ཝརཾ, སབྦེཧིཔི ཨེཏེཧི ཨུཏྟརིཏརོཏི ཨཏྠོ.

དེསནཱཝསཱནེ ལཉྫཾ གཧེཏྭཱ ཝཱིཐིསིངྒྷཱཊཀཱདཱིསུ ཋཏྭཱ ¶ ཨཀྐོསནྟོ པརིབྷཱསནྟོ སབྦོཔི སོ མཧཱཛནོ སོཏཱཔཏྟིཕལཱདཱིནི པཱཔུཎཱིཏི.

ན ¶ ¶ ཧི ཨེཏེཧཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཧཏྠཱཙརིཡཔུབྦཀཾ བྷིཀྑུཾ ཨཱརབྦྷ ཀཐེསི.

སོ ཀིར ཨེཀདིཝསཾ ཨཙིརཝཏཱིནདཱིཏཱིརེ ཧཏྠིདམཀཾ ‘‘ཨེཀཾ ཧཏྠིཾ དམེསྶཱམཱི’’ཏི ཨཏྟནཱ ཨིཙྪིཏཾ ཀཱརཎཾ སིཀྑཱཔེཏུཾ ཨསཀྐོནྟཾ དིསྭཱ སམཱིཔེ ཋིཏེ བྷིཀྑཱུ ཨཱམནྟེཏྭཱ ཨཱཧ – ‘‘ཨཱཝུསོ, སཙེ ཨཡཾ ཧཏྠཱཙརིཡོ ཨིམཾ ཧཏྠིཾ ཨསུཀཊྛཱནེ ནཱམ ཝིཛ྄ཛྷེཡྻ, ཁིཔྤམེཝ ཨིམཾ ཀཱརཎཾ སིཀྑཱཔེཡྻཱ’’ཏི. སོ ཏསྶ ཀཐཾ སུཏྭཱ ཏཐཱ ཀཏྭཱ ཏཾ ཧཏྠིཾ སུདནྟཾ དམེསི. ཏེ བྷིཀྑཱུ ཏཾ པཝཏྟིཾ སཏྠུ ཨཱརོཙེསུཾ. སཏྠཱ ཏཾ བྷིཀྑུཾ པཀྐོསཱཔེཏྭཱ ‘‘སཙྩཾ ཀིར ཏཡཱ ཨེཝཾ ཝུཏྟ’’ནྟི པུཙྪིཏྭཱ ‘‘སཙྩཾ, བྷནྟེ’’ཏི ཝུཏྟེ ཝིགརཧིཏྭཱ ‘‘ཀིཾ ཏེ, མོགྷཔུརིས, ཧཏྠིཡཱནེན ཝཱ ཨཉྙེན ཝཱ དནྟེན. ན ཧི ཨེཏེཧི ཡཱནེཧི ཨགཏཔུབྦཾ ཋཱནཾ གནྟུཾ སམཏྠཱ ¶ ནཱམ ཨཏྠི, ཨཏྟནཱ པན སུདནྟེན སཀྐཱ ཨགཏཔུབྦཾ ཋཱནཾ གནྟུཾ, ཏསྨཱ ཨཏྟཱནམེཝ དམེཧི, ཀིཾ ཏེ ཨེཏེསཾ དམནེནཱ’’ཏི ཝཏྭཱ ཨིམཾ གཱཐམཱཧ –

‘‘ན ཧི ཨེཏེཧི ཡཱནེཧི, གཙྪེཡྻ ཨགཏཾ དིསཾ;

ཡཐཱཏྟནཱ སུདནྟེན, དནྟོ དནྟེན གཙྪཏཱི’’ཏི.

ཏསྶཏྠོ – ཡཱནི ཏཱནི ཧཏྠིཡཱནཱདཱིནི ཡཱནཱནི, ན ཧི ཨེཏེཧི ཡཱནེཧི ཀོཙི པུགྒལོ སུཔིནནྟེནཔི ཨགཏཔུབྦཏྟཱ ‘‘ཨགཏ’’ནྟི སངྑཱཏཾ ནིབྦཱནདིསཾ ཏཐཱ གཙྪེཡྻ, ཡཐཱ པུབྦབྷཱགེ ཨིནྡྲིཡདམེན ཨཔརབྷཱགེ ཨརིཡམགྒབྷཱཝནཱཡ སུདནྟེན དནྟོ ནིབྦིསེཝནོ སཔྤཉྙོ པུགྒལོ ཏཾ ཨགཏཔུབྦཾ དིསཾ གཙྪཏི, དནྟབྷཱུམིཾ པཱཔུཎཱཏི. ཏསྨཱ ཨཏྟདམནམེཝ ཏཏོ ཝརནྟི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཧཏྠཱཙརིཡཔུབྦཀབྷིཀྑུཝཏྠུ དུཏིཡཾ.

དྷནཔཱལོཏི ¶ ¶ ¶ ཨིམཾ དྷམྨདེསནཾ སཏྠཱ སཱཝཏྠིཡཾ ཝིཧརནྟོ ཨཉྙཏརསྶ པརིཛིཎྞབྲཱཧྨཎསྶ པུཏྟེ ཨཱརབྦྷ ཀཐེསི.

སཱཝཏྠིཡཾ ཀིརེཀོ བྲཱཧྨཎོ ཨཊྛསཏསཧསྶཝིབྷཝོ ཝཡཔྤཏྟཱནཾ ཙཏུནྣཾ པུཏྟཱནཾ ཨཱཝཱཧཾ ཀཏྭཱ ཙཏྟཱརི སཏསཧསྶཱནི ཨདཱསི. ཨཐསྶ བྲཱཧྨཎིཡཱ ཀཱལཀཏཱཡ པུཏྟཱ སམྨནྟཡིཾསུ – ‘‘སཙེ ཨཡཾ ཨཉྙཾ བྲཱཧྨཎིཾ ཨཱནེསྶཏི, ཏསྶཱ ཀུཙྪིཡཾ ནིབྦཏྟཱནཾ ཝསེན ཀུལསནྟཀཾ བྷིཛྫིསྶཏི, ཧནྡ ནཾ མཡཾ སངྒཎྷིསྶཱམཱ’’ཏི ཏེ ཏཾ པཎཱིཏེཧི གྷཱསཙྪཱདནཱདཱིཧི ཨུཔཊྛཧནྟཱ ཧཏྠཔཱདསམྦཱཧནཱདཱིནི ཀརོནྟཱ ཨུཔཊྛཧིཏྭཱ ཨེཀདིཝསམསྶ དིཝཱ ནིདྡཱཡིཏྭཱ ཝུཊྛིཏསྶ ཧཏྠཔཱདེ སམྦཱཧནྟཱ པཱཊིཡེཀྐཾ གྷརཱཝཱསེ ཨཱདཱིནཝཾ ཝཏྭཱ ‘‘མཡཾ ཏུམྷེ ཨིམིནཱ ནཱིཧཱརེན ཡཱཝཛཱིཝཾ ཨུཔཊྛཧིསྶཱམ, སེསདྷནམྤི ནོ དེཐཱ’’ཏི ཡཱཙིཾསུ. བྲཱཧྨཎོ པུན ཨེཀེཀསྶ སཏསཧསྶཾ དཏྭཱ ཨཏྟནོ ནིཝཏྠཔཱརུཔནམཏྟཾ ཋཔེཏྭཱ སབྦཾ ཨུཔབྷོགཔརིབྷོགཾ ཙཏྟཱརོ ཀོཊྛཱསེ ཀཏྭཱ ནིཡྻཱདེསི. ཏཾ ཛེཊྛཔུཏྟོ ཀཏིཔཱཧཾ ཨུཔཊྛཧི. ཨཐ ནཾ ཨེཀདིཝསཾ ནྷཏྭཱ ཨཱགཙྪནྟཾ དྭཱརཀོཊྛཀེ ¶ ཋཏྭཱ སུཎྷཱ ཨེཝམཱཧ – ‘‘ཀིཾ ཏཡཱ ཛེཊྛཔུཏྟསྶ སཏཾ ཝཱ སཧསྶཾ ཝཱ ཨཏིརེཀཾ དིནྣཾ ཨཏྠི, ནནུ སབྦེསཾ དྭེ དྭེ སཏསཧསྶཱནི དིནྣཱནི, ཀིཾ སེསཔུཏྟཱནཾ གྷརསྶ མགྒཾ ན ཛཱནཱསཱི’’ཏི. སོཔི ‘‘ནསྶ ཝསལཱི’’ཏི ཀུཛ྄ཛྷིཏྭཱ ཨཉྙསྶ གྷརཾ ཨགམཱསི. ཏཏོཔི ཀཏིཔཱཧཙྩཡེན ཨིམིནཱཝ ཨུཔཱཡེན པལཱཔིཏོ ཨཉྙསྶཱཏི ཨེཝཾ ཨེཀགྷརམྤི པཝེསནཾ ཨལབྷམཱནོ པཎྜརངྒཔབྦཛྫཾ པབྦཛིཏྭཱ བྷིཀྑཱཡ ཙརནྟོ ཀཱལཱནམཙྩཡེན ཛརཱཛིཎྞོ དུབྦྷོཛནདུཀྑསེཡྻཱཧི མིལཱཏསརཱིརོ བྷིཀྑཱཡ ཙརནྟོ ཨཱགམྨ པཱིཋིཀཱཡ ནིཔནྣོ ནིདྡཾ ཨོཀྐམིཏྭཱ ཨུཊྛཱཡ ནིསིནྣོ ཨཏྟཱནཾ ཨོལོཀེཏྭཱ པུཏྟེསུ ཨཏྟནོ པཏིཊྛཾ ཨཔསྶནྟོ ཙིནྟེསི – ‘‘སམཎོ ཀིར གོཏམོ ཨབྦྷཱཀུཊིཀོ ཨུཏྟཱནམུཁོ སུཁསམྦྷཱསོ པཊིསནྠཱརཀུསལོ, སཀྐཱ སམཎཾ གོཏམཾ ཨུཔསངྐམིཏྭཱ པཊིསནྠཱརཾ ལབྷིཏུ’’ནྟི. སོ ནིཝཱསནཔཱརུཔནཾ སཎྛཱཔེཏྭཱ བྷིཀྑབྷཱཛནཾ གཧེཏྭཱ དཎྜམཱདཱཡ བྷགཝཏོ སནྟིཀཾ ཨགམཱསི. ཝུཏྟམྤི ཙེཏཾ (སཾ. ནི. ༡.༢༠༠) –

ཨཐ ¶ ཁོ ཨཉྙཏརོ བྲཱཧྨཎམཧཱསཱལོ ལཱུཁོ ལཱུཁཔཱཝུརཎོ ཡེན བྷགཝཱ ཏེནུཔསངྐམི, ཨུཔསངྐམིཏྭཱ ཨེཀམནྟཾ ནིསཱིདི. སཏྠཱ ཨེཀམནྟཾ ནིསིནྣེན ཏེན སདྡྷིཾ པཊིསནྠཱརཾ ཀཏྭཱ ཨེཏདཝོཙ – ‘‘ཀིནྣུ ཏྭཾ ¶ , བྲཱཧྨཎ, ལཱུཁོ ལཱུཁཔཱཝུརཎོ’’ཏི. ཨིདྷ མེ, བྷོ གོཏམ, ཙཏྟཱརོ པུཏྟཱ ¶ , ཏེ མཾ དཱརེཧི སཾཔུཙྪ གྷརཱ ནིཀྑཱམེནྟཱིཏི. ཏེན ཧི ཏྭཾ, བྲཱཧྨཎ, ཨིམཱ གཱཐཱཡོ པརིཡཱཔུཎིཏྭཱ སབྷཱཡཾ མཧཱཛནཀཱཡེ སནྣིཔཏིཏེ པུཏྟེསུ ཙ སནྣིསིནྣེསུ བྷཱསསྶུ –

‘‘ཡེཧི ཛཱཏེཧི ནནྡིསྶཾ, ཡེསཉྩ བྷཝམིཙྪིསཾ;

ཏེ མཾ དཱརེཧི སཾཔུཙྪ, སཱཝ ཝཱརེནྟི སཱུཀརཾ.

‘‘ཨསནྟཱ ཀིར མཾ ཛམྨཱ, ཏཱཏ ཏཱཏཱཏི བྷཱསརེ;

རཀྑསཱ པུཏྟརཱུཔེན, ཏེ ཛཧནྟི ཝཡོགཏཾ.

‘‘ཨསྶོཝ ཛིཎྞོ ནིབྦྷོགོ, ཁཱདནཱ ཨཔནཱིཡཏི;

བཱལཀཱནཾ པིཏཱ ཐེརོ, པརཱགཱརེསུ བྷིཀྑཏི.

‘‘དཎྜོཝ ཀིར མེ སེཡྻོ, ཡཉྩེ པུཏྟཱ ཨནསྶཝཱ;

ཙཎྜམྤི གོཎཾ ཝཱརེཏི, ཨཐོ ཙཎྜམྤི ཀུཀྐུརཾ.

‘‘ཨནྡྷཀཱརེ པུརེ ཧོཏི, གམྦྷཱིརེ གཱདྷམེདྷཏི;

དཎྜསྶ ཨཱནུབྷཱཝེན, ཁལིཏྭཱ པཏིཏིཊྛཏཱི’’ཏི. (སཾ. ནི. ༡.༢༠༠);

སོ ¶ བྷགཝཏོ སནྟིཀེ ཏཱ གཱཐཱཡོ ཨུགྒཎྷིཏྭཱ ཏཐཱརཱུཔེ བྲཱཧྨཎཱནཾ སམཱགམདིཝསེ སབྦཱལངྐཱརཔཊིམཎྜིཏེསུ པུཏྟེསུ ཏཾ སབྷཾ ཨོགཱཧིཏྭཱ བྲཱཧྨཎཱནཾ མཛ྄ཛྷེ མཧཱརཧེསུ ཨཱསནེསུ ནིསིནྣེསུ ‘‘ཨཡཾ མེ ཀཱལོ’’ཏི སབྷཱཡ མཛ྄ཛྷེ པཝིསིཏྭཱ ཧཏྠཾ ཨུཀྑིཔིཏྭཱ ‘‘ཨཧཾ, བྷོ, ཏུམྷཱཀཾ གཱཐཱཡོ བྷཱསིཏུཀཱམོ, སུཎིསྶཐཱ’’ཏི ཝཏྭཱ ‘‘བྷཱསསྶུ, བྲཱཧྨཎ, སུཎོམཱ’’ཏི ཝུཏྟེ ཋིཏཀོཝ ཨབྷཱསི. ཏེན ཙ སམཡེན མནུསྶཱནཾ ཝཏྟཾ ཧོཏི ‘‘ཡོ མཱཏཱཔིཏཱུནཾ སནྟཀཾ ཁཱདནྟོ མཱཏཱཔིཏརོ ན པོསེཏི, སོ མཱརེཏབྦོ’’ཏི. ཏསྨཱ ཏེ བྲཱཧྨཎཔུཏྟཱ པིཏུ པཱདེསུ པཏིཏྭཱ ‘‘ཛཱིཝིཏཾ ནོ, ཏཱཏ, དེཐཱ’’ཏི ཡཱཙིཾསུ. སོ པིཏུ ཧདཡམུདུཏཱཡ ‘‘མཱ མེ, བྷོ, པུཏྟཀེ ཝིནཱསཡིཏྠ, པོསེསྶནྟི མ’’ནྟི ཨཱཧ. ཨཐསྶ པུཏྟེ མནུསྶཱ ཨཱཧཾསུ – ‘‘སཙེ, བྷོ ¶ , ཨཛྫ པཊྛཱཡ པིཏརཾ ན སམྨཱ པཊིཛགྒིསྶཐ, གྷཱཏེསྶཱམ ཝོ’’ཏི. ཏེ བྷཱིཏཱ པིཏརཾ པཱིཋེ ནིསཱིདཱཔེཏྭཱ སཡཾ ཨུཀྑིཔིཏྭཱ གེཧཾ ནེཏྭཱ ¶ སརཱིརཾ ཏེལེན ཨབྦྷཉྫིཏྭཱ ཨུབྦཊྚེཏྭཱ གནྡྷཙུཎྞཱདཱིཧི ནྷཱཔེཏྭཱ བྲཱཧྨཎིཡོ པཀྐོསཱཔེཏྭཱ ‘‘ཨཛྫ པཊྛཱཡ ཨམྷཱཀཾ པིཏརཾ སམྨཱ པཊིཛགྒཐ, སཙེ ཏུམྷེ པམཱདཾ ཨཱཔཛྫིསྶཐ, ནིགྒཎྷིསྶཱམ ཝོ’’ཏི ཝཏྭཱ པཎཱིཏབྷོཛནཾ བྷོཛེསུཾ.

བྲཱཧྨཎོ ¶ སུབྷོཛནཉྩ སུཁསེཡྻཉྩ ཨཱགམྨ ཀཏིཔཱཧཙྩཡེན སཉྫཱཏབལོ པཱིཎིནྡྲིཡོ ཨཏྟབྷཱཝཾ ཨོལོཀེཏྭཱ ‘‘ཨཡཾ མེ སམྤཏྟི སམཎཾ གོཏམཾ ནིསྶཱཡ ལདྡྷཱ’’ཏི པཎྞཱཀཱརཏྠཱཡ ཨེཀཾ དུསྶཡུགཾ ཨཱདཱཡ བྷགཝཏོ སནྟིཀཾ གནྟྭཱ ཀཏཔཊིསནྠཱརོ ཨེཀམནྟཾ ནིསིནྣོ ཏཾ དུསྶཡུགཾ བྷགཝཏོ པཱདམཱུལེ ཋཔེཏྭཱ ‘‘མཡཾ, བྷོ གོཏམ, བྲཱཧྨཎཱ ནཱམ ཨཱཙརིཡསྶ ཨཱཙརིཡདྷནཾ པརིཡེསཱམ, པཊིགྒཎྷཱཏུ མེ བྷཝཾ གོཏམོ ཨཱཙརིཡོ ཨཱཙརིཡདྷན’’ནྟི ཨཱཧ. བྷགཝཱ ཏསྶ ཨནུཀམྤཱཡ ཏཾ པཊིགྒཧེཏྭཱ དྷམྨཾ དེསེསི. དེསནཱཝསཱནེ བྲཱཧྨཎོ སརཎེསུ པཏིཊྛཱཡ ཨེཝམཱཧ – ‘‘བྷོ གོཏམ, མཡ྄ཧཾ པུཏྟེཧི ཙཏྟཱརི དྷུཝབྷཏྟཱནི དིནྣཱནི, ཏཏོ ཨཧཾ དྭེ ཏུམྷཱཀཾ དམྨཱི’’ཏི. ཨཐ ནཾ སཏྠཱ ‘‘ཀལྱཱཎཾ, བྲཱཧྨཎ, མཡཾ པན རུཙྩནཊྛཱནམེཝ གམིསྶཱམཱ’’ཏི ཝཏྭཱ ཨུཡྻོཛེསི. བྲཱཧྨཎོ གྷརཾ གནྟྭཱ པུཏྟེ ཨཱཧ – ‘‘ཏཱཏཱ, སམཎོ གོཏམོ ¶ མཡ྄ཧཾ སཧཱཡོ, ཏསྶ མེ དྭེ དྷུཝབྷཏྟཱནི དིནྣཱནི, ཏུམྷེ ཏསྨིཾ སམྤཏྟེ མཱ པམཛྫིཏྠཱ’’ཏི. ཏེ ‘‘སཱདྷཱུ’’ཏི སམྤཊིཙྪིཾསུ.

སཏྠཱ པུནདིཝསེ པིཎྜཱཡ ཙརནྟོ ཛེཊྛཔུཏྟསྶ གྷརདྭཱརཾ ཨགམཱསི. སོ སཏྠཱརཾ དིསྭཱ པཏྟམཱདཱཡ གྷརཾ པཝེསེཏྭཱ མཧཱརཧེ པལླངྐེ ནིསཱིདཱཔེཏྭཱ པཎཱིཏབྷོཛནམདཱསི. སཏྠཱ པུནདིཝསེ ཨིཏརསྶ ཨིཏརསྶཱཏི པཊིཔཱཊིཡཱ སབྦེསཾ གྷརཱནི ཨགམཱསི. སབྦེ ཏེ ཏཐེཝ སཀྐཱརཾ ཨཀཾསུ. ཨེཀདིཝསཾ ཛེཊྛཔུཏྟོ མངྒལེ པཙྩུཔཊྛིཏེ པིཏརཾ ཨཱཧ – ‘‘ཏཱཏ, ཀསྶ མངྒལཾ དེམཱ’’ཏི? ‘‘ནཱཧཾ ཨཉྙེ ཛཱནཱམི, སམཎོ གོཏམོ མཡ྄ཧཾ སཧཱཡོ’’ཏི. ‘‘ཏེན ཧི ཏཾ སྭཱཏནཱཡ པཉྩཧི བྷིཀྑུསཏེཧི སདྡྷིཾ ནིམནྟེཐཱ’’ཏི. བྲཱཧྨཎོ ཏཐཱ ཨཀཱསི. སཏྠཱ པུནདིཝསེ སཔརིཝཱརོ ཏསྶ གེཧཾ ཨགམཱསི. སོ ཧརིཏུཔལིཏྟེ སབྦཱལངྐཱརཔཊིམཎྜིཏེ གེཧེ བུདྡྷཔྤམུཁཾ བྷིཀྑུསངྒྷཾ ནིསཱིདཱཔེཏྭཱ ཨཔྤོདཀམདྷུཔཱཡསེན ¶ ཙེཝ པཎཱིཏེན ཁཱདནཱིཡེན ཙ པརིཝིསི. ཨནྟརཱབྷཏྟསྨིཾཡེཝ བྲཱཧྨཎསྶ ཙཏྟཱརོ པུཏྟཱ སཏྠུ སནྟིཀེ ནིསཱིདིཏྭཱ ཨཱཧཾསུ – ‘‘བྷོ གོཏམ, མཡཾ ཨམྷཱཀཾ པིཏརཾ པཊིཛགྒཱམ ན པམཛྫཱམ ¶ , པསྶཐིམསྶ ཨཏྟབྷཱཝ’’ནྟི.

སཏྠཱ ‘‘ཀལྱཱཎཾ ཝོ ཀཏཾ, མཱཏཱཔིཏུཔོསནཾ ནཱམ པོརཱཎཀཔཎྜིཏཱནཾ ཨཱཙིཎྞམེཝཱ’’ཏི ཝཏྭཱ ‘‘ཏསྶ ནཱགསྶ ཝིཔྤཝཱསེན, ཝིརཱུལ༹ྷཱ སལླཀཱི ཙ ཀུཊཛཱ ཙཱ’’ཏི ཨིམཾ ཨེཀཱདསནིཔཱཏེ མཱཏུཔོསཀནཱགརཱཛཛཱཏཀཾ (ཙརིཡཱ. ༢.༡ ཨཱདཡོ; ཛཱ. ༡.༡༡.༡ ཨཱདཡོ) ཝིཏྠཱརེན ཀཐེཏྭཱ ཨིམཾ གཱཐཾ ཨབྷཱསི –

ཏཏྠ དྷནཔཱལོ ནཱམཱཏི ཏདཱ ཀཱསིཀརཉྙཱ ཧཏྠཱཙརིཡཾ པེསེཏྭཱ རམཎཱིཡེ ནཱགཝནེ གཱཧཱཔིཏསྶ ཧཏྠིནོ ཨེཏཾ ནཱམཾ. ཀཊུཀབྷེདནོཏི ཏིཁིཎམདོ. ཧཏྠཱིནཉྷི མདཀཱལེ ཀཎྞཙཱུལི༹ཀཱ པབྷིཛྫནྟི, པཀཏིཡཱཔི ཧཏྠིནོ ཏསྨིཾ ཀཱལེ ཨངྐུསེ ཝཱ ¶ ཀུནྟཏོམརེ ཝཱ ན གཎེནྟི, ཙཎྜཱ བྷཝནྟི. སོ པན ཨཏིཙཎྜོཡེཝ. ཏེན ཝུཏྟཾ – ཀཊུཀབྷེདནོ དུནྣིཝཱརཡོཏི. བདྡྷོ ཀབལ༹ཾ ན བྷུཉྫཏཱིཏི སོ བདྡྷོ ཧཏྠིསཱལཾ པན ནེཏྭཱ ཝིཙིཏྲསཱཎིཡཱ པརིཀྑིཔཱཔེཏྭཱ ཀཏགནྡྷཔརིབྷཎྜཱཡ ཨུཔརི བདྡྷཝིཙིཏྲཝིཏཱནཱཡ བྷཱུམིཡཱ ཋཔིཏོ རཉྙཱ རཱཛཱརཧེན ནཱནགྒརསེན བྷོཛནེན ཨུཔཊྛཱཔིཏོཔི ཀིཉྩི བྷུཉྫིཏུཾ ན ཨིཙྪི, ཏམཏྠཾ སནྡྷཱཡ ‘‘བདྡྷོ ཀབལ༹ཾ ན བྷུཉྫཏཱི’’ཏི ཝུཏྟཾ. སུམརཏི ནཱགཝནསྶཱཏི སོ རམཎཱིཡཾ མེ ཝསནཊྛཱནནྟི ནཱགཝནཾ སརཏི. ‘‘མཱཏཱ པན མེ ཨརཉྙེ པུཏྟཝིཡོགེན དུཀྑཔྤཏྟཱ ཨཧོསི, མཱཏཱཔིཏུཨུཔཊྛཱནདྷམྨོ ན མེ པཱུརཏི, ཀིཾ མེ ཨིམིནཱ བྷོཛནེནཱ’’ཏི དྷམྨིཀཾ མཱཏཱཔིཏུཨུཔཊྛཱནདྷམྨམེཝ སརི. ཏཾ པན ཡསྨཱ ཏསྨིཾ ནཱགཝནེཡེཝ ¶ ཋིཏོ སཀྐཱ པཱུརེཏུཾ, ཏེན ཝུཏྟཾ – སུམརཏི ནཱགཝནསྶ ཀུཉྫརོཏི. སཏྠརི ཨིམཾ ཨཏྟནོ པུབྦཙརིཡཾ ¶ ཨཱནེཏྭཱ ཀཐེནྟེ ཀཐེནྟེཡེཝ སབྦེཔི ཏེ ཨསྶུདྷཱརཱ པཝཏྟེཏྭཱ མུདུཧདཡཱ ཨོཧིཏསོཏཱ བྷཝིཾསུ. ཨཐ ནེསཾ བྷགཝཱ སཔྤཱཡཾ ཝིདིཏྭཱ སཙྩཱནི པཀཱསེཏྭཱ དྷམྨཾ དེསེསི.

དེསནཱཝསཱནེ སདྡྷིཾ པུཏྟེཧི ཙེཝ སུཎིསཱཧི ཙ བྲཱཧྨཎོ སོཏཱཔཏྟིཕལེ པཏིཊྛཧཱིཏི.

པརིཛིཎྞབྲཱཧྨཎཔུཏྟཝཏྠུ ཏཏིཡཾ.

མིདྡྷཱི ཡདཱ ཧོཏཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ རཱཛཱནཾ པསེནདིཀོསལཾ ཨཱརབྦྷ ཀཐེསི.

ཨེཀསྨིཉྷི སམཡེ རཱཛཱ ཏཎྜུལདོཎསྶ ཨོདནཾ ཏདུཔིཡེན སཱུཔབྱཉྫནེན བྷུཉྫཏི. སོ ཨེཀདིཝསཾ བྷུཏྟཔཱཏརཱསོ བྷཏྟསམྨདཾ ཨཝིནོདེཏྭཱཝ སཏྠུ སནྟིཀཾ གནྟྭཱ ཀིལནྟརཱུཔོ ཨིཏོ ཙིཏོ ཙ སམྤརིཝཏྟཏི, ནིདྡཱཡ ཨབྷིབྷུཡྻམཱནོཔི ¶ ཨུཛུཀཾ ནིཔཛྫིཏུཾ ཨསཀྐོནྟོ ཨེཀམནྟཾ ¶ ནིསཱིདི. ཨཐ ནཾ སཏྠཱ ཨཱཧ – ‘‘ཀིཾ, མཧཱརཱཛ, ཨཝིསྶམིཏྭཱཝ ཨཱགཏོསཱི’’ཏི? ‘‘ཨཱམ, བྷནྟེ, བྷུཏྟཀཱལཏོ པཊྛཱཡ མེ མཧཱདུཀྑཾ ཧོཏཱི’’ཏི. ཨཐ ནཾ སཏྠཱ, ‘‘མཧཱརཱཛ, ཨཏིབཧུབྷོཛནཾ ཨེཝཾ དུཀྑཾ ཧོཏཱི’’ཏི ཝཏྭཱ ཨིམཾ གཱཐམཱཧ –

ཏཏྠ མིདྡྷཱིཏི ཐིནམིདྡྷཱབྷིབྷཱུཏོ. མཧགྒྷསོ ཙཱཏི མཧཱབྷོཛནོ ཨཱཧརཧཏྠཀཨལཾསཱཊཀཏཏྲཝཊྚཀཀཱཀམཱསཀབྷུཏྟཝམིཏཀཱནཾ ཨཉྙཏརོ ཝིཡ. ནིཝཱཔཔུཊྛོཏི ཀུཎྜཀཱདིནཱ སཱུཀརབྷཏྟེན པུཊྛོ. གྷརསཱུཀརོ ཧི དཧརཀཱལཏོ པཊྛཱཡ པོསིཡམཱནོ ཐཱུལསརཱིརཀཱལེ གེཧཱ བཧི ནིཀྑམིཏུཾ ཨལབྷནྟོ ཧེཊྛཱམཉྩཱདཱིསུ སམྤརིཝཏྟིཏྭཱ ¶ ཨསྶསནྟོ པསྶསནྟོ སཡཏེཝ. ཨིདཾ ཝུཏྟཾ ཧོཏི – ཡདཱ པུརིསོ མིདྡྷཱི ཙ ¶ ཧོཏི མཧགྒྷསོ ཙ, ནིཝཱཔཔུཊྛོ མཧཱཝརཱཧོ ཝིཡ ཙ ཨཉྙེན ཨིརིཡཱཔཐེན ཡཱཔེཏུཾ ཨསཀྐོནྟོ ནིདྡཱཡནསཱིལོ སམྤརིཝཏྟསཱཡཱི, ཏདཱ སོ ‘‘ཨནིཙྩཾ དུཀྑཾ ཨནཏྟཱ’’ཏི ཏཱིཎི ལཀྑཎཱནི མནསིཀཱཏུཾ ན སཀྐོཏི. ཏེསཾ ཨམནསིཀཱརཱ མནྡཔཉྙོ པུནཔྤུནཾ གབྦྷམུཔེཏི, གབྦྷཝཱསཏོ ན པརིམུཙྩཏཱིཏི. དེསནཱཝསཱནེ སཏྠཱ རཉྙོ ཨུཔཀཱརཝསེན –

‘‘མནུཛསྶ སདཱ སཏཱིམཏོ, མཏྟཾ ཛཱནཏོ ལདྡྷབྷོཛནེ;

ཏནུཀསྶ བྷཝནྟི ཝེདནཱ, སཎིཀཾ ཛཱིརཏི ཨཱཡུ པཱལཡ’’ནྟི. (སཾ. ནི. ༡.༡༢༤);

ཨིམཾ གཱཐཾ ཝཏྭཱ ཨུཏྟརམཱཎཝཾ ཨུགྒཎྷཱཔེཏྭཱ ‘‘ཨིམཾ གཱཐཾ རཉྙོ བྷོཛནཝེལཱཡ པཝེདེཡྻཱསི, ཨིམིནཱ ཨུཔཱཡེན བྷོཛནཾ པརིཧཱཔེཡྻཱསཱི’’ཏི ཨུཔཱཡཾ ཨཱཙིཀྑི, སོ ཏཐཱ ཨཀཱསི. རཱཛཱ ཨཔརེན སམཡེན ནཱལི༹ཀོདནཔརམཏཱཡ སཎྛིཏོ སུསལླཧུཀསརཱིརོ སུཁཔྤཏྟོ སཏྠརི ཨུཔྤནྣཝིསྶཱསོ སཏྟཱཧཾ ཨསདིསདཱནཾ པཝཏྟེསི. དཱནཱནུམོདནཱཡ མཧཱཛནོ མཧནྟཾ ཝིསེསཾ པཱཔུཎཱིཏི.

ཨིདཾ ¶ ¶ པུརེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཱནུཾ ནཱམ སཱམཎེརཾ ཨཱརབྦྷ ཀཐེསི.

སོ ཀིར ཨེཀིསྶཱ ཨུཔཱསིཀཱཡ ཨེཀཔུཏྟཀོ ཨཧོསི. ཨཐ ནཾ སཱ དཧརཀཱལེཡེཝ པབྦཱཛེསི. སོ པབྦཛིཏཀཱལཏོ པཊྛཱཡ སཱིལཝཱ ཨཧོསི ཝཏྟསམྤནྣོ, ཨཱཙརིཡུཔཛ྄ཛྷཱཡཨཱགནྟུཀཱནཾ ཝཏྟཾ ཀཏམེཝ ཧོཏི. མཱསསྶ ཨཊྛམེ དིཝསེ པཱཏོཝ ཨུཊྛཱཡ ཨུདཀམཱལ༹ཀེ ཨུདཀཾ ཨུཔཊྛཱཔེཏྭཱ དྷམྨསྶཝནགྒཾ སམྨཛྫིཏྭཱ ཨཱསནཾ པཉྙཱཔེཏྭཱ དཱིཔཾ ཛཱལེཏྭཱ མདྷུརསྶརེན དྷམྨསྶཝནཾ གྷོསེཏི. བྷིཀྑཱུ ཏསྶ ཐཱམཾ ཉཏྭཱ ¶ ‘‘སརབྷཉྙཾ བྷཎ སཱམཎེརཱ’’ཏི ཨཛ྄ཛྷེསནྟི. སོ ‘‘མཡ྄ཧཾ ཧདཡཝཱཏོ རུཛཏི, ཀཱཡོ ཝཱ བཱདྷཏཱི’’ཏི ཀིཉྩི པཙྩཱཧཱརཾ ཨཀཏྭཱ དྷམྨཱསནཾ ཨབྷིརཱུཧིཏྭཱ ཨཱཀཱསགངྒཾ ཨོཏཱརེནྟོ ཝིཡ སརབྷཉྙཾ ཝཏྭཱ ཨོཏརནྟོ ‘‘མཡ྄ཧཾ མཱཏཱཔིཏཱུནཾ ཨིམསྨིཾ སརབྷཉྙེ པཏྟིཾ དམྨཱི’’ཏི ཝདཏི. ཏསྶ མནུསྶཱ མཱཏཱཔིཏརོ པཏྟིཡཱ དིནྣབྷཱཝཾ ¶ ན ཛཱནནྟི. ཨནནྟརཏྟབྷཱཝེ པནསྶ མཱཏཱ ཡཀྑིནཱི ཧུཏྭཱ ནིབྦཏྟཱ, སཱ དེཝཏཱཧི སདྡྷིཾ ཨཱགནྟྭཱ དྷམྨཾ སུཏྭཱ ‘‘སཱམཎེརེན དིནྣཔཏྟིཾ ཨནུམོདཱམི, ཏཱཏཱ’’ཏི ཝདཏི. ‘‘སཱིལསམྤནྣོ ཙ ནཱམ བྷིཀྑུ སདེཝཀསྶ ལོཀསྶ པིཡོ ཧོཏཱི’’ཏི ཏསྨིཾ སཱམཎེརེ དེཝཏཱ སལཛྫཱ སགཱརཝཱ མཧཱབྲཧྨཱནཾ ཝིཡ ཨགྒིཀྑནྡྷཾ ཝིཡ ཙ ནཾ མཉྙནྟི. སཱམཎེརེ གཱརཝེན ཏཉྩ ཡཀྑིནིཾ གརུཀཾ ཀཏྭཱ པསྶནྟི. ཏཱ དྷམྨསྶཝནཡཀྑསམཱགམཱདཱིསུ ‘‘སཱནུམཱཏཱ སཱནུམཱཏཱ’’ཏི ཡཀྑིནིཡཱ ཨགྒཱསནཾ ཨགྒོདཀཾ ཨགྒཔིཎྜཾ དེནྟི. མཧེསཀྑཱཔི ཡཀྑཱ ཏཾ དིསྭཱ མགྒཱ ཨོཀྐམནྟི, ཨཱསནཱ ཝུཊྛཧནྟི.

ཨཐ ཁོ སཱམཎེརོ ཝུཌྜྷིམནྭཱཡ པརིཔཀྐིནྡྲིཡོ ཨནབྷིརཏིཡཱ པཱིལི༹ཏོ ཨནབྷིརཏིཾ ཝིནོདེཏུཾ ཨསཀྐོནྟོ པརུལ༹ྷཀེསནཁོ ཀིལིཊྛནིཝཱསནཔཱརུཔནོ ཀསྶཙི ཨནཱརོཙེཏྭཱ པཏྟཙཱིཝརམཱདཱཡ ཨེཀཀོཝ མཱཏུགྷརཾ ཨགམཱསི. ཨུཔཱསིཀཱ པུཏྟཾ དིསྭཱ ཝནྡིཏྭཱ ཨཱཧ – ‘‘ཀིཾ, ཏཱཏ, ཏྭཾ པུབྦེ ¶ ཨཱཙརིཡུཔཛ྄ཛྷཱཡེཧི ཝཱ དཧརསཱམཎེརེཧི ཝཱ སདྡྷིཾ ཨིདྷཱགཙྪསི, ཀསྨཱ ཨེཀཀོཝ ཨཛྫ ཨཱགཏོསཱི’’ཏི? སོ ཨུཀྐཎྛིཏབྷཱཝཾ ཨཱརོཙེསི. སཱ ཨུཔཱསིཀཱ ནཱནཔྤཀཱརེན གྷརཱཝཱསེ ཨཱདཱིནཝཾ དསྶེཏྭཱ པུཏྟཾ ཨོཝདམཱནཱཔི སཉྙཱཔེཏུཾ ཨསཀྐོནྟཱི ‘‘ཨཔྤེཝ ནཱམ ཨཏྟནོ དྷམྨཏཱཡཔི སལླཀྑེཡྻཱ’’ཏི ཨནུཡྻོཛེཏྭཱ ‘‘ཏིཊྛ, ཏཱཏ, ཡཱཝ ཏེ ཡཱགུབྷཏྟཾ སམྤཱདེམི, ཡཱགུཾ པིཝིཏྭཱ ཀཏབྷཏྟཀིཙྩསྶ ཏེ མནཱཔཱནི ཝཏྠཱནི ནཱིཧརིཏྭཱ དསྶཱམཱི’’ཏི ཝཏྭཱ ཨཱསནཾ པཉྙཱཔེཏྭཱ ཨདཱསི. ནིསཱིདི སཱམཎེརོ. ཨུཔཱསིཀཱ མུཧུཏྟེནེཝ ཡཱགུཁཛྫཀཾ ¶ སམྤཱདེཏྭཱ ཨདཱསི. ཨཐ ‘‘བྷཏྟཾ སམྤཱདེསྶཱམཱི’’ཏི ཨཝིདཱུརེ ནིསིནྣཱ ཏཎྜུལེ དྷོཝཏི. ཏསྨིཾ སམཡེ སཱ ཡཀྑིནཱི ‘‘ཀཧཾ ནུ ཁོ སཱམཎེརོ, ཀཙྩི བྷིཀྑཱཧཱརཾ ལབྷཏི, ནོ’’ཏི ཨཱཝཛྫམཱནཱ ཏསྶ ཝིབྦྷམིཏུཀཱམཏཱཡ ནིསིནྣབྷཱཝཾ ཉཏྭཱ ‘‘སཱམཎེརོ མེ མཧེསཀྑཱནཾ དེཝཏཱནཾ ཨནྟརེ ལཛྫཾ ཨུཔྤཱདེཡྻ, གཙྪཱམིསྶ ཝིབྦྷམནེ ཨནྟརཱཡཾ ཀརིསྶཱམཱི’’ཏི ཨཱགནྟྭཱ ཏསྶ སརཱིརེ ཨདྷིམུཙྩིཏྭཱ ¶ གཱིཝཾ པརིཝཏྟེཏྭཱ ཁེལེ༹ན པགྒྷརནྟེན བྷཱུམིཡཾ ¶ ནིཔཏི. ཨུཔཱསིཀཱ པུཏྟསྶ ཏཾ ཝིཔྤཀཱརཾ དིསྭཱ ཝེགེན གནྟྭཱ པུཏྟཾ ཨཱལིངྒེཏྭཱ ཨཱུརཱུསུ ནིཔཛྫཱཔེསི. སཀལགཱམཝཱསིནོ ཨཱགནྟྭཱ བལིཀམྨཱདཱིནི ཀརིཾསུ. ཨུཔཱསིཀཱ པན པརིདེཝམཱནཱ ཨིམཱ གཱཐཱ ཨབྷཱསི –

‘‘ཙཱཏུདྡསིཾ པཉྩདསིཾ, ཡཱ ཙ པཀྑསྶ ཨཊྛམཱི;

པཱཊིཧཱརིཡཔཀྑཉྩ, ཨཊྛངྒསུསམཱགཏཾ.

‘‘ཨུཔོསཐཾ ཨུཔཝསནྟི, བྲཧྨཙརིཡཾ ཙརནྟི ཡེ;

ན ཏེཧི ཡཀྑཱ ཀཱིལ༹ནྟི, ཨིཏི མེ ཨརཧཏཾ སུཏཾ;

སཱ དཱནི ཨཛྫ པསྶཱམི, ཡཀྑཱ ཀཱིལ༹ནྟི སཱནུནཱ’’ཏི. (སཾ. ནི. ༡.༢༣༩);

‘‘ཙཱཏུདྡསིཾ པཉྩདསིཾ, ཡཱ ཙ པཀྑསྶ ཨཊྛམཱི;

པཱཊིཧཱརིཡཔཀྑཉྩ, ཨཊྛངྒསུསམཱགཏཾ.

‘‘ཨུཔོསཐཾ ཨུཔཝསནྟི, བྲཧྨཙརིཡཾ ཙརནྟི ཡེ;

ན ཏེཧི ཡཀྑཱ ཀཱིལ༹ནྟི, སཱཧུ ཏེ ཨརཧཏཾ སུཏ’’ནྟི. (སཾ. ནི. ༡.༢༣༩) –

‘‘སཱནུཾ པབུདྡྷཾ ཝཛྫཱསི, ཡཀྑཱནཾ ཝཙནཾ ཨིདཾ;

མཱཀཱསི པཱཔཀཾ ཀམྨཾ, ཨཱཝི ཝཱ ཡདི ཝཱ རཧོ.

‘‘སཙེ ¶ ཙ པཱཔཀཾ ཀམྨཾ, ཀརིསྶསི ཀརོསི ཝཱ;

ན ཏེ དུཀྑཱ པམུཏྱཏྠི, ཨུཔྤཙྩཱཔི པལཱཡཏོ’’ཏི. (སཾ. ནི. ༡.༢༣༩);

ཨེཝཾ ¶ པཱཔཀཾ ཀམྨཾ ཀཏྭཱ སཀུཎསྶ ཝིཡ ཨུཔྤཏིཏྭཱ པལཱཡཏོཔི ཏེ མོཀྑོ ནཏྠཱིཏི ཝཏྭཱ སཱ ཡཀྑིནཱི སཱམཎེརཾ མུཉྩི. སོ ཨཀྑཱིནི ཨུམྨཱིལེཏྭཱ མཱཏརཾ ཀེསེ ཝིཀིརིཡ ཨསྶསནྟིཾ པསྶསནྟིཾ རོདམཱནཾ སཀལགཱམཝཱསིནོ ཙ སནྣིཔཏིཏེ དིསྭཱ ཨཏྟནོ ཡཀྑེན གཧིཏབྷཱཝཾ ཨཛཱནནྟོ ‘‘ཨཧཾ པུབྦེ པཱིཋེ ནིསིནྣོ, མཱཏཱ མེ ཨཝིདཱུརེ ནིསཱིདིཏྭཱ ཏཎྜུལེ དྷོཝི, ཨིདཱནི པནམྷི བྷཱུམིཡཾ ནིཔནྣོ, ཀིཾ ནུ ཁོ ཨེཏ’’ནྟི ནིཔནྣཀོཝ མཱཏརཾ ཨཱཧ –

‘‘མཏཾ ¶ ཝཱ ཨམྨ རོདནྟི, ཡོ ཝཱ ཛཱིཝཾ ན དིསྶཏི;

ཛཱིཝནྟཾ ཨམྨ པསྶནྟཱི, ཀསྨཱ མཾ ཨམྨ རོདསཱི’’ཏི. (ཐེརགཱ. ༤༤; སཾ. ནི. ༡.༢༣༩);

ཨཐསྶ མཱཏཱ ཝཏྠུཀཱམཀིལེསཀཱམེ པཧཱཡ པབྦཛིཏསྶ པུན ཝིབྦྷམནཏྠཾ ཨཱགམནེ ཨཱདཱིནཝཾ དསྶེནྟཱི ཨཱཧ –

‘‘མཏཾ ཝཱ པུཏྟ རོདནྟི, ཡོ ཝཱ ཛཱིཝཾ ན དིསྶཏི;

ཡོ ཙ ཀཱམེ ཙཛིཏྭཱན, པུནརཱགཙྪཏེ ཨིདྷ;

ཏཾ ཝཱཔི པུཏྟ རོདནྟི, པུན ཛཱིཝཾ མཏོ ཧི སོ’’ཏི. (སཾ. ནི. ༡.༢༣༩);

ཨེཝཉྩ ¶ པན ཝཏྭཱ གྷརཱཝཱསཾ ཀུཀྐུལ༹སདིསཉྩེཝ ནརཀསདིསཉྩ ཀཏྭཱ གྷརཱཝཱསེ ཨཱདཱིནཝཾ དསྶེནྟཱི པུན ཨཱཧ –

‘‘ཀུཀྐུལཱ༹ ཨུབྦྷཏོ ཏཱཏ, ཀུཀྐུལ༹ཾ པཏིཏུམིཙྪསི;

ནརཀཱ ཨུབྦྷཏོ ཏཱཏ, ནརཀཾ པཏིཏུམིཙྪསཱི’’ཏི. (སཾ. ནི. ༡.༢༣༩);

ཨཐ ནཾ, ‘‘པུཏྟ, བྷདྡཾ ཏཝ ཧོཏུ, མཡཱ པན ‘ཨཡཾ ནོ པུཏྟཀོ ཌཡ྄ཧམཱནོ’ཏི གེཧཱ བྷཎྜཾ ¶ ཝིཡ ནཱིཧརིཏྭཱ བུདྡྷསཱསནེ པབྦཱཛིཏོ, གྷརཱཝཱསེ པུན ཌཡ྄ཧིཏུཾ ཨིཙྪསི. ཨབྷིདྷཱཝཐ པརིཏྟཱཡཐ ནོཏི ཨིམམཏྠཾ ཀསྶ ཨུཛ྄ཛྷཱཔཡཱམ ཀཾ ནིཛ྄ཛྷཱཔཡཱམཱ’’ཏི དཱིཔེཏུཾ ཨིམཾ གཱཐམཱཧ –

‘‘ཨབྷིདྷཱཝཐ བྷདྡནྟེ, ཀསྶ ཨུཛ྄ཛྷཱཔཡཱམསེ;

ཨཱདིཏྟཱ ནཱིཧཏཾ བྷཎྜཾ, པུན ཌཡ྄ཧིཏུམིཙྪསཱི’’ཏི. (སཾ. ནི. ༡.༢༣༩);

སོ མཱཏརི ཀཐེནྟིཡཱ ཀཐེནྟིཡཱ སལླཀྑེཏྭཱ ‘‘ནཏྠི མཡ྄ཧཾ གིཧིབྷཱཝེན ཨཏྠོ’’ཏི ཨཱཧ. ཨཐསྶ མཱཏཱ ‘‘སཱདྷུ, ཏཱཏཱ’’ཏི ཏུཊྛཱ པཎཱིཏབྷོཛནཾ བྷོཛེཏྭཱ ‘‘ཀཏིཝསྶོསི, ཏཱཏཱ’’ཏི པུཙྪིཏྭཱ པརིཔུཎྞཝསྶབྷཱཝཾ ཉཏྭཱ ཏིཙཱིཝརཾ པཊིཡཱདེསི. སོ པརིཔུཎྞཔཏྟཙཱིཝརོ ཨུཔསམྤདཾ ལབྷི. ཨཐསྶ ཨཙིརཱུཔསམྤནྣསྶ སཏྠཱ ཙིཏྟནིགྒཧེ ཨུསྶཱཧཾ ཛནེནྟོ ‘‘ཙིཏྟཾ ¶ ནཱམེཏཾ ནཱནཱརམྨཎེསུ དཱིགྷརཏྟཾ ཙཱརིཀཾ ཙརནྟཾ ཨནིགྒཎྷནྟསྶ སོཏྠིབྷཱཝོ ནཱམ ནཏྠི, ཏསྨཱ ཨངྐུསེན མཏྟཧཏྠིནོ ཝིཡ ཙིཏྟསྶ ནིགྒཎྷནེ ཡོགོ ཀརཎཱིཡོ’’ཏི ཝཏྭཱ ཨིམཾ གཱཐམཱཧ –

‘‘ཨིདཾ ¶ པུརེ ཙིཏྟམཙཱརི ཙཱརིཀཾ,

ཧཏྠིཔྤབྷིནྣཾ ཝིཡ ཨངྐུསགྒཧོ’’ཏི.

ཏསྶཏྠོ – ཨིདཾ ཙིཏྟཾ ནཱམ ཨིཏོ པུབྦེ རཱུཔཱདཱིསུ ཙ ཨཱརམྨཎེསུ རཱགཱདཱིནཾ ཡེན ཀཱརཎེན ཨིཙྪཏི, ཡཏྠེཝསྶ ཀཱམོ ཨུཔྤཛྫཏི, ཏསྶ ཝསེན ཡཏྠ ཀཱམཾ ཡཐཱརུཙི ཙརནྟསྶ སུཁཾ ཧོཏི, ཏཐེཝ ཝིཙརཎཏོ ཡཐཱསུཁཾ དཱིགྷརཏྟཾ ཙཱརིཀཾ ཙརི, ཏཾ ཨཛྫ ཨཧཾ པབྷིནྣཾ མཏྟཧཏྠིཾ ཧཏྠཱཙརིཡསངྑཱཏོ ཚེཀོ ཨངྐུསགྒཧོ ཨངྐུསེན ཝིཡ ཡོནིསོམནསིཀཱརེན ནིགྒཧེསྶཱམི, ནཱསྶ ཝཱིཏིཀྐམིཏུཾ དསྶཱམཱིཏི.

དེསནཱཝསཱནེ སཱནུནཱ སདྡྷིཾ དྷམྨསྶཝནཱཡ ཨུཔསངྐམནྟཱནཾ ¶ བཧཱུནཾ དེཝཏཱནཾ དྷམྨཱབྷིསམཡོ ཨཧོསི. སོཔཱཡསྨཱ ཏེཔིཊཀཾ བུདྡྷཝཙནཾ ཨུགྒཎྷིཏྭཱ མཧཱདྷམྨཀཐིཀོ ཧུཏྭཱ ཝཱིསཝསྶསཏཾ ཋཏྭཱ སཀལཛམྦུདཱིཔཾ སངྑོབྷེཏྭཱ པརིནིབྦཱཡཱིཏི.

ཨཔྤམཱདརཏཱཏི ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀོསལརཉྙོ པཱཝེཡྻཀཾ ནཱམ ཧཏྠིཾ ཨཱརབྦྷ ཀཐེསི.

སོ ཀིར ཧཏྠཱི ཏརུཎཀཱལེ མཧཱབལོ ཧུཏྭཱ ཨཔརེན སམཡེན ཛརཱཝཱཏཝེགབྦྷཱཧཏོ ཧུཏྭཱ ཨེཀཾ མཧནྟཾ སརཾ ཨོརུཡ྄ཧ ཀལལེ ལགྒིཏྭཱ ཨུཏྟརིཏུཾ ནཱསཀྑི. མཧཱཛནོ ཏཾ དིསྭཱ ‘‘ཨེཝརཱུཔོཔི ནཱམ ཧཏྠཱི ཨིམཾ དུབྦལབྷཱཝཾ པཏྟོ’’ཏི ཀཐཾ སམུཊྛཱཔེསི. རཱཛཱ ཏཾ པཝཏྟིཾ སུཏྭཱ ཧཏྠཱཙརིཡཾ ཨཱཎཱཔེསི – ‘‘གཙྪ, ཨཱཙརིཡ, ཏཾ ཧཏྠིཾ ཀལལཏོ ཨུདྡྷརཱཧཱི’’ཏི. སོ གནྟྭཱ ཏསྨིཾ ཋཱནེ སངྒཱམསཱིསཾ དསྶེཏྭཱ སངྒཱམབྷེརིཾ ཨཱཀོཊཱཔེསི. མཱནཛཱཏིཀོ ཧཏྠཱི ཝེགེནུཊྛཱཡ ཐལེ པཏིཊྛཧི. བྷིཀྑཱུ ཏཾ ཀཱརཎཾ དིསྭཱ སཏྠུ ཨཱརོཙེསུཾ. སཏྠཱ ‘‘ཏེན, བྷིཀྑཝེ ¶ , ཧཏྠིནཱ ¶ པཀཏིཔངྐདུགྒཏོ ཨཏྟཱ ཨུདྡྷཊོ, ཏུམྷེ པན ཀིལེསདུགྒེ པཀྑནྡཱ. ཏསྨཱ ཡོནིསོ པདཧིཏྭཱ ཏུམྷེཔི ཏཏོ ཨཏྟཱནཾ ཨུདྡྷརཐཱ’’ཏི ཝཏྭཱ ཨིམཾ གཱཐམཱཧ –

‘‘ཨཔྤམཱདརཏཱ ཧོཐ, སཙིཏྟམནུརཀྑཐ;

དུགྒཱ ཨུདྡྷརཐཏྟཱནཾ, པངྐེ སནྣོཝ ཀུཉྫརོ’’ཏི.

ཏཏྠ ཨཔྤམཱདརཏཱཏི སཏིཡཱ ཨཝིཔྤཝཱསེ ཨབྷིརཏཱ ཧོཐ. སཙིཏྟནྟི རཱུཔཱདཱིསུ ཨཱརམྨཎེསུ ཨཏྟནོ ཙིཏྟཾ ཡཐཱ ཝཱིཏིཀྐམཾ ན ཀརོཏི, ཨེཝཾ རཀྑཐ. དུགྒཱཏི ཡཐཱ སོ པངྐེ སནྣོ ཀུཉྫརོ ཧཏྠེཧི ཙ པཱདེཧི ཙ ཝཱཡཱམཾ ཀཏྭཱ པངྐདུགྒཏོ ཨཏྟཱནཾ ཨུདྡྷརིཏྭཱ ཐལེ པཏིཊྛིཏོ, ཨེཝཾ ཏུམྷེཔི ཀིལེསདུགྒཏོ ཨཏྟཱནཾ ཨུདྡྷརཐ, ནིབྦཱནཐལེ པཏིཊྛཱཔེཐཱཏི ཨཏྠོ.

དེསནཱཝསཱནེ ཏེ བྷིཀྑཱུ ཨརཧཏྟེ པཏིཊྛཧིཾསཱུཏི.

སཙེ ལབྷེཐཱཏི ཨིམཾ དྷམྨདེསནཾ སཏྠཱ པཱལིལེཡྻཀཾ ནིསྶཱཡ རཀྑིཏཝནསཎྜེ ཝིཧརནྟོ སམྦཧུལེ ¶ བྷིཀྑཱུ ཨཱརབྦྷ ཀཐེསི. ཝཏྠུ ¶ ཡམཀཝགྒེ ‘‘པརེ ཙ ན ཝིཛཱནནྟཱི’’ཏི གཱཐཱཝཎྞནཱཡ ཨཱགཏམེཝ. ཝུཏྟཉྷེཏཾ (དྷ. པ. ཨཊྛ. ༡.༥ ཀོསམྦཀཝཏྠུ) –

ཏཐཱགཏསྶ ཏཏྠ ཧཏྠིནཱགེན ཨུཔཊྛིཡམཱནསྶ ཝསནབྷཱཝོ སཀལཛམྦུདཱིཔེ པཱཀཊོ ཨཧོསི. སཱཝཏྠིནགརཏོ ‘‘ཨནཱཐཔིཎྜིཀོ ཝིསཱཁཱ མཧཱཨུཔཱསིཀཱ’’ཏི ཨེཝམཱདཱིནི མཧཱཀུལཱནི ཨཱནནྡཏྠེརསྶ སཱསནཾ པཧིཎིཾསུ ‘‘སཏྠཱརཾ ནོ, བྷནྟེ, དསྶེཐཱ’’ཏི. དིསཱཝཱསིནོཔི པཉྩསཏཱ བྷིཀྑཱུ ཝུཊྛཝསྶཱ ཨཱནནྡཏྠེརཾ ཨུཔསངྐམིཏྭཱ ‘‘ཙིརསྶུཏཱ ནོ, ཨཱཝུསོ ཨཱནནྡ, བྷགཝཏོ སམྨུཁཱ དྷམྨཱི ཀཐཱ, སཱདྷུ མཡཾ, ཨཱཝུསོ ཨཱནནྡ, ལབྷེཡྻཱམ བྷགཝཏོ སམྨུཁཱ དྷམྨིཾ ཀཐཾ སཝནཱཡཱ’’ཏི ཡཱཙིཾསུ. ཐེརོ ཏེ བྷིཀྑཱུ ཨཱདཱཡ ཏཏྠ གནྟྭཱ ‘‘ཏེམཱསཾ ¶ ཨེཀཝིཧཱརིནོ ཏཐཱགཏསྶ སནྟིཀཾ ཨེཏྟཀེཧི བྷིཀྑཱུཧི སདྡྷིཾ ཨུཔསངྐམནཾ ཨཡུཏྟ’’ནྟི ཙིནྟེཏྭཱ ཏེ བྷིཀྑཱུ བཧི ཋཔེཏྭཱ ཨེཀཀོཝ སཏྠཱརཾ ཨུཔསངྐམི. པཱལིལེཡྻཀོ ཏཾ དིསྭཱ དཎྜམཱདཱཡ པཀྑནྡི. ཏཾ སཏྠཱ ཨོལོཀེཏྭཱ ‘‘ཨཔེཧི, ཨཔེཧི, པཱལིལེཡྻཀ, མཱ ཝཱརཡི, བུདྡྷུཔཊྛཱཀོ ཨེསོ’’ཏི ཨཱཧ. སོ ཏཏྠེཝ དཎྜཾ ཚཌྜེཏྭཱ པཏྟཙཱིཝརཔཊིགྒཧཎཾ ཨཱཔུཙྪི. ཐེརོ ནཱདཱསི. ནཱགོ ‘‘སཙེ ཨུགྒཧིཏཝཏྟོ བྷཝིསྶཏི, སཏྠུ ནིསཱིདནཔཱསཱཎཕལཀེ ཨཏྟནོ པརིཀྑཱརཾ ན ཋཔེསྶཏཱི’’ཏི ཙིནྟེསི. ཐེརོ པཏྟཙཱིཝརཾ བྷཱུམིཡཾ ཋཔེསི. ཝཏྟསམྤནྣཱ ཧི གརཱུནཾ ཨཱསནེ ཝཱ སཡནེ ཝཱ ཨཏྟནོ པརིཀྑཱརཾ ན ཋཔེནྟི.

ཐེརོ སཏྠཱརཾ ཝནྡིཏྭཱ ཨེཀམནྟཾ ¶ ནིསཱིདི. སཏྠཱ ‘‘ཨེཀཀོཝ ཨཱགཏོསཱི’’ཏི པུཙྪིཏྭཱ པཉྩཧི བྷིཀྑུསཏེཧི ཨཱགཏབྷཱཝཾ སུཏྭཱ ‘‘ཀཧཾ པན ཏེ’’ཏི པུཙྪིཏྭཱ ‘‘ཏུམྷཱཀཾ ཙིཏྟཾ ཨཛཱནནྟོ བཧི ཋཔེཏྭཱ ཨཱགཏོམྷཱི’’ཏི ཝུཏྟེ ‘‘པཀྐོསཱཧི ནེ’’ཏི ཨཱཧ. ཐེརོ ཏཐཱ ཨཀཱསི. སཏྠཱ ཏེཧི བྷིཀྑཱུཧི སདྡྷིཾ པཊིསནྠཱརཾ ཀཏྭཱ ཏེཧི བྷིཀྑཱུཧི, ‘‘བྷནྟེ, བྷགཝཱ བུདྡྷསུཁུམཱལོ ཙེཝ ཁཏྟིཡསུཁུམཱལོ ཙ, ཏུམྷེཧི ཏེམཱསཾ ཨེཀཀེཧི ཏིཊྛནྟེཧི ནིསཱིདནྟེཧི ཙ དུཀྐརཾ ཀཏཾ, ཝཏྟཔཊིཝཏྟཀཱརཀོཔི མུཁོདཀཱདིདཱཡཀོཔི ནཱཧོསི མཉྙེ’’ཏི ཝུཏྟེ, ‘‘བྷིཀྑཝེ, པཱལིལེཡྻཀཧཏྠིནཱ མམ སབྦཀིཙྩཱནི ཀཏཱནི. ཨེཝརཱུཔཉྷི སཧཱཡཾ ལབྷནྟེན ཨེཀཀོཝ ཝསིཏུཾ ཡུཏྟཾ, ཨལབྷནྟསྶ ཨེཀཙཱརིཀབྷཱཝོཝ སེཡྻོ’’ཏི ཝཏྭཱ ནཱགཝགྒེ ཨིམཱ གཱཐཱ ཨབྷཱསི –

ཨཔྤོསྶུཀྐོ མཱཏངྒརཉྙེཝ ནཱགོ’’ཏི.

ཏཏྠ ནིཔཀནྟི ནེཔཀྐཔཉྙཱཡ སམནྣཱགཏཾ. སཱདྷུཝིཧཱརི དྷཱིརནྟི བྷདྡཀཝིཧཱརིཾ པཎྜིཏཾ. པརིསྶཡཱནཱིཏི ཏཱདིསཾ མེཏྟཱཝིཧཱརིཾ སཧཱཡཾ ལབྷནྟོ སཱིཧབྱགྒྷཱདཡོ པཱཀཊཔརིསྶཡེ ཙ རཱགབྷཡདོསབྷཡམོཧབྷཡཱདཡོ པཊིཙྪནྣཔརིསྶཡེ ཙཱཏི སབྦེཝ པརིསྶཡེ ཨབྷིབྷཝིཏྭཱ ཏེན སདྡྷིཾ ཨཏྟམནོ ཨུཔཊྛིཏསཏཱི ཧུཏྭཱ ཙརེཡྻ, ཝིཧརེཡྻཱཏི ཨཏྠོ.

རཱཛཱཝ རཊྛནྟི རཊྛཾ ཧིཏྭཱ གཏོ མཧཱཛནཀརཱཛཱ ཝིཡ. ཨིདཾ ཝུཏྟཾ ཧོཏི – ཡཐཱ ཝིཛིཏབྷཱུམིཔདེསོ རཱཛཱ ‘‘ཨིདཾ རཛྫཾ ནཱམ མཧནྟཾ པམཱདཊྛཱནཾ, ཀིཾ མེ རཛྫེན ཀཱརིཏེནཱ’’ཏི ཝིཛིཏཾ རཊྛཾ པཧཱཡ ཨེཀཀོཝ མཧཱརཉྙཾ པཝིསིཏྭཱ ཏཱཔསཔབྦཛྫཾ པབྦཛིཏྭཱ ཙཏཱུསུ ཨིརིཡཱཔཐེསུ ཨེཀཀོཝ ཙརཏི, ཨེཝཾ ཨེཀཀོཝ ཙརེཡྻཱཏི. མཱཏངྒརཉྙེཝ ནཱགོཏི ཡཐཱ ཙ ‘‘ཨཧཾ ཁོ ཨཱཀིཎྞོ ཝིཧརཱམི ཧཏྠཱིཧི ཧཏྠིནཱིཧི ¶ ཧཏྠིཀལ༹བྷེཧི ཧཏྠིཙྪཱཔེཧི, ཚིནྣགྒཱནི ཙེཝ ཏིཎཱནི ཁཱདཱམི, ཨོབྷགྒོབྷགྒཉྩ མེ སཱཁཱབྷངྒཾ ཁཱདནྟི, ཨཱཝིལཱནི ཙ པཱནཱིཡཱནི པིཝཱམི, ཨོགཱཧཱ ཙ མེ ཨུཏྟིཎྞསྶ ཧཏྠིནིཡོ ཀཱཡཾ ཨུཔནིགྷཾསནྟིཡོ གཙྪནྟི, ཡཾནཱུནཱཧཾ ཨེཀཀོཝ གཎམྷཱ ཝཱུཔཀཊྛོ ཝིཧརེཡྻ’’ནྟི (མཧཱཝ. ༤༦༧; ཨུདཱ. ༣༥) ཨེཝཾ པཊིསཉྩིཀྑིཏྭཱ གམནཏོ མཱཏངྒོཏི ལདྡྷནཱམོ ཨིམསྨིཾ ཨརཉྙེ ཨཡཾ ཧཏྠིནཱགོ ཡཱུཐཾ པཧཱཡ སབྦིརིཡཱཔཐེསུ ཨེཀཀོཝ སུཁཾ ཙརཏི, ཨེཝམྤི ཨེཀོཝ ཙརེཡྻཱཏི ཨཏྠོ.

ཨེཀསྶཱཏི པབྦཛིཏསྶ ཧི པབྦཛིཏཀཱལཏོ པཊྛཱཡ ཨེཀཱིབྷཱཝཱབྷིརཏསྶ ཨེཀཀསྶེཝ ཙརིཏཾ སེཡྻོ. ནཏྠི བཱལེ སཧཱཡཏཱཏི ཙཱུལ༹སཱིལཾ མཛ྄ཛྷིམསཱིལཾ མཧཱསཱིལཾ དས ཀཐཱཝཏྠཱུནི ཏེརས དྷུཏངྒགུཎཱནི ཝིཔསྶནཱཉཱཎཾ ཙཏྟཱརོ མགྒཱ ཙཏྟཱརི ཕལཱནི ཏིསྶོ ཝིཛྫཱ ཚ ཨབྷིཉྙཱ ཨམཏམཧཱནིབྦཱནནྟི ཨཡཉྷི སཧཱཡཏཱ ནཱམ. སཱ བཱལེ ¶ ནིསྶཱཡ ཨདྷིགནྟུཾ ¶ ན སཀྐཱཏི ¶ ནཏྠི བཱལེ སཧཱཡཏཱ. ཨེཀོཏི ཨིམིནཱ ཀཱརཎེན སབྦིརིཡཱཔཐེསུ ཨེཀཀོཝ ཙརེཡྻ, ཨཔྤམཏྟཀཱནིཔི ན ཙ པཱཔཱནི ཀཡིརཱ. ཡཐཱ སོ ཨཔྤོསྶུཀྐོ ནིརཱལཡོ ཨིམསྨིཾ ཨརཉྙེ མཱཏངྒནཱགོ ཨིཙྪིཏིཙྪིཏཊྛཱནེ སུཁཾ ཙརཏི, ཨེཝཾ ཨེཀཀོཝ ཧུཏྭཱ ཙརེཡྻ, ཨཔྤམཏྟཀཱནིཔི ན ཙ པཱཔཱནི ཀརེཡྻཱཏི ཨཏྠོ. ཏསྨཱ ཏུམྷེཧི པཏིརཱུཔཾ སཧཱཡཾ ཨལབྷནྟེཧི ཨེཀཙཱརཱིཧེཝ བྷཝིཏབྦནྟི ཨིམམཏྠཾ དསྶེནྟོ སཏྠཱ ཏེསཾ བྷིཀྑཱུནཾ ཨིམཾ དྷམྨདེསནཾ དེསེསི.

དེསནཱཝསཱནེ པཉྩསཏཱཔི ཏེ བྷིཀྑཱུ ཨརཧཏྟེ པཏིཊྛཧིཾསཱུཏི.

ཨཏྠམྷཱིཏི ཨིམཾ དྷམྨདེསནཾ སཏྠཱ ཧིམཝནྟཔདེསེ ཨརཉྙཀུཊིཀཱཡཾ ཝིཧརནྟོ མཱརཾ ཨཱརབྦྷ ཀཐེསི.

ཏསྨིཾ ཀིར ཀཱལེ རཱཛཱནོ མནུསྶེ པཱིལེ༹ཏྭཱ རཛྫཾ ཀཱརེནྟི. ཨཐ བྷགཝཱ ཨདྷམྨིཀརཱཛཱུནཾ རཛྫེ དཎྜཀརཎཔཱིལི༹ཏེ མནུསྶེ དིསྭཱ ཀཱརུཉྙེན ཨེཝཾ ཙིནྟེསི ¶ – ‘‘སཀྐཱ ནུ ཁོ རཛྫཾ ཀཱརེཏུཾ ཨཧནཾ ཨགྷཱཏཡཾ, ཨཛིནཾ ཨཛཱཔཡཾ, ཨསོཙཾ ཨསོཙཱཔཡཾ དྷམྨེནཱ’’ཏི, མཱརོ པཱཔིམཱ ཏཾ བྷགཝཏོ པརིཝིཏཀྐཾ ཉཏྭཱ ‘‘སམཎོ གོཏམོ ‘སཀྐཱ ནུ ཁོ རཛྫཾ ཀཱརེཏུ’ནྟི ཙིནྟེསི, ཨིདཱནི རཛྫཾ ཀཱརེཏུཀཱམོ བྷཝིསྶཏི, རཛྫཉྩ ནཱམེཏཾ པམཱདཊྛཱནཾ, ཏཾ ཀཱརེནྟེ སཀྐཱ ཨོཀཱསཾ ལབྷིཏུཾ, གཙྪཱམི ཨུསྶཱཧམསྶ ཛནེསྶཱམཱི’’ཏི ཙིནྟེཏྭཱ སཏྠཱརཾ ཨུཔསངྐམིཏྭཱ ཨཱཧ – ‘‘ཀཱརེཏུ, བྷནྟེ, བྷགཝཱ རཛྫཾ, ཀཱརེཏུ སུགཏོ རཛྫཾ ཨཧནཾ ཨགྷཱཏཡཾ, ཨཛིནཾ ཨཛཱཔཡཾ, ཨསོཙཾ ཨསོཙཱཔཡཾ དྷམྨེནཱ’’ཏི. ཨཐ ནཾ སཏྠཱ ‘‘ཀིཾ པན མེ ཏྭཾ, པཱཔིམ, པསྶསི, ཡཾ མཾ ཏྭཾ ཨེཝཾ ཝདེསཱི’’ཏི ཝཏྭཱ ‘‘བྷགཝཏཱ ཁོ, བྷནྟེ, ཙཏྟཱརོ ཨིདྡྷིཔཱདཱ སུབྷཱཝིཏཱ. ཨཱཀངྑམཱནོ ཧི བྷགཝཱ ཧིམཝནྟཾ པབྦཏརཱཛཾ ‘སུཝཎྞ’ནྟི ཨདྷིམུཙྩེཡྻ, ཏཉྩ སུཝཎྞམེཝ ཨསྶ, ཨཧམྤི ཁོ དྷནེན དྷནཀརཎཱིཡཾ ཀརིསྶཱམི, ཏུམྷེ དྷམྨེན རཛྫཾ ཀཱརེསྶཐཱ’’ཏི ཏེན ཝུཏྟེ –

‘‘པབྦཏསྶ ¶ སུཝཎྞསྶ, ཛཱཏརཱུཔསྶ ཀེཝལོ;

དྭིཏྟཱཝ ནཱལམེཀསྶ, ཨིཏི ཝིདྭཱ སམཉྩརེ.

ཏསྶེཝ ཛནྟུ ཝིནཡཱཡ སིཀྑེ’’ཏི. (སཾ. ནི. ༡.༡༥༦) –

ཨིམཱཧི གཱཐཱཧི སཾཝེཛེཏྭཱ ‘‘ཨཉྙོ ཨེཝ ཁོ, པཱཔིམ, ཏཝ ཨོཝཱདོ, ཨཉྙོ མམ, ཏཡཱ སདྡྷིཾ དྷམྨསཾསནྡནཱ ནཱམ ནཏྠི, ཨཧཉྷི ཨེཝཾ ཨོཝདཱམཱི’’ཏི ཝཏྭཱ ཨིམཱ གཱཐཱ ཨབྷཱསི –

‘‘སུཁཾ ཡཱཝ ཛརཱསཱིལཾ, སུཁཱ སདྡྷཱ པཏིཊྛིཏཱ;

སུཁོ པཉྙཱཡ པཊིལཱབྷོ, པཱཔཱནཾ ཨཀརཎཾ སུཁ’’ནྟི.

ཏཏྠ ཨཏྠམྷཱིཏི པབྦཛིཏསྶཱཔི ཧི ཙཱིཝརཀརཎཱདིཀེ ཝཱ ཨདྷིཀརཎཝཱུཔསམཱདིཀེ ཝཱ གིཧིནོཔི ¶ ཀསིཀམྨཱདིཀེ ཝཱ བལཝཔཀྑསནྣིསྶིཏེཧི ཨབྷིབྷཝནཱདིཀེ ཝཱ ཀིཙྩེ ཨུཔྤནྣེ ཡེ ཏཾ ཀིཙྩཾ ནིཔྥཱདེཏུཾ ཝཱ ཝཱུཔསམེཏུཾ ཝཱ སཀྐོནྟི, ཨེཝརཱུཔཱ སུཁཱ སཧཱཡཱཏི ཨཏྠོ. ཏུཊྛཱི སུཁཱཏི ཡསྨཱ པན གིཧིནོཔི སཀེན ཨསནྟུཊྛཱ སནྡྷིཙྪེདཱདཱིནི ཨཱརབྷནྟི, པབྦཛིཏཱཔི ནཱནཔྤཀཱརཾ ཨནེསནཾ. ཨིཏི ཏེ སུཁཾ ན ཝིནྡནྟིཡེཝ. ཏསྨཱ ཡཱ ཨིཏརཱིཏརེན པརིཏྟེན ཝཱ ཝིཔུལེན ཝཱ ཨཏྟནོ སནྟཀེན སནྟུཊྛི, ཨཡམེཝ སུཁཱཏི ཨཏྠོ. པུཉྙནྟི མརཎཀཱལེ པན ཡཐཱཛ྄ཛྷཱསཡེན པཏྠརིཏྭཱ ཀཏཔུཉྙཀམྨམེཝ ¶ སུཁཾ. སབྦསྶཱཏི སཀལསྶཔི པན ཝཊྚདུཀྑསྶ པཧཱནསངྑཱཏཾ ཨརཧཏྟམེཝ ཨིམསྨིཾ ལོཀེ སུཁཾ ནཱམ.

མཏྟེཡྻཏཱཏི ¶ མཱཏརི སམྨཱ པཊིཔཏྟི. པེཏྟེཡྻཏཱཏི པིཏརི སམྨཱ པཊིཔཏྟི. ཨུབྷཡེནཔི མཱཏཱཔིཏཱུནཾ ཨུཔཊྛཱནམེཝ ཀཐིཏཾ. མཱཏཱཔིཏརོ ཧི པུཏྟཱནཾ ཨནུཔཊྛཧནབྷཱཝཾ ཉཏྭཱ ཨཏྟནོ སནྟཀཾ བྷཱུམིཡཾ ཝཱ ནིདཧནྟི, པརེསཾ ཝཱ ཝིསྶཛྫེནྟི, ‘‘མཱཏཱཔིཏརོ ན ཨུཔཊྛཧནྟཱི’’ཏི ནེསཾ ནིནྡཱཔི ཝཌྜྷཏི, ཀཱཡསྶ བྷེདཱ གཱུཐནིརཡེཔི ནིབྦཏྟནྟི. ཡེ པན མཱཏཱཔིཏརོ སཀྐཙྩཾ ཨུཔཊྛཧནྟི, ཏེ ¶ ཏེསཾ སནྟཀཾ དྷནམྤི པཱཔུཎནྟི, པསཾསམྤི ལབྷནྟི, ཀཱཡསྶ བྷེདཱ སགྒེ ནིབྦཏྟནྟི. ཏསྨཱ ཨུབྷཡམྤེཏཾ སུཁནྟི ཝུཏྟཾ. སཱམཉྙཏཱཏི པབྦཛིཏེསུ སམྨཱ པཊིཔཏྟི. བྲཧྨཉྙཏཱཏི བཱཧིཏཔཱཔེསུ བུདྡྷཔཙྩེཀབུདྡྷསཱཝཀེསུ སམྨཱ པཊིཔཏྟིཡེཝ. ཨུབྷཡེནཔི ཏེསཾ ཙཏཱུཧི པཙྩཡེཧི པཊིཛགྒནབྷཱཝོ ཀཐིཏོ, ཨིདམྤི ལོཀེ སུཁཾ ནཱམ ཀཐིཀཾ.

སཱིལནྟི མཎིཀུཎྜལརཏྟཝཏྠཱདཡོ ཧི ཨལངྐཱརཱ ཏསྨིཾ ཏསྨིཾ ཝཡེ ཋིཏཱནཾཡེཝ སོབྷནྟི. ན དཧརཱནཾ ཨལངྐཱརོ མཧལླཀཀཱལེ, མཧལླཀཱནཾ ཝཱ ཨལངྐཱརོ དཧརཀཱལེ སོབྷཏི, ‘‘ཨུམྨཏྟཀོ ཨེས མཉྙེ’’ཏི གརཧུཔྤཱདནེན པན དོསམེཝ ཛནེཏི. པཉྩསཱིལདསསཱིལཱདིབྷེདཾ པན སཱིལཾ དཧརསྶཱཔི མཧལླཀསྶཱཔི སབྦཝཡེསུ སོབྷཏིཡེཝ, ‘‘ཨཧོ ཝཏཱཡཾ སཱིལཝཱ’’ཏི པསཾསུཔྤཱདནེན སོམནསྶམེཝ ཨཱཝཧཏི. ཏེན ཝུཏྟཾ – སུཁཾ ཡཱཝ ཛརཱ སཱིལནྟི. སདྡྷཱ པཏིཊྛིཏཱཏི ལོཀིཡལོཀུཏྟརཏོ དུཝིདྷཱཔི སདྡྷཱ ནིཙྩལཱ ཧུཏྭཱ པཏིཊྛིཏཱ. སུཁོ པཉྙཱཡ པཊིལཱབྷོཏི ལོཀིཡལོཀུཏྟརཔཉྙཱཡ པཊིལཱབྷོ སུཁོ. པཱཔཱནཾ ¶ ཨཀརཎནྟི སེཏུགྷཱཏཝསེན པན པཱཔཱནཾ ཨཀརཎཾ ཨིམསྨིཾ ལོཀེ སུཁནྟི ཨཏྠོ.

དེསནཱཝསཱནེ བཧཱུནཾ དེཝཏཱནཾ དྷམྨཱབྷིསམཡོ ཨཧོསཱིཏི.

མནུཛསྶཱཏི ¶ ¶ ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀཔིལམཙྪཾ ཨཱརབྦྷ ཀཐེསི.

ཨཏཱིཏེ ཀིར ཀསྶཔབྷགཝཏོ པརིནིབྦུཏཀཱལེ དྭེ ཀུལབྷཱཏརོ ནིཀྑམིཏྭཱ སཱཝཀཱནཾ སནྟིཀེ པབྦཛིཾསུ. ཏེསུ ཛེཊྛོ སཱགཏོ ནཱམ ཨཧོསི, ཀནིཊྛོ ཀཔིལོ ནཱམ. མཱཏཱ པན ནེསཾ སཱདྷིནཱི ནཱམ, ཀནིཊྛབྷགིནཱི ཏཱཔནཱ ནཱམ. ཏཱཔི བྷིཀྑུནཱིསུ པབྦཛིཾསུ. ཨེཝཾ ཏེསུ པབྦཛིཏེསུ ཨུབྷོ བྷཱཏརོ ཨཱཙརིཡུཔཛ྄ཛྷཱཡཱནཾ ཝཏྟཔཊིཝཏྟཾ ཀཏྭཱ ཝིཧརནྟཱ ཨེཀདིཝསཾ, ‘‘བྷནྟེ, ཨིམསྨིཾ སཱསནེ ཀཏི དྷུརཱནཱི’’ཏི པུཙྪིཏྭཱ ‘‘གནྠདྷུརཾ ཝིཔསྶནཱདྷུརཉྩཱཏི དྭེ དྷུརཱནཱི’’ཏི སུཏྭཱ ཛེཊྛོ ‘‘ཝིཔསྶནཱདྷུརཾ ¶ པཱུརེསྶཱམཱི’’ཏི པཉྩ ཝསྶཱནི ཨཱཙརིཡུཔཛ྄ཛྷཱཡཱནཾ སནྟིཀེ ཝསིཏྭཱ ཡཱཝ ཨརཧཏྟཱ ཀམྨཊྛཱནཾ གཧེཏྭཱ ཨརཉྙཾ པཝིསིཏྭཱ ཝཱཡམནྟོ ཨརཧཏྟཾ པཱཔུཎི. ཀནིཊྛོ ‘‘ཨཧཾ ཏཱཝ ཏརུཎོ, ཝུཌྜྷཀཱལེ ཝིཔསྶནཱདྷུརཾ པཱུརེསྶཱམཱི’’ཏི གནྠདྷུརཾ པཊྛཔེཏྭཱ ཏཱིཎི པིཊཀཱནི ཨུགྒཎྷི. ཏསྶ པརིཡཏྟིཾ ནིསྶཱཡ མཧཱཔརིཝཱརོ, པརིཝཱརཾ ནིསྶཱཡ ལཱབྷོ ཨུདཔཱདི. སོ བཱཧུསཙྩམདེན མཏྟོ ལཱབྷཏཎྷཱཡ ཨབྷིབྷཱུཏོ ཨཏིཔཎྜིཏམཱནིཏཱཡ པརེཧི ཝུཏྟཾ ཀཔྤིཡམྤི ‘‘ཨཀཔྤིཡ’’ནྟི ཝདེཏི, ཨཀཔྤིཡམྤི ‘‘ཀཔྤིཡ’’ནྟི ཝདེཏི, སཱཝཛྫམྤི ‘‘ཨནཝཛྫ’’ནྟི, ཨནཝཛྫམྤི ‘‘སཱཝཛྫ’’ནྟི. སོ པེསལེཧི བྷིཀྑཱུཧི ‘‘མཱ, ཨཱཝུསོ ཀཔིལ, ཨེཝཾ ཨཝཙཱ’’ཏི ཝཏྭཱ དྷམྨཉྩ ཝིནཡཉྩ དསྶེཏྭཱ ཨོཝདིཡམཱནོཔི ‘‘ཏུམྷེ ཀིཾ ཛཱནཱཐ, རིཏྟམུཊྛིསདིསཱ’’ཏིཨཱདཱིནི ཝཏྭཱ ཁུཾསེནྟོ ཝམྦྷེནྟོ ཙརཏི. ཨཐསྶ བྷཱཏུ སཱགཏཏྠེརསྶཱཔི བྷིཀྑཱུ ཏམཏྠཾ ཨཱརོཙེསུཾ. སོཔི ནཾ ཨུཔསངྐམིཏྭཱ, ‘‘ཨཱཝུསོ ཀཔིལ, ཏུམྷཱདིསཱནཉྷི སམྨཱཔཊིཔཏྟི སཱསནསྶ ཨཱཡུ ནཱམ, ཏསྨཱ པཊིཔཏྟིཾ པཧཱཡ ཀཔྤིཡཱདཱིནི པཊིབཱཧནྟོ མཱ ཨེཝཾ ཨཝཙཱ’’ཏི ཨོཝདི. སོ ཏསྶཔི ཝཙནཾ ནཱདིཡི. ཨེཝཾ སནྟེཔི ཐེརོ དྭཏྟིཀྑཏྟུཾ ཨོཝདིཏྭཱ ཨོཝཱདཾ ཨགཎྷནྟཾ ‘‘ནཱཡཾ མམ ཝཙནཾ ཀརོཏཱི’’ཏི ཉཏྭཱ ‘‘ཏེན, ཨཱཝུསོ, པཉྙཱཡིསྶསི སཀེན ཀམྨེནཱ’’ཏི ཝཏྭཱ པཀྐཱམི ¶ . ཏཏོ པཊྛཱཡ ནཾ ཨཉྙེ པེསལཱ བྷིཀྑཱུ ཚཌྜཡིཾསུ.

སོ ¶ ¶ དུརཱཙཱརོ ཧུཏྭཱ དུརཱཙཱརཔརིཝུཏོ ཝིཧརནྟོ ཨེཀདིཝསཾ ཨུཔོསཐགྒེ ‘‘པཱཏིམོཀྑཾ ཨུདྡིསིསྶཱམཱི’’ཏི བཱིཛནིཾ ཨཱདཱཡ དྷམྨཱསནེ ནིསཱིདིཏྭཱ ‘‘ཝཏྟཏི, ཨཱཝུསོ, ཨེཏྠ སནྣིཔཏིཏཱནཾ བྷིཀྑཱུནཾ པཱཏིམོཀྑ’’ནྟི པུཙྪིཏྭཱ ‘‘ཀོ ཨཏྠོ ཨིམསྶ པཊིཝཙནེན དིནྣེནཱ’’ཏི ཏུཎྷཱིབྷཱུཏེ བྷིཀྑཱུ དིསྭཱ, ‘‘ཨཱཝུསོ, དྷམྨོ ཝཱ ཝིནཡོ ཝཱ ནཏྠི, པཱཏིམོཀྑེན སུཏེན ཝཱ ཨསུཏེན ཝཱ ཀོ ཨཏྠོ’’ཏི ཝཏྭཱ ཨཱསནཱ ཝུཊྛཧི. ཨེཝཾ སོ ཀསྶཔསྶ བྷགཝཏོ པརིཡཏྟིསཱསནཾ ཨོསཀྐཱཔེསི. སཱགཏཏྠེརོཔི ཏདཧེཝ པརིནིབྦཱཡི. ཀཔིལོ ཨཱཡུཔརིཡོསཱནེ ཨཝཱིཙིམྷི མཧཱནིརཡེ ནིབྦཏྟི. སཱཔིསྶ མཱཏཱ ཙ བྷགིནཱི ཙ ཏསྶེཝ དིཊྛཱནུགཏིཾ ཨཱཔཛྫིཏྭཱ པེསལེ བྷིཀྑཱུ ཨཀྐོསིཏྭཱ པརིབྷཱསིཏྭཱ ཏཏྠེཝ ནིབྦཏྟིཾསུ.

ཏསྨིཾ པན ཀཱལེ པཉྩསཏཱ པུརིསཱ གཱམགྷཱཏཀཱདཱིནི ཀཏྭཱ ཙོརིཀཱཡ ཛཱིཝནྟཱ ཛནཔདམནུསྶེཧི ཨནུབདྡྷཱ པལཱཡམཱནཱ ཨརཉྙཾ པཝིསིཏྭཱ ཏཏྠ ཀིཉྩི པཊིསརཎཾ ཨཔསྶནྟཱ ཨཉྙཏརཾ ཨཱརཉྙིཀཾ བྷིཀྑུཾ དིསྭཱ ཝནྡིཏྭཱ ‘‘པཊིསརཎཾ ནོ, བྷནྟེ, ཧོཐཱ’’ཏི ཝདིཾསུ. ཐེརོ ‘‘ཏུམྷཱཀཾ སཱིལསདིསཾ པཊིསརཎཾ ནཱམ ¶ ནཏྠི, སབྦེཔི པཉྩསཱིལཱནི སམཱདིཡཐཱ’’ཏི ཨཱཧ. ཏེ ‘‘སཱདྷཱུ’’ཏི སམྤཊིཙྪིཏྭཱ སཱིལཱནི སམཱདིཡིཾསུ. ཨཐ ནེ ཐེརོ ཨོཝདི – ‘‘ཨིདཱནི ཏུམྷེ སཱིལཝནྟཱ, ཛཱིཝིཏཧེཏུཔི ཝོ ནེཝ སཱིལཾ ཨཏིཀྐམིཏབྦཾ, ན མནོཔདོསོ ཀཱཏབྦོ’’ཏི. ཏེ ‘‘སཱདྷཱུ’’ཏི སམྤཊིཙྪིཾསུ. ཨཐ ནེ ཛནཔདམནུསྶཱ ཏཾ ཋཱནཾ པཏྭཱ ཨིཏོ ཙིཏོ ཙ པརིཡེསམཱནཱ ཏེ ཙོརེ དིསྭཱ སབྦེ ཏེ ཛཱིཝིཏཱ ཝོརོཔེསུཾ. ཏེ ཀཱལཾ ཀཏྭཱ དེཝལོཀེ ནིབྦཏྟིཾསུ, ཙོརཛེཊྛཀོ ཛེཊྛཀདེཝཔུཏྟོ ཨཧོསི.

ཏེ ཨནུལོམཔཊིལོམཝསེན ཨེཀཾ བུདྡྷནྟརཾ དེཝལོཀེ སཾསརིཏྭཱ ཨིམསྨིཾ བུདྡྷུཔྤཱདེ སཱཝཏྠིནགརདྭཱརེ པཉྩསཏཀུལིཀེ ཀེཝཊྚགཱམེ ནིབྦཏྟིཾསུ. ཛེཊྛཀདེཝཔུཏྟོ ཀེཝཊྚཛེཊྛཀསྶ གེཧེ པཊིསནྡྷིཾ གཎྷི, ཨིཏརེ ཨིཏརེསུ. ཨེཝཾ ཏེསཾ ཨེཀདིཝསེཡེཝ པཊིསནྡྷིགཧཎཉྩ མཱཏུཀུཙྪིཏོ ནིཀྑམནཉྩ ཨཧོསི. ཀེཝཊྚཛེཊྛཀོ ‘‘ཨཏྠི ནུ ཁོ ཨིམསྨིཾ གཱམེ ཨཉྙེཔི དཱརཀཱ ཨཛྫ ཛཱཏཱ’’ཏི པརིཡེསཱཔེཏྭཱ ཏེསཾ ཛཱཏབྷཱཝཾ ཉཏྭཱ ‘‘ཨེཏེ མམ པུཏྟསྶ སཧཱཡཀཱ བྷཝིསྶནྟཱི’’ཏི སབྦེསཾ པོསཱཝནིཀཾ ¶ དཱཔེསི. ཏེ སབྦེཔི སཧཔཾསུཀཱིལ༹ཀཱ སཧཱཡཀཱ ཧུཏྭཱ ཨནུཔུབྦེན ཝཡཔྤཏྟཱ ཨཧེསུཾ. ཏེསཾ ཀེཝཊྚཛེཊྛཀཔུཏྟོཝ ཡསཏོ ཙ ཏེཛཏོ ཙ ཨགྒཔུརིསོ ཨཧོསི.

ཀཔིལོཔི ¶ ཨེཀཾ བུདྡྷནྟརཾ ནིརཡེ པཙྩིཏྭཱ ཝིཔཱཀཱཝསེསེན ཏསྨིཾ ཀཱལེ ཨཙིརཝཏིཡཱ སུཝཎྞཝཎྞོ དུགྒནྡྷམུཁོ མཙྪོ ཧུཏྭཱ ནིབྦཏྟི. ཨཐེཀདིཝསཾ ཏེ སཧཱཡཀཱ ‘‘མཙྪེ བནྡྷིསྶཱམཱ’’ཏི ཛཱལཱདཱིནི གཧེཏྭཱ ནདིཡཱ ཁིཔིཾསུ. ཨཐ ནེསཾ ཨནྟོཛཱལཾ སོ མཙྪོ པཱཝིསི ¶ . ཏཾ དིསྭཱ སབྦེ ཀེཝཊྚགཱམཝཱསིནོ ཨུཙྩཱསདྡམཀཾསུ – ‘‘པུཏྟཱ ནོ པཋམཾ མཙྪེ བནྡྷནྟཱ སུཝཎྞམཙྪཾ བནྡྷིཾསུ, ཨིདཱནི ནོ རཱཛཱ བཧུདྷནཾ དསྶཏཱི’’ཏི. ཏེཔི ཁོ སཧཱཡཀཱ མཙྪཾ ནཱཝཱཡ པཀྑིཔིཏྭཱ ནཱཝཾ ཨུཀྑིཔིཏྭཱ རཉྙོ སནྟིཀཾ ཨགམཾསུ. རཉྙཱཔི ཏཾ དིསྭཱཝ ‘‘ཀིཾ ཨེཏ’’ནྟི ཝུཏྟེ ‘‘མཙྪོ, དེཝཱ’’ཏི ཨཱཧཾསུ. རཱཛཱ སུཝཎྞཝཎྞཾ མཙྪཾ དིསྭཱ ‘‘སཏྠཱ ཨེཏསྶ སུཝཎྞཝཎྞཀཱརཎཾ ཛཱནིསྶཏཱི’’ཏི མཙྪཾ གཱཧཱཔེཏྭཱ བྷགཝཏོ སནྟིཀཾ ཨགམཱསི. མཙྪེན མུཁེ ཝིཝཊམཏྟེཡེཝ སཀལཛེཏཝནཾ ཨཏིཝིཡ དུགྒནྡྷཾ ཨཧོསི. རཱཛཱ སཏྠཱརཾ པུཙྪི – ‘‘ཀསྨཱ, བྷནྟེ, མཙྪོ སུཝཎྞཝཎྞོ ཛཱཏོ, ཀསྨཱ ཙསྶ མུཁཏོ དུགྒནྡྷོ ཝཱཡཏཱི’’ཏི?

ཨཡཾ, མཧཱརཱཛ, ཀསྶཔབྷགཝཏོ པཱཝཙནེ ཀཔིལོ ནཱམ བྷིཀྑུ ཨཧོསི བཧུསྶུཏོ མཧཱཔརིཝཱརོ ལཱབྷཏཎྷཱཡ ཨབྷིབྷཱུཏོ ཨཏྟནོ ཝཙནཾ ཨགཎྷནྟཱནཾ ཨཀྐོསཀཔརིབྷཱསཀོ, ཏསྶ ཙ བྷགཝཏོ སཱསནཾ ཨོསཀྐཱཔེསི, སོ ཏེན ¶ ཀམྨེན ཨཝཱིཙིམྷི ནིབྦཏྟིཏྭཱ ཝིཔཱཀཱཝསེསེན ཨིདཱནི མཙྪོ ཧུཏྭཱ ཛཱཏོ. ཡཾ པན སོ དཱིགྷརཏྟཾ བུདྡྷཝཙནཾ ཝཱཙེསི, བུདྡྷསྶ ཙ གུཎཾ ཀཐེསི, ཏསྶ ནིསྶནྡེན ཨིམཾ སུཝཎྞཝཎྞཾ པཊིལབྷི. ཡཾ བྷིཀྑཱུནཾ ཨཀྐོསཀཔརིབྷཱསཀོ ཨཧོསི, ཏེནསྶ མུཁཏོ དུགྒནྡྷོ ཝཱཡཏི. ‘‘ཀཐཱཔེམི ནཾ, མཧཱརཱཛཱ’’ཏི? ‘‘ཀཐཱཔེཐ, བྷནྟེ’’ཏི. ཨཐ ནཾ སཏྠཱ པུཙྪི – ‘‘ཏྭཾསི ཀཔིལོ’’ཏི? ‘‘ཨཱམ, བྷནྟེ, ཨཧཾ ཀཔིལོ’’ཏི. ‘‘ཀུཏོ ཨཱགཏོསཱི’’ཏི? ‘‘ཨཝཱིཙིམཧཱནིརཡཏོ, བྷནྟེ’’ཏི. ‘‘ཛེཊྛབྷཱཏིཀོ ཏེ སཱགཏོ ཀུཧིཾ གཏོ’’ཏི? ‘‘པརིནིབྦུཏོ, བྷནྟེ’’ཏི. ‘‘མཱཏཱ པན ཏེ སཱདྷིནཱི ཀཧ’’ནྟི? ‘‘མཧཱནིརཡེ ནིབྦཏྟཱ, བྷནྟེ’’ཏི. ‘‘ཀནིཊྛབྷགིནཱི ཙ ཏེ ཏཱཔནཱ ཀཧ’’ནྟི? ‘‘མཧཱནིརཡེ ནིབྦཏྟཱ, བྷནྟེ’’ཏི. ‘‘ཨིདཱནི ཏྭཾ ཀཧཾ གམིསྶསཱི’’ཏི? ‘‘ཨཝཱིཙིམཧཱནིརཡམེཝ, བྷནྟེ’’ཏི ཝཏྭཱ ཝིཔྤཊིསཱརཱབྷིབྷཱུཏོ ནཱཝཾ ¶ སཱིསེན པཧརིཏྭཱ ཏཱཝདེཝ ཀཱལཾ ཀཏྭཱ ནིརཡེ ནིབྦཏྟི. མཧཱཛནོ སཾཝིགྒོ ཨཧོསི ལོམཧཊྛཛཱཏོ.

ཨཐ བྷགཝཱ ཏསྨིཾ ཁཎེ སནྣིཔཏིཏཱཡ པརིསཱཡ ཙིཏྟཱཙཱརཾ ཨོལོཀེཏྭཱ ཏངྑཎཱནུརཱུཔཾ དྷམྨཾ དེསེཏུཾ ‘‘དྷམྨཙརིཡཾ བྲཧྨཙརིཡཾ, ཨེཏདཱཧུ ཝསུཏྟམ’’ནྟི སུཏྟནིཔཱཏེ (སུ. ནི. ༢༧༦) ཀཔིལསུཏྟཾ ཀཐེཏྭཱ ཨིམཱ གཱཐཱ ཨབྷཱསི –

‘‘མནུཛསྶ ¶ པམཏྟཙཱརིནོ, ཏཎྷཱ ཝཌྜྷཏི མཱལུཝཱ ཝིཡ;

སོ པླཝཏཱི ཧུརཱ ཧུརཾ, ཕལམིཙྪཾཝ ཝནསྨི ཝཱནརོ.

‘‘ཡཾ ¶ ཨེསཱ སཧཏེ ཛམྨཱི, ཏཎྷཱ ལོཀེ ཝིསཏྟིཀཱ;

སོཀཱ ཏསྶ པཝཌྜྷནྟི, ཨབྷིཝཊྛཾཝ བཱིརཎཾ.

‘‘ཡོ ཙེཏཾ སཧཏེ ཛམྨིཾ, ཏཎྷཾ ལོཀེ དུརཙྩཡཾ;

སོཀཱ ཏམྷཱ པཔཏནྟི, ཨུདབིནྡུཝ པོཀྑརཱ.

‘‘ཏཾ ཝོ ཝདཱམི བྷདྡཾ ཝོ, ཡཱཝནྟེཏྠ སམཱགཏཱ;

ཏཎྷཱཡ མཱུལཾ ཁཎཐ, ཨུསཱིརཏྠོཝ བཱིརཎཾ;

མཱ ཝོ ནལ༹ཾཝ སོཏོཝ, མཱརོ བྷཉྫི པུནཔྤུན’’ནྟི.

ཏཏྠ པམཏྟཙཱརིནོཏི སཏིཝོསྶགྒལཀྑཎེན པམཱདེན པམཏྟཙཱརིསྶ པུགྒལསྶ ནེཝ ཛྷཱནཾ ན ཝིཔསྶནཱ ན མགྒཕལཱནི ཝཌྜྷནྟི. ཡཐཱ པན རུཀྑཾ སཾསིབྦནྟཱི པརིཡོནནྡྷནྟཱི ཏསྶ ཝིནཱསཱཡ མཱལུཝཱལཏཱ ཝཌྜྷཏི ¶ , ཨེཝམསྶ ཚ དྭཱརཱནི ནིསྶཱཡ པུནཔྤུནཾ ཨུཔྤཛྫནཏོ ཏཎྷཱ ཝཌྜྷཏཱིཏི ཨཏྠོ. སོ པླཝཏཱི ཧུརཱ ཧུརནྟི སོ ཏཎྷཱཝསིཀོ པུགྒལོ བྷཝེ བྷཝེ ཨུཔླཝཏི དྷཱཝཏི. ཡཐཱ ཀིཾ ཝིཡཱཏི? ཕལམིཙྪཾཝ ཝནསྨི ཝཱནརོ, ཡཐཱ རུཀྑཕལཾ ཨིཙྪནྟོ ཝཱནརོ ཝནསྨིཾ དྷཱཝཏི, ཏསྶ ཏསྶ རུཀྑསྶ སཱཁཾ གཎྷཱཏི, ཏཾ མུཉྩིཏྭཱ ཨཉྙཾ གཎྷཱཏི, ཏམྤི མུཉྩིཏྭཱ ཨཉྙཾ གཎྷཱཏི, ‘‘སཱཁཾ ཨལབྷིཏྭཱ སནྣིསིནྣོ’’ཏི ཝཏྟབྦཏཾ ནཱཔཛྫཏི, ཨེཝམེཝ ཏཎྷཱཝསིཀོ པུགྒལོ ཧུརཱ ཧུརཾ དྷཱཝནྟོ ‘‘ཨཱརམྨཎཾ ཨལབྷིཏྭཱ ཏཎྷཱཡ ཨཔཝཏྟཾ པཏྟོ’’ཏི ཝཏྟབྦཏཾ ནཱཔཛྫཏི.

ཡནྟི ¶ ཡཾ པུགྒལཾ ཨེསཱ ལཱམཀབྷཱཝེན ཛམྨཱི ཝིསཱཧཱརཏཱཡ ཝིསཔུཔྥཏཱཡ ཝིསཕལཏཱཡ ཝིསཔརིབྷོགཏཱཡ རཱུཔཱདཱིསུ ཝིསཏྟཏཱཡ ཨཱསཏྟཏཱཡ ཝིསཏྟིཀཱཏི སངྑྱཾ གཏཱ ཚདྭཱརིཀཏཎྷཱ ཨབྷིབྷཝཏི. ཡཐཱ ནཱམ ཝསྶཱནེ པུནཔྤུནཾ ཝསྶནྟེན དེཝེན ¶ ཨབྷིཝཊྛཾ བཱིརཎཏིཎཾ ཝཌྜྷཏི, ཨེཝཾ ཏསྶ པུགྒལསྶ ཨནྟོ ཝཊྚམཱུལཀཱ སོཀཱ ཨབྷིཝཌྜྷནྟཱིཏི ཨཏྠོ.

དུརཙྩཡནྟི ཡོ པན པུགྒལོ ཨེཝཾ ཝུཏྟཔྤཀཱརཾ ཨཏིཀྐམིཏུཾ པཛཧིཏུཾ དུཀྐརཏཱཡ དུརཙྩཡཾ ཏཎྷཾ སཧཏི ཨབྷིབྷཝཏི, ཏམྷཱ པུགྒལཱ ཝཊྚམཱུལཀཱ སོཀཱ པཔཏནྟི. ཡཐཱ ནཱམ པོཀྑརེ པདུམཔཏྟེ པཏིཏཾ ཨུདཀབིནྡུ ན པཏིཊྛཱཏི, ཨེཝཾ ན པཏིཊྛཧནྟཱིཏི ཨཏྠོ.

ཏཾ ཝོ ཝདཱམཱིཏི ཏེན ཀཱརཎེན ཨཧཾ ཏུམྷེ ཝདཱམི. བྷདྡཾ ཝོཏི བྷདྡཾ ཏུམྷཱཀཾ ཧོཏུ, མཱ ¶ ཨཧཾ ཀཔིལོ ཝིཡ ཝིནཱསཾ པཱཔུཎཐཱཏི ཨཏྠོ. མཱུལནྟི ཨིམིསྶཱ ཚདྭཱརིཀཏཎྷཱཡ ཨརཧཏྟམགྒཉཱཎེན མཱུལཾ ཁཎཐ. ཀིཾ ཝིཡཱཏི? ཨུསཱིརཏྠོཝ བཱིརཎཾ, ཡཐཱ ཨུསཱིརེན ཨཏྠིཀོ པུརིསོ མཧནྟེན ཀུདཱལེན བཱིརཎཾ ཁཎཏི, ཨེཝམསྶཱ མཱུལཾ ཁཎཐཱཏི ཨཏྠོ. མཱ ཝོ ནལ༹ཾཝ སོཏོཝ, མཱརོ བྷཉྫི པུནཔྤུནནྟི མཱ ཏུམྷེ ནདཱིསོཏེ ཛཱཏཾ ནལ༹ཾ མཧཱཝེགེན ཨཱགཏོ ནདཱིསོཏོ ཝིཡ ཀིལེསམཱརོ མརཎམཱརོ དེཝཔུཏྟམཱརོ ཙ པུནཔྤུནཾ བྷཉྫཏཱུཏི ཨཏྠོ.

དེསནཱཝསཱནེ པཉྩསཏཱཔི ཀེཝཊྚཔུཏྟཱ སཾཝེགཾ ཨཱཔཛྫིཏྭཱ དུཀྑསྶནྟཀིརིཡཾ པཏྠཡམཱནཱ སཏྠུ སནྟིཀེ ¶ པབྦཛིཏྭཱ ན ཙིརསྶེཝ དུཀྑསྶནྟཾ ཀཏྭཱ སཏྠཱརཱ སདྡྷིཾ ཨཱནེཉྫཝིཧཱརསམཱཔཏྟིདྷམྨཔརིབྷོགེན ཨེཀཔརིབྷོགཱ ཨཧེསུནྟི.

ཡཐཱཔི མཱུལེཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ གཱུཐསཱུཀརཔོཏིཀཾ ཨཱརབྦྷ ཀཐེསི.

ཨེཀསྨིཾ ¶ ཀིར སམཡེ སཏྠཱ རཱཛགཧཾ པིཎྜཱཡ པཝིསནྟོ ཨེཀཾ སཱུཀརཔོཏིཀཾ དིསྭཱ སིཏཾ པཱཏྭཱཀཱསི. ཏསྶ སིཏཾ ཀརོནྟསྶ མུཁཝིཝརནིགྒཏཾ དནྟོབྷཱསམཎྜལཾ དིསྭཱ ཨཱནནྡཏྠེརོ ‘‘ཀོ ནུ ཁོ, བྷནྟེ, ཧེཏུ སིཏསྶ པཱཏུཀམྨཱཡཱ’’ཏི སིཏཀཱརཎཾ པུཙྪི. ཨཐ ནཾ སཏྠཱ ཨཱཧ – ‘‘པསྶསེཏཾ, ཨཱནནྡ, སཱུཀརཔོཏིཀ’’ནྟི? ‘‘ཨཱམ, བྷནྟེ’’ཏི. ཨེསཱ ཀཀུསནྡྷསྶ བྷགཝཏོ སཱསནེ ཨེཀཱཡ ཨཱསནསཱལཱཡ སཱམནྟཱ ཀུཀྐུཊཱི ཨཧོསི. སཱ ཨེཀསྶ ཡོགཱཝཙརསྶ ཝིཔསྶནཱཀམྨཊྛཱནཾ སཛ྄ཛྷཱཡནྟསྶ དྷམྨགྷོསཾ སུཏྭཱ ཏཏོ ཙུཏཱ རཱཛཀུལེ ནིབྦཏྟིཏྭཱ ཨུབྦརཱི ནཱམ རཱཛདྷཱིཏཱ ཨཧོསི. སཱ ཨཔརབྷཱགེ སརཱིརཝལཉྫཊྛཱནཾ པཝིཊྛཱ པུལ༹ཝཀརཱསིཾ དིསྭཱ ཏཏྠ ¶ པུལ༹ཝཀསཉྙཾ ཨུཔྤཱདེཏྭཱ པཋམཾ ཛྷཱནཾ པཊིལབྷི. སཱ ཏཏྠ ཡཱཝཏཱཡུཀཾ ཋཏྭཱ ཏཏོ ཙུཏཱ བྲཧྨལོཀེ ནིབྦཏྟི. ཏཏོ ཙཝིཏྭཱ པུན གཏིཝསེན ཨཱལུལམཱནཱ ཨིདཱནི སཱུཀརཡོནིཡཾ ནིབྦཏྟི, ཨིདཾ ཀཱརཎཾ དིསྭཱ མཡཱ སིཏཾ པཱཏུཀཏནྟི. ཏཾ སུཏྭཱ ཨཱནནྡཏྠེརཔྤམུཁཱ བྷིཀྑཱུ མཧནྟཾ སཾཝེགཾ པཊིལབྷིཾསུ. སཏྠཱ ཏེསཾ སཾཝེགཾ ཨུཔྤཱདེཏྭཱ བྷཝཏཎྷཱཡ ཨཱདཱིནཝཾ པཀཱསེནྟོ ཨནྟརཝཱིཐིཡཾ ཋིཏཀོཝ ཨིམཱ གཱཐཱ ཨབྷཱསི –

‘‘ཡཐཱཔི ¶ མཱུལེ ཨནུཔདྡཝེ དལ༹ྷེ,

‘‘ཡསྶ ཚཏྟིཾསཏི སོཏཱ, མནཱཔསཝནཱ བྷུསཱ;

མཧཱཝཧནྟི དུདྡིཊྛིཾ, སངྐཔྤཱ རཱགནིསྶིཏཱ.

‘‘སཝནྟི སབྦདྷི སོཏཱ, ལཏཱ ཨུཔྤཛྫ ཏིཊྛཏི;

ཏཉྩ དིསྭཱ ལཏཾ ཛཱཏཾ, མཱུལཾ པཉྙཱཡ ཚིནྡཐ.

ཏཏྠ མཱུལེཏི ཡསྶ རུཀྑསྶ ཙཏཱུསུ དིསཱསུ ཙཏུདྷཱ ཧེཊྛཱ ཙ ཨུཛུཀམེཝ གཏེ པཉྩཝིདྷམཱུལེ ཚེདནཕཱལནཔཱཙནཝིཛ྄ཛྷནཱདཱིནཾ ཀེནཙི ཨུཔདྡཝེན ཨནུཔདྡཝེ ཐིརཔཏྟཏཱཡ དལ༹ྷེ སོ རུཀྑོ ཨུཔརིཙྪིནྣོཔི སཱཁཱནཾ ཝསེན པུནདེཝ རཱུཧཏི, ཨེཝམེཝ ཚདྭཱརིཀཱཡ ཏཎྷཱཡ ཨནུསཡེ ¶ ཨརཧཏྟམགྒཉཱཎེན ཨནུཧཏེ ཨསམུཙྪིནྣེ ཏསྨིཾ ཏསྨིཾ བྷཝེ ཛཱཏིཨཱདིབྷེདཾ ཨིདཾ དུཀྑཾ པུནཔྤུནཾ ནིབྦཏྟཏིཡེཝཱཏི ཨཏྠོ.

ཡསྶཱཏི ཡསྶ པུགྒལསྶ ‘‘ཨིཏི ཨཛ྄ཛྷཏྟིཀསྶཱུཔཱདཱཡ ཨཊྛཱརས ཏཎྷཱཝིཙརིཏཱནི བཱཧིརསྶཱུཔཱདཱཡ ཨཊྛཱརས ཏཎྷཱཝིཙརིཏཱནཱི’’ཏི ཨིམེསཾ ཏཎྷཱཝིཙརིཏཱནཾ ཝསེན ཚཏྟིཾསཏིཡཱ སོཏེཧི སམནྣཱགཏཱ མནཱཔེསུ རཱུཔཱདཱིསུ ཨཱསཝཏི པཝཏྟཏཱིཏི མནཱཔསཝནཱ ཏཎྷཱ བྷུསཱ བལཝཏཱི ཧོཏི, ཏཾ པུགྒལཾ ཝིཔནྣཉཱཎཏཱཡ དུདྡིཊྛིཾ པུནཔྤུནཾ ཨུཔྤཛྫནཏོ མཧནྟབྷཱཝེན མཧཱ ཧུཏྭཱ ཛྷཱནཾ ཝཱ ཝིཔསྶནཾ ཝཱ ཨནིསྶཱཡ རཱགནིསྶིཏཱ ¶ སངྐཔྤཱ ཝཧནྟཱིཏི ཨཏྠོ.

སཝནྟི སབྦདྷི སོཏཱཏི ཨིམེ ཏཎྷཱསོཏཱ ཙཀྑུདྭཱརཱདཱིནཾ ཝསེན སབྦེསུ རཱུཔཱདཱིསུ ཨཱརམྨཎེསུ སཝནཏོ, སབྦཱཔི རཱུཔཏཎྷཱ…པེ… དྷམྨཏཎྷཱཏི སབྦབྷཝེསུ ཝཱ སཝནཏོ སབྦདྷི སཝནྟི ནཱམ. ལཏཱཏི པལིཝེཋནཊྛེན སཾསིབྦནཊྛེན ཙ ལཏཱ ཝིཡཱཏི ལཏཱ. ཨུཔྤཛྫ ཏིཊྛཏཱིཏི ཚཧི དྭཱརེཧི ཨུཔྤཛྫིཏྭཱ རཱུཔཱདཱིསུ ཨཱརམྨཎེསུ ཏིཊྛཏི. ཏཉྩ དིསྭཱཏི ཏཾ པན ཏཎྷཱལཏཾ ‘‘ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏཱི’’ཏི ཛཱཏཊྛཱནཝསེན དིསྭཱ. པཉྙཱཡཱཏི སཏྠེན ཝནེ ཛཱཏཾ ལཏཾ ཝིཡ མགྒཔཉྙཱཡ མཱུལེ ཚིནྡཐཱཏི ཨཏྠོ.

སརིཏཱནཱིཏི ¶ ཨནུསཊཱནི པཡཱཏཱནི. སིནེཧིཏཱནཱིཏི ཙཱིཝརཱདཱིསུ པཝཏྟསིནེཧཝསེན སིནེཧིཏཱནི ཙ, ཏཎྷཱསིནེཧམཀྑིཏཱནཱིཏི ཨཏྠོ. སོམནསྶཱནཱིཏི ཏཎྷཱཝསིཀསྶ ཛནྟུནོ ཨེཝརཱུཔཱནི སོམནསྶཱནི བྷཝནྟི. ཏེ སཱཏསིཏཱཏི ཏེ ཏཎྷཱཝསིཀཱ པུགྒལཱ སཱཏནིསྶིཏཱ སུཁནིསྶིཏཱ ཙ ཧུཏྭཱ སུཁེསིནོ སུཁཔརིཡེསིནོ བྷཝནྟི. ཏེ ཝེཏི ཡེ ཨེཝརཱུཔཱ ནརཱ, ཏེ ཛཱཏིཛརཱབྱཱདྷིམརཎཱནི ཨུཔགཙྪནྟིཡེཝཱཏི ཛཱཏིཛརཱུཔགཱ ནཱམ ཧོནྟི. པཛཱཏི ཨིམེ སཏྟཱ ཏཱསཀརཎེན ཏསིཎཱཏི སངྑྱཾ གཏཱཡ ཏཎྷཱཡ པུརཀྑཏཱ པརིཝཱརིཏཱ ཧུཏྭཱ.

བནྡྷིཏོཏི ལུདྡེན ཨརཉྙེ བདྡྷོ སསོ ཝིཡ པརིསཔྤནྟི བྷཱཡནྟི. སཾཡོཛནསངྒསཏྟཀཱཏི ¶ དསཝིདྷེན སཾཡོཛནསངྒེན ཙེཝ སཏྟཝིདྷེན རཱགསངྒཱདིནཱ ཙ སཏྟཱ བདྡྷཱ ཏསྨིཾ ཝཱ ལགྒཱ ཧུཏྭཱ. ཙིརཱཡཱཏི ཙིརཾ དཱིགྷམདྡྷཱནཾ པུནཔྤུནཾ ཛཱཏིཨཱདིཀཾ དུཀྑཾ ཨུཔགཙྪནྟཱིཏི ཨཏྠོ. ཏསྨཱཏི ཡསྨཱ ཏསིཎཱཡ པུརཀྑཏཱ པལིཝེཋིཏཱ སཏྟཱ, ཏསྨཱ ཨཏྟནོ ཝིརཱགཾ རཱགཱདིཝིགམཾ ནིབྦཱནཾ པཏྠེནྟོ ཨཱཀངྐམཱནོ བྷིཀྑུ ཨརཧཏྟམགྒེནེཏཾ ཏསིཎཾ ཝིནོདཡེ པནུདིཏྭཱ ནཱིཧརིཏྭཱ ཚཌྜེཡྻཱཏི ཨཏྠོ.

དེསནཱཝསཱནེ ¶ བཧཱུ སོཏཱཔཏྟིཕལཱདཱིནི པཱཔུཎིཾསུ.

སཱཔི ཁོ སཱུཀརཔོཏིཀཱ ཏཏོ ཙཝིཏྭཱ སུཝཎྞབྷཱུམིཡཾ རཱཛཀུལེ ནིབྦཏྟི, ཏཏོ ཙུཏཱ བཱརཱཎསིཡཾ, ཏཏོ ཙུཏཱ སུཔྤཱརཀཔཊྚནེ ཨསྶཝཱཎིཛགེཧེ ནིབྦཏྟི, ཏཏོ ཙུཏཱ ཀཱཝཱིརཔཊྚནེ ནཱཝིཀསྶ གེཧེ ནིབྦཏྟི, ཏཏོ ཙུཏཱ ཨནུརཱདྷཔུརེ ཨིསྶརཀུལགེཧེ ནིབྦཏྟི, ཏཏོ ཙུཏཱ ཏསྶེཝ དཀྑིཎདིསཱཡ བྷོཀྐནྟགཱམེ སུམནསྶ ནཱམ ཀུཊུམྦིཀསྶ དྷཱིཏཱ ནཱམེན སུམནཱ ཨེཝ ཧུཏྭཱ ནིབྦཏྟི. ཨཐསྶཱ པིཏཱ ཏསྨིཾ གཱམེ ཚཌྜིཏེ དཱིགྷཝཱཔིརཊྛཾ གནྟྭཱ མཧཱམུནིགཱམེ ནཱམ ཝསི. ཏཏྠ ནཾ དུཊྛགཱམཎིརཉྙོ ཨམཙྩོ ལཀུཎྜཀཨཏིམྦརོ ནཱམ ཀེནཙིདེཝ ཀརཎཱིཡེན གཏོ དིསྭཱ མཧནྟཾ མངྒལཾ ཀཏྭཱ ཨཱདཱཡ མཧཱཔུཎྞགཱམཾ གཏོ. ཨཐ ནཾ ཀོཊིཔབྦཏམཧཱཝིཧཱརཝཱསཱི མཧཱཨནུརུདྡྷཏྠེརོ ནཱམ ཏཏྠ པིཎྜཱཡ ཙརིཏྭཱ ཏསྶཱ གེཧདྭཱརེ ཋིཏོ དིསྭཱ བྷིཀྑཱུཧི སདྡྷིཾ ཀཐེསི, ‘‘ཨཱཝུསོ, སཱུཀརཔོཏིཀཱ ནཱམ ལཀུཎྜཀཨཏིམྦརམཧཱམཏྟསྶ ¶ བྷརིཡབྷཱཝཾ པཏྟཱ, ཨཧོ ཨཙྪརིཡ’’ནྟི. སཱ ཏཾ ཀཐཾ སུཏྭཱ ཨཏཱིཏབྷཝེ ¶ ཨུགྒྷཱཊེཏྭཱ ཛཱཏིསྶརཉཱཎཾ པཊིལབྷི. ཏངྑཎཉྙེཝ ཨུཔྤནྣསཾཝེགཱ སཱམིཀཾ ཡཱཙིཏྭཱ མཧནྟེན ཨིསྶརིཡེན པཉྩབལཀཏྠེརཱིནཾ སནྟིཀེ པབྦཛིཏྭཱ ཏིསྶམཧཱཝིཧཱརེ མཧཱསཏིཔཊྛཱནསུཏྟཀཐཾ སུཏྭཱ སོཏཱཔཏྟིཕལེ པཏིཊྛཧི. པཙྪཱ དམིལ༹མདྡནེ ཀཏེ ཉཱཏཱིནཾ ཝསནཊྛཱནཾ བྷོཀྐནྟགཱམམེཝ གནྟྭཱ ཏཏྠ ཝསནྟཱི ཀལླམཧཱཝིཧཱརེ ཨཱསཱིཝིསོཔམསུཏྟནྟཾ སུཏྭཱ ཨརཧཏྟཾ པཱཔུཎི.

སཱ པརིནིབྦཱནདིཝསེ བྷིཀྑུབྷིཀྑུནཱིཧི པུཙྪིཏཱ བྷིཀྑུནིསངྒྷསྶ སབྦཾ ཨིམཾ པཝཏྟིཾ ནིརནྟརཾ ཀཐེཏྭཱ སནྣིཔཏིཏསྶ བྷིཀྑུསངྒྷསྶ མཛ྄ཛྷེ མཎྜལཱརཱམཝཱསིནཱ དྷམྨཔདབྷཱཎཀམཧཱཏིསྶཏྠེརེན སདྡྷིཾ སཾསནྡིཏྭཱ ‘‘ཨཧཾ པུབྦེ མནུསྶཡོནིཡཾ ནིབྦཏྟིཏྭཱ ཏཏོ ཙུཏཱ ཀུཀྐུཊཱི ཧུཏྭཱ ཏཏྠ སེནསྶ སནྟིཀཱ སཱིསཙྪེདཾ པཏྭཱ རཱཛགཧེ ནིབྦཏྟཱ, པརིབྦཱཛིཀཱསུ པབྦཛིཏྭཱ པཋམཛ྄ཛྷཱནབྷཱུམིཡཾ ནིབྦཏྟིཏྭཱ ཏཏོ ཙུཏཱ སེཊྛིཀུལེ ནིབྦཏྟཱ ནཙིརསྶེཝ ཙཝིཏྭཱ སཱུཀརཡོནིཾ གནྟྭཱ ཏཏོ ཙུཏཱ སུཝཎྞབྷཱུམིཾ, ཏཏོ ཙུཏཱ བཱརཱཎསིཾ, ཏཏོ ཙུཏཱ སུཔྤཱརཀཔཊྚནཾ, ཏཏོ ཙུཏཱ ཀཱཝཱིརཔཊྚནཾ, ཏཏོ ཙུཏཱ ཨནུརཱདྷཔུརཾ, ཏཏོ ཙུཏཱ བྷོཀྐནྟགཱམ’’ནྟི ཨེཝཾ སམཝིསམེ ཏེརས ཨཏྟབྷཱཝེ པཏྭཱ ‘‘ཨིདཱནི ཨུཀྐཎྛིཏྭཱ པབྦཛིཏྭཱ ཨརཧཏྟཾ པཏྟཱ, སབྦེཔི ཨཔྤམཱདེན སམྤཱདེཐཱ’’ཏི ཝཏྭཱ ཙཏསྶོ པརིསཱ སཾཝེཛེཏྭཱ པརིནིབྦཱཡཱིཏི.

ཡོ ¶ ¶ ནིབྦནཐོཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨེཀཾ ཝིབྦྷནྟཀཾ བྷིཀྑུཾ ཨཱརབྦྷ ཀཐེསི.

ཨེཀོ ཀིར མཧཱཀསྶཔཏྠེརསྶ སདྡྷིཝིཧཱརིཀོ ཧུཏྭཱ ཙཏྟཱརི ཛྷཱནཱནི ཨུཔྤཱདེཏྭཱཔི ཨཏྟནོ མཱཏུལསྶ སུཝཎྞཀཱརསྶ གེཧེ ཝིསབྷཱགཱརམྨཎཾ དིསྭཱ ཏཏྠ པཊིབདྡྷཙིཏྟོ ཝིབྦྷམི. ཨཐ ནཾ མནུསྶཱ ཨལསབྷཱཝེན ཀམྨཾ ཀཱཏུཾ ཨནིཙྪནྟཾ གེཧཱ ནཱིཧརིཾསུ. སོ པཱཔམིཏྟསཾསགྒེན ཙོརཀམྨེན ཛཱིཝིཀཾ ཀཔྤེནྟོ ཝིཙརི. ཨཐ ནཾ ཨེཀདིཝསཾ གཧེཏྭཱ ¶ པཙྪཱབཱཧཾ གཱལ༹ྷབནྡྷནཾ བནྡྷིཏྭཱ ཙཏུཀྐེ ཙཏུཀྐེ ཀསཱཧི ཏཱལེ༹ནྟཱ ཨཱགྷཱཏནཾ ནཡིཾསུ. ཐེརོ པིཎྜཱཡ ཙརིཏུཾ པཝིསནྟོ ཏཾ དཀྑིཎེན དྭཱརེན ནཱིཧརིཡམཱནཾ དིསྭཱ བནྡྷནཾ སིཐིལཾ ཀཱརེཏྭཱ ‘‘པུབྦེ ཏཡཱ པརིཙིཏཀམྨཊྛཱནཾ པུན ཨཱཝཛྫེཧཱི’’ཏི ཨཱཧ. སོ ཏེན ཨོཝཱདེན སཏུཔྤཱདཾ ལབྷིཏྭཱ པུན ཙཏུཏྠཛ྄ཛྷཱནཾ ནིབྦཏྟེསི. ཨཐ ནཾ ‘‘ཨཱགྷཱཏནཾ ནེཏྭཱ གྷཱཏེསྶཱམཱ’’ཏི སཱུལེ ཨུཏྟཱསེསུཾ. སོ ན བྷཱཡཏི ན སནྟསཏི. ཨཐསྶ ཏསྨིཾ ཏསྨིཾ དིསཱབྷཱགེ ཋིཏཱ མནུསྶཱ ཨསིསཏྟིཏོམརཱདཱིནི ཨཱཝུདྷཱནི ཨུཀྑིཔིཏྭཱཔི ཏཾ ཨསནྟསནྟམེཝ དིསྭཱ ‘‘པསྶཐ, བྷོ, ཨིམཾ པུརིསཾ, ཨནེཀསཏཱནཉྷི ཨཱཝུདྷཧཏྠཱནཾ པུརིསཱནཾ མཛ྄ཛྷེ ནེཝ ཚམྦྷཏི ན ཝེདྷཏི, ཨཧོ ཨཙྪརིཡ’’ནྟི ཨཙྪརིཡབྦྷུཏཛཱཏཱ མཧཱནཱདཾ ནདིཏྭཱ རཉྙོ ཏཾ པཝཏྟིཾ ཨཱརོཙེསུཾ. རཱཛཱ ཏཾ ཀཱརཎཾ སུཏྭཱ ‘‘ཝིསྶཛྫེཐ ན’’ནྟི ཨཱཧ. སཏྠུ སནྟིཀམྤི ¶ གནྟྭཱ ཏམཏྠཾ ཨཱརོཙཡིཾསུ. སཏྠཱ ཨོབྷཱསཾ ཕརིཏྭཱ ཏསྶ དྷམྨཾ དེསེནྟོ ཨིམཾ གཱཐམཱཧ –

ཏསྶཏྠོ – ཡོ པུགྒལོ གིཧིབྷཱཝེ ཨཱལཡསངྑཱཏཾ ཝནཐཾ ཚཌྜེཏྭཱ པབྦཛིཏཏཱཡ ནིབྦནཐོ དིབྦཝིཧཱརསངྑཱཏེ ཏཔོཝནེ ཨདྷིམུཏྟོ གྷརཱཝཱསབནྡྷནསངྑཱཏཱ ཏཎྷཱཝནཱ མུཏྟོ ཧུཏྭཱ པུན གྷརཱཝཱསབནྡྷནསངྑཱཏཾ ཏཎྷཱཝནམེཝ དྷཱཝཏི, ཨེཐ ཏཾ པུགྒལཾ པསྶཐ, ཨེསོ གྷརཱཝཱསབནྡྷནཏོ མུཏྟོ གྷརཱཝཱསབནྡྷནམེཝ དྷཱཝཏཱིཏི.

ཨིམཾ ¶ པན དེསནཾ སུཏྭཱ སོ རཱཛཔུརིསཱནཾ ཨནྟརེ སཱུལགྒེ ནིསིནྣོཝ ཨུདཡབྦཡཾ པཊྛཔེཏྭཱ ཏིལཀྑཎཾ ཨཱརོཔེཏྭཱ སངྑཱརེ སམྨསནྟོ སོཏཱཔཏྟིཕལཾ པཏྭཱ སམཱཔཏྟིསུཁཾ ཨནུབྷཝནྟོ ཝེཧཱསཾ ཨུཔྤཏིཏྭཱ ཨཱཀཱསེནེཝ སཏྠུ སནྟིཀཾ གནྟྭཱ སཏྠཱརཾ ཝནྡིཏྭཱ སརཱཛིཀཱཡ པརིསཱཡ མཛ྄ཛྷེཡེཝ ཨརཧཏྟཾ པཱཔུཎཱིཏི.

ན ¶ ཏཾ དལ༹ྷནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ བནྡྷནཱགཱརཾ ཨཱརབྦྷ ཀཐེསི.

ཨེཀསྨིཾ ཀིར ཀཱལེ བཧཱུ སནྡྷིཙྪེདཀཔནྠགྷཱཏཀམནུསྶགྷཱཏཀེ ཙོརེ ¶ ཨཱནེཏྭཱ ཀོསལརཉྙོ དསྶཡིཾསུ. ཏེ རཱཛཱ ཨནྡུབནྡྷནརཛྫུབནྡྷནསངྑལིཀབནྡྷནེཧི བནྡྷཱཔེསི. ཏིཾསམཏྟཱཔི ཁོ ཛཱནཔདཱ བྷིཀྑཱུ སཏྠཱརཾ དཊྛུཀཱམཱ ཨཱགནྟྭཱ དིསྭཱ ཝནྡིཏྭཱ པུནདིཝསེ སཱཝཏྠིཾ པིཎྜཱཡ ཙརནྟཱ བནྡྷནཱགཱརཾ གནྟྭཱ ཏེ ཙོརེ དིསྭཱ པིཎྜཔཱཏཔཊིཀྐནྟཱ སཱཡནྷསམཡེ ཏཐཱགཏཾ ཨུཔསངྐམིཏྭཱ, ‘‘བྷནྟེ, ཨཛྫ ཨམྷེཧི པིཎྜཱཡ ཙརནྟེཧི བནྡྷནཱགཱརེ བཧཱུ ཙོརཱ ཨནྡུབནྡྷནཱདཱིཧི བདྡྷཱ མཧཱདུཀྑཾ ཨནུབྷཝནྟཱ དིཊྛཱ, ཏེ ཏཱནི བནྡྷནཱནི ཚིནྡིཏྭཱ པལཱཡིཏུཾ ན སཀྐོནྟི, ཨཏྠི ནུ ཁོ, བྷནྟེ, ཏེཧི བནྡྷནེཧི ཐིརཏརཾ ཨཉྙཾ བནྡྷནཾ ནཱམཱ’’ཏི པུཙྪིཾསུ. སཏྠཱ, ‘‘བྷིཀྑཝེ, ཀིཾ བནྡྷནཱནི ནཱམེཏཱནི, ཡཾ པནེཏཾ དྷནདྷཉྙཔུཏྟདཱརཱདཱིསུ ཏཎྷཱསངྑཱཏཾ ཀིལེསབནྡྷནཾ, ཨེཏཾ ཨེཏེཧི སཏགུཎེན སཧསྶགུཎེན སཏསཧསྶགུཎེན ཐིརཏརཾ, ཨེཝཾ མཧནྟམྤི པནེཏཾ དུཙྪིནྡནིཡཾ བནྡྷནཾ པོརཱཎཀཔཎྜིཏཱ ཚིནྡིཏྭཱ ཧིམཝནྟཾ པཝིསིཏྭཱ པབྦཛིཾསཱུ’’ཏི ཝཏྭཱ ཨཏཱིཏཾ ཨཱཧརི –

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨེཀསྨིཾ དུགྒཏགཧཔཏིཀུལེ ནིབྦཏྟི. ཏསྶ ཝཡཔྤཏྟསྶ པིཏཱ ཀཱལམཀཱསི. སོ བྷཏིཾ ཀཏྭཱ མཱཏརཾ པོསེསི. ཨཐསྶ མཱཏཱ ཨནིཙྪམཱནསྶེཝ ཨེཀཾ ཀུལདྷཱིཏརཾ གེཧེ ཀཏྭཱ ཨཔརབྷཱགེ ཀཱལམཀཱསི. བྷརིཡཱཡཔིསྶ ཀུཙྪིཡཾ གབྦྷོ པཏིཊྛཧི. སོ གབྦྷསྶ པཏིཊྛིཏབྷཱཝཾ ཨཛཱནནྟོཝ, ‘‘བྷདྡེ, ཏྭཾ བྷཏིཾ ཀཏྭཱ ཛཱིཝ, ཨཧཾ པབྦཛིསྶཱམཱི’’ཏི ཨཱཧ. ‘‘སཱམི, ནནུ གབྦྷོ ¶ མེ པཏིཊྛིཏོ, མཡི ཝིཛཱཏཱཡ དཱརཀཾ དིསྭཱ པབྦཛིསྶསཱི’’ཏི ཨཱཧ. སོ ‘‘སཱདྷཱུ’’ཏི སམྤཊིཙྪིཏྭཱ ཏསྶཱ ཝིཛཱཏཀཱལེ, ‘‘བྷདྡེ, ཏྭཾ སོཏྠིནཱ ཝིཛཱཏཱ, ཨིདཱནི ཨཧཾ པབྦཛིསྶཱམཱི’’ཏི ཨཱཔུཙྪི. ཨཐ ནཾ སཱ ‘‘པུཏྟསྶ ¶ ཏཱཝ ཐནཔཱནཏོ ཨཔགམནཀཱལཾ ཨཱགམེཧཱི’’ཏི ཝཏྭཱ པུན གབྦྷཾ གཎྷི. སོ ཙིནྟེསི – ‘‘ཨིམཾ སམྤཊིཙྪཱཔེཏྭཱ གནྟུཾ ན སཀྐཱ, ཨིམིསྶཱ ཨནཱཙིཀྑིཏྭཱཝ པལཱཡིཏྭཱ པབྦཛིསྶཱམཱི’’ཏི. སོ ¶ ཏསྶཱ ཨནཱཙིཀྑིཏྭཱཝ རཏྟིབྷཱགེ ཨུཊྛཱཡ པལཱཡི. ཨཐ ནཾ ནགརགུཏྟིཀཱ ཨགྒཧེསུཾ. སོ ‘‘ཨཧཾ, སཱམི, མཱཏུཔོསཀོ ནཱམ, ཝིསྶཛྫེཐ མ’’ནྟི ཨཏྟཱནཾ ཝིསྶཛྫཱཔེཏྭཱ ཨེཀསྨིཾ ཋཱནེ ཝསིཏྭཱ ཨིསིཔབྦཛྫཾ པབྦཛིཏྭཱ ཨབྷིཉྙཱསམཱཔཏྟིཡོ ལབྷིཏྭཱ ཛྷཱནཀཱིལཱ༹ཡ ཀཱིལ༹ནྟོ ཝིཧཱསི. སོ ཏཏྠ ཝསནྟོཡེཝ ‘‘ཨེཝརཱུཔམྤི ནཱམ མེ དུཙྪིནྡནིཡཾ པུཏྟདཱརབནྡྷནཾ ཀིལེསབནྡྷནཾ ཚིནྣ’’ནྟི ཨིམཾ ཨུདཱནཾ ཨུདཱནེསི.

སཏྠཱ ཨིམཾ ཨཏཱིཏཾ ཨཱཧརིཏྭཱ ཏེན ཨུདཱནིཏཾ ཨུདཱནཾ པཀཱསེནྟོ ཨིམཱ གཱཐཱ ཨབྷཱསི –

ཏཏྠ ¶ དྷཱིརཱཏི བུདྡྷཱདཡོ པཎྜིཏཔུརིསཱ ཡཾ སངྑལིཀསངྑཱཏཾ ཨཡསཱ ནིབྦཏྟཾ ཨཱཡསཾ, ཨནྡུབནྡྷནསངྑཱཏཾ དཱརུཛཾ, ཡཉྩ པབྦཛཏིཎེཧི ཝཱ ཨཉྙེཧི ཝཱ ཝཱཀཱདཱིཧི རཛྫུཾ ཀཏྭཱ ཀཏཾ རཛྫུབནྡྷནཾ, ཏཾ ཨསིཨཱདཱིཧི ཚིནྡིཏུཾ སཀྐུཎེཡྻབྷཱཝེན ཐིརནྟི ན ཝདནྟཱིཏི ཨཏྠོ. སཱརཏྟརཏྟཱཏི སཱརཏྟཱ ཧུཏྭཱ རཏྟཱ, བཧལཏརརཱགརཏྟཱཏི ཨཏྠོ. མཎིཀུཎྜལེསཱུཏི མཎཱིསུ ཙེཝ ཀུཎྜལེསུ ཙ, མཎིཝིཙིཏྟེསུ ཝཱ ཀུཎྜལེསུ. ཨེཏཾ དལ༹ྷནྟི ཡེ མཎིཀུཎྜལེསུ སཱརཏྟརཏྟཱ, ཏེསཾ སོ རཱགོ ཙ ཡཱ པུཏྟདཱརེསུ ཨཔེཀྑཱ ཏཎྷཱ, ཨེཏཾ ཀིལེསམཡཾ བནྡྷནཉྩ པཎྜིཏཔུརིསཱ དལ༹ྷནྟི ཝདནྟི. ཨོཧཱརིནནྟི ཨཱཀཌྜྷིཏྭཱ ཙཏཱུསུ ཨཔཱཡེསུ པཱཏནཏོ ཨཝཧརཏི ཧེཊྛཱ ཧརཏཱིཏི ཨོཧཱརིནཾ. སིཐིལནྟི བནྡྷནཊྛཱནེ ཚཝིཙམྨམཾསཱནི ན ཚིནྡཏི, ལོཧིཏཾ ན ནཱིཧརཏི, བནྡྷནབྷཱཝམྤི ཨཛཱནཱཔེཏྭཱ ཐལཔཐཛལཔཐཱདཱིསུ ཀམྨཱནི ཀཱཏུཾ དེཏཱིཏི སིཐིལཾ. དུཔྤམུཉྩནྟི ལོབྷཝསེན ཧི ཨེཀཝཱརམྤི ཨུཔྤནྣཾ ཀིལེསབནྡྷནཾ དཊྛཊྛཱནཏོ ཀཙྪཔོ ¶ ཝིཡ དུམྨོཙིཡཾ ¶ ཧོཏཱིཏི དུཔྤམུཉྩཾ. ཨེཏམྤི ཚེཏྭཱནཱཏི ཨེཏཾ དལ༹ྷམྤི ཀིལེསབནྡྷནཾ ཉཱཎཁགྒེན ཚིནྡིཏྭཱ ཨནཔེཀྑིནོ ¶ ཧུཏྭཱ ཀཱམསུཁཾ པཧཱཡ པརིབྦཛནྟི, པཀྐམནྟི པབྦཛནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡེ རཱགརཏྟཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཁེམཾ ནཱམ རཉྙོ བིམྦིསཱརསྶ ཨགྒམཧེསིཾ ཨཱརབྦྷ ཀཐེསི.

སཱ ཀིར པདུམུཏྟརཔཱདམཱུལེ པཏྠིཏཔཏྠནཱ ཨཏིཝིཡ ཨབྷིརཱུཔཱ པཱསཱདིཀཱ ཨཧོསི. ‘‘སཏྠཱ ཀིར རཱུཔསྶ དོསཾ ཀཐེཏཱི’’ཏི སུཏྭཱ པན སཏྠུ སནྟིཀཾ གནྟུཾ ན ཨིཙྪི. རཱཛཱ ཏསྶཱ རཱུཔམདམཏྟབྷཱཝཾ ཉཏྭཱ ཝེལུ༹ཝནཝཎྞནཱཔཊིསཾཡུཏྟཱནི གཱིཏཱནི ཀཱརེཏྭཱ ནཊཱདཱིནཾ དཱཔེསི. ཏེསཾ ཏཱནི གཱཡནྟཱནཾ སདྡཾ སུཏྭཱ ཏསྶཱ ཝེལུ༹ཝནཾ ཨདིཊྛཔུབྦཾ ཝིཡ ཨསུཏཔུབྦཾ ཝིཡ ཙ ཨཧོསི. སཱ ‘‘ཀཏརཾ ཨུཡྻཱནཾ སནྡྷཱཡ གཱཡཐཱ’’ཏི པུཙྪིཏྭཱ, ‘‘དེཝཱི, ཏུམྷཱཀཾ ཝེལུ༹ཝནུཡྻཱནམེཝཱ’’ཏི ཝུཏྟེ ཨུཡྻཱནཾ གནྟུཀཱམཱ ཨཧོསི. སཏྠཱ ཏསྶཱ ཨཱགམནཾ ཉཏྭཱ པརིསམཛ྄ཛྷེ ནིསཱིདིཏྭཱ དྷམྨཾ དེསེནྟོཝ ཏཱལཝཎྚཾ ཨཱདཱཡ ཨཏྟནོ པསྶེ ཋཏྭཱ བཱིཛམཱནཾ ཨབྷིརཱུཔཾ ཨིཏྠིཾ ནིམྨིནི. ཁེམཱ, དེཝཱིཔི པཝིསམཱནཱཝ ཏཾ ཨིཏྠིཾ དིསྭཱ ཙིནྟེསི – ‘‘སམྨཱསམྦུདྡྷོ རཱུཔསྶ དོསཾ ཀཐེཏཱིཏི ཝདནྟི, ཨཡཉྩསྶ སནྟིཀེ ཨིཏྠཱི བཱིཛཡམཱནཱ ཋིཏཱ, ནཱཧཾ ཨིམིསྶཱ ཀལབྷཱགམྤི ¶ ཨུཔེམི, ན མཡཱ ཨཱིདིསཾ ཨིཏྠིརཱུཔཾ དིཊྛཔུབྦཾ, སཏྠཱརཾ ཨབྷཱུཏེན ཨབྦྷཱཙིཀྑནྟི མཉྙེ’’ཏི ཙིནྟེཏྭཱ ཏཐཱགཏསྶ ཀཐཱསདྡམྤི ཨནིསཱམེཏྭཱ ཏམེཝ ཨིཏྠིཾ ཨོལོཀཡམཱནཱ ཨཊྛཱསི. སཏྠཱ ཏསྶཱ ཏསྨིཾ རཱུཔེ ཨུཔྤནྣབཧུམཱནཏཾ ཉཏྭཱ ཏཾ རཱུཔཾ པཋམཝཡཱདིཝསེན དསྶེཏྭཱ ཧེཊྛཱ ཝུཏྟནཡེནེཝ པརིཡོསཱནེ ཨཊྛིམཏྟཱཝསཱནཾ ཀཏྭཱ དསྶེསི. ཁེམཱ ཏཾ དིསྭཱ ‘‘ཨེཝརཱུཔམྤི ནཱམེཏཾ རཱུཔཾ མུཧུཏྟེནེཝ ཁཡཝཡཾ སམྤཏྟཾ, ནཏྠི ཝཏ ཨིམསྨིཾ རཱུཔེ སཱརོ’’ཏི ཙིནྟེསི. སཏྠཱ ཏསྶཱ ཙིཏྟཱཙཱརཾ ཨོལོཀེཏྭཱ, ‘‘ཁེམེ, ཏྭཾ ‘ཨིམསྨིཾ རཱུཔེ སཱརོ ཨཏྠཱི’ཏི ཙིནྟེསི, པསྶ དཱནིསྶ ཨསཱརབྷཱཝ’’ནྟི ཝཏྭཱ ཨིམཾ གཱཐམཱཧ –

‘‘ཨཱཏུརཾ ¶ ¶ ཨསུཙིཾ པཱུཏིཾ, པསྶ ཁེམེ སམུསྶཡཾ;

ཨུགྒྷརནྟཾ པགྒྷརནྟཾ, བཱལཱནཾ ཨབྷིཔཏྠིཏ’’ནྟི. (ཨཔ. ཐེརཱི ༢.༢.༣༥༤);

སཱ གཱཐཱཔརིཡོསཱནེ སོཏཱཔཏྟིཕལེ པཏིཊྛཧི. ཨཐ ནཾ སཏྠཱ, ‘‘ཁེམེ, ཨིམེ སཏྟཱ རཱགརཏྟཱ དོསཔདུཊྛཱ མོཧམཱུལ༹ྷཱ ཨཏྟནོ ཏཎྷཱསོཏཾ སམཏིཀྐམིཏུཾ ན སཀྐོནྟི, ཏཏྠེཝ ལགྒནྟཱི’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

ཨནཔེཀྑིནོ སབྦདུཀྑཾ པཧཱཡཱ’’ཏི.

ཏཏྠ མཀྐཊཀོཝ ཛཱལནྟི ཡཐཱ ནཱམ མཀྐཊཀོ སུཏྟཛཱལཾ ཀཏྭཱ མཛ྄ཛྷེ ཋཱནེ ནཱབྷིམཎྜལེ ནིཔནྣོ པརིཡནྟེ པཏིཏཾ པཊངྒཾ ཝཱ མཀྑིཀཾ ཝཱ ཝེགེན གནྟྭཱ ཝིཛ྄ཛྷིཏྭཱ ཏསྶ རསཾ པིཝིཏྭཱ པུན གནྟྭཱ ཏསྨིཾཡེཝ ¶ ཋཱནེ ནིཔཛྫཏི, ཨེཝམེཝ ཡེ སཏྟཱ རཱགརཏྟཱ དོསཔདུཊྛཱ མོཧམཱུལ༹ྷཱ སཡཾཀཏཾ ཏཎྷཱསོཏཾ ཨནུཔཏནྟི, ཏེ ཏཾ སམཏིཀྐམིཏུཾ ན སཀྐོནྟི, ཨེཝཾ དུརཏིཀྐམཾ. ཨེཏམྤི ཚེཏྭཱན ཝཛནྟི དྷཱིརཱཏི པཎྜིཏཱ ཨེཏཾ བནྡྷནཾ ཚེཏྭཱ ཨནཔེཀྑིནོ ནིརཱལཡཱ ཧུཏྭཱ ཨརཧཏྟམགྒེན སབྦདུཀྑཾ པཧཱཡ ཝཛནྟི, གཙྪནྟཱིཏི ཨཏྠོ.

དེསནཱཝསཱནེ ཁེམཱ ཨརཧཏྟེ པཏིཊྛཧི, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསི. སཏྠཱ རཱཛཱནཾ ཨཱཧ – ‘‘མཧཱརཱཛ, ཁེམཱཡ པབྦཛིཏུཾ ཝཱ པརིནིབྦཱཡིཏུཾ ཝཱ ཝཊྚཏཱི’’ཏི. བྷནྟེ, པབྦཱཛེཐ ནཾ, ཨལཾ པརིནིབྦཱནེནཱཏི. སཱ པབྦཛིཏྭཱ ཨགྒསཱཝིཀཱ ཨཧོསཱིཏི.

མུཉྩ པུརེཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨུགྒསེནཾ ཨཱརབྦྷ ཀཐེསི.

པཉྩསཏཱ ¶ ཀིར ནཊཱ སཾཝཙྪརེ ཝཱ ཚམཱསེ ཝཱ པཏྟེ རཱཛགཧཾ གནྟྭཱ རཉྙོ སཏྟཱཧཾ སམཛྫཾ ¶ ཀཏྭཱ བཧུཾ ཧིརཉྙསུཝཎྞཾ ལབྷནྟི, ཨནྟརནྟརེ ཨུཀྑེཔདཱཡཱནཾ པརིཡནྟོ ནཏྠི. མཧཱཛནོ མཉྩཱཏིམཉྩཱདཱིསུ ཋཏྭཱ སམཛྫཾ ཨོལོཀེསི. ཨཐེཀཱ ལངྒྷིཀདྷཱིཏཱ ཝཾསཾ ཨབྷིརུཡ྄ཧ ཏསྶ ཨུཔརི པརིཝཏྟིཏྭཱ ཏསྶ པརིཡནྟེ ཨཱཀཱསེ ཙངྐམམཱནཱ ནཙྩཏི ཙེཝ གཱཡཏི ཙ. ཏསྨིཾ སམཡེ ¶ ཨུགྒསེནོ ནཱམ སེཊྛིཔུཏྟོ སཧཱཡཀེན སདྡྷིཾ མཉྩཱཏིམཉྩེ ཋིཏོ ཏཾ ཨོལོཀེཏྭཱ ཏསྶཱ ཧཏྠཔཱདཝིཀྑེཔཱདཱིསུ ཨུཔྤནྣསིནེཧོ གེཧཾ གནྟྭཱ ‘‘ཏཾ ལབྷནྟོ ཛཱིཝིསྶཱམི, ཨལབྷནྟསྶ མེ ཨིདྷེཝ མརཎ’’ནྟི ཨཱཧཱརཱུཔཙྪེདཾ ཀཏྭཱ མཉྩཀེ ནིཔཛྫི. མཱཏཱཔིཏཱུཧི, ‘‘ཏཱཏ, ཀིཾ ཏེ རུཛྫཏཱི’’ཏི པུཙྪིཏོཔི ‘‘ཏཾ མེ ནཊདྷཱིཏརཾ ལབྷནྟསྶ ཛཱིཝིཏཾ ཨཏྠི, ཨལབྷནྟསྶ མེ ཨིདྷེཝ མརཎ’’ནྟི ཝཏྭཱ, ‘‘ཏཱཏ, མཱ ཨེཝཾ ཀརི, ཨཉྙཾ ཏེ ཨམྷཱཀཾ ཀུལསྶ ཙ བྷོགཱནཉྩ ཨནུརཱུཔཾ ཀུམཱརིཀཾ ཨཱནེསྶཱམཱ’’ཏི ཝུཏྟེཔི ཏཐེཝ ཝཏྭཱ ནིཔཛྫི. ཨཐསྶ པིཏཱ བཧུཾ ཡཱཙིཏྭཱཔི ཏཾ སཉྙཱཔེཏུཾ ཨསཀྐོནྟོ ཏསྶ སཧཱཡཾ པཀྐོསཱཔེཏྭཱ ཀཧཱཔཎསཧསྶཾ དཏྭཱ ‘‘ཨིམེ ཀཧཱཔཎེ གཧེཏྭཱ ཨཏྟནོ དྷཱིཏརཾ མཡ྄ཧཾ པུཏྟསྶ དེཏཱུ’’ཏི པཧིཎི. སོ ‘‘ནཱཧཾ ཀཧཱཔཎེ གཧེཏྭཱ དེམི, སཙེ པན སོ ཨིམཾ ཨལབྷིཏྭཱ ཛཱིཝིཏུཾ ན སཀྐོཏི, ཏེན ཧི ཨམྷེཧི སདྡྷིཾཡེཝ ཝིཙརཏུ, དསྶཱམིསྶ དྷཱིཏར’’ནྟི ཨཱཧ. མཱཏཱཔིཏརོ པུཏྟསྶ ཏམཏྠཾ ཨཱརོཙེསུཾ. སོ ‘‘ཨཧཾ ཏེཧི སདྡྷིཾ ཝིཙརིསྶཱམཱི’’ཏི ཝཏྭཱ ཡཱཙནྟཱནམྤི ཏེསཾ ཀཐཾ ཨནཱདིཡིཏྭཱ ནིཀྑམིཏྭཱ ནཱཊཀསྶ སནྟིཀཾ ཨགམཱསི. སོ ཏསྶ དྷཱིཏརཾ དཏྭཱ ཏེན སདྡྷིཾཡེཝ གཱམནིགམརཱཛདྷཱནཱིསུ སིཔྤཾ དསྶེནྟོ ཝིཙརི.

སཱཔི ཏེན སདྡྷིཾ སཾཝཱསམནྭཱཡ ནཙིརསྶེཝ པུཏྟཾ ལབྷིཏྭཱ ཀཱིལཱ༹པཡམཱནཱ ‘‘སཀཊགོཔཀསྶ པུཏྟ, བྷཎྜཧཱརཀསྶ པུཏྟ, ཀིཉྩི ཨཛཱནཀསྶ པུཏྟཱ’’ཏི ཝདཏི. སོཔི ནེསཾ སཀཊཔརིཝཏྟཀཾ ཀཏྭཱ ཋིཏཊྛཱནེ གོཎཱནཾ ཏིཎཾ ཨཱཧརཏི, སིཔྤདསྶནཊྛཱནེ ལདྡྷབྷཎྜཀཾ ཨུཀྑིཔིཏྭཱ ཧརཏི ¶ . ཏདེཝ ཀིར སནྡྷཱཡ སཱ ཨིཏྠཱི པུཏྟཾ ཀཱིལཱ༹པཡམཱནཱ ཏཐཱ ཝདཏི. སོ ཨཏྟཱནཾ ཨཱརབྦྷ ཏསྶཱ གཱཡནབྷཱཝཾ ཉཏྭཱ ཏཾ པུཙྪི – ‘‘མཾ སནྡྷཱཡ ཀཐེསཱི’’ཏི? ‘‘ཨཱམ, ཏཾ སནྡྷཱཡཱ’’ཏི. ‘‘ཨེཝཾ སནྟེ ཨཧཾ པལཱཡིསྶཱམཱི’’ཏི ¶ . སཱ ‘‘ཀིཾ པན མཡ྄ཧཾ ཏཡཱ པལཱཡིཏེན ཝཱ ཨཱགཏེན ཝཱ’’ཏི པུནཔྤུནཾ ཏདེཝ གཱིཏཾ གཱཡཏི. སཱ ཀིར ཨཏྟནོ རཱུཔསམྤཏྟིཉྩེཝ དྷནལཱབྷཉྩ ནིསྶཱཡ ཏཾ ཀིསྨིཉྩི ན མཉྙཏི. སོ ‘‘ཀིཾ ནུ ཁོ ནིསྶཱཡ ཨིམིསྶཱ ཨཡཾ མཱནོ’’ཏི ཙིནྟེནྟོ ‘‘སིཔྤཾ ནིསྶཱཡཱ’’ཏི ཉཏྭཱ ‘‘ཧོཏུ, སིཔྤཾ ཨུགྒཎྷིསྶཱམཱི’’ཏི སསུརཾ ཨུཔསངྐམིཏྭཱ ཏསྶ ཛཱནནཀསིཔྤཾ ཨུགྒཎྷིཏྭཱ གཱམནིགམཱདཱིསུ སིཔྤཾ དསྶེནྟོ ཨནུཔུབྦེན རཱཛགཧཾ ཨཱགནྟྭཱ ‘‘ཨིཏོ སཏྟམེ དིཝསེ ཨུགྒསེནོ སེཊྛིཔུཏྟོ ནགརཝཱསཱིནཾ སིཔྤཾ དསྶེསྶཏཱི’’ཏི ཨཱརོཙཱཔེསི.

ནགརཝཱསིནོ ¶ མཉྩཱཏིམཉྩཱདཡོ བནྡྷཱཔེཏྭཱ སཏྟམེ དིཝསེ སནྣིཔཏིཾསུ. སོཔི སཊྛིཧཏྠཾ ཝཾསཾ ཨབྷིརུཡ྄ཧ ཏསྶ མཏྠཀེ ཨཊྛཱསི. ཏཾ དིཝསཾ སཏྠཱ པཙྩཱུསཀཱལེ ལོཀཾ ཝོལོཀེནྟོ ཏཾ ཨཏྟནོ ཉཱཎཛཱལསྶ ཨནྟོ པཝིཊྛཾ དིསྭཱ ‘‘ཀིཾ ནུ ཁོ བྷཝིསྶཏཱི’’ཏི ཨཱཝཛྫེནྟོ ‘‘སྭེ སེཊྛིཔུཏྟོ སིཔྤཾ དསྶེསྶཱམཱིཏི ཝཾསམཏྠཀེ ཋསྶཏི, ཏསྶ དསྶནཏྠཾ མཧཱཛནོ སནྣིཔཏིསྶཏི. ཏཏྲ ཨཧཾ ཙཏུཔྤདིཀཾ གཱཐཾ དེསེསྶཱམི, ཏཾ སུཏྭཱ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ བྷཝིསྶཏི, ཨུགྒསེནོཔི ཨརཧཏྟེ པཏིཊྛཧིསྶཏཱི’’ཏི ཨཉྙཱསི. སཏྠཱ པུནདིཝསེ ཀཱལཾ སལླཀྑེཏྭཱ བྷིཀྑུསངྒྷཔརིཝུཏོ རཱཛགཧཾ པིཎྜཱཡ པཱཝིསི. ཨུགྒསེནོཔི སཏྠརི ཨནྟོནགརཾ ཨཔཝིཊྛེཡེཝ ཨུནྣཱདནཏྠཱཡ མཧཱཛནསྶ ཨངྒུལིསཉྙཾ དཏྭཱ ཝཾསམཏྠཀེ ¶ པཏིཊྛཱཡ ཨཱཀཱསེཡེཝ སཏྟ ཝཱརེ པརིཝཏྟིཏྭཱ ཨོརུཡ྄ཧ ཝཾསམཏྠཀེ ཨཊྛཱསི. ཏསྨིཾ ཁཎེ སཏྠཱ ནགརཾ པཝིསནྟོ ཡཐཱ ཏཾ པརིསཱ ན ཨོལོཀེཏི, ཨེཝཾ ཀཏྭཱ ཨཏྟཱནམེཝ ཨོལོཀཱཔེསི. ཨུགྒསེནོ པརིསཾ ཨོལོཀེཏྭཱ ‘‘ན མཾ པརིསཱ ཨོལོཀེཏཱི’’ཏི དོམནསྶཔྤཏྟོ ‘‘ཨིདཾ མཡཱ སཾཝཙྪརེ ཀཏྟབྦཾ སིཔྤཾ, སཏྠརི ནགརཾ པཝིསནྟེ པརིསཱ མཾ ཨནོལོཀེཏྭཱ སཏྠཱརམེཝ ཨོལོཀེཏི, མོགྷཾ ཝཏ མེ སིཔྤདསྶནཾ ཛཱཏ’’ནྟི ཙིནྟེསི.

སཏྠཱ ཏསྶ ཙིཏྟཾ ཉཏྭཱ མཧཱམོགྒལླཱནཾ ཨཱམནྟེཏྭཱ ‘‘གཙྪ, མོགྒལླཱན, སེཊྛིཔུཏྟཾ ཝདེཧི ‘སིཔྤཾ ཀིར དསྶེཏཱུ’’’ཏི ཨཱཧ. ཐེརོ གནྟྭཱ ཝཾསསྶ ཧེཊྛཱ ཋིཏོ སེཊྛིཔུཏྟཾ ཨཱམནྟེཏྭཱ ཨིམཾ གཱཐམཱཧ –

‘‘ཨིངྒྷ ¶ པསྶ ནཊཔུཏྟ, ཨུགྒསེན མཧབྦལ;

ཀརོཧི རངྒཾ པརིསཱཡ, ཧཱསཡསྶུ མཧཱཛན’’ནྟི.

སོ ཐེརསྶ ཀཐཾ སུཏྭཱ ཏུཊྛམཱནསོ ཧུཏྭཱ ‘‘སཏྠཱ མཉྙེ མམ སིཔྤཾ པསྶིཏུཀཱམོ’’ཏི ཝཾསམཏྠཀེ ཋིཏཀོཝ ཨིམཾ གཱཐམཱཧ –

‘‘ཨིངྒྷ པསྶ མཧཱཔཉྙ, མོགྒལླཱན མཧིདྡྷིཀ;

ཀརོམི རངྒཾ པརིསཱཡ, ཧཱསཡཱམི མཧཱཛན’’ནྟི.

ཨེཝཉྩ པན ཝཏྭཱ ཝཾསམཏྠཀཏོ ཝེཧཱསཾ ཨབྦྷུགྒནྟྭཱ ཨཱཀཱསེཝ ཙུདྡསཀྑཏྟུཾ པརིཝཏྟིཏྭཱ ཨོརུཡ྄ཧ ཝཾསམཏྠཀེཝ ཨཊྛཱསི. ཨཐ ནཾ སཏྠཱ, ‘‘ཨུགྒསེན, པཎྜིཏེན ནཱམ ཨཏཱིཏཱནཱགཏཔཙྩུཔྤནྣེསུ ¶ ཁནྡྷེསུ ཨཱལཡཾ པཧཱཡ ཛཱཏིཨཱདཱིཧི མུཙྩིཏུཾ ཝཊྚཏཱི’’ཏི ཝཏྭཱ ཨིམཾ གཱཐམཱཧ –

ཏཏྠ ¶ མུཉྩ པུརེཏི ཨཏཱིཏེསུ ཁནྡྷེསུ ཨཱལཡཾ ནིཀནྟིཾ ཨཛ྄ཛྷོསཱནཾ པཏྠནཾ པརིཡུཊྛཱནཾ གཱཧཾ པརཱམཱསཾ ཏཎྷཾ མུཉྩ. པཙྪཏོཏི ཨནཱགཏེསུཔི ཁནྡྷེསུ ཨཱལཡཱདཱིནི མུཉྩ. མཛ྄ཛྷེཏི པཙྩུཔྤནྣེསུཔི ཏཱནི མུཉྩ. བྷཝསྶ པཱརགཱུཏི ཨེཝཾ སནྟེ ཏིཝིདྷསྶཱཔི བྷཝསྶ ཨབྷིཉྙཱཔརིཉྙཱཔཧཱནབྷཱཝནཱསཙྪིཀིརིཡཝསེན པཱརགཱུ པཱརངྒཏོ ཧུཏྭཱ ཁནྡྷདྷཱཏུཨཱཡཏནཱདིབྷེདེ སབྦསངྑཏེ ཝིམུཏྟམཱནསོ ཝིཧརནྟོ པུན ཛཱཏིཛརཱམརཎཱནི ན ཨུཔགཙྪཏཱིཏི ཨཏྠོ.

དེསནཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི. སེཊྛིཔུཏྟོཔི ཝཾསམཏྠཀེ ཋིཏཀོཝ སཧ པཊིསམྦྷིདཱཧི ཨརཧཏྟཾ པཏྭཱ ཝཾསཏོ ཨོརུཡ྄ཧ སཏྠུ སནྟིཀཾ ཨཱགནྟྭཱ པཉྩཔཏིཊྛིཏེན སཏྠཱརཾ ཝནྡིཏྭཱ པབྦཛྫཾ ཡཱཙི. ཨཐ ནཾ སཏྠཱ དཀྑིཎཧཏྠཾ པསཱརེཏྭཱ ‘‘ཨེཧི བྷིཀྑཱུ’’ཏི ཨཱཧ. སོ ཏཱཝདེཝ ཨཊྛཔརིཀྑཱརདྷརོ སཊྛིཝསྶིཀཏྠེརོ ཝིཡ ཨཧོསི. ཨཐ ནཾ བྷིཀྑཱུ, ‘‘ཨཱཝུསོ ཨུགྒསེན, སཊྛིཧཏྠསྶ ཏེ ཝཾསསྶ མཏྠཀཏོ ཨོཏརནྟསྶ བྷཡཾ ནཱམ ནཱཧོསཱི’’ཏི པུཙྪིཏྭཱ ‘‘ནཏྠི མེ, ཨཱཝུསོ, བྷཡ’’ནྟི ཝུཏྟེ སཏྠུ ཨཱརོཙེསུཾ, ‘‘བྷནྟེ, ཨུགྒསེནོ ¶ ‘ན བྷཱཡཱམཱི’ཏི ཝདཏི, ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི. སཏྠཱ ‘‘ན, བྷིཀྑཝེ, མམ པུཏྟེན ཨུགྒསེནེན སདིསཱ ཚིནྣསཾཡོཛནཱ བྷིཀྑཱུ བྷཱཡནྟི, ན ཏསནྟཱི’’ཏི ཝཏྭཱ བྲཱཧྨཎཝགྒེ ཨིམཾ གཱཐམཱཧ –

‘‘སབྦསཾཡོཛནཾ ¶ ཚེཏྭཱ, ཡོ ཝེ ན པརིཏསྶཏི;

སངྒཱཏིགཾ ཝིསཾཡུཏྟཾ, ཏམཧཾ བྲཱུམི བྲཱཧྨཎ’’ནྟི. (དྷ. པ. ༣༩༧; སུ. ནི. ༦༢༦);

དེསནཱཝསཱནེ བཧཱུནཾ དྷམྨཱབྷིསམཡོ ཨཧོསི. པུནེཀདིཝསཾ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཀིཾ ནུ ཁོ, ཨཱཝུསོ, ཨེཝཾ ཨརཧཏྟཱུཔནིསྶཡསམྤནྣསྶ བྷིཀྑུནོ ནཊདྷཱིཏརཾ ནིསྶཱཡ ¶ ནཊེཧི སདྡྷིཾ ཝིཙརཎཀཱརཎཾ, ཀིཾ ཨརཧཏྟཱུཔནིསྶཡཀཱརཎ’’ནྟི? སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཨུབྷཡམྤེཏཾ ཨིམིནཱ ཨེཝ ཀཏ’’ནྟི ཝཏྭཱ ཏམཏྠཾ པཀཱསེཏུཾ ཨཏཱིཏཾ ཨཱཧརི.

ཨཏཱིཏེ ཀིར ཀསྶཔདསབལསྶ སུཝཎྞཙེཏིཡེ ཀརིཡམཱནེ བཱརཱཎསིཝཱསིནོ ཀུལཔུཏྟཱ བཧུཾ ཁཱདནཱིཡབྷོཛནཱིཡཾ ཡཱནཀེསུ ཨཱརོཔེཏྭཱ ‘‘ཧཏྠཀམྨཾ ཀརིསྶཱམཱ’’ཏི ཙེཏིཡཊྛཱནཾ གཙྪནྟཱ ཨནྟརཱམགྒེ ཨེཀཾ ཐེརཾ པིཎྜཱཡ པཝིསནྟཾ པསྶིཾསུ. ཨཐེཀཱ ཀུལདྷཱིཏཱ ཐེརཾ ཨོལོཀེཏྭཱ སཱམིཀཾ ཨཱཧ – ‘‘སཱམི, ཨཡྻོ, པིཎྜཱཡ པཝིསཏི, ཡཱནཀེ ཙ ནོ བཧུཾ ཁཱདནཱིཡཾ བྷོཛནཱིཡཾ, པཏྟམསྶ ཨཱཧར, བྷིཀྑཾ དསྶཱམཱ’’ཏི. སོ ཏཾ པཏྟཾ ཨཱཧརིཏྭཱ ཁཱདནཱིཡབྷོཛནཱིཡསྶ པཱུརེཏྭཱ ཐེརསྶ ཧཏྠེ པཏིཊྛཔེཏྭཱ ཨུབྷོཔི པཏྠནཾ ཀརིཾསུ, ‘‘བྷནྟེ, ཏུམྷེཧི དིཊྛདྷམྨསྶེཝ བྷཱགིནོ བྷཝེཡྻཱམཱ’’ཏི. སོཔི ཐེརོ ཁཱིཎཱསཝོཝ, ཏསྨཱ ཨོལོཀེནྟོ ཏེསཾ པཏྠནཱཡ སམིཛ྄ཛྷནབྷཱཝཾ ཉཏྭཱ སིཏཾ ཨཀཱསི. ཏཾ དིསྭཱ སཱ ཨིཏྠཱི སཱམིཀཾ ཨཱཧ – ‘‘ཨམྷཱཀཾ, ཨཡྻོ, སིཏཾ ཀརོཏི, ཨེཀོ ནཊཀཱརཀོ ¶ བྷཝིསྶཏཱི’’ཏི. སཱམིཀོཔིསྶཱ ‘‘ཨེཝཾ བྷཝིསྶཏི, བྷདྡེ’’ཏི ཝཏྭཱ པཀྐཱམི. ཨིདཾ ཏེསཾ པུབྦཀམྨཾ. ཏེ ཏཏྠ ཡཱཝཏཱཡུཀཾ ཋཏྭཱ དེཝལོཀེ ནིབྦཏྟིཏྭཱ ཏཏོ ཙཝིཏྭཱ སཱ ཨིཏྠཱི ནཊགེཧེ ནིབྦཏྟི, པུརིསོ སེཊྛིགེཧེ. སོ ‘‘ཨེཝཾ, བྷདྡེ, བྷཝིསྶཏཱི’’ཏི ཏསྶཱ པཊིཝཙནསྶ དིནྣཏྟཱ ནཊེཧི སདྡྷིཾ ཝིཙརི. ཁཱིཎཱསཝཏྠེརསྶ ¶ དིནྣཔིཎྜཔཱཏཾ ནིསྶཱཡ ཨརཧཏྟཾ པཱཔུཎི. སཱཔི ནཊདྷཱིཏཱ ‘‘ཡཱ མེ སཱམིཀསྶ གཏི, མཡ྄ཧམྤི སཱ ཨེཝ གཏཱི’’ཏི པབྦཛིཏྭཱ ཨརཧཏྟེ པཏིཊྛཧཱིཏི.

ཝིཏཀྐམཐིཏསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཙཱུལ༹དྷནུགྒཧཔཎྜིཏཾ ཨཱརབྦྷ ཀཐེསི.

ཨེཀོ ཀིར དཧརབྷིཀྑུ སལཱཀགྒེ ཨཏྟནོ པཏྟསལཱཀཾ གཧེཏྭཱ སལཱཀཡཱགུཾ ཨཱདཱཡ ཨཱསནསཱལཾ གནྟྭཱ པིཝི. ཏཏྠ ཨུདཀཾ ཨལབྷིཏྭཱ ཨུདཀཏྠཱཡ ཨེཀཾ གྷརཾ ཨགམཱསི. ཏཏྠ ཏཾ ཨེཀཱ ཀུམཱརིཀཱ དིསྭཱཝ ཨུཔྤནྣསིནེཧཱ, ‘‘བྷནྟེ, པུན པཱནཱིཡེན ཨཏྠེ སཏི ཨིདྷེཝ ཨཱགཙྪེཡྻཱཐཱ’’ཏི ཨཱཧ. སོ ཏཏོ པཊྛཱཡ ཡདཱ པཱནཱིཡཾ ན ལབྷཏི, ཏདཱ ཏཏྠེཝ གཙྪཏི. སཱཔིསྶ ¶ པཏྟཾ གཧེཏྭཱ པཱནཱིཡཾ དེཏི. ཨེཝཾ གཙྪནྟེ ཀཱལེ ཡཱགུམྤི དཏྭཱ པུནེཀདིཝསཾ ཏཏྠེཝ ནིསཱིདཱཔེཏྭཱ བྷཏྟཾ ཨདཱསི. སནྟིཀེ ཙསྶ ནིསཱིདིཏྭཱ ¶ , ‘‘བྷནྟེ, ཨིམསྨིཾ གེཧེ ན ཀིཉྩི ནཏྠི ནཱམ, ཀེཝལཾ མཡཾ ཝིཙརཎཀམནུསྶམེཝ ན ལབྷཱམཱ’’ཏི ཀཐཾ སམུཊྛཱཔེསི. སོ ཀཐིཔཱཧེནེཝ ཏསྶཱ ཀཐཾ སུཏྭཱ ཨུཀྐཎྛི. ཨཐ ནཾ ཨེཀདིཝསཾ ཨཱགནྟུཀཱ བྷིཀྑཱུ དིསྭཱ ‘‘ཀསྨཱ ཏྭཾ, ཨཱཝུསོ, ཀིསོ ཨུཔྤཎྜུཔཎྜུཀཛཱཏོསཱི’’ཏི པུཙྪིཏྭཱ ‘‘ཨུཀྐཎྛིཏོམྷི, ཨཱཝུསོ’’ཏི ཝུཏྟེ ཨཱཙརིཡུཔཛ྄ཛྷཱཡཱནཾ སནྟིཀཾ ནཡིཾསུ. ཏེཔི ནཾ སཏྠུ སནྟིཀཾ ནེཏྭཱ ཏམཏྠཾ ཨཱརོཙེསུཾ. སཏྠཱ ‘‘སཙྩཾ ཀིར ཏྭཾ, བྷིཀྑུ, ཨུཀྐཎྛིཏོསཱི’’ཏི པུཙྪིཏྭཱ ‘‘སཙྩ’’ནྟི ཝུཏྟེ ‘‘ཀསྨཱ ཏྭཾ མཱདིསསྶ ཨཱརདྡྷཝཱིརིཡསྶ བུདྡྷསྶ སཱསནེ པབྦཛིཏྭཱ ‘སོཏཱཔནྣོ’ཏི ཝཱ ‘སཀདཱགཱམཱི’ཏི ཝཱ ཨཏྟཱནཾ ཨཝདཱཔེཏྭཱ ‘ཨུཀྐཎྛིཏོ’ཏི ཝདཱཔེསི, བྷཱརིཡཾ ཏེ ཀམྨཾ ཀཏ’’ནྟི ཝཏྭཱ ‘‘ཀིཾ ཀཱརཎཱ ཨུཀྐཎྛིཏོསཱི’’ཏི པུཙྪི. ‘‘བྷནྟེ, ཨེཀཱ མཾ ཨིཏྠཱི ཨེཝམཱཧཱ’’ཏི ཝུཏྟེ, ‘‘བྷིཀྑུ, ཨནཙྪརིཡཾ ཨེཏཾ ཏསྶཱ ཀིརིཡཾ. སཱ ཧི པུབྦེ སཀལཛམྦུདཱིཔེ ཨགྒདྷནུགྒཧཔཎྜིཏཾ པཧཱཡ ཏཾམུཧུཏྟདིཊྛཀེ ཨེཀསྨིཾ སིནེཧཾ ཨུཔྤཱདེཏྭཱ ཏཾ ¶ ཛཱིཝིཏཀྑཡཾ པཱཔེསཱི’’ཏི ཝཏྭཱ ཏསྶཏྠསྶ པཀཱསནཏྠཾ བྷིཀྑཱུཧི ཡཱཙིཏོ –

ཨཏཱིཏེ ཙཱུལ༹དྷནུགྒཧཔཎྜིཏཀཱལེ ཏཀྐསིལཱཡཾ དིསཱཔཱམོཀྑསྶ ཨཱཙརིཡསྶ སནྟིཀེ སིཔྤཾ ཨུགྒཧེཏྭཱ ཏེན ཏུཊྛེན དིནྣཾ དྷཱིཏརཾ ཨཱདཱཡ བཱརཱཎསིཾ གཙྪནྟསྶ ཨེཀསྨིཾ ཨཊཝིམུཁེ ཨེཀཱུནཔཉྙཱསཱཡ ཀཎྜེཧི ཨེཀཱུནཔཉྙཱསཙོརེ མཱརེཏྭཱ ཀཎྜེསུ ཁཱིཎེསུ ཙོརཛེཊྛཀཾ གཧེཏྭཱ བྷཱུམིཡཾ པཱཏེཏྭཱ, ‘‘བྷདྡེ, ཨསིཾ ཨཱཧརཱ’’ཏི ཝུཏྟེ ཏཱཡ ཏངྑཎཾ དིཊྛཙོརེ སིནེཧཾ ཀཏྭཱ ཙོརསྶ ཧཏྠེ ཨསིཐརུཾ ཋཔེཏྭཱ ཙོརེན དྷནུགྒཧཔཎྜིཏསྶ མཱརིཏབྷཱཝཾ ཨཱཝིཀཏྭཱ ཙོརེན ཙ ཏཾ ཨཱདཱཡ གཙྪནྟེན ‘‘མམྤི ཨེསཱ ཨཉྙཾ དིསྭཱ ཨཏྟནོ སཱམིཀཾ ཝིཡ མཱརཱཔེསྶཏི ¶ , ཀིཾ མེ ཨིམཱཡཱ’’ཏི ཨེཀཾ ནདིཾ དིསྭཱ ཨོརིམཏཱིརེ ཏཾ ཋཔེཏྭཱ ཏསྶཱ བྷཎྜཀཾ ཨཱདཱཡ ‘‘ཏྭཾ ཨིདྷེཝ ཧོཧི, ཡཱཝཱཧཾ བྷཎྜིཀཾ ཨུཏྟཱརེམཱི’’ཏི ཏཏྠེཝ ཏཾ པཧཱཡ གམནབྷཱཝཉྩ ཨཱཝིཀཏྭཱ –

‘‘སབྦཾ བྷཎྜཾ སམཱདཱཡ, པཱརཾ ཏིཎྞོསི བྲཱཧྨཎ;

པཙྩཱགཙྪ ལཧུཾ ཁིཔྤཾ, མམྤི ཏཱརེཧི དཱནིཏོ.

‘‘ཀཱཡཾ ¶ ཨེལ༹གལཱགུམྦེ, ཀརོཏི ཨཧུཧཱསིཡཾ;

ནཡཱིདྷ ནཙྩཾ ཝཱ གཱིཏཾ ཝཱ, ཏཱལ༹ཾ ཝཱ སུསམཱཧིཏཾ;

ཨནམྷིཀཱལེ སུསོཎི, ཀིཾ ནུ ཛགྒྷསི སོབྷནེ.

‘‘སིངྒཱལ བཱལ དུམྨེདྷ, ཨཔྤཔཉྙོསི ཛམྦུཀ;

ཛཱིནོ མཙྪཉྩ པེསིཉྩ, ཀཔཎོ ཝིཡ ཛྷཱཡསི.

‘‘སུདསྶཾ ཝཛྫམཉྙེསཾ, ཨཏྟནོ པན དུདྡསཾ;

ཛཱིནཱ པཏིཉྩ ཛཱརཉྩ, མཉྙེ ཏྭཉྙེཝ ཛྷཱཡསི.

‘‘ཨེཝམེཏཾ ¶ མིགརཱཛ, ཡཐཱ བྷཱསསི ཛམྦུཀ;

སཱ ནཱུནཱཧཾ ཨིཏོ གནྟྭཱ, བྷཏྟུ ཧེསྶཾ ཝསཱནུགཱ.

‘‘ཡོ ཧརེ མཏྟིཀཾ ཐཱལཾ, ཀཾསཐཱལམྤི སོ ཧརེ;

ཀཏཉྩེཝ ཏཡཱ པཱཔཾ, པུནཔེཝཾ ཀརིསྶསཱི’’ཏི. (ཛཱ. ༡.༥.༡༢༨-༡༣༤) –

ཨིམཾ པཉྩཀནིཔཱཏེ ཙཱུལ༹དྷནུགྒཧཛཱཏཀཾ ཝིཏྠཱརེཏྭཱ ‘‘ཏདཱ ཙཱུལ༹དྷནུགྒཧཔཎྜིཏོ ཏྭཾ ཨཧོསི, སཱ ཨིཏྠཱི ཨེཏརཧི ¶ ཨཡཾ ཀུམཱརིཀཱ, སིངྒཱལརཱུཔེན ཨཱགནྟྭཱ ཏསྶཱ ནིགྒཧཀཱརཀོ སཀྐོ དེཝརཱཛཱ ཨཧམེཝཱ’’ཏི ཝཏྭཱ ‘‘ཨེཝཾ སཱ ཨིཏྠཱི ཏཾམུཧུཏྟདིཊྛཀེ ཨེཀསྨིཾ སིནེཧེན སཀལཛམྦུདཱིཔེ ཨགྒཔཎྜིཏཾ ཛཱིཝིཏཱ ཝོརོཔེསི, ཏཾ ཨིཏྠིཾ ཨཱརབྦྷ ཨུཔྤནྣཾ ཏཝ ཏཎྷཾ ཚིནྡིཏྭཱ ཝིཧརཱཧི བྷིཀྑཱུ’’ཏི ཏཾ ཨོཝདིཏྭཱ ཨུཏྟརིམྤི དྷམྨཾ དེསེནྟོ ཨིམཱ དྭེ གཱཐཱ ཨབྷཱསི –

ཏཏྠ ཝིཏཀྐམཐིཏསྶཱཏི ཀཱམཝིཏཀྐཱདཱིཧི ཝིཏཀྐེཧི ནིམྨཐིཏསྶ. ཏིབྦརཱགསྶཱཏི བཧལརཱགསྶ. སུབྷཱནུཔསྶིནོཏི ཨིཊྛཱརམྨཎེ སུབྷནིམིཏྟགཱཧཱདིཝསེན ཝིསྶཊྛམཱནསཏཱཡ སུབྷནྟི ཨནུཔསྶནྟསྶ. ཏཎྷཱཏི ཨེཝརཱུཔསྶ ཛྷཱནཱདཱིསུ ཨེཀམྤི ན ཝཌྜྷཏི, ཨཐ ཁོ ཚདྭཱརིཀཱ ཏཎྷཱཡེཝ བྷིཡྻོ ཝཌྜྷཏི. ཨེས ཁོཏི ཨེསོ པུགྒལོ ཏཎྷཱབནྡྷནཾ དལ༹ྷཾ སུཐིརཾ ཀརོཏི. ཝིཏཀྐཱུཔསམེཏི མིཙྪཱཝིཏཀྐཱདཱིནཾ ཝཱུཔསམསངྑཱཏེ དསསུ ཨསུབྷེསུ པཋམཛ྄ཛྷཱནེ. སདཱ སཏོཏི ¶ ཡོ ཨེཏྠ ཨབྷིརཏོ ཧུཏྭཱ ནིཙྩཾ ཨུཔཊྛིཏསཏིཏཱཡ སཏོ ཏཾ ཨསུབྷཛྷཱནཾ བྷཱཝེཏི. བྱནྟི ཀཱཧིཏཱིཏི ཨེས ¶ བྷིཀྑུ ཏཱིསུ བྷཝེསུ ཨུཔྤཛྫནཀཾ ཏཎྷཾ ཝིགཏནྟཾ ཀརིསྶཏི. མཱརབནྡྷནནྟི ཨེསོ ཏེབྷཱུམཀཝཊྚསངྑཱཏཾ མཱརབནྡྷནམྤི ཚིནྡིསྶཏཱིཏི ཨཏྠོ.

དེསནཱཝསཱནེ སོ བྷིཀྑུ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ནིཊྛངྒཏོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཱརཾ ཨཱརབྦྷ ཀཐེསི.

ཨེཀདིཝསཉྷི ཝིཀཱལེ སམྦཧུལཱ ཐེརཱ ཛེཏཝནཝིཧཱརཾ པཝིསིཏྭཱ རཱཧུལཏྠེརསྶ ཝསནཊྛཱནཾ གནྟྭཱ ཏཾ ཨུཊྛཱཔེསུཾ. སོ ཨཉྙཏྠ ཝསནཊྛཱནཾ ཨཔསྶནྟོ ཏཐཱགཏསྶ གནྡྷཀུཊིཡཱ པམུཁེ ནིཔཛྫི. ཏདཱ སོ ཨཱཡསྨཱ ཨརཧཏྟཾ པཏྟོ ཨཝསྶིཀོཝ ཧོཏི. མཱརོ ཝསཝཏྟིབྷཝནེ ཋིཏོཡེཝ ཏཾ ཨཱཡསྨནྟཾ གནྡྷཀུཊིཔམུཁེ ནིཔནྣཾ དིསྭཱ ཙིནྟེསི – ‘‘སམཎསྶ གོཏམསྶ རུཛནཀཨངྒུལཱི བཧི ནིཔནྣོ, སཡཾ ཨནྟོགནྡྷཀུཊིཡཾ ནིཔནྣོ, ཨངྒུལིཡཱ པཱིལི༹ཡམཱནཱཡ སཡམྤི ¶ པཱིལི༹ཏོ བྷཝིསྶཏཱི’’ཏི. སོ མཧནྟཾ ཧཏྠིརཱཛཝཎྞཾ ཨབྷིནིམྨིནིཏྭཱ ཨཱགམྨ སོཎྜཱཡ ཐེརསྶ མཏྠཀཾ པརིཀྑིཔིཏྭཱ མཧནྟེན སདྡེན ཀོཉྩནཱདཾ རཝི. སཏྠཱ གནྡྷཀུཊིཡཾ ནིསིནྣོཝ ཏསྶ མཱརབྷཱཝཾ ཉཏྭཱ, ‘‘མཱར, ཏཱདིསཱནཾ སཏསཧསྶེནཱཔི མམ པུཏྟསྶ བྷཡཾ ཨུཔྤཱདེཏུཾ ན སཀྐཱ. པུཏྟོ ཧི མེ ཨསནྟཱསཱི ཝཱིཏཏཎྷོ མཧཱཝཱིརིཡོ མཧཱཔཉྙོ’’ཏི ཝཏྭཱ ཨིམཱ གཱཐཱ ཨབྷཱསི –

‘‘ནིཊྛངྒཏོ ¶ ཨསནྟཱསཱི, ཝཱིཏཏཎྷོ ཨནངྒཎོ;

ཨཙྪིནྡི བྷཝསལླཱནི, ཨནྟིམོཡཾ སམུསྶཡོ.

‘‘ཝཱིཏཏཎྷོ ཨནཱདཱནོ, ནིརུཏྟིཔདཀོཝིདོ;

ཨཀྑརཱནཾ སནྣིཔཱཏཾ, ཛཉྙཱ པུབྦཱཔརཱནི ཙ;

མཧཱཔཉྙོ མཧཱཔུརིསོཏི ཝུཙྩཏཱི’’ཏི.

ཏཏྠ ¶ ནིཊྛངྒཏོཏི ཨིམསྨིཾ སཱསནེ པབྦཛིཏཱནཾ ཨརཧཏྟཾ ནིཊྛཾ ནཱམ, ཏཾ གཏོ པཏྟོཏི ཨཏྠོ. ཨསནྟཱསཱིཏི ཨབྦྷནྟརེ རཱགསནྟཱསཱདཱིནཾ ཨབྷཱཝེན ཨསནྟསནཀོ. ཨཙྪིནྡི བྷཝསལླཱནཱིཏི སབྦཱནིཔི བྷཝགཱམཱིནི སལླཱནི ཨཙྪིནྡི. སམུསྶཡོཏི ཨཡཾ ཨེཏསྶ ཨནྟིམོ དེཧོ.

ཨནཱདཱནོཏི ཁནྡྷཱདཱིསུ ནིགྒཧཎོ. ནིརུཏྟིཔདཀོཝིདོཏི ནིརུཏྟིཡཉྩ སེསཔདེསུ ཙཱཏི ཙཏཱུསུཔི པཊིསམྦྷིདཱསུ ཚེཀོཏི ཨཏྠོ. ཨཀྑརཱནཾ སནྣིཔཱཏཾ, ཛཉྙཱ པུབྦཱཔརཱནི ཙཱཏི ཨཀྑརཱནཾ སནྣིཔཱཏསངྑཱཏཾ ཨཀྑརཔིཎྜཉྩ ཛཱནཱཏི, པུབྦཀྑརེན ཨཔརཀྑརཾ, ཨཔརཀྑརེན པུབྦཀྑརཉྩ ཛཱནཱཏི. པུབྦཀྑརེན ཨཔརཀྑརཾ ཛཱནཱཏི ནཱམ – ཨཱདིམྷི པཉྙཱཡམཱནེ མཛ྄ཛྷཔརིཡོསཱནེསུ ¶ ཨཔཉྙཱཡམཱནེསུཔི ‘‘ཨིམེསཾ ཨཀྑརཱནཾ ཨིདཾ མཛ྄ཛྷཾ, ཨིདཾ པརིཡོསཱན’’ནྟི ཛཱནཱཏི. ཨཔརཀྑརེན པུབྦཀྑརཾ ཛཱནཱཏི ནཱམ – ཨནྟེ པཉྙཱཡམཱནེ ཨཱདིམཛ྄ཛྷེསུ ཨཔཉྙཱཡམཱནེསུ ‘‘ཨིམེསཾ ཨཀྑརཱནཾ ཨིདཾ མཛ྄ཛྷཾ, ཨཡཾ ཨཱདཱི’’ཏི ཛཱནཱཏི. མཛ྄ཛྷེ པཉྙཱཡམཱནེཔི ‘‘ཨིམེསཾ ཨཀྑརཱནཾ ཨཡཾ ཨཱདི, ཨཡཾ ཨནྟོ’’ཏི ཛཱནཱཏི. ཨེཝཾ མཧཱཔཉྙོ. ས ཝེ ཨནྟིམསཱརཱིརོཏི ཨེས ཀོཊིཡཾ ཋིཏསརཱིརོ, མཧནྟཱནཾ ཨཏྠདྷམྨནིརུཏྟིཔཊིབྷཱནཱནཾ སཱིལཀྑནྡྷཱདཱིནཉྩ པརིགྒཱཧིཀཱཡ པཉྙཱཡ སམནྣཱགཏཏྟཱ མཧཱཔཉྙོ, ‘‘ཝིམུཏྟཙིཏྟཏྟཱ ཁྭཱཧཾ, སཱརིཔུཏྟ, མཧཱཔུརིསོཏི ཝདཱམཱི’’ཏི (སཾ. ནི. ༥.༣༧༧) ཝཙནཏོ ཝིམུཏྟཙིཏྟཏཱཡ ཙ མཧཱཔུརིསོཏི ཝུཙྩཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ. མཱརོཔི པཱཔིམཱ ‘‘ཛཱནཱཏི མཾ སམཎོ གོཏམོ’’ཏི ཏཏྠེཝནྟརདྷཱཡཱིཏི.

སབྦཱབྷིབྷཱུཏི ¶ ཨིམཾ དྷམྨདེསནཾ སཏྠཱ ཨནྟརཱམགྒེ ཨུཔཀཾ ཨཱཛཱིཝཀཾ ཨཱརབྦྷ ཀཐེསི.

ཨེཀསྨིཉྷི སམཡེ སཏྠཱ པཏྟསབྦཉྙུཏཉྙཱཎོ བོདྷིམཎྜེ ¶ སཏྟསཏྟཱཧཾ ཝཱིཏིནཱམེཏྭཱ ཨཏྟནོ པཏྟཙཱིཝརམཱདཱཡ དྷམྨཙཀྐཔཝཏྟནཏྠཾ བཱརཱཎསིཾ སནྡྷཱཡ ཨཊྛཱརསཡོཛནམགྒཾ པཊིཔནྣོ ཨནྟརཱམགྒེ ཨུཔཀཾ ཨཱཛཱིཝཀཾ ¶ ཨདྡས. སོཔི སཏྠཱརཾ དིསྭཱ ‘‘ཝིཔྤསནྣཱནི ཁོ ཏེ, ཨཱཝུསོ, ཨིནྡྲིཡཱནི, པརིསུདྡྷོ ཚཝིཝཎྞོ པརིཡོདཱཏོ, ཀཾསི ཏྭཾ, ཨཱཝུསོ, ཨུདྡིསྶ པབྦཛིཏོ, ཀོ ཝཱ ཏེ སཏྠཱ, ཀསྶ ཝཱ ཏྭཾ དྷམྨཾ རོཙེསཱི’’ཏི པུཙྪི. ཨཐསྶ སཏྠཱ ‘‘མཡ྄ཧཾ ཨུཔཛ྄ཛྷཱཡོ ཝཱ ཨཱཙརིཡོ ཝཱ ནཏྠཱི’’ཏི ཝཏྭཱ ཨིམཾ གཱཐམཱཧ –

ཏཏྠ སབྦཱབྷིབྷཱུཏི སབྦེསཾ ཏེབྷཱུམཀདྷམྨཱནཾ ཨབྷིབྷཝནཏོ སབྦཱབྷིབྷཱུ. སབྦཝིདཱུཏི ཝིདིཏསབྦཙཏུབྷཱུམཀདྷམྨོ. སབྦེསུ དྷམྨེསཱུཏི སབྦེསུཔི ཏེབྷཱུམཀདྷམྨེསུ ཏཎྷཱདིཊྛཱིཧི ཨནཱུཔལིཏྟོ. སབྦཉྫཧོཏི སབྦེ ཏེབྷཱུམཀདྷམྨེ ཛཧིཏྭཱ ཋིཏོ. ཏཎྷཀྑཡེ ཝིམུཏྟོཏི ཏཎྷཀྑཡནྟེ ཨུཔྤཱདིཏེ ཏཎྷཀྑཡསངྑཱཏེ ཨརཧཏྟེ ཨསེཁཱཡ ཝིམུཏྟིཡཱ ཝིམུཏྟོ. སཡཾ ཨབྷིཉྙཱཡཱཏི ཨབྷིཉྙེཡྻཱདིབྷེདེ དྷམྨེ སཡམེཝ ཛཱནིཏྭཱ. ཀམུདྡིསེཡྻནྟི ‘‘ཨཡཾ མེ ཨུཔཛ྄ཛྷཱཡོ ཝཱ ཨཱཙརིཡོ ཝཱ’’ཏི ཀཾ ནཱམ ཨུདྡིསེཡྻནྟི.

དེསནཱཝསཱནེ ཨུཔཀོ ཨཱཛཱིཝཀོ ཏཐཱགཏསྶ ཝཙནཾ ནེཝཱབྷིནནྡི, ན པཊིཀྐོསི. སཱིསཾ པན ཙཱལེཏྭཱ ཛིཝ྄ཧཾ ནིལླཱལེ༹ཏྭཱ ཨེཀཔདིཀམགྒཾ གཧེཏྭཱ ཨཉྙཏརཾ ལུདྡཀནིཝཱསནཊྛཱནཾ ཨགམཱསཱིཏི.

སབྦདཱནནྟི ¶ ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཀྐཾ དེཝརཱཛཱནཾ ཨཱརབྦྷ ཀཐེསི.

ཨེཀསྨིཉྷི ¶ སམཡེ ཏཱཝཏིཾསདེཝལོཀེ དེཝཏཱ སནྣིཔཏིཏྭཱ ཙཏྟཱརོ པཉྷེ སམུཊྛཱཔེསུཾ ‘‘ཀཏརཾ དཱནཾ ནུ ཁོ དཱནེསུ, ཀཏརོ རསོ རསེསུ, ཀཏརཱ རཏི རཏཱིསུ ཛེཊྛཀཱ, ཏཎྷཀྑཡོཝ ཀསྨཱ ཛེཊྛཀོཏི ཝུཙྩཏཱི’’ཏི? ཏེ པཉྷེ ཨེཀཱ དེཝཏཱཔི ཝིནིཙྪིཏུཾ ནཱསཀྑི. ཨེཀོ པན དེཝོ ཨེཀཾ དེཝཾ, སོཔི ཨཔརནྟི ཨེཝཾ ཨཉྙམཉྙཾ པུཙྪནྟཱ དསསུ ཙཀྐཝཱལ༹སཧསྶེསུ དྭཱདས སཾཝཙྪརཱནི ཝིཙརིཾསུ. ཨེཏྟཀེནཱཔི ཀཱལེན པཉྷཱནཾ ཨཏྠཾ ཨདིསྭཱ དསསཧསྶཙཀྐཝཱལ༹དེཝཏཱ སནྣིཔཏིཏྭཱ ཙཏུནྣཾ མཧཱརཱཛཱནཾ སནྟིཀཾ གནྟྭཱ ‘‘ཀིཾ, ཏཱཏཱ, མཧཱདེཝཏཱསནྣིཔཱཏོ’’ཏི ཝུཏྟེ ‘‘ཙཏྟཱརོ པཉྷེ སམུཊྛཱཔེཏྭཱ ཝིནིཙྪིཏུཾ ཨསཀྐོནྟཱ ཏུམྷཱཀཾ སནྟིཀཾ ཨཱགཏམྷཱ’’ཏི. ‘‘ཀིཾ པཉྷཾ ནཱམེཏཾ, ཏཱཏཱ’’ཏི. ‘‘དཱནརསརཏཱིསུ ཀཏམཱ དཱནརསརཏཱི ནུ ཁོ སེཊྛཱ, ཏཎྷཀྑཡོཝ ཀསྨཱ སེཊྛོ’’ཏི ཨིམེ པཉྷེ ཝིནིཙྪིཏུཾ ཨསཀྐོནྟཱ ཨཱགཏམྷཱཏི. ཏཱཏཱ, མཡམྤི ཨིམེསཾ ཨཏྠེ ན ཛཱནཱམ, ཨམྷཱཀཾ པན རཱཛཱ ཛནསཧསྶེན ཙིནྟིཏེ ཨཏྠེ ཙིནྟེཏྭཱ ཏངྑཎེནེཝ ཛཱནཱཏི, སོ ཨམྷེཧི པཉྙཱཡ ཙ པུཉྙེན ཙ ཝིསིཊྛོ, ཨེཐ, ཏསྶ སནྟིཀཾ གཙྪཱམཱཏི ཏམེཝ དེཝགཎཾ ཨཱདཱཡ སཀྐསྶ དེཝརཉྙོ སནྟིཀཾ གནྟྭཱ ཏེནཱཔི ‘‘ཀིཾ, ཏཱཏཱ, མཧནྟོ དེཝསནྣིཔཱཏོ’’ཏི ཝུཏྟེ ཏམཏྠཾ ཨཱརོཙེསུཾ. ‘‘ཏཱཏཱ, ཨིམེསཾ པཉྷཱནཾ ཨཏྠཾ ཨཉྙོཔི ཛཱནིཏུཾ ན སཀྐོཏི, བུདྡྷཝིསཡཱ ཧེཏེ. སཏྠཱ པནེཏརཧི ཀཧཾ ཝིཧརཏཱི’’ཏི པུཙྪིཏྭཱ ‘‘ཛེཏཝནེ’’ཏི སུཏྭཱ ‘‘ཨེཐ, ཏསྶ སནྟིཀཾ གམིསྶཱམཱ’’ཏི དེཝགཎེན སདྡྷིཾ རཏྟིབྷཱགེ སཀལཾ ཛེཏཝནཾ ¶ ཨོབྷཱསེཏྭཱ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ཋིཏོ ‘‘ཀིཾ, མཧཱརཱཛ, མཧཏཱ དེཝསངྒྷེན ཨཱགཏོསཱི’’ཏི ཝུཏྟེ, ‘‘བྷནྟེ, དེཝགཎེན ཨིམེ ནཱམ པཉྷཱ སམུཊྛཱཔིཏཱ, ཨཉྙོ ཨིམེསཾ ཨཏྠཾ ཛཱནིཏུཾ སམཏྠོ ནཱམ ནཏྠི, ཨིམེསཾ ནོ ཨཏྠཾ པཀཱསེཐཱ’’ཏི ཨཱཧ.

སཏྠཱ ‘‘སཱདྷུ མཧཱརཱཛ, མཡཱ ཧི པཱརམིཡོ པཱུརེཏྭཱ མཧཱཔརིཙྩཱགེ པརིཙྩཛིཏྭཱ ཏུམྷཱདིསཱནཾ ཀངྑཙྪེདནཏྠམེཝ སབྦཉྙུཏཉྙཱཎཾ པཊིཝིདྡྷཾ, ཏཡཱ པུཙྪིཏཔཉྷེསུ ཧི སབྦདཱནཱནཾ དྷམྨདཱནཾ སེཊྛཾ, སབྦརསཱནཾ དྷམྨརསོ སེཊྛོ, སབྦརཏཱིནཾ དྷམྨརཏི སེཊྛཱ, ཏཎྷཀྑཡོ པན ཨརཧཏྟཾ སམྤཱཔཀཏྟཱ སེཊྛོཡེཝཱ’’ཏི ཝཏྭཱ ཨིམཾ གཱཐམཱཧ –

ཏཎྷཀྑཡོ སབྦདུཀྑཾ ཛིནཱཏཱི’’ཏི.

ཏཏྠ སབྦདཱནཾ དྷམྨདཱནནྟི སཙེཔི ཧི ཙཀྐཝཱལ༹གབྦྷེ ཡཱཝ བྲཧྨལོཀཱ ནིརནྟརཾ ཀཏྭཱ སནྣིསིནྣཱནཾ བུདྡྷཔཙྩེཀབུདྡྷཁཱིཎཱསཝཱནཾ ཀདལིགབྦྷསདིསཱནི ཙཱིཝརཱནི དདེཡྻ, ཏསྨིཾ སམཱགམེ ཙཏུཔྤདིཀཱཡ གཱཐཱཡ ཀཏཱནུམོདནཱཝ སེཊྛཱ. ཏཉྷི དཱནཾ ཏསྶཱ གཱཐཱཡ སོལ༹སིཾ ཀལཾ ནཱགྒྷཏི. ཨེཝཾ དྷམྨསྶ དེསནཱཔི ཝཱཙནམྤི སཝནམྤི མཧནྟཾ. ཡེན ཙ པུགྒལེན བཧཱུནཾ ཏཾ དྷམྨསྶཝནཾ ཀཱརིཏཾ, ཏསྶེཝ ཨཱནིསཾསོ མཧཱ. ཏཐཱརཱུཔཱཡ ཨེཝ པརིསཱཡ པཎཱིཏཔིཎྜཔཱཏསྶ པཏྟེ པཱུརེཏྭཱ དིནྣདཱནཏོཔི སཔྤིཏེལཱདཱིནཾ པཏྟེ པཱུརེཏྭཱ དིནྣབྷེསཛྫདཱནཏོཔི མཧཱཝིཧཱརསདིསཱནཾ ཝིཧཱརཱནཉྩ ལོཧཔཱསཱདསདིསཱནཉྩ ¶ པཱསཱདཱནཾ ཨནེཀཱནི སཏསཧསྶཱནི ཀཱརེཏྭཱ དིནྣསེནཱསནདཱནཏོཔི ཨནཱཐཔིཎྜིཀཱདཱིཧི ཝིཧཱརེ ཨཱརབྦྷ ཀཏཔརིཙྩཱགཏོཔི ཨནྟམསོ ཙཏུཔྤདིཀཱཡ གཱཐཱཡ ཨནུམོདནཱཝསེནཱཔི པཝཏྟིཏཾ དྷམྨདཱནམེཝ ཝརཾ སེཊྛཾ. ཀིཾ ཀཱརཎཱ? ཨེཝརཱུཔཱནི ཧི པུཉྙཱནི ཀརོནྟཱ དྷམྨཾ སུཏྭཱཝ ཀརོནྟི, ནོ ཨསུཏྭཱ. སཙེ ཧི ཨིམེ སཏྟཱ དྷམྨཾ ན སུཎེཡྻུཾ, ཨུལུ༹ངྐམཏྟཾ ཡཱགུམྤི ཀཊཙྪུམཏྟཾ བྷཏྟམྤི ན དདེཡྻུཾ. ཨིམིནཱ ཀཱརཎེན སབྦདཱནེཧི དྷམྨདཱནམེཝ སེཊྛཾ. ཨཔིཙ ཋཔེཏྭཱ བུདྡྷེ ཙ པཙྩེཀབུདྡྷེ ཙ སཀལཀཔྤཾ དེཝེ ཝསྶནྟེ ཨུདཀབིནྡཱུནི གཎེཏུཾ སམཏྠཱཡ པཉྙཱཡ སམནྣཱགཏཱ སཱརིཔུཏྟཱདཡོཔི ཨཏྟནོ དྷམྨཏཱཡ སོཏཱཔཏྟིཕལཱདཱིནི ཨདྷིགནྟུཾ ནཱསཀྑིཾསུ, ཨསྶཛིཏྠེརཱདཱིཧི ཀཐིཏདྷམྨཾ སུཏྭཱ སོཏཱཔཏྟིཕལཾ སཙྪིཀརིཾསུ, སཏྠུ དྷམྨདེསནཱཡ སཱཝཀཔཱརམཱིཉཱཎཾ སཙྪིཀརིཾསུ. ཨིམིནཱཔི ཀཱརཎེན, མཧཱརཱཛ, དྷམྨདཱནམེཝ སེཊྛཾ. ཏེན ཝུཏྟཾ – ‘‘སབྦདཱནཾ དྷམྨདཱནཾ ཛིནཱཏཱི’’ཏི.

སབྦེ པན གནྡྷརསཱདཡོཔི རསཱ ཨུཀྐཾསཏོ དེཝཏཱནཾ སུདྷཱབྷོཛནརསོཔི སཾསཱརཝཊྚེ པཱཏེཏྭཱ དུཀྑཱནུབྷཝནསྶེཝ པཙྩཡོ. ཡོ པནེས སཏྟཏིཾསབོདྷིཔཀྑིཡདྷམྨསངྑཱཏོ ཙ ནཝལོཀུཏྟརདྷམྨསངྑཱཏོ ཙ དྷམྨརསོ, ཨཡམེཝ སབྦརསཱནཾ སེཊྛོ. ཏེན ཝུཏྟཾ – ‘‘སབྦརསཾ དྷམྨརསོ ཛིནཱཏཱི’’ཏི ¶ . ཡཱཔེསཱ པུཏྟརཏིདྷཱིཏུརཏིདྷནརཏིཨིཏྠིརཏིནཙྩགཱིཏཝཱདིཏཱདིརཏིཔབྷེདཱ ཙ ཨནེཀཔྤབྷེདཱ རཏཱི, སཱཔི སཾསཱརཝཊྚེ པཱཏེཏྭཱ དུཀྑཱནུབྷཝནསྶེཝ པཙྩཡོ. ཡཱ པནེསཱ དྷམྨཾ ཀཐེནྟསྶ ཝཱ སུཎནྟསྶ ཝཱ ཝཱཙེནྟསྶ ཝཱ ¶ ཨནྟོ ཨུཔྤཛྫམཱནཱ པཱིཏི ཨུདགྒབྷཱཝཾ ཛནེཏི, ཨསྶཱུནི པཝཏྟེཏི, ལོམཧཾསཾ ཛནེཏི, སཱཡཾ སཾསཱརཝཊྚསྶ ཨནྟཾ ཀཏྭཱ ཨརཧཏྟཔརིཡོསཱནཱ ཧོཏི. ཏསྨཱ སབྦརཏཱིནཾ ཨེཝརཱུཔཱ དྷམྨརཏིཡེཝ སེཊྛཱ. ཏེན ཝུཏྟཾ – ‘‘སབྦརཏིཾ དྷམྨརཏི ཛིནཱཏཱི’’ཏི ¶ ཏཎྷཀྑཡོ པན ཏཎྷཱཡ ཁཡནྟེ ཨུཔྤནྣཾ ཨརཧཏྟཾ སཀལསྶཔི ཝཊྚདུཀྑསྶ ཨབྷིབྷཝནཏོ སབྦསེཊྛམེཝ. ཏེན ཝུཏྟཾ – ‘‘ཏཎྷཀྑཡོ སབྦདུཀྑཾ ཛིནཱཏཱི’’ཏི.

ཨེཝཾ སཏྠརི ཨིམིསྶཱ གཱཐཱཡ ཨཏྠཾ ཀཐེནྟེཡེཝ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི. སཀྐོཔི སཏྠུ དྷམྨཀཐཾ སུཏྭཱ སཏྠཱརཾ ཝནྡིཏྭཱ ཨེཝམཱཧ – ‘‘བྷནྟེ, ཨེཝཾཛེཊྛཀེ ནཱམ དྷམྨདཱནེ ཀིམཏྠཾ ཨམྷཱཀཾ པཏྟིཾ ན དཱཔེཐ, ཨིཏོ པཊྛཱཡ ནོ བྷིཀྑུསངྒྷསྶ ཀཐེཏྭཱ པཏྟིཾ དཱཔེཐ, བྷནྟེ’’ཏི. སཏྠཱ ཏསྶ ཝཙནཾ སུཏྭཱ བྷིཀྑུསངྒྷཾ སནྣིཔཱཏེཏྭཱ, ‘‘བྷིཀྑཝེ, ཨཛྫཱདིཾ ཀཏྭཱ མཧཱདྷམྨསྶཝནཾ ཝཱ པཱཀཏིཀདྷམྨསྶཝནཾ ཝཱ ཨུཔནིསིནྣཀཐཾ ཝཱ ཨནྟམསོ ཨནུམོདནམྤི ཀཐེཏྭཱ སབྦསཏྟཱནཾ པཏྟིཾ དདེཡྻཱཐཱ’’ཏི ཨཱཧ.

ཧནནྟི བྷོགཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཔུཏྟཀསེཊྛིཾ ནཱམ ཨཱརབྦྷ ཀཐེསི.

ཏསྶ ¶ ཀིར ཀཱལཀིརིཡཾ སུཏྭཱ རཱཛཱ པསེནདི ཀོསལོ ‘‘ཨཔུཏྟཀཾ སཱཔཏེཡྻཾ ཀསྶ པཱཔུཎཱཏཱི’’ཏི པུཙྪིཏྭཱ ‘‘རཉྙོ’’ཏི སུཏྭཱ སཏྟཧི དིཝསེཧི ཏསྶ གེཧཏོ དྷནཾ རཱཛཀུལཾ ཨབྷིཧརཱཔེཏྭཱ སཏྠུ སནྟིཀཾ ཨུཔསངྐམིཏྭཱ ‘‘ཧནྡ ཀུཏོ ནུ ཏྭཾ, མཧཱརཱཛ, ཨཱགཙྪསི དིཝཱདིཝསྶཱ’’ཏི ཝུཏྟེ ‘‘ཨིདྷ, བྷནྟེ, སཱཝཏྠིཡཾ སེཊྛི, གཧཔཏི, ཀཱལཀཏོ, ཏམཧཾ ཨཔུཏྟཀཾ སཱཔཏེཡྻཾ རཱཛནྟེཔུརཾ ཨབྷིཧརིཏྭཱ ཨཱགཙྪཱམཱི’’ཏི ཨཱཧ. སབྦཾ སུཏྟེ (སཾ. ནི. ༡.༡༣༠) ཨཱགཏནཡེནེཝ ཝེདིཏབྦཾ.

སོ ¶ ཀིར སུཝཎྞཔཱཏིཡཱ ནཱནགྒརསབྷོཛནེ ཨུཔནཱིཏེ ‘‘ཨེཝརཱུཔཾ ནཱམ མནུསྶཱ བྷུཉྫནྟི, ཀིཾ ཏུམྷེ མཡཱ སདྡྷིཾ ཨིམསྨིཾ གེཧེ ཀེལི༹ཾ ཀརོཐཱ’’ཏི བྷོཛནེ ཨུཔཊྛིཏེ ལེཌྜུདཎྜཱདཱིཧི པཧརིཏྭཱ པལཱཔེཏྭཱ ‘‘ཨིདཾ མནུསྶཱནཾ བྷོཛན’’ནྟི ཀཎཱཛཀཾ བྷུཉྫཏི བིལ༹ངྒདུཏིཡཾ. ཝཏྠཡཱནཚཏྟེསུཔི མནཱཔེསུ ཨུཔཊྛཱཔིཏེསུ ཏེ མནུསྶེ ལེཌྜུདཎྜཱདཱིཧི པཧརནྟོ པལཱཔེཏྭཱ སཱཎཱནི དྷཱརེཏི, ཛཛྫརརཐཀེན ཡཱཏི པཎྞཚཏྟཀེན དྷཱརིཡམཱནེནཱཏི ཨེཝཾ རཉྙཱ ཨཱརོཙིཏེ སཏྠཱ ཏསྶ པུབྦཀམྨཾ ཀཐེསི.

བྷཱུཏཔུབྦཾ ¶ སོ, མཧཱརཱཛ, སེཊྛི, གཧཔཏི, ཏགརསིཁིཾ ནཱམ པཙྩེཀབུདྡྷཾ པིཎྜཔཱཏེན པཊིཔཱདེསི. ‘‘དེཐ སམཎསྶ པིཎྜ’’ནྟི ཝཏྭཱ སོ ཨུཊྛཱཡཱསནཱ པཀྐཱམི. ཏསྨིཾ ཀིར ཨསྶདྡྷེ བཱལེ ཨེཝཾ ཝཏྭཱ པཀྐནྟེ ཏསྶ བྷརིཡཱ སདྡྷཱ པསནྣཱ ‘‘ཙིརསྶཾ ཝཏ མེ ཨིམསྶ མུཁཏོ ‘དེཧཱི’ཏི ཝཙནཾ སུཏཾ, ཨཛྫ མམ མནོརཐཾ པཱུརེནྟཱི པིཎྜཔཱཏཾ དསྶཱམཱི’’ཏི པཙྩེཀབུདྡྷསྶ པཏྟཾ གཧེཏྭཱ པཎཱིཏབྷོཛནསྶ པཱུརེཏྭཱ ཨདཱསི. སོཔི ནིཝཏྟམཱནོ ཏཾ དིསྭཱ ‘‘ཀིཾ, སམཎ, ཀིཉྩི ཏེ ལདྡྷ’’ནྟི པཏྟཾ གཧེཏྭཱ པཎཱིཏཔིཎྜཔཱཏཾ དིསྭཱ ཝིཔྤཊིསཱརཱི ཧུཏྭཱ ཨེཝཾ ¶ ཙིནྟེསི – ‘‘ཝརམེཏཾ པིཎྜཔཱཏཾ དཱསཱ ཝཱ ཀམྨཀརཱ ཝཱ བྷུཉྫེཡྻུཾ. ཏེ ཧི ཨིམཾ བྷུཉྫིཏྭཱ མཡ྄ཧཾ ཀམྨཾ ཀརིསྶནྟི, ཨཡཾ པན གནྟྭཱ བྷུཉྫིཏྭཱ ནིདྡཱཡིསྶཏི, ནཊྛོ མེ སོ པིཎྜཔཱཏོ’’ཏི. སོ བྷཱཏུ ཙ པན ཨེཀཔུཏྟཀཾ སཱཔཏེཡྻསྶ ཀཱརཎཱ ཛཱིཝིཏཱ ཝོརོཔེསི. སོ ཀིརསྶ ཨངྒུལིཾ གཧེཏྭཱ ཝིཙརནྟོ ‘‘ཨིདཾ མཡ྄ཧཾ པིཏུསནྟཀཾ ཡཱནཀཾ, ཨཡཾ ཏསྶ གོཎོ’’ཏིཨཱདཱིནི ཨཱཧ. ཨཐ ནཾ སོ སེཊྛི ‘‘ཨིདཱནི ཏཱཝེས ཨེཝཾ ཝདེཏི, ཨིམསྶ པན ཝུཌྜྷིཔྤཏྟཀཱལེ ཨིམསྨིཾ གེཧེ བྷོགེ ཀོ རཀྑིསྶཏཱི’’ཏི ཏཾ ཨརཉྙཾ ནེཏྭཱ ཨེཀསྨིཾ གཙྪམཱུལེ གཱིཝཱཡ གཧེཏྭཱ མཱུལཀནྡཾ ཝིཡ གཱིཝཾ ཕཱལེཏྭཱ མཱརེཏྭཱ ཏཏྠེཝ ཚཌྜེསི. ཨིདམསྶ པུབྦཀམྨཾ. ཏེན ཝུཏྟཾ –

‘‘ཡཾ ཁོ སོ, མཧཱརཱཛ, སེཊྛི, གཧཔཏི, ཏགརསིཁིཾ པཙྩེཀབུདྡྷཾ པིཎྜཔཱཏེན པཊིཔཱདེསི, ཏསྶ ཀམྨསྶ ཝིཔཱཀེན སཏྟཀྑཏྟུཾ སུགཏིཾ སགྒཾ ལོཀཾ ཨུཔཔཛྫི, ཏསྶེཝ ཀམྨསྶ ཝིཔཱཀཱཝསེསེན ཨིམིསྶཱཡེཝ སཱཝཏྠིཡཱ སཏྟཀྑཏྟུཾ སེཊྛིཏྟཾ ཀཱརེསི. ཡཾ ཁོ སོ, མཧཱརཱཛ, སེཊྛི, གཧཔཏི, དཏྭཱ པཙྪཱ ཝིཔྤཊིསཱརཱི ཨཧོསི ‘ཝརམེཏཾ པིཎྜཔཱཏཾ དཱསཱ ཝཱ ཀམྨཀརཱ ཝཱ བྷུཉྫེཡྻུ’ནྟི, ཏསྶ ཀམྨསྶ ཝིཔཱཀེན ནཱསྶུལཱ༹རཱཡ བྷཏྟབྷོགཱཡ ¶ ཙིཏྟཾ ནམཏི, ནཱསྶུལཱ༹རཱཡ ¶ ཝཏྠབྷོགཱཡ, ནཱསྶུལཱ༹རཱཡ ཡཱནབྷོགཱཡ, ནཱསྶུལཱ༹རཱནཾ པཉྩནྣཾ ཀཱམགུཎཱནཾ བྷོགཱཡ ཙིཏྟཾ ནམཏི. ཡཾ ཁོ སོ, མཧཱརཱཛ, སེཊྛི, གཧཔཏི, བྷཱཏུ ཙ པན ཨེཀཔུཏྟཾ སཱཔཏེཡྻསྶ ཀཱརཎཱ ཛཱིཝིཏཱ ཝོརོཔེསི, ཏསྶ ཀམྨསྶ ཝིཔཱཀེན བཧཱུནི ཝསྶསཏཱནི བཧཱུནི ཝསྶསཧསྶཱནི བཧཱུནི ཝསྶསཏསཧསྶཱནི ནིརཡེ པཙྩིཏྠ, ཏསྶེཝ ཀམྨསྶ ཝིཔཱཀཱཝསེསེན ཨིདཾ སཏྟམཾ ཨཔུཏྟཀཾ སཱཔཏེཡྻཾ རཱཛཀོསཾ པཝེསེཏི. ཏསྶ ཁོ པན, མཧཱརཱཛ, སེཊྛིསྶ གཧཔཏིསྶ པུརཱཎཉྩ པུཉྙཾ པརིཀྑཱིཎཾ, ནཝཉྩ པུཉྙཾ ཨནུཔཙིཏཾ. ཨཛྫ པན, མཧཱརཱཛ, སེཊྛི, གཧཔཏི, མཧཱརོརུཝེ ནིརཡེ པཙྩཏཱི’’ཏི (སཾ. ནི. ༡.༡༣༡).

རཱཛཱ སཏྠུ ཝཙནཾ སུཏྭཱ ‘‘ཨཧོ, བྷནྟེ, བྷཱརིཡཾ ཀམྨཾ, ཨེཏྟཀེ ནཱམ བྷོགེ ཝིཛྫམཱནེ ནེཝ ཨཏྟནཱ པརིབྷུཉྫི, ན ཏུམྷཱདིསེ བུདྡྷེ དྷུརཝིཧཱརེ ཝིཧརནྟེ པུཉྙཀམྨཾ ཨཀཱསཱི’’ཏི ཨཱཧ ¶ . སཏྠཱ ‘‘ཨེཝམེཏཾ, མཧཱརཱཛ, དུམྨེདྷཔུགྒལཱ ནཱམ བྷོགེ ལབྷིཏྭཱ ནིབྦཱནཾ ན གཝེསནྟི, བྷོགེ ནིསྶཱཡ ཨུཔྤནྣཏཎྷཱ པནེཏེ དཱིགྷརཏྟཾ ཧནཏཱི’’ཏི ཝཏྭཱ ཨིམཾ གཱཐམཱཧ –

‘‘ཧནནྟི བྷོགཱ དུམྨེདྷཾ, ནོ ཙ པཱརགཝེསིནོ;

བྷོགཏཎྷཱཡ དུམྨེདྷོ, ཧནྟི ཨཉྙེཝ ཨཏྟན’’ནྟི.

ཏཏྠ ¶ ནོ ཙ པཱརགཝེསིནོཏི ཡེ པན ནིབྦཱནཔཱརགཝེསིནོ པུགྒལཱ, ན ཏེ བྷོགཱ ཧནནྟི. ཨཉྙེཝ ཨཏྟནནྟི བྷོགེ ནིསྶཱཡ ཨུཔྤནྣཱཡ ཏཎྷཱཡ དུཔྤཉྙོ པུགྒལོ པརེ ཝིཡ ཨཏྟཱནམེཝ ཧནཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཏིཎདོསཱནཱིཏི ཨིམཾ དྷམྨདེསནཾ སཏྠཱ པཎྜུཀམྦལསིལཱཡཾ ཝིཧརནྟོ ཨངྐུརཾ ཨཱརབྦྷ ཀཐེསི. ཝཏྠུ ‘‘ཡེ ཛྷཱནཔྤསུཏཱ དྷཱིརཱ’’ཏི (དྷ. པ. ༡༨༡) གཱཐཱཡ ¶ ཝིཏྠཱརིཏམེཝ. ཝུཏྟཉྷེཏཾ ཏཏྠ ཨིནྡཀཾ ཨཱརབྦྷ. སོ ཀིར ཨནུརུདྡྷཏྠེརསྶ ཨནྟོགཱམཾ པིཎྜཱཡ པཝིཊྛསྶ ཨཏྟནོ ཨཱབྷཏཾ ཀཊཙྪུམཏྟཀཾ བྷིཀྑཾ དཱཔེསི. ཏདསྶ པུཉྙཾ ཨངྐུརེན དསཝསྶསཧསྶཱནི དྭཱདསཡོཛནིཀཾ ཨུདྡྷནཔནྟིཾ ཀཏྭཱ དིནྣདཱནཏོ མཧཔྥལཏརཾ ཛཱཏཾ. ཏསྨཱ ཨེཝམཱཧ. ཨེཝཾ ཝུཏྟེ སཏྠཱ, ‘‘ཨངྐུར, དཱནཾ ནཱམ ཝིཙེཡྻ དཱཏུཾ ཝཊྚཏི, ཨེཝཾ ཏཾ སུཁེཏྟེ སུཝུཏྟབཱིཛཾ ཝིཡ མཧཔྥལཾ ཧོཏི. ཏྭཾ པན ཏཐཱ ནཱཀཱསི, ཏེན ཏེ ¶ དཱནཾ ན མཧཔྥལཾ ཛཱཏ’’ནྟི ཨིམམཏྠཾ ཝིབྷཱཝེནྟོ –

‘‘ཝིཙེཡྻ དཱནཾ དཱཏབྦཾ, ཡཏྠ དིནྣཾ མཧཔྥལཾ;

བཱིཛཱནི ཝུཏྟཱནི ཡཐཱསུཁེཏྟེ’’ཏི. (པེ. ཝ. ༣༢༩) –

ཝཏྭཱ ¶ ཨུཏྟརིམྤི དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ཏིཎདོསཱནི ཁེཏྟཱནི, རཱགདོསཱ ཨཡཾ པཛཱ;

ཏསྨཱ ཧི ཝཱིཏརཱགེསུ, དིནྣཾ ཧོཏི མཧཔྥལཾ.

‘‘ཏིཎདོསཱནི ཁེཏྟཱནི, དོསདོསཱ ཨཡཾ པཛཱ;

ཏསྨཱ ཧི ཝཱིཏདོསེསུ, དིནྣཾ ཧོཏི མཧཔྥལཾ.

‘‘ཏིཎདོསཱནི ཁེཏྟཱནི, མོཧདོསཱ ཨཡཾ པཛཱ;

ཏསྨཱ ཧི ཝཱིཏམོཧེསུ, དིནྣཾ ཧོཏི མཧཔྥལཾ.

‘‘ཏིཎདོསཱནི ཁེཏྟཱནི, ཨིཙྪཱདོསཱ ཨཡཾ པཛཱ;

ཏསྨཱ ཧི ཝིགཏིཙྪེསུ, དིནྣཾ ཧོཏི མཧཔྥལ’’ནྟི.

ཏཏྠ ཏིཎདོསཱནཱིཏི སཱམཱཀཱདཱིནི ཏིཎཱནི ཨུཊྛཧནྟཱནི པུབྦཎྞཱཔརཎྞཱནི ཁེཏྟཱནི དཱུསེནྟི, ཏེན ཏཱནི ན བཧུཕལཱནི ཧོནྟི. ཨེཝཾ སཏྟཱནམྤི ཨནྟོ རཱགོ ཨུཔྤཛྫནྟོ སཏྟེ དཱུསེཏི, ཏེན ཏེསུ དིནྣཾ མཧཔྥལཾ ན ཧོཏི ¶ . ཁཱིཎཱསཝེསུ དིནྣཾ པན མཧཔྥལཾ ཧོཏི. ཏེན ཝུཏྟཾ –

‘‘ཏིཎདོསཱནི ¶ ཁེཏྟཱནི, རཱགདོསཱ ཨཡཾ པཛཱ;

ཏསྨཱ ཧི ཝཱིཏརཱགེསུ, དིནྣཾ ཧོཏི མཧཔྥལ’’ནྟི. –

དེསནཱཝསཱནེ ཨངྐུརོ ཙ ཨིནྡཀོ ཙ སོཏཱཔཏྟིཕལེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཙཀྑུནཱ ¶ ¶ ¶ སཾཝརོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩ བྷིཀྑཱུ ཨཱརབྦྷ ཀཐེསི.

ཏེསུ ཀིར ཨེཀེཀོ ཙཀྑུདྭཱརཱདཱིསུ པཉྩསུ དྭཱརེསུ ཨེཀེཀམེཝ རཀྑི. ཨཐེཀདིཝསཾ སནྣིཔཏིཏྭཱ ‘‘ཨཧཾ དུརཀྑཾ རཀྑཱམི, ཨཧཾ དུརཀྑཾ རཀྑཱམཱི’’ཏི ཝིཝདིཏྭཱ ‘‘སཏྠཱརཾ པུཙྪིཏྭཱ ཨིམམཏྠཾ ཛཱནིསྶཱམཱ’’ཏི སཏྠཱརཾ ཨུཔསངྐམིཏྭཱ, ‘‘བྷནྟེ, མཡཾ ཙཀྑུདྭཱརཱདཱིནི རཀྑནྟཱ ཨཏྟནོ ཨཏྟནོ རཀྑནདྭཱརམེཝ དུརཀྑནྟི མཉྙཱམ, ཀོ ནུ ཁོ ཨམྷེསུ དུརཀྑཾ རཀྑཏཱི’’ཏི པུཙྪིཾསུ. སཏྠཱ ཨེཀཾ བྷིཀྑུམྤི ཨནོསཱདེཏྭཱ, ‘‘བྷིཀྑཝེ, སབྦཱནི པེཏཱནི དུརཀྑཱནེཝ, ཨཔི ཙ ཁོ པན ཏུམྷེ ན ཨིདཱནེཝ པཉྩསུ ཋཱནེསུ ཨསཾཝུཏཱ, པུབྦེཔི ཨསཾཝུཏཱ, ཨསཾཝུཏཏྟཱཡེཝ ཙ པཎྜིཏཱནཾ ཨོཝཱདེ ཨཝཏྟིཏྭཱ ཛཱིཝིཏཀྑཡཾ པཱཔུཎིཏྠཱ’’ཏི ཝཏྭཱ ‘‘ཀདཱ, བྷནྟེ’’ཏི ཏེཧི ཡཱཙིཏོ ཨཏཱིཏེ ཏཀྐསིལཛཱཏཀསྶ ཝཏྠུཾ ཝིཏྠཱརེཏྭཱ རཀྑསཱིནཾ ¶ ཝསེན རཱཛཀུལེ ཛཱིཝིཏཀྑཡཾ པཏྟེ པཏྟཱབྷིསེཀེན མཧཱསཏྟེན སེཏཙྪཏྟསྶ ཧེཊྛཱ རཱཛཱསནེ ནིསིནྣེན ཨཏྟནོ སིརིསམྤཏྟིཾ ཨོལོཀེཏྭཱ ‘‘ཝཱིརིཡཾ ནཱམེཏཾ སཏྟེཧི ཀཏྟབྦམེཝཱ’’ཏི ཨུདཱནཝསེན ཨུདཱནིཏཾ –

‘‘ཀུསལཱུཔདེསེ དྷིཏིཡཱ དལ༹ྷཱཡ ཙ,

ས སོཏྠིབྷཱཝོ མཧཏཱ བྷཡེན མེ’’ཏི. (ཛཱ. ༡.༡.༡༣༢) –

ཨིམཾ གཱཐཾ དསྶེཏྭཱ ‘‘ཏདཱཔི ཏུམྷེཝ པཉྩ ཛནཱ ཏཀྐསིལཱཡཾ རཛྫགཧཎཏྠཱཡ ནིཀྑནྟཾ མཧཱསཏྟཾ ཨཱཝུདྷཧཏྠཱ པརིཝཱརེཏྭཱ མགྒཾ གཙྪནྟཱ ཨནྟརཱམགྒེ རཀྑསཱིཧི ཙཀྑུདྭཱརཱདིཝསེན ཨུཔནཱིཏེསུ རཱུཔཱརམྨཎཱདཱིསུ ཨསཾཝུཏཱ པཎྜིཏསྶ ཨོཝཱདེ ཨཝཏྟིཏྭཱ ཨོལཱིཡནྟཱ རཀྑསཱིཧི ཁཱདིཏཱ ¶ ཛཱིཝིཏཀྑཡཾ པཱཔུཎིཏྠ. ཏེསུ པན ཨཱརམྨཎེསུ སུསཾཝུཏོ པིཊྛིཏོ པིཊྛིཏོ ཨནུབནྡྷནྟིཾ དེཝཝཎྞིཾ ཡཀྑིནིཾ ཨནཱདིཡིཏྭཱ སོཏྠིནཱ ཏཀྐསིལཾ གནྟྭཱ རཛྫཾ ¶ པཏྟོ རཱཛཱ ཨཧམེཝཱ’’ཏི ཛཱཏཀཾ སམོདྷཱནེཏྭཱ, ‘‘བྷིཀྑཝེ, བྷིཀྑུནཱ ནཱམ སབྦཱནི དྭཱརཱནི སཾཝརིཏབྦཱནི. ཨེཏཱནི ཧི སཾཝརནྟོ ཨེཝ སབྦདུཀྑཱ པམུཙྩཏཱི’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ཙཀྑུནཱ ¶ སཾཝརོ སཱདྷུ, སཱདྷུ སོཏེན སཾཝརོ;

གྷཱནེན སཾཝརོ སཱདྷུ, སཱདྷུ ཛིཝ྄ཧཱཡ སཾཝརོ.

‘‘ཀཱཡེན སཾཝརོ སཱདྷུ, སཱདྷུ ཝཱཙཱཡ སཾཝརོ;

མནསཱ སཾཝརོ སཱདྷུ, སཱདྷུ སབྦཏྠ སཾཝརོ;

སབྦཏྠ སཾཝུཏོ བྷིཀྑུ, སབྦདུཀྑཱ པམུཙྩཏཱི’’ཏི.

ཏཏྠ ཙཀྑུནཱཏི ཡདཱ ཧི བྷིཀྑུནོ ཙཀྑུདྭཱརེ རཱུཔཱརམྨཎཾ ཨཱཔཱཐམཱགཙྪཏི, ཏདཱ ཨིཊྛཱརམྨཎེ ཨརཛྫནྟསྶ ཨནིཊྛཱརམྨཎེ ཨདུསྶནྟསྶ ཨསམཔེཀྑནེན མོཧཾ ཨནུཔྤཱདེནྟསྶ ཏསྨིཾ དྭཱརེ སཾཝརོ ཐཀནཾ པིདཧནཾ གུཏྟི ཀཏཱ ནཱམ ཧོཏི. ཏསྶ སོ ཨེཝརཱུཔོ ཙཀྑུནཱ སཾཝརོ སཱདྷུ. ཨེས ནཡོ སོཏདྭཱརཱདཱིསུཔི. ཙཀྑུདྭཱརཱདཱིསུཡེཝ པན སཾཝརོ ཝཱ ཨསཾཝརོ ཝཱ ནུཔྤཛྫཏི, པརཏོ པན ཛཝནཝཱིཐིཡཾ ཨེས ལབྦྷཏི. ཏདཱ ཧི ཨསཾཝརོ ཨུཔྤཛྫནྟོ ཨསྶདྡྷཱ ཨཀྑནྟི ཀོསཛྫཾ མུཊྛསཙྩཾ ཨཉྙཱཎནྟི ཨཀུསལཝཱིཐིཡཾ ཨཡཾ པཉྩཝིདྷོ ལབྦྷཏི. སཾཝརོ ཨུཔྤཛྫནྟོ སདྡྷཱ ཁནྟི ཝཱིརིཡཾ སཏི ཉཱཎནྟི ཀུསལཝཱིཐིཡཾ ཨཡཾ པཉྩཝིདྷོ ལབྦྷཏི.

ཀཱཡེན སཾཝརོཏི ཨེཏྠ པན པསཱདཀཱཡོཔི ཙོཔནཀཱཡོཔི ལབྦྷཏི. ཨུབྷཡམྤི པནེཏཾ ཀཱཡདྭཱརམེཝ. ཏཏྠ པསཱདདྭཱརེ སཾཝརཱསཾཝརོ ཀཐིཏོཝ. ཙོཔནདྭཱརེཔི ཏཾཝཏྠུཀཱ པཱཎཱཏིཔཱཏཨདིནྣཱདཱནཀཱམེསུམིཙྪཱཙཱརཱ. ཏེཧི པན སདྡྷིཾ ཨཀུསལཝཱིཐིཡཾ ཨུཔྤཛྫནྟེཧི ཏཾ དྭཱརཾ ཨསཾཝུཏཾ ཧོཏི, ཀུསལཝཱིཐིཡཾ ཨུཔྤཛྫནྟེཧི ¶ པཱཎཱཏིཔཱཏཱཝེརམཎིཨཱདཱིཧི སཾཝུཏཾ. སཱདྷུ ཝཱཙཱཡཱཏི ཨེཏྠཱཔི ཙོཔནཝཱཙཱཔི ཝཱཙཱ. ཏཱཡ སདྡྷིཾ ཨུཔྤཛྫནྟེཧི མུསཱཝཱདཱདཱིཧི ཏཾ དྭཱརཾ ཨསཾཝུཏཾ ཧོཏི, མུསཱཝཱདཱཝེརམཎིཨཱདཱིཧི སཾཝུཏཾ. མནསཱ སཾཝརོཏི ཨེཏྠཱཔི ཛཝནམནཏོ ཨཉྙེན མནེན སདྡྷིཾ ཨབྷིཛ྄ཛྷཱདཡོ ནཏྠི. མནོདྭཱརེ པན ཛཝནཀྑཎེ ཨུཔྤཛྫམཱནེཧི ཨབྷིཛ྄ཛྷཱདཱིཧི ཏཾ དྭཱརཾ ཨསཾཝུཏཾ ཧོཏི, ཨནབྷིཛ྄ཛྷཱདཱིཧི སཾཝུཏཾ ཧོཏི. སཱདྷུ སབྦཏྠཱཏི ཏེསུ ཙཀྑུདྭཱརཱདཱིསུ སབྦེསུཔི སཾཝརོ སཱདྷུ. ཨེཏྟཱཝཏཱ ཧི ཨཊྛ སཾཝརདྭཱརཱནི ཨཊྛ ཙ ཨསཾཝརདྭཱརཱནི ¶ ཀཐིཏཱནི. ཏེསུ ཨཊྛསུ ཨསཾཝརདྭཱརེསུ ཋིཏོ བྷིཀྑུ སཀལཝཊྚམཱུལཀདུཀྑཏོ ¶ ན མུཙྩཏི, སཾཝརདྭཱརེསུ པན ཋིཏོ སབྦསྨཱཔི ཝཊྚམཱུལཀདུཀྑཱ མུཙྩཏི. ཏེན ཝུཏྟཾ – ‘‘སབྦཏྠ སཾཝུཏོ བྷིཀྑུ, སབྦདུཀྑཱ པམུཙྩཏཱི’’ཏི.

དེསནཱཝསཱནེ ཏེ པཉྩ བྷིཀྑཱུ སོཏཱཔཏྟིཕལེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཧཏྠསཾཡཏོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཧཾསགྷཱཏཀཾ བྷིཀྑུཾ ཨཱརབྦྷ ཀཐེསི.

སཱཝཏྠིཝཱསིནོ ¶ ཀིར དྭེ སཧཱཡཀཱ བྷིཀྑཱུསུ པབྦཛིཏྭཱ ལདྡྷཱུཔསམྤདཱ ཡེབྷུཡྻེན ཨེཀཏོ ཝིཙརནྟི. ཏེ ཨེཀདིཝསཾ ཨཙིརཝཏིཾ གནྟྭཱ ནྷཏྭཱ ཨཱཏཔེ ཏཔྤམཱནཱ སཱརཎཱིཡཀཐཾ ཀཐེནྟཱ ཨཊྛཾསུ. ཏསྨིཾ ཁཎེ དྭེ ཧཾསཱ ཨཱཀཱསེན གཙྪནྟི. ཨཐེཀོ དཧརབྷིཀྑུ སཀྑརཾ གཧེཏྭཱ ‘‘ཨེཀསྶ ཧཾསཔོཏཀསྶ ཨཀྑིཾ པཧརིསྶཱམཱི’’ཏི ཨཱཧ, ཨིཏརོ ‘‘ན སཀྑིསྶཱམཱི’’ཏི ཨཱཧ. ཏིཊྛཏུ ཨིམསྨིཾ པསྶེ ཨཀྑི, པརཔསྶེ ཨཀྑིཾ པཧརིསྶཱམཱིཏི. ཨིདམྤི ན སཀྑིསྶསིཡེཝཱཏི. ‘‘ཏེན ཧི ཨུཔདྷཱརེཧཱི’’ཏི དུཏིཡཾ སཀྑརཾ གཧེཏྭཱ ཧཾསསྶ པཙྪཱབྷཱགེ ཁིཔི, ཧཾསོ སཀྑརསདྡཾ སུཏྭཱ ནིཝཏྟིཏྭཱ ཨོལོཀེསི. ཨཐ ནཾ ཨིཏརཾ ཝཊྚསཀྑརཾ གཧེཏྭཱ པརཔསྶེ ཨཀྑིམྷི པཧརིཏྭཱ ཨོརིམཀྑིནཱ ནིཀྑཱམེསི. ཧཾསོ ཝིརཝནྟོ པརིཝཏྟིཏྭཱ ཏེསཾ པཱདམཱུལེཡེཝ པཏི. ཏཏྠ ཏཏྠ ཋིཏཱ བྷིཀྑཱུ དིསྭཱ, ‘‘ཨཱཝུསོ, བུདྡྷསཱསནེ པབྦཛིཏྭཱ ཨནནུཙྪཝིཀཾ ཝོ ཀཏཾ པཱཎཱཏིཔཱཏཾ ཀརོནྟེཧཱི’’ཏི ཝཏྭཱ ཏེ ཨཱདཱཡ གནྟྭཱ ཏཐཱགཏསྶ དསྶེསུཾ.

སཏྠཱ ‘‘སཙྩཾ ཀིར ཏཡཱ བྷིཀྑུ པཱཎཱཏིཔཱཏོ ཀཏོ’’ཏི པུཙྪིཏྭཱ ‘‘སཙྩཾ, བྷནྟེ’’ཏི ཝུཏྟེ ‘‘བྷིཀྑུ ཀསྨཱ ཨེཝརཱུཔེ ནིཡྻཱནིཀསཱསནེ པབྦཛིཏྭཱ ཨེཝམཀཱསི, པོརཱཎཀཔཎྜིཏཱ ཨནུཔྤནྣེ བུདྡྷེ ཨགཱརམཛ྄ཛྷེ ¶ ཝསམཱནཱ ཨཔྤམཏྟཀེསུཔི ¶ ཋཱནེསུ ཀུཀྐུཙྩཾ ཀརིཾསུ ¶ , ཏྭཾ པན ཨེཝརཱུཔེ བུདྡྷསཱསནེ པབྦཛིཏྭཱ ཀུཀྐུཙྩམཏྟམྤི ན ཨཀཱསཱི’’ཏི ཝཏྭཱ ཏེཧི ཡཱཙིཏོ ཨཏཱིཏཾ ཨཱཧརི.

ཨཏཱིཏེ ཀུརུརཊྛེ ཨིནྡཔཏྟནགརེ དྷནཉྩཡེ རཛྫཾ ཀཱརེནྟེ བོདྷིསཏྟོ ཏསྶ ཨགྒམཧེསིཡཱ ཀུཙྪིསྨིཾ པཊིསནྡྷིཾ གཧེཏྭཱ ཨནུཔུབྦེན ཝིཉྙུཏཾ པཏྟོ ཏཀྐསིལཱཡཾ སིཔྤཱནི ཨུགྒཧེཏྭཱ པིཏརཱ ཨུཔརཛྫེ པཏིཊྛཱཔིཏོ ཨཔརབྷཱགེ པིཏུ ཨཙྩཡེན རཛྫཾ པཏྭཱ དས རཱཛདྷམྨེ ཨཀོཔེནྟོ ཀུརུདྷམྨེ ཝཏྟིཏྠ. ཀུརུདྷམྨོ ནཱམ པཉྩསཱིལཱནི, ཏཱནི བོདྷིསཏྟོ པརིསུདྡྷཱནི ཀཏྭཱ རཀྑི. ཡཐཱ ཙ བོདྷིསཏྟོ, ཨེཝམསྶ མཱཏཱ ཨགྒམཧེསཱི ཀནིཊྛབྷཱཏཱ ཨུཔརཱཛཱ པུརོཧིཏོ བྲཱཧྨཎོ རཛྫུགཱཧཀོ ཨམཙྩོ སཱརཐི སེཊྛི དོཎམཱཔཀོ མཧཱམཏྟོ དོཝཱརིཀོ ནགརསོབྷིནཱི ཝཎྞདཱསཱིཏི ཨེཝམེཏེསུ ཨེཀཱདསསུ ཛནེསུ ཀུརུདྷམྨཾ རཀྑནྟེསུ ཀལིངྒརཊྛེ དནྟཔུརནགརེ ཀལིངྒེ རཛྫཾ ཀཱརེནྟེ ཏསྨིཾ རཊྛེ དེཝོ ན ཝསྶི. མཧཱསཏྟསྶ པན ཨཉྫནསནྣིབྷོ ནཱམ མངྒལཧཏྠཱི མཧཱཔུཉྙོ ཧོཏི. རཊྛཝཱསིནོ ‘‘ཏསྨིཾ ཨཱནཱིཏེ དེཝོ ཝསྶིསྶཏཱི’’ཏི སཉྙཱཡ རཉྙོ ཨཱརོཙཡིཾསུ. རཱཛཱ ཏསྶ ཧཏྠིསྶ ཨཱནཡནཏྠཱཡ བྲཱཧྨཎེ པཧིཎི. ཏེ གནྟྭཱ མཧཱསཏྟཾ ཧཏྠིཾ ཡཱཙིཾསུ. སཏྠཱ ཏེསཾ ཡཱཙནཀཱརཎཾ དསྶེཏུཾ ཨཱཧ –

‘‘ཏཝ ¶ སདྡྷཉྩ སཱིལཉྩ, ཝིདིཏྭཱན ཛནཱདྷིཔ;

ཝཎྞཾ ཨཉྫནཝཎྞེན, ཀལིངྒསྨིཾ ནིམིམྷསེ’’ཏི. (ཛཱ. ༡.༣.༧༦) –

ཨིམཾ ཏིཀནིཔཱཏེ ཛཱཏཀཾ ཀཐེསི. ཧཏྠིམྷི པན ཨཱནཱིཏེཔི དེཝེ ཨཝསྶནྟེ ‘‘སོ རཱཛཱ ཀུརུདྷམྨཾ རཀྑཏི, ཏེནསྶ རཊྛེ དེཝོ ཝསྶཏཱི’’ཏི སཉྙཱཡ ‘‘ཡཾ སོ ཀུརུདྷམྨཾ རཀྑཏི, ཏཾ སུཝཎྞཔཊྚེ ལིཁིཏྭཱ ཨཱནེཐཱ’’ཏི པུན ཀཱལིངྒོ བྲཱཧྨཎེ ཙ ཨམཙྩེ ཙ པེསེསི. ཏེསུ གནྟྭཱ ཡཱཙནྟེསུ རཱཛཱནཾ ཨཱདིཾ ཀཏྭཱ སབྦེཔི ཏེ ཨཏྟནོ ཨཏྟནོ སཱིལེསུ ཀིཉྩི ཀུཀྐུཙྩམཏྟཾ ཀཏྭཱ ‘‘ཨཔརིསུདྡྷཾ ནོ སཱིལ’’ནྟི པཊིཀྑིཔིཏྭཱཔི ‘‘ན ཨེཏྟཱཝཏཱ སཱིལབྷེདོ ཧོཏཱི’’ཏི ཏེཧི པུནཔྤུནཾ ཡཱཙིཏཱ ཨཏྟནོ ཨཏྟནོ སཱིལཱནི ཀཐཡིཾསུ. ཀཱལིངྒོ སུཝཎྞཔཊྚེ ལིཁཱཔེཏྭཱ ཨཱབྷཏཾ ¶ ཀུརུདྷམྨཾ དིསྭཱཝ སམཱདཱཡ སཱདྷུཀཾ པཱུརེསི. ཏསྶ རཊྛེ དེཝོ པཱཝསྶི, རཊྛཾ ཁེམཾ སུབྷིཀྑཾ ཨཧོསི. སཏྠཱ ཨིམཾ ཨཏཱིཏཾ ཨཱཧརིཏྭཱ –

‘‘གཎིཀཱ ཨུཔྤལཝཎྞཱ, པུཎྞོ དོཝཱརིཀོ ཏདཱ;

རཛྫུགཱཧོ ཙ ཀཙྩཱནོ, དོཎམཱཔཀོ ཙ ཀོལིཏོ.

‘‘སཱརིཔུཏྟོ ¶ ཏདཱ སེཊྛཱི, ཨནུརུདྡྷོ ཙ སཱརཐཱི;

བྲཱཧྨཎོ ཀསྶཔོ ཐེརོ, ཨུཔརཱཛཱནནྡཔཎྜིཏོ.

‘‘མཧེསཱི རཱཧུལམཱཏཱ, མཱཡཱདེཝཱི ཛནེཏྟིཀཱ;

ཀུརུརཱཛཱ བོདྷིསཏྟོ, ཨེཝཾ དྷཱརེཐ ཛཱཏཀ’’ནྟི. –

ཛཱཏཀཾ ¶ སམོདྷཱནེཏྭཱ ‘‘བྷིཀྑུ ཨེཝཾ པུབྦེཔི པཎྜིཏཱ ཨཔྤམཏྟཀེཔི ཀུཀྐུཙྩེ ཨུཔྤནྣེ ཨཏྟནོ སཱིལབྷེདེ ཨཱསངྐཾ ཀརིཾསུ, ཏྭཾ པན མཱདིསསྶ བུདྡྷསྶ སཱསནེ པབྦཛིཏྭཱ པཱཎཱཏིཔཱཏཾ ཀརོནྟོ ཨཏིབྷཱརིཡཾ ཀམྨམཀཱསི, བྷིཀྑུནཱ ནཱམ ཧཏྠེཧི པཱདེཧི ཝཱཙཱཡ ཙ སཾཡཏེན བྷཝིཏབྦ’’ནྟི ཝཏྭཱ ཨིམཾ གཱཐམཱཧ –

ཨེཀོ སནྟུསིཏོ ཏམཱཧུ བྷིཀྑུ’’ནྟི.

ཏཏྠ ཧཏྠསཾཡཏོཏི ཧཏྠཀཱིལཱ༹པནཱདཱིནཾ ཝཱ ཧཏྠེན པརེསཾ པཧརཎཱདཱིནཾ ཝཱ ཨབྷཱཝེན ཧཏྠསཾཡཏོ. དུཏིཡཔདེཔི ཨེསེཝ ནཡོ. ཝཱཙཱཡ པན མུསཱཝཱདཱདཱིནཾ ཨཀརཎཏོ ཝཱཙཱཡ སཾཡཏོ. སཾཡཏུཏྟམོཏི སཾཡཏཏྟབྷཱཝོ, ཀཱཡཙལནསཱིསུཀྑིཔནབྷམུཀཝིཀཱརཱདཱིནཾ ཨཀཱརཀོཏི ཨཏྠོ. ཨཛ྄ཛྷཏྟརཏོཏི གོཙརཛ྄ཛྷཏྟསངྑཱཏཱཡ ཀམྨཊྛཱནབྷཱཝནཱཡ རཏོ. སམཱཧིཏོཏི སུཊྛུ ཋཔིཏོ. ཨེཀོ སནྟུསིཏོཏི ཨེཀཝིཧཱརཱི ཧུཏྭཱ སུཊྛུ ཏུསིཏོ ཝིཔསྶནཱཙཱརཏོ པཊྛཱཡ ཨཏྟནོ ཨདྷིགམེན ཏུཊྛམཱནསོ. པུཐུཛྫནཀལྱཱཎཀཉྷི ཨཱདིཾ ཀཏྭཱ སབྦེཔི སེཁཱ ཨཏྟནོ ཨདྷིགམེན སནྟུསྶནྟཱིཏི སནྟུསིཏཱ, ཨརཧཱ པན ཨེཀནྟསནྟུསིཏོཝ. ཏཾ སནྡྷཱཡེཏཾ ཝུཏྟཾ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡོ ¶ ¶ ¶ མུཁསཾཡཏོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀོཀཱལིཀཾ ཨཱརབྦྷ ཀཐེསི. ཝཏྠུ ‘‘ཨཐ ཁོ ཀོཀཱལིཀོ བྷིཀྑུ ཡེན བྷགཝཱ ཏེནུཔསངྐམཱི’’ཏི སུཏྟེ (སཾ. ནི. ༡.༡༨༡; སུ. ནི. ཀོཀཱལིཀསུཏྟ; ཨ. ནི. ༡༠.༨༩) ཨཱགཏམེཝ. ཨཏྠོཔིསྶ ཨཊྛཀཐཱཡ ཝུཏྟནཡེནེཝ ཝེདིཏབྦོ.

ཀོཀཱལིཀེ པན པདུམནིརཡེ ཨུཔྤནྣེ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཨཧོ ཀོཀཱལིཀོ བྷིཀྑུ ཨཏྟནོ མུཁཾ ནིསྶཱཡ ཝིནཱསཾ པཏྟོ, དྭེ ཨགྒསཱཝཀེ ཨཀྐོསནྟསྶེཝ ཧིསྶ པཐཝཱི ཝིཝརཾ ཨདཱསཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ, པུབྦེཔི ཀོཀཱལིཀོ བྷིཀྑུ ཨཏྟནོ མུཁམེཝ ནིསྶཱཡ ནཊྛོ’’ཏི ཝཏྭཱ ཏམཏྠཾ སོཏུཀཱམེཧི བྷིཀྑཱུཧི ཡཱཙིཏོ ཏསྶ པཀཱསནཏྠཾ ཨཏཱིཏཾ ཨཱཧརི.

ཨཏཱིཏེ ཧིམཝནྟཔདེསེ ཨེཀསྨིཾ སརེ ཀཙྪཔོ ཝསཏི. དྭེ ཧཾསཔོཏཀཱ གོཙརཱཡ ཙརནྟཱ ཏེན སདྡྷིཾ ཝིསྶཱསཾ ཀཏྭཱ དལ༹ྷཝིསྶཱསིཀཱ ཧུཏྭཱ ཨེཀདིཝསཾ ཀཙྪཔཾ པུཙྪིཾསུ – ‘‘སམྨ, ཨམྷཱཀཾ ཧིམཝནྟེ ཙིཏྟཀཱུཊཔབྦཏཏལེ ཀཉྩནགུཧཱཡ ཝསནཊྛཱནཾ, རམཎིཡོ པདེསོ, གཙྪིསྶསི ཨམྷེཧི སདྡྷི’’ནྟི. ‘‘སམྨ, ཨཧཾ ཀཐཾ གམིསྶཱམཱི’’ཏི? ‘‘མཡཾ ཏཾ ནེསྶཱམ, སཙེ མུཁཾ རཀྑིཏུཾ སཀྑིསྶསཱི’’ཏི. ‘‘རཀྑིསྶཱམི, སམྨཱ གཧེཏྭཱ མཾ གཙྪཐཱ’’ཏི. ཏེ ‘‘སཱདྷཱུ’’ཏི ཝཏྭཱ ཨེཀཾ དཎྜཀཾ ཀཙྪཔེན ¶ ཌཾསཱཔེཏྭཱ སཡཾ ཏསྶ ཨུབྷོ ཀོཊིཡོ ཌཾསིཏྭཱ ཨཱཀཱསཾ པཀྑནྡིཾསུ. ཏཾ ཏཐཱ ཧཾསེཧི ནཱིཡམཱནཾ གཱམདཱརཀཱ དིསྭཱ ‘‘དྭེ ཧཾསཱ ཀཙྪཔཾ དཎྜེན ཧརནྟཱི’’ཏི ཨཱཧཾསུ. ཀཙྪཔོ ‘‘ཡདི མཾ སཧཱཡཀཱ ནེནྟི, ཏུམྷཱཀཾ ཨེཏྠ ཀིཾ ཧོཏི དུཊྛཙེཊཀཱ’’ཏི ཝཏྟུཀཱམོ ཧཾསཱནཾ སཱིགྷཝེགཏཱཡ བཱརཱཎསིནགརེ རཱཛནིཝེསནསྶ ཨུཔརིབྷཱགཾ སམྤཏྟཀཱལེ དཊྛཊྛཱནཏོ དཎྜཀཾ ཝིསྶཛྫེཏྭཱ ཨཱཀཱསངྒཎེ པཏིཏྭཱ དྭེདྷཱ བྷིཛྫི. སཏྠཱ ཨིམཾ ཨཏཱིཏཾ ཨཱཧརིཏྭཱ –

‘‘ཨཝདྷཱི ¶ ཝཏ ཨཏྟཱནཾ, ཀཙྪཔོ བྱཱཧརཾ གིརཾ;

སུགྒཧཱིཏསྨིཾ ཀཊྛསྨིཾ, ཝཱཙཱཡ སཀིཡཱཝདྷཱི.

‘‘ཨེཏམྤི ¶ དིསྭཱ ནརཝཱིརིཡསེཊྛ,

པསྶསི བཧུབྷཱཎེན, ཀཙྪཔཾ བྱསནཾ གཏ’’ནྟི. (ཛཱ. ༡.༢.༡༢༩-༡༣༠);

ཨིམཾ དུཀནིཔཱཏེ བཧུབྷཱཎིཛཱཏཀཾ ཝིཏྠཱརེཏྭཱ, ‘‘བྷིཀྑཝེ, བྷིཀྑུནཱ ནཱམ མུཁསཾཡཏེན སམཙཱརིནཱ ཨནུདྡྷཏེན ནིབྦུཏཙིཏྟེན བྷཝིཏབྦ’’ནྟི ཝཏྭཱ ཨིམཾ གཱཐམཱཧ –

‘‘ཡོ ¶ མུཁསཾཡཏོ བྷིཀྑུ, མནྟབྷཱཎཱི ཨནུདྡྷཏོ;

ཨཏྠཾ དྷམྨཉྩ དཱིཔེཏི, མདྷུརཾ ཏསྶ བྷཱསིཏ’’ནྟི.

ཏཏྠ མུཁསཾཡཏོཏི དཱསཙཎྜཱལཱདཡོཔི ‘‘ཏྭཾ དུཛྫཱཏོ, ཏྭཾ དུསྶཱིལོ’’ཏིཨཱདཱིནཾ ཨཝཙནཏཱཡ མུཁེན སཾཡཏོ. མནྟབྷཱཎཱིཏི མནྟཱ ཝུཙྩཏི པཉྙཱ, ཏཱཡ བྷཎནསཱིལོ. ཨནུདྡྷཏོཏི ནིབྦུཏཙིཏྟོ. ཨཏྠཾ དྷམྨཉྩ དཱིཔེཏཱིཏི བྷཱསིཏཏྠཉྩེཝ དེསནཱདྷམྨཉྩ ཀཐེཏི. མདྷུརནྟི ཨེཝརཱུཔསྶ བྷིཀྑུནོ བྷཱསིཏཾ མདྷུརཾ ནཱམ. ཡོ པན ཨཏྠམེཝ སམྤཱདེཏི, ན པཱལི༹ཾ, པཱལི༹ཾཡེཝ སམྤཱདེཏི, ན ཨཏྠཾ, ཨུབྷཡཾ ཝཱ པན ན སམྤཱདེཏི, ཏསྶ བྷཱསིཏཾ མདྷུརཾ ནཱམ ན ཧོཏཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

དྷམྨཱརཱམོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ དྷམྨཱརཱམཏྠེརཾ ཨཱརབྦྷ ཀཐེསི.

སཏྠཱརཱ ཀིར ‘‘ཨིཏོ མེ ཙཏུམཱསཙྩཡེན པརིནིབྦཱནཾ བྷཝིསྶཏཱི’’ཏི ཨཱརོཙིཏེ ཨནེཀསཧསྶཱ བྷིཀྑཱུ སཏྠཱརཾ པརིཝཱརེཏྭཱ ཝིཙརིཾསུ. ཏཏྠ པུཐུཛྫནཱ ¶ བྷིཀྑཱུ ཨསྶཱུནི སནྡྷཱརེཏུཾ ནཱསཀྑིཾསུ, ཁཱིཎཱསཝཱནཾ དྷམྨསཾཝེགོ ཨུཔྤཛྫི. སབྦེཔི ‘‘ཀིཾ ནུ ཁོ ཀརིསྶཱམཱ’’ཏི ཝགྒབནྡྷནེན ¶ ཝིཙརནྟི. ཨེཀོ པན དྷམྨཱརཱམོ ནཱམ བྷིཀྑུ བྷིཀྑཱུནཾ སནྟིཀཾ ན ཨུཔསངྐམཏི. བྷིཀྑཱུཧི ‘‘ཀིཾ, ཨཱཝུསོ’’ཏི ཝུཙྩམཱནོ པཊིཝཙནམྤི ཨདཏྭཱ ‘‘སཏྠཱ ¶ ཀིར ཙཏུམཱསཙྩཡེན པརིནིབྦཱཡིསྶཏི, ཨཧཉྩམྷི ཨཝཱིཏརཱགོ, སཏྠརི དྷརམཱནེཡེཝ ཝཱཡམིཏྭཱ ཨརཧཏྟཾ པཱཔུཎིསྶཱམཱི’’ཏི ཨེཀཀོཝ ཝིཧརནྟོ སཏྠཱརཱ དེསིཏཾ དྷམྨཾ ཨཱཝཛྫེཏི ཙིནྟེཏི ཨནུསྶརཏི. བྷིཀྑཱུ ཏཐཱགཏསྶ ཨཱརོཙེསུཾ – ‘‘བྷནྟེ, དྷམྨཱརཱམསྶ ཏུམྷེསུ སིནེཧམཏྟམྤི ནཏྠི, ‘སཏྠཱ ཀིར པརིནིབྦཱཡིསྶཏི, ཀིཾ ནུ ཁོ ཀརིསྶཱམཱ’ཏི ཨམྷེཧི སདྡྷིཾ སམྨནྟནམཏྟམྤི ན ཀརོཏཱི’’ཏི. སཏྠཱ ཏཾ པཀྐོསཱཔེཏྭཱ ‘‘སཙྩཾ ཀིར ཏྭཾ ཨེཝཾ ཀརོསཱི’’ཏི པུཙྪི. ‘‘སཙྩཾ, བྷནྟེ’’ཏི. ‘‘ཀིཾ ཀཱརཎཱ’’ཏི? ཏུམྷེ ཀིར ཙཏུམཱསཙྩཡེན པརིནིབྦཱཡིསྶཐ, ཨཧཉྩམྷི ཨཝཱིཏརཱགོ, ཏུམྷེསུ དྷརནྟེསུཡེཝ ཝཱཡམིཏྭཱ ཨརཧཏྟཾ པཱཔུཎིསྶཱམཱིཏི ཏུམྷེཧི དེསིཏཾ དྷམྨཾ ཨཱཝཛྫཱམི ཙིནྟེམི ཨནུསྶརཱམཱིཏི.

སཏྠཱ ‘‘སཱདྷུ སཱདྷཱུ’’ཏི ཏསྶ སཱདྷུཀཱརཾ དཏྭཱ, ‘‘བྷིཀྑཝེ, ཨཉྙེནཱཔི མཡི སིནེཧཝནྟེན བྷིཀྑུནཱ ནཱམ དྷམྨཱརཱམསདིསེནེཝ བྷཝིཏབྦཾ. ན ཧི མཡ྄ཧཾ མཱལཱགནྡྷཱདཱིཧི པཱུཛཾ ཀརོནྟཱ མམ པཱུཛཾ ཀརོནྟི ནཱམ, དྷམྨཱནུདྷམྨཾ པཊིཔཛྫནྟཱཡེཝ པན མཾ པཱུཛེནྟི ནཱམཱ’’ཏི ཝཏྭཱ ཨིམཾ གཱཐམཱཧ –

‘‘དྷམྨཱརཱམོ དྷམྨརཏོ, དྷམྨཾ ཨནུཝིཙིནྟཡཾ;

དྷམྨཾ ཨནུསྶརཾ བྷིཀྑུ, སདྡྷམྨཱ ན པརིཧཱཡཏཱི’’ཏི.

ཏཏྠ ¶ ནིཝཱསནཊྛེན སམཐཝིཔསྶནཱདྷམྨོ ཨཱརཱམོ ཨསྶཱཏི དྷམྨཱརཱམོ. ཏསྨིཾཡེཝ དྷམྨེ རཏོཏི དྷམྨརཏོ. ཏསྶེཝ དྷམྨསྶ པུནཔྤུནཾ ཝིཙིནྟནཏཱཡ དྷམྨཾ ཨནུཝིཙིནྟཡཾ, ཏཾ དྷམྨཾ ཨཱཝཛྫེནྟོ མནསིཀརོནྟོཏི ཨཏྠོ. ཨནུསྶརནྟི ཏམེཝ དྷམྨཾ ཨནུསྶརནྟོ. སདྡྷམྨཱཏི ཨེཝརཱུཔོ བྷིཀྑུ སཏྟཏིཾསབྷེདཱ བོདྷིཔཀྑིཡདྷམྨཱ ནཝཝིདྷལོཀུཏྟརདྷམྨཱ ཙ ན པརིཧཱཡཏཱིཏི ཨཏྠོ.

དེསནཱཝསཱནེ སོ བྷིཀྑུ ཨརཧཏྟེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

སལཱབྷནྟི ¶ ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨཉྙཏརཾ ཝིཔཀྑསེཝཀཾ བྷིཀྑུཾ ཨཱརབྦྷ ཀཐེསི.

ཏསྶ ¶ ཀིརེཀོ དེཝདཏྟཔཀྑིཀོ བྷིཀྑུ སཧཱཡོ ཨཧོསི. སོ ཏཾ བྷིཀྑཱུཧི སདྡྷིཾ པིཎྜཱཡ ཙརིཏྭཱ ཀཏབྷཏྟཀིཙྩཾ ཨཱགཙྪནྟཾ དིསྭཱ ‘‘ཀུཧིཾ གཏོསཱི’’ཏི པུཙྪི. ‘‘ཨསུཀཊྛཱནཾ ནཱམ པིཎྜཱཡ ཙརིཏུ’’ནྟི. ‘‘ལདྡྷོ ཏེ པིཎྜཔཱཏོ’’ཏི? ‘‘ཨཱམ, ལདྡྷོ’’ཏི. ‘‘ཨིདྷ ཨམྷཱཀཾ མཧཱལཱབྷསཀྐཱརོ, ཀཏིཔཱཧཾ ཨིདྷེཝ ཧོཧཱི’’ཏི. སོ ཏསྶ ཝཙནེན ཀཏིཔཱཧཾ ཏཏྠ ཝསིཏྭཱ སཀཊྛཱནམེཝ ཨགམཱསི ¶ . ཨཐ ནཾ བྷིཀྑཱུ ‘‘ཨཡཾ, བྷནྟེ, དེཝདཏྟསྶ ཨུཔྤནྣལཱབྷསཀྐཱརཾ པརིབྷུཉྫཏི, དེཝདཏྟསྶ པཀྑིཀོ ཨེསོ’’ཏི ཏཐཱགཏསྶ ཨཱརོཙེསུཾ. སཏྠཱ ཏཾ པཀྐོསཱཔེཏྭཱ ‘‘སཙྩཾ ཀིར ཏྭཾ ཨེཝམཀཱསཱི’’ཏི པུཙྪི. ‘‘ཨཱམ, བྷནྟེ, ཨཧཾ ཏཏྠ ཨེཀཾ དཧརཾ ནིསྶཱཡ ཀཏིཔཱཧཾ ཝསིཾ, ན ཙ པན དེཝདཏྟསྶ ལདྡྷིཾ རོཙེམཱི’’ཏི. ཨཐ ནཾ བྷགཝཱ ‘‘ཀིཉྩཱཔི ཏྭཾ ལདྡྷིཾ ན རོཙེསི, དིཊྛདིཊྛཀཱནཾཡེཝ པན ལདྡྷིཾ རོཙེནྟོ ཝིཡ ཝིཙརསི. ན ཏྭཾ ཨིདཱནེཝ ཨེཝཾ ཀརོསི, པུབྦེཔི ཨེཝརཱུཔོཡེཝཱ’’ཏི ཝཏྭཱ ‘‘ཨིདཱནི ཏཱཝ, བྷནྟེ, ཨམྷེཧི སཱམཾ དིཊྛོ, པུབྦེ པནེས ཀེསཾ ལདྡྷིཾ རོཙེནྟོ ཝིཡ ཝིཙརི, ཨཱཙིཀྑཐ ནོ’’ཏི བྷིཀྑཱུཧི ཡཱཙིཏོ ཨཏཱིཏཾ ཨཱཧརིཏྭཱ –

གཛུཏྟམོ སབྦགུཎེསུ ཨཊྛཱ’’ཏི. (ཛཱ. ༡.༡.༢༦) –

ཨིམཾ མཧིལཱ༹མུཁཛཱཏཀཾ ཝིཏྠཱརེཏྭཱ, ‘‘བྷིཀྑཝེ, བྷིཀྑུནཱ ནཱམ སཀལཱབྷེནེཝ སནྟུཊྛེན བྷཝིཏབྦཾ, པརལཱབྷཾ པཏྠེཏུཾ ན ཝཊྚཏི. པརལཱབྷཾ པཏྠེནྟསྶ ཧི ཛྷཱནཝིཔསྶནཱམགྒཕལེསུ ཨེཀདྷམྨོཔི ནུཔྤཛྫཏི, སཀལཱབྷསནྟུཊྛསྶེཝ པན ཛྷཱནཱདཱིནི ¶ ཨུཔྤཛྫནྟཱི’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘སལཱབྷཾ ནཱཏིམཉྙེཡྻ, ནཱཉྙེསཾ པིཧཡཾ ཙརེ;

ཨཉྙེསཾ པིཧཡཾ བྷིཀྑུ, སམཱདྷིཾ ནཱདྷིགཙྪཏི.

‘‘ཨཔྤལཱབྷོཔི ¶ ཙེ བྷིཀྑུ, སལཱབྷཾ ནཱཏིམཉྙཏི;

ཏཾ ཝེ དེཝཱ པསཾསནྟི, སུདྡྷཱཛཱིཝིཾ ཨཏནྡིཏ’’ནྟི.

ཏཏྠ སལཱབྷནྟི ཨཏྟནོ ཨུཔྤཛྫནཀལཱབྷཾ. སཔདཱནཙཱརཉྷི པརིཝཛྫེཏྭཱ ཨནེསནཱཡ ཛཱིཝིཀཾ ¶ ཀཔྤེནྟོ སལཱབྷཾ ཨཏིམཉྙཏི ཧཱིལེ༹ཏི ཛིགུཙྪཏི ནཱམ. ཏསྨཱ ཨེཝཾ ཨཀརཎེན སལཱབྷཾ ནཱཏིམཉྙེཡྻ. ཨཉྙེསཾ པིཧཡནྟི ཨཉྙེསཾ ལཱབྷཾ པཏྠེནྟོ ན ཙརེཡྻཱཏི ཨཏྠོ. སམཱདྷིཾ ནཱདྷིགཙྪཏཱིཏི ཨཉྙེསཉྷི ལཱབྷཾ པིཧཡནྟོ ཏེསཾ ཙཱིཝརཱདིཀརཎེ ཨུསྶུཀྐཾ ཨཱཔནྣོ བྷིཀྑུ ཨཔྤནཱསམཱདྷིཾ ཝཱ ཨུཔཙཱརསམཱདྷིཾ ཝཱ ནཱདྷིགཙྪཏི. སལཱབྷཾ ནཱཏིམཉྙཏཱིཏི ཨཔྤལཱབྷོཔི སམཱནོ ཨུཙྩནཱིཙཀུལེ པཊིཔཱཊིཡཱ སཔདཱནཾ ཙརནྟོ བྷིཀྑུ སལཱབྷཾ ནཱཏིམཉྙཏི ནཱམ. ཏཾ ཝེཏི ཏཾ ཨེཝརཱུཔཾ བྷིཀྑུཾ སཱརཛཱིཝིཏཏཱཡ སུདྡྷཱཛཱིཝིཾ ཛངྒྷབལཾ ནིསྶཱཡ ཛཱིཝིཏཀཔྤནེན ཨཀུསཱིཏཏཱཡ ཨཏནྡིཏཾ དེཝཱ པསཾསནྟི ཐོམེནྟཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སབྦསོཏི ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩགྒདཱཡཀཾ ནཱམ བྲཱཧྨཎཾ ཨཱརབྦྷ ཀཐེསི.

སོ ཀིར སསྶེ ཁེཏྟེ ཋིཏཀཱལེཡེཝ ཁེཏྟགྒཾ ནཱམ དེཏི, ཁལཀཱལེ ཁལགྒཾ ནཱམ དེཏི, ཁལབྷཎྜཀཱལེ ཁལབྷཎྜགྒཾ ནཱམ དེཏི, ཨུཀྑལིཀཀཱལེ ཀུམྦྷགྒཾ ནཱམ དེཏི, པཱཏིཡཾ ཝཌྜྷིཏཀཱལེ པཱཏགྒཾ ནཱམ དེཏཱིཏི ཨིམཱནི པཉྩ ཨགྒདཱནཱནི དེཏི, སམྤཏྟསྶ ཨདཏྭཱ ནཱམ ན བྷུཉྫཏི. ཏེནསྶ པཉྩགྒདཱཡཀོཏྭེཝ ནཱམཾ ཨཧོསི. སཏྠཱ ཏསྶ ཙ བྲཱཧྨཎིཡཱ ཙསྶ ཏིཎྞཾ ཕལཱནཾ ཨུཔནིསྶཡཾ དིསྭཱ བྲཱཧྨཎསྶ བྷོཛནཝེལཱཡཾ གནྟྭཱ དྭཱརེ ཨཊྛཱསི. སོཔི དྭཱརཔམུཁེ ཨནྟོགེཧཱབྷིམུཁོ ནིསཱིདིཏྭཱ བྷུཉྫཏི, སཏྠཱརཾ དྭཱརེ ཋིཏཾ ན པསྶཏི. བྲཱཧྨཎཱི པན ཏཾ པརིཝིསམཱནཱ སཏྠཱརཾ དིསྭཱ ཙིནྟེསི – ‘‘ཨཡཾ བྲཱཧྨཎོ པཉྩསུ ¶ ཋཱནེསུ ཨགྒཾ དཏྭཱ བྷུཉྫཏི, ཨིདཱནི ཙ སམཎོ གོཏམོ ཨཱགནྟྭཱ དྭཱརེ ཋིཏོ. སཙེ བྲཱཧྨཎོ ཨེཏཾ དིསྭཱ ཨཏྟནོ བྷཏྟཾ ཧརིཏྭཱ དསྶཏི, པུནཔཱཧཾ པཙིཏུཾ ན སཀྑིསྶཱམཱི’’ཏི. སཱ ‘‘ཨེཝཾ ཨཡཾ སམཎཾ གོཏམཾ ན པསྶིསྶཏཱི’’ཏི སཏྠུ པིཊྛིཾ དཏྭཱ ཏསྶ པཙྪཏོ ཏཾ པཊིཙྪཱདེནྟཱི ཨོནམིཏྭཱ པུཎྞཙནྡཾ པཱཎིནཱ པཊིཙྪཱདེནྟཱི ཝིཡ ཨཊྛཱསི. ཏཐཱ ཋིཏཱ ཨེཝ ཙ པན ‘‘གཏོ ནུ ཁོ ནོ’’ཏི སཏྠཱརཾ ཨཌྜྷཀྑིཀེན ཨོལོཀེསི. སཏྠཱ ཏཏྠེཝ ཨཊྛཱསི. བྲཱཧྨཎསྶ པན སཝནབྷཡེན ‘‘ཨཏིཙྪཐཱ’’ཏི ན ཝདེཏི, ཨོསཀྐིཏྭཱ པན སཎིཀམེཝ ‘‘ཨཏིཙྪཐཱ’’ཏི ཨཱཧ ¶ . སཏྠཱ ‘‘ན གམིསྶཱམཱི’’ཏི སཱིསཾ ¶ ཙཱལེསི. ལོཀགརུནཱ བུདྡྷེན ‘‘ན གམིསྶཱམཱི’’ཏི སཱིསེ ཙཱལིཏེ སཱ སནྡྷཱརེཏུཾ ཨསཀྐོནྟཱི མཧཱཧསིཏཾ ཧསི. ཏསྨིཾ ཁཎེ སཏྠཱ གེཧཱབྷིམུཁཾ ཨོབྷཱསཾ མུཉྩི. བྲཱཧྨཎོཔི པིཊྛིཾ དཏྭཱ ནིསིནྣོཡེཝ བྲཱཧྨཎིཡཱ ཧསིཏསདྡཾ སུཏྭཱ ཚབྦཎྞཱནཉྩ རསྨཱིནཾ ཨོབྷཱསཾ ཨོལོཀེཏྭཱ སཏྠཱརཾ ཨདྡས. བུདྡྷཱ ཧི ནཱམ གཱམེ ཝཱ ཨརཉྙེ ཝཱ ཧེཏུསམྤནྣཱནཾ ཨཏྟཱནཾ ཨདསྶེཏྭཱ ན པཀྐམནྟི. བྲཱཧྨཎོཔི སཏྠཱརཾ དིསྭཱ, ‘‘བྷོཏི ནཱསིཏོམྷི ཏཡཱ, རཱཛཔུཏྟཾ ཨཱགནྟྭཱ དྭཱརེ ཋིཏཾ མཡ྄ཧཾ ཨནཱཙིཀྑནྟིཡཱ བྷཱརིཡཾ ཏེ ཀམྨཾ ཀཏ’’ནྟི ཝཏྭཱ ཨཌྜྷབྷུཏྟཾ བྷོཛནཔཱཏིཾ ཨཱདཱཡ སཏྠུ སནྟིཀཾ གནྟྭཱ, ‘‘བྷོ གོཏམ, ཨཧཾ པཉྩསུ ཋཱནེསུ ཨགྒཾ དཏྭཱཝ བྷུཉྫཱམི, ཨིཏོ ཙ མེ མཛ྄ཛྷེ བྷིནྡིཏྭཱ ཨེཀོཝ བྷཏྟཀོཊྛཱསོ བྷུཏྟོ, ཨེཀོ ཀོཊྛཱསོ ཨཝསིཊྛོ, པཊིགྒཎྷིསྶསི མེ ཨིདཾ བྷཏྟ’’ནྟི. སཏྠཱ ‘‘ན མེ ཏཝ ཨུཙྪིཊྛབྷཏྟེན ཨཏྠོ’’ཏི ཨཝཏྭཱ, ‘‘བྲཱཧྨཎ, ཨགྒམྤི མཡ྄ཧམེཝ ཨནུཙྪཝིཀཾ, མཛ྄ཛྷེ བྷིནྡིཏྭཱ ཨཌྜྷབྷུཏྟབྷཏྟམྤི, ཙརིམཀབྷཏྟཔིཎྜོཔི མཡ྄ཧམེཝ ཨནུཙྪཝིཀོ. མཡཉྷི, བྲཱཧྨཎ, པརདཏྟཱུཔཛཱིཝིཔེཏསདིསཱ’’ཏི ཝཏྭཱ ཨིམཾ གཱཐམཱཧ –

ཏཾ ཝཱཔི དྷཱིརཱ མུནི ཝེདཡནྟཱི’’ཏི. (སུ. ནི. ༢༡༩);

བྲཱཧྨཎོ ¶ ཏཾ སུཏྭཱཝ པསནྣཙིཏྟོ ཧུཏྭཱ ‘‘ཨཧོ ཨཙྪརིཡཾ, དཱིཔསཱམིཀོ ནཱམ རཱཛཔུཏྟོ ‘ན མེ ཏཝ ཨུཙྪིཊྛབྷཏྟེན ཨཏྠོ’ཏི ཨཝཏྭཱ ཨེཝཾ ཝཀྑཏཱི’’ཏི དྭཱརེ ཋིཏཀོཝ སཏྠཱརཾ པཉྷཾ པུཙྪི – ‘‘བྷོ གོཏམ ¶ , ཏུམྷེ ཨཏྟནོ སཱཝཀེ བྷིཀྑཱུཏི ཝདཐ, ཀིཏྟཱཝཏཱ བྷིཀྑུ ནཱམ ཧོཏཱི’’ཏི. སཏྠཱ ‘‘ཀཐཾརཱུཔཱ ནུ ཁོ ཨིམསྶ དྷམྨདེསནཱ སཔྤཱཡཱ’’ཏི ཨུཔདྷཱརེནྟོ ‘‘ཨིམེ དྭེཔི ཛནཱ ཀསྶཔབུདྡྷཀཱལེ ‘ནཱམརཱུཔ’ནྟི ཝདནྟཱནཾ ཀཐཾ སུཎིཾསུ, ནཱམརཱུཔཾ ཨཝིསྶཛྫིཏྭཱཝ ནེསཾ དྷམྨཾ དེསེཏུཾ ཝཊྚཏཱི’’ཏི, ‘‘བྲཱཧྨཎ, ནཱམེ ཙ རཱུཔེ ཙ ཨརཛྫནྟོ ཨསཛྫནྟོ ཨསོཙནྟོ བྷིཀྑུ ནཱམ ཧོཏཱི’’ཏི ཝཏྭཱ ཨིམཾ གཱཐམཱཧ –

‘‘སབྦསོ ནཱམརཱུཔསྨིཾ, ཡསྶ ནཏྠི མམཱཡིཏཾ;

ཨསཏཱ ཙ ན སོཙཏི, ས ཝེ བྷིཀྑཱུཏི ཝུཙྩཏཱི’’ཏི.

ཏཏྠ སབྦསོཏི སབྦསྨིམྤི ཝེདནཱདཱིནཾ ཙཏུནྣཾ, རཱུཔཀྑནྡྷསྶ ཙཱཏི པཉྩནྣཾ ཁནྡྷཱནཾ ཝསེན ¶ པཝཏྟེ ནཱམརཱུཔེ. མམཱཡིཏནྟི ཡསྶ ཨཧནྟི ཝཱ མམནྟི ཝཱ གཱཧོ ནཏྠི. ཨསཏཱ ཙ ན སོཙཏཱིཏི ཏསྨིཉྩ ནཱམརཱུཔེ ཁཡཝཡཾ པཏྟེ ‘‘མམ རཱུཔཾ ཁཱིཎཾ…པེ… མམ ཝིཉྙཱཎཾ ཁཱིཎ’’ནྟི ན སོཙཏི ན ཝིཧཉྙཏི, ‘‘ཁཡཝཡདྷམྨཾ མེ ཁཱིཎ’’ནྟི པསྶཏི. ས ཝེཏི སོ ཨེཝརཱུཔོ ཝིཛྫམཱནེཔི ནཱམརཱུཔེ མམཱཡིཏརཧིཏོཔི ཨསཏཱཔི ཏེན ཨསོཙནྟོ བྷིཀྑཱུཏི ཝུཙྩཏཱིཏི ཨཏྠོ.

དེསནཱཝསཱནེ ¶ ཨུབྷོཔི ཛཡམྤཏིཀཱ ཨནཱགཱམིཕལེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

མེཏྟཱཝིཧཱརཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ བྷིཀྑཱུ ཨཱརབྦྷ ཀཐེསི.

ཨེཀསྨིཉྷི སམཡེ ཨཱཡསྨནྟེ མཧཱཀཙྩཱནེ ཨཝནྟིཛནཔདེ ཀུརརགྷརཾ ནིསྶཱཡ པཝཏྟཔབྦཏེ ཝིཧརནྟེ སོཎོ ནཱམ ཀོཊིཀཎྞོ ཨུཔཱསཀོ ཐེརསྶ དྷམྨཀཐཱཡ པསཱིདིཏྭཱ ཐེརསྶ སནྟིཀེ པབྦཛིཏུཀཱམོ ¶ ཐེརེན ‘‘དུཀྐརཾ ཁོ, སོཎ, ཡཱཝཛཱིཝཾ ཨེཀབྷཏྟཾ ཨེཀསེཡྻཾ བྲཧྨཙརིཡ’’ནྟི ཝཏྭཱ དྭེ ཝཱརེ པཊིཀྑིཏྟོཔི པབྦཛྫཱཡ ཨཏིཝིཡ ཨུསྶཱཧཛཱཏོ ཏཏིཡཝཱརེ ཐེརཾ ཡཱཙིཏྭཱ པབྦཛིཏྭཱ ཨཔྤབྷིཀྑུཀཏྟཱ དཀྑིཎཱཔཐེ ཏིཎྞཾ ཝསྶཱནཾ ཨཙྩཡེན ལདྡྷཱུཔསམྤདོ སཏྠཱརཾ སམྨུཁཱ དཊྛུཀཱམོ ཧུཏྭཱ ཨུཔཛ྄ཛྷཱཡཾ ཨཱཔུཙྪིཏྭཱ ཏེན དིནྣཾ སཱསནཾ གཧེཏྭཱ ཨནུཔུབྦེན ཛེཏཝནཾ གནྟྭཱ སཏྠཱརཾ ཝནྡིཏྭཱ ཀཏཔཊིསནྠཱརོ སཏྠཱརཱ ཨེཀགནྡྷཀུཊིཡཾཡེཝ ཨནུཉྙཱཏསེནཱསནོ བཧུདེཝ རཏྟིཾ ཨཛ྄ཛྷོཀཱསེ ཝཱིཐིནཱམེཏྭཱ རཏྟིབྷཱགེ གནྡྷཀུཊིཾ པཝིསིཏྭཱ ཨཏྟནོ པཏྟསེནཱསནེ ཏཾ རཏྟིབྷཱགཾ ཝཱིཏིནཱམེཏྭཱ པཙྩཱུསསམཡེ སཏྠཱརཱ ཨཛ྄ཛྷིཊྛོ སོལ༹ས ཨཊྛཀཝགྒིཀཱནི ¶ (སུ. ནི. ༧༧༢ ཨཱདཡོ) སབྦཱནེཝ སརབྷཉྙེན ཨབྷཎི. ཨཐསྶ བྷགཝཱ སརབྷཉྙཔརིཡོསཱནེ ཨབྦྷཱནུམོདེནྟོ – ‘‘སཱདྷུ སཱདྷུ, བྷིཀྑཱུ’’ཏི སཱདྷུཀཱརཾ ཨདཱསི. སཏྠཱརཱ དིནྣསཱདྷུཀཱརཾ སུཏྭཱ བྷཱུམཊྛཀདེཝཱ ནཱགཱ སུཔཎྞཱཏི ཨེཝཾ ཡཱཝ བྲཧྨལོཀཱ ཨེཀསཱདྷུཀཱརམེཝ ཨཧོསི.

ཏསྨིཾ ¶ ཁཎེ ཛེཏཝནཏོ ཝཱིསཡོཛནསཏམཏྠཀེ ཀུརརགྷརནགརེ ཐེརསྶ མཱཏུ མཧཱཨུཔཱསིཀཱཡ གེཧེ ཨདྷིཝཏྠཱ དེཝཏཱཔི མཧནྟེན སདྡེན སཱདྷུཀཱརམདཱསི. ཨཐ ནཾ ཨུཔཱསིཀཱ ཨཱཧ – ‘‘ཀོ ཨེས སཱདྷུཀཱརཾ དེཏཱི’’ཏི? ཨཧཾ, བྷགིནཱིཏི. ཀོསི ཏྭནྟི? ཏཝ གེཧེ ཨདྷིཝཏྠཱ, དེཝཏཱཏི. ཏྭཾ ཨིཏོ པུབྦེ མཡ྄ཧཾ སཱདྷུཀཱརཾ ཨདཏྭཱ ཨཛྫ ཀསྨཱ དེསཱིཏི? ནཱཧཾ ཏུཡ྄ཧཾ སཱདྷུཀཱརཾ དམྨཱིཏི. ཨཐ ཀསྶ ཏེ སཱདྷུཀཱརོ དིནྣོཏི? ཏཝ པུཏྟསྶ ཀོཊིཀཎྞསྶ སོཎཏྠེརསྶཱཏི. ཀིཾ མེ པུཏྟེན ཀཏནྟི? པུཏྟོ ཏེ ཨཛྫ སཏྠཱརཱ སདྡྷིཾ ཨེཀགནྡྷཀུཊིཡཾ ཝསིཏྭཱ དྷམྨཾ དེསེསི, སཏྠཱ ཏཝ པུཏྟསྶ དྷམྨཾ སུཏྭཱ པསནྣོ སཱདྷུཀཱརམདཱསི. ཏེནསྶ མཡཱཔི སཱདྷུཀཱརོ དིནྣོ. སམྨཱསམྦུདྡྷསྶ ཧི སཱདྷུཀཱརཾ སམྤཊིཙྪིཏྭཱ བྷཱུམཊྛཀདེཝེ ཨཱདིཾ ཀཏྭཱ ཡཱཝ བྲཧྨལོཀཱ ཨེཀསཱདྷུཀཱརམེཝ ཛཱཏནྟི. ཀིཾ པན, སཱམི, མམ པུཏྟེན སཏྠུ དྷམྨོ ཀཐིཏོ, སཏྠཱརཱ མམ པུཏྟསྶ ཀཐིཏོཏི? ཏཝ པུཏྟེན སཏྠུ ཀཐིཏོཏི. ཨེཝཾ དེཝཏཱཡ ཀཐེནྟིཡཱཝ ཨུཔཱསིཀཱཡ པཉྩཝཎྞཱ པཱིཏི ཨུཔྤཛྫིཏྭཱ སཀལསརཱིརཾ ཕརི.

ཨཐསྶཱ ཨེཏདཧོསི – ‘‘སཙེ མེ པུཏྟོ སཏྠཱརཱ སདྡྷིཾ ཨེཀགནྡྷཀུཊིཡཾ ཝསིཏྭཱ སཏྠུ དྷམྨཾ ཀཐེཏུཾ སཀྑི ¶ , མཡ྄ཧམྤི ཀཐེཏུཾ སཀྑིསྶཏིཡེཝ ¶ . པུཏྟསྶ ཨཱགཏཀཱལེ དྷམྨསྶཝནཾ ཀཱརེཏྭཱ དྷམྨཀཐཾ སུཎིསྶཱམཱི’’ཏི. སོཎཏྠེརོཔི ཁོ སཏྠཱརཱ སཱདྷུཀཱརེ དིནྣེ ‘‘ཨཡཾ མེ ཨུཔཛ྄ཛྷཱཡེན དིནྣསཱསནཾ ཨཱརོཙེཏུཾ ཀཱལོ’’ཏི བྷགཝནྟཾ པཙྩནྟིམེསུ ཛནཔདེསུ ཝིནཡདྷརཔཉྩམེན གཎེན ཨུཔསམྤདཾ ཨཱདིཾ ཀཏྭཱ (མཧཱཝ. ༢༥༩) པཉྩ ཝརེ ཡཱཙིཏྭཱ ཀཏིཔཱཧཾ སཏྠུ སནྟིཀེཡེཝ ཝསིཏྭཱ ‘‘ཨུཔཛ྄ཛྷཱཡཾ པསྶིསྶཱམཱི’’ཏི སཏྠཱརཾ ཨཱཔུཙྪིཏྭཱ ཛེཏཝནཱ ནིཀྑམིཏྭཱ ཨནུཔུབྦེན ཨུཔཛ྄ཛྷཱཡསྶ སནྟིཀཾ ཨགམཱསི.

ཐེརོ པུནདིཝསེ ཏཾ ཨཱདཱཡ པིཎྜཱཡ ཙརནྟོ མཱཏུ ཨུཔཱསིཀཱཡ གེཧདྭཱརཾ ཨགམཱསི. སཱཔི པུཏྟཾ དིསྭཱ ཏུཊྛམཱནསཱ ཝནྡིཏྭཱ སཀྐཙྩཾ པརིཝིསིཏྭཱ པུཙྪི – ‘‘སཙྩཾ ཀིར ཏྭཾ, ཏཱཏ, སཏྠཱརཱ སདྡྷིཾ ཨེཀགནྡྷཀུཊིཡཾ ཝསིཏྭཱ སཏྠུ དྷམྨཀཐཾ ཀཐེསཱི’’ཏི. ‘‘ཨུཔཱསིཀེ, ཏུཡ྄ཧཾ ཀེན ཨིདཾ ཀཐིཏ’’ནྟི? ‘‘ཏཱཏ, ཨིམསྨིཾ གེཧེ ཨདྷིཝཏྠཱ དེཝཏཱ མཧནྟེན སདྡེན སཱདྷུཀཱརཾ དཏྭཱ མཡཱ ‘ཀོ ཨེསོ’ཏི ཝུཏྟེ ‘ཨཧ’ནྟི ཝཏྭཱ ཨེཝཉྩ ཨེཝཉྩ ཀཐེསི. ཏཾ སུཏྭཱ མཡ྄ཧཾ ཨེཏདཧོསི – ‘སཙེ མེ པུཏྟོ སཏྠུ དྷམྨཀཐཾ ཀཐེསི, མཡ྄ཧམྤི ཀཐེཏུཾ སཀྑིསྶཏཱི’ཏི. ཨཐ ནཾ ཨཱཧ – ‘ཏཱཏ, ཡཏོ ཏཡཱ སཏྠུ སམྨུཁཱ དྷམྨོ ཀཐིཏོ, མཡ྄ཧམྤི ཀཐེཏུཾ སཀྑིསྶསི ཨེཝ. ཨསུཀདིཝསེ ནཱམ དྷམྨསྶཝནཾ ཀཱརེཏྭཱ ཏཝ དྷམྨཾ སུཎིསྶཱམི, ཏཱཏཱ’’’ཏི. སོ ཨདྷིཝཱསེསི. ཨུཔཱསིཀཱ བྷིཀྑུསངྒྷསྶ དཱནཾ དཏྭཱ པཱུཛཾ ཀཏྭཱ ‘‘པུཏྟསྶ མེ དྷམྨཀཐཾ སུཎིསྶཱམཱི’’ཏི ཨེཀམེཝ དཱསིཾ གེཧརཀྑིཀཾ ཋཔེཏྭཱ ¶ སབྦཾ པརིཛནཾ ཨཱདཱཡ ཨནྟོནགརེ དྷམྨསྶཝནཏྠཱཡ ¶ ཀཱརིཏེ མཎྜཔེ ཨལངྐཏདྷམྨཱསནཾ ཨབྷིརུཡ྄ཧ དྷམྨཾ དེསེནྟསྶ པུཏྟསྶ དྷམྨཀཐཾ སོཏུཾ ཨགམཱསི.

ཏསྨིཾ པན ཀཱལེ ནཝསཏཱ ཙོརཱ ཏསྶཱ ཨུཔཱསིཀཱཡ གེཧེ ཨོཏཱརཾ ཨོལོཀེནྟཱ ཝིཙརནྟི. ཏསྶཱ པན གེཧཾ སཏྟཧི པཱཀཱརེཧི པརིཀྑིཏྟཾ སཏྟདྭཱརཀོཊྛཀཡུཏྟཾ, ཏཏྠ ཏེསུ ཏེསུ ཋཱནེསུ ཙཎྜསུནཁེ བནྡྷིཏྭཱ ཋཔཡིཾསུ. ཨནྟོགེཧེ ཚདནསྶ ཨུདཀཔཱཏཊྛཱནེ པན པརིཁཾ ཁཎིཏྭཱ ཏིཔུནཱ པཱུརཡིཾསུ. ཏཾ དིཝཱ ཨཱཏཔེན ཝིལཱིནཾ པཀྐུཐིཏཾ ཝིཡ ཏིཊྛཏི, རཏྟིཾ ཀཋིནཾ ཀཀྑལ༹ཾ ཧུཏྭཱ ཏིཊྛཏི. ཏསྶཱནནྟརཱ མཧནྟཱནི ཨཡསངྒྷཱཊཀཱནི ནིརནྟརཾ བྷཱུམིཡཾ ཨོདཧིཾསུ. ཨིཏི ཨིམཉྩཱརཀྑཾ ཨུཔཱསིཀཱཡ ཙ ཨནྟོགེཧེ ཋིཏབྷཱཝཾ པཊིཙྩ ཏེ ཙོརཱ ཨོཀཱསཾ ཨལབྷནྟཱ ཏཾ དིཝསཾ ཏསྶཱ གཏབྷཱཝཾ ཉཏྭཱ ཨུམངྒཾ བྷིནྡིཏྭཱ ཏིཔུཔརིཁཱཡ ¶ ཙ ཨཡསངྒྷཱཊཀཱནཉྩ ཧེཊྛཱབྷཱགེནེཝ གེཧཾ པཝིསིཏྭཱ ཙོརཛེཊྛཀཾ ཏསྶཱ སནྟིཀཾ པཧིཎིཾསུ ‘‘སཙེ སཱ ཨམྷཱཀཾ ཨིདྷ པཝིཊྛབྷཱཝཾ སུཏྭཱ ནིཝཏྟིཏྭཱ གེཧཱབྷིམུཁཱི ཨཱགཙྪཏི, ཨསིནཱ ནཾ པཧརིཏྭཱ མཱརེཐཱ’’ཏི. སོ གནྟྭཱ ཏསྶཱ སནྟིཀེ ཨཊྛཱསི.

ཙོརཱཔི ཨནྟོགེཧེ དཱིཔཾ ཛཱལེཏྭཱ ཀཧཱཔཎགབྦྷདྭཱརཾ ཝིཝརིཾསུ. སཱ དཱསཱི ཙོརེ དིསྭཱ ཨུཔཱསིཀཱཡ སནྟིཀཾ གནྟྭཱ, ‘‘ཨཡྻེ, བཧཱུ ཙོརཱ གེཧཾ པཝིསིཏྭཱ ཀཧཱཔཎགབྦྷདྭཱརཾ ཝིཝརིཾསཱུ’’ཏི ཨཱརོཙེསི. ‘‘ཙོརཱ ཨཏྟནཱ དིཊྛཀཧཱཔཎེ ཧརནྟུ, ཨཧཾ མམ པུཏྟསྶ དྷམྨཀཐཾ སུཎཱམི, མཱ མེ དྷམྨསྶ ཨནྟརཱཡཾ ཀརི, གེཧཾ གཙྪཱ’’ཏི ཏཾ པཧིཎི. ཙོརཱཔི ཀཧཱཔཎགབྦྷཾ ཏུཙྪཾ ཀཏྭཱ ¶ རཛཏགབྦྷཾ ཝིཝརིཾསུ. སཱ པུནཔི གནྟྭཱ ཏམཏྠཾ ཨཱརོཙེསི. ཨུཔཱསིཀཱཔི ‘‘ཙོརཱ ཨཏྟནཱ ཨིཙྪིཏཾ ཧརནྟུ, མཱ མེ ཨནྟརཱཡཾ ཀརཱི’’ཏི པུན ཏཾ པཧིཎི. ཙོརཱ རཛཏགབྦྷམྤི ཏུཙྪཾ ཀཏྭཱ སུཝཎྞགབྦྷཾ ཝིཝརིཾསུ. སཱ པུནཔི གནྟྭཱ ཨུཔཱསིཀཱཡ ཏམཏྠཾ ཨཱརོཙེསི. ཨཐ ནཾ ཨུཔཱསིཀཱ ཨཱམནྟེཏྭཱ, ‘‘བྷོཏི ཛེ ཏྭཾ ཨནེཀཝཱརཾ མམ སནྟིཀཾ ཨཱགཏཱ, ‘ཙོརཱ ཡཐཱརུཙིཏཾ ཧརནྟུ, ཨཧཾ མམ པུཏྟསྶ དྷམྨཀཐཾ སུཎཱམི, མཱ མེ ཨནྟརཱཡཾ ཀརཱི’ཏི མཡཱ ཝུཏྟཱཔི མམ ཀཐཾ ཨནཱདིཡིཏྭཱ པུནཔྤུནཾ ཨཱགཙྪསིཡེཝ. སཙེ ཨིདཱནི ཏྭཾ ཨཱགཙྪིསྶསི, ཛཱནིསྶཱམི ཏེ ཀཏྟབྦཾ, གེཧམེཝ གཙྪཱ’’ཏི པཧིཎི.

ཙོརཛེཊྛཀོ ཏསྶཱ ཀཐཾ སུཏྭཱ ‘‘ཨེཝརཱུཔཱཡ ཨིཏྠིཡཱ སནྟཀཾ ཧརནྟཱནཾ ཨསནི པཏིཏྭཱ མཏྠཀཾ བྷིནྡེཡྻཱ’’ཏི ཙོརཱནཾ སནྟིཀཾ གནྟྭཱ ‘‘སཱིགྷཾ ཨུཔཱསིཀཱཡ སནྟཀཾ པཊིཔཱཀཏིཀཾ ཀརོཐཱ’’ཏི ཨཱཧ. ཏེ ཀཧཱཔཎེཧི ཀཧཱཔཎགབྦྷཾ, རཛཏསུཝཎྞེཧི རཛཏསུཝཎྞགབྦྷེ པུན པཱུརཡིཾསུ. དྷམྨཏཱ ཀིརེསཱ, ཡཾ དྷམྨོ དྷམྨཙཱརིནཾ རཀྑཏི. ཏེནེཝཱཧ –

ན དུགྒཏིཾ གཙྪཏི དྷམྨཙཱརཱི’’ཏི. (ཐེརགཱ. ༣༠༣; ཛཱ. ༡.༡༠.༡༠༢);

ཙོརཱཔི གནྟྭཱ དྷམྨསྶཝནཊྛཱནེ ཨཊྛཾསུ. ཐེརོཔི དྷམྨཾ ཀཐེཏྭཱ ཝིབྷཱཏཱཡ རཏྟིཡཱ ཨཱསནཱ ཨོཏརི. ཏསྨིཾ ཁཎེ ཙོརཛེཊྛཀོ ཨུཔཱསིཀཱཡ ¶ པཱདམཱུལེ ནིཔཛྫིཏྭཱ ‘‘ཁམཱཧི མེ, ཨཡྻེ’’ཏི ཨཱཧ. ‘‘ཀིཾ ཨིདཾ, ཏཱཏཱ’’ཏི? ‘‘ཨཧཉྷི ཏུམྷེསུ ¶ ཨཱགྷཱཏཾ ཀཏྭཱ ཏུམྷེ མཱརེཏུཀཱམོ ཨཊྛཱསི’’ནྟི. ‘‘ཏེན ཧི ཏེ, ཏཱཏ, ཁམཱམཱི’’ཏི. སེསཙོརཱཔི ཏཐེཝ ཝཏྭཱ, ‘‘ཏཱཏཱ, ཁམཱམཱི’’ཏི ཝུཏྟེ ཨཱཧཾསུ – ‘‘ཨཡྻེ, སཙེ ནོ ཁམཐ, པུཏྟསྶ ཝོ སནྟིཀེ ཨམྷཱཀཾ པབྦཛྫཾ དཱཔེཐཱ’’ཏི. སཱ པུཏྟཾ ཝནྡིཏྭཱ ཨཱཧ – ‘‘ཏཱཏ, ཨིམེ ཙོརཱ མམ གུཎེསུ ཏུམྷཱཀཉྩ དྷམྨཀཐཱཡ པསནྣཱ པབྦཛྫཾ ཡཱཙནྟི, པབྦཱཛེཐ ནེ’’ཏི. ཐེརོ ‘‘སཱདྷཱུ’’ཏི ཝཏྭཱ ཏེཧི ནིཝཏྠཝཏྠཱནཾ དསཱནི ཚིནྡཱཔེཏྭཱ ཏམྦམཏྟིཀཱཡ རཛཱཔེཏྭཱ ཏེ པབྦཱཛེཏྭཱ སཱིལེསུ པཏིཊྛཱཔེསི. ཨུཔསམྤནྣཀཱལེ ཙ ནེསཾ ཨེཀེཀསྶ ཝིསུཾ ཝིསུཾ ཀམྨཊྛཱནམདཱསི. ཏེ ནཝསཏཱ བྷིཀྑཱུ ཝིསུཾ ཝིསུཾ ནཝསཏཀམྨཊྛཱནཱནི གཧེཏྭཱ ཨེཀཾ པབྦཏཾ ཨབྷིརུཡ྄ཧ ཏསྶ ཏསྶ རུཀྑསྶ ཚཱཡཱཡ ནིསཱིདིཏྭཱ སམཎདྷམྨཾ ཀརིཾསུ.

སཏྠཱ ཝཱིསཡོཛནསཏམཏྠཀེ ཛེཏཝནམཧཱཝིཧཱརེ ནིསིནྣོཝ ཏེ བྷིཀྑཱུ ཨོལོཀེཏྭཱ ཏེསཾ ཙརིཡཝསེན དྷམྨདེསནཾ ཝཝཏྠཱཔེཏྭཱ ཨོབྷཱསཾ ཕརིཏྭཱ སམྨུཁེ ནིསཱིདིཏྭཱ ཀཐེནྟོ ཝིཡ ཨིམཱ གཱཐཱ ཨབྷཱསི –

‘‘མེཏྟཱཝིཧཱརཱི ཡོ བྷིཀྑུ, པསནྣོ བུདྡྷསཱསནེ;

ཨདྷིགཙྪེ པདཾ སནྟཾ, སངྑཱརཱུཔསམཾ སུཁཾ.

‘‘སིཉྩ བྷིཀྑུ ཨིམཾ ནཱཝཾ, སིཏྟཱ ཏེ ལཧུམེསྶཏི;

ཚེཏྭཱ རཱགཉྩ དོསཉྩ, ཏཏོ ནིབྦཱནམེཧིསི.

‘‘པཉྩ ཚིནྡེ པཉྩ ཛཧེ, པཉྩ ཙུཏྟརི བྷཱཝཡེ;

པཉྩསངྒཱཏིགོ བྷིཀྑུ, ཨོགྷཏིཎྞོཏི ཝུཙྩཏི.

‘‘ནཏྠི ¶ ཛྷཱནཾ ཨཔཉྙསྶ, པཉྙཱ ནཏྠི ཨཛྷཱཡཏོ;

ཡམྷི ཛྷཱནཉྩ པཉྙཱ ཙ, ས ཝེ ནིབྦཱནསནྟིཀེ.

‘‘སུཉྙཱགཱརཾ པཝིཊྛསྶ, སནྟཙིཏྟསྶ བྷིཀྑུནོ;

ཨམཱནུསཱི རཏཱི ཧོཏི, སམྨཱ དྷམྨཾ ཝིཔསྶཏོ.

‘‘ཡཏོ ཡཏོ སམྨསཏི, ཁནྡྷཱནཾ ཨུདཡབྦཡཾ;

ལབྷཏཱི པཱིཏིཔཱམོཛྫཾ, ཨམཏཾ ཏཾ ཝིཛཱནཏཾ.

‘‘ཏཏྲཱཡམཱདི བྷཝཏི, ཨིདྷ པཉྙསྶ བྷིཀྑུནོ;

ཨིནྡྲིཡགུཏྟི སནྟུཊྛི, པཱཏིམོཀྑེ ཙ སཾཝརོ.

‘‘མིཏྟེ བྷཛསྶུ ཀལྱཱཎེ, སུདྡྷཱཛཱིཝེ ཨཏནྡིཏེ;

པཊིསནྠཱརཝུཏྱསྶ, ཨཱཙཱརཀུསལོ སིཡཱ;

ཏཏོ པཱམོཛྫབཧུལོ, དུཀྑསྶནྟཾ ཀརིསྶཏཱི’’ཏི.

ཏཏྠ ¶ མེཏྟཱཝིཧཱརཱིཏི མེཏྟཱཀམྨཊྛཱནེ ཀམྨཾ ཀརོནྟོཔི མེཏྟཱཝསེན ཏིཀཙཏུཀྐཛ྄ཛྷཱནེ ནིབྦཏྟེཏྭཱ ཋིཏོཔི མེཏྟཱཝིཧཱརཱིཡེཝ ནཱམ. པསནྣོཏི ཡོ པན བུདྡྷསཱསནེ པསནྣོ ཧོཏི, པསཱདཾ རོཙེཏིཡེཝཱཏི ཨཏྠོ. པདཾ སནྟནྟི ནིབྦཱནསྶེཏཾ ནཱམཾ. ཨེཝརཱུཔོ ཧི བྷིཀྑུ སནྟཾ ཀོཊྛཱསཾ སབྦསངྑཱརཱནཾ ཨུཔསནྟཏཱཡ སངྑཱརཱུཔསམཾ, པརམསུཁཏཱཡ སུཁནྟི ལདྡྷནཱམཾ ནིབྦཱནཾ ཨདྷིགཙྪཏི, ཝིནྡཏིཡེཝཱཏི ཨཏྠོ.

སིཉྩ བྷིཀྑུ ཨིམཾ ནཱཝནྟི བྷིཀྑུ ཨིམཾ ཨཏྟབྷཱཝསངྑཱཏཾ ནཱཝཾ མིཙྪཱཝིཏཀྐོདཀཾ ཚཌྜེནྟོ སིཉྩ. སིཏྟཱ ཏེ ལཧུམེསྶཏཱིཏི ཡཐཱ ཧི མཧཱསམུདྡེ ཨུདཀསྶེཝ བྷརིཏཱ ནཱཝཱ ཚིདྡཱནི ¶ པིདཧིཏྭཱ ཨུདཀསྶ སིཏྟཏཱཡ སིཏྟཱ སལླཧུཀཱ ཧུཏྭཱ མཧཱསམུདྡེ ཨནོསཱིདིཏྭཱ སཱིགྷཾ སུཔཊྚནཾ གཙྪཏི, ཨེཝཾ ཏཝཱཔི ཨཡཾ མིཙྪཱཝིཏཀྐོདཀབྷརིཏཱ ཨཏྟབྷཱཝནཱཝཱ ཙཀྑུདྭཱརཱདིཚིདྡཱནི སཾཝརེན པིདཧིཏྭཱ ཨུཔྤནྣསྶ མིཙྪཱཝིཏཀྐོདཀསྶ སིཏྟཏཱཡ སིཏྟཱ སལླཧུཀཱ སཾསཱརཝཊྚེ ཨནོསཱིདིཏྭཱ སཱིགྷཾ ནིབྦཱནཾ གམིསྶཏི. ཚེཏྭཱཏི རཱགདོསབནྡྷནཱནི ཚིནྡ. ཨེཏཱནི ཧི ཚིནྡིཏྭཱ ཨརཧཏྟཔྤཏྟོ ཏཏོ ཨཔརབྷཱགེ ཨནུཔཱདིསེསནིབྦཱནམེཝ ཨེཧིསི, གམིསྶསཱིཏི ཨཏྠོ.

པཉྩ ¶ ཚིནྡེཏི ¶ ཧེཊྛཱཨཔཱཡསམྤཱཔཀཱནི པཉྩོརམྦྷཱགིཡསཾཡོཛནཱནི པཱདེ བདྡྷརཛྫུཾ པུརིསོ སཏྠེན ཝིཡ ཧེཊྛཱམགྒཏྟཡེན ཚིནྡེཡྻ. པཉྩ ཛཧེཏི ཨུཔརིདེཝལོཀསམྤཱཔཀཱནི པཉྩུདྡྷམྦྷཱགིཡསཾཡོཛནཱནི པུརིསོ གཱིཝཱཡ བདྡྷརཛྫུཀཾ ཝིཡ ཨརཧཏྟམགྒེན ཛཧེཡྻ པཛཧེཡྻ, ཚིནྡེཡྻཱཏི ཨཏྠོ. པཉྩ ཙུཏྟརི བྷཱཝཡེཏི ཨུདྡྷམྦྷཱགིཡསཾཡོཛནཱནཾ པཧཱནཏྠཱཡ སདྡྷཱདཱིནི པཉྩིནྡྲིཡཱནི ཨུཏྟརི བྷཱཝེཡྻ. པཉྩསངྒཱཏིགོཏི ཨེཝཾ སནྟེ པཉྩནྣཾ རཱགདོསམོཧམཱནདིཊྛིསངྒཱནཾ ཨཏིཀྐམནེན པཉྩསངྒཱཏིགོ བྷིཀྑུ ཨོགྷཏིཎྞོཏི ཝུཙྩཏི, ཙཏྟཱརོ ཨོགྷེ ཏིཎྞོཡེཝཱཏི ཝུཙྩཏཱིཏི ཨཏྠོ.

ཛྷཱཡ བྷིཀྑཱུཏི བྷིཀྑུ ཏྭཾ དྭིནྣཾ ཛྷཱནཱནཾ ཝསེན ཛྷཱཡ ཙེཝ, ཀཱཡཀམྨཱདཱིསུ ཙ ཨཔྤམཏྟཝིཧཱརིཏཱཡ མཱ པམཛྫི. རམེསྶཱུཏི པཉྩཝིདྷེ ཙ ཀཱམགུཎེ ཏེ ཙིཏྟཾ མཱ རམེསྶུ. མཱ ལོཧགུལ༹ནྟི སཏིཝོསྶགྒལཀྑཎེན ཧི པམཱདེན པམཏྟཱ ནིརཡེ ཏཏྟཾ ལོཧགུལ༹ཾ གིལནྟི, ཏེན ཏཾ ཝདཱམི ‘‘མཱ པམཏྟོ ཧུཏྭཱ ལོཧགུལ༹ཾ གིལི, མཱ ནིརཡེ ཌཡ྄ཧམཱནོ ‘དུཀྑམིད’ནྟི ཀནྡཱི’’ཏི ཨཏྠོ.

ནཏྠི ཛྷཱནནྟི ཛྷཱནུཔྤཱདིཀཱཡ ཝཱཡཱམཔཉྙཱཡ ཨཔཉྙསྶ ཛྷཱནཾ ནཱམ ནཏྠི. པཉྙཱ ནཏྠཱིཏི ¶ ཨཛྷཱཡནྟསྶ ‘‘སམཱཧིཏོ བྷིཀྑུ ཡཐཱབྷཱུཏཾ ཛཱནཱཏི པསྶཏཱི’’ཏི ཝུཏྟལཀྑཎཱ པཉྙཱ ནཏྠི. ཡམྷི ཛྷཱནཉྩ པཉྙཱ ཙཱཏི ཡམྷི པུགྒལེ ཨིདཾ ཨུབྷཡམྤི ཨཏྠི, སོ ནིབྦཱནསྶ སནྟིཀེ ཋིཏོཡེཝཱཏི ཨཏྠོ.

སུཉྙཱགཱརཾ པཝིཊྛསྶཱཏི ཀིསྨིཉྩིདེཝ ཝིཝིཏྟོཀཱསེ ཀམྨཊྛཱནཾ ཨཝིཛཧིཏྭཱ ཀམྨཊྛཱནམནསིཀཱརེན ནིསིནྣསྶ. སནྟཙིཏྟསྶཱཏི ནིབྦུཏཙིཏྟསྶ. སམྨཱཏི ཧེཏུནཱ ཀཱརཎེན དྷམྨཾ ཝིཔསྶནྟསྶ ཝིཔསྶནཱསངྑཱཏཱ ཨམཱནུསཱི རཏི ཨཊྛསམཱཔཏྟིསངྑཱཏཱ དིབྦཱཔི རཏི ཧོཏི ཨུཔྤཛྫཏཱིཏི ཨཏྠོ.

ཡཏོ ¶ ཡཏོ སམྨསཏཱིཏི ཨཊྛཏིཾསཱཡ ཨཱརམྨཎེསུ ཀམྨཾ ཀརོནྟོ ཡེན ཡེནཱཀཱརེན, པུརེབྷཏྟཱདཱིསུ ཝཱ ཀཱལེསུ ཡསྨིཾ ཡསྨིཾ ཨཏྟནཱ ཨབྷིརུཙིཏེ ཀཱལེ, ཨབྷིརུཙིཏེ ཝཱ ཀམྨཊྛཱནེ ཀམྨཾ ཀརོནྟོ སམྨསཏི. ཨུདཡབྦཡནྟི པཉྩནྣཾ ཁནྡྷཱནཾ པཉྩཝཱིསཏིཡཱ ལཀྑཎེཧི ཨུདཡཾ ¶ , པཉྩཝཱིསཏིཡཱ ཨེཝ ཙ ལཀྑཎེཧི ཝཡཾ. པཱིཏིཔཱམོཛྫནྟི ཨེཝཾ ཁནྡྷཱནཾ ཨུདཡབྦཡཾ སམྨསནྟོ དྷམྨཔཱིཏིཾ དྷམྨཔཱམོཛྫཉྩ ལབྷཏི. ཨམཏནྟི ཏཾ སཔྤཙྩཡེ ནཱམརཱུཔེ པཱཀཊེ ཧུཏྭཱ ཨུཔཊྛཧནྟེ ཨུཔྤནྣཾ པཱིཏིཔཱམོཛྫཾ ཨམཏནིབྦཱནསམྤཱཔཀཏྟཱ ¶ ཝིཛཱནཏཾ པཎྜིཏཱནཾ ཨམཏམེཝཱཏི ཨཏྠོ.

ཏཏྲཱཡམཱདི བྷཝཏཱིཏི ཏཏྲ ཨཡཾ ཨཱདི, ཨིདཾ པུབྦཊྛཱནཾ ཧོཏི. ཨིདྷ པཉྙསྶཱཏི ཨིམསྨིཾ སཱསནེ པཎྜིཏབྷིཀྑུནོ. ཨིདཱནི ‘‘ཏཾ ཨཱདཱི’’ཏི ཝུཏྟཾ པུབྦཊྛཱནཾ དསྶེནྟོ ཨིནྡྲིཡགུཏྟཱིཏིཨཱདིམཱཧ. ཙཏུཔཱརིསུདྡྷིསཱིལཉྷི པུབྦཊྛཱནཾ ནཱམ. ཏཏྠ ཨིནྡྲིཡགུཏྟཱིཏི ཨིནྡྲིཡསཾཝརོ. སནྟུཊྛཱིཏི ཙཏུཔཙྩཡསནྟོསོ. ཏེན ཨཱཛཱིཝཔཱརིསུདྡྷི ཙེཝ པཙྩཡསནྣིསྶིཏཉྩ སཱིལཾ ཀཐིཏཾ. པཱཏིམོཀྑེཏི པཱཏིམོཀྑསངྑཱཏེ ཛེཊྛཀསཱིལེ པརིཔཱུརཀཱརིཏཱ ཀཐིཏཱ.

མིཏྟེ བྷཛསྶུ ཀལྱཱཎེཏི ཝིསྶཊྛཀམྨནྟེ ཨཔཏིརཱུཔསཧཱཡེ ཝཛྫེཏྭཱ སཱདྷུཛཱིཝིཏཱཡ སུདྡྷཱཛཱིཝེ ཛངྒྷབལཾ ནིསྶཱཡ ཛཱིཝིཀཀཔྤནཱཡ ཨཀུསཱིཏེ ཨཏནྡིཏེ ཀལྱཱཎམིཏྟེ བྷཛསྶུ, སེཝསྶཱུཏི ཨཏྠོ. པཊིསནྠཱརཝུཏྱསྶཱཏི ཨཱམིསཔཊིསནྠཱརེན ཙ དྷམྨཔཊིསནྠཱརེན ཙ སམྤནྣཝུཏྟིཏཱཡ པཊིསནྠཱརཝུཏྟི ཨསྶ, པཊིསནྠཱརསྶ ཀཱརཀཱ བྷཝེཡྻཱཏི ཨཏྠོ. ཨཱཙཱརཀུསལོཏི སཱིལམྤི ཨཱཙཱརོ, ཝཏྟཔཊིཝཏྟམྤི ཨཱཙཱརོ. ཏཏྠ ཀུསལོ སིཡཱ, ཚེཀོ བྷཝེཡྻཱཏི ཨཏྠོ. ཏཏོ པཱམོཛྫབཧུལོཏི ཏཏོ པཊིསནྠཱརཝུཏྟིཏོ ཙ ཨཱཙཱརཀོསལླཏོ ཙ ཨུཔྤནྣེན དྷམྨཔཱམོཛྫེན པཱམོཛྫབཧུལོ ཧུཏྭཱ ཏཾ སཀལསྶཱཔི ཝཊྚདུཀྑསྶ ཨནྟཾ ཀརིསྶཏཱིཏི ཨཏྠོ.

ཨེཝཾ སཏྠཱརཱ དེསིཏཱསུ ཨིམཱསུ གཱཐཱསུ ཨེཀམེཀིསྶཱཡ གཱཐཱཡ པརིཡོསཱནེ ཨེཀམེཀཾ བྷིཀྑུསཏཾ ནིསིནྣནིསིནྣཊྛཱནེཡེཝ སཧ པཊིསམྦྷིདཱཧི ཨརཧཏྟཾ པཏྭཱ ཝེཧཱསཾ ཨབྦྷུགྒནྟྭཱ སབྦེཔི ཏེ བྷིཀྑཱུ ཨཱཀཱསེནེཝ ཝཱིསཡོཛནསཏིཀཾ ¶ ཀནྟཱརཾ ཨཏིཀྐམིཏྭཱ ཏཐཱགཏསྶ སུཝཎྞཝཎྞཾ སརཱིརཾ ཝཎྞེནྟཱ ཐོམེནྟཱ པཱདེ ཝནྡིཾསཱུཏི.

ཝསྶིཀཱ ¶ ¶ ཝིཡ པུཔྥཱནཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པཉྩསཏེ བྷིཀྑཱུ ཨཱརབྦྷ ཀཐེསི.

ཏེ ཀིར སཏྠུ སནྟིཀེ ཀམྨཊྛཱནཾ གཧེཏྭཱ ཨརཉྙེ སམཎདྷམྨཾ ཀརོནྟཱ པཱཏོཝ པུཔྥིཏཱནི ཝསྶིཀཔུཔྥཱནི སཱཡཾ ཝཎྚཏོ མུཙྩནྟཱནི དིསྭཱ ‘‘པུཔྥཱནཾ ཝཎྚེཧི མུཙྩནཏོ མཡཾ པཋམཏརཾ རཱགཱདཱིཧི མུཙྩིསྶཱམཱ’’ཏི ཝཱཡམིཾསུ. སཏྠཱ ཏེ བྷིཀྑཱུ ཨོལོཀེཏྭཱ, ‘‘བྷིཀྑཝེ, བྷིཀྑུནཱ ནཱམ ཝཎྚཏོ མུཙྩནཔུཔྥེན ཝིཡ དུཀྑཏོ མུཙྩིཏུཾ ཝཱཡམིཏབྦམེཝཱ’’ཏི ཝཏྭཱ གནྡྷཀུཊིཡཾ ནིསིནྣོཝ ཨཱལོཀཾ ཕརིཏྭཱ ཨིམཾ གཱཐམཱཧ –

‘‘ཝསྶིཀཱ ཝིཡ པུཔྥཱནི, མདྡཝཱནི པམུཉྩཏི;

ཨེཝཾ རཱགཉྩ དོསཉྩ, ཝིཔྤམུཉྩེཐ བྷིཀྑཝོ’’ཏི.

ཏཏྠ ཝསྶིཀཱཏི སུམནཱ. མདྡཝཱནཱིཏི མིལཱཏཱནི. ཨིདཾ ཝུཏྟཾ ཧོཏི – ཡཐཱ ཝསྶིཀཱ ཧིཡྻོ པུཔྥིཏཔུཔྥཱནི ¶ པུནདིཝསེ པུརཱཎབྷཱུཏཱནི མུཉྩཏི, ཝཎྚཏོ ཝིསྶཛྫེཏི, ཨེཝཾ ཏུམྷེཔི རཱགཱདཡོ དོསེ ཝིཔྤམུཉྩེཐཱཏི.

དེསནཱཝསཱནེ སབྦེཔི ཏེ བྷིཀྑཱུ ཨརཧཏྟེ པཏིཊྛཧིཾསཱུཏི.

སནྟཀཱཡོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སནྟཀཱཡཏྠེརཾ ནཱམ ཨཱརབྦྷ ཀཐེསི.

ཏསྶ ཀིར ཧཏྠཔཱདཀུཀྐུཙྩཾ ནཱམ ནཱཧོསི, ཀཱཡཝིཛམྦྷནརཧིཏོ སནྟཨཏྟབྷཱཝོཝ ཨཧོསི. སོ ཀིར སཱིཧཡོནིཏོ ཨཱགཏོ ཐེརོ. སཱིཧཱ ཀིར ཨེཀདིཝསཾ གོཙརཾ གཧེཏྭཱ རཛཏསུཝཎྞམཎིཔཝཱལ༹གུཧཱནཾ ཨཉྙཏརཾ པཝིསིཏྭཱ མནོསིལཱཏལེ ཧརིཏཱལཙུཎྞེསུ སཏྟཱཧཾ ནིཔཛྫིཏྭཱ ¶ སཏྟམེ དིཝསེ ཨུཊྛཱཡ ནིཔནྣཊྛཱནཾ ཨོལོཀེཏྭཱ སཙེ ནངྒུཊྛསྶ ཝཱ ཀཎྞཱནཾ ཝཱ ཧཏྠཔཱདཱནཾ ཝཱ ཙལིཏཏྟཱ མནོསིལཱཧརིཏཱལཙུཎྞཱནཾ ཝིཔྤཀིཎྞཏཾ པསྶནྟི, ‘‘ན ཏེ ཨིདཾ ཛཱཏིཡཱ ཝཱ གོཏྟསྶ ཝཱ པཏིརཱུཔ’’ནྟི ¶ པུན སཏྟཱཧཾ ནིརཱཧཱརཱ ནིཔཛྫནྟི, ཙུཎྞཱནཾ པན ཝིཔྤཀིཎྞབྷཱཝེ ཨསཏི ‘‘ཨིདཾ ¶ ཏེ ཛཱཏིགོཏྟཱནཾ ཨནུཙྪཝིཀ’’ནྟི ཨཱསཡཱ ནིཀྑམིཏྭཱ ཝིཛམྦྷིཏྭཱ དིསཱ ཨནུཝིལོཀེཏྭཱ ཏིཀྑཏྟུཾ སཱིཧནཱདཾ ནདིཏྭཱ གོཙརཱཡ པཀྐམནྟི. ཨེཝརཱུཔཱཡ སཱིཧཡོནིཡཱ ཨཱགཏོ ཨཡཾ བྷིཀྑུ. ཏསྶ ཀཱཡསམཱཙཱརཾ དིསྭཱ བྷིཀྑཱུ སཏྠུ ཨཱརོཙེསུཾ – ‘‘ན ནོ, བྷནྟེ, སནྟཀཱཡཏྠེརསདིསོ བྷིཀྑུ དིཊྛཔུབྦོ. ཨིམསྶ ཧི ནིསིནྣཊྛཱནེ ཧཏྠཙལནཾ ཝཱ པཱདཙལནཾ ཝཱ ཀཱཡཝིཛམྦྷིཏཱ ཝཱ ནཏྠཱི’’ཏི. ཏཾ སུཏྭཱ སཏྠཱ, ‘‘བྷིཀྑཝེ, བྷིཀྑུནཱ ནཱམ སནྟཀཱཡཏྠེརེན ཝིཡ ཀཱཡཱདཱིཧི ཨུཔསནྟེནེཝ བྷཝིཏབྦ’’ནྟི ཝཏྭཱ ཨིམཾ གཱཐམཱཧ –

‘‘སནྟཀཱཡོ སནྟཝཱཙོ, སནྟཝཱ སུསམཱཧིཏོ;

ཝནྟལོཀཱམིསོ བྷིཀྑུ, ཨུཔསནྟོཏི ཝུཙྩཏཱི’’ཏི.

ཏཏྠ སནྟཀཱཡོཏི པཱཎཱཏིཔཱཏཱདཱིནཾ ཨབྷཱཝེན སནྟཀཱཡོ, མུསཱཝཱདཱདཱིནཾ ཨབྷཱཝེན སནྟཝཱཙོ, ཨབྷིཛ྄ཛྷཱདཱིནཾ ཨབྷཱཝེན སནྟཝཱ, ཀཱཡཱདཱིནཾ ཏིཎྞམྤི སུཊྛུ སམཱཧིཏཏྟཱ སུསམཱཧིཏོ, ཙཏཱུཧི མགྒེཧི ལོཀཱམིསསྶ ཝནྟཏཱཡ ཝནྟལོཀཱམིསོ བྷིཀྑུ ཨབྦྷནྟརེ རཱགཱདཱིནཾ ཨུཔསནྟཏཱཡ ཨུཔསནྟོཏི ཝུཙྩཏཱིཏི ཨཏྠོ.

དེསནཱཝསཱནེ སོ ཐེརོ ཨརཧཏྟེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཨཏྟནཱ ¶ ཙོདཡཏྟཱནནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ནངྒལཀུལཏྠེརཾ ཨཱརབྦྷ ཀཐེསི.

ཨེཀོ ཀིར དུགྒཏམནུསྶོ པརེསཾ བྷཏིཾ ཀཏྭཱ ཛཱིཝཏི, ཏཾ ཨེཀོ བྷིཀྑུ པིལོཏིཀཁཎྜནིཝཏྠཾ ནངྒལཾ ཨུཀྑིཔིཏྭཱ གཙྪནྟཾ དིསྭཱ ཨེཝམཱཧ – ‘‘ཀིཾ པན ཏེ ཨེཝཾ ཛཱིཝནཏོ པབྦཛིཏུཾ ན ཝར’’ནྟི. ཀོ མཾ, བྷནྟེ, ཨེཝཾ ཛཱིཝནྟཾ པབྦཱཛེསྶཏཱིཏི? སཙེ པབྦཛིསྶསི ¶ , ཨཧཾ ཏཾ པབྦཱཛེསྶཱམཱིཏི. སཱདྷུ བྷནྟེ ¶ , སཙེ མཾ པབྦཱཛེསྶཐ, པབྦཛིསྶཱམཱིཏི. ཨཐ ནཾ སོ ཐེརོ ཛེཏཝནཾ ནེཏྭཱ སཧཏྠེན, ནྷཱཔེཏྭཱ མཱལ༹ཀེ ཋཔེཏྭཱ པབྦཱཛེཏྭཱ ནིཝཏྠཔིལོཏིཀཁཎྜེན སདྡྷིཾ ནངྒལཾ མཱལ༹ཀསཱིམཱཡམེཝ རུཀྑསཱཁཱཡཾ ཋཔཱཔེསི. སོ ཨུཔསམྤནྣཀཱལེཔི ནངྒལཀུལཏྠེརོཏྭེཝ པཉྙཱཡི. སོ བུདྡྷཱནཾ ཨུཔྤནྣལཱབྷསཀྐཱརཾ ནིསྶཱཡ ཛཱིཝནྟོ ཨུཀྐཎྛིཏྭཱ ཨུཀྐཎྛིཏཾ ཝིནོདེཏུཾ ཨསཀྐོནྟོ ‘‘ན དཱནི སདྡྷཱདེཡྻཱནི ཀཱསཱཡཱནི པརིདཧིཏྭཱ གམིསྶཱམཱི’’ཏི ཏཾ རུཀྑམཱུལཾ གནྟྭཱ ཨཏྟནཱཝ ཨཏྟཱནཾ ཨོཝདི – ‘‘ཨཧིརིཀ, ནིལླཛྫ, ཨིདཾ ནིཝཱསེཏྭཱ ཝིབྦྷམིཏྭཱ བྷཏིཾ ཀཏྭཱ ཛཱིཝིཏུཀཱམོ ཛཱཏོ’’ཏི. ཏསྶེཝཾ ཨཏྟཱནཾ ཨོཝདནྟསྶེཝ ཙིཏྟཾ ཏནུཀབྷཱཝཾ གཏཾ. སོ ནིཝཏྟིཏྭཱ པུན ཀཏིཔཱཧཙྩཡེན ¶ ཨུཀྐཎྛིཏྭཱ ཏཐེཝ ཨཏྟཱནཾ ཨོཝདི, པུནསྶ ཙིཏྟཾ ནིཝཏྟི. སོ ཨིམིནཱཝ ནཱིཧཱརེན ཨུཀྐཎྛིཏཨུཀྐཎྛིཏཀཱལེ ཏཏྠ གནྟྭཱ ཨཏྟཱནཾ ཨོཝདི. ཨཐ ནཾ བྷིཀྑཱུ ཏཏྠ ཨབྷིཎྷཾ གཙྪནྟཾ དིསྭཱ, ‘‘ཨཱཝུསོ, ནངྒལཏྠེར ཀསྨཱ ཨེཏྠ གཙྪསཱི’’ཏི པུཙྪིཾསུ. སོ ‘‘ཨཱཙརིཡསྶ སནྟིཀཾ གཙྪཱམི, བྷནྟེ’’ཏི ཝཏྭཱ ཀཏིཔཱཧེནེཝ ཨརཧཏྟཾ པཱཔུཎི.

བྷིཀྑཱུ ཏེན སདྡྷིཾ ཀེལི༹ཾ ཀརོནྟཱ ཨཱཧཾསུ – ‘‘ཨཱཝུསོ ནངྒལཏྠེར, ཏཝ ཝིཙརཎམགྒོ ཨཝལ༹ཉྫོ ཝིཡ ཛཱཏོ, ཨཱཙརིཡསྶ སནྟིཀཾ ན གཙྪསི མཉྙེ’’ཏི. ཨཱམ, བྷནྟེ, མཡཾ སཾསགྒེ སཏི ཨགམིམྷཱ, ཨིདཱནི པན སོ སཾསགྒོ ཚིནྣོ, ཏེན ན གཙྪཱམཱཏི. ཏཾ སུཏྭཱ བྷིཀྑཱུ ‘‘ཨེས ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི སཏྠུ ཏམཏྠཾ ཨཱརོཙེསུཾ. སཏྠཱ ‘‘ཨཱམ, བྷིཀྑཝེ, མམ པུཏྟོ ཨཏྟནཱཝ ཨཏྟཱནཾ ཙོདེཏྭཱ པབྦཛིཏཀིཙྩསྶ མཏྠཀཾ པཏྟོ’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ཨཏྟནཱ ཙོདཡཏྟཱནཾ, པཊིམཾསེཐ ཨཏྟནཱ;

སོ ཨཏྟགུཏྟོ སཏིམཱ, སུཁཾ བྷིཀྑུ ཝིཧཱཧིསི.

‘‘ཨཏྟཱ ཧི ཨཏྟནོ ནཱཐོ, ཀོ ཧི ནཱཐོ པརོ སིཡཱ;

ཏསྨཱ སཾཡམམཏྟཱནཾ, ཨསྶཾ བྷདྲཾཝ ཝཱཎིཛོ’’ཏི.

ཏཏྠ ¶ ¶ ཙོདཡཏྟཱནནྟི ཨཏྟནཱཝ ཨཏྟཱནཾ ཙོདཡ སཱརཡ. པཊིམཾསེཐཱཏི ཨཏྟནཱཝ ཨཏྟཱནཾ པརིཝཱིམཾསཐ. སོཏི སོ ཏྭཾ, བྷིཀྑུ, ཨེཝཾ སནྟེ ཨཏྟནཱཝ གུཏྟཏཱཡ ཨཏྟགུཏྟོ, ཨུཔཊྛིཏསཏིཏཱཡ སཏིམཱ ཧུཏྭཱ སབྦིརིཡཱཔཐེསུ སུཁཾ ཝིཧརིསྶསཱིཏི ཨཏྠོ.

ནཱཐོཏི ¶ ཨཝསྶཡོ པཏིཊྛཱ. ཀོ ཧི ནཱཐོ པརོཏི ཡསྨཱ པརསྶ ཨཏྟབྷཱཝེ པཏིཊྛཱཡ ཀུསལཾ ཝཱ ཀཏྭཱ སགྒཔརཱཡཎེན མགྒཾ ཝཱ བྷཱཝེཏྭཱ སཙྪིཀཏཕལེན བྷཝིཏུཾ ན སཀྐཱ, ཏསྨཱ ཀོ ཧི ནཱམ པརོ ནཱཐོ བྷཝེཡྻཱཏི ཨཏྠོ. ཏསྨཱཏི ཡསྨཱ ཨཏྟཱཝ ཨཏྟནོ གཏི པཏིཊྛཱ སརཎཾ, ཏསྨཱ ཡཐཱ བྷདྲཾ ཨསྶཱཛཱནཱིཡཾ ནིསྶཱཡ ལཱབྷཾ པཏྠཡནྟོ ཝཱཎིཛོ ཏསྶ ཝིསམཊྛཱནཙཱརཾ པཙྪིནྡིཏྭཱ དིཝསསྶ ཏིཀྑཏྟུཾ ནཧཱཔེནྟོ བྷོཛེནྟོ སཾཡམེཏི པཊིཛགྒཏི, ཨེཝཾ ཏྭམྤི ཨནུཔྤནྣསྶ ཨཀུསལསྶ ཨུཔྤཱདཾ ནིཝཱརེནྟོ སཏིསམྨོསེན ཨུཔྤནྣཾ ཨཀུསལཾ པཛཧནྟོ ཨཏྟཱནཾ སཾཡམ གོཔཡ, ཨེཝཾ སནྟེ པཋམཛ྄ཛྷཱནཾ ཨཱདིཾ ཀཏྭཱ ལོཀིཡལོཀུཏྟརཝིསེསཾ ཨདྷིགམིསྶསཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པཱམོཛྫབཧུལོཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཝཀྐལིཏྠེརཾ ཨཱརབྦྷ ཀཐེསི.

སོ ¶ ཀིརཱཡསྨཱ སཱཝཏྠིཡཾ བྲཱཧྨཎཀུལེ ནིབྦཏྟིཏྭཱ ཝཡཔྤཏྟོ པིཎྜཱཡ པཝིཊྛཾ ཏཐཱགཏཾ དིསྭཱ སཏྠུ སརཱིརསམྤཏྟིཾ ཨོལོཀེཏྭཱ སརཱིརསམྤཏྟིདསྶནེན ཨཏིཏྟོ ‘‘ཨེཝཱཧཾ ནིཙྩཀཱལཾ ཏཐཱགཏཾ དཊྛུཾ ལབྷིསྶཱམཱི’’ཏི སཏྠུ སནྟིཀེ པབྦཛིཏྭཱ ཡཏྠ ཋིཏེན སཀྐཱ དསབལཾ པསྶིཏུཾ, ཏཏྠ ཋིཏོ སཛ྄ཛྷཱཡཀམྨཊྛཱནམནསིཀཱརཱདཱིནི པཧཱཡ སཏྠཱརཾ ཨོལོཀེནྟོཝ ཝིཙརཏི. སཏྠཱ ཏསྶ ཉཱཎཔརིཔཱཀཾ ཨཱགམེནྟོ ཀིཉྩི ཨཝཏྭཱ ‘‘ཨིདཱནིསྶ ཉཱཎཾ པརིཔཱཀཾ གཏ’’ནྟི ཉཏྭཱ ‘‘ཀིཾ ཏེ, ཝཀྐལི, ཨིམིནཱ ¶ པཱུཏིཀཱཡེན དིཊྛེན, ཡོ ཁོ, ཝཀྐལི, དྷམྨཾ པསྶཏི, སོ མཾ པསྶཏི. ཡོ མཾ པསྶཏི, སོ དྷམྨཾ པསྶཏཱི’’ཏི (སཾ. ནི. ༣.༨༧) ཝཏྭཱ ཨོཝདི. སོ ཨེཝཾ ཨོཝདིཏོཔི སཏྠུ དསྶནཾ པཧཱཡ ནེཝ ཨཉྙཏྠ གནྟུཾ སཀྐོཏི. ཨཐ ནཾ སཏྠཱ ‘‘ནཱཡཾ བྷིཀྑུ སཾཝེགཾ ཨལབྷིཏྭཱ བུཛ྄ཛྷིསྶཏཱི’’ཏི ཨུཔཀཊྛཱཡ ཝསྶཱུཔནཱཡིཀཱཡ རཱཛགཧཾ གནྟྭཱ ཝསྶཱུཔནཱཡིཀདིཝསེ ‘‘ཨཔེཧི, ཝཀྐལི, ཨཔེཧི, ཝཀྐལཱི’’ཏི པཎཱམེསི. སོ ‘‘ན མཾ སཏྠཱ ཨཱལཔཏཱི’’ཏི ཏེམཱསཾ སཏྠུ སམྨུཁེ ཋཱཏུཾ ཨསཀྐོནྟོ ‘‘ཀིཾ མཡ྄ཧཾ ཛཱིཝིཏེན, པབྦཏཱ ཨཏྟཱནཾ པཱཏེསྶཱམཱི’’ཏི གིཛ྄ཛྷཀཱུཊཾ ཨབྷིརུཧི.

སཏྠཱ ཏསྶ ཀིལམནབྷཱཝཾ ཉཏྭཱ ‘‘ཨཡཾ བྷིཀྑུ མམ སནྟིཀཱ ཨསྶཱསཾ ཨལབྷནྟོ མགྒཕལཱནཾ ¶ ཨུཔནིསྶཡཾ ནཱསེཡྻཱ’’ཏི ཨཏྟཱནཾ དསྶེཏུཾ ཨོབྷཱསཾ མུཉྩི. ཨཐསྶ སཏྠུ དིཊྛཀཱལཏོ པཊྛཱཡ ཏཱཝམཧནྟོཔི སོཀོ པཧཱིཡི. སཏྠཱ སུཀྑཏལཱ༹ཀཾ ཨོགྷེན པཱུརེནྟོ ཝིཡ ཐེརསྶ བལཝཔཱིཏིཔཱམོཛྫཾ ཨུཔྤཱདེཏུཾ ཨིམཾ གཱཐམཱཧ –

‘‘པཱམོཛྫབཧུལོ ¶ བྷིཀྑུ, པསནྣོ བུདྡྷསཱསནེ;

ཨདྷིགཙྪེ པདཾ སནྟཾ, སངྑཱརཱུཔསམཾ སུཁ’’ནྟི.

ཏསྶཏྠོ – པཀཏིཡཱཔི པཱམོཛྫབཧུལོ བྷིཀྑུ བུདྡྷསཱསནེ པསཱདཾ རོཙེཏི, སོ ཨེཝཾ པསནྣོ བུདྡྷསཱསནེ སནྟཾ པདཾ སངྑཱརཱུཔསམཾ སུཁནྟི ལདྡྷནཱམཾ ནིབྦཱནཾ ཨདྷིགཙྪེཡྻཱཏི. ཨིམཉྩ པན གཱཐཾ ཝཏྭཱ སཏྠཱ ཝཀྐལིཏྠེརསྶ ཧཏྠཾ པསཱརེཏྭཱ –

‘‘ཨེཧི ཝཀྐལི མཱ བྷཱཡི, ཨོལོཀེཧི ཏཐཱགཏཾ;

ཨཧཾ ཏཾ ཨུདྡྷརིསྶཱམི, པངྐེ སནྣཾཝ ཀུཉྫརཾ.

‘‘ཨེཧི ཝཀྐལི མཱ བྷཱཡི, ཨོལོཀེཧི ཏཐཱགཏཾ;

ཨཧཾ ཏཾ མོཙཡིསྶཱམི, རཱཧུགྒཧཾཝ སཱུརིཡཾ.

‘‘ཨེཧི ཝཀྐལི མཱ བྷཱཡི, ཨོལོཀེཧི ཏཐཱགཏཾ;

ཨཧཾ ཏཾ མོཙཡིསྶཱམི, རཱཧུགྒཧཾཝ ཙནྡིམ’’ནྟི. –

ཨིམཱ གཱཐཱ ཨབྷཱསི. སོ ‘‘དསབལོ མེ དིཊྛོ, ཨེཧཱིཏི ཙ ཨཝ྄ཧཱནམྤི ལདྡྷ’’ནྟི བལཝཔཱིཏིཾ ཨུཔྤཱདེཏྭཱ ‘‘ཀུཏོ ནུ ཁོ གནྟབྦ’’ནྟི གམནམགྒཾ ཨཔསྶནྟོ དསབལསྶ སམྨུཁེ ཨཱཀཱསེ ཨུཔྤཏིཏྭཱ པཋམཔཱདེ པབྦཏེ ¶ ཋིཏེཡེཝ སཏྠཱརཱ ཝུཏྟགཱཐཱ ཨཱཝཛྫེནྟོ ཨཱཀཱསེཡེཝ པཱིཏིཾ ཝིཀྑམྦྷེཏྭཱ སཧ པཊིསམྦྷིདཱཧི ཨརཧཏྟཾ པཏྭཱ ཏཐཱགཏཾ ཝནྡམཱནོཝ ཨོཏརིཏྭཱ སཏྠུ སནྟིཀེ ཨཊྛཱསི. ཨཐ ནཾ སཏྠཱ ཨཔརབྷཱགེ སདྡྷཱདྷིམུཏྟཱནཾ ཨགྒཊྛཱནེ ཋཔེསཱིཏི.

ཡོ ¶ ¶ ཧཝེཏི ཨིམཾ དྷམྨདེསནཾ སཏྠཱ པུབྦཱརཱམེ ཝིཧརནྟོ སུམནསཱམཎེརཾ ཨཱརབྦྷ ཀཐེསི. ཏཏྲཱཡཾ ཨནུཔུབྦཱི ཀཐཱ –

པདུམུཏྟརབུདྡྷཀཱལསྨིཉྷི ཨེཀོ ཀུལཔུཏྟོ སཏྠཱརཱ ཙཏུཔརིསམཛ྄ཛྷེ ཨེཀཾ བྷིཀྑུཾ དིབྦཙཀྑུཀཱནཾ ཨགྒཊྛཱནེ ཋཔེནྟཾ དིསྭཱ ཏཾ སམྤཏྟིཾ པཏྠཡམཱནོ སཏྠཱརཾ ནིམནྟེཏྭཱ སཏྟཱཧཾ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ དཏྭཱ, ‘‘བྷནྟེ, ཨཧམྤི ཨནཱགཏེ ཨེཀསྶ བུདྡྷསྶ སཱསནེ དིབྦཙཀྑུཀཱནཾ ཨགྒོ བྷཝེཡྻ’’ནྟི པཏྠནཾ ཋཔེསི. སཏྠཱ ཀཔྤསཏསཧསྶཾ ཨོལོཀེནྟོ ཏསྶ པཏྠནཱཡ སམིཛ྄ཛྷནབྷཱཝཾ ཝིདིཏྭཱ ‘‘ཨིཏོ ཀཔྤསཏསཧསྶམཏྠཀེ གོཏམབུདྡྷསཱསནེ དིབྦཙཀྑུཀཱནཾ ཨགྒོ ཨནུརུདྡྷོ ནཱམ བྷཝིསྶསཱི’’ཏི བྱཱཀཱསི. སོ ཏཾ བྱཱཀརཎཾ སུཏྭཱ སྭེ པཏྟབྦཾ ཝིཡ ཏཾ སམྤཏྟིཾ མཉྙམཱནོ པརིནིབྦུཏེ སཏྠརི བྷིཀྑཱུ དིབྦཙཀྑུཔརིཀམྨཾ པུཙྪིཏྭཱ སཏྟཡོཛནིཀཾ ཀཉྩནཐཱུཔཾ པརིཀྑིཔིཏྭཱ ཨནེཀཱནི དཱིཔརུཀྑསཧསྶཱནི ཀཱརེཏྭཱ དཱིཔཔཱུཛཾ ཀཏྭཱ ཏཏོ ཙུཏོ དེཝལོཀེ ནིབྦཏྟིཏྭཱ དེཝམནུསྶེསུ ཀཔྤསཏསཧསྶཱནི སཾསརིཏྭཱ ཨིམསྨིཾ ཀཔྤེ བཱརཱཎསིཡཾ དལིདྡཀུལེ ནིབྦཏྟོ སུམནསེཊྛིཾ ནིསྶཱཡ ཏསྶ ཏིཎཧཱརཀོ ཧུཏྭཱ ཛཱིཝིཀཾ ཀཔྤེསི. ཨནྣབྷཱརོཏིསྶ ནཱམཾ ཨཧོསི. སུམནསེཊྛཱིཔི ཏསྨིཾ ནགརེ ནིཙྩཀཱལཾ མཧཱདཱནཾ དེཏི.

ཨཐེཀདིཝསཾ ཨུཔརིཊྛོ ནཱམ པཙྩེཀབུདྡྷོ གནྡྷམཱདནེ ནིརོདྷསམཱཔཏྟིཏོ ¶ ཝུཊྛཱཡ ‘‘ཀསྶ ནུ ཁོ ཨཛྫ ཨནུགྒཧཾ ཀརིསྶཱམཱི’’ཏི ཙིནྟེཏྭཱ ‘‘ཨཛྫ མཡཱ ཨནྣབྷཱརསྶ ཨནུགྒཧཾ ཀཱཏུཾ ཝཊྚཏི, ཨིདཱནི ཙ སོ ཨཊཝིཏོ ཏིཎཾ ཨཱདཱཡ གེཧཾ ཨཱགམིསྶཏཱི’’ཏི ཉཏྭཱ པཏྟཙཱིཝརམཱདཱཡ ཨིདྡྷིཡཱ གནྟྭཱ ཨནྣབྷཱརསྶ སམྨུཁེ པཙྩུཊྛཱསི. ཨནྣབྷཱརོ ཏཾ ཏུཙྪཔཏྟཧཏྠཾ དིསྭཱ ‘‘ཨཔི ¶ , བྷནྟེ, བྷིཀྑཾ ལབྷིཏྠཱ’’ཏི པུཙྪིཏྭཱ ‘‘ལབྷིསྶཱམ མཧཱཔུཉྙཱ’’ཏི ཝུཏྟེ ‘‘ཏེན ཧི, བྷནྟེ, ཐོཀཾ ཨཱགམེཐཱ’’ཏི ཏིཎཀཱཛཾ ཚཌྜེཏྭཱ ཝེགེན གེཧཾ གནྟྭཱ, ‘‘བྷདྡེ, མཡ྄ཧཾ ཋཔིཏབྷཱགབྷཏྟཾ ཨཏྠི, ནཏྠཱི’’ཏི བྷརིཡཾ པུཙྪིཏྭཱ ‘‘ཨཏྠི, སཱམཱི’’ཏི ཝུཏྟེ ཝེགེན པཙྩཱགནྟྭཱ པཙྩེཀབུདྡྷསྶ པཏྟཾ ཨཱདཱཡ ‘‘མཡ྄ཧཾ དཱཏུཀཱམཏཱཡ སཏི དེཡྻདྷམྨོ ན ཧོཏི, དེཡྻདྷམྨེ སཏི པཊིགྒཱཧཀཾ ན ལབྷཱམི. ཨཛྫ པན མེ པཊིགྒཱཧཀོ ཙ དིཊྛོ, དེཡྻདྷམྨོ ཙ ཨཏྠི, ལཱབྷཱ ཝཏ མེ’’ཏི གེཧཾ གནྟྭཱ བྷཏྟཾ པཏྟེ པཀྑིཔཱཔེཏྭཱ པཙྩཱཧརིཏྭཱ པཙྩེཀབུདྡྷསྶ ཧཏྠེ པཏིཊྛཔེཏྭཱ –

‘‘ཨིམིནཱ ¶ པན དཱནེན, མཱ མེ དཱལིདྡིཡཾ ཨཧུ;

ནཏྠཱིཏི ཝཙནཾ ནཱམ, མཱ ཨཧོསི བྷཝཱབྷཝེ. –

བྷནྟེ ཨེཝརཱུཔཱ དུཛྫཱིཝིཏཱ མུཙྩེཡྻཾ, ནཏྠཱིཏི པདམེཝ ན སུཎེཡྻ’’ནྟི པཏྠནཾ ཋཔེསི. པཙྩེཀབུདྡྷོ ‘‘ཨེཝཾ ཧོཏུ མཧཱཔུཉྙཱ’’ཏི ཝཏྭཱ ཨནུམོདནཾ ཀཏྭཱ པཀྐཱམི.

སུམནསེཊྛིནོཔི ཚཏྟེ ཨདྷིཝཏྠཱ དེཝཏཱ ‘‘ཨཧོ དཱནཾ པརམདཱནཾ, ཨུཔརིཊྛེ སུཔཏིཊྛིཏ’’ནྟི ¶ ཝཏྭཱ ཏིཀྑཏྟུཾ སཱདྷུཀཱརམདཱསི. ཨཐ ནཾ སེཊྛི ‘‘ཀིཾ མཾ ཨེཏྟཀཾ ཀཱལཾ དཱནཾ དདམཱནཾ ན པསྶསཱི’’ཏི ཨཱཧ. ནཱཧཾ ཏཝ དཱནཾ ཨཱརབྦྷ སཱདྷུཀཱརཾ དེམི, ཨནྣབྷཱརེན པན ཨུཔརིཊྛསྶ དིནྣཔིཎྜཔཱཏེ པསཱིདིཏྭཱ མཡཱ ཨེས སཱདྷུཀཱརོ པཝཏྟིཏོཏི. སོ ‘‘ཨཙྪརིཡཾ ཝཏ, བྷོ, ཨཧཾ ཨེཏྟཀཾ ཀཱལཾ དཱནཾ དདནྟོ དེཝཏཾ སཱདྷུཀཱརཾ དཱཔེཏུཾ ནཱསཀྑིཾ, ཨནྣབྷཱརོ མཾ ནིསྶཱཡ ཛཱིཝནྟོ ཨེཀཔིཎྜཔཱཏེནེཝ སཱདྷུཀཱརཾ དཱཔེསི, ཏསྶ དཱནེ ཨནུཙྪཝིཀཾ ཀཏྭཱ ཏཾ པིཎྜཔཱཏཾ མམ སནྟཀཾ ཀརིསྶཱམཱི’’ཏི ཙིནྟེཏྭཱ ཏཾ པཀྐོསཱཔེཏྭཱ ‘‘ཨཛྫ ཏཡཱ ཀསྶཙི ཀིཉྩི དིནྣ’’ནྟི པུཙྪི. ‘‘ཨཱམ, སཱམི, ཨུཔརིཊྛཔཙྩེཀབུདྡྷསྶ མེ ཨཛྫ བྷཱགབྷཏྟཾ དིནྣ’’ནྟི. ‘‘ཧནྡ, བྷོ, ཀཧཱཔཎཾ གཧེཏྭཱ ཨེཏཾ མཡ྄ཧཾ པིཎྜཔཱཏཾ དེཧཱི’’ཏི? ‘‘ན དེམི, སཱམཱི’’ཏི. སོ ཡཱཝ སཧསྶཾ ཝཌྜྷེསི, ཨིཏརོ སཧསྶེནཱཔི ནཱདཱསི. ཨཐ ནཾ ‘‘ཧོཏུ, བྷོ, ཡདི པིཎྜཔཱཏཾ ན དེསི, སཧསྶཾ གཧེཏྭཱ པཏྟིཾ མེ དེཧཱི’’ཏི ཨཱཧ. སོ ‘‘ཨཡྻེན སདྡྷིཾ མནྟེཏྭཱ ཛཱནིསྶཱམཱི’’ཏི ཝེགེན པཙྩེཀབུདྡྷཾ སམྤཱཔུཎིཏྭཱ, ‘‘བྷནྟེ སུམནསེཊྛི, སཧསྶཾ དཏྭཱ ཏུམྷཱཀཾ པིཎྜཔཱཏེ པཏྟིཾ ཡཱཙཏི, ཀིཾ ཀརོམཱི’’ཏི པུཙྪི.

ཨཐསྶ ¶ སོ ཨུཔམཾ ཨཱཧརི ‘‘སེཡྻཐཱཔི, པཎྜིཏ, ཀུལསཏིཀེ གཱམེ ཨེཀསྨིཾ གྷརེ དཱིཔཾ ཛཱལེཡྻ, སེསཱ ཨཏྟནོ ཏེལེན ཝཊྚིཾ ཏེམེཏྭཱ ཛཱལཱཔེཏྭཱ གཎྷེཡྻུཾ, པུརིམཔདཱིཔསྶ ¶ པབྷཱ ཨཏྠཱིཏི ཝཏྟབྦཱ ནཏྠཱི’’ཏི. ཨཏིརེཀཏརཱ, བྷནྟེ, པབྷཱ ཧོཏཱིཏི. ཨེཝམེཝཾ པཎྜིཏ ཨུལུ༹ངྐཡཱགུ ཝཱ ཧོཏུ, ཀཊཙྪུབྷིཀྑཱ ཝཱ, ཨཏྟནོ པིཎྜཔཱཏེ པརེསཾ པཏྟིཾ དེནྟསྶ ཡཏྟཀཱནཾ དེཏི, ཏཏྟཀཾ ཝཌྜྷཏི. ཏྭཉྷི ཨེཀམེཝ པིཎྜཔཱཏཾ ཨདཱསི, སེཊྛིསྶ པན པཏྟིཡཱ དིནྣཱཡ དྭེ པིཎྜཔཱཏཱ ཧོནྟི ཨེཀོ ཏཝ, ཨེཀོ ཏསྶཱཏི.

སོ ‘‘སཱདྷུ, བྷནྟེ’’ཏི ཏཾ ཨབྷིཝཱདེཏྭཱ སེཊྛིསྶ སནྟིཀཾ གནྟྭཱ ‘‘གཎྷ, སཱམི, པཏྟི’’ནྟི ཨཱཧ. ཏེན ཧི ཨིམེ ཀཧཱཔཎེ གཎྷཱཏི. ནཱཧཾ པིཎྜཔཱཏཾ ཝིཀྐིཎཱམི, སདྡྷཱཡ ཏེ པཏྟིཾ དམྨཱིཏི. ‘‘ཏྭཾ སདྡྷཱཡ དེསི, ཨཧམྤི ཏཝ གུཎེ པཱུཛེམི, གཎྷ, ཏཱཏ, ཨིཏོ པཊྛཱཡ ¶ ཙ པན མཱ སཧཏྠཱ ཀམྨམཀཱསི, ཝཱིཐིཡཾ གྷརཾ མཱཔེཏྭཱ ཝས. ཡེན ཙ ཏེ ཨཏྠོ ཧོཏི, སབྦཾ མམ སནྟིཀཱ གཎྷཱཧཱི’’ཏི ཨཱཧ. ནིརོདྷཱ ཝུཊྛིཏསྶ པན དིནྣཔིཎྜཔཱཏོ ཏདཧེཝ ཝིཔཱཀཾ དེཏི. ཏསྨཱ རཱཛཱཔི ཏཾ པཝཏྟིཾ སུཏྭཱ ཨནྣབྷཱརཾ པཀྐོསཱཔེཏྭཱ པཏྟིཾ གཧེཏྭཱ མཧནྟཾ བྷོགཾ དཏྭཱ ཏསྶ སེཊྛིཊྛཱནཾ དཱཔེསི.

སོ སུམནསེཊྛིསྶ སཧཱཡཀོ ཧུཏྭཱ ཡཱཝཛཱིཝཾ པུཉྙཱནི ཀཏྭཱ ཏཏོ ཙུཏོ དེཝལོཀེ ནིབྦཏྟིཏྭཱ དེཝམནུསྶེསུ སཾསརནྟོ ¶ ཨིམསྨིཾ བུདྡྷུཔྤཱདེ ཀཔིལཝཏྠུནགརེ ཨམིཏོདནསྶ སཀྐསྶ གེཧེ པཊིསནྡྷིཾ གཎྷི, ཨནུརུདྡྷོཏིསྶ ནཱམཾ ཨཀཾསུ. སོ མཧཱནཱམསཀྐསྶ ཀནིཊྛབྷཱཏཱ, སཏྠུ ཙཱུལ༹པིཏུ པུཏྟོ པརམསུཁུམཱལོ མཧཱཔུཉྙོ ཨཧོསི. ཨེཀདིཝསཾ ཀིར ཚསུ ཁཏྟིཡེསུ པཱུཝེ ལཀྑཾ ཀཏྭཱ གུལེ༹ཧི ཀཱིལ༹ནྟེསུ ཨནུརུདྡྷོ པརཱཛིཏོ པཱུཝཱནཾ ཨཏྠཱཡ མཱཏུ སནྟིཀཾ པཧིཎི. སཱ མཧནྟཾ སུཝཎྞཐཱལཾ པཱུརེཏྭཱ པཱུཝེ པེསེསི. པཱུཝེ ཁཱདིཏྭཱ པུན ཀཱིལ༹ནྟོ པརཱཛིཏོ ཏཐེཝ པཧིཎི. ཨེཝཾ ཏིཀྑཏྟུཾ པཱུཝེསུ ཨཱཧཊེསུ ཙཏུཏྠེ ཝཱརེ མཱཏཱ ‘‘ཨིདཱནི པཱུཝཱ ནཏྠཱི’’ཏི པཧིཎི. ཏསྶཱ ཝཙནཾ སུཏྭཱ ‘‘ནཏྠཱི’’ཏི པདསྶ ཨསུཏཔུབྦཏཱཡ ‘‘ནཏྠིཔཱུཝཱ ནཱམ ཨིདཱནི བྷཝིསྶནྟཱི’’ཏི སཉྙཾ ཀཏྭཱ ‘‘གཙྪ ནཏྠིཔཱུཝེ ཨཱཧརཱ’’ཏི པེསེསི. ཨཐསྶ ¶ མཱཏཱ ‘‘ནཏྠིཔཱུཝེ ཀིར, ཨཡྻེ, དེཐཱ’’ཏི ཝུཏྟེ ‘‘མམ པུཏྟེན ནཏྠཱིཏི པདཾ ན སུཏཔུབྦཾ, ཀཐཾ ནུ ཁོ ནཏྠིབྷཱཝཾ ཛཱནཱཔེཡྻ’’ནྟི སུཝཎྞཔཱཏིཾ དྷོཝིཏྭཱ ཨཔརཱཡ སུཝཎྞཔཱཏིཡཱ པཊིཀུཛྫིཏྭཱ ‘‘ཧནྡ, ཏཱཏ, ཨིམཾ མམ པུཏྟསྶ དེཧཱི’’ཏི པཧིཎི. ཏསྨིཾ ཁཎེ ནགརཔརིགྒཱཧིཀཱ དེཝཏཱ ‘‘ཨམྷཱཀཾ སཱམིནཱ ཨནྣབྷཱརཀཱལེ ཨུཔརིཊྛསྶ པཙྩེཀབུདྡྷསྶ བྷཱགབྷཏྟཾ ¶ དཏྭཱ ‘ནཏྠཱིཏི པདམེཝ ན སུཎེཡྻ’ནྟི པཏྠནཱ ནཱམ ཋཔིཏཱ. སཙེ མཡཾ ཏམཏྠཾ ཉཏྭཱ ཨཛ྄ཛྷུཔེཀྑེཡྻཱམ, མུདྡྷཱཔི ནོ སཏྟདྷཱ ཕལེཡྻཱ’’ཏི ཙིནྟེཏྭཱ དིབྦཔཱུཝེཧི པཱཏིཾ པཱུརཡིཾསུ. སོ པུརིསོ པཱཏིཾ ཨཱཧརིཏྭཱ ཏསྶ སནྟིཀེ ཋཔེཏྭཱ ཝིཝརི. ཏེསཾ གནྡྷོ སཀལནགརཾ ཕརི. པཱུཝོ པན མུཁེ ཋཔིཏམཏྟོཝ སཏྟརསཧརཎིསཧསྶཱནི ཕརིཏྭཱ ཨཊྛཱསི.

ཨནུརུདྡྷོཔི ཙིནྟེསི – ‘‘ན མཾ མཉྙེ ཨིཏོ པུབྦེ མཱཏཱ པིཡཱཡཏི. ན ཧི མེ ཨཉྙདཱ ཏཱཡ ནཏྠིཔཱུཝཱ ནཱམ པཀྐཔུབྦཱ’’ཏི. སོ གནྟྭཱ མཱཏརཾ ཨེཝམཱཧ – ‘‘ཨམྨ, ནཱཧཾ ཏཝ པིཡོ’’ཏི. ཏཱཏ, ཀིཾ ཝདེསི, མམ ཨཀྑཱིཧིཔི ཧདཡམཾསཏོཔི ཏྭཾ པིཡཏརོཏི. སཙཱཧཾ, ཨམྨ, ཏཝ པིཡོ, ཀསྨཱ མམ པུབྦེ ཨེཝརཱུཔེ ནཏྠིཔཱུཝེ ནཱམ ན ཨདཱསཱིཏི. སཱ ཏཾ པུརིསཾ པུཙྪི – ‘‘ཏཱཏ, ཀིཉྩི པཱཏིཡཾ ཨཧོསཱི’’ཏི. ཨཱམ, ཨཡྻེ, པཱུཝཱནཾ པཱཏི པརིཔུཎྞཱ ཨཧོསི, ན མེ ཨེཝརཱུཔཱ དིཊྛཔུབྦཱཏི. སཱ ཙིནྟེསི – ‘‘པུཏྟོ མེ ཀཏཔུཉྙོ, དེཝཏཱཧིསྶ དིབྦཔཱུཝཱ པཧིཏཱ བྷཝིསྶནྟཱི’’ཏི. སོཔི མཱཏརཾ ཨཱཧ – ‘‘ཨམྨ, ན མཡཱ ཨེཝརཱུཔཱ ¶ པཱུཝཱ ཁཱདིཏཔུབྦཱ, ཨིཏོ པཊྛཱཡ མེ ནཏྠིཔཱུཝམེཝ པཙེཡྻཱསཱི’’ཏི. སཱ ཏཏོ པཊྛཱཡ ཏེན ‘‘པཱུཝེ ཁཱདིཏུཀཱམོམྷཱི’’ཏི ཝུཏྟཀཱལེ སུཝཎྞཔཱཏིཾ དྷོཝིཏྭཱ ཨཉྙཱཡ པཱཏིཡཱ པཊིཀུཛྫིཏྭཱ ¶ པཧིཎཏི, དེཝཏཱ པཱཏིཾ པཱུརེནྟི. ཨེཝཾ སོ ཨགཱརམཛ྄ཛྷེ ཝསནྟོ ནཏྠཱིཏི པདསྶ ཨཏྠཾ ཨཛཱནིཏྭཱ དིབྦཔཱུཝེཡེཝ པརིབྷུཉྫི.

སཏྠུ པན པརིཝཱརཏྠཾ ཀུལཔཊིཔཱཊིཡཱ སཱཀིཡཀུམཱརེསུ པབྦཛནྟེསུ མཧཱནཱམེན སཀྐེན, ‘‘ཏཱཏ, ཨམྷཱཀཾ ཀུལཱ ཀོཙི པབྦཛིཏོ ནཏྠི, ཏཡཱ ཝཱ པབྦཛིཏབྦཾ, མཡཱ ཝཱ’’ཏི ཝུཏྟེ སོ ཨཱཧ – ‘‘ཨཧཾ ཨཏིསུཁུམཱལོ པབྦཛིཏུཾ ན སཀྑིསྶཱམཱི’’ཏི. ཏེན ཧི ཀམྨནྟཾ ཨུགྒཎྷ, ཨཧཾ པབྦཛིསྶཱམཱིཏི. ཀོ ཨེས ཀམྨནྟོ ནཱམཱཏི? སོ ཧི བྷཏྟསྶ ཨུཊྛཱནཊྛཱནམྤི ན ཛཱནཱཏི, ཀམྨནྟཾ ཀིམེཝ ཛཱནིསྶཏི, ཏསྨཱ ཨེཝམཱཧ. ཨེཀདིཝསཉྷི ¶ ཨནུརུདྡྷོ བྷདྡིཡོ ཀིམིལོཏི ཏཡོ ཛནཱ ‘‘བྷཏྟཾ ནཱམ ཀཧཾ ཨུཊྛཱཏཱི’’ཏི མནྟཡིཾསུ. ཏེསུ ཀིམིལོ ‘‘ཀོཊྛེསུ ཨུཊྛཱཏཱི’’ཏི ཨཱཧ. སོ ཀིརེཀདིཝསཾ ཝཱིཧཱི ཀོཊྛམྷི པཀྑིཔནྟེ ཨདྡས, ཏསྨཱ ‘‘ཀོཊྛེ བྷཏྟཾ ཨུཔྤཛྫཏཱི’’ཏི སཉྙཱཡ ཨེཝམཱཧ. ཨཐ ནཾ བྷདྡིཡོ ‘‘ཏྭཾ ན ཛཱནཱསཱི’’ཏི ཝཏྭཱ ‘‘བྷཏྟཾ ནཱམ ཨུཀྑལིཡཾ ཨུཊྛཱཏཱི’’ཏི ཨཱཧ. སོ ཀིརེཀདིཝསཾ ཨུཀྑལིཏོ བྷཏྟཾ ཝཌྜྷེནྟེ དིསྭཱ ‘‘ཨེཏྠེཝེཏཾ ཨུཔྤཛྫཏཱི’’ཏི སཉྙམཀཱསི, ཏསྨཱ ཨེཝམཱཧ. ཨནུརུདྡྷོ ཏེ ཨུབྷོཔི ‘‘ཏུམྷེ ན ཛཱནཱཐཱ’’ཏི ཝཏྭཱ ‘‘བྷཏྟཾ ནཱམ རཏནུབྦེདྷམཀུལཱ༹ཡ ¶ མཧཱསུཝཎྞཔཱཏིཡཾ ཨུཊྛཱཏཱི’’ཏི ཨཱཧ. ཏེན ཀིར ནེཝ ཝཱིཧིཾ ཀོཊྚེནྟཱ, ན བྷཏྟཾ པཙནྟཱ དིཊྛཔུབྦཱ, སུཝཎྞཔཱཏིཡཾ ཝཌྜྷེཏྭཱ པུརཏོ ཋཔིཏབྷཏྟམེཝ པསྶཏི, ཏསྨཱ ‘‘པཱཏིཡཾཡེཝེཏཾ ཨུཔྤཛྫཏཱི’’ཏི སཉྙམཀཱསི, ཏསྨཱ ཨེཝམཱཧ. ཨེཝཾ བྷཏྟུཊྛཱནཊྛཱནམྤི ཨཛཱནནྟོ མཧཱཔུཉྙོ ཀུལཔུཏྟོ ཀམྨནྟེ ཀིཾ ཛཱནིསྶཏི.

སོ ‘‘ཨེཧི ཁོ ཏེ, ཨནུརུདྡྷ, གྷརཱཝཱསཏྠཾ ཨནུསཱསིསྶཱམི, པཋམཾ ཁེཏྟཾ ཀསཱཔེཏབྦ’’ནྟིཨཱདིནཱ ནཡེན བྷཱཏརཱ ཝུཏྟཱནཾ ཀམྨནྟཱནཾ ཨཔརིཡནྟབྷཱཝཾ སུཏྭཱ ‘‘ན མེ གྷརཱཝཱསེན ཨཏྠོ’’ཏི མཱཏརཾ ཨཱཔུཙྪིཏྭཱ བྷདྡིཡཔམུཁེཧི པཉྩཧི སཱཀིཡཀུམཱརེཧི སདྡྷིཾ ནིཀྑམིཏྭཱ ཨནུཔིཡམྦཝནེ སཏྠཱརཾ ཨུཔསངྐམིཏྭཱ པབྦཛི. པབྦཛིཏྭཱ ཙ པན སམྨཱཔཊིཔདཾ པཊིཔནྣོ ཨནུཔུབྦེན ཏིསྶོ ཝིཛྫཱ སཙྪིཀཏྭཱ དིབྦེན ཙཀྑུནཱ ཨེཀཱསནེ ནིསིནྣོཝ ཧཏྠཏལེ ཋཔིཏཨཱམལཀཱནི ཝིཡ སཧསྶལོཀདྷཱཏུཡོ ཨོལོཀནསམཏྠོ ཧུཏྭཱ –

‘‘པུབྦེནིཝཱསཾ ཛཱནཱམི, དིབྦཙཀྑུ ཝིསོདྷིཏཾ;

ཏེཝིཛྫོ ཨིདྡྷིཔཏྟོམྷི, ཀཏཾ བུདྡྷསྶ སཱསན’’ནྟི. (ཐེརགཱ. ༣༣༢, ༥༦༢) –

ཨུདཱནཾ ¶ ཨུདཱནེཏྭཱ ‘‘ཀིཾ ནུ ཁོ མེ ཀཏྭཱ ཨཡཾ སམྤཏྟི ལདྡྷཱ’’ཏི ཨོལོཀེནྟོ ‘‘པདུམུཏྟརཔཱདམཱུལེ པཏྠནཾ ཋཔེསི’’ནྟི ཉཏྭཱ པུན ‘‘སཾསཱརེ སཾསརནྟོ ཨསུཀསྨིཾ ནཱམ ཀཱལེ བཱརཱཎསིཡཾ སུམནསེཊྛིཾ ནིསྶཱཡ ཛཱིཝནྟོ ཨནྣབྷཱརོ ནཱམ ཨཧོསི’’ནྟིཔི ཉཏྭཱ –

‘‘ཨནྣབྷཱརོ ¶ པུརེ ཨཱསིཾ, དལིདྡོ ཏིཎཧཱརཀོ;

པིཎྜཔཱཏོ མཡཱ དིནྣོ, ཨུཔརིཊྛསྶ ཏཱདིནོ’’ཏི. –

ཨཱཧ ¶ . ཨཐསྶ ཨེཏདཧོསི – ‘‘ཡོ སོ ཏདཱ མཡཱ ཨུཔརིཊྛསྶ དིནྣཔིཎྜཔཱཏཏོ ཀཧཱཔཎེ དཏྭཱ པཏྟིཾ ཨགྒཧེསི, མམ སཧཱཡཀོ སུམནསེཊྛི ཀཧཾ ནུ ཁོ སོ ཨེཏརཧི ནིབྦཏྟོ’’ཏི. ཨཐ ནཾ ‘‘ཝིཉྫྷཱཊཝིཡཾ པབྦཏཔཱདེ མུཎྜནིགམོ ནཱམ ཨཏྠི, ཏཏྠ མཧཱམུཎྜསྶ ནཱམ ཨུཔཱསཀསྶ མཧཱསུམནོ ཙཱུལ༹སུམནོཏི དྭེ པུཏྟཱ, ཏེསུ སོ ཙཱུལ༹སུམནོ ཧུཏྭཱ ནིབྦཏྟོ’’ཏི ཨདྡས. དིསྭཱ ཙ པན ཙིནྟེསི – ‘‘ཨཏྠི ནུ ཁོ ཏཏྠ མཡི གཏེ ཨུཔཀཱརོ, ནཏྠཱི’’ཏི. སོ ཨུཔདྷཱརེནྟོ ཨིདཾ ཨདྡས ‘‘སོ ཏཏྠ མཡི གཏེ སཏྟཝསྶིཀོཝ ནིཀྑམིཏྭཱ པབྦཛིསྶཏི, ཁུརགྒེཡེཝ ཙ ཨརཧཏྟཾ པཱཔུཎིསྶཏཱི’’ཏི. དིསྭཱ ཙ པན ཨུཔཀཊྛེ ཨནྟོཝསྶེ ཨཱཀཱསེན གནྟྭཱ གཱམདྭཱརེ ཨོཏརི. མཧཱམུཎྜོ པན ཨུཔཱསཀོ ཐེརསྶ པུབྦེཔི ཝིསྶཱསིཀོ ཨེཝ. སོ ཐེརཾ པིཎྜཔཱཏཀཱལེ ཙཱིཝརཾ པཱརུཔནྟཾ དིསྭཱ པུཏྟཾ མཧཱསུམནཾ ཨཱཧ – ‘‘ཏཱཏ, ཨཡྻོ, མེ ཨནུརུདྡྷཏྠེརོ ཨཱགཏོ, ཡཱཝསྶ ཨཉྙོ ཀོཙི པཏྟཾ ན གཎྷཱཏི, ཏཱཝསྶ གནྟྭཱ པཏྟཾ གཎྷ, ཨཧཾ ཨཱསནཾ པཉྙཱཔེསྶཱམཱི’’ཏི. སོ ཏཐཱ ཨཀཱསི. ཨུཔཱསཀོ ཐེརཾ ཨནྟོནིཝེསནེ སཀྐཙྩཾ པརིཝིསིཏྭཱ ཏེམཱསཾ ཝསནཏྠཱཡ པཊིཉྙཾ གཎྷི, ཐེརོཔི ཨདྷིཝཱསེསི.

ཨཐ ནཾ ཨེཀདིཝསཾ པཊིཛགྒནྟོ ཝིཡ ¶ ཏེམཱསཾ པཊིཛགྒིཏྭཱ མཧཱཔཝཱརཎཱཡ ཏིཙཱིཝརཉྩེཝ གུལ༹ཏེལཏཎྜུལཱདཱིནི ཙ ཨཱཧརིཏྭཱ ཐེརསྶ པཱདམཱུལེ ཋཔེཏྭཱ ‘‘གཎྷཐ, བྷནྟེ’’ཏི ཨཱཧ. ‘‘ཨལཾ, ཨུཔཱསཀ, ན མེ ཨིམིནཱ ཨཏྠོ’’ཏི. ‘‘ཏེན ཧི, བྷནྟེ, ཝསྶཱཝཱསིཀལཱབྷོ ནཱམེས, གཎྷཐ ན’’ནྟི? ‘‘ན གཎྷཱམི, ཨུཔཱསཀཱ’’ཏི. ‘‘ཀིམཏྠཾ ན གཎྷཐ, བྷནྟེ’’ཏི? ‘‘མཡ྄ཧཾ སནྟིཀེ ཀཔྤིཡཀཱརཀོ སཱམཎེརོཔི ནཏྠཱི’’ཏི. ‘‘ཏེན ཧི, བྷནྟེ, མམ པུཏྟོ མཧཱསུམནོ སཱམཎེརོ བྷཝིསྶཏཱི’’ཏི. ‘‘ན མེ, ཨུཔཱསཀ, མཧཱསུམནེནཏྠོ’’ཏི. ‘‘ཏེན ཧི, བྷནྟེ, ཙཱུལ༹སུམནཾ པབྦཱཛེཐཱ’’ཏི. ཐེརོ ‘‘སཱདྷཱུ’’ཏི སམྤཊིཙྪིཏྭཱ ཙཱུལ༹སུམནཾ པབྦཱཛེསི. སོ ཁུརགྒེཡེཝ ཨརཧཏྟཾ པཱཔུཎི. ཐེརོ ཏེན སདྡྷིཾ ཨཌྜྷམཱསམཏྟཾ ཏཏྠེཝ ཝསིཏྭཱ ‘‘སཏྠཱརཾ པསྶིསྶཱམཱི’’ཏི ཏསྶ ཉཱཏཀེ ཨཱཔུཙྪིཏྭཱ ཨཱཀཱསེནེཝ གནྟྭཱ ཧིམཝནྟཔདེསེ ཨརཉྙཀུཊིཀཱཡ ཨོཏརི.

ཐེརོ ¶ པན པཀཏིཡཱཔི ཨཱརདྡྷཝཱིརིཡོ, ཏསྶ ཏཏྠ པུབྦརཏྟཱཔརརཏྟཾ ཙངྐམནྟསྶ ཨུདརཝཱཏོ སམུཊྛཧི. ཨཐ ནཾ ཀིལནྟརཱུཔཾ དིསྭཱ སཱམཎེརོ པུཙྪི – ‘‘བྷནྟེ, ཀིཾ ཝོ རུཛྫཏཱི’’ཏི? ‘‘ཨུདརཝཱཏོ མེ སམུཊྛིཏོ’’ཏི ¶ . ‘‘ཨཉྙདཱཔི སམུཊྛིཏཔུབྦོ, བྷནྟེ’’ཏི? ‘‘ཨཱམཱཝུསོ’’ཏི. ‘‘ཀེན ཕཱསུཀཾ ཧོཏི, བྷནྟེ’’ཏི? ‘‘ཨནོཏཏྟཏོ པཱནཱིཡེ ལདྡྷེ ཕཱསུཀཾ ཧོཏི, ཨཱཝུསོ’’ཏི. ‘‘ཏེན ཧི, བྷནྟེ, ཨཱཧརཱམཱི’’ཏི. ‘‘སཀྑིསྶསི སཱམཎེརཱ’’ཏི? ‘‘ཨཱམ, བྷནྟེ’’ཏི. ཏེན ཧི ཨནོཏཏྟེ པནྣགོ ནཱམ ནཱགརཱཛཱ མཾ ཛཱནཱཏི, ཏསྶ ཨཱཙིཀྑིཏྭཱ བྷེསཛྫཏྠཱཡ ཨེཀཾ པཱནཱིཡཝཱརཀཾ ཨཱཧརཱཏི. སོ སཱདྷཱུཏི ཨུཔཛ྄ཛྷཱཡཾ ཝནྡིཏྭཱ ཝེཧཱསཾ ཨབྦྷུགྒནྟྭཱ པཉྩཡོཛནསཏཾ ཋཱནཾ ཨགམཱསི ¶ . ཏཾ དིཝསཾ པན ནཱགརཱཛཱ ནཱགནཱཊཀཔརིཝུཏོ ཨུདཀཀཱིལ༹ཾ ཀཱིལི༹ཏུཀཱམོ ཧོཏི. སོ སཱམཎེརཾ ཨཱགཙྪནྟཾ དིསྭཱཝ ཀུཛ྄ཛྷི, ‘‘ཨཡཾ མུཎྜཀསམཎོ ཨཏྟནོ པཱདཔཾསུཾ མམ མཏྠཀེ ཨོཀིརནྟོ ཝིཙརཏི, ཨནོཏཏྟེ པཱནཱིཡཏྠཱཡ ཨཱགཏོ བྷཝིསྶཏི, ན དཱནིསྶ པཱནཱིཡཾ དསྶཱམཱི’’ཏི པཎྞཱསཡོཛནིཀཾ ཨནོཏཏྟདཧཾ མཧཱཔཱཏིཡཱ ཨུཀྑལིཾ པིདཧནྟོ ཝིཡ ཕཎེན པིདཧིཏྭཱ ནིཔཛྫི. སཱམཎེརོ ནཱགརཱཛསྶ ཨཱཀཱརཾ ཨོལོཀེཏྭཱཝ ‘‘ཀུདྡྷོ ཨཡ’’ནྟི ཉཏྭཱ ཨིམཾ གཱཐམཱཧ –

‘‘སུཎོཧི མེ ནཱགརཱཛ, ཨུགྒཏེཛ མཧབྦལ;

དེཧི མེ པཱནཱིཡགྷཊཾ, བྷེསཛྫཏྠམྷི ཨཱགཏོ’’ཏི.

ཏཾ སུཏྭཱ ནཱགརཱཛཱ ཨིམཾ གཱཐམཱཧ –

‘‘པུརཏྠིམསྨིཾ དིསཱབྷཱགེ, གངྒཱ ནཱམ མཧཱནདཱི;

མཧཱསམུདྡམཔྤེཏི, ཏཏོ ཏྭཾ པཱནཱིཡཾ ཧརཱ’’ཏི.

ཏཾ སུཏྭཱ སཱམཎེརོ ‘‘ཨཡཾ ནཱགརཱཛཱ ཨཏྟནོ ཨིཙྪཱཡ ན དསྶཏི, ཨཧཾ བལཀྐཱརཾ ཀཏྭཱ ཨཱནུབྷཱཝཾ ཛཱནཱཔེཏྭཱ ཨིམཾ ཨབྷིབྷཝིཏྭཱཝ པཱནཱིཡཾ གཎྷིསྶཱམཱི’’ཏི ཙིནྟེཏྭཱ, ‘‘མཧཱརཱཛ ¶ , ཨུཔཛ྄ཛྷཱཡོ མཾ ཨནོཏཏྟཏོཝ པཱནཱིཡཾ ཨཱཧརཱཔེཏི, ཏེནཱཧཾ ཨིདམེཝ ཧརིསྶཱམི, ཨཔེཧི, མཱ མཾ ཝཱརེཧཱི’’ཏི ཝཏྭཱ ཨིམཾ གཱཐམཱཧ –

‘‘ཨིཏོཝ པཱནཱིཡཾ ཧཱསྶཾ, ཨིམིནཱཝམྷི ཨཏྠིཀོ;

ཡདི ཏེ ཐཱམབལཾ ཨཏྠི, ནཱགརཱཛ ནིཝཱརཡཱ’’ཏི.

‘‘སཱམཎེར སཙེ ཨཏྠི, ཏཝ ཝིཀྐམ པོརིསཾ;

ཨབྷིནནྡཱམི ཏེ ཝཱཙཾ, ཧརསྶུ པཱནཱིཡཾ མམཱ’’ཏི.

ཨཐ ¶ ནཾ སཱམཎེརོ ‘‘ཨེཝཾ, མཧཱརཱཛ, ཧརཱམཱི’’ཏི ཝཏྭཱ ‘‘ཡདི སཀྐོནྟོ ཧརཱཧཱི’’ཏི ཝུཏྟེ – ‘‘ཏེན ཧི སུཊྛུ ཛཱནསྶཱུ’’ཏི ཏིཀྑཏྟུཾ པཊིཉྙཾ གཧེཏྭཱ ‘‘བུདྡྷསཱསནསྶ ཨཱནུབྷཱཝཾ དསྶེཏྭཱ མཡཱ པཱནཱིཡཾ ཧརིཏུཾ ཝཊྚཏཱི’’ཏི ཙིནྟེཏྭཱ ཨཱཀཱསཊྛདེཝཏཱནཾ ཏཱཝ སནྟིཀཾ ཨགམཱསི. ཏཱ ཨཱགནྟྭཱ ཝནྡིཏྭཱ ‘‘ཀིཾ, བྷནྟེ’’ཏི ཝཏྭཱ ཨཊྛཾསུ. ‘‘ཨེཏསྨིཾ ཨནོཏཏྟདཧཔིཊྛེ པནྣགནཱགརཱཛེན སདྡྷིཾ མམ སངྒཱམོ བྷཝིསྶཏི, ཏཏྠ གནྟྭཱ ཛཡཔརཱཛཡཾ ཨོལོཀེཐཱ’’ཏི ཨཱཧ. སོ ཨེཏེནེཝ ནཱིཧཱརེན ཙཏྟཱརོ ལོཀཔཱལེ སཀྐསུཡཱམསནྟུསིཏཔརནིམྨིཏཝསཝཏྟཱི ཙ ཨུཔསངྐམིཏྭཱ ཏམཏྠཾ ཨཱརོཙེསི. ཏཏོ པརཾ པཊིཔཱཊིཡཱ ཡཱཝ བྲཧྨལོཀཾ གནྟྭཱ ཏཏྠ ཏཏྠ བྲཧྨེཧི ཨཱགནྟྭཱ ¶ ཝནྡིཏྭཱ ཋིཏེཧི ‘‘ཀིཾ, བྷནྟེ’’ཏི པུཊྛོ ཏམཏྠཾ ཨཱརོཙེསི. ཨེཝཾ སོ ཨསཉྙེ ཙ ཨརཱུཔིབྲཧྨཱནོ ཙ ཋཔེཏྭཱ སབྦཏྠ མུཧུཏྟེནེཝ ཨཱཧིཎྜིཏྭཱ ཨཱརོཙེསི. ཏསྶ ཝཙནཾ སུཏྭཱ སབྦཱཔི དེཝཏཱ ཨནོཏཏྟདཧཔིཊྛེ ནཱལི༹ཡཾ པཀྑིཏྟཱནི པིཊྛཙུཎྞཱནི ཝིཡ ཨཱཀཱསཾ ནིརནྟརཾ པཱུརེཏྭཱ སནྣིཔཏིཾསུ. སནྣིཔཏིཏེ དེཝསངྒྷེ སཱམཎེརོ ཨཱཀཱསེ ཋཏྭཱ ནཱགརཱཛཾ ཨཱཧ –

‘‘སུཎོཧི མེ ནཱགརཱཛ, ཨུགྒཏེཛ མཧབྦལ;

དེཧི མེ པཱནཱིཡགྷཊཾ, བྷེསཛྫཏྠམྷི ཨཱགཏོ’’ཏི.

‘‘སཱམཎེར སཙེ ཨཏྠི, ཏཝ ཝིཀྐམ པོརིསཾ;

ཨབྷིནནྡཱམི ཏེ ཝཱཙཾ, ཧརསྶུ པཱནཱིཡཾ མམཱ’’ཏི.

སོ ཏིཀྑཏྟུཾ ནཱགརཱཛསྶ པཊིཉྙཾ གཧེཏྭཱ ཨཱཀཱསེ ཋིཏཀོཝ དྭཱདསཡོཛནིཀཾ བྲཧྨཏྟབྷཱཝཾ མཱཔེཏྭཱ ཨཱཀཱསཏོ ཨོརུཡ྄ཧ ནཱགརཱཛསྶ ཕཎེ ཨཀྐམིཏྭཱ ཨདྷོམུཁཾ ནིཔྤཱིལེ༹སི, ཏཱཝདེཝ བལཝཏཱ པུརིསེན ཨཀྐནྟཨལླཙམྨཾ ཝིཡ ནཱགརཱཛསྶ ཕཎེ ཨཀྐནྟམཏྟེ ཨོགལིཏྭཱ དབྦིམཏྟཱ ཕཎཔུཊཀཱ ཨཧེསུཾ. ནཱགརཱཛསྶ ཕཎེཧི མུཏྟམུཏྟཊྛཱནཏོ ཏཱལཀྑནྡྷཔམཱཎཱ ¶ ཨུདཀཝཊྚིཡོ ཨུགྒཉྪིཾསུ. སཱམཎེརོ ཨཱཀཱསེཡེཝ པཱནཱིཡཝཱརཀཾ ¶ པཱུརེསི. དེཝསངྒྷོ སཱདྷུཀཱརམདཱསི. ཨཐ ནཱགརཱཛཱ ¶ ལཛྫིཏྭཱ སཱམཎེརསྶ ཀུཛ྄ཛྷི, ཛཡཀུསུམཝཎྞཱནིསྶ ཨཀྑཱིནི ཨཧེསུཾ. སོ ‘‘ཨཡཾ མཾ དེཝསངྒྷཾ སནྣིཔཱཏེཏྭཱ པཱནཱིཡཾ གཧེཏྭཱ ལཛྫཱཔེསི, ཨེཏཾ གཧེཏྭཱ མུཁེ ཧཏྠཾ པཀྑིཔིཏྭཱ ཧདཡམཾསཾ ཝཱསྶ མདྡཱམི, པཱདེ ཝཱ ནཾ གཧེཏྭཱ པཱརགངྒཱཡཾ ཁིཔཱམཱི’’ཏི ཝེགེན ཨནུབནྡྷི. ཨནུབནྡྷནྟོཔི ནཾ པཱཔུཎིཏུཾ ནཱསཀྑིཡེཝ. སཱམཎེརོ གནྟྭཱ ཨུཔཛ྄ཛྷཱཡསྶ ཧཏྠེ པཱནཱིཡཾ ཋཔེཏྭཱ ‘‘པིཝཐ, བྷནྟེ’’ཏི ཨཱཧ. ནཱགརཱཛཱཔི པཙྪཏོ ཨཱགནྟྭཱ, ‘‘བྷནྟེ ཨནུརུདྡྷ, སཱམཎེརོ མཡཱ ཨདིནྣམེཝ པཱནཱིཡཾ གཧེཏྭཱ ཨཱགཏོ, མཱ པིཝིཏྠཱ’’ཏི ཨཱཧ. ཨེཝཾ ཀིར སཱམཎེརཱཏི. ‘‘པིཝཐ, བྷནྟེ, ཨིམིནཱ མེ དིནྣཾ པཱནཱིཡཾ ཨཱཧཊ’’ནྟི ཨཱཧ. ཐེརོ ‘‘ཁཱིཎཱསཝསཱམཎེརསྶ མུསཱཀཐནཾ ནཱམ ནཏྠཱི’’ཏི ཉཏྭཱ པཱནཱིཡཾ པིཝི. ཏངྑཎཉྙེཝསྶ ཨཱབཱདྷོ པཊིཔསྶམྦྷི. པུན ནཱགོ ཐེརཾ ཨཱཧ – ‘‘བྷནྟེ, སཱམཎེརེནམྷི སབྦཾ དེཝགཎཾ སནྣིཔཱཏེཏྭཱ ལཛྫཱཔིཏོ, ཨཧམསྶ ཧདཡཾ ཝཱ ཕཱལེསྶཱམི, པཱདེ ཝཱ ནཾ གཧེཏྭཱ པཱརགངྒཱཡ ཁིཔིསྶཱམཱི’’ཏི. མཧཱརཱཛ, སཱམཎེརོ མཧཱནུབྷཱཝོ, ཏུམྷེ སཱམཎེརེན སདྡྷིཾ སངྒཱམེཏུཾ ན སཀྑིསྶཐ ¶ , ཁམཱཔེཏྭཱ ནཾ གཙྪཐཱཏི. སོ སཡམྤི སཱམཎེརསྶ ཨཱནུབྷཱཝཾ ཛཱནཱཏིཡེཝ, ལཛྫཱཡ པན ཨནུབནྡྷིཏྭཱ ཨཱགཏོ. ཨཐ ནཾ ཐེརསྶ ཝཙནེན ཁམཱཔེཏྭཱ ཏེན སདྡྷིཾ མིཏྟསནྠཝཾ ཀཏྭཱ ‘‘ཨིཏོ པཊྛཱཡ ཨནོཏཏྟཨུདཀེན ཨཏྠེ སཏི ཏུམྷཱཀཾ ཨཱགམནཀིཙྩཾ ནཏྠི, མཡ྄ཧཾ པཧིཎེཡྻཱཐ, ཨཧམེཝ ཨཱཧརིཏྭཱ དསྶཱམཱི’’ཏི ཝཏྭཱ པཀྐཱམི.

ཐེརོཔི སཱམཎེརཾ ཨཱདཱཡ པཱཡཱསི. སཏྠཱ ཐེརསྶ ཨཱགམནབྷཱཝཾ ཉཏྭཱ མིགཱརམཱཏུཔཱསཱདེ ཐེརསྶ ཨཱགམནཾ ཨོལོཀེནྟོ ནིསཱིདི. བྷིཀྑཱུཔི ཐེརཾ ཨཱགཙྪནྟཾ དིསྭཱ པཙྩུགྒནྟྭཱ པཏྟཙཱིཝརཾ པཊིགྒཧེསུཾ. ཨཐེཀཙྩེ སཱམཎེརཾ སཱིསེཔི ཀཎྞེསུཔི བཱཧཱཡམྤི གཧེཏྭཱ སཉྩཱལེཏྭཱ ‘‘ཀིཾ, སཱམཎེར ཙཱུལ༹ཀནིཊྛ, ན ཨུཀྐཎྛིཏོསཱི’’ཏི ཨཱཧཾསུ. སཏྠཱ ཏེསཾ ཀིརིཡཾ དིསྭཱ ཙིནྟེསི – ‘‘བྷཱརིཡཾ ཝཏིམེསཾ བྷིཀྑཱུནཾ ཀམྨཾ ཨཱསཱིཝིསཾ གཱིཝཱཡ གཎྷནྟཱ ཝིཡ སཱམཎེརཾ གཎྷནྟི, ནཱསྶ ཨཱནུབྷཱཝཾ ཛཱནནྟི, ཨཛྫ མཡཱ སུམནསཱམཎེརསྶ གུཎཾ པཱཀཊཾ ཀཱཏུཾ ཝཊྚཏཱི’’ཏི. ཐེརོཔི ཨཱགནྟྭཱ སཏྠཱརཾ ཝནྡིཏྭཱ ནིསཱིདི. སཏྠཱ ཏེན སདྡྷིཾ པཊིསནྠཱརཾ ཀཏྭཱ ཨཱནནྡཏྠེརཾ ཨཱམནྟེསི – ‘‘ཨཱནནྡ, ཨནོཏཏྟཨུདཀེནམྷི པཱདེ དྷོཝིཏུཀཱམོ ¶ , སཱམཎེརཱནཾ གྷཊཾ དཏྭཱ པཱནཱིཡཾ ཨཱཧརཱཔེཧཱི’’ཏི. ཐེརོ ཝིཧཱརེ པཉྩམཏྟཱནི ¶ སཱམཎེརསཏཱནི སནྣིཔཱཏེསི. ཏེསུ སུམནསཱམཎེརོ སབྦནཝཀོ ཨཧོསི. ཐེརོ སབྦམཧལླཀཾ སཱམཎེརཾ ཨཱཧ – ‘‘སཱམཎེར, སཏྠཱ ཨནོཀཏྟདཧཨུདཀེན པཱདེ དྷོཝིཏུཀཱམོ, གྷཊཾ ཨཱདཱཡ གནྟྭཱ པཱནཱིཡཾ ཨཱཧརཱ’’ཏི. སོ ‘‘ན སཀྐོམི, བྷནྟེ’’ཏི ན ཨིཙྪི. ཐེརོ སེསེཔི པཊིཔཱཊིཡཱ པུཙྪི, ཏེཔི ཏཐེཝ ཝཏྭཱ པཊིཀྑིཔིཾསུ. ‘‘ཀིཾ པནེཏྠ ཁཱིཎཱསཝསཱམཎེརཱ ནཏྠཱི’’ཏི? ཨཏྠི, ཏེ པན ‘‘ནཱཡཾ ཨམྷཱཀཾ བདྡྷོ ¶ མཱལཱཔུཊོ, སུམནསཱམཎེརསྶེཝ བདྡྷོ’’ཏི ན ཨིཙྪིཾསུ, པུཐུཛྫནཱ པན ཨཏྟནོ ཨསམཏྠཏཱཡེཝ ན ཨིཙྪིཾསུ. པརིཡོསཱནེ པན སུམནསྶ ཝཱརེ སམྤཏྟེ, ‘‘སཱམཎེར, སཏྠཱ ཨནོཏཏྟདཧཨུདཀེན པཱདེ དྷོཝིཏུཀཱམོ, ཀུཊཾ ཨཱདཱཡ ཀིར ཨུདཀཾ ཨཱཧརཱ’’ཏི ཨཱཧ. སོ ‘‘སཏྠརི ཨཱཧརཱཔེནྟེ ཨཱཧརིསྶཱམཱི’’ཏི སཏྠཱརཾ ཝནྡིཏྭཱ, ‘‘བྷནྟེ, ཨནོཏཏྟཏོ ཀིར མཾ ཨུདཀཾ ཨཱཧཱརཱཔེཐཱ’’ཏི ཨཱཧ. ‘‘ཨཱམ, སུམནཱ’’ཏི. སོ ཝིསཱཁཱཡ ཀཱརིཏེསུ གྷནསུཝཎྞཀོཊྚིམེསུ སེནཱསནཀུཊེསུ ཨེཀཾ སཊྛིཀུཊཨུདཀགཎྷནཀཾ མཧཱགྷཊཾ ཧཏྠེན གཧེཏྭཱ ‘‘ཨིམིནཱ མེ ཨུཀྑིཔིཏྭཱ ཨཾསཀཱུཊེ ཋཔིཏེན ཨཏྠོ ནཏྠཱི’’ཏི ཨོལམྦཀཾ ཀཏྭཱ ཝེཧཱསཾ ཨབྦྷུགྒནྟྭཱ ཧིམཝནྟཱབྷིམུཁོ པཀྑནྡི.

ནཱགརཱཛཱ སཱམཎེརཾ དཱུརཏོཝ ཨཱགཙྪནྟཾ དིསྭཱ པཙྩུགྒནྟྭཱ ཀུཊཾ ¶ ཨཾསཀཱུཊེན ཨཱདཱཡ, ‘‘བྷནྟེ, ཏུམྷེ མཱདིསེ དཱསེ ཝིཛྫམཱནེ ཀསྨཱ སཡཾ ཨཱགཏཱ, ཨུདཀེནཏྠེ སཏི ཀསྨཱ སཱསནམཏྟམྤི ན པཧིཎཐཱ’’ཏི ཀུཊེན ཨུདཀཾ ཨཱདཱཡ སཡཾ ཨུཀྑིཔིཏྭཱ ‘‘པུརཏོ ཧོཐ, བྷནྟེ, ཨཧམེཝ ཨཱཧརིསྶཱམཱི’’ཏི ཨཱཧ. ‘‘ཏིཊྛཐ ཏུམྷེ, མཧཱརཱཛ, ཨཧམེཝ སམྨཱསམྦུདྡྷེན ཨཱཎཏྟོ’’ཏི ནཱགརཱཛཱནཾ ནིཝཏྟཱཔེཏྭཱ ཀུཊཾ མུཁཝཊྚིཡཾ ཧཏྠེན གཧེཏྭཱ ཨཱཀཱསེནཱགཉྪི. ཨཐ ནཾ སཏྠཱ ཨཱགཙྪནྟཾ ཨོལོཀེཏྭཱ བྷིཀྑཱུ ཨཱམནྟེསི – ‘‘པསྶཐ, བྷིཀྑཝེ, སཱམཎེརསྶ ལཱིལཾ, ཨཱཀཱསེ ཧཾསརཱཛཱ ཝིཡ སོབྷཏཱི’’ཏི ཨཱཧ. སོཔི པཱནཱིཡགྷཊཾ ཋཔེཏྭཱ སཏྠཱརཾ ཝནྡིཏྭཱ ཨཊྛཱསི. ཨཐ ནཾ སཏྠཱ ཨཱཧ – ‘‘ཀཏིཝསྶོསི ཏྭཾ, སུམནཱ’’ཏི? ‘‘སཏྟཝསྶོམྷི, བྷནྟེཏི. ‘‘ཏེན ཧི, སུམན, ཨཛྫ པཊྛཱཡ བྷིཀྑུ ཧོཧཱི’’ཏི ཝཏྭཱ དཱཡཛྫཨུཔསམྤདཾ ཨདཱསི. དྭེཡེཝ ¶ ཀིར སཱམཎེརཱ སཏྟཝསྶིཀཱ ཨུཔསམྤདཾ ལབྷིཾསུ – ཨཡཉྩ སུམནོ སོཔཱཀོ ཙཱཏི.

ཨེཝཾ ཏསྨིཾ ཨུཔསམྤནྣེ དྷམྨསབྷཱཡཾ ཀཐཾ སམུཊྛཱཔེསུཾ, ‘‘ཨཙྪརིཡཾ ཨཱཝུསོ, ཨེཝརཱུཔོ ཧི ནཱམ དཧརསཱམཎེརསྶ ཨཱནུབྷཱཝོ ཧོཏི, ན ནོ ཨིཏོ པུབྦེ ཨེཝརཱུཔོ ཨཱནུབྷཱཝོ དིཊྛཔུབྦོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, མམ སཱསནེ དཧརོཔི སམྨཱ པཊིཔནྣོ ཨེཝརཱུཔཾ ¶ སམྤཏྟིཾ ལབྷཏིཡེཝཱ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཡོ ཧཝེ དཧརོ བྷིཀྑུ, ཡུཉྫཏི བུདྡྷསཱསནེ;

སོམཾ ལོཀཾ པབྷཱསེཏི, ཨབྦྷཱ མུཏྟོཝ ཙནྡིམཱ’’ཏི.

ཏཏྠ ¶ ཡུཉྫཏཱིཏི གྷཊཏི ཝཱཡམཏི. པབྷཱསེཏཱིཏི སོ བྷིཀྑུ ཨཏྟནོ ཨརཧཏྟམགྒཉཱཎེན ཨབྦྷཱདཱིཧི མུཏྟོ ཙནྡིམཱ ཝིཡ ལོཀཾ ཁནྡྷཱདིབྷེདཾ ལོཀཾ ཨོབྷཱསེཏི, ཨེཀཱལོཀཾ ཀརོཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཚིནྡ ¶ ¶ ¶ སོཏནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པསཱདབཧུལཾ བྲཱཧྨཎཾ ཨཱརབྦྷ ཀཐེསི.

སོ ཀིར བྲཱཧྨཎོ བྷགཝཏོ དྷམྨདེསནཾ སུཏྭཱ པསནྣཙིཏྟོ ཨཏྟནོ གེཧེ སོལ༹སམཏྟཱནཾ བྷིཀྑཱུནཾ ནིཙྩབྷཏྟཾ པཊྛཔེཏྭཱ བྷིཀྑཱུནཾ ཨཱགཏཝེལཱཡ པཏྟཾ གཧེཏྭཱ ‘‘ཨཱགཙྪནྟུ བྷོནྟོ ཨརཧནྟོ, ནིསཱིདནྟུ བྷོནྟོ ཨརཧནྟོ’’ཏི ཡཾཀིཉྩི ཝདནྟོ ཨརཧནྟཝཱདཔཊིསཾཡུཏྟམེཝ ཝདཏི. ཏེསུ པུཐུཛྫནཱ ‘‘ཨཡཾ ཨམྷེསུ ཨརཧནྟསཉྙཱི’’ཏི ཙིནྟཡིཾསུ, ཁཱིཎཱསཝཱ ‘‘ཨཡཾ ནོ ཁཱིཎཱསཝབྷཱཝཾ ཛཱནཱཏཱི’’ཏི. ཨེཝཾ ཏེ སབྦེཔི ཀུཀྐུཙྩཱཡནྟཱ ཏསྶ གེཧཾ ནཱགམིཾསུ. སོ དུཀྑཱི དུམྨནོ ‘‘ཀིནྣུ ཁོ, ཨཡྻཱ, ནཱགཙྪནྟཱི’’ཏི ཝིཧཱརཾ གནྟྭཱ སཏྠཱརཾ ཝནྡིཏྭཱ ཏམཏྠཾ ཨཱརོཙེསི. སཏྠཱ བྷིཀྑཱུ ཨཱམནྟེཏྭཱ ‘‘ཀིཾ ཨེཏཾ, བྷིཀྑཝེ’’ཏི པུཙྪིཏྭཱ ཏེཧི ཏསྨིཾ ཨཏྠེ ཨཱརོཙིཏེ ‘‘སཱདིཡཐ པན ཏུམྷེ, བྷིཀྑཝེ, ཨརཧནྟཝཱད’’ནྟི ཨཱཧ. ‘‘ན སཱདིཡཱམ མཡཾ, བྷནྟེ’’ཏི. ‘‘ཨེཝཾ སནྟེ མནུསྶཱནཾ ཨེཏཾ པསཱདབྷཉྙཾ, ཨནཱཔཏྟི ¶ , བྷིཀྑཝེ, པསཱདབྷཉྙེ, ཨཔི ཙ ཁོ པན བྲཱཧྨཎསྶ ཨརཧནྟེསུ ཨདྷིམཏྟཾ པེམཾ, ཏསྨཱ ཏུམྷེཧིཔི ཏཎྷཱསོཏཾ ཚེཏྭཱ ཨརཧཏྟམེཝ པཏྟུཾ ཡུཏྟ’’ནྟི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཚིནྡ སོཏཾ པརཀྐམྨ, ཀཱམེ པནུད བྲཱཧྨཎ;

སངྑཱརཱནཾ ཁཡཾ ཉཏྭཱ, ཨཀཏཉྙཱུསི བྲཱཧྨཎཱ’’ཏི.

ཏཏྠ པརཀྐམྨཱཏི ཏཎྷཱསོཏཾ ནཱམ ན ཨཔྤམཏྟཀེན ཝཱཡཱམེན ཚིནྡིཏུཾ སཀྐཱ, ཏསྨཱ ཉཱཎསམྤཡུཏྟེན མཧནྟེན པརཀྐམེན པརཀྐམིཏྭཱ ཏཾ སོཏཾ ཚིནྡ. ཨུབྷོཔི ཀཱམེ པནུད ནཱིཧར. བྲཱཧྨཎཱཏི ཁཱིཎཱསཝཱནཾ ཨཱལཔནམེཏཾ. སངྑཱརཱནནྟི པཉྩནྣཾ ཁནྡྷཱནཾ ཁཡཾ ཛཱནིཏྭཱ. ཨཀཏཉྙཱུཏི ཨེཝཾ སནྟེ ཏྭཾ སུཝཎྞཱདཱིསུ ཀེནཙི ཨཀཏསྶ ནིབྦཱནསྶ ཛཱནནཏོ ཨཀཏཉྙཱུ ནཱམ ཧོསཱིཏི.

དེསནཱཝསཱནེ ¶ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡདཱ ¶ དྭཡེསཱུཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སམྦཧུལེ བྷིཀྑཱུ ཨཱརབྦྷ ཀཐེསི.

ཨེཀདིཝསཉྷི ¶ ཏིཾསམཏྟཱ དིསཱཝཱསིཀཱ བྷིཀྑཱུ ཨཱགནྟྭཱ སཏྠཱརཾ ཝནྡིཏྭཱ ནིསཱིདིཾསུ. སཱརིཔུཏྟཏྠེརོ ཏེསཾ ཨརཧཏྟསྶ ཨུཔནིསྶཡཾ དིསྭཱ སཏྠཱརཾ ཨུཔསངྐམིཏྭཱ ཋིཏཀོཝ ཨིམཾ པཉྷཾ པུཙྪི – ‘‘བྷནྟེ, དྭེ དྷམྨཱཏི ཝུཙྩནྟི, ཀཏམེ ནུ ཁོ དྭེ དྷམྨཱ’’ཏི? ཨཐ ནཾ སཏྠཱ ‘‘དྭེ དྷམྨཱཏི ཁོ, སཱརིཔུཏྟ, སམཐཝིཔསྶནཱ ཝུཙྩནྟཱི’’ཏི ཝཏྭཱ ཨིམཾ གཱཐམཱཧ –

‘‘ཡདཱ དྭཡེསུ དྷམྨེསུ, པཱརགཱུ ཧོཏི བྲཱཧྨཎོ;

ཨཐསྶ སབྦེ སཾཡོགཱ, ཨཏྠཾ གཙྪནྟི ཛཱནཏོ’’ཏི.

ཏཏྠ ཡདཱཏི ཡསྨིཾ ཀཱལེ དྭིདྷཱ ཋིཏེསུ སམཐཝིཔསྶནཱདྷམྨེསུ ཨབྷིཉྙཱཔཱརགཱདིཝསེན ཨཡཾ ཁཱིཎཱསཝོ པཱརགཱུ ཧོཏི, ཨཐསྶ ཝཊྚསྨིཾ སཾཡོཛནསམཏྠཱ སབྦེ ཀཱམཡོགཱདཡོ སཾཡོགཱ ཨེཝཾ ཛཱནནྟསྶ ཨཏྠཾ པརིཀྑཡཾ གཙྪནྟཱིཏི ཨཏྠོ.

དེསནཱཝསཱནེ སབྦེཔི ཏེ བྷིཀྑཱུ ཨརཧཏྟེ པཏིཊྛཧིཾསཱུཏི.

ཡསྶ པཱརནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཱརཾ ཨཱརབྦྷ ཀཐེསི.

སོ ¶ ཀིརེཀསྨིཾ དིཝསེ ཨཉྙཏརོ པུརིསོ ཝིཡ ཧུཏྭཱ སཏྠཱརཾ ཨུཔསངྐམིཏྭཱ པུཙྪི – ‘‘བྷནྟེ ¶ , པཱརཾ པཱརནྟི ཝུཙྩཏི, ཀིནྣུ ཁོ ཨེཏཾ པཱརཾ ནཱམཱ’’ཏི. སཏྠཱ ‘‘མཱརོ ཨཡ’’ནྟི ཝིདིཏྭཱ, ‘‘པཱཔིམ, ཀིཾ ཏཝ པཱརེན, ཏཉྷི ཝཱིཏརཱགེཧི པཏྟབྦ’’ནྟི ཝཏྭཱ ཨིམཾ གཱཐམཱཧ –

‘‘ཡསྶ པཱརཾ ཨཔཱརཾ ཝཱ, པཱརཱཔཱརཾ ན ཝིཛྫཏི;

ཝཱིཏདྡརཾ ཝིསཾཡུཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ¶ པཱརནྟི ཨཛ྄ཛྷཏྟིཀཱནི ཚ ཨཱཡཏནཱནི. ཨཔཱརནྟི བཱཧིརཱནི ཚ ཨཱཡཏནཱནི. པཱརཱཔཱརནྟི ཏདུབྷཡཾ. ན ཝིཛྫཏཱིཏི ཡསྶ སབྦམྤེཏཾ ‘‘ཨཧ’’ནྟི ཝཱ ‘‘མམ’’ནྟི ཝཱ གཧཎཱབྷཱཝེན ནཏྠི, ཏཾ ཀིལེསདརཐཱནཾ ཝིགམེན ཝཱིཏདྡརཾ སབྦཀིལེསེཧི ཝིསཾཡུཏྟཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཛྷཱཡིནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ བྲཱཧྨཎཾ ཨཱརབྦྷ ཀཐེསི.

སོ ཀིར ཙིནྟེསི – ‘‘སཏྠཱ ཨཏྟནོ སཱཝཀེ, ‘བྲཱཧྨཎཱ’ཏི ¶ ཝདཏི, ཨཧཉྩམྷི ཛཱཏིགོཏྟེན བྲཱཧྨཎོ, མམྤི ནུ ཁོ ཨེཝཾ ཝཏྟུཾ ཝཊྚཏཱི’’ཏི. སོ སཏྠཱརཾ ཨུཔསངྐམིཏྭཱ ཏམཏྠཾ པུཙྪི. སཏྠཱ ‘‘ནཱཧཾ ཛཱཏིགོཏྟམཏྟེན བྲཱཧྨཎཾ ཝདཱམི, ཨུཏྟམཏྠཾ ཨརཧཏྟཾ ཨནུཔྤཏྟམེཝ པནེཝཾ ཝདཱམཱི’’ཏི ཝཏྭཱ ཨིམཾ གཱཐམཱཧ –

‘‘ཛྷཱཡིཾ ཝིརཛམཱསཱིནཾ, ཀཏཀིཙྩམནཱསཝཾ;

ཨུཏྟམཏྠམནུཔྤཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཛྷཱཡིནྟི དུཝིདྷེན ཛྷཱནེན ཛྷཱཡནྟཾ ཀཱམརཛེན ཝིརཛཾ ཝནེ ཨེཀཀམཱསཱིནཾ ཙཏཱུཧི མགྒེཧི སོལ༹སནྣཾ ཀིཙྩཱནཾ ཀཏཏྟཱ ཀཏཀིཙྩཾ ཨཱསཝཱནཾ ཨབྷཱཝེན ཨནཱསཝཾ ཨུཏྟམཏྠཾ ཨརཧཏྟཾ ཨནུཔྤཏྟཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ ¶ སོ བྲཱཧྨཎོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

དིཝཱ ¶ ཏཔཏཱིཏི ཨིམཾ དྷམྨདེསནཾ སཏྠཱ མིགཱརམཱཏུཔཱསཱདེ ཝིཧརནྟོ ཨཱནནྡཏྠེརཾ ཨཱརབྦྷ ཀཐེསི.

པསེནདི ཀོསལོ ཀིར མཧཱཔཝཱརཎཱཡ སབྦཱབྷརཎཔཊིམཎྜིཏོ ¶ གནྡྷམཱལཱདཱིནི ཨཱདཱཡ ཝིཧཱརཾ ཨགམཱསི. ཏསྨིཾ ཁཎེ ཀཱལུ༹དཱཡིཏྠེརོ ཛྷཱནཾ སམཱཔཛྫིཏྭཱ པརིསཔརིཡནྟེ ནིསིནྣོ ཧོཏི, ནཱམམེཝ པནསྶེཏཾ, སརཱིརཾ སུཝཎྞཝཎྞཾ. ཏསྨིཾ པན ཁཎེ ཙནྡོ ཨུགྒཙྪཏི, སཱུརིཡོ ཨཏྠམེཏི. ཨཱནནྡཏྠེརོ ཨཏྠམེནྟསྶ ཙ སཱུརིཡསྶ ཨུགྒཙྪནྟསྶ ཙ ཙནྡསྶ ཨོབྷཱསཾ ཨོལོཀེནྟོ རཉྙོ སརཱིརོབྷཱསཾ ཐེརསྶ སརཱིརོབྷཱསཾ ཏཐཱགཏསྶ ཙ སརཱིརོབྷཱསཾ ཨོལོཀེསི. ཏཏྠ སབྦོབྷཱསེ ཨཏིཀྐམིཏྭཱ སཏྠཱཝ ཝིརོཙཏི. ཐེརོ སཏྠཱརཾ ཝནྡིཏྭཱ, ‘‘བྷནྟེ, ཨཛྫ མམ ཨིམེ ཨོབྷཱསེ ཨོལོཀེནྟསྶ ཏུམྷཱཀམེཝ ཨོབྷཱསོ རུཙྩཏི. ཏུམྷཱཀཉྷི སརཱིརཾ སབྦོབྷཱསེ ཨཏིཀྐམིཏྭཱ ཝིརོཙཏཱི’’ཏི ཨཱཧ. ཨཐ ནཾ སཏྠཱ, ‘‘ཨཱནནྡ, སཱུརིཡོ ནཱམ དིཝཱ ཝིརོཙཏི, ཙནྡོ རཏྟིཾ, རཱཛཱ ཨལངྐཏཀཱལེཡེཝ, ཁཱིཎཱསཝེ གཎསངྒཎིཀཾ པཧཱཡ ཨནྟོསམཱཔཏྟིཡཾཡེཝ ཝིརོཙཏི, བུདྡྷཱ པན རཏྟིམྤི དིཝཱཔི པཉྩཝིདྷེན ཏེཛེན ཝིརོཙནྟཱི’’ཏི ཝཏྭཱ ཨིམཾ གཱཐམཱཧ –

‘‘དིཝཱ ཏཔཏི ཨཱདིཙྩོ, རཏྟིམཱབྷཱཏི ཙནྡིམཱ;

སནྣདྡྷོ ཁཏྟིཡོ ཏཔཏི, ཛྷཱཡཱི ཏཔཏི བྲཱཧྨཎོ;

ཨཐ སབྦམཧོརཏྟིཾ, བུདྡྷོ ཏཔཏི ཏེཛསཱ’’ཏི.

ཏཏྠ དིཝཱ ཏཔཏཱིཏི དིཝཱ ཝིརོཙཏི, རཏྟིཾ པནསྶ གཏམགྒོཔི ན པཉྙཱཡཏི. ཙནྡིམཱཏི ཙནྡོཔི ¶ ཨབྦྷཱདཱིཧི ཝིམུཏྟོ རཏྟིམེཝ ཝིརོཙཏི, ནོ དིཝཱ. སནྣདྡྷོཏི སུཝཎྞམཎིཝིཙིཏྟེཧི སབྦཱབྷརཎེཧི པཊིམཎྜིཏོ ཙཏུརངྒིནིཡཱ སེནཱཡ པརིཀྑིཏྟོཝ རཱཛཱ ཝིརོཙཏི, ན ཨཉྙཱཏཀཝེསེན ཋིཏོ. ཛྷཱཡཱིཏི ཁཱིཎཱསཝོ པན གཎཾ ཝིནོདེཏྭཱ ཛྷཱཡནྟོཝ ཝིརོཙཏི. ཏེཛསཱཏི སམྨཱསམྦུདྡྷོ པན སཱིལཏེཛེན དུསྶཱིལྱཏེཛཾ, གུཎཏེཛེན ནིགྒུཎཏེཛཾ, པཉྙཱཏེཛེན ¶ དུཔྤཉྙཏེཛཾ, པུཉྙཏེཛེན ¶ ཨཔུཉྙཏེཛཾ, དྷམྨཏེཛེན ཨདྷམྨཏེཛཾ པརིཡཱདིཡིཏྭཱ ཨིམིནཱ པཉྩཝིདྷེན ཏེཛསཱ ནིཙྩཀཱལམེཝ ཝིརོཙཏཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

བཱཧིཏཔཱཔོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ བྲཱཧྨཎཔབྦཛིཏཾ ཨཱརབྦྷ ཀཐེསི.

ཨེཀོ ཀིར བྲཱཧྨཎོ བཱཧིརཀཔབྦཛྫཱཡ པབྦཛིཏྭཱ ‘‘སམཎོ གོཏམོ ཨཏྟནོ སཱཝཀེ ‘པབྦཛིཏཱ’ཏི ཝདཏི, ཨཧཉྩམྷི ¶ པབྦཛིཏོ, མམྤི ཁོ ཨེཝཾ ཝཏྟུཾ ཝཊྚཏཱི’’ཏི ཙིནྟེཏྭཱ སཏྠཱརཾ ཨུཔསངྐམིཏྭཱ ཨེཏམཏྠཾ པུཙྪི. སཏྠཱ ‘‘ནཱཧཾ ཨེཏྟཀེན ‘པབྦཛིཏོ’ཏི ཝདཱམི, ཀིལེསམལཱནཾ པན པབྦཱཛིཏཏྟཱ པབྦཛིཏོ ནཱམ ཧོཏཱི’’ཏི ཝཏྭཱ ཨིམཾ གཱཐམཱཧ –

‘‘བཱཧིཏཔཱཔོཏི བྲཱཧྨཎོ, སམཙརིཡཱ སམཎོཏི ཝུཙྩཏི;

པབྦཱཛཡམཏྟནོ མལཾ, ཏསྨཱ པབྦཛིཏོཏི ཝུཙྩཏཱི’’ཏི.

ཏཏྠ སམཙརིཡཱཏི སབྦཱཀུསལཱནི སམེཏྭཱ ཙརཎེན. ཏསྨཱཏི ཡསྨཱ བཱཧིཏཔཱཔཏཱཡ བྲཱཧྨཎོ, ཨཀུསལཱནི སམེཏྭཱ ཙརཎེན སམཎོཏི ཝུཙྩཏི, ཏསྨཱ ཡོ ཨཏྟནོ རཱགཱདིམལཾ པབྦཱཛཡནྟོ ཝིནོདེནྟོ ཙརཏི, སོཔི ཏེན པབྦཱཛནེན པབྦཛིཏོཏི ཝུཙྩཏཱིཏི ཨཏྠོ.

དེསནཱཝསཱནེ སོ བྲཱཧྨཎཔབྦཛིཏོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ན ¶ ¶ བྲཱཧྨཎསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཱརིཔུཏྟཏྠེརཾ ཨཱརབྦྷ ཀཐེསི.

ཨེཀསྨིཾ ཀིར ཋཱནེ སམྦཧུལཱ མནུསྶཱ ‘‘ཨཧོ ཨམྷཱཀཾ ¶ , ཨཡྻོ, ཁནྟིབལེན སམནྣཱགཏོ, ཨཉྙེསུ ཨཀྐོསནྟེསུ ཝཱ པཧརནྟེསུ ཝཱ ཀོཔམཏྟམྤི ནཏྠཱི’’ཏི ཐེརསྶ གུཎེ ཀཐཡིཾསུ. ཨཐེཀོ མིཙྪཱདིཊྛིཀོ བྲཱཧྨཎོ ‘‘ཀོ ཨེས ན ཀུཛ྄ཛྷཏཱི’’ཏི པུཙྪི. ‘‘ཨམྷཱཀཾ ཐེརོ’’ཏི. ‘‘ནཾ ཀུཛ྄ཛྷཱཔེནྟོ ན བྷཝིསྶཏཱི’’ཏི? ‘‘ནཏྠེཏཾ, བྲཱཧྨཎཱ’’ཏི. ‘‘ཏེན ཧི ཨཧཾ ནཾ ཀུཛ྄ཛྷཱཔེསྶཱམཱི’’ཏི? ‘‘སཙེ སཀྐོསི, ཀུཛ྄ཛྷཱཔེཧཱི’’ཏི. སོ ‘‘ཧོཏུ, ཛཱནིསྶཱམིསྶ ཀཏྟབྦ’’ནྟི ཐེརཾ བྷིཀྑཱཡ པཝིཊྛཾ དིསྭཱ པཙྪཱབྷཱགེན གནྟྭཱ པིཊྛིམཛ྄ཛྷེ མཧནྟཾ པཱཎིཔྤཧཱརམདཱསི. ཐེརོ ‘‘ཀིཾ ནཱམེཏ’’ནྟི ཨནོལོཀེཏྭཱཝ གཏོ. བྲཱཧྨཎསྶ སཀལསརཱིརེ ཌཱཧོ ཨུཔྤཛྫི. སོ ‘‘ཨཧོ གུཎསམྤནྣོ, ཨཡྻོ’’ཏི ཐེརསྶ པཱདམཱུལེ ནིཔཛྫིཏྭཱ ‘‘ཁམཐ མེ, བྷནྟེ’’ཏི ཝཏྭཱ ‘‘ཀིཾ ཨེཏ’’ནྟི ཙ ཝུཏྟེ ‘‘ཨཧཾ ཝཱིམཾསནཏྠཱཡ ཏུམྷེ པཧརི’’ནྟི ཨཱཧ. ‘‘ཧོཏུ ཁམཱམི ཏེ’’ཏི. ‘‘སཙེ མེ, བྷནྟེ, ཁམཐ, མམ གེཧེཡེཝ ནིསཱིདིཏྭཱ བྷིཀྑཾ གཎྷཐཱ’’ཏི ཐེརསྶ པཏྟཾ གཎྷི, ཐེརོཔི པཏྟཾ ཨདཱསི. བྲཱཧྨཎོ ཐེརཾ གེཧཾ ནེཏྭཱ པརིཝིསི.

མནུསྶཱ ཀུཛ྄ཛྷིཏྭཱ ‘‘ཨིམིནཱ ཨམྷཱཀཾ ནིརཔརཱདྷོ ཨཡྻོ པཧཊོ, དཎྜེནཔིསྶ མོཀྑོ ནཏྠི, ཨེཏྠེཝ ནཾ མཱརེསྶཱམཱ’’ཏི ལེཌྜུདཎྜཱདིཧཏྠཱ བྲཱཧྨཎསྶ གེཧདྭཱརེ ཨཊྛཾསུ. ཐེརོ ཨུཊྛཱཡ གཙྪནྟོ བྲཱཧྨཎསྶ ཧཏྠེ པཏྟཾ ཨདཱསི. མནུསྶཱ ཏཾ ཐེརེན སདྡྷིཾ གཙྪནྟཾ དིསྭཱ, ‘‘བྷནྟེ, ཏུམྷཱཀཾ པཏྟཾ གཧེཏྭཱ བྲཱཧྨཎཾ ནིཝཏྟེཐཱ’’ཏི ཨཱཧཾསུ. ཀིཾ ཨེཏཾ ཨུཔཱསཀཱཏི? བྲཱཧྨཎེན ¶ ཏུམྷེ པཧཊཱ, མཡམསྶ ཀཏྟབྦཾ ཛཱནིསྶཱམཱཏི. ཀིཾ པན ཏུམྷེ ཨིམིནཱ པཧཊཱ, ཨུདཱཧུ ཨཧནྟི? ཏུམྷེ, བྷནྟེཏི. ‘‘མཾ ཨེས པཧརིཏྭཱ ཁམཱཔེསི, གཙྪཐ ཏུམྷེ’’ཏི མནུསྶེ ཨུཡྻོཛེཏྭཱ བྲཱཧྨཎཾ ནིཝཏྟཱཔེཏྭཱ ཐེརོ ཝིཧཱརམེཝ གཏོ. བྷིཀྑཱུ ཨུཛ྄ཛྷཱཡིཾསུ ‘‘ཀིཾ ནཱམེཏཾ སཱརིཔུཏྟཏྠེརོ ཡེན བྲཱཧྨཎེན པཧཊོ, ཏསྶེཝ གེཧེ ནིསཱིདིཏྭཱ བྷིཀྑཾ གཧེཏྭཱ ཨཱགཏོ. ཐེརསྶ པཧཊཀཱལཏོ པཊྛཱཡ ཨིདཱནི སོ ཀསྶ ལཛྫིསྶཏི, ཨཝསེསེ པོཐེནྟོ ཝིཙརིསྶཏཱི’’ཏི. སཏྠཱ ཨཱགནྟྭཱ ¶ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, བྲཱཧྨཎོ བྲཱཧྨཎཾ པཧརནྟོ ནཱམ ནཏྠི, གིཧིབྲཱཧྨཎེན པན སམཎབྲཱཧྨཎོ པཧཊོ བྷཝིསྶཏི, ཀོདྷོ ནཱམེས ཨནཱགཱམིམགྒེན སམུགྒྷཱཏཾ གཙྪཏཱི’’ཏི ཝཏྭཱ དྷམྨཾ དེསེནྟོ ཨིམཱ གཱཐཱ ཨབྷཱསི –

‘‘ན ¶ བྲཱཧྨཎསྶ པཧརེཡྻ, ནཱསྶ མུཉྩེཐ བྲཱཧྨཎོ;

དྷཱི བྲཱཧྨཎསྶ ཧནྟཱརཾ, ཏཏོ དྷཱི ཡསྶ མུཉྩཏི.

‘‘ན བྲཱཧྨཎསྶེཏདཀིཉྩི སེཡྻོ, ཡདཱ ནིསེདྷོ མནསོ པིཡེཧི;

ཡཏོ ཡཏོ ཧིཾསམནོ ནིཝཏྟཏི, ཏཏོ ཏཏོ སམྨཏིམེཝ དུཀྑ’’ནྟི.

ཏཏྠ པཧརེཡྻཱཏི ‘‘ཁཱིཎཱསཝབྲཱཧྨཎོཧམསྨཱི’’ཏི ཛཱནནྟོ ཁཱིཎཱསཝསྶ ཝཱ ཨཉྙཏརསྶ ཝཱ ཛཱཏིབྲཱཧྨཎསྶ ¶ ན པཧརེཡྻ. ནཱསྶ མུཉྩེཐཱཏི སོཔི པཧཊོ ཁཱིཎཱསཝབྲཱཧྨཎོ ཨསྶ པཧརིཏྭཱ ཋིཏསྶ ཝེརཾ ན མུཉྩེཐ, ཏསྨིཾ ཀོཔཾ ན ཀརེཡྻཱཏི ཨཏྠོ. དྷཱི བྲཱཧྨཎསྶཱཏི ཁཱིཎཱསཝབྲཱཧྨཎསྶ ཧནྟཱརཾ གརཧཱམི. ཏཏོ དྷཱིཏི ཡོ པན ཏཾ པཧརནྟཾ པཊིཔཧརནྟོ ཏསྶ ཨུཔརི ཝེརཾ མུཉྩཏི, ཏཾ ཏཏོཔི གརཧཱམིཡེཝ.

ཨེཏདཀིཉྩི སེཡྻོཏི ཡཾ ཁཱིཎཱསཝསྶ ཨཀྐོསནྟཾ ཝཱ ཨཔཙྩཀྐོསནཾ, པཧརནྟཾ ཝཱ ཨཔྤཊིཔཧརཎཾ, ཨེཏཾ ཏསྶ ཁཱིཎཱསཝབྲཱཧྨཎསྶ ན ཀིཉྩི སེཡྻོ, ཨཔྤམཏྟཀཾ སེཡྻོ ན ཧོཏི, ཨདྷིམཏྟམེཝ སེཡྻོཏི ཨཏྠོ. ཡདཱ ནིསེདྷོ མནསོ པིཡེཧཱིཏི ཀོདྷནསྶ ཧི ཀོདྷུཔྤཱདོཝ མནསོ པིཡོ ནཱམ. ཀོདྷོ ཧི པནེས མཱཏཱཔིཏཱུསུཔི བུདྡྷཱདཱིསུཔི ཨཔརཛ྄ཛྷཏི. ཏསྨཱ ཡོ ཨསྶ ཏེཧི མནསོ ནིསེདྷོ ཀོདྷཝསེན ཨུཔྤཛྫམཱནསྶ ཙིཏྟསྶ ནིགྒཧོ, ཨེཏཾ ན ཀིཉྩི སེཡྻོཏི ཨཏྠོ. ཧིཾསམནོཏི ཀོདྷམནོ. སོ ཏསྶ ཡཏོ ཡཏོ ཝཏྠུཏོ ཨནཱགཱམིམགྒེན སམུགྒྷཱཏཾ གཙྪནྟོ ནིཝཏྟཏི ¶ ¶ . ཏཏོ ཏཏོཏི ཏཏོ ཏཏོ ཝཏྠུཏོ སཀལམྤི ཝཊྚདུཀྑཾ ནིཝཏྟཏིཡེཝཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡསྶ ཀཱཡེན ཝཱཙཱཡཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཧཱཔཛཱཔཏིཾ གོཏམིཾ ཨཱརབྦྷ ཀཐེསི.

བྷགཝཏཱ ¶ ཧི ཨནུཔྤནྣེ ཝཏྠུསྨིཾ པཉྙཏྟེ ཨཊྛ གརུདྷམྨེ མཎྜནཀཛཱཏིཡོ པུརིསོ སུརབྷིཔུཔྥདཱམཾ ཝིཡ སིརསཱ སམྤཊིཙྪིཏྭཱ སཔརིཝཱརཱ མཧཱཔཛཱཔཏི གོཏམཱི ཨུཔསམྤདཾ ལབྷི, ཨཉྙོ ཏསྶཱ ཨུཔཛ྄ཛྷཱཡོ ཝཱ ཨཱཙརིཡོ ཝཱ ནཏྠི. ཨེཝཾ ལདྡྷཱུཔསམྤདཾ ཐེརིཾ ཨཱརབྦྷ ཨཔརེན སམཡེན ཀཐཾ སམུཊྛཱཔེསུཾ ‘‘མཧཱཔཛཱཔཏིཡཱ གོཏམིཡཱ ཨཱཙརིཡུཔཛ྄ཛྷཱཡཱ ན པཉྙཱཡནྟི, སཧཏྠེནེཝ ཀཱསཱཡཱནི གཎྷཱི’’ཏི. ཨེཝཉྩ པན ཝཏྭཱ བྷིཀྑུནིཡོ ཀུཀྐུཙྩཱཡནྟིཡོ ཏཱཡ སདྡྷིཾ ནེཝ ཨུཔོསཐཾ ན པཝཱརཎཾ ཀརོནྟི, ཏཱ གནྟྭཱ ཏཐཱགཏསྶཔི ཏམཏྠཾ ཨཱརོཙེསུཾ. སཏྠཱ ཏཱསཾ ཀཐཾ སུཏྭཱ ‘‘མཡཱ མཧཱཔཛཱཔཏིཡཱ གོཏམིཡཱ ཨཊྛ གརུདྷམྨཱ དིནྣཱ, ཨཧམེཝསྶཱཙརིཡོ, ཨཧམེཝ ཨུཔཛ྄ཛྷཱཡོ. ཀཱཡདུཙྩརིཏཱདིཝིརཧིཏེསུ ཁཱིཎཱསཝེསུ ཀུཀྐུཙྩཾ ནཱམ ན ཀཱཏབྦ’’ནྟི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཡསྶ ¶ ཀཱཡེན ཝཱཙཱཡ, མནསཱ ནཏྠི དུཀྐཊཾ;

སཾཝུཏཾ ཏཱིཧི ཋཱནེཧི, ཏམཧཾ བྲཱུམི བྲཱཧྨཎ’’ནྟི.

ཏཏྠ དུཀྐཊནྟི སཱཝཛྫཾ དུཀྑུདྲཡཾ ཨཔཱཡསཾཝཏྟནིཀཾ ཀམྨཾ. ཏཱིཧི ཋཱནེཧཱིཏི ཨེཏེཧི ཀཱཡཱདཱིཧི ཏཱིཧི ཀཱརཎེཧི ཀཱཡདུཙྩརིཏཱདིཔཝེསནིཝཱརཎཏྠཱཡ དྭཱརཾ པིཧིཏཾ, ཏཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡམྷཱཏི ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཱརིཔུཏྟཏྠེརཾ ཨཱརབྦྷ ཀཐེསི.

སོ ཀིརཱཡསྨཱ ཨསྶཛིཏྠེརསྶ སནྟིཀེ དྷམྨཾ སུཏྭཱ སོཏཱཔཏྟིཕལཾ པཏྟཀཱལཏོ པཊྛཱཡ ‘‘ཡསྶཾ དིསཱཡཾ ཐེརོ ཝསཏཱི’’ཏི སུཎཱཏི, ཏཏོ ཨཉྫལིཾ པགྒཡ྄ཧ ཏཏོཝ སཱིསཾ ཀཏྭཱ ནིཔཛྫཏི. བྷིཀྑཱུ ‘‘མིཙྪཱདིཊྛིཀོ སཱརིཔུཏྟོ, ཨཛྫཱཔི དིསཱ ནམསྶམཱནོ ཝིཙརཏཱི’’ཏི ཏམཏྠཾ ཏཐཱགཏསྶ ཨཱརོཙེསུཾ. སཏྠཱ ཐེརཾ པཀྐོསཱཔེཏྭཱ ‘‘སཙྩཾ ཀིར ཏྭཾ, སཱརིཔུཏྟ, དིསཱ ནམསྶནྟོ ཝིཙརསཱི’’ཏི པུཙྪིཏྭཱ ¶ , ‘‘བྷནྟེ, མམ དིསཱ ནམསྶནབྷཱཝཾ ཝཱ ཨནམསྶནབྷཱཝཾ ཝཱ ¶ ཏུམྷེཝ ཛཱནཱཐཱ’’ཏི ཝུཏྟེ ‘‘ན, བྷིཀྑཝེ, སཱརིཔུཏྟོ དིསཱ ནམསྶཏི, ཨསྶཛིཏྠེརསྶ པན སནྟིཀཱ དྷམྨཾ སུཏྭཱ སོཏཱཔཏྟིཕལཾ པཏྟཏཱཡ ཨཏྟནོ ཨཱཙརིཡཾ ནམསྶཏི. ཡཉྷི ཨཱཙརིཡཾ ནིསྶཱཡ བྷིཀྑུ དྷམྨཾ ཝིཛཱནཱཏི, ཏེན སོ བྲཱཧྨཎེན ཨགྒི ཝིཡ སཀྐཙྩཾ ནམསྶིཏབྦོཡེཝཱ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཡམྷཱ དྷམྨཾ ཝིཛཱནེཡྻ, སམྨཱསམྦུདྡྷདེསིཏཾ;

སཀྐཙྩཾ ཏཾ ནམསྶེཡྻ, ཨགྒིཧུཏྟཾཝ བྲཱཧྨཎོ’’ཏི.

ཏཏྠ ཨགྒིཧུཏྟཾཝཱཏི ཡཐཱ བྲཱཧྨཎོ ཨགྒིཧུཏྟཾ སམྨཱ པརིཙརཎེན ཙེཝ ཨཉྫལིཀམྨཱདཱིཧི ཙ སཀྐཙྩཾ ནམསྶཏི, ཨེཝཾ ཡམྷཱ ཨཱཙརིཡཱ ཏཐཱགཏཔཝེདིཏཾ དྷམྨཾ ཝིཛཱནེཡྻ, ཏཾ སཀྐཙྩཾ ནམསྶེཡྻཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ན ཛཊཱཧཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ ཛཊིལབྲཱཧྨཎཾ ཨཱརབྦྷ ཀཐེསི.

སོ ¶ ¶ ཀིར ‘‘ཨཧཾ མཱཏིཏོ ཙ པིཏིཏོ ཙ སུཛཱཏོ བྲཱཧྨཎཀུལེ ནིབྦཏྟོ. སཙེ སམཎོ གོཏམོ ཨཏྟནོ སཱཝཀེ བྲཱཧྨཎཱཏི ཝདཏི, མམྤི ནུ ཁོ ཏཐཱ ཝཏྟུཾ ཝཊྚཏཱི’’ཏི སཏྠུ སནྟིཀཾ གནྟྭཱ ཏམཏྠཾ པུཙྪི. ཨཐ ནཾ སཏྠཱ ‘‘ནཱཧཾ, བྲཱཧྨཎ, ཛཊཱམཏྟེན, ན ཛཱཏིགོཏྟམཏྟེན བྲཱཧྨཎཾ ཝདཱམི, པཊིཝིདྡྷསཙྩམེཝ པནཱཧཾ བྲཱཧྨཎོཏི ཝདཱམཱི’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ན ཛཊཱཧི ན གོཏྟེན, ན ཛཙྩཱ ཧོཏི བྲཱཧྨཎོ;

ཡམྷི སཙྩཉྩ དྷམྨོ ཙ, སོ སུཙཱི སོ ཙ བྲཱཧྨཎོ’’ཏི.

ཏཏྠ ¶ སཙྩནྟི ཡསྨིཾ པུགྒལེ ཙཏྟཱརི སཙྩཱནི སོལ༹སཧཱཀཱརེཧི པཊིཝིཛ྄ཛྷིཏྭཱ ཋིཏཾ སཙྩཉཱཎཉྩེཝ ནཝཝིདྷོ ཙ ལོཀུཏྟརདྷམྨོ ཨཏྠི, སོ སུཙི, སོ བྲཱཧྨཎོ ཙཱཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཀིཾ ཏེཏི ཨིམཾ དྷམྨདེསནཾ སཏྠཱ ཀཱུཊཱགཱརསཱལཱཡཾ ཝིཧརནྟོ ཨེཀཾ ཝགྒུལིཝཏཾ ཀུཧཀབྲཱཧྨཎཾ ཨཱརབྦྷ ཀཐེསི.

སོ ¶ ཀིར ཝེསཱལིནགརདྭཱརེ ཨེཀཾ ཀཀུདྷརུཀྑཾ ཨཱརུཡ྄ཧ དྭཱིཧི པཱདེཧི རུཀྑསཱཁཾ གཎྷིཏྭཱ ཨདྷོསིརོ ཨོལམྦནྟོ ‘‘ཀཔིལཱནཾ མེ སཏཾ དེཐ, ཀཧཱཔཎེ དེཐ, པརིཙཱརིཀཾ དེཐ, ནོ ཙེ དསྶཐ, ཨིཏོ པཏིཏྭཱ མརནྟོ ནགརཾ ཨནགརཾ ཀརིསྶཱམཱི’’ཏི ཝདཏི. ཏཐཱགཏསྶ བྷིཀྑུསངྒྷཔརིཝུཏསྶ ནགརཾ པཝིསནཀཱལེ བྷིཀྑཱུ ཏཾ བྲཱཧྨཎཾ དིསྭཱ ནིཀྑམནཀཱལེཔི ནཾ ཏཐེཝ ཨོལམྦནྟཾ པསྶིཾསུ. ནཱགརཱཔི ‘‘ཨཡཾ པཱཏོཝ པཊྛཱཡ ཨེཝཾ ཨོལམྦནྟོ པཏིཏྭཱ མརནྟོ ནགརཾ ཨནགརཾ ཀརེཡྻཱ’’ཏི ཙིནྟེཏྭཱ ནགརཝིནཱསབྷཱིཏཱ ‘‘ཡཾ སོ ཡཱཙཏི, སབྦཾ དེམཱ’’ཏི པཊིསྶུཎིཏྭཱ ཨདཾསུ. སོ ཨོཏརིཏྭཱ སབྦཾ གཧེཏྭཱ ཨགམཱསི. བྷིཀྑཱུ ཝིཧཱརཱུཔཙཱརེ ཏཾ གཱཝིཾ ཝིཡ ཝིརཝིཏྭཱ གཙྪནྟཾ དིསྭཱ སཉྫཱནིཏྭཱ ‘‘ལདྡྷཾ ཏེ ¶ , བྲཱཧྨཎ, ཡཐཱཔཏྠིཏ’’ནྟི པུཙྪིཏྭཱ ‘‘ཨཱམ, ལདྡྷཾ མེ’’ཏི སུཏྭཱ ཨནྟོཝིཧཱརཾ གནྟྭཱ ཏཐཱགཏསྶ ཏམཏྠཾ ཨཱརོཙེསུཾ. སཏྠཱ ‘‘ན, བྷིཀྑཝེ, ཨིདཱནེཝ སོ ཀུཧཀཙོརོ, པུབྦེཔི ཀུཧཀཙོརོཡེཝ ཨཧོསི. ཨིདཱནི པནེས ¶ བཱལཛནཾ ཝཉྩེཏི, ཏདཱ པན པཎྜིཏེ ཝཉྩེཏུཾ ནཱསཀྑཱི’’ཏི ཝཏྭཱ ཏེཧི ཡཱཙིཏོ ཨཏཱིཏམཱཧརི.

ཨཏཱིཏེ ཨེཀཾ ཀཱསིཀགཱམཾ ནིསྶཱཡ ཨེཀོ ཀུཧཀཏཱཔསོ ཝཱསཾ ཀཔྤེསི. ཏཾ ཨེཀཾ ཀུལཾ པཊིཛགྒི. དིཝཱ ཨུཔྤནྣཁཱདནཱིཡབྷོཛནཱིཡཏོ ཨཏྟནོ པུཏྟཱནཾ ཝིཡ ཏསྶཔི ཨེཀཾ ཀོཊྛཱསཾ དེཏི, སཱཡཾ ཨུཔྤནྣཀོཊྛཱསཾ ཋཔེཏྭཱ དུཏིཡདིཝསེ དེཏི. ཨཐེཀདིཝསཾ སཱཡཾ གོདྷམཾསཾ ལབྷིཏྭཱ སཱདྷུཀཾ པཙིཏྭཱ ཏཏོ ཀོཊྛཱསཾ ཋཔེཏྭཱ དུཏིཡདིཝསེ ཏསྶ ཨདཾསུ. ཏཱཔསོ མཾསཾ ཁཱདིཏྭཱཝ རསཏཎྷཱཡ བདྡྷོ ‘‘ཀིཾ མཾསཾ ནཱམེཏ’’ནྟི པུཙྪིཏྭཱ ‘‘གོདྷམཾས’’ནྟི སུཏྭཱ བྷིཀྑཱཡ ཙརིཏྭཱ སཔྤིདདྷིཀཊུཀབྷཎྜཱདཱིནི ¶ གཧེཏྭཱ པཎྞསཱལཾ གནྟྭཱ ཨེཀམནྟཾ ཋཔེསི. པཎྞསཱལཱཡ པན ཨཝིདཱུརེ ཨེཀསྨིཾ ཝམྨིཀེ གོདྷརཱཛཱ ཝིཧརཏི. སོ ཀཱལེན ཀཱལཾ ཏཱཔསཾ ཝནྡིཏུཾ ཨཱགཙྪཏི. ཏཾདིཝསཾ པནེས ‘‘ཏཾ ཝདྷིསྶཱམཱི’’ཏི དཎྜཾ པཊིཙྪཱདེཏྭཱ ཏསྶ ཝམྨིཀསྶ ཨཝིདཱུརེ ཋཱནེ ནིདྡཱཡནྟོ ཝིཡ ནིསཱིདི. གོདྷརཱཛཱ ཝམྨིཀཏོ ནིཀྑམིཏྭཱ ཏསྶ སནྟིཀཾ ཨཱགཙྪནྟོཝ ཨཱཀཱརཾ སལླཀྑེཏྭཱ ‘‘ན མེ ཨཛྫ ཨཱཙརིཡསྶ ཨཱཀཱརོ རུཙྩཏཱི’’ཏི ཏཏོཝ ནིཝཏྟི. ཏཱཔསོ ཏསྶ ནིཝཏྟནབྷཱཝཾ ཉཏྭཱ ཏསྶ ¶ མཱརཎཏྠཱཡ དཎྜཾ ཁིཔི, དཎྜོ ཝིརཛ྄ཛྷིཏྭཱ གཏོ. གོདྷརཱཛཱཔི དྷམྨིཀཾ པཝིསིཏྭཱ ཏཏོ སཱིསཾ ནཱིཧརིཏྭཱ ཨཱགཏམགྒཾ ཨོལོཀེནྟོ ཏཱཔསཾ ཨཱཧ –

‘‘སམཎཾ ཏཾ མཉྙམཱནོ, ཨུཔགཙྪིམསཉྙཏཾ;

སོ མཾ དཎྜེན པཱཧཱསི, ཡཐཱ ཨསམཎོ ཏཐཱ.

‘‘ཀིཾ ཏེ ཛཊཱཧི དུམྨེདྷ, ཀིཾ ཏེ ཨཛིནསཱཊིཡཱ;

ཨབྦྷནྟརཾ ཏེ གཧནཾ, བཱཧིརཾ པརིམཛྫསཱི’’ཏི. (ཛཱ. ༡.༤.༩༧-༩༨);

ཨཐ ནཾ ཏཱཔསོ ཨཏྟནོ སནྟཀེན པལོབྷེཏུཾ ཨེཝམཱཧ –

‘‘ཨེཧི གོདྷ ནིཝཏྟསྶུ, བྷུཉྫ སཱལཱིནམོདནཾ;

ཏེལཾ ལོཎཉྩ མེ ཨཏྠི, པཧཱུཏཾ མཡ྄ཧ པིཔྥལཱི’’ཏི. (ཛཱ. ༡.༤.༩༩);

ཏཾ ¶ སུཏྭཱ གོདྷརཱཛཱ ‘‘ཡཐཱ ཡཐཱ ཏྭཾ ཀཐེསི, ཏཐཱ ཏཐཱ མེ པལཱཡིཏུཀཱམཏཱཝ ཧོཏཱི’’ཏི ཝཏྭཱ ཨིམཾ གཱཐམཱཧ –

‘‘ཨེས བྷིཡྻོ པཝེཀྑཱམི, ཝམྨིཀཾ སཏཔོརིསཾ;

ཏེལཾ ལོཎཉྩ ཀིཏྟེསི, ཨཧིཏཾ མཡ྄ཧ པིཔྥལཱི’’ཏི. (ཛཱ. ༡.༤.༡༠༠);

ཨེཝཉྩ པན ཝཏྭཱ ‘‘ཨཧཾ ཨེཏྟཀཾ ཀཱལཾ ཏཡི སམཎསཉྙཾ ཨཀཱསིཾ, ཨིདཱནི པན ཏེ མཾ པཧརིཏུཀཱམཏཱཡ དཎྜོ ཁིཏྟོ, ཏསྶ ཁིཏྟཀཱལེཡེཝ ཨསམཎོ ¶ ཛཱཏོ. ཀིཾ ཏཱདིསསྶ དུཔྤཉྙསྶ པུགྒལསྶ ཛཊཱཧི, ཀིཾ སཁུརེན ཨཛིནཙམྨེན. ཨབྦྷནྟརཉྷི ཏེ གཧནཾ, ཀེཝལཾ བཱཧིརམེཝ པརིམཛྫསཱི’’ཏི ཨཱཧ. སཏྠཱ ཨིམཾ ཨཏཱིཏཾ ཨཱཧརིཏྭཱ ‘‘ཏདཱ ཨེས ཀུཧཀོ ཏཱཔསོ ¶ ཨཧོསི, གོདྷརཱཛཱ པན ཨཧམེཝཱ’’ཏི ཝཏྭཱ ཛཱཏཀཾ སམོདྷཱནེཏྭཱ ཏདཱ གོདྷཔཎྜིཏེན ཏསྶ ནིགྒཧིཏཀཱརཎཾ དསྶེནྟོ ཨིམཾ གཱཐམཱཧ –

‘‘ཀིཾ ཏེ ཛཊཱཧི དུམྨེདྷ, ཀིཾ ཏེ ཨཛིནསཱཊིཡཱ;

ཨབྦྷནྟརཾ ཏེ གཧནཾ, བཱཧིརཾ པརིམཛྫསཱི’’ཏི. (ཛཱ. ༡.༤.༩༨);

ཏཏྠ ཀིཾ ཏེ ཛཊཱཧཱིཏི ཨམྦྷོ དུཔྤཉྙ ཏཝ བདྡྷཱཧིཔི ཨིམཱཧི ཛཊཱཧི སཁུརཱཡ ནིཝཏྠཱཡཔི ཨིམཱཡ ཨཛིནཙམྨསཱཊིཀཱཡ ཙ ཀིམཏྠོཏི. ཨབྦྷནྟརནྟི ཨབྦྷནྟརཉྷི ཏེ རཱགཱདིཀིལེསགཧནཾ, ཀེཝལཾ ཧཏྠིལཎྜཾ ཨསྶལཎྜཾ ཝིཡ མཊྛཾ བཱཧིརཾ པརིམཛྫསཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པཾསུཀཱུལདྷརནྟི ཨིམཾ དྷམྨདེསནཾ སཏྠཱ གིཛ྄ཛྷཀཱུཊེ པབྦཏེ ཝིཧརནྟོ ཀིསཱགོཏམིཾ ཨཱརབྦྷ ཀཐེསི.

ཏདཱ ¶ ཀིར སཀྐོ པཋམཡཱམཱཝསཱནེ དེཝཔརིསཱཡ སདྡྷིཾ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟེ སཱརཎཱིཡདྷམྨཀཐཾ སུཎནྟོ ནིསཱིདི. ཏསྨིཾ ཁཎེ ཀིསཱགོཏམཱི ‘‘སཏྠཱརཾ པསྶིསྶཱམཱི’’ཏི ཨཱཀཱསེནཱགནྟྭཱ སཀྐཾ དིསྭཱ ནིཝཏྟི. སོ ཏཾ ཝནྡིཏྭཱ ནིཝཏྟནྟིཾ དིསྭཱ སཏྠཱརཾ པུཙྪི – ‘‘ཀཱ ནཱམེསཱ ¶ , བྷནྟེ, ཨཱགཙྪམཱནཱཝ ཏུམྷེ དིསྭཱ ནིཝཏྟཏཱི’’ཏི? སཏྠཱ ‘‘ཀིསཱགོཏམཱི ནཱམེསཱ, མཧཱརཱཛ, མམ དྷཱིཏཱ པཾསུཀཱུལིཀཏྠེརཱིནཾ ཨགྒཱ’’ཏི ཝཏྭཱ ཨིམཾ གཱཐམཱཧ –

‘‘པཾསུཀཱུལདྷརཾ ཛནྟུཾ, ཀིསཾ དྷམནིསནྠཏཾ;

ཨེཀཾ ཝནསྨིཾ ཛྷཱཡནྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཀིསནྟི པཾསུཀཱུལིཀཱ ཧི ཨཏྟནོ ཨནུརཱུཔཾ པཊིཔདཾ པཱུརེནྟཱ ཨཔྤམཾསལོཧིཏཱ ཙེཝ ཧོནྟི ¶ དྷམནིསནྠཏགཏྟཱ ཙ, ཏསྨཱ ཨེཝམཱཧ. ཨེཀཾ ཝནསྨིནྟི ཝིཝིཏྟཊྛཱནེ ཨེཀཀཾ ཝནསྨིཾ ཛྷཱཡནྟཾ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ན ¶ ཙཱཧནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨེཀཾ བྲཱཧྨཎཾ ཨཱརབྦྷ ཀཐེསི.

སོ ཀིར ‘‘སམཎོ གོཏམོ ཨཏྟནོ སཱཝཀེ བྲཱཧྨཎཱཏི ཝདཏི ཨཧཉྩམྷི བྲཱཧྨཎཡོནིཡཾ ནིབྦཏྟོ, མམྤི ནུ ཁོ ཨེཝཾ ཝཏྟུཾ ཝཊྚཏཱི’’ཏི སཏྠཱརཾ ཨུཔསངྐམིཏྭཱ ཏམཏྠཾ པུཙྪི. ཨཐ ནཾ སཏྠཱ ‘‘ནཱཧཾ, བྲཱཧྨཎ, བྲཱཧྨཎཡོནིཡཾ ནིབྦཏྟམཏྟེནེཝཾ ཝདཱམི, ཡོ པན ཨཀིཉྩནོ ཨགཧཎོ, ཏམཧཾ བྲཱཧྨཎཾ ཝདཱམཱི’’ཏི ཝཏྭཱ ཨིམཾ གཱཐམཱཧ –

‘‘ན ཙཱཧཾ བྲཱཧྨཎཾ བྲཱུམི, ཡོནིཛཾ མཏྟིསམྦྷཝཾ;

བྷོཝཱདི ནཱམ སོ ཧོཏི, སཙེ ཧོཏི སཀིཉྩནོ;

ཨཀིཉྩནཾ ཨནཱདཱནཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཡོནིཛནྟི ཡོནིཡཾ ཛཱཏཾ. མཏྟིསམྦྷཝནྟི བྲཱཧྨཎིཡཱ མཱཏུ སནྟཀེ ཨུདརསྨིཾ སམྦྷཱུཏཾ. བྷོཝཱདཱིཏི སོ པན ཨཱམནྟནཱདཱིསུ ‘‘བྷོ, བྷོ’’ཏི ཝཏྭཱ ཝིཙརནྟོ བྷོཝཱདི ནཱམ ཧོཏི, སཙེ རཱགཱདཱིཧི ¶ ཀིཉྩནེཧི སཀིཉྩནོ. ཨཧཾ པན རཱགཱདཱིཧི ཨཀིཉྩནཾ ཙཏཱུཧི ཨུཔཱདཱནེཧི ཨནཱདཱནཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ སོ བྲཱཧྨཎོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

སབྦསཾཡོཛནནྟི ¶ ¶ ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨུགྒསེནཾ ནཱམ སེཊྛིཔུཏྟཾ ཨཱརབྦྷ ཀཐེསི. ཝཏྠུ ‘‘མུཉྩ པུརེ མུཉྩ པཙྪཏོ’’ཏི (དྷ. པ. ༣༤༨) གཱཐཱཝཎྞནཱཡ ཝིཏྠཱརིཏམེཝ.

ཏདཱ ཧི སཏྠཱ, ‘‘བྷནྟེ, ཨུགྒསེནོ ‘ན བྷཱཡཱམཱི’ཏི ཝདཏི, ཨབྷཱུཏེན མཉྙེ ཨཉྙཾ བྱཱཀརོཏཱི’’ཏི བྷིཀྑཱུཧི ཝུཏྟེ, ‘‘བྷིཀྑཝེ, མམ པུཏྟསདིསཱ ཚིནྣསཾཡོཛནཱ ན བྷཱཡནྟིཡེཝཱ’’ཏི ཝཏྭཱ ཨིམཾ གཱཐམཱཧ –

‘‘སབྦསཾཡོཛནཾ ཚེཏྭཱ, ཡོ ཝེ ན པརིཏསྶཏི;

སངྒཱཏིགཾ ཝིསཾཡུཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ སབྦསཾཡོཛནནྟི དསཝིདྷསཾཡོཛནཾ. ན པརིཏསྶཏཱིཏི ཏཎྷཱཡ ན བྷཱཡཏི. ཏམཧནྟི ཏཾ ཨཧཾ རཱགཱདཱིནཾ སངྒཱནཾ ཨཏཱིཏཏྟཱ སངྒཱཏིགཾ, ཙཏུནྣམྤི ཡོགཱནཾ ཨབྷཱཝེན ཝིསཾཡུཏྟཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨུགྒསེནསེཊྛིཔུཏྟཝཏྠུ ཙུདྡསམཾ.

ཚེཏྭཱ ¶ ནདྡྷིནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ དྭེ བྲཱཧྨཎེ ཨཱརབྦྷ ཀཐེསི.

ཏེསུ ¶ ཀིརེཀསྶ ཙཱུལ༹རོཧིཏོ ནཱམ གོཎོ ཨཧོསི, ཨེཀསྶ མཧཱརོཧིཏོ ནཱམ. ཏེ ཨེཀདིཝསཾ ‘‘ཏཝ གོཎོ བལཝཱ, མམ གོཎོ བལཝཱ’’ཏི ཝིཝདིཏྭཱ ‘‘ཀིཾ ནོ ཝིཝཱདེན, པཱཛེཏྭཱ ཛཱནིསྶཱམཱ’’ཏི ཨཙིརཝཏཱིཏཱིརེ སཀཊཾ ཝཱལུཀཱཡ པཱུརེཏྭཱ གོཎེ ཡོཛཡིཾསུ. ཏསྨིཾ ཁཎེ བྷིཀྑཱུཔི ནྷཱཡིཏུཾ ཏཏྠ གཏཱ ཧོནྟི. བྲཱཧྨཎཱ གོཎེ པཱཛེསུཾ. སཀཊཾ ནིཙྩལཾ ཨཊྛཱསི, ནདྡྷིཝརཏྟཱ པན ཚིཛྫིཾསུ. བྷིཀྑཱུ དིསྭཱ ཝིཧཱརཾ གནྟྭཱ ཏམཏྠཾ སཏྠུ ཨཱརོཙཡིཾསུ. སཏྠཱ, ‘‘བྷིཀྑཝེ ¶ , བཱཧིརཱ ཨེཏཱ ནདྡྷིཝརཏྟཱ, ཡོ ཀོཙི ཨེཏཱ ཚིནྡཏེཝ, བྷིཀྑུནཱ པན ཨཛ྄ཛྷཏྟིཀཾ ཀོདྷནདྡྷིཉྩེཝ ཏཎྷཱཝརཏྟཉྩ ཚིནྡིཏུཾ ཝཊྚཏཱི’’ཏི ཝཏྭཱ ཨིམཾ གཱཐམཱཧ –

‘‘ཚེཏྭཱ ནདྡྷིཾ ཝརཏྟཉྩ, སནྡཱནཾ སཧནུཀྐམཾ;

ཨུཀྑིཏྟཔལིགྷཾ བུདྡྷཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ¶ ནདྡྷིནྟི ནཡ྄ཧནབྷཱཝེན པཝཏྟཾ ཀོདྷཾ. ཝརཏྟནྟི བནྡྷནབྷཱཝེན པཝཏྟཾ ཏཎྷཾ. སནྡཱནཾ སཧནུཀྐམནྟི ཨནུསཡཱནུཀྐམསཧིཏཾ དྭཱསཊྛིདིཊྛིསནྡཱནཾ, ཨིདཾ སབྦམྤི ཚིནྡིཏྭཱ ཋིཏཾ ཨཝིཛྫཱཔལིགྷསྶ ཨུཀྑིཏྟཏྟཱ ཨུཀྑིཏྟཔལིགྷཾ, ཙཏུནྣཾ སཙྩཱནཾ བུདྡྷཏྟཱ བུདྡྷཾ ཏཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ པཉྩསཏཱ བྷིཀྑཱུ ཨརཧཏྟེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཨཀྐོསནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨཀྐོསཀབྷཱརདྭཱཛཾ ཨཱརབྦྷ ཀཐེསི.

ཏསྶ ཧི བྷཱཏུ བྷཱརདྭཱཛསྶ དྷནཉྫཱནཱི ནཱམ བྲཱཧྨཎཱི སོཏཱཔནྣཱ ཨཧོསི. སཱ ཁཱིཔིཏྭཱཔི ཀཱསིཏྭཱཔི པཀྑལིཏྭཱཔི ‘‘ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶཱ’’ཏི ཨིམཾ ཨུདཱནཾ ཨུདཱནེསི. སཱ ཨེཀདིཝསཾ བྲཱཧྨཎཔརིཝེསནཱཡ ¶ པཝཏྟམཱནཱཡ པཀྑལིཏྭཱ ཏཐེཝ མཧཱསདྡེན ཨུདཱནཾ ཨུདཱནེསི. བྲཱཧྨཎོ ཀུཛ྄ཛྷིཏྭཱ ‘‘ཨེཝམེཝཱཡཾ ཝསལཱི ཡཏྠ ཝཱ ཏཏྠ ཝཱ པཀྑལིཏྭཱ ཏསྶ མུཎྜཀསྶ སམཎཀསྶ ཝཎྞཾ བྷཱསཏཱི’’ཏི ¶ ཝཏྭཱ ‘‘ཨིདཱནི ཏེ, ཝསལི, གནྟྭཱ ཏསྶ སཏྠུནོ ཝཱདཾ ཨཱརོཔེསྶཱམཱི’’ཏི ཨཱཧ. ཨཐ ནཾ སཱ ‘‘གཙྪ, བྲཱཧྨཎ, ནཱཧཾ ཏཾ པསྶཱམི, ཡོ ཏསྶ བྷགཝཏོ ཝཱདཾ ཨཱརོཔེཡྻ, ཨཔི ཙ གནྟྭཱ ཏཾ བྷགཝནྟཾ པཉྷཾ པུཙྪསྶཱུ’’ཏི ཨཱཧ. སོ སཏྠུ སནྟིཀཾ གནྟྭཱ ཨཝནྡིཏྭཱཝ ཨེཀམནྟཾ ཋིཏོ པཉྷཾ པུཙྪནྟོ ཨིམཾ གཱཐམཱཧ –

‘‘ཀིཾསུ ¶ ཚེཏྭཱ སུཁཾ སེཏི, ཀིཾསུ ཚེཏྭཱ ན སོཙཏི;

ཀིསྶསྶུ ཨེཀདྷམྨསྶ, ཝདྷཾ རོཙེསི གོཏམཱ’’ཏི. (སཾ. ནི. ༡.༡༨༧);

ཨཐསྶ པཉྷཾ བྱཱཀརོནྟོ སཏྠཱ ཨིམཾ གཱཐམཱཧ –

‘‘ཀོདྷཾ ཚེཏྭཱ སུཁཾ སེཏི, ཀོདྷཾ ཚེཏྭཱ ན སོཙཏི;

ཀོདྷསྶ ཝིསམཱུལསྶ, མདྷུརགྒསྶ བྲཱཧྨཎ;

ཝདྷཾ ཨརིཡཱ པསཾསནྟི, ཏཉྷི ཚེཏྭཱ ན སོཙཏཱི’’ཏི. (སཾ. ནི. ༡.༡༨༧);

སོ ¶ སཏྠརི པསཱིདིཏྭཱ པབྦཛིཏྭཱ ཨརཧཏྟཾ པཱཔུཎི. ཨཐསྶ ཀནིཊྛོ ཨཀྐོསཀབྷཱརདྭཱཛོ ‘‘བྷཱཏཱ ཀིར མེ པབྦཛིཏོ’’ཏི སུཏྭཱ ཀུདྡྷོ ཨཱགནྟྭཱ སཏྠཱརཾ ཨསབྦྷཱཧི ཕརུསཱཧི ཝཱཙཱཧི ཨཀྐོསི. སོཔི སཏྠཱརཱ ཨཏིཐཱིནཾ ཁཱདནཱིཡཱདིདཱནཨོཔམྨེན སཉྙཏྟོ སཏྠརི པསནྣོ པབྦཛིཏྭཱ ཨརཧཏྟཾ པཱཔུཎི. ཨཔརེཔིསྶ སུནྡརིཀབྷཱརདྭཱཛོ བིལིངྒཀབྷཱརདྭཱཛོཏི དྭེ ཀནིཊྛབྷཱཏརོ སཏྠཱརཾ ཨཀྐོསནྟཱཝ སཏྠཱརཱ ཝིནཱིཏཱ པབྦཛིཏྭཱ ཨརཧཏྟཾ པཱཔུཎིཾསུ.

ཨཐེཀདིཝསཾ དྷམྨསབྷཱཡཾ ཀཐཾ སམུཊྛཱཔེསུཾ, ‘‘ཨཱཝུསོ, ཨཙྪརིཡཱ ཝཏ བུདྡྷགུཎཱ, ཙཏཱུསུ ནཱམ བྷཱཏིཀེསུ ཨཀྐོསནྟེསུ སཏྠཱ ཀིཉྩི ཨཝཏྭཱ ཏེསཾཡེཝ པཏིཊྛཱ ཛཱཏོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཨཧཾ མམ ཁནྟིབལེན སམནྣཱགཏཏྟཱ དུཊྛེསུ ཨདུསྶནྟོ མཧཱཛནསྶ པཏིཊྛཱ ཧོམིཡེཝཱ’’ཏི ཝཏྭཱ ཨིམཾ གཱཐམཱཧ –

‘‘ཨཀྐོསཾ ཝདྷབནྡྷཉྩ, ཨདུཊྛོ ཡོ ཏིཏིཀྑཏི;

ཁནྟཱིབལཾ བལཱནཱིཀཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ¶ ཨདུཊྛོཏི ཨེཏཾ དསཧི ཨཀྐོསཝཏྠཱུཧི ཨཀྐོསཉྩ པཱཎིཨཱདཱིཧི པོཐནཉྩ ཨནྡུབནྡྷནཱདཱིཧི བནྡྷནཉྩ ཡོ ཨཀུདྡྷམཱནསོ ཧུཏྭཱ ཨདྷིཝཱསེཏི ¶ , ཁནྟིབལེན སམནྣཱགཏཏྟཱ ཁནྟིབལཾ, པུནཔྤུནཾ ཨུཔྤཏྟིཡཱ ཨནཱིཀབྷཱུཏེན ཏེནེཝ ཁནྟིབལེན སམནྣཱགཏཏྟཱ བལཱནཱིཀཾ ཏཾ ཨེཝརཱུཔཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ ¶ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཀྐོདྷནནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ སཱརིཔུཏྟཏྠེརཾ ཨཱརབྦྷ ཀཐེསི.

ཏདཱ ཀིར ཐེརོ པཉྩཧི བྷིཀྑུསཏེཧི སདྡྷིཾ པིཎྜཱཡ ཙརནྟོ ནཱལཀགཱམེ མཱཏུ གྷརདྭཱརཾ ཨགམཱསི. ཨཐ ནཾ སཱ ནིསཱིདཱཔེཏྭཱ པརིཝིསམཱནཱ ཨཀྐོསི – ‘‘ཨམྦྷོ, ཨུཙྪིཊྛཁཱདཀ ཨུཙྪིཊྛཀཉྫིཡཾ ཨལབྷིཏྭཱ པརགྷརེསུ ཨུལུ༹ངྐཔིཊྛེན གྷཊྚིཏཀཉྫིཡཾ པརིབྷུཉྫིཏུཾ ཨསཱིཏིཀོཊིདྷནཾ པཧཱཡ པབྦཛིཏོསི, ནཱསིཏམྷཱ ཏཡཱ, བྷུཉྫཱཧི དཱནཱི’’ཏི. བྷིཀྑཱུནམྤི བྷཏྟཾ དདམཱནཱ ¶ ‘‘ཏུམྷེཧི མམ པུཏྟོ ཨཏྟནོ ཙཱུལུ༹པཊྛཱཀོ ཀཏོ, ཨིདཱནི བྷུཉྫཐཱ’’ཏི ཝདེཏི. ཐེརོ བྷིཀྑཾ གཧེཏྭཱ ཝིཧཱརམེཝ ཨགམཱསི. ཨཐཱཡསྨཱ རཱཧུལོ སཏྠཱརཾ པིཎྜཔཱཏེན ཨཱཔུཙྪི. ཨཐ ནཾ སཏྠཱ ཨཱཧ – ‘‘རཱཧུལ, ཀཧཾ གམིཏྠཱ’’ཏི? ‘‘ཨཡྻིཀཱཡ གཱམཾ, བྷནྟེ’’ཏི. ‘‘ཀིཾ པན ཏེ ཨཡྻིཀཱཡ ཨུཔཛ྄ཛྷཱཡོ ཝུཏྟོ’’ཏི? ‘‘ཨཡྻིཀཱཡ མེ, བྷནྟེ, ཨུཔཛ྄ཛྷཱཡོ ཨཀྐུཊྛོ’’ཏི. ‘‘ཀིནྟི ཝཏྭཱ’’ཏི? ‘‘ཨིདཾ ནཱམ, བྷནྟེ’’ཏི. ‘‘ཨུཔཛ྄ཛྷཱཡེན པན ཏེ ཀིཾ ཝུཏྟ’’ནྟི? ‘‘ན ཀིཉྩི, བྷནྟེ’’ཏི. ཏཾ སུཏྭཱ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ, ‘‘ཨཱཝུསོ, ཨཙྪརིཡཱ ཝཏ སཱརིཔུཏྟཏྠེརསྶ གུཎཱ, ཨེཝཾནཱམསྶ མཱཏརི ཨཀྐོསནྟིཡཱ ཀོདྷམཏྟམྤི ནཱཧོསཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཁཱིཎཱསཝཱ ནཱམ ཨཀྐོདྷནཱཝ ཧོནྟཱི’’ཏི ཝཏྭཱ ཨིམཾ གཱཐམཱཧ –

‘‘ཨཀྐོདྷནཾ ཝཏཝནྟཾ, སཱིལཝནྟཾ ཨནུསྶདཾ;

དནྟཾ ཨནྟིམསཱརཱིརཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ¶ ཝཏཝནྟནྟི དྷུཏཝཏེན, སམནྣཱགཏཾ ཙཏུཔཱརིསུདྡྷིསཱིལེན སཱིལཝནྟཾ, ཏཎྷཱཨུསྶདཱབྷཱཝེན ཨནུསྶདཾ ¶ , ཚལི༹ནྡྲིཡདམནེན དནྟཾ, ཀོཊིཡཾ ཋིཏེན ཨཏྟབྷཱཝེན ཨནྟིམསརཱིརཾ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ ¶ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཝཱརི པོཀྑརཔཏྟེཝཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨུཔྤལཝཎྞཐེརིཾ ཨཱརབྦྷ ཀཐེསི. ཝཏྠུ ‘‘མདྷུཝཱ མཉྙཏི བཱལོ’’ཏི གཱཐཱཝཎྞནཱཡ (དྷ. པ. ༦༩) ཝིཏྠཱརིཏམེཝ. ཝུཏྟཉྷི ཏཏྠ (དྷ. པ. ཨཊྛ. ༡.༦༩) –

ཨཔརེན སམཡེན མཧཱཛནོ དྷམྨསབྷཱཡཾ ཀཐཾ སམུཊྛཱཔེསི ‘‘ཁཱིཎཱསཝཱཔི མཉྙེ ཀཱམསུཁཾ སཱདིཡནྟི, ཀཱམཾ སེཝནྟི, ཀིཾ ན སེཝིསྶནྟི. ན ཧེཏེ ཀོལཱ༹པརུཀྑཱ, ན ཙ ཝམྨིཀཱ, ཨལླམཾསསརཱིརཱཝ, ཏསྨཱ ཨེཏེཔི ཀཱམསུཁཾ སཱདིཡནྟཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཁཱིཎཱསཝཱ ཀཱམསུཁཾ སཱདིཡནྟི, ན ཀཱམཾ སེཝནྟི. ཡཐཱ ཧི པདུམཔཏྟེ པཏིཏཾ ཨུདཀབིནྡུ ན ལིམྤཏི ན སཎྛཱཏི, ཝིནིཝཏྟིཏྭཱ པན པཏཏེཝ. ཡཐཱ ཙ ཨཱརགྒེ སཱསཔོ ན ཨུཔལིམྤཏི ན སཎྛཱཏི, ཝིནིཝཏྟིཏྭཱ པཏཏེཝ, ཨེཝཾ ཁཱིཎཱསཝསྶ ¶ ཙིཏྟེ དུཝིདྷོཔི ཀཱམོ ན ལིམྤཏི ན སཎྛཱཏཱི’’ཏི ཨནུསནྡྷིཾ གྷཊེཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཝཱརི པོཀྑརཔཏྟེཝ, ཨཱརགྒེརིཝ སཱསཔོ;

ཡོ ན ལིམྤཏི ཀཱམེསུ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཡོ ན ལིམྤཏཱིཏི ཨེཝམེཝཾ ཡོ ཨབྦྷནྟརེ དུཝིདྷེཔི ཀཱམེ ན ཨུཔལིམྤཏི, ཏསྨིཾ ཀཱམེ ན སཎྛཱཏི, ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨུཔྤལཝཎྞཱཐེརཱིཝཏྠུ ཨཊྛཱརསམཾ.

ཡོ ¶ ¶ དུཀྑསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ བྲཱཧྨཎཾ ཨཱརབྦྷ ཀཐེསི.

ཏསྶ ཀིརེཀོ དཱསོ ཨཔཉྙཏྟེ སིཀྑཱཔདེ པལཱཡིཏྭཱ པབྦཛིཏྭཱ ཨརཧཏྟཾ པཱཔུཎི. བྲཱཧྨཎོ ཏཾ ཨོལོཀེནྟོ ཨདིསྭཱ ཨེཀདིཝསཾ སཏྠཱརཱ སདྡྷིཾ པིཎྜཱཡ པཝིསནྟཾ དྭཱརནྟརེ དིསྭཱ ཙཱིཝརཾ དལ༹ྷཾ ཨགྒཧེསི. སཏྠཱ ནིཝཏྟིཏྭཱ ‘‘ཀིཾ ཨིདཾ, བྲཱཧྨཎཱ’’ཏི པུཙྪི. དཱསོ མེ, བྷོ གོཏམཱཏི ¶ . པནྣབྷཱརོ ཨེས, བྲཱཧྨཎཱཏི. ‘‘པནྣབྷཱརོ’’ཏི ཙ ཝུཏྟེ བྲཱཧྨཎོ ‘‘ཨརཧཱ’’ཏི སལླཀྑེསི. ཏསྨཱ པུནཔི ཏེན ‘‘ཨེཝཾ, བྷོ གོཏམཱ’’ཏི ཝུཏྟེ སཏྠཱ ‘‘ཨཱམ, བྲཱཧྨཎ, པནྣབྷཱརོ’’ཏི ཝཏྭཱ ཨིམཾ གཱཐམཱཧ –

‘‘ཡོ དུཀྑསྶ པཛཱནཱཏི, ཨིདྷེཝ ཁཡམཏྟནོ;

པནྣབྷཱརཾ ཝིསཾཡུཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ དུཀྑསྶཱཏི ཁནྡྷདུཀྑསྶ. པནྣབྷཱརནྟི ཨོཧིཏཁནྡྷབྷཱརཾ ཙཏཱུཧི ཡོགེཧི སབྦཀིལེསེཧི ཝཱ ཝིསཾཡུཏྟཾ ཏམཧཾ བྲཱཧྨཎཾ ཝདཱམཱིཏི ཨཏྠོ. དེསནཱཝསཱནེ སོ བྲཱཧྨཎོ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི.

ཨཉྙཏརབྲཱཧྨཎཝཏྠུ ཨེཀཱུནཝཱིསཏིམཾ.

གམྦྷཱིརཔཉྙནྟི ཨིམཾ དྷམྨདེསནཾ སཏྠཱ གིཛ྄ཛྷཀཱུཊེ ཝིཧརནྟོ ཁེམཾ ནཱམ བྷིཀྑུནིཾ ཨཱརབྦྷ ཀཐེསི.

ཨེཀདིཝསཉྷི པཋམཡཱམསམནནྟརེ སཀྐོ དེཝརཱཛཱ པརིསཱཡ སདྡྷིཾ ཨཱགནྟྭཱ སཏྠུ སནྟིཀེ སཱརཎཱིཡདྷམྨཀཐཾ སུཎནྟོ ནིསཱིདི. ཏསྨིཾ ཁཎེ ཁེམཱ བྷིཀྑུནཱི ‘‘སཏྠཱརཾ པསྶིསྶཱམཱི’’ཏི ཨཱགནྟྭཱ སཀྐཾ དིསྭཱ ¶ ཨཱཀཱསེ ཋིཏཱཝ སཏྠཱརཾ ཝནྡིཏྭཱ ནིཝཏྟི. སཀྐོ ཏཾ དིསྭཱ ‘‘ཀོ ¶ ཨེསཱ, བྷནྟེ, ཨཱགཙྪམཱནཱ ཨཱཀཱསེ ཋིཏཱཝ སཏྠཱརཾ ཝནྡིཏྭཱ ནིཝཏྟཱི’’ཏི ¶ པུཙྪི. སཏྠཱ ‘‘ཨེསཱ, མཧཱརཱཛ, མམ དྷཱིཏཱ ཁེམཱ ནཱམ མཧཱཔཉྙཱ མགྒཱམགྒཀོཝིདཱ’’ཏི ཝཏྭཱ ཨིམཾ གཱཐམཱཧ –

‘‘གམྦྷཱིརཔཉྙཾ མེདྷཱཝིཾ, མགྒཱམགྒསྶ ཀོཝིདཾ;

ཨུཏྟམཏྠམནུཔྤཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ གབྦྷཱིརཔཉྙནྟི གམྦྷཱིརེསུ ཁནྡྷཱདཱིསུ པཝཏྟཱཡ པཉྙཱཡ སམནྣཱགཏཾ དྷམྨོཛཔཉྙཱཡ སམནྣཱགཏཾ མེདྷཱཝིཾ ‘‘ཨཡཾ དུགྒཏིཡཱ མགྒོ, ཨཡཾ སུགཏིཡཱ མགྒོ, ཨཡཾ ནིབྦཱནསྶ མགྒོ, ཨཡཾ ཨམགྒོ’’ཏི ཨེཝཾ མགྒེ ཙ ཨམགྒེ ཙ ཚེཀཏཱཡ མགྒཱམགྒསྶ ཀོཝིདཾ ཨརཧཏྟསངྑཱཏཾ ཨུཏྟམཏྠཾ ཨནུཔྤཏྟཾ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨསཾསཊྛནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ པབྦྷཱརཝཱསཱིཏིསྶཏྠེརཾ ཨཱརབྦྷ ཀཐེསི.

སོ ཀིར སཏྠུ སནྟིཀེ ཀམྨཊྛཱནཾ གཧེཏྭཱ ཨརཉྙཾ ¶ པཝིསིཏྭཱ སཔྤཱཡཾ སེནཱསནཾ ཨོལོཀེནྟོ ཨེཀཾ ལེཎཔབྦྷཱརཾ པཱཔུཎི, སམྤཏྟཀྑཎེཡེཝསྶ ཙིཏྟཾ ཨེཀགྒཏཾ ལབྷི. སོ ‘‘ཨཧཾ ཨིདྷ ཝསནྟོ པབྦཛིཏཀིཙྩཾ ནིཔྥཱདེཏུཾ སཀྑིསྶཱམཱི’’ཏི ཙིནྟེསི. ལེཎེཔི ཨདྷིཝཏྠཱ དེཝཏཱ ‘‘སཱིལཝཱ བྷིཀྑུ ཨཱགཏོ, ཨིམིནཱ སདྡྷིཾ ཨེཀཊྛཱནེ ཝསིཏུཾ དུཀྑཾ. ཨཡཾ པན ཨིདྷ ཨེཀརཏྟིམེཝ ཝསིཏྭཱ པཀྐམིསྶཏཱི’’ཏི ཙིནྟེཏྭཱ པུཏྟེ ཨཱདཱཡ ནིཀྑམི. ཐེརོ པུནདིཝསེ པཱཏོཝ གོཙརགཱམཾ པིཎྜཱཡ པཱཝིསི. ཨཐ ནཾ ཨེཀཱ ཨུཔཱསིཀཱ དིསྭཱཝ པུཏྟསིནེཧཾ པཊིལབྷིཏྭཱ གེཧེ ནིསཱིདཱཔེཏྭཱ བྷོཛེཏྭཱ ཨཏྟཱནཾ ནིསྶཱཡ ཏེམཱསཾ ཝསནཏྠཱཡ ཡཱཙི. སོཔི ‘‘སཀྐཱ མཡཱ ཨིམཾ ནིསྶཱཡ ¶ བྷཝནིསྶརཎཾ ཀཱཏུ’’ནྟི ཨདྷིཝཱསེཏྭཱ ཏམེཝ ལེཎཾ ཨགམཱསི. དེཝཏཱ ཏཾ ཨཱགཙྪནྟཾ དིསྭཱ ‘‘ཨདྡྷཱ ཀེནཙི ནིམནྟིཏོ བྷཝིསྶཏི, སྭེ ཝཱ པརསུཝེ ཝཱ གམིསྶཏཱི’’ཏི ཙིནྟེསི.

ཨེཝཾ ¶ ཨཌྜྷམཱསམཏྟེ ཨཏིཀྐནྟེ ‘‘ཨཡཾ ཨིདྷེཝ མཉྙེ ཨནྟོཝསྶཾ ཝསིསྶཏི, སཱིལཝཏཱ པན སདྡྷིཾ ཨེཀཊྛཱནེ པུཏྟཀེཧི སདྡྷིཾ ཝསིཏུཾ དུཀྐརཾ, ཨིམཉྩ ‘ནིཀྑམཱ’ཏི ཝཏྟུཾ ན སཀྐཱ, ཨཏྠི ནུ ཁོ ཨིམསྶ སཱིལེ ཁལིཏ’’ནྟི དིབྦེན ཙཀྑུནཱ ཨོལོཀེནྟཱི ཨུཔསམྤདམཱལ༹ཀཏོ པཊྛཱཡ ཏསྶ སཱིལེ ཁལིཏཾ ཨདིསྭཱ ‘‘པརིསུདྡྷམསྶ སཱིལཾ, ཀིཉྩིདེཝསྶ ཀཏྭཱ ཨཡསཾ ཨུཔྤཱདེསྶཱམཱི’’ཏི ཏསྶ ཨུཔཊྛཱཀཀུལེ ཨུཔཱསིཀཱཡ ཛེཊྛཔུཏྟསྶ སརཱིརེ ཨདྷིམུཙྩིཏྭཱ གཱིཝཾ པརིཝཏྟེསི. ཏསྶ ཨཀྑཱིནི ནིཀྑམིཾསུ, མུཁཏོ ཁེལོ༹ པགྒྷརི. ཨུཔཱསིཀཱ ཏཾ དིསྭཱ ‘‘ཀིཾ ཨིད’’ནྟི ཝིརཝི. ཨཐ ནཾ དེཝཏཱ ཨདིསྶམཱནརཱུཔཱ ¶ ཨེཝམཱཧ – ‘‘མཡཱ ཨེས གཧིཏོ, བལིཀམྨེནཔི མེ ཨཏྠོ ནཏྠི, ཏུམྷཱཀཾ པན ཀུལཱུཔཀཾ ཐེརཾ ལཊྛིམདྷུཀཾ ཡཱཙིཏྭཱ ཏེན ཏེལཾ པཙིཏྭཱ ཨིམསྶ ནཏྠུཀམྨཾ དེཐ, ཨེཝཱཧཾ ཨིམཾ མུཉྩིསྶཱམཱི’’ཏི. ནསྶཏུ ཝཱ ཨེས མརཏུ ཝཱ, ན སཀྑིསྶཱམཧཾ ཨཡྻཾ ལཊྛིམདྷུཀཾ ཡཱཙིཏུནྟི. སཙེ ལཊྛིམདྷུཀཾ ཡཱཙིཏུཾ ན སཀྐོཐ, ནཱསིཀཱཡསྶ ཧིངྒུཙུཎྞཾ པཀྑིཔིཏུཾ ཝདེཐཱཏི. ཨིདམྤི ཝཏྟུཾ ན སཀྐོམཱཏི. ཏེན ཧིསྶ པཱདདྷོཝནཨུདཀཾ ཨཱདཱཡ སཱིསེ ཨཱསིཉྩཐཱཏི. ཨུཔཱསིཀཱ ‘‘སཀྐཱ ཨིདཾ ཀཱཏུ’’ནྟི ཝེལཱཡ ཨཱགཏཾ ཐེརཾ ནིསཱིདཱཔེཏྭཱ ཡཱགུཁཛྫཀཾ དཏྭཱ ཨནྟརབྷཏྟེ ནིསིནྣསྶ པཱདེ དྷོཝིཏྭཱ ཨུདཀཾ གཧེཏྭཱ, ‘‘བྷནྟེ, ཨིདཾ ཨུདཀཾ དཱརཀསྶ སཱིསེ ཨཱསིཉྩཱམཱ’’ཏི ཨཱཔུཙྪིཏྭཱ ‘‘ཏེན ཧི ཨཱསིཉྩཐཱ’’ཏི ཝུཏྟེ ཏཐཱ ཨཀཱསི. སཱ དེཝཏཱ ཏཱཝདེཝ ཏཾ མུཉྩིཏྭཱ གནྟྭཱ ལེཎདྭཱརེ ཨཊྛཱསི.

ཐེརོཔི བྷཏྟཀིཙྩཱཝསཱནེ ཨུཊྛཱཡཱསནཱ ཨཝིསྶཊྛཀམྨཊྛཱནཏཱཡ དྭཏྟིཾསཱཀཱརཾ སཛ྄ཛྷཱཡནྟོཝ པཀྐཱམི. ཨཐ ནཾ ལེཎདྭཱརཾ པཏྟཀཱལེ སཱ དེཝཏཱ ‘‘མཧཱཝེཛྫ མཱ ཨིདྷ པཝིསཱ’’ཏི ཨཱཧ. སོ ཏཏྠེཝ ཋཏྭཱ ‘‘ཀཱསི ཏྭ’’ནྟི ཨཱཧ. ཨཧཾ ཨིདྷ ¶ ཨདྷིཝཏྠཱ དེཝཏཱཏི. ཐེརོ ‘‘ཨཏྠི ནུ ཁོ མཡཱ ཝེཛྫཀམྨསྶ ཀཏཊྛཱན’’ནྟི ཨུཔསམྤདམཱལ༹ཀཏོ པཊྛཱཡ ཨོལོཀེནྟོ ཨཏྟནོ སཱིལེ ཏིལཀཾ ཝཱ ཀཱལ༹ཀཾ ཝཱ ཨདིསྭཱ ¶ ‘‘ཨཧཾ མཡཱ ཝེཛྫཀམྨསྶ ཀཏཊྛཱནཾ ན པསྶཱམི, ཀསྨཱ ཨེཝཾ ཝདེསཱི’’ཏི ཨཱཧ. ན པསྶསཱིཏི. ཨཱམ, ན པསྶཱམཱིཏི? ཨཱཙིཀྑཱམི ཏེཏི. ཨཱམ, ཨཱཙིཀྑཱཧཱིཏི. ཏིཊྛཏུ ཏཱཝ དཱུརེ ཀཏཾ, ཨཛྫེཝ ཏཡཱ ཨམནུསྶགཧིཏསྶ ཨུཔཊྛཱཀཔུཏྟསྶ པཱདདྷོཝནཨུདཀཾ སཱིསེ ཨཱསིཏྟཾ, ནཱསིཏྟནྟི? ཨཱམ, ཨཱསིཏྟནྟི. ཀིཾ ཨེཏཾ ན པསྶསཱིཏི? ཨེཏཾ སནྡྷཱཡ ཏྭཾ ཝདེསཱིཏི? ཨཱམ, ཨེཏཾ སནྡྷཱཡ ཝདཱམཱིཏི. ཐེརོ ཙིནྟེསི – ‘‘ཨཧོ ཝཏ མེ སམྨཱ པཎིཧིཏོ ཨཏྟཱ, སཱསནསྶ ཨནུརཱུཔཾ ཝཏ མེ ཙརིཏཾ, དེཝཏཱཔི མམ ཙཏུཔཱརིསུདྡྷིསཱིལེ ཏིལཀཾ ཝཱ ཀཱལ༹ཀཾ ཝཱ ཨདིསྭཱ དཱརཀསྶ སཱིསེ ཨཱསིཏྟཔཱདདྷོཝནམཏྟཾ ཨདྡསཱ’’ཏི ཏསྶ སཱིལཾ ཨཱརབྦྷ བལཝཔཱིཏི ཨུཔྤཛྫི. སོ ཏཾ ཝིཀྑམྦྷེཏྭཱ པཱདུདྡྷཱརམྤི ཨཀཏྭཱ ¶ ཏཏྠེཝ ཨརཧཏྟཾ པཏྭཱ ‘‘མཱདིསཾ པརིསུདྡྷཾ སམཎཾ དཱུསེཏྭཱ མཱ ཨིདྷ ཝནསཎྜེ ཝསི, ཏྭམེཝ ནིཀྑམཱཧཱི’’ཏི དེཝཏཾ ཨོཝདནྟོ ཨིམཾ ཨུདཱནཾ ཨུདཱནེསི –

‘‘ཝིསུདྡྷོ ¶ ཝཏ མེ ཝཱསོ, ནིམྨལཾ མཾ ཏཔསྶིནཾ;

མཱ ཏྭཾ ཝིསུདྡྷཾ དཱུསེསི, ནིཀྑམ པཝནཱ ཏུཝ’’ནྟི.

སོ ཏཏྠེཝ ཏེམཱསཾ ཝསིཏྭཱ ཝུཏྠཝསྶོ སཏྠུ སནྟིཀཾ གནྟྭཱ བྷིཀྑཱུཧི ‘‘ཀིཾ, ཨཱཝུསོ, པབྦཛིཏཀིཙྩཾ ཏེ མཏྠཀཾ པཱཔིཏ’’ནྟི པུཊྛོ ཏསྨིཾ ལེཎེ ཝསྶཱུཔགམནཏོ པཊྛཱཡ སབྦཾ ཏཾ པཝཏྟིཾ བྷིཀྑཱུནཾ ཨཱརོཙེཏྭཱ, ‘‘ཨཱཝུསོ, ཏྭཾ དེཝཏཱཡ ཨེཝཾ ཝུཙྩམཱནོ ན ཀུཛ྄ཛྷཱི’’ཏི ཝུཏྟེ ‘‘ན ཀུཛ྄ཛྷི’’ནྟི ཨཱཧ. བྷིཀྑཱུ ཏཐཱགཏསྶ ཨཱརོཙེསུཾ, ‘‘བྷནྟེ, ཨཡཾ བྷིཀྑུ ཨཉྙཾ བྱཱཀརོཏི, དེཝཏཱཡ ཨིདཾ ནཱམ ཝུཙྩམཱནོཔི ན ཀུཛ྄ཛྷིནྟི ཝདཏཱི’’ཏི. སཏྠཱ ཏེསཾ ཀཐཾ སུཏྭཱ ‘‘ནེཝ, བྷིཀྑཝེ, མམ པུཏྟོ ཀུཛ྄ཛྷཏི, ཨེཏསྶ གིཧཱིཧི ཝཱ པབྦཛིཏེཧི ཝཱ སཾསགྒོ ནཱམ ནཏྠི, ཨསཾསཊྛོ ཨེས ཨཔྤིཙྪོ སནྟུཊྛོ’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཨསཾསཊྛཾ གཧཊྛེཧི, ཨནཱགཱརེཧི ཙཱུབྷཡཾ;

ཨནོཀསཱརིམཔྤིཙྪཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཨསཾསཊྛནྟི དསྶནསཝནསམུལླཔནཔརིབྷོགཀཱཡསཾསགྒཱནཾ ཨབྷཱཝེན ཨསཾསཊྛཾ. ཨུབྷཡནྟི ¶ གིཧཱིཧི ཙ ཨནཱགཱརེཧི ཙཱཏི ཨུབྷཡེཧིཔི ཨསཾསཊྛཾ ¶ . ཨནོཀསཱརིནྟི ཨནཱལཡཙཱརིཾ ཏཾ ཨེཝརཱུཔཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པབྦྷཱརཝཱསཱིཏིསྶཏྠེརཝཏྠུ ཨེཀཝཱིསཏིམཾ.

ནིདྷཱཡ དཎྜནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཾ བྷིཀྑུཾ ཨཱརབྦྷ ཀཐེསི.

སོ ¶ ཀིར སཏྠུ སནྟིཀེ ཀམྨཊྛཱནཾ གཧེཏྭཱ ཨརཉྙེ ཝཱཡམནྟོ ཨརཧཏྟཾ པཏྭཱ ‘‘པཊིལདྡྷགུཎཾ སཏྠུ ཨཱརོཙེསྶཱམཱི’’ཏི ཏཏོ ནིཀྑམི. ཨཐ ནཾ ཨེཀསྨིཾ གཱམེ ཨེཀཱ ཨིཏྠཱི སཱམིཀེན སདྡྷིཾ ཀལཧཾ ཀཏྭཱ ཏསྨིཾ བཧི ནིཀྑནྟེ ‘‘ཀུལགྷརཾ གམིསྶཱམཱི’’ཏི མགྒཾ པཊིཔནྣཱ ཨནྟརཱམགྒེ དིསྭཱ ‘‘ཨིམཾ ཐེརཾ ནིསྶཱཡ གམིསྶཱམཱི’’ཏི པིཊྛིཏོ པིཊྛིཏོ ཨནུབནྡྷི. ཐེརོ པན ཏཾ ན པསྶཏི. ཨཐསྶཱ སཱམིཀོ གེཧཾ ཨཱགཏོ ཏཾ ཨདིསྭཱ ‘‘ཀུལགཱམཾ གཏཱ བྷཝིསྶཏཱི’’ཏི ཨནུབནྡྷནྟོ ཏཾ དིསྭཱ ‘‘ན སཀྐཱ ཨིམཱཡ ཨེཀིཀཱཡ ཨིམཾ ཨཊཝིཾ པཊིཔཛྫིཏུཾ, ཀཾ ནུ ཁོ ནིསྶཱཡ གཙྪཏཱི’’ཏི ཨོལོཀེནྟོ ཐེརཾ དིསྭཱ ‘‘ཨཡཾ ཨིམཾ ¶ གཎྷིཏྭཱ ནིཀྑནྟོ བྷཝིསྶཏཱི’’ཏི ཙིནྟེཏྭཱ ཐེརཾ སནྟཛྫེསི. ཨཐ ནཾ སཱ ཨིཏྠཱི ‘‘ནེཝ མཾ ཨེས བྷདནྟོ པསྶཏི, ན ཨཱལཔཏི, མཱ ནཾ ཀིཉྩི ཨཝཙཱ’’ཏི ཨཱཧ. སོ ‘‘ཀིཾ པན ཏྭཾ ཨཏྟཱནཾ གཧེཏྭཱ གཙྪནྟཾ མམ ཨཱཙིཀྑིསྶསི, ཏུཡ྄ཧམེཝ ཨནུཙྪཝིཀཾ ཨིམསྶ ཀརིསྶཱམཱི’’ཏི ཨུཔྤནྣཀོདྷོ ཨིཏྠིཡཱ ཨཱགྷཱཏེན ཐེརཾ པོཐེཏྭཱ ཏཾ ཨཱདཱཡ ནིཝཏྟི. ཐེརསྶ སཀལསརཱིརཾ སཉྫཱཏགཎྜཾ ཨཧོསི. ཨཐསྶ ཝིཧཱརཾ གཏཀཱལེ བྷིཀྑཱུ སརཱིརཾ སམྦཱཧནྟཱ གཎྜེ དིསྭཱ ‘‘ཀིཾ ཨིད’’ནྟི པུཙྪིཾསུ. སོ ཏེསཾ ཏམཏྠཾ ཨཱརོཙེསི. ཨཐ ནཾ བྷིཀྑཱུ, ‘‘ཨཱཝུསོ, ཏསྨིཾ པུརིསེ ཨེཝཾ པཧརནྟེ ཏྭཾ ཀིཾ ཨཝཙ, ཀིཾ ཝཱ ཏེ ཀོདྷོ ཨུཔྤནྣོ’’ཏི. ‘‘ན མེ, ཨཱཝུསོ, ཀོདྷོ ཨུཔྤཛྫཱི’’ཏི ཝུཏྟེ སཏྠུ སནྟིཀཾ གནྟྭཱ ཏམཏྠཾ ཨཱརོཙེཏྭཱ, ‘‘བྷནྟེ, ཨེས བྷིཀྑུ ‘ཀོདྷོ ཏེ ¶ ཨུཔྤཛྫཏཱི’ཏི ཝུཙྩམཱནོ ‘ན མེ, ཨཱཝུསོ, ཀོདྷོ ཨུཔྤཛྫཏཱི’ཏི ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི ཨཱརོཙེསུཾ. སཏྠཱ ཏེསཾ ཀཐཾ སུཏྭཱ, ‘‘བྷིཀྑཝེ, ཁཱིཎཱསཝཱ ནཱམ ནིཧིཏདཎྜཱ, ཏེ པཧརནྟེསུཔི ཀོདྷཾ ན ཀརོནྟིཡེཝཱ’’ཏི ཝཏྭཱ ཨིམཾ གཱཐམཱཧ –

‘‘ནིདྷཱཡ དཎྜཾ བྷཱུཏེསུ, ཏསེསུ ཐཱཝརེསུ ཙ;

ཡོ ན ཧནྟི ན གྷཱཏེཏི, ཏམཧཾ བྲཱུམི བྲཱཧྨཎ’’ནྟི.

ཏཏྠ ནིདྷཱཡཱཏི ནིཀྑིཔིཏྭཱ ཨོརོཔེཏྭཱ. ཏསེསུ ཐཱཝརེསུ ཙཱཏི ཏཎྷཱཏཱསེན ཏསེསུ, ཏཎྷཱཨབྷཱཝེན ཐིརཏཱཡ ¶ ཐཱཝརེསུ ཙ. ཡོ ན ཧནྟཱིཏི ཡོ ཨེཝཾ སབྦསཏྟེསུ ཝིགཏཔཊིགྷཏཱཡ ནིཀྑིཏྟདཎྜོ ནེཝ ཀཉྩི སཡཾ ཧནཏི, ན ཨཉྙེ གྷཱཏེཏི, ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཝིརུདྡྷནྟི ¶ ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཙཏྟཱརོ སཱམཎེརེ ཨཱརབྦྷ ཀཐེསི.

ཨེཀཱ ཀིར བྲཱཧྨཎཱི ཙཏུནྣཾ བྷིཀྑཱུནཾ ཨུདྡེསབྷཏྟཾ སཛྫེཏྭཱ བྲཱཧྨཎཾ ཨཱཧ – ‘‘ཝིཧཱརཾ གནྟྭཱ ཙཏྟཱརོ མཧལླཀབྲཱཧྨཎེ ཨུདྡིསཱཔེཏྭཱ ཨཱནེཧཱི’’ཏི. སོ ཝིཧཱརཾ གནྟྭཱ ‘‘ཙཏྟཱརོ མེ བྲཱཧྨཎེ ཨུདྡིསིཏྭཱ དེཐཱ’’ཏི ཨཱཧ. ཏསྶ སཾཀིཙྩོ པཎྜིཏོ སོཔཱཀོ རེཝཏོཏི སཏྟཝསྶིཀཱ ཙཏྟཱརོ ཁཱིཎཱསཝསཱམཎེརཱ པཱཔུཎིཾསུ. བྲཱཧྨཎཱི མཧཱརཧཱནི ཨཱསནཱནི པཉྙཱཔེཏྭཱ ཋིཏཱ སཱམཎེརེ དིསྭཱཝ ཀུཔིཏཱ ཨུདྡྷནེ པཀྑིཏྟལོཎཾ ཝིཡ ཏཊཏཊཱཡམཱནཱ ‘‘ཏྭཾ ཝིཧཱརཾ གནྟྭཱ ཨཏྟནོ ནཏྟུམཏྟེཔི ཨཔྤཧོནྟེ ¶ ཙཏྟཱརོ ཀུམཱརཀེ གཧེཏྭཱ ཨཱགཏོསཱི’’ཏི ཝཏྭཱ ཏེསཾ ཏེསུ ཨཱསནེསུ ནིསཱིདིཏུཾ ཨདཏྭཱ ནཱིཙཔཱིཋཀཱནི ཨཏྠརིཏྭཱ ‘‘ཨེཏེསུ ནིསཱིདཐཱ’’ཏི ཝཏྭཱ ‘‘གཙྪ, བྲཱཧྨཎ, མཧལླཀེ ཨོལོཀེཏྭཱ ཨཱནེཧཱི’’ཏི ¶ ཨཱཧ. བྲཱཧྨཎོ ཝིཧཱརཾ གནྟྭཱ སཱརིཔུཏྟཏྠེརཾ དིསྭཱ ‘‘ཨེཐ, ཨམྷཱཀཾ གེཧཾ གམིསྶཱམཱ’’ཏི ཨཱནེསི. ཐེརོ ཨཱགནྟྭཱ སཱམཎེརེ དིསྭཱ ‘‘ཨིམེཧི བྲཱཧྨཎེཧི བྷཏྟཾ ལདྡྷ’’ནྟི པུཙྪིཏྭཱ ‘‘ན ལདྡྷ’’ནྟི ཝུཏྟེ ཙཏུནྣམེཝ བྷཏྟསྶ པཊིཡཏྟབྷཱཝཾ ཉཏྭཱ ‘‘ཨཱཧར མེ པཏྟ’’ནྟི པཏྟཾ གཧེཏྭཱ པཀྐཱམི. བྲཱཧྨཎཱིཔི ‘‘ཀིཾ ཨིམིནཱ ཝུཏྟ’’ནྟི པུཙྪིཏྭཱ ‘‘ཨེཏེསཾ ནིསིནྣཱནཾ བྲཱཧྨཎཱནཾ ལདྡྷུཾ ཝཊྚཏི, ཨཱཧར མེ པཏྟ’’ནྟི ཨཏྟནོ པཏྟཾ གཧེཏྭཱ གཏོ, ན བྷུཉྫིཏུཀཱམོ བྷཝིསྶཏི, སཱིགྷཾ གནྟྭཱ ཨཉྙཾ ཨོལོཀེཏྭཱ ཨཱནེཧཱིཏི. བྲཱཧྨཎོ གནྟྭཱ མཧཱམོགྒལླཱནཏྠེརཾ དིསྭཱ ཏཐེཝ ཝཏྭཱ ཨཱནེསི. སོཔི སཱམཎེརེ དིསྭཱ ཏཐེཝ ཝཏྭཱ པཏྟཾ གཧེཏྭཱ པཀྐཱམི. ཨཐ ནཾ བྲཱཧྨཎཱི ཨཱཧ – ‘‘ཨེཏེ ན བྷུཉྫིཏུཀཱམཱ, བྲཱཧྨཎཝཱདཀཾ གནྟྭཱ ཨེཀཾ མཧལླཀབྲཱཧྨཎཾ ཨཱནེཧཱི’’ཏི.

སཱམཎེརཱཔི པཱཏོཝ པཊྛཱཡ ཀིཉྩི ཨལབྷམཱནཱ ཛིགྷཙྪཱཡ པཱིལི༹ཏཱ ནིསཱིདིཾསུ. ཨཐ ནེསཾ གུཎཏེཛེན སཀྐསྶ ཨཱསནཾ ཨུཎྷཱཀཱརཾ དསྶེསི. སོ ཨཱཝཛྫེནྟོ ཏེསཾ པཱཏོཝ པཊྛཱཡ ནིསིནྣཱནཾ ཀིལནྟབྷཱཝཾ ཉཏྭཱ ‘‘མཡཱ ཏཏྠ གནྟུཾ ཝཊྚཏཱི’’ཏི ཛརཱཛིཎྞོ མཧལླཀབྲཱཧྨཎོ ཧུཏྭཱ ཏསྨིཾ བྲཱཧྨཎཝཱདཀེ བྲཱཧྨཎཱནཾ ཨགྒཱསནེ ནིསཱིདི. བྲཱཧྨཎོ ཏཾ དིསྭཱ ¶ ‘‘ཨིདཱནི མེ བྲཱཧྨཎཱི ཨཏྟམནཱ བྷཝིསྶཏཱི’’ཏི ཨེཧི གེཧཾ གམིསྶཱམཱ’’ཏི ཏཾ ཨཱདཱཡ གེཧཾ ཨགམཱསི. བྲཱཧྨཎཱི ཏཾ དིསྭཱཝ ཏུཊྛཙིཏྟཱ དྭཱིསུ ཨཱསནེསུ ཨཏྠརཎཾ ཨེཀསྨིཾཡེཝ ཨཏྠརིཏྭཱ, ‘‘ཨཡྻ, ཨིདྷ ནིསཱིདཱཧཱི’’ཏི ཨཱཧ. སཀྐོ གེཧཾ པཝིསིཏྭཱ ཙཏྟཱརོ སཱམཎེརེ པཉྩཔཏིཊྛིཏེན ཝནྡིཏྭཱ ཏེསཾ ཨཱསནཔརིཡནྟེ བྷཱུམིཡཾ པལླངྐེན ནིསཱིདི. ཨཐ ནཾ དིསྭཱ བྲཱཧྨཎཱི བྲཱཧྨཎཾ ཨཱཧ – ‘‘ཨཧོ ཏེ ཨཱནཱིཏོ བྲཱཧྨཎོ, ཨེཏམྤི ཨུམྨཏྟཀཾ གཧེཏྭཱ ཨཱགཏོསི, ཨཏྟནོ ནཏྟུམཏྟེ ཝནྡནྟོ ¶ ཝིཙརཏི, ཀིཾ ཨིམིནཱ, ནཱིཧརཱཧི ན’’ནྟི. སོ ཁནྡྷེཔི ཧཏྠེཔི ཀཙྪཱཡཔི གཧེཏྭཱ ནིཀྐཌྜྷིཡམཱནོ ཨུཊྛཱཏུམྤི ན ཨིཙྪཏི. ཨཐ ནཾ བྲཱཧྨཎཱི ‘‘ཨེཧི, བྲཱཧྨཎ, ཏྭཾ ཨེཀསྨིཾ ཧཏྠེ གཎྷ, ཨཧཾ ཨེཀསྨིཾ ཧཏྠེ གཎྷིསྶཱམཱི’’ཏི ཨུབྷོཔི དྭཱིསུ ཧཏྠེསུ གཧེཏྭཱ པིཊྛིཡཾ པོཐེནྟཱ གེཧདྭཱརཏོ བཧི ཨཀཾསུ. སཀྐོཔི ནིསིནྣཊྛཱནེཡེཝ ནིསིནྣོ ཧཏྠཾ པརིཝཏྟེསི. ཏེ ནིཝཏྟིཏྭཱ ཏཾ ནིསིནྣམེཝ དིསྭཱ བྷཱིཏརཝཾ རཝནྟཱ ཝིསྶཛྫེསུཾ. ཏསྨིཾ ཁཎེ སཀྐོ ཨཏྟནོ སཀྐབྷཱཝཾ ཛཱནཱཔེསི. ཨཐ ནེསཾ ཨཱཧཱརཾ ཨདཾསུ. པཉྩཔི ཛནཱ ¶ ཨཱཧཱརཾ གཧེཏྭཱ ཨེཀོ ཀཎྞིཀཱམཎྜལཾ ཝིནིཝིཛ྄ཛྷིཏྭཱ, ཨེཀོ ཚདནསྶ པུརིམབྷཱགཾ, ཨེཀོ པཙྪིམབྷཱགཾ, ཨེཀོ པཐཝིཡཾ ནིམུཛྫིཏྭཱ, སཀྐོཔི ཨེཀེན ཋཱནེན ནིཀྑམཱིཏི ཨེཝཾ པཉྩདྷཱ ཨགམཾསུ ¶ . ཏཏོ པཊྛཱཡ ཙ པན ཏཾ གེཧཾ པཉྩཚིདྡགེཧཾ ཀིར ནཱམ ཛཱཏཾ.

སཱམཎེརེཔི ཝིཧཱརཾ གཏཀཱལེ བྷིཀྑཱུ, ‘‘ཨཱཝུསོ, ཀཱིདིས’’ནྟི པུཙྪིཾསུ. མཱ ནོ པུཙྪིཏྠ, ཨམྷཱཀཾ དིཊྛཀཱལཏོ པཊྛཱཡ བྲཱཧྨཎཱི ཀོདྷཱབྷིབྷཱུཏཱ པཉྙཏྟཱསནེསུ ནོ ནིསཱིདིཏུམྤི ཨདཏྭཱ ‘‘སཱིགྷཾ སཱིགྷཾ མཧལླཀབྲཱཧྨཎཾ ཨཱནེཧཱི’’ཏི ཨཱཧ. ཨམྷཱཀཾ ཨུཔཛ྄ཛྷཱཡོ ཨཱགནྟྭཱ ཨམྷེ དིསྭཱ ‘‘ཨིམེསཾ ནིསིནྣབྲཱཧྨཎཱནཾ ལདྡྷུཾ ཝཊྚཏཱི’’ཏི པཏྟཾ ཨཱཧརཱཔེཏྭཱ ནིཀྑམི. ‘‘ཨཉྙཾ མཧལླཀཾ བྲཱཧྨཎཾ ཨཱནེསཱི’’ཏི ཝུཏྟེ བྲཱཧྨཎོ མཧཱམོགྒལླཱནཏྠེརཾ ཨཱནེསི, སོཔི ཨམྷེ དིསྭཱ ཏཐེཝ ཝཏྭཱ པཀྐཱམི. ཨཐ བྲཱཧྨཎཱི ‘‘ན ཨེཏེ བྷུཉྫིཏུཀཱམཱ, གཙྪ བྲཱཧྨཎཝཱདཀཏོ ཨེཀཾ མཧལླཀབྲཱཧྨཎཾ ཨཱནེཧཱི’’ཏི བྲཱཧྨཎཾ པཧིཎི. སོ ཏཏྠ གནྟྭཱ བྲཱཧྨཎཝེསེན ཨཱགཏཾ སཀྐཾ ཨཱནེསི, ཏསྶ ཨཱགཏཀཱལེ ཨམྷཱཀཾ ཨཱཧཱརཾ ཨདཾསཱུཏི. ཨེཝཾ ཀརོནྟཱནཾ པན ཏེསཾ ཏུམྷེ ན ཀུཛ྄ཛྷིཏྠཱཏི? ན ཀུཛ྄ཛྷིམྷཱཏི. བྷིཀྑཱུ ཏཾ སུཏྭཱ སཏྠུ ཨཱརོཙེསུཾ – ‘‘བྷནྟེ, ཨིམེ ‘ན ཀུཛ྄ཛྷིམྷཱ’ཏི ཨབྷཱུཏཾ ཝཏྭཱ ཨཉྙཾ བྱཱཀརོནྟཱི’’ཏི. སཏྠཱ, ‘‘བྷིཀྑཝེ, ཁཱིཎཱསཝཱ ནཱམ ཝིརུདྡྷེསུཔི ན ཝིརུཛ྄ཛྷནྟིཡེཝཱ’’ཏི ཝཏྭཱ ཨིམཾ གཱཐམཱཧ –

‘‘ཨཝིརུདྡྷཾ ¶ ཝིརུདྡྷེསུ, ཨཏྟདཎྜེསུ ནིབྦུཏཾ;

སཱདཱནེསུ ཨནཱདཱནཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཨཝིརུདྡྷནྟི ཨཱགྷཱཏཝསེན ཝིརུདྡྷེསུཔི ལོཀིཡམཧཱཛནེསུ ཨཱགྷཱཏཱབྷཱཝེན ཨཝིརུདྡྷཾ. ཧཏྠགཏེ དཎྜེ ཝཱ སཏྠེ ཝཱ ཨཝིཛྫམཱནེཔི པརེསཾ པཧཱརདཱནཏོ ཨཝིརཏཏྟཱ ཨཏྟདཎྜེསུ ཛནེསུ ནིབྦུཏཾ ནིཀྑིཏྟདཎྜཾ, པཉྩནྣཾ ཁནྡྷཱནཾ ཨཧཾ མམནྟི གཧིཏཏྟཱ སཱདཱནེསུ ཏསྶ གཧཎསྶ ཨབྷཱཝེན ཨནཱདཱནཾ ཏཾ ཨེཝརཱུཔཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ ¶ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡསྶ ¶ རཱགོ ཙཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ མཧཱཔནྠཀཾ ཨཱརབྦྷ ཀཐེསི.

སོ ཧཱཡསྨཱ ཙཱུལ༹པནྠཀཾ ཙཏཱུཧི མཱསེཧི ཨེཀཾ གཱཐཾ པགུཎཾ ཀཱཏུཾ ཨསཀྐོནྟཾ ‘‘ཏྭཾ སཱསནེ ཨབྷབྦོ, གིཧིབྷོགཱཔི པརིཧཱིནོ, ཀིཾ ཏེ ཨིདྷ ཝཱསེན, ཨིཏོ ནིཀྑམཱ’’ཏི ཝིཧཱརཱ ནིཀྐཌྜྷིཏྭཱ དྭཱརཾ ཐཀེསི. བྷིཀྑཱུ ཀཐཾ སམུཊྛཱཔེསུཾ, ‘‘ཨཱཝུསོ, མཧཱཔནྠཀཏྠེརེན ཨིདཾ ནཱམ ཀཏཾ ¶ , ཁཱིཎཱསཝཱནམྤི མཉྙེ ཀོདྷོ ཨུཔྤཛྫཏཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཁཱིཎཱསཝཱནཾ རཱགཱདཡོ ཀིལེསཱ ཨཏྠི, མམ པུཏྟེན ཨཏྠཔུརེཀྑཱརཏཱཡ ཙེཝ དྷམྨཔུརེཀྑཱརཏཱཡ ཙ ཀཏ’’ནྟི ཝཏྭཱ ཨིམཾ གཱཐམཱཧ –

‘‘ཡསྶ རཱགོ ཙ དོསོ ཙ, མཱནོ མཀྑོ ཙ པཱཏིཏོ;

སཱསཔོརིཝ ཨཱརགྒཱ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཨཱརགྒཱཏི ཡསྶེཏེ རཱགཱདཡོ ཀིལེསཱ, ཨཡཉྩ པརགུཎམཀྑནལཀྑཎོ མཀྑོ ཨཱརགྒཱ སཱསཔོ ཝིཡ པཱཏིཏོ, ཡཐཱ སཱསཔོ ཨཱརགྒེ ན སནྟིཊྛཏི, ཨེཝཾ ཙིཏྟེ ན སནྟིཊྛཏི, ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཧཱཔནྠཀཏྠེརཝཏྠུ ཙཏུཝཱིསཏིམཾ.

ཨཀཀྐསནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ པིལིནྡཝཙྪཏྠེརཾ ཨཱརབྦྷ ཀཐེསི.

སོ ¶ ཀིརཱཡསྨཱ ‘‘ཨེཧི, ཝསལི, ཡཱཧི, ཝསལཱི’’ཏིཨཱདཱིནི ཝདནྟོ ¶ གིཧཱིཔི པབྦཛིཏེཔི ཝསལིཝཱདེནེཝ སམུདཱཙརཏི. ཨཐེཀདིཝསཾ སམྦཧུལཱ བྷིཀྑཱུ སཏྠུ ཨཱརོཙེསུཾ – ‘‘ཨཱཡསྨཱ, བྷནྟེ, པིལིནྡཝཙྪོ བྷིཀྑཱུ ཝསལིཝཱདེན སམུདཱཙརཏཱི’’ཏི. སཏྠཱ ཏཾ པཀྐོསཱཔེཏྭཱ ‘‘སཙྩཾ ཀིར ཏྭཾ ¶ པིལིནྡཝཙྪ བྷིཀྑཱུ ཝསལིཝཱདེན སམུདཱཙརསཱི’’ཏི པུཙྪིཏྭཱ ‘‘ཨེཝཾ, བྷནྟེ’’ཏི ཝུཏྟེ ཏསྶཱཡསྨཏོ པུབྦེནིཝཱསཾ མནསིཀརིཏྭཱ ‘‘མཱ ཁོ ཏུམྷེ, བྷིཀྑཝེ, ཝཙྪསྶ བྷིཀྑུནོ ཨུཛ྄ཛྷཱཡིཏྠ, ན, བྷིཀྑཝེ, ཝཙྪོ དོསནྟརོ བྷིཀྑཱུ ཝསལིཝཱདེན སམུདཱཙརཏི, ཝཙྪསྶ, བྷིཀྑཝེ, བྷིཀྑུནོ པཉྩ ཛཱཏིསཏཱནི ཨབྦོཀིཎྞཱནི སབྦཱནི ཏཱནི བྲཱཧྨཎཀུལེ པཙྩཱཛཱཏཱནི, སོ ཏསྶ དཱིགྷརཏྟཾ ཝསལིཝཱདོ སམུདཱཙིཎྞོ, ཁཱིཎཱསཝསྶ ནཱམ ཀཀྐསཾ ཕརུསཾ པརེསཾ མམྨགྷཊྚནཝཙནམེཝ ནཏྠི. ཨཱཙིཎྞཝསེན ཧི མམ པུཏྟོ ཨེཝཾ ཀཐེཏཱི’’ཏི ཝཏྭཱ ཨིམཾ གཱཐམཱཧ –

‘‘ཨཀཀྐསཾ ཝིཉྙཱཔནིཾ, གིརཾ སཙྩམུདཱིརཡེ;

ཡཱཡ ནཱབྷིསཛེ ཀཉྩི, ཏམཧཾ བྲཱུམི བྲཱཧྨཎ’’ནྟི.

ཏཏྠ ཨཀཀྐསནྟི ཨཕརུསཾ. ཝིཉྙཱཔནིནྟི ཨཏྠཝིཉྙཱཔནིཾ. སཙྩནྟི བྷཱུཏཏྠཾ. ནཱབྷིསཛེཏི ཡཱཡ གིརཱཡ ཨཉྙཾ ཀུཛ྄ཛྷཱཔནཝསེན ན ལགྒཱཔེཡྻ, ཁཱིཎཱསཝོ ནཱམ ཨེཝརཱུཔམེཝ གིརཾ བྷཱསེཡྻ, ཏསྨཱ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

པིལིནྡཝཙྪཏྠེརཝཏྠུ པཉྩཝཱིསཏིམཾ.

ཡོདྷ ¶ དཱིགྷནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཉྙཏརཏྠེརཾ ཨཱརབྦྷ ཀཐེསི.

སཱཝཏྠིཡཾ ཀིརེཀོ མིཙྪཱདིཊྛིཀོ བྲཱཧྨཎོ སརཱིརགནྡྷགཧཎབྷཡེན ཨུཏྟརསཱཊཀཾ ཨཔནེཏྭཱ ཨེཀམནྟེ ཋཔེཏྭཱ གེཧདྭཱརཱབྷིམུཁོ ནིསཱིདི. ཨཐེཀོ ཁཱིཎཱསཝོ བྷཏྟཀིཙྩཾ ཀཏྭཱ ཝིཧཱརཾ གཙྪནྟོ ཏཾ སཱཊཀཾ དིསྭཱ ཨིཏོ ཙིཏོ ཙ ཨོལོཀེཏྭཱ ཀཉྩི ཨཔསྶནྟོ ‘‘ནིསྶཱམིཀོ ཨཡ’’ནྟི པཾསུཀཱུལཾ ཨདྷིཊྛཧིཏྭཱ གཎྷི. ཨཐ ནཾ བྲཱཧྨཎོ དིསྭཱ ཨཀྐོསནྟོ ཨུཔསངྐམིཏྭཱ ‘‘མུཎྜཀ ¶ , སམཎ, མམ སཱཊཀཾ གཎྷསཱི’’ཏི ཨཱཧ. ཏཝེསོ, བྲཱཧྨཎཱཏི. ཨཱམ, སམཎཱཏི. ‘‘མཡཱ ¶ ཀཉྩི ཨཔསྶནྟེན པཾསུཀཱུལསཉྙཱཡ གཧིཏོ, གཎྷ ན’’ནྟི ཏསྶ དཏྭཱ ཝིཧཱརཾ གནྟྭཱ བྷིཀྑཱུནཾ ཏམཏྠཾ ཨཱརོཙེསི. ཨཐསྶ ཝཙནཾ སུཏྭཱ བྷིཀྑཱུ ཏེན སདྡྷིཾ ཀེལི༹ཾ ཀརོནྟཱ ‘‘ཀིཾ ནུ ཁོ, ཨཱཝུསོ, སཱཊཀོ དཱིགྷོ རསྶོ ཐཱུལོ སཎྷོ’’ཏི. ཨཱཝུསོ, དཱིགྷོ ཝཱ ཧོཏུ རསྶོ ཝཱ ཐཱུལོ ཝཱ སཎྷོ ཝཱ, ནཏྠི མཡ྄ཧཾ ཏསྨིཾ ཨཱལཡོ, པཾསུཀཱུལསཉྙཱཡ ནཾ གཎྷིནྟི. ཏཾ སུཏྭཱ བྷིཀྑཱུ ཏཐཱགཏསྶ ཨཱརོཙེསུཾ – ‘‘ཨེས, བྷནྟེ, བྷིཀྑུ ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི. སཏྠཱ ‘‘བྷཱུཏཾ, བྷིཀྑཝེ, ཨེས ཀཐེཏི, ཁཱིཎཱསཝཱ ནཱམ པརེསཾ སནྟཀཾ ན གཎྷནྟཱི’’ཏི ཝཏྭཱ ཨིམཾ གཱཐམཱཧ –

‘‘ཡོདྷ ¶ དཱིགྷཾ ཝ རསྶཾ ཝཱ, ཨཎུཾ ཐཱུལཾ སུབྷཱསུབྷཾ;

ལོཀེ ཨདིནྣཾ ནཱདིཡཏི, ཏམཧཾ བྲཱུམི བྲཱཧྨཎ’’ནྟི.

ཏསྶཏྠོ – སཱཊཀཱབྷརཎཱདཱིསུ དཱིགྷཾ ཝཱ རསྶཾ ཝཱ མཎིམུཏྟཱདཱིསུ ཨཎུཾ ཝཱ ཐཱུལཾ ཝཱ མཧགྒྷཨཔྤགྒྷཝསེན སུབྷཾ ཝཱ ཨསུབྷཾ ཝཱ ཡོ པུགྒལོ ཨིམསྨིཾ ལོཀེ པརཔརིགྒཧིཏཾ ནཱདིཡཏི, ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨཱསཱ ཡསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཱརིཔུཏྟཏྠེརཾ ཨཱརབྦྷ ཀཐེསི.

ཐེརོ ཀིར པཉྩབྷིཀྑུསཏཔརིཝཱརོ ཛནཔདེ ཨེཀཾ ཝིཧཱརཾ གནྟྭཱ ཝསྶཾ ཨུཔགཉྪི. མནུསྶཱ ཐེརཾ དིསྭཱ བཧུཾ ཝསྶཱཝཱསིཀཾ པཊིསྶུཎིཾསུ. ཐེརོ པཝཱརེཏྭཱ སབྦསྨིཾ ཝསྶཱཝཱསིཀེ ཨསམྤཏྟེཡེཝ སཏྠུ སནྟིཀཾ གཙྪནྟོ བྷིཀྑཱུ ཨཱཧ – ‘‘དཧརཱནཉྩེཝ སཱམཎེརཱནཉྩ མནུསྶེཧི ཝསྶཱཝཱསིཀེ ཨཱཧཊེ གཧེཏྭཱ པེསེཡྻཱཐ, ཋཔེཏྭཱ ཝཱ སཱསནཾ པཧིཎེཡྻཱཐཱ’’ཏི. ཨེཝཾ ཝཏྭཱ ཙ པན སཏྠུ ¶ སནྟིཀཾ ཨགམཱསི. བྷིཀྑཱུ ཀཐཾ སམུཊྛཱཔེསུཾ ‘‘ཨཛྫཱཔི མཉྙེ སཱརིཔུཏྟཏྠེརསྶ ཏཎྷཱ ཨཏྠིཡེཝ. ཏཐཱ ¶ ཧི མནུསྶེཧི ཝསྶཱཝཱསིཀེ དིནྣེ ཨཏྟནོ སདྡྷིཝིཧཱརིཀཱནཾ ‘ཝསྶཱཝཱསིཀཾ པེསེཡྻཱཐ ¶ , ཋཔེཏྭཱ ཝཱ སཱསནཾ པཧིཎེཡྻཱཐཱ’ཏི བྷིཀྑཱུནཾ ཝཏྭཱ ཨཱགཏོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, མམ པུཏྟསྶ ཏཎྷཱ ཨཏྠི, མནུསྶཱནཾ པན པུཉྙཏོ དཧརསཱམཎེརཱནཉྩ དྷམྨིཀལཱབྷཏོ པརིཧཱནི མཱ ཨཧོསཱིཏི ཏེནེཝཾ ཀཐིཏ’’ནྟི ཝཏྭཱ ཨིམཾ གཱཐམཱཧ –

‘‘ཨཱསཱ ཡསྶ ན ཝིཛྫནྟི, ཨསྨིཾ ལོཀེ པརམྷི ཙ;

ནིརཱསཱསཾ ཝིསཾཡུཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཨཱསཱཏི ཏཎྷཱ. ནིརཱསཱསནྟི ནིཏྟཎྷཾ. ཝིསཾཡུཏྟནྟི སབྦཀིལེསེཧི ཝིསཾཡུཏྟཾ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

སཱརིཔུཏྟཏྠེརཝཏྠུ སཏྟཝཱིསཏིམཾ.

ཡསྶཱལཡཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཧཱམོགྒལླཱནཏྠེརཾ ཨཱརབྦྷ ཀཐེསི. ཝཏྠུ པུརིམསདིསམེཝ. ཨིདྷ པན སཏྠཱ མོགྒལླཱནཏྠེརསྶ ¶ ནིཏྟཎྷབྷཱཝཾ ཝཏྭཱ ཨིམཾ གཱཐམཱཧ –

‘‘ཡསྶཱལཡཱ ན ཝིཛྫནྟི, ཨཉྙཱཡ ཨཀཐཾཀཐཱི;

ཨམཏོགདྷམནུཔྤཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཨཱལཡཱཏི ཏཎྷཱ. ཨཉྙཱཡ ཨཀཐཾཀཐཱིཏི ཨཊྛ ཝཏྠཱུནི ཡཐཱབྷཱུཏཾ ཛཱནིཏྭཱ ཨཊྛཝཏྠུཀཱཡ ཝིཙིཀིཙྪཱཡ ནིབྦིཙིཀིཙྪོ. ཨམཏོགདྷམནུཔྤཏྟནྟི ཨམཏཾ ནིབྦཱནཾ ཨོགཱཧེཏྭཱ ཨནུཔྤཏྟཾ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

མཧཱམོགྒལླཱནཏྠེརཝཏྠུ ཨཊྛཝཱིསཏིམཾ.

ཡོདྷ ¶ ¶ པུཉྙཉྩཱཏི ཨིམཾ དྷམྨདེསནཾ སཏྠཱ པུབྦཱརཱམེ ཝིཧརནྟོ རེཝཏཏྠེརཾ ཨཱརབྦྷ ཀཐེསི. ཝཏྠུ ‘‘གཱམེ ཝཱ ཡདི ཝཱརཉྙེ’’ཏི (དྷ. པ. ༩༨) གཱཐཱཝཎྞནཱཡ ཝིཏྠཱརིཏམེཝ. ཝུཏྟཉྷི ཏཏྠ (དྷ. པ. ཨཊྛ. ༡.༩༨) –

པུན ཨེཀདིཝསཾ བྷིཀྑཱུ ཀཐཾ སམུཊྛཱཔེསུཾ ‘‘ཨཧོ སཱམཎེརསྶ ལཱབྷོ, ཨཧོ པུཉྙཾ, ཡེན ཨེཀཀེན པཉྩནྣཾ བྷིཀྑུསཏཱནཾ པཉྩཀཱུཊཱགཱརསཏཱནི ཀཏཱནཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, མཡ྄ཧཾ པུཏྟསྶ ¶ ནེཝ པུཉྙཾ ཨཏྠི, ན པཱཔཾ, ཨུབྷཡམསྶ པཧཱིན’’ནྟི ཝཏྭཱ ཨིམཾ གཱཐམཱཧ –

‘‘ཡོདྷ པུཉྙཉྩ པཱཔཉྩ, ཨུབྷོ སངྒམུཔཙྩགཱ;

ཨསོཀཾ ཝིརཛཾ སུདྡྷཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཨུབྷོཏི དྭེཔི པུཉྙཱནི ཙ པཱཔཱནི ཙ ཚཌྜེཏྭཱཏི ཨཏྠོ. སངྒནྟི རཱགཱདིབྷེདཾ སངྒཾ. ཨུཔཙྩགཱཏི ཨཏིཀྐནྟོ. ཝཊྚམཱུལཀསོཀཱབྷཱཝེན ཨསོཀཾ ཨབྦྷནྟརེ རཱགརཛཱདཱིནཾ ཨབྷཱཝེན ཝིརཛཾ ནིརུཔཀྐིལེསཏཱཡ སུདྡྷཾ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

རེཝཏཏྠེརཝཏྠུ ཨེཀཱུནཏིཾསཏིམཾ.

ཙནྡཾ ཝཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཙནྡཱབྷཏྠེརཾ ཨཱརབྦྷ ཀཐེསི.

ཏཏྲཱཡཾ ཨནུཔུབྦཱི ཀཐཱ – ཨཏཱིཏེ ཨེཀོ བཱརཱཎསིཝཱསཱི ཝཱཎིཛོ ‘‘པཙྩནྟཾ གནྟྭཱ ཙནྡནཾ ཨཱཧརིསྶཱམཱི’’ཏི བཧཱུནི ཝཏྠཱབྷརཎཱདཱིནི གཧེཏྭཱ པཉྩཧི སཀཊསཏེཧི པཙྩནྟཾ གནྟྭཱ གཱམདྭཱརེ ནིཝཱསཾ གཧེཏྭཱ ཨཊཝིཡཾ གོཔཱལདཱརཀེ པུཙྪི – ‘‘ཨིམསྨིཾ གཱམེ པབྦཏཔཱདཀམྨིཀོ ¶ ¶ ཀོཙི ¶ མནུསྶོ ཨཏྠཱི’’ཏི? ‘‘ཨཱམ, ཨཏྠཱི’’ཏི. ‘‘ཀོ ནཱམེསོ’’ཏི? ‘‘ཨསུཀོ ནཱམཱ’’ཏི. ‘‘བྷརིཡཱཡ པནསྶ པུཏྟཱནཾ ཝཱ ཀིཾནཱམ’’ནྟི? ‘‘ཨིདཉྩིདཉྩཱ’’ཏི. ‘‘ཀཧཾ པནསྶ ཋཱནེ གེཧ’’ནྟི? ‘‘ཨསུཀཊྛཱནེ ནཱམཱ’’ཏི. སོ ཏེཧི དིནྣསཉྙཱཡ སུཁཡཱནཀེ ནིསཱིདིཏྭཱ ཏསྶ གེཧདྭཱརཾ གནྟྭཱ ཡཱནཱ ཨོརུཡ྄ཧ གེཧཾ པཝིསིཏྭཱ ‘‘ཨསུཀནཱམེ’’ཏི ཏཾ ཨིཏྠིཾ པཀྐོསི. སཱ ‘‘ཨེཀོ ནོ ཉཱཏཀོ བྷཝིསྶཏཱི’’ཏི ཝེགེནཱགནྟྭཱ ཨཱསནཾ པཉྙཱཔེསི. སོ ཏཏྠ ནིསཱིདིཏྭཱ ནཱམཾ ཝཏྭཱ ‘‘མམ སཧཱཡོ ཀཧ’’ནྟི པུཙྪི. ‘‘ཨརཉྙཾ གཏོ, སཱམཱི’’ཏི. ‘‘མམ པུཏྟོ ཨསུཀོ ནཱམ, མམ དྷཱིཏཱ ཨསུཀཱ ནཱམ ཀཧ’’ནྟི སབྦེསཾ ནཱམཾ ཀིཏྟེནྟོཝ པུཙྪིཏྭཱ ‘‘ཨིམཱནི ནེསཾ ཝཏྠཱབྷརཎཱནི དདེཡྻཱསི, སཧཱཡསྶཱཔི མེ ཨཊཝིཏོ ཨཱགཏཀཱལེ ཨིདཾ ཝཏྠཱབྷརཎཾ དདེཡྻཱསཱི’’ཏི ཨདཱསི. སཱ ཏསྶ ཨུལཱ༹རཾ སཀྐཱརཾ ཀཏྭཱ སཱམིཀསྶ ཨཱགཏཀཱལེ ‘‘སཱམི, ཨིམིནཱ ཨཱགཏཀཱལཏོ པཊྛཱཡ སབྦེསཾ ནཱམཾ ཝཏྭཱ ཨིདཉྩིདཉྩ དིནྣ’’ནྟི ཨཱཧ. སོཔིསྶ ཀཏྟབྦཡུཏྟཀཾ ཀརི.

ཨཐ ནཾ སཱཡཾ སཡནེ ནིསིནྣོ པུཙྪི – ‘‘སམྨ, པབྦཏཔཱདེ ཙརནྟེན ཏེ ཀིཾ བཧུཾ དིཊྛཔུབྦ’’ནྟི? ‘‘ཨཉྙཾ ན པསྶཱམི, རཏྟསཱཁཱ ¶ པན མེ བཧཱུ རུཀྑཱ དིཊྛཱ’’ཏི. ‘‘བཧཱུ རུཀྑཱ’’ཏི? ‘‘ཨཱམ, བཧཱུ’’ཏི. ཏེན ཧི ཏེ ཨམྷཱཀཾ དསྶེཧཱིཏི ཏེན སདྡྷིཾ གནྟྭཱ རཏྟཙནྡནརུཀྑེ ཚིནྡིཏྭཱ པཉྩ སཀཊསཏཱནི པཱུརེཏྭཱ ཨཱགཙྪནྟོ ཏཾ ཨཱཧ – ‘‘སམྨ, བཱརཱཎསིཡཾ ཨསུཀཊྛཱནེ ནཱམ མམ གེཧཾ, ཀཱལེན ཀཱལཾ མམ སནྟིཀཾ ཨཱགཙྪེཡྻཱསི, ཨཉྙེན ཙ མེ པཎྞཱཀཱརེན ཨཏྠོ ནཏྠི, རཏྟསཱཁརུཀྑེ ཨེཝ ཨཱཧརེཡྻཱསཱི’’ཏི. སོ ‘‘སཱདྷཱུ’’ཏི ཝཏྭཱ ཀཱལེན ཀཱལཾ ཏསྶ སནྟིཀཾ ཨཱགཙྪནྟོ རཏྟཙནྡནམེཝ ཨཱཧརཏི, སོཔིསྶ བཧུདྷནཾ དེཏི.

ཏཏོ ཨཔརེན སམཡེན པརིནིབྦུཏེ ཀསྶཔདསབལེ པཏིཊྛིཏེ ཀཉྩནཐཱུཔེ སོ པུརིསོ བཧུཾ ཙནྡནཾ ཨཱདཱཡ བཱརཱཎསིཾ ཨགམཱསི. ཨཐསྶ སོ སཧཱཡཀོ ཝཱཎིཛོ བཧུཾ ཙནྡནཾ པིསཱཔེཏྭཱ པཱཏིཾ པཱུརེཏྭཱ ‘‘ཨེཧི, སམྨ, ཡཱཝ བྷཏྟཾ པཙཏི, ཏཱཝ ཙེཏིཡཀརཎཊྛཱནཾ གནྟྭཱ ཨཱགམིསྶཱམཱ’’ཏི ཏཾ ཨཱདཱཡ ཏཏྠ གནྟྭཱ ཙནྡནཔཱུཛཾ ཨཀཱསི. སོཔིསྶ པཙྩནྟཝཱསཱི སཧཱཡཀོ ཙེཏིཡཀུཙྪིཡཾ ཙནྡནེན ཙནྡམཎྜལཾ ཨཀཱསི. ཨེཏྟཀམེཝསྶ པུབྦཀམྨཾ.

སོ ¶ ཏཏོ ཙུཏོ དེཝལོཀེ ནིབྦཏྟིཏྭཱ ཨེཀཾ བུདྡྷནྟརཾ ཏཏྠ ཁེཔེཏྭཱ ཨིམསྨིཾ བུདྡྷུཔྤཱདེ རཱཛགཧནགརེ བྲཱཧྨཎམཧཱསཱལཀུལེ ནིབྦཏྟི. ཏསྶ ནཱབྷིམཎྜལཏོ ཙནྡམཎྜལསདིསཱ པབྷཱ ཨུཊྛཧི, ཏེནསྶ ཙནྡཱབྷོཏྭེཝ ནཱམཾ ཀརིཾསུ. ཙེཏིཡེ ཀིརསྶ ཙནྡམཎྜལཀརཎནིསྶནྡོ ¶ ཨེས. བྲཱཧྨཎཱ ¶ ཙིནྟཡིཾསུ – ‘‘སཀྐཱ ཨམྷེཧི ཨིམཾ གཧེཏྭཱ ལོཀཾ ཁཱདིཏུ’’ནྟི. ཏཾ ཡཱནེ ནིསཱིདཱཔེཏྭཱ ‘‘ཡོ ཨིམསྶ སརཱིརཾ ཧཏྠེན པརཱམསཏི, སོ ཨེཝརཱུཔཾ ནཱམ ཨིསྶརིཡསམྤཏྟིཾ ལབྷཏཱི’’ཏི ཝཏྭཱ ཝིཙརིཾསུ. སཏཾ ཝཱ སཧསྶཾ ཝཱ དདམཱནཱ ཨེཝ ཏསྶ སརཱིརཾ ཧཏྠེན ཕུསིཏུཾ ལབྷནྟི. ཏེ ཨེཝཾ ཨནུཝིཙརནྟཱ སཱཝཏྠིཾ ཨནུཔྤཏྟཱ ནགརསྶ ཙ ཝིཧཱརསྶ ཙ ཨནྟརཱ ནིཝཱསཾ གཎྷིཾསུ. སཱཝཏྠིཡམྤི པཉྩཀོཊིམཏྟཱ ཨརིཡསཱཝཀཱ པུརེབྷཏྟཾ དཱནཾ དཏྭཱ པཙྪཱབྷཏྟཾ གནྡྷམཱལཝཏྠབྷེསཛྫཱདིཧཏྠཱ དྷམྨསྶཝནཱཡ གཙྪནྟི. བྲཱཧྨཎཱ ཏེ དིསྭཱ ‘‘ཀཧཾ གཙྪཐཱ’’ཏི པུཙྪིཾསུ. སཏྠུ སནྟིཀཾ དྷམྨསྶཝནཱཡཱཏི. ཨེཐ ཏཏྠ གནྟྭཱ ཀིཾ ཀརིསྶཐ, ཨམྷཱཀཾ ཙནྡཱབྷསྶ བྲཱཧྨཎསྶ ཨཱནུབྷཱཝསདིསོ ཨཱནུབྷཱཝོ ནཏྠི. ཨེཏསྶ ཧི སརཱིརཾ ཕུསནྟཱ ཨིདཾ ནཱམ ལབྷནྟི, ཨེཐ པསྶཐ ནནྟི. ཏུམྷཱཀཾ ཙནྡཱབྷསྶ བྲཱཧྨཎསྶ ཀོ ཨཱནུབྷཱཝོ ནཱམ, ཨམྷཱཀཾ སཏྠཱཡེཝ མཧཱནུབྷཱཝོཏི. ཏེ ཨཉྙམཉྙཾ སཉྙཱཔེཏུཾ ཨསཀྐོནྟཱ ‘‘ཝིཧཱརཾ གནྟྭཱ ཙནྡཱབྷསྶ ཝཱ ཨམྷཱཀཾ ཝཱ སཏྠུ ཨཱནུབྷཱཝཾ ¶ ཛཱནིསྶཱམཱ’’ཏི ཏཾ གཧེཏྭཱ ཝིཧཱརཾ ཨགམཾསུ.

སཏྠཱ ཏསྨིཾ ཨཏྟནོ སནྟིཀཾ ཨུཔསངྐམནྟེཡེཝ ཙནྡཱབྷཱཡ ཨནྟརདྷཱནཾ ཨཀཱསི. སོ སཏྠུ སནྟིཀེ ཨངྒཱརཔཙྪིཡཾ ཀཱཀོ ཝིཡ ཨཧོསི. ཨཐ ནཾ ཨེཀམནྟཾ ནཡིཾསུ, ཨཱབྷཱ པཊིཔཱཀཏིཀཱ ཨཧོསི. པུན སཏྠུ སནྟིཀཾ ཨཱནཡིཾསུ, ཨཱབྷཱ ཏཐེཝ ཨནྟརདྷཱཡི. ཨེཝཾ ཏིཀྑཏྟུཾ གནྟྭཱ ཨནྟརདྷཱཡམཱནཾ ཨཱབྷཾ དིསྭཱ ཙནྡཱབྷོ ཙིནྟེསི – ‘‘ཨཡཾ ཨཱབྷཱཡ ཨནྟརདྷཱནམནྟཾ ཛཱནཱཏི མཉྙེ’’ཏི. སོ སཏྠཱརཾ པུཙྪི – ‘‘ཀིཾ ནུ ཁོ ཨཱབྷཱཡ ཨནྟརདྷཱནམནྟཾ ཛཱནཱཐཱ’’ཏི? ཨཱམ, ཛཱནཱམཱིཏི. ཏེན ཧི མེ དེཐཱཏི. ན སཀྐཱ ཨཔབྦཛིཏསྶ དཱཏུནྟི. སོ བྲཱཧྨཎེ ཨཱཧ – ‘‘ཨེཏསྨིཾ མནྟེ གཧིཏེ ཨཧཾ སཀལཛམྦུདཱིཔེ ཛེཊྛཀོ བྷཝིསྶཱམི, ཏུམྷེ ཨེཏྠེཝ ཧོཐ, ཨཧཾ པབྦཛིཏྭཱ ཀཏིཔཱཧེནེཝ མནྟཾ གཎྷིསྶཱམཱི’’ཏི. སོ སཏྠཱརཾ པབྦཛྫཾ ཡཱཙིཏྭཱ ཨུཔསམྤཛྫི. ཨཐསྶ དྭཏྟིཾསཱཀཱརཾ ¶ ཨཱཙིཀྑི. སོ ‘‘ཀིཾ ཨིད’’ནྟི པུཙྪི. ཨིདཾ མནྟསྶ པརིཀམྨཾ སཛ྄ཛྷཱཡིཏུཾ ཝཊྚཏཱིཏི. བྲཱཧྨཎཱཔི ཨནྟརནྟརཱ ཨཱགནྟྭཱ ‘‘གཧིཏོ ཏེ མནྟོ’’ཏི པུཙྪནྟི. ན ཏཱཝ གཎྷཱམཱིཏི. སོ ཀཏིཔཱཧེནེཝ ཨརཧཏྟཾ པཏྭཱ བྲཱཧྨཎེཧི ཨཱགནྟྭཱ པུཙྪིཏཀཱལེ ‘‘ཡཱཐ ཏུམྷེ, ཨིདཱནཱཧཾ ཨནཱགམནདྷམྨོ ཛཱཏོ’’ཏི ཨཱཧ. བྷིཀྑཱུ ཏཐཱགཏསྶ ཨཱརོཙེསུཾ – ‘‘ཨཡཾ, བྷནྟེ, ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི. སཏྠཱ ‘‘ཁཱིཎཱསཝོ ཨིདཱནི, བྷིཀྑཝེ, མམ པུཏྟོ ཙནྡཱབྷོ, བྷཱུཏམེཝེས ཀཐེཏཱི’’ཏི ཝཏྭཱ ཨིམཾ གཱཐམཱཧ –

‘‘ཙནྡཾཝ ¶ ཝིམལཾ སུདྡྷཾ, ཝིཔྤསནྣམནཱཝིལཾ;

ནནྡཱིབྷཝཔརིཀྑཱིཎཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ¶ ཝིམལནྟི ཨབྦྷཱདིམལརཧིཏཾ. སུདྡྷནྟི ནིརུཔཀྐིལེསཾ. ཝིཔྤསནྣནྟི པསནྣཙིཏྟཾ. ཨནཱཝིལནྟི ཀིལེསཱཝིལཏྟརཧིཏཾ. ནནྡཱིབྷཝཔརིཀྑཱིཎནྟི ཏཱིསུ བྷཝེསུ པརིཀྑཱིཎཏཎྷཾ ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡོ ཨིམནྟི ཨིམཾ དྷམྨདེསནཾ སཏྠཱ ཀུཎྜཀོལིཡཾ ནིསྶཱཡ ཀུཎྜདྷཱནཝནེ ཝིཧརནྟོ སཱིཝལིཏྠེརཾ ཨཱརབྦྷ ཀཐེསི.

ཨེཀསྨིཉྷི སམཡེ སུཔྤཝཱསཱ ནཱམ ཀོལིཡདྷཱིཏཱ སཏྟཝསྶཱནི གབྦྷཾ དྷཱརེཏྭཱ སཏྟཱཧཾ མཱུལ༹ྷགབྦྷཱ དུཀྑཱཧི ཏིབྦཱཧི ཀཊུཀཱཧི ཝེདནཱཧི ཕུཊྛཱ ‘‘སམྨཱསམྦུདྡྷོ ཝཏ སོ བྷགཝཱ, ཡོ ཨིམསྶ ཨེཝརཱུཔསྶ དུཀྑསྶ ¶ པཧཱནཱཡ དྷམྨཾ དེསེཏི. སུཔྤཊིཔནྣོ ཝཏ ཏསྶ བྷགཝཏོ སཱཝཀསངྒྷོ, ཡོ ཨིམསྶ ཨེཝརཱུཔསྶ དུཀྑསྶ པཧཱནཱཡ པཊིཔནྣོ. སུསུཁཾ ཝཏ ཏཾ ནིབྦཱནཾ, ཡཐིདཾ ཨེཝརཱུཔཾ དུཀྑཾ ན སཾཝིཛྫཏཱི’’ཏི (ཨུདཱ. ༡༨) ཨིམེཧི ཏཱིཧི ཝིཏཀྐེཧི ཏཾ ¶ དུཀྑཾ ཨདྷིཝཱསེནྟཱི སཱམིཀཾ སཏྠུ སནྟིཀཾ པེསེཏྭཱ ཏེན ཏསྶཱ ཝཙནེན སཏྠུ ཝནྡནཱཡ ཨཱརོཙིཏཱཡ ‘‘སུཁིནཱི ཧོཏུ སུཔྤཝཱསཱ ཀོལིཡདྷཱིཏཱ, ཨརོགཱ ཨརོགཾ པུཏྟཾ ཝིཛཱཡཏཱུ’’ཏི སཏྠཱརཱ ཝུཏྟཀྑཎེཡེཝ སུཁིནཱི ཨརོགཱ ཨརོགཾ པུཏྟཾ ཝིཛཱཡིཏྭཱ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ སཏྟཱཧཾ མཧཱདཱནཾ ཨདཱསི. པུཏྟོཔིསྶཱ ཛཱཏདིཝསཏོ པཊྛཱཡ དྷམྨཀརཎཾ ཨཱདཱཡ སངྒྷསྶ ཨུདཀཾ པརིསྶཱཝེསི. སོ ཨཔརབྷཱགེ ནིཀྑམིཏྭཱ པབྦཛིཏོ ཨརཧཏྟཾ པཱཔུཎི.

ཨཐེཀདིཝསཾ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘པསྶཐཱཝུསོ, ཨེཝརཱུཔོ ནཱམ ཨརཧཏྟསྶ ཨུཔནིསྶཡསམྤནྣོ བྷིཀྑུ ཨེཏྟཀཾ ཀཱལཾ མཱཏུཀུཙྪིསྨིཾ དུཀྑཾ ཨནུབྷོསི, ཀིམངྒཾ པན ཨཉྙེ, བཧུཾ ཝཏ ཨིམིནཱ དུཀྑཾ ནིཏྠིཎྞ’’ནྟི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ཨཱམ, བྷིཀྑཝེ, མམ པུཏྟོ ཨེཏྟཀཱ དུཀྑཱ མུཙྩིཏྭཱ ཨིདཱནི ནིབྦཱནཾ སཙྪིཀཏྭཱ ཝིཧརཏཱི’’ཏི ཝཏྭཱ ཨིམཾ གཱཐམཱཧ –

‘‘ཡོམཾ ¶ ¶ པལིཔཐཾ དུགྒཾ, སཾསཱརཾ མོཧམཙྩགཱ;

ཏིཎྞོ པཱརངྒཏོ ཛྷཱཡཱི, ཨནེཛོ ཨཀཐཾཀཐཱི;

ཨནུཔཱདཱཡ ནིབྦུཏོ, ཏམཧཾ བྲཱུམི བྲཱཧྨཎ’’ནྟི.

ཏསྶཏྠོ – ཡོ བྷིཀྑུ ཨིམཾ རཱགཔལིཔཐཉྩེཝ ཀིལེསདུགྒཉྩ སཾསཱརཝཊྚཉྩ ཙཏུནྣཾ ཨརིཡསཙྩཱནཾ ཨཔྤཊིཝིཛ྄ཛྷནཀམོཧཉྩ ཨཏཱིཏོ, ཙཏྟཱརོ ཨོགྷེ ཏིཎྞོ ཧུཏྭཱ པཱརཾ ཨནུཔྤཏྟོ, དུཝིདྷེན ཛྷཱནེན ཛྷཱཡཱི, ཏཎྷཱཡ ཨབྷཱཝེན ཨནེཛོ, ཀཐཾཀཐཱཡ ཨབྷཱཝེན ཨཀཐཾཀཐཱི, ཨུཔཱདཱནཱནཾ ཨབྷཱཝེན ཨནུཔཱདིཡིཏྭཱ ཀིལེསནིབྦཱནེན ནིབྦུཏོ, ཏམཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡོདྷ ¶ ཀཱམེཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སུནྡརསམུདྡཏྠེརཾ ཨཱརབྦྷ ཀཐེསི.

སཱཝཏྠིཡཾ ཀིརེཀོ ཀུལཔུཏྟོ སུནྡརསམུདྡཀུམཱརོ ནཱམ ཙཏྟཱལཱིསཀོཊིཝིབྷཝེ མཧཱཀུལེ ནིབྦཏྟོ. སོ ཨེཀདིཝསཾ ¶ པཙྪཱབྷཏྟཾ གནྡྷམཱལཱདིཧཏྠཾ མཧཱཛནཾ དྷམྨསྶཝནཏྠཱཡ ཛེཏཝནཾ གཙྪནྟཾ དིསྭཱ ‘‘ཀཧཾ གཙྪཐཱ’’ཏི པུཙྪིཏྭཱ ‘‘སཏྠུ སནྟིཀཾ དྷམྨསྶཝནཏྠཱཡཱ’’ཏི ཝུཏྟེ ‘‘ཨཧམྤི གམིསྶཱམཱི’’ཏི ཝཏྭཱ ཏེན སདྡྷིཾ གནྟྭཱ པརིསཔརིཡནྟེ ནིསཱིདི. སཏྠཱ ཏསྶ ཨཱསཡཾ ཝིདིཏྭཱ ཨནུཔུབྦིཾ ཀཐཾ ཀཐེསི. སོ ‘‘ན སཀྐཱ ཨགཱརཾ ཨཛ྄ཛྷཱཝསནྟེན སངྑལིཁིཏཾ བྲཧྨཙརིཡཾ ཙརིཏུ’’ནྟི སཏྠུ དྷམྨཀཐཾ ནིསྶཱཡ པབྦཛྫཱཡ ཛཱཏུསྶཱཧོ པརིསཱཡ པཀྐནྟཱཡ སཏྠཱརཾ པབྦཛྫཾ ཡཱཙིཏྭཱ ‘‘མཱཏཱཔིཏཱུཧི ཨནནུཉྙཱཏཾ ཏཐཱགཏཱ ན པབྦཱཛེནྟཱི’’ཏི སུཏྭཱ གེཧཾ གནྟྭཱ རཊྛཔཱལཀུལཔུཏྟཱདཡོ ཝིཡ མཧནྟེན ཝཱཡཱམེན མཱཏཱཔིཏརོ ཨནུཛཱནཱཔེཏྭཱ སཏྠུ སནྟིཀེ པབྦཛིཏྭཱ ལདྡྷཱུཔསམྤདོ ‘‘ཀིཾ མེ ཨིདྷ ཝཱསེནཱ’’ཏི ཏཏོ ནིཀྑམིཏྭཱ རཱཛགཧཾ གནྟྭཱ པིཎྜཱཡ ཙརནྟོ ཝཱིཏིནཱམེསི.

ཨཐེཀདིཝསཾ སཱཝཏྠིཡཾ ཏསྶ ¶ མཱཏཱཔིཏརོ ཨེཀསྨིཾ ཚཎདིཝསེ མཧནྟེན སིརིསོབྷགྒེན ཏསྶ སཧཱཡཀཀུམཱརཀེ ཀཱིལ༹མཱནེ དིསྭཱ ‘‘ཨམྷཱཀཾ པུཏྟསྶ ཨིདཾ དུལླབྷཾ ཛཱཏ’’ནྟི པརིདེཝིཾསུ. ཏསྨིཾ ཁཎེ ཨེཀཱ གཎིཀཱ ཏཾ ཀུལཾ གནྟྭཱ ཏསྶ མཱཏརཾ རོདམཱནཾ ནིསིནྣཾ དིསྭཱ ‘‘ཨམྨ, ཀིཾ ཀཱརཎཱ རོདསཱི’’ཏི པུཙྪི. ‘‘པུཏྟཾ ཨནུསྶརིཏྭཱ རོདཱམཱི’’ཏི. ‘‘ཀཧཾ པན སོ, ཨམྨཱ’’ཏི? ‘‘བྷིཀྑཱུསུ པབྦཛིཏོ’’ཏི. ‘‘ཀིཾ ཨུཔྤབྦཱཛེཏུཾ ན ཝཊྚཏཱི’’ཏི? ‘‘ཝཊྚཏི, ན པན ཨིཙྪཏི, ཨིཏོ ནིཀྑམིཏྭཱ རཱཛགཧཾ གཏོ’’ཏི. ‘‘སཙཱཧཾ ཏཾ ཨུཔྤབྦཱཛེཡྻཾ, ཀིཾ མེ ཀརེཡྻཱཐཱ’’ཏི? ‘‘ཨིམསྶ ཏེ ཀུལསྶ ཀུཊུམྦསཱམིནིཾ ¶ ཀརེཡྻཱམཱ’’ཏི. ཏེན ཧི མེ པརིབྦཡཾ དེཐཱཏི པརིབྦཡཾ གཧེཏྭཱ མཧནྟེན པརིཝཱརེན རཱཛགཧཾ གནྟྭཱ ཏསྶ པིཎྜཱཡ ཙརཎཝཱིཐིཾ སལླཀྑེཏྭཱ ཏཏྠེཀཾ ནིཝཱསགེཧཾ གཧེཏྭཱ པཱཏོཝ པཎཱིཏཾ ཨཱཧཱརཾ པཊིཡཱདེཏྭཱ ཐེརསྶ པིཎྜཱཡ པཝིཊྛཀཱལེ བྷིཀྑཾ དཏྭཱ ཀཏིཔཱཧཙྩཡེན, ‘‘བྷནྟེ, ཨིདྷེཝ ནིསཱིདིཏྭཱ བྷཏྟཀིཙྩཾ ཀརོཐཱ’’ཏི པཏྟཾ གཎྷི. སོ པཏྟམདཱསི.

ཨཐ ¶ ནཾ པཎཱིཏེན ཨཱཧཱརེན པརིཝིསིཏྭཱ, ‘‘བྷནྟེ, ཨིདྷེཝ པིཎྜཱཡ ཙརིཏུཾ ཕཱསུཀ’’ནྟི ཝཏྭཱ ཀཏིཔཱཧཾ ཨཱལིནྡེ ནིསཱིདཱཔེཏྭཱ བྷོཛེཏྭཱ དཱརཀེ པཱུཝེཧི སངྒཎྷིཏྭཱ ‘‘ཨེཐ ཏུམྷེ ཐེརསྶ ཨཱགཏཀཱལེ མཡི ཝཱརེནྟིཡཱཔི ཨིདྷཱགནྟྭཱ རཛཾ ཨུཊྛཱཔེཡྻཱཐཱ’’ཏི ཨཱཧ. ཏེ པུནདིཝསེ ཐེརསྶ བྷོཛནཝེལཱཡ ཏཱཡ ཝཱརིཡམཱནཱཔི རཛཾ ཨུཊྛཱཔེསུཾ. སཱ པུནདིཝསེ, ‘‘བྷནྟེ, དཱརཀཱ ཝཱརིཡམཱནཱཔི མམ ཝཙནཾ ཨསུཎིཏྭཱ ཨིདྷ རཛཾ ཨུཊྛཱཔེནྟི, ཨནྟོགེཧེ ནིསཱིདཐཱ’’ཏི ཨནྟོ ནིསཱིདཱཔེཏྭཱ ཀཏིཔཱཧཾ བྷོཛེསི. པུན དཱརཀེ སངྒཎྷིཏྭཱ ‘‘ཏུམྷེ མཡཱ ཝཱརིཡམཱནཱཔི ཐེརསྶ བྷོཛནཀཱལེ མཧཱསདྡཾ ཀརེཡྻཱཐཱ’’ཏི ཨཱཧ. ཏེ ཏཐཱ ཀརིཾསུ. སཱ པུནདིཝསེ, ‘‘བྷནྟེ, ཨིམསྨིཾ ཋཱནེ ཨཏིཝིཡ མཧཱསདྡོ ཧོཏི, དཱརཀཱ མཡཱ ཝཱརིཡམཱནཱཔི ཝཙནཾ ན གཎྷནྟི, ཨུཔརིཔཱསཱདེཡེཝ ནིསཱིདཐཱ’’ཏི ཝཏྭཱ ཐེརེན ཨདྷིཝཱསིཏེ ཐེརཾ པུརཏོ ཀཏྭཱ པཱསཱདཾ ཨབྷིརུཧནྟཱི དྭཱརཱནི པིདཧམཱནཱཝ པཱསཱདཾ ཨབྷིརུཧི. ཐེརོ ཨུཀྐཊྛསཔདཱནཙཱརིཀོ སམཱནོཔི རསཏཎྷཱཡ བདྡྷོ ཏསྶཱ ཝཙནེན སཏྟབྷཱུམིཀཾ པཱསཱདཾ ཨབྷིརུཧི.

སཱ ཐེརཾ ནིསཱིདཱཔེཏྭཱ ‘‘ཙཏྟཱལཱིསཱཡ ཁལུ, སམྨ, པུཎྞམུཁ ཋཱནེཧི ཨིཏྠཱི པུརིསཾ ཨཙྩཱཝདཏི ¶ ཝིཛམྦྷཏི ཝིནམཏི གིལསཏི ཝིལཛྫཏི ནཁེན ནཁཾ གྷཊྚེཏི, པཱདེན པཱདཾ ཨཀྐམཏི, ཀཊྛེན པཐཝིཾ ཝིལིཁཏི, དཱརཀཾ ཨུལླངྒྷེཏི ཨོལངྒྷེཏི, ཀཱིལ༹ཏི ཀཱིལཱ༹པེཏི, ཙུམྦཏི ཙུམྦཱཔེཏི, བྷུཉྫཏི བྷུཉྫཱཔེཏི, དདཱཏི ཨཱཡཱཙཏི, ཀཏམནུཀརོཏི, ཨུཙྩཾ བྷཱསཏི, ནཱིཙཾ བྷཱསཏི, ཨཝིཙྩཾ བྷཱསཏི, ཝིཝིཙྩཾ བྷཱསཏི, ནཙྩེན གཱིཏེན ཝཱདིཏེན རོདིཏེན ཝིལསིཏེན ཝིབྷཱུསིཏེན ཛགྒྷཏི, པེཀྑཏི, ཀཊིཾ ཙཱལེཏི, གུཡ྄ཧབྷཎྜཀཾ ཙཱལེཏི, ཨཱུརུཾ ཝིཝརཏི, ཨཱུརུཾ པིདཧཏི, ཐནཾ དསྶེཏི, ཀཙྪཾ དསྶེཏི, ནཱབྷིཾ དསྶེཏི, ཨཀྑིཾ ནིཁཎཏི, བྷམུཀཾ ¶ ཨུཀྑིཔཏི, ཨོཊྛཾ པལིཁཏི, ཛིཝ྄ཧཾ ནིལླཱལེཏི, དུསྶཾ མུཉྩཏི, དུསྶཾ བནྡྷཏི, སིརསཾ མུཉྩཏི, སིརསཾ བནྡྷཏཱི’’ཏི (ཛཱ. ༢.༢༡.༣༠༠) ཨེཝཾ ཨཱགཏཾ ཨིཏྠིཀུཏྟཾ ཨིཏྠིལཱིལཾ དསྶེཏྭཱ ཏསྶ པུརཏོ ཋིཏཱ ཨིམཾ གཱཐམཱཧ –

‘‘ཨལཏྟཀཀཏཱ པཱདཱ, པཱདུཀཱརུཡ྄ཧ ཝེསིཡཱ;

ཨུབྷོཔི པབྦཛིསྶཱམ, ཛིཎྞཱ དཎྜཔརཱཡཎཱ’’ཏི. (ཐེརགཱ. ༤༥༩, ༤༦༢);

ཐེརསྶ ¶ ‘‘ཨཧོ ཝཏ མེ བྷཱརིཡཾ ཨནུཔདྷཱརེཏྭཱ ཀཏཀམྨ’’ནྟི མཧཱསཾཝེགོ ཨུདཔཱདི. ཏསྨིཾ ཁཎེ སཏྠཱ པཉྩཙཏྟཱལཱིསཡོཛནམཏྠཀེ ཛེཏཝནེ ནིསིནྣོཝ ཏཾ ¶ ཀཱརཎཾ དིསྭཱ སིཏཾ པཱཏྭཱཀཱསི. ཨཐ ནཾ ཨཱནནྡཏྠེརོ པུཙྪི – ‘‘བྷནྟེ, ཀོ ནུ ཁོ ཧེཏུ, ཀོ པཙྩཡོ སིཏསྶ པཱཏུཀམྨཱཡཱ’’ཏི. ཨཱནནྡ, རཱཛགཧནགརེ སཏྟབྷཱུམིཀཔཱསཱདཏལེ སུནྡརསམུདྡསྶ ཙ བྷིཀྑུནོ གཎིཀཱཡ ཙ སངྒཱམོ ཝཏྟཏཱིཏི. ཀསྶ ནུ ཁོ, བྷནྟེ, ཛཡོ བྷཝིསྶཏི, ཀསྶ པརཱཛཡོཏི? སཏྠཱ, ‘‘ཨཱནནྡ, སུནྡརསམུདྡསྶ ཛཡོ བྷཝིསྶཏི, གཎིཀཱཡ པརཱཛཡོ’’ཏི ཐེརསྶ ཛཡཾ པཀཱསེཏྭཱ ཏཏྠ ནིསིནྣཀོཝ ཨོབྷཱསཾ ཕརིཏྭཱ ‘‘བྷིཀྑུ ཨུབྷོཔི ཀཱམེ ནིརཔེཀྑོ པཛཧཱ’’ཏི ཝཏྭཱ ཨིམཾ གཱཐམཱཧ –

‘‘ཡོདྷ ཀཱམེ པཧནྟྭཱན, ཨནཱགཱརོ པརིབྦཛེ;

ཀཱམབྷཝཔརིཀྑཱིཎཾ, ཏམཧཾ བྲཱུམི བྲཱཧྨཎ’’ནྟི.

ཏསྶཏྠོ – ཡོ པུགྒལོ ཨིདྷ ལོཀེ ཨུབྷོཔི ཀཱམེ ཧིཏྭཱ ཨནཱགཱརོ ཧུཏྭཱ པརིབྦཛཏི, ཏཾ པརིཀྑཱིཎཀཱམཉྩེཝ པརིཀྑཱིཎབྷཝཉྩ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ སོ ཐེརོ ཨརཧཏྟཾ པཏྭཱ ཨིདྡྷིབལེན ཝེཧཱསཾ ཨབྦྷུགྒནྟྭཱ ཀཎྞིཀཱམཎྜལཾ ཝིནིཝིཛ྄ཛྷིཏྭཱ སཏྠུ སརཱིརཾ ཐོམེནྟོཡེཝ ཨཱགནྟྭཱ སཏྠཱརཾ ཝནྡི. དྷམྨསབྷཱཡམྤི ཀཐཾ སམུཊྛཱཔེསུཾ, ‘‘ཨཱཝུསོ, ཛིཝ྄ཧཱཝིཉྙེཡྻཾ རསཾ ནིསྶཱཡ མནཾ ནཊྛོ སུནྡརསམུདྡཏྠེརོ, སཏྠཱ པནསྶ ཨཝསྶཡོ ཛཱཏོ’’ཏི. སཏྠཱ ཏཾ ཀཐཾ སུཏྭཱ ‘‘ན, བྷིཀྑཝེ, ཨིདཱནེཝ, པུབྦེཔཱཧཾ ཨེཏསྶ རསཏཎྷཱཡ བདྡྷམནསྶ ཨཝསྶཡོ ཛཱཏོཡེཝཱ’’ཏི ཝཏྭཱ ཏེཧི ཡཱཙིཏོ ཏསྶཏྠསྶ པཀཱསནཏྠཾ ཨཏཱིཏཾ ཨཱཧརིཏྭཱ –

ཝསམཱནེསི རསེཧི སཉྫཡོ’’ཏི. (ཛཱ. ༡.༡.༡༤) –

ཨེཀཀནིཔཱཏེ ¶ ཨིམཾ ཝཱཏམིགཛཱཏཀཾ ཝིཏྠཱརེཏྭཱ ‘‘ཏདཱ སུནྡརསམུདྡོ ཝཱཏམིགོ ཨཧོསི, ཨིམཾ པན གཱཐཾ ཝཏྭཱ ཏསྶ ཝིསྶཛྫཱཔེཏཱ རཉྙོ མཧཱམཙྩོ ཨཧམེཝཱ’’ཏི ཛཱཏཀཾ སམོདྷཱནེསཱིཏི.

སུནྡརསམུདྡཏྠེརཝཏྠུ བཏྟིཾསཏིམཾ.

ཡོདྷ ཏཎྷནྟི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཛཊིལཏྠེརཾ ཨཱརབྦྷ ཀཐེསི.

ཏཏྲཱཡཾ ཨནུཔུབྦཱི ཀཐཱ – ཨཏཱིཏེ ཀིར བཱརཱཎསིཡཾ དྭེ བྷཱཏརོ ཀུཊུམྦིཀཱ མཧནྟཾ ཨུཙྪུཁེཏྟཾ ཀཱརེསུཾ. ཨཐེཀདིཝསཾ ཀནིཊྛབྷཱཏཱ ཨུཙྪུཁེཏྟཾ གནྟྭཱ ‘‘ཨེཀཾ ཛེཊྛབྷཱཏིཀསྶ དསྶཱམི, ཨེཀཾ མཡ྄ཧཾ བྷཝིསྶཏཱི’’ཏི དྭེ ཨུཙྪུཡཊྛིཡོ རསསྶ ཨནིཀྑམནཏྠཱཡ ཚིནྣཊྛཱནེ བནྡྷིཏྭཱ གཎྷི. ཏདཱ ཀིར ཨུཙྪཱུནཾ ཡནྟེན པཱིལ༹ནཀིཙྩཾ ནཏྠི, ཨགྒེ ཝཱ མཱུལེ ཝཱ ཚིནྡིཏྭཱ ཨུཀྑིཏྟཀཱལེ དྷམྨཀརཎཏོ ཨུདཀཾ ཝིཡ སཡམེཝ རསོ ནིཀྑམཏི. ཏསྶ པན ཁེཏྟཏོ ཨུཙྪུཡཊྛིཡོ གཧེཏྭཱ ཨཱགམནཀཱལེ ¶ གནྡྷམཱདནེ པཙྩེཀབུདྡྷོ སམཱཔཏྟིཏོ ཝུཊྛཱཡ ‘‘ཀསྶ ནུ ཁོ ཨཛྫ ཨནུགྒཧཾ ཀརིསྶཱམཱི’’ཏི ཨུཔདྷཱརེནྟོ ཏཾ ཨཏྟནོ ཉཱཎཛཱལེ པཝིཊྛཾ དིསྭཱ སངྒཧཾ ཀཱཏུཾ སམཏྠབྷཱཝཉྩ ཉཏྭཱ པཏྟཙཱིཝརཾ ཨཱདཱཡ ཨིདྡྷིཡཱ ཨཱགནྟྭཱ ཏསྶ པུརཏོ ཨཊྛཱསི. སོ ཏཾ དིསྭཱཝ པསནྣཙིཏྟོ ཨུཏྟརསཱཊཀཾ ཨུཙྩཏརེ བྷཱུམིཔདེསེ ཨཏྠརིཏྭཱ, ‘‘བྷནྟེ, ཨིདྷ ནིསཱིདཐཱ’’ཏི པཙྩེཀབུདྡྷཾ ནིསཱིདཱཔེཏྭཱ ‘‘པཏྟཾ ཨུཔནཱམེཐཱ’’ཏི ཨུཙྪུཡཊྛིཡཱ བནྡྷནཊྛཱནཾ མོཙེཏྭཱ པཏྟསྶ ཨུཔརི ཨཀཱསི, རསོ ཨོཏརིཏྭཱ པཏྟཾ པཱུརེསི. པཙྩེཀབུདྡྷེན ཏསྨིཾ རསེ པཱིཏེ ‘‘སཱདྷུཀཾ ཝཏ མེ ཨཡྻེན རསོ པཱིཏོ. སཙེ མེ ཛེཊྛབྷཱཏིཀོ མཱུལཾ ཨཱཧརཱཔེསྶཏི, མཱུལཾ དསྶཱམི. སཙེ པཏྟིཾ ཨཱཧརཱཔེསྶཏི, པཏྟིཾ དསྶཱམཱི’’ཏི ཙིནྟེཏྭཱ, ‘‘བྷནྟེ, པཏྟཾ མེ ཨུཔནཱམེཐཱ’’ཏི དུཏིཡམྤི ཨུཙྪུཡཊྛིཾ མོཙེཏྭཱ རསཾ ཨདཱསི. ‘‘བྷཱཏཱ མེ ཨུཙྪུཁེཏྟཏོ ཨཉྙཾ ཨུཙྪུཾ ཨཱཧརིཏྭཱ ཁཱདིསྶཏཱི’’ཏི ཨེཏྟཀམྤི ཀིརསྶ ཝཉྩནཙིཏྟཾ ནཱཧོསི. པཙྩེཀབུདྡྷོ པན པཋམཾ ཨུཙྪུརསསྶ པཱིཏཏྟཱ ཏཾ ཨུཙྪུརསཾ ¶ ཨཉྙེཧིཔི སདྡྷིཾ སཾཝིབྷཛིཏུཀཱམོ ཧུཏྭཱ གཧེཏྭཱཝ ནིསཱིདི ¶ . སོ ཏསྶ ཨཱཀཱརཾ ཉཏྭཱ པཉྩཔཏིཊྛིཏེན ཝནྡིཏྭཱ, ‘‘བྷནྟེ, ཡོ ཨཡཾ མཡཱ དིནྣོ ཨགྒརསོ, ཨིམསྶ ནིསྶནྡེན དེཝམནུསྶེསུ སམྤཏྟིཾ ཨནུབྷཝིཏྭཱ པརིཡོསཱནེ ཏུམྷེཧི པཏྟདྷམྨམེཝ པཱཔུཎེཡྻ’’ནྟི པཏྠནཾ པཊྛཔེསི. པཙྩེཀབུདྡྷོཔིསྶ ‘‘ཨེཝཾ ཧོཏཱུ’’ཏི ཝཏྭཱ ‘‘ཨིཙྪིཏཾ པཏྠིཏཾ ཏུཡ྄ཧ’’ནྟི དྭཱིཧི གཱཐཱཧི ཨནུམོདནཾ ཀཏྭཱ ཡཐཱ སོ པསྶཏི, ཨེཝཾ ཨདྷིཊྛཧིཏྭཱ ཨཱཀཱསེན ¶ གནྡྷམཱདནཾ གནྟྭཱ པཉྩནྣཾ པཙྩེཀབུདྡྷསཏཱནཾ ཏཾ རསཾ ཨདཱསི.

སོ ཏཾ པཱཊིཧཱརིཡཾ དིསྭཱ བྷཱཏུ སནྟིཀཾ གནྟྭཱ ‘‘ཀཧཾ གཏོསཱི’’ཏི ཝུཏྟེ ‘‘ཨུཙྪུཁེཏྟཾ ཨོལོཀེཏུཾ གཏོམྷཱི’’ཏི. ‘‘ཀིཾ ཏཱདིསེན ཨུཙྪུཁེཏྟཾ གཏེན, ནནུ ནཱམ ཨེཀཾ ཝཱ དྭེ ཝཱ ཨུཙྪུཡཊྛིཡོ ཨཱདཱཡ ཨཱགནྟབྦཾ བྷཝེཡྻཱ’’ཏི བྷཱཏརཱ ཝུཏྟོ – ‘‘ཨཱམ, བྷཱཏིཀ, དྭེ མེ ཨུཙྪུཡཊྛིཡོ གཧིཏཱ, ཨེཀཾ པན པཙྩེཀབུདྡྷཾ དིསྭཱ མམ ཨུཙྪུཡཊྛིཏོ རསཾ དཏྭཱ ‘མཱུལཾ ཝཱ པཏྟིཾ ཝཱ དསྶཱམཱི’ཏི ཏུམྷཱཀམྤི མེ ཨུཙྪུཡཊྛིཏོ རསོ དིནྣོ, ཀིཾ ནུ ཁོ ཏསྶ མཱུལཾ གཎྷིསྶཐ, ཨུདཱཧུ པཏྟི’’ནྟི ཨཱཧ. ‘‘ཀིཾ པན པཙྩེཀབུདྡྷེན ཀཏ’’ནྟི? ‘‘མམ ཨུཙྪུཡཊྛིཏོ རསཾ པིཝིཏྭཱ ཏུམྷཱཀཾ ཨུཙྪུཡཊྛིཏོ རསཾ ཨཱདཱཡ ཨཱཀཱསེན གནྡྷམཱདནཾ གནྟྭཱ པཉྩསཏཱནཾ པཙྩེཀབུདྡྷཱནཾ ཨདཱསཱི’’ཏི. སོ ཏསྨིཾ ཀཐེནྟེཡེཝ ནིརནྟརཾ པཱིཏིཡཱ ཕུཊྛསརཱིརོ ཧུཏྭཱ ‘‘ཏེན མེ པཙྩེཀབུདྡྷེན དིཊྛདྷམྨསྶེཝ ཨདྷིགམོ བྷཝེཡྻཱ’’ཏི པཏྠནཾ ཨཀཱསི. ཨེཝཾ ཀནིཊྛེན ཏིསྶོ སམྤཏྟིཡོ པཏྠིཏཱ, ཛེཊྛེན པན ཨེཀཔདེནེཝ ཨརཧཏྟཾ པཏྠིཏནྟི ཨིདཾ ཏེསཾ པུབྦཀམྨཾ.

ཏེ ཡཱཝཏཱཡུཀཾ ཋཏྭཱ ཏཏོ ཙུཏཱ དེཝལོཀེ ནིབྦཏྟིཏྭཱ ཨེཀཾ བུདྡྷནྟརཾ ཁེཔཡིཾསུ. ཏེསཾ དེཝལོཀེ ཋིཏཀཱལེཡེཝ ཝིཔསྶཱི སམྨཱསམྦུདྡྷོ ལོཀེ ཨུཔྤཛྫི. ཏེཔི དེཝལོཀཏོ ཙཝིཏྭཱ བནྡྷུམཏིཡཱ ཨེཀསྨིཾ ཀུལགེཧེ ཛེཊྛོ ཛེཊྛོཝ, ཀནིཊྛོ ཀནིཊྛོཝ ཧུཏྭཱ པཊིསནྡྷིཾ གཎྷིཾསུ. ཏེསུ ཛེཊྛསྶ སེནོཏི ནཱམཾ ཨཀཾསུ, ཀནིཊྛསྶ ཨཔརཱཛིཏོཏི ¶ . ཏེསུ ཝཡཔྤཏྟཀཱལེ ཀུཊུམྦཾ སཎྛཱཔེཏྭཱ ཝིཧརནྟེསུ ‘‘བུདྡྷརཏནཾ ལོཀེ ཨུཔྤནྣཾ, དྷམྨརཏནཾ, སངྒྷརཏནཾ, དཱནཱནི དེཐ, པུཉྙཱནི ཀརོཐ, ཨཛྫ ཨཊྛམཱི, ཨཛྫ ཙཱཏུདྡསཱི, ཨཛྫ པནྣརསཱི, ཨུཔོསཐཾ ཀརོཐ, དྷམྨཾ ¶ སུཎཱཐཱ’’ཏི དྷམྨགྷོསཀསྶ བནྡྷུམཏཱིནགརེ གྷོསནཾ སུཏྭཱ མཧཱཛནཾ པུརེབྷཏྟཾ དཱནཾ དཏྭཱ པཙྪཱབྷཏྟཾ དྷམྨསྶཝནཱཡ གཙྪནྟཾ དིསྭཱ སེནཀུཊུམྦིཀོ ‘‘ཀཧཾ གཙྪཐཱ’’ཏི པུཙྪིཏྭཱ ‘‘སཏྠུ སནྟིཀཾ དྷམྨསྶཝནཱཡཱ’’ཏི ཝུཏྟེ ‘‘ཨཧམྤི གམིསྶཱམཱི’’ཏི ཏེཧི སདྡྷིཾཡེཝ གནྟྭཱ པརིསཔརིཡནྟེ ནིསཱིདི.

སཏྠཱ ཏསྶ ཨཛ྄ཛྷཱསཡཾ ཝིདིཏྭཱ ཨནུཔུབྦིཾ ཀཐཾ ཀཐེསི. སོ སཏྠུ དྷམྨཾ སུཏྭཱ པབྦཛྫཱཡ ཨུསྶཱཧཛཱཏོ སཏྠཱརཾ པབྦཛྫཾ ཡཱཙི. ཨཐ ནཾ སཏྠཱ ‘‘ཨཏྠི པན ཏེ ཨཔལོཀེཏབྦཱ ¶ ཉཱཏཀཱ’’ཏི པུཙྪི. ཨཏྠི, བྷནྟེཏི. ཏེན ཧི ཨཔལོཀེཏྭཱ ཨེཧཱིཏི. སོ ཀནིཊྛསྶ སནྟིཀཾ གནྟྭཱ ‘‘ཡཾ ཨིམསྨིཾ ཀུལེ སཱཔཏེཡྻཾ, ཏཾ སབྦཾ ཏཝ ཧོཏཱུ’’ཏི ཨཱཧ. ཏུམྷེ པན, སཱམཱིཏི. ཨཧཾ སཏྠུ སནྟིཀེ པབྦཛིསྶཱམཱིཏི. སཱམི ཀིཾ ཝདེཐ, ཨཧཾ མཱཏརི མཏཱཡ མཱཏརཾ ཝིཡ, པིཏརི མཏེ པིཏརཾ ཝིཡ ཏུམྷེ ཨལཏྠཾ, ཨིདཾ ཀུལཾ མཧཱབྷོགཾ, གེཧེ ཋིཏེནེཝ སཀྐཱ པུཉྙཱནི ཀཱཏུཾ, མཱ ཨེཝཾ ཀརིཏྠཱཏི. མཡཱ སཏྠུ སནྟིཀེ དྷམྨོ སུཏོ, ན སཀྐཱ ཏཾ ཨགཱརམཛ྄ཛྷེ ཋིཏེན པཱུརེཏུཾ, པབྦཛིསྶཱམེཝཱཧཾ, ཏྭཾ ནིཝཏྟཱཧཱིཏི. ཨེཝཾ སོ ཀནིཊྛཾ ནིཝཏྟཱཔེཏྭཱ སཏྠུ སནྟིཀེ པབྦཛིཏྭཱ ལདྡྷཱུཔསམྤདོ ན ཙིརསྶེཝ ཨརཧཏྟཾ པཱཔུཎི. ཀནིཊྛོཔི ‘‘བྷཱཏུ པབྦཛིཏསཀྐཱརཾ ཀརིསྶཱམཱི’’ཏི སཏྟཱཧཾ བུདྡྷཔྤམུཁསྶ བྷིཀྑུསངྒྷསྶ དཱནཾ དཏྭཱ བྷཱཏརཾ ¶ ཝནྡིཏྭཱ ཨཱཧ – ‘‘བྷནྟེ, ཏུམྷེཧི ཨཏྟནོ བྷཝནིསྶརཎཾ ཀཏཾ, ཨཧཾ པན པཉྩཧི ཀཱམགུཎེཧི བདྡྷོ ནིཀྑམིཏྭཱ པབྦཛིཏུཾ ན སཀྐོམི, མཡ྄ཧཾ གེཧེ ཋིཏསྶེཝ ཨནུཙྪཝིཀཾ མཧནྟཾ པུཉྙཀམྨཾ ཨཱཙིཀྑཐཱ’’ཏི. ཨཐ ནཾ ཐེརོ ‘‘སཱདྷུ སཱདྷུ, པཎྜིཏ, སཏྠུ གནྡྷཀུཊིཾ ཀརོཧཱི’’ཏི ཨཱཧ. སོ ‘‘སཱདྷཱུ’’ཏི སམྤཊིཙྪིཏྭཱ ནཱནཱདཱརཱུནི ཨཱཧརཱཔེཏྭཱ ཐམྦྷཱདཱིནཾ ཨཏྠཱཡ ཏཙྪཱཔེཏྭཱ ཨེཀཾ སུཝཎྞཁཙིཏཾ, ཨེཀཾ རཛཏཁཙིཏཾ, ཨེཀཾ མཎིཁཙིཏནྟི སབྦཱནི སཏྟརཏནཁཙིཏཱནི ཀཱརེཏྭཱ ཏེཧི གནྡྷཀུཊིཾ ཀཱརེཏྭཱ སཏྟརཏནཁཙིཏཱཧེཝ ཚདནིཊྛཀཱཧི ཚཱདཱཔེསི. གནྡྷཀུཊིཡཱ ཀརཎཀཱལེཡེཝ པན ཏཾ ཨཏྟནཱ སམཱནནཱམཀོ ཨཔརཱཛིཏོཡེཝ ནཱམ བྷཱགིནེཡྻོ ཨུཔསངྐམིཏྭཱ ‘‘ཨཧམྤི ཀརིསྶཱམི, མཡ྄ཧམྤི པཏྟིཾ དེཐ མཱཏུལཱ’’ཏི ཨཱཧ. ན དེམི, ཏཱཏ, ཨཉྙེཧི ཨསཱདྷཱརཎཾ ཀརིསྶཱམཱིཏི. སོ བཧུམྤི ཡཱཙིཏྭཱ པཏྟིཾ ཨལབྷམཱནོ ‘‘གནྡྷཀུཊིཡཱ པུརཏོ ཀུཉྫརསཱལཾ ལདྡྷུཾ ཝཊྚཏཱི’’ཏི སཏྟརཏནམཡཾ ཀུཉྫརསཱལཾ ཀཱརེསི. སོ ཨིམསྨིཾ བུདྡྷུཔྤཱདེ མེཎྜཀསེཊྛི ཧུཏྭཱ ནིབྦཏྟི.

གནྡྷཀུཊིཡཾ ¶ པན སཏྟརཏནམཡཱནི ཏཱིཎི མཧཱཝཱཏཔཱནཱནི ཨཧེསུཾ. ཏེསཾ ཨབྷིམུཁེ ཧེཊྛཱ སུདྷཱཔརིཀམྨཀཏཱ ཏིསྶོ པོཀྑརཎིཡོ ཀཱརེཏྭཱ ཙཏུཛྫཱཏིཀགནྡྷོདཀསྶ པཱུརེཏྭཱ ཨཔརཱཛིཏོ, གཧཔཏི, པཉྩཝཎྞཱནི ཀུསུམཱནི རོཔཱཔེསི ཏཐཱགཏསྶ ཨནྟོ ནིསིནྣཀཱལེ ཝཱཏཝེགེན སམུཊྛིཏཱཧི རེཎུཝཊྚཱིཧི སརཱིརསྶ ཨོཀིརཎཏྠཾ. གནྡྷཀུཊིཐཱུཔིཀཱཡ ཀཔལླཾ རཏྟསུཝཎྞམཡཾ ཨཧོསི, པཝཱལ༹མཡཱ སིཁརཱ, ཧེཊྛཱ མཎིམཡཱ ཚདནིཊྛཀཱ. ཨིཏི སཱ ནཙྩནྟོ ཝིཡ མོརོ སོབྷམཱནཱ ཨཊྛཱསི. སཏྟསུ པན རཏནེསུ ཀོཊྚེཏབྦཡུཏྟཀཾ ཀོཊྚེཏྭཱ ཨིཏརཾ སཀལམེཝ ¶ གཧེཏྭཱ ཛཎྞུམཏྟེན ཨོདྷིནཱ གནྡྷཀུཊིཾ པརིཀྑིཔིཏྭཱ པརིཝེཎཾ པཱུརེསི.

ཨེཝཾ གནྡྷཀུཊིཾ ནིཊྛཱཔེཏྭཱ ཨཔརཱཛིཏོ, གཧཔཏི, བྷཱཏིཀཏྠེརཾ ཨུཔསངྐམིཏྭཱ ཨཱཧ – ‘‘བྷནྟེ, ནིཊྛིཏཱ གནྡྷཀུཊི, པརིབྷོགམསྶཱ པཙྩཱསཱིསཱམི, པརིབྷོགེན ཀིར མཧནྟཾ པུཉྙཾ ཧོཏཱི’’ཏི ¶ . སོ སཏྠཱརཾ ཨུཔསངྐམིཏྭཱ, ‘‘བྷནྟེ, ཨིམིནཱ ཀིར ཝོ ཀུཊུམྦིཀེན གནྡྷཀུཊི ཀཱརིཏཱ, ཨིདཱནི པན པརིབྷོགཾ པཙྩཱསཱིསཏཱི’’ཏི ཨཱཧ. སཏྠཱ ཨུཊྛཱཡཱསནཱ གནྡྷཀུཊིཨབྷིམུཁཾ གནྟྭཱ གནྡྷཀུཊིཾ པརིཀྑིཔིཏྭཱ པརིཀྑིཏྟརཏནརཱསིཾ ཨོལོཀེནྟོ དྭཱརཀོཊྛཀེ ཨཊྛཱསི. ཨཐ ནཾ ཀུཊུམྦིཀོ ‘‘པཝིསཐ, བྷནྟེ’’ཏི ཨཱཧ. སཏྠཱ ཏཏྠེཝ ཋཏྭཱ ཏཏིཡཝཱརེ ཏསྶ བྷཱཏིཀཏྠེརཾ ཨོལོཀེསི. སོ ཨོལོཀིཏཱཀཱརེནེཝ ཉཏྭཱ ཀནིཊྛབྷཱཏརཾ ཨཱཧ – ‘‘ཨེཧི, ཏཱཏ, ‘མམེཝ རཀྑཱ བྷཝིསྶཏི, ཏུམྷེ ཡཐཱསུཁཾ ཝསཐཱ’ཏི སཏྠཱརཾ ཝདེཧཱི’’ཏི. སོ ཏསྶ ཝཙནཾ སུཏྭཱ སཏྠཱརཾ པཉྩཔཏིཊྛིཏེན ཝནྡིཏྭཱ, ‘‘བྷནྟེ, ཡཐཱ མནུསྶཱ རུཀྑམཱུལེ པཝིསིཏྭཱ ཨནཔེཀྑཱ པཀྐམནྟི, ཡཐཱ ཝཱ ནདིཾ ཏརིཏྭཱ ཨུལུ༹མྤཾ ཨནཔེཀྑཱ པརིཙྩཛནྟི, ཨེཝཾ ཨནཔེཀྑཱ ཧུཏྭཱ ཏུམྷེ ཝསཐཱ’’ཏི ཨཱཧ. ཀིམཏྠཾ པན སཏྠཱ ཨཊྛཱསི? ཨེཝཾ ཀིརསྶ ཨཧོསི – ‘‘བུདྡྷཱནཾ སནྟིཀཾ པུརེབྷཏྟམྤི པཙྪཱབྷཏྟམྤི བཧཱུ ཨཱགཙྪནྟི, ཏེསུ རཏནཱནི ཨཱདཱཡ པཀྐམནྟེསུ ན སཀྐཱ ཨམྷེཧི ཝཱརེཏུཾ, པརིཝེཎམྷི ཨེཏྟཀེ རཏནེ ཝོཀིཎྞེ ཨཏྟནོ ཨུཔཊྛཱཀེ ཧརནྟེཔི ན ཝཱརེཏཱིཏི ཀུཊུམྦིཀོ མཡི ཨཱགྷཱཏཾ ཀཏྭཱ ཨཔཱཡཱུཔགོ བྷཝེཡྻཱ’’ཏི ཨིམིནཱ ཀཱརཎེན ཨཊྛཱསི. ཏེན པན ¶ , ‘‘བྷནྟེ, མམེཝ རཀྑཱ བྷཝིསྶཏི, ཏུམྷེ ཝསཐཱ’’ཏི ཝུཏྟེ པཱཝིསི.

ཀུཊུམྦིཀོ ¶ སམནྟཱ རཀྑཾ ཋཔེཏྭཱ མནུསྶེ ཨཱཧ – ‘‘ཏཱཏཱ, ཨུཙྪངྒེན ཝཱ པཙྪིཔསིབྦཀེཧི ཝཱ ཨཱདཱཡ གཙྪནྟེ ཝཱརེཡྻཱཐ, ཧཏྠེན གཧེཏྭཱ གཙྪནྟེ པན མཱ ཝཱརཡིཏྠཱ’’ཏི. ཨནྟོནགརེཔི ཨཱརོཙཱཔེསི ‘‘མཡཱ གནྡྷཀུཊིཔརིཝེཎེ སཏྟ རཏནཱནི ཨོཀིཎྞཱནི, སཏྠུ སནྟིཀེ དྷམྨཾ སུཏྭཱ གཙྪནྟཱ དུགྒཏམནུསྶཱ ཨུབྷོ ཧཏྠེ པཱུརེཏྭཱ གཎྷནྟུ, སུཁིཏཱཔི ཨེཀེན གཎྷནྟཱུ’’ཏི. ཨེཝཾ ཀིརསྶ ཨཧོསི ‘‘སདྡྷཱ ཏཱཝ དྷམྨཾ སོཏུཀཱམཱ གམིསྶནྟིཡེཝ, ཨསྶདྡྷཱཔི པན དྷནལོབྷེན གནྟྭཱ དྷམྨཾ སུཏྭཱ དུཀྑཏོ མུཙྩིསྶནྟཱི’’ཏི. ཏསྨཱ ཛནསངྒཧཏྠཱཡ ཨེཝཾ ཨཱརོཙཱཔེསི. མཧཱཛནོ ཏེན ཝུཏྟནིཡཱམེནེཝ རཏནཱནི གཎྷི. སཀིཾ ཨོཀིཎྞརཏནེསུ ཁཱིཎེསུ ཡཱཝཏཏིཡཾ ཛཎྞུམཏྟེན ཨོདྷིནཱ ཨོཀིརཱཔེསིཡེཝ. སཏྠུ པན པཱདམཱུལེ ཏིཔུསམཏྟཾ ཨནགྒྷཾ མཎིརཏནཾ ཋཔེསི. ཨེཝཾ ཀིརསྶ ཨཧོསི – ‘‘སཏྠུ སརཱིརཏོ སུཝཎྞཝཎྞཱཡ པབྷཱཡ སདྡྷིཾ མཎིཔབྷཾ ཨོལོཀེནྟཱནཾ ཏིཏྟི ནཱམ ན བྷཝིསྶཏཱི’’ཏི. ཏསྨཱ ཨེཝམཀཱསི. མཧཱཛནོཔི ཨཏིཏྟོཝ ཨོལོཀེསི.

ཨཐེཀདིཝསཾ ཨེཀོ མིཙྪཱདིཊྛིཀབྲཱཧྨཎོ ‘‘སཏྠུ ཀིར པཱདམཱུལེ མཧགྒྷཾ མཎིརཏནཾ ནིཀྑིཏྟཾ, ཧརིསྶཱམི ན’’ནྟི ཝིཧཱརཾ གནྟྭཱ སཏྠཱརཾ ཝནྡིཏུཾ ཨཱགཏསྶ མཧཱཛནསྶ ཨནྟརེན པཱཝིསི. ཀུཊུམྦིཀོ ཏསྶ པཝིསནཱཀཱརེནེཝ ¶ ‘‘མཎིཾ གཎྷིཏུཀཱམོ’’ཏི སལླཀྑེཏྭཱ ‘‘ཨཧོ ཝཏ ན གཎྷེཡྻཱ’’ཏི ཙིནྟེསི. སོཔི སཏྠཱརཾ ཝནྡནྟོ ཝིཡ པཱདམཱུལེ ཧཏྠཾ ཨུཔནཱམེཏྭཱ མཎིཾ གཧེཏྭཱ ¶ ཨོཝཊྚིཀཱཡ ཀཏྭཱ པཀྐཱམི. ཀུཊུམྦིཀོ ཏསྨིཾ ཙིཏྟཾ པསཱདེཏུཾ ནཱསཀྑི. སོ དྷམྨཀཐཱཝསཱནེ སཏྠཱརཾ ཨུཔསངྐམིཏྭཱ ཨཱཧ – ‘‘བྷནྟེ, མཡཱ ཏིཀྑཏྟུཾ གནྡྷཀུཊིཾ པརིཀྑིཔིཏྭཱ ཛཎྞུམཏྟེན ཨོདྷིནཱ སཏྟ རཏནཱནི ཨོཀིཎྞཱནི, ཏཱནི མེ གཎྷནྟེསུ ཨཱགྷཱཏོ ནཱམ ནཱཧོསི, ཙིཏྟཾ བྷིཡྻོ བྷིཡྻོ པསཱིདིཡེཝ. ཨཛྫ པན ‘ཨཧོ ཝཏཱཡཾ བྲཱཧྨཎོ མཎིཾ ན གཎྷེཡྻཱ’ཏི ཙིནྟེཏྭཱ ཏསྨིཾ མཎིཾ ཨཱདཱཡ གཏེ ཙིཏྟཾ པསཱདེཏུཾ ནཱསཀྑི’’ནྟི. སཏྠཱ ཏསྶ ཝཙནཾ སུཏྭཱ ‘‘ནནུ, ཨུཔཱསཀ, ཨཏྟནོ སནྟཀཾ པརེཧི ཨནཱཧརཎཱིཡཾ ཀཱཏུཾ སཀྐོསཱི’’ཏི ནཡཾ ཨདཱསི. སོ སཏྠཱརཱ དིནྣནཡེ ཋཏྭཱ སཏྠཱརཾ ཝནྡིཏྭཱ ‘‘ཨཛྫ ཨཱདིཾ ཀཏྭཱ མམ སནྟཀཾ དསིཀསུཏྟམཏྟམྤི མཾ ཨབྷིབྷཝིཏྭཱ ཨནེཀསཏཱཔི རཱཛཱནོ ཝཱ ཙོརཱ ཝཱ གཎྷིཏུཾ སམཏྠཱ ནཱམ མཱ ཧོནྟུ, ཨགྒིནཱཔི མམ སནྟཀཾ མཱ ཌཡ྄ཧཏུ, ཨུདཀེནཔི མཱ ཝུཡ྄ཧཏཱུ’’ཏི པཏྠནཾ ཨཀཱསི ¶ . སཏྠཱཔིསྶ ‘‘ཨེཝཾ ཧོཏཱུ’’ཏི ཨནུམོདནཾ ཨཀཱསི. སོ གནྡྷཀུཊིམཧཾ ཀརོནྟོ ཨཊྛསཊྛིཡཱ བྷིཀྑུསཏསཧསྶཱནཾ ཨནྟོཝིཧཱརེཡེཝ ནཝ མཱསེ མཧཱདཱནཾ དཏྭཱ དཱནཔརིཡོསཱནེ སབྦེསཾ ཏིཙཱིཝརཾ ཨདཱསི. སངྒྷནཝཀསྶ ཙཱིཝརསཱཊཀཱ སཧསྶགྒྷནཀཱ ཨཧེསུཾ.

སོ ཨེཝཾ ཡཱཝཏཱཡུཀཾ པུཉྙཱནི ཀརིཏྭཱ ཏཏོ ཙུཏོ དེཝལོཀེ ནིབྦཏྟིཏྭཱ ཨེཏྟཀཾ ཀཱལཾ དེཝམནུསྶེསུ སཾསརིཏྭཱ ཨིམསྨིཾ ¶ བུདྡྷུཔྤཱདེ རཱཛགཧེ ཨེཀསྨིཾ སེཊྛིཀུལེ པཊིསནྡྷིཾ གཧེཏྭཱ ཨཌྜྷམཱསཱདྷིཀེ ནཝ མཱསེ མཱཏུཀུཙྪིཡཾ ཝསི. ཛཱཏདིཝསེ པནསྶ སཀལནགརེ སབྦཱཝུདྷཱནི པཛྫལིཾསུ, སབྦེསཾ ཀཱཡརཱུལ༹ྷཱནི ཨཱབྷརཎཱནིཔི པཛྫལིཏཱནི ཝིཡ ཨོབྷཱསཾ མུཉྩིཾསུ, ནགརཾ ཨེཀཔཛྫོཏཾ ཨཧོསི. སེཊྛིཔི པཱཏོཝ རཱཛཱུཔཊྛཱནཾ ཨགམཱསི. ཨཐ ནཾ རཱཛཱ པུཙྪི – ‘‘ཨཛྫ སབྦཱཝུདྷཱནི པཛྫལིཾསུ, ནགརཾ ཨེཀཔཛྫོཏཾ ཛཱཏཾ, ཛཱནཱསི ནུ ཁོ ཨེཏྠ ཀཱརཎ’’ནྟི? ‘‘ཛཱནཱམི, དེཝཱ’’ཏི. ‘‘ཀིཾ, སེཊྛཱི’’ཏི? ‘‘མམ གེཧེ ཏུམྷཱཀཾ དཱསོ ཛཱཏོ, ཏསྶ པུཉྙཏེཛེནེཝཾ ཨཧོསཱི’’ཏི. ‘‘ཀིཾ ནུ ཁོ ཙོརོ བྷཝིསྶཏཱི’’ཏི? ‘‘ནཏྠེཏཾ, དེཝ, པུཉྙཝཱ སཏྟོ ཀཏཱབྷིནཱིཧཱརོ’’ཏི. ‘‘ཏེན ཧི ནཾ སམྨཱ པོསེཏུཾ ཝཊྚཏི, ཨིདམསྶ ཁཱིརམཱུལཾ ཧོཏཱུ’’ཏི དེཝསིཀཾ སཧསྶཾ པཊྛཔེསི. ཨཐསྶ ནཱམགཧཎདིཝསེ སཀལནགརསྶ ཨེཀཔཛྫོཏབྷཱུཏཏྟཱ ཛོཏིཀོཏྭེཝ ནཱམཾ ཀརིཾསུ.

ཨཐསྶ ཝཡཔྤཏྟཀཱལེ གེཧཀརཎཏྠཱཡ བྷཱུམིཏལེ སོདྷིཡམཱནེ སཀྐསྶ བྷཝནཾ ཨུཎྷཱཀཱརཾ དསྶེསི. སཀྐོ ‘‘ཀིཾ ནུ ཁོ ཨིད’’ནྟི ཨུཔདྷཱརཡམཱནོ ‘‘ཛོཏིཀསྶ གེཧཊྛཱནཾ གཎྷནྟཱི’’ཏི ཉཏྭཱ ‘‘ནཱཡཾ ཨེཏེཧི ཀཏགེཧེ ཝསིསྶཏི, མཡཱཔེཏྠ གནྟུཾ ཝཊྚཏཱི’’ཏི ཝཌྜྷཀཱིཝེསེན ཏཏྠ གནྟྭཱ ‘‘ཀིཾ ཀརོཐཱ’’ཏི ཨཱཧ. ‘‘ཛོཏིཀསྶ གེཧཊྛཱནཾ གཎྷཱམཱ’’ཏི. ‘‘ཨཔེཐ, ནཱཡཾ ཏུམྷེཧི ཀཏགེཧེ ཝསིསྶཏཱི’’ཏི ཝཏྭཱ སོལ༹སཀརཱིསམཏྟཾ ¶ བྷཱུམིཔདེསཾ ཨོལོཀེསི, སོ ཏཱཝདེཝ ཀསིཎམཎྜལཾ ¶ ཝིཡ སམོ ཨཧོསི. པུན ‘‘ཨིམསྨིཾ ཋཱནེ པཐཝིཾ བྷིནྡིཏྭཱ སཏྟརཏནམཡོ སཏྟབྷཱུམིཀཔཱསཱདོ ཨུཊྛཧཏཱུ’’ཏི ཙིནྟེཏྭཱ ཨོལོཀེསི, ཏཱཝདེཝ ཏཐཱརཱུཔོ པཱསཱདོ ཨུཊྛཧི. པུན ‘‘ཨིམཾ པརིཀྑིཔིཏྭཱ སཏྟརཏནམཡཱ སཏྟ པཱཀཱརཱ ཨུཊྛཧནྟཱུ’’ཏི ཙིནྟེཏྭཱ ཨོལོཀེསི, ཏཐཱརཱུཔཱ པཱཀཱརཱ ཨུཊྛཧིཾསུ. ཨཐ ‘‘ནེསཾ པརིཡནྟེ ཀཔྤརུཀྑཱ ཨུཊྛཧནྟཱུ’’ཏི ཙིནྟེཏྭཱ ¶ ཨོལོཀེསི, ཏཐཱརཱུཔཱ ཀཔྤརུཀྑཱ ཨུཊྛཧིཾསུ. ‘‘པཱསཱདསྶ ཙཏཱུསུ ཀཎྞེསུ ཙཏསྶོ ནིདྷིཀུམྦྷིཡོ ཨུཊྛཧནྟཱུ’’ཏི ཙིནྟེཏྭཱ ཨོལོཀེསི, སབྦཾ ཏཐེཝ ཨཧོསི. ནིདྷིཀུམྦྷཱིསུ པན ཨེཀཱ ཡོཛནིཀཱ ཨཧོསི, ཨེཀཱ ཏིགཱཝུཏིཀཱ, ཨེཀཱ ཨཌྜྷཡོཛནིཀཱ, ཨེཀཱ གཱཝུཏཔྤམཱཎཱ. བོདྷིསཏྟསྶ ནིབྦཏྟནིདྷིཀུམྦྷཱིནཾ པན ཨེཀམུཁཔྤམཱཎཾ ཨཧོསི, ཧེཊྛཱ པཐཝཱིཔརིཡནྟཱཝ ཨཧེསུཾ. ཛོཏིཀསྶ ནིབྦཏྟནིདྷིཀུམྦྷཱིནཾ མུཁཔརིམཱཎཾ ན ཀཐིཏཾ, སབྦཱ མུཁཚིནྣཏཱལཕལཾ ཝིཡ པརིཔུཎྞཱཝ ཨུཊྛཧིཾསུ. པཱསཱདསྶ ཙཏཱུསུ ཀཎྞེསུ ཏརུཎཏཱལཀྑནྡྷཔྤམཱཎཱ ཙཏསྶོ སུཝཎྞམཡཱ ཨུཙྪུཡཊྛིཡོ ནིབྦཏྟིཾསུ. ཏཱསཾ མཎིམཡཱནི པཏྟཱནི, སོཝཎྞམཡཱནི ཁནྡྷཱནི ཨཧེསུཾ. པུབྦཀམྨསྶ དསྶནཏྠཾ ཀིརེཏཱནི, ནིབྦཏྟིཾསུ.

སཏྟསུ དྭཱརཀོཊྛཀེསུ སཏྟ ཡཀྑཱ ཨཱརཀྑཾ གཎྷིཾསུ. པཋམེ དྭཱརཀོཊྛཀེ ཡམཀོལཱི༹ ནཱམ ཡཀྑོ ཨཏྟནོ པརིཝཱརེན ཡཀྑསཧསྶེན སདྡྷིཾ ཨཱརཀྑཾ གཎྷི, དུཏིཡེ ¶ ཨུཔྤལོ ནཱམ ཨཏྟནོ པརིཝཱརཡཀྑཱནཾ དྭཱིཧི སཧསྶེཧི སདྡྷིཾ, ཏཏིཡེ ཝཛིརོ ནཱམ ཏཱིཧི སཧསྶེཧི སདྡྷིཾ, ཙཏུཏྠེ ཝཛིརབཱཧུ ནཱམ ཙཏཱུཧི སཧསྶེཧི སདྡྷིཾ, པཉྩམེ ཀསཀནྡོ ནཱམ པཉྩཧི སཧསྶེཧི སདྡྷིཾ, ཚཊྛེ ཀཊཏྠོ ནཱམ ཚཧི སཧསྶེཧི སདྡྷིཾ, སཏྟམེ དིསཱམུཁོ ནཱམ སཏྟཧི སཧསྶེཧི སདྡྷིཾ ཨཱརཀྑཾ གཎྷི. ཨེཝཾ པཱསཱདསྶ ཨནྟོ ཙ བཧི ཙ གཱལ༹ྷརཀྑཱ ཨཧོསི. ‘‘ཛོཏིཀསྶ ཀིར སཏྟརཏནམཡོ སཏྟབྷཱུམིཀཔཱསཱདོ ཨུཊྛིཏོ, སཏྟ པཱཀཱརཱ སཏྟདྭཱརཀོཊྛཀཱ ཙཏསྶོ ནིདྷིཀུམྦྷིཡོ ཨུཊྛིཏཱ’’ཏི སུཏྭཱ བིམྦིསཱརོ རཱཛཱ སེཊྛིཙྪཏྟཾ པཧིཎི. སོ ཛོཏིཀསེཊྛི ནཱམ ཨཧོསི.

ཏེན པན སདྡྷིཾ ཀཏཔུཉྙཀམྨཱ ཨིཏྠཱི ཨུཏྟརཀུརཱུསུ ནིབྦཏྟི. ཨཐ ནཾ དེཝཏཱ ཏཏོ ཨཱནེཏྭཱ སིརིགབྦྷེ ནིསཱིདཱཔེསུཾ. སཱ ཨཱགཙྪམཱནཱ ཨེཀཾ ཏཎྜུལནཱལི༹ཾ ཏཡོ ཙ ཛོཏིཔཱསཱཎེ གཎྷི. ཏེསཾ ཡཱཝཛཱིཝཾ ཏཱཡེཝ ཏཎྜུལནཱལི༹ཡཱ བྷཏྟཾ ཨཧོསི. སཙེ ཀིར ཏེ སཀཊསཏམྤི ཏཎྜུལཱནཾ པཱུརེཏུཀཱམཱ ཧོནྟི, སཱ ཏཎྜུལནཱལི༹ ནཱལི༹ཡེཝ ཧུཏྭཱ ཏིཊྛཏི. བྷཏྟཔཙནཀཱལེ ཏཎྜུལེ ཨུཀྑལིཡཾ པཀྑིཔིཏྭཱ ཏེསཾ པཱསཱཎཱནཾ ¶ ཨུཔརི ཋཔེཏི, པཱསཱཎཱ ཏཱཝདེཝ པཛྫལིཏྭཱ བྷཏྟེ པཀྐམཏྟེ ནིབྦཱཡནྟི. ཏེནེཝ སཉྙཱཎེན བྷཏྟསྶ པཀྐབྷཱཝཾ ཛཱནནྟི. སཱུཔེཡྻཱདིཔཙནཀཱལེཔི ཨེསེཝ ནཡོ. ཨེཝཾ ཏེསཾ ཛོཏིཔཱསཱཎེཧི ཨཱཧཱརོ པཙྩཏི. མཎིཨཱལོཀེན ¶ ཙ ཝསནྟི, ཨགྒིསྶ ཝཱ དཱིཔསྶ ¶ ཝཱ ཨོབྷཱསཾ ནེཝ ཛཱནིཾསུ. ‘‘ཛོཏིཀསྶ ཀིར ཨེཝརཱུཔཱ སམྤཏྟཱི’’ཏི སཀལཛམྦུདཱིཔེ པཱཀཊོ ཨཧོསི. མཧཱཛནོ ཡཱནཱདཱིནི ཡོཛེཏྭཱ དསྶནཏྠཱཡ ཨཱགཙྪཏི. ཛོཏིཀསེཊྛི ཨཱགཏཱགཏཱནཾ ཨུཏྟརཀུརུཏཎྜུལཱནཾ བྷཏྟཾ པཙཱཔེཏྭཱ དཱཔེསི. ‘‘ཀཔྤརུཀྑེཧི ཝཏྠཱནི གཎྷནྟུ, ཨཱབྷརཎཱནི གཎྷནྟཱུ’’ཏི ཨཱཎཱཔེསི. ‘‘གཱཝུཏིཀནིདྷིཀུམྦྷིཡཱ མུཁཾ ཝིཝརཱཔེཏྭཱ ཡཱཔནམཏྟཾ དྷནཾ གཎྷནྟཱུ’’ཏི ཨཱཎཱཔེསི. སཀལཛམྦུདཱིཔཝཱསིཀེསུ དྷནཾ གཧེཏྭཱ གཙྪནྟེསུ ནིདྷིཀུམྦྷིཡཱ ཨངྒུལིམཏྟམྤི ཨཱུནཾ ནཱཧོསི. གནྡྷཀུཊིཔརིཝེཎེ ཝཱལུཀཾ ཀཏྭཱ ཨོཀིཎྞརཏནཱནཾ ཀིརསྶ ཨེསོ ནིསྶནྡོ.

ཨེཝཾ མཧཱཛནེ ཝཏྠཱབྷརཎཱནི ཙེཝ དྷནཉྩ ཡདིཙྪཀཾ ཨཱདཱཡ གཙྪནྟེ བིམྦིསཱརོ ཏསྶ པཱསཱདཾ དཊྛུཀཱམོཔི མཧཱཛནེ ཨཱགཙྪནྟེ ཨོཀཱསཾ ནཱལཏྠ. ཨཔརབྷཱགེ ཡདིཙྪཀཾ ཨཱདཱཡ གཏཏྟཱ མནུསྶེསུ མནྡཱིབྷཱུཏེསུ རཱཛཱ ཛོཏིཀསྶ པིཏརཾ ཨཱཧ – ‘‘ཏཝ པུཏྟསྶ པཱསཱདཾ དཊྛུཀཱམམྷཱ’’ཏི. སོ ‘‘སཱདྷུ, དེཝཱ’’ཏི ཝཏྭཱ གནྟྭཱ པུཏྟསྶ ཀཐེསི – ‘‘ཏཱཏ, རཱཛཱ ཏེ པཱསཱདཾ དཊྛུཀཱམོ’’ཏི. ‘‘སཱདྷུ, ཏཱཏ, ཨཱགཙྪཏཱུ’’ཏི. རཱཛཱ མཧནྟེན པརིཝཱརེན ཏཏྠ ཨགམཱསི. པཋམདྭཱརཀོཊྛཀེ སམྨཛྫིཏྭཱ ཀཙཝརཚཌྜིཀཱ དཱསཱི རཉྙོ ཧཏྠཾ ཨདཱསི, རཱཛཱ ‘‘སེཊྛིཛཱཡཱ’’ཏི སཉྙཱཡ ལཛྫམཱནོ ཏསྶཱ བཱཧཱཡ ཧཏྠཾ ན ཋཔེསི. ཨེཝཾ སེསདྭཱརཀོཊྛཀེསུཔི ¶ དཱསིཡོ ‘‘སེཊྛིབྷརིཡཱཡོ’’ཏི མཉྙམཱནོ ཏཱསཾ བཱཧཱཡ ཧཏྠཾ ན ཋཔེསི. ཛོཏིཀོ ཨཱགནྟྭཱ རཱཛཱནཾ པཙྩུགྒནྟྭཱ ཝནྡིཏྭཱ པཙྪཏོ ཧུཏྭཱ ‘‘པུརཏོ ཡཱཐ, དེཝཱ’’ཏི ཨཱཧ. རཉྙོ མཎིཔཐཝཱི སཏཔོརིསཔཔཱཏོ ཝིཡ ཧུཏྭཱ ཨུཔཊྛཧི. སོ ‘‘ཨིམིནཱ མམ གཧཎཏྠཱཡ ཨོཔཱཏོ ཁཎིཏོ’’ཏི མཉྙམཱནོ པཱདཾ ནིཀྑིཔིཏུཾ ན ཝིསཧི. ཛོཏིཀོ ‘‘ནཱཡཾ, དེཝ, ཨོཔཱཏོ, མམ པཙྪཏོ ཨཱགཙྪཐཱ’’ཏི པུརཏོ ཨཧོསི. རཱཛཱ ཏེན ཨཀྐནྟཀཱལེ བྷཱུམིཾ ཨཀྐམིཏྭཱ ཧེཊྛིམཏལཏོ ¶ པཊྛཱཡ པཱསཱདཾ ཨོལོཀེནྟོ ཝིཙརི. ཏདཱ ཨཛཱཏསཏྟུཀུམཱརོཔི པིཏུ ཨངྒུལིཾ གཧེཏྭཱ ཝིཙརནྟོ ཙིནྟེསི – ‘‘ཨཧོ ཨནྡྷབཱལོ མམ པིཏཱ, གཧཔཏིཀེ ནཱམ སཏྟརཏནམཡེ པཱསཱདེ ཝསནྟེ ཨེས རཱཛཱ ཧུཏྭཱ དཱརུམཡེ གེཧེ ཝསཏི, ཨཧཾ དཱནི རཱཛཱ ཧུཏྭཱ ཨིམསྶ ཨིམསྨིཾ པཱསཱདེ ཝསིཏུཾ ན དསྶཱམཱི’’ཏི.

རཉྙོཔི ཨུཔརིམཏལཱནི ཨབྷིརུཧནྟསྶེཝ པཱཏརཱསཝེལཱ ཛཱཏཱ. སོ སེཊྛིཾ ཨཱམནྟེཏྭཱ, ‘‘མཧཱསེཊྛི, ཨིདྷེཝ པཱཏརཱསཾ བྷུཉྫིསྶཱམཱ’’ཏི. ཛཱནཱམི, དེཝ, སཛྫིཏོ དེཝསྶཱཧཱརོཏི. སོ སོལ༹སཧི གནྡྷོདཀགྷཊེཧི ནྷཏྭཱ རཏནམཡེ སེཊྛིསྶ ནིསཱིདནམཎྜཔེ པཉྙཏྟེ ཏསྶེཝ ནིསཱིདནཔལླངྐེ ནིསཱིདི. ཨཐསྶ ཧཏྠདྷོཝནཱུདཀཾ དཏྭཱ སཏསཧསྶགྒྷནིཀཱཡ སུཝཎྞཔཱཏིཡཱ ཀིལིནྣཔཱཡཱསཾ ཝཌྜྷེཏྭཱ པུརཏོ ཋཔཡིཾསུ. རཱཛཱ ‘‘བྷོཛན’’ནྟི སཉྙཱཡ བྷུཉྫིཏུཾ ཨཱརབྷི. སེཊྛི ¶ ‘‘ནཡིདཾ, དེཝ, བྷོཛནཾ, ཀིལིནྣཔཱཡཱསོ ¶ ཨེསོ’’ཏི ཨཉྙིསྶཱ སུཝཎྞཔཱཏིཡཱ བྷོཛནཾ ཝཌྜྷེཏྭཱ པུརིམཔཱཏིཡཾ ཋཔཡིཾསུ. ཏཏོ ཨུཊྛིཏཨུཏུནཱ ཀིར ཏཾ བྷུཉྫིཏུཾ སུཁཾ ཧོཏི. རཱཛཱ མདྷུརབྷོཛནཾ བྷུཉྫནྟོ པམཱཎཾ ན ཨཉྙཱསི. ཨཐ ནཾ སེཊྛི ཝནྡིཏྭཱ ཨཉྫལིཾ པགྒཡ྄ཧ ‘‘ཨལཾ, དེཝ, ཨེཏྟཀམེཝ ཧོཏུ, ཨིཏོ ཨུཏྟརིཾ ཛིརཱཔེཏུཾ ན སཀྐཱ’’ཏི ཨཱཧ. ཨཐ ནཾ རཱཛཱ ཨཱཧ – ‘‘ཀིཾ, གཧཔཏི, གརུཀཾ ཀཏྭཱ ཀཐེསི ཨཏྟནོ བྷཏྟ’’ནྟི? དེཝ, ནཏྠེཏཾ, ཏུམྷཱཀཾ སབྦསྶཱཔི ཧི བལཀཱཡསྶ ཨིདམེཝ བྷཏྟཾ ཨིདཾ སུཔེཡྻཾ. ཨཔི ཙ ཁོ ཨཧཾ ཨཡསསྶ བྷཱཡཱམཱིཏི. ཀིཾ ཀཱརཎཱཏི? སཙེ དེཝསྶ ཀཱཡཱལསིཡམཏྟཾ བྷཝེཡྻ, ‘‘ཧིཡྻོ རཉྙཱ སེཊྛིསྶ གེཧེ བྷཏྟཾ བྷུཏྟཾ, སེཊྛིནཱ ཀིཉྩི ཀཏཾ བྷཝིསྶཏཱི’’ཏི ཝཙནསྶ བྷཱཡཱམི, དེཝཱཏི. ཏེན ཧི བྷཏྟཾ ཧར, ཨུདཀཾ ཨཱཧརཱཏི. རཉྙོ བྷཏྟཀིཙྩཱཝསཱནེ སབྦོ རཱཛཔརིཝཱརོ ཏདེཝ བྷཏྟཾ པརིབྷུཉྫི.

རཱཛཱ སུཁཀཐཱཡ ནིསིནྣོ སེཊྛིཾ ཨཱམནྟེཏྭཱ, ‘‘ཀིཾ ཨིམསྨིཾ གེཧེ སེཊྛིབྷརིཡཱ ནཏྠཱི’’ཏི ཨཱཧ? ‘‘ཨཱམ ཨཏྠི, དེཝཱ’’ཏི. ‘‘ཀཧཾ སཱ’’ཏི? ‘‘སིརིགབྦྷེ ནིསིནྣཱ, དེཝསྶ ཨཱགཏབྷཱཝཾ ན ཛཱནཱཏཱི’’ཏི. ཀིཉྩཱཔི ཧི པཱཏོཝ རཱཛཱ སཔརིཝཱརོ ཨཱགཏོ, སཱ པནསྶ ཨཱགཏབྷཱཝཾ ན ཛཱནཱཏེཝ. ཏཏོ སེཊྛི ‘‘རཱཛཱ མེ བྷརིཡཾ དཊྛུཀཱམོ’’ཏི ཏསྶཱ སནྟིཀཾ གནྟྭཱ ‘‘རཱཛཱ ཨཱགཏོ, ཀིཾ ཏཝ རཱཛཱནཾ དཊྛུཾ ན ཝཊྚཏཱི’’ཏི ཨཱཧ. སཱ ¶ ནིཔནྣཀཱཝ ¶ ‘‘ཀོ ཨེས, སཱམི, རཱཛཱ ནཱམཱ’’ཏི ཝཏྭཱ ‘‘རཱཛཱ ནཱམ ཨམྷཱཀཾ ཨིསྶརོ’’ཏི ཝུཏྟེ ཨནཏྟམནཏཾ པཝེདེནྟཱི ‘‘དུཀྐཊཱནི ཝཏ ནོ པུཉྙཀམྨཱནི, ཡེསཾ ནོ ཨིསྶརོཔི ཨཏྠི. ཨསྶདྡྷཱཡ ནཱམ པུཉྙཀམྨཱནི ཀཏྭཱ མཡཾ སམྤཏྟིཾ པཱཔུཎིཏྭཱ ཨཉྙསྶ ཨིསྶརིཡཊྛཱནེ ནིབྦཏྟམྷཱ. ཨདྡྷཱ ཨམྷེཧི ཨསདྡཧིཏྭཱ དཱནཾ དིནྣཾ བྷཝིསྶཏི, ཏསྶེཏཾ ཕལ’’ནྟི ཝཏྭཱ ‘‘ཀིཾ དཱནི ཀརོམི, སཱམཱི’’ཏི ཨཱཧ. ཏཱལཝཎྚཾ ཨཱདཱཡ ཨཱགནྟྭཱ རཱཛཱནཾ བཱིཛཱཧཱིཏི. ཏསྶཱ ཏཱལཝཎྚཾ ཨཱདཱཡ ཨཱགནྟྭཱ རཱཛཱནཾ བཱིཛེནྟིཡཱ རཉྙོ ཝེཋནསྶ གནྡྷཝཱཏོ ཨཀྑཱིནི པཧརི, ཨཐསྶཱ ཨཀྑཱིཧི ཨསྶུདྷཱརཱ པཝཏྟིཾསུ. ཏཾ དིསྭཱ རཱཛཱ སེཊྛིཾ ཨཱཧ – ‘‘མཧཱསེཊྛི, མཱཏུགཱམོ ནཱམ ཨཔྤབུདྡྷིཀོ, ‘རཱཛཱ མེ སཱམིཀསྶ སམྤཏྟིཾ གཎྷེཡྻཱ’ཏི བྷཡེན རོདཏི མཉྙེ, ཨསྶཱསེཧི ནཾ ‘ན མེ ཏཝ སམྤཏྟིཡཱ ཨཏྠོ’’’ཏི. ན ཨེསཱ, དེཝ, རོདཏཱིཏི. ཨཐ ཀིཾ ཨེཏནྟི? ཏུམྷཱཀཾ ཝེཋནགནྡྷེནསྶཱ ཨསྶཱུནི པཝཏྟིཾསུ. ཨཡཉྷི དཱིཔོབྷཱསཾ ཝཱ ཨགྒིཨོབྷཱསཾ ཝཱ ཨདིསྭཱ མཎིཨཱལོཀེནེཝ བྷུཉྫཏི ཙ ནིསཱིདཏི ཙ ནིཔཛྫཏི ཙ, དེཝོ པན དཱིཔཱལོཀེན ནིསིནྣོ བྷཝིསྶཏཱིཏི? ཨཱམ, སེཊྛཱིཏི. ཏེན ཧི, དེཝ, ཨཛྫ པཊྛཱཡ མཎིཨཱལོཀེན ནིསཱིདཐཱཏི མཧནྟཾ ཏིཔུསམཏྟཾ ཨནགྒྷཾ མཎིརཏནཾ ཨདཱསི. རཱཛཱ གེཧཾ ཨོལོཀེཏྭཱ ‘‘མཧཏཱི ཝཏ ཛོཏིཀསྶ སམྤཏྟཱི’’ཏི ཝཏྭཱ ཨགམཱསི. ཨཡཾ ཏཱཝ ཛོཏིཀསྶ ཨུཔྤཏྟི.

ཨིདཱནི ¶ ¶ ཛཊིལསྶ ཨུཔྤཏྟི ཝེདིཏབྦཱ – བཱརཱཎསིཡཉྷི ཨེཀཱ སེཊྛིདྷཱིཏཱ ཨབྷིརཱུཔཱ ཨཧོསི, ཏཾ པནྣརསསོལ༹སཝསྶུདྡེསིཀཀཱལེ རཀྑཎཏྠཱཡ ཨེཀཾ དཱསིཾ དཏྭཱ སཏྟབྷཱུམིཀསྶ པཱསཱདསྶ ཨུཔརིམཏལེ སིརིགབྦྷེ ཝཱསཡིཾསུ. ཏཾ ཨེཀདིཝསཾ ཝཱཏཔཱནཾ ཝིཝརིཏྭཱ བཧི ཨོལོཀཡམཱནཾ ཨཱཀཱསེན གཙྪནྟོ ཨེཀོ ཝིཛྫཱདྷརོ དིསྭཱ ཨུཔྤནྣསིནེཧོ ཝཱཏཔཱནེན པཝིསིཏྭཱ ཏཱཡ སདྡྷིཾ སནྠཝམཀཱསི. སཱ ཏེན སདྡྷིཾ སཾཝཱསམནྭཱཡ ན ཙིརསྶེཝ གབྦྷཾ པཊིལབྷི. ཨཐ ནཾ སཱ དཱསཱི དིསྭཱ, ‘‘ཨམྨ, ཀིཾ ཨིད’’ནྟི ཝཏྭཱ ‘‘ཧོཏུ མཱ ཀསྶཙི ཨཱཙིཀྑཱི’’ཏི ཏཱཡ ཝུཏྟཱ བྷཡེན ཏུཎྷཱི ཨཧོསི. སཱཔི དསམཱསཙྩཡེན པུཏྟཾ ཝིཛཱཡིཏྭཱ ནཝབྷཱཛནཾ ཨཱཧརཱཔེཏྭཱ ཏཏྠ ཏཾ དཱརཀཾ ནིཔཛྫཱཔེཏྭཱ ཏཾ བྷཱཛནཾ པིདཧིཏྭཱ ཨུཔརི པུཔྥདཱམཱནི ཋཔེཏྭཱ ‘‘ཨིམཾ སཱིསེན ཨུཀྑིཔིཏྭཱ གངྒཱཡ ¶ ཝིསྶཛྫེཧི, ‘ཀིཾ ཨིད’ནྟི ཙ པུཊྛཱ ‘ཨཡྻཱཡ མེ བལིཀམྨ’ནྟི ཝདེཡྻཱསཱི’’ཏི དཱསིཾ ཨཱཎཱཔེསི. སཱ ཏཐཱ ཨཀཱསི.

ཧེཊྛཱགངྒཱཡམྤི དྭེ ཨིཏྠིཡོ ནྷཱཡམཱནཱ ཏཾ བྷཱཛནཾ ཨུདཀེནཱཧརིཡམཱནཾ དིསྭཱ ཨེཀཱ ‘‘མཡ྄ཧེཏཾ བྷཱཛན’’ནྟི ཨཱཧ. ཨེཀཱ ‘‘ཡཾ ཨེཏསྶ ཨནྟོ, ཏཾ མཡ྄ཧ’’ནྟི ཝཏྭཱ བྷཱཛནེ སམྤཏྟེ ཏཾ ཨཱདཱཡ ཐལེ ཋཔེཏྭཱ ཝིཝརིཏྭཱ དཱརཀཾ དིསྭཱ ཨེཀཱ ‘‘མམ བྷཱཛནནྟི ཝུཏྟཏཱཡ དཱརཀོ མམེཝ ཧོཏཱི’’ཏི ཨཱཧ. ཨེཀཱ ‘‘ཡཾ བྷཱཛནསྶ ཨནྟོ, ཏཾ མམེཝ ཧོཏཱུཏི ཝུཏྟཏཱཡ མམ དཱརཀོ’’ཏི ཨཱཧ. ཏཱ ¶ ཝིཝདམཱནཱ ཝིནིཙྪཡཊྛཱནཾ གནྟྭཱ ཏམཏྠཾ ཨཱརོཙེཏྭཱ ཨམཙྩེསུ ཝིནིཙྪིཏུཾ ཨསཀྐོནྟེསུ རཉྙོ སནྟིཀཾ ཨགམཾསུ. རཱཛཱ ཏཱསཾ ཝཙནཾ སུཏྭཱ ‘‘ཏྭཾ དཱརཀཾ གཎྷ, ཏྭཾ བྷཱཛནཾ གཎྷཱ’’ཏི ཨཱཧ. ཡཱཡ པན དཱརཀོ ལདྡྷོ, སཱ མཧཱཀཙྩཱནཏྠེརསྶ ཨུཔཊྛཱཡིཀཱ ཨཧོསི. ཏསྨཱ སཱ དཱརཀཾ ‘‘ཨིམཾ ཐེརསྶ སནྟིཀེ པབྦཱཛེསྶཱམཱི’’ཏི པོསེསི. ཏསྶ ཛཱཏདིཝསེ གབྦྷམལསྶ དྷོཝིཏྭཱ ཨནཔནཱིཏཏཱཡ ཀེསཱ ཛཊིཏཱ ཧུཏྭཱ ཨཊྛཾསུ, ཏེནསྶ ཛཊིལོཏྭེཝ ནཱམཾ ཀརིཾསུ. ཏསྶ པདསཱ ཝིཙརཎཀཱལེ ཐེརོ ཏཾ གེཧཾ པིཎྜཱཡ པཱཝིསི. ཨུཔཱསིཀཱ ཐེརཾ ནིསཱིདཱཔེཏྭཱ ཨཱཧཱརམདཱསི. ཐེརོ དཱརཀཾ དིསྭཱ ‘‘ཀིཾ ཨུཔཱསིཀེ དཱརཀོ ལདྡྷོ’’ཏི པུཙྪི. ‘‘ཨཱམ, བྷནྟེ, ཨིམཱཧཾ དཱརཀཾ ཏུམྷཱཀཾ སནྟིཀེ པབྦཱཛེསྶཱམཱིཏི པོསེསིཾ, པབྦཱཛེཐ ན’’ནྟི ཨདཱསི. ཐེརོ ‘‘སཱདྷཱུ’’ཏི ཨཱདཱཡ ཏཾ གཙྪནྟོ ‘‘ཨཏྠི ནུ ཁོ ཨིམསྶ གིཧིསམྤཏྟིཾ ཨནུབྷཝིཏུཾ པུཉྙཀམྨ’’ནྟི ཨོལོཀེནྟོ ‘‘མཧཱཔུཉྙོ སཏྟོ མཧཱསམྤཏྟིཾ ཨནུབྷཝིསྶཏི, དཧརོ ཨེས ཏཱཝ, ཉཱཎམྤིསྶ པརིཔཱཀཾ ན གཙྪཏཱི’’ཏི ཙིནྟེཏྭཱ ཏཾ ཨཱདཱཡ ཏཀྐསིལཱཡཾ ཨེཀསྶ ཨུཔཊྛཱཀསྶ གེཧཾ ཨགམཱསི.

སོ ཐེརཾ ཝནྡིཏྭཱ ཋིཏོ ཏཾ དཱརཀཾ དིསྭཱ ‘‘དཱརཀོ ཝོ, བྷནྟེ, ལདྡྷོ’’ཏི པུཙྪི. ཨཱམ, ཨུཔཱསཀ, པབྦཛིསྶཏི, དཧརོ ཏཱཝ, ཏཝེཝ སནྟིཀེ ཧོཏཱུཏི. སོ ‘‘སཱདྷུ, བྷནྟེ’’ཏི ཏཾ ¶ པུཏྟཊྛཱནེ ཋཔེཏྭཱ པཊིཛགྒི. ཏསྶ པན གེཧེ དྭཱདས ཝསྶཱནི བྷཎྜཀཾ ཨུསྶནྣཾ ཧོཏི. སོ གཱམནྟརཾ གཙྪནྟོ སབྦམྤི ཏཾ བྷཎྜཾ ¶ ཨཱཔཎཾ ཧརིཏྭཱ དཱརཀཾ ཨཱཔཎེ ནིསཱིདཱཔེཏྭཱ ཏསྶ ཏསྶ བྷཎྜཀསྶ མཱུལཾ ཨཱཙིཀྑིཏྭཱ ‘‘ཨིདཉྩ ཨིདཉྩ ཨེཏྟཀཾ ནཱམ ¶ དྷནཾ གཧེཏྭཱ དདེཡྻཱསཱི’’ཏི ཝཏྭཱ པཀྐཱམི. ཏཾདིཝསཾ ནགརཔརིགྒཱཧིཀཱ དེཝཏཱ ཨནྟམསོ མརིཙཛཱིརཀམཏྟེནཱཔི ཨཏྠིཀེ ཏསྶེཝ ཨཱཔཎཱབྷིམུཁེ ཀརིཾསུ. སོ དྭཱདས ཝསྶཱནི ཨུསྶནྣཾ བྷཎྜཀཾ ཨེཀདིཝསེནེཝ ཝིཀྐིཎི. ཀུཊུམྦིཀོ ཨཱགནྟྭཱ ཨཱཔཎེ ཀིཉྩི ཨདིསྭཱ ‘‘སབྦཾ ཏེ, ཏཱཏ, བྷཎྜཀཾ ནཱསིཏ’’ནྟི ཨཱཧ. ན ནཱསེམི, སབྦཾ ཏུམྷེཧི ཝུཏྟནཡེནེཝ ཝིཀྐིཎིཾ, ཨིདཾ ཨསུཀསྶ མཱུལཾ, ཨིདཾ ཨསུཀསྶཱཏི. ཀུཊུམྦིཀོ པསཱིདིཏྭཱ ‘‘ཨནགྒྷོ པུརིསོ, ཡཏྠ ཀཏྠཙི ཛཱིཝིཏུཾ སམཏྠོ’’ཏི ཨཏྟནོ གེཧེ ཝཡཔྤཏྟཾ དྷཱིཏརཾ ཏསྶ དཏྭཱ ‘‘གེཧམསྶ ཀརོཐཱ’’ཏི པུརིསེ ཨཱཎཱཔེཏྭཱ ནིཊྛིཏེ གེཧེ ‘‘གཙྪཐ, ཏུམྷེ ཨཏྟནོ གེཧེ ཝསཐཱ’’ཏི ཨཱཧ.

ཨཐསྶ གེཧཔཝིསནཀཱལེ ཨེཀེན པཱདེན ཨུམྨཱརེ ཨཀྐནྟམཏྟེ གེཧསྶ པཙྪིམབྷཱགེ བྷཱུམིཾ བྷིནྡིཏྭཱ ཨསཱིཏིཧཏྠོ སུཝཎྞཔབྦཏོ ཨུཊྛཧི. རཱཛཱ ‘‘ཛཊིལཀུམཱརསྶ ཀིར གེཧེ བྷཱུམིཾ བྷིནྡིཏྭཱ སུཝཎྞཔབྦཏོ ཨུཊྛིཏོ’’ཏི སུཏྭཱཝ ཏསྶ སེཊྛིཙྪཏྟཾ པེསེསི. སོ ཛཊིལསེཊྛི ནཱམ ཨཧོསི. ཏསྶ ཏཡོ པུཏྟཱ ཨཧེསུཾ. སོ ཏེསཾ ཝཡཔྤཏྟཀཱལེ པབྦཛྫཱཡ ཙིཏྟཾ ཨུཔྤཱདེཏྭཱ ‘‘སཙེ ཨམྷེཧི སམཱནབྷོགཾ སེཊྛིཀུལཾ བྷཝིསྶཏི, པབྦཛིཏུཾ དསྶནྟི. ནོ ཙེ, ན དསྶནྟི. ཨཏྠི ནུ ཁོ ཛམྦུདཱིཔེ ཨམྷེཧི སམཱནབྷོགཾ ཀུལ’’ནྟི ཝཱིམཾསནཏྠཱཡ སུཝཎྞམཡཾ ཨིཊྛཀཾ སུཝཎྞམཡཾ པཏོདལཊྛིཾ སུཝཎྞམཡཾ པཱདུཀཉྩ ཀཱརཱཔེཏྭཱ པུརིསཱནཾ ཧཏྠེ དཏྭཱ ‘‘གཙྪཐ, ཨིམཱནི ཨཱདཱཡ ཀིཉྩིདེཝ ཨོལོཀཡམཱནཱ ཝིཡ ཛམྦུདཱིཔཏལེ ཝིཙརིཏྭཱ ¶ ཨམྷེཧི སམཱནབྷོགསྶ སེཊྛིཀུལསྶ ཨཏྠིབྷཱཝཾ ཝཱ ནཏྠིབྷཱཝཾ ཝཱ ཉཏྭཱ ཨཱགཙྪཐཱ’’ཏི པཧིཎི.

ཏེ ཙཱརིཀཾ ཙརནྟཱ བྷདྡིཡནགརཾ པཱཔུཎིཾསུ. ཨཐ ནེ མེཎྜཀསེཊྛི དིསྭཱ, ‘‘ཏཱཏཱ, ཀིཾ ཀརོནྟཱ ཝིཙརཐཱ’’ཏི པུཙྪིཏྭཱ ‘‘ཨེཀཾ ཨོལོཀེནྟཱ ཝིཙརཱམཱ’’ཏི ཝུཏྟེ ‘‘ཨིམེསཾ ཨིམཱནི གཧེཏྭཱ ཀིཉྩིདེཝ ཨོལོཀེཏུཾ ཝིཙརཎཀིཙྩཾ ནཏྠི, རཊྛཾ པརིགྒཎྷམཱནཱ ཝིཙརནྟཱི’’ཏི ཉཏྭཱ, ‘‘ཏཱཏཱ, ཨམྷཱཀཾ པཙྪིམགེཧཾ པཝིསིཏྭཱ ཨོལོཀེཐཱ’’ཏི ཨཱཧ. ཏེ ཏཏྠ ཨཊྛཀརཱིསམཏྟེ ཋཱནེ ཧཏྠིཨསྶཨུསབྷཔྤམཱཎེ པིཊྛིཡཱ པིཊྛིཾ ཨཱཧཙྩ པཐཝིཾ བྷིནྡིཏྭཱ ཨུཊྛིཏེ ཧེཊྛཱ ཝུཏྟཔྤཀཱརེ སུཝཎྞམེཎྜཀེ དིསྭཱ ཏེསཾ ཨནྟརནྟརཱ ¶ ཝིཙརིཏྭཱ ནིཀྑམིཾསུ. ཨཐ ནེ སེཊྛི, ‘‘ཏཱཏཱ, ཡཾ ཨོལོཀེནྟཱ ཝིཙརཐ, དིཊྛོ ཝོ སོ’’ཏི པུཙྪིཏྭཱ ‘‘པསྶཱམ, སཱམཱི’’ཏི ཝུཏྟེ ‘‘ཏེན ཧི གཙྪཐཱ’’ཏི ཨུཡྻོཛེསི. ཏེ ཏཏོཝ གནྟྭཱ ཨཏྟནོ སེཊྛིནཱ ‘‘ཀིཾ, ཏཱཏཱ, དིཊྛཾ ཝོ ཨམྷཱཀཾ སམཱནབྷོགཾ སེཊྛིཀུལ’’ནྟི ཝུཏྟེ, ‘‘སཱམི, ཏུམྷཱཀཾ ཀིཾ ཨཏྠི, བྷདྡིཡནགརེ མེཎྜཀསེཊྛིནོ ཨེཝརཱུཔོ ¶ ནཱམ ཝིབྷཝོ’’ཏི སབྦཾ ཏཾ པཝཏྟིཾ ཨཱཙིཀྑིཾསུ. ཏཾ སུཏྭཱ སེཊྛི ཨཏྟམནོ ཧུཏྭཱ ‘‘ཨེཀཾ ཏཱཝ སེཊྛིཀུལཾ ལདྡྷཾ, ཨཔརམྤི ནུ ཁོ ཨཏྠཱི’’ཏི སཏསཧསྶགྒྷནིཀཾ ཀམྦལཾ དཏྭཱ ‘‘གཙྪཐ, ཏཱཏཱ, ཨཉྙམྤི. སེཊྛིཀུལཾ ཝིཙིནཐཱ’’ཏི པཧིཎི.

ཏེ རཱཛགཧཾ གནྟྭཱ ཛོཏིཀསེཊྛིསྶ གེཧཏོ ཨཝིདཱུརེ དཱརུརཱསིཾ ཀཏྭཱ ཨགྒིཾ དཏྭཱ ཨཊྛཾསུ. ‘‘ཀིཾ ཨིད’’ནྟི པུཊྛཀཱལེ ཙ ‘‘ཨེཀཾ ནོ མཧགྒྷཀམྦལཾ ཝིཀྐིཎནྟཱནཾ ཀཡིཀོ ནཏྠི, གཧེཏྭཱ ཝིཙརནྟཱཔི ཙོརཱནཾ བྷཱཡཱམ, ཏེན ཏཾ ཛྷཱཔེཏྭཱ གམིསྶཱམཱ’’ཏི ཝདིཾསུ. ཨཐ ནེ ཛོཏིཀསེཊྛི དིསྭཱ ‘‘ཨིམེ ཀིཾ ཀརོནྟཱི’’ཏི པུཙྪིཏྭཱ ཏམཏྠཾ སུཏྭཱ པཀྐོསཱཔེཏྭཱ ‘‘ཀིཾ ཨགྒྷནཀོ ཀམྦལོ’’ཏི པུཙྪི. ‘‘སཏསཧསྶགྒྷནཀོ’’ཏི ཝུཏྟེ སཏསཧསྶཾ དཱཔེཏྭཱ ¶ ‘‘དྭཱརཀོཊྛཀཾ སམྨཛྫིཏྭཱ ཀཙཝརཚཌྜིཀཱཡ དཱསིཡཱ དེཐཱ’’ཏི ཏེསཾཡེཝ ཧཏྠེ པཧིཎི. སཱ ཀམྦལཾ གཧེཏྭཱ རོདམཱནཱ སཱམིཀསྶ སནྟིཀཾ ཨཱགནྟྭཱ ‘‘ཀིཾ མཾ, སཱམི, ཨཔརཱདྷེ སཏི པཧརིཏུཾ ན ཝཊྚཏི, ཀསྨཱ མེ ཨེཝརཱུཔཾ ཐཱུལཀམྦལཾ པཧིཎིཏྠ, ཀཐཱཧཾ ཨིམཾ ནིཝཱསེསྶཱམི ཝཱ པཱརུཔིསྶཱམི ཝཱ’’ཏི. ནཱཧཾ ཏཝ ཨེཏདཏྠཱཡ པཧིཎིཾ, ཨེཏཾ པན པལིཝེཋེཏྭཱ ཏཝ སཡནཔཱདམཱུལེ ཋཔེཏྭཱ ནིཔཛྫནཀཱལེ གནྡྷོདཀེན དྷོཏཱནཾ པཱདཱནཾ པུཉྪནཏྠཱཡ ཏེ པཧིཎིཾ, ཀིཾ ཨེཏམྤི ཀཱཏུཾ ན སཀྐོསཱིཏི. སཱ ‘‘ཨེཏཾ པན ཀཱཏུཾ སཀྑིསྶཱམཱི’’ཏི གཧེཏྭཱ ཨགམཱསི. ཏེ ཙ པུརིསཱ ཏཾ ཀཱརཎཾ དིསྭཱ ཨཏྟནོ སེཊྛིསྶ སནྟིཀཾ གནྟྭཱ ‘‘ཀིཾ, ཏཱཏཱ, དིཊྛཾ ཝོ སེཊྛིཀུལ’’ནྟི ཝུཏྟེ, ‘‘སཱམི, ཀིཾ ཏུམྷཱཀཾ ཨཏྠི, རཱཛགཧནགརེ ཛོཏིཀསེཊྛིསྶ ཨེཝརཱུཔཱ ནཱམ སམྤཏྟཱི’’ཏི སབྦཾ གེཧསམྤཏྟིཾ ཨཱརོཙེཏྭཱ ཏཾ པཝཏྟིཾ ཨཱཙིཀྑིཾསུ. སེཊྛི ཏེསཾ ཝཙནཾ སུཏྭཱ ཏུཊྛམཱནསོ ‘‘ཨིདཱནི པབྦཛིཏུཾ ལབྷིསྶཱམཱི’’ཏི རཉྙོ སནྟིཀཾ གནྟྭཱ ‘‘པབྦཛིཏུཀཱམོམྷི, དེཝཱ’’ཏི ཨཱཧ. སཱདྷུ, མཧཱསེཊྛི, པབྦཛཱཧཱིཏི ¶ . སོ གེཧཾ གནྟྭཱ པུཏྟེ པཀྐོསཱཔེཏྭཱ སུཝཎྞདཎྜཾ ཝཛིརཀུདྡཱལཾ ཛེཊྛཔུཏྟསྶ ཧཏྠེ ཋཔེཏྭཱ, ‘‘ཏཱཏ, པཙྪིམགེཧེ སུཝཎྞཔབྦཏཏོ སུཝཎྞཔིཎྜཾ ཨུདྡྷརཱཧཱི’’ཏི ཨཱཧ. སོ ཀུདྡཱལཾ ཨཱདཱཡ གནྟྭཱ སུཝཎྞཔབྦཏཾ པཧརི, པིཊྛིཔཱསཱཎེ པཧཊཀཱལོ ཝིཡ ཨཧོསི. ཏསྶ ཧཏྠཏོ ཀུདྡཱལཾ གཧེཏྭཱ མཛ྄ཛྷིམཔུཏྟསྶ ཧཏྠེ དཏྭཱ པཧིཎི, ཏསྶཔི སུཝཎྞཔབྦཏཾ པཧརནྟསྶ པིཊྛིཔཱསཱཎེ པཧཊཀཱལོ ཝིཡ ཨཧོསི. ཨཐ ¶ ནཾ ཀནིཊྛཔུཏྟསྶ ཧཏྠེ དཏྭཱ པཧིཎི, ཏསྶ ཏཾ གཧེཏྭཱ པཧརནྟསྶ ཀོཊྚེཏྭཱ རཱསིཀཏཱཡ མཏྟིཀཱཡ པཧཊཀཱལོ ཝིཡ ཨཧོསི. ཨཐ ནཾ སེཊྛི ‘‘ཨེཧི, ཏཱཏ, ཨལཾ ཨེཏྟཀེནཱ’’ཏི ཝཏྭཱ ཨིཏརེ དྭེ ཛེཊྛབྷཱཏིཀེ པཀྐོསཱཔེཏྭཱ ‘‘ཨཡཾ སུཝཎྞཔབྦཏོ ན ཏུམྷཱཀཾ ནིབྦཏྟོ, མཡ྄ཧཉྩ ཀནིཊྛསྶ ཙ ནིབྦཏྟོ, ཨིམིནཱ སདྡྷིཾ ཨེཀཏོ ཧུཏྭཱ པརིབྷུཉྫཐཱ’’ཏི ཨཱཧ. ཀསྨཱ པན སོ ཏེསམེཝ ནིབྦཏྟཏི, ཀསྨཱ ཙ ཛཊིལོ ཛཱཏཀཱལེ ཨུདཀེ པཱཏིཏོཏི? ཨཏྟནོ ཀཏཀམྨེནེཝ.

ཀསྶཔསམྨཱསམྦུདྡྷསྶ ¶ ཧི ཙེཏིཡེ ཀརིཡམཱནེ ཨེཀོ ཁཱིཎཱསཝོ ཙེཏིཡཊྛཱནཾ གནྟྭཱ ཨོལོཀེཏྭཱ, ‘‘ཏཱཏཱ, ཀསྨཱ ཙེཏིཡསྶ ཨུཏྟརེན མུཁཾ ན ཨུཊྛཧཏཱི’’ཏི པུཙྪི. ‘‘སུཝཎྞཾ ནཔྤཧོཏཱི’’ཏི ཨཱཧཾསུ. ཨཧཾ ཨནྟོགཱམཾ པཝིསིཏྭཱ སམཱདཔེསྶཱམི, ཏུམྷེ ཨཱདརེན ཀམྨཾ ཀརོཐཱཏི. སོ ཨེཝཾ ཝཏྭཱ ནགརཾ པཝིསིཏྭཱ, ‘‘ཨམྨཱ, ཏཱཏཱ, ཏུམྷཱཀཾ ཙེཏིཡསྶ ཨེཀསྨིཾ མུཁེ སུཝཎྞཾ ནཔྤཧོཏི, སུཝཎྞཾ ཛཱནཱཐཱ’’ཏི མཧཱཛནཾ སམཱདཔེནྟོ སུཝཎྞཀཱརཀུལཾ ཨགམཱསི. སུཝཎྞཀཱརོཔི ཏངྑཎེཡེཝ བྷརིཡཱཡ སདྡྷིཾ ཀལཧཾ ཀརོནྟོ ནིསིནྣོ ཧོཏི. ཨཐ ནཾ ཐེརོ ‘‘ཙེཏིཡེ ཏུམྷེཧི གཧིཏམུཁསྶ སུཝཎྞཾ ནཔྤཧོཏི, ཏཾ ཛཱནིཏུཾ ཝཊྚཏཱི’’ཏི ཨཱཧ. སོ བྷརིཡཱཡ ཀོཔེན ‘‘ཏཝ སཏྠཱརཾ ཨུདཀེ ཁིཔིཏྭཱ གཙྪཱ’’ཏི ཨཱཧ. ཨཐ ནཾ སཱ ‘‘ཨཏིསཱཧསིཀཀམྨཾ ཏེ ཀཏཾ, མམ ཀུདྡྷེན ཏེ ཨཧམེཝ ཨཀྐོསིཏབྦཱ ཝཱ པཧརིཏབྦཱ ཝཱ, ཀསྨཱ ཨཏཱིཏཱནཱགཏཔཙྩུཔྤནྣེསུ བུདྡྷེསུ ཝེརམཀཱསཱི’’ཏི ཨཱཧ. སུཝཎྞཀཱརོ ཏཱཝདེཝ ¶ སཾཝེགཔྤཏྟོ ཧུཏྭཱ ‘‘ཁམཐ མེ, བྷནྟེ’’ཏི ཝཏྭཱ ཐེརསྶ པཱདམཱུལེ ནིཔཛྫི. ཏཱཏ, ཨཧཾ ཏཡཱ ན ཀིཉྩི ཝུཏྟོ, སཏྠཱརཾ ཁམཱཔེཧཱིཏི. ཀིནྟི ཀཏྭཱ ཁམཱཔེམི, བྷནྟེཏི. སུཝཎྞཔུཔྥཱནཾ ཏཡོ ¶ ཀུམྦྷེ ཀཏྭཱ ཨནྟོདྷཱཏུནིདྷཱནེ པཀྑིཔིཏྭཱ ཨལླཝཏྠོ ཨལླཀེསོ ཧུཏྭཱ ཁམཱཔེཧི, ཏཱཏཱཏི.

སོ ‘‘སཱདྷུ, བྷནྟེ’’ཏི ཝཏྭཱ སུཝཎྞཔུཔྥཱནི ཀརོནྟོ ཏཱིསུ པུཏྟེསུ ཛེཊྛཔུཏྟཾ པཀྐོསཱཔེཏྭཱ ‘‘ཨེཧི, ཏཱཏ, ཨཧཾ སཏྠཱརཾ ཝེརཝཙནེན ཨཝཙཾ, ཏསྨཱ ཨིམཱནི པུཔྥཱནི ཀཏྭཱ དྷཱཏུནིདྷཱནེ པཀྑིཔིཏྭཱ ཁམཱཔེསྶཱམི, ཏྭམྤི ཁོ མེ སཧཱཡོ ཧོཧཱི’’ཏི ཨཱཧ. སོ ‘‘ན ཏྭཾ མཡཱ ཝེརཝཙནཾ ཝདཱཔིཏོ, ཏྭཾཡེཝ ཀརོཧཱི’’ཏི ཀཱཏུཾ ན ཨིཙྪི. མཛ྄ཛྷིམཔུཏྟཾ པཀྐོསིཏྭཱ ཏཐེཝཱཧ, སོཔི ཏཐེཝ ཝཏྭཱ ཀཱཏུཾ ན ཨིཙྪི. ཀནིཊྛཾ པཀྐོསིཏྭཱ ཏཐེཝཱཧ, སོ ‘‘པིཏུ ཨུཔྤནྣཀིཙྩཾ ནཱམ པུཏྟསྶ བྷཱརོ’’ཏི ཝཏྭཱ པིཏུསཧཱཡོ ཧུཏྭཱ པུཔྥཱནི ཨཀཱསི. སུཝཎྞཀཱརོ ཝིདཏྠིཔྤམཱཎཱནཾ པུཔྥཱནཾ ཏཡོ ཀུམྦྷེ ནིཊྛཱཔེཏྭཱ དྷཱཏུནིདྷཱནེ པཀྑིཔིཏྭཱ ཨལླཝཏྠོ ཨལླཀེསོ སཏྠཱརཾ ཁམཱཔེསི. ཨིཏི སོ སཏྟཀྑཏྟུཾ ཛཱཏཀཱལེ ཨུདཀེ པཱཏནཾ ལབྷི. ཨཡཾ པནསྶ ཀོཊིཡཾ ཋིཏོ ཨཏྟབྷཱཝོ. ཨིདྷཱཔི ཏསྶེཝ ནིསྶནྡེན ཨུདཀེ པཱཏིཏོ. ཡེ པནསྶ དྭེ ཛེཊྛབྷཱཏིཀཱ པུཏྟཱ སུཝཎྞཔུཔྥཱནཾ ཀརཎཀཱལེ སཧཱཡཱ བྷཝིཏུཾ ན ཨིཙྪིཾསུ, ཏེསཾ ཏེན ཀཱརཎེན སུཝཎྞཔབྦཏོ ན ནིབྦཏྟི, ཛཊིལསྶ ཙེཝ ཀནིཊྛཔུཏྟསྶ ཙ ཨེཀཏོ ཀཏབྷཱཝེན ནིབྦཏྟི. ཨིཏི ¶ སོ པུཏྟེ ཨནུསཱསིཏྭཱ སཏྠུ སནྟིཀེ པབྦཛིཏྭཱ ཀཏིཔཱཧེནེཝ ཨརཧཏྟཾ པཱཔུཎི. སཏྠཱ ཨཔརེན སམཡེན པཉྩཧི བྷིཀྑུསཏེཧི སདྡྷིཾ པིཎྜཱཡ ཙརནྟོ ཏསྶ པུཏྟཱནཾ གེཧདྭཱརཾ ཨགམཱསི, ཏེ བུདྡྷཔྤམུཁསྶ བྷིཀྑུསངྒྷསྶ ཨཌྜྷམཱསཾ བྷིཀྑཱདཱནཾ ཨདཾསུ.

བྷིཀྑཱུ ¶ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཨཛྫཱཔི ཏེ, ཨཱཝུསོ ཛཊིལ, ཨསཱིཏིཧཏྠེ སུཝཎྞཔབྦཏེ ཙ པུཏྟེསུ ཙ ཏཎྷཱ ཨཏྠཱི’’ཏི. ‘‘ན མེ, ཨཱཝུསོ, ཨེཏེསུ ཏཎྷཱ ཝཱ མཱནོ ཝཱ ཨཏྠཱི’’ཏི. ཏེ ‘‘ཨཡཾ ཛཊིལཏྠེརོ ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི ཝདིཾསུ. སཏྠཱ ཏེསཾ ཀཐཾ སུཏྭཱ ‘‘ན, བྷིཀྑཝེ, མམ པུཏྟསྶ ཏེསུ ཏཎྷཱ ཝཱ མཱནོ ཝཱ ཨཏྠཱི’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཡོདྷ ཏཎྷཾ པཧནྟྭཱན, ཨནཱགཱརོ པརིབྦཛེ;

ཏཎྷཱབྷཝཔརིཀྑཱིཎཾ, ཏམཧཾ བྲཱུམི བྲཱཧྨཎ’’ནྟི.

ཏསྶཏྠོ ¶ – ཡོ ཨིདྷ ལོཀེ ཚདྭཱརིཀཾ ཏཎྷཾ ཝཱ མཱནཾ ཝཱ ཛཧིཏྭཱ གྷརཱཝཱསེན ཨནཏྠིཀོ ཨནཱགཱརོ ཧུཏྭཱ པརིབྦཛཏི, ཏཎྷཱཡ ཙེཝ བྷཝསྶ ཙ པརིཀྑཱིཎཏྟཱ ཏཎྷཱབྷཝཔརིཀྑཱིཎཾ ཏམཧཾ བྲཱཧྨཎཾ ཝདཱམཱིཏི.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡོདྷ ཏཎྷནྟི པུན ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཛོཏིཀཏྠེརཾ ཨཱརབྦྷ ཀཐེསི.

ཨཛཱཏསཏྟུཀུམཱརོ ཧི དེཝདཏྟེན སདྡྷིཾ ཨེཀཏོ ཧུཏྭཱ པིཏརཾ གྷཱཏེཏྭཱ རཛྫེ པཏིཊྛིཏོ ‘‘ཛོཏིཀསེཊྛིསྶ མཧཱཔཱསཱདཾ གཎྷིསྶཱམཱི’’ཏི ¶ ཡུདྡྷསཛྫོ ནིཀྑམིཏྭཱ མཎིཔཱཀཱརེ སཔརིཝཱརསྶ ཨཏྟནོ ཚཱཡཾ དིསྭཱ ‘‘གཧཔཏིཀོ ཡུདྡྷསཛྫོ ཧུཏྭཱ བལཾ ཨཱདཱཡ ནིཀྑནྟོ’’ཏི སལླཀྑེཏྭཱ ཨུཔགནྟུཾ ན ཝིསཧི. སེཊྛིཔི ཏཾ དིཝསཾ ཨུཔོསཐིཀོ ཧུཏྭཱ པཱཏོཝ བྷུཏྟཔཱཏརཱསོ ཝིཧཱརཾ གནྟྭཱ སཏྠུ སནྟིཀེ དྷམྨཾ སུཎནྟོ ནིསིནྣོ ཧོཏི. པཋམེ དྭཱརཀོཊྛཀེ ཨཱརཀྑཾ གཧེཏྭཱ ཋིཏོ པན ཡམཀོལི༹ ནཱམ ཡཀྑོ ཏཾ དིསྭཱ ‘‘ཀཧཾ གཙྪསཱི’’ཏི སཔརིཝཱརཾ ཝིདྡྷཾསེཏྭཱ དིསཱཝིདིསཱསུ ཨནུབནྡྷི. རཱཛཱ ཝིཧཱརམེཝ ཨགམཱསི.

ཨཐ ནཾ སེཊྛི དིསྭཱཝ ‘‘ཀིཾ, དེཝཱ’’ཏི ཝཏྭཱ ཨུཊྛཱཡཱསནཱ ཨཊྛཱསི. གཧཔཏི, ཀིཾ ཏྭཾ ¶ ཏཝ པུརིསེ ‘‘མཡཱ སདྡྷིཾ ཡུཛ྄ཛྷཐཱ’’ཏི ཨཱཎཱཔེཏྭཱ ཨིདྷཱགམྨ དྷམྨཾ སུཎནྟོ ཝིཡ ནིསིནྣོཏི. ཀིཾ པན དེཝོ མམ གེཧཾ གཎྷིཏུཾ གཏོཏི? ཨཱམ, གཏོམྷཱིཏི. མམ ཨནིཙྪཱཡ མམ གེཧཾ གཎྷིཏུཾ རཱཛསཧསྶམྤི ན སཀྐོཏི, དེཝཱཏི. སོ ‘‘ཀིཾ པན ཏྭཾ རཱཛཱ བྷཝིསྶསཱི’’ཏི ཀུཛ྄ཛྷི. ནཱཧཾ རཱཛཱ, མམ སནྟཀཾ པན དསིཀསུཏྟམྤི མམ ཨནིཙྪཱཡ རཱཛཱུཧི ཝཱ ཙོརེཧི ཝཱ གཧེཏུཾ ན སཀྐཱཏི. ཀིཾ པནཱཧཾ ཏཝ རུཙིཡཱ གཎྷིསྶཱམཱིཏི? ཏེན ཧི, དེཝ, ཨིམཱ མེ དསསུ ཨངྒུལཱིསུ ཝཱིསཏི མུདྡིཀཱ, ཨིམཱཧཾ ཏུམྷཱཀཾ ན དེམི. སཙེ སཀྐོཐ, གཎྷཐཱཏི ¶ . སོ པན རཱཛཱ བྷཱུམིཡཾ ཨུཀྐུཊིཀཾ ནིསཱིདིཏྭཱ ཨུལླངྒྷནྟོ ཨཊྛཱརསཧཏྠཾ ཋཱནཾ ཨབྷིརུཧཏི, ཋཏྭཱ ཨུལླངྒྷནྟོ ཨསཱིཏིཧཏྠཾ ¶ ཋཱནཾ ཨབྷིརུཧཏི. ཨེཝཾམཧཱབལོ སམཱནོཔི ཨིཏོ ཙིཏོ ཙ པརིཝཏྟེནྟོ ཨེཀཾ མུདྡིཀམྤི ཀཌྜྷིཏུཾ ནཱསཀྑི. ཨཐ ནཾ སེཊྛི ‘‘སཱཊཀཾ པཏྠར, དེཝཱ’’ཏི ཝཏྭཱ ཨངྒུལིཡོ ཨུཛུཀཱ ཨཀཱསི, ཝཱིསཏིཔི མུདྡིཀཱ ནིཀྑམིཾསུ. ཨཐ ནཾ སེཊྛི ‘‘ཨེཝཾ, དེཝ, མམ སནྟཀཾ མམ ཨནིཙྪཱཡ ན སཀྐཱ གཎྷིཏུ’’ནྟི ཝཏྭཱ རཉྙོ ཀིརིཡཱཡ ཨུཔྤནྣསཾཝེགོ ‘‘པབྦཛིཏུཾ མེ ཨནུཛཱན, དེཝཱ’’ཏི ཨཱཧ. སོ ‘‘ཨིམསྨིཾ པབྦཛིཏེ སུཁཾ པཱསཱདཾ གཎྷིསྶཱམཱི’’ཏི ཙིནྟེཏྭཱ ཨེཀཝཙནེནེཝ ‘‘ཏྭཾ པབྦཛཱཧཱི’’ཏི ཨཱཧ. སོ སཏྠུ སནྟིཀེ པབྦཛིཏྭཱ ན ཙིརསྶེཝ ཨརཧཏྟཾ པཏྭཱ ཛོཏིཀཏྠེརོ ནཱམ ཨཧོསི. ཏསྶ ཨརཧཏྟཾ པཏྟཀྑཎེཡེཝ སབྦཱཔི སཱ སམྤཏྟི ཨནྟརདྷཱཡི, ཏམྤིསྶ སཏུལཀཱཡིཾ ནཱམ བྷརིཡཾ དེཝཏཱ ཨུཏྟརཀུརུམེཝ ནཡིཾསུ.

ཨཐེཀདིཝསཾ བྷིཀྑཱུ ཏཾ ཨཱམནྟེཏྭཱ, ‘‘ཨཱཝུསོ ཛོཏིཀ, ཏསྨིཾ པན ཏེ པཱསཱདེ ཝཱ ཨིཏྠིཡཱ ཝཱ ཏཎྷཱ ཨཏྠཱི’’ཏི པུཙྪིཏྭཱ ‘‘ནཏྠཱཝུསོ’’ཏི ཝུཏྟེ སཏྠུ ཨཱརོཙེསུཾ – ‘‘ཨཡཾ, བྷནྟེ, ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི. སཏྠཱ ‘‘ནཏྠེཝ, བྷིཀྑཝེ, མམ པུཏྟསྶ ཏསྨིཾ ཏཎྷཱ’’ཏི ཝཏྭཱ ཨིམཾ གཱཐམཱཧ –

‘‘ཡོདྷ ¶ ཏཎྷཾ པཧནྟྭཱན, ཨནཱགཱརོ པརིབྦཛེ;

ཏཎྷཱབྷཝཔརིཀྑཱིཎཾ, ཏམཧཾ བྲཱུམི བྲཱཧྨཎ’’ནྟི.

ཨིམིསྶཱ གཱཐཱཡཏྠོ ཧེཊྛཱ ཛཊིལཏྠེརཝཏྠུམྷི ཝུཏྟནཡེནེཝ ཝེདིཏབྦོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཧིཏྭཱཏི ¶ ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨེཀཾ ནཊཔུཏྟཀཾ ཨཱརབྦྷ ཀཐེསི.

སོ ཀིར ཨེཀཾ ནཊཀཱིལ༹ཾ ཀཱིལ༹ཡམཱནོ ཝིཙརནྟོ སཏྠུ དྷམྨཀཐཾ སུཏྭཱ པབྦཛིཏྭཱ ཨརཧཏྟཾ པཱཔུཎི. ཏསྨིཾ བུདྡྷཔྤམུཁེན བྷིཀྑུསངྒྷེན སདྡྷིཾ ¶ པིཎྜཱཡ པཝིསནྟེ བྷིཀྑཱུ ཨེཀཾ ནཊཔུཏྟཾ ཀཱིལ༹ནྟཾ དིསྭཱ, ‘‘ཨཱཝུསོ, ཨེས ཏཡཱ ཀཱིལི༹ཏཀཱིལི༹ཏཾ ཀཱིལ༹ཏི, ཨཏྠི ནུ ཁོ ཏེ ཨེཏྠ སིནེཧོ’’ཏི པུཙྪིཏྭཱ ‘‘ནཏྠཱི’’ཏི ཝུཏྟེ ‘‘ཨཡཾ, བྷནྟེ, ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི ཨཱཧཾསུ. སཏྠཱ ཏེསཾ ཀཐཾ སུཏྭཱ, ‘‘བྷིཀྑཝེ, མམ པུཏྟོ སབྦཡོགེ ཨཏིཀྐནྟོ’’ཏི ཝཏྭཱ ཨིམཾ གཱཐམཱཧ –

‘‘ཧིཏྭཱ མཱནུསཀཾ ཡོགཾ, དིབྦཾ ཡོགཾ ཨུཔཙྩགཱ;

སབྦཡོགཝིསཾཡུཏྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ¶ མཱནུསཀཾ ཡོགནྟི མཱནུསཀཾ ཨཱཡུཉྩེཝ པཉྩ ཀཱམགུཎེ ཙ. དིབྦཡོགེཔི ཨེསེཝ ནཡོ. ཨུཔཙྩགཱཏི ཡོ མཱནུསཀཾ ཡོགཾ ཧིཏྭཱ དིབྦཾ ཡོགཾ ཨཏིཀྐནྟོ, ཏཾ སབྦེཧི ཙཏཱུཧིཔི ཡོགེཧི ཝིསཾཡུཏྟཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ནཊཔུཏྟཀཏྠེརཝཏྠུ པཉྩཏིཾསཏིམཾ.

ཧིཏྭཱ རཏིཉྩཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨེཀཾ ནཊཔུཏྟཀཾཡེཝ ཨཱརབྦྷ ཀཐེསི. ཝཏྠུ པུརིམསདིསམེཝ. ཨིདྷ པན སཏྠཱ, ‘‘བྷིཀྑཝེ, མམ པུཏྟོ རཏིཉྩ ཨརཏིཉྩ པཧཱཡ ཋིཏོ’’ཏི ཝཏྭཱ ཨིམཾ གཱཐམཱཧ –

‘‘ཧིཏྭཱ རཏིཉྩ ཨརཏིཉྩ, སཱིཏིབྷཱུཏཾ ནིརཱུཔདྷིཾ;

སབྦལོཀཱབྷིབྷུཾ ཝཱིརཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ¶ རཏིནྟི པཉྩཀཱམགུཎརཏིཾ. ཨརཏིནྟི ཨརཉྙཝཱསེ ཨུཀྐཎྛིཏཏྟཾ. སཱིཏིབྷཱུཏནྟི ནིབྦུཏཾ. ནིརཱུཔདྷིནྟི ནིརུཔཀྐིལེསཾ. ཝཱིརནྟི ཏཾ ཨེཝརཱུཔཾ སབྦཾ ཁནྡྷལོཀཾ ཨབྷིབྷཝིཏྭཱ ཋིཏཾ ཝཱིརིཡཝནྟཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཙུཏིཾ ¶ ¶ ཡོ ཝེདཱིཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཝངྒཱིསཏྠེརཾ ཨཱརབྦྷ ཀཐེསི.

རཱཛགཧེ ཀིརེཀོ བྲཱཧྨཎོ ཝངྒཱིསོ ནཱམ མཏམནུསྶཱནཾ སཱིསཾ ཨཱཀོཊེཏྭཱ ‘‘ཨིདཾ ནིརཡེ ནིབྦཏྟསྶ སཱིསཾ, ཨིདཾ ཏིརཙྪཱནཡོནིཡཾ, ཨིདཾ པེཏྟིཝིསཡེ, ཨིདཾ མནུསྶལོཀེ, ཨིདཾ དེཝལོཀེ ནིབྦཏྟསྶ སཱིས’’ནྟི ཛཱནཱཏི. བྲཱཧྨཎཱ ‘‘སཀྐཱ ཨིམཾ ནིསྶཱཡ ལོཀཾ ཁཱདིཏུ’’ནྟི ཙིནྟེཏྭཱ ཏཾ དྭེ རཏྟཝཏྠཱནི པརིདཧཱཔེཏྭཱ ཨཱདཱཡ ཛནཔདཾ ཙརནྟཱ མནུསྶེ ཝདནྟི ‘‘ཨེསོ ཝངྒཱིསོ ནཱམ བྲཱཧྨཎོ མཏམནུསྶཱནཾ སཱིསཾ ཨཱཀོཊེཏྭཱ ནིབྦཏྟཊྛཱནཾ ཛཱནཱཏི, ཨཏྟནོ ཉཱཏཀཱནཾ ནིབྦཏྟཊྛཱནཾ པུཙྪཐཱ’’ཏི. མནུསྶཱ ཡཐཱབལཾ དསཔི ཀཧཱཔཎེ ཝཱིསཏིཔི སཏམྤི དཏྭཱ ཉཱཏཀཱནཾ ནིབྦཏྟཊྛཱནཾ པུཙྪནྟི. ཏེ ཨནུཔུབྦེན སཱཝཏྠིཾ པཏྭཱ ཛེཏཝནསྶ ཨཝིདཱུརེ ནིཝཱསཾ གཎྷིཾསུ. ཏེ བྷུཏྟཔཱཏརཱསཱ མཧཱཛནཾ གནྡྷམཱལཱདིཧཏྠཾ དྷམྨསྶཝནཱཡ གཙྪནྟཾ དིསྭཱ ‘‘ཀཧཾ གཙྪཐཱ’’ཏི པུཙྪིཏྭཱ ‘‘ཝིཧཱརཾ དྷམྨསྶཝནཱཡཱ’’ཏི ཝུཏྟེ ‘‘ཏཏྠ གནྟྭཱ ཀིཾ ཀརིསྶཐ, ཨམྷཱཀཾ ཝངྒཱིསབྲཱཧྨཎེན སདིསོ ནཱམ ནཏྠི, མཏམནུསྶཱནཾ སཱིསཾ ཨཱཀོཊེཏྭཱ ནིབྦཏྟཊྛཱནཾ ཛཱནཱཏི, ཉཱཏཀཱནཾ ནིབྦཏྟཊྛཱནཾ པུཙྪཐཱ’’ཏི ཨཱཧཾསུ. ཏེ ‘‘ཝངྒཱིསོ ཀིཾ ཛཱནཱཏི ¶ , ཨམྷཱཀཾ སཏྠཱརཱ སདིསོ ནཱམ ནཏྠཱི’’ཏི ཝཏྭཱ ཨིཏརེཧིཔི ‘‘ཝངྒཱིསསདིསོ ནཏྠཱི’’ཏི ཝུཏྟེ ཀཐཾ ཝཌྜྷེཏྭཱ ‘‘ཨེཐ, དཱནི ཝོ ཝངྒཱིསསྶ ཝཱ ཨམྷཱཀཾ ཝཱ སཏྠུ ཛཱནནབྷཱཝཾ ཛཱནིསྶཱམཱ’’ཏི ཏེ ཨཱདཱཡ ཝིཧཱརཾ ཨགམཾསུ. སཏྠཱ ཏེསཾ ཨཱགམནབྷཱཝཾ ཉཏྭཱ ནིརཡེ ཏིརཙྪཱནཡོནིཡཾ མནུསྶལོཀེ དེཝལོཀེཏི ཙཏཱུསུ ཋཱནེསུ ནིབྦཏྟཱནཾ ཙཏྟཱརི སཱིསཱནི, ཁཱིཎཱསཝསཱིསཉྩཱཏི པཉྩ སཱིསཱནི ཨཱཧརཱཔེཏྭཱ པཊིཔཱཊིཡཱ ཋཔེཏྭཱ ཨཱགཏཀཱལེ ཝངྒཱིསཾ པུཙྪི – ‘‘ཏྭཾ ཀིར སཱིསཾ ཨཱཀོཊེཏྭཱ མཏཀཱནཾ ནིབྦཏྟཊྛཱནཾ ཛཱནཱསཱི’’ཏི? ‘‘ཨཱམ, ཛཱནཱམཱི’’ཏི. ‘‘ཨིདཾ ཀསྶ སཱིས’’ནྟི? སོ ཏཾ ཨཱཀོཊེཏྭཱ ‘‘ནིརཡེ ནིབྦཏྟསྶཱ’’ཏི ཨཱཧ. ཨཐསྶ སཏྠཱ ‘‘སཱདྷུ སཱདྷཱུ’’ཏི སཱདྷུཀཱརཾ དཏྭཱ ¶ ཨིཏརཱནིཔི ཏཱིཎི སཱིསཱནི པུཙྪིཏྭཱ ཏེན ཨཝིརཛ྄ཛྷིཏྭཱ ཝུཏྟཝུཏྟཀྑཎེ ཏཐེཝ ཏསྶ སཱདྷུཀཱརཾ དཏྭཱ པཉྩམཾ སཱིསཾ དསྶེཏྭཱ ‘‘ཨིདཾ ཀསྶ སཱིས’’ནྟི པུཙྪི, སོ ཏམྤི ཨཱཀོཊེཏྭཱ ནིབྦཏྟཊྛཱནཾ ན ཛཱནཱཏི.

ཨཐ ¶ ནཾ སཏྠཱ ‘‘ཀིཾ, ཝངྒཱིས, ན ཛཱནཱསཱི’’ཏི ཝཏྭཱ, ‘‘ཨཱམ, ན ཛཱནཱམཱི’’ཏི ཝུཏྟེ ‘‘ཨཧཾ ཛཱནཱམཱི’’ཏི ཨཱཧ. ཨཐ ནཾ ཝངྒཱིསོ ཡཱཙི ‘‘དེཐ མེ ཨིམཾ མནྟ’’ནྟི. ན སཀྐཱ ཨཔབྦཛིཏསྶ དཱཏུནྟི. སོ ‘‘ཨིམསྨིཾ མནྟེ གཧིཏེ སཀལཛམྦུདཱིཔེ ཨཧཾ ཛེཊྛཀོ བྷཝིསྶཱམཱི’’ཏི ཙིནྟེཏྭཱ ཏེ བྲཱཧྨཎེ ‘‘ཏུམྷེ ཏཏྠེཝ ཀཏིཔཱཧཾ ཝསཐ, ཨཧཾ པབྦཛིསྶཱམཱི’’ཏི ཨུཡྻོཛེཏྭཱ སཏྠུ སནྟིཀེ པབྦཛིཏྭཱ ལདྡྷཱུཔསམྤདོ ཝངྒཱིསཏྠེརོ ནཱམ ཨཧོསི. ཨཐསྶ སཏྠཱ དྭཏྟིཾསཱཀཱརཀམྨཊྛཱནཾ དཏྭཱ ‘‘མནྟསྶ པརིཀམྨཾ སཛ྄ཛྷཱཡཱཧཱི’’ཏི ¶ ཨཱཧ. སོ ཏཾ སཛ྄ཛྷཱཡནྟོ ཨནྟརནྟརཱ བྲཱཧྨཎེཧི ‘‘གཧིཏོ ཏེ མནྟོ’’ཏི པུཙྪིཡམཱནོ ‘‘ཨཱགམེཐ ཏཱཝ, གཎྷཱམཱི’’ཏི ཝཏྭཱ ཀཏིཔཱཧེནེཝ ཨརཧཏྟཾ པཏྭཱ པུན བྲཱཧྨཎེཧི པུཊྛོ ‘‘ཨབྷབྦོ དཱནཱཧཾ, ཨཱཝུསོ, གནྟུ’’ནྟི ཨཱཧ. ཏཾ སུཏྭཱ བྷིཀྑཱུ ‘‘ཨཡཾ, བྷནྟེ, ཨབྷཱུཏེན ཨཉྙཾ བྱཱཀརོཏཱི’’ཏི སཏྠུ ཨཱརོཙེསུཾ. སཏྠཱ ‘‘མཱ, བྷིཀྑཝེ, ཨེཝཾ ཨཝཙུཏྠ, ཨིདཱནི, བྷིཀྑཝེ, མམ པུཏྟོ ཙུཏིཔཊིསནྡྷིཀུསལོ ཛཱཏོ’’ཏི ཝཏྭཱ ཨིམཱ གཱཐཱ ཨབྷཱསི –

‘‘ཙུཏིཾ ཡོ ཝེདི སཏྟཱནཾ, ཨུཔཔཏྟིཉྩ སབྦསོ;

ཨསཏྟཾ སུགཏཾ བུདྡྷཾ, ཏམཧཾ བྲཱུམི བྲཱཧྨཎཾ.

‘‘ཡསྶ གཏིཾ ན ཛཱནནྟི, དེཝཱ གནྡྷབྦམཱནུསཱ;

ཁཱིཎཱསཝཾ ཨརཧནྟཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ ཡོ ཝེདཱིཏི ཡོ སཏྟཱནཾ སབྦཱཀཱརེན ཙུཏིཉྩ པཊིསནྡྷིཉྩ པཱཀཊཾ ཀཏྭཱ ཛཱནཱཏི, ཏམཧཾ ཨལགྒཏཱཡ ཨསཏྟཾ, པཊིཔཏྟིཡཱ སུཊྛུ གཏཏྟཱ སུགཏཾ, ཙཏུནྣཾ སཙྩཱནཾ བུདྡྷཏཱཡ བུདྡྷཾ བྲཱཧྨཎཾ ཝདཱམཱིཏི ཨཏྠོ. ཡསྶཱཏི ཡསྶེཏེ དེཝཱདཡོ གཏིཾ ན ཛཱནནྟི, ཏམཧཾ ཨཱསཝཱནཾ ཁཱིཎཏཱཡ ཁཱིཎཱསཝཾ, ཀིལེསེཧི ཨཱརཀཏྟཱ ཨརཧནྟཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཡསྶཱཏི ¶ ¶ ¶ ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ དྷམྨདིནྣཾ ནཱམ བྷིཀྑུནིཾ ཨཱརབྦྷ ཀཐེསི.

ཨེཀདིཝསཉྷི ཏསྶཱ གིཧིཀཱལེ སཱམིཀོ ཝིསཱཁོ ཨུཔཱསཀོ སཏྠུ སནྟིཀེ དྷམྨཾ སུཏྭཱ ཨནཱགཱམིཕལཾ པཏྭཱ ཙིནྟེསི – ‘‘མཡཱ སབྦཾ སཱཔཏེཡྻཾ དྷམྨདིནྣཾ པཊིཙྪཱཔེཏུཾ ཝཊྚཏཱི’’ཏི. སོ ཏཏོ པུབྦེ ཨཱགཙྪནྟོ དྷམྨདིནྣཾ ཝཱཏཔཱནེན ཨོལོཀེནྟིཾ དིསྭཱ སིཏཾ ཀརོཏི. ཏཾ དིཝསཾ པན ཝཱཏཔཱནེན ཋིཏཾ ཨནོལོཀེནྟོཝ ཨགམཱསི. སཱ ‘‘ཀིཾ ནུ ཁོ ཨིད’’ནྟི ཙིནྟེཏྭཱ ‘‘ཧོཏུ, བྷོཛནཀཱལེ ཛཱནིསྶཱམཱི’’ཏི བྷོཛནཝེལཱཡ བྷཏྟཾ ཨུཔནཱམེསི. སོ ཨཉྙེསུ དིཝསེསུ ‘‘ཨེཧི, ཨེཀཏོ བྷུཉྫཱམཱ’’ཏི ཝདཏི, ཏཾ དིཝསཾ པན ཏུཎྷཱིབྷཱུཏོཝ བྷུཉྫི. སཱ ‘‘ཀེནཙིདེཝ ཀཱརཎེན ཀུཔིཏོ བྷཝིསྶཏཱི’’ཏི ཙིནྟེསི. ཨཐ ནཾ ཝིསཱཁོ སུཁནིསིནྣཝེལཱཡ ཏཾ པཀྐོསིཏྭཱ ‘‘དྷམྨདིནྣེ ཨིམསྨིཾ གེཧེ སབྦཾ སཱཔཏེཡྻཾ པཊིཙྪཱཧཱི’’ཏི ཨཱཧ. སཱ ‘‘ཀུདྡྷཱ ནཱམ སཱཔཏེཡྻཾ ན པཊིཙྪཱཔེནྟི, ཀིཾ ནུ ཁོ ཨེཏ’’ནྟི ཙིནྟེཏྭཱ ‘‘ཏུམྷེ པན, སཱམཱི’’ཏི ཨཱཧ. ཨཧཾ ཨིཏོ པཊྛཱཡ ན ཀིཉྩི ཝིཙཱརེམཱིཏི. ཏུམྷེཧི ཚཌྜིཏཾ ཁེལ༹ཾ ཀོ པཊིཙྪིསྶཏི, ཨེཝཾ སནྟེ མམ པབྦཛྫཾ ཨནུཛཱནཱཐཱཏི. སོ ‘‘སཱདྷུ, བྷདྡེ’’ཏི སམྤཊིཙྪིཏྭཱ མཧནྟེན སཀྐཱརེན ཏཾ བྷིཀྑུནཱིཨུཔསྶཡཾ ནེཏྭཱ པབྦཱཛེསི. སཱ ལདྡྷཱུཔསམྤདཱ དྷམྨདིནྣཏྠེརཱི ནཱམ ཨཧོསི.

སཱ པཝིཝེཀཀཱམཏཱཡ བྷིཀྑུནཱིཧི སདྡྷིཾ ཛནཔདཾ གནྟྭཱ ཏཏྠ ཝིཧརནྟཱི ན ཙིརསྶེཝ སཧ པཊིསམྦྷིདཱཧི ཨརཧཏྟཾ པཏྭཱ ‘‘ཨིདཱནི མཾ ནིསྶཱཡ ཉཱཏིཛནཱ ¶ པུཉྙཱནི ཀརིསྶནྟཱི’’ཏི པུནདེཝ རཱཛགཧཾ པཙྩཱགཉྪི. ཨུཔཱསཀོ ཏསྶཱ ཨཱགཏབྷཱཝཾ སུཏྭཱ ‘‘ཀེན ནུ ཁོ ཀཱརཎེན ཨཱགཏཱ’’ཏི བྷིཀྑུནཱིཨུཔསྶཡཾ གནྟྭཱ ཐེརིཾ ཝནྡིཏྭཱ ཨེཀམནྟཾ ནིསིནྣོ ‘‘ཨུཀྐཎྛིཏཱ ནུ ཁོསི, ཨཡྻེཏི ཝཏྟུཾ ཨཔྤཏིརཱུཔཾ, པཉྷམེཀཾ ནཾ པུཙྪིསྶཱམཱི’’ཏི ཙིནྟེཏྭཱ སོཏཱཔཏྟིམགྒེ པཉྷཾ པུཙྪི, སཱ ཏཾ ཝིསྶཛྫེསི. ཨུཔཱསཀོ ཏེནེཝ ཨུཔཱཡེན སེསམགྒེསུཔི པཉྷཾ པུཙྪིཏྭཱ ཨཏིཀྐམྨ པཉྷསྶ པུཊྛཀཱལེ ཏཱཡ ‘‘ཨཙྩཡཱསི, ཨཱཝུསོ, ཝིསཱཁཱ’’ཏི ཝཏྭཱ ‘‘ཨཱཀངྑམཱནོ སཏྠཱརཾ ཨུཔསངྐམིཏྭཱ ཨིམཾ པཉྷཾ པུཙྪེཡྻཱསཱི’’ཏི ཝུཏྟེ ཐེརིཾ ཝནྡིཏྭཱ ཨུཊྛཱཡཱསནཱ སཏྠུ སནྟིཀཾ ¶ གནྟྭཱ ཏཾ ཀཐཱསལླཱཔཾ སབྦཾ བྷགཝཏོ ཨཱརོཙེསི. སཏྠཱ ‘‘སུཀཐིཏཾ མམ དྷཱིཏཱཡ དྷམྨདིནྣཱཡ, ཨཧམྤེཏཾ པཉྷཾ ཝིསྶཛྫེནྟོ ཨེཝམེཝ ཝིསྶཛྫེཡྻ’’ནྟི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

‘‘ཡསྶ ¶ པུརེ ཙ པཙྪཱ ཙ, མཛ྄ཛྷེ ཙ ནཏྠི ཀིཉྩནཾ;

ཨཀིཉྩནཾ ཨནཱདཱནཾ, ཏམཧཾ བྲཱུམི བྲཱཧྨཎ’’ནྟི.

ཏཏྠ པུརེཏི ཨཏཱིཏེསུ ཁནྡྷེསུ. པཙྪཱཏི ཨནཱགཏེསུ ཁནྡྷེསུ. མཛ྄ཛྷེཏི པཙྩུཔྤནྣེསུ ཁནྡྷེསུ. ནཏྠི ཀིཉྩནནྟི ཡསྶེཏེསུ ཋཱནེསུ ཏཎྷཱགཱཧསངྑཱཏཾ ¶ ཀིཉྩནཾ ནཏྠི, ཏམཧཾ རཱགཀིཉྩནཱདཱིཧི ཨཀིཉྩནཾ ཀསྶཙི གཧཎསྶ ཨབྷཱཝེན ཨནཱདཱནཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

དྷམྨདིནྣཏྠེརཱིཝཏྠུ ཨཊྛཏིཾསཏིམཾ.

ཨུསབྷནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨངྒུལིམཱལཏྠེརཾ ཨཱརབྦྷ ཀཐེསི. ཝཏྠུ ‘‘ན ཝེ ཀདརིཡཱ དེཝལོཀཾ ཝཛནྟཱི’’ཏི (དྷ. པ. ༡༧༧) གཱཐཱཝཎྞནཱཡ ཝུཏྟམེཝ. ཝུཏྟཉྷི ཏཏྠ –

བྷིཀྑཱུ ཨངྒུལིམཱལཾ པུཙྪིཾསུ – ‘‘ཀིཾ ནུ ཁོ, ཨཱཝུསོ ཨངྒུལིམཱལ, དུཊྛཧཏྠིཾ ཚཏྟཾ དྷཱརེཏྭཱ ཋིཏཾ དིསྭཱ བྷཱཡཱི’’ཏི? ‘‘ན བྷཱཡིཾ, ཨཱཝུསོ’’ཏི. ཏེ སཏྠཱརཾ ཨུཔསངྐམིཏྭཱ ཨཱཧཾསུ – ‘‘ཨངྒུལིམཱལོ, བྷནྟེ, ཨཉྙཾ བྱཱཀརོཏཱི’’ཏི. སཏྠཱ ‘‘ན, བྷིཀྑཝེ, མམ པུཏྟོ ཨངྒུལིམཱལོ བྷཱཡཏི. ཁཱིཎཱསཝཨུསབྷཱནཉྷི ཨནྟརེ ཛེཊྛཀཨུསབྷཱ མམ པུཏྟསདིསཱ བྷིཀྑཱུ ན བྷཱཡནྟཱི’’ཏི ཝཏྭཱ ཨིམཾ གཱཐམཱཧ –

‘‘ཨུསབྷཾ པཝརཾ ཝཱིརཾ, མཧེསིཾ ཝིཛིཏཱཝིནཾ;

ཨནེཛཾ ནྷཱཏཀཾ བུདྡྷཾ, ཏམཧཾ བྲཱུམི བྲཱཧྨཎ’’ནྟི.

ཏསྶཏྠོ ¶ – ཨཙྪམྦྷིཏཊྛེན ཨུསབྷསདིསཏཱཡ ཨུསབྷཾ ཨུཏྟམཊྛེན པཝརཾ ཝཱིརིཡསམྤཏྟིཡཱ ཝཱིརཾ ¶ མཧནྟཱནཾ སཱིལཀྑནྡྷཱདཱིནཾ ཨེསིཏཏྟཱ མཧེསིཾ ཏིཎྞཾ མཱརཱནཾ ཝིཛིཏཏྟཱ ཝིཛིཏཱཝིནཾ ནྷཱཏཀིལེསཏཱཡ ནྷཱཏཀཾ ཙཏུསཙྩབུདྡྷཏཱཡ བུདྡྷཾ ཏཾ ཨེཝརཱུཔཾ ཨཧཾ བྲཱཧྨཎཾ ཝདཱམཱིཏི ཨཏྠོ.

དེསནཱཝསཱནེ ¶ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི.

ཨངྒུལིམཱལཏྠེརཝཏྠུ ཨེཀཱུནཙཏྟཱལཱིསཾ.

པུབྦེནིཝཱསནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ དེཝཧིཏབྲཱཧྨཎསྶ པཉྷཾ ཨཱརབྦྷ ཀཐེསི.

ཨེཀསྨིཉྷི སམཡེ བྷགཝཱ ཝཱཏརོགེན ཨཱབཱདྷིཀོ ཧུཏྭཱ ཨུཔཝཱཎཏྠེརཾ ཨུཎྷོདཀཏྠཱཡ དེཝཧིཏབྲཱཧྨཎསྶ སནྟིཀཾ པཧིཎི. སོ གནྟྭཱ སཏྠུ ཨཱབཱདྷིཀབྷཱཝཾ ཨཱཙིཀྑིཏྭཱ ཨུཎྷོདཀཾ ཡཱཙི, ཏཾ སུཏྭཱ བྲཱཧྨཎོ ཏུཊྛམཱནསོ ཧུཏྭཱ ‘‘ལཱབྷཱ ཝཏ མེ, ཡཾ མམ སནྟིཀཾ སམྨཱསམྦུདྡྷོ ཨུཎྷོདཀསྶཏྠཱཡ སཱཝཀཾ པཧིཎཱི’’ཏི ཨུཎྷོདཀསྶ ཀཱཛཾ པུརིསེན གཱཧཱཔེཏྭཱ ཕཱཎིཏསྶ ཙ པུཊཾ ཨུཔཝཱཎཏྠེརསྶ པཱདཱསི. ཐེརོ ཏཾ གཱཧཱཔེཏྭཱ ཝིཧཱརཾ གནྟྭཱ སཏྠཱརཾ ཨུཎྷོདཀེན ནྷཱཔེཏྭཱ ཨུཎྷོདཀེན ཕཱཎིཏཾ ཨཱལོལེ༹ཏྭཱ བྷགཝཏོ པཱདཱསི, ཏསྶ ཏངྑཎེཡེཝ སོ ཨཱབཱདྷོ པཊིཔསྶམྦྷི. བྲཱཧྨཎོ ཙིནྟེསི ¶ – ‘‘ཀསྶ ནུ ཁོ དེཡྻདྷམྨོ དིནྣོ མཧཔྥལོ ཧོཏི, སཏྠཱརཾ པུཙྪིསྶཱམཱི’’ཏི སོ སཏྠུ སནྟིཀཾ གནྟྭཱ ཏམཏྠཾ པུཙྪནྟོ ཨིམཾ གཱཐམཱཧ –

‘‘ཀཏྠ དཛྫཱ དེཡྻདྷམྨཾ, ཀཏྠ དིནྣཾ མཧཔྥལཾ;

ཀཐཉྷི ཡཛམཱནསྶ, ཀཐཾ ཨིཛ྄ཛྷཏི དཀྑིཎཱ’’ཏི. (སཾ. ནི. ༡.༡༩༩);

ཨཐསྶ སཏྠཱ ‘‘ཨེཝརཱུཔསྶ བྲཱཧྨཎསྶ དིནྣཾ མཧཔྥལཾ ཧོཏཱི’’ཏི ཝཏྭཱ བྲཱཧྨཎཾ པཀཱསེནྟོ ཨིམཾ གཱཐམཱཧ –

‘‘པུབྦེནིཝཱསཾ ¶ ཡོ ཝེདི, སགྒཱཔཱཡཉྩ པསྶཏི;

ཨཐོ ཛཱཏིཀྑཡཾ པཏྟོ, ཨབྷིཉྙཱཝོསིཏོ མུནི; (སཾ. ནི. ༡.༡༩༩);

སབྦཝོསིཏཝོསཱནཾ, ཏམཧཾ བྲཱུམི བྲཱཧྨཎ’’ནྟི.

ཏསྶཏྠོ – ཡོ པུབྦེནིཝཱསཾ པཱཀཊཾ ཀཏྭཱ ཛཱནཱཏི, ཚབྦཱིསཏིདེཝལོཀབྷེདཾ སགྒཉྩ ཙཏུབྦིདྷཾ ཨཔཱཡཉྩ དིབྦཙཀྑུནཱ པསྶཏི, ཨཐོ ཛཱཏིཀྑཡསངྑཱཏཾ ཨརཧཏྟཾ པཏྟོ, ཨབྷིཉྙེཡྻཾ ¶ དྷམྨཾ ཨབྷིཛཱནིཏྭཱ པརིཉྙེཡྻཾ པརིཛཱནིཏྭཱ པཧཱཏབྦཾ པཧཱཡ སཙྪིཀཱཏབྦཾ སཙྪིཀཏྭཱ ཝོསིཀོ ནིཊྛཱནཾ པཏྟོ, ཝུསིཏཝོསཱནཾ ཝཱ པཏྟོ, ཨཱསཝཀྑཡཔཉྙཱཡ མོནབྷཱཝཾ པཏྟཏྟཱ མུནི, ཏམཧཾ སབྦེསཾ ཀིལེསཱནཾ ཝོསཱནཾ ཨརཧཏྟམགྒཉཱཎཾ བྲཧྨཙརིཡཝཱསཾ ཝུཏྠབྷཱཝེན སབྦཝོསིཏཝོསཱནཾ བྲཱཧྨཎཾ ཝདཱམཱིཏི.

དེསནཱཝསཱནེ ¶ བཧཱུ སོཏཱཔཏྟིཕལཱདཱིནི པཱཔུཎིཾསུ. བྲཱཧྨཎོཔི པསནྣམཱནསོ སརཎེསུ པཏིཊྛཱཡ ཨུཔཱསཀཏྟཾ པཝེདེསཱིཏི.

ཨེཏྟཱཝཏཱ ¶ ¶ སབྦཔཋམེ ཡམཀཝགྒེ ཙུདྡས ཝཏྠཱུནི, ཨཔྤམཱདཝགྒེ ནཝ, ཙིཏྟཝགྒེ ནཝ, པུཔྥཝགྒེ དྭཱདས, བཱལཝགྒེ པནྣརས, པཎྜིཏཝགྒེ ཨེཀཱདས, ཨརཧནྟཝགྒེ དས, སཧསྶཝགྒེ ཙུདྡས, པཱཔཝགྒེ དྭཱདས, དཎྜཝགྒེ ཨེཀཱདས, ཛརཱཝགྒེ ནཝ, ཨཏྟཝགྒེ དས, ལོཀཝགྒེ ཨེཀཱདས, བུདྡྷཝགྒེ ནཝ, སུཁཝགྒེ ཨཊྛ, པིཡཝགྒེ ནཝ, ཀོདྷཝགྒེ ཨཊྛ, མལཝགྒེ དྭཱདས, དྷམྨཊྛཝགྒེ དས, མགྒཝགྒེ དྭཱདས, པཀིཎྞཀཝགྒེ ནཝ, ནིརཡཝགྒེ ནཝ, ནཱགཝགྒེ ཨཊྛ, ཏཎྷཱཝགྒེ དྭཱདས, བྷིཀྑུཝགྒེ དྭཱདས, བྲཱཧྨཎཝགྒེ ཙཏྟཱལཱིསཱཏི པཉྩཱདྷིཀཱནི ཏཱིཎི ཝཏྠུསཏཱནི པཀཱསེཏྭཱ ནཱཏིསངྑེཔནཱཏིཝིཏྠཱརཝསེན ཨུཔརཙིཏཱ དྭཱསཏྟཏིབྷཱཎཝཱརཔམཱཎཱ དྷམྨཔདསྶ ཨཏྠཝཎྞནཱ ནིཊྛིཏཱཏི.

པཏྟཾ ¶ དྷམྨཔདཾ ཡེན, དྷམྨརཱཛེནནུཏྟརཾ;

གཱཐཱ དྷམྨཔདེ ཏེན, བྷཱསིཏཱ ཡཱ མཧེསིནཱ.

སཏེཝཱིསཱ ཙཏུསྶཏཱ, ཙཏུསཙྩཝིབྷཱཝིནཱ;

སཏཏྟཡཉྷི ཝཏྠཱུནཾ, པཉྩཱདྷིཀཱ སམུཊྛིཏཱ.

ཝིཧཱརེ ཨདྷིརཱཛེན, ཀཱརིཏམྷི ཀཏཉྙུནཱ;

པཱསཱདེ སིརིཀཱུཊསྶ, རཉྙོ ཝིཧརཏཱ མཡཱ.

ཨཏྠབྱཉྫནསམྤནྣཾ, ཨཏྠཱཡ ཙ ཧིཏཱཡ ཙ;

ལོཀསྶ ལོཀནཱཐསྶ, སདྡྷམྨཊྛིཏིཀམྱཏཱ.

ཏཱསཾ ཨཊྛཀཐཾ ཨེཏཾ, ཀརོནྟེན སུནིམྨལཾ;

དྭཱསཏྟཏིཔམཱཎཱཡ, བྷཱཎཝཱརེཧི པཱལི༹ཡཱ.

ཡཾ ¶ པཏྟཾ ཀུསལཾ ཏེན, ཀུསལཱ སབྦཔཱཎིནཾ;

སབྦེ ཨིཛ྄ཛྷནྟུ སངྐཔྤཱ, ལབྷནྟུ མདྷུརཾ ཕལནྟི.

པརམཝིསུདྡྷསདྡྷཱབུདྡྷིཝཱིརིཡཔཊིམཎྜིཏེན སཱིལཱཙཱརཛྫཝམདྡཝཱདིགུཎསམུདཡསམུདིཏེན སཀསམཡསམཡནྟརགཧནཛ྄ཛྷོགཱཧཎསམཏྠེན པཉྙཱཝེཡྻཏྟིཡསམནྣཱགཏེན ཏིཔིཊཀཔརིཡཏྟིཔྤབྷེདེ སཱཊྛཀཐེ སཏྠུསཱསནེ ཨཔྤཊིཧཏཉཱཎཔྤབྷཱཝེན མཧཱཝེཡྻཱཀརཎེན ཀརཎསམྤཏྟིཛནིཏསུཁཝིནིགྒཏམདྷུརོདཱརཝཙནལཱཝཎྞཡུཏྟེན ཡུཏྟམུཏྟཝཱདིནཱ ཝཱདཱིཝརེན ¶ མཧཱཀཝིནཱ ¶ པབྷིནྣཔཊིསམྦྷིདཱཔརིཝཱརེ ཚལ༹བྷིཉྙཱཔཊིསམྦྷིདཱདིཔྤབྷེདགུཎཔཊིམཎྜིཏེ ཨུཏྟརིམནུསྶདྷམྨེ སུཔྤཏིཊྛིཏབུདྡྷཱིནཾ ཐེརཝཾསཔྤདཱིཔཱནཾ ཐེརཱནཾ མཧཱཝིཧཱརཝཱསཱིནཾ ཝཾསཱལངྐཱརབྷཱུཏེན ཝིཔུལཝིསུདྡྷབུདྡྷིནཱ བུདྡྷགྷོསོཏི གརཱུཧི གཧིཏནཱམདྷེཡྻེན ཐེརེན ཀཏཱཡཾ དྷམྨཔདཊྛཀཐཱ –

ཏཱཝ ཏིཊྛཏུ ལོཀསྨིཾ, ལོཀནིཏྠརཎེསིནཾ;

དསྶེནྟཱི ཀུལཔུཏྟཱནཾ, ནཡཾ སདྡྷཱདིབུདྡྷིཡཱ.

ཡཱཝ བུདྡྷོཏི ནཱམམྤི, སུདྡྷཙིཏྟསྶ ཏཱདིནོ;

ལོཀམྷི ལོཀཛེཊྛསྶ, པཝཏྟཏི མཧེསིནོཏི.

ཨིཏི ཏེཝཱིསཱདྷིཀཙཏུསཏགཱཐཱཔཉྩཱདྷིཀཏིསཏཝཏྠུཔཊིམཎྜིཏཱ

ཚབྦཱིསཏིཝགྒསམནྣཱགཏཱ དྷམྨཔདཝཎྞནཱ སམཏྟཱ.

དྷམྨཔད-ཨཊྛཀཐཱ སབྦཱཀཱརེན ནིཊྛིཏཱ.