📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཁུདྡཀནིཀཱཡེ

ཐེརཱིགཱཐཱཔཱལི༹

༡. ཨེཀཀནིཔཱཏོ

༡. ཨཉྙཏརཱཐེརཱིགཱཐཱ

༡.

‘‘སུཁཾ ¶ ¶ ¶ ¶ སུཔཱཧི ཐེརིཀེ, ཀཏྭཱ ཙོལེ༹ན པཱརུཏཱ;

ཨུཔསནྟོ ཧི ཏེ རཱགོ, སུཀྑཌཱཀཾ ཝ ཀུམྦྷིཡ’’ནྟི.

ཨིཏྠཾ སུདཾ ཨཉྙཏརཱ ཐེརཱི ཨཔཉྙཱཏཱ བྷིཀྑུནཱི གཱཐཾ ཨབྷཱསིཏྠཱཏི.

༢. མུཏྟཱཐེརཱིགཱཐཱ

༢.

‘‘མུཏྟེ ¶ མུཙྩསྶུ ཡོགེཧི, ཙནྡོ རཱཧུགྒཧཱ ཨིཝ;

ཝིཔྤམུཏྟེན ཙིཏྟེན, ཨནཎཱ བྷུཉྫ པིཎྜཀ’’ནྟི.

ཨིཏྠཾ སུདཾ བྷགཝཱ མུཏྟཾ སིཀྑམཱནཾ ཨིམཱཡ གཱཐཱཡ ཨབྷིཎྷཾ ཨོཝདཏཱིཏི.

༣. པུཎྞཱཐེརཱིགཱཐཱ

༣.

‘‘པུཎྞེ པཱུརསྶུ དྷམྨེཧི, ཙནྡོ པནྣརསེརིཝ;

པརིཔུཎྞཱཡ པཉྙཱཡ, ཏམོཁནྡྷཾ [ཏམོཀྑནྡྷཾ (སཱི. སྱཱ.)] པདཱལཡཱ’’ཏི.

ཨིཏྠཾ སུདཾ པུཎྞཱ ཐེརཱི གཱཐཾ ཨབྷཱསིཏྠཱཏི.

༤. ཏིསྶཱཐེརཱིགཱཐཱ

༤.

‘‘ཏིསྶེ སིཀྑསྶུ སིཀྑཱཡ, མཱ ཏཾ ཡོགཱ ཨུཔཙྩགུཾ;

སབྦཡོགཝིསཾཡུཏྟཱ, ཙར ལོཀེ ཨནཱསཝཱ’’ཏི.

… ཏིསྶཱ ཐེརཱི….

༥. ཨཉྙཏརཱཏིསྶཱཐེརཱིགཱཐཱ

༥.

‘‘ཏིསྶེ ¶ ¶ ཡུཉྫསྶུ དྷམྨེཧི, ཁཎོ ཏཾ མཱ ཨུཔཙྩགཱ;

ཁཎཱཏཱིཏཱ ཧི སོཙནྟི, ནིརཡམྷི སམཔྤིཏཱ’’ཏི.

… ཨཉྙཏརཱ ཏིསྶཱ ཐེརཱི….

༦. དྷཱིརཱཐེརཱིགཱཐཱ

༦.

‘‘དྷཱིརེ ¶ ནིརོདྷཾ ཕུསེཧི [ཕུསྶེཧི (སཱི.)], སཉྙཱཝཱུཔསམཾ སུཁཾ;

ཨཱརཱདྷཡཱཧི ནིབྦཱནཾ, ཡོགཀྑེམམནུཏྟར’’ནྟི [ཡོགཀྑེམཾ ཨནུཏྟརནྟི (སཱི. སྱཱ.)].

… དྷཱིརཱ ཐེརཱི….

༧. ཝཱིརཱཐེརཱིགཱཐཱ

༧.

‘‘ཝཱིརཱ ¶ ཝཱིརེཧི [དྷཱིརཱ དྷཱིརེཧི (ཀ.)] དྷམྨེཧི, བྷིཀྑུནཱི བྷཱཝིཏིནྡྲིཡཱ;

དྷཱརེཧི ཨནྟིམཾ དེཧཾ, ཛེཏྭཱ མཱརཾ སཝཱཧིནི’’ནྟི [སཝཱཧནནྟི (ཀ.)].

… ཝཱིརཱ ཐེརཱི….

༨. མིཏྟཱཐེརཱིགཱཐཱ

༨.

‘‘སདྡྷཱཡ པབྦཛིཏྭཱན, མིཏྟེ མིཏྟརཏཱ བྷཝ;

བྷཱཝེཧི ཀུསལེ དྷམྨེ, ཡོགཀྑེམསྶ པཏྟིཡཱ’’ཏི.

… མིཏྟཱ ཐེརཱི….

༩. བྷདྲཱཐེརཱིགཱཐཱ

༩.

‘‘སདྡྷཱཡ པབྦཛིཏྭཱན, བྷདྲེ བྷདྲརཏཱ བྷཝ;

བྷཱཝེཧི ཀུསལེ དྷམྨེ, ཡོགཀྑེམམནུཏྟར’’ནྟི.

… བྷདྲཱ ཐེརཱི….

༡༠. ཨུཔསམཱཐེརཱིགཱཐཱ

༡༠.

‘‘ཨུཔསམེ ཏརེ ཨོགྷཾ, མཙྩུདྷེཡྻཾ སུདུཏྟརཾ;

དྷཱརེཧི ཨནྟིམཾ དེཧཾ, ཛེཏྭཱ མཱརཾ སཝཱཧན’’ནྟི.

… ཨུཔསམཱ ཐེརཱི….

༡༡. མུཏྟཱཐེརཱིགཱཐཱ

༡༡.

‘‘སུམུཏྟཱ ¶ སཱདྷུམུཏྟཱམྷི, ཏཱིཧི ཁུཛྫེཧི མུཏྟིཡཱ;

ཨུདུཀྑལེན མུསལེན, པཏིནཱ ཁུཛྫཀེན ཙ;

མུཏྟཱམྷི ¶ ཛཱཏིམརཎཱ, བྷཝནེཏྟི སམཱུཧཏཱ’’ཏི.

… མུཏྟཱ ཐེརཱི….

༡༢. དྷམྨདིནྣཱཐེརཱིགཱཐཱ

༡༢.

‘‘ཚནྡཛཱཏཱ ཨཝསཱཡཱི, མནསཱ ཙ ཕུཊཱ [ཕུཊྛཱ (སྱཱ.), ཕུཋཱ (སཱི. ཨཊྛ.)] སིཡཱ;

ཀཱམེསུ ཨཔྤཊིབདྡྷཙིཏྟཱ [ཨཔྤཊིབནྡྷཙིཏྟཱ (ཀ.)], ཨུདྡྷཾསོཏཱཏི ཝུཙྩཏཱི’’ཏི [ཨུདྡྷཾསོཏཱ ཝིམུཙྩཏཱིཏི (སཱི. པཱི.)].

… དྷམྨདིནྣཱ ཐེརཱི….

༡༣.ཝིསཱཁཱཐེརཱིགཱཐཱ

༡༣.

‘‘ཀརོཐ ¶ བུདྡྷསཱསནཾ, ཡཾ ཀཏྭཱ ནཱནུཏཔྤཏི;

ཁིཔྤཾ པཱདཱནི དྷོཝིཏྭཱ, ཨེཀམནྟེ ནིསཱིདཐཱ’’ཏི.

… ཝིསཱཁཱ ཐེརཱི….

༡༤.སུམནཱཐེརཱིགཱཐཱ

༡༤.

‘‘དྷཱཏུཡོ དུཀྑཏོ དིསྭཱ, མཱ ཛཱཏིཾ པུནརཱགམི;

བྷཝེ ཚནྡཾ ཝིརཱཛེཏྭཱ, ཨུཔསནྟཱ ཙརིསྶསཱི’’ཏི.

… སུམནཱ ཐེརཱི….

༡༥. ཨུཏྟརཱཐེརཱིགཱཐཱ

༡༥.

‘‘ཀཱཡེན ¶ སཾཝུཏཱ ཨཱསིཾ, ཝཱཙཱཡ ཨུད ཙེཏསཱ;

སམཱུལཾ ཏཎྷམབྦུཡ྄ཧ, སཱིཏིབྷཱུཏཱམྷི ནིབྦུཏཱ’’ཏི.

… ཨུཏྟརཱ ཐེརཱི….

༡༦. ཝུཌྜྷཔབྦཛིཏསུམནཱཐེརཱིགཱཐཱ

༡༦.

‘‘སུཁཾ ཏྭཾ ཝུཌྜྷིཀེ སེཧི, ཀཏྭཱ ཙོལེ༹ན པཱརཱུཏཱ;

ཨུཔསནྟོ ཧི ཏེ རཱགོ, སཱིཏིབྷཱུཏཱསི ནིབྦུཏཱ’’ཏི.

… སུམནཱ ཝུཌྜྷཔབྦཛིཏཱ ཐེརཱི….

༡༧. དྷམྨཱཐེརཱིགཱཐཱ

༡༧.

‘‘པིཎྜཔཱཏཾ ¶ ཙརིཏྭཱན, དཎྜམོལུབྦྷ དུབྦལཱ;

ཝེདྷམཱནེཧི གཏྟེཧི, ཏཏྠེཝ ནིཔཏིཾ ཚམཱ;

དིསྭཱ ¶ ཨཱདཱིནཝཾ ཀཱཡེ, ཨཐ ཙིཏྟཾ ཝིམུཙྩི མེ’’ཏི.

… དྷམྨཱ ཐེརཱི….

༡༨. སངྒྷཱཐེརཱིགཱཐཱ

༡༨.

‘‘ཧིཏྭཱ ¶ གྷརེ པབྦཛིཏྭཱ [པབྦཛིཏཱ (སཱི. ཨཊྛ.)], ཧིཏྭཱ པུཏྟཾ པསུཾ པིཡཾ;

ཧིཏྭཱ རཱགཉྩ དོསཉྩ, ཨཝིཛྫཉྩ ཝིརཱཛིཡ;

སམཱུལཾ ཏཎྷམབྦུཡ྄ཧ, ཨུཔསནྟཱམྷི ནིབྦུཏཱ’’ཏི.

… སངྒྷཱ ཐེརཱི….

ཨེཀཀནིཔཱཏོ ནིཊྛིཏོ.

༢. དུཀནིཔཱཏོ

༡. ཨབྷིརཱུཔནནྡཱཐེརཱིགཱཐཱ

༡༩.

[ཨཔ. ཐེརཱི ༢.༤.༡༥༧ ཨཔདཱནེཔི] ‘‘ཨཱཏུརཾ ¶ ཨསུཙིཾ པཱུཏིཾ, པསྶ ནནྡེ སམུསྶཡཾ;

ཨསུབྷཱཡ ཙིཏྟཾ བྷཱཝེཧི, ཨེཀགྒཾ སུསམཱཧིཏཾ.

༢༠.

‘‘ཨནིམིཏྟཉྩ བྷཱཝེཧི, མཱནཱནུསཡམུཛྫཧ;

ཏཏོ མཱནཱབྷིསམཡཱ, ཨུཔསནྟཱ ཙརིསྶསཱི’’ཏི.

ཨིཏྠཾ སུདཾ བྷགཝཱ ཨབྷིརཱུཔནནྡཾ སིཀྑམཱནཾ ཨིམཱཧི གཱཐཱཧི ཨབྷིཎྷཾ ཨོཝདཏཱིཏི [ཨིཏྠཾ སུདཾ བྷགཝཱ ཨབྷིརཱུཔནནྡཾ སིཀྑམཱནཾ ཨིམཱཧི གཱཐཱཧི ཨབྷིཎྷཾ ཨོཝདཏཱིཏི (ཀ.)].

༢. ཛེནྟཱཐེརཱིགཱཐཱ

༢༡.

‘‘ཡེ ཨིམེ སཏྟ བོཛ྄ཛྷངྒཱ, མགྒཱ ནིབྦཱནཔཏྟིཡཱ;

བྷཱཝིཏཱ ཏེ མཡཱ སབྦེ, ཡཐཱ བུདྡྷེན དེསིཏཱ.

༢༢.

‘‘དིཊྛོ ཧི མེ སོ བྷགཝཱ, ཨནྟིམོཡཾ སམུསྶཡོ;

ཝིཀྑཱིཎོ ཛཱཏིསཾསཱརོ, ནཏྠི དཱནི པུནབྦྷཝོ’’ཏི.

ཨིཏྠཾ སུདཾ ཛེནྟཱ ཐེརཱི གཱཐཱཡོ ཨབྷཱསིཏྠཱཏི.

༣. སུམངྒལམཱཏཱཐེརཱིགཱཐཱ

༢༣.

‘‘སུམུཏྟིཀཱ ¶ ¶ ¶ སུམུཏྟིཀཱ [སུམུཏྟིཀེ སུམུཏྟིཀེ (སཱི.), སུམུཏྟིཀེ སུམུཏྟིཀཱ (སྱཱ. ཀ.)], སཱདྷུམུཏྟིཀཱམྷི མུསལསྶ;

ཨཧིརིཀོ མེ ཚཏྟཀཾ ཝཱཔི, ཨུཀྑལིཀཱ མེ དེཌྜུབྷཾ ཝཱཏི.

༢༤.

‘‘རཱགཉྩ ཨཧཾ དོསཉྩ, ཙིཙྩིཊི ཙིཙྩིཊཱིཏི ཝིཧནཱམི;

སཱ རུཀྑམཱུལམུཔགམྨ, ཨཧོ སུཁནྟི སུཁཏོ ཛྷཱཡཱམཱི’’ཏི.

… སུམངྒལམཱཏཱ ཐེརཱི [ཨཉྙཏརཱ ཐེརཱི བྷིཀྑུནཱི ཨཔཉྙཱཏཱ (སྱཱ. ཀ.)].

༤. ཨཌྜྷཀཱསིཐེརཱིགཱཐཱ

༢༥.

‘‘ཡཱཝ ཀཱསིཛནཔདོ, སུངྐོ མེ ཏཏྠཀོ ཨཧུ;

ཏཾ ཀཏྭཱ ནེགམོ ཨགྒྷཾ, ཨཌྜྷེནགྒྷཾ ཋཔེསི མཾ.

༢༦.

‘‘ཨཐ ¶ ནིབྦིནྡཧཾ རཱུཔེ, ནིབྦིནྡཉྩ ཝིརཛྫཧཾ;

མཱ པུན ཛཱཏིསཾསཱརཾ, སནྡྷཱཝེཡྻཾ པུནཔྤུནཾ;

ཏིསྶོ ཝིཛྫཱ སཙྪིཀཏཱ, ཀཏཾ བུདྡྷསྶ སཱསན’’ནྟི.

… ཨཌྜྷཀཱསི ཐེརཱི….

༥. ཙིཏྟཱཐེརཱིགཱཐཱ

༢༧.

‘‘ཀིཉྩཱཔི ཁོམྷི ཀིསིཀཱ, གིལཱནཱ བཱལ༹ྷདུབྦལཱ;

དཎྜམོལུབྦྷ གཙྪཱམི, པབྦཏཾ ཨབྷིརཱུཧིཡ.

༢༨.

‘‘སངྒྷཱཊིཾ ནིཀྑིཔིཏྭཱན, པཏྟཀཉྩ ནིཀུཛྫིཡ;

སེལེ ཁམྦྷེསིམཏྟཱནཾ, ཏམོཁནྡྷཾ པདཱལིཡཱ’’ཏི.

… ཙིཏྟཱ ཐེརཱི….

༦. མེཏྟིཀཱཐེརཱིགཱཐཱ

༢༩.

‘‘ཀིཉྩཱཔི ཁོམྷི དུཀྑིཏཱ, དུབྦལཱ གཏཡོབྦནཱ;

དཎྜམོལུབྦྷ གཙྪཱམི, པབྦཏཾ ཨབྷིརཱུཧིཡ.

༣༠.

‘‘ནིཀྑིཔིཏྭཱན ¶ སངྒྷཱཊིཾ, པཏྟཀཉྩ ནིཀུཛྫིཡ;

ནིསིནྣཱ ཙམྷི སེལམྷི, ཨཐ ཙིཏྟཾ ཝིམུཙྩི མེ;

ཏིསྶོ ¶ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསན’’ནྟི.

… མེཏྟིཀཱ ཐེརཱི….

༧. མིཏྟཱཐེརཱིགཱཐཱ

༣༡.

‘‘ཙཱཏུདྡསིཾ པཉྩདསིཾ, ཡཱ ཙ པཀྑསྶ ཨཊྛམཱི;

པཱཊིཧཱརིཡཔཀྑཉྩ, ཨཊྛངྒསུསམཱགཏཾ.

༣༢.

‘‘ཨུཔོསཐཾ ¶ ཨུཔཱགཙྪིཾ, དེཝཀཱཡཱབྷིནནྡིནཱི;

སཱཛྫ ཨེཀེན བྷཏྟེན, མུཎྜཱ སངྒྷཱཊིཔཱརུཏཱ;

དེཝཀཱཡཾ ན པཏྠེཧཾ, ཝིནེཡྻ ཧདཡེ དར’’ནྟི.

… མིཏྟཱ ཐེརཱི….

༨. ཨབྷཡམཱཏུཐེརཱིགཱཐཱ

༣༣.

‘‘ཨུདྡྷཾ པཱདཏལཱ ཨམྨ, ཨདྷོ ཝེ ཀེསམཏྠཀཱ;

པཙྩཝེཀྑསྶུམཾ ཀཱཡཾ, ཨསུཙིཾ པཱུཏིགནྡྷིཀཾ.

༣༤.

‘‘ཨེཝཾ ¶ ཝིཧརམཱནཱཡ, སབྦོ རཱགོ སམཱུཧཏོ;

པརིལཱ༹ཧོ སམུཙྪིནྣོ, སཱིཏིབྷཱུཏཱམྷི ནིབྦུཏཱ’’ཏི.

… ཨབྷཡམཱཏུ ཐེརཱི….

༩. ཨབྷཡཱཐེརཱིགཱཐཱ

༣༥.

‘‘ཨབྷཡེ བྷིདུརོ ཀཱཡོ, ཡཏྠ སཏཱ པུཐུཛྫནཱ;

ནིཀྑིཔིསྶཱམིམཾ དེཧཾ, སམྤཛཱནཱ སཏཱིམཏཱི.

༣༦.

‘‘བཧཱུཧི དུཀྑདྷམྨེཧི, ཨཔྤམཱདརཏཱཡ མེ;

ཏཎྷཀྑཡོ ཨནུཔྤཏྟོ, ཀཏཾ བུདྡྷསྶ སཱསན’’ནྟི.

… ཨབྷཡཱ ཐེརཱི….

༡༠. སཱམཱཐེརཱིགཱཐཱ

༣༧.

‘‘ཙཏུཀྑཏྟུཾ ¶ ¶ པཉྩཀྑཏྟུཾ, ཝིཧཱརཱ ཨུཔནིཀྑམིཾ;

ཨལདྡྷཱ ཙེཏསོ སནྟིཾ, ཙིཏྟེ ཨཝསཝཏྟིནཱི;

ཏསྶཱ མེ ཨཊྛམཱི རཏྟི, ཡཏོ ཏཎྷཱ སམཱུཧཏཱ.

༣༨.

‘‘བཧཱུཧི དུཀྑདྷམྨེཧི, ཨཔྤམཱདརཏཱཡ མེ;

ཏཎྷཀྑཡོ ཨནུཔྤཏྟོ, ཀཏཾ བུདྡྷསྶ སཱསན’’ནྟི.

… སཱམཱ ཐེརཱི….

དུཀནིཔཱཏོ ནིཊྛིཏོ.

༣. ཏིཀནིཔཱཏོ

༡. ཨཔརཱསཱམཱཐེརཱིགཱཐཱ

༣༩.

‘‘པཎྞཝཱིསཏིཝསྶཱནི ¶ , ཡཏོ པབྦཛིཏཱཡ མེ;

ནཱབྷིཛཱནཱམི ཙིཏྟསྶ, སམཾ ལདྡྷཾ ཀུདཱཙནཾ.

༤༠.

‘‘ཨལདྡྷཱ ཙེཏསོ སནྟིཾ, ཙིཏྟེ ཨཝསཝཏྟིནཱི;

ཏཏོ སཾཝེགམཱཔཱདིཾ, སརིཏྭཱ ཛིནསཱསནཾ.

༤༡.

‘‘བཧཱུཧི དུཀྑདྷམྨེཧི, ཨཔྤམཱདརཏཱཡ མེ;

ཏཎྷཀྑཡོ ཨནུཔྤཏྟོ, ཀཏཾ བུདྡྷསྶ སཱསནཾ;

ཨཛྫ ¶ མེ སཏྟམཱི རཏྟི, ཡཏོ ཏཎྷཱ ཝིསོསིཏཱ’’ཏི.

… ཨཔརཱ སཱམཱ ཐེརཱི….

༢. ཨུཏྟམཱཐེརཱིགཱཐཱ

༤༢.

‘‘ཙཏུཀྑཏྟུཾ ¶ པཉྩཀྑཏྟུཾ, ཝིཧཱརཱ ཨུཔནིཀྑམིཾ;

ཨལདྡྷཱ ཙེཏསོ སནྟིཾ, ཙིཏྟེ ཨཝསཝཏྟིནཱི.

༤༣.

‘‘སཱ ¶ བྷིཀྑུནིཾ ཨུཔགཙྪིཾ, ཡཱ མེ སདྡྷཱཡིཀཱ ཨཧུ;

སཱ མེ དྷམྨམདེསེསི, ཁནྡྷཱཡཏནདྷཱཏུཡོ.

༤༤.

‘‘ཏསྶཱ དྷམྨཾ སུཎིཏྭཱན, ཡཐཱ མཾ ཨནུསཱསི སཱ;

སཏྟཱཧཾ ཨེཀཔལླངྐེན, ནིསཱིདིཾ པཱིཏིསུཁསམཔྤིཏཱ [ནིསཱིདིཾ སུཁསམཔྤིཏཱ (སཱི.)];

ཨཊྛམིཡཱ པཱདེ པསཱརེསིཾ, ཏམོཁནྡྷཾ པདཱལིཡཱ’’ཏི.

… ཨུཏྟམཱ ཐེརཱི….

༣. ཨཔརཱཨུཏྟམཱཐེརཱིགཱཐཱ

༤༥.

‘‘ཡེ ཨིམེ སཏྟ བོཛ྄ཛྷངྒཱ, མགྒཱ ནིབྦཱནཔཏྟིཡཱ;

བྷཱཝིཏཱ ཏེ མཡཱ སབྦེ, ཡཐཱ བུདྡྷེན དེསིཏཱ.

༤༦.

‘‘སུཉྙཏསྶཱནིམིཏྟསྶ, ལཱབྷིནཱིཧཾ ཡདིཙྪཀཾ;

ཨོརསཱ དྷཱིཏཱ བུདྡྷསྶ, ནིབྦཱནཱབྷིརཏཱ སདཱ.

༤༧.

‘‘སབྦེ ¶ ཀཱམཱ སམུཙྪིནྣཱ, ཡེ དིབྦཱ ཡེ ཙ མཱནུསཱ;

ཝིཀྑཱིཎོ ཛཱཏིསཾསཱརོ, ནཏྠི དཱནི པུནབྦྷཝོ’’ཏི.

… ཨཔརཱ ཨུཏྟམཱ ཐེརཱི….

༤. དནྟིཀཱཐེརཱིགཱཐཱ

༤༨.

‘‘དིཝཱཝིཧཱརཱ ནིཀྑམྨ, གིཛ྄ཛྷཀཱུཊམྷི པབྦཏེ;

ནཱགཾ ཨོགཱཧམུཏྟིཎྞཾ, ནདཱིཏཱིརམྷི ཨདྡསཾ.

༤༩.

‘‘པུརིསོ ཨངྐུསམཱདཱཡ, ‘དེཧི པཱད’ནྟི ཡཱཙཏི;

ནཱགོ པསཱརཡཱི པཱདཾ, པུརིསོ ནཱགམཱརུཧི.

༥༠.

‘‘དིསྭཱ ¶ ཨདནྟཾ དམིཏཾ, མནུསྶཱནཾ ཝསཾ གཏཾ;

ཏཏོ ཙིཏྟཾ སམཱདྷེསིཾ, ཁལུ ཏཱཡ ཝནཾ གཏཱ’’ཏི.

… དནྟིཀཱ ཐེརཱི….

༥. ཨུབྦིརིཐེརཱིགཱཐཱ

༥༡.

‘‘ཨམྨ ཛཱིཝཱཏི ཝནམྷི ཀནྡསི, ཨཏྟཱནཾ ཨདྷིགཙྪ ཨུབྦིརི;

ཙུལླཱསཱིཏིསཧསྶཱནི [ཙཱུལཱ༹སཱིཏིསཧསྶཱནི (སཱི.)], སབྦཱ ཛཱིཝསནཱམིཀཱ;

ཨེཏམྷཱལཱ༹ཧནེ དཌྜྷཱ, ཏཱསཾ ཀམནུསོཙསི.

༥༢.

‘‘ཨབྦཧཱི ¶ ¶ [ཨབྦུཏཱི (སྱཱ.), ཨབྦུལ༹ྷཾ (ཀ.)] ཝཏ མེ སལླཾ, དུདྡསཾ ཧདཡསྶིཏཾ [ཧདཡནིསྶིཏཾ (སཱི. སྱཱ.)];

ཡཾ མེ སོཀཔརེཏཱཡ, དྷཱིཏུསོཀཾ བྱཔཱནུདི.

༥༣.

‘‘སཱཛྫ ཨབྦཱུལ༹ྷསལླཱཧཾ, ནིཙྪཱཏཱ པརིནིབྦུཏཱ;

བུདྡྷཾ དྷམྨཉྩ སངྒྷཉྩ, ཨུཔེམི སརཎཾ མུནི’’ནྟི.

… ཨུབྦིརཱི ཐེརཱི….

༦. སུཀྐཱཐེརཱིགཱཐཱ

༥༤.

‘‘ཀིཾམེ ཀཏཱ རཱཛགཧེ མནུསྶཱ, མདྷུཾ པཱིཏཱཝ [མདྷུཔཱིཏཱཝ (སཱི.)] ཨཙྪརེ;

ཡེ སུཀྐཾ ན ཨུཔཱསནྟི, དེསེནྟིཾ བུདྡྷསཱསནཾ.

༥༥.

‘‘ཏཉྩ ཨཔྤཊིཝཱནཱིཡཾ, ཨསེཙནཀམོཛཝཾ;

པིཝནྟི མཉྙེ སཔྤཉྙཱ, ཝལཱཧཀམིཝདྡྷགཱུ.

༥༦.

‘‘སུཀྐཱ ¶ སུཀྐེཧི དྷམྨེཧི, ཝཱིཏརཱགཱ སམཱཧིཏཱ;

དྷཱརེཏི ཨནྟིམཾ དེཧཾ, ཛེཏྭཱ མཱརཾ སཝཱཧན’’ནྟི.

… སུཀྐཱ ཐེརཱི….

༧. སེལཱཐེརཱིགཱཐཱ

༥༧.

‘‘ནཏྠི ནིསྶརཎཾ ལོཀེ, ཀིཾ ཝིཝེཀེན ཀཱཧསི;

བྷུཉྫཱཧི ¶ ཀཱམརཏིཡོ, མཱཧུ པཙྪཱནུཏཱཔིནཱི’’.

༥༨.

‘‘སཏྟིསཱུལཱུཔམཱ ཀཱམཱ, ཁནྡྷཱསཾ ཨདྷིཀུཊྚནཱ;

ཡཾ ཏྭཾ ‘ཀཱམརཏིཾ’ བྲཱུསི, ‘ཨརཏཱི’ དཱནི སཱ མམ.

༥༩.

‘‘སབྦཏྠ ཝིཧཏཱ ནནྡཱི [ནནྡི (སཱི. སྱཱ.)], ཏམོཁནྡྷོ པདཱལིཏོ;

ཨེཝཾ ཛཱནཱཧི པཱཔིམ, ནིཧཏོ ཏྭམསི ཨནྟཀཱ’’ཏི.

… སེལཱ ཐེརཱི….

༨. སོམཱཐེརཱིགཱཐཱ

༦༠.

‘‘ཡཾ ཏཾ ཨིསཱིཧི པཏྟབྦཾ, ཋཱནཾ དུརབྷིསམྦྷཝཾ;

ན ཏཾ དྭངྒུལཔཉྙཱཡ, སཀྐཱ པཔྤོཏུམིཏྠིཡཱ’’.

༦༡.

‘‘ཨིཏྠིབྷཱཝོ ནོ ཀིཾ ཀཡིརཱ, ཙིཏྟམྷི སུསམཱཧིཏེ;

ཉཱཎམྷི ཝཏྟམཱནམྷི, སམྨཱ དྷམྨཾ ཝིཔསྶཏོ.

༦༢.

‘‘སབྦཏྠ ¶ ¶ ཝིཧཏཱ ནནྡཱི, ཏམོཁནྡྷོ པདཱལིཏོ;

ཨེཝཾ ཛཱནཱཧི པཱཔིམ, ནིཧཏོ ཏྭམསི ཨནྟཀཱ’’ཏི.

… སོམཱ ཐེརཱི….

ཏིཀནིཔཱཏོ ནིཊྛིཏོ.

༤. ཙཏུཀྐནིཔཱཏོ

༡. བྷདྡཱཀཱཔིལཱནཱིཐེརཱིགཱཐཱ

༦༣.

‘‘པུཏྟོ ¶ བུདྡྷསྶ དཱཡཱདོ, ཀསྶཔོ སུསམཱཧིཏོ;

པུབྦེནིཝཱསཾ ཡོཝེདི, སགྒཱཔཱཡཉྩ པསྶཏི.

༦༤.

‘‘ཨཐོ ¶ ཛཱཏིཀྑཡཾ པཏྟོ, ཨབྷིཉྙཱཝོསིཏོ མུནི;

ཨེཏཱཧི ཏཱིཧི ཝིཛྫཱཧི, ཏེཝིཛྫོ ཧོཏི བྲཱཧྨཎོ.

༦༥.

‘‘ཏཐེཝ བྷདྡཱ ཀཱཔིལཱནཱི, ཏེཝིཛྫཱ མཙྩུཧཱཡིནཱི;

དྷཱརེཏི ཨནྟིམཾ དེཧཾ, ཛེཏྭཱ མཱརཾ སཝཱཧནཾ.

༦༦.

‘‘དིསྭཱ ཨཱདཱིནཝཾ ལོཀེ, ཨུབྷོ པབྦཛིཏཱ མཡཾ;

ཏྱམྷ ཁཱིཎཱསཝཱ དནྟཱ, སཱིཏིབྷཱུཏམྷ ནིབྦུཏཱ’’ཏི.

… བྷདྡཱ ཀཱཔིལཱནཱི ཐེརཱི….

ཙཏུཀྐནིཔཱཏོ ནིཊྛིཏོ.

༥. པཉྩཀནིཔཱཏོ

༡. ཨཉྙཏརཱཐེརཱིགཱཐཱ

༦༧.

‘‘པཎྞཝཱིསཏིཝསྶཱནི ¶ ¶ , ཡཏོ པབྦཛིཏཱ ཨཧཾ;

ནཱཙྪརཱསངྒྷཱཏམཏྟམྤི, ཙིཏྟསྶཱུཔསམཛ྄ཛྷགཾ.

༦༨.

‘‘ཨལདྡྷཱ ཙེཏསོ སནྟིཾ, ཀཱམརཱགེནཝསྶུཏཱ;

བཱཧཱ པགྒཡ྄ཧ ཀནྡནྟཱི, ཝིཧཱརཾ པཱཝིསིཾ ཨཧཾ.

༦༩.

‘‘སཱ བྷིཀྑུནིཾ ཨུཔཱགཙྪིཾ, ཡཱ མེ སདྡྷཱཡིཀཱ ཨཧུ;

སཱ མེ དྷམྨམདེསེསི, ཁནྡྷཱཡཏནདྷཱཏུཡོ.

༧༠.

‘‘ཏསྶཱ དྷམྨཾ སུཎིཏྭཱན, ཨེཀམནྟེ ཨུཔཱཝིསིཾ;

པུབྦེནིཝཱསཾ ཛཱནཱམི, དིབྦཙཀྑུ ཝིསོདྷིཏཾ.

༧༡.

‘‘ཙེཏོཔརིཙྩཉཱཎཉྩ ¶ ¶ [ཙེཏོཔརིཡཉཱཎཉྩ (ཀ.)], སོཏདྷཱཏུ ཝིསོདྷིཏཱ;

ཨིདྡྷཱིཔི མེ སཙྪིཀཏཱ, པཏྟོ མེ ཨཱསཝཀྑཡོ;

ཚལ༹བྷིཉྙཱ [ཚ མེབྷིཉྙཱ (སྱཱ. ཀ.)] སཙྪིཀཏཱ, ཀཏཾ བུདྡྷསྶ སཱསན’’ནྟི.

… ཨཉྙཏརཱ ཐེརཱི ….

༢. ཝིམལཱཐེརཱིགཱཐཱ

༧༢.

‘‘མཏྟཱ ཝཎྞེན རཱུཔེན, སོབྷགྒེན ཡསེན ཙ;

ཡོབྦནེན ཙུཔཏྠདྡྷཱ, ཨཉྙཱསམཏིམཉྙིཧཾ.

༧༣.

‘‘ཝིབྷཱུསེཏྭཱ ཨིམཾ ཀཱཡཾ, སུཙིཏྟཾ བཱལལཱཔནཾ;

ཨཊྛཱསིཾ ཝེསིདྭཱརམྷི, ལུདྡོ པཱསམིཝོཌྜིཡ.

༧༤.

‘‘པིལནྡྷནཾ ཝིདཾསེནྟཱི, གུཡ྄ཧཾ པཀཱསིཀཾ བཧུཾ;

ཨཀཱསིཾ ཝིཝིདྷཾ མཱཡཾ, ཨུཛྫགྒྷནྟཱི བཧུཾ ཛནཾ.

༧༥.

‘‘སཱཛྫ པིཎྜཾ ཙརིཏྭཱན, མུཎྜཱ སངྒྷཱཊིཔཱརུཏཱ;

ནིསིནྣཱ རུཀྑམཱུལམྷི, ཨཝིཏཀྐསྶ ལཱབྷིནཱི.

༧༦.

‘‘སབྦེ ཡོགཱ སམུཙྪིནྣཱ, ཡེ དིབྦཱ ཡེ ཙ མཱནུསཱ;

ཁེཔེཏྭཱ ཨཱསཝེ སབྦེ, སཱིཏིབྷཱུཏཱམྷི ནིབྦུཏཱ’’ཏི.

… ཝིམལཱ པུརཱཎགཎིཀཱ ཐེརཱི….

༣. སཱིཧཱཐེརཱིགཱཐཱ

༧༧.

‘‘ཨཡོནིསོ ¶ ¶ མནསིཀཱརཱ, ཀཱམརཱགེན ཨཊྚིཏཱ;

ཨཧོསིཾ ཨུདྡྷཏཱ པུབྦེ, ཙིཏྟེ ཨཝསཝཏྟིནཱི.

༧༨.

‘‘པརིཡུཊྛིཏཱ ཀླེསེཧི, སུབྷསཉྙཱནུཝཏྟིནཱི;

སམཾ ཙིཏྟསྶ ན ལབྷིཾ, རཱགཙིཏྟཝསཱནུགཱ.

༧༩.

‘‘ཀིསཱ ¶ པཎྜུ ཝིཝཎྞཱ ཙ, སཏྟ ཝསྶཱནི ཙཱརིཧཾ;

ནཱཧཾ དིཝཱ ཝཱ རཏྟིཾ ཝཱ, སུཁཾ ཝིནྡིཾ སུདུཀྑིཏཱ.

༨༠.

‘‘ཏཏོ རཛྫུཾ གཧེཏྭཱན, པཱཝིསིཾ ཝནམནྟརཾ;

ཝརཾ མེ ཨིདྷ ཨུབྦནྡྷཾ, ཡཉྩ ཧཱིནཾ པུནཱཙརེ.

༨༡.

‘‘དལ༹ྷཔཱསཾ [དལ༹ྷཾ པཱསཾ (སཱི.)] ཀརིཏྭཱན, རུཀྑསཱཁཱཡ བནྡྷིཡ;

པཀྑིཔིཾ ¶ པཱསཾ གཱིཝཱཡཾ, ཨཐ ཙིཏྟཾ ཝིམུཙྩི མེ’’ཏི.

… སཱིཧཱ ཐེརཱི….

༤. སུནྡརཱིནནྡཱཐེརཱིགཱཐཱ

༨༢.

‘‘ཨཱཏུརཾ ཨསུཙིཾ པཱུཏིཾ, པསྶ ནནྡེ སམུསྶཡཾ;

ཨསུབྷཱཡ ཙིཏྟཾ བྷཱཝེཧི, ཨེཀགྒཾ སུསམཱཧིཏཾ.

༨༣.

‘‘ཡཐཱ ཨིདཾ ཏཐཱ ཨེཏཾ, ཡཐཱ ཨེཏཾ ཏཐཱ ཨིདཾ;

དུགྒནྡྷཾ པཱུཏིཀཾ ཝཱཏི, བཱལཱནཾ ཨབྷིནནྡིཏཾ.

༨༤.

‘‘ཨེཝམེཏཾ ཨཝེཀྑནྟཱི, རཏྟིནྡིཝམཏནྡིཏཱ;

ཏཏོ སཀཱཡ པཉྙཱཡ, ཨབྷིནིབྦིཛ྄ཛྷ [ཨབྷིནིབྦིཛྫ (སཱི. སྱཱ.)] དཀྑིསཾ.

༨༥.

‘‘ཏསྶཱ མེ ཨཔྤམཏྟཱཡ, ཝིཙིནནྟིཡཱ ཡོནིསོ;

ཡཐཱབྷཱུཏཾ ཨཡཾ ཀཱཡོ, དིཊྛོ སནྟརབཱཧིརོ.

༨༦.

‘‘ཨཐ ནིབྦིནྡཧཾ ཀཱཡེ, ཨཛ྄ཛྷཏྟཉྩ ཝིརཛྫཧཾ;

ཨཔྤམཏྟཱ ཝིསཾཡུཏྟཱ, ཨུཔསནྟཱམྷི ནིབྦུཏཱ’’ཏི.

… སུནྡརཱིནནྡཱ ཐེརཱི….

༥. ནནྡུཏྟརཱཐེརཱིགཱཐཱ

༨༧.

‘‘ཨགྒིཾ ¶ ཙནྡཉྩ སཱུརིཡཉྩ, དེཝཏཱ ཙ ནམསྶིཧཾ;

ནདཱིཏིཏྠཱནི གནྟྭཱན, ཨུདཀཾ ཨོརུཧཱམིཧཾ.

༨༨.

‘‘བཧཱུཝཏསམཱདཱནཱ ¶ ¶ , ཨཌྜྷཾ སཱིསསྶ ཨོལིཁིཾ;

ཚམཱཡ སེཡྻཾ ཀཔྤེམི, རཏྟིཾ བྷཏྟཾ ན བྷུཉྫཧཾ.

༨༩.

‘‘ཝིབྷཱུསཱམཎྜནརཏཱ, ནྷཱཔནུཙྪཱདནེཧི ཙ;

ཨུཔཀཱསིཾ ཨིམཾ ཀཱཡཾ, ཀཱམརཱགེན ཨཊྚིཏཱ.

༩༠.

‘‘ཏཏོ སདྡྷཾ ལབྷིཏྭཱན, པབྦཛིཾ ཨནགཱརིཡཾ;

དིསྭཱ ཀཱཡཾ ཡཐཱབྷཱུཏཾ, ཀཱམརཱགོ སམཱུཧཏོ.

༩༡.

‘‘སབྦེ བྷཝཱ སམུཙྪིནྣཱ, ཨིཙྪཱ ཙ པཏྠནཱཔི ཙ;

སབྦཡོགཝིསཾཡུཏྟཱ, སནྟིཾ པཱཔུཎི ཙེཏསོ’’ཏི.

… ནནྡུཏྟརཱ ཐེརཱི….

༦. མིཏྟཱཀཱལཱི༹ཐེརཱིགཱཐཱ

༩༢.

‘‘སདྡྷཱཡ པབྦཛིཏྭཱན, ཨགཱརསྨཱནགཱརིཡཾ;

ཝིཙརིཾཧཾ ཏེན ཏེན, ལཱབྷསཀྐཱརཨུསྶུཀཱ.

༩༣.

‘‘རིཉྩིཏྭཱ ¶ པརམཾ ཨཏྠཾ, ཧཱིནམཏྠཾ ཨསེཝིཧཾ;

ཀིལེསཱནཾ ཝསཾ གནྟྭཱ, སཱམཉྙཏྠཾ ན བུཛ྄ཛྷིཧཾ.

༩༤.

‘‘ཏསྶཱ མེ ཨཧུ སཾཝེགོ, ནིསིནྣཱཡ ཝིཧཱརཀེ;

ཨུམྨགྒཔཊིཔནྣཱམྷི, ཏཎྷཱཡ ཝསམཱགཏཱ.

༩༥.

‘‘ཨཔྤཀཾ ཛཱིཝིཏཾ མཡ྄ཧཾ, ཛརཱ བྱཱདྷི ཙ མདྡཏི;

པུརཱཡཾ བྷིཛྫཏི [ཛརཱཡ བྷིཛྫཏེ (སཱི.)] ཀཱཡོ, ན མེ ཀཱལོ པམཛྫིཏུཾ.

༩༦.

‘‘ཡཐཱབྷཱུཏམཝེཀྑནྟཱི, ཁནྡྷཱནཾ ཨུདཡབྦཡཾ;

ཝིམུཏྟཙིཏྟཱ ཨུཊྛཱསིཾ, ཀཏཾ བུདྡྷསྶ སཱསན’’ནྟི.

… མིཏྟཱ ཀཱལཱི༹ ཐེརཱི….

༧. སཀུལཱཐེརཱིགཱཐཱ

༩༧.

‘‘ཨགཱརསྨིཾ ¶ ¶ ཝསནྟཱིཧཾ, དྷམྨཾ སུཏྭཱན བྷིཀྑུནོ;

ཨདྡསཾ ཝིརཛཾ དྷམྨཾ, ནིབྦཱནཾ པདམཙྩུཏཾ.

༩༨.

‘‘སཱཧཾ པུཏྟཾ དྷཱིཏརཉྩ, དྷནདྷཉྙཉྩ ཚཌྜིཡ;

ཀེསེ ཚེདཱཔཡིཏྭཱན, པབྦཛིཾ ཨནགཱརིཡཾ.

༩༩.

‘‘སིཀྑམཱནཱ ¶ ཨཧཾ སནྟཱི, བྷཱཝེནྟཱི མགྒམཉྫསཾ;

པཧཱསིཾ རཱགདོསཉྩ, ཏདེཀཊྛེ ཙ ཨཱསཝེ.

༡༠༠.

‘‘བྷིཀྑུནཱི ཨུཔསམྤཛྫ, པུབྦཛཱཏིམནུསྶརིཾ;

དིབྦཙཀྑུ ཝིསོདྷིཏཾ [ཝིསོདྷིཏཾ དིབྦཙཀྑུ (སཱི.)], ཝིམལཾ སཱདྷུབྷཱཝིཏཾ.

༡༠༡.

‘‘སངྑཱརེ པརཏོ དིསྭཱ, ཧེཏུཛཱཏེ པལོཀིཏེ [པལོཀིནེ (ཀ.)];

པཧཱསིཾ ཨཱསཝེ སབྦེ, སཱིཏིབྷཱུཏཱམྷི ནིབྦུཏཱ’’ཏི.

… སཀུལཱ ཐེརཱི….

༨. སོཎཱཐེརཱིགཱཐཱ

༡༠༢.

‘‘དས པུཏྟེ ཝིཛཱཡིཏྭཱ, ཨསྨིཾ རཱུཔསམུསྶཡེ;

ཏཏོཧཾ དུབྦལཱ ཛིཎྞཱ, བྷིཀྑུནིཾ ཨུཔསངྐམིཾ.

༡༠༣.

‘‘སཱ མེ དྷམྨམདེསེསི, ཁནྡྷཱཡཏནདྷཱཏུཡོ;

ཏསྶཱ དྷམྨཾ སུཎིཏྭཱན, ཀེསེ ཚེཏྭཱན པབྦཛིཾ.

༡༠༤.

‘‘ཏསྶཱ མེ སིཀྑམཱནཱཡ, དིབྦཙཀྑུ ཝིསོདྷིཏཾ;

པུབྦེནིཝཱསཾ ཛཱནཱམི, ཡཏྠ མེ ཝུསིཏཾ པུརེ.

༡༠༥.

‘‘ཨནིམིཏྟཉྩ ¶ བྷཱཝེམི, ཨེཀགྒཱ སུསམཱཧིཏཱ;

ཨནནྟརཱཝིམོཀྑཱསིཾ, ཨནུཔཱདཱཡ ནིབྦུཏཱ.

༡༠༦.

‘‘པཉྩཀྑནྡྷཱ པརིཉྙཱཏཱ, ཏིཊྛནྟི ཚིནྣམཱུལཀཱ;

དྷི ¶ ཏཝཏྠུ ཛརེ ཛམྨེ, ནཏྠི དཱནི པུནབྦྷཝོ’’ཏི.

… སོཎཱ ཐེརཱི….

༩. བྷདྡཱཀུཎྜལཀེསཱཐེརཱིགཱཐཱ

༡༠༧.

‘‘ལཱུནཀེསཱི ¶ པངྐདྷརཱི, ཨེཀསཱཊཱི པུརེ ཙརིཾ;

ཨཝཛྫེ ཝཛྫམཏིནཱི, ཝཛྫེ ཙཱཝཛྫདསྶིནཱི.

༡༠༨.

‘‘དིཝཱཝིཧཱརཱ ནིཀྑམྨ, གིཛ྄ཛྷཀཱུཊམྷི པབྦཏེ;

ཨདྡསཾ ཝིརཛཾ བུདྡྷཾ, བྷིཀྑུསངྒྷཔུརཀྑཏཾ.

༡༠༩.

‘‘ནིཧཙྩ ཛཱཎུཾ ཝནྡིཏྭཱ, སམྨུཁཱ ཨཉྫལིཾ ཨཀཾ;

‘ཨེཧི བྷདྡེ’ཏི མཾ ཨཝཙ, སཱ མེ ཨཱསཱུཔསམྤདཱ.

༡༡༠.

‘‘ཙིཎྞཱ ¶ ཨངྒཱ ཙ མགདྷཱ, ཝཛྫཱི ཀཱསཱི ཙ ཀོསལཱ;

ཨནཎཱ པཎྞཱསཝསྶཱནི, རཊྛཔིཎྜཾ ཨབྷུཉྫཧཾ.

༡༡༡.

‘‘པུཉྙཾ ཝཏ པསཝི བཧུཾ, སཔྤཉྙོ ཝཏཱཡཾ ཨུཔཱསཀོ;

ཡོ བྷདྡཱཡ ཙཱིཝརཾ ཨདཱསི, ཝིཔྤམུཏྟཱཡ སབྦགནྠེཧཱི’’ཏི.

… བྷདྡཱ ཀུཎྜལཀེསཱ ཐེརཱི….

༡༠. པཊཱཙཱརཱཐེརཱིགཱཐཱ

༡༡༢.

‘‘ནངྒལེཧི ཀསཾ ཁེཏྟཾ, བཱིཛཱནི པཝཔཾ ཚམཱ;

པུཏྟདཱརཱནི པོསེནྟཱ, དྷནཾ ཝིནྡནྟི མཱཎཝཱ.

༡༡༣.

‘‘ཀིམཧཾ སཱིལསམྤནྣཱ, སཏྠུསཱསནཀཱརིཀཱ;

ནིབྦཱནཾ ནཱདྷིགཙྪཱམི, ཨཀུསཱིཏཱ ཨནུདྡྷཏཱ.

༡༡༤.

‘‘པཱདེ པཀྑཱལཡིཏྭཱན, ཨུདཀེསུ ཀརོམཧཾ;

པཱདོདཀཉྩ ¶ དིསྭཱན, ཐལཏོ ནིནྣམཱགཏཾ.

༡༡༥.

‘‘ཏཏོ ཙིཏྟཾ སམཱདྷེསིཾ, ཨསྶཾ བྷདྲཾཝཛཱནིཡཾ;

ཏཏོ ¶ དཱིཔཾ གཧེཏྭཱན, ཝིཧཱརཾ པཱཝིསིཾ ཨཧཾ;

སེཡྻཾ ཨོལོཀཡིཏྭཱན, མཉྩཀམྷི ཨུཔཱཝིསིཾ.

༡༡༦.

‘‘ཏཏོ སཱུཙིཾ གཧེཏྭཱན, ཝཊྚིཾ ཨོཀསྶཡཱམཧཾ;

པདཱིཔསྶེཝ ནིབྦཱནཾ, ཝིམོཀྑོ ཨཧུ ཙེཏསོ’’ཏི.

… པཊཱཙཱརཱ ཐེརཱི….

༡༡. ཏིཾསམཏྟཱཐེརཱིགཱཐཱ

༡༡༧.

‘‘‘མུསལཱནི ¶ གཧེཏྭཱན, དྷཉྙཾ ཀོཊྚེནྟི མཱཎཝཱ [མཱནཝཱ (སཱི.)];

པུཏྟདཱརཱནི པོསེནྟཱ, དྷནཾ ཝིནྡནྟི མཱཎཝཱ.

༡༡༨.

‘‘‘ཀརོཐ བུདྡྷསཱསནཾ, ཡཾ ཀཏྭཱ ནཱནུཏཔྤཏི;

ཁིཔྤཾ པཱདཱནི དྷོཝིཏྭཱ, ཨེཀམནྟེ ནིསཱིདཐ;

ཙེཏོསམཐམནུཡུཏྟཱ, ཀརོཐ བུདྡྷསཱསནཾ’.

༡༡༩.

‘‘ཏསྶཱ ཏཱ [ཏཾ (སཱི.)] ཝཙནཾ སུཏྭཱ, པཊཱཙཱརཱཡ སཱསནཾ;

པཱདེ པཀྑཱལཡིཏྭཱན, ཨེཀམནྟཾ ཨུཔཱཝིསུཾ;

ཙེཏོསམཐམནུཡུཏྟཱ, ཨཀཾསུ བུདྡྷསཱསནཾ.

༡༢༠.

‘‘རཏྟིཡཱ ¶ པུརིམེ ཡཱམེ, པུབྦཛཱཏིམནུསྶརུཾ;

རཏྟིཡཱ མཛ྄ཛྷིམེ ཡཱམེ, དིབྦཙཀྑུཾ ཝིསོདྷཡུཾ;

རཏྟིཡཱ པཙྪིམེ ཡཱམེ, ཏམོཁནྡྷཾ པདཱལཡུཾ.

༡༢༡.

‘‘ཨུཊྛཱཡ པཱདེ ཝནྡིཾསུ, ‘ཀཏཱ ཏེ ཨནུསཱསནཱི;

ཨིནྡཾཝ ¶ དེཝཱ ཏིདསཱ, སངྒཱམེ ཨཔརཱཛིཏཾ;

པུརཀྑཏྭཱ ཝིཧསྶཱམ [ཝིཧརཱམ (སཱི.), ཝིཧརིསྶཱམ (སྱཱ.)], ཏེཝིཛྫཱམྷ ཨནཱསཝཱ’’’ཏི.

ཨིཏྠཾ སུདཾ ཏིཾསམཏྟཱ ཐེརཱི བྷིཀྑུནིཡོ པཊཱཙཱརཱཡ སནྟིཀེ ཨཉྙཾ བྱཱཀརིཾསཱུཏི.

༡༢. ཙནྡཱཐེརཱིགཱཐཱ

༡༢༢.

‘‘དུགྒཏཱཧཾ པུརེ ཨཱསིཾ, ཝིདྷཝཱ ཙ ཨཔུཏྟིཀཱ;

ཝིནཱ མིཏྟེཧི ཉཱཏཱིཧི, བྷཏྟཙོལ༹སྶ ནཱདྷིགཾ.

༡༢༣.

‘‘པཏྟཾ དཎྜཉྩ གཎྷིཏྭཱ, བྷིཀྑམཱནཱ ཀུལཱ ཀུལཾ;

སཱིཏུཎྷེན ཙ ཌཡ྄ཧནྟཱི, སཏྟ ཝསྶཱནི ཙཱརིཧཾ.

༡༢༤.

‘‘བྷིཀྑུནིཾ པུན དིསྭཱན, ཨནྣཔཱནསྶ ལཱབྷིནིཾ;

ཨུཔསངྐམྨ ཨཝོཙཾ [ཨཝོཙིཾ (ཀ.)], ‘པབྦཛྫཾ ཨནགཱརིཡཾ’.

༡༢༥.

‘‘སཱ ¶ ཙ མཾ ཨནུཀམྤཱཡ, པབྦཱཛེསི པཊཱཙཱརཱ;

ཏཏོ མཾ ཨོཝདིཏྭཱན, པརམཏྠེ ནིཡོཛཡི.

༡༢༦.

‘‘ཏསྶཱཧཾ ¶ ཝཙནཾ སུཏྭཱ, ཨཀཱསིཾ ཨནུསཱསནིཾ;

ཨམོགྷོ ཨཡྻཱཡོཝཱདོ, ཏེཝིཛྫཱམྷི ཨནཱསཝཱ’’ཏི.

… ཙནྡཱ ཐེརཱི….

པཉྩཀནིཔཱཏོ ནིཊྛིཏོ.

༦. ཚཀྐནིཔཱཏོ

༡. པཉྩསཏམཏྟཱཐེརཱིགཱཐཱ

༡༢༧.

‘‘ཡསྶ ¶ མགྒཾ ན ཛཱནཱསི, ཨཱགཏསྶ གཏསྶ ཝཱ;

ཏཾ ¶ ཀུཏོ ཙཱགཏཾ སཏྟཾ [སནྟཾ (སཱི.), པུཏྟཾ (སྱཱ.)], ‘མམ པུཏྟོ’ཏི རོདསི.

༡༢༨.

‘‘མགྒཉྩ ཁོསྶ [ཁོ’ཐ (སྱཱ. ཀ.)] ཛཱནཱསི, ཨཱགཏསྶ གཏསྶ ཝཱ;

ན ནཾ སམནུསོཙེསི, ཨེཝཾདྷམྨཱ ཧི པཱཎིནོ.

༡༢༩.

‘‘ཨཡཱཙིཏོ ཏཏཱགཙྪི, ནཱནུཉྙཱཏོ [ཨནནུཉྙཱཏོ (སཱི. སྱཱ.)] ཨིཏོ གཏོ;

ཀུཏོཙི ནཱུན ཨཱགནྟྭཱ, ཝསིཏྭཱ ཀཏིཔཱཧཀཾ;

ཨིཏོཔི ཨཉྙེན གཏོ, ཏཏོཔཉྙེན གཙྪཏི.

༡༣༠.

‘‘པེཏོ མནུསྶརཱུཔེན, སཾསརནྟོ གམིསྶཏི;

ཡཐཱགཏོ ཏཐཱ གཏོ, ཀཱ ཏཏྠ པརིདེཝནཱ’’.

༡༣༡.

‘‘ཨབྦཧཱི [ཨབྦུཡ྄ཧཾ (སྱཱ.)] ཝཏ མེ སལླཾ, དུདྡསཾ ཧདཡསྶིཏཾ;

ཡཱ མེ སོཀཔརེཏཱཡ, པུཏྟསོཀཾ བྱཔཱནུདི.

༡༣༢.

‘‘སཱཛྫ ཨབྦཱུལ༹ྷསལླཱཧཾ, ནིཙྪཱཏཱ པརིནིབྦུཏཱ;

བུདྡྷཾ དྷམྨཉྩ སངྒྷཉྩ, ཨུཔེམི སརཎཾ མུནིཾ’’.

ཨིཏྠཾ སུདཾ པཉྩསཏམཏྟཱ ཐེརཱི བྷིཀྑུནིཡོ…པེ….

༢. ཝཱསེཊྛཱིཐེརཱིགཱཐཱ

༡༣༣.

‘‘པུཏྟསོཀེནཧཾ ཨཊྚཱ, ཁིཏྟཙིཏྟཱ ཝིསཉྙིནཱི;

ནགྒཱ པཀིཎྞཀེསཱི ཙ, ཏེན ཏེན ཝིཙཱརིཧཾ.

༡༣༤.

‘‘ཝཱིཐི [ཝསིཾ (སཱི.)] སངྐཱརཀཱུཊེསུ, སུསཱནེ རཐིཡཱསུ ཙ;

ཨཙརིཾ ཏཱིཎི ཝསྶཱནི, ཁུཔྤིཔཱསཱསམཔྤིཏཱ.

༡༣༥.

‘‘ཨཐདྡསཱསིཾ ¶ ¶ སུགཏཾ, ནགརཾ མིཐིལཾ པཏི [གཏཾ (ཀ.)];

ཨདནྟཱནཾ དམེཏཱརཾ, སམྦུདྡྷམཀུཏོབྷཡཾ.

༡༣༦.

‘‘སཙིཏྟཾ ¶ པཊིལདྡྷཱན, ཝནྡིཏྭཱན ཨུཔཱཝིསིཾ;

སོ མེ དྷམྨམདེསེསི, ཨནུཀམྤཱཡ གོཏམོ.

༡༣༧.

‘‘ཏསྶ ¶ དྷམྨཾ སུཎིཏྭཱན, པབྦཛིཾ ཨནགཱརིཡཾ;

ཡུཉྫནྟཱི སཏྠུཝཙནེ, སཙྪཱཀཱསིཾ པདཾ སིཝཾ.

༡༣༨.

‘‘སབྦེ སོཀཱ སམུཙྪིནྣཱ, པཧཱིནཱ ཨེཏདནྟིཀཱ;

པརིཉྙཱཏཱ ཧི མེ ཝཏྠཱུ, ཡཏོ སོཀཱན སམྦྷཝོ’’ཏི.

… ཝཱསེཊྛཱི ཐེརཱི….

༣. ཁེམཱཐེརཱིགཱཐཱ

༡༣༩.

‘‘དཧརཱ ཏྭཾ རཱུཔཝཏཱི, ཨཧམྤི དཧརོ ཡུཝཱ;

པཉྩངྒིཀེན ཏུརིཡེན [ཏཱུརེན (ཀ.)], ཨེཧི ཁེམེ རམཱམསེ’’.

༡༤༠.

‘‘ཨིམིནཱ པཱུཏིཀཱཡེན, ཨཱཏུརེན པབྷངྒུནཱ;

ཨཊྚིཡཱམི ཧརཱཡཱམི, ཀཱམཏཎྷཱ སམཱུཧཏཱ.

༡༤༡.

‘‘སཏྟིསཱུལཱུཔམཱ ཀཱམཱ, ཁནྡྷཱསཾ ཨདྷིཀུཊྚནཱ;

ཡཾ ‘ཏྭཾ ཀཱམརཏིཾ’ བྲཱུསི, ‘ཨརཏཱི’ དཱནི སཱ མམ.

༡༤༢.

‘‘སབྦཏྠ ཝིཧཏཱ ནནྡཱི, ཏམོཁནྡྷོ པདཱལིཏོ;

ཨེཝཾ ཛཱནཱཧི པཱཔིམ, ནིཧཏོ ཏྭམསི ཨནྟཀ.

༡༤༣.

‘‘ནཀྑཏྟཱནི ནམསྶནྟཱ, ཨགྒིཾ པརིཙརཾ ཝནེ;

ཡཐཱབྷུཙྩམཛཱནནྟཱ, བཱལཱ སུདྡྷིམམཉྙཐ.

༡༤༤.

‘‘ཨཧཉྩ ཁོ ནམསྶནྟཱི, སམྦུདྡྷཾ པུརིསུཏྟམཾ;

པམུཏྟཱ [པརིམུཏྟཱ (སཱི. སྱཱ.)] སབྦདུཀྑེཧི, སཏྠུསཱསནཀཱརིཀཱ’’ཏི.

… ཁེམཱ ཐེརཱི….

༤. སུཛཱཏཱཐེརཱིགཱཐཱ

༡༤༥.

‘‘ཨལངྐཏཱ ¶ སུཝསནཱ, མཱལིནཱི ཙནྡནོཀྑིཏཱ;

སབྦཱབྷརཎསཉྪནྣཱ, དཱསཱིགཎཔུརཀྑཏཱ.

༡༤༦.

‘‘ཨནྣཾ ¶ པཱནཉྩ ཨཱདཱཡ, ཁཛྫཾ བྷོཛྫཾ ཨནཔྤཀཾ;

གེཧཏོ ནིཀྑམིཏྭཱན, ཨུཡྻཱནམབྷིཧཱརཡིཾ.

༡༤༧.

‘‘ཏཏྠ ¶ རམིཏྭཱ ཀཱིལི༹ཏྭཱ, ཨཱགཙྪནྟཱི སཀཾ གྷརཾ;

ཝིཧཱརཾ དཊྛུཾ པཱཝིསིཾ, སཱཀེཏེ ཨཉྫནཾ ཝནཾ.

༡༤༨.

‘‘དིསྭཱན ¶ ལོཀཔཛྫོཏཾ, ཝནྡིཏྭཱན ཨུཔཱཝིསིཾ;

སོ མེ དྷམྨམདེསེསི, ཨནུཀམྤཱཡ ཙཀྑུམཱ.

༡༤༩.

‘‘སུཏྭཱ ཙ ཁོ མཧེསིསྶ, སཙྩཾ སམྤཊིཝིཛ྄ཛྷཧཾ;

ཏཏྠེཝ ཝིརཛཾ དྷམྨཾ, ཕུསཡིཾ ཨམཏཾ པདཾ.

༡༥༠.

‘‘ཏཏོ ཝིཉྙཱཏསདྡྷམྨཱ, པབྦཛིཾ ཨནགཱརིཡཾ;

ཏིསྶོ ཝིཛྫཱ ཨནུཔྤཏྟཱ, ཨམོགྷཾ བུདྡྷསཱསན’’ནྟི.

… སུཛཱཏཱ ཐེརཱི….

༥. ཨནོཔམཱཐེརཱིགཱཐཱ

༡༥༡.

‘‘ཨུཙྩེ ཀུལེ ཨཧཾ ཛཱཏཱ, བཧུཝིཏྟེ མཧདྡྷནེ;

ཝཎྞརཱུཔེན སམྤནྣཱ, དྷཱིཏཱ མཛ྄ཛྷསྶ [མེགྷསྶ (སཱི.), མེགྷིསྶ (སྱཱ.)] ཨཏྲཛཱ.

༡༥༢.

‘‘པཏྠིཏཱ རཱཛཔུཏྟེཧི, སེཊྛིཔུཏྟེཧི གིཛ྄ཛྷིཏཱ [སེཊྛིཔུཏྟེཧི བྷིཛ྄ཛྷིཏཱ (སཱི.)];

པིཏུ མེ པེསཡཱི དཱུཏཾ, དེཐ མཡ྄ཧཾ ཨནོཔམཾ.

༡༥༣.

‘‘ཡཏྟཀཾ ཏུལིཏཱ ཨེསཱ, ཏུཡ྄ཧཾ དྷཱིཏཱ ཨནོཔམཱ;

ཏཏོ ཨཊྛགུཎཾ དསྶཾ, ཧིརཉྙཾ རཏནཱནི ཙ.

༡༥༤.

‘‘སཱཧཾ ¶ དིསྭཱན སམྦུདྡྷཾ, ལོཀཛེཊྛཾ ཨནུཏྟརཾ;

ཏསྶ པཱདཱནི ཝནྡིཏྭཱ, ཨེཀམནྟཾ ཨུཔཱཝིསིཾ.

༡༥༥.

‘‘སོ མེ དྷམྨམདེསེསི, ཨནུཀམྤཱཡ གོཏམོ;

ནིསིནྣཱ ཨཱསནེ ཏསྨིཾ, ཕུསཡིཾ ཏཏིཡཾ ཕལཾ.

༡༥༦.

‘‘ཏཏོ ཀེསཱནི ཚེཏྭཱན, པབྦཛིཾ ཨནགཱརིཡཾ;

ཨཛྫ མེ སཏྟམཱི རཏྟི, ཡཏོ ཏཎྷཱ ཝིསོསིཏཱ’’ཏི.

… ཨནོཔམཱ ཐེརཱི….

༦. མཧཱཔཛཱཔཏིགོཏམཱིཐེརཱིགཱཐཱ

༡༥༧.

‘‘བུདྡྷ ¶ ཝཱིར ནམོ ཏྱཏྠུ, སབྦསཏྟཱནམུཏྟམ;

ཡོ མཾ དུཀྑཱ པམོཙེསི, ཨཉྙཉྩ བཧུཀཾ ཛནཾ.

༡༥༨.

‘‘སབྦདུཀྑཾ པརིཉྙཱཏཾ, ཧེཏུཏཎྷཱ ཝིསོསིཏཱ;

བྷཱཝིཏོ ཨཊྛངྒིཀོ [ཨརིཡཊྛངྒིཀོ (སཱི. ཀ.), བྷཱཝིཏཊྛངྒིཀོ (སྱཱ.)] མགྒོ, ནིརོདྷོ ཕུསིཏོ མཡཱ.

༡༥༩.

‘‘མཱཏཱ ¶ ¶ པུཏྟོ པིཏཱ བྷཱཏཱ, ཨཡྻཀཱ ཙ པུརེ ཨཧུཾ;

ཡཐཱབྷུཙྩམཛཱནནྟཱི, སཾསརིཾཧཾ ཨནིབྦིསཾ.

༡༦༠.

‘‘དིཊྛོ ཧི མེ སོ བྷགཝཱ, ཨནྟིམོཡཾ སམུསྶཡོ;

ཝིཀྑཱིཎོ ཛཱཏིསཾསཱརོ, ནཏྠི དཱནི པུནབྦྷཝོ.

༡༦༡.

‘‘ཨཱརདྡྷཝཱིརིཡེ པཧིཏཏྟེ, ནིཙྩཾ དལ༹ྷཔརཀྐམེ;

སམགྒེ སཱཝཀེ པསྶེ, ཨེསཱ བུདྡྷཱན ཝནྡནཱ.

༡༦༢.

‘‘བཧཱུནཾ [བཧུནྣཾ (སཱི. སྱཱ.)] ཝཏ ཨཏྠཱཡ, མཱཡཱ ཛནཡི གོཏམཾ;

བྱཱདྷིམརཎཏུནྣཱནཾ, དུཀྑཀྑནྡྷཾ བྱཔཱནུདཱི’’ཏི.

… མཧཱཔཛཱཔཏིགོཏམཱི ཐེརཱི….

༧. གུཏྟཱཐེརཱིགཱཐཱ

༡༦༣.

‘‘གུཏྟེ ¶ ཡདཏྠཾ པབྦཛྫཱ, ཧིཏྭཱ པུཏྟཾ ཝསུཾ པིཡཾ;

ཏམེཝ ཨནུབྲཱུཧེཧི, མཱ ཙིཏྟསྶ ཝསཾ གམི.

༡༦༤.

‘‘ཙིཏྟེན ཝཉྩིཏཱ སཏྟཱ, མཱརསྶ ཝིསཡེ རཏཱ;

ཨནེཀཛཱཏིསཾསཱརཾ, སནྡྷཱཝནྟི ཨཝིདྡསཱུ.

༡༦༥.

‘‘ཀཱམཙྪནྡཉྩ བྱཱཔཱདཾ, སཀྐཱཡདིཊྛིམེཝ ཙ;

སཱིལབྦཏཔརཱམཱསཾ, ཝིཙིཀིཙྪཉྩ པཉྩམཾ.

༡༦༦.

‘‘སཾཡོཛནཱནི ཨེཏཱནི, པཛཧིཏྭཱན བྷིཀྑུནཱི;

ཨོརམྦྷཱགམནཱིཡཱནི, ནཡིདཾ པུནརེཧིསི.

༡༦༧.

‘‘རཱགཾ མཱནཾ ཨཝིཛྫཉྩ, ཨུདྡྷཙྩཉྩ ཝིཝཛྫིཡ;

སཾཡོཛནཱནི ཚེཏྭཱན, དུཀྑསྶནྟཾ ཀརིསྶསི.

༡༦༨.

‘‘ཁེཔེཏྭཱ ¶ ཛཱཏིསཾསཱརཾ, པརིཉྙཱཡ པུནབྦྷཝཾ;

དིཊྛེཝ དྷམྨེ ནིཙྪཱཏཱ, ཨུཔསནྟཱ ཙརིསྶཏཱི’’ཏི.

… གུཏྟཱ ཐེརཱི….

༨. ཝིཛཡཱཐེརཱིགཱཐཱ

༡༦༩.

‘‘ཙཏུཀྑཏྟུཾ པཉྩཀྑཏྟུཾ, ཝིཧཱརཱ ཨུཔནིཀྑམིཾ;

ཨལདྡྷཱ ཙེཏསོ སནྟིཾ, ཙིཏྟེ ཨཝསཝཏྟིནཱི.

༡༧༠.

‘‘བྷིཀྑུནིཾ ¶ ཨུཔསངྐམྨ, སཀྐཙྩཾ པརིཔུཙྪཧཾ;

སཱ མེ དྷམྨམདེསེསི, དྷཱཏུཨཱཡཏནཱནི ཙ.

༡༧༡.

‘‘ཙཏྟཱརི ¶ ཨརིཡསཙྩཱནི, ཨིནྡྲིཡཱནི བལཱནི ཙ;

བོཛ྄ཛྷངྒཊྛངྒིཀཾ མགྒཾ, ཨུཏྟམཏྠསྶ པཏྟིཡཱ.

༡༧༢.

‘‘ཏསྶཱཧཾ ¶ ཝཙནཾ སུཏྭཱ, ཀརོནྟཱི ཨནུསཱསནིཾ;

རཏྟིཡཱ པུརིམེ ཡཱམེ, པུབྦཛཱཏིམནུསྶརིཾ.

༡༧༣.

‘‘རཏྟིཡཱ མཛ྄ཛྷིམེ ཡཱམེ, དིབྦཙཀྑུཾ ཝིསོདྷཡིཾ;

རཏྟིཡཱ པཙྪིམེ ཡཱམེ, ཏམོཁནྡྷཾ པདཱལཡིཾ.

༡༧༤.

‘‘པཱིཏིསུཁེན ཙ ཀཱཡཾ, ཕརིཏྭཱ ཝིཧརིཾ ཏདཱ;

སཏྟམིཡཱ པཱདེ པསཱརེསིཾ, ཏམོཁནྡྷཾ པདཱལིཡཱ’’ཏི.

… ཝིཛཡཱ ཐེརཱི….

ཚཀྐནིཔཱཏོ ནིཊྛིཏོ.

༧. སཏྟཀནིཔཱཏོ

༡. ཨུཏྟརཱཐེརཱིགཱཐཱ

༡༧༥.

‘‘‘མུསལཱནི ¶ གཧེཏྭཱན, དྷཉྙཾ ཀོཊྚེནྟི མཱཎཝཱ;

པུཏྟདཱརཱནི པོསེནྟཱ, དྷནཾ ཝིནྡནྟི མཱཎཝཱ.

༡༧༦.

‘‘‘གྷཊེཐ ¶ བུདྡྷསཱསནེ, ཡཾ ཀཏྭཱ ནཱནུཏཔྤཏི;

ཁིཔྤཾ པཱདཱནི དྷོཝིཏྭཱ, ཨེཀམནྟཾ ནིསཱིདཐ.

༡༧༧.

‘‘‘ཙིཏྟཾ ཨུཔཊྛཔེཏྭཱན, ཨེཀགྒཾ སུསམཱཧིཏཾ;

པཙྩཝེཀྑཐ སངྑཱརེ, པརཏོ ནོ ཙ ཨཏྟཏོ’.

༡༧༨.

‘‘ཏསྶཱཧཾ ཝཙནཾ སུཏྭཱ, པཊཱཙཱརཱནུསཱསནིཾ;

པཱདེ པཀྑཱལཡིཏྭཱན, ཨེཀམནྟེ ཨུཔཱཝིསིཾ.

༡༧༩.

‘‘རཏྟིཡཱ ¶ པུརིམེ ཡཱམེ, པུབྦཛཱཏིམནུསྶརིཾ;

རཏྟིཡཱ མཛ྄ཛྷིམེ ཡཱམེ, དིབྦཙཀྑུཾ ཝིསོདྷཡིཾ.

༡༨༠.

‘‘རཏྟིཡཱ པཙྪིམེ ཡཱམེ, ཏམོཀྑནྡྷཾ པདཱལཡིཾ;

ཏེཝིཛྫཱ ཨཐ ཝུཊྛཱསིཾ, ཀཏཱ ཏེ ཨནུསཱསནཱི.

༡༨༡.

‘‘སཀྐཾཝ དེཝཱ ཏིདསཱ, སངྒཱམེ ཨཔརཱཛིཏཾ;

པུརཀྑཏྭཱ ཝིཧསྶཱམི, ཏེཝིཛྫཱམྷི ཨནཱསཝཱ’’.

… ཨུཏྟརཱ ཐེརཱི….

༢. ཙཱལཱཐེརཱིགཱཐཱ

༡༨༢.

‘‘སཏིཾ ¶ ཨུཔཊྛཔེཏྭཱན, བྷིཀྑུནཱི བྷཱཝིཏིནྡྲིཡཱ;

པཊིཝིཛ྄ཛྷི པདཾ སནྟཾ, སངྑཱརཱུཔསམཾ སུཁཾ’’.

༡༨༣.

‘‘ཀཾ ནུ ཨུདྡིསྶ མུཎྜཱསི, སམཎཱི ཝིཡ དིསྶསི;

ན ཙ རོཙེསི པཱསཎྜེ, ཀིམིདཾ ཙརསི མོམུཧཱ’’.

༡༨༤.

‘‘ཨིཏོ བཧིདྡྷཱ པཱསཎྜཱ, དིཊྛིཡོ ཨུཔནིསྶིཏཱ;

ན ཏེ དྷམྨཾ ཝིཛཱནནྟི, ན ཏེ དྷམྨསྶ ཀོཝིདཱ.

༡༨༥.

‘‘ཨཏྠི སཀྱཀུལེ ཛཱཏོ, བུདྡྷོ ཨཔྤཊིཔུགྒལོ;

སོ མེ དྷམྨམདེསེསི, དིཊྛཱིནཾ སམཏིཀྐམཾ.

༡༨༦.

‘‘དུཀྑཾ ¶ དུཀྑསམུཔྤཱདཾ, དུཀྑསྶ ཙ ཨཏིཀྐམཾ;

ཨརིཡཾ ཙཊྛངྒིཀཾ མགྒཾ, དུཀྑཱུཔསམགཱམིནཾ.

༡༨༧.

‘‘ཏསྶཱཧཾ ཝཙནཾ སུཏྭཱ, ཝིཧརིཾ སཱསནེ རཏཱ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ.

༡༨༨.

‘‘སབྦཏྠ ¶ ¶ ཝིཧཏཱ ནནྡཱི, ཏམོཁནྡྷོ པདཱལིཏོ;

ཨེཝཾ ཛཱནཱཧི པཱཔིམ, ནིཧཏོ ཏྭམསི ཨནྟཀ’’.

… ཙཱལཱ ཐེརཱི….

༣. ཨུཔཙཱལཱཐེརཱིགཱཐཱ

༡༨༩.

‘‘སཏིམཏཱི ཙཀྑུམཏཱི, བྷིཀྑུནཱི བྷཱཝིཏིནྡྲིཡཱ;

པཊིཝིཛ྄ཛྷིཾ པདཾ སནྟཾ, ཨཀཱཔུརིསསེཝིཏཾ’’.

༡༩༠.

‘‘ཀིཾ ནུ ཛཱཏིཾ ན རོཙེསི, ཛཱཏོ ཀཱམཱནི བྷུཉྫཏི;

བྷུཉྫཱཧི ཀཱམརཏིཡོ, མཱཧུ པཙྪཱནུཏཱཔིནཱི’’.

༡༩༡.

‘‘ཛཱཏསྶ མརཎཾ ཧོཏི, ཧཏྠཔཱདཱན ཚེདནཾ;

ཝདྷབནྡྷཔརིཀླེསཾ, ཛཱཏོ དུཀྑཾ ནིགཙྪཏི.

༡༩༢.

‘‘ཨཏྠི སཀྱཀུལེ ཛཱཏོ, སམྦུདྡྷོ ཨཔརཱཛིཏོ;

སོ མེ དྷམྨམདེསེསི, ཛཱཏིཡཱ སམཏིཀྐམཾ.

༡༩༣.

‘‘དུཀྑཾ དུཀྑསམུཔྤཱདཾ, དུཀྑསྶ ཙ ཨཏིཀྐམཾ;

ཨརིཡཾ ཙཊྛངྒིཀཾ མགྒཾ, དུཀྑཱུཔསམགཱམིནཾ.

༡༩༤.

‘‘ཏསྶཱཧཾ ཝཙནཾ སུཏྭཱ, ཝིཧརིཾ སཱསནེ རཏཱ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ.

༡༩༥.

‘‘སབྦཏྠ ¶ ཝིཧཏཱ ནནྡཱི, ཏམོཁནྡྷོ པདཱལིཏོ;

ཨེཝཾ ཛཱནཱཧི པཱཔིམ, ནིཧཏོ ཏྭམསི ཨནྟཀ’’.

… ཨུཔཙཱལཱ ཐེརཱི….

སཏྟཀནིཔཱཏོ ནིཊྛིཏོ.

༨. ཨཊྛཀནིཔཱཏོ

༡. སཱིསཱུཔཙཱལཱཐེརཱིགཱཐཱ

༡༩༦.

‘‘བྷིཀྑུནཱི ¶ ¶ ¶ སཱིལསམྤནྣཱ, ཨིནྡྲིཡེསུ སུསཾཝུཏཱ;

ཨདྷིགཙྪེ པདཾ སནྟཾ, ཨསེཙནཀམོཛཝཾ’’.

༡༩༧.

‘‘ཏཱཝཏིཾསཱ ཙ ཡཱམཱ ཙ, ཏུསིཏཱ ཙཱཔི དེཝཏཱ;

ནིམྨཱནརཏིནོ དེཝཱ, ཡེ དེཝཱ ཝསཝཏྟིནོ;

ཏཏྠ ཙིཏྟཾ པཎཱིདྷེཧི, ཡཏྠ ཏེ ཝུསིཏཾ པུརེ’’.

༡༩༨.

‘‘ཏཱཝཏིཾསཱ ཙ ཡཱམཱ ཙ, ཏུསིཏཱ ཙཱཔི དེཝཏཱ;

ནིམྨཱནརཏིནོ དེཝཱ, ཡེ དེཝཱ ཝསཝཏྟིནོ.

༡༩༩.

‘‘ཀཱལཾ ཀཱལཾ བྷཝཱབྷཝཾ, སཀྐཱཡསྨིཾ པུརཀྑཏཱ;

ཨཝཱིཏིཝཏྟཱ སཀྐཱཡཾ, ཛཱཏིམརཎསཱརིནོ.

༢༠༠.

‘‘སབྦོ ཨཱདཱིཔིཏོ ལོཀོ, སབྦོ ལོཀོ པདཱིཔིཏོ;

སབྦོ པཛྫལིཏོ ལོཀོ, སབྦོ ལོཀོ པཀམྤིཏོ.

༢༠༡.

‘‘ཨཀམྤིཡཾ ཨཏུལིཡཾ, ཨཔུཐུཛྫནསེཝིཏཾ;

བུདྡྷོ དྷམྨམདེསེསི, ཏཏྠ མེ ནིརཏོ མནོ.

༢༠༢.

‘‘ཏསྶཱཧཾ ཝཙནཾ སུཏྭཱ, ཝིཧརིཾ སཱསནེ རཏཱ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ.

༢༠༣.

‘‘སབྦཏྠ ཝིཧཏཱ ནནྡཱི, ཏམོཁནྡྷོ པདཱལིཏོ;

ཨེཝཾ ཛཱནཱཧི པཱཔིམ, ནིཧཏོ ཏྭམསི ཨནྟཀ’’.

… སཱིསཱུཔཙཱལཱ ཐེརཱི….

ཨཊྛཀནིཔཱཏོ ནིཊྛིཏོ.

༩. ནཝཀནིཔཱཏོ

༡. ཝཌྜྷམཱཏུཐེརཱིགཱཐཱ

༢༠༤.

‘‘མཱ ¶ ¶ ¶ སུ ཏེ ཝཌྜྷ ལོཀམྷི, ཝནཐོ ཨཱཧུ ཀུདཱཙནཾ;

མཱ པུཏྟཀ པུནཔྤུནཾ, ཨཧུ དུཀྑསྶ བྷཱགིམཱ.

༢༠༥.

‘‘སུཁཉྷི ¶ ཝཌྜྷ མུནཡོ, ཨནེཛཱ ཚིནྣསཾསཡཱ;

སཱིཏིབྷཱུཏཱ དམཔྤཏྟཱ, ཝིཧརནྟི ཨནཱསཝཱ.

༢༠༦.

‘‘ཏེཧཱནུཙིཎྞཾ ཨིསཱིབྷི, མགྒཾ དསྶནཔཏྟིཡཱ;

དུཀྑསྶནྟཀིརིཡཱཡ, ཏྭཾ ཝཌྜྷ ཨནུབྲཱུཧཡ’’.

༢༠༧.

‘‘ཝིསཱརདཱཝ བྷཎསི, ཨེཏམཏྠཾ ཛནེཏྟི མེ;

མཉྙཱམི ནཱུན མཱམིཀེ, ཝནཐོ ཏེ ན ཝིཛྫཏི’’.

༢༠༨.

‘‘ཡེ ཀེཙི ཝཌྜྷ སངྑཱརཱ, ཧཱིནཱ ཨུཀྐཊྛམཛ྄ཛྷིམཱ;

ཨཎཱུཔི ཨཎུམཏྟོཔི, ཝནཐོ མེ ན ཝིཛྫཏི.

༢༠༩.

‘‘སབྦེ མེ ཨཱསཝཱ ཁཱིཎཱ, ཨཔྤམཏྟསྶ ཛྷཱཡཏོ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ’’.

༢༡༠.

‘‘ཨུལཱ༹རཾ ཝཏ མེ མཱཏཱ, པཏོདཾ སམཝསྶརི;

པརམཏྠསཉྷིཏཱ གཱཐཱ, ཡཐཱཔི ཨནུཀམྤིཀཱ.

༢༡༡.

‘‘ཏསྶཱཧཾ ཝཙནཾ སུཏྭཱ, ཨནུསིཊྛིཾ ཛནེཏྟིཡཱ;

དྷམྨསཾཝེགམཱཔཱདིཾ, ཡོགཀྑེམསྶ པཏྟིཡཱ.

༢༡༢.

‘‘སོཧཾ པདྷཱནཔཧིཏཏྟོ, རཏྟིནྡིཝམཏནྡིཏོ;

མཱཏརཱ ཙོདིཏོ སནྟོ, ཨཕུསིཾ སནྟིམུཏྟམཾ’’.

… ཝཌྜྷམཱཏཱ ཐེརཱི….

ནཝཀནིཔཱཏོ ནིཊྛིཏོ.

༡༠. ཨེཀཱདསནིཔཱཏོ

༡. ཀིསཱགོཏམཱིཐེརཱིགཱཐཱ

༢༡༣.

‘‘ཀལྱཱཎམིཏྟཏཱ ¶ ¶ ¶ མུནིནཱ, ལོཀཾ ཨཱདིསྶ ཝཎྞིཏཱ;

ཀལྱཱཎམིཏྟེ བྷཛམཱནོ, ཨཔི བཱལོ པཎྜིཏོ ཨསྶ.

༢༡༤.

‘‘བྷཛིཏབྦཱ སཔྤུརིསཱ, པཉྙཱ ཏཐཱ ཝཌྜྷཏི བྷཛནྟཱནཾ;

བྷཛམཱནོ སཔྤུརིསེ, སབྦེཧིཔི དུཀྑེཧི པམུཙྩེཡྻ.

༢༡༥.

‘‘དུཀྑཉྩ ཝིཛཱནེཡྻ, དུཀྑསྶ ཙ སམུདཡཾ ནིརོདྷཾ;

ཨཊྛངྒིཀཉྩ མགྒཾ, ཙཏྟཱརིཔི ཨརིཡསཙྩཱནི.

༢༡༦.

‘‘དུཀྑོ ¶ ཨིཏྠིབྷཱཝོ, ཨཀྑཱཏོ པུརིསདམྨསཱརཐིནཱ;

སཔཏྟིཀམྤི ཧི དུཀྑཾ, ཨཔྤེཀཙྩཱ སཀིཾ ཝིཛཱཏཱཡོ.

༢༡༧.

‘‘གལཀེ ཨཔི ཀནྟནྟི, སུཁུམཱལིནིཡོ ཝིསཱནི ཁཱདནྟི;

ཛནམཱརཀམཛ྄ཛྷགཏཱ, ཨུབྷོཔི བྱསནཱནི ཨནུབྷོནྟི.

༢༡༨.

‘‘ཨུཔཝིཛཉྙཱ གཙྪནྟཱི, ཨདྡསཱཧཾ པཏིཾ མཏཾ;

པནྠམྷི ཝིཛཱཡིཏྭཱན, ཨཔྤཏྟཱཝ སཀཾ གྷརཾ.

༢༡༩.

‘‘དྭེ པུཏྟཱ ཀཱལཀཏཱ, པཏཱི ཙ པནྠེ མཏོ ཀཔཎིཀཱཡ;

མཱཏཱ པིཏཱ ཙ བྷཱཏཱ, ཌཡ྄ཧནྟི ཙ ཨེཀཙིཏཀཱཡཾ.

༢༢༠.

‘‘ཁཱིཎཀུལཱིནེ ཀཔཎེ, ཨནུབྷཱུཏཾ ཏེ དུཁཾ ཨཔརིམཱཎཾ;

ཨསྶཱུ ཙ ཏེ པཝཏྟཾ, བཧཱུནི ཙ ཛཱཏིསཧསྶཱནི.

༢༢༡.

‘‘ཝསིཏཱ སུསཱནམཛ྄ཛྷེ, ཨཐོཔི ཁཱདིཏཱནི པུཏྟམཾསཱནི;

ཧཏཀུལིཀཱ ¶ སབྦགརཧིཏཱ, མཏཔཏིཀཱ ཨམཏམདྷིགཙྪིཾ.

༢༢༢.

‘‘བྷཱཝིཏོ མེ མགྒོ, ཨརིཡོ ཨཊྛངྒིཀོ ཨམཏགཱམཱི;

ནིབྦཱནཾ སཙྪིཀཏཾ, དྷམྨཱདཱསཾ ཨཝེཀྑིཾཧཾ [ཨཔེཀྑིཧཾ (སཱི.)].

༢༢༣.

‘‘ཨཧམམྷི ཀནྟསལླཱ, ཨོཧིཏབྷཱརཱ ཀཏཉྷི ཀརཎཱིཡཾ;

ཀིསཱ གོཏམཱི ཐེརཱི, ཝིམུཏྟཙིཏྟཱ ཨིམཾ བྷཎཱི’’ཏི.

… ཀིསཱ གོཏམཱི ཐེརཱི….

ཨེཀཱདསནིཔཱཏོ ནིཊྛིཏོ.

༡༡. དྭཱདསཀནིཔཱཏོ

༡. ཨུཔྤལཝཎྞཱཐེརཱིགཱཐཱ

༢༢༤.

‘‘ཨུབྷོ ¶ ¶ མཱཏཱ ཙ དྷཱིཏཱ ཙ, མཡཾ ཨཱསུཾ [ཨཱབྷུཾ (སཱི.)] སཔཏྟིཡོ;

ཏསྶཱ མེ ཨཧུ སཾཝེགོ, ཨབྦྷུཏོ ལོམཧཾསནོ.

༢༢༥.

‘‘དྷིརཏྠུ ཀཱམཱ ཨསུཙཱི, དུགྒནྡྷཱ བཧུཀཎྚཀཱ;

ཡཏྠ མཱཏཱ ཙ དྷཱིཏཱ ཙ, སབྷརིཡཱ མཡཾ ཨཧུཾ.

༢༢༦.

‘‘ཀཱམེསྭཱདཱིནཝཾ ¶ དིསྭཱ, ནེཀྑམྨཾ དཊྛུ ཁེམཏོ;

སཱ པབྦཛྫིཾ རཱཛགཧེ, ཨགཱརསྨཱནགཱརིཡཾ.

༢༢༧.

‘‘པུབྦེནིཝཱསཾ ཛཱནཱམི, དིབྦཙཀྑུཾ ཝིསོདྷིཏཾ;

ཙེཏོཔརིཙྩཉཱཎཉྩ, སོཏདྷཱཏུ ཝིསོདྷིཏཱ.

༢༢༨.

‘‘ཨིདྡྷཱིཔི མེ སཙྪིཀཏཱ, པཏྟོ མེ ཨཱསཝཀྑཡོ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ.

༢༢༩.

‘‘ཨིདྡྷིཡཱ ¶ ཨབྷིནིམྨིཏྭཱ, ཙཏུརསྶཾ རཐཾ ཨཧཾ;

བུདྡྷསྶ པཱདེ ཝནྡིཏྭཱ, ལོཀནཱཐསྶ ཏཱདིནོ’’ [སིརཱིམཏོ (སྱཱ. ཀ.)].

༢༣༠.

‘‘སུཔུཔྥིཏགྒཾ ཨུཔགམྨ པཱདཔཾ, ཨེཀཱ ཏུཝཾ ཏིཊྛསི སཱལམཱུལེ [རུཀྑམཱུལེ (སྱཱ. ཀ.)];

ན ཙཱཔི ཏེ དུཏིཡོ ཨཏྠི ཀོཙི, ན ཏྭཾ བཱལེ བྷཱཡསི དྷུཏྟཀཱནཾ’’.

༢༣༡.

‘‘སཏཾ སཧསྶཱནིཔི དྷུཏྟཀཱནཾ, སམཱགཏཱ ཨེདིསཀཱ བྷཝེཡྻུཾ;

ལོམཾ ན ཨིཉྫེ ནཔི སམྤཝེདྷེ, ཀིཾ མེ ཏུཝཾ མཱར ཀརིསྶསེཀོ.

༢༣༢.

‘‘ཨེསཱ ཨནྟརདྷཱཡཱམི, ཀུཙྪིཾ ཝཱ པཝིསཱམི ཏེ;

བྷམུཀནྟརེ ཏིཊྛཱམི, ཏིཊྛནྟིཾ མཾ ན དཀྑསི.

༢༣༣.

‘‘ཙིཏྟམྷི ¶ ཝསཱིབྷཱུཏཱཧཾ, ཨིདྡྷིཔཱདཱ སུབྷཱཝིཏཱ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ.

༢༣༤.

‘‘སཏྟིསཱུལཱུཔམཱ ཀཱམཱ, ཁནྡྷཱསཾ ཨདྷིཀུཊྚནཱ;

ཡཾ ཏྭཾ ‘ཀཱམརཏིཾ’ བྲཱུསི, ‘ཨརཏཱི’ དཱནི སཱ མམ.

༢༣༥.

‘‘སབྦཏྠ ¶ ཝིཧཏཱ ནནྡཱི, ཏམོཁནྡྷོ པདཱལིཏོ;

ཨེཝཾ ཛཱནཱཧི པཱཔིམ, ནིཧཏོ ཏྭམསི ཨནྟཀཱ’’ཏི.

… ཨུཔྤལཝཎྞཱ ཐེརཱི….

དྭཱདསནིཔཱཏོ ནིཊྛིཏོ.

༡༢. སོལ༹སནིཔཱཏོ

༡. པུཎྞཱཐེརཱིགཱཐཱ

༢༣༦.

‘‘ཨུདཧཱརཱི ¶ ¶ ¶ ཨཧཾ སཱིཏེ [ཨུདཀམཱཧརིཾ སཱིཏེ (སཱི.)], སདཱ ཨུདཀམོཏརིཾ;

ཨཡྻཱནཾ དཎྜབྷཡབྷཱིཏཱ, ཝཱཙཱདོསབྷཡཊྚིཏཱ.

༢༣༧.

‘‘ཀསྶ བྲཱཧྨཎ ཏྭཾ བྷཱིཏོ, སདཱ ཨུདཀམོཏརི;

ཝེདྷམཱནེཧི གཏྟེཧི, སཱིཏཾ ཝེདཡསེ བྷུསཾ’’.

༢༣༨.

ཛཱནནྟཱི ཝཏ མཾ [ཛཱནནྟཱི ཙ ཏུཝཾ (ཀ.)] བྷོཏི, པུཎྞིཀེ པརིཔུཙྪསི;

ཀརོནྟཾ ཀུསལཾ ཀམྨཾ, རུནྡྷནྟཾ ཀཏཔཱཔཀཾ.

༢༣༩.

‘‘ཡོ ཙ ཝུཌྜྷོ དཧརོ ཝཱ, པཱཔཀམྨཾ པཀུབྦཏི;

དཀཱབྷིསེཙནཱ སོཔི, པཱཔཀམྨཱ པམུཙྩཏི’’.

༢༤༠.

‘‘ཀོ ནུ ཏེ ཨིདམཀྑཱསི, ཨཛཱནནྟསྶ ཨཛཱནཀོ;

དཀཱབྷིསེཙནཱ ནཱམ, པཱཔཀམྨཱ པམུཙྩཏི.

༢༤༡.

‘‘སགྒཾ ནཱུན གམིསྶནྟི, སབྦེ མཎྜཱུཀཀཙྪཔཱ;

ནཱགཱ [ནཀྐཱ (སཱི.)] ཙ སུསུམཱརཱ ཙ, ཡེ ཙཉྙེ ཨུདཀེ ཙརཱ.

༢༤༢.

‘‘ཨོརབྦྷིཀཱ སཱུཀརིཀཱ, མཙྪིཀཱ མིགབནྡྷཀཱ;

ཙོརཱ ཙ ཝཛ྄ཛྷགྷཱཏཱ ཙ, ཡེ ཙཉྙེ པཱཔཀམྨིནོ;

དཀཱབྷིསེཙནཱ ཏེཔི, པཱཔཀམྨཱ པམུཙྩརེ.

༢༤༣.

‘‘སཙེ ཨིམཱ ནདིཡོ ཏེ, པཱཔཾ པུབྦེ ཀཏཾ ཝཧུཾ;

པུཉྙམྤིམཱ ¶ ཝཧེཡྻུཾ ཏེ, ཏེན ཏྭཾ པརིབཱཧིརོ.

༢༤༤.

‘‘ཡསྶ ¶ བྲཱཧྨཎ ཏྭཾ བྷཱིཏོ, སདཱ ཨུདཀམོཏརི;

ཏམེཝ བྲཧྨེ མཱ ཀཱསི, མཱ ཏེ སཱིཏཾ ཚཝིཾ ཧནེ’’.

༢༤༥.

‘‘ཀུམྨགྒཔཊིཔནྣཾ མཾ, ཨརིཡམགྒཾ སམཱནཡི;

དཀཱབྷིསེཙནཱ བྷོཏི, ཨིམཾ སཱཊཾ དདཱམི ཏེ’’.

༢༤༦.

‘‘ཏུཡ྄ཧེཝ སཱཊཀོ ཧོཏུ, ནཱཧམིཙྪཱམི སཱཊཀཾ;

སཙེ བྷཱཡསི དུཀྑསྶ, སཙེ ཏེ དུཀྑམཔྤིཡཾ.

༢༤༧.

‘‘མཱཀཱསི ¶ ¶ པཱཔཀཾ ཀམྨཾ, ཨཱཝི ཝཱ ཡདི ཝཱ རཧོ;

སཙེ ཙ པཱཔཀཾ ཀམྨཾ, ཀརིསྶསི ཀརོསི ཝཱ.

༢༤༨.

‘‘ན ཏེ དུཀྑཱ པམུཏྱཏྠི, ཨུཔེཙྩཱཔི [ཨུཔྤཙྩཱཔི (ཨཊྛ. པཱཋནྟརཾ)] པལཱཡཏོ;

སཙེ བྷཱཡསི དུཀྑསྶ, སཙེ ཏེ དུཀྑམཔྤིཡཾ.

༢༤༩.

‘‘ཨུཔེཧི སརཎཾ བུདྡྷཾ, དྷམྨཾ སངྒྷཉྩ ཏཱདིནཾ;

སམཱདིཡཱཧི སཱིལཱནི, ཏཾ ཏེ ཨཏྠཱཡ ཧེཧིཏི’’.

༢༥༠.

‘‘ཨུཔེམི སརཎཾ བུདྡྷཾ, དྷམྨཾ སངྒྷཉྩ ཏཱདིནཾ;

སམཱདིཡཱམི སཱིལཱནི, ཏཾ མེ ཨཏྠཱཡ ཧེཧིཏི.

༢༥༡.

‘‘བྲཧྨབནྡྷུ པུརེ ཨཱསིཾ, ཨཛྫམྷི སཙྩབྲཱཧྨཎོ;

ཏེཝིཛྫོ ཝེདསམྤནྣོ, སོཏྟིཡོ ཙམྷི ནྷཱཏཀོ’’ཏི.

… པུཎྞཱ ཐེརཱི….

སོལ༹སནིཔཱཏོ ནིཊྛིཏོ.

༡༣. ཝཱིསཏིནིཔཱཏོ

༡. ཨམྦཔཱལཱིཐེརཱིགཱཐཱ

༢༥༢.

‘‘ཀཱལ༹ཀཱ ¶ ¶ བྷམརཝཎྞསཱདིསཱ, ཝེལླིཏགྒཱ མམ མུདྡྷཛཱ ཨཧུཾ;

ཏེ ཛརཱཡ སཱཎཝཱཀསཱདིསཱ, སཙྩཝཱདིཝཙནཾ ཨནཉྙཐཱ.

༢༥༣.

‘‘ཝཱསིཏོཝ སུརབྷཱི ཀརཎྜཀོ, པུཔྥཔཱུར མམ ཨུཏྟམངྒཛོ [ཨུཏྟམངྒབྷཱུཏོ (ཀ.)].

ཏཾ ཛརཱཡཐ སལོམགནྡྷིཀཾ, སཙྩཝཱདིཝཙནཾ ཨནཉྙཐཱ.

༢༥༤.

‘‘ཀཱནནཾཝ ¶ སཧིཏཾ སུརོཔིཏཾ, ཀོཙྪསཱུཙིཝིཙིཏགྒསོབྷིཏཾ;

ཏཾ ཛརཱཡ ཝིརལཾ ཏཧིཾ ཏཧིཾ, སཙྩཝཱདིཝཙནཾ ཨནཉྙཐཱ.

༢༥༥.

‘‘ཀཎྷཁནྡྷཀསུཝཎྞམཎྜིཏཾ, སོབྷཏེ སུཝེཎཱིཧིལངྐཏཾ;

ཏཾ ¶ ཛརཱཡ ཁལིཏཾ སིརཾ ཀཏཾ, སཙྩཝཱདིཝཙནཾ ཨནཉྙཐཱ.

༢༥༦.

‘‘ཙིཏྟཀཱརསུཀཏཱཝ ལེཁིཀཱ, སོབྷརེ སུ བྷམུཀཱ པུརེ མམ;

ཏཱ ¶ ཛརཱཡ ཝལིབྷིཔྤལམྦིཏཱ, སཙྩཝཱདིཝཙནཾ ཨནཉྙཐཱ.

༢༥༧.

‘‘བྷསྶརཱ སུརུཙིརཱ ཡཐཱ མཎཱི, ནེཏྟཧེསུམབྷིནཱིལམཱཡཏཱ;

ཏེ ཛརཱཡབྷིཧཏཱ ན སོབྷརེ, སཙྩཝཱདིཝཙནཾ ཨནཉྙཐཱ.

༢༥༨.

‘‘སཎྷཏུངྒསདིསཱི ¶ ཙ ནཱསིཀཱ, སོབྷཏེ སུ ཨབྷིཡོབྦནཾ པཏི;

སཱ ཛརཱཡ ཨུཔཀཱུལིཏཱ ཝིཡ, སཙྩཝཱདིཝཙནཾ ཨནཉྙཐཱ.

༢༥༩.

‘‘ཀངྐཎཾ ཝ སུཀཏཾ སུནིཊྛིཏཾ, སོབྷརེ སུ མམ ཀཎྞཔཱལི༹ཡོ;

ཏཱ ཛརཱཡ ཝལིབྷིཔྤལམྦིཏཱ, སཙྩཝཱདིཝཙནཾ ཨནཉྙཐཱ.

༢༦༠.

‘‘པཏྟལཱིམཀུལཝཎྞསཱདིསཱ, སོབྷརེ སུ དནྟཱ པུརེ མམ;

ཏེ ཛརཱཡ ཁཎྜིཏཱ ཙཱསིཏཱ [པཱིཏཀཱ (སཱི.)], སཙྩཝཱདིཝཙནཾ ཨནཉྙཐཱ.

༢༦༡.

‘‘ཀཱནནམྷི ཝནསཎྜཙཱརིནཱི, ཀོཀིལཱཝ ¶ མདྷུརཾ ནིཀཱུཛིཧཾ;

ཏཾ ཛརཱཡ ཁལིཏཾ ཏཧིཾ ཏཧིཾ, སཙྩཝཱདིཝཙནཾ ཨནཉྙཐཱ.

༢༦༢.

‘‘སཎྷཀམྦུརིཝ སུཔྤམཛྫིཏཱ, སོབྷཏེ སུ གཱིཝཱ པུརེ མམ;

སཱ ཛརཱཡ བྷགྒཱ [བྷཉྫིཏཱ (?)] ཝིནཱམིཏཱ, སཙྩཝཱདིཝཙནཾ ཨནཉྙཐཱ.

༢༦༣.

‘‘ཝཊྚཔལིགྷསདིསོཔམཱ ¶ ཨུབྷོ, སོབྷརེ སུ བཱཧཱ པུརེ མམ;

ཏཱ ཛརཱཡ ཡཐ པཱཊལིབྦལིཏཱ [ཡཐཱ པཱཊལིཔྤལིཏཱ (སཱི. སྱཱ. ཀ.)], སཙྩཝཱདིཝཙནཾ ཨནཉྙཐཱ.

༢༦༤.

‘‘སཎྷམུདྡིཀསུཝཎྞམཎྜིཏཱ, སོབྷརེ སུ ཧཏྠཱ པུརེ མམ;

ཏེ ཛརཱཡ ཡཐཱ མཱུལམཱུལིཀཱ, སཙྩཝཱདིཝཙནཾ ཨནཉྙཐཱ.

༢༦༥.

‘‘པཱིནཝཊྚསཧིཏུགྒཏཱ ¶ ཨུབྷོ, སོབྷརེ [སོབྷཏེ (ཨཊྛ.)] སུ ཐནཀཱ པུརེ མམ;

ཐེཝིཀཱིཝ ལམྦནྟི ནོདཀཱ, སཙྩཝཱདིཝཙནཾ ¶ ཨནཉྙཐཱ.

༢༦༦.

‘‘ཀཉྩནསྶཕལཀཾཝ སམྨཊྛཾ, སོབྷཏེ སུ ཀཱཡོ པུརེ མམ;

སོ ཝལཱིཧི སུཁུམཱཧི ཨོཏཏོ, སཙྩཝཱདིཝཙནཾ ཨནཉྙཐཱ.

༢༦༧.

‘‘ནཱགབྷོགསདིསོཔམཱ ཨུབྷོ, སོབྷརེ སུ ཨཱུརཱུ པུརེ མམ;

ཏེ ཛརཱཡ ཡཐཱ ཝེལུ༹ནཱལི༹ཡོ, སཙྩཝཱདིཝཙནཾ ཨནཉྙཐཱ.

༢༦༨.

‘‘སཎྷནཱུཔུརསུཝཎྞམཎྜིཏཱ ¶ , སོབྷརེ སུ ཛངྒྷཱ པུརེ མམ;

ཏཱ ཛརཱཡ ཏིལདཎྜཀཱརིཝ, སཙྩཝཱདིཝཙནཾ ཨནཉྙཐཱ.

༢༦༩.

‘‘ཏཱུལཔུཎྞསདིསོཔམཱ ཨུབྷོ, སོབྷརེ སུ པཱདཱ པུརེ མམ;

ཏེ ཛརཱཡ ཕུཊིཏཱ ཝལཱིམཏཱ, སཙྩཝཱདིཝཙནཾ ཨནཉྙཐཱ.

༢༧༠.

‘‘ཨེདིསོ ཨཧུ ཨཡཾ སམུསྶཡོ, ཛཛྫརོ བཧུདུཀྑཱནམཱལཡོ;

སོཔལེཔཔཏིཏོ ¶ ཛརཱགྷརོ, སཙྩཝཱདིཝཙནཾ ཨནཉྙཐཱ’’.

… ཨམྦཔཱལཱི ཐེརཱི….

༢. རོཧིནཱིཐེརཱིགཱཐཱ

༢༧༡.

‘‘‘སམཎཱ’ཏི ¶ བྷོཏི སུཔི [བྷོཏི ཏྭཾ སཡསི (སཱི.), བྷོཏི མཾ ཝིཔསྶི (སྱཱ.)], ‘སམཎཱ’ཏི པབུཛ྄ཛྷསི [པཊིབུཛ྄ཛྷསི (སཱི. སྱཱ.)];

སམཎཱནེཝ [སམཎཱནམེཝ (སཱི. སྱཱ.)] ཀིཏྟེསི, སམཎཱི ནཱུན [སམཎཱི ནུ (ཀ.)] བྷཝིསྶསི.

༢༧༢.

‘‘ཝིཔུལཾ ¶ ཨནྣཉྩ པཱནཉྩ, སམཎཱནཾ པཝེཙྩསི [པཡཙྪསི (སཱི.)];

རོཧིནཱི དཱནི པུཙྪཱམི, ཀེན ཏེ སམཎཱ པིཡཱ.

༢༧༣.

‘‘ཨཀམྨཀཱམཱ ཨལསཱ, པརདཏྟཱུཔཛཱིཝིནོ;

ཨཱསཾསུཀཱ སཱདུཀཱམཱ, ཀེན ཏེ སམཎཱ པིཡཱ’’.

༢༧༤.

‘‘ཙིརསྶཾ ཝཏ མཾ ཏཱཏ, སམཎཱནཾ པརིཔུཙྪསི;

ཏེསཾ ཏེ ཀིཏྟཡིསྶཱམི, པཉྙཱསཱིལཔརཀྐམཾ.

༢༧༥.

‘‘ཀམྨཀཱམཱ ཨནལསཱ, ཀམྨསེཊྛསྶ ཀཱརཀཱ;

རཱགཾ དོསཾ པཛཧནྟི, ཏེན མེ སམཎཱ པིཡཱ.

༢༧༦.

‘‘ཏཱིཎི པཱཔསྶ མཱུལཱནི, དྷུནནྟི སུཙིཀཱརིནོ;

སབྦཾ པཱཔཾ པཧཱིནེསཾ, ཏེན མེ སམཎཱ པིཡཱ.

༢༧༧.

‘‘ཀཱཡཀམྨཾ སུཙི ནེསཾ, ཝཙཱིཀམྨཉྩ ཏཱདིསཾ;

མནོཀམྨཾ སུཙི ནེསཾ, ཏེན མེ སམཎཱ པིཡཱ.

༢༧༨.

‘‘ཝིམལཱ སངྑམུཏྟཱཝ, སུདྡྷཱ སནྟརབཱཧིརཱ;

པུཎྞཱ སུཀྐཱན དྷམྨཱནཾ [སུཀྐེཧི དྷམྨེཧི (སཱི. སྱཱ. ཨཊྛ.)], ཏེན མེ སམཎཱ པིཡཱ.

༢༧༩.

‘‘བཧུསྶུཏཱ དྷམྨདྷརཱ, ཨརིཡཱ དྷམྨཛཱིཝིནོ;

ཨཏྠཾ དྷམྨཉྩ དེསེནྟི, ཏེན མེ སམཎཱ པིཡཱ.

༢༨༠.

‘‘བཧུསྶུཏཱ ¶ དྷམྨདྷརཱ, ཨརིཡཱ དྷམྨཛཱིཝིནོ;

ཨེཀགྒཙིཏྟཱ སཏིམནྟོ, ཏེན མེ སམཎཱ པིཡཱ.

༢༨༡.

‘‘དཱུརངྒམཱ ¶ སཏིམནྟོ, མནྟབྷཱཎཱི ཨནུདྡྷཏཱ;

དུཀྑསྶནྟཾ པཛཱནནྟི, ཏེན མེ སམཎཱ པིཡཱ.

༢༨༢.

‘‘ཡསྨཱ གཱམཱ པཀྐམནྟི, ན ཝིལོཀེནྟི ཀིཉྩནཾ;

ཨནཔེཀྑཱཝ གཙྪནྟི, ཏེན མེ སམཎཱ པིཡཱ.

༢༨༣.

‘‘ན ¶ ཏེསཾ ཀོཊྛེ ཨོཔེནྟི, ན ཀུམྦྷིཾ ན ཁལོ༹པིཡཾ;

པརིནིཊྛིཏམེསཱནཱ, ཏེན མེ སམཎཱ པིཡཱ.

༢༨༤.

‘‘ན ཏེ ཧིརཉྙཾ གཎྷནྟི, ན སུཝཎྞཾ ན རཱུཔིཡཾ;

པཙྩུཔྤནྣེན ཡཱཔེནྟི, ཏེན མེ སམཎཱ པིཡཱ.

༢༨༥.

‘‘ནཱནཱཀུལཱ ¶ པབྦཛིཏཱ, ནཱནཱཛནཔདེཧི ཙ;

ཨཉྙམཉྙཾ པིཡཱཡནྟི [པིཧཡནྟི (ཀ.)], ཏེན མེ སམཎཱ པིཡཱ’’.

༢༨༦.

‘‘ཨཏྠཱཡ ཝཏ ནོ བྷོཏི, ཀུལེ ཛཱཏཱསི རོཧིནཱི;

སདྡྷཱ བུདྡྷེ ཙ དྷམྨེ ཙ, སངྒྷེ ཙ ཏིབྦགཱརཝཱ.

༢༨༧.

‘‘ཏུཝཾ ཧེཏཾ པཛཱནཱསི, པུཉྙཀྑེཏྟཾ ཨནུཏྟརཾ;

ཨམྷམྤི ཨེཏེ སམཎཱ, པཊིགཎྷནྟི དཀྑིཎཾ’’.

༢༨༨.

‘‘པཏིཊྛིཏོ ཧེཏྠ ཡཉྙོ, ཝིཔུལོ ནོ བྷཝིསྶཏི;

སཙེ བྷཱཡསི དུཀྑསྶ, སཙེ ཏེ དུཀྑམཔྤིཡཾ.

༢༨༩.

‘‘ཨུཔེཧི སརཎཾ བུདྡྷཾ, དྷམྨཾ སངྒྷཉྩ ཏཱདིནཾ;

སམཱདིཡཱཧི སཱིལཱནི, ཏཾ ཏེ ཨཏྠཱཡ ཧེཧིཏི’’.

༢༩༠.

‘‘ཨུཔེམི ¶ སརཎཾ བུདྡྷཾ, དྷམྨཾ སངྒྷཉྩ ཏཱདིནཾ;

སམཱདིཡཱམི སཱིལཱནི, ཏཾ མེ ཨཏྠཱཡ ཧེཧིཏི.

༢༩༡.

‘‘བྲཧྨབནྡྷུ པུརེ ཨཱསིཾ, སོ ཨིདཱནིམྷི བྲཱཧྨཎོ;

ཏེཝིཛྫོ སོཏྟིཡོ ཙམྷི, ཝེདགཱུ ཙམྷི ནྷཱཏཀོ’’.

… རོཧིནཱི ཐེརཱི….

༣. ཙཱཔཱཐེརཱིགཱཐཱ

༢༩༢.

‘‘ལཊྛིཧཏྠོ པུརེ ཨཱསི, སོ དཱནི མིགལུདྡཀོ;

ཨཱསཱཡ པལིཔཱ གྷོརཱ, ནཱསཀྑི པཱརམེཏཝེ.

༢༩༣.

‘‘སུམཏྟཾ མཾ མཉྙམཱནཱ, ཙཱཔཱ པུཏྟམཏོསཡི;

ཙཱཔཱཡ བནྡྷནཾ ཚེཏྭཱ, པབྦཛིསྶཾ པུནོཔཧཾ.

༢༩༤.

‘‘མཱ ¶ མེ ཀུཛ྄ཛྷི མཧཱཝཱིར, མཱ མེ ཀུཛ྄ཛྷི མཧཱམུནི;

ན ཧི ཀོདྷཔརེཏསྶ, སུདྡྷི ཨཏྠི ཀུཏོ ཏཔོ.

༢༩༥.

‘‘པཀྐམིསྶཉྩ ¶ ནཱལཱ༹ཏོ, ཀོདྷ ནཱལཱ༹ཡ ཝཙྪཏི;

བནྡྷནྟཱི ཨིཏྠིརཱུཔེན, སམཎེ དྷམྨཛཱིཝིནོ’’ [དྷམྨཛཱིཝིནེ (ཀ.)].

༢༩༦.

‘‘ཨེཧི ཀཱལ༹ ནིཝཏྟསྶུ, བྷུཉྫ ཀཱམེ ཡཐཱ པུརེ;

ཨཧཉྩ ཏེ ཝསཱིཀཏཱ, ཡེ ཙ མེ སནྟི ཉཱཏཀཱ’’.

༢༩༧.

‘‘ཨེཏྟོ ¶ ཙཱཔེ ཙཏུབྦྷཱགཾ, ཡཐཱ བྷཱསསི ཏྭཉྩ མེ;

ཏཡི རཏྟསྶ པོསསྶ, ཨུལཱ༹རཾ ཝཏ ཏཾ སིཡཱ’’.

༢༩༨.

‘‘ཀཱལ༹ངྒིནིཾཝ ཏཀྐཱརིཾ, པུཔྥིཏཾ གིརིམུདྡྷནི;

ཕུལླཾ དཱལིམལཊྛིཾཝ, ཨནྟོདཱིཔེཝ པཱཊལིཾ.

༢༩༩.

‘‘ཧརིཙནྡནལིཏྟངྒིཾ, ཀཱསིཀུཏྟམདྷཱརིནིཾ;

ཏཾ ¶ མཾ རཱུཔཝཏིཾ སནྟིཾ, ཀསྶ ཨོཧཱཡ གཙྪསི’’.

༣༠༠.

‘‘སཱཀུནྟིཀོཝ སཀུཎིཾ [སཀུཎཾ (སྱཱ.)], ཡཐཱ བནྡྷིཏུམིཙྪཏི;

ཨཱཧརིམེན རཱུཔེན, ན མཾ ཏྭཾ བཱདྷཡིསྶསི’’.

༣༠༡.

‘‘ཨིམཉྩ མེ པུཏྟཕལཾ, ཀཱལ༹ ཨུཔྤཱདིཏཾ ཏཡཱ;

ཏཾ མཾ པུཏྟཝཏིཾ སནྟིཾ, ཀསྶ ཨོཧཱཡ གཙྪསི’’.

༣༠༢.

‘‘ཛཧནྟི པུཏྟེ སཔྤཉྙཱ, ཏཏོ ཉཱཏཱི ཏཏོ དྷནཾ;

པབྦཛནྟི མཧཱཝཱིརཱ, ནཱགོ ཚེཏྭཱཝ བནྡྷནཾ’’.

༣༠༣.

‘‘ཨིདཱནི ཏེ ཨིམཾ པུཏྟཾ, དཎྜེན ཚུརིཀཱཡ ཝཱ;

བྷཱུམིཡཾ ཝཱ ནིསུམྦྷིསྶཾ [ནིསུམྦྷེཡྻཾ (སཱི.)], པུཏྟསོཀཱ ན གཙྪསི’’.

༣༠༤.

‘‘སཙེ པུཏྟཾ སིངྒཱལཱནཾ, ཀུཀྐུརཱནཾ པདཱཧིསི;

ན མཾ པུཏྟཀཏྟེ ཛམྨི, པུནརཱཝཏྟཡིསྶསི’’.

༣༠༥.

‘‘ཧནྡ ཁོ དཱནི བྷདྡནྟེ, ཀུཧིཾ ཀཱལ༹ གམིསྶསི;

ཀཏམཾ ¶ གཱམནིགམཾ, ནགརཾ རཱཛདྷཱནིཡོ’’.

༣༠༦.

‘‘ཨཧུམྷ པུབྦེ གཎིནོ, ཨསྶམཎཱ སམཎམཱནིནོ;

གཱམེན གཱམཾ ཝིཙརིམྷ, ནགརེ རཱཛདྷཱནིཡོ.

༣༠༧.

‘‘ཨེསོ ཧི བྷགཝཱ བུདྡྷོ, ནདིཾ ནེརཉྫརཾ པཏི;

སབྦདུཀྑཔྤཧཱནཱཡ, དྷམྨཾ དེསེཏི པཱཎིནཾ;

ཏསྶཱཧཾ སནྟིཀཾ གཙྪཾ, སོ མེ སཏྠཱ བྷཝིསྶཏི’’.

༣༠༨.

‘‘ཝནྡནཾ ¶ དཱནི ཝཛྫཱསི, ལོཀནཱཐཾ ཨནུཏྟརཾ;

པདཀྑིཎཉྩ ཀཏྭཱན, ཨཱདིསེཡྻཱསི དཀྑིཎཾ’’.

༣༠༩.

‘‘ཨེཏཾ ཁོ ལབྦྷམམྷེཧི, ཡཐཱ བྷཱསསི ཏྭཉྩ མེ;

ཝནྡནཾ དཱནི ཏེ ཝཛྫཾ, ལོཀནཱཐཾ ཨནུཏྟརཾ;

པདཀྑིཎཉྩ ¶ ཀཏྭཱན, ཨཱདིསིསྶཱམི དཀྑིཎཾ’’.

༣༡༠.

ཏཏོ ¶ ཙ ཀཱལོ༹ པཀྐཱམི, ནདིཾ ནེརཉྫརཾ པཏི;

སོ ཨདྡསཱསི སམྦུདྡྷཾ, དེསེནྟཾ ཨམཏཾ པདཾ.

༣༡༡.

དུཀྑཾ དུཀྑསམུཔྤཱདཾ, དུཀྑསྶ ཙ ཨཏིཀྐམཾ;

ཨརིཡཾ ཙཊྛངྒིཀཾ མགྒཾ, དུཀྑཱུཔསམགཱམིནཾ.

༣༡༢.

ཏསྶ པཱདཱནི ཝནྡིཏྭཱ, ཀཏྭཱན ནཾ [ཀཏྭཱནཧཾ (སཱི.)] པདཀྑིཎཾ;

ཙཱཔཱཡ ཨཱདིསིཏྭཱན, པབྦཛིཾ ཨནགཱརིཡཾ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ.

… ཙཱཔཱ ཐེརཱི….

༤. སུནྡརཱིཐེརཱིགཱཐཱ

༣༡༣.

‘‘པེཏཱནི བྷོཏི པུཏྟཱནི, ཁཱདམཱནཱ ཏུཝཾ པུརེ;

ཏུཝཾ དིཝཱ ཙ རཏྟོ ཙ, ཨཏཱིཝ པརིཏཔྤསི.

༣༡༤.

‘‘སཱཛྫ སབྦཱནི ཁཱདིཏྭཱ, སཏཔུཏྟཱནི [སཏྟ པུཏྟཱནི (སྱཱ.)] བྲཱཧྨཎཱི;

ཝཱསེཊྛི ཀེན ཝཎྞེན, ན བཱལ༹ྷཾ པརིཏཔྤསི’’.

༣༡༥.

‘‘བཧཱུནི པུཏྟསཏཱནི, ཉཱཏིསངྒྷསཏཱནི ཙ;

ཁཱདིཏཱནི ཨཏཱིཏཾསེ, མམ ཏུཡ྄ཧཉྩ བྲཱཧྨཎ.

༣༡༦.

‘‘སཱཧཾ ནིསྶརཎཾ ཉཏྭཱ, ཛཱཏིཡཱ མརཎསྶ ཙ;

ན ¶ སོཙཱམི ན རོདཱམི, ན ཙཱཔི པརིཏཔྤཡིཾ’’.

༣༡༧.

‘‘ཨབྦྷུཏཾ ¶ ཝཏ ཝཱསེཊྛི, ཝཱཙཾ བྷཱསསི ཨེདིསིཾ;

ཀསྶ ཏྭཾ དྷམྨམཉྙཱཡ, གིརཾ [ཐིརཾ (སཱི.)] བྷཱསསི ཨེདིསིཾ’’.

༣༡༨.

‘‘ཨེས བྲཱཧྨཎ སམྦུདྡྷོ, ནགརཾ མིཐིལཾ པཏི;

སབྦདུཀྑཔྤཧཱནཱཡ, དྷམྨཾ དེསེསི པཱཎིནཾ.

༣༡༩.

‘‘ཏསྶ བྲཧྨེ [བྲཱཧྨཎ (སཱི. སྱཱ.)] ཨརཧཏོ, དྷམྨཾ སུཏྭཱ ནིརཱུཔདྷིཾ;

ཏཏྠ ཝིཉྙཱཏསདྡྷམྨཱ, པུཏྟསོཀཾ བྱཔཱནུདིཾ’’.

༣༢༠.

‘‘སོ ¶ ཨཧམྤི གམིསྶཱམི, ནགརཾ མིཐིལཾ པཏི;

ཨཔྤེཝ མཾ སོ བྷགཝཱ, སབྦདུཀྑཱ པམོཙཡེ’’.

༣༢༡.

ཨདྡས ¶ བྲཱཧྨཎོ བུདྡྷཾ, ཝིཔྤམུཏྟཾ ནིརཱུཔདྷིཾ;

སྭསྶ དྷམྨམདེསེསི, མུནི དུཀྑསྶ པཱརགཱུ.

༣༢༢.

དུཀྑཾ དུཀྑསམུཔྤཱདཾ, དུཀྑསྶ ཙ ཨཏིཀྐམཾ;

ཨརིཡཾ ཙཊྛངྒིཀཾ མགྒཾ, དུཀྑཱུཔསམགཱམིནཾ.

༣༢༣.

ཏཏྠ ཝིཉྙཱཏསདྡྷམྨོ, པབྦཛྫཾ སམརོཙཡི;

སུཛཱཏོ ཏཱིཧི རཏྟཱིཧི, ཏིསྶོ ཝིཛྫཱ ཨཕསྶཡི.

༣༢༤.

‘‘ཨེཧི སཱརཐི གཙྪཱཧི, རཐཾ ནིཡྻཱདཡཱཧིམཾ;

ཨཱརོགྱཾ བྲཱཧྨཎིཾ ཝཛྫ [ཝཛྫཱ (སཱི.)], ‘པབྦཛི [པབྦཛིཏོ (སཱི.)] དཱནི བྲཱཧྨཎོ;

སུཛཱཏོ ཏཱིཧི རཏྟཱིཧི, ཏིསྶོ ཝིཛྫཱ ཨཕསྶཡི’’’.

༣༢༥.

ཏཏོ ཙ རཐམཱདཱཡ, སཧསྶཉྩཱཔི སཱརཐི;

ཨཱརོགྱཾ ¶ བྲཱཧྨཎིཝོཙ, ‘‘པབྦཛི དཱནི བྲཱཧྨཎོ;

སུཛཱཏོ ཏཱིཧི རཏྟཱིཧི, ཏིསྶོ ཝིཛྫཱ ཨཕསྶཡི’’.

༣༢༦.

‘‘ཨེཏཉྩཱཧཾ ཨསྶརཐཾ, སཧསྶཉྩཱཔི སཱརཐི;

ཏེཝིཛྫཾ བྲཱཧྨཎཾ སུཏྭཱ [ཉཏྭཱ (སཱི.)], པུཎྞཔཏྟཾ དདཱམི ཏེ’’.

༣༢༧.

‘‘ཏུཡ྄ཧེཝ ཧོཏྭསྶརཐོ, སཧསྶཉྩཱཔི བྲཱཧྨཎི;

ཨཧམྤི པབྦཛིསྶཱམི, ཝརཔཉྙསྶ སནྟིཀེ’’.

༣༢༨.

‘‘ཧཏྠཱི ¶ གཝསྶཾ མཎིཀུཎྜལཉྩ, ཕཱིཏཉྩིམཾ གཧཝིབྷཝཾ པཧཱཡ;

པིཏཱ པབྦཛིཏོ ཏུཡ྄ཧཾ, བྷུཉྫ བྷོགཱནི སུནྡརི; ཏུཝཾ དཱཡཱདིཀཱ ཀུལེ’’.

༣༢༩.

‘‘ཧཏྠཱི གཝསྶཾ མཎིཀུཎྜལཉྩ, རམྨཾ ཙིམཾ གཧཝིབྷཝཾ པཧཱཡ;

པིཏཱ པབྦཛིཏོ མཡ྄ཧཾ, པུཏྟསོཀེན ཨཊྚིཏོ;

ཨཧམྤི པབྦཛིསྶཱམི, བྷཱཏུསོཀེན ཨཊྚིཏཱ’’.

༣༣༠.

‘‘སོ ཏེ ཨིཛ྄ཛྷཏུ སངྐཔྤོ, ཡཾ ཏྭཾ པཏྠེསི སུནྡརཱི;

ཨུཏྟིཊྛཔིཎྜོ ཨུཉྪོ ཙ, པཾསུཀཱུལཉྩ ཙཱིཝརཾ;

ཨེཏཱནི ཨབྷིསམྦྷོནྟཱི, པརལོཀེ ཨནཱསཝཱ’’.

༣༣༡.

‘‘སིཀྑམཱནཱཡ ¶ མེ ཨཡྻེ, དིབྦཙཀྑུ ཝིསོདྷིཏཾ;

པུབྦེནིཝཱསཾ ཛཱནཱམི, ཡཏྠ མེ ཝུསིཏཾ པུརེ.

༣༣༢.

‘‘ཏུཝཾ ¶ ¶ ནིསྶཱཡ ཀལྱཱཎཱི, ཐེརཱི སངྒྷསྶ སོབྷནེ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ.

༣༣༣.

‘‘ཨནུཛཱནཱཧི མེ ཨཡྻེ, ཨིཙྪེ སཱཝཏྠི གནྟཝེ;

སཱིཧནཱདཾ ནདིསྶཱམི, བུདྡྷསེཊྛསྶ སནྟིཀེ’’.

༣༣༤.

‘‘པསྶ སུནྡརི སཏྠཱརཾ, ཧེམཝཎྞཾ ཧརིཏྟཙཾ;

ཨདནྟཱནཾ དམེཏཱརཾ, སམྦུདྡྷམཀུཏོབྷཡཾ’’.

༣༣༥.

‘‘པསྶ སུནྡརིམཱཡནྟིཾ, ཝིཔྤམུཏྟཾ ནིརཱུཔདྷིཾ;

ཝཱིཏརཱགཾ ཝིསཾཡུཏྟཾ, ཀཏཀིཙྩམནཱསཝཾ.

༣༣༦.

‘‘བཱརཱཎསཱིཏོ ནིཀྑམྨ, ཏཝ སནྟིཀམཱགཏཱ;

སཱཝིཀཱ ཏེ མཧཱཝཱིར, པཱདེ ཝནྡཏི སུནྡརཱི’’.

༣༣༧.

‘‘ཏུཝཾ བུདྡྷོ ཏུཝཾ སཏྠཱ, ཏུཡ྄ཧཾ དྷཱིཏཱམྷི བྲཱཧྨཎ;

ཨོརསཱ མུཁཏོ ཛཱཏཱ, ཀཏཀིཙྩཱ ཨནཱསཝཱ’’.

༣༣༨.

‘‘ཏསྶཱ ¶ ཏེ སྭཱགཏཾ བྷདྡེ, ཏཏོ [ཨཐོ (ཀ.)] ཏེ ཨདུརཱགཏཾ;

ཨེཝཉྷི དནྟཱ ཨཱཡནྟི, སཏྠུ པཱདཱནི ཝནྡིཀཱ;

ཝཱིཏརཱགཱ ཝིསཾཡུཏྟཱ, ཀཏཀིཙྩཱ ཨནཱསཝཱ’’.

… སུནྡརཱི ཐེརཱི….

༥. སུབྷཱཀམྨཱརདྷཱིཏུཐེརཱིགཱཐཱ

༣༣༩.

‘‘དཧརཱཧཾ སུདྡྷཝསནཱ, ཡཾ པུརེ དྷམྨམསྶུཎིཾ;

ཏསྶཱ མེ ཨཔྤམཏྟཱཡ, སཙྩཱབྷིསམཡོ ཨཧུ.

༣༤༠.

‘‘ཏཏོཧཾ སབྦཀཱམེསུ, བྷུསཾ ཨརཏིམཛ྄ཛྷགཾ;

སཀྐཱཡསྨིཾ བྷཡཾ དིསྭཱ, ནེཀྑམྨམེཝ [ནེཀྑམྨཉྙེཝ (སཱི.), ནེཀྑམྨསྶེཝ (སྱཱ.)] པཱིཧཡེ.

༣༤༡.

‘‘ཧིཏྭཱནཧཾ ¶ ཉཱཏིགཎཾ, དཱསཀམྨཀརཱནི ཙ;

གཱམཁེཏྟཱནི ཕཱིཏཱནི, རམཎཱིཡེ པམོདིཏེ.

༣༤༢.

‘‘པཧཱཡཧཾ ¶ པབྦཛིཏཱ, སཱཔཏེཡྻམནཔྤཀཾ;

ཨེཝཾ སདྡྷཱཡ ནིཀྑམྨ, སདྡྷམྨེ སུཔྤཝེདིཏེ.

༣༤༣.

‘‘ནེཏཾ [ན མེཏཾ (སཱི. སྱཱ.)] ཨསྶ པཏིརཱུཔཾ, ཨཱཀིཉྩཉྙཉྷི པཏྠཡེ;

ཡོ [ཡཱ (སྱཱ.)] ཛཱཏརཱུཔཾ རཛཏཾ, ཚཌྜེཏྭཱ [ཐཔེཏྭཱ (ཀ.)] པུནརཱགམེ [པུནརཱགཧེ (ཀ.)].

༣༤༤.

‘‘རཛཏཾ ¶ ཛཱཏརཱུཔཾ ཝཱ, ན བོདྷཱཡ ན སནྟིཡཱ;

ནེཏཾ སམཎསཱརུཔྤཾ, ན ཨེཏཾ ཨརིཡདྡྷནཾ.

༣༤༥.

‘‘ལོབྷནཾ མདནཉྩེཏཾ, མོཧནཾ རཛཝཌྜྷནཾ;

སཱསངྐཾ བཧུཨཱཡཱསཾ, ནཏྠི ཙེཏྠ དྷུཝཾ ཋིཏི.

༣༤༦.

‘‘ཨེཏྠ རཏྟཱ པམཏྟཱ ཙ, སངྐིལིཊྛམནཱ ནརཱ;

ཨཉྙམཉྙེན བྱཱརུདྡྷཱ, པུཐུ ཀུབྦནྟི མེདྷགཾ.

༣༤༧.

‘‘ཝདྷོ བནྡྷོ པརིཀླེསོ, ཛཱནི སོཀཔརིདྡཝོ;

ཀཱམེསུ ཨདྷིཔནྣཱནཾ, དིསྶཏེ བྱསནཾ བཧུཾ.

༣༤༨.

‘‘ཏཾ མཾ ཉཱཏཱི ཨམིཏྟཱཝ, ཀིཾ ཝོ ཀཱམེསུ ཡུཉྫཐ;

ཛཱནཱཐ མཾ པབྦཛིཏཾ, ཀཱམེསུ བྷཡདསྶིནིཾ.

༣༤༩.

‘‘ན ¶ ཧིརཉྙསུཝཎྞེན, པརིཀྑཱིཡནྟི ཨཱསཝཱ;

ཨམིཏྟཱ ཝདྷཀཱ ཀཱམཱ, སཔཏྟཱ སལླབནྡྷནཱ.

༣༥༠.

‘‘ཏཾ ¶ མཾ ཉཱཏཱི ཨམིཏྟཱཝ, ཀིཾ ཝོ ཀཱམེསུ ཡུཉྫཐ;

ཛཱནཱཐ མཾ པབྦཛིཏཾ, མུཎྜཾ སངྒྷཱཊིཔཱརུཏཾ.

༣༥༡.

‘‘ཨུཏྟིཊྛཔིཎྜོ ཨུཉྪོ ཙ, པཾསུཀཱུལཉྩ ཙཱིཝརཾ;

ཨེཏཾ ཁོ མམ སཱརུཔྤཾ, ཨནགཱརཱུཔནིསྶཡོ.

༣༥༢.

‘‘ཝནྟཱ མཧེསཱིཧི ཀཱམཱ, ཡེ དིབྦཱ ཡེ ཙ མཱནུསཱ;

ཁེམཊྛཱནེ ཝིམུཏྟཱ ཏེ, པཏྟཱ ཏེ ཨཙལཾ སུཁཾ.

༣༥༣.

‘‘མཱཧཾ ཀཱམེཧི སངྒཙྪིཾ, ཡེསུ ཏཱཎཾ ན ཝིཛྫཏི;

ཨམིཏྟཱ ཝདྷཀཱ ཀཱམཱ, ཨགྒིཀྑནྡྷཱུཔམཱ དུཁཱ.

༣༥༤.

‘‘པརིཔནྠོ ¶ ཨེས བྷཡོ, སཝིགྷཱཏོ སཀཎྚཀོ;

གེདྷོ སུཝིསམོ ཙེསོ [ལེཔོ (སཱི.)], མཧནྟོ མོཧནཱམུཁོ.

༣༥༥.

‘‘ཨུཔསགྒོ བྷཱིམརཱུཔོ, ཀཱམཱ སཔྤསིརཱུཔམཱ;

ཡེ བཱལཱ ཨབྷིནནྡནྟི, ཨནྡྷབྷཱུཏཱ པུཐུཛྫནཱ.

༣༥༦.

‘‘ཀཱམཔངྐེན སཏྟཱ ཧི, བཧཱུ ལོཀེ ཨཝིདྡསཱུ;

པརིཡནྟཾ ན ཛཱནནྟི, ཛཱཏིཡཱ མརཎསྶ ཙ.

༣༥༧.

‘‘དུགྒཏིགམནཾ མགྒཾ, མནུསྶཱ ཀཱམཧེཏུཀཾ;

བཧུཾ ཝེ པཊིཔཛྫནྟི, ཨཏྟནོ རོགམཱཝཧཾ.

༣༥༨.

‘‘ཨེཝཾ ¶ ཨམིཏྟཛནནཱ, ཏཱཔནཱ སཾཀིལེསིཀཱ;

ལོཀཱམིསཱ བནྡྷནཱིཡཱ, ཀཱམཱ མརཎབནྡྷནཱ [ཙརཎབནྡྷནཱ (སཱི.)].

༣༥༩.

‘‘ཨུམྨཱདནཱ ¶ ཨུལླཔནཱ, ཀཱམཱ ཙིཏྟཔྤམདྡིནོ;

སཏྟཱནཾ སངྐིལེསཱཡ, ཁིཔྤཾ [ཁིཔཾ (སཱི.)] མཱརེན ཨོཌྜིཏཾ.

༣༦༠.

‘‘ཨནནྟཱདཱིནཝཱ ཀཱམཱ, བཧུདུཀྑཱ མཧཱཝིསཱ;

ཨཔྤསྶཱདཱ ¶ རཎཀརཱ, སུཀྐཔཀྑཝིསོསནཱ [ཝིསོསཀཱ (སཱི.)].

༣༦༡.

‘‘སཱཧཾ ཨེཏཱདིསཾ ཀཏྭཱ, བྱསནཾ ཀཱམཧེཏུཀཾ;

ན ཏཾ པཙྩཱགམིསྶཱམི, ནིབྦཱནཱབྷིརཏཱ སདཱ.

༣༦༢.

‘‘རཎཾ ཀརིཏྭཱ [ཏརིཏྭཱ (སཱི.)] ཀཱམཱནཾ, སཱིཏིབྷཱཝཱབྷིཀངྑིནཱི;

ཨཔྤམཏྟཱ ཝིཧསྶཱམི, སབྦསཾཡོཛནཀྑཡེ.

༣༦༣.

‘‘ཨསོཀཾ ཝིརཛཾ ཁེམཾ, ཨརིཡཊྛངྒིཀཾ ཨུཛུཾ;

ཏཾ མགྒཾ ཨནུགཙྪཱམི, ཡེན ཏིཎྞཱ མཧེསིནོ’’.

༣༦༤.

ཨིམཾ པསྶཐ དྷམྨཊྛཾ, སུབྷཾ ཀམྨཱརདྷཱིཏརཾ;

ཨནེཛཾ ཨུཔསམྤཛྫ, རུཀྑམཱུལམྷི ཛྷཱཡཏི.

༣༦༥.

ཨཛྫཊྛམཱི པབྦཛིཏཱ, སདྡྷཱ སདྡྷམྨསོབྷནཱ;

ཝིནཱིཏུཔྤལཝཎྞཱཡ, ཏེཝིཛྫཱ མཙྩུཧཱཡིནཱི.

༣༦༦.

སཱཡཾ ¶ བྷུཛིསྶཱ ཨནཎཱ, བྷིཀྑུནཱི བྷཱཝིཏིནྡྲིཡཱ;

སབྦཡོགཝིསཾཡུཏྟཱ, ཀཏཀིཙྩཱ ཨནཱསཝཱ.

༣༦༧.

ཏཾ སཀྐོ དེཝསངྒྷེན, ཨུཔསངྐམྨ ཨིདྡྷིཡཱ;

ནམསྶཏི བྷཱུཏཔཏི, སུབྷཾ ཀམྨཱརདྷཱིཏརནྟི.

… སུབྷཱ ཀམྨཱརདྷཱིཏཱ ཐེརཱི….

ཝཱིསཏིནིཔཱཏོ ནིཊྛིཏོ.

༡༤. ཏིཾསནིཔཱཏོ

༡. སུབྷཱཛཱིཝཀམྦཝནིཀཱཐེརཱིགཱཐཱ

༣༦༨.

ཛཱིཝཀམྦཝནཾ ¶ ¶ ¶ རམྨཾ, གཙྪནྟིཾ བྷིཀྑུནིཾ སུབྷཾ;

དྷུཏྟཀོ སནྣིཝཱརེསི [ཏཾ ནིཝཱརེསི (ཀ.)], ཏམེནཾ ཨབྲཝཱི སུབྷཱ.

༣༦༩.

‘‘ཀིཾ ཏེ ཨཔརཱདྷིཏཾ མཡཱ, ཡཾ མཾ ཨོཝརིཡཱན ཏིཊྛསི;

ན ཧི པབྦཛིཏཱཡ ཨཱཝུསོ, པུརིསོ སམྥུསནཱཡ ཀཔྤཏི.

༣༧༠.

‘‘གརུཀེ མམ སཏྠུསཱསནེ, ཡཱ སིཀྑཱ སུགཏེན དེསིཏཱ;

པརིསུདྡྷཔདཾ ¶ ཨནངྒཎཾ, ཀིཾ མཾ ཨོཝརིཡཱན ཏིཊྛསི.

༣༧༡.

‘‘ཨཱཝིལཙིཏྟོ ཨནཱཝིལཾ, སརཛོ ཝཱིཏརཛཾ ཨནངྒཎཾ;

སབྦཏྠ ཝིམུཏྟམཱནསཾ, ཀིཾ མཾ ཨོཝརིཡཱན ཏིཊྛསི’’.

༣༧༢.

‘‘དཧརཱ ཙ ཨཔཱཔིཀཱ ཙསི, ཀིཾ ཏེ པབྦཛྫཱ ཀརིསྶཏི;

ནིཀྑིཔ ཀཱསཱཡཙཱིཝརཾ, ཨེཧི རམཱམ སུཔུཔྥིཏེ [རམཱམསེ པུཔྥིཏེ (སཱི. སྱཱ.)] ཝནེ.

༣༧༣.

‘‘མདྷུརཉྩ པཝནྟི སབྦསོ, ཀུསུམརཛེན སམུཊྛིཏཱ དུམཱ;

པཋམཝསནྟོ སུཁོ ཨུཏུ, ཨེཧི རམཱམ སུཔུཔྥིཏེ ཝནེ.

༣༧༤.

‘‘ཀུསུམིཏསིཁརཱ ཙ པཱདཔཱ, ཨབྷིགཛྫནྟིཝ མཱལུཏེརིཏཱ;

ཀཱ ཏུཡ྄ཧཾ རཏི བྷཝིསྶཏི, ཡདི ཨེཀཱ ཝནམོགཧིསྶསི [ཝནམོཏརིསྶསི (སཱི.), ཝནམོགཱཧིསྶསི (སྱཱ. ཀ.)].

༣༧༥.

‘‘ཝཱལ༹མིགསངྒྷསེཝིཏཾ ¶ , ཀུཉྫརམཏྟཀརེཎུལོལི༹ཏཾ;

ཨསཧཱཡིཀཱ གནྟུམིཙྪསི, རཧིཏཾ བྷིཾསནཀཾ མཧཱཝནཾ.

༣༧༦.

‘‘ཏཔནཱིཡཀཏཱཝ དྷཱིཏིཀཱ, ཝིཙརསི ཙིཏྟལཏེཝ ཨཙྪརཱ;

ཀཱསིཀསུཁུམེཧི ¶ ཝགྒུབྷི, སོབྷསཱི སུཝསནེཧི ནཱུཔམེ.

༣༧༧.

‘‘ཨཧཾ ཏཝ ཝསཱནུགོ སིཡཾ, ཡདི ཝིཧརེམསེ [ཡདིཔི ཝིཧརེསི (ཀ.)] ཀཱནནནྟརེ;

ན ཧི མཏྠི ཏཡཱ པིཡཏྟརོ, པཱཎོ ཀིནྣརིམནྡལོཙནེ.

༣༧༨.

‘‘ཡདི མེ ཝཙནཾ ཀརིསྶསི, སུཁིཏཱ ཨེཧི ཨགཱརམཱཝས;

པཱསཱདནིཝཱཏཝཱསིནཱི, པརིཀམྨཾ ཏེ ཀརོནྟུ ནཱརིཡོ.

༣༧༩.

‘‘ཀཱསིཀསུཁུམཱནི དྷཱརཡ, ཨབྷིརོཔེཧི [ཨབྷིརོཧེཧི (སཱི.)] ཙ མཱལཝཎྞཀཾ;

ཀཉྩནམཎིམུཏྟཀཾ ¶ བཧུཾ, ཝིཝིདྷཾ ཨཱབྷརཎཾ ཀརོམི ཏེ.

༣༨༠.

‘‘སུདྷོཏརཛཔཙྪདཾ ¶ སུབྷཾ, གོཎཀཏཱུལིཀསནྠཏཾ ནཝཾ;

ཨབྷིརུཧ སཡནཾ མཧཱརཧཾ, ཙནྡནམཎྜིཏསཱརགནྡྷིཀཾ;

༣༨༡.

‘‘ཨུཔྤལཾ ཙུདཀཱ སམུགྒཏཾ, ཡཐཱ ཏཾ ཨམནུསྶསེཝིཏཾ;

ཨེཝཾ ཏྭཾ བྲཧྨཙཱརིནཱི, སཀེསངྒེསུ ཛརཾ གམིསྶསི’’.

༣༨༢.

‘‘ཀིཾ ¶ ཏེ ཨིདྷ སཱརསམྨཏཾ, ཀུཎཔཔཱུརམྷི སུསཱནཝཌྜྷནེ;

བྷེདནདྷམྨེ ཀལེ༹ཝརེ [ཀལེཝརེ (སཱི. ཀ.)], ཡཾ དིསྭཱ ཝིམནོ ཨུདིཀྑསི’’.

༣༨༣.

‘‘ཨཀྑཱིནི ཙ ཏུརིཡཱརིཝ, ཀིནྣརིཡཱརིཝ པབྦཏནྟརེ;

ཏཝ མེ ནཡནཱནི དཀྑིཡ, བྷིཡྻོ ཀཱམརཏཱི པཝཌྜྷཏི.

༣༨༤.

‘‘ཨུཔྤལསིཁརོཔམཱནི ཏེ, ཝིམལེ ཧཱཊཀསནྣིབྷེ མུཁེ;

ཏཝ མེ ནཡནཱནི དཀྑིཡ [ནཡནཱནུདིཀྑིཡ (སཱི.)], བྷིཡྻོ ཀཱམགུཎོ པཝཌྜྷཏི.

༣༨༥.

‘‘ཨཔི དཱུརགཏཱ སརམྷསེ, ཨཱཡཏཔམྷེ ཝིསུདྡྷདསྶནེ;

ན ¶ ཧི མཏྠི ཏཡཱ པིཡཏྟརཱ, ནཡནཱ ཀིནྣརིམནྡལོཙནེ’’.

༣༨༦.

‘‘ཨཔཐེན པཡཱཏུམིཙྪསི, ཙནྡཾ ཀཱིལ༹ནཀཾ གཝེསསི;

མེརུཾ ལངྒྷེཏུམིཙྪསི, ཡོ ཏྭཾ བུདྡྷསུཏཾ མགྒཡསི.

༣༨༧.

‘‘ནཏྠི ¶ ཧི ལོཀེ སདེཝཀེ, རཱགོ ཡཏྠཔི དཱནི མེ སིཡཱ;

ནཔི ནཾ ཛཱནཱམི ཀཱིརིསོ, ཨཐ མགྒེན ཧཏོ སམཱུལཀོ.

༣༨༨.

‘‘ཨིངྒཱལཀུཡཱཝ [ཨིངྒྷཱལ༹ཁུཡཱཝ (སྱཱ.)] ཨུཛ྄ཛྷིཏོ, ཝིསཔཏྟོརིཝ ཨགྒིཏོ ཀཏོ [ཨགྒྷཏོ ཧཏོ (སཱི.)];

ནཔི ནཾ པསྶཱམི ཀཱིརིསོ, ཨཐ མགྒེན ཧཏོ སམཱུལཀོ.

༣༨༩.

‘‘ཡསྶཱ ¶ སིཡཱ ཨཔཙྩཝེཀྑིཏཾ, སཏྠཱ ཝཱ ཨནུཔཱསིཏོ སིཡཱ;

ཏྭཾ ཏཱདིསིཀཾ པལོབྷཡ, ཛཱནནྟིཾ སོ ཨིམཾ ཝིཧཉྙསི.

༣༩༠.

‘‘མཡ྄ཧཉྷི ཨཀྐུཊྛཝནྡིཏེ, སུཁདུཀྑེ ཙ སཏཱི ཨུཔཊྛིཏཱ;

སངྑཏམསུབྷནྟི ཛཱནིཡ, སབྦཏྠེཝ མནོ ན ལིམྤཏི.

༣༩༡.

‘‘སཱཧཾ སུགཏསྶ སཱཝིཀཱ, མགྒཊྛངྒིཀཡཱནཡཱཡིནཱི;

ཨུདྡྷཊསལླཱ ཨནཱསཝཱ, སུཉྙཱགཱརགཏཱ རམཱམཧཾ.

༣༩༢.

‘‘དིཊྛཱ ཧི མཡཱ སུཙིཏྟིཏཱ, སོམྦྷཱ དཱརུཀཔིལླཀཱནི ཝཱ;

ཏནྟཱིཧི ཙ ཁཱིལཀེཧི ཙ, ཝིནིབདྡྷཱ ཝིཝིདྷཾ པནཙྩཀཱ.

༣༩༣.

‘‘ཏམྷུདྡྷཊེ ཏནྟིཁཱིལཀེ, ཝིསྶཊྛེ ཝིཀལེ པརིཀྲིཏེ [པརིཔཀྑཱིཏེ (སཱི.), པརིཔཀྐཏེ (སྱཱ.)];

ན ཝིནྡེཡྻ ཁཎྜསོ ཀཏེ, ཀིམྷི ཏཏྠ མནཾ ནིཝེསཡེ.

༣༩༤.

‘‘ཏཐཱུཔམཱ ¶ དེཧཀཱནི མཾ, ཏེཧི དྷམྨེཧི ཝིནཱ ན ཝཏྟནྟི;

དྷམྨེཧི ¶ ཝིནཱ ན ཝཏྟཏི, ཀིམྷི ཏཏྠ མནཾ ནིཝེསཡེ.

༣༩༥.

‘‘ཡཐཱ ཧརིཏཱལེན མཀྑིཏཾ, ཨདྡས ཙིཏྟིཀཾ བྷིཏྟིཡཱ ཀཏཾ;

ཏམྷི ¶ ཏེ ཝིཔརཱིཏདསྶནཾ, སཉྙཱ མཱནུསིཀཱ ནིརཏྠིཀཱ.

༣༩༦.

‘‘མཱཡཾ ¶ ཝིཡ ཨགྒཏོ ཀཏཾ, སུཔིནནྟེཝ སུཝཎྞཔཱདཔཾ;

ཨུཔགཙྪསི ཨནྡྷ རིཏྟཀཾ, ཛནམཛ྄ཛྷེརིཝ རུཔྤརཱུཔཀཾ [རཱུཔརཱུཔཀཾ (ཀ.)].

༣༩༧.

‘‘ཝཊྚནིརིཝ ཀོཊརོཧིཏཱ, མཛ྄ཛྷེ པུབྦུལ༹ཀཱ སཨསྶུཀཱ;

པཱིལ༹ཀོལི༹ཀཱ ཙེཏྠ ཛཱཡཏི, ཝིཝིདྷཱ ཙཀྑུཝིདྷཱ ཙ པིཎྜིཏཱ’’.

༣༩༨.

ཨུཔྤཱཊིཡ ཙཱརུདསྶནཱ, ན ཙ པཛྫིཏྠ ཨསངྒམཱནསཱ;

‘‘ཧནྡ ཏེ ཙཀྑུཾ ཧརསྶུ ཏཾ’’, ཏསྶ ནརསྶ ཨདཱསི ཏཱཝདེ.

༣༩༩.

ཏསྶ ཙ ཝིརམཱསི ཏཱཝདེ, རཱགོ ཏཏྠ ཁམཱཔཡཱི ཙ ནཾ;

‘‘སོཏྠི སིཡཱ བྲཧྨཙཱརིནཱི, ན པུནོ ཨེདིསཀཾ བྷཝིསྶཏི’’.

༤༠༠.

‘‘ཨཱསཱདིཡ [ཨཱཧནིཡ (སྱཱ. ཀ.)] ཨེདིསཾ ཛནཾ, ཨགྒིཾ པཛྫལིཏཾ ཝ ལིངྒིཡ;

གཎྷིཡ ཨཱསཱིཝིསཾ ཝིཡ, ཨཔི ནུ སོཏྠི སིཡཱ ཁམེཧི ནོ’’.

༤༠༡.

མུཏྟཱ ཙ ཏཏོ སཱ བྷིཀྑུནཱི, ཨགམཱི བུདྡྷཝརསྶ སནྟིཀཾ;

པསྶིཡ ཝརཔུཉྙལཀྑཎཾ, ཙཀྑུ ཨཱསི ཡཐཱ པུརཱཎཀནྟི.

… སུབྷཱ ཛཱིཝཀམྦཝནིཀཱ ཐེརཱི….

ཏིཾསནིཔཱཏོ ནིཊྛིཏོ.

༡༥. ཙཏྟཱལཱིསནིཔཱཏོ

༡. ཨིསིདཱསཱིཐེརཱིགཱཐཱ

༤༠༢.

ནགརམྷི ¶ ¶ ཀུསུམནཱམེ, པཱཊལིཔུཏྟམྷི པཐཝིཡཱ མཎྜེ;

སཀྱཀུལཀུལཱིནཱཡོ, དྭེ བྷིཀྑུནིཡོ ཧི གུཎཝཏིཡོ.

༤༠༣.

ཨིསིདཱསཱི ¶ ཏཏྠ ཨེཀཱ, དུཏིཡཱ བོདྷཱིཏི སཱིལསམྤནྣཱ ཙ;

ཛྷཱནཛ྄ཛྷཱཡནརཏཱཡོ, བཧུསྶུཏཱཡོ དྷུཏཀིལེསཱཡོ.

༤༠༤.

ཏཱ ¶ པིཎྜཱཡ ཙརིཏྭཱ, བྷཏྟཏྠཾ [བྷཏྟཏྟཾ (སཱི.)] ཀརིཡ དྷོཏཔཏྟཱཡོ;

རཧིཏམྷི སུཁནིསིནྣཱ, ཨིམཱ གིརཱ ཨབྦྷུདཱིརེསུཾ.

༤༠༥.

‘‘པཱསཱདིཀཱསི ཨཡྻེ, ཨིསིདཱསི ཝཡོཔི ཏེ ཨཔརིཧཱིནོ;

ཀིཾ དིསྭཱན བྱཱལིཀཾ, ཨཐཱསི ནེཀྑམྨམནུཡུཏྟཱ’’.

༤༠༦.

ཨེཝམནུཡུཉྫིཡམཱནཱ སཱ, རཧིཏེ དྷམྨདེསནཱཀུསལཱ;

ཨིསིདཱསཱི ཝཙནམབྲཝི, ‘‘སུཎ བོདྷི ཡཐཱམྷི པབྦཛིཏཱ.

༤༠༧.

‘‘ཨུཛྫེནིཡཱ པུརཝརེ, མཡ྄ཧཾ པིཏཱ སཱིལསཾཝུཏོ སེཊྛི;

ཏསྶམྷི ཨེཀདྷཱིཏཱ, པིཡཱ མནཱཔཱ ཙ དཡིཏཱ ཙ.

༤༠༨.

‘‘ཨཐ མེ སཱཀེཏཏོ ཝརཀཱ, ཨཱགཙྪུམུཏྟམཀུལཱིནཱ;

སེཊྛཱི པཧཱུཏརཏནོ, ཏསྶ མམཾ སུཎྷམདཱསི ཏཱཏོ.

༤༠༩.

‘‘སསྶུཡཱ སསྶུརསྶ ཙ, སཱཡཾ པཱཏཾ པཎཱམམུཔགམྨ;

སིརསཱ ཀརོམི པཱདེ, ཝནྡཱམི ཡཐཱམྷི ཨནུསིཊྛཱ.

༤༡༠.

‘‘ཡཱ ¶ མཡ྄ཧཾ སཱམིཀསྶ, བྷགིནིཡོ བྷཱཏུནོ པརིཛནོ ཝཱ;

ཏམེཀཝརཀམྤི དིསྭཱ, ཨུབྦིགྒཱ ཨཱསནཾ དེམི.

༤༡༡.

‘‘ཨནྣེན ཙ པཱནེན ཙ, ཁཛྫེན ཙ ཡཉྩ ཏཏྠ སནྣིཧིཏཾ;

ཚཱདེམི ཨུཔནཡཱམི ཙ, དེམི ཙ ཡཾ ཡསྶ པཏིརཱུཔཾ.

༤༡༢.

‘‘ཀཱལེན ཨུཔཊྛཧིཏྭཱ [ཨུཊྛཧིཏྭཱ (སྱཱ. ཀ.), ཨུཔཊྛཧིཏུཾ (?)], གྷརཾ སམུཔགམཱམི ཨུམྨཱརེ;

དྷོཝནྟཱི ཧཏྠཔཱདེ, པཉྫལིཀཱ སཱམིཀམུཔེམི.

༤༡༣.

‘‘ཀོཙྪཾ པསཱདཾ ཨཉྫནིཉྩ, ཨཱདཱསཀཉྩ གཎྷིཏྭཱ;

པརིཀམྨཀཱརིཀཱ ¶ ཝིཡ, སཡམེཝ པཏིཾ ཝིབྷཱུསེམི.

༤༡༤.

‘‘སཡམེཝ ¶ ཨོདནཾ སཱདྷཡཱམི, སཡམེཝ བྷཱཛནཾ དྷོཝནྟཱི;

མཱཏཱཝ ཨེཀཔུཏྟཀཾ, ཏཐཱ [ཏདཱ (སཱི.)] བྷཏྟཱརཾ པརིཙརཱམི.

༤༡༥.

‘‘ཨེཝཾ མཾ བྷཏྟིཀཏཾ, ཨནུརཏྟཾ ཀཱརིཀཾ ནིཧཏམཱནཾ;

ཨུཊྛཱཡིཀཾ [ཨུཊྛཱཧིཀཾ (ཀ.)] ཨནལསཾ, སཱིལཝཏིཾ དུསྶཏེ བྷཏྟཱ.

༤༡༦.

‘‘སོ མཱཏརཉྩ པིཏརཉྩ, བྷཎཏི ‘ཨཱཔུཙྪཧཾ གམིསྶཱམི;

ཨིསིདཱསིཡཱ ན སཧ ཝཙྪཾ, ཨེཀཱགཱརེཧཾ [ཨེཀགྷརེཔ’ཧཾ (?)] སཧ ཝཏྠུཾ’.

༤༡༧.

‘‘‘མཱ ཨེཝཾ པུཏྟ ཨཝཙ, ཨིསིདཱསཱི པཎྜིཏཱ པརིབྱཏྟཱ;

ཨུཊྛཱཡིཀཱ ཨནལསཱ, ཀིཾ ཏུཡ྄ཧཾ ན རོཙཏེ པུཏྟ’.

༤༡༨.

‘‘‘ན ¶ ཙ མེ ཧིཾསཏི ཀིཉྩི, ན ཙཧཾ ཨིསིདཱསིཡཱ སཧ ཝཙྪཾ;

དེསྶཱཝ མེ ཨལཾ མེ, ཨཔུཙྪཱཧཾ [ཨཱཔུཙྪཱཧཾ (སྱཱ.), ཨཱཔུཙྪཧཾ-ནཱཔུཙྪཧཾ (?)] གམིསྶཱམི’.

༤༡༩.

‘‘ཏསྶ ཝཙནཾ སུཎིཏྭཱ, སསྶུ སསུརོ ཙ མཾ ཨཔུཙྪིཾསུ;

‘ཀིསྶ [ཀིཾས (?)] ཏཡཱ ཨཔརདྡྷཾ, བྷཎ ཝིསྶཊྛཱ ཡཐཱབྷཱུཏཾ’.

༤༢༠.

‘‘‘ནཔིཧཾ ¶ ཨཔརཛ྄ཛྷཾ ཀིཉྩི, ནཔི ཧིཾསེམི ན བྷཎཱམི དུབྦཙནཾ;

ཀིཾ སཀྐཱ ཀཱཏུཡྻེ, ཡཾ མཾ ཝིདྡེསྶཏེ བྷཏྟཱ’.

༤༢༡.

‘‘ཏེ མཾ པིཏུགྷརཾ པཊིནཡིཾསུ, ཝིམནཱ དུཁེན ཨདྷིབྷཱུཏཱ;

‘པུཏྟམནུརཀྑམཱནཱ, ཛིཏཱམྷསེ རཱུཔིནིཾ ལཀྑིཾ’.

༤༢༢.

‘‘ཨཐ མཾ ཨདཱསི ཏཱཏོ, ཨཌྜྷསྶ གྷརམྷི དུཏིཡཀུལིཀསྶ;

ཏཏོ ཨུཔཌྜྷསུངྐེན, ཡེན མཾ ཝིནྡཐ སེཊྛི.

༤༢༣.

‘‘ཏསྶཔི གྷརམྷི མཱསཾ, ཨཝསིཾ ཨཐ སོཔི མཾ པཊིཙྪརཡི [པཊིཙྪསི (སཱི. ཀ.), པཊིཙྪཏི (སྱཱ.), པཊིཙྪརཏི (ཀ.)];

དཱསཱིཝ ¶ ཨུཔཊྛཧནྟིཾ, ཨདཱུསིཀཾ སཱིལསམྤནྣཾ.

༤༢༤.

‘‘བྷིཀྑཱཡ ཙ ཝིཙརནྟཾ, དམཀཾ དནྟཾ མེ པིཏཱ བྷཎཏི;

‘ཧོཧིསི [སོཧིསི (སབྦཏྠ)] མེ ཛཱམཱཏཱ, ནིཀྑིཔ པོཊྛིཉྩ [པོནྟིཾ (སཱི. སྱཱ.)] གྷཊིཀཉྩ’.

༤༢༥.

‘‘སོཔི ཝསིཏྭཱ པཀྑཾ [པཀྐམཐ (སཱི.)], ཨཐ ཏཱཏཾ བྷཎཏི ‘དེཧི མེ པོཊྛིཾ;

གྷཊིཀཉྩ མལླཀཉྩ, པུནཔི བྷིཀྑཾ ཙརིསྶཱམི’.

༤༢༦.

‘‘ཨཐ ¶ ནཾ བྷཎཏཱི ཏཱཏོ, ཨམྨཱ སབྦོ ཙ མེ ཉཱཏིགཎཝགྒོ;

‘ཀིཾ ཏེ ན ཀཱིརཏི ཨིདྷ, བྷཎ ཁིཔྤཾ ཏཾ ཏེ ཀརིཧི’ཏི.

༤༢༧.

‘‘ཨེཝཾ བྷཎིཏོ བྷཎཏི, ‘ཡདི མེ ཨཏྟཱ སཀྐོཏི ཨལཾ མཡ྄ཧཾ;

ཨིསིདཱསིཡཱ ན སཧ ཝཙྪཾ, ཨེཀགྷརེཧཾ སཧ ཝཏྠུཾ’.

༤༢༨.

‘‘ཝིསྶཛྫིཏོ གཏོ སོ, ཨཧམྤི ཨེཀཱཀིནཱི ཝིཙིནྟེམི;

‘ཨཱཔུཙྪིཏཱུན གཙྪཾ, མརིཏུཡེ [མརིཏཱཡེ (སཱི.), མརིཏུཾ (སྱཱ.)] ཝཱ པབྦཛིསྶཾ ཝཱ’.

༤༢༩.

‘‘ཨཐ ཨཡྻཱ ཛིནདཏྟཱ, ཨཱགཙྪཱི གོཙརཱཡ ཙརམཱནཱ;

ཏཱཏཀུལཾ ¶ ཝིནཡདྷརཱི, བཧུསྶུཏཱ སཱིལསམྤནྣཱ.

༤༣༠.

‘‘ཏཾ དིསྭཱན ཨམྷཱཀཾ, ཨུཊྛཱཡཱསནཾ ཏསྶཱ པཉྙཱཔཡིཾ;

ནིསིནྣཱཡ ཙ པཱདེ, ཝནྡིཏྭཱ བྷོཛནམདཱསིཾ.

༤༣༡.

‘‘ཨནྣེན ¶ ཙ པཱནེན ཙ, ཁཛྫེན ཙ ཡཉྩ ཏཏྠ སནྣིཧིཏཾ;

སནྟཔྤཡིཏྭཱ ཨཝཙཾ, ‘ཨཡྻེ ཨིཙྪཱམི པབྦཛིཏུཾ’.

༤༣༢.

‘‘ཨཐ མཾ བྷཎཏཱི ཏཱཏོ, ‘ཨིདྷེཝ པུཏྟཀ [པུཏྟིཀེ (སྱཱ. ཀ.)] ཙརཱཧི ཏྭཾ དྷམྨཾ;

ཨནྣེན ཙ པཱནེན ཙ, ཏཔྤཡ སམཎེ དྭིཛཱཏཱི ཙ’.

༤༣༣.

‘‘ཨཐཧཾ བྷཎཱམི ཏཱཏཾ, རོདནྟཱི ཨཉྫལིཾ པཎཱམེཏྭཱ;

‘པཱཔཉྷི མཡཱ པཀཏཾ, ཀམྨཾ ཏཾ ནིཛྫརེསྶཱམི’.

༤༣༤.

‘‘ཨཐ ¶ མཾ བྷཎཏཱི ཏཱཏོ, ‘པཱཔུཎ བོདྷིཉྩ ཨགྒདྷམྨཉྩ;

ནིབྦཱནཉྩ ལབྷསྶུ, ཡཾ སཙྪིཀརཱི དྭིཔདསེཊྛོ’.

༤༣༥.

‘‘མཱཏཱཔིཏཱུ ཨབྷིཝཱདཡིཏྭཱ, སབྦཉྩ ཉཱཏིགཎཝགྒཾ;

སཏྟཱཧཾ པབྦཛིཏཱ, ཏིསྶོ ཝིཛྫཱ ཨཕསྶཡིཾ.

༤༣༦.

‘‘ཛཱནཱམི ཨཏྟནོ སཏྟ, ཛཱཏིཡོ ཡསྶཡཾ ཕལཝིཔཱཀོ;

ཏཾ ཏཝ ཨཱཙིཀྑིསྶཾ, ཏཾ ཨེཀམནཱ ནིསཱམེཧི.

༤༣༧.

‘‘ནགརམྷི ཨེརཀཙྪེ [ཨེརཀཀཙྪེ (སྱཱ. ཀ.)], སུཝཎྞཀཱརོ ཨཧཾ པཧཱུཏདྷནོ;

ཡོབྦནམདེན མཏྟོ སོ, པརདཱརཾ ཨསེཝིཧཾ.

༤༣༨.

‘‘སོཧཾ ཏཏོ ཙཝིཏྭཱ, ནིརཡམྷི ཨཔཙྩིསཾ ཙིརཾ;

པཀྐོ ཏཏོ ཙ ཨུཊྛཧིཏྭཱ, མཀྐཊིཡཱ ཀུཙྪིམོཀྐམིཾ.

༤༣༩.

‘‘སཏྟཱཧཛཱཏཀཾ ¶ ¶ མཾ, མཧཱཀཔི ཡཱུཐཔོ ནིལླཙྪེསི;

ཏསྶེཏཾ ཀམྨཕལཾ, ཡཐཱཔི གནྟྭཱན པརདཱརཾ.

༤༤༠.

‘‘སོཧཾ ཏཏོ ཙཝིཏྭཱ, ཀཱལཾ ཀརིཏྭཱ སིནྡྷཝཱརཉྙེ;

ཀཱཎཱཡ ཙ ཁཉྫཱཡ ཙ, ཨེལ༹ཀིཡཱ ཀུཙྪིམོཀྐམིཾ.

༤༤༡.

‘‘དྭཱདས ཝསྶཱནི ཨཧཾ, ནིལླཙྪིཏོ དཱརཀེ པརིཝཧིཏྭཱ;

ཀིམིནཱཝཊྚོ ཨཀལློ, ཡཐཱཔི གནྟྭཱན པརདཱརཾ.

༤༤༢.

‘‘སོཧཾ ཏཏོ ཙཝིཏྭཱ, གོཝཱཎིཛཀསྶ གཱཝིཡཱ ཛཱཏོ;

ཝཙྪོ ལཱཁཱཏམྦོ, ནིལླཙྪིཏོ དྭཱདསེ མཱསེ.

༤༤༣.

‘‘ཝོཌྷཱུན [ཏེ པུན (སྱཱ. ཀ.), ཝོདྷུན (ཀ. ཨཊྛ.)] ནངྒལམཧཾ, སཀཊཉྩ དྷཱརཡཱམི;

ཨནྡྷོཝཊྚོ ཨཀལློ, ཡཐཱཔི གནྟྭཱན པརདཱརཾ.

༤༤༤.

‘‘སོཧཾ ཏཏོ ཙཝིཏྭཱ, ཝཱིཐིཡཱ དཱསིཡཱ གྷརེ ཛཱཏོ;

ནེཝ མཧིལཱ ན པུརིསོ, ཡཐཱཔི གནྟྭཱན པརདཱརཾ.

༤༤༥.

‘‘ཏིཾསཏིཝསྶམྷི ¶ ¶ མཏོ, སཱཀཊིཀཀུལམྷི དཱརིཀཱ ཛཱཏཱ;

ཀཔཎམྷི ཨཔྤབྷོགེ, དྷནིཀ [ཨཎིཀ (ཨཊྛ.), ཏཾསཾཝཎྞནཱཡམྤི ཨཏྠཡུཏྟི གཝེསིཏབྦཱ] པུརིསཔཱཏབཧུལམྷི.

༤༤༦.

‘‘ཏཾ མཾ ཏཏོ སཏྠཝཱཧོ, ཨུསྶནྣཱཡ ཝིཔུལཱཡ ཝཌྜྷིཡཱ;

ཨོཀཌྜྷཏི ཝིལཔནྟིཾ, ཨཙྪིནྡིཏྭཱ ཀུལགྷརསྨཱ.

༤༤༧.

‘‘ཨཐ སོལ༹སམེ ཝསྶེ, དིསྭཱ མཾ པཏྟཡོབྦནཾ ཀཉྙཾ;

ཨོརུནྡྷཏསྶ པུཏྟོ, གིརིདཱསོ ནཱམ ནཱམེན.

༤༤༨.

‘‘ཏསྶཔི ཨཉྙཱ བྷརིཡཱ, སཱིལཝཏཱི གུཎཝཏཱི ཡསཝཏཱི ཙ;

ཨནུརཏྟཱ ¶ [ཨནུཝཏྟཱ (ཀ.)] བྷཏྟཱརཾ, ཏསྶཱཧཾ [ཏསྶ ཏཾ (?)] ཝིདྡེསནམཀཱསིཾ.

༤༤༩.

‘‘ཏསྶེཏཾ ཀམྨཕལཾ, ཡཾ མཾ ཨཔཀཱིརིཏཱུན གཙྪནྟི;

དཱསཱིཝ ཨུཔཊྛཧནྟིཾ, ཏསྶཔི ཨནྟོ ཀཏོ མཡཱ’’ཏི.

… ཨིསིདཱསཱི ཐེརཱི….

ཙཏྟཱལཱིསནིཔཱཏོ ནིཊྛིཏོ.

༡༦. མཧཱནིཔཱཏོ

༡. སུམེདྷཱཐེརཱིགཱཐཱ

༤༥༠.

མནྟཱཝཏིཡཱ ¶ ནགརེ, རཉྙོ ཀོཉྩསྶ ཨགྒམཧེསིཡཱ;

དྷཱིཏཱ ཨཱསིཾ སུམེདྷཱ, པསཱདིཏཱ སཱསནཀརེཧི.

༤༥༡.

སཱིལཝཏཱི ཙིཏྟཀཐཱ, བཧུསྶུཏཱ བུདྡྷསཱསནེ ཝིནཱིཏཱ;

མཱཏཱཔིཏརོ ཨུཔགམྨ, བྷཎཏི ‘‘ཨུབྷཡོ ནིསཱམེཐ.

༤༥༢.

‘‘ནིབྦཱནཱབྷིརཏཱཧཾ, ཨསསྶཏཾ བྷཝགཏཾ ཡདིཔི དིབྦཾ;

ཀིམངྒཾ པན [ཀིམངྒ པན (སཱི. སྱཱ.), ཀིཾ པན (?)] ཏུཙྪཱ ཀཱམཱ, ཨཔྤསྶཱདཱ བཧུཝིགྷཱཏཱ.

༤༥༣.

‘‘ཀཱམཱ ཀཊུཀཱ ཨཱསཱིཝིསཱུཔམཱ, ཡེསུ མུཙྪིཏཱ བཱལཱ;

ཏེ དཱིགྷརཏྟཾ ནིརཡེ, སམཔྤིཏཱ ཧཉྙནྟེ དུཀྑིཏཱ [ཧཉྙརེ དུཁིཏཱ (?)].

༤༥༤.

‘‘སོཙནྟི པཱཔཀམྨཱ, ཝིནིཔཱཏེ པཱཔཝདྡྷིནོ སདཱ;

ཀཱཡེན ཙ ཝཱཙཱཡ ཙ, མནསཱ ཙ ཨསཾཝུཏཱ བཱལཱ.

༤༥༥.

‘‘བཱལཱ ¶ ཏེ དུཔྤཉྙཱ, ཨཙེཏནཱ དུཀྑསམུདཡོརུདྡྷཱ;

དེསནྟེ ¶ ཨཛཱནནྟཱ, ན བུཛ྄ཛྷརེ ཨརིཡསཙྩཱནི.

༤༥༦.

‘‘སཙྩཱནི ¶ ཨམྨ བུདྡྷཝརདེསིཏཱནི, ཏེ བཧུཏརཱ ཨཛཱནནྟཱ ཡེ;

ཨབྷིནནྡནྟི བྷཝགཏཾ, པིཧེནྟི དེཝེསུ ཨུཔཔཏྟིཾ.

༤༥༧.

‘‘དེཝེསུཔི ཨུཔཔཏྟི, ཨསསྶཏཱ བྷཝགཏེ ཨནིཙྩམྷི;

ན ཙ སནྟསནྟི བཱལཱ, པུནཔྤུནཾ ཛཱཡིཏབྦསྶ.

༤༥༨.

‘‘ཙཏྟཱརོ ཝིནིཔཱཏཱ, དུཝེ [དྭེ (སབྦཏྠ)] ཙ གཏིཡོ ཀཐཉྩི ལབྦྷནྟི;

ན ཙ ཝིནིཔཱཏགཏཱནཾ, པབྦཛྫཱ ཨཏྠི ནིརཡེསུ.

༤༥༩.

‘‘ཨནུཛཱནཱཐ མཾ ཨུབྷཡོ, པབྦཛིཏུཾ དསབལསྶ པཱཝཙནེ;

ཨཔྤོསྶུཀྐཱ གྷཊིསྶཾ, ཛཱཏིམརཎཔྤཧཱནཱཡ.

༤༦༠.

‘‘ཀིཾ བྷཝགཏེ [བྷཝགཏེན (སྱཱ.)] ཨབྷིནནྡིཏེན, ཀཱཡཀལིནཱ ཨསཱརེན;

བྷཝཏཎྷཱཡ ནིརོདྷཱ, ཨནུཛཱནཱཐ པབྦཛིསྶཱམི.

༤༦༡.

‘‘བུདྡྷཱནཾ ¶ ཨུཔྤཱདོ ཝིཝཛྫིཏོ, ཨཀྑཎོ ཁཎོ ལདྡྷོ;

སཱིལཱནི བྲཧྨཙརིཡཾ, ཡཱཝཛཱིཝཾ ན དཱུསེཡྻཾ’’.

༤༦༢.

ཨེཝཾ བྷཎཏི སུམེདྷཱ, མཱཏཱཔིཏརོ ‘‘ན ཏཱཝ ཨཱཧཱརཾ;

ཨཱཧརིསྶཾ [ཨཱཧརིཡཱམི (སཱི.), ཨཱཧཱརིསཾ (?)] གཧཊྛཱ, མརཎཝསཾ གཏཱཝ ཧེསྶཱམི’’.

༤༦༣.

མཱཏཱ དུཀྑིཏཱ རོདཏི པིཏཱ ཙ, ཨསྶཱ སབྦསོ སམབྷིཧཏོ;

གྷཊེནྟི སཉྙཱཔེཏུཾ, པཱསཱདཏལེ ཚམཱཔཏིཏཾ.

༤༦༤.

‘‘ཨུཊྛེཧི པུཏྟཀ ཀིཾ སོཙིཏེན, དིནྣཱསི ཝཱརཎཝཏིམྷི;

རཱཛཱ ¶ ཨནཱིཀརཏྟོ [ཨཎཱིཀདཏྟོ (སཱི. སྱཱ.)], ཨབྷིརཱུཔོ ཏསྶ ཏྭཾ དིནྣཱ.

༤༦༥.

‘‘ཨགྒམཧེསཱི བྷཝིསྶསི, ཨནིཀརཏྟསྶ རཱཛིནོ བྷརིཡཱ;

སཱིལཱནི བྲཧྨཙརིཡཾ, པབྦཛྫཱ དུཀྐརཱ པུཏྟཀ.

༤༦༦.

‘‘རཛྫེ ཨཱཎཱདྷནམིསྶརིཡཾ, བྷོགཱ སུཁཱ དཧརིཀཱསི;

བྷུཉྫཱཧི ཀཱམབྷོགེ, ཝཱརེཡྻཾ ཧོཏུ ཏེ པུཏྟ’’.

༤༦༧.

ཨཐ ནེ བྷཎཏི སུམེདྷཱ, ‘‘མཱ ཨེདིསིཀཱནི བྷཝགཏམསཱརཾ;

པབྦཛྫཱ ཝཱ ཧོཧིཏི, མརཎཾ ཝཱ མེ ན ཙེཝ ཝཱརེཡྻཾ.

༤༦༨.

‘‘ཀིམིཝ ¶ པཱུཏིཀཱཡམསུཙིཾ, སཝནགནྡྷཾ བྷཡཱནཀཾ ཀུཎཔཾ;

ཨབྷིསཾཝིསེཡྻཾ བྷསྟཾ, ཨསཀིཾ པགྒྷརིཏཾ ཨསུཙིཔུཎྞཾ.

༤༦༩.

‘‘ཀིམིཝ ¶ ཏཱཧཾ ཛཱནནྟཱི, ཝིཀུལཀཾ མཾསསོཎིཏུཔལིཏྟཾ;

ཀིམིཀུལཱལཡཾ སཀུཎབྷཏྟཾ, ཀལེ༹ཝརཾ ཀིསྶ དིཡྻཏི.

༤༧༠.

‘‘ནིབྦུཡ྄ཧཏི སུསཱནཾ, ཨཙིརཾ ཀཱཡོ ཨཔེཏཝིཉྙཱཎོ;

ཚུདྡྷོ [ཚཌྜིཏོ (སྱཱ.), ཚུཊྛོ (ཀ.)] ཀལི༹ངྒརཾ ཝིཡ, ཛིགུཙྪམཱནེཧི ཉཱཏཱིཧི.

༤༧༡.

‘‘ཚུདྡྷཱུན [ཚཌྜཱུན (སྱཱ.), ཚུཊྛཱུན (ཀ.)] ནཾ སུསཱནེ, པརབྷཏྟཾ ནྷཱཡནྟི [ནྷཱཡརེ (?)] ཛིགུཙྪནྟཱ;

ནིཡཀཱ མཱཏཱཔིཏརོ, ཀིཾ པན སཱདྷཱརཎཱ ཛནཏཱ.

༤༧༢.

‘‘ཨཛ྄ཛྷོསིཏཱ ཨསཱརེ, ཀལེ༹ཝརེ ཨཊྛིནྷཱརུསངྒྷཱཏེ;

ཁེལ༹སྶུཙྩཱརསྶཝ, པརིཔུཎྞེ [ཁེལ༹སྶུཙྩཱརཔསྶཝཔརིཔུཎྞེ (སཱི.)] པཱུཏིཀཱཡམྷི.

༤༧༣.

‘‘ཡོ ¶ ནཾ ཝིནིབྦྷུཛིཏྭཱ, ཨབྦྷནྟརམསྶ བཱཧིརཾ ཀཡིརཱ ¶ ;

གནྡྷསྶ ཨསཧམཱནཱ, སཀཱཔི མཱཏཱ ཛིགུཙྪེཡྻ.

༤༧༤.

‘‘ཁནྡྷདྷཱཏུཨཱཡཏནཾ, སངྑཏཾ ཛཱཏིམཱུལཀཾ དུཀྑཾ;

ཡོནིསོ ཨནུཝིཙིནནྟཱི, ཝཱརེཡྻཾ ཀིསྶ ཨིཙྪེཡྻཾ.

༤༧༥.

‘‘དིཝསེ དིཝསེ ཏིསཏྟི, སཏཱནི ནཝནཝཱ པཏེཡྻུཾ ཀཱཡམྷི;

ཝསྶསཏམྤི ཙ གྷཱཏོ, སེཡྻོ དུཀྑསྶ ཙེཝཾ ཁཡོ.

༤༧༦.

‘‘ཨཛ྄ཛྷུཔགཙྪེ གྷཱཏཾ, ཡོ ཝིཉྙཱཡེཝཾ སཏྠུནོ ཝཙནཾ;

‘དཱིགྷོ ཏེསཾ [ཝོ (ཀ.)] སཾསཱརོ, པུནཔྤུནཾ ཧཉྙམཱནཱནཾ’.

༤༧༧.

‘‘དེཝེསུ མནུསྶེསུ ཙ, ཏིརཙྪཱནཡོནིཡཱ ཨསུརཀཱཡེ;

པེཏེསུ ¶ ཙ ནིརཡེསུ ཙ, ཨཔརིམིཏཱ དིསྶརེ གྷཱཏཱ.

༤༧༨.

‘‘གྷཱཏཱ ནིརཡེསུ བཧཱུ, ཝིནིཔཱཏགཏསྶ པཱིལི༹ཡམཱནསྶ [ཀིལིསྶམཱནསྶ (སྱཱ. ཀ.)];

དེཝེསུཔི ཨཏྟཱཎཾ, ནིབྦཱནསུཁཱ པརཾ ནཏྠི.

༤༧༩.

‘‘པཏྟཱ ཏེ ནིབྦཱནཾ, ཡེ ཡུཏྟཱ དསབལསྶ པཱཝཙནེ;

ཨཔྤོསྶུཀྐཱ གྷཊེནྟི, ཛཱཏིམརཎཔྤཧཱནཱཡ.

༤༨༠.

‘‘ཨཛྫེཝ ཏཱཏབྷིནིཀྑམིསྶཾ, བྷོགེཧི ཀིཾ ཨསཱརེཧི;

ནིབྦིནྣཱ མེ ཀཱམཱ, ཝནྟསམཱ ཏཱལཝཏྠུཀཏཱ’’.

༤༨༡.

སཱ ཙེཝཾ བྷཎཏི པིཏརམནཱིཀརཏྟོ ཙ ཡསྶ སཱ དིནྣཱ;

ཨུཔཡཱསི ཝཱརཎཝཏེ, ཝཱརེཡྻམུཔཊྛིཏེ ཀཱལེ.

༤༨༢.

ཨཐ ཨསིཏནིཙིཏམུདུཀེ, ཀེསེ ཁགྒེན ཚིནྡིཡ སུམེདྷཱ;

པཱསཱདཾ པིདཧིཏྭཱ [པིདྷེཏྭཱ (སཱི. སྱཱ.), པིདྷིཏྭཱ (ཀ.)], པཋམཛ྄ཛྷཱནཾ སམཱཔཛྫི.

༤༨༣.

སཱ ¶ ¶ ཙ ཏཧིཾ སམཱཔནྣཱ, ཨནཱིཀརཏྟོ ཙ ཨཱགཏོ ནགརཾ;

པཱསཱདེ ཙ [པཱསཱདེཝ (སཱི. སྱཱ.)] སུམེདྷཱ, ཨནིཙྩསཉྙཾ [ཨནིཙྩསཉྙཱ (སབྦཏྠ)] སུབྷཱཝེཏི.

༤༨༤.

སཱ ཙ མནསི ཀརོཏི, ཨནཱིཀརཏྟོ ཙ ཨཱརུཧཱི ཏུརིཏཾ;

མཎིཀནཀབྷཱུསིཏངྒོ, ཀཏཉྫལཱི ཡཱཙཏི སུམེདྷཾ.

༤༨༥.

‘‘རཛྫེ ཨཱཎཱདྷནམིསྶརིཡཾ, བྷོགཱ སུཁཱ དཧརིཀཱསི;

བྷུཉྫཱཧི ཀཱམབྷོགེ, ཀཱམསུཁཱ དུལླབྷཱ ལོཀེ.

༤༨༦.

‘‘ནིསྶཊྛཾ ¶ ཏེ རཛྫཾ, བྷོགེ བྷུཉྫསྶུ དེཧི དཱནཱནི;

མཱ དུམྨནཱ ཨཧོསི, མཱཏཱཔིཏརོ ཏེ དུཀྑིཏཱ’’ [མཱཏཱཔིཏརོ ཙ ཏེ དུཁིཏཱ (?)].

༤༨༧.

ཏཾ ཏཾ བྷཎཏི སུམེདྷཱ, ཀཱམེཧི ཨནཏྠིཀཱ ཝིགཏམོཧཱ;

‘‘མཱ ཀཱམེ ཨབྷིནནྡི, ཀཱམེསྭཱདཱིནཝཾ པསྶ.

༤༨༨.

‘‘ཙཱཏུདྡཱིཔོ རཱཛཱ མནྡྷཱཏཱ, ཨཱསི ཀཱམབྷོགིན མགྒོ;

ཨཏིཏྟོ ¶ ཀཱལངྐཏོ, ན ཙསྶ པརིཔཱུརིཏཱ ཨིཙྪཱ.

༤༨༩.

‘‘སཏྟ རཏནཱནི ཝསྶེཡྻ, ཝུཊྛིམཱ དསདིསཱ སམནྟེན;

ན ཙཏྠི ཏིཏྟི ཀཱམཱནཾ, ཨཏིཏྟཱཝ མརནྟི ནརཱ.

༤༩༠.

‘‘ཨསིསཱུནཱུཔམཱ ཀཱམཱ, ཀཱམཱ སཔྤསིརོཔམཱ;

ཨུཀྐོཔམཱ ཨནུདཧནྟི, ཨཊྛིཀངྐལ [ཀངྑལ (སཱི.)] སནྣིབྷཱ.

༤༩༡.

‘‘ཨནིཙྩཱ ཨདྡྷུཝཱ ཀཱམཱ, བཧུདུཀྑཱ མཧཱཝིསཱ;

ཨཡོགུལོ༹ཝ སནྟཏྟོ, ཨགྷམཱུལཱ དུཁཔྥལཱ.

༤༩༢.

‘‘རུཀྑཔྥལཱུཔམཱ ཀཱམཱ, མཾསཔེསཱུཔམཱ དུཁཱ;

སུཔིནོཔམཱ ¶ ཝཉྩནིཡཱ, ཀཱམཱ ཡཱཙིཏཀཱུཔམཱ.

༤༩༣.

‘‘སཏྟིསཱུལཱུཔམཱ ཀཱམཱ, རོགོ གཎྜོ ཨགྷཾ ནིགྷཾ;

ཨངྒཱརཀཱསུསདིསཱ, ཨགྷམཱུལཾ བྷཡཾ ཝདྷོ.

༤༩༤.

‘‘ཨེཝཾ བཧུདུཀྑཱ ཀཱམཱ, ཨཀྑཱཏཱ ཨནྟརཱཡིཀཱ;

གཙྪཐ ན མེ བྷགཝཏེ, ཝིསྶཱསོ ཨཏྠི ཨཏྟནོ.

༤༩༥.

‘‘ཀིཾ མམ པརོ ཀརིསྶཏི, ཨཏྟནོ སཱིསམྷི ཌཡ྄ཧམཱནམྷི;

ཨནུབནྡྷེ ཛརཱམརཎེ, ཏསྶ གྷཱཏཱཡ གྷཊིཏབྦཾ’’.

༤༩༦.

དྭཱརཾ ¶ ཨཔཱཔུརིཏྭཱནཧཾ [ཨཝཱཔུརིཏྭཱཧཾ (སཱི.)], མཱཏཱཔིཏརོ ཨནཱིཀརཏྟཉྩ;

དིསྭཱན ཚམཾ ནིསིནྣེ, རོདནྟེ ཨིདམཝོཙཾ.

༤༩༧.

‘‘དཱིགྷོ བཱལཱནཾ སཾསཱརོ, པུནཔྤུནཉྩ རོདཏཾ;

ཨནམཏགྒེ པིཏུ མརཎེ, བྷཱཏུ ཝདྷེ ཨཏྟནོ ཙ ཝདྷེ.

༤༩༨.

‘‘ཨསྶུ ཐཉྙཾ རུདྷིརཾ, སཾསཱརཾ ཨནམཏགྒཏོ སརཐ;

སཏྟཱནཾ སཾསརཏཾ, སརཱཧི ཨཊྛཱིནཉྩ སནྣིཙཡཾ.

༤༩༩.

‘‘སར ¶ ཙཏུརོདདྷཱི [སརསྶུ ཙཏུརོ ཨུདདྷཱི (?)], ཨུཔནཱིཏེ ཨསྶུཐཉྙརུདྷིརམྷི;

སར ཨེཀཀཔྤམཊྛཱིནཾ, སཉྩཡཾ ཝིཔུལེན སམཾ.

༥༠༠.

‘‘ཨནམཏགྒེ ¶ སཾསརཏོ, མཧིཾ [མཧཱམཧིཾ (?)] ཛམྦུདཱིཔམུཔནཱིཏཾ;

ཀོལཊྛིམཏྟགུལི༹ཀཱ, མཱཏཱ མཱཏུསྭེཝ ནཔྤཧོནྟི.

༥༠༡.

‘‘ཏིཎཀཊྛསཱཁཱཔལཱསཾ [སར ཏིཎཀཊྛསཱཁཱཔལཱསཾ (སཱི.)], ཨུཔནཱིཏཾ ཨནམཏགྒཏོ སར;

ཙཏུརངྒུལིཀཱ གྷཊིཀཱ, པིཏུཔིཏུསྭེཝ ནཔྤཧོནྟི.

༥༠༢.

‘‘སར ཀཱཎཀཙྪཔཾ པུབྦསམུདྡེ, ཨཔརཏོ ཙ ཡུགཚིདྡཾ;

སིརཾ ¶ [སར (སཱི.)] ཏསྶ ཙ པཊིམུཀྐཾ, མནུསྶལཱབྷམྷི ཨོཔམྨཾ.

༥༠༣.

‘‘སར རཱུཔཾ ཕེཎཔིཎྜོཔམསྶ, ཀཱཡཀལིནོ ཨསཱརསྶ;

ཁནྡྷེ པསྶ ཨནིཙྩེ, སརཱཧི ནིརཡེ བཧུཝིགྷཱཏེ.

༥༠༤.

‘‘སར ཀཊསིཾ ཝཌྜྷེནྟེ, པུནཔྤུནཾ ཏཱསུ ཏཱསུ ཛཱཏཱིསུ;

སར ཀུམྦྷཱིལབྷཡཱནི ཙ, སརཱཧི ཙཏྟཱརི སཙྩཱནི.

༥༠༥.

‘‘ཨམཏམྷི ཝིཛྫམཱནེ, ཀིཾ ཏཝ པཉྩཀཊུཀེན པཱིཏེན;

སབྦཱ ཧི ཀཱམརཏིཡོ, ཀཊུཀཏརཱ པཉྩཀཊུཀེན.

༥༠༦.

‘‘ཨམཏམྷི ཝིཛྫམཱནེ, ཀིཾ ཏཝ ཀཱམེཧི ཡེ པརིལཱ༹ཧཱ [སཔརིལཱ༹ཧཱ (སཱི. ཨཊྛ.)];

སབྦཱ ཧི ཀཱམརཏིཡོ, ཛལིཏཱ ཀུཐིཏཱ ཀམྤིཏཱ སནྟཱཔིཏཱ.

༥༠༧.

‘‘ཨསཔཏྟམྷི སམཱནེ, ཀིཾ ཏཝ ཀཱམེཧི ཡེ བཧུསཔཏྟཱ;

རཱཛགྒིཙོརཨུདཀཔྤིཡེཧི, སཱདྷཱརཎཱ ཀཱམཱ བཧུསཔཏྟཱ.

༥༠༨.

‘‘མོཀྑམྷི ཝིཛྫམཱནེ, ཀིཾ ཏཝ ཀཱམེཧི ཡེསུ ཝདྷབནྡྷོ;

ཀཱམེསུ ཧི ཨསཀཱམཱ, ཝདྷབནྡྷདུཁཱནི ཨནུབྷོནྟི.

༥༠༩.

‘‘ཨཱདཱིཔིཏཱ ¶ ¶ ཏིཎུཀྐཱ, གཎྷནྟཾ དཧནྟི ནེཝ མུཉྩནྟཾ;

ཨུཀྐོཔམཱ ཧི ཀཱམཱ, དཧནྟི ཡེ ཏེ ན མུཉྩནྟི.

༥༡༠.

‘‘མཱ ཨཔྤཀསྶ ཧེཏུ, ཀཱམསུཁསྶ ཝིཔུལཾ ཛཧཱི སུཁཾ;

མཱ པུཐུལོམོཝ བལི༹སཾ, གིལིཏྭཱ པཙྪཱ ཝིཧཉྙསི.

༥༡༡.

‘‘ཀཱམཾ ¶ ཀཱམེསུ དམསྶུ, ཏཱཝ སུནཁོཝ སངྑལཱབདྡྷོ;

ཀཱཧིནྟི ཁུ ཏཾ ཀཱམཱ, ཚཱཏཱ སུནཁཾཝ ཙཎྜཱལཱ.

༥༡༢.

‘‘ཨཔརིམིཏཉྩ ¶ དུཀྑཾ, བཧཱུནི ཙ ཙིཏྟདོམནསྶཱནི;

ཨནུབྷོཧིསི ཀཱམཡུཏྟོ, པཊིནིསྶཛ [པཊིནིསྶར (སཱི.)] ཨདྡྷུཝེ ཀཱམེ.

༥༡༣.

‘‘ཨཛརམྷི ཝིཛྫམཱནེ, ཀིཾ ཏཝ ཀཱམེཧི [ཡེསུ ཛརཱཡ ཙ; མརཎབྱཱདྷིཧི གཧིཏཱ (?)] ཡེསུ ཛརཱ;

མརཎབྱཱདྷིགཧིཏཱ [ཡེསུ ཛརཱཡ ཙ; མརཎབྱཱདྷིཧི གཧིཏཱ (?)], སབྦཱ སབྦཏྠ ཛཱཏིཡོ.

༥༡༤.

‘‘ཨིདམཛརམིདམམརཾ [ཨིདཾ ཨཛརཾ ཨིདཾ ཨམརཾ (?)], ཨིདམཛརཱམརཾ པདམསོཀཾ;

ཨསཔཏྟམསམྦཱདྷཾ, ཨཁལིཏམབྷཡཾ ནིརུཔཏཱཔཾ.

༥༡༥.

‘‘ཨདྷིགཏམིདཾ བཧཱུཧི, ཨམཏཾ ཨཛྫཱཔི ཙ ལབྷནཱིཡམིདཾ;

ཡོ ཡོནིསོ པཡུཉྫཏི, ན ཙ སཀྐཱ ཨགྷཊམཱནེན’’.

༥༡༦.

ཨེཝཾ བྷཎཏི སུམེདྷཱ, སངྑཱརགཏེ རཏིཾ ཨལབྷམཱནཱ;

ཨནུནེནྟཱི ཨནིཀརཏྟཾ, ཀེསེ ཙ ཚམཾ ཁིཔི སུམེདྷཱ.

༥༡༧.

ཨུཊྛཱཡ ཨནིཀརཏྟོ, པཉྫལིཀོ ཡཱཙིཏསྶཱ པིཏརཾ སོ;

‘‘ཝིསྶཛྫེཐ སུམེདྷཾ, པབྦཛིཏུཾ ཝིམོཀྑསཙྩདསྶཱ’’.

༥༡༨.

ཝིསྶཛྫིཏཱ མཱཏཱཔིཏཱུཧི, པབྦཛི སོཀབྷཡབྷཱིཏཱ;

ཚ ཨབྷིཉྙཱ སཙྪིཀཏཱ, ཨགྒཕལཾ སིཀྑམཱནཱཡ.

༥༡༩.

ཨཙྪརིཡམབྦྷུཏཾ ¶ ཏཾ, ནིབྦཱནཾ ཨཱསི རཱཛཀཉྙཱཡ;

པུབྦེནིཝཱསཙརིཏཾ, ཡཐཱ བྱཱཀརི པཙྪིམེ ཀཱལེ.

༥༢༠.

‘‘བྷགཝཏི ཀོཎཱགམནེ, སངྒྷཱརཱམམྷི ནཝནིཝེསམྷི;

སཁིཡོ ཏིསྶོ ཛནིཡོ, ཝིཧཱརདཱནཾ ཨདཱསིམྷ.

༥༢༡.

‘‘དསཀྑཏྟུཾ སཏཀྑཏྟུཾ, དསསཏཀྑཏྟུཾ སཏཱནི ཙ སཏཀྑཏྟུཾ;

དེཝེསུ ¶ ཨུཔྤཛྫིམྷ, ཀོ པན ཝཱདོ མནུསྶེསུ.

༥༢༢.

‘‘དེཝེསུ མཧིདྡྷིཀཱ ཨཧུམྷ, མཱནུསཀམྷི ཀོ པན ཝཱདོ;

སཏྟརཏནསྶ མཧེསཱི, ཨིཏྠིརཏནཾ ཨཧཾ ཨཱསིཾ.

༥༢༣.

‘‘སོ ¶ ¶ ཧེཏུ སོ པབྷཝོ, ཏཾ མཱུལཾ སཱཝ སཱསནེ ཁནྟཱི;

ཏཾ པཋམསམོདྷཱནཾ, ཏཾ དྷམྨརཏཱཡ ནིབྦཱནཾ’’.

༥༢༤.

ཨེཝཾ ཀརོནྟི ཡེ སདྡཧནྟི, ཝཙནཾ ཨནོམཔཉྙསྶ;

ནིབྦིནྡནྟི བྷཝགཏེ, ནིབྦིནྡིཏྭཱ ཝིརཛྫནྟཱིཏི.

ཨིཏྠཾ སུདཾ སུམེདྷཱ ཐེརཱི གཱཐཱཡོ ཨབྷཱསིཏྠཱཏི.

མཧཱནིཔཱཏོ ནིཊྛིཏོ.

སམཏྟཱ ཐེརཱིགཱཐཱཡོ.

གཱཐཱསཏཱནི ཙཏྟཱརི, ཨསཱིཏི པུན ཙུདྡས [གཱཐཱསངྑྱཱ ཨིདྷ ཨནུཀྐམཎིཀགཎནཱཝསེན པཱཀཊཱ];

ཐེརིཡེཀུཏྟརསཏཱ [ཐེརཱིཡེཀུཏྟརཚསཏཱ (?) ཏིཾསམཏྟཱཔི པཉྩསཏམཏྟཱཔི ཐེརིཡོ ཨེཀཏོ ཨཱགཏཱ མནསིཀཱཏབྦཱ], སབྦཱ ཏཱ ཨཱསཝཀྑཡཱཏི.

ཐེརཱིགཱཐཱཔཱལི༹ ནིཊྛིཏཱ.