📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཁུདྡཀནིཀཱཡེ

ཐེརཱཔདཱནཔཱལི༹

(པཋམོ བྷཱགོ)

༡. བུདྡྷཝགྒོ

༡. བུདྡྷཨཔདཱནཾ

༡.

ཏཐཱགཏཾ ¶ ¶ ¶ ཛེཏཝནེ ཝསནྟཾ, ཨཔུཙྪི ཝེདེཧམུནཱི ནཏངྒོ;

‘‘སབྦཉྙུབུདྡྷཱ ཀིར ནཱམ ཧོནྟི, བྷཝནྟི ཏེ ཧེཏུབྷི ཀེཧི ཝཱིར’’.

༢.

ཏདཱཧ སབྦཉྙུཝརོ མཧེསཱི, ཨཱནནྡབྷདྡཾ མདྷུརསྶརེན;

‘‘ཡེ པུབྦབུདྡྷེསུ [སབྦབུདྡྷེསུ (སྱཱ.)] ཀཏཱདྷིཀཱརཱ, ཨལདྡྷམོཀྑཱ ཛིནསཱསནེསུ.

༣.

‘‘ཏེནེཝ སམྦོདྷིམུཁེན དྷཱིརཱ, ཨཛ྄ཛྷཱསཡེནཱཔི མཧཱབལེན;

པཉྙཱཡ ཏེཛེན སུཏིཀྑཔཉྙཱ, སབྦཉྙུབྷཱཝཾ ཨནུཔཱཔུཎནྟི.

༤.

‘‘ཨཧམྤི ¶ ¶ པུབྦབུདྡྷེསུ, བུདྡྷཏྟམབྷིཔཏྠཡིཾ,

མནསཱཡེཝ ཧུཏྭཱན, དྷམྨརཱཛཱ ཨསངྑིཡཱ.

༥.

‘‘ཨཐ ¶ ¶ བུདྡྷཱཔདཱནཱནི, སུཎཱཐ སུདྡྷམཱནསཱ;

ཏིཾསཔཱརམིསམྤུཎྞཱ, དྷམྨརཱཛཱ ཨསངྑིཡཱ.

༦.

‘‘སམྦོདྷིཾ བུདྡྷསེཊྛཱནཾ, སསངྒྷེ ལོཀནཱཡཀེ;

དསངྒུལཱི ནམསྶིཏྭཱ, སིརསཱ ཨབྷིཝཱདཡིཾ [ཨབྷིཝཱདཡེ (སྱཱ.)].

༧.

‘‘ཡཱཝཏཱ བུདྡྷཁེཏྟེསུ, རཏནཱ ཝིཛྫནྟིསངྑིཡཱ;

ཨཱཀཱསཊྛཱ ཙ བྷཱུམཊྛཱ [བྷུམྨཊྛཱ (སཱི. སྱཱ.)], མནསཱ སབྦམཱཧརིཾ.

༨.

‘‘ཏཏྠ རཱུཔིཡབྷཱུམིཡཾ, པཱསཱདཾ མཱཔཡིཾ ཨཧཾ;

ནེཀབྷུམྨཾ རཏནམཡཾ, ཨུབྦིདྡྷཾ ནབྷམུགྒཏཾ.

༩.

‘‘ཝིཙིཏྟཐམྦྷཾ སུཀཏཾ, སུཝིབྷཏྟཾ མཧཱརཧཾ;

ཀནཀམཡསངྒྷཱཊཾ, ཀོནྟཙྪཏྟེཧི མཎྜིཏཾ.

༡༠.

‘‘པཋམཱ ཝེལུ༹རིཡཱ བྷཱུམི, ཝིམལབྦྷསམཱ སུབྷཱ;

ནལི༹ནཛལཛཱཀིཎྞཱ, ཝརཀཉྩནབྷཱུམིཡཱ.

༡༡.

‘‘པཝཱལ༹ཾསཱ པཝཱལ༹ཝཎྞཱ, ཀཱཙི ལོཧིཏཀཱ སུབྷཱ;

ཨིནྡགོཔཀཝཎྞཱབྷཱ, བྷཱུམི ཨོབྷཱསཏཱི དིསཱ.

༡༢.

‘‘སུཝིབྷཏྟཱ གྷརམུཁཱ, ནིཡྻཱུཧཱ སཱིཧཔཉྫརཱ;

ཙཏུརོ ཝེདིཀཱ ཛཱལཱ, གནྡྷཱཝེལཱ༹ མནོརམཱ.

༡༣.

‘‘ནཱིལཱ པཱིཏཱ ལོཧིཏཀཱ, ཨོདཱཏཱ སུདྡྷཀཱལ༹ཀཱ;

ཀཱུཊཱགཱརཝརཱུཔེཏཱ, སཏྟརཏནབྷཱུསིཏཱ.

༡༤.

‘‘ཨོལོཀམཡཱ ¶ པདུམཱ, ཝཱལ༹ཝིཧངྒསོབྷིཏཱ;

ནཀྑཏྟཏཱརཀཱཀིཎྞཱ, ཙནྡསཱུརེཧི [ཙནྡསུརིཡེཧི (སཱི. སྱཱ.)] མཎྜིཏཱ.

༡༥.

‘‘ཧེམཛཱལེན ¶ སཉྪནྣཱ, སོཎྞཀིངྐིཎིཀཱཡུཏཱ;

ཝཱཏཝེགེན ཀཱུཛནྟི, སོཎྞམཱལཱ མནོརམཱ.

༡༦.

‘‘མཉྫེཊྛཀཾ ལོཧིཏཀཾ, པཱིཏཀཾ ཧརིཔིཉྫརཾ;

ནཱནཱརངྒེཧི སམྤཱིཏཾ [སཾཙིཏྟཾ (སྱཱ.)], ཨུསྶིཏདྡྷཛམཱལིནཱི [མཱལིནིཾ (སཱི.)].

༡༧.

‘‘ན ནཾ [ནཱནཱ (སཱི. སྱཱ.)] བཧཱུནེཀསཏཱ, ཕལིཀཱ རཛཏཱམཡཱ;

མཎིམཡཱ ལོཧིཏངྒཱ, མསཱརགལླམཡཱ ཏཐཱ;

ནཱནཱསཡནཝིཙིཏྟཱ, སཎྷཀཱསིཀསནྠཏཱ.

༡༨.

‘‘ཀམྤལཱ ¶ ¶ དུཀཱུལཱ ཙཱིནཱ, པཊྚུཎྞཱ པཎྜུཔཱཝུརཱ;

ཝིཝིདྷཏྠརཎཾ སབྦཾ, མནསཱ པཉྙཔེསཧཾ.

༡༩.

‘‘ཏཱསུ ཏཱསྭེཝ བྷཱུམཱིསུ, རཏནཀཱུཊལངྐཏཾ;

མཎིཝེརོཙནཱ ཨུཀྐཱ, དྷཱརཡནྟཱ སུཏིཊྛརེ.

༢༠.

‘‘སོབྷནྟི ཨེསིཀཱ ཐམྦྷཱ, སུབྷཱ ཀཉྩནཏོརཎཱ;

ཛམྦོནདཱ སཱརམཡཱ, ཨཐོ རཛཏམཡཱཔི ཙ.

༢༡.

‘‘ནེཀཱ སནྡྷཱི སུཝིབྷཏྟཱ, ཀཝཱཊགྒལ༹ཙིཏྟིཏཱ;

ཨུབྷཏོ པུཎྞགྷཊཱནེཀཱ, པདུམུཔྤལསཾཡུཏཱ.

༢༢.

‘‘ཨཏཱིཏེ སབྦབུདྡྷེ ཙ, སསངྒྷེ ལོཀནཱཡཀེ;

པཀཏིཝཎྞརཱུཔེན, ནིམྨིནིཏྭཱ སསཱཝཀེ.

༢༣.

‘‘ཏེན དྭཱརེན པཝིསིཏྭཱ, སབྦེ བུདྡྷཱ སསཱཝཀཱ;

སབྦསོཎྞམཡེ པཱིཋེ, ནིསིནྣཱ ཨརིཡམཎྜལཱ.

༢༤.

‘‘ཡེ ཙ ཨེཏརཧི ཨཏྠི, བུདྡྷཱ ལོཀེ ཨནུཏྟརཱ;

ཨཏཱིཏེ ¶ ཝཏྟམཱནཱ ཙ, བྷཝནཾ སབྦེ སམཱཧརིཾ.

༢༥.

‘‘པཙྩེཀབུདྡྷེནེཀསཏེ, སཡམྦྷཱུ ཨཔརཱཛིཏེ;

ཨཏཱིཏེ ཝཏྟམཱནེ ཙ, བྷཝནཾ སབྦེ སམཱཧརིཾ.

༢༦.

‘‘ཀཔྤརུཀྑཱ བཧཱུ ཨཏྠི, ཡེ དིབྦཱ ཡེ ཙ མཱནུསཱ;

སབྦཾ དུསྶཾ སམཱཧནྟཱ, ཨཙྪཱདེམི ཏིཙཱིཝརཾ.

༢༧.

‘‘ཁཛྫཾ བྷོཛྫཾ སཱཡནཱིཡཾ, སམྤནྣཾ པཱནབྷོཛནཾ;

མཎིམཡེ སུབྷེ པཏྟེ, སཾཔཱུརེཏྭཱ ཨདཱསཧཾ.

༢༨.

‘‘དིབྦཝཏྠསམཱ ཧུཏྭཱ, མཊྛཱ [མཊྚཱ (སཱི.)] ཙཱིཝརསཾཡུཏཱ;

མདྷུརཱ སཀྑརཱ ཙེཝ, ཏེལཱ ཙ མདྷུཕཱཎིཏཱ.

༢༩.

‘‘ཏཔྤིཏཱ པརམནྣེན, སབྦེ ཏེ ཨརིཡམཎྜལཱ;

རཏནགབྦྷཾ ¶ པཝིསིཏྭཱ, ཀེསརཱིཝ གུཧཱསཡཱ.

༣༠.

‘‘མཧཱརཧམྷི སཡནེ, སཱིཧསེཡྻམཀཔྤཡུཾ;

སམྤཛཱནཱ སམུཊྛཱཡ, སཡནེ [སེཡྻེ (སྱཱ.)] པལླངྐམཱབྷུཛུཾ.

༣༡.

‘‘གོཙརཾ ¶ སབྦབུདྡྷཱནཾ, ཛྷཱནརཏིསམཔྤིཏཱ;

ཨཉྙེ དྷམྨཱནི དེསེནྟི, ཨཉྙེ ཀཱིལ༹ནྟི ཨིདྡྷིཡཱ.

༣༢.

‘‘ཨཉྙེ ¶ ཨབྷིཉྙཱ ཨཔྤེནྟི, ཨབྷིཉྙཱ ཝསིབྷཱཝིཏཱ;

ཝིཀུབྦནཱ ཝིཀུབྦནྟི, ཨཉྙེནེཀསཧསྶིཡོ.

༣༣.

‘‘བུདྡྷཱཔི བུདྡྷེ པུཙྪནྟི, ཝིསཡཾ སབྦཉྙུམཱལཡཾ;

གམྦྷཱིརཾ ནིཔུཎཾ ཋཱནཾ, པཉྙཱཡ ཝིནིབུཛ྄ཛྷརེ.

༣༤.

‘‘སཱཝཀཱ བུདྡྷེ པུཙྪནྟི, བུདྡྷཱ པུཙྪནྟི སཱཝཀེ;

ཨཉྙམཉྙཉྩ ¶ པུཙྪིཏྭཱ [པུཙྪནྟི (སཱི. སྱཱ.)], ཨཉྙོཉྙཾ བྱཱཀརོནྟི ཏེ.

༣༥.

‘‘བུདྡྷཱ པཙྩེཀབུདྡྷཱ ཙ, སཱཝཀཱ པརིཙཱརཀཱ;

ཨེཝཾ སཀཱཡ རཏིཡཱ, པཱསཱདེབྷིརམནྟི ཏེ.

༣༦.

‘‘ཚཏྟཱ ཏིཊྛནྟུ རཏནཱ, ཀཉྩནཱཝེལ༹པནྟིཀཱ;

མུཏྟཱཛཱལཔརིཀྑིཏྟཱ, སབྦེ དྷཱརེནྟུ [དྷཱརེནྟི (ཀ.)] མཏྠཀེ.

༣༧.

‘‘བྷཝནྟུ ཙེལ༹ཝིཏཱནཱ, སོཎྞཏཱརཀཙིཏྟིཏཱ;

ཝིཙིཏྟམལྱཝིཏཏཱ, སབྦེ དྷཱརེནྟུ མཏྠཀེ.

༣༨.

‘‘ཝིཏཏཱ མལྱདཱམེཧི, གནྡྷདཱམེཧི སོབྷིཏཱ;

དུསྶདཱམཔརིཀིཎྞཱ, རཏནདཱམབྷཱུསིཏཱ.

༣༩.

‘‘པུཔྥཱབྷིཀིཎྞཱ སུཙིཏྟཱ, སུརབྷིགནྡྷབྷཱུསིཏཱ;

གནྡྷཔཉྩངྒུལིཀཏཱ [གནྡྷཔཉྩངྒུལཾ ཀཏཱ (ཨཊྛ.)], ཧེམཙྪདནཚཱདིཏཱ.

༤༠.

‘‘ཙཏུདྡིསཱ པོཀྑརཉྙོ, པདུམུཔྤལསནྠཏཱ;

སོཝཎྞརཱུཔཱ ཁཱཡནྟུ, པདྨཾརེཎུརཛུགྒཏཱ.

༤༡.

‘‘པུཔྥནྟུ པཱདཔཱ སབྦེ, པཱསཱདསྶ སམནྟཏོ;

སཡཉྩ པུཔྥཱ མུཉྩིཏྭཱ, གནྟྭཱ བྷཝནམོཀིརུཾ.

༤༢.

‘‘སིཁིནོ ཏཏྠ ནཙྩནྟུ, དིབྦཧཾསཱ པཀཱུཛརེ;

ཀརཝཱིཀཱ ཙ གཱཡནྟུ, དིཛསངྒྷཱ སམནྟཏོ.

༤༣.

‘‘བྷེརིཡོ སབྦཱ ཝཛྫནྟུ, ཝཱིཎཱ སབྦཱ རསནྟུ [རཝནྟུ (སཱི. སྱཱ.)] ཏཱ;

སབྦཱ སངྒཱིཏི ཝཏྟནྟུ, པཱསཱདསྶ སམནྟཏོ.

༤༤.

‘‘ཡཱཝཏཱ ¶ ¶ ¶ བུདྡྷཁེཏྟམྷི, ཙཀྐཝཱལེ༹ ཏཏོ པརེ;

མཧནྟཱ ཛོཏིསམྤནྣཱ, ཨཙྪིནྣཱ རཏནཱམཡཱ.

༤༥.

‘‘ཏིཊྛནྟུ སོཎྞཔལླངྐཱ, དཱིཔརུཀྑཱ ཛལནྟུ ཏེ;

བྷཝནྟུ ཨེཀཔཛྫོཏཱ, དསསཧསྶིཔརམྤརཱ.

༤༦.

‘‘གཎིཀཱ ལཱསིཀཱ ཙེཝ, ནཙྩནྟུ ཨཙྪརཱགཎཱ;

ནཱནཱརངྒཱ པདིསྶནྟུ, པཱསཱདསྶ སམནྟཏོ.

༤༧.

‘‘དུམགྒེ ¶ པབྦཏགྒེ ཝཱ, སིནེརུགིརིམུདྡྷནི;

ཨུསྶཱཔེམི དྷཛཾ སབྦཾ, ཝིཙིཏྟཾ པཉྩཝཎྞིཀཾ.

༤༨.

‘‘ནརཱ ནཱགཱ ཙ གནྡྷབྦཱ, སབྦེ དེཝཱ ཨུཔེནྟུ ཏེ;

ནམསྶནྟཱ པཉྫལིཀཱ, པཱསཱདཾ པརིཝཱརཡུཾ.

༤༩.

‘‘ཡཾ ཀིཉྩི ཀུསལཾ ཀམྨཾ, ཀཏྟབྦཾ ཀིརིཡཾ མམ;

ཀཱཡེན ཝཱཙཱ མནསཱ, ཏིདསེ སུཀཏཾ ཀཏཾ.

༥༠.

‘‘ཡེ སཏྟཱ སཉྙིནོ ཨཏྠི, ཡེ ཙ སཏྟཱ ཨསཉྙིནོ;

ཀཏཾ པུཉྙཕལཾ མཡ྄ཧཾ, སབྦེ བྷཱགཱི བྷཝནྟུ ཏེ.

༥༡.

‘‘ཡེསཾ ཀཏཾ སུཝིདིཏཾ, དིནྣཾ པུཉྙཕལཾ མཡཱ;

ཡེ ཙ ཏཏྠ [ཏསྨིཾ (སཱི. ཀ.)] ན ཛཱནནྟི, དེཝཱ གནྟྭཱ ནིཝེདཡུཾ.

༥༢.

‘‘སབྦལོཀམྷི [སབྦེ ལོཀམྷི (སྱཱ. ཀ.)] ཡེ སཏྟཱ, ཛཱིཝནྟཱཧཱརཧེཏུཀཱ;

མནུཉྙཾ བྷོཛནཾ སབྦཾ [སབྦེ (སྱཱ.)], ལབྷནྟུ མམ ཙེཏསཱ.

༥༣.

‘‘མནསཱ དཱནཾ མཡཱ དིནྣཾ, མནསཱ པསཱདམཱཝཧིཾ;

པཱུཛིཏཱ སབྦསམྦུདྡྷཱ, པཙྩེཀཱ ཛིནསཱཝཀཱ.

༥༤.

‘‘ཏེན ¶ ཀམྨེན སུཀཏེན, ཙེཏནཱཔཎིདྷཱིཧི ཙ;

ཛཧིཏྭཱ མཱནུསཾ དེཧཾ, ཏཱཝཏིཾསམགཙྪཧཾ.

༥༥.

‘‘དུཝེ བྷཝེ པཛཱནཱམི, དེཝཏྟེ ཨཐ མཱནུསེ;

ཨཉྙཾ གཏིཾ ན ཛཱནཱམི, མནསཱ པཏྠནཱཕལཾ.

༥༦.

‘‘དེཝཱནཾ ཨདྷིཀོ ཧོམི, བྷཝཱམི མནུཛཱདྷིཔོ;

རཱུཔལཀྑཎསམྤནྣོ, པཉྙཱཡ ཨསམོ བྷཝེ.

༥༧.

‘‘བྷོཛནཾ ཝིཝིདྷཾ སེཊྛཾ, རཏནཉྩ ཨནཔྤཀཾ;

ཝིཝིདྷཱནི ཙ ཝཏྠཱནི, ནབྷཱ [ནབྷསཱ (སྱཱ.)] ཁིཔྤཾ ཨུཔེནྟི མཾ.

༥༨.

‘‘པཐབྱཱ ¶ པབྦཏེ ཙེཝ, ཨཱཀཱསེ ཨུདཀེ ཝནེ;

ཡཾ ཡཾ ཧཏྠཾ པསཱརེམི, དིབྦཱ བྷཀྑཱ ཨུཔེནྟི མཾ.

༥༩.

‘‘པཐབྱཱ ¶ པབྦཏེ ཙེཝ, ཨཱཀཱསེ ཨུདཀེ ཝནེ;

ཡཾ ཡཾ ཧཏྠཾ པསཱརེམི, རཏནཱ སབྦེ ཨུཔེནྟི མཾ.

༦༠.

‘‘པཐབྱཱ ¶ པབྦཏེ ཙེཝ, ཨཱཀཱསེ ཨུདཀེ ཝནེ;

ཡཾ ཡཾ ཧཏྠཾ པསཱརེམི, སབྦེ གནྡྷཱ ཨུཔེནྟི མཾ.

༦༡.

‘‘པཐབྱཱ པབྦཏེ ཙེཝ, ཨཱཀཱསེ ཨུདཀེ ཝནེ;

ཡཾ ཡཾ [ཡཏྠ (སྱཱ.), ཡཉྙཾ (ཀ.)] ཧཏྠཾ པསཱརེམི, སབྦེ ཡཱནཱ ཨུཔེནྟི མཾ.

༦༢.

‘‘པཐབྱཱ པབྦཏེ ཙེཝ, ཨཱཀཱསེ ཨུདཀེ ཝནེ;

ཡཾ ཡཾ ཧཏྠཾ པསཱརེམི, སབྦེ མཱལཱ ཨུཔེནྟི མཾ.

༦༣.

‘‘པཐབྱཱ པབྦཏེ ཙེཝ, ཨཱཀཱསེ ཨུདཀེ ཝནེ;

ཡཾ ཡཾ ཧཏྠཾ པསཱརེམི, ཨལངྐཱརཱ ཨུཔེནྟི མཾ.

༦༤.

‘‘པཐབྱཱ ¶ པབྦཏེ ཙེཝ, ཨཱཀཱསེ ཨུདཀེ ཝནེ;

ཡཾ ཡཾ ཧཏྠཾ པསཱརེམི, སབྦཱ ཀཉྙཱ ཨུཔེནྟི མཾ.

༦༥.

‘‘པཐབྱཱ པབྦཏེ ཙེཝ, ཨཱཀཱསེ ཨུདཀེ ཝནེ;

ཡཾ ཡཾ ཧཏྠཾ པསཱརེམི, མདྷུསཀྑརཱ ཨུཔེནྟི མཾ.

༦༦.

‘‘པཐབྱཱ པབྦཏེ ཙེཝ, ཨཱཀཱསེ ཨུདཀེ ཝནེ;

ཡཾ ཡཾ ཧཏྠཾ པསཱརེམི, སབྦེ ཁཛྫཱ ཨུཔེནྟི མཾ.

༦༧.

‘‘ཨདྷནེ ཨདྡྷིཀ [ཨདྡྷིཀེ (སྱཱ.)] ཛནེ, ཡཱཙཀེ ཙ པཐཱཝིནོ;

དདཱམིཧཾ [དདཱམིཧ (སཱི.) དདཱམི ཏཾ (སྱཱ.)] དཱནཝརཾ, སམྦོདྷིཝརཔཏྟིཡཱ.

༦༨.

‘‘ནཱདེནྟོ པབྦཏཾ སེལཾ, གཛྫེནྟོ བཧལཾ གིརིཾ;

སདེཝཀཾ ཧཱསཡནྟོ, བུདྡྷོ ལོཀེ བྷཝཱམཧཾ.

༦༩.

‘‘དིསཱ དསཝིདྷཱ ལོཀེ, ཡཱཡཏོ ནཏྠི ཨནྟཀཾ;

ཏསྨིཉྩ དིསཱབྷཱགམྷི, བུདྡྷཁེཏྟཱ ཨསངྑིཡཱ.

༧༠.

‘‘པབྷཱ པཀིཏྟིཏཱ མཡ྄ཧཾ, ཡམཀཱ རཾསིཝཱཧནཱ;

ཨེཏྠནྟརེ རཾསིཛཱལཾ, ཨཱལོཀོ ཝིཔུལོ བྷཝེ.

༧༡.

‘‘ཨེཏྟཀེ ¶ ལོཀདྷཱཏུམྷི, སབྦེ པསྶནྟུ མཾ ཛནཱ;

སབྦེ མཾ ཨནུཝཏྟནྟུ, ཡཱཝ བྲཧྨནིཝེསནཾ [སབྦེཝ སུམནཱ ཧོནྟུ, སབྦེ མཾ ཨནུཝཏྟརེ (སཱི. སྱཱ.)].

༧༢.

‘‘ཝིསིཊྛམདྷུནཱདེན, ཨམཏབྷེརིམཱཧནིཾ;

ཨེཏྠནྟརེ ཛནཱ སབྦེ, སུཎནྟུ མདྷུརཾ གིརཾ.

༧༣.

‘‘དྷམྨམེགྷེན ཝསྶནྟེ, སབྦེ ཧོནྟུ ཨནཱསཝཱ;

ཡེཏྠ པཙྪིམཀཱ སཏྟཱ, སོཏཱཔནྣཱ བྷཝནྟུ ཏེ.

༧༤.

‘‘དཏྭཱ ¶ ¶ དཱཏབྦཀཾ དཱནཾ, སཱིལཾ པཱུརེཏྭཱ ཨསེསཏོ;

ནེཀྑམྨཔཱརམིཾ གནྟྭཱ, པཏྟོ སམྦོདྷིམུཏྟམཾ.

༧༥.

‘‘པཎྜིཏེ ¶ པརིཔུཙྪིཏྭཱ, ཀཏྭཱ ཝཱིརིཡམུཏྟམཾ;

ཁནྟིཡཱ པཱརམིཾ གནྟྭཱ, པཏྟོ སམྦོདྷིམུཏྟམཾ.

༧༦.

‘‘ཀཏྭཱ དལ༹ྷམདྷིཊྛཱནཾ, སཙྩཔཱརམི པཱུརིཡ;

མེཏྟཱཡ པཱརམིཾ གནྟྭཱ, པཏྟོ སམྦོདྷིམུཏྟམཾ.

༧༧.

‘‘ལཱབྷཱལཱབྷེ སུཁེ དུཀྑེ, སམྨཱནེ ཙཱཝམཱནནེ [སམྨཱནེ ཙ ཝིམཱནནེ (ཀ.) སམྨཱནནེ ཝིམཱནནེ (སྱཱ.)];

སབྦཏྠ སམཀོ ཧུཏྭཱ, པཏྟོ སམྦོདྷིམུཏྟམཾ.

༧༨.

‘‘ཀོསཛྫཾ བྷཡཏོ དིསྭཱ, ཝཱིརིཡཾ ཙཱཔི ཁེམཏོ;

ཨཱརདྡྷཝཱིརིཡཱ ཧོཐ, ཨེསཱ བུདྡྷཱནུསཱསནཱི.

༧༩.

‘‘ཝིཝཱདཾ བྷཡཏོ དིསྭཱ, ཨཝིཝཱདཉྩ ཁེམཏོ;

སམགྒཱ སཁིལཱ ཧོཐ, ཨེསཱ བུདྡྷཱནུསཱསནཱི.

༨༠.

‘‘པམཱདཾ བྷཡཏོ དིསྭཱ, ཨཔྤམཱདཉྩ ཁེམཏོ;

བྷཱཝེཐཊྛངྒིཀཾ མགྒཾ, ཨེསཱ བུདྡྷཱནུསཱསནཱི.

༨༡.

‘‘སམཱགཏཱ བཧཱུ བུདྡྷཱ, ཨརཧནྟཱ [ཨརཧནྟོ (སྱཱ.)] ཙ སབྦསོ;

སམྦུདྡྷེ ཨརཧནྟེ ཙ, ཝནྡམཱནཱ ནམསྶཐ.

༨༢.

‘‘ཨེཝཾ ཨཙིནྟིཡཱ བུདྡྷཱ, བུདྡྷདྷམྨཱ ཨཙིནྟིཡཱ;

ཨཙིནྟིཡེ པསནྣཱནཾ, ཝིཔཱཀོ ཧོཏི ཨཙིནྟིཡོ’’’.

ཨིཏྠཾ སུདཾ བྷགཝཱ ཨཏྟནོ བུདྡྷཙརིཡཾ སམྦྷཱཝཡམཱནོ བུདྡྷཱཔདཱནིཡཾ [བུདྡྷཙརིཡཾ (སཱི.) བུདྡྷཙརིཏཾ (སྱཱ.)] ནཱམ དྷམྨཔརིཡཱཡཾ ཨབྷཱསིཏྠཱཏི.

བུདྡྷཱཔདཱནཾ སམཏྟཾ.

༢. པཙྩེཀབུདྡྷཨཔདཱནཾ

ཨཐ ¶ ¶ པཙྩེཀབུདྡྷཱཔདཱནཾ སུཎཱཐ –

༨༣.

‘‘ཏཐཱགཏཾ ¶ ཛེཏཝནེ ཝསནྟཾ, ཨཔུཙྪི ཝེདེཧམུནཱི ནཏངྒོ;

‘པཙྩེཀབུདྡྷཱ ཀིར ནཱམ ཧོནྟི, བྷཝནྟི ཏེ ཧེཏུབྷི ཀེཧི ཝཱིར’ [དྷཱིར (སཱི.) དྷཱིརཱ (སྱཱ.)].

༨༤.

‘‘ཏདཱཧ ¶ སབྦཉྙུཝརོ མཧེསཱི, ཨཱནནྡབྷདྡཾ མདྷུརསྶརེན;

‘ཡེ པུབྦབུདྡྷེསུ [སབྦབུདྡྷེསུ (སྱཱ. ཀ.)] ཀཏཱདྷིཀཱརཱ, ཨལདྡྷམོཀྑཱ ཛིནསཱསནེསུ.

༨༥.

‘‘‘ཏེནེཝ སཾཝེགམུཁེན དྷཱིརཱ, ཝིནཱཔི བུདྡྷེཧི སུཏིཀྑཔཉྙཱ;

ཨཱརམྨཎེནཱཔི པརིཏྟཀེན, པཙྩེཀབོདྷིཾ ཨནུཔཱཔུཎནྟི.

༨༦.

‘‘‘སབྦམྷི ལོཀམྷི མམཾ ཋཔེཏྭཱ, པཙྩེཀབུདྡྷེཧི སམོཝ ནཏྠི;

ཏེསཾ ཨིམཾ ཝཎྞཔདེསམཏྟཾ, ཝཀྑཱམཧཾ སཱདྷུ མཧཱམུནཱིནཾ.

༨༧.

‘‘‘སཡམེཝ ¶ བུདྡྷཱནཾ མཧཱཨིསཱིནཾ, སཱདྷཱུནི ཝཱཀྱཱནི མདྷཱུཝ [མདྷུཾཝ (སཱི.)] ཁུདྡཾ;

ཨནུཏྟརཾ བྷེསཛཾ པཏྠཡནྟཱ, སུཎཱཐ སབྦེསུ པསནྣཙིཏྟཱ.

༨༨.

‘‘‘པཙྩེཀབུདྡྷཱནཾ སམཱགཏཱནཾ, པརམྤརཾ བྱཱཀརཎཱནི ཡཱནི;

ཨཱདཱིནཝོ ཡཉྩ ཝིརཱགཝཏྠུཾ, ཡཐཱ ཙ བོདྷིཾ ཨནུཔཱཔུཎིཾསུ.

༨༩.

‘‘‘སརཱགཝཏྠཱུསུ ¶ ¶ ཝིརཱགསཉྙཱི, རཏྟམྷི ལོཀམྷི ཝིརཏྟཙིཏྟཱ;

ཧིཏྭཱ པཔཉྩེ ཛིཏཕནྡིཏཱནི [ཝིདིཡ ཕནྡིཏཱནི (སཱི.) ཛིཏབནྡྷིཏཱནི (ཀ.)], ཏཐེཝ བོདྷིཾ ཨནུཔཱཔུཎིཾསུ.

༩༠.

‘‘‘སབྦེསུ བྷཱུཏེསུ ནིདྷཱཡ དཎྜཾ, ཨཝིཧེཋཡཾ ཨཉྙཏརམྤི ཏེསཾ;

མེཏྟེན ཙིཏྟེན ཧིཏཱནུཀམྤཱི, ཨེཀོ ཙརེ ཁགྒཝིསཱཎཀཔྤོ.

༩༡.

‘‘‘སབྦེསུ བྷཱུཏེསུ ནིདྷཱཡ དཎྜཾ, ཨཝིཧེཋཡཾ ཨཉྙཏརམྤི ཏེསཾ;

ན པུཏྟམིཙྪེཡྻ ཀུཏོ སཧཱཡཾ, ཨེཀོ ཙརེ ཁགྒཝིསཱཎཀཔྤོ.

༩༢.

‘‘‘སཾསགྒཛཱཏསྶ ¶ བྷཝནྟི སྣེཧཱ, སྣེཧནྭཡཾ དུཀྑམིདཾ པཧོཏི;

ཨཱདཱིནཝཾ སྣེཧཛཾ པེཀྑམཱནོ, ཨེཀོ ཙརེ ཁགྒཝིསཱཎཀཔྤོ.

༩༣.

‘‘‘མིཏྟེ སུཧཛྫེ ཨནུཀམྤམཱནོ, ཧཱཔེཏི ཨཏྠཾ པཊིབདྡྷཙིཏྟོ;

ཨེཏཾ བྷཡཾ སནྠཝེ པེཀྑམཱནོ, ཨེཀོ ཙརེ ཁགྒཝིསཱཎཀཔྤོ.

༩༤.

‘‘‘ཝཾསོ ཝིསཱལོཝ ཡཐཱ ཝིསཏྟོ, པུཏྟེསུ དཱརེསུ ཙ ཡཱ ཨཔེཀྑཱ;

ཝཾསེ ཀལཱི༹རོཝ ཨསཛྫམཱནོ, ཨེཀོ ཙརེ ཁགྒཝིསཱཎཀཔྤོ.

༩༥.

‘‘‘མིགོ ཨརཉྙམྷི ཡཐཱ ཨབདྡྷོ, ཡེནིཙྪཀཾ གཙྪཏི གོཙརཱཡ;

ཝིཉྙཱུ ནརོ སེརིཏཾ པེཀྑམཱནོ, ཨེཀོ ཙརེ ཁགྒཝིསཱཎཀཔྤོ.

༩༦.

‘‘‘ཨཱམནྟནཱ ¶ ཧོཏི སཧཱཡམཛ྄ཛྷེ, ཝཱསེ ཙ [ཝཱསེ (སཱི. སྱཱ.) སུཏྟནིཔཱཏེཔི ‘‘ཙ‘‘ཀཱརོ ནཏྠི] ཋཱནེ གམནེ ཙཱརིཀཱཡ;

ཨནབྷིཛ྄ཛྷིཏཾ སེརིཏཾ པེཀྑམཱནོ, ཨེཀོ ཙརེ ཁགྒཝིསཱཎཀཔྤོ.

༩༧.

‘‘‘ཁིཌྜཱ ¶ རཏཱི ཧོཏི སཧཱཡམཛ྄ཛྷེ, པུཏྟེསུ པེམཾ ཝིཔུལཉྩ ཧོཏི;

པིཡཝིཔྤཡོགཾ ¶ ཝིཛིགུཙྪམཱནོ, ཨེཀོ ཙརེ ཁགྒཝིསཱཎཀཔྤོ.

༩༨.

‘‘‘ཙཱཏུདྡིསོ ¶ ཨཔྤཊིགྷོ ཙ ཧོཏི, སནྟུསྶམཱནོ ཨིཏརཱིཏརེན;

པརིསྶཡཱནཾ སཧིཏཱ ཨཚམྦྷཱི, ཨེཀོ ཙརེ ཁགྒཝིསཱཎཀཔྤོ.

༩༩.

‘‘‘དུསྶངྒཧཱ པབྦཛིཏཱཔི ཨེཀེ, ཨཐོ གཧཊྛཱ གྷརམཱཝསནྟཱ;

ཨཔྤོསྶུཀྐོ པརཔུཏྟེསུ ཧུཏྭཱ, ཨེཀོ ཙརེ ཁགྒཝིསཱཎཀཔྤོ.

༡༠༠.

‘‘‘ཨོརོཔཡིཏྭཱ གིཧིབྱཉྫནཱནི, སཉྪིནྣཔཏྟོ ཡཐཱ ཀོཝིལཱ༹རོ;

ཚེཏྭཱན ཝཱིརོ གིཧིབནྡྷནཱནི, ཨེཀོ ཙརེ ཁགྒཝིསཱཎཀཔྤོ.

༡༠༡.

‘‘‘སཙེ ལབྷེཐ ནིཔཀཾ སཧཱཡཾ, སདྡྷིཾ ཙརཾ སཱདྷུཝིཧཱརིདྷཱིརཾ;

ཨབྷིབྷུཡྻ སབྦཱནི པརིསྶཡཱནི, ཙརེཡྻ ཏེནཏྟམནོ སཏཱིམཱ.

༡༠༢.

‘‘‘ནོ ¶ ཙེ ལབྷེཐ ནིཔཀཾ སཧཱཡཾ, སདྡྷིཾ ཙརཾ སཱདྷུཝིཧཱརིདྷཱིརཾ;

རཱཛཱཝ རཊྛཾ ཝིཛིཏཾ པཧཱཡ, ཨེཀོ ཙརེ མཱཏངྒརཉྙེཝ ནཱགོ.

༡༠༣.

‘‘‘ཨདྡྷཱ ¶ པསཾསཱམ སཧཱཡསམྤདཾ, སེཊྛཱ སམཱ སེཝིཏབྦཱ སཧཱཡཱ;

ཨེཏེ ཨལདྡྷཱ ཨནཝཛྫབྷོཛཱི, ཨེཀོ ཙརེ ཁགྒཝིསཱཎཀཔྤོ.

༡༠༤.

‘‘‘དིསྭཱ སུཝཎྞསྶ པབྷསྶརཱནི, ཀམྨཱརཔུཏྟེན སུནིཊྛིཏཱནི;

སངྒྷཊྚམཱནཱནི དུཝེ བྷུཛསྨིཾ, ཨེཀོ ཙརེ ཁགྒཝིསཱཎཀཔྤོ.

༡༠༥.

‘‘‘ཨེཝཾ དུཏཱིཡེན སཧཱ མམསྶ, ཝཱཙཱབྷིལཱཔོ ཨབྷིསཛྫནཱ ཝཱ;

ཨེཏཾ བྷཡཾ ཨཱཡཏིཾ པེཀྑམཱནོ, ཨེཀོ ཙརེ ཁགྒཝིསཱཎཀཔྤོ.

༡༠༦.

‘‘‘ཀཱམཱ ¶ ཧི ཙིཏྲཱ མདྷུརཱ མནོརམཱ, ཝིརཱུཔརཱུཔེན མཐེནྟི ཙིཏྟཾ;

ཨཱདཱིནཝཾ ཀཱམགུཎེསུ དིསྭཱ, ཨེཀོ ཙརེ ཁགྒཝིསཱཎཀཔྤོ.

༡༠༧.

‘‘‘ཨཱིཏཱི ¶ ཙ གཎྜོ ཙ ཨུཔདྡཝོ ཙ, རོགོ ཙ སལླཉྩ བྷཡཉྩ མེཏཾ;

ཨེཏཾ བྷཡཾ ཀཱམགུཎེསུ དིསྭཱ, ཨེཀོ ཙརེ ཁགྒཝིསཱཎཀཔྤོ.

༡༠༨.

‘‘‘སཱིཏཉྩ ཨུཎྷཉྩ ཁུདཾ པིཔཱསཾ, ཝཱཏཱཏཔེ ཌཾསསརཱིསཔེ [ཌཾསསིརིཾསཔེ (སཱི. སྱཱ.)] ཙ;

སབྦཱནིཔེཏཱནི ཨབྷིབྦྷཝིཏྭཱ [ཨབྷིསཾབྷཝིཏྭཱ (སུཏྟནིཔཱཏེ)], ཨེཀོ ཙརེ ཁགྒཝིསཱཎཀཔྤོ.

༡༠༩.

‘‘‘ནཱགོཝ ཡཱུཐཱནི ཝིཝཛྫཡིཏྭཱ, སཉྫཱཏཁནྡྷོ པདུམཱི ཨུལཱ༹རོ;

ཡཐཱབྷིརནྟཾ ཝིཧརཾ ཨརཉྙེ, ཨེཀོ ཙརེ ཁགྒཝིསཱཎཀཔྤོ.

༡༡༠.

‘‘‘ཨཊྛཱནཏཾ ¶ སངྒཎིཀཱརཏསྶ, ཡཾ ཕསྶཡེ [ཕུསྶཡེ (སྱཱ.)] སཱམཡིཀཾ ཝིམུཏྟིཾ;

ཨཱདིཙྩབནྡྷུསྶ ཝཙོ ནིསམྨ, ཨེཀོ ཙརེ ཁགྒཝིསཱཎཀཔྤོ.

༡༡༡.

‘‘‘དིཊྛཱིཝིསཱུཀཱནི ཨུཔཱཏིཝཏྟོ, པཏྟོ ནིཡཱམཾ པཊིལདྡྷམགྒོ;

ཨུཔྤནྣཉཱཎོམྷི ཨནཉྙནེཡྻོ, ཨེཀོ ཙརེ ཁགྒཝིསཱཎཀཔྤོ.

༡༡༢.

‘‘‘ནིལློལུཔོ ¶ ¶ ནིཀྐུཧོ ནིཔྤིཔཱསོ, ནིམྨཀྑ [ནིམྨཀྑོ (སྱཱ.)] ནིདྡྷནྟཀསཱཝམོཧོ;

ནིརཱསཡོ [ནིརཱསཱསོ (ཀ.)] སབྦལོཀེ བྷཝིཏྭཱ, ཨེཀོ ཙརེ ཁགྒཝིསཱཎཀཔྤོ.

༡༡༣.

‘‘‘པཱཔཾ སཧཱཡཾ པརིཝཛྫཡེཐ, ཨནཏྠདསྶིཾ ཝིསམེ ནིཝིཊྛཾ;

སཡཾ ན སེཝེ པསུཏཾ པམཏྟཾ, ཨེཀོ ཙརེ ཁགྒཝིསཱཎཀཔྤོ.

༡༡༤.

‘‘‘བཧུསྶུཏཾ དྷམྨདྷརཾ བྷཛེཐ, མིཏྟཾ ཨུལཱ༹རཾ པཊིབྷཱནཝནྟཾ;

ཨཉྙཱཡ ¶ ཨཏྠཱནི ཝིནེཡྻ ཀངྑཾ, ཨེཀོ ཙརེ ཁགྒཝིསཱཎཀཔྤོ.

༡༡༥.

‘‘‘ཁིཌྜཾ རཏིཾ ཀཱམསུཁཉྩ ལོཀེ, ཨནལངྐརིཏྭཱ ཨནཔེཀྑམཱནོ;

ཝིབྷཱུསཊྛཱནཱ ཝིརཏོ སཙྩཝཱདཱི, ཨེཀོ ཙརེ ཁགྒཝིསཱཎཀཔྤོ.

༡༡༦.

‘‘‘པུཏྟཉྩ དཱརཾ པིཏརཉྩ མཱཏརཾ, དྷནཱནི དྷཉྙཱནི ཙ བནྡྷཝཱནི;

ཧིཏྭཱན ཀཱམཱནི ཡཐོདྷིཀཱནི, ཨེཀོ ཙརེ ཁགྒཝིསཱཎཀཔྤོ.

༡༡༧.

‘‘‘སངྒོ ¶ ¶ ཨེསོ པརིཏྟམེཏྠ སོཁྱཾ, ཨཔྤསྶཱདོ དུཀྑམེཝེཏྠ བྷིཡྻོ;

གལོ༹ [གཱཧོ (སཱི.) ཀཎྜོ (སྱཱ.) གཱལ༹ྷོ (ཀ.)] ཨེསོ ཨིཏི ཉཏྭཱ མཏིམཱ, ཨེཀོ ཙརེ ཁགྒཝིསཱཎཀཔྤོ.

༡༡༨.

‘‘‘སནྡཱལཡིཏྭཱན སཾཡོཛནཱནི, ཛཱལཾཝ བྷེཏྭཱ སལིལམྦུཙཱརཱི;

ཨགྒཱིཝ དཌྜྷཾ ཨནིཝཏྟམཱནོ, ཨེཀོ ཙརེ ཁགྒཝིསཱཎཀཔྤོ.

༡༡༩.

‘‘‘ཨོཀྑིཏྟཙཀྑཱུ ན ཙ པཱདལོལོ, གུཏྟིནྡྲིཡོ རཀྑིཏམཱནསཱནོ;

ཨནཝསྶུཏོ ཨཔརིཌཡ྄ཧམཱནོ, ཨེཀོ ཙརེ ཁགྒཝིསཱཎཀཔྤོ.

༡༢༠.

‘‘‘ཨོཧཱརཡིཏྭཱ གིཧིབྱཉྫནཱནི, སཉྪནྣཔཏྟོ ཡཐཱ པཱརིཚཏྟོ;

ཀཱསཱཡཝཏྠོ ཨབྷིནིཀྑམིཏྭཱ, ཨེཀོ ཙརེ ཁགྒཝིསཱཎཀཔྤོ.

༡༢༡.

‘‘‘རསེསུ གེདྷཾ ཨཀརཾ ཨལོལོ, ཨནཉྙཔོསཱི སཔདཱནཙཱརཱི;

ཀུལེ ཀུལེ ཨཔྤཊིབདྡྷཙིཏྟོ, ཨེཀོ ཙརེ ཁགྒཝིསཱཎཀཔྤོ.

༡༢༢.

‘‘‘པཧཱཡ ¶ པཉྩཱཝརཎཱནི ཙེཏསོ, ཨུཔཀྐིལེསེ བྱཔནུཛྫ སབྦེ;

ཨནིསྶིཏོ ཚེཛྫ སིནེཧདོསཾ, ཨེཀོ ཙརེ ཁགྒཝིསཱཎཀཔྤོ.

༡༢༣.

‘‘‘ཝིཔིཊྛིཀཏྭཱན ¶ སུཁཉྩ དུཀྑཾ, པུབྦེཝ སོམནསྶདོམནསྶཾ;

ལདྡྷཱནུཔེཀྑཾ སམཐཾ ཝིསུདྡྷཾ, ཨེཀོ ཙརེ ཁགྒཝིསཱཎཀཔྤོ.

༡༢༤.

‘‘‘ཨཱརདྡྷཝཱིརིཡོ ¶ པརམཏྠཔཏྟིཡཱ, ཨལཱིནཙིཏྟོ ཨཀུསཱིཏཝུཏྟི;

དལ༹ྷནིཀྐམོ ཐཱམབལཱུཔཔནྣོ, ཨེཀོ ཙརེ ཁགྒཝིསཱཎཀཔྤོ.

༡༢༥.

‘‘‘པཊིསལླཱནཾ ཛྷཱནམརིཉྩམཱནོ, དྷམྨེསུ ནིཙྩཾ ཨནུདྷམྨཙཱརཱི;

ཨཱདཱིནཝཾ སམྨསིཏཱ བྷཝེསུ, ཨེཀོ ཙརེ ཁགྒཝིསཱཎཀཔྤོ.

༡༢༦.

‘‘‘ཏཎྷཀྑཡཾ ¶ པཏྠཡམཔྤམཏྟོ, ཨནེལ༹མཱུགོ སུཏཝཱ སཏཱིམཱ;

སངྑཱཏདྷམྨོ ནིཡཏོ པདྷཱནཝཱ, ཨེཀོ ཙརེ ཁགྒཝིསཱཎཀཔྤོ.

༡༢༧.

‘‘‘སཱིཧོཝ ¶ སདྡེསུ ཨསནྟསནྟོ, ཝཱཏོཝ ཛཱལམྷི ཨསཛྫམཱནོ;

པདུམཾཝ ཏོཡེན ཨལིམྤམཱནོ, ཨེཀོ ཙརེ ཁགྒཝིསཱཎཀཔྤོ.

༡༢༨.

‘‘‘སཱིཧོ ཡཐཱ དཱཋབལཱི པསཡ྄ཧ, རཱཛཱ མིགཱནཾ ཨབྷིབྷུཡྻ ཙཱརཱི;

སེཝེཐ པནྟཱནི སེནཱསནཱནི, ཨེཀོ ཙརེ ཁགྒཝིསཱཎཀཔྤོ.

༡༢༩.

‘‘‘མེཏྟཾ ཨུཔེཀྑཾ ཀརུཎཾ ཝིམུཏྟིཾ, ཨཱསེཝམཱནོ མུདིཏཉྩ ཀཱལེ;

སབྦེན ལོཀེན ཨཝིརུཛ྄ཛྷམཱནོ, ཨེཀོ ཙརེ ཁགྒཝིསཱཎཀཔྤོ.

༡༣༠.

‘‘‘རཱགཉྩ དོསཉྩ པཧཱཡ མོཧཾ, སནྡཱལཡིཏྭཱན སཾཡོཛནཱནི;

ཨསནྟསཾ ཛཱིཝིཏསངྑཡམྷི, ཨེཀོ ཙརེ ཁགྒཝིསཱཎཀཔྤོ.

༡༣༡.

‘‘‘བྷཛནྟི ¶ ¶ སེཝནྟི ཙ ཀཱརཎཏྠཱ, ནིཀྐཱརཎཱ དུལླབྷཱ ཨཛྫ མིཏྟཱ;

ཨཏྟཏྠཔཉྙཱ ཨསུཙཱིམནུསྶཱ, ཨེཀོ ཙརེ ཁགྒཝིསཱཎཀཔྤོ.

༡༣༢.

‘‘‘ཝིསུདྡྷསཱིལཱ ¶ སུཝིསུདྡྷཔཉྙཱ, སམཱཧིཏཱ ཛཱགརིཡཱནུཡུཏྟཱ;

ཝིཔསྶཀཱ དྷམྨཝིསེསདསྶཱི, མགྒངྒབོཛ྄ཛྷངྒགཏེ ཝིཛཉྙཱ.

༡༣༣.

‘‘‘སུཉྙཔྤཎིདྷིཉྩ ཏཐཱནིམིཏྟཾ [སུཉྙཏཔྤཎཱིཧིཏཉྩཱནིམིཏྟཾ (སཱི.)], ཨཱསེཝཡིཏྭཱ ཛིནསཱསནམྷི;

ཡེ སཱཝཀཏྟཾ ན ཝཛནྟི དྷཱིརཱ, བྷཝནྟི པཙྩེཀཛིནཱ སཡམྦྷཱུ.

༡༣༤.

‘‘‘མཧནྟདྷམྨཱ བཧུདྷམྨཀཱཡཱ, ཙིཏྟིསྶརཱ སབྦདུཀྑོགྷཏིཎྞཱ;

ཨུདགྒཙིཏྟཱ པརམཏྠདསྶཱི, སཱིཧོཔམཱ ཁགྒཝིསཱཎཀཔྤཱ.

༡༣༥.

‘‘‘སནྟིནྡྲིཡཱ སནྟམནཱ སམཱདྷཱི, པཙྩནྟསཏྟེསུ པཏིཔྤཙཱརཱ [པཙྩཏྟགམྦྷཱིརམཏཔྤཙཱརཱ (སཱི.)];

དཱིཔཱ པརཏྠ ཨིདྷ ཝིཛྫལནྟཱ, པཙྩེཀབུདྡྷཱ སཏཏཾ ཧིཏཱམེ.

༡༣༦.

‘‘‘པཧཱིནསབྦཱཝརཎཱ ཛནིནྡཱ, ལོཀཔྤདཱིཔཱ གྷནཀཉྩནཱབྷཱ;

ནིསྶཾསཡཾ ལོཀསུདཀྑིཎེཡྻཱ, པཙྩེཀབུདྡྷཱ སཏཏཔྤིཏཱམེ.

༡༣༧.

‘‘‘པཙྩེཀབུདྡྷཱནཾ ¶ སུབྷཱསིཏཱནི, ཙརནྟི ལོཀམྷི སདེཝཀམྷི;

སུཏྭཱ ཏཐཱ ཡེ ན ཀརོནྟི བཱལཱ, ཙརནྟི དུཀྑེསུ པུནཔྤུནཾ ཏེ.

༡༣༨.

‘‘‘པཙྩེཀབུདྡྷཱནཾ ¶ སུབྷཱསིཏཱནི, མདྷུཾ ཡཐཱ ཁུདྡམཝསྶཝནྟཾ;

སུཏྭཱ ཏཐཱ ཡེ པཊིཔཏྟིཡུཏྟཱ, བྷཝནྟི ཏེ སཙྩདསཱ སཔཉྙཱ’.

༡༣༩.

‘‘པཙྩེཀབུདྡྷེཧི ¶ ཛིནེཧི བྷཱསིཏཱ, ཀཐཱ [གཱཐཱ (སཱི. སྱཱ.)] ཨུལཱ༹རཱ ཨབྷིནིཀྑམིཏྭཱ;

ཏཱ སཀྱསཱིཧེན ནརུཏྟམེན, པཀཱསིཏཱ དྷམྨཝིཛཱནནཏྠཾ.

༡༤༠.

‘‘ལོཀཱནུཀམྤཱཡ ¶ ཨིམཱནི ཏེསཾ, པཙྩེཀབུདྡྷཱན ཝིཀུབྦིཏཱནི;

སཾཝེགསངྒམཏིཝཌྜྷནཏྠཾ, སཡམྦྷུསཱིཧེན པཀཱསིཏཱནཱི’’ཏི.

པཙྩེཀབུདྡྷཱཔདཱནཾ སམཏྟཾ.

༣-༡. སཱརིཔུཏྟཏྠེརཨཔདཱནཾ

ཨཐ ཐེརཱཔདཱནཾ སུཎཱཐ –

༡༤༡.

‘‘ཧིམཝནྟསྶ ¶ ¶ ཨཝིདཱུརེ, ལམྦཀོ ནཱམ པབྦཏོ;

ཨསྶམོ སུཀཏོ མཡ྄ཧཾ, པཎྞསཱལཱ སུམཱཔིཏཱ.

༡༤༢.

‘‘ཨུཏྟཱནཀཱུལཱ ནདིཀཱ, སུཔཏིཏྠཱ མནོརམཱ;

སུསུདྡྷཔུལི༹ནཱཀིཎྞཱ, ཨཝིདཱུརེ མམསྶམཾ.

༡༤༣.

‘‘ཨསཀྑརཱ ཨཔབྦྷཱརཱ, སཱདུ ཨཔྤཊིགནྡྷིཀཱ;

སནྡཏཱི ནདིཀཱ ཏཏྠ, སོབྷཡནྟཱ མམསྶམཾ.

༡༤༤.

‘‘ཀུམྦྷཱིལཱ མཀརཱ ཙེཏྠ, སུསུམཱརཱ [སུཾསུམཱརཱ (སཱི. སྱཱ. )] ཙ ཀཙྪཔཱ;

ཙརནྟི ནདིཡཱ ཏཏྠ, སོབྷཡནྟཱ མམསྶམཾ.

༡༤༥.

‘‘པཱཋཱིནཱ པཱཝུསཱ མཙྪཱ, བལཛཱ [ཝཛལཱ (སཱི. སྱཱ.) ཛལཛཱ (པཱི.)] མུཉྫརོཧིཏཱ;

ཝགྒལཱ༹ [ཝགྒུལཱ (སཱི.) ཝགྒུལཱ༹ (སྱཱ.) མགྒུརཱ (ཐེརགཱཐཱ)] པཔཏཱཡནྟཱ, སོབྷཡནྟི [པཔཏཱཡནྟི, སོབྷཡནྟཱ (ཀ.)] མམསྶམཾ.

༡༤༦.

‘‘ཨུབྷོ ¶ ཀཱུལེསུ ནདིཡཱ, པུཔྥིནོ ཕལིནོ དུམཱ;

ཨུབྷཏོ ཨབྷིལམྦནྟཱ, སོབྷཡནྟི [ཨབྷིལམྦནྟི སོབྷཡནྟཱ (ཀ.)] མམསྶམཾ.

༡༤༧.

‘‘ཨམྦཱ སཱལཱ ཙ ཏིལཀཱ, པཱཊལཱི སིནྡུཝཱརཀཱ [སིནྡུཝཱརིཀཱ (བཧཱུསུ)];

དིབྦགནྡྷཱ སམྤཝནྟི, པུཔྥིཏཱ མམ ཨསྶམེ.

༡༤༨.

‘‘ཙམྤཀཱ སལ༹ལཱ ནཱིཔཱ [ནིམྦཱ (ཀ.)], ནཱགཔུནྣཱགཀེཏཀཱ;

དིབྦགནྡྷཱ སམྤཝནྟི, པུཔྥིཏཱ མམ ཨསྶམེ.

༡༤༩.

‘‘ཨཏིམུཏྟཱ ¶ ཨསོཀཱ ཙ, བྷགིནཱིམཱལཱ ཙ པུཔྥིཏཱ;

ཨངྐོལཱ བིམྦིཛཱལཱ [བིམྦཛཱལཱ (ཀ.)] ཙ, པུཔྥིཏཱ མམ ཨསྶམེ.

༡༥༠.

‘‘ཀེཏཀཱ ¶ ཀནྡལི [ཀདལཱི (སྱཱ.)] ཙེཝ, གོདྷུཀཱ ཏིཎསཱུལིཀཱ;

དིབྦགནྡྷཾ སམྤཝནྟཱ, སོབྷཡནྟི མམསྶམཾ.

༡༥༡.

‘‘ཀཎིཀཱརཱ ¶ ཀཎྞིཀཱ ཙ, ཨསནཱ ཨཛྫུནཱ བཧཱུ;

དིབྦགནྡྷཾ སམྤཝནྟཱ, སོབྷཡནྟི མམསྶམཾ.

༡༥༢.

‘‘པུནྣཱགཱ གིརིཔུནྣཱགཱ, ཀོཝིལཱ༹རཱ ཙ པུཔྥིཏཱ;

དིབྦགནྡྷཾ སམྤཝནྟཱ, སོབྷཡནྟི མམསྶམཾ.

༡༥༣.

‘‘ཨུདྡྷཱལཀཱ ཙ ཀུཊཛཱ, ཀདམྦཱ ཝཀུལཱ བཧཱུ;

དིབྦགནྡྷཾ སམྤཝནྟཱ, སོབྷཡནྟི མམསྶམཾ.

༡༥༤.

‘‘ཨཱལ༹ཀཱ ཨིསིམུགྒཱ ཙ, ཀདལིམཱཏུལུངྒིཡོ;

གནྡྷོདཀེན སཾཝཌྜྷཱ, ཕལཱནི དྷཱརཡནྟི ཏེ.

༡༥༥.

‘‘ཨཉྙེ པུཔྥནྟི པདུམཱ, ཨཉྙེ ཛཱཡནྟི ཀེསརཱི;

ཨཉྙེ ཨོཔུཔྥཱ པདུམཱ, པུཔྥིཏཱ ཏལཱ༹ཀེ ཏདཱ.

༡༥༦.

‘‘གབྦྷཾ གཎྷནྟི པདུམཱ, ནིདྡྷཱཝནྟི མུལཱལི༹ཡོ;

སིཾགྷཱཊིཔཏྟམཱཀིཎྞཱ, སོབྷནྟི ཏལཱ༹ཀེ ཏདཱ.

༡༥༧.

‘‘ནཡིཏཱ ཨམྦགནྡྷཱི ཙ, ཨུཏྟལཱི བནྡྷུཛཱིཝཀཱ;

དིབྦགནྡྷཱ སམྤཝནྟི, པུཔྥིཏཱ ཏལཱ༹ཀེ ཏདཱ.

༡༥༨.

‘‘པཱཋཱིནཱ པཱཝུསཱ མཙྪཱ, བལཛཱ མུཉྫརོཧིཏཱ;

སཾགུལཱ མགྒུརཱ [མངྒུརཱ (སཱི. ཀ.)] ཙེཝ, ཝསནྟི ཏལཱ༹ཀེ ཏདཱ.

༡༥༩.

‘‘ཀུམྦྷཱིལཱ ¶ ¶ སུསུམཱརཱ ཙ, ཏནྟིགཱཧཱ ཙ རཀྑསཱ;

ཨོགུཧཱ [ཨོགཱཧཱ (སྱཱ.)] ཨཛགརཱ ཙ, ཝསནྟི ཏལཱ༹ཀེ ཏདཱ.

༡༦༠.

‘‘པཱརེཝཏཱ རཝིཧཾསཱ, ཙཀྐཝཱཀཱ ནདཱིཙརཱ;

ཀོཀིལཱ སུཀསཱལི༹ཀཱ, ཨུཔཛཱིཝནྟི ཏཾ སརཾ.

༡༦༡.

‘‘ཀུཀྐུཏྠཀཱ ཀུལཱི༹རཀཱ, ཝནེ པོཀྑརསཱཏཀཱ;

དིནྡིབྷཱ སུཝཔོཏཱ ཙ, ཨུཔཛཱིཝནྟི ཏཾ སརཾ.

༡༦༢.

‘‘ཧཾསཱ ¶ ཀོཉྩཱ མཡཱུརཱ ཙ, ཀོཀིལཱ ཏམྦཙཱུལ༹ཀཱ [ཏམྦཙཱུལི༹ཀཱ (སཱི.)];

པམྤཀཱ ཛཱིཝཾཛཱིཝཱ ཙ, ཨུཔཛཱིཝནྟི ཏཾ སརཾ.

༡༦༣.

‘‘ཀོསིཀཱ པོཊྛསཱིསཱ ཙ, ཀུརརཱ སེནཀཱ བཧཱུ;

མཧཱཀཱལཱ༹ ཙ སཀུཎཱ, ཨུཔཛཱིཝནྟི ཏཾ སརཾ.

༡༦༤.

‘‘པསདཱ ཙ ཝརཱཧཱ ཙ, ཙམརཱ གཎྜཀཱ བཧཱུ [ཝཀཱ བྷེརཎྜཀཱ བཧཱུ (སཱི. སྱཱ.)];

རོཧིཙྩཱ སུཀཔོཏཱ [སུཏྟཔོཏཱ (སྱཱ.)] ཙ, ཨུཔཛཱིཝནྟི ཏཾ སརཾ.

༡༦༥.

‘‘སཱིཧབྱགྒྷཱ ¶ ཙ དཱིཔཱི ཙ, ཨཙྪཀོཀཏརཙྪཀཱ;

ཏིདྷཱ པབྷིནྣམཱཏངྒཱ, ཨུཔཛཱིཝནྟི ཏཾ སརཾ.

༡༦༦.

‘‘ཀིནྣརཱ ཝཱནརཱ ཙེཝ, ཨཐོཔི ཝནཀམྨིཀཱ;

ཙེཏཱ ཙ ལུདྡཀཱ ཙེཝ, ཨུཔཛཱིཝནྟི ཏཾ སརཾ.

༡༦༧.

‘‘ཏིནྡུཀཱནི པིཡཱལཱནི, མདྷུཀཱ ཀཱསུམཱརཡོ [ཀཱསམཱརིཡོ (སྱཱ.)];

དྷུཝཾ ཕལཱནི དྷཱརེནྟི, ཨཝིདཱུརེ མམསྶམཾ.

༡༦༨.

‘‘ཀོསམྦཱ [ཀོསུམྦྷཱ (སཱི. སྱཱ.)] སལ༹ལཱ ནིམྦཱ [སལ༹ལཱ ནཱིཔཱ (སཱི. སྱཱ.) པནསཱ ཨམྦཱ (?)], སཱདུཕལསམཱཡུཏཱ;

དྷུཝཾ ཕལཱནི དྷཱརེནྟི, ཨཝིདཱུརེ མམསྶམཾ.

༡༦༩.

‘‘ཧརཱིཏཀཱ ¶ ཨཱམལཀཱ, ཨམྦཛམྦུཝིབྷཱིཏཀཱ;

ཀོལཱ བྷལླཱཏཀཱ བིལླཱ, ཕལཱནི དྷཱརཡནྟི ཏེ.

༡༧༠.

‘‘ཨཱལུཝཱ ཙ ཀལ༹མྦཱ ཙ, བིལཱ༹ལཱིཏཀྐལཱ༹ནི ཙ;

ཛཱིཝཀཱ སུཏཀཱ ཙེཝ, བཧུཀཱ མམ ཨསྶམེ.

༡༧༡.

‘‘ཨསྶམསྶཱཝིདཱུརམྷི, ཏལཱ༹ཀཱསུཾ སུནིམྨིཏཱ;

ཨཙྪོདཀཱ སཱིཏཛལཱ, སུཔཏིཏྠཱ མནོརམཱ.

༡༧༢.

‘‘པདུམུཔྤལསཉྪནྣཱ ¶ , པུཎྜརཱིཀསམཱཡུཏཱ;

མནྡཱལཀེཧི སཉྪནྣཱ, དིབྦགནྡྷོ པཝཱཡཏི.

༡༧༣.

‘‘ཨེཝཾ སབྦངྒསམྤནྣེ, པུཔྥིཏེ ཕལིཏེ ཝནེ;

སུཀཏེ ཨསྶམེ རམྨེ, ཝིཧརཱམི ཨཧཾ ཏདཱ.

༡༧༤.

‘‘སཱིལཝཱ ཝཏསམྤནྣོ [ཝཏྟསམྤནྣོ (སྱཱ.)], ཛྷཱཡཱི ཛྷཱནརཏོ སདཱ;

པཉྩཱབྷིཉྙཱབལཔྤཏྟོ, སུརུཙི ནཱམ ཏཱཔསོ.

༡༧༥.

‘‘ཙཏུཝཱིསསཧསྶཱནི, སིསྶཱ མཡ྄ཧཾ ཨུཔཊྛཧུ;

སབྦེཝ བྲཱཧྨཎཱ ཨེཏེ, ཛཱཏིམནྟོ ཡསསྶིནོ.

༡༧༦.

‘‘ལཀྑཎེ ཨིཏིཧཱསེ ཙ, སནིགྷཎྚུསཀེཊུབྷེ;

པདཀཱ ཝེཡྻཱཀརཎཱ, སདྷམྨེ པཱརམིཾ གཏཱ.

༡༧༧.

‘‘ཨུཔྤཱཏེསུ ¶ ནིམིཏྟེསུ, ལཀྑཎེསུ ཙ ཀོཝིདཱ;

པཐབྱཱ བྷཱུམནྟལིཀྑེ, མམ སིསྶཱ སུསིཀྑིཏཱ.

༡༧༨.

‘‘ཨཔྤིཙྪཱ ནིཔཀཱ ཨེཏེ, ཨཔྤཱཧཱརཱ ཨལོལུཔཱ;

ལཱབྷཱལཱབྷེན སནྟུཊྛཱ, པརིཝཱརེནྟི མཾ སདཱ.

༡༧༩.

‘‘ཛྷཱཡཱི ¶ ¶ ཛྷཱནརཏཱ དྷཱིརཱ, སནྟཙིཏྟཱ སམཱཧིཏཱ;

ཨཱཀིཉྩཉྙཾ པཏྠཡནྟཱ, པརིཝཱརེནྟི མཾ སདཱ.

༡༨༠.

‘‘ཨབྷིཉྙཱཔཱརམིཔྤཏྟཱ, པེཏྟིཀེ གོཙརེ རཏཱ;

ཨནྟལིཀྑཙརཱ དྷཱིརཱ, པརིཝཱརེནྟི མཾ སདཱ.

༡༨༡.

‘‘སཾཝུཏཱ ཚསུ དྭཱརེསུ, ཨནེཛཱ རཀྑིཏིནྡྲིཡཱ;

ཨསཾསཊྛཱ ཙ ཏེ དྷཱིརཱ, མམ སིསྶཱ དུརཱསདཱ.

༡༨༢.

‘‘པལླངྐེན ནིསཛྫཱཡ, ཋཱནཙངྐམནེན ཙ;

ཝཱིཏིནཱམེནྟི ཏེ རཏྟིཾ, མམ སིསྶཱ དུརཱསདཱ.

༡༨༣.

‘‘རཛནཱིཡེ ན རཛྫནྟི, དུསྶནཱིཡེ ན དུསྶརེ;

མོཧནཱིཡེ ན མུཡ྄ཧནྟི, མམ སིསྶཱ དུརཱསདཱ.

༡༨༤.

‘‘ཨིདྡྷིཾ ཝཱིམཾསམཱནཱ ཏེ, ཝཏྟནྟི ནིཙྩཀཱལིཀཾ;

པཐཝིཾ [པཋཝིཾ (སཱི. སྱཱ.)] ཏེ པཀམྤེནྟི, སཱརམྦྷེན དུརཱསདཱ.

༡༨༥.

‘‘ཀཱིལ༹མཱནཱ ཙ ཏེ སིསྶཱ, ཀཱིལ༹ནྟི ཛྷཱནཀཱིལི༹ཏཾ;

ཛམྦུཏོ ཕལམཱནེནྟི, མམ སིསྶཱ དུརཱསདཱ.

༡༨༦.

‘‘ཨཉྙེ ¶ གཙྪནྟི གོཡཱནཾ, ཨཉྙེ པུབྦཝིདེཧཀཾ [པུབྦཝིདེཧནཾ (སྱཱ. ཀ.)];

ཨཉྙེ ཙ ཨུཏྟརཀུརུཾ, ཨེསནཱཡ དུརཱསདཱ.

༡༨༧.

‘‘པུརཏོ པེསེནྟི ཁཱརིཾ, པཙྪཏོ ཙ ཝཛནྟི ཏེ;

ཙཏུཝཱིསསཧསྶེཧི, ཚཱདིཏཾ ཧོཏི ཨམྦརཾ.

༡༨༨.

‘‘ཨགྒིཔཱཀཱི ཨནགྒཱི ཙ, དནྟོདུཀྑལིཀཱཔི ཙ;

ཨསྨེན ཀོཊྚིཏཱ ཀེཙི, པཝཏྟཕལབྷོཛནཱ.

༡༨༩.

‘‘ཨུདཀོརོཧཎཱ ¶ ཀེཙི, སཱཡཾ པཱཏོ སུཙཱིརཏཱ;

ཏོཡཱབྷིསེཙནཀརཱ, མམ སིསྶཱ དུརཱསདཱ.

༡༩༠.

‘‘པརཱུལ༹ྷཀཙྪནཁལོམཱ, པངྐདནྟཱ རཛསྶིརཱ;

གནྡྷིཏཱ སཱིལགནྡྷེན, མམ སིསྶཱ དུརཱསདཱ.

༡༩༡.

‘‘པཱཏོཝ ¶ སནྣིཔཏིཏྭཱ, ཛཊིལཱ ཨུགྒཏཱཔནཱ;

ལཱབྷཱལཱབྷཾ པཀིཏྟེཏྭཱ, གཙྪནྟི ཨམྦརེ ཏདཱ.

༡༩༢.

‘‘ཨེཏེསཾ པཀྐམནྟཱནཾ, མཧཱསདྡོ པཝཏྟཏི;

ཨཛིནཙམྨསདྡེན, མུདིཏཱ ཧོནྟི དེཝཏཱ.

༡༩༣.

‘‘དིསོདིསཾ ¶ པཀྐམནྟི, ཨནྟལིཀྑཙརཱ ཨིསཱི;

སཀེ བལེནུཔཏྠདྡྷཱ, ཏེ གཙྪནྟི ཡདིཙྪཀཾ.

༡༩༤.

‘‘པཐཝཱིཀམྤཀཱ ཨེཏེ, སབྦེཝ ནབྷཙཱརིནོ;

ཨུགྒཏེཛཱ དུཔྤསཧཱ, སཱགརོཝ ཨཁོབྷིཡཱ.

༡༩༥.

‘‘ཋཱནཙངྐམིནོ ཀེཙི, ཀེཙི ནེསཛྫིཀཱ ཨིསཱི;

པཝཏྟབྷོཛནཱ ཀེཙི, མམ སིསྶཱ དུརཱསདཱ.

༡༩༦.

‘‘མེཏྟཱཝིཧཱརིནོ ཨེཏེ, ཧིཏེསཱི སབྦཔཱཎིནཾ;

ཨནཏྟུཀྐཾསཀཱ སབྦེ, ན ཏེ ཝམྦྷེནྟི ཀསྶཙི.

༡༩༧.

‘‘སཱིཧརཱཛཱཝསམྦྷཱིཏཱ, གཛརཱཛཱཝ ཐཱམཝཱ;

དུརཱསདཱ བྱགྒྷཱརིཝ, ཨཱགཙྪནྟི མམནྟིཀེ.

༡༩༨.

‘‘ཝིཛྫཱདྷརཱ དེཝཏཱ ཙ, ནཱགགནྡྷབྦརཀྑསཱ;

ཀུམྦྷཎྜཱ དཱནཝཱ གརུལཱ༹, ཨུཔཛཱིཝནྟི ཏཾ སརཾ.

༡༩༩.

‘‘ཏེ ¶ ¶ ཛཊཱཁཱརིབྷརིཏཱ, ཨཛིནུཏྟརཝཱསནཱ;

ཨནྟལིཀྑཙརཱ སབྦེ, ཨུཔཛཱིཝནྟི ཏཾ སརཾ.

༢༠༠.

‘‘སདཱནུཙྪཝིཀཱ [ཏདཱནུཙྪཝིཀཱ (སྱཱ. ཀ.)] ཨེཏེ, ཨཉྙམཉྙཾ སགཱརཝཱ;

ཙཏུབྦཱིསསཧསྶཱནཾ, ཁིཔིཏསདྡོ ན ཝིཛྫཏི.

༢༠༡.

‘‘པཱདེ པཱདཾ ནིཀྑིཔནྟཱ, ཨཔྤསདྡཱ སུསཾཝུཏཱ;

ཨུཔསངྐམྨ སབྦེཝ [སབྦེ ཏེ (སྱཱ.)], སིརསཱ ཝནྡརེ མམཾ.

༢༠༢.

‘‘ཏེཧི སིསྶེཧི པརིཝུཏོ, སནྟེཧི ཙ ཏཔསྶིབྷི;

ཝསཱམི ཨསྶམེ ཏཏྠ, ཛྷཱཡཱི ཛྷཱནརཏོ ཨཧཾ.

༢༠༣.

‘‘ཨིསཱིནཾ སཱིལགནྡྷེན, པུཔྥགནྡྷེན ཙཱུབྷཡཾ;

ཕལཱིནཾ ཕལགནྡྷེན, གནྡྷིཏོ ཧོཏི ཨསྶམོ.

༢༠༤.

‘‘རཏྟིནྡིཝཾ ན ཛཱནཱམི, ཨརཏི མེ ན ཝིཛྫཏི;

སཀེ སིསྶེ ཨོཝདནྟོ, བྷིཡྻོ ཧཱསཾ ལབྷཱམཧཾ.

༢༠༥.

‘‘པུཔྥཱནཾ པུཔྥམཱནཱནཾ, ཕལཱནཉྩ ཝིཔཙྩཏཾ;

དིབྦགནྡྷཱ པཝཱཡནྟི, སོབྷཡནྟཱ མམསྶམཾ.

༢༠༦.

‘‘སམཱདྷིམྷཱ ¶ ཝུཊྛཧིཏྭཱ, ཨཱཏཱཔཱི ནིཔཀོ ཨཧཾ;

ཁཱརིབྷཱརཾ གཧེཏྭཱན, ཝནཾ ཨཛ྄ཛྷོགཧིཾ ཨཧཾ.

༢༠༧.

‘‘ཨུཔྤཱཏེ ¶ སུཔིནེ ཙཱཔི, ལཀྑཎེསུ སུསིཀྑིཏོ;

པཝཏྟམཱནཾ [ཝཏྟམཱནཾ (ཀ.)] མནྟཔདཾ, དྷཱརཡཱམི ཨཧཾ ཏདཱ.

༢༠༨.

‘‘ཨནོམདསྶཱི བྷགཝཱ, ལོཀཛེཊྛོ ནརཱསབྷོ;

ཝིཝེཀཀཱམོ སམྦུདྡྷོ, ཧིམཝནྟམུཔཱགམི.

༢༠༩.

‘‘ཨཛ྄ཛྷོགཱཧེཏྭཱ ¶ ཧིམཝནྟཾ, ཨགྒོ ཀཱརུཎིཀོ མུནི;

པལླངྐཾ ཨཱབྷུཛིཏྭཱན, ནིསཱིདི པུརིསུཏྟམོ.

༢༡༠.

‘‘ཏམདྡསཱཧཾ སམྦུདྡྷཾ, སཔྤབྷཱསཾ མནོརམཾ;

ཨིནྡཱིཝརཾཝ ཛལིཏཾ, ཨཱདིཏྟཾཝ ཧུཏཱསནཾ.

༢༡༡.

‘‘ཛལནྟཾ དཱིཔརུཀྑཾཝ, ཝིཛྫུཏཾ གགཎེ ཡཐཱ;

སུཕུལླཾ སཱལརཱཛཾཝ, ཨདྡསཾ ལོཀནཱཡཀཾ.

༢༡༢.

‘‘ཨཡཾ ¶ ནཱགོ མཧཱཝཱིརོ, དུཀྑསྶནྟཀརོ མུནི;

ཨིམཾ དསྶནམཱགམྨ, སབྦདུཀྑཱ པམུཙྩརེ.

༢༡༣.

‘‘དིསྭཱནཱཧཾ དེཝདེཝཾ, ལཀྑཎཾ ཨུཔདྷཱརཡིཾ;

བུདྡྷོ ནུ ཁོ ན ཝཱ བུདྡྷོ, ཧནྡ པསྶཱམི ཙཀྑུམཾ.

༢༡༤.

‘‘སཧསྶཱརཱནི ཙཀྐཱནི, དིསྶནྟི ཙརཎུཏྟམེ;

ལཀྑཎཱནིསྶ དིསྭཱན, ནིཊྛཾ གཙྪིཾ ཏཐཱགཏེ.

༢༡༥.

‘‘སམྨཛྫནིཾ གཧེཏྭཱན, སམྨཛྫིཏྭཱནཧཾ ཏདཱ;

ཨཐ པུཔྥེ སམཱནེཏྭཱ, བུདྡྷསེཊྛཾ ཨཔཱུཛཡིཾ.

༢༡༦.

‘‘པཱུཛཡིཏྭཱན ཏཾ བུདྡྷཾ, ཨོགྷཏིཎྞམནཱསཝཾ;

ཨེཀཾསཾ ཨཛིནཾ ཀཏྭཱ, ནམསྶིཾ ལོཀནཱཡཀཾ.

༢༡༧.

‘‘ཡེན ཉཱཎེན སམྦུདྡྷོ, ཝིཧརཏི [ཝིཧརིཏྠ (སཱི.), ཝིཧརེཏི (ཀ.)] ཨནཱསཝོ;

ཏཾ ཉཱཎཾ ཀིཏྟཡིསྶཱམི, སུཎཱཐ མམ བྷཱསཏོ.

༢༡༨.

‘‘‘སམུདྡྷརསིམཾ [སམུདྡྷརཡིམཾ (སྱཱ.)] ལོཀཾ, སཡམྦྷཱུ ཨམིཏོདཡ;

ཏཝ དསྶནམཱགམྨ, ཀངྑཱསོཏཾ ཏརནྟི ཏེ.

༢༡༩.

‘‘‘ཏུཝཾ ¶ སཏྠཱ ཙ ཀེཏུ ཙ, དྷཛོ ཡཱུཔོ ཙ པཱཎིནཾ;

པརཱཡཎོ [པརཱཡནོ (སྱཱ. ཀ.)] པཏིཊྛཱ ཙ, དཱིཔོ ཙ དྭིཔདུཏྟམོ.

༢༢༠.

‘‘‘སཀྐཱ སམུདྡེ ཨུདཀཾ, པམེཏུཾ ཨཱལ༹ྷཀེན ཝཱ;

ན ཏྭེཝ ཏཝ སབྦཉྙུ, ཉཱཎཾ སཀྐཱ པམེཏཝེ.

༢༢༡.

‘‘‘དྷཱརེཏུཾ ¶ པཐཝིཾ སཀྐཱ, ཋཔེཏྭཱ ཏུལམཎྜལེ;

ན ཏྭེཝ ཏཝ སབྦཉྙུ, ཉཱཎཾ སཀྐཱ དྷརེཏཝེ.

༢༢༢.

‘‘‘ཨཱཀཱསོ ¶ མིནིཏུཾ སཀྐཱ, རཛྫུཡཱ ཨངྒུལེན ཝཱ;

ན ཏྭེཝ ཏཝ སབྦཉྙུ, ཉཱཎཾ སཀྐཱ པམེཏཝེ.

༢༢༣.

‘‘‘མཧཱསམུདྡེ ཨུདཀཾ, པཐཝཱི ཙཱཁིལཱ ཛཊཾ [པཐཝིཾ ཙཱཁིལཉྫཧེ (སྱཱ.)];

བུདྡྷཉཱཎཾ ཨུཔཱདཱཡ, ཨུཔམཱཏོ ན ཡུཛྫརེ.

༢༢༤.

‘‘‘སདེཝཀསྶ ལོཀསྶ, ཙིཏྟཾ ཡེསཾ པཝཏྟཏི;

ཨནྟོཛཱལཱིཀཏཱ [ཨནྟོཛཱལགཏཱ (པཱི.)] ཨེཏེ, ཏཝ ཉཱཎམྷི ཙཀྑུམ.

༢༢༥.

‘‘‘ཡེན ¶ ཉཱཎེན པཏྟོསི, ཀེཝལཾ བོདྷིམུཏྟམཾ;

ཏེན ཉཱཎེན སབྦཉྙུ, མདྡསཱི པརཏིཏྠིཡེ’.

༢༢༦.

‘‘ཨིམཱ གཱཐཱ ཐཝིཏྭཱན, སུརུཙི ནཱམ ཏཱཔསོ;

ཨཛིནཾ པཏྠརིཏྭཱན, པཐཝིཡཾ ནིསཱིདི སོ.

༢༢༧.

‘‘ཙུལླཱསཱིཏིསཧསྶཱནི, ཨཛ྄ཛྷོགཱལ༹ྷོ མཧཎྞཝེ;

ཨཙྩུགཏོ ཏཱཝདེཝ, གིརིརཱཛཱ པཝུཙྩཏི.

༢༢༨.

‘‘ཏཱཝ ཨཙྩུགྒཏོ ནེརུ, ཨཱཡཏོ ཝིཏྠཏོ ཙ སོ;

ཙུཎྞིཏོ ཨཎུབྷེདེན, ཀོཊིསཏསཧསྶསོ [སཧསྶིཡོ (སྱཱ. ཀ.)].

༢༢༩.

‘‘ལཀྑེ ¶ ཋཔིཡམཱནམྷི, པརིཀྑཡམགཙྪཐ;

ན ཏྭེཝ ཏཝ སབྦཉྙུ, ཉཱཎཾ སཀྐཱ པམེཏཝེ.

༢༣༠.

‘‘སུཁུམཙྪིཀེན ཛཱལེན, ཨུདཀཾ ཡོ པརིཀྑིཔེ;

ཡེ ཀེཙི ཨུདཀེ པཱཎཱ, ཨནྟོཛཱལཱིཀཏཱ སིཡུཾ.

༢༣༡.

‘‘ཏཐེཝ ཧི མཧཱཝཱིར, ཡེ ཀེཙི པུཐུཏིཏྠིཡཱ;

དིཊྛིགཧནཔཀྑནྡཱ [པཀྑནྟཱ (སཱི. སྱཱ.)], པརཱམཱསེན མོཧིཏཱ.

༢༣༢.

‘‘ཏཝ སུདྡྷེན ཉཱཎེན, ཨནཱཝརཎདསྶིནཱ;

ཨནྟོཛཱལཱིཀཏཱ ཨེཏེ, ཉཱཎཾ ཏེ ནཱཏིཝཏྟརེ.

༢༣༣.

‘‘བྷགཝཱ ཏམྷི སམཡེ, ཨནོམདསྶཱི མཧཱཡསོ;

ཝུཊྛཧིཏྭཱ སམཱདྷིམྷཱ, དིསཾ ཨོལོཀཡཱི ཛིནོ.

༢༣༤.

‘‘ཨནོམདསྶིམུནིནོ, ནིསབྷོ ནཱམ སཱཝཀོ;

པརིཝུཏོ སཏསཧསྶེཧི, སནྟཙིཏྟེཧི ཏཱདིབྷི.

༢༣༥.

‘‘ཁཱིཎཱསཝེཧི ¶ སུདྡྷེཧི, ཚལ༹བྷིཉྙེཧི ཛྷཱཡིབྷི;

ཙིཏྟམཉྙཱཡ བུདྡྷསྶ, ཨུཔེསི ལོཀནཱཡཀཾ.

༢༣༦.

‘‘ཨནྟལིཀྑེ ཋིཏཱ ཏཏྠ, པདཀྑིཎམཀཾསུ ཏེ;

ནམསྶནྟཱ པཉྫལིཀཱ, ཨོཏརུཾ [ཨོརུཧུཾ (སྱཱ.)] བུདྡྷསནྟིཀེ.

༢༣༧.

‘‘ཨནོམདསྶཱི བྷགཝཱ, ལོཀཛེཊྛོ ནརཱསབྷོ;

བྷིཀྑུསངྒྷེ ནིསིདིཏྭཱ, སིཏཾ པཱཏུཀརཱི ཛིནོ.

༢༣༨.

‘‘ཝརུཎོ ¶ ནཱམུཔཊྛཱཀོ, ཨནོམདསྶིསྶ སཏྠུནོ;

ཨེཀཾསཾ ཙཱིཝརཾ ཀཏྭཱ, ཨཔུཙྪི ལོཀནཱཡཀཾ.

༢༣༩.

‘‘‘ཀོ ¶ ¶ ནུ ཁོ བྷགཝཱ ཧེཏུ, སིཏཀམྨསྶ སཏྠུནོ;

ན ཧི བུདྡྷཱ ཨཧེཏཱུཧི, སིཏཾ པཱཏུཀརོནྟི ཏེ’.

༢༤༠.

‘‘ཨནོམདསྶཱི བྷགཝཱ, ལོཀཛེཊྛོ ནརཱསབྷོ;

བྷིཀྑུམཛ྄ཛྷེ ནིསཱིདིཏྭཱ, ཨིམཾ གཱཐཾ ཨབྷཱསཐ.

༢༤༡.

‘‘‘ཡོ མཾ པུཔྥེན པཱུཛེསི, ཉཱཎཉྩཱཔི ཨནུཏྠཝི;

ཏམཧཾ ཀིཏྟཡིསྶཱམི, སུཎོཐ མམ བྷཱསཏོ.

༢༤༢.

‘‘‘བུདྡྷསྶ གིརམཉྙཱཡ, སབྦེ དེཝཱ སམཱགཏཱ;

སདྡྷམྨཾ སོཏུཀཱམཱ ཏེ, སམྦུདྡྷམུཔསངྐམུཾ.

༢༤༣.

‘‘‘དསསུ ལོཀདྷཱཏཱུསུ, དེཝཀཱཡཱ མཧིདྡྷིཀཱ;

སདྡྷམྨཾ སོཏུཀཱམཱ ཏེ, སམྦུདྡྷམུཔསངྐམུཾ.

༢༤༤.

‘‘‘ཧཏྠཱི ཨསྶཱ རཐཱ པཏྟཱི, སེནཱ ཙ ཙཏུརངྒིནཱི;

པརིཝཱརེསྶནྟིམཾ ནིཙྩཾ, བུདྡྷཔཱུཛཱཡིདཾ ཕལཾ.

༢༤༥.

‘‘‘སཊྛིཏཱུརིཡསཧསྶཱནི, བྷེརིཡོ སམལངྐཏཱ;

ཨུཔཊྛིསྶནྟིམཾ ནིཙྩཾ, བུདྡྷཔཱུཛཱཡིདཾ ཕལཾ.

༢༤༦.

‘‘‘སོལ༹སིཏྠིསཧསྶཱནི, ནཱརིཡོ སམལངྐཏཱ;

ཝིཙིཏྟཝཏྠཱབྷརཎཱ, ཨཱམུཏྟམཎིཀུཎྜལཱ.

༢༤༧.

‘‘‘ཨལཱ༹རཔམྷཱ ཧསུལཱ, སུསཉྙཱ ཏནུམཛ྄ཛྷིམཱ;

པརིཝཱརེསྶནྟིམཾ ནིཙྩཾ, བུདྡྷཔཱུཛཱཡིདཾ ཕལཾ.

༢༤༨.

‘‘‘ཀཔྤསཏསཧསྶཱནི, དེཝལོཀེ རམིསྶཏི;

སཧསྶཀྑཏྟུཾ ཙཀྐཝཏྟཱི, རཱཛཱ རཊྛེ བྷཝིསྶཏི.

༢༤༩.

‘‘‘སཧསྶཀྑཏྟུཾ ¶ ¶ དེཝིནྡོ, དེཝརཛྫཾ ཀརིསྶཏི;

པདེསརཛྫཾ ཝིཔུལཾ, གཎནཱཏོ ཨསངྑིཡཾ [ཨསངྑཡཾ (སྱཱ. ཀ.) ཨེཝམུཔརིཔི].

༢༥༠.

‘‘‘པཙྪིམེ བྷཝསམྤཏྟེ [པཙྪིམབྷཝེ སམྤཏྟེ (སཱི.)], མནུསྶཏྟཾ གམིསྶཏི;

བྲཱཧྨཎཱི སཱརིཡཱ ནཱམ, དྷཱརཡིསྶཏི ཀུཙྪིནཱ.

༢༥༡.

‘‘‘མཱཏུཡཱ ¶ ནཱམགོཏྟེན, པཉྙཱཡིསྶཏིཡཾ ནརོ;

སཱརིཔུཏྟོཏི ནཱམེན, ཏིཀྑཔཉྙོ བྷཝིསྶཏི.

༢༥༢.

‘‘‘ཨསཱིཏིཀོཊཱི ཚཌྜེཏྭཱ, པབྦཛིསྶཏིཀིཉྩནོ;

གཝེསནྟོ སནྟིཔདཾ, ཙརིསྶཏི མཧིཾ ཨིམཾ.

༢༥༣.

‘‘‘ཨཔྤརིམེཡྻེ ཨིཏོ ཀཔྤེ, ཨོཀྐཱཀཀུལསམྦྷཝོ;

གོཏམོ ནཱམ གོཏྟེན, སཏྠཱ ལོཀེ བྷཝིསྶཏི.

༢༥༤.

‘‘‘ཏསྶ དྷམྨེསུ དཱཡཱདོ, ཨོརསོ དྷམྨནིམྨིཏོ;

སཱརིཔུཏྟོཏི ནཱམེན, ཧེསྶཏི ཨགྒསཱཝཀོ.

༢༥༥.

‘‘‘ཨཡཾ ¶ བྷཱགཱིརཐཱི [བྷཱགཱིརསཱི (སྱཱ. ཀ.)] གངྒཱ, ཧིམཝནྟཱ པབྷཱཝིཏཱ;

མཧཱསམུདྡམཔྤེཏི, ཏཔྤཡནྟཱི མཧོདདྷིཾ [མཧོདདྷཱི (?) གངྒཱདིམཧཱནདིཡོཏི ཨཏྠོ].

༢༥༦.

‘‘‘ཏཐེཝཱཡཾ སཱརིཔུཏྟོ, སཀེ ཏཱིསུ ཝིསཱརདོ;

པཉྙཱཡ པཱརམིཾ གནྟྭཱ, ཏཔྤཡིསྶཏི པཱཎིནེ [པཱཎིནོ (སཱི. སྱཱ.)].

༢༥༧.

‘‘‘ཧིམཝནྟམུཔཱདཱཡ, སཱགརཉྩ མཧོདདྷིཾ;

ཨེཏྠནྟརེ ཡཾ པུལིནཾ, གཎནཱཏོ ཨསངྑིཡཾ.

༢༥༨.

‘‘‘ཏམྤི སཀྐཱ ཨསེསེན, སངྑཱཏུཾ གཎནཱ ཡཐཱ;

ན ཏྭེཝ སཱརིཔུཏྟསྶ, པཉྙཱཡནྟོ བྷཝིསྶཏི.

༢༥༩.

‘‘‘ལཀྑེ ¶ ཋཔིཡམཱནམྷི, ཁཱིཡེ གངྒཱཡ ཝཱལུཀཱ;

ན ཏྭེཝ སཱརིཔུཏྟསྶ, པཉྙཱཡནྟོ བྷཝིསྶཏི.

༢༦༠.

‘‘‘མཧཱསམུདྡེ ཨཱུམིཡོ, གཎནཱཏོ ཨསངྑིཡཱ;

ཏཐེཝ སཱརིཔུཏྟསྶ, པཉྙཱཡནྟོ ན ཧེསྶཏི.

༢༦༡.

‘‘‘ཨཱརཱདྷཡིཏྭཱ སམྦུདྡྷཾ, གོཏམཾ སཀྱཔུངྒཝཾ;

པཉྙཱཡ པཱརམིཾ གནྟྭཱ, ཧེསྶཏི ཨགྒསཱཝཀོ.

༢༦༢.

‘‘‘པཝཏྟིཏཾ དྷམྨཙཀྐཾ, སཀྱཔུཏྟེན ཏཱདིནཱ;

ཨནུཝཏྟེསྶཏི སམྨཱ, ཝསྶེནྟོ དྷམྨཝུཊྛིཡོ.

༢༦༣.

‘‘‘སབྦམེཏཾ ¶ ཨབྷིཉྙཱཡ, གོཏམོ སཀྱཔུངྒཝོ;

བྷིཀྑུསངྒྷེ ནིསཱིདིཏྭཱ, ཨགྒཊྛཱནེ ཋཔེསྶཏི’.

༢༦༤.

‘‘ཨཧོ ¶ མེ སུཀཏཾ ཀམྨཾ, ཨནོམདསྶིསྶ སཏྠུནོ;

ཡསྶཱཧཾ ཀཱརཾ [ཡསྶཱདྷིཀཱརཾ (སྱཱ.)] ཀཏྭཱན, སབྦཏྠ པཱརམིཾ གཏོ.

༢༦༥.

‘‘ཨཔརིམེཡྻེ ཀཏཾ ཀམྨཾ, ཕལཾ དསྶེསི མེ ཨིདྷ;

སུམུཏྟོ སརཝེགོཝ, ཀིལེསེ ཛྷཱཔཡིཾ ཨཧཾ.

༢༦༦.

‘‘ཨསངྑཏཾ གཝེསནྟོ, ནིབྦཱནཾ ཨཙལཾ པདཾ;

ཝིཙིནཾ ཏིཏྠིཡེ སབྦེ, ཨེསཱཧཾ སཾསརིཾ བྷཝེ.

༢༦༧.

‘‘ཡཐཱཔི བྱཱདྷིཏོ པོསོ, པརིཡེསེཡྻ ཨོསདྷཾ;

ཝིཙིནེཡྻ ཝནཾ [དྷནཾ (སྱཱ. ཀ.)] སབྦཾ, བྱཱདྷིཏོ པརིམུཏྟིཡཱ.

༢༦༨.

‘‘ཨསངྑཏཾ གཝེསནྟོ, ནིབྦཱནཾ ཨམཏཾ པདཾ;

ཨབྦོཀིཎྞཾ [ཨབྦོཙྪིནྣཾ (ཨཊྛ.)] པཉྩསཏཾ, པབྦཛིཾ ཨིསིཔབྦཛཾ.

༢༦༩.

‘‘ཛཊཱབྷཱརེན ¶ བྷརིཏོ, ཨཛིནུཏྟརནིཝཱསནོ;

ཨབྷིཉྙཱཔཱརམིཾ གནྟྭཱ, བྲཧྨལོཀཾ ཨགཙྪིཧཾ.

༢༧༠.

‘‘ནཏྠི ¶ བཱཧིརཀེ སུདྡྷི, ཋཔེཏྭཱ ཛིནསཱསནཾ;

ཡེ ཀེཙི བུདྡྷིམཱ སཏྟཱ, སུཛ྄ཛྷནྟི ཛིནསཱསནེ.

༢༧༡.

‘‘ཨཏྟཀཱརམཡཾ [ཨཏྠཀཱརམཡཾ (ཀ.)] ཨེཏཾ, ནཡིདཾ ཨིཏིཧཱིཏིཧཾ;

ཨསངྑཏཾ གཝེསནྟོ, ཀུཏིཏྠེ [ཀུཏིཏྠཾ (སཱི. སྱཱ.)] སཉྩརིཾ ཨཧཾ.

༢༧༢.

‘‘ཡཐཱ སཱརཏྠིཀོ པོསོ, ཀདལིཾ ཚེཏྭཱན ཕཱལཡེ;

ན ཏཏྠ སཱརཾ ཝིནྡེཡྻ, སཱརེན རིཏྟཀོ ཧི སོ.

༢༧༣.

‘‘ཏཐེཝ ཏིཏྠིཡཱ ལོཀེ, ནཱནཱདིཊྛཱི བཧུཛྫནཱ;

ཨསངྑཏེན རིཏྟཱསེ, སཱརེན ཀདལཱི ཡཐཱ.

༢༧༤.

‘‘པཙྪིམེ བྷཝསམྤཏྟེ, བྲཧྨབནྡྷུ ཨཧོསཧཾ;

མཧཱབྷོགཾ ཚཌྜེཏྭཱན, པབྦཛིཾ ཨནགཱརིཡཾ.

པཋམབྷཱཎཝཱརཾ.

༢༧༥.

‘‘ཨཛ྄ཛྷཱཡཀོ མནྟདྷརོ, ཏིཎྞཾ ཝེདཱན པཱརགཱུ;

བྲཱཧྨཎོ སཉྩཡོ [སཉྫཡོ (སཱི. སྱཱ. པཱི.)] ནཱམ, ཏསྶ མཱུལེ ཝསཱམཧཾ.

༢༧༦.

‘‘སཱཝཀོ ¶ ཏེ མཧཱཝཱིར, ཨསྶཛི ནཱམ བྲཱཧྨཎོ;

དུརཱསདོ ཨུགྒཏེཛོ, པིཎྜཱཡ ཙརཏཱི ཏདཱ.

༢༧༧.

‘‘ཏམདྡསཱསིཾ ¶ སཔྤཉྙཾ, མུནིཾ མོནེ སམཱཧིཏཾ;

སནྟཙིཏྟཾ མཧཱནཱགཾ, སུཕུལླཾ པདུམཾ ཡཐཱ.

༢༧༨.

‘‘དིསྭཱ ¶ མེ ཙིཏྟམུཔྤཛྫི, སུདནྟཾ སུདྡྷམཱནསཾ;

ཨུསབྷཾ པཝརཾ ཝཱིརཾ, ཨརཧཱཡཾ བྷཝིསྶཏི.

༢༧༩.

‘‘པཱསཱདིཀོ ཨིརིཡཏི, ཨབྷིརཱུཔོ སུསཾཝུཏོ;

ཨུཏྟམེ དམཐེ དནྟོ, ཨམཏདསྶཱི བྷཝིསྶཏི.

༢༨༠.

‘‘ཡཾནཱུནཱཧཾ ཨུཏྟམཏྠཾ, པུཙྪེཡྻཾ ཏུཊྛམཱནསཾ;

སོ མེ པུཊྛོ ཀཐེསྶཏི, པཊིཔུཙྪཱམཧཾ ཏདཱ.

༢༨༡.

‘‘པིཎྜཔཱཏཾ [པིཎྜཙཱརཾ (སྱཱ.)] ཙརནྟསྶ, པཙྪཏོ ཨགམཱསཧཾ;

ཨོཀཱསཾ པཊིམཱནེནྟོ, པུཙྪིཏུཾ ཨམཏཾ པདཾ.

༢༨༢.

‘‘ཝཱིཐིནྟརེ ཨནུཔྤཏྟཾ, ཨུཔགནྟྭཱན པུཙྪཧཾ;

‘ཀཐཾ གོཏྟོསི ཏྭཾ ཝཱིར, ཀསྶ སིསྶོསི མཱརིས’.

༢༨༣.

‘‘སོ མེ པུཊྛོ ཝིཡཱཀཱསི, ཨསམྦྷཱིཏོཝ ཀེསརཱི;

‘བུདྡྷོ ལོཀེ སམུཔྤནྣོ, ཏསྶ སིསྶོམྷི ཨཱཝུསོ’.

༢༨༤.

‘‘‘ཀཱིདིསཾ ¶ ཏེ མཧཱཝཱིར, ཨནུཛཱཏ མཧཱཡས;

བུདྡྷསྶ སཱསནཾ དྷམྨཾ, སཱདྷུ མེ ཀཐཡསྶུ བྷོ’.

༢༨༥.

‘‘སོ མེ པུཊྛོ ཀཐཱི སབྦཾ, གམྦྷཱིརཾ ནིཔུཎཾ པདཾ;

ཏཎྷཱསལླསྶ ཧནྟཱརཾ, སབྦདུཀྑཱཔནཱུདནཾ.

༢༨༦.

‘‘‘ཡེ དྷམྨཱ ཧེཏུཔྤབྷཝཱ, ཏེསཾ ཧེཏུཾ ཏཐཱགཏོ ཨཱཧ;

ཏེསཉྩ ཡོ ནིརོདྷོ, ཨེཝཾ ཝཱདཱི མཧཱསམཎོ’.

༢༨༧.

‘‘སོཧཾ ཝིསྶཛྫིཏེ པཉྷེ, པཋམཾ ཕལམཛ྄ཛྷགཾ;

ཝིརཛོ ཝིམལོ ཨཱསིཾ, སུཏྭཱན ཛིནསཱསནཾ.

༢༨༨.

‘‘སུཏྭཱན ¶ མུནིནོ ཝཱཀྱཾ, པསྶིཏྭཱ དྷམྨམུཏྟམཾ;

པརིཡོགཱལ༹ྷསདྡྷམྨོ, ཨིམཾ གཱཐམབྷཱསཧཾ.

༢༨༩.

‘‘‘ཨེསེཝ ¶ དྷམྨོ ཡདི ཏཱཝདེཝ, པཙྩབྱཐཔདམསོཀཾ;

ཨདིཊྛཾ ཨབྦྷཏཱིཏཾ, བཧུཀེཧི ཀཔྤནཧུཏེཧི’.

༢༩༠.

‘‘སྭཱཧཾ དྷམྨཾ གཝེསནྟོ, ཀུཏིཏྠེ སཉྩརིཾ ཨཧཾ;

སོ མེ ཨཏྠོ ཨནུཔྤཏྟོ, ཀཱལོ མེ ནཔྤམཛྫིཏུཾ.

༢༩༡.

‘‘ཏོསིཏོཧཾ ¶ ཨསྶཛིནཱ, པཏྭཱན ཨཙལཾ པདཾ;

སཧཱཡཀཾ གཝེསནྟོ, ཨསྶམཾ ཨགམཱསཧཾ.

༢༩༢.

‘‘དཱུརཏོཝ མམཾ དིསྭཱ, སཧཱཡོ མེ སུསིཀྑིཏོ;

ཨིརིཡཱཔཐསམྤནྣོ [ཨིརིཡཱཔཐཾ མམཾ དིསྭཱ (ཀ.)], ཨིདཾ ཝཙནམབྲཝི.

༢༩༣.

‘‘‘པསནྣམུཁནེཏྟོསི, མུནིབྷཱཝོཝ དིསྶཏི;

ཨམཏཱདྷིགཏོ ཀཙྩི, ནིབྦཱནམཙྩུཏཾ པདཾ.

༢༩༤.

‘‘‘སུབྷཱནུརཱུཔོ ཨཱཡཱསི, ཨཱནེཉྫཀཱརིཏོ ཝིཡ;

དནྟོཝ དནྟདམཐོ [དནྟོཝུཏྟམདམཐོ (སཱི.) དནྟོཝ དནྟ དམཐེ (སྱཱ.)], ཨུཔསནྟོསི བྲཱཧྨཎ.

༢༩༥.

‘‘‘ཨམཏཾ མཡཱདྷིགཏཾ, སོཀསལླཱཔནཱུདནཾ;

ཏྭམྤི ཏཾ ཨདྷིགཙྪེསི [ཨདྷིགཙྪཱཧི (སཱི.), ཨདྷིགཙྪེཧི (སྱཱ.), ཨདྷིགཏོསི (?)], གཙྪཱམ བུདྡྷསནྟིཀཾ’.

༢༩༦.

‘‘སཱདྷཱུཏི སོ པཊིསྶུཏྭཱ, སཧཱཡོ མེ སུསིཀྑིཏོ;

ཧཏྠེན ཧཏྠཾ གཎྷིཏྭཱ, ཨུཔགམྨ [ཨུཔཱགམི (སཱི.), ཨུཔཱགམྨ (སྱཱ.)] ཏཝནྟིཀཾ.

༢༩༧.

‘‘ཨུབྷོཔི པབྦཛིསྶཱམ, སཀྱཔུཏྟ ཏཝནྟིཀེ;

ཏཝ སཱསནམཱགམྨ, ཝིཧརཱམ ཨནཱསཝཱ.

༢༩༨.

‘‘ཀོལིཏོ ¶ ཨིདྡྷིཡཱ སེཊྛོ, ཨཧཾ པཉྙཱཡ པཱརགོ;

ཨུབྷོཝ ཨེཀཏོ ཧུཏྭཱ, སཱསནཾ སོབྷཡཱམསེ.

༢༩༩.

‘‘ཨཔརིཡོསིཏསངྐཔྤོ ¶ , ཀུཏིཏྠེ སཉྩརིཾ ཨཧཾ;

ཏཝ དསྶནམཱགམྨ, སངྐཔྤོ པཱུརིཏོ མམ.

༣༠༠.

‘‘པཐཝིཡཾ པཏིཊྛཱཡ, པུཔྥནྟི སམཡེ དུམཱ;

དིབྦགནྡྷཱ སམྤཝནྟི, ཏོསེནྟི སབྦཔཱཎིནཾ.

༣༠༡.

‘‘ཏཐེཝཱཧཾ མཧཱཝཱིར, སཀྱཔུཏྟ མཧཱཡས;

སཱསནེ ཏེ པཏིཊྛཱཡ, སམཡེསཱམི པུཔྥིཏུཾ.

༣༠༢.

‘‘ཝིམུཏྟིཔུཔྥཾ ¶ ཨེསནྟོ, བྷཝསཾསཱརམོཙནཾ;

ཝིམུཏྟིཔུཔྥལཱབྷེན, ཏོསེམི སབྦཔཱཎིནཾ.

༣༠༣.

‘‘ཡཱཝཏཱ བུདྡྷཁེཏྟམྷི, ཋཔེཏྭཱན མཧཱམུནིཾ;

པཉྙཱཡ སདིསོ ནཏྠི, ཏཝ པུཏྟསྶ ཙཀྑུམ.

༣༠༤.

‘‘སུཝིནཱིཏཱ ཙ ཏེ སིསྶཱ, པརིསཱ ཙ སུསིཀྑིཏཱ;

ཨུཏྟམེ དམཐེ དནྟཱ, པརིཝཱརེནྟི ཏཾ སདཱ.

༣༠༥.

‘‘ཛྷཱཡཱི ¶ ཛྷཱནརཏཱ དྷཱིརཱ, སནྟཙིཏྟཱ སམཱཧིཏཱ;

མུནཱི མོནེཡྻསམྤནྣཱ, པརིཝཱརེནྟི ཏཾ སདཱ.

༣༠༦.

‘‘ཨཔྤིཙྪཱ ནིཔཀཱ དྷཱིརཱ, ཨཔྤཱཧཱརཱ ཨལོལུཔཱ;

ལཱབྷཱལཱབྷེན སནྟུཊྛཱ, པརིཝཱརེནྟི ཏཾ སདཱ.

༣༠༧.

‘‘ཨཱརཉྙིཀཱ དྷུཏརཏཱ, ཛྷཱཡིནོ ལཱུཁཙཱིཝརཱ;

ཝིཝེཀཱབྷིརཏཱ དྷཱིརཱ, པརིཝཱརེནྟི ཏཾ སདཱ.

༣༠༨.

‘‘པཊིཔནྣཱ ¶ ཕལཊྛཱ ཙ, སེཁཱ ཕལསམངྒིནོ;

ཨཱསཱིསཀཱ [ཨཱསིཾསཀཱ (སཱི. སྱཱ.)] ཨུཏྟམཏྠཾ, པརིཝཱརེནྟི ཏཾ སདཱ.

༣༠༩.

‘‘སོཏཱཔནྣཱ ཙ ཝིམལཱ, སཀདཱགཱམིནོ ཙ ཡེ;

ཨནཱགཱམཱི ཙ ཨརཧཱ, པརིཝཱརེནྟི ཏཾ སདཱ.

༣༡༠.

‘‘སཏིཔཊྛཱནཀུསལཱ, བོཛ྄ཛྷངྒབྷཱཝནཱརཏཱ;

སཱཝཀཱ ཏེ བཧཱུ སབྦེ, པརིཝཱརེནྟི ཏཾ སདཱ.

༣༡༡.

‘‘ཨིདྡྷིཔཱདེསུ ཀུསལཱ, སམཱདྷིབྷཱཝནཱརཏཱ;

སམྨཔྤདྷཱནཱནུཡུཏྟཱ, པརིཝཱརེནྟི ཏཾ སདཱ.

༣༡༢.

‘‘ཏེཝིཛྫཱ ཚལ༹བྷིཉྙཱ ཙ, ཨིདྡྷིཡཱ པཱརམིཾ གཏཱ;

པཉྙཱཡ པཱརམིཾ པཏྟཱ, པརིཝཱརེནྟི ཏཾ སདཱ.

༣༡༣.

‘‘ཨེདིསཱ ཏེ མཧཱཝཱིར, ཏཝ སིསྶཱ སུསིཀྑིཏཱ;

དུརཱསདཱ ཨུགྒཏེཛཱ, པརིཝཱརེནྟི ཏཾ སདཱ.

༣༡༤.

‘‘ཏེཧི སིསྶེཧི པརིཝུཏོ, སཉྙཏེཧི ཏཔསྶིབྷི;

མིགརཱཛཱཝསམྦྷཱིཏོ, ཨུལུ༹རཱཛཱཝ སོབྷསི.

༣༡༥.

‘‘པཐཝིཡཾ པཏིཊྛཱཡ, རུཧནྟི དྷརཎཱིརུཧཱ;

ཝེཔུལླཏཾ པཱཔུཎནྟི, ཕལཉྩ དསྶཡནྟི ཏེ.

༣༡༦.

‘‘པཐཝཱིསདིསོ ¶ ¶ ཏྭཾསི, སཀྱཔུཏྟ མཧཱཡས;

སཱསནེ ཏེ པཏིཊྛཱཡ, ལབྷནྟི ཨམཏཾ ཕལཾ.

༣༡༧.

‘‘སིནྡྷུ སརསྶཏཱི ཙེཝ, ནདིཡོ ཙནྡབྷཱགིཀཱ;

གངྒཱ ཙ ཡམུནཱ ཙེཝ, སརབྷཱུ ཙ ཨཐོ མཧཱི.

༣༡༨.

‘‘ཨེཏཱསཾ ¶ སནྡམཱནཱནཾ, སཱགརོ སམྤཊིཙྪཏི;

ཛཧནྟི པུརིམཾ ནཱམཾ, སཱགརོཏེཝ ཉཱཡཏི.

༣༡༩.

‘‘ཏཐེཝིམེ ¶ ཙཏུབྦཎྞཱ, པབྦཛིཏྭཱ ཏཝནྟིཀེ;

ཛཧནྟི པུརིམཾ ནཱམཾ, བུདྡྷཔུཏྟཱཏི ཉཱཡརེ.

༣༢༠.

‘‘ཡཐཱཔི ཙནྡོ ཝིམལོ, གཙྪཾ ཨཱཀཱསདྷཱཏུཡཱ;

སབྦེ ཏཱརགཎེ ལོཀེ, ཨཱབྷཱཡ ཨཏིརོཙཏི.

༣༢༡.

‘‘ཏཐེཝ ཏྭཾ མཧཱཝཱིར, པརིཝུཏོ དེཝམཱནུསེ;

ཨེཏེ སབྦེ ཨཏིཀྐམྨ, ཛལསི སབྦདཱ ཏུཝཾ.

༣༢༢.

‘‘གམྦྷཱིརེ ཨུཊྛིཏཱ ཨཱུམཱི, ན ཝེལམཏིཝཏྟརེ;

སབྦཱ ཝེལཾཝ ཕུསནྟི [སབྦཱཝ ཝེལཾ ཕུསནྟི (སཱི.), སབྦཱ ཝེལཾ པཕུསྶནྟི (སྱཱ.)], སཉྩུཎྞཱ ཝིཀིརནྟི ཏཱ.

༣༢༣.

‘‘ཏཐེཝ ཏིཏྠིཡཱ ལོཀེ, ནཱནཱདིཊྛཱི བཧུཛྫནཱ;

དྷམྨཾ ཝཱདིཏུཀཱམཱ ཏེ, ནཱཏིཝཏྟནྟི ཏཾ མུནིཾ.

༣༢༤.

‘‘སཙེ ཙ ཏཾ པཱཔུཎནྟི, པཊིཝཱདེཧི ཙཀྑུམ;

ཏཝནྟིཀཾ ཨུཔཱགནྟྭཱ, སཉྩུཎྞཱཝ བྷཝནྟི ཏེ.

༣༢༥.

‘‘ཡཐཱཔི ཨུདཀེ ཛཱཏཱ, ཀུམུདཱ མནྡཱལཀཱ བཧཱུ;

ཨུཔལིམྤནྟི [ཨུཔལིཔྤནྟི (?)] ཏོཡེན, ཀདྡམཀལལེན ཙ.

༣༢༦.

‘‘ཏཐེཝ བཧུཀཱ སཏྟཱ, ལོཀེ ཛཱཏཱ ཝིརཱུཧརེ;

ཨཊྚིཏཱ རཱགདོསེན, ཀདྡམེ ཀུམུདཾ ཡཐཱ.

༣༢༧.

‘‘ཡཐཱཔི པདུམཾ ཛལཛཾ, ཛལམཛ྄ཛྷེ ཝིརཱུཧཏི;

ན སོ ལིམྤཏི ཏོཡེན, པརིསུདྡྷོ ཧི ཀེསརཱི.

༣༢༨.

‘‘ཏཐེཝ ¶ ཏྭཾ མཧཱཝཱིར, ལོཀེ ཛཱཏོ མཧཱམུནི;

ནོཔལིམྤསི ལོཀེན, ཏོཡེན པདུམཾ ཡཐཱ.

༣༢༩.

‘‘ཡཐཱཔི རམྨཀེ མཱསེ, བཧཱུ པུཔྥནྟི ཝཱརིཛཱ;

ནཱཏིཀྐམནྟི ཏཾ མཱསཾ, སམཡོ པུཔྥནཱཡ སོ.

༣༣༠.

‘‘ཏཐེཝ ¶ ¶ ¶ ཏྭཾ མཧཱཝཱིར, པུཔྥིཏོ ཏེ ཝིམུཏྟིཡཱ;

སཱསནཾ ནཱཏིཝཏྟནྟི, པདུམཾ ཝཱརིཛཾ ཡཐཱ.

༣༣༡.

‘‘སུཔུཔྥིཏོ སཱལརཱཛཱ, དིབྦགནྡྷཾ པཝཱཡཏི;

ཨཉྙསཱལེཧི པརིཝུཏོ, སཱལརཱཛཱཝ སོབྷཏི.

༣༣༢.

‘‘ཏཐེཝ ཏྭཾ མཧཱཝཱིར, བུདྡྷཉཱཎེན པུཔྥིཏོ;

བྷིཀྑུསངྒྷཔརིཝུཏོ, སཱལརཱཛཱཝ སོབྷསི.

༣༣༣.

‘‘ཡཐཱཔི སེལོ ཧིམཝཱ, ཨོསདྷོ སབྦཔཱཎིནཾ;

ནཱགཱནཾ ཨསུརཱནཉྩ, དེཝཏཱནཉྩ ཨཱལཡོ.

༣༣༤.

‘‘ཏཐེཝ ཏྭཾ མཧཱཝཱིར, ཨོསདྷོ ཝིཡ པཱཎིནཾ;

ཏེཝིཛྫཱ ཚལ༹བྷིཉྙཱ ཙ, ཨིདྡྷིཡཱ པཱརམིཾ གཏཱ.

༣༣༥.

‘‘ཨནུསིཊྛཱ མཧཱཝཱིར, ཏཡཱ ཀཱརུཎིཀེན ཏེ;

རམནྟི དྷམྨརཏིཡཱ, ཝསནྟི ཏཝ སཱསནེ.

༣༣༦.

‘‘མིགརཱཛཱ ཡཐཱ སཱིཧོ, ཨབྷིནིཀྑམྨ ཨཱསཡཱ;

ཙཏུདྡིསཱནུཝིལོཀེཏྭཱ [ཝིལོཀེཏྭཱ (སཱི. སྱཱ.), ནུལོཀེཏྭཱ (ཀ.)],

ཏིཀྑཏྟུཾ ཨབྷིནཱདཏི.

༣༣༧.

‘‘སབྦེ མིགཱ ཨུཏྟསནྟི, མིགརཱཛསྶ གཛྫཏོ;

ཏཐཱ ཧི ཛཱཏིམཱ ཨེསོ, པསཱུ ཏཱསེཏི སབྦདཱ.

༣༣༨.

‘‘གཛྫཏོ ¶ ཏེ མཧཱཝཱིར, ཝསུདྷཱ སམྤཀམྤཏི;

བོདྷནེཡྻཱཝབུཛ྄ཛྷནྟི, ཏསནྟི མཱརཀཱཡིཀཱ.

༣༣༩.

‘‘ཏསནྟི ཏིཏྠིཡཱ སབྦེ, ནདཏོ ཏེ མཧཱམུནི;

ཀཱཀཱ སེནཱཝ ཝིབྦྷནྟཱ, མིགརཉྙཱ ཡཐཱ མིགཱ.

༣༤༠.

‘‘ཡེ ཀེཙི གཎིནོ ལོཀེ, སཏྠཱརོཏི པཝུཙྩརེ;

པརམྤརཱགཏཾ དྷམྨཾ, དེསེནྟི པརིསཱཡ ཏེ.

༣༤༡.

‘‘ན ཧེཝཾ ཏྭཾ མཧཱཝཱིར, དྷམྨཾ དེསེསི པཱཎིནཾ;

སཱམཾ སཙྩཱནི བུཛ྄ཛྷིཏྭཱ, ཀེཝལཾ བོདྷིཔཀྑིཡཾ.

༣༤༢.

‘‘ཨཱསཡཱནུསཡཾ ཉཏྭཱ, ཨིནྡྲིཡཱནཾ བལཱབལཾ;

བྷབྦཱབྷབྦེ ཝིདིཏྭཱན, མཧཱམེགྷོཝ གཛྫསི.

༣༤༣.

‘‘ཙཀྐཝཱལ༹པརིཡནྟཱ ¶ , ནིསིནྣཱ པརིསཱ བྷཝེ;

ནཱནཱདིཊྛཱི ཝིཙིནནྟཱ [ཝིཙིནྟེནྟི (སྱཱ.), ཝིཙིནནྟཾ (ཀ.)], ཝིམཏིཙྪེདནཱཡ ཏཾ.

༣༤༤.

‘‘སབྦེསཾ ¶ ཙིཏྟམཉྙཱཡ, ཨོཔམྨཀུསལོ མུནི;

ཨེཀཾ པཉྷཾ ཀཐེནྟོཝ, ཝིམཏིཾ ཚིནྡསི [ཚིནྡི (སྱཱ. ཀ.)] པཱཎིནཾ.

༣༤༥.

‘‘ཨུཔཏིསྶསདིསེཧེཝ, ཝསུདྷཱ པཱུརིཏཱ བྷཝེ;

སབྦེཝ ཏེ པཉྫལིཀཱ, ཀིཏྟཡུཾ ལོཀནཱཡཀཾ.

༣༤༦.

‘‘ཀཔྤཾ ཝཱ ཏེ ཀིཏྟཡནྟཱ, ནཱནཱཝཎྞེཧི ཀིཏྟཡུཾ;

པརིམེཏུཾ ན སཀྐེཡྻུཾ [ན ཀཔྤེཡྻུཾ (སྱཱ.), ན པཔྤེཡྻུཾ (ཀ.)], ཨཔྤམེཡྻོ ཏཐཱགཏོ.

༣༤༧.

‘‘ཡཐཱསཀེན ¶ ཐཱམེན, ཀིཏྟིཏོ ཧི མཡཱ ཛིནོ;

ཀཔྤཀོཊཱིཔི ཀིཏྟེནྟཱ, ཨེཝམེཝ པཀིཏྟཡུཾ.

༣༤༨.

‘‘སཙེ ¶ ཧི ཀོཙི དེཝོ ཝཱ, མནུསྶོ ཝཱ སུསིཀྑིཏོ;

པམེཏུཾ པརིཀཔྤེཡྻ, ཝིགྷཱཏཾཝ ལབྷེཡྻ སོ.

༣༤༩.

‘‘སཱསནེ ཏེ པཏིཊྛཱཡ, སཀྱཔུཏྟ མཧཱཡས;

པཉྙཱཡ པཱརམིཾ གནྟྭཱ, ཝིཧརཱམི ཨནཱསཝོ.

༣༥༠.

‘‘ཏིཏྠིཡེ སམྤམདྡཱམི, ཝཏྟེམི ཛིནསཱསནཾ;

དྷམྨསེནཱཔཏི ཨཛྫ, སཀྱཔུཏྟསྶ སཱསནེ.

༣༥༡.

‘‘ཨཔརིམེཡྻེ ཀཏཾ ཀམྨཾ, ཕལཾ དསྶེསི མེ ཨིདྷ;

སུཁིཏྟོ སརཝེགོཝ, ཀིལེསེ ཛྷཱཔཡཱི མམ [ཛྷཱཔཡིཾ མམ (སྱཱ.), ཛྷཱཔཡིཾ ཨཧཾ (ཀ.)].

༣༥༢.

‘‘ཡོ ཀོཙི མནུཛོ བྷཱརཾ, དྷཱརེཡྻ མཏྠཀེ སདཱ;

བྷཱརེན དུཀྑིཏོ ཨསྶ, བྷཱརེཧི བྷརིཏོ ཏཐཱ.

༣༥༣.

‘‘ཌཡ྄ཧམཱནོ ཏཱིཧགྒཱིཧི, བྷཝེསུ སཾསརིཾ ཨཧཾ;

བྷརིཏོ བྷཝབྷཱརེན, གིརིཾ ཨུཙྩཱརིཏོ ཡཐཱ.

༣༥༤.

‘‘ཨོརོཔིཏོ ཙ མེ བྷཱརོ, བྷཝཱ ཨུགྒྷཱཊིཏཱ མཡཱ;

ཀརཎཱིཡཾ ཀཏཾ སབྦཾ, སཀྱཔུཏྟསྶ སཱསནེ.

༣༥༥.

‘‘ཡཱཝཏཱ བུདྡྷཁེཏྟམྷི, ཋཔེཏྭཱ སཀྱཔུངྒཝཾ;

ཨཧཾ ཨགྒོམྷི པཉྙཱཡ, སདིསོ མེ ན ཝིཛྫཏི.

༣༥༦.

‘‘སམཱདྷིམྷི ¶ སུཀུསལོ, ཨིདྡྷིཡཱ པཱརམིཾ གཏོ;

ཨིཙྪམཱནོ ཙཧཾ ཨཛྫ, སཧསྶཾ ཨབྷིནིམྨིནེ.

༣༥༧.

‘‘ཨནུཔུབྦཝིཧཱརསྶ ¶ , ཝསཱིབྷཱུཏོ མཧཱམུནི;

ཀཐེསི སཱསནཾ མཡ྄ཧཾ, ནིརོདྷོ སཡནཾ མམ.

༣༥༨.

‘‘དིབྦཙཀྑུ ¶ ཝིསུདྡྷཾ མེ, སམཱདྷིཀུསལོ ཨཧཾ;

སམྨཔྤདྷཱནཱནུཡུཏྟོ, བོཛ྄ཛྷངྒབྷཱཝནཱརཏོ.

༣༥༩.

‘‘སཱཝཀེན ཧི པཏྟབྦཾ, སབྦམེཝ ཀཏཾ མཡཱ;

ལོཀནཱཐཾ ཋཔེཏྭཱན, སདིསོ མེ ན ཝིཛྫཏི.

༣༦༠.

‘‘སམཱཔཏྟཱིནཾ ཀུསལོ [སམཱཔཏྟིནཡཀུསལོ (སཱི.)], ཛྷཱནཝིམོཀྑཱན ཁིཔྤཔཊིལཱབྷཱི;

བོཛ྄ཛྷངྒབྷཱཝནཱརཏོ, སཱཝཀགུཎཔཱརམིགཏོསྨི.

༣༦༡.

‘‘སཱཝཀགུཎེནཔི ¶ ཕུསྶེན [སཱཝཀགུཎཕུསྶེན (སྱཱ.)], བུདྡྷིཡཱ པརིསུཏྟམབྷཱརཝཱ [པུརིསུཏྟམགཱརཝཱ (སྱཱ.), པུརིསུཏྟམབྷཱརཝཱ (ཀ.)];

ཡཾ སདྡྷཱསངྒཧིཏཾ [སདྡྷཱཡ སངྒཧིཏཾ (སཱི.), སདྡཱསངྒཧིཏཾ (སྱཱ.)] ཙིཏྟཾ, སདཱ སབྲཧྨཙཱརཱིསུ.

༣༦༢.

‘‘ཨུདྡྷཏཝིསོཝ སཔྤོ, ཚིནྣཝིསཱཎོཝ ཨུསབྷོ;

ནིཀྑིཏྟམཱནདཔྤོཝ [དབྦོཝ (ཀ.)], ཨུཔེམི གརུགཱརཝེན གཎཾ.

༣༦༣.

‘‘ཡདི རཱུཔིནཱི བྷཝེཡྻ, པཉྙཱ མེ ཝསུམཏཱིཔི [ཝསུམཏཱི (སཱི. ཀ.) ཝསུཔཏཱིནཾ (སྱཱ.)] ན སམེཡྻ;

ཨནོམདསྶིསྶ [ཨནོམདསྶི (?)] བྷགཝཏོ, ཕལམེཏཾ ཉཱཎཐཝནཱཡ.

༣༦༤.

‘‘པཝཏྟིཏཾ དྷམྨཙཀྐཾ, སཀྱཔུཏྟེན ཏཱདིནཱ;

ཨནུཝཏྟེམཧཾ སམྨཱ, ཉཱཎཐཝནཱཡིདཾ ཕལཾ.

༣༦༥.

‘‘མཱ མེ ཀདཱཙི པཱཔིཙྪོ, ཀུསཱིཏོ ཧཱིནཝཱིརིཡོ;

ཨཔྤསྶུཏོ ཨནཱདརོ [ཨནཱཙཱརོ (སབྦཏྠ) ཐེརགཱ. ༩༨༧ པསྶིཏབྦཱ], སམེཏོ ཨཧུ ཀཏྠཙི.

༣༦༦.

‘‘བཧུསྶུཏོ ཙ མེདྷཱཝཱི, སཱིལེསུ སུསམཱཧིཏོ;

ཙེཏོསམཐཱནུཡུཏྟོ, ཨཔི མུདྡྷནི ཏིཊྛཏུ.

༣༦༧.

‘‘ཏཾ ཝོ ཝདཱམི བྷདྡནྟེ, ཡཱཝནྟེཏྠ སམཱགཏཱ;

ཨཔྤིཙྪཱ ཧོཐ སནྟུཊྛཱ, ཛྷཱཡཱི ཛྷཱནརཏཱ སདཱ.

༣༦༨.

‘‘ཡམཧཾ ¶ ¶ ¶ པཋམཾ དིསྭཱ, ཝིརཛོ ཝིམལོ ཨཧུཾ;

སོ མེ ཨཱཙརིཡོ དྷཱིརོ, ཨསྶཛི ནཱམ སཱཝཀོ.

༣༦༩.

‘‘ཏསྶཱཧཾ ཝཱཧསཱ ཨཛྫ, དྷམྨསེནཱཔཏཱི ཨཧུཾ;

སབྦཏྠ པཱརམིཾ པཏྭཱ, ཝིཧརཱམི ཨནཱསཝོ.

༣༧༠.

‘‘ཡོ མེ ཨཱཙརིཡོ ཨཱསི, ཨསྶཛི ནཱམ སཱཝཀོ;

ཡསྶཾ དིསཱཡཾ ཝསཏི, ཨུསྶཱིསམྷི ཀརོམཧཾ.

༣༧༡.

‘‘མམ ཀམྨཾ སརིཏྭཱན, གོཏམོ སཀྱཔུངྒཝོ;

བྷིཀྑུསངྒྷེ ནིསཱིདིཏྭཱ, ཨགྒཊྛཱནེ ཋཔེསི མཾ.

༣༧༢.

[ཨིམཱ དྭེ གཱཐཱཡོ སྱཱམཔོཏྠཀེ ན སནྟི]

ཀིལེསཱ ཛྷཱཔིཏཱ མཡ྄ཧཾ, བྷཝཱ སབྦེ སམཱུཧཏཱ.

ནཱགོཝ བནྡྷནཾ ཚེཏྭཱ, ཝིཧརཱམི ཨནཱསཝོ.

༣༧༣.

‘‘སྭཱགཏཾ ཝཏ མེ ཨཱསི, བུདྡྷསེཊྛསྶ སནྟིཀེ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ [ཨིམཱ དྭེ གཱཐཱརོ སྱཱམཔོཏྠཀེ ན སནྟི].

༣༧༤.

‘‘པཊིསམྦྷིདཱ ¶ ཙཏསྶོ [ཙཏསྶོ ཙ (སཱི.)], ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ སཱརིཔུཏྟོ ཐེརོ ཨིམཱ གཱཐཱཡོ

ཨབྷཱསིཏྠཱཏི.

སཱརིཔུཏྟཏྠེརསྶཱཔདཱནཾ པཋམཾ.

༣-༢. མཧཱམོགྒལླཱནཏྠེརཨཔདཱནཾ

༣༧༥.

‘‘ཨནོམདསྶཱི བྷགཝཱ, ལོཀཛེཊྛོ ནརཱསབྷོ;

ཝིཧཱསི ཧིམཝནྟམྷི, དེཝསངྒྷཔུརཀྑཏོ.

༣༧༦.

‘‘ཝརུཎོ ནཱམ ནཱམེན, ནཱགརཱཛཱ ཨཧཾ ཏདཱ;

ཀཱམརཱུཔཱི ཝིཀུབྦཱམི, མཧོདདྷིནིཝཱསཧཾ.

༣༧༧.

‘‘སངྒཎིཡཾ ¶ གཎཾ ཧིཏྭཱ, ཏཱུརིཡཾ པཊྛཔེསཧཾ;

སམྦུདྡྷཾ པརིཝཱརེཏྭཱ, ཝཱདེསུཾ ཨཙྪརཱ ཏདཱ.

༣༧༨.

‘‘ཝཛྫམཱནེསུ ¶ ཏཱུརེསུ, དེཝཱ ཏཱུརཱནི [ཏུརིཡེསུ, དེཝཱ ཏུརིཡཱནི (སཱི. སྱཱ.)] ཝཛྫཡུཾ;

ཨུབྷིནྣཾ སདྡཾ སུཏྭཱན, བུདྡྷོཔི སམྤབུཛ྄ཛྷཐ.

༣༧༩.

‘‘ནིམནྟེཏྭཱན སམྦུདྡྷཾ, སཀཾ བྷཝནུཔཱགམིཾ;

ཨཱསནཾ པཉྙཔེཏྭཱན, ཀཱལམཱརོཙཡིཾ ཨཧཾ.

༣༨༠.

‘‘ཁཱིཎཱསཝསཧསྶེཧི, པརིཝུཏོ ལོཀནཱཡཀོ;

ཨོབྷཱསེནྟོ དིསཱ སབྦཱ, བྷཝནཾ མེ ཨུཔཱགམི.

༣༨༡.

‘‘ཨུཔཝིཊྛཾ ¶ མཧཱཝཱིརཾ, དེཝདེཝཾ ནརཱསབྷཾ;

སབྷིཀྑུསངྒྷཾ ཏཔྤེསིཾ [སནྟཔྤེསིཾ (སྱཱ.), ཏཔྤེམི (ཀ.)], ཨནྣཔཱནེནཧཾ ཏདཱ.

༣༨༢.

‘‘ཨནུམོདི མཧཱཝཱིརོ, སཡམྦྷཱུ ཨགྒཔུགྒལོ;

བྷིཀྑུསངྒྷེ ནིསཱིདིཏྭཱ, ཨིམཱ གཱཐཱ ཨབྷཱསཐ.

༣༨༣.

‘‘‘ཡོ སོ [ཡཾ སོ (ཀ.)] སངྒྷཾ ཨཔཱུཛེསི, བུདྡྷཉྩ ལོཀནཱཡཀཾ;

ཏེན ཙིཏྟཔྤསཱདེན, དེཝལོཀཾ གམིསྶཏི.

༣༨༤.

‘‘‘སཏྟསཏྟཏིཀྑཏྟུཉྩ, དེཝརཛྫཾ ཀརིསྶཏི;

པཐབྱཱ རཛྫཾ ཨཊྛསཏཾ, ཝསུདྷཾ ཨཱཝསིསྶཏི.

༣༨༥.

‘‘‘པཉྩཔཉྙཱསཀྑཏྟུཉྩ, ཙཀྐཝཏྟཱི བྷཝིསྶཏི;

བྷོགཱ ཨསངྑིཡཱ ཏསྶ, ཨུཔྤཛྫིསྶནྟི ཏཱཝདེ.

༣༨༦.

‘‘‘ཨཔརིམེཡྻེ ¶ ཨིཏོ ཀཔྤེ, ཨོཀྐཱཀཀུལསམྦྷཝོ;

གོཏམོ ནཱམ གོཏྟེན [ནཱམེན (སཱི.)], སཏྠཱ ལོཀེ བྷཝིསྶཏི.

༣༨༧.

‘‘‘ནིརཡཱ ¶ སོ ཙཝིཏྭཱན, མནུསྶཏཾ གམིསྶཏི;

ཀོལིཏོ ནཱམ ནཱམེན, བྲཧྨབནྡྷུ བྷཝིསྶཏི.

༣༨༨.

‘‘‘སོ པཙྪཱ པབྦཛིཏྭཱན, ཀུསལམཱུལེན ཙོདིཏོ;

གོཏམསྶ བྷགཝཏོ, དུཏིཡོ ཧེསྶཏི སཱཝཀོ.

༣༨༩.

‘‘‘ཨཱརདྡྷཝཱིརིཡོ པཧིཏཏྟོ, ཨིདྡྷིཡཱ པཱརམིཾ གཏོ;

སབྦཱསཝེ པརིཉྙཱཡ, ནིབྦཱཡིསྶཏིནཱསཝོ’.

༣༩༠.

‘‘པཱཔམིཏྟོཔནིསྶཱཡ, ཀཱམརཱགཝསཾ གཏོ;

མཱཏརཾ པིཏརཉྩཱཔི, གྷཱཏཡིཾ དུཊྛམཱནསོ.

༣༩༡.

‘‘ཡཾ ¶ ཡཾ ཡོནུཔཔཛྫཱམི, ནིརཡཾ ཨཐ མཱནུསཾ;

པཱཔཀམྨསམངྒིཏཱ, བྷིནྣསཱིསོ མརཱམཧཾ.

༣༩༢.

‘‘ཨིདཾ པཙྪིམཀཾ མཡ྄ཧཾ, ཙརིམོ ཝཏྟཏེ བྷཝོ;

ཨིདྷཱཔི ཨེདིསོ མཡ྄ཧཾ, མརཎཀཱལེ བྷཝིསྶཏི.

༣༩༣.

‘‘པཝིཝེཀམནུཡུཏྟོ, སམཱདྷིབྷཱཝནཱརཏོ;

སབྦཱསཝེ པརིཉྙཱཡ, ཝིཧརཱམི ཨནཱསཝོ.

༣༩༤.

‘‘དྷརཎིམྤི སུགམྦྷཱིརཾ, བཧལཾ དུཔྤདྷཾསིཡཾ;

ཝཱམངྒུཊྛེན ཁོབྷེཡྻཾ, ཨིདྡྷིཡཱ པཱརམིཾ གཏོ.

༣༩༥.

‘‘ཨསྨིམཱནཾ ན པསྶཱམི, མཱནོ མཡ྄ཧཾ ན ཝིཛྫཏི;

སཱམཎེརེ ཨུཔཱདཱཡ, གརུཙིཏྟཾ ཀརོམཧཾ.

༣༩༦.

‘‘ཨཔརིམེཡྻེ ཨིཏོ ཀཔྤེ, ཡཾ ཀམྨམབྷིནཱིཧརིཾ;

ཏཱཧཾ བྷཱུམིམནུཔྤཏྟོ, པཏྟོམྷི ཨཱསཝཀྑཡཾ.

༣༩༧.

‘‘པཊིསམྦྷིདཱ ¶ ¶ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ མཧཱམོགྒལླཱནོ ཐེརོ ཨིམཱ གཱཐཱཡོ ཨབྷཱསིཏྠཱཏི.

མཧཱམོགྒལླཱནཏྠེརསྶཱཔདཱནཾ དུཏིཡཾ.

༣-༣. མཧཱཀསྶཔཏྠེརཨཔདཱནཾ

༣༩༨.

‘‘པདུམུཏྟརསྶ ¶ བྷགཝཏོ, ལོཀཛེཊྛསྶ ཏཱདིནོ;

ནིབྦུཏེ ལོཀནཱཐམྷི, པཱུཛཾ ཀུབྦནྟི སཏྠུནོ.

༣༩༩.

‘‘ཨུདགྒཙིཏྟཱ ཛནཏཱ, ཨཱམོདིཏཔམོདིཏཱ;

ཏེསུ སཾཝེགཛཱཏེསུ, པཱིཏི མེ ཨུདཔཛྫཐ.

༤༠༠.

‘‘ཉཱཏིམིཏྟེ སམཱནེཏྭཱ, ཨིདཾ ཝཙནམབྲཝིཾ;

པརིནིབྦུཏོ མཧཱཝཱིརོ, ཧནྡ པཱུཛཾ ཀརོམསེ.

༤༠༡.

‘‘སཱདྷཱུཏི ཏེ པཊིསྶུཏྭཱ, བྷིཡྻོ ཧཱསཾ ཛནིཾསུ མེ;

བུདྡྷསྨིཾ ལོཀནཱཐམྷི, ཀཱཧཱམ པུཉྙསཉྩཡཾ.

༤༠༢.

‘‘ཨགྒྷིཡཾ ¶ སུཀཏཾ ཀཏྭཱ, སཏཧཏྠསམུགྒཏཾ;

དིཡཌྜྷཧཏྠཔཏྠཊཾ, ཝིམཱནཾ ནབྷམུགྒཏཾ.

༤༠༣.

‘‘ཀཏྭཱན ཧམྨིཡཾ ཏཏྠ, ཏཱལཔནྟཱིཧི ཙིཏྟིཏཾ;

སཀཾ ཙིཏྟཾ པསཱདེཏྭཱ, ཙེཏིཡཾ པཱུཛཡུཏྟམཾ.

༤༠༤.

‘‘ཨགྒིཀྑནྡྷོཝ ¶ ཛལིཏོ, ཀིཾསུཀོ ཨིཝ [སཱལརཱཛཱཝ (སཱི.)] ཕུལླིཏོ;

ཨིནྡལཊྛཱིཝ ཨཱཀཱསེ, ཨོབྷཱསེཏི ཙཏུདྡིསཱ.

༤༠༥.

‘‘ཏཏྠ ཙིཏྟཾ པསཱདེཏྭཱ, ཀཏྭཱན ཀུསལཾ བཧུཾ;

པུབྦཀམྨཾ སརིཏྭཱན, ཏིདསཾ ཨུཔཔཛྫཧཾ.

༤༠༦.

‘‘སཧསྶཡུཏྟཾ ¶ ཧཡཝཱཧིཾ, དིབྦཡཱནམདྷིཊྛིཏོ;

ཨུབྦིདྡྷཾ བྷཝནཾ མཡ྄ཧཾ, སཏྟབྷཱུམཾ སམུགྒཏཾ.

༤༠༧.

‘‘ཀཱུཊཱགཱརསཧསྶཱནི, སབྦསོཎྞམཡཱ ཨཧུཾ;

ཛལནྟི སཀཏེཛེན, དིསཱ སབྦཱ པབྷཱསཡཾ.

༤༠༨.

‘‘སནྟི ཨཉྙེཔི ནིཡྻཱུཧཱ, ལོཧིཏངྒམཡཱ ཏདཱ;

ཏེཔི ཛོཏནྟི ཨཱབྷཱཡ, སམནྟཱ ཙཏུརོ དིསཱ.

༤༠༩.

‘‘པུཉྙཀམྨཱབྷིནིབྦཏྟཱ, ཀཱུཊཱགཱརཱ སུནིམྨིཏཱ;

མཎིམཡཱཔི ཛོཏནྟི, དིསཱ དས [དིསོདིསཾ (སྱཱ.)] སམནྟཏོ.

༤༡༠.

‘‘ཏེསཾ ཨུཛྫོཏམཱནཱནཾ, ཨོབྷཱསོ ཝིཔུལོ ཨཧུ;

སབྦེ དེཝེ ཨབྷིབྷོམི, པུཉྙཀམྨསྶིདཾ ཕལཾ.

༤༡༡.

‘‘སཊྛིཀཔྤསཧསྶམྷི ¶ , ཨུབྦིདྡྷོ ནཱམ ཁཏྟིཡོ;

ཙཱཏུརནྟོ ཝིཛིཏཱཝཱི, པཐཝིཾ ཨཱཝསིཾ ཨཧཾ.

༤༡༢.

‘‘ཏཐེཝ བྷདྡཀེ ཀཔྤེ, ཏིཾསཀྑཏྟུཾ ཨཧོསཧཾ;

སཀཀམྨཱབྷིརདྡྷོམྷི, ཙཀྐཝཏྟཱི མཧབྦལོ.

༤༡༣.

‘‘སཏྟརཏནསམྤནྣོ, ཙཏུདཱིཔམྷི ཨིསྶརོ;

ཏཏྠཱཔི བྷཝནཾ མཡ྄ཧཾ, ཨིནྡལཊྛཱིཝ ཨུགྒཏཾ.

༤༡༤.

‘‘ཨཱཡཱམཏོ ¶ ¶ ཙཏུབྦཱིསཾ, ཝིཏྠཱརེན ཙ དྭཱདས;

རམྨཎཾ [རམྨཀཾ (སཱི. སྱཱ.)] ནཱམ ནགརཾ, དལ༹ྷཔཱཀཱརཏོརཎཾ.

༤༡༥.

‘‘ཨཱཡཱམཏོ པཉྩསཏཾ, ཝིཏྠཱརེན ཏདཌྜྷཀཾ;

ཨཱཀིཎྞཾ ཛནཀཱཡེཧི, ཏིདསཱནཾ པུརཾ ཝིཡ.

༤༡༦.

‘‘ཡཐཱ སཱུཙིགྷརེ སཱུཙཱི, པཀྑིཏྟཱ པཎྞཝཱིསཏི;

ཨཉྙམཉྙཾ པགྷཊྚེནྟི, ཨཱཀིཎྞཾ ཧོཏི ལངྐཏཾ [ཏཾ ཏདཱ (སཱི.), སཏཏཱ (སྱཱ.), སངྐརཾ (?)].

༤༡༧.

‘‘ཨེཝམྤི ནགརཾ མཡ྄ཧཾ, ཧཏྠིསྶརཐསཾཀུལཾ;

མནུསྶེཧི སདཱཀིཎྞཾ, རམྨཎཾ ནགརུཏྟམཾ.

༤༡༨.

‘‘ཏཏྠ བྷུཏྭཱ པིཝིཏྭཱ ཙ, པུན དེཝཏྟནཾ གཏོ [པུནཔི དེཝཏངྒཏོ (ཀ.)].

བྷཝེ པཙྪིམཀེ མཡ྄ཧཾ, ཨཧོསི ཀུལསམྤདཱ.

༤༡༩.

‘‘བྲཱཧྨཉྙཀུལསམྦྷཱུཏོ ¶ , མཧཱརཏནསཉྩཡོ;

ཨསཱིཏིཀོཊིཡོ ཧིཏྭཱ, ཧིརཉྙསྶཱཔི པབྦཛིཾ.

༤༢༠.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ མཧཱཀསྶཔོ ཐེརོ ཨིམཱ གཱཐཱཡོ ཨབྷཱསིཏྠཱཏི.

མཧཱཀསྶཔཏྠེརསྶཱཔདཱནཾ ཏཏིཡཾ.

༣-༤. ཨནུརུདྡྷཏྠེརཨཔདཱནཾ

༤༢༡.

‘‘སུམེདྷཾ ¶ བྷགཝནྟཱཧཾ, ལོཀཛེཊྛཾ ནརཱསབྷཾ;

ཝཱུཔཀཊྛཾ ཝིཧརནྟཾ, ཨདྡསཾ ལོཀནཱཡཀཾ.

༤༢༢.

‘‘ཨུཔགནྟྭཱན སམྦུདྡྷཾ, སུམེདྷཾ ལོཀནཱཡཀཾ;

ཨཉྫལིཾ པགྒཧེཏྭཱན, བུདྡྷསེཊྛམཡཱཙཧཾ.

༤༢༣.

‘‘ཨནུཀམྤ ¶ མཧཱཝཱིར, ལོཀཛེཊྛ ནརཱསབྷ;

པདཱིཔཾ ཏེ པདསྶཱམི, རུཀྑམཱུལམྷི ཛྷཱཡཏོ.

༤༢༤.

‘‘ཨདྷིཝཱསེསི སོ དྷཱིརོ, སཡམྦྷཱུ ཝདཏཾ ཝརོ;

དུམེསུ ཝིནིཝིཛ྄ཛྷིཏྭཱ, ཡནྟཾ ཡོཛིཡཧཾ ཏདཱ.

༤༢༥.

‘‘སཧསྶཝཊྚིཾ ¶ པཱདཱསིཾ, བུདྡྷསྶ ལོཀབནྡྷུནོ;

སཏྟཱཧཾ པཛྫལིཏྭཱན, དཱིཔཱ ཝཱུཔསམིཾསུ མེ.

༤༢༦.

‘‘ཏེན ཙིཏྟཔྤསཱདེན, ཙེཏནཱཔཎིདྷཱིཧི ཙ;

ཛཧིཏྭཱ མཱནུསཾ དེཧཾ, ཝིམཱནམུཔཔཛྫཧཾ.

༤༢༧.

‘‘ཨུཔཔནྣསྶ དེཝཏྟཾ, བྱམྷཾ ཨཱསི སུནིམྨིཏཾ;

སམནྟཏོ པཛྫལཏི, དཱིཔདཱནསྶིདཾ ཕལཾ.

༤༢༨.

‘‘སམནྟཱ ¶ ཡོཛནསཏཾ, ཝིརོཙེསིམཧཾ ཏདཱ;

སབྦེ དེཝེ ཨབྷིབྷོམི, དཱིཔདཱནསྶིདཾ ཕལཾ.

༤༢༩.

‘‘ཏིཾསཀཔྤཱནི ¶ དེཝིནྡོ, དེཝརཛྫམཀཱརཡིཾ;

ན མཾ ཀེཙཱིཏིམཉྙནྟི, དཱིཔདཱནསྶིདཾ ཕལཾ.

༤༣༠.

‘‘ཨཊྛཝཱིསཏིཀྑཏྟུཉྩ, ཙཀྐཝཏྟཱི ཨཧོསཧཾ;

དིཝཱ རཏྟིཉྩ པསྶཱམི, སམནྟཱ ཡོཛནཾ ཏདཱ.

༤༣༡.

‘‘སཧསྶལོཀཾ ཉཱཎེན, པསྶཱམི སཏྠུ སཱསནེ;

དིབྦཙཀྑུམནུཔྤཏྟོ, དཱིཔདཱནསྶིདཾ ཕལཾ.

༤༣༢.

‘‘སུམེདྷོ ནཱམ སམྦུདྡྷོ, ཏིཾསཀཔྤསཧསྶིཏོ;

ཏསྶ དཱིཔོ མཡཱ དིནྣོ, ཝིཔྤསནྣེན ཙེཏསཱ.

༤༣༣.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཨནུརུདྡྷོ ཐེརོ ཨིམཱ གཱཐཱཡོ ཨབྷཱསིཏྠཱཏི.

ཨནུརུདྡྷཏྠེརསྶཱཔདཱནཾ ཙཏུཏྠཾ.

༣-༥. པུཎྞམནྟཱཎིཔུཏྟཏྠེརཨཔདཱནཾ

༤༣༤.

‘‘ཨཛ྄ཛྷཱཡཀོ མནྟདྷརོ, ཏིཎྞཾ ཝེདཱན པཱརགཱུ;

པུརཀྑཏོམྷི སིསྶེཧི, ཨུཔགཙྪིཾ ནརུཏྟམཾ.

༤༣༥.

‘‘པདུམུཏྟརོ ¶ ལོཀཝིདཱུ, ཨཱཧུཏཱིནཾ པཊིགྒཧོ;

མམ ཀམྨཾ པཀིཏྟེསི, སངྑིཏྟེན མཧཱམུནི.

༤༣༦.

‘‘ཏཱཧཾ ¶ དྷམྨཾ སུཎིཏྭཱན, ཨབྷིཝཱདེཏྭཱན སཏྠུནོ;

ཨཉྫལིཾ པགྒཧེཏྭཱན, པཀྐམིཾ [པཀྐཱམིཾ (སཱི. སྱཱ.)] དཀྑིཎཱམུཁོ.

༤༣༧.

‘‘སངྑིཏྟེན ¶ སུཎིཏྭཱན, ཝིཏྠཱརེན ཨབྷཱསཡིཾ [ཨདེསཡིཾ (སཱི. སྱཱ.)];

སབྦེ སིསྶཱ ཨཏྟམནཱ, སུཏྭཱན མམ བྷཱསཏོ;

སཀཾ དིཊྛིཾ ཝིནོདེཏྭཱ, བུདྡྷེ ཙིཏྟཾ པསཱདཡུཾ.

༤༣༨.

‘‘སངྑིཏྟེནཔི དེསེམི, ཝིཏྠཱརེན ཏཐེཝཧཾ [དེསེསིཾ ཝིཏྠཱརེནཔི བྷཱསཡིཾ (ཀ.)];

ཨབྷིདྷམྨནཡཉྙཱུཧཾ ¶ , ཀཐཱཝཏྠུཝིསུདྡྷིཡཱ;

སབྦེསཾ ཝིཉྙཱཔེཏྭཱན, ཝིཧརཱམི ཨནཱསཝོ.

༤༣༩.

‘‘ཨིཏོ པཉྩསཏེ ཀཔྤེ, ཙཏུརོ སུཔྤཀཱསཀཱ;

སཏྟརཏནསམྤནྣཱ, ཙཏུདཱིཔམྷི ཨིསྶརཱ.

༤༤༠.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ པུཎྞོ མནྟཱཎིཔུཏྟོ ཐེརོ ཨིམཱ གཱཐཱཡོ ཨབྷཱསིཏྠཱཏི.

པུཎྞམནྟཱཎིཔུཏྟཏྠེརསྶཱཔདཱནཾ པཉྩམཾ.

༣-༦. ཨུཔཱལིཏྠེརཨཔདཱནཾ

༤༤༡.

‘‘ནགརེ ཧཾསཝཏིཡཱ, སུཛཱཏོ ནཱམ བྲཱཧྨཎོ;

ཨསཱིཏིཀོཊིནིཙཡོ, པཧཱུཏདྷནདྷཉྙཝཱ.

༤༤༢.

‘‘ཨཛ྄ཛྷཱཡཀོ མནྟདྷརོ, ཏིཎྞཾ ཝེདཱན པཱརགཱུ;

ལཀྑཎེ ཨིཏིཧཱསེ ཙ, སདྷམྨེ པཱརམིཾ གཏོ.

༤༤༣.

‘‘པརིབྦཱཛཱ ¶ ཨེཀསིཁཱ [ཨེཀབྷིཀྑཱ (ཀ.)], གོཏམཱ

བུདྡྷསཱཝཀཱ [སབྦཏྠཔི ཨེཝམེཝ དིསྶཏི].

ཙརཀཱ ཏཱཔསཱ ཙེཝ, ཙརནྟི མཧིཡཱ ཏདཱ.

༤༤༤.

‘‘ཏེཔི མཾ པརིཝཱརེནྟི, བྲཱཧྨཎོ ཝིསྶུཏོ ཨིཏི;

བཧུཛྫནོ མཾ པཱུཛེཏི, ནཱཧཾ པཱུཛེམི ཀིཉྩནཾ.

༤༤༥.

‘‘པཱུཛཱརཧཾ ¶ ན པསྶཱམི, མཱནཏྠདྡྷོ ཨཧཾ ཏདཱ;

བུདྡྷོཏི ཝཙནཾ ནཏྠི, ཏཱཝ ནུཔྤཛྫཏེ ཛིནོ.

༤༤༦.

‘‘ཨཙྩཡེན ¶ ཨཧོརཏྟཾ, པདུམུཏྟརནཱམཀོ [ནཱཡཀོ (སཱི. སྱཱ.)];

སབྦཾ ཏམཾ ཝིནོདེཏྭཱ, ལོཀེ ཨུཔྤཛྫི ཙཀྑུམཱ.

༤༤༧.

‘‘ཝིཏྠཱརིཀེ བཱཧུཛཉྙེ, པུཐུབྷཱུཏེ ཙ སཱསནེ;

ཨུཔཱགམི ཏདཱ བུདྡྷོ, ནགརཾ ཧཾསསཝ྄ཧཡཾ.

༤༤༨.

‘‘པིཏུ ཨཏྠཱཡ ¶ སོ བུདྡྷོ, དྷམྨཾ དེསེསི ཙཀྑུམཱ;

ཏེན ཀཱལེན པརིསཱ, སམནྟཱ ཡོཛནཾ ཏདཱ.

༤༤༩.

‘‘སམྨཏོ མནུཛཱནཾ སོ, སུནནྡོ ནཱམ ཏཱཔསོ;

ཡཱཝཏཱ བུདྡྷཔརིསཱ, པུཔྥེཧཙྪཱདཡཱི ཏདཱ.

༤༥༠.

‘‘ཙཏུསཙྩཾ པཀཱསེནྟེ, སེཊྛེ ཙ [ཧེཊྛཱ ཙ (ཀ.)] པུཔྥམཎྜཔེ;

ཀོཊིསཏསཧསྶཱནཾ, དྷམྨཱབྷིསམཡོ ཨཧུ.

༤༥༡.

‘‘སཏྟརཏྟིནྡིཝཾ བུདྡྷོ, ཝསྶེཏྭཱ དྷམྨཝུཊྛིཡོ;

ཨཊྛམེ དིཝསེ པཏྟེ, སུནནྡཾ ཀིཏྟཡཱི ཛིནོ.

༤༥༢.

‘‘དེཝལོཀེ མནུསྶེ ཝཱ, སཾསརནྟོ ཨཡཾ བྷཝེ;

སབྦེསཾ པཝརོ ཧུཏྭཱ, བྷཝེསུ སཾསརིསྶཏི.

༤༥༣.

‘‘ཀཔྤསཏསཧསྶམྷི ¶ , ཨོཀྐཱཀཀུལསམྦྷཝོ;

གོཏམོ ནཱམ གོཏྟེན, སཏྠཱ ལོཀེ བྷཝིསྶཏི.

༤༥༤.

‘‘ཏསྶ དྷམྨེསུ དཱཡཱདོ, ཨོརསོ དྷམྨནིམྨིཏོ;

མནྟཱཎིཔུཏྟོ པུཎྞོཏི, ཧེསྶཏི སཏྠུ སཱཝཀོ.

༤༥༥.

‘‘ཨེཝཾ ཀིཏྟཡི སམྦུདྡྷོ, སུནནྡཾ ཏཱཔསཾ ཏདཱ;

ཧཱསཡནྟོ ཛནཾ སབྦཾ, དསྶཡནྟོ སཀཾ བལཾ.

༤༥༦.

‘‘ཀཏཉྫལཱི ནམསྶནྟི, སུནནྡཾ ཏཱཔསཾ ཛནཱ;

བུདྡྷེ ཀཱརཾ ཀརིཏྭཱན, སོདྷེསི གཏིམཏྟནོ.

༤༥༧.

‘‘ཏཏྠ མེ ཨཧུ སངྐཔྤོ, སུཏྭཱན མུནིནོ ཝཙཾ;

ཨཧམྤི ཀཱརཾ ཀསྶཱམི, ཡཐཱ པསྶཱམི གོཏམཾ.

༤༥༨.

‘‘ཨེཝཱཧཾ ¶ ཙིནྟཡིཏྭཱན, ཀིརིཡཾ ཙིནྟཡིཾ མམ;

ཀྱཱཧཾ ཀམྨཾ ཨཱཙརཱམི, པུཉྙཀྑེཏྟེ ཨནུཏྟརེ.

༤༥༩.

‘‘ཨཡཉྩ པཱཋིཀོ བྷིཀྑུ, སབྦཔཱཋིསྶ སཱསནེ;

ཝིནཡེ ཨགྒནིཀྑིཏྟོ, ཏཾ ཋཱནཾ པཏྠཡེ ཨཧཾ.

༤༦༠.

‘‘ཨིདཾ ¶ མེ ཨམིཏཾ བྷོགཾ, ཨཀྑོབྷཾ སཱགརཱུཔམཾ;

ཏེན བྷོགེན བུདྡྷསྶ, ཨཱརཱམཾ མཱཔཡེ ཨཧཾ.

༤༦༡.

‘‘སོབྷནཾ ནཱམ ཨཱརཱམཾ, ནགརསྶ པུརཏྠཏོ;

ཀིཎིཏྭཱ [ཀཱིཏྭཱ (སཱི.), ཀིཏྭཱ (ཀ.)] སཏསཧསྶེན, སངྒྷཱརཱམཾ ཨམཱཔཡིཾ.

༤༦༢.

‘‘ཀཱུཊཱགཱརེ ¶ ཙ པཱསཱདེ, མཎྜཔེ ཧམྨིཡེ གུཧཱ;

ཙངྐམེ སུཀཏེ ཀཏྭཱ, སངྒྷཱརཱམཾ ཨམཱཔཡིཾ.

༤༦༣.

‘‘ཛནྟཱགྷརཾ ¶ ཨགྒིསཱལཾ, ཨཐོ ཨུདཀམཱལ༹ཀཾ;

ནྷཱནགྷརཾ མཱཔཡིཏྭཱ, བྷིཀྑུསངྒྷསྶདཱསཧཾ.

༤༦༤.

‘‘ཨཱསནྡིཡོ པཱིཋཀེ ཙ, པརིབྷོགེ ཙ བྷཱཛནེ;

ཨཱརཱམིཀཉྩ བྷེསཛྫཾ, སབྦམེཏཾ ཨདཱསཧཾ.

༤༦༥.

‘‘ཨཱརཀྑཾ པཊྛཔེཏྭཱན, པཱཀཱརཾ ཀཱརཡིཾ དལ༹ྷཾ;

མཱ ནཾ ཀོཙི ཝིཧེཋེསི, སནྟཙིཏྟཱན ཏཱདིནཾ.

༤༦༦.

‘‘སཏསཧསྶེནཱཝཱསཾ [ཨཱཝཱསཾ སཏསཧསྶེན (སཱི.), ཨཱཝཱསེ སཏསཧསྶེ (སྱཱ.)], སངྒྷཱརཱམེ ཨམཱཔཡིཾ;

ཝེཔུལླཾ ཏཾ མཱཔཡིཏྭཱ [ཝེཔུལླཏཾ པཱཔཡིཏྭཱ (སཱི.)], སམྦུདྡྷཾ ཨུཔནཱམཡིཾ.

༤༦༧.

‘‘ནིཊྛཱཔིཏོ མཡཱརཱམོ, སམྤཊིཙྪ ཏུཝཾ མུནི;

ནིཡྻཱདེསྶཱམི ཏཾ ཝཱིར [ཏེ ཝཱིར (སཱི.), ཏཾ དྷཱིར (སྱཱ.)], ཨདྷིཝཱསེཧི ཙཀྑུམ.

༤༦༨.

‘‘པདུམུཏྟརོ ལོཀཝིདཱུ, ཨཱཧུཏཱིནཾ པཊིགྒཧོ;

མམ སངྐཔྤམཉྙཱཡ, ཨདྷིཝཱསེསི ནཱཡཀོ.

༤༦༩.

‘‘ཨདྷིཝཱསནམཉྙཱཡ, སབྦཉྙུསྶ མཧེསིནོ;

བྷོཛནཾ པཊིཡཱདེཏྭཱ, ཀཱལམཱརོཙཡིཾ ཨཧཾ.

༤༧༠.

‘‘ཨཱརོཙིཏམྷི ཀཱལམྷི, པདུམུཏྟརནཱཡཀོ;

ཁཱིཎཱསཝསཧསྶེཧི, ཨཱརཱམཾ མེ ཨུཔཱགམི.

༤༧༡.

‘‘ནིསིནྣཾ ¶ ཀཱལམཉྙཱཡ, ཨནྣཔཱནེན ཏཔྤཡིཾ;

བྷུཏྟཱཝིཾ ཀཱལམཉྙཱཡ, ཨིདཾ ཝཙནམབྲཝིཾ.

༤༧༢.

‘‘ཀཱིཏོ སཏསཧསྶེན, ཏཏྟཀེནེཝ ཀཱརིཏོ;

སོབྷནོ ནཱམ ཨཱརཱམོ, སམྤཊིཙྪ ཏུཝཾ མུནི.

༤༧༣.

‘‘ཨིམིནཱརཱམདཱནེན ¶ , ཙེཏནཱཔཎིདྷཱིཧི ཙ;

བྷཝེ ནིབྦཏྟམཱནོཧཾ, ལབྷཱམི མམ པཏྠིཏཾ.

༤༧༤.

‘‘པཊིགྒཧེཏྭཱ ¶ སམྦུདྡྷོ, སངྒྷཱརཱམཾ སུམཱཔིཏཾ;

བྷིཀྑུསངྒྷེ ནིསཱིདིཏྭཱ, ཨིདཾ ཝཙནམབྲཝི.

༤༧༥.

‘‘ཡོ སོ བུདྡྷསྶ པཱདཱསི, སངྒྷཱརཱམཾ སུམཱཔིཏཾ;

ཏམཧཾ ཀིཏྟཡིསྶཱམི, སུཎཱཐ མམ བྷཱསཏོ.

༤༧༦.

‘‘ཧཏྠཱི ¶ ཨསྶཱ རཐཱ པཏྟཱི, སེནཱ ཙ ཙཏུརངྒིནཱི;

པརིཝཱརེསྶནྟིམཾ ནིཙྩཾ, སངྒྷཱརཱམསྶིདཾ ཕལཾ.

༤༧༧.

‘‘སཊྛི ཏཱུརསཧསྶཱནི [ཏུརིཡསཧསྶཱནི (སཱི. སྱཱ.)], བྷེརིཡོ སམལངྐཏཱ;

པརིཝཱརེསྶནྟིམཾ ནིཙྩཾ, སངྒྷཱརཱམསྶིདཾ ཕལཾ.

༤༧༨.

‘‘ཚལ༹སཱིཏིསཧསྶཱནི, ནཱརིཡོ སམལངྐཏཱ;

ཝིཙིཏྟཝཏྠཱབྷརཎཱ, ཨཱམུཏྟམཎིཀུཎྜལཱ.

༤༧༩.

‘‘ཨལཱ༹རཔམྷཱ ཧསུལཱ, སུསཉྙཱ ཏནུམཛ྄ཛྷིམཱ;

པརིཝཱརེསྶནྟིམཾ ནིཙྩཾ, སངྒྷཱརཱམསྶིདཾ ཕལཾ.

༤༨༠.

‘‘ཏིཾསཀཔྤསཧསྶཱནི, དེཝལོཀེ རམིསྶཏི;

སཧསྶཀྑཏྟུཾ དེཝིནྡོ, དེཝརཛྫཾ ཀརིསྶཏི.

༤༨༡.

‘‘དེཝརཱཛེན པཏྟབྦཾ, སབྦཾ པཊིལབྷིསྶཏི;

ཨནཱུནབྷོགོ ཧུཏྭཱན, དེཝརཛྫཾ ཀརིསྶཏི.

༤༨༢.

‘‘སཧསྶཀྑཏྟུཾ ཙཀྐཝཏྟཱི, རཱཛཱ རཊྛེ བྷཝིསྶཏི;

པཐབྱཱ རཛྫཾ ཝིཔུལཾ, གཎནཱཏོ ཨསངྑིཡཾ.

༤༨༣.

‘‘ཀཔྤསཏསཧསྶམྷི ¶ , ཨོཀྐཱཀཀུལསམྦྷཝོ;

གོཏམོ ནཱམ གོཏྟེན, སཏྠཱ ལོཀེ བྷཝིསྶཏི.

༤༨༤.

‘‘ཏསྶ ¶ དྷམྨེསུ དཱཡཱདོ, ཨོརསོ དྷམྨནིམྨིཏོ;

ཨུཔཱལི ནཱམ ནཱམེན, ཧེསྶཏི སཏྠུ སཱཝཀོ.

༤༨༥.

‘‘ཝིནཡེ པཱརམིཾ པཏྭཱ, ཋཱནཱཋཱནེ ཙ ཀོཝིདོ;

ཛིནསཱསནཾ དྷཱརེནྟོ, ཝིཧརིསྶཏིནཱསཝོ.

༤༨༦.

‘‘སབྦམེཏཾ ཨབྷིཉྙཱཡ, གོཏམོ སཀྱཔུངྒཝོ;

བྷིཀྑུསངྒྷེ ནིསཱིདིཏྭཱ, ཨེཏདགྒེ ཋཔེསྶཏི.

༤༨༧.

‘‘ཨཔརིམེཡྻུཔཱདཱཡ, པཏྠེམི ཏཝ སཱསནཾ;

སོ མེ ཨཏྠོ ཨནུཔྤཏྟོ, སབྦསཾཡོཛནཀྑཡོ.

༤༨༨.

‘‘ཡཐཱ ¶ སཱུལཱཝུཏོ པོསོ, རཱཛདཎྜེན ཏཛྫིཏོ;

སཱུལེ སཱཏཾ ཨཝིནྡནྟོ, པརིམུཏྟིཾཝ ཨིཙྪཏི.

༤༨༩.

‘‘ཏཐེཝཱཧཾ ¶ མཧཱཝཱིར, བྷཝདཎྜེན ཏཛྫིཏོ;

ཀམྨསཱུལཱཝུཏོ སནྟོ, པིཔཱསཱཝེདནཊྚིཏོ.

༤༩༠.

‘‘བྷཝེ སཱཏཾ ན ཝིནྡཱམི, ཌཡ྄ཧནྟོ ཏཱིཧི ཨགྒིབྷི;

པརིམུཏྟིཾ གཝེསཱམི, ཡཐཱཔི རཱཛདཎྜིཏོ.

༤༩༡.

‘‘ཡཐཱ ¶ ཝིསཱདོ པུརིསོ, ཝིསེན པརིཔཱིལི༹ཏོ;

ཨགདཾ སོ གཝེསེཡྻ, ཝིསགྷཱཏཱཡུཔཱལནཾ [ཝིསགྷཱཏཱཡུཔཱཡནཾ (སྱཱ. ཀ.)].

༤༩༢.

‘‘གཝེསམཱནོ པསྶེཡྻ, ཨགདཾ ཝིསགྷཱཏཀཾ;

ཏཾ པིཝིཏྭཱ སུཁཱི ཨསྶ, ཝིསམྷཱ པརིམུཏྟིཡཱ.

༤༩༣.

‘‘ཏཐེཝཱཧཾ མཧཱཝཱིར, ཡཐཱ ཝིསཧཏོ ནརོ;

སམྤཱིལི༹ཏོ ཨཝིཛྫཱཡ, སདྡྷམྨཱགདམེསཧཾ.

༤༩༤.

‘‘དྷམྨཱགདཾ གཝེསནྟོ, ཨདྡཀྑིཾ སཀྱསཱསནཾ;

ཨགྒཾ སབྦོསདྷཱནཾ ཏཾ, སབྦསལླཝིནོདནཾ.

༤༩༥.

‘‘དྷམྨོསདྷཾ པིཝིཏྭཱན, ཝིསཾ སབྦཾ སམཱུཧནིཾ;

ཨཛརཱམརཾ སཱིཏིབྷཱཝཾ, ནིབྦཱནཾ ཕསྶཡིཾ ཨཧཾ.

༤༩༦.

‘‘ཡཐཱ བྷཱུཏཊྚིཏོ པོསོ, བྷཱུཏགྒཱཧེན པཱིལི༹ཏོ;

བྷཱུཏཝེཛྫཾ གཝེསེཡྻ, བྷཱུཏསྨཱ པརིམུཏྟིཡཱ.

༤༩༧.

‘‘གཝེསམཱནོ ¶ པསྶེཡྻ, བྷཱུཏཝིཛྫཱསུ ཀོཝིདཾ;

ཏསྶ སོ ཝིཧནེ བྷཱུཏཾ, སམཱུལཉྩ ཝིནཱསཡེ.

༤༩༨.

‘‘ཏཐེཝཱཧཾ ¶ མཧཱཝཱིར, ཏམགྒཱཧེན པཱིལི༹ཏོ;

ཉཱཎཱལོཀཾ གཝེསཱམི, ཏམཏོ པརིམུཏྟིཡཱ.

༤༩༩.

‘‘ཨཐདྡསཾ སཀྱམུནིཾ, ཀིལེསཏམསོདྷནཾ;

སོ མེ ཏམཾ ཝིནོདེསི, བྷཱུཏཝེཛྫོཝ བྷཱུཏཀཾ.

༥༠༠.

‘‘སཾསཱརསོཏཾ སཉྪིནྡིཾ, ཏཎྷཱསོཏཾ ནིཝཱརཡིཾ;

བྷཝཾ ཨུགྒྷཱཊཡིཾ སབྦཾ, བྷཱུཏཝེཛྫོཝ མཱུལཏོ.

༥༠༡.

‘‘གརུལོ༹ ཡཐཱ ཨོཔཏཏི, པནྣགཾ བྷཀྑམཏྟནོ;

སམནྟཱ ཡོཛནསཏཾ, ཝིཀྑོབྷེཏི མཧཱསརཾ.

༥༠༢.

‘‘པནྣགཾ ¶ སོ གཧེཏྭཱན, ཨདྷོསཱིསཾ ཝིཧེཋཡཾ;

ཨཱདཱཡ སོ པཀྐམཏི, ཡེནཀཱམཾ ཝིཧངྒམོ.

༥༠༣.

‘‘ཏཐེཝཱཧཾ མཧཱཝཱིར, ཡཐཱཔི གརུལོ༹ བལཱི;

ཨསངྑཏཾ གཝེསནྟོ, དོསེ ཝིཀྑཱལཡིཾ ཨཧཾ.

༥༠༤.

‘‘དིཊྛོ ཨཧཾ དྷམྨཝརཾ, སནྟིཔདམནུཏྟརཾ;

ཨཱདཱཡ ཝིཧརཱམེཏཾ, གརུལོ༹ པནྣགཾ ཡཐཱ.

༥༠༥.

‘‘ཨཱསཱཝཏཱི ནཱམ ལཏཱ, ཛཱཏཱ ཙིཏྟལཏཱཝནེ;

ཏསྶཱ ཝསྶསཧསྶེན, ཨེཀཾ ནིབྦཏྟཏེ ཕལཾ.

༥༠༦.

‘‘ཏཾ ¶ དེཝཱ པཡིརུཔཱསནྟི, ཏཱཝདཱུརཕལེ སཏི;

དེཝཱནཾ སཱ པིཡཱ ཨེཝཾ, ཨཱསཱཝཏཱི ལཏུཏྟམཱ.

༥༠༧.

‘‘སཏསཧསྶུཔཱདཱཡ, ཏཱཧཾ པརིཙརེ མུནི;

སཱཡཾ པཱཏཾ ནམསྶཱམི, དེཝཱ ཨཱསཱཝཏིཾ ཡཐཱ.

༥༠༨.

‘‘ཨཝཉྫྷཱ པཱརིཙརིཡཱ, ཨམོགྷཱ ཙ ནམསྶནཱ;

དཱུརཱགཏམྤི མཾ སནྟཾ, ཁཎོཡཾ ན ཝིརཱདྷཡི.

༥༠༩.

‘‘པཊིསནྡྷིཾ ན པསྶཱམི, ཝིཙིནནྟོ བྷཝེ ཨཧཾ;

ནིརཱུཔདྷི ཝིཔྤམུཏྟོ [ཝིཔྤཡུཏྟོ (ཀ.)], ཨུཔསནྟོ ཙརཱམཧཾ.

༥༡༠.

‘‘ཡཐཱཔི ¶ པདུམཾ ནཱམ, སཱུརིཡརཾསེན པུཔྥཏི;

ཏཐེཝཱཧཾ མཧཱཝཱིར, བུདྡྷརཾསེན པུཔྥིཏོ.

༥༡༡.

‘‘ཡཐཱ བལཱཀཡོནིམྷི, ན ཝིཛྫཏི པུམོ [པུམཱ (སཱི. སྱཱ.)] སདཱ;

མེགྷེསུ གཛྫམཱནེསུ, གབྦྷཾ གཎྷནྟི ཏཱ སདཱ.

༥༡༢.

‘‘ཙིརམྤི གབྦྷཾ དྷཱརེནྟི, ཡཱཝ མེགྷོ ན གཛྫཏི;

བྷཱརཏོ པརིམུཙྩནྟི, ཡདཱ མེགྷོ པཝསྶཏི.

༥༡༣.

‘‘པདུམུཏྟརབུདྡྷསྶ ¶ , དྷམྨམེགྷེན གཛྫཏོ;

སདྡེན དྷམྨམེགྷསྶ, དྷམྨགབྦྷཾ ཨགཎྷཧཾ.

༥༡༤.

སཏསཧསྶུཔཱདཱཡ, པུཉྙགབྦྷཾ དྷརེམཧཾ;

ནཔྤམུཙྩཱམི བྷཱརཏོ, དྷམྨམེགྷོ ན གཛྫཏི.

༥༡༥.

‘‘ཡདཱ ཏུཝཾ སཀྱམུནི, རམྨེ ཀཔིལཝཏྠཝེ;

གཛྫསི དྷམྨམེགྷེན, བྷཱརཏོ པརིམུཙྩཧཾ.

༥༡༦.

‘‘སུཉྙཏཾ ¶ ཨནིམིཏྟཉྩ, ཏཐཱཔྤཎིཧིཏམྤི ཙ;

ཙཏུརོ ཙ ཕལེ སབྦེ, དྷམྨེཝཾ ཝིཛནཡིཾ [ཝིཛཊཡིཾ (ཀ.) བལཱཀཱནཾ ཝིཛཱཡནཱུཔམཱཡ སཾསནྡེཏྭཱ ཨཏྠོ ཝེདིཏབྦོ] ཨཧཾ.

དུཏིཡབྷཱཎཝཱརཾ.

༥༡༧.

‘‘ཨཔརིམེཡྻུཔཱདཱཡ, པཏྠེམི ཏཝ སཱསནཾ;

སོ མེ ཨཏྠོ ཨནུཔྤཏྟོ, སནྟིཔདམནུཏྟརཾ.

༥༡༨.

‘‘ཝིནཡེ ¶ པཱརམིཾ པཏྟོ, ཡཐཱཔི པཱཋིཀོ ཨིསི;

ན མེ སམསམོ ཨཏྠི, དྷཱརེམི སཱསནཾ ཨཧཾ.

༥༡༩.

‘‘ཝིནཡེ ཁནྡྷཀེ ཙཱཔི, ཏིཀཙྪེདེ ཙ པཉྩཀེ [པཉྩམེ (སཱི.)];

ཨེཏྠ མེ ཝིམཏི ནཏྠི, ཨཀྑརེ བྱཉྫནེཔི ཝཱ.

༥༢༠.

‘‘ནིགྒཧེ པཊིཀམྨེ ཙ, ཋཱནཱཋཱནེ ཙ ཀོཝིདོ;

ཨོསཱརཎེ ཝུཊྛཱཔནེ, སབྦཏྠ པཱརམིཾ གཏོ.

༥༢༡.

‘‘ཝིནཡེ ཁནྡྷཀེ ཝཱཔི, ནིཀྑིཔིཏྭཱ པདཾ ཨཧཾ;

ཨུབྷཏོ ཝིནིཝེཋེཏྭཱ, རསཏོ ཨོསརེཡྻཧཾ.

༥༢༢.

‘‘ནིརུཏྟིཡཱ ¶ ¶ སུཀུསལོ, ཨཏྠཱནཏྠེ ཙ ཀོཝིདོ;

ཨནཉྙཱཏཾ མཡཱ ནཏྠི, ཨེཀགྒོ སཏྠུ སཱསནེ.

༥༢༣.

‘‘རཱུཔདཀྑོ [རཱུཔརཀྑོ (?) མིལིནྡཔཉྷོ དྷམྨནགརཱདྷིཀཱརེ པསྶིཏབྦཾ] ཨཧཾ ཨཛྫ, སཀྱཔུཏྟསྶ སཱསནེ;

ཀངྑཾ སབྦཾ ཝིནོདེམི, ཚིནྡཱམི སབྦསཾསཡཾ.

༥༢༤.

‘‘པདཾ ཨནུཔདཉྩཱཔི, ཨཀྑརཉྩཱཔི བྱཉྫནཾ;

ནིདཱནེ པརིཡོསཱནེ, སབྦཏྠ ཀོཝིདོ ཨཧཾ.

༥༢༥.

‘‘ཡཐཱཔི རཱཛཱ བལཝཱ, ནིགྒཎྷིཏྭཱ པརནྟཔེ;

ཝིཛིནིཏྭཱན སངྒཱམཾ, ནགརཾ ཏཏྠ མཱཔཡེ.

༥༢༦.

‘‘པཱཀཱརཾ པརིཁཉྩཱཔི, ཨེསིཀཾ དྭཱརཀོཊྛཀཾ;

ཨཊྚཱལཀེ ཙ ཝིཝིདྷེ, ཀཱརཡེ ནགརེ བཧཱུ.

༥༢༧.

‘‘སིངྒྷཱཊཀཾ ཙཙྩརཉྩ, སུཝིབྷཏྟནྟརཱཔཎཾ;

ཀཱརཡེཡྻ སབྷཾ ཏཏྠ, ཨཏྠཱནཏྠཝིནིཙྪཡཾ.

༥༢༨.

‘‘ནིགྒྷཱཏཏྠཾ ཨམིཏྟཱནཾ, ཚིདྡཱཚིདྡཉྩ ཛཱནིཏུཾ;

བལཀཱཡསྶ རཀྑཱཡ, སེནཱཔཙྩཾ ཋཔེཏི [ཐཔེསི (ཀ.)] སོ.

༥༢༩.

‘‘ཨཱརཀྑཏྠཱཡ ¶ བྷཎྜསྶ, ནིདྷཱནཀུསལཾ ནརཾ;

མཱ མེ བྷཎྜཾ ཝིནསྶཱིཏི, བྷཎྜརཀྑཾ ཋཔེཏི སོ.

༥༣༠.

‘‘མམཏྟོ [མཱམཀོ (སཱི.), སམགྒོ (སྱཱ.)]

ཧོཏི ཡོ རཉྙོ, ཝུདྡྷིཾ ཡསྶ ཙ ཨིཙྪཏི.

ཏསྶཱདྷིཀརཎཾ དེཏི, མིཏྟསྶ པཊིཔཛྫིཏུཾ.

༥༣༡.

‘‘ཨུཔྤཱཏེསུ ནིམིཏྟེསུ, ལཀྑཎེསུ ཙ ཀོཝིདཾ;

ཨཛ྄ཛྷཱཡཀཾ མནྟདྷརཾ, པོརོཧིཙྩེ ཋཔེཏི སོ.

༥༣༢.

‘‘ཨེཏེཧངྒེཧི ¶ ¶ སམྤནྣོ, ཁཏྟིཡོཏི པཝུཙྩཏི;

སདཱ རཀྑནྟི རཱཛཱནཾ, ཙཀྐཝཱཀོཝ དུཀྑིཏཾ.

༥༣༣.

‘‘ཏཐེཝ ཏྭཾ མཧཱཝཱིར, ཧཏཱམིཏྟོཝ ཁཏྟིཡོ;

སདེཝཀསྶ ལོཀསྶ, དྷམྨརཱཛཱཏི ཝུཙྩཏི.

༥༣༤.

‘‘ཏིཏྠིཡེ ནིཧནིཏྭཱན [ནཱིཧརིཏྭཱན (སྱཱ. ཀ.)], མཱརཉྩཱཔི སསེནཀཾ;

ཏམནྡྷཀཱརཾ ཝིདྷམིཏྭཱ, དྷམྨནགརཾ ཨམཱཔཡི.

༥༣༥.

‘‘སཱིལཾ ¶ པཱཀཱརཀཾ ཏཏྠ, ཉཱཎཾ ཏེ དྭཱརཀོཊྛཀཾ;

སདྡྷཱ ཏེ ཨེསིཀཱ ཝཱིར, དྭཱརཔཱལོ ཙ སཾཝརོ.

༥༣༦.

‘‘སཏིཔཊྛཱནམཊྚཱལཾ, པཉྙཱ ཏེ ཙཙྩརཾ མུནེ;

ཨིདྡྷིཔཱདཉྩ སིངྒྷཱཊཾ, དྷམྨཝཱིཐི སུམཱཔིཏཱ.

༥༣༧.

‘‘སུཏྟནྟཾ ཨབྷིདྷམྨཉྩ, ཝིནཡཉྩཱཔི ཀེཝལཾ;

ནཝངྒཾ བུདྡྷཝཙནཾ, ཨེསཱ དྷམྨསབྷཱ ཏཝ.

༥༣༨.

‘‘སུཉྙཏཾ ཨནིམིཏྟཉྩ, ཝིཧཱརཉྩཔྤཎཱིཧིཏཾ;

ཨཱནེཉྫཉྩ ནིརོདྷོ ཙ, ཨེསཱ དྷམྨཀུཊཱི ཏཝ.

༥༣༩.

‘‘པཉྙཱཡ ཨགྒོ ནིཀྑིཏྟོ [ཨགྒནིཀྑིཏྟོ (སཱི.)], པཊིབྷཱནེ ཙ ཀོཝིདོ;

སཱརིཔུཏྟོཏི ནཱམེན, དྷམྨསེནཱཔཏཱི ཏཝ.

༥༤༠.

‘‘ཙུཏཱུཔཔཱཏཀུསལོ, ཨིདྡྷིཡཱ པཱརམིཾ གཏོ;

ཀོལིཏོ ནཱམ ནཱམེན, པོརོཧིཙྩོ ཏཝཾ མུནེ.

༥༤༡.

‘‘པོརཱཎཀཝཾསདྷརོ, ཨུགྒཏེཛོ དུརཱསདོ;

དྷུཏཝཱདཱིགུཎེནགྒོ, ཨཀྑདསྶོ ཏཝཾ མུནེ.

༥༤༢.

‘‘བཧུསྶུཏོ ¶ དྷམྨདྷརོ, སབྦཔཱཋཱི ཙ སཱསནེ;

ཨཱནནྡོ ནཱམ ནཱམེན, དྷམྨཱརཀྑོ [དྷམྨརཀྑོ (སྱཱ.)] ཏཝཾ མུནེ.

༥༤༣.

‘‘ཨེཏེ ¶ སབྦེ ཨཏིཀྐམྨ, པམེསི བྷགཝཱ མམཾ;

ཝིནིཙྪཡཾ མེ པཱདཱསི, ཝིནཡེ ཝིཉྙུདེསིཏཾ.

༥༤༤.

‘‘ཡོ ཀོཙི ཝིནཡེ པཉྷཾ, པུཙྪཏི བུདྡྷསཱཝཀོ;

ཏཏྠ མེ ཙིནྟནཱ ནཏྠི, ཏཉྙེཝཏྠཾ ཀཐེམཧཾ.

༥༤༥.

‘‘ཡཱཝཏཱ བུདྡྷཁེཏྟམྷི, ཋཔེཏྭཱ ཏཾ མཧཱམུནི;

ཝིནཡེ མཱདིསོ ནཏྠི, ཀུཏོ བྷིཡྻོ བྷཝིསྶཏི.

༥༤༦.

‘‘བྷིཀྑུསངྒྷེ ¶ ནིསཱིདིཏྭཱ, ཨེཝཾ གཛྫཏི གོཏམོ;

ཨུཔཱལིསྶ སམོ ནཏྠི, ཝིནཡེ ཁནྡྷཀེསུ ཙ.

༥༤༧.

‘‘ཡཱཝཏཱ བུདྡྷབྷཎིཏཾ, ནཝངྒཾ སཏྠུསཱསནཾ;

ཝིནཡོགདྷཾ ཏཾ [ཝིནཡོགདྷིཏཾ (སཱི. ཨཊྛ.), ཝིནཡེ ཀཐིཏཾ (སྱཱ.)] སབྦཾ,

ཝིནཡམཱུལཔསྶིནོ [ཝིནཡཾ མཱུལནྟི པསྶཏོ (སཱི.)].

༥༤༨.

‘‘མམ ¶ ཀམྨཾ སརིཏྭཱན, གོཏམོ སཀྱཔུངྒཝོ;

བྷིཀྑུསངྒྷེ ནིསཱིདིཏྭཱ, ཨེཏདགྒེ ཋཔེསི མཾ.

༥༤༩.

‘‘སཏསཧསྶུཔཱདཱཡ, ཨིམཾ ཋཱནཾ ཨཔཏྠཡིཾ;

སོ མེ ཨཏྠོ ཨནུཔྤཏྟོ, ཝིནཡེ པཱརམིཾ གཏོ.

༥༥༠.

‘‘སཀྱཱནཾ ནནྡིཛནནོ, ཀཔྤཀོ ཨཱསཧཾ པུརེ;

ཝིཛཧིཏྭཱན ཏཾ ཛཱཏིཾ, པུཏྟོ ཛཱཏོ མཧེསིནོ.

༥༥༡.

‘‘ཨིཏོ དུཏིཡཀེ ཀཔྤེ, ཨཉྫསོ ནཱམ ཁཏྟིཡོ;

ཨནནྟཏེཛོ ཨམིཏཡསོ, བྷཱུམིཔཱལོ མཧདྡྷནོ.

༥༥༢.

‘‘ཏསྶ ¶ རཉྙོ ཨཧཾ པུཏྟོ, ཙནྡནོ ནཱམ ཁཏྟིཡོ;

ཛཱཏིམདེནུཔཏྠདྡྷོ, ཡསབྷོགམདེན ཙ.

༥༥༣.

‘‘ནཱགསཏསཧསྶཱནི, སབྦཱལངྐཱརབྷཱུསིཏཱ;

ཏིདྷཱཔབྷིནྣཱ མཱཏངྒཱ, པརིཝཱརེནྟི མཾ སདཱ.

༥༥༤.

‘‘སབལེཧི པརེཏོཧཾ, ཨུཡྻཱནཾ གནྟུཀཱམཀོ;

ཨཱརུཡ྄ཧ སིརིཀཾ ནཱགཾ, ནགརཱ ནིཀྑམིཾ ཏདཱ.

༥༥༥.

‘‘ཙརཎེན ཙ སམྤནྣོ, གུཏྟདྭཱརོ སུསཾཝུཏོ;

དེཝལོ ནཱམ སམྦུདྡྷོ, ཨཱགཙྪི པུརཏོ མམ.

༥༥༦.

‘‘པེསེཏྭཱ སིརིཀཾ ནཱགཾ, བུདྡྷཾ ཨཱསཱདཡིཾ ཏདཱ;

ཏཏོ སཉྫཱཏཀོཔོ སོ [ཛཱཏཀོཔོཝ (སྱཱ.)], ནཱགོ ནུདྡྷརཏེ པདཾ.

༥༥༧.

‘‘ནཱགཾ ¶ རུཎྞམནཾ [རུཊྛམནཾ (པཱི. ཨཊྛ.), དུཊྛམནཾ (སཱི. ཨཊྛ.), རུདྡྷཔདཾ (?)] དིསྭཱ, བུདྡྷེ ཀོདྷཾ ཨཀཱསཧཾ;

ཝིཧེསཡིཏྭཱ སམྦུདྡྷཾ, ཨུཡྻཱནཾ ཨགམཱསཧཾ.

༥༥༨.

‘‘སཱཏཾ ཏཏྠ ན ཝིནྡཱམི, སིརོ པཛྫལིཏོ ཡཐཱ;

པརིལཱ༹ཧེན ཌཡ྄ཧཱམི, མཙྪོཝ བལི༹སཱདཀོ.

༥༥༩.

‘‘སསཱགརནྟཱ ¶ པཐཝཱི, ཨཱདིཏྟཱ ཝིཡ ཧོཏི མེ;

པིཏུ སནྟིཀུཔཱགམྨ, ཨིདཾ ཝཙནམབྲཝིཾ.

༥༦༠.

‘‘ཨཱསཱིཝིསཾཝ ཀུཔིཏཾ, ཨགྒིཀྑནྡྷཾཝ ཨཱགཏཾ;

མཏྟཾཝ ཀུཉྫརཾ དནྟིཾ, ཡཾ སཡམྦྷུམསཱདཡིཾ.

༥༦༡.

‘‘ཨཱསཱདིཏོ ¶ མཡཱ བུདྡྷོ, གྷོརོ ཨུགྒཏཔོ ཛིནོ;

པུརཱ སབྦེ ཝིནསྶཱམ, ཁམཱཔེསྶཱམ ཏཾ མུནིཾ.

༥༦༢.

‘‘ནོ ¶ ཙེ ཏཾ ནིཛ྄ཛྷཱཔེསྶཱམ, ཨཏྟདནྟཾ སམཱཧིཏཾ;

ཨོརེན སཏྟདིཝསཱ, རཊྛཾ མེ ཝིདྷམིསྶཏི.

༥༦༣.

‘‘སུམེཁལོ ཀོསིཡོ ཙ, སིགྒཝོ ཙཱཔི སཏྟཀོ [སཏྟུཀོ (སཱི.)];

ཨཱསཱདཡིཏྭཱ ཨིསཡོ, དུགྒཏཱ ཏེ སརཊྛཀཱ.

༥༦༤.

‘‘ཡདཱ ཀུཔྤནྟི ཨིསཡོ, སཉྙཏཱ བྲཧྨཙཱརིནོ;

སདེཝཀཾ ཝིནཱསེནྟི, སསཱགརཾ སཔབྦཏཾ.

༥༦༥.

‘‘ཏིཡོཛནསཧསྶམྷི, པུརིསེ སནྣིཔཱཏཡིཾ;

ཨཙྩཡཾ དེསནཏྠཱཡ, སཡམྦྷུཾ ཨུཔསངྐམིཾ.

༥༦༦.

‘‘ཨལླཝཏྠཱ ཨལླསིརཱ, སབྦེཝ པཉྫལཱིཀཏཱ;

བུདྡྷསྶ པཱདེ ནིཔཏིཏྭཱ, ཨིདཾ ཝཙནམབྲཝུཾ [མབྲཝིཾ (ཀ.)].

༥༦༧.

‘‘ཁམསྶུ ཏྭཾ མཧཱཝཱིར, ཨབྷིཡཱཙཏི ཏཾ ཛནོ;

པརིལཱ༹ཧཾ ཝིནོདེཧི, མཱ ནོ རཊྛཾ ཝིནཱསཡ.

༥༦༨.

‘‘སདེཝམཱནུསཱ སབྦེ, སདཱནཝཱ སརཀྑསཱ;

ཨཡོམཡེན ཀུཊེན, སིརཾ བྷིནྡེཡྻུ མེ སདཱ.

༥༦༩.

‘‘དཀེ [ཨུདཀེ (སཱི. སྱཱ.)] ཨགྒི ན སཎྛཱཏི, བཱིཛཾ སེལེ ན རཱུཧཏི;

ཨགདེ ཀིམི ན སཎྛཱཏི, ཀོཔོ བུདྡྷེ ན ཛཱཡཏི.

༥༧༠.

‘‘ཡཐཱ ཙ བྷཱུམི ཨཙལཱ, ཨཔྤམེཡྻོ ཙ སཱགརོ;

ཨནནྟཀོ ཙ ཨཱཀཱསོ, ཨེཝཾ བུདྡྷཱ ཨཁོབྷིཡཱ.

༥༧༡.

‘‘སདཱ ¶ ཁནྟཱ མཧཱཝཱིརཱ, ཁམིཏཱ ཙ ཏཔསྶིནོ;

ཁནྟཱནཾ ཁམིཏཱནཉྩ, གམནཾ ཏཾ [ཝོ (སྱཱ.)] ན ཝིཛྫཏི.

༥༧༢.

‘‘ཨིདཾ ¶ ཝཏྭཱན སམྦུདྡྷོ, པརིལཱ༹ཧཾ ཝིནོདཡཾ;

མཧཱཛནསྶ པུརཏོ, ནབྷཾ ཨབྦྷུགྒམི ཏདཱ.

༥༧༣.

‘‘ཏེན ¶ ཀམྨེནཧཾ ཝཱིར, ཧཱིནཏྟཾ ཨཛ྄ཛྷུཔཱགཏོ;

སམཏིཀྐམྨ ཏཾ ཛཱཏིཾ, པཱཝིསིཾ ཨབྷཡཾ པུརཾ.

༥༧༤.

‘‘ཏདཱཔི ¶ མཾ མཧཱཝཱིར, ཌཡ྄ཧམཱནཾ སུསཎྛིཏཾ;

པརིལཱ༹ཧཾ ཝིནོདེསི, སཡམྦྷུཉྩ ཁམཱཔཡིཾ.

༥༧༥.

‘‘ཨཛྫཱཔི མཾ མཧཱཝཱིར, ཌཡ྄ཧམཱནཾ ཏིཧགྒིབྷི;

ནིབྦཱཔེསི ཏཡོ ཨགྒཱི, སཱིཏིབྷཱཝཉྩ པཱཔཡིཾ [པཱཔཡཱི (སཱི.)].

༥༧༦.

ཡེསཾ སོཏཱཝདྷཱནཏྠི, སུཎཱཐ མམ བྷཱསཏོ;

ཨཏྠཾ ཏུམྷཾ པཝཀྑཱམི, ཡཐཱ དིཊྛཾ པདཾ མམ.

༥༧༧.

‘‘སཡམྦྷུཾ ཏཾ ཝིམཱནེཏྭཱ, སནྟཙིཏྟཾ སམཱཧིཏཾ;

ཏེན ཀམྨེནཧཾ ཨཛྫ, ཛཱཏོམྷི ནཱིཙཡོནིཡཾ.

༥༧༨.

‘‘མཱ ཝོ ཁཎཾ ཝིརཱདྷེཐ, ཁཎཱཏཱིཏཱ ཧི སོཙརེ;

སདཏྠེ ཝཱཡམེཡྻཱཐ, ཁཎོ ཝོ པཊིཔཱདིཏོ.

༥༧༩.

‘‘ཨེཀཙྩཱནཉྩ ཝམནཾ, ཨེཀཙྩཱནཾ ཝིརེཙནཾ;

ཝིསཾ ཧལཱཧལཾ ཨེཀེ, ཨེཀཙྩཱནཉྩ ཨོསདྷཾ.

༥༨༠.

‘‘ཝམནཾ པཊིཔནྣཱནཾ, ཕལཊྛཱནཾ ཝིརེཙནཾ;

ཨོསདྷཾ ཕལལཱབྷཱིནཾ, པུཉྙཀྑེཏྟཾ གཝེསིནཾ.

༥༨༡.

‘‘སཱསནེན ཝིརུདྡྷཱནཾ, ཝིསཾ ཧལཱཧལཾ ཡཐཱ;

ཨཱསཱིཝིསོ དིཊྛཝིསོ [དཊྛཝིསོ (སྱཱ. ཨཊྛ.)], ཨེཝཾ ཛྷཱཔེཏི ཏཾ ནརཾ.

༥༨༢.

‘‘སཀིཾ ¶ པཱིཏཾ ཧལཱཧལཾ, ཨུཔརུནྡྷཏི ཛཱིཝིཏཾ;

སཱསནེན ཝིརུཛ྄ཛྷིཏྭཱ, ཀཔྤཀོཊིམྷི ཌཡ྄ཧཏི.

༥༨༣.

‘‘ཁནྟིཡཱ ཨཝིཧིཾསཱཡ, མེཏྟཙིཏྟཝཏཱཡ ཙ;

སདེཝཀཾ སོ ཏཱརཏི, ཏསྨཱ ཏེ ཨཝིརཱདྷིཡཱ [ཨཝིརོདྷིཡོ (སཱི.), ཏེ ཨཝིརོདྷིཡཱ (སྱཱ.)].

༥༨༤.

‘‘ལཱབྷཱལཱབྷེ ན སཛྫནྟི, སམྨཱནནཝིམཱནནེ;

པཐཝཱིསདིསཱ བུདྡྷཱ, ཏསྨཱ ཏེ ན ཝིརཱདྷིཡཱ [ཏེ ན ཝིརོདྷིཡཱ (སཱི. སྱཱ.)].

༥༨༥.

‘‘དེཝདཏྟེ ¶ ཙ ཝདྷཀེ, ཙོརེ ཨངྒུལིམཱལཀེ;

རཱཧུལེ དྷནཔཱལེ ཙ, སབྦེསཾ སམཀོ མུནི.

༥༨༦.

‘‘ཨེཏེསཾ ¶ པཊིགྷོ ནཏྠི, རཱགོམེསཾ ན ཝིཛྫཏི;

སབྦེསཾ སམཀོ བུདྡྷོ, ཝདྷཀསྶོརསསྶ ཙ.

༥༨༧.

‘‘པནྠེ ¶ དིསྭཱན ཀཱསཱཝཾ, ཚཌྜིཏཾ མཱིལ༹ྷམཀྑིཏཾ;

སིརསྨིཾ ཨཉྫལིཾ ཀཏྭཱ, ཝནྡིཏབྦཾ ཨིསིདྡྷཛཾ.

༥༨༨.

‘‘ཨབྦྷཏཱིཏཱ ཙ ཡེ བུདྡྷཱ, ཝཏྟམཱནཱ ཨནཱགཏཱ;

དྷཛེནཱནེན སུཛ྄ཛྷནྟི, ཏསྨཱ ཨེཏེ ནམསྶིཡཱ.

༥༨༩.

‘‘སཏྠུཀཔྤཾ སུཝིནཡཾ, དྷཱརེམི ཧདཡེནཧཾ;

ནམསྶམཱནོ ཝིནཡཾ, ཝིཧརིསྶཱམི སབྦདཱ.

༥༩༠.

‘‘ཝིནཡོ ཨཱསཡོ མཡ྄ཧཾ, ཝིནཡོ ཋཱནཙངྐམཾ;

ཀཔྤེམི ཝིནཡེ ཝཱསཾ, ཝིནཡོ མམ གོཙརོ.

༥༩༡.

‘‘ཝིནཡེ པཱརམིཔྤཏྟོ, སམཐེ ཙཱཔི ཀོཝིདོ;

ཨུཔཱལི ཏཾ མཧཱཝཱིར, པཱདེ ཝནྡཏི སཏྠུནོ.

༥༩༢.

‘‘སོ ¶ ཨཧཾ ཝིཙརིསྶཱམི, གཱམཱ གཱམཾ པུརཱ པུརཾ;

ནམསྶམཱནོ སམྦུདྡྷཾ, དྷམྨསྶ ཙ སུདྷམྨཏཾ.

༥༩༣.

‘‘ཀིལེསཱ ཛྷཱཔིཏཱ མཡ྄ཧཾ, བྷཝཱ སབྦེ སམཱུཧཏཱ;

སབྦཱསཝཱ པརིཀྑཱིཎཱ, ནཏྠི དཱནི པུནབྦྷཝོ.

༥༩༤.

‘‘སྭཱགཏཾ ཝཏ མེ ཨཱསི, བུདྡྷསེཊྛསྶ སནྟིཀེ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ.

༥༩༥.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཨུཔཱལི ཐེརོ ཨིམཱ གཱཐཱཡོ ཨབྷཱསིཏྠཱཏི.

ཨུཔཱལིཏྠེརསྶཱཔདཱནཾ ཚཊྛཾ.

༣-༧. ཨཉྙཱསིཀོཎྜཉྙཏྠེརཨཔདཱནཾ

༥༩༦.

‘‘པདུམུཏྟརསམྦུདྡྷཾ, ལོཀཛེཊྛཾ ཝིནཱཡཀཾ;

བུདྡྷབྷཱུམིམནུཔྤཏྟཾ, པཋམཾ ཨདྡསཾ ཨཧཾ.

༥༩༧.

‘‘ཡཱཝཏཱ ¶ བོདྷིཡཱ མཱུལེ, ཡཀྑཱ སབྦེ སམཱགཏཱ;

སམྦུདྡྷཾ པརིཝཱརེཏྭཱ, ཝནྡནྟི པཉྫལཱིཀཏཱ.

༥༩༨.

‘‘སབྦེ ¶ ¶ དེཝཱ ཏུཊྛམནཱ, ཨཱཀཱསེ སཉྩརནྟི ཏེ;

བུདྡྷོ ཨཡཾ ཨནུཔྤཏྟོ, ཨནྡྷཀཱརཏམོནུདོ.

༥༩༩.

‘‘ཏེསཾ ¶ ཧཱསཔརེཏཱནཾ, མཧཱནཱདོ ཨཝཏྟཐ;

ཀིལེསེ ཛྷཱཔཡིསྶཱམ, སམྨཱསམྦུདྡྷསཱསནེ.

༦༠༠.

‘‘དེཝཱནཾ གིརམཉྙཱཡ, ཝཱཙཱསབྷིམུདཱིརིཧཾ;

ཧཊྛོ ཧཊྛེན ཙིཏྟེན, ཨཱདིབྷིཀྑམདཱསཧཾ.

༦༠༡.

‘‘མམ སངྐཔྤམཉྙཱཡ, སཏྠཱ ལོཀེ ཨནུཏྟརོ;

དེཝསངྒྷེ ནིསཱིདིཏྭཱ, ཨིམཱ གཱཐཱ ཨབྷཱསཐ.

༦༠༢.

‘‘‘སཏྟཱཧཾ ཨབྷིནིཀྑམྨ, བོདྷིཾ ཨཛ྄ཛྷགམཾ ཨཧཾ;

ཨིདཾ མེ པཋམཾ བྷཏྟཾ, བྲཧྨཙཱརིསྶ ཡཱཔནཾ.

༦༠༣.

‘‘‘ཏུསིཏཱ ཧི ཨིདྷཱགནྟྭཱ, ཡོ མེ བྷིཀྑཾ ཨུཔཱནཡི;

ཏམཧཾ ཀིཏྟཡིསྶཱམི, སུཎོཐ མམ བྷཱསཏོ.

༦༠༤.

‘‘‘ཏིཾསཀཔྤསཧསྶཱནི [ཏིཾསམཏྟེ ཀཔྤསགསྶེ (སྱཱ. ཀ.)], དེཝརཛྫཾ ཀརིསྶཏི;

སབྦེ དེཝེ ཨབྷིབྷོཏྭཱ, ཏིདིཝཾ ཨཱཝསིསྶཏི.

༦༠༥.

‘‘‘དེཝལོཀཱ ཙཝིཏྭཱན, མནུསྶཏྟཾ གམིསྶཏི;

སཧསྶདྷཱ ཙཀྐཝཏྟཱི, ཏཏྠ རཛྫཾ ཀརིསྶཏི.

༦༠༦.

‘‘‘ཀཔྤསཏསཧསྶམྷི, ཨོཀྐཱཀཀུལསམྦྷཝོ;

གོཏམོ ནཱམ གོཏྟེན, སཏྠཱ ལོཀེ བྷཝིསྶཏི.

༦༠༧.

‘‘‘ཏིདསཱ སོ ཙཝིཏྭཱན, མནུསྶཏྟཾ གམིསྶཏི;

ཨགཱརཱ པབྦཛིཏྭཱན, ཚབྦསྶཱནི ཝསིསྶཏི.

༦༠༨.

‘‘‘ཏཏོ སཏྟམཀེ ཝསྶེ, བུདྡྷོ སཙྩཾ ཀཐེསྶཏི;

ཀོཎྜཉྙོ ནཱམ ནཱམེན, པཋམཾ སཙྪིཀཱཧིཏི’.

༦༠༩.

‘‘ནིཀྑནྟེནཱནུཔབྦཛིཾ ¶ , པདྷཱནཾ སུཀཏཾ མཡཱ;

ཀིལེསེ ཛྷཱཔནཏྠཱཡ, པབྦཛིཾ ཨནགཱརིཡཾ.

༦༡༠.

‘‘ཨབྷིགནྟྭཱན སབྦཉྙཱུ, བུདྡྷོ ལོཀེ སདེཝཀེ;

ཨིསིནཱམེ མིགཱརཉྙེ [ཨིམིནཱ མེ མཧཱརཉྙཾ (སྱཱ.), ཨིམིནཱ མེ མིགཱརཉྙཾ (ཀ.)], ཨམཏབྷེརིམཱཧནི.

༦༡༡.

‘‘སོ ¶ ¶ དཱནི པཏྟོ ཨམཏཾ, སནྟིཔདམནུཏྟརཾ;

སབྦཱསཝེ པརིཉྙཱཡ, ཝིཧརཱམི ཨནཱསཝོ.

༦༡༢.

‘‘པཊིསམྦྷིདཱ ¶ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཨཉྙཱསིཀོཎྜཉྙོ [ཨཉྙཱཏཀོཎྜཉྙོ (སཱི.), ཨཉྙཱ ཀོཎྜཉྙོ (སྱཱ.)] ཐེརོ ཨིམཱ

གཱཐཱཡོ ཨབྷཱསིཏྠཱཏི.

ཨཉྙཱསིཀོཎྜཉྙཏྠེརསྶཱཔདཱནཾ སཏྟམཾ.

༣-༨. པིཎྜོལབྷཱརདྭཱཛཏྠེརཨཔདཱནཾ

༦༡༣.

‘‘པདུམུཏྟརོ ནཱམ ཛིནོ, སཡམྦྷཱུ ཨགྒཔུགྒལོ;

པུརཏོ ཧིམཝནྟསྶ, ཙིཏྟཀཱུཊེ ཝསཱི ཏདཱ.

༦༡༤.

‘‘ཨབྷཱིཏརཱུཔོ ཏཏྠཱསིཾ, མིགརཱཛཱ ཙཏུཀྐམོ;

ཏསྶ སདྡཾ སུཎིཏྭཱན, ཝིཀྑམྦྷནྟི བཧུཛྫནཱ.

༦༡༥.

‘‘སུཕུལླཾ པདུམཾ གཡ྄ཧ, ཨུཔགཙྪིཾ ནརཱསབྷཾ;

ཝུཊྛིཏསྶ སམཱདྷིམྷཱ, བུདྡྷསྶ ཨབྷིརོཔཡིཾ.

༦༡༦.

‘‘ཙཱཏུདྡིསཾ ¶ ནམསྶིཏྭཱ, བུདྡྷསེཊྛཾ ནརུཏྟམཾ;

སཀཾ ཙིཏྟཾ པསཱདེཏྭཱ, སཱིཧནཱདཾ ནདིཾ ཨཧཾ [ཏདཱ (སྱཱ.)].

༦༡༧.

‘‘པདུམུཏྟརོ ལོཀཝིདཱུ, ཨཱཧུཏཱིནཾ པཊིགྒཧོ;

སཀཱསནེ ནིསཱིདིཏྭཱ, ཨིམཱ གཱཐཱ ཨབྷཱསཐ.

༦༡༨.

‘‘‘བུདྡྷསྶ གིརམཉྙཱཡ, སབྦེ དེཝཱ སམཱགཏཱ;

ཨཱགཏོ ཝདཏཾ སེཊྛོ, དྷམྨཾ སོསྶཱམ ཏཾ མཡཾ.

༦༡༩.

‘‘‘ཏེསཾ ཧཱསཔརེཏཱནཾ, པུརཏོ ལོཀནཱཡཀོ;

མམ སདྡཾ [ཀམྨཾ (?)] པཀིཏྟེསི, དཱིགྷདསྶཱི མཧཱམུནི’.

༦༢༠.

‘‘ཡེནིདཾ པདུམཾ དིནྣཾ, སཱིཧནཱདོ ཙ ནཱདིཏོ;

ཏམཧཾ ཀིཏྟཡིསྶཱམི, སུཎཱཐ མམ བྷཱསཏོ.

༦༢༡.

‘‘‘ཨིཏོ ¶ ཨཊྛམཀེ ཀཔྤེ, ཙཀྐཝཏྟཱི བྷཝིསྶཏི;

སཏྟརཏནསམྤནྣོ ཙཏུདཱིཔམྷི ཨིསྶརོ.

༦༢༢.

‘‘‘ཀཱརཡིསྶཏི ཨིསྶརིཡཾ [ཨིསྶརཾ (སྱཱ. ཀ.)], མཧིཡཱ ཙཏུསཊྛིཡཱ;

པདུམོ ནཱམ ནཱམེན, ཙཀྐཝཏྟཱི མཧབྦལོ.

༦༢༣.

‘‘ཀཔྤསཏསཧསྶམྷི ¶ ¶ , ཨོཀྐཱཀཀུལསམྦྷཝོ;

གོཏམོ ནཱམ གོཏྟེན, སཏྠཱ ལོཀེ བྷཝིསྶཏི.

༦༢༤.

‘པཀཱསིཏེ པཱཝཙནེ, བྲཧྨབནྡྷུ བྷཝིསྶཏི;

བྲཧྨཉྙཱ ཨབྷིནིཀྑམྨ, པབྦཛིསྶཏི ཏཱཝདེ’.

༦༢༥.

‘‘པདྷཱནཔཧིཏཏྟོ སོ, ཨུཔསནྟོ ནིརཱུཔདྷི;

སབྦཱསཝེ པརིཉྙཱཡ, ནིབྦཱཡིསྶཏིནཱསཝོ.

༦༢༦.

‘‘ཝིཛནེ ¶ པནྟསེཡྻམྷི, ཝཱལ༹མིགསམཱཀུལེ;

སབྦཱསཝེ པརིཉྙཱཡ, ནིབྦཱཡིསྶཏིནཱསཝོ.

༦༢༧.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ པིཎྜོལབྷཱརདྭཱཛོ ཐེརོ ཨིམཱ གཱཐཱཡོ ཨབྷཱསིཏྠཱཏི.

པིཎྜོལབྷཱརདྭཱཛཏྠེརསྶཱཔདཱནཾ ཨཊྛམཾ.

༣-༩. ཁདིརཝནིཡརེཝཏཏྠེརཨཔདཱནཾ

༦༢༨.

‘‘གངྒཱ བྷཱགཱིརཐཱི ནཱམ, ཧིམཝནྟཱ པབྷཱཝིཏཱ;

ཀུཏིཏྠེ ནཱཝིཀོ ཨཱསིཾ, ཨོརིམེ ཙ ཏརིཾ [ཨོརིམཾ ཙ ཏརེ (སྱཱ.)] ཨཧཾ.

༦༢༩.

‘‘པདུམུཏྟརོ ནཱཡཀོ, སམྦུདྡྷོ དྭིཔདུཏྟམོ;

ཝསཱི སཏསཧསྶེཧི, གངྒཱཏཱིརམུཔཱགཏོ [པུབྦེ མཡ྄ཧཾ སུཏཾ ཨཱསི,§‘‘པདུམུཏྟརནཱཡཀོ; ཝསཱིསཏསཧསྶེཧི, གངྒཱསོཏཾ ཏརིསྶཏི‘‘; (སཱི.)].

༦༣༠.

‘‘བཧཱུ ནཱཝཱ སམཱནེཏྭཱ, ཝཌྜྷཀཱིཧི [ཙམྨཀེཧི (ཀ.)] སུསངྑཏཾ;

ནཱཝཱཡ [ནཱཝཱནཾ (ཀ.)] ཚདནཾ ཀཏྭཱ, པཊིམཱནིཾ ནརཱསབྷཾ.

༦༣༡.

‘‘ཨཱགནྟྭཱན ¶ ཙ སམྦུདྡྷོ, ཨཱརཱུཧི ཏཉྩ ནཱཝཀཾ;

ཝཱརིམཛ྄ཛྷེ ཋིཏོ སཏྠཱ, ཨིམཱ གཱཐཱ ཨབྷཱསཐ.

༦༣༢.

‘‘‘ཡོ སོ ཏཱརེསི སམྦུདྡྷཾ, སངྒྷཉྩཱཔི ཨནཱསཝཾ;

ཏེན ཙིཏྟཔྤསཱདེན, དེཝལོཀེ རམིསྶཏི.

༦༣༣.

‘‘‘ནིབྦཏྟིསྶཏི ཏེ བྱམྷཾ, སུཀཏཾ ནཱཝསཎྛིཏཾ;

ཨཱཀཱསེ པུཔྥཚདནཾ, དྷཱརཡིསྶཏི སབྦདཱ.

༦༣༤.

‘‘‘ཨཊྛཔཉྙཱསཀཔྤམྷི ¶ , ཏཱརཀོ [ཏཱརཎོ (སྱཱ.)] ནཱམ ཁཏྟིཡོ;

ཙཱཏུརནྟོ ཝིཛིཏཱཝཱི, ཙཀྐཝཏྟཱི བྷཝིསྶཏི.

༦༣༥.

‘‘‘སཏྟཔཉྙཱསཀཔྤམྷི ¶ ¶ , ཙམྨཀོ [ཙམྤཀོ (སཱི.), ཙམྦཀོ (སྱཱ.)] ནཱམ ཁཏྟིཡོ;

ཨུགྒཙྪནྟོཝ སཱུརིཡོ, ཛོཏིསྶཏི མཧབྦལོ.

༦༣༦.

‘‘‘ཀཔྤསཏསཧསྶམྷི, ཨོཀྐཱཀཀུལསམྦྷཝོ;

གོཏམོ ནཱམ གོཏྟེན, སཏྠཱ ལོཀེ བྷཝིསྶཏི.

༦༣༧.

‘‘‘ཏིདསཱ སོ ཙཝིཏྭཱན, མནུསྶཏྟཾ གམིསྶཏི;

རེཝཏོ ནཱམ ནཱམེན, བྲཧྨབནྡྷུ བྷཝིསྶཏི.

༦༣༨.

‘‘‘ཨགཱརཱ ནིཀྑམིཏྭཱན, སུཀྐམཱུལེན ཙོདིཏོ;

གོཏམསྶ བྷགཝཏོ, སཱསནེ པབྦཛིསྶཏི.

༦༣༩.

‘‘‘སོ པཙྪཱ པབྦཛིཏྭཱན, ཡུཏྟཡོགོ ཝིཔསྶཀོ;

སབྦཱསཝེ པརིཉྙཱཡ, ནིབྦཱཡིསྶཏིནཱསཝོ’.

༦༤༠.

‘‘ཝཱིརིཡཾ [ཝིརིཡཾ (སཱི. སྱཱ.)] མེ དྷུརདྷོརཡ྄ཧཾ, ཡོགཀྑེམཱདྷིཝཱཧནཾ;

དྷཱརེམི ཨནྟིམཾ དེཧཾ, སམྨཱསམྦུདྡྷསཱསནེ.

༦༤༡.

‘‘སཏསཧསྶེ ཀཏཾ ཀམྨཾ, ཕལཾ དསྶེསི མེ ཨིདྷ;

སུམུཏྟོ སརཝེགོཝ, ཀིལེསེ ཛྷཱཔཡཱི མམ.

༦༤༢.

‘‘ཏཏོ མཾ ཝནནིརཏཾ, དིསྭཱ ལོཀནྟགཱུ མུནི;

ཝནཝཱསིབྷིཀྑཱུནགྒཾ, པཉྙཔེསི མཧཱམཏི.

༦༤༣.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ ¶ སུདཾ ཨཱཡསྨཱ ཁདིརཝནིཡོ རེཝཏོ ཐེརོ ཨིམཱ གཱཐཱཡོ ཨབྷཱསིཏྠཱཏི.

ཁདིརཝནིཡརེཝཏཏྠེརསྶཱཔདཱནཾ ནཝམཾ.

༣-༡༠. ཨཱནནྡཏྠེརཨཔདཱནཾ

༦༤༤.

‘‘ཨཱརཱམདྭཱརཱ ¶ ནིཀྑམྨ, པདུམུཏྟརོ མཧཱམུནི;

ཝསྶེནྟོ ཨམཏཾ ཝུཊྛིཾ, ནིབྦཱཔེསི མཧཱཛནཾ.

༦༤༥.

‘‘སཏསཧསྶཾ ཏེ དྷཱིརཱ, ཚལ༹བྷིཉྙཱ མཧིདྡྷིཀཱ;

པརིཝཱརེནྟི སམྦུདྡྷཾ, ཚཱཡཱཝ ཨནཔཱཡིནཱི [ཨནུཔཱཡིནཱི (སྱཱ. ཀ.)].

༦༤༦.

‘‘ཧཏྠིཀྑནྡྷགཏོ ཨཱསིཾ, སེཏཙྪཏྟཾ ཝརུཏྟམཾ;

སུཙཱརུརཱུཔཾ དིསྭཱན, ཝིཏྟི མེ ཨུདཔཛྫཐ.

༦༤༧.

‘‘ཨོརུཡ྄ཧ ¶ ཧཏྠིཁནྡྷམྷཱ, ཨུཔགཙྪིཾ ནརཱསབྷཾ;

རཏནཱམཡཚཏྟཾ མེ, བུདྡྷསེཊྛསྶ དྷཱརཡིཾ.

༦༤༨.

‘‘མམ ¶ སངྐཔྤམཉྙཱཡ, པདུམུཏྟརོ མཧཱཨིསི;

ཏཾ ཀཐཾ ཋཔཡིཏྭཱན, ཨིམཱ གཱཐཱ ཨབྷཱསཐ.

༦༤༩.

‘‘‘ཡོ སོ ཚཏྟམདྷཱརེསི, སོཎྞཱལངྐཱརབྷཱུསིཏཾ;

ཏམཧཾ ཀིཏྟཡིསྶཱམི, སུཎོཐ མམ བྷཱསཏོ.

༦༥༠.

‘‘‘ཨིཏོ གནྟྭཱ ཨཡཾ པོསོ, ཏུསིཏཾ ཨཱཝསིསྶཏི;

ཨནུབྷོསྶཏི སམྤཏྟིཾ, ཨཙྪརཱཧི པུརཀྑཏོ.

༦༥༡.

‘‘‘ཙཏུཏྟིཾསཏིཀྑཏྟུཉྩ, དེཝརཛྫཾ ཀརིསྶཏི;

བལཱདྷིཔོ ཨཊྛསཏཾ, ཝསུདྷཾ ཨཱཝསིསྶཏི.

༦༥༢.

‘‘‘ཨཊྛཔཉྙཱསཀྑཏྟུཉྩ, ཙཀྐཝཏྟཱི བྷཝིསྶཏི;

པདེསརཛྫཾ ཝིཔུལཾ, མཧིཡཱ ཀཱརཡིསྶཏི.

༦༥༣.

‘‘‘ཀཔྤསཏསཧསྶམྷི ¶ , ཨོཀྐཱཀཀུལསམྦྷཝོ;

གོཏམོ ནཱམ གོཏྟེན, སཏྠཱ ལོཀེ བྷཝིསྶཏི.

༦༥༤.

‘‘‘སཀྱཱནཾ ¶ ཀུལཀེཏུསྶ, ཉཱཏིབནྡྷུ བྷཝིསྶཏི;

ཨཱནནྡོ ནཱམ ནཱམེན, ཨུཔཊྛཱཀོ མཧེསིནོ.

༦༥༥.

‘‘‘ཨཱཏཱཔཱི ནིཔཀོ ཙཱཔི, བཱཧུསཙྩེ སུཀོཝིདོ;

ནིཝཱཏཝུཏྟི ཨཏྠདྡྷོ, སབྦཔཱཋཱི བྷཝིསྶཏི.

༦༥༦.

‘‘‘པདྷཱནཔཧིཏཏྟོ སོ, ཨུཔསནྟོ ནིརཱུཔདྷི;

སབྦཱསཝེ པརིཉྙཱཡ, ནིབྦཱཡིསྶཏིནཱསཝོ.

༦༥༧.

‘‘‘སནྟི ཨཱརཉྙཀཱ ནཱགཱ, ཀུཉྫརཱ སཊྛིཧཱཡནཱ;

ཏིདྷཱཔབྷིནྣཱ མཱཏངྒཱ, ཨཱིསཱདནྟཱ ཨུརཱུལ༹ྷཝཱ.

༦༥༨.

‘‘‘ཨནེཀསཏསཧསྶཱ, པཎྜིཏཱཔི མཧིདྡྷིཀཱ;

སབྦེ ཏེ བུདྡྷནཱགསྶ, ན ཧོནྟུ པཎིདྷིམྷི ཏེ’ [ན ཧོནྟི པརིཝིམྦྷིཏཱ (སྱཱ.), ན ཧོནྟི པཎིདྷིམྷི ཏེ (ཀ.)].

༦༥༩.

‘‘ཨཱདིཡཱམེ ནམསྶཱམི, མཛ྄ཛྷིམེ ཨཐ པཙྪིམེ;

པསནྣཙིཏྟོ སུམནོ, བུདྡྷསེཊྛཾ ཨུཔཊྛཧིཾ.

༦༦༠.

‘‘ཨཱཏཱཔཱི ནིཔཀོ ཙཱཔི, སམྤཛཱནོ པཏིསྶཏོ;

སོཏཱཔཏྟིཕལཾ པཏྟོ, སེཁབྷཱུམཱིསུ ཀོཝིདོ.

༦༦༡.

‘‘སཏསཧསྶིཏོ ¶ ཀཔྤེ, ཡཾ ཀམྨམབྷིནཱིཧརིཾ;

ཏཱཧཾ བྷཱུམིམནུཔྤཏྟོ, ཋིཏཱ སདྡྷམྨམཱཙལཱ [ཋིཏོ སདྡྷམྨམཱཙལོ (སཱི.), ཋིཏཱ སདྡྷཱ མཧཔྥལཱ (སྱཱ.)].

༦༦༢.

‘‘སྭཱགཏཾ ¶ ཝཏ མེ ཨཱསི, བུདྡྷསེཊྛསྶ སནྟིཀེ;

ཏིསྶོ ཝིཛྫཱ ཨནུཔྤཏྟཱ, ཀཏཾ བུདྡྷསྶ སཱསནཾ.

༦༦༣.

‘‘པཊིསམྦྷིདཱ ¶ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཨཱནནྡོ ཐེརོ ཨིམཱ གཱཐཱཡོ ཨབྷཱསིཏྠཱཏི.

ཨཱནནྡཏྠེརསྶཱཔདཱནཾ དསམཾ.

ཏསྶུདྡཱནཾ –

བུདྡྷོ ¶ པཙྩེཀབུདྡྷོ ཙ, སཱརིཔུཏྟོ ཙ ཀོལིཏོ;

ཀསྶཔོ ཨནུརུདྡྷོ ཙ, པུཎྞཏྠེརོ ཨུཔཱལི ཙ.

ཨཉྙཱསིཀོཎྜཉྙོ པིཎྜོལོ, རེཝཏཱནནྡཔཎྜིཏོ;

ཚསཏཱནི ཙ པཉྙཱས, གཱཐཱཡོ སབྦཔིཎྜིཏཱ.

ཨཔདཱནེ བུདྡྷཝགྒོ པཋམོ.

༢. སཱིཧཱསནིཡཝགྒོ

༡. སཱིཧཱསནདཱཡཀཏྠེརཨཔདཱནཾ

༡.

‘‘ནིབྦུཏེ ¶ ¶ ¶ ལོཀནཱཐམྷི, སིདྡྷཏྠེ དྭིཔདུཏྟམེ [དིཔདུཏྟམེ (སཱི. སྱཱ.)];

ཝིཏྠཱརིཀེ པཱཝཙནེ, བཱཧུཛཉྙམྷི སཱསནེ.

༢.

‘‘པསནྣཙིཏྟོ སུམནོ, སཱིཧཱསནམཀཱསཧཾ;

སཱིཧཱསནཾ ཀརིཏྭཱན, པཱདཔཱིཋམཀཱསཧཾ.

༣.

‘‘སཱིཧཱསནེ ཙ ཝསྶནྟེ, གྷརཾ ཏཏྠ ཨཀཱསཧཾ;

ཏེན ཙིཏྟཔྤསཱདེན, ཏུསིཏཾ ཨུཔཔཛྫཧཾ.

༤.

‘‘ཨཱཡཱམེན ¶ ཙཏུབྦཱིས, ཡོཛནཾ ཨཱསི [ཡོཛནཱསིཾསུ (སྱཱ. ཀ.)] ཏཱཝདེ;

ཝིམཱནཾ སུཀཏཾ མཡ྄ཧཾ, ཝིཏྠཱརེན ཙཏུདྡས.

༥.

‘‘སཏཾ [སཏྟ (སྱཱ.)] ཀཉྙཱསཧསྶཱནི, པརིཝཱརེནྟི མཾ སདཱ;

སོཎྞམཡཉྩ པལླངྐཾ, བྱམྷེ ཨཱསི སུནིམྨིཏཾ.

༦.

‘‘ཧཏྠིཡཱནཾ ཨསྶཡཱནཾ, དིབྦཡཱནཾ ཨུཔཊྛིཏཾ;

པཱསཱདཱ སིཝིཀཱ ཙེཝ, ནིབྦཏྟནྟི ཡདིཙྪཀཾ.

༧.

‘‘མཎིམཡཱ ཙ པལླངྐཱ, ཨཉྙེ སཱརམཡཱ བཧཱུ;

ནིབྦཏྟནྟི མམཾ སབྦེ, སཱིཧཱསནསྶིདཾ ཕལཾ.

༨.

‘‘སོཎྞམཡཱ རཱུཔིམཡཱ, ཕལིཀཱཝེལུ༹རིཡཱམཡཱ;

པཱདུཀཱ ཨབྷིརཱུཧཱམི, པཱདཔཱིཋསྶིདཾ ཕལཾ.

༩.

‘‘ཙཏུནྣཝུཏིཏོ [ཙཏུནཝུཏེ ཨིཏོ (སཱི. སྱཱ.)] ཀཔྤེ, ཡཾ ཀམྨམཀརིཾ ཏདཱ;

དུགྒཏིཾ ནཱབྷིཛཱནཱམི, པུཉྙཀམྨསྶིདཾ ཕལཾ.

༡༠.

‘‘ཏེསཏྟཏིམྷིཏོ ཀཔྤེ, ཨིནྡནཱམཱ ཏཡོ ཛནཱ;

དྭེསཏྟཏིམྷིཏོ ཀཔྤེ, ཏཡོ སུམནནཱམཀཱ.

༡༡.

‘‘སམསཏྟཏིཏོ ཀཔྤེ, ཏཡོ ཝརུཎནཱམཀཱ;

སཏྟརཏནསམྤནྣཱ, ཙཏུདཱིཔམྷི ཨིསྶརཱ.

༡༢.

‘‘པཊིསམྦྷིདཱ ¶ ¶ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ སཱིཧཱསནདཱཡཀོ ཐེརོ ཨིམཱ གཱཐཱཡོ ཨབྷཱསིཏྠཱཏི.

སཱིཧཱསནདཱཡཀཏྠེརསྶཱཔདཱནཾ པཋམཾ.

༢. ཨེཀཏྠམྦྷིཀཏྠེརཨཔདཱནཾ

༡༣.

‘‘སིདྡྷཏྠསྶ ¶ ¶ བྷགཝཏོ, མཧཱཔཱུགགཎོ ཨཧུ;

སརཎཾ གཏཱ ཙ ཏེ བུདྡྷཾ, སདྡཧནྟི ཏཐཱགཏཾ.

༡༤.

‘‘སབྦེ སངྒམྨ མནྟེཏྭཱ, མཱལ༹ཾ ཀུབྦནྟི སཏྠུནོ;

ཨེཀཏྠམྦྷཾ ཨལབྷནྟཱ, ཝིཙིནནྟི བྲཧཱཝནེ.

༡༥.

‘‘ཏེཧཾ ཨརཉྙེ དིསྭཱན, ཨུཔགམྨ གཎཾ ཏདཱ;

ཨཉྫལིཾ པགྒཧེཏྭཱན, པརིཔུཙྪིཾ གཎཾ ཨཧཾ.

༡༦.

‘‘ཏེ མེ པུཊྛཱ ཝིཡཱཀཾསུ, སཱིལཝནྟོ ཨུཔཱསཀཱ;

མཱལ༹ཾ མཡཾ ཀཏྟུཀཱམཱ, ཨེཀཏྠམྦྷོ ན ལབྦྷཏི.

༡༧.

‘‘ཨེཀཏྠམྦྷཾ མམཾ དེཐ, ཨཧཾ དསྶཱམི སཏྠུནོ;

ཨཱཧརིསྶཱམཧཾ ཐམྦྷཾ, ཨཔྤོསྶུཀྐཱ བྷཝནྟུ ཏེ [བྷཝནྟུ ཝོ (སཱི.), བྷཝཱཐ ཝོ (?)].

༡༨.

‘‘ཏེ མེ ཐམྦྷཾ པཝེཙྪིཾསུ, པསནྣཱ ཏུཊྛམཱནསཱ;

ཏཏོ པཊིནིཝཏྟིཏྭཱ, ཨགམཾསུ སཀཾ གྷརཾ.

༡༩.

‘‘ཨཙིརཾ གཏེ པཱུགགཎེ, ཐམྦྷཾ ཨཧཱསཧཾ ཏདཱ;

ཧཊྛོ ཧཊྛེན ཙིཏྟེན, པཋམཾ ཨུསྶཔེསཧཾ.

༢༠.

‘‘ཏེན ཙིཏྟཔྤསཱདེན, ཝིམཱནཾ ཨུཔཔཛྫཧཾ;

ཨུབྦིདྡྷཾ བྷཝནཾ མཡ྄ཧཾ, སཏྟབྷཱུམཾ [སཏབྷཱུམཾ (སཱི. ཀ.)] སམུགྒཏཾ.

༢༡.

‘‘ཝཛྫམཱནཱསུ བྷེརཱིསུ, པརིཙཱརེམཧཾ སདཱ;

པཉྩཔཉྙཱསཀཔྤམྷི, རཱཛཱ ཨཱསིཾ ཡསོདྷརོ.

༢༢.

‘‘ཏཏྠཱཔི ¶ ¶ བྷཝནཾ མཡ྄ཧཾ, སཏྟབྷཱུམཾ སམུགྒཏཾ;

ཀཱུཊཱགཱརཝརཱུཔེཏཾ, ཨེཀཏྠམྦྷཾ མནོརམཾ.

༢༣.

‘‘ཨེཀཝཱིསཏིཀཔྤམྷི, ཨུདེནོ ནཱམ ཁཏྟིཡོ;

ཏཏྲཱཔི བྷཝནཾ མཡ྄ཧཾ, སཏྟབྷཱུམཾ སམུགྒཏཾ.

༢༤.

‘‘ཡཾ ¶ ཡཾ ཡོནུཔཔཛྫཱམི, དེཝཏྟཾ ཨཐ མཱནུསཾ;

ཨནུབྷོམི སུཁཾ སབྦཾ [སབྦམེཏཾ (སྱཱ.)], ཨེཀཏྠམྦྷསྶིདཾ ཕལཾ.

༢༥.

‘‘ཙཏུནྣཝུཏིཏོ ¶ ཀཔྤེ, ཡཾ ཐམྦྷམདདཾ ཏདཱ;

དུགྒཏིཾ ནཱབྷིཛཱནཱམི, ཨེཀཏྠམྦྷསྶིདཾ ཕལཾ.

༢༦.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཨེཀཏྠམྦྷིཀོ ཐེརོ ཨིམཱ གཱཐཱཡོ ཨབྷཱསིཏྠཱཏི.

ཨེཀཏྠམྦྷིཀཏྠེརསྶཱཔདཱནཾ དུཏིཡཾ.

༣. ནནྡཏྠེརཨཔདཱནཾ

༢༧.

‘‘པདུམུཏྟརསྶ བྷགཝཏོ, ལོཀཛེཊྛསྶ ཏཱདིནོ;

ཝཏྠཾ ཁོམཾ མཡཱ དིནྣཾ, སཡམྦྷུསྶ མཧེསིནོ.

༢༨.

‘‘ཏཾ མེ བུདྡྷོ ཝིཡཱཀཱསི, ཛལཛུཏྟརནཱམཀོ;

‘ཨིམིནཱ ཝཏྠདཱནེན, ཧེམཝཎྞོ བྷཝིསྶསི.

༢༩.

‘‘‘དྭེ ¶ སམྤཏྟཱི ཨནུབྷོཏྭཱ, ཀུསལམཱུལེཧི ཙོདིཏོ;

གོཏམསྶ བྷགཝཏོ, ཀནིཊྛོ ཏྭཾ བྷཝིསྶསི.

༣༠.

‘‘‘རཱགརཏྟོ སུཁསཱིལོ, ཀཱམེསུ གེདྷམཱཡུཏོ;

བུདྡྷེན ཙོདིཏོ སནྟོ, ཏདཱ [ཏཏོ (སྱཱ.)] ཏྭཾ པབྦཛིསྶསི.

༣༡.

‘‘‘པབྦཛིཏྭཱན ཏྭཾ ཏཏྠ, ཀུསལམཱུལེན ཙོདིཏོ;

སབྦཱསཝེ པརིཉྙཱཡ, ནིབྦཱཡིསྶསིནཱསཝོ’.

༣༢.

‘‘སཏྟ ¶ [སཏ (སྱཱ.)] ཀཔྤསཧསྶམྷི, ཙཏུརོ ཙེལ༹ནཱམཀཱ;

སཊྛི ཀཔྤསཧསྶམྷི, ཨུཔཙེལཱ ཙཏུཛྫནཱ.

༣༣.

‘‘པཉྩ ཀཔྤསཧསྶམྷི, ཙེལཱ༹ཝ ཙཏུརོ ཛནཱ;

སཏྟརཏནསམྤནྣཱ, ཙཏུདཱིཔམྷི ཨིསྶརཱ.

༣༤.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ནནྡོ ཐེརོ ཨིམཱ གཱཐཱཡོ ཨབྷཱསིཏྠཱཏི.

ནནྡཏྠེརསྶཱཔདཱནཾ ཏཏིཡཾ.

༤. ཙཱུལ༹པནྠཀཏྠེརཨཔདཱནཾ

༣༥.

‘‘པདུམུཏྟརོ ¶ ¶ ནཱམ ཛིནོ, ཨཱཧུཏཱིནཾ པཊིགྒཧོ;

གཎམྷཱ ཝཱུཔཀཊྛོ སོ, ཧིམཝནྟེ ཝསཱི ཏདཱ.

༣༦.

‘‘ཨཧམྤི ¶ ཧིམཝནྟམྷི, ཝསཱམི ཨསྶམེ ཏདཱ;

ཨཙིརཱགཏཾ མཧཱཝཱིརཾ, ཨུཔེསིཾ ལོཀནཱཡཀཾ.

༣༧.

‘‘པུཔྥཙྪཏྟཾ གཧེཏྭཱན, ཨུཔགཙྪིཾ ནརཱསབྷཾ;

སམཱདྷིཾ སམཱཔཛྫནྟཾ, ཨནྟརཱཡམཀཱསཧཾ.

༣༨.

‘‘ཨུབྷོ ཧཏྠེཧི པགྒཡ྄ཧ, པུཔྥཙྪཏྟཾ ཨདཱསཧཾ;

པཊིགྒཧེསི བྷགཝཱ, པདུམུཏྟརོ མཧཱམུནི.

༣༩.

‘‘སབྦེ དེཝཱ ཨཏྟམནཱ, ཧིམཝནྟཾ ཨུཔེནྟི ཏེ;

སཱདྷུཀཱརཾ པཝཏྟེསུཾ, ཨནུམོདིསྶཏི ཙཀྑུམཱ.

༤༠.

‘‘ཨིདཾ ཝཏྭཱན ཏེ དེཝཱ, ཨུཔགཙྪུཾ ནརུཏྟམཾ;

ཨཱཀཱསེ དྷཱརཡནྟསྶ [དྷཱརཡནྟཾ མེ (ཀ), དྷཱརཡཏོ མེ (?)], པདུམཙྪཏྟམུཏྟམཾ.

༤༡.

‘‘སཏཔཏྟཚཏྟཾ པགྒཡ྄ཧ, ཨདཱསི ཏཱཔསོ མམ;

‘ཏམཧཾ ཀིཏྟཡིསྶཱམི, སུཎཱཐ མམ བྷཱསཏོ.

༤༢.

‘‘‘པཉྩཝཱིསཏིཀཔྤཱནི, དེཝརཛྫཾ ཀརིསྶཏི;

ཙཏུཏྟིཾསཏིཀྑཏྟུཉྩ, ཙཀྐཝཏྟཱི བྷཝིསྶཏི.

༤༣.

‘‘‘ཡཾ ¶ ཡཾ ཡོནིཾ སཾསརཏི, དེཝཏྟཾ ཨཐ མཱནུསཾ;

ཨབྦྷོཀཱསེ པཏིཊྛནྟཾ, པདུམཾ དྷཱརཡིསྶཏི’.

༤༤.

‘‘ཀཔྤསཏསཧསྶམྷི, ཨོཀྐཱཀཀུལསམྦྷཝོ;

གོཏམོ ནཱམ གོཏྟེན [ནཱམེན (སཱི. ཀ.)], སཏྠཱ ལོཀེ བྷཝིསྶཏི.

༤༥.

‘‘‘པཀཱསིཏེ པཱཝཙནེ, མནུསྶཏྟཾ ལབྷིསྶཏི;

མནོམཡམྷི ཀཱཡམྷི, ཨུཏྟམོ སོ བྷཝིསྶཏི.

༤༦.

‘‘‘དྭེ ¶ བྷཱཏརོ བྷཝིསྶནྟི, ཨུབྷོཔི པནྠཀཝ྄ཧཡཱ;

ཨནུབྷོཏྭཱ ཨུཏྟམཏྠཾ, ཛོཏཡིསྶནྟི སཱསནཾ’.

༤༧.

‘‘སོཧཾ ¶ ཨཊྛཱརསཝསྶོ [སོ ཨཊྛཱརསཝསྶོཧཾ (སྱཱ.)], པབྦཛིཾ ཨནགཱརིཡཾ;

ཝིསེསཱཧཾ ན ཝིནྡཱམི, སཀྱཔུཏྟསྶ སཱསནེ.

༤༨.

‘‘དནྡྷཱ མཡ྄ཧཾ གཏཱི ཨཱསི, པརིབྷཱུཏོ པུརེ ཨཧུཾ [ཨཧཾ (སྱཱ.)];

བྷཱཏཱ ཙ མཾ པཎཱམེསི, གཙྪ དཱནི སཀཾ གྷརཾ.

༤༩.

‘‘སོཧཾ པཎཱམིཏོ སནྟོ, སངྒྷཱརཱམསྶ ཀོཊྛཀེ;

དུམྨནོ ཏཏྠ ཨཊྛཱསིཾ, སཱམཉྙསྨིཾ ཨཔེཀྑཝཱ.

༥༠.

‘‘བྷགཝཱ ¶ ཏཏྠ [ཨཐེཏྠ སཏྠཱ (སཱི. སྱཱ.)] ཨཱགཙྪི, སཱིསཾ མཡ྄ཧཾ པརཱམསི;

བཱཧཱཡ མཾ གཧེཏྭཱན, སངྒྷཱརཱམཾ པཝེསཡི.

༥༡.

‘‘ཨནུཀམྤཱཡ མེ སཏྠཱ, ཨདཱསི པཱདཔུཉྪནིཾ;

ཨེཝཾ སུདྡྷཾ ཨདྷིཊྛེཧི, ཨེཀམནྟམདྷིཊྛཧཾ.

༥༢.

‘‘ཧཏྠེཧི ཏམཧཾ གཡ྄ཧ, སརིཾ ཀོཀནདཾ ཨཧཾ;

ཏཏྠ ཙིཏྟཾ ཝིམུཙྩི མེ, ཨརཧཏྟཾ ཨཔཱཔུཎིཾ.

༥༣.

‘‘མནོམཡེསུ ཀཱཡེསུ, སབྦཏྠ པཱརམིཾ གཏོ;

སབྦཱསཝེ པརིཉྙཱཡ, ཝིཧརཱམི ཨནཱསཝོ.

༥༤.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཙཱུལ༹པནྠཀོ [ཙུལླཔནྠཀོ (སཱི. སྱཱ.)] ཐེརོ ཨིམཱ གཱཐཱཡོ ཨབྷཱསིཏྠཱཏི.

ཙཱུལ༹པནྠཀཏྠེརསྶཱཔདཱནཾ ཙཏུཏྠཾ.

༥. པིལིནྡཝཙྪཏྠེརཨཔདཱནཾ

༥༥.

‘‘ནིབྦུཏེ ¶ ¶ ལོཀནཱཐམྷི, སུམེདྷེ ཨགྒཔུགྒལེ;

པསནྣཙིཏྟོ སུམནོ, ཐཱུཔཔཱུཛཾ ཨཀཱསཧཾ.

༥༦.

‘‘ཡེ ཙ ཁཱིཎཱསཝཱ ཏཏྠ, ཚལ༹བྷིཉྙཱ མཧིདྡྷིཀཱ;

ཏེཧཾ ཏཏྠ སམཱནེཏྭཱ, སངྒྷབྷཏྟཾ ཨཀཱསཧཾ.

༥༧.

‘‘སུམེདྷསྶ བྷགཝཏོ, ཨུཔཊྛཱཀོ ཏདཱ ཨཧུ;

སུམེདྷོ ནཱམ ནཱམེན, ཨནུམོདིཏྠ སོ ཏདཱ.

༥༨.

‘‘ཏེན ཙིཏྟཔྤསཱདེན, ཝིམཱནཾ ཨུཔཔཛྫཧཾ;

ཚལཱ༹སཱིཏིསཧསྶཱནི, ཨཙྪརཱཡོ རམིཾསུ མེ.

༥༩.

‘‘མམེཝ ¶ ཨནུཝཏྟནྟི, སབྦཀཱམེཧི ཏཱ སདཱ;

ཨཉྙེ དེཝེ ཨབྷིབྷོམི, པུཉྙཀམྨསྶིདཾ ཕལཾ.

༦༠.

‘‘པཉྩཝཱིསཏིཀཔྤམྷི, ཝརུཎོ ནཱམ ཁཏྟིཡོ;

ཝིསུདྡྷབྷོཛནོ [སུསུདྡྷབྷོཛནོ (སཱི.)] ཨཱསིཾ, ཙཀྐཝཏྟཱི ཨཧཾ ཏདཱ.

༦༡.

‘‘ན ཏེ བཱིཛཾ པཝཔནྟི, ནཔི ནཱིཡནྟི ནངྒལཱ;

ཨཀཊྛཔཱཀིམཾ སཱལིཾ, པརིབྷུཉྫནྟི མཱནུསཱ.

༦༢.

‘‘ཏཏྠ ¶ རཛྫཾ ཀརིཏྭཱན, དེཝཏྟཾ པུན གཙྪཧཾ;

ཏདཱཔི ཨེདིསཱ མཡ྄ཧཾ, ནིབྦཏྟཱ བྷོགསམྤདཱ.

༦༣.

‘‘ན མཾ མིཏྟཱ ཨམིཏྟཱ ཝཱ, ཧིཾསནྟི སབྦཔཱཎིནོ;

སབྦེསམྤི པིཡོ ཧོམི, པུཉྙཀམྨསྶིདཾ ཕལཾ.

༦༤.

‘‘ཏིཾསཀཔྤསཧསྶམྷི ¶ , ཡཾ དཱནམདདིཾ ཏདཱ;

དུགྒཏིཾ ནཱབྷིཛཱནཱམི, གནྡྷཱལེཔསྶིདཾ ཕལཾ.

༦༥.

‘‘ཨིམསྨིཾ བྷདྡཀེ ཀཔྤེ, ཨེཀོ ཨཱསིཾ ཛནཱདྷིཔོ;

མཧཱནུབྷཱཝོ རཱཛཱཧཾ [རཱཛཱིསི (སྱཱ. ཀ.)], ཙཀྐཝཏྟཱི མཧབྦལོ.

༦༦.

‘‘སོཧཾ པཉྩསུ སཱིལེསུ, ཋཔེཏྭཱ ཛནཏཾ བཧུཾ;

པཱཔེཏྭཱ སུགཏིཾཡེཝ, དེཝཏཱནཾ པིཡོ ཨཧུཾ.

༦༧.

‘‘པཊིསམྦྷིདཱ ¶ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ པིལིནྡཝཙྪོ [པིལིནྡིཝཙྪོ (སཱི.)] ཐེརོ ཨིམཱ གཱཐཱཡོ ཨབྷཱསིཏྠཱཏི.

པིལིནྡཝཙྪཏྠེརསྶཱཔདཱནཾ པཉྩམཾ.

༦. རཱཧུལཏྠེརཨཔདཱནཾ

༦༨.

‘‘པདུམུཏྟརསྶ བྷགཝཏོ, ལོཀཛེཊྛསྶ ཏཱདིནོ;

སཏྟབྷཱུམམྷི པཱསཱདེ, ཨཱདཱསཾ སནྠརིཾ ཨཧཾ.

༦༩.

‘‘ཁཱིཎཱསཝསཧསྶེཧི, པརིཀིཎྞོ མཧཱམུནི;

ཨུཔཱགམི གནྡྷཀུཊིཾ, དྭིཔདིནྡོ [དིཔདིནྡོ (སཱི. སྱཱ.)] ནརཱསབྷོ.

༧༠.

‘‘ཝིརོཙེནྟོ [ཝིརོཙཡཾ (སྱཱ.)] གནྡྷཀུཊིཾ, དེཝདེཝོ ནརཱསབྷོ;

བྷིཀྑུསངྒྷེ ཋིཏོ སཏྠཱ, ཨིམཱ གཱཐཱ ཨབྷཱསཐ.

༧༡.

‘‘‘ཡེནཱཡཾ ¶ ¶ ཛོཏིཏཱ སེཡྻཱ, ཨཱདཱསོཝ སུསནྠཏོ;

ཏམཧཾ ཀིཏྟཡིསྶཱམི, སུཎཱཐ མམ བྷཱསཏོ.

༧༢.

‘‘‘སོཎྞམཡཱ རཱུཔིམཡཱ, ཨཐོ ཝེལུ༹རིཡཱམཡཱ;

ནིབྦཏྟིསྶནྟི པཱསཱདཱ, ཡེ ཀེཙི མནསོ པིཡཱ.

༧༣.

‘‘‘ཙཏུསཊྛིཀྑཏྟུཾ ¶ དེཝིནྡོ, དེཝརཛྫཾ ཀརིསྶཏི;

སཧསྶཀྑཏྟུཾ ཙཀྐཝཏྟཱི, བྷཝིསྶཏི ཨནནྟརཱ.

༧༤.

‘‘‘ཨེཀཝཱིསཏིཀཔྤམྷི, ཝིམལོ ནཱམ ཁཏྟིཡོ;

ཙཱཏུརནྟོ ཝིཛིཏཱཝཱི, ཙཀྐཝཏྟཱི བྷཝིསྶཏི.

༧༥.

‘‘‘ནགརཾ རེཎུཝཏཱི ནཱམ, ཨིཊྛཀཱཧི སུམཱཔིཏཾ;

ཨཱཡཱམཏོ ཏཱིཎི སཏཾ, ཙཏུརསྶསམཱཡུཏཾ.

༧༦.

‘‘‘སུདསྶནོ ནཱམ པཱསཱདོ, ཝིསྶཀམྨེན མཱཔིཏོ [ཝིསུཀམྨེན§མཱཔིཏོ (ཀ.), ཝིསྶཀམྨེན ནིམྨིཏོ (སཱི.)];

ཀཱུཊཱགཱརཝརཱུཔེཏོ, སཏྟརཏནབྷཱུསིཏོ.

༧༧.

‘‘‘དསསདྡཱཝིཝིཏྟཾ ¶ ཏཾ [ཨཝིཝིཏྟཾ (སཱི.)], ཝིཛྫཱདྷརསམཱཀུལཾ;

སུདསྶནཾཝ ནགརཾ, དེཝཏཱནཾ བྷཝིསྶཏི.

༧༨.

‘‘‘པབྷཱ ནིགྒཙྪཏེ ཏསྶ, ཨུགྒཙྪནྟེཝ སཱུརིཡེ;

ཝིརོཙེསྶཏི ཏཾ ནིཙྩཾ, སམནྟཱ ཨཊྛཡོཛནཾ.

༧༩.

‘‘‘ཀཔྤསཏསཧསྶམྷི, ཨོཀྐཱཀཀུལསམྦྷཝོ;

གོཏམོ ནཱམ གོཏྟེན, སཏྠཱ ལོཀེ བྷཝིསྶཏི.

༨༠.

‘‘‘ཏུསིཏཱ སོ ཙཝིཏྭཱན, སུཀྐམཱུལེན ཙོདིཏོ;

གོཏམསྶ བྷགཝཏོ, ཨཏྲཛོ སོ བྷཝིསྶཏི.

༨༡.

‘‘‘སཙེ ¶ ཝསེཡྻ [སཙཱ’ཝསེཡྻ (?)] ཨགཱརཾ, ཙཀྐཝཏྟཱི བྷཝེཡྻ སོ;

ཨཊྛཱནམེཏཾ ཡཾ ཏཱདཱི, ཨགཱརེ རཏིམཛ྄ཛྷགཱ.

༨༢.

‘‘‘ནིཀྑམིཏྭཱ ཨགཱརམྷཱ, པབྦཛིསྶཏི སུབྦཏོ;

རཱཧུལོ ནཱམ ནཱམེན, ཨརཧཱ སོ བྷཝིསྶཏི’.

༨༣.

‘‘ཀིཀཱིཝ ཨཎྜཾ རཀྑེཡྻ, ཙཱམརཱི ཝིཡ ཝཱལདྷིཾ;

ནིཔཀོ སཱིལསམྤནྣོ, མམཾ རཀྑི མཧཱམུནི [ཨེཝཾ རཀྑིཾ མཧཱམུནི (སཱི. ཀ.), མམཾ དཀྑི མཧཱམུནི (སྱཱ.)].

༨༤.

‘‘ཏསྶཱཧཾ དྷམྨམཉྙཱཡ, ཝིཧཱསིཾ སཱསནེ རཏོ;

སབྦཱསཝེ པརིཉྙཱཡ, ཝིཧརཱམི ཨནཱསཝོ.

༨༥.

‘‘པཊིསམྦྷིདཱ ¶ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ རཱཧུལོ ཐེརོ ཨིམཱ གཱཐཱཡོ ཨབྷཱསིཏྠཱཏི.

རཱཧུལཏྠེརསྶཱཔདཱནཾ ཚཊྛཾ.

༧. ཨུཔསེནཝངྒནྟཔུཏྟཏྠེརཨཔདཱནཾ

༨༦.

‘‘པདུམུཏྟརཾ ¶ བྷགཝནྟཾ, ལོཀཛེཊྛཾ ནརཱསབྷཾ;

པབྦྷཱརམྷི ནིསཱིདནྟཾ, ཨུཔགཙྪིཾ ནརུཏྟམཾ.

༨༧.

‘‘ཀཎིཀཱརཔུཔྥཾ ¶ [ཀཎིཀཱརཾ པུཔྥིཏཾ (སཱི. སྱཱ.)] དིསྭཱ, ཝཎྚེ ཚེཏྭཱནཧཾ ཏདཱ;

ཨལངྐརིཏྭཱ ཚཏྟམྷི, བུདྡྷསྶ ཨབྷིརོཔཡིཾ.

༨༨.

‘‘པིཎྜཔཱཏཉྩ ¶ པཱདཱསིཾ, པརམནྣཾ སུབྷོཛནཾ;

བུདྡྷེན ནཝམེ ཏཏྠ, སམཎེ ཨཊྛ བྷོཛཡིཾ.

༨༩.

‘‘ཨནུམོདི མཧཱཝཱིརོ, སཡམྦྷཱུ ཨགྒཔུགྒལོ;

ཨིམིནཱ ཚཏྟདཱནེན, པརམནྣཔཝེཙྪནཱ.

༩༠.

‘‘ཏེན ཙིཏྟཔྤསཱདེན, སམྤཏྟིམནུབྷོསྶསི;

ཚཏྟིཾསཀྑཏྟུཾ དེཝིནྡོ, དེཝརཛྫཾ ཀརིསྶཏི.

༩༡.

‘‘ཨེཀཝཱིསཏིཀྑཏྟུཉྩ, ཙཀྐཝཏྟཱི བྷཝིསྶཏི;

པདེསརཛྫཾ ཝིཔུལཾ, གཎནཱཏོ ཨསངྑིཡཾ.

༩༢.

‘‘སཏསཧསྶིཏོ ཀཔྤེ, ཨོཀྐཱཀཀུལསམྦྷཝོ;

གོཏམོ ནཱམ གོཏྟེན, སཏྠཱ ལོཀེ བྷཝིསྶཏི [ཡཾ ཝདནྟི སུམེདྷོཏི, བྷཱུརིཔཉྙཾ སུམེདྷསཾ; ཀཔྤེཏོ སཏསཧསྶེ, ཨེས བུདྡྷོ བྷཝིསྶཏི; (ཀ.)].

༩༣.

‘‘སཱསནེ དིབྦམཱནམྷི, མནུསྶཏྟཾ གམིསྶཏི;

ཏསྶ དྷམྨེསུ དཱཡཱདོ, ཨོརསོ དྷམྨནིམྨིཏོ.

༩༤.

‘‘ཨུཔསེནོཏི ནཱམེན, ཧེསྶཏི སཏྠུ སཱཝཀོ;

[ཨིདཾ པཱདདྭཡཾ ཐེརགཱཐཱཨཊྛཀཐཱཡམེཝ དིསྶཏི] སམནྟཔཱསཱདིཀཏྟཱ, ཨགྒཊྛཱནེ ཋཔེསྶཏི

[ཨིདཾ པཱདདྭཡཾ ཐེརགཱཐཱཨཊྛཀཐཱཡམེཝ དིསྶཏི].

༩༥.

‘‘ཙརིམཾ ཝཏྟཏེ མཡ྄ཧཾ, བྷཝཱ སབྦེ སམཱུཧཏཱ;

དྷཱརེམི ཨནྟིམཾ དེཧཾ, ཛེཏྭཱ མཱརཾ སཝཱཧནཾ [སཝཱཧིནིཾ (?)].

༩༦.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ ¶ སུདཾ ཨཱཡསྨཱ ཨུཔསེནོ ཝངྒནྟཔུཏྟོ ཐེརོ ཨིམཱ གཱཐཱཡོ ཨབྷཱསིཏྠཱཏི.

ཨུཔསེནཝངྒནྟཔུཏྟཏྠེརསྶཱཔདཱནཾ སཏྟམཾ.

ཏཏིཡབྷཱཎཝཱརཾ.

༨. རཊྛཔཱལཏྠེརཨཔདཱནཾ

༩༧.

‘‘པདུམུཏྟརསྶ ¶ ¶ ¶ བྷགཝཏོ, ལོཀཛེཊྛསྶ ཏཱདིནོ;

ཝརནཱགོ མཡཱ དིནྣོ, ཨཱིསཱདནྟོ ཨུརཱུལ༹ྷཝཱ.

༩༨.

‘‘སེཏཙྪཏྟོ པསོབྷིཏོ, སཀཔྤནོ སཧཏྠིཔོ;

ཨགྒྷཱཔེཏྭཱན ཏཾ སབྦཾ, སངྒྷཱརཱམཾ ཨཀཱརཡིཾ.

༩༩.

‘‘ཙཏུཔཉྙཱསསཧསྶཱནི, པཱསཱདེ ཀཱརཡིཾ ཨཧཾ;

མཧོགྷདཱནཾ [མཧཱབྷཏྟཾ (སཱི.), མཧོགྷཉྩ (ཀ.), མཧཱདཱནཾ (?)] ཀརིཏྭཱན, ནིཡྻཱདེསིཾ མཧེསིནོ.

༡༠༠.

‘‘ཨནུམོདི མཧཱཝཱིརོ, སཡམྦྷཱུ ཨགྒཔུགྒལོ;

སབྦེ ཛནེ ཧཱསཡནྟོ, དེསེསི ཨམཏཾ པདཾ.

༡༠༡.

‘‘ཏཾ མེ བུདྡྷོ ཝིཡཱཀཱསི, ཛལཛུཏྟརནཱམཀོ;

བྷིཀྑུསངྒྷེ ནིསཱིདིཏྭཱ, ཨིམཱ གཱཐཱ ཨབྷཱསཐ.

༡༠༢.

‘‘‘ཙཏུཔཉྙཱསསཧསྶཱནི, པཱསཱདེ ཀཱརཡཱི ཨཡཾ;

ཀཐཡིསྶཱམི ཝིཔཱཀཾ, སུཎོཐ མམ བྷཱསཏོ.

༡༠༣.

‘‘‘ཨཊྛཱརསསཧསྶཱནི, ཀཱུཊཱགཱརཱ བྷཝིསྶརེ;

བྱམྷུཏྟམམྷི ནིབྦཏྟཱ, སབྦསོཎྞམཡཱ ཙ ཏེ.

༡༠༤.

‘‘‘པཉྙཱསཀྑཏྟུཾ དེཝིནྡོ, དེཝརཛྫཾ ཀརིསྶཏི;

ཨཊྛཔཉྙཱསཀྑཏྟུཉྩ, ཙཀྐཝཏྟཱི བྷཝིསྶཏི.

༡༠༥.

‘‘‘ཀཔྤསཏསཧསྶམྷི, ཨོཀྐཱཀཀུལསམྦྷཝོ;

གོཏམོ ནཱམ གོཏྟེན, སཏྠཱ ལོཀེ བྷཝིསྶཏི.

༡༠༦.

‘‘‘དེཝལོཀཱ ¶ ཙཝིཏྭཱན, སུཀྐམཱུལེན ཙོདིཏོ;

ཨཌྜྷེ ཀུལེ མཧཱབྷོགེ, ནིབྦཏྟིསྶཏི ཏཱཝདེ.

༡༠༧.

‘‘‘སོ པཙྪཱ པབྦཛིཏྭཱན, སུཀྐམཱུལེན ཙོདིཏོ;

རཊྛཔཱལོཏི ནཱམེན, ཧེསྶཏི སཏྠུ སཱཝཀོ.

༡༠༨.

‘‘‘པདྷཱནཔཧིཏཏྟོ ¶ སོ, ཨུཔསནྟོ ནིརཱུཔདྷི;

སབྦཱསཝེ པརིཉྙཱཡ, ནིབྦཱཡིསྶཏིནཱསཝོ’.

༡༠༩.

‘‘ཨུཊྛཱཡ ཨབྷིནིཀྑམྨ, ཛཧིཏཱ བྷོགསམྤདཱ;

ཁེལ༹པིཎྜེཝ བྷོགམྷི, པེམཾ མཡ྄ཧཾ ན ཝིཛྫཏི.

༡༡༠.

‘‘ཝཱིརིཡཾ ¶ ¶ མེ དྷུརདྷོརཡ྄ཧཾ, ཡོགཀྑེམཱདྷིཝཱཧནཾ;

དྷཱརེམི ཨནྟིམཾ དེཧཾ, སམྨཱསམྦུདྡྷསཱསནེ.

༡༡༡.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ རཊྛཔཱལོ ཐེརོ ཨིམཱ གཱཐཱཡོ ཨབྷཱསིཏྠཱཏི.

རཊྛཔཱལཏྠེརསྶཱཔདཱནཾ ཨཊྛམཾ.

༩. སོཔཱཀཏྠེརཨཔདཱནཾ

༡༡༢.

‘‘པབྦྷཱརཾ སོདྷཡནྟསྶ [སེཝཡནྟསྶ (སཱི. ཀ.)], ཝིཔིནེ པབྦཏུཏྟམེ;

སིདྡྷཏྠོ ནཱམ བྷགཝཱ, ཨཱགཙྪི མམ སནྟིཀཾ.

༡༡༣.

‘‘བུདྡྷཾ ¶ ཨུཔགཏཾ དིསྭཱ, ལོཀཛེཊྛསྶ ཏཱདིནོ;

སནྠརཾ སནྠརིཏྭཱན [པཉྙཔེཏྭཱན (སྱཱ. ཨཊྛ)], པུཔྥཱསནམདཱསཧཾ.

༡༡༤.

‘‘པུཔྥཱསནེ ནིསཱིདིཏྭཱ, སིདྡྷཏྠོ ལོཀནཱཡཀོ;

མམཉྩ གཏིམཉྙཱཡ, ཨནིཙྩཏམུདཱཧརི.

༡༡༥.

‘‘‘ཨནིཙྩཱ ཝཏ སངྑཱརཱ, ཨུཔྤཱདཝཡདྷམྨིནོ;

ཨུཔྤཛྫིཏྭཱ ནིརུཛ྄ཛྷནྟི, ཏེསཾ ཝཱུཔསམོ སུཁོ’.

༡༡༦.

‘‘ཨིདཾ ཝཏྭཱན སབྦཉྙཱུ, ལོཀཛེཊྛོ ནརཱསབྷོ;

ནབྷཾ ཨབྦྷུགྒམི ཝཱིརོ, ཧཾསརཱཛཱཝ ཨམྦརེ.

༡༡༧.

‘‘སཀཾ དིཊྛིཾ ཛཧིཏྭཱན, བྷཱཝཡཱནིཙྩསཉྙཧཾ;

ཨེཀཱཧཾ བྷཱཝཡིཏྭཱན, ཏཏྠ ཀཱལཾ ཀཏོ ཨཧཾ.

༡༡༨.

‘‘དྭེ སམྤཏྟཱི ཨནུབྷོཏྭཱ, སུཀྐམཱུལེན ཙོདིཏོ;

པཙྪིམེ བྷཝེ སམྤཏྟེ, སཔཱཀཡོནུཔཱགམིཾ.

༡༡༩.

‘‘ཨགཱརཱ ཨབྷིནིཀྑམྨ, པབྦཛིཾ ཨནགཱརིཡཾ;

ཛཱཏིཡཱ སཏྟཝསྶོཧཾ, ཨརཧཏྟམཔཱཔུཎིཾ.

༡༢༠.

‘‘ཨཱརདྡྷཝཱིརིཡོ ¶ ¶ པཧིཏཏྟོ, སཱིལེསུ སུསམཱཧིཏོ;

ཏོསེཏྭཱན མཧཱནཱགཾ, ཨལཏྠཾ ཨུཔསམྤདཾ.

༡༢༡.

‘‘ཙཏུནྣཝུཏིཏོ ¶ ཀཔྤེ, ཡཾ ཀམྨམཀརིཾ ཏདཱ;

དུགྒཏིཾ ནཱབྷིཛཱནཱམི, པུཔྥདཱནསྶིདཾ ཕལཾ.

༡༢༢.

‘‘ཙཏུནྣཝུཏིཏོ ཀཔྤེ, ཡཾ སཉྙཾ བྷཱཝཡིཾ ཏདཱ;

ཏཾ སཉྙཾ བྷཱཝཡནྟསྶ, པཏྟོ མེ ཨཱསཝཀྑཡོ.

༡༢༣.

‘‘པཊིསམྦྷིདཱ ¶ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ སོཔཱཀོ ཐེརོ ཨིམཱ གཱཐཱཡོ ཨབྷཱསིཏྠཱཏི.

སོཔཱཀཏྠེརསྶཱཔདཱནཾ ནཝམཾ.

༡༠. སུམངྒལཏྠེརཨཔདཱནཾ

༡༢༤.

‘‘ཨཱཧུཏིཾ ཡིཊྛུཀཱམོཧཾ, པཊིཡཱདེཏྭཱན བྷོཛནཾ;

བྲཱཧྨཎེ པཊིམཱནེནྟོ, ཝིསཱལེ མཱལ༹ཀེ ཋིཏོ.

༡༢༥.

‘‘ཨཐདྡསཱསིཾ སམྦུདྡྷཾ, པིཡདསྶིཾ མཧཱཡསཾ;

སབྦལོཀཝིནེཏཱརཾ, སཡམྦྷུཾ ཨགྒཔུགྒལཾ.

༡༢༦.

‘‘བྷགཝནྟཾ ཛུཏིམནྟཾ, སཱཝཀེཧི པུརཀྑཏཾ;

ཨཱདིཙྩམིཝ རོཙནྟཾ, རཐིཡཾ པཊིཔནྣཀཾ.

༡༢༧.

‘‘ཨཉྫལིཾ པགྒཧེཏྭཱན, སཀཾ ཙིཏྟཾ པསཱདཡིཾ;

མནསཱཝ ནིམནྟེསིཾ, ‘ཨཱགཙྪཏུ མཧཱམུནི’.

༡༢༨.

‘‘མམ སངྐཔྤམཉྙཱཡ, སཏྠཱ ལོཀེ ཨནུཏྟརོ;

ཁཱིཎཱསཝསཧསྶེཧི, མམ དྭཱརཾ ཨུཔཱགམི.

༡༢༩.

‘‘ནམོ ཏེ པུརིསཱཛཉྙ, ནམོ ཏེ པུརིསུཏྟམ;

པཱསཱདཾ ཨབྷིརཱུཧིཏྭཱ, སཱིཧཱསནེ ནིསཱིདཏཾ [ནིསཱིད ཏྭཾ (སཱི.)].

༡༣༠.

‘‘དནྟོ ¶ ¶ དནྟཔརིཝཱརོ, ཏིཎྞོ ཏཱརཡཏཾ ཝརོ;

པཱསཱདཾ ཨབྷིརཱུཧིཏྭཱ, ནིསཱིདི པཝརཱསནེ.

༡༣༡.

‘‘ཡཾ མེ ཨཏྠི སཀེ གེཧེ, ཨཱམིསཾ པཙྩུཔཊྛིཏཾ;

ཏཱཧཾ བུདྡྷསྶ པཱདཱསིཾ, པསནྣོ སེཧི པཱཎིབྷི.

༡༣༢.

‘‘པསནྣཙིཏྟོ ¶ སུམནོ, ཝེདཛཱཏོ ཀཏཉྫལཱི;

བུདྡྷསེཊྛཾ ནམསྶཱམི, ཨཧོ བུདྡྷསྶུལཱ༹རཏཱ.

༡༣༣.

‘‘ཨཊྛནྣཾ ¶ པཡིརཱུཔཱསཏཾ, བྷུཉྫཾ ཁཱིཎཱསཝཱ བཧཱུ;

ཏུཡ྄ཧེཝེསོ ཨཱནུབྷཱཝོ, སརཎཾ ཏཾ ཨུཔེམཧཾ.

༡༣༤.

‘‘པིཡདསྶཱི ཙ བྷགཝཱ, ལོཀཛེཊྛོ ནརཱསབྷོ;

བྷིཀྑུསངྒྷེ ནིསཱིདིཏྭཱ, ཨིམཱ གཱཐཱ ཨབྷཱསཐ.

༡༣༥.

‘‘‘ཡོ སོ སངྒྷཾ ཨབྷོཛེསི, ཨུཛུབྷཱུཏཾ སམཱཧིཏཾ;

ཏཐཱགཏཉྩ སམྦུདྡྷཾ, སུཎཱཐ མམ བྷཱསཏོ.

༡༣༦.

‘‘‘སཏྟཝཱིསཏིཀྑཏྟུཾ སོ, དེཝརཛྫཾ ཀརིསྶཏི;

སཀཀམྨཱབྷིརདྡྷོ སོ, དེཝལོཀེ རམིསྶཏི.

༡༣༧.

‘‘‘དས ཨཊྛ ཙཀྑཏྟུཾ [དསཉྩཊྛཀྑཏྠུཾ (སཱི.), དས ཙཊྛཀྑཏྟུཾ (སྱཱ.)] སོ, ཙཀྐཝཏྟཱི བྷཝིསྶཏི;

པཐབྱཱ རཛྫཾ པཉྩསཏཾ, ཝསུདྷཾ ཨཱཝསིསྶཏི’.

༡༣༨.

‘‘ཨརཉྙཝནམོགྒཡ྄ཧ, ཀཱནནཾ བྱགྒྷསེཝིཏཾ;

པདྷཱནཾ པདཧིཏྭཱན, ཀིལེསཱ ཛྷཱཔིཏཱ མཡཱ.

༡༣༩.

‘‘ཨཊྛཱརསེ ཀཔྤསཏེ, ཡཾ དཱནམདདིཾ ཏདཱ;

དུགྒཏིཾ ནཱབྷིཛཱནཱམི, བྷཏྟདཱནསྶིདཾ ཕལཾ.

༡༤༠.

‘‘པཊིསམྦྷིདཱ ¶ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ སུམངྒལོ ཐེརོ ཨིམཱ གཱཐཱཡོ ཨབྷཱསིཏྠཱཏི.

སུམངྒལཏྠེརསྶཱཔདཱནཾ དསམཾ.

ཏསྶུདྡཱནཾ –

སཱིཧཱསནཱི ¶ ཨེཀཐམྦྷཱི, ནནྡོ ཙ ཙཱུལ༹པནྠཀོ;

པིལིནྡརཱཧུལོ ཙེཝ, ཝངྒནྟོ རཊྛཔཱལཀོ.

སོཔཱཀོ མངྒལོ ཙེཝ, དསེཝ དུཏིཡེ ཝགྒེ;

སཏཉྩ ཨཊྛཏིཾས ཙ, གཱཐཱ ཙེཏྠ པཀཱསིཏཱ.

སཱིཧཱསནིཡཝགྒོ དུཏིཡོ.

༣. སུབྷཱུཏིཝགྒོ

༡. སུབྷཱུཏིཏྠེརཨཔདཱནཾ

༡.

‘‘ཧིམཝནྟསྶཱཝིདཱུརེ ¶ ¶ ¶ , ནིསབྷོ ནཱམ པབྦཏོ;

ཨསྶམོ སུཀཏོ མཡ྄ཧཾ, པཎྞསཱལཱ སུམཱཔིཏཱ.

༢.

‘‘ཀོསིཡོ ནཱམ ནཱམེན, ཛཊིལོ ཨུགྒཏཱཔནོ;

ཨེཀཱཀིཡོ [ཨེཀཱཀིཀོ (ཀ.)] ཨདུཏིཡོ, ཝསཱམི ནིསབྷེ ཏདཱ.

༣.

‘‘ཕལཾ མཱུལཉྩ པཎྞཉྩ, ན བྷུཉྫཱམི ཨཧཾ ཏདཱ;

པཝཏྟཾཝ སུཔཱཏཱཧཾ [པཝཏྟཔཎྜུཔཏྟཱནི (སཱི.)], ཨུཔཛཱིཝཱམི ཏཱཝདེ.

༤.

‘‘ནཱཧཾ ¶ ཀོཔེམི ཨཱཛཱིཝཾ, ཙཛམཱནོཔི ཛཱིཝིཏཾ;

ཨཱརཱདྷེམི སཀཾ ཙིཏྟཾ, ཝིཝཛྫེམི ཨནེསནཾ.

༥.

‘‘རཱགཱུཔསཾཧིཏཾ ཙིཏྟཾ, ཡདཱ ཨུཔྤཛྫཏེ མམ;

སཡཾཝ པཙྩཝེཀྑཱམི, ཨེཀགྒོ ཏཾ དམེམཧཾ.

༦.

‘‘‘རཛྫསེ རཛྫནཱིཡེ ཙ, དུསྶནཱིཡེ ཙ དུསྶསེ;

མུཡ྄ཧསེ མོཧནཱིཡེ ཙ, ནིཀྑམསྶུ ཝནཱ ཏུཝཾ.

༧.

‘‘‘ཝིསུདྡྷཱནཾ ཨཡཾ ཝཱསོ, ནིམྨལཱནཾ ཏཔསྶིནཾ;

མཱ ཁོ ཝིསུདྡྷཾ དཱུསེསི, ནིཀྑམསྶུ ཝནཱ ཏུཝཾ.

༨.

‘‘‘ཨགཱརིཀོ བྷཝིཏྭཱན, ཡདཱ པུཏྟཾ [སདཱཡུཏྟཾ (སཱི.), ཡདཱཡུཏྟཾ (སྱཱ.)], ལབྷིསྶསི;

ཨུབྷོཔི མཱ ཝིརཱདྷེསི, ནིཀྑམསྶུ ཝནཱ ཏུཝཾ.

༩.

‘‘‘ཚཝཱལཱཏཾ ཡཐཱ ཀཊྛཾ, ན ཀྭཙི ཀིཙྩཀཱརཀཾ;

ནེཝ གཱམེ ཨརཉྙེ ཝཱ, ན ཧི ཏཾ ཀཊྛསམྨཏཾ.

༡༠.

‘‘‘ཚཝཱལཱཏཱུཔམོ ཏྭཾསི, ན གིཧཱི ནཱཔི སཉྙཏོ;

ཨུབྷཏོ མུཏྟཀོ ཨཛྫ, ནིཀྑམསྶུ ཝནཱ ཏུཝཾ.

༡༡.

‘‘‘སིཡཱ ནུ ཁོ ཏཝ ཨེཏཾ, ཀོ པཛཱནཱཏི ཏེ ཨིདཾ;

སདྡྷཱདྷུརཾ ཝཧིསི [སདྡྷཱདྷུརཾ ཛཧསི (སཱི.), སཱིགྷཾ དྷུརཾ ཝཧིསི (སྱཱ.)] མེ, ཀོསཛྫབཧུལཱཡ ཙ.

༡༢.

‘‘‘ཛིགུཙྪིསྶནྟི ¶ ¶ ཏཾ ཝིཉྙཱུ, ཨསུཙིཾ ནཱགརིཀོ ཡཐཱ;

ཨཱཀཌྜྷིཏྭཱན ཨིསཡོ, ཙོདཡིསྶནྟི ཏཾ སདཱ.

༡༣.

‘‘‘ཏཾ ཝིཉྙཱུ པཝདིསྶནྟི, སམཏིཀྐནྟསཱསནཾ;

སཾཝཱསཾ ཨལབྷནྟོ ཧི, ཀཐཾ ཛཱིཝིཧིསི [ཛཱིཝིསྶསི (སཱི.)] ཏུཝཾ.

༡༤.

‘‘‘ཏིདྷཱཔབྷིནྣཾ ¶ ¶ མཱཏངྒཾ, ཀུཉྫརཾ སཊྛིཧཱཡནཾ;

བལཱི ནཱགོ ཨུཔགནྟྭཱ, ཡཱུཐཱ ནཱིཧརཏེ གཛཾ.

༡༥.

‘‘‘ཡཱུཐཱ ཝིནིསྶཊོ སནྟོ, སུཁཾ སཱཏཾ ན ཝིནྡཏི;

དུཀྑིཏོ ཝིམནོ ཧོཏི, པཛ྄ཛྷཱཡནྟོ པཝེདྷཏི.

༡༦.

‘‘‘ཏཐེཝ ཛཊིལཱ ཏམྤི, ནཱིཧརིསྶནྟི དུམྨཏིཾ;

ཏེཧི ཏྭཾ ནིསྶཊོ སནྟོ, སུཁཾ སཱཏཾ ན ལཙྪསི.

༡༧.

‘‘‘དིཝཱ ཝཱ ཡདི ཝཱ རཏྟིཾ, སོཀསལླསམཔྤིཏོ;

ཌཡ྄ཧསི པརིལཱ༹ཧེན, གཛོ ཡཱུཐཱཝ ནིསྶཊོ.

༡༨.

‘‘‘ཛཱཏརཱུཔཾ ཡཐཱ ཀཱུཊཾ, ནེཝ ཛྷཱཡཏི [ཡཱཡཏི (སྱཱ.)] ཀཏྠཙི;

ཏཐཱ སཱིལཝིཧཱིནོ ཏྭཾ, ན ཛྷཱཡིསྶསི [ཡཱརིསྶཏི (སྱཱ.)] ཀཏྠཙི.

༡༩.

‘‘‘ཨགཱརཾ ཝསམཱནོཔི, ཀཐཾ ཛཱིཝིཧིསི ཏུཝཾ;

མཏྟིཀཾ པེཏྟིཀཉྩཱཔི, ནཏྠི ཏེ ནིཧིཏཾ དྷནཾ.

༢༠.

‘‘‘སཡཾ ཀམྨཾ ཀརིཏྭཱན, གཏྟེ སེདཾ པམོཙཡཾ;

ཨེཝཾ ཛཱིཝིཧིསི གེཧེ, སཱདྷུ ཏེ ཏཾ ན རུཙྩཏི.

༢༡.

‘‘‘ཨེཝཱཧཾ ཏཏྠ ཝཱརེམི, སཾཀིལེསགཏཾ མནཾ;

ནཱནཱདྷམྨཀཐཾ ཀཏྭཱ, པཱཔཱ ཙིཏྟཾ ནིཝཱརཡིཾ’.

༢༢.

‘‘ཨེཝཾ མེ ཝིཧརནྟསྶ, ཨཔྤམཱདཝིཧཱརིནོ;

ཏིཾསཝསྶསཧསྶཱནི, ཝིཔིནེ མེ ཨཏིཀྐམུཾ.

༢༣.

‘‘ཨཔྤམཱདརཏཾ དིསྭཱ, ཨུཏྟམཏྠཾ གཝེསཀཾ;

པདུམུཏྟརསམྦུདྡྷོ, ཨཱགཙྪི མམ སནྟིཀཾ.

༢༤.

‘‘ཏིམྦརཱུསཀཝཎྞཱབྷོ ¶ , ཨཔྤམེཡྻོ ཨནཱུཔམོ;

རཱུཔེནཱསདིསོ བུདྡྷོ, ཨཱཀཱསེ ཙངྐམཱི ཏདཱ.

༢༥.

‘‘སུཕུལློ ¶ སཱལརཱཛཱཝ, ཝིཛྫཱུཝབྦྷགྷནནྟརེ;

ཉཱཎེནཱསདིསོ བུདྡྷོ, ཨཱཀཱསེ ཙངྐམཱི ཏདཱ.

༢༦.

‘‘སཱིཧརཱཛཱ ¶ ཝསམྦྷཱིཏོ [ཚམྦྷིཏོ (ཀ.)],

གཛརཱཛཱཝ དཔྤིཏོ [དམྨིཏོ (ཀ.)].

ལཱསིཏོ [ཨབྷཱིཏོ (སྱཱ.)] བྱགྒྷརཱཛཱཝ, ཨཱཀཱསེ ཙངྐམཱི ཏདཱ.

༢༧.

‘‘སིངྒཱིནིཀྑསཝཎྞཱབྷོ, ཁདིརངྒཱརསནྣིབྷོ;

མཎི ཡཐཱ ཛོཏིརསོ, ཨཱཀཱསེ ཙངྐམཱི ཏདཱ.

༢༨.

‘‘ཝིསུདྡྷཀེལཱསནིབྷོ ¶ , པུཎྞམཱཡེཝ ཙནྡིམཱ;

མཛ྄ཛྷནྷིཀེཝ [མཛ྄ཛྷནྟིཀེཝ (སབྦཏྠ)] སཱུརིཡོ, ཨཱཀཱསེ ཙངྐམཱི ཏདཱ.

༢༩.

‘‘དིསྭཱ ནབྷེ ཙངྐམནྟཾ, ཨེཝཾ ཙིནྟེསཧཾ ཏདཱ;

‘དེཝོ ནུ ཁོ ཨཡཾ སཏྟོ, ཨུདཱཧུ མནུཛོ ཨཡཾ.

༣༠.

‘‘‘ན མེ སུཏོ ཝཱ དིཊྛོ ཝཱ, མཧིཡཱ ཨེདིསོ ནརོ;

ཨཔི མནྟཔདཾ ཨཏྠི, ཨཡཾ སཏྠཱ བྷཝིསྶཏི’.

༣༡.

‘‘ཨེཝཱཧཾ ཙིནྟཡིཏྭཱན, སཀཾ ཙིཏྟཾ པསཱདཡིཾ;

ནཱནཱཔུཔྥཉྩ གནྡྷཉྩ, སནྣིཔཱཏེསཧཾ [སནྣིཔཱཏེཏྭཱཧཾ (སཱི.)] ཏདཱ.

༣༢.

‘‘པུཔྥཱསནཾ པཉྙཔེཏྭཱ, སཱདྷུཙིཏྟཾ མནོརམཾ;

ནརསཱརཐིནཾ ཨགྒཾ, ཨིདཾ ཝཙནམབྲཝིཾ.

༣༣.

‘‘‘ཨིདཾ མེ ཨཱསནཾ ཝཱིར, པཉྙཏྟཾ ཏཝནུཙྪཝཾ;

ཧཱསཡནྟོ མམཾ ཙིཏྟཾ, ནིསཱིད ཀུསུམཱསནེ’.

༣༤.

‘‘ནིསཱིདི ¶ ཏཏྠ བྷགཝཱ, ཨསམྦྷཱིཏོཝ [ཨཚམྦྷིཏོཝ (ཀ.)] ཀེསརཱི;

སཏྟརཏྟིནྡིཝཾ བུདྡྷོ, པཝརེ ཀུསུམཱསནེ.

༣༥.

‘‘ནམསྶམཱནོ ཨཊྛཱསིཾ, སཏྟརཏྟིནྡིཝཾ ཨཧཾ;

ཝུཊྛཧིཏྭཱ སམཱདྷིམྷཱ, སཏྠཱ ལོཀེ ཨནུཏྟརོ;

མམ ཀམྨཾ པཀིཏྟེནྟོ, ཨིདཾ ཝཙནམབྲཝི.

༣༦.

‘‘‘བྷཱཝེཧི བུདྡྷཱནུསྶཏིཾ, བྷཱཝནཱནམནུཏྟརཾ;

ཨིམཾ སཏིཾ བྷཱཝཡིཏྭཱ, པཱུརཡིསྶསི མཱནསཾ.

༣༧.

‘‘‘ཏིཾསཀཔྤསཧསྶཱནི, དེཝལོཀེ རམིསྶསི;

ཨསཱིཏིཀྑཏྟུཾ དེཝིནྡོ, དེཝརཛྫཾ ཀརིསྶསི;

སཧསྶཀྑཏྟུཾ ཙཀྐཝཏྟཱི, རཱཛཱ རཊྛེ བྷཝིསྶསི.

༣༨.

‘‘‘པདེསརཛྫཾ ¶ ཝིཔུལཾ, གཎནཱཏོ ཨསངྑིཡཾ;

ཨནུབྷོསྶསི ཏཾ སབྦཾ, བུདྡྷཱནུསྶཏིཡཱ ཕལཾ.

༣༩.

‘‘‘བྷཝཱབྷཝེ ¶ སཾསརནྟོ, མཧཱབྷོགཾ ལབྷིསྶསི;

བྷོགེ ཏེ ཨཱུནཏཱ ནཏྠི, བུདྡྷཱནུསྶཏིཡཱ ཕལཾ.

༤༠.

‘‘‘ཀཔྤསཏསཧསྶམྷི, ཨོཀྐཱཀཀུལསམྦྷཝོ;

གོཏམོ ནཱམ གོཏྟེན, སཏྠཱ ལོཀེ བྷཝིསྶཏི.

༤༡.

‘‘‘ཨསཱིཏིཀོཊིཾ ཚཌྜེཏྭཱ, དཱསེ ཀམྨཀརེ བཧཱུ;

གོཏམསྶ བྷགཝཏོ, སཱསནེ པབྦཛིསྶསི.

༤༢.

‘‘‘ཨཱརཱདྷཡིཏྭཱ སམྦུདྡྷཾ, གོཏམཾ སཀྱཔུངྒཝཾ;

སུབྷཱུཏི ནཱམ ནཱམེན, ཧེསྶཏི སཏྠུ སཱཝཀོ.

༤༣.

‘‘‘བྷིཀྑུསངྒྷེ ¶ ¶ ནིསཱིདིཏྭཱ, དཀྑིཎེཡྻགུཎམྷི ཏཾ;

ཏཐཱརཎཝིཧཱརེ ཙ, དྭཱིསུ ཨགྒེ ཋཔེསྶཏི’.

༤༤.

‘‘ཨིདཾ ཝཏྭཱན སམྦུདྡྷོ, ཛལཛུཏྟམནཱམཀོ;

ནབྷཾ ཨབྦྷུགྒམཱི ཝཱིརོ, ཧཾསརཱཛཱཝ ཨམྦརེ.

༤༥.

‘‘སཱསིཏོ ལོཀནཱཐེན, ནམསྶིཏྭཱ ཏཐཱགཏཾ;

སདཱ བྷཱཝེམི མུདིཏོ, བུདྡྷཱནུསྶཏིམུཏྟམཾ.

༤༦.

‘‘ཏེན ཀམྨེན སུཀཏེན, ཙེཏནཱཔཎིདྷཱིཧི ཙ;

ཛཧིཏྭཱ མཱནུསཾ དེཧཾ, ཏཱཝཏིཾསཾ ཨགཙྪཧཾ.

༤༧.

‘‘ཨསཱིཏིཀྑཏྟུཾ དེཝིནྡོ, དེཝརཛྫམཀཱརཡིཾ;

སཧསྶཀྑཏྟུཾ རཱཛཱ ཙ, ཙཀྐཝཏྟཱི ཨཧོསཧཾ.

༤༨.

‘‘པདེསརཛྫཾ ཝིཔུལཾ, གཎནཱཏོ ཨསངྑིཡཾ;

ཨནུབྷོམི སུསམྤཏྟིཾ, བུདྡྷཱནུསྶཏིཡཱ ཕལཾ.

༤༩.

‘‘བྷཝཱབྷཝེ སཾསརནྟོ, མཧཱབྷོགཾ ལབྷཱམཧཾ;

བྷོགེ མེ ཨཱུནཏཱ ནཏྠི, བུདྡྷཱནུསྶཏིཡཱ ཕལཾ.

༥༠.

‘‘སཏསཧསྶིཏོ ཀཔྤེ, ཡཾ ཀམྨམཀརིཾ ཏདཱ;

དུགྒཏིཾ ནཱབྷིཛཱནཱམི, བུདྡྷཱནུསྶཏིཡཱ ཕལཾ.

༥༡.

‘‘པཊིསམྦྷིདཱ ¶ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ སུབྷཱུཏི ཐེརོ ཨིམཱ གཱཐཱཡོ ཨབྷཱསིཏྠཱཏི.

སུབྷཱུཏིཏྠེརསྶཱཔདཱནཾ པཋམཾ.

༢. ཨུཔཝཱནཏྠེརཨཔདཱནཾ

༥༢.

‘‘པདུམུཏྟརོ ¶ ¶ ནཱམ ཛིནོ, སབྦདྷམྨཱན པཱརགཱུ;

ཛལིཏྭཱ ཨགྒིཀྑནྡྷོཝ, སམྦུདྡྷོ པརིནིབྦུཏོ.

༥༣.

‘‘མཧཱཛནཱ སམཱགམྨ, པཱུཛཡིཏྭཱ ཏཐཱགཏཾ;

ཙིཏཾ ཀཏྭཱན སུཀཏཾ, སརཱིརཾ ཨབྷིརོཔཡུཾ.

༥༤.

‘‘སརཱིརཀིཙྩཾ ཀཏྭཱན, དྷཱཏུཾ ཏཏྠ སམཱནཡུཾ;

སདེཝམཱནུསཱ སབྦེ, བུདྡྷཐཱུཔཾ ཨཀཾསུ ཏེ.

༥༥.

‘‘པཋམཱ ¶ ཀཉྩནམཡཱ, དུཏིཡཱསི མཎཱིམཡཱ;

ཏཏིཡཱ རཱུཔིཡམཡཱ, ཙཏུཏྠཱི ཕལིཀཱམཡཱ.

༥༦.

‘‘ཏཐཱ [ཏཏྠ (སྱཱ. ཀ.)] པཉྩམིཡཱ བྷཱུམི [ནེམི (སཱི.)], ལོཧིཏངྒམཡཱ ཨཧུ;

ཚཊྛཱ མསཱརགལླསྶ, སབྦརཏནམཡཱུཔརི.

༥༧.

‘‘ཛངྒྷཱ མཎིམཡཱ ཨཱསི, ཝེདིཀཱ རཏནམཡཱ;

སབྦསོཎྞམཡོ ཐཱུཔོ, ཨུདྡྷཾ ཡོཛནམུགྒཏོ.

༥༨.

‘‘དེཝཱ ཏཏྠ སམཱགནྟྭཱ, ཨེཀཏོ མནྟཡུཾ ཏདཱ;

མཡམྤི ཐཱུཔཾ ཀསྶཱམ, ལོཀནཱཐསྶ ཏཱདིནོ.

༥༩.

‘‘དྷཱཏུ ཨཱཝེཎིཀཱ ནཏྠི, སརཱིརཾ ཨེཀཔིཎྜིཏཾ;

ཨིམམྷི བུདྡྷཐཱུཔམྷི, ཀསྶཱམ ཀཉྩུཀཾ མཡཾ.

༦༠.

‘‘དེཝཱ སཏྟཧི རཏྣེཧི [སཏྟརཏནེཧི (སཱི.)], ཨཉྙཾ ཝཌྜྷེསུ ཡོཛནཾ;

ཐཱུཔོ དྭིཡོཛནུབྦེདྷོ, ཏིམིརཾ བྱཔཧནྟི སོ.

༦༡.

‘‘ནཱགཱ ¶ ཏཏྠ སམཱགནྟྭཱ, ཨེཀཏོ མནྟཡུཾ ཏདཱ;

མནུསྶཱ ཙེཝ དེཝཱ ཙ, བུདྡྷཐཱུཔཾ ཨཀཾསུ ཏེ.

༦༢.

‘‘མཱ ¶ ནོ པམཏྟཱ ཨསྶུམྷ [ཨསྶུམྷཱ (སཱི. སྱཱ.), ཨཱསིམྷཱ (?)], ཨཔྤམཏྟཱ སདེཝཀཱ;

མཡམྤི ཐཱུཔཾ ཀསྶཱམ, ལོཀནཱཐསྶ ཏཱདིནོ.

༦༣.

‘‘ཨིནྡནཱིལཾ མཧཱནཱིལཾ, ཨཐོ ཛོཏིརསཾ མཎིཾ;

ཨེཀཏོ སནྣིཔཱཏེཏྭཱ, བུདྡྷཐཱུཔཾ ཨཚཱདཡུཾ.

༦༤.

‘‘སབྦཾ མཎིམཡཾ ཨཱསི, ཏཱཝཏཱ བུདྡྷཙེཏིཡཾ;

ཏིཡོཛནསམུབྦིདྡྷཾ [ཏཱིཎི ཡོཛནམུབྦིདྡྷཾ (སཱི. ཀ.)], ཨཱལོཀཀརཎཾ ཏདཱ.

༦༥.

‘‘གརུལཱ༹ ¶ ཙ སམཱགནྟྭཱ, ཨེཀཏོ མནྟཡུཾ ཏདཱ;

མནུསྶཱ དེཝཱ ནཱགཱ ཙ, བུདྡྷཐཱུཔཾ ཨཀཾསུ ཏེ.

༦༦.

‘‘‘མཱ ནོ པམཏྟཱ ཨསྶུམྷ, ཨཔྤམཏྟཱ སདེཝཀཱ;

མཡམྤི ཐཱུཔཾ ཀསྶཱམ, ལོཀནཱཐསྶ ཏཱདིནོ’.

༦༧.

‘‘སབྦཾ མཎིམཡཾ ཐཱུཔཾ, ཨཀརུཾ ཏེ ཙ ཀཉྩུཀཾ [སབྦམཎིམཡཾ ཐཱུཔེ, ཨཀརུཏྟརཀཉྩུཀཾ (སཱི.)];

ཡོཛནཾ ཏེཔི ཝཌྜྷེསུཾ, ཨཱཡཏཾ བུདྡྷཙེཏིཡཾ.

༦༨.

‘‘ཙཏུཡོཛནམུབྦིདྡྷོ, བུདྡྷཐཱུཔོ ཝིརོཙཏི;

ཨོབྷཱསེཏི དིསཱ སབྦཱ, སཏརཾསཱིཝ ཨུགྒཏོ.

༦༩.

‘‘ཀུམྦྷཎྜཱ ཙ སམཱགནྟྭཱ, ཨེཀཏོ མནྟཡུཾ ཏདཱ;

མནུསྶཱ ཙེཝ དེཝཱ ཙ, ནཱགཱ ཙ གརུལཱ༹ ཏཐཱ.

པཙྩེཀཾ བུདྡྷསེཊྛསྶ, ཨཀཾསུ ཐཱུཔམུཏྟམཾ.

༧༠.

‘‘‘མཱ ནོ པམཏྟཱ ཨསྶུམྷ, ཨཔྤམཏྟཱ སདེཝཀཱ;

མཡམྤི ཐཱུཔཾ ཀསྶཱམ, ལོཀནཱཐསྶ ཏཱདིནོ;

རཏནེཧི ཚཱདེསྶཱམ, ཨཱཡཏཾ བུདྡྷཙེཏིཡཾ’.

༧༡.

‘‘ཡོཛནཾ ཏེཔི ཝཌྜྷེསུཾ, ཨཱཡཏཾ བུདྡྷཙེཏིཡཾ;

པཉྩཡོཛནམུབྦིདྡྷོ, ཐཱུཔོ ཨོབྷཱསཏེ ཏདཱ.

༧༢.

‘‘ཡཀྑཱ ¶ ཏཏྠ སམཱགནྟྭཱ, ཨེཀཏོ མནྟཡུཾ ཏདཱ;

མནུསྶཱ དེཝཱ ནཱགཱ ཙ, གརུལཱ༹ ཀུམྦྷཨཎྜཀཱ.

༧༣.

‘‘པཙྩེཀཾ བུདྡྷསེཊྛསྶ, ཨཀཾསུ ཐཱུཔམུཏྟམཾ;

‘མཱ ནོ པམཏྟཱ ཨསྶུམྷ, ཨཔྤམཏྟཱ སདེཝཀཱ.

༧༤.

‘‘‘མཡམྤི ¶ ¶ ཐཱུཔཾ ཀསྶཱམ, ལོཀནཱཐསྶ ཏཱདིནོ;

ཕལིཀཱཧི ཚཱདེསྶཱམ, ཨཱཡཏཾ བུདྡྷཙེཏིཡཾ’.

༧༥.

‘‘ཡོཛནཾ ཏེཔི ཝཌྜྷེསུཾ, ཨཱཡཏཾ བུདྡྷཙེཏིཡཾ;

ཚ ཡོཛནཱནི ཨུབྦིདྡྷོ, ཐཱུཔོ ཨོབྷཱསཏེ ཏདཱ.

༧༦.

‘‘གནྡྷབྦཱ ཙ སམཱགནྟྭཱ, ཨེཀཏོ མནྟཡུཾ ཏདཱ;

‘མནུཛཱ དེཝཏཱ ནཱགཱ, གརུལཱ༹ ཀུམྦྷཡཀྑཀཱ.

༧༧.

‘‘‘སབྦེཀཾསུ བུདྡྷཐཱུཔཾ, མཡམེཏྠ ཨཀཱརཀཱ;

མཡམྤི ཐཱུཔཾ ཀསྶཱམ, ལོཀནཱཐསྶ ཏཱདིནོ’.

༧༨.

‘‘ཝེདིཡོ ¶ སཏྟ ཀཏྭཱན, ཚཏྟམཱརོཔཡིཾསུ ཏེ;

སབྦསོཎྞམཡཾ ཐཱུཔཾ, གནྡྷབྦཱ ཀཱརཡུཾ ཏདཱ.

༧༩.

‘‘སཏྟཡོཛནམུབྦིདྡྷོ, ཐཱུཔོ ཨོབྷཱསཏེ ཏདཱ;

རཏྟིནྡིཝཱ ན ཉཱཡནྟི, ཨཱལོཀོ ཧོཏི [ཨཱལོཀཱ ཧོནྟི (སྱཱ. ཀ.)] སབྦདཱ.

༨༠.

‘‘ཨབྷིབྷོནྟི ¶ ན ཏསྶཱབྷཱ, ཙནྡསཱུརཱ སཏཱརཀཱ;

སམནྟཱ ཡོཛནསཏེ, པདཱིཔོཔི ན པཛྫལི.

༨༡.

‘‘ཏེན ཀཱལེན ཡེ ཀེཙི, ཐཱུཔཾ པཱུཛེནྟི མཱནུསཱ;

ན ཏེ ཐཱུཔམཱརུཧནྟི, ཨམྦརེ ཨུཀྑིཔནྟི ཏེ.

༨༢.

‘‘དེཝེཧི ཋཔིཏོ ཡཀྑོ, ཨབྷིསམྨཏནཱམཀོ;

དྷཛཾ ཝཱ པུཔྥདཱམཾ ཝཱ, ཨབྷིརོཔེཏི ཨུཏྟརི.

༨༣.

‘‘ན ཏེ པསྶནྟི ཏཾ ཡཀྑཾ, དཱམཾ པསྶནྟི གཙྪཏོ;

ཨེཝཾ པསྶིཏྭཱ གཙྪནྟཱ, སབྦེ གཙྪནྟི སུགྒཏིཾ.

༨༤.

‘‘ཝིརུདྡྷཱ [ཝིསདྡྷཱ (སཱི.)] ཡེ པཱཝཙནེ, པསནྣཱ ཡེ ཙ སཱསནེ;

པཱཊིཧེརཾ དཊྛུཀཱམཱ, ཐཱུཔཾ པཱུཛེནྟི མཱནུསཱ.

༨༥.

‘‘ནགརེ ཧཾསཝཏིཡཱ, ཨཧོསིཾ བྷཏཀོ [ཝརཀོ (སྱཱ. ཀ.)] ཏདཱ;

ཨཱམོདིཏཾ ཛནཾ དིསྭཱ, ཨེཝཾ ཙིནྟེསཧཾ ཏདཱ.

༨༦.

‘‘‘ཨུལཱ༹རོ བྷགཝཱ ཧེསོ, ཡསྶ དྷཱཏུདྷརེདིསཾ;

ཨིམཱ ཙ ཛནཏཱ ཏུཊྛཱ, ཀཱརཾ ཀུབྦཾ ན ཏཔྤརེ [ཀུབྦནྟནཔྤཀཾ (སཱི.)].

༨༧.

‘‘‘ཨཧམྤི ¶ ཀཱརཾ ཀསྶཱམི, ལོཀནཱཐསྶ ཏཱདིནོ;

ཏསྶ དྷམྨེསུ དཱཡཱདོ, བྷཝིསྶཱམི ཨནཱགཏེ’.

༨༨.

‘‘སུདྷོཏཾ ¶ རཛཀེནཱཧཾ, ཨུཏྟརེཡྻཔཊཾ མམ;

ཝེལ༹གྒེ ཨཱལགེཏྭཱན, དྷཛཾ ཨུཀྑིཔིམམྦརེ.

༨༩.

‘‘ཨབྷིསམྨཏཀོ གཡ྄ཧ, ཨམྦརེཧཱསི མེ དྷཛཾ;

ཝཱཏེརིཏཾ དྷཛཾ དིསྭཱ, བྷིཡྻོ ཧཱསཾ ཛནེསཧཾ.

༩༠.

‘‘ཏཏྠ ¶ ཙིཏྟཾ པསཱདེཏྭཱ, སམཎཾ ཨུཔསངྐམིཾ;

ཏཾ བྷིཀྑུཾ ཨབྷིཝཱདེཏྭཱ, ཝིཔཱཀཾ པུཙྪཧཾ དྷཛེ.

༩༡.

‘‘སོ མེ ཀཐེསི ཨཱནནྡ, པཱིཏིསཉྫནནཾ མམ;

‘ཏསྶ དྷཛསྶ ཝིཔཱཀཾ, ཨནུབྷོསྶསི སབྦདཱ.

༩༢.

‘‘‘ཧཏྠཱི ¶ ཨསྶཱ རཐཱ པཏྟཱི, སེནཱ ཙ ཙཏུརངྒིནཱི;

པརིཝཱརེསྶནྟི ཏཾ ནིཙྩཾ, དྷཛདཱནསྶིདཾ ཕལཾ.

༩༣.

‘‘‘སཊྛིཏཱུརིཡསཧསྶཱནི, བྷེརིཡོ སམལངྐཏཱ;

པརིཝཱརེསྶནྟི ཏཾ ནིཙྩཾ, དྷཛདཱནསྶིདཾ ཕལཾ.

༩༤.

‘‘‘ཚལཱ༹སཱིཏིསཧསྶཱནི, ནཱརིཡོ སམལངྐཏཱ;

ཝིཙིཏྟཝཏྠཱབྷརཎཱ, ཨཱམུཏྟམཎིཀུཎྜལཱ.

༩༥.

‘‘‘ཨལཱ༹རཔམྷཱ ཧསུལཱ, སུསཉྙཱ ཏནུམཛ྄ཛྷིམཱ;

པརིཝཱརེསྶནྟི ཏཾ ནིཙྩཾ, དྷཛདཱནསྶིདཾ ཕལཾ.

༩༦.

‘‘‘ཏིཾསཀཔྤསཧསྶཱནི, དེཝལོཀེ རམིསྶསི;

ཨསཱིཏིཀྑཏྟུཾ དེཝིནྡོ, དེཝརཛྫཾ ཀརིསྶསི.

༩༧.

‘‘‘སཧསྶཀྑཏྟུཾ རཱཛཱ ཙ, ཙཀྐཝཏྟཱི བྷཝིསྶསི;

པདེསརཛྫཾ ཝིཔུལཾ, གཎནཱཏོ ཨསངྑིཡཾ.

༩༨.

‘‘‘ཀཔྤསཏསཧསྶམྷི, ཨོཀྐཱཀཀུལསམྦྷཝོ;

གོཏམོ ནཱམ གོཏྟེན, སཏྠཱ ལོཀེ བྷཝིསྶཏི.

༩༩.

‘‘‘དེཝལོཀཱ ཙཝིཏྭཱན, སུཀྐམཱུལེན ཙོདིཏོ;

པུཉྙཀམྨེན སཾཡུཏྟོ, བྲཧྨབནྡྷུ བྷཝིསྶསི.

༡༠༠.

‘‘‘ཨསཱིཏིཀོཊིཾ ¶ ཚཌྜེཏྭཱ, དཱསེ ཀམྨཀརེ བཧཱུ;

གོཏམསྶ བྷགཝཏོ, སཱསནེ པབྦཛིསྶསི.

༡༠༡.

‘‘‘ཨཱརཱདྷཡིཏྭཱ ¶ སམྦུདྡྷཾ, གོཏམཾ སཀྱཔུངྒཝཾ;

ཨུཔཝཱནོཏི ནཱམེན, ཧེསྶསི སཏྠུ སཱཝཀོ’.

༡༠༢.

‘‘སཏསཧསྶེ ཀཏཾ ཀམྨཾ, ཕལཾ དསྶེསི མེ ཨིདྷ;

སུམུཏྟོ སརཝེགོཝ ཀིལེསེ ཛྷཱཔཡཱི མམ.

༡༠༣.

‘‘ཙཀྐཝཏྟིསྶ སནྟསྶ, ཙཏུདཱིཔིསྶརསྶ མེ;

ཏིཡོཛནཱནི སམནྟཱ, ཨུསྶཱིསནྟི དྷཛཱ སདཱ.

༡༠༤.

‘‘སཏསཧསྶིཏོ ¶ ཀཔྤེ, ཡཾ ཀམྨམཀརིཾ ཏདཱ;

དུགྒཏིཾ ནཱབྷིཛཱནཱམི, དྷཛདཱནསྶིདཾ ཕལཾ.

༡༠༥.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ ¶ སུདཾ ཨཱཡསྨཱ ཨུཔཝཱནོ ཐེརོ ཨིམཱ གཱཐཱཡོ ཨབྷཱསིཏྠཱཏི.

ཨུཔཝཱནཏྠེརསྶཱཔདཱནཾ དུཏིཡཾ.

༣. ཏིསརཎགམནིཡཏྠེརཨཔདཱནཾ

༡༠༦.

‘‘ནགརེ ཙནྡཝཏིཡཱ [བནྡྷུམཏིཡཱ (ཨཊྛ.)], མཱཏུཨུཔཊྛཱཀོ [མཱཏུཔཊྛཱཡཀོ (སཱི.), མཱཏུཔཊྛཱནཀོ (སྱཱ.)] ཨཧུཾ;

ཨནྡྷཱ མཱཏཱ པིཏཱ མཡ྄ཧཾ, ཏེ པོསེམི ཨཧཾ ཏདཱ.

༡༠༧.

‘‘རཧོགཏོ ¶ ནིསཱིདིཏྭཱ, ཨེཝཾ ཙིནྟེསཧཾ ཏདཱ;

པོསེནྟོ མཱཏཱཔིཏརོ, པབྦཛྫཾ ན ལབྷཱམཧཾ.

༡༠༨.

‘‘མཧནྡྷཀཱརཔིཧིཏཱ [ཏམནྡྷཀཱརཔིཧིཏཱ (སྱཱ.)], ཏིཝིདྷགྒཱིཧི ཌཡ྄ཧརེ;

ཨེཏཱདིསེ བྷཝེ [བྷཡེ (སཱི.)] ཛཱཏེ, ནཏྠི ཀོཙི ཝིནཱཡཀོ.

༡༠༩.

‘‘བུདྡྷོ ལོཀེ སམུཔྤནྣོ, དིཔྤཏི [དིབྦཏི (ཀ.)] [ཛིནསཱསནཾ (སཱི.)] དཱནི སཱསནཾ;

སཀྐཱ ཨུདྡྷརིཏུཾ ཨཏྟཱ, པུཉྙཀཱམེན ཛནྟུནཱ.

༡༡༠.

‘‘ཨུགྒཡ྄ཧ ཏཱིཎི སརཎེ, པརིཔུཎྞཱནི གོཔཡིཾ;

ཏེན ཀམྨེན སུཀཏེན, པཊིམོཀྑཱམི དུགྒཏིཾ.

༡༡༡.

‘‘ནིསབྷོ ¶ ནཱམ སམཎོ, བུདྡྷསྶ ཨགྒསཱཝཀོ;

ཏམཧཾ ཨུཔགནྟྭཱན, སརཎགམནཾ གཧིཾ.

༡༡༢.

‘‘ཝསྶསཏསཧསྶཱནི, ཨཱཡུ ཝིཛྫཏི ཏཱཝདེ;

ཏཱཝཏཱ སརཎགམནཾ, པརིཔུཎྞཾ ཨགོཔཡིཾ.

༡༡༣.

‘‘ཙརིམེ ཝཏྟམཱནམྷི, སརཎཾ ཏཾ ཨནུསྶརིཾ;

ཏེན ཀམྨེན སུཀཏེན, ཏཱཝཏིཾསཾ ཨགཙྪཧཾ.

༡༡༤.

‘‘དེཝལོཀགཏོ སནྟོ, པུཉྙཀམྨསམཱཧིཏོ;

ཡཾ དེསཾ [ཡཾ ཡཾ དེསཾ (སྱཱ.)] ཨུཔཔཛྫཱམི [ཨུཔགཙྪཱམི (སཱི.)], ཨཊྛ ཧེཏཱུ ལབྷཱམཧཾ.

༡༡༥.

‘‘དིསཱསུ ¶ པཱུཛིཏོ ཧོམི, ཏིཀྑཔཉྙོ བྷཝཱམཧཾ;

སབྦེ དེཝཱནུཝཏྟནྟི, ཨམིཏབྷོགཾ ལབྷཱམཧཾ.

༡༡༦.

‘‘སུཝཎྞཝཎྞོ སབྦཏྠ, པཊིཀནྟོ བྷཝཱམཧཾ;

མིཏྟཱནཾ ཨཙལོ ཧོམི, ཡསོ ཨབྦྷུགྒཏོ མམཾ.

༡༡༧.

‘‘ཨསཱིཏིཀྑཏྟུ ¶ དེཝིནྡོ, དེཝརཛྫམཀཱརཡིཾ;

དིབྦསུཁཾ ཨནུབྷཝིཾ, ཨཙྪརཱཧི པུརཀྑཏོ.

༡༡༨.

‘‘པཉྩསཏྟཏིཀྑཏྟུཉྩ ¶ , ཙཀྐཝཏྟཱི ཨཧོསཧཾ;

པདེསརཛྫཾ ཝིཔུལཾ, གཎནཱཏོ ཨསངྑིཡཾ.

༡༡༩.

‘‘པཙྪིམེ བྷཝེ སམྤཏྟེ, པུཉྙཀམྨསམཱཧིཏོ;

པུརེ སཱཝཏྠིཡཾ ཛཱཏོ, མཧཱསཱལེ སུཨཌྜྷཀེ.

༡༢༠.

‘‘ནགརཱ ནིཀྑམིཏྭཱན, དཱརཀེཧི པུརཀྑཏོ;

ཧསཁིཌྜསམངྒཱིཧཾ [སཱཧཾ ཁིཌྜསམངྒཱི (སྱཱ.)], སངྒྷཱརཱམཾ ཨུཔཱགམིཾ.

༡༢༡.

‘‘ཏཏྠདྡསཱསིཾ [ཏཏྠདྡསཱཧཾ (ཀ.)] སམཎཾ, ཝིཔྤམུཏྟཾ ནིརཱུཔདྷིཾ;

སོ མེ དྷམྨམདེསེསི, སརཎཉྩ ཨདཱསི མེ.

༡༢༢.

‘‘སོཧཾ སུཏྭཱན སརཎཾ, སརཎཾ མེ ཨནུསྶརིཾ;

ཨེཀཱསནེ ནིསཱིདིཏྭཱ, ཨརཧཏྟམཔཱཔུཎིཾ.

༡༢༣.

‘‘ཛཱཏིཡཱ སཏྟམེ ཝསྶེ, ཨརཧཏྟམཔཱཔུཎིཾ;

ཨུཔསམྤཱདཡི བུདྡྷོ, གུཎམཉྙཱཡ ཙཀྑུམཱ.

༡༢༤.

‘‘ཨཔརིམེཡྻེ ¶ ཨིཏོ ཀཔྤེ, སརཎཱནི ཨགཙྪཧཾ;

ཏཏོ མེ སུཀཏཾ ཀམྨཾ, ཕལཾ དསྶེསི མེ ཨིདྷ.

༡༢༥.

‘‘སུགོཔིཏཾ མེ སརཎཾ, མཱནསཾ སུཔྤཎཱིཧིཏཾ;

ཨནུབྷོཏྭཱ ཡསཾ སབྦཾ, པཏྟོམྷི ཨཙལཾ པདཾ.

༡༢༦.

‘‘ཡེསཾ སོཏཱཝདྷཱནཏྠི, སུཎོཐ མམ བྷཱསཏོ;

ཨཧཾ [ཨཏྠཾ (སྱཱ.)] ཝོ ཀཐཡིསྶཱམི, སཱམཾ དིཊྛཾ པདཾ མམ.

༡༢༧.

‘‘‘བུདྡྷོ ¶ ལོཀེ སམུཔྤནྣོ, ཝཏྟཏེ ཛིནསཱསནཾ;

ཨམཏཱ ཝཱདིཏཱ བྷེརཱི, སོཀསལླཝིནོདནཱ.

༡༢༨.

‘‘‘ཡཐཱསཀེན ཐཱམེན, པུཉྙཀྑེཏྟེ ཨནུཏྟརེ;

ཨདྷིཀཱརཾ ཀརེཡྻཱཐ, པསྶཡིསྶཐ ནིབྦུཏིཾ.

༡༢༩.

‘‘‘པགྒཡ྄ཧ ཏཱིཎི སརཎེ, པཉྩསཱིལཱནི གོཔིཡ;

བུདྡྷེ ཙིཏྟཾ པསཱདེཏྭཱ, དུཀྑསྶནྟཾ ཀརིསྶཐ.

༡༣༠.

‘‘‘སམྨཱ དྷམྨཾ བྷཱཝེཏྭཱན [མམོཔམཾ ཀརིཏྭཱན (སཱི. སྱཱ.)], སཱིལཱནི ¶ པརིགོཔིཡ;

ཨཙིརཾ ཨརཧཏྟཾ ཝོ, སབྦེཔི པཱཔུཎིསྶཐ.

༡༣༡.

‘‘‘ཏེཝིཛྫོ ཨིདྡྷིཔཏྟོམྷི, ཙེཏོཔརིཡཀོཝིདོ;

སཱཝཀོ ཏེ མཧཱཝཱིར, སརཎོ [ཙརཎེ (སཱི. སྱཱ.)] ཝནྡཏི སཏྠུནོ’.

༡༣༢.

‘‘ཨཔརིམེཡྻེ ¶ ཨིཏོ ཀཔྤེ, སརཎཾ བུདྡྷསྶ གཙྪཧཾ;

དུགྒཏིཾ ནཱབྷིཛཱནཱམི, སརཎཾ གམནེ ཕལཾ.

༡༣༣.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཏིསརཎགམནིཡོ ཐེརོ ཨིམཱ གཱཐཱཡོ ཨབྷཱསིཏྠཱཏི.

ཏིསརཎགམནིཡཏྠེརསྶཱཔདཱནཾ ཏཏིཡཾ.

༤. པཉྩསཱིལསམཱདཱནིཡཏྠེརཨཔདཱནཾ

༡༣༤.

‘‘ནགརེ ཙནྡཝཏིཡཱ, བྷཏཀོ ཨཱསཧཾ ཏདཱ;

པརཀམྨཱཡནེ ཡུཏྟོ, པབྦཛྫཾ ན ལབྷཱམཧཾ.

༡༣༥.

‘‘མཧནྡྷཀཱརཔིཧིཏཱ ¶ ¶ , ཏིཝིདྷགྒཱིཧི ཌཡ྄ཧརེ;

ཀེན ནུ ཁོ ཨུཔཱཡེན, ཝིསཾཡུཏྟོ བྷཝེ ཨཧཾ.

༡༣༦.

‘‘དེཡྻདྷམྨོ ཙ མེ ནཏྠི, ཝརཱཀོ བྷཏཀོ ཨཧཾ;

ཡཾནཱུནཱཧཾ པཉྩསཱིལཾ, རཀྑེཡྻཾ པརིཔཱུརཡཾ.

༡༣༧.

‘‘ཨནོམདསྶིསྶ མུནིནོ, ནིསབྷོ ནཱམ སཱཝཀོ;

ཏམཧཾ ཨུཔསངྐམྨ, པཉྩསིཀྑཱཔདགྒཧིཾ.

༡༣༨.

‘‘ཝསྶསཏསཧསྶཱནི, ཨཱཡུ ཝིཛྫཏི ཏཱཝདེ;

ཏཱཝཏཱ པཉྩསཱིལཱནི, པརིཔུཎྞཱནི གོཔཡིཾ.

༡༣༩.

‘‘མཙྩུཀཱལེ ཙ སམྤཏྟེ, དེཝཱ ཨསྶཱསཡནྟི མཾ;

‘རཐོ སཧསྶཡུཏྟོ ཏེ, མཱརིསཱཡཾ [མཱརིསསྶ (ཀ.)] ཨུཔཊྛིཏོ’.

༡༤༠.

‘‘ཝཏྟནྟེ ཙརིམེ ཙིཏྟེ, མམ སཱིལཾ ཨནུསྶརིཾ;

ཏེན ཀམྨེན སུཀཏེན, ཏཱཝཏིཾསཾ ཨགཙྪཧཾ.

༡༤༡.

‘‘ཏིཾསཀྑཏྟུཉྩ ¶ དེཝིནྡོ, དེཝརཛྫམཀཱརཡིཾ;

དིབྦསུཁཾ [དིབྦཾ སུཁཾ (སཱི.)] ཨནུབྷཝིཾ, ཨཙྪརཱཧི པུརཀྑཏོ.

༡༤༢.

‘‘པཉྩསཏྟཏིཀྑཏྟུཉྩ, ཙཀྐཝཏྟཱི ཨཧོསཧཾ;

པདེསརཛྫཾ ཝིཔུལཾ, གཎནཱཏོ ཨསངྑིཡཾ.

༡༤༣.

‘‘དེཝལོཀཱ ཙཝིཏྭཱན, སུཀྐམཱུལེན ཙོདིཏོ;

པུརེ ཝེསཱལིཡཾ ཛཱཏོ, མཧཱསཱལེ སུཨཌྜྷཀེ.

༡༤༤.

‘‘ཝསྶཱུཔནཱཡིཀེ ¶ ཀཱལེ, དིཔྤནྟེ [དིབྦནྟི (ཀ.)] ཛིནསཱསནེ;

མཱཏཱ ཙ མེ པིཏཱ ཙེཝ, པཉྩསིཀྑཱཔདགྒཧུཾ.

༡༤༥.

‘‘སཧ ¶ སུཏྭཱནཧཾ སཱིལཾ, མམ སཱིལཾ ཨནུསྶརིཾ;

ཨེཀཱསནེ ནིསཱིདིཏྭཱ, ཨརཧཏྟམཔཱཔུཎིཾ.

༡༤༦.

‘‘ཛཱཏིཡཱ པཉྩཝསྶེན, ཨརཧཏྟམཔཱཔུཎིཾ;

ཨུཔསམྤཱདཡི བུདྡྷོ, གུཎམཉྙཱཡ ཙཀྑུམཱ.

༡༤༧.

‘‘པརིཔུཎྞཱནི གོཔེཏྭཱ, པཉྩསིཀྑཱཔདཱནཧཾ;

ཨཔརིམེཡྻེ ཨིཏོ ཀཔྤེ, ཝིནིཔཱཏཾ ན གཙྪཧཾ.

༡༤༨.

‘‘སྭཱཧཾ ¶ ཡསམནུབྷཝིཾ, ཏེསཾ སཱིལཱན ཝཱཧསཱ;

ཀཔྤཀོཊིམྤི ཀིཏྟེནྟོ, ཀིཏྟཡེ ཨེཀདེསཀཾ.

༡༤༩.

‘‘པཉྩསཱིལཱནི གོཔེཏྭཱ, ཏཡོ ཧེཏཱུ ལབྷཱམཧཾ;

དཱིགྷཱཡུཀོ མཧཱབྷོགོ, ཏིཀྑཔཉྙོ བྷཝཱམཧཾ.

༡༥༠.

‘‘སཾཀིཏྟེནྟོ ཙ [པཀིཏྟེནྟོཝ (སཱི.), པཀིཏྟེནྟེ ཙ (སྱཱ.)] སབྦེསཾ, ཨབྷིམཏྟཉྩ པོརིསཾ;

བྷཝཱབྷཝེ སཾསརིཏྭཱ, ཨེཏེ ཋཱནེ ལབྷཱམཧཾ.

༡༥༡.

‘‘ཨཔརིམེཡྻསཱིལེསུ, ཝཏྟནྟཱ ཛིནསཱཝཀཱ;

བྷཝེསུ ཡདི རཛྫེཡྻུཾ, ཝིཔཱཀོ ཀཱིདིསོ བྷཝེ.

༡༥༢.

‘‘སུཙིཎྞཾ མེ པཉྩསཱིལཾ, བྷཏཀེན ཏཔསྶིནཱ [ཝིཔསྶིནཱ (སཱི.)];

ཏེན སཱིལེནཧཾ ཨཛྫ, མོཙཡིཾ སབྦབནྡྷནཱ.

༡༥༣.

‘‘ཨཔརིམེཡྻེ ཨིཏོ ཀཔྤེ, པཉྩསཱིལཱནི གོཔཡིཾ;

དུགྒཏིཾ ནཱབྷིཛཱནཱམི, པཉྩསཱིལཱནིདཾ ཕལཾ.

༡༥༤.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ ¶ སུདཾ ཨཱཡསྨཱ པཉྩསཱིལསམཱདཱནིཡོ ཐེརོ ཨིམཱ གཱཐཱཡོ ཨབྷཱསིཏྠཱཏི.

པཉྩསཱིལསམཱདཱནིཡཏྠེརསྶཱཔདཱནཾ ཙཏུཏྠཾ.

༥. ཨནྣསཾསཱཝཀཏྠེརཨཔདཱནཾ

༡༥༥.

‘‘སུཝཎྞཝཎྞཾ ¶ སམྦུདྡྷཾ, གཙྪནྟཾ ཨནྟརཱཔཎེ;

ཀཉྩནགྒྷིཡསཾཀཱསཾ, བཱཏྟིཾསཝརལཀྑཎཾ.

༡༥༦.

‘‘སིདྡྷཏྠཾ ¶ ལོཀཔཛྫོཏཾ, ཨཔྤམེཡྻཾ ཨནོཔམཾ;

ཨལཏྠཾ པརམཾ པཱིཏིཾ, དིསྭཱ དནྟཾ ཛུཏིནྡྷརཾ.

༡༥༧.

‘‘སམྦུདྡྷཾ ཨབྷིནཱམེཏྭཱ, བྷོཛཡིཾ ཏཾ མཧཱམུནིཾ;

མཧཱཀཱརུཎིཀོ ལོཀེ [ནཱཐོ (སཱི.)], ཨནུམོདི མམཾ ཏདཱ.

༡༥༨.

‘‘ཏསྨིཾ ¶ མཧཱཀཱརུཎིཀེ, པརམསྶཱསཀཱརཀེ;

བུདྡྷེ ཙིཏྟཾ པསཱདེཏྭཱ, ཀཔྤཾ སགྒམྷི མོདཧཾ.

༡༥༩.

‘‘ཙཏུནྣཝུཏིཏོ ཀཔྤེ, ཡཾ དཱནམདདིཾ ཏདཱ;

དུགྒཏིཾ ནཱབྷིཛཱནཱམི, བྷིཀྑཱདཱནསྶིདཾ ཕལཾ.

༡༦༠.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཨནྣསཾསཱཝཀོ ཐེརོ ཨིམཱ གཱཐཱཡོ ཨབྷཱསིཏྠཱཏི.

ཨནྣསཾསཱཝཀཏྠེརསྶཱཔདཱནཾ པཉྩམཾ.

༦. དྷཱུཔདཱཡཀཏྠེརཨཔདཱནཾ

༡༦༡.

‘‘སིདྡྷཏྠསྶ ¶ བྷགཝཏོ, ལོཀཛེཊྛསྶ ཏཱདིནོ;

ཀུཊིདྷཱུཔཾ མཡཱ དིནྣཾ, ཝིཔྤསནྣེན ཙེཏསཱ.

༡༦༢.

ཡཾ ཡཾ ཡོནུཔཔཛྫཱམི, དེཝཏྟཾ ཨཐ མཱནུསཾ;

སབྦེསམྤི པིཡོ ཧོམི, དྷཱུཔདཱནསྶིདཾ ཕལཾ.

༡༦༣.

‘‘ཙཏུནྣཝུཏིཏོ ཀཔྤེ, ཡཾ དྷཱུཔམདདིཾ ཏདཱ [ཡཾ དྷཱུཔནམདཱསཧཾ (ཀ.)];

དུགྒཏིཾ ནཱབྷིཛཱནཱམི, དྷཱུཔདཱནསྶིདཾ ཕལཾ.

༡༦༤.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ དྷཱུཔདཱཡཀོ ཐེརོ ཨིམཱ གཱཐཱཡོ ཨབྷཱསིཏྠཱཏི.

དྷཱུཔདཱཡཀཏྠེརསྶཱཔདཱནཾ ཚཊྛཾ.

༧. པུལིནཔཱུཛཀཏྠེརཨཔདཱནཾ

༡༦༥.

‘‘ཝིཔསྶིསྶ ¶ ¶ བྷགཝཏོ, བོདྷིཡཱ པཱདཔུཏྟམེ;

པུརཱཎཔུལིནཾ ཧིཏྭཱ [ཚཌྜེཏྭཱ (སཱི. སྱཱ.)], སུདྡྷཔུལིནམཱཀིརིཾ.

༡༦༦.

‘‘ཨེཀནཝུཏིཏོ ¶ ཀཔྤེ, ཡཾ པུལིནམདཱསཧཾ;

དུགྒཏིཾ ནཱབྷིཛཱནཱམི, པུལིནདཱནསྶིདཾ ཕལཾ.

༡༦༧.

‘‘ཏིཾསཏིམེ ¶ [ཏིཔཉྙཱསེ (སཱི. སྱཱ.)] ཨིཏོ ཀཔྤེ, རཱཛཱ ཨཱསིཾ ཛནཱདྷིབྷཱུ;

མཧཱཔུལིནནཱམེན, ཙཀྐཝཏྟཱི མཧབྦལོ.

༡༦༨.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ པུལིནཔཱུཛཀོ ཐེརོ ཨིམཱ གཱཐཱཡོ ཨབྷཱསིཏྠཱཏི.

པུལིནཔཱུཛཀཏྠེརསྶཱཔདཱནཾ སཏྟམཾ.

༨. ཨུཏྟིཡཏྠེརཨཔདཱནཾ

༡༦༩.

‘‘ཙནྡབྷཱགཱནདཱིཏཱིརེ, སུསུམཱརོ ཨཧཾ ཏདཱ;

སགོཙརཔྤསུཏོཧཾ [སབྷོཛནཔསུཏཱཧཾ (སྱཱ. ཀ.)], ནདཱིཏིཏྠཾ ཨགཙྪཧཾ.

༡༧༠.

‘‘སིདྡྷཏྠོ ཏམྷི སམཡེ, སཡམྦྷཱུ ཨགྒཔུགྒལོ;

ནདིཾ ཏརིཏུཀཱམོ སོ, ནདཱིཏིཏྠཾ ཨུཔཱགམི.

༡༧༡.

‘‘ཨུཔཱགཏེ ཙ [ཨུཔཱགཏམྷི (སྱཱ. ཀ.)] སམྦུདྡྷེ, ཨཧམྤི ཏཏྠུཔཱགམིཾ;

ཨུཔགནྟྭཱན སམྦུདྡྷཾ, ཨིམཾ ཝཱཙཾ ཨུདཱིརཡིཾ.

༡༧༢.

‘‘‘ཨབྷིརཱུཧ མཧཱཝཱིར, ཏཱརེསྶཱམི ཨཧཾ ཏུཝཾ;

པེཏྟིཀཾ ཝིསཡཾ མཡ྄ཧཾ, ཨནུཀམྤ མཧཱམུནི’.

༡༧༣.

‘‘མམ ཨུགྒཛྫནཾ སུཏྭཱ, ཨབྷིརཱུཧི མཧཱམུནི;

ཧཊྛོ ཧཊྛེན ཙིཏྟེན, ཏཱརེསིཾ ལོཀནཱཡཀཾ.

༡༧༤.

‘‘ནདིཡཱ ¶ པཱརིམེ ཏཱིརེ, སིདྡྷཏྠོ ལོཀནཱཡཀོ;

ཨསྶཱསེསི མམཾ ཏཏྠ, ཨམཏཾ པཱཔུཎིསྶསི.

༡༧༥.

‘‘ཏམྷཱ ¶ ཀཱཡཱ ཙཝིཏྭཱན, དེཝལོཀཾ ཨཱགཙྪཧཾ;

དིབྦསུཁཾ ཨནུབྷཝིཾ, ཨཙྪརཱཧི པུརཀྑཏོ.

༡༧༦.

‘‘སཏྟཀྑཏྟུཉྩ ¶ དེཝིནྡོ, དེཝརཛྫམཀཱསཧཾ;

ཏཱིཎིཀྑཏྟུཾ ཙཀྐཝཏྟཱི, མཧིཡཱ ཨིསྶརོ ཨཧུཾ.

༡༧༧.

‘‘ཝིཝེཀམནུཡུཏྟོཧཾ ¶ , ནིཔཀོ ཙ སུསཾཝུཏོ;

དྷཱརེམི ཨནྟིམཾ དེཧཾ, སམྨཱསམྦུདྡྷསཱསནེ.

༡༧༨.

‘‘ཙཏུནྣཝུཏིཏོ ཀཔྤེ, ཏཱརེསིཾ ཡཾ ནརཱསབྷཾ;

དུགྒཏིཾ ནཱབྷིཛཱནཱམི, ཏརཎཱཡ ཨིདཾ ཕལཾ.

༡༧༩.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཨུཏྟིཡོ [ཨུཏྟིརིཡོ (སཱི.)] ཐེརོ ཨིམཱ གཱཐཱཡོ ཨབྷཱསིཏྠཱཏི.

ཨུཏྟིཡཏྠེརསྶཱཔདཱནཾ ཨཊྛམཾ.

༩. ཨེཀཉྫལིཀཏྠེརཨཔདཱནཾ

༡༨༠.

‘‘སུཝཎྞཝཎྞཾ སམྦུདྡྷཾ, གཙྪནྟཾ ཨནྟརཱཔཎེ;

ཝིཔསྶིཾ སཏྠཝཱཧགྒཾ, ནརཝརཾ ཝིནཱཡཀཾ.

༡༨༡.

‘‘ཨདནྟདམནཾ ¶ ཏཱདིཾ, མཧཱཝཱདིཾ མཧཱམཏིཾ;

དིསྭཱ པསནྣོ སུམནོ, ཨེཀཉྫལིམཀཱསཧཾ.

༡༨༢.

‘‘ཨེཀནཝུཏིཏོ ཀཔྤེ, ཡམཉྫལིཾ ཀརིཾ [ཡཾ ཨཉྫལིམཀརིཾ (སྱཱ.), ཨཉྫལིམཀརིཾ (ཀ.)] ཏདཱ;

དུགྒཏིཾ ནཱབྷིཛཱནཱམི, ཨཉྫལིསྶ ཨིདཾ ཕལཾ.

༡༨༣.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཨེཀཉྫལིཀོ ཐེརོ ཨིམཱ གཱཐཱཡོ ཨབྷཱསིཏྠཱཏི.

ཨེཀཉྫལིཀཏྠེརསྶཱཔདཱནཾ ནཝམཾ.

༡༠. ཁོམདཱཡཀཏྠེརཨཔདཱནཾ

༡༨༤.

‘‘ནགརེ ¶ ¶ བནྡྷུམཏིཡཱ, ཨཧོསིཾ ཝཱཎིཛོ ཏདཱ;

ཏེནེཝ དཱརཾ པོསེམི, རོཔེམི བཱིཛསམྤདཾ.

༡༨༥.

‘‘རཐིཡཾ པཊིཔནྣསྶ, ཝིཔསྶིསྶ མཧེསིནོ;

ཨེཀཾ ཁོམཾ མཡཱ དིནྣཾ, ཀུསལཏྠཱཡ སཏྠུནོ.

༡༨༦.

‘‘ཨེཀནཝུཏིཏོ ¶ ཀཔྤེ, ཡཾ ཁོམམདདིཾ ཏདཱ;

དུགྒཏིཾ ནཱབྷིཛཱནཱམི, ཁོམདཱནསྶིདཾ ཕལཾ.

༡༨༧.

‘‘སཏྟརསེ [སཏྟཝཱིསེ (སཱི. སྱཱ.)] ཨིཏོ ཀཔྤེ, ཨེཀོ སིནྡྷཝསནྡྷནོ;

སཏྟརཏནསམྤནྣོ, ཙཏུདཱིཔམྷི ཨིསྶརོ.

༡༨༨.

‘‘པཊིསམྦྷིདཱ ¶ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཁོམདཱཡཀོ ཐེརོ ཨིམཱ གཱཐཱཡོ ཨབྷཱསིཏྠཱཏི.

ཁོམདཱཡཀཏྠེརསྶཱཔདཱནཾ དསམཾ.

ཏསྶུདྡཱནཾ –

སུསཱུཏི ཨུཔཝཱནོ ཙ, སརཎོ སཱིལགཱཧཀོ;

ཨནྣསཾསཱཝཀོ ཁོམདཱཡཱི ཙ, དསེཝ ཏཏིཡེ གཎེ;

ཨཉྫལཱི ཁོམདཱཡཱི ཙ, དསེཝ ཏཏིཡེ གཎེ;

པཉྩཱལཱིསཱིཏིསཏཾ ཝུཏྟཱ, གཱཐཱཡོ སབྦཔིཎྜིཏཱ.

སུབྷཱུཏིཝགྒོ ཏཏིཡོ.

ཙཏུཏྠབྷཱཎཝཱརཾ.

༤. ཀུཎྜདྷཱནཝགྒོ

༡. ཀུཎྜདྷཱནཏྠེརཨཔདཱནཾ

༡.

‘‘སཏྟཱཧཾ ¶ ¶ པཊིསལླཱིནཾ, སཡམྦྷུཾ ཨགྒཔུགྒལཾ;

པསནྣཙིཏྟོ སུམནོ, བུདྡྷསེཊྛཾ ཨུཔཊྛཧིཾ.

༢.

‘‘ཝུཊྛིཏཾ ཀཱལམཉྙཱཡ, པདུམུཏྟརཾ མཧཱམུནིཾ;

མཧནྟིཾ ཀདལཱིཀཎྞིཾ, གཧེཏྭཱ ཨུཔགཙྪཧཾ.

༣.

‘‘པཊིགྒཧེཏྭཱ ¶ [པཊིགྒཧེསི (སྱཱ. ཀ.)] བྷགཝཱ, སབྦཉྙཱུ [ཏཾ ཕལཾ (སཱི.)] ལོཀནཱཡཀོ;

མམ ཙིཏྟཾ པསཱདེནྟོ, པརིབྷུཉྫི མཧཱམུནི.

༤.

‘‘པརིབྷུཉྫིཏྭཱ སམྦུདྡྷོ, སཏྠཝཱཧོ ཨནུཏྟརོ;

སཀཱསནེ ནིསཱིདིཏྭཱ, ཨིམཱ གཱཐཱ ཨབྷཱསཐ.

༥.

‘‘‘ཡེ ¶ ཙ སནྟི སམིཏཱརོ [ཡེ ཝསནྟི སམེཏཱརོ (སཱི.)], ཡཀྑཱ ཨིམམྷི པབྦཏེ;

ཨརཉྙེ བྷཱུཏབྷབྱཱནི [བྷཱུཏགཎཱ སབྦེ (སྱཱ.)], སུཎནྟུ ཝཙནཾ མམ’.

༦.

‘‘ཡོ སོ བུདྡྷཾ ཨུཔཊྛཱསི, མིགརཱཛཾཝ ཀེསརིཾ [མིགརཱཛཱཝ ཀེསརཱི (སཱི.)];

ཏམཧཾ ཀིཏྟཡིསྶཱམི, སུཎཱཐ མམ བྷཱསཏོ.

༧.

‘‘‘ཨེཀཱདསཉྩཀྑཏྟུཾ, སོ [སོཡམེཀཱདསཀྑཏྟུཾ (སཱི.)] དེཝརཱཛཱ བྷཝིསྶཏི;

ཙཏུཏིཾསཏིཀྑཏྟུཉྩ, ཙཀྐཝཏྟཱི བྷཝིསྶཏི.

༨.

‘‘‘ཀཔྤསཏསཧསྶམྷི, ཨོཀྐཱཀཀུལསམྦྷཝོ;

གོཏམོ ནཱམ གོཏྟེན, སཏྠཱ ལོཀེ བྷཝིསྶཏི.

༩.

‘‘‘ཨཀྐོསིཏྭཱན སམཎེ, སཱིལཝནྟེ ཨནཱསཝེ;

པཱཔཀམྨཝིཔཱཀེན, ནཱམདྷེཡྻཾ ལབྷིསྶཏི [བྷཝིསྶཏི (ཀ.)].

༡༠.

‘‘‘ཏསྶ དྷམྨེསུ དཱཡཱདོ, ཨོརསོ དྷམྨནིམྨིཏོ;

ཀུཎྜདྷཱནོཏི ནཱམེན, སཱཝཀོ སོ བྷཝིསྶཏི’.

༡༡.

‘‘པཝིཝེཀམནུཡུཏྟོ, ཛྷཱཡཱི ཛྷཱནརཏོ ཨཧཾ;

ཏོསཡིཏྭཱན སཏྠཱརཾ, ཝིཧརཱམི ཨནཱསཝོ.

༡༢.

‘‘སཱཝཀེཧི ¶ ¶ [སཱཝཀགྒེཧི (སཱི.)] པརིཝུཏོ, བྷིཀྑུསངྒྷཔུརཀྑཏོ;

བྷིཀྑུསངྒྷེ ནིསཱིདིཏྭཱ, སལཱཀཾ གཱཧཡཱི ཛིནོ.

༡༣.

‘‘ཨེཀཾསཾ ¶ ཙཱིཝརཾ ཀཏྭཱ, ཝནྡིཏྭཱ ལོཀནཱཡཀཾ;

ཝདཏཾ ཝརསྶ པུརཏོ, པཋམཾ ཨགྒཧེསཧཾ.

༡༤.

‘‘ཏེན ཀམྨེན བྷགཝཱ, དསསཧསྶཱིཀམྤཀོ;

བྷིཀྑུསངྒྷེ ནིསཱིདིཏྭཱ, ཨགྒཊྛཱནེ ཋཔེསི མཾ.

༡༥.

‘‘ཝཱིརིཡཾ མེ དྷུརདྷོརཡ྄ཧཾ, ཡོགཀྑེམཱདྷིཝཱཧནཾ;

དྷཱརེམི ཨནྟིམཾ དེཧཾ, སམྨཱསམྦུདྡྷསཱསནེ.

༡༦.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཀུཎྜདྷཱནོ ཐེརོ ཨིམཱ གཱཐཱཡོ ཨབྷཱསིཏྠཱཏི.

ཀུཎྜདྷཱནཏྠེརསྶཱཔདཱནཾ པཋམཾ.

༢. སཱགཏཏྠེརཨཔདཱནཾ

༡༧.

‘‘སོབྷིཏོ ¶ ནཱམ ནཱམེན, ཨཧོསིཾ བྲཱཧྨཎོ ཏདཱ;

པུརཀྑཏོ སསིསྶེཧི, ཨཱརཱམཾ ཨགམཱསཧཾ.

༡༨.

‘‘བྷགཝཱ ཏམྷི སམཡེ, བྷིཀྑུསངྒྷཔུརཀྑཏོ;

ཨཱརཱམདྭཱརཱ ནིཀྑམྨ, ཨཊྛཱསི པུརིསུཏྟམོ.

༡༩.

‘‘ཏམདྡསཱསིཾ སམྦུདྡྷཾ, དནྟཾ དནྟཔུརཀྑཏཾ;

སཀཾ ཙིཏྟཾ པསཱདེཏྭཱ, སནྠཝིཾ ལོཀནཱཡཀཾ.

༢༠.

‘‘ཡེ ཀེཙི པཱདཔཱ སབྦེ, མཧིཡཱ ཏེ ཝིརཱུཧརེ;

བུདྡྷིམནྟོ ¶ ཏཐཱ སཏྟཱ, རུཧནྟི ཛིནསཱསནེ.

༢༡.

‘‘སཏྠཝཱཧོསི སཔྤཉྙོ, མཧེསི བཧུཀེ ཛནེ;

ཝིཔཐཱ ཨུདྡྷརིཏྭཱན, པཐཾ ཨཱཙིཀྑསེ ཏུཝཾ.

༢༢.

‘‘དནྟོ ¶ དནྟཔརིཀིཎྞོ [པུརཀྑཏོ (སྱཱ.)], ཛྷཱཡཱི ཛྷཱནརཏེཧི ཙ;

ཨཱཏཱཔཱི པཧིཏཏྟེཧི, ཨུཔསནྟེཧི ཏཱདིབྷི.

༢༣.

‘‘ཨལངྐཏོ པརིསཱཧི, པུཉྙཉཱཎེཧི སོབྷཏི;

པབྷཱ ནིདྡྷཱཝཏེ ཏུཡ྄ཧཾ, སཱུརིཡོདཡནེ ཡཐཱ.

༢༤.

‘‘པསནྣཙིཏྟཾ ¶ དིསྭཱན, མཧེསཱི པདུམུཏྟརོ;

བྷིཀྑུསངྒྷེ ཋིཏོ སཏྠཱ, ཨིམཱ གཱཐཱ ཨབྷཱསཐ.

༢༥.

‘‘‘ཡོ སོ ཧཱསཾ ཛནེཏྭཱན, མམཾ ཀིཏྟེསི བྲཱཧྨཎོ;

ཀཔྤཱནཾ སཏསཧསྶཾ, དེཝལོཀེ རམིསྶཏི.

༢༦.

‘‘‘ཏུསིཏཱ ཧི ཙཝིཏྭཱན, སུཀྐམཱུལེན ཙོདིཏོ;

གོཏམསྶ བྷགཝཏོ, སཱསནེ པབྦཛིསྶཏི.

༢༧.

‘‘‘ཏེན ཀམྨེན སུཀཏེན, ཨརཧཏྟཾ [ཏུཊྛཧཊྛཾ (སྱཱ. ཀ.)] ལབྷིསྶཏི;

སཱགཏོ ནཱམ ནཱམེན, ཧེསྶཏི སཏྠུ སཱཝཀོ’.

༢༨.

‘‘པབྦཛིཏྭཱན ཀཱཡེན, པཱཔཀམྨཾ ཝིཝཛྫཡིཾ;

ཝཙཱིདུཙྩརིཏཾ ཧིཏྭཱ, ཨཱཛཱིཝཾ པརིསོདྷཡིཾ.

༢༩.

‘‘ཨེཝཾ ¶ ཝིཧརམཱནོཧཾ, ཏེཛོདྷཱཏཱུསུ ཀོཝིདོ;

སབྦཱསཝེ པརིཉྙཱཡ, ཝིཧརཱམི ཨནཱསཝོ.

༣༠.

‘‘པཊིསམྦྷིདཱ ¶ ཙཏསྶོ…པེ… ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ སཱགཏོ ཐེརོ ཨིམཱ གཱཐཱཡོ ཨབྷཱསིཏྠཱཏི.

སཱགཏཏྠེརསྶཱཔདཱནཾ དུཏིཡཾ.

༣. མཧཱཀཙྩཱནཏྠེརཨཔདཱནཾ

༣༡.

‘‘པདུམུཏྟརནཱཐསྶ, པདུམཾ ནཱམ ཙེཏིཡཾ;

སིལཱསནཾ [སཱིཧཱསནཾ (ཀ.)] ཀཱརཡིཏྭཱ, སུཝཎྞེནཱབྷིལེཔཡིཾ.

༣༢.

‘‘རཏནཱམཡཚཏྟཉྩ, པགྒཡ྄ཧ ཝཱལ༹བཱིཛནིཾ [ཝཱལ༹བཱིཛནཱི (སཱི. སྱཱ.)];

བུདྡྷསྶ ཨབྷིརོཔེསིཾ, ལོཀབནྡྷུསྶ ཏཱདིནོ.

༣༣.

‘‘ཡཱཝཏཱ ¶ དེཝཏཱ བྷུམྨཱ [བྷཱུམཱ (ཀ.)], སབྦེ སནྣིཔཏུཾ ཏདཱ;

རཏནཱམཡཚཏྟཱནཾ, ཝིཔཱཀཾ ཀཐཡིསྶཏི.

༣༤.

‘‘ཏཉྩ སབྦཾ སུཎིསྶཱམ, ཀཐཡནྟསྶ སཏྠུནོ;

བྷིཡྻོ ཧཱསཾ ཛནེཡྻཱམ, སམྨཱསམྦུདྡྷསཱསནེ.

༣༥.

‘‘ཧེམཱསནེ ནིསཱིདིཏྭཱ, སཡམྦྷཱུ ཨགྒཔུགྒལོ;

བྷིཀྑུསངྒྷཔརིབྱཱུལ༹ྷོ [པརིབྦཱུལ༹ྷོ (སཱི.)], ཨིམཱ གཱཐཱ ཨབྷཱསཐ.

༣༦.

‘‘‘ཡེནིདཾ ¶ ཨཱསནཾ དིནྣཾ, སོཝཎྞཾ རཏནཱམཡཾ;

ཏམཧཾ ཀིཏྟཡིསྶཱམི, སུཎཱཐ མམ བྷཱསཏོ.

༣༧.

‘‘‘ཏིཾསཀཔྤཱནི ¶ དེཝིནྡོ, དེཝརཛྫཾ ཀརིསྶཏི;

སམནྟཱ ཡོཛནསཏཾ, ཨཱབྷཱཡཱབྷིབྷཝིསྶཏི.

༣༨.

‘‘‘མནུསྶལོཀམཱགནྟྭཱ, ཙཀྐཝཏྟཱི བྷཝིསྶཏི;

པབྷསྶརོཏི ནཱམེན, ཨུགྒཏེཛོ བྷཝིསྶཏི.

༣༩.

‘‘‘དིཝཱ ཝཱ ཡདི ཝཱ རཏྟིཾ, སཏརཾསཱིཝ ཨུགྒཏོ;

སམནྟཱ ཨཊྛརཏནཾ, ཨུཛྫོཏིསྶཏི ཁཏྟིཡོ.

༤༠.

‘‘‘ཀཔྤསཏསཧསྶམྷི, ཨོཀྐཱཀཀུལསམྦྷཝོ;

གོཏམོ ནཱམ གོཏྟེན, སཏྠཱ ལོཀེ བྷཝིསྶཏི.

༤༡.

‘‘‘ཏུསིཏཱ ¶ ཧི ཙཝིཏྭཱན, སུཀྐམཱུལེན ཙོདིཏོ;

ཀཙྩཱནོ ནཱམ ནཱམེན, བྲཧྨབནྡྷུ བྷཝིསྶཏི.

༤༢.

‘‘‘སོ པཙྪཱ པབྦཛིཏྭཱན, ཨརཧཱ ཧེསྶཏིནཱསཝོ;

གོཏམོ ལོཀཔཛྫོཏོ, ཨགྒཊྛཱནེ ཋཔེསྶཏི.

༤༣.

‘‘‘སཾཁིཏྟཔུཙྪིཏཾ [སཾཁིཏྟཾ པུཙྪིཏཾ (སྱཱ. ཀ.)] པཉྷཾ, ཝིཏྠཱརེན ཀཐེསྶཏི;

ཀཐཡནྟོ ཙ ཏཾ པཉྷཾ, ཨཛ྄ཛྷཱསཡཾ [ཨཛ྄ཛྷཱསཾ (སཱི.), ཨབྦྷཱསཾ (ཀ.)] པཱུརཡིསྶཏི’.

༤༤.

‘‘ཨཌྜྷེ ཀུལེ ཨབྷིཛཱཏོ, བྲཱཧྨཎོ མནྟཔཱརགཱུ;

ཨོཧཱཡ དྷནདྷཉྙཱནི, པབྦཛིཾ ཨནགཱརིཡཾ.

༤༥.

‘‘སཾཁིཏྟེནཔི པུཙྪནྟེ, ཝིཏྠཱརེན ཀཐེམཧཾ;

ཨཛ྄ཛྷཱསཡཾ ཏེསཾ པཱུརེམི, ཏོསེམི དྭིཔདུཏྟམཾ.

༤༦.

‘‘ཏོསིཏོ ¶ མེ མཧཱཝཱིརོ, སཡམྦྷཱུ ཨགྒཔུགྒལོ;

བྷིཀྑུསངྒྷེ ནིསཱིདིཏྭཱ, ཨེཏདགྒེ ཋཔེསི མཾ.

༤༧.

‘‘པཊིསམྦྷིདཱ ¶ ཙཏསྶོ…པེ… ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ མཧཱཀཙྩཱནོ ཐེརོ ཨིམཱ གཱཐཱཡོ ཨབྷཱསིཏྠཱཏི.

མཧཱཀཙྩཱནཏྠེརསྶཱཔདཱནཾ ཏཏིཡཾ.

༤. ཀཱལུ༹དཱཡིཏྠེརཨཔདཱནཾ

༤༨.

‘‘པདུམུཏྟརབུདྡྷསྶ ¶ , ལོཀཛེཊྛསྶ ཏཱདིནོ;

ཨདྡྷཱནཾ པཊིཔནྣསྶ, ཙརཏོ ཙཱརིཀཾ ཏདཱ.

༤༩.

‘‘སུཕུལླཾ པདུམཾ གཡ྄ཧ, ཨུཔྤལཾ མལླིཀཉྩཧཾ;

པརམནྣཾ གཧེཏྭཱན, ཨདཱསིཾ སཏྠུནོ ཨཧཾ.

༥༠.

‘‘པརིབྷུཉྫི མཧཱཝཱིརོ, པརམནྣཾ སུབྷོཛནཾ;

ཏཉྩ པུཔྥཾ གཧེཏྭཱན, ཛནསྶ སམྤདསྶཡི.

༥༡.

‘‘ཨིཊྛཾ ཀནྟཾ [ཀནྟཡིདཾ (སྱཱ.)], པིཡཾ ལོཀེ, ཛལཛཾ པུཔྥམུཏྟམཾ;

སུདུཀྐརཾ ཀཏཾ ཏེན, ཡོ མེ པུཔྥཾ ཨདཱསིདཾ.

༥༢.

‘‘ཡོ ¶ པུཔྥམབྷིརོཔེསི, པརམནྣཉྩདཱསི མེ;

ཏམཧཾ ཀིཏྟཡིསྶཱམི, སུཎཱཐ མམ བྷཱསཏོ.

༥༣.

‘‘‘དས ཨཊྛ ཙཀྑཏྟུཾ [དས ཙཊྛཀྑཏྟུཾ (སཱི.), དསམཊྛཀྑཏྟུཾ (སྱཱ.)] སོ, དེཝརཛྫཾ ཀརིསྶཏི;

ཨུཔྤལཾ པདུམཉྩཱཔི, མལླིཀཉྩ ཏདུཏྟརི.

༥༤.

‘‘‘ཨསྶ ¶ པུཉྙཝིཔཱཀེན, དིབྦགནྡྷསམཱཡུཏཾ;

ཨཱཀཱསེ ཚདནཾ ཀཏྭཱ, དྷཱརཡིསྶཏི ཏཱཝདེ.

༥༥.

‘‘‘པཉྩཝཱིསཏིཀྑཏྟུཉྩ, ཙཀྐཝཏྟཱི བྷཝིསྶཏི;

པཐབྱཱ རཛྫཾ པཉྩསཏཾ, ཝསུདྷཾ ཨཱཝསིསྶཏི.

༥༦.

‘‘‘ཀཔྤསཏསཧསྶམྷི, ཨོཀྐཱཀཀུལསམྦྷཝོ;

གོཏམོ ནཱམ གོཏྟེན [ནཱམེན (སཱི. སྱཱ. ཀ.)], སཏྠཱ ལོཀེ བྷཝིསྶཏི.

༥༧.

‘‘‘སཀཀམྨཱབྷིརདྡྷོ ¶ སོ, སུཀྐམཱུལེན ཙོདིཏོ;

སཀྱཱནཾ ནནྡིཛནནོ, ཉཱཏིབནྡྷུ བྷཝིསྶཏི.

༥༨.

‘‘‘སོ པཙྪཱ པབྦཛིཏྭཱན, སུཀྐམཱུལེན ཙོདིཏོ;

སབྦཱསཝེ པརིཉྙཱཡ, ནིབྦཱཡིསྶཏིནཱསཝོ.

༥༩.

‘‘‘པཊིསམྦྷིདམནུཔྤཏྟཾ, ཀཏཀིཙྩམནཱསཝཾ;

གོཏམོ ལོཀབནྡྷུ ཏཾ [སོ (སཱི.)], ཨེཏདགྒེ ཋཔེསྶཏི.

༦༠.

‘‘‘པདྷཱནཔཧིཏཏྟོ སོ, ཨུཔསནྟོ ནིརཱུཔདྷི;

ཨུདཱཡཱི ནཱམ ནཱམེན, ཧེསྶཏི སཏྠུ སཱཝཀོ’.

༦༡.

‘‘རཱགོ ¶ དོསོ ཙ མོཧོ ཙ, མཱནོ མཀྑོ ཙ དྷཾསིཏོ;

སབྦཱསཝེ པརིཉྙཱཡ, ཝིཧརཱམི ཨནཱསཝོ.

༦༢.

‘‘ཏོསཡིཉྩཱཔི སམྦུདྡྷཾ, ཨཱཏཱཔཱི ནིཔཀོ ཨཧཾ;

པསཱདིཏོ [པམོདིཏོ (སཱི.)] ཙ སམྦུདྡྷོ, ཨེཏདགྒེ ཋཔེསི མཾ.

༦༣.

‘‘པཊིསམྦྷིདཱ ཙཏསྶོ…པེ… ཀཏཾ བུདྡྷསྶ སཱསནཾ’’.

ཨིཏྠཾ ¶ སུདཾ ཨཱཡསྨཱ ཀཱལུ༹དཱཡཱི ཐེརོ ཨིམཱ གཱཐཱཡོ ཨབྷཱསིཏྠཱཏི;

ཀཱལུ༹དཱཡཱིཐེརསྶཱཔདཱནཾ ཙཏུཏྠཾ.

༥. མོགྷརཱཛཏྠེརཨཔདཱནཾ

༦༤.

‘‘ཨཏྠདསྶཱི ¶ ཏུ བྷགཝཱ, སཡམྦྷཱུ ཨཔརཱཛིཏོ;

བྷིཀྑུསངྒྷཔརིབྱཱུལ༹ྷོ, རཐིཡཾ པཊིཔཛྫཐ.

༦༥.

‘‘སིསྶེཧི སམྤརིཝུཏོ, གྷརམྷཱ ཨབྷིནིཀྑམིཾ;

ནིཀྑམིཏྭཱནཧཾ ཏཏྠ, ཨདྡསཾ ལོཀནཱཡཀཾ.

༦༦.

‘‘ཨབྷིཝཱདིཡ སམྦུདྡྷཾ, སིརེ ཀཏྭཱན ཨཉྫལིཾ;

སཀཾ ཙིཏྟཾ པསཱདེཏྭཱ, སནྠཝིཾ ལོཀནཱཡཀཾ.

༦༧.

‘‘ཡཱཝཏཱ རཱུཔིནོ སཏྟཱ, ཨརཱུཔཱི ཝཱ ཨསཉྙིནོ;

སབྦེ ཏེ ཏཝ ཉཱཎམྷི, ཨནྟོ ཧོནྟི སམོགདྷཱ.

༦༨.

‘‘སུཁུམཙྪིཀཛཱལེན ¶ , ཨུདཀཾ ཡོ པརིཀྑིཔེ;

ཡེ ཀེཙི ཨུདཀེ པཱཎཱ, ཨནྟོཛཱལེ བྷཝནྟི ཏེ.

༦༩.

‘‘ཡེསཉྩ ཙེཏནཱ ཨཏྠི, རཱུཔིནོ ཙ ཨརཱུཔིནོ;

སབྦེ ཏེ ཏཝ ཉཱཎམྷི, ཨནྟོ ཧོནྟི སམོགདྷཱ.

༧༠.

‘‘སམུདྡྷརསིམཾ ལོཀཾ, ཨནྡྷཀཱརསམཱཀུལཾ;

ཏཝ དྷམྨཾ སུཎིཏྭཱན, ཀངྑཱསོཏཾ ཏརནྟི ཏེ.

༧༡.

‘‘ཨཝིཛྫཱནིཝུཏེ ལོཀེ, ཨནྡྷཀཱརེན ཨོཏྠཊེ;

ཏཝ ¶ ཉཱཎམྷི ཛོཏནྟེ, ཨནྡྷཀཱརཱ པདྷཾསིཏཱ.

༧༢.

‘‘ཏུཝཾ ཙཀྑཱུསི སབྦེསཾ, མཧཱཏམཔནཱུདནོ;

ཏཝ དྷམྨཾ སུཎིཏྭཱན, ནིབྦཱཡཏི བཧུཛྫནོ.

༧༣.

‘‘པུཊཀཾ ¶ པཱུརཡིཏྭཱན [པཱིཋརཾ (སཱི.), པུཏརཾ (སྱཱ.)], མདྷུཁུདྡམནེལ༹ཀཾ;

ཨུབྷོ ཧཏྠེཧི པགྒཡ྄ཧ, ཨུཔནེསིཾ མཧེསིནོ.

༧༤.

‘‘པཊིགྒཎྷི མཧཱཝཱིརོ, སཧཏྠེན མཧཱ ཨིསཱི;

བྷུཉྫིཏྭཱ ཏཉྩ སབྦཉྙཱུ, ཝེཧཱསཾ ནབྷམུགྒམི.

༧༥.

‘‘ཨནྟལིཀྑེ ཋིཏོ སཏྠཱ, ཨཏྠདསྶཱི ནརཱསབྷོ;

མམ ཙིཏྟཾ པསཱདེནྟོ, ཨིམཱ གཱཐཱ ཨབྷཱསཐ.

༧༦.

‘‘‘ཡེནིདཾ ཐཝིཏཾ ཉཱཎཾ, བུདྡྷསེཊྛོ ཙ ཐོམིཏོ;

ཏེན ཙིཏྟཔྤསཱདེན, དུགྒཏིཾ སོ ན གཙྪཏི.

༧༧.

‘‘‘ཙཏུདྡསཉྩཀྑཏྟུཾ [ཙཏུསཊྛིཉྩ (སྱཱ.)] སོ, དེཝརཛྫཾ ཀརིསྶཏི;

པཐབྱཱ རཛྫཾ ཨཊྛསཏཾ, ཝསུདྷཾ ཨཱཝསིསྶཏི.

༧༨.

‘‘‘པཉྩེཝ ¶ སཏཀྑཏྟུཉྩ [ཨཐ པཉྩསཏཀྑཏྟུཾ (སཱི.)], ཙཀྐཝཏྟཱི བྷཝིསྶཏི;

པདེསརཛྫཾ ཨསངྑེཡྻཾ, མཧིཡཱ ཀཱརཡིསྶཏི.

༧༩.

‘‘‘ཨཛ྄ཛྷཱཡཀོ མནྟདྷརོ, ཏིཎྞཾ ཝེདཱན པཱརགཱུ;

གོཏམསྶ བྷགཝཏོ, སཱསནེ པབྦཛིསྶཏི.

༨༠.

‘‘‘གམྦྷཱིརཾ ནིཔུཎཾ ཨཏྠཾ, ཉཱཎེན ཝིཙིནིསྶཏི;

མོགྷརཱཛཱཏི ནཱམེན, ཧེསྶཏི སཏྠུ སཱཝཀོ.

༨༡.

‘‘‘ཏཱིཧི ¶ ཝིཛྫཱཧི སམྤནྣཾ, ཀཏཀིཙྩམནཱསཝཾ;

གོཏམོ ¶ སཏྠཝཱཧགྒོ, ཨེཏདགྒེ ཋཔེསྶཏི’.

༨༢.

‘‘ཧིཏྭཱ མཱནུསཀཾ ཡོགཾ, ཚེཏྭཱན བྷཝབནྡྷནཾ;

སབྦཱསཝེ པརིཉྙཱཡ, ཝིཧརཱམི ཨནཱསཝོ.

༨༣.

‘‘པཊིསམྦྷིདཱ ཙཏསྶོ…པེ… ཀཏཾ བུདྡྷསྶ སཱསནཾ’’.

ཨིཏྠཾ ¶ སུདཾ ཨཱཡསྨཱ མོགྷརཱཛོ ཐེརོ ཨིམཱ གཱཐཱཡོ ཨབྷཱསིཏྠཱཏི;

མོགྷརཱཛཏྠེརསྶཱཔདཱནཾ པཉྩམཾ.

༦. ཨདྷིམུཏྟཏྠེརཨཔདཱནཾ

༨༤.

‘‘ནིབྦུཏེ ལོཀནཱཐམྷི, ཨཏྠདསྶཱིནརུཏྟམེ;

ཨུཔཊྛཧིཾ བྷིཀྑུསངྒྷཾ, ཝིཔྤསནྣེན ཙེཏསཱ.

༨༥.

‘‘ནིམནྟེཏྭཱ ¶ བྷིཀྑུསངྒྷཾ [སཾགྷརཏནཾ (སཱི. སྱཱ.)], ཨུཛུབྷཱུཏཾ སམཱཧིཏཾ;

ཨུཙྪུནཱ མཎྜཔཾ ཀཏྭཱ, བྷོཛེསིཾ སངྒྷམུཏྟམཾ.

༨༦.

‘‘ཡཾ ཡཾ ཡོནུཔཔཛྫཱམི, དེཝཏྟཾ ཨཐ མཱནུསཾ;

སབྦེ སཏྟེ ཨབྷིབྷོམི [ཨཏིབྷོམི (སཱི. ཀ.)], པུཉྙཀམྨསྶིདཾ ཕལཾ.

༨༧.

‘‘ཨཊྛཱརསེ ཀཔྤསཏེ, ཡཾ དཱནམདདིཾ ཏདཱ;

དུགྒཏིཾ ནཱབྷིཛཱནཱམི, ཨུཙྪུདཱནསྶིདཾ ཕལཾ.

༨༨.

‘‘པཊིསམྦྷིདཱ ཙཏསྶོ…པེ… ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཨདྷིམུཏྟོ ཐེརོ ཨིམཱ གཱཐཱཡོ ཨབྷཱསིཏྠཱཏི;

ཨདྷིམུཏྟཏྠེརསྶཱཔདཱནཾ ཚཊྛཾ.

༧. ལསུཎདཱཡཀཏྠེརཨཔདཱནཾ

༨༩.

‘‘ཧིམཝནྟསྶཱཝིདཱུརེ ¶ , ཏཱཔསོ ཨཱསཧཾ ཏདཱ;

ལསུཎཾ ཨུཔཛཱིཝཱམི, ལསུཎཾ མཡ྄ཧབྷོཛནཾ.

༩༠.

‘‘ཁཱརིཡོ ¶ པཱུརཡིཏྭཱན, སངྒྷཱརཱམམགཙྪཧཾ;

ཧཊྛོ ཧཊྛེན ཙིཏྟེན, སངྒྷསྶ ལསུཎཾ ཨདཾ.

༩༡.

‘‘ཝིཔསྶིསྶ ནརགྒསྶ, སཱསནེ ནིརཏསྶཧཾ;

སངྒྷསྶ ལསུཎཾ དཏྭཱ, ཀཔྤཾ སགྒམྷི མོདཧཾ.

༩༢.

‘‘ཨེཀནཝུཏིཏོ ཀཔྤེ, ལསུཎཾ ཡམདཾ ཏདཱ;

དུགྒཏིཾ ནཱབྷིཛཱནཱམི, ལསུཎསྶ ཨིདཾ ཕལཾ.

༩༣.

‘‘པཊིསམྦྷིདཱ ཙཏསྶོ…པེ… ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ལསུཎདཱཡཀོ ཐེརོ ཨིམཱ གཱཐཱཡོ ཨབྷཱསིཏྠཱཏི;

ལསུཎདཱཡཀཏྠེརསྶཱཔདཱནཾ སཏྟམཾ.

༨. ཨཱཡཱགདཱཡཀཏྠེརཨཔདཱནཾ

༩༤.

‘‘ནིབྦུཏེ ¶ ལོཀནཱཐམྷི, སིཁིམྷི ཝདཏཾ ཝརེ;

ཧཊྛོ ཧཊྛེན ཙིཏྟེན, ཨཝནྡིཾ ཐཱུཔམུཏྟམཾ.

༩༥.

‘‘ཝཌྜྷཀཱིཧི ¶ ཀཐཱཔེཏྭཱ, མཱུལཾ དཏྭཱནཧཾ ཏདཱ;

ཧཊྛོ ཧཊྛེན ཙིཏྟེན, ཨཱཡཱགཾ ཀཱརཔེསཧཾ.

༩༦.

‘‘ཨཊྛ ཀཔྤཱནི དེཝེསུ, ཨབྦོཀིཎྞཾ [ཨབྦོཙྪིནྣཾ (སཱི.)] ཝསིཾ ཨཧཾ;

ཨཝསེསེསུ ཀཔྤེསུ, ཝོཀིཎྞཾ སཾསརིཾ ཨཧཾ.

༩༧.

‘‘ཀཱཡེ ཝིསཾ ན ཀམཏི, སཏྠཱནི ན ཙ ཧནྟི མེ;

ཨུདཀེཧཾ ན མིཡྻཱམི, ཨཱཡཱགསྶ ཨིདཾ ཕལཾ.

༩༨.

‘‘ཡདིཙྪཱམི ཨཧཾ ཝསྶཾ, མཧཱམེགྷོ པཝསྶཏི;

དེཝཱཔི མེ ཝསཾ ཨེནྟི, པུཉྙཀམྨསྶིདཾ ཕལཾ.

༩༩.

‘‘སཏྟརཏནསམྤནྣོ, ཏིསཀྑཏྟུཾ ཨཧོསཧཾ;

ན མཾ ཀེཙཱཝཛཱནནྟི, པུཉྙཀམྨསྶིདཾ ཕལཾ.

༡༠༠.

‘‘ཨེཀཏྟིཾསེ ¶ ཨིཏོ ཀཔྤེ, ཨཱཡཱགཾ ཡམཀཱརཡིཾ;

དུགྒཏིཾ ནཱབྷིཛཱནཱམི, ཨཱཡཱགསྶ ཨིདཾ ཕལཾ.

༡༠༡.

‘‘པཊིསམྦྷིདཱ ¶ ཙཏསྶོ…པེ… ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཨཱཡཱགདཱཡཀོ ཐེརོ ཨིམཱ གཱཐཱཡོ ཨབྷཱསིཏྠཱཏི.

ཨཱཡཱགདཱཡཀཏྠེརསྶཱཔདཱནཾ ཨཊྛམཾ.

༩. དྷམྨཙཀྐིཀཏྠེརཨཔདཱནཾ

༡༠༢.

‘‘སིདྡྷཏྠསྶ ¶ བྷགཝཏོ, སཱིཧཱསནསྶ སམྨུཁཱ;

དྷམྨཙཀྐཾ མེ ཋཔིཏཾ, སུཀཏཾ ཝིཉྙུཝཎྞིཏཾ.

༡༠༣.

‘‘ཙཱརུཝཎྞོཝ སོབྷཱམི, སཡོགྒབལཝཱཧནོ;

པརིཝཱརེནྟི མཾ ནིཙྩཾ, ཨནུཡནྟཱ བཧུཛྫནཱ.

༡༠༤.

‘‘སཊྛིཏཱུརིཡསཧསྶེཧི, པརིཙཱརེམཧཾ སདཱ;

པརིཝཱརེན སོབྷཱམི, པུཉྙཀམྨསྶིདཾ ཕལཾ.

༡༠༥.

‘‘ཙཏུནྣཝུཏིཏོ ཀཔྤེ, ཡཾ ཙཀྐཾ ཋཔཡིཾ ཨཧཾ;

དུགྒཏིཾ ནཱབྷིཛཱནཱམི, དྷམྨཙཀྐསྶིདཾ ཕལཾ.

༡༠༦.

‘‘ཨིཏོ ཨེཀཱདསེ ཀཔྤེ, ཨཊྛཱསིཾསུ ཛནཱདྷིཔཱ;

སཧསྶརཱཛནཱམེན, ཙཀྐཝཏྟཱི མཧབྦལཱ.

༡༠༧.

‘‘པཊིསམྦྷིདཱ ¶ ཙཏསྶོ…པེ… ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ དྷམྨཙཀྐིཀོ ཐེརོ ཨིམཱ གཱཐཱཡོ ཨབྷཱསིཏྠཱཏི.

དྷམྨཙཀྐིཀཏྠེརསྶཱཔདཱནཾ ནཝམཾ.

༡༠. ཀཔྤརུཀྑིཡཏྠེརཨཔདཱནཾ

༡༠༨.

‘‘སིདྡྷཏྠསྶ བྷགཝཏོ, ཐཱུཔསེཊྛསྶ སམྨུཁཱ;

ཝིཙིཏྟདུསྶེ ལགེཏྭཱ [ལགྒེཏྭཱ (སཱི. སྱཱ.)], ཀཔྤརུཀྑཾ ཋཔེསཧཾ.

༡༠༩.

‘‘ཡཾ ¶ ¶ ཡཾ ཡོནུཔཔཛྫཱམི, དེཝཏྟཾ ཨཐ མཱནུསཾ;

སོབྷཡནྟོ མམ དྭཱརཾ, ཀཔྤརུཀྑོ པཏིཊྛཏི.

༡༡༠.

‘‘ཨཧཉྩ ¶ པརིསཱ ཙེཝ, ཡེ ཀེཙི མམ ཝསྶིཏཱ [ནིསྶིཏཱ (སཱི.)];

ཏམྷཱ དུསྶཾ གཧེཏྭཱན, ནིཝཱསེམ མཡཾ སདཱ [ཏདཱ (སྱཱ.)].

༡༡༡.

‘‘ཙཏུནྣཝུཏིཏོ ཀཔྤེ, ཡཾ རུཀྑཾ ཋཔཡིཾ ཨཧཾ;

དུགྒཏིཾ ནཱབྷིཛཱནཱམི, ཀཔྤརུཀྑསྶིདཾ ཕལཾ.

༡༡༢.

‘‘ཨིཏོ ཙ སཏྟམེ ཀཔྤེ, སུཙེལཱ༹ ཨཊྛ ཁཏྟིཡཱ;

སཏྟརཏནསམྤནྣཱ, ཙཀྐཝཏྟཱི མཧབྦལཱ.

༡༡༣.

‘‘པཊིསམྦྷིདཱ ཙཏསྶོ…པེ… ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཀཔྤརུཀྑིཡོ ཐེརོ ཨིམཱ གཱཐཱཡོ ཨབྷཱསིཏྠཱཏི.

ཀཔྤརུཀྑིཡཏྠེརསྶཱཔདཱནཾ དསམཾ.

ཀུཎྜདྷཱནཝགྒོ ཙཏུཏྠོ.

ཏསྶུདྡཱནཾ –

ཀུཎྜསཱགཏཀཙྩཱནཱ, ཨུདཱཡཱི མོགྷརཱཛཀོ;

ཨདྷིམུཏྟོ ལསུཎདོ, ཨཱཡཱགཱི དྷམྨཙཀྐིཀོ;

ཀཔྤརུཀྑཱི ཙ དསམོ, གཱཐཱ དྭཡདསསཏཾ [གཱཐཱཡོ དྭཱདསསཏཾ (སཱི.)].

༥. ཨུཔཱལིཝགྒོ

༡. བྷཱགིནེཡྻུཔཱལིཏྠེརཨཔདཱནཾ

༡.

‘‘ཁཱིཎཱསཝསཧསྶེཧི ¶ ¶ , པརིཝུཏོ [པརེཏོ (ཀ. ཨཊྛ)] ལོཀནཱཡཀོ;

ཝིཝེཀམནུཡུཏྟོ སོ, གཙྪཏེ པཊིསལླིཏུཾ.

༢.

‘‘ཨཛིནེན ནིཝཏྠོཧཾ, ཏིདཎྜཔརིདྷཱརཀོ;

བྷིཀྑུསངྒྷཔརིབྱཱུལ༹ྷཾ, ཨདྡསཾ ལོཀནཱཡཀཾ.

༣.

‘‘ཨེཀཾསཾ ¶ ཨཛིནཾ ཀཏྭཱ, སིརེ ཀཏྭཱན ཨཉྫལིཾ;

སམྦུདྡྷཾ ཨབྷིཝཱདེཏྭཱ, སནྠཝིཾ ལོཀནཱཡཀཾ.

༤.

‘‘ཡཐཱཎྜཛཱ ཙ སཾསེདཱ, ཨོཔཔཱཏཱི ཛལཱབུཛཱ;

ཀཱཀཱདིཔཀྑིནོ སབྦེ, ཨནྟལིཀྑཙརཱ སདཱ.

༥.

‘‘ཡེ ཀེཙི པཱཎབྷཱུཏཏྠི, སཉྙིནོ ཝཱ ཨསཉྙིནོ;

སབྦེ ཏེ ཏཝ ཉཱཎམྷི, ཨནྟོ ཧོནྟི སམོགདྷཱ.

༦.

‘‘གནྡྷཱ ཙ པབྦཏེཡྻཱ ཡེ, ཧིམཝནྟནགུཏྟམེ;

སབྦེ ཏེ ཏཝ སཱིལམྷི, ཀལཱཡཔི ན ཡུཛྫརེ.

༧.

‘‘མོཧནྡྷཀཱརཔཀྑནྡོ, ཨཡཾ ལོཀོ སདེཝཀོ;

ཏཝ ཉཱཎམྷི ཛོཏནྟེ, ཨནྡྷཀཱརཱ ཝིདྷཾསིཏཱ.

༨.

‘‘ཡཐཱ ཨཏྠངྒཏེ སཱུརིཡེ, ཧོནྟི སཏྟཱ ཏམོགཏཱ;

ཨེཝཾ བུདྡྷེ ཨནུཔྤནྣེ, ཧོཏི ལོཀོ ཏམོགཏོ.

༩.

‘‘ཡཐོདཡནྟོ ཨཱདིཙྩོ, ཝིནོདེཏི ཏམཾ སདཱ;

ཏཐེཝ ཏྭཾ བུདྡྷསེཊྛ, ཝིདྡྷཾསེསི ཏམཾ སདཱ.

༡༠.

‘‘པདྷཱནཔཧིཏཏྟོསི ¶ , བུདྡྷོ ལོཀེ སདེཝཀེ;

ཏཝ ཀམྨཱབྷིརདྡྷེན, ཏོསེསི ཛནཏཾ བཧུཾ.

༡༡.

‘‘ཏཾ སབྦཾ ཨནུམོདིཏྭཱ, པདུམུཏྟརོ མཧཱམུནི;

ནབྷཾ ཨབྦྷུགྒམཱི དྷཱིརོ, ཧཾསརཱཛཱཝ ཨམྦརེ.

༡༢.

‘‘ཨབྦྷུགྒནྟྭཱན ¶ སམྦུདྡྷོ, མཧེསི པདུམུཏྟརོ;

ཨནྟལིཀྑེ ཋིཏོ སཏྠཱ, ཨིམཱ གཱཐཱ ཨབྷཱསཐ.

༡༣.

‘‘ཡེནིདཾ ¶ ཐཝིཏཾ ཉཱཎཾ, ཨོཔམྨེཧི སམཱཡུཏཾ;

ཏམཧཾ ཀིཏྟཡིསྶཱམི, སུཎཱཐ མམ བྷཱསཏོ.

༡༤.

‘‘‘ཨཊྛཱརསཉྩ ཁཏྟུཾ སོ, དེཝརཱཛཱ བྷཝིསྶཏི;

པཐབྱཱ རཛྫཾ ཏིསཏཾ, ཝསུདྷཾ ཨཱཝསིསྶཏི.

༡༥.

‘‘‘པཉྩཝཱིསཏིཀྑཏྟུཉྩ, ཙཀྐཝཏྟཱི བྷཝིསྶཏི;

པདེསརཛྫཾ ཝིཔུལཾ, གཎནཱཏོ ཨསངྑིཡཾ.

༡༦.

‘‘‘ཀཔྤསཏསཧསྶམྷི, ཨོཀྐཱཀཀུལསམྦྷཝོ;

གོཏམོ ནཱམ གོཏྟེན, སཏྠཱ ལོཀེ བྷཝིསྶཏི.

༡༧.

‘‘‘ཏུསིཏཱ ཧི ཙཝིཏྭཱན, སུཀྐམཱུལེན ཙོདིཏོ;

ཧཱིནོཝ ཛཱཏིཡཱ སནྟོ, ཨུཔཱལི ནཱམ ཧེསྶཏི.

༡༨.

‘‘‘སོ ¶ པཙྪཱ པབྦཛིཏྭཱན, ཝིརཱཛེཏྭཱན པཱཔཀཾ;

སབྦཱསཝེ པརིཉྙཱཡ, ནིབྦཱཡིསྶཏིནཱསཝོ.

༡༩.

‘‘‘ཏུཊྛོ ཙ གོཏམོ བུདྡྷོ, སཀྱཔུཏྟོ མཧཱཡསོ;

ཝིནཡཱདྷིགཏཾ ཏསྶ, ཨེཏདགྒེ ཋཔེསྶཏི’.

༢༠.

‘‘སདྡྷཱཡཱཧཾ ¶ པབྦཛིཏོ, ཀཏཀིཙྩོ ཨནཱསཝོ;

སབྦཱསཝེ པརིཉྙཱཡ, ཝིཧརཱམི ཨནཱསཝོ.

༢༡.

‘‘བྷགཝཱ ཙཱནུཀམྤཱི མཾ, ཝིནཡེཧཾ ཝིསཱརདོ;

སཀཀམྨཱབྷིརདྡྷོ ཙ, ཝིཧརཱམི ཨནཱསཝོ.

༢༢.

‘‘སཾཝུཏོ པཱཏིམོཀྑམྷི, ཨིནྡྲིཡེསུ ཙ པཉྩསུ;

དྷཱརེམི ཝིནཡཾ སབྦཾ, ཀེཝལཾ རཏནཱཀརཾ [རཏནགྒྷརཾ (ཀ.)].

༢༣.

‘‘མམཉྩ གུཎམཉྙཱཡ, སཏྠཱ ལོཀེ ཨནུཏྟརོ;

བྷིཀྑུསངྒྷེ ནིསཱིདིཏྭཱ, ཨེཏདགྒེ ཋཔེསི མཾ.

༢༤.

‘‘པཊིསམྦྷིདཱ ཙཏསྶོ, ཝིམོཀྑཱཔི ཙ ཨཊྛིམེ;

ཚལ༹བྷིཉྙཱ སཙྪིཀཏཱ, ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ ཨུཔཱལིཐེརོ ཨིམཱ གཱཐཱཡོ ཨབྷཱསིཏྠཱཏི.

བྷཱགིནེཡྻུཔཱལིཏྠེརསྶཱཔདཱནཾ པཋམཾ.

༢. སོཎཀོལི༹ཝིསཏྠེརཨཔདཱནཾ

༢༥.

‘‘ཨནོམདསྶིསྶ ¶ ¶ མུནིནོ, ལོཀཛེཊྛསྶ ཏཱདིནོ;

སུདྷཱཡ ལེཔནཾ ཀཏྭཱ, ཙངྐམཾ ཀཱརཡིཾ ཨཧཾ.

༢༦.

‘‘ནཱནཱཝཎེཧི པུཔྥེཧི, ཙངྐམཾ སནྠརིཾ ཨཧཾ;

ཨཱཀཱསེ ཝིཏཱནཾ ཀཏྭཱ, བྷོཛཡིཾ བུདྡྷམུཏྟམཾ.

༢༧.

‘‘ཨཉྫལིཾ ¶ པགྒཧེཏྭཱན, ཨབྷིཝཱདེཏྭཱན སུབྦཏཾ [པུཔྥཀཾ (ཀ.)];

དཱིགྷསཱལཾ བྷགཝཏོ, ནིཡྻཱདེསིམཧཾ ཏདཱ.

༢༨.

‘‘མམ སངྐཔྤམཉྙཱཡ, སཏྠཱ ལོཀེ ཨནུཏྟརོ;

པཊིགྒཧེསི བྷགཝཱ, ཨནུཀམྤཱཡ ཙཀྑུམཱ.

༢༩.

‘‘པཊིགྒཧེཏྭཱན སམྦུདྡྷོ, དཀྑིཎེཡྻོ སདེཝཀེ;

བྷིཀྑུསངྒྷེ ནིསཱིདིཏྭཱ, ཨིམཱ གཱཐཱ ཨབྷཱསཐ.

༣༠.

‘‘‘ཡོ སོ ཧཊྛེན ཙིཏྟེན, དཱིགྷསཱལཾ ཨདཱསི [ཨཀཱསི (སཱི.)] མེ;

ཏམཧཾ ཀིཏྟཡིསྶཱམི, སུཎཱཐ མམ བྷཱསཏོ.

༣༡.

‘‘‘ཨིམསྶ ¶ མཙྩུཀཱལམྷི, པུཉྙཀམྨསམངྒིནོ;

སཧསྶཡུཏྟསྶརཐོ, ཨུཔཊྛིསྶཏི ཏཱཝདེ.

༣༢.

‘‘‘ཏེན ཡཱནེནཡཾ པོསོ, དེཝལོཀཾ གམིསྶཏི;

ཨནུམོདིསྶརེ དེཝཱ, སམྤཏྟེ ཀུསལབྦྷཝེ [ཀུསལེ བྷཝེ (སཱི. སྱཱ.)].

༣༣.

‘‘‘མཧཱརཧཾ བྱམྷཾ སེཊྛཾ, རཏནམཏྟིཀལེཔནཾ;

ཀཱུཊཱགཱརཝརཱུཔེཏཾ, བྱམྷཾ ཨཛ྄ཛྷཱཝསིསྶཏི.

༣༤.

‘‘‘ཏིཾསཀཔྤསཧསྶཱནི, དེཝལོཀེ རམིསྶཏི;

པཉྩཝཱིསཏི ཀཔྤཱནི, དེཝརཱཛཱ བྷཝིསྶཏི.

༣༥.

‘‘‘སཏྟསཏྟཏིཀྑཏྟུཉྩ, ཙཀྐཝཏྟཱི བྷཝིསྶཏི;

ཡསོདྷརསནཱམཱ [ཡསེདྷརཱ སམཱནཱ (སཱི.)] ཏེ, སབྦེཔི ཨེཀནཱམཀཱ.

༣༦.

‘‘‘དྭེ སམྤཏྟཱི ཨནུབྷོཏྭཱ, ཝཌྜྷེཏྭཱ [ཙིནིཏྭཱ (སྱཱ.)] པུཉྙསཉྩཡཾ;

ཨཊྛཝཱིསཏིཀཔྤམྷི, ཙཀྐཝཏྟཱི བྷཝིསྶཏི.

༣༧.

‘‘‘ཏཏྲཱཔི ¶ ¶ བྱམྷཾ པཝརཾ, ཝིསྶཀམྨེན མཱཔིཏཾ;

དསསདྡཱཝིཝིཏྟཾ ཏཾ, པུརམཛ྄ཛྷཱཝསིསྶཏི.

༣༨.

‘‘‘ཨཔརིམེཡྻེ ¶ ཨིཏོ ཀཔྤེ, བྷཱུམིཔཱལོ མཧིདྡྷིཀོ;

ཨོཀྐཱཀོ ནཱམ ནཱམེན, རཱཛཱ རཊྛེ བྷཝིསྶཏི.

༣༩.

‘‘‘སོལ༹སིཏྠིསཧསྶཱནཾ, སབྦཱསཾ པཝརཱ ཙ སཱ [པཝརཱཝ ཡཱ (སྱཱ.), པཝརཱ པིཡཱ (?)];

ཨབྷིཛཱཏཱ ཁཏྟིཡཱནཱི, ནཝ པུཏྟེ ཛནེསྶཏི.

༤༠.

‘‘‘ནཝ པུཏྟེ ཛནེཏྭཱན, ཁཏྟིཡཱནཱི མརིསྶཏི;

ཏརུཎཱི ཙ པིཡཱ ཀཉྙཱ, མཧེསིཏྟཾ ཀརིསྶཏི.

༤༡.

‘‘‘ཨོཀྐཱཀཾ ཏོསཡིཏྭཱན, ཝརཾ ཀཉྙཱ ལབྷིསྶཏི;

ཝརཾ ལདྡྷཱན སཱ ཀཉྙཱ, པུཏྟེ པབྦཱཛཡིསྶཏི.

༤༢.

‘‘‘པབྦཱཛིཏཱ ཙ ཏེ སབྦེ, གམིསྶནྟི ནགུཏྟམཾ;

ཛཱཏིབྷེདབྷཡཱ སབྦེ, བྷགིནཱིཧི ཝསིསྶརེ [སཾཝསིསྶརེ (སཱི.)].

༤༣.

‘‘‘ཨེཀཱ ཙ ཀཉྙཱ བྱཱདྷཱིཧི, བྷཝིསྶཏི པརིཀྑཏཱ [པུརཀྑཏཱ (སྱཱ. ཀ.)];

མཱ ནོ ཛཱཏི པབྷིཛྫཱིཏི, ནིཁཎིསྶནྟི ཁཏྟིཡཱ.

༤༤.

‘‘‘ཁཏྟིཡོ ནཱིཧརིཏྭཱན, ཏཱཡ སདྡྷིཾ ཝསིསྶཏི;

བྷཝིསྶཏི ཏདཱ བྷེདོ, ཨོཀྐཱཀཀུལསམྦྷཝོ.

༤༥.

‘‘‘ཏེསཾ ¶ པཛཱ བྷཝིསྶནྟི, ཀོལི༹ཡཱ ནཱམ ཛཱཏིཡཱ;

ཏཏྠ མཱནུསཀཾ བྷོགཾ, ཨནུབྷོསྶཏིནཔྤཀཾ.

༤༦.

‘‘‘ཏམྷཱ ཀཱཡཱ ཙཝིཏྭཱན, དེཝལོཀཾ གམིསྶཏི;

ཏཏྲཱཔི པཝརཾ བྱམྷཾ, ལབྷིསྶཏི མནོརམཾ.

༤༧.

‘‘‘དེཝལོཀཱ ¶ ཙཝིཏྭཱན, སུཀྐམཱུལེན ཙོདིཏོ;

ཨཱགནྟྭཱན མནུསྶཏྟཾ, སོཎོ ནཱམ བྷཝིསྶཏི.

༤༨.

‘‘‘ཨཱརདྡྷཝཱིརིཡོ པཧིཏཏྟོ, པདཧཾ སཏྠུ སཱསནེ;

སབྦཱསཝེ པརིཉྙཱཡ, ནིབྦཱཡིསྶཏིནཱསཝོ.

༤༩.

‘‘‘ཨནནྟདསྶཱི བྷགཝཱ, གོཏམོ སཀྱཔུངྒཝོ;

ཝིསེསཉྙཱུ མཧཱཝཱིརོ, ཨགྒཊྛཱནེ ཋཔེསྶཏི’.

༥༠.

‘‘ཝུཊྛམྷི ¶ དེཝེ ཙཏུརངྒུལམྷི, ཏིཎེ ཨནིལེརིཏཨངྒཎམྷི;

ཋཏྭཱན ཡོགསྶ པཡུཏྟཏཱདིནོ, ཏཏོཏྟརིཾ པཱརམཏཱ ན ཝིཛྫཏི.

༥༡.

‘‘ཨུཏྟམེ དམཐེ དནྟོ, ཙིཏྟཾ མེ སུཔཎཱིཧིཏཾ;

བྷཱརོ མེ ཨོཧིཏོ སབྦོ, ནིབྦུཏོམྷི ཨནཱསཝོ.

༥༢.

‘‘ཨངྒཱིརསོ ¶ མཧཱནཱགོ, ཨབྷིཛཱཏོཝ ཀེསརཱི;

བྷིཀྑུསངྒྷེ ནིསཱིདིཏྭཱ, ཨེཏདགྒེ ཋཔེསི མཾ.

༥༣.

‘‘པཊིསམྦྷིདཱ ཙཏསྶོ…པེ… ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ སོཎོ ཀོལི༹ཝིསོ [ཀོལི༹ཡཝེསྶོ (སཱི. སྱཱ.), ཀོཊིཀཎྞོ (ཀ.)] ཐེརོ ཨིམཱ གཱཐཱཡོ ཨབྷཱསིཏྠཱཏི.

སོཎཀོལི༹ཝིསཏྠེརསྶཱཔདཱནཾ དུཏིཡཾ.

༣. ཀཱལི༹གོདྷཱཔུཏྟབྷདྡིཡཏྠེརཨཔདཱནཾ

༥༤.

‘‘པདུམུཏྟརསམྦུདྡྷཾ ¶ , མེཏྟཙིཏྟཾ མཧཱམུནིཾ;

ཨུཔེཏི ཛནཏཱ སབྦཱ, སབྦལོཀགྒནཱཡཀཾ.

༥༥.

‘‘སཏྟུཀཉྩ བདྡྷཀཉྩ [ཝཏྠཾ སེནཱསནཉྩེཝ (སཱི.), སཏྟུཀཉྩ པདཀཉྩ (སཱི. ཨཊྛ.), སཏྟུཀཉྩ པཝཱཀཉྩ (སྱཱ.)], ཨཱམིསཾ པཱནབྷོཛནཾ;

དདནྟི སཏྠུནོ སབྦེ, པུཉྙཀྑེཏྟེ ཨནུཏྟརེ.

༥༦.

‘‘ཨཧམྤི ¶ དཱནཾ དསྶཱམི, དེཝདེཝསྶ ཏཱདིནོ;

བུདྡྷསེཊྛཾ ནིམནྟེཏྭཱ, སངྒྷམྤི ཙ ཨནུཏྟརཾ.

༥༧.

‘‘ཨུཡྻོཛིཏཱ མཡཱ ཙེཏེ, ནིམནྟེསུཾ ཏཐཱགཏཾ;

ཀེཝལཾ བྷིཀྑུསངྒྷཉྩ, པུཉྙཀྑེཏྟཾ ཨནུཏྟརཾ.

༥༨.

‘‘སཏསཧསྶཔལླངྐཾ, སོཝཎྞཾ གོནཀཏྠཏཾ;

ཏཱུལིཀཱཔཊལིཀཱཡ, ཁོམཀཔྤཱསིཀེཧི ཙ;

མཧཱརཧཾ པཉྙཱཔཡིཾ, ཨཱསནཾ བུདྡྷཡུཏྟཀཾ.

༥༩.

‘‘པདུམུཏྟརོ ¶ ལོཀཝིདཱུ, དེཝདེཝོ ནརཱསབྷོ;

བྷིཀྑུསངྒྷཔརིབྱཱུལ༹ྷོ, མམ དྭཱརམུཔཱགམི.

༦༠.

‘‘པཙྩུགྒནྟྭཱན སམྦུདྡྷཾ, ལོཀནཱཐཾ ཡསསྶིནཾ;

པསནྣཙིཏྟོ སུམནོ, ཨབྷིནཱམཡིཾ སངྒྷརཾ [སཀཾ གྷརཾ (སཱི.)].

༦༡.

‘‘བྷིཀྑཱུནཾ སཏསཧསྶཾ, བུདྡྷཉྩ ལོཀནཱཡཀཾ;

པསནྣཙིཏྟོ སུམནོ, པརམནྣེན ཏཔྤཡིཾ.

༦༢.

‘‘པདུམུཏྟརོ ལོཀཝིདཱུ, ཨཱཧུཏཱིནཾ པཊིགྒཧོ;

བྷིཀྑུསངྒྷེ ¶ ནིསཱིདིཏྭཱ, ཨིམཱ གཱཐཱ ཨབྷཱསཐ.

༦༣.

‘‘‘ཡེནིདཾ ཨཱསནཾ དིནྣཾ, སོཝཎྞཾ གོནཀཏྠཏཾ;

ཏམཧཾ ཀིཏྟཡིསྶཱམི, སུཎཱཐ མམ བྷཱསཏོ.

༦༤.

‘‘‘ཙཏུསཏྟཏིཀྑཏྟུཾ ¶ སོ, དེཝརཛྫཾ ཀརིསྶཏི;

ཨནུབྷོསྶཏི སམྤཏྟིཾ, ཨཙྪརཱཧི པུརཀྑཏོ.

༦༥.

‘‘‘པདེསརཛྫཾ སཧསྶཾ, ཝསུདྷཾ ཨཱཝསིསྶཏི;

ཨེཀཔཉྙཱསཀྑཏྟུཉྩ, ཙཀྐཝཏྟཱི བྷཝིསྶཏི.

༦༦.

‘‘‘སབྦཱསུ བྷཝཡོནཱིསུ, ཨུཙྩཱཀུལཱི [ཨུཙྩཱཀུལེ (ཀ.)] བྷཝིསྶཏི;

སོ ཙ པཙྪཱ པབྦཛིཏྭཱ, སུཀྐམཱུལེན ཙོདིཏོ;

བྷདྡིཡོ ནཱམ ནཱམེན, ཧེསྶཏི སཏྠུ སཱཝཀོ.

༦༧.

‘‘‘ཝིཝེཀམནུཡུཏྟོམྷི, པནྟསེནནིཝཱསཧཾ;

ཕལཉྩཱདྷིགཏཾ སབྦཾ, ཙཏྟཀླེསོམྷི ཨཛྫཧཾ.

༦༨.

‘‘‘མམ སབྦཾ [ཀམྨཾ (?)] ཨབྷིཉྙཱཡ, སབྦཉྙཱུ ལོཀནཱཡཀོ;

བྷིཀྑུསངྒྷེ ནིསཱིདིཏྭཱ, ཨེཏདགྒེ ཋཔེསི མཾ’.

༦༩.

‘‘པཊིསམྦྷིདཱ ཙཏསྶོ…པེ… ཀཏཾ བུདྡྷསྶ སཱསནཾ’’.

ཨིཏྠཾ ¶ སུདཾ ཨཱཡསྨཱ བྷདྡིཡོ ཀཱལི༹གོདྷཱཡ པུཏྟོ ཐེརོ ཨིམཱ གཱཐཱཡོ ཨབྷཱསིཏྠཱཏི.

བྷདྡིཡསྶ ཀཱལི༹གོདྷཱཡ པུཏྟཏྠེརསྶཱཔདཱནཾ ཏཏིཡཾ.

༤. སནྣིཊྛཱཔཀཏྠེརཨཔདཱནཾ

༧༠.

‘‘ཨརཉྙེ ¶ ¶ ཀུཊིཀཾ ཀཏྭཱ, ཝསཱམི པབྦཏནྟརེ;

ལཱབྷཱལཱབྷེན སནྟུཊྛོ, ཡསེན ཨཡསེན ཙ.

༧༡.

‘‘པདུམུཏྟརོ ལོཀཝིདཱུ, ཨཱཧུཏཱིནཾ པཊིགྒཧོ;

ཝསཱིསཏསཧསྶེཧི [བྷིཀྑུསཏསཧསྶེཧི (སྱཱ.)], ཨཱགཙྪི མམ སནྟིཀཾ.

༧༢.

‘‘ཨུཔཱགཏཾ མཧཱནཱགཾ [མཧཱཝཱིརཾ (སཱི.)], ཛལཛུཏྟམནཱམཀཾ;

ཏིཎསནྠརཾ [ཏིཎཏྠརཾ (ཀ.)] པཉྙཱཔེཏྭཱ, ཨདཱསིཾ སཏྠུནོ ཨཧཾ.

༧༣.

‘‘པསནྣཙིཏྟོ སུམནོ, ཨཱམཎྜཾ པཱནཱིཡཉྩཧཾ;

ཨདཱསིཾ ཨུཛུབྷཱུཏསྶ, ཝིཔྤསནྣེན ཙེཏསཱ.

༧༤.

‘‘སཏསཧསྶིཏོ ཀཔྤེ [སཏསཧསྶེ ཨིཏོ ཀཔྤེ (སཱི.)], ཡཾ དཱནམདདིཾ ཏདཱ;

དུགྒཏིཾ ནཱབྷིཛཱནཱམི, ཨཱམཎྜསྶ ཨིདཾ ཕལཾ.

༧༥.

‘‘ཨེཀཏཱལཱིསཀཔྤམྷི, ཨེཀོ ཨཱསིཾ ཨརིནྡམོ;

སཏྟརཏནསམྤནྣོ, ཙཀྐཝཏྟཱི མཧབྦལོ.

༧༦.

‘‘པཊིསམྦྷིདཱ ¶ ཙཏསྶོ…པེ… ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ སནྣིཊྛཱཔཀོ [སནྣིདྷཱཔཀོ (སཱི.)] ཐེརོ ཨིམཱ གཱཐཱཡོ ཨབྷཱསིཏྠཱཏི.

སནྣིཊྛཱཔཀཏྠེརསྶཱཔདཱནཾ ཙཏུཏྠཾ.

༥. པཉྩཧཏྠིཡཏྠེརཨཔདཱནཾ

༧༧.

‘‘སུམེདྷོ ¶ ནཱམ སམྦུདྡྷོ, གཙྪཏེ ཨནྟརཱཔཎེ;

ཨོཀྑིཏྟཙཀྑུ [ཁིཏྟཙཀྑུ (ཀ. སཱི. ཀ.)] མིཏབྷཱཎཱི, སཏིམཱ སཾཝུཏིནྡྲིཡོ.

༧༨.

‘‘པཉྩ ཨུཔྤལཧཏྠཱནི, ཨཱཝེལ༹ཏྠཾ ཨཧཾསུ མེ;

ཏེན བུདྡྷཾ ཨཔཱུཛེསིཾ, པསནྣོ སེཧི པཱཎིབྷི.

༧༩.

‘‘ཨཱརོཔིཏཱ ¶ ཙ ཏེ པུཔྥཱ, ཚདནཾ ཨསྶུ སཏྠུནོ;

སམཱདྷིཾསུ [སཾསཱཝིཾསུ (སཱི.)] མཧཱནཱགཾ, སིསྶཱ ཨཱཙརིཡཾ ཡཐཱ.

༨༠.

‘‘ཏིཾསཀཔྤསཧསྶམྷི ¶ , ཡཾ པུཔྥམབྷིརོཔཡིཾ;

དུགྒཏིཾ ནཱབྷིཛཱནཱམི, བུདྡྷཔཱུཛཱཡིདཾ ཕལཾ.

༨༡.

‘‘ཨིཏོ ཝཱིསཀཔྤསཏེ, ཨཧེསུཾ པཉྩ ཁཏྟིཡཱ;

ཧཏྠིཡཱ ནཱམ ནཱམེན, ཙཀྐཝཏྟཱི མཧབྦལཱ.

༨༢.

‘‘པཊིསམྦྷིདཱ ཙཏསྶོ…པེ… ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ པཉྩཧཏྠིཡོ ཐེརོ ཨིམཱ གཱཐཱཡོ ཨབྷཱསིཏྠཱཏི.

པཉྩཧཏྠིཡཏྠེརསྶཱཔདཱནཾ པཉྩམཾ.

༦. པདུམཙྪདནིཡཏྠེརཨཔདཱནཾ

༨༣.

‘‘ནིབྦུཏེ ལོཀནཱཐམྷི, ཝིཔསྶིམྷགྒཔུགྒལེ;

སུཕུལླཔདུམཾ གཡ྄ཧ, ཙིཏམཱརོཔཡིཾ ཨཧཾ.

༨༤.

‘‘ཨཱརོཔིཏེ ¶ ཙ ཙིཏཀེ, ཝེཧཱསཾ ནབྷམུགྒམི;

ཨཱཀཱསེ ཚདནཾ [ཨཱཀཱསཙྪདནཾ (སཱི.)] ཀཏྭཱ, ཙིཏཀམྷི ཨདྷཱརཡི.

༨༥.

‘‘ཨེཀནཝུཏིཏོ ཀཔྤེ, ཡཾ པུཔྥམབྷིརོཔཡིཾ;

དུགྒཏིཾ ནཱབྷིཛཱནཱམི, བུདྡྷཔཱུཛཱཡིདཾ ཕལཾ.

༨༦.

‘‘སཏྟཏཱལཱིསིཏོ ¶ ཀཔྤེ, པདུམིསྶརནཱམཀོ;

ཙཱཏུརནྟོ ཝིཛིཏཱཝཱི, ཙཀྐཝཏྟཱི མཧབྦལོ.

༨༧.

‘‘པཊིསམྦྷིདཱ ཙཏསྶོ…པེ… ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ པདུམཙྪདནིཡོ ཐེརོ ཨིམཱ གཱཐཱཡོ ཨབྷཱསིཏྠཱཏི;

པདུམཙྪདནིཡཏྠེརསྶཱཔདཱནཾ ཚཊྛཾ.

༧. སཡནདཱཡཀཏྠེརཨཔདཱནཾ

༨༨.

‘‘སིདྡྷཏྠསྶ བྷགཝཏོ, མེཏྟཙིཏྟསྶ ཏཱདིནོ;

སཡནགྒཾ མཡཱ དིནྣཾ, དུསྶབྷཎྜེཧི [དུསྶབྷཎྜེན (སྱཱ.)] ཨཏྠཏཾ.

༨༩.

‘‘པཊིགྒཧེསི ¶ བྷགཝཱ, ཀཔྤིཡཾ སཡནཱསནཾ;

ཨུཊྛཱཡ སཡནཱ [ཨཱསནཱ (སཱི.)] ཏམྷཱ, ཝེཧཱསཾ ཨུགྒམཱི ཛིནོ.

༩༠.

‘‘ཙཏུནྣཝུཏིཏོ ¶ ཀཔྤེ, ཡཾ སཡནམདཱསཧཾ;

དུགྒཏིཾ ནཱབྷིཛཱནཱམི, སཡནསྶ ཨིདཾ ཕལཾ.

༩༡.

‘‘ཨེཀཔཉྙཱསིཏོ ¶ ཀཔྤེ, ཝརཀོ [ཝརུཎོ (སཱི. སྱཱ.)] དེཝསཝ྄ཧཡོ;

སཏྟརཏནསམྤནྣོ, ཙཀྐཝཏྟཱི མཧབྦལོ.

༩༢.

‘‘པཊིསམྦྷིདཱ ཙཏསྶོ…པེ… ཀཏཾ བུདྡྷསྶ སཱསནཾ’’.

ཨིཏྠཾ སུདཾ ཨཱཡསྨཱ སཡནདཱཡཀོ ཐེརོ ཨིམཱ གཱཐཱཡོ ཨབྷཱསིཏྠཱཏི.

སཡནདཱཡཀཏྠེརསྶཱཔདཱནཾ སཏྟམཾ.

༨. ཙངྐམནདཱཡཀཏྠེརཨཔདཱནཾ

༩༣.

‘‘ཨཏྠདསྶིསྶ མུནིནོ, ལོཀཛེཊྛསྶ ཏཱདིནོ;

ཨིཊྛཀཱཧི ཙིནིཏྭཱན, ཙངྐམཾ ཀཱརཡིཾ ཨཧཾ.

༩༤.

‘‘ཨུཙྩཏོ པཉྩརཏནཾ, ཙངྐམཾ སཱདྷུམཱཔིཏཾ;

ཨཱཡཱམཏོ ཧཏྠསཏཾ, བྷཱཝནཱིཡྻཾ མནོརམཾ.

༩༥.

‘‘པཊིགྒཧེསི བྷགཝཱ, ཨཏྠདསྶཱི ནརུཏྟམོ;

ཧཏྠེན པུལིནཾ གཡ྄ཧ, ཨིམཱ གཱཐཱ ཨབྷཱསཐ.

༩༦.

‘‘‘ཨིམིནཱ ¶ པུལིནདཱནེན, ཙངྐམཾ སུཀཏེན ཙ;

སཏྟརཏནསམྤནྣཾ, པུལིནཾ ཨནུབྷོསྶཏི.

༩༧.