📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཁུདྡཀནིཀཱཡེ

ཐེརགཱཐཱཔཱལི༹

ནིདཱནགཱཐཱ

སཱིཧཱནཾཝ ¶ ¶ ¶ ¶ ནདནྟཱནཾ, དཱཋཱིནཾ གིརིགབྦྷརེ;

སུཎཱཐ བྷཱཝིཏཏྟཱནཾ, གཱཐཱ ཨཏྠཱུཔནཱཡིཀཱ [ཨཏྟཱུཔནཱཡིཀཱ (སཱི. ཀ.)].

ཡཐཱནཱམཱ ཡཐཱགོཏྟཱ, ཡཐཱདྷམྨཝིཧཱརིནོ;

ཡཐཱདྷིམུཏྟཱ སཔྤཉྙཱ, ཝིཧརིཾསུ ཨཏནྡིཏཱ.

ཏཏྠ ཏཏྠ ཝིཔསྶིཏྭཱ, ཕུསིཏྭཱ ཨཙྩུཏཾ པདཾ;

ཀཏནྟཾ པཙྩཝེཀྑནྟཱ, ཨིམམཏྠམབྷཱསིསུཾ.

༡. ཨེཀཀནིཔཱཏོ

༡. པཋམཝགྒོ

༡. སུབྷཱུཏིཏྠེརགཱཐཱ

༡.

‘‘ཚནྣཱ ¶ མེ ཀུཊིཀཱ སུཁཱ ནིཝཱཏཱ, ཝསྶ དེཝ ཡཐཱསུཁཾ;

ཙིཏྟཾ མེ སུསམཱཧིཏཾ ཝིམུཏྟཾ, ཨཱཏཱཔཱི ཝིཧརཱམི ཝསྶ དེཝཱ’’ཏི.

ཨིཏྠཾ སུདཾ [ཨིཏྠཾ སུམཾ (ཀ. ཨཊྛ.)] ཨཱཡསྨཱ སུབྷཱུཏིཏྠེརོ གཱཐཾ ཨབྷཱསིཏྠཱཏི.

༢. མཧཱཀོཊྛིཀཏྠེརགཱཐཱ

༢.

‘‘ཨུཔསནྟོ ¶ ཨུཔརཏོ, མནྟབྷཱཎཱི ཨནུདྡྷཏོ;

དྷུནཱཏི པཱཔཀེ དྷམྨེ, དུམཔཏྟཾཝ མཱལུཏོ’’ཏི.

ཨིཏྠཾ སུདཾ ཨཱཡསྨཱ མཧཱཀོཊྛིཀོ [མཧཱཀོཊྛིཏོ (སཱི. སྱཱ.)] ཐེརོ གཱཐཾ ཨབྷཱསིཏྠཱཏི.

༣. ཀངྑཱརེཝཏཏྠེརགཱཐཱ

༣.

‘‘པཉྙཾ ¶ ¶ ཨིམཾ པསྶ ཏཐཱགཏཱནཾ, ཨགྒི ཡཐཱ པཛྫལིཏོ ནིསཱིཐེ;

ཨཱལོཀདཱ ཙཀྑུདདཱ བྷཝནྟི, ཡེ ཨཱགཏཱནཾ ཝིནཡནྟི ཀངྑ’’ནྟི.

ཨིཏྠཾ སུདཾ ཨཱཡསྨཱ ཀངྑཱརེཝཏོ ཐེརོ གཱཐཾ ཨབྷཱསིཏྠཱཏི.

༤. པུཎྞཏྠེརགཱཐཱ

༤.

‘‘སམྦྷིརེཝ སམཱསེཐ, པཎྜིཏེཧཏྠདསྶིབྷི;

ཨཏྠཾ མཧནྟཾ གམྦྷཱིརཾ, དུདྡསཾ ནིཔུཎཾ ཨཎུཾ;

དྷཱིརཱ སམདྷིགཙྪནྟི, ཨཔྤམཏྟཱ ཝིཙཀྑཎཱ’’ཏི.

ཨིཏྠཾ སུདཾ ཨཱཡསྨཱ པུཎྞོ མནྟཱཎིཔུཏྟོ [མནྟཱནིཔུཏྟོ (སྱཱ. ཀ.)] ཐེརོ གཱཐཾ ཨབྷཱསིཏྠཱཏི.

༥. དབྦཏྠེརགཱཐཱ

༥.

‘‘ཡོ ¶ དུདྡམིཡོ དམེན དནྟོ, དབྦོ སནྟུསིཏོ ཝིཏིཎྞཀངྑོ;

ཝིཛིཏཱཝཱི ཨཔེཏབྷེརཝོ ཧི, དབྦོ སོ པརིནིབྦུཏོ ཋིཏཏྟོ’’ཏི.

ཨིཏྠཾ སུདཾ ཨཱཡསྨཱ དབྦོ ཐེརོ གཱཐཾ ཨབྷཱསིཏྠཱཏི.

༦. སཱིཏཝནིཡཏྠེརགཱཐཱ

༦.

‘‘ཡོ ¶ སཱིཏཝནཾ ཨུཔགཱ བྷིཀྑུ, ཨེཀོ སནྟུསིཏོ སམཱཧིཏཏྟོ;

ཝིཛིཏཱཝཱི ཨཔེཏལོམཧཾསོ, རཀྑཾ ཀཱཡགཏཱསཏིཾ དྷིཏིམཱ’’ཏི.

ཨིཏྠཾ སུདཾ ཨཱཡསྨཱ སཱིཏཝནིཡོ ཐེརོ གཱཐཾ ཨབྷཱསིཏྠཱཏི.

༧. བྷལླིཡཏྠེརགཱཐཱ

༧.

‘‘ཡོཔཱནུདཱི ¶ མཙྩུརཱཛསྶ སེནཾ, ནལ༹སེཏུཾཝ སུདུབྦལཾ མཧོགྷོ;

ཝིཛིཏཱཝཱི ཨཔེཏབྷེརཝོ ཧི, དནྟོ སོ པརིནིབྦུཏོ ཋིཏཏྟོ’’ཏི.

ཨིཏྠཾ སུདཾ ཨཱཡསྨཱ བྷལླིཡོ ཐེརོ གཱཐཾ ཨབྷཱསིཏྠཱཏི.

༨. ཝཱིརཏྠེརགཱཐཱ

༨.

‘‘ཡོ དུདྡམིཡོ དམེན དནྟོ, ཝཱིརོ སནྟུསིཏོ ཝིཏིཎྞཀངྑོ;

ཝིཛིཏཱཝཱི ཨཔེཏལོམཧཾསོ, ཝཱིརོ སོ པརིནིབྦུཏོ ཋིཏཏྟོ’’ཏི.

ཨིཏྠཾ སུདཾ ཨཱཡསྨཱ ཝཱིརོ ཐེརོ གཱཐཾ ཨབྷཱསིཏྠཱཏི.

༩. པིལིནྡཝཙྪཏྠེརགཱཐཱ

༩.

‘‘སྭཱགཏཾ ན དུརཱགཏཾ [ནཱཔགཏཾ (སཱི. སྱཱ.)], ནཡིདཾ དུམནྟིཏཾ མམ;

སཾཝིབྷཏྟེསུ དྷམྨེསུ, ཡཾ སེཊྛཾ ཏདུཔཱགམི’’ནྟི.

ཨིཏྠཾ སུདཾ ཨཱཡསྨཱ པིལིནྡཝཙྪོ [པིལིནྡིཝཙྪོ (སཱི.)] ཐེརོ གཱཐཾ ཨབྷཱསིཏྠཱཏི.

༡༠. པུཎྞམཱསཏྠེརགཱཐཱ

༡༠.

‘‘ཝིཧརི ¶ ¶ ¶ ཨཔེཀྑཾ ཨིདྷ ཝཱ ཧུརཾ ཝཱ, ཡོ ཝེདགཱུ སམིཏོ ཡཏཏྟོ;

སབྦེསུ དྷམྨེསུ ཨནཱུཔལིཏྟོ, ལོཀསྶ ཛཉྙཱ ཨུདཡབྦཡཉྩཱ’’ཏི.

ཨིཏྠཾ སུདཾ ཨཱཡསྨཱ པུཎྞམཱསོ ཐེརོ གཱཐཾ ཨབྷཱསིཏྠཱཏི.

ཝགྒོ པཋམོ ནིཊྛིཏོ.

ཏསྶུདྡཱནཾ –

སུབྷཱུཏི ¶ ཀོཊྛིཀོ ཐེརོ, ཀངྑཱརེཝཏསམྨཏོ;

མནྟཱཎིཔུཏྟོ དབྦོ ཙ, སཱིཏཝནིཡོ ཙ བྷལླིཡོ;

ཝཱིརོ པིལིནྡཝཙྪོ ཙ, པུཎྞམཱསོ ཏམོནུདོཏི.

༢. དུཏིཡཝགྒོ

༡. ཙཱུལ༹ཝཙྪཏྠེརགཱཐཱ

༡༡.

‘‘པཱམོཛྫབཧུལོ བྷིཀྑུ, དྷམྨེ བུདྡྷཔྤཝེདིཏེ;

ཨདྷིགཙྪེ པདཾ སནྟཾ, སངྑཱརཱུཔསམཾ སུཁ’’ནྟི.

… ཙཱུལ༹ཝཙྪོ [ཙཱུལགཝཙྪོ (སཱི.)] ཐེརོ….

༢. མཧཱཝཙྪཏྠེརགཱཐཱ

༡༢.

‘‘པཉྙཱབལཱི སཱིལཝཏཱུཔཔནྣོ, སམཱཧིཏོ ཛྷཱནརཏོ སཏཱིམཱ;

ཡདཏྠིཡཾ བྷོཛནཾ བྷུཉྫམཱནོ, ཀངྑེཐ ཀཱལཾ ཨིདྷ ཝཱིཏརཱགོ’’ཏི.

… མཧཱཝཙྪོ [མཧཱགཝཙྪོ (སཱི.)] ཐེརོ….

༣. ཝནཝཙྪཏྠེརགཱཐཱ

༡༣.

‘‘ནཱིལབྦྷཝཎྞཱ ¶ རུཙིརཱ, སཱིཏཝཱརཱི སུཙིནྡྷརཱ;

ཨིནྡགོཔཀསཉྪནྣཱ, ཏེ སེལཱ རམཡནྟི མ’’ནྟི.

… ཝནཝཙྪོ ཐེརོ….

༤. སིཝཀསཱམཎེརགཱཐཱ

༡༤.

‘‘ཨུཔཛ྄ཛྷཱཡོ ¶ མཾ ཨཝཙ, ཨིཏོ གཙྪཱམ སཱིཝཀ;

གཱམེ ¶ མེ ཝསཏི ཀཱཡོ, ཨརཉྙཾ མེ གཏོ མནོ;

སེམཱནཀོཔི གཙྪཱམི, ནཏྠི སངྒོ ཝིཛཱནཏ’’ནྟི.

… སིཝཀོ སཱམཎེརོ….

༥. ཀུཎྜདྷཱནཏྠེརགཱཐཱ

༡༥.

‘‘པཉྩ ཚིནྡེ པཉྩ ཛཧེ, པཉྩ ཙུཏྟརི བྷཱཝཡེ;

པཉྩསངྒཱཏིགོ བྷིཀྑུ, ཨོགྷཏིཎྞོཏི ཝུཙྩཏཱི’’ཏི.

… ཀུཎྜདྷཱནོ ཐེརོ….

༦. བེལཊྛསཱིསཏྠེརགཱཐཱ

༡༦.

‘‘ཡཐཱཔི བྷདྡོ ཨཱཛཉྙོ, ནངྒལཱཝཏྟནཱི སིཁཱི;

གཙྪཏི ཨཔྤཀསིརེན, ཨེཝཾ རཏྟིནྡིཝཱ མམ;

གཙྪནྟི ཨཔྤཀསིརེན, སུཁེ ལདྡྷེ ནིརཱམིསེ’’ཏི.

… བེལཊྛསཱིསོ ཐེརོ….

༧. དཱསཀཏྠེརགཱཐཱ

༡༧.

‘‘མིདྡྷཱི ¶ ཡདཱ ཧོཏི མཧགྒྷསོ ཙ, ནིདྡཱཡིཏཱ སམྤརིཝཏྟསཱཡཱི;

མཧཱཝརཱཧོཝ ནིཝཱཔཔུཊྛོ, པུནཔྤུནཾ གབྦྷམུཔེཏི མནྡོ’’ཏི.

… དཱསཀོ ཐེརོ….

༨. སིངྒཱལཔིཏུཏྠེརགཱཐཱ

༡༨.

‘‘ཨཧུ ¶ བུདྡྷསྶ དཱཡཱདོ, བྷིཀྑུ བྷེསཀལཱ༹ཝནེ;

ཀེཝལཾ ཨཊྛིསཉྙཱཡ, ཨཕརཱི པཐཝིཾ [པཋཝིཾ (སཱི. སྱཱ.)] ཨིམཾ;

མཉྙེཧཾ ཀཱམརཱགཾ སོ, ཁིཔྤམེཝ པཧིསྶཏཱི’’ཏི [པཧཱིཡབྷི (སབྦཏྠ པཱལི༹ཡཾ)].

… སིངྒཱལཔིཏཱ [སཱིགཱལཔིཏཱ (སཱི.)] ཐེརོ….

༩. ཀུལཏྠེརགཱཐཱ

༡༩.

[དྷ. པ. ༨༠, ༡༤༥ དྷམྨཔདེཔི] ‘‘ཨུདཀཾ ¶ ཧི ནཡནྟི ནེཏྟིཀཱ, ཨུསུཀཱརཱ ནམཡནྟི [དམཡནྟི (ཀ.)] ཏེཛནཾ;

དཱརུཾ ¶ ནམཡནྟི ཏཙྪཀཱ, ཨཏྟཱནཾ དམཡནྟི སུབྦཏཱ’’ཏི.

… ཀུལོ [ཀུཎྜལོ (སཱི.), ཀུལོ༹ (སྱཱ. ཀ.)] ཐེརོ….

༡༠. ཨཛིཏཏྠེརགཱཐཱ

༢༠.

‘‘མརཎེ མེ བྷཡཾ ནཏྠི, ནིཀནྟི ནཏྠི ཛཱིཝིཏེ;

སནྡེཧཾ ནིཀྑིཔིསྶཱམི, སམྤཛཱནོ པཊིསྶཏོ’’ཏི [པཏིསྶཏོཏི (སཱི. སྱཱ.)].

… ཨཛིཏོ ཐེརོ ….

ཝགྒོ དུཏིཡོ ནིཊྛིཏོ.

ཏསྶུདྡཱནཾ –

ཙཱུལ༹ཝཙྪོ མཧཱཝཙྪོ, ཝནཝཙྪོ ཙ སཱིཝཀོ;

ཀུཎྜདྷཱནོ ཙ བེལཊྛི, དཱསཀོ ཙ ཏཏོཔརི;

སིངྒཱལཔིཏིཀོ ཐེརོ, ཀུལོ ཙ ཨཛིཏོ དསཱཏི.

༣. ཏཏིཡཝགྒོ

༡. ནིགྲོདྷཏྠེརགཱཐཱ

༢༡.

‘‘ནཱཧཾ བྷཡསྶ བྷཱཡཱམི, སཏྠཱ ནོ ཨམཏསྶ ཀོཝིདོ;

ཡཏྠ བྷཡཾ ནཱཝཏིཊྛཏི, ཏེན མགྒེན ཝཛནྟི བྷིཀྑཝོ’’ཏི.

… ནིགྲོདྷོ ཐེརོ….

༢. ཙིཏྟཀཏྠེརགཱཐཱ

༢༢.

‘‘ནཱིལཱ ¶ སུགཱིཝཱ སིཁིནོ, མོརཱ ཀཱརམྦྷིཡཾ [ཀཱརཾཝིཡཾ (སཱི.), ཀཱརཝིཡཾ (སྱཱ.)] ཨབྷིནདནྟི;

ཏེ སཱིཏཝཱཏཀཱིལི༹ཏཱ [སཱིཏཝཱཏཀདྡིཏཀལིཏཱ (སཱི.), སཱིཏཝཱཏཀལིཏཱ (སྱཱ.)], སུཏྟཾ ཛྷཱཡཾ [ཛྷཱནཾ (སྱཱ.), ཛྷཱཡིཾ (?)] ནིབོདྷེནྟཱི’’ཏི.

… ཙིཏྟཀོ ཐེརོ….

༣. གོསཱལཏྠེརགཱཐཱ

༢༣.

‘‘ཨཧཾ ¶ ¶ ¶ ཁོ ཝེལུ༹གུམྦསྨིཾ, བྷུཏྭཱན མདྷུཔཱཡསཾ;

པདཀྑིཎཾ སམྨསནྟོ, ཁནྡྷཱནཾ ཨུདཡབྦཡཾ;

སཱནུཾ པཊིགམིསྶཱམི, ཝིཝེཀམནུབྲཱུཧཡ’’ནྟི.

… གོསཱལོ ཐེརོ….

༤. སུགནྡྷཏྠེརགཱཐཱ

༢༤.

‘‘ཨནུཝསྶིཀོ པབྦཛིཏོ, པསྶ དྷམྨསུདྷམྨཏཾ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསན’’ནྟི.

… སུགནྡྷོ ཐེརོ….

༥. ནནྡིཡཏྠེརགཱཐཱ

༢༥.

‘‘ཨོབྷཱསཛཱཏཾ ཕལགཾ, ཙིཏྟཾ ཡསྶ ཨབྷིཎྷསོ;

ཏཱདིསཾ བྷིཀྑུམཱསཛྫ, ཀཎྷ དུཀྑཾ ནིགཙྪསཱི’’ཏི.

… ནནྡིཡོ ཐེརོ….

༦. ཨབྷཡཏྠེརགཱཐཱ

༢༦.

‘‘སུཏྭཱ སུབྷཱསིཏཾ ཝཱཙཾ, བུདྡྷསྶཱདིཙྩབནྡྷུནོ;

པཙྩབྱདྷིཾ ཧི ནིཔུཎཾ, ཝཱལགྒཾ ཨུསུནཱ ཡཐཱ’’ཏི.

… ཨབྷཡོ ཐེརོ….

༧. ལོམསཀངྒིཡཏྠེརགཱཐཱ

༢༧.

‘‘དབྦཾ ¶ ཀུསཾ པོཊཀིལཾ, ཨུསཱིརཾ མུཉྫཔབྦཛཾ;

ཨུརསཱ པནུདིསྶཱམི, ཝིཝེཀམནུབྲཱུཧཡ’’ནྟི.

… ལོམསཀངྒིཡོ ཐེརོ….

༨. ཛམྦུགཱམིཀཔུཏྟཏྠེརགཱཐཱ

༢༨.

‘‘ཀཙྩི ¶ ནོ ཝཏྠཔསུཏོ, ཀཙྩི ནོ བྷཱུསནཱརཏོ;

ཀཙྩི སཱིལམཡཾ གནྡྷཾ, ཀིཾ ཏྭཾ ཝཱཡསི [ཀཙྩི སཱིལམཡཾ གནྡྷཾ, ཏྭཾ ཝཱསི (སྱཱ.)] ནེཏརཱ པཛཱ’’ཏི.

… ཛམྦུགཱམིཀཔུཏྟོ ཐེརོ….

༩. ཧཱརིཏཏྠེརགཱཐཱ

༢༩.

‘‘སམུནྣམཡམཏྟཱནཾ, ཨུསུཀཱརོཝ ཏེཛནཾ;

ཙིཏྟཾ ¶ ཨུཛུཾ ཀརིཏྭཱན, ཨཝིཛྫཾ བྷིནྡ ཧཱརིཏཱ’’ཏི.

… ཧཱརིཏོ ཐེརོ….

༡༠. ཨུཏྟིཡཏྠེརགཱཐཱ

༣༠.

‘‘ཨཱབཱདྷེ མེ སམུཔྤནྣེ, སཏི མེ ཨུདཔཛྫཐ;

ཨཱབཱདྷོ མེ སམུཔྤནྣོ, ཀཱལོ མེ ནཔྤམཛྫིཏུ’’ནྟི.

… ཨུཏྟིཡོ ཐེརོ….

ཝགྒོ ཏཏིཡོ ནིཊྛིཏོ.

ཏསྶུདྡཱནཾ –

ནིགྲོདྷོ ཙིཏྟཀོ ཐེརོ, གོསཱལཐེརོ སུགནྡྷོ;

ནནྡིཡོ ཨབྷཡོ ཐེརོ, ཐེརོ ལོམསཀངྒིཡོ;

ཛམྦུགཱམིཀཔུཏྟོ ཙ, ཧཱརིཏོ ཨུཏྟིཡོ ཨིསཱིཏི.

༤. ཙཏུཏྠཝགྒོ

༡. གཧྭརཏཱིརིཡཏྠེརགཱཐཱ

༣༡.

‘‘ཕུཊྛོ ¶ ¶ ཌཾསེཧི མཀསེཧི, ཨརཉྙསྨིཾ བྲཧཱཝནེ;

ནཱགོ སཾགཱམསཱིསེཝ, སཏོ ཏཏྲཱདྷིཝཱསཡེ’’ཏི.

… གཧྭརཏཱིརིཡོ ཐེརོ….

༢. སུཔྤིཡཏྠེརགཱཐཱ

༣༢.

‘‘ཨཛརཾ ¶ ཛཱིརམཱནེན, ཏཔྤམཱནེན ནིབྦུཏིཾ;

ནིམིཡཾ [ནིམྨིསྶཾ (སཱི.), ནིརཱམིསཾ (སྱཱ.), ནིམིནེཡྻཾ (?)] པརམཾ སནྟིཾ, ཡོགཀྑེམཾ ཨནུཏྟར’’ནྟི.

… སུཔྤིཡོ ཐེརོ….

༣. སོཔཱཀཏྠེརགཱཐཱ

༣༣.

‘‘ཡཐཱཔི ¶ ཨེཀཔུཏྟསྨིཾ, པིཡསྨིཾ ཀུསལཱི སིཡཱ;

ཨེཝཾ སབྦེསུ པཱཎེསུ, སབྦཏྠ ཀུསལོ སིཡཱ’’ཏི.

… སོཔཱཀོ ཐེརོ….

༤. པོསིཡཏྠེརགཱཐཱ

༣༤.

‘‘ཨནཱསནྣཝརཱ ཨེཏཱ, ནིཙྩམེཝ ཝིཛཱནཏཱ;

གཱམཱ ཨརཉྙམཱགམྨ, ཏཏོ གེཧཾ ཨུཔཱཝིསི [ཨུཔཱཝིསིཾ (སཱི.)];

ཏཏོ ཨུཊྛཱཡ པཀྐཱམི, ཨནཱམནྟེཏྭཱ [ཨནཱམནྟིཡ (སཱི.)] པོསིཡོ’’ཏི.

… པོསིཡོ ཐེརོ….

༥. སཱམཉྙཀཱནིཏྠེརགཱཐཱ

༣༥.

‘‘སུཁཾ སུཁཏྠོ ལབྷཏེ ཏདཱཙརཾ, ཀིཏྟིཉྩ པཔྤོཏི ཡསསྶ ཝཌྜྷཏི;

ཡོ ཨརིཡམཊྛངྒིཀམཉྫསཾ ཨུཛུཾ, བྷཱཝེཏི མགྒཾ ཨམཏསྶ པཏྟིཡཱ’’ཏི.

… སཱམཉྙཀཱནིཏྠེརོ….

༦. ཀུམཱཔུཏྟཏྠེརགཱཐཱ

༣༦.

‘‘སཱདྷུ ¶ སུཏཾ སཱདྷུ ཙརིཏཀཾ, སཱདྷུ སདཱ ཨནིཀེཏཝིཧཱརོ;

ཨཏྠཔུཙྪནཾ པདཀྑིཎཀམྨཾ, ཨེཏཾ སཱམཉྙམཀིཉྩནསྶཱ’’ཏི.

… ཀུམཱཔུཏྟོ ཐེརོ….

༧. ཀུམཱཔུཏྟསཧཱཡཀཏྠེརགཱཐཱ

༣༧.

‘‘ནཱནཱཛནཔདཾ ཡནྟི, ཝིཙརནྟཱ ཨསཉྙཏཱ;

སམཱདྷིཉྩ ཝིརཱདྷེནྟི, ཀིཾསུ རཊྛཙརིཡཱ ཀརིསྶཏི;

ཏསྨཱ ཝིནེཡྻ སཱརམྦྷཾ, ཛྷཱཡེཡྻ ཨཔུརཀྑཏོ’’ཏི.

… ཀུམཱཔུཏྟཏྠེརསྶ སཧཱཡཀོ ཐེརོ….

༨. གཝམྤཏིཏྠེརགཱཐཱ

༣༨.

‘‘ཡོ ¶ ¶ ཨིདྡྷིཡཱ སརབྷུཾ ཨཊྛཔེསི, སོ གཝམྤཏི ཨསིཏོ ཨནེཛོ;

ཏཾ སབྦསངྒཱཏིགཏཾ མཧཱམུནིཾ, དེཝཱ ནམསྶནྟི བྷཝསྶ པཱརགུ’’ནྟི.

… གཝམྤཏིཏྠེརོ….

༩. ཏིསྶཏྠེརགཱཐཱ

༣༩.

[སཾ. ནི. ༡.༢༡, ༩༧]‘‘སཏྟིཡཱ ཝིཡ ཨོམཊྛོ, ཌཡ྄ཧམཱནོཝ [ཌཡ྄ཧམཱནེཝ (སབྦཏྠ)] མཏྠཀེ;

ཀཱམརཱགཔྤཧཱནཱཡ, སཏོ བྷིཀྑུ པརིབྦཛེ’’ཏི.

… ཏིསྶོ ཐེརོ….

༡༠. ཝཌྜྷམཱནཏྠེརགཱཐཱ

༤༠.

‘‘སཏྟིཡཱ ¶ ཝིཡ ཨོམཊྛོ, ཌཡ྄ཧམཱནོཝ མཏྠཀེ;

བྷཝརཱགཔྤཧཱནཱཡ, སཏོ བྷིཀྑུ པརིབྦཛེ’’ཏི.

… ཝཌྜྷམཱནོ ཐེརོ….

ཝགྒོ ཙཏུཏྠོ ནིཊྛིཏོ.

ཏསྶུདྡཱནཾ –

གཧྭརཏཱིརིཡོ ¶ སུཔྤིཡོ, སོཔཱཀོ ཙེཝ པོསིཡོ;

སཱམཉྙཀཱནི ཀུམཱཔུཏྟོ, ཀུམཱཔུཏྟསཧཱཡཀོ;

གཝམྤཏི ཏིསྶཏྠེརོ, ཝཌྜྷམཱནོ མཧཱཡསོཏི.

༥. པཉྩམཝགྒོ

༡. སིརིཝཌྜྷཏྠེརགཱཐཱ

༤༡.

‘‘ཝིཝརམནུཔཏནྟི ¶ ཝིཛྫུཏཱ, ཝེབྷཱརསྶ ཙ པཎྜཝསྶ ཙ;

ནགཝིཝརགཏོ ཙ ཛྷཱཡཏི, པུཏྟོ ཨཔྤཊིམསྶ ཏཱདིནོ’’ཏི.

… སིརིཝཌྜྷོ ཐེརོ….

༢. ཁདིརཝནིཡཏྠེརགཱཐཱ

༤༢.

‘‘ཙཱལེ ¶ ཨུཔཙཱལེ སཱིསཱུཔཙཱལེ ( ) [(ཙཱལཱ ཨུཔཙཱལཱ, སཱིསཱུཔཙཱལཱ) (ཀ.)] པཏིསྶཏཱ [པཊིསྶཏིཀཱ (སྱཱ. ཀ.)] ནུ ཁོ ཝིཧརཐ;

ཨཱགཏོ ཝོ ཝཱལཾ ཝིཡ ཝེདྷཱི’’ཏི.

… ཁདིརཝནིཡོ ཐེརོ….

༣. སུམངྒལཏྠེརགཱཐཱ

༤༣.

‘‘སུམུཏྟིཀོ སུམུཏྟིཀོ སཱཧུ, སུམུཏྟིཀོམྷི ཏཱིཧི ཁུཛྫཀེཧི;

ཨསིཏཱསུ མཡཱ ནངྒལཱསུ, མཡཱ ཁུདྡཀུདྡཱལཱསུ མཡཱ.

ཡདིཔི ཨིདྷམེཝ ཨིདྷམེཝ, ཨཐ ཝཱཔི ཨལམེཝ ཨལམེཝ;

ཛྷཱཡ སུམངྒལ ཛྷཱཡ སུམངྒལ, ཨཔྤམཏྟོ ཝིཧར སུམངྒལཱ’’ཏི.

… སུམངྒལོ ཐེརོ….

༤. སཱནུཏྠེརགཱཐཱ

༤༤.

[སཾ. ནི. ༡.༢༣༩] ‘‘མཏཾ ཝཱ ཨམྨ རོདནྟི, ཡོ ཝཱ ཛཱིཝཾ ན དིསྶཏི;

ཛཱིཝནྟཾ མཾ ཨམྨ པསྶནྟཱི, ཀསྨཱ མཾ ཨམྨ རོདསཱི’’ཏི.

… སཱནུཏྠེརོ….

༥. རམཎཱིཡཝིཧཱརིཏྠེརགཱཐཱ

༤༥.

‘‘ཡཐཱཔི ¶ བྷདྡོ ཨཱཛཉྙོ, ཁལིཏྭཱ པཏིཏིཊྛཏི;

ཨེཝཾ ¶ དསྶནསམྤནྣཾ, སམྨཱསམྦུདྡྷསཱཝཀ’’ནྟི.

… རམཎཱིཡཝིཧཱརིཏྠེརོ….

༦. སམིདྡྷིཏྠེརགཱཐཱ

༤༦.

‘‘སདྡྷཱཡཱཧཾ པབྦཛིཏོ, ཨགཱརསྨཱནགཱརིཡཾ;

སཏི པཉྙཱ ཙ མེ ཝུཌྜྷཱ, ཙིཏྟཉྩ སུསམཱཧིཏཾ;

ཀཱམཾ ཀརསྶུ རཱུཔཱནི, ནེཝ མཾ བྱཱདྷཡིསྶསཱི’’ཏི [བཱདྷཡིསྶསཱིཏི (སཱི.), བྱཱཐཡིསྶསཱིཏི (?)].

… སམིདྡྷིཏྠེརོ….

༧. ཨུཛྫཡཏྠེརགཱཐཱ

༤༧.

‘‘ནམོ ¶ ¶ ཏེ བུདྡྷ ཝཱིརཏྠུ, ཝིཔྤམུཏྟོསི སབྦདྷི;

ཏུཡ྄ཧཱཔདཱནེ ཝིཧརཾ, ཝིཧརཱམི ཨནཱསཝོ’’ཏི.

… ཨུཛྫཡོ ཐེརོ….

༨. སཉྫཡཏྠེརགཱཐཱ

༤༨.

‘‘ཡཏོ ཨཧཾ པབྦཛིཏོ, ཨགཱརསྨཱནགཱརིཡཾ;

ནཱབྷིཛཱནཱམི སངྐཔྤཾ, ཨནརིཡཾ དོསསཾཧིཏ’’ནྟི.

… སཉྫཡོ ཐེརོ….

༩. རཱམཎེཡྻཀཏྠེརགཱཐཱ

༤༩.

‘‘ཙིཧཙིཧཱབྷིནདིཏེ [ཝིཧཝིཧཱབྷིནདིཏེ (སཱི. སྱཱ.)], སིཔྤིཀཱབྷིརུཏེཧི ཙ;

ན མེ ཏཾ ཕནྡཏི ཙིཏྟཾ, ཨེཀཏྟནིརཏཾ ཧི མེ’’ཏི.

… རཱམཎེཡྻཀོ ཐེརོ….

༡༠. ཝིམལཏྠེརགཱཐཱ

༥༠.

‘‘དྷརཎཱི ¶ ཙ སིཉྩཏི ཝཱཏི, མཱལུཏོ ཝིཛྫུཏཱ ཙརཏི ནབྷེ;

ཨུཔསམནྟི ཝིཏཀྐཱ, ཙིཏྟཾ སུསམཱཧིཏཾ མམཱ’’ཏི.

… ཝིམལོ ཐེརོ….

ཝགྒོ པཉྩམོ ནིཊྛིཏོ.

ཏསྶུདྡཱནཾ –

སིརཱིཝཌྜྷོ རེཝཏོ ཐེརོ, སུམངྒལོ སཱནུསཝ྄ཧཡོ ¶ ;

རམཎཱིཡཝིཧཱརཱི ཙ, སམིདྡྷིཨུཛྫཡསཉྫཡཱ;

རཱམཎེཡྻོ ཙ སོ ཐེརོ, ཝིམལོ ཙ རཎཉྫཧོཏི.

༦. ཚཊྛཝགྒོ

༡. གོདྷིཀཏྠེརགཱཐཱ

༥༡.

‘‘ཝསྶཏི ¶ དེཝོ ཡཐཱ སུགཱིཏཾ, ཚནྣཱ མེ ཀུཊིཀཱ སུཁཱ ནིཝཱཏཱ;

ཙིཏྟཾ སུསམཱཧིཏཉྩ མཡ྄ཧཾ, ཨཐ ཙེ པཏྠཡསི པཝསྶ དེཝཱ’’ཏི.

… གོདྷིཀོ ཐེརོ….

༢. སུབཱཧུཏྠེརགཱཐཱ

༥༢.

‘‘ཝསྶཏི དེཝོ ཡཐཱ སུགཱིཏཾ, ཚནྣཱ མེ ཀུཊིཀཱ སུཁཱ ནིཝཱཏཱ;

ཙིཏྟཾ སུསམཱཧིཏཉྩ ཀཱཡེ, ཨཐ ཙེ པཏྠཡསི པཝསྶ དེཝཱ’’ཏི.

… སུབཱཧུཏྠེརོ….

༣. ཝལླིཡཏྠེརགཱཐཱ

༥༣.

‘‘ཝསྶཏི དེཝོ ཡཐཱ སུགཱིཏཾ, ཚནྣཱ མེ ཀུཊིཀཱ སུཁཱ ནིཝཱཏཱ;

ཏསྶཾ ཝིཧརཱམི ཨཔྤམཏྟོ, ཨཐ ཙེ པཏྠཡསི པཝསྶ དེཝཱ’’ཏི.

… ཝལླིཡོ ཐེརོ….

༤. ཨུཏྟིཡཏྠེརགཱཐཱ

༥༤.

‘‘ཝསྶཏི ¶ ¶ དེཝོ ཡཐཱ སུགཱིཏཾ, ཚནྣཱ མེ ཀུཊིཀཱ སུཁཱ ནིཝཱཏཱ;

ཏསྶཾ ཝིཧརཱམི ཨདུཏིཡོ, ཨཐ ཙེ པཏྠཡསི པཝསྶ དེཝཱ’’ཏི.

… ཨུཏྟིཡོ ཐེརོ….

༥. ཨཉྫནཝནིཡཏྠེརགཱཐཱ

༥༥.

‘‘ཨཱསནྡིཾ ¶ ཀུཊིཀཾ ཀཏྭཱ, ཨོགཡ྄ཧ ཨཉྫནཾ ཝནཾ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསན’’ནྟི.

… ཨཉྫནཝནིཡོ ཐེརོ….

༦. ཀུཊིཝིཧཱརིཏྠེརགཱཐཱ

༥༦.

‘‘ཀོ ¶ ཀུཊིཀཱཡཾ བྷིཀྑུ ཀུཊིཀཱཡཾ, ཝཱིཏརཱགོ སུསམཱཧིཏཙིཏྟོ;

ཨེཝཾ ཛཱནཱཧི ཨཱཝུསོ, ཨམོགྷཱ ཏེ ཀུཊིཀཱ ཀཏཱ’’ཏི.

… ཀུཊིཝིཧཱརིཏྠེརོ….

༧. དུཏིཡཀུཊིཝིཧཱརིཏྠེརགཱཐཱ

༥༧.

‘‘ཨཡམཱཧུ པུརཱཎིཡཱ ཀུཊི, ཨཉྙཾ པཏྠཡསེ ནཝཾ ཀུཊིཾ;

ཨཱསཾ ཀུཊིཡཱ ཝིརཱཛཡ, དུཀྑཱ བྷིཀྑུ པུན ནཝཱ ཀུཊཱི’’ཏི.

… དུཏིཡཀུཊིཝིཧཱརིཏྠེརོ….

༨. རམཎཱིཡཀུཊིཀཏྠེརགཱཐཱ

༥༨.

‘‘རམཎཱིཡཱ མེ ཀུཊིཀཱ, སདྡྷཱདེཡྻཱ མནོརམཱ;

ན མེ ཨཏྠོ ཀུམཱརཱིཧི, ཡེསཾ ཨཏྠོ ཏཧིཾ གཙྪཐ ནཱརིཡོ’’ཏི.

… རམཎཱིཡཀུཊིཀོ ཐེརོ….

༩. ཀོསལཝིཧཱརིཏྠེརགཱཐཱ

༥༩.

‘‘སདྡྷཱཡཱཧཾ ¶ པབྦཛིཏོ, ཨརཉྙེ མེ ཀུཊིཀཱ ཀཏཱ;

ཨཔྤམཏྟོ ཙ ཨཱཏཱཔཱི, སམྤཛཱནོ པཏིསྶཏོ’’ཏི [པཊིསྶཏོཏི (ཀ.)].

… ཀོསལཝིཧཱརིཏྠེརོ….

༡༠. སཱིཝལིཏྠེརགཱཐཱ

༦༠.

‘‘ཏེ མེ ཨིཛ྄ཛྷིཾསུ སངྐཔྤཱ, ཡདཏྠོ པཱཝིསིཾ ཀུཊིཾ;

ཝིཛྫཱཝིམུཏྟིཾ པཙྩེསཾ, མཱནཱནུསཡམུཛྫཧ’’ནྟི.

… སཱིཝལིཏྠེརོ….

ཝགྒོ ཚཊྛོ ནིཊྛིཏོ.

ཏསྶུདྡཱནཾ –

གོདྷིཀོ ¶ ཙ སུབཱཧུ ཙ, ཝལླིཡོ ཨུཏྟིཡོ ཨིསི;

ཨཉྫནཝནིཡོ ཐེརོ, དུཝེ ཀུཊིཝིཧཱརིནོ;

རམཎཱིཡཀུཊིཀོ ཙ, ཀོསལཝ྄ཧཡསཱིཝལཱིཏི.

༧. སཏྟམཝགྒོ

༡. ཝཔྤཏྠེརགཱཐཱ

༦༡.

‘‘པསྶཏི ¶ པསྶོ པསྶནྟཾ, ཨཔསྶནྟཉྩ པསྶཏི;

ཨཔསྶནྟོ ཨཔསྶནྟཾ, པསྶནྟཉྩ ན པསྶཏཱི’’ཏི.

… ཝཔྤོ ཐེརོ….

༢. ཝཛྫིཔུཏྟཏྠེརགཱཐཱ

༦༢.

‘‘ཨེཀཀཱ ¶ མཡཾ ཨརཉྙེ ཝིཧརཱམ, ཨཔཝིདྡྷཾཝ ཝནསྨིཾ དཱརུཀཾ;

ཏསྶ མེ བཧུཀཱ པིཧཡནྟི, ནེརཡིཀཱ ཝིཡ སགྒགཱམིན’’ནྟི.

… ཝཛྫིཔུཏྟོ ཐེརོ….

༣. པཀྑཏྠེརགཱཐཱ

༦༣.

‘‘ཙུཏཱ ¶ པཏནྟི པཏིཏཱ, གིདྡྷཱ ཙ པུནརཱགཏཱ;

ཀཏཾ ཀིཙྩཾ རཏཾ རམྨཾ, སུཁེནནྭཱགཏཾ སུཁ’’ནྟི.

… པཀྑོ ཐེརོ….

༤. ཝིམལཀོཎྜཉྙཏྠེརགཱཐཱ

༦༤.

‘‘དུམཝ྄ཧཡཱཡ ཨུཔྤནྣོ, ཛཱཏོ པཎྜརཀེཏུནཱ;

ཀེཏུཧཱ ¶ ཀེཏུནཱཡེཝ, མཧཱཀེཏུཾ པདྷཾསཡཱི’’ཏི.

… ཝིམལཀོཎྜཉྙོ ཐེརོ….

༥. ཨུཀྑེཔཀཏཝཙྪཏྠེརགཱཐཱ

༦༥.

‘‘ཨུཀྑེཔཀཏཝཙྪསྶ, སངྐལིཏཾ བཧཱུཧི ཝསྶེཧི;

ཏཾ བྷཱསཏི གཧཊྛཱནཾ, སུནིསིནྣོ ཨུལཱ༹རཔཱམོཛྫོ’’ཏི.

… ཨུཀྑེཔཀཏཝཙྪོ ཐེརོ….

༦. མེགྷིཡཏྠེརགཱཐཱ

༦༦.

‘‘ཨནུསཱསི ¶ མཧཱཝཱིརོ, སབྦདྷམྨཱན པཱརགཱུ;

ཏསྶཱཧཾ དྷམྨཾ སུཏྭཱན, ཝིཧཱསིཾ སནྟིཀེ སཏོ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསན’’ནྟི.

… མེགྷིཡོ ཐེརོ….

༧. ཨེཀདྷམྨསཝནཱིཡཏྠེརགཱཐཱ

༦༧.

‘‘ཀིལེསཱ ཛྷཱཔིཏཱ མཡ྄ཧཾ, བྷཝཱ སབྦེ སམཱུཧཏཱ;

ཝིཀྑཱིཎོ ཛཱཏིསཾསཱརོ, ནཏྠི དཱནི པུནབྦྷཝོ’’ཏི.

… ཨེཀདྷམྨསཝནཱིཡོ ཐེརོ….

༨. ཨེཀུདཱནིཡཏྠེརགཱཐཱ

༦༨.

[ཨུདཱ. ༣༧; པཱཙི. ༡༥༣] ‘‘ཨདྷིཙེཏསོ ཨཔྤམཛྫཏོ, མུནིནོ མོནཔཐེསུ སིཀྑཏོ;

སོཀཱ ན བྷཝནྟི ཏཱདིནོ, ཨུཔསནྟསྶ སདཱ སཏཱིམཏོ’’ཏི.

… ཨེཀུདཱནིཡོ ཐེརོ….

༩. ཚནྣཏྠེརགཱཐཱ

༦༩.

‘‘སུཏྭཱན ¶ དྷམྨཾ མཧཏོ མཧཱརསཾ, སབྦཉྙུཏཉྙཱཎཝརེན དེསིཏཾ;

མགྒཾ པཔཛྫིཾ [པཔཛྫཾ (ཀ.)] ཨམཏསྶ པཏྟིཡཱ, སོ ཡོགཀྑེམསྶ པཐསྶ ཀོཝིདོ’’ཏི.

… ཚནྣོ ཐེརོ….

༡༠. པུཎྞཏྠེརགཱཐཱ

༧༠.

‘‘སཱིལམེཝ ¶ ¶ ཨིདྷ ཨགྒཾ, པཉྙཝཱ པན ཨུཏྟམོ;

མནུསྶེསུ ཙ དེཝེསུ, སཱིལཔཉྙཱཎཏོ ཛཡ’’ནྟི.

… པུཎྞོ ཐེརོ….

ཝགྒོ སཏྟམོ ནིཊྛིཏོ.

ཏསྶུདྡཱནཾ ¶ –

ཝཔྤོ ཙ ཝཛྫིཔུཏྟོ ཙ, པཀྑོ ཝིམལཀོཎྜཉྙོ;

ཨུཀྑེཔཀཏཝཙྪོ ཙ, མེགྷིཡོ ཨེཀདྷམྨིཀོ;

ཨེཀུདཱནིཡཚནྣཱ ཙ, པུཎྞཏྠེརོ མཧབྦལོཏི.

༨. ཨཊྛམཝགྒོ

༡. ཝཙྪཔཱལཏྠེརགཱཐཱ

༧༡.

‘‘སུསུཁུམནིཔུཎཏྠདསྶིནཱ, མཏིཀུསལེན ནིཝཱཏཝུཏྟིནཱ;

སཾསེཝིཏཝུདྡྷསཱིལིནཱ [སཾསེཝིཏབུདྡྷསཱིལིནཱ (ཀ.)], ནིབྦཱནཾ ན ཧི ཏེན དུལླབྷ’’ནྟི.

… ཝཙྪཔཱལོ ཐེརོ….

༢. ཨཱཏུམཏྠེརགཱཐཱ

༧༢.

‘‘ཡཐཱ ¶ ཀལཱི༹རོ སུསུ ཝཌྜྷིཏགྒོ, དུནྣིཀྑམོ ཧོཏི པསཱཁཛཱཏོ;

ཨེཝཾ ཨཧཾ བྷརིཡཱཡཱནིཏཱཡ, ཨནུམཉྙཾ ¶ མཾ པབྦཛིཏོམྷི དཱནཱི’’ཏི.

… ཨཱཏུམོ ཐེརོ….

༣. མཱཎཝཏྠེརགཱཐཱ

༧༣.

‘‘ཛིཎྞཉྩ དིསྭཱ དུཁིཏཉྩ བྱཱདྷིཏཾ, མཏཉྩ དིསྭཱ གཏམཱཡུསངྑཡཾ;

ཏཏོ ཨཧཾ ནིཀྑམིཏཱུན པབྦཛིཾ, པཧཱཡ ཀཱམཱནི མནོརམཱནཱི’’ཏི.

… མཱཎཝོ ཐེརོ….

༤. སུཡཱམནཏྠེརགཱཐཱ

༧༤.

‘‘ཀཱམཙྪནྡོ ཙ བྱཱཔཱདོ, ཐིནམིདྡྷཉྩ [ཐཱིནམིདྡྷཉྩ (སཱི. སྱཱ.)] བྷིཀྑུནོ;

ཨུདྡྷཙྩཾ ཝིཙིཀིཙྪཱ ཙ, སབྦསོཝ ན ཝིཛྫཏཱི’’ཏི.

… སུཡཱམནོ ཐེརོ….

༥. སུསཱརདཏྠེརགཱཐཱ

༧༥.

‘‘སཱདྷུ སུཝིཧིཏཱན དསྶནཾ, ཀངྑཱ ཚིཛྫཏི བུདྡྷི ཝཌྜྷཏི;

བཱལམྤི ཀརོནྟི པཎྜིཏཾ, ཏསྨཱ སཱདྷུ སཏཾ སམཱགམོ’’ཏི.

… སུསཱརདོ ཐེརོ….

༦. པིཡཉྫཧཏྠེརགཱཐཱ

༧༦.

‘‘ཨུཔྤཏནྟེསུ ¶ ནིཔཏེ, ནིཔཏནྟེསུ ཨུཔྤཏེ;

ཝསེ ཨཝསམཱནེསུ, རམམཱནེསུ ནོ རམེ’’ཏི.

… པིཡཉྫཧོ ཐེརོ….

༧. ཧཏྠཱརོཧཔུཏྟཏྠེརགཱཐཱ

༧༧.

‘‘ཨིདཾ ¶ ¶ པུརེ ཙིཏྟམཙཱརི ཙཱརིཀཾ, ཡེནིཙྪཀཾ ཡཏྠཀཱམཾ ཡཐཱསུཁཾ;

ཏདཛྫཧཾ ནིགྒཧེསྶཱམི ཡོནིསོ, ཧཏྠིཔྤབྷིནྣཾ ཝིཡ ཨངྐུསགྒཧོ’’ཏི.

… ཧཏྠཱརོཧཔུཏྟོ ཐེརོ….

༨. མེཎྜསིརཏྠེརགཱཐཱ

༧༨.

‘‘ཨནེཀཛཱཏིསཾསཱརཾ ¶ , སནྡྷཱཝིསྶཾ ཨནིབྦིསཾ;

ཏསྶ མེ དུཀྑཛཱཏསྶ, དུཀྑཀྑནྡྷོ ཨཔརདྡྷོ’’ཏི.

… མེཎྜསིརོ ཐེརོ….

༩. རཀྑིཏཏྠེརགཱཐཱ

༧༩.

‘‘སབྦོ རཱགོ པཧཱིནོ མེ, སབྦོ དོསོ སམཱུཧཏོ;

སབྦོ མེ ཝིགཏོ མོཧོ, སཱིཏིབྷཱུཏོསྨི ནིབྦུཏོ’’ཏི.

… རཀྑིཏོ ཐེརོ….

༡༠. ཨུགྒཏྠེརགཱཐཱ

༨༠.

‘‘ཡཾ ¶ མཡཱ པཀཏཾ ཀམྨཾ, ཨཔྤཾ ཝཱ ཡདི ཝཱ བཧུཾ;

སབྦམེཏཾ པརིཀྑཱིཎཾ, ནཏྠི དཱནི པུནབྦྷཝོ’’ཏི.

… ཨུགྒོ ཐེརོ….

ཝགྒོ ཨཊྛམོ ནིཊྛིཏོ.

ཏསྶུདྡཱནཾ –

ཝཙྪཔཱལོ ཙ ཡོ ཐེརོ, ཨཱཏུམོ མཱཎཝོ ཨིསི;

སུཡཱམནོ སུསཱརདོ, ཐེརོ ཡོ ཙ པིཡཉྫཧོ;

ཨཱརོཧཔུཏྟོ མེཎྜསིརོ, རཀྑིཏོ ཨུགྒསཝ྄ཧཡོཏི.

༩. ནཝམཝགྒོ

༡. སམིཏིགུཏྟཏྠེརགཱཐཱ

༨༡.

‘‘ཡཾ ¶ མཡཱ པཀཏཾ པཱཔཾ, པུབྦེ ཨཉྙཱསུ ཛཱཏིསུ;

ཨིདྷེཝ ཏཾ ཝེདནཱིཡཾ, ཝཏྠུ ཨཉྙཾ ན ཝིཛྫཏཱི’’ཏི.

… སམིཏིགུཏྟོ ཐེརོ….

༢. ཀསྶཔཏྠེརགཱཐཱ

༨༢.

‘‘ཡེན ¶ ཡེན སུབྷིཀྑཱནི, སིཝཱནི ཨབྷཡཱནི ཙ;

ཏེན པུཏྟཀ གཙྪསྶུ, མཱ སོཀཱཔཧཏོ བྷཝཱ’’ཏི.

… ཀསྶཔོ ཐེརོ….

༣. སཱིཧཏྠེརགཱཐཱ

༨༣.

‘‘སཱིཧཔྤམཏྟོ ཝིཧར, རཏྟིནྡིཝམཏནྡིཏོ;

བྷཱཝེཧི ཀུསལཾ དྷམྨཾ, ཛཧ སཱིགྷཾ སམུསྶཡ’’ནྟི.

… སཱིཧོ ཐེརོ….

༤. ནཱིཏཏྠེརགཱཐཱ

༨༤.

‘‘སབྦརཏྟིཾ ¶ སུཔིཏྭཱན, དིཝཱ སངྒཎིཀེ རཏོ;

ཀུདཱསྶུ ནཱམ དུམྨེདྷོ, དུཀྑསྶནྟཾ ཀརིསྶཏཱི’’ཏི.

… ནཱིཏོ ཐེརོ….

༥. སུནཱགཏྠེརགཱཐཱ

༨༥.

‘‘ཙིཏྟནིམིཏྟསྶ ཀོཝིདོ, པཝིཝེཀརསཾ ཝིཛཱནིཡ;

ཛྷཱཡཾ ནིཔཀོ པཏིསྶཏོ, ཨདྷིགཙྪེཡྻ སུཁཾ ནིརཱམིས’’ནྟི.

… སུནཱགོ ཐེརོ….

༦. ནཱགིཏཏྠེརགཱཐཱ

༨༦.

‘‘ཨིཏོ ¶ བཧིདྡྷཱ པུཐུ ཨཉྙཝཱདིནཾ, མགྒོ ན ནིབྦཱནགམོ ཡཐཱ ཨཡཾ;

ཨིཏིསྶུ སངྒྷཾ བྷགཝཱནུསཱསཏི, སཏྠཱ སཡཾ པཱཎིཏལེཝ དསྶཡ’’ནྟི.

… ནཱགིཏོ ཐེརོ….

༧. པཝིཊྛཏྠེརགཱཐཱ

༨༧.

‘‘ཁནྡྷཱ ¶ དིཊྛཱ ཡཐཱབྷཱུཏཾ, བྷཝཱ སབྦེ པདཱལིཏཱ;

ཝིཀྑཱིཎོ ཛཱཏིསཾསཱརོ, ནཏྠི དཱནི པུནབྦྷཝོ’’ཏི.

… པཝིཊྛོ ཐེརོ….

༨. ཨཛྫུནཏྠེརགཱཐཱ

༨༨.

‘‘ཨསཀྑིཾ ¶ ཝཏ ཨཏྟཱནཾ, ཨུདྡྷཱཏུཾ ཨུདཀཱ ཐལཾ;

ཝུཡ྄ཧམཱནོ མཧོགྷེཝ, སཙྩཱནི པཊིཝིཛ྄ཛྷཧ’’ནྟི.

… ཨཛྫུནོ ཐེརོ….

༩. (པཋམ)-དེཝསབྷཏྠེརགཱཐཱ

༨༩.

‘‘ཨུཏྟིཎྞཱ པངྐཔལིཔཱ, པཱཏཱལཱ པརིཝཛྫིཏཱ;

མུཏྟོ ཨོགྷཱ ཙ གནྠཱ ཙ, སབྦེ མཱནཱ ཝིསཾཧཏཱ’’ཏི.

… དེཝསབྷོ ཐེརོ….

༡༠. སཱམིདཏྟཏྠེརགཱཐཱ

༩༠.

‘‘པཉྩཀྑནྡྷཱ པརིཉྙཱཏཱ, ཏིཊྛནྟི ཚིནྣམཱུལཀཱ;

ཝིཀྑཱིཎོ ཛཱཏིསཾསཱརོ, ནཏྠི དཱནི པུནབྦྷཝོ’’ཏི.

… སཱམིདཏྟོ ཐེརོ….

ཝགྒོ ནཝམོ ནིཊྛིཏོ.

ཏསྶུདྡཱནཾ –

ཐེརོ སམིཏིགུཏྟོ ཙ, ཀསྶཔོ སཱིཧསཝ྄ཧཡོ;

ནཱིཏོ སུནཱགོ ནཱགིཏོ, པཝིཊྛོ ཨཛྫུནོ ཨིསི;

དེཝསབྷོ ཙ ཡོ ཐེརོ, སཱམིདཏྟོ མཧབྦལོཏི.

༡༠. དསམཝགྒོ

༡. པརིཔུཎྞཀཏྠེརགཱཐཱ

༩༡.

‘‘ན ¶ ཏཐཱ མཏཾ སཏརསཾ, སུདྷནྣཾ ཡཾ མཡཛྫ པརིབྷུཏྟཾ;

ཨཔརིམིཏདསྶིནཱ གོཏམེན, བུདྡྷེན དེསིཏོ དྷམྨོ’’ཏི.

… པརིཔུཎྞཀོ ཐེརོ….

༢. ཝིཛཡཏྠེརགཱཐཱ

༩༢.

‘‘ཡསྶཱསཝཱ ¶ ¶ ¶ པརིཀྑཱིཎཱ, ཨཱཧཱརེ ཙ ཨནིསྶིཏོ;

སུཉྙཏཱ ཨནིམིཏྟོ ཙ, ཝིམོཀྑོ ཡསྶ གོཙརོ;

ཨཱཀཱསེཝ སཀུནྟཱནཾ, པདཾ ཏསྶ དུརནྣཡ’’ནྟི.

… ཝིཛཡོ ཐེརོ….

༣. ཨེརཀཏྠེརགཱཐཱ

༩༣.

‘‘དུཀྑཱ ཀཱམཱ ཨེརཀ, ན སུཁཱ ཀཱམཱ ཨེརཀ;

ཡོ ཀཱམེ ཀཱམཡཏི, དུཀྑཾ སོ ཀཱམཡཏི ཨེརཀ;

ཡོ ཀཱམེ ན ཀཱམཡཏི, དུཀྑཾ སོ ན ཀཱམཡཏི ཨེརཀཱ’’ཏི.

… ཨེརཀོ ཐེརོ….

༤. མེཏྟཛིཏྠེརགཱཐཱ

༩༤.

‘‘ནམོ ཧི ཏསྶ བྷགཝཏོ, སཀྱཔུཏྟསྶ སིརཱིམཏོ;

ཏེནཱཡཾ ཨགྒཔྤཏྟེན, ཨགྒདྷམྨོ [ཨགྒོ དྷམྨོ (སཱི.)] སུདེསིཏོ’’ཏི.

… མེཏྟཛི ཐེརོ….

༥. ཙཀྑུཔཱལཏྠེརགཱཐཱ

༩༥.

‘‘ཨནྡྷོཧཾ ཧཏནེཏྟོསྨི, ཀནྟཱརདྡྷཱནཔཀྑནྡོ [པཀྑནྣོ (སཱི.), པཀྐནྟོ (སྱཱ. སཱི. ཨཊྛ.)];

སཡམཱནོཔི གཙྪིསྶཾ, ན སཧཱཡེན པཱཔེནཱ’’ཏི.

… ཙཀྑུཔཱལོ ཐེརོ….

༦. ཁཎྜསུམནཏྠེརགཱཐཱ

༩༦.

‘‘ཨེཀཔུཔྥཾ ¶ ཙཛིཏྭཱན, ཨསཱིཏི [ཨསཱིཏིཾ (སཱི.)] ཝསྶཀོཊིཡོ;

སགྒེསུ པརིཙཱརེཏྭཱ, སེསཀེནམྷི ནིབྦུཏོ’’ཏི.

… ཁཎྜསུམནོ ཐེརོ….

༧. ཏིསྶཏྠེརགཱཐཱ

༩༧.

‘‘ཧིཏྭཱ སཏཔལཾ ཀཾསཾ, སོཝཎྞཾ སཏརཱཛིཀཾ;

ཨགྒཧིཾ མཏྟིཀཱཔཏྟཾ, ཨིདཾ དུཏིཡཱབྷིསེཙན’’ནྟི.

… ཏིསྶོ ཐེརོ….

༨. ཨབྷཡཏྠེརགཱཐཱ

༩༨.

‘‘རཱུཔཾ ¶ ¶ དིསྭཱ སཏི མུཊྛཱ, པིཡཾ ནིམིཏྟཾ མནསིཀརོཏོ;

སཱརཏྟཙིཏྟོ ཝེདེཏི, ཏཉྩ ཨཛ྄ཛྷོས ཏིཊྛཏི;

ཏསྶ ཝཌྜྷནྟི ཨཱསཝཱ, བྷཝམཱུལོཔགཱམིནོ’’ཏི [བྷཝམཱུལཱ བྷཝགཱམིནོཏི (སཱི. ཀ.)].

… ཨབྷཡོ ཐེརོ….

༩. ཨུཏྟིཡཏྠེརགཱཐཱ

༩༩.

‘‘སདྡཾ སུཏྭཱ སཏི མུཊྛཱ, པིཡཾ ནིམིཏྟཾ མནསིཀརོཏོ;

སཱརཏྟཙིཏྟོ ཝེདེཏི, ཏཉྩ ཨཛ྄ཛྷོས ཏིཊྛཏི;

ཏསྶ ཝཌྜྷནྟི ཨཱསཝཱ, སཾསཱརཾ ཨུཔགཱམིནོ’’ཏི.

… ཨུཏྟིཡོ ཐེརོ….

༡༠. (དུཏིཡ)-དེཝསབྷཏྠེརགཱཐཱ

༡༠༠.

‘‘སམྨཔྤདྷཱནསམྤནྣོ, སཏིཔཊྛཱནགོཙརོ;

ཝིམུཏྟིཀུསུམསཉྪནྣོ, པརིནིབྦིསྶཏྱནཱསཝོ’’ཏི.

… དེཝསབྷོ ཐེརོ….

ཝགྒོ དསམོ ནིཊྛིཏོ.

ཏསྶུདྡཱནཾ –

པརིཔུཎྞཀོ ཙ ཝིཛཡོ, ཨེརཀོ མེཏྟཛཱི མུནི;

ཙཀྑུཔཱལོ ཁཎྜསུམནོ, ཏིསྶོ ཙ ཨབྷཡོ ཏཐཱ;

ཨུཏྟིཡོ ཙ མཧཱཔཉྙོ, ཐེརོ དེཝསབྷོཔི ཙཱཏི.

༡༡. ཨེཀཱདསམཝགྒོ

༡. བེལཊྛཱནིཀཏྠེརགཱཐཱ

༡༠༡.

‘‘ཧིཏྭཱ ¶ ¶ གིཧིཏྟཾ ཨནཝོསིཏཏྟོ, མུཁནངྒལཱི ཨོདརིཀོ ཀུསཱིཏོ;

མཧཱཝརཱཧོཝ ¶ ནིཝཱཔཔུཊྛོ, པུནཔྤུནཾ གབྦྷམུཔེཏི མནྡོ’’ཏི.

… བེལཊྛཱནིཀོ ཐེརོ….

༢. སེཏུཙྪཏྠེརགཱཐཱ

༡༠༢.

‘‘མཱནེན ¶ ཝཉྩིཏཱསེ, སངྑཱརེསུ སཾཀིལིསྶམཱནཱསེ;

ལཱབྷཱལཱབྷེན མཐིཏཱ, སམཱདྷིཾ ནཱདྷིགཙྪནྟཱི’’ཏི.

… སེཏུཙྪོ ཐེརོ….

༣. བནྡྷུརཏྠེརགཱཐཱ

༡༠༣.

‘‘ནཱཧཾ ཨེཏེན ཨཏྠིཀོ, སུཁིཏོ དྷམྨརསེན ཏཔྤིཏོ;

པིཏྭཱ [པཱིཏྭཱན (སཱི. སྱཱ.)] རསགྒམུཏྟམཾ, ན ཙ ཀཱཧཱམི ཝིསེན སནྠཝ’’ནྟི.

… བནྡྷུརོ [བནྡྷནོ (ཀ.)] ཐེརོ….

༤. ཁིཏཀཏྠེརགཱཐཱ

༡༠༤.

‘‘ལཧུཀོ ཝཏ མེ ཀཱཡོ, ཕུཊྛོ ཙ པཱིཏིསུཁེན ཝིཔུལེན;

ཏཱུལམིཝ ཨེརིཏཾ མཱལུཏེན, པིལཝཏཱིཝ མེ ཀཱཡོ’’ཏི.

… ཁིཏཀོ ཐེརོ….

༥. མལིཏཝམྦྷཏྠེརགཱཐཱ

༡༠༥.

‘‘ཨུཀྐཎྛིཏོཔི ན ཝསེ, རམམཱནོཔི པཀྐམེ;

ན ཏྭེཝཱནཏྠསཾཧིཏཾ, ཝསེ ཝཱསཾ ཝིཙཀྑཎོ’’ཏི.

… མལིཏཝམྦྷོ ཐེརོ….

༦. སུཧེམནྟཏྠེརགཱཐཱ

༡༠༦.

‘‘སཏལིངྒསྶ ¶ ཨཏྠསྶ, སཏལཀྑཎདྷཱརིནོ;

ཨེཀངྒདསྶཱི དུམྨེདྷོ, སཏདསྶཱི ཙ པཎྜིཏོ’’ཏི.

… སུཧེམནྟོ ཐེརོ….

༧. དྷམྨསཝཏྠེརགཱཐཱ

༡༠༧.

‘‘པབྦཛིཾ ¶ ཏུལཡིཏྭཱན, ཨགཱརསྨཱནགཱརིཡཾ;

ཏིསྶོ ¶ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསན’’ནྟི.

… དྷམྨསཝོ ཐེརོ….

༨. དྷམྨསཝཔིཏུཏྠེརགཱཐཱ

༡༠༨.

‘‘ས ཝཱིསཝསྶསཏིཀོ, པབྦཛིཾ ཨནགཱརིཡཾ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསན’’ནྟི.

… དྷམྨསཝཔིཏུ ཐེརོ….

༩. སངྒྷརཀྑིཏཏྠེརགཱཐཱ

༡༠༩.

‘‘ན ¶ ནཱུནཱཡཾ པརམཧིཏཱནུཀམྤིནོ, རཧོགཏོ ཨནུཝིགཎེཏི སཱསནཾ;

ཏཐཱཧཡཾ ཝིཧརཏི པཱཀཏིནྡྲིཡོ, མིགཱི ཡཐཱ ཏརུཎཛཱཏིཀཱ ཝནེ’’ཏི.

… སངྒྷརཀྑིཏོ ཐེརོ….

༡༠. ཨུསབྷཏྠེརགཱཐཱ

༡༡༠.

‘‘ནགཱ ནགགྒེསུ སུསཾཝིརཱུལ༹ྷཱ, ཨུདགྒམེགྷེན ནཝེན སིཏྟཱ;

ཝིཝེཀཀཱམསྶ ཨརཉྙསཉྙིནོ, ཛནེཏི བྷིཡྻོ ཨུསབྷསྶ ཀལྱཏ’’ནྟི.

… ཨུསབྷོ ཐེརོ….

ཝགྒོ ཨེཀཱདསམོ ནིཊྛིཏོ.

ཏསྶུདྡཱནཾ –

བེལཊྛཱནིཀོ སེཏུཙྪོ, བནྡྷུརོ ཁིཏཀོ ཨིསི;

མལིཏཝམྦྷོ སུཧེམནྟོ, དྷམྨསཝོ དྷམྨསཝཔིཏཱ;

སངྒྷརཀྑིཏཏྠེརོ ¶ ཙ, ཨུསབྷོ ཙ མཧཱམུནཱིཏི.

༡༢. དྭཱདསམཝགྒོ

༡. ཛེནྟཏྠེརགཱཐཱ

༡༡༡.

‘‘དུཔྤབྦཛྫཾ ¶ ¶ ཝེ དུརདྷིཝཱསཱ གེཧཱ, དྷམྨོ གམྦྷཱིརོ དུརདྷིགམཱ བྷོགཱ;

ཀིཙྪཱ ཝུཏྟི ནོ ཨིཏརཱིཏརེནེཝ, ཡུཏྟཾ ཙིནྟེཏུཾ སཏཏམནིཙྩཏ’’ནྟི.

… ཛེནྟོ ཐེརོ….

༢. ཝཙྪགོཏྟཏྠེརགཱཐཱ

༡༡༢.

‘‘ཏེཝིཛྫོཧཾ མཧཱཛྷཱཡཱི, ཙེཏོསམཐཀོཝིདོ;

སདཏྠོ མེ ཨནུཔྤཏྟོ, ཀཏཾ བུདྡྷསྶ སཱསན’’ནྟི.

… ཝཙྪགོཏྟོ ཐེརོ….

༣. ཝནཝཙྪཏྠེརགཱཐཱ

༡༡༣.

‘‘ཨཙྪོདིཀཱ པུཐུསིལཱ,གོནངྒུལམིགཱཡུཏཱ;

ཨམྦུསེཝཱལསཉྪནྣཱ, ཏེ སེལཱ རམཡནྟི མ’’ནྟི.

… ཝནཝཙྪོ ཐེརོ….

༤. ཨདྷིམུཏྟཏྠེརགཱཐཱ

༡༡༤.

‘‘ཀཱཡདུཊྛུལླགརུནོ, ཧིཡྻམཱནམྷི [ཧཱིཡམཱནམྷི (སཱི.)] ཛཱིཝིཏེ;

སརཱིརསུཁགིདྡྷསྶ, ཀུཏོ སམཎསཱདྷུཏཱ’’ཏི.

… ཨདྷིམུཏྟོ ཐེརོ….

༥. མཧཱནཱམཏྠེརགཱཐཱ

༡༡༥.

‘‘ཨེསཱཝཧིཡྻསེ པབྦཏེན, བཧུཀུཊཛསལླཀིཀེན [སལླཀིཏེན (སཱི.), སལླརིཀེན (སྱཱ.)];

ནེསཱདཀེན ¶ གིརིནཱ, ཡསསྶིནཱ པརིཙྪདེནཱ’’ཏི.

… མཧཱནཱམོ ཐེརོ….

༦. པཱརཱཔརིཡཏྠེརགཱཐཱ

༡༡༦.

‘‘ཚཕསྶཱཡཏནེ ¶ ¶ ¶ ཧིཏྭཱ, གུཏྟདྭཱརོ སུསཾཝུཏོ;

ཨགྷམཱུལཾ ཝམིཏྭཱན, པཏྟོ མེ ཨཱསཝཀྑཡོ’’ཏི.

… པཱརཱཔརིཡོ [པཱརཱསརིཡོ (སཱི.), པཱརཾཔརིཡོ (ཀ.)] ཐེརོ ….

༧. ཡསཏྠེརགཱཐཱ

༡༡༧.

‘‘སུཝིལིཏྟོ སུཝསནོ,སབྦཱབྷརཎབྷཱུསིཏོ;

ཏིསྶོ ཝིཛྫཱ ཨཛ྄ཛྷགམིཾ, ཀཏཾ བུདྡྷསྶ སཱསན’’ནྟི.

… ཡསོ ཐེརོ….

༨. ཀིམིལཏྠེརགཱཐཱ

༡༡༨.

‘‘ཨབྷིསཏྟོཝ ནིཔཏཏི, ཝཡོ རཱུཔཾ ཨཉྙམིཝ ཏཐེཝ སནྟཾ;

ཏསྶེཝ སཏོ ཨཝིཔྤཝསཏོ, ཨཉྙསྶེཝ སརཱམི ཨཏྟཱན’’ནྟི.

… ཀིམིལོ [ཀིམྦིལོ (སཱི. སྱཱ.)] ཐེརོ….

༩. ཝཛྫིཔུཏྟཏྠེརགཱཐཱ

༡༡༩.

‘‘རུཀྑམཱུལགཧནཾ པསཀྐིཡ, ནིབྦཱནཾ ཧདཡསྨིཾ ཨོཔིཡ;

ཛྷཱཡ གོཏམ མཱ ཙ པམཱདོ, ཀིཾ ཏེ བིལི༹བིལི༹ཀཱ ཀརིསྶཏཱི’’ཏི.

… ཝཛྫིཔུཏྟོ ཐེརོ….

༡༠. ཨིསིདཏྟཏྠེརགཱཐཱ

༡༢༠.

‘‘པཉྩཀྑནྡྷཱ པརིཉྙཱཏཱ, ཏིཊྛནྟི ཚིནྣམཱུལཀཱ;

དུཀྑཀྑཡོ ¶ ཨནུཔྤཏྟོ,པཏྟོ མེ ཨཱསཝཀྑཡོ’’ཏི.

… ཨིསིདཏྟོ ཐེརོ….

ཝགྒོ དྭཱདསམོ ནིཊྛིཏོ.

ཏསྶུདྡཱནཾ ¶ –

ཛེནྟོ ¶ ཙ ཝཙྪགོཏྟོ ཙ, ཝཙྪོ ཙ ཝནསཝ྄ཧཡོ;

ཨདྷིམུཏྟོ མཧཱནཱམོ, པཱརཱཔརིཡོ ཡསོཔི ཙ;

ཀིམིལོ ཝཛྫིཔུཏྟོ ཙ, ཨིསིདཏྟོ མཧཱཡསོཏི.

ཨེཀཀནིཔཱཏོ ནིཊྛིཏོ.

ཏཏྲུདྡཱནཾ –

ཝཱིསུཏྟརསཏཾ ཐེརཱ, ཀཏཀིཙྩཱ ཨནཱསཝཱ;

ཨེཀཀེཝ ནིཔཱཏམྷི, སུསངྒཱིཏཱ མཧེསིབྷཱིཏི.

༢. དུཀནིཔཱཏོ

༡. པཋམཝགྒོ

༡. ཨུཏྟརཏྠེརགཱཐཱ

༡༢༡.

‘‘ནཏྠི ¶ ¶ ¶ ཀོཙི བྷཝོ ནིཙྩོ, སངྑཱརཱ ཝཱཔི སསྶཏཱ;

ཨུཔྤཛྫནྟི ཙ ཏེ ཁནྡྷཱ, ཙཝནྟི ཨཔརཱཔརཾ.

༡༢༢.

‘‘ཨེཏམཱདཱིནཾ ཉཏྭཱ, བྷཝེནམྷི ཨནཏྠིཀོ;

ནིསྶཊོ སབྦཀཱམེཧི, པཏྟོ མེ ཨཱསཝཀྑཡོ’’ཏི.

ཨིཏྠཾ སུདཾ ཨཱཡསྨཱ ཨུཏྟརོ ཐེརོ གཱཐཱཡོ ཨབྷཱསིཏྠཱཏི.

༢. པིཎྜོལབྷཱརདྭཱཛཏྠེརགཱཐཱ

༡༢༣.

‘‘ནཡིདཾ ¶ ཨནཡེན ཛཱིཝིཏཾ, ནཱཧཱརོ ཧདཡསྶ སནྟིཀོ;

ཨཱཧཱརཊྛིཏིཀོ སམུསྶཡོ, ཨིཏི དིསྭཱན ཙརཱམི ཨེསནཾ.

༡༢༤.

‘‘པངྐོཏི ཧི ནཾ པཝེདཡུཾ, ཡཱཡཾ ཝནྡནཔཱུཛནཱ ཀུལེསུ;

སུཁུམཾ སལླཾ དུརུབྦཧཾ, སཀྐཱརོ ཀཱཔུརིསེན དུཛྫཧོ’’ཏི.

ཨིཏྠཾ སུདཾ ཨཱཡསྨཱ པིཎྜོལབྷཱརདྭཱཛོ ཐེརོ གཱཐཱཡོ ཨབྷཱསིཏྠཱཏི.

༣. ཝལླིཡཏྠེརགཱཐཱ

༡༢༥.

‘‘མཀྐཊོ པཉྩདྭཱརཱཡཾ, ཀུཊིཀཱཡཾ པསཀྐིཡ;

དྭཱརེན ཨནུཔརིཡེཏི, གྷཊྚཡནྟོ མུཧུཾ མུཧུཾ.

༡༢༦.

‘‘ཏིཊྛ མཀྐཊ མཱ དྷཱཝི, ན ཧི ཏེ ཏཾ ཡཐཱ པུརེ;

ནིགྒཧཱིཏོསི པཉྙཱཡ, ནེཝ དཱུརཾ གམིསྶཏཱི’’ཏི.

… ཝལླིཡོ ཐེརོ….

༤. གངྒཱཏཱིརིཡཏྠེརགཱཐཱ

༡༢༧.

‘‘ཏིཎྞཾ ¶ ¶ མེ ཏཱལཔཏྟཱནཾ, གངྒཱཏཱིརེ ཀུཊཱི ཀཏཱ;

ཚཝསིཏྟོཝ མེ པཏྟོ, པཾསུཀཱུལཉྩ ཙཱིཝརཾ.

༡༢༨.

‘‘དྭིནྣཾ ཨནྟརཝསྶཱནཾ, ཨེཀཱ ཝཱཙཱ མེ བྷཱསིཏཱ;

ཏཏིཡེ ཨནྟརཝསྶམྷི, ཏམོཁནྡྷོ [ཏམོཀྑནྡྷོ (སཱི. སྱཱ.)] པདཱལིཏོ’’ཏི.

… གངྒཱཏཱིརིཡོ ཐེརོ….

༥. ཨཛིནཏྠེརགཱཐཱ

༡༢༩.

‘‘ཨཔི ཙེ ཧོཏི ཏེཝིཛྫོ, མཙྩུཧཱཡཱི ཨནཱསཝོ;

ཨཔྤཉྙཱཏོཏི ནཾ བཱལཱ, ཨཝཛཱནནྟི ཨཛཱནཏཱ.

༡༣༠.

‘‘ཡོ ¶ ཙ ཁོ ཨནྣཔཱནསྶ, ལཱབྷཱི ཧོཏཱིདྷ པུགྒལོ;

པཱཔདྷམྨོཔི ཙེ ཧོཏི, སོ ནེསཾ ཧོཏི སཀྐཏོ’’ཏི.

… ཨཛིནོ ཐེརོ….

༦. མེལ༹ཛིནཏྠེརགཱཐཱ

༡༣༡.

‘‘ཡདཱཧཾ ¶ དྷམྨམསྶོསིཾ, བྷཱསམཱནསྶ སཏྠུནོ;

ན ཀངྑམབྷིཛཱནཱམི, སབྦཉྙཱུཨཔརཱཛིཏེ.

༡༣༢.

‘‘སཏྠཝཱཧེ མཧཱཝཱིརེ, སཱརཐཱིནཾ ཝརུཏྟམེ;

མགྒེ པཊིཔདཱཡཾ ཝཱ, ཀངྑཱ མཡ྄ཧཾ ན ཝིཛྫཏཱི’’ཏི.

… མེལ༹ཛིནོ ཐེརོ….

༧. རཱདྷཏྠེརགཱཐཱ

༡༣༣.

[དྷ. པ. ༡༣ དྷམྨཔདེ] ‘‘ཡཐཱ ཨགཱརཾ དུཙྪནྣཾ, ཝུཊྛཱི སམཏིཝིཛ྄ཛྷཏི;

ཨེཝཾ ཨབྷཱཝིཏཾ ཙིཏྟཾ, རཱགོ སམཏིཝིཛ྄ཛྷཏི.

༡༣༤.

[དྷ. པ. ༡༤ དྷམྨཔདེ] ‘‘ཡཐཱ ཨགཱརཾ སུཙྪནྣཾ, ཝུཌྜྷཱི ན སམཏིཝིཛ྄ཛྷཏི;

ཨེཝཾ སུབྷཱཝིཏཾ ཙིཏྟཾ, རཱགོ ན སམཏིཝིཛ྄ཛྷཏཱི’’ཏི.

… རཱདྷོ ཐེརོ….

༨. སུརཱདྷཏྠེརགཱཐཱ

༡༣༥.

‘‘ཁཱིཎཱ ¶ ¶ ཧི མཡ྄ཧཾ ཛཱཏི, ཝུསིཏཾ ཛིནསཱསནཾ;

པཧཱིནོ ཛཱལསངྑཱཏོ, བྷཝནེཏྟི སམཱུཧཏཱ.

༡༣༦.

‘‘ཡསྶཏྠཱཡ པབྦཛིཏོ, ཨགཱརསྨཱནགཱརིཡཾ;

སོ མེ ཨཏྠོ ཨནུཔྤཏྟོ, སབྦསཾཡོཛནཀྑཡོ’’ཏི.

… སུརཱདྷོ ཐེརོ….

༩. གོཏམཏྠེརགཱཐཱ

༡༣༧.

‘‘སུཁཾ སུཔནྟི མུནཡོ, ཡེ ཨིཏྠཱིསུ ན བཛ྄ཛྷརེ;

སདཱ ཝེ རཀྑིཏབྦཱསུ, ཡཱསུ སཙྩཾ སུདུལླབྷཾ.

༡༣༨.

‘‘ཝདྷཾ ཙརིམྷ ཏེ ཀཱམ, ཨནཎཱ དཱནི ཏེ མཡཾ;

གཙྪཱམ དཱནི ནིབྦཱནཾ, ཡཏྠ གནྟྭཱ ན སོཙཏཱི’’ཏི.

… གོཏམོ ཐེརོ….

༡༠. ཝསབྷཏྠེརགཱཐཱ

༡༣༩.

‘‘པུབྦེ ¶ ཧནཏི ཨཏྟཱནཾ, པཙྪཱ ཧནཏི སོ པརེ;

སུཧཏཾ ཧནྟི ཨཏྟཱནཾ, ཝཱིཏཾསེནེཝ པཀྑིམཱ.

༡༤༠.

‘‘ན བྲཱཧྨཎོ བཧིཝཎྞོ, ཨནྟོ ཝཎྞོ ཧི བྲཱཧྨཎོ;

ཡསྨིཾ པཱཔཱནི ཀམྨཱནི, ས ཝེ ཀཎྷོ སུཛམྤཏཱི’’ཏི.

… ཝསབྷོ ཐེརོ….

ཝགྒོ པཋམོ ནིཊྛིཏོ.

ཏསྶུདྡཱནཾ –

ཨུཏྟརོ ཙེཝ པིཎྜོལོ, ཝལླིཡོ ཏཱིརིཡོ ཨིསི;

ཨཛིནོ ཙ མེལ༹ཛིནོ, རཱདྷོ སུརཱདྷོ གོཏམོ;

ཝསབྷེན ཨིམེ ཧོནྟི, དས ཐེརཱ མཧིདྡྷིཀཱཏི.

༢. དུཏིཡཝགྒོ

༡. མཧཱཙུནྡཏྠེརགཱཐཱ

༡༤༡.

‘‘སུསྶཱུསཱ ¶ ¶ ¶ སུཏཝདྡྷནཱི, སུཏཾ པཉྙཱཡ ཝདྡྷནཾ;

པཉྙཱཡ ཨཏྠཾ ཛཱནཱཏི, ཉཱཏོ ཨཏྠོ སུཁཱཝཧོ.

༡༤༢.

‘‘སེཝེཐ པནྟཱནི སེནཱསནཱནི, ཙརེཡྻ སཾཡོཛནཝིཔྤམོཀྑཾ;

སཙེ རཏིཾ ནཱདྷིགཙྪེཡྻ ཏཏྠ, སངྒྷེ ཝསེ རཀྑིཏཏྟོ སཏིམཱ’’ཏི.

… མཧཱཙུནྡོ ཐེརོ….

༢. ཛོཏིདཱསཏྠེརགཱཐཱ

༡༤༣.

‘‘ཡེ ཁོ ཏེ ཝེཋམིསྶེན [ཝེགྷམིསྶེན (སཱི. སྱཱ.), ཝེ གམིསྶེན, ཝེཁམིསྶེན (ཀ.)], ནཱནཏྟེན ཙ ཀམྨུནཱ;

མནུསྶེ ཨུཔརུནྡྷནྟི, ཕརུསཱུཔཀྐམཱ ཛནཱ;

ཏེཔི ¶ ཏཏྠེཝ ཀཱིརནྟི, ན ཧི ཀམྨཾ པནསྶཏི.

༡༤༤.

‘‘ཡཾ ཀརོཏི ནརོ ཀམྨཾ, ཀལྱཱཎཾ ཡདི པཱཔཀཾ;

ཏསྶ ཏསྶེཝ དཱཡཱདོ, ཡཾ ཡཾ ཀམྨཾ པཀུབྦཏཱི’’ཏི.

… ཛོཏིདཱསོ ཐེརོ….

༣. ཧེརཉྙཀཱནིཏྠེརགཱཐཱ

༡༤༥.

‘‘ཨཙྩཡནྟི ཨཧོརཏྟཱ, ཛཱིཝིཏཾ ཨུཔརུཛ྄ཛྷཏི;

ཨཱཡུ ཁཱིཡཏི མཙྩཱནཾ, ཀུནྣདཱིནཾཝ ཨོདཀཾ.

༡༤༦.

‘‘ཨཐ པཱཔཱནི ཀམྨཱནི, ཀརཾ བཱལོ ན བུཛ྄ཛྷཏི;

པཙྪཱསྶ ཀཊུཀཾ ཧོཏི, ཝིཔཱཀོ ཧིསྶ པཱཔཀོ’’ཏི.

… ཧེརཉྙཀཱནིཏྠེརོ….

༤. སོམམིཏྟཏྠེརགཱཐཱ

༡༤༧.

‘‘པརིཏྟཾ དཱརུམཱརུཡ྄ཧ, ཡཐཱ སཱིདེ མཧཎྞཝེ;

ཨེཝཾ ཀུསཱིཏམཱགམྨ, སཱདྷུཛཱིཝཱིཔི སཱིདཏི;

ཏསྨཱ ཏཾ པརིཝཛྫེཡྻ, ཀུསཱིཏཾ ཧཱིནཝཱིརིཡཾ.

༡༤༨.

‘‘པཝིཝིཏྟེཧི ¶ ¶ ཨརིཡེཧི, པཧིཏཏྟེཧི ཛྷཱཡིབྷི;

ནིཙྩཾ ཨཱརདྡྷཝཱིརིཡེཧི, པཎྜིཏེཧི སཧཱཝསེ’’ཏི.

… སོམམིཏྟོ ཐེརོ….

༥. སབྦམིཏྟཏྠེརགཱཐཱ

༡༤༩.

‘‘ཛནོ ཛནམྷི སམྦདྡྷོ [སམྦདྡྷོ (སྱཱ. ཀ.)], ཛནམེཝསྶིཏོ ཛནོ;

ཛནོ ཛནེན ཧེཋཱིཡཏི, ཧེཋེཏི ཙ [བོདྷིཡཏི, བཱདྷེཏི ཙ (ཀ.)] ཛནོ ཛནཾ.

༡༥༠.

‘‘ཀོ ¶ ཧི ཏསྶ ཛནེནཏྠོ, ཛནེན ཛནིཏེན ཝཱ;

ཛནཾ ཨོཧཱཡ གཙྪཾ ཏཾ, ཧེཋཡིཏྭཱ [བཱདྷཡིཏྭཱ (ཀ.)] བཧུཾ ཛན’’ནྟི.

… སབྦམིཏྟོ ཐེརོ….

༦. མཧཱཀཱལ༹ཏྠེརགཱཐཱ

༡༥༡.

‘‘ཀཱལཱི༹ ¶ ཨིཏྠཱི བྲཧཏཱི དྷངྐརཱུཔཱ, སཏྠིཉྩ བྷེཏྭཱ ཨཔརཉྩ སཏྠིཾ;

བཱཧཉྩ བྷེཏྭཱ ཨཔརཉྩ བཱཧཾ, སཱིསཉྩ བྷེཏྭཱ དདྷིཐཱལཀཾཝ;

ཨེསཱ ནིསིནྣཱ ཨབྷིསནྡཧིཏྭཱ.

༡༥༢.

‘‘ཡོ ཝེ ཨཝིདྭཱ ཨུཔདྷིཾ ཀརོཏི, པུནཔྤུནཾ དུཀྑམུཔེཏི མནྡོ;

ཏསྨཱ པཛཱནཾ ཨུཔདྷིཾ ན ཀཡིརཱ, མཱཧཾ པུན བྷིནྣསིརོ སཡིསྶ’’ནྟི [པསྶིསྶནྟི (ཀ.)].

… མཧཱཀཱལོ༹ ཐེརོ….

༧. ཏིསྶཏྠེརགཱཐཱ

༡༥༣.

‘‘བཧཱུ སཔཏྟེ ལབྷཏི, མུཎྜོ སངྒྷཱཊིཔཱརུཏོ;

ལཱབྷཱི ཨནྣསྶ པཱནསྶ, ཝཏྠསྶ སཡནསྶ ཙ.

༡༥༤.

‘‘ཨེཏམཱདཱིནཝཾ ཉཏྭཱ, སཀྐཱརེསུ མཧབྦྷཡཾ;

ཨཔྤལཱབྷོ ཨནཝསྶུཏོ, སཏོ བྷིཀྑུ པརིབྦཛེ’’ཏི.

… ཏིསྶོ ཐེརོ….

༨. ཀིམིལཏྠེརགཱཐཱ

༡༥༥.

‘‘པཱཙཱིནཝཾསདཱཡམྷི ¶ , སཀྱཔུཏྟཱ སཧཱཡཀཱ;

པཧཱཡཱནཔྤཀེ བྷོགེ, ཨུཉྪཱཔཏྟཱགཏེ རཏཱ.

༡༥༦.

‘‘ཨཱརདྡྷཝཱིརིཡཱ ¶ པཧིཏཏྟཱ, ནིཙྩཾ དལ༹ྷཔརཀྐམཱ;

རམནྟི དྷམྨརཏིཡཱ, ཧིཏྭཱན ལོཀིཡཾ རཏི’’ནྟི.

… ཀིམིལོ [ཀིམྦིལོ (སཱི. སྱཱ. པཱི.)] ཐེརོ….

༩. ནནྡཏྠེརགཱཐཱ

༡༥༧.

‘‘ཨཡོནིསོ ¶ མནསིཀཱརཱ, མཎྜནཾ ཨནུཡུཉྫིསཾ;

ཨུདྡྷཏོ ཙཔལོ ཙཱསིཾ, ཀཱམརཱགེན ཨཊྚིཏོ.

༡༥༨.

‘‘ཨུཔཱཡཀུསལེནཱཧཾ, བུདྡྷེནཱདིཙྩབནྡྷུནཱ;

ཡོནིསོ པཊིཔཛྫིཏྭཱ, བྷཝེ ཙིཏྟཾ ཨུདབྦཧི’’ནྟི.

… ནནྡོ ཐེརོ….

༡༠. སིརིམཏྠེརགཱཐཱ

༡༥༩.

‘‘པརེ ཙ ནཾ པསཾསནྟི, ཨཏྟཱ ཙེ ཨསམཱཧིཏོ;

མོགྷཾ པརེ པསཾསནྟི, ཨཏྟཱ ཧི ཨསམཱཧིཏོ.

༡༦༠.

‘‘པརེ ཙ ནཾ གརཧནྟི, ཨཏྟཱ ཙེ སུསམཱཧིཏོ;

མོགྷཾ པརེ གརཧནྟི, ཨཏྟཱ ཧི སུསམཱཧིཏོ’’ཏི.

… སིརིམཱ ཐེརོ….

ཝགྒོ དུཏིཡོ ནིཊྛིཏོ.

ཏསྶུདྡཱནཾ –

ཙུནྡོ ¶ ཙ ཛོཏིདཱསོ ཙ, ཐེརོ ཧེརཉྙཀཱནི ཙ;

སོམམིཏྟོ སབྦམིཏྟོ, ཀཱལོ ཏིསྶོ ཙ ཀིམིལོ [ཀིམྦིལོ (སཱི. སྱཱ. པཱི.), ཚནྡལཀྑཎཱནུལོམཾ];

ནནྡོ ཙ སིརིམཱ ཙེཝ, དས ཐེརཱ མཧིདྡྷིཀཱཏི.

༣. ཏཏིཡཝགྒོ

༡. ཨུཏྟརཏྠེརགཱཐཱ

༡༦༡.

‘‘ཁནྡྷཱ ¶ ¶ མཡཱ པརིཉྙཱཏཱ, ཏཎྷཱ མེ སུསམཱུཧཏཱ;

བྷཱཝིཏཱ མམ བོཛ྄ཛྷངྒཱ, པཏྟོ མེ ཨཱསཝཀྑཡོ.

༡༦༢.

‘‘སོཧཾ ¶ ཁནྡྷེ པརིཉྙཱཡ, ཨབྦཧིཏྭཱན [ཨབྦུཧིཏྭཱན (ཀ.)] ཛཱལིནིཾ;

བྷཱཝཡིཏྭཱན བོཛ྄ཛྷངྒེ, ནིབྦཱཡིསྶཾ ཨནཱསཝོ’’ཏི.

… ཨུཏྟརོ ཐེརོ….

༢. བྷདྡཛིཏྠེརགཱཐཱ

༡༦༣.

‘‘པནཱདོ ནཱམ སོ རཱཛཱ, ཡསྶ ཡཱུཔོ སུཝཎྞཡོ;

ཏིརིཡཾ སོལ༹སུབྦེདྷོ [སོལ༹སཔབྦེདྷོ (སཱི. ཨཊྛ.), སོལ༹སབྦཱཎོ (?)], ཨུབྦྷམཱཧུ [ཨུདྡྷམཱཧུ (སཱི.), ཨུཙྩམཱཧུ (སྱཱ.)] སཧསྶདྷཱ.

༡༦༤.

‘‘སཧསྶཀཎྜོ སཏགེཎྜུ, དྷཛཱལུ ཧརིཏཱམཡོ;

ཨནཙྩུཾ ཏཏྠ གནྡྷབྦཱ, ཚསཧསྶཱནི སཏྟདྷཱ’’ཏི.

… བྷདྡཛིཏྠེརོ….

༣. སོབྷིཏཏྠེརགཱཐཱ

༡༦༥.

‘‘སཏིམཱ པཉྙཝཱ བྷིཀྑུ, ཨཱརདྡྷབལཝཱིརིཡོ;

པཉྩ ཀཔྤསཏཱནཱཧཾ, ཨེཀརཏྟིཾ ཨནུསྶརིཾ.

༡༦༦.

‘‘ཙཏྟཱརོ སཏིཔཊྛཱནེ, སཏྟ ཨཊྛ ཙ བྷཱཝཡཾ;

པཉྩ ཀཔྤསཏཱནཱཧཾ, ཨེཀརཏྟིཾ ཨནུསྶརི’’ནྟི.

… སོབྷིཏོ ཐེརོ….

༤. ཝལླིཡཏྠེརགཱཐཱ

༡༦༧.

‘‘ཡཾ ཀིཙྩཾ དལ༹ྷཝཱིརིཡེན, ཡཾ ཀིཙྩཾ བོདྡྷུམིཙྪཏཱ;

ཀརིསྶཾ ནཱཝརཛ྄ཛྷིསྶཾ [ནཱཝརུཛ྄ཛྷིསྶཾ (ཀ. སཱི. ཀ.)], པསྶ ཝཱིརིཡཾ པརཀྐམ.

༡༦༨.

‘‘ཏྭཉྩ མེ མགྒམཀྑཱཧི, ཨཉྫསཾ ཨམཏོགདྷཾ;

ཨཧཾ མོནེན མོནིསྶཾ, གངྒཱསོཏོཝ སཱགར’’ནྟི.

… ཝལླིཡོ ཐེརོ….

༥. ཝཱིཏསོཀཏྠེརགཱཐཱ

༡༦༩.

‘‘ཀེསེ ¶ ¶ མེ ཨོལིཁིསྶནྟི, ཀཔྤཀོ ཨུཔསངྐམི;

ཏཏོ ¶ ཨཱདཱསམཱདཱཡ, སརཱིརཾ པཙྩཝེཀྑིསཾ.

༡༧༠.

‘‘ཏུཙྪོ ¶ ཀཱཡོ ཨདིསྶིཏྠ, ཨནྡྷཀཱརོ ཏམོ བྱགཱ;

སབྦེ ཙོལཱ༹ སམུཙྪིནྣཱ, ནཏྠི དཱནི པུནབྦྷཝོ’’ཏི.

… ཝཱིཏསོཀོ ཐེརོ….

༦. པུཎྞམཱསཏྠེརགཱཐཱ

༡༧༡.

‘‘པཉྩ ནཱིཝརཎེ ཧིཏྭཱ, ཡོགཀྑེམསྶ པཏྟིཡཱ;

དྷམྨཱདཱསཾ གཧེཏྭཱན, ཉཱཎདསྶནམཏྟནོ.

༡༧༢.

‘‘པཙྩཝེཀྑིཾ ཨིམཾ ཀཱཡཾ, སབྦཾ སནྟརབཱཧིརཾ;

ཨཛ྄ཛྷཏྟཉྩ བཧིདྡྷཱ ཙ, ཏུཙྪོ ཀཱཡོ ཨདིསྶཐཱ’’ཏི.

… པུཎྞམཱསོ ཐེརོ….

༧. ནནྡཀཏྠེརགཱཐཱ

༡༧༣.

‘‘ཡཐཱཔི བྷདྡོ ཨཱཛཉྙོ, ཁལིཏྭཱ པཏིཏིཊྛཏི;

བྷིཡྻོ ལདྡཱན སཾཝེགཾ, ཨདཱིནོ ཝཧཏེ དྷུརཾ.

༡༧༤.

‘‘ཨེཝཾ དསྶནསམྤནྣཾ, སམྨཱསམྦུདྡྷསཱཝཀཾ;

ཨཱཛཱནཱིཡཾ མཾ དྷཱརེཐ, པུཏྟཾ བུདྡྷསྶ ཨོརས’’ནྟི.

… ནནྡཀོ ཐེརོ….

༨. བྷརཏཏྠེརགཱཐཱ

༡༧༥.

‘‘ཨེཧི ནནྡཀ གཙྪཱམ, ཨུཔཛ྄ཛྷཱཡསྶ སནྟིཀཾ;

སཱིཧནཱདཾ ནདིསྶཱམ, བུདྡྷསེཊྛསྶ སམྨུཁཱ.

༡༧༦.

‘‘ཡཱཡ ནོ ཨནུཀམྤཱཡ, ཨམྷེ པབྦཱཛཡཱི མུནི;

སོ ནོ ཨཏྠོ ཨནུཔྤཏྟོ, སབྦསཾཡོཛནཀྑཡོ’’ཏི.

… བྷརཏོ ཐེརོ….

༩. བྷཱརདྭཱཛཏྠེརགཱཐཱ

༡༧༧.

‘‘ནདནྟི ¶ ¶ ¶ ཨེཝཾ སཔྤཉྙཱ, སཱིཧཱཝ གིརིགབྦྷརེ;

ཝཱིརཱ ཝིཛིཏསངྒཱམཱ, ཛེཏྭཱ མཱརཾ སཝཱཧནིཾ [སཝཱཧནཾ (བཧཱུསུ)].

༡༧༨.

‘‘སཏྠཱ ཙ པརིཙིཎྞོ མེ, དྷམྨོ སངྒྷོ ཙ པཱུཛིཏོ;

ཨཧཉྩ ཝིཏྟོ སུམནོ, པུཏྟཾ དིསྭཱ ཨནཱསཝ’’ནྟི.

… བྷཱརདྭཱཛོ ཐེརོ….

༡༠. ཀཎྷདིནྣཏྠེརགཱཐཱ

༡༧༩.

‘‘ཨུཔཱསིཏཱ སཔྤུརིསཱ, སུཏཱ དྷམྨཱ ཨབྷིཎྷསོ;

སུཏྭཱན པཊིཔཛྫིསྶཾ, ཨཉྫསཾ ཨམཏོགདྷཾ.

༡༨༠.

‘‘བྷཝརཱགཧཏསྶ མེ སཏོ, བྷཝརཱགོ པུན མེ ན ཝིཛྫཏི;

ན ཙཱཧུ ན ཙ མེ བྷཝིསྶཏི, ན ཙ མེ ཨེཏརཧི ཝིཛྫཏཱི’’ཏི.

… ཀཎྷདིནྣོ ཐེརོ….

ཝགྒོ ཏཏིཡོ ནིཊྛིཏོ.

ཏསྶུདྡཱནཾ –

ཨུཏྟརོ བྷདྡཛིཏྠེརོ, སོབྷིཏོ ཝལླིཡོ ཨིསི;

ཝཱིཏསོཀོ ཙ ཡོ ཐེརོ, པུཎྞམཱསོ ཙ ནནྡཀོ;

བྷརཏོ བྷཱརདྭཱཛོ ཙ, ཀཎྷདིནྣོ མཧཱམུནཱིཏི.

༤. ཙཏུཏྠཝགྒོ

༡. མིགསིརཏྠེརགཱཐཱ

༡༨༡.

‘‘ཡཏོ ¶ ཨཧཾ པབྦཛིཏོ, སམྨཱསམྦུདྡྷསཱསནེ;

ཝིམུཙྩམཱནོ ཨུགྒཙྪིཾ, ཀཱམདྷཱཏུཾ ཨུཔཙྩགཾ.

༡༨༢.

‘‘བྲཧྨུནོ ¶ ¶ པེཀྑམཱནསྶ, ཏཏོ ཙིཏྟཾ ཝིམུཙྩི མེ;

ཨཀུཔྤཱ མེ ཝིམུཏྟཱིཏི, སབྦསཾཡོཛནཀྑཡཱ’’ཏི.

… མིགསིརོ ཐེརོ….

༢. སིཝཀཏྠེརགཱཐཱ

༡༨༣.

‘‘ཨནིཙྩཱནི ¶ གཧཀཱནི, ཏཏྠ ཏཏྠ པུནཔྤུནཾ;

གཧཀཱརཾ [གཧཀཱརཀཾ (སཱི. པཱི.)] གཝེསནྟོ, དུཀྑཱ ཛཱཏི པུནཔྤུནཾ.

༡༨༤.

‘‘གཧཀཱརཀ དིཊྛོསི, པུན གེཧཾ ན ཀཱཧསི;

སབྦཱ ཏེ ཕཱསུཀཱ བྷགྒཱ, ཐཱུཎིཀཱ [ཐཱུཎིརཱ (པཱི. ཀ.), དྷུཎིརཱ (སྱཱ.)] ཙ ཝིདཱལིཏཱ [པདཱལིཏཱ (སཱི. སྱཱ.)];

ཝིམརིཡཱདིཀཏཾ ཙིཏྟཾ, ཨིདྷེཝ ཝིདྷམིསྶཏཱི’’ཏི.

… སིཝཀོ [སཱིཝཀོ (སཱི.)] ཐེརོ….

༣. ཨུཔཝཱཎཏྠེརགཱཐཱ

༡༨༥.

‘‘ཨརཧཾ སུགཏོ ལོཀེ, ཝཱཏེཧཱབཱདྷིཏོ [… བཱདྷིཏོ (ཀ.)] མུནི;

སཙེ ཨུཎྷོདཀཾ ཨཏྠི, མུནིནོ དེཧི བྲཱཧྨཎ.

༡༨༦.

‘‘པཱུཛིཏོ པཱུཛནེཡྻཱནཾ [པཱུཛནཱིཡཱནཾ (སཱི.)], སཀྐརེཡྻཱན སཀྐཏོ;

ཨཔཙིཏོཔཙེཡྻཱནཾ [ཨཔཙནཱིཡཱནཾ (སཱི.), ཨཔཙིནེཡྻཱནཾ (སྱཱ.)], ཏསྶ ཨིཙྪཱམི ཧཱཏཝེ’’ཏི.

… ཨུཔཝཱཎོ ཐེརོ….

༤. ཨིསིདིནྣཏྠེརགཱཐཱ

༡༨༧.

‘‘དིཊྛཱ མཡཱ དྷམྨདྷརཱ ཨུཔཱསཀཱ, ཀཱམཱ ཨནིཙྩཱ ཨིཏི བྷཱསམཱནཱ;

སཱརཏྟརཏྟཱ མཎིཀུཎྜལེསུ, པུཏྟེསུ དཱརེསུ ཙ ཏེ ཨཔེཀྑཱ.

༡༨༨.

‘‘ཨདྡྷཱ ན ཛཱནནྟི ཡཏོདྷ དྷམྨཾ, ཀཱམཱ ¶ ཨནིཙྩཱ ཨིཏི ཙཱཔི ཨཱཧུ;

རཱགཉྩ ཏེསཾ ན བལཏྠི ཚེཏྟུཾ, ཏསྨཱ སིཏཱ པུཏྟདཱརཾ དྷནཉྩཱ’’ཏི.

… ཨིསིདིནྣོ ཐེརོ….

༥. སམྦུལཀཙྩཱནཏྠེརགཱཐཱ

༡༨༩.

‘‘དེཝོ ¶ ཙ ཝསྶཏི དེཝོ ཙ གལ༹གལཱ༹ཡཏི,

ཨེཀཀོ ཙཱཧཾ བྷེརཝེ བིལེ ཝིཧརཱམི;

ཏསྶ མཡ྄ཧཾ ཨེཀཀསྶ བྷེརཝེ བིལེ ཝིཧརཏོ,

ནཏྠི བྷཡཾ ཝཱ ཚམྦྷིཏཏྟཾ ཝཱ ལོམཧཾསོ ཝཱ.

༡༩༠.

‘‘དྷམྨཏཱ ¶ མམསཱ ཡསྶ མེ, ཨེཀཀསྶ བྷེརཝེ བིལེ;

ཝིཧརཏོ ནཏྠི བྷཡཾ ཝཱ, ཚམྦྷིཏཏྟཾ ཝཱ ལོམཧཾསོ ཝཱ’’ཏི.

… སམྦུལཀཙྩཱནོ [སམྦཧུལཀཙྩཱནོ (ཀ.)] ཐེརོ….

༦. ནིཏཀཏྠེརགཱཐཱ

༡༩༡.

[ཨུདཱ. ༣༤ ཨུདཱནེཔི] ‘‘ཀསྶ ¶ སེལཱུཔམཾ ཙིཏྟཾ, ཋིཏཾ ནཱནུཔཀམྤཏི;

ཝིརཏྟཾ རཛནཱིཡེསུ, ཀུཔྤནཱིཡེ ན ཀུཔྤཏི;

ཡསྶེཝཾ བྷཱཝིཏཾ ཙིཏྟཾ, ཀུཏོ ཏཾ དུཀྑམེསྶཏི.

༡༩༢.

‘‘མམ སེལཱུཔམཾ ཙིཏྟཾ, ཋིཏཾ ནཱནུཔཀམྤཏི;

ཝིརཏྟཾ རཛནཱིཡེསུ, ཀུཔྤནཱིཡེ ན ཀུཔྤཏི;

མམེཝཾ བྷཱཝིཏཾ ཙིཏྟཾ, ཀུཏོ མཾ དུཀྑམེསྶཏཱི’’ཏི.

… ནིཏཀོ [ཁིཏཀོ (སཱི. སྱཱ.)] ཐེརོ….

༧. སོཎཔོཊིརིཡཏྠེརགཱཐཱ

༡༩༣.

‘‘ན ཏཱཝ སུཔིཏུཾ ཧོཏི, རཏྟི ནཀྑཏྟམཱལིནཱི;

པཊིཛགྒིཏུམེཝེསཱ, རཏྟི ཧོཏི ཝིཛཱནཏཱ.

༡༩༤.

‘‘ཧཏྠིཀྑནྡྷཱཝཔཏིཏཾ ¶ , ཀུཉྫརོ ཙེ ཨནུཀྐམེ;

སངྒཱམེ མེ མཏཾ སེཡྻོ, ཡཉྩེ ཛཱིཝེ པརཱཛིཏོ’’ཏི.

… སོཎོ པོཊིརིཡོ [སེལིསྶརིཡོ (སཱི.), པོཊྚིརིཡཔུཏྟོ (སྱཱ.)] ཐེརོ ….

༨. ནིསབྷཏྠེརགཱཐཱ

༡༩༥.

‘‘པཉྩ ¶ ཀཱམགུཎེ ཧིཏྭཱ, པིཡརཱུཔེ མནོརམེ;

སདྡྷཱཡ གྷརཱ ནིཀྑམྨ, དུཀྑསྶནྟཀརོ བྷཝེ.

༡༩༦.

‘‘ནཱབྷིནནྡཱམི མརཎཾ, ནཱབྷིནནྡཱམི ཛཱིཝིཏཾ;

ཀཱལཉྩ པཊིཀངྑཱམི, སམྤཛཱནོ པཏིསྶཏོ’’ཏི.

… ནིསབྷོ ཐེརོ….

༩. ཨུསབྷཏྠེརགཱཐཱ

༡༩༧.

‘‘ཨམྦཔལླཝསངྐཱསཾ, ཨཾསེ ཀཏྭཱན ཙཱིཝརཾ;

ནིསིནྣོ ཧཏྠིགཱིཝཱཡཾ, གཱམཾ པིཎྜཱཡ པཱཝིསིཾ.

༡༩༨.

‘‘ཧཏྠིཀྑནྡྷཏོ ¶ ཨོརུཡ྄ཧ, སཾཝེགཾ ཨལབྷིཾ ཏདཱ;

སོཧཾ དིཏྟོ ཏདཱ སནྟོ, པཏྟོ མེ ཨཱསཝཀྑཡོ’’ཏི.

… ཨུསབྷོ ཐེརོ….

༡༠. ཀཔྤཊཀུརཏྠེརགཱཐཱ

༡༩༩.

‘‘ཨཡམིཏི ཀཔྤཊོ ཀཔྤཊཀུརོ, ཨཙྪཱཡ ཨཏིབྷརིཏཱཡ [ཨཏིབྷརིཡཱཡ (སཱི. ཀ.), ཨཙྩཾ བྷརཱཡ (སྱཱ.)];

ཨམཏགྷཊིཀཱཡཾ དྷམྨཀཊམཏྟོ [དྷམྨཀཊཔཏྟོ (སྱཱ. ཀ. ཨཊྛ.), དྷམྨཀཊམགྒོ (སཱི. ཨཊྛ.)], ཀཏཔདཾ ཛྷཱནཱནི ཨོཙེཏུཾ.

༢༠༠.

‘‘མཱ ¶ ཁོ ཏྭཾ ཀཔྤཊ པཙཱལེསི, མཱ ཏྭཾ ཨུཔཀཎྞམྷི ཏཱལེ༹སྶཾ;

ན ¶ ཧི [ན ཝཱ (ཀ.)] ཏྭཾ ཀཔྤཊ མཏྟམཉྙཱསི, སངྒྷམཛ྄ཛྷམྷི པཙལཱཡམཱནོཏི.

… ཀཔྤཊཀུརོ ཐེརོ….

ཝགྒོ ཙཏུཏྠོ ནིཊྛིཏོ.

ཏསྶུདྡཱནཾ –

མིགསིརོ ¶ སིཝཀོ ཙ, ཨུཔཝཱནོ ཙ པཎྜིཏོ;

ཨིསིདིནྣོ ཙ ཀཙྩཱནོ, ནིཏཀོ ཙ མཧཱཝསཱི;

པོཊིརིཡཔུཏྟོ ནིསབྷོ, ཨུསབྷོ ཀཔྤཊཀུརོཏི.

༥. པཉྩམཝགྒོ

༡. ཀུམཱརཀསྶཔཏྠེརགཱཐཱ

༢༠༡.

‘‘ཨཧོ བུདྡྷཱ ཨཧོ དྷམྨཱ, ཨཧོ ནོ སཏྠུ སམྤདཱ;

ཡཏྠ ཨེཏཱདིསཾ དྷམྨཾ, སཱཝཀོ སཙྪིཀཱཧི’’ཏི.

༢༠༢.

‘‘ཨསངྑེཡྻེསུ ཀཔྤེསུ, སཀྐཱཡཱདྷིགཏཱ ཨཧཱུ;

ཏེསམཡཾ པཙྪིམཀོ, ཙརིམོཡཾ སམུསྶཡོ;

ཛཱཏིམརཎསཾསཱརོ, ནཏྠི དཱནི པུནབྦྷཝོ’’ཏི.

… ཀུམཱརཀསྶཔོ ཐེརོ….

༢. དྷམྨཔཱལཏྠེརགཱཐཱ

༢༠༣.

‘‘ཡོ ¶ ཧཝེ དཧརོ བྷིཀྑུ, ཡུཉྫཏི བུདྡྷསཱསནེ;

ཛཱགརོ ས ཧི སུཏྟེསུ [པཏིསུཏྟེསུ (སཱི. ཀ.)], ཨམོགྷཾ ཏསྶ ཛཱིཝིཏཾ.

༢༠༤.

‘‘ཏསྨཱ ¶ སདྡྷཉྩ སཱིལཉྩ, པསཱདཾ དྷམྨདསྶནཾ;

ཨནུཡུཉྫེཐ མེདྷཱཝཱི, སརཾ བུདྡྷཱན སཱསན’’ནྟི.

… དྷམྨཔཱལོ ཐེརོ….

༣. བྲཧྨཱལིཏྠེརགཱཐཱ

༢༠༥.

‘‘ཀསྶིནྡྲིཡཱནི སམཐངྒཏཱནི, ཨསྶཱ ཡཐཱ སཱརཐིནཱ སུདནྟཱ;

པཧཱིནམཱནསྶ ཨནཱསཝསྶ, དེཝཱཔི ཀསྶ [ཏསྶ (བཧཱུསུ)] པིཧཡནྟི ཏཱདིནོ’’ཏི.

༢༠༦.

[དྷ. པ. ༩༤ དྷམྨཔདེཔི] ‘‘མཡ྄ཧིནྡྲིཡཱནི ¶ སམཐངྒཏཱནི, ཨསྶཱ ཡཐཱ སཱརཐིནཱ སུདནྟཱ;

པཧཱིནམཱནསྶ ཨནཱསཝསྶ, དེཝཱཔི མཡ྄ཧཾ པིཧཡནྟི ཏཱདིནོ’’ཏི.

… བྲཧྨཱལི ཐེརོ….

༤. མོགྷརཱཛཏྠེརགཱཐཱ

༢༠༧.

‘‘ཚཝིཔཱཔཀ ¶ ཙིཏྟབྷདྡཀ, མོགྷརཱཛ སཏཏཾ སམཱཧིཏོ;

ཧེམནྟིཀསཱིཏཀཱལརཏྟིཡོ [ཧེམནྟིཀཀཱལརཏྟིཡོ (ཀ.)], བྷིཀྑུ ཏྭཾསི ཀཐཾ ཀརིསྶསི’’.

༢༠༨.

‘‘སམྤནྣསསྶཱ མགདྷཱ, ཀེཝལཱ ཨིཏི མེ སུཏཾ;

པལཱལཙྪནྣཀོ སེཡྻཾ, ཡཐཉྙེ སུཁཛཱིཝིནོ’’ཏི.

… མོགྷརཱཛཱ ཐེརོ….

༥. ཝིསཱཁཔཉྩཱལཔུཏྟཏྠེརགཱཐཱ

༢༠༩.

‘‘ན ཨུཀྑིཔེ ནོ ཙ པརིཀྑིཔེ པརེ, ཨོཀྑིཔེ པཱརགཏཾ ན ཨེརཡེ;

ན ¶ ཙཏྟཝཎྞཾ པརིསཱསུ བྱཱཧརེ, ཨནུདྡྷཏོ སམྨིཏབྷཱཎི སུབྦཏོ.

༢༡༠.

‘‘སུསུཁུམནིཔུཎཏྠདསྶིནཱ, མཏིཀུསལེན ནིཝཱཏཝུཏྟིནཱ;

སཾསེཝིཏཝུདྡྷསཱིལིནཱ, ནིབྦཱནཾ ན ཧི ཏེན དུལླབྷ’’ནྟི.

… ཝིསཱཁོ པཉྩཱལཔུཏྟོ ཐེརོ ….

༦. ཙཱུལ༹ཀཏྠེརགཱཐཱ

༢༡༡.

‘‘ནདནྟི ¶ མོརཱ སུསིཁཱ སུཔེཁུཎཱ, སུནཱིལགཱིཝཱ སུམུཁཱ སུགཛྫིནོ;

སུསདྡལཱ ཙཱཔི མཧཱམཧཱི ཨཡཾ, སུབྱཱཔིཏམྦུ སུཝལཱཧཀཾ ནབྷཾ.

༢༡༢.

‘‘སུཀལླརཱུཔོ ¶ སུམནསྶ ཛྷཱཡཏཾ [ཛྷཱཡིཏཾ (སྱཱ. ཀ.)], སུནིཀྐམོ སཱདྷུ སུབུདྡྷསཱསནེ;

སུསུཀྐསུཀྐཾ ནིཔུཎཾ སུདུདྡསཾ, ཕུསཱཧི ཏཾ ཨུཏྟམམཙྩུཏཾ པད’’ནྟི.

… ཙཱུལ༹ཀོ [ཙཱུལཀོ (སཱི. ཨཊྛ.)] ཐེརོ….

༧. ཨནཱུཔམཏྠེརགཱཐཱ

༢༡༣.

‘‘ནནྡམཱནཱགཏཾ ཙིཏྟཾ, སཱུལམཱརོཔམཱནཀཾ;

ཏེན ཏེནེཝ ཝཛསི, ཡེན སཱུལཾ ཀལིངྒརཾ.

༢༡༤.

‘‘ཏཱཧཾ ཙིཏྟཀལིཾ བྲཱུམི, ཏཾ བྲཱུམི ཙིཏྟདུབྦྷཀཾ;

སཏྠཱ ཏེ དུལླབྷོ ལདྡྷོ, མཱནཏྠེ མཾ ནིཡོཛཡཱི’’ཏི.

… ཨནཱུཔམོ ཐེརོ….

༨. ཝཛྫིཏཏྠེརགཱཐཱ

༢༡༥.

‘‘སཾསརཾ ¶ དཱིགྷམདྡྷཱནཾ, གཏཱིསུ པརིཝཏྟིསཾ;

ཨཔསྶཾ ཨརིཡསཙྩཱནི, ཨནྡྷབྷཱུཏོ [ཨནྡྷཱིབྷཱུཏོ (ཀ.)] པུཐུཛྫནོ.

༢༡༦.

‘‘ཏསྶ ¶ མེ ཨཔྤམཏྟསྶ, སཾསཱརཱ ཝིནལཱི༹ཀཏཱ;

སབྦཱ གཏཱི སམུཙྪིནྣཱ, ནཏྠི དཱནི པུནབྦྷཝོ’’ཏི.

… ཝཛྫིཏོ ཐེརོ….

༩. སནྡྷིཏཏྠེརགཱཐཱ

༢༡༧.

‘‘ཨསྶཏྠེ ཧརིཏོབྷཱསེ, སཾཝིརཱུལ༹ྷམྷི པཱདཔེ;

ཨེཀཾ བུདྡྷགཏཾ སཉྙཾ, ཨལབྷིཏྠཾ [ཨལབྷིཾ ཧཾ (ཀ.)] པཏིསྶཏོ.

༢༡༨.

‘‘ཨེཀཏིཾསེ ཨིཏོ ཀཔྤེ, ཡཾ སཉྙམལབྷིཾ ཏདཱ;

ཏསྶཱ སཉྙཱཡ ཝཱཧསཱ, པཏྟོ མེ ཨཱསཝཀྑཡོ’’ཏི.

… སནྡྷིཏོ ཐེརོ….

ཝགྒོ པཉྩམོ ནིཊྛིཏོ.

ཏསྶུདྡཱནཾ ¶ –

ཀུམཱརཀསྶཔོ ¶ ཐེརོ, དྷམྨཔཱལོ ཙ བྲཧྨཱལི;

མོགྷརཱཛཱ ཝིསཱཁོ ཙ, ཙཱུལ༹ཀོ ཙ ཨནཱུཔམོ;

ཝཛྫིཏོ སནྡྷིཏོ ཐེརོ, ཀིལེསརཛཝཱཧནོཏི.

དུཀནིཔཱཏོ ནིཊྛིཏོ.

ཏཏྲུདྡཱནཾ –

གཱཐཱདུཀནིཔཱཏམྷི, ནཝུཏི ཙེཝ ཨཊྛ ཙ;

ཐེརཱ ཨེཀཱུནཔཉྙཱསཾ, བྷཱསིཏཱ ནཡཀོཝིདཱཏི.

༣. ཏིཀནིཔཱཏོ

༡. ཨངྒཎིཀབྷཱརདྭཱཛཏྠེརགཱཐཱ

༢༡༩.

‘‘ཨཡོནི ¶ ¶ ¶ ¶ སུདྡྷིམནྭེསཾ, ཨགྒིཾ པརིཙརིཾ ཝནེ;

སུདྡྷིམགྒཾ ཨཛཱནནྟོ, ཨཀཱསིཾ ཨམརཾ ཏཔཾ [ཨཀཱསིཾ ཨཔརཾ ཏཔཾ (སྱཱ.), ཨཀཱསིཾ ཨམཏཾ ཏཔཾ (ཀ.)].

༢༢༠.

‘‘ཏཾ སུཁེན སུཁཾ ལདྡྷཾ, པསྶ དྷམྨསུདྷམྨཏཾ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ.

༢༢༡.

‘‘བྲཧྨབནྡྷུ པུརེ ཨཱསིཾ, ཨིདཱནི ཁོམྷི བྲཱཧྨཎོ;

ཏེཝིཛྫོ ནྷཱཏཀོ [ནཧཱཏཀོ (སཱི. ཨཊྛ.)] ཙམྷི, སོཏྟིཡོ ཙམྷི ཝེདགཱུ’’ཏི.

… ཨངྒཎིཀབྷཱརདྭཱཛོ ཐེརོ….

༢. པཙྩཡཏྠེརགཱཐཱ

༢༢༢.

‘‘པཉྩཱཧཱཧཾ པབྦཛིཏོ, སེཁོ ཨཔྤཏྟམཱནསོ,

ཝིཧཱརཾ མེ པཝིཊྛསྶ, ཙེཏསོ པཎིདྷཱི ཨཧུ.

༢༢༣.

‘‘ནཱསིསྶཾ ན པིཝིསྶཱམི, ཝིཧཱརཏོ ན ནིཀྑམེ;

ནཔི པསྶཾ ནིཔཱཏེསྶཾ, ཏཎྷཱསལླེ ཨནཱུཧཏེ.

༢༢༤.

‘‘ཏསྶ མེཝཾ ཝིཧརཏོ, པསྶ ཝཱིརིཡཔརཀྐམཾ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསན’’ནྟི.

… པཙྩཡོ ཐེརོ….

༣. བཱཀུལཏྠེརགཱཐཱ

༢༢༥.

‘‘ཡོ པུབྦེ ཀརཎཱིཡཱནི, པཙྪཱ སོ ཀཱཏུམིཙྪཏི;

སུཁཱ སོ དྷཾསཏེ ཋཱནཱ, པཙྪཱ ཙ མནུཏཔྤཏི.

༢༢༦.

‘‘ཡཉྷི ཀཡིརཱ ཏཉྷི ཝདེ, ཡཾ ན ཀཡིརཱ ན ཏཾ ཝདེ;

ཨཀརོནྟཾ ¶ བྷཱསམཱནཾ, པརིཛཱནནྟི པཎྜིཏཱ.

༢༢༧.

‘‘སུསུཁཾ ¶ ¶ ཝཏ ནིབྦཱནཾ, སམྨཱསམྦུདྡྷདེསིཏཾ;

ཨསོཀཾ ཝིརཛཾ ཁེམཾ, ཡཏྠ དུཀྑཾ ནིརུཛ྄ཛྷཏཱི’’ཏི.

… བཱཀུལོ [བཱཀྐུལོ (སཱི.)] ཐེརོ….

༤. དྷནིཡཏྠེརགཱཐཱ

༢༢༨.

‘‘སུཁཾ ཙེ ཛཱིཝིཏུཾ ཨིཙྪེ, སཱམཉྙསྨིཾ ཨཔེཀྑཝཱ;

སངྒྷིཀཾ ནཱཏིམཉྙེཡྻ, ཙཱིཝརཾ པཱནབྷོཛནཾ.

༢༢༩.

‘‘སུཁཾ ཙེ ཛཱིཝིཏུཾ ཨིཙྪེ, སཱམཉྙསྨིཾ ཨཔེཀྑཝཱ;

ཨཧི མཱུསིཀསོབྦྷཾཝ, སེཝེཐ སཡནཱསནཾ.

༢༣༠.

‘‘སུཁཾ ཙེ ¶ ཛཱིཝིཏུཾ ཨིཙྪེ, སཱམཉྙསྨིཾ ཨཔེཀྑཝཱ;

ཨིཏརཱིཏརེན ཏུསྶེཡྻ, ཨེཀདྷམྨཉྩ བྷཱཝཡེ’’ཏི.

… དྷནིཡོ ཐེརོ….

༥. མཱཏངྒཔུཏྟཏྠེརགཱཐཱ

༢༣༡.

‘‘ཨཏིསཱིཏཾ ཨཏིཨུཎྷཾ, ཨཏིསཱཡམིདཾ ཨཧུ;

ཨིཏི ཝིསྶཊྛཀམྨནྟེ, ཁཎཱ ཨཙྩེནྟི མཱཎཝེ.

༢༣༢.

‘‘ཡོ ཙ སཱིཏཉྩ ཨུཎྷཉྩ, ཏིཎཱ བྷིཡྻོ ན མཉྙཏི;

ཀརཾ པུརིསཀིཙྩཱནི, སོ སུཁཱ ན ཝིཧཱཡཏི.

༢༣༣.

‘‘དབྦཾ ཀུསཾ པོཊཀིལཾ, ཨུསཱིརཾ མུཉྫཔབྦཛཾ;

ཨུརསཱ པནུདིསྶཱམི, ཝིཝེཀམནུབྲཱུཧཡ’’ནྟི.

… མཱཏངྒཔུཏྟོ ཐེརོ….

༦. ཁུཛྫསོབྷིཏཏྠེརགཱཐཱ

༢༣༤.

‘‘ཡེ ཙིཏྟཀཐཱི བཧུསྶུཏཱ, སམཎཱ པཱཊལིཔུཏྟཝཱསིནོ;

ཏེསཉྙཏརོཡམཱཡུཝཱ, དྭཱརེ ཏིཊྛཏི ཁུཛྫསོབྷིཏོ.

༢༣༥.

‘‘ཡེ ¶ ¶ ཙིཏྟཀཐཱི བཧུསྶུཏཱ, སམཎཱ པཱཊལིཔུཏྟཝཱསིནོ;

ཏེསཉྙཏརོཡམཱཡུཝཱ, དྭཱརེ ཏིཊྛཏི མཱལུཏེརིཏོ.

༢༣༦.

‘‘སུཡུདྡྷེན སུཡིཊྛེན, སངྒཱམཝིཛཡེན ཙ;

བྲཧྨཙརིཡཱནུཙིཎྞེན, ཨེཝཱཡཾ སུཁམེདྷཏཱི’’ཏི.

… ཁུཛྫསོབྷིཏོ ཐེརོ….

༧. ཝཱརཎཏྠེརགཱཐཱ

༢༣༧.

‘‘ཡོདྷ ¶ ཀོཙི མནུསྶེསུ, པརཔཱཎཱནི ཧིཾསཏི;

ཨསྨཱ ལོཀཱ པརམྷཱ ཙ, ཨུབྷཡཱ དྷཾསཏེ ནརོ.

༢༣༨.

‘‘ཡོ ཙ མེཏྟེན ཙིཏྟེན, སབྦཔཱཎཱནུཀམྤཏི;

བཧུཉྷི སོ པསཝཏི, པུཉྙཾ ཏཱདིསཀོ ནརོ.

༢༣༩.

‘‘སུབྷཱསིཏསྶ སིཀྑེཐ, སམཎཱུཔཱསནསྶ ཙ;

ཨེཀཱསནསྶ ཙ རཧོ, ཙིཏྟཝཱུཔསམསྶ ཙཱ’’ཏི.

… ཝཱརཎོ ཐེརོ….

༨. ཝསྶིཀཏྠེརགཱཐཱ

༢༤༠.

‘‘ཨེཀོཔི སདྡྷོ མེདྷཱཝཱི, ཨསྶདྡྷཱནཱིདྷ ཉཱཏིནཾ;

དྷམྨཊྛོ སཱིལསམྤནྣོ, ཧོཏི ཨཏྠཱཡ བནྡྷུནཾ.

༢༤༡.

‘‘ནིགྒཡ྄ཧ ཨནུཀམྤཱཡ, ཙོདིཏཱ ཉཱཏཡོ མཡཱ;

ཉཱཏིབནྡྷཝཔེམེན, ཀཱརཾ ཀཏྭཱན བྷིཀྑུསུ.

༢༤༢.

‘‘ཏེ ཨབྦྷཏཱིཏཱ ཀཱལངྐཏཱ, པཏྟཱ ཏེ ཏིདིཝཾ སུཁཾ;

བྷཱཏརོ མཡ྄ཧཾ མཱཏཱ ཙ, མོདནྟི ཀཱམཀཱམིནོ’’ཏི.

… ཝསྶིཀོ [པསྶིཀོ (སཱི. སྱཱ. པཱི.)] ཐེརོ….

༩. ཡསོཛཏྠེརགཱཐཱ

༢༤༣.

‘‘ཀཱལཔབྦངྒསངྐཱསོ, ཀིསོ དྷམནིསནྠཏོ;

མཏྟཉྙཱུ ¶ ཨནྣཔཱནམྷི, ཨདཱིནམནསོ ནརོ’’.

༢༤༤.

‘‘ཕུཊྛོ ¶ ¶ ཌཾསེཧི མཀསེཧི, ཨརཉྙསྨིཾ བྲཧཱཝནེ;

ནཱགོ སངྒཱམསཱིསེཝ, སཏོ ཏཏྲཱདྷིཝཱསཡེ.

༢༤༥.

‘‘ཡཐཱ བྲཧྨཱ ཏཐཱ ཨེཀོ, ཡཐཱ དེཝོ ཏཐཱ དུཝེ;

ཡཐཱ གཱམོ ཏཐཱ ཏཡོ, ཀོལཱཧལཾ ཏཏུཏྟརི’’ནྟི.

… ཡསོཛོ ཐེརོ….

༡༠. སཱཊིམཏྟིཡཏྠེརགཱཐཱ

༢༤༦.

‘‘ཨཧུ ¶ ཏུཡ྄ཧཾ པུརེ སདྡྷཱ, སཱ ཏེ ཨཛྫ ན ཝིཛྫཏི;

ཡཾ ཏུཡ྄ཧཾ ཏུཡ྄ཧམེཝེཏཾ, ནཏྠི དུཙྩརིཏཾ མམ.

༢༤༧.

‘‘ཨནིཙྩཱ ཧི ཙལཱ སདྡཱ, ཨེཝཾ དིཊྛཱ ཧི སཱ མཡཱ;

རཛྫནྟིཔི ཝིརཛྫནྟི, ཏཏྠ ཀིཾ ཛིཡྻཏེ མུནི.

༢༤༨.

‘‘པཙྩཏི མུནིནོ བྷཏྟཾ, ཐོཀཾ ཐོཀཾ ཀུལེ ཀུལེ;

པིཎྜིཀཱཡ ཙརིསྶཱམི, ཨཏྠི ཛངྒྷབལཾ [ཛངྒྷཱབལཾ (སཱི.)] མམཱ’’ཏི.

… སཱཊིམཏྟིཡོ ཐེརོ….

༡༡. ཨུཔཱལིཏྠེརགཱཐཱ

༢༤༩.

‘‘སདྡྷཱཡ ཨབྷིནིཀྑམྨ, ནཝཔབྦཛིཏོ ནཝོ;

མིཏྟེ བྷཛེཡྻ ཀལྱཱཎེ, སུདྡྷཱཛཱིཝེ ཨཏནྡིཏེ.

༢༥༠.

‘‘སདྡྷཱཡ ཨབྷིནིཀྑམྨ, ནཝཔབྦཛིཏོ ནཝོ;

སངྒྷསྨིཾ ཝིཧརཾ བྷིཀྑུ, སིཀྑེཐ ཝིནཡཾ བུདྷོ.

༢༥༡.

‘‘སདྡྷཱཡ ཨབྷིནིཀྑམྨ, ནཝཔབྦཛིཏོ ནཝོ;

ཀཔྤཱཀཔྤེསུ ཀུསལོ, ཙརེཡྻ ཨཔུརཀྑཏོ’’ཏི.

… ཨུཔཱལིཏྠེརོ….

༡༢. ཨུཏྟརཔཱལཏྠེརགཱཐཱ

༢༥༢.

‘‘པཎྜིཏཾ ¶ ཝཏ མཾ སནྟཾ, ཨལམཏྠཝིཙིནྟཀཾ;

པཉྩ ཀཱམགུཎཱ ལོཀེ, སམྨོཧཱ པཱཏཡིཾསུ མཾ.

༢༥༣.

‘‘པཀྑནྡོ མཱརཝིསཡེ, དལ༹ྷསལླསམཔྤིཏོ;

ཨསཀྑིཾ མཙྩུརཱཛསྶ, ཨཧཾ པཱསཱ པམུཙྩིཏུཾ.

༢༥༤.

‘‘སབྦེ ¶ ཀཱམཱ པཧཱིནཱ མེ, བྷཝཱ སབྦེ པདཱལིཏཱ [ཝིདཱལིཏཱ (སཱི. པཱི. ཨཊྛ.)];

ཝིཀྑཱིཎོ ཛཱཏིསཾསཱརོ, ནཏྠི དཱནི པུནབྦྷཝོ’’ཏི.

… ཨུཏྟརཔཱལོ ཐེརོ….

༡༣. ཨབྷིབྷཱུཏཏྠེརགཱཐཱ

༢༥༥.

‘‘སུཎཱཐ ཉཱཏཡོ སབྦེ, ཡཱཝནྟེཏྠ སམཱགཏཱ;

དྷམྨཾ ཝོ དེསཡིསྶཱམི, དུཀྑཱ ཛཱཏི པུནཔྤུནཾ.

༢༥༦.

[སཾ. ནི. ༡.༡༨༥] ‘‘ཨཱརམྦྷཐ [ཨཱརབྷཐ (སཱི. སྱཱ.), ཨཱརབྦྷཐ (ཀ.)] ནིཀྐམཐ, ཡུཉྫཐ བུདྡྷསཱསནེ;

དྷུནཱཐ མཙྩུནོ སེནཾ, ནལཱ༹གཱརཾཝ ཀུཉྫརོ.

༢༥༧.

‘‘ཡོ ¶ ཨིམསྨིཾ དྷམྨཝིནཡེ, ཨཔྤམཏྟོ ཝིཧསྶཏི [ཝིཧེསྶཏི (སྱཱ. པཱི.)];

པཧཱཡ ཛཱཏིསཾསཱརཾ, དུཀྑསྶནྟཾ ཀརིསྶཏཱི’’ཏི.

… ཨབྷིབྷཱུཏོ ཐེརོ….

༡༤. གོཏམཏྠེརགཱཐཱ

༢༥༨.

‘‘སཾསརཾ ¶ ཧི ནིརཡཾ ཨགཙྪིསྶཾ, པེཏལོཀམགམཾ པུནཔྤུནཾ;

དུཀྑམམྷིཔི ཏིརཙྪཱནཡོནིཡཾ, ནེཀདྷཱ ཧི ཝུསིཏཾ ཙིརཾ མཡཱ.

༢༥༩.

‘‘མཱནུསོཔི ཙ བྷཝོབྷིརཱདྷིཏོ, སགྒཀཱཡམགམཾ སཀིཾ སཀིཾ;

རཱུཔདྷཱཏུསུ ¶ ཨརཱུཔདྷཱཏུསུ, ནེཝསཉྙིསུ ཨསཉྙིསུཊྛིཏཾ.

༢༦༠.

‘‘སམྦྷཝཱ སུཝིདིཏཱ ཨསཱརཀཱ, སངྑཏཱ པཙལིཏཱ སདེརིཏཱ;

ཏཾ ཝིདིཏྭཱ མཧམཏྟསམྦྷཝཾ, སནྟིམེཝ སཏིམཱ སམཛ྄ཛྷག’’ནྟི.

… གོཏམོ ཐེརོ….

༡༥. ཧཱརིཏཏྠེརགཱཐཱ

༢༦༡.

‘‘ཡོ པུབྦེ ཀརཎཱིཡཱནི, པཙྪཱ སོ ཀཱཏུམིཙྪཏི;

སུཁཱ སོ དྷཾསཏེ ཋཱནཱ, པཙྪཱ ཙ མནུཏཔྤཏི.

༢༦༢.

‘‘ཡཉྷི ¶ ཀཡིརཱ ཏཉྷི ཝདེ, ཡཾ ན ཀཡིརཱ ན ཏཾ ཝདེ;

ཨཀརོནྟཾ བྷཱསམཱནཾ, པརིཛཱནནྟི པཎྜིཏཱ.

༢༦༣.

‘‘སུསུཁཾ ཝཏ ནིབྦཱནཾ, སམྨཱསམྦུདྡྷདེསིཏཾ;

ཨསོཀཾ ཝིརཛཾ ཁེམཾ, ཡཏྠ དུཀྑཾ ནིརུཛ྄ཛྷཏཱི’’ཏི.

… ཧཱརིཏོ ཐེརོ….

༡༦. ཝིམལཏྠེརགཱཐཱ

༢༦༤.

‘‘པཱཔམིཏྟེ ཝིཝཛྫེཏྭཱ, བྷཛེཡྻུཏྟམཔུགྒལཾ;

ཨོཝཱདེ ཙསྶ ཏིཊྛེཡྻ, པཏྠེནྟོ ཨཙལཾ སུཁཾ.

༢༦༥.

‘‘པརིཏྟཾ དཱརུམཱརུཡ྄ཧ, ཡཐཱ སཱིདེ མཧཎྞཝེ;

ཨེཝཾ ཀུསཱིཏམཱགམྨ, སཱདྷུཛཱིཝཱིཔི སཱིདཏི;

ཏསྨཱ ཏཾ པརིཝཛྫེཡྻ, ཀུསཱིཏཾ ཧཱིནཝཱིརིཡཾ.

༢༦༦.

‘‘པཝིཝིཏྟེཧི ¶ ཨརིཡེཧི, པཧིཏཏྟེཧི ཛྷཱཡིབྷི;

ནིཙྩཾ ¶ ཨཱརདྡྷཝཱིརིཡེཧི, པཎྜིཏེཧི སཧཱཝསེ’’ཏི.

… ཝིམལོ ཐེརོ….

ཏིཀནིཔཱཏོ ནིཊྛིཏོ.

ཏཏྲུདྡཱནཾ –

ཨངྒཎིཀོ བྷཱརདྭཱཛོ, པཙྩཡོ བཱཀུལོ ཨིསི;

དྷནིཡོ མཱཏངྒཔུཏྟོ, སོབྷིཏོ ཝཱརཎོ ཨིསི.

ཝསྶིཀོ ཙ ཡསོཛོ ཙ, སཱཊིམཏྟིཡུཔཱལི ཙ;

ཨུཏྟརཔཱལོ ཨབྷིབྷཱུཏོ, གོཏམོ ཧཱརིཏོཔི ཙ.

ཐེརོ ཏིཀནིཔཱཏམྷི, ནིབྦཱནེ ཝིམལོ ཀཏོ;

ཨཊྛཏཱལཱིས གཱཐཱཡོ, ཐེརཱ སོལ༹ས ཀིཏྟིཏཱཏི.

༤. ཙཏུཀནིཔཱཏོ

༡. ནཱགསམཱལཏྠེརགཱཐཱ

༢༦༧.

‘‘ཨལངྐཏཱ ¶ ¶ ¶ སུཝསནཱ, མཱལིནཱི ཙནྡནུསྶདཱ;

མཛ྄ཛྷེ མཧཱཔཐེ ནཱརཱི, ཏུརིཡེ ནཙྩཏི ནཊྚཀཱི.

༢༦༨.

‘‘པིཎྜིཀཱཡ པཝིཊྛོཧཾ, གཙྪནྟོ ནཾ ཨུདིཀྑིསཾ;

ཨལངྐཏཾ སུཝསནཾ, མཙྩུཔཱསཾཝ ཨོཌྜིཏཾ.

༢༦༩.

‘‘ཏཏོ མེ མནསཱིཀཱརོ, ཡོནིསོ ཨུདཔཛྫཐ;

ཨཱདཱིནཝོ པཱཏུརཧུ, ནིབྦིདཱ སམཏིཊྛཐ [སམྤཏིཊྛཐ (ཀ.)].

༢༧༠.

‘‘ཏཏོ ཙིཏྟཾ ཝིམུཙྩི མེ, པསྶ དྷམྨསུདྷམྨཏཾ;

ཏིསྶོ ¶ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསན’’ནྟི.

… ནཱགསམཱལོ ཐེརོ….

༢. བྷགུཏྠེརགཱཐཱ

༢༧༡.

‘‘ཨཧཾ མིདྡྷེན པཀཏོ, ཝིཧཱརཱ ཨུཔནིཀྑམིཾ;

ཙངྐམཾ ཨབྷིརུཧནྟོ, ཏཏྠེཝ པཔཏིཾ ཚམཱ.

༢༧༢.

‘‘གཏྟཱནི པརིམཛྫིཏྭཱ, པུནཔཱརུཡ྄ཧ ཙངྐམཾ;

ཙངྐམེ ཙངྐམིཾ སོཧཾ, ཨཛ྄ཛྷཏྟཾ སུསམཱཧིཏོ.

༢༧༣.

‘‘ཏཏོ མེ མནསཱིཀཱརོ, ཡོནིསོ ཨུདཔཛྫཐ;

ཨཱདཱིནཝོ པཱཏུརཧུ, ནིབྦིདཱ སམཏིཊྛཐ.

༢༧༤.

‘‘ཏཏོ ཙིཏྟཾ ཝིམུཙྩི མེ, པསྶ དྷམྨསུདྷམྨཏཾ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསན’’ནྟི.

… བྷགུཏྠེརོ….

༣. སབྷིཡཏྠེརགཱཐཱ

༢༧༥.

[དྷ. པ. ༦ དྷམྨཔདེཔི] ‘‘པརེ ཙ ན ཝིཛཱནནྟི, མཡམེཏྠ ཡམཱམསེ;

ཡེ ཙ ཏཏྠ ཝིཛཱནནྟི, ཏཏོ སམྨནྟི མེདྷགཱ.

༢༧༦.

‘‘ཡདཱ ¶ ཙ ཨཝིཛཱནནྟཱ, ཨིརིཡནྟྱམརཱ ཝིཡ;

ཝིཛཱནནྟི ཙ ཡེ དྷམྨཾ, ཨཱཏུརེསུ ཨནཱཏུརཱ.

༢༧༧.

‘‘ཡཾ ¶ ཀིཉྩི སིཐིལཾ ཀམྨཾ, སཾཀིལིཊྛཉྩ ཡཾ ཝཏཾ;

སངྐསྶརཾ བྲཧྨཙརིཡཾ, ན ཏཾ ཧོཏི མཧཔྥལཾ.

༢༧༨.

‘‘ཡསྶ སབྲཧྨཙཱརཱིསུ, གཱརཝོ ནཱུཔལབྦྷཏི;

ཨཱརཀཱ ཧོཏི སདྡྷམྨཱ, ནབྷཾ པུཐཝིཡཱ ཡཐཱ’’ཏི.

… སབྷིཡོ ཐེརོ….

༤. ནནྡཀཏྠེརགཱཐཱ

༢༧༩.

‘‘དྷིརཏྠུ ¶ པཱུརེ དུགྒནྡྷེ, མཱརཔཀྑེ ཨཝསྶུཏེ;

ནཝསོཏཱནི ཏེ ཀཱཡེ, ཡཱནི སནྡནྟི སབྦདཱ.

༢༨༠.

‘‘མཱ ¶ པུརཱཎཾ ཨམཉྙིཏྠོ, མཱསཱདེསི ཏཐཱགཏེ;

སགྒེཔི ཏེ ན རཛྫནྟི, ཀིམངྒཾ པན [ཀིམངྒ པན (སཱི.)] མཱནུསེ.

༢༨༡.

‘‘ཡེ ཙ ཁོ བཱལཱ དུམྨེདྷཱ, དུམྨནྟཱི མོཧཔཱརུཏཱ;

ཏཱདིསཱ ཏཏྠ རཛྫནྟི, མཱརཁིཏྟམྷི བནྡྷནེ.

༢༨༢.

‘‘ཡེསཾ རཱགོ ཙ དོསོ ཙ, ཨཝིཛྫཱ ཙ ཝིརཱཛིཏཱ;

ཏཱདཱི ཏཏྠ ན རཛྫནྟི, ཚིནྣསུཏྟཱ ཨབནྡྷནཱ’’ཏི.

… ནནྡཀོ ཐེརོ….

༥. ཛམྦུཀཏྠེརགཱཐཱ

༢༨༣.

‘‘པཉྩཔཉྙཱསཝསྶཱནི, རཛོཛལླམདྷཱརཡིཾ;

བྷུཉྫནྟོ མཱསིཀཾ བྷཏྟཾ, ཀེསམསྶུཾ ཨལོཙཡིཾ.

༢༨༤.

‘‘ཨེཀཔཱདེན ཨཊྛཱསིཾ, ཨཱསནཾ པརིཝཛྫཡིཾ;

སུཀྑགཱུཐཱནི ཙ ཁཱདིཾ, ཨུདྡེསཉྩ ན སཱདིཡིཾ.

༢༨༥.

‘‘ཨེཏཱདིསཾ ཀརིཏྭཱན, བཧུཾ དུགྒཏིགཱམིནཾ;

ཝུཡ྄ཧམཱནོ མཧོགྷེན, བུདྡྷཾ སརཎམཱགམཾ.

༢༨༦.

‘‘སརཎགམནཾ པསྶ, པསྶ དྷམྨསུདྷམྨཏཾ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསན’’ནྟི.

… ཛམྦུཀོ ཐེརོ….

༦. སེནཀཏྠེརགཱཐཱ

༢༨༧.

‘‘སྭཱགཏཾ ¶ ¶ ཝཏ མེ ཨཱསི, གཡཱཡཾ གཡཕགྒུཡཱ;

ཡཾ ཨདྡསཱསིཾ སམྦུདྡྷཾ, དེསེནྟཾ དྷམྨམུཏྟམཾ.

༢༨༨.

‘‘མཧཔྤབྷཾ ¶ གཎཱཙརིཡཾ, ཨགྒཔཏྟཾ ཝིནཱཡཀཾ;

སདེཝཀསྶ ལོཀསྶ, ཛིནཾ ཨཏུལདསྶནཾ.

༢༨༩.

‘‘མཧཱནཱགཾ མཧཱཝཱིརཾ, མཧཱཛུཏིམནཱསཝཾ;

སབྦཱསཝཔརིཀྑཱིཎཾ, སཏྠཱརམཀུཏོབྷཡཾ.

༢༩༠.

‘‘ཙིརསཾཀིལིཊྛཾ ཝཏ མཾ, དིཊྛིསནྡཱནབནྡྷིཏཾ [སནྡྷིཏཾ (སཱི. སྱཱ.), སནྡིཏཾ (པཱི. སཱི. ཨཊྛ.)];

ཝིམོཙཡི སོ བྷགཝཱ, སབྦགནྠེཧི སེནཀ’’ནྟི.

… སེནཀོ ཐེརོ….

༧. སམྦྷཱུཏཏྠེརགཱཐཱ

༢༩༡.

‘‘ཡོ དནྡྷཀཱལེ ཏརཏི, ཏརཎཱིཡེ ཙ དནྡྷཡེ;

ཨཡོནི [ཨཡོནིསོ (སྱཱ.)] སཾཝིདྷཱནེན, བཱལོ དུཀྑཾ ནིགཙྪཏི.

༢༩༢.

‘‘ཏསྶཏྠཱ པརིཧཱཡནྟི, ཀཱལ༹པཀྑེཝ ཙནྡིམཱ;

ཨཱཡསཀྱཉྩ [ཨཱཡསསྱཉྩ (སཱི.)] པཔྤོཏི, མིཏྟེཧི ཙ ཝིརུཛ྄ཛྷཏི.

༢༩༣.

‘‘ཡོ དནྡྷཀཱལེ དནྡྷེཏི, ཏརཎཱིཡེ ཙ ཏཱརཡེ;

ཡོནིསོ སཾཝིདྷཱནེན, སུཁཾ པཔྤོཏི པཎྜིཏོ.

༢༩༤.

‘‘ཏསྶཏྠཱ པརིཔཱུརེནྟི, སུཀྐཔཀྑེཝ ཙནྡིམཱ;

ཡསོ ཀིཏྟིཉྩ པཔྤོཏི, མིཏྟེཧི ན ཝིརུཛ྄ཛྷཏཱི’’ཏི.

… སམྦྷཱུཏོ ཐེརོ….

༨. རཱཧུལཏྠེརགཱཐཱ

༢༩༥.

‘‘ཨུབྷཡེནེཝ ¶ སམྤནྣོ, རཱཧུལབྷདྡོཏི མཾ ཝིདཱུ;

ཡཉྩམྷི པུཏྟོ བུདྡྷསྶ, ཡཉྩ དྷམྨེསུ ཙཀྑུམཱ.

༢༩༦.

‘‘ཡཉྩ མེ ཨཱསཝཱ ཁཱིཎཱ, ཡཉྩ ནཏྠི པུནབྦྷཝོ;

ཨརཧཱ ¶ དཀྑིཎེཡྻོམྷི, ཏེཝིཛྫོ ཨམཏདྡསོ.

༢༩༧.

‘‘ཀཱམནྡྷཱ ¶ ཛཱལཔཙྪནྣཱ, ཏཎྷཱཚཱདནཚཱདིཏཱ;

པམཏྟབནྡྷུནཱ བདྡྷཱ, མཙྪཱཝ ཀུམིནཱམུཁེ.

༢༩༨.

‘‘ཏཾ ¶ ཀཱམཾ ཨཧམུཛ྄ཛྷིཏྭཱ, ཚེཏྭཱ མཱརསྶ བནྡྷནཾ;

སམཱུལཾ ཏཎྷམབྦུཡ྄ཧ, སཱིཏིབྷཱུཏོསྨི ནིབྦུཏོ’’ཏི.

… རཱཧུལོ ཐེརོ….

༩. ཙནྡནཏྠེརགཱཐཱ

༢༩༩.

‘‘ཛཱཏརཱུཔེན སཉྪནྣཱ [པཙྪནྣཱ (སཱི.)], དཱསཱིགཎཔུརཀྑཏཱ;

ཨངྐེན པུཏྟམཱདཱཡ, བྷརིཡཱ མཾ ཨུཔཱགམི.

༣༠༠.

‘‘ཏཉྩ དིསྭཱན ཨཱཡནྟིཾ, སཀཔུཏྟསྶ མཱཏརཾ;

ཨལངྐཏཾ སུཝསནཾ, མཙྩུཔཱསཾཝ ཨོཌྜིཏཾ.

༣༠༡.

‘‘ཏཏོ མེ མནསཱིཀཱརོ, ཡོནིསོ ཨུདཔཛྫཐ;

ཨཱདཱིནཝོ པཱཏུརཧུ, ནིབྦིདཱ སམཏིཊྛཐ.

༣༠༢.

‘‘ཏཏོ ཙིཏྟཾ ཝིམུཙྩི མེ, པསྶ དྷམྨསུདྷམྨཏཾ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསན’’ནྟི.

… ཙནྡནོ ཐེརོ….

༡༠. དྷམྨིཀཏྠེརགཱཐཱ

༣༠༣.

[ཛཱ. ༡.༡༠.༡༠༢ ཛཱཏཀེཔི] ‘‘དྷམྨོ ཧཝེ རཀྑཏི དྷམྨཙཱརིཾ, དྷམྨོ སུཙིཎྞོ སུཁམཱཝཧཏི;

ཨེསཱནིསཾསོ དྷམྨེ སུཙིཎྞེ, ན དུགྒཏིཾ གཙྪཏི དྷམྨཙཱརཱི.

༣༠༤.

[ཛཱ. ༡.༡༥.༣༨༥] ‘‘ནཧི དྷམྨོ ཨདྷམྨོ ཙ, ཨུབྷོ སམཝིཔཱཀིནོ;

ཨདྷམྨོ ¶ ནིརཡཾ ནེཏི, དྷམྨོ པཱཔེཏི སུགྒཏིཾ.

༣༠༥.

‘‘ཏསྨཱ ཧི དྷམྨེསུ ཀརེཡྻ ཚནྡཾ, ཨིཏི མོདམཱནོ སུགཏེན ཏཱདིནཱ;

དྷམྨེ ཋིཏཱ སུགཏཝརསྶ སཱཝཀཱ, ནཱིཡནྟི དྷཱིརཱ སརཎཝརགྒགཱམིནོ.

༣༠༦.

‘‘ཝིཔྥོཊིཏོ ¶ གཎྜམཱུལོ, ཏཎྷཱཛཱལོ སམཱུཧཏོ;

སོ ཁཱིཎསཾསཱརོ ན ཙཏྠི ཀིཉྩནཾ,

ཙནྡོ ཡཐཱ དོསིནཱ པུཎྞམཱསིཡ’’ནྟི.

… དྷམྨིཀོ ཐེརོ….

༡༡. སཔྤཀཏྠེརགཱཐཱ

༣༠༧.

‘‘ཡདཱ བལཱཀཱ སུཙིཔཎྜརཙྪདཱ, ཀཱལ༹སྶ མེགྷསྶ བྷཡེན ཏཛྫིཏཱ;

པལེཧིཏི ཨཱལཡམཱལཡེསིནཱི, ཏདཱ ནདཱི ཨཛཀརཎཱི རམེཏི མཾ.

༣༠༨.

‘‘ཡདཱ ¶ ¶ བལཱཀཱ སུཝིསུདྡྷཔཎྜརཱ, ཀཱལ༹སྶ མེགྷསྶ བྷཡེན ཏཛྫིཏཱ;

པརིཡེསཏི ལེཎམལེཎདསྶིནཱི, ཏདཱ ནདཱི ཨཛཀརཎཱི རམེཏི མཾ.

༣༠༩.

‘‘ཀཾ ནུ ཏཏྠ ན རམེནྟི, ཛམྦུཡོ ཨུབྷཏོ ཏཧིཾ;

སོབྷེནྟི ཨཱཔགཱཀཱུལཾ, མམ ལེཎསྶ [མཧཱལེཎསྶ (སྱཱ. ཀ.)] པཙྪཏོ.

༣༡༠.

‘‘ཏཱ མཏམདསངྒྷསུཔྤཧཱིནཱ,

བྷེཀཱ ¶ མནྡཝཏཱི པནཱདཡནྟི;

‘ནཱཛྫ གིརིནདཱིཧི ཝིཔྤཝཱསསམཡོ,

ཁེམཱ ཨཛཀརཎཱི སིཝཱ སུརམྨཱ’’’ཏི.

… སཔྤཀོ ཐེརོ….

༡༢. མུདིཏཏྠེརགཱཐཱ

༣༡༡.

‘‘པབྦཛིཾ ཛཱིཝིཀཏྠོཧཾ, ལདྡྷཱན ཨུཔསམྤདཾ;

ཏཏོ སདྡྷཾ པཊིལབྷིཾ, དལ༹ྷཝཱིརིཡོ པརཀྐམིཾ.

༣༡༢.

‘‘ཀཱམཾ བྷིཛྫཏུཡཾ ཀཱཡོ, མཾསཔེསཱི ཝིསཱིཡརུཾ [ཝིསིཡནྟུ (ཀ.)];

ཨུབྷོ ཛཎྞུཀསནྡྷཱིཧི, ཛངྒྷཱཡོ པཔཏནྟུ མེ.

༣༡༣.

‘‘ནཱསིསྶཾ ¶ ན པིཝིསྶཱམི, ཝིཧཱརཱ ཙ ན ནིཀྑམེ;

ནཔི པསྶཾ ནིཔཱཏེསྶཾ, ཏཎྷཱསལླེ ཨནཱུཧཏེ.

༣༡༤.

‘‘ཏསྶ མེཝཾ ཝིཧརཏོ, པསྶ ཝཱིརིཡཔརཀྐམཾ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསན’’ནྟི.

… མུདིཏོ ཐེརོ….

ཙཏུཀྐནིཔཱཏོ ནིཊྛིཏོ.

ཏཏྲུདྡཱནཾ –

ནཱགསམཱལོ བྷགུ ཙ, སབྷིཡོ ནནྡཀོཔི ཙ;

ཛམྦུཀོ སེནཀོ ཐེརོ, སམྦྷཱུཏོ རཱཧུལོཔི ཙ.

བྷཝཏི ཙནྡནོ ཐེརོ, དསེཏེ [ཨིདཱནི ནཝེཝ ཐེརཱ དིསྶནྟི] བུདྡྷསཱཝཀཱ;

དྷམྨིཀོ སཔྤཀོ ཐེརོ, མུདིཏོ ཙཱཔི ཏེ ཏཡོ;

གཱཐཱཡོ དྭེ ཙ པཉྙཱས, ཐེརཱ སབྦེཔི ཏེརསཱཏི [ཨིདཱནི དྭཱདསེཝ ཐེརཱ དིསྶནྟི].

༥. པཉྩཀནིཔཱཏོ

༡. རཱཛདཏྟཏྠེརགཱཐཱ

༣༡༥.

‘‘བྷིཀྑུ ¶ ¶ ¶ ¶ སིཝཐིཀཾ [སཱིཝཐིཀཾ (སཱི. སྱཱ. པཱི.)] གནྟྭཱ, ཨདྡས ཨིཏྠིམུཛ྄ཛྷིཏཾ;

ཨཔཝིདྡྷཾ སུསཱནསྨིཾ, ཁཛྫནྟིཾ ཀིམིཧཱི ཕུཊཾ.

༣༡༦.

‘‘ཡཉྷི ཨེཀེ ཛིགུཙྪནྟི, མཏཾ དིསྭཱན པཱཔཀཾ;

ཀཱམརཱགོ པཱཏུརཧུ, ཨནྡྷོཝ སཝཏཱི [ཝསཏཱི (སཱི.)] ཨཧུཾ.

༣༡༧.

‘‘ཨོརཾ ཨོདནཔཱཀམྷཱ, ཏམྷཱ ཋཱནཱ ཨཔཀྐམིཾ;

སཏིམཱ སམྤཛཱནོཧཾ, ཨེཀམནྟཾ ཨུཔཱཝིསིཾ.

༣༡༨.

‘‘ཏཏོ མེ མནསཱིཀཱརོ, ཡོནིསོ ཨུདཔཛྫཐ;

ཨཱདཱིནཝོ པཱཏུརཧུ, ནིབྦིདཱ སམཏིཊྛཐ.

༣༡༩.

‘‘ཏཏོ ཙིཏྟཾ ཝིམུཙྩི མེ, པསྶ དྷམྨསུདྷམྨཏཾ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསན’’ནྟི.

… རཱཛདཏྟོ ཐེརོ….

༢. སུབྷཱུཏཏྠེརགཱཐཱ

༣༢༠.

‘‘ཨཡོགེ ཡུཉྫམཏྟཱནཾ, པུརིསོ ཀིཙྩམིཙྪཀོ [ཀིཙྩམིཙྪཏོ (སཱི.), ཀིཙྩམིཙྪཡཾ (ཀཏྠཙི)];

ཙརཾ ཙེ ནཱདྷིགཙྪེཡྻ, ‘ཏཾ མེ དུབྦྷགལཀྑཎཾ’.

༣༢༡.

‘‘ཨབྦཱུལ༹ྷཾ ཨགྷགཏཾ ཝིཛིཏཾ, ཨེཀཉྩེ ཨོསྶཛེཡྻ ཀལཱིཝ སིཡཱ;

སབྦཱནིཔི ཙེ ཨོསྶཛེཡྻ ཨནྡྷོཝ སིཡཱ, སམཝིསམསྶ ཨདསྶནཏོ.

༣༢༢.

‘‘ཡཉྷི ¶ ཀཡིརཱ ཏཉྷི ཝདེ, ཡཾ ན ཀཡིརཱ ན ཏཾ ཝདེ;

ཨཀརོནྟཾ བྷཱསམཱནཾ, པརིཛཱནནྟི པཎྜིཏཱ.

༣༢༣.

[དྷ. པ. ༥༡ དྷམྨཔདེཔི] ‘‘ཡཐཱཔི རུཙིརཾ པུཔྥཾ, ཝཎྞཝནྟཾ ཨགནྡྷཀཾ;

ཨེཝཾ སུབྷཱསིཏཱ ཝཱཙཱ, ཨཕལཱ ཧོཏི ཨཀུབྦཏོ.

༣༢༤.

[དྷ. པ. ༥༢] ‘‘ཡཐཱཔི ¶ རུཙིརཾ པུཔྥཾ, ཝཎྞཝནྟཾ སུགནྡྷཀཾ [སགནྡྷཀཾ (སཱི. སྱཱ. པཱི.)];

ཨེཝཾ སུབྷཱསིཏཱ ཝཱཙཱ, སཕལཱ ཧོཏི ཀུབྦཏོ’’ཏི [སཀུབྦཏོ (སཱི. པཱི.), སུཀུབྦཏོ (སྱཱ.)].

… སུབྷཱུཏོ ཐེརོ….

༣. གིརིམཱནནྡཏྠེརགཱཐཱ

༣༢༥.

‘‘ཝསྶཏི ¶ ¶ དེཝོ ཡཐཱ སུགཱིཏཾ, ཚནྣཱ མེ ཀུཊིཀཱ སུཁཱ ནིཝཱཏཱ;

ཏསྶཾ ཝིཧརཱམི ཝཱུཔསནྟོ, ཨཐ ཙེ པཏྠཡསཱི པཝསྶ དེཝ.

༣༢༦.

‘‘ཝསྶཏི དེཝོ ཡཐཱ སུགཱིཏཾ, ཚནྣཱ མེ ཀུཊིཀཱ སུཁཱ ནིཝཱཏཱ;

ཏསྶཾ ཝིཧརཱམི སནྟཙིཏྟོ, ཨཐ ཙེ པཏྠཡསཱི པཝསྶ དེཝ.

༣༢༧.

‘‘ཝསྶཏི དེཝོ…པེ… ཏསྶཾ ཝིཧརཱམི ཝཱིཏརཱགོ…པེ….

༣༢༨.

‘‘ཝསྶཏི དེཝོ…པེ… ཏསྶཾ ཝིཧརཱམི ཝཱིཏདོསོ…པེ….

༣༢༩.

‘‘ཝསྶཏི དེཝོ…པེ… ཏསྶཾ ¶ ཝིཧརཱམི ཝཱིཏམོཧོ;

ཨཐ ཙེ པཏྠཡསཱི པཝསྶ དེཝཱ’’ཏི.

… གིརིམཱནནྡོ ཐེརོ….

༤. སུམནཏྠེརགཱཐཱ

༣༣༠.

‘‘ཡཾ པཏྠཡཱནོ དྷམྨེསུ, ཨུཔཛ྄ཛྷཱཡོ ཨནུགྒཧི;

ཨམཏཾ ཨབྷིཀངྑནྟཾ, ཀཏཾ ཀཏྟབྦཀཾ མཡཱ.

༣༣༡.

‘‘ཨནུཔྤཏྟོ སཙྪིཀཏོ, སཡཾ དྷམྨོ ཨནཱིཏིཧོ;

ཝིསུདྡྷིཉཱཎོ ནིཀྐངྑོ, བྱཱཀརོམི ཏཝནྟིཀེ.

༣༣༢.

‘‘པུབྦེནིཝཱསཾ ཛཱནཱམི, དིབྦཙཀྑུ ཝིསོདྷིཏཾ;

སདཏྠོ མེ ཨནུཔྤཏྟོ, ཀཏཾ བུདྡྷསྶ སཱསནཾ.

༣༣༣.

‘‘ཨཔྤམཏྟསྶ མེ སིཀྑཱ, སུསྶུཏཱ ཏཝ སཱསནེ;

སབྦེ མེ ཨཱསཝཱ ཁཱིཎཱ, ནཏྠི དཱནི པུནབྦྷཝོ.

༣༣༤.

‘‘ཨནུསཱསི ¶ མཾ ཨརིཡཝཏཱ, ཨནུཀམྤི ཨནུགྒཧི;

ཨམོགྷོ ཏུཡ྄ཧམོཝཱདོ, ཨནྟེཝཱསིམྷི སིཀྑིཏོ’’ཏི.

… སུམནོ ཐེརོ….

༥. ཝཌྜྷཏྠེརགཱཐཱ

༣༣༥.

‘‘སཱདྷཱུ ཧི ཀིར མེ མཱཏཱ, པཏོདཾ ཨུཔདཾསཡི;

ཡསྶཱཧཾ ཝཙནཾ སུཏྭཱ, ཨནུསིཊྛོ ཛནེཏྟིཡཱ;

ཨཱརདྡྷཝཱིརིཡོ པཧིཏཏྟོ, པཏྟོ སམྦོདྷིམུཏྟམཾ.

༣༣༦.

‘‘ཨརཧཱ ¶ དཀྑིཎེཡྻོམྷི, ཏེཝིཛྫོ ཨམཏདྡསོ;

ཛེཏྭཱ ནམུཙིནོ སེནཾ, ཝིཧརཱམི ཨནཱསཝོ.

༣༣༧.

‘‘ཨཛ྄ཛྷཏྟཉྩ ¶ བཧིདྡྷཱ ཙ, ཡེ མེ ཝིཛྫིཾསུ ཨཱསཝཱ;

སབྦེ ཨསེསཱ ཨུཙྪིནྣཱ, ན ཙ ཨུཔྤཛྫརེ པུན.

༣༣༨.

‘‘ཝིསཱརདཱ ཁོ བྷགིནཱི, ཨེཏམཏྠཾ ཨབྷཱསཡི;

‘ཨཔིཧཱ ནཱུན མཡིཔི, ཝནཐོ ཏེ ན ཝིཛྫཏི’.

༣༣༩.

‘‘པརིཡནྟཀཏཾ དུཀྑཾ, ཨནྟིམོཡཾ སམུསྶཡོ;

ཛཱཏིམརཎསཾསཱརོ, ནཏྠི དཱནི པུནབྦྷཝོ’’ཏི.

… ཝཌྜྷོ ཐེརོ….

༦. ནདཱིཀསྶཔཏྠེརགཱཐཱ

༣༤༠.

‘‘ཨཏྠཱཡ ཝཏ མེ བུདྡྷོ, ནདིཾ ནེརཉྫརཾ ཨགཱ;

ཡསྶཱཧཾ དྷམྨཾ སུཏྭཱན, མིཙྪཱདིཊྛིཾ ཝིཝཛྫཡིཾ.

༣༤༡.

‘‘ཡཛིཾ ¶ ཨུཙྩཱཝཙེ ཡཉྙེ, ཨགྒིཧུཏྟཾ ཛུཧིཾ ཨཧཾ;

‘ཨེསཱ སུདྡྷཱི’ཏི མཉྙནྟོ, ཨནྡྷབྷཱུཏོ [ཨནྡྷཱིབྷཱུཏོ (ཀ.)] པུཐུཛྫནོ.

༣༤༢.

‘‘དིཊྛིགཧནཔཀྑནྡོ [པཀྑནྟོ (སཱི.), པཀྑནྣོ (སྱཱ. པཱི.)], པརཱམཱསེན མོཧིཏོ;

ཨསུདྡྷིཾ མཉྙིསཾ སུདྡྷིཾ, ཨནྡྷབྷཱུཏོ ཨཝིདྡསུ.

༣༤༣.

‘‘མིཙྪཱདིཊྛི པཧཱིནཱ མེ, བྷཝཱ སབྦེ པདཱལིཏཱ [ཝིདཱལིཏཱ (ཀ.)];

ཛུཧཱམི དཀྑིཎེཡྻགྒིཾ, ནམསྶཱམི ཏཐཱགཏཾ.

༣༤༤.

‘‘མོཧཱ ¶ སབྦེ པཧཱིནཱ མེ, བྷཝཏཎྷཱ པདཱལིཏཱ;

ཝིཀྑཱིཎོ ཛཱཏིསཾསཱརོ, ནཏྠི དཱནི པུནབྦྷཝོ’’ཏི.

… ནདཱིཀསྶཔོ ཐེརོ….

༧. གཡཱཀསྶཔཏྠེརགཱཐཱ

༣༤༥.

‘‘པཱཏོ མཛ྄ཛྷནྷིཀཾ སཱཡཾ, ཏིཀྑཏྟུཾ དིཝསསྶཧཾ;

ཨོཏརིཾ ཨུདཀཾ སོཧཾ, གཡཱཡ གཡཕགྒུཡཱ.

༣༤༦.

‘‘‘ཡཾ ¶ མཡཱ པཀཏཾ པཱཔཾ, པུབྦེ ཨཉྙཱསུ ཛཱཏིསུ;

ཏཾ དཱནཱིདྷ པཝཱཧེམི’, ཨེཝཾདིཊྛི པུརེ ཨཧུཾ.

༣༤༧.

‘‘སུཏྭཱ ¶ སུབྷཱསིཏཾ ཝཱཙཾ, དྷམྨཏྠསཧིཏཾ པདཾ;

ཏཐཾ ཡཱཐཱཝཀཾ ཨཏྠཾ, ཡོནིསོ པཙྩཝེཀྑིསཾ;

༣༤༨.

‘‘ནིནྷཱཏསབྦཔཱཔོམྷི, ནིམྨལོ པཡཏོ སུཙི;

སུདྡྷོ སུདྡྷསྶ དཱཡཱདོ, པུཏྟོ བུདྡྷསྶ ཨོརསོ.

༣༤༩.

‘‘ཨོགཡ྄ཧཊྛངྒིཀཾ སོཏཾ, སབྦཔཱཔཾ པཝཱཧཡིཾ;

ཏིསྶོ ཝིཛྫཱ ཨཛ྄ཛྷགམིཾ, ཀཏཾ བུདྡྷསྶ སཱསན’’ནྟི.

… གཡཱཀསྶཔོ ཐེརོ….

༨. ཝཀྐལིཏྠེརགཱཐཱ

༣༥༠.

‘‘ཝཱཏརོགཱབྷིནཱིཏོ ཏྭཾ, ཝིཧརཾ ཀཱནནེ ཝནེ;

པཝིཊྛགོཙརེ ལཱུཁེ, ཀཐཾ བྷིཀྑུ ཀརིསྶསི.

༣༥༡.

‘‘པཱིཏིསུཁེན ཝིཔུལེན, ཕརམཱནོ སམུསྶཡཾ;

ལཱུཁམྤི ཨབྷིསམྦྷོནྟོ, ཝིཧརིསྶཱམི ཀཱནནེ.

༣༥༢.

‘‘བྷཱཝེནྟོ སཏིཔཊྛཱནེ, ཨིནྡྲིཡཱནི བལཱནི ཙ;

བོཛ྄ཛྷངྒཱནི ཙ བྷཱཝེནྟོ, ཝིཧརིསྶཱམི ཀཱནནེ.

༣༥༣.

‘‘ཨཱརདྡྷཝཱིརིཡེ པཧིཏཏྟེ, ནིཙྩཾ དལ༹ྷཔརཀྐམེ [ཨཱརདྡྷཝཱིརིཡོ པཧིཏཏྟོ, ནིཙྩཾ དལ༹ྷཔརཀྐམོ (སཱི.)];

སམགྒེ སཧིཏེ དིསྭཱ, ཝིཧརིསྶཱམི ཀཱནནེ.

༣༥༤.

‘‘ཨནུསྶརནྟོ སམྦུདྡྷཾ, ཨགྒཾ དནྟཾ སམཱཧིཏཾ;

ཨཏནྡིཏོ ¶ རཏྟིནྡིཝཾ, ཝིཧརིསྶཱམི ཀཱནནེ’’ཏི.

… ཝཀྐལིཏྠེརོ….

༩. ཝིཛིཏསེནཏྠེརགཱཐཱ

༣༥༥.

‘‘ཨོལགྒེསྶཱམི ¶ ཏེ ཙིཏྟ, ཨཱཎིདྭཱརེཝ ཧཏྠིནཾ;

ན ཏཾ པཱཔེ ནིཡོཛེསྶཾ, ཀཱམཛཱལ [ཀཱམཛཱལཾ (སྱཱ.)] སརཱིརཛ [སརཱིརཛཾ (སྱཱ. ཀ.)].

༣༥༦.

‘‘ཏྭཾ ¶ ཨོལགྒོ ན གཙྪསི [ན གཉྪིསི (པཱི)], དྭཱརཝིཝརཾ གཛོཝ ཨལབྷནྟོ;

ན ཙ ཙིཏྟཀལི པུནཔྤུནཾ, པསཀྐ [པསཧཾ (སཱི. སྱཱ. པཱི.)] པཱཔརཏོ ཙརིསྶསི.

༣༥༧.

‘‘ཡཐཱ ཀུཉྫརཾ ཨདནྟཾ, ནཝགྒཧམངྐུསགྒཧོ;

བལཝཱ ཨཱཝཏྟེཏི ཨཀཱམཾ, ཨེཝཾ ཨཱཝཏྟཡིསྶཾ ཏཾ.

༣༥༨.

‘‘ཡཐཱ ཝརཧཡདམཀུསལོ, སཱརཐི པཝརོ དམེཏི ཨཱཛཉྙཾ;

ཨེཝཾ དམཡིསྶཾ ཏཾ, པཏིཊྛིཏོ པཉྩསུ བལེསུ.

༣༥༩.

‘‘སཏིཡཱ ¶ ཏཾ ནིབནྡྷིསྶཾ, པཡུཏྟོ ཏེ དམེསྶཱམི [པཡཏཏྟོ ཝོདཔེསྶཱམི (སཱི.)];

ཝཱིརིཡདྷུརནིགྒཧིཏོ, ན ཡིཏོ དཱུརཾ ¶ གམིསྶསེ ཙིཏྟཱ’’ཏི.

… ཝིཛིཏསེནོ ཐེརོ….

༡༠. ཡསདཏྟཏྠེརགཱཐཱ

༣༦༠.

‘‘ཨུཔཱརམྦྷཙིཏྟོ དུམྨེདྷོ, སུཎཱཏི ཛིནསཱསནཾ;

ཨཱརཀཱ ཧོཏི སདྡྷམྨཱ, ནབྷསོ པཐཝཱི ཡཐཱ.

༣༦༡.

‘‘ཨུཔཱརམྦྷཙིཏྟོ དུམྨེདྷོ, སུཎཱཏི ཛིནསཱསནཾ;

པརིཧཱཡཏི སདྡྷམྨཱ, ཀཱལ༹པཀྑེཝ ཙནྡིམཱ.

༣༦༢.

‘‘ཨུཔཱརམྦྷཙིཏྟོ དུམྨེདྷོ, སུཎཱཏི ཛིནསཱསནཾ;

པརིསུསྶཏི སདྡྷམྨེ, མཙྪོ ཨཔྤོདཀེ ཡཐཱ.

༣༦༣.

‘‘ཨུཔཱརམྦྷཙིཏྟོ དུམྨེདྷོ, སུཎཱཏི ཛིནསཱསནཾ;

ན ཝིརཱུཧཏི སདྡྷམྨེ, ཁེཏྟེ བཱིཛཾཝ པཱུཏིཀཾ.

༣༦༤.

‘‘ཡོ ཙ ཏུཊྛེན ཙིཏྟེན, སུཎཱཏི ཛིནསཱསནཾ;

ཁེཔེཏྭཱ ཨཱསཝེ སབྦེ, སཙྪིཀཏྭཱ ཨཀུཔྤཏཾ;

པཔྤུཡྻ པརམཾ སནྟིཾ, པརིནིབྦཱཏིནཱསཝོ’’ཏི.

… ཡསདཏྟོ ཐེརོ….

༡༡. སོཎཀུཊིཀཎྞཏྠེརགཱཐཱ

༣༦༥.

‘‘ཨུཔསམྤདཱ ¶ ཙ མེ ལདྡྷཱ, ཝིམུཏྟོ ཙམྷི ཨནཱསཝོ;

སོ ཙ མེ བྷགཝཱ དིཊྛོ, ཝིཧཱརེ ཙ སཧཱཝསིཾ.

༣༦༦.

‘‘བཧུདེཝ རཏྟིཾ བྷགཝཱ, ཨབྦྷོཀཱསེཏིནཱམཡི;

ཝིཧཱརཀུསལོ སཏྠཱ, ཝིཧཱརཾ པཱཝིསཱི ཏདཱ.

༣༦༧.

‘‘སནྠརིཏྭཱན སངྒྷཱཊིཾ, སེཡྻཾ ཀཔྤེསི གོཏམོ;

སཱིཧོ ¶ སེལགུཧཱཡཾཝ, པཧཱིནབྷཡབྷེརཝོ.

༣༦༨.

‘‘ཏཏོ ཀལྱཱཎཝཱཀྐརཎོ, སམྨཱསམྦུདྡྷསཱཝཀོ;

སོཎོ ཨབྷཱསི སདྡྷམྨཾ, བུདྡྷསེཊྛསྶ སམྨུཁཱ.

༣༦༩.

‘‘པཉྩཀྑནྡྷེ པརིཉྙཱཡ, བྷཱཝཡིཏྭཱན ཨཉྫསཾ;

པཔྤུཡྻ པརམཾ སནྟིཾ, པརིནིབྦིསྶཏྱནཱསཝོ’’ཏི.

… སོཎོ ཀུཊིཀཎྞཐེརོ….

༡༢. ཀོསིཡཏྠེརགཱཐཱ

༣༧༠.

‘‘ཡོ ¶ ¶ ཝེ གརཱུནཾ ཝཙནཉྙུ དྷཱིརོ, ཝསེ ཙ ཏམྷི ཛནཡེཐ པེམཾ;

སོ བྷཏྟིམཱ ནཱམ ཙ ཧོཏི པཎྜིཏོ, ཉཏྭཱ ཙ དྷམྨེསུ ཝིསེསི ཨསྶ.

༣༧༡.

‘‘ཡཾ ཨཱཔདཱ ཨུཔྤཏིཏཱ ཨུལཱ༹རཱ, ནཀྑམྦྷཡནྟེ པཊིསངྑཡནྟཾ;

སོ ཐཱམཝཱ ནཱམ ཙ ཧོཏི པཎྜིཏོ, ཉཏྭཱ ཙ དྷམྨེསུ ཝིསེསི ཨསྶ.

༣༧༢.

‘‘ཡོ ཝེ སམུདྡོཝ ཋིཏོ ཨནེཛོ, གམྦྷཱིརཔཉྙོ ནིཔུཎཏྠདསྶཱི;

ཨསཾཧཱརིཡོ ནཱམ ཙ ཧོཏི པཎྜིཏོ, ཉཏྭཱ ཙ དྷམྨེསུ ཝིསེསི ཨསྶ.

༣༧༣.

‘‘བཧུསྶུཏོ དྷམྨདྷརོ ཙ ཧོཏི, དྷམྨསྶ ¶ ཧོཏི ཨནུདྷམྨཙཱརཱི;

སོ ཏཱདིསོ ནཱམ ཙ ཧོཏི པཎྜིཏོ, ཉཏྭཱ ཙ དྷམྨེསུ ཝིསེསི ཨསྶ.

༣༧༤.

‘‘ཨཏྠཉྩ ¶ ཡོ ཛཱནཱཏི བྷཱསིཏསྶ, ཨཏྠཉྩ ཉཏྭཱན ཏཐཱ ཀརོཏི;

ཨཏྠནྟརོ ནཱམ ས ཧོཏི པཎྜིཏོ, ཉཏྭཱ ཙ དྷམྨེསུ ཝིསེསི ཨསྶཱ’’ཏི.

… ཀོསིཡོ ཐེརོ….

པཉྩཀནིཔཱཏོ ནིཊྛིཏོ.

ཏཏྲུདྡཱནཾ –

རཱཛདཏྟོ སུབྷཱུཏོ ཙ, གིརིམཱནནྡསུམནཱ;

ཝཌྜྷོ ཙ ཀསྶཔོ ཐེརོ, གཡཱཀསྶཔཝཀྐལཱི.

ཝིཛིཏོ ཡསདཏྟོ ཙ, སོཎོ ཀོསིཡསཝ྄ཧཡོ;

སཊྛི ཙ པཉྩ གཱཐཱཡོ, ཐེརཱ ཙ ཨེཏྠ དྭཱདསཱཏི.

༦. ཚཀྐནིཔཱཏོ

༡. ཨུརུཝེལ༹ཀསྶཔཏྠེརགཱཐཱ

༣༧༥.

‘‘དིསྭཱན ¶ ¶ ¶ པཱཊིཧཱིརཱནི, གོཏམསྶ ཡསསྶིནོ;

ན ཏཱཝཱཧཾ པཎིཔཏིཾ, ཨིསྶཱམཱནེན ཝཉྩིཏོ.

༣༧༦.

‘‘མམ སངྐཔྤམཉྙཱཡ, ཙོདེསི ནརསཱརཐི;

ཏཏོ ¶ མེ ཨཱསི སཾཝེགོ, ཨབྦྷུཏོ ལོམཧཾསནོ.

༣༧༧.

‘‘པུབྦེ ཛཊིལབྷཱུཏསྶ, ཡཱ མེ སིདྡྷི པརིཏྟིཀཱ;

ཏཱཧཾ ཏདཱ ནིརཱཀཏྭཱ [ནིརཾཀཏྭཱ (སྱཱ. ཀ.)], པབྦཛིཾ ཛིནསཱསནེ.

༣༧༨.

‘‘པུབྦེ ཡཉྙེན སནྟུཊྛོ, ཀཱམདྷཱཏུཔུརཀྑཏོ;

པཙྪཱ རཱགཉྩ དོསཉྩ, མོཧཉྩཱཔི སམཱུཧནིཾ.

༣༧༩.

‘‘པུབྦེནིཝཱསཾ ཛཱནཱམི, དིབྦཙཀྑུ ཝིསོདྷིཏཾ;

ཨིདྡྷིམཱ པརཙིཏྟཉྙཱུ, དིབྦསོཏཉྩ པཱཔུཎིཾ.

༣༨༠.

‘‘ཡསྶ ཙཏྠཱཡ པབྦཛིཏོ, ཨགཱརསྨཱནགཱརིཡཾ;

སོ མེ ཨཏྠོ ཨནུཔྤཏྟོ, སབྦསཾཡོཛནཀྑཡོ’’ཏི.

… ཨུརུཝེལ༹ཀསྶཔོ ཐེརོ….

༢. ཏེཀིཙྪཀཱརིཏྠེརགཱཐཱ

༣༨༡.

‘‘ཨཏིཧིཏཱ ཝཱིཧི, ཁལགཏཱ སཱལཱི;

ན ཙ ལབྷེ པིཎྜཾ, ཀཐམཧཾ ཀསྶཾ.

༣༨༢.

‘‘བུདྡྷམཔྤམེཡྻཾ ཨནུསྶར པསནྣོ;

པཱིཏིཡཱ ཕུཊསརཱིརོ ཧོཧིསི སཏཏམུདགྒོ.

༣༨༣.

‘‘དྷམྨམཔྤམེཡྻཾ ཨནུསྶར པསནྣོ;

པཱིཏིཡཱ ཕུཊསརཱིརོ ཧོཧིསི སཏཏམུདགྒོ.

༣༨༤.

‘‘སངྒྷམཔྤམེཡྻཾ ཨནུསྶར པསནྣོ;

པཱིཏིཡཱ ཕུཊསརཱིརོ ཧོཧིསི སཏཏམུདགྒོ.

༣༨༥.

‘‘ཨབྦྷོཀཱསེ ¶ ¶ ཝིཧརསི, སཱིཏཱ ཧེམནྟིཀཱ ཨིམཱ རཏྱོ;

མཱ སཱིཏེན པརེཏོ ཝིཧཉྙིཏྠོ, པཝིས ¶ ཏྭཾ ཝིཧཱརཾ ཕུསིཏགྒལ༹ཾ.

༣༨༦.

‘‘ཕུསིསྶཾ ཙཏསྶོ ཨཔྤམཉྙཱཡོ, ཏཱཧི ཙ སུཁིཏོ ཝིཧརིསྶཾ;

ནཱཧཾ སཱིཏེན ཝིཧཉྙིསྶཾ, ཨནིཉྫིཏོ ཝིཧརནྟོ’’ཏི.

… ཏེཀིཙྪཀཱརཱི [ཏེཀིཙྪཀཱནི (སཱི. སྱཱ. པཱི.)] ཐེརོ….

༣. མཧཱནཱགཏྠེརགཱཐཱ

༣༨༧.

‘‘ཡསྶ ¶ སབྲཧྨཙཱརཱིསུ, གཱརཝོ ནཱུཔལབྦྷཏི;

པརིཧཱཡཏི སདྡྷམྨཱ, མཙྪོ ཨཔྤོདཀེ ཡཐཱ.

༣༨༨.

‘‘ཡསྶ སབྲཧྨཙཱརཱིསུ, གཱརཝོ ནཱུཔལབྦྷཏི;

ན ཝིརཱུཧཏི སདྡྷམྨེ, ཁེཏྟེ བཱིཛཾཝ པཱུཏིཀཾ.

༣༨༩.

‘‘ཡསྶ སབྲཧྨཙཱརཱིསུ, གཱརཝོ ནཱུཔལབྦྷཏི;

ཨཱརཀཱ ཧོཏི ནིབྦཱནཱ [ནིབྦཱཎཱ (སཱི.)], དྷམྨརཱཛསྶ སཱསནེ.

༣༩༠.

‘‘ཡསྶ སབྲཧྨཙཱརཱིསུ, གཱརཝོ ཨུཔལབྦྷཏི;

ན ཝིཧཱཡཏི སདྡྷམྨཱ, མཙྪོ བཝ྄ཧོདཀེ [བཧྭོདཀེ (སཱི.), བཧོདཀེ (སྱཱ.)] ཡཐཱ.

༣༩༡.

‘‘ཡསྶ སབྲཧྨཙཱརཱིསུ, གཱརཝོ ཨུཔལབྦྷཏི;

སོ ཝིརཱུཧཏི སདྡྷམྨེ, ཁེཏྟེ བཱིཛཾཝ བྷདྡཀཾ.

༣༩༢.

‘‘ཡསྶ སབྲཧྨཙཱརཱིསུ, གཱརཝོ ཨུཔལབྦྷཏི;

སནྟིཀེ ཧོཏི ནིབྦཱནཾ [ནིབྦཱཎཾ (སཱི.)], དྷམྨརཱཛསྶ སཱསནེ’’ཏི.

… མཧཱནཱགོ ཐེརོ….

༤. ཀུལླཏྠེརགཱཐཱ

༣༩༣.

‘‘ཀུལློ སིཝཐིཀཾ གནྟྭཱ, ཨདྡས ཨིཏྠིམུཛ྄ཛྷིཏཾ;

ཨཔཝིདྡྷཾ ¶ སུསཱནསྨིཾ, ཁཛྫནྟིཾ ཀིམིཧཱི ཕུཊཾ.

༣༩༤.

‘‘ཨཱཏུརཾ ¶ ཨསུཙིཾ པཱུཏིཾ, པསྶ ཀུལླ སམུསྶཡཾ;

ཨུགྒྷརནྟཾ པགྒྷརནྟཾ, བཱལཱནཾ ཨབྷིནནྡིཏཾ.

༣༩༥.

‘‘དྷམྨཱདཱསཾ གཧེཏྭཱན, ཉཱཎདསྶནཔཏྟིཡཱ;

པཙྩཝེཀྑིཾ ཨིམཾ ཀཱཡཾ, ཏུཙྪཾ སནྟརབཱཧིརཾ.

༣༩༦.

‘‘ཡཐཱ ཨིདཾ ཏཐཱ ཨེཏཾ, ཡཐཱ ཨེཏཾ ཏཐཱ ཨིདཾ;

ཡཐཱ ཨདྷོ ཏཐཱ ཨུདྡྷཾ, ཡཐཱ ཨུདྡྷཾ ཏཐཱ ཨདྷོ.

༣༩༧.

‘‘ཡཐཱ ¶ དིཝཱ ཏཐཱ རཏྟིཾ, ཡཐཱ རཏྟིཾ ཏཐཱ དིཝཱ;

ཡཐཱ པུརེ ཏཐཱ པཙྪཱ, ཡཐཱ པཙྪཱ ཏཐཱ པུརེ.

༣༩༨.

‘‘པཉྩངྒིཀེན ཏུརིཡེན, ན རཏཱི ཧོཏི ཏཱདིསཱི;

ཡཐཱ ཨེཀགྒཙིཏྟསྶ, སམྨཱ དྷམྨཾ ཝིཔསྶཏོ’’ཏི.

… ཀུལློ ཐེརོ….

༥. མཱལུཀྱཔུཏྟཏྠེརགཱཐཱ

༣༩༩.

‘‘མནུཛསྶ པམཏྟཙཱརིནོ, ཏཎྷཱ ཝཌྜྷཏི མཱལུཝཱ ཝིཡ;

སོ པླཝཏཱི [པླཝཏི (སཱི. པཱི. ཀ.), པརིཔླཝཏི (སྱཱ.)] ཧུརཱ ཧུརཾ, ཕལམིཙྪཾཝ ཝནསྨི ཝཱནརོ.

༤༠༠.

‘‘ཡཾ ཨེསཱ སཧཏེ [སཧཏི (པཱི. ཀ.)] ཛམྨཱི, ཏཎྷཱ ལོཀེ ཝིསཏྟིཀཱ;

སོཀཱ ཏསྶ པཝཌྜྷནྟི, ཨབྷིཝཊྛཾཝ [ཨབྷིཝུཊྛཾཝ (སྱཱ.), ཨབྷིཝཌྜྷཾཝ (ཀ.)] བཱིརཎཾ.

༤༠༡.

‘‘ཡོ ཙེཏཾ སཧཏེ [སཧཏི (པཱི. ཀ.)] ཛམྨིཾ, ཏཎྷཾ ལོཀེ དུརཙྩཡཾ;

སོཀཱ ཏམྷཱ པཔཏནྟི, ཨུདབིནྡཱུཝ པོཀྑརཱ.

༤༠༢.

‘‘ཏཾ ¶ ཝོ ཝདཱམི བྷདྡཾ ཝོ, ཡཱཝནྟེཏྠ སམཱགཏཱ;

ཏཎྷཱཡ ¶ མཱུལཾ ཁཎཐ, ཨུསཱིརཏྠོཝ བཱིརཎཾ;

མཱ ཝོ ནལ༹ཾཝ སོཏོཝ, མཱརོ བྷཉྫི པུནཔྤུནཾ.

༤༠༣.

‘‘ཀརོཐ བུདྡྷཝཙནཾ, ཁཎོ ཝོ མཱ ཨུཔཙྩགཱ;

ཁཎཱཏཱིཏཱ ཧི སོཙནྟི, ནིརཡམྷི སམཔྤིཏཱ.

༤༠༤.

‘‘པམཱདོ རཛོ པམཱདོ [སབྦདཱ (སཱི. ཀ.), སུཏྟནིཔཱཏཊྛཀཐཱཡཾ ཨུཊྛཱནསུཏྟཝཎྞནཱ ཨོལོཀེཏབྦཱ], པམཱདཱནུཔཏིཏོ རཛོ;

ཨཔྤམཱདེན ཝིཛྫཱཡ, ཨབྦཧེ སལླམཏྟནོ’’ཏི.

… མཱལུཀྱཔུཏྟོ [མཱལུངྐྱཔུཏྟོ (སཱི. སྱཱ. པཱི.)] ཐེརོ….

༦. སཔྤདཱསཏྠེརགཱཐཱ

༤༠༥.

‘‘པཎྞཝཱིསཏིཝསྶཱནི ¶ , ཡཏོ པབྦཛིཏོ ཨཧཾ;

ཨཙྪརཱསངྒྷཱཏམཏྟམྤི, ཙེཏོསནྟིམནཛ྄ཛྷགཾ.

༤༠༦.

‘‘ཨལདྡྷཱ ཙིཏྟསྶེཀགྒཾ, ཀཱམརཱགེན ཨཊྚིཏོ [ཨདྡིཏོ (སྱཱ. སཱི. ཨཊྛ.), ཨཌྜིཏོ (ཀ.)];

བཱཧཱ པགྒཡ྄ཧ ཀནྡནྟོ, ཝིཧཱརཱ ཨུཔནིཀྑམིཾ [ནཱུཔནིཀྑམིཾ (སབྦཏྠ), དུཔནིཀྑམིཾ (?)].

༤༠༧.

‘‘སཏྠཾ ཝཱ ཨཱཧརིསྶཱམི, ཀོ ཨཏྠོ ཛཱིཝིཏེན མེ;

ཀཐཾ ཧི སིཀྑཾ པཙྩཀྑཾ, ཀཱལཾ ཀུབྦེཐ མཱདིསོ.

༤༠༨.

‘‘ཏདཱཧཾ ¶ ཁུརམཱདཱཡ, མཉྩཀམྷི ཨུཔཱཝིསིཾ;

པརིནཱིཏོ ཁུརོ ཨཱསི, དྷམནིཾ ཚེཏྟུམཏྟནོ.

༤༠༩.

‘‘ཏཏོ མེ མནསཱིཀཱརོ, ཡོནིསོ ཨུདཔཛྫཐ;

ཨཱདཱིནཝོ པཱཏུརཧུ, ནིབྦིདཱ སམཏིཊྛཐ.

༤༡༠.

‘‘ཏཏོ ཙིཏྟཾ ཝིམུཙྩི མེ, པསྶ དྷམྨསུདྷམྨཏཾ;

ཏིསྶོ ¶ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསན’’ནྟི.

… སཔྤདཱསོ ཐེརོ….

༧.ཀཱཏིཡཱནཏྠེརགཱཐཱ

༤༡༡.

‘‘ཨུཊྛེཧི ནིསཱིད ཀཱཏིཡཱན, མཱ ནིདྡཱབཧུལོ ཨཧུ ཛཱགརསྶུ;

མཱ ཏཾ ཨལསཾ པམཏྟབནྡྷུ, ཀཱུཊེནེཝ ཛིནཱཏུ མཙྩུརཱཛཱ.

༤༡༢.

‘‘སེཡྻཐཱཔི [སཡཐཱཔི (སཱི. པཱི.)] མཧཱསམུདྡཝེགོ, ཨེཝཾ ཛཱཏིཛརཱཏིཝཏྟཏེ ཏཾ;

སོ ཀརོཧི སུདཱིཔམཏྟནོ ཏྭཾ, ན ཧི ཏཱཎཾ ཏཝ ཝིཛྫཏེཝ ཨཉྙཾ.

༤༡༣.

‘‘སཏྠཱ ཧི ཝིཛེསི མགྒམེཏཾ, སངྒཱ ཛཱཏིཛརཱབྷཡཱ ཨཏཱིཏཾ;

པུབྦཱཔརརཏྟམཔྤམཏྟོ, ཨནུཡུཉྫསྶུ དལ༹ྷཾ ཀརོཧི ཡོགཾ.

༤༡༤.

‘‘པུརིམཱནི ¶ པམུཉྩ བནྡྷནཱནི, སངྒྷཱཊིཁུརམུཎྜབྷིཀྑབྷོཛཱི;

མཱ ཁིཌྜཱརཏིཉྩ མཱ ནིདྡཾ, ཨནུཡུཉྫིཏྠ ཛྷཱཡ ཀཱཏིཡཱན.

༤༡༥.

‘‘ཛྷཱཡཱཧི ¶ ཛིནཱཧི ཀཱཏིཡཱན, ཡོགཀྑེམཔཐེསུ ¶ ཀོཝིདོསི;

པཔྤུཡྻ ཨནུཏྟརཾ ཝིསུདྡྷིཾ, པརིནིབྦཱཧིསི ཝཱརིནཱཝ ཛོཏི.

༤༡༦.

‘‘པཛྫོཏཀརོ པརིཏྟརཾསོ, ཝཱཏེན ཝིནམྱཏེ ལཏཱཝ;

ཨེཝམྤི ཏུཝཾ ཨནཱདིཡཱནོ, མཱརཾ ཨིནྡསགོཏྟ ནིདྡྷུནཱཧི;

སོ ཝེདཡིཏཱསུ ཝཱིཏརཱགོ, ཀཱལཾ ཀངྑ ཨིདྷེཝ སཱིཏིབྷཱུཏོ’’ཏི.

… ཀཱཏིཡཱནོ ཐེརོ….

༨. མིགཛཱལཏྠེརགཱཐཱ

༤༡༧.

‘‘སུདེསིཏོ ཙཀྑུམཏཱ, བུདྡྷེནཱདིཙྩབནྡྷུནཱ;

སབྦསཾཡོཛནཱཏཱིཏོ, སབྦཝཊྚཝིནཱསནོ.

༤༡༨.

‘‘ནིཡྻཱནིཀོ ཨུཏྟརཎོ, ཏཎྷཱམཱུལཝིསོསནོ;

ཝིསམཱུལཾ ཨཱགྷཱཏནཾ, ཚེཏྭཱ པཱཔེཏི ནིབྦུཏིཾ.

༤༡༩.

‘‘ཨཉྙཱཎམཱུལབྷེདཱཡ ¶ , ཀམྨཡནྟཝིགྷཱཊནོ;

ཝིཉྙཱཎཱནཾ པརིགྒཧེ, ཉཱཎཝཛིརནིཔཱཏནོ.

༤༢༠.

‘‘ཝེདནཱནཾ ཝིཉྙཱཔནོ, ཨུཔཱདཱནཔྤམོཙནོ;

བྷཝཾ ཨངྒཱརཀཱསུཾཝ, ཉཱཎེན ཨནུཔསྶནོ [ཨནུཔསྶཀོ (སཱི. པཱི.)].

༤༢༡.

‘‘མཧཱརསོ སུགམྦྷཱིརོ, ཛརཱམཙྩུནིཝཱརཎོ;

ཨརིཡོ ¶ ཨཊྛངྒིཀོ མགྒོ, དུཀྑཱུཔསམནོ སིཝོ.

༤༢༢.

‘‘ཀམྨཾ ཀམྨནྟི ཉཏྭཱན, ཝིཔཱཀཉྩ ཝིཔཱཀཏོ;

པཊིཙྩུཔྤནྣདྷམྨཱནཾ, ཡཐཱཝཱལོཀདསྶནོ;

མཧཱཁེམངྒམོ སནྟོ, པརིཡོསཱནབྷདྡཀོ’’ཏི.

… མིགཛཱལོ ཐེརོ….

༩. པུརོཧིཏཔུཏྟཛེནྟཏྠེརགཱཐཱ

༤༢༣.

‘‘ཛཱཏིམདེན ¶ མཏྟོཧཾ, བྷོགཨིསྶརིཡེན ཙ;

སཎྛཱནཝཎྞརཱུཔེན, མདམཏྟོ ཨཙཱརིཧཾ.

༤༢༤.

‘‘ནཱཏྟནོ སམཀཾ ཀཉྩི, ཨཏིརེཀཾ ཙ མཉྙིསཾ;

ཨཏིམཱནཧཏོ བཱལོ, པཏྠདྡྷོ ཨུསྶིཏདྡྷཛོ.

༤༢༥.

‘‘མཱཏརཾ པིཏརཉྩཱཔི, ཨཉྙེཔི གརུསམྨཏེ;

ན ཀཉྩི ཨབྷིཝཱདེསིཾ, མཱནཏྠདྡྷོ ཨནཱདརོ.

༤༢༦.

‘‘དིསྭཱ ཝིནཱཡཀཾ ཨགྒཾ, སཱརཐཱིནཾ ཝརུཏྟམཾ;

ཏཔནྟམིཝ ཨཱདིཙྩཾ, བྷིཀྑུསངྒྷཔུརཀྑཏཾ.

༤༢༧.

‘‘མཱནཾ མདཉྩ ཚཌྜེཏྭཱ, ཝིཔྤསནྣེན ཙེཏསཱ;

སིརསཱ ཨབྷིཝཱདེསིཾ, སབྦསཏྟཱནམུཏྟམཾ.

༤༢༨.

‘‘ཨཏིམཱནོ ¶ ཙ ཨོམཱནོ, པཧཱིནཱ སུསམཱུཧཏཱ;

ཨསྨིམཱནོ སམུཙྪིནྣོ, སབྦེ མཱནཝིདྷཱ ཧཏཱ’’ཏི.

… ཛེནྟོ པུརོཧིཏཔུཏྟོ ཐེརོ….

༡༠. སུམནཏྠེརགཱཐཱ

༤༢༩.

‘‘ཡདཱ ¶ ནཝོ པབྦཛིཏོ, ཛཱཏིཡཱ སཏྟཝསྶིཀོ;

ཨིདྡྷིཡཱ ཨབྷིབྷོཏྭཱན, པནྣགིནྡཾ མཧིདྡྷིཀཾ.

༤༣༠.

‘‘ཨུཔཛ྄ཛྷཱཡསྶ ¶ ཨུདཀཾ, ཨནོཏཏྟཱ མཧཱསརཱ;

ཨཱཧརཱམི ཏཏོ དིསྭཱ, མཾ སཏྠཱ ཨེཏདབྲཝི’’.

༤༣༡.

‘‘སཱརིཔུཏྟ ཨིམཾ པསྶ, ཨཱགཙྪནྟཾ ཀུམཱརཀཾ;

ཨུདཀཀུམྦྷམཱདཱཡ, ཨཛ྄ཛྷཏྟཾ སུསམཱཧིཏཾ.

༤༣༢.

‘‘པཱསཱདིཀེན ཝཏྟེན, ཀལྱཱཎཨིརིཡཱཔཐོ;

སཱམཎེརོནུརུདྡྷསྶ, ཨིདྡྷིཡཱ ཙ ཝིསཱརདོ.

༤༣༣.

‘‘ཨཱཛཱནཱིཡེན ཨཱཛཉྙོ, སཱདྷུནཱ སཱདྷུཀཱརིཏོ;

ཝིནཱིཏོ ཨནུརུདྡྷེན, ཀཏཀིཙྩེན སིཀྑིཏོ.

༤༣༤.

‘‘སོ པཏྭཱ པརམཾ སནྟིཾ, སཙྪིཀཏྭཱ ཨཀུཔྤཏཾ;

སཱམཎེརོ ས སུམནོ, མཱ མཾ ཛཉྙཱཏི ཨིཙྪཏཱི’’ཏི.

… སུམནོ ཐེརོ….

༡༡. ནྷཱཏཀམུནིཏྠེརགཱཐཱ

༤༣༥.

‘‘ཝཱཏརོགཱབྷིནཱིཏོ ¶ ཏྭཾ, ཝིཧརཾ ཀཱནནེ ཝནེ;

པཝིདྡྷགོཙརེ ལཱུཁེ, ཀཐཾ བྷིཀྑུ ཀརིསྶསི’’.

༤༣༦.

‘‘པཱིཏིསུཁེན ཝིཔུལེན, ཕརིཏྭཱན སམུསྶཡཾ;

ལཱུཁམྤི ཨབྷིསམྦྷོནྟོ, ཝིཧརིསྶཱམི ཀཱནནེ.

༤༣༧.

‘‘བྷཱཝེནྟོ སཏྟ བོཛ྄ཛྷངྒེ, ཨིནྡྲིཡཱནི བལཱནི ཙ;

ཛྷཱནསོཁུམྨསམྤནྣོ [ཛྷཱནསུཁུམསམྤནྣོ (སྱཱ. ཀ.)], ཝིཧརིསྶཾ ཨནཱསཝོ.

༤༣༨.

‘‘ཝིཔྤམུཏྟཾ ¶ ཀིལེསེཧི, སུདྡྷཙིཏྟཾ ཨནཱཝིལཾ;

ཨབྷིཎྷཾ པཙྩཝེཀྑནྟོ, ཝིཧརིསྶཾ ཨནཱསཝོ.

༤༣༩.

‘‘ཨཛ྄ཛྷཏྟཉྩ བཧིདྡྷཱ ཙ, ཡེ མེ ཝིཛྫིཾསུ ཨཱསཝཱ;

སབྦེ ཨསེསཱ ཨུཙྪིནྣཱ, ན ཙ ཨུཔྤཛྫརེ པུན.

༤༤༠.

‘‘པཉྩཀྑནྡྷཱ པརིཉྙཱཏཱ, ཏིཊྛནྟི ཚིནྣམཱུལཀཱ;

དུཀྑཀྑཡོ ཨནུཔྤཏྟོ, ནཏྠི དཱནི པུནབྦྷཝོ’’ཏི.

… ནྷཱཏཀམུནིཏྠེརོ….

༡༢. བྲཧྨདཏྟཏྠེརགཱཐཱ

༤༤༡.

‘‘ཨཀྐོདྷསྶ ཀུཏོ ཀོདྷོ, དནྟསྶ སམཛཱིཝིནོ;

སམྨདཉྙཱ ཝིམུཏྟསྶ, ཨུཔསནྟསྶ ཏཱདིནོ.

༤༤༢.

‘‘ཏསྶེཝ ¶ ¶ ཏེན པཱཔིཡོ, ཡོ ཀུདྡྷཾ པཊིཀུཛ྄ཛྷཏི;

ཀུདྡྷཾ ཨཔྤཊིཀུཛ྄ཛྷནྟོ, སངྒཱམཾ ཛེཏི དུཛྫཡཾ.

༤༤༣.

[སཾ. ནི. ༡.༡༨༨, ༢༥༠] ‘‘ཨུབྷིནྣམཏྠཾ ཙརཏི, ཨཏྟནོ ཙ པརསྶ ཙ;

པརཾ སངྐུཔིཏཾ ཉཏྭཱ, ཡོ སཏོ ཨུཔསམྨཏི.

༤༤༤.

[སཾ. ནི. ༡.༡༨༨, ༢༥༠] ‘‘ཨུབྷིནྣཾ ཏིཀིཙྪནྟཾ ཏཾ, ཨཏྟནོ ཙ པརསྶ ཙ;

ཛནཱ མཉྙནྟི བཱལོཏི, ཡེ དྷམྨསྶ ཨཀོཝིདཱ.

༤༤༥.

‘‘ཨུཔྤཛྫེ ཏེ སཙེ ཀོདྷོ, ཨཱཝཛྫ ཀཀཙཱུཔམཾ;

ཨུཔྤཛྫེ ཙེ རསེ ཏཎྷཱ, པུཏྟམཾསཱུཔམཾ སར.

༤༤༦.

‘‘སཙེ དྷཱཝཏི ཙིཏྟཾ ཏེ, ཀཱམེསུ ཙ བྷཝེསུ ཙ;

ཁིཔྤཾ ¶ ནིགྒཎྷ སཏིཡཱ, ཀིཊྛཱདཾ ཝིཡ དུཔྤསུ’’ནྟི;

… བྲཧྨདཏྟོ ཐེརོ….

༡༣. སིརིམཎྜཏྠེརགཱཐཱ

༤༤༧.

[ཨུདཱ. ༤༥; ཙཱུལ༹ཝ. ༣༨༥; པརི. ༣༣༩] ‘‘ཚནྣམཏིཝསྶཏི ¶ , ཝིཝཊཾ ནཱཏིཝསྶཏི;

ཏསྨཱ ཚནྣཾ ཝིཝརེཐ, ཨེཝཾ ཏཾ ནཱཏིཝསྶཏི.

༤༤༨.

[སཾ. ནི. ༡.༦༦; ནེཏྟི. ༡༨] ‘‘མཙྩུནཱབྦྷཧཏོ ལོཀོ, ཛརཱཡ པརིཝཱརིཏོ;

ཏཎྷཱསལླེན ཨོཏིཎྞོ, ཨིཙྪཱདྷཱུཔཱཡིཏོ སདཱ.

༤༤༩.

‘‘མཙྩུནཱབྦྷཧཏོ ལོཀོ, པརིཀྑིཏྟོ ཛརཱཡ ཙ;

ཧཉྙཏི ནིཙྩམཏྟཱཎོ, པཏྟདཎྜོཝ ཏཀྐརོ.

༤༥༠.

‘‘ཨཱགཙྪནྟགྒིཁནྡྷཱཝ, མཙྩུ བྱཱདྷི ཛརཱ ཏཡོ;

པཙྩུགྒནྟུཾ བལཾ ནཏྠི, ཛཝོ ནཏྠི པལཱཡིཏུཾ.

༤༥༡.

‘‘ཨམོགྷཾ དིཝསཾ ཀཡིརཱ, ཨཔྤེན བཧུཀེན ཝཱ;

ཡཾ ཡཾ ཝིཛཧཏེ [ཝིརཧཏེ (སཱི. པཱི.), ཝིཝཧཏེ (སྱཱ.)] རཏྟིཾ, ཏདཱུནཾ ཏསྶ ཛཱིཝིཏཾ.

༤༥༢.

‘‘ཙརཏོ ཏིཊྛཏོ ཝཱཔི, ཨཱསཱིནསཡནསྶ ཝཱ;

ཨུཔེཏི ཙརིམཱ རཏྟི, ན ཏེ ཀཱལོ པམཛྫིཏུ’’ནྟི.

… སིརིམཎྜོ [སིརིམནྡོ (སཱི.)] ཐེརོ….

༡༤. སབྦཀཱམིཏྠེརགཱཐཱ

༤༥༣.

‘‘དྭིཔཱདཀོཡཾ ཨསུཙི, དུགྒནྡྷོ པརིཧཱིརཏི [པརིཧརཏི (ཀ.)];

ནཱནཱཀུཎཔཔརིཔཱུརོ, ཝིསྶཝནྟོ ཏཏོ ཏཏོ.

༤༥༤.

‘‘མིགཾ ¶ ནིལཱིནཾ ཀཱུཊེན, བལི༹སེནེཝ ཨམྦུཛཾ;

ཝཱནརཾ ཝིཡ ལེཔེན, བཱདྷཡནྟི པུཐུཛྫནཾ.

༤༥༥.

‘‘རཱུཔཱ ¶ སདྡཱ རསཱ གནྡྷཱ, ཕོཊྛབྦཱ ཙ མནོརམཱ;

པཉྩ ཀཱམགུཎཱ ཨེཏེ, ཨིཏྠིརཱུཔསྨི དིསྶརེ.

༤༥༦.

‘‘ཡེ ¶ ཨེཏཱ ཨུཔསེཝནྟི, རཏྟཙིཏྟཱ པུཐུཛྫནཱ;

ཝཌྜྷེནྟི ཀཊསིཾ གྷོརཾ, ཨཱཙིནནྟི པུནབྦྷཝཾ.

༤༥༧.

‘‘ཡོ ཙེཏཱ པརིཝཛྫེཏི, སཔྤསྶེཝ པདཱ སིརོ;

སོམཾ ཝིསཏྟིཀཾ ལོཀེ, སཏོ སམཏིཝཏྟཏི.

༤༥༨.

‘‘ཀཱམེསྭཱདཱིནཝཾ ¶ དིསྭཱ, ནེཀྑམྨཾ དཊྛུ ཁེམཏོ;

ནིསྶཊོ སབྦཀཱམེཧི, པཏྟོ མེ ཨཱསཝཀྑཡོ’’ཏི.

… སབྦཀཱམིཏྠེརོ….

ཚཀྐནིཔཱཏོ ནིཊྛིཏོ.

ཏཏྲུདྡཱནཾ –

ཨུརུཝེལ༹ཀསྶཔོ ཙ, ཐེརོ ཏེཀིཙྪཀཱརི ཙ;

མཧཱནཱགོ ཙ ཀུལློ ཙ, མཱལུཀྱོ [མཱལུཏོ (སཱི. ཀ.), མཱལུངྐྱོ (སྱཱ.)] སཔྤདཱསཀོ.

ཀཱཏིཡཱནོ མིགཛཱལོ, ཛེནྟོ སུམནསཝ྄ཧཡོ;

ནྷཱཏམུནི བྲཧྨདཏྟོ, སིརིམཎྜོ སབྦཀཱམཱི ཙ;

གཱཐཱཡོ ཙཏུརཱསཱིཏི, ཐེརཱ ཙེཏྠ ཙཏུདྡསཱཏི.

༧. སཏྟཀནིཔཱཏོ

༡. སུནྡརསམུདྡཏྠེརགཱཐཱ

༤༥༩.

‘‘ཨལངྐཏཱ ¶ ¶ ¶ ¶ སུཝསནཱ, མཱལདྷཱརཱི [མཱལཱབྷཱརཱི (སཱི.), མཱལབྷཱརཱི (སྱཱ.)] ཝིབྷཱུསིཏཱ;

ཨལཏྟཀཀཏཱཔཱདཱ, པཱདུཀཱརུཡ྄ཧ ཝེསིཀཱ.

༤༦༠.

‘‘པཱདུཀཱ ཨོརུཧིཏྭཱན, པུརཏོ པཉྫལཱིཀཏཱ;

སཱ མཾ སཎྷེན མུདུནཱ, མྷིཏཔུབྦཾ [མིཧིཏཔུབྦཾ (སཱི.)] ཨབྷཱསཐ’’.

༤༦༡.

‘‘ཡུཝཱསི ཏྭཾ པབྦཛིཏོ, ཏིཊྛཱཧི མམ སཱསནེ;

བྷུཉྫ མཱནུསཀེ ཀཱམེ, ཨཧཾ ཝིཏྟཾ དདཱམི ཏེ;

སཙྩཾ ཏེ པཊིཛཱནཱམི, ཨགྒིཾ ཝཱ ཏེ ཧརཱམཧཾ.

༤༦༢.

‘‘ཡདཱ ཛིཎྞཱ བྷཝིསྶཱམ, ཨུབྷོ དཎྜཔརཱཡནཱ;

ཨུབྷོཔི པབྦཛིསྶཱམ, ཨུབྷཡཏྠ ཀཊགྒཧོ’’.

༤༦༣.

‘‘ཏཉྩ དིསྭཱན ཡཱཙནྟིཾ, ཝེསིཀཾ པཉྫལཱིཀཏཾ;

ཨལངྐཏཾ སུཝསནཾ, མཙྩུཔཱསཾཝ ཨོཌྜིཏཾ.

༤༦༤.

‘‘ཏཏོ མེ མནསཱིཀཱརོ…པེ… ནིབྦིདཱ སམཏིཊྛཐ.

༤༦༥.

‘‘ཏཏོ ཙིཏྟཾ ཝིམུཙྩི མེ…པེ… ཀཏཾ བུདྡྷསྶ སཱསན’’ནྟི.

… སུནྡརསམུདྡོ ཐེརོ….

༢. ལཀུཎྜཀབྷདྡིཡཏྠེརགཱཐཱ

༤༦༦.

པརེ ཨམྦཱཊཀཱརཱམེ, ཝནསཎྜམྷི བྷདྡིཡོ;

སམཱུལཾ ཏཎྷམབྦུཡ྄ཧ, ཏཏྠ བྷདྡོཝ ཛྷཱཡཏི [བྷདྡོ’དྷིཛྷཱཡཱཡཏི (སཱི.), བྷདྡོ ཛྷིཡཱཡཏི (སྱཱ. སཱི. ཨཊྛ.)].

༤༦༧.

‘‘རམནྟེཀེ མུདིངྒེཧི [མུཏིངྒེཧི (སཱི. ཨཊྛ.)], ཝཱིཎཱཧི པཎཝེཧི ཙ;

ཨཧཉྩ ¶ རུཀྑམཱུལསྨིཾ, རཏོ བུདྡྷསྶ སཱསནེ.

༤༦༨.

‘‘བུདྡྷོ ཙེ [བུདྡྷོ ཙ (སབྦཏྠ)] མེ ཝརཾ དཛྫཱ, སོ ཙ ལབྦྷེཐ མེ ཝརོ;

གཎྷེཧཾ སབྦལོཀསྶ, ནིཙྩཾ ཀཱཡགཏཾ སཏིཾ.

༤༦༩.

‘‘ཡེ ¶ མཾ རཱུཔེན པཱམིཾསུ, ཡེ ཙ གྷོསེན ཨནྭགཱུ;

ཚནྡརཱགཝསཱུཔེཏཱ, ན མཾ ཛཱནནྟི ཏེ ཛནཱ.

༤༧༠.

‘‘ཨཛ྄ཛྷཏྟཉྩ ¶ ན ཛཱནཱཏི, བཧིདྡྷཱ ཙ ན པསྶཏི;

སམནྟཱཝརཎོ བཱལོ, ས ཝེ གྷོསེན ཝུཡ྄ཧཏི.

༤༧༡.

‘‘ཨཛ྄ཛྷཏྟཉྩ ན ཛཱནཱཏི, བཧིདྡྷཱ ཙ ཝིཔསྶཏི;

བཧིདྡྷཱ ཕལདསྶཱཝཱི, སོཔི གྷོསེན ཝུཡ྄ཧཏི.

༤༧༢.

‘‘ཨཛ྄ཛྷཏྟཉྩ པཛཱནཱཏི, བཧིདྡྷཱ ཙ ཝིཔསྶཏི;

ཨནཱཝརཎདསྶཱཝཱི, ན སོ གྷོསེན ཝུཡ྄ཧཏཱི’’ཏི.

… ལཀུཎྜཀབྷདྡིཡོ ཐེརོ….

༣. བྷདྡཏྠེརགཱཐཱ

༤༧༣.

‘‘ཨེཀཔུཏྟོ ¶ ཨཧཾ ཨཱསིཾ, པིཡོ མཱཏུ པིཡོ པིཏུ;

བཧཱུཧི ཝཏཙརིཡཱཧི, ལདྡྷོ ཨཱཡཱཙནཱཧི ཙ.

༤༧༤.

‘‘ཏེ ཙ མཾ ཨནུཀམྤཱཡ, ཨཏྠཀཱམཱ ཧིཏེསིནོ;

ཨུབྷོ པིཏཱ ཙ མཱཏཱ ཙ, བུདྡྷསྶ ཨུཔནཱམཡུཾ’’.

༤༧༥.

‘‘ཀིཙྪཱ ལདྡྷོ ཨཡཾ པུཏྟོ, སུཁུམཱལོ སུཁེདྷིཏོ;

ཨིམཾ དདཱམ ཏེ ནཱཐ, ཛིནསྶ པརིཙཱརཀཾ’’.

༤༧༦.

‘‘སཏྠཱ ཙ མཾ པཊིགྒཡ྄ཧ, ཨཱནནྡཾ ཨེཏདབྲཝི;

‘པབྦཱཛེཧི ཨིམཾ ཁིཔྤཾ, ཧེསྶཏྱཱཛཱནིཡོ ཨཡཾ.

༤༧༧.

‘‘པབྦཱཛེཏྭཱན ¶ མཾ སཏྠཱ, ཝིཧཱརཾ པཱཝིསཱི ཛིནོ;

ཨནོགྒཏསྨིཾ སཱུརིཡསྨིཾ, ཏཏོ ཙིཏྟཾ ཝིམུཙྩི མེ.

༤༧༨.

‘‘ཏཏོ སཏྠཱ ནིརཱཀཏྭཱ, པཊིསལླཱནཝུཊྛིཏོ;

‘ཨེཧི བྷདྡཱ’ཏི མཾ ཨཱཧ, སཱ མེ ཨཱསཱུཔསམྤདཱ.

༤༧༩.

‘‘ཛཱཏིཡཱ སཏྟཝསྶེན, ལདྡྷཱ མེ ཨུཔསམྤདཱ;

ཏིསྶོ ཝིཛྫཱ ཨནུཔྤཏྟཱ, ཨཧོ དྷམྨསུདྷམྨཏཱ’’ཏི.

… བྷདྡོ ཐེརོ….

༤. སོཔཱཀཏྠེརགཱཐཱ

༤༨༠.

‘‘དིསྭཱ ¶ པཱསཱདཚཱཡཱཡཾ, ཙངྐམནྟཾ ནརུཏྟམཾ;

ཏཏྠ ནཾ ཨུཔསངྐམྨ, ཝནྡིསྶཾ [ཝནྡིསཾ (སཱི. པཱི.)] པུརིསུཏྟམཾ.

༤༨༡.

‘‘ཨེཀཾསཾ ¶ ཙཱིཝརཾ ཀཏྭཱ, སཾཧརིཏྭཱན པཱཎཡོ;

ཨནུཙངྐམིསྶཾ ཝིརཛཾ, སབྦསཏྟཱནམུཏྟམཾ.

༤༨༢.

‘‘ཏཏོ པཉྷེ ཨཔུཙྪི མཾ, པཉྷཱནཾ ཀོཝིདོ ཝིདཱུ;

ཨཙྪམྦྷཱི ཙ ཨབྷཱིཏོ ཙ, བྱཱཀཱསིཾ སཏྠུནོ ཨཧཾ.

༤༨༣.

‘‘ཝིསྶཛྫིཏེསུ པཉྷེསུ, ཨནུམོདི ཏཐཱགཏོ;

བྷིཀྑུསངྒྷཾ ཝིལོཀེཏྭཱ, ཨིམམཏྠཾ ཨབྷཱསཐ’’.

༤༨༤.

‘‘ལཱབྷཱ ཨངྒཱནཾ མགདྷཱནཾ, ཡེསཱཡཾ པརིབྷུཉྫཏི;

ཙཱིཝརཾ པིཎྜཔཱཏཉྩ, པཙྩཡཾ སཡནཱསནཾ;

པཙྩུཊྛཱནཉྩ སཱམཱིཙིཾ, ཏེསཾ ལཱབྷཱ’’ཏི ཙཱབྲཝི.

༤༨༥.

‘‘ཨཛྫཏགྒེ མཾ སོཔཱཀ, དསྶནཱཡོཔསངྐམ;

ཨེསཱ ¶ ཙེཝ ཏེ སོཔཱཀ, བྷཝཏུ ཨུཔསམྤདཱ’’.

༤༨༦.

‘‘ཛཱཏིཡཱ སཏྟཝསྶོཧཾ, ལདྡྷཱན ཨུཔསམྤདཾ;

དྷཱརེམི ཨནྟིམཾ དེཧཾ, ཨཧོ དྷམྨསུདྷམྨཏཱ’’ཏི.

… སོཔཱཀོ ཐེརོ….

༥. སརབྷངྒཏྠེརགཱཐཱ

༤༨༧.

‘‘སརེ ཧཏྠེཧི བྷཉྫིཏྭཱ, ཀཏྭཱན ཀུཊིམཙྪིསཾ;

ཏེན མེ སརབྷངྒོཏི, ནཱམཾ སམྨུཏིཡཱ ཨཧུ.

༤༨༨.

‘‘ན ¶ མཡ྄ཧཾ ཀཔྤཏེ ཨཛྫ, སརེ ཧཏྠེཧི བྷཉྫིཏུཾ;

སིཀྑཱཔདཱ ནོ པཉྙཏྟཱ, གོཏམེན ཡསསྶིནཱ.

༤༨༩.

‘‘སཀལཾ སམཏྟཾ རོགཾ, སརབྷངྒོ ནཱདྡསཾ པུབྦེ;

སོཡཾ རོགོ དིཊྛོ, ཝཙནཀརེནཱཏིདེཝསྶ.

༤༩༠.

‘‘ཡེནེཝ མགྒེན གཏོ ཝིཔསྶཱི, ཡེནེཝ མགྒེན སིཁཱི ཙ ཝེསྶབྷཱུ;

ཀཀུསནྡྷཀོཎཱགམནོ ཙ ཀསྶཔོ, ཏེནཉྫསེན ཨགམཱསི གོཏམོ.

༤༩༡.

‘‘ཝཱིཏཏཎྷཱ ¶ ཨནཱདཱནཱ, སཏྟ བུདྡྷཱ ཁཡོགདྷཱ;

ཡེཧཱཡཾ དེསིཏོ དྷམྨོ, དྷམྨབྷཱུཏེཧི ཏཱདིབྷི.

༤༩༢.

‘‘ཙཏྟཱརི ཨརིཡསཙྩཱནི, ཨནུཀམྤཱཡ པཱཎིནཾ;

དུཀྑཾ སམུདཡོ མགྒོ, ནིརོདྷོ དུཀྑསངྑཡོ.

༤༩༣.

‘‘ཡསྨིཾ ¶ ནིཝཏྟཏེ [ཡསྨིཾ ན ནིབྦཏྟཏེ (ཀ.)] དུཀྑཾ, སཾསཱརསྨིཾ ཨནནྟཀཾ;

བྷེདཱ ¶ ཨིམསྶ ཀཱཡསྶ, ཛཱིཝིཏསྶ ཙ སངྑཡཱ;

ཨཉྙོ པུནབྦྷཝོ ནཏྠི, སུཝིམུཏྟོམྷི སབྦདྷཱི’’ཏི.

… སརབྷངྒོ ཐེརོ….

སཏྟཀནིཔཱཏོ ནིཊྛིཏོ.

ཏཏྲུདྡཱནཾ –

སུནྡརསམུདྡོ ཐེརོ, ཐེརོ ལཀུཎྜབྷདྡིཡོ;

བྷདྡོ ཐེརོ ཙ སོཔཱཀོ, སརབྷངྒོ མཧཱཨིསི;

སཏྟཀེ པཉྩཀཱ ཐེརཱ, གཱཐཱཡོ པཉྩཏིཾསཏཱིཏི.

༨. ཨཊྛཀནིཔཱཏོ

༡. མཧཱཀཙྩཱཡནཏྠེརགཱཐཱ

༤༩༤.

‘‘ཀམྨཾ ¶ ¶ ¶ བཧུཀཾ ན ཀཱརཡེ, པརིཝཛྫེཡྻ ཛནཾ ན ཨུཡྻམེ;

སོ ཨུསྶུཀྐོ རསཱནུགིདྡྷོ, ཨཏྠཾ རིཉྩཏི ཡོ སུཁཱདྷིཝཱཧོ.

༤༩༥.

‘‘པངྐོཏི ཧི ནཾ ཨཝེདཡུཾ, ཡཱཡཾ ཝནྡནཔཱུཛནཱ ཀུལེསུ;

སུཁུམཾ སལླཾ དུརུབྦཧཾ, སཀྐཱརོ ཀཱཔུརིསེན དུཛྫཧོ.

༤༩༦.

‘‘ན པརསྶུཔནིདྷཱཡ, ཀམྨཾ མཙྩསྶ པཱཔཀཾ;

ཨཏྟནཱ ཏཾ ན སེཝེཡྻ, ཀམྨབནྡྷཱུཧི མཱཏིཡཱ.

༤༩༧.

‘‘ན པརེ ཝཙནཱ ཙོརོ, ན པརེ ཝཙནཱ མུནི;

ཨཏྟཱ ཙ ནཾ ཡཐཱཝེདི [ཡཐཱ ཝེཏྟི (སཱི.)], དེཝཱཔི ནཾ ཏཐཱ ཝིདཱུ.

༤༩༨.

‘‘པརེ ཙ ན ཝིཛཱནནྟི, མཡམེཏྠ ཡམཱམསེ;

ཡེ ¶ ཙ ཏཏྠ ཝིཛཱནནྟི, ཏཏོ སམྨནྟི མེདྷགཱ.

༤༩༩.

‘‘ཛཱིཝཏེ ཝཱཔི སཔྤཉྙོ, ཨཔི ཝིཏྟཔརིཀྑཡོ;

པཉྙཱཡ ཙ ཨལཱབྷེན [ཨབྷཱཝེན (སཱི. ཨཊྛ.)], ཝིཏྟཝཱཔི ན ཛཱིཝཏི.

༥༠༠.

‘‘སབྦཾ སུཎཱཏི སོཏེན, སབྦཾ པསྶཏི ཙཀྑུནཱ;

ན ཙ དིཊྛཾ སུཏཾ དྷཱིརོ, སབྦཾ ཨུཛ྄ཛྷིཏུམརཧཏི.

༥༠༡.

‘‘ཙཀྑུམཱསྶ ཡཐཱ ཨནྡྷོ, སོཏཝཱ བདྷིརོ ཡཐཱ;

པཉྙཝཱསྶ ཡཐཱ མཱུགོ, བལཝཱ དུབྦལོརིཝ;

ཨཐ ཨཏྠེ སམུཔྤནྣེ, སཡེཐ [པསྶེཐ (ཀ.)] མཏསཱཡིཀ’’ནྟི.

… མཧཱཀཙྩཱཡནོ ཐེརོ….

༢. སིརིམིཏྟཏྠེརགཱཐཱ

༥༠༢.

‘‘ཨཀྐོདྷནོནུཔནཱཧཱི, ཨམཱཡོ རིཏྟཔེསུཎོ;

ས ཝེ ཏཱདིསཀོ བྷིཀྑུ, ཨེཝཾ པེཙྩ ན སོཙཏི.

༥༠༣.

‘‘ཨཀྐོདྷནོནུཔནཱཧཱི, ཨམཱཡོ རིཏྟཔེསུཎོ;

གུཏྟདྭཱརོ སདཱ བྷིཀྑུ, ཨེཝཾ པེཙྩ ན སོཙཏི.

༥༠༤.

‘‘ཨཀྐོདྷནོནུཔནཱཧཱི ¶ ¶ , ཨམཱཡོ རིཏྟཔེསུཎོ;

ཀལྱཱཎསཱིལོ སོ [ཡོ (སྱཱ.)] བྷིཀྑུ, ཨེཝཾ པེཙྩ ན སོཙཏི.

༥༠༥.

‘‘ཨཀྐོདྷནོནུཔནཱཧཱི, ཨམཱཡོ རིཏྟཔེསུཎོ;

ཀལྱཱཎམིཏྟོ སོ བྷིཀྑུ, ཨེཝཾ པེཙྩ ན སོཙཏི.

༥༠༦.

‘‘ཨཀྐོདྷནོནུཔནཱཧཱི ¶ , ཨམཱཡོ རིཏྟཔེསུཎོ;

ཀལྱཱཎཔཉྙོ སོ བྷིཀྑུ, ཨེཝཾ པེཙྩ ན སོཙཏི.

༥༠༧.

‘‘ཡསྶ སདྡྷཱ ཏཐཱགཏེ, ཨཙལཱ སུཔྤཏིཊྛིཏཱ;

སཱིལཉྩ ¶ ཡསྶ ཀལྱཱཎཾ, ཨརིཡཀནྟཾ པསཾསིཏཾ.

༥༠༨.

‘‘སངྒྷེ པསཱདོ ཡསྶཏྠི, ཨུཛུབྷཱུཏཉྩ དསྶནཾ;

‘ཨདལིདྡོ’ཏི ཏཾ ཨཱཧུ, ཨམོགྷཾ ཏསྶ ཛཱིཝིཏཾ.

༥༠༩.

‘‘ཏསྨཱ སདྡྷཉྩ སཱིལཉྩ, པསཱདཾ དྷམྨདསྶནཾ;

ཨནུཡུཉྫེཐ མེདྷཱཝཱི, སརཾ བུདྡྷཱན སཱསན’’ནྟི.

… སིརིམིཏྟོ ཐེརོ….

༣. མཧཱཔནྠཀཏྠེརགཱཐཱ

༥༡༠.

‘‘ཡདཱ པཋམམདྡཀྑིཾ, སཏྠཱརམཀུཏོབྷཡཾ;

ཏཏོ མེ ཨཧུ སཾཝེགོ, པསྶིཏྭཱ པུརིསུཏྟམཾ.

༥༡༡.

‘‘སིརིཾ ཧཏྠེཧི པཱདེཧི, ཡོ པཎཱམེཡྻ ཨཱགཏཾ;

ཨེཏཱདིསཾ སོ སཏྠཱརཾ, ཨཱརཱདྷེཏྭཱ ཝིརཱདྷཡེ.

༥༡༢.

‘‘ཏདཱཧཾ པུཏྟདཱརཉྩ, དྷནདྷཉྙཉྩ ཚཌྜཡིཾ;

ཀེསམསྶཱུནི ཚེདེཏྭཱ, པབྦཛིཾ ཨནགཱརིཡཾ.

༥༡༣.

‘‘སིཀྑཱསཱཛཱིཝསམྤནྣོ, ཨིནྡྲིཡེསུ སུསཾཝུཏོ;

ནམསྶམཱནོ སམྦུདྡྷཾ, ཝིཧཱསིཾ ཨཔརཱཛིཏོ.

༥༡༤.

‘‘ཏཏོ མེ པཎིདྷཱི ཨཱསི, ཙེཏསོ ཨབྷིཔཏྠིཏོ;

ན ནིསཱིདེ མུཧུཏྟམྤི, ཏཎྷཱསལླེ ཨནཱུཧཏེ.

༥༡༥.

‘‘ཏསྶ མེཝཾ ཝིཧརཏོ, པསྶ ཝཱིརིཡཔརཀྐམཾ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ.

༥༡༦.

‘‘པུབྦེནིཝཱསཾ ¶ ཛཱནཱམི, དིབྦཙཀྑུ ཝིསོདྷིཏཾ;

ཨརཧཱ དཀྑིཎེཡྻོམྷི, ཝིཔྤམུཏྟོ ནིརཱུཔདྷི.

༥༡༧.

‘‘ཏཏོ ¶ ¶ རཏྱཱ ཝིཝསཱནེ [ཝིཝསནེ (སཱི. སྱཱ.)], སཱུརིཡསྶུགྒམནཾ པཏི;

སབྦཾ ཏཎྷཾ ཝིསོསེཏྭཱ, པལླངྐེན ཨུཔཱཝིསི’’ནྟི.

… མཧཱཔནྠཀོ ཐེརོ….

ཨཊྛཀནིཔཱཏོ ནིཊྛིཏོ.

ཏཏྲུདྡཱནཾ –

མཧཱཀཙྩཱཡནོ ཐེརོ, སིརིམིཏྟོ མཧཱཔནྠཀོ;

ཨེཏེ ཨཊྛནིཔཱཏམྷི, གཱཐཱཡོ ཙཏུཝཱིསཏཱིཏི.

༩. ནཝཀནིཔཱཏོ

༡. བྷཱུཏཏྠེརགཱཐཱ

༥༡༨.

‘‘ཡདཱ ¶ ¶ ¶ དུཀྑཾ ཛརཱམརཎནྟི པཎྜིཏོ, ཨཝིདྡསཱུ ཡཏྠ སིཏཱ པུཐུཛྫནཱ;

དུཀྑཾ པརིཉྙཱཡ སཏོཝ ཛྷཱཡཏི, ཏཏོ རཏིཾ པརམཏརཾ ན ཝིནྡཏི.

༥༡༩.

‘‘ཡདཱ དུཀྑསྶཱཝཧནིཾ ཝིསཏྟིཀཾ, པཔཉྩསངྒྷཱཏདུཁཱདྷིཝཱཧིནིཾ;

ཏཎྷཾ པཧནྟྭཱན སཏོཝ ཛྷཱཡཏི, ཏཏོ རཏིཾ པརམཏརཾ ན ཝིནྡཏི.

༥༢༠.

‘‘ཡདཱ སིཝཾ དྭེཙཏུརངྒགཱམིནཾ, མགྒུཏྟམཾ ¶ སབྦཀིལེསསོདྷནཾ;

པཉྙཱཡ པསྶིཏྭ སཏོཝ ཛྷཱཡཏི, ཏཏོ རཏིཾ པརམཏརཾ ན ཝིནྡཏི.

༥༢༡.

‘‘ཡདཱ ཨསོཀཾ ཝིརཛཾ ཨསངྑཏཾ, སནྟཾ པདཾ སབྦཀིལེསསོདྷནཾ;

བྷཱཝེཏི སཉྙོཛནབནྡྷནཙྪིདཾ, ཏཏོ རཏིཾ པརམཏརཾ ན ཝིནྡཏི.

༥༢༢.

‘‘ཡདཱ ནབྷེ གཛྫཏི མེགྷདུནྡུབྷི, དྷཱརཱཀུལཱ ཝིཧགཔཐེ སམནྟཏོ;

བྷིཀྑཱུ ཙ པབྦྷཱརགཏོཝ ཛྷཱཡཏི, ཏཏོ རཏིཾ པརམཏརཾ ན ཝིནྡཏི.

༥༢༣.

‘‘ཡདཱ ནདཱིནཾ ཀུསུམཱཀུལཱནཾ, ཝིཙིཏྟ-ཝཱནེཡྻ-ཝཊཾསཀཱནཾ;

ཏཱིརེ ནིསིནྣོ སུམནོཝ ཛྷཱཡཏི, ཏཏོ རཏིཾ པརམཏརཾ ན ཝིནྡཏི.

༥༢༤.

‘‘ཡདཱ ¶ ནིསཱིཐེ རཧིཏམྷི ཀཱནནེ, དེཝེ གལ༹ནྟམྷི ནདནྟི དཱཋིནོ;

བྷིཀྑཱུ ཙ པབྦྷཱརགཏོཝ ཛྷཱཡཏི, ཏཏོ རཏིཾ པརམཏརཾ ན ཝིནྡཏི.

༥༢༥.

‘‘ཡདཱ ¶ ཝིཏཀྐེ ཨུཔརུནྡྷིཡཏྟནོ, ནགནྟརེ ནགཝིཝརཾ སམསྶིཏོ;

ཝཱིཏདྡརོ ཝཱིཏཁིལོཝ ཛྷཱཡཏི, ཏཏོ རཏིཾ པརམཏརཾ ན ཝིནྡཏི.

༥༢༦.

‘‘ཡདཱ ¶ སུཁཱི མལཁིལསོཀནཱསནོ, ནིརགྒལོ༹ ནིབྦནཐོ ཝིསལློ;

སབྦཱསཝེ བྱནྟིཀཏོཝ ཛྷཱཡཏི, ཏཏོ རཏིཾ པརམཏརཾ ན ཝིནྡཏཱི’’ཏི.

… བྷཱུཏོ ཐེརོ….

ནཝཀནིཔཱཏོ ནིཊྛིཏོ.

ཏཏྲུདྡཱནཾ –

བྷཱུཏོ ཏཐདྡསོ ཐེརོ, ཨེཀོ ཁགྒཝིསཱཎཝཱ;

ནཝཀམྷི ནིཔཱཏམྷི, གཱཐཱཡོཔི ཨིམཱ ནཝཱཏི.

༡༠. དསཀནིཔཱཏོ

༡. ཀཱལུ༹དཱཡིཏྠེརགཱཐཱ

༥༢༧.

‘‘ཨངྒཱརིནོ ¶ ¶ ¶ དཱནི དུམཱ བྷདནྟེ, ཕལེསིནོ ཚདནཾ ཝིཔྤཧཱཡ;

ཏེ ཨཙྩིམནྟོཝ པབྷཱསཡནྟི, སམཡོ མཧཱཝཱིར བྷཱགཱི རསཱནཾ.

༥༢༨.

‘‘དུམཱནི ¶ ཕུལླཱནི མནོརམཱནི, སམནྟཏོ སབྦདིསཱ པཝནྟི;

པཏྟཾ པཧཱཡ ཕལམཱསསཱནཱ [ཕལམཱསམཱནོ (ཀ.)], ཀཱལོ ཨིཏོ པཀྐམནཱཡ ཝཱིར.

༥༢༩.

‘‘ནེཝཱཏིསཱིཏཾ ན པནཱཏིཨུཎྷཾ, སུཁཱ ཨུཏུ ཨདྡྷནིཡཱ བྷདནྟེ;

པསྶནྟུ ཏཾ སཱཀིཡཱ ཀོལི༹ཡཱ ཙ, པཙྪཱམུཁཾ རོཧིནིཡཾ ཏརནྟཾ.

༥༣༠.

‘‘ཨཱསཱཡ ཀསཏེ ཁེཏྟཾ, བཱིཛཾ ཨཱསཱཡ ཝཔྤཏི;

ཨཱསཱཡ ཝཱཎིཛཱ ཡནྟི, སམུདྡཾ དྷནཧཱརཀཱ;

ཡཱཡ ཨཱསཱཡ ཏིཊྛཱམི, སཱ མེ ཨཱསཱ སམིཛ྄ཛྷཏུ.

༥༣༡.

[སཾ. ནི. ༡.༡༩༨] ‘‘པུནཔྤུནཾ ཙེཝ ཝཔནྟི བཱིཛཾ, པུནཔྤུནཾ ཝསྶཏི དེཝརཱཛཱ;

པུནཔྤུནཾ ཁེཏྟཾ ཀསནྟི ཀསྶཀཱ, པུནཔྤུནཾ དྷཉྙམུཔེཏི རཊྛཾ.

༥༣༢.

[སཾ. ནི. ༡.༡༩༨] ‘‘པུནཔྤུནཾ ཡཱཙནཀཱ ཙརནྟི, པུནཔྤུནཾ དཱནཔཏཱི དདནྟི;

པུནཔྤུནཾ དཱནཔཏཱི དདིཏྭཱ, པུནཔྤུནཾ སགྒམུཔེནྟི ཋཱནཾ.

༥༣༣.

‘‘ཝཱིརོ ¶ ¶ ཧཝེ སཏྟཡུགཾ པུནེཏི, ཡསྨིཾ ཀུལེ ཛཱཡཏི བྷཱུརིཔཉྙོ;

མཉྙཱམཧཾ སཀྐཏི དེཝདེཝོ, ཏཡཱ ཧི ཛཱཏོ [ཏཡཱབྷིཛཱཏོ (སཱི.)] མུནི སཙྩནཱམོ.

༥༣༤.

‘‘སུདྡྷོདནོ ¶ ནཱམ པིཏཱ མཧེསིནོ, བུདྡྷསྶ མཱཏཱ པན མཱཡནཱམཱ;

ཡཱ བོདྷིསཏྟཾ པརིཧརིཡ ཀུཙྪིནཱ, ཀཱཡསྶ བྷེདཱ ཏིདིཝམྷི མོདཏི.

༥༣༥.

‘‘སཱ གོཏམཱི ཀཱལཀཏཱ ཨིཏོ ཙུཏཱ, དིབྦེཧི ཀཱམེཧི སམངྒིབྷཱུཏཱ;

སཱ མོདཏི ཀཱམགུཎེཧི པཉྩཧི, པརིཝཱརིཏཱ དེཝགཎེཧི ཏེཧི.

༥༣༦.

‘‘བུདྡྷསྶ པུཏྟོམྷི ཨསཡ྄ཧསཱཧིནོ, ཨངྒཱིརསསྶཔྤཊིམསྶ ཏཱདིནོ;

པིཏུཔིཏཱ མཡ྄ཧཾ ཏུཝཾསི སཀྐ, དྷམྨེན མེ གོཏམ ཨཡྻཀོསཱི’’ཏི.

… ཀཱལུ༹དཱཡཱི ཐེརོ….

༢. ཨེཀཝིཧཱརིཡཏྠེརགཱཐཱ

༥༣༧.

‘‘པུརཏོ ¶ པཙྪཏོ ཝཱཔི, ཨཔརོ ཙེ ན ཝིཛྫཏི;

ཨཏཱིཝ ཕཱསུ བྷཝཏི, ཨེཀསྶ ཝསཏོ ཝནེ.

༥༣༨.

‘‘ཧནྡ ¶ ཨེཀོ གམིསྶཱམི, ཨརཉྙཾ བུདྡྷཝཎྞིཏཾ;

ཕཱསུ [ཕཱསུཾ (སྱཱ. པཱི.)] ཨེཀཝིཧཱརིསྶ, པཧིཏཏྟསྶ བྷིཀྑུནོ.

༥༣༩.

‘‘ཡོགཱི-པཱིཏིཀརཾ རམྨཾ, མཏྟཀུཉྫརསེཝིཏཾ;

ཨེཀོ ཨཏྟཝསཱི ཁིཔྤཾ, པཝིསིསྶཱམི ཀཱནནཾ.

༥༤༠.

‘‘སུཔུཔྥིཏེ སཱིཏཝནེ, སཱིཏལེ གིརིཀནྡརེ;

གཏྟཱནི པརིསིཉྩིཏྭཱ, ཙངྐམིསྶཱམི ཨེཀཀོ.

༥༤༡.

‘‘ཨེཀཱཀིཡོ ཨདུཏིཡོ, རམཎཱིཡེ མཧཱཝནེ;

ཀདཱཧཾ ཝིཧརིསྶཱམི, ཀཏཀིཙྩོ ཨནཱསཝོ.

༥༤༢.

‘‘ཨེཝཾ མེ ཀཏྟུཀཱམསྶ, ཨདྷིཔྤཱཡོ སམིཛ྄ཛྷཏུ;

སཱདྷིཡིསྶཱམཧཾཡེཝ, ནཱཉྙོ ཨཉྙསྶ ཀཱརཀོ.

༥༤༣.

‘‘ཨེས ¶ བནྡྷཱམི སནྣཱཧཾ, པཝིསིསྶཱམི ཀཱནནཾ;

ན ཏཏོ ནིཀྑམིསྶཱམི, ཨཔྤཏྟོ ཨཱསཝཀྑཡཾ.

༥༤༤.

‘‘མཱལུཏེ ཨུཔཝཱཡནྟེ, སཱིཏེ སུརབྷིགནྡྷིཀེ [གནྡྷཀེ (སྱཱ. པཱི. ཀ.)];

ཨཝིཛྫཾ དཱལཡིསྶཱམི, ནིསིནྣོ ནགམུདྡྷནི.

༥༤༥.

‘‘ཝནེ ཀུསུམསཉྪནྣེ, པབྦྷཱརེ ནཱུན སཱིཏལེ;

ཝིམུཏྟིསུཁེན སུཁིཏོ, རམིསྶཱམི གིརིབྦཛེ.

༥༤༦.

‘‘སོཧཾ ¶ པརིཔུཎྞསངྐཔྤོ, ཙནྡོ པནྣརསོ ཡཐཱ;

སབྦཱསཝཔརིཀྑཱིཎོ, ནཏྠི དཱནི པུནབྦྷཝོ’’ཏི.

… ཨེཀཝིཧཱརིཡོ ཐེརོ….

༣. མཧཱཀཔྤིནཏྠེརགཱཐཱ

༥༤༧.

‘‘ཨནཱགཏཾ ¶ ཡོ པཊིཀཙྩ [པཊིགཙྩ (སཱི.)] པསྶཏི, ཧིཏཉྩ ཨཏྠཾ ཨཧིཏཉྩ ཏཾ དྭཡཾ;

ཝིདྡེསིནོ ཏསྶ ཧིཏེསིནོ ཝཱ, རནྡྷཾ ན པསྶནྟི སམེཀྑམཱནཱ.

༥༤༨.

[པཊི. མ. ༡.༡༦༠ པཊིསམྦྷིདཱམགྒེ] ‘‘ཨཱནཱཔཱནསཏཱི ཡསྶ, པརིཔུཎྞཱ སུབྷཱཝིཏཱ;

ཨནུཔུབྦཾ པརིཙིཏཱ, ཡཐཱ བུདྡྷེན དེསིཏཱ;

སོམཾ ལོཀཾ པབྷཱསེཏི, ཨབྦྷཱ མུཏྟོཝ ཙནྡིམཱ.

༥༤༩.

‘‘ཨོདཱཏཾ ¶ ཝཏ མེ ཙིཏྟཾ, ཨཔྤམཱཎཾ སུབྷཱཝིཏཾ;

ནིབྦིདྡྷཾ པགྒཧཱིཏཉྩ, སབྦཱ ཨོབྷཱསཏེ དིསཱ.

༥༥༠.

‘‘ཛཱིཝཏེ ཝཱཔི སཔྤཉྙོ, ཨཔི ཝིཏྟཔརིཀྑཡོ;

པཉྙཱཡ ཙ ཨལཱབྷེན, ཝིཏྟཝཱཔི ན ཛཱིཝཏི.

༥༥༡.

‘‘པཉྙཱ སུཏཝིནིཙྪིནཱི, པཉྙཱ ཀིཏྟིསིལོཀཝདྡྷནཱི;

པཉྙཱསཧིཏོ ནརོ ཨིདྷ, ཨཔི དུཀྑེསུ སུཁཱནི ཝིནྡཏི.

༥༥༢.

‘‘ནཱཡཾ ཨཛྫཏནོ དྷམྨོ, ནཙྪེརོ ནཔི ཨབྦྷུཏོ;

ཡཏྠ ཛཱཡེཐ མཱིཡེཐ, ཏཏྠ ཀིཾ ཝིཡ ཨབྦྷུཏཾ.

༥༥༣.

‘‘ཨནནྟརཾ ཧི ཛཱཏསྶ, ཛཱིཝིཏཱ མརཎཾ དྷུཝཾ;

ཛཱཏཱ ཛཱཏཱ མརནྟཱིདྷ, ཨེཝཾདྷམྨཱ ཧི པཱཎིནོ.

༥༥༤.

‘‘ན ¶ ཧེཏདཏྠཱཡ མཏསྶ ཧོཏི, ཡཾ ཛཱིཝིཏཏྠཾ པརཔོརིསཱནཾ;

མཏམྷི རུཎྞཾ ན ཡསོ ན ལོཀྱཾ, ན ¶ ཝཎྞིཏཾ སམཎབྲཱཧྨཎེཧི.

༥༥༥.

‘‘ཙཀྑུཾ སརཱིརཾ ཨུཔཧནྟི ཏེན [ཨུཔཧནྟི རུཎྞཾ (སཱི.), ཨུཔཧནྟི རོཎྞཾ (སྱཱ. པཱི.)], ནིཧཱིཡཏི ཝཎྞབལཾ མཏཱི ཙ;

ཨཱནནྡིནོ ཏསྶ དིསཱ བྷཝནྟི, ཧིཏེསིནོ ནཱསྶ སུཁཱི བྷཝནྟི.

༥༥༦.

‘‘ཏསྨཱ ཧི ཨིཙྪེཡྻ ཀུལེ ཝསནྟེ, མེདྷཱཝིནོ ཙེཝ བཧུསྶུཏེ ཙ;

ཡེསཾ ¶ ཧི པཉྙཱཝིབྷཝེན ཀིཙྩཾ, ཏརནྟི ནཱཝཱཡ ནདིཾཝ པུཎྞ’’ནྟི.

… མཧཱཀཔྤིནོ ཐེརོ….

༤. ཙཱུལ༹པནྠཀཏྠེརགཱཐཱ

༥༥༧.

‘‘དནྡྷཱ མཡ྄ཧཾ གཏཱི ཨཱསི, པརིབྷཱུཏོ པུརེ ཨཧཾ;

བྷཱཏཱ ཙ མཾ པཎཱམེསི, ‘གཙྪ དཱནི ཏུཝཾ གྷརཾ’.

༥༥༨.

‘‘སོཧཾ པཎཱམིཏོ སནྟོ [བྷཱཏཱ (ཨཊྛ.)], སངྒྷཱརཱམསྶ ཀོཊྛཀེ;

དུམྨནོ ཏཏྠ ཨཊྛཱསིཾ, སཱསནསྨིཾ ཨཔེཀྑཝཱ.

༥༥༩.

‘‘བྷགཝཱ ཏཏྠ ཨཱགཙྪི [ཨཱགཉྪི (སཱི. པཱི.)], སཱིསཾ མཡ྄ཧཾ པརཱམསི;

བཱཧཱཡ མཾ གཧེཏྭཱན, སངྒྷཱརཱམཾ པཝེསཡི.

༥༦༠.

‘‘ཨནུཀམྤཱཡ མེ སཏྠཱ, པཱདཱསི པཱདཔུཉྪནིཾ;

‘ཨེཏཾ སུདྡྷཾ ཨདྷིཊྛེཧི, ཨེཀམནྟཾ སྭདྷིཊྛིཏཾ’.

༥༦༡.

‘‘ཏསྶཱཧཾ ཝཙནཾ སུཏྭཱ, ཝིཧཱསིཾ སཱསནེ རཏོ;

སམཱདྷིཾ ¶ པཊིཔཱདེསིཾ, ཨུཏྟམཏྠསྶ པཏྟིཡཱ.

༥༦༢.

‘‘པུབྦེནིཝཱསཾ ¶ ཛཱནཱམི, དིབྦཙཀྑུ ཝིསོདྷིཏཾ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ.

༥༦༣.

‘‘སཧསྶཀྑཏྟུམཏྟཱནཾ ¶ , ནིམྨིནིཏྭཱན པནྠཀོ;

ནིསཱིདམྦཝནེ རམྨེ, ཡཱཝ ཀཱལཔྤཝེདནཱ.

༥༦༤.

‘‘ཏཏོ མེ སཏྠཱ པཱཧེསི, དཱུཏཾ ཀཱལཔྤཝེདཀཾ;

པཝེདིཏམྷི ཀཱལམྷི, ཝེཧཱསཱདུཔསངྐམིཾ [ཝེཧཱསཱནུཔསངྐམིཾ (སྱཱ. ཀ.)].

༥༦༥.

‘‘ཝནྡིཏྭཱ སཏྠུནོ པཱདེ, ཨེཀམནྟཾ ནིསཱིདཧཾ;

ནིསིནྣཾ མཾ ཝིདིཏྭཱན, ཨཐ སཏྠཱ པཊིགྒཧི.

༥༦༦.

‘‘ཨཱཡཱགོ སབྦལོཀསྶ, ཨཱཧུཏཱིནཾ པཊིགྒཧོ;

པུཉྙཀྑེཏྟཾ མནུསྶཱནཾ, པཊིགཎྷིཏྠ དཀྑིཎ’’ནྟི.

… ཙཱུལ༹པནྠཀོ ཐེརོ….

༥. ཀཔྤཏྠེརགཱཐཱ

༥༦༧.

‘‘ནཱནཱཀུལམལསམྤུཎྞོ, མཧཱཨུཀྐཱརསམྦྷཝོ;

ཙནྡནིཀཾཝ པརིཔཀྐཾ, མཧཱགཎྜོ མཧཱཝཎོ.

༥༦༨.

‘‘པུབྦརུཧིརསམྤུཎྞོ, གཱུཐཀཱུཔེན གཱལ༹ྷིཏོ [གཱུཐཀཱུཔེ ནིགཱལ༹ྷིཏོ (སྱཱ. པཱི. ཀ.)];

ཨཱཔོཔགྒྷརཎོ ཀཱཡོ, སདཱ སནྡཏི པཱུཏིཀཾ.

༥༦༩.

‘‘སཊྛིཀཎྜརསམྦནྡྷོ ¶ , མཾསལེཔནལེཔིཏོ;

ཙམྨཀཉྩུཀསནྣདྡྷོ, པཱུཏིཀཱཡོ ནིརཏྠཀོ.

༥༧༠.

‘‘ཨཊྛིསངྒྷཱཏགྷཊིཏོ, ནྷཱརུསུཏྟནིབནྡྷནོ;

ནེཀེསཾ སཾགཏཱིབྷཱཝཱ, ཀཔྤེཏི ཨིརིཡཱཔཐཾ.

༥༧༡.

‘‘དྷུཝཔྤཡཱཏོ ¶ མརཎཱཡ, མཙྩུརཱཛསྶ སནྟིཀེ;

ཨིདྷེཝ ཚཌྜཡིཏྭཱན, ཡེནཀཱམངྒམོ ནརོ.

༥༧༢.

‘‘ཨཝིཛྫཱཡ ནིཝུཏོ ཀཱཡོ, ཙཏུགནྠེན གནྠིཏོ;

ཨོགྷསཾསཱིདནོ ཀཱཡོ, ཨནུསཡཛཱལམོཏྠཏོ.

༥༧༣.

‘‘པཉྩནཱིཝརཎེ ཡུཏྟོ, ཝིཏཀྐེན སམཔྤིཏོ;

ཏཎྷཱམཱུལེནཱནུགཏོ, མོཧཙྪཱདནཚཱདིཏོ.

༥༧༤.

‘‘ཨེཝཱཡཾ ཝཏྟཏེ ཀཱཡོ, ཀམྨཡནྟེན ཡནྟིཏོ;

སམྤཏྟི ཙ ཝིཔཏྱནྟཱ, ནཱནཱབྷཱཝོ ཝིཔཛྫཏི.

༥༧༥.

‘‘ཡེམཾ ¶ ¶ ཀཱཡཾ མམཱཡནྟི, ཨནྡྷབཱལཱ པུཐུཛྫནཱ;

ཝཌྜྷེནྟི ཀཊསིཾ གྷོརཾ, ཨཱདིཡནྟི པུནབྦྷཝཾ.

༥༧༦.

‘‘ཡེམཾ ཀཱཡཾ ཝིཝཛྫེནྟི, གཱུཐལིཏྟཾཝ པནྣགཾ;

བྷཝམཱུལཾ ཝམིཏྭཱན, པརིནིབྦིསྶནྟིནཱསཝཱ’’ཏི [པརིནིབྦནྟུནཱསཝཱ (སཱི.)].

… ཀཔྤོ ཐེརོ….

༦. ཝངྒནྟཔུཏྟཨུཔསེནཏྠེརགཱཐཱ

༥༧༧.

‘‘ཝིཝིཏྟཾ ཨཔྤནིགྒྷོསཾ, ཝཱལ༹མིགནིསེཝིཏཾ;

སེཝེ སེནཱསནཾ བྷིཀྑུ, པཊིསལླཱནཀཱརཎཱ.

༥༧༨.

‘‘སངྐཱརཔུཉྫཱ ཨཱཧཏྭཱ [ཨཱཧིཏྭཱ (ཀ.)], སུསཱནཱ རཐིཡཱཧི ཙ;

ཏཏོ སངྒྷཱཊིཀཾ ཀཏྭཱ, ལཱུཁཾ དྷཱརེཡྻ ཙཱིཝརཾ.

༥༧༩.

‘‘ནཱིཙཾ མནཾ ཀརིཏྭཱན, སཔདཱནཾ ཀུལཱ ཀུལཾ;

པིཎྜིཀཱཡ ཙརེ བྷིཀྑུ, གུཏྟདྭཱརོ སུསཾཝུཏོ.

༥༨༠.

‘‘ལཱུཁེནཔི ཝཱ [ལཱུཁེནཔི ཙ (བཧཱུསུ)] སནྟུསྶེ, ནཱཉྙཾ པཏྠེ རསཾ བཧུཾ;

རསེསུ ¶ ཨནུགིདྡྷསྶ, ཛྷཱནེ ན རམཏཱི མནོ.

༥༨༡.

‘‘ཨཔྤིཙྪོ ཙེཝ སནྟུཊྛོ, པཝིཝིཏྟོ ཝསེ མུནི;

ཨསཾསཊྛོ གཧཊྛེཧི, ཨནཱགཱརེཧི ཙཱུབྷཡཾ.

༥༨༢.

‘‘ཡཐཱ ཛལོ༹ ཝ མཱུགོ ཝ, ཨཏྟཱནཾ དསྶཡེ ཏཐཱ;

ནཱཏིཝེལཾ སམྦྷཱསེཡྻ, སངྒྷམཛ྄ཛྷམྷི པཎྜིཏོ.

༥༨༣.

‘‘ན སོ ཨུཔཝདེ ཀཉྩི, ཨུཔགྷཱཏཾ ཝིཝཛྫཡེ;

སཾཝུཏོ པཱཏིམོཀྑསྨིཾ, མཏྟཉྙཱུ ཙསྶ བྷོཛནེ.

༥༨༤.

‘‘སུགྒཧཱིཏནིམིཏྟསྶ, ཙིཏྟསྶུཔྤཱདཀོཝིདོ;

སམཾ ཨནུཡུཉྫེཡྻ, ཀཱལེན ཙ ཝིཔསྶནཾ.

༥༨༥.

‘‘ཝཱིརིཡསཱཏཙྩསམྤནྣོ ¶ , ཡུཏྟཡོགོ སདཱ སིཡཱ;

ན ཙ ཨཔྤཏྭཱ དུཀྑནྟཾ, ཝིསྶཱསཾ ཨེཡྻ པཎྜིཏོ.

༥༨༦.

‘‘ཨེཝཾ ཝིཧརམཱནསྶ, སུདྡྷིཀཱམསྶ བྷིཀྑུནོ;

ཁཱིཡནྟི ཨཱསཝཱ སབྦེ, ནིབྦུཏིཉྩཱདྷིགཙྪཏཱི’’ཏི.

… ཨུཔསེནོ ཝངྒནྟཔུཏྟོ ཐེརོ….

༧. (ཨཔར)-གོཏམཏྠེརགཱཐཱ

༥༨༧.

‘‘ཝིཛཱནེཡྻ ¶ ¶ སཀཾ ཨཏྠཾ, ཨཝལོཀེཡྻཱཐ པཱཝཙནཾ;

ཡཉྩེཏྠ ཨསྶ པཏིརཱུཔཾ, སཱམཉྙཾ ཨཛ྄ཛྷུཔགཏསྶ.

༥༨༨.

‘‘མིཏྟཾ ཨིདྷ ཙ ཀལྱཱཎཾ, སིཀྑཱ ཝིཔུལཾ སམཱདཱནཾ;

སུསྶཱུསཱ ཙ གརཱུནཾ, ཨེཏཾ སམཎསྶ པཏིརཱུཔཾ.

༥༨༩.

‘‘བུདྡྷེསུ སགཱརཝཏཱ, དྷམྨེ ཨཔཙིཏི ཡཐཱབྷཱུཏཾ;

སངྒྷེ ¶ ཙ ཙིཏྟིཀཱརོ, ཨེཏཾ སམཎསྶ པཏིརཱུཔཾ.

༥༩༠.

‘‘ཨཱཙཱརགོཙརེ ཡུཏྟོ, ཨཱཛཱིཝོ སོདྷིཏོ ཨགཱརཡ྄ཧོ;

ཙིཏྟསྶ ཙ སཎྛཔནཾ, ཨེཏཾ སམཎསྶ པཏིརཱུཔཾ.

༥༩༡.

‘‘ཙཱརིཏྟཾ ཨཐ ཝཱརིཏྟཾ, ཨིརིཡཱཔཐིཡཾ པསཱདནིཡཾ;

ཨདྷིཙིཏྟེ ཙ ཨཱཡོགོ, ཨེཏཾ སམཎསྶ པཏིརཱུཔཾ.

༥༩༢.

‘‘ཨཱརཉྙཀཱནི སེནཱསནཱནི, པནྟཱནི ཨཔྤསདྡཱནི;

བྷཛིཏབྦཱནི མུནིནཱ, ཨེཏཾ སམཎསྶ པཏིརཱུཔཾ.

༥༩༣.

‘‘སཱིལཉྩ བཱཧུསཙྩཉྩ, དྷམྨཱནཾ པཝིཙཡོ ཡཐཱབྷཱུཏཾ;

སཙྩཱནཾ ཨབྷིསམཡོ, ཨེཏཾ སམཎསྶ པཏིརཱུཔཾ.

༥༩༤.

‘‘བྷཱཝེཡྻ ཙ ཨནིཙྩནྟི, ཨནཏྟསཉྙཾ ཨསུབྷསཉྙཉྩ;

ལོཀམྷི ཙ ཨནབྷིརཏིཾ, ཨེཏཾ སམཎསྶ པཏིརཱུཔཾ.

༥༩༥.

‘‘བྷཱཝེཡྻ ཙ བོཛ྄ཛྷངྒེ, ཨིདྡྷིཔཱདཱནི ཨིནྡྲིཡཱནི བལཱནི;

ཨཊྛངྒམགྒམརིཡཾ, ཨེཏཾ སམཎསྶ པཏིརཱུཔཾ.

༥༩༦.

‘‘ཏཎྷཾ པཛཧེཡྻ མུནི, སམཱུལཀེ ཨཱསཝེ པདཱལེཡྻ;

ཝིཧརེཡྻ ཝིཔྤམུཏྟོ, ཨེཏཾ སམཎསྶ པཏིརཱུཔ’’ནྟི.

… གོཏམོ ཐེརོ….

དསཀནིཔཱཏོ ནིཊྛིཏོ.

ཏཏྲུདྡཱནཾ –

ཀཱལུ༹དཱཡཱི ཙ སོ ཐེརོ, ཨེཀཝིཧཱརཱི ཙ ཀཔྤིནོ;

ཙཱུལ༹པནྠཀོ ཀཔྤོ ཙ, ཨུཔསེནོ ཙ གོཏམོ;

སཏྟིམེ དསཀེ ཐེརཱ, གཱཐཱཡོ ཙེཏྠ སཏྟཏཱིཏི.

༡༡. ཨེཀཱདསནིཔཱཏོ

༡. སཾཀིཙྩཏྠེརགཱཐཱ

༥༩༧.

‘‘ཀིཾ ¶ ¶ ¶ ¶ ཏཝཏྠོ ཝནེ ཏཱཏ, ཨུཛྫུཧཱནོཝ པཱཝུསེ;

ཝེརམྦྷཱ རམཎཱིཡཱ ཏེ, པཝིཝེཀོ ཧི ཛྷཱཡིནཾ.

༥༩༨.

‘‘ཡཐཱ ཨབྦྷཱནི ཝེརམྦྷོ, ཝཱཏོ ནུདཏི པཱཝུསེ;

སཉྙཱ མེ ཨབྷིཀིརནྟི, ཝིཝེཀཔཊིསཉྙུཏཱ.

༥༩༩.

‘‘ཨཔཎྜརོ ཨཎྜསམྦྷཝོ, སཱིཝཐིཀཱཡ ནིཀེཏཙཱརིཀོ;

ཨུཔྤཱདཡཏེཝ མེ སཏིཾ, སནྡེཧསྨིཾ ཝིརཱགནིསྶིཏཾ.

༦༠༠.

‘‘ཡཉྩ ཨཉྙེ ན རཀྑནྟི, ཡོ ཙ ཨཉྙེ ན རཀྑཏི;

ས ཝེ བྷིཀྑུ སུཁཾ སེཏི, ཀཱམེསུ ཨནཔེཀྑཝཱ.

༦༠༡.

‘‘ཨཙྪོདིཀཱ པུཐུསིལཱ, གོནངྒུལམིགཱཡུཏཱ;

ཨམྦུསེཝཱལསཉྪནྣཱ, ཏེ སེལཱ རམཡནྟི མཾ.

༦༠༢.

‘‘ཝསིཏཾ མེ ཨརཉྙེསུ, ཀནྡརཱསུ གུཧཱསུ ཙ;

སེནཱསནེསུ པནྟེསུ, ཝཱལ༹མིགནིསེཝིཏེ.

༦༠༣.

‘‘‘ཨིམེ ཧཉྙནྟུ ཝཛ྄ཛྷནྟུ, དུཀྑཾ པཔྤོནྟུ པཱཎིནོ’;

སངྐཔྤཾ ནཱབྷིཛཱནཱམི, ཨནརིཡཾ དོསསཾཧིཏཾ.

༦༠༤.

‘‘པརིཙིཎྞོ མཡཱ སཏྠཱ, ཀཏཾ བུདྡྷསྶ སཱསནཾ;

ཨོཧིཏོ གརུཀོ བྷཱརོ, བྷཝནེཏྟི སམཱུཧཏཱ.

༦༠༥.

‘‘ཡསྶ ཙཏྠཱཡ [ཡསྶཏྠཱཡ (སཱི.)] པབྦཛིཏོ, ཨགཱརསྨཱནགཱརིཡཾ;

སོ མེ ཨཏྠོ ཨནུཔྤཏྟོ, སབྦསཾཡོཛནཀྑཡོ.

༦༠༦.

‘‘ནཱབྷིནནྡཱམི ¶ མརཎཾ, ནཱབྷིནནྡཱམི ཛཱིཝིཏཾ;

ཀཱལཉྩ པཊིཀངྑཱམི, ནིབྦིསཾ བྷཏཀོ ཡཐཱ.

༦༠༧.

‘‘ནཱབྷིནནྡཱམི ¶ ¶ མརཎཾ, ནཱབྷིནནྡཱམི ཛཱིཝིཏཾ;

ཀཱལཉྩ པཊིཀངྑཱམི, སམྤཛཱནོ པཏིསྶཏོ’’ཏི.

… སཾཀིཙྩོ ཐེརོ….

ཨེཀཱདསནིཔཱཏོ ནིཊྛིཏོ.

ཏཏྲུདྡཱནཾ –

སཾཀིཙྩཐེརོ ཨེཀོཝ, ཀཏཀིཙྩོ ཨནཱསཝོ;

ཨེཀཱདསནིཔཱཏམྷི, གཱཐཱ ཨེཀཱདསེཝ ཙཱཏི.

༡༢. དྭཱདསཀནིཔཱཏོ

༡. སཱིལཝཏྠེརགཱཐཱ

༦༠༨.

‘‘སཱིལམེཝིདྷ ¶ ¶ ¶ སིཀྑེཐ, ཨསྨིཾ ལོཀེ སུསིཀྑིཏཾ;

སཱིལཾ ཧི སབྦསམྤཏྟིཾ, ཨུཔནཱམེཏི སེཝིཏཾ.

༦༠༩.

‘‘སཱིལཾ རཀྑེཡྻ མེདྷཱཝཱི, པཏྠཡཱནོ ཏཡོ སུཁེ;

པསཾསཾ ཝིཏྟིལཱབྷཉྩ, པེཙྩ སགྒེ པམོདནཾ [པེཙྩ སགྒེ ཙ མོདནཾ (སཱི. པཱི.)].

༦༡༠.

‘‘སཱིལཝཱ ཧི བཧཱུ མིཏྟེ, སཉྙམེནཱདྷིགཙྪཏི;

དུསྶཱིལོ པན མིཏྟེཧི, དྷཾསཏེ པཱཔམཱཙརཾ.

༦༡༡.

‘‘ཨཝཎྞཉྩ ཨཀིཏྟིཉྩ, དུསྶཱིལོ ལབྷཏེ ནརོ;

ཝཎྞཾ ཀིཏྟིཾ པསཾསཉྩ, སདཱ ལབྷཏི སཱིལཝཱ.

༦༡༢.

‘‘ཨཱདི ¶ སཱིལཾ པཏིཊྛཱ ཙ, ཀལྱཱཎཱནཉྩ མཱཏུཀཾ;

པམུཁཾ སབྦདྷམྨཱནཾ, ཏསྨཱ སཱིལཾ ཝིསོདྷཡེ.

༦༡༣.

‘‘ཝེལཱ ཙ སཾཝརཾ སཱིལཾ [སཾཝརོ སཱིལཾ (སཱི.), སཾཝརསཱིལཾ (སཱི. ཨཊྛ.)], ཙིཏྟསྶ ཨབྷིཧཱསནཾ;

ཏིཏྠཉྩ སབྦབུདྡྷཱནཾ, ཏསྨཱ སཱིལཾ ཝིསོདྷཡེ.

༦༡༤.

‘‘སཱིལཾ བལཾ ཨཔྤཊིམཾ, སཱིལཾ ཨཱཝུདྷམུཏྟམཾ;

སཱིལམཱབྷརཎཾ སེཊྛཾ, སཱིལཾ ཀཝཙམབྦྷུཏཾ.

༦༡༥.

‘‘སཱིལཾ སེཏུ མཧེསཀྑོ, སཱིལཾ གནྡྷོ ཨནུཏྟརོ;

སཱིལཾ ཝིལེཔནཾ སེཊྛཾ, ཡེན ཝཱཏི དིསོདིསཾ.

༦༡༦.

‘‘སཱིལཾ སམྦལམེཝགྒཾ, སཱིལཾ པཱཐེཡྻམུཏྟམཾ;

སཱིལཾ སེཊྛོ ཨཏིཝཱཧོ, ཡེན ཡཱཏི དིསོདིསཾ.

༦༡༧.

‘‘ཨིདྷེཝ ནིནྡཾ ལབྷཏི, པེཙྩཱཔཱཡེ ཙ དུམྨནོ;

སབྦཏྠ དུམྨནོ བཱལོ, སཱིལེསུ ཨསམཱཧིཏོ.

༦༡༨.

‘‘ཨིདྷེཝ ཀིཏྟིཾ ལབྷཏི, པེཙྩ སགྒེ ཙ སུམྨནོ;

སབྦཏྠ སུམནོ དྷཱིརོ, སཱིལེསུ སུསམཱཧིཏོ.

༦༡༩.

‘‘སཱིལམེཝ ¶ ཨིདྷ ཨགྒཾ, པཉྙཝཱ པན ཨུཏྟམོ;

མནུསྶེསུ ཙ དེཝེསུ, སཱིལཔཉྙཱཎཏོ ཛཡ’’ནྟི.

… སཱིལཝོ ཐེརོ….

༢. སུནཱིཏཏྠེརགཱཐཱ

༦༢༠.

‘‘ནཱིཙེ ¶ ཀུལམྷི ཛཱཏོཧཾ, དལིདྡོ ཨཔྤབྷོཛནོ;

ཧཱིནཀམྨཾ [ཧཱིནཾ ཀམྨཾ (སྱཱ.)] མམཾ ཨཱསི, ཨཧོསིཾ པུཔྥཚཌྜཀོ.

༦༢༡.

‘‘ཛིགུཙྪིཏོ ¶ མནུསྶཱནཾ, པརིབྷཱུཏོ ཙ ཝམྦྷིཏོ;

ནཱིཙཾ མནཾ ཀརིཏྭཱན, ཝནྡིསྶཾ བཧུཀཾ ཛནཾ.

༦༢༢.

‘‘ཨཐདྡསཱསིཾ ¶ སམྦུདྡྷཾ, བྷིཀྑུསངྒྷཔུརཀྑཏཾ;

པཝིསནྟཾ མཧཱཝཱིརཾ, མགདྷཱནཾ པུརུཏྟམཾ.

༦༢༣.

‘‘ནིཀྑིཔིཏྭཱན བྱཱབྷངྒིཾ, ཝནྡིཏུཾ ཨུཔསངྐམིཾ;

མམེཝ ཨནུཀམྤཱཡ, ཨཊྛཱསི པུརིསུཏྟམོ.

༦༢༤.

‘‘ཝནྡིཏྭཱ སཏྠུནོ པཱདེ, ཨེཀམནྟཾ ཋིཏོ ཏདཱ;

པབྦཛྫཾ ཨཧམཱཡཱཙིཾ, སབྦསཏྟཱནམུཏྟམཾ.

༦༢༥.

‘‘ཏཏོ ཀཱརུཎིཀོ སཏྠཱ, སབྦལོཀཱནུཀམྤཀོ;

‘ཨེཧི བྷིཀྑཱུ’ཏི མཾ ཨཱཧ, སཱ མེ ཨཱསཱུཔསམྤདཱ.

༦༢༦.

‘‘སོཧཾ ཨེཀོ ཨརཉྙསྨིཾ, ཝིཧརནྟོ ཨཏནྡིཏོ;

ཨཀཱསིཾ སཏྠུཝཙནཾ, ཡཐཱ མཾ ཨོཝདཱི ཛིནོ.

༦༢༧.

‘‘རཏྟིཡཱ པཋམཾ ཡཱམཾ, པུབྦཛཱཏིམནུསྶརིཾ;

རཏྟིཡཱ མཛ྄ཛྷིམཾ ཡཱམཾ, དིབྦཙཀྑུཾ ཝིསོདྷཡིཾ [དིབྦཙཀྑུ ཝིསོདྷིཏཾ (ཀ.)];

རཏྟིཡཱ པཙྪིམེ ཡཱམེ, ཏམོཁནྡྷཾ པདཱལཡིཾ.

༦༢༨.

‘‘ཏཏོ རཏྱཱ ཝིཝསཱནེ, སཱུརིཡསྶུགྒམནཾ པཏི;

ཨིནྡོ བྲཧྨཱ ཙ ཨཱགནྟྭཱ, མཾ ནམསྶིཾསུ པཉྫལཱི.

༦༢༩.

‘‘‘ནམོ ཏེ པུརིསཱཛཉྙ, ནམོ ཏེ པུརིསུཏྟམ;

ཡསྶ ཏེ ཨཱསཝཱ ཁཱིཎཱ, དཀྑིཎེཡྻོསི མཱརིས’.

༦༣༠.

‘‘ཏཏོ ¶ དིསྭཱན མཾ སཏྠཱ, དེཝསངྒྷཔུརཀྑཏཾ;

སིཏཾ པཱཏུཀརིཏྭཱན, ཨིམམཏྠཾ ཨབྷཱསཐ.

༦༣༡.

[སུ. ནི. ༦༦༠ སུཏྟནིཔཱཏེཔི] ‘‘‘ཏཔེན ¶ ¶ བྲཧྨཙརིཡེན, སཾཡམེན དམེན ཙ;

ཨེཏེན བྲཱཧྨཎོ ཧོཏི, ཨེཏཾ བྲཱཧྨཎམུཏྟམ’’’ནྟི.

… སུནཱིཏོ ཐེརོ….

དྭཱདསཀནིཔཱཏོ ནིཊྛིཏོ.

ཏཏྲུདྡཱནཾ –

སཱིལཝཱ ཙ སུནཱིཏོ ཙ, ཐེརཱ དྭེ ཏེ མཧིདྡྷིཀཱ;

དྭཱདསམྷི ནིཔཱཏམྷི, གཱཐཱཡོ ཙཏུཝཱིསཏཱིཏི.

༡༣. ཏེརསནིཔཱཏོ

༡. སོཎཀོལི༹ཝིསཏྠེརགཱཐཱ

༦༣༢.

‘‘ཡཱཧུ ¶ ¶ ¶ རཊྛེ སམུཀྐཊྛོ, རཉྙོ ཨངྒསྶ པདྡྷགཱུ [པཏྠགཱུ (སྱཱ.), པཊྛགཱུ (ཀ.)];

སྭཱཛྫ དྷམྨེསུ ཨུཀྐཊྛོ, སོཎོ དུཀྑསྶ པཱརགཱུ.

༦༣༣.

‘‘པཉྩ ཚིནྡེ པཉྩ ཛཧེ, པཉྩ ཙུཏྟརི བྷཱཝཡེ;

པཉྩསངྒཱཏིགོ བྷིཀྑུ, ཨོགྷཏིཎྞོཏི ཝུཙྩཏི.

༦༣༤.

‘‘ཨུནྣལ༹སྶ པམཏྟསྶ, བཱཧིརཱསསྶ [བཱཧིརཱསཡསྶ (ཀ.)] བྷིཀྑུནོ;

སཱིལཾ སམཱདྷི པཉྙཱ ཙ, པཱརིཔཱུརིཾ ན གཙྪཏི.

༦༣༥.

‘‘ཡཉྷི ཀིཙྩཾ ཨཔཝིདྡྷཾ [ཏདཔཝིདྡྷཾ (སཱི. སྱཱ.)], ཨཀིཙྩཾ པན ཀརཱིཡཏི;

ཨུནྣལཱ༹ནཾ ¶ པམཏྟཱནཾ, ཏེསཾ ཝཌྜྷནྟི ཨཱསཝཱ.

༦༣༦.

‘‘ཡེསཉྩ སུསམཱརདྡྷཱ, ནིཙྩཾ ཀཱཡགཏཱ སཏི;

ཨཀིཙྩཾ ཏེ ན སེཝནྟི, ཀིཙྩེ སཱཏཙྩཀཱརིནོ;

སཏཱནཾ སམྤཛཱནཱནཾ, ཨཏྠཾ གཙྪནྟི ཨཱསཝཱ.

༦༣༧.

‘‘ཨུཛུམགྒམྷི ཨཀྑཱཏེ, གཙྪཐ མཱ ནིཝཏྟཐ;

ཨཏྟནཱ ཙོདཡཏྟཱནཾ, ནིབྦཱནམབྷིཧཱརཡེ.

༦༣༨.

‘‘ཨཙྩཱརདྡྷམྷི ཝཱིརིཡམྷི, སཏྠཱ ལོཀེ ཨནུཏྟརོ;

ཝཱིཎོཔམཾ ཀརིཏྭཱ མེ, དྷམྨཾ དེསེསི ཙཀྑུམཱ;

ཏསྶཱཧཾ ཝཙནཾ སུཏྭཱ, ཝིཧཱསིཾ སཱསནེ རཏོ.

༦༣༩.

‘‘སམཐཾ པཊིཔཱདེསིཾ, ཨུཏྟམཏྠསྶ པཏྟིཡཱ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ.

༦༤༠.

‘‘ནེཀྑམྨེ [ནིཀྑམེ (ཀ.), ནེཀྑམྨཾ (མཧཱཝ. ༢༤༤; ཨ. ནི. ༦.༥༥)] ཨདྷིམུཏྟསྶ, པཝིཝེཀཉྩ ཙེཏསོ;

ཨབྱཱཔཛ྄ཛྷཱདྷིམུཏྟསྶ [ཨབྱཱཔཛ྄ཛྷཱདྷིམྷཏྟསྶ (ཀ.)], ཨུཔཱདཱནཀྑཡསྶ ཙ.

༦༤༡.

‘‘ཏཎྷཀྑཡཱདྷིམུཏྟསྶ, ཨསམྨོཧཉྩ ཙེཏསོ;

དིསྭཱ ཨཱཡཏནུཔྤཱདཾ, སམྨཱ ཙིཏྟཾ ཝིམུཙྩཏི.

༦༤༢.

‘‘ཏསྶ ¶ སམྨཱ ཝིམུཏྟསྶ, སནྟཙིཏྟསྶ བྷིཀྑུནོ;

ཀཏསྶ པཊིཙཡོ ནཏྠི, ཀརཎཱིཡཾ ན ཝིཛྫཏི.

༦༤༣.

‘‘སེལོ ¶ ¶ ཡཐཱ ཨེཀགྷནོ [ཨེཀགྷནོ (ཀ.)], ཝཱཏེན ན སམཱིརཏི;

ཨེཝཾ རཱུཔཱ རསཱ སདྡཱ, གནྡྷཱ ཕསྶཱ ཙ ཀེཝལཱ.

༦༤༤.

‘‘ཨིཊྛཱ ¶ དྷམྨཱ ཨནིཊྛཱ ཙ, ནཔྤཝེདྷེནྟི ཏཱདིནོ;

ཋིཏཾ ཙིཏྟཾ ཝིསཉྙུཏྟཾ, ཝཡཉྩསྶཱནུཔསྶཏཱི’’ཏི.

… སོཎོ ཀོལི༹ཝིསོ ཐེརོ….

ཏེརསནིཔཱཏོ ནིཊྛིཏོ.

ཏཏྲུདྡཱནཾ –

སོཎོ ཀོལི༹ཝིསོ ཐེརོ, ཨེཀོཡེཝ མཧིདྡྷིཀོ;

ཏེརསམྷི ནིཔཱཏམྷི, གཱཐཱཡོ ཙེཏྠ ཏེརསཱཏི.

༡༤. ཙུདྡསཀནིཔཱཏོ

༡. ཁདིརཝནིཡརེཝཏཏྠེརགཱཐཱ

༦༤༥.

‘‘ཡདཱ ¶ ¶ ¶ ཨཧཾ པབྦཛིཏོ, ཨགཱརསྨཱནགཱརིཡཾ;

ནཱབྷིཛཱནཱམི སངྐཔྤཾ, ཨནརིཡཾ དོསསཾཧིཏཾ.

༦༤༦.

‘‘‘ཨིམེ ཧཉྙནྟུ ཝཛ྄ཛྷནྟུ, དུཀྑཾ པཔྤོནྟུ པཱཎིནོ’;

སངྐཔྤཾ ནཱབྷིཛཱནཱམི, ཨིམསྨིཾ དཱིགྷམནྟརེ.

༦༤༧.

‘‘མེཏྟཉྩ ཨབྷིཛཱནཱམི, ཨཔྤམཱཎཾ སུབྷཱཝིཏཾ;

ཨནུཔུབྦཾ པརིཙིཏཾ, ཡཐཱ བུདྡྷེན དེསིཏཾ.

༦༤༨.

‘‘སབྦམིཏྟོ སབྦསཁོ, སབྦབྷཱུཏཱནུཀམྤཀོ;

མེཏྟཙིཏྟཉྩ [མེཏྟཾ ཙིཏྟཾ (སཱི. སྱཱ.)] བྷཱཝེམི, ཨབྱཱཔཛྫརཏོ [ཨབྱཱཔཛ྄ཛྷརཏོ (སཱི. སྱཱ.)] སདཱ.

༦༤༩.

‘‘ཨསཾཧཱིརཾ ཨསཾཀུཔྤཾ, ཙིཏྟཾ ཨཱམོདཡཱམཧཾ;

བྲཧྨཝིཧཱརཾ བྷཱཝེམི, ཨཀཱཔུརིསསེཝིཏཾ.

༦༥༠.

‘‘ཨཝིཏཀྐཾ ¶ སམཱཔནྣོ, སམྨཱསམྦུདྡྷསཱཝཀོ;

ཨརིཡེན ཏུཎྷཱིབྷཱཝེན, ཨུཔེཏོ ཧོཏི ཏཱཝདེ.

༦༥༡.

‘‘ཡཐཱཔི པབྦཏོ སེལོ, ཨཙལོ སུཔྤཏིཊྛིཏོ;

ཨེཝཾ མོཧཀྑཡཱ བྷིཀྑུ, པབྦཏོཝ ན ཝེདྷཏི.

༦༥༢.

‘‘ཨནངྒཎསྶ པོསསྶ, ནིཙྩཾ སུཙིགཝེསིནོ;

ཝཱལགྒམཏྟཾ པཱཔསྶ, ཨབྦྷམཏྟཾཝ ཁཱཡཏི.

༦༥༣.

‘‘ནགརཾ ཡཐཱ པཙྩནྟཾ, གུཏྟཾ སནྟརབཱཧིརཾ;

ཨེཝཾ གོཔེཐ ཨཏྟཱནཾ, ཁཎོ ཝོ མཱ ཨུཔཙྩགཱ.

༦༥༤.

‘‘ནཱབྷིནནྡཱམི མརཎཾ, ནཱབྷིནནྡཱམི ཛཱིཝིཏཾ;

ཀཱལཉྩ པཊིཀངྑཱམི, ནིབྦིསཾ བྷཏཀོ ཡཐཱ.

༦༥༥.

‘‘ནཱབྷིནནྡཱམི མརཎཾ…པེ… སམྤཛཱནོ པཏིསྶཏོ.

༦༥༦.

‘‘པརིཙིཎྞོ མཡཱ སཏྠཱ, ཀཏཾ བུདྡྷསྶ སཱསནཾ;

ཨོཧིཏོ གརུཀོ བྷཱརོ, བྷཝནེཏྟི སམཱུཧཏཱ.

༦༥༧.

‘‘ཡསྶ ¶ ¶ ཙཏྠཱཡ པབྦཛིཏོ, ཨགཱརསྨཱནགཱརིཡཾ;

སོ མེ ཨཏྠོ ཨནུཔྤཏྟོ, སབྦསཾཡོཛནཀྑཡོ.

༦༥༨.

‘‘སམྤཱདེཐཔྤམཱདེན, ཨེསཱ མེ ཨནུསཱསནཱི;

ཧནྡཱཧཾ པརིནིབྦིསྶཾ, ཝིཔྤམུཏྟོམྷི སབྦདྷཱི’’ཏི.

… ཁདིརཝནིཡརེཝཏོ ཐེརོ….

༢. གོདཏྟཏྠེརགཱཐཱ

༦༥༩.

‘‘ཡཐཱཔི བྷདྡོ ཨཱཛཉྙོ, དྷུརེ ཡུཏྟོ དྷུརསྶཧོ [དྷུརཱསཧོ (ཨཊྛ.)];

མཐིཏོ ¶ ཨཏིབྷཱརེན, སཾཡུགཾ ནཱཏིཝཏྟཏི.

༦༦༠.

‘‘ཨེཝཾ པཉྙཱཡ ཡེ ཏིཏྟཱ, སམུདྡོ ཝཱརིནཱ ཡཐཱ;

ན པརེ ཨཏིམཉྙནྟི, ཨརིཡདྷམྨོཝ པཱཎིནཾ.

༦༦༡.

‘‘ཀཱལེ ¶ ཀཱལཝསཾ པཏྟཱ, བྷཝཱབྷཝཝསཾ གཏཱ;

ནརཱ དུཀྑཾ ནིགཙྪནྟི, ཏེདྷ སོཙནྟི མཱཎཝཱ [མཱནཝཱ (སཱི.)].

༦༦༢.

‘‘ཨུནྣཏཱ སུཁདྷམྨེན, དུཀྑདྷམྨེན ཙོནཏཱ;

དྭཡེན བཱལཱ ཧཉྙནྟི, ཡཐཱབྷཱུཏཾ ཨདསྶིནོ.

༦༦༣.

‘‘ཡེ ཙ དུཀྑེ སུཁསྨིཉྩ, མཛ྄ཛྷེ སིབྦིནིམཙྩགཱུ;

ཋིཏཱ ཏེ ཨིནྡཁཱིལོཝ, ན ཏེ ཨུནྣཏཨོནཏཱ.

༦༦༤.

‘‘ན ཧེཝ ལཱབྷེ ནཱལཱབྷེ, ན ཡསེ ན ཙ ཀིཏྟིཡཱ;

ན ནིནྡཱཡཾ པསཾསཱཡ, ན ཏེ དུཀྑེ སུཁམྷི.

༦༦༥.

‘‘སབྦཏྠ ཏེ ན ལིམྤནྟི, ཨུདབིནྡུཝ པོཀྑརེ;

སབྦཏྠ སུཁིཏཱ དྷཱིརཱ, སབྦཏྠ ཨཔརཱཛིཏཱ.

༦༦༦.

‘‘དྷམྨེན ཙ ཨལཱབྷོ ཡོ, ཡོ ཙ ལཱབྷོ ཨདྷམྨིཀོ;

ཨལཱབྷོ དྷམྨིཀོ སེཡྻོ, ཡཾ ཙེ ལཱབྷོ ཨདྷམྨིཀོ.

༦༦༧.

‘‘ཡསོ ཙ ཨཔྤབུདྡྷཱིནཾ, ཝིཉྙཱུནཾ ཨཡསོ ཙ ཡོ;

ཨཡསོཝ སེཡྻོ ཝིཉྙཱུནཾ, ན ཡསོ ཨཔྤབུདྡྷིནཾ.

༦༦༨.

‘‘དུམྨེདྷེཧི ¶ པསཾསཱ ཙ, ཝིཉྙཱུཧི གརཧཱ ཙ ཡཱ;

གརཧཱཝ སེཡྻོ ཝིཉྙཱུཧི, ཡཾ ཙེ བཱལཔྤསཾསནཱ.

༦༦༩.

‘‘སུཁཉྩ ¶ ¶ ཀཱམམཡིཀཾ, དུཀྑཉྩ པཝིཝེཀིཡཾ;

པཝིཝེཀདུཀྑཾ སེཡྻོ, ཡཾ ཙེ ཀཱམམཡཾ སུཁཾ.

༦༧༠.

‘‘ཛཱིཝིཏཉྩ ཨདྷམྨེན, དྷམྨེན མརཎཉྩ ཡཾ;

མརཎཾ དྷམྨིཀཾ སེཡྻོ, ཡཾ ཙེ ཛཱིཝེ ཨདྷམྨིཀཾ.

༦༧༡.

‘‘ཀཱམཀོཔཔྤཧཱིནཱ ཡེ, སནྟཙིཏྟཱ བྷཝཱབྷཝེ;

ཙརནྟི ལོཀེ ཨསིཏཱ, ནཏྠི ཏེསཾ པིཡཱཔིཡཾ.

༦༧༢.

‘‘བྷཱཝཡིཏྭཱན བོཛ྄ཛྷངྒེ, ཨིནྡྲིཡཱནི བལཱནི ཙ;

པཔྤུཡྻ པརམཾ སནྟིཾ, པརིནིབྦནྟིནཱསཝཱ’’ཏི.

… གོདཏྟོ ཐེརོ….

ཙུདྡསཀནིཔཱཏོ ནིཊྛིཏོ.

ཏཏྲུདྡཱནཾ –

རེཝཏོ ཙེཝ གོདཏྟོ, ཐེརཱ དྭེ ཏེ མཧིདྡྷིཀཱ;

ཙུདྡསམྷི ནིཔཱཏམྷི, གཱཐཱཡོ ཨཊྛཝཱིསཏཱིཏི.

༡༥. སོལ༹སཀནིཔཱཏོ

༡. ཨཉྙཱསིཀོཎྜཉྙཏྠེརགཱཐཱ

༦༧༣.

‘‘ཨེས ¶ ¶ ¶ བྷིཡྻོ པསཱིདཱམི, སུཏྭཱ དྷམྨཾ མཧཱརསཾ;

ཝིརཱགོ དེསིཏོ དྷམྨོ, ཨནུཔཱདཱཡ སབྦསོ.

༦༧༤.

‘‘བཧཱུནི ལོཀེ ཙིཏྲཱནི, ཨསྨིཾ པཐཝིམཎྜལེ;

མཐེནྟི ¶ མཉྙེ སངྐཔྤཾ, སུབྷཾ རཱགཱུཔསཾཧིཏཾ.

༦༧༥.

‘‘རཛམུཧཏཉྩ ཝཱཏེན, ཡཐཱ མེགྷོཔསམྨཡེ;

ཨེཝཾ སམྨནྟི སངྐཔྤཱ, ཡདཱ པཉྙཱཡ པསྶཏི.

༦༧༦.

[དྷ. པ. ༢༧༧ དྷམྨཔདེ] ‘‘སབྦེ སངྑཱརཱ ཨནིཙྩཱཏི, ཡདཱ པཉྙཱཡ པསྶཏི;

ཨཐ ནིབྦིནྡཏི དུཀྑེ, ཨེས མགྒོ ཝིསུདྡྷིཡཱ.

༦༧༧ .

[དྷ. པ. ༢༧༨ དྷམྨཔདེ] ‘‘སབྦེ སངྑཱརཱ དུཀྑཱཏི, ཡདཱ པཉྙཱཡ པསྶཏི

ཨཐ ནིབྦིནྡཏི དུཀྑེ, ཨེས མགྒོ ཝིསུདྡྷིཡཱ.

༦༧༨.

[དྷ. པ. ༢༧༩ དྷམྨཔདེ] ‘‘སབྦེ དྷམྨཱ ཨནཏྟཱཏི, ཡདཱ པཉྙཱཡ པསྶཏི;

ཨཐ ནིབྦིནྡཏི དུཀྑེ, ཨེས མགྒོ ཝིསུདྡྷིཡཱ.

༦༧༩.

‘‘བུདྡྷཱནུབུདྡྷོ ཡོ ཐེརོ, ཀོཎྜཉྙོ ཏིབྦནིཀྐམོ;

པཧཱིནཛཱཏིམརཎོ, བྲཧྨཙརིཡསྶ ཀེཝལཱི.

༦༨༠.

‘‘ཨོགྷཔཱསོ དལ༹ྷཁིལོ [དལ༹ྷོ ཁིལོ (སྱཱ. ཀ.)], པབྦཏོ དུཔྤདཱལཡོ;

ཚེཏྭཱ ཁིལཉྩ པཱསཉྩ, སེལཾ བྷེཏྭཱན [ཚེཏྭཱན (ཀ.)] དུབྦྷིདཾ;

ཏིཎྞོ པཱརངྒཏོ ཛྷཱཡཱི, མུཏྟོ སོ མཱརབནྡྷནཱ.

༦༨༡.

‘‘ཨུདྡྷཏོ ཙཔལོ བྷིཀྑུ, མིཏྟེ ཨཱགམྨ པཱཔཀེ;

སཾསཱིདཏི མཧོགྷསྨིཾ, ཨཱུམིཡཱ པཊིཀུཛྫིཏོ.

༦༨༢.

‘‘ཨནུདྡྷཏོ ཨཙཔལོ, ནིཔཀོ སཾཝུཏིནྡྲིཡོ;

ཀལྱཱཎམིཏྟོ མེདྷཱཝཱི, དུཀྑསྶནྟཀརོ སིཡཱ.

༦༨༣.

‘‘ཀཱལཔབྦངྒསངྐཱསོ, ཀིསོ དྷམནིསནྠཏོ;

མཏྟཉྙཱུ ¶ ཨནྣཔཱནསྨིཾ, ཨདཱིནམནསོ ནརོ.

༦༨༤.

‘‘ཕུཊྛོ ¶ ཌཾསེཧི མཀསེཧི, ཨརཉྙསྨིཾ བྲཧཱཝནེ;

ནཱགོ སངྒཱམསཱིསེཝ, སཏོ ཏཏྲཱདྷིཝཱསཡེ.

༦༨༥.

‘‘ནཱབྷིནནྡཱམི ¶ མརཎཾ…པེ… ནིབྦིསཾ བྷཏཀོ ཡཐཱ.

༦༨༦.

‘‘ནཱབྷིནནྡཱམི མརཎཾ…པེ… སམྤཛཱནོ པཏིསྶཏོ.

༦༨༧.

‘‘པརིཙིཎྞོ མཡཱ སཏྠཱ…པེ… བྷཝནེཏྟི སམཱུཧཏཱ.

༦༨༨.

‘‘ཡསྶ ཙཏྠཱཡ པབྦཛིཏོ, ཨགཱརསྨཱནགཱརིཡཾ;

སོ མེ ཨཏྠོ ཨནུཔྤཏྟོ, ཀིཾ མེ སདྡྷིཝིཧཱརིནཱ’’ཏི.

… ཨཉྙཱསིཀོཎྜཉྙོ [ཨཉྙཱཀོཎྜཉྙོ (སཱི. སྱཱ.)] ཐེརོ….

༢. ཨུདཱཡིཏྠེརགཱཐཱ

༦༨༩.

[ཨ. ནི. ༦.༤༣] ‘‘མནུསྶབྷཱུཏཾ སམྦུདྡྷཾ, ཨཏྟདནྟཾ སམཱཧིཏཾ;

ཨིརིཡམཱནཾ བྲཧྨཔཐེ, ཙིཏྟསྶཱུཔསམེ རཏཾ.

༦༩༠.

‘‘ཡཾ མནུསྶཱ ནམསྶནྟི, སབྦདྷམྨཱན པཱརགུཾ;

དེཝཱཔི ཏཾ ནམསྶནྟི, ཨིཏི མེ ཨརཧཏོ སུཏཾ.

༦༩༡.

‘‘སབྦསཾཡོཛནཱཏཱིཏཾ ¶ , ཝནཱ ནིབྦནམཱགཏཾ;

ཀཱམེཧི ནེཀྑམྨརཏཾ [ནིཀྑམྨརཏཾ (ཀ.)], མུཏྟཾ སེལཱཝ ཀཉྩནཾ.

༦༩༢.

‘‘ས ཝེ ཨཙྩརུཙི ནཱགོ, ཧིམཝཱཝཉྙེ སིལུཙྩཡེ;

སབྦེསཾ ¶ ནཱགནཱམཱནཾ, སཙྩནཱམོ ཨནུཏྟརོ.

༦༩༣.

‘‘ནཱགཾ ཝོ ཀིཏྟཡིསྶཱམི, ན ཧི ཨཱགུཾ ཀརོཏི སོ;

སོརཙྩཾ ཨཝིཧིཾསཱ ཙ, པཱདཱ ནཱགསྶ ཏེ དུཝེ.

༦༩༤.

‘‘སཏི ཙ སམྤཛཉྙཉྩ, ཙརཎཱ ནཱགསྶ ཏེཔརེ;

སདྡྷཱཧཏྠོ མཧཱནཱགོ, ཨུཔེཀྑཱསེཏདནྟཝཱ.

༦༩༥.

‘‘སཏི གཱིཝཱ སིརོ པཉྙཱ, ཝཱིམཾསཱ དྷམྨཙིནྟནཱ;

དྷམྨཀུཙྪིསམཱཝཱསོ, ཝིཝེཀོ ཏསྶ ཝཱལདྷི.

༦༩༦.

‘‘སོ ཛྷཱཡཱི ཨསྶཱསརཏོ, ཨཛ྄ཛྷཏྟཾ སུསམཱཧིཏོ;

གཙྪཾ སམཱཧིཏོ ནཱགོ, ཋིཏོ ནཱགོ སམཱཧིཏོ.

༦༩༧.

‘‘སཡཾ སམཱཧིཏོ ནཱགོ, ནིསིནྣོཔི སམཱཧིཏོ;

སབྦཏྠ སཾཝུཏོ ནཱགོ, ཨེསཱ ནཱགསྶ སམྤདཱ.

༦༩༨.

‘‘བྷུཉྫཏི ¶ ཨནཝཛྫཱནི, སཱཝཛྫཱནི ན བྷུཉྫཏི;

གྷཱསམཙྪཱདནཾ ལདྡྷཱ, སནྣིདྷིཾ པརིཝཛྫཡཾ.

༦༩༩.

‘‘སཾཡོཛནཾ ¶ ཨཎུཾ ཐཱུལཾ, སབྦཾ ཚེཏྭཱན བནྡྷནཾ;

ཡེན ཡེནེཝ གཙྪཏི, ཨནཔཀྑོཝ གཙྪཏི.

༧༠༠.

‘‘ཡཐཱཔི ཨུདཀེ ཛཱཏཾ, པུཎྜརཱིཀཾ པཝཌྜྷཏི;

ནོཔལིཔྤཏི ཏོཡེན, སུཙིགནྡྷཾ མནོརམཾ.

༧༠༡.

‘‘ཏཐེཝ ཙ ལོཀེ ཛཱཏོ, བུདྡྷོ ལོཀེ ཝིཧརཏི;

ནོཔལིཔྤཏི ལོཀེན, ཏོཡེན པདུམཾ ཡཐཱ.

༧༠༢.

‘‘མཧཱགིནི པཛྫལིཏོ, ཨནཱཧཱརོཔསམྨཏི;

ཨངྒཱརེསུ ¶ ཙ སནྟེསུ, ནིབྦུཏོཏི པཝུཙྩཏི.

༧༠༣.

‘‘ཨཏྠསྶཱཡཾ ཝིཉྙཱཔནཱི, ཨུཔམཱ ཝིཉྙཱུཧི དེསིཏཱ;

ཝིཉྙིསྶནྟི མཧཱནཱགཱ, ནཱགཾ ནཱགེན དེསིཏཾ.

༧༠༤.

‘‘ཝཱིཏརཱགོ ཝཱིཏདོསོ, ཝཱིཏམོཧོ ཨནཱསཝོ;

སརཱིརཾ ཝིཛཧཾ ནཱགོ, པརིནིབྦིསྶཏྱནཱསཝོ’’ཏི.

… ཨུདཱཡཱི ཐེརོ….

སོལ༹སཀནིཔཱཏོ ནིཊྛིཏོ.

ཏཏྲུདྡཱནཾ –

ཀོཎྜཉྙོ ཙ ཨུདཱཡཱི ཙ, ཐེརཱ དྭེ ཏེ མཧིདྡྷིཀཱ;

སོལ༹སམྷི ནིཔཱཏམྷི, གཱཐཱཡོ དྭེ ཙ ཏིཾས ཙཱཏི.

༡༦. ཝཱིསཏིནིཔཱཏོ

༡. ཨདྷིམུཏྟཏྠེརགཱཐཱ

༧༠༥.

‘‘ཡཉྙཏྠཾ ¶ ¶ ¶ ཝཱ དྷནཏྠཾ ཝཱ, ཡེ ཧནཱམ མཡཾ པུརེ;

ཨཝསེསཾ [ཨཝསེ ཏཾ (སཱི. ཨཊྛ. མཱུལཔཱཋོ), ཨཝསེསཱནཾ (ཨཊྛ.?)] བྷཡཾ ཧོཏི, ཝེདྷནྟི ཝིལཔནྟི ཙ.

༧༠༦.

‘‘ཏསྶ ཏེ ནཏྠི བྷཱིཏཏྟཾ, བྷིཡྻོ ཝཎྞོ པསཱིདཏི;

ཀསྨཱ ན པརིདེཝེསི, ཨེཝརཱུཔེ མཧབྦྷཡེ.

༧༠༧.

‘‘ནཏྠི ཙེཏསིཀཾ དུཀྑཾ, ཨནཔེཀྑསྶ གཱམཎི;

ཨཏིཀྐནྟཱ བྷཡཱ སབྦེ, ཁཱིཎསཾཡོཛནསྶ ཝེ.

༧༠༨.

‘‘ཁཱིཎཱཡ བྷཝནེཏྟིཡཱ, དིཊྛེ དྷམྨེ ཡཐཱཏཐེ;

ན ¶ བྷཡཾ མརཎེ ཧོཏི, བྷཱརནིཀྑེཔནེ ཡཐཱ.

༧༠༩.

‘‘སུཙིཎྞཾ བྲཧྨཙརིཡཾ མེ, མགྒོ ཙཱཔི སུབྷཱཝིཏོ;

མརཎེ མེ བྷཡཾ ནཏྠི, རོགཱནམིཝ སངྑཡེ.

༧༡༠.

‘‘སུཙིཎྞཾ བྲཧྨཙརིཡཾ མེ, མགྒོ ཙཱཔི སུབྷཱཝིཏོ;

ནིརསྶཱདཱ བྷཝཱ དིཊྛཱ, ཝིསཾ པིཏྭཱཝ [པཱིཏྭཱཝ (སཱི.)] ཚཌྜིཏཾ.

༧༡༡.

‘‘པཱརགཱུ ཨནུཔཱདཱནོ, ཀཏཀིཙྩོ ཨནཱསཝོ;

ཏུཊྛོ ཨཱཡུཀྑཡཱ ཧོཏི, མུཏྟོ ཨཱགྷཱཏནཱ ཡཐཱ.

༧༡༢.

‘‘ཨུཏྟམཾ དྷམྨཏཾ པཏྟོ, སབྦལོཀེ ཨནཏྠིཀོ;

ཨཱདིཏྟཱཝ གྷརཱ མུཏྟོ, མརཎསྨིཾ ན སོཙཏི.

༧༡༣.

‘‘ཡདཏྠི སངྒཏཾ ཀིཉྩི, བྷཝོ ཝཱ ཡཏྠ ལབྦྷཏི;

སབྦཾ ཨནིསྶརཾ ཨེཏཾ, ཨིཏི ཝུཏྟཾ མཧེསིནཱ.

༧༡༤.

‘‘ཡོ ཏཾ ཏཐཱ པཛཱནཱཏི, ཡཐཱ བུདྡྷེན དེསིཏཾ;

ན གཎྷཱཏི བྷཝཾ ཀིཉྩི, སུཏཏྟཾཝ ཨཡོགུལ༹ཾ.

༧༡༥.

‘‘ན མེ ཧོཏི ‘ཨཧོསི’ནྟི, ‘བྷཝིསྶ’ནྟི ན ཧོཏི མེ;

སངྑཱརཱ ཝིགམིསྶནྟི, ཏཏྠ ཀཱ པརིདེཝནཱ.

༧༡༦.

‘‘སུདྡྷཾ དྷམྨསམུཔྤཱདཾ, སུདྡྷཾ སངྑཱརསནྟཏིཾ;

པསྶནྟསྶ ཡཐཱབྷཱུཏཾ, ན བྷཡཾ ཧོཏི གཱམཎི.

༧༡༧.

‘‘ཏིཎཀཊྛསམཾ ¶ ¶ ལོཀཾ, ཡདཱ པཉྙཱཡ པསྶཏི;

མམཏྟཾ སོ ཨསཾཝིནྡཾ, ‘ནཏྠི མེ’ཏི ན སོཙཏི.

༧༡༨.

‘‘ཨུཀྐཎྛཱམི ¶ སརཱིརེན, བྷཝེནམྷི ཨནཏྠིཀོ;

སོཡཾ ¶ བྷིཛྫིསྶཏི ཀཱཡོ, ཨཉྙོ ཙ ན བྷཝིསྶཏི.

༧༡༩.

‘‘ཡཾ ཝོ ཀིཙྩཾ སརཱིརེན, ཏཾ ཀརོཐ ཡདིཙྪཐ;

ན མེ ཏཔྤཙྩཡཱ ཏཏྠ, དོསོ པེམཉྩ ཧེཧིཏི’’.

༧༢༠.

ཏསྶ ཏཾ ཝཙནཾ སུཏྭཱ, ཨབྦྷུཏཾ ལོམཧཾསནཾ;

སཏྠཱནི ནིཀྑིཔིཏྭཱན, མཱཎཝཱ ཨེཏདབྲཝུཾ.

༧༢༡.

‘‘ཀིཾ བྷདནྟེ ཀརིཏྭཱན, ཀོ ཝཱ ཨཱཙརིཡོ ཏཝ;

ཀསྶ སཱསནམཱགམྨ, ལབྦྷཏེ ཏཾ ཨསོཀཏཱ’’.

༧༢༢.

‘‘སབྦཉྙཱུ སབྦདསྶཱཝཱི, ཛིནོ ཨཱཙརིཡོ མམ;

མཧཱཀཱརུཎིཀོ སཏྠཱ, སབྦལོཀཏིཀིཙྪཀོ.

༧༢༣.

‘‘ཏེནཱཡཾ དེསིཏོ དྷམྨོ, ཁཡགཱམཱི ཨནུཏྟརོ;

ཏསྶ སཱསནམཱགམྨ, ལབྦྷཏེ ཏཾ ཨསོཀཏཱ’’.

༧༢༤.

སུཏྭཱན ཙོརཱ ཨིསིནོ སུབྷཱསིཏཾ, ནིཀྑིཔྤ སཏྠཱནི ཙ ཨཱཝུདྷཱནི ཙ;

ཏམྷཱ ཙ ཀམྨཱ ཝིརམིཾསུ ཨེཀེ, ཨེཀེ ཙ པབྦཛྫམརོཙཡིཾསུ.

༧༢༥.

ཏེ པབྦཛིཏྭཱ སུགཏསྶ སཱསནེ, བྷཱཝེཏྭ བོཛ྄ཛྷངྒབལཱནི པཎྜིཏཱ;

ཨུདགྒཙིཏྟཱ སུམནཱ ཀཏིནྡྲིཡཱ, ཕུསིཾསུ ནིབྦཱནཔདཾ ཨསངྑཏནྟི.

…ཨདྷིམུཏྟོ ཐེརོ….

༢. པཱརཱཔརིཡཏྠེརགཱཐཱ

༧༢༦.

‘‘སམཎསྶ ¶ ཨཧུ ཙིནྟཱ, པཱརཱཔརིཡསྶ བྷིཀྑུནོ;

ཨེཀཀསྶ ནིསིནྣསྶ, པཝིཝིཏྟསྶ ཛྷཱཡིནོ.

༧༢༧.

‘‘ཀིམཱནུཔུབྦཾ པུརིསོ, ཀིཾ ཝཏཾ ཀིཾ སམཱཙཱརཾ;

ཨཏྟནོ ཀིཙྩཀཱརཱིསྶ, ན ཙ ཀཉྩི ཝིཧེཋཡེ.

༧༢༨.

‘‘ཨིནྡྲིཡཱནི ¶ མནུསྶཱནཾ, ཧིཏཱཡ ཨཧིཏཱཡ ཙ;

ཨརཀྑིཏཱནི ཨཧིཏཱཡ, རཀྑིཏཱནི ཧིཏཱཡ ཙ.

༧༢༩.

‘‘ཨིནྡྲིཡཱནེཝ སཱརཀྑཾ, ཨིནྡྲིཡཱནི ཙ གོཔཡཾ;

ཨཏྟནོ ཀིཙྩཀཱརཱིསྶ, ན ཙ ཀཉྩི ཝིཧེཋཡེ.

༧༣༠.

‘‘ཙཀྑུནྡྲིཡཾ ¶ ཙེ རཱུཔེསུ, གཙྪནྟཾ ཨནིཝཱརཡཾ;

ཨནཱདཱིནཝདསྶཱཝཱི, སོ དུཀྑཱ ན ཧི མུཙྩཏི.

༧༣༡.

‘‘སོཏིནྡྲིཡཾ ཙེ སདྡེསུ, གཙྪནྟཾ ཨནིཝཱརཡཾ;

ཨནཱདཱིནཝདསྶཱཝཱི, སོ དུཀྑཱ ན ཧི མུཙྩཏི.

༧༣༢.

‘‘ཨནིསྶརཎདསྶཱཝཱི ¶ , གནྡྷེ ཙེ པཊིསེཝཏི;

ན སོ མུཙྩཏི དུཀྑམྷཱ, གནྡྷེསུ ཨདྷིམུཙྪིཏོ.

༧༣༣.

‘‘ཨམྦིལཾ མདྷུརགྒཉྩ, ཏིཏྟཀགྒམནུསྶརཾ;

རསཏཎྷཱཡ གདྷིཏོ, ཧདཡཾ ནཱཝབུཛ྄ཛྷཏི.

༧༣༤.

‘‘སུབྷཱནྱཔྤཊིཀཱུལཱནི, ཕོཊྛབྦཱནི ཨནུསྶརཾ;

རཏྟོ རཱགཱདྷིཀརཎཾ, ཝིཝིདྷཾ ཝིནྡཏེ དུཁཾ.

༧༣༥.

‘‘མནཾ ཙེཏེཧི དྷམྨེཧི, ཡོ ན སཀྐོཏི རཀྑིཏུཾ;

ཏཏོ ¶ ནཾ དུཀྑམནྭེཏི, སབྦེཧེཏེཧི པཉྩཧི.

༧༣༦.

‘‘པུབྦལོཧིཏསམྤུཎྞཾ, བཧུསྶ ཀུཎཔསྶ ཙ;

ནརཝཱིརཀཏཾ ཝགྒུཾ, སམུགྒམིཝ ཙིཏྟིཏཾ.

༧༣༧.

‘‘ཀཊུཀཾ མདྷུརསྶཱདཾ, པིཡནིབནྡྷནཾ དུཁཾ;

ཁུརཾཝ མདྷུནཱ ལིཏྟཾ, ཨུལླིཧཾ ནཱཝབུཛ྄ཛྷཏི.

༧༣༨.

‘‘ཨིཏྠིརཱུཔེ ཨིཏྠིསརེ, ཕོཊྛབྦེཔི ཙ ཨིཏྠིཡཱ;

ཨིཏྠིགནྡྷེསུ སཱརཏྟོ, ཝིཝིདྷཾ ཝིནྡཏེ དུཁཾ.

༧༣༩.

‘‘ཨིཏྠིསོཏཱནི སབྦཱནི, སནྡནྟི པཉྩ པཉྩསུ;

ཏེསམཱཝརཎཾ ཀཱཏུཾ, ཡོ སཀྐོཏི ཝཱིརིཡཝཱ.

༧༤༠.

‘‘སོ ཨཏྠཝཱ སོ དྷམྨཊྛོ, སོ དཀྑོ སོ ཝིཙཀྑཎོ;

ཀརེཡྻ རམམཱནོཔི, ཀིཙྩཾ དྷམྨཏྠསཾཧིཏཾ.

༧༤༡.

‘‘ཨཐོ ¶ སཱིདཏི སཉྙུཏྟཾ, ཝཛྫེ ཀིཙྩཾ ནིརཏྠཀཾ;

‘ན ཏཾ ཀིཙྩ’ནྟི མཉྙིཏྭཱ, ཨཔྤམཏྟོ ཝིཙཀྑཎོ.

༧༤༢.

‘‘ཡཉྩ ཨཏྠེན སཉྙུཏྟཾ, ཡཱ ཙ དྷམྨགཏཱ རཏི;

ཏཾ སམཱདཱཡ ཝཏྟེཐ, སཱ ཧི ཝེ ཨུཏྟམཱ རཏི.

༧༤༣.

‘‘ཨུཙྩཱཝཙེཧུཔཱཡེཧི, པརེསམབྷིཛིགཱིསཏི;

ཧནྟྭཱ ཝདྷིཏྭཱ ཨཐ སོཙཡིཏྭཱ, ཨཱལོཔཏི སཱཧསཱ ཡོ པརེསཾ.

༧༤༤.

‘‘ཏཙྪནྟོ ཨཱཎིཡཱ ཨཱཎིཾ, ནིཧནྟི བལཝཱ ཡཐཱ;

ཨིནྡྲིཡཱནིནྡྲིཡེཧེཝ ¶ , ནིཧནྟི ཀུསལོ ཏཐཱ.

༧༤༥.

‘‘སདྡྷཾ ¶ ཝཱིརིཡཾ སམཱདྷིཉྩ, སཏིཔཉྙཉྩ བྷཱཝཡཾ;

པཉྩ པཉྩཧི ཧནྟྭཱན, ཨནཱིགྷོ ཡཱཏི བྲཱཧྨཎོ.

༧༤༦.

‘‘སོ ཨཏྠཝཱ སོ དྷམྨཊྛོ, ཀཏྭཱ ཝཱཀྱཱནུསཱསནིཾ;

སབྦེན སབྦཾ བུདྡྷསྶ, སོ ནརོ སུཁམེདྷཏཱི’’ཏི.

…པཱརཱཔརིཡོ ཐེརོ….

༣. ཏེལཀཱནིཏྠེརགཱཐཱ

༧༤༧.

‘‘ཙིརརཏྟཾ ཝཏཱཏཱཔཱི, དྷམྨཾ ཨནུཝིཙིནྟཡཾ;

སམཾ ཙིཏྟསྶ ནཱལཏྠཾ, པུཙྪཾ སམཎབྲཱཧྨཎེ.

༧༤༨.

‘‘‘ཀོ ¶ སོ པཱརངྒཏོ ལོཀེ, ཀོ པཏྟོ ཨམཏོགདྷཾ;

ཀསྶ དྷམྨཾ པཊིཙྪཱམི, པརམཏྠཝིཛཱནནཾ’.

༧༤༩.

‘‘ཨནྟོཝངྐགཏོ ཨཱསི, མཙྪོཝ གྷསམཱམིསཾ;

བདྡྷོ མཧིནྡཔཱསེན, ཝེཔཙིཏྱསུརོ ཡཐཱ.

༧༥༠.

‘‘ཨཉྪཱམི ནཾ ན མུཉྩཱམི, ཨསྨཱ སོཀཔརིདྡཝཱ;

ཀོ མེ བནྡྷཾ མུཉྩཾ ལོཀེ, སམྦོདྷིཾ ཝེདཡིསྶཏི.

༧༥༡.

‘‘སམཎཾ བྲཱཧྨཎཾ ཝཱ ཀཾ, ཨཱདིསནྟཾ པབྷངྒུནཾ.

ཀསྶ དྷམྨཾ པཊིཙྪཱམི, ཛརཱམཙྩུཔཝཱཧནཾ.

༧༥༢.

‘‘ཝིཙིཀིཙྪཱཀངྑཱགནྠིཏཾ, སཱརམྦྷབལསཉྙུཏཾ;

ཀོདྷཔྤཏྟམནཏྠདྡྷཾ, ཨབྷིཛཔྤཔྤདཱརཎཾ.

༧༥༣.

‘‘ཏཎྷཱདྷནུསམུཊྛཱནཾ ¶ , དྭེ ཙ པནྣརསཱཡུཏཾ [དྭེདྷཱཔནྣརསཱཡུཏཾ (?)];

པསྶ ¶ ཨོརསིཀཾ བཱལ༹ྷཾ, བྷེཏྭཱན ཡདི [ཡད (སཱི. ཨཊྛ.) ཧདི (?) ‘‘ཧདཡེ’’ཏི ཏཾསཾཝཎྞནཱ] ཏིཊྛཏི.

༧༥༤.

‘‘ཨནུདིཊྛཱིནཾ ཨཔྤཧཱནཾ, སངྐཔྤཔརཏེཛིཏཾ;

ཏེན ཝིདྡྷོ པཝེདྷཱམི, པཏྟཾཝ མཱལུཏེརིཏཾ.

༧༥༥.

‘‘ཨཛ྄ཛྷཏྟཾ མེ སམུཊྛཱཡ, ཁིཔྤཾ པཙྩཏི མཱམཀཾ;

ཚཕསྶཱཡཏནཱི ཀཱཡོ, ཡཏྠ སརཏི སབྦདཱ.

༧༥༦.

‘‘ཏཾ ན པསྶཱམི ཏེཀིཙྪཾ, ཡོ མེཏཾ སལླམུདྡྷརེ;

ནཱནཱརཛྫེན སཏྠེན [ནཱརགྒེན ན སཏྠེན (?)], ནཱཉྙེན ཝིཙིཀིཙྪིཏཾ.

༧༥༧.

‘‘ཀོ མེ ཨསཏྠོ ཨཝཎོ, སལླམབྦྷནྟརཔསྶཡཾ;

ཨཧིཾསཾ སབྦགཏྟཱནི, སལླཾ མེ ཨུདྡྷརིསྶཏི.

༧༥༨.

‘‘དྷམྨཔྤཏི ¶ ཧི སོ སེཊྛོ, ཝིསདོསཔྤཝཱཧཀོ;

གམྦྷཱིརེ པཏིཏསྶ མེ, ཐལཾ པཱཎིཉྩ དསྶཡེ.

༧༥༩.

‘‘རཧདེཧམསྨི ཨོགཱལ༹ྷོ, ཨཧཱརིཡརཛམཏྟིཀེ;

མཱཡཱཨུསཱུཡསཱརམྦྷ, ཐིནམིདྡྷམཔཏྠཊེ.

༧༦༠.

‘‘ཨུདྡྷཙྩམེགྷཐནིཏཾ, སཾཡོཛནཝལཱཧཀཾ;

ཝཱཧཱ ཝཧནྟི ཀུདྡིཊྛིཾ [དུདྡིཊྛིཾ (སཱི. དྷ. པ. ༣༣༩)], སངྐཔྤཱ རཱགནིསྶིཏཱ.

༧༦༡.

‘‘སཝནྟི སབྦདྷི སོཏཱ, ལཏཱ ཨུབྦྷིཛྫ ཏིཊྛཏི;

ཏེ སོཏེ ཀོ ནིཝཱརེཡྻ, ཏཾ ལཏཾ ཀོ ཧི ཚེཙྪཏི.

༧༦༢.

‘‘ཝེལཾ ¶ ཀརོཐ བྷདྡནྟེ, སོཏཱནཾ སནྣིཝཱརཎཾ;

མཱ ཏེ མནོམཡོ སོཏོ, རུཀྑཾཝ སཧསཱ ལུཝེ.

༧༦༣.

‘‘ཨེཝཾ ¶ མེ བྷཡཛཱཏསྶ, ཨཔཱརཱ པཱརམེསཏོ;

ཏཱཎོ པཉྙཱཝུདྷོ སཏྠཱ, ཨིསིསངྒྷནིསེཝིཏོ.

༧༦༤.

‘‘སོཔཱཎཾ སུགཏཾ སུདྡྷཾ, དྷམྨསཱརམཡཾ དལ༹ྷཾ;

པཱདཱསི ཝུཡ྄ཧམཱནསྶ, ‘མཱ བྷཱཡཱི’ཏི ཙ མབྲཝི.

༧༦༥.

‘‘སཏིཔཊྛཱནཔཱསཱདཾ, ཨཱརུཡ྄ཧ པཙྩཝེཀྑིསཾ;

ཡཾ ཏཾ པུབྦེ ཨམཉྙིསྶཾ, སཀྐཱཡཱབྷིརཏཾ པཛཾ.

༧༦༦.

‘‘ཡདཱ ¶ ཙ མགྒམདྡཀྑིཾ, ནཱཝཱཡ ཨབྷིརཱུཧནཾ;

ཨནདྷིཊྛཱཡ ཨཏྟཱནཾ, ཏིཏྠམདྡཀྑིམུཏྟམཾ.

༧༦༧.

‘‘སལླཾ ཨཏྟསམུཊྛཱནཾ, བྷཝནེཏྟིཔྤབྷཱཝིཏཾ;

ཨེཏེསཾ ཨཔྤཝཏྟཱཡ [ཨཔྤཝཏྟིཡཱ (?)], དེསེསི མགྒམུཏྟམཾ.

༧༦༨.

‘‘དཱིགྷརཏྟཱནུསཡིཏཾ, ཙིརརཏྟམདྷིཊྛིཏཾ;

བུདྡྷོ མེཔཱནུདཱི གནྠཾ, ཝིསདོསཔྤཝཱཧནོ’’ཏི.

…ཏེལཀཱནི ཐེརོ….

༤. རཊྛཔཱལཏྠེརགཱཐཱ

༧༦༩.

[མ. ནི. ༢.༣༠༢] ‘‘པསྶ ཙིཏྟཀཏཾ བིམྦཾ, ཨརུཀཱཡཾ སམུསྶིཏཾ;

ཨཱཏུརཾ བཧུསངྐཔྤཾ, ཡསྶ ནཏྠི དྷུཝཾ ཋིཏི.

༧༧༠.

‘‘པསྶ ཙིཏྟཀཏཾ རཱུཔཾ, མཎིནཱ ཀུཎྜལེན ཙ;

ཨཊྛིཾ ཏཙེན ཨོནདྡྷཾ, སཧ ཝཏྠེཧི སོབྷཏི.

༧༧༡.

‘‘ཨལཏྟཀཀཏཱ ¶ པཱདཱ, མུཁཾ ཙུཎྞཀམཀྑིཏཾ;

ཨལཾ བཱལསྶ མོཧཱཡ, ནོ ཙ པཱརགཝེསིནོ.

༧༧༢.

‘‘ཨཊྛཔདཀཏཱ ¶ ཀེསཱ, ནེཏྟཱ ཨཉྫནམཀྑིཏཱ;

ཨལཾ བཱལསྶ མོཧཱཡ, ནོ ཙ པཱརགཝེསིནོ.

༧༧༣.

‘‘ཨཉྫནཱིཝ ནཝཱ ཙིཏྟཱ, པཱུཏིཀཱཡོ ཨལངྐཏོ;

ཨལཾ བཱལསྶ མོཧཱཡ, ནོ ཙ པཱརགཝེསིནོ.

༧༧༤.

‘‘ཨོདཧི མིགཝོ པཱསཾ, ནཱསདཱ ཝཱགུརཾ མིགོ;

བྷུཏྭཱ ནིཝཱཔཾ གཙྪཱམ, ཀནྡནྟེ མིགབནྡྷཀེ.

༧༧༥.

‘‘ཚིནྣོ པཱསོ མིགཝསྶ, ནཱསདཱ ཝཱགུརཾ མིགོ;

བྷུཏྭཱ ནིཝཱཔཾ གཙྪཱམ, སོཙནྟེ མིགལུདྡཀེ.

༧༧༦.

‘‘པསྶཱམི ལོཀེ སདྷནེ མནུསྶེ, ལདྡྷཱན ཝིཏྟཾ ན དདནྟི མོཧཱ;

ལུདྡྷཱ ¶ དྷནཾ སནྣིཙཡཾ ཀརོནྟི, བྷིཡྻོཝ ཀཱམེ ཨབྷིཔཏྠཡནྟི.

༧༧༧.

‘‘རཱཛཱ ¶ པསཡ྄ཧཔྤཐཝིཾ ཝིཛེཏྭཱ, སསཱགརནྟཾ མཧིམཱཝསནྟོ;

ཨོརཾ སམུདྡསྶ ཨཏིཏྟརཱུཔོ, པཱརཾ སམུདྡསྶཔི པཏྠཡེཐ.

༧༧༨.

‘‘རཱཛཱ ཙ ཨཉྙེ ཙ བཧཱུ མནུསྶཱ, ཨཝཱིཏཏཎྷཱ མརཎཾ ཨུཔེནྟི;

ཨཱུནཱཝ ཧུཏྭཱན ཛཧནྟི དེཧཾ, ཀཱམེཧི ལོཀམྷི ན ཧཏྠི ཏིཏྟི.

༧༧༩.

‘‘ཀནྡནྟི ¶ ནཾ ཉཱཏཱི པཀིརིཡ ཀེསེ, ཨཧོ ཝཏཱ ནོ ཨམརཱཏི ཙཱཧུ;

ཝཏྠེན ནཾ པཱརུཏཾ ནཱིཧརིཏྭཱ, ཙིཏཾ སམོདྷཱཡ ཏཏོ ཌཧནྟི.

༧༨༠.

‘‘སོ ཌཡ྄ཧཏི སཱུལེཧི ཏུཛྫམཱནོ, ཨེཀེན ཝཏྠེན [ཨེཏེན གཏྠེན (ཀ.)] པཧཱཡ བྷོགེ;

ན མཱིཡམཱནསྶ བྷཝནྟི ཏཱཎཱ, ཉཱཏཱི ཙ མིཏྟཱ ཨཐ ཝཱ སཧཱཡཱ.

༧༨༡.

‘‘དཱཡཱདཀཱ ཏསྶ དྷནཾ ཧརནྟི, སཏྟོ པན གཙྪཏི ཡེན ཀམྨཾ;

ན མཱིཡམཱནཾ དྷནམནྭེཏི [མནྭིཏི (ཀ.)] ཀིཉྩི, པུཏྟཱ ཙ དཱརཱ ཙ དྷནཉྩ རཊྛཾ.

༧༨༢.

‘‘ན དཱིགྷམཱཡུཾ ལབྷཏེ དྷནེན, ན ཙཱཔི ཝིཏྟེན ཛརཾ ཝིཧནྟི;

ཨཔྤཔྤཾ ཧིདཾ ཛཱིཝིཏམཱཧུ དྷཱིརཱ, ཨསསྶཏཾ ཝིཔྤརིཎཱམདྷམྨཾ.

༧༨༣.

‘‘ཨཌྜྷཱ དལིདྡཱ ཙ ཕུསནྟི ཕསྶཾ, བཱལོ ཙ དྷཱིརོ ཙ ཏཐེཝ ཕུཊྛོ;

བཱལོ ཧི བཱལྱཱ ཝདྷིཏོཝ སེཏི, དྷཱིརོ ¶ ཙ ནོ ཝེདྷཏི ཕསྶཕུཊྛོ.

༧༨༤.

‘‘ཏསྨཱ ¶ ཧི པཉྙཱཝ དྷནེན སེཡྻཱ, ཡཱཡ ཝོསཱནམིདྷཱདྷིགཙྪཏི;

ཨབྱོསིཏཏྟཱ ཧི བྷཝཱབྷཝེསུ, པཱཔཱནི ཀམྨཱནི ཀརོཏི མོཧཱ.

༧༨༥.

‘‘ཨུཔེཏི ¶ གབྦྷཉྩ པརཉྩ ལོཀཾ, སཾསཱརམཱཔཛྫ པརམྤརཱཡ;

ཏསྶཔྤཔཉྙོ ཨབྷིསདྡཧནྟོ, ཨུཔེཏི གབྦྷཉྩ པརཉྩ ལོཀཾ.

༧༨༦.

‘‘ཙོརོ ¶ ཡཐཱ སནྡྷིམུཁེ གཧཱིཏོ, སཀམྨུནཱ ཧཉྙཏི པཱཔདྷམྨོ;

ཨེཝཾ པཛཱ པེཙྩ པརམྷི ལོཀེ, སཀམྨུནཱ ཧཉྙཏི པཱཔདྷམྨོ.

༧༨༧.

‘‘ཀཱམཱ ཧི ཙིཏྲཱ མདྷུརཱ མནོརམཱ, ཝིརཱུཔརཱུཔེན མཐེནྟི ཙིཏྟཾ;

ཨཱདཱིནཝཾ ཀཱམགུཎེསུ དིསྭཱ, ཏསྨཱ ཨཧཾ པབྦཛིཏོམྷི རཱཛ.

༧༨༨.

‘‘དུམཔྥལཱནཱིཝ པཏནྟི མཱཎཝཱ, དཧརཱ ཙ ཝུཌྜྷཱ ཙ སརཱིརབྷེདཱ;

ཨེཏམྤི ¶ དིསྭཱ པབྦཛིཏོམྷི རཱཛ, ཨཔཎྞཀཾ སཱམཉྙམེཝ སེཡྻོ.

༧༨༩.

‘‘སདྡྷཱཡཱཧཾ པབྦཛིཏོ, ཨུཔེཏོ ཛིནསཱསནེ;

ཨཝཛ྄ཛྷཱ མཡ྄ཧཾ པབྦཛྫཱ, ཨནཎོ བྷུཉྫཱམི བྷོཛནཾ.

༧༩༠.

‘‘ཀཱམེ ཨཱདིཏྟཏོ དིསྭཱ, ཛཱཏརཱུཔཱནི སཏྠཏོ;

གབྦྷཝོཀྐནྟིཏོ དུཀྑཾ, ནིརཡེསུ མཧབྦྷཡཾ.

༧༩༡.

‘‘ཨེཏམཱདཱིནཝཾ ཉཏྭཱ, སཾཝེགཾ ཨལབྷིཾ ཏདཱ;

སོཧཾ ཝིདྡྷོ ཏདཱ སནྟོ, སམྤཏྟོ ཨཱསཝཀྑཡཾ.

༧༩༢.

‘‘པརིཙིཎྞོ མཡཱ སཏྠཱ, ཀཏཾ བུདྡྷསྶ སཱསནཾ;

ཨོཧིཏོ གརུཀོ བྷཱརོ, བྷཝནེཏྟི སམཱུཧཏཱ.

༧༩༣.

‘‘ཡསྶཏྠཱཡ པབྦཛིཏོ, ཨགཱརསྨཱནགཱརིཡཾ;

སོ མེ ཨཏྠོ ཨནུཔྤཏྟོ, སབྦསཾཡོཛནཀྑཡོ’’ཏི.

… རཊྛཔཱལོ ཐེརོ….

༥. མཱལུཀྱཔུཏྟཏྠེརགཱཐཱ

༧༩༤.

[སཾ. ནི. ༤.༩༥] ‘‘རཱུཔཾ ¶ དིསྭཱ སཏི མུཊྛཱ, པིཡཾ ནིམིཏྟཾ མནསི ཀརོཏོ;

སཱརཏྟཙིཏྟོ ཝེདེཏི, ཏཉྩ ཨཛ྄ཛྷོསྶ ཏིཊྛཏི.

༧༩༥.

‘‘ཏསྶ ¶ ཝཌྜྷནྟི ཝེདནཱ, ཨནེཀཱ རཱུཔསམྦྷཝཱ;

ཨབྷིཛ྄ཛྷཱ ཙ ཝིཧེསཱ ཙ, ཙིཏྟམསྶཱུཔཧཉྙཏི;

ཨེཝམཱཙིནཏོ དུཀྑཾ, ཨཱརཱ ནིབྦཱན [ནིབྦཱནཾ (སཱི.)] ཝུཙྩཏི.

༧༩༦.

‘‘སདྡཾ སུཏྭཱ སཏི མུཊྛཱ, པིཡཾ ནིམིཏྟཾ མནསི ཀརོཏོ;

སཱརཏྟཙིཏྟོ ཝེདེཏི, ཏཉྩ ཨཛ྄ཛྷོསྶ ཏིཊྛཏི.

༧༩༧.

‘‘ཏསྶ ཝཌྜྷནྟི ཝེདནཱ, ཨནེཀཱ སདྡསམྦྷཝཱ;

ཨབྷིཛ྄ཛྷཱ ཙ ཝིཧེསཱ ཙ, ཙིཏྟམསྶཱུཔཧཉྙཏི;

ཨེཝམཱཙིནཏོ དུཀྑཾ, ཨཱརཱ ནིབྦཱན ཝུཙྩཏི.

༧༩༨.

‘‘གནྡྷཾ གྷཏྭཱ སཏི མུཊྛཱ, པིཡཾ ནིམིཏྟཾ མནསི ཀརོཏོ;

སཱརཏྟཙིཏྟོ ཝེདེཏི, ཏཉྩ ཨཛ྄ཛྷོསྶ ཏིཊྛཏི.

༧༩༩.

‘‘ཏསྶ ¶ ཝཌྜྷནྟི ཝེདནཱ, ཨནེཀཱ གནྡྷསམྦྷཝཱ;

ཨབྷིཛ྄ཛྷཱ ཙ ཝིཧེསཱ ཙ, ཙིཏྟམསྶཱུཔཧཉྙཏི;

ཨེཝམཱཙིནཏོ དུཀྑཾ, ཨཱརཱ ནིབྦཱན ཝུཙྩཏི.

༨༠༠.

‘‘རསཾ བྷོཏྭཱ སཏི མུཊྛཱ, པིཡཾ ནིམིཏྟཾ མནསི ཀརོཏོ;

སཱརཏྟཙིཏྟོ ཝེདེཏི, ཏཉྩ ཨཛ྄ཛྷོསྶ ཏིཊྛཏི.

༨༠༡.

‘‘ཏསྶ ¶ ཝཌྜྷནྟི ཝེདནཱ, ཨནེཀཱ རསསམྦྷཝཱ;

ཨབྷིཛ྄ཛྷཱ ཙ ཝིཧེསཱ ཙ, ཙིཏྟམསྶཱུཔཧཉྙཏི;

ཨེཝམཱཙིནཏོ དུཀྑཾ, ཨཱརཱ ནིབྦཱན ཝུཙྩཏི.

༨༠༢.

‘‘ཕསྶཾ ¶ ཕུསྶ སཏི མུཊྛཱ, པིཡཾ ནིམིཏྟཾ མནསི ཀརོཏོ;

སཱརཏྟཙིཏྟོ ཝེདེཏི, ཏཉྩ ཨཛ྄ཛྷོསྶ ཏིཊྛཏི.

༨༠༣.

‘‘ཏསྶ ཝཌྜྷནྟི ཝེདནཱ, ཨནེཀཱ ཕསྶསམྦྷཝཱ;

ཨབྷིཛ྄ཛྷཱ ཙ ཝིཧེསཱ ཙ, ཙིཏྟམསྶཱུཔཧཉྙཏི;

ཨེཝམཱཙིནཏོ དུཀྑཾ, ཨཱརཱ ནིབྦཱན ཝུཙྩཏི.

༨༠༤.

‘‘དྷམྨཾ ཉཏྭཱ སཏི མུཊྛཱ, པིཡཾ ནིམིཏྟཾ མནསི ཀརོཏོ;

སཱརཏྟཙིཏྟོ ཝེདེཏི, ཏཉྩ ཨཛ྄ཛྷོསྶ ཏིཊྛཏི.

༨༠༥.

‘‘ཏསྶ ¶ ཝཌྜྷནྟི ཝེདནཱ, ཨནེཀཱ དྷམྨསམྦྷཝཱ;

ཨབྷིཛ྄ཛྷཱ ཙ ཝིཧེསཱ ཙ, ཙིཏྟམསྶཱུཔཧཉྙཏི;

ཨེཝམཱཙིནཏོ དུཀྑཾ, ཨཱརཱ ནིབྦཱན ཝུཙྩཏི.

༨༠༦.

‘‘ན སོ རཛྫཏི རཱུཔེསུ, རཱུཔཾ དིསྭཱ པཏིསྶཏོ;

ཝིརཏྟཙིཏྟོ ཝེདེཏི, ཏཉྩ ནཱཛ྄ཛྷོསྶ ཏིཊྛཏི.

༨༠༧.

‘‘ཡཐཱསྶ པསྶཏོ རཱུཔཾ, སེཝཏོ ཙཱཔི ཝེདནཾ;

ཁཱིཡཏི ནོཔཙཱིཡཏི, ཨེཝཾ སོ ཙརཏཱི སཏོ;

ཨེཝཾ ཨཔཙིནཏོ དུཀྑཾ, སནྟིཀེ ནིབྦཱན ཝུཙྩཏི.

༨༠༨.

‘‘ན སོ རཛྫཏི སདྡེསུ, སདྡཾ སུཏྭཱ པཏིསྶཏོ;

ཝིརཏྟཙིཏྟོ ཝེདེཏི, ཏཉྩ ནཱཛ྄ཛྷོསྶ ཏིཊྛཏི.

༨༠༩.

‘‘ཡཐཱསྶ སུཎཏོ སདྡཾ, སེཝཏོ ཙཱཔི ཝེདནཾ;

ཁཱིཡཏི ནོཔཙཱིཡཏི, ཨེཝཾ སོ ཙརཏཱི སཏོ;

ཨེཝཾ ཨཔཙིནཏོ དུཀྑཾ, སནྟིཀེ ནིབྦཱན ཝུཙྩཏི.

༨༡༠.

‘‘ན སོ རཛྫཏི གནྡྷེསུ, གནྡྷཾ གྷཏྭཱ པཏིསྶཏོ;

ཝིརཏྟཙིཏྟོ ཝེདེཏི, ཏཉྩ ནཱཛ྄ཛྷོསྶ ཏིཊྛཏི.

༨༡༡.

‘‘ཡཐཱསྶ ¶ གྷཱཡཏོ གནྡྷཾ, སེཝཏོ ཙཱཔི ཝེདནཾ;

ཁཱིཡཏི ནོཔཙཱིཡཏི, ཨེཝཾ སོ ཙརཏཱི སཏོ;

ཨེཝཾ ཨཔཙིནཏོ དུཀྑཾ, སནྟིཀེ ནིབྦཱན ཝུཙྩཏི.

༨༡༢.

‘‘ན ¶ སོ རཛྫཏི རསེསུ, རསཾ བྷོཏྭཱ པཏིསྶཏོ;

ཝིརཏྟཙིཏྟོ ཝེདེཏི, ཏཉྩ ནཱཛ྄ཛྷོསྶ ཏིཊྛཏི.

༨༡༣.

‘‘ཡཐཱསྶ སཱཡརཏོ རསཾ, སེཝཏོ ཙཱཔི ཝེདནཾ;

ཁཱིཡཏི ནོཔཙཱིཡཏི, ཨེཝཾ སོ ཙརཏཱི སཏོ;

ཨེཝཾ ཨཔཙིནཏོ དུཀྑཾ, སནྟིཀེ ནིབྦཱན ཝུཙྩཏི.

༨༡༤.

‘‘ན སོ རཛྫཏི ཕསྶེསུ, ཕསྶཾ ཕུསྶ པཏིསྶཏོ;

ཝིརཏྟཙིཏྟོ ཝེདེཏི, ཏཉྩ ནཱཛ྄ཛྷོསྶ ཏིཊྛཏི.

༨༡༥.

‘‘ཡཐཱསྶ ཕུསཏོ ཕསྶཾ, སེཝཏོ ཙཱཔི ཝེདནཾ;

ཁཱིཡཏི ནོཔཙཱིཡཏི, ཨེཝཾ སོ ཙརཏཱི སཏོ;

ཨེཝཾ ཨཔཙིནཏོ དུཀྑཾ, སནྟིཀེ ནིབྦཱན ཝུཙྩཏི.

༨༡༦.

‘‘ན སོ རཛྫཏི དྷམྨེསུ, དྷམྨཾ ཉཏྭཱ པཏིསྶཏོ;

ཝིརཏྟཙིཏྟོ ཝེདེཏི, ཏཉྩ ནཱཛ྄ཛྷོསྶ ཏིཊྛཏི.

༨༡༧.

‘‘ཡཐཱསྶ ¶ ཝིཛཱནཏོ དྷམྨཾ, སེཝཏོ ཙཱཔི ཝེདནཾ;

ཁཱིཡཏི ནོཔཙཱིཡཏི, ཨེཝཾ སོ ཙརཏཱི སཏོ;

ཨེཝཾ ཨཔཙིནཏོ དུཀྑཾ, སནྟིཀེ ནིབྦཱན ཝུཙྩཏི’’.

… མཱལུཀྱཔུཏྟོ ཐེརོ….

༦. སེལཏྠེརགཱཐཱ

༨༡༨.

‘‘པརིཔུཎྞཀཱཡོ སུརུཙི, སུཛཱཏོ ཙཱརུདསྶནོ;

སུཝཎྞཝཎྞོསི བྷགཝཱ, སུསུཀྐདཱཋོསི ཝཱིརིཡཝཱ [སུསུཀྐདཱཋོ ཝིརཱིཡཝཱ (སཱི.)].

༨༡༩.

‘‘ནརསྶ ཧི སུཛཱཏསྶ, ཡེ བྷཝནྟི ཝིཡཉྫནཱ;

སབྦེ ¶ ཏེ ཏཝ ཀཱཡསྨིཾ, མཧཱཔུརིསལཀྑཎཱ.

༨༢༠.

‘‘པསནྣནེཏྟོ སུམུཁོ, བྲཧཱ ཨུཛུ པཏཱཔཝཱ;

མཛ྄ཛྷེ སམཎསངྒྷསྶ, ཨཱདིཙྩོཝ ཝིརོཙསི.

༨༢༡.

‘‘ཀལྱཱཎདསྶནོ བྷིཀྑུ, ཀཉྩནསནྣིབྷཏྟཙོ;

ཀིཾ ཏེ སམཎབྷཱཝེན, ཨེཝཾ ཨུཏྟམཝཎྞིནོ.

༨༢༢.

‘‘རཱཛཱ ¶ ཨརཧསི བྷཝིཏུཾ, ཙཀྐཝཏྟཱི རཐེསབྷོ;

ཙཱཏུརནྟོ ཝིཛིཏཱཝཱི, ཛམྦུསཎྜསྶ [ཛམྦུམཎྜསྶ (ཀ.)] ཨིསྶརོ.

༨༢༣.

‘‘ཁཏྟིཡཱ བྷོགཱི རཱཛཱནོ [བྷོགཱ རཱཛཱནོ (སཱི. ཀ.), བྷོཛརཱཛཱནོ (སྱཱ.)], ཨནུཡནྟཱ བྷཝནྟི ཏེ;

རཱཛཱབྷིརཱཛཱ [རཱཛཱདྷིརཱཛཱ (སཱི. ཀ.)] མནུཛིནྡོ, རཛྫཾ ཀཱརེཧི གོཏམ’’.

༨༢༤.

‘‘རཱཛཱཧམསྨི ¶ སེལ, (སེལཱཏི བྷགཝཱ) དྷམྨརཱཛཱ ཨནུཏྟརོ;

དྷམྨེན ཙཀྐཾ ཝཏྟེམི, ཙཀྐཾ ཨཔྤཊིཝཏྟིཡཾ’’.

༨༢༥.

‘‘སམྦུདྡྷོ པཊིཛཱནཱསི, (ཨིཏི སེལོ བྲཱཧྨཎོ) དྷམྨརཱཛཱ ཨནུཏྟརོ;

‘དྷམྨེན ཙཀྐཾ ཝཏྟེམི’, ཨིཏི བྷཱསཐ གོཏམ.

༨༢༦.

‘‘ཀོ ནུ སེནཱཔཏི བྷོཏོ, སཱཝཀོ སཏྠུརནྭཡོ [ཨནྭཡོ (སཱི.)];

ཀོ ཏེཏམནུཝཏྟེཏི, དྷམྨཙཀྐཾ པཝཏྟིཏཾ’’.

༨༢༧.

‘‘མཡཱ ¶ པཝཏྟིཏཾ ཙཀྐཾ, (སེལཱཏི བྷགཝཱ) དྷམྨཙཀྐཾ ཨནུཏྟརཾ;

སཱརིཔུཏྟོ ཨནུཝཏྟེཏི, ཨནུཛཱཏོ ཏཐཱགཏཾ.

༨༢༨.

‘‘ཨབྷིཉྙེཡྻཾ ཨབྷིཉྙཱཏཾ, བྷཱཝེཏབྦཉྩ བྷཱཝིཏཾ;

པཧཱཏབྦཾ པཧཱིནཾ མེ, ཏསྨཱ བུདྡྷོསྨི བྲཱཧྨཎ.

༨༢༩.

‘‘ཝིནཡསྶུ ¶ མཡི ཀངྑཾ, ཨདྷིམུཉྩསྶུ བྲཱཧྨཎ;

དུལླབྷཾ དསྶནཾ ཧོཏི, སམྦུདྡྷཱནཾ ཨབྷིཎྷསོ.

༨༣༠.

‘‘ཡེསཾ ཝེ དུལླབྷོ ལོཀེ, པཱཏུབྷཱཝོ ཨབྷིཎྷསོ;

སོཧཾ བྲཱཧྨཎ བུདྡྷོསྨི, སལླཀཏྟོ [སལླཀནྟོ (སཱི.)] ཨནུཏྟརོ.

༨༣༡.

‘‘བྲཧྨབྷཱུཏོ ཨཏིཏུལོ, མཱརསེནཔྤམདྡནོ;

སབྦཱམིཏྟེ ཝསེ [ཝསཱི (སྱཱ. ཀ., མ. ནི. ༢.༣༩༩; སུ. ནི. ༩༦༦)] ཀཏྭཱ, མོདཱམི ཨཀུཏོབྷཡོ’’.

༨༣༢.

‘‘ཨིདཾ བྷོནྟོ ནིསཱམེཐ, ཡཐཱ བྷཱསཏི ཙཀྑུམཱ;

སལླཀཏྟོ མཧཱཝཱིརོ, སཱིཧོཝ ནདཏཱི ཝནེ.

༨༣༣.

‘‘བྲཧྨབྷཱུཏཾ ཨཏིཏུལཾ, མཱརསེནཔྤམདྡནཾ;

ཀོ དིསྭཱ ནཔྤསཱིདེཡྻ, ཨཔི ཀཎྷཱབྷིཛཱཏིཀོ.

༨༣༤.

‘‘ཡོ མཾ ཨིཙྪཏི ཨནྭེཏུ, ཡོ ཝཱ ནིཙྪཏི གཙྪཏུ;

ཨིདྷཱཧཾ པབྦཛིསྶཱམི, ཝརཔཉྙསྶ སནྟིཀེ’’.

༨༣༥.

‘‘ཨེཏཾ ཙེ རུཙྩཏི བྷོཏོ, སམྨཱསམྦུདྡྷསཱསནཾ;

མཡམྤི པབྦཛིསྶཱམ, ཝརཔཉྙསྶ སནྟིཀེ.

༨༣༦.

‘‘བྲཱཧྨཎཱ ཏིསཏཱ ཨིམེ, ཡཱཙནྟི པཉྫལཱིཀཏཱ;

‘བྲཧྨཙརིཡཾ ཙརིསྶཱམ, བྷགཝཱ ཏཝ སནྟིཀེ’’’.

༨༣༧.

‘‘སྭཱཁཱཏཾ ¶ བྲཧྨཙརིཡཾ, (སེལཱཏི བྷགཝཱ) སནྡིཊྛིཀམཀཱལིཀཾ;

ཡཏྠ ཨམོགྷཱ པབྦཛྫཱ, ཨཔྤམཏྟསྶ སིཀྑཏོ’’.

༨༣༨.

‘‘ཡཾ ¶ ཏཾ སརཎམཱགམྷ [སརཎམཱགམྨ (སབྦཏྠ)], ཨིཏོ ཨཊྛམེ [ཨཊྛམི (སྱཱ. ཀ.)] ཙཀྑུམ;

སཏྟརཏྟེན བྷགཝཱ, དནྟཱམྷ ཏཝ སཱསནེ.

༨༣༩.

‘‘ཏུཝཾ ¶ ¶ བུདྡྷོ ཏུཝཾ སཏྠཱ, ཏུཝཾ མཱརཱབྷིབྷཱུ མུནི;

ཏུཝཾ ཨནུསཡེ ཚེཏྭཱ, ཏིཎྞོ ཏཱརེསིམཾ པཛཾ.

༨༤༠.

‘‘ཨུཔདྷཱི ཏེ སམཏིཀྐནྟཱ, ཨཱསཝཱ ཏེ པདཱལིཏཱ;

སཱིཧོཝ ཨནུཔཱདཱནོ, པཧཱིནབྷཡབྷེརཝོ.

༨༤༡.

‘‘བྷིཀྑཝོ ཏིསཏཱ ཨིམེ, ཏིཊྛནྟི པཉྫལཱིཀཏཱ;

པཱདེ ཝཱིར པསཱརེཧི, ནཱགཱ ཝནྡནྟུ སཏྠུནོ’’ཏི.

… སེལོ ཐེརོ….

༧. ཀཱལི༹གོདྷཱཔུཏྟབྷདྡིཡཏྠེརགཱཐཱ

༨༤༢.

‘‘ཡཱཏཾ མེ ཧཏྠིགཱིཝཱཡ, སུཁུམཱ ཝཏྠཱ པདྷཱརིཏཱ;

སཱལཱིནཾ ཨོདནོ བྷུཏྟོ, སུཙིམཾསཱུཔསེཙནོ.

༨༤༣.

‘‘སོཛྫ བྷདྡོ སཱཏཏིཀོ, ཨུཉྪཱཔཏྟཱགཏེ རཏོ;

ཛྷཱཡཏི ཨནུཔཱདཱནོ, པུཏྟོ གོདྷཱཡ བྷདྡིཡོ.

༨༤༤.

‘‘པཾསུཀཱུལཱི སཱཏཏིཀོ, ཨུཉྪཱཔཏྟཱགཏེ རཏོ;

ཛྷཱཡཏི ཨནུཔཱདཱནོ, པུཏྟོ གོདྷཱཡ བྷདྡིཡོ.

༨༤༥.

‘‘པིཎྜཔཱཏཱི སཱཏཏིཀོ…པེ….

༨༤༦.

‘‘ཏེཙཱིཝརཱི སཱཏཏིཀོ…པེ….

༨༤༧.

‘‘སཔདཱནཙཱརཱི སཱཏཏིཀོ…པེ….

༨༤༨.

‘‘ཨེཀཱསནཱི སཱཏཏིཀོ…པེ….

༨༤༩.

‘‘པཏྟཔིཎྜཱི སཱཏཏིཀོ…པེ….

༨༥༠.

‘‘ཁལུཔཙྪཱབྷཏྟཱི སཱཏཏིཀོ…པེ….

༨༥༡.

‘‘ཨཱརཉྙིཀོ སཱཏཏིཀོ…པེ….

༨༥༢.

‘‘རུཀྑམཱུལིཀོ ¶ སཱཏཏིཀོ…པེ….

༨༥༣.

‘‘ཨབྦྷོཀཱསཱི སཱཏཏིཀོ…པེ….

༨༥༤.

‘‘སོསཱནིཀོ སཱཏཏིཀོ…པེ….

༨༥༥.

‘‘ཡཐཱསནྠཏིཀོ སཱཏཏིཀོ…པེ….

༨༥༦.

‘‘ནེསཛྫིཀོ ¶ ¶ སཱཏཏིཀོ…པེ….

༨༥༧.

‘‘ཨཔྤིཙྪོ སཱཏཏིཀོ…པེ….

༨༥༨.

‘‘སནྟུཊྛོ སཱཏཏིཀོ…པེ….

༨༥༩.

‘‘པཝིཝིཏྟོ སཱཏཏིཀོ…པེ….

༨༦༠.

‘‘ཨསཾསཊྛོ སཱཏཏིཀོ…པེ….

༨༦༡.

‘‘ཨཱརདྡྷཝཱིརིཡོ སཱཏཏིཀོ…པེ….

༨༦༢.

‘‘ཧིཏྭཱ སཏཔལཾ ཀཾསཾ, སོཝཎྞཾ སཏརཱཛིཀཾ;

ཨགྒཧིཾ མཏྟིཀཱཔཏྟཾ, ཨིདཾ དུཏིཡཱབྷིསེཙནཾ.

༨༦༣.

‘‘ཨུཙྩེ མཎྜལིཔཱཀཱརེ, དལ༹ྷམཊྚཱལཀོཊྛཀེ;

རཀྑིཏོ ཁགྒཧཏྠེཧི, ཨུཏྟསཾ ཝིཧརིཾ པུརེ.

༨༦༤.

‘‘སོཛྫ བྷདྡོ ཨནུཏྲཱསཱི, པཧཱིནབྷཡབྷེརཝོ;

ཛྷཱཡཏི ཝནམོགཡ྄ཧ, པུཏྟོ གོདྷཱཡ བྷདྡིཡོ.

༨༦༥.

‘‘སཱིལཀྑནྡྷེ པཏིཊྛཱཡ, སཏིཾ པཉྙཉྩ བྷཱཝཡཾ;

པཱཔུཎིཾ ཨནུཔུབྦེན, སབྦསཾཡོཛནཀྑཡ’’ནྟི.

… བྷདྡིཡོ ཀཱལི༹གོདྷཱཡ པུཏྟོ ཐེརོ….

༨. ཨངྒུལིམཱལཏྠེརགཱཐཱ

༨༦༦.

‘‘གཙྪཾ ¶ ཝདེསི སམཎ ‘ཊྛིཏོམྷི’, མམཉྩ བྲཱུསི ཋིཏམཊྛིཏོཏི;

པུཙྪཱམི ¶ ཏཾ སམཎ ཨེཏམཏྠཾ, ‘ཀཐཾ ཋིཏོ ཏྭཾ ཨཧམཊྛིཏོམྷི’’’.

༨༦༧.

‘‘ཋིཏོ ཨཧཾ ཨངྒུལིམཱལ སབྦདཱ, སབྦེསུ བྷཱུཏེསུ ནིདྷཱཡ དཎྜཾ;

ཏུཝཉྩ པཱཎེསུ ཨསཉྙཏོསི, ཏསྨཱ ཋིཏོཧཾ ཏུཝམཊྛིཏོསི’’.

༨༦༨.

‘‘ཙིརསྶཾ ཝཏ མེ མཧིཏོ མཧེསཱི, མཧཱཝནཾ སམཎོ པཙྩཔཱདི [པཙྩུཔཱདི (སབྦཏྠ)];

སོཧཾ ཙཛིསྶཱམི སཧསྶཔཱཔཾ, སུཏྭཱན གཱཐཾ ཏཝ དྷམྨཡུཏྟཾ’’.

༨༦༩.

ཨིཙྩེཝ ¶ ཙོརོ ཨསིམཱཝུདྷཉྩ, སོབྦྷེ པཔཱཏེ ནརཀེ ཨནྭཀཱསི [ཨཀིརི (མ. ནི. ༢.༣༤༩)];

ཨཝནྡི ཙོརོ སུགཏསྶ པཱདེ, ཏཏྠེཝ པབྦཛྫམཡཱཙི བུདྡྷཾ.

༨༧༠.

བུདྡྷོ ཙ ཁོ ཀཱརུཎིཀོ མཧེསི, ཡོ སཏྠཱ ལོཀསྶ སདེཝཀསྶ;

‘ཏམེཧི བྷིཀྑཱུ’ཏི ཏདཱ ཨཝོཙ, ཨེསེཝ ཏསྶ ཨཧུ བྷིཀྑུབྷཱཝོ.

༨༧༡.

‘‘ཡོ ¶ ཙ པུབྦེ པམཛྫིཏྭཱ, པཙྪཱ སོ ནཔྤམཛྫཏི;

སོམཾ ལོཀཾ པབྷཱསེཏི, ཨབྦྷཱ མུཏྟོཝ ཙནྡིམཱ.

༨༧༢.

‘‘ཡསྶ ¶ པཱཔཾ ཀཏཾ ཀམྨཾ, ཀུསལེན པིདྷཱིཡཏི [པིཐཱིཡཏི (སཱི. སྱཱ.)];

སོམཾ ལོཀཾ པབྷཱསེཏི, ཨབྦྷཱ མུཏྟོཝ ཙནྡིམཱ.

༨༧༣.

‘‘ཡོ ཧཝེ དཧརོ བྷིཀྑུ, ཡུཉྫཏི བུདྡྷསཱསནེ;

སོམཾ ལོཀཾ པབྷཱསེཏི, ཨབྦྷཱ མུཏྟོཝ ཙནྡིམཱ.

༨༧༤.

[དིསཱ ཧི (སྱཱ. ཀ., མ. ནི. ༢.༣༥༢)] ‘‘དིསཱཔི མེ དྷམྨཀཐཾ སུཎནྟུ, དིསཱཔི མེ ཡུཉྫནྟུ བུདྡྷསཱསནེ;

དིསཱཔི མེ ཏེ མནུཛེ བྷཛནྟུ, ཡེ དྷམྨམེཝཱདཔཡནྟི སནྟོ.

༨༧༥.

‘‘དིསཱ ཧི མེ ཁནྟིཝཱདཱནཾ, ཨཝིརོདྷཔྤསཾསིནཾ;

སུཎནྟུ དྷམྨཾ ཀཱལེན, ཏཉྩ ཨནུཝིདྷཱིཡནྟུ.

༨༧༦.

‘‘ན ཧི ཛཱཏུ སོ མམཾ ཧིཾསེ, ཨཉྙཾ ཝཱ པན ཀིཉྩནཾ [ཀཉྩིནཾ (སཱི. སྱཱ.), ཀཉྩནཾ (?)];

པཔྤུཡྻ པརམཾ སནྟིཾ, རཀྑེཡྻ ཏསཐཱཝརེ.

༨༧༧.

[ཐེརགཱ. ༡༩] ‘‘ཨུདཀཉྷི ¶ ནཡནྟི ནེཏྟིཀཱ, ཨུསུཀཱརཱ ནམཡནྟི [དམཡནྟི (ཀ.)] ཏེཛནཾ;

དཱརུཾ ནམཡནྟི [དམཡནྟི (ཀ.)] ཏཙྪཀཱ, ཨཏྟཱནཾ དམཡནྟི པཎྜིཏཱ.

༨༧༨.

‘‘དཎྜེནེཀེ ¶ དམཡནྟི, ཨངྐུསེབྷི ཀསཱཧི ཙ;

ཨདཎྜེན ཨསཏྠེན, ཨཧཾ དནྟོམྷི ཏཱདིནཱ.

༨༧༩.

‘‘‘ཨཧིཾསཀོ’ཏི ¶ མེ ནཱམཾ, ཧིཾསཀསྶ པུརེ སཏོ;

ཨཛྫཱཧཾ སཙྩནཱམོམྷི, ན ནཾ ཧིཾསཱམི ཀིཉྩནཾ [ཀཉྩིནཾ (སཱི. སྱཱ.), ཀཉྩནཾ (?)].

༨༨༠.

‘‘ཙོརོ ཨཧཾ པུརེ ཨཱསིཾ, ཨངྒུལིམཱལོཏི ཝིསྶུཏོ;

ཝུཡ྄ཧམཱནོ མཧོགྷེན, བུདྡྷཾ སརཎམཱགམཾ.

༨༨༡.

‘‘ལོཧིཏཔཱཎི པུརེ ཨཱསིཾ, ཨངྒུལིམཱལོཏི ཝིསྶུཏོ;

སརཎགམནཾ པསྶ, བྷཝནེཏྟི སམཱུཧཏཱ.

༨༨༢.

‘‘ཏཱདིསཾ ཀམྨཾ ཀཏྭཱན, བཧུཾ དུགྒཏིགཱམིནཾ;

ཕུཊྛོ ཀམྨཝིཔཱཀེན, ཨནཎོ བྷུཉྫཱམི བྷོཛནཾ.

༨༨༣.

‘‘པམཱདམནུཡུཉྫནྟི, བཱལཱ དུམྨེདྷིནོ ཛནཱ;

ཨཔྤམཱདཉྩ མེདྷཱཝཱི, དྷནཾ སེཊྛཾཝ རཀྑཏི.

༨༨༤.

‘‘མཱ པམཱདམནུཡུཉྫེཐ, མཱ ཀཱམརཏིསནྠཝཾ [སནྡྷཝཾ (ཀ.)];

ཨཔྤམཏྟོ ཧི ཛྷཱཡནྟོ, པཔྤོཏི པརམཾ སུཁཾ.

༨༨༥.

‘‘སྭཱགཏཾ ནཱཔགཏཾ, ནེཏཾ དུམྨནྟིཏཾ མམ;

སཝིབྷཏྟེསུ དྷམྨེསུ, ཡཾ སེཊྛཾ ཏདུཔཱགམཾ.

༨༨༦.

‘‘སྭཱགཏཾ ནཱཔགཏཾ, ནེཏཾ དུམྨནྟིཏཾ མམ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ.

༨༨༧.

‘‘ཨརཉྙེ ¶ རུཀྑམཱུལེ ཝཱ, པབྦཏེསུ གུཧཱསུ ཝཱ;

ཏཏྠ ཏཏྠེཝ ཨཊྛཱསིཾ, ཨུབྦིགྒམནསོ ཏདཱ.

༨༨༨.

‘‘སུཁཾ སཡཱམི ཋཱཡཱམི, སུཁཾ ཀཔྤེམི ཛཱིཝིཏཾ;

ཨཧཏྠཔཱསོ མཱརསྶ, ཨཧོ སཏྠཱནུཀམྤིཏོ.

༨༨༩.

‘‘བྲཧྨཛཙྩོ ¶ པུརེ ཨཱསིཾ, ཨུདིཙྩོ ཨུབྷཏོ ཨཧུ;

སོཛྫ པུཏྟོ སུགཏསྶ, དྷམྨརཱཛསྶ སཏྠུནོ.

༨༩༠.

‘‘ཝཱིཏཏཎྷོ ཨནཱདཱནོ, གུཏྟདྭཱརོ སུསཾཝུཏོ;

ཨགྷམཱུལཾ ཝདྷིཏྭཱན, པཏྟོ མེ ཨཱསཝཀྑཡོ.

༨༩༡.

‘‘པརིཙིཎྞོ ¶ མཡཱ སཏྠཱ, ཀཏཾ བུདྡྷསྶ སཱསནཾ;

ཨོཧིཏོ གརུཀོ བྷཱརོ, བྷཝནེཏྟི སམཱུཧཏཱ’’ཏི.

… ཨངྒུལིམཱལོ ཐེརོ….

༩. ཨནུརུདྡྷཏྠེརགཱཐཱ

༨༩༢.

‘‘པཧཱཡ ¶ མཱཏཱཔིཏརོ, བྷགིནཱི ཉཱཏིབྷཱཏརོ;

པཉྩ ཀཱམགུཎེ ཧིཏྭཱ, ཨནུརུདྡྷོཝ ཛྷཱཡཏུ.

༨༩༣.

‘‘སམེཏོ ནཙྩགཱིཏེཧི, སམྨཏཱལ༹པྤབོདྷནོ;

ན ཏེན སུདྡྷིམཛ྄ཛྷགཾ [སུདྡྷམཛ྄ཛྷགཱ (སཱི. ཀ.), སུདྡྷིམཛ྄ཛྷགམཱ (སྱཱ.)], མཱརསྶ ཝིསཡེ རཏོ.

༨༩༤.

‘‘ཨེཏཉྩ སམཏིཀྐམྨ, རཏོ བུདྡྷསྶ སཱསནེ;

སབྦོགྷཾ སམཏིཀྐམྨ, ཨནུརུདྡྷོཝ ཛྷཱཡཏི.

༨༩༥.

‘‘རཱུཔཱ སདྡཱ རསཱ གནྡྷཱ, ཕོཊྛབྦཱ ཙ མནོརམཱ;

ཨེཏེ ཙ སམཏིཀྐམྨ, ཨནུརུདྡྷོཝ ཛྷཱཡཏི.

༨༩༦.

‘‘པིཎྜཔཱཏཔཊིཀྐནྟོ, ཨེཀོ ཨདུཏིཡོ མུནི;

ཨེསཏི པཾསུཀཱུལཱནི, ཨནུརུདྡྷོ ཨནཱསཝོ.

༨༩༧.

‘‘ཝིཙིནཱི ཨགྒཧཱི དྷོཝི, རཛཡཱི དྷཱརཡཱི མུནི;

པཾསུཀཱུལཱནི མཏིམཱ, ཨནུརུདྡྷོ ཨནཱསཝོ.

༨༩༨.

‘‘མཧིཙྪོ ¶ ཙ ཨསནྟུཊྛོ, སཾསཊྛོ ཡོ ཙ ཨུདྡྷཏོ;

ཏསྶ དྷམྨཱ ཨིམེ ཧོནྟི, པཱཔཀཱ སཾཀིལེསིཀཱ.

༨༩༩.

‘‘སཏོ ཙ ཧོཏི ཨཔྤིཙྪོ, སནྟུཊྛོ ཨཝིགྷཱཏཝཱ;

པཝིཝེཀརཏོ ཝིཏྟོ, ནིཙྩམཱརདྡྷཝཱིརིཡོ.

༩༠༠.

‘‘ཏསྶ ¶ དྷམྨཱ ཨིམེ ཧོནྟི, ཀུསལཱ བོདྷིཔཀྑིཀཱ;

ཨནཱསཝོ ཙ སོ ཧོཏི, ཨིཏི ཝུཏྟཾ མཧེསིནཱ.

༩༠༡.

‘‘མམ སངྐཔྤམཉྙཱཡ, སཏྠཱ ལོཀེ ཨནུཏྟརོ;

མནོམཡེན ཀཱཡེན, ཨིདྡྷིཡཱ ཨུཔསངྐམི.

༩༠༢.

‘‘ཡདཱ མེ ཨཧུ སངྐཔྤོ, ཏཏོ ཨུཏྟརི དེསཡི;

ནིཔྤཔཉྩརཏོ བུདྡྷོ, ནིཔྤཔཉྩམདེསཡི.

༩༠༣.

‘‘ཏསྶཱཧཾ དྷམྨམཉྙཱཡ, ཝིཧཱསིཾ སཱསནེ རཏོ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ.

༩༠༤.

‘‘པཉྩཔཉྙཱསཝསྶཱནི ¶ , ཡཏོ ནེསཛྫིཀོ ཨཧཾ;

པཉྩཝཱིསཏིཝསྶཱནི, ཡཏོ མིདྡྷཾ སམཱུཧཏཾ.

༩༠༥.

[དཱི. ནི. ༢.༢༢༢] ‘‘ནཱཧུ ཨསྶཱསཔསྶཱསཱ, ཋིཏཙིཏྟསྶ ཏཱདིནོ;

ཨནེཛོ སནྟིམཱརབྦྷ, ཙཀྑུམཱ པརིནིབྦུཏོ.

༩༠༦.

[དཱི. ནི. ༢.༢༢༢] ‘‘ཨསལླཱིནེན ཙིཏྟེན, ཝེདནཾ ཨཛ྄ཛྷཝཱསཡི;

པཛྫོཏསྶེཝ ནིབྦཱནཾ, ཝིམོཀྑོ ཙེཏསོ ཨཧུ.

༩༠༧.

‘‘ཨེཏེ པཙྪིམཀཱ དཱནི, མུནིནོ ཕསྶཔཉྩམཱ;

ནཱཉྙེ ¶ དྷམྨཱ བྷཝིསྶནྟི, སམྦུདྡྷེ པརིནིབྦུཏེ.

༩༠༨.

‘‘ནཏྠི དཱནི པུནཱཝཱསོ, དེཝཀཱཡསྨི ཛཱལིནི;

ཝིཀྑཱིཎོ ཛཱཏིསཾསཱརོ, ནཏྠི དཱནི པུནབྦྷཝོ.

༩༠༩.

‘‘ཡསྶ ¶ མུཧུཏྟེན སཧསྶདྷཱ, ལོཀོ སཾཝིདིཏོ སབྲཧྨཀཔྤོ;

ཝསཱི ཨིདྡྷིགུཎེ ཙུཏཱུཔཔཱཏེ, ཀཱལེ པསྶཏི དེཝཏཱ ས བྷིཀྑུ [སབྷིཀྑུནོ (སཱི. ཀ.)].

༩༡༠.

‘‘ཨནྣབྷཱརོ [ཨནྣཧཱརོ (སཱི.)] པུརེ ཨཱསིཾ, དལིདྡོ གྷཱསཧཱརཀོ;

སམཎཾ པཊིཔཱདེསིཾ, ཨུཔརིཊྛཾ ཡསསྶིནཾ.

༩༡༡.

‘‘སོམྷི སཀྱཀུལེ ཛཱཏོ, ཨནུརུདྡྷོཏི མཾ ཝིདཱུ;

ཨུཔེཏོ ནཙྩགཱིཏེཧི, སམྨཏཱལ༹པྤབོདྷནོ.

༩༡༢.

‘‘ཨཐདྡསཱསིཾ སམྦུདྡྷཾ, སཏྠཱརཾ ཨཀུཏོབྷཡཾ;

ཏསྨིཾ ཙིཏྟཾ པསཱདེཏྭཱ, པབྦཛིཾ ཨནགཱརིཡཾ.

༩༡༣.

‘‘པུབྦེནིཝཱསཾ ཛཱནཱམི, ཡཏྠ མེ ཝུསིཏཾ པུརེ;

ཏཱཝཏིཾསེསུ དེཝེསུ, ཨཊྛཱསིཾ སཀྐཛཱཏིཡཱ [སཏཛཱཏིཡཱ (སཱི.)].

༩༡༤.

‘‘སཏྟཀྑཏྟུཾ ¶ མནུསྶིནྡོ, ཨཧཾ རཛྫམཀཱརཡིཾ;

ཙཱཏུརནྟོ ཝིཛིཏཱཝཱི, ཛམྦུསཎྜསྶ ཨིསྶརོ;

ཨདཎྜེན ཨསཏྠེན, དྷམྨེན ཨནུསཱསཡིཾ.

༩༡༥.

‘‘ཨིཏོ སཏྟ ཏཏོ སཏྟ, སཾསཱརཱནི ཙཏུདྡས;

ནིཝཱསམབྷིཛཱནིསྶཾ, དེཝལོཀེ ཋིཏཱ ཏདཱ.

༩༡༦.

‘‘པཉྩངྒིཀེ ¶ ¶ སམཱདྷིམྷི, སནྟེ ཨེཀོདིབྷཱཝིཏེ;

པཊིཔྤསྶདྡྷིལདྡྷམྷི, དིབྦཙཀྑུ ཝིསུཛ྄ཛྷི མེ.

༩༡༧.

‘‘ཙུཏཱུཔཔཱཏཾ ཛཱནཱམི, སཏྟཱནཾ ཨཱགཏིཾ གཏིཾ;

ཨིཏྠབྷཱཝཉྙཐཱབྷཱཝཾ, ཛྷཱནེ པཉྩངྒིཀེ ཋིཏོ.

༩༡༨.

‘‘པརིཙིཎྞོ མཡཱ སཏྠཱ…པེ… བྷཝནེཏྟི སམཱུཧཏཱ.

༩༡༩.

‘‘ཝཛྫཱིནཾ ཝེལུ༹ཝགཱམེ, ཨཧཾ ཛཱིཝིཏསངྑཡཱ;

ཧེཊྛཏོ ཝེལུ༹གུམྦསྨིཾ, ནིབྦཱཡིསྶཾ ཨནཱསཝོ’’ཏི.

… ཨནུརུདྡྷོ ཐེརོ….

༡༠. པཱརཱཔརིཡཏྠེརགཱཐཱ

༩༢༠.

སམཎསྶ ཨཧུ ཙིནྟཱ, པུཔྥིཏམྷི མཧཱཝནེ;

ཨེཀགྒསྶ ནིསིནྣསྶ, པཝིཝིཏྟསྶ ཛྷཱཡིནོ.

༩༢༡.

‘‘ཨཉྙཐཱ ལོཀནཱཐམྷི, ཏིཊྛནྟེ པུརིསུཏྟམེ;

ཨིརིཡཾ ཨཱསི བྷིཀྑཱུནཾ, ཨཉྙཐཱ དཱནི དིསྶཏི.

༩༢༢.

‘‘སཱིཏཝཱཏཔརིཏྟཱནཾ, ཧིརིཀོཔཱིནཚཱདནཾ;

མཏྟཊྛིཡཾ ཨབྷུཉྫིཾསུ, སནྟུཊྛཱ ཨིཏརཱིཏརེ.

༩༢༣.

‘‘པཎཱིཏཾ ཡདི ཝཱ ལཱུཁཾ, ཨཔྤཾ ཝཱ ཡདི ཝཱ བཧུཾ;

ཡཱཔནཏྠཾ ཨབྷུཉྫིཾསུ, ཨགིདྡྷཱ ནཱདྷིམུཙྪིཏཱ.

༩༢༤.

‘‘ཛཱིཝིཏཱནཾ ¶ པརིཀྑཱརེ, བྷེསཛྫེ ཨཐ པཙྩཡེ;

ན བཱལ༹ྷཾ ཨུསྶུཀཱ ཨཱསུཾ, ཡཐཱ ཏེ ཨཱསཝཀྑཡེ.

༩༢༥.

‘‘ཨརཉྙེ རུཀྑམཱུལེསུ, ཀནྡརཱསུ གུཧཱསུ ཙ;

ཝིཝེཀམནུབྲཱུཧནྟཱ, ཝིཧཾསུ ཏཔྤརཱཡནཱ.

༩༢༦.

‘‘ནཱིཙཱ ¶ ནིཝིཊྛཱ སུབྷརཱ, མུདཱུ ཨཏྠདྡྷམཱནསཱ;

ཨབྱཱསེཀཱ ཨམུཁརཱ, ཨཏྠཙིནྟཱ ཝསཱནུགཱ.

༩༢༧.

‘‘ཏཏོ ¶ པཱསཱདིཀཾ ཨཱསི, གཏཾ བྷུཏྟཾ ནིསེཝིཏཾ;

སིནིདྡྷཱ ཏེལདྷཱརཱཝ, ཨཧོསི ཨིརིཡཱཔཐོ.

༩༢༨.

‘‘སབྦཱསཝཔརིཀྑཱིཎཱ, མཧཱཛྷཱཡཱི མཧཱཧིཏཱ;

ནིབྦུཏཱ དཱནི ཏེ ཐེརཱ, པརིཏྟཱ དཱནི ཏཱདིསཱ.

༩༢༩.

‘‘ཀུསལཱནཉྩ ¶ དྷམྨཱནཾ, པཉྙཱཡ ཙ པརིཀྑཡཱ;

སབྦཱཀཱརཝརཱུཔེཏཾ, ལུཛྫཏེ ཛིནསཱསནཾ.

༩༣༠.

‘‘པཱཔཀཱནཉྩ དྷམྨཱནཾ, ཀིལེསཱནཉྩ ཡོ ཨུཏུ;

ཨུཔཊྛིཏཱ ཝིཝེཀཱཡ, ཡེ ཙ སདྡྷམྨསེསཀཱ.

༩༣༡.

‘‘ཏེ ཀིལེསཱ པཝཌྜྷནྟཱ, ཨཱཝིསནྟི བཧུཾ ཛནཾ;

ཀཱིལ༹ནྟི མཉྙེ བཱལེཧི, ཨུམྨཏྟེཧིཝ རཀྑསཱ.

༩༣༢.

‘‘ཀིལེསེཧཱབྷིབྷཱུཏཱ ཏེ, ཏེན ཏེན ཝིདྷཱཝིཏཱ;

ནརཱ ཀིལེསཝཏྠཱུསུ, སསངྒཱམེཝ གྷོསིཏེ.

༩༣༣.

‘‘པརིཙྩཛིཏྭཱ སདྡྷམྨཾ, ཨཉྙམཉྙེཧི བྷཎྜརེ;

དིཊྛིགཏཱནི ཨནྭེནྟཱ, ཨིདཾ སེཡྻོཏི མཉྙརེ.

༩༣༤.

‘‘དྷནཉྩ པུཏྟཾ བྷརིཡཉྩ, ཚཌྜཡིཏྭཱན ནིགྒཏཱ;

ཀཊཙྪུབྷིཀྑཧེཏཱུཔི, ཨཀིཙྪཱནི ནིསེཝརེ.

༩༣༥.

‘‘ཨུདརཱཝདེཧཀཾ བྷུཏྭཱ, སཡནྟུཏྟཱནསེཡྻཀཱ;

ཀཐཾ ཝཏྟེནྟི [ཀཐཱ ཝཌྜྷེནྟི (སཱི. ཀ.)] པཊིབུདྡྷཱ, ཡཱ ཀཐཱ སཏྠུགརཧིཏཱ.

༩༣༦.

‘‘སབྦཀཱརུཀསིཔྤཱནི ¶ , ཙིཏྟིཾ ཀཏྭཱན [ཙིཏྟཱིཀཏྭཱན (སཱི.), ཙིཏྟཾ ཀཏྭཱན (སྱཱ.)] སིཀྑརེ;

ཨཝཱུཔསནྟཱ ཨཛ྄ཛྷཏྟཾ, སཱམཉྙཏྠོཏི ཨཙྪཏི [ཏིརིཉྩཏི (?)].

༩༣༧.

‘‘མཏྟིཀཾ ཏེལཙུཎྞཉྩ, ཨུདཀཱསནབྷོཛནཾ;

གིཧཱིནཾ ཨུཔནཱམེནྟི, ཨཱཀངྑནྟཱ བཧུཏྟརཾ.

༩༣༨.

‘‘དནྟཔོནཾ ཀཔིཏྠཉྩ, པུཔྥཾ ཁཱདནིཡཱནི ཙ;

པིཎྜཔཱཏེ ཙ སམྤནྣེ, ཨམྦེ ཨཱམལཀཱནི ཙ.

༩༣༩.

‘‘བྷེསཛྫེསུ ཡཐཱ ཝེཛྫཱ, ཀིཙྩཱཀིཙྩེ ཡཐཱ གིཧཱི;

གཎིཀཱཝ ཝིབྷཱུསཱཡཾ, ཨིསྶརེ ཁཏྟིཡཱ ཡཐཱ.

༩༤༠.

‘‘ནེཀཏིཀཱ ¶ ཝཉྩནིཀཱ, ཀཱུཊསཀྑཱི ཨཔཱཊུཀཱ;

བཧཱུཧི པརིཀཔྤེཧི, ཨཱམིསཾ པརིབྷུཉྫརེ.

༩༤༡.

‘‘ལེསཀཔྤེ པརིཡཱཡེ, པརིཀཔྤེནུདྷཱཝིཏཱ;

ཛཱིཝིཀཏྠཱ ཨུཔཱཡེན, སངྐཌྜྷནྟི བཧུཾ དྷནཾ.

༩༤༢.

‘‘ཨུཔཊྛཱཔེནྟི ¶ ¶ པརིསཾ, ཀམྨཏོ ནོ ཙ དྷམྨཏོ;

དྷམྨཾ པརེསཾ དེསེནྟི, ལཱབྷཏོ ནོ ཙ ཨཏྠཏོ.

༩༤༣.

‘‘སངྒྷལཱབྷསྶ བྷཎྜནྟི, སངྒྷཏོ པརིབཱཧིརཱ;

པརལཱབྷོཔཛཱིཝནྟཱ, ཨཧིརཱིཀཱ ན ལཛྫརེ.

༩༤༤.

‘‘ནཱནུཡུཏྟཱ ཏཐཱ ཨེཀེ, མུཎྜཱ སངྒྷཱཊིཔཱརུཏཱ;

སམྦྷཱཝནཾཡེཝིཙྪནྟི, ལཱབྷསཀྐཱརམུཙྪིཏཱ.

༩༤༥.

‘‘ཨེཝཾ ནཱནཔྤཡཱཏམྷི, ན དཱནི སུཀརཾ ཏཐཱ;

ཨཕུསིཏཾ ¶ ཝཱ ཕུསིཏུཾ, ཕུསིཏཾ ཝཱནུརཀྑིཏུཾ.

༩༤༦.

‘‘ཡཐཱ ཀཎྚཀཊྛཱནམྷི, ཙརེཡྻ ཨནུཔཱཧནོ;

སཏིཾ ཨུཔཊྛཔེཏྭཱན, ཨེཝཾ གཱམེ མུནཱི ཙརེ.

༩༤༧.

‘‘སརིཏྭཱ པུབྦཀེ ཡོགཱི, ཏེསཾ ཝཏྟམནུསྶརཾ;

ཀིཉྩཱཔི པཙྪིམོ ཀཱལོ, ཕུསེཡྻ ཨམཏཾ པདཾ.

༩༤༨.

‘‘ཨིདཾ ཝཏྭཱ སཱལཝནེ, སམཎོ བྷཱཝིཏིནྡྲིཡོ;

བྲཱཧྨཎོ པརིནིབྦཱཡཱི, ཨིསི ཁཱིཎཔུནབྦྷཝོ’’ཏི.

… པཱརཱཔརིཡོ [པཱརཱསརིཡོ (སྱཱ.)] ཐེརོ….

ཝཱིསཏིནིཔཱཏོ ནིཊྛིཏོ.

ཏཏྲུདྡཱནཾ –

ཨདྷིམུཏྟོ པཱརཱཔརིཡོ, ཏེལཀཱནི རཊྛཔཱལོ;

མཱལུཀྱསེལོ བྷདྡིཡོ, ཨངྒུལི དིབྦཙཀྑུཀོ.

པཱརཱཔརིཡོ དསེཏེ, ཝཱིསམྷི པརིཀིཏྟིཏཱ;

གཱཐཱཡོ དྭེ སཏཱ ཧོནྟི, པཉྩཏཱལཱིས [༢༤༤ གཱཐཱཡོཡེཝ དིསྶནྟི] ཨུཏྟརིནྟི.

༡༧. ཏིཾསནིཔཱཏོ

༡. ཕུསྶཏྠེརགཱཐཱ

༩༤༩.

པཱསཱདིཀེ ¶ ¶ ¶ བཧཱུ དིསྭཱ, བྷཱཝིཏཏྟེ སུསཾཝུཏེ;

ཨིསི པཎྜརསགོཏྟོ [པཎྜརསྶ གོཏྟོ (སཱི.)], ཨཔུཙྪི ཕུསྶསཝ྄ཧཡཾ.

༩༥༠.

‘‘ཀིཾཚནྡཱ ¶ ཀིམདྷིཔྤཱཡཱ, ཀིམཱཀཔྤཱ བྷཝིསྶརེ;

ཨནཱགཏམྷི ཀཱལམྷི, ཏཾ མེ ཨཀྑཱཧི པུཙྪིཏོ’’.

༩༥༡.

‘‘སུཎོཧི ཝཙནཾ མཡ྄ཧཾ, ཨིསིཔཎྜརསཝ྄ཧཡ;

སཀྐཙྩཾ ཨུཔདྷཱརེཧི, ཨཱཙིཀྑིསྶཱམྱནཱགཏཾ.

༩༥༢.

‘‘ཀོདྷནཱ ཨུཔནཱཧཱི ཙ, མཀྑཱི ཐམྦྷཱི སཋཱ བཧཱུ;

ཨུསྶུཀཱི ནཱནཱཝཱདཱ ཙ, བྷཝིསྶནྟི ཨནཱགཏེ.

༩༥༣.

‘‘ཨཉྙཱཏམཱནིནོ དྷམྨེ, གམྦྷཱིརེ ཏཱིརགོཙརཱ;

ལཧུཀཱ ཨགརུ དྷམྨེ, ཨཉྙམཉྙམགཱརཝཱ.

༩༥༤.

‘‘བཧཱུ ཨཱདཱིནཝཱ ལོཀེ, ཨུཔྤཛྫིསྶནྟྱནཱགཏེ;

སུདེསིཏཾ ཨིམཾ དྷམྨཾ, ཀིལེསེསྶནྟི [ཀིལེསིསྶནྟི (སཱི.), ཀིལིསིསྶནྟི (སྱཱ. ཀ.)] དུམྨཏཱི.

༩༥༥.

‘‘གུཎཧཱིནཱཔི སངྒྷམྷི, ཝོཧརནྟཱ ཝིསཱརདཱ;

བལཝནྟོ བྷཝིསྶནྟི, མུཁརཱ ཨསྶུཏཱཝིནོ.

༩༥༦.

‘‘གུཎཝནྟོཔི སངྒྷམྷི, ཝོཧརནྟཱ ཡཐཱཏྠཏོ;

དུབྦལཱ ཏེ བྷཝིསྶནྟི, ཧིརཱིམནཱ ཨནཏྠིཀཱ.

༩༥༧.

‘‘རཛཏཾ ཛཱཏརཱུཔཉྩ, ཁེཏྟཾ ཝཏྠུམཛེལ༹ཀཾ;

དཱསིདཱསཉྩ དུམྨེདྷཱ, སཱདིཡིསྶནྟྱནཱགཏེ.

༩༥༨.

‘‘ཨུཛ྄ཛྷཱནསཉྙིནོ བཱལཱ, སཱིལེསུ ཨསམཱཧིཏཱ;

ཨུནྣལཱ༹ ཝིཙརིསྶནྟི, ཀལཧཱབྷིརཏཱ མགཱ.

༩༥༩.

‘‘ཨུདྡྷཏཱ ཙ བྷཝིསྶནྟི, ནཱིལཙཱིཝརཔཱརུཏཱ;

ཀུཧཱ ¶ ཐདྡྷཱ ལཔཱ སིངྒཱི, ཙརིསྶནྟྱརིཡཱ ཝིཡ.

༩༦༠.

‘‘ཏེལསཎྛེཧི ཀེསེཧི, ཙཔལཱ ཨཉྫནཀྑིཀཱ;

རཐིཡཱཡ གམིསྶནྟི, དནྟཝཎྞིཀཔཱརུཏཱ.

༩༦༡.

‘‘ཨཛེགུཙྪཾ ¶ ¶ ཝིམུཏྟེཧི, སུརཏྟཾ ཨརཧདྡྷཛཾ;

ཛིགུཙྪིསྶནྟི ཀཱསཱཝཾ, ཨོདཱཏེསུ སམུཙྪིཏཱ [ཨོདཱཏེ སུསམུཙྪིཏཱ (སཱི.)].

༩༦༢.

‘‘ལཱབྷཀཱམཱ བྷཝིསྶནྟི, ཀུསཱིཏཱ ཧཱིནཝཱིརིཡཱ;

ཀིཙྪནྟཱ ཝནཔཏྠཱནི, གཱམནྟེསུ ཝསིསྶརེ.

༩༦༣.

‘‘ཡེ ¶ ཡེ ལཱབྷཾ ལབྷིསྶནྟི, མིཙྪཱཛཱིཝརཏཱ སདཱ;

ཏེ ཏེཝ ཨནུསིཀྑནྟཱ, བྷཛིསྶནྟི ཨསཾཡཏཱ.

༩༦༤.

‘‘ཡེ ཡེ ཨལཱབྷིནོ ལཱབྷཾ, ན ཏེ པུཛྫཱ བྷཝིསྶརེ;

སུཔེསལེཔི ཏེ དྷཱིརེ, སེཝིསྶནྟི ན ཏེ ཏདཱ.

༩༦༥.

‘‘མིལཀྑུརཛནཾ རཏྟཾ [པིལཀྑརཛནཾ རཏྟཾ (?)], གརཧནྟཱ སཀཾ དྷཛཾ;

ཏིཏྠིཡཱནཾ དྷཛཾ ཀེཙི, དྷཱརིསྶནྟྱཝདཱཏཀཾ.

༩༦༦.

‘‘ཨགཱརཝོ ཙ ཀཱསཱཝེ, ཏདཱ ཏེསཾ བྷཝིསྶཏི;

པཊིསངྑཱ ཙ ཀཱསཱཝེ, བྷིཀྑཱུནཾ ན བྷཝིསྶཏི.

༩༦༧.

‘‘ཨབྷིབྷཱུཏསྶ དུཀྑེན, སལླཝིདྡྷསྶ རུཔྤཏོ;

པཊིསངྑཱ མཧཱགྷོརཱ, ནཱགསྶཱསི ཨཙིནྟིཡཱ.

༩༦༨.

‘‘ཚདྡནྟོ ཧི ཏདཱ དིསྭཱ, སུརཏྟཾ ཨརཧདྡྷཛཾ;

ཏཱཝདེཝ བྷཎཱི གཱཐཱ, གཛོ ཨཏྠོཔསཾཧིཏཱ’’.

༩༦༩.

[དྷ. པ. ༩; ཛཱ. ༡.༢.༡༤༡; ༡.༡༦.༡༢༢] ‘‘ཨནིཀྐསཱཝོ ¶ ཀཱསཱཝཾ, ཡོ ཝཏྠཾ པརིདྷསྶཏི [པརིདཧིསྶཏི (སཱི. སྱཱ.)];

ཨཔེཏོ དམསཙྩེན, ན སོ ཀཱསཱཝམརཧཏི.

༩༧༠.

‘‘ཡོ ཙ ཝནྟཀཱསཱཝསྶ, སཱིལེསུ སུསམཱཧིཏོ;

ཨུཔེཏོ དམསཙྩེན, ས ཝེ ཀཱསཱཝམརཧཏི.

༩༧༡.

‘‘ཝིཔནྣསཱིལོ དུམྨེདྷོ, པཱཀཊོ ཀཱམཀཱརིཡོ;

ཝིབྦྷནྟཙིཏྟོ ནིསྶུཀྐོ, ན སོ ཀཱསཱཝམརཧཏི.

༩༧༢.

‘‘ཡོ ཙ སཱིལེན སམྤནྣོ, ཝཱིཏརཱགོ སམཱཧིཏོ;

ཨོདཱཏམནསངྐཔྤོ, ས ཝེ ཀཱསཱཝམརཧཏི.

༩༧༣.

‘‘ཨུདྡྷཏོ ཨུནྣལོ༹ བཱལོ, སཱིལཾ ཡསྶ ན ཝིཛྫཏི;

ཨོདཱཏཀཾ ཨརཧཏི, ཀཱསཱཝཾ ཀིཾ ཀརིསྶཏི.

༩༧༤.

‘‘བྷིཀྑཱུ ¶ ཙ བྷིཀྑུནིཡོ ཙ, དུཊྛཙིཏྟཱ ཨནཱདརཱ;

ཏཱདཱིནཾ མེཏྟཙིཏྟཱནཾ, ནིགྒཎྷིསྶནྟྱནཱགཏེ.

༩༧༥.

‘‘སིཀྑཱཔེནྟཱཔི ཐེརེཧི, བཱལཱ ཙཱིཝརདྷཱརཎཾ;

ན སུཎིསྶནྟི དུམྨེདྷཱ, པཱཀཊཱ ཀཱམཀཱརིཡཱ.

༩༧༦.

‘‘ཏེ ¶ ཏཐཱ སིཀྑིཏཱ བཱལཱ, ཨཉྙམཉྙཾ ཨགཱརཝཱ;

ནཱདིཡིསྶནྟུཔཛ྄ཛྷཱཡེ, ཁལུ༹ངྐོ ཝིཡ སཱརཐིཾ.

༩༧༧.

‘‘ཨེཝཾ ཨནཱགཏདྡྷཱནཾ, པཊིཔཏྟི བྷཝིསྶཏི;

བྷིཀྑཱུནཾ བྷིཀྑུནཱིནཉྩ, པཏྟེ ཀཱལམྷི པཙྪིམེ.

༩༧༨.

‘‘པུརཱ ཨཱགཙྪཏེ ཨེཏཾ, ཨནཱགཏཾ མཧབྦྷཡཾ;

སུབྦཙཱ ཧོཐ སཁིལཱ, ཨཉྙམཉྙཾ སགཱརཝཱ.

༩༧༩.

‘‘མེཏྟཙིཏྟཱ ¶ ཀཱརུཎིཀཱ, ཧོཐ སཱིལེསུ སཾཝུཏཱ;

ཨཱརདྡྷཝཱིརིཡཱ པཧིཏཏྟཱ, ནིཙྩཾ དལ༹ྷཔརཀྐམཱ.

༩༨༠.

‘‘པམཱདཾ ¶ བྷཡཏོ དིསྭཱ, ཨཔྤམཱདཉྩ ཁེམཏོ;

བྷཱཝེཐཊྛངྒིཀཾ མགྒཾ, ཕུསནྟཱ ཨམཏཾ པད’’ནྟི.

… ཕུསྶོ ཐེརོ….

༢. སཱརིཔུཏྟཏྠེརགཱཐཱ

༩༨༡.

‘‘ཡཐཱཙཱརཱི ཡཐཱསཏོ སཏཱིམཱ, ཡཏསངྐཔྤཛ྄ཛྷཱཡི ཨཔྤམཏྟོ;

ཨཛ྄ཛྷཏྟརཏོ སམཱཧིཏཏྟོ, ཨེཀོ སནྟུསིཏོ ཏམཱཧུ བྷིཀྑུཾ.

༩༨༢.

‘‘ཨལླཾ སུཀྑཾ ཝཱ བྷུཉྫནྟོ, ན བཱལ༹ྷཾ སུཧིཏོ སིཡཱ;

ཨཱུནཱུདརོ མིཏཱཧཱརོ, སཏོ བྷིཀྑུ པརིབྦཛེ.

༩༨༣.

‘‘ཙཏྟཱརོ པཉྩ ཨཱལོཔེ, ཨབྷུཏྭཱ ཨུདཀཾ པིཝེ;

ཨལཾ ཕཱསུཝིཧཱརཱཡ, པཧིཏཏྟསྶ བྷིཀྑུནོ.

༩༨༤.

‘‘ཀཔྤིཡཾ ཏཾ ཙེ ཚཱདེཏི, ཙཱིཝརཾ ཨིདམཏྠིཀཾ [ཨིདམཏྠིཏཾ (སཱི.)];

ཨལཾ ཕཱསུཝིཧཱརཱཡ, པཧིཏཏྟསྶ བྷིཀྑུནོ.

༩༨༥.

‘‘པལླངྐེན ¶ ནིསིནྣསྶ, ཛཎྞུཀེ ནཱབྷིཝསྶཏི;

ཨལཾ ཕཱསུཝིཧཱརཱཡ, པཧིཏཏྟསྶ བྷིཀྑུནོ.

༩༨༦.

[སཾ. ནི. ༤.༢༥༣; ཨིཏིཝུ. ༥༣] ‘‘ཡོ སུཁཾ དུཀྑཏོ ཨདྡ, དུཀྑམདྡཀྑི སལླཏོ;

ཨུབྷཡནྟརེན ¶ [ཨུབྷཡམནྟརེ (སཱི.)] ནཱཧོསི, ཀེན ལོཀསྨི ཀིཾ སིཡཱ.

༩༨༧.

‘‘མཱ མེ ཀདཱཙི པཱཔིཙྪོ, ཀུསཱིཏོ ཧཱིནཝཱིརིཡོ;

ཨཔྤསྶུཏོ ཨནཱདརོ, ཀེན ལོཀསྨི ཀིཾ སིཡཱ.

༩༨༨.

‘‘བཧུསྶུཏོ ¶ ཙ མེདྷཱཝཱི, སཱིལེསུ སུསམཱཧིཏོ;

ཙེཏོསམཐམནུཡུཏྟོ, ཨཔི མུདྡྷནི ཏིཊྛཏུ.

༩༨༩.

‘‘ཡོ པཔཉྩམནུཡུཏྟོ, པཔཉྩཱབྷིརཏོ མགོ;

ཝིརཱདྷཡཱི སོ ནིབྦཱནཾ, ཡོགཀྑེམཾ ཨནུཏྟརཾ.

༩༩༠.

‘‘ཡོ ཙ པཔཉྩཾ ཧིཏྭཱན, ནིཔྤཔཉྩཔཐེ རཏོ;

ཨཱརཱདྷཡཱི སོ ནིབྦཱནཾ, ཡོགཀྑེམཾ ཨནུཏྟརཾ.

༩༩༡.

[དྷ. པ. ༩༨] ‘‘གཱམེ ཝཱ ཡདི ཝཱརཉྙེ, ནིནྣེ ཝཱ ཡདི ཝཱ ཐལེ;

ཡཏྠ ཨརཧནྟོ ཝིཧརནྟི, ཏཾ བྷཱུམིརཱམཎེཡྻཀཾ.

༩༩༢.

‘‘རམཎཱིཡཱནི ཨརཉྙཱནི, ཡཏྠ ན རམཏཱི ཛནོ;

ཝཱིཏརཱགཱ རམིསྶནྟི, ན ཏེ ཀཱམགཝེསིནོ.

༩༩༣.

[དྷ. པ. ༧༦] ‘‘ནིདྷཱིནཾཝ པཝཏྟཱརཾ, ཡཾ པསྶེ ཝཛྫདསྶིནཾ;

ནིགྒཡ྄ཧཝཱདིཾ ¶ མེདྷཱཝིཾ, ཏཱདིསཾ པཎྜིཏཾ བྷཛེ;

ཏཱདིསཾ བྷཛམཱནསྶ, སེཡྻོ ཧོཏི ན པཱཔིཡོ.

༩༩༤.

[དྷ. པ. ༧༧] ‘‘ཨོཝདེཡྻཱནུསཱསེཡྻ, ཨསབྦྷཱ ཙ ནིཝཱརཡེ;

སཏཉྷི སོ པིཡོ ཧོཏི, ཨསཏཾ ཧོཏི ཨཔྤིཡོ.

༩༩༥.

‘‘ཨཉྙསྶ བྷགཝཱ བུདྡྷོ, དྷམྨཾ དེསེསི ཙཀྑུམཱ;

དྷམྨེ ¶ དེསིཡམཱནམྷི, སོཏམོདྷེསིམཏྠིཀོ;

ཏཾ མེ ཨམོགྷཾ སཝནཾ, ཝིམུཏྟོམྷི ཨནཱསཝོ.

༩༩༦.

‘‘ནེཝ པུབྦེནིཝཱསཱཡ, ནཔི དིབྦསྶ ཙཀྑུནོ;

ཙེཏོཔརིཡཱཡ ཨིདྡྷིཡཱ, ཙུཏིཡཱ ཨུཔཔཏྟིཡཱ;

སོཏདྷཱཏུཝིསུདྡྷིཡཱ, པཎིདྷཱི མེ ན ཝིཛྫཏི [ཀཐཱ. ༣༧༨].

༩༩༧.

‘‘རུཀྑམཱུལཾཝ ¶ ནིསྶཱཡ, མུཎྜོ སངྒྷཱཊིཔཱརུཏོ;

པཉྙཱཡ ཨུཏྟམོ ཐེརོ, ཨུཔཏིསྶོཝ [ཨུཔཏིསྶོ ཙ (སཱི. ཀ.)] ཛྷཱཡཏི.

༩༩༨.

‘‘ཨཝིཏཀྐཾ སམཱཔནྣོ, སམྨཱསམྦུདྡྷསཱཝཀོ;

ཨརིཡེན ཏུཎྷཱིབྷཱཝེན, ཨུཔེཏོ ཧོཏི ཏཱཝདེ.

༩༩༩.

[ཨུདཱ. ༢༤] ‘‘ཡཐཱཔི པབྦཏོ སེལོ, ཨཙལོ སུཔྤཏིཊྛིཏོ;

ཨེཝཾ མོཧཀྑཡཱ བྷིཀྑུ, པབྦཏོཝ ན ཝེདྷཏི.

༡༠༠༠.

‘‘ཨནངྒཎསྶ པོསསྶ, ནིཙྩཾ སུཙིགཝེསིནོ;

ཝཱལགྒམཏྟཾ པཱཔསྶ, ཨབྦྷམཏྟཾཝ ཁཱཡཏི.

༡༠༠༡.

‘‘ནཱབྷིནནྡཱམི ¶ མརཎཾ, ནཱབྷིནནྡཱམི ཛཱིཝིཏཾ;

ནིཀྑིཔིསྶཾ ཨིམཾ ཀཱཡཾ, སམྤཛཱནོ པཏིསྶཏོ.

༡༠༠༢.

‘‘ནཱབྷིནནྡཱམི མརཎཾ, ནཱབྷིནནྡཱམི ཛཱིཝིཏཾ;

ཀཱལཉྩ པཊིཀངྑཱམི, ནིབྦིསཾ བྷཏཀོ ཡཐཱ.

༡༠༠༣.

‘‘ཨུབྷཡེན མིདཾ མརཎམེཝ, ནཱམརཎཾ པཙྪཱ ཝཱ པུརེ ཝཱ;

པཊིཔཛྫཐ མཱ ཝིནསྶཐ, ཁཎོ ཝོ མཱ ཨུཔཙྩགཱ.

༡༠༠༤.

‘‘ནགརཾ ཡཐཱ པཙྩནྟཾ, གུཏྟཾ སནྟརབཱཧིརཾ;

ཨེཝཾ གོཔེཐ ཨཏྟཱནཾ, ཁཎོ ཝོ མཱ ཨུཔཙྩགཱ;

ཁཎཱཏཱིཏཱ ¶ ཧི སོཙནྟི, ནིརཡམྷི སམཔྤིཏཱ.

༡༠༠༥.

‘‘ཨུཔསནྟོ ཨུཔརཏོ, མནྟབྷཱཎཱི [མཏྟབྷཱཎཱི (སཱི.)] ཨནུདྡྷཏོ;

དྷུནཱཏི པཱཔཀེ དྷམྨེ, དུམཔཏྟཾཝ མཱལུཏོ.

༡༠༠༦.

‘‘ཨུཔསནྟོ ཨུཔརཏོ, མནྟབྷཱཎཱི ཨནུདྡྷཏོ;

ཨཔྤཱསི [ཨབྦཧི (སྱཱ.), ཨབྷཱསི (?)] པཱཔཀེ དྷམྨེ, དུམཔཏྟཾཝ མཱལུཏོ.

༡༠༠༧.

‘‘ཨུཔསནྟོ ¶ ཨནཱཡཱསོ, ཝིཔྤསནྣོ ཨནཱཝིལོ;

ཀལྱཱཎསཱིལོ མེདྷཱཝཱི, དུཀྑསྶནྟཀརོ སིཡཱ.

༡༠༠༨.

‘‘ན ཝིསྶསེ ཨེཀཏིཡེསུ ཨེཝཾ, ཨགཱརིསུ པབྦཛིཏེསུ ཙཱཔི;

སཱདྷཱུཔི ཧུཏྭཱ ན ཨསཱདྷུ ཧོནྟི, ཨསཱདྷུ ཧུཏྭཱ པུན སཱདྷུ ཧོནྟི.

༡༠༠༩.

‘‘ཀཱམཙྪནྡོ ¶ ཙ བྱཱཔཱདོ, ཐིནམིདྡྷཉྩ བྷིཀྑུནོ;

ཨུདྡྷཙྩཾ ཝིཙིཀིཙྪཱ ཙ, པཉྩེཏེ ཙིཏྟཀེལིསཱ.

༡༠༡༠.

‘‘ཡསྶ སཀྐརིཡམཱནསྶ, ཨསཀྐཱརེན ཙཱུབྷཡཾ;

སམཱདྷི ན ཝིཀམྤཏི, ཨཔྤམཱདཝིཧཱརིནོ.

༡༠༡༡.

‘‘ཏཾ ཛྷཱཡིནཾ སཱཏཏིཀཾ, སུཁུམདིཊྛིཝིཔསྶཀཾ;

ཨུཔཱདཱནཀྑཡཱརཱམཾ, ཨཱཧུ སཔྤུརིསོ ཨིཏི.

༡༠༡༢.

‘‘མཧཱསམུདྡོ པཐཝཱི, པབྦཏོ ཨནིལོཔི ཙ;

ཨུཔམཱཡ ན ཡུཛྫནྟི, སཏྠུ ཝརཝིམུཏྟིཡཱ.

༡༠༡༣.

‘‘ཙཀྐཱནུཝཏྟཀོ ¶ ཐེརོ, མཧཱཉཱཎཱི སམཱཧིཏོ;

པཐཝཱཔགྒིསམཱནོ, ན རཛྫཏི ན དུསྶཏི.

༡༠༡༤.

‘‘པཉྙཱཔཱརམིཏཾ པཏྟོ, མཧཱབུདྡྷི མཧཱམཏི;

ཨཛལོ༹ ཛལ༹སམཱནོ, སདཱ ཙརཏི ནིབྦུཏོ.

༡༠༡༥.

‘‘པརིཙིཎྞོ མཡཱ སཏྠཱ…པེ… བྷཝནེཏྟི སམཱུཧཏཱ.

༡༠༡༦.

‘‘སམྤཱདེཐཔྤམཱདེན ¶ , ཨེསཱ མེ ཨནུསཱསནཱི;

ཧནྡཱཧཾ པརིནིབྦིསྶཾ, ཝིཔྤམུཏྟོམྷི སབྦདྷཱི’’ཏི.

… སཱརིཔུཏྟོ ཐེརོ….

༣. ཨཱནནྡཏྠེརགཱཐཱ

༡༠༡༧.

‘‘པིསུཎེན ཙ ཀོདྷནེན ཙ, མཙྪརིནཱ ཙ ཝིབྷཱུཏནནྡིནཱ;

སཁིཏཾ ན ཀརེཡྻ པཎྜིཏོ, པཱཔོ ཀཱཔུརིསེན སངྒམོ.

༡༠༡༨.

‘‘སདྡྷེན ཙ པེསལེན ཙ, པཉྙཝཏཱ བཧུསྶུཏེན ཙ;

སཁིཏཾ ཀརེཡྻ པཎྜིཏོ, བྷདྡོ སཔྤུརིསེན སངྒམོ.

༡༠༡༩.

‘‘པསྶ ཙིཏྟཀཏཾ བིམྦཾ…པེ… ཡསྶ ནཏྠི དྷུཝཾ ཋིཏི.

༡༠༢༠.

‘‘པསྶ ཙིཏྟཀཏཾ བིམྦཾ…པེ… ཝཏྠེཧི སོབྷཏི.

༡༠༢༡.

‘‘ཨལཏྟཀཀཏཱ ¶ …པེ… ནོ ཙ པཱརགཝེསིནོ.

༡༠༢༢.

‘‘ཨཊྛཔདཀཏཱ…པེ… ནོ ཙ པཱརགཝེསིནོ.

༡༠༢༣.

‘‘ཨཉྫནཱིཝ ནཝཱ…པེ… ནོ ཙ པཱརགཝེསིནོ.

༡༠༢༤.

‘‘བཧུསྶུཏོ ཙིཏྟཀཐཱི, བུདྡྷསྶ པརིཙཱརཀོ;

པནྣབྷཱརོ ཝིསཉྙུཏྟོ, སེཡྻཾ ཀཔྤེཏི གོཏམོ.

༡༠༢༥.

‘‘ཁཱིཎཱསཝོ ཝིསཉྙུཏྟོ, སངྒཱཏཱིཏོ སུནིབྦུཏོ;

དྷཱརེཏི ཨནྟིམཾ དེཧཾ, ཛཱཏིམརཎཔཱརགཱུ.

༡༠༢༦.

‘‘ཡསྨིཾ ¶ པཏིཊྛིཏཱ དྷམྨཱ, བུདྡྷསྶཱདིཙྩབནྡྷུནོ;

ནིབྦཱནགམནེ མགྒེ, སོཡཾ ཏིཊྛཏི གོཏམོ.

༡༠༢༧.

‘‘དྭཱསཱིཏི ¶ བུདྡྷཏོ གཎྷིཾ, དྭེ སཧསྶཱནི བྷིཀྑུཏོ;

ཙཏུརཱསཱིཏིསཧསྶཱནི, ཡེ མེ དྷམྨཱ པཝཏྟིནོ.

༡༠༢༨.

‘‘ཨཔྤསྶུཏཱཡཾ པུརིསོ, བལིབདྡོཝ ཛཱིརཏི;

མཾསཱནི ཏསྶ ཝཌྜྷནྟི, པཉྙཱ ཏསྶ ན ཝཌྜྷཏི.

༡༠༢༩.

‘‘བཧུསྶུཏོ ཨཔྤསྶུཏཾ, ཡོ སུཏེནཱཏིམཉྙཏི;

ཨནྡྷོ པདཱིཔདྷཱརོཝ, ཏཐེཝ པཊིབྷཱཏི མཾ.

༡༠༣༠.

‘‘བཧུསྶུཏཾ ཨུཔཱསེཡྻ, སུཏཉྩ ན ཝིནཱསཡེ;

ཏཾ མཱུལཾ བྲཧྨཙརིཡསྶ, ཏསྨཱ དྷམྨདྷརོ སིཡཱ.

༡༠༣༡.

‘‘པུབྦཱཔརཉྙཱུ ཨཏྠཉྙཱུ, ནིརུཏྟིཔདཀོཝིདོ;

སུགྒཧཱིཏཉྩ གཎྷཱཏི, ཨཏྠཉྩོཔཔརིཀྑཏི.

༡༠༣༢.

‘‘ཁནྟྱཱ ¶ ཚནྡིཀཏོ [ཁནྟིཡཱ ཚནྡིཏོ (?)] ཧོཏི, ཨུསྶཧིཏྭཱ ཏུལེཏི ཏཾ;

སམཡེ སོ པདཧཏི, ཨཛ྄ཛྷཏྟཾ སུསམཱཧིཏོ.

༡༠༣༣.

‘‘བཧུསྶུཏཾ དྷམྨདྷརཾ, སཔྤཉྙཾ བུདྡྷསཱཝཀཾ;

དྷམྨཝིཉྙཱཎམཱཀངྑཾ, ཏཾ བྷཛེཐ ཏཐཱཝིདྷཾ.

༡༠༣༤.

‘‘བཧུསྶུཏོ དྷམྨདྷརོ, ཀོསཱརཀྑོ མཧེསིནོ;

ཙཀྑུ སབྦསྶ ལོཀསྶ, པཱུཛནཱིཡོ བཧུསྶུཏོ.

༡༠༣༥.

‘‘དྷམྨཱརཱམོ དྷམྨརཏོ, དྷམྨཾ ཨནུཝིཙིནྟཡཾ;

དྷམྨཾ ཨནུསྶརཾ བྷིཀྑུ, སདྡྷམྨཱ ན པརིཧཱཡཏི.

༡༠༣༦.

‘‘ཀཱཡམཙྪེརགརུནོ ¶ [གརུཀོ (སཱི.)], ཧིཡྻམཱནེ [ཧིཡྻམཱནོ (སཱི.)] ཨནུཊྛཧེ;

སརཱིརསུཁགིདྡྷསྶ, ཀུཏོ སམཎཕཱསུཏཱ.

༡༠༣༧.

‘‘ན ¶ པཀྑནྟི དིསཱ སབྦཱ, དྷམྨཱ ན པཊིབྷནྟི མཾ;

གཏེ ཀལྱཱཎམིཏྟམྷི, ཨནྡྷཀཱརཾཝ ཁཱཡཏི.

༡༠༣༨.

‘‘ཨབྦྷཏཱིཏསཧཱཡསྶ, ཨཏཱིཏགཏསཏྠུནོ;

ནཏྠི ཨེཏཱདིསཾ མིཏྟཾ, ཡཐཱ ཀཱཡགཏཱ སཏི.

༡༠༣༩.

‘‘ཡེ པུརཱཎཱ ཨཏཱིཏཱ ཏེ, ནཝེཧི ན སམེཏི མེ;

སྭཛྫ ཨེཀོཝ ཛྷཱཡཱམི, ཝསྶུཔེཏོཝ པཀྑིམཱ.

༡༠༤༠.

‘‘དསྶནཱཡ ཨབྷིཀྐནྟེ, ནཱནཱཝེརཛྫཀེ བཧཱུ;

མཱ ཝཱརཡིཏྠ སོཏཱརོ, པསྶནྟུ སམཡོ མམཾ.

༡༠༤༡.

‘‘དསྶནཱཡ ¶ ཨབྷིཀྐནྟེ, ནཱནཱཝེརཛྫཀེ པུཐུ;

ཀརོཏི སཏྠཱ ཨོཀཱསཾ, ན ནིཝཱརེཏི ཙཀྑུམཱ.

༡༠༤༢.

‘‘པཎྞཝཱིསཏིཝསྶཱནི, སེཁབྷཱུཏསྶ མེ སཏོ;

ན ཀཱམསཉྙཱ ཨུཔྤཛྫི, པསྶ དྷམྨསུདྷམྨཏཾ.

༡༠༤༣.

‘‘པཎྞཝཱིསཏིཝསྶཱནི, སེཁབྷཱུཏསྶ མེ སཏོ;

ན དོསསཉྙཱ ཨུཔྤཛྫི, པསྶ དྷམྨསུདྷམྨཏཾ.

༡༠༤༤.

‘‘པཎྞཝཱིསཏིཝསྶཱནི, བྷགཝནྟཾ ཨུཔཊྛཧིཾ;

མེཏྟེན ཀཱཡཀམྨེན, ཚཱཡཱཝ ཨནཔཱཡིནཱི [ཨནུཔཱཡིནཱི (སྱཱ. ཀ.)].

༡༠༤༥.

‘‘པཎྞཝཱིསཏིཝསྶཱནི, བྷགཝནྟཾ ཨུཔཊྛཧིཾ;

མེཏྟེན ཝཙཱིཀམྨེན, ཚཱཡཱཝ ཨནཔཱཡིནཱི.

༡༠༤༦.

‘‘པཎྞཝཱིསཏིཝསྶཱནི, བྷགཝནྟཾ ཨུཔཊྛཧིཾ;

མེཏྟེན མནོཀམྨེན, ཚཱཡཱཝ ཨནཔཱཡིནཱི.

༡༠༤༧.

‘‘བུདྡྷསྶ ¶ ¶ ཙངྐམནྟསྶ, པིཊྛིཏོ ཨནུཙངྐམིཾ;

དྷམྨེ དེསིཡམཱནམྷི, ཉཱཎཾ མེ ཨུདཔཛྫཐ.

༡༠༤༨.

‘‘ཨཧཾ སཀརཎཱིཡོམྷི, སེཁོ ཨཔྤཏྟམཱནསོ;

སཏྠུ ཙ པརིནིབྦཱནཾ, ཡོ ཨམྷཾ ཨནུཀམྤཀོ.

༡༠༤༩.

‘‘ཏདཱསི ¶ ཡཾ བྷིཾསནཀཾ, ཏདཱསི ལོམཧཾསནཾ;

སབྦཱཀཱརཝརཱུཔེཏེ, སམྦུདྡྷེ པརིནིབྦུཏེ.

༡༠༥༠.

‘‘བཧུསྶུཏོ དྷམྨདྷརོ, ཀོསཱརཀྑོ མཧེསིནོ;

ཙཀྑུ སབྦསྶ ལོཀསྶ, ཨཱནནྡོ པརིནིབྦུཏོ.

༡༠༥༡.

‘‘བཧུསྶུཏོ དྷམྨདྷརོ, ཀོསཱརཀྑོ མཧེསིནོ;

ཙཀྑུ སབྦསྶ ལོཀསྶ, ཨནྡྷཀཱརེ ཏམོནུདོ.

༡༠༥༢.

‘‘གཏིམནྟོ སཏིམནྟོ, དྷིཏིམནྟོ ཙ ཡོ ཨིསི;

སདྡྷམྨདྷཱརཀོ ཐེརོ, ཨཱནནྡོ རཏནཱཀརོ.

༡༠༥༣.

‘‘པརིཙིཎྞོ མཡཱ སཏྠཱ, ཀཏཾ བུདྡྷསྶ སཱསནཾ;

ཨོཧིཏོ གརུཀོ བྷཱརོ, ནཏྠི དཱནི པུནབྦྷཝོ’’ཏི.

… ཨཱནནྡོ ཐེརོ….

ཏིཾསནིཔཱཏོ ནིཊྛིཏོ.

ཏཏྲུདྡཱནཾ –

ཕུསྶོཔཏིསྶོ ཨཱནནྡོ, ཏཡོཏིམེ པཀིཏྟིཏཱ;

གཱཐཱཡོ ཏཏྠ སངྑཱཏཱ, སཏཾ པཉྩ ཙ ཨུཏྟརཱིཏི;

༡༨. ཙཏྟཱལཱིསནིཔཱཏོ

༡. མཧཱཀསྶཔཏྠེརགཱཐཱ

༡༠༥༤.

‘‘ན ¶ ¶ ¶ ¶ གཎེན པུརཀྑཏོ ཙརེ, ཝིམནོ ཧོཏི སམཱདྷི དུལླབྷོ;

ནཱནཱཛནསངྒཧོ དུཁོ, ཨིཏི དིསྭཱན གཎཾ ན རོཙཡེ.

༡༠༥༥.

‘‘ན ཀུལཱནི ཨུཔབྦཛེ མུནི, ཝིམནོ ཧོཏི སམཱདྷི དུལླབྷོ;

སོ ཨུསྶུཀྐོ རསཱནུགིདྡྷོ, ཨཏྠཾ རིཉྩཏི ཡོ སུཁཱཝཧོ.

༡༠༥༦.

‘‘པངྐོཏི ཧི ནཾ ཨཝེདཡུཾ, ཡཱཡཾ ཝནྡནཔཱུཛནཱ ཀུལེསུ;

སུཁུམཾ སལླ དུརུབྦཧཾ, སཀྐཱརོ ཀཱཔུརིསེན དུཛྫཧོ.

༡༠༥༧.

‘‘སེནཱསནམྷཱ ཨོརུཡ྄ཧ, ནགརཾ པིཎྜཱཡ པཱཝིསིཾ;

བྷུཉྫནྟཾ པུརིསཾ ཀུཊྛིཾ, སཀྐཙྩཾ ཏཾ ཨུཔཊྛཧིཾ.

༡༠༥༨.

‘‘སོ མེ [ཏཾ (སཱི. ཀ.)] པཀྐེན ཧཏྠེན, ཨཱལོཔཾ ཨུཔནཱམཡི;

ཨཱལོཔཾ པཀྑིཔནྟསྶ, ཨངྒུལི ཙེཏྠ [པེཏྠ (སཱི. ཀ.)] ཚིཛྫཐ.

༡༠༥༩.

‘‘ཀུཊྚམཱུལཉྩ [ཀུཌྜམཱུལཉྩ (སཱི. སྱཱ.)] ནིསྶཱཡ, ཨཱལོཔཾ ཏཾ ཨབྷུཉྫིསཾ;

བྷུཉྫམཱནེ ཝཱ བྷུཏྟེ ཝཱ, ཛེགུཙྪཾ མེ ན ཝིཛྫཏི.

༡༠༦༠.

‘‘ཨུཏྟིཊྛཔིཎྜོ ཨཱཧཱརོ, པཱུཏིམུཏྟཉྩ ཨོསདྷཾ;

སེནཱསནཾ རུཀྑམཱུལཾ, པཾསུཀཱུལཉྩ ཙཱིཝརཾ;

ཡསྶེཏེ ཨབྷིསམྦྷུཏྭཱ [ཨབྷིབྷུཉྫཏི (?)], ས ཝེ ཙཱཏུདྡིསོ ནརོ.

༡༠༦༡.

‘‘ཡཏྠ ཨེཀེ ཝིཧཉྙནྟི, ཨཱརུཧནྟཱ སིལུཙྩཡཾ;

ཏསྶ བུདྡྷསྶ དཱཡཱདོ, སམྤཛཱནོ པཏིསྶཏོ;

ཨིདྡྷིབལེནུཔཏྠདྡྷོ ¶ , ཀསྶཔོ ཨབྷིརཱུཧཏི.

༡༠༦༢.

‘‘པིཎྜཔཱཏཔཊིཀྐནྟོ ¶ , སེལམཱརུཡ྄ཧ ཀསྶཔོ;

ཛྷཱཡཏི ཨནུཔཱདཱནོ, པཧཱིནབྷཡབྷེརཝོ.

༡༠༦༣.

‘‘པིཎྜཔཱཏཔཊིཀྐནྟོ, སེལམཱརུཡ྄ཧ ཀསྶཔོ;

ཛྷཱཡཏི ཨནུཔཱདཱནོ, ཌཡ྄ཧམཱནེསུ ནིབྦུཏོ.

༡༠༦༤.

‘‘པིཎྜཔཱཏཔཊིཀྐནྟོ, སེལམཱརུཡ྄ཧ ཀསྶཔོ;

ཛྷཱཡཏི ཨནུཔཱདཱནོ, ཀཏཀིཙྩོ ཨནཱསཝོ.

༡༠༦༥.

‘‘ཀརེརིམཱལཱཝིཏཏཱ ¶ ¶ , བྷཱུམིབྷཱགཱ མནོརམཱ;

ཀུཉྫརཱབྷིརུདཱ རམྨཱ, ཏེ སེལཱ རམཡནྟི མཾ.

༡༠༦༦.

‘‘ནཱིལབྦྷཝཎྞཱ རུཙིརཱ, ཝཱརིསཱིཏཱ སུཙིནྡྷརཱ;

ཨིནྡགོཔཀསཉྪནྣཱ, ཏེ སེལཱ རམཡནྟི མཾ.

༡༠༦༧.

‘‘ནཱིལབྦྷཀཱུཊསདིསཱ, ཀཱུཊཱགཱརཝརཱུཔམཱ;

ཝཱརཎཱབྷིརུདཱ རམྨཱ, ཏེ སེལཱ རམཡནྟི མཾ.

༡༠༦༨.

‘‘ཨབྷིཝུཊྛཱ རམྨཏལཱ, ནགཱ ཨིསིབྷི སེཝིཏཱ;

ཨབྦྷུནྣདིཏཱ སིཁཱིཧི, ཏེ སེལཱ རམཡནྟི མཾ.

༡༠༦༩.

‘‘ཨལཾ ཛྷཱཡིཏུཀཱམསྶ, པཧིཏཏྟསྶ མེ སཏོ;

ཨལཾ མེ ཨཏྠཀཱམསྶ [ཨཏྟཀཱམསྶ (?)], པཧིཏཏྟསྶ བྷིཀྑུནོ.

༡༠༧༠.

‘‘ཨལཾ མེ ཕཱསུཀཱམསྶ, པཧིཏཏྟསྶ བྷིཀྑུནོ;

ཨལཾ མེ ཡོགཀཱམསྶ, པཧིཏཏྟསྶ ཏཱདིནོ.

༡༠༧༡.

‘‘ཨུམཱཔུཔྥེན སམཱནཱ, གགནཱཝབྦྷཚཱདིཏཱ;

ནཱནཱདིཛགཎཱཀིཎྞཱ ¶ , ཏེ སེལཱ རམཡནྟི མཾ.

༡༠༧༢.

‘‘ཨནཱཀིཎྞཱ གཧཊྛེཧི, མིགསངྒྷནིསེཝིཏཱ;

ནཱནཱདིཛགཎཱཀིཎྞཱ, ཏེ སེལཱ རམཡནྟི མཾ.

༡༠༧༣.

‘‘ཨཙྪོདིཀཱ པུཐུསིལཱ, གོནངྒུལམིགཱཡུཏཱ;

ཨམྦུསེཝཱལསཉྪནྣཱ, ཏེ སེལཱ རམཡནྟི མཾ.

༡༠༧༤.

‘‘ན པཉྩངྒིཀེན ཏུརིཡེན, རཏི མེ ཧོཏི ཏཱདིསཱི;

ཡཐཱ ཨེཀགྒཙིཏྟསྶ, སམྨཱ དྷམྨཾ ཝིཔསྶཏོ.

༡༠༧༥.

‘‘ཀམྨཾ ¶ བཧུཀཾ ན ཀཱརཡེ, པརིཝཛྫེཡྻ ཛནཾ ན ཨུཡྻམེ;

ཨུསྶུཀྐོ སོ རསཱནུགིདྡྷོ, ཨཏྠཾ རིཉྩཏི ཡོ སུཁཱཝཧོ.

༡༠༧༦.

‘‘ཀམྨཾ བཧུཀཾ ན ཀཱརཡེ, པརིཝཛྫེཡྻ ཨནཏྟནེཡྻམེཏཾ;

ཀིཙྪཏི ཀཱཡོ ཀིལམཏི, དུཀྑིཏོ སོ སམཐཾ ན ཝིནྡཏི.

༡༠༧༧.

‘‘ཨོཊྛཔྤཧཏམཏྟེན, ཨཏྟཱནམྤི ན པསྶཏི;

པཏྠདྡྷགཱིཝོ ཙརཏི, ཨཧཾ སེཡྻོཏི མཉྙཏི.

༡༠༧༨.

‘‘ཨསེཡྻོ སེཡྻསམཱནཾ, བཱལོ མཉྙཏི ཨཏྟཱནཾ;

ན ཏཾ ཝིཉྙཱུ པསཾསནྟི, པཏྠདྡྷམཱནསཾ ནརཾ.

༡༠༧༩.

‘‘ཡོ ¶ ཙ སེཡྻོཧམསྨཱིཏི, ནཱཧཾ སེཡྻོཏི ཝཱ པན;

ཧཱིནོ ཏཾསདིསོ [ཏཱིནོཧཾ སདིསོ (སྱཱ.)] ཝཱཏི, ཝིདྷཱསུ ན ཝིཀམྤཏི.

༡༠༨༠.

‘‘པཉྙཝནྟཾ ¶ ཏཐཱ ཏཱདིཾ, སཱིལེསུ སུསམཱཧིཏཾ;

ཙེཏོསམཐམནུཏྟཾ, ཏཉྩེ ཝིཉྙཱུ པསཾསརེ.

༡༠༨༡.

‘‘ཡསྶ ¶ སབྲཧྨཙཱརཱིསུ, གཱརཝོ ནཱུཔལབྦྷཏི;

ཨཱརཀཱ ཧོཏི སདྡྷམྨཱ, ནབྷཏོ པུཐཝཱི ཡཐཱ.

༡༠༨༢.

‘‘ཡེསཉྩ ཧིརི ཨོཏྟཔྤཾ, སདཱ སམྨཱ ཨུཔཊྛིཏཾ;

ཝིརཱུལ༹ྷབྲཧྨཙརིཡཱ ཏེ, ཏེསཾ ཁཱིཎཱ པུནབྦྷཝཱ.

༡༠༨༣.

‘‘ཨུདྡྷཏོ ཙཔལོ བྷིཀྑུ, པཾསུཀཱུལེན པཱརུཏོ;

ཀཔཱིཝ སཱིཧཙམྨེན, ན སོ ཏེནུཔསོབྷཏི.

༡༠༨༤.

‘‘ཨནུདྡྷཏོ ཨཙཔལོ, ནིཔཀོ སཾཝུཏིནྡྲིཡོ;

སོབྷཏི པཾསུཀཱུལེན, སཱིཧོཝ གིརིགབྦྷརེ.

༡༠༨༥.

‘‘ཨེཏེ སམྦཧུལཱ དེཝཱ, ཨིདྡྷིམནྟོ ཡསསྶིནོ;

དསདེཝསཧསྶཱནི, སབྦེ ཏེ བྲཧྨཀཱཡིཀཱ.

༡༠༨༦.

‘‘དྷམྨསེནཱཔཏིཾ ཝཱིརཾ, མཧཱཛྷཱཡིཾ སམཱཧིཏཾ;

སཱརིཔུཏྟཾ ནམསྶནྟཱ, ཏིཊྛནྟི པཉྫལཱིཀཏཱ.

༡༠༨༧.

‘‘‘ནམོ ¶ ཏེ པུརིསཱཛཉྙ, ནམོ ཏེ པུརིསུཏྟམ;

ཡསྶ ཏེ ནཱབྷིཛཱནཱམ, ཡམྤི ནིསྶཱཡ ཛྷཱཡཏི [ཛྷཱཡསི (ཀ. ཨཊྛ.)].

༡༠༨༨.

‘‘‘ཨཙྪེརཾ ཝཏ བུདྡྷཱནཾ, གམྦྷཱིརོ གོཙརོ སཀོ;

ཡེ མཡཾ ནཱབྷིཛཱནཱམ, ཝཱལཝེདྷིསམཱགཏཱ’.

༡༠༨༩.

‘‘ཏཾ ཏཐཱ དེཝཀཱཡེཧི, པཱུཛིཏཾ པཱུཛནཱརཧཾ;

སཱརིཔུཏྟཾ ཏདཱ དིསྭཱ, ཀཔྤིནསྶ སིཏཾ ཨཧུ.

༡༠༩༠.

‘‘ཡཱཝཏཱ བུདྡྷཁེཏྟམྷི, ཋཔཡིཏྭཱ མཧཱམུནིཾ;

དྷུཏགུཎེ ཝིསིཊྛོཧཾ, སདིསོ མེ ན ཝིཛྫཏི.

༡༠༩༡.

‘‘པརིཙིཎྞོ ¶ མཡཱ སཏྠཱ, ཀཏཾ བུདྡྷསྶ སཱསནཾ;

ཨོཧིཏོ གརུཀོ བྷཱརོ, ནཏྠི དཱནི པུནབྦྷཝོ.

༡༠༩༢.

‘‘ན ¶ ཙཱིཝརེ ན སཡནེ, བྷོཛནེ ནུཔལིམྤཏི;

གོཏམོ ཨནཔྤམེཡྻོ, མུལཱ༹ལཔུཔྥཾ ཝིམལཾཝ;

ཨམྦུནཱ ནེཀྑམྨནིནྣོ, ཏིབྷཝཱབྷིནིསྶཊོ.

༡༠༩༣.

‘‘སཏིཔཊྛཱནགཱིཝོ སོ, སདྡྷཱཧཏྠོ མཧཱམུནི;

པཉྙཱསཱིསོ མཧཱཉཱཎཱི, སདཱ ཙརཏི ནིབྦུཏོ’’ཏི.

… མཧཱཀསྶཔོ ཐེརོ….

ཙཏྟཱལཱིསནིཔཱཏོ ནིཊྛིཏོ.

ཏཏྲུདྡཱནཾ –

ཙཏྟཱལཱིསནིཔཱཏམྷི, མཧཱཀསྶཔསཝ྄ཧཡོ;

ཨེཀོཝ ཐེརོ གཱཐཱཡོ, ཙཏྟཱསཱིལ དུཝེཔི ཙཱཏི.

༡༩. པཉྙཱསནིཔཱཏོ

༡. ཏཱལཔུཊཏྠེརགཱཐཱ

༡༠༩༤.

‘‘ཀདཱ ¶ ¶ ¶ ནུཧཾ པབྦཏཀནྡརཱསུ, ཨེཀཱཀིཡོ ཨདྡུཏིཡོ ཝིཧསྶཾ;

ཨནིཙྩཏོ སབྦབྷཝཾ ཝིཔསྶཾ, ཏཾ མེ ཨིདཾ ཏཾ ནུ ཀདཱ བྷཝིསྶཏི.

༡༠༩༥.

‘‘ཀདཱ ནུཧཾ བྷིནྣཔཊནྡྷརོ མུནི, ཀཱསཱཝཝཏྠོ ¶ ཨམམོ ནིརཱསོ;

རཱགཉྩ དོསཉྩ ཏཐེཝ མོཧཾ, ཧནྟྭཱ སུཁཱི པཝནགཏོ ཝིཧསྶཾ.

༡༠༩༦.

‘‘ཀདཱ ཨནིཙྩཾ ཝདྷརོགནཱིལ༹ཾ, ཀཱཡཾ ཨིམཾ མཙྩུཛརཱཡུཔདྡུཏཾ;