མཱུལ > སུཏྟཔིཊཀ > ཁུདྡཀནིཀཱཡ

THA Vol 2
MMR Vol 2
VRI Vol 2
PTS Vol 0

Misc. Paragraph

ཁུདྡཀནིཀཱཡེ

བུདྡྷཝཾསཔཱལི༹

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

བྲཧྨཱ ¶ ¶ ¶ ¶ ཙ ལོཀཱདྷིཔཏཱི སཧམྤཏཱི [སཧམྤཏི (སྱཱ. ཀཾ.)], ཀཏཉྫལཱི ཨནདྷིཝརཾ ཨཡཱཙཐ;

‘‘སནྟཱིདྷ སཏྟཱཔྤརཛཀྑཛཱཏིཀཱ, དེསེཧི དྷམྨཾ ཨནུཀམྤིམཾ པཛཾ’’.

སམྤནྣཝིཛྫཱཙརཎསྶ ཏཱདིནོ, ཛུཏིནྡྷརསྶནྟིམདེཧདྷཱརིནོ;

ཏཐཱགཏསྶཔྤཊིཔུགྒལསྶ, ཨུཔྤཛྫི ཀཱརུཉྙཏཱ སབྦསཏྟེ.

‘‘ན ཧེཏེ ཛཱནནྟི སདེཝམཱནུསཱ, བུདྡྷོ ཨཡཾ ཀཱིདིསཀོ ནརུཏྟམོ;

ཨིདྡྷིབལཾ པཉྙཱབལཉྩ ཀཱིདིསཾ, བུདྡྷབལཾ ལོཀཧིཏསྶ ཀཱིདིསཾ.

‘‘ན ¶ ཧེཏེ ཛཱནནྟི སདེཝམཱནུསཱ, བུདྡྷོ ཨཡཾ ཨེདིསཀོ ནརུཏྟམོ;

ཨིདྡྷིབལཾ པཉྙཱབལཉྩ ཨེདིསཾ, བུདྡྷབལཾ ལོཀཧིཏསྶ ཨེདིསཾ.

‘‘ཧནྡཱཧཾ ¶ ¶ དསྶཡིསྶཱམི, བུདྡྷབལམནུཏྟརཾ;

ཙངྐམཾ མཱཔཡིསྶཱམི, ནབྷེ རཏནམཎྜིཏཾ’’.

བྷུམྨཱ མཧཱརཱཛིཀཱ ཏཱཝཏིཾསཱ, ཡཱམཱ ཙ དེཝཱ ཏུསིཏཱ ཙ ནིམྨིཏཱ;

པརནིམྨིཏཱ ཡེཔི ཙ བྲཧྨཀཱཡིཀཱ, ཨཱནནྡིཏཱ ཝིཔུལམཀཾསུ གྷོསཾ.

ཨོབྷཱསིཏཱ ¶ ཙ པཐཝཱི སདེཝཀཱ, པུཐཱུ ཙ ལོཀནྟརིཀཱ ཨསཾཝུཏཱ;

ཏམོ ཙ ཏིབྦོ ཝིཧཏོ ཏདཱ ཨཧུ, དིསྭཱན ཨཙྪེརཀཾ པཱཊིཧཱིརཾ.

སདེཝགནྡྷབྦམནུསྶརཀྑསེ, ཨཱབྷཱ ཨུལཱ༹རཱ ཝིཔུལཱ ཨཛཱཡཐ;

ཨིམསྨིཾ ¶ ལོཀེ པརསྨིཉྩོབྷཡསྨིཾ [པརསྨིཾ ཙཱུབྷཡེ (སྱཱ. ཀཾ.)], ཨདྷོ ཙ ཨུདྡྷཾ ཏིརིཡཉྩ ཝིཏྠཏཾ.

སཏྟུཏྟམོ ཨནདྷིཝརོ ཝིནཱཡཀོ, སཏྠཱ ཨཧཱུ དེཝམནུསྶཔཱུཛིཏོ;

མཧཱནུབྷཱཝོ སཏཔུཉྙལཀྑཎོ, དསྶེསི ཨཙྪེརཀཾ པཱཊིཧཱིརཾ.

སོ ཡཱཙིཏོ དེཝཝརེན ཙཀྑུམཱ, ཨཏྠཾ སམེཀྑིཏྭཱ ཏདཱ ནརུཏྟམོ;

ཙངྐམཾ [ཙངྐམཾ ཏཏྠ (སཱི.)] མཱཔཡི ལོཀནཱཡཀོ, སུནིཊྛིཏཾ སབྦརཏནནིམྨིཏཾ.

ཨིདྡྷཱི ཙ ཨཱདེསནཱནུསཱསནཱི, ཏིཔཱཊིཧཱིརེ བྷགཝཱ ཝསཱི ཨཧུ;

ཙངྐམཾ མཱཔཡི ལོཀནཱཡཀོ, སུནིཊྛིཏཾ སབྦརཏནནིམྨིཏཾ.

དསསཧསྶཱིལོཀདྷཱཏུཡཱ, སིནེརུཔབྦཏུཏྟམེ;

ཐམྦྷེཝ དསྶེསི པཊིཔཱཊིཡཱ, ཙངྐམེ རཏནཱམཡེ.

དསསཧསྶཱི ¶ ཨཏིཀྐམྨ, ཙངྐམཾ མཱཔཡཱི ཛིནོ;

སབྦསོཎྞམཡཱ པསྶེ, ཙངྐམེ རཏནཱམཡེ.

ཏུལཱསངྒྷཱཊཱནུཝགྒཱ ¶ , སོཝཎྞཕལཀཏྠཏཱ;

ཝེདིཀཱ སབྦསོཝཎྞཱ, དུབྷཏོ པསྶེསུ ནིམྨིཏཱ.

མཎིམུཏྟཱཝཱལུཀཱཀིཎྞཱ, ནིམྨིཏོ རཏནཱམཡོ;

ཨོབྷཱསེཏི དིསཱ སབྦཱ, སཏརཾསཱིཝ ཨུགྒཏོ.

ཏསྨིཾ ཙངྐམནེ དྷཱིརོ, དྭཏྟིཾསཝརལཀྑཎོ;

ཝིརོཙམཱནོ སམྦུདྡྷོ, ཙངྐམེ ཙངྐམཱི ཛིནོ.

དིབྦཾ མནྡཱརཝཾ པུཔྥཾ, པདུམཾ པཱརིཚཏྟཀཾ;

ཙངྐམནེ ཨོཀིརནྟི, སབྦེ དེཝཱ སམཱགཏཱ.

པསྶནྟི ཏཾ དེཝསངྒྷཱ, དསསཧསྶཱི པམོདིཏཱ;

ནམསྶམཱནཱ ནིཔཏནྟི, ཏུཊྛཧཊྛཱ པམོདིཏཱ.

ཏཱཝཏིཾསཱ ¶ ཙ ཡཱམཱ ཙ, ཏུསིཏཱ ཙཱཔི དེཝཏཱ;

ནིམྨཱནརཏིནོ དེཝཱ, ཡེ དེཝཱ ཝསཝཏྟིནོ;

ཨུདགྒཙིཏྟཱ སུམནཱ, པསྶནྟི ལོཀནཱཡཀཾ.

སདེཝགནྡྷབྦམནུསྶརཀྑསཱ, ནཱགཱ སུཔཎྞཱ ཨཐ ཝཱཔི ཀིནྣརཱ;

པསྶནྟི ¶ ཏཾ ལོཀཧིཏཱནུཀམྤཀཾ, ནབྷེཝ ཨཙྩུགྒཏཙནྡམཎྜལཾ.

ཨཱབྷསྶརཱ ¶ སུབྷཀིཎྷཱ, ཝེཧཔྥལཱ ཨཀནིཊྛཱ ཙ དེཝཏཱ;

སུསུདྡྷསུཀྐཝཏྠཝསནཱ, ཏིཊྛནྟི པཉྫལཱིཀཏཱ.

མུཉྩནྟི པུཔྥཾ པན པཉྩཝཎྞིཀཾ, མནྡཱརཝཾ ཙནྡནཙུཎྞམིསྶིཏཾ;

བྷམེནྟི ཙེལཱནི ཙ ཨམྦརེ ཏདཱ, ‘‘ཨཧོ ཛིནོ ལོཀཧིཏཱནུཀམྤཀོ.

‘‘ཏུཝཾ སཏྠཱ ཙ ཀེཏཱུ ཙ, དྷཛོ ཡཱུཔོ ཙ པཱཎིནཾ;

པརཱཡནོ པཏིཊྛཱ ཙ, དཱིཔོ ཙ དྭིཔདུཏྟམོ [དིཔདུཏྟམོ (སཱི. སྱཱ.)].

‘‘དསསཧསྶཱིལོཀདྷཱཏུཡཱ, དེཝཏཱཡོ མཧིདྡྷིཀཱ;

པརིཝཱརེཏྭཱ ནམསྶནྟི, ཏུཊྛཧཊྛཱ པམོདིཏཱ.

‘‘དེཝཏཱ དེཝཀཉྙཱ ཙ, པསནྣཱ ཏུཊྛམཱནསཱ;

པཉྩཝཎྞིཀཔུཔྥེཧི, པཱུཛཡནྟི ནརཱསབྷཾ.

‘‘པསྶནྟི ¶ ཏཾ དེཝསངྒྷཱ, པསནྣཱ ཏུཊྛམཱནསཱ;

པཉྩཝཎྞིཀཔུཔྥེཧི, པཱུཛཡནྟི ནརཱསབྷཾ.

‘‘ཨཧོ ཨཙྪརིཡཾ ལོཀེ, ཨབྦྷུཏཾ ལོམཧཾསནཾ;

ན མེདིསཾ བྷཱུཏཔུབྦཾ, ཨཙྪེརཾ ལོམཧཾསནཾ’’.

སཀསཀམྷི བྷཝནེ, ནིསཱིདིཏྭཱན དེཝཏཱ;

ཧསནྟི ཏཱ མཧཱཧསིཏཾ, དིསྭཱནཙྪེརཀཾ ནབྷེ.

ཨཱཀཱསཊྛཱ ཙ བྷཱུམཊྛཱ, ཏིཎཔནྠནིཝཱསིནོ;

ཀཏཉྫལཱི ནམསྶནྟི, ཏུཊྛཧཊྛཱ པམོདིཏཱ.

ཡེཔི ¶ དཱིགྷཱཡུཀཱ ནཱགཱ, པུཉྙཝནྟོ མཧིདྡྷིཀཱ;

པམོདིཏཱ ནམསྶནྟི, པཱུཛཡནྟི ནརུཏྟམཾ.

སངྒཱིཏིཡོ པཝཏྟེནྟི, ཨམྦརེ ཨནིལཉྫསེ;

ཙམྨནདྡྷཱནི ཝཱདེནྟི, དིསྭཱནཙྪེརཀཾ ནབྷེ.

སངྑཱ ཙ པཎཝཱ ཙེཝ, ཨཐོཔི ཌིཎྜིམཱ [ཌེཎྜིམཱ (སཱི.)] བཧཱུ;

ཨནྟལིཀྑསྨིཾ ཝཛྫནྟི, དིསྭཱནཙྪེརཀཾ ནབྷེ.

ཨབྦྷུཏོ ¶ ཝཏ ནོ ཨཛྫ, ཨུཔྤཛྫི ལོམཧཾསནོ;

དྷུཝམཏྠསིདྡྷིཾ ལབྷཱམ, ཁཎོ ནོ པཊིཔཱདིཏོ.

བུདྡྷོཏི ཏེསཾ སུཏྭཱན, པཱིཏི ཨུཔྤཛྫི ཏཱཝདེ;

བུདྡྷོ བུདྡྷོཏི ཀཐཡནྟཱ, ཏིཊྛནྟི པཉྫལཱིཀཏཱ.

ཧིངྐཱརཱ སཱདྷུཀཱརཱ ཙ [ཧིངྐཱརཾ སཱདྷུཀཱརཉྩ (སཱི. སྱཱ.)], ཨུཀྐུཊྛི སམྤཧཾསནཾ [སམྤསཱདནཾ (སཱི.), སམྤནཱདནཾ (སྱཱ.)];

པཛཱ ཙ ཝིཝིདྷཱ གགནེ, ཝཏྟེནྟི པཉྫལཱིཀཏཱ.

གཱཡནྟི སེལེ༹ནྟི ཙ ཝཱདཡནྟི ཙ, བྷུཛཱནི པོཐེནྟི ཙ ནཙྩཡནྟི ཙ;

མུཉྩནྟི པུཔྥཾ པན པཉྩཝཎྞིཀཾ, མནྡཱརཝཾ ཙནྡནཙུཎྞམིསྶིཏཾ.

‘‘ཡཐཱ ¶ ཏུཡ྄ཧཾ མཧཱཝཱིར, པཱདེསུ ཙཀྐལཀྑཎཾ;

དྷཛཝཛིརཔཊཱཀཱ, ཝཌྜྷམཱནངྐུསཱཙིཏཾ.

‘‘རཱུཔེ ¶ སཱིལེ སམཱདྷིམྷི, པཉྙཱཡ ཙ ཨསཱདིསོ;

ཝིམུཏྟིཡཱ ཨསམསམོ, དྷམྨཙཀྐཔྤཝཏྟནེ.

‘‘དསནཱགབལཾ ¶ ཀཱཡེ, ཏུཡ྄ཧཾ པཱཀཏིཀཾ བལཾ;

ཨིདྡྷིབལེན ཨསམོ, དྷམྨཙཀྐཔྤཝཏྟནེ.

‘‘ཨེཝཾ སབྦགུཎཱུཔེཏཾ, སབྦངྒསམུཔཱགཏཾ;

མཧཱམུནིཾ ཀཱརུཎིཀཾ, ལོཀནཱཐཾ ནམསྶཐ.

‘‘ཨབྷིཝཱདནཾ ཐོམནཉྩ, ཝནྡནཉྩ པསཾསནཾ;

ནམསྶནཉྩ པཱུཛཉྩ, སབྦཾ ཨརཧསཱི ཏུཝཾ.

‘‘ཡེ ཀེཙི ལོཀེ ཝནྡནེཡྻཱ, ཝནྡནཾ ཨརཧནྟི ཡེ;

སབྦསེཊྛོ མཧཱཝཱིར, སདིསོ ཏེ ན ཝིཛྫཏི.

‘‘སཱརིཔུཏྟོ མཧཱཔཉྙོ, སམཱདྷིཛ྄ཛྷཱནཀོཝིདོ;

གིཛ྄ཛྷཀཱུཊེ ཋིཏོཡེཝ, པསྶཏི ལོཀནཱཡཀཾ.

‘‘སུཕུལླཾ སཱལརཱཛཾཝ, ཙནྡཾཝ གགནེ ཡཐཱ;

མཛ྄ཛྷནྷིཀེཝ [མཛ྄ཛྷནྟིཀེཝ (སབྦཏྠ)] སཱུརིཡཾ, ཨོལོཀེསི ནརཱསབྷཾ.

‘‘ཛལནྟཾ དཱིཔརུཀྑཾཝ, ཏརུཎསཱུརིཡཾཝ ཨུགྒཏཾ;

བྱཱམཔྤབྷཱནུརཉྫིཏཾ, དྷཱིརཾ པསྶཏི ལོཀནཱཡཀཾ.

‘‘པཉྩནྣཾ བྷིཀྑུསཏཱནཾ, ཀཏཀིཙྩཱན ཏཱདིནཾ;

ཁཱིཎཱསཝཱནཾ ཝིམལཱནཾ, ཁཎེན སནྣིཔཱཏཡི.

‘‘ལོཀཔྤསཱདནཾ ¶ ནཱམ, པཱཊིཧཱིརཾ ནིདསྶཡི;

ཨམྷེཔི ཏཏྠ གནྟྭཱན, ཝནྡིསྶཱམ མཡཾ ཛིནཾ.

‘‘ཨེཐ སབྦེ གམིསྶཱམ, པུཙྪིསྶཱམ མཡཾ ཛིནཾ;

ཀངྑཾ ཝིནོདཡིསྶཱམ, པསྶིཏྭཱ ལོཀནཱཡཀཾ’’.

སཱདྷཱུཏི ¶ ཏེ པཊིསྶུཏྭཱ, ནིཔཀཱ སཾཝུཏིནྡྲིཡཱ;

པཏྟཙཱིཝརམཱདཱཡ, ཏརམཱནཱ ཨུཔཱགམུཾ.

ཁཱིཎཱསཝེཧི ཝིམལེཧི, དནྟེཧི ཨུཏྟམེ དམེ;

སཱརིཔུཏྟོ མཧཱཔཉྙོ, ཨིདྡྷིཡཱ ཨུཔསངྐམི.

ཏེཧི ¶ བྷིཀྑཱུཧི པརིཝུཏོ, སཱརིཔུཏྟོ མཧཱགཎཱི;

ལལ༹ནྟོ དེཝོཝ གགནེ, ཨིདྡྷིཡཱ ཨུཔསངྐམི.

ཨུཀྐཱསིཏཉྩ ཁིཔིཏཾ [ཨུཀྐཱསིཏཉྩ ཁིཔིཏཉྩ (སྱཱ. ཨཊྛ.)], ཨཛ྄ཛྷུཔེཀྑིཡ སུབྦཏཱ;

སགཱརཝཱ སཔྤཏིསྶཱ, སམྦུདྡྷཾ ཨུཔསངྐམུཾ.

ཨུཔསངྐམིཏྭཱ པསྶནྟི, སཡམྦྷུཾ ལོཀནཱཡཀཾ;

ནབྷེ ཨཙྩུགྒཏཾ དྷཱིརཾ, ཙནྡཾཝ གགནེ ཡཐཱ.

ཛལནྟཾ དཱིཔརུཀྑཾཝ, ཝིཛྫུཾཝ གགནེ ཡཐཱ;

མཛ྄ཛྷནྷིཀེཝ སཱུརིཡཾ, པསྶནྟི ལོཀནཱཡཀཾ.

པཉྩབྷིཀྑུསཏཱ སབྦེ, པསྶནྟི ལོཀནཱཡཀཾ;

རཧདམིཝ ཝིཔྤསནྣཾ, སུཕུལླཾ པདུམཾ ཡཐཱ.

ཨཉྫལིཾ ¶ པགྒཧེཏྭཱན, ཏུཊྛཧཊྛཱ པམོདིཏཱ;

ནམསྶམཱནཱ ནིཔཏནྟི, སཏྠུནོ ཙཀྐལཀྑཎེ.

སཱརིཔུཏྟོ མཧཱཔཉྙོ, ཀོརཎྜསམསཱདིསོ;

སམཱདྷིཛ྄ཛྷཱནཀུསལོ, ཝནྡཏེ ལོཀནཱཡཀཾ.

གཛྫིཏཱ ཀཱལམེགྷོཝ, ནཱིལུཔྤལསམསཱདིསོ;

ཨིདྡྷིབལེན ཨསམོ, མོགྒལླཱནོ མཧིདྡྷིཀོ.

མཧཱཀསྶཔོཔི ¶ ཙ ཐེརོ, ཨུཏྟཏྟཀནཀསནྣིབྷོ;

དྷུཏགུཎེ ཨགྒནིཀྑིཏྟོ, ཐོམིཏོ སཏྠུཝཎྞིཏོ.

དིབྦཙཀྑཱུནཾ ཡོ ཨགྒོ, ཨནུརུདྡྷོ མཧཱགཎཱི;

ཉཱཏིསེཊྛོ བྷགཝཏོ, ཨཝིདཱུརེཝ ཏིཊྛཏི.

ཨཱཔཏྟིཨནཱཔཏྟིཡཱ ¶ , སཏེཀིཙྪཱཡ ཀོཝིདོ;

ཝིནཡེ ཨགྒནིཀྑིཏྟོ, ཨུཔཱལི སཏྠུཝཎྞིཏོ.

སུཁུམནིཔུཎཏྠཔཊིཝིདྡྷོ, ཀཐིཀཱནཾ པཝརོ གཎཱི;

ཨིསི མནྟཱནིཡཱ པུཏྟོ, པུཎྞོ ནཱམཱཏི ཝིསྶུཏོ.

ཨེཏེསཾ ཙིཏྟམཉྙཱཡ, ཨོཔམྨཀུསལོ མུནི;

ཀངྑཙྪེདོ མཧཱཝཱིརོ, ཀཐེསི ཨཏྟནོ གུཎཾ.

‘‘ཙཏྟཱརོ ¶ ཏེ ཨསངྑེཡྻཱ, ཀོཊི ཡེསཾ ན ནཱཡཏི;

སཏྟཀཱཡོ ཙ ཨཱཀཱསོ, ཙཀྐཝཱལཱ༹ ཙནནྟཀཱ;

བུདྡྷཉཱཎཾ ཨཔྤམེཡྻཾ, ན སཀྐཱ ཨེཏེ ཝིཛཱནིཏུཾ.

‘‘ཀིམེཏཾ ཨཙྪརིཡཾ ལོཀེ, ཡཾ མེ ཨིདྡྷིཝིཀུབྦནཾ;

ཨཉྙེ བཧཱུ ཨཙྪརིཡཱ, ཨབྦྷུཏཱ ལོམཧཾསནཱ.

‘‘ཡདཱཧཾ ཏུསིཏེ ཀཱཡེ, སནྟུསིཏོ ནཱམཧཾ ཏདཱ;

དསསཧསྶཱི སམཱགམྨ, ཡཱཙནྟི པཉྫལཱི མམཾ.

‘‘‘ཀཱལོ ཁོ ཏེ [ཀཱལོ དེཝ (སཱི.), ཀཱལོཡཾ ཏེ (སྱཱ. ཀ.)] མཧཱཝཱིར, ཨུཔྤཛྫ མཱཏུཀུཙྪིཡཾ;

སདེཝཀཾ ཏཱརཡནྟོ, བུཛ྄ཛྷསྶུ ཨམཏཾ པདཾ’.

‘‘ཏུསིཏཱ ¶ ཀཱཡཱ ཙཝིཏྭཱན, ཡདཱ ཨོཀྐམི ཀུཙྪིཡཾ;

དསསཧསྶཱིལོཀདྷཱཏུ, ཀམྤིཏྠ དྷརཎཱི ཏདཱ.

‘‘ཡདཱཧཾ མཱཏུཀུཙྪིཏོ, སམྤཛཱནོཝ ནིཀྑམིཾ;

སཱདྷུཀཱརཾ པཝཏྟེནྟི, དསསཧསྶཱི པཀམྤཐ.

‘‘ཨོཀྐནྟིཾ མེ སམོ ནཏྠི, ཛཱཏིཏོ ཨབྷིནིཀྑམེ;

སམྦོདྷིཡཾ ཨཧཾ སེཊྛོ, དྷམྨཙཀྐཔྤཝཏྟནེ.

‘‘ཨཧོ ཨཙྪརིཡཾ ལོཀེ, བུདྡྷཱནཾ གུཎམཧནྟཏཱ;

དསསཧསྶཱིལོཀདྷཱཏུ, ཚཔྤཀཱརཾ པཀམྤཐ;

ཨོབྷཱསོ ཙ མཧཱ ཨཱསི, ཨཙྪེརཾ ལོམཧཾསནཾ’’.

བྷགཝཱ ཏམྷི [བྷགཝཱ ཙ ཏམྷི (སཱི. སྱཱ. ཀ.)] སམཡེ, ལོཀཛེཊྛོ ནརཱསབྷོ;

སདེཝཀཾ དསྶཡནྟོ, ཨིདྡྷིཡཱ ཙངྐམཱི ཛིནོ.

ཙངྐམེ ཙངྐམནྟོཝ, ཀཐེསི ལོཀནཱཡཀོ;

ཨནྟརཱ ན ནིཝཏྟེཏི, ཙཏུཧཏྠེ ཙངྐམེ ཡཐཱ.

སཱརིཔུཏྟོ ¶ ¶ མཧཱཔཉྙོ, སམཱདྷིཛ྄ཛྷཱནཀོཝིདོ;

པཉྙཱཡ པཱརམིཔྤཏྟོ, པུཙྪཏི ལོཀནཱཡཀཾ.

‘‘ཀཱིདིསོ ཏེ མཧཱཝཱིར, ཨབྷིནཱིཧཱརོ ནརུཏྟམ;

ཀམྷི ཀཱལེ ཏཡཱ དྷཱིར, པཏྠིཏཱ བོདྷིམུཏྟམཱ.

‘‘དཱནཾ ¶ སཱིལཉྩ ནེཀྑམྨཾ, པཉྙཱཝཱིརིཡཉྩ ཀཱིདིསཾ;

ཁནྟིསཙྩམདྷིཊྛཱནཾ, མེཏྟུཔེཀྑཱ ཙ ཀཱིདིསཱ.

‘‘དས ¶ པཱརམཱི ཏཡཱ དྷཱིར, ཀཱིདིསཱི ལོཀནཱཡཀ;

ཀཐཾ ཨུཔཔཱརམཱི པུཎྞཱ, པརམཏྠཔཱརམཱི ཀཐཾ’’.

ཏསྶ པུཊྛོ ཝིཡཱཀཱསི, ཀརཝཱིཀམདྷུརགིརོ;

ནིབྦཱཔཡནྟོ ཧདཡཾ, ཧཱསཡནྟོ སདེཝཀཾ.

ཨཏཱིཏབུདྡྷཱནཾ ཛིནཱནཾ དེསིཏཾ, ནིཀཱིལིཏཾ [ནིཀཱིལི༹ཏཾ (ཀ.)] བུདྡྷཔརམྤརཱགཏཾ;

པུབྦེནིཝཱསཱནུགཏཱཡ བུདྡྷིཡཱ, པཀཱསཡཱི ལོཀཧིཏཾ སདེཝཀེ.

‘‘པཱིཏིཔཱམོཛྫཛནནཾ, སོཀསལླཝིནོདནཾ;

སབྦསམྤཏྟིཔཊིལཱབྷཾ, ཙིཏྟཱིཀཏྭཱ སུཎཱཐ མེ.

‘‘མདནིམྨདནཾ སོཀནུདཾ, སཾསཱརཔརིམོཙནཾ;

སབྦདུཀྑཀྑཡཾ མགྒཾ, སཀྐཙྩཾ པཊིཔཛྫཐཱ’’ཏི.

ཀཔྤེ ¶ ཙ སཏསཧསྶེ, ཙཏུརོ ཙ ཨསངྑིཡེ;

ཨམརཾ ནཱམ ནགརཾ, དསྶནེཡྻཾ མནོརམཾ.

དསཧི སདྡེཧི ཨཝིཝིཏྟཾ, ཨནྣཔཱནསམཱཡུཏཾ;

ཧཏྠིསདྡཾ ཨསྶསདྡཾ, བྷེརིསངྑརཐཱནི ཙ;

ཁཱདཐ པིཝཐ ཙེཝ, ཨནྣཔཱནེན གྷོསིཏཾ.

ནགརཾ ¶ སབྦངྒསམྤནྣཾ, སབྦཀམྨམུཔཱགཏཾ;

སམིདྡྷཾ དེཝནགརཾཝ, ཨཱཝཱསཾ པུཉྙཀམྨིནཾ.

ནགརེ ཨམརཝཏིཡཱ, སུམེདྷོ ནཱམ བྲཱཧྨཎོ;

ཨནེཀཀོཊིསནྣིཙཡོ, པཧཱུཏདྷནདྷཉྙཝཱ.

ཨཛ྄ཛྷཱཡཀོ ¶ ¶ མནྟདྷརོ, ཏིཎྞཾ ཝེདཱན པཱརགཱུ;

ལཀྑཎེ ཨིཏིཧཱསེ ཙ, སདྷམྨེ པཱརམིཾ གཏོ.

རཧོགཏོ ནིསཱིདིཏྭཱ, ཨེཝཾ ཙིནྟེསཧཾ ཏདཱ;

‘‘དུཀྑོ པུནབྦྷཝོ ནཱམ, སརཱིརསྶ ཙ བྷེདནཾ.

‘‘ཛཱཏིདྷམྨོ ཛརཱདྷམྨོ, བྱཱདྷིདྷམྨོ སཧཾ [ཙཧཾ (སཱི. སྱཱ.)] ཏདཱ;

ཨཛརཾ ཨམཏཾ ཁེམཾ, པརིཡེསིསྶཱམི ནིབྦུཏིཾ.

‘‘ཡཾནཱུནིམཾ པཱུཏིཀཱཡཾ, ནཱནཱཀུཎཔཔཱུརིཏཾ;

ཚཌྜཡིཏྭཱན གཙྪེཡྻཾ, ཨནཔེཀྑོ ཨནཏྠིཀོ.

‘‘ཨཏྠི ཧེཧིཏི སོ མགྒོ, ན སོ སཀྐཱ ན ཧེཏུཡེ;

པརིཡེསིསྶཱམི ཏཾ མགྒཾ, བྷཝཏོ པརིམུཏྟིཡཱ.

‘‘ཡཐཱཔི དུཀྑེ ཝིཛྫནྟེ, སུཁཾ ནཱམཔི ཝིཛྫཏི;

ཨེཝཾ བྷཝེ ཝིཛྫམཱནེ, ཝིབྷཝོཔི ཨིཙྪིཏབྦཀོ.

‘‘ཡཐཱཔི ཨུཎྷེ ཝིཛྫནྟེ, ཨཔརཾ ཝིཛྫཏི སཱིཏལཾ;

ཨེཝཾ ཏིཝིདྷགྒི ཝིཛྫནྟེ, ནིབྦཱནཾ ཨིཙྪིཏབྦཀཾ.

‘‘ཡཐཱཔི པཱཔེ ཝིཛྫནྟེ, ཀལྱཱཎམཔི ཝིཛྫཏི;

ཨེཝམེཝ ཛཱཏི ཝིཛྫནྟེ, ཨཛཱཏིཔིཙྪིཏབྦཀཾ.

‘‘ཡཐཱ གཱུཐགཏོ པུརིསོ, ཏལཱ༹ཀཾ དིསྭཱན པཱུརིཏཾ;

ན གཝེསཏི ཏཾ ཏལཱ༹ཀཾ, ན དོསོ ཏལཱ༹ཀསྶ སོ.

‘‘ཨེཝཾ ཀིལེསམལདྷོཝ, ཝིཛྫནྟེ ཨམཏནྟལེ༹;

ན གཝེསཏི ཏཾ ཏལཱ༹ཀཾ, ན དོསོ ཨམཏནྟལེ༹.

‘‘ཡཐཱ ཨརཱིཧི པརིརུདྡྷོ, ཝིཛྫནྟེ གམནམྤཐེ;

ན པལཱཡཏི སོ པུརིསོ, ན དོསོ ཨཉྫསསྶ སོ.

‘‘ཨེཝཾ ¶ ཀིལེསཔརིརུདྡྷོ, ཝིཛྫམཱནེ སིཝེ པཐེ;

ན གཝེསཏི ཏཾ མགྒཾ, ན དོསོ སིཝམཉྫསེ.

‘‘ཡཐཱཔི ¶ བྱཱདྷིཏོ པུརིསོ, ཝིཛྫམཱནེ ཏིཀིཙྪཀེ;

ན ཏིཀིཙྪཱཔེཏི ཏཾ བྱཱདྷིཾ, ན དོསོ སོ ཏིཀིཙྪཀེ.

‘‘ཨེཝཾ ¶ ཀིལེསབྱཱདྷཱིཧི, དུཀྑིཏོ པརིཔཱིལི༹ཏོ;

ན གཝེསཏི ཏཾ ཨཱཙརིཡཾ, ན དོསོ སོ ཝིནཱཡཀེ.

‘‘ཡཐཱཔི ཀུཎཔཾ པུརིསོ, ཀཎྛེ བནྡྷཾ ཛིགུཙྪིཡ;

མོཙཡིཏྭཱན གཙྪེཡྻ, སུཁཱི སེརཱི སཡཾཝསཱི.

‘‘ཏཐེཝིམཾ པཱུཏིཀཱཡཾ, ནཱནཱཀུཎཔསཉྩཡཾ;

ཚཌྜཡིཏྭཱན གཙྪེཡྻཾ, ཨནཔེཀྑོ ཨནཏྠིཀོ.

‘‘ཡཐཱ ཨུཙྩཱརཊྛཱནམྷི, ཀརཱིསཾ ནརནཱརིཡོ;

ཚཌྜཡིཏྭཱན གཙྪནྟི, ཨནཔེཀྑཱ ཨནཏྠིཀཱ.

‘‘ཨེཝམེཝཱཧཾ ཨིམཾ ཀཱཡཾ, ནཱནཱཀུཎཔཔཱུརིཏཾ;

ཚཌྜཡིཏྭཱན གཙྪིསྶཾ, ཝཙྩཾ ཀཏྭཱ ཡཐཱ ཀུཊིཾ.

‘‘ཡཐཱཔི ཛཛྫརཾ ནཱཝཾ, པལུགྒཾ ཨུདགཱཧིནིཾ [ཨུདཀགཱཧིཎིཾ (སཱི.), ཨུདཀགཱཧིནིཾ (སྱཱ.)];

སཱམཱི ཚཌྜེཏྭཱ གཙྪནྟི, ཨནཔེཀྑཱ ཨནཏྠིཀཱ.

‘‘ཨེཝམེཝཱཧཾ ¶ ཨིམཾ ཀཱཡཾ, ནཝཙྪིདྡཾ དྷུཝསྶཝཾ;

ཚཌྜཡིཏྭཱན གཙྪིསྶཾ, ཛིཎྞནཱཝཾཝ སཱམིཀཱ.

‘‘ཡཐཱཔི པུརིསོ ཙོརེཧི, གཙྪནྟོ བྷཎྜམཱདིཡ;

བྷཎྜཙྪེདབྷཡཾ དིསྭཱ, ཚཌྜཡིཏྭཱན གཙྪཏི.

‘‘ཨེཝམེཝ ཨཡཾ ཀཱཡོ, མཧཱཙོརསམོ ཝིཡ;

པཧཱཡིམཾ གམིསྶཱམི, ཀུསལཙྪེདནཱ བྷཡཱ’’.

ཨེཝཱཧཾ ¶ ཙིནྟཡིཏྭཱན, ནེཀཀོཊིསཏཾ དྷནཾ;

ནཱཐཱནཱཐཱནཾ དཏྭཱན, ཧིམཝནྟམུཔཱགམིཾ.

ཧིམཝནྟསྶཱཝིདཱུརེ, དྷམྨིཀོ ནཱམ པབྦཏོ;

ཨསྶམོ སུཀཏོ མཡ྄ཧཾ, པཎྞསཱལཱ སུམཱཔིཏཱ.

ཙངྐམཾ ཏཏྠ མཱཔེསིཾ, པཉྩདོསཝིཝཛྫིཏཾ;

ཨཊྛགུཎསམཱུཔེཏཾ, ཨབྷིཉྙཱབལམཱཧརིཾ.

སཱཊཀཾ པཛཧིཾ ཏཏྠ, ནཝདོསམུཔཱགཏཾ;

ཝཱཀཙཱིརཾ ནིཝཱསེསིཾ, དྭཱདསགུཎམུཔཱགཏཾ.

ཨཊྛདོསསམཱཀིཎྞཾ ¶ ¶ , པཛཧིཾ པཎྞསཱལཀཾ;

ཨུཔཱགམིཾ རུཀྑམཱུལཾ, གུཎེ དསཧུཔཱགཏཾ.

ཝཱཔིཏཾ རོཔིཏཾ དྷཉྙཾ, པཛཧིཾ ནིརཝསེསཏོ;

ཨནེཀགུཎསམྤནྣཾ, པཝཏྟཕལམཱདིཡིཾ.

ཏཏྠཔྤདྷཱནཾ པདཧིཾ, ནིསཛྫཊྛཱནཙངྐམེ;

ཨབྦྷནྟརམྷི སཏྟཱཧེ, ཨབྷིཉྙཱབལཔཱཔུཎིཾ.

ཨེཝཾ མེ སིདྡྷིཔྤཏྟསྶ, ཝསཱིབྷཱུཏསྶ སཱསནེ;

དཱིཔངྐརོ ནཱམ ཛིནོ, ཨུཔྤཛྫི ལོཀནཱཡཀོ.

ཨུཔྤཛྫནྟེ ཙ ཛཱཡནྟེ, བུཛ྄ཛྷནྟེ དྷམྨདེསནེ;

ཙཏུརོ ནིམིཏྟེ ནཱདྡསཾ, ཛྷཱནརཏིསམཔྤིཏོ.

པཙྩནྟདེསཝིསཡེ, ནིམནྟེཏྭཱ ཏཐཱགཏཾ;

ཏསྶ ཨཱགམནཾ མགྒཾ, སོདྷེནྟི ཏུཊྛམཱནསཱ.

ཨཧཾ ¶ ཏེན སམཡེན, ནིཀྑམིཏྭཱ སཀསྶམཱ;

དྷུནནྟོ ཝཱཀཙཱིརཱནི, གཙྪཱམི ཨམྦརེ ཏདཱ.

ཝེདཛཱཏཾ ཛནཾ དིསྭཱ, ཏུཊྛཧཊྛཾ པམོདིཏཾ;

ཨོརོཧིཏྭཱན གགནཱ, མནུསྶེ པུཙྪི ཏཱཝདེ.

‘‘ཏུཊྛཧཊྛོ པམུདིཏོ, ཝེདཛཱཏོ མཧཱཛནོ;

ཀསྶ སོདྷཱིཡཏི མགྒོ, ཨཉྫསཾ ཝཊུམཱཡནཾ’’.

ཏེ མེ པུཊྛཱ ཝིཡཱཀཾསུ, ‘‘བུདྡྷོ ལོཀེ ཨནུཏྟརོ;

དཱིཔངྐརོ ནཱམ ཛིནོ, ཨུཔྤཛྫི ལོཀནཱཡཀོ;

ཏསྶ སོདྷཱིཡཏི མགྒོ, ཨཉྫསཾ ཝཊུམཱཡནཾ’’.

བུདྡྷོཏིཝཙནཾ [བུདྡྷོཏི མམ (སཱི. སྱཱ. ཀ.)] སུཏྭཱན, པཱིཏི ཨུཔྤཛྫི ཏཱཝདེ;

བུདྡྷོ བུདྡྷོཏི ཀཐཡནྟོ, སོམནསྶཾ པཝེདཡིཾ.

ཏཏྠ ཋཏྭཱ ཝིཙིནྟེསིཾ, ཏུཊྛོ སཾཝིགྒམཱནསོ;

‘‘ཨིདྷ ¶ བཱིཛཱནི རོཔིསྶཾ, ཁཎོ ཝེ མཱ ཨུཔཙྩགཱ.

‘‘ཡདི བུདྡྷསྶ སོདྷེཐ, ཨེཀོཀཱསཾ དདཱཐ མེ;

ཨཧམྤི སོདྷཡིསྶཱམི, ཨཉྫསཾ ཝཊུམཱཡནཾ’’.

ཨདཾསུ ¶ ཏེ མམོཀཱསཾ, སོདྷེཏུཾ ཨཉྫསཾ ཏདཱ;

བུདྡྷོ བུདྡྷོཏི ཙིནྟེནྟོ, མགྒཾ སོདྷེམཧཾ ཏདཱ.

ཨནིཊྛིཏེ ¶ མམོཀཱསེ, དཱིཔངྐརོ མཧཱམུནི;

ཙཏཱུཧི སཏསཧསྶེཧི, ཚལ༹བྷིཉྙེཧི ཏཱདིཧི;

ཁཱིཎཱསཝེཧི ཝིམལེཧི, པཊིཔཛྫི ཨཉྫསཾ ཛིནོ.

པཙྩུགྒམནཱ ¶ ཝཏྟནྟི, ཝཛྫནྟི བྷེརིཡོ བཧཱུ;

ཨཱམོདིཏཱ ནརམརཱུ, སཱདྷུཀཱརཾ པཝཏྟཡུཾ.

དེཝཱ མནུསྶེ པསྶནྟི, མནུསྶཱཔི ཙ དེཝཏཱ;

ཨུབྷོཔི ཏེ པཉྫལིཀཱ, ཨནུཡནྟི ཏཐཱགཏཾ.

དེཝཱ དིབྦེཧི ཏུརིཡེཧི, མནུསྶཱ མཱནུསེཧི ཙ [མཱནུསྶཀེཧི ཙ མཱནུསཀེཧི ཙ (སྱཱ. ཀ.)];

ཨུབྷོཔི ཏེ ཝཛྫཡནྟཱ, ཨནུཡནྟི ཏཐཱགཏཾ.

དིབྦཾ མནྡཱརཝཾ པུཔྥཾ, པདུམཾ པཱརིཚཏྟཀཾ;

དིསོདིསཾ ཨོཀིརནྟི, ཨཱཀཱསནབྷགཏཱ མརཱུ.

དིབྦཾ ཙནྡནཙུཎྞཉྩ, ཝརགནྡྷཉྩ ཀེཝལཾ;

དིསོདིསཾ ཨོཀིརནྟི, ཨཱཀཱསནབྷགཏཱ [ཨཱཀཱསེ ནབྷགཱ (སྱཱ.)] མརཱུ.

ཙམྤཀཾ སརལཾ ནཱིཔཾ, ནཱགཔུནྣཱགཀེཏཀཾ;

དིསོདིསཾ ཨུཀྑིཔནྟི, བྷཱུམིཏལགཏཱ ནརཱ.

ཀེསེ མུཉྩིཏྭཱཧཾ ཏཏྠ, ཝཱཀཙཱིརཉྩ ཙམྨཀཾ;

ཀལལེ པཏྠརིཏྭཱན, ཨཝཀུཛྫོ ནིཔཛྫཧཾ.

‘‘ཨཀྐམིཏྭཱན མཾ བུདྡྷོ, སཧ སིསྶེཧི གཙྪཏུ;

མཱ ནཾ ཀལལེ ཨཀྐམིཏྠ, ཧིཏཱཡ མེ བྷཝིསྶཏི’’.

པཐཝིཡཾ ནིཔནྣསྶ, ཨེཝཾ མེ ཨཱསི ཙེཏསོ;

‘‘ཨིཙྪམཱནོ ཨཧཾ ཨཛྫ, ཀིལེསེ ཛྷཱཔཡེ མམ.

‘‘ཀིཾ མེ ཨཉྙཱཏཝེསེན, དྷམྨཾ སཙྪིཀཏེནིདྷ;

སབྦཉྙུཏཾ པཱཔུཎིཏྭཱ, བུདྡྷོ ཧེསྶཾ སདེཝཀེ.

‘‘ཀིཾ ¶ མེ ཨེཀེན ཏིཎྞེན, པུརིསེན ཐཱམདསྶིནཱ;

སབྦཉྙུཏཾ པཱཔུཎིཏྭཱ, སནྟཱརེསྶཾ སདེཝཀཾ.

‘‘ཨིམིནཱ ¶ མེ ཨདྷིཀཱརེན, ཀཏེན པུརིསུཏྟམེ;

སབྦཉྙུཏཾ པཱཔུཎིཏྭཱ, ཏཱརེམི ཛནཏཾ བཧུཾ.

‘‘སཾསཱརསོཏཾ ཚིནྡིཏྭཱ, ཝིདྡྷཾསེཏྭཱ ཏཡོ བྷཝེ;

དྷམྨནཱཝཾ སམཱརུཡ྄ཧ, སནྟཱརེསྶཾ སདེཝཀཾ’’.

མནུསྶཏྟཾ ¶ ལིངྒསམྤཏྟི, ཧེཏུ སཏྠཱརདསྶནཾ;

པབྦཛྫཱ གུཎསམྤཏྟི, ཨདྷིཀཱརོ ཙ ཚནྡཏཱ;

ཨཊྛདྷམྨསམོདྷཱནཱ, ཨབྷིནཱིཧཱརོ སམིཛ྄ཛྷཏི.

དཱིཔངྐརོ ལོཀཝིདཱུ, ཨཱཧུཏཱིནཾ པཊིགྒཧོ;

ཨུསྶཱིསཀེ མཾ ཋཏྭཱན, ཨིདཾ ཝཙནམབྲཝི.

‘‘པསྶཐ ཨིམཾ ཏཱཔསཾ, ཛཊིལཾ ཨུགྒཏཱཔནཾ;

ཨཔརིམེཡྻིཏོ ¶ ཀཔྤེ, བུདྡྷོ ལོཀེ བྷཝིསྶཏི.

‘‘ཨཧུ ཀཔིལཝ྄ཧཡཱ རམྨཱ, ནིཀྑམིཏྭཱ ཏཐཱགཏོ;

པདྷཱནཾ པདཧིཏྭཱན, ཀཏྭཱ དུཀྐརཀཱརིཀཾ.

‘‘ཨཛཔཱལརུཀྑམཱུལསྨིཾ, ནིསཱིདིཏྭཱ ཏཐཱགཏོ;

ཏཏྠ པཱཡཱསཾ པགྒཡ྄ཧ, ནེརཉྫརམུཔེཧིཏི.

‘‘ནེརཉྫརཱཡ ཏཱིརམྷི, པཱཡཱསཾ ཨད སོ ཛིནོ;

པཊིཡཏྟཝརམགྒེན, བོདྷིམཱུལམུཔེཧིཏི.

‘‘ཏཏོ པདཀྑིཎཾ ཀཏྭཱ, བོདྷིམཎྜཾ ཨནུཏྟརོ [ཨནུཏྟརཾ (སྱཱ. ཀཾ.)];

ཨསྶཏྠརུཀྑམཱུལམྷི, བུཛ྄ཛྷིསྶཏི མཧཱཡསོ.

‘‘ཨིམསྶ ཛནིཀཱ མཱཏཱ, མཱཡཱ ནཱམ བྷཝིསྶཏི;

པིཏཱ སུདྡྷོདནོ ནཱམ, ཨཡཾ ཧེསྶཏི གོཏམོ.

‘‘ཨནཱསཝཱ ཝཱིཏརཱགཱ, སནྟཙིཏྟཱ སམཱཧིཏཱ;

ཀོལིཏོ ¶ ཨུཔཏིསྶོ ཙ, ཨགྒཱ ཧེསྶནྟི སཱཝཀཱ;

ཨཱནནྡོ ནཱམུཔཊྛཱཀོ, ཨུཔཊྛིསྶཏིམཾ [ཨུཔཊྛིསྶཏི ཏཾ (སཱི.)] ཛིནཾ.

‘‘ཁེམཱ ཨུཔྤལཝཎྞཱ ཙ, ཨགྒཱ ཧེསྶནྟི སཱཝིཀཱ;

ཨནཱསཝཱ ཝཱིཏརཱགཱ, སནྟཙིཏྟཱ སམཱཧིཏཱ;

བོདྷི ཏསྶ བྷགཝཏོ, ཨསྶཏྠོཏི པཝུཙྩཏི.

‘‘ཙིཏྟོ ¶ ཙ ཧཏྠཱལ༹ཝཀོ [ཧཏྠཱལཝཀོ (སཱི.)], ཨགྒཱ ཧེསྶནྟུཔཊྛཀཱ;

ཨུཏྟརཱ ནནྡམཱཏཱ ཙ, ཨགྒཱ ཧེསྶནྟུཔཊྛིཀཱ’’.

ཨིདཾ སུཏྭཱན ཝཙནཾ, ཨསམསྶ མཧེསིནོ;

ཨཱམོདིཏཱ ནརམརཱུ, བུདྡྷབཱིཛཾ ཀིར [བུདྡྷབཱིཛངྐུརོ (སཱི. སྱཱ.)] ཨཡཾ.

ཨུཀྐུཊྛིསདྡཱ ཝཏྟནྟི, ཨཔྥོཊེནྟི [ཨཔྥོཋེནྟི (སཱི.)] ཧསནྟི ཙ;

ཀཏཉྫལཱི ནམསྶནྟི, དསསཧསྶཱི སདེཝཀཱ.

‘‘ཡདིམསྶ ¶ ལོཀནཱཐསྶ, ཝིརཛ྄ཛྷིསྶཱམ སཱསནཾ;

ཨནཱགཏམྷི ཨདྡྷཱནེ, ཧེསྶཱམ སམྨུཁཱ ཨིམཾ.

‘‘ཡཐཱ མནུསྶཱ ནདིཾ ཏརནྟཱ, པཊིཏིཏྠཾ ཝིརཛ྄ཛྷིཡ;

ཧེཊྛཱཏིཏྠེ གཧེཏྭཱན, ཨུཏྟརནྟི མཧཱནདིཾ.

‘‘ཨེཝམེཝ མཡཾ སབྦེ, ཡདི མུཉྩཱམིམཾ ཛིནཾ;

ཨནཱགཏམྷི ཨདྡྷཱནེ, ཧེསྶཱམ སམྨུཁཱ ཨིམཾ’’.

དཱིཔངྐརོ ¶ ལོཀཝིདཱུ, ཨཱཧུཏཱིནཾ པཊིགྒཧོ;

མམ ཀམྨཾ པཀིཏྟེཏྭཱ, དཀྑིཎཾ པཱདམུདྡྷརི.

ཡེ ཏཏྠཱསུཾ ཛིནཔུཏྟཱ, པདཀྑིཎམཀཾསུ [སབྦེ པདཀྑིཎམཀཾསུ (སྱཱ. ཀ.)] མཾ;

དེཝཱ མནུསྶཱ ཨསུརཱ ཙ, ཨབྷིཝཱདེཏྭཱན པཀྐམུཾ.

དསྶནཾ མེ ཨཏིཀྐནྟེ, སསངྒྷེ ལོཀནཱཡཀེ;

སཡནཱ ཝུཊྛཧིཏྭཱན, པལླངྐཾ ཨཱབྷུཛིཾ ཏདཱ.

སུཁེན སུཁིཏོ ཧོམི, པཱམོཛྫེན པམོདིཏོ;

པཱིཏིཡཱ ཙ ཨབྷིསྶནྣོ, པལླངྐཾ ཨཱབྷུཛིཾ ཏདཱ.

པལླངྐེན ནིསཱིདིཏྭཱ, ཨེཝཾ ཙིནྟེསཧཾ ཏདཱ;

‘‘ཝསཱིབྷཱུཏོ ¶ ཨཧཾ ཛྷཱནེ, ཨབྷིཉྙཱསུ པཱརམིཾགཏོ [ཨབྷིཉྙཱཔཱརམིཾ གཏོ (སཱི.)].

‘‘སཧསྶིཡམྷི ལོཀམྷི, ཨིསཡོ ནཏྠི མེ སམཱ;

ཨསམོ ཨིདྡྷིདྷམྨེསུ, ཨལབྷིཾ ཨཱིདིསཾ སུཁཾ.

‘‘པལླངྐཱབྷུཛནེ མཡ྄ཧཾ, དསསཧསྶཱདྷིཝཱསིནོ;

མཧཱནཱདཾ པཝཏྟེསུཾ, ‘དྷུཝཾ བུདྡྷོ བྷཝིསྶསི.

‘‘‘ཡཱ ¶ པུབྦེ བོདྷིསཏྟཱནཾ, པལླངྐཝརམཱབྷུཛེ;

ནིམིཏྟཱནི པདིསྶནྟི, ཏཱནི ཨཛྫ པདིསྶརེ.

‘‘‘སཱིཏཾ བྱཔགཏཾ ཧོཏི, ཨུཎྷཉྩ ཨུཔསམྨཏི;

ཏཱནི ཨཛྫ པདིསྶནྟི, དྷུཝཾ བུདྡྷོ བྷཝིསྶསི.

‘‘‘དསསཧསྶཱི ལོཀདྷཱཏཱུ, ནིསྶདྡཱ ཧོནྟི ནིརཱཀུལཱ;

ཏཱནི ཨཛྫ པདིསྶནྟི, དྷུཝཾ བུདྡྷོ བྷཝིསྶསི.

‘‘‘མཧཱཝཱཏཱ ¶ ན ཝཱཡནྟི, ན སནྡནྟི སཝནྟིཡོ;

ཏཱནི ཨཛྫ པདིསྶནྟི, དྷུཝཾ བུདྡྷོ བྷཝིསྶསི.

‘‘‘ཐལཛཱ ¶ དཀཛཱ པུཔྥཱ, སབྦེ པུཔྥནྟི ཏཱཝདེ;

ཏེཔཛྫ པུཔྥིཏཱ [པུཔྥིཏཱནི (ཨཊྛ.)] སབྦེ, དྷུཝཾ བུདྡྷོ བྷཝིསྶསི.

‘‘‘ལཏཱ ཝཱ ཡདི ཝཱ རུཀྑཱ, ཕལབྷཱརཱ ཧོནྟི ཏཱཝདེ;

ཏེཔཛྫ ཕལིཏཱ སབྦེ, དྷུཝཾ བུདྡྷོ བྷཝིསྶསི.

‘‘‘ཨཱཀཱསཊྛཱ ཙ བྷཱུམཊྛཱ, རཏནཱ ཛོཏནྟི ཏཱཝདེ;

ཏེཔཛྫ རཏནཱ ཛོཏནྟི, དྷུཝཾ བུདྡྷོ བྷཝིསྶསི.

‘‘‘མཱནུསྶཀཱ ཙ དིབྦཱ ཙ, ཏུརིཡཱ ཝཛྫནྟི ཏཱཝདེ;

ཏེཔཛྫུབྷོ ཨབྷིརཝནྟི, དྷུཝཾ བུདྡྷོ བྷཝིསྶསི.

‘‘‘ཝིཙིཏྲཔུཔྥཱ གགནཱ, ཨབྷིཝསྶནྟི ཏཱཝདེ;

ཏེཔི ཨཛྫ པཝསྶནྟི, དྷུཝཾ བུདྡྷོ བྷཝིསྶསི.

‘‘‘མཧཱསམུདྡོ ཨཱབྷུཛཏི, དསསཧསྶཱི པཀམྤཏི;

ཏེཔཛྫུབྷོ ཨབྷིརཝནྟི, དྷུཝཾ བུདྡྷོ བྷཝིསྶསི.

‘‘‘ནིརཡེཔི དསསཧསྶེ, ཨགྒཱི ནིབྦནྟི ཏཱཝདེ;

ཏེཔཛྫ ནིབྦུཏཱ ཨགྒཱི, དྷུཝཾ བུདྡྷོ བྷཝིསྶསི.

‘‘‘ཝིམལོ ཧོཏི སཱུརིཡོ, སབྦཱ དིསྶནྟི ཏཱརཀཱ;

ཏེཔི ཨཛྫ པདིསྶནྟི, དྷུཝཾ བུདྡྷོ བྷཝིསྶསི.

‘‘‘ཨནོཝཊྛེན [ཨནོཝུཊྛེན (སྱཱ. ཀ.)] ཨུདཀཾ, མཧིཡཱ ཨུབྦྷིཛྫི ཏཱཝདེ;

ཏམྤཛྫུབྦྷིཛྫཏེ མཧིཡཱ, དྷུཝཾ བུདྡྷོ བྷཝིསྶསི.

‘‘‘ཏཱརཱགཎཱ ¶ ¶ ཝིརོཙནྟི, ནཀྑཏྟཱ གགནམཎྜལེ;

ཝིསཱཁཱ ཙནྡིམཱ ཡུཏྟཱ, དྷུཝཾ བུདྡྷོ བྷཝིསྶསི.

‘‘‘བིལཱསཡཱ དརཱིསཡཱ, ནིཀྑམནྟི སཀཱསཡཱ;

ཏེཔཛྫ ཨཱསཡཱ ཚུདྡྷཱ, དྷུཝཾ བུདྡྷོ བྷཝིསྶསི.

‘‘‘ན ཧོནྟི ཨརཏཱི སཏྟཱནཾ, སནྟུཊྛཱ ཧོནྟི ཏཱཝདེ;

ཏེཔཛྫ སབྦེ སནྟུཊྛཱ, དྷུཝཾ བུདྡྷོ བྷཝིསྶསི.

‘‘‘རོགཱ ཏདུཔསམྨནྟི, ཛིགྷཙྪཱ ཙ ཝིནསྶཏི;

ཏཱནི ¶ ཨཛྫ པདིསྶནྟི, དྷུཝཾ བུདྡྷོ བྷཝིསྶསི.

‘‘‘རཱགོ ཏདཱ ཏནུ ཧོཏི, དོསོ མོཧོ ཝིནསྶཏི;

ཏེཔཛྫ ཝིགཏཱ སབྦེ, དྷུཝཾ བུདྡྷོ བྷཝིསྶསི.

‘‘‘བྷཡཾ ¶ ཏདཱ ན བྷཝཏི, ཨཛྫཔེཏཾ པདིསྶཏི;

ཏེན ལིངྒེན ཛཱནཱམ, དྷུཝཾ བུདྡྷོ བྷཝིསྶསི.

‘‘‘རཛོནུདྡྷཾསཏི ཨུདྡྷཾ, ཨཛྫཔེཏཾ པདིསྶཏི;

ཏེན ལིངྒེན ཛཱནཱམ, དྷུཝཾ བུདྡྷོ བྷཝིསྶསི.

‘‘‘ཨནིཊྛགནྡྷོ པཀྐམཏི, དིབྦགནྡྷོ པཝཱཡཏི;

སོཔཛྫ ཝཱཡཏི གནྡྷོ, དྷུཝཾ བུདྡྷོ བྷཝིསྶསི.

‘‘‘སབྦེ དེཝཱ པདིསྶནྟི, ཋཔཡིཏྭཱ ཨརཱུཔིནོ;

ཏེཔཛྫ སབྦེ དིསྶནྟི, དྷུཝཾ བུདྡྷོ བྷཝིསྶསི.

‘‘‘ཡཱཝཏཱ ནིརཡཱ ནཱམ, སབྦེ དིསྶནྟི ཏཱཝདེ;

ཏེཔཛྫ སབྦེ དིསྶནྟི, དྷུཝཾ བུདྡྷོ བྷཝིསྶསི.

‘‘‘ཀུཊྚཱ ¶ [ཀུཌྜཱ (སཱི.)] ཀཝཱཊཱ སེལཱ ཙ, ན ཧོནྟཱཝརཎཱ ཏདཱ;

ཨཱཀཱསབྷཱུཏཱ ཏེཔཛྫ, དྷུཝཾ བུདྡྷོ བྷཝིསྶསི.

‘‘‘ཙུཏཱི ཙ ཨུཔཔཏྟི ཙ, ཁཎེ ཏསྨིཾ ན ཝིཛྫཏི;

ཏཱནིཔཛྫ པདིསྶནྟི, དྷུཝཾ བུདྡྷོ བྷཝིསྶསི.

‘‘‘དལ༹ྷཾ པགྒཎྷ ཝཱིརིཡཾ, མཱ ནིཝཏྟ ཨབྷིཀྐམ;

མཡམྤེཏཾ ཝིཛཱནཱམ, དྷུཝཾ བུདྡྷོ བྷཝིསྶསི’’’.

བུདྡྷསྶ ¶ ཝཙནཾ སུཏྭཱ, དསསཧསྶཱིནཙཱུབྷཡཾ;

ཏུཊྛཧཊྛོ པམོདིཏོ, ཨེཝཾ ཙིནྟེསཧཾ ཏདཱ.

‘‘ཨདྭེཛ྄ཛྷཝཙནཱ བུདྡྷཱ, ཨམོགྷཝཙནཱ ཛིནཱ;

ཝིཏཐཾ ནཏྠི བུདྡྷཱནཾ, དྷུཝཾ བུདྡྷོ བྷཝཱམཧཾ.

‘‘ཡཐཱ ཁིཏྟཾ ནབྷེ ལེཌྜུ, དྷུཝཾ པཏཏི བྷཱུམིཡཾ;

ཏཐེཝ བུདྡྷསེཊྛཱནཾ, ཝཙནཾ དྷུཝསསྶཏཾ;

ཝིཏཐཾ ནཏྠི བུདྡྷཱནཾ, དྷུཝཾ བུདྡྷོ བྷཝཱམཧཾ.

‘‘ཡཐཱཔི སབྦསཏྟཱནཾ, མརཎཾ དྷུཝསསྶཏཾ;

ཏཐེཝ བུདྡྷསེཊྛཱནཾ, ཝཙནཾ དྷུཝསསྶཏཾ;

ཝིཏཐཾ ནཏྠི བུདྡྷཱནཾ, དྷུཝཾ བུདྡྷོ བྷཝཱམཧཾ.

‘‘ཡཐཱ རཏྟིཀྑཡེ པཏྟེ, སཱུརིཡུགྒམནཾ དྷུཝཾ;

ཏཐེཝ བུདྡྷསེཊྛཱནཾ, ཝཙནཾ དྷུཝསསྶཏཾ;

ཝིཏཐཾ ནཏྠི བུདྡྷཱནཾ, དྷུཝཾ བུདྡྷོ བྷཝཱམཧཾ.

‘‘ཡཐཱ ¶ ནིཀྑནྟསཡནསྶ, སཱིཧསྶ ནདནཾ དྷུཝཾ;

ཏཐེཝ བུདྡྷསེཊྛཱནཾ, ཝཙནཾ དྷུཝསསྶཏཾ;

ཝིཏཐཾ ནཏྠི བུདྡྷཱནཾ, དྷུཝཾ བུདྡྷོ བྷཝཱམཧཾ.

‘‘ཡཐཱ ¶ ཨཱཔནྣསཏྟཱནཾ, བྷཱརམོརོཔནཾ དྷུཝཾ;

ཏཐེཝ ¶ བུདྡྷསེཊྛཱནཾ, ཝཙནཾ དྷུཝསསྶཏཾ;

ཝིཏཐཾ ནཏྠི བུདྡྷཱནཾ, དྷུཝཾ བུདྡྷོ བྷཝཱམཧཾ.

‘‘ཧནྡ བུདྡྷཀརེ དྷམྨེ, ཝིཙིནཱམི ཨིཏོ ཙིཏོ;

ཨུདྡྷཾ ཨདྷོ དས དིསཱ, ཡཱཝཏཱ དྷམྨདྷཱཏུཡཱ’’.

ཝིཙིནནྟོ ཏདཱ དཀྑིཾ, པཋམཾ དཱནཔཱརམིཾ;

པུབྦཀེཧི མཧེསཱིཧི, ཨནུཙིཎྞཾ མཧཱཔཐཾ.

‘‘ཨིམཾ ཏྭཾ པཋམཾ ཏཱཝ, དལ༹ྷཾ ཀཏྭཱ སམཱདིཡ;

དཱནཔཱརམིཏཾ གཙྪ, ཡདི བོདྷིཾ པཏྟུམིཙྪསི.

‘‘ཡཐཱཔི ཀུམྦྷོ སམྤུཎྞོ, ཡསྶ ཀསྶཙི ཨདྷོ ཀཏོ;

ཝམཏེ ཝུདཀཾ ནིསྶེསཾ, ན ཏཏྠ པརིརཀྑཏི.

‘‘ཏཐེཝ ¶ ཡཱཙཀེ དིསྭཱ, ཧཱིནམུཀྐཊྛམཛ྄ཛྷིམེ;

དདཱཧི དཱནཾ ནིསྶེསཾ, ཀུམྦྷོ ཝིཡ ཨདྷོ ཀཏོ.

‘‘ནཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ’’.

ཝིཙིནནྟོ ཏདཱ དཀྑིཾ, དུཏིཡཾ སཱིལཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ དུཏིཡཾ ཏཱཝ, དལ༹ྷཾ ཀཏྭཱ སམཱདིཡ;

སཱིལཔཱརམིཏཾ གཙྪ, ཡདི བོདྷིཾ པཏྟུམིཙྪསི.

‘‘ཡཐཱཔི ཙམརཱི ཝཱལཾ, ཀིསྨིཉྩི པཊིལགྒིཏཾ;

ཨུཔེཏི མརཎཾ ཏཏྠ, ན ཝིཀོཔེཏི ཝཱལདྷིཾ.

‘‘ཏཐེཝ ¶ ཏྭཾ ཙཏཱུསུ བྷཱུམཱིསུ, སཱིལཱནི པརིཔཱུརཡ;

པརིརཀྑ སབྦདཱ སཱིལཾ, ཙམརཱི ཝིཡ ཝཱལདྷིཾ.

‘‘ནཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ’’.

ཝིཙིནནྟོ ¶ ཏདཱ དཀྑིཾ, ཏཏིཡཾ ནེཀྑམྨཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ ཏཏིཡཾ ཏཱཝ, དལ༹ྷཾ ཀཏྭཱ སམཱདིཡ;

ནེཀྑམྨཔཱརམིཏཾ གཙྪ, ཡདི བོདྷིཾ པཏྟུམིཙྪསི.

‘‘ཡཐཱ ཨནྡུགྷརེ པུརིསོ, ཙིརཝུཏྠོ དུཁཊྚིཏོ;

ན ཏཏྠ རཱགཾ ཛནེསི, མུཏྟིཾཡེཝ གཝེསཏི.

‘‘ཏཐེཝ ཏྭཾ སབྦབྷཝེ, པསྶ ཨནྡུགྷརེ ཝིཡ;

ནེཀྑམྨཱབྷིམུཁོ ཧོཧི, བྷཝཏོ པརིམུཏྟིཡཱ.

‘‘ནཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ’’.

ཝིཙིནནྟོ ཏདཱ དཀྑིཾ, ཙཏུཏྠཾ པཉྙཱཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ ཙཏུཏྠཾ ཏཱཝ, དལ༹ྷཾ ཀཏྭཱ སམཱདིཡ;

པཉྙཱཔཱརམིཏཾ ¶ གཙྪ, ཡདི བོདྷིཾ པཏྟུམིཙྪསི.

‘‘ཡཐཱཔི ¶ བྷིཀྑུ བྷིཀྑནྟོ, ཧཱིནམུཀྐཊྛམཛ྄ཛྷིམེ;

ཀུལཱནི ན ཝིཝཛྫེནྟོ, ཨེཝཾ ལབྷཏི ཡཱཔནཾ.

‘‘ཏཐེཝ ¶ ཏྭཾ སབྦཀཱལཾ, པརིཔུཙྪཾ བུདྷཾ ཛནཾ;

པཉྙཱཔཱརམིཏཾ གནྟྭཱ, སམྦོདྷིཾ པཱཔུཎིསྶསི.

‘‘ནཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ’’.

ཝིཙིནནྟོ ཏདཱ དཀྑིཾ, པཉྩམཾ ཝཱིརིཡཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ པཉྩམཾ ཏཱཝ, དལ༹ྷཾ ཀཏྭཱ སམཱདིཡ;

ཝཱིརིཡཔཱརམིཏཾ གཙྪ, ཡདི བོདྷིཾ པཏྟུམིཙྪསི.

‘‘ཡཐཱཔི སཱིཧོ མིགརཱཛཱ, ནིསཛྫཊྛཱནཙངྐམེ;

ཨལཱིནཝཱིརིཡོ ཧོཏི, པགྒཧིཏམནོ སདཱ.

‘‘ཏཐེཝ ཏྭཾ [ཏྭཾཔི (སཱི.)] སབྦབྷཝེ, པགྒཎྷ ཝཱིརིཡཾ དལ༹ྷཾ;

ཝཱིརིཡཔཱརམིཏཾ གནྟྭཱ, སམྦོདྷིཾ པཱཔུཎིསྶསི.

‘‘ནཧེཏེ ¶ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ’’.

ཝིཙིནནྟོ ཏདཱ དཀྑིཾ, ཚཊྛམཾ ཁནྟིཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ ཚཊྛམཾ ཏཱཝ, དལ༹ྷཾ ཀཏྭཱ སམཱདིཡ;

ཏཏྠ ཨདྭེཛ྄ཛྷམཱནསོ, སམྦོདྷིཾ པཱཔུཎིསྶསི.

‘‘ཡཐཱཔི པཐཝཱི ནཱམ, སུཙིམྤི ཨསུཙིམྤི ཙ;

སབྦཾ སཧཏི ནིཀྑེཔཾ, ན ཀརོཏི པཊིགྷཾ ཏཡཱ.

‘‘ཏཐེཝ ¶ ཏྭམྤི སབྦེསཾ, སམྨཱནཱཝམཱནཀྑམོ;

ཁནྟིཔཱརམིཏཾ གནྟྭཱ, སམྦོདྷིཾ པཱཔུཎིསྶསི.

‘‘ནཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ’’.

ཝིཙིནནྟོ ¶ ཏདཱ དཀྑིཾ, སཏྟམཾ སཙྩཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ སཏྟམཾ ཏཱཝ, དལ༹ྷཾ ཀཏྭཱ སམཱདིཡ;

ཏཏྠ ཨདྭེཛ྄ཛྷཝཙནོ, སམྦོདྷིཾ པཱཔུཎིསྶསི.

‘‘ཡཐཱཔི ཨོསདྷཱི ནཱམ, ཏུལཱབྷཱུཏཱ སདེཝཀེ;

སམཡེ ཨུཏུཝསྶེ ཝཱ, ན ཝོཀྐམཏི ཝཱིཐིཏོ.

‘‘ཏཐེཝ ཏྭམྤི སཙྩེསུ, མཱ ཝོཀྐམ ཧི ཝཱིཐིཏོ;

སཙྩཔཱརམིཏཾ གནྟྭཱ, སམྦོདྷིཾ པཱཔུཎིསྶསི.

‘‘ནཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ’’.

ཝིཙིནནྟོ ཏདཱ དཀྑིཾ, ཨཊྛམཾ ཨདྷིཊྛཱནཔཱརམིཾ;

པུབྦཀེཧི ¶ མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ ཨཊྛམཾ ཏཱཝ, དལ༹ྷཾ ཀཏྭཱ སམཱདིཡ;

ཏཏྠ ཏྭཾ ཨཙལོ ཧུཏྭཱ, སམྦོདྷིཾ པཱཔུཎིསྶསི.

‘‘ཡཐཱཔི པབྦཏོ སེལོ, ཨཙལོ སུཔྤཏིཊྛིཏོ;

ན ཀམྤཏི བྷུསཝཱཏེཧི, སཀཊྛཱནེཝ ཏིཊྛཏི.

‘‘ཏཐེཝ ¶ ¶ ཏྭམྤི ཨདྷིཊྛཱནེ, སབྦདཱ ཨཙལོ བྷཝ;

ཨདྷིཊྛཱནཔཱརམིཏཾ གནྟྭཱ, སམྦོདྷིཾ པཱཔུཎིསྶསི.

‘‘ནཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ’’.

ཝིཙིནནྟོ ཏདཱ དཀྑིཾ, ནཝམཾ མེཏྟཱཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ ནཝམཾ ཏཱཝ, དལ༹ྷཾ ཀཏྭཱ སམཱདིཡ;

མེཏྟཱཡ ཨསམོ ཧོཧི, ཡདི བོདྷིཾ པཏྟུམིཙྪསི.

‘‘ཡཐཱཔི ཨུདཀཾ ནཱམ, ཀལྱཱཎེ པཱཔཀེ ཛནེ;

སམཾ ཕརཏི སཱིཏེན, པཝཱཧེཏི རཛོམལཾ.

‘‘ཏཐེཝ ཏྭཾ ཧིཏཱཧིཏེ, སམཾ མེཏྟཱཡ བྷཱཝཡ;

མེཏྟཱཔཱརམིཏཾ གནྟྭཱ, སམྦོདྷིཾ པཱཔུཎིསྶསི.

‘‘ནཧེཏེ ¶ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ’’.

ཝིཙིནནྟོ ཏདཱ དཀྑིཾ, དསམཾ ཨུཔེཀྑཱཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ དསམཾ ཏཱཝ, དལ༹ྷཾ ཀཏྭཱ སམཱདིཡ;

ཏུལཱབྷཱུཏོ དལ༹ྷོ ཧུཏྭཱ, སམྦོདྷིཾ པཱཔུཎིསྶསི.

‘‘ཡཐཱཔི པཐཝཱི ནཱམ, ནིཀྑིཏྟཾ ཨསུཙིཾ སུཙིཾ;

ཨུཔེཀྑཏི ཨུབྷོཔེཏེ, ཀོཔཱནུནཡཝཛྫིཏཱ.

‘‘ཏཐེཝ ¶ ཏྭཾ སུཁདུཀྑེ, ཏུལཱབྷཱུཏོ སདཱ བྷཝ;

ཨུཔེཀྑཱཔཱརམིཏཾ གནྟྭཱ, སམྦོདྷིཾ པཱཔུཎིསྶསི.

‘‘ཨེཏྟཀཱཡེཝ ཏེ ལོཀེ, ཡེ དྷམྨཱ བོདྷིཔཱཙནཱ;

ཏཏུདྡྷཾ ནཏྠི ཨཉྙཏྲ, དལ༹ྷཾ ཏཏྠ པཏིཊྛཧ’’.

ཨིམེ དྷམྨེ སམྨསཏོ, སབྷཱཝསརསལཀྑཎེ;

དྷམྨཏེཛེན ཝསུདྷཱ, དསསཧསྶཱི པཀམྤཐ.

ཙལཏཱི རཝཏཱི པཐཝཱི, ཨུཙྪུཡནྟཾཝ པཱིལི༹ཏཾ;

ཏེལཡནྟེ ཡཐཱ ཙཀྐཾ, ཨེཝཾ ཀམྤཏི མེདནཱི.

ཡཱཝཏཱ པརིསཱ ཨཱསི, བུདྡྷསྶ པརིཝེསནེ;

པཝེདྷམཱནཱ སཱ ཏཏྠ, མུཙྪིཏཱ སེཏི བྷཱུམིཡཾ.

གྷཊཱནེཀསཧསྶཱནི, ཀུམྦྷཱིནཉྩ སཏཱ བཧཱུ;

སཉྩུཎྞམཐིཏཱ ཏཏྠ, ཨཉྙམཉྙཾ པགྷཊྚིཏཱ.

ཨུབྦིགྒཱ ¶ ཏསིཏཱ བྷཱིཏཱ, བྷནྟཱ བྱཱཐིཏམཱནསཱ;

མཧཱཛནཱ ¶ སམཱགམྨ, དཱིཔངྐརམུཔཱགམུཾ.

‘‘ཀིཾ བྷཝིསྶཏི ལོཀསྶ, ཀལྱཱཎམཐ པཱཔཀཾ;

སབྦོ ཨུཔདྡུཏོ ལོཀོ, ཏཾ ཝིནོདེཧི ཙཀྑུམ’’.

ཏེསཾ ཏདཱ སཉྙཔེསི, དཱིཔངྐརོ མཧཱམུནི;

‘‘ཝིསཊྛཱ ཧོཐ མཱ བྷེཐ [བྷཱཐ (སབྦཏྠ)], ཨིམསྨིཾ པཐཝིཀམྤནེ.

‘‘ཡམཧཾ ¶ ཨཛྫ བྱཱཀཱསིཾ, བུདྡྷོ ལོཀེ བྷཝིསྶཏི;

ཨེསོ སམྨསཏི དྷམྨཾ, པུབྦཀཾ ཛིནསེཝིཏཾ.

‘‘ཏསྶ ¶ སམྨསཏོ དྷམྨཾ, བུདྡྷབྷཱུམིཾ ཨསེསཏོ;

ཏེནཱཡཾ ཀམྤིཏཱ པཐཝཱི, དསསཧསྶཱི སདེཝཀེ’’.

བུདྡྷསྶ ཝཙནཾ སུཏྭཱ, མནོ ནིབྦཱཡི ཏཱཝདེ;

སབྦེ མཾ ཨུཔསངྐམྨ, པུནཱཔི ཨབྷིཝནྡིསུཾ.

སམཱདིཡིཏྭཱ བུདྡྷགུཎཾ, དལ༹ྷཾ ཀཏྭཱན མཱནསཾ;

དཱིཔངྐརཾ ནམསྶིཏྭཱ, ཨཱསནཱ ཝུཊྛཧིཾ ཏདཱ.

དིབྦཾ མཱནུསཀཾ པུཔྥཾ, དེཝཱ མཱནུསཀཱ ཨུབྷོ;

སམོཀིརནྟི པུཔྥེཧི, ཝུཊྛཧནྟསྶ ཨཱསནཱ.

ཝེདཡནྟི ཙ ཏེ སོཏྠིཾ, དེཝཱ མཱནུསཀཱ ཨུབྷོ;

‘‘མཧནྟཾ པཏྠིཏཾ ཏུཡ྄ཧཾ, ཏཾ ལབྷསྶུ ཡཐིཙྪིཏཾ.

‘‘སབྦཱིཏིཡོ ཝིཝཛྫནྟུ, སོཀོ རོགོ ཝིནསྶཏུ;

མཱ ཏེ བྷཝནྟྭནྟརཱཡཱ [བྷཝཏྭནྟརཱཡོ (སཱི. སྱཱ.)], ཕུས ཁིཔྤཾ བོདྷིམུཏྟམཾ.

‘‘ཡཐཱཔི སམཡེ པཏྟེ, པུཔྥནྟི པུཔྥིནོ དུམཱ;

ཏཐེཝ ཏྭཾ མཧཱཝཱིར, བུདྡྷཉཱཎེན པུཔྥསི.

‘‘ཡཐཱ ཡེ ཀེཙི སམྦུདྡྷཱ, པཱུརཡུཾ དས པཱརམཱི;

ཏཐེཝ ཏྭཾ མཧཱཝཱིར, པཱུརཡ དས པཱརམཱི.

‘‘ཡཐཱ ཡེ ཀེཙི སམྦུདྡྷཱ, བོདྷིམཎྜམྷི བུཛ྄ཛྷརེ;

ཏཐེཝ ཏྭཾ མཧཱཝཱིར, བུཛ྄ཛྷསྶུ ཛིནབོདྷིཡཾ.

‘‘ཡཐཱ ཡེ ཀེཙི སམྦུདྡྷཱ, དྷམྨཙཀྐཾ པཝཏྟཡུཾ;

ཏཐེཝ ཏྭཾ མཧཱཝཱིར, དྷམྨཙཀྐཾ པཝཏྟཡ.

‘‘པུཎྞམཱཡེ ¶ ¶ ཡཐཱ ཙནྡོ, པརིསུདྡྷོ ཝིརོཙཏི;

ཏཐེཝ ཏྭཾ པུཎྞམནོ, ཝིརོཙ དསསཧསྶིཡཾ.

‘‘རཱཧུམུཏྟོ ཡཐཱ སཱུརིཡོ, ཏཱཔེན ཨཏིརོཙཏི;

ཏཐེཝ ལོཀཱ མུཉྩིཏྭཱ, ཝིརོཙ སིརིཡཱ ཏུཝཾ.

‘‘ཡཐཱ ¶ ཡཱ ཀཱཙི ནདིཡོ, ཨོསརནྟི མཧོདདྷིཾ;

ཨེཝཾ སདེཝཀཱ ལོཀཱ, ཨོསརནྟུ ཏཝནྟིཀེ’’.

ཏེཧི ཐུཏཔྤསཏྠོ སོ, དས དྷམྨེ སམཱདིཡ;

ཏེ དྷམྨེ པརིཔཱུརེནྟོ, པཝནཾ པཱཝིསཱི ཏདཱཏི.

ཏདཱ ¶ ཏེ བྷོཛཡིཏྭཱན, སསངྒྷཾ ལོཀནཱཡཀཾ;

ཨུཔགཙྪུཾ སརཎཾ ཏསྶ, དཱིཔངྐརསྶ སཏྠུནོ.

སརཎཱགམནེ ཀཉྩི, ནིཝེསེསི ཏཐཱགཏོ;

ཀཉྩི པཉྩསུ སཱིལེསུ, སཱིལེ དསཝིདྷེ པརཾ.

ཀསྶཙི དེཏི སཱམཉྙཾ, ཙཏུརོ ཕལམུཏྟམེ;

ཀསྶཙི ཨསམེ དྷམྨེ, དེཏི སོ པཊིསམྦྷིདཱ.

ཀསྶཙི ཝརསམཱཔཏྟིཡོ, ཨཊྛ དེཏི ནརཱསབྷོ;

ཏིསྶོ ཀསྶཙི ཝིཛྫཱཡོ, ཚལ༹བྷིཉྙཱ པཝེཙྪཏི.

ཏེན ཡོགེན ཛནཀཱཡཾ, ཨོཝདཏི མཧཱམུནི;

ཏེན ཝིཏྠཱརིཀཾ ཨཱསི, ལོཀནཱཐསྶ སཱསནཾ.

མཧཱཧནུསབྷཀྑནྡྷོ ¶ , དཱིཔངྐརསྶ ནཱམཀོ;

བཧཱུ ཛནེ ཏཱརཡཏི, པརིམོཙེཏི དུགྒཏིཾ.

བོདྷནེཡྻཾ ཛནཾ དིསྭཱ, སཏསཧསྶེཔི ཡོཛནེ;

ཁཎེན ཨུཔགནྟྭཱན, བོདྷེཏི ཏཾ མཧཱམུནི.

པཋམཱབྷིསམཡེ ¶ བུདྡྷོ, ཀོཊིསཏམབོདྷཡི;

དུཏིཡཱབྷིསམཡེ ནཱཐོ, ནཝུཏིཀོཊིམབོདྷཡི.

ཡདཱ ཙ དེཝབྷཝནམྷི, བུདྡྷོ དྷམྨམདེསཡི;

ནཝུཏིཀོཊིསཧསྶཱནཾ, ཏཏིཡཱབྷིསམཡོ ཨཧུ.

སནྣིཔཱཏཱ ཏཡོ ཨཱསུཾ, དཱིཔངྐརསྶ སཏྠུནོ;

ཀོཊིསཏསཧསྶཱནཾ, པཋམོ ཨཱསི སམཱགམོ.

པུན ¶ ནཱརདཀཱུཊམྷི, པཝིཝེཀགཏེ ཛིནེ;

ཁཱིཎཱསཝཱ ཝཱིཏམལཱ, སམིཾསུ སཏཀོཊིཡོ.

ཡམྷི ཀཱལེ མཧཱཝཱིརོ, སུདསྶནསིལུཙྩཡེ;

ནཝཀོཊིསཧསྶེཧི, པཝཱརེསི མཧཱམུནི.

དསཝཱིསསཧསྶཱནཾ, དྷམྨཱབྷིསམཡོ ཨཧུ;

ཨེཀདྭིནྣཾ ཨབྷིསམཡཱ, གཎནཱཏོ ཨསངྑིཡཱ.

ཝིཏྠཱརིཀཾ བཱཧུཛཉྙཾ, ཨིདྡྷཾ ཕཱིཏཾ ཨཧཱུ ཏདཱ;

དཱིཔངྐརསྶ བྷགཝཏོ, སཱསནཾ སུཝིསོདྷིཏཾ.

ཙཏྟཱརི ¶ སཏསཧསྶཱནི, ཚལ༹བྷིཉྙཱ མཧིདྡྷིཀཱ;

དཱིཔངྐརཾ ལོཀཝིདུཾ, པརིཝཱརེནྟི སབྦདཱ.

ཡེ ཀེཙི ཏེན སམཡེན, ཛཧནྟི མཱནུསཾ བྷཝཾ;

ཨཔཏྟམཱནསཱ སེཁཱ, གརཧིཏཱ བྷཝནྟི ཏེ.

སུཔུཔྥིཏཾ པཱཝཙནཾ, ཨརཧནྟེཧི ཏཱདིཧི;

ཁཱིཎཱསཝེཧི ཝིམལེཧི, ཨུཔསོབྷཏི སབྦདཱ.

ནགརཾ རམྨཝཏཱི ནཱམ, སུདེཝོ ནཱམ ཁཏྟིཡོ;

སུམེདྷཱ ནཱམ ཛནིཀཱ, དཱིཔངྐརསྶ སཏྠུནོ.

དསཝསྶསཧསྶཱནི ¶ , ཨགཱརཾ ཨཛ྄ཛྷ སོ ཝསི [ཨཛ྄ཛྷཱཝསཱི ཛིནོ (སྱཱ. ཀ.)];

ཧཾསཱ ཀོཉྩཱ མཡཱུརཱ ཙ, ཏཡོ པཱསཱདམུཏྟམཱ.

ཏཱིཎིསཏསཧསྶཱནི, ནཱརིཡོ སམལངྐཏཱ;

པདུམཱ ནཱམ སཱ ནཱརཱི, ཨུསབྷཀྑནྡྷོ ཨཏྲཛོ.

ནིམིཏྟེ ཙཏུརོ དིསྭཱ, ཧཏྠིཡཱནེན ནིཀྑམི;

ཨནཱུནདསམཱསཱནི, པདྷཱནེ པདཧཱི ཛིནོ.

པདྷཱནཙཱརཾ ¶ ཙརིཏྭཱན, ཨབུཛ྄ཛྷི མཱནསཾ མུནི;

བྲཧྨུནཱ ཡཱཙིཏོ སནྟོ, དཱིཔངྐརོ མཧཱམུནི.

ཝཏྟི ཙཀྐཾ མཧཱཝཱིརོ, ནནྡཱརཱམེ སིརཱིགྷརེ [སིརཱིདྷརེ (སཱི.)];

ནིསིནྣོ སིརཱིསམཱུལམྷི, ཨཀཱ ཏིཏྠིཡམདྡནཾ.

སུམངྒལོ ¶ ཙ ཏིསྶོ ཙ, ཨཧེསུཾ ཨགྒསཱཝཀཱ;

སཱགཏོ [སོབྷིཏོ (ཀ.)] ནཱམུཔཊྛཱཀོ, དཱིཔངྐརསྶ སཏྠུནོ.

ནནྡཱ ¶ ཙེཝ སུནནྡཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, པིཔྥལཱིཏི པཝུཙྩཏི.

ཏཔུསྶབྷལླིཀཱ [ཏཔསྶུབྷལླིཀཱ (སཱི.)] ནཱམ, ཨཧེསུཾ ཨགྒུཔཊྛཀཱ;

སིརིམཱ ཀོཎཱ ཨུཔཊྛིཀཱ, དཱིཔངྐརསྶ སཏྠུནོ.

ཨསཱིཏིཧཏྠམུབྦེདྷོ, དཱིཔངྐརོ མཧཱམུནི;

སོབྷཏི དཱིཔརུཀྑོཝ, སཱལརཱཛཱཝ ཕུལླིཏོ.

སཏསཧསྶཝསྶཱནི, ཨཱཡུ ཏསྶ མཧེསིནོ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

ཛོཏཡིཏྭཱན སདྡྷམྨཾ, སནྟཱརེཏྭཱ མཧཱཛནཾ;

ཛལིཏྭཱ ཨགྒིཀྑནྡྷོཝ, ནིབྦུཏོ སོ སསཱཝཀོ.

སཱ ཙ ཨིདྡྷི སོ ཙ ཡསོ, ཏཱནི ཙ པཱདེསུ ཙཀྐརཏནཱནི;

སབྦཾ ཏམནྟརཧིཏཾ [སམནྟརཧིཏཾ (སཱི. སྱཱ. ཀ.)], ནནུ རིཏྟཱ སབྦསངྑཱརཱ [སབྦསངྑཱརཱཏི (སབྦཏྠ)].

དཱིཔངྐརོ ཛིནོ སཏྠཱ, ནནྡཱརཱམམྷི ནིབྦུཏོ;

ཏཏྠེཝསྶ ཛིནཐཱུཔོ, ཚཏྟིཾསུབྦེདྷཡོཛནོཏི.

དཱིཔངྐརསྶ ¶ ¶ ཨཔརེན, ཀོཎྜཉྙོ ནཱམ ནཱཡཀོ;

ཨནནྟཏེཛོ ཨམིཏཡསོ, ཨཔྤམེཡྻོ དུརཱསདོ.

དྷརཎཱུཔམོ ¶ ཁམནེན, སཱིལེན སཱགརཱུཔམོ;

སམཱདྷིནཱ མེརཱུཔམོ, ཉཱཎེན གགནཱུཔམོ.

ཨིནྡྲིཡབལབོཛ྄ཛྷངྒ-མགྒསཙྩཔྤཀཱསནཾ;

པཀཱསེསི སདཱ བུདྡྷོ, ཧིཏཱཡ སབྦཔཱཎིནཾ.

དྷམྨཙཀྐཾ ¶ པཝཏྟེནྟེ, ཀོཎྜཉྙེ ལོཀནཱཡཀེ;

ཀོཊིསཏསཧསྶཱནཾ, པཋམཱབྷིསམཡོ ཨཧུ.

ཏཏོ པརམྤི དེསེནྟེ, ནརམརཱུནཾ སམཱགམེ;

ནཝུཏིཀོཊིསཧསྶཱནཾ, དུཏིཡཱབྷིསམཡོ ཨཧུ.

ཏིཏྠིཡེ ཨབྷིམདྡནྟོ, ཡདཱ དྷམྨམདེསཡི;

ཨསཱིཏིཀོཊིསཧསྶཱནཾ, ཏཏིཡཱབྷིསམཡོ ཨཧུ.

སནྣིཔཱཏཱ ཏཡོ ཨཱསུཾ, ཀོཎྜཉྙསྶ མཧེསིནོ;

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

ཀོཊིསཏསཧསྶཱནཾ, པཋམོ ཨཱསི སམཱགམོ;

དུཏིཡོ ཀོཊིསཧསྶཱནཾ, ཏཏིཡོ ནཝུཏིཀོཊིནཾ.

ཨཧཾ ཏེན སམཡེན, ཝིཛིཏཱཝཱི ནཱམ ཁཏྟིཡོ;

སམུདྡཾ ཨནྟམནྟེན, ཨིསྶརིཡཾ ཝཏྟཡཱམཧཾ.

ཀོཊིསཏསཧསྶཱནཾ ¶ , ཝིམལཱནཾ མཧེསིནཾ;

སཧ ལོཀགྒནཱཐེན, པརམནྣེན ཏཔྤཡིཾ.

སོཔི མཾ བུདྡྷོ བྱཱཀཱསི, ཀོཎྜཉྙོ ལོཀནཱཡཀོ;

‘‘ཨཔརིམེཡྻིཏོ ཀཔྤེ, བུདྡྷོ ལོཀེ བྷཝིསྶཏི.

‘‘པདྷཱནཾ པདཧིཏྭཱན, ཀཏྭཱ དུཀྐརཀཱརིཀཾ;

ཨསྶཏྠམཱུལེ སམྦུདྡྷོ, བུཛ྄ཛྷིསྶཏི མཧཱཡསོ.

‘‘ཨིམསྶ ཛནིཀཱ མཱཏཱ, མཱཡཱ ནཱམ བྷཝིསྶཏི;

པིཏཱ སུདྡྷོདནོ ནཱམ, ཨཡཾ ཧེསྶཏི གོཏམོ.

‘‘ཀོལིཏོ ཨུཔཏིསྶོ ཙ, ཨགྒཱ ཧེསྶནྟི སཱཝཀཱ;

ཨཱནནྡོ ནཱམུཔཊྛཱཀོ, ཨུཔཊྛིསྶཏིམཾ ཛིནཾ.

‘‘ཁེམཱ ཨུཔྤལཝཎྞཱ ཙ, ཨགྒཱ ཧེསྶནྟི སཱཝིཀཱ;

བོདྷི ¶ ཏསྶ བྷགཝཏོ, ཨསྶཏྠོཏི པཝུཙྩཏི.

‘‘ཙིཏྟོ ¶ ཙ ཧཏྠཱལ༹ཝཀོ, ཨགྒཱ ཧེསྶནྟུཔཊྛཀཱ;

ནནྡམཱཏཱ ཙ ཨུཏྟརཱ, ཨགྒཱ ཧེསྶནྟུཔཊྛིཀཱ;

ཨཱཡུ ¶ ཝསྶསཏཾ ཏསྶ, གོཏམསྶ ཡསསྶིནོ’’.

ཨིདཾ སུཏྭཱན ཝཙནཾ, ཨསམསྶ མཧེསིནོ;

ཨཱམོདིཏཱ ནརམརཱུ, བུདྡྷབཱིཛཾ ཀིར ཨཡཾ.

ཨུཀྐུཊྛིསདྡཱ ¶ ཝཏྟནྟི, ཨཔྥོཊེནྟི ཧསནྟི ཙ;

ཀཏཉྫལཱི ནམསྶནྟི, དསསཧསྶིདེཝཏཱ.

‘‘ཡདིམསྶ ལོཀནཱཐསྶ, ཝིརཛ྄ཛྷིསྶཱམ སཱསནཾ;

ཨནཱགཏམྷི ཨདྡྷཱནེ, ཧེསྶཱམ སམྨུཁཱ ཨིམཾ.

‘‘ཡཐཱ མནུསྶཱ ནདིཾ ཏརནྟཱ, པཊིཏིཏྠཾ ཝིརཛ྄ཛྷིཡ;

ཧེཊྛཱཏིཏྠེ གཧེཏྭཱན, ཨུཏྟརནྟི མཧཱནདིཾ.

‘‘ཨེཝམེཝ མཡཾ སབྦེ, ཡདི མུཉྩཱམིམཾ ཛིནཾ;

ཨནཱགཏམྷི ཨདྡྷཱནེ, ཧེསྶཱམ སམྨུཁཱ ཨིམཾ’’.

ཏསྶཱཧཾ ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཏམེཝ ཨཏྠཾ སཱདྷེནྟོ, མཧཱརཛྫཾ ཛིནེ ཨདཾ;

མཧཱརཛྫཾ དདིཏྭཱན [ཙཛིཏྭཱ (སཱི.)], པབྦཛིཾ ཏསྶ སནྟིཀེ.

སུཏྟནྟཾ ཝིནཡཉྩཱཔི, ནཝངྒཾ སཏྠུསཱསནཾ;

སབྦཾ པརིཡཱཔུཎིཏྭཱན, སོབྷཡིཾ ཛིནསཱསནཾ.

ཏཏྠཔྤམཏྟོ ¶ ཝིཧརནྟོ, ནིསཛྫཊྛཱནཙངྐམེ;

ཨབྷིཉྙཱཔཱརམིཾ གནྟྭཱ, བྲཧྨལོཀམགཉྪཧཾ.

ནགརཾ རམྨཝཏཱི ནཱམ, སུནནྡོ ནཱམ ཁཏྟིཡོ;

སུཛཱཏཱ ནཱམ ཛནིཀཱ, ཀོཎྜཉྙསྶ མཧེསིནོ.

དསཝསྶསཧསྶཱནི, ཨགཱརཾ ཨཛ྄ཛྷ སོ ཝསི [ཨགཱརམཛ྄ཛྷེ ཙ སོ ཝསི (སྱཱ.)];

སུཙི སུརུཙི སུབྷོ ཙ, ཏཡོ པཱསཱདམུཏྟམཱ.

ཏཱིཎིསཏསཧསྶཱནི, ནཱརིཡོ སམལངྐཏཱ;

རུཙིདེཝཱི ནཱམ ནཱརཱི, ཝིཛིཏསེནོ ཨཏྲཛོ.

ནིམིཏྟེ ཙཏུརོ དིསྭཱ, རཐཡཱནེན ནིཀྑམི;

ཨནཱུནདསམཱསཱནི, པདྷཱནཾ པདཧཱི ཛིནོ.

བྲཧྨུནཱ ¶ ཡཱཙིཏོ སནྟོ, ཀོཎྜཉྙོ དྭིཔདུཏྟམོ;

ཝཏྟི ཙཀྐཾ མཧཱཝཱིརོ, དེཝཱནཾ ནགརུཏྟམེ.

བྷདྡོ ཙེཝ སུབྷདྡོ ཙ, ཨཧེསུཾ ཨགྒསཱཝཀཱ;

ཨནུརུདྡྷོ ནཱམུཔཊྛཱཀོ, ཀོཎྜཉྙསྶ མཧེསིནོ.

ཏིསྶཱ ¶ ཙ ཨུཔཏིསྶཱ ཙ, ཨཧེསུཾ ཨགྒསཱཝིཀཱ;

སཱལཀལྱཱཎིཀོ བོདྷི, ཀོཎྜཉྙསྶ མཧེསིནོ.

སོཎོ ཙ ཨུཔསོཎོ ཙ, ཨཧེསུཾ ཨགྒུཔཊྛཀཱ;

ནནྡཱ ཙེཝ སིརཱིམཱ ཙ, ཨཧེསུཾ ཨགྒུཔཊྛིཀཱ.

སོ ཨཊྛཱསཱིཏི ཧཏྠཱནི, ཨཙྩུགྒཏོ མཧཱམུནི;

སོབྷཏེ ཨུལུ༹རཱཛཱཝ སཱུརིཡོ མཛ྄ཛྷནྷིཀེ ཡཐཱ.

ཝསྶསཏསཧསྶཱནི ¶ , ཨཱཡུ ཝིཛྫཏི ཏཱཝདེ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

ཁཱིཎཱསཝེཧི ¶ ཝིམལེཧི, ཝིཙིཏྟཱ ཨཱསི མེདནཱི;

ཡཐཱ གགནམུལཱུ༹ཧི, ཨེཝཾ སོ ཨུཔསོབྷཐ.

ཏེཔི ནཱགཱ ཨཔྤམེཡྻཱ, ཨསངྑོབྷཱ དུརཱསདཱ;

ཝིཛྫུཔཱཏཾཝ དསྶེཏྭཱ, ནིབྦུཏཱ ཏེ མཧཱཡསཱ.

སཱ ཙ ཨཏུལིཡཱ ཛིནསྶ ཨིདྡྷི, ཉཱཎཔརིབྷཱཝིཏོ ཙ སམཱདྷི;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱ.

ཀོཎྜཉྙོ པཝརོ བུདྡྷོ, ཙནྡཱརཱམམྷི ནིབྦུཏོ;

ཏཏྠེཝ ཙེཏིཡོ ཙིཏྟོ, སཏྟ ཡོཛནམུསྶིཏོཏི.

ཀོཎྜཉྙསྶ ཨཔརེན, མངྒལོ ནཱམ ནཱཡཀོ;

ཏམཾ ལོཀེ ནིཧནྟྭཱན, དྷམྨོཀྐམབྷིདྷཱརཡི.

ཨཏུལཱསི ¶ པབྷཱ ཏསྶ, ཛིནེཧཉྙེཧི ཨུཏྟརིཾ;

ཙནྡསཱུརིཡཔབྷཾ ཧནྟྭཱ, དསསཧསྶཱི ཝིརོཙཏི.

སོཔི བུདྡྷོ པཀཱསེསི, ཙཏུརོ སཙྩཝརུཏྟམེ;

ཏེ ཏེ སཙྩརསཾ པཱིཏྭཱ, ཝིནོདེནྟི མཧཱཏམཾ.

པཏྭཱན ¶ བོདྷིམཏུལཾ, པཋམེ དྷམྨདེསནེ;

ཀོཊིསཏསཧསྶཱནཾ, དྷམྨཱབྷིསམཡོ ཨཧུ.

སུརིནྡདེཝབྷཝནེ ¶ , བུདྡྷོ དྷམྨམདེསཡི;

ཏདཱ ཀོཊིསཧསྶཱནཾ [ནཝཀོཊིསཧསྶཱནཾ (སཱི.)], དུཏིཡོ སམཡོ ཨཧུ.

ཡདཱ སུནནྡོ ཙཀྐཝཏྟཱི, སམྦུདྡྷཾ ཨུཔསངྐམི;

ཏདཱ ཨཱཧནི སམྦུདྡྷོ, དྷམྨབྷེརིཾ ཝརུཏྟམཾ.

སུནནྡསྶཱནུཙརཱ ཛནཏཱ, ཏདཱསུཾ ནཝུཏིཀོཊིཡོ;

སབྦེཔི ཏེ ནིརཝསེསཱ, ཨཧེསུཾ ཨེཧི བྷིཀྑུཀཱ.

སནྣིཔཱཏཱ ཏཡོ ཨཱསུཾ, མངྒལསྶ མཧེསིནོ;

ཀོཊིསཏསཧསྶཱནཾ, པཋམོ ཨཱསི སམཱགམོ.

དུཏིཡོ ཀོཊིསཏསཧསྶཱནཾ, ཏཏིཡོ ནཝུཏིཀོཊིནཾ;

ཁཱིཎཱསཝཱནཾ ཝིམལཱནཾ, ཏདཱ ཨཱསི སམཱགམོ.

ཨཧཾ ཏེན སམཡེན, སུརུཙཱི ནཱམ བྲཱཧྨཎོ;

ཨཛ྄ཛྷཱཡཀོ མནྟདྷརོ, ཏིཎྞཾ ཝེདཱན པཱརགཱུ.

ཏམཧཾ ¶ ཨུཔསངྐམྨ, སརཎཾ གནྟྭཱན སཏྠུནོ;

སམྦུདྡྷཔྤམུཁཾ སངྒྷཾ, གནྡྷམཱལེན པཱུཛཡིཾ;

པཱུཛེཏྭཱ གནྡྷམཱལེན, གཝཔཱནེན ཏཔྤཡིཾ.

སོཔི མཾ བུདྡྷོ བྱཱཀཱསི, མངྒལོ དྭིཔདུཏྟམོ;

‘‘ཨཔརིམེཡྻིཏོ ཀཔྤེ, ཨཡཾ བུདྡྷོ བྷཝིསྶཏི.

‘‘པདྷཱནཾ ¶ པདཧིཏྭཱན…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དས པཱརམིཔཱུརིཡཱ.

ཏདཱ པཱིཏིམནུབྲཱུཧནྟོ, སམྦོདྷིཝརཔཏྟིཡཱ;

བུདྡྷེ དཏྭཱན མཾ གེཧཾ, པབྦཛིཾ ཏསྶ སནྟིཀེ.

སུཏྟནྟཾ ¶ ཝིནཡཉྩཱཔི, ནཝངྒཾ སཏྠུསཱསནཾ;

སབྦཾ པརིཡཱཔུཎིཏྭཱ, སོབྷཡིཾ ཛིནསཱསནཾ.

ཏཏྠཔྤམཏྟོ ཝིཧརནྟོ, བྲཧྨཾ བྷཱཝེཏྭ བྷཱཝནཾ;

ཨབྷིཉྙཱཔཱརམིཾ གནྟྭཱ, བྲཧྨལོཀམགཙྪཧཾ.

ཨུཏྟརཾ ¶ ནཱམ ནགརཾ, ཨུཏྟརོ ནཱམ ཁཏྟིཡོ;

ཨུཏྟརཱ ནཱམ ཛནིཀཱ, མངྒལསྶ མཧེསིནོ.

ནཝཝསྶསཧསྶཱནི ¶ , ཨགཱརཾ ཨཛ྄ཛྷ སོ ཝསི;

ཡསཝཱ སུཙིམཱ སིརཱིམཱ, ཏཡོ པཱསཱདམུཏྟམཱ.

སམཏིཾསསཧསྶཱནི, ནཱརིཡོ སམལངྐཏཱ;

ཡསཝཏཱི ནཱམ ནཱརཱི, སཱིཝལོ ནཱམ ཨཏྲཛོ.

ནིམིཏྟེ ཙཏུརོ དིསྭཱ, ཨསྶཡཱནེན ནིཀྑམི;

ཨནཱུནཨཊྛམཱསཱནི, པདྷཱནཾ པདཧཱི ཛིནོ.

བྲཧྨུནཱ ཡཱཙིཏོ སནྟོ, མངྒལོ ནཱམ ནཱཡཀོ;

ཝཏྟི ཙཀྐཾ མཧཱཝཱིརོ, ཝནེ སིརཱིཝརུཏྟམེ.

སུདེཝོ དྷམྨསེནོ ཙ, ཨཧེསུཾ ཨགྒསཱཝཀཱ;

པཱལིཏོ ནཱམུཔཊྛཱཀོ, མངྒལསྶ མཧེསིནོ.

སཱིཝལཱ ཙ ཨསོཀཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, ནཱགརུཀྑོཏི ཝུཙྩཏི.

ནནྡོ ཙེཝ ཝིསཱཁོ ཙ, ཨཧེསུཾ ཨགྒུཔཊྛཀཱ;

ཨནུལཱ ཙེཝ སུཏནཱ ཙ, ཨཧེསུཾ ཨགྒུཔཊྛིཀཱ.

ཨཊྛཱསཱིཏི རཏནཱནི, ཨཙྩུགྒཏོ མཧཱམུནི;

ཏཏོ ནིདྡྷཱཝཏཱི རཾསཱི, ཨནེཀསཏསཧསྶིཡོ.

ནཝུཏིཝསྶསཧསྶཱནི, ཨཱཡུ ཝིཛྫཏི ཏཱཝདེ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

ཡཐཱཔི སཱགརེ ཨཱུམཱི, ན སཀྐཱ ཏཱ གཎེཏུཡེ;

ཏཐེཝ སཱཝཀཱ ཏསྶ, ན སཀྐཱ ཏེ གཎེཏུཡེ.

ཡཱཝ ¶ ཨཊྛཱསི སམྦུདྡྷོ, མངྒལོ ལོཀནཱཡཀོ;

ན ¶ ཏསྶ སཱསནེ ཨཏྠི, སཀིལེསམརཎཾ [སཾཀིལེསམརཎཾ (སཱི.)] ཏདཱ.

དྷམྨོཀྐཾ ¶ དྷཱརཡིཏྭཱན, སནྟཱརེཏྭཱ མཧཱཛནཾ;

ཛལིཏྭཱ དྷཱུམཀེཏཱུཝ, ནིབྦུཏོ སོ མཧཱཡསོ.

སངྑཱརཱནཾ ¶ སབྷཱཝཏྠཾ, དསྶཡིཏྭཱ སདེཝཀེ;

ཛལིཏྭཱ ཨགྒིཀྑནྡྷོཝ, སཱུརིཡོ ཨཏྠངྒཏོ ཡཐཱ.

ཨུཡྻཱནེ ཝསྶརེ ནཱམ, བུདྡྷོ ནིབྦཱཡི མངྒལོ;

ཏཏྠེཝསྶ ཛིནཐཱུཔོ, ཏིཾསཡོཛནམུགྒཏོཏི.

སབྦདྷམྨེཧི ཨསམོ, སབྦསཏྟཱནམུཏྟམོ.

ཏདཱ ཨམཏབྷེརིཾ སོ, ཨཱཧནཱི མེཁལེ པུརེ;

དྷམྨསངྑསམཱཡུཏྟཾ, ནཝངྒཾ ཛིནསཱསནཾ.

ནིཛྫིནིཏྭཱ ཀིལེསེ སོ, པཏྭཱ སམྦོདྷིམུཏྟམཾ;

མཱཔེསི ནགརཾ སཏྠཱ, སདྡྷམྨཔུརཝརུཏྟམཾ.

ནིརནྟརཾ ཨཀུཊིལཾ, ཨུཛུཾ ཝིཔུལཝིཏྠཏཾ;

མཱཔེསི སོ མཧཱཝཱིཐིཾ, སཏིཔཊྛཱནཝརུཏྟམཾ.

ཕལེ ¶ ཙཏྟཱརི སཱམཉྙེ, ཙཏསྶོ པཊིསམྦྷིདཱ;

ཚལ༹བྷིཉྙཱཊྛསམཱཔཏྟཱི, པསཱརེསི ཏཏྠ ཝཱིཐིཡཾ.

ཡེ ཨཔྤམཏྟཱ ཨཁིལཱ, ཧིརིཝཱིརིཡེཧུཔཱགཏཱ;

ཏེ ཏེ ཨིམེ གུཎཝརེ, ཨཱདིཡནྟི ཡཐཱ སུཁཾ.

ཨེཝམེཏེན ཡོགེན, ཨུདྡྷརནྟོ མཧཱཛནཾ;

བོདྷེསི པཋམཾ སཏྠཱ, ཀོཊིསཏསཧསྶིཡོ.

ཡམྷི ཀཱལེ མཧཱཝཱིརོ, ཨོཝདཱི ཏིཏྠིཡེ གཎེ;

ཀོཊིསཧསྶཱབྷིསམིཾསུ [ཀོཊིསཏསཧསྶཱནི (སྱཱ. ཀཾ.), ཀོཊིསཏསཧསྶཱནཾ (ཀ.)], དུཏིཡེ དྷམྨདེསནེ.

ཡདཱ དེཝཱ མནུསྶཱ ཙ, སམགྒཱ ཨེཀམཱནསཱ;

ནིརོདྷཔཉྷཾ པུཙྪིཾསུ, སཾསཡཉྩཱཔི མཱནསཾ.

ཏདཱཔི ¶ ¶ དྷམྨདེསནེ, ནིརོདྷཔརིདཱིཔནེ;

ནཝུཏིཀོཊིསཧསྶཱནཾ, ཏཏིཡཱབྷིསམཡོ ཨཧུ.

སནྣིཔཱཏཱ ཏཡོ ཨཱསུཾ, སུམནསྶ མཧེསིནོ;

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

ཝསྶཾཝུཏྠསྶ ¶ བྷགཝཏོ, ཨབྷིགྷུཊྛེ པཝཱརཎེ;

ཀོཊིསཏསཧསྶེཧི, པཝཱརེསི ཏཐཱགཏོ.

ཏཏོཔརཾ སནྣིཔཱཏེ, ཝིམལེ ཀཉྩནཔབྦཏེ;

ནཝུཏིཀོཊིསཧསྶཱནཾ, དུཏིཡོ ཨཱསི སམཱགམོ.

ཡདཱ སཀྐོ དེཝརཱཛཱ, བུདྡྷདསྶནུཔཱགམི;

ཨསཱིཏིཀོཊིསཧསྶཱནཾ, ཏཏིཡོ ཨཱསི སམཱགམོ.

ཨཧཾ ¶ ཏེན སམཡེན, ནཱགརཱཛཱ མཧིདྡྷིཀོ;

ཨཏུལོ ནཱམ ནཱམེན, ཨུསྶནྣཀུསལསཉྩཡོ.

ཏདཱཧཾ ནཱགབྷཱཝནཱ, ནིཀྑམིཏྭཱ སཉཱཏིབྷི;

ནཱགཱནཾ དིབྦཏུརིཡེཧི, སསངྒྷཾ ཛིནམུཔཊྛཧིཾ.

ཀོཊིསཏསཧསྶཱནཾ, ཨནྣཔཱནེན ཏཔྤཡིཾ;

པཙྩེཀདུསྶཡུགཾ དཏྭཱ, སརཎཾ ཏམུཔཱགམིཾ.

སོཔི མཾ བུདྡྷོ བྱཱཀཱསི, སུམནོ ལོཀནཱཡཀོ;

‘‘ཨཔརིམེཡྻིཏོ ཀཔྤེ, ཨཡཾ བུདྡྷོ བྷཝིསྶཏི.

‘‘པདྷཱནཾ པདཧིཏྭཱན…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

ནགརཾ མེཁལཾ ནཱམ [མེཁལཾ ནཱམ ནགརཾ (སཱི. སྱཱ.)], སུདཏྟོ ནཱམ ཁཏྟིཡོ;

སིརིམཱ ནཱམ ཛནིཀཱ, སུམནསྶ མཧེསིནོ.

ནཝཝསྶསཧསྶཱནི ¶ , ཨགཱརཾ ཨཛ྄ཛྷ སོ ཝསི;

ཙནྡོ སུཙནྡོ ཝཊཾསོ ཙ, ཏཡོ པཱསཱདམུཏྟམཱ.

ཏེསཊྛིསཏསཧསྶཱནི, ནཱརིཡོ སམལངྐཏཱ;

ཝཊཾསིཀཱ ནཱམ ནཱརཱི, ཨནཱུཔམོ ནཱམ ཨཏྲཛོ.

ནིམིཏྟེ ¶ ཙཏུརོ དིསྭཱ, ཧཏྠིཡཱནེན ནིཀྑམི;

ཨནཱུནདསམཱསཱནི, པདྷཱནཾ པདཧཱི ཛིནོ.

བྲཧྨུནཱ ¶ ཡཱཙིཏོ སནྟོ, སུམནོ ལོཀནཱཡཀོ;

ཝཏྟི ཙཀྐཾ མཧཱཝཱིརོ, མེཁལེ པུརམུཏྟམེ.

སརཎོ བྷཱཝིཏཏྟོ ཙ, ཨཧེསུཾ ཨགྒསཱཝཀཱ;

ཨུདེནོ ནཱམུཔཊྛཱཀོ, སུམནསྶ མཧེསིནོ.

སོཎཱ ཙ ཨུཔསོཎཱ ཙ, ཨཧེསུཾ ཨགྒསཱཝིཀཱ;

སོཔི བུདྡྷོ ཨམིཏཡསོ, ནཱགམཱུལེ ཨབུཛ྄ཛྷཐ.

ཝརུཎོ ཙེཝ སརཎོ ཙ, ཨཧེསུཾ ཨགྒུཔཊྛཀཱ;

ཙཱལཱ ཙ ཨུཔཙཱལཱ ཙ, ཨཧེསུཾ ཨགྒུཔཊྛིཀཱ.

ཨུཙྩཏྟནེན [ཨུཙྩཏརེན (ཀ.)] སོ བུདྡྷོ, ནཝུཏིཧཏྠམུགྒཏོ;

ཀཉྩནགྒྷིཡསངྐཱསོ, དསསཧསྶཱི ཝིརོཙཏི.

ནཝུཏིཝསྶསཧསྶཱནི, ཨཱཡུ ཝིཛྫཏི ཏཱཝདེ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

ཏཱརཎཱིཡེ ¶ ཏཱརཡིཏྭཱ, བོདྷནཱིཡེ ཙ བོདྷཡི;

པརིནིབྦཱཡི སམྦུདྡྷོ, ཨུལུ༹རཱཛཱཝ ཨཏྠམི.

ཏེ ¶ ཙ ཁཱིཎཱསཝཱ བྷིཀྑཱུ, སོ ཙ བུདྡྷོ ཨསཱདིསོ;

ཨཏུལཔྤབྷཾ དསྶཡིཏྭཱ, ནིབྦུཏཱ ཡེ མཧཱཡསཱ.

ཏཉྩ ཉཱཎཾ ཨཏུལིཡཾ, ཏཱནི ཙ ཨཏུལཱནི རཏནཱནི;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱ.

སུམནོ ཡསདྷརོ བུདྡྷོ, ཨངྒཱརཱམམྷི ནིབྦུཏོ;

ཏཏྠེཝ ཏསྶ ཛིནཐཱུཔོ, ཙཏུཡོཛནམུགྒཏོཏི.

ཨནཱུཔམོ ཨསདིསོ, ཨཏུལོ ཨུཏྟམོ ཛིནོ.

སོཔི དྷམྨཾ ¶ ¶ པཀཱསེསི, བྲཧྨུནཱ ཨབྷིཡཱཙིཏོ;

ཁནྡྷདྷཱཏུཝཝཏྠཱནཾ, ཨཔྤཝཏྟཾ བྷཝཱབྷཝེ.

ཏསྶཱབྷིསམཡཱ ཏཱིཎི, ཨཧེསུཾ དྷམྨདེསནེ;

གཎནཱཡ ན ཝཏྟབྦོ, པཋམཱབྷིསམཡོ ཨཧུ.

ཡདཱ ཨརིནྡམཾ རཱཛཾ [རཱཛཱནཾ (ཀ.)], ཝིནེསི རེཝཏོ མུནི;

ཏདཱ ཀོཊིསཧསྶཱནཾ, དུཏིཡཱབྷིསམཡོ ཨཧུ.

སཏྟཱཧཾ པཊིསལླཱནཱ, ཝུཊྛཧིཏྭཱ ནརཱསབྷོ;

ཀོཊིསཏཾ ནརམརཱུནཾ, ཝིནེསི ཨུཏྟམེ ཕལེ.

སནྣིཔཱཏཱ ¶ ཏཡོ ཨཱསུཾ, རེཝཏསྶ མཧེསིནོ;

ཁཱིཎཱསཝཱནཾ ཝིམལཱནཾ, སུཝིམུཏྟཱན ཏཱདིནཾ.

ཨཏིཀྐནྟཱ གཎནཔཐཾ, པཋམཾ ཡེ སམཱགཏཱ;

ཀོཊིསཏསཧསྶཱནཾ, དུཏིཡོ ཨཱསི སམཱགམོ.

ཡོཔི [ཡོ སོ (སྱཱ. ཀཾ. ཀ.)] པཉྙཱཡ ཨསམོ, ཏསྶ ཙཀྐཱནུཝཏྟཀོ;

སོ ཏདཱ བྱཱདྷིཏོ ཨཱསི, པཏྟོ ཛཱིཝིཏསཾསཡཾ.

ཏསྶ གིལཱནཔུཙྪཱཡ, ཡེ ཏདཱ ཨུཔགཏཱ མུནཱི;

ཀོཊིསཧསྶཱ ཨརཧནྟོ, ཏཏིཡོ ཨཱསི སམཱགམོ.

ཨཧཾ ཏེན སམཡེན, ཨཏིདེཝོ ནཱམ བྲཱཧྨཎོ;

ཨུཔགནྟྭཱ རེཝཏཾ བུདྡྷཾ, སརཎཾ ཏསྶ གཉྪཧཾ.

ཏསྶ སཱིལཾ སམཱདྷིཉྩ, པཉྙཱགུཎམནུཏྟམཾ;

ཐོམཡིཏྭཱ ཡཐཱཐཱམཾ, ཨུཏྟརཱིཡམདཱསཧཾ.

སོཔི ¶ མཾ བུདྡྷོ བྱཱཀཱསི, རེཝཏོ ལོཀནཱཡཀོ;

‘‘ཨཔརིམེཡྻིཏོ ཀཔྤེ, ཨཡཾ བུདྡྷོ བྷཝིསྶཏི.

‘‘པདྷཱནཾ པདཧིཏྭཱན…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

ཏདཱཔི ཏཾ བུདྡྷདྷམྨཾ, སརིཏྭཱ ཨནུབྲཱུཧཡིཾ;

ཨཱཧརིསྶཱམི ཏཾ དྷམྨཾ, ཡཾ མཡ྄ཧཾ ཨབྷིཔཏྠིཏཾ.

ནགརཾ ¶ སུདྷཉྙཝཏཱི ནཱམ [སུདྷམྨཀཾ ནཱམ (སཱི.), སུདྷཉྙཀཾ ནཱམ (སྱཱ.)], ཝིཔུལོ ནཱམ ཁཏྟིཡོ;

ཝིཔུལཱ ནཱམ ཛནིཀཱ, རེཝཏསྶ མཧེསིནོ.

ཚ ¶ ཙ ཝསྶསཧསྶཱནི [ཚབྦསྶསཧསྶཱནི (སཱི. སྱཱ.)], ཨགཱརཾ ཨཛ྄ཛྷ སོ ཝསི;

སུདསྶནོ རཏནགྒྷི, ཨཱཝེལོ༹ ཙ ཝིབྷཱུསིཏོ;

པུཉྙཀམྨཱབྷིནིབྦཏྟཱ, ཏཡོ པཱསཱདམུཏྟམཱ.

ཏེཏྟིཾས ཙ སཧསྶཱནི, ནཱརིཡོ སམལངྐཏཱ;

སུདསྶནཱ ནཱམ ནཱརཱི, ཝརུཎོ ནཱམ ཨཏྲཛོ.

ནིམིཏྟེ ཙཏུརོ དིསྭཱ, རཐཡཱནེན ནིཀྑམི;

ཨནཱུནསཏྟམཱསཱནི, པདྷཱནཾ པདཧཱི ཛིནོ.

བྲཧྨུནཱ ཡཱཙིཏོ སནྟོ, རེཝཏོ ལོཀནཱཡཀོ;

ཝཏྟི ཙཀྐཾ མཧཱཝཱིརོ, ཝརུཎཱརཱམེ སིརཱིགྷརེ.

ཝརུཎོ ¶ བྲཧྨདེཝོ ཙ, ཨཧེསུཾ ཨགྒསཱཝཀཱ;

སམྦྷཝོ ནཱམུཔཊྛཱཀོ, རེཝཏསྶ མཧེསིནོ.

བྷདྡཱ ཙེཝ སུབྷདྡཱ ཙ, ཨཧེསུཾ ཨགྒསཱཝིཀཱ;

སོཔི བུདྡྷོ ཨསམསམོ, ནཱགམཱུལེ ཨབུཛ྄ཛྷཐ.

པདུམོ ཀུཉྫརོ ཙེཝ, ཨཧེསུཾ ཨགྒུཔཊྛིཀཱ;

སིརཱིམཱ ཙེཝ ཡསཝཏཱི, ཨཧེསུཾ ཨགྒུཔཊྛིཀཱ.

ཨུཙྩཏྟནེན སོ བུདྡྷོ, ཨསཱིཏིཧཏྠམུགྒཏོ;

ཨོབྷཱསེཏི དིསཱ སབྦཱ, ཨིནྡཀེཏུཝ ཨུགྒཏོ.

ཏསྶ སརཱིརེ ནིབྦཏྟཱ, པབྷཱམཱལཱ ཨནུཏྟརཱ;

དིཝཱ ཝཱ ཡདི ཝཱ རཏྟིཾ, སམནྟཱ ཕརཏི ཡོཛནཾ.

སཊྛིཝསྶསཧསྶཱནི, ཨཱཡུ ཝིཛྫཏི ཏཱཝདེ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

དསྶཡིཏྭཱ བུདྡྷབལཾ, ཨམཏཾ ལོཀེ པཀཱསཡཾ;

ནིབྦཱཡི ཨནུཔཱདཱནོ, ཡཐགྒུཔཱདཱནསངྑཡཱ.

སོ ཙ ཀཱཡོ རཏནནིབྷོ, སོ ཙ དྷམྨོ ཨསཱདིསོ;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱ.

རེཝཏོ ¶ ཡསདྷརོ བུདྡྷོ, ནིབྦུཏོ སོ མཧཱཔུརེ;

དྷཱཏུཝིཏྠཱརིཀཾ ཨཱསི, ཏེསུ ཏེསུ པདེསཏོཏི.

རེཝཏསྶ ¶ ¶ ¶ ཨཔརེན, སོབྷིཏོ ནཱམ ནཱཡཀོ;

སམཱཧིཏོ སནྟཙིཏྟོ, ཨསམོ ཨཔྤཊིཔུགྒལོ.

སོ ཛིནོ སཀགེཧམྷི, མཱནསཾ ཝིནིཝཏྟཡི;

པཏྭཱན ཀེཝལཾ བོདྷིཾ, དྷམྨཙཀྐཾ པཝཏྟཡི.

ཡཱཝ ཧེཊྛཱ ཨཝཱིཙིཏོ, བྷཝགྒཱ ཙཱཔི ཨུདྡྷཏོ;

ཨེཏྠནྟརེ ཨེཀཔརིསཱ, ཨཧོསི དྷམྨདེསནེ.

ཏཱཡ པརིསཱཡ སམྦུདྡྷོ, དྷམྨཙཀྐཾ པཝཏྟཡི;

གཎནཱཡ ན ཝཏྟབྦོ, པཋམཱབྷིསམཡོ ཨཧུ.

ཏཏོ པརམྤི དེསེནྟེ, མརཱུནཉྩ སམཱགམེ;

ནཝུཏིཀོཊིསཧསྶཱནཾ, དུཏིཡཱབྷིསམཡོ ཨཧུ.

པུནཱཔརཾ རཱཛཔུཏྟོ, ཛཡསེནོ ནཱམ ཁཏྟིཡོ;

ཨཱརཱམཾ རོཔཡིཏྭཱན, བུདྡྷེ ནིཡྻཱདཡཱི ཏདཱ.

ཏསྶ ཡཱགཾ པཀིཏྟེནྟོ, དྷམྨཾ དེསེསི ཙཀྑུམཱ;

ཏདཱ ཀོཊིསཧསྶཱནཾ, ཏཏིཡཱབྷིསམཡོ ཨཧུ.

སནྣིཔཱཏཱ ཏཡོ ཨཱསུཾ, སོབྷིཏསྶ མཧེསིནོ;

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

ཨུགྒཏོ ནཱམ སོ རཱཛཱ, དཱནཾ དེཏི ནརུཏྟམེ;

ཏམྷི དཱནེ སམཱགཉྪུཾ, ཨརཧནྟཱ [ཨརཧཏཾ (ཀ.)] སཏཀོཊིཡོ.

པུནཱཔརཾ ¶ པུརགཎོ [པུགགཎོ (ཀ.)], དེཏི དཱནཾ ནརུཏྟམེ;

ཏདཱ ནཝུཏིཀོཊཱིནཾ, དུཏིཡོ ཨཱསི སམཱགམོ.

དེཝལོཀེ ¶ ཝསིཏྭཱན, ཡདཱ ཨོརོཧཏཱི ཛིནོ;

ཏདཱ ཨསཱིཏིཀོཊཱིནཾ, ཏཏིཡོ ཨཱསི སམཱགམོ.

ཨཧཾ ཏེན སམཡེན, སུཛཱཏོ ནཱམ བྲཱཧྨཎོ;

ཏདཱ སསཱཝཀཾ བུདྡྷཾ, ཨནྣཔཱནེན ཏཔྤཡིཾ.

སོཔི མཾ བུདྡྷོ བྱཱཀཱསི, སོབྷིཏོ ལོཀནཱཡཀོ;

‘‘ཨཔརིམེཡྻིཏོ ཀཔྤེ, ཨཡཾ བུདྡྷོ བྷཝིསྶཏི.

‘‘པདྷཱནཾ ¶ པདཧིཏྭཱན…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, ཧཊྛོ སཾཝིགྒམཱནསོ;

ཏམེཝཏྠམནུཔྤཏྟིཡཱ, ཨུགྒཾ དྷིཏིམཀཱསཧཾ.

སུདྷམྨཾ ནཱམ ནགརཾ, སུདྷམྨོ ནཱམ ཁཏྟིཡོ;

སུདྷམྨཱ ནཱམ ཛནིཀཱ, སོབྷིཏསྶ མཧེསིནོ.

ནཝཝསྶསཧསྶཱནི ¶ ¶ , ཨགཱརཾ ཨཛ྄ཛྷ སོ ཝསི;

ཀུམུདོ ནཱལི༹ནོ པདུམོ, ཏཡོ པཱསཱདམུཏྟམཱ.

སཏྟཏིཾསསཧསྶཱནི, ནཱརིཡོ སམལངྐཏཱ;

མཎིལཱ [མཁིལཱ (ཨཊྛ.), སམངྒཱི (སཱི.), མཀིལཱ (སྱཱ. ཀཾ.)] ནཱམ སཱ ནཱརཱི, སཱིཧོ ནཱམཱསི ཨཏྲཛོ.

ནིམིཏྟེ ཙཏུརོ དིསྭཱ, པཱསཱདེནཱབྷིནིཀྑམི;

སཏྟཱཧཾ པདྷཱནཙཱརཾ, ཙརིཏྭཱ པུརིསུཏྟམོ.

བྲཧྨུནཱ ཡཱཙིཏོ སནྟོ, སོབྷིཏོ ལོཀནཱཡཀོ;

ཝཏྟི ཙཀྐཾ མཧཱཝཱིརོ, སུདྷམྨུཡྻཱནམུཏྟམེ.

ཨསམོ ཙ སུནེཏྟོ ཙ, ཨཧེསུཾ ཨགྒསཱཝཀཱ;

ཨནོམོ ནཱམུཔཊྛཱཀོ, སོབྷིཏསྶ མཧེསིནོ.

ནཀུལཱ ཙ སུཛཱཏཱ ཙ, ཨཧེསུཾ ཨགྒསཱཝིཀཱ;

བུཛ྄ཛྷམཱནོ ཙ སོ བུདྡྷོ, ནཱགམཱུལེ ཨབུཛ྄ཛྷཐ.

རམྨོ ཙེཝ སུདཏྟོ ཙ, ཨཧེསུཾ ཨགྒུཔཊྛཀཱ;

ནཀུལཱ ཙེཝ ཙིཏྟཱ ཙ, ཨཧེསུཾ ཨགྒུཔཊྛིཀཱ.

ཨཊྛཔཎྞཱསརཏནཾ, ཨཙྩུགྒཏོ མཧཱམུནི;

ཨོབྷཱསེཏི དིསཱ སབྦཱ, སཏརཾསཱིཝ ཨུགྒཏོ.

ཡཐཱ ¶ སུཕུལླཾ པཝནཾ, ནཱནཱགནྡྷེཧི དྷཱུཔིཏཾ;

ཏཐེཝ ཏསྶ པཱཝཙནཾ, སཱིལགནྡྷེཧི དྷཱུཔིཏཾ.

ཡཐཱཔི སཱགརོ ནཱམ, དསྶནེན ཨཏཔྤིཡོ;

ཏཐེཝ ཏསྶ པཱཝཙནཾ, སཝཎེན ཨཏཔྤིཡཾ.

ནཝུཏིཝསྶསཧསྶཱནི ¶ , ཨཱཡུ ཝིཛྫཏི ཏཱཝདེ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

ཨོཝཱདཾ ཨནུསིཊྛིཉྩ, དཏྭཱན སེསཀེ ཛནེ;

ཧུཏཱསནོཝ ཏཱཔེཏྭཱ, ནིབྦུཏོ སོ སསཱཝཀོ.

སོ ¶ ཙ བུདྡྷོ ཨསམསམོ, ཏེཔི སཱཝཀཱ བལཔྤཏྟཱ;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱ.

སོབྷིཏོ ཝརསམྦུདྡྷོ, སཱིཧཱརཱམམྷི ནིབྦུཏོ;

དྷཱཏུཝིཏྠཱརིཀཾ ཨཱསི, ཏེསུ ཏེསུ པདེསཏོཏི.

སོབྷིཏསྶ ¶ ཨཔརེན, སམྦུདྡྷོ དྭིཔདུཏྟམོ;

ཨནོམདསྶཱི ཨམིཏཡསོ, ཏེཛསྶཱི དུརཏིཀྐམོ.

སོ ཚེཏྭཱ བནྡྷནཾ སབྦཾ, ཝིདྡྷཾསེཏྭཱ ཏཡོ བྷཝེ;

ཨནིཝཏྟིགམནཾ མགྒཾ, དེསེསི དེཝམཱནུསེ.

སཱགརོཝ ཨསངྑོབྷོ, པབྦཏོཝ དུརཱསདོ;

ཨཱཀཱསོཝ ཨནནྟོ སོ, སཱལརཱཛཱཝ ཕུལླིཏོ.

དསྶནེནཔི ཏཾ བུདྡྷཾ, ཏོསིཏཱ ཧོནྟི པཱཎིནོ;

བྱཱཧརནྟཾ གིརཾ སུཏྭཱ, ཨམཏཾ པཱཔུཎནྟི ཏེ.

དྷམྨཱབྷིསམཡོ ¶ ཏསྶ, ཨིདྡྷོ ཕཱིཏོ ཏདཱ ཨཧུ;

ཀོཊིསཏཱནི ཨབྷིསམིཾསུ, པཋམེ དྷམྨདེསནེ.

ཏཏོ པརཾ ཨབྷིསམཡེ, ཝསྶནྟེ དྷམྨཝུཊྛིཡོ;

ཨསཱིཏིཀོཊིཡོབྷིསམིཾསུ, དུཏིཡེ དྷམྨདེསནེ.

ཏཏོཔརཉྷི ¶ ཝསྶནྟེ, ཏཔྤཡནྟེ ཙ པཱཎིནཾ;

ཨཊྛསཏྟཏིཀོཊཱིནཾ, ཏཏིཡཱབྷིསམཡོ ཨཧུ.

སནྣིཔཱཏཱ ཏཡོ ཨཱསུཾ, ཏསྶཱཔི ཙ མཧེསིནོ;

ཨབྷིཉྙཱབལཔྤཏྟཱནཾ, པུཔྥིཏཱནཾ ཝིམུཏྟིཡཱ.

ཨཊྛསཏསཧསྶཱནཾ, སནྣིཔཱཏོ ཏདཱ ཨཧུ;

པཧཱིནམདམོཧཱནཾ, སནྟཙིཏྟཱན ཏཱདིནཾ.

སཏྟསཏསཧསྶཱནཾ ¶ , དུཏིཡོ ཨཱསི སམཱགམོ;

ཨནངྒཎཱནཾ ཝིརཛཱནཾ, ཨུཔསནྟཱན ཏཱདིནཾ.

ཚནྣཾ སཏསཧསྶཱནཾ, ཏཏིཡོ ཨཱསི སམཱགམོ;

ཨབྷིཉྙཱབལཔྤཏྟཱནཾ, ནིབྦུཏཱནཾ ཏཔསྶིནཾ.

ཨཧཾ ཏེན སམཡེན, ཡཀྑོ ཨཱསིཾ མཧིདྡྷིཀོ;

ནེཀཱནཾ ཡཀྑཀོཊཱིནཾ, ཝསཝཏྟིམྷི ཨིསྶརོ.

ཏདཱཔི ཏཾ བུདྡྷཝརཾ, ཨུཔགནྟྭཱ མཧེསིནཾ;

ཨནྣཔཱནེན ཏཔྤེསིཾ, སསངྒྷཾ ལོཀནཱཡཀཾ.

སོཔི མཾ ཏདཱ བྱཱཀཱསི, ཝིསུདྡྷནཡནོ མུནི;

‘‘ཨཔརིམེཡྻིཏོ ཀཔྤེ, ཨཡཾ བུདྡྷོ བྷཝིསྶཏི.

‘‘པདྷཱནཾ ¶ པདཧིཏྭཱན…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, ཧཊྛོ སཾཝིགྒམཱནསོ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

ནགརཾ ¶ ཙནྡཝཏཱི ནཱམ, ཡསཝཱ ནཱམ ཁཏྟིཡོ;

མཱཏཱ ཡསོདྷརཱ ནཱམ, ཨནོམདསྶིསྶ སཏྠུནོ.

དསཝསྶསཧསྶཱནི, ཨགཱརཾ ཨཛ྄ཛྷ སོ ཝསི;

སིརཱི ཨུཔསིརཱི ཝཌྜྷོ, ཏཡོ པཱསཱདམུཏྟམཱ.

ཏེཝཱིསཏིསཧསྶཱནི, ནཱརིཡོ སམལངྐཏཱ;

སིརིམཱ ནཱམ སཱ ནཱརཱི, ཨུཔཝཱཎོ ནཱམ ཨཏྲཛོ.

ནིམིཏྟེ ཙཏུརོ དིསྭཱ, སིཝིཀཱཡཱབྷིནིཀྑམི;

ཨནཱུནདསམཱསཱནི, པདྷཱནཾ པདཧཱི ཛིནོ.

བྲཧྨུནཱ ¶ ¶ ཡཱཙིཏོ སནྟོ, ཨནོམདསྶཱི མཧཱམུནི;

ཝཏྟི ཙཀྐཾ མཧཱཝཱིརོ, ཨུཡྻཱནེ སོ སུདསྶནེ [སུདསྶནུཡྻཱནམུཏྟམེ (སྱཱ. ཀཾ.)].

ནིསབྷོ ཙ ཨནོམོ ཙ [ཨསོཀོ ཙ (སཱི.)], ཨཧེསུཾ ཨགྒསཱཝཀཱ;

ཝརུཎོ ནཱམུཔཊྛཱཀོ, ཨནོམདསྶིསྶ སཏྠུནོ.

སུནྡརཱི ཙ སུམནཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, ཨཛྫུནོཏི པཝུཙྩཏི.

ནནྡིཝཌྜྷོ སིརིཝཌྜྷོ, ཨཧེསུཾ ཨགྒུཔཊྛཀཱ;

ཨུཔྤལཱ ཙེཝ པདུམཱ ཙ, ཨཧེསུཾ ཨགྒུཔཊྛིཀཱ.

ཨཊྛཔཎྞཱསརཏནཾ ¶ , ཨཙྩུགྒཏོ མཧཱམུནི;

པབྷཱ ནིདྡྷཱཝཏཱི ཏསྶ, སཏརཾསཱིཝ ཨུགྒཏོ.

ཝསྶསཏསཧསྶཱནི, ཨཱཡུ ཝིཛྫཏི ཏཱཝདེ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

སུཔུཔྥིཏཾ པཱཝཙནཾ, ཨརཧནྟེཧི ཏཱདིཧི;

ཝཱིཏརཱགེཧི ཝིམལེཧི, སོབྷིཏྠ ཛིནསཱསནཾ.

སོ ཙ སཏྠཱ ཨམིཏཡསོ, ཡུགཱནི ཏཱནི ཨཏུལིཡཱནི;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱ.

ཨནོམདསྶཱི ཛིནོ སཏྠཱ, དྷམྨཱརཱམམྷི ནིབྦུཏོ;

ཏཏྠེཝསྶ ཛིནཐཱུཔོ, ཨུབྦེདྷོ པཉྩཝཱིསཏཱིཏི.

ཨནོམདསྶིསྶ ¶ ¶ ཨཔརེན, སམྦུདྡྷོ དྭིཔདུཏྟམོ;

པདུམོ ནཱམ ནཱམེན, ཨསམོ ཨཔྤཊིཔུགྒལོ.

ཏསྶཱཔི ཨསམཾ སཱིལཾ, སམཱདྷིཔི ཨནནྟཀོ;

ཨསངྑེཡྻཾ ཉཱཎཝརཾ, ཝིམུཏྟིཔི ཨནཱུཔམཱ.

ཏསྶཱཔི ¶ ཨཏུལཏེཛསྶ, དྷམྨཙཀྐཔྤཝཏྟནེ;

ཨབྷིསམཡཱ ཏཡོ ཨཱསུཾ, མཧཱཏམཔཝཱཧནཱ.

པཋམཱབྷིསམཡེ བུདྡྷོ, ཀོཊིསཏམབོདྷཡི;

དུཏིཡཱབྷིསམཡེ དྷཱིརོ, ནཝུཏིཀོཊིམབོདྷཡི.

ཡདཱ ཙ པདུམོ བུདྡྷོ, ཨོཝདཱི སཀམཏྲཛཾ;

ཏདཱ ཨསཱིཏིཀོཊཱིནཾ, ཏཏིཡཱབྷིསམཡོ ཨཧུ.

སནྣིཔཱཏཱ ཏཡོ ཨཱསུཾ, པདུམསྶ མཧེསིནོ;

ཀོཊིསཏསཧསྶཱནཾ, པཋམོ ཨཱསི སམཱགམོ.

ཀཐིནཏྠཱརསམཡེ ¶ , ཨུཔྤནྣེ ཀཐིནཙཱིཝརེ;

དྷམྨསེནཱཔཏིཏྠཱཡ, བྷིཀྑཱུ སིབྦིཾསུ [ཡཱཙིཾསུ (ཀ.)] ཙཱིཝརཾ.

ཏདཱ ཏེ ཝིམལཱ བྷིཀྑཱུ, ཚལ༹བྷིཉྙཱ མཧིདྡྷིཀཱ;

ཏཱིཎི སཏསཧསྶཱནི, སམིཾསུ ཨཔརཱཛིཏཱ.

པུནཱཔརཾ སོ ནརཱསབྷོ [ནརཝུསབྷོ (སྱཱ. ཀཾ.)], པཝནེ ཝཱསཾ ཨུཔཱགམི;

ཏདཱ སམཱགམོ ཨཱསི, དྭིནྣཾ སཏསཧསྶིནཾ.

ཨཧཾ ཏེན སམཡེན, སཱིཧོ ཨཱསིཾ མིགཱདྷིབྷཱུ;

ཝིཝེཀམནུབྲཱུཧནྟཾ ¶ , པཝནེ ཨདྡསཾ ཛིནཾ.

ཝནྡིཏྭཱ སིརསཱ པཱདེ, ཀཏྭཱན ཏཾ པདཀྑིཎཾ;

ཏིཀྑཏྟུཾ ཨབྷིནཱདིཏྭཱ, སཏྟཱཧཾ ཛིནམུཔཊྛཧཾ.

སཏྟཱཧཾ ཝརསམཱཔཏྟིཡཱ, ཝུཊྛཧིཏྭཱ ཏཐཱགཏོ;

མནསཱ ཙིནྟཡིཏྭཱན, ཀོཊིབྷིཀྑཱུ སམཱནཡི.

ཏདཱཔི སོ མཧཱཝཱིརོ, ཏེསཾ མཛ྄ཛྷེ ཝིཡཱཀརི;

‘‘ཨཔརིམེཡྻིཏོ ཀཔྤེ, ཨཡཾ བུདྡྷོ བྷཝིསྶཏི.

‘‘པདྷཱནཾ པདཧིཏྭཱན…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

ཙམྤཀཾ ནཱམ ནགརཾ, ཨསམོ ནཱམ ཁཏྟིཡོ;

ཨསམཱ ནཱམ ཛནིཀཱ, པདུམསྶ མཧེསིནོ.

དསཝསྶསཧསྶཱནི ¶ ¶ , ཨགཱརཾ ཨཛ྄ཛྷ སོ ཝསི;

ནནྡཱཝསུཡསུཏྟརཱ ¶ , ཏཡོ པཱསཱདམུཏྟམཱ.

ཏེཏྟིཾས ཙ སཧསྶཱནི, ནཱརིཡོ སམལངྐཏཱ;

ཨུཏྟརཱ ནཱམ སཱ ནཱརཱི, རམྨོ ནཱམཱསི ཨཏྲཛོ.

ནིམིཏྟེ ཙཏུརོ དིསྭཱ, རཐཡཱནེན ནིཀྑམི;

ཨནཱུནཨཊྛམཱསཱནི, པདྷཱནཾ པདཧཱི ཛིནོ.

བྲཧྨུནཱ ཡཱཙིཏོ སནྟོ, པདུམོ ལོཀནཱཡཀོ;

ཝཏྟི ཙཀྐཾ མཧཱཝཱིརོ, དྷནཉྩུཡྻཱནམུཏྟམེ.

སཱལོ ཙ ཨུཔསཱལོ ཙ, ཨཧེསུཾ ཨགྒསཱཝཀཱ;

ཝརུཎོ ནཱམུཔཊྛཱཀོ, པདུམསྶ མཧེསིནོ.

རཱདྷཱ ¶ ཙེཝ སུརཱདྷཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, མཧཱསོཎོཏི ཝུཙྩཏི.

བྷིཡྻོ ཙེཝ ཨསམོ ཙ, ཨཧེསུཾ ཨགྒུཔཊྛཀཱ;

རུཙཱི ཙ ནནྡརཱམཱ ཙ, ཨཧེསུཾ ཨགྒུཔཊྛིཀཱ.

ཨཊྛཔཎྞཱསརཏནཾ, ཨཙྩུགྒཏོ མཧཱམུནི;

པབྷཱ ནིདྡྷཱཝཏཱི ཏསྶ, ཨསམཱ སབྦསོ དིསཱ.

ཙནྡཔྤབྷཱ སཱུརིཡཔྤབྷཱ, རཏནགྒིམཎིཔྤབྷཱ;

སབྦཱཔི ཏཱ ཧཏཱ ཧོནྟི, པཏྭཱ ཛིནཔབྷུཏྟམཾ.

ཝསྶསཏསཧསྶཱནི, ཨཱཡུ ཝིཛྫཏི ཏཱཝདེ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

པརིཔཀྐམཱནསེ ¶ སཏྟེ, བོདྷཡིཏྭཱ ཨསེསཏོ;

སེསཀེ ཨནུསཱསིཏྭཱ, ནིབྦུཏོ སོ སསཱཝཀོ.

ཨུརགོཝ ཏཙཾ ཛིཎྞཾ, ཝདྡྷཔཏྟཾཝ པཱདཔོ;

ཛཧིཏྭཱ སབྦསངྑཱརེ, ནིབྦུཏོ སོ ཡཐཱ སིཁཱི.

པདུམོ ཛིནཝརོ སཏྠཱ, དྷམྨཱརཱམམྷི ནིབྦུཏོ;

དྷཱཏུཝིཏྠཱརིཀཾ ཨཱསི, ཏེསུ ཏེསུ པདེསཏོཏི.

པདུམསྶ ¶ ¶ ཨཔརེན, སམྦུདྡྷོ དྭིཔདུཏྟམོ;

ནཱརདོ ནཱམ ནཱམེན, ཨསམོ ཨཔྤཊིཔུགྒལོ.

སོ བུདྡྷོ ཙཀྐཝཏྟིསྶ, ཛེཊྛོ དཡིཏཨོརསོ;

ཨཱམུཀྐམཱལཱབྷརཎོ, ཨུཡྻཱནཾ ཨུཔསངྐམི.

ཏཏྠཱསི རུཀྑོ ཡསཝིཔུལོ, ཨབྷིརཱུཔོ བྲཧཱ སུཙི;

ཏམཛ྄ཛྷཔཏྭཱ ཨུཔནིསཱིདི, མཧཱསོཎསྶ ཧེཊྛཏོ.

ཏཏྠ ¶ ཉཱཎཝརུཔྤཛྫི, ཨནནྟཾ ཝཛིརཱུཔམཾ;

ཏེན ཝིཙིནི སངྑཱརེ, ཨུཀྐུཛྫམཝཀུཛྫཀཾ [ཀུཛྫཏཾ (སྱཱ. ཀཾ.)].

ཏཏྠ སབྦཀིལེསཱནི, ཨསེསམབྷིཝཱཧཡི;

པཱཔུཎཱི ཀེཝལཾ བོདྷིཾ, བུདྡྷཉཱཎེ ཙ ཙུདྡས.

པཱཔུཎིཏྭཱན ¶ སམྦོདྷིཾ, དྷམྨཙཀྐཾ པཝཏྟཡི;

ཀོཊིསཏསཧསྶཱནཾ, པཋམཱབྷིསམཡོ ཨཧུ.

མཧཱདོཎཾ ནཱགརཱཛཾ, ཝིནཡནྟོ མཧཱམུནི;

པཱཊིཧེརཾ ཏདཱཀཱསི, དསྶཡནྟོ སདེཝཀེ.

ཏདཱ དེཝམནུསྶཱནཾ, ཏམྷི དྷམྨཔྤཀཱསནེ;

ནཝུཏིཀོཊིསཧསྶཱནི, ཏརིཾསུ སབྦསཾསཡཾ.

ཡམྷི ཀཱལེ མཧཱཝཱིརོ, ཨོཝདཱི སཀམཏྲཛཾ;

ཨསཱིཏིཀོཊིསཧསྶཱནཾ, ཏཏིཡཱབྷིསམཡོ ཨཧུ.

སནྣིཔཱཏཱ ཏཡོ ཨཱསུཾ, ནཱརདསྶ མཧེསིནོ;

ཀོཊིསཏསཧསྶཱནཾ, པཋམོ ཨཱསི སམཱགམོ.

ཡདཱ བུདྡྷོ བུདྡྷགུཎཾ, སནིདཱནཾ པཀཱསཡི;

ནཝུཏིཀོཊིསཧསྶཱནི, སམིཾསུ ཝིམལཱ ཏདཱ.

ཡདཱ ཝེརོཙནོ ནཱགོ, དཱནཾ དདཱཏི སཏྠུནོ;

ཏདཱ སམིཾསུ ཛིནཔུཏྟཱ, ཨསཱིཏིསཏསཧསྶིཡོ.

ཨཧཾ ¶ ཏེན སམཡེན, ཛཊིལོ ཨུགྒཏཱཔནོ;

ཨནྟལིཀྑཙརོ ཨཱསིཾ, པཉྩཱབྷིཉྙཱསུ པཱརགཱུ.

ཏདཱཔཱཧཾ ཨསམསམཾ, སསངྒྷཾ སཔརིཛྫནཾ;

ཨནྣཔཱནེན ཏཔྤེཏྭཱ, ཙནྡནེནཱབྷིཔཱུཛཡིཾ.

སོཔི མཾ ཏདཱ བྱཱཀཱསི, ནཱརདོ ལོཀནཱཡཀོ;

‘‘ཨཔརིམེཡྻིཏོ ¶ ཀཔྤེ, ཨཡཾ བུདྡྷོ བྷཝིསྶཏི.

‘‘པདྷཱནཾ པདཧིཏྭཱན…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཔི ¶ ཝཙནཾ སུཏྭཱ, བྷིཡྻོ ཧཱསེཏྭ མཱནསཾ;

ཨདྷིཊྛཧིཾ ཝཏཾ ཨུགྒཾ, དསཔཱརམིཔཱུརིཡཱ.

ནགརཾ དྷཉྙཝཏཱི ནཱམ, སུདེཝོ ནཱམ ཁཏྟིཡོ;

ཨནོམཱ ནཱམ ཛནིཀཱ, ནཱརདསྶ མཧེསིནོ.

ནཝཝསྶསཧསྶཱནི ¶ , ཨགཱརཾ ཨཛ྄ཛྷ སོ ཝསི;

ཛིཏོ ཝིཛིཏཱབྷིརཱམོ, ཏཡོ པཱསཱདམུཏྟམཱ.

ཏིཙཏྟཱརཱིསསཧསྶཱནི, ནཱརིཡོ སམལངྐཏཱ;

ཝིཛིཏསེནཱ ནཱམ ནཱརཱི, ནནྡུཏྟརོ ནཱམ ཨཏྲཛོ.

ནིམིཏྟེ ཙཏུརོ དིསྭཱ, པདསཱ གམནེན ནིཀྑམི;

སཏྟཱཧཾ པདྷཱནཙཱརཾ, ཨཙརཱི པུརིསུཏྟམོ [ལོཀནཱཡཀོ (སཱི. ཀ.)].

བྲཧྨུནཱ ¶ ཡཱཙིཏོ སནྟོ, ནཱརདོ ལོཀནཱཡཀོ;

ཝཏྟི ཙཀྐཾ མཧཱཝཱིརོ, དྷནཉྩུཡྻཱནམུཏྟམེ.

བྷདྡསཱལོ ཛིཏམིཏྟོ, ཨཧེསུཾ ཨགྒསཱཝཀཱ;

ཝཱསེཊྛོ ནཱམུཔཊྛཱཀོ, ནཱརདསྶ མཧེསིནོ.

ཨུཏྟརཱ ཕགྒུནཱི ཙེཝ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, མཧཱསོཎོཏི ཝུཙྩཏི.

ཨུགྒརིནྡོ ཝསབྷོ ཙ, ཨཧེསུཾ ཨགྒུཔཊྛཀཱ;

ཨིནྡཱཝརཱི ཙ ཝཎྜཱི [ཨུནྡཱི (སཱི.), གཎྜཱི (སྱཱ. ཀཾ.)] ཙ, ཨཧེསུཾ ཨགྒུཔཊྛིཀཱ.

ཨཊྛཱསཱིཏིརཏནཱནི ¶ , ཨཙྩུགྒཏོ མཧཱམུནི;

ཀཉྩནགྒྷིཡསངྐཱསོ, དསསཧསྶཱི ཝིརོཙཏི.

ཏསྶ བྱཱམཔྤབྷཱ ཀཱཡཱ, ནིདྡྷཱཝཏི དིསོདིསཾ;

ནིརནྟརཾ དིཝཱརཏྟིཾ, ཡོཛནཾ ཕརཏེ སདཱ.

ན ཀེཙི ཏེན སམཡེན, སམནྟཱ ཡོཛནེ ཛནཱ;

ཨུཀྐཱཔདཱིཔེ ཨུཛྫཱལེནྟི, བུདྡྷརཾསཱིཧི ཨོཏྠཊཱ.

ནཝུཏིཝསྶསཧསྶཱནི, ཨཱཡུ ཝིཛྫཏི ཏཱཝདེ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

ཡཐཱ ཨུལཱུ༹ཧི གགནཾ, ཝིཙིཏྟཾ ཨུཔསོབྷཏི;

ཏཐེཝ སཱསནཾ ཏསྶ, ཨརཧནྟེཧི སོབྷཏི.

སཾསཱརསོཏཾ ཏརཎཱཡ, སེསཀེ པཊིཔནྣཀེ;

དྷམྨསེཏུཾ ¶ དལ༹ྷཾ ཀཏྭཱ, ནིབྦུཏོ སོ ནརཱསབྷོ.

སོཔི བུདྡྷོ ཨསམསམོ, ཏེཔི ཁཱིཎཱསཝཱ ཨཏུལཏེཛཱ;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱ.

ནཱརདོ ཛིནཝསབྷོ, ནིབྦུཏོ སུདསྶནེ པུརེ;

ཏཏྠེཝསྶ ཐཱུཔཝརོ, ཙཏུཡོཛནམུགྒཏོཏི.

ནཱརདསྶ ¶ ¶ ཨཔརེན, སམྦུདྡྷོ དྭིཔདུཏྟམོ;

པདུམུཏྟརོ ནཱམ ཛིནོ, ཨཀྑོབྷོ སཱགརཱུཔམོ.

མཎྜཀཔྤོཝ སོ ཨཱསི, ཡམྷི བུདྡྷོ ཨཛཱཡཐ;

ཨུསྶནྣཀུསལཱ ཛནཏཱ, ཏམྷི ཀཔྤེ ཨཛཱཡཐ.

པདུམུཏྟརསྶ བྷགཝཏོ, པཋམེ དྷམྨདེསནེ;

ཀོཊིསཏསཧསྶཱནཾ, དྷམྨཱབྷིསམཡོ ཨཧུ.

ཏཏོ པརམྤི ཝསྶནྟེ, ཏཔྤཡནྟེ ཙ པཱཎིནེ;

སཏྟཏིཾསསཏསཧསྶཱནཾ, དུཏིཡཱབྷིསམཡོ ཨཧུ.

ཡམྷི ¶ ཀཱལེ མཧཱཝཱིརོ, ཨཱནནྡཾ ཨུཔསངྐམི;

པིཏུསནྟིཀཾ ཨུཔགནྟྭཱ, ཨཱཧནཱི ཨམཏདུནྡུབྷིཾ.

ཨཱཧཏེ ཨམཏབྷེརིམྷི, ཝསྶནྟེ དྷམྨཝུཊྛིཡཱ;

པཉྙཱསསཏསཧསྶཱནཾ, ཏཏིཡཱབྷིསམཡོ ཨཧུ.

ཨོཝཱདཀོ ¶ ཝིཉྙཱཔཀོ, ཏཱརཀོ སབྦཔཱཎིནཾ;

དེསནཱཀུསལོ བུདྡྷོ, ཏཱརེསི ཛནཏཾ བཧུཾ.

སནྣིཔཱཏཱ ཏཡོ ཨཱསུཾ, པདུམུཏྟརསྶ སཏྠུནོ;

ཀོཊིསཏསཧསྶཱནཾ, པཋམོ ཨཱསི སམཱགམོ.

ཡདཱ བུདྡྷོ ཨསམསམོ, ཝསི ཝེབྷཱརཔབྦཏེ;

ནཝུཏིཀོཊིསཧསྶཱནཾ, དུཏིཡོ ཨཱསི སམཱགམོ.

པུན ཙཱརིཀཾ པཀྐནྟེ, གཱམནིགམརཊྛཏོ;

ཨསཱིཏིཀོཊིསཧསྶཱནཾ, ཏཏིཡོ ཨཱསི སམཱགམོ.

ཨཧཾ ཏེན སམཡེན, ཛཊིལོ ནཱམ རཊྛིཀོ;

སམྦུདྡྷཔྤམུཁཾ སངྒྷཾ, སབྷཏྟཾ དུསྶམདཱསཧཾ.

སོཔི མཾ བུདྡྷོ བྱཱཀཱསི, སངྒྷམཛ྄ཛྷེ ནིསཱིདིཡ;

‘‘སཏསཧསྶིཏོ ཀཔྤེ, ཨཡཾ བུདྡྷོ བྷཝིསྶཏི.

‘‘པདྷཱནཾ ¶ པདཧིཏྭཱན…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, ཨུཏྟརིཾ ཝཏམདྷིཊྛཧིཾ;

ཨཀཱསིཾ ཨུགྒདལ༹ྷཾ དྷིཏིཾ, དསཔཱརམིཔཱུརིཡཱ.

བྱཱཧཏཱ ཏིཏྠིཡཱ སབྦེ, ཝིམནཱ དུམྨནཱ ཏདཱ;

ན ཏེསཾ ཀེཙི པརིཙརནྟི, རཊྛཏོ ནིཙྪུབྷནྟི ཏེ.

སབྦེ ¶ ཏཏྠ སམཱགནྟྭཱ, ཨུཔགཙྪུཾ བུདྡྷསནྟིཀེ;

ཏུཝཾ ནཱཐོ མཧཱཝཱིར, སརཎཾ ཧོཧི ཙཀྑུམ.

ཨནུཀམྤཀོ ཀཱརུཎིཀོ, ཧིཏེསཱི སབྦཔཱཎིནཾ;

སམྤཏྟེ ཏིཏྠིཡེ སབྦེ, པཉྩསཱིལེ པཏིཊྛཔི.

ཨེཝཾ ནིརཱཀུལཾ ཨཱསི, སུཉྙཏཾ ཏིཏྠིཡེཧི ཏཾ;

ཝིཙིཏྟཾ ཨརཧནྟེཧི, ཝསཱིབྷཱུཏེཧི ཏཱདིཧི.

ནགརཾ ¶ ཧཾསཝཏཱི ནཱམ, ཨཱནནྡོ ནཱམ ཁཏྟིཡོ;

སུཛཱཏཱ ནཱམ ཛནིཀཱ, པདུམུཏྟརསྶ སཏྠུནོ.

དསཝསྶསཧསྶཱནི, ཨགཱརཾ ཨཛ྄ཛྷ སོ ཝསི;

ནརཝཱཧནོ ཡསོ ཝསཝཏྟཱི [ནཱརིཝཱཧནོ ཡསཝཏཱི (སྱཱ. ཀཾ.)], ཏཡོ པཱསཱདམུཏྟམཱ.

ཏིཙཏྟཱརཱིསསཧསྶཱནི, ནཱརིཡོ སམལངྐཏཱ;

ཝསུདཏྟཱ ནཱམ ནཱརཱི, ཨུཏྟམོ ནཱམ ཨཏྲཛོ.

ནིམིཏྟེ ཙཏུརོ དིསྭཱ, པཱསཱདེནཱབྷིནིཀྑམི;

སཏྟཱཧཾ པདྷཱནཙཱརཾ, ཨཙརཱི པུརིསུཏྟམོ.

བྲཧྨུནཱ ¶ ཡཱཙིཏོ སནྟོ, པདུམུཏྟརོ ཝིནཱཡཀོ;

ཝཏྟི ཙཀྐཾ མཧཱཝཱིརོ, མིཐིལུཡྻཱནམུཏྟམེ.

དེཝལོ ཙ སུཛཱཏོ ཙ, ཨཧེསུཾ ཨགྒསཱཝཀཱ;

སུམནོ ནཱམུཔཊྛཱཀོ, པདུམུཏྟརསྶ མཧེསིནོ.

ཨམིཏཱ ཙ ཨསམཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, སལལོཏི པཝུཙྩཏི.

ཝིཏིཎྞོ ཙེཝ [ཨམིཏོ ཙེཝ (སྱཱ.)] ཏིསྶོ ཙ, ཨཧེསུཾ ཨགྒུཔཊྛཀཱ;

ཧཊྛཱ ཙེཝ ཝིཙིཏྟཱ ཙ, ཨཧེསུཾ ཨགྒུཔཊྛིཀཱ.

ཨཊྛཔཎྞཱསརཏནཾ, ཨཙྩུགྒཏོ མཧཱམུནི;

ཀཉྩནགྒྷིཡསངྐཱསོ, དྭཏྟིཾསཝརལཀྑཎོ.

ཀུཊྚཱ ¶ ཀཝཱཊཱ བྷིཏྟཱི ཙ, རུཀྑཱ ནགསིལུཙྩཡཱ;

ན ཏསྶཱཝརཎཾ ཨཏྠི, སམནྟཱ དྭཱདསཡོཛནེ.

ཝསྶསཏསཧསྶཱནི, ཨཱཡུ ཝིཛྫཏི ཏཱཝདེ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

སནྟཱརེཏྭཱ བཧུཛནཾ, ཚིནྡིཏྭཱ སབྦསཾསཡཾ;

ཛལིཏྭཱ ཨགྒིཀྑནྡྷོཝ ནིབྦུཏོ སོ སསཱཝཀོ.

པདུམུཏྟརོ ཛིནོ བུདྡྷོ, ནནྡཱརཱམམྷི ནིབྦུཏོ;

ཏཏྠེཝསྶ ཐཱུཔཝརོ, དྭཱདསུབྦེདྷཡོཛནོཏི.

པདུམུཏྟརསྶ ¶ ¶ ¶ ཨཔརེན, སུམེདྷོ ནཱམ ནཱཡཀོ;

དུརཱསདོ ཨུགྒཏེཛོ, སབྦལོཀུཏྟམོ མུནི.

པསནྣནེཏྟོ སུམུཁོ, བྲཧཱ ཨུཛུ པཏཱཔཝཱ;

ཧིཏེསཱི སབྦསཏྟཱནཾ, བཧཱུ མོཙེསི བནྡྷནཱ.

ཡདཱ བུདྡྷོ པཱཔུཎིཏྭཱ, ཀེཝལཾ བོདྷིམུཏྟམཾ;

སུདསྶནམྷི ནགརེ, དྷམྨཙཀྐཾ པཝཏྟཡི.

ཏསྶཱཔི ཨབྷིསམཡཱ ཏཱིཎི, ཨཧེསུཾ དྷམྨདེསནེ;

ཀོཊིསཏསཧསྶཱནཾ, པཋམཱབྷིསམཡོ ཨཧུ.

པུནཱཔརཾ ཀུམྦྷཀཎྞཾ, ཡཀྑཾ སོ དམཡཱི ཛིནོ;

ནཝུཏིཀོཊིསཧསྶཱནཾ, དུཏིཡཱབྷིསམཡོ ཨཧུ.

པུནཱཔརཾ ཨམིཏཡསོ, ཙཏུསཙྩཾ པཀཱསཡི;

ཨསཱིཏིཀོཊིསཧསྶཱནཾ, ཏཏིཡཱབྷིསམཡོ ཨཧུ.

སནྣིཔཱཏཱ ཏཡོ ཨཱསུཾ, སུམེདྷསྶ མཧེསིནོ;

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

སུདསྶནཾ ¶ ནཱམ ནགརཾ, ཨུཔགཉྪི ཛིནོ ཡདཱ;

ཏདཱ ཁཱིཎཱསཝཱ བྷིཀྑཱུ, སམིཾསུ སཏཀོཊིཡོ.

པུནཱཔརཾ དེཝཀཱུཊེ, བྷིཀྑཱུནཾ ཀཐིནཏྠཏེ;

ཏདཱ ནཝུཏིཀོཊཱིནཾ, དུཏིཡོ ཨཱསི སམཱགམོ.

པུནཱཔརཾ ¶ དསབལོ, ཡདཱ ཙརཏི ཙཱརིཀཾ;

ཏདཱ ཨསཱིཏིཀོཊཱིནཾ, ཏཏིཡོ ཨཱསི སམཱགམོ.

ཨཧཾ ཏེན སམཡེན, ཨུཏྟརོ ནཱམ མཱཎཝོ;

ཨསཱིཏིཀོཊིཡོ མཡ྄ཧཾ, གྷརེ སནྣིཙིཏཾ དྷནཾ.

ཀེཝལཾ སབྦཾ དཏྭཱན, སསངྒྷེ ལོཀནཱཡཀེ;

སརཎཾ ཏསྶུཔགཉྪིཾ, པབྦཛྫཉྩཱབྷིརོཙཡིཾ.

སོཔི མཾ བུདྡྷོ བྱཱཀཱསི, ཀརོནྟོ ཨནུམོདནཾ;

‘‘ཏིཾསཀཔྤསཧསྶམྷི, ཨཡཾ བུདྡྷོ བྷཝིསྶཏི.

‘‘པདྷཱནཾ ¶ པདཧིཏྭཱན…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

སུཏྟནྟཾ ཝིནཡཉྩཱཔི, ནཝངྒཾ སཏྠུསཱསནཾ;

སབྦཾ པརིཡཱཔུཎིཏྭཱན, སོབྷཡིཾ ཛིནསཱསནཾ.

ཏཏྠཔྤམཏྟོ ¶ ¶ ཝིཧརནྟོ, ནིསཛྫཊྛཱནཙངྐམེ;

ཨབྷིཉྙཱསུ པཱརམིཾ གནྟྭཱ, བྲཧྨལོཀམགཉྪཧཾ.

སུདསྶནཾ ནཱམ ནགརཾ, སུདཏྟོ ནཱམ ཁཏྟིཡོ;

སུདཏྟཱ ནཱམ ཛནིཀཱ, སུམེདྷསྶ མཧེསིནོ.

ནཝཝསྶསཧསྶཱནི, ཨགཱརཾ ཨཛ྄ཛྷ སོ ཝསི;

སུཙནྡཀཉྩནསིརིཝཌྜྷཱ, ཏཡོ པཱསཱདམུཏྟམཱ.

ཏིསོལ༹སསཧསྶཱནི, ནཱརིཡོ སམལངྐཏཱ;

སུམནཱ ནཱམ སཱ ནཱརཱི, པུནབྦསུ ནཱམ ཨཏྲཛོ.

ནིམིཏྟེ ཙཏུརོ དིསྭཱ, ཧཏྠིཡཱནེན ནིཀྑམི;

ཨནཱུནཀཾ ཨཌྜྷམཱསཾ, པདྷཱནཾ པདཧཱི ཛིནོ.

བྲཧྨུནཱ ཡཱཙིཏོ སནྟོ, སུམེདྷོ ལོཀནཱཡཀོ;

ཝཏྟི ཙཀྐཾ མཧཱཝཱིརོ, སུདསྶནུཡྻཱནམུཏྟམེ.

སརཎོ ¶ སབྦཀཱམོ ཙ, ཨཧེསུཾ ཨགྒསཱཝཀཱ;

སཱགརོ ནཱམུཔཊྛཱཀོ, སུམེདྷསྶ མཧེསིནོ.

རཱམཱ ཙེཝ སུརཱམཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, མཧཱནཱིཔོཏི ཝུཙྩཏི.

ཨུརུཝེལཱ ཡསཝཱ ཙ, ཨཧེསུཾ ཨགྒུཔཊྛཀཱ;

ཡསོདྷརཱ སིརིམཱ ཙ [ཡསཱ ནཱམ སིརིམཱ ཙ (སྱཱ. ཀཾ.)], ཨཧེསུཾ ཨགྒུཔཊྛིཀཱ.

ཨཊྛཱསཱིཏིརཏནཱནི, ཨཙྩུགྒཏོ མཧཱམུནི;

ཨོབྷཱསེཏི དིསཱ སབྦཱ, ཙནྡོ ཏཱརགཎེ ཡཐཱ.

ཙཀྐཝཏྟིམཎཱི ¶ ནཱམ, ཡཐཱ ཏཔཏི ཡོཛནཾ;

ཏཐེཝ ཏསྶ རཏནཾ, སམནྟཱ ཕརཏི ཡོཛནཾ.

ནཝུཏིཝསྶསཧསྶཱནི ¶ , ཨཱཡུ ཝིཛྫཏི ཏཱཝདེ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

ཏེཝིཛྫཚལ༹བྷིཉྙེཧི, བལཔྤཏྟེཧི ཏཱདིཧི;

སམཱཀུལམིདཾ ཨཱསི, ཨརཧནྟེཧི སཱདྷུཧི.

ཏེཔི སབྦེ ཨམིཏཡསཱ, ཝིཔྤམུཏྟཱ ནིརཱུཔདྷཱི;

ཉཱཎཱལོཀཾ དསྶཡིཏྭཱ, ནིབྦུཏཱ ཏེ མཧཱཡསཱ.

སུམེདྷོ ཛིནཝརོ བུདྡྷོ, མེདྷཱརཱམམྷི ནིབྦུཏོ;

དྷཱཏུཝིཏྠཱརིཀཾ ཨཱསི, ཏེསུ ཏེསུ པདེསཏོཏི.

ཏཏྠེཝ ¶ མཎྜཀཔྤམྷི, སུཛཱཏོ ནཱམ ནཱཡཀོ;

སཱིཧཧནུསབྷཀྑནྡྷོ, ཨཔྤམེཡྻོ དུརཱསདོ.

ཙནྡོཝ ཝིམལོ སུདྡྷོ, སཏརཾསཱིཝ པཏཱཔཝཱ;

ཨེཝཾ སོབྷཏི སམྦུདྡྷོ, ཛལནྟོ སིརིཡཱ སདཱ.

པཱཔུཎིཏྭཱན ¶ སམྦུདྡྷོ, ཀེཝལཾ བོདྷིམུཏྟམཾ;

སུམངྒལམྷི ནགརེ, དྷམྨཙཀྐཾ པཝཏྟཡི.

དེསེནྟེ ¶ [དེསེནྟོ (སྱཱ. ཀཾ.)] པཝརཾ དྷམྨཾ, སུཛཱཏེ ལོཀནཱཡཀེ [སུཛཱཏོ ལོཀནཱཡཀོ (སྱཱ. ཀཾ.)];

ཨསཱིཏིཀོཊཱི ཨབྷིསམིཾསུ, པཋམེ དྷམྨདེསནེ.

ཡདཱ སུཛཱཏོ ཨམིཏཡསོ, དེཝེ ཝསྶཾ ཨུཔཱགམི;

སཏྟཏིཾསསཏསཧསྶཱནཾ, དུཏིཡཱབྷིསམཡོ ཨཧུ.

ཡདཱ སུཛཱཏོ ཨསམསམོ, ཨུཔགཙྪི པིཏུསནྟིཀཾ;

སཊྛིསཏསཧསྶཱནཾ [སཏྟཏིཾསསཧསྶཱནཾ (སཱི.)], ཏཏིཡཱབྷིསམཡོ ཨཧུ.

སནྣིཔཱཏཱ ཏཡོ ཨཱསུཾ, སུཛཱཏསྶ མཧེསིནོ;

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

ཨབྷིཉྙཱབལཔྤཏྟཱནཾ ¶ , ཨཔྤཏྟཱནཾ བྷཝཱབྷཝེ;

སཊྛིསཏསཧསྶཱནི, པཋམཾ སནྣིཔཏིཾསུ ཏེ.

པུནཱཔརཾ སནྣིཔཱཏེ, ཏིདིཝོརོཧཎེ ཛིནེ;

པཉྙཱསསཏསཧསྶཱནཾ, དུཏིཡོ ཨཱསི སམཱགམོ.

ཨུཔསངྐམནྟོ ནརཱསབྷཾ, ཏསྶ ཡོ ཨགྒསཱཝཀོ;

ཙཏཱུཧི སཏསཧསྶེཧི, སམྦུདྡྷཾ ཨུཔསངྐམི.

ཨཧཾ ཏེན སམཡེན, ཙཏུདཱིཔམྷི ཨིསྶརོ;

ཨནྟལིཀྑཙརོ ཨཱསིཾ, ཙཀྐཝཏྟཱི མཧབྦལོ.

ལོཀེ ཨཙྪརིཡཾ དིསྭཱ, ཨབྦྷུཏཾ ལོམཧཾསནཾ;

ཨུཔགནྟྭཱན ཝནྡིཾ སོ, སུཛཱཏཾ ལོཀནཱཡཀཾ.

ཙཏུདཱིཔེ མཧཱརཛྫཾ, རཏནེ སཏྟ ཨུཏྟམེ;

བུདྡྷེ ནིཡྻཱདཡིཏྭཱན, པབྦཛིཾ ཏསྶ སནྟིཀེ.

ཨཱརཱམིཀཱ ཛནཔདེ, ཨུཊྛཱནཾ པཊིཔིཎྜིཡ;

ཨུཔནེནྟི ¶ བྷིཀྑུསངྒྷསྶ, པཙྩཡཾ སཡནཱསནཾ.

སོཔི མཾ བུདྡྷོ [ཏདཱ (སྱཱ. ཀཾ.)] བྱཱཀཱསི, དསསཧསྶིམྷི ཨིསྶརོ;

‘‘ཏིཾསཀཔྤསཧསྶམྷི, ཨཡཾ བུདྡྷོ བྷཝིསྶཏི.

‘‘པདྷཱནཾ ¶ པདཧིཏྭཱན…པེ… ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, བྷིཡྻོ ཧཱསཾ ཛནེསཧཾ;

ཨདྷིཊྛཧིཾ ཝཏཾ ཨུགྒཾ, དསཔཱརམིཔཱུརིཡཱ.

སུཏྟནྟཾ ¶ ཝིནཡཉྩཱཔི, ནཝངྒཾ སཏྠུསཱསནཾ;

སབྦཾ པརིཡཱཔུཎིཏྭཱན, སོབྷཡིཾ ཛིནསཱསནཾ.

ཏཏྠཔྤམཏྟོ ཝིཧརནྟོ, བྲཧྨཾ བྷཱཝེཏྭ བྷཱཝནཾ;

ཨབྷིཉྙཱཔཱརམིཾ གནྟྭཱ, བྲཧྨལོཀམགཉྪཧཾ.

སུམངྒལཾ ནཱམ ནགརཾ, ཨུགྒཏོ ནཱམ ཁཏྟིཡོ;

མཱཏཱ པབྷཱཝཏཱི ནཱམ, སུཛཱཏསྶ མཧེསིནོ.

ནཝཝསྶསཧསྶཱནི ¶ , ཨགཱརཾ ཨཛ྄ཛྷ སོ ཝསི;

སིརཱི ཨུཔསིརཱི ནནྡོ, ཏཡོ པཱསཱདམུཏྟམཱ.

ཏེཝཱིསཏིསཧསྶཱནི ¶ , ནཱརིཡོ སམལངྐཏཱ;

སིརིནནྡཱ ནཱམ ནཱརཱི, ཨུཔསེནོ ནཱམ ཨཏྲཛོ.

ནིམིཏྟེ ཙཏུརོ དིསྭཱ, ཨསྶཡཱནེན ནིཀྑམི;

ཨནཱུནནཝམཱསཱནི, པདྷཱནཾ པདཧཱི ཛིནོ.

བྲཧྨུནཱ ཡཱཙིཏོ སནྟོ, སུཛཱཏོ ལོཀནཱཡཀོ;

ཝཏྟི ཙཀྐཾ མཧཱཝཱིརོ, སུམངྒལུཡྻཱནམུཏྟམེ.

སུདསྶནོ སུདེཝོ ཙ, ཨཧེསུཾ ཨགྒསཱཝཀཱ;

ནཱརདོ ནཱམུཔཊྛཱཀོ, སུཛཱཏསྶ མཧེསིནོ.

ནཱགཱ ཙ ནཱགསམཱལཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, མཧཱཝེལཱུ༹ཏི ཝུཙྩཏི.

སོ ཙ རུཀྑོ གྷནཀྑནྡྷོ [གྷནརུཙིརོ (སཱི. ཀ.)], ཨཙྪིདྡོ ཧོཏི པཏྟིཀོ;

ཨུཛུ ཝཾསོ བྲཧཱ ཧོཏི, དསྶནཱིཡོ མནོརམོ.

ཨེཀཀྑནྡྷོ པཝཌྜྷིཏྭཱ, ཏཏོ སཱཁཱ པབྷིཛྫཏི;

ཡཐཱ སུབདྡྷོ མོརཧཏྠོ, ཨེཝཾ སོབྷཏི སོ དུམོ.

ན ཏསྶ ཀཎྚཀཱ ཧོནྟི, ནཱཔི ཚིདྡཾ མཧཱ ཨཧུ;

ཝིཏྠིཎྞསཱཁོ ཨཝིརལོ, སནྡཙྪཱཡོ མནོརམོ.

སུདཏྟོ ཙེཝ ཙིཏྟོ ཙ, ཨཧེསུཾ ཨགྒུཔཊྛཀཱ;

སུབྷདྡཱ ཙ པདུམཱ ཙ, ཨཧེསུཾ ཨགྒུཔཊྛིཀཱ.

པཉྙཱསརཏནོ ¶ ཨཱསི, ཨུཙྩཏྟནེན སོ ཛིནོ;

སབྦཱཀཱརཝརཱུཔེཏོ, སབྦགུཎམུཔཱགཏོ.

ཏསྶ པབྷཱ ཨསམསམཱ, ནིདྡྷཱཝཏི སམནྟཏོ;

ཨཔྤམཱཎོ ཨཏུལིཡོ, ཨོཔམྨེཧི ཨནཱུཔམོ.

ནཝུཏིཝསྶསཧསྶཱནི ¶ , ཨཱཡུ ཝིཛྫཏི ཏཱཝདེ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

ཡཐཱཔི སཱགརེ ཨཱུམཱི, གགནེ ཏཱརཀཱ ཡཐཱ;

ཨེཝཾ ཏདཱ པཱཝཙནཾ, ཨརཧནྟེཧི ཙིཏྟིཏཾ [ཙིཏྟཀཾ (སྱཱ. ཀཾ.)].

སོ ¶ ¶ ཙ བུདྡྷོ ཨསམསམོ, གུཎཱནི ཙ ཏཱནི ཨཏུལིཡཱནི;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱ.

སུཛཱཏོ ཛིནཝརོ བུདྡྷོ, སིལཱརཱམམྷི ནིབྦུཏོ;

ཏཏྠེཝ ཏསྶ ཙེཏིཡོ [ཏཏྠེཝ ཙེཏིཡོ སཏྠུ (སྱཱ. ཀཾ.)], ཏཱིཎིགཱཝུཏམུགྒཏོཏི.

སུཛཱཏསྶ ཨཔརེན, སཡམྦྷཱུ ལོཀནཱཡཀོ;

དུརཱསདོ ཨསམསམོ, པིཡདསྶཱི མཧཱཡསོ.

སོཔི ¶ བུདྡྷོ ཨམིཏཡསོ, ཨཱདིཙྩོཝ ཝིརོཙཏི;

སབྦཾ ཏམཾ ནིཧནྟྭཱན, དྷམྨཙཀྐཾ པཝཏྟཡི.

ཏསྶཱཔི ཨཏུལཏེཛསྶ, ཨཧེསུཾ ཨབྷིསམཡཱ ཏཡོ;

ཀོཊིསཏསཧསྶཱནཾ, པཋམཱབྷིསམཡོ ཨཧུ.

སུདསྶནོ དེཝརཱཛཱ, མིཙྪཱདིཊྛིམརོཙཡི;

ཏསྶ དིཊྛིཾ ཝིནོདེནྟོ, སཏྠཱ དྷམྨམདེསཡི.

ཛནསནྣིཔཱཏོ ཨཏུལོ, མཧཱསནྣིཔཏཱི ཏདཱ;

ནཝུཏིཀོཊིསཧསྶཱནཾ, དུཏིཡཱབྷིསམཡོ ཨཧུ.

ཡདཱ དོཎམུཁཾ ཧཏྠིཾ, ཝིནེསི ནརསཱརཐི;

ཨསཱིཏིཀོཊིསཧསྶཱནཾ, ཏཏིཡཱབྷིསམཡོ ཨཧུ.

སནྣིཔཱཏཱ ཏཡོ ཨཱསུཾ, ཏསྶཱཔི པིཡདསྶིནོ;

ཀོཊིསཏསཧསྶཱནཾ, པཋམོ ཨཱསི སམཱགམོ.

ཏཏོ ¶ པརཾ ནཝུཏིཀོཊཱི, སམིཾསུ ཨེཀཏོ མུནཱི;

ཏཏིཡེ སནྣིཔཱཏམྷི, ཨསཱིཏིཀོཊིཡོ ཨཧཱུ.

ཨཧཾ ཏེན སམཡེན, ཀསྶཔོ ནཱམ བྲཱཧྨཎོ [མཱནཝོ (སྱཱ. ཀཾ.)];

ཨཛ྄ཛྷཱཡཀོ མནྟདྷརོ, ཏིཎྞཾ ཝེདཱན པཱརགཱུ.

ཏསྶ ¶ དྷམྨཾ སུཎིཏྭཱན, པསཱདཾ ཛནཡིཾ ཨཧཾ;

ཀོཊིསཏསཧསྶེཧི, སངྒྷཱརཱམཾ ཨམཱཔཡིཾ.

ཏསྶ དཏྭཱན ཨཱརཱམཾ, ཧཊྛོ སཾཝིགྒམཱནསོ;

སརཎེ པཉྩ སཱིལེ ཙ [སརཎཾ པཉྩསཱིལཉྩ (སཱི.)], དལ༹ྷཾ ཀཏྭཱ སམཱདིཡིཾ.

སོཔི ¶ མཾ བུདྡྷོ བྱཱཀཱསི, སངྒྷམཛ྄ཛྷེ ནིསཱིདིཡ;

‘‘ཨཊྛཱརསེ ཀཔྤསཏེ, ཨཡཾ བུདྡྷོ བྷཝིསྶཏི.

‘‘པདྷཱནཾ ¶ པདཧིཏྭཱན…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

སུདྷཉྙཾ ནཱམ ནགརཾ, སུདཏྟོ ནཱམ ཁཏྟིཡོ;

ཙནྡཱ ནཱམཱསི ཛནིཀཱ, པིཡདསྶིསྶ སཏྠུནོ.

ནཝཝསྶསཧསྶཱནི, ཨགཱརཾ ཨཛ྄ཛྷ སོ ཝསི;

སུནིམྨལཝིམལགིརིགུཧཱ, ཏཡོ པཱསཱདམུཏྟམཱ.

ཏེཏྟིཾསསཧསྶཱནི ཙ, ནཱརིཡོ སམལངྐཏཱ;

ཝིམལཱ ནཱམ ནཱརཱི ཙ, ཀཉྩནཱཝེལོ༹ ནཱམ ཨཏྲཛོ.

ནིམིཏྟེ ¶ ཙཏུརོ དིསྭཱ, རཐཡཱནེན ནིཀྑམི;

ཚམཱསཾ པདྷཱནཙཱརཾ, ཨཙརཱི པུརིསུཏྟམོ.

བྲཧྨུནཱ ཡཱཙིཏོ སནྟོ, པིཡདསྶཱི མཧཱམུནི;

ཝཏྟི ཙཀྐཾ མཧཱཝཱིརོ, ཨུསབྷུཡྻཱནེ མནོརམེ.

པཱལིཏོ སབྦདསྶཱི ཙ, ཨཧེསུཾ ཨགྒསཱཝཀཱ;

སོབྷིཏོ ནཱམུཔཊྛཱཀོ, པིཡདསྶིསྶ སཏྠུནོ.

སུཛཱཏཱ དྷམྨདིནྣཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, ཀཀུདྷོཏི པཝུཙྩཏི.

སནྡྷཀོ དྷམྨཀོ ཙེཝ, ཨཧེསུཾ ཨགྒུཔཊྛཀཱ;

ཝིསཱཁཱ དྷམྨདིནྣཱ ཙ, ཨཧེསུཾ ཨགྒུཔཊྛིཀཱ.

སོཔི ¶ ¶ བུདྡྷོ ཨམིཏཡསོ, དྭཏྟིཾསཝརལཀྑཎོ;

ཨསཱིཏིཧཏྠམུབྦེདྷོ, སཱལརཱཛཱཝ དིསྶཏི.

ཨགྒིཙནྡསཱུརིཡཱནཾ, ནཏྠི ཏཱདིསིཀཱ པབྷཱ;

ཏསྶཱཔི དེཝདེཝསྶ, ཨཱཡུ ཏཱཝཏཀཾ ཨཧུ;

ནཝུཏིཝསྶསཧསྶཱནི, ལོཀེ ཨཊྛཱསི ཙཀྑུམཱ.

སོཔི བུདྡྷོ ཨསམསམོ, ཡུགཱནིཔི ཏཱནི ཨཏུལིཡཱནི;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱ.

པིཡདསྶཱི མུནིཝརོ, ཨསྶཏྠཱརཱམམྷི ནིབྦུཏོ;

ཏཏྠེཝསྶ ཛིནཐཱུཔོ, ཏཱིཎིཡོཛནམུགྒཏོཏི.

ཏཏྠེཝ ¶ ¶ མཎྜཀཔྤམྷི, ཨཏྠདསྶཱི མཧཱཡསོ;

མཧཱཏམཾ ནིཧནྟྭཱན, པཏྟོ སམྦོདྷིམུཏྟམཾ.

བྲཧྨུནཱ ཡཱཙིཏོ སནྟོ, དྷམྨཙཀྐཾ པཝཏྟཡི;

ཨམཏེན ཏཔྤཡཱི ལོཀཾ, དསསཧསྶིསདེཝཀཾ.

ཏསྶཱཔི ལོཀནཱཐསྶ, ཨཧེསུཾ ཨབྷིསམཡཱ ཏཡོ;

ཀོཊིསཏསཧསྶཱནཾ, པཋམཱབྷིསམཡོ ཨཧུ.

ཡདཱ བུདྡྷོ ཨཏྠདསྶཱི, ཙརཏེ དེཝཙཱརིཀཾ;

ཀོཊིསཏསཧསྶཱནཾ, དུཏིཡཱབྷིསམཡོ ཨཧུ.

པུནཱཔརཾ ཡདཱ བུདྡྷོ, དེསེསི པིཏུསནྟིཀེ;

ཀོཊིསཏསཧསྶཱནཾ, ཏཏིཡཱབྷིསམཡོ ཨཧུ.

སནྣིཔཱཏཱ ཏཡོ ཨཱསུཾ, ཏསྶཱཔི ཙ མཧེསིནོ;

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

ཨཊྛནཝུཏིསཧསྶཱནཾ ¶ , པཋམོ ཨཱསི སམཱགམོ;

ཨཊྛཱསཱིཏིསཧསྶཱནཾ, དུཏིཡོ ཨཱསི སམཱགམོ.

ཨཊྛསཏྟཏིསཏསཧསྶཱནཾ ¶ , ཏཏིཡོ ཨཱསི སམཱགམོ;

ཨནུཔཱདཱ ཝིམུཏྟཱནཾ, ཝིམལཱནཾ མཧེསིནཾ.

ཨཧཾ ཏེན སམཡེན, ཛཊིལོ ཨུགྒཏཱཔནོ;

སུསཱིམོ ནཱམ ནཱམེན, མཧིཡཱ སེཊྛསམྨཏོ.

དིབྦཾ ¶ མནྡཱརཝཾ པུཔྥཾ, པདུམཾ པཱརིཚཏྟཀཾ;

དེཝལོཀཱཧརིཏྭཱན, སམྦུདྡྷམབྷིཔཱུཛཡིཾ.

སོཔི མཾ བུདྡྷོ བྱཱཀཱསི, ཨཏྠདསྶཱི མཧཱམུནི;

‘‘ཨཊྛཱརསེ ཀཔྤསཏེ, ཨཡཾ བུདྡྷོ བྷཝིསྶཏི.

‘‘པདྷཱནཾ པདཧིཏྭཱན…པེ… ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, ཧཊྛོ [ཏུཊྛོ (སྱཱ. ཀཾ.)] སཾཝིགྒམཱནསོ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

སོབྷཎཾ ནཱམ ནགརཾ, སཱགརོ ནཱམ ཁཏྟིཡོ;

སུདསྶནཱ ནཱམ ཛནིཀཱ, ཨཏྠདསྶིསྶ སཏྠུནོ.

དསཝསྶསཧསྶཱནི, ཨགཱརཾ ཨཛ྄ཛྷ སོ ཝསི;

ཨམརགིརི སུགིརི ཝཱཧནཱ, ཏཡོ པཱསཱདམུཏྟམཱ.

ཏེཏྟིཾསཉྩ ¶ སཧསྶཱནི, ནཱརིཡོ སམལངྐཏཱ;

ཝིསཱཁཱ ནཱམ ནཱརཱི ཙ, སེལོ ནཱམཱསི ཨཏྲཛོ.

ནིམིཏྟེ ¶ ཙཏུརོ དིསྭཱ, ཨསྶཡཱནེན ནིཀྑམི;

ཨནཱུནཨཊྛམཱསཱནི, པདྷཱནཾ པདཧཱི ཛིནོ.

བྲཧྨུནཱ ཡཱཙིཏོ སནྟོ, ཨཏྠདསྶཱི མཧཱཡསོ;

ཝཏྟི ཙཀྐཾ མཧཱཝཱིརོ, ཨནོམུཡྻཱནེ ནརཱསབྷོ.

སནྟོ ཙ ཨུཔསནྟོ ཙ, ཨཧེསུཾ ཨགྒསཱཝཀཱ;

ཨབྷཡོ ནཱམུཔཊྛཱཀོ, ཨཏྠདསྶིསྶ སཏྠུནོ.

དྷམྨཱ ཙེཝ སུདྷམྨཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, ཙམྤཀོཏི པཝུཙྩཏི.

ནཀུལོ ཙ ནིསབྷོ ཙ, ཨཧེསུཾ ཨགྒུཔཊྛཀཱ;

མཀིལཱ ཙ སུནནྡཱ ཙ, ཨཧེསུཾ ཨགྒུཔཊྛིཀཱ.

སོཔི ¶ ¶ བུདྡྷོ ཨསམསམོ, ཨསཱིཏིཧཏྠམུགྒཏོ;

སོབྷཏེ སཱལརཱཛཱཝ, ཨུལུ༹རཱཛཱཝ པཱུརིཏོ.

ཏསྶ པཱཀཏིཀཱ རཾསཱི, ཨནེཀསཏཀོཊིཡོ;

ཨུདྡྷཾ ཨདྷོ དས དིསཱ, ཕརནྟི ཡོཛནཾ སདཱ.

སོཔི བུདྡྷོ ནརཱསབྷོ, སབྦསཏྟུཏྟམོ མུནི;

ཝསྶསཏསཧསྶཱནི, ལོཀེ ཨཊྛཱསི ཙཀྑུམཱ.

ཨཏུལཾ དསྶེཏྭཱ ཨོབྷཱསཾ, ཝིརོཙེཏྭཱ སདེཝཀེ [ཨཏུལཾ དསྶཡིཏྭཱན, ཨོབྷཱསེཏྭཱ སདེཝཀེ (སཱི. ཀ.)];

སོཔི ཨནིཙྩཏཾ པཏྟོ, ཡཐགྒུཔཱདཱནསངྑཡཱ.

ཨཏྠདསྶཱི ¶ ཛིནཝརོ, ཨནོམཱརཱམམྷི ནིབྦུཏོ;

དྷཱཏུཝིཏྠཱརིཀཾ ཨཱསི, ཏེསུ ཏེསུ པདེསཏོཏི.

ཏཏྠེཝ ¶ མཎྜཀཔྤམྷི, དྷམྨདསྶཱི མཧཱཡསོ;

ཏམནྡྷཀཱརཾ ཝིདྷམིཏྭཱ, ཨཏིརོཙཏི སདེཝཀེ.

ཏསྶཱཔི ཨཏུལཏེཛསྶ, དྷམྨཙཀྐཔྤཝཏྟནེ;

ཀོཊིསཏསཧསྶཱནཾ, པཋམཱབྷིསམཡོ ཨཧུ.

ཡདཱ བུདྡྷོ དྷམྨདསྶཱི, ཝིནེསི སཉྫཡཾ ཨིསིཾ;

ཏདཱ ནཝུཏིཀོཊཱིནཾ, དུཏིཡཱབྷིསམཡོ ཨཧུ.

ཡདཱ སཀྐོ ཨུཔཱགཉྪི, སཔརིསོ ཝིནཱཡཀཾ;

ཏདཱ ཨསཱིཏིཀོཊཱིནཾ, ཏཏིཡཱབྷིསམཡོ ཨཧུ.

ཏསྶཱཔི དེཝདེཝསྶ, སནྣིཔཱཏཱ ཏཡོ ཨཧུཾ [ཨཱསུཾ (སཱི. སྱཱ.)];

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

ཡདཱ བུདྡྷོ དྷམྨདསྶཱི, སརཎེ ཝསྶཾ ཨུཔཱགམི;

ཏདཱ ཀོཊིསཏསཧསྶཱནཾ [ཀོཊིསཧསྶཱནཾ (སཱི. སྱཱ. ཀཾ.)], པཋམོ ཨཱསི སམཱགམོ.

པུནཱཔརཾ ¶ ཡདཱ བུདྡྷོ, དེཝཏོ ཨེཏི མཱནུསཾ;

ཏདཱཔི སཏཀོཊཱིནཾ, དུཏིཡོ ཨཱསི སམཱགམོ.

པུནཱཔརཾ ¶ ¶ ཡདཱ བུདྡྷོ, པཀཱསེསི དྷུཏེ གུཎེ;

ཏདཱ ཨསཱིཏིཀོཊཱིནཾ, ཏཏིཡོ ཨཱསི སམཱགམོ.

ཨཧཾ ཏེན སམཡེན, སཀྐོ ཨཱསིཾ པུརིནྡདོ;

དིབྦེན གནྡྷམཱལེན, ཏུརིཡེནཱབྷིཔཱུཛཡིཾ.

སོཔི མཾ བུདྡྷོ བྱཱཀཱསི, དེཝམཛ྄ཛྷེ ནིསཱིདིཡ;

‘‘ཨཊྛཱརསེ ཀཔྤསཏེ, ཨཡཾ བུདྡྷོ བྷཝིསྶཏི.

‘‘པདྷཱནཾ པདཧིཏྭཱན…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

སུནནྡཱ ནཱམ ཛནིཀཱ, དྷམྨདསྶིསྶ སཏྠུནོ.

ཨཊྛཝསྶསཧསྶཱནི ¶ , ཨགཱརཾ ཨཛ྄ཛྷ སོ ཝསི;

ཨརཛོ ཝིརཛོ སུདསྶནོ, ཏཡོ པཱསཱདམུཏྟམཱ.

ཏིཙཏྟཱརཱིསསཧསྶཱནི [ཙཏྟཱལཱིསསཧསྶཱནི (སྱཱ. ཀཾ.)], ནཱརིཡོ སམལངྐཏཱ;

ཝིཙིཀོལི༹ ནཱམ ནཱརཱི, ཨཏྲཛོ པུཉྙཝཌྜྷནོ.

ནིམིཏྟེ ¶ ཙཏུརོ དིསྭཱ, པཱསཱདེནཱབྷིནིཀྑམི;

སཏྟཱཧཾ པདྷཱནཙཱརཾ, ཨཙརཱི པུརིསུཏྟམོ.

བྲཧྨུནཱ ཡཱཙིཏོ སནྟོ, དྷམྨདསྶཱི ནརཱསབྷོ;

ཝཏྟི ཙཀྐཾ མཧཱཝཱིརོ, མིགདཱཡེ ནརུཏྟམོ.

པདུམོ ཕུསྶདེཝོ ཙ, ཨཧེསུཾ ཨགྒསཱཝཀཱ;

སུནེཏྟོ [སུདཏྟོ (སྱཱ. ཀཾ.)] ནཱམུཔཊྛཱཀོ, དྷམྨདསྶིསྶ སཏྠུནོ.

ཁེམཱ ཙ སཙྩནཱམཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, བིམྦིཛཱལོཏི ཝུཙྩཏི.

སུབྷདྡོ ཀཊིསྶཧོ ཙེཝ, ཨཧེསུཾ ཨགྒུཔཊྛཀཱ;

སཱལི༹ཡཱ [སཱལིསཱ (སྱཱ. ཀཾ.)] ཙ ཀལི༹ཡཱ ཙ, ཨཧེསུཾ ཨགྒུཔཊྛིཀཱ.

སོཔི ¶ བུདྡྷོ ཨསམསམོ, ཨསཱིཏིཧཏྠམུགྒཏོ;

ཨཏིརོཙཏི ཏེཛེན, དསསཧསྶིམྷི དྷཱཏུཡཱ.

སུཕུལློ ¶ སཱལརཱཛཱཝ, ཝིཛྫཱུཝ གགནེ ཡཐཱ;

མཛ྄ཛྷནྷིཀེཝ སཱུརིཡོ, ཨེཝཾ སོ ཨུཔསོབྷཐ.

ཏསྶཱཔི ཨཏུལཏེཛསྶ, སམཀཾ ཨཱསི ཛཱིཝིཏཾ;

ཝསྶསཏསཧསྶཱནི, ལོཀེ ཨཊྛཱསི ཙཀྑུམཱ.

ཨོབྷཱསཾ ¶ དསྶཡིཏྭཱན, ཝིམལཾ ཀཏྭཱན སཱསནཾ;

ཙཝི ཙནྡོཝ གགནེ, ནིབྦུཏོ སོ སསཱཝཀོ.

དྷམྨདསྶཱི མཧཱཝཱིརོ, སཱལཱརཱམམྷི ནིབྦུཏོ;

ཏཏྠེཝསྶ ཐཱུཔཝརོ, ཏཱིཎིཡོཛནམུགྒཏོཏི.

དྷམྨདསྶིསྶ ¶ ཨཔརེན, སིདྡྷཏྠོ ནཱམ ནཱཡཀོ;

ནིཧནིཏྭཱ ཏམཾ སབྦཾ, སཱུརིཡོ ཨབྦྷུགྒཏོ ཡཐཱ.

སོཔི པཏྭཱན སམྦོདྷིཾ, སནྟཱརེནྟོ སདེཝཀཾ;

ཨབྷིཝསྶི དྷམྨམེགྷེན, ནིབྦཱཔེནྟོ སདེཝཀཾ.

ཏསྶཱཔི ཨཏུལཏེཛསྶ, ཨཧེསུཾ ཨབྷིསམཡཱ ཏཡོ;

ཀོཊིསཏསཧསྶཱནཾ, པཋམཱབྷིསམཡོ ཨཧུ.

པུནཱཔརཾ བྷཱིམརཐེ [ཧིམརཊྛེ (ཀ.)], ཡདཱ ཨཱཧནི དུནྡུབྷིཾ;

ཏདཱ ནཝུཏིཀོཊཱིནཾ, དུཏིཡཱབྷིསམཡོ ཨཧུ.

ཡདཱ བུདྡྷོ དྷམྨཾ དེསེསི, ཝེབྷཱརེ སོ པུརུཏྟམེ;

ཏདཱ ནཝུཏིཀོཊཱིནཾ, ཏཏིཡཱབྷིསམཡོ ཨཧུ.

སནྣིཔཱཏཱ ཏཡོ ཨཱསུཾ, ཏསྨིམྤི དྭིཔདུཏྟམེ;

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

ཀོཊིསཏཱནཾ ¶ ¶ ནཝུཏཱིནཾ [ནཝུཏིཡཱ (སྱཱ. ཀཾ.)], ཨསཱིཏིཡཱཔི ཙ ཀོཊིནཾ;

ཨེཏེ ཨཱསུཾ ཏཡོ ཋཱནཱ, ཝིམལཱནཾ སམཱགམེ.

ཨཧཾ ¶ ཏེན སམཡེན, མངྒལོ ནཱམ ཏཱཔསོ;

ཨུགྒཏེཛོ དུཔྤསཧོ, ཨབྷིཉྙཱབལསམཱཧིཏོ.

ཛམྦུཏོ ཕལམཱནེཏྭཱ [ཕལམཱཧཏྭཱ (སཱི. སྱཱ.)] སིདྡྷཏྠསྶ ཨདཱསཧཾ;

པཊིགྒཧེཏྭཱ སམྦུདྡྷོ, ཨིདཾ ཝཙནམབྲཝི.

‘‘པསྶཐ ཨིམཾ ཏཱཔསཾ, ཛཊིལཾ ཨུགྒཏཱཔནཾ;

ཙཏུནྣཝུཏིཏོ ཀཔྤེ, ཨཡཾ བུདྡྷོ བྷཝིསྶཏི.

‘‘པདྷཱནཾ པདཧིཏྭཱན…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

ཝེབྷཱརཾ ནཱམ ནགརཾ, ཨུདེནོ ནཱམ ཁཏྟིཡོ;

སུཕསྶཱ ནཱམ ཛནིཀཱ, སིདྡྷཏྠསྶ མཧེསིནོ.

དསཝསྶསཧསྶཱནི ¶ , ཨགཱརཾ ཨཛ྄ཛྷ སོ ཝསི;

ཀོཀཱསུཔྤལཀོཀནདཱ, ཏཡོ པཱསཱདམུཏྟམཱ.

ཏིསོལ༹སསཧསྶཱནི, ནཱརིཡོ སམལངྐཏཱ;

སོམནསྶཱ ནཱམ སཱ ནཱརཱི, ཨནུཔམོ ནཱམ ཨཏྲཛོ.

ནིམིཏྟེ ཙཏུརོ དིསྭཱ, སིཝིཀཱཡཱབྷིནིཀྑམི;

ཨནཱུནདསམཱསཱནི, པདྷཱནཾ པདཧཱི ཛིནོ.

བྲཧྨུནཱ ཡཱཙིཏོ སནྟོ, སིདྡྷཏྠོ ལོཀནཱཡཀོ;

ཝཏྟི ¶ ཙཀྐཾ མཧཱཝཱིརོ, མིགདཱཡེ ནརུཏྟམོ.

སམྦལོ ཙ སུམིཏྟོ ཙ, ཨཧེསུཾ ཨགྒསཱཝཀཱ;

རེཝཏོ ནཱམུཔཊྛཱཀོ, སིདྡྷཏྠསྶ མཧེསིནོ.

སཱིཝལཱ ཙ སུརཱམཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, ཀཎིཀཱརོཏི ཝུཙྩཏི.

སུཔྤིཡོ ཙ སམུདྡོ ཙ, ཨཧེསུཾ ཨགྒུཔཊྛཀཱ;

རམྨཱ ཙེཝ སུརམྨཱ ཙ, ཨཧེསུཾ ཨགྒུཔཊྛིཀཱ.

སོ ¶ བུདྡྷོ སཊྛིརཏནཾ, ཨཧོསི ནབྷམུགྒཏོ;

ཀཉྩནགྒྷིཡསངྐཱསོ, དསསཧསྶཱི ཝིརོཙཏི.

སོཔི བུདྡྷོ ཨསམསམོ, ཨཏུལོ ཨཔྤཊིཔུགྒལོ;

ཝསྶསཏསཧསྶཱནི, ལོཀེ ཨཊྛཱསི ཙཀྑུམཱ.

ཝིཔུལཾ ¶ པབྷཾ དསྶཡིཏྭཱ, པུཔྥཱཔེཏྭཱན སཱཝཀེ;

ཝིལཱསེཏྭཱ སམཱཔཏྱཱ, ནིབྦུཏོ སོ སསཱཝཀོ.

སིདྡྷཏྠོ ¶ མུནིཝརོ བུདྡྷོ, ཨནོམཱརཱམམྷི ནིབྦུཏོ;

ཏཏྠེཝསྶ ཐཱུཔཝརོ, ཙཏུཡོཛནམུགྒཏོཏི.

སིདྡྷཏྠསྶ ཨཔརེན, ཨསམོ ཨཔྤཊིཔུགྒལོ;

ཨནནྟཏེཛོ ཨམིཏཡསོ, ཏིསྶོ ལོཀགྒནཱཡཀོ.

ཏམནྡྷཀཱརཾ ཝིདྷམིཏྭཱ, ཨོབྷཱསེཏྭཱ སདེཝཀཾ;

ཨནུཀམྤཀོ མཧཱཝཱིརོ, ལོཀེ ཨུཔྤཛྫི ཙཀྑུམཱ.

ཏསྶཱཔི ཨཏུལཱ ཨིདྡྷི, ཨཏུལཾ སཱིལཾ སམཱདྷི ཙ;

སབྦཏྠ པཱརམིཾ གནྟྭཱ, དྷམྨཙཀྐཾ པཝཏྟཡི.

སོ བུདྡྷོ དསསཧསྶིམྷི, ཝིཉྙཱཔེསི གིརཾ སུཙིཾ;

ཀོཊིསཏཱནི ཨབྷིསམིཾསུ, པཋམེ དྷམྨདེསནེ.

དུཏིཡོ ནཝུཏིཀོཊཱིནཾ, ཏཏིཡོ སཊྛིཀོཊིཡོ;

བནྡྷནཱཏོ པམོཙེསི, སཏྟེ [སམྤཏྟེ (ཀ.)] ནརམརཱུ ཏདཱ.

སནྣིཔཱཏཱ ཏཡོ ཨཱསུཾ, ཏིསྶེ ལོཀགྒནཱཡཀེ;

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

ཁཱིཎཱསཝསཏསཧསྶཱནཾ, པཋམོ ཨཱསི སམཱགམོ;

ནཝུཏིསཏསཧསྶཱནཾ, དུཏིཡོ ཨཱསི སམཱགམོ.

ཨསཱིཏིསཏསཧསྶཱནཾ ¶ ¶ ¶ , ཏཏིཡོ ཨཱསི སམཱགམོ;

ཁཱིཎཱསཝཱནཾ ཝིམལཱནཾ, པུཔྥིཏཱནཾ ཝིམུཏྟིཡཱ.

ཨཧཾ ཏེན སམཡེན, སུཛཱཏོ ནཱམ ཁཏྟིཡོ;

མཧཱབྷོགཾ ཚཌྜཡིཏྭཱ, པབྦཛིཾ ཨིསིཔབྦཛཾ.

མཡི ¶ པབྦཛིཏེ སནྟེ, ཨུཔྤཛྫི ལོཀནཱཡཀོ;

བུདྡྷོཏི སདྡཾ སུཏྭཱན, པཱིཏི མེ ཨུཔཔཛྫཐ.

དིབྦཾ མནྡཱརཝཾ པུཔྥཾ, པདུམཾ པཱརིཚཏྟཀཾ;

ཨུབྷོ ཧཏྠེཧི པགྒཡ྄ཧ, དྷུནམཱནོ ཨུཔཱགམིཾ.

ཙཏུཝཎྞཔརིཝུཏཾ, ཏིསྶཾ ལོཀགྒནཱཡཀཾ;

ཏམཧཾ པུཔྥཾ གཧེཏྭཱ, མཏྠཀེ དྷཱརཡིཾ ཛིནཾ.

སོཔི མཾ བུདྡྷོ བྱཱཀཱསི, ཛནམཛ྄ཛྷེ ནིསཱིདིཡ;

‘‘དྭེནཝུཏེ ཨིཏོ ཀཔྤེ, ཨཡཾ བུདྡྷོ བྷཝིསྶཏི.

‘‘པདྷཱནཾ ¶ པདཧིཏྭཱན…པེ… ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

ཁེམཀཾ ནཱམ ནགརཾ, ཛནསནྡྷོ ནཱམ ཁཏྟིཡོ;

པདུམཱ ནཱམ ཛནིཀཱ, ཏིསྶསྶ ཙ མཧེསིནོ.

སཏྟཝསྶསཧསྶཱནི, ཨགཱརཾ ཨཛ྄ཛྷ སོ ཝསི;

གུཧཱསེལ ནཱརིསཡ ནིསབྷཱ [ཀུམུདོ ནཱལི༹ཡོ པདུམོ (ཀ.)], ཏཡོ པཱསཱདམུཏྟམཱ.

སམཏིཾསསཧསྶཱནི, ནཱརིཡོ སམལངྐཏཱ;

སུབྷདྡཱནཱམིཀཱ ནཱརཱི, ཨཱནནྡོ ནཱམ ཨཏྲཛོ.

ནིམིཏྟེ ཙཏུརོ དིསྭཱ, ཨསྶཡཱནེན ནིཀྑམི;

ཨནཱུནཨཊྛམཱསཱནི, པདྷཱནཾ པདཧཱི ཛིནོ.

བྲཧྨུནཱ ཡཱཙིཏོ སནྟོ, ཏིསྶོ ལོཀགྒནཱཡཀོ;

ཝཏྟི ཙཀྐཾ མཧཱཝཱིརོ, ཡསཝཏིཡམུཏྟམེ.

བྲཧྨདེཝོ ཨུདཡོ ཙ, ཨཧེསུཾ ཨགྒསཱཝཀཱ;

སམངྒོ ནཱམུཔཊྛཱཀོ, ཏིསྶསྶ ཙ མཧེསིནོ.

ཕུསྶཱ ¶ ཙེཝ སུདཏྟཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, ཨསནོཏི པཝུཙྩཏི.

སམྦལོ ཙ སིརིམཱ ཙེཝ, ཨཧེསུཾ ཨགྒུཔཊྛཀཱ;

ཀིསཱགོཏམཱི ཨུཔསེནཱ, ཨཧེསུཾ ཨགྒུཔཊྛིཀཱ.

སོ ¶ བུདྡྷོ སཊྛིརཏནོ, ཨཧུ ཨུཙྩཏྟནེ ཛིནོ;

ཨནཱུཔམོ ཨསདིསོ, ཧིམཝཱ ཝིཡ དིསྶཏི.

ཏསྶཱཔི ཨཏུལཏེཛསྶ, ཨཱཡུ ཨཱསི ཨནུཏྟརོ;

ཝསྶསཏསཧསྶཱནི, ལོཀེ ཨཊྛཱསི ཙཀྑུམཱ.

ཨུཏྟམཾ ¶ པཝརཾ སེཊྛཾ, ཨནུབྷོཏྭཱ མཧཱཡསཾ;

ཛལིཏྭཱ ཨགྒིཀྑནྡྷོཝ, ནིབྦུཏོ སོ སསཱཝཀོ.

ཝལཱཧཀོཝ ¶ ཨནིལེན, སཱུརིཡེན ཝིཡ ཨུསྶཝོ;

ཨནྡྷཀཱརོཝ པདཱིཔེན, ནིབྦུཏོ སོ སསཱཝཀོ.

ཏིསྶོ ཛིནཝརོ བུདྡྷོ, ནནྡཱརཱམམྷི ནིབྦུཏོ;

ཏཏྠེཝསྶ ཛིནཐཱུཔོ, ཏཱིཎིཡོཛནམུགྒཏོཏི.

ཏཏྠེཝ མཎྜཀཔྤམྷི, ཨཧུ སཏྠཱ ཨནུཏྟརོ;

ཨནུཔམོ ཨསམསམོ, ཕུསྶོ ལོཀགྒནཱཡཀོ.

སོཔི སབྦཾ ཏམཾ ཧནྟྭཱ, ཝིཛཊེཏྭཱ མཧཱཛཊཾ;

སདེཝཀཾ ཏཔྤཡནྟོ, ཨབྷིཝསྶི ཨམཏམྦུནཱ.

དྷམྨཙཀྐཾ པཝཏྟེནྟེ, ཕུསྶེ ནཀྑཏྟམངྒལེ;

ཀོཊིསཏསཧསྶཱནཾ, པཋམཱབྷིསམཡོ ཨཧུ.

ནཝུཏིསཏསཧསྶཱནཾ ¶ , དུཏིཡཱབྷིསམཡོ ཨཧུ;

ཨསཱིཏིསཏསཧསྶཱནཾ, ཏཏིཡཱབྷིསམཡོ ཨཧུ.

སནྣིཔཱཏཱ ཏཡོ ཨཱསུཾ, ཕུསྶསྶཱཔི མཧེསིནོ;

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

སཊྛིསཏསཧསྶཱནཾ ¶ , པཋམོ ཨཱསི སམཱགམོ;

པཉྙཱསསཏསཧསྶཱནཾ, དུཏིཡོ ཨཱསི སམཱགམོ.

ཙཏྟཱརཱིསསཏསཧསྶཱནཾ, ཏཏིཡོ ཨཱསི སམཱགམོ;

ཨནུཔཱདཱ ཝིམུཏྟཱནཾ, ཝོཙྪིནྣཔཊིསནྡྷིནཾ.

ཨཧཾ ཏེན སམཡེན, ཝིཛིཏཱཝཱི ནཱམ ཁཏྟིཡོ;

ཚཌྜཡིཏྭཱ མཧཱརཛྫཾ, པབྦཛིཾ ཏསྶ སནྟིཀེ.

སོཔི ¶ མཾ བུདྡྷོ བྱཱཀཱསི, ཕུསྶོ ལོཀགྒནཱཡཀོ;

‘‘དྭེནཝུཏེ ཨིཏོ ཀཔྤེ, ཨཡཾ བུདྡྷོ བྷཝིསྶཏི.

‘‘པདྷཱནཾ པདཧིཏྭཱན…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

སུཏྟནྟཾ ¶ ཝིནཡཉྩཱཔི, ནཝངྒཾ སཏྠུསཱསནཾ;

སབྦཾ པརིཡཱཔུཎིཏྭཱ, སོབྷཡིཾ ཛིནསཱསནཾ.

ཏཏྠཔྤམཏྟོ ¶ ཝིཧརནྟོ, བྲཧྨཾ བྷཱཝེཏྭ བྷཱཝནཾ;

ཨབྷིཉྙཱསུ པཱརམིཾ གནྟྭཱ, བྲཧྨལོཀམགཉྪཧཾ.

ཀཱསིཀཾ ནཱམ ནགརཾ, ཛཡསེནོ ནཱམ ཁཏྟིཡོ;

སིརིམཱ ནཱམ ཛནིཀཱ, ཕུསྶསྶཱཔི མཧེསིནོ.

ནཝཝསྶསཧསྶཱནི, ཨགཱརཾ ཨཛ྄ཛྷ སོ ཝསི;

གརུལ༹པཀྑ ཧཾས སུཝཎྞབྷཱརཱ, ཏཡོ པཱསཱདམུཏྟམཱ.

ཏིཾསཨིཏྠིསཧསྶཱནི, ནཱརིཡོ སམལངྐཏཱ;

ཀིསཱགོཏམཱི ནཱམ ནཱརཱི, ཨནཱུཔམོ ནཱམ ཨཏྲཛོ.

ནིམིཏྟེ ཙཏུརོ དིསྭཱ, ཧཏྠིཡཱནེན ནིཀྑམི;

ཚམཱསཾ པདྷཱནཙཱརཾ, ཨཙརཱི པུརིསུཏྟམོ.

བྲཧྨུནཱ ཡཱཙིཏོ སནྟོ, ཕུསྶོ ལོཀགྒནཱཡཀོ;

ཝཏྟི ཙཀྐཾ མཧཱཝཱིརོ, མིགདཱཡེ ནརུཏྟམོ.

སུརཀྑིཏོ དྷམྨསེནོ, ཨཧེསུཾ ཨགྒསཱཝཀཱ;

སབྷིཡོ ནཱམུཔཊྛཱཀོ, ཕུསྶསྶཱཔི མཧེསིནོ.

ཙཱལཱ ¶ ཙ ཨུཔཙཱལཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, ཨཱམཎྜོཏི པཝུཙྩཏི.

དྷནཉྩཡོ ཝིསཱཁོ ཙ, ཨཧེསུཾ ཨགྒུཔཊྛཀཱ;

པདུམཱ ཙེཝ ནཱགཱ ཙ, ཨཧེསུཾ ཨགྒུཔཊྛིཀཱ.

ཨཊྛཔཎྞཱསརཏནཾ ¶ , སོཔི ཨཙྩུགྒཏོ མུནི;

སོབྷཏེ སཏརཾསཱིཝ, ཨུལུ༹རཱཛཱཝ པཱུརིཏོ.

ནཝུཏིཝསྶསཧསྶཱནི, ཨཱཡུ ཝིཛྫཏི ཏཱཝདེ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

ཨོཝདིཏྭཱ ¶ བཧཱུ སཏྟེ, སནྟཱརེཏྭཱ བཧཱུ ཛནེ;

སོཔི སཏྠཱ ཨཏུལཡསོ, ནིབྦུཏོ སོ སསཱཝཀོ.

ཕུསྶོ ཛིནཝརོ སཏྠཱ, སེནཱརཱམམྷི ནིབྦུཏོ;

དྷཱཏུཝིཏྠཱརིཀཾ ཨཱསི, ཏེསུ ཏེསུ པདེསཏོཏི.

ཕུསྶསྶ ¶ ཙ ཨཔརེན, སམྦུདྡྷོ དྭིཔདུཏྟམོ;

ཝིཔསྶཱི ནཱམ ནཱམེན, ལོཀེ ཨུཔྤཛྫི ཙཀྑུམཱ.

ཨཝིཛྫཾ སབྦཾ པདཱལེཏྭཱ, པཏྟོ སམྦོདྷིམུཏྟམཾ;

དྷམྨཙཀྐཾ པཝཏྟེཏུཾ, པཀྐཱམི བནྡྷུམཏཱིཔུརཾ.

དྷམྨཙཀྐཾ པཝཏྟེཏྭཱ, ཨུབྷོ བོདྷེསི ནཱཡཀོ;

གཎནཱཡ ན ཝཏྟབྦོ, པཋམཱབྷིསམཡོ ཨཧུ.

པུནཱཔརཾ ཨམིཏཡསོ, ཏཏྠ སཙྩཾ པཀཱསཡི;

ཙཏུརཱསཱིཏིསཧསྶཱནཾ, དུཏིཡཱབྷིསམཡོ ཨཧུ.

ཙཏུརཱསཱིཏིསཧསྶཱནི ¶ , སམྦུདྡྷཾ ཨནུཔབྦཛུཾ;

ཏེསམཱརཱམཔཏྟཱནཾ, དྷམྨཾ དེསེསི ཙཀྑུམཱ.

སབྦཱཀཱརེན ¶ བྷཱསཏོ, སུཏྭཱ ཨུཔནིསཱདིནོ [ཨུཔནིསྶཱ ཛིནོ (སྱཱ. ཀཾ.)];

ཏེཔི དྷམྨཝརཾ གནྟྭཱ, ཏཏིཡཱབྷིསམཡོ ཨཧུ.

སནྣིཔཱཏཱ ཏཡོ ཨཱསུཾ, ཝིཔསྶིསྶ མཧེསིནོ;

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

ཨཊྛསཊྛིསཏསཧསྶཱནཾ, པཋམོ ཨཱསི སམཱགམོ;

བྷིཀྑུསཏསཧསྶཱནཾ, དུཏིཡོ ཨཱསི སམཱགམོ.

ཨསཱིཏིབྷིཀྑུསཧསྶཱནཾ, ཏཏིཡོ ཨཱསི སམཱགམོ;

ཏཏྠ བྷིཀྑུགཎམཛ྄ཛྷེ, སམྦུདྡྷོ ཨཏིརོཙཏི.

ཨཧཾ ¶ ཏེན སམཡེན, ནཱགརཱཛཱ མཧིདྡྷིཀོ;

ཨཏུལོ ནཱམ ནཱམེན, པུཉྙཝནྟོ ཛུཏིནྡྷརོ.

ནེཀཱནཾ ནཱགཀོཊཱིནཾ, པརིཝཱརེཏྭཱནཧཾ ཏདཱ;

ཝཛྫནྟོ དིབྦཏུརིཡེཧི, ལོཀཛེཊྛཾ ཨུཔཱགམིཾ.

ཨུཔསངྐམིཏྭཱ སམྦུདྡྷཾ, ཝིཔསྶིཾ ལོཀནཱཡཀཾ;

མཎིམུཏྟརཏནཁཙིཏཾ, སབྦཱབྷརཎཝིབྷཱུསིཏཾ;

ནིམནྟེཏྭཱ དྷམྨརཱཛསྶ, སུཝཎྞཔཱིཋམདཱསཧཾ.

སོཔི མཾ བུདྡྷོ བྱཱཀཱསི, སངྒྷམཛ྄ཛྷེ ནིསཱིདིཡ;

‘‘ཨེཀནཝུཏིཏོ ཀཔྤེ, ཨཡཾ བུདྡྷོ བྷཝིསྶཏི.

‘‘ཨཧུ ¶ ཀཔིལཝ྄ཧཡཱ རམྨཱ, ནིཀྑམིཏྭཱ ཏཐཱགཏོ;

པདྷཱནཾ པདཧིཏྭཱན, ཀཏྭཱ དུཀྐརཀཱརིཀཾ.

‘‘ཨཛཔཱལརུཀྑམཱུལསྨིཾ ¶ , ནིསཱིདིཏྭཱ ཏཐཱགཏོ;

ཏཏྠ པཱཡཱསཾ པགྒཡ྄ཧ, ནེརཉྫརམུཔེཧིཏི.

‘‘ནེརཉྫརཱཡ ཏཱིརམྷི, པཱཡཱསཾ ཨད སོ ཛིནོ;

པཊིཡཏྟཝརམགྒེན, བོདྷིམཱུལམུཔེཧིཏི.

‘‘ཏཏོ པདཀྑིཎཾ ཀཏྭཱ, བོདྷིམཎྜཾ ཨནུཏྟརོ;

ཨསྶཏྠམཱུལེ སམྦོདྷིཾ, བུཛ྄ཛྷིསྶཏི མཧཱཡསོ.

‘‘ཨིམསྶ ཛནིཀཱ མཱཏཱ, མཱཡཱ ནཱམ བྷཝིསྶཏི;

པིཏཱ སུདྡྷོདནོ ནཱམ, ཨཡཾ ཧེསྶཏི གོཏམོ.

‘‘ཨནཱསཝཱ ¶ ཝཱིཏརཱགཱ, སནྟཙིཏྟཱ སམཱཧིཏཱ;

ཀོལིཏོ ཨུཔཏིསྶོ ཙ, ཨགྒཱ ཧེསྶནྟི སཱཝཀཱ;

ཨཱནནྡོ ནཱམུཔཊྛཱཀོ, ཨུཔཊྛིསྶཏིམཾ ཛིནཾ.

‘‘ཁེམཱ ཨུཔྤལཝཎྞཱ ཙ, ཨགྒཱ ཧེསྶནྟི སཱཝིཀཱ;

ཨནཱསཝཱ ཝཱིཏརཱགཱ, སནྟཙིཏྟཱ སམཱཧིཏཱ;

བོདྷི ཏསྶ བྷགཝཏོ, ཨསྶཏྠོཏི པཝུཙྩཏི.

‘‘ཙིཏྟོ ཙ ཧཏྠཱལ༹ཝཀོ, ཨགྒཱ ཧེསྶནྟུཔཊྛཀཱ;

ནནྡམཱཏཱ ཙ ཨུཏྟརཱ, ཨགྒཱ ཧེསྶནྟུཔཊྛིཀཱ;

ཨཱཡུ ཝསྶསཏཾ ཏསྶ, གོཏམསྶ ཡསསྶིནོ.

‘‘ཨིདཾ ¶ ¶ སུཏྭཱན ཝཙནཾ…པེ… ཧེསྶཱམ སམྨུཁཱ ཨིམཾ’’.

ཏསྶཱཧཾ ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

ནགརཾ བནྡྷུམཏཱི ནཱམ, བནྡྷུམཱ ནཱམ ཁཏྟིཡོ;

མཱཏཱ བནྡྷུམཏཱི ནཱམ, ཝིཔསྶིསྶ མཧེསིནོ.

ཨཊྛཝསྶསཧསྶཱནི, ཨགཱརཾ ཨཛ྄ཛྷ སོ ཝསི;

ནནྡོ སུནནྡོ སིརིམཱ, ཏཡོ པཱསཱདམུཏྟམཱ.

ཏིཙཏྟཱརཱིསསཧསྶཱནི, ནཱརིཡོ སམལངྐཏཱ;

སུདསྶནཱ ནཱམ སཱ ནཱརཱི, སམཝཏྟཀྑནྡྷོ ནཱམ ཨཏྲཛོ.

ནིམིཏྟེ ཙཏུརོ དིསྭཱ, རཐཡཱནེན ནིཀྑམི;

ཨནཱུནཨཊྛམཱསཱནི, པདྷཱནཾ པདཧཱི ཛིནོ.

བྲཧྨུནཱ ¶ ཡཱཙིཏོ སནྟོ, ཝིཔསྶཱི ལོཀནཱཡཀོ;

ཝཏྟི ཙཀྐཾ མཧཱཝཱིརོ, མིགདཱཡེ ནརུཏྟམོ.

ཁཎྜོ ཙ ཏིསྶནཱམོ ཙ, ཨཧེསུཾ ཨགྒསཱཝཀཱ;

ཨསོཀོ ནཱམུཔཊྛཱཀོ, ཝིཔསྶིསྶ མཧེསིནོ.

ཙནྡཱ ཙ ཙནྡམིཏྟཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, པཱཊལཱིཏི པཝུཙྩཏི.

པུནབྦསུམིཏྟོ ནཱགོ ཙ, ཨཧེསུཾ ཨགྒུཔཊྛཀཱ;

སིརིམཱ ཨུཏྟརཱ ཙེཝ, ཨཧེསུཾ ཨགྒུཔཊྛིཀཱ.

ཨསཱིཏིཧཏྠམུབྦེདྷོ ¶ , ཝིཔསྶཱི ལོཀནཱཡཀོ;

པབྷཱ ནིདྡྷཱཝཏི ཏསྶ, སམནྟཱ སཏྟཡོཛནེ.

ཨསཱིཏིཝསྶསཧསྶཱནི, ཨཱཡུ བུདྡྷསྶ ཏཱཝདེ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

བཧུདེཝམནུསྶཱནཾ, བནྡྷནཱ པརིམོཙཡི;

མགྒཱམགྒཉྩ ཨཱཙིཀྑི, ཨཝསེསཔུཐུཛྫནེ.

ཨཱལོཀཾ ¶ དསྶཡིཏྭཱན, དེསེཏྭཱ ཨམཏཾ པདཾ;

ཛལིཏྭཱ ཨགྒིཀྑནྡྷོཝ, ནིབྦུཏོ སོ སསཱཝཀོ.

ཨིདྡྷིཝརཾ པུཉྙཝརཾ, ལཀྑཎཉྩ ཀུསུམིཏཾ;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱ.

ཝིཔསྶཱི ¶ ཛིནཝརོ བུདྡྷོ, སུམིཏྟཱརཱམམྷི ནིབྦུཏོ;

ཏཏྠེཝསྶ ཐཱུཔཝརོ, སཏྟཡོཛནམུསྶིཏོཏི.

ཝིཔསྶིསྶ བྷགཝཏོ ཝཾསོ ཨེཀཱུནཝཱིསཏིམོ.

ཝིཔསྶིསྶ ¶ ཨཔརེན, སམྦུདྡྷོ དྭིཔདུཏྟམོ;

སིཁིཝ྄ཧཡོ ཨཱསི ཛིནོ, ཨསམོ ཨཔྤཊིཔུགྒལོ.

མཱརསེནཾ པམདྡིཏྭཱ, པཏྟོ སམྦོདྷིམུཏྟམཾ;

དྷམྨཙཀྐཾ པཝཏྟེསི, ཨནུཀམྤཱཡ པཱཎིནཾ.

དྷམྨཙཀྐཾ པཝཏྟེནྟེ, སིཁིམྷི ཛིནཔུངྒཝེ [མུནིཔུངྒཝེ (སཱི.)];

ཀོཊིསཏསཧསྶཱནཾ, པཋམཱབྷིསམཡོ ཨཧུ.

ཨཔརམྤི དྷམྨཾ དེསེནྟེ, གཎསེཊྛེ ནརུཏྟམེ;

ནཝུཏིཀོཊིསཧསྶཱནཾ, དུཏིཡཱབྷིསམཡོ ཨཧུ.

ཡམཀཔཱཊིཧཱརིཡཉྩ [ཡམཀཾ པཱཊིཧཱིརཉྩ (སཱི.)], དསྶཡནྟེ སདེཝཀེ;

ཨསཱིཏིཀོཊིསཧསྶཱནཾ, ཏཏིཡཱབྷིསམཡོ ཨཧུ.

སནྣིཔཱཏཱ ¶ ཏཡོ ཨཱསུཾ, སིཁིསྶཱཔི མཧེསིནོ;

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

བྷིཀྑུསཏསཧསྶཱནཾ, པཋམོ ཨཱསི སམཱགམོ;

ཨསཱིཏིབྷིཀྑུསཧསྶཱནཾ, དུཏིཡོ ཨཱསི སམཱགམོ.

སཏྟཏིབྷིཀྑུསཧསྶཱནཾ, ཏཏིཡོ ཨཱསི སམཱགམོ;

ཨནུཔལིཏྟོ པདུམཾཝ, ཏོཡམྷི སམྤཝཌྜྷིཏཾ.

ཨཧཾ ཏེན སམཡེན, ཨརིནྡམོ ནཱམ ཁཏྟིཡོ;

སམྦུདྡྷཔྤམུཁཾ སངྒྷཾ, ཨནྣཔཱནེན ཏཔྤཡིཾ.

བཧུཾ ¶ དུསྶཝརཾ དཏྭཱ, དུསྶཀོཊིཾ ཨནཔྤཀཾ;

ཨལངྐཏཾ ཧཏྠིཡཱནཾ, སམྦུདྡྷསྶ ཨདཱསཧཾ.

ཧཏྠིཡཱནཾ ¶ ནིམྨིནིཏྭཱ, ཀཔྤིཡཾ ཨུཔནཱམཡིཾ;

པཱུརཡིཾ མཱནསཾ མཡ྄ཧཾ, ནིཙྩཾ དལ༹ྷམུཔཊྛིཏཾ.

སོཔི ¶ མཾ བུདྡྷོ བྱཱཀཱསི, སིཁཱི ལོཀགྒནཱཡཀོ;

‘‘ཨེཀཏིཾསེ ཨིཏོ ཀཔྤེ, ཨཡཾ བུདྡྷོ བྷཝིསྶཏི.

‘‘ཨཧུ ཀཔིལཝ྄ཧཡཱ རམྨཱ…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཧཾ ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

ནགརཾ ཨརུཎཝཏཱི ནཱམ, ཨརུཎོ ནཱམ ཁཏྟིཡོ;

པབྷཱཝཏཱི ནཱམ ཛནིཀཱ, སིཁིསྶཱཔི མཧེསིནོ.

སཏྟཝསྶསཧསྶཱནི ¶ , ཨགཱརཾ ཨཛ྄ཛྷ སོ ཝསི;

སུཙནྡཀོ གིརི ཝསབྷོ [སུཙནྡོ གིརིཝཧནོ (སཱི.)], ཏཡོ པཱསཱདམུཏྟམཱ.

ཙཏུཝཱིསསཧསྶཱནི, ནཱརིཡོ སམལངྐཏཱ;

སབྦཀཱམཱ ནཱམ ནཱརཱི, ཨཏུལོ ནཱམ ཨཏྲཛོ.

ནིམིཏྟེ ཙཏུརོ དིསྭཱ, ཧཏྠིཡཱནེན ནིཀྑམི;

ཨཊྛམཱསཾ པདྷཱནཙཱརཾ, ཨཙརཱི པུརིསུཏྟམོ.

བྲཧྨུནཱ ¶ ཡཱཙིཏོ སནྟོ, སིཁཱི ལོཀགྒནཱཡཀོ;

ཝཏྟི ཙཀྐཾ མཧཱཝཱིརོ, མིགདཱཡེ ནརུཏྟམོ.

ཨབྷིབྷཱུ སམྦྷཝོ ཙེཝ, ཨཧེསུཾ ཨགྒསཱཝཀཱ;

ཁེམངྐརོ ནཱམུཔཊྛཱཀོ, སིཁིསྶཱཔི མཧེསིནོ.

སཁིལཱ ཙ པདུམཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, པུཎྜརཱིཀོཏི ཝུཙྩཏི.

སིརིཝཌྜྷོ ཙ ནནྡོ ཙ, ཨཧེསུཾ ཨགྒུཔཊྛཀཱ;

ཙིཏྟཱ ཙེཝ སུགུཏྟཱ ཙ, ཨཧེསུཾ ཨགྒུཔཊྛིཀཱ.

ཨུཙྩཏྟནེན སོ བུདྡྷོ, སཏྟཏིཧཏྠམུགྒཏོ;

ཀཉྩནགྒྷིཡསངྐཱསོ, དྭཏྟིཾསཝརལཀྑཎོ.

ཏསྶཱཔི བྱཱམཔྤབྷཱ ཀཱཡཱ, དིཝཱརཏྟིཾ ནིརནྟརཾ;

དིསོདིསཾ ནིཙྪརནྟི, ཏཱིཎིཡོཛནསོ པབྷཱ.

སཏྟཏིཝསྶསཧསྶཱནི, ཨཱཡུ ཏསྶ མཧེསིནོ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

དྷམྨམེགྷཾ ¶ ¶ པཝསྶེཏྭཱ, ཏེམཡིཏྭཱ སདེཝཀེ;

ཁེམནྟཾ པཱཔཡིཏྭཱན, ནིབྦུཏོ སོ སསཱཝཀོ.

ཨནུབྱཉྫནསམྤནྣཾ, དྭཏྟིཾསཝརལཀྑཎཾ;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱ.

སིཁཱི མུནིཝརོ བུདྡྷོ, ཨསྶཱརཱམམྷི ནིབྦུཏོ;

ཏཏྠེཝསྶ ཐཱུཔཝརོ, ཏཱིཎིཡོཛནམུགྒཏོཏི.

ཏཏྠེཝ ¶ མཎྜཀཔྤམྷི, ཨསམོ ཨཔྤཊིཔུགྒལོ;

ཝེསྶབྷཱུ ནཱམ ནཱམེན, ལོཀེ ཨུཔྤཛྫི ནཱཡཀོ [སོ ཛིནོ (སྱཱ. ཀཾ. ཀ.)].

ཨཱདིཏྟཾ ¶ ཝཏ རཱགགྒི, ཏཎྷཱནཾ ཝིཛིཏཾ ཏདཱ;

ནཱགོཝ བནྡྷནཾ ཚེཏྭཱ, པཏྟོ སམྦོདྷིམུཏྟམཾ.

དྷམྨཙཀྐཾ པཝཏྟེནྟེ, ཝེསྶབྷཱུལོཀནཱཡཀེ;

ཨསཱིཏིཀོཊིསཧསྶཱནཾ, པཋམཱབྷིསམཡོ ཨཧུ.

པཀྐནྟེ ཙཱརིཀཾ རཊྛེ, ལོཀཛེཊྛེ ནརཱསབྷེ;

སཏྟཏིཀོཊིསཧསྶཱནཾ, དུཏིཡཱབྷིསམཡོ ཨཧུ.

མཧཱདིཊྛིཾ ཝིནོདེནྟོ, པཱཊིཧེརཾ ཀརོཏི སོ;

སམཱགཏཱ ནརམརཱུ, དསསཧསྶཱི སདེཝཀེ.

མཧཱཨཙྪརིཡཾ ¶ དིསྭཱ, ཨབྦྷུཏཾ ལོམཧཾསནཾ;

དེཝཱ ཙེཝ མནུསྶཱ ཙ, བུཛ྄ཛྷརེ སཊྛིཀོཊིཡོ.

སནྣིཔཱཏཱ ཏཡོ ཨཱསུཾ, ཝེསྶབྷུསྶ མཧེསིནོ;

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

ཨསཱིཏིབྷིཀྑུསཧསྶཱནཾ, པཋམོ ཨཱསི སམཱགམོ;

སཏྟཏིབྷིཀྑུསཧསྶཱནཾ, དུཏིཡོ ཨཱསི སམཱགམོ.

སཊྛིབྷིཀྑུསཧསྶཱནཾ ¶ , ཏཏིཡོ ཨཱསི སམཱགམོ;

ཛརཱདིབྷཡབྷཱིཏཱནཾ, ཨོརསཱནཾ མཧེསིནོ.

ཨཧཾ ཏེན སམཡེན, སུདསྶནོ ནཱམ ཁཏྟིཡོ;

ནིམནྟེཏྭཱ མཧཱཝཱིརཾ, དཱནཾ དཏྭཱ མཧཱརཧཾ;

ཨནྣཔཱནེན ཝཏྠེན, སསངྒྷཾ ཛིན པཱུཛཡིཾ.

ཏསྶ བུདྡྷསྶ ཨསམསྶ, ཙཀྐཾ ཝཏྟིཏམུཏྟམཾ;

སུཏྭཱན པཎིཏཾ དྷམྨཾ, པབྦཛྫམབྷིརོཙཡིཾ.

མཧཱདཱནཾ པཝཏྟེཏྭཱ, རཏྟིནྡིཝམཏནྡིཏོ;

པབྦཛྫཾ གུཎསམྤནྣཾ, པབྦཛིཾ ཛིནསནྟིཀེ.

ཨཱཙཱརགུཎསམྤནྣོ, ཝཏྟསཱིལསམཱཧིཏོ;

སབྦཉྙུཏཾ གཝེསནྟོ, རམཱམི ཛིནསཱསནེ.

སདྡྷཱཔཱིཏིཾ ཨུཔགནྟྭཱ, བུདྡྷཾ ཝནྡཱམི སཏྠརཾ;

པཱིཏི ཨུཔྤཛྫཏི མཡ྄ཧཾ, བོདྷིཡཱཡེཝ ཀཱརཎཱ.

ཨནིཝཏྟམཱནསཾ ¶ ཉཏྭཱ, སམྦུདྡྷོ ཨེཏདབྲཝི;

‘‘ཨེཀཏིཾསེ ཨིཏོ ཀཔྤེ, ཨཡཾ བུདྡྷོ བྷཝིསྶཏི.

‘‘ཨཧུ ¶ ཀཔིལཝ྄ཧཡཱ རམྨཱ…པེ… ཧེསྶཱམ སམྨུཁཱ ཨིམཾ’’.

ཏསྶཱཧཾ ¶ ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

ཨནོམཾ ནཱམ ནགརཾ, སུཔྤཏཱིཏོ ནཱམ ཁཏྟིཡོ;

མཱཏཱ ཡསཝཏཱི ནཱམ, ཝེསྶབྷུསྶ མཧེསིནོ.

ཚ ཙ ཝསྶསཧསྶཱནི, ཨགཱརཾ ཨཛ྄ཛྷ སོ ཝསི;

རུཙི སུརུཙི རཏིཝཌྜྷནོ, ཏཡོ པཱསཱདམུཏྟམཱ.

ཨནཱུནཏིཾསསཧསྶཱནི, ནཱརིཡོ སམལངྐཏཱ;

སུཙིཏྟཱ ནཱམ སཱ ནཱརཱི, སུཔྤབུདྡྷོ ནཱམ ཨཏྲཛོ.

ནིམིཏྟེ ཙཏུརོ དིསྭཱ, སིཝིཀཱཡཱབྷིནིཀྑམི;

ཚམཱསཾ པདྷཱནཙཱརཾ, ཨཙརཱི པུརིསུཏྟམོ.

བྲཧྨུནཱ ¶ ཡཱཙིཏོ སནྟོ, ཝེསྶབྷཱུལོཀནཱཡཀོ;

ཝཏྟི ཙཀྐཾ མཧཱཝཱིརོ, ཨརུཎཱརཱམེ ནརུཏྟམོ.

སོཎོ ¶ ཙ ཨུཏྟརོ ཙེཝ, ཨཧེསུཾ ཨགྒསཱཝཀཱ;

ཨུཔསནྟོ ནཱམུཔཊྛཱཀོ, ཝེསྶབྷུསྶ མཧེསིནོ.

རཱམཱ [དཱམཱ (སཱི.)] ཙེཝ སམཱལཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, མཧཱསཱལོཏི ཝུཙྩཏི.

སོཏྠིཀོ ཙེཝ རམྦྷོ ཙ, ཨཧེསུཾ ཨགྒུཔཊྛཀཱ;

གོཏམཱི སིརིམཱ ཙེཝ, ཨཧེསུཾ ཨགྒུཔཊྛིཀཱ.

སཊྛིརཏནམུབྦེདྷོ, ཧེམཡཱུཔསམཱུཔམོ;

ཀཱཡཱ ནིཙྪརཏི རསྨི, རཏྟིཾཝ པབྦཏེ སིཁཱི.

སཊྛིཝསྶསཧསྶཱནི, ཨཱཡུ ཏསྶ མཧེསིནོ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

དྷམྨཾ ¶ ཝིཏྠཱརིཀཾ ཀཏྭཱ, ཝིབྷཛིཏྭཱ མཧཱཛནཾ;

དྷམྨནཱཝཾ ཋཔེཏྭཱན, ནིབྦུཏོ སོ སསཱཝཀོ.

དསྶནེཡྻཾ སབྦཛནཾ, ཝིཧཱརཾ ཨིརིཡཱཔཐཾ;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱ.

ཝེསྶབྷཱུ ཛིནཝརོ སཏྠཱ, ཁེམཱརཱམམྷི ནིབྦུཏོ;

དྷཱཏུཝིཏྠཱརིཀཾ ཨཱསི, ཏེསུ ཏེསུ པདེསཏོཏི.

ཝེསྶབྷུསྶ བྷགཝཏོ ཝཾསོ ཨེཀཝཱིསཏིམོ.

ཝེསྶབྷུསྶ ¶ ¶ ཨཔརེན, སམྦུདྡྷོ དྭིཔདུཏྟམོ;

ཀཀུསནྡྷོ ནཱམ ནཱམེན, ཨཔྤམེཡྻོ དུརཱསདོ.

ཨུགྒྷཱཊེཏྭཱ སབྦབྷཝཾ, ཙརིཡཱཡ པཱརམིཾ གཏོ;

སཱིཧོཝ པཉྫརཾ བྷེཏྭཱ, པཏྟོ སམྦོདྷིམུཏྟམཾ.

དྷམྨཙཀྐཾ པཝཏྟེནྟེ, ཀཀུསནྡྷེ ལོཀནཱཡཀེ;

ཙཏྟཱརཱིསཀོཊིསཧསྶཱནཾ, དྷམྨཱབྷིསམཡོ ཨཧུ.

ཨནྟལིཀྑམྷི ¶ ཨཱཀཱསེ, ཡམཀཾ ཀཏྭཱ ཝིཀུབྦནཾ;

ཏིཾསཀོཊིསཧསྶཱནཾ, བོདྷེསི དེཝམཱནུསེ.

དྷམྨཱབྷིསམཡོ ཏསྶ, གཎནཱཏོ ཨསངྑིཡོ.

ཀཀུསནྡྷསྶ བྷགཝཏོ, ཨེཀོ ཨཱསི སམཱགམོ;

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

ཙཏྟཱལཱིསསཧསྶཱནཾ, ཏདཱ ཨཱསི སམཱགམོ;

དནྟབྷཱུམིམནུཔྤཏྟཱནཾ, ཨཱསཝཱརིགཎཀྑཡཱ.

ཨཧཾ ཏེན སམཡེན, ཁེམོ ནཱམཱསི ཁཏྟིཡོ;

ཏཐཱགཏེ ཛིནཔུཏྟེ, དཱནཾ དཏྭཱ ཨནཔྤཀཾ.

པཏྟཉྩ ཙཱིཝརཾ དཏྭཱ, ཨཉྫནཾ མདྷུལཊྛིཀཾ;

ཨིམེཏཾ པཏྠིཏཾ སབྦཾ, པཊིཡཱདེམི ཝརཾ ཝརཾ.

སོཔི ¶ ¶ མཾ བུདྡྷོ བྱཱཀཱསི, ཀཀུསནྡྷོ ཝིནཱཡཀོ;

‘‘ཨིམམྷི བྷདྡཀེ ཀཔྤེ, ཨཡཾ བུདྡྷོ བྷཝིསྶཏི.

‘‘ཨཧུ ཀཔིལཝ྄ཧཡཱ རམྨཱ…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

ནགརཾ ཁེམཱཝཏཱི ནཱམ, ཁེམོ ནཱམཱསཧཾ ཏདཱ;

སབྦཉྙུཏཾ གཝེསནྟོ, པབྦཛིཾ ཏསྶ སནྟིཀེ.

བྲཱཧྨཎོ ཨགྒིདཏྟོ ཙ, ཨཱསི བུདྡྷསྶ སོ པིཏཱ;

ཝིསཱཁཱ ནཱམ ཛནིཀཱ, ཀཀུསནྡྷསྶ སཏྠུནོ.

ཝསཏེ ཏཏྠ ཁེམེ པུརེ, སམྦུདྡྷསྶ མཧཱཀུལཾ;

ནརཱནཾ པཝརཾ སེཊྛཾ, ཛཱཏིམནྟཾ མཧཱཡསཾ.

ཙཏུཝསྶསཧསྶཱནི, ཨགཱརཾ ཨཛ྄ཛྷ སོ ཝསི;

ཀཱམ ¶ -ཀཱམཝཎྞ-ཀཱམསུདྡྷིནཱམཱ [སུཙི སུརུཙི རཏིཝདྡྷནནཱམཀཱ (སཱི.)], ཏཡོ པཱསཱདམུཏྟམཱ.

སམཏིཾསསཧསྶཱནི ¶ , ནཱརིཡོ སམལངྐཏཱ;

རོཙིནཱི ནཱམ སཱ ནཱརཱི, ཨུཏྟརོ ནཱམ ཨཏྲཛོ.

ནིམིཏྟེ ཙཏུརོ དིསྭཱ, རཐཡཱནེན ནིཀྑམི;

ཨནཱུནཨཊྛམཱསཱནི, པདྷཱནཾ པདཧཱི ཛིནོ.

བྲཧྨུནཱ ¶ ཡཱཙིཏོ སནྟོ, ཀཀུསནྡྷོ ཝིནཱཡཀོ;

ཝཏྟི ཙཀྐཾ མཧཱཝཱིརོ, མིགདཱཡེ ནརུཏྟམོ.

ཝིདྷུརོ ཙ སཉྫཱིཝོ ཙ, ཨཧེསུཾ ཨགྒསཱཝཀཱ;

བུདྡྷིཛོ ནཱམུཔཊྛཱཀོ, ཀཀུསནྡྷསྶ སཏྠུནོ.

སཱམཱ ཙ ཙམྤཱནཱམཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, སིརཱིསོཏི པཝུཙྩཏི.

ཨཙྩུཏོ ཙ སུམནོ ཙ, ཨཧེསུཾ ཨགྒུཔཊྛཀཱ;

ནནྡཱ ཙེཝ སུནནྡཱ ཙ, ཨཧེསུཾ ཨགྒུཔཊྛིཀཱ.

ཙཏྟཱལཱིསརཏནཱནི ¶ , ཨཙྩུགྒཏོ མཧཱམུནི;

ཀནཀཔྤབྷཱ ནིཙྪརཏི, སམནྟཱ དསཡོཛནཾ.

ཙཏྟཱལཱིསཝསྶསཧསྶཱནི, ཨཱཡུ ཏསྶ མཧེསིནོ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

དྷམྨཱཔཎཾ པསཱརེཏྭཱ, ནརནཱརཱིནཾ སདེཝཀེ;

ནདིཏྭཱ ¶ སཱིཧནཱདཾཝ, ནིབྦུཏོ སོ སསཱཝཀོ.

ཨཊྛངྒཝཙནསམྤནྣོ, ཨཙྪིདྡཱནི ནིརནྟརཾ;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱ.

ཀཀུསནྡྷོ ཛིནཝརོ, ཁེམཱརཱམམྷི ནིབྦུཏོ;

ཏཏྠེཝསྶ ཐཱུཔཝརོ, གཱཝུཏཾ ནབྷམུགྒཏོཏི.

ཀཀུསནྡྷསྶ བྷགཝཏོ ཝཾསོ དྭཱཝཱིསཏིམོ.

ཀཀུསནྡྷསྶ ¶ ཨཔརེན, སམྦུདྡྷོ དྭིཔདུཏྟམོ;

ཀོཎཱགམནོ ནཱམ ཛིནོ, ལོཀཛེཊྛོ ནརཱསབྷོ.

དསདྷམྨེ པཱུརཡིཏྭཱན, ཀནྟཱརཾ སམཏིཀྐམི;

པཝཱཧིཡ མལཾ སབྦཾ, པཏྟོ སམྦོདྷིམུཏྟམཾ.

དྷམྨཙཀྐཾ ¶ པཝཏྟེནྟེ, ཀོཎཱགམནནཱཡཀེ;

ཏིཾསཀོཊིསཧསྶཱནཾ, པཋམཱབྷིསམཡོ ཨཧུ.

པཱཊིཧཱིརཾ ཀརོནྟེ ཙ, པརཝཱདཔྤམདྡནེ;

ཝཱིསཏིཀོཊིསཧསྶཱནཾ, དུཏིཡཱབྷིསམཡོ ཨཧུ.

ཏཏོ ཝིཀུབྦནཾ ཀཏྭཱ, ཛིནོ དེཝཔུརཾ གཏོ;

ཝསཏེ ཏཏྠ སམྦུདྡྷོ, སིལཱཡ པཎྜུཀམྦལེ.

པཀརཎེ སཏྟ དེསེནྟོ, ཝསྶཾ ཝསཏི སོ མུནི;

དསཀོཊིསཧསྶཱནཾ, ཏཏིཡཱབྷིསམཡོ ཨཧུ.

ཏསྶཱཔི ¶ དེཝདེཝསྶ, ཨེཀོ ཨཱསི སམཱགམོ;

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

ཏིཾསབྷིཀྑུསཧསྶཱནཾ ¶ , ཏདཱ ཨཱསི སམཱགམོ;

ཨོགྷཱནམཏིཀྐནྟཱནཾ, བྷིཛྫིཏཱནཉྩ མཙྩུཡཱ.

ཨཧཾ ཏེན སམཡེན, པབྦཏོ ནཱམ ཁཏྟིཡོ;

མིཏྟཱམཙྩེཧི སམྤནྣོ, ཨནནྟབལཝཱཧནོ.

སམྦུདྡྷདསྶནཾ གནྟྭཱ, སུཏྭཱ དྷམྨམནུཏྟརཾ;

ནིམནྟེཏྭཱ སཛིནསངྒྷཾ, དཱནཾ དཏྭཱ ཡདིཙྪཀཾ.

པཊྚུཎྞཾ ཙཱིནཔཊྚཉྩ, ཀོསེཡྻཾ ཀམྦལམྤི ཙ;

སོཝཎྞཔཱདུཀཉྩེཝ, ཨདཱསིཾ སཏྠུསཱཝཀེ.

སོཔི མཾ བུདྡྷོ བྱཱཀཱསི, སངྒྷམཛ྄ཛྷེ ནིསཱིདིཡ;

‘‘ཨིམམྷི བྷདྡཀེ ཀཔྤེ, ཨཡཾ བུདྡྷོ བྷཝིསྶཏི.

‘‘ཨཧུ ཀཔིལཝ྄ཧཡཱ རམྨཱ…པེ… ¶ ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

སབྦཉྙུཏཾ གཝེསནྟོ, དཱནཾ དཏྭཱ ནརུཏྟམེ;

ཨོཧཱཡཱཧཾ མཧཱརཛྫཾ, པབྦཛིཾ ཛིནསནྟིཀེ [ཏསྶ སནྟིཀེ (སཱི.)].

ནགརཾ སོབྷཝཏཱི ནཱམ, སོབྷོ ནཱམཱསི ཁཏྟིཡོ;

ཝསཏེ ཏཏྠ ནགརེ, སམྦུདྡྷསྶ མཧཱཀུལཾ.

བྲཱཧྨཎོ ¶ ཡཉྙདཏྟོ ཙ, ཨཱསི བུདྡྷསྶ སོ པིཏཱ;

ཨུཏྟརཱ ནཱམ ཛནིཀཱ, ཀོཎཱགམནསྶ སཏྠུནོ.

ཏཱིཎི ¶ ཝསྶསཧསྶཱནི, ཨགཱརཾ ཨཛ྄ཛྷ སོ ཝསི;

ཏུསིཏསནྟུསིཏསནྟུཊྛཱ, ཏཡོ པཱསཱདམུཏྟམཱ.

ཨནཱུནསོལ༹སསཧསྶཱནི, ནཱརིཡོ སམལངྐཏཱ;

རུཙིགཏྟཱ ནཱམ ནཱརཱི, སཏྠཝཱཧོ ནཱམ ཨཏྲཛོ.

ནིམིཏྟེ ཙཏུརོ དིསྭཱ, ཧཏྠིཡཱནེན ནིཀྑམི;

ཚམཱསཾ པདྷཱནཙཱརཾ, ཨཙརཱི པུརིསུཏྟམོ.

བྲཧྨུནཱ ¶ ཡཱཙིཏོ སནྟོ, ཀོཎཱགམནནཱཡཀོ;

ཝཏྟི ཙཀྐཾ མཧཱཝཱིརོ, མིགདཱཡེ ནརུཏྟམོ.

བྷིཡྻསོ ཨུཏྟརོ ནཱམ, ཨཧེསུཾ ཨགྒསཱཝཀཱ;

སོཏྠིཛོ ནཱམུཔཊྛཱཀོ, ཀོཎཱགམནསྶ སཏྠུནོ.

སམུདྡཱ ¶ ཨུཏྟརཱ ཙེཝ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, ཨུདུམྦརོཏི པཝུཙྩཏི.

ཨུགྒོ ཙ སོམདེཝོ ཙ, ཨཧེསུཾ ཨགྒུཔཊྛཀཱ;

སཱིཝལཱ ཙེཝ སཱམཱ ཙ, ཨཧེསུཾ ཨགྒུཔཊྛིཀཱ.

ཨུཙྩཏྟནེན སོ བུདྡྷོ, ཏིཾསཧཏྠསམུགྒཏོ;

ཨུཀྐཱམུཁེ ཡཐཱ ཀམྦུ, ཨེཝཾ རཾསཱིཧི མཎྜིཏོ.

ཏིཾསཝསྶསཧསྶཱནི, ཨཱཡུ བུདྡྷསྶ ཏཱཝདེ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

དྷམྨཙེཏིཾ སམུསྶེཏྭཱ, དྷམྨདུསྶཝིབྷཱུསིཏཾ;

དྷམྨཔུཔྥགུལ༹ཾ ཀཏྭཱ, ནིབྦུཏོ སོ སསཱཝཀོ.

མཧཱཝིལཱསོ ཏསྶ ཛནོ, སིརིདྷམྨཔྤཀཱསནོ;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱ.

ཀོཎཱགམནོ སམྦུདྡྷོ, པབྦཏཱརཱམམྷི ནིབྦུཏོ;

དྷཱཏུཝིཏྠཱརིཀཾ ཨཱསི, ཏེསུ ཏེསུ པདེསཏོཏི.

ཀོཎཱགམནསྶ བྷགཝཏོ ཝཾསོ ཏེཝཱིསཏིམོ.

ཀོཎཱགམནསྶ ¶ ¶ ཨཔརེན, སམྦུདྡྷོ དྭིཔདུཏྟམོ;

ཀསྶཔོ ནཱམ གོཏྟེན, དྷམྨརཱཛཱ པབྷངྐརོ.

སཉྪཌྜིཏཾ ¶ ཀུལམཱུལཾ, བཧྭནྣཔཱནབྷོཛནཾ;

དཏྭཱན ཡཱཙཀེ དཱནཾ, པཱུརཡིཏྭཱན མཱནསཾ;

ཨུསབྷོཝ ཨཱལ༹ཀཾ བྷེཏྭཱ, པཏྟོ སམྦོདྷིམུཏྟམཾ.

དྷམྨཙཀྐཾ ¶ པཝཏྟེནྟེ, ཀསྶཔེ ལོཀནཱཡཀེ;

ཝཱིསཀོཊིསཧསྶཱནཾ, པཋམཱབྷིསམཡོ ཨཧུ.

ཙཏུམཱསཾ ཡདཱ བུདྡྷོ, ལོཀེ ཙརཏི ཙཱརིཀཾ;

དསཀོཊིསཧསྶཱནཾ, དུཏིཡཱབྷིསམཡོ ཨཧུ.

ཡམཀཾ ཝིཀུབྦནཾ ཀཏྭཱ, ཉཱཎདྷཱཏུཾ པཀིཏྟཡི;

པཉྩཀོཊིསཧསྶཱནཾ, ཏཏིཡཱབྷིསམཡོ ཨཧུ.

སུདྷམྨཱ དེཝཔུརེ རམྨེ, ཏཏྠ དྷམྨཾ པཀིཏྟཡི;

ཏཱིཎིཀོཊིསཧསྶཱནཾ, དེཝཱནཾ བོདྷཡཱི ཛིནོ.

ཨེཏེསཱནཾ ཨབྷིསམཡཱ, གཎནཱཏོ ཨསངྑིཡཱ.

ཏསྶཱཔི དེཝདེཝསྶ, ཨེཀོ ཨཱསི སམཱགམོ;

ཁཱིཎཱསཝཱནཾ ཝིམལཱནཾ, སནྟཙིཏྟཱན ཏཱདིནཾ.

ཝཱིསབྷིཀྑུསཧསྶཱནཾ, ཏདཱ ཨཱསི སམཱགམོ;

ཨཏིཀྐནྟབྷཝནྟཱནཾ, ཧིརིསཱིལེན ཏཱདིནཾ.

ཨཧཾ ཏདཱ མཱཎཝཀོ, ཛོཏིཔཱལོཏི ཝིསྶུཏོ;

ཨཛ྄ཛྷཱཡཀོ མནྟདྷརོ, ཏིཎྞཾ ཝེདཱན པཱརགཱུ.

ལཀྑཎེ ¶ ཨིཏིཧཱསེ ཙ, སདྷམྨེ པཱརམིཾ གཏོ;

བྷཱུམནྟལིཀྑཀུསལོ, ཀཏཝིཛྫོ ཨནཱཝཡོ.

ཀསྶཔསྶ བྷགཝཏོ, གྷཊིཀཱརོ ནཱམུཔཊྛཱཀོ;

སགཱརཝོ སཔྤཏིསྶོ, ནིབྦུཏོ ཏཏིཡེ ཕལེ.

ཨཱདཱཡ ¶ མཾ གྷཊཱིཀཱརོ, ཨུཔགཉྪི ཀསྶཔཾ ཛིནཾ;

ཏསྶ དྷམྨཾ སུཎིཏྭཱན, པབྦཛིཾ ཏསྶ སནྟིཀེ.

ཨཱརདྡྷཝཱིརིཡོ ཧུཏྭཱ, ཝཏྟཱཝཏྟེསུ ཀོཝིདོ;

ན ཀྭཙི པརིཧཱཡཱམི, པཱུརེསིཾ ཛིནསཱསནཾ.

ཡཱཝཏཱ བུདྡྷབྷཎིཏཾ, ནཝངྒཾ ཛིནསཱསནཾ;

སབྦཾ པརིཡཱཔུཎིཏྭཱན, སོབྷཡིཾ ཛིནསཱསནཾ.

མམ ཨཙྪརིཡཾ དིསྭཱ, སོཔི བུདྡྷོ ཝིཡཱཀརི;

‘‘ཨིམམྷི བྷདྡཀེ ཀཔྤེ, ཨཡཾ བུདྡྷོ བྷཝིསྶཏི.

‘‘ཨཧུ ¶ ¶ ཀཔིལཝ྄ཧཡཱ རམྨཱ, ནིཀྑམིཏྭཱ ཏཐཱགཏོ;

པདྷཱནཾ པདཧིཏྭཱན, ཀཏྭཱ དུཀྐརཀཱརིཀཾ.

‘‘ཨཛཔཱལརུཀྑམཱུལེ, ནིསཱིདིཏྭཱ ཏཐཱགཏོ;

ཏཏྠ པཱཡཱསཾ པགྒཡ྄ཧ, ནེརཉྫརམུཔེཧིཏི.

‘‘ནེརཉྫརཱཡ ཏཱིརམྷི, པཱཡཱསཾ པརིབྷུཉྫིཡ;

པཊིཡཏྟཝརམགྒེན, བོདྷིམཱུལམུཔེཧིཏི.

‘‘ཏཏོ པདཀྑིཎཾ ཀཏྭཱ, བོདྷིམཎྜཾ ཨནུཏྟརོ;

ཨཔརཱཛིཏཊྛཱནམྷི [ཨཔརཱཛིཏནིསབྷཊྛཱནེ (ཀ.)], བོདྷིཔལླངྐམུཏྟམེ;

པལླངྐེན ནིསཱིདིཏྭཱ, བུཛ྄ཛྷིསྶཏི མཧཱཡསོ.

‘‘ཨིམསྶ ¶ ཛནིཀཱ མཱཏཱ, མཱཡཱ ནཱམ བྷཝིསྶཏི;

པིཏཱ སུདྡྷོདནོ ནཱམ, ཨཡཾ ཧེསྶཏི གོཏམོ.

‘‘ཨནཱསཝཱ ཝཱིཏརཱགཱ, སནྟཙིཏྟཱ སམཱཧིཏཱ;

ཀོལིཏོ ཨུཔཏིསྶོ ཙ, ཨགྒཱ ཧེསྶནྟི སཱཝཀཱ;

ཨཱནནྡོ ནཱམུཔཊྛཱཀོ, ཨུཔཊྛིསྶཏིམཾ ཛིནཾ.

‘‘ཁེམཱ ཨུཔྤལཝཎྞཱ ཙ, ཨགྒཱ ཧེསྶནྟི སཱཝིཀཱ;

ཨནཱསཝཱ སནྟཙིཏྟཱ, ཝཱིཏརཱགཱ སམཱཧིཏཱ;

བོདྷི ཏསྶ བྷགཝཏོ, ཨསྶཏྠོཏི པཝུཙྩཏི.

‘‘ཙིཏྟོ ཧཏྠཱལ༹ཝཀོ ཙ, ཨགྒཱ ཧེསྶནྟུཔཊྛཀཱ;

ནནྡམཱཏཱ ཙ ཨུཏྟརཱ, ཨགྒཱ ཧེསྶནྟུཔཊྛིཀཱ’’.

ཨིདཾ སུཏྭཱན ཝཙནཾ, ཨསྶམསྶ མཧེསིནོ;

ཨཱམོདིཏཱ ནརམརཱུ, བུདྡྷབཱིཛཾ ཀིར ཨཡཾ.

ཨུཀྐུཊྛིསདྡཱ ¶ པཝཏྟནྟི, ཨཔྥོཊེནྟི ཧསནྟི ཙ;

ཀཏཉྫལཱི ནམསྶནྟི, དསསཧསྶཱི སདེཝཀཱ.

‘‘ཡདིམསྶ ལོཀནཱཐསྶ, ཝིརཛ྄ཛྷིསྶཱམ སཱསནཾ;

ཨནཱགཏམྷི ཨདྡྷཱནེ, ཧེསྶཱམ སམྨུཁཱ ཨིམཾ.

‘‘ཡཐཱ མནུསྶཱ ནདིཾ ཏརནྟཱ, པཊིཏིཏྠཾ ཝིརཛ྄ཛྷིཡ;

ཧེཊྛཱ ཏིཏྠེ གཧེཏྭཱན, ཨུཏྟརནྟི མཧཱནདིཾ.

‘‘ཨེཝམེཝ ¶ ¶ མཡཾ སབྦེ, ཡདི མུཉྩཱམིམཾ ཛིནཾ;

ཨནཱགཏམྷི ཨདྡྷཱནེ, ཧེསྶཱམ སམྨུཁཱ ཨིམཾ’’.

ཏསྶཱཔི ཝཙནཾ སུཏྭཱ, བྷིཡྻོ ཙིཏྟཾ པསཱདཡིཾ;

ཨུཏྟརིཾ ཝཏམདྷིཊྛཱསིཾ, དསཔཱརམིཔཱུརིཡཱ.

ཨེཝམཧཾ སཾསརིཏྭཱ, པརིཝཛྫེནྟོ ཨནཱཙརཾ;

དུཀྐརཉྩ ཀཏཾ མཡ྄ཧཾ, བོདྷིཡཱཡེཝ ཀཱརཎཱ.

ནགརཾ བཱརཱཎསཱི ནཱམ, ཀིཀཱི ནཱམཱསི ཁཏྟིཡོ;

ཝསཏེ ཏཏྠ ནགརེ, སམྦུདྡྷསྶ མཧཱཀུལཾ.

བྲཱཧྨཎོ བྲཧྨདཏྟོཝ, ཨཱསི བུདྡྷསྶ སོ པིཏཱ;

དྷནཝཏཱི ནཱམ ཛནིཀཱ, ཀསྶཔསྶ མཧེསིནོ.

དུཝེ ¶ ཝསྶསཧསྶཱནི, ཨགཱརཾ ཨཛ྄ཛྷ སོ ཝསི;

ཧཾསོ ཡསོ སིརིནནྡོ, ཏཡོ པཱསཱདམུཏྟམཱ.

ཏིསོལ༹སསཧསྶཱནི, ནཱརིཡོ སམལངྐཏཱ;

སུནནྡཱ ནཱམ སཱ ནཱརཱི, ཝིཛིཏསེནོ ནཱམ ཨཏྲཛོ.

ནིམིཏྟེ ཙཏུརོ དིསྭཱ, པཱསཱདེནཱབྷིནིཀྑམི;

སཏྟཱཧཾ པདྷཱནཙཱརཾ, ཨཙརཱི པུརིསུཏྟམོ.

བྲཧྨུནཱ ཡཱཙིཏོ སནྟོ, ཀསྶཔོ ལོཀནཱཡཀོ;

ཝཏྟི ཙཀྐཾ མཧཱཝཱིརོ, མིགདཱཡེ ནརུཏྟམོ.

ཏིསྶོ ཙ བྷཱརདྭཱཛོ ཙ, ཨཧེསུཾ ཨགྒསཱཝཀཱ;

སབྦམིཏྟོ ནཱམུཔཊྛཱཀོ, ཀསྶཔསྶ མཧེསིནོ.

ཨནུལཱ༹ ¶ ཨུརུཝེལཱ༹ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, ནིགྲོདྷོཏི པཝུཙྩཏི.

སུམངྒལོ ¶ གྷཊིཀཱརོ ཙ, ཨཧེསུཾ ཨགྒུཔཊྛཀཱ;

ཝིཙིཏསེནཱ བྷདྡཱ [བྷདྲཱ (ཀ.)] ཙ, ཨཧེསུཾ ཨགྒུཔཊྛིཀཱ.

ཨུཙྩཏྟནེན སོ བུདྡྷོ, ཝཱིསཏིརཏནུགྒཏོ;

ཝིཛྫུལཊྛཱིཝ ཨཱཀཱསེ, ཙནྡོཝ གཧཔཱུརིཏོ.

ཝཱིསཏིཝསྶསཧསྶཱནི ¶ , ཨཱཡུ ཏསྶ མཧེསིནོ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

དྷམྨཏལཱ༹ཀཾ མཱཔཡིཏྭཱ, སཱིལཾ དཏྭཱ ཝིལེཔནཾ;

དྷམྨདུསྶཾ ནིཝཱསེཏྭཱ, དྷམྨམཱལཾ ཝིབྷཛྫིཡ.

དྷམྨཝིམལམཱདཱསཾ, ཋཔཡིཏྭཱ མཧཱཛནེ;

ཀེཙི ནིབྦཱནཾ པཏྠེནྟཱ, པསྶནྟུ མེ ཨལངྐརཾ.

སཱིལཀཉྩུཀཾ དཏྭཱན, ཛྷཱནཀཝཙཝམྨིཏཾ;

དྷམྨཙམྨཾ པཱརུཔིཏྭཱ, དཏྭཱ སནྣཱཧམུཏྟམཾ.

སཏིཕལཀཾ དཏྭཱན, ཏིཁིཎཉཱཎཀུནྟིམཾ;

དྷམྨཁགྒཝརཾ དཏྭཱ, སཱིལསཾསགྒམདྡནཾ.

ཏེཝིཛྫཱབྷཱུསནཾ དཏྭཱན, ཨཱཝེལ༹ཾ ཙཏུརོ ཕལེ;

ཚལ༹བྷིཉྙཱབྷརཎཾ དཏྭཱ, དྷམྨཔུཔྥཔིལ༹ནྡྷནཾ.

སདྡྷམྨཔཎྜརཙྪཏྟཾ, དཏྭཱ པཱཔནིཝཱརཎཾ;

མཱཔཡིཏྭཱབྷཡཾ པུཔྥཾ, ནིབྦུཏོ སོ སསཱཝཀོ.

ཨེསོ ¶ ཧི སམྨཱསམྦུདྡྷོ, ཨཔྤམེཡྻོ དུརཱསདོ;

ཨེསོ ཧི དྷམྨརཏནོ, སྭཱཀྑཱཏོ ཨེཧིཔསྶིཀོ.

ཨེསོ ཧི སངྒྷརཏནོ, སུཔྤཊིཔནྣོ ཨནུཏྟརོ;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱ.

མཧཱཀསྶཔོ ཛིནོ སཏྠཱ, སེཏབྱཱརཱམམྷི ནིབྦུཏོ;

ཏཏྠེཝསྶ ཛིནཐཱུཔོ, ཡོཛནུབྦེདྷམུགྒཏོཏི.

ཀསྶཔསྶ བྷགཝཏོ ཝཾསོ ཙཏུཝཱིསཏིམོ.

ཨཧམེཏརཧི ¶ ¶ སམྦུདྡྷོ [བུདྡྷོ (སཱི.)], གོཏམོ སཀྱཝཌྜྷནོ;

པདྷཱནཾ པདཧིཏྭཱན, པཏྟོ སམྦོདྷིམུཏྟམཾ.

བྲཧྨུནཱ ¶ ཡཱཙིཏོ སནྟོ, དྷམྨཙཀྐཾ པཝཏྟཡིཾ;

ཨཊྛཱརསནྣཾ ཀོཊཱིནཾ, པཋམཱབྷིསམཡོ ཨཧུ.

ཏཏོ པརཉྩ དེསེནྟེ, ནརདེཝསམཱགམེ;

གཎནཱཡ ན ཝཏྟབྦོ, དུཏིཡཱབྷིསམཡོ ཨཧུ.

ཨིདྷེཝཱཧཾ ཨེཏརཧི, ཨོཝདིཾ མམ ཨཏྲཛཾ;

གཎནཱཡ ན ཝཏྟབྦོ, ཏཏིཡཱབྷིསམཡོ ཨཧུ.

ཨེཀོསི སནྣིཔཱཏོ མེ, སཱཝཀཱནཾ མཧེསིནཾ;

ཨཌྜྷཏེལ༹སསཏཱནཾ, བྷིཀྑཱུནཱསི སམཱགམོ.

ཝིརོཙམཱནོ ཝིམལོ, བྷིཀྑུསངྒྷསྶ མཛ྄ཛྷགོ;

དདཱམི པཏྠིཏཾ སབྦཾ, མཎཱིཝ སབྦཀཱམདོ.

ཕལམཱཀངྑམཱནཱནཾ ¶ , བྷཝཙྪནྡཛཧེསིནཾ;

ཙཏུསཙྩཾ པཀཱསེམི, ཨནུཀམྤཱཡ པཱཎིནཾ.

དསཝཱིསསཧསྶཱནཾ, དྷམྨཱབྷིསམཡོ ཨཧུ;

ཨེཀདྭིནྣཾ ཨབྷིསམཡོ, གཎནཱཏོ ཨསངྑིཡོ.

ཝིཏྠཱརིཀཾ བཱཧུཛཉྙཾ, ཨིདྡྷཾ ཕཱིཏཾ སུཕུལླིཏཾ;

ཨིདྷ མཡ྄ཧཾ སཀྱམུནིནོ, སཱསནཾ སུཝིསོདྷིཏཾ.

ཨནཱསཝཱ ཝཱིཏརཱགཱ, སནྟཙིཏྟཱ སམཱཧིཏཱ;

བྷིཀྑཱུནེཀསཏཱ སབྦེ, པརིཝཱརེནྟི མཾ སདཱ.

ཨིདཱནི ཡེ ཨེཏརཧི, ཛཧནྟི མཱནུསཾ བྷཝཾ;

ཨཔྤཏྟམཱནསཱ སེཁཱ, ཏེ བྷིཀྑཱུ ཝིཉྙུགརཧིཏཱ.

ཨརིཡཉྩ སཾཐོམཡནྟཱ, སདཱ དྷམྨརཏཱ ཛནཱ;

བུཛ྄ཛྷིསྶནྟི སཏིམནྟོ, སཾསཱརསརིཏཾ གཏཱ.

ནགརཾ ཀཔིལཝཏྠུ མེ, རཱཛཱ སུདྡྷོདནོ པིཏཱ;

མཡ྄ཧཾ ཛནེཏྟིཀཱ མཱཏཱ, མཱཡཱདེཝཱིཏི ཝུཙྩཏི.

ཨེཀཱུནཏིཾསཝསྶཱནི ¶ , ཨགཱརཾ ཨཛ྄ཛྷཧཾ ཝསིཾ;

རམྨོ སུརམྨོ སུབྷཀོ, ཏཡོ པཱསཱདམུཏྟམཱ.

ཙཏྟཱརཱིསསཧསྶཱནི, ནཱརིཡོ སམལངྐཏཱ;

བྷདྡཀཉྩནཱ ནཱམ ནཱརཱི, རཱཧུལོ ནཱམ ཨཏྲཛོ.

ནིམིཏྟེ ¶ ཙཏུརོ དིསྭཱ, ཨསྶཡཱནེན ནིཀྑམིཾ;

ཚབྦསྶཾ ¶ པདྷཱནཙཱརཾ, ཨཙརིཾ དུཀྐརཾ ཨཧཾ.

བཱརཱཎསིཡཾ ¶ ཨིསིཔཏནེ, ཙཀྐཾ པཝཏྟིཏཾ མཡཱ;

ཨཧཾ གོཏམསམྦུདྡྷོ, སརཎཾ སབྦཔཱཎིནཾ.

ཀོལིཏོ ཨུཔཏིསྶོ ཙ, དྭེ བྷིཀྑཱུ ཨགྒསཱཝཀཱ;

ཨཱནནྡོ ནཱམུཔཊྛཱཀོ, སནྟིཀཱཝཙརོ མམ;

ཁེམཱ ཨུཔྤལཝཎྞཱ ཙ, བྷིཀྑུནཱི ཨགྒསཱཝིཀཱ.

ཙིཏྟོ ཧཏྠཱལ༹ཝཀོ ཙ, ཨགྒུཔཊྛཱཀུཔཱསཀཱ;

ནནྡམཱཏཱ ཙ ཨུཏྟརཱ, ཨགྒུཔཊྛིཀུཔཱསིཀཱ.

ཨཧཾ ཨསྶཏྠམཱུལམྷི, པཏྟོ སམྦོདྷིམུཏྟམཾ;

བྱཱམཔྤབྷཱ སདཱ མཡ྄ཧཾ, སོལ༹སཧཏྠམུགྒཏཱ.

ཨཔྤཾ ཝསྶསཏཾ ཨཱཡུ, ཨིདཱནེཏརཧི ཝིཛྫཏི;

ཏཱཝཏཱ ཏིཊྛམཱནོཧཾ, ཏཱརེམི ཛནཏཾ བཧུཾ.

ཋཔཡིཏྭཱན དྷམྨུཀྐཾ, པཙྪིམཾ ཛནབོདྷནཾ;

ཨཧམྤི ནཙིརསྶེཝ, སདྡྷིཾ སཱཝཀསངྒྷཏོ;

ཨིདྷེཝ པརིནིབྦིསྶཾ, ཨགྒཱི ཝཱཧཱརསངྑཡཱ.

ཏཱནི ཙ ཨཏུལཏེཛཱནི, ཨིམཱནི ཙ དསབལཱནི [ཡསབལཱནི (ཨཊྛ.)];

ཨཡཉྩ གུཎདྷཱརཎོ དེཧོ, དྭཏྟིཾསཝརལཀྑཎཝིཙིཏྟོ.

དས དིསཱ པབྷཱསེཏྭཱ, སཏརཾསཱིཝ ཚཔྤབྷཱ;

སབྦཾ ཏམནྟརཧིསྶནྟི, ནནུ རིཏྟཱ སབྦསངྑཱརཱཏི.

གོཏམསྶ བྷགཝཏོ ཝཾསོ པཉྩཝཱིསཏིམོ.

ཨཔརིམེཡྻིཏོ ¶ ¶ ཀཔྤེ, ཙཏུརོ ཨཱསུཾ ཝིནཱཡཀཱ;

ཏཎྷངྐརོ མེདྷངྐརོ, ཨཐོཔི སརཎངྐརོ;

དཱིཔངྐརོ ཙ སམྦུདྡྷོ, ཨེཀཀཔྤམྷི ཏེ ཛིནཱ.

དཱིཔངྐརསྶ ¶ ཨཔརེན, ཀོཎྜཉྙོ ནཱམ ནཱཡཀོ;

ཨེཀོཝ ཨེཀཀཔྤམྷི, ཏཱརེསི ཛནཏཾ བཧུཾ.

དཱིཔངྐརསྶ བྷགཝཏོ, ཀོཎྜཉྙསྶ ཙ སཏྠུནོ;

ཨེཏེསཾ ཨནྟརཱ ཀཔྤཱ, གཎནཱཏོ ཨསངྑིཡཱ.

ཀོཎྜཉྙསྶ ཨཔརེན, མངྒལོ ནཱམ ནཱཡཀོ;

ཏེསམྤི ཨནྟརཱ ཀཔྤཱ, གཎནཱཏོ ཨསངྑིཡཱ.

མངྒལོ ཙ སུམནོ ཙ, རེཝཏོ སོབྷིཏོ མུནི;

ཏེཔི བུདྡྷཱ ཨེཀཀཔྤེ, ཙཀྑུམནྟོ པབྷངྐརཱ.

སོབྷིཏསྶ ¶ ཨཔརེན, ཨནོམདསྶཱི མཧཱཡསོ;

ཏེསམྤི ཨནྟརཱ ཀཔྤཱ, གཎནཱཏོ ཨསངྑིཡཱ.

ཨནོམདསྶཱི པདུམོ, ནཱརདོ ཙཱཔི ནཱཡཀོ;

ཏེཔི བུདྡྷཱ ཨེཀཀཔྤེ, ཏམནྟཀཱརཀཱ མུནཱི.

ནཱརདསྶ ཨཔརེན, པདུམུཏྟརོ ནཱམ ནཱཡཀོ;

ཨེཀཀཔྤམྷི ཨུཔྤནྣོ, ཏཱརེསི ཛནཏཾ བཧུཾ.

ནཱརདསྶ བྷགཝཏོ, པདུམུཏྟརསྶ སཏྠུནོ;

ཏེསམྤི ཨནྟརཱ ཀཔྤཱ, གཎནཱཏོ ཨསངྑིཡཱ.

ཀཔྤསཏསཧསྶམྷི ¶ , ཨེཀོ ཨཱསི མཧཱམུནི;

པདུམུཏྟརོ ལོཀཝིདཱུ, ཨཱཧུཏཱིནཾ པཊིགྒཧོ.

ཏིཾསཀཔྤསཧསྶམྷི, དུཝེ ཨཱསུཾ ཝིནཱཡཀཱ [ཨཱསིཾསུ ནཱཡཀཱ (སྱཱ. ཀ.)];

སུམེདྷོ ཙ སུཛཱཏོ ཙ, ཨོརཏོ པདུམུཏྟརཱ.

ཨཊྛཱརསེ ཀཔྤསཏེ, ཏཡོ ཨཱསུཾ ཝིནཱཡཀཱ [ཨཱསིཾསུ ནཱཡཀཱ (སྱཱ. ཀ.)];

པིཡདསྶཱི ཨཏྠདསྶཱི, དྷམྨདསྶཱི ཙ ནཱཡཀཱ.

ཨོརཏོ ¶ ཙ སུཛཱཏསྶ, སམྦུདྡྷཱ དྭིཔདུཏྟམཱ;

ཨེཀཀཔྤམྷི ཏེ བུདྡྷཱ, ལོཀེ ཨཔྤཊིཔུགྒལཱ.

ཙཏུནྣཝུཏིཏོ ཀཔྤེ, ཨེཀོ ཨཱསི མཧཱམུནི;

སིདྡྷཏྠོ སོ ལོཀཝིདཱུ, སལླཀཏྟོ ཨནུཏྟརོ.

དྭེནཝུཏེ ¶ ཨིཏོ ཀཔྤེ, དུཝེ ཨཱསུཾ ཝིནཱཡཀཱ;

ཏིསྶོ ཕུསྶོ ཙ སམྦུདྡྷཱ, ཨསམཱ ཨཔྤཊིཔུགྒལཱ.

ཨེཀནཝུཏིཏོ ཀཔྤེ, ཝིཔསྶཱི ནཱམ ནཱཡཀོ;

སོཔི བུདྡྷོ ཀཱརུཎིཀོ, སཏྟེ མོཙེསི བནྡྷནཱ.

ཨེཀཏིཾསེ ཨིཏོ ཀཔྤེ, དུཝེ ཨཱསུཾ ཝིནཱཡཀཱ;

སིཁཱི ཙ ཝེསྶབྷཱུ ཙེཝ, ཨསམཱ ཨཔྤཊིཔུགྒལཱ.

ཨིམམྷི བྷདྡཀེ ཀཔྤེ, ཏཡོ ཨཱསུཾ ཝིནཱཡཀཱ;

ཀཀུསནྡྷོ ཀོཎཱགམནོ, ཀསྶཔོ ཙཱཔི ནཱཡཀོ.

ཨཧམེཏརཧི སམྦུདྡྷོ, མེཏྟེཡྻོ ཙཱཔི ཧེསྶཏི;

ཨེཏེཔིམེ ¶ པཉྩ བུདྡྷཱ, དྷཱིརཱ ལོཀཱནུཀམྤཀཱ.

ཨེཏེསཾ དྷམྨརཱཛཱུནཾ, ཨཉྙེསཾནེཀཀོཊིནཾ;

ཨཱཙིཀྑིཏྭཱན ཏཾ མགྒཾ, ནིབྦུཏཱ ཏེ སསཱཝཀཱཏི.

མཧཱགོཏམོ ¶ ཛིནཝརོ, ཀུསིནཱརམྷི ནིབྦུཏོ;

དྷཱཏུཝིཏྠཱརིཀཾ ཨཱསི, ཏེསུ ཏེསུ པདེསཏོ.

ཨེཀོ ཨཛཱཏསཏྟུསྶ, ཨེཀོ ཝེསཱལིཡཱ པུརེ;

ཨེཀོ ཀཔིལཝཏྠུསྨིཾ, ཨེཀོ ཙ ཨལླཀཔྤཀེ.

ཨེཀོ ཙ རཱམགཱམམྷི, ཨེཀོ ཙ ཝེཋདཱིཔཀེ;

ཨེཀོ པཱཝེཡྻཀེ མལླེ, ཨེཀོ ཙ ཀོསིནཱརཀེ.

ཀུམྦྷསྶ ¶ ཐཱུཔཾ ཀཱརེསི, བྲཱཧྨཎོ དོཎསཝ྄ཧཡོ;

ཨངྒཱརཐཱུཔཾ ཀཱརེསུཾ, མོརིཡཱ ཏུཊྛམཱནསཱ.

ཨཊྛ སཱརཱིརིཀཱ ཐཱུཔཱ, ནཝམོ ཀུམྦྷཙེཏིཡོ;

ཨངྒཱརཐཱུཔོ དསམོ, ཏདཱཡེཝ པཏིཊྛིཏོ.

ཨུཎྷཱིསཾ ཙཏསྶོ དཱཋཱ, ཨཀྑཀཱ དྭེ ཙ དྷཱཏུཡོ;

ཨསམྦྷིནྣཱ ཨིམཱ སཏྟ, སེསཱ བྷིནྣཱཝ དྷཱཏུཡོ.

མཧནྟཱ ¶ མུགྒམཏྟཱ ཙ [མུགྒམཱསཱཝ (ཀ.)], མཛ྄ཛྷིམཱ བྷིནྣཏཎྜུལཱ;

ཁུདྡཀཱ སཱསཔམཏྟཱ ཙ, ནཱནཱཝཎྞཱ ཙ དྷཱཏུཡོ.

མཧནྟཱ སུཝཎྞཝཎྞཱ ཙ, མུཏྟཝཎྞཱ ཙ མཛ྄ཛྷིམཱ;

ཁུདྡཀཱ མཀུལཝཎྞཱ ཙ, སོལ༹སདོཎམཏྟིཀཱ.

མཧནྟཱ པཉྩ ནཱལི༹ཡོ, ནཱལི༹ཡོ པཉྩ མཛ྄ཛྷིམཱ;

ཁུདྡཀཱ ཚ ནཱལཱི༹ ཙེཝ, ཨེཏཱ སབྦཱཔི དྷཱཏུཡོ.

ཨུཎྷཱིསཾ སཱིཧལེ༹ དཱིཔེ, བྲཧྨལོཀེ ཙ ཝཱམཀཾ;

སཱིཧལེ༹ དཀྑིཎཀྑཉྩ, སབྦཱཔེཏཱ པཏིཊྛིཏཱ.

ཨེཀཱ དཱཋཱ ཏིདསཔུརེ, ཨེཀཱ ནཱགཔུརེ ཨཧུ;

ཨེཀཱ གནྡྷཱརཝིསཡེ, ཨེཀཱ ཀལིངྒརཱཛིནོ.

ཙཏྟཱལཱིསསམཱ ¶ དནྟཱ, ཀེསཱ ལོམཱ ཙ སབྦསོ;

དེཝཱ ཧརིཾསུ ཨེཀེཀཾ, ཙཀྐཝཱལ༹པརམྤརཱ.

ཝཛིརཱཡཾ བྷགཝཏོ, པཏྟོ དཎྜཉྩ ཙཱིཝརཾ;

ནིཝཱསནཾ ཀུལགྷརེ, པཙྩཏྠརཎཾ ཀཔིལཝ྄ཧཡེ [སིལཝ྄ཧཡེ (སྱཱ.)].

པཱཊལིཔུཏྟཔུརམྷི, ཀརཎཾ ཀཱཡབནྡྷནཾ;

ཙམྤཱཡུདཀསཱཊིཡཾ, ཨུཎྞལོམཉྩ ཀོསལེ.

ཀཱསཱཝཾ བྲཧྨལོཀེ ཙ, ཝེཋནཾ ཏིདསེ པུརེ;

ནིསཱིདནཾ ཨཝནྟཱིསུ, རཊྛེ [དེཝརཊྛེ (སྱཱ.)] ཨཏྠརཎཾ ཏདཱ.

ཨརཎཱི ཙ མིཐིལཱཡཾ, ཝིདེཧེ པརིསཱཝནཾ;

ཝཱསི ¶ སཱུཙིགྷརཉྩཱཔི, ཨིནྡཔཏྠཔུརེ ཏདཱ.

པརིཀྑཱརཱ ཨཝསེསཱ, ཛནཔདེ ཨཔརནྟཀེ;

པརིབྷུཏྟཱནི མུནིནཱ, ཨཀཾསུ མནུཛཱ ཏདཱ.

དྷཱཏུཝིཏྠཱརིཀཾ ¶ ཨཱསི, གོཏམསྶ མཧེསིནོ;

པཱཎཱིནཾ ཨནུཀམྤཱཡ, ཨཧུ པོརཱཎིཀཾ ཏདཱཏི.