📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཁུདྡཀནིཀཱཡེ

པེཏཝཏྠུཔཱལི༹

༡. ཨུརགཝགྒོ

༡. ཁེཏྟཱུཔམཔེཏཝཏྠུ

༡.

‘‘ཁེཏྟཱུཔམཱ ¶ ¶ ¶ ¶ ཨརཧནྟོ, དཱཡཀཱ ཀསྶཀཱུཔམཱ;

བཱིཛཱུཔམཾ དེཡྻདྷམྨཾ, ཨེཏྟོ ནིབྦཏྟཏེ ཕལཾ.

༢.

‘‘ཨེཏཾ བཱིཛཾ ཀསི ཁེཏྟཾ, པེཏཱནཾ དཱཡཀསྶ ཙ;

ཏཾ པེཏཱ པརིབྷུཉྫནྟི, དཱཏཱ པུཉྙེན ཝཌྜྷཏི.

༣.

‘‘ཨིདྷེཝ ¶ ཀུསལཾ ཀཏྭཱ, པེཏེ ཙ པཊིཔཱུཛིཡ;

སགྒཉྩ ཀམཏི [གམཏི (ཀ.)] ཊྛཱནཾ, ཀམྨཾ ཀཏྭཱན བྷདྡཀ’’ནྟི.

ཁེཏྟཱུཔམཔེཏཝཏྠུ པཋམཾ.

༢. སཱུཀརམུཁཔེཏཝཏྠུ

༤.

‘‘ཀཱཡོ ¶ ཏེ སབྦསོཝཎྞོ, སབྦཱ ཨོབྷཱསཏེ དིསཱ;

མུཁཾ ཏེ སཱུཀརསྶེཝ, ཀིཾ ཀམྨམཀརཱི པུརེ’’ [མཀརཱ པུརེ (ཀ.)].

༥.

‘‘ཀཱཡེན སཉྙཏོ ཨཱསིཾ, ཝཱཙཱཡཱསིམསཉྙཏོ;

ཏེན མེཏཱདིསོ ཝཎྞོ, ཡཐཱ པསྶསི ནཱརད.

༦.

‘‘ཏཾ ¶ ཏྱཱཧཾ [ཏཱཧཾ (ཀ.)] ནཱརད བྲཱུམི, སཱམཾ དིཊྛམིདཾ ཏཡཱ;

མཱཀཱསི ¶ མུཁསཱ པཱཔཾ, མཱ ཁོ སཱུཀརམུཁོ ཨཧཱུ’’ཏི.

སཱུཀརམུཁཔེཏཝཏྠུ དུཏིཡཾ.

༣. པཱུཏིམུཁཔེཏཝཏྠུ

༧.

‘‘དིབྦཾ སུབྷཾ དྷཱརེསི ཝཎྞདྷཱཏུཾ, ཝེཧཱཡསཾ ཏིཊྛསི ཨནྟལིཀྑེ;

མུཁཉྩ ཏེ ཀིམཡོ པཱུཏིགནྡྷཾ, ཁཱདནྟི ཀིཾ ཀམྨམཀཱསི པུབྦེ’’.

༨.

‘‘སམཎོ ཨཧཾ པཱཔོཏིདུཊྛཝཱཙོ [པཱཔོ དུཊྛཝཱཙོ (སཱི.), པཱཔོ དུཀྑཝཱཙོ (སྱཱ. པཱི.)], ཏཔསྶིརཱུཔོ མུཁསཱ ཨསཉྙཏོ;

ལདྡྷཱ ཙ མེ ཏཔསཱ ཝཎྞདྷཱཏུ, མུཁཉྩ མེ པེསུཎིཡེན པཱུཏི.

༩.

‘‘ཏཡིདཾ ཏཡཱ ནཱརད སཱམཾ དིཊྛཾ,

ཨནུཀམྤཀཱ ཡེ ཀུསལཱ ཝདེཡྻུཾ;

‘མཱ པེསུཎཾ མཱ ཙ མུསཱ ཨབྷཱཎི,

ཡཀྑོ ཏུཝཾ ཧོཧིསི ཀཱམཀཱམཱི’’’ཏི.

པཱུཏིམུཁཔེཏཝཏྠུ ཏཏིཡཾ.

༤. པིཊྛདྷཱིཏལིཀཔེཏཝཏྠུ

༡༠.

‘‘ཡཾ ¶ ¶ ཀིཉྩཱརམྨཎཾ ཀཏྭཱ, དཛྫཱ དཱནཾ ཨམཙྪརཱི;

པུབྦཔེཏེ ཙ ཨཱརབྦྷ, ཨཐ ཝཱ ཝཏྠུདེཝཏཱ.

༡༡.

‘‘ཙཏྟཱརོ ཙ མཧཱརཱཛེ, ལོཀཔཱལེ ཡསསྶིནེ [ཡསསྶིནོ (སཱི. སྱཱ.)];

ཀུཝེརཾ དྷཏརཊྛཉྩ, ཝིརཱུཔཀྑཾ ཝིརཱུལ༹ྷཀཾ;

ཏེ ¶ ཙེཝ པཱུཛིཏཱ ཧོནྟི, དཱཡཀཱ ཙ ཨནིཔྥལཱ.

༡༢.

‘‘ན ¶ ཧི རུཎྞཾ ཝཱ སོཀོ ཝཱ, ཡཱ ཙཉྙཱ པརིདེཝནཱ;

ན ཏཾ པེཏསྶ ཨཏྠཱཡ, ཨེཝཾ ཏིཊྛནྟི ཉཱཏཡོ.

༡༣.

‘‘ཨཡཉྩ ཁོ དཀྑིཎཱ དིནྣཱ, སངྒྷམྷི སུཔྤཏིཊྛིཏཱ;

དཱིགྷརཏྟཾ ཧིཏཱཡསྶ, ཋཱནསོ ཨུཔཀཔྤཏཱི’’ཏི.

པིཊྛདྷཱིཏལིཀཔེཏཝཏྠུ ཙཏུཏྠཾ.

༥. ཏིརོཀུཊྚཔེཏཝཏྠུ

༡༤.

[ཁུ. པཱ. ༧.༡ ཁུདྡཀཔཱཋེ] ‘‘ཏིརོཀུཊྚེསུ [ཏིརོཀུཌྜེསུ (སཱི. སྱཱ. པཱི.)] ཏིཊྛནྟི, སནྡྷིསིངྒྷཱཊཀེསུ ཙ;

དྭཱརབཱཧཱསུ ཏིཊྛནྟི, ཨཱགནྟྭཱན སཀཾ གྷརཾ.

༡༥.

‘‘པཧཱུཏེ ཨནྣཔཱནམྷི, ཁཛྫབྷོཛྫེ ཨུཔཊྛིཏེ;

ན ཏེསཾ ཀོཙི སརཏི, སཏྟཱནཾ ཀམྨཔཙྩཡཱ.

༡༦.

‘‘ཨེཝཾ ¶ དདནྟི ཉཱཏཱིནཾ, ཡེ ཧོནྟི ཨནུཀམྤཀཱ;

སུཙིཾ པཎཱིཏཾ ཀཱལེན, ཀཔྤིཡཾ པཱནབྷོཛནཾ;

‘ཨིདཾ ཝོ ཉཱཏཱིནཾ ཧོཏུ, སུཁིཏཱ ཧོནྟུ ཉཱཏཡོ’.

༡༧.

‘‘ཏེ ཙ ཏཏྠ སམཱགནྟྭཱ, ཉཱཏིཔེཏཱ སམཱགཏཱ;

པཧཱུཏེ ཨནྣཔཱནམྷི, སཀྐཙྩཾ ཨནུམོདརེ.

༡༨.

‘‘‘ཙིརཾ ཛཱིཝནྟུ ནོ ཉཱཏཱི, ཡེསཾ ཧེཏུ ལབྷཱམསེ;

ཨམྷཱཀཉྩ ཀཏཱ པཱུཛཱ, དཱཡཀཱ ཙ ཨནིཔྥལཱ’.

༡༩.

‘‘‘ན ཧི ཏཏྠ ཀསི ཨཏྠི, གོརཀྑེཏྠ ན ཝིཛྫཏི;

ཝཎིཛྫཱ ཏཱདིསཱི ནཏྠི, ཧིརཉྙེན ཀཡཱཀཡཾ [ཀཡོཀྐཡཾ (སཱི. ཀ.) ཀཡོཀཡཾ (ཁུ. པཱ. ༧.༦)];

ཨིཏོ ¶ དིནྣེན ཡཱཔེནྟི, པེཏཱ ཀཱལགཏཱ [ཀཱལཀཏཱ (སཱི. སྱཱ. པཱི.)] ཏཧིཾ’.

༢༠.

‘‘‘ཨུནྣམེ ¶ ཨུདཀཾ ཝུཊྛཾ, ཡཐཱ ནིནྣཾ པཝཏྟཏི;

ཨེཝམེཝ ཨིཏོ དིནྣཾ, པེཏཱནཾ ཨུཔཀཔྤཏི’.

༢༡.

‘‘‘ཡཐཱ ཝཱརིཝཧཱ པཱུརཱ, པརིཔཱུརེནྟི སཱགརཾ;

ཨེཝམེཝ ཨིཏོ དིནྣཾ, པེཏཱནཾ ཨུཔཀཔྤཏི’.

༢༢.

‘‘‘ཨདཱསི ¶ མེ ཨཀཱསི མེ, ཉཱཏི མིཏྟཱ [ཉཱཏི མིཏྟོ (?)] སཁཱ ཙ མེ;

པེཏཱནཾ དཀྑིཎཾ དཛྫཱ, པུབྦེ ཀཏམནུསྶརཾ’.

༢༣.

‘‘‘ན ཧི རུཎྞཾ ཝཱ སོཀོ ཝཱ, ཡཱ ཙཉྙཱ པརིདེཝནཱ;

ན ཏཾ པེཏཱནམཏྠཱཡ, ཨེཝཾ ཏིཊྛནྟི ཉཱཏཡོ’.

༢༤.

‘‘‘ཨཡཉྩ ཁོ དཀྑིཎཱ དིནྣཱ, སངྒྷམྷི སུཔྤཏིཊྛིཏཱ;

དཱིགྷརཏྟཾ ཧིཏཱཡསྶ, ཋཱནསོ ཨུཔཀཔྤཏི’.

༢༥.

‘‘སོ ཉཱཏིདྷམྨོ ཙ ཨཡཾ ནིདསྶིཏོ, པེཏཱན པཱུཛཱ ཙ ཀཏཱ ཨུལཱ༹རཱ;

བལཉྩ བྷིཀྑཱུནམནུཔྤདིནྣཾ, ཏུམྷེཧི པུཉྙཾ པསུཏཾ ཨནཔྤཀ’’ནྟི.

ཏིརོཀུཊྚཔེཏཝཏྠུ པཉྩམཾ.

༦. པཉྩཔུཏྟཁཱདཔེཏིཝཏྠུ

༢༦.

‘‘ནགྒཱ ¶ དུབྦཎྞརཱུཔཱསི, དུགྒནྡྷཱ པཱུཏི ཝཱཡསི;

མཀྑིཀཱཧི པརིཀིཎྞཱ [མཀྑིཀཱཔརིཀིཎྞཱ ཙ (སཱི.)], ཀཱ ནུ ཏྭཾ ཨིདྷ ཏིཊྛསཱི’’ཏི.

༢༧.

‘‘ཨཧཾ བྷདནྟེ [བྷདྡནྟེ (ཀ.)] པེཏཱིམྷི, དུགྒཏཱ ཡམལོཀིཀཱ;

པཱཔཀམྨཾ ¶ ཀརིཏྭཱན, པེཏལོཀཾ ཨིཏོ གཏཱ.

༢༨.

‘‘ཀཱལེན པཉྩ པུཏྟཱནི, སཱཡཾ པཉྩ པུནཱཔརེ;

ཝིཛཱཡིཏྭཱན ཁཱདཱམི, ཏེཔི ནཱ ཧོནྟི མེ ཨལཾ.

༢༩.

‘‘པརིཌཡ྄ཧཏི དྷཱུམཱཡཏི, ཁུདཱཡ [ཁུདྡཱཡ (ཀ.)] ཧདཡཾ མམ;

པཱནཱིཡཾ ན ལབྷེ པཱཏུཾ, པསྶ མཾ བྱསནཾ གཏ’’ནྟི.

༣༠.

‘‘ཀིཾ ནུ ཀཱཡེན ཝཱཙཱཡ, མནསཱ དུཀྐཊཾ ཀཏཾ;

ཀིསྶ ཀམྨཝིཔཱཀེན, པུཏྟམཾསཱནི ཁཱདསཱི’’ཏི.

༣༡.

‘‘སཔཏཱི [སཔཏྟཱི (སཱི.)] མེ གབྦྷིནཱི ཨཱསི, ཏསྶཱ པཱཔཾ ཨཙེཏཡིཾ;

སཱཧཾ པདུཊྛམནསཱ, ཨཀརིཾ གབྦྷཔཱཏནཾ.

༣༢.

‘‘ཏསྶཱ ¶ ¶ དྭེམཱསིཀོ གབྦྷོ, ལོཧིཏཉྙེཝ པགྒྷརི;

ཏདསྶཱ མཱཏཱ ཀུཔིཏཱ, མཡ྄ཧཾ ཉཱཏཱི སམཱནཡི;

སཔཐཉྩ མཾ ཀཱརེསི, པརིབྷཱསཱཔཡཱི ཙ མཾ.

༣༣.

‘‘སཱཧཾ གྷོརཉྩ སཔཐཾ, མུསཱཝཱདཾ ཨབྷཱསིསཾ;

པུཏྟམཾསཱནི ཁཱདཱམི, སཙེ ཏཾ པཀཏཾ མཡཱ.

༣༤.

‘‘ཏསྶ ཀམྨསྶ ཝིཔཱཀེན [ཝིཔཱཀཾ (སྱཱ. ཀ.)], མུསཱཝཱདསྶ ཙཱུབྷཡཾ;

པུཏྟམཾསཱནི ཁཱདཱམི, པུབྦལོཧིཏམཀྑིཏཱ’’ཏི.

པཉྩཔུཏྟཁཱདཔེཏིཝཏྠུ [པཉྩཔུཏྟཁཱདཔེཏཝཏྠུ (སཱི. སྱཱ. པཱི.) ཨེཝམུཔརིཔི] ཚཊྛཾ.

༧. སཏྟཔུཏྟཁཱདཔེཏིཝཏྠུ

༣༥.

‘‘ནགྒཱ ¶ དུབྦཎྞརཱུཔཱསི, དུགྒནྡྷཱ པཱུཏི ཝཱཡསི;

མཀྑིཀཱཧི ¶ པརིཀིཎྞཱ, ཀཱ ནུ ཏྭཾ ཨིདྷ ཏིཊྛསཱི’’ཏི.

༣༦.

‘‘ཨཧཾ བྷདནྟེ པེཏཱིམྷི, དུགྒཏཱ ཡམལོཀིཀཱ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏཱ.

༣༧.

‘‘ཀཱལེན སཏྟ པུཏྟཱནི, སཱཡཾ སཏྟ པུནཱཔརེ;

ཝིཛཱཡིཏྭཱན ཁཱདཱམི, ཏེཔི ནཱ ཧོནྟི མེ ཨལཾ.

༣༨.

‘‘པརིཌཡ྄ཧཏི དྷཱུམཱཡཏི, ཁུདཱཡ ཧདཡཾ མམ;

ནིབྦུཏིཾ ནཱདྷིགཙྪཱམི, ཨགྒིདཌྜྷཱཝ ཨཱཏཔེ’’ཏི.

༣༩.

‘‘ཀིཾ ནུ ཀཱཡེན ཝཱཙཱཡ, མནསཱ དུཀྐཊཾ ཀཏཾ;

ཀིསྶ ཀམྨཝིཔཱཀེན, པུཏྟམཾསཱནི ཁཱདསཱི’’ཏི.

༤༠.

‘‘ཨཧཱུ མཡ྄ཧཾ དུཝེ པུཏྟཱ, ཨུབྷོ སམྤཏྟཡོབྦནཱ;

སཱཧཾ པུཏྟབལཱུཔེཏཱ, སཱམིཀཾ ཨཏིམཉྙིསཾ.

༤༡.

‘‘ཏཏོ མེ སཱམིཀོ ཀུདྡྷོ, སཔཏྟིཾ མཡ྄ཧམཱནཡི;

སཱ ཙ གབྦྷཾ ཨལབྷིཏྠ, ཏསྶཱ པཱཔཾ ཨཙེཏཡིཾ.

༤༢.

‘‘སཱཧཾ ¶ པདུཊྛམནསཱ, ཨཀརིཾ གབྦྷཔཱཏནཾ;

ཏསྶཱ ཏེམཱསིཀོ གབྦྷོ, པུབྦལོཧིཏཀོ [པུབྦལོཧིཏཀོ (ཀ.)] པཏི.

༤༣.

‘‘ཏདསྶཱ མཱཏཱ ཀུཔིཏཱ, མཡ྄ཧཾ ཉཱཏཱི སམཱནཡི;

སཔཐཉྩ མཾ ཀཱརེསི, པརིབྷཱསཱཔཡཱི ཙ མཾ.

༤༤.

‘‘སཱཧཾ ¶ གྷོརཉྩ སཔཐཾ, མུསཱཝཱདཾ ཨབྷཱསིསཾ;

‘པུཏྟམཾསཱནི ཁཱདཱམི, སཙེ ཏཾ པཀཏཾ མཡཱ’.

༤༥.

‘‘ཏསྶ ¶ ཀམྨསྶ ཝིཔཱཀེན, མུསཱཝཱདསྶ ཙཱུབྷཡཾ;

པུཏྟམཾསཱནི ཁཱདཱམི, པུབྦལོཧིཏམཀྑིཏཱ’’ཏི.

སཏྟཔུཏྟཁཱདཔེཏིཝཏྠུ སཏྟམཾ.

༨. གོཎཔེཏཝཏྠུ

༤༦.

‘‘ཀིཾ ¶ ནུ ཨུམྨཏྟརཱུཔོཝ, ལཱཡིཏྭཱ ཧརིཏཾ ཏིཎཾ;

ཁཱད ཁཱདཱཏི ལཔསི, གཏསཏྟཾ ཛརགྒཝཾ.

༤༧.

‘‘ན ཧི ཨནྣེན པཱནེན, མཏོ གོཎོ སམུཊྛཧེ;

ཏྭཾསི བཱལོ ཙ [བཱལོཝ (ཀ.)] དུམྨེདྷོ, ཡཐཱ ཏཉྙོཝ དུམྨཏཱི’’ཏི.

༤༨.

‘‘ཨིམེ པཱདཱ ཨིདཾ སཱིསཾ, ཨཡཾ ཀཱཡོ སཝཱལདྷི;

ནེཏྟཱ ཏཐེཝ ཏིཊྛནྟི, ཨཡཾ གོཎོ སམུཊྛཧེ.

༤༩.

‘‘ནཱཡྻཀསྶ ཧཏྠཔཱདཱ, ཀཱཡོ སཱིསཉྩ དིསྶཏི;

རུདཾ མཏྟིཀཐཱུཔསྨིཾ, ནནུ ཏྭཉྙེཝ དུམྨཏཱི’’ཏི.

༥༠.

‘‘ཨཱདིཏྟཾ ཝཏ མཾ སནྟཾ, གྷཏསིཏྟཾཝ པཱཝཀཾ;

ཝཱརིནཱ ཝིཡ ཨོསིཉྩཾ, སབྦཾ ནིབྦཱཔཡེ དརཾ.

༥༡.

‘‘ཨབྦཧཱི [ཨབྦཱུལ༹ྷཾ (བཧཱུསུ)] ཝཏ མེ སལླཾ, སོཀཾ ཧདཡནིསྶིཏཾ;

ཡོ མེ སོཀཔརེཏསྶ, པིཏུསོཀཾ ཨཔཱནུདི.

༥༢.

‘‘སྭཱཧཾ ཨབྦཱུལ༹ྷསལློསྨི, སཱིཏིབྷཱུཏོསྨི ནིབྦུཏོ;

ན སོཙཱམི ན རོདཱམི, ཏཝ སུཏྭཱན མཱཎཝ’.

༥༣.

ཨེཝཾ ¶ ཀརོནྟི སཔྤཉྙཱ, ཡེ ཧོནྟི ཨནུཀམྤཀཱ;

ཝིནིཝཏྟཡནྟི སོཀམྷཱ, སུཛཱཏོ པིཏརཾ ཡཐཱཏི.

གོཎཔེཏཝཏྠུ ཨཊྛམཾ.

༩. མཧཱཔེསཀཱརཔེཏིཝཏྠུ

༥༤.

‘‘གཱུཐཉྩ ¶ ¶ ¶ མུཏྟཾ རུཧིརཉྩ པུབྦཾ, པརིབྷུཉྫཏི ཀིསྶ ཨཡཾ ཝིཔཱཀོ;

ཨཡཾ ནུ ཀིཾ ཀམྨམཀཱསི ནཱརཱི, ཡཱ སབྦདཱ ལོཧིཏཔུབྦབྷཀྑཱ.

༥༥.

‘‘ནཝཱནི ཝཏྠཱནི སུབྷཱནི ཙེཝ, མུདཱུནི སུདྡྷཱནི ཙ ལོམསཱནི;

དིནྣཱནི མིསྶཱ ཀིཏཀཱ [ཀིཊཀཱ (ཀ.)] བྷཝནྟི, ཨཡཾ ནུ ཀིཾ ཀམྨམཀཱསི ནཱརཱི’’ཏི.

༥༦.

‘‘བྷརིཡཱ མམེསཱ ཨཧཱུ བྷདནྟེ, ཨདཱཡིཀཱ མཙྪརིནཱི ཀདརིཡཱ;

སཱ མཾ དདནྟཾ སམཎབྲཱཧྨཎཱནཾ, ཨཀྐོསཏི ཙ པརིབྷཱསཏི ཙ.

༥༧.

‘‘‘གཱུཐཉྩ མུཏྟཾ རུཧིརཉྩ པུབྦཾ, པརིབྷུཉྫ ཏྭཾ ཨསུཙིཾ སབྦཀཱལཾ;

ཨེཏཾ ཏེ པརལོཀསྨིཾ ཧོཏུ, ཝཏྠཱ ཙ ཏེ ཀིཊཀསམཱ བྷཝནྟུ’;

ཨེཏཱདིསཾ དུཙྩརིཏཾ ཙརིཏྭཱ, ཨིདྷཱགཏཱ ཙིརརཏྟཱཡ ཁཱདཏཱི’’ཏི.

མཧཱཔེསཀཱརཔེཏིཝཏྠུ ནཝམཾ.

༡༠. ཁལླཱཊིཡཔེཏིཝཏྠུ

༥༨.

‘‘ཀཱ ¶ ¶ ནུ ཨནྟོཝིམཱནསྨིཾ, ཏིཊྛནྟཱི ནཱུཔནིཀྑམི;

ཨུཔནིཀྑམསྶུ བྷདྡེ, པསྶཱམ ཏཾ བཧིཊྛིཏ’’ནྟི.

༥༩.

‘‘ཨཊྚཱིཡཱམི ¶ ཧརཱཡཱམི, ནགྒཱ ནིཀྑམིཏུཾ བཧི;

ཀེསེཧམྷི པཊིཙྪནྣཱ, པུཉྙཾ མེ ཨཔྤཀཾ ཀཏ’’ནྟི.

༦༠.

‘‘ཧནྡུཏྟརཱིཡཾ དདཱམི ཏེ, ཨིདཾ དུསྶཾ ནིཝཱསཡ;

ཨིདཾ དུསྶཾ ནིཝཱསེཏྭཱ, ཨེཧི ནིཀྑམ སོབྷནེ;

ཨུཔནིཀྑམསྶུ བྷདྡེ, པསྶཱམ ཏཾ བཧིཊྛིཏ’’ནྟི.

༦༡.

‘‘ཧཏྠེན ཧཏྠེ ཏེ དིནྣཾ, ན མཡ྄ཧཾ ཨུཔཀཔྤཏི;

ཨེསེཏྠུཔཱསཀོ སདྡྷོ, སམྨཱསམྦུདྡྷསཱཝཀོ.

༦༢.

‘‘ཨེཏཾ ཨཙྪཱདཡིཏྭཱན, མམ དཀྑིཎམཱདིས;

ཏཐཱཧཾ [ཨཐཱཧཾ (སཱི.)] སུཁིཏཱ ཧེསྶཾ, སབྦཀཱམསམིདྡྷིནཱི’’ཏི.

༦༣.

ཏཉྩ ཏེ ནྷཱཔཡིཏྭཱན, ཝིལིམྤེཏྭཱན ཝཱཎིཛཱ;

ཝཏྠེཧཙྪཱདཡིཏྭཱན, ཏསྶཱ དཀྑིཎམཱདིསུཾ.

༦༤.

སམནནྟརཱནུདྡིཊྛེ ¶ [སམནནྟརཱ ཨནུདྡིཊྛེ (སྱཱ. ཀ.)], ཝིཔཱཀོ ཨུདཔཛྫཐ [ཨུཔཔཛྫཐ (སཱི. སྱཱ.)];

བྷོཛནཙྪཱདནཔཱནཱིཡཾ [བྷོཛནཙྪཱདནཾ པཱནཱིཡཾ (སྱཱ. ཀ.)], དཀྑིཎཱཡ ཨིདཾ ཕལཾ.

༦༥.

ཏཏོ སུདྡྷཱ སུཙིཝསནཱ, ཀཱསིཀུཏྟམདྷཱརིནཱི;

ཧསནྟཱི ཝིམཱནཱ ནིཀྑམི, ‘དཀྑིཎཱཡ ཨིདཾ ཕལ’’’ནྟི.

༦༦.

‘‘སུཙིཏྟརཱུཔཾ རུཙིརཾ, ཝིམཱནཾ ཏེ པབྷཱསཏི;

དེཝཏེ པུཙྪིཏཱཙིཀྑ, ཀིསྶ ཀམྨསྶིདཾ ཕལ’’ནྟི.

༦༧.

‘‘བྷིཀྑུནོ ¶ ཙརམཱནསྶ, དོཎིནིམྨཛྫནིཾ ཨཧཾ;

ཨདཱསིཾ ཨུཛུབྷཱུཏསྶ, ཝིཔྤསནྣེན ཙེཏསཱ.

༦༨.

‘‘ཏསྶ ཀམྨསྶ ཀུསལསྶ, ཝིཔཱཀཾ དཱིགྷམནྟརཾ;

ཨནུབྷོམི ཝིམཱནསྨིཾ, ཏཉྩ དཱནི པརིཏྟཀཾ.

༦༩.

‘‘ཨུདྡྷཾ ¶ ཙཏཱུཧི མཱསེཧི, ཀཱལཾཀིརིཡཱ [ཀཱལཾཀིརིཡཱ (ཀ.)] བྷཝིསྶཏི;

ཨེཀནྟཀཊུཀཾ གྷོརཾ, ནིརཡཾ པཔཏིསྶཧཾ.

༧༠.

[མ. ནི. ༣.༢༥༠, ༢༦༧; ཨ. ནི. ༣.༣༦; པེ. ཝ. ༢༤༠, ༦༩༣] ‘‘ཙཏུཀྐཎྞཾ ཙཏུདྭཱརཾ, ཝིབྷཏྟཾ བྷཱགསོ མིཏཾ;

ཨཡོཔཱཀཱརཔརིཡནྟཾ, ཨཡསཱ པཊིཀུཛྫིཏཾ.

༧༡.

‘‘ཏསྶ ¶ ཨཡོམཡཱ བྷཱུམི, ཛལིཏཱ ཏེཛསཱ ཡུཏཱ;

སམནྟཱ ཡོཛནསཏཾ, ཕརིཏྭཱ ཏིཊྛཏི སབྦདཱ.

༧༢.

‘‘ཏཏྠཱཧཾ དཱིགྷམདྡྷཱནཾ, དུཀྑཾ ཝེདིསྶ ཝེདནཾ;

ཕལཉྩ པཱཔཀམྨསྶ, ཏསྨཱ སོཙཱམཧཾ བྷུས’’ནྟི.

ཁལླཱཊིཡཔེཏིཝཏྠུ དསམཾ.

༡༡. ནཱགཔེཏཝཏྠུ

༧༣.

‘‘པུརཏོཝ ¶ [པུརཏོ ཙ (སྱཱ.)] སེཏེན པལེཏི ཧཏྠིནཱ, མཛ྄ཛྷེ པན ཨསྶཏརཱིརཐེན;

པཙྪཱ ཙ ཀཉྙཱ སིཝིཀཱཡ ནཱིཡཏི, ཨོབྷཱསཡནྟཱི དས སབྦཏོ [སབྦཏོ (ཀ.)] དིསཱ.

༧༤.

‘‘ཏུམྷེ པན མུགྒརཧཏྠཔཱཎིནོ, རུདཾམུཁཱ ཚིནྣཔབྷིནྣགཏྟཱ;

མནུསྶབྷཱུཏཱ ¶ ཀིམཀཏྠ པཱཔཾ, ཡེནཉྙམཉྙསྶ པིཝཱཐ ལོཧིཏ’’ནྟི.

༧༥.

‘‘པུརཏོཝ ཡོ གཙྪཏི ཀུཉྫརེན, སེཏེན ནཱགེན ཙཏུཀྐམེན;

ཨམྷཱཀ པུཏྟོ ཨཧུ ཛེཊྛཀོ སོ [སོཝ ཛེཊྛོ (ཀ.)], དཱནཱནི དཏྭཱན སུཁཱི པམོདཏི.

༧༦.

‘‘ཡོ ¶ སོ མཛ྄ཛྷེ ཨསྶཏརཱིརཐེན, ཙཏུབྦྷི ཡུཏྟེན སུཝགྒིཏེན;

ཨམྷཱཀ པུཏྟོ ཨཧུ མཛ྄ཛྷིམོ སོ, ཨམཙྪརཱི དཱནཝཏཱི ཝིརོཙཏི.

༧༧.

‘‘ཡཱ སཱ ཙ པཙྪཱ སིཝིཀཱཡ ནཱིཡཏི, ནཱརཱི སཔཉྙཱ མིགམནྡལོཙནཱ;

ཨམྷཱཀ དྷཱིཏཱ ཨཧུ སཱ ཀནིཊྛིཀཱ, བྷཱགཌྜྷབྷཱགེན སུཁཱི པམོདཏི.

༧༨.

‘‘ཨེཏེ ¶ ཙ དཱནཱནི ཨདཾསུ པུབྦེ, པསནྣཙིཏྟཱ སམཎབྲཱཧྨཎཱནཾ;

མཡཾ པན མཙྪརིནོ ཨཧུམྷ, པརིབྷཱསཀཱ སམཎབྲཱཧྨཎཱནཾ;

ཨེཏེ ཙ དཏྭཱ པརིཙཱརཡནྟི, མཡཉྩ ¶ སུསྶཱམ ནལོ༹ཝ ཚིནྣོ’’ཏི [ཁིཏྟོཏི (སཱི.)].

༧༩.

‘‘ཀིཾ ཏུམྷཱཀཾ བྷོཛནཾ ཀིཾ སཡཱནཾ, ཀཐཉྩ ཡཱཔེཐ སུཔཱཔདྷམྨིནོ;

པཧཱུཏབྷོགེསུ ཨནཔྤཀེསུ, སུཁཾ ཝིརཱདྷཱཡ [ཝིརཱགཱཡ (སྱཱ. ཀ.)] དུཀྑཛྫ པཏྟཱ’’ཏི.

༨༠.

‘‘ཨཉྙམཉྙཾ ཝདྷིཏྭཱན, པིཝཱམ པུབྦལོཧིཏཾ;

བཧུཾ པིཏྭཱ ན དྷཱཏཱ ཧོམ, ནཙྪཱདིམྷསེ [ནརུཙྩཱདིམྷསེ (ཀ.)] མཡཾ.

༨༡.

‘‘ཨིཙྩེཝ མཙྩཱ པརིདེཝཡནྟི, ཨདཱཡཀཱ པེཙྩ [མཙྪརིནོ (ཀ.)] ཡམསྶ ཋཱཡིནོ;

ཡེ ཏེ ཝིདིཙྩ [ཝིདིཏྭཱ (སཱི.)] ཨདྷིགམྨ བྷོགེ, ན བྷུཉྫརེ ནཱཔི ཀརོནྟི པུཉྙཾ.

༨༢.

‘‘ཏེ ¶ ཁུཔྤིཔཱསཱུཔགཏཱ པརཏྠ, པཙྪཱ [པེཏཱ (སཱི.)] ཙིརཾ ཛྷཱཡརེ ཌཡ྄ཧམཱནཱ;

ཀམྨཱནི ཀཏྭཱན དུཁུདྲཱནི, ཨནུབྷོནྟི དུཀྑཾ ཀཊུཀཔྥལཱནི.

༨༣.

‘‘ཨིཏྟརཾ ཧི དྷནཾ དྷཉྙཾ, ཨིཏྟརཾ ཨིདྷ ཛཱིཝིཏཾ;

ཨིཏྟརཾ ཨིཏྟརཏོ ཉཏྭཱ, དཱིཔཾ ཀཡིརཱཐ པཎྜིཏོ.

༨༤.

‘‘ཡེ ཏེ ཨེཝཾ པཛཱནནྟི, ནརཱ དྷམྨསྶ ཀོཝིདཱ;

ཏེ དཱནེ ནཔྤམཛྫནྟི, སུཏྭཱ ཨརཧཏཾ ཝཙོ’’ཏི.

ནཱགཔེཏཝཏྠུ ཨེཀཱདསམཾ.

༡༢. ཨུརགཔེཏཝཏྠུ

༨༥.

‘‘ཨུརགོཝ ¶ ¶ ¶ ཏཙཾ ཛིཎྞཾ, ཧིཏྭཱ གཙྪཏི སནྟནུཾ;

ཨེཝཾ སརཱིརེ ནིབྦྷོགེ, པེཏེ ཀཱལངྐཏེ སཏི.

༨༦.

‘‘ཌཡ྄ཧམཱནོ ན ཛཱནཱཏི, ཉཱཏཱིནཾ པརིདེཝིཏཾ;

ཏསྨཱ ཨེཏཾ ན རོདཱམི, གཏོ སོ ཏསྶ ཡཱ གཏི’’.

༨༧.

‘‘ཨནབྦྷིཏོ [ཨནཝ྄ཧིཏོ (སཱི.)] ཏཏོ ཨཱགཱ, ནཱནུཉྙཱཏོ ཨིཏོ གཏོ;

ཡཐཱགཏོ ཏཐཱ གཏོ, ཏཏྠ ཀཱ [ཀཱ ཏཏྠ (སཱི.)] པརིདེཝནཱ.

༨༨.

‘‘ཌཡ྄ཧམཱནོ ¶ ན ཛཱནཱཏི, ཉཱཏཱིནཾ པརིདེཝིཏཾ;

ཏསྨཱ ཨེཏཾ ན རོདཱམི, གཏོ སོ ཏསྶ ཡཱ གཏི’’.

༨༩.

‘‘སཙེ རོདེ ཀིསཱ ཨསྶཾ, ཏཏྠ མེ ཀིཾ ཕལཾ སིཡཱ;

ཉཱཏིམིཏྟསུཧཛྫཱནཾ, བྷིཡྻོ ནོ ཨརཏཱི སིཡཱ.

༩༠.

‘‘ཌཡ྄ཧམཱནོ ན ཛཱནཱཏི, ཉཱཏཱིནཾ པརིདེཝིཏཾ;

ཏསྨཱ ཨེཏཾ ན རོདཱམི, གཏོ སོ ཏསྶ ཡཱ གཏི’’.

༩༡.

‘‘ཡཐཱཔི དཱརཀོ ཙནྡཾ, གཙྪནྟམནུརོདཏི;

ཨེཝཾ སམྤདམེཝེཏཾ, ཡོ པེཏམནུསོཙཏི.

༩༢.

‘‘ཌཡ྄ཧམཱནོ ན ཛཱནཱཏི, ཉཱཏཱིནཾ པརིདེཝིཏཾ;

ཏསྨཱ ཨེཏཾ ན རོདཱམི, གཏོ སོ ཏསྶ ཡཱ གཏི’’.

༩༣.

‘‘ཡཐཱཔི བྲཧྨེ ཨུདཀུམྦྷོ, བྷིནྣོ ཨཔྤཊིསནྡྷིཡོ;

ཨེཝཾ སམྤདམེཝེཏཾ, ཡོ པེཏམནུསོཙཏི.

༩༤.

‘‘ཌཡ྄ཧམཱནོ ན ཛཱནཱཏི, ཉཱཏཱིནཾ པརིདེཝིཏཾ;

ཏསྨཱ ¶ ཨེཏཾ ན རོདཱམི, གཏོ སོ ཏསྶ ཡཱ གཏཱི’’ཏི.

ཨུརགཔེཏཝཏྠུ དྭཱདསམཾ.

ཨུརགཝགྒོ པཋམོ ནིཊྛིཏོ.

ཏསྶུདྡཱནཾ –

ཁེཏྟཉྩ སཱུཀརཾ པཱུཏི, པིཊྛཾ ཙཱཔི ཏིརོཀུཊྚཾ;

པཉྩཱཔི ¶ སཏྟཔུཏྟཉྩ, གོཎཾ པེསཀཱརཀཉྩ;

ཏཐཱ ཁལླཱཊིཡཾ ནཱགཾ, དྭཱདསཾ ཨུརགཉྩེཝཱཏི.

༢. ཨུབྦརིཝགྒོ

༡. སཾསཱརམོཙཀཔེཏིཝཏྠུ

༩༥.

‘‘ནགྒཱ ¶ ¶ ¶ དུབྦཎྞརཱུཔཱསི, ཀིསཱ དྷམནིསནྠཏཱ;

ཨུཔྥཱསུལིཀེ [ཨུཔྤཱསུལི༹ཀེ (ཀ.)] ཀིསིཀེ, ཀཱ ནུ ཏྭཾ ཨིདྷ ཏིཊྛསཱི’’ཏི.

༩༦.

‘‘ཨཧཾ བྷདནྟེ པེཏཱིམྷི, དུགྒཏཱ ཡམལོཀིཀཱ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏཱ’’ཏི.

༩༧.

‘‘ཀིཾ ནུ ཀཱཡེན ཝཱཙཱཡ, མནསཱ དུཀྐཊཾ ཀཏཾ;

ཀིསྶ ཀམྨཝིཔཱཀེན, པེཏལོཀཾ ཨིཏོ གཏཱ’’ཏི.

༩༨.

‘‘ཨནུཀམྤཀཱ མཡ྄ཧཾ ནཱཧེསུཾ བྷནྟེ, པིཏཱ ཙ མཱཏཱ ཨཐཝཱཔི ཉཱཏཀཱ;

ཡེ མཾ ནིཡོཛེཡྻུཾ དདཱཧི དཱནཾ, པསནྣཙིཏྟཱ སམཎབྲཱཧྨཎཱནཾ.

༩༩.

‘‘ཨིཏོ ཨཧཾ ཝསྶསཏཱནི པཉྩ, ཡཾ ཨེཝརཱུཔཱ ཝིཙརཱམི ནགྒཱ;

ཁུདཱཡ ¶ ཏཎྷཱཡ ཙ ཁཛྫམཱནཱ, པཱཔསྶ ཀམྨསྶ ཕལཾ མམེདཾ.

༡༠༠.

‘‘ཝནྡཱམི ཏཾ ཨཡྻ པསནྣཙིཏྟཱ, ཨནུཀམྤ མཾ ཝཱིར མཧཱནུབྷཱཝ;

དཏྭཱ ཙ མེ ཨཱདིས ཡཾ ཧི ཀིཉྩི, མོཙེཧི མཾ དུགྒཏིཡཱ བྷདནྟེ’’ཏི.

༡༠༡.

སཱདྷཱུཏི སོ པཊིསྶུཏྭཱ, སཱརིཔུཏྟོནུཀམྤཀོ;

བྷིཀྑཱུནཾ ཨཱལོཔཾ དཏྭཱ, པཱཎིམཏྟཉྩ ཙོལ༹ཀཾ;

ཐཱལཀསྶ ཙ པཱནཱིཡཾ, ཏསྶཱ དཀྑིཎམཱདིསི.

༡༠༢.

སམནནྟརཱནུདྡིཊྛེ, ཝིཔཱཀོ ཨུདཔཛྫཐ;

བྷོཛནཙྪཱདནཔཱནཱིཡཾ, དཀྑིཎཱཡ ཨིདཾ ཕལཾ.

༡༠༣.

ཏཏོ ¶ ¶ སུདྡྷཱ སུཙིཝསནཱ, ཀཱསིཀུཏྟམདྷཱརིནཱི;

ཝིཙིཏྟཝཏྠཱབྷརཎཱ, སཱརིཔུཏྟཾ ཨུཔསངྐམི.

༡༠༤.

‘‘ཨབྷིཀྐནྟེན ཝཎྞེན, ཡཱ ཏྭཾ ཏིཊྛསི དེཝཏེ;

ཨོབྷཱསེནྟཱི དིསཱ སབྦཱ, ཨོསདྷཱི ཝིཡ ཏཱརཀཱ.

༡༠༥.

‘‘ཀེན ཏེཏཱདིསོ ཝཎྞོ, ཀེན ཏེ ཨིདྷ མིཛ྄ཛྷཏི;

ཨུཔྤཛྫནྟི ཙ ཏེ བྷོགཱ, ཡེ ཀེཙི མནསོ པིཡཱ.

༡༠༦.

‘‘པུཙྪཱམི ¶ ཏཾ དེཝི མཧཱནུབྷཱཝེ, མནུསྶབྷཱུཏཱ ཀིམཀཱསི པུཉྙཾ;

ཀེནཱསི ཨེཝཾ ཛལིཏཱནུབྷཱཝཱ, ཝཎྞོ ¶ ཙ ཏེ སབྦདིསཱ པབྷཱསཏཱི’’ཏི.

༡༠༧.

‘‘ཨུཔྤཎྜུཀིཾ ཀིསཾ ཚཱཏཾ, ནགྒཾ སམྤཏིཏཙྪཝིཾ [ཨཱཔཏིཏཙྪཝིཾ (སཱི.)];

མུནི ཀཱརུཎིཀོ ལོཀེ, ཏཾ མཾ ཨདྡཀྑི དུགྒཏཾ.

༡༠༨.

‘‘བྷིཀྑཱུནཾ ཨཱལོཔཾ དཏྭཱ, པཱཎིམཏྟཉྩ ཙོལ༹ཀཾ;

ཐཱལཀསྶ ཙ པཱནཱིཡཾ, མམ དཀྑིཎམཱདིསི.

༡༠༩.

‘‘ཨཱལོཔསྶ ཕལཾ པསྶ, བྷཏྟཾ ཝསྶསཏཾ དས;

བྷུཉྫཱམི ཀཱམཀཱམིནཱི, ཨནེཀརསབྱཉྫནཾ.

༡༡༠.

‘‘པཱཎིམཏྟསྶ ཙོལ༹སྶ, ཝིཔཱཀཾ པསྶ ཡཱདིསཾ;

ཡཱཝཏཱ ནནྡརཱཛསྶ, ཝིཛིཏསྨིཾ པཊིཙྪདཱ.

༡༡༡.

‘‘ཏཏོ བཧུཏརཱ བྷནྟེ, ཝཏྠཱནཙྪཱདནཱནི མེ;

ཀོསེཡྻཀམྦལཱིཡཱནི, ཁོམཀཔྤཱསིཀཱནི ཙ.

༡༡༢.

‘‘ཝིཔུལཱ ཙ མཧགྒྷཱ ཙ, ཏེཔཱཀཱསེཝལམྦརེ;

སཱཧཾ ཏཾ པརིདཧཱམི, ཡཾ ཡཾ ཧི མནསོ པིཡཾ.

༡༡༣.

‘‘ཐཱལཀསྶ ཙ པཱནཱིཡཾ, ཝིཔཱཀཾ པསྶ ཡཱདིསཾ;

གམྦྷཱིརཱ ཙཏུརསྶཱ ཙ, པོཀྑརཉྙོ སུནིམྨིཏཱ.

༡༡༤.

‘‘སེཏོདཀཱ སུཔྤཏིཏྠཱ, སཱིཏཱ ཨཔྤཊིགནྡྷིཡཱ;

པདུམུཔྤལསཉྪནྣཱ, ཝཱརིཀིཉྫཀྑཔཱུརིཏཱ.

༡༡༥.

‘‘སཱཧཾ ¶ རམཱམི ཀཱིལཱ༹མི, མོདཱམི ཨཀུཏོབྷཡཱ;

མུནིཾ ཀཱརུཎིཀཾ ལོཀེ, བྷནྟེ ཝནྡིཏུམཱགཏཱ’’ཏི.

སཾསཱརམོཙཀཔེཏིཝཏྠུ པཋམཾ.

༢. སཱརིཔུཏྟཏྠེརམཱཏུཔེཏིཝཏྠུ

༡༡༦.

‘‘ནགྒཱ ¶ ¶ དུབྦཎྞརཱུཔཱསི, ཀིསཱ དྷམནིསནྠཏཱ;

ཨུཔྥཱསུལིཀེ ཀིསིཀེ, ཀཱ ནུ ཏྭཾ ཨིདྷ ཏིཊྛསི’’.

༡༡༧.

‘‘ཨཧཾ ¶ ཏེ སཀིཡཱ མཱཏཱ, པུབྦེ ཨཉྙཱསུ ཛཱཏཱིསུ;

ཨུཔཔནྣཱ པེཏྟིཝིསཡཾ, ཁུཔྤིཔཱསསམཔྤིཏཱ.

༡༡༨.

‘‘ཚཌྜིཏཾ ¶ ཁིཔིཏཾ ཁེལ༹ཾ, སིངྒྷཱཎིཀཾ སིལེསུམཾ;

ཝསཉྩ ཌཡ྄ཧམཱནཱནཾ, ཝིཛཱཏཱནཉྩ ལོཧིཏཾ.

༡༡༩.

‘‘ཝཎིཀཱནཉྩ ཡཾ གྷཱན-སཱིསཙྪིནྣཱན ལོཧིཏཾ;

ཁུདཱཔརེཏཱ བྷུཉྫཱམི, ཨིཏྠིཔུརིསནིསྶིཏཾ.

༡༢༠.

‘‘པུབྦལོཧིཏཾ བྷཀྑཱམི [པུབྦལོཧིཏབྷཀྑཱསྨི (སཱི.)], པསཱུནཾ མཱནུསཱན ཙ;

ཨལེཎཱ ཨནགཱརཱ ཙ, ནཱིལམཉྩཔརཱཡཎཱ.

༡༢༡.

‘‘དེཧི པུཏྟཀ མེ དཱནཾ, དཏྭཱ ཨནྭཱདིསཱཧི མེ;

ཨཔྤེཝ ནཱམ མུཙྩེཡྻཾ, པུབྦལོཧིཏབྷོཛནཱ’’ཏི.

༡༢༢.

མཱཏུཡཱ ཝཙནཾ སུཏྭཱ, ཨུཔཏིསྶོནུཀམྤཀོ;

ཨཱམནྟཡི མོགྒལླཱནཾ, ཨནུརུདྡྷཉྩ ཀཔྤིནཾ.

༡༢༣.

ཙཏསྶོ ཀུཊིཡོ ཀཏྭཱ, སངྒྷེ ཙཱཏུདྡིསེ ཨདཱ;

ཀུཊིཡོ ཨནྣཔཱནཉྩ, མཱཏུ དཀྑིཎམཱདིསཱི.

༡༢༤.

སམནནྟརཱནུདྡིཊྛེ, ཝིཔཱཀོ ཨུདཔཛྫཐ;

བྷོཛནཾ པཱནཱིཡཾ ཝཏྠཾ, དཀྑིཎཱཡ ཨིདཾ ཕལཾ.

༡༢༥.

ཏཏོ སུདྡྷཱ སུཙིཝསནཱ, ཀཱསིཀུཏྟམདྷཱརིནཱི;

ཝིཙིཏྟཝཏྠཱབྷརཎཱ, ཀོལིཏཾ ཨུཔསངྐམི.

༡༢༦.

‘‘ཨབྷིཀྐནྟེན ¶ ¶ ཝཎྞེན, ཡཱ ཏྭཾ ཏིཊྛསི དེཝཏེ;

ཨོབྷཱསེནྟཱི དིསཱ སབྦཱ, ཨོསདྷཱི ཝིཡ ཏཱརཀཱ.

༡༢༧.

‘‘ཀེན ཏེཏཱདིསོ ཝཎྞོ, ཀེན ཏེ ཨིདྷ མིཛ྄ཛྷཏི;

ཨུཔྤཛྫནྟི ཙ ཏེ བྷོགཱ, ཡེ ཀེཙི མནསོ པིཡཱ.

༡༢༨.

‘‘པུཙྪཱམི ཏཾ དེཝི མཧཱནུབྷཱཝེ, མནུསྶབྷཱུཏཱ ཀིམཀཱསི པུཉྙཾ;

ཀེནཱསི ཨེཝཾ ཛལིཏཱནུབྷཱཝཱ, ཝཎྞོ ཙ ཏེ སབྦདིསཱ པབྷཱསཏཱི’’ཏི.

༡༢༩.

‘‘སཱརིཔུཏྟསྶཱཧཾ མཱཏཱ, པུབྦེ ཨཉྙཱསུ ཛཱཏཱིསུ;

ཨུཔཔནྣཱ པེཏྟིཝིསཡཾ, ཁུཔྤིཔཱསསམཔྤིཏཱ.

༡༣༠.

‘‘ཚཌྜིཏཾ ཁིཔིཏཾ ཁེལ༹ཾ, སིངྒྷཱཎིཀཾ སིལེསུམཾ;

ཝསཉྩ ཌཡ྄ཧམཱནཱནཾ, ཝིཛཱཏཱནཉྩ ལོཧིཏཾ.

༡༣༡.

‘‘ཝཎིཀཱནཉྩ ཡཾ གྷཱན-སཱིསཙྪིནྣཱན ལོཧིཏཾ;

ཁུདཱཔརེཏཱ བྷུཉྫཱམི, ཨིཏྠིཔུརིསནིསྶིཏཾ.

༡༣༢.

‘‘པུབྦལོཧིཏཾ བྷཀྑིསྶཾ, པསཱུནཾ མཱནུསཱན ཙ;

ཨལེཎཱ ཨནགཱརཱ ཙ, ནཱིལམཉྩཔརཱཡཎཱ.

༡༣༣.

‘‘སཱརིཔུཏྟསྶ ¶ ¶ དཱནེན, མོདཱམི ཨཀུཏོབྷཡཱ;

མུནིཾ ཀཱརུཎིཀཾ ལོཀེ, བྷནྟེ ཝནྡིཏུམཱགཏཱ’’ཏི.

སཱརིཔུཏྟཏྠེརསྶ མཱཏུཔེཏིཝཏྠུ དུཏིཡཾ.

༣. མཏྟཱཔེཏིཝཏྠུ

༡༣༤.

‘‘ནགྒཱ དུབྦཎྞརཱུཔཱསི, ཀིསཱ དྷམནིསནྠཏཱ;

ཨུཔྥཱསུལིཀེ ¶ ཀིསིཀེ, ཀཱ ནུ ཏྭཾ ཨིདྷ ཏིཊྛསཱི’’ཏི.

༡༣༥.

‘‘ཨཧཾ མཏྟཱ ཏུཝཾ ཏིསྶཱ, སཔཏྟཱི ཏེ པུརེ ཨཧུཾ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏཱ’’ཏི.

༡༣༦.

‘‘ཀིཾ ནུ ཀཱཡེན ཝཱཙཱཡ, མནསཱ དུཀྐཊཾ ཀཏཾ;

ཀིསྶ ཀམྨཝིཔཱཀེན, པེཏལོཀཾ ཨིཏོ གཏཱ’’ཏི.

༡༣༧.

‘‘ཙཎྜཱི ¶ ¶ ཙ ཕརུསཱ ཙཱསིཾ, ཨིསྶུཀཱི མཙྪརཱི སཋཱ [སཋཱི (སཱི.)];

ཏཱཧཾ དུརུཏྟཾ ཝཏྭཱན, པེཏལོཀཾ ཨིཏོ གཏཱ’’ཏི.

༡༣༨.

སབྦཾ [སཙྩཾ (ཀ.)] ཨཧམྤི ཛཱནཱམི, ཡཐཱ ཏྭཾ ཙཎྜིཀཱ ཨཧུ;

ཨཉྙཉྩ ཁོ ཏཾ པུཙྪཱམི, ཀེནཱསི པཾསུཀུནྠིཏཱ’’ཏི.

༡༣༩.

‘‘སཱིསཾནྷཱཏཱ ཏུཝཾ ཨཱསི, སུཙིཝཏྠཱ ཨལངྐཏཱ;

ཨཧཉྩ ཁོ [ཁོ ཏཾ (སཱི. ཀ.)] ཨདྷིམཏྟཾ, སམལངྐཏཏརཱ ཏཡཱ.

༡༤༠.

‘‘ཏསྶཱ མེ པེཀྑམཱནཱཡ, སཱམིཀེན སམནྟཡི;

ཏཏོ མེ ཨིསྶཱ ཝིཔུལཱ, ཀོདྷོ མེ སམཛཱཡཐ.

༡༤༡.

‘‘ཏཏོ པཾསུཾ གཧེཏྭཱན, པཾསུནཱ ཏཾ ཧི ཨོཀིརིཾ [ཏཾ ཝིཀཱིརིཧཾ (སྱཱ. ཀ.)];

ཏསྶ ¶ ཀམྨཝིཔཱཀེན, ཏེནམྷི པཾསུཀུནྠིཏཱ’’ཏི.

༡༤༢.

‘‘སཙྩཾ ཨཧམྤི ཛཱནཱམི, པཾསུནཱ མཾ ཏྭམོཀིརི;

ཨཉྙཉྩ ཁོ ཏཾ པུཙྪཱམི, ཀེན ཁཛྫསི ཀཙྪུཡཱ’’ཏི.

༡༤༣.

‘‘བྷེསཛྫཧཱརཱི ཨུབྷཡོ, ཝནནྟཾ ཨགམིམྷསེ;

ཏྭཉྩ བྷེསཛྫམཱཧརི, ཨཧཉྩ ཀཔིཀཙྪུནོ.

༡༤༤.

‘‘ཏསྶཱ ཏྱཱཛཱནམཱནཱཡ, སེཡྻཾ ཏྱཱཧཾ སམོཀིརིཾ;

ཏསྶ ཀམྨཝིཔཱཀེན, ཏེན ཁཛྫཱམི ཀཙྪུཡཱ’’ཏི.

༡༤༥.

‘‘སཙྩཾ ¶ ཨཧམྤི ཛཱནཱམི, སེཡྻཾ མེ ཏྭཾ སམོཀིརི;

ཨཉྙཉྩ ཁོ ཏཾ པུཙྪཱམི, ཀེནཱསི ནགྒིཡཱ ཏུཝ’’ནྟི.

༡༤༦.

‘‘སཧཱཡཱནཾ སམཡོ ཨཱསི, ཉཱཏཱིནཾ སམིཏཱི ཨཧུ;

ཏྭཉྩ ཨཱམནྟིཏཱ ཨཱསི, སསཱམིནཱི ནོ ཙ ཁོ ཨཧཾ.

༡༤༧.

‘‘ཏསྶཱ ཏྱཱཛཱནམཱནཱཡ, དུསྶཾ ཏྱཱཧཾ ཨཔཱནུདིཾ;

ཏསྶ ཀམྨཝིཔཱཀེན, ཏེནམྷི ནགྒིཡཱ ཨཧ’’ནྟི.

༡༤༨.

‘‘སཙྩཾ ཨཧམྤི ཛཱནཱམི, དུསྶཾ མེ ཏྭཾ ཨཔཱནུདི;

ཨཉྙཉྩ ཁོ ཏཾ པུཙྪཱམི, ཀེནཱསི གཱུཐགནྡྷིནཱི’’ཏི.

༡༤༩.

‘‘ཏཝ ¶ གནྡྷཉྩ མཱལཉྩ, པཙྩགྒྷཉྩ ཝིལེཔནཾ;

གཱུཐཀཱུཔེ ཨདྷཱརེསིཾ [ཨདྷཱརེསིཾ (ཀ.)], ཏཾ པཱཔཾ པཀཏཾ མཡཱ;

ཏསྶ ཀམྨཝིཔཱཀེན, ཏེནམྷི གཱུཐགནྡྷིནཱི’’ཏི.

༡༥༠.

‘‘སཙྩཾ ཨཧམྤི ཛཱནཱམི, ཏཾ པཱཔཾ པཀཏཾ ཏཡཱ;

ཨཉྙཉྩ ཁོ ཏཾ པུཙྪཱམི, ཀེནཱསི དུགྒཏཱ ཏུཝ’’ནྟི.

༡༥༡.

‘‘ཨུབྷིནྣཾ སམཀཾ ཨཱསི, ཡཾ གེཧེ ཝིཛྫཏེ དྷནཾ;

སནྟེསུ དེཡྻདྷམྨེསུ, དཱིཔཾ ནཱཀཱསིམཏྟནོ;

ཏསྶ ཀམྨཝིཔཱཀེན, ཏེནམྷི དུགྒཏཱ ཨཧཾ.

༡༥༢.

‘‘ཏདེཝ ¶ མཾ ཏྭཾ ཨཝཙ, ‘པཱཔཀམྨཾ ནིསེཝསི;

ན ཧི པཱཔེཧི ཀམྨེཧི, སུལབྷཱ ཧོཏི སུགྒཏཱི’’’ཏི.

༡༥༣.

‘‘ཝཱམཏོ མཾ ཏྭཾ པཙྩེསི, ཨཐོཔི མཾ ཨུསཱུཡསི;

པསྶ ¶ པཱཔཱནཾ ཀམྨཱནཾ, ཝིཔཱཀོ ཧོཏི ཡཱདིསོ.

༡༥༤.

‘‘ཏེ གྷརཱ ཏཱ ཙ དཱསིཡོ [ཏེ གྷརདཱསིཡོ ཨཱསུཾ (སཱི. སྱཱ.), ཏེ གྷརེ དཱསིཡོ ཙེཝ (ཀ.)], ཏཱནེཝཱབྷརཎཱནིམེ;

ཏེ ཨཉྙེ པརིཙཱརེནྟི, ན བྷོགཱ ཧོནྟི སསྶཏཱ.

༡༥༥.

‘‘ཨིདཱནི བྷཱུཏསྶ པིཏཱ, ཨཱཔཎཱ གེཧམེཧིཏི;

ཨཔྤེཝ ཏེ དདེ ཀིཉྩི, མཱ སུ ཏཱཝ ཨིཏོ ཨགཱ’’ཏི.

༡༥༦.

‘‘ནགྒཱ དུབྦཎྞརཱུཔཱམྷི, ཀིསཱ དྷམནིསནྠཏཱ;

ཀོཔཱིནམེཏཾ ཨིཏྠཱིནཾ, མཱ མཾ བྷཱུཏཔིཏཱདྡསཱ’’ཏི.

༡༥༧.

‘‘ཧནྡ ཀིཾ ཝཱ ཏྱཱཧཾ [ཀིཾ ཏྱཱཧཾ (སཱི. སྱཱ.), ཀིཾ ཝཏཱཧཾ (ཀ.)] དམྨི, ཀིཾ ཝཱ ཏེདྷ [ཀིཾ ཝཱ ཙ ཏེ (སཱི. སྱཱ.), ཀིཾ ཝིདྷ ཏེ (ཀ.)] ཀརོམཧཾ;

ཡེན ཏྭཾ སུཁིཏཱ ཨསྶ, སབྦཀཱམསམིདྡྷིནཱི’’ཏི.

༡༥༨.

‘‘ཙཏྟཱརོ ¶ བྷིཀྑཱུ སངྒྷཏོ, ཙཏྟཱརོ པན པུགྒལཱ;

ཨཊྛ བྷིཀྑཱུ བྷོཛཡིཏྭཱ, མམ དཀྑིཎམཱདིས;

ཏདཱཧཾ སུཁིཏཱ ཧེསྶཾ, སབྦཀཱམསམིདྡྷིནཱི’’ཏི.

༡༥༩.

སཱདྷཱུཏི སཱ པཊིསྶུཏྭཱ, བྷོཛཡིཏྭཱཊྛ བྷིཀྑཝོ;

ཝཏྠེཧཙྪཱདཡིཏྭཱན, ཏསྶཱ དཀྑིཎམཱདིསཱི.

༡༦༠.

སམནནྟརཱནུདྡིཊྛེ ¶ , ཝིཔཱཀོ ཨུདཔཛྫཐ;

བྷོཛནཙྪཱདནཔཱནཱིཡཾ, དཀྑིཎཱཡ ཨིདཾ ཕལཾ.

༡༦༡.

ཏཏོ སུདྡྷཱ སུཙིཝསནཱ, ཀཱསིཀུཏྟམདྷཱརིནཱི;

ཝིཙིཏྟཝཏྠཱབྷརཎཱ, སཔཏྟིཾ ཨུཔསངྐམི.

༡༦༢.

‘‘ཨབྷིཀྐནྟེན ཝཎྞེན, ཡཱ ཏྭཾ ཏིཊྛསི དེཝཏེ;

ཨོབྷཱསེནྟཱི ¶ དིསཱ སབྦཱ, ཨོསདྷཱི ཝིཡ ཏཱརཀཱ.

༡༦༣.

‘‘ཀེན ཏེཏཱདིསོ ཝཎྞོ, ཀེན ཏེ ཨིདྷ མིཛ྄ཛྷཏི;

ཨུཔྤཛྫནྟི ཙ ཏེ བྷོགཱ, ཡེ ཀེཙི མནསོ པིཡཱ.

༡༦༤.

‘‘པུཙྪཱམི ཏཾ དེཝི མཧཱནུབྷཱཝེ, མནུསྶབྷཱུཏཱ ཀིམཀཱསི པུཉྙཾ;

ཀེནཱསི ཨེཝཾ ཛལིཏཱནུབྷཱཝཱ, ཝཎྞོ ཙ ཏེ སབྦདིསཱ པབྷཱསཏཱི’’ཏི.

༡༦༥.

‘‘ཨཧཾ མཏྟཱ ཏུཝཾ ཏིསྶཱ, སཔཏྟཱི ཏེ པུརེ ཨཧུཾ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏཱ.

༡༦༦.

‘‘ཏཝ དིནྣེན དཱནེན, མོདཱམི ཨཀུཏོབྷཡཱ;

ཙཱིརཾ ཛཱིཝཱཧི བྷགིནི, སཧ སབྦེཧི ཉཱཏིབྷི;

ཨསོཀཾ ཝིརཛཾ ཋཱནཾ, ཨཱཝཱསཾ ཝསཝཏྟིནཾ.

༡༦༧.

‘‘ཨིདྷ ¶ དྷམྨཾ ཙརིཏྭཱན, དཱནཾ དཏྭཱན སོབྷནེ;

ཝིནེཡྻ མཙྪེརམལཾ སམཱུལཾ, ཨནིནྡིཏཱ སགྒམུཔེཧི ཋཱན’’ནྟི.

མཏྟཱཔེཏིཝཏྠུ ཏཏིཡཾ.

༤. ནནྡཱཔེཏིཝཏྠུ

༡༦༨.

‘‘ཀཱལཱི༹ ¶ དུབྦཎྞརཱུཔཱསི, ཕརུསཱ བྷཱིརུདསྶནཱ;

པིངྒལཱསི ཀལཱ༹རཱསི, ན ཏཾ མཉྙཱམི མཱནུསི’’ནྟི.

༡༦༩.

‘‘ཨཧཾ ¶ ནནྡཱ ནནྡིསེན, བྷརིཡཱ ཏེ པུརེ ཨཧུཾ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏཱ’’ཏི.

༡༧༠.

‘‘ཀིཾ ¶ ¶ ནུ ཀཱཡེན ཝཱཙཱཡ, མནསཱ དུཀྐཊཾ ཀཏཾ;

ཀིསྶ ཀམྨཝིཔཱཀེན, པེཏལོཀཾ ཨིཏོ གཏཱ’’ཏི.

༡༧༡.

‘‘ཙཎྜཱི ཙ ཕརུསཱ ཙཱསིཾ [ཙཎྜཱི ཕརུསཝཱཙཱ ཙ (སཱི.)], ཏཡི ཙཱཔི ཨགཱརཝཱ;

ཏཱཧཾ དུརུཏྟཾ ཝཏྭཱན, པེཏལོཀཾ ཨིཏོ གཏཱ’’ཏི.

༡༧༢.

‘‘ཧནྡུཏྟརཱིཡཾ དདཱམི ཏེ, ཨིམཾ [ཨིདཾ (སཱི. ཨཊྛ.)] དུསྶཾ ནིཝཱསཡ;

ཨིམཾ དུསྶཾ ནིཝཱསེཏྭཱ, ཨེཧི ནེསྶཱམི ཏཾ གྷརཾ.

༡༧༣.

‘‘ཝཏྠཉྩ ཨནྣཔཱནཉྩ, ལཙྪསི ཏྭཾ གྷརཾ གཏཱ;

པུཏྟེ ཙ ཏེ པསྶིསྶསི, སུཎིསཱཡོ ཙ དཀྑསཱི’’ཏི.

༡༧༤.

‘‘ཧཏྠེན ཧཏྠེ ཏེ དིནྣཾ, ན མཡ྄ཧཾ ཨུཔཀཔྤཏི;

བྷིཀྑཱུ ཙ སཱིལསམྤནྣེ, ཝཱིཏརཱགེ བཧུསྶུཏེ.

༡༧༥.

‘‘ཏཔྤེཧི ཨནྣཔཱནེན, མམ དཀྑིཎམཱདིས;

ཏདཱཧཾ སུཁིཏཱ ཧེསྶཾ, སབྦཀཱམསམིདྡྷིནཱི’’ཏི.

༡༧༦.

སཱདྷཱུཏི སོ པཊིསྶུཏྭཱ, དཱནཾ ཝིཔུལམཱཀིརི;

ཨནྣཾ པཱནཾ ཁཱདནཱིཡཾ, ཝཏྠསེནཱསནཱནི ཙ;

ཚཏྟཾ གནྡྷཉྩ མཱལཉྩ, ཝིཝིདྷཱ ཙ ཨུཔཱཧནཱ.

༡༧༧.

བྷིཀྑཱུ ཙ སཱིལསམྤནྣེ, ཝཱིཏརཱགེ བཧུསྶུཏེ;

ཏཔྤེཏྭཱ ཨནྣཔཱནེན, ཏསྶཱ དཀྑིཎམཱདིསཱི.

༡༧༨.

སམནནྟརཱནུདྡིཊྛེ ¶ , ཝིཔཱཀོ ཨུདཔཛྫཐ;

བྷོཛནཙྪཱདནཔཱནཱིཡཾ, དཀྑིཎཱཡ ཨིདཾ ཕལཾ.

༡༧༩.

ཏཏོ ¶ སུདྡྷཱ སུཙིཝསནཱ, ཀཱསིཀུཏྟམདྷཱརིནཱི;

ཝིཙིཏྟཝཏྠཱབྷརཎཱ, སཱམིཀཾ ཨུཔསངྐམི.

༡༨༠.

‘‘ཨབྷིཀྐནྟེན ཝཎྞེན, ཡཱ ཏྭཾ ཏིཊྛསི དེཝཏེ;

ཨོབྷཱསེནྟཱི དིསཱ སབྦཱ, ཨོསདྷཱི ཝིཡ ཏཱརཀཱ.

༡༨༡.

‘‘ཀེན ཏེཏཱདིསོ ཝཎྞོ, ཀེན ཏེ ཨིདྷ མིཛ྄ཛྷཏི;

ཨུཔྤཛྫནྟི ཙ ཏེ བྷོགཱ, ཡེ ཀེཙི མནསོ པིཡཱ.

༡༨༢.

‘‘པུཙྪཱམི ¶ ཏཾ དེཝི མཧཱནུབྷཱཝེ, མནུསྶབྷཱུཏཱ ཀིམཀཱསི པུཉྙཾ;

ཀེནཱསི ཨེཝཾ ཛལིཏཱནུབྷཱཝཱ, ཝཎྞོ ཙ ཏེ སབྦདིསཱ པབྷཱསཏཱི’’ཏི.

༡༨༣.

‘‘ཨཧཾ ¶ ནནྡཱ ནནྡིསེན, བྷརིཡཱ ཏེ པུརེ ཨཧུཾ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏཱ.

༡༨༤.

‘‘ཏཝ དིནྣེན དཱནེན, མོདཱམི ཨཀུཏོབྷཡཱ;

ཙིརཾ ཛཱིཝ གཧཔཏི, སཧ སབྦེཧི ཉཱཏིབྷི;

ཨསོཀཾ ཝིརཛཾ ཁེམཾ, ཨཱཝཱསཾ ཝསཝཏྟིནཾ.

༡༨༥.

‘‘ཨིདྷ དྷམྨཾ ཙརིཏྭཱན, དཱནཾ དཏྭཱ གཧཔཏི;

ཝིནེཡྻ མཙྪེརམལཾ སམཱུལཾ, ཨནིནྡིཏོ སགྒམུཔེཧི ཋཱན’’ནྟི.

ནནྡཱཔེཏིཝཏྠུ ཙཏུཏྠཾ.

༥. མཊྛཀུཎྜལཱིཔེཏཝཏྠུ

༡༨༦.

[ཝི. ཝ. ༡༢༠༧] ‘‘ཨལངྐཏོ ¶ མཊྛཀུཎྜལཱི, མཱལདྷཱརཱི ཧརིཙནྡནུསྶདོ;

བཱཧཱ པགྒཡ྄ཧ ཀནྡསི, ཝནམཛ྄ཛྷེ ཀིཾ དུཀྑིཏོ ཏུཝ’’ནྟི.

༡༨༧.

‘‘སོཝཎྞམཡོ པབྷསྶརོ, ཨུཔྤནྣོ རཐཔཉྫརོ མམ;

ཏསྶ ཙཀྐཡུགཾ ན ཝིནྡཱམི, ཏེན དུཀྑེན ཛཧཱམི ཛཱིཝིཏ’’ནྟི.

༡༨༨.

‘‘སོཝཎྞམཡཾ མཎིམཡཾ, ལོཧིཏཀམཡཾ [ལོཧིཏངྒམཡཾ (སྱཱ.), ལོཧིཏངྐམཡཾ (སཱི.), ལོཧམཡཾ (ཀཏྠཙི)] ཨཐ རཱུཔིཡམཡཾ;

ཨཱཙིཀྑ མེ བྷདྡམཱཎཝ, ཙཀྐཡུགཾ པཊིཔཱདཡཱམི ཏེ’’ཏི.

༡༨༩.

སོ ¶ མཱཎཝོ ཏསྶ པཱཝདི, ‘‘ཙནྡསཱུརིཡཱ ཨུབྷཡེཏྠ དིསྶརེ;

སོཝཎྞམཡོ རཐོ མམ, ཏེན ཙཀྐཡུགེན སོབྷཏཱི’’ཏི.

༡༩༠.

‘‘བཱལོ ཁོ ཏྭཾ ཨསི མཱཎཝ, ཡོ ཏྭཾ པཏྠཡསེ ཨཔཏྠིཡཾ;

མཉྙཱམི ཏུཝཾ མརིསྶསི, ན ཧི ཏྭཾ ལཙྪསི ཙནྡསཱུརིཡེ’’ཏི.

༡༩༡.

‘‘གམནཱགམནམྤི དིསྶཏི, ཝཎྞདྷཱཏུ ཨུབྷཡཏྠ ཝཱིཐིཡཱ;

པེཏོ ཀཱལཀཏོ ན དིསྶཏི, ཀོ ནིདྷ ཀནྡཏཾ བཱལྱཏརོ’’ཏི.

༡༩༢.

‘‘སཙྩཾ ཁོ ཝདེསི མཱཎཝ, ཨཧམེཝ ཀནྡཏཾ བཱལྱཏརོ;

ཙནྡཾ ཝིཡ དཱརཀོ རུདཾ, པེཏཾ ཀཱལཀཏཱབྷིཔཏྠཡི’’ནྟི.

༡༩༣.

‘‘ཨཱདིཏྟཾ ཝཏ མཾ སནྟཾ, གྷཏསིཏྟཾཝ པཱཝཀཾ;

ཝཱརིནཱ ཝིཡ ཨོསིཉྩཾ, སབྦཾ ནིབྦཱཔཡེ དརཾ.

༡༩༤.

‘‘ཨབྦཧཱི [ཨབྦཱུལ༹ྷཾ (སྱཱ. ཀ.)] ཝཏ མེ སལླཾ, སོཀཾ ཧདཡནིསྶིཏཾ;

ཡོ མེ སོཀཔརེཏསྶ, པུཏྟསོཀཾ ཨཔཱནུདི.

༡༩༥.

‘‘སྭཱཧཾ ཨབྦཱུལ༹ྷསལློསྨི, སཱིཏིབྷཱུཏོསྨི ནིབྦུཏོ;

ན སོཙཱམི ན རོདཱམི, ཏཝ སུཏྭཱན མཱཎཝཱ’’ཏི.

༡༩༦.

‘‘དེཝཏཱ ¶ ནུསི གནྡྷབྦོ, ཨདུ སཀྐོ པུརིནྡདོ;

ཀོ ཝཱ ཏྭཾ ཀསྶ ཝཱ པུཏྟོ, ཀཐཾ ཛཱནེམུ ཏཾ མཡ’’ནྟི.

༡༩༧.

‘‘ཡཉྩ ཀནྡསི ཡཉྩ རོདསི, པུཏྟཾ ཨཱལཱ༹ཧནེ སཡཾ དཧིཏྭཱ;

སྭཱཧཾ ཀུསལཾ ཀརིཏྭཱ ཀམྨཾ, ཏིདསཱནཾ སཧབྱཏཾ གཏོ’’ཏི.

༡༩༨.

‘‘ཨཔྤཾ ¶ ཝཱ བཧུཾ ཝཱ ནཱདྡསཱམ, དཱནཾ དདནྟསྶ སཀེ ཨགཱརེ;

ཨུཔོསཐཀམྨཾ ཝཱ ཏཱདིསཾ, ཀེན ཀམྨེན གཏོསི དེཝལོཀ’’ནྟི.

༡༩༩.

‘‘ཨཱབཱདྷིཀོཧཾ དུཀྑིཏོ གིལཱནོ, ཨཱཏུརརཱུཔོམྷི སཀེ ནིཝེསནེ;

བུདྡྷཾ ཝིགཏརཛཾ ཝིཏིཎྞཀངྑཾ, ཨདྡཀྑིཾ སུགཏཾ ཨནོམཔཉྙཾ.

༢༠༠.

‘‘སྭཱཧཾ མུདིཏམནོ པསནྣཙིཏྟོ, ཨཉྫལིཾ ཨཀརིཾ ཏཐཱགཏསྶ;

ཏཱཧཾ ཀུསལཾ ཀརིཏྭཱན ཀམྨཾ, ཏིདསཱནཾ སཧབྱཏཾ གཏོ’’ཏི.

༢༠༡.

‘‘ཨཙྪརིཡཾ ཝཏ ཨབྦྷུཏཾ ཝཏ, ཨཉྫལིཀམྨསྶ ཨཡམཱིདིསོ ཝིཔཱཀོ;

ཨཧམྤི མུདིཏམནོ པསནྣཙིཏྟོ, ཨཛྫེཝ བུདྡྷཾ སརཎཾ ཝཛཱམཱི’’ཏི.

༢༠༢.

‘‘ཨཛྫེཝ བུདྡྷཾ སརཎཾ ཝཛཱཧི, དྷམྨཉྩ སངྒྷཉྩ པསནྣཙིཏྟོ;

ཏཐེཝ སིཀྑཱཡ པདཱནི པཉྩ, ཨཁཎྜཕུལླཱནི སམཱདིཡསྶུ.

༢༠༣.

‘‘པཱཎཱཏིཔཱཏཱ ཝིརམསྶུ ཁིཔྤཾ, ལོཀེ ཨདིནྣཾ པརིཝཛྫཡསྶུ;

ཨམཛྫཔོ མཱ ཙ མུསཱ བྷཎཱཧི, སཀེན དཱརེན ཙ ཧོཧི ཏུཊྛོ’’ཏི.

༢༠༤.

‘‘ཨཏྠཀཱམོསི མེ ཡཀྑ, ཧིཏཀཱམོསི དེཝཏེ;

ཀརོམི ཏུཡ྄ཧཾ ཝཙནཾ, ཏྭཾསི ཨཱཙརིཡོ མམཱཏི.

༢༠༥.

‘‘ཨུཔེམི སརཎཾ བུདྡྷཾ, དྷམྨཉྩཱཔི ཨནུཏྟརཾ;

སངྒྷཉྩ ནརདེཝསྶ, གཙྪཱམི སརཎཾ ཨཧཾ.

༢༠༦.

‘‘པཱཎཱཏིཔཱཏཱ ¶ ཝིརམཱམི ཁིཔྤཾ, ལོཀེ ཨདིནྣཾ པརིཝཛྫཡཱམི;

ཨམཛྫཔོ ནོ ཙ མུསཱ བྷཎཱམི; སཀེན དཱརེན ཙ ཧོམི ཏུཊྛོ’’ཏི.

མཊྛཀུཎྜལཱིཔེཏཝཏྠུ པཉྩམཾ.

༦. ཀཎྷཔེཏཝཏྠུ

༢༠༧.

‘‘ཨུཊྛེཧི ¶ ཀཎྷ ཀིཾ སེསི, ཀོ ཨཏྠོ སུཔནེན ཏེ;

ཡོ ཙ ཏུཡ྄ཧཾ སཀོ བྷཱཏཱ, ཧདཡཾ ཙཀྑུ ཙ [ཙཀྑུཾཝ (ཨཊྛ.)] དཀྑིཎཾ;

ཏསྶ ཝཱཏཱ བལཱིཡནྟི, སསཾ ཛཔྤཏི [གྷཊོ ཛཔྤཏི (ཀ.)] ཀེསཝཱ’’ཏི.

༢༠༨.

‘‘ཏསྶ ¶ ཏཾ ཝཙནཾ སུཏྭཱ, རོཧིཎེཡྻསྶ ཀེསཝོ;

ཏརམཱནརཱུཔོ ཝུཊྛཱསི, བྷཱཏུསོཀེན ཨཊྚིཏོ.

༢༠༩.

‘‘ཀིཾ ནུ ཨུམྨཏྟརཱུཔོཝ, ཀེཝལཾ དྭཱརཀཾ ཨིམཾ;

སསོ སསོཏི ལཔསི, ཀཱིདིསཾ སསམིཙྪསི.

༢༡༠.

‘‘སོཝཎྞམཡཾ མཎིམཡཾ, ལོཧམཡཾ ཨཐ རཱུཔིཡམཡཾ;

སངྑསིལཱཔཝཱལ༹མཡཾ, ཀཱརཡིསྶཱམི ཏེ སསཾ.

༢༡༡.

‘‘སནྟི ཨཉྙེཔི སསཀཱ, ཨརཉྙཝནགོཙརཱ;

ཏེཔི ཏེ ཨཱནཡིསྶཱམི, ཀཱིདིསཾ སསམིཙྪསཱི’’ཏི.

༢༡༢.

‘‘ནཱཧམེཏེ སསེ ཨིཙྪེ, ཡེ སསཱ པཐཝིསྶིཏཱ;

ཙནྡཏོ སསམིཙྪཱམི, ཏཾ མེ ཨོཧར ཀེསཝཱ’’ཏི.

༢༡༣.

‘‘སོ ནཱུན མདྷུརཾ ཉཱཏི, ཛཱིཝིཏཾ ཝིཛཧིསྶསི;

ཨཔཏྠིཡཾ པཏྠཡསི, ཙནྡཏོ སསམིཙྪསཱི’’ཏི.

༢༡༤.

‘‘ཨེཝཾ ཙེ ཀཎྷ ཛཱནཱསི, ཡཐཉྙམནུསཱསསི;

ཀསྨཱ ¶ པུརེ མཏཾ པུཏྟཾ, ཨཛྫཱཔི མནུསོཙསི.

༢༡༥.

‘‘ན ཡཾ ལབྦྷཱ མནུསྶེན, ཨམནུསྶེན ཝཱ པན;

ཛཱཏོ མེ མཱ མརི པུཏྟོ, ཀུཏོ ལབྦྷཱ ཨལབྦྷིཡཾ.

༢༡༦.

‘‘ན ¶ མནྟཱ མཱུལབྷེསཛྫཱ, ཨོསདྷེཧི དྷནེན ཝཱ;

སཀྐཱ ཨཱནཡིཏུཾ ཀཎྷ, ཡཾ པེཏམནུསོཙསི.

༢༡༧.

‘‘མཧདྡྷནཱ ¶ མཧཱབྷོགཱ, རཊྛཝནྟོཔི ཁཏྟིཡཱ;

པཧཱུཏདྷནདྷཉྙཱསེ, ཏེཔི ནོ [ནཏྠེཏྠཔཱཋབྷེདོ] ཨཛརཱམརཱ.

༢༡༨.

‘‘ཁཏྟིཡཱ བྲཱཧྨཎཱ ཝེསྶཱ, སུདྡཱ ཙཎྜཱལཔུཀྐུསཱ;

ཨེཏེ ཙཉྙེ ཙ ཛཱཏིཡཱ, ཏེཔི ནོ ཨཛརཱམརཱ.

༢༡༩.

‘‘ཡེ མནྟཾ པརིཝཏྟེནྟི, ཚལ༹ངྒཾ བྲཧྨཙིནྟིཏཾ;

ཨེཏེ ཙཉྙེ ཙ ཝིཛྫཱཡ, ཏེཔི ནོ ཨཛརཱམརཱ.

༢༢༠.

‘‘ཨིསཡོ ཝཱཔི [ཨིསཡོ ཙཱཔི (ཝིམཱནཝཏྠུ ༩༩)] ཡེ སནྟཱ, སཉྙཏཏྟཱ ཏཔསྶིནོ;

སརཱིརཾ ཏེཔི ཀཱལེན, ཝིཛཧནྟི ཏཔསྶིནོ.

༢༢༡.

‘‘བྷཱཝིཏཏྟཱ ཨརཧནྟོ, ཀཏཀིཙྩཱ ཨནཱསཝཱ;

ནིཀྑིཔནྟི ཨིམཾ དེཧཾ, པུཉྙཔཱཔཔརིཀྑཡཱ’’ཏི.

༢༢༢.

‘‘ཨཱདིཏྟཾ ཝཏ མཾ སནྟཾ, གྷཏསིཏྟཾཝ པཱཝཀཾ;

ཝཱརིནཱ ཝིཡ ཨོསིཉྩཾ, སབྦཾ ནིབྦཱཔཡེ དརཾ.

༢༢༣.

‘‘ཨབྦཧཱི ¶ ཝཏ མེ སལླཾ, སོཀཾ ཧདཡནིསྶིཏཾ;

ཡོ མེ སོཀཔརེཏསྶ, པུཏྟསོཀཾ ཨཔཱནུདི.

༢༢༤.

‘‘སྭཱཧཾ ¶ ཨབྦཱུལ༹ྷསལློསྨི, སཱིཏིབྷཱུཏོསྨི ནིབྦུཏོ;

ན སོཙཱམི ན རོདཱམི, ཏཝ སུཏྭཱན བྷཱཏིཀ’’ [བྷཱསིཏཾ (སྱཱ.)].

༢༢༥.

ཨེཝཾ ཀརོནྟི སཔྤཉྙཱ, ཡེ ཧོནྟི ཨནུཀམྤཀཱ;

ནིཝཏྟཡནྟི སོཀམྷཱ, གྷཊོ ཛེཊྛཾཝ བྷཱཏརཾ.

༢༢༦.

ཡསྶ ཨེཏཱདིསཱ ཧོནྟི, ཨམཙྩཱ པརིཙཱརཀཱ;

སུབྷཱསིཏེན ཨནྭེནྟི, གྷཊོ ཛེཊྛཾཝ བྷཱཏརནྟི.

ཀཎྷཔེཏཝཏྠུ ཚཊྛཾ.

༧. དྷནཔཱལསེཊྛིཔེཏཝཏྠུ

༢༢༧.

‘‘ནགྒོ ¶ ¶ དུབྦཎྞརཱུཔོསི, ཀིསོ དྷམནིསནྠཏོ;

ཨུཔྥཱསུལིཀོ ཀིསིཀོ, ཀོ ནུ ཏྭམསི མཱརིས’’.

༢༢༨.

‘‘ཨཧཾ བྷདནྟེ པེཏོམྷི, དུགྒཏོ ཡམལོཀིཀོ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏོ’’.

༢༢༩.

‘‘ཀིཾ ནུ ཀཱཡེན ཝཱཙཱཡ, མནསཱ དུཀྐཊཾ ཀཏཾ;

ཀིསྶ ཀམྨཝིཔཱཀེན, པེཏལོཀཾ ཨིཏོ གཏོ’’.

༢༣༠.

‘‘ནགརཾ ཨཏྠི པཎྞཱནཾ [དསནྣཱནཾ (སཱི. སྱཱ. པཱི.)], ཨེརཀཙྪནྟི ཝིསྶུཏཾ;

ཏཏྠ སེཊྛི པུརེ ཨཱསིཾ, དྷནཔཱལོཏི མཾ ཝིདཱུ.

༢༣༡.

‘‘ཨསཱིཏི སཀཊཝཱཧཱནཾ, ཧིརཉྙསྶ ཨཧོསི མེ;

པཧཱུཏཾ མེ ཛཱཏརཱུཔཾ, མུཏྟཱ ཝེལུ༹རིཡཱ བཧཱུ.

༢༣༢.

‘‘ཏཱཝ མཧདྡྷནསྶཱཔི, ན མེ དཱཏུཾ པིཡཾ ཨཧུ;

པིདཧིཏྭཱ ¶ དྭཱརཾ བྷུཉྫིཾ [བྷུཉྫཱམི (སཱི. སྱཱ.)], མཱ མཾ ཡཱཙནཀཱདྡསུཾ.

༢༣༣.

‘‘ཨསྶདྡྷོ མཙྪརཱི ཙཱསིཾ, ཀདརིཡོ པརིབྷཱསཀོ;

དདནྟཱནཾ ཀརོནྟཱནཾ, ཝཱརཡིསྶཾ བཧུ ཛནེ [བཧུཛྫནཾ (སཱི. སྱཱ.)].

༢༣༤.

‘‘ཝིཔཱཀོ ¶ ནཏྠི དཱནསྶ, སཾཡམསྶ ཀུཏོ ཕལཾ;

པོཀྑརཉྙོདཔཱནཱནི, ཨཱརཱམཱནི ཙ རོཔིཏེ;

པཔཱཡོ ཙ ཝིནཱསེསིཾ, དུགྒེ སངྐམནཱནི ཙ.

༢༣༥.

‘‘སྭཱཧཾ ¶ ཨཀཏཀལྱཱཎོ, ཀཏཔཱཔོ ཏཏོ ཙུཏོ;

ཨུཔཔནྣོ པེཏྟིཝིསཡཾ, ཁུཔྤིཔཱསསམཔྤིཏོ.

༢༣༦.

‘‘པཉྩཔཎྞཱསཝསྶཱནི, ཡཏོ ཀཱལངྐཏོ ཨཧཾ;

ནཱབྷིཛཱནཱམི བྷུཏྟཾ ཝཱ, པཱིཏཾ ཝཱ པན པཱནིཡཾ.

༢༣༧.

‘‘ཡོ སཾཡམོ སོ ཝིནཱསོ,ཡོ ཝིནཱསོ སོ སཾཡམོ;

པེཏཱ ཧི ཀིར ཛཱནནྟི, ཡོ སཾཡམོ སོ ཝིནཱསོ.

༢༣༨.

‘‘ཨཧཾ ¶ པུརེ སཾཡམིསྶཾ, ནཱདཱསིཾ བཧུཀེ དྷནེ;

སནྟེསུ དེཡྻདྷམྨེསུ, དཱིཔཾ ནཱཀཱསིམཏྟནོ;

སྭཱཧཾ པཙྪཱནུཏཔྤཱམི, ཨཏྟཀམྨཕལཱུཔགོ.

༢༣༩.

[པེ. ཝ. ༦༩] ‘‘ཨུདྡྷཾ ཙཏཱུཧི མཱསེཧི, ཀཱལཾཀིརིཡཱ བྷཝིསྶཏི;

ཨེཀནྟཀཊུཀཾ གྷོརཾ, ནིརཡཾ པཔཏིསྶཧཾ.

༢༤༠.

[པེ. ཝ. ༧༠] ‘‘ཙཏུཀྐཎྞཾ ཙཏུདྭཱརཾ, ཝིབྷཏྟཾ བྷཱགསོ མིཏཾ;

ཨཡོཔཱཀཱརཔརིཡནྟཾ, ཨཡསཱ པཊིཀུཛྫིཏཾ.

༢༤༡.

[པེ. ཝ. ༧༡] ‘‘ཏསྶ ¶ ཨཡོམཡཱ བྷཱུམི, ཛལིཏཱ ཏེཛསཱ ཡུཏཱ;

སམནྟཱ ཡོཛནསཏཾ, ཕརིཏྭཱ ཏིཊྛཏི སབྦདཱ.

༢༤༢.

[པེ. ཝ. ༧༢] ‘‘ཏཏྠཱཧཾ དཱིགྷམདྡྷཱནཾ, དུཀྑཾ ཝེདིསྶ ཝེདནཾ;

ཕལཾ པཱཔསྶ ཀམྨསྶ, ཏསྨཱ སོཙཱམཧཾ བྷུསཾ.

༢༤༣.

‘‘ཏཾ ཝོ ཝདཱམི བྷདྡཾ ཝོ, ཡཱཝནྟེཏྠ སམཱགཏཱ;

མཱཀཏྠ པཱཔཀཾ ཀམྨཾ, ཨཱཝི ཝཱ ཡདི ཝཱ རཧོ.

༢༤༤.

‘‘སཙེ ཏཾ པཱཔཀཾ ཀམྨཾ, ཀརིསྶཐ ཀརོཐ ཝཱ;

ན ཝོ དུཀྑཱ པམུཏྱཏྠི [པམུཏྟཏྠི (སབྦཏྠ) ཨུདཱ. ༤༤ པསྶིཏབྦཾ], ཨུཔྤཙྩཱཔི [ཨུཔེཙྩཱཔི (སྱཱ. ཀ.)] པལཱཡཏཾ.

༢༤༥.

‘‘མཏྟེཡྻཱ ཧོཐ པེཏྟེཡྻཱ, ཀུལེ ཛེཊྛཱཔཙཱཡིཀཱ;

སཱམཉྙཱ ཧོཐ བྲཧྨཉྙཱ, ཨེཝཾ སགྒཾ གམིསྶཐཱ’’ཏི.

དྷནཔཱལསེཊྛིཔེཏཝཏྠུ སཏྟམཾ.

༨. ཙཱུལ༹སེཊྛིཔེཏཝཏྠུ

༢༤༦.

‘‘ནགྒོ ¶ ཀིསོ པབྦཛིཏོསི བྷནྟེ, རཏྟིཾ ཀུཧིཾ གཙྪསི ཀིསྶ ཧེཏུ;

ཨཱཙིཀྑ མེ ཏཾ ཨཔི སཀྐུཎེམུ, སབྦེན ཝིཏྟཾ པཊིཔཱདཡེ ཏུཝ’’ནྟི.

༢༤༧.

‘‘བཱརཱཎསཱི ¶ ¶ ¶ ནགརཾ དཱུརགྷུཊྛཾ, ཏཏྠཱཧཾ གཧཔཏི ཨཌྜྷཀོ ཨཧུ དཱིནོ;

ཨདཱཏཱ གེདྷིཏམནོ ཨཱམིསསྨིཾ, དུསྶཱིལྱེན ཡམཝིསཡམྷི པཏྟོ.

༢༤༨.

‘‘སོ སཱུཙིཀཱཡ ཀིལམིཏོ ཏེཧི,

ཏེནེཝ ཉཱཏཱིསུ ཡཱམི ཨཱམིསཀིཉྩིཀྑཧེཏུ;

ཨདཱནསཱིལཱ ན ཙ སདྡཧནྟི,

དཱནཕལཾ ཧོཏི པརམྷི ལོཀེ.

༢༤༩.

‘‘དྷཱིཏཱ ¶ ཙ མཡ྄ཧཾ ལཔཏེ ཨབྷིཀྑཎཾ, ‘དསྶཱམི དཱནཾ པིཏཱུནཾ པིཏཱམཧཱནཾ’;

ཏམུཔཀྑཊཾ པརིཝིསཡནྟི བྲཱཧྨཎཱ [བྲཱཧྨཎེ (སཱི.)], ‘ཡཱམི ཨཧཾ ཨནྡྷཀཝིནྡཾ བྷོཏྟུ’’’ནྟི.

༢༥༠.

ཏམཝོཙ རཱཛཱ ‘‘ཨནུབྷཝིཡཱན ཏམྤི,

ཨེཡྻཱསི ཁིཔྤཾ ཨཧམཔི ཀསྶཾ པཱུཛཾ;

ཨཱཙིཀྑ མེ ཏཾ ཡདི ཨཏྠི ཧེཏུ,

སདྡྷཱཡིཏཾ ཧེཏུཝཙོ སུཎོམཱ’’ཏི.

༢༥༡.

‘ཏཐཱ’ཏི ཝཏྭཱ ཨགམཱསི ཏཏྠ, བྷུཉྫིཾསུ བྷཏྟཾ ན ཙ དཀྑིཎཱརཧཱ;

པཙྩཱགམི ¶ རཱཛགཧཾ པུནཱཔརཾ, པཱཏུརཧོསི པུརཏོ ཛནཱདྷིཔསྶ.

༢༥༢.

དིསྭཱན པེཏཾ པུནདེཝ ཨཱགཏཾ, རཱཛཱ ཨཝོཙ ‘‘ཨཧམཔི ཀིཾ དདཱམི;

ཨཱཙིཀྑ མེ ཏཾ ཡདི ཨཏྠི ཧེཏུ, ཡེན ཏུཝཾ ཙིརཏརཾ པཱིཎིཏོ སིཡཱ’’ཏི.

༢༥༣.

‘‘བུདྡྷཉྩ སངྒྷཾ པརིཝིསིཡཱན རཱཛ, ཨནྣེན པཱནེན ཙ ཙཱིཝརེན;

ཏཾ དཀྑིཎཾ ཨཱདིས མེ ཧིཏཱཡ, ཨེཝཾ ཨཧཾ ཙིརཏརཾ པཱིཎིཏོ སིཡཱ’’ཏི.

༢༥༤.

ཏཏོ ¶ ཙ རཱཛཱ ནིཔཏིཏྭཱ ཏཱཝདེ [ཏཱཝདེཝ (སྱཱ.), ཏདེཝ (ཀ.)], དཱནཾ སཧཏྠཱ ཨཏུལཾ དདིཏྭཱ [ཨཏུལཉྩ དཏྭཱ (སྱཱ. ཀ.)] སངྒྷེ;

ཨཱརོཙེསི པཀཏཾ [ཨཱརོཙཡཱི པཀཏིཾ (སཱི. སྱཱ.)] ཏཐཱགཏསྶ, ཏསྶ ཙ པེཏསྶ དཀྑིཎཾ ཨཱདིསིཏྠ.

༢༥༥.

སོ པཱུཛིཏོ ཨཏིཝིཡ སོབྷམཱནོ, པཱཏུརཧོསི པུརཏོ ཛནཱདྷིཔསྶ;

‘‘ཡཀྑོཧམསྨི པརམིདྡྷིཔཏྟོ, ན མཡ྄ཧམཏྠི སམཱ སདིསཱ [མཡ྄ཧམིདྡྷིསམསདིསཱ (སཱི. སྱཱ.)] མཱནུསཱ.

༢༥༦.

‘‘པསྶཱནུབྷཱཝཾ ཨཔརིམིཏཾ མམཡིདཾ, ཏཡཱནུདིཊྛཾ ¶ ཨཏུལཾ དཏྭཱ སངྒྷེ;

སནྟཔྤིཏོ སཏཏཾ སདཱ བཧཱུཧི, ཡཱམི ཨཧཾ སུཁིཏོ མནུསྶདེཝཱ’’ཏི.

ཙཱུལ༹སེཊྛིཔེཏཝཏྠུ ཨཊྛམཾ ནིཊྛིཏཾ.

བྷཱཎཝཱརཾ པཋམཾ ནིཊྛིཏཾ.

༩. ཨངྐུརཔེཏཝཏྠུ

༢༥༧.

‘‘ཡསྶ ¶ ¶ ཨཏྠཱཡ གཙྪཱམ, ཀམྦོཛཾ དྷནཧཱརཀཱ;

ཨཡཾ ཀཱམདདོ ཡཀྑོ, ཨིམཾ ཡཀྑཾ ནཡཱམསེ.

༢༥༨.

‘‘ཨིམཾ ཡཀྑཾ གཧེཏྭཱན, སཱདྷུཀེན པསཡ྄ཧ ཝཱ;

ཡཱནཾ ཨཱརོཔཡིཏྭཱན, ཁིཔྤཾ གཙྪཱམ དྭཱརཀ’’ནྟི.

༢༥༩.

[ཛཱ. ༡.༡༠.༡༥༡; ༡.༡༤.༡༩༦; ༢.༡༨.༡༥༣; ༢.༢༢.༡༠] ‘‘ཡསྶ རུཀྑསྶ ཚཱཡཱཡ, ནིསཱིདེཡྻ སཡེཡྻ ཝཱ;

ན ཏསྶ སཱཁཾ བྷཉྫེཡྻ, མིཏྟདུབྦྷོ ཧི པཱཔཀོ’’ཏི.

༢༦༠.

‘‘ཡསྶ རུཀྑསྶ ཚཱཡཱཡ, ནིསཱིདེཡྻ སཡེཡྻ ཝཱ;

ཁནྡྷམྤི ཏསྶ ཚིནྡེཡྻ, ཨཏྠོ ཙེ ཏཱདིསོ སིཡཱ’’ཏི.

༢༦༡.

‘‘ཡསྶ ¶ རུཀྑསྶ ཚཱཡཱཡ, ནིསཱིདེཡྻ སཡེཡྻ ཝཱ;

ན ཏསྶ པཏྟཾ བྷིནྡེཡྻ [ཧིཾསེཡྻ (ཀ.)], མིཏྟདུབྦྷོ ཧི པཱཔཀོ’’ཏི.

༢༦༢.

‘‘ཡསྶ རུཀྑསྶ ཚཱཡཱཡ, ནིསཱིདེཡྻ སཡེཡྻ ཝཱ;

སམཱུལམྤི ཏཾ ཨབྦུཧེ [ཨུབྦཧེ (?)], ཨཏྠོ ཙེ ཏཱདིསོ སིཡཱ’’ཏི.

༢༦༣.

‘‘ཡསྶེཀརཏྟིམྤི གྷརེ ཝསེཡྻ, ཡཏྠནྣཔཱནཾ པུརིསོ ལབྷེཐ;

ན ཏསྶ པཱཔཾ མནསཱཔི ཙིནྟཡེ, ཀཏཉྙུཏཱ ¶ སཔྤུརིསེཧི ཝཎྞིཏཱ.

༢༦༤.

‘‘ཡསྶེཀརཏྟིམྤི གྷརེ ཝསེཡྻ, ཨནྣེན པཱནེན ཨུཔཊྛིཏོ སིཡཱ;

ན ཏསྶ པཱཔཾ མནསཱཔི ཙིནྟཡེ, ཨདུབྦྷཔཱཎཱི དཧཏེ མིཏྟདུབྦྷིཾ.

༢༦༥.

‘‘ཡོ པུབྦེ ཀཏཀལྱཱཎོ, པཙྪཱ པཱཔེན ཧིཾསཏི;

ཨལླཔཱཎིཧཏོ [ཨདུབྦྷིཔཱཎཱིཧཏོ (ཀ)] པོསོ, ན སོ བྷདྲཱནི པསྶཏཱི’’ཏི.

༢༦༦.

‘‘ནཱཧཾ དེཝེན ཝཱ མནུསྶེན ཝཱ, ཨིསྶརིཡེན ཝཱཧཾ སུཔྤསཡ྄ཧོ;

ཡཀྑོཧམསྨི པརམིདྡྷིཔཏྟོ, དཱུརངྒམོ ཝཎྞབལཱུཔཔནྣོ’’ཏི.

༢༦༧.

‘‘པཱཎི ཏེ སབྦསོ ཝཎྞོ, པཉྩདྷཱརོ མདྷུསྶཝོ;

ནཱནཱརསཱ པགྒྷརནྟི, མཉྙེཧཾ ཏཾ པུརིནྡད’’ནྟི.

༢༦༨.

‘‘ནཱམྷི དེཝོ ན གནྡྷབྦོ, ནཱཔི སཀྐོ པུརིནྡདོ;

པེཏཾ མཾ ཨངྐུར ཛཱནཱཧི, རོརུཝམྷཱ [ཧེརུཝམྷཱ (སཱི.)] ཨིདྷཱགཏ’’ནྟི.

༢༦༩.

‘‘ཀིཾསཱིལོ ¶ ¶ ཀིཾསམཱཙཱརོ, རོརུཝསྨིཾ པུརེ ཏུཝཾ;

ཀེན ཏེ བྲཧྨཙརིཡེན, པུཉྙཾ པཱཎིམྷི ཨིཛ྄ཛྷཏཱི’’ཏི.

༢༧༠.

‘‘ཏུནྣཝཱཡོ པུརེ ཨཱསིཾ, རོརུཝསྨིཾ ཏདཱ ཨཧཾ;

སུཀིཙྪཝུཏྟི ཀཔཎོ, ན མེ ཝིཛྫཏི དཱཏཝེ.

༢༧༡.

‘‘ནིཝེསནཉྩ ¶ ¶ [ཨཱཝེསནཉྩ (སཱི.)] མེ ཨཱསི, ཨསཡ྄ཧསྶ ཨུཔནྟིཀེ;

སདྡྷསྶ དཱནཔཏིནོ, ཀཏཔུཉྙསྶ ལཛྫིནོ.

༢༧༢.

‘‘ཏཏྠ ཡཱཙནཀཱ ཡནྟི, ནཱནཱགོཏྟཱ ཝནིབྦཀཱ;

ཏེ ཙ མཾ ཏཏྠ པུཙྪནྟི, ཨསཡ྄ཧསྶ ནིཝེསནཾ.

༢༧༣.

‘‘ཀཏྠ གཙྪཱམ བྷདྡཾ ཝོ, ཀཏྠ དཱནཾ པདཱིཡཏི;

ཏེསཱཧཾ པུཊྛོ ཨཀྑཱམི, ཨསཡ྄ཧསྶ ནིཝེསནཾ.

༢༧༤.

‘‘པགྒཡ྄ཧ དཀྑིཎཾ བཱཧུཾ, ཨེཏྠ གཙྪཐ བྷདྡཾ ཝོ;

ཨེཏྠ དཱནཾ པདཱིཡཏི, ཨསཡ྄ཧསྶ ནིཝེསནེ.

༢༧༥.

‘‘ཏེན པཱཎི ཀཱམདདོ, ཏེན པཱཎི མདྷུསྶཝོ;

ཏེན མེ བྲཧྨཙརིཡེན, པུཉྙཾ པཱཎིམྷི ཨིཛ྄ཛྷཏཱི’’ཏི.

༢༧༦.

‘‘ན ཀིར ཏྭཾ ཨདཱ དཱནཾ, སཀཔཱཎཱིཧི ཀསྶཙི;

པརསྶ དཱནཾ ཨནུམོདམཱནོ, པཱཎིཾ པགྒཡ྄ཧ པཱཝདི.

༢༧༧.

‘‘ཏེན པཱཎི ཀཱམདདོ, ཏེན པཱཎི མདྷུསྶཝོ;

ཏེན ཏེ བྲཧྨཙརིཡེན, པུཉྙཾ པཱཎིམྷི ཨིཛ྄ཛྷཏི.

༢༧༨.

‘‘ཡོ ¶ སོ དཱནམདཱ བྷནྟེ, པསནྣོ སཀཔཱཎིབྷི;

སོ ཧིཏྭཱ མཱནུསཾ དེཧཾ, ཀིཾ ནུ སོ དིསཏཾ གཏོ’’ཏི.

༢༧༩.

‘‘ནཱཧཾ པཛཱནཱམི ཨསཡ྄ཧསཱཧིནོ, ཨངྒཱིརསསྶ གཏིཾ ཨཱགཏིཾ ཝཱ;

སུཏཉྩ མེ ཝེསྶཝཎསྶ སནྟིཀེ, སཀྐསྶ སཧབྱཏཾ གཏོ ཨསཡ྄ཧོ’’ཏི.

༢༨༠.

‘‘ཨལམེཝ ཀཱཏུཾ ཀལྱཱཎཾ, དཱནཾ དཱཏུཾ ཡཐཱརཧཾ;

པཱཎིཾ ཀཱམདདཾ དིསྭཱ, ཀོ པུཉྙཾ ན ཀརིསྶཏི.

༢༨༡.

‘‘སོ ཧི ནཱུན ཨིཏོ གནྟྭཱ, ཨནུཔྤཏྭཱན དྭཱརཀཾ;

དཱནཾ པཊྛཔཡིསྶཱམི, ཡཾ མམསྶ སུཁཱཝཧཾ.

༢༨༢.

‘‘དསྶཱམནྣཉྩ པཱནཉྩ, ཝཏྠསེནཱསནཱནི ཙ;

པཔཉྩ ཨུདཔཱནཉྩ, དུགྒེ སངྐམནཱནི ཙཱ’’ཏི.

༢༨༣.

‘‘ཀེན ¶ ཏེ ཨངྒུལཱི ཀུཎཱ [ཀུཎྛཱ (སཱི. སྱཱ.)], མུཁཉྩ ཀུཎལཱིཀཏཾ [ཀུཎྜལཱིཀཏཾ (སཱི. སྱཱ. ཀ.)];

ཨཀྑཱིནི ཙ པགྒྷརནྟི, ཀིཾ པཱཔཾ པཀཏཾ ཏཡཱ’’ཏི.

༢༨༤.

‘‘ཨངྒཱིརསསྶ ¶ གཧཔཏིནོ, སདྡྷསྶ གྷརམེསིནོ;

ཏསྶཱཧཾ དཱནཝིསྶགྒེ, དཱནེ ཨདྷིཀཏོ ཨཧུཾ.

༢༨༥.

‘‘ཏཏྠ ཡཱཙནཀེ དིསྭཱ, ཨཱགཏེ བྷོཛནཏྠིཀེ;

ཨེཀམནྟཾ ཨཔཀྐམྨ, ཨཀཱསིཾ ཀུཎལིཾ མུཁཾ.

༢༨༦.

‘‘ཏེན ¶ མེ ཨངྒུལཱི ཀུཎཱ, མུཁཉྩ ཀུཎལཱིཀཏཾ;

ཨཀྑཱིནི མེ པགྒྷརནྟི, ཏཾ པཱཔཾ པཀཏཾ མཡཱ’’ཏི.

༢༨༧.

‘‘དྷམྨེན ¶ ཏེ ཀཱཔུརིས, མུཁཉྩ ཀུཎལཱིཀཏཾ;

ཨཀྑཱིནི ཙ པགྒྷརནྟི, ཡཾ ཏཾ པརསྶ དཱནསྶ;

ཨཀཱསི ཀུཎལིཾ མུཁཾ.

༢༨༨.

‘‘ཀཐཾ ཧི དཱནཾ དདམཱནོ, ཀརེཡྻ པརཔཏྟིཡཾ;

ཨནྣཾ པཱནཾ ཁཱདནཱིཡཾ, ཝཏྠསེནཱསནཱནི ཙ.

༢༨༩.

‘‘སོ ཧི ནཱུན ཨིཏོ གནྟྭཱ, ཨནུཔྤཏྭཱན དྭཱརཀཾ;

དཱནཾ པཊྛཔཡིསྶཱམི, ཡཾ མམསྶ སུཁཱཝཧཾ.

༢༩༠.

‘‘དསྶཱམནྣཉྩ པཱནཉྩ, ཝཏྠསེནཱསནཱནི ཙ;

པཔཉྩ ཨུདཔཱནཉྩ, དུགྒེ སངྐམནཱནི ཙཱ’’ཏི.

༢༩༡.

ཏཏོ ཧི སོ ནིཝཏྟིཏྭཱ, ཨནུཔྤཏྭཱན དྭཱརཀཾ;

དཱནཾ པཊྛཔཡི ཨངྐུརོ, ཡཾཏུམསྶ [ཡཾ ཏཾ ཨསྶ (སྱཱ.), ཡནྟམསྶ (ཀ.)] སུཁཱཝཧཾ.

༢༩༢.

ཨདཱ ཨནྣཉྩ པཱནཉྩ, ཝཏྠསེནཱསནཱནི ཙ;

པཔཉྩ ཨུདཔཱནཉྩ, ཝིཔྤསནྣེན ཙེཏསཱ.

༢༩༣.

‘‘ཀོ ཚཱཏོ ཀོ ཙ ཏསིཏོ, ཀོ ཝཏྠཾ པརིདཧིསྶཏི;

ཀསྶ སནྟཱནི ཡོགྒཱནི, ཨིཏོ ཡོཛེནྟུ ཝཱཧནཾ.

༢༩༤.

‘‘ཀོ ཚཏྟིཙྪཏི གནྡྷཉྩ, ཀོ མཱལཾ ཀོ ཨུཔཱཧནཾ;

ཨིཏིསྶུ ཏཏྠ གྷོསེནྟི, ཀཔྤཀཱ སཱུདམཱགདྷཱ [པཱཊཝཱ (ཀ.)];

སདཱ སཱཡཉྩ པཱཏོ ཙ, ཨངྐུརསྶ ནིཝེསནེ.

༢༩༥.

‘‘‘སུཁཾ ¶ སུཔཏི ཨངྐུརོ’, ཨིཏི ཛཱནཱཏི མཾ ཛནོ;

དུཀྑཾ ¶ སུཔཱམི སིནྡྷཀ [སནྡུཀ, སིནྡྷུཀ (ཀ.)], ཡཾ ན པསྶཱམི ཡཱཙཀེ.

༢༩༦.

‘‘‘སུཁཾ སུཔཏི ཨངྐུརོ’, ཨིཏི ཛཱནཱཏི མཾ ཛནོ;

དུཀྑཾ སིནྡྷཀ སུཔཱམི, ཨཔྤཀེ སུ ཝནིབྦཀེ’’ཏི.

༢༩༧.

‘‘སཀྐོ ཙེ ཏེ ཝརཾ དཛྫཱ, ཏཱཝཏིཾསཱནམིསྶརོ;

ཀིསྶ སབྦསྶ ལོཀསྶ, ཝརམཱནོ ཝརཾ ཝརེ’’ཏི.

༢༩༨.

‘‘སཀྐོ ཙེ མེ ཝརཾ དཛྫཱ, ཏཱཝཏིཾསཱནམིསྶརོ;

ཀཱལུཊྛིཏསྶ མེ སཏོ, སུརིཡུགྒམནཾ པཏི;

དིབྦཱ བྷཀྑཱ པཱཏུབྷཝེཡྻུཾ, སཱིལཝནྟོ ཙ ཡཱཙཀཱ.

༢༩༩.

‘‘དདཏོ ¶ ¶ མེ ན ཁཱིཡེཐ, དཏྭཱ ནཱནུཏཔེཡྻཧཾ;

དདཾ ཙིཏྟཾ པསཱདེཡྻཾ, ཨེཏཾ སཀྐཾ ཝརཾ ཝརེ’’ཏི.

༣༠༠.

‘‘ན སབྦཝིཏྟཱནི པརེ པཝེཙྪེ, དདེཡྻ དཱནཉྩ དྷནཉྩ རཀྑེ;

ཏསྨཱ ཧི དཱནཱ དྷནམེཝ སེཡྻོ, ཨཏིཔྤདཱནེན ཀུལཱ ན ཧོནྟི.

༣༠༡.

‘‘ཨདཱནམཏིདཱནཉྩ, ནཔྤསཾསནྟི པཎྜིཏཱ;

ཏསྨཱ ཧི དཱནཱ དྷནམེཝ སེཡྻོ, སམེན ཝཏྟེཡྻ ས དྷཱིརདྷམྨོ’’ཏི.

༣༠༢.

‘‘ཨཧོ ཝཏ རེ ཨཧམེཝ དཛྫཾ, སནྟོ ཙ མཾ སཔྤུརིསཱ བྷཛེཡྻུཾ;

མེགྷོཝ ¶ ནིནྣཱནི པརིཔཱུརཡནྟོ [བྷིཔཱུརཡནྟོ (སཱི.), ཧི པཱུརཡནྟོ (སྱཱ.)], སནྟཔྤཡེ སབྦཝནིབྦཀཱནཾ.

༣༠༣.

‘‘ཡསྶ ཡཱཙནཀེ དིསྭཱ, མུཁཝཎྞོ པསཱིདཏི;

དཏྭཱ ཨཏྟམནོ ཧོཏི, ཏཾ གྷརཾ ཝསཏོ སུཁཾ.

༣༠༤.

‘‘ཡསྶ ཡཱཙནཀེ དིསྭཱ, མུཁཝཎྞོ པསཱིདཏི;

དཏྭཱ ཨཏྟམནོ ཧོཏི, ཨེསཱ ཡཉྙསྶ [པུཉྙསྶ (སཱི.)] སམྤདཱ.

༣༠༥.

[ཨ. ནི. ༦.༣༧] ‘‘པུབྦེཝ ¶ དཱནཱ སུམནོ, དདཾ ཙིཏྟཾ པསཱདཡེ;

དཏྭཱ ཨཏྟམནོ ཧོཏི, ཨེསཱ ཡཉྙསྶ [པུཉྙསྶ (སཱི.)] སམྤདཱ’’ཏི.

༣༠༦.

སཊྛི ཝཱཧསཧསྶཱནི, ཨངྐུརསྶ ནིཝེསནེ;

བྷོཛནཾ དཱིཡཏེ ནིཙྩཾ, པུཉྙཔེཀྑསྶ ཛནྟུནོ.

༣༠༧.

ཏིསཧསྶཱནི སཱུདཱནི ཧི [སཱུདཱནི (སྱཱ. ཀ.)], ཨཱམུཏྟམཎིཀུཎྜལཱ;

ཨངྐུརཾ ཨུཔཛཱིཝནྟི, དཱནེ ཡཉྙསྶ ཝཱཝཊཱ [བྱཱཝཊཱ (སཱི.), པཱཝཊཱ (སྱཱ.)].

༣༠༨.

སཊྛི པུརིསསཧསྶཱནི, ཨཱམུཏྟམཎིཀུཎྜལཱ;

ཨངྐུརསྶ མཧཱདཱནེ, ཀཊྛཾ ཕཱལེནྟི མཱཎཝཱ.

༣༠༩.

སོལ༹སིཏྠིསཧསྶཱནི, སབྦཱལངྐཱརབྷཱུསིཏཱ;

ཨངྐུརསྶ མཧཱདཱནེ, ཝིདྷཱ པིཎྜེནྟི ནཱརིཡོ.

༣༡༠.

སོལ༹སིཏྠིསཧསྶཱནི, སབྦཱལངྐཱརབྷཱུསིཏཱ;

ཨངྐུརསྶ མཧཱདཱནེ, དབྦིགཱཧཱ ཨུཔཊྛིཏཱ.

༣༡༡.

བཧུཾ ¶ བཧཱུནཾ པཱདཱསི, ཙིརཾ པཱདཱསི ཁཏྟིཡོ;

སཀྐཙྩཉྩ སཧཏྠཱ ཙ, ཙིཏྟཱིཀཏྭཱ པུནཔྤུནཾ.

༣༡༢.

བཧཱུ མཱསེ ཙ པཀྑེ ཙ, ཨུཏུསཾཝཙྪརཱནི ཙ;

མཧཱདཱནཾ པཝཏྟེསི, ཨངྐུརོ དཱིགྷམནྟརཾ.

༣༡༣.

ཨེཝཾ ¶ ¶ དཏྭཱ ཡཛིཏྭཱ ཙ, ཨངྐུརོ དཱིགྷམནྟརཾ;

སོ ཧིཏྭཱ མཱནུསཾ དེཧཾ, ཏཱཝཏིཾསཱུཔགོ ཨཧུ.

༣༡༤.

ཀཊཙྪུབྷིཀྑཾ དཏྭཱན, ཨནུརུདྡྷསྶ ཨིནྡཀོ;

སོ ཧིཏྭཱ མཱནུསཾ དེཧཾ, ཏཱཝཏིཾསཱུཔགོ ཨཧུ.

༣༡༥.

དསཧི ཋཱནེཧི ཨངྐུརཾ, ཨིནྡཀོ ཨཏིརོཙཏི;

རཱུཔེ སདྡེ རསེ གནྡྷེ, ཕོཊྛབྦེ ཙ མནོརམེ.

༣༡༦.

ཨཱཡུནཱ ཡསསཱ ཙེཝ, ཝཎྞེན ཙ སུཁེན ཙ;

ཨཱདྷིཔཙྩེན ཨངྐུརཾ, ཨིནྡཀོ ཨཏིརོཙཏི.

༣༡༧.

ཏཱཝཏིཾསེ ཡདཱ བུདྡྷོ, སིལཱཡཾ པཎྜུཀམྦལེ;

པཱརིཙྪཏྟཀམཱུལམྷི, ཝིཧཱསི པུརིསུཏྟམོ.

༣༡༨.

དསསུ ¶ ལོཀདྷཱཏཱུསུ, སནྣིཔཏིཏྭཱན དེཝཏཱ;

པཡིརུཔཱསནྟི སམྦུདྡྷཾ, ཝསནྟཾ ནགམུདྡྷནི.

༣༡༩.

ན ཀོཙི དེཝོ ཝཎྞེན, སམྦུདྡྷཾ ཨཏིརོཙཏི;

སབྦེ དེཝེ ཨཏིཀྐམྨ [ཨདྷིགཡ྄ཧ (སཱི.), ཨཏིགྒཡ྄ཧ (ཀ)], སམྦུདྡྷོཝ ཝིརོཙཏི.

༣༢༠.

ཡོཛནཱནི ¶ དས དྭེ ཙ, ཨངྐུརོཡཾ ཏདཱ ཨཧུ;

ཨཝིདཱུརེཝ བུདྡྷསྶ [ཨཝིདཱུརེ སམྦུདྡྷསྶ (ཀ.)], ཨིནྡཀོ ཨཏིརོཙཏི.

༣༢༡.

ཨོལོཀེཏྭཱན སམྦུདྡྷོ, ཨངྐུརཉྩཱཔི ཨིནྡཀཾ;

དཀྑིཎེཡྻཾ སམྦྷཱཝེནྟོ [པབྷཱཝེནྟོ (སཱི.)], ཨིདཾ ཝཙནམབྲཝི.

༣༢༢.

‘‘མཧཱདཱནཾ ཏཡཱ དིནྣཾ, ཨངྐུར དཱིགྷམནྟརཾ;

ཨཏིདཱུརེ [སུཝིདཱུརེ (ཀ.)] ནིསིནྣོསི, ཨཱགཙྪ མམ སནྟིཀེ’’ཏི.

༣༢༣.

ཙོདིཏོ བྷཱཝིཏཏྟེན, ཨངྐུརོ ཨིདམབྲཝི;

‘‘ཀིཾ མཡ྄ཧཾ ཏེན དཱནེན, དཀྑིཎེཡྻེན སུཉྙཏཾ.

༣༢༤.

‘‘ཨཡཾ སོ ཨིནྡཀོ ཡཀྑོ, དཛྫཱ དཱནཾ པརིཏྟཀཾ;

ཨཏིརོཙཏི ཨམྷེཧི, ཙནྡོ ཏཱརགཎེ ཡཐཱ’’ཏི.

༣༢༥.

‘‘ཨུཛྫངྒལེ ཡཐཱ ཁེཏྟེ, བཱིཛཾ བཧུམྤི རོཔིཏཾ;

ན ཝིཔུལཕལཾ ཧོཏི, ནཔི ཏོསེཏི ཀསྶཀཾ.

༣༢༦.

‘‘ཏཐེཝ དཱནཾ བཧུཀཾ, དུསྶཱིལེསུ པཏིཊྛིཏཾ;

ན ཝིཔུལཕལཾ ཧོཏི, ནཔི ཏོསེཏི དཱཡཀཾ.

༣༢༧.

‘‘ཡཐཱཔི ¶ བྷདྡཀེ ཁེཏྟེ, བཱིཛཾ ཨཔྤམྤི རོཔིཏཾ;

སམྨཱ དྷཱརཾ པཝེཙྪནྟེ, ཕལཾ ཏོསེཏི ཀསྶཀཾ.

༣༢༨.

‘‘ཏཐེཝ སཱིལཝནྟེསུ, གུཎཝནྟེསུ ཏཱདིསུ;

ཨཔྤཀམྤི ཀཏཾ ཀཱརཾ, པུཉྙཾ ཧོཏི མཧཔྥལ’’ནྟི.

༣༢༩.

ཝིཙེཡྻ ¶ ¶ དཱནཾ དཱཏབྦཾ, ཡཏྠ དིནྣཾ མཧཔྥལཾ;

ཝིཙེཡྻ དཱནཾ དཏྭཱན, སགྒཾ གཙྪནྟི དཱཡཀཱ.

༣༣༠.

ཝིཙེཡྻ ¶ དཱནཾ སུགཏཔྤསཏྠཾ, ཡེ དཀྑིཎེཡྻཱ ཨིདྷ ཛཱིཝལོཀེ;

ཨེཏེསུ དིནྣཱནི མཧཔྥལཱནི, བཱིཛཱནི ཝུཏྟཱནི ཡཐཱ སུཁེཏྟེཏི.

ཨངྐུརཔེཏཝཏྠུ ནཝམཾ.

༡༠. ཨུཏྟརམཱཏུཔེཏིཝཏྠུ

༣༣༡.

དིཝཱཝིཧཱརགཏཾ ¶ བྷིཀྑུཾ, གངྒཱཏཱིརེ ནིསིནྣཀཾ;

ཏཾ པེཏཱི ཨུཔསངྐམྨ, དུབྦཎྞཱ བྷཱིརུདསྶནཱ.

༣༣༢.

ཀེསཱ ཙསྶཱ ཨཏིདཱིགྷཱ [ཨཧཱུ དཱིགྷཱ (ཀ.)], ཡཱཝབྷཱུམཱཝལམྦརེ [ཡཱཝ བྷཱུམྱཱ’ཝལམྦརེ (?)];

ཀེསེཧི སཱ པཊིཙྪནྣཱ, སམཎཾ ཨེཏདབྲཝི.

༣༣༣.

‘‘པཉྩཔཎྞཱསཝསྶཱནི, ཡཏོ ཀཱལངྐཏཱ ཨཧཾ;

ནཱབྷིཛཱནཱམི བྷུཏྟཾ ཝཱ, པཱིཏཾ ཝཱ པན པཱནིཡཾ;

དེཧི ཏྭཾ པཱནིཡཾ བྷནྟེ, ཏསིཏཱ པཱནིཡཱཡ མེ’’ཏི.

༣༣༤.

‘‘ཨཡཾ སཱིཏོདིཀཱ གངྒཱ, ཧིམཝནྟཏོ [ཧིམཝནྟཱཝ (ཀ.)] སནྡཏི;

པིཝ ཨེཏྟོ གཧེཏྭཱན, ཀིཾ མཾ ཡཱཙསི པཱནིཡ’’ནྟི.

༣༣༥.

‘‘སཙཱཧཾ བྷནྟེ གངྒཱཡ, སཡཾ གཎྷཱམི པཱནིཡཾ;

ལོཧིཏཾ མེ པརིཝཏྟཏི, ཏསྨཱ ཡཱཙཱམི པཱནིཡ’’ནྟི.

༣༣༦.

‘‘ཀིཾ ནུ ཀཱཡེན ཝཱཙཱཡ, མནསཱ དུཀྐཊཾ ཀཏཾ;

ཀིསྶ ཀམྨཝིཔཱཀེན, གངྒཱ ཏེ ཧོཏི ལོཧིཏ’’ནྟི.

༣༣༧.

‘‘པུཏྟོ མེ ཨུཏྟརོ ནཱམ [པུཏྟོ མེ བྷནྟེ ཨུཏྟརོ (ཀ.)], སདྡྷོ ཨཱསི ཨུཔཱསཀོ;

སོ ¶ ཙ མཡ྄ཧཾ ཨཀཱམཱཡ, སམཎཱནཾ པཝེཙྪཏི.

༣༣༨.

‘‘ཙཱིཝརཾ ¶ པིཎྜཔཱཏཉྩ, པཙྩཡཾ སཡནཱསནཾ;

ཏམཧཾ པརིབྷཱསཱམི, མཙྪེརེན ཨུཔདྡུཏཱ.

༣༣༩.

‘‘ཡཾ ཏྭཾ མཡ྄ཧཾ ཨཀཱམཱཡ, སམཎཱནཾ པཝེཙྪསི;

ཙཱིཝརཾ པིཎྜཔཱཏཉྩ, པཙྩཡཾ སཡནཱསནཾ.

༣༤༠.

‘‘ཨེཏཾ ¶ ཏེ པརལོཀསྨིཾ, ལོཧིཏཾ ཧོཏུ ཨུཏྟར;

ཏསྶ ཀམྨསྶ ཝིཔཱཀེན, གངྒཱ མེ ཧོཏི ལོཧིཏ’’ནྟི.

ཨུཏྟརམཱཏུཔེཏིཝཏྠུ དསམཾ.

༡༡. སུཏྟཔེཏཝཏྠུ

༣༤༡.

‘‘ཨཧཾ ¶ པུརེ པབྦཛིཏསྶ བྷིཀྑུནོ, སུཏྟཾ ཨདཱསིཾ ཨུཔསངྐམྨ ཡཱཙིཏཱ;

ཏསྶ ཝིཔཱཀོ ཝིཔུལཕལཱུཔལབྦྷཏི, བཧུཀཱ ཙ མེ ཨུཔྤཛྫརེ [བཧཱུ ཙ མེ ཨུཔཔཛྫརེ (སཱི.)] ཝཏྠཀོཊིཡོ.

༣༤༢.

‘‘པུཔྥཱབྷིཀིཎྞཾ རམིཏཾ [རམྨམིདཾ (ཀ.)] ཝིམཱནཾ, ཨནེཀཙིཏྟཾ ནརནཱརིསེཝིཏཾ;

སཱཧཾ བྷུཉྫཱམི ཙ པཱརུཔཱམི ཙ, པཧཱུཏཝིཏྟཱ ན ཙ ཏཱཝ ཁཱིཡཏི.

༣༤༣.

‘‘ཏསྶེཝ ཀམྨསྶ ཝིཔཱཀམནྭཡཱ, སུཁཉྩ སཱཏཉྩ ཨིདྷཱུཔལབྦྷཏི;

སཱཧཾ གནྟྭཱ པུནདེཝ མཱནུསཾ, ཀཱཧཱམི ¶ པུཉྙཱནི ནཡཡྻཔུཏྟ མ’’ནྟི.

༣༤༤.

‘‘སཏྟ ཏུཝཾ ཝསྶསཏཱ ཨིདྷཱགཏཱ,

ཛིཎྞཱ ཙ ཝུཌྜྷཱ ཙ ཏཧིཾ བྷཝིསྶསི;

སབྦེཝ ཏེ ཀཱལཀཏཱ ཙ ཉཱཏཀཱ,

ཀིཾ ཏཏྠ གནྟྭཱན ཨིཏོ ཀརིསྶསཱི’’ཏི.

༣༤༥.

‘‘སཏྟེཝ ཝསྶཱནི ཨིདྷཱགཏཱཡ མེ, དིབྦཉྩ སུཁཉྩ སམཔྤིཏཱཡ;

སཱཧཾ གནྟྭཱན པུནདེཝ མཱནུསཾ, ཀཱཧཱམི པུཉྙཱནི ནཡཡྻཔུཏྟ མ’’ནྟི.

༣༤༦.

སོ ¶ ཏཾ གཧེཏྭཱན པསཡ྄ཧ བཱཧཱཡཾ, པཙྩཱནཡིཏྭཱན ཐེརིཾ སུདུབྦལཾ;

‘‘ཝཛྫེསི ཨཉྙམྤི ཛནཾ ཨིདྷཱགཏཾ, ‘ཀརོཐ པུཉྙཱནི སུཁཱུཔལབྦྷཏི’’.

༣༤༧.

‘‘དིཊྛཱ ¶ མཡཱ ཨཀཏེན སཱདྷུནཱ, པེཏཱ ཝིཧཉྙནྟི ཏཐེཝ མནུསྶཱ;

ཀམྨཉྩ ཀཏྭཱ སུཁཝེདནཱིཡཾ, དེཝཱ མནུསྶཱ ཙ སུཁེ ཋིཏཱ པཛཱ’’ཏི.

སུཏྟཔེཏཝཏྠུ ཨེཀཱདསམཾ.

༡༢. ཀཎྞམུཎྜཔེཏིཝཏྠུ

༣༤༨.

‘‘སོཎྞསོཔཱནཕལཀཱ ¶ ¶ , སོཎྞཝཱལུཀསནྠཏཱ;

ཏཏྠ སོགནྡྷིཡཱ ཝགྒཱུ, སུཙིགནྡྷཱ མནོརམཱ.

༣༤༩.

‘‘ནཱནཱརུཀྑེཧི སཉྪནྣཱ, ནཱནཱགནྡྷསམེརིཏཱ;

ནཱནཱཔདུམསཉྪནྣཱ, པུཎྜརཱིཀསམོཏཏཱ [སམོཧཏཱ (ཀ.)].

༣༥༠.

‘‘སུརབྷིཾ སམྤཝཱཡནྟི, མནུཉྙཱ མཱལུཏེརིཏཱ;

ཧཾསཀོཉྩཱབྷིརུདཱ ཙ, ཙཀྐཝཀྐཱབྷིཀཱུཛིཏཱ.

༣༥༡.

‘‘ནཱནཱདིཛགཎཱཀིཎྞཱ ¶ , ནཱནཱསརགཎཱཡུཏཱ;

ནཱནཱཕལདྷརཱ རུཀྑཱ, ནཱནཱཔུཔྥདྷརཱ ཝནཱ.

༣༥༢.

‘‘ན མནུསྶེསུ ཨཱིདིསཾ, ནགརཾ ཡཱདིསཾ ཨིདཾ;

པཱསཱདཱ བཧུཀཱ ཏུཡ྄ཧཾ, སོཝཎྞརཱུཔིཡཱམཡཱ;

དདྡལླམཱནཱ ཨཱབྷེནྟི [ཨཱབྷནྟི (ཀ.)], སམནྟཱ ཙཏུརོ དིསཱ.

༣༥༣.

‘‘པཉྩ དཱསིསཏཱ ཏུཡ྄ཧཾ, ཡཱ ཏེམཱ པརིཙཱརིཀཱ;

ཏཱ [ཀཱ (ཀ.)] ཀམྦུཀཱཡཱུརདྷརཱ [ཀམྦུཀེཡཱུརདྷརཱ (སཱི.)], ཀཉྩནཱཝེལ༹བྷཱུསིཏཱ.

༣༥༤.

‘‘པལླངྐཱ བཧུཀཱ ཏུཡ྄ཧཾ, སོཝཎྞརཱུཔིཡཱམཡཱ;

ཀདལིམིགསཉྪནྣཱ [ཀཱདལིམིགསཉྪནྣཱ (སཱི.)], སཛྫཱ གོནཀསནྠཏཱ.

༣༥༥.

‘‘ཡཏྠ ཏྭཾ ཝཱསཱུཔགཏཱ, སབྦཀཱམསམིདྡྷིནཱི;

སམྤཏྟཱཡཌྜྷརཏྟཱཡ [… རཏྟིཡཱ (ཀ.)], ཏཏོ ཨུཊྛཱཡ གཙྪསི.

༣༥༦.

‘‘ཨུཡྻཱནབྷཱུམིཾ ¶ གནྟྭཱན, པོཀྑརཉྙཱ སམནྟཏོ;

ཏསྶཱ ¶ ཏཱིརེ ཏུཝཾ ཋཱསི, ཧརིཏེ སདྡལེ སུབྷེ.

༣༥༧.

‘‘ཏཏོ ཏེ ཀཎྞམུཎྜོ སུནཁོ, ཨངྒམངྒཱནི ཁཱདཏི;

ཡདཱ ཙ ཁཱཡིཏཱ ཨཱསི, ཨཊྛིསངྑལིཀཱ ཀཏཱ;

ཨོགཱཧསི པོཀྑརཎིཾ, ཧོཏི ཀཱཡོ ཡཐཱ པུརེ.

༣༥༨.

‘‘ཏཏོ ཏྭཾ ཨངྒཔཙྩངྒཱི [ཨངྒཔཙྩངྒཱ (ཀ.)], སུཙཱརུ པིཡདསྶནཱ;

ཝཏྠེན པཱརུཔིཏྭཱན, ཨཱཡཱསི མམ སནྟིཀཾ.

༣༥༩.

‘‘ཀིཾ ནུ ཀཱཡེན ཝཱཙཱཡ, མནསཱ དུཀྐཊཾ ཀཏཾ;

ཀིསྶ ཀམྨཝིཔཱཀེན, ཀཎྞམུཎྜོ སུནཁོ ཏཝཨངྒམངྒཱནི ཁཱདཏཱི’’ཏི.

༣༦༠.

‘‘ཀིམིལཱཡཾ [ཀིམྦིལཱཡཾ (སཱི. སྱཱ.)] གཧཔཏི, སདྡྷོ ཨཱསི ཨུཔཱསཀོ;

ཏསྶཱཧཾ བྷརིཡཱ ཨཱསིཾ, དུསྶཱིལཱ ཨཏིཙཱརིནཱི.

༣༦༡.

‘‘སོ ¶ མཾ ཨཏིཙརམཱནཱཡ [ཨེཝམཱཏིཙརམཱནཱཡ (སྱཱ. པཱི.)], སཱམིཀོ ཨེཏདབྲཝི;

‘ནེཏཾ ཚནྣཾ [ནེཏཾ ཚནྣཾ ན (སཱི.), ནེཏཾ ཚནྣཾ ནེཏཾ (ཀ.)] པཏིརཱུཔཾ, ཡཾ ཏྭཾ ཨཏིཙརཱསི མཾ’.

༣༦༢.

‘‘སཱཧཾ གྷོརཉྩ སཔཐཾ, མུསཱཝཱདཉྩ བྷཱསིསཾ;

‘ནཱཧཾ ཏཾ ཨཏིཙརཱམི, ཀཱཡེན ཨུད ཙེཏསཱ.

༣༦༣.

‘‘‘སཙཱཧཾ ཏཾ ཨཏིཙརཱམི, ཀཱཡེན ཨུད ཙེཏསཱ;

ཀཎྞམུཎྜོ ཡཾ སུནཁོ, ཨངྒམངྒཱནི ཁཱདཏུ’.

༣༦༤.

‘‘ཏསྶ ཀམྨསྶ ཝིཔཱཀཾ, མུསཱཝཱདསྶ ཙཱུབྷཡཾ;

སཏྟེཝ ཝསྶསཏཱནི, ཨནུབྷཱུཏཾ ཡཏོ ཧི མེ;

ཀཎྞམུཎྜོ ¶ ཙ སུནཁོ, ཨངྒམངྒཱནི ཁཱདཏི.

༣༦༥.

‘‘ཏྭཉྩ དེཝ བཧུཀཱརོ, ཨཏྠཱཡ མེ ཨིདྷཱགཏོ;

སུམུཏྟཱཧཾ ཀཎྞམུཎྜསྶ, ཨསོཀཱ ཨཀུཏོབྷཡཱ.

༣༦༦.

‘‘ཏཱཧཾ ¶ དེཝ ནམསྶཱམི, ཡཱཙཱམི པཉྫལཱིཀཏཱ;

བྷུཉྫ ཨམཱནུསེ ཀཱམེ, རམ དེཝ མཡཱ སཧཱ’’ཏི.

༣༦༧.

‘‘བྷུཏྟཱ ¶ ཨམཱནུསཱ ཀཱམཱ, རམིཏོམྷི ཏཡཱ སཧ;

ཏཱཧཾ སུབྷགེ ཡཱཙཱམི, ཁིཔྤཾ པཊིནཡཱཧི མ’’ནྟི.

ཀཎྞམུཎྜཔེཏིཝཏྠུ དྭཱདསམཾ.

༡༣. ཨུབྦརིཔེཏཝཏྠུ

༣༦༨.

ཨཧུ ¶ རཱཛཱ བྲཧྨདཏྟོ, པཉྩཱལཱནཾ རཐེསབྷོ;

ཨཧོརཏྟཱནམཙྩཡཱ, རཱཛཱ ཀཱལམཀྲུབྦཐ [རཱཛཱ ཀཱལངྐརཱི ཏདཱ (སཱི.)].

༣༦༩.

ཏསྶ ཨཱལཱ༹ཧནཾ གནྟྭཱ, བྷརིཡཱ ཀནྡཏི ཨུབྦརཱི [ཨུཔྤརི (ཀ.)];

བྲཧྨདཏྟཾ ཨཔསྶནྟཱི, བྲཧྨདཏྟཱཏི ཀནྡཏི.

༣༧༠.

ཨིསི ཙ ཏཏྠ ཨཱགཙྪི, སམྤནྣཙརཎོ མུནི;

སོ ཙ ཏཏྠ ཨཔུཙྪིཏྠ, ཡེ ཏཏྠ སུསམཱགཏཱ.

༣༧༡.

‘‘ཀསྶ ཨིདཾ ཨཱལཱ༹ཧནཾ, ནཱནཱགནྡྷསམེརིཏཾ;

ཀསྶཱཡཾ ཀནྡཏི བྷརིཡཱ, ཨིཏོ དཱུརགཏཾ པཏིཾ;

བྲཧྨདཏྟཾ ཨཔསྶནྟཱི, ‘བྲཧྨདཏྟཱ’ཏི ཀནྡཏི’’.

༣༧༢.

ཏེ ¶ ཙ ཏཏྠ ཝིཡཱཀཾསུ, ཡེ ཏཏྠ སུསམཱགཏཱ;

‘‘བྲཧྨདཏྟསྶ བྷདནྟེ [བྷདྡནྟེ (ཀ.)], བྲཧྨདཏྟསྶ མཱརིས.

༣༧༣.

‘‘ཏསྶ ¶ ཨིདཾ ཨཱལཱ༹ཧནཾ, ནཱནཱགནྡྷསམེརིཏཾ;

ཏསྶཱཡཾ ཀནྡཏི བྷརིཡཱ, ཨིཏོ དཱུརགཏཾ པཏིཾ;

བྲཧྨདཏྟཾ ཨཔསྶནྟཱི, ‘བྲཧྨདཏྟཱ’ཏི ཀནྡཏི’’.

༣༧༤.

‘‘ཚལཱ༹སཱིཏིསཧསྶཱནི, བྲཧྨདཏྟསྶནཱམཀཱ;

ཨིམསྨིཾ ཨཱལཱ༹ཧནེ དཌྜྷཱ, ཏེསཾ ཀམནུསོཙསཱི’’ཏི.

༣༧༥.

‘‘ཡོ རཱཛཱ ཙཱུལ༹ནཱིཔུཏྟོ, པཉྩཱལཱནཾ རཐེསབྷོ;

ཏཾ བྷནྟེ ཨནུསོཙཱམི, བྷཏྟཱརཾ སབྦཀཱམད’’ནྟི.

༣༧༦.

‘‘སབྦེ ཝཱཧེསུཾ རཱཛཱནོ, བྲཧྨདཏྟསྶནཱམཀཱ;

སབྦེཝཙཱུལ༹ནཱིཔུཏྟཱ, པཉྩཱལཱནཾ རཐེསབྷཱ.

༣༧༧.

‘‘སབྦེསཾ ¶ ཨནུཔུབྦེན, མཧེསིཏྟམཀཱརཡི;

ཀསྨཱ པུརིམཀེ ཧིཏྭཱ, པཙྪིམཾ ཨནུསོཙསཱི’’ཏི.

༣༧༨.

‘‘ཨཱཏུམེ ¶ ཨིཏྠིབྷཱུཏཱཡ, དཱིགྷརཏྟཱཡ མཱརིས;

ཡསྶཱ མེ ཨིཏྠིབྷཱུཏཱཡ, སཾསཱརེ བཧུབྷཱསསཱི’’ཏི.

༣༧༩.

‘‘ཨཧུ ཨིཏྠཱི ཨཧུ པུརིསོ, པསུཡོནིམྤི ཨཱགམཱ;

ཨེཝམེཏཾ ཨཏཱིཏཱནཾ, པརིཡནྟོ ན དིསྶཏཱི’’ཏི.

༣༨༠.

‘‘ཨཱདིཏྟཾ ཝཏ མཾ སནྟཾ, གྷཏསིཏྟཾཝ པཱཝཀཾ;

ཝཱརིནཱ ཝིཡ ཨོསིཉྩཾ, སབྦཾ ནིབྦཱཔཡེ དརཾ.

༣༨༡.

‘‘ཨབྦཧཱི ཝཏ མེ སལླཾ, སོཀཾ ཧདཡནིསྶིཏཾ;

ཡོ མེ སོཀཔརེཏཱཡ, པཏིསོཀཾ ཨཔཱནུདི.

༣༨༢.

‘‘སཱཧཾ ¶ ཨབྦཱུལ༹ྷསལླཱསྨི, སཱིཏིབྷཱུཏཱསྨི ནིབྦུཏཱ;

ན སོཙཱམི ན རོདཱམི, ཏཝ སུཏྭཱ མཧཱམུནཱི’’ཏི.

༣༨༣.

ཏསྶ ཏཾ ཝཙནཾ སུཏྭཱ, སམཎསྶ སུབྷཱསིཏཾ;

པཏྟཙཱིཝརམཱདཱཡ, པབྦཛི ཨནགཱརིཡཾ.

༣༨༤.

སཱ ཙ པབྦཛིཏཱ སནྟཱ, ཨགཱརསྨཱ ཨནགཱརིཡཾ;

མེཏྟཱཙིཏྟཾ ཨབྷཱཝེསི, བྲཧྨལོཀཱུཔཔཏྟིཡཱ.

༣༨༥.

གཱམཱ གཱམཾ ཝིཙརནྟཱི, ནིགམེ རཱཛདྷཱནིཡོ;

ཨུརུཝེལཱ ནཱམ སོ གཱམོ, ཡཏྠ ཀཱལམཀྲུབྦཐ.

༣༨༦.

མེཏྟཱཙིཏྟཾ ¶ ཨཱབྷཱཝེཏྭཱ, བྲཧྨལོཀཱུཔཔཏྟིཡཱ;

ཨིཏྠིཙིཏྟཾ ཝིརཱཛེཏྭཱ, བྲཧྨལོཀཱུཔགཱ ཨཧཱུཏི.

ཨུབྦརིཔེཏཝཏྠུ ཏེརསམཾ.

ཨུབྦརིཝགྒོ དུཏིཡོ ནིཊྛིཏོ.

ཏསྶུདྡཱནཾ –

མོཙཀཾ [པཎྜུ (སབྦཏྠ)] མཱཏཱ མཏྟཱ [པིཏཱ (སཱི. ཀ.), པཏིཡཱ (སྱཱ.)] ཙ, ནནྡཱ ཀུཎྜལཱིནཱ གྷཊོ;

དྭེ སེཊྛཱི ཏུནྣཝཱཡོ ཙ, ཨུཏྟར [ཝིཧཱར (སབྦཏྠ)] སུཏྟཀཎྞ [སོཔཱན (སབྦཏྠ)] ཨུབྦརཱིཏི.

༣. ཙཱུལ༹ཝགྒོ

༡. ཨབྷིཛྫམཱནཔེཏཝཏྠུ

༣༨༧.

‘‘ཨབྷིཛྫམཱནེ ¶ ¶ ¶ ཝཱརིམྷི, གངྒཱཡ ཨིདྷ གཙྪསི;

ནགྒོ པུབྦདྡྷཔེཏོཝ མཱལདྷཱརཱི ཨལངྐཏོ;

ཀུཧིཾ གམིསྶསི པེཏ, ཀཏྠ ཝཱསོ བྷཝིསྶཏཱི’’ཏི.

༣༨༨.

‘‘ཙུནྡཊྛིལཾ ¶ [ཙུནྡཊྛིཀཾ (སཱི.)] གམིསྶཱམི, པེཏོ སོ ཨིཏི བྷཱསཏི;

ཨནྟརེ ཝཱསབྷགཱམཾ, བཱརཱཎསིཾ ཙ [བཱརཱཎསིཡཱ ཙ (སཱི. སྱཱ.)] སནྟིཀེ’’.

༣༨༩.

ཏཉྩ དིསྭཱ མཧཱམཏྟོ, ཀོལིཡོ ཨིཏི ཝིསྶུཏོ;

སཏྟུཾ བྷཏྟཉྩ པེཏསྶ, པཱིཏཀཉྩ ཡུགཾ ཨདཱ.

༣༩༠.

ནཱཝཱཡ ཏིཊྛམཱནཱཡ, ཀཔྤཀསྶ ཨདཱཔཡི;

ཀཔྤཀསྶ པདིནྣམྷི, ཋཱནེ པེཏསྶ དིསྶཐ [པེཏསྶུ’དིསྶཐ (སཱི.), པེཏསྶུ’དིཙྪཐ (?)].

༣༩༡.

ཏཏོ སུཝཏྠཝསནོ, མཱལདྷཱརཱི ཨལངྐཏོ;

ཋཱནེ ཋིཏསྶ པེཏསྶ, དཀྑིཎཱ ཨུཔཀཔྤཐ;

ཏསྨཱ དཛྫེཐ པེཏཱནཾ, ཨནུཀམྤཱཡ པུནཔྤུནཾ.

༣༩༢.

སཱཏུནྣཝསནཱ [སཱཧུནྣཝཱསིནོ (སྱཱ. པཱི.), སཱཧུནྡཝཱསིནོ (ཀ.)] ཨེཀེ, ཨཉྙེ ཀེསནིཝཱསནཱ [ཀེསནིཝཱསིནོ (སྱཱ. ཀ.)];

པེཏཱ བྷཏྟཱཡ གཙྪནྟི, པཀྐམནྟི དིསོདིསཾ.

༣༩༣.

དཱུརེ ཨེཀེ [དཱུརེ པེཏཱ (ཀ.)] པདྷཱཝིཏྭཱ, ཨལདྡྷཱཝ ནིཝཏྟརེ;

ཚཱཏཱ པམུཙྪིཏཱ བྷནྟཱ, བྷཱུམིཡཾ པཊིསུམྦྷིཏཱ.

༣༩༤.

ཏེ ཙ [ཀེཙི (སཱི. སྱཱ.)] ཏཏྠ པཔཏིཏཱ [པཔཏིཏྭཱ (སཱི.), ཙ པཏིཏཱ (སྱཱ.)], བྷཱུམིཡཾ པཊིསུམྦྷིཏཱ;

པུབྦེ ཨཀཏཀལྱཱཎཱ, ཨགྒིདཌྜྷཱཝ ཨཱཏཔེ.

༣༩༥.

‘‘མཡཾ པུབྦེ པཱཔདྷམྨཱ, གྷརཎཱི ཀུལམཱཏརོ;

སནྟེསུ དེཡྻདྷམྨེསུ, དཱིཔཾ ནཱཀམྷ ཨཏྟནོ.

༣༩༦.

‘‘པཧཱུཏཾ ¶ ¶ ཨནྣཔཱནམྤི, ཨཔིསྶུ ཨཝཀིརཱིཡཏི;

སམྨགྒཏེ པབྦཛིཏེ, ན ཙ ཀིཉྩི ཨདམྷསེ.

༣༩༧.

‘‘ཨཀམྨཀཱམཱ ¶ ཨལསཱ, སཱདུཀཱམཱ མཧགྒྷསཱ;

ཨཱལོཔཔིཎྜདཱཏཱརོ, པཊིགྒཧེ པརིབྷཱསིམྷསེ [པརིབྷཱསིཏཱ (སྱཱ. ཀ.)].

༣༩༨.

‘‘ཏེ ¶ གྷརཱ ཏཱ ཙ དཱསིཡོ, ཏཱནེཝཱབྷརཎཱནི ནོ;

ཏེ ཨཉྙེ པརིཙཱརེནྟི, མཡཾ དུཀྑསྶ བྷཱགིནོ.

༣༩༩.

‘‘ཝེཎཱི ཝཱ ཨཝཉྙཱ ཧོནྟི, རཐཀཱརཱི ཙ དུབྦྷིཀཱ;

ཙཎྜཱལཱི ཀཔཎཱ ཧོནྟི, ཀཔྤཀཱ [ནྷཱཔིཀཱ (སཱི.)] ཙ པུནཔྤུནཾ.

༤༠༠.

‘‘ཡཱནི ཡཱནི ནིཧཱིནཱནི, ཀུལཱནི ཀཔཎཱནི ཙ;

ཏེསུ ཏེསྭེཝ ཛཱཡནྟི, ཨེསཱ མཙྪརིནོ གཏི.

༤༠༡.

‘‘པུབྦེ ཙ ཀཏཀལྱཱཎཱ, དཱཡཀཱ ཝཱིཏམཙྪརཱ;

སགྒཾ ཏེ པརིཔཱུརེནྟི, ཨོབྷཱསེནྟི ཙ ནནྡནཾ.

༤༠༢.

‘‘ཝེཛཡནྟེ ཙ པཱསཱདེ, རམིཏྭཱ ཀཱམཀཱམིནོ;

ཨུཙྩཱཀུལེསུ ཛཱཡནྟི, སབྷོགེསུ ཏཏོ ཙུཏཱ.

༤༠༣.

‘‘ཀཱུཊཱགཱརེ ཙ པཱསཱདེ, པལླངྐེ གོནཀཏྠཏེ;

བཱིཛིཏངྒཱ [ཝཱིཛིཏངྒཱ (སཱི. སྱཱ.)] མོརཧཏྠེཧི, ཀུལེ ཛཱཏཱ ཡསསྶིནོ.

༤༠༤.

‘‘ཨངྐཏོ ཨངྐཾ གཙྪནྟི, མཱལདྷཱརཱི ཨལངྐཏཱ;

དྷཱཏིཡོ ཨུཔཏིཊྛནྟི, སཱཡཾ པཱཏཾ སུཁེསིནོ.

༤༠༥.

‘‘ནཡིདཾ ¶ ཨཀཏཔུཉྙཱནཾ, ཀཏཔུཉྙཱནམེཝིདཾ;

ཨསོཀཾ ནནྡནཾ རམྨཾ, ཏིདསཱནཾ མཧཱཝནཾ.

༤༠༦.

‘‘སུཁཾ ཨཀཏཔུཉྙཱནཾ, ཨིདྷ ནཏྠི པརཏྠ ཙ;

སུཁཉྩ ཀཏཔུཉྙཱནཾ, ཨིདྷ ཙེཝ པརཏྠ ཙ.

༤༠༧.

‘‘ཏེསཾ སཧབྱཀཱམཱནཾ, ཀཏྟབྦཾ ཀུསལཾ བཧུཾ;

ཀཏཔུཉྙཱ ཧི མོདནྟི, སགྒེ བྷོགསམངྒིནོ’’ཏི.

ཨབྷིཛྫམཱནཔེཏཝཏྠུ པཋམཾ.

༢. སཱཎཝཱསཱིཐེརཔེཏཝཏྠུ

༤༠༨.

ཀུཎྜིནཱགརིཡོ ¶ ཐེརོ, སཱཎཝཱསི [སཱནུཝཱསི (སཱི.), སཱནཝཱསི (སྱཱ.)] ནིཝཱསིཀོ;

པོཊྛཔཱདོཏི ནཱམེན, སམཎོ བྷཱཝིཏིནྡྲིཡོ.

༤༠༩.

ཏསྶ ¶ མཱཏཱ པིཏཱ བྷཱཏཱ, དུགྒཏཱ ཡམལོཀིཀཱ;

པཱཔཀམྨཾ ¶ ཀརིཏྭཱན, པེཏལོཀཾ ཨིཏོ གཏཱ.

༤༡༠.

ཏེ ¶ དུགྒཏཱ སཱུཙིཀཊྚཱ, ཀིལནྟཱ ནགྒིནོ ཀིསཱ;

ཨུཏྟསནྟཱ [ཨོཏྟཔྤནྟཱ (སྱཱ. ཀ.)] མཧཏྟཱསཱ [མཧཱཏཱསཱ (སཱི.)], ན དསྶེནྟི ཀུརཱུརིནོ [ཀུརུདྡིནོ (ཀ.)].

༤༡༡.

ཏསྶ བྷཱཏཱ ཝིཏརིཏྭཱ, ནགྒོ ཨེཀཔཐེཀཀོ;

ཙཏུཀུཎྜིཀོ བྷཝིཏྭཱན, ཐེརསྶ དསྶཡཱིཏུམཾ.

༤༡༢.

ཐེརོ ཙཱམནསིཀཏྭཱ, ཏུཎྷཱིབྷཱུཏོ ཨཏིཀྐམི;

སོ ཙ ཝིཉྙཱཔཡཱི ཐེརཾ, ‘བྷཱཏཱ པེཏགཏོ ཨཧཾ’.

༤༡༣.

‘‘མཱཏཱ ¶ པིཏཱ ཙ ཏེ བྷནྟེ, དུགྒཏཱ ཡམལོཀིཀཱ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏཱ.

༤༡༤.

‘‘ཏེ དུགྒཏཱ སཱུཙིཀཊྚཱ, ཀིལནྟཱ ནགྒིནོ ཀིསཱ;

ཨུཏྟསནྟཱ མཧཏྟཱསཱ, ན དསྶེནྟི ཀུརཱུརིནོ.

༤༡༥.

‘‘ཨནུཀམྤསྶུ ཀཱརུཎིཀོ, དཏྭཱ ཨནྭཱདིསཱཧི ནོ;

ཏཝ དིནྣེན དཱནེན, ཡཱཔེསྶནྟི ཀུརཱུརིནོ’’ཏི.

༤༡༦.

ཐེརོ ཙརིཏྭཱ པིཎྜཱཡ, བྷིཀྑཱུ ཨཉྙེ ཙ དྭཱདས;

ཨེཀཛ྄ཛྷཾ སནྣིཔཏིཾསུ, བྷཏྟཝིསྶགྒཀཱརཎཱ.

༤༡༧.

ཐེརོ སབྦེཝ ཏེ ཨཱཧ, ‘‘ཡཐཱལདྡྷཾ དདཱཐ མེ;

སངྒྷབྷཏྟཾ ཀརིསྶཱམི, ཨནུཀམྤཱཡ ཉཱཏིནཾ’’.

༤༡༨.

ནིཡྻཱདཡིཾསུ ཐེརསྶ, ཐེརོ སངྒྷཾ ནིམནྟཡི;

དཏྭཱ ཨནྭཱདིསི ཐེརོ, མཱཏུ པིཏུ ཙ བྷཱཏུནོ;

‘‘ཨིདཾ མེ ཉཱཏཱིནཾ ཧོཏུ, སུཁིཏཱ ཧོནྟུ ཉཱཏཡོ’’.

༤༡༩.

སམནནྟརཱནུདྡིཊྛེ, བྷོཛནཾ ཨུདཔཛྫཐ;

སུཙིཾ པཎཱིཏཾ སམྤནྣཾ, ཨནེཀརསབྱཉྫནཾ.

༤༢༠.

ཏཏོ ཨུདྡསྶཡཱི [ཨུདྡིསཡཱི (སཱི. ཀ.), ཨུདྡིསྶཏི (སྱཱ. ཀ.)] བྷཱཏཱ, ཝཎྞཝཱ བལཝཱ སུཁཱི;

‘‘པཧཱུཏཾ བྷོཛནཾ བྷནྟེ, པསྶ ནགྒཱམྷསེ མཡཾ;

ཏཐཱ བྷནྟེ པརཀྐམ, ཡཐཱ ཝཏྠཾ ལབྷཱམསེ’’ཏི.

༤༢༡.

ཐེརོ ¶ སངྐཱརཀཱུཊམྷཱ, ཨུཙྩིནིཏྭཱན ནནྟཀེ;

པིལོཏིཀཾ ¶ པཊཾ ཀཏྭཱ, སངྒྷེ ཙཱཏུདྡིསེ ཨདཱ.

༤༢༢.

དཏྭཱ ཨནྭཱདིསཱི ཐེརོ, མཱཏུ པིཏུ ཙ བྷཱཏུནོ;

‘‘ཨིདཾ མེ ཉཱཏཱིནཾ ཧོཏུ, སུཁིཏཱ ཧོནྟུ ཉཱཏཡོ’’.

༤༢༣.

སམནནྟརཱནུདྡིཊྛེ, ཝཏྠཱནི ཨུདཔཛྫིསུཾ;

ཏཏོ སུཝཏྠཝསནོ, ཐེརསྶ དསྶཡཱིཏུམཾ.

༤༢༤.

‘‘ཡཱཝཏཱ ¶ ནནྡརཱཛསྶ, ཝིཛིཏསྨིཾ པཊིཙྪདཱ;

ཏཏོ བཧུཏརཱ བྷནྟེ, ཝཏྠཱནཙྪཱདནཱནི ནོ.

༤༢༥.

‘‘ཀོསེཡྻཀམྦལཱིཡཱནི, ཁོམ ཀཔྤཱསིཀཱནི ཙ;

ཝིཔུལཱ ཙ མཧགྒྷཱ ཙ, ཏེཔཱཀཱསེཝལམྦརེ.

༤༢༦.

‘‘ཏེ མཡཾ པརིདཧཱམ, ཡཾ ཡཾ ཧི མནསོ པིཡཾ;

ཏཐཱ བྷནྟེ པརཀྐམ, ཡཐཱ གེཧཾ ལབྷཱམསེ’’ཏི.

༤༢༧.

ཐེརོ པཎྞཀུཊིཾ ཀཏྭཱ, སངྒྷེ ཙཱཏུདྡིསེ ཨདཱ;

དཏྭཱ ཨནྭཱདིསཱི ཐེརོ, མཱཏུ པིཏུ ཙ བྷཱཏུནོ;

‘‘ཨིདཾ མེ ཉཱཏཱིནཾ ཧོཏུ, སུཁིཏཱ ཧོནྟུ ཉཱཏཡོ’’.

༤༢༨.

སམནནྟརཱནུདྡིཊྛེ ¶ , གྷརཱནི ཨུདཔཛྫིསུཾ;

ཀཱུཊཱགཱརནིཝེསནཱ, ཝིབྷཏྟཱ བྷཱགསོ མིཏཱ.

༤༢༩.

‘‘ན མནུསྶེསུ ཨཱིདིསཱ, ཡཱདིསཱ ནོ གྷརཱ ཨིདྷ;

ཨཔི དིབྦེསུ ཡཱདིསཱ, ཏཱདིསཱ ནོ གྷརཱ ཨིདྷ.

༤༣༠.

‘‘དདྡལླམཱནཱ ¶ ཨཱབྷེནྟི [ཨཱབྷནྟི (ཀ.)], སམནྟཱ ཙཏུརོ དིསཱ;

‘ཏཐཱ བྷནྟེ པརཀྐམ, ཡཐཱ པཱནཱིཡཾ ལབྷཱམསེ’’ཏི.

༤༣༡.

ཐེརོ ཀརཎཾ [ཀརཀཾ (སཱི. སྱཱ. པཱི.)] པཱུརེཏྭཱ, སངྒྷེ ཙཱཏུདྡིསེ ཨདཱ;

དཏྭཱ ཨནྭཱདིསཱི ཐེརོ, མཱཏུ པིཏུ ཙ བྷཱཏུནོ;

‘‘ཨིདཾ མེ ཉཱཏཱིནཾ ཧོཏུ, སུཁིཏཱ ཧོནྟུ ཉཱཏཡོ’.

༤༣༢.

སམནནྟརཱནུདྡིཊྛེ, པཱནཱིཡཾ ཨུདཔཛྫཐ;

གམྦྷཱིརཱ ཙཏུརསྶཱ ཙ, པོཀྑརཉྙོ སུནིམྨིཏཱ.

༤༣༣.

སཱིཏོདིཀཱ ¶ སུཔྤཏིཏྠཱ, སཱིཏཱ ཨཔྤཊིགནྡྷིཡཱ;

པདུམུཔྤལསཉྪནྣཱ, ཝཱརིཀིཉྫཀྑཔཱུརིཏཱ.

༤༣༤.

ཏཏྠ ནྷཏྭཱ པིཝིཏྭཱ ཙ, ཐེརསྶ པཊིདསྶཡུཾ;

‘‘པཧཱུཏཾ པཱནཱིཡཾ བྷནྟེ, པཱདཱ དུཀྑཱ ཕལནྟི ནོ’’.

༤༣༥.

‘‘ཨཱཧིཎྜམཱནཱ ཁཉྫཱམ, སཀྑརེ ཀུསཀཎྚཀེ;

‘ཏཐཱ བྷནྟེ པརཀྐམ, ཡཐཱ ཡཱནཾ ལབྷཱམསེ’’’ཏི.

༤༣༦.

ཐེརོ སིཔཱཊིཀཾ ལདྡྷཱ, སངྒྷེ ཙཱཏུདྡིསེ ཨདཱ;

དཏྭཱ ཨནྭཱདིསཱི ཐེརོ, མཱཏུ པིཏུ ཙ བྷཱཏུནོ;

‘‘ཨིདཾ མེ ཉཱཏཱིནཾ ཧོཏུ, སུཁིཏཱ ཧོནྟུ ཉཱཏཡོ’’.

༤༣༧.

སམནནྟརཱནུདྡིཊྛེ ¶ , པེཏཱ རཐེན མཱགམུཾ;

‘‘ཨནུཀམྤིཏམྷ བྷདནྟེ, བྷཏྟེནཙྪཱདནེན ཙ.

༤༣༨.

‘‘གྷརེན པཱནཱིཡདཱནེན, ཡཱནདཱནེན ཙཱུབྷཡཾ;

མུནིཾ ཀཱརུཎིཀཾ ལོཀེ, བྷནྟེ ཝནྡིཏུམཱགཏཱ’’ཏི.

སཱཎཝཱསཱིཐེརཔེཏཝཏྠུ དུཏིཡཾ.

༣. རཐཀཱརཔེཏིཝཏྠུ

༤༣༩.

‘‘ཝེལུ༹རིཡཐམྦྷཾ ¶ ¶ རུཙིརཾ པབྷསྶརཾ, ཝིམཱནམཱརུཡ྄ཧ ཨནེཀཙིཏྟཾ;

ཏཏྠཙྪསི དེཝི མཧཱནུབྷཱཝེ, པཐདྡྷནི [སམནྟཏོ (ཀ.)] པནྣརསེཝ ཙནྡོ.

༤༤༠.

‘‘ཝཎྞོ ཙ ཏེ ཀནཀསྶ སནྣིབྷོ, ཨུཏྟཏྟརཱུཔོ བྷུས དསྶནེཡྻོ;

པལླངྐསེཊྛེ ཨཏུལེ ནིསིནྣཱ, ཨེཀཱ ཏུཝཾ ནཏྠི ཙ ཏུཡ྄ཧ སཱམིཀོ.

༤༤༡.

‘‘ཨིམཱ ཙ ཏེ པོཀྑརཎཱི སམནྟཱ, པཧཱུཏམལྱཱ [པཧཱུཏམཱལཱ (སཱི. སྱཱ.)] བཧུཔུཎྜརཱིཀཱ;

སུཝཎྞཙུཎྞེཧི སམནྟམོཏྠཏཱ, ན ཏཏྠ པངྐོ པཎཀོ ཙ ཝིཛྫཏི.

༤༤༢.

‘‘ཧཾསཱ ¶ ཙིམེ དསྶནཱིཡཱ མནོརམཱ, ཨུདཀསྨིམནུཔརིཡནྟི སབྦདཱ;

སམཡྻ ཝགྒཱུཔནདནྟི སབྦེ, བིནྡུསྶརཱ དུནྡུབྷཱིནཾཝ གྷོསོ.

༤༤༣.

‘‘དདྡལླམཱནཱ ཡསསཱ ཡསསྶིནཱི, ནཱཝཱཡ ཙ ཏྭཾ ཨཝལམྦ ཏིཊྛསི;

ཨཱལཱ༹རཔམྷེ ¶ ཧསིཏེ པིཡཾཝདེ, སབྦངྒཀལྱཱཎི བྷུསཾ ཝིརོཙསི.

༤༤༤.

‘‘ཨིདཾ ¶ ཝིམཱནཾ ཝིརཛཾ སམེ ཋིཏཾ, ཨུཡྻཱནཝནྟཾ [ཨུཡྻཱནཝནཾ (ཀ.)] རཏིནནྡིཝཌྜྷནཾ;

ཨིཙྪཱམཧཾ ནཱརི ཨནོམདསྶནེ, ཏཡཱ སཧ ནནྡནེ ཨིདྷ མོདིཏུ’’ནྟི.

༤༤༥.

‘‘ཀརོཧི ཀམྨཾ ཨིདྷ ཝེདནཱིཡཾ, ཙིཏྟཉྩ ཏེ ཨིདྷ ནིཧིཏཾ བྷཝཏུ [ནཏཉྩ ཧོཏུ (ཀ.), ནིཏཉྩ ཧོཏུ (སྱཱ.)];

ཀཏྭཱན ཀམྨཾ ཨིདྷ ཝེདནཱིཡཾ, ཨེཝཾ མམཾ ལཙྪསི ཀཱམཀཱམིནི’’ནྟི.

༤༤༦.

‘‘སཱདྷཱུ’’ཏི སོ ཏསྶཱ པཊིསྶུཎིཏྭཱ, ཨཀཱསི ཀམྨཾ ཏཧིཾ ཝེདནཱིཡཾ;

ཀཏྭཱན ཀམྨཾ ཏཧིཾ ཝེདནཱིཡཾ, ཨུཔཔཛྫི སོ མཱཎཝོ ཏསྶཱ སཧབྱཏནྟི.

རཐཀཱརཔེཏིཝཏྠུ ཏཏིཡཾ.

བྷཱཎཝཱརཾ དུཏིཡཾ ནིཊྛིཏཾ.

༤. བྷུསཔེཏཝཏྠུ

༤༤༧.

‘‘བྷུསཱནི ¶ ¶ ཨེཀོ སཱལིཾ པུནཱཔརོ, ཨཡཉྩ ནཱརཱི སཀམཾསལོཧིཏཾ;

ཏུཝཉྩ ¶ གཱུཐཾ ཨསུཙིཾ ཨཀནྟཾ [ཨཀནྟིཀཾ (སཱི. པཱི.)], པརིབྷུཉྫསི ཀིསྶ ཨཡཾ ཝིཔཱཀོ’’ཏི.

༤༤༨.

‘‘ཨཡཾ ¶ པུརེ མཱཏརཾ ཧིཾསཏི, ཨཡཾ པན ཀཱུཊཝཱཎིཛོ;

ཨཡཾ མཾསཱནི ཁཱདིཏྭཱ, མུསཱཝཱདེན ཝཉྩེཏི.

༤༤༩.

‘‘ཨཧཾ མནུསྶེསུ མནུསྶབྷཱུཏཱ, ཨགཱརིནཱི སབྦཀུལསྶ ཨིསྶརཱ;

སནྟེསུ པརིགུཧཱམི, མཱ ཙ ཀིཉྩི ཨིཏོ ཨདཾ.

༤༥༠.

‘‘མུསཱཝཱདེན ཚཱདེམི, ‘ནཏྠི ཨེཏཾ མམ གེཧེ;

སཙེ སནྟཾ ནིགུཧཱམི, གཱུཐོ མེ ཧོཏུ བྷོཛནཾ’.

༤༥༡.

‘‘ཏསྶ ཀམྨསྶ ཝིཔཱཀེན, མུསཱཝཱདསྶ ཙཱུབྷཡཾ;

སུགནྡྷཾ སཱལིནོ བྷཏྟཾ, གཱུཐཾ མེ པརིཝཏྟཏི.

༤༥༢.

‘‘ཨཝཉྫྷཱནི ཙ ཀམྨཱནི, ན ཧི ཀམྨཾ ཝིནསྶཏི;

དུགྒནྡྷཾ ཀིམིནཾ [ཀིམིཛཾ (སཱི.)] མཱིལ༹ཾ, བྷུཉྫཱམི ཙ པིཝཱམི ཙཱ’’ཏི.

བྷུསཔེཏཝཏྠུ ཙཏུཏྠཾ.

༥. ཀུམཱརཔེཏཝཏྠུ

༤༥༣.

ཨཙྪེརརཱུཔཾ སུགཏསྶ ཉཱཎཾ, སཏྠཱ ཡཐཱ པུགྒལཾ བྱཱཀཱསི;

ཨུསྶནྣཔུཉྙཱཔི བྷཝནྟི ཧེཀེ, པརིཏྟཔུཉྙཱཔི བྷཝནྟི ཧེཀེ.

༤༥༤.

ཨཡཾ ¶ ཀུམཱརོ སཱིཝཐིཀཱཡ ཚཌྜིཏོ, ཨངྒུཊྛསྣེཧེན ¶ ཡཱཔེཏི རཏྟིཾ;

ན ཡཀྑབྷཱུཏཱ ན སརཱིསཔཱ [སིརིཾསཔཱ (སཱི. སྱཱ. པཱི.)] ཝཱ, ཝིཧེཋཡེཡྻུཾ ཀཏཔུཉྙཾ ཀུམཱརཾ.

༤༥༥.

སུནཁཱཔིམསྶ པལིཧིཾསུ པཱདེ, དྷངྐཱ སིངྒཱལཱ [སིགཱལཱ (སཱི. སྱཱ. པཱི.)] པརིཝཏྟཡནྟི;

གབྦྷཱསཡཾ པཀྑིགཎཱ ཧརནྟི, ཀཱཀཱ པན ཨཀྑིམལཾ ཧརནྟི.

༤༥༦.

ནཡིམསྶ ¶ [ན ཨིམསྶ (སྱཱ.), ནིམསྶ (ཀ.)] རཀྑཾ ཝིདཧིཾསུ ཀེཙི, ན ཨོསདྷཾ སཱསཔདྷཱུཔནཾ ཝཱ;

ནཀྑཏྟཡོགམྤི ན ཨགྒཧེསུཾ [ན ཨུགྒཧེསུཾ (ཀ.)], ན སབྦདྷཉྙཱནིཔི ཨཱཀིརིཾསུ.

༤༥༧.

ཨེཏཱདིསཾ ཨུཏྟམཀིཙྪཔཏྟཾ, རཏྟཱབྷཏཾ སཱིཝཐིཀཱཡ ཚཌྜིཏཾ;

ནོནཱིཏཔིཎྜཾཝ པཝེདྷམཱནཾ, སསཾསཡཾ ཛཱིཝིཏསཱཝསེསཾ.

༤༥༨.

ཏམདྡསཱ ¶ དེཝམནུསྶཔཱུཛིཏོ, དིསྭཱ ཙ ཏཾ བྱཱཀརི བྷཱུརིཔཉྙོ;

‘‘ཨཡཾ ཀུམཱརོ ནགརསྶིམསྶ, ཨགྒཀུལིཀོ བྷཝིསྶཏི བྷོགཏོ ཙ’’ [བྷོགཝཱ ཙ (སྱཱ. ཀ.)].

༤༥༩.

‘‘ཀིསྶ ¶ [ཀིཾ’ས (?)] ཝཏཾ ཀིཾ པན བྲཧྨཙརིཡཾ, ཀིསྶ སུཙིཎྞསྶ ཨཡཾ ཝིཔཱཀོ;

ཨེཏཱདིསཾ བྱསནཾ པཱཔུཎིཏྭཱ, ཏཾ ཏཱདིསཾ པཙྩནུབྷོསྶཏིདྡྷི’’ནྟི.

༤༦༠.

བུདྡྷཔམུཁསྶ བྷིཀྑུསངྒྷསྶ, པཱུཛཾ ཨཀཱསི ཛནཏཱ ཨུལཱ༹རཾ;

ཏཏྲསྶ ཙིཏྟསྶཧུ ཨཉྙཐཏྟཾ, ཝཱཙཾ ཨབྷཱསི ཕརུསཾ ཨསབྦྷཾ.

༤༦༡.

སོ ཏཾ ཝིཏཀྐཾ པཝིནོདཡིཏྭཱ, པཱིཏིཾ པསཱདཾ པཊིལདྡྷཱ པཙྪཱ;

ཏཐཱགཏཾ ཛེཏཝནེ ཝསནྟཾ, ཡཱགུཡཱ ཨུཔཊྛཱསི སཏྟརཏྟཾ.

༤༦༢.

ཏསྶ [ཏཾ’ས (?)] ཝཏཾ ཏཾ པན བྲཧྨཙརིཡཾ, ཏསྶ སུཙིཎྞསྶ ཨཡཾ ཝིཔཱཀོ;

ཨེཏཱདིསཾ བྱསནཾ པཱཔུཎིཏྭཱ, ཏཾ ཏཱདིསཾ པཙྩནུབྷོསྶཏིདྡྷིཾ.

༤༦༣.

ཋཏྭཱན ¶ སོ ཝསྶསཏཾ ཨིདྷེཝ, སབྦེཧི ཀཱམེཧི སམངྒིབྷཱུཏོ;

ཀཱཡསྶ བྷེདཱ ཨབྷིསམྤརཱཡཾ, སཧབྱཏཾ གཙྪཏི ཝཱསཝསྶཱཏི.

ཀུམཱརཔེཏཝཏྠུ པཉྩམཾ.

༦. སེརིཎཱིཔེཏཝཏྠུ

༤༦༤.

‘‘ནགྒཱ ¶ ¶ དུབྦཎྞརཱུཔཱསི, ཀིསཱ དྷམནིསནྠཏཱ;

ཨུཔྥཱསུལིཀེ ཀིསིཀེ, ཀཱ ནུ ཏྭཾ ཨིདྷ ཏིཊྛསཱི’’ཏི.

༤༦༥.

‘‘ཨཧཾ བྷདནྟེ པེཏཱིམྷི, དུགྒཏཱ ཡམལོཀིཀཱ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏཱ’’ཏི.

༤༦༦.

‘‘ཀིཾ ནུ ཀཱཡེན ཝཱཙཱཡ, མནསཱ ཀུཀྐཊཾ ཀཏཾ;

ཀིསྶ ཀམྨཝིཔཱཀེན, པེཏལོཀཾ ཨིཏོ གཏཱ’’ཏི.

༤༦༧.

‘‘ཨནཱཝཊེསུ ཏིཏྠེསུ, ཝིཙིནིཾ ཨཌྜྷམཱསཀཾ;

སནྟེསུ དེཡྻདྷམྨེསུ, དཱིཔཾ ནཱཀཱསིམཏྟནོ.

༤༦༨.

‘‘ནདིཾ ཨུཔེམི ཏསིཏཱ, རིཏྟཀཱ པརིཝཏྟཏི;

ཚཱཡཾ ཨུཔེམི ཨུཎྷེསུ, ཨཱཏཔོ པརིཝཏྟཏི.

༤༦༩.

‘‘ཨགྒིཝཎྞོ ཙ མེ ཝཱཏོ, ཌཧནྟོ ཨུཔཝཱཡཏི;

ཨེཏཉྩ བྷནྟེ ཨརཧཱམི, ཨཉྙཉྩ པཱཔཀཾ ཏཏོ.

༤༧༠.

‘‘གནྟྭཱན ¶ ¶ ཧཏྠིནིཾ པུརཾ, ཝཛྫེསི མཡ྄ཧ མཱཏརཾ;

‘དྷཱིཏཱ ཙ ཏེ མཡཱ དིཊྛཱ, དུགྒཏཱ ཡམལོཀིཀཱ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏཱ’.

༤༧༡.

‘‘ཨཏྠི མེ ཨེཏྠ ནིཀྑིཏྟཾ, ཨནཀྑཱཏཉྩ ཏཾ མཡཱ;

ཙཏྟཱརིསཏསཧསྶཱནི, པལླངྐསྶ ཙ ཧེཊྛཏོ.

༤༧༢.

‘‘ཏཏོ མེ དཱནཾ དདཏུ, ཏསྶཱ ཙ ཧོཏུ ཛཱིཝིཀཱ;

དཱནཾ དཏྭཱ ཙ མེ མཱཏཱ, དཀྑིཎཾ ཨནུདིཙྪཏུ [ཨནུདིསྶཏུ (སཱི. པཱི.), ཨནྭཱདིསྶཏུ (སྱཱ.)];

ཏདཱཧཾ ¶ སུཁིཏཱ ཧེསྶཾ, སབྦཀཱམསམིདྡྷིནཱི’’ཏི.

༤༧༣.

‘‘སཱདྷཱུ’’ཏི ¶ སོ པཊིསྶུཏྭཱ, གནྟྭཱན ཧཏྠིནིཾ པུརཾ;

ཨཝོཙ ཏསྶཱ མཱཏརཾ –

‘དྷཱིཏཱ ཙ ཏེ མཡཱ དིཊྛཱ, དུགྒཏཱ ཡམལོཀིཀཱ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏཱ’.

༤༧༤.

‘‘སཱ མཾ ཏཏྠ སམཱདཔེསི, ( ) [(གནྟྭཱན ཧཏྠིནིཾ པུརཾ) (སྱཱ. ཀ.)] ཝཛྫེསི མཡ྄ཧ མཱཏརཾ;

‘དྷཱིཏཱ ཙ ཏེ མཡཱ དིཊྛཱ, དུགྒཏཱ ཡམལོཀིཀཱ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏཱ’.

༤༧༥.

‘‘ཨཏྠི ཙ མེ ཨེཏྠ ནིཀྑིཏྟཾ, ཨནཀྑཱཏཉྩ ཏཾ མཡཱ;

ཙཏྟཱརིསཏསཧསྶཱནི, པལླངྐསྶ ཙ ཧེཊྛཏོ.

༤༧༦.

‘‘ཏཏོ མེ དཱནཾ དདཏུ, ཏསྶཱ ཙ ཧོཏུ ཛཱིཝིཀཱ;

དཱནཾ དཏྭཱ ཙ མེ མཱཏཱ, དཀྑིཎཾ ཨནུདིཙྪཏུ ( ) [(ཏཏོ ཏུཝཾ དཱནཾ དེཧི, ཏསྶཱ དཀྑིཎམཱདིསཱི) (ཀ.)];

‘ཏདཱ སཱ སུཁིཏཱ ཧེསྶཾ, སབྦཀཱམསམིདྡྷིནཱི’’’ཏི.

༤༧༧.

ཏཏོ ཧི སཱ དཱནམདཱ, ཏསྶཱ དཀྑིཎམཱདིསཱི;

པེཏཱི ཙ སུཁིཏཱ ཨཱསི, ཏསྶཱ ཙཱསི སུཛཱིཝིཀཱཏི.

སེརིཎཱིཔེཏཝཏྠུ ཚཊྛཾ.

༧. མིགལུདྡཀཔེཏཝཏྠུ

༤༧༨.

‘‘ནརནཱརིཔུརཀྑཏོ ¶ ཡུཝཱ, རཛནཱིཡེཧི ཀཱམགུཎེཧི [ཀཱམེཧི (ཀ.)] སོབྷསི;

དིཝསཾ ཨནུབྷོསི ཀཱརཎཾ, ཀིམཀཱསི པུརིམཱཡ ཛཱཏིཡཱ’’ཏི.

༤༧༩.

‘‘ཨཧཾ ¶ རཱཛགཧེ རམྨེ, རམཎཱིཡེ གིརིབྦཛེ;

མིགལུདྡོ ¶ པུརེ ཨཱསིཾ, ལོཧིཏཔཱཎི དཱརུཎོ.

༤༨༠.

‘‘ཨཝིརོདྷཀརེསུ པཱཎིསུ, པུཐུསཏྟེསུ པདུཊྛམཱནསོ;

ཝིཙརིཾ ཨཏིདཱརུཎོ སདཱ [ཏདཱ (སཱི.)], པརཧིཾསཱཡ རཏོ ཨསཉྙཏོ.

༤༨༡.

‘‘ཏསྶ ¶ མེ སཧཱཡོ སུཧདཡོ [སུཧདོ (སཱི.)], སདྡྷོ ཨཱསི ཨུཔཱསཀོ;

སོཔི [སོ ཧི (སྱཱ.)] མཾ ཨནུཀམྤནྟོ, ནིཝཱརེསི པུནཔྤུནཾ.

༤༨༢.

‘‘‘མཱཀཱསི པཱཔཀཾ ཀམྨཾ, མཱ ཏཱཏ དུགྒཏིཾ ཨགཱ;

སཙེ ཨིཙྪསི པེཙྩ སུཁཾ, ཝིརམ པཱཎཝདྷཱ ཨསཾཡམཱ’.

༤༨༣.

‘‘ཏསྶཱཧཾ ཝཙནཾ སུཏྭཱ, སུཁཀཱམསྶ ཧིཏཱནུཀམྤིནོ;

ནཱཀཱསིཾ སཀལཱནུསཱསནིཾ, ཙིརཔཱཔཱབྷིརཏོ ཨབུདྡྷིམཱ.

༤༨༤.

‘‘སོ མཾ པུན བྷཱུརིསུམེདྷསོ, ཨནུཀམྤཱཡ སཾཡམེ ནིཝེསཡི;

‘སཙེ དིཝཱ ཧནསི པཱཎིནོ, ཨཐ ཏེ རཏྟིཾ བྷཝཏུ སཾཡམོ’.

༤༨༥.

‘‘སྭཱཧཾ ¶ དིཝཱ ཧནིཏྭཱ པཱཎིནོ, ཝིརཏོ རཏྟིམཧོསི སཉྙཏོ;

རཏྟཱཧཾ པརིཙཱརེམི, དིཝཱ ཁཛྫཱམི དུགྒཏོ.

༤༨༦.

‘‘ཏསྶ ཀམྨསྶ ཀུསལསྶ, ཨནུབྷོམི རཏྟིཾ ཨམཱནུསིཾ;

དིཝཱ པཊིཧཏཱཝ [པཊིཧཏཱ ཙ (ཀ.)] ཀུཀྐུརཱ, ཨུཔདྷཱཝནྟི སམནྟཱ ཁཱདིཏུཾ.

༤༨༧.

‘‘ཡེ ཙ ཏེ སཏཏཱནུཡོགིནོ, དྷུཝཾ པཡུཏྟཱ སུགཏསྶ སཱསནེ;

མཉྙཱམི ཏེ ཨམཏམེཝ ཀེཝལཾ, ཨདྷིགཙྪནྟི པདཾ ཨསངྑཏ’’ནྟི.

མིགལུདྡཀཔེཏཝཏྠུ སཏྟམཾ.

༨. དུཏིཡམིགལུདྡཀཔེཏཝཏྠུ

༤༨༨.

‘‘ཀཱུཊཱགཱརེ ¶ ཙ པཱསཱདེ, པལླངྐེ གོནཀཏྠཏེ;

པཉྩངྒིཀེན ཏུརིཡེན, རམསི སུཔྤཝཱདིཏེ.

༤༨༩.

‘‘ཏཏོ ¶ རཏྱཱ ཝིཝསཱནེ [ཝྱཝསཱནེ (སཱི.)], སཱུརིཡུགྒམནཾ པཏི;

ཨཔཝིདྡྷོ སུསཱནསྨིཾ, བཧུདུཀྑཾ ནིགཙྪསི.

༤༩༠.

‘‘ཀིཾ ¶ ནུ ཀཱཡེན ཝཱཙཱཡ, མནསཱ དུཀྐཊཾ ཀཏཾ;

ཀིསྶ ཀམྨཝིཔཱཀེན, ཨིདཾ དུཀྑཾ ནིགཙྪསི’’.

༤༩༡.

‘‘ཨཧཾ ¶ རཱཛགཧེ རམྨེ, རམཎཱིཡེ གིརིབྦཛེ;

མིགལུདྡོ པུརེ ཨཱསིཾ, ལུདྡོ ཙཱསིམསཉྙཏོ.

༤༩༢.

‘‘ཏསྶ མེ སཧཱཡོ སུཧདཡོ, སདྡྷོ ཨཱསི ཨུཔཱསཀོ;

ཏསྶ ཀུལུཔཀོ བྷིཀྑུ, ཨཱསི གོཏམསཱཝཀོ;

སོཔི མཾ ཨནུཀམྤནྟོ, ནིཝཱརེསི པུནཔྤུནཾ.

༤༩༣.

‘‘‘མཱཀཱསི པཱཔཀཾ ཀམྨཾ, མཱ ཏཱཏ དུགྒཏིཾ ཨགཱ;

སཙེ ཨིཙྪསི པེཙྩ སུཁཾ, ཝིརམ པཱཎཝདྷཱ ཨསཾཡམཱ’.

༤༩༤.

‘‘ཏསྶཱཧཾ ཝཙནཾ སུཏྭཱ, སུཁཀཱམསྶ ཧིཏཱནུཀམྤིནོ;

ནཱཀཱསིཾ སཀལཱནུསཱསནིཾ, ཙིརཔཱཔཱབྷིརཏོ ཨབུདྡྷིམཱ.

༤༩༥.

‘‘སོ མཾ པུན བྷཱུརིསུམེདྷསོ, ཨནུཀམྤཱཡ སཾཡམེ ནིཝེསཡི;

‘སཙེ དིཝཱ ཧནསི པཱཎིནོ, ཨཐ ཏེ རཏྟིཾ བྷཝཏུ སཾཡམོ’.

༤༩༦.

‘‘སྭཱཧཾ དིཝཱ ཧནིཏྭཱ པཱཎིནོ, ཝིརཏོ རཏྟིམཧོསི སཉྙཏོ;

རཏྟཱཧཾ པརིཙཱརེམི, དིཝཱ ཁཛྫཱམི དུགྒཏོ.

༤༩༧.

‘‘ཏསྶ ¶ ཀམྨསྶ ཀུསལསྶ, ཨནུབྷོམི རཏྟིཾ ཨམཱནུསིཾ;

དིཝཱ པཊིཧཏཱཝ ཀུཀྐུརཱ, ཨུཔདྷཱཝནྟི སམནྟཱ ཁཱདིཏུཾ.

༤༩༨.

‘‘ཡེ ཙ ཏེ སཏཏཱནུཡོགིནོ, དྷུཝཾ པཡུཏྟཱ [དྷུཝཡུཏྟཱ (སཱི.)] སུགཏསྶ སཱསནེ;

མཉྙཱམི ཏེ ཨམཏམེཝ ཀེཝལཾ, ཨདྷིགཙྪནྟི པདཾ ཨསངྑཏ’’ནྟི.

དུཏིཡམིགལུདྡཀཔེཏཝཏྠུ ཨཊྛམཾ.

༩. ཀཱུཊཝིནིཙྪཡིཀཔེཏཝཏྠུ

༤༩༩.

‘‘མཱལཱི ¶ ¶ ཀིརིཊཱི ཀཱཡཱུརཱི [ཀེཡཱུརཱི (སཱི.)], གཏྟཱ ཏེ ཙནྡནུསྶདཱ;

པསནྣམུཁཝཎྞོསི, སཱུརིཡཝཎྞོཝ སོབྷསི.

༥༠༠.

‘‘ཨམཱནུསཱ པཱརིསཛྫཱ, ཡེ ཏེམེ པརིཙཱརཀཱ;

དས ཀཉྙཱསཧསྶཱནི, ཡཱ ཏེམཱ པརིཙཱརིཀཱ;

ཏཱ [ཀཱ (ཀ.)] ཀམྦུཀཱཡཱུརདྷརཱ, ཀཉྩནཱཝེལ༹བྷཱུསིཏཱ.

༥༠༡.

‘‘མཧཱནུབྷཱཝོསི ཏུཝཾ, ལོམཧཾསནརཱུཔཝཱ;

པིཊྛིམཾསཱནི ཨཏྟནོ, སཱམཾ ཨུཀྐཙྩ [ཨུཀྐཌྜྷ (སཱི.)] ཁཱདསི.

༥༠༢.

‘‘ཀིཾ ¶ ནུ ཀཱཡེན ཝཱཙཱཡ, མནསཱ དུཀྐུཊཾ ཀཏཾ;

ཀིསྶ ཀམྨཝིཔཱཀེན, པིཊྛིམཾསཱནི ཨཏྟནོ;

སཱམཾ ཨུཀྐཙྩ ཁཱདསཱི’’ཏི.

༥༠༣.

‘‘ཨཏྟནོཧཾ ཨནཏྠཱཡ, ཛཱིཝལོཀེ ཨཙཱརིསཾ;

པེསུཉྙམུསཱཝཱདེན, ནིཀཏིཝཉྩནཱཡ ཙ.

༥༠༤.

‘‘ཏཏྠཱཧཾ པརིསཾ གནྟྭཱ, སཙྩཀཱལེ ཨུཔཊྛིཏེ;

ཨཏྠཾ ¶ དྷམྨཾ ནིརཱཀཏྭཱ [ནིརཾཀཏྭཱ (ཀ.) ནི + ཨཱ + ཀར + ཏྭཱ = ནིརཱཀཏྭཱ], ཨདྷམྨམནུཝཏྟིསཾ.

༥༠༥.

‘‘ཨེཝཾ སོ ཁཱདཏཏྟཱནཾ, ཡོ ཧོཏི པིཊྛིམཾསིཀོ;

ཡཐཱཧཾ ཨཛྫ ཁཱདཱམི, པིཊྛིམཾསཱནི ཨཏྟནོ.

༥༠༦.

‘‘ཏཡིདཾ ཏཡཱ ནཱརད སཱམཾ དིཊྛཾ, ཨནུཀམྤཀཱ ཡེ ཀུསལཱ ཝདེཡྻུཾ;

མཱ པེསུཎཾ མཱ ཙ མུསཱ ཨབྷཱཎི, མཱ ཁོསི པིཊྛིམཾསིཀོ ཏུཝ’’ནྟི.

ཀཱུཊཝིནིཙྪཡིཀཔེཏཝཏྠུ ནཝམཾ.

༡༠. དྷཱཏུཝིཝཎྞཔེཏཝཏྠུ

༥༠༧.

‘‘ཨནྟལིཀྑསྨིཾ ¶ ཏིཊྛནྟོ, དུགྒནྡྷོ པཱུཏི ཝཱཡསི;

མུཁཉྩ ཏེ ཀིམཡོ པཱུཏིགནྡྷཾ, ཁཱདནྟི ཀིཾ ཀམྨམཀཱསི པུབྦེ.

༥༠༨.

‘‘ཏཏོ ¶ སཏྠཾ གཧེཏྭཱན, ཨོཀྐནྟནྟི པུནཔྤུནཾ;

ཁཱརེན པརིཔྥོསིཏྭཱ, ཨོཀྐནྟནྟི པུནཔྤུནཾ.

༥༠༩.

‘‘ཀིཾ ནུ ཀཱཡེན ཝཱཙཱཡ, མནསཱ དུཀྐཊཾ ཀཏཾ;

ཀིསྶ ཀམྨཝིཔཱཀེན, ཨིདཾ དུཀྑཾ ནིགཙྪསཱི’’ཏི.

༥༡༠.

‘‘ཨཧཾ རཱཛགཧེ རམྨེ, རམཎཱིཡེ གིརིབྦཛེ;

ཨིསྶརོ དྷནདྷཉྙསྶ, སུཔཧཱུཏསྶ མཱརིས.

༥༡༡.

‘‘ཏསྶཱཡཾ མེ བྷརིཡཱ ཙ, དྷཱིཏཱ ཙ སུཎིསཱ ཙ མེ;

ཏཱ མཱལཾ ཨུཔྤལཉྩཱཔི, པཙྩགྒྷཉྩ ཝིལེཔནཾ;

ཐཱུཔཾ ཧརནྟིཡོ ཝཱརེསིཾ, ཏཾ པཱཔཾ པཀཏཾ མཡཱ.

༥༡༢.

‘‘ཚལཱ༹སཱིཏིསཧསྶཱནི ¶ , མཡཾ པཙྩཏྟཝེདནཱ;

ཐཱུཔཔཱུཛཾ ཝིཝཎྞེཏྭཱ, པཙྩཱམ ནིརཡེ བྷུསཾ.

༥༡༣.

‘‘ཡེ ¶ ཙ ཁོ ཐཱུཔཔཱུཛཱཡ, ཝཏྟནྟེ ཨརཧཏོ མཧེ;

ཨཱདཱིནཝཾ པཀཱསེནྟི, ཝིཝེཙཡེཐ [ཝིཝེཙཡཐ (སཱི.)] ནེ ཏཏོ.

༥༡༤.

‘‘ཨིམཱ ཙ པསྶ ཨཱཡནྟིཡོ, མཱལདྷཱརཱི ཨལངྐཏཱ;

མཱལཱཝིཔཱཀཾནུབྷོནྟིཡོ [ཨནུབྷཝནྟི (སཱི. པཱི.)], སམིདྡྷཱ ཙ ཏཱ [སམིདྡྷཱ ཏཱ (སཱི. སྱཱ.)] ཡསསྶིནིཡོ.

༥༡༥.

‘‘ཏཉྩ དིསྭཱན ཨཙྪེརཾ, ཨབྦྷུཏཾ ལོམཧཾསནཾ;

ནམོ ཀརོནྟི སཔྤཉྙཱ, ཝནྡནྟི ཏཾ མཧཱམུནིཾ.

༥༡༦.

‘‘སོཧཾ ¶ ནཱུན ཨིཏོ གནྟྭཱ, ཡོནིཾ ལདྡྷཱན མཱནུསིཾ;

ཐཱུཔཔཱུཛཾ ཀརིསྶཱམི, ཨཔྤམཏྟོ པུནཔྤུན’’ནྟི.

དྷཱཏུཝིཝཎྞཔེཏཝཏྠུ དསམཾ.

ཙཱུལ༹ཝགྒོ ཏཏིཡོ ནིཊྛིཏོ.

ཏསྶུདྡཱནཾ –

ཨབྷིཛྫམཱནོ ཀུཎྜིཡོ [ཀོཎྜཉྙོ (སབྦཏྠ)], རཐཀཱརཱི བྷུསེན ཙ;

ཀུམཱརོ གཎིཀཱ ཙེཝ, དྭེ ལུདྡཱ པིཊྛིཔཱུཛནཱ;

ཝགྒོ ཏེན པཝུཙྩཏཱིཏི.

༤. མཧཱཝགྒོ

༡. ཨམྦསཀྐརཔེཏཝཏྠུ

༥༡༧.

ཝེསཱལཱི ¶ ¶ ¶ ¶ ནཱམ ནགརཏྠི ཝཛྫཱིནཾ, ཏཏྠ ཨཧུ ལིཙྪཝི ཨམྦསཀྐརོ [ཨམྦསཀྑརོ (སཱི. སྱཱ.), ཨཔྤསཀྐརོ (ཀ.)];

དིསྭཱན པེཏཾ ནགརསྶ བཱཧིརཾ, ཏཏྠེཝ པུཙྪིཏྠ ཏཾ ཀཱརཎཏྠིཀོ.

༥༡༨.

‘‘སེཡྻཱ ནིསཛྫཱ ནཡིམསྶ ཨཏྠི, ཨབྷིཀྐམོ ནཏྠི པཊིཀྐམོ ཙ;

ཨསིཏཔཱིཏཁཱཡིཏཝཏྠབྷོགཱ, པརིཙཱརིཀཱ [པརིཙཱརཎཱ (སཱི. པཱི.)] སཱཔི ཨིམསྶ ནཏྠི.

༥༡༩.

‘‘ཡེ ཉཱཏཀཱ དིཊྛསུཏཱ སུཧཛྫཱ, ཨནུཀམྤཀཱ ཡསྶ ཨཧེསུཾ པུབྦེ;

དཊྛུམྤི ཏེ དཱནི ན ཏཾ ལབྷནྟི, ཝིརཱཛིཏཏྟོ [ཝིརཱདྷིཏཏྟོ (སཱི. པཱི.)] ཧི ཛནེན ཏེན.

༥༢༠.

‘‘ན ཨོགྒཏཏྟསྶ བྷཝནྟི མིཏྟཱ, ཛཧནྟི མིཏྟཱ ཝིཀལཾ ཝིདིཏྭཱ;

ཨཏྠཉྩ དིསྭཱ པརིཝཱརཡནྟི, བཧཱུ མིཏྟཱ ཨུགྒཏཏྟསྶ ཧོནྟི.

༥༢༡.

‘‘ནིཧཱིནཏྟོ སབྦབྷོགེཧི ཀིཙྪོ, སམྨཀྑིཏོ ¶ སམྤརིབྷིནྣགཏྟོ;

ཨུསྶཱཝབིནྡཱུཝ པལིམྤམཱནོ, ཨཛྫ སུཝེ ཛཱིཝིཏསྶཱུཔརོདྷོ.

༥༢༢.

‘‘ཨེཏཱདིསཾ ཨུཏྟམཀིཙྪཔྤཏྟཾ, ཨུཏྟཱསིཏཾ པུཙིམནྡསྶ སཱུལེ;

‘ཨཐ ཏྭཾ ཀེན ཝཎྞེན ཝདེསི ཡཀྑ, ཛཱིཝ བྷོ ཛཱིཝིཏམེཝ སེཡྻོ’’’ཏི.

༥༢༣.

‘‘སཱལོཧིཏོ ¶ ¶ ཨེས ཨཧོསི མཡ྄ཧཾ, ཨཧཾ སརཱམི པུརིམཱཡ ཛཱཏིཡཱ;

དིསྭཱ ཙ མེ ཀཱརུཉྙམཧོསི རཱཛ, མཱ པཱཔདྷམྨོ ནིརཡཾ པཏཱཡཾ [པཏི + ཨཡཾ = པཏཱཡཾ].

༥༢༤.

‘‘ཨིཏོ ཙུཏོ ལིཙྪཝི ཨེས པོསོ, སཏྟུསྶདཾ ནིརཡཾ གྷོརརཱུཔཾ;

ཨུཔཔཛྫཏི དུཀྐཊཀམྨཀཱརཱི, མཧཱབྷིཏཱཔཾ ཀཊུཀཾ བྷཡཱནཀཾ.

༥༢༥.

‘‘ཨནེཀབྷཱགེན གུཎེན སེཡྻོ, ཨཡམེཝ སཱུལོ ནིརཡེན ཏེན;

ཨེཀནྟདུཀྑཾ ཀཊུཀཾ བྷཡཱནཀཾ, ཨེཀནྟཏིབྦཾ ནིརཡཾ པཏཱཡཾ [པཏེ + ཨཡཾ = པཏཱཡཾ].

༥༢༦.

‘‘ཨིདཉྩ ¶ སུཏྭཱ ཝཙནཾ མམེསོ, དུཀྑཱུཔནཱིཏོ ཝིཛཧེཡྻ པཱཎཾ;

ཏསྨཱ ཨཧཾ སནྟིཀེ ན བྷཎཱམི, མཱ མེ ཀཏོ ཛཱིཝིཏསྶཱུཔརོདྷོ’’.

༥༢༧.

‘‘ཨཉྙཱཏོ ཨེསོ [ཨཛ྄ཛྷིཏོ ཨེས (ཀ.)] པུརིསསྶ ཨཏྠོ, ཨཉྙམྤི ཨིཙྪཱམསེ པུཙྪིཏུཾ ཏུཝཾ;

ཨོཀཱསཀམྨཾ སཙེ ནོ ཀརོསི, པུཙྪཱམ ཏཾ ནོ ན ཙ ཀུཛ྄ཛྷིཏབྦ’’ནྟི.

༥༢༨.

‘‘ཨདྡྷཱ པཊིཉྙཱ མེ ཏདཱ ཨཧུ [པཊིཉྙཱཏམེཏཾ ཏདཱཧུ (ཀ.), པཊིཉྙཱ ན མེཏེ ཏདཱ ཨཧུ (?)], ནཱཙིཀྑནཱ ཨཔྤསནྣསྶ ཧོཏི;

ཨཀཱམཱ སདྡྷེཡྻཝཙོཏི ཀཏྭཱ, པུཙྪསྶུ མཾ ཀཱམཾ ཡཐཱ ཝིསཡ྄ཧ’’ནྟི [ཝིསཡཾ (ཀ.)].

༥༢༩.

‘‘ཡཾ ¶ ཀིཉྩཧཾ ཙཀྑུནཱ པསྶིསྶཱམི [པསྶཱམི (ཀ.)], སབྦམྤི ཏཱཧཾ ཨབྷིསདྡཧེཡྻཾ;

དིསྭཱཝ ཏཾ ནོཔི ཙེ སདྡཧེཡྻཾ, ཀརེཡྻཱསི [ཀརོཧི (ཀཏྠཙི)] མེ ཡཀྑ ནིཡསྶཀམྨ’’ནྟི.

༥༣༠.

‘‘སཙྩཔྤཊིཉྙཱ ¶ ཏཝ མེསཱ ཧོཏུ, སུཏྭཱན དྷམྨཾ ལབྷ སུཔྤསཱདཾ;

ཨཉྙཏྠིཀོ ¶ ནོ ཙ པདུཊྛཙིཏྟོ, ཡཾ ཏེ སུཏཾ ཨསུཏཉྩཱཔི དྷམྨཾ;

སབྦམྤི ཨཀྑིསྶཾ [སབྦཾ ཨཱཙིཀྑིསྶཾ (སཱི.)] ཡཐཱ པཛཱནནྟི.

༥༣༡.

‘‘སེཏེན ཨསྶེན ཨལངྐཏེན, ཨུཔཡཱསི སཱུལཱཝུཏཀསྶ སནྟིཀེ;

ཡཱནཾ ཨིདཾ ཨབྦྷུཏཾ དསྶནེཡྻཾ, ཀིསྶེཏཾ ཀམྨསྶ ཨཡཾ ཝིཔཱཀོ’’ཏི.

༥༣༢.

‘‘ཝེསཱལིཡཱ ¶ ནགརསྶ [ཏསྶ ནགརསྶ (སཱི. སྱཱ. པཱི.)] མཛ྄ཛྷེ, ཙིཀྑལླམགྒེ ནརཀཾ ཨཧོསི;

གོསཱིསམེཀཱཧཾ པསནྣཙིཏྟོ, སེཏཾ [སེཏུཾ (སྱཱ. ཀ.)] གཧེཏྭཱ ནརཀསྨིཾ ནིཀྑིཔིཾ.

༥༣༣.

‘‘ཨེཏསྨིཾ པཱདཱནི པཏིཊྛཔེཏྭཱ, མཡཉྩ ཨཉྙེ ཙ ཨཏིཀྐམིམྷཱ;

ཡཱནཾ ཨིདཾ ཨབྦྷུཏཾ དསྶནེཡྻཾ, ཏསྶེཝ ཀམྨསྶ ཨཡཾ ཝིཔཱཀོ’’ཏི.

༥༣༤.

‘‘ཝཎྞོ ཙ ཏེ སབྦདིསཱ པབྷཱསཏི, གནྡྷོ ཙ ཏེ སབྦདིསཱ པཝཱཡཏི;

ཡཀྑིདྡྷིཔཏྟོསི མཧཱནུབྷཱཝོ, ནགྒོ ཙཱསི ཀིསྶ ཨཡཾ ཝིཔཱཀོ’’ཏི.

༥༣༥.

‘‘ཨཀྐོདྷནོ ¶ ནིཙྩཔསནྣཙིཏྟོ, སཎྷཱཧི ཝཱཙཱཧི ཛནཾ ཨུཔེམི;

ཏསྶེཝ ཀམྨསྶ ཨཡཾ ཝིཔཱཀོ, དིབྦོ མེ ཝཎྞོ སཏཏཾ པབྷཱསཏི.

༥༣༦.

‘‘ཡསཉྩ ཀིཏྟིཉྩ དྷམྨེ ཋིཏཱནཾ, དིསྭཱན མནྟེམི [དིསྭཱ སམནྟེམི (ཀ.)] པསནྣཙིཏྟོ;

ཏསྶེཝ ཀམྨསྶ ཨཡཾ ཝིཔཱཀོ, དིབྦོ མེ གནྡྷོ སཏཏཾ པཝཱཡཏི.

༥༣༧.

‘‘སཧཱཡཱནཾ ¶ ཏིཏྠསྨིཾ ནྷཱཡནྟཱནཾ, ཐལེ གཧེཏྭཱ ནིདཧིསྶ དུསྶཾ;

ཁིཌྜཏྠིཀོ ནོ ཙ པདུཊྛཙིཏྟོ, ཏེནམྷི ནགྒོ ཀསིརཱ ཙ ཝུཏྟཱི’’ཏི.

༥༣༨.

‘‘ཡོ ཀཱིལ༹མཱནོ པཀརོཏི པཱཔཾ, ཏསྶེདིསཾ ཀམྨཝིཔཱཀམཱཧུ;

ཨཀཱིལ༹མཱནོ པན ཡོ ཀརོཏི, ཀིཾ ཏསྶ ཀམྨསྶ ཝིཔཱཀམཱཧཱུ’’ཏི.

༥༣༩.

‘‘ཡེ དུཊྛསངྐཔྤམནཱ མནུསྶཱ, ཀཱཡེན ཝཱཙཱཡ ཙ སངྐིལིཊྛཱ;

ཀཱཡསྶ བྷེདཱ ཨབྷིསམྤརཱཡཾ, ཨསཾསཡཾ ཏེ ནིརཡཾ ཨུཔེནྟི.

༥༤༠.

‘‘ཨཔརེ ¶ པན སུགཏིམཱསམཱནཱ, དཱནེ རཏཱ སངྒཧིཏཏྟབྷཱཝཱ;

ཀཱཡསྶ བྷེདཱ ཨབྷིསམྤརཱཡཾ, ཨསཾསཡཾ ཏེ སུགཏིཾ ཨུཔེནྟཱི’’ཏི.

༥༤༡.

‘‘ཏཾ ཀིནྟི ཛཱནེཡྻམཧཾ ཨཝེཙྩ, ཀལྱཱཎཔཱཔསྶ ཨཡཾ ཝིཔཱཀོ;

ཀིཾ ཝཱཧཾ དིསྭཱ ཨབྷིསདྡཧེཡྻཾ, ཀོ ཝཱཔི མཾ སདྡཧཱཔེཡྻ ཨེཏ’’ནྟི.

༥༤༢.

‘‘དིསྭཱ ¶ ཙ སུཏྭཱ ཨབྷིསདྡཧསྶུ, ཀལྱཱཎཔཱཔསྶ ཨཡཾ ཝིཔཱཀོ;

ཀལྱཱཎཔཱཔེ ཨུབྷཡེ ཨསནྟེ, སིཡཱ ནུ སཏྟཱ སུགཏཱ དུགྒཏཱ ཝཱ.

༥༤༣.

‘‘ནོ ¶ ཙེཏྠ ཀམྨཱནི ཀརེཡྻུཾ མཙྩཱ, ཀལྱཱཎཔཱཔཱནི མནུསྶལོཀེ;

ནཱཧེསུཾ སཏྟཱ སུགཏཱ དུགྒཏཱ ཝཱ, ཧཱིནཱ པཎཱིཏཱ ཙ མནུསྶལོཀེ.

༥༤༤.

‘‘ཡསྨཱ ¶ ཙ ཀམྨཱནི ཀརོནྟི མཙྩཱ, ཀལྱཱཎཔཱཔཱནི མནུསྶལོཀེ;

ཏསྨཱ ཧི སཏྟཱ སུགཏཱ དུགྒཏཱ ཝཱ, ཧཱིནཱ ¶ པཎཱིཏཱ ཙ མནུསྶལོཀེ.

༥༤༥.

‘‘དྭཡཛྫ ཀམྨཱནཾ ཝིཔཱཀམཱཧུ, སུཁསྶ དུཀྑསྶ ཙ ཝེདནཱིཡཾ;

ཏཱ དེཝཏཱཡོ པརིཙཱརཡནྟི, པཙྩནྟི བཱལཱ དྭཡཏཾ ཨཔསྶིནོ.

༥༤༦.

‘‘ན མཏྠི ཀམྨཱནི སཡཾཀཏཱནི, དཏྭཱཔི མེ ནཏྠི ཡོ [སོ (སབྦཏྠ)] ཨཱདིསེཡྻ;

ཨཙྪཱདནཾ སཡནམཐནྣཔཱནཾ, ཏེནམྷི ནགྒོ ཀསིརཱ ཙ ཝུཏྟཱི’’ཏི.

༥༤༧.

‘‘སིཡཱ ནུ ཁོ ཀཱརཎཾ ཀིཉྩི ཡཀྑ, ཨཙྪཱདནཾ ཡེན ཏུཝཾ ལབྷེཐ;

ཨཱཙིཀྑ མེ ཏྭཾ ཡདཏྠི ཧེཏུ, སདྡྷཱཡིཀཾ [སདྡྷཱཡིཏཾ (སཱི. པཱི.)] ཧེཏུཝཙོ སུཎོམཱ’’ཏི.

༥༤༨.

‘‘ཀཔྤིཏཀོ [ཀཔྤིནཀོ (སཱི.)] ནཱམ ཨིདྷཏྠི བྷིཀྑུ, ཛྷཱཡཱི སུསཱིལོ ཨརཧཱ ཝིམུཏྟོ;

གུཏྟིནྡྲིཡོ སཾཝུཏཔཱཏིམོཀྑོ, སཱིཏིབྷཱུཏོ ཨུཏྟམདིཊྛིཔཏྟོ.

༥༤༩.

‘‘སཁིལོ ཝདཉྙཱུ སུཝཙོ སུམུཁོ, སྭཱགམོ སུཔྤཊིམུཏྟཀོ ཙ;

པུཉྙསྶ ཁེཏྟཾ ཨརཎཝིཧཱརཱི, དེཝམནུསྶཱནཉྩ ¶ དཀྑིཎེཡྻོ.

༥༥༠.

‘‘སནྟོ ཝིདྷཱུམོ ཨནཱིགྷོ ནིརཱསོ, མུཏྟོ ཝིསལློ ཨམམོ ཨཝངྐོ;

ནིརཱུཔདྷཱི སབྦཔཔཉྩཁཱིཎོ, ཏིསྶོ ཝིཛྫཱ ཨནུཔྤཏྟོ ཛུཏིམཱ.

༥༥༡.

‘‘ཨཔྤཉྙཱཏོ ¶ དིསྭཱཔི ན ཙ སུཛཱནོ, མུནཱིཏི ནཾ ཝཛྫིསུ ཝོཧརནྟི;

ཛཱནནྟི ཏཾ ཡཀྑབྷཱུཏཱ ཨནེཛཾ, ཀལྱཱཎདྷམྨཾ ཝིཙརནྟཾ ལོཀེ.

༥༥༢.

‘‘ཏསྶ ¶ ཏུཝཾ ཨེཀཡུགཾ དུཝེ ཝཱ, མམུདྡིསིཏྭཱན སཙེ དདེཐ;

པཊིགྒཧཱིཏཱནི ཙ ཏཱནི ཨསྶུ, མམཉྩ པསྶེཐ སནྣདྡྷདུསྶ’’ནྟི.

༥༥༣.

‘‘ཀསྨིཾ པདེསེ སམཎཾ ཝསནྟཾ, གནྟྭཱན པསྶེམུ མཡཾ ཨིདཱནི;

ཡོ མཛྫ [ས མཛྫ (སཱི.)] ཀངྑཾ ཝིཙིཀིཙྪིཏཉྩ, དིཊྛཱིཝིསཱུཀཱནི ཝིནོདཡེཡྻཱ’’ཏི.

༥༥༤.

‘‘ཨེསོ ནིསིནྣོ ཀཔིནཙྩནཱཡཾ, པརིཝཱརིཏོ དེཝཏཱཧི བཧཱུཧི;

དྷམྨིཾ ¶ ཀཐཾ བྷཱསཏི སཙྩནཱམོ, སཀསྨིམཱཙེརཀེ ཨཔྤམཏྟོ’’ཏི.

༥༥༥.

‘‘ཏཐཱཧཾ [ཡཐཱཧཾ (ཀ.)] ཀསྶཱམི གནྟྭཱ ཨིདཱནི, ཨཙྪཱདཡིསྶཾ སམཎཾ ཡུགེན;

པཊིགྒཧིཏཱནི ཙ ཏཱནི ཨསྶུ, ཏུཝཉྩ པསྶེམུ སནྣདྡྷདུསྶ’’ནྟི.

༥༥༦.

‘‘མཱ ཨཀྑཎེ པབྦཛིཏཾ ཨུཔཱགམི, སཱདྷུ ཝོ ལིཙྪཝི ནེས དྷམྨོ;

ཏཏོ ཙ ཀཱལེ ཨུཔསངྐམིཏྭཱ, ཏཏྠེཝ པསྶཱཧི རཧོ ནིསིནྣ’’ནྟི.

༥༥༧.

ཏཐཱཏི ཝཏྭཱ ཨགམཱསི ཏཏྠ, པརིཝཱརིཏོ དཱསགཎེན ལིཙྪཝི;

སོ ཏཾ ནགརཾ ཨུཔསངྐམིཏྭཱ, ཝཱསཱུཔགཙྪིཏྠ སཀེ ནིཝེསནེ.

༥༥༨.

ཏཏོ ¶ ¶ ཙ ཀཱལེ གིཧིཀིཙྩཱནི ཀཏྭཱ, ནྷཏྭཱ པིཝིཏྭཱ ཙ ཁཎཾ ལབྷིཏྭཱ;

ཝིཙེཡྻ པེལཱ༹ཏོ ཙ ཡུགཱནི ཨཊྛ, གཱཧཱཔཡཱི དཱསགཎེན ལིཙྪཝི.

༥༥༩.

སོ ཏཾ པདེསཾ ཨུཔསངྐམིཏྭཱ, ཏཾ ཨདྡས སམཎཾ སནྟཙིཏྟཾ;

པཊིཀྐནྟཾ ¶ གོཙརཏོ ནིཝཏྟཾ, སཱིཏིབྷཱུཏཾ རུཀྑམཱུལེ ནིསིནྣཾ.

༥༦༠.

ཏམེནམཝོཙ ཨུཔསངྐམིཏྭཱ, ཨཔྤཱབཱདྷཾ ཕཱསུཝིཧཱརཉྩ པུཙྪི;

‘‘ཝེསཱལིཡཾ ལིཙྪཝིཧཾ བྷདནྟེ, ཛཱནནྟི མཾ ལིཙྪཝི ཨམྦསཀྐརོ.

༥༦༡.

‘‘ཨིམཱནི མེ ཨཊྛ ཡུགཱ སུབྷཱནི [ཡུགཱནི བྷནྟེ (སྱཱ. ཀ.)], པཊིགཎྷ བྷནྟེ པདདཱམི ཏུཡ྄ཧཾ;

ཏེནེཝ ཨཏྠེན ཨིདྷཱགཏོསྨི, ཡཐཱ ཨཧཾ ཨཏྟམནོ བྷཝེཡྻ’’ནྟི.

༥༦༢.

‘‘དཱུརཏོཝ ¶ སམཎབྲཱཧྨཎཱ ཙ, ནིཝེསནཾ ཏེ པརིཝཛྫཡནྟི;

པཏྟཱནི བྷིཛྫནྟི ཙ ཏེ [བྷིཛྫནྟི ཏཝ (སྱཱ. ཀ.)] ནིཝེསནེ, སངྒྷཱཊིཡོ ཙཱཔི ཝིདཱལཡནྟི [ཝིཔཱཊཡནྟི (སཱི.), ཝིཔཱཏཡནྟི (ཀ.)].

༥༦༣.

‘‘ཨཐཱཔརེ པཱདཀུཋཱརིཀཱཧི, ཨཝཾསིརཱ སམཎཱ པཱཏཡནྟི;

ཨེཏཱདིསཾ པབྦཛིཏཱ ཝིཧེསཾ, ཏཡཱ ཀཏཾ སམཎཱ པཱཔུཎནྟི.

༥༦༤.

‘‘ཏིཎེན ཏེལམྤི ན ཏྭཾ ཨདཱསི, མཱུལ༹ྷསྶ ¶ མགྒམྤི ན པཱཝདཱསི;

ཨནྡྷསྶ དཎྜཾ སཡམཱདིཡཱསི, ཨེཏཱདིསོ ཀདརིཡོ ཨསཾཝུཏོ ཏུཝཾ;

ཨཐ ཏྭཾ ཀེན ཝཎྞེན ཀིམེཝ དིསྭཱ,

ཨམྷེཧི སཧ སཾཝིབྷཱགཾ ཀརོསཱི’’ཏི.

༥༦༥.

‘‘པཙྩེམི ¶ བྷནྟེ ཡཾ ཏྭཾ ཝདེསི, ཝིཧེསཡིཾ སམཎེ བྲཱཧྨཎེ ཙ;

ཁིཌྜཏྠིཀོ ནོ ཙ པདུཊྛཙིཏྟོ, ཨེཏམྤི མེ དུཀྐཊམེཝ བྷནྟེ.

༥༦༦.

‘‘ཁིཌྜཱཡ ཡཀྑོ པསཝིཏྭཱ པཱཔཾ, ཝེདེཏི དུཀྑཾ ཨསམཏྟབྷོགཱི;

དཧརོ ཡུཝཱ ནགྒནིཡསྶ བྷཱགཱི, ཀིཾ སུ ཏཏོ དུཀྑཏརསྶ ཧོཏི.

༥༦༧.

‘‘ཏཾ དིསྭཱ སཾཝེགམལཏྠཾ བྷནྟེ, ཏཔྤཙྩཡཱ ཝཱཔི [ཏཔྤཙྩཡཱ ཏཱཧཾ (སཱི.), ཏཔྤཙྩཡཱ ཙཱཧཾ (པཱི.)] དདཱམི དཱནཾ;

པཊིགཎྷ བྷནྟེ ཝཏྠཡུགཱནི ཨཊྛ, ཡཀྑསྶིམཱ གཙྪནྟུ དཀྑིཎཱཡོ’’ཏི.

༥༦༨.

‘‘ཨདྡྷཱ ཧི དཱནཾ བཧུདྷཱ པསཏྠཾ, དདཏོ ཙ ཏེ ཨཀྑཡདྷམྨམཏྠུ;

པཊིགཎྷཱམི ¶ ཏེ ཝཏྠཡུགཱནི ཨཊྛ, ཡཀྑསྶིམཱ གཙྪནྟུ དཀྑིཎཱཡོ’’ཏི.

༥༦༩.

ཏཏོ ཧི སོ ཨཱཙམཡིཏྭཱ ལིཙྪཝི, ཐེརསྶ དཏྭཱན ཡུགཱནི ཨཊྛ;

‘པཊིགྒཧིཏཱནི ཙ ཏཱནི ཨསྶུ, ཡཀྑཉྩ པསྶེཐ སནྣདྡྷདུསྶཾ’.

༥༧༠.

ཏམདྡསཱ ཙནྡནསཱརལིཏྟཾ, ཨཱཛཉྙམཱརཱུལ༹ྷམུལཱ༹རཝཎྞཾ;

ཨལངྐཏཾ སཱདྷུནིཝཏྠདུསྶཾ, པརིཝཱརིཏཾ ཡཀྑམཧིདྡྷིཔཏྟཾ.

༥༧༡.

སོ ¶ ཏཾ དིསྭཱ ཨཏྟམནཱ ཨུདགྒོ, པཧཊྛཙིཏྟོ ཙ སུབྷགྒརཱུཔོ;

ཀམྨཉྩ དིསྭཱན མཧཱཝིཔཱཀཾ, སནྡིཊྛིཀཾ ཙཀྑུནཱ སཙྪིཀཏྭཱ.

༥༧༢.

ཏམེནམཝོཙ ¶ ¶ ཨུཔསངྐམིཏྭཱ, ‘‘དསྶཱམི དཱནཾ སམཎབྲཱཧྨཎཱནཾ;

ན ཙཱཔི མེ ཀིཉྩི ཨདེཡྻམཏྠི, ཏུཝཉྩ མེ ཡཀྑ བཧཱུཔཀཱརོ’’ཏི.

༥༧༣.

‘‘ཏུཝཉྩ མེ ལིཙྪཝི ཨེཀདེསཾ, ཨདཱསི དཱནཱནི ཨམོགྷམེཏཾ;

སྭཱཧཾ ¶ ཀརིསྶཱམི ཏཡཱཝ སཀྑིཾ, ཨམཱནུསོ མཱནུསཀེན སདྡྷི’’ནྟི.

༥༧༤.

‘‘གཏཱི ཙ བནྡྷཱུ ཙ པརཱཡཎཉྩ [པརཱཡནཉྩ (སྱཱ. ཀ.)], མིཏྟོ མམཱསི ཨཐ དེཝཏཱ མེ [དེཝཏཱསི (སཱི. སྱཱ.)];

ཡཱཙཱམི ཏཾ [ཡཱཙཱམཧཾ (སཱི.)] པཉྫལིཀོ བྷཝིཏྭཱ, ཨིཙྪཱམི ཏཾ ཡཀྑ པུནཱཔི དཊྛུ’’ནྟི.

༥༧༥.

‘‘སཙེ ཏུཝཾ ཨསྶདྡྷོ བྷཝིསྶསི, ཀདརིཡརཱུཔོ ཝིཔྤཊིཔནྣཙིཏྟོ;

ཏྭཾ ནེཝ མཾ ལཙྪསི [ཏེནེཝ མཾ ན ལཙྪསཱི (སཱི.), ཏེནེཝ མཾ ལིཙྪཝི (སྱཱ.), ཏེནེཝ མཾ ལཙྪསི (ཀ.)] དསྶནཱཡ, དིསྭཱ ཙ ཏཾ ནོཔི ཙ ཨཱལཔིསྶཾ.

༥༧༦.

‘‘སཙེ པན ཏྭཾ བྷཝིསྶསི དྷམྨགཱརཝོ, དཱནེ རཏོ སངྒཧིཏཏྟབྷཱཝོ;

ཨོཔཱནབྷཱུཏོ སམཎབྲཱཧྨཎཱནཾ, ཨེཝཾ མམཾ ལཙྪསི དསྶནཱཡ.

༥༧༧.

‘‘དིསྭཱ ཙ ཏཾ ཨཱལཔིསྶཾ བྷདནྟེ, ཨིམཉྩ སཱུལཏོ ལཧུཾ པམུཉྩ;

ཡཏོ ནིདཱནཾ ཨཀརིམྷ སཀྑིཾ, མཉྙཱམི སཱུལཱཝུཏཀསྶ ཀཱརཎཱ.

༥༧༨.

‘‘ཏེ ¶ ཨཉྙམཉྙཾ ཨཀརིམྷ སཀྑིཾ, ཨཡཉྩ ¶ སཱུལཏོ [སཱུལཱཝུཏོ (སཱི. སྱཱ.)] ལཧུཾ པམུཏྟོ;

སཀྐཙྩ དྷམྨཱནི སམཱཙརནྟོ, མུཙྩེཡྻ སོ ནིརཡཱ ཙ ཏམྷཱ;

ཀམྨཾ སིཡཱ ཨཉྙཏྲ ཝེདནཱིཡཾ.

༥༧༩.

‘‘ཀཔྤིཏཀཉྩ ཨུཔསངྐམིཏྭཱ, ཏེནེཝ [ཏེན (སྱཱ. ཀ.)] སཧ སཾཝིབྷཛིཏྭཱ ཀཱལེ;

སཡཾ མུཁེནཱུཔནིསཛྫ པུཙྪ, སོ ཏེ ཨཀྑིསྶཏི ཨེཏམཏྠཾ.

༥༨༠.

‘‘ཏམེཝ བྷིཀྑུཾ ཨུཔསངྐམིཏྭཱ, པུཙྪསྶུ ཨཉྙཏྠིཀོ ནོ ཙ པདུཊྛཙིཏྟོ;

སོ ཏེ སུཏཾ ཨསུཏཉྩཱཔི དྷམྨཾ,

སབྦམྤི ¶ ཨཀྑིསྶཏི ཡཐཱ པཛཱན’’ནྟི.

༥༨༡.

སོ ཏཏྠ རཧསྶཾ སམུལླཔིཏྭཱ, སཀྑིཾ ཀརིཏྭཱན ཨམཱནུསེན;

པཀྐཱམི སོ ལིཙྪཝཱིནཾ སཀཱསཾ, ཨཐ བྲཝི པརིསཾ སནྣིསིནྣཾ.

༥༨༢.

‘‘སུཎནྟུ བྷོནྟོ མམ ཨེཀཝཱཀྱཾ, ཝརཾ ཝརིསྶཾ ལབྷིསྶཱམི ཨཏྠཾ;

སཱུལཱཝུཏོ ¶ པུརིསོ ལུདྡཀམྨོ, པཎཱིཧིཏདཎྜོ [པཎཱིཏནཎྜོ (ཀ.)] ཨནུསཏྟརཱུཔོ [ཨནུཔཀྐརཱུཔོ (ཀ.)].

༥༨༣.

‘‘ཨེཏྟཱཝཏཱ ཝཱིསཏིརཏྟིམཏྟཱ, ཡཏོ ཨཱཝུཏོ ནེཝ ཛཱིཝཏི ན མཏོ;

ཏཱཧཾ མོཙཡིསྶཱམི དཱནི, ཡཐཱམཏིཾ ཨནུཛཱནཱཏུ སངྒྷོ’’ཏི.

༥༨༤.

‘‘ཨེཏཉྩ ཨཉྙཉྩ ལཧུཾ པམུཉྩ, ཀོ ཏཾ ཝདེཐ [ཝདེཐཱཏི (ཀ.), ཝདེཐ ཙ (སྱཱ.)] ཏཐཱ ཀརོནྟཾ;

ཡཐཱ པཛཱནཱསི ཏཐཱ ཀརོཧི, ཡཐཱམཏིཾ ཨནུཛཱནཱཏི སངྒྷོ’’ཏི.

༥༨༥.

སོ ¶ ཏཾ པདེསཾ ཨུཔསངྐམིཏྭཱ, སཱུལཱཝུཏཾ མོཙཡི ཁིཔྤམེཝ;

‘མཱ བྷཱཡི སམྨཱ’ཏི ཙ ཏཾ ཨཝོཙ, ཏིཀིཙྪཀཱནཉྩ ཨུཔཊྛཔེསི.

༥༨༦.

‘‘ཀཔྤིཏཀཉྩ ¶ ཨུཔསངྐམིཏྭཱ, ཏེནེཝ སཧ [ཏེན སམཾ (སཱི.), ཏེན སཧ (སྱཱ. ཀ.)] སཾཝིབྷཛིཏྭཱ ཀཱལེ;

སཡཾ མུཁེནཱུཔནིསཛྫ ལིཙྪཝི, ཏཐེཝ པུཙྪིཏྠ ནཾ ཀཱརཎཏྠིཀོ.

༥༨༧.

‘‘སཱུལཱཝུཏོ པུརིསོ ལུདྡཀམྨོ, པཎཱིཏདཎྜོ ¶ ཨནུསཏྟརཱུཔོ;

ཨེཏྟཱཝཏཱ ཝཱིསཏིརཏྟིམཏྟཱ, ཡཏོ ཨཱཝུཏོ ནེཝ ཛཱིཝཏི ན མཏོ.

༥༨༨.

‘‘སོ མོཙིཏོ གནྟྭཱ མཡཱ ཨིདཱནི, ཨེཏསྶ ཡཀྑསྶ ཝཙོ ཧི བྷནྟེ;

སིཡཱ ནུ ཁོ ཀཱརཎཾ ཀིཉྩིདེཝ, ཡེན སོ ནིརཡཾ ནོ ཝཛེཡྻ.

༥༨༩.

‘‘ཨཱཙིཀྑ བྷནྟེ ཡདི ཨཏྠི ཧེཏུ, སདྡྷཱཡིཀཾ ཧེཏུཝཙོ སུཎོམ;

ན ཏེསཾ ཀམྨཱནཾ ཝིནཱསམཏྠི, ཨཝེདཡིཏྭཱ ཨིདྷ བྱནྟིབྷཱཝོ’’ཏི.

༥༩༠.

‘‘སཙེ ¶ ས དྷམྨཱནི སམཱཙརེཡྻ, སཀྐཙྩ རཏྟིནྡིཝམཔྤམཏྟོ;

མུཙྩེཡྻ སོ ནིརཡཱ ཙ ཏམྷཱ, ཀམྨཾ སིཡཱ ཨཉྙཏྲ ཝེདནཱིཡ’’ནྟི.

༥༩༡.

‘‘ཨཉྙཱཏོ [ཉཱཏོམྷི (ཀ.)] ཨེསོ པུརིསསྶ ཨཏྠོ, མམམྤི དཱནི ཨནུཀམྤ བྷནྟེ;

ཨནུསཱས མཾ ཨོཝད བྷཱུརིཔཉྙ, ཡཐཱ ཨཧཾ ནོ ནིརཡཾ ཝཛེཡྻ’’ནྟི.

༥༩༢.

‘‘ཨཛྫེཝ ¶ ¶ བུདྡྷཾ སརཎཾ ཨུཔེཧི, དྷམྨཉྩ སངྒྷཉྩ པསནྣཙིཏྟོ;

ཏཐེཝ སིཀྑཱཡ པདཱནི པཉྩ, ཨཁཎྜཕུལླཱནི སམཱདིཡསྶུ.

༥༩༣.

‘‘པཱཎཱཏིཔཱཏཱ ཝིརམསྶུ ཁིཔྤཾ, ལོཀེ ཨདིནྣཾ པརིཝཛྫཡསྶུ;

ཨམཛྫཔོ མཱ ཙ མུསཱ ཨབྷཱཎཱི, སཀེན དཱརེན ཙ ཧོཧི ཏུཊྛོ;

ཨིམཉྩ ཨརིཡཾ [ཨིམཉྩ (སྱཱ.)] ཨཊྛངྒཝརེནུཔེཏཾ, སམཱདིཡཱཧི ཀུསལཾ སུཁུདྲཡཾ.

༥༩༤.

‘‘ཙཱིཝརཾ པིཎྜཔཱཏཉྩ, པཙྩཡཾ སཡནཱསནཾ;

ཨནྣཾ པཱནཾ ཁཱདནཱིཡཾ, ཝཏྠསེནཱསནཱནི ཙ;

དདཱཧི ཨུཛུབྷཱུཏེསུ, ཝིཔྤསནྣེན ཙེཏསཱ [སདཱ པུཉྙཾ པཝཌྜྷཏི (སྱཱ. ཀ.)].

༥༩༥.

‘‘བྷིཀྑཱུཔི སཱིལསམྤནྣེ, ཝཱིཏརཱགེ བཧུསྶུཏེ;

ཏཔྤེཧི ཨནྣཔཱནེན, སདཱ པུཉྙཾ པཝཌྜྷཏི.

༥༩༦.

‘‘ཨེཝཉྩ དྷམྨཱནི [ཀམྨཱནི (སཱི. སྱཱ.)] སམཱཙརནྟོ, སཀྐཙྩ རཏྟིནྡིཝམཔྤམཏྟོ;

མུཉྩ ཏུཝཾ [མུཙྩེཡྻ སོ ཏྭཾ (ཀ.)] ནིརཡཱ ཙ ཏམྷཱ, ཀམྨཾ ¶ སིཡཱ ཨཉྙཏྲ ཝེདནཱིཡ’’ནྟི.

༥༩༧.

‘‘ཨཛྫེཝ བུདྡྷཾ སརཎཾ ཨུཔེམི, དྷམྨཉྩ སངྒྷཉྩ པསནྣཙིཏྟོ;

ཏཐེཝ སིཀྑཱཡ པདཱནི པཉྩ, ཨཁཎྜཕུལླཱནི སམཱདིཡཱམི.

༥༩༨.

‘‘པཱཎཱཏིཔཱཏཱ ཝིརམཱམི ཁིཔྤཾ, ལོཀེ ཨདིནྣཾ པརིཝཛྫཡཱམི;

ཨམཛྫཔོ ནོ ཙ མུསཱ བྷཎཱམི, སཀེན དཱརེན ཙ ཧོམི ཏུཊྛོ;

ཨིམཉྩ ཨརིཡཾ ཨཊྛངྒཝརེནུཔེཏཾ, སམཱདིཡཱམི ཀུསལཾ སུཁུདྲཡཾ.

༥༩༩.

‘‘ཙཱིཝརཾ ¶ ¶ པིཎྜཔཱཏཉྩ, པཙྩཡཾ སཡནཱསནཾ;

ཨནྣཾ པཱནཾ ཁཱདནཱིཡཾ, ཝཏྠསེནཱསནཱནི ཙ.

༦༠༠.

‘‘བྷིཀྑཱུ ¶ ཙ སཱིལསམྤནྣེ, ཝཱིཏརཱགེ བཧུསྶུཏེ;

དདཱམི ན ཝིཀམྤཱམི [ཝིཀཔྤཱམི (སཱི. སྱཱ.)], བུདྡྷཱནཾ སཱསནེ རཏོ’’ཏི.

༦༠༡.

ཨེཏཱདིསཱ ལིཙྪཝི ཨམྦསཀྐརོ, ཝེསཱལིཡཾ ཨཉྙཏརོ ཨུཔཱསཀོ;

སདྡྷོ མུདཱུ ཀཱརཀརོ ཙ བྷིཀྑུ, སངྒྷཉྩ སཀྐཙྩ ཏདཱ ཨུཔཊྛཧི.

༦༠༢.

སཱུལཱཝུཏོ ཙ ཨརོགོ ཧུཏྭཱ, སེརཱི ¶ སུཁཱི པབྦཛྫཾ ཨུཔཱགམི [པབྦཛྫམུཔགཙྪི (ཀ.)];

བྷིཀྑུཉྩ ཨཱགམྨ ཀཔྤིཏཀུཏྟམཾ, ཨུབྷོཔི སཱམཉྙཕལཱནི ཨཛ྄ཛྷགུཾ.

༦༠༣.

ཨེཏཱདིསཱ སཔྤུརིསཱན སེཝནཱ, མཧཔྥལཱ ཧོཏི སཏཾ ཝིཛཱནཏཾ;

སཱུལཱཝུཏོ ཨགྒཕལཾ ཨཕསྶཡི [ཕུསྶཡི (སྱཱ. ཀ.)], ཕལཾ ཀནིཊྛཾ པན ཨམྦསཀྐརོ’’ཏི.

ཨམྦསཀྐརཔེཏཝཏྠུ པཋམཾ.

༢. སེརཱིསཀཔེཏཝཏྠུ

༦༠༤.

[ཝི. ཝ. ༡༢༢༨] སུཎོཐ ཡཀྑསྶ ཝཱཎིཛཱན ཙ, སམཱགམོ ཡཏྠ ཏདཱ ཨཧོསི;

ཡཐཱ ཀཐཾ ཨིཏརིཏརེན ཙཱཔི, སུབྷཱསིཏཾ ཏཉྩ སུཎཱཐ སབྦེ.

༦༠༥.

ཡོ སོ ཨཧུ རཱཛཱ པཱཡཱསི ནཱམ [ནཱམོ (སཱི.)], བྷུམྨཱནཾ སཧབྱགཏོ ཡསསྶཱི;

སོ མོདམཱནོཝ སཀེ ཝིམཱནེ, ཨམཱནུསོ མཱནུསེ ཨཛ྄ཛྷབྷཱསཱིཏི.

༦༠༦.

‘‘ཝངྐེ ¶ ཨརཉྙེ ཨམནུསྶཊྛཱནེ, ཀནྟཱརེ ཨཔྤོདཀེ ཨཔྤབྷཀྑེ;

སུདུགྒམེ ཝཎྞུཔཐསྶ མཛ྄ཛྷེ, ཝངྐཾབྷཡཱ ནཊྛམནཱ མནུསྶཱ.

༦༠༧.

‘‘ནཡིདྷ ཕལཱ མཱུལམཡཱ ཙ སནྟི, ཨུཔཱདཱནཾ ནཏྠི ཀུཏོདྷ བྷཀྑོ [བྷིཀྑོ (ཀ.)];

ཨཉྙཏྲ པཾསཱུཧི ཙ ཝཱལུཀཱཧི ཙ, ཏཏཱཧི ཨུཎྷཱཧི ཙ དཱརུཎཱཧི ཙ.

༦༠༨.

‘‘ཨུཛྫངྒལཾ ཏཏྟམིཝཾ ཀཔཱལཾ, ཨནཱཡསཾ པརལོཀེན ཏུལྱཾ;

ལུདྡཱནམཱཝཱསམིདཾ པུརཱཎཾ, བྷཱུམིཔྤདེསོ ཨབྷིསཏྟརཱུཔོ.

༦༠༩.

‘‘‘ཨཐ ཏུམྷེ ཀེན ཝཎྞེན, ཀིམཱསམཱནཱ ཨིམཾ པདེསཾ ཧི;

ཨནུཔཝིཊྛཱ སཧསཱ སམཙྩ, ལོབྷཱ བྷཡཱ ཨཐ ཝཱ སམྤམཱུལ༹ྷཱ’’’ཏི.

༦༡༠.

‘‘མགདྷེསུ ཨངྒེསུ ཙ སཏྠཝཱཧཱ, ཨཱརོཔཡིཏྭཱ པཎིཡཾ པུཐུཏྟཾ;

ཏེ ཡཱམསེ སིནྡྷུསོཝཱིརབྷཱུམིཾ, དྷནཏྠིཀཱ ཨུདྡཡཾ པཏྠཡཱནཱ.

༦༡༡.

‘‘དིཝཱ པིཔཱསཾ ནདྷིཝཱསཡནྟཱ, ཡོགྒཱནུཀམྤཉྩ སམེཀྑམཱནཱ;

ཨེཏེན ཝེགེན ཨཱཡཱམ སབྦེ, རཏྟིཾ མགྒཾ པཊིཔནྣཱ ཝིཀཱལེ.

༦༡༢.

‘‘ཏེ ¶ དུཔྤཡཱཏཱ ཨཔརདྡྷམགྒཱ, ཨནྡྷཱཀུལཱ ཝིཔྤནཊྛཱ ཨརཉྙེ;

སུདུགྒམེ ཝཎྞུཔཐསྶ མཛ྄ཛྷེ, དིསཾ ན ཛཱནཱམ པམཱུལ༹ྷཙིཏྟཱ.

༦༡༣.

‘‘ཨིདཉྩ ¶ དིསྭཱན ཨདིཊྛཔུབྦཾ, ཝིམཱནསེཊྛཉྩ ཏཝཉྩ ཡཀྑ;

ཏཏུཏྟརིཾ ཛཱིཝིཏམཱསམཱནཱ, དིསྭཱ པཏཱིཏཱ སུམནཱ ཨུདགྒཱ’’ཏི.

༦༡༤.

‘‘པཱརཾ སམུདྡསྶ ཨིམཉྩ ཝཎྞུཾ, ཝེཏྟཱཙརཾ [ཝེཏྟཾ པརཾ (སྱཱ.), ཝེཏྟཱཙཱརཾ (ཀ.)] སངྐུཔཐཉྩ མགྒཾ;

ནདིཡོ པན པབྦཏཱནཉྩ དུགྒཱ, པུཐུདྡིསཱ གཙྪཐ བྷོགཧེཏུ.

༦༡༥.

‘‘པཀྑནྡིཡཱན ཝིཛིཏཾ པརེསཾ, ཝེརཛྫཀེ མཱནུསེ པེཀྑམཱནཱ;

ཡཾ ཝོ སུཏཾ ཝཱ ཨཐ ཝཱཔི དིཊྛཾ, ཨཙྪེརཀཾ ཏཾ ཝོ སུཎོམ ཏཱཏཱ’’ཏི.

༦༡༦.

‘‘ཨིཏོཔི ཨཙྪེརཏརཾ ཀུམཱར, ན ནོ སུཏཾ ཝཱ ཨཐ ཝཱཔི དིཊྛཾ;

ཨཏཱིཏམཱནུསྶཀམེཝ སབྦཾ, དིསྭཱ ན ཏཔྤཱམ ཨནོམཝཎྞཾ.

༦༡༧.

‘‘ཝེཧཱཡསཾ པོཀྑརཉྙོ སཝནྟི, པཧཱུཏམལྱཱ [པཧཱུཏམཱལྱཱ (སྱཱ.)] བཧུཔུཎྜརཱིཀཱ;

དུམཱ ཙིམེ ནིཙྩཕལཱུཔཔནྣཱ, ཨཏཱིཝ གནྡྷཱ སུརབྷིཾ པཝཱཡནྟི.

༦༡༨.

‘‘ཝེལཱུ༹རིཡཐམྦྷཱ སཏམུསྶིཏཱསེ, སིལཱཔཝཱལ༹སྶ ཙ ཨཱཡཏཾསཱ;

མསཱརགལླཱ སཧལོཧིཏངྒཱ, ཐམྦྷཱ ཨིམེ ཛོཏིརསཱམཡཱསེ.

༦༡༩.

‘‘སཧསྶཐམྦྷཾ ཨཏུལཱནུབྷཱཝཾ, ཏེསཱུཔརི སཱདྷུམིདཾ ཝིམཱནཾ;

རཏནནྟརཾ ཀཉྩནཝེདིམིསྶཾ, ཏཔནཱིཡཔཊྚེཧི ཙ སཱདྷུཚནྣཾ.

༦༢༠.

‘‘ཛམྦོནདུཏྟཏྟམིདཾ ¶ སུམཊྛོ, པཱསཱདསོཔཱཎཕལཱུཔཔནྣོ;

དལ༹ྷོ ཙ ཝགྒུ ཙ སུསངྒཏོ ཙ [ཝགྒུ སུམུཁོ སུསངྒཏོ (སཱི.)], ཨཏཱིཝ ནིཛ྄ཛྷཱནཁམོ མནུཉྙོ.

༦༢༡.

‘‘རཏནནྟརསྨིཾ བཧུཨནྣཔཱནཾ, པརིཝཱརིཏོ ཨཙྪརཱསངྒཎེན;

མུརཛཨཱལམྦརཏཱུརིཡགྷུཊྛོ, ཨབྷིཝནྡིཏོསི ཐུཏིཝནྡནཱཡ.

༦༢༢.

‘‘སོ མོདསི ནཱརིགཎཔྤབོདྷནོ, ཝིམཱནཔཱསཱདཝརེ མནོརམེ;

ཨཙིནྟིཡོ སབྦགུཎཱུཔཔནྣོ, རཱཛཱ ཡཐཱ ཝེསྶཝཎོ ནལི༹ནྱཱ [ནལི༹ཉྙཾ (ཀ.)].

༦༢༣.

‘‘དེཝོ ནུ ཨཱསི ཨུདཝཱསི ཡཀྑོ, ཨུདཱཧུ དེཝིནྡོ མནུསྶབྷཱུཏོ;

པུཙྪནྟི ཏཾ ཝཱཎིཛཱ སཏྠཝཱཧཱ, ཨཱཙིཀྑ ཀོ ནཱམ ཏུཝཾསི ཡཀྑོ’’ཏི.

༦༢༤.

‘‘སེརཱིསཀོ ནཱམ ཨཧམྷི ཡཀྑོ, ཀནྟཱརིཡོ ཝཎྞུཔཐམྷི གུཏྟོ;

ཨིམཾ པདེསཾ ཨབྷིཔཱལཡཱམི, ཝཙནཀརོ ཝེསྶཝཎསྶ རཉྙོ’’ཏི.

༦༢༥.

‘‘ཨདྷིཙྩལདྡྷཾ པརིཎཱམཛཾ ཏེ, སཡཾ ཀཏཾ ཨུདཱཧུ དེཝེཧི དིནྣཾ;

པུཙྪནྟི ཏཾ ཝཱཎིཛཱ སཏྠཝཱཧཱ, ཀཐཾ ཏཡཱ ལདྡྷམིདཾ མནུཉྙ’’ནྟི.

༦༢༦.

‘‘ནཱདྷིཙྩལདྡྷཾ ན པརིཎཱམཛཾ མེ, ན སཡཾ ཀཏཾ ན ཧི དེཝེཧི དིནྣཾ;

སཀེཧི ཀམྨེཧི ཨཔཱཔཀེཧི, པུཉྙེཧི མེ ལདྡྷམིདཾ མནུཉྙ’’ནྟི.

༦༢༧.

‘‘ཀིཾ ¶ ཏེ ཝཏཾ ཀིཾ པན བྲཧྨཙརིཡཾ, ཀིསྶ སུཙིཎྞསྶ ཨཡཾ ཝིཔཱཀོ;

པུཙྪནྟི ཏཾ ཝཱཎིཛཱ སཏྠཝཱཧཱ, ཀཐཾ ཏཡཱ ལདྡྷམིདཾ ཝིམཱན’’ནྟི.

༦༢༨.

‘‘མམཾ ¶ པཱཡཱསཱིཏི ཨཧུ སམཉྙཱ, རཛྫཾ ཡདཱ ཀཱརཡིཾ ཀོསལཱནཾ;

ནཏྠིཀདིཊྛི ཀདརིཡོ པཱཔདྷམྨོ, ཨུཙྪེདཝཱདཱི ཙ ཏདཱ ཨཧོསིཾ.

༦༢༩.

‘‘སམཎོ ཙ ཁོ ཨཱསི ཀུམཱརཀསྶཔོ, བཧུསྶུཏོ ཙིཏྟཀཐཱི ཨུལཱ༹རོ;

སོ མེ ཏདཱ དྷམྨཀཐཾ ཨབྷཱསི, དིཊྛིཝིསཱུཀཱནི ཝིནོདཡཱི མེ.

༦༣༠.

‘‘ཏཱཧཾ ཏསྶ དྷམྨཀཐཾ སུཎིཏྭཱ, ཨུཔཱསཀཏྟཾ པཊིདེཝཡིསྶཾ;

པཱཎཱཏིཔཱཏཱ ཝིརཏོ ཨཧོསིཾ, ལོཀེ ཨདིནྣཾ པརིཝཛྫཡིསྶཾ;

ཨམཛྫཔོ ནོ ཙ མུསཱ ཨབྷཱཎིཾ, སཀེན དཱརེན ཙ ཨཧོསི ཏུཊྛོ.

༦༣༡.

‘‘ཏཾ མེ ཝཏཾ ཏཾ པན བྲཧྨཙརིཡཾ, ཏསྶ སུཙིཎྞསྶ ཨཡཾ ཝིཔཱཀོ;

ཏེཧེཝ ཀམྨེཧི ཨཔཱཔཀེཧི, པུཉྙེཧི མེ ལདྡྷམིདཾ ཝིམཱན’’ནྟི.

༦༣༢.

‘‘སཙྩཾ ཀིརཱཧཾསུ ནརཱ སཔཉྙཱ, ཨནཉྙཐཱ ཝཙནཾ པཎྜིཏཱནཾ;

ཡཧིཾ ཡཧིཾ གཙྪཏི པུཉྙཀམྨོ, ཏཧིཾ ཏཧིཾ མོདཏི ཀཱམཀཱམཱི.

༦༣༣.

‘‘ཡཧིཾ ཡཧིཾ སོཀཔརིདྡཝོ ཙ, ཝདྷོ ཙ བནྡྷོ ཙ པརིཀྐིལེསོ;

ཏཧིཾ ཏཧིཾ གཙྪཏི པཱཔཀམྨོ, ན མུཙྩཏི དུགྒཏིཡཱ ཀདཱཙཱི’’ཏི.

༦༣༤.

‘‘སམྨཱུལ༹ྷརཱུཔོཝ ¶ ཛནོ ཨཧོསི, ཨསྨིཾ མུཧུཏྟེ ཀལལཱིཀཏོཝ;

ཛནསྶིམསྶ ཏུཡ྄ཧཉྩ ཀུམཱར, ཨཔྤཙྩཡོ ཀེན ནུ ཁོ ཨཧོསཱི’’ཏི.

༦༣༥.

‘‘ཨིམེ ཙ སིརཱིསཝནཱ [ཨིམེ སིརཱིསཱུཔཝནཱ ཙ (སཱི.), ཨིམེཔི སིརཱིསཝནཱ ཙ (པཱི. ཀ.)] ཏཱཏཱ, དིབྦཱ གནྡྷཱ སུརབྷཱི སམྤཝནྟི;

ཏེ སམྤཝཱཡནྟི ཨིམཾ ཝིམཱནཾ, དིཝཱ ཙ རཏྟོ ཙ ཏམཾ ནིཧནྟྭཱ.

༦༣༦.

‘‘ཨིམེསཉྩ ཁོ ཝསྶསཏཙྩཡེན, སིཔཱཊིཀཱ ཕལཏི ཨེཀམེཀཱ;

མཱནུསྶཀཾ ཝསྶསཏཾ ཨཏཱིཏཾ, ཡདགྒེ ཀཱཡམྷི ཨིདྷཱུཔཔནྣོ.

༦༣༧.

‘‘དིསྭཱནཧཾ ཝསྶསཏཱནི པཉྩ, ཨསྨིཾ ཝིམཱནེ ཋཏྭཱན ཏཱཏཱ;

ཨཱཡུཀྑཡཱ པུཉྙཀྑཡཱ ཙཝིསྶཾ, ཏེནེཝ སོཀེན པམུཙྪིཏོསྨཱི’’ཏི.

༦༣༨.

‘‘ཀཐཾ ནུ སོཙེཡྻ ཏཐཱཝིདྷོ སོ, ལདྡྷཱ ཝིམཱནཾ ཨཏུལཾ ཙིརཱཡ;

ཡེ ཙཱཔི ཁོ ཨིཏྟརམུཔཔནྣཱ, ཏེ ནཱུན སོཙེཡྻུཾ པརིཏྟཔུཉྙཱ’’ཏི.

༦༣༩.

‘‘ཨནུཙྪཝིཾ ཨོཝདིཡཉྩ མེ ཏཾ, ཡཾ མཾ ཏུམྷེ པེཡྻཝཱཙཾ ཝདེཐ;

ཏུམྷེ ཙ ཁོ ཏཱཏཱ མཡཱནུགུཏྟཱ, ཡེནིཙྪཀཾ ཏེན པལེཐ སོཏྠི’’ནྟི.

༦༤༠.

‘‘གནྟྭཱ མཡཾ སིནྡྷུསོཝཱིརབྷཱུམིཾ, དྷནྣཏྠིཀཱ ཨུདྡཡཾ པཏྠཡཱནཱ;

ཡཐཱཔཡོགཱ པརིཔུཎྞཙཱགཱ, ཀཱཧཱམ སེརཱིསམཧཾ ཨུལཱ༹ར’’ནྟི.

༦༤༡.

‘‘མཱ ¶ ཙེཝ སེརཱིསམཧཾ ཨཀཏྠ, སབྦཉྩ ཝོ བྷཝིསྶཏི ཡཾ ཝདེཐ;

པཱཔཱནི ཀམྨཱནི ཝིཝཛྫཡཱཐ, དྷམྨཱནུཡོགཉྩ ཨདྷིཊྛཧཱཐ.

༦༤༢.

‘‘ཨུཔཱསཀོ ཨཏྠི ཨིམམྷི སངྒྷེ, བཧུསྶུཏོ སཱིལཝཏཱུཔཔནྣོ;

སདྡྷོ ཙ ཙཱགཱི ཙ སུཔེསལོ ཙ, ཝིཙཀྑཎོ སནྟུསིཏོ མུཏཱིམཱ.

༦༤༣.

‘‘སཉྫཱནམཱནོ ¶ ན མུསཱ བྷཎེཡྻ, པརཱུཔགྷཱཏཱཡ ཙ ཙེཏཡེཡྻ;

ཝེབྷཱུཏིཀཾ པེསུཎཾ ནོ ཀརེཡྻ, སཎྷཉྩ ཝཱཙཾ སཁིལཾ བྷཎེཡྻ.

༦༤༤.

‘‘སགཱརཝོ སཔྤཊིསྶོ ཝིནཱིཏོ, ཨཔཱཔཀོ ཨདྷིསཱིལེ ཝིསུདྡྷོ;

སོ མཱཏརཾ པིཏརཉྩཱཔི ཛནྟུ, དྷམྨེན པོསེཏི ཨརིཡཝུཏྟི.

༦༤༥.

‘‘མཉྙེ སོ མཱཏཱཔིཏཱུནཾ ཀཱརཎཱ, བྷོགཱནི པརིཡེསཏི ན ཨཏྟཧེཏུ;

མཱཏཱཔིཏཱུནཉྩ ཡོ ཨཙྩཡེན, ནེཀྑམྨཔོཎོ ཙརིསྶཏི བྲཧྨཙརིཡཾ.

༦༤༦.

‘‘ཨུཛཱུ ཨཝངྐོ ཨསཋོ ཨམཱཡོ, ན ལེསཀཔྤེན ཙ ཝོཧརེཡྻ;

སོ ཏཱདིསོ སུཀཏཀམྨཀཱརཱི, དྷམྨེ ཋིཏོ ཀིནྟི ལབྷེཐ དུཀྑཾ.

༦༤༧.

‘‘ཏཾ ཀཱརཎཱ པཱཏུཀཏོམྷི ཨཏྟནཱ, ཏསྨཱ དྷམྨཾ པསྶཐ ཝཱཎིཛཱསེ;

ཨཉྙཏྲ ཏེནིཧ བྷསྨཱི [བྷསྨི (སྱཱ.), བྷསྨ (ཀ.)] བྷཝེཐ, ཨནྡྷཱཀུལཱ ཝིཔྤནཊྛཱ ཨརཉྙེ;

ཏཾ ཁིཔྤམཱནེན ལཧུཾ པརེན, སུཁོ ཧཝེ སཔྤུརིསེན སངྒམོ’’ཏི.

༦༤༨.

‘‘ཀིཾ ¶ ནཱམ སོ ཀིཉྩ ཀརོཏི ཀམྨཾ, ཀིཾ ནཱམདྷེཡྻཾ ཀིཾ པན ཏསྶ གོཏྟཾ;

མཡམྤི ནཾ དཊྛུཀཱམམྷ ཡཀྑ, ཡསྶཱནུཀམྤཱཡ ཨིདྷཱགཏོསི;

ལཱབྷཱ ཧི ཏསྶ ཡསྶ ཏུཝཾ པིཧེསཱི’’ཏི.

༦༤༩.

‘‘ཡོ ཀཔྤཀོ སམྦྷཝནཱམདྷེཡྻོ, ཨུཔཱསཀོ ཀོཙྪཕལཱུཔཛཱིཝཱི;

ཛཱནཱཐ ནཾ ཏུམྷཱཀཾ པེསིཡོ སོ, མཱ ཁོ ནཾ ཧཱིལི༹ཏྠ སུཔེསལོ སོ’’ཏི.

༦༥༠.

‘‘ཛཱནཱམསེ ཡཾ ཏྭཾ པཝདེསི ཡཀྑ, ན ཁོ ནཾ ཛཱནཱམ ས ཨེདིསོཏི;

མཡམྤི ནཾ པཱུཛཡིསྶཱམ ཡཀྑ, སུཏྭཱན ཏུཡ྄ཧཾ ཝཙནཾ ཨུལཱ༹ར’’ནྟི.

༦༥༡.

‘‘ཡེ ཀེཙི ཨིམསྨིཾ སཏྠེ མནུསྶཱ, དཧརཱ མཧནྟཱ ཨཐཝཱཔི མཛ྄ཛྷིམཱ;

སབྦེཝ ཏེ ཨཱལམྦནྟུ ཝིམཱནཾ, པསྶནྟུ པུཉྙཱནཾ ཕལཾ ཀདརིཡཱ’’ཏི.

༦༥༢.

ཏེ ཏཏྠ སབྦེཝ ‘ཨཧཾ པུརེ’ཏི, ཏཾ ཀཔྤཀཾ ཏཏྠ པུརཀྑཏྭཱ [པུརཀྑིཔིཏྭཱ (སཱི.)];

སབྦེཝ ཏེ ཨཱལམྦིཾསུ ཝིམཱནཾ, མསཀྐསཱརཾ ཝིཡ ཝཱསཝསྶ.

༦༥༣.

ཏེ ཏཏྠ སབྦེཝ ‘ཨཧཾ པུརེ’ཏི, ཨུཔཱསཀཏྟཾ པཊིཝེདཡིཾསུ;

པཱཎཱཏིཔཱཏཱ པཊིཝིརཏཱ ཨཧེསུཾ, ལོཀེ ཨདིནྣཾ པརིཝཛྫཡིཾསུ;

ཨམཛྫཔཱ ནོ ཙ མུསཱ བྷཎིཾསུ, སཀེན དཱརེན ཙ ཨཧེསུཾ ཏུཊྛཱ.

༦༥༤.

ཏེ ¶ ཏཏྠ སབྦེཝ ‘ཨཧཾ པུརེ’ཏི, ཨུཔཱསཀཏྟཾ པཊིཝེདཡིཏྭཱ;

པཀྐཱམི སཏྠོ ཨནུམོདམཱནོ, ཡཀྑིདྡྷིཡཱ ཨནུམཏོ པུནཔྤུནཾ.

༦༥༥.

གནྟྭཱན ཏེ སིནྡྷུསོཝཱིརབྷཱུམིཾ, དྷནཏྠིཀཱ ཨུདྡཡཾ [ཨུདཡ (པཱི. ཀ.)] པཏྠཡཱནཱ;

ཡཐཱཔཡོགཱ པརིཔུཎྞལཱབྷཱ, པཙྩཱགམུཾ པཱཊལིཔུཏྟམཀྑཏཾ.

༦༥༦.

གནྟྭཱན ཏེ སངྒྷརཾ སོཏྠིཝནྟོ, པུཏྟེཧི དཱརེཧི སམངྒིབྷཱུཏཱ;

ཨཱནནྡཱི ཝིཏྟཱ སུམནཱ པཏཱིཏཱ, ཨཀཾསུ སེརཱིསམཧཾ ཨུལཱ༹རཾ;

སེརཱིསཀཾ ཏེ པརིཝེཎཾ མཱཔཡིཾསུ.

༦༥༧.

ཨེཏཱདིསཱ ¶ སཔྤུརིསཱན སེཝནཱ, མཧཏྠིཀཱ དྷམྨགུཎཱན སེཝནཱ;

ཨེཀསྶ ཨཏྠཱཡ ཨུཔཱསཀསྶ, སབྦེཝ སཏྟཱ སུཁིཏཱ [སུཁིནོ (པཱི. ཀ.)] ཨཧེསུནྟི.

སེརཱིསཀཔེཏཝཏྠུ དུཏིཡཾ.

བྷཱཎཝཱརཾ ཏཏིཡཾ ནིཊྛིཏཾ.

༣. ནནྡཀཔེཏཝཏྠུ

༦༥༨.

རཱཛཱ ¶ པིངྒལཀོ ནཱམ, སུརཊྛཱནཾ ཨདྷིཔཏི ཨཧུ;

མོརིཡཱནཾ ཨུཔཊྛཱནཾ གནྟྭཱ, སུརཊྛཾ པུནརཱགམཱ.

༦༥༩.

ཨུཎྷེ མཛ྄ཛྷནྷིཀེ [མཛ྄ཛྷནྟིཀེ (སབྦཏྠ)] ཀཱལེ, རཱཛཱ པངྐཾ [ཝངྐཾ (ཀ.)] ཨུཔཱགམི;

ཨདྡས མགྒཾ རམཎཱིཡཾ, པེཏཱནཾ ཏཾ ཝཎྞུཔཐཾ [ཝཎྞནཱཔཐཾ (སཱི. སྱཱ.)].

༦༦༠.

སཱརཐིཾ ¶ ཨཱམནྟཡཱི རཱཛཱ –

‘‘ཨཡཾ མགྒོ རམཎཱིཡོ, ཁེམོ སོཝཏྠིཀོ སིཝོ;

ཨིམིནཱ སཱརཐི ཡཱམ, སུརཊྛཱནཾ སནྟིཀེ ཨིཏོ’’.

༦༦༡.

ཏེན ¶ པཱཡཱསི སོརཊྛོ, སེནཱཡ ཙཏུརངྒིནིཡཱ;

ཨུབྦིགྒརཱུཔོ པུརིསོ, སོརཊྛཾ ཨེཏདབྲཝི.

༦༦༢.

‘‘ཀུམྨགྒཾ པཊིཔནྣམྷཱ, བྷིཾསནཾ ལོམཧཾསནཾ;

པུརཏོ དིསྶཏི མགྒོ, པཙྪཏོ ཙ ན དིསྶཏི.

༦༦༣.

‘‘ཀུམྨགྒཾ པཊིཔནྣམྷཱ, ཡམཔུརིསཱན སནྟིཀེ;

ཨམཱནུསོ ཝཱཡཏི གནྡྷོ, གྷོསོ སུཡྻཏི [སཱུཡཏི (སཱི. སྱཱ.)] དཱརུཎོ’’.

༦༦༤.

སཾཝིགྒོ རཱཛཱ སོརཊྛོ, སཱརཐིཾ ཨེཏདབྲཝི;

‘‘ཀུམྨགྒཾ པཊིཔནྣམྷཱ, བྷིཾསནཾ ལོམཧཾསནཾ;

པུརཏོ དིསྶཏི མགྒོ, པཙྪཏོ ཙ ན དིསྶཏི.

༦༦༥.

‘‘ཀུམྨགྒཾ པཊིཔནྣམྷཱ, ཡམཔུརིསཱན སནྟིཀེ;

ཨམཱནུསོ ཝཱཡཏི གནྡྷོ, གྷོསོ སུཡྻཏི དཱརུཎོ’’.

༦༦༦.

ཧཏྠིཀྑནྡྷཾ སམཱརུཡ྄ཧ, ཨོལོཀེནྟོ ཙཏུདྡིསཾ [ཙཏུདྡིསྶཱ (ཀ.)];

ཨདྡས ནིགྲོདྷཾ རམཎཱིཡཾ [རུཀྑཾ ནིགྲོདྷཾ (སྱཱ. ཀ.)], པཱདཔཾ ཚཱཡཱསམྤནྣཾ;

ནཱིལབྦྷཝཎྞསདིསཾ, མེགྷཝཎྞསིརཱིནིབྷཾ.

༦༦༧.

སཱརཐིཾ ¶ ¶ ཨཱམནྟཡཱི རཱཛཱ, ‘‘ཀིཾ ཨེསོ དིསྶཏི བྲཧཱ;

ནཱིལབྦྷཝཎྞསདིསོ, མེགྷཝཎྞསིརཱིནིབྷོ’’.

༦༦༨.

‘‘ནིགྲོདྷོ སོ མཧཱརཱཛ, པཱདཔོ ཚཱཡཱསམྤནྣོ;

ནཱིལབྦྷཝཎྞསདིསོ ¶ , མེགྷཝཎྞསིརཱིནིབྷོ’’.

༦༦༩.

ཏེན པཱཡཱསི སོརཊྛོ, ཡེན སོ དིསྶཏེ བྲཧཱ;

ནཱིལབྦྷཝཎྞསདིསོ, མེགྷཝཎྞསིརཱིནིབྷོ.

༦༧༠.

ཧཏྠིཀྑནྡྷཏོ ཨོརུཡ྄ཧ, རཱཛཱ རུཀྑཾ ཨུཔཱགམི;

ནིསཱིདི རུཀྑམཱུལསྨིཾ, སཱམཙྩོ སཔརིཛྫནོ;

པཱུརཾ པཱནཱིཡསརཀཾ, པཱུཝེ ཝིཏྟེ ཙ ཨདྡས.

༦༧༡.

པུརིསོ ¶ ཙ དེཝཝཎྞཱི, སབྦཱབྷརཎབྷཱུསིཏོ;

ཨུཔསངྐམིཏྭཱ རཱཛཱནཾ, སོརཊྛཾ ཨེཏདབྲཝི.

༦༧༢.

‘‘སྭཱགཏཾ ཏེ མཧཱརཱཛ, ཨཐོ ཏེ ཨདུརཱགཏཾ;

པིཝཏུ དེཝོ པཱནཱིཡཾ, པཱུཝེ ཁཱད ཨརིནྡམ’’.

༦༧༣.

པིཝིཏྭཱ རཱཛཱ པཱནཱིཡཾ, སཱམཙྩོ སཔརིཛྫནོ;

པཱུཝེ ཁཱདིཏྭཱ པིཏྭཱ ཙ, སོརཊྛོ ཨེཏདབྲཝི.

༦༧༤.

‘‘དེཝཏཱ ནུསི གནྡྷབྦོ, ཨདུ སཀྐོ པུརིནྡདོ;

ཨཛཱནནྟཱ ཏཾ པུཙྪཱམ, ཀཐཾ ཛཱནེམུ ཏཾ མཡ’’ནྟི.

༦༧༥.

‘‘ནཱམྷི དེཝོ ན གནྡྷབྦོ, ནཱཔི [ནམྷི (ཀ.)] སཀྐོ པུརིནྡདོ;

པེཏོ ཨཧཾ མཧཱརཱཛ, སུརཊྛཱ ཨིདྷ མཱགཏོ’’ཏི.

༦༧༦.

‘‘ཀིཾསཱིལོ ཀིཾསམཱཙཱརོ, སུརཊྛསྨིཾ པུརེ ཏུཝཾ;

ཀེན ཏེ བྲཧྨཙརིཡེན, ཨཱནུབྷཱཝོ ཨཡཾ ཏཝཱ’’ཏི.

༦༧༧.

‘‘ཏཾ སུཎོཧི མཧཱརཱཛ, ཨརིནྡམ རཊྛཝཌྜྷན;

ཨམཙྩཱ པཱརིསཛྫཱ ཙ, བྲཱཧྨཎོ ཙ པུརོཧིཏོ.

༦༧༨.

‘‘སུརཊྛསྨིཾ ཨཧཾ དེཝ, པུརིསོ པཱཔཙེཏསོ;

མིཙྪཱདིཊྛི ཙ དུསྶཱིལོ, ཀདརིཡོ པརིབྷཱསཀོ.

༦༧༩.

‘‘‘དདནྟཱནཾ ¶ ཀརོནྟཱནཾ, ཝཱརཡིསྶཾ བཧུཛྫནཾ;

ཨཉྙེསཾ དདམཱནཱནཾ, ཨནྟརཱཡཀརོ ཨཧཾ.

༦༨༠.

‘‘‘ཝིཔཱཀོ ནཏྠི དཱནསྶ, སཾཡམསྶ ཀུཏོ ཕལཾ;

ནཏྠི ཨཱཙརིཡོ ནཱམ, ཨདནྟཾ ཀོ དམེསྶཏི.

༦༨༡.

‘‘‘སམཏུལྱཱནི ¶ བྷཱུཏཱནི, ཀུཏོ [ཀུལེ (སྱཱ. ཀ.)] ཛེཊྛཱཔཙཱཡིཀོ;

ནཏྠི བལཾ ཝཱིརིཡཾ ཝཱ, ཀུཏོ ཨུཊྛཱནཔོརིསཾ.

༦༨༢.

‘‘‘ནཏྠི དཱནཕལཾ ནཱམ, ན ཝིསོདྷེཏི ཝེརིནཾ;

ལདྡྷེཡྻཾ ལབྷཏེ མཙྩོ, ནིཡཏིཔརིཎཱམཛཾ [པརིཎཱམཛཱ (སཱི. ཀ.)].

༦༨༣.

‘‘‘ནཏྠི ¶ མཱཏཱ པིཏཱ བྷཱཏཱ, ལོཀོ ནཏྠི ཨིཏོ པརཾ;

ནཏྠི དིནྣཾ ནཏྠི ཧུཏཾ, སུནིཧིཏཾ ན ཝིཛྫཏི.

༦༨༤.

‘‘‘ཡོཔི ¶ ཧནེཡྻ པུརིསཾ, པརསྶ ཚིནྡཏེ [པུརིསསྶ ཚིནྡེ (སྱཱ. ཀ.)] སིརཾ;

ན ཀོཙི ཀཉྩི ཧནཏི, སཏྟནྣཾ ཝིཝརམནྟརེ.

༦༨༥.

‘‘‘ཨཙྪེཛྫཱབྷེཛྫོ ཧི [བྷེཛྫོ (སཱི.), ཨབྷེཛྫོ (སྱཱ.), བྷེཛྫཱསི (ཀ.)] ཛཱིཝོ, ཨཊྛཾསོ གུལ༹པརིམཎྜལོ;

ཡོཛནཱནཾ སཏཾ པཉྩ, ཀོ ཛཱིཝཾ ཚེཏྟུམརཧཏི.

༦༨༦.

‘‘‘ཡཐཱ སུཏྟགུལེ༹ ཁིཏྟེ, ནིབྦེཋེནྟཾ པལཱཡཏི;

ཨེཝམེཝ ཙ སོ ཛཱིཝོ, ནིབྦེཋེནྟོ པལཱཡཏི.

༦༨༧.

‘‘‘ཡཐཱ གཱམཏོ ནིཀྑམྨ, ཨཉྙཾ གཱམཾ པཝིསཏི;

ཨེཝམེཝ ཙ སོ ཛཱིཝོ, ཨཉྙཾ བོནྡིཾ པཝིསཏི.

༦༨༨.

‘‘‘ཡཐཱ ¶ གེཧཏོ ནིཀྑམྨ, ཨཉྙཾ གེཧཾ པཝིསཏི;

ཨེཝམེཝ ཙ སོ ཛཱིཝོ, ཨཉྙཾ བོནྡིཾ པཝིསཏི.

༦༨༩.

‘‘‘ཙུལླཱསཱིཏི [ཙུལཱ༹སཱིཏི (སཱི. སྱཱ. ཀ.)] མཧཱཀཔྤིནོ [མཧཱཀཔྤུནོ (སཱི.)], སཏསཧསྶཱནི ཧི;

ཡེ བཱལཱ ཡེ ཙ པཎྜིཏཱ, སཾསཱརཾ ཁེཔཡིཏྭཱན;

དུཀྑསྶནྟཾ ཀརིསྶརེ.

༦༩༠.

‘‘‘མིཏཱནི སུཁདུཀྑཱནི, དོཎེཧི པིཊཀེཧི ཙ;

ཛིནོ སབྦཾ པཛཱནཱཏི’, སམྨཱུལ༹ྷཱ ཨིཏརཱ པཛཱ.

༦༩༡.

‘‘ཨེཝཾདིཊྛི པུརེ ཨཱསིཾ, སམྨཱུལ༹ྷོ མོཧཔཱརུཏོ;

མིཙྪཱདིཊྛི ཙ དུསྶཱིལོ, ཀདརིཡོ པརིབྷཱསཀོ.

༦༩༢.

‘‘ཨོརཾ མེ ཚཧི མཱསེཧི, ཀཱལངྐིརིཡཱ བྷཝིསྶཏི;

ཨེཀནྟཀཊུཀཾ གྷོརཾ, ནིརཡཾ པཔཏིསྶཧཾ.

༦༩༣.

[པེ. ཝ. ༧༠] ‘‘ཙཏུཀྐཎྞཾ ཙཏུདྭཱརཾ, ཝིབྷཏྟཾ བྷཱགསོ མིཏཾ;

ཨཡོཔཱཀཱརཔརིཡནྟཾ, ཨཡསཱ པཊིཀུཛྫིཏཾ.

༦༩༤.

[པེ. ཝ. ༧༡] ‘‘ཏསྶ ཨཡོམཡཱ བྷཱུམི, ཛལིཏཱ ཏེཛསཱ ཡུཏཱ;

སམནྟཱ ཡོཛནསཏཾ, ཕརིཏྭཱ ཏིཊྛཏི སབྦདཱ.

༦༩༥.

‘‘ཝསྶཱནི ¶ སཏསཧསྶཱནི, གྷོསོ སུཡྻཏི ཏཱཝདེ;

ལཀྑོ ཨེསོ མཧཱརཱཛ, སཏབྷཱགཝསྶཀོཊིཡོ.

༦༩༦.

‘‘ཀོཊིསཏསཧསྶཱནི ¶ , ནིརཡེ པཙྩརེ ཛནཱ;

མིཙྪཱདིཊྛཱི ཙ དུསྶཱིལཱ, ཡེ ཙ ཨརིཡཱུཔཝཱདིནོ.

༦༩༧.

‘‘ཏཏྠཱཧཾ དཱིགྷམདྡྷཱནཾ, དུཀྑཾ ཝེདིསྶ ཝེདནཾ;

ཕལཾ པཱཔསྶ ཀམྨསྶ, ཏསྨཱ སོཙཱམཧཾ བྷུསཾ.

༦༩༨.

‘‘ཏཾ ¶ ¶ སུཎོཧི མཧཱརཱཛ, ཨརིནྡམ རཊྛཝཌྜྷན;

དྷཱིཏཱ མཡ྄ཧཾ མཧཱརཱཛ, ཨུཏྟརཱ བྷདྡམཏྠུ ཏེ.

༦༩༩.

‘‘ཀརོཏི བྷདྡཀཾ ཀམྨཾ, སཱིལེསུཔོསཐེ རཏཱ;

སཉྙཏཱ སཾཝིབྷཱགཱི ཙ, ཝདཉྙཱུ ཝཱིཏམཙྪརཱ.

༧༠༠.

‘‘ཨཁཎྜཀཱརཱི སིཀྑཱཡ, སུཎྷཱ པརཀུལེསུ ཙ;

ཨུཔཱསིཀཱ སཀྱམུནིནོ, སམྦུདྡྷསྶ སིརཱིམཏོ.

༧༠༡.

‘‘བྷིཀྑུ ཙ སཱིལསམྤནྣོ, གཱམཾ པིཎྜཱཡ པཱཝིསི;

ཨོཀྑིཏྟཙཀྑུ སཏིམཱ, གུཏྟདྭཱརོ སུསཾཝུཏོ.

༧༠༢.

‘‘སཔདཱནཾ ཙརམཱནོ, ཨགམཱ ཏཾ ནིཝེསནཾ;

‘ཏམདྡས མཧཱརཱཛ, ཨུཏྟརཱ བྷདྡམཏྠུ ཏེ’.

༧༠༣.

‘‘པཱུརཾ པཱནཱིཡསརཀཾ, པཱུཝེ ཝིཏྟེ ཙ སཱ ཨདཱ;

‘པིཏཱ མེ ཀཱལངྐཏོ, བྷནྟེ ཏསྶེཏཾ ཨུཔཀཔྤཏུ’.

༧༠༤.

‘‘སམནནྟརཱནུདྡིཊྛེ, ཝིཔཱཀོ ཨུདཔཛྫཐ;

བྷུཉྫཱམི ཀཱམཀཱམཱིཧཾ, རཱཛཱ ཝེསྶཝཎོ ཡཐཱ.

༧༠༥.

‘‘ཏཾ སུཎོཧི མཧཱརཱཛ, ཨརིནྡམ རཊྛཝཌྜྷན;

སདེཝཀསྶ ལོཀསྶ, བུདྡྷོ ཨགྒོ པཝུཙྩཏི;

ཏཾ བུདྡྷཾ སརཎཾ གཙྪ, སཔུཏྟདཱརོ ཨརིནྡམ.

༧༠༦.

‘‘ཨཊྛངྒིཀེན མགྒེན, ཕུསནྟི ཨམཏཾ པདཾ;

ཏཾ དྷམྨཾ སརཎཾ གཙྪ, སཔུཏྟདཱརོ ཨརིནྡམ.

༧༠༧.

‘‘ཙཏྟཱརོ ¶ ཙ པཊིཔནྣཱ [མགྒཔཊིཔནྣཱ (སཱི. སྱཱ.)], ཙཏྟཱརོ ཙ ཕལེ ཋིཏཱ;

ཨེས སངྒྷོ ཨུཛུབྷཱུཏོ, པཉྙཱསཱིལསམཱཧིཏོ;

ཏཾ སངྒྷཾ སརཎཾ གཙྪ, སཔུཏྟདཱརོ ཨརིནྡམ.

༧༠༨.

‘‘པཱཎཱཏིཔཱཏཱ ¶ ¶ ཝིརམསྶུ ཁིཔྤཾ, ལོཀེ ཨདིནྣཾ པརིཝཛྫཡསྶུ;

ཨམཛྫཔོ མཱ ཙ མུསཱ ཨབྷཱཎཱི, སཀེན དཱརེན ཙ ཧོཧི ཏུཊྛོ’’ཏི.

༧༠༩.

‘‘ཨཏྠཀཱམོསི མེ ཡཀྑ, ཧིཏཀཱམོསི དེཝཏེ;

ཀརོམི ཏུཡ྄ཧཾ ཝཙནཾ, ཏྭཾསི ཨཱཙརིཡོ མམ.

༧༡༠.

‘‘ཨུཔེམི སརཎཾ བུདྡྷཾ, དྷམྨཉྩཱཔི ཨནུཏྟརཾ;

སངྒྷཉྩ ནརདེཝསྶ, གཙྪཱམི སརཎཾ ཨཧཾ.

༧༡༡.

‘‘པཱཎཱཏིཔཱཏཱ ཝིརམཱམི ཁིཔྤཾ, ལོཀེ ཨདིནྣཾ པརིཝཛྫཡཱམི;

ཨམཛྫཔོ ནོ ཙ མུསཱ བྷཎཱམི, སཀེན དཱརེན ཙ ཧོམི ཏུཊྛོ.

༧༡༢.

‘‘ཨོཕུཎཱམི ¶ [ཨོཔུཎཱམི (སཱི.), ཨོཕུནཱམི (སྱཱ. ཀ.), ཨོཔུནཱམི (?)] མཧཱཝཱཏེ, ནདིཡཱ སཱིགྷགཱམིཡཱ;

ཝམཱམི པཱཔིཀཾ དིཊྛིཾ, བུདྡྷཱནཾ སཱསནེ རཏོ’’.

༧༡༣.

ཨིདཾ ཝཏྭཱན སོརཊྛོ, ཝིརམིཏྭཱ པཱཔདསྶནཱ [པཱཔདསྶནཾ (སྱཱ. ཀ.)];

ནམོ ¶ བྷགཝཏོ ཀཏྭཱ, པཱམོཀྑོ རཐམཱརུཧཱིཏི.

ནནྡཀཔེཏཝཏྠུ ཏཏིཡཾ.

༤. རེཝཏཱིཔེཏཝཏྠུ

༧༡༤.

[ཝི. ཝ. ༨༦༣] ‘‘ཨུཊྛེཧི རེཝཏེ སུཔཱཔདྷམྨེ, ཨཔཱརུཏདྭཱརེ ཨདཱནསཱིལེ;

ནེསྶཱམ ཏཾ ཡཏྠ ཐུནནྟི དུགྒཏཱ, སམཔྤིཏཱ [སམཛྫཏཱ (སཱི.)] ནེརཡིཀཱ དུཁེནཱ’’ཏི.

༧༡༥.

ཨིཙྩེཝ [ཨིཙྩེཝཾ (སྱཱ. ཀ.)] ཝཏྭཱན ཡམསྶ དཱུཏཱ, ཏེ དྭེ ཡཀྑཱ ལོཧིཏཀྑཱ བྲཧནྟཱ;

པཙྩེཀབཱཧཱསུ གཧེཏྭཱ རེཝཏཾ, པཀྐཱམཡུཾ དེཝགཎསྶ སནྟིཀེ.

༧༡༦.

‘‘ཨཱདིཙྩཝཎྞཾ ¶ རུཙིརཾ པབྷསྶརཾ, བྱམྷཾ སུབྷཾ ཀཉྩནཛཱལཚནྣཾ;

ཀསྶེཏམཱཀིཎྞཛནཾ ཝིམཱནཾ, སུརིཡསྶ རཾསཱིརིཝ ཛོཏམཱནཾ.

༧༡༧.

‘‘ནཱརཱིགཎཱ ཙནྡནསཱརལིཏྟཱ [ཙནྡནསཱརཱནུལིཏྟཱ (སྱཱ.)], ཨུབྷཏོ ཝིམཱནཾ ཨུཔསོབྷཡནྟི;

ཏཾ དིསྶཏི སུརིཡསམཱནཝཎྞཾ, ཀོ མོདཏི སགྒཔཏྟོ ཝིམཱནེ’’ཏི.

༧༡༨.

‘‘བཱརཱཎསིཡཾ ནནྡིཡོ ནཱམཱསི, ཨུཔཱསཀོ ཨམཙྪརཱི དཱནཔཏི ཝདཉྙཱུ;

ཏསྶེཏམཱཀིཎྞཛནཾ ཝིམཱནཾ, སུརིཡསྶ རཾསཱིརིཝ ཛོཏམཱནཾ.

༧༡༩.

‘‘ནཱརཱིགཎཱ ཙནྡནསཱརལིཏྟཱ, ཨུབྷཏོ ཝིམཱནཾ ཨུཔསོབྷཡནྟི;

ཏཾ དིསྶཏི སུརིཡསམཱནཝཎྞཾ, སོ མོདཏི སགྒཔཏྟོ ཝིམཱནེ’’ཏི.

༧༢༠.

‘‘ནནྡིཡསྶཱཧཾ ¶ བྷརིཡཱ, ཨགཱརིནཱི སབྦཀུལསྶ ཨིསྶརཱ;

བྷཏྟུ ཝིམཱནེ རམིསྶཱམི དཱནཧཾ, ན པཏྠཡེ ནིརཡདསྶནཱཡཱ’’ཏི.

༧༢༡.

‘‘ཨེསོ ཏེ ནིརཡོ སུཔཱཔདྷམྨེ, པུཉྙཾ ཏཡཱ ཨཀཏཾ ཛཱིཝལོཀེ;

ན ཧི མཙྪརཱི རོསཀོ པཱཔདྷམྨོ, སགྒཱུཔགཱནཾ ལབྷཏི སཧབྱཏ’’ནྟི.

༧༢༢.

‘‘ཀིཾ ནུ གཱུཐཉྩ མུཏྟཉྩ, ཨསུཙཱི པཊིདིསྶཏི;

དུགྒནྡྷཾ ཀིམིདཾ མཱིལ༹ྷཾ, ཀིམེཏཾ ཨུཔཝཱཡཏཱི’’ཏི.

༧༢༣.

‘‘ཨེས སཾསཝཀོ ནཱམ, གམྦྷཱིརོ སཏཔོརིསོ;

ཡཏྠ ཝསྶསཧསྶཱནི, ཏུཝཾ པཙྩསི རེཝཏེ’’ཏི.

༧༢༤.

‘‘ཀིཾ ¶ ནུ ཀཱཡེན ཝཱཙཱཡ, མནསཱ དུཀྐཊཾ ཀཏཾ;

ཀེན སཾསཝཀོ ལདྡྷོ, གམྦྷཱིརོ སཏཔོརིསོ’’ཏི.

༧༢༥.

‘‘སམཎེ བྲཱཧྨཎེ ཙཱཔི, ཨཉྙེ ཝཱཔི ཝནིབྦཀེ;

མུསཱཝཱདེན ཝཉྩེསི, ཏཾ པཱཔཾ པཀཏཾ ཏཡཱ.

༧༢༦.

‘‘ཏེན སཾསཝཀོ ལདྡྷོ, གམྦྷཱིརོ སཏཔོརིསོ;

ཏཏྠ ཝསྶསཧསྶཱནི, ཏུཝཾ པཙྩསི རེཝཏེ.

༧༢༧.

‘‘ཧཏྠེཔི ཚིནྡནྟི ཨཐོཔི པཱདེ, ཀཎྞེཔི ཚིནྡནྟི ཨཐོཔི ནཱསཾ;

ཨཐོཔི ཀཱཀོལ༹གཎཱ སམེཙྩ, སངྒམྨ ཁཱདནྟི ཝིཕནྡམཱན’’ནྟི.

༧༢༨.

‘‘སཱདྷུ ཁོ མཾ པཊིནེཐ, ཀཱཧཱམི ཀུསལཾ བཧུཾ;

དཱནེན སམཙརིཡཱཡ, སཾཡམེན དམེན ཙ;

ཡཾ ཀཏྭཱ སུཁིཏཱ ཧོནྟི, ན ཙ པཙྪཱནུཏཔྤརེ’’ཏི.

༧༢༩.

‘‘པུརེ ཏུཝཾ པམཛྫིཏྭཱ, ཨིདཱནི པརིདེཝསི;

སཡཾ ཀཏཱནཾ ཀམྨཱནཾ, ཝིཔཱཀཾ ཨནུབྷོསྶསཱི’’ཏི.

༧༣༠.

‘‘ཀོ དེཝལོཀཏོ མནུསྶལོཀཾ, གནྟྭཱན པུཊྛོ མེ ཨེཝཾ ཝདེཡྻ;

‘ནིཀྑིཏྟདཎྜེསུ དདཱཐ དཱནཾ, ཨཙྪཱདནཾ སེཡྻ [སཡན (སཱི.)] མཐནྣཔཱནཾ;

ན ཧི མཙྪརཱི རོསཀོ པཱཔདྷམྨོ, སགྒཱུཔགཱནཾ ལབྷཏི སཧབྱཏཾ’.

༧༣༡.

‘‘སཱཧཾ ནཱུན ཨིཏོ གནྟྭཱ, ཡོནིཾ ལདྡྷཱན མཱནུསིཾ;

ཝདཉྙཱུ སཱིལསམྤནྣཱ, ཀཱཧཱམི ཀུསལཾ བཧུཾ;

དཱནེན སམཙརིཡཱཡ, སཾཡམེན དམེན ཙ.

༧༣༢.

‘‘ཨཱརཱམཱནི ཙ རོཔིསྶཾ, དུགྒེ སངྐམནཱནི ཙ;

པཔཉྩ ཨུདཔཱནཉྩ, ཝིཔྤསནྣེན ཙེཏསཱ.

༧༣༣.

‘‘ཙཱཏུདྡསིཾ ¶ པཉྩདསིཾ, ཡཱ ཙ པཀྑསྶ ཨཊྛམཱི;

པཱཊིཧཱརིཡཔཀྑཉྩ, ཨཊྛངྒསུསམཱགཏཾ.

༧༣༤.

‘‘ཨུཔོསཐཾ ཨུཔཝསིསྶཾ, སདཱ སཱིལེསུ སཾཝུཏཱ;

ན ཙ དཱནེ པམཛྫིསྶཾ, སཱམཾ དིཊྛམིདཾ མཡཱ’’ཏི.

༧༣༥.

ཨིཙྩེཝཾ ¶ ཝིཔྤལཔནྟིཾ, ཕནྡམཱནཾ ཏཏོ ཏཏོ;

ཁིཔིཾསུ ནིརཡེ གྷོརེ, ཨུདྡྷཾཔཱདཾ ཨཝཾསིརཾ.

༧༣༦.

‘‘ཨཧཾ པུརེ མཙྪརིནཱི ཨཧོསིཾ, པརིབྷཱསིཀཱ སམཎབྲཱཧྨཎཱནཾ;

ཝིཏཐེན ཙ སཱམིཀཾ ཝཉྩཡིཏྭཱ, པཙྩཱམཧཾ ནིརཡེ གྷོརརཱུཔེ’’ཏི.

རེཝཏཱིཔེཏཝཏྠུ ཙཏུཏྠཾ.

༥. ཨུཙྪུཔེཏཝཏྠུ

༧༣༧.

‘‘ཨིདཾ ¶ མམ ཨུཙྪུཝནཾ མཧནྟཾ, ནིབྦཏྟཏི པུཉྙཕལཾ ཨནཔྤཀཾ;

ཏཾ དཱནི མེ ན [ན དཱནི མེ ཏཾ (སཱི. ཀ.)] པརིབྷོགམེཏི, ཨཱཙིཀྑ བྷནྟེ ཀིསྶ ཨཡཾ ཝིཔཱཀོ.

༧༣༨.

‘‘ཧཉྙཱམི [ཝིཧཉྙཱམི (ཀ.)] ཁཛྫཱམི ཙ ཝཱཡམཱམི, པརིསཀྐཱམི པརིབྷུཉྫིཏུཾ ཀིཉྩི;

སྭཱཧཾ ཚིནྣཐཱམོ ཀཔཎོ ལཱལཔཱམི, ཀིསྶ [ཀིསྶསྶ (སཱི.), ཀིསྶསྶུ (?)] ཀམྨསྶ ཨཡཾ ཝིཔཱཀོ.

༧༣༩.

‘‘ཝིགྷཱཏོ ཙཱཧཾ པརིཔཏཱམི ཚམཱཡཾ, པརིཝཏྟཱམི ཝཱརིཙརོཝ གྷམྨེ;

རུདཏོ ཙ མེ [དཱུརཏོ ཙ མེ (སྱཱ. ཀ.)] ཨསྶུཀཱ ནིགྒལནྟི, ཨཱཙིཀྑ བྷནྟེ ཀིསྶ ཨཡཾ ཝིཔཱཀོ.

༧༤༠.

‘‘ཚཱཏོ ¶ ཀིལནྟོ ཙ པིཔཱསིཏོ ཙ, སནྟསྶིཏོ ¶ སཱཏསུཁཾ ན ཝིནྡེ;

པུཙྪཱམི ཏཾ ཨེཏམཏྠཾ བྷདནྟེ, ཀཐཾ ནུ ཨུཙྪུཔརིབྷོགཾ ལབྷེཡྻ’’ནྟི.

༧༤༡.

‘‘པུརེ ཏུཝཾ ཀམྨམཀཱསི ཨཏྟནཱ, མནུསྶབྷཱུཏོ པུརིམཱཡ ཛཱཏིཡཱ;

ཨཧཉྩ ཏཾ ཨེཏམཏྠཾ ཝདཱམི, སུཏྭཱན ཏྭཾ ཨེཏམཏྠཾ ཝིཛཱན.

༧༤༢.

‘‘ཨུཙྪུཾ ¶ ཏུཝཾ ཁཱདམཱནོ པཡཱཏོ, པུརིསོ ཙ ཏེ པིཊྛིཏོ ཨནྭགཙྪི;

སོ ཙ ཏཾ པཙྩཱསནྟོ ཀཐེསི, ཏསྶ ཏུཝཾ ན ཀིཉྩི ཨཱལཔིཏྠ.

༧༤༣.

‘‘སོ ཙ ཏཾ ཨབྷཎནྟཾ ཨཡཱཙི, ‘དེཧཡྻ ཨུཙྪུ’ནྟི ཙ ཏཾ ཨཝོཙ;

ཏསྶ ཏུཝཾ པིཊྛིཏོ ཨུཙྪུཾ ཨདཱསི, ཏསྶེཏཾ ཀམྨསྶ ཨཡཾ ཝིཔཱཀོ.

༧༤༤.

‘‘ཨིངྒྷ ཏྭཾ གནྟྭཱན པིཊྛིཏོ གཎྷེཡྻཱསི [ཨིངྒྷ ཏྭཾ པིཊྛིཏོ གཎྷ ཨུཙྪུཾ (སཱི.)], གཧེཏྭཱན ཏཾ ཁཱདསྶུ ཡཱཝདཏྠཾ;

ཏེནེཝ ཏྭཾ ཨཏྟམནོ བྷཝིསྶསི, ཧཊྛོ ཙུདགྒོ ཙ པམོདིཏོ ཙཱ’’ཏི.

༧༤༥.

གནྟྭཱན ¶ སོ པིཊྛིཏོ ཨགྒཧེསི, གཧེཏྭཱན ཏཾ ཁཱདི ཡཱཝདཏྠཾ;

ཏེནེཝ སོ ཨཏྟམནོ ཨཧོསི, ཧཊྛོ ཙུདགྒོ ཙ པམོདིཏོ ཙཱཏི.

ཨུཙྪུཔེཏཝཏྠུ པཉྩམཾ.

༦. ཀུམཱརཔེཏཝཏྠུ

༧༤༦.

‘‘སཱཝཏྠི ¶ ¶ ནཱམ ནགརཾ, ཧིམཝནྟསྶ པསྶཏོ;

ཏཏྠ ཨཱསུཾ དྭེ ཀུམཱརཱ, རཱཛཔུཏྟཱཏི མེ སུཏཾ.

༧༤༧.

‘‘སམྨཏྟཱ ¶ [པམཏྟཱ (ཀ.)] རཛནཱིཡེསུ, ཀཱམསྶཱདཱབྷིནནྡིནོ;

པཙྩུཔྤནྣསུཁེ གིདྡྷཱ, ན ཏེ པསྶིཾསུནཱགཏཾ.

༧༤༨.

‘‘ཏེ ཙུཏཱ ཙ མནུསྶཏྟཱ, པརལོཀཾ ཨིཏོ གཏཱ;

ཏེདྷ གྷོསེནྟྱདིསྶནྟཱ, པུབྦེ དུཀྐཊམཏྟནོ.

༧༤༩.

‘‘‘བཧཱུསུ ཝཏ [བཧུསྶུཏེསུ (སཱི. ཀ.)] སནྟེསུ, དེཡྻདྷམྨེ ཨུཔཊྛིཏེ;

ནཱསཀྑིམྷཱ ཙ ཨཏྟཱནཾ, པརིཏྟཾ ཀཱཏུཾ སུཁཱཝཧཾ.

༧༥༠.

‘‘‘ཀིཾ ཏཏོ པཱཔཀཾ ཨསྶ, ཡཾ ནོ རཱཛཀུལཱ ཙུཏཱ;

ཨུཔཔནྣཱ པེཏྟིཝིསཡཾ, ཁུཔྤིཔཱསསམཔྤིཏཱ [ཁུཔྤིཔཱསཱསམཔྤིཏཱ (སཱི. པཱི.)].

༧༥༡.

‘‘སཱམིནོ ཨིདྷ ཧུཏྭཱན, ཧོནྟི ཨསཱམིནོ ཏཧིཾ;

བྷམནྟི [ཙརནྟི (སཱི. པཱི.), མརནྟི (སྱཱ.)] ཁུཔྤིཔཱསཱཡ, མནུསྶཱ ཨུནྣཏོནཏཱ.

༧༥༢.

‘‘ཨེཏམཱདཱིནཝཾ ཉཏྭཱ, ཨིསྶརམདསམྦྷཝཾ;

པཧཱཡ ¶ ཨིསྶརམདཾ, བྷཝེ སགྒགཏོ ནརོ;

ཀཱཡསྶ བྷེདཱ སཔྤཉྙོ, སགྒཾ སོ ཨུཔཔཛྫཏཱི’’ཏི.

ཀུམཱརཔེཏཝཏྠུ ཚཊྛཾ.

༧. རཱཛཔུཏྟཔེཏཝཏྠུ

༧༥༣.

པུབྦེ ¶ ཀཏཱནཾ ཀམྨཱནཾ, ཝིཔཱཀོ མཐཡེ མནཾ;

རཱུཔེ སདྡེ རསེ གནྡྷེ, ཕོཊྛབྦེ ཙ མནོརམེ.

༧༥༤.

ནཙྩཾ གཱིཏཾ རཏིཾ ཁིཌྜཾ, ཨནུབྷུཏྭཱ ཨནཔྤཀཾ;

ཨུཡྻཱནེ པརིཙརིཏྭཱ, པཝིསནྟོ གིརིབྦཛཾ.

༧༥༥.

ཨིསིཾ སུནེཏྟ [སུནིཏ (ཀ.)] མདྡཀྑི, ཨཏྟདནྟཾ སམཱཧིཏཾ;

ཨཔྤིཙྪཾ ཧིརིསམྤནྣཾ, ཨུཉྪེ པཏྟགཏེ རཏཾ.

༧༥༦.

ཧཏྠིཀྑནྡྷཏོ ཨོརུཡ྄ཧ, ལདྡྷཱ བྷནྟེཏི ཙཱབྲཝི;

ཏསྶ པཏྟཾ གཧེཏྭཱན, ཨུཙྩཾ པགྒཡ྄ཧ ཁཏྟིཡོ.

༧༥༧.

ཐཎྜིལེ ¶ པཏྟཾ བྷིནྡིཏྭཱ, ཧསམཱནོ ཨཔཀྐམི;

‘‘རཉྙོ ཀིཏཝསྶཱཧཾ པུཏྟོ, ཀིཾ མཾ བྷིཀྑུ ཀརིསྶསི’’.

༧༥༨.

ཏསྶ ¶ ཀམྨསྶ ཕརུསསྶ, ཝིཔཱཀོ ཀཊུཀོ ཨཧུ;

ཡཾ རཱཛཔུཏྟོ ཝེདེསི, ནིརཡམྷི སམཔྤིཏོ.

༧༥༩.

ཚལེ༹ཝ ཙཏུརཱསཱིཏི, ཝསྶཱནི ནཝུཏཱནི ཙ;

བྷུསཾ དུཀྑཾ ནིགཙྪིཏྠོ, ནིརཡེ ཀཏཀིབྦིསོ.

༧༦༠.

ཨུཏྟཱནོཔི ཙ པཙྩིཏྠ, ནིཀུཛྫོ ཝཱམདཀྑིཎོ;

ཨུདྡྷཾཔཱདོ ཋིཏོ ཙེཝ, ཙིརཾ བཱལོ ཨཔཙྩཐ.

༧༦༡.

བཧཱུནི ¶ ཝསྶསཧསྶཱནི, པཱུགཱནི ནཧུཏཱནི ཙ;

བྷུསཾ དུཀྑཾ ནིགཙྪིཏྠོ, ནིརཡེ ཀཏཀིབྦིསོ.

༧༦༢.

ཨེཏཱདིསཾ ཁོ ཀཊུཀཾ, ཨཔྤདུཊྛཔྤདོསིནཾ;

པཙྩནྟི པཱཔཀམྨནྟཱ, ཨིསིམཱསཛྫ སུབྦཏཾ.

༧༦༣.

སོ ཏཏྠ བཧུཝསྶཱནི, ཝེདཡིཏྭཱ བཧུཾ དུཁཾ;

ཁུཔྤིཔཱསཧཏོ ནཱམ [ཁུཔྤིཔཱསཱཧཏོ ནཱམ (སཱི. པཱི)], པེཏོ ཨཱསི ཏཏོ ཙུཏོ.

༧༦༤.

ཨེཏམཱདཱིནཝཾ ཉཏྭཱ [དིསྭཱ (སཱི.)], ཨིསྶརམདསམྦྷཝཾ;

པཧཱཡ ཨིསྶརམདཾ, ནིཝཱཏམནུཝཏྟཡེ.

༧༦༥.

དིཊྛེཝ དྷམྨེ པཱསཾསོ, ཡོ བུདྡྷེསུ སགཱརཝོ;

ཀཱཡསྶ བྷེདཱ སཔྤཉྙོ, སགྒཾ སོ ཨུཔཔཛྫཏཱིཏི.

རཱཛཔུཏྟཔེཏཝཏྠུ སཏྟམཾ.

༨. གཱུཐཁཱདཀཔེཏཝཏྠུ

༧༦༦.

‘‘གཱུཐཀཱུཔཏོ ¶ ཨུགྒནྟྭཱ, ཀོ ནུ དཱིནོ པཏིཊྛསི [དཱིནོ ཧི ཏིཊྛསི (སཱི.)];

ནིསྶཾསཡཾ པཱཔཀམྨནྟོ, ཀིཾ ནུ སདྡཧསེ ཏུཝ’’ནྟི.

༧༦༧.

‘‘ཨཧཾ བྷདནྟེ པེཏོམྷི, དུགྒཏོ ཡམལོཀིཀོ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏོ’’.

༧༦༨.

‘‘ཀིཾ ནུ ཀཱཡེན ཝཱཙཱཡ, མནསཱ དུཀྐཊཾ ཀཏཾ;

ཀིསྶ ཀམྨཝིཔཱཀེན, ཨིདཾ དུཀྑཾ ནིགཙྪསཱི’’ཏི.

༧༦༩.

‘‘ཨཧུ ¶ ཨཱཝཱསིཀོ མཡ྄ཧཾ, ཨིསྶུཀཱི ཀུལམཙྪརཱི;

ཨཛ྄ཛྷོསིཏོ མཡ྄ཧཾ གྷརེ, ཀདརིཡོ པརིབྷཱསཀོ.

༧༧༠.

‘‘ཏསྶཱཧཾ ¶ ¶ ཝཙནཾ སུཏྭཱ, བྷིཀྑཝོ པརིབྷཱསིསཾ;

ཏསྶ ཀམྨཝིཔཱཀེན, པེཏལོཀཾ ཨིཏོ གཏོ’’ཏི.

༧༧༡.

‘‘ཨམིཏྟོ མིཏྟཝཎྞེན, ཡོ ཏེ ཨཱསི ཀུལཱུཔཀོ;

ཀཱཡསྶ བྷེདཱ དུཔྤཉྙོ, ཀིཾ ནུ པེཙྩ གཏིཾ གཏོ’’ཏི.

༧༧༢.

‘‘ཏསྶེཝཱཧཾ པཱཔཀམྨསྶ, སཱིསེ ཏིཊྛཱམི མཏྠཀེ;

སོ ཙ པརཝིསཡཾ པཏྟོ, མམེཝ པརིཙཱརཀོ.

༧༧༣.

‘‘ཡཾ བྷདནྟེ ཧདནྟཉྙེ, ཨེཏཾ མེ ཧོཏི བྷོཛནཾ;

ཨཧཉྩ ཁོ ཡཾ ཧདཱམི, ཨེཏཾ སོ ཨུཔཛཱིཝཏཱི’’ཏི.

གཱུཐཁཱདཀཔེཏཝཏྠུ ཨཊྛམཾ.

༩. གཱུཐཁཱདཀཔེཏིཝཏྠུ

༧༧༤.

‘‘གཱུཐཀཱུཔཏོ ¶ ཨུགྒནྟྭཱ, ཀཱ ནུ དཱིནཱ པཏིཊྛསི;

ནིསྶཾསཡཾ པཱཔཀམྨནྟཱ, ཀིཾ ནུ སདྡཧསེ ཏུཝ’’ནྟི.

༧༧༥.

‘‘ཨཧཾ བྷདནྟེ པེཏཱིམྷི, དུགྒཏཱ ཡམལོཀིཀཱ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏཱ’’ཏི.

༧༧༦.

‘‘ཀིཾ ནུ ཀཱཡེན ཝཱཙཱཡ, མནསཱ དུཀྐཊཾ ཀཏཾ;

ཀིསྶ ཀམྨཝིཔཱཀེན, ཨིདཾ དུཀྑཾ ནིགཙྪསཱི’’ཏི.

༧༧༧.

‘‘ཨཧུ ཨཱཝཱསིཀོ མཡ྄ཧཾ, ཨིསྶུཀཱི ཀུལམཙྪརཱི;

ཨཛ྄ཛྷོསིཏོ མཡ྄ཧཾ གྷརེ, ཀདརིཡོ པརིབྷཱསཀོ.

༧༧༨.

‘‘ཏསྶཱཧཾ ཝཙནཾ སུཏྭཱ, བྷིཀྑཝོ པརིབྷཱསིསཾ;

ཏསྶ ཀམྨཝིཔཱཀེན, པེཏལོཀཾ ཨིཏོ གཏཱ’’ཏི.

༧༧༩.

‘‘ཨམིཏྟོ ¶ མིཏྟཝཎྞེན, ཡོ ཏེ ཨཱསི ཀུལཱུཔཀོ;

ཀཱཡསྶ བྷེདཱ དུཔྤཉྙོ, ཀིཾ ནུ པེཙྩ གཏིཾ གཏོ’’ཏི.

༧༨༠.

‘‘ཏསྶེཝཱཧཾ པཱཔཀམྨསྶ, སཱིསེ ཏིཊྛཱམི མཏྠཀེ;

སོ ཙ པརཝིསཡཾ པཏྟོ, མམེཝ པརིཙཱརཀོ.

༧༨༡.

‘‘ཡཾ ¶ བྷདནྟེ ཧདནྟཉྙེ, ཨེཏཾ མེ ཧོཏི བྷོཛནཾ;

ཨཧཉྩ ཁོ ཡཾ ཧདཱམི, ཨེཏཾ སོ ཨུཔཛཱིཝཏཱི’’ཏི.

གཱུཐཁཱདཀཔེཏིཝཏྠུ ནཝམཾ.

༡༠. གཎཔེཏཝཏྠུ

༧༨༢.

‘‘ནགྒཱ ¶ དུབྦཎྞརཱུཔཱཏྠ, ཀིསཱ དྷམནིསནྠཏཱ;

ཨུཔྥཱསུལིཀཱ [ཨུཔྤཱསུལི༹ཀཱ (ཀ.)] ཀིསིཀཱ, ཀེ ནུ ཏུམྷེཏྠ མཱརིསཱ’’ཏི.

༧༨༣.

‘‘མཡཾ བྷདནྟེ པེཏཱམྷཱ, དུགྒཏཱ ཡམལོཀིཀཱ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏཱ’’ཏི.

༧༨༤.

‘‘ཀིཾ ¶ ནུ ཀཱཡེན ཝཱཙཱཡ, མནསཱ དུཀྐཊཾ ཀཏཾ;

ཀིསྶ ཀམྨཝིཔཱཀེན, པེཏལོཀཾ ཨིཏོ གཏཱ’’ཏི.

༧༨༥.

‘‘ཨནཱཝཊེསུ ཏིཏྠེསུ, ཝིཙིནིམྷདྡྷམཱསཀཾ;

སནྟེསུ དེཡྻདྷམྨེསུ, དཱིཔཾ ནཱཀམྷ ཨཏྟནོ.

༧༨༦.

‘‘ནདིཾ ཨུཔེམ ཏསིཏཱ, རིཏྟཀཱ པརིཝཏྟཏི;

ཚཱཡཾ ཨུཔེམ ཨུཎྷེསུ, ཨཱཏཔོ པརིཝཏྟཏི.

༧༨༧.

‘‘ཨགྒིཝཎྞོ ཙ ནོ ཝཱཏོ, ཌཧནྟོ ཨུཔཝཱཡཏི;

ཨེཏཉྩ བྷནྟེ ཨརཧཱམ, ཨཉྙཉྩ པཱཔཀཾ ཏཏོ.

༧༨༨.

‘‘ཨཔི ཡོཛནཱནི [ཨདྷིཡོཛནཱནི (སཱི. ཀ.)] གཙྪཱམ, ཚཱཏཱ ཨཱཧཱརགེདྷིནོ;

ཨལདྡྷཱཝ ¶ ནིཝཏྟཱམ, ཨཧོ ནོ ཨཔྤཔུཉྙཏཱ.

༧༨༩.

‘‘ཚཱཏཱ པམུཙྪིཏཱ བྷནྟཱ, བྷཱུམིཡཾ པཊིསུམྦྷིཏཱ;

ཨུཏྟཱནཱ པཊིཀིརཱམ, ཨཝཀུཛྫཱ པཏཱམསེ.

༧༩༠.

‘‘ཏེ ཙ ཏཏྠེཝ པཏིཏཱ [ཏཏྠ པཔཧིཏཱ (ཀ.)], བྷཱུམིཡཾ པཊིསུམྦྷིཏཱ;

ཨུརཾ སཱིསཉྩ གྷཊྚེམ, ཨཧོ ནོ ཨཔྤཔུཉྙཏཱ.

༧༩༡.

‘‘ཨེཏཉྩ བྷནྟེ ཨརཧཱམ, ཨཉྙཉྩ པཱཔཀཾ ཏཏོ;

སནྟེསུ དེཡྻདྷམྨེསུ, དཱིཔཾ ནཱཀམྷ ཨཏྟནོ.

༧༩༢.

‘‘ཏེ ཧི ནཱུན ཨིཏོ གནྟྭཱ, ཡོནིཾ ལདྡྷཱན མཱནུསིཾ;

ཝདཉྙཱུ སཱིལསམྤནྣཱ, ཀཱཧཱམ ཀུསལཾ བཧུ’’ནྟི.

གཎཔེཏཝཏྠུ དསམཾ.

༡༡. པཱཊལིཔུཏྟཔེཏཝཏྠུ

༧༩༣.

‘‘དིཊྛཱ ¶ ¶ ¶ ཏཡཱ ནིརཡཱ ཏིརཙྪཱནཡོནི,

པེཏཱ ཨསུརཱ ཨཐཝཱཔི མཱནུསཱ དེཝཱ; སཡམདྡས ཀམྨཝིཔཱཀམཏྟནོ,

ནེསྶཱམི ཏཾ པཱཊལིཔུཏྟམཀྑཏཾ; ཏཏྠ གནྟྭཱ ཀུསལཾ ཀརོཧི ཀམྨཾ’’.

༧༩༤.

‘‘ཨཏྠཀཱམོསི མེ ཡཀྑ, ཧིཏཀཱམོསི དེཝཏེ;

ཀརོམི ཏུཡ྄ཧཾ ཝཙནཾ, ཏྭཾསི ཨཱཙརིཡོ མམ.

༧༩༥.

‘‘དིཊྛཱ མཡཱ ནིརཡཱ ཏིརཙྪཱནཡོནི, པེཏཱ ཨསུརཱ ཨཐཝཱཔི མཱནུསཱ དེཝཱ;

སཡམདྡསཾ ¶ ཀམྨཝིཔཱཀམཏྟནོ, ཀཱཧཱམི པུཉྙཱནི ཨནཔྤཀཱནཱི’’ཏི.

པཱཊལིཔུཏྟཔེཏཝཏྠུ ཨེཀཱདསམཾ.

༡༢. ཨམྦཝནཔེཏཝཏྠུ

༧༩༦.

‘‘ཨཡཉྩ ཏེ པོཀྑརཎཱི སུརམྨཱ, སམཱ སུཏིཏྠཱ ཙ མཧོདཀཱ ཙ;

སུཔུཔྥིཏཱ བྷམརགཎཱནུཀིཎྞཱ, ཀཐཾ ཏཡཱ ལདྡྷཱ ཨཡཾ མནུཉྙཱ.

༧༩༧.

‘‘ཨིདཉྩ ཏེ ཨམྦཝནཾ སུརམྨཾ, སབྦོཏུཀཾ དྷཱརཡཏེ [དྷཱརཡཏི (སྱཱ. ཀ.)] ཕལཱནི;

སུཔུཔྥིཏཾ བྷམརགཎཱནུཀིཎྞཾ, ཀཐཾ ཏཡཱ ལདྡྷམིདཾ ཝིམཱནཾ’’.

༧༩༨.

‘‘ཨམྦཔཀྐཾ དཀཾ [ཨམྦཔཀྐོདཀཾ (སཱི. སྱཱ. པཱི.), ཨམྦཔཀྐཱུདཀཾ (ཀ.)] ཡཱགུ, སཱིཏཙྪཱཡཱ མནོརམཱ;

དྷཱིཏཱཡ དིནྣདཱནེན, ཏེན མེ ཨིདྷ ལབྦྷཏི’’.

༧༩༩.

‘‘སནྡིཊྛིཀཾ ¶ ཀམྨཾ ཨེཝཾ [སནྡིཊྛིཀཾ ཨེཝ (སྱཱ.)] པསྶཐ, དཱནསྶ དམསྶ སཾཡམསྶ ཝིཔཱཀཾ;

དཱསཱི ཨཧཾ ཨཡྻཀུལེསུ ཧུཏྭཱ, སུཎིསཱ ཧོམི ཨགཱརསྶ ཨིསྶརཱ’’ཏི.

ཨམྦཝནཔེཏཝཏྠུ དྭཱདསམཾ.

༡༣. ཨཀྑརུཀྑཔེཏཝཏྠུ

༨༠༠.

‘‘ཡཾ ¶ ¶ དདཱཏི ན ཏཾ ཧོཏི, དེཐེཝ དཱནཾ དཏྭཱ ཨུབྷཡཾ ཏརཏི;

ཨུབྷཡཾ ཏེན དཱནེན [ཏེན (ཀ.)] གཙྪཏི, ཛཱགརཐ མཱཔམཛྫཐཱ’’ཏི.

ཨཀྑརུཀྑཔེཏཝཏྠུ ཏེརསམཾ.

༡༤. བྷོགསཾཧརཔེཏཝཏྠུ

༨༠༡.

‘‘མཡཾ ¶ བྷོགེ སཾཧརིམྷ, སམེན ཝིསམེན ཙ;

ཏེ ཨཉྙེ པརིབྷུཉྫནྟི, མཡཾ དུཀྑསྶ བྷཱགིནཱི’’ཏི.

བྷོགསཾཧརཔེཏཝཏྠུ ཙུདྡསམཾ.

༡༥. སེཊྛིཔུཏྟཔེཏཝཏྠུ

༨༠༢.

[ཛཱ. ༡.༤.༥༤ ཛཱཏཀེཔི] ‘‘སཊྛིཝསྶསཧསྶཱནི, པརིཔུཎྞཱནི སབྦསོ;

ནིརཡེ པཙྩམཱནཱནཾ, ཀདཱ ཨནྟོ བྷཝིསྶཏི’’.

༨༠༣.

[ཛཱ. ༡.༤.༥༥ ཛཱཏཀེཔི] ‘‘ནཏྠི ཨནྟོ ཀུཏོ ཨནྟོ, ན ཨནྟོ པཊིདིསྶཏི;

ཏཐཱ ཧི པཀཏཾ པཱཔཾ, ཏུཡ྄ཧཾ མཡ྄ཧཉྩ མཱརིསཱ [མམ ཏུཡ྄ཧཉྩ མཱརིས (སཱི. སྱཱ. པཱི.)].

༨༠༤.

[ཛཱ. ༡.༤.༥༣ ཛཱཏཀེཔི] ‘‘དུཛྫཱིཝིཏམཛཱིཝམྷ ¶ , ཡེ སནྟེ ན དདམྷསེ;

སནྟེསུ དེཡྻདྷམྨེསུ, དཱིཔཾ ནཱཀམྷ ཨཏྟནོ.

༨༠༥.

[ཛཱ. ༡.༤.༥༦ ཛཱཏཀེཔི] ‘‘སོཧཾ ནཱུན ཨིཏོ གནྟྭཱ, ཡོནིཾ ལདྡྷཱན མཱནུསིཾ;

ཝདཉྙཱུ སཱིལསམྤནྣོ, ཀཱཧཱམི ཀུསལཾ བཧུ’’ནྟི.

སེཊྛིཔུཏྟཔེཏཝཏྠུ པནྣརསམཾ.

༡༦. སཊྛིཀཱུཊཔེཏཝཏྠུ

༨༠༦.

‘‘ཀིཾ ¶ ནུ ཨུམྨཏྟརཱུཔོཝ, མིགོ བྷནྟོཝ དྷཱཝསི;

ནིསྶཾསཡཾ པཱཔཀམྨནྟོ [པཱཔཀམྨཾ (སྱཱ. པཱི.)], ཀིཾ ནུ སདྡཱཡསེ ཏུཝ’’ནྟི.

༨༠༧.

‘‘ཨཧཾ ¶ བྷདནྟེ པེཏོམྷི, དུགྒཏོ ཡམལོཀིཀོ;

པཱཔཀམྨཾ ཀརིཏྭཱན, པེཏལོཀཾ ཨིཏོ གཏོ.

༨༠༨.

‘‘སཊྛི ཀཱུཊསཧསྶཱནི, པརིཔུཎྞཱནི སབྦསོ;

སཱིསེ མཡ྄ཧཾ ནིཔཏནྟི, ཏེ བྷིནྡནྟི ཙ མཏྠཀ’’ནྟི.

༨༠༩.

‘‘ཀིཾ ནུ ཀཱཡེན ཝཱཙཱཡ, མནསཱ དུཀྐཊཾ ཀཏཾ;

ཀིསྶ ཀམྨཝིཔཱཀེན, ཨིདཾ དུཀྑཾ ནིགཙྪསི.

༨༡༠.

‘‘སཊྛི ¶ ཀཱུཊསཧསྶཱནི, པརིཔུཎྞཱནི སབྦསོ;

སཱིསེ ཏུཡ྄ཧཾ ནིཔཏནྟི, ཏེ བྷིནྡནྟི ཙ མཏྠཀ’’ནྟི.

༨༡༡.

‘‘ཨཐདྡསཱསིཾ སམྦུདྡྷཾ, སུནེཏྟཾ བྷཱཝིཏིནྡྲིཡཾ;

ནིསིནྣཾ རུཀྑམཱུལསྨིཾ, ཛྷཱཡནྟཾ ཨཀུཏོབྷཡཾ.

༨༡༢.

‘‘སཱལིཏྟཀཔྤཧཱརེན, བྷིནྡིསྶཾ ཏསྶ མཏྠཀཾ;

ཏསྶ ཀམྨཝིཔཱཀེན, ཨིདཾ དུཀྑཾ ནིགཙྪིསཾ.

༨༡༣.

‘‘སཊྛི ཀཱུཊསཧསྶཱནི, པརིཔུཎྞཱནི སབྦསོ;

སཱིསེ མཡ྄ཧཾ ནིཔཏནྟི, ཏེ བྷིནྡནྟི ཙ [ནིཔཏནྟི, ཝོ བྷིནྡནྟེཝ (སཱི. དྷམྨཔདཊྛཀཐཱ)] མཏྠཀ’’ནྟི.

༨༡༤.

‘‘དྷམྨེན ཏེ ཀཱཔུརིས, སཊྛིཀཱུཊསཧསྶཱནི, པརིཔུཎྞཱནི སབྦསོ;

སཱིསེ ཏུཡ྄ཧཾ ནིཔཏནྟི, ཏེ བྷིནྡནྟི ཙ མཏྠཀ’’ནྟི.

སཊྛིཀཱུཊཔེཏཝཏྠུ སོལ༹སམཾ.

མཧཱཝགྒོ ཙཏུཏྠོ ནིཊྛིཏོ.

ཏསྶུདྡཱནཾ ¶ –

ཨམྦསཀྐརོ ¶ ¶ སེརཱིསཀོ, པིངྒལོ རེཝཏི ཨུཙྪུ;

དྭེ ཀུམཱརཱ དུཝེ གཱུཐཱ, གཎཔཱཊལིཨམྦཝནཾ.

ཨཀྑརུཀྑབྷོགསཾཧརཱ, སེཊྛིཔུཏྟསཊྛིཀཱུཊཱ;

ཨིཏི སོལ༹སཝཏྠཱུནི, ཝགྒོ ཏེན པཝུཙྩཏི.

ཨཐ ཝགྒུདྡཱནཾ –

ཨུརགོ ཨུཔརིཝགྒོ, ཙཱུལ༹མཧཱཏི ཙཏུདྷཱ;

ཝཏྠཱུནི ཨེཀཔཉྙཱསཾ, ཙཏུདྷཱ བྷཱཎཝཱརཏོ.

པེཏཝཏྠུཔཱལི༹ ནིཊྛིཏཱ.