མཱུལ > སུཏྟཔིཊཀ > ཁུདྡཀནིཀཱཡ

MMR Vol 0
VRI Vol 0
PTS Vol 0
THA Vol 0

Misc. Paragraph

ཁུདྡཀནིཀཱཡེ

དྷམྨཔདཔཱལི༹

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

མནོཔུབྦངྒམཱ ¶ ¶ ¶ ¶ དྷམྨཱ, མནོསེཊྛཱ མནོམཡཱ;

མནསཱ ཙེ པདུཊྛེན, བྷཱསཏི ཝཱ ཀརོཏི ཝཱ;

ཏཏོ ནཾ དུཀྑམནྭེཏི, ཙཀྐཾཝ ཝཧཏོ པདཾ.

མནོཔུབྦངྒམཱ དྷམྨཱ, མནོསེཊྛཱ མནོམཡཱ;

མནསཱ ཙེ པསནྣེན, བྷཱསཏི ཝཱ ཀརོཏི ཝཱ;

ཏཏོ ནཾ སུཁམནྭེཏི, ཚཱཡཱཝ ཨནཔཱཡིནཱི [ཨནུཔཱཡིནཱི (ཀ.)].

ཨཀྐོཙྪི ¶ མཾ ཨཝདྷི མཾ, ཨཛིནི [ཨཛིནཱི (?)] མཾ ཨཧཱསི མེ;

ཡེ ཙ ཏཾ ཨུཔནཡ྄ཧནྟི, ཝེརཾ ཏེསཾ ན སམྨཏི.

ཨཀྐོཙྪི མཾ ཨཝདྷི མཾ, ཨཛིནི མཾ ཨཧཱསི མེ;

ཡེ ཙ ཏཾ ནུཔནཡ྄ཧནྟི, ཝེརཾ ཏེསཱུཔསམྨཏི.

ན ¶ ¶ ཧི ཝེརེན ཝེརཱནི, སམྨནྟཱིདྷ ཀུདཱཙནཾ;

ཨཝེརེན ཙ སམྨནྟི, ཨེས དྷམྨོ སནནྟནོ.

པརེ ¶ ཙ ན ཝིཛཱནནྟི, མཡམེཏྠ ཡམཱམསེ;

ཡེ ཙ ཏཏྠ ཝིཛཱནནྟི, ཏཏོ སམྨནྟི མེདྷགཱ.

སུབྷཱནུཔསྶིཾ ཝིཧརནྟཾ, ཨིནྡྲིཡེསུ ཨསཾཝུཏཾ;

བྷོཛནམྷི ཙཱམཏྟཉྙུཾ, ཀུསཱིཏཾ ཧཱིནཝཱིརིཡཾ;

ཏཾ ཝེ པསཧཏི མཱརོ, ཝཱཏོ རུཀྑཾཝ དུབྦལཾ.

ཨསུབྷཱནུཔསྶིཾ ཝིཧརནྟཾ, ཨིནྡྲིཡེསུ སུསཾཝུཏཾ;

བྷོཛནམྷི ཙ མཏྟཉྙུཾ, སདྡྷཾ ཨཱརདྡྷཝཱིརིཡཾ;

ཏཾ ཝེ ནཔྤསཧཏི མཱརོ, ཝཱཏོ སེལཾཝ པབྦཏཾ.

ཨནིཀྐསཱཝོ ཀཱསཱཝཾ, ཡོ ཝཏྠཾ པརིདཧིསྶཏི;

ཨཔེཏོ དམསཙྩེན, ན སོ ཀཱསཱཝམརཧཏི.

ཡོ ཙ ཝནྟཀསཱཝསྶ, སཱིལེསུ སུསམཱཧིཏོ;

ཨུཔེཏོ དམསཙྩེན, ས ཝེ ཀཱསཱཝམརཧཏི.

ཨསཱརེ སཱརམཏིནོ, སཱརེ ཙཱསཱརདསྶིནོ;

ཏེ སཱརཾ ནཱདྷིགཙྪནྟི, མིཙྪཱསངྐཔྤགོཙརཱ.

སཱརཉྩ ¶ སཱརཏོ ཉཏྭཱ, ཨསཱརཉྩ ཨསཱརཏོ;

ཏེ སཱརཾ ཨདྷིགཙྪནྟི, སམྨཱསངྐཔྤགོཙརཱ.

ཡཐཱ ཨགཱརཾ དུཙྪནྣཾ, ཝུཊྛཱི སམཏིཝིཛ྄ཛྷཏི;

ཨེཝཾ ཨབྷཱཝིཏཾ ཙིཏྟཾ, རཱགོ སམཏིཝིཛ྄ཛྷཏི.

ཡཐཱ ¶ ¶ ཨགཱརཾ སུཚནྣཾ, ཝུཊྛཱི ན སམཏིཝིཛ྄ཛྷཏི;

ཨེཝཾ སུབྷཱཝིཏཾ ཙིཏྟཾ, རཱགོ ན སམཏིཝིཛ྄ཛྷཏི.

ཨིདྷ ¶ སོཙཏི པེཙྩ སོཙཏི, པཱཔཀཱརཱི ཨུབྷཡཏྠ སོཙཏི;

སོ སོཙཏི སོ ཝིཧཉྙཏི, དིསྭཱ ཀམྨཀིལིཊྛམཏྟནོ.

ཨིདྷ མོདཏི པེཙྩ མོདཏི, ཀཏཔུཉྙོ ཨུབྷཡཏྠ མོདཏི;

སོ མོདཏི སོ པམོདཏི, དིསྭཱ ཀམྨཝིསུདྡྷིམཏྟནོ.

ཨིདྷ ཏཔྤཏི པེཙྩ ཏཔྤཏི, པཱཔཀཱརཱི [པཱཔཀཱརི (?)] ཨུབྷཡཏྠ ཏཔྤཏི;

‘‘པཱཔཾ མེ ཀཏ’’ནྟི ཏཔྤཏི, བྷིཡྻོ [བྷཱིཡོ (སཱི.)] ཏཔྤཏི དུགྒཏིཾ གཏོ.

ཨིདྷ ནནྡཏི པེཙྩ ནནྡཏི, ཀཏཔུཉྙོ ཨུབྷཡཏྠ ནནྡཏི;

‘‘པུཉྙཾ མེ ཀཏ’’ནྟི ནནྡཏི, བྷིཡྻོ ནནྡཏི སུགྒཏིཾ གཏོ.

བཧུམྤི ཙེ སཾཧིཏ [སཧིཏཾ (སཱི. སྱཱ. ཀཾ. པཱི.)] བྷཱསམཱནོ, ན ཏཀྐརོ ཧོཏི ནརོ པམཏྟོ;

གོཔོཝ ¶ གཱཝོ གཎཡཾ པརེསཾ, ན བྷཱགཝཱ སཱམཉྙསྶ ཧོཏི.

ཨཔྤམྤི ཙེ སཾཧིཏ བྷཱསམཱནོ, དྷམྨསྶ ཧོཏི [ཧོཏཱི (སཱི. པཱི.)] ཨནུདྷམྨཙཱརཱི;

རཱགཉྩ དོསཉྩ པཧཱཡ མོཧཾ, སམྨཔྤཛཱནོ སུཝིམུཏྟཙིཏྟོ;

ཨནུཔཱདིཡཱནོ ཨིདྷ ཝཱ ཧུརཾ ཝཱ, ས བྷཱགཝཱ སཱམཉྙསྶ ཧོཏི.

ཨཔྤམཱདོ ¶ ¶ ¶ ཨམཏཔདཾ [ཨམཏཾ པདཾ (ཀ.)], པམཱདོ མཙྩུནོ པདཾ;

ཨཔྤམཏྟཱ ན མཱིཡནྟི, ཡེ པམཏྟཱ ཡཐཱ མཏཱ.

ཨེཝཾ [ཨེཏཾ (སཱི. སྱཱ. ཀཾ. པཱི.)] ཝིསེསཏོ ཉཏྭཱ, ཨཔྤམཱདམྷི པཎྜིཏཱ;

ཨཔྤམཱདེ པམོདནྟི, ཨརིཡཱནཾ གོཙརེ རཏཱ.

ཏེ ཛྷཱཡིནོ སཱཏཏིཀཱ, ནིཙྩཾ དལ༹ྷཔརཀྐམཱ;

ཕུསནྟི དྷཱིརཱ ནིབྦཱནཾ, ཡོགཀྑེམཾ ཨནུཏྟརཾ.

ཨུཊྛཱནཝཏོ སཏཱིམཏོ [སཏིམཏོ (སཱི. སྱཱ. ཀ.)], སུཙིཀམྨསྶ ནིསམྨཀཱརིནོ;

སཉྙཏསྶ དྷམྨཛཱིཝིནོ, ཨཔྤམཏྟསྶ [ཨཔམཏྟསྶ (?)] ཡསོབྷིཝཌྜྷཏི.

ཨུཊྛཱནེནཔྤམཱདེན ¶ , སཾཡམེན དམེན ཙ;

དཱིཔཾ ཀཡིརཱཐ མེདྷཱཝཱི, ཡཾ ཨོགྷོ ནཱབྷིཀཱིརཏི.

པམཱདམནུཡུཉྫནྟི, བཱལཱ དུམྨེདྷིནོ ཛནཱ;

ཨཔྤམཱདཉྩ མེདྷཱཝཱི, དྷནཾ སེཊྛཾཝ རཀྑཏི.

མཱ པམཱདམནུཡུཉྫེཐ, མཱ ཀཱམརཏིསནྠཝཾ [སནྡྷཝཾ (ཀ)];

ཨཔྤམཏྟོ ཧི ཛྷཱཡནྟོ, པཔྤོཏི ཝིཔུལཾ སུཁཾ.

པམཱདཾ ཨཔྤམཱདེན, ཡདཱ ནུདཏི པཎྜིཏོ;

པཉྙཱཔཱསཱདམཱརུཡ྄ཧ, ཨསོཀོ སོཀིནིཾ པཛཾ;

པབྦཏཊྛོཝ བྷཱུམཊྛེ [བྷུམྨཊྛེ (སཱི. སྱཱ.)], དྷཱིརོ བཱལེ ཨཝེཀྑཏི.

ཨཔྤམཏྟོ ¶ ¶ པམཏྟེསུ, སུཏྟེསུ བཧུཛཱགརོ;

ཨབལསྶཾཝ ¶ སཱིགྷསྶོ, ཧིཏྭཱ ཡཱཏི སུམེདྷསོ.

ཨཔྤམཱདེན མགྷཝཱ, དེཝཱནཾ སེཊྛཏཾ གཏོ;

ཨཔྤམཱདཾ པསཾསནྟི, པམཱདོ གརཧིཏོ སདཱ.

ཨཔྤམཱདརཏོ བྷིཀྑུ, པམཱདེ བྷཡདསྶི ཝཱ;

སཾཡོཛནཾ ཨཎུཾ ཐཱུལཾ, ཌཧཾ ཨགྒཱིཝ གཙྪཏི.

ཨཔྤམཱདརཏོ བྷིཀྑུ, པམཱདེ བྷཡདསྶི ཝཱ;

ཨབྷབྦོ པརིཧཱནཱཡ, ནིབྦཱནསྶེཝ སནྟིཀེ.

ཕནྡནཾ ¶ ཙཔལཾ ཙིཏྟཾ, དཱུརཀྑཾ [དུརཀྑཾ (སབྦཏྠ)] དུནྣིཝཱརཡཾ;

ཨུཛུཾ ཀརོཏི མེདྷཱཝཱི, ཨུསུཀཱརོཝ ཏེཛནཾ.

ཝཱརིཛོཝ ཐལེ ཁིཏྟོ, ཨོཀམོཀཏཨུབྦྷཏོ;

པརིཕནྡཏིདཾ ཙིཏྟཾ, མཱརདྷེཡྻཾ པཧཱཏཝེ.

དུནྣིགྒཧསྶ ལཧུནོ, ཡཏྠཀཱམནིཔཱཏིནོ;

ཙིཏྟསྶ དམཐོ སཱདྷུ, ཙིཏྟཾ དནྟཾ སུཁཱཝཧཾ.

སུདུདྡསཾ ¶ ¶ སུནིཔུཎཾ, ཡཏྠཀཱམནིཔཱཏིནཾ;

ཙིཏྟཾ རཀྑེཐ མེདྷཱཝཱི, ཙིཏྟཾ གུཏྟཾ སུཁཱཝཧཾ.

དཱུརངྒམཾ ཨེཀཙརཾ [ཨེཀཙཱརཾ (ཀ.)], ཨསརཱིརཾ གུཧཱསཡཾ;

ཡེ ¶ ཙིཏྟཾ སཾཡམེསྶནྟི, མོཀྑནྟི མཱརབནྡྷནཱ.

ཨནཝཊྛིཏཙིཏྟསྶ, སདྡྷམྨཾ ཨཝིཛཱནཏོ;

པརིཔླཝཔསཱདསྶ, པཉྙཱ ན པརིཔཱུརཏི.

པུཉྙཔཱཔཔཧཱིནསྶ, ནཏྠི ཛཱགརཏོ བྷཡཾ.

ཀུམྦྷཱུཔམཾ ཀཱཡམིམཾ ཝིདིཏྭཱ, ནགརཱུཔམཾ ཙིཏྟམིདཾ ཋཔེཏྭཱ;

ཡོདྷེཐ མཱརཾ པཉྙཱཝུདྷེན, ཛིཏཉྩ རཀྑེ ཨནིཝེསནོ སིཡཱ.

ཨཙིརཾ ¶ ཝཏཡཾ ཀཱཡོ, པཐཝིཾ ཨདྷིསེསྶཏི;

ཚུདྡྷོ ཨཔེཏཝིཉྙཱཎོ, ནིརཏྠཾཝ ཀལིངྒརཾ.

དིསོ དིསཾ ཡཾ ཏཾ ཀཡིརཱ, ཝེརཱི ཝཱ པན ཝེརིནཾ;

མིཙྪཱཔཎིཧིཏཾ ཙིཏྟཾ, པཱཔིཡོ [པཱཔིཡཾ (?)] ནཾ ཏཏོ ཀརེ.

ན ཏཾ མཱཏཱ པིཏཱ ཀཡིརཱ, ཨཉྙེ ཝཱཔི ཙ ཉཱཏཀཱ;

སམྨཱཔཎིཧིཏཾ ཙིཏྟཾ, སེཡྻསོ ནཾ ཏཏོ ཀརེ.

ཀོ ¶ ¶ ¶ ཨིམཾ [ཀོམཾ (ཀ.)] པཐཝིཾ ཝིཙེསྶཏི [ཝིཛེསྶཏི (སཱི. སྱཱ. པཱི.)], ཡམལོཀཉྩ ཨིམཾ སདེཝཀཾ;

ཀོ དྷམྨཔདཾ སུདེསིཏཾ, ཀུསལོ པུཔྥམིཝ པཙེསྶཏི [པུཔྥམིཝཔྤཙེསྶཏི (ཀ.)].

སེཁོ པཐཝིཾ ཝིཙེསྶཏི, ཡམལོཀཉྩ ཨིམཾ སདེཝཀཾ;

སེཁོ དྷམྨཔདཾ སུདེསིཏཾ, ཀུསལོ པུཔྥམིཝ པཙེསྶཏི.

ཕེཎཱུཔམཾ ¶ ཀཱཡམིམཾ ཝིདིཏྭཱ, མརཱིཙིདྷམྨཾ ཨབྷིསམྦུདྷཱནོ;

ཚེཏྭཱན མཱརསྶ པཔུཔྥཀཱནི [སཔུཔྥཀཱནི (ཊཱིཀཱ)], ཨདསྶནཾ མཙྩུརཱཛསྶ གཙྪེ.

པུཔྥཱནི ཧེཝ པཙིནནྟཾ, བྱཱསཏྟམནསཾ [བྱཱསཏྟམཱནསཾ (ཀ.)] ནརཾ;

སུཏྟཾ གཱམཾ མཧོགྷོཝ, མཙྩུ ཨཱདཱཡ གཙྪཏི.

པུཔྥཱནི ཧེཝ པཙིནནྟཾ, བྱཱསཏྟམནསཾ ནརཾ;

ཨཏིཏྟཉྙེཝ ཀཱམེསུ, ཨནྟཀོ ཀུརུཏེ ཝསཾ.

ཡཐཱཔི བྷམརོ པུཔྥཾ, ཝཎྞགནྡྷམཧེཋཡཾ [ཝཎྞགནྡྷམཔོཋཡཾ (ཀ.)];

པལེཏི རསམཱདཱཡ, ཨེཝཾ གཱམེ མུནཱི ཙརེ.

ན པརེསཾ ཝིལོམཱནི, ན པརེསཾ ཀཏཱཀཏཾ;

ཨཏྟནོཝ ཨཝེཀྑེཡྻ, ཀཏཱནི ཨཀཏཱནི ཙ.

ཡཐཱཔི ¶ ¶ རུཙིརཾ པུཔྥཾ, ཝཎྞཝནྟཾ ཨགནྡྷཀཾ;

ཨེཝཾ སུབྷཱསིཏཱ ཝཱཙཱ, ཨཕལཱ ཧོཏི ཨཀུབྦཏོ.

ཡཐཱཔི ¶ རུཙིརཾ པུཔྥཾ, ཝཎྞཝནྟཾ སུགནྡྷཀཾ [སགནྡྷཀཾ (སཱི. སྱཱ. ཀཾ. པཱི.)];

ཨེཝཾ སུབྷཱསིཏཱ ཝཱཙཱ, སཕལཱ ཧོཏི ཀུབྦཏོ [སཀུབྦཏོ (སཱི. པཱི.), པཀུབྦཏོ (སཱི. ཨཊྛ.), སུཀུབྦཏོ (སྱཱ. ཀཾ.)].

ཡཐཱཔི ¶ པུཔྥརཱསིམྷཱ, ཀཡིརཱ མཱལཱགུཎེ བཧཱུ;

ཨེཝཾ ཛཱཏེན མཙྩེན, ཀཏྟབྦཾ ཀུསལཾ བཧུཾ.

ན པུཔྥགནྡྷོ པཊིཝཱཏམེཏི, ན ཙནྡནཾ ཏགརམལླིཀཱ [ཏགརམལླིཀཱ (སཱི. སྱཱ. ཀཾ. པཱི.)];

སཏཉྩ གནྡྷོ པཊིཝཱཏམེཏི, སབྦཱ དིསཱ སཔྤུརིསོ པཝཱཡཏི.

ཙནྡནཾ ཏགརཾ ཝཱཔི, ཨུཔྤལཾ ཨཐ ཝསྶིཀཱི;

ཨེཏེསཾ གནྡྷཛཱཏཱནཾ, སཱིལགནྡྷོ ཨནུཏྟརོ.

ཨཔྤམཏྟོ ཨཡཾ གནྡྷོ, ཡྭཱཡཾ ཏགརཙནྡནཾ [ཡཱཡཾ ཏགརཙནྡནཱི (སཱི. སྱཱ. ཀཾ. པཱི.)];

ཡོ ཙ སཱིལཝཏཾ གནྡྷོ, ཝཱཏི དེཝེསུ ཨུཏྟམོ.

ཏེསཾ སམྤནྣསཱིལཱནཾ, ཨཔྤམཱདཝིཧཱརིནཾ;

སམྨདཉྙཱ ཝིམུཏྟཱནཾ, མཱརོ མགྒཾ ན ཝིནྡཏི.

ཡཐཱ སངྐཱརཋཱནསྨིཾ [སངྐཱརདྷཱནསྨིཾ (སཱི. སྱཱ. ཀཾ. པཱི.)], ཨུཛ྄ཛྷིཏསྨིཾ མཧཱཔཐེ;

པདུམཾ ཏཏྠ ཛཱཡེཐ, སུཙིགནྡྷཾ མནོརམཾ.

ཨེཝཾ ¶ སངྐཱརབྷཱུཏེསུ, ཨནྡྷབྷཱུཏེ [ཨནྡྷཱིབྷཱུཏེ (ཀ.)] པུཐུཛྫནེ;

ཨཏིརོཙཏི པཉྙཱཡ, སམྨཱསམྦུདྡྷསཱཝཀོ.

དཱིགྷཱ ¶ ¶ ¶ ཛཱགརཏོ རཏྟི, དཱིགྷཾ སནྟསྶ ཡོཛནཾ;

དཱིགྷོ བཱལཱནཾ སཾསཱརོ, སདྡྷམྨཾ ཨཝིཛཱནཏཾ.

ཙརཉྩེ ནཱདྷིགཙྪེཡྻ, སེཡྻཾ སདིསམཏྟནོ;

ཨེཀཙརིཡཾ [ཨེཀཙརིཡཾ (ཀ.)] དལ༹ྷཾ ཀཡིརཱ, ནཏྠི བཱལེ སཧཱཡཏཱ.

པུཏྟཱ མཏྠི དྷནམྨཏྠི [པུཏྟམཏྠི དྷནམཏྠི (ཀ.)], ཨིཏི བཱལོ ཝིཧཉྙཏི;

ཨཏྟཱ ཧི [ཨཏྟཱཔི (?)] ཨཏྟནོ ནཏྠི, ཀུཏོ པུཏྟཱ ཀུཏོ དྷནཾ.

ཡོ བཱལོ མཉྙཏི བཱལྱཾ, པཎྜིཏོ ཝཱཔི ཏེན སོ;

བཱལོ ཙ པཎྜིཏམཱནཱི, ས ཝེ ‘‘བཱལོ’’ཏི ཝུཙྩཏི.

ཡཱཝཛཱིཝམྤི ཙེ བཱལོ, པཎྜིཏཾ པཡིརུཔཱསཏི;

ན སོ དྷམྨཾ ཝིཛཱནཱཏི, དབྦཱི སཱུཔརསཾ ཡཐཱ.

མུཧུཏྟམཔི ¶ ཙེ ཝིཉྙཱུ, པཎྜིཏཾ པཡིརུཔཱསཏི;

ཁིཔྤཾ དྷམྨཾ ཝིཛཱནཱཏི, ཛིཝ྄ཧཱ སཱུཔརསཾ ཡཐཱ.

ཙརནྟི བཱལཱ དུམྨེདྷཱ, ཨམིཏྟེནེཝ ཨཏྟནཱ;

ཀརོནྟཱ པཱཔཀཾ ཀམྨཾ, ཡཾ ཧོཏི ཀཊུཀཔྥལཾ.

ན ¶ ཏཾ ཀམྨཾ ཀཏཾ སཱདྷུ, ཡཾ ཀཏྭཱ ཨནུཏཔྤཏི;

ཡསྶ ཨསྶུམུཁོ རོདཾ, ཝིཔཱཀཾ པཊིསེཝཏི.

ཏཉྩ ¶ ཀམྨཾ ཀཏཾ སཱདྷུ, ཡཾ ཀཏྭཱ ནཱནུཏཔྤཏི;

ཡསྶ པཏཱིཏོ སུམནོ, ཝིཔཱཀཾ པཊིསེཝཏི.

མདྷུཝཱ ¶ [མདྷུཾ ཝཱ (དཱི. ནི. ཊཱིཀཱ ༡)] མཉྙཏི བཱལོ, ཡཱཝ པཱཔཾ ན པཙྩཏི;

ཡདཱ ཙ པཙྩཏི པཱཔཾ, བཱལོ [ཨཐ བཱལོ (སཱི. སྱཱ.) ཨཐ (?)] དུཀྑཾ ནིགཙྪཏི.

མཱསེ མཱསེ ཀུསགྒེན, བཱལོ བྷུཉྫེཡྻ བྷོཛནཾ;

ན སོ སངྑཱཏདྷམྨཱནཾ [སངྑཏདྷམྨཱནཾ (སཱི. པཱི. ཀ.)], ཀལཾ ཨགྒྷཏི སོལ༹སིཾ.

ན ཧི པཱཔཾ ཀཏཾ ཀམྨཾ, སཛྫུ ཁཱིརཾཝ མུཙྩཏི;

ཌཧནྟཾ བཱལམནྭེཏི, བྷསྨཙྪནྣོཝ [བྷསྨཱཚནྣོཝ (སཱི. པཱི. ཀ.)] པཱཝཀོ.

ཡཱཝདེཝ ཨནཏྠཱཡ, ཉཏྟཾ [ཉཱཏཾ (?)] བཱལསྶ ཛཱཡཏི;

ཧནྟི བཱལསྶ སུཀྐཾསཾ, མུདྡྷམསྶ ཝིཔཱཏཡཾ.

ཨསནྟཾ ¶ བྷཱཝནམིཙྪེཡྻ [ཨསནྟཾ བྷཱཝམིཙྪེཡྻ (སྱཱ.), ཨསནྟབྷཱཝནམིཙྪེཡྻ (ཀ.)], པུརེཀྑཱརཉྩ བྷིཀྑུསུ;

ཨཱཝཱསེསུ ཙ ཨིསྶརིཡཾ, པཱུཛཱ པརཀུལེསུ ཙ.

མམེཝ ¶ ཀཏ མཉྙནྟུ, གིཧཱིཔབྦཛིཏཱ ཨུབྷོ;

མམེཝཱཏིཝསཱ ཨསྶུ, ཀིཙྩཱཀིཙྩེསུ ཀིསྨིཙི;

ཨིཏི བཱལསྶ སངྐཔྤོ, ཨིཙྪཱ མཱནོ ཙ ཝཌྜྷཏི.

ཨཉྙཱ ཧི ལཱབྷཱུཔནིསཱ, ཨཉྙཱ ནིབྦཱནགཱམིནཱི;

ཨེཝམེཏཾ ཨབྷིཉྙཱཡ, བྷིཀྑུ བུདྡྷསྶ སཱཝཀོ;

སཀྐཱརཾ ནཱབྷིནནྡེཡྻ, ཝིཝེཀམནུབྲཱུཧཡེ.

ནིདྷཱིནཾཝ ¶ ¶ པཝཏྟཱརཾ, ཡཾ པསྶེ ཝཛྫདསྶིནཾ;

ནིགྒཡ྄ཧཝཱདིཾ མེདྷཱཝིཾ, ཏཱདིསཾ པཎྜིཏཾ བྷཛེ;

ཏཱདིསཾ བྷཛམཱནསྶ, སེཡྻོ ཧོཏི ན པཱཔིཡོ.

ཨོཝདེཡྻཱནུསཱསེཡྻ, ཨསབྦྷཱ ཙ ནིཝཱརཡེ;

སཏཉྷི སོ པིཡོ ཧོཏི, ཨསཏཾ ཧོཏི ཨཔྤིཡོ.

ན བྷཛེ པཱཔཀེ མིཏྟེ, ན བྷཛེ པུརིསཱདྷམེ;

བྷཛེཐ མིཏྟེ ཀལྱཱཎེ, བྷཛེཐ པུརིསུཏྟམེ.

དྷམྨཔཱིཏི ¶ སུཁཾ སེཏི, ཝིཔྤསནྣེན ཙེཏསཱ;

ཨརིཡཔྤཝེདིཏེ དྷམྨེ, སདཱ རམཏི པཎྜིཏོ.

ཨུདཀཉྷི ¶ ནཡནྟི ནེཏྟིཀཱ, ཨུསུཀཱརཱ ནམཡནྟི [དམཡནྟི (ཀ.)] ཏེཛནཾ;

དཱརུཾ ནམཡནྟི ཏཙྪཀཱ, ཨཏྟཱནཾ དམཡནྟི པཎྜིཏཱ.

སེལོ ཡཐཱ ཨེཀགྷནོ [ཨེཀགྒྷནོ (ཀ.)], ཝཱཏེན ན སམཱིརཏི;

ཨེཝཾ ནིནྡཱཔསཾསཱསུ, ན སམིཉྫནྟི པཎྜིཏཱ.

ཡཐཱཔི རཧདོ གམྦྷཱིརོ, ཝིཔྤསནྣོ ཨནཱཝིལོ;

ཨེཝཾ དྷམྨཱནི སུཏྭཱན, ཝིཔྤསཱིདནྟི པཎྜིཏཱ.

སབྦཏྠ ཝེ སཔྤུརིསཱ ཙཛནྟི, ན ¶ ཀཱམཀཱམཱ ལཔཡནྟི སནྟོ;

སུཁེན ཕུཊྛཱ ཨཐ ཝཱ དུཁེན, ན ཨུཙྩཱཝཙཾ [ནོཙྩཱཝཙཾ (སཱི. ཨཊྛ.)] པཎྜིཏཱ དསྶཡནྟི.

ན ¶ ཨཏྟཧེཏུ ན པརསྶ ཧེཏུ, ན པུཏྟམིཙྪེ ན དྷནཾ ན རཊྛཾ;

ན ཨིཙྪེཡྻ [ནཡིཙྪེ (པཱི.), ནིཙྪེ (?)] ཨདྷམྨེན སམིདྡྷིམཏྟནོ, ས སཱིལཝཱ པཉྙཝཱ དྷམྨིཀོ སིཡཱ.

ཨཔྤཀཱ ཏེ མནུསྶེསུ, ཡེ ཛནཱ པཱརགཱམིནོ;

ཨཐཱཡཾ ཨིཏརཱ པཛཱ, ཏཱིརམེཝཱནུདྷཱཝཏི.

ཡེ ¶ ཙ ཁོ སམྨདཀྑཱཏེ, དྷམྨེ དྷམྨཱནུཝཏྟིནོ;

ཏེ ཛནཱ པཱརམེསྶནྟི, མཙྩུདྷེཡྻཾ སུདུཏྟརཾ.

ཀཎྷཾ ¶ དྷམྨཾ ཝིཔྤཧཱཡ, སུཀྐཾ བྷཱཝེཐ པཎྜིཏོ;

ཨོཀཱ ཨནོཀམཱགམྨ, ཝིཝེཀེ ཡཏྠ དཱུརམཾ.

ཏཏྲཱབྷིརཏིམིཙྪེཡྻ, ཧིཏྭཱ ཀཱམེ ཨཀིཉྩནོ;

པརིཡོདཔེཡྻ [པརིཡོདཱཔེཡྻ (?)] ཨཏྟཱནཾ, ཙིཏྟཀླེསེཧི པཎྜིཏོ.

ཡེསཾ སམྦོདྷིཡངྒེསུ, སམྨཱ ཙིཏྟཾ སུབྷཱཝིཏཾ;

ཨཱདཱནཔཊིནིསྶགྒེ, ཨནུཔཱདཱཡ ཡེ རཏཱ;

ཁཱིཎཱསཝཱ ཛུཏིམནྟོ, ཏེ ལོཀེ པརིནིབྦུཏཱ.

གཏདྡྷིནོ ¶ ཝིསོཀསྶ, ཝིཔྤམུཏྟསྶ སབྦདྷི;

སབྦགནྠཔྤཧཱིནསྶ, པརིལཱ༹ཧོ ན ཝིཛྫཏི.

ཨུཡྻུཉྫནྟི ¶ སཏཱིམནྟོ, ན ནིཀེཏེ རམནྟི ཏེ;

ཧཾསཱཝ པལླལཾ ཧིཏྭཱ, ཨོཀམོཀཾ ཛཧནྟི ཏེ.

ཡེསཾ ¶ སནྣིཙཡོ ནཏྠི, ཡེ པརིཉྙཱཏབྷོཛནཱ;

སུཉྙཏོ ཨནིམིཏྟོ ཙ, ཝིམོཀྑོ ཡེསཾ གོཙརོ;

ཨཱཀཱསེ ཝ སཀུནྟཱནཾ [སཀུཎཱནཾ (ཀ.)], གཏི ཏེསཾ དུརནྣཡཱ.

ཡསྶཱསཝཱ ¶ པརིཀྑཱིཎཱ, ཨཱཧཱརེ ཙ ཨནིསྶིཏོ;

སུཉྙཏོ ཨནིམིཏྟོ ཙ, ཝིམོཀྑོ ཡསྶ གོཙརོ;

ཨཱཀཱསེ ཝ སཀུནྟཱནཾ, པདཾ ཏསྶ དུརནྣཡཾ.

ཡསྶིནྡྲིཡཱནི སམཐངྒཏཱནི [སམཐཾ གཏཱནི (སཱི. པཱི.)], ཨསྶཱ ཡཐཱ སཱརཐིནཱ སུདནྟཱ;

པཧཱིནམཱནསྶ ཨནཱསཝསྶ, དེཝཱཔི ཏསྶ པིཧཡནྟི ཏཱདིནོ.

པཐཝིསམོ ནོ ཝིརུཛ྄ཛྷཏི, ཨིནྡཁིལུཔམོ [ཨིནྡཁཱིལཱུཔམོ (སཱི. སྱཱ. ཀ.)] ཏཱདི སུབྦཏོ;

རཧདོཝ ཨཔེཏཀདྡམོ, སཾསཱརཱ ན བྷཝནྟི ཏཱདིནོ.

སནྟཾ ¶ ཏསྶ མནཾ ཧོཏི, སནྟཱ ཝཱཙཱ ཙ ཀམྨ ཙ;

སམྨདཉྙཱ ཝིམུཏྟསྶ, ཨུཔསནྟསྶ ཏཱདིནོ.

ཨསྶདྡྷོ ཨཀཏཉྙཱུ ཙ, སནྡྷིཙྪེདོ ཙ ཡོ ནརོ;

ཧཏཱཝཀཱསོ ཝནྟཱསོ, ས ཝེ ཨུཏྟམཔོརིསོ.

གཱམེ ཝཱ ཡདི ཝཱརཉྙེ, ནིནྣེ ཝཱ ཡདི ཝཱ ཐལེ;

ཡཏྠ ཨརཧནྟོ ཝིཧརནྟི, ཏཾ བྷཱུམིརཱམཎེཡྻཀཾ.

རམཎཱིཡཱནི ¶ ¶ ཨརཉྙཱནི, ཡཏྠ ན རམཏཱི ཛནོ;

ཝཱིཏརཱགཱ རམིསྶནྟི, ན ཏེ ཀཱམགཝེསིནོ.

སཧསྶམཔི ¶ ཙེ ཝཱཙཱ, ཨནཏྠཔདསཾཧིཏཱ;

ཨེཀཾ ཨཏྠཔདཾ སེཡྻོ, ཡཾ སུཏྭཱ ཨུཔསམྨཏི.

སཧསྶམཔི ཙེ གཱཐཱ, ཨནཏྠཔདསཾཧིཏཱ;

ཨེཀཾ གཱཐཱཔདཾ སེཡྻོ, ཡཾ སུཏྭཱ ཨུཔསམྨཏི.

ཡོ ཙ གཱཐཱ སཏཾ བྷཱསེ, ཨནཏྠཔདསཾཧིཏཱ [ཨནཏྠཔདསཉྷིཏཾ (ཀ.) ཝིསེསནཾ ཧེཏཾ གཱཐཱཏིཔདསྶ];

ཨེཀཾ དྷམྨཔདཾ སེཡྻོ, ཡཾ སུཏྭཱ ཨུཔསམྨཏི.

ཡོ སཧསྶཾ སཧསྶེན, སངྒཱམེ མཱནུསེ ཛིནེ;

ཨེཀཉྩ ཛེཡྻམཏྟཱནཾ [ཨཏྟཱནཾ (སཱི. པཱི.)], ས ཝེ སངྒཱམཛུཏྟམོ.

ཨཏྟཱ ¶ ཧཝེ ཛིཏཾ སེཡྻོ, ཡཱ ཙཱཡཾ ཨིཏརཱ པཛཱ;

ཨཏྟདནྟསྶ པོསསྶ, ནིཙྩཾ སཉྙཏཙཱརིནོ.

ནེཝ དེཝོ ན གནྡྷབྦོ, ན མཱརོ སཧ བྲཧྨུནཱ;

ཛིཏཾ ཨཔཛིཏཾ ཀཡིརཱ, ཏཐཱརཱུཔསྶ ཛནྟུནོ.

མཱསེ ¶ ¶ མཱསེ སཧསྶེན, ཡོ ཡཛེཐ སཏཾ སམཾ;

ཨེཀཉྩ བྷཱཝིཏཏྟཱནཾ, མུཧུཏྟམཔི པཱུཛཡེ;

སཱཡེཝ པཱུཛནཱ སེཡྻོ, ཡཉྩེ ཝསྶསཏཾ ཧུཏཾ.

ཡོ ཙ ཝསྶསཏཾ ཛནྟུ, ཨགྒིཾ པརིཙརེ ཝནེ;

ཨེཀཉྩ བྷཱཝིཏཏྟཱནཾ, མུཧུཏྟམཔི པཱུཛཡེ;

སཱཡེཝ པཱུཛནཱ སེཡྻོ, ཡཉྩེ ཝསྶསཏཾ ཧུཏཾ.

ཡཾ ¶ ཀིཉྩི ཡིཊྛཾ ཝ ཧུཏཾ ཝ [ཡིཊྛཉྩ ཧུཏཉྩ (ཀ.)] ལོཀེ, སཾཝཙྪརཾ ཡཛེཐ པུཉྙཔེཀྑོ;

སབྦམྤི ཏཾ ན ཙཏུབྷཱགམེཏི, ཨབྷིཝཱདནཱ ཨུཛྫུགཏེསུ སེཡྻོ.

ཨབྷིཝཱདནསཱིལིསྶ, ནིཙྩཾ ཝུཌྜྷཱཔཙཱཡིནོ [ཝདྡྷཱཔཙཱཡིནོ (སཱི. པཱི.)];

ཙཏྟཱརོ དྷམྨཱ ཝཌྜྷནྟི, ཨཱཡུ ཝཎྞོ སུཁཾ བལཾ.

ཡོ ཙ ཝསྶསཏཾ ཛཱིཝེ, དུསྶཱིལོ ཨསམཱཧིཏོ;

ཨེཀཱཧཾ ཛཱིཝིཏཾ སེཡྻོ, སཱིལཝནྟསྶ ཛྷཱཡིནོ.

ཡོ ཙ ཝསྶསཏཾ ཛཱིཝེ, དུཔྤཉྙོ ཨསམཱཧིཏོ;

ཨེཀཱཧཾ ཛཱིཝིཏཾ སེཡྻོ, པཉྙཝནྟསྶ ཛྷཱཡིནོ.

ཡོ ¶ ཙ ཝསྶསཏཾ ཛཱིཝེ, ཀུསཱིཏོ ཧཱིནཝཱིརིཡོ;

ཨེཀཱཧཾ ཛཱིཝིཏཾ སེཡྻོ, ཝཱིརིཡམཱརབྷཏོ དལ༹ྷཾ.

ཡོ ¶ ཙ ཝསྶསཏཾ ཛཱིཝེ, ཨཔསྶཾ ཨུདཡབྦཡཾ;

ཨེཀཱཧཾ ཛཱིཝིཏཾ སེཡྻོ, པསྶཏོ ཨུདཡབྦཡཾ.

ཡོ ¶ ཙ ཝསྶསཏཾ ཛཱིཝེ, ཨཔསྶཾ ཨམཏཾ པདཾ;

ཨེཀཱཧཾ ཛཱིཝིཏཾ སེཡྻོ, པསྶཏོ ཨམཏཾ པདཾ.

ཡོ ཙ ཝསྶསཏཾ ཛཱིཝེ, ཨཔསྶཾ དྷམྨམུཏྟམཾ;

ཨེཀཱཧཾ ཛཱིཝིཏཾ སེཡྻོ, པསྶཏོ དྷམྨམུཏྟམཾ.

ཨབྷིཏྠརེཐ ¶ ཀལྱཱཎེ, པཱཔཱ ཙིཏྟཾ ནིཝཱརཡེ;

དནྡྷཉྷི ཀརོཏོ པུཉྙཾ, པཱཔསྨིཾ རམཏཱི མནོ.

པཱཔཉྩེ པུརིསོ ཀཡིརཱ, ན ནཾ [ན ཏཾ (སཱི. པཱི.)] ཀཡིརཱ པུནཔྤུནཾ;

ན ཏམྷི ཚནྡཾ ཀཡིརཱཐ, དུཀྑོ པཱཔསྶ ཨུཙྩཡོ.

པུཉྙཉྩེ པུརིསོ ཀཡིརཱ, ཀཡིརཱ ནཾ [ཀཡིརཱཐེཏཾ (སཱི. སྱཱ.), ཀཡིརཱཐེནཾ (པཱི.)] པུནཔྤུནཾ;

ཏམྷི ཚནྡཾ ཀཡིརཱཐ, སུཁོ པུཉྙསྶ ཨུཙྩཡོ.

པཱཔོཔི ¶ པསྶཏི བྷདྲཾ, ཡཱཝ པཱཔཾ ན པཙྩཏི;

ཡདཱ ཙ པཙྩཏི པཱཔཾ, ཨཐ པཱཔོ པཱཔཱནི [ཨཐ པཱཔཱནི (?)] པསྶཏི.

བྷདྲོཔི ¶ ¶ པསྶཏི པཱཔཾ, ཡཱཝ བྷདྲཾ ན པཙྩཏི;

ཡདཱ ཙ པཙྩཏི བྷདྲཾ, ཨཐ བྷདྲོ བྷདྲཱནི [ཨཐ བྷདྲཱནི (?)] པསྶཏི.

མཱཝམཉྙེཐ [མཱཔྤམཉྙེཐ (སཱི. སྱཱ. པཱི.)] པཱཔསྶ, ན མནྟཾ [ན མཾ ཏཾ (སཱི. པཱི.), ན མཏྟཾ (སྱཱ.)] ཨཱགམིསྶཏི;

ཨུདབིནྡུནིཔཱཏེན, ཨུདཀུམྦྷོཔི པཱུརཏི;

བཱལོ པཱུརཏི [པཱུརཏི བཱལོ (སཱི. ཀ.), ཨཱཔཱུརཏི བཱལོ (སྱཱ.)] པཱཔསྶ, ཐོཀཾ ཐོཀམྤི [ཐོཀ ཐོཀམྤི (སཱི. པཱི.)] ཨཱཙིནཾ.

མཱཝམཉྙེཐ པུཉྙསྶ, ན མནྟཾ ཨཱགམིསྶཏི;

ཨུདབིནྡུནིཔཱཏེན, ཨུདཀུམྦྷོཔི པཱུརཏི;

དྷཱིརོ པཱུརཏི པུཉྙསྶ, ཐོཀཾ ཐོཀམྤི ཨཱཙིནཾ.

ཝཱཎིཛོཝ བྷཡཾ མགྒཾ, ཨཔྤསཏྠོ མཧདྡྷནོ;

ཝིསཾ ཛཱིཝིཏུཀཱམོཝ, པཱཔཱནི པརིཝཛྫཡེ.

པཱཎིམྷི ¶ ཙེ ཝཎོ ནཱསྶ, ཧརེཡྻ པཱཎིནཱ ཝིསཾ;

ནཱབྦཎཾ ཝིསམནྭེཏི, ནཏྠི པཱཔཾ ཨཀུབྦཏོ.

ཡོ ¶ ཨཔྤདུཊྛསྶ ནརསྶ དུསྶཏི, སུདྡྷསྶ པོསསྶ ཨནངྒཎསྶ;

ཏམེཝ བཱལཾ པཙྩེཏི པཱཔཾ, སུཁུམོ རཛོ པཊིཝཱཏཾཝ ཁིཏྟོ.

གབྦྷམེཀེ ཨུཔྤཛྫནྟི, ནིརཡཾ པཱཔཀམྨིནོ;

སགྒཾ སུགཏིནོ ཡནྟི, པརིནིབྦནྟི ཨནཱསཝཱ.

ན ¶ ཨནྟལིཀྑེ ན སམུདྡམཛ྄ཛྷེ, ན པབྦཏཱནཾ ཝིཝརཾ པཝིསྶ [པཝིསཾ (སྱཱ.)];

ན ¶ ཝིཛྫཏཱི [ན ཝིཛྫཏི (ཀ. སཱི. པཱི. ཀ.)] སོ ཛགཏིཔྤདེསོ, ཡཏྠཊྛིཏོ [ཡཏྲཊྛིཏོ (སྱཱ.)] མུཙྩེཡྻ པཱཔཀམྨཱ.

ན ཨནྟལིཀྑེ ན སམུདྡམཛ྄ཛྷེ, ན པབྦཏཱནཾ ཝིཝརཾ པཝིསྶ;

ན ཝིཛྫཏཱི སོ ཛགཏིཔྤདེསོ, ཡཏྠཊྛིཏཾ [ཡཏྲཊྛིཏཾ (སྱཱ.)] ནཔྤསཧེཡྻ མཙྩུ.

སབྦེ ཏསནྟི དཎྜསྶ, སབྦེ བྷཱཡནྟི མཙྩུནོ;

ཨཏྟཱནཾ ཨུཔམཾ ཀཏྭཱ, ན ཧནེཡྻ ན གྷཱཏཡེ.

སབྦེ ¶ ཏསནྟི དཎྜསྶ, སབྦེསཾ ཛཱིཝིཏཾ པིཡཾ;

ཨཏྟཱནཾ ཨུཔམཾ ཀཏྭཱ, ན ཧནེཡྻ ན གྷཱཏཡེ.

སུཁཀཱམཱནི ¶ བྷཱུཏཱནི, ཡོ དཎྜེན ཝིཧིཾསཏི;

ཨཏྟནོ སུཁམེསཱནོ, པེཙྩ སོ ན ལབྷཏེ སུཁཾ.

སུཁཀཱམཱནི ¶ བྷཱུཏཱནི, ཡོ དཎྜེན ན ཧིཾསཏི;

ཨཏྟནོ སུཁམེསཱནོ, པེཙྩ སོ ལབྷཏེ སུཁཾ.

མཱཝོཙ ཕརུསཾ ཀཉྩི, ཝུཏྟཱ པཊིཝདེཡྻུ ཏཾ [པཊིཝདེཡྻུཾ ཏཾ (ཀ.)];

དུཀྑཱ ཧི སཱརམྦྷཀཐཱ, པཊིདཎྜཱ ཕུསེཡྻུ ཏཾ [ཕུསེཡྻུཾ ཏཾ (ཀ.)].

སཙེ ¶ ནེརེསི ཨཏྟཱནཾ, ཀཾསོ ཨུཔཧཏོ ཡཐཱ;

ཨེས པཏྟོསི ནིབྦཱནཾ, སཱརམྦྷོ ཏེ ན ཝིཛྫཏི.

ཡཐཱ དཎྜེན གོཔཱལོ, གཱཝོ པཱཛེཏི གོཙརཾ;

ཨེཝཾ ཛརཱ ཙ མཙྩུ ཙ, ཨཱཡུཾ པཱཛེནྟི པཱཎིནཾ.

ཨཐ པཱཔཱནི ཀམྨཱནི, ཀརཾ བཱལོ ན བུཛ྄ཛྷཏི;

སེཧི ཀམྨེཧི དུམྨེདྷོ, ཨགྒིདཌྜྷོཝ ཏཔྤཏི.

ཡོ དཎྜེན ཨདཎྜེསུ, ཨཔྤདུཊྛེསུ དུསྶཏི;

དསནྣམཉྙཏརཾ ཋཱནཾ, ཁིཔྤམེཝ ནིགཙྪཏི.

ཝེདནཾ ¶ ཕརུསཾ ཛཱནིཾ, སརཱིརསྶ ཙ བྷེདནཾ [སརཱིརསྶ པབྷེདནཾ (སྱཱ.)];

གརུཀཾ ཝཱཔི ཨཱབཱདྷཾ, ཙིཏྟཀྑེཔཉྩ [ཙིཏྟཀྑེཔཾ ཝ (སཱི. སྱཱ. པཱི.)] པཱཔུཎེ.

རཱཛཏོ ཝཱ ཨུཔསགྒཾ [ཨུཔསྶགྒཾ (སཱི. པཱི.)], ཨབྦྷཀྑཱནཉྩ [ཨབྦྷཀྑཱནཾ ཝ (སཱི. པཱི.)] དཱརུཎཾ;

པརིཀྑཡཉྩ [པརིཀྑཡཾ ཝ (སཱི. སྱཱ. པཱི.)] ཉཱཏཱིནཾ, བྷོགཱནཉྩ [བྷོགཱནཾ ཝ (སཱི. སྱཱ. པཱི.)] པབྷངྒུརཾ [པབྷངྒུནཾ (ཀ.)].

ཨཐ ཝཱསྶ ཨགཱརཱནི, ཨགྒི ཌཧཏི [ཌཡ྄ཧཏི (ཀ.)] པཱཝཀོ;

ཀཱཡསྶ བྷེདཱ དུཔྤཉྙོ, ནིརཡཾ སོཔཔཛྫཏི [སོ ཨུཔཔཛྫཏི (སཱི. སྱཱ.)].

ན ¶ ¶ ནགྒཙརིཡཱ ན ཛཊཱ ན པངྐཱ, ནཱནཱསཀཱ ཐཎྜིལསཱཡིཀཱ ཝཱ;

རཛོཛལླཾ ཨུཀྐུཊིཀཔྤདྷཱནཾ, སོདྷེནྟི མཙྩཾ ཨཝིཏིཎྞཀངྑཾ.

ཨལངྐཏོ ཙེཔི སམཾ ཙརེཡྻ, སནྟོ དནྟོ ནིཡཏོ བྲཧྨཙཱརཱི;

སབྦེསུ ¶ བྷཱུཏེསུ ནིདྷཱཡ དཎྜཾ, སོ བྲཱཧྨཎོ སོ སམཎོ ས བྷིཀྑུ.

ཧིརཱིནིསེདྷོ པུརིསོ, ཀོཙི ལོཀསྨི ཝིཛྫཏི;

ཡོ ནིདྡཾ [ནིནྡཾ (སཱི. པཱི.) སཾ. ནི. ༡.༡༨] ཨཔབོདྷེཏི [ཨཔབོདྷཏི (སཱི. སྱཱ. པཱི.)], ཨསྶོ བྷདྲོ ཀསཱམིཝ.

ཨསྶོ ¶ ཡཐཱ བྷདྲོ ཀསཱནིཝིཊྛོ, ཨཱཏཱཔིནོ སཾཝེགིནོ བྷཝཱཐ;

སདྡྷཱཡ སཱིལེན ཙ ཝཱིརིཡེན ཙ, སམཱདྷིནཱ དྷམྨཝིནིཙྪཡེན ཙ;

སམྤནྣཝིཛྫཱཙརཎཱ པཏིསྶཏཱ, ཛཧིསྶཐ [པཧསྶཐ (སཱི. སྱཱ. པཱི.)] དུཀྑམིདཾ ཨནཔྤཀཾ.

ཨུདཀཉྷི ནཡནྟི ནེཏྟིཀཱ, ཨུསུཀཱརཱ ནམཡནྟི ཏེཛནཾ;

དཱརུཾ ནམཡནྟི ཏཙྪཀཱ, ཨཏྟཱནཾ དམཡནྟི སུབྦཏཱ.

ཀོ ¶ ¶ ནུ ཧཱསོ [ཀིནྣུ ཧཱསོ (ཀ.)] ཀིམཱནནྡོ, ནིཙྩཾ པཛྫལིཏེ སཏི;

ཨནྡྷཀཱརེན ཨོནདྡྷཱ, པདཱིཔཾ ན གཝེསཐ.

པསྶ ཙིཏྟཀཏཾ བིམྦཾ, ཨརུཀཱཡཾ སམུསྶིཏཾ;

ཨཱཏུརཾ བཧུསངྐཔྤཾ, ཡསྶ ནཏྠི དྷུཝཾ ཋིཏི.

པརིཛིཎྞམིདཾ ¶ རཱུཔཾ, རོགནཱིལ༹ཾ [རོགནིཌྜྷཾ (སཱི. པཱི.), རོགནིདྡྷཾ (སྱཱ.)] པབྷངྒུརཾ;

བྷིཛྫཏི པཱུཏིསནྡེཧོ, མརཎནྟཉྷི ཛཱིཝིཏཾ.

ཡཱནིམཱནི ¶ ཨཔཏྠཱནི [ཡཱནིམཱནི ཨཔཏྠཱནི (སཱི. སྱཱ. པཱི.), ཡཱནིམཱནི’པཝིདྡྷཱནི (?)], ཨལཱབཱུནེཝ [ཨལཱཔཱུནེཝ (སཱི. སྱཱ. པཱི.)] སཱརདེ;

ཀཱཔོཏཀཱནི ཨཊྛཱིནི, ཏཱནི དིསྭཱན ཀཱ རཏི.

ཨཊྛཱིནཾ ནགརཾ ཀཏཾ, མཾསལོཧིཏལེཔནཾ;

ཡཏྠ ཛརཱ ཙ མཙྩུ ཙ, མཱནོ མཀྑོ ཙ ཨོཧིཏོ.

ཛཱིརནྟི ཝེ རཱཛརཐཱ སུཙིཏྟཱ, ཨཐོ སརཱིརམྤི ཛརཾ ཨུཔེཏི;

སཏཉྩ དྷམྨོ ན ཛརཾ ཨུཔེཏི, སནྟོ ཧཝེ སབྦྷི པཝེདཡནྟི.

ཨཔྤསྶུཏཱཡཾ པུརིསོ, བལིབདྡྷོཝ [བལིཝདྡོཝ (སཱི. སྱཱ. པཱི.)] ཛཱིརཏི;

མཾསཱནི ཏསྶ ཝཌྜྷནྟི, པཉྙཱ ཏསྶ ན ཝཌྜྷཏི.

ཨནེཀཛཱཏིསཾསཱརཾ ¶ , སནྡྷཱཝིསྶཾ ཨནིབྦིསཾ;

གཧཀཱརཾ [གཧཀཱརཀཾ (སཱི. སྱཱ. པཱི.)] གཝེསནྟོ, དུཀྑཱ ཛཱཏི པུནཔྤུནཾ.

གཧཀཱརཀ དིཊྛོསི, པུན གེཧཾ ན ཀཱཧསི;

སབྦཱ ¶ ཏེ ཕཱསུཀཱ བྷགྒཱ, གཧཀཱུཊཾ ཝིསངྑཏཾ;

ཝིསངྑཱརགཏཾ ཙིཏྟཾ, ཏཎྷཱནཾ ཁཡམཛ྄ཛྷགཱ.

ཨཙརིཏྭཱ བྲཧྨཙརིཡཾ, ཨལདྡྷཱ ཡོབྦནེ དྷནཾ;

ཛིཎྞཀོཉྩཱཝ ཛྷཱཡནྟི, ཁཱིཎམཙྪེཝ པལླལེ.

ཨཙརིཏྭཱ ¶ བྲཧྨཙརིཡཾ, ཨལདྡྷཱ ཡོབྦནེ དྷནཾ;

སེནྟི ཙཱཔཱཏིཁཱིཎཱཝ, པུརཱཎཱནི ཨནུཏྠུནཾ.

ཨཏྟཱནཉྩེ ¶ པིཡཾ ཛཉྙཱ, རཀྑེཡྻ ནཾ སུརཀྑིཏཾ;

ཏིཎྞཾ ཨཉྙཏརཾ ཡཱམཾ, པཊིཛགྒེཡྻ པཎྜིཏོ.

ཨཏྟཱནམེཝ པཋམཾ, པཏིརཱུཔེ ནིཝེསཡེ;

ཨཐཉྙམནུསཱསེཡྻ, ན ཀིལིསྶེཡྻ པཎྜིཏོ.

ཨཏྟཱནཾ ¶ ཙེ ཏཐཱ ཀཡིརཱ, ཡཐཱཉྙམནུསཱསཏི;

སུདནྟོ ཝཏ དམེཐ, ཨཏྟཱ ཧི ཀིར དུདྡམོ.

ཨཏྟཱ ཧི ཨཏྟནོ ནཱཐོ, ཀོ ཧི ནཱཐོ པརོ སིཡཱ;

ཨཏྟནཱ ཧི སུདནྟེན, ནཱཐཾ ལབྷཏི དུལླབྷཾ.

ཨཏྟནཱ ཧི ཀཏཾ པཱཔཾ, ཨཏྟཛཾ ཨཏྟསམྦྷཝཾ;

ཨབྷིམཏྠཏི [ཨབྷིམནྟཏི (སཱི. པཱི.)] དུམྨེདྷཾ, ཝཛིརཾ ཝསྨམཡཾ [ཝཛིརཾཝ’མྷམཡཾ (སྱཱ. ཀ.)] མཎིཾ.

ཡསྶ ¶ ཨཙྩནྟདུསྶཱིལྱཾ, མཱལུཝཱ སཱལམིཝོཏྠཏཾ;

ཀརོཏི སོ ཏཐཏྟཱནཾ, ཡཐཱ ནཾ ཨིཙྪཏཱི དིསོ.

སུཀརཱནི ¶ ཨསཱདྷཱུནི, ཨཏྟནོ ཨཧིཏཱནི ཙ;

ཡཾ ཝེ ཧིཏཉྩ སཱདྷུཉྩ, ཏཾ ཝེ པརམདུཀྐརཾ.

ཡོ སཱསནཾ ཨརཧཏཾ, ཨརིཡཱནཾ དྷམྨཛཱིཝིནཾ;

པཊིཀྐོསཏི དུམྨེདྷོ, དིཊྛིཾ ནིསྶཱཡ པཱཔིཀཾ;

ཕལཱནི ཀཊྛཀསྶེཝ, ཨཏྟགྷཱཏཱཡ [ཨཏྟགྷཉྙཱཡ (སཱི. སྱཱ. པཱི.)] ཕལླཏི.

ཨཏྟནཱ ¶ ཧི [ཨཏྟནཱཝ (སཱི. སྱཱ. པཱི.)] ཀཏཾ པཱཔཾ, ཨཏྟནཱ སཾཀིལིསྶཏི;

ཨཏྟནཱ ཨཀཏཾ པཱཔཾ, ཨཏྟནཱཝ ཝིསུཛ྄ཛྷཏི;

སུདྡྷཱི ཨསུདྡྷི པཙྩཏྟཾ, ནཱཉྙོ ཨཉྙཾ [ནཱཉྙམཉྙོ(སཱི.)] ཝིསོདྷཡེ.

ཨཏྟདཏྠཾ ¶ པརཏྠེན, བཧུནཱཔི ན ཧཱཔཡེ;

ཨཏྟདཏྠམབྷིཉྙཱཡ, སདཏྠཔསུཏོ སིཡཱ.

ཧཱིནཾ དྷམྨཾ ན སེཝེཡྻ, པམཱདེན ན སཾཝསེ;

མིཙྪཱདིཊྛིཾ ན སེཝེཡྻ, ན སིཡཱ ལོཀཝཌྜྷནོ.

ཨུཏྟིཊྛེ ནཔྤམཛྫེཡྻ, དྷམྨཾ སུཙརིཏཾ ཙརེ;

དྷམྨཙཱརཱི སུཁཾ སེཏི, ཨསྨིཾ ལོཀེ པརམྷི ཙ.

དྷམྨཾ ¶ ¶ ཙརེ སུཙརིཏཾ, ན ནཾ དུཙྩརིཏཾ ཙརེ;

དྷམྨཙཱརཱི སུཁཾ སེཏི, ཨསྨིཾ ལོཀེ པརམྷི ཙ.

ཡཐཱ པུབྦུལ༹ཀཾ [པུབྦུལ༹ཀཾ (སཱི. པཱི.)] པསྶེ, ཡཐཱ པསྶེ མརཱིཙིཀཾ;

ཨེཝཾ ལོཀཾ ཨཝེཀྑནྟཾ, མཙྩུརཱཛཱ ན པསྶཏི.

ཨེཐ པསྶཐིམཾ ལོཀཾ, ཙིཏྟཾ རཱཛརཐཱུཔམཾ;

ཡཏྠ བཱལཱ ཝིསཱིདནྟི, ནཏྠི སངྒོ ཝིཛཱནཏཾ.

ཡོ ¶ ¶ ཙ པུབྦེ པམཛྫིཏྭཱ, པཙྪཱ སོ ནཔྤམཛྫཏི;

སོམཾ ལོཀཾ པབྷཱསེཏི, ཨབྦྷཱ མུཏྟོཝ ཙནྡིམཱ.

ཡསྶ པཱཔཾ ཀཏཾ ཀམྨཾ, ཀུསལེན པིདྷཱིཡཏི [པིཏཱིཡཏི (སཱི. སྱཱ. པཱི.)];

སོམཾ ལོཀཾ པབྷཱསེཏི, ཨབྦྷཱ མུཏྟོཝ ཙནྡིམཱ.

ཨནྡྷབྷཱུཏོ [ཨནྡྷཱིབྷཱུཏོ (ཀ.)] ཨཡཾ ལོཀོ, ཏནུཀེཏྠ ཝིཔསྶཏི;

སཀུཎོ ཛཱལམུཏྟོཝ, ཨཔྤོ སགྒཱཡ གཙྪཏི.

ཧཾསཱདིཙྩཔཐེ ཡནྟི, ཨཱཀཱསེ ཡནྟི ཨིདྡྷིཡཱ;

ནཱིཡནྟི དྷཱིརཱ ལོཀམྷཱ, ཛེཏྭཱ མཱརཾ སཝཱཧིནིཾ [སཝཱཧནཾ (སྱཱ. ཀ.)].

ཨེཀཾ དྷམྨཾ ཨཏཱིཏསྶ, མུསཱཝཱདིསྶ ཛནྟུནོ;

ཝིཏིཎྞཔརལོཀསྶ, ནཏྠི པཱཔཾ ཨཀཱརིཡཾ.

ན ¶ ཝེ ཀདརིཡཱ དེཝལོཀཾ ཝཛནྟི, བཱལཱ ཧཝེ ནཔྤསཾསནྟི དཱནཾ;

དྷཱིརོ ཙ དཱནཾ ཨནུམོདམཱནོ, ཏེནེཝ ¶ སོ ཧོཏི སུཁཱི པརཏྠ.

པཐབྱཱ ཨེཀརཛྫེན, སགྒསྶ གམནེན ཝཱ;

སབྦལོཀཱདྷིཔཙྩེན, སོཏཱཔཏྟིཕལཾ ཝརཾ.

ཡསྶ ¶ ¶ ཛིཏཾ ནཱཝཛཱིཡཏི, ཛིཏཾ ཡསྶ [ཛིཏམསྶ (སཱི. སྱཱ. པཱི.), ཛིཏཾ མསྶ (ཀ.)] ནོ ཡཱཏི ཀོཙི ལོཀེ;

ཏཾ བུདྡྷམནནྟགོཙརཾ, ཨཔདཾ ཀེན པདེན ནེསྶཐ.

ཡསྶ ཛཱལིནཱི ཝིསཏྟིཀཱ, ཏཎྷཱ ནཏྠི ཀུཧིཉྩི ནེཏཝེ;

ཏཾ བུདྡྷམནནྟགོཙརཾ, ཨཔདཾ ཀེན པདེན ནེསྶཐ.

ཡེ ཛྷཱནཔསུཏཱ དྷཱིརཱ, ནེཀྑམྨཱུཔསམེ རཏཱ;

དེཝཱཔི ཏེསཾ པིཧཡནྟི, སམྦུདྡྷཱནཾ སཏཱིམཏཾ.

ཀིཙྪོ ¶ མནུསྶཔཊིལཱབྷོ, ཀིཙྪཾ མཙྩཱན ཛཱིཝིཏཾ;

ཀིཙྪཾ སདྡྷམྨསྶཝནཾ, ཀིཙྪོ བུདྡྷཱནམུཔྤཱདོ.

སབྦཔཱཔསྶ ཨཀརཎཾ, ཀུསལསྶ ཨུཔསམྤདཱ [ཀུསལསྶཱུཔསམྤདཱ (སྱཱ.)];

སཙིཏྟཔརིཡོདཔནཾ ¶ [སཙིཏྟཔརིཡོདཱཔནཾ (?)], ཨེཏཾ བུདྡྷཱན སཱསནཾ.

ཁནྟཱི པརམཾ ཏཔོ ཏིཏིཀྑཱ, ནིབྦཱནཾ [ནིབྦཱཎཾ (ཀ. སཱི. པཱི.)] པརམཾ ཝདནྟི བུདྡྷཱ;

ན ཧི པབྦཛིཏོ པརཱུཔགྷཱཏཱི, ན [ཨཡཾ ནཀཱརོ སཱི. སྱཱ. པཱི. པཱཏྠཀེསུ ན དིསྶཏི] སམཎོ ཧོཏི པརཾ ཝིཧེཋཡནྟོ.

ཨནཱུཔཝཱདོ ཨནཱུཔགྷཱཏོ [ཨནུཔཝཱདོ ཨནུཔགྷཱཏོ (སྱཱ. ཀ.)], པཱཏིམོཀྑེ ཙ སཾཝརོ;

མཏྟཉྙུཏཱ ཙ བྷཏྟསྨིཾ, པནྟཉྩ སཡནཱསནཾ;

ཨདྷིཙིཏྟེ ཙ ཨཱཡོགོ, ཨེཏཾ བུདྡྷཱན སཱསནཾ.

ན ¶ ཀཧཱཔཎཝསྶེན, ཏིཏྟི ཀཱམེསུ ཝིཛྫཏི;

ཨཔྤསྶཱདཱ དུཁཱ ཀཱམཱ, ཨིཏི ཝིཉྙཱཡ པཎྜིཏོ.

ཨཔི ¶ དིབྦེསུ ཀཱམེསུ, རཏིཾ སོ ནཱདྷིགཙྪཏི;

ཏཎྷཀྑཡརཏོ ཧོཏི, སམྨཱསམྦུདྡྷསཱཝཀོ.

བཧུཾ ཝེ སརཎཾ ཡནྟི, པབྦཏཱནི ཝནཱནི ཙ;

ཨཱརཱམརུཀྑཙེཏྱཱནི, མནུསྶཱ བྷཡཏཛྫིཏཱ.

ནེཏཾ ཁོ སརཎཾ ཁེམཾ, ནེཏཾ སརཎམུཏྟམཾ;

ནེཏཾ སརཎམཱགམྨ, སབྦདུཀྑཱ པམུཙྩཏི.

ཡོ ¶ ཙ བུདྡྷཉྩ དྷམྨཉྩ, སངྒྷཉྩ སརཎཾ གཏོ;

ཙཏྟཱརི ཨརིཡསཙྩཱནི, སམྨཔྤཉྙཱཡ པསྶཏི.

དུཀྑཾ དུཀྑསམུཔྤཱདཾ, དུཀྑསྶ ཙ ཨཏིཀྐམཾ;

ཨརིཡཾ ཙཊྛངྒིཀཾ མགྒཾ, དུཀྑཱུཔསམགཱམིནཾ.

ཨེཏཾ ¶ ཁོ སརཎཾ ཁེམཾ, ཨེཏཾ སརཎམུཏྟམཾ;

ཨེཏཾ སརཎམཱགམྨ, སབྦདུཀྑཱ པམུཙྩཏི.

དུལླབྷོ པུརིསཱཛཉྙོ, ན སོ སབྦཏྠ ཛཱཡཏི;

ཡཏྠ སོ ཛཱཡཏི དྷཱིརོ, ཏཾ ཀུལཾ སུཁམེདྷཏི.

སུཁོ བུདྡྷཱནམུཔྤཱདོ, སུཁཱ སདྡྷམྨདེསནཱ;

སུཁཱ སངྒྷསྶ སཱམགྒཱི, སམགྒཱནཾ ཏཔོ སུཁོ.

པཱུཛཱརཧེ པཱུཛཡཏོ, བུདྡྷེ ཡདི ཝ སཱཝཀེ;

པཔཉྩསམཏིཀྐནྟེ, ཏིཎྞསོཀཔརིདྡཝེ.

ཏེ ¶ ¶ ཏཱདིསེ པཱུཛཡཏོ, ནིབྦུཏེ ཨཀུཏོབྷཡེ;

ན སཀྐཱ པུཉྙཾ སངྑཱཏུཾ, ཨིམེཏྟམཔི ཀེནཙི.

སུསུཁཾ ¶ ཝཏ ཛཱིཝཱམ, ཝེརིནེསུ ཨཝེརིནོ;

ཝེརིནེསུ མནུསྶེསུ, ཝིཧརཱམ ཨཝེརིནོ.

སུསུཁཾ ¶ ཝཏ ཛཱིཝཱམ, ཨཱཏུརེསུ ཨནཱཏུརཱ;

ཨཱཏུརེསུ མནུསྶེསུ, ཝིཧརཱམ ཨནཱཏུརཱ.

སུསུཁཾ ཝཏ ཛཱིཝཱམ, ཨུསྶུཀེསུ ཨནུསྶུཀཱ;

ཨུསྶུཀེསུ ¶ མནསྶེསུ, ཝིཧརཱམ ཨནུསྶུཀཱ.

སུསུཁཾ ཝཏ ཛཱིཝཱམ, ཡེསཾ ནོ ནཏྠི ཀིཉྩནཾ;

པཱིཏིབྷཀྑཱ བྷཝིསྶཱམ, དེཝཱ ཨཱབྷསྶརཱ ཡཐཱ.

ཛཡཾ ཝེརཾ པསཝཏི, དུཀྑཾ སེཏི པརཱཛིཏོ;

ཨུཔསནྟོ སུཁཾ སེཏི, ཧིཏྭཱ ཛཡཔརཱཛཡཾ.

ནཏྠི རཱགསམོ ཨགྒི, ནཏྠི དོསསམོ ཀལི;

ནཏྠི ཁནྡྷསམཱ [ཁནྡྷཱདིསཱ (སཱི. སྱཱ. པཱི. རཱུཔསིདྡྷིཡཱ སམེཏི)] དུཀྑཱ, ནཏྠི སནྟིཔརཾ སུཁཾ.

ཛིགྷཙྪཱཔརམཱ ¶ རོགཱ, སངྑཱརཔརམཱ [སངྐཱརཱ པརམཱ (བཧཱུསུ)] དུཁཱ;

ཨེཏཾ ཉཏྭཱ ཡཐཱབྷཱུཏཾ, ནིབྦཱནཾ པརམཾ སུཁཾ.

ཨཱརོགྱཔརམཱ ལཱབྷཱ, སནྟུཊྛིཔརམཾ དྷནཾ;

ཝིསྶཱསཔརམཱ ཉཱཏི [ཝིསྶཱསཔརམོ ཉཱཏི (ཀ. སཱི.), ཝིསྶཱསཔརམཱ ཉཱཏཱི (སཱི. ཨཊྛ.), ཝིསྶཱསཱ པརམཱ ཉཱཏི (ཀ.)], ནིབྦཱནཾ པརམཾ [ནིབྦཱཎཔརམཾ (ཀ. སཱི.)] སུཁཾ.

པཝིཝེཀརསཾ ¶ པིཏྭཱ [པཱིཏྭཱ (སཱི. སྱཱ. ཀཾ. པཱི.)], རསཾ ཨུཔསམསྶ ཙ;

ནིདྡརོ ཧོཏི ནིཔྤཱཔོ, དྷམྨཔཱིཏིརསཾ པིཝཾ.

སཱཧུ ¶ དསྶནམརིཡཱནཾ, སནྣིཝཱསོ སདཱ སུཁོ;

ཨདསྶནེན བཱལཱནཾ, ནིཙྩམེཝ སུཁཱི སིཡཱ.

བཱལསངྒཏཙཱརཱི [བཱལསངྒཏིཙཱརཱི (ཀ.)] ཧི, དཱིགྷམདྡྷཱན སོཙཏི;

དུཀྑོ བཱལེཧི སཾཝཱསོ, ཨམིཏྟེནེཝ སབྦདཱ;

དྷཱིརོ ཙ སུཁསཾཝཱསོ, ཉཱཏཱིནཾཝ སམཱགམོ.

དྷཱིརཉྩ པཉྙཉྩ བཧུསྶུཏཉྩ, དྷོརཡ྄ཧསཱིལཾ ¶ ཝཏཝནྟམརིཡཾ;

ཏཾ ཏཱདིསཾ སཔྤུརིསཾ སུམེདྷཾ, བྷཛེཐ ནཀྑཏྟཔཐཾཝ ཙནྡིམཱ [ཏསྨཱ ཧི དྷཱིརཾ པཉྙཉྩ, བཧུསྶུཏཉྩ དྷོརཡ྄ཧཾ; སཱིལཾ དྷུཏཝཏམརིཡཾ, ཏཾ ཏཱདིསཾ སཔྤུརིསཾ; སུམེདྷཾ བྷཛེཐ ནཀྑཏྟཔཐཾཝ ཙནྡིམཱ; (ཀ.)].

ཨཡོགེ ¶ ཡུཉྫམཏྟཱནཾ, ཡོགསྨིཉྩ ཨཡོཛཡཾ;

ཨཏྠཾ ཧིཏྭཱ པིཡགྒཱཧཱི, པིཧེཏཏྟཱནུཡོགིནཾ.

མཱ ¶ པིཡེཧི སམཱགཉྪི, ཨཔྤིཡེཧི ཀུདཱཙནཾ;

པིཡཱནཾ ཨདསྶནཾ དུཀྑཾ, ཨཔྤིཡཱནཉྩ དསྶནཾ.

ཏསྨཱ པིཡཾ ན ཀཡིརཱཐ, པིཡཱཔཱཡོ ཧི པཱཔཀོ;

གནྠཱ ཏེསཾ ན ཝིཛྫནྟི, ཡེསཾ ནཏྠི པིཡཱཔྤིཡཾ.

པིཡཏོ ཛཱཡཏཱི སོཀོ, པིཡཏོ ཛཱཡཏཱི [ཛཱཡཏེ (ཀ.)] བྷཡཾ;

པིཡཏོ ཝིཔྤམུཏྟསྶ, ནཏྠི སོཀོ ཀུཏོ བྷཡཾ.

པེམཏོ ¶ ཛཱཡཏཱི སོཀོ, པེམཏོ ཛཱཡཏཱི བྷཡཾ;

པེམཏོ ཝིཔྤམུཏྟསྶ, ནཏྠི སོཀོ ཀུཏོ བྷཡཾ.

རཏིཡཱ ཛཱཡཏཱི སོཀོ, རཏིཡཱ ཛཱཡཏཱི བྷཡཾ;

རཏིཡཱ ཝིཔྤམུཏྟསྶ, ནཏྠི སོཀོ ཀུཏོ བྷཡཾ.

ཀཱམཏོ ཛཱཡཏཱི སོཀོ, ཀཱམཏོ ཛཱཡཏཱི བྷཡཾ;

ཀཱམཏོ ¶ ཝིཔྤམུཏྟསྶ, ནཏྠི སོཀོ ཀུཏོ བྷཡཾ.

ཏཎྷཱཡ ཛཱཡཏཱི [ཛཱཡཏེ (ཀ.)] སོཀོ, ཏཎྷཱཡ ཛཱཡཏཱི བྷཡཾ;

ཏཎྷཱཡ ཝིཔྤམུཏྟསྶ, ནཏྠི སོཀོ ཀུཏོ བྷཡཾ.

སཱིལདསྶནསམྤནྣཾ ¶ , དྷམྨཊྛཾ སཙྩཝེདིནཾ;

ཨཏྟནོ ཀམྨ ཀུབྦཱནཾ, ཏཾ ཛནོ ཀུརུཏེ པིཡཾ.

ཚནྡཛཱཏོ ཨནཀྑཱཏེ, མནསཱ ཙ ཕུཊོ སིཡཱ;

ཀཱམེསུ ཙ ཨཔྤཊིབདྡྷཙིཏྟོ [ཨཔྤཊིབནྡྷཙིཏྟོ (ཀ.)], ཨུདྡྷཾསོཏོཏི ཝུཙྩཏི.

ཙིརཔྤཝཱསིཾ པུརིསཾ, དཱུརཏོ སོཏྠིམཱགཏཾ;

ཉཱཏིམིཏྟཱ སུཧཛྫཱ ཙ, ཨབྷིནནྡནྟི ཨཱགཏཾ.

ཏཐེཝ ¶ ཀཏཔུཉྙམྤི, ཨསྨཱ ལོཀཱ པརཾ གཏཾ;

པུཉྙཱནི པཊིགཎྷནྟི, པིཡཾ ཉཱཏཱིཝ ཨཱགཏཾ.

ཀོདྷཾ ¶ ཛཧེ ཝིཔྤཛཧེཡྻ མཱནཾ, སཾཡོཛནཾ སབྦམཏིཀྐམེཡྻ;

ཏཾ ནཱམརཱུཔསྨིམསཛྫམཱནཾ, ཨཀིཉྩནཾ ནཱནུཔཏནྟི དུཀྑཱ.

ཡོ ཝེ ཨུཔྤཏིཏཾ ཀོདྷཾ, རཐཾ བྷནྟཾཝ ཝཱརཡེ [དྷཱརཡེ (སཱི. སྱཱ. པཱི.)];

ཏམཧཾ ¶ སཱརཐིཾ བྲཱུམི, རསྨིགྒཱཧོ ཨིཏརོ ཛནོ.

ཨཀྐོདྷེན ཛིནེ ཀོདྷཾ, ཨསཱདྷུཾ སཱདྷུནཱ ཛིནེ;

ཛིནེ ཀདརིཡཾ དཱནེན, སཙྩེནཱལིཀཝཱདིནཾ.

སཙྩཾ བྷཎེ ན ཀུཛ྄ཛྷེཡྻ, དཛྫཱ ཨཔྤམྤི [དཛྫཱ’པྤསྨིམྤི (སཱི. པཱི.), དཛྫཱ ཨཔྤསྨི (སྱཱ. ཀ.)] ཡཱཙིཏོ;

ཨེཏེཧི ཏཱིཧི ཋཱནེཧི, གཙྪེ དེཝཱན སནྟིཀེ.

ཨཧིཾསཀཱ ¶ ¶ ཡེ མུནཡོ [ཨཧིཾསཀཱཡཱ མུནཡོ (ཀ.)], ནིཙྩཾ ཀཱཡེན སཾཝུཏཱ;

ཏེ ཡནྟི ཨཙྩུཏཾ ཋཱནཾ, ཡཏྠ གནྟྭཱ ན སོཙརེ.

སདཱ ཛཱགརམཱནཱནཾ, ཨཧོརཏྟཱནུསིཀྑིནཾ;

ནིབྦཱནཾ ཨདྷིམུཏྟཱནཾ, ཨཏྠཾ གཙྪནྟི ཨཱསཝཱ.

པོརཱཎམེཏཾ ¶ ཨཏུལ, ནེཏཾ ཨཛྫཏནཱམིཝ;

ནིནྡནྟི ཏུཎྷིམཱསཱིནཾ, ནིནྡནྟི བཧུབྷཱཎིནཾ;

མིཏབྷཱཎིམྤི ནིནྡནྟི, ནཏྠི ལོཀེ ཨནིནྡིཏོ.

ན ཙཱཧུ ན ཙ བྷཝིསྶཏི, ན ཙེཏརཧི ཝིཛྫཏི;

ཨེཀནྟཾ ནིནྡིཏོ པོསོ, ཨེཀནྟཾ ཝཱ པསཾསིཏོ.

ཡཾ ཙེ ཝིཉྙཱུ པསཾསནྟི, ཨནུཝིཙྩ སུཝེ སུཝེ;

ཨཙྪིདྡཝུཏྟིཾ [ཨཙྪིནྣཝུཏྟིཾ (ཀ.)] མེདྷཱཝིཾ, པཉྙཱསཱིལསམཱཧིཏཾ.

ནིཀྑཾ [ནེཀྑཾ (སཱི. སྱཱ. པཱི.)] ཛམྦོནདསྶེཝ, ཀོ ཏཾ ནིནྡིཏུམརཧཏི;

དེཝཱཔི ནཾ པསཾསནྟི, བྲཧྨུནཱཔི པསཾསིཏོ.

ཀཱཡཔྤཀོཔཾ རཀྑེཡྻ, ཀཱཡེན སཾཝུཏོ སིཡཱ;

ཀཱཡདུཙྩརིཏཾ ཧིཏྭཱ, ཀཱཡེན སུཙརིཏཾ ཙརེ.

ཝཙཱིཔཀོཔཾ ¶ རཀྑེཡྻ, ཝཱཙཱཡ སཾཝུཏོ སིཡཱ;

ཝཙཱིདུཙྩརིཏཾ ཧིཏྭཱ, ཝཱཙཱཡ སུཙརིཏཾ ཙརེ.

མནོཔཀོཔཾ རཀྑེཡྻ, མནསཱ སཾཝུཏོ སིཡཱ;

མནོདུཙྩརིཏཾ ཧིཏྭཱ, མནསཱ སུཙརིཏཾ ཙརེ.

ཀཱཡེན ¶ སཾཝུཏཱ དྷཱིརཱ, ཨཐོ ཝཱཙཱཡ སཾཝུཏཱ;

མནསཱ སཾཝུཏཱ དྷཱིརཱ, ཏེ ཝེ སུཔརིསཾཝུཏཱ.

པཎྜུཔལཱསོཝ ¶ དཱནིསི, ཡམཔུརིསཱཔི ཙ ཏེ [ཏཾ (སཱི. སྱཱ. ཀཾ. པཱི.)] ཨུཔཊྛིཏཱ;

ཨུཡྻོགམུཁེ ཙ ཏིཊྛསི, པཱཐེཡྻམྤི ཙ ཏེ ན ཝིཛྫཏི.

སོ ¶ ཀརོཧི དཱིཔམཏྟནོ, ཁིཔྤཾ ཝཱཡམ པཎྜིཏོ བྷཝ;

ནིདྡྷནྟམལོ ཨནངྒཎོ, དིབྦཾ ཨརིཡབྷཱུམིཾ ཨུཔེཧིསི [དིབྦཾ ཨརིཡབྷཱུམིམེཧིསི (སཱི. སྱཱ. པཱི.), དིབྦམརིཡབྷཱུམིཾ ཨུཔེཧིསི (?)].

ཨུཔནཱིཏཝཡོ ཙ དཱནིསི, སམྤཡཱཏོསི ¶ ཡམསྶ སནྟིཀེ;

ཝཱསོ [ཝཱསོཔི ཙ (བཧཱུསུ)] ཏེ ནཏྠི ཨནྟརཱ, པཱཐེཡྻམྤི ཙ ཏེ ན ཝིཛྫཏི.

སོ ཀརོཧི དཱིཔམཏྟནོ, ཁིཔྤཾ ཝཱཡམ པཎྜིཏོ བྷཝ;

ནིདྡྷནྟམལོ ཨནངྒཎོ, ན པུནཾ ཛཱཏིཛརཾ [ན པུན ཛཱཏིཛརཾ (སཱི. སྱཱ.), ན པུན ཛཱཏིཛྫརཾ (ཀ.)] ཨུཔེཧིསི.

ཨནུཔུབྦེན མེདྷཱཝཱི, ཐོཀཾ ཐོཀཾ ཁཎེ ཁཎེ;

ཀམྨཱརོ རཛཏསྶེཝ, ནིདྡྷམེ མལམཏྟནོ.

ཨཡསཱཝ མལཾ སམུཊྛིཏཾ [སམུཊྛཱཡ (ཀ.)], ཏཏུཊྛཱཡ [ཏདུཊྛཱཡ (སཱི. སྱཱ. པཱི.)] ཏམེཝ ཁཱདཏི;

ཨེཝཾ ཨཏིདྷོནཙཱརིནཾ, སཱནི ཀམྨཱནི [སཀཀམྨཱནི (སཱི. པཱི.)] ནཡནྟི དུགྒཏིཾ.

ཨསཛ྄ཛྷཱཡམལཱ ¶ ¶ མནྟཱ, ཨནུཊྛཱནམལཱ གྷརཱ;

མལཾ ཝཎྞསྶ ཀོསཛྫཾ, པམཱདོ རཀྑཏོ མལཾ.

མལིཏྠིཡཱ དུཙྩརིཏཾ, མཙྪེརཾ དདཏོ མལཾ;

མལཱ ཝེ པཱཔཀཱ དྷམྨཱ, ཨསྨིཾ ལོཀེ པརམྷི ཙ.

ཨེཏཾ མལཾ པཧནྟྭཱན, ནིམྨལཱ ཧོཐ བྷིཀྑཝོ.

སུཛཱིཝཾ ¶ ཨཧིརིཀེན, ཀཱཀསཱུརེན དྷཾསིནཱ;

པཀྑནྡིནཱ པགབྦྷེན, སཾཀིལིཊྛེན ཛཱིཝིཏཾ.

ཧིརཱིམཏཱ ¶ ཙ དུཛྫཱིཝཾ, ནིཙྩཾ སུཙིགཝེསིནཱ;

ཨལཱིནེནཱཔྤགབྦྷེན, སུདྡྷཱཛཱིཝེན པསྶཏཱ.

ཡོ པཱཎམཏིཔཱཏེཏི, མུསཱཝཱདཉྩ བྷཱསཏི;

ལོཀེ ཨདིནྣམཱདིཡཏི, པརདཱརཉྩ གཙྪཏི.

སུརཱམེརཡཔཱནཉྩ, ཡོ ནརོ ཨནུཡུཉྫཏི;

ཨིདྷེཝམེསོ ལོཀསྨིཾ, མཱུལཾ ཁཎཏི ཨཏྟནོ.

ཨེཝཾ བྷོ པུརིས ཛཱནཱཧི, པཱཔདྷམྨཱ ཨསཉྙཏཱ;

མཱ ཏཾ ལོབྷོ ཨདྷམྨོ ཙ, ཙིརཾ དུཀྑཱཡ རནྡྷཡུཾ.

དདཱཏི ཝེ ཡཐཱསདྡྷཾ, ཡཐཱཔསཱདནཾ [ཡཏྠ པསཱདནཾ (ཀཏྠཙི)] ཛནོ;

ཏཏྠ ཡོ མངྐུ བྷཝཏི [ཏཏྠ ཙེ མཾཀུ ཡོ ཧོཏི (སཱི.), ཏཏྠ ཡོ མངྐུཏོ ཧོཏི (སྱཱ.)], པརེསཾ པཱནབྷོཛནེ;

ན སོ དིཝཱ ཝཱ རཏྟིཾ ཝཱ, སམཱདྷིམདྷིགཙྪཏི.

ཡསྶ ¶ ¶ ཙེཏཾ སམུཙྪིནྣཾ, མཱུལགྷཙྩཾ [མཱུལགྷཙྪཾ (ཀ.)] སམཱུཧཏཾ;

ས ཝེ དིཝཱ ཝཱ རཏྟིཾ ཝཱ, སམཱདྷིམདྷིགཙྪཏི.

ནཏྠི རཱགསམོ ཨགྒི, ནཏྠི དོསསམོ གཧོ;

ནཏྠི མོཧསམཾ ཛཱལཾ, ནཏྠི ཏཎྷཱསམཱ ནདཱི.

སུདསྶཾ ཝཛྫམཉྙེསཾ, ཨཏྟནོ པན དུདྡསཾ;

པརེསཾ ཧི སོ ཝཛྫཱནི, ཨོཔུནཱཏི [ཨོཕུནཱཏི (ཀ.)] ཡཐཱ བྷུསཾ;

ཨཏྟནོ པན ཚཱདེཏི, ཀལིཾཝ ཀིཏཝཱ སཋོ.

པརཝཛྫཱནུཔསྶིསྶ ¶ , ¶ ནིཙྩཾ ཨུཛ྄ཛྷཱནསཉྙིནོ;

ཨཱསཝཱ ཏསྶ ཝཌྜྷནྟི, ཨཱརཱ སོ ཨཱསཝཀྑཡཱ.

ཨཱཀཱསེཝ པདཾ ནཏྠི, སམཎོ ནཏྠི བཱཧིརེ;

པཔཉྩཱབྷིརཏཱ པཛཱ, ནིཔྤཔཉྩཱ ཏཐཱགཏཱ.

ཨཱཀཱསེཝ པདཾ ནཏྠི, སམཎོ ནཏྠི བཱཧིརེ;

སངྑཱརཱ སསྶཏཱ ནཏྠི, ནཏྠི བུདྡྷཱནམིཉྫིཏཾ.

ན ¶ ཏེན ཧོཏི དྷམྨཊྛོ, ཡེནཏྠཾ སཱཧསཱ [སཧསཱ (སཱི. སྱཱ. ཀ.)] ནཡེ;

ཡོ ཙ ཨཏྠཾ ཨནཏྠཉྩ, ཨུབྷོ ནིཙྪེཡྻ པཎྜིཏོ.

ཨསཱཧསེན ¶ དྷམྨེན, སམེན ནཡཏཱི པརེ;

དྷམྨསྶ གུཏྟོ མེདྷཱཝཱི, ‘‘དྷམྨཊྛོ’’ཏི པཝུཙྩཏི.

ན ཏེན པཎྜིཏོ ཧོཏི, ཡཱཝཏཱ བཧུ བྷཱསཏི;

ཁེམཱི ཨཝེརཱི ཨབྷཡོ, ‘‘པཎྜིཏོ’’ཏི པཝུཙྩཏི.

ན ཏཱཝཏཱ དྷམྨདྷརོ, ཡཱཝཏཱ བཧུ བྷཱསཏི;

ཡོ ཙ ཨཔྤམྤི སུཏྭཱན, དྷམྨཾ ཀཱཡེན པསྶཏི;

ས ཝེ དྷམྨདྷརོ ཧོཏི, ཡོ དྷམྨཾ ནཔྤམཛྫཏི.

ན ¶ ཏེན ཐེརོ སོ ཧོཏི [ཐེརོ ཧོཏི (སཱི. སྱཱ.)], ཡེནསྶ པལིཏཾ སིརོ;

པརིཔཀྐོ ¶ ཝཡོ ཏསྶ, ‘‘མོགྷཛིཎྞོ’’ཏི ཝུཙྩཏི.

ཡམྷི སཙྩཉྩ དྷམྨོ ཙ, ཨཧིཾསཱ སཾཡམོ དམོ;

ས ཝེ ཝནྟམལོ དྷཱིརོ, ‘‘ཐེརོ’’ ཨིཏི [སོ ཐེརོཏི (སྱཱ. ཀ.)] པཝུཙྩཏི.

ན ཝཱཀྐརཎམཏྟེན, ཝཎྞཔོཀྑརཏཱཡ ཝཱ;

སཱདྷུརཱུཔོ ནརོ ཧོཏི, ཨིསྶུཀཱི མཙྪརཱི སཋོ.

ཡསྶ ཙེཏཾ སམུཙྪིནྣཾ, མཱུལགྷཙྩཾ སམཱུཧཏཾ;

ས ཝནྟདོསོ མེདྷཱཝཱི, ‘‘སཱདྷུརཱུཔོ’’ཏི ཝུཙྩཏི.

ན མུཎྜཀེན སམཎོ, ཨབྦཏོ ཨལིཀཾ བྷཎཾ;

ཨིཙྪཱལོབྷསམཱཔནྣོ, སམཎོ ཀིཾ བྷཝིསྶཏི.

ཡོ ¶ ཙ སམེཏི པཱཔཱནི, ཨཎུཾ ཐཱུལཱནི སབྦསོ;

སམིཏཏྟཱ ཧི པཱཔཱནཾ, ‘‘སམཎོ’’ཏི པཝུཙྩཏི.

ན ¶ ཏེན བྷིཀྑུ སོ ཧོཏི, ཡཱཝཏཱ བྷིཀྑཏེ པརེ;

ཝིསྶཾ དྷམྨཾ སམཱདཱཡ, བྷིཀྑུ ཧོཏི ན ཏཱཝཏཱ.

ཡོདྷ པུཉྙཉྩ པཱཔཉྩ, བཱཧེཏྭཱ བྲཧྨཙརིཡཝཱ [བྲཧྨཙརིཡཾ (ཀ.)];

སངྑཱཡ ལོཀེ ཙརཏི, ས ཝེ ‘‘བྷིཀྑཱུ’’ཏི ཝུཙྩཏི.

ན མོནེན མུནཱི ཧོཏི, མཱུལ༹ྷརཱུཔོ ཨཝིདྡསུ;

ཡོ ཙ ཏུལཾཝ པགྒཡ྄ཧ, ཝརམཱདཱཡ པཎྜིཏོ.

པཱཔཱནི ¶ པརིཝཛྫེཏི, ས མུནཱི ཏེན སོ མུནི;

ཡོ མུནཱཏི ཨུབྷོ ལོཀེ, ‘‘མུནི’’ ཏེན པཝུཙྩཏི.

ན ཏེན ཨརིཡོ ཧོཏི, ཡེན པཱཎཱནི ཧིཾསཏི;

ཨཧིཾསཱ ¶ སབྦཔཱཎཱནཾ, ‘‘ཨརིཡོ’’ཏི པཝུཙྩཏི.

ན སཱིལབྦཏམཏྟེན, བཱཧུསཙྩེན ཝཱ པན;

ཨཐ ཝཱ སམཱདྷིལཱབྷེན, ཝིཝིཏྟསཡནེན ཝཱ.

ཕུསཱམི ནེཀྑམྨསུཁཾ, ཨཔུཐུཛྫནསེཝིཏཾ;

བྷིཀྑུ ཝིསྶཱསམཱཔཱདི, ཨཔྤཏྟོ ཨཱསཝཀྑཡཾ.

དྷམྨཊྛཝགྒོ ཨེཀཱུནཝཱིསཏིམོ ནིཊྛིཏོ.

མགྒཱནཊྛངྒིཀོ ¶ ¶ སེཊྛོ, སཙྩཱནཾ ཙཏུརོ པདཱ;

ཝིརཱགོ སེཊྛོ དྷམྨཱནཾ, དྭིཔདཱནཉྩ ཙཀྑུམཱ.

ཨེསེཝ [ཨེསོཝ (སཱི. པཱི.)] མགྒོ ནཏྠཉྙོ, དསྶནསྶ ཝིསུདྡྷིཡཱ;

ཨེཏཉྷི ཏུམྷེ པཊིཔཛྫཐ, མཱརསྶེཏཾ པམོཧནཾ.

ཨེཏཉྷི ཏུམྷེ པཊིཔནྣཱ, དུཀྑསྶནྟཾ ཀརིསྶཐ;

ཨཀྑཱཏོ ཝོ [ཨཀྑཱཏོ ཝེ (སཱི. པཱི.)] མཡཱ མགྒོ, ཨཉྙཱཡ སལླཀནྟནཾ [སལླསནྠནཾ (སཱི. པཱི.), སལླསཏྠནཾ (སྱཱ.)].

ཏུམྷེཧི ཀིཙྩམཱཏཔྤཾ, ཨཀྑཱཏཱརོ ཏཐཱགཏཱ;

པཊིཔནྣཱ པམོཀྑནྟི, ཛྷཱཡིནོ མཱརབནྡྷནཱ.

‘‘སབྦེ ¶ སངྑཱརཱ ཨནིཙྩཱ’’ཏི, ཡདཱ པཉྙཱཡ པསྶཏི;

ཨཐ ¶ ནིབྦིནྡཏི དུཀྑེ, ཨེས མགྒོ ཝིསུདྡྷིཡཱ.

‘‘སབྦེ སངྑཱརཱ དུཀྑཱ’’ཏི, ཡདཱ པཉྙཱཡ པསྶཏི;

ཨཐ ནིབྦིནྡཏི དུཀྑེ, ཨེས མགྒོ ཝིསུདྡྷིཡཱ.

‘‘སབྦེ དྷམྨཱ ཨནཏྟཱ’’ཏི, ཡདཱ པཉྙཱཡ པསྶཏི;

ཨཐ ནིབྦིནྡཏི དུཀྑེ, ཨེས མགྒོ ཝིསུདྡྷིཡཱ.

ཨུཊྛཱནཀཱལམྷི ཨནུཊྛཧཱནོ, ཡུཝཱ བལཱི ཨཱལསིཡཾ ཨུཔེཏོ;

སཾསནྣསངྐཔྤམནོ [ཨསམྤནྣསངྐཔྤམནོ (ཀ.)] ཀུསཱིཏོ, པཉྙཱཡ མགྒཾ ཨལསོ ན ཝིནྡཏི.

ཝཱཙཱནུརཀྑཱི ¶ ¶ མནསཱ སུསཾཝུཏོ, ཀཱཡེན ཙ ནཱཀུསལཾ ཀཡིརཱ [ཨཀུསལཾ ན ཀཡིརཱ (སཱི. སྱཱ. ཀཾ. པཱི.)];

ཨེཏེ ཏཡོ ཀམྨཔཐེ ཝིསོདྷཡེ, ཨཱརཱདྷཡེ མགྒམིསིཔྤཝེདིཏཾ.

ཡོགཱ ཝེ ཛཱཡཏཱི [ཛཱཡཏེ (ཀཏྠཙི)] བྷཱུརི, ཨཡོགཱ བྷཱུརིསངྑཡོ;

ཨེཏཾ དྭེདྷཱཔཐཾ ཉཏྭཱ, བྷཝཱཡ ཝིབྷཝཱཡ ཙ;

ཏཐཱཏྟཱནཾ ནིཝེསེཡྻ, ཡཐཱ བྷཱུརི པཝཌྜྷཏི.

ཝནཾ ¶ ཚིནྡཐ མཱ རུཀྑཾ, ཝནཏོ ཛཱཡཏེ བྷཡཾ;

ཚེཏྭཱ ཝནཉྩ ཝནཐཉྩ, ནིབྦནཱ ཧོཐ བྷིཀྑཝོ.

ཡཱཝ ཧི ཝནཐོ ན ཚིཛྫཏི, ཨཎུམཏྟོཔི ནརསྶ ནཱརིསུ;

པཊིབདྡྷམནོཝ [པཊིབནྡྷམནོཝ (ཀ.)] ཏཱཝ སོ, ཝཙྪོ ཁཱིརཔཀོཝ [ཁཱིརཔཱནོཝ (པཱི.)] མཱཏརི.

ཨུཙྪིནྡ ¶ སིནེཧམཏྟནོ ཀུམུདཾ སཱརདིཀཾཝ [པཱཎིནཱ];

སནྟིམགྒམེཝ བྲཱུཧཡ, ནིབྦཱནཾ སུགཏེན དེསིཏཾ.

ཨིདྷ ཝསྶཾ ཝསིསྶཱམི, ཨིདྷ ཧེམནྟགིམྷིསུ;

ཨིཏི བཱལོ ཝིཙིནྟེཏི, ཨནྟརཱཡཾ ན བུཛ྄ཛྷཏི.

ཏཾ པུཏྟཔསུསམྨཏྟཾ, བྱཱསཏྟམནསཾ ནརཾ;

སུཏྟཾ གཱམཾ མཧོགྷོཝ, མཙྩུ ཨཱདཱཡ གཙྪཏི.

ན ¶ སནྟི པུཏྟཱ ཏཱཎཱཡ, ན པིཏཱ ནཱཔི བནྡྷཝཱ;

ཨནྟཀེནཱདྷིཔནྣསྶ, ནཏྠི ཉཱཏཱིསུ ཏཱཎཏཱ.

ཨེཏམཏྠཝསཾ ཉཏྭཱ, པཎྜིཏོ སཱིལསཾཝུཏོ;

ནིབྦཱནགམནཾ མགྒཾ, ཁིཔྤམེཝ ཝིསོདྷཡེ.

མཏྟཱསུཁཔརིཙྩཱགཱ ¶ ¶ , པསྶེ ཙེ ཝིཔུལཾ སུཁཾ;

ཙཛེ མཏྟཱསུཁཾ དྷཱིརོ, སམྤསྶཾ ཝིཔུལཾ སུཁཾ.

པརདུཀྑཱུཔདྷཱནེན, ཨཏྟནོ [ཡོ ཨཏྟནོ (སྱཱ. པཱི. ཀ.)] སུཁམིཙྪཏི;

ཝེརསཾསགྒསཾསཊྛོ, ཝེརཱ སོ ན པརིམུཙྩཏི.

ཡཉྷི ¶ ཀིཙྩཾ ཨཔཝིདྡྷཾ [ཏདཔཝིདྡྷཾ (སཱི. སྱཱ.)], ཨཀིཙྩཾ པན ཀཡིརཏི;

ཨུནྣལཱ༹ནཾ པམཏྟཱནཾ, ཏེསཾ ཝཌྜྷནྟི ཨཱསཝཱ.

ཡེསཉྩ སུསམཱརདྡྷཱ, ནིཙྩཾ ཀཱཡགཏཱ སཏི;

ཨཀིཙྩཾ ཏེ ན སེཝནྟི, ཀིཙྩེ སཱཏཙྩཀཱརིནོ;

སཏཱནཾ སམྤཛཱནཱནཾ, ཨཏྠཾ གཙྪནྟི ཨཱསཝཱ.

མཱཏརཾ ¶ པིཏརཾ ཧནྟྭཱ, རཱཛཱནོ དྭེ ཙ ཁཏྟིཡེ;

རཊྛཾ སཱནུཙརཾ ཧནྟྭཱ, ཨནཱིགྷོ ཡཱཏི བྲཱཧྨཎོ.

མཱཏརཾ པིཏརཾ ཧནྟྭཱ, རཱཛཱནོ དྭེ ཙ སོཏྠིཡེ;

ཝེཡགྒྷཔཉྩམཾ ཧནྟྭཱ, ཨནཱིགྷོ ཡཱཏི བྲཱཧྨཎོ.