མཱུལ > སུཏྟཔིཊཀ > ཁུདྡཀནིཀཱཡ

THA Vol 2
MMR Vol 2
VRI Vol 2
PTS Vol 0

Misc. Paragraph

ཁུདྡཀནིཀཱཡེ

ཙརིཡཱཔིཊཀཔཱལི༹

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

‘‘ཀཔྤེ ¶ ¶ ¶ ¶ ཙ སཏསཧསྶེ, ཙཏུརོ ཙ ཨསངྑིཡེ;

ཨེཏྠནྟརེ ཡཾ ཙརིཏཾ, སབྦཾ ཏཾ བོདྷིཔཱཙནཾ.

‘‘ཨཏཱིཏཀཔྤེ ཙརིཏཾ, ཋཔཡིཏྭཱ བྷཝཱབྷཝེ;

ཨིམམྷི ཀཔྤེ ཙརིཏཾ, པཝཀྑིསྶཾ སུཎོཧི མེ.

‘‘ཡདཱ ཨཧཾ བྲཧཱརཉྙེ, སུཉྙེ ཝིཔིནཀཱནནེ;

ཨཛ྄ཛྷོགཱཧེཏྭཱ [ཨཛ྄ཛྷོགཧེཏྭཱ (སཱི. སྱཱ.)] ཝིཧརཱམི, ཨཀིཏྟི ནཱམ ཏཱཔསོ.

‘‘ཏདཱ ¶ མཾ ཏཔཏེཛེན, སནྟཏྟོ ཏིདིཝཱབྷིབྷཱུ;

དྷཱརེནྟོ བྲཱཧྨཎཝཎྞཾ, བྷིཀྑཱཡ མཾ ཨུཔཱགམི.

‘‘པཝནཱ ཨཱབྷཏཾ པཎྞཾ, ཨཏེལཉྩ ཨལོཎིཀཾ;

མམ དྭཱརེ ཋིཏཾ དིསྭཱ, སཀཊཱཧེན ཨཱཀིརིཾ.

‘‘ཏསྶ དཏྭཱནཧཾ པཎྞཾ, ནིཀྐུཛྫིཏྭཱན བྷཱཛནཾ;

པུནེསནཾ ཛཧིཏྭཱན, པཱཝིསིཾ པཎྞསཱལཀཾ.

‘‘དུཏིཡམྤི ¶ ཏཏིཡམྤི, ཨུཔགཉྪི མམནྟིཀཾ;

ཨཀམྤིཏོ ཨནོལགྒོ, ཨེཝམེཝམདཱསཧཾ.

‘‘ན ¶ མེ ཏཔྤཙྩཡཱ ཨཏྠི, སརཱིརསྨིཾ ཝིཝཎྞིཡཾ;

པཱིཏིསུཁེན རཏིཡཱ, ཝཱིཏིནཱམེམི ཏཾ དིཝཾ.

‘‘ཡདི མཱསམྤི དྭེམཱསཾ, དཀྑིཎེཡྻཾ ཝརཾ ལབྷེ;

ཨཀམྤིཏོ ཨནོལཱིནོ, དདེཡྻཾ དཱནམུཏྟམཾ.

‘‘ན ཏསྶ དཱནཾ དདམཱནོ, ཡསཾ ལཱབྷཉྩ པཏྠཡིཾ;

སབྦཉྙུཏཾ པཏྠཡཱནོ, ཏཱནི ཀམྨཱནི ཨཱཙརི’’ནྟི.

‘‘པུནཱཔརཾ ¶ ཡདཱ ཧོམི, བྲཱཧྨཎོ སངྑསཝ྄ཧཡོ;

མཧཱསམུདྡཾ ཏརིཏུཀཱམོ, ཨུཔགཙྪཱམི པཊྚནཾ.

‘‘ཏཏྠདྡསཾ པཊིཔཐེ, སཡམྦྷུཾ ཨཔརཱཛིཏཾ;

ཀནྟཱརདྡྷཱནཾ པཊིཔནྣཾ [ཀནྟཱརདྡྷཱནཔཊིཔནྣཾ (སཱི. སྱཱ.)], ཏཏྟཱཡ ཀཋིནབྷཱུམིཡཱ.

‘‘ཏམཧཾ པཊིཔཐེ དིསྭཱ, ཨིམམཏྠཾ ཝིཙིནྟཡིཾ;

‘ཨིདཾ ཁེཏྟཾ ཨནུཔྤཏྟཾ, པུཉྙཀཱམསྶ ཛནྟུནོ.

‘‘‘ཡཐཱ ཀསྶཀོ པུརིསོ, ཁེཏྟཾ དིསྭཱ མཧཱགམཾ;

ཏཏྠ བཱིཛཾ ན རོཔེཏི, ན སོ དྷཉྙེན ཨཏྠིཀོ.

‘‘‘ཨེཝམེཝཱཧཾ ¶ ¶ པུཉྙཀཱམོ, དིསྭཱ ཁེཏྟཝརུཏྟམཾ;

ཡདི ཏཏྠ ཀཱརཾ ན ཀརོམི, ནཱཧཾ པུཉྙེན ཨཏྠིཀོ.

‘‘‘ཡཐཱ ཨམཙྩོ མུདྡིཀཱམོ, རཉྙོ ཨནྟེཔུརེ ཛནེ;

ན དེཏི ཏེསཾ དྷནདྷཉྙཾ, མུདྡིཏོ པརིཧཱཡཏི.

‘‘‘ཨེཝམེཝཱཧཾ པུཉྙཀཱམོ, ཝིཔུལཾ དིསྭཱན དཀྑིཎཾ;

ཡདི ཏསྶ དཱནཾ ན དདཱམི, པརིཧཱཡིསྶཱམི པུཉྙཏོ’.

‘‘ཨེཝཱཧཾ ཙིནྟཡིཏྭཱན, ཨོརོཧིཏྭཱ ཨུཔཱཧནཱ;

ཏསྶ པཱདཱནི ཝནྡིཏྭཱ, ཨདཱསིཾ ཚཏྟུཔཱཧནཾ.

‘‘ཏེནེཝཱཧཾ ¶ སཏགུཎཏོ, སུཁུམཱལོ སུཁེདྷིཏོ;

ཨཔི ཙ དཱནཾ པརིཔཱུརེནྟོ, ཨེཝཾ ཏསྶ ཨདཱསཧ’’ནྟི.

‘‘པུནཱཔརཾ ཡདཱ ཧོམི, ཨིནྡཔཏྠེ [ཨིནྡཔཏྟེ (སཱི. ཀ.)] པུརུཏྟམེ;

རཱཛཱ དྷནཉྩཡོ ནཱམ, ཀུསལེ དསཧུཔཱགཏོ.

‘‘ཀལིངྒརཊྛཝིསཡཱ, བྲཱཧྨཎཱ ཨུཔགཉྪུ མཾ;

ཨཱཡཱཙུཾ མཾ ཧཏྠིནཱགཾ, དྷཉྙཾ མངྒལསམྨཏཾ.

‘‘‘ཨཝུཊྛིཀོ ཛནཔདོ, དུབྦྷིཀྑོ ཚཱཏཀོ མཧཱ;

དདཱཧི པཝརཾ ནཱགཾ, ནཱིལཾ ཨཉྫནསཝ྄ཧཡཾ.

‘‘‘ན ¶ ¶ མེ ཡཱཙཀམནུཔྤཏྟེ, པཊིཀྑེཔོ ཨནུཙྪཝོ;

མཱ མེ བྷིཛྫི སམཱདཱནཾ, དསྶཱམི ཝིཔུལཾ གཛཾ’.

‘‘ནཱགཾ གཧེཏྭཱ སོཎྜཱཡ, བྷིངྒཱརེ [བྷིངྐཱརེ (སཱི.)] རཏནཱམཡེ;

ཛལཾ ཧཏྠེ ཨཱཀིརིཏྭཱ, བྲཱཧྨཎཱནཾ ཨདཾ གཛཾ.

‘‘ཏསྶ ནཱགེ པདིནྣམྷི, ཨམཙྩཱ ཨེཏདབྲཝུཾ;

‘ཀིཾ ནུ ཏུཡ྄ཧཾ ཝརཾ ནཱགཾ, ཡཱཙཀཱནཾ པདསྶསི.

‘‘‘དྷཉྙཾ ¶ མངྒལསམྤནྣཾ, སངྒཱམཝིཛཡུཏྟམཾ;

ཏསྨིཾ ནཱགེ པདིནྣམྷི, ཀིཾ ཏེ རཛྫཾ ཀརིསྶཏི.

‘‘‘རཛྫམྤི མེ དདེ སབྦཾ, སརཱིརཾ དཛྫམཏྟནོ;

སབྦཉྙུཏཾ པིཡཾ མཡ྄ཧཾ, ཏསྨཱ ནཱགཾ ཨདཱསཧ’’’ནྟི.

‘‘ཀུསཱཝཏིམྷི ནགརེ, ཡདཱ ཨཱསིཾ མཧཱིཔཏི;

མཧཱསུདསྶནོ ནཱམ, ཙཀྐཝཏྟཱི མཧབྦལོ.

‘‘ཏཏྠཱཧཾ ¶ དིཝསེ ཏིཀྑཏྟུཾ, གྷོསཱཔེམི ཏཧིཾ ཏཧིཾ;

‘ཀོ ཀིཾ ཨིཙྪཏི པཏྠེཏི, ཀསྶ ཀིཾ དཱིཡཏཱུ དྷནཾ.

‘‘‘ཀོ ཚཱཏཀོ ཀོ ཏསིཏོ, ཀོ མཱལཾ ཀོ ཝིལེཔནཾ;

ནཱནཱརཏྟཱནི ཝཏྠཱནི, ཀོ ནགྒོ པརིདཧིསྶཏི.

‘‘‘ཀོ པཐེ ཚཏྟམཱདེཏི, ཀོཔཱཧནཱ མུདཱུ སུབྷཱ’;

ཨིཏི ¶ སཱཡཉྩ པཱཏོ ཙ, གྷོསཱཔེམི ཏཧིཾ ཏཧིཾ.

‘‘ན ཏཾ དསསུ ཋཱནེསུ, ནཔི ཋཱནསཏེསུ ཝཱ;

ཨནེཀསཏཋཱནེསུ, པཊིཡཏྟཾ ཡཱཙཀེ དྷནཾ.

‘‘དིཝཱ ཝཱ ཡདི ཝཱ རཏྟིཾ, ཡདི ཨེཏི ཝནིབྦཀོ;

ལདྡྷཱ ཡདིཙྪཀཾ བྷོགཾ, པཱུརཧཏྠོཝ གཙྪཏི.

‘‘ཨེཝརཱུཔཾ མཧཱདཱནཾ, ཨདཱསིཾ ཡཱཝཛཱིཝིཀཾ;

ནཔཱཧཾ དེསྶཾ དྷནཾ དམྨི, ནཔི ནཏྠི ནིཙཡོ མཡི.

‘‘ཡཐཱཔི ཨཱཏུརོ ནཱམ, རོགཏོ པརིམུཏྟིཡཱ;

དྷནེན ཝེཛྫཾ ཏཔྤེཏྭཱ, རོགཏོ པརིམུཙྩཏི.

‘‘ཏཐེཝཱཧཾ ཛཱནམཱནོ, པརིཔཱུརེཏུམསེསཏོ;

ཨཱུནམནཾ པཱུརཡིཏུཾ, དེམི དཱནཾ ཝནིབྦཀེ;

ནིརཱལཡོ ཨཔཙྩཱསོ, སམྦོདྷིམནུཔཏྟིཡཱ’’ཏི.

‘‘པུནཱཔརཾ ¶ ¶ ཡདཱ ཧོམི, སཏྟརཱཛཔུརོཧིཏོ;

པཱུཛིཏོ ནརདེཝེཧི, མཧཱགོཝིནྡབྲཱཧྨཎོ.

‘‘ཏདཱཧཾ སཏྟརཛྫེསུ, ཡཾ མེ ཨཱསི ཨུཔཱཡནཾ;

ཏེན དེམི མཧཱདཱནཾ, ཨཀྑོབྦྷཾ [ཨཀྑོབྷཾ (སྱཱ. ཀཾ.)] སཱགརཱུཔམཾ.

‘‘ན ¶ ¶ མེ དེསྶཾ དྷནཾ དྷཉྙཾ, ནཔི ནཏྠི ནིཙཡོ མཡི;

སབྦཉྙུཏཾ པིཡཾ མཡ྄ཧཾ, ཏསྨཱ དེམི ཝརཾ དྷན’’ནྟི.

‘‘པུནཱཔརཾ ཡདཱ ཧོམི, མིཐིལཱཡཾ པུརུཏྟམེ;

ནིམི ནཱམ མཧཱརཱཛཱ, པཎྜིཏོ ཀུསལཏྠིཀོ.

‘‘ཏདཱཧཾ མཱཔཡིཏྭཱན, ཙཏུསྶཱལཾ ཙཏུམྨུཁཾ;

ཏཏྠ དཱནཾ པཝཏྟེསིཾ, མིགཔཀྑིནརཱདིནཾ.

‘‘ཨཙྪཱདནཉྩ སཡནཾ, ཨནྣཾ པཱནཉྩ བྷོཛནཾ;

ཨབྦོཙྪིནྣཾ ཀརིཏྭཱན, མཧཱདཱནཾ པཝཏྟཡིཾ.

‘‘ཡཐཱཔི སེཝཀོ སཱམིཾ, དྷནཧེཏུམུཔཱགཏོ;

ཀཱཡེན ཝཱཙཱ མནསཱ, ཨཱརཱདྷནཱིཡམེསཏི.

‘‘ཏཐེཝཱཧཾ སབྦབྷཝེ, པརིཡེསིསྶཱམི བོདྷིཛཾ;

དཱནེན སཏྟེ ཏཔྤེཏྭཱ, ཨིཙྪཱམི བོདྷིམུཏྟམ’’ནྟི.

‘‘པུནཱཔརཾ ¶ ¶ ཡདཱ ཧོམི, ཨེཀརཱཛསྶ ཨཏྲཛོ;

ནགརེ པུཔྥཝཏིཡཱ, ཀུམཱརོ ཙནྡསཝ྄ཧཡོ.

‘‘ཏདཱཧཾ ¶ ཡཛནཱ མུཏྟོ, ནིཀྑནྟོ ཡཉྙཝཱཊཏོ;

སཾཝེགཾ ཛནཡིཏྭཱན, མཧཱདཱནཾ པཝཏྟཡིཾ.

‘‘ནཱཧཾ པིཝཱམི ཁཱདཱམི, ནཔི བྷུཉྫཱམི བྷོཛནཾ;

དཀྑིཎེཡྻེ ཨདཏྭཱན, ཨཔི ཚཔྤཉྩརཏྟིཡོ.

‘‘ཡཐཱཔི ¶ ཝཱཎིཛོ ནཱམ, ཀཏྭཱན བྷཎྜསཉྩཡཾ;

ཡཏྠ ལཱབྷོ མཧཱ ཧོཏི, ཏཏྠ ཏཾ [ཏཏྠ ནཾ (སཱི.), ཏཏྠ (ཀ.)] ཧརཏི བྷཎྜཀཾ.

‘‘ཏཐེཝ སཀབྷུཏྟཱཔི, པརེ དིནྣཾ མཧཔྥལཾ;

ཏསྨཱ པརསྶ དཱཏབྦཾ, སཏབྷཱགོ བྷཝིསྶཏི.

‘‘ཨེཏམཏྠཝསཾ ཉཏྭཱ, དེམི དཱནཾ བྷཝཱབྷཝེ;

ན པཊིཀྐམཱམི དཱནཏོ, སམྦོདྷིམནུཔཏྟིཡཱ’’ཏི.

‘‘ཨརིཊྛསཝ྄ཧཡེ ནགརེ, སིཝིནཱམཱསི ཁཏྟིཡོ;

ནིསཛྫ པཱསཱདཝརེ, ཨེཝཾ ཙིནྟེསཧཾ ཏདཱ.

‘‘‘ཡཾ ཀིཉྩི མཱནུསཾ དཱནཾ, ཨདིནྣཾ མེ ན ཝིཛྫཏི;

ཡོཔི ཡཱཙེཡྻ མཾ ཙཀྑུཾ, དདེཡྻཾ ཨཝིཀམྤིཏོ’.

‘‘མམ སངྐཔྤམཉྙཱཡ, སཀྐོ དེཝཱནམིསྶརོ;

ནིསིནྣོ དེཝཔརིསཱཡ, ཨིདཾ ཝཙནམབྲཝི.

‘‘‘ནིསཛྫ ¶ པཱསཱདཝརེ, སིཝིརཱཛཱ མཧིདྡྷིཀོ;

ཙིནྟེནྟོ ཝིཝིདྷཾ དཱནཾ, ཨདེཡྻཾ སོ ན པསྶཏི.

‘‘‘ཏཐཾ ¶ ནུ ཝིཏཐཾ ནེཏཾ, ཧནྡ ཝཱིམཾསཡཱམི ཏཾ;

མུཧུཏྟཾ ཨཱགམེཡྻཱཐ, ཡཱཝ ཛཱནཱམི ཏཾ མནཾ’.

‘‘པཝེདྷམཱནོ པལིཏསིརོ, ཝལིགཏྟོ [ཝལིཏགཏྟོ (སཱི.)] ཛརཱཏུརོ;

ཨནྡྷཝཎྞོཝ ཧུཏྭཱན, རཱཛཱནཾ ཨུཔསངྐམི.

‘‘སོ ¶ ཏདཱ པགྒཧེཏྭཱན, ཝཱམཾ དཀྑིཎབཱཧུ ཙ;

སིརསྨིཾ ཨཉྫལིཾ ཀཏྭཱ, ཨིདཾ ཝཙནམབྲཝི.

‘‘‘ཡཱཙཱམི ཏཾ མཧཱརཱཛ, དྷམྨིཀ རཊྛཝཌྜྷན;

ཏཝ དཱནརཏཱ ཀིཏྟི, ཨུགྒཏཱ དེཝམཱནུསེ.

‘‘‘ཨུབྷོཔི ¶ ནེཏྟཱ ནཡནཱ, ཨནྡྷཱ ཨུཔཧཏཱ མམ;

ཨེཀཾ མེ ནཡནཾ དེཧི, ཏྭམྤི ཨེཀེན ཡཱཔཡ’.

‘‘ཏསྶཱཧཾ ཝཙནཾ སུཏྭཱ, ཧཊྛོ སཾཝིགྒམཱནསོ;

ཀཏཉྫལཱི ཝེདཛཱཏོ, ཨིདཾ ཝཙནམབྲཝིཾ.

‘‘‘ཨིདཱནཱཧཾ ཙིནྟཡིཏྭཱན, པཱསཱདཏོ ཨིདྷཱགཏོ;

ཏྭཾ མམ ཙིཏྟམཉྙཱཡ, ནེཏྟཾ ཡཱཙིཏུམཱགཏོ.

‘‘‘ཨཧོ མེ མཱནསཾ སིདྡྷཾ, སངྐཔྤོ པརིཔཱུརིཏོ;

ཨདིནྣཔུབྦཾ དཱནཝརཾ, ཨཛྫ དསྶཱམི ཡཱཙཀེ.

‘‘‘ཨེཧི སིཝཀ ཨུཊྛེཧི, མཱ དནྡྷཡི མཱ པཝེདྷཡི;

ཨུབྷོཔི ནཡནཾ དེཧི, ཨུཔྤཱཊེཏྭཱ ཝཎིབྦཀེ’.

‘‘ཏཏོ ¶ སོ ཙོདིཏོ མཡ྄ཧཾ, སིཝཀོ ཝཙནཾ ཀརོ;

ཨུདྡྷརིཏྭཱན པཱདཱསི, ཏཱལམིཉྫཾཝ ཡཱཙཀེ.

‘‘དདམཱནསྶ དེནྟསྶ, དིནྣདཱནསྶ མེ སཏོ;

ཙིཏྟསྶ ཨཉྙཐཱ ནཏྠི, བོདྷིཡཱཡེཝ ཀཱརཎཱ.

‘‘ན མེ དེསྶཱ ཨུབྷོ ཙཀྑཱུ, ཨཏྟཱ ན མེ ན དེསྶིཡོ;

སབྦཉྙུཏཾ པིཡཾ མཡ྄ཧཾ, ཏསྨཱ ཙཀྑུཾ ཨདཱསཧ’’ནྟི.

‘‘ཡཱ ¶ མེ ཨཧོསི ཛནིཀཱ, ཕུསྶཏཱི [ཕུསཏཱི (སཱི.)] ནཱམ ཁཏྟིཡཱ;

སཱ ཨཏཱིཏཱསུ ཛཱཏཱིསུ, སཀྐསྶ མཧེསཱི པིཡཱ.

‘‘ཏསྶཱ ཨཱཡུཀྑཡཾ ཉཏྭཱ, དེཝིནྡོ ཨེཏདབྲཝི;

‘དདཱམི ཏེ དས ཝརེ, ཝརབྷདྡེ ཡདིཙྪསི’.

‘‘ཨེཝཾ ཝུཏྟཱ ཙ སཱ དེཝཱི, སཀྐཾ པུནིདམབྲཝི;

‘ཀིཾ ནུ མེ ཨཔརཱདྷཏྠི, ཀིཾ ནུ དེསྶཱ ཨཧཾ ཏཝ;

རམྨཱ ཙཱཝེསི མཾ ཋཱནཱ, ཝཱཏོཝ དྷརཎཱིརུཧཾ’.

‘‘ཨེཝཾ ¶ ཝུཏྟོ ཙ སོ སཀྐོ, པུན ཏསྶིདམབྲཝི;

‘ན ཙེཝ ཏེ ཀཏཾ པཱཔཾ, ན ཙ མེ ཏྭཾསི ཨཔྤིཡཱ.

‘‘‘ཨེཏྟཀཾཡེཝ ¶ ཏེ ཨཱཡུ, ཙཝནཀཱལོ བྷཝིསྶཏི;

པཊིགྒཎྷ མཡཱ དིནྣེ, ཝརེ དས ཝརུཏྟམེ’.

‘‘སཀྐེན ¶ སཱ དིནྣཝརཱ, ཏུཊྛཧཊྛཱ པམོདིཏཱ;

མམཾ ཨབྦྷནྟརཾ ཀཏྭཱ, ཕུསྶཏཱི དས ཝརེ ཝརཱི.

‘‘ཏཏོ ཙུཏཱ སཱ ཕུསྶཏཱི, ཁཏྟིཡེ ཨུཔཔཛྫཐ;

ཛེཏུཏྟརམྷི ནགརེ, སཉྫཡེན སམཱགམི.

‘‘ཡདཱཧཾ ཕུསྶཏིཡཱ ཀུཙྪིཾ, ཨོཀྐནྟོ པིཡམཱཏུཡཱ;

མམ ཏེཛེན མེ མཱཏཱ, སདཱ དཱནརཏཱ ཨཧུ.

‘‘ཨདྷནེ ཨཱཏུརེ ཛིཎྞེ, ཡཱཙཀེ ཨདྡྷིཀེ [པཐིཀེ (ཀ.)] ཛནེ;

སམཎེ བྲཱཧྨཎེ ཁཱིཎེ, དེཏི དཱནཾ ཨཀིཉྩནེ.

‘‘དས མཱསེ དྷཱརཡིཏྭཱན, ཀརོནྟེ པུརཾ པདཀྑིཎཾ;

ཝེསྶཱནཾ ཝཱིཐིཡཱ མཛ྄ཛྷེ, ཛནེསི ཕུསྶཏཱི མམཾ.

‘‘ན མཡ྄ཧཾ མཏྟིཀཾ ནཱམཾ, ནཔི པེཏྟིཀསམྦྷཝཾ;

ཛཱཏེཏྠ ཝེསྶཝཱིཐིཡཱ, ཏསྨཱ ཝེསྶནྟརོ ཨཧུ.

‘‘ཡདཱཧཾ དཱརཀོ ཧོམི, ཛཱཏིཡཱ ཨཊྛཝསྶིཀོ;

ཏདཱ ནིསཛྫ པཱསཱདེ, དཱནཾ དཱཏུཾ ཝིཙིནྟཡིཾ.

‘‘‘ཧདཡཾ ¶ དདེཡྻཾ ཙཀྑུཾ, མཾསམྤི རུདྷིརམྤི ཙ;

དདེཡྻཾ ཀཱཡཾ སཱཝེཏྭཱ, ཡདི ཀོཙི ཡཱཙཡེ མམཾ’.

‘‘སབྷཱཝཾ ཙིནྟཡནྟསྶ, ཨཀམྤིཏམསཎྛིཏཾ;

ཨཀམྤི ཏཏྠ པཐཝཱི, སིནེརུཝནཝཊཾསཀཱ.

‘‘ཨནྭདྡྷམཱསེ པནྣརསེ, པུཎྞམཱསེ ཨུཔོསཐེ;

པཙྩཡཾ ནཱགམཱརུཡ྄ཧ, དཱནཾ དཱཏུཾ ཨུཔཱགམིཾ.

‘‘ཀལིངྒརཊྛཝིསཡཱ ¶ , བྲཱཧྨཎཱ ཨུཔགཉྪུ མཾ;

ཨཡཱཙུཾ མཾ ཧཏྠིནཱགཾ, དྷཉྙཾ མངྒལསམྨཏཾ.

‘‘ཨཝུཊྛིཀོ ¶ ཛནཔདོ, དུབྦྷིཀྑོ ཚཱཏཀོ མཧཱ;

དདཱཧི པཝརཾ ནཱགཾ, སབྦསེཏཾ གཛུཏྟམཾ.

‘‘དདཱམི ན ཝིཀམྤཱམི, ཡཾ མཾ ཡཱཙནྟི བྲཱཧྨཎཱ;

སནྟཾ ནཔྤཏིགཱུཧཱམི [ནཔྤཏིགུཡ྄ཧཱམི (སཱི. ཀ.)], དཱནེ མེ རམཏེ མནོ.

‘‘ན མེ ཡཱཙཀམནུཔྤཏྟེ, པཊིཀྑེཔོ ཨནུཙྪཝོ;

‘མཱ མེ བྷིཛྫི སམཱདཱནཾ, དསྶཱམི ཝིཔུལཾ གཛཾ’.

‘‘ནཱགཾ གཧེཏྭཱ སོཎྜཱཡ, བྷིངྒཱརེ རཏནཱམཡེ;

ཛལཾ ཧཏྠེ ཨཱཀིརིཏྭཱ, བྲཱཧྨཎཱནཾ ཨདཾ གཛཾ.

‘‘པུནཱཔརཾ དདནྟསྶ, སབྦསེཏཾ གཛུཏྟམཾ;

ཏདཱཔི པཐཝཱི ཀམྤི, སིནེརུཝནཝཊཾསཀཱ.

‘‘ཏསྶ ནཱགསྶ དཱནེན, སིཝཡོ ཀུདྡྷཱ སམཱགཏཱ;

པབྦཱཛེསུཾ སཀཱ རཊྛཱ, ‘ཝངྐཾ གཙྪཏུ པབྦཏཾ’.

‘‘ཏེསཾ ནིཙྪུབྷམཱནཱནཾ, ཨཀམྤིཏྠམསཎྛིཏཾ;

མཧཱདཱནཾ པཝཏྟེཏུཾ, ཨེཀཾ ཝརམཡཱཙིསཾ.

‘‘ཡཱཙིཏཱ ¶ སིཝཡོ སབྦེ, ཨེཀཾ ཝརམདཾསུ མེ;

སཱཝཡིཏྭཱ ཀཎྞབྷེརིཾ, མཧཱདཱནཾ དདཱམཧཾ.

‘‘ཨཐེཏྠ ཝཏྟཏཱི སདྡོ, ཏུམུལོ བྷེརཝོ མཧཱ;

དཱནེནིམཾ ནཱིཧརནྟི, པུན དཱནཾ དདཱཏཡཾ.

‘‘ཧཏྠིཾ ¶ ཨསྶེ རཐེ དཏྭཱ, དཱསིཾ དཱསཾ གཝཾ དྷནཾ;

མཧཱདཱནཾ དདིཏྭཱན, ནགརཱ ནིཀྑམིཾ ཏདཱ.

‘‘ནིཀྑམིཏྭཱན ¶ ནགརཱ, ནིཝཏྟིཏྭཱ ཝིལོཀིཏེ;

ཏདཱཔི པཐཝཱི ཀམྤི, སིནེརུཝནཝཊཾསཀཱ.

‘‘ཙཏུཝཱཧིཾ རཐཾ དཏྭཱ, ཋཏྭཱ ཙཱཏུམྨཧཱཔཐེ;

ཨེཀཱཀིཡོ ཨདུཏིཡོ, མདྡིདེཝིཾ ཨིདམབྲཝིཾ.

‘‘‘ཏྭཾ མདྡི ཀཎྷཾ གཎྷཱཧི, ལཧུཀཱ ཨེསཱ ཀནིཊྛིཀཱ;

ཨཧཾ ཛཱལིཾ གཧེསྶཱམི, གརུཀོ བྷཱཏིཀོ ཧི སོ’.

‘‘པདུམཾ ¶ པུཎྜརཱིཀཾཝ, མདྡཱི ཀཎྷཱཛིནགྒཧཱི;

ཨཧཾ སུཝཎྞབིམྦཾཝ, ཛཱལིཾ ཁཏྟིཡམགྒཧིཾ.

‘‘ཨབྷིཛཱཏཱ སུཁུམཱལཱ, ཁཏྟིཡཱ ཙཏུརོ ཛནཱ;

ཝིསམཾ སམཾ ཨཀྐམནྟཱ, ཝངྐཾ གཙྪཱམ པབྦཏཾ.

‘‘ཡེ ཀེཙི མནུཛཱ ཨེནྟི, ཨནུམགྒེ པཊིཔྤཐེ;

མགྒནྟེ པཊིཔུཙྪཱམ, ‘ཀུཧིཾ ཝངྐནྟ [ཝངྐཏ (སཱི.)] པབྦཏོ’.

‘‘ཏེ ཏཏྠ ཨམྷེ པསྶིཏྭཱ, ཀརུཎཾ གིརམུདཱིརཡུཾ;

དུཀྑཾ ཏེ པཊིཝེདེནྟི, དཱུརེ ཝངྐནྟཔབྦཏོ.

‘‘ཡདི པསྶནྟི པཝནེ, དཱརཀཱ ཕལིནེ དུམེ;

ཏེསཾ ཕལཱནཾ ཧེཏུམྷི, ཨུཔརོདནྟི དཱརཀཱ.

‘‘རོདནྟེ དཱརཀེ དིསྭཱ, ཨུབྦིདྡྷཱ [ཨུབྦིགྒཱ (སྱཱ. ཀཾ.)] ཝིཔུལཱ དུམཱ;

སཡམེཝོཎམིཏྭཱན, ཨུཔགཙྪནྟི དཱརཀེ.

‘‘ཨིདཾ ¶ ཨཙྪརིཡཾ དིསྭཱ, ཨབྦྷུཏཾ ལོམཧཾསནཾ;

སཱཧུཀཱརཾ [སཱདྷུཀཱརཾ (སབྦཏྠ)] པཝཏྟེསི, མདྡཱི སབྦངྒསོབྷནཱ.

‘‘ཨཙྪེརཾ ཝཏ ལོཀསྨིཾ, ཨབྦྷུཏཾ ལོམཧཾསནཾ;

ཝེསྶནྟརསྶ ཏེཛེན, སཡམེཝོཎཏཱ དུམཱ.

‘‘སངྑིཔིཾསུ པཐཾ ཡཀྑཱ, ཨནུཀམྤཱཡ དཱརཀེ;

ནིཀྑནྟདིཝསེནེཝ [ནིཀྑནྟདིཝསེཡེཝ (སཱི.)], ཙེཏརཊྛམུཔཱགམུཾ.

‘‘སཊྛིརཱཛསཧསྶཱནི, ཏདཱ ཝསནྟི མཱཏུལེ;

སབྦེ པཉྫལིཀཱ ཧུཏྭཱ, རོདམཱནཱ ཨུཔཱགམུཾ.

‘‘ཏཏྠ ཝཏྟེཏྭཱ སལླཱཔཾ, ཙེཏེཧི ཙེཏཔུཏྟེཧི;

ཏེ ཏཏོ ནིཀྑམིཏྭཱན, ཝངྐཾ ཨགམུ པབྦཏཾ.

‘‘ཨཱམནྟཡིཏྭཱ ¶ དེཝིནྡོ, ཝིསྶཀམྨཾ [ཝིསུཀམྨཾ (ཀ.)] མཧིདྡྷིཀཾ;

ཨསྶམཾ སུཀཏཾ རམྨཾ, པཎྞསཱལཾ སུམཱཔཡ.

‘‘སཀྐསྶ ཝཙནཾ སུཏྭཱ, ཝིསྶཀམྨོ མཧིདྡྷིཀོ;

ཨསྶམཾ ¶ སུཀཏཾ རམྨཾ, པཎྞསཱལཾ སུམཱཔཡི.

‘‘ཨཛ྄ཛྷོགཱཧེཏྭཱ ¶ པཝནཾ, ཨཔྤསདྡཾ ནིརཱཀུལཾ;

ཙཏུརོ ཛནཱ མཡཾ ཏཏྠ, ཝསཱམ པབྦཏནྟརེ.

‘‘ཨཧཉྩ མདྡིདེཝཱི ཙ, ཛཱལཱི ཀཎྷཱཛིནཱ ཙུབྷོ;

ཨཉྙམཉྙཾ སོཀནུདཱ, ཝསཱམ ཨསྶམེ ཏདཱ.

‘‘དཱརཀེ ཨནུརཀྑནྟོ, ཨསུཉྙོ ཧོམི ཨསྶམེ;

མདྡཱི ཕལཾ ཨཱཧརིཏྭཱ, པོསེཏི སཱ ཏཡོ ཛནེ.

‘‘པཝནེ ¶ ཝསམཱནསྶ, ཨདྡྷིཀོ མཾ ཨུཔཱགམི;

ཨཱཡཱཙི པུཏྟཀེ མཡ྄ཧཾ, ཛཱལིཾ ཀཎྷཱཛིནཾ ཙུབྷོ.

‘‘ཡཱཙཀཾ ཨུཔགཏཾ དིསྭཱ, ཧཱསོ མེ ཨུཔཔཛྫཐ;

ཨུབྷོ པུཏྟེ གཧེཏྭཱན, ཨདཱསིཾ བྲཱཧྨཎེ ཏདཱ.

‘‘སཀེ པུཏྟེ ཙཛནྟསྶ, ཛཱུཛཀེ བྲཱཧྨཎེ ཡདཱ;

ཏདཱཔི པཐཝཱི ཀམྤི, སིནེརུཝནཝཊཾསཀཱ.

‘‘པུནདེཝ སཀྐོ ཨོརུཡ྄ཧ, ཧུཏྭཱ བྲཱཧྨཎསནྣིབྷོ;

ཨཱཡཱཙི མཾ མདྡིདེཝིཾ, སཱིལཝནྟིཾ པཏིབྦཏཾ.

‘‘མདྡིཾ ཧཏྠེ གཧེཏྭཱན, ཨུདཀཉྫལི པཱུརིཡ;

པསནྣམནསངྐཔྤོ, ཏསྶ མདྡིཾ ཨདཱསཧཾ.

‘‘མདྡིཡཱ དཱིཡམཱནཱཡ, གགནེ དེཝཱ པམོདིཏཱ;

ཏདཱཔི པཐཝཱི ཀམྤི, སིནེརུཝནཝཊཾསཀཱ.

‘‘ཛཱལིཾ ཀཎྷཱཛིནཾ དྷཱིཏཾ, མདྡིདེཝིཾ པཏིབྦཏཾ;

ཙཛམཱནོ ན ཙིནྟེསིཾ, བོདྷིཡཱཡེཝ ཀཱརཎཱ.

‘‘ན མེ དེསྶཱ ཨུབྷོ པུཏྟཱ, མདྡིདེཝཱི ན དེསྶིཡཱ;

སབྦཉྙུཏཾ པིཡཾ མཡ྄ཧཾ, ཏསྨཱ པིཡེ ཨདཱསཧཾ.

‘‘པུནཱཔརཾ བྲཧཱརཉྙེ, མཱཏཱཔིཏུསམཱགམེ;

ཀརུཎཾ པརིདེཝནྟེ, སལླཔནྟེ སུཁཾ དུཁཾ.

‘‘ཧིརོཏྟཔྤེན ¶ གརུནཱ [གརུནཾ (སྱཱ. ཀ.)], ཨུབྷིནྣཾ ཨུཔསངྐམི;

ཏདཱཔི པཐཝཱི ཀམྤི, སིནེརུཝནཝཊཾསཀཱ.

‘‘པུནཱཔརཾ ¶ ¶ བྲཧཱརཉྙཱ, ནིཀྑམིཏྭཱ སཉཱཏིབྷི;

པཝིསཱམི པུརཾ རམྨཾ, ཛེཏུཏྟརཾ པུརུཏྟམཾ.

‘‘རཏནཱནི སཏྟ ཝསྶིཾསུ, མཧཱམེགྷོ པཝསྶཐ;

ཏདཱཔི པཐཝཱི ཀམྤི, སིནེརུཝནཝཊཾསཀཱ.

‘‘ཨཙེཏནཱཡཾ པཐཝཱི, ཨཝིཉྙཱཡ སུཁཾ དུཁཾ;

སཱཔི དཱནབལཱ མཡ྄ཧཾ, སཏྟཀྑཏྟུཾ པཀམྤཐཱ’’ཏི.

‘‘པུནཱཔརཾ ¶ ཡདཱ ཧོམི, སསཀོ པཝནཙཱརཀོ;

ཏིཎཔཎྞསཱཀཕལབྷཀྑོ, པརཧེཋནཝིཝཛྫིཏོ.

‘‘མཀྐཊོ ཙ སིངྒཱལོ ཙ, སུཏྟཔོཏོ ཙཧཾ ཏདཱ;

ཝསཱམ ཨེཀསཱམནྟཱ, སཱཡཾ པཱཏོ ཙ དིསྶརེ [སཱཡཾ པཱཏོ པདིསྶརེ (ཀ.)].

‘‘ཨཧཾ ཏེ ཨནུསཱསཱམི, ཀིརིཡེ ཀལྱཱཎཔཱཔཀེ;

‘པཱཔཱནི པརིཝཛྫེཐ, ཀལྱཱཎེ ཨབྷིནིཝིསྶཐ’.

‘‘ཨུཔོསཐམྷི དིཝསེ, ཙནྡཾ དིསྭཱན པཱུརིཏཾ;

ཨེཏེསཾ ཏཏྠ ཨཱཙིཀྑིཾ, དིཝསོ ཨཛྫུཔོསཐོ.

‘‘དཱནཱནི པཊིཡཱདེཐ, དཀྑིཎེཡྻསྶ དཱཏཝེ;

དཏྭཱ དཱནཾ དཀྑིཎེཡྻེ, ཨུཔཝསྶཐུཔོསཐཾ.

‘‘ཏེ ¶ མེ སཱདྷཱུཏི ཝཏྭཱན, ཡཐཱསཏྟི ཡཐཱབལཾ;

དཱནཱནི པཊིཡཱདེཏྭཱ, དཀྑིཎེཡྻཾ གཝེསིསུཾ [གཝེསཡྻུཾ (ཀ.)].

‘‘ཨཧཾ ནིསཛྫ ཙིནྟེསིཾ, དཱནཾ དཀྑིཎནུཙྪཝཾ;

‘ཡདིཧཾ ལབྷེ དཀྑིཎེཡྻཾ, ཀིཾ མེ དཱནཾ བྷཝིསྶཏི.

‘‘‘ན ¶ མེ ཨཏྠི ཏིལཱ མུགྒཱ, མཱསཱ ཝཱ ཏཎྜུལཱ གྷཏཾ;

ཨཧཾ ཏིཎེན ཡཱཔེམི, ན སཀྐཱ ཏིཎ དཱཏཝེ.

‘‘‘ཡདི ¶ ཀོཙི ཨེཏི དཀྑིཎེཡྻོ, བྷིཀྑཱཡ མམ སནྟིཀེ;

དཛྫཱཧཾ སཀམཏྟཱནཾ, ན སོ ཏུཙྪོ གམིསྶཏི’.

‘‘མམ སངྐཔྤམཉྙཱཡ, སཀྐོ བྲཱཧྨཎཝཎྞིནཱ;

ཨཱསཡཾ མེ ཨུཔཱགཙྪི, དཱནཝཱིམཾསནཱཡ མེ.

‘‘ཏམཧཾ དིསྭཱན སནྟུཊྛོ, ཨིདཾ ཝཙནམབྲཝིཾ;

‘སཱདྷུ ཁོསི ཨནུཔྤཏྟོ, གྷཱསཧེཏུ མམནྟིཀེ.

‘‘‘ཨདིནྣཔུབྦཾ དཱནཝརཾ, ཨཛྫ དསྶཱམི ཏེ ཨཧཾ;

ཏུཝཾ སཱིལགུཎཱུཔེཏོ, ཨཡུཏྟཾ ཏེ པརཧེཋནཾ.

‘‘‘ཨེཧི ཨགྒིཾ པདཱིཔེཧི, ནཱནཱཀཊྛེ སམཱནཡ;

ཨཧཾ པཙིསྶམཏྟཱནཾ, པཀྐཾ ཏྭཾ བྷཀྑཡིསྶསི’.

‘‘‘སཱདྷཱུ’ཏི སོ ཧཊྛམནོ, ནཱནཱཀཊྛེ སམཱནཡི;

མཧནྟཾ ཨཀཱསི ཙིཏཀཾ, ཀཏྭཱ ཨངྒཱརགབྦྷཀཾ.

‘‘ཨགྒིཾ ཏཏྠ པདཱིཔེསི, ཡཐཱ སོ ཁིཔྤཾ མཧཱ བྷཝེ;

ཕོཊེཏྭཱ རཛགཏེ གཏྟེ, ཨེཀམནྟཾ ཨུཔཱཝིསིཾ.

‘‘ཡདཱ ¶ མཧཱཀཊྛཔུཉྫོ, ཨཱདིཏྟོ དྷམདྷམཱཡཏི [དྷུམདྷུམཱཡཏི (སཱི.), དྷམམཱཡཏི (ཀ.)];

ཏདུཔྤཏིཏྭཱ པཔཏིཾ, མཛ྄ཛྷེ ཛཱལསིཁནྟརེ.

‘‘ཡཐཱ ¶ སཱིཏོདཀཾ ནཱམ, པཝིཊྛཾ ཡསྶ ཀསྶཙི;

སམེཏི དརཐཔརིལཱ༹ཧཾ, ཨསྶཱདཾ དེཏི པཱིཏི ཙ.

‘‘ཏཐེཝ ཛལིཏཾ ཨགྒིཾ, པཝིཊྛསྶ མམཾ ཏདཱ;

སབྦཾ སམེཏི དརཐཾ, ཡཐཱ སཱིཏོདཀཾ ཝིཡ.

‘‘ཚཝིཾ ཙམྨཾ མཾསཾ ནྷཱརུཾ, ཨཊྛིཾ ཧདཡབནྡྷནཾ;

ཀེཝལཾ སཀལཾ ཀཱཡཾ, བྲཱཧྨཎསྶ ཨདཱསཧ’’ནྟི.

ཨཀིཏྟིབྲཱཧྨཎོ ¶ སངྑོ, ཀུརུརཱཛཱ དྷནཉྩཡོ;

མཧཱསུདསྶནོ རཱཛཱ, མཧཱགོཝིནྡབྲཱཧྨཎོ.

ནིམི ཙནྡཀུམཱརོ ཙ, སིཝི ཝེསྶནྟརོ སསོ;

ཨཧམེཝ ཏདཱ ཨཱསིཾ, ཡོ ཏེ དཱནཝརེ ཨདཱ.

ཨེཏེ དཱནཔརིཀྑཱརཱ, ཨེཏེ དཱནསྶ པཱརམཱི;

ཛཱིཝིཏཾ ཡཱཙཀེ དཏྭཱ, ཨིམཾ པཱརམི པཱུརཡིཾ.

བྷིཀྑཱཡ ཨུཔགཏཾ དིསྭཱ, སཀཏྟཱནཾ པརིཙྩཛིཾ;

དཱནེན མེ སམོ ནཏྠི, ཨེསཱ མེ དཱནཔཱརམཱིཏི.

‘‘ཡདཱ ¶ ¶ ¶ ¶ ཨཧོསིཾ པཝནེ, ཀུཉྫརོ མཱཏུཔོསཀོ;

ན ཏདཱ ཨཏྠི མཧིཡཱ, གུཎེན མམ སཱདིསོ.

‘‘པཝནེ དིསྭཱ ཝནཙརོ, རཉྙོ མཾ པཊིཝེདཡི;

‘ཏཝཱནུཙྪཝོ མཧཱརཱཛ, གཛོ ཝསཏི ཀཱནནེ.

‘‘‘ན ཏསྶ པརིཀྑཱཡཏྠོ, ནཔི ཨཱལ༹ཀཀཱསུཡཱ;

སཧ གཧིཏེ [སམཾ གཧིཏེ (སཱི.)] སོཎྜཱཡ, སཡམེཝ ཨིདྷེཧི’ཏི.

‘‘ཏསྶ ཏཾ ཝཙནཾ སུཏྭཱ, རཱཛཱཔི ཏུཊྛམཱནསོ;

པེསེསི ཧཏྠིདམཀཾ, ཚེཀཱཙརིཡཾ སུསིཀྑིཏཾ.

‘‘གནྟྭཱ སོ ཧཏྠིདམཀོ, ཨདྡས པདུམསྶརེ;

བྷིསམུལཱ༹ལཾ [བྷིསམཱུལཾ (ཀ.)] ཨུདྡྷརནྟཾ, ཡཱཔནཏྠཱཡ མཱཏུཡཱ.

‘‘ཝིཉྙཱཡ མེ སཱིལགུཎཾ, ལཀྑཎཾ ཨུཔདྷཱརཡི;

‘ཨེཧི པུཏྟཱ’ཏི པཏྭཱན, མམ སོཎྜཱཡ ཨགྒཧི.

‘‘ཡཾ མེ ཏདཱ པཱཀཏིཀཾ, སརཱིརཱནུགཏཾ བལཾ;

ཨཛྫ ནཱགསཧསྶཱནཾ, བལེན སམསཱདིསཾ.

‘‘ཡདིཧཾ ཏེསཾ པཀུཔྤེཡྻཾ, ཨུཔེཏཱནཾ གཧཎཱཡ མཾ;

པཊིབལོ བྷཝེ ཏེསཾ, ཡཱཝ རཛྫམྤི མཱནུསཾ.

‘‘ཨཔི ¶ ཙཱཧཾ སཱིལརཀྑཱཡ, སཱིལཔཱརམིཔཱུརིཡཱ;

ན ཀརོམི ཙིཏྟེ ཨཉྙཐཏྟཾ, པཀྑིཔནྟཾ མམཱལ༹ཀེ.

‘‘ཡདི ཏེ མཾ ཏཏྠ ཀོཊྚེཡྻུཾ, ཕརསཱུཧི ཏོམརེཧི ཙ;

ནེཝ ཏེསཾ པཀུཔྤེཡྻཾ, སཱིལཁཎྜབྷཡཱ མམཱ’’ཏི.

‘‘པུནཱཔརཾ ¶ ¶ ¶ ཡདཱ ཧོམི, བྷཱུརིདཏྟོ མཧིདྡྷིཀོ;

ཝིརཱུཔཀྑེན མཧཱརཉྙཱ, དེཝལོཀམགཉྪཧཾ.

‘‘ཏཏྠ པསྶིཏྭཱཧཾ དེཝེ, ཨེཀནྟཾ སུཁསམཔྤིཏེ;

ཏཾ སགྒགམནཏྠཱཡ, སཱིལབྦཏཾ སམཱདིཡིཾ.

‘‘སརཱིརཀིཙྩཾ ཀཏྭཱན, བྷུཏྭཱ ཡཱཔནམཏྟཀཾ;

ཙཏུརོ ཨངྒེ ཨདྷིཊྛཱཡ, སེམི ཝམྨིཀམུདྡྷནི.

‘‘ཚཝིཡཱ ཙམྨེན མཾསེན, ནཧཱརུཨཊྛིཀེཧི ཝཱ;

ཡསྶ ཨེཏེན ཀརཎཱིཡཾ, དིནྣཾཡེཝ ཧརཱཏུ སོ.

‘‘སཾསིཏོ ཨཀཏཉྙུནཱ, ཨཱལམྤཱཡནོ [ཨཱལམྦཎོ (སཱི.)] མམགྒཧི;

པེལཱ༹ཡ པཀྑིཔིཏྭཱན, ཀཱིལེ༹ཏི མཾ ཏཧིཾ ཏཧིཾ.

‘‘པེལཱ༹ཡ པཀྑིཔནྟེཔི, སམྨདྡནྟེཔི པཱཎིནཱ;

ཨཱལམྤཱཡནེ [ཨཱལམྦཎེ (སཱི.)] ན ཀུཔྤཱམི, སཱིལཁཎྜབྷཡཱ མམ.

‘‘སཀཛཱིཝིཏཔརིཙྩཱགོ ¶ , ཏིཎཏོ ལཧུཀོ མམ;

སཱིལཝཱིཏིཀྐམོ མཡ྄ཧཾ, པཐཝཱིཨུཔྤཏནཾ ཝིཡ.

‘‘ནིརནྟརཾ ཛཱཏིསཏཾ, ཙཛེཡྻཾ མམ ཛཱིཝིཏཾ;

ནེཝ སཱིལཾ པབྷིནྡེཡྻཾ, ཙཏུདྡཱིཔཱན ཧེཏུཔི.

‘‘ཨཔི ཙཱཧཾ སཱིལརཀྑཱཡ, སཱིལཔཱརམིཔཱུརིཡཱ;

ན ཀརོམི ཙིཏྟེ ཨཉྙཐཏྟཾ, པཀྑིཔནྟམྤི པེལ༹ཀེ’’ཏི.

‘‘པུནཱཔརཾ ཡདཱ ཧོམི, ཙམྤེཡྻཀོ མཧིདྡྷིཀོ;

ཏདཱཔི དྷམྨིཀོ ཨཱསིཾ, སཱིལབྦཏསམཔྤིཏོ.

‘‘ཏདཱཔི ¶ མཾ དྷམྨཙཱརིཾ, ཨུཔཝུཏྠཾ ཨུཔོསཐཾ;

ཨཧིཏུཎྜིཀོ གཧེཏྭཱན, རཱཛདྭཱརམྷི ཀཱིལ༹ཏི.

‘‘ཡཾ ¶ ཡཾ སོ ཝཎྞཾ ཙིནྟཡི, ནཱིལཾཝ པཱིཏལོཧིཏཾ;

ཏསྶ ཙིཏྟཱནུཝཏྟནྟོ, ཧོམི ཙིནྟིཏསནྣིབྷོ.

‘‘ཐལཾ ¶ ཀརེཡྻམུདཀཾ, ཨུདཀམྤི ཐལཾ ཀརེ;

ཡདིཧཾ ཏསྶ པཀུཔྤེཡྻཾ, ཁཎེན ཚཱརིཀཾ ཀརེ.

‘‘ཡདི ཙིཏྟཝསཱི ཧེསྶཾ, པརིཧཱཡིསྶཱམི སཱིལཏོ;

སཱིལེན པརིཧཱིནསྶ, ཨུཏྟམཏྠོ ན སིཛ྄ཛྷཏི.

‘‘ཀཱམཾ ¶ བྷིཛྫཏུཡཾ ཀཱཡོ, ཨིདྷེཝ ཝིཀིརཱིཡཏུ;

ནེཝ སཱིལཾ པབྷིནྡེཡྻཾ, ཝིཀིརནྟེ བྷུསཾ ཝིཡཱ’’ཏི.

‘‘པུནཱཔརཾ ཡདཱ ཧོམི, ཙཱུལ༹བོདྷི སུསཱིལཝཱ;

བྷཝཾ དིསྭཱན བྷཡཏོ, ནེཀྑམྨཾ ཨབྷིནིཀྑམིཾ.

‘‘ཡཱ མེ དུཏིཡིཀཱ ཨཱསི, བྲཱཧྨཎཱི ཀནཀསནྣིབྷཱ;

སཱཔི ཝཊྚེ ཨནཔེཀྑཱ, ནེཀྑམྨཾ ཨབྷིནིཀྑམི.

‘‘ནིརཱལཡཱ ཚིནྣབནྡྷཱུ, ཨནཔེཀྑཱ ཀུལེ གཎེ;

ཙརནྟཱ གཱམནིགམཾ, བཱརཱཎསིམུཔཱགམུཾ.

‘‘ཏཏྠ ཝསཱམ ནིཔཀཱ, ཨསཾསཊྛཱ ཀུལེ གཎེ;

ནིརཱཀུལེ ཨཔྤསདྡེ, རཱཛུཡྻཱནེ ཝསཱམུབྷོ.

‘‘ཨུཡྻཱནདསྶནཾ གནྟྭཱ, རཱཛཱ ཨདྡས བྲཱཧྨཎིཾ;

ཨུཔགམྨ མམཾ པུཙྪི, ‘ཏུཡ྄ཧེསཱ ཀཱ ཀསྶ བྷརིཡཱ’.

‘‘ཨེཝཾ ཝུཏྟེ ཨཧཾ ཏསྶ, ཨིདཾ ཝཙནམབྲཝིཾ;

‘ན མཡ྄ཧཾ བྷརིཡཱ ཨེསཱ, སཧདྷམྨཱ ཨེཀསཱསནཱི’.

‘‘ཏིསྶཱ ¶ [ཏསྶཱ (སཱི.)] སཱརཏྟགདྷིཏོ, གཱཧཱཔེཏྭཱན ཙེཊཀེ;

ནིཔྤཱིལ༹ཡནྟོ བལསཱ, ཨནྟེཔུརཾ པཝེསཡི.

‘‘ཨོདཔཏྟཀིཡཱ ¶ མཡ྄ཧཾ, སཧཛཱ ཨེཀསཱསནཱི;

ཨཱཀཌྜྷིཏྭཱ ནཡནྟིཡཱ, ཀོཔོ མེ ཨུཔཔཛྫཐ.

‘‘སཧ ¶ ཀོཔེ སམུཔྤནྣེ, སཱིལབྦཏམནུསྶརིཾ;

ཏཏྠེཝ ཀོཔཾ ནིགྒཎྷིཾ, ནཱདཱསིཾ ཝཌྜྷིཏཱུཔརི.

‘‘ཡདི ནཾ བྲཱཧྨཎིཾ ཀོཙི, ཀོཊྚེཡྻ ཏིཎྷསཏྟིཡཱ;

ནེཝ སཱིལཾ པབྷིནྡེཡྻཾ, བོདྷིཡཱཡེཝ ཀཱརཎཱ.

‘‘ན མེསཱ བྲཱཧྨཎཱི དེསྶཱ, ནཔི མེ བལཾ ན ཝིཛྫཏི;

སབྦཉྙུཏཾ པིཡཾ མཡ྄ཧཾ, ཏསྨཱ སཱིལཱནུརཀྑིས’’ནྟི.

‘‘པུནཱཔརཾ ¶ ཡདཱ ཧོམི, མཧིཾསོ པཝནཙཱརཀོ;

པཝཌྜྷཀཱཡོ བལཝཱ, མཧནྟོ བྷཱིམདསྶནོ.

‘‘པབྦྷཱརེ གིརིདུགྒེ [ཝནདུགྒེ (སཱི.)] ཙ, རུཀྑམཱུལེ དཀཱསཡེ;

ཧོཏེཏྠ ཋཱནཾ མཧིཾསཱནཾ, ཀོཙི ཀོཙི ཏཧིཾ ཏཧིཾ.

‘‘ཝིཙརནྟོ བྲཧཱརཉྙེ, ཋཱནཾ ཨདྡས བྷདྡཀཾ;

ཏཾ ཋཱནཾ ཨུཔགནྟྭཱན, ཏིཊྛཱམི ཙ སཡཱམི ཙ.

‘‘ཨཐེཏྠ ཀཔིམཱགནྟྭཱ, པཱཔོ ཨནརིཡོ ལཧུ;

ཁནྡྷེ ནལཱཊེ བྷམུཀེ, མུཏྟེཏི ཨོཧནེཏིཏཾ.

‘‘སཀིམྤི དིཝསཾ དུཏིཡཾ, ཏཏིཡཾ ཙཏུཏྠམྤི ཙ;

དཱུསེཏི མཾ སབྦཀཱལཾ, ཏེན ཧོམི ཨུཔདྡུཏོ.

‘‘མམཾ ¶ ཨུཔདྡུཏཾ དིསྭཱ, ཡཀྑོ མཾ ཨིདམབྲཝི;

‘ནཱསེཧེཏཾ ཚཝཾ པཱཔཾ, སིངྒེཧི ཙ ཁུརེཧི ཙ’.

‘‘ཨེཝཾ ¶ ཝུཏྟེ ཏདཱ ཡཀྑེ, ཨཧཾ ཏཾ ཨིདམབྲཝིཾ;

‘ཀིཾ ཏྭཾ མཀྑེསི ཀུཎཔེན, པཱཔེན ཨནརིཡེན མཾ.

‘‘‘ཡདིཧཾ ¶ ཏསྶ པཀུཔྤེཡྻཾ, ཏཏོ ཧཱིནཏརོ བྷཝེ;

སཱིལཉྩ མེ པབྷིཛྫེཡྻ, ཝིཉྙཱུ ཙ གརཧེཡྻུ མཾ.

‘‘‘ཧཱིལི༹ཏཱ ཛཱིཝིཏཱ ཝཱཔི, པརིསུདྡྷེན མཏཾ ཝརཾ;

ཀྱཱཧཾ ཛཱིཝིཏཧེཏཱུཔི, ཀཱཧཱམིཾ པརཧེཋནཾ’.

‘‘མམེཝཱཡཾ མཉྙམཱནོ, ཨཉྙེཔེཝཾ ཀརིསྶཏི;

ཏེཝ ཏསྶ ཝདྷིསྶནྟི, སཱ མེ མུཏྟི བྷཝིསྶཏི.

‘‘ཧཱིནམཛ྄ཛྷིམཨུཀྐཊྛེ, སཧནྟོ ཨཝམཱནིཏཾ;

ཨེཝཾ ལབྷཏི སཔྤཉྙོ, མནསཱ ཡཐཱ པཏྠིཏ’’ནྟི.

‘‘པུནཱཔརཾ ཡདཱ ཧོམི, སུཏཏྟཀནཀསནྣིབྷོ;

མིགརཱཛཱ རུརུནཱམ, པརམསཱིལསམཱཧིཏོ.

‘‘རམྨེ པདེསེ རམཎཱིཡེ, ཝིཝིཏྟེ ཨམནུསྶཀེ;

ཏཏྠ ཝཱསཾ ཨུཔགཉྪིཾ, གངྒཱཀཱུལེ མནོརམེ.

‘‘ཨཐ ¶ ཨུཔརི གངྒཱཡ, དྷནིཀེཧི པརིཔཱིལི༹ཏོ;

པུརིསོ གངྒཱཡ པཔཏི, ‘ཛཱིཝཱམི ཝཱ མརཱམི ཝཱ’.

‘‘རཏྟིནྡིཝཾ ¶ སོ གངྒཱཡ, ཝུཡ྄ཧམཱནོ མཧོདཀེ;

རཝནྟོ ཀརུཎཾ རཝཾ, མཛ྄ཛྷེ གངྒཱཡ གཙྪཏི.

‘‘ཏསྶཱཧཾ སདྡཾ སུཏྭཱན, ཀརུཎཾ པརིདེཝཏོ;

གངྒཱཡ ཏཱིརེ ཋཏྭཱན, ཨཔུཙྪིཾ ‘ཀོསི ཏྭཾ ནརོ’.

‘‘སོ མེ པུཊྛོ ཙ བྱཱཀཱསི, ཨཏྟནོ ཀརཎཾ ཏདཱ;

‘དྷནིཀེཧི བྷཱིཏོ ཏསིཏོ, པཀྑནྡོཧཾ མཧཱནདིཾ’.

‘‘ཏསྶ ¶ ཀཏྭཱན ཀཱརུཉྙཾ, ཙཛིཏྭཱ མམ ཛཱིཝིཏཾ;

པཝིསིཏྭཱ ནཱིཧརིཾ ཏསྶ, ཨནྡྷཀཱརམྷི རཏྟིཡཱ.

‘‘ཨསྶཏྠཀཱལམཉྙཱཡ, ཏསྶཱཧཾ ཨིདམབྲཝིཾ;

‘ཨེཀཾ ཏཾ ཝརཾ ཡཱཙཱམི, མཱ མཾ ཀསྶཙི པཱཝད’.

‘‘ནགརཾ ¶ གནྟྭཱན ཨཱཙིཀྑི, པུཙྪིཏོ དྷནཧེཏུཀོ;

རཱཛཱནཾ སོ གཧེཏྭཱན, ཨུཔགཉྪི མམནྟིཀཾ.

‘‘ཡཱཝཏཱ ཀརཎཾ སབྦཾ, རཉྙོ ཨཱརོཙིཏཾ མཡཱ;

རཱཛཱ སུཏྭཱན ཝཙནཾ, ཨུསུཾ ཏསྶ པཀཔྤཡི;

‘ཨིདྷེཝ གྷཱཏཡིསྶཱམི, མིཏྟདུབྦྷིཾ [མིཏྟདཱུབྷིཾ (སཱི.)] ཨནཱརིཡཾ’.

‘‘ཏམཧཾ ཨནུརཀྑནྟོ, ནིམྨིནིཾ མམ ཨཏྟནཱ;

‘ཏིཊྛཏེསོ མཧཱརཱཛ, ཀཱམཀཱརོ བྷཝཱམི ཏེ’.

‘‘ཨནུརཀྑིཾ མམ སཱིལཾ, ནཱརཀྑིཾ མམ ཛཱིཝིཏཾ;

སཱིལཝཱ ཧི ཏདཱ ཨཱསིཾ, བོདྷིཡཱཡེཝ ཀཱརཎཱ’’ཏི.

‘‘པུནཱཔརཾ ¶ ཡདཱ ཧོམི, ཛཊིལོ ཨུགྒཏཱཔནོ;

མཱཏངྒོ ནཱམ ནཱམེན, སཱིལཝཱ སུསམཱཧིཏོ.

‘‘ཨཧཉྩ བྲཱཧྨཎོ ཨེཀོ, གངྒཱཀཱུལེ ཝསཱམུབྷོ;

ཨཧཾ ཝསཱམི ཨུཔརི, ཧེཊྛཱ ཝསཏི བྲཱཧྨཎོ.

‘‘ཝིཙརནྟོ ཨནུཀཱུལམྷི, ཨུདྡྷཾ མེ ཨསྶམདྡས;

ཏཏྠ མཾ པརིབྷཱསེཏྭཱ, ཨབྷིསཔི མུདྡྷཕཱལནཾ.

‘‘ཡདིཧཾ ཏསྶ པཀུཔྤེཡྻཾ, ཡདི སཱིལཾ ན གོཔཡེ;

ཨོལོཀེཏྭཱནཧཾ ཏསྶ, ཀརེཡྻཾ ཚཱརིཀཾ ཝིཡ.

‘‘ཡཾ ¶ སོ ཏདཱ མཾ ཨབྷིསཔི, ཀུཔིཏོ དུཊྛམཱནསོ;

ཏསྶེཝ མཏྠཀེ ནིཔཏི, ཡོགེན ཏཾ པམོཙཡིཾ.

‘‘ཨནུརཀྑིཾ ¶ མམ སཱིལཾ, ནཱརཀྑིཾ མམ ཛཱིཝིཏཾ;

སཱིལཝཱ ཧི ཏདཱ ཨཱསིཾ, བོདྷིཡཱཡེཝ ཀཱརཎཱ’’ཏི.

‘‘པུནཱཔརཾ ¶ ཡདཱ ཧོམི, མཧཱཔཀྑོ མཧིདྡྷིཀོ;

དྷམྨོ ནཱམ མཧཱཡཀྑོ, སབྦལོཀཱནུཀམྤཀོ.

‘‘དསཀུསལཀམྨཔཐེ ¶ , སམཱདཔེནྟོ མཧཱཛནཾ;

ཙརཱམི གཱམནིགམཾ, སམིཏྟོ སཔརིཛྫནོ.

‘‘པཱཔོ ཀདརིཡོ ཡཀྑོ, དཱིཔེནྟོ དས པཱཔཀེ;

སོཔེཏྠ མཧིཡཱ ཙརཏི, སམིཏྟོ སཔརིཛྫནོ.

‘‘དྷམྨཝཱདཱི ཨདྷམྨོ ཙ, ཨུབྷོ པཙྩནིཀཱ མཡཾ;

དྷུརེ དྷུརཾ གྷཊྚཡནྟཱ, སམིམྷཱ པཊིཔཐེ ཨུབྷོ.

‘‘ཀལཧོ ཝཏྟཏཱི བྷེསྨཱ, ཀལྱཱཎཔཱཔཀསྶ ཙ;

མགྒཱ ཨོཀྐམནཏྠཱཡ, མཧཱཡུདྡྷོ ཨུཔཊྛིཏོ.

‘‘ཡདིཧཾ ཏསྶ ཀུཔྤེཡྻཾ, ཡདི བྷིནྡེ ཏཔོགུཎཾ;

སཧཔརིཛནཾ ཏསྶ, རཛབྷཱུཏཾ ཀརེཡྻཧཾ.

‘‘ཨཔིཙཱཧཾ སཱིལརཀྑཱཡ, ནིབྦཱཔེཏྭཱན མཱནསཾ;

སཧ ཛནེནོཀྐམིཏྭཱ, པཐཾ པཱཔསྶ དཱསཧཾ.

‘‘སཧ པཐཏོ ཨོཀྐནྟེ, ཀཏྭཱ ཙིཏྟསྶ ནིབྦུཏིཾ;

ཝིཝརཾ ཨདཱསི པཐཝཱི, པཱཔཡཀྑསྶ ཏཱཝདེ’’ཏི.

‘‘པཉྩཱལརཊྛེ ¶ ¶ ནགརཝརེ, ཀཔིལཱཡཾ [ཀམྤིལཱཡཾ (སཱི.), ཀཔྤིལཱཡཾ (སྱཱ.)] པུརུཏྟམེ;

རཱཛཱ ཛཡདྡིསོ ནཱམ, སཱིལགུཎམུཔཱགཏོ.

‘‘ཏསྶ ¶ རཉྙོ ཨཧཾ པུཏྟོ, སུཏདྷམྨོ སུསཱིལཝཱ;

ཨལཱིནསཏྟོ གུཎཝཱ, ཨནུརཀྑཔརིཛནོ སདཱ.

‘‘པིཏཱ མེ མིགཝཾ གནྟྭཱ, པོརིསཱདཾ ཨུཔཱགམི;

སོ མེ པིཏུམགྒཧེསི, ‘བྷཀྑོསི མམ མཱ ཙལི’.

‘‘ཏསྶ ¶ ཏཾ ཝཙནཾ སུཏྭཱ, བྷཱིཏོ ཏསིཏཝེདྷིཏོ;

ཨཱུརུཀྑམྦྷོ ཨཧུ ཏསྶ, དིསྭཱན པོརིསཱདཀཾ.

‘‘མིགཝཾ གཧེཏྭཱ མུཉྩསྶུ, ཀཏྭཱ ཨཱགམནཾ པུན;

བྲཱཧྨཎསྶ དྷནཾ དཏྭཱ, པིཏཱ ཨཱམནྟཡཱི མམཾ.

‘‘‘རཛྫཾ པུཏྟ པཊིཔཛྫ, མཱ པམཛྫི པུརཾ ཨིདཾ;

ཀཏཾ མེ པོརིསཱདེན, མམ ཨཱགམནཾ པུན’.

‘‘མཱཏཱཔིཏཱུ ཙ ཝནྡིཏྭཱ, ནིམྨིནིཏྭཱན ཨཏྟནཱ;

ནིཀྑིཔིཏྭཱ དྷནུཾ ཁགྒཾ, པོརིསཱདཾ ཨུཔཱགམིཾ.

‘‘སསཏྠཧཏྠཱུཔགཏཾ, ཀདཱཙི སོ ཏསིསྶཏི;

ཏེན བྷིཛྫིསྶཏི སཱིལཾ, པརིཏྟཱསཾ [པརིཏཱསཾ (སཱི.)] ཀཏེ མཡི.

‘‘སཱིལཁཎྜབྷཡཱ མཡ྄ཧཾ, ཏསྶ དེསྶཾ ན བྱཱཧརིཾ;

མེཏྟཙིཏྟོ ཧིཏཝཱདཱི, ཨིདཾ ཝཙནམབྲཝིཾ.

‘‘‘ཨུཛྫཱལེཧི མཧཱཨགྒིཾ, པཔཏིསྶཱམི རུཀྑཏོ;

ཏྭཾ པཀྐཀཱལམཉྙཱཡ [སུཔཀྐཀཱལམཉྙཱཡ (པཱི.)], བྷཀྑཡ མཾ པིཏཱམཧ’.

‘‘ཨིཏི སཱིལཝཏཾ ཧེཏུ, ནཱརཀྑིཾ མམ ཛཱིཝིཏཾ;

པབྦཱཛེསིཾ ཙཧཾ ཏསྶ, སདཱ པཱཎཱཏིཔཱཏིཀ’’ནྟི.

‘‘པུནཱཔརཾ ¶ ¶ ¶ ཡདཱ ཧོམི, སངྑཔཱལོ མཧིདྡྷིཀོ;

དཱཋཱཝུདྷོ གྷོརཝིསོ, དྭིཛིཝ྄ཧོ ཨུརགཱདྷིབྷཱུ.

‘‘ཙཏུཔྤཐེ མཧཱམགྒེ, ནཱནཱཛནསམཱཀུལེ;

ཙཏུརོ ཨངྒེ ཨདྷིཊྛཱཡ, ཏཏྠ ཝཱསམཀཔྤཡིཾ.

‘‘ཚཝིཡཱ ཙམྨེན མཾསེན, ནཧཱརུཨཊྛིཀེཧི ཝཱ;

ཡསྶ ཨེཏེན ཀརཎཱིཡཾ, དིནྣཾཡེཝ ཧརཱཏུ སོ.

‘‘ཨདྡསཾསུ ¶ བྷོཛཔུཏྟཱ, ཁརཱ ལུདྡཱ ཨཀཱརུཎཱ;

ཨུཔགཉྪུཾ མམཾ ཏཏྠ, དཎྜམུགྒརཔཱཎིནོ.

‘‘ནཱསཱཡ ཝིནིཝིཛ྄ཛྷིཏྭཱ, ནངྒུཊྛེ པིཊྛིཀཎྚཀེ;

ཀཱཛེ ཨཱརོཔཡིཏྭཱན, བྷོཛཔུཏྟཱ ཧརིཾསུ མཾ.

‘‘སསཱགརནྟཾ པཐཝིཾ, སཀཱནནཾ སཔབྦཏཾ;

ཨིཙྪམཱནོ ཙཧཾ ཏཏྠ, ནཱསཱཝཱཏེན ཛྷཱཔཡེ.

‘‘སཱུལེཧི ཝིནིཝིཛ྄ཛྷནྟེ, ཀོཊྚཡནྟེཔི སཏྟིབྷི;

བྷོཛཔུཏྟེ ན ཀུཔྤཱམི, ཨེསཱ མེ སཱིལཔཱརམཱི’’ཏི.

ཧཏྠིནཱགོ ¶ བྷཱུརིདཏྟོ, ཙམྤེཡྻོ བོདྷི མཧིཾསོ;

རུརུ མཱཏངྒོ དྷམྨོ ཙ, ཨཏྲཛོ ཙ ཛཡདྡིསོ.

ཨེཏེ ནཝ སཱིལབལཱ, པརིཀྑཱརཱ པདེསིཀཱ;

ཛཱིཝིཏཾ པརིརཀྑིཏྭཱ, སཱིལཱནི ཨནུརཀྑིསཾ.

སངྑཔཱལསྶ མེ སཏོ, སབྦཀཱལམྤི ཛཱིཝིཏཾ;

ཡསྶ ཀསྶཙི ནིཡྻཏྟཾ, ཏསྨཱ སཱ སཱིལཔཱརམཱིཏི.

‘‘ཡདཱཧཾ ¶ ¶ ¶ ཨམིཏཡསོ, རཱཛཔུཏྟོ ཡུདྷཉྫཡོ;

ཨུསྶཱཝབིནྡུཾ སཱུརིཡཱཏཔེ, པཏིཏཾ དིསྭཱན སཾཝིཛིཾ.

‘‘ཏཉྙེཝཱདྷིཔཏིཾ ཀཏྭཱ, སཾཝེགམནུབྲཱུཧཡིཾ;

མཱཏཱཔིཏཱུ ཙ ཝནྡིཏྭཱ, པབྦཛྫམནུཡཱཙཧཾ.

‘‘ཡཱཙནྟི མཾ པཉྫལིཀཱ, སནེགམཱ སརཊྛཀཱ;

‘ཨཛྫེཝ པུཏྟ པཊིཔཛྫ, ཨིདྡྷཾ ཕཱིཏཾ མཧཱམཧིཾ’.

‘‘སརཱཛཀེ སཧོརོདྷེ, སནེགམེ སརཊྛཀེ;

ཀརུཎཾ པརིདེཝནྟེ, ཨནཔེཀྑོཝ པརིཙྩཛིཾ.

‘‘ཀེཝལཾ པཐཝིཾ རཛྫཾ, ཉཱཏིཔརིཛནཾ ཡསཾ;

ཙཛམཱནོ ན ཙིནྟེསིཾ, བོདྷིཡཱཡེཝ ཀཱརཎཱ.

‘‘མཱཏཱཔིཏཱ ན མེ དེསྶཱ, ནཔི མེ དེསྶཾ མཧཱཡསཾ;

སབྦཉྙུཏཾ པིཡཾ མཡ྄ཧཾ, ཏསྨཱ རཛྫཾ པརིཙྩཛི’’ནྟི.

‘‘པུནཱཔརཾ ¶ ཡདཱ ཧོམི, ཨིནྡཔཏྠེ པུརུཏྟམེ;

ཀཱམིཏོ དཡིཏོ པུཏྟོ, སོམནསྶོཏི ཝིསྶུཏོ.

‘‘སཱིལཝཱ གུཎསམྤནྣོ, ཀལྱཱཎཔཊིབྷཱནཝཱ;

ཝུཌྜྷཱཔཙཱཡཱི ཧིརཱིམཱ, སངྒཧེསུ ཙ ཀོཝིདོ.

‘‘ཏསྶ ¶ རཉྙོ པཏིཀརོ, ཨཧོསི ཀུཧཀཏཱཔསོ;

ཨཱརཱམཾ མཱལཱཝཙྪཉྩ, རོཔཡིཏྭཱན ཛཱིཝཏི.

‘‘ཏམཧཾ ¶ དིསྭཱན ཀུཧཀཾ, ཐུསརཱསིཾཝ ཨཏཎྜུལཾ;

དུམཾཝ ཨནྟོ སུསིརཾ, ཀདལིཾཝ ཨསཱརཀཾ.

‘‘ནཏྠིམསྶ ¶ སཏཾ དྷམྨོ, སཱམཉྙཱཔགཏོ ཨཡཾ;

ཧིརཱིསུཀྐདྷམྨཛཧིཏོ, ཛཱིཝིཏཝུཏྟིཀཱརཎཱ.

‘‘ཀུཔིཏོ ཨཧུ [ཨཧོསི (སཱི.), ཨཱསི (སྱཱ.)] པཙྩནྟོ, ཨཊཝཱིཧི པརནྟིཧི;

ཏཾ ནིསེདྷེཏུཾ གཙྪནྟོ, ཨནུསཱསི པིཏཱ མམཾ.

‘‘‘མཱ པམཛྫི ཏུཝཾ ཏཱཏ, ཛཊིལཾ ཨུགྒཏཱཔནཾ;

ཡདིཙྪཀཾ པཝཏྟེཧི, སབྦཀཱམདདོ ཧི སོ’.

‘‘ཏམཧཾ གནྟྭཱནུཔཊྛཱནཾ, ཨིདཾ ཝཙནམབྲཝིཾ;

‘ཀཙྩི ཏེ གཧཔཏི ཀུསལཾ, ཀིཾ ཝཱ ཏེ ཨཱཧརཱིཡཏུ’.

‘‘ཏེན སོ ཀུཔིཏོ ཨཱསི, ཀུཧཀོ མཱནནིསྶིཏོ;

‘གྷཱཏཱཔེམི ཏུཝཾ ཨཛྫ, རཊྛཱ པབྦཱཛཡཱམི ཝཱ’.

‘‘ནིསེདྷཡིཏྭཱ ¶ པཙྩནྟཾ, རཱཛཱ ཀུཧཀམབྲཝི;

‘ཀཙྩི ཏེ བྷནྟེ ཁམནཱིཡཾ, སམྨཱནོ ཏེ པཝཏྟིཏོ’.

‘‘ཏསྶ ཨཱཙིཀྑཏཱི པཱཔོ, ཀུམཱརོ ཡཐཱ ནཱསིཡོ;

ཏསྶ ཏཾ ཝཙནཾ སུཏྭཱ, ཨཱཎཱཔེསི མཧཱིཔཏི.

‘‘‘སཱིསཾ ཏཏྠེཝ ཚིནྡིཏྭཱ, ཀཏྭཱན ཙཏུཁཎྜིཀཾ;

རཐིཡཱ རཐིཡཾ དསྶེཐ, སཱ གཏི ཛཊིལཧཱིལི༹ཏཱ’.

‘‘ཏཏྠ ཀཱརཎིཀཱ གནྟྭཱ, ཙཎྜཱ ལུདྡཱ ཨཀཱརུཎཱ;

མཱཏུཨངྐེ ནིསིནྣསྶ, ཨཱཀཌྜྷིཏྭཱ ནཡནྟི མཾ.

‘‘ཏེསཱཧཾ ཨེཝམཝཙཾ, བནྡྷཏཾ གཱལ༹ྷབནྡྷནཾ;

‘རཉྙོ དསྶེཐ མཾ ཁིཔྤཾ, རཱཛཀིརིཡཱནི ཨཏྠི མེ’.

‘‘ཏེ མཾ རཉྙོ དསྶཡིཾསུ, པཱཔསྶ པཱཔསེཝིནོ;

དིསྭཱན ཏཾ སཉྙཱཔེསིཾ, མམཉྩ ཝསམཱནཡིཾ.

‘‘སོ མཾ ཏཏྠ ཁམཱཔེསི, མཧཱརཛྫམདཱསི མེ;

སོཧཾ ཏམཾ དཱལཡིཏྭཱ, པབྦཛིཾ ཨནགཱརིཡཾ.

‘‘ན ¶ མེ དེསྶཾ མཧཱརཛྫཾ, ཀཱམབྷོགོ ན དེསྶིཡོ;

སབྦཉྙུཏཾ པིཡཾ མཡ྄ཧཾ, ཏསྨཱ རཛྫཾ པརིཙྩཛི’’ནྟི.

‘‘པུནཱཔརཾ ¶ ¶ ¶ ཡདཱ ཧོམི, ཀཱསིརཱཛསྶ ཨཏྲཛོ;

ཨཡོགྷརམྷི སཾཝཌྜྷོ, ནཱམེནཱསི ཨཡོགྷརོ.

‘‘དུཀྑེན ཛཱིཝིཏོ ལདྡྷོ, སཾཔཱིལེ༹ པཏིཔོསིཏོ;

ཨཛྫེཝ པུཏྟ པཊིཔཛྫ, ཀེཝལཾ ཝསུདྷཾ ཨིམཾ.

‘‘སརཊྛཀཾ སནིགམཾ, སཛནཾ ཝནྡིཏྭ ཁཏྟིཡཾ;

ཨཉྫལིཾ པགྒཧེཏྭཱན, ཨིདཾ ཝཙནམབྲཝིཾ.

‘‘‘ཡེ ཀེཙི མཧིཡཱ སཏྟཱ, ཧཱིནམུཀྐཊྛམཛ྄ཛྷིམཱ;

ནིརཱརཀྑཱ སཀེ གེཧེ, ཝཌྜྷནྟི སཀཉཱཏིབྷི.

‘‘‘ཨིདཾ ལོཀེ ཨུཏྟརིཡཾ, སཾཔཱིལེ༹ མམ པོསནཾ;

ཨཡོགྷརམྷི སཾཝཌྜྷོ, ཨཔྤབྷེ ཙནྡསཱུརིཡེ.

‘‘‘པཱུཏིཀུཎཔསམྤུཎྞཱ, མུཙྩིཏྭཱ མཱཏུ ཀུཙྪིཏོ;

ཏཏོ གྷོརཏརེ དུཀྑེ, པུན པཀྑིཏྟཡོགྷརེ.

‘‘‘ཡདིཧཾ ཏཱདིསཾ པཏྭཱ, དུཀྑཾ པརམདཱརུཎཾ;

རཛྫེསུ ཡདི རཛྫཱམི [རཉྫཱམི (སཱི.)], པཱཔཱནཾ ཨུཏྟམོ སིཡཾ.

‘‘‘ཨུཀྐཎྛིཏོམྷི ཀཱཡེན, རཛྫེནམྷི ཨནཏྠིཀོ;

ནིབྦུཏིཾ པརིཡེསིསྶཾ, ཡཏྠ མཾ མཙྩུ ན མདྡིཡེ’.

‘‘ཨེཝཱཧཾ ཙིནྟཡིཏྭཱན, ཝིརཝནྟེ མཧཱཛནེ;

ནཱགོཝ བནྡྷནཾ ཚེཏྭཱ, པཱཝིསིཾ ཀཱནནཾ ཝནཾ.

‘‘མཱཏཱཔིཏཱ ¶ ¶ ན མེ དེསྶཱ, ནཔི མེ དེསྶཾ མཧཱཡསཾ;

སབྦཉྙུཏཾ པིཡཾ མཡ྄ཧཾ, ཏསྨཱ རཛྫཾ པརིཙྩཛི’’ནྟི.

‘‘པུནཱཔརཾ ཡདཱ ཧོམི, ཀཱསཱིནཾ པུརཝརུཏྟམེ;

བྷགིནཱི ཙ བྷཱཏརོ སཏྟ, ནིབྦཏྟཱ སོཏྠིཡེ ཀུལེ.

‘‘ཨེཏེསཾ ¶ པུབྦཛོ ཨཱསིཾ, ཧིརཱིསུཀྐམུཔཱགཏོ;

བྷཝཾ དིསྭཱན བྷཡཏོ, ནེཀྑམྨཱབྷིརཏོ ཨཧཾ.

‘‘མཱཏཱཔིཏཱུཧི ¶ པཧིཏཱ, སཧཱཡཱ ཨེཀམཱནསཱ;

ཀཱམེཧི མཾ ནིམནྟེནྟི, ‘ཀུལཝཾསཾ དྷརེཧི’ཏི.

‘‘ཡཾ ཏེསཾ ཝཙནཾ ཝུཏྟཾ, གིཧཱིདྷམྨེ སུཁཱཝཧཾ;

ཏཾ མེ ཨཧོསི ཀཋིནཾ, ཏཏྟ [སནྟཏྟ (ཀ.)] ཕཱལསམཾ ཝིཡ.

‘‘ཏེ མཾ ཏདཱ ཨུཀྑིཔནྟཾ, པུཙྪིཾསུ པཏྠིཏཾ མམ;

‘ཀིཾ ཏྭཾ པཏྠཡསེ སམྨ, ཡདི ཀཱམེ ན བྷུཉྫསི’.

‘‘ཏེསཱཧཾ ཨེཝམཝཙཾ, ཨཏྠཀཱམོ ཧིཏེསིནཾ;

‘ནཱཧཾ པཏྠེམི གིཧཱིབྷཱཝཾ, ནེཀྑམྨཱབྷིརཏོ ཨཧཾ’.

‘‘ཏེ མཡ྄ཧཾ ཝཙནཾ སུཏྭཱ, པིཏུམཱཏུ ཙ སཱཝཡུཾ;

མཱཏཱཔིཏཱ ཨེཝམཱཧུ, ‘སབྦེཝ པབྦཛཱམ བྷོ’.

‘‘ཨུབྷོ ¶ མཱཏཱཔིཏཱ མཡ྄ཧཾ, བྷགིནཱི ཙ སཏྟ བྷཱཏརོ;

ཨམིཏདྷནཾ ཚཌྜཡིཏྭཱ, པཱཝིསིམྷཱ མཧཱཝན’’ནྟི.

‘‘པུནཱཔརཾ ¶ ཡདཱ ཧོམི, ནགརེ བྲཧྨཝཌྜྷནེ;

ཏཏྠ ཀུལཝརེ སེཊྛེ, མཧཱསཱལེ ཨཛཱཡཧཾ.

‘‘ཏདཱཔི ལོཀཾ དིསྭཱན, ཨནྡྷཱིབྷཱུཏཾ ཏམོཏྠཊཾ;

ཙིཏྟཾ བྷཝཏོ པཏིཀུཊཏི, ཏུཏྟཝེགཧཏཾ ཝིཡ.

‘‘དིསྭཱན ཝིཝིདྷཾ པཱཔཾ, ཨེཝཾ ཙིནྟེསཧཾ ཏདཱ;

‘ཀདཱཧཾ གེཧཱ ནིཀྑམྨ, པཝིསིསྶཱམི ཀཱནནཾ’.

‘‘ཏདཱཔི མཾ ནིམནྟེསུཾ, ཀཱམབྷོགེཧི ཉཱཏཡོ;

ཏེསམྤི ཚནྡམཱཙིཀྑིཾ, ‘མཱ ནིམནྟེཐ ཏེཧི མཾ’.

‘‘ཡོ ¶ མེ ཀནིཊྛཀོ བྷཱཏཱ, ནནྡོ ནཱམཱསི པཎྜིཏོ;

སོཔི མཾ ཨནུསིཀྑནྟོ, པབྦཛྫཾ སམརོཙཡི.

‘‘ཨཧཾ སོཎོ ཙ ནནྡོ ཙ, ཨུབྷོ མཱཏཱཔིཏཱ མམ;

ཏདཱཔི བྷོགེ ཚཌྜེཏྭཱ, པཱཝིསིམྷཱ མཧཱཝན’’ནྟི.

‘‘པུནཱཔརཾ ¶ ¶ ཡདཱ ཧོམི, ཀཱསིརཱཛསྶ ཨཏྲཛོ;

མཱུགཔཀྑོཏི ནཱམེན, ཏེམིཡོཏི ཝདནྟི མཾ.

‘‘སོལ༹སིཏྠིསཧསྶཱནཾ, ན ཝིཛྫཏི པུམོ ཏདཱ [སདཱ (སཱི.)];

ཨཧོརཏྟཱནཾ ཨཙྩཡེན, ནིབྦཏྟོ ཨཧམེཀཀོ.

‘‘ཀིཙྪཱ ལདྡྷཾ པིཡཾ པུཏྟཾ, ཨབྷིཛཱཏཾ ཛུཏིནྡྷརཾ;

སེཏཙྪཏྟཾ དྷཱརཡིཏྭཱན, སཡནེ པོསེཏི མཾ པིཏཱ.

‘‘ནིདྡཱཡམཱནོ སཡནཝརེ, པབུཛ྄ཛྷིཏྭཱནཧཾ ཏདཱ;

ཨདྡསཾ པཎྜརཾ ཚཏྟཾ, ཡེནཱཧཾ ནིརཡཾ གཏོ.

‘‘སཧ ¶ དིཊྛསྶ མེ ཚཏྟཾ, ཏཱསོ ཨུཔྤཛྫི བྷེརཝོ;

ཝིནིཙྪཡཾ སམཱཔནྣོ, ‘ཀཐཱཧཾ ཨིམཾ མུཉྩིསྶཾ’.

‘‘པུབྦསཱལོཧིཏཱ མཡ྄ཧཾ, དེཝཏཱ ཨཏྠཀཱམིནཱི;

སཱ མཾ དིསྭཱན དུཀྑིཏཾ, ཏཱིསུ ཋཱནེསུ ཡོཛཡི.

‘‘‘མཱ པཎྜིཙྩཡཾ ཝིབྷཱཝཡ, བཱལམཏོ བྷཝ སབྦཔཱཎིནཾ;

སབྦོ ཏཾ ཛནོ ཨོཙིནཱཡཏུ, ཨེཝཾ ཏཝ ཨཏྠོ བྷཝིསྶཏི’.

‘‘ཨེཝཾ ཝུཏྟཱཡཧཾ ཏསྶཱ, ཨིདཾ ཝཙནམབྲཝིཾ;

‘ཀརོམི ཏེ ཏཾ ཝཙནཾ, ཡཾ ཏྭཾ བྷཎསི དེཝཏེ;

ཨཏྠཀཱམཱསི མེ ཨམྨ, ཧིཏཀཱམཱསི དེཝཏེ’.

‘‘ཏསྶཱཧཾ ཝཙནཾ སུཏྭཱ, སཱགརེཝ ཐལཾ ལབྷིཾ;

ཧཊྛོ ¶ སཾཝིགྒམཱནསོ, ཏཡོ ཨངྒེ ཨདྷིཊྛཧིཾ.

‘‘མཱུགོ ¶ ཨཧོསིཾ བདྷིརོ, པཀྑོ གཏིཝིཝཛྫིཏོ;

ཨེཏེ ཨངྒེ ཨདྷིཊྛཱཡ, ཝསྶཱནི སོལ༹སཾ ཝསིཾ.

‘‘ཏཏོ མེ ཧཏྠཔཱདེ ཙ, ཛིཝ྄ཧཾ སོཏཉྩ མདྡིཡ;

ཨནཱུནཏཾ མེ པསྶིཏྭཱ, ‘ཀཱལ༹ཀཎྞཱི’ཏི ནིནྡིསུཾ.

‘‘ཏཏོ ཛཱནཔདཱ སབྦེ, སེནཱཔཏིཔུརོཧིཏཱ;

སབྦེ ཨེཀམནཱ ཧུཏྭཱ, ཚཌྜནཾ ཨནུམོདིསུཾ.

‘‘སོཧཾ ཏེསཾ མཏིཾ སུཏྭཱ, ཧཊྛོ སཾཝིགྒམཱནསོ;

ཡསྶཏྠཱཡ ཏཔོཙིཎྞོ, སོ མེ ཨཏྠོ སམིཛ྄ཛྷཐ.

‘‘ནྷཱཔེཏྭཱ ཨནུལིམྤིཏྭཱ, ཝེཋེཏྭཱ རཱཛཝེཋནཾ;

ཚཏྟེན ཨབྷིསིཉྩིཏྭཱ, ཀཱརེསུཾ པུརཾ པདཀྑིཎཾ.

‘‘སཏྟཱཧཾ དྷཱརཡིཏྭཱན, ཨུགྒཏེ རཝིམཎྜལེ;

རཐེན མཾ ནཱིཧརིཏྭཱ, སཱརཐཱི ཝནམུཔཱགམི.

‘‘ཨེཀོཀཱསེ ¶ རཐཾ ཀཏྭཱ, སཛྫསྶཾ ཧཏྠམུཙྩིཏོ [ཧཏྠམུཉྩིཏོ (སཱི. སྱཱ.)];

སཱརཐཱི ཁཎཏཱི ཀཱསུཾ, ནིཁཱཏུཾ པཐཝིཡཱ མམཾ.

‘‘ཨདྷིཊྛིཏམདྷིཊྛཱནཾ, ཏཛྫེནྟོ ཝིཝིདྷཀཱརཎཱ;

ན བྷིནྡིཾ ཏམདྷིཊྛཱནཾ, བོདྷིཡཱཡེཝ ཀཱརཎཱ.

‘‘མཱཏཱཔིཏཱ ན མེ དེསྶཱ, ཨཏྟཱ མེ ན ཙ དེསྶིཡོ;

སབྦཉྙུཏཾ པིཡཾ མཡ྄ཧཾ, ཏསྨཱ ཝཏམདྷིཊྛཧིཾ.

‘‘ཨེཏེ ¶ ¶ ཨངྒེ ཨདྷིཊྛཱཡ, ཝསྶཱནི སོལ༹སཾ ཝསིཾ;

ཨདྷིཊྛཱནེན མེ སམོ ནཏྠི, ཨེསཱ མེ ཨདྷིཊྛཱནཔཱརམཱི’’ཏི.

‘‘ཡདཱ ཨཧཾ ཀཔི ཨཱསིཾ, ནདཱིཀཱུལེ དརཱིསཡེ;

པཱིལི༹ཏོ སུསུམཱརེན, གམནཾ ན ལབྷཱམཧཾ.

‘‘ཡམྷོཀཱསེ ¶ ཨཧཾ ཋཏྭཱ, ཨོརཱ པཱརཾ པཏཱམཧཾ;

ཏཏྠཙྪི སཏྟུ ཝདྷཀོ, ཀུམྦྷཱིལོ ལུདྡདསྶནོ.

‘‘སོ མཾ ཨསཾསི ‘ཨེཧཱི’ཏི, ‘ཨཧཾཔེམཱི’ཏི ཏཾ ཝཏིཾ;

ཏསྶ མཏྠཀམཀྐམྨ, པརཀཱུལེ པཏིཊྛཧིཾ.

‘‘ན ཏསྶ ཨལིཀཾ བྷཎིཏཾ, ཡཐཱ ཝཱཙཾ ཨཀཱསཧཾ;

སཙྩེན མེ སམོ ནཏྠི, ཨེསཱ མེ སཙྩཔཱརམཱི’’ཏི.

‘‘པུནཱཔརཾ ཡདཱ ཧོམི, ཏཱཔསོ སཙྩསཝ྄ཧཡོ;

སཙྩེན ལོཀཾ པཱལེསིཾ, སམགྒཾ ཛནམཀཱསཧ’’ནྟི.

‘‘པུནཱཔརཾ ¶ ¶ ¶ ཡདཱ ཧོམི, མགདྷེ ཝཊྚཔོཏཀོ;

ཨཛཱཏཔཀྑོ ཏརུཎོ, མཾསཔེསི ཀུལཱཝཀེ.

‘‘མུཁཏུཎྜཀེནཱཧརིཏྭཱ [མུཁཏུཎྜེནཱཧརིཏྭཱ (སཱི.)], མཱཏཱ པོསཡཏཱི མམཾ;

ཏསྶཱ ཕསྶེན ཛཱིཝཱམི, ནཏྠི མེ ཀཱཡིཀཾ བལཾ.

‘‘སཾཝཙྪརེ གིམྷསམཡེ, དཝཌཱཧོ [ཝནདཱཧོ (ཀ.)] པདིཔྤཏི;

ཨུཔགཙྪཏི ཨམྷཱཀཾ, པཱཝཀོ ཀཎྷཝཏྟནཱི.

‘‘དྷམདྷམཱ ཨིཏིཨེཝཾ, སདྡཱཡནྟོ མཧཱསིཁཱི;

ཨནུཔུབྦེན ཛྷཱཔེནྟོ, ཨགྒི མམམུཔཱགམི.

‘‘ཨགྒིཝེགབྷཡཱཏཱིཏཱ, ཏསིཏཱ མཱཏཱཔིཏཱ མམ;

ཀུལཱཝཀེ མཾ ཚཌྜེཏྭཱ, ཨཏྟཱནཾ པརིམོཙཡུཾ.

‘‘པཱདེ ¶ པཀྑེ པཛཧཱམི, ནཏྠི མེ ཀཱཡིཀཾ བལཾ;

སོཧཾ ཨགཏིཀོ ཏཏྠ, ཨེཝཾ ཙིནྟེསཧཾ ཏདཱ.

‘‘‘ཡེསཱཧཾ ཨུཔདྷཱཝེཡྻཾ, བྷཱིཏོ ཏསིཏཝེདྷིཏོ;

ཏེ མཾ ཨོཧཱཡ པཀྐནྟཱ, ཀཐཾ མེ ཨཛྫ ཀཱཏཝེ.

‘‘‘ཨཏྠི ལོཀེ སཱིལགུཎོ, སཙྩཾ སོཙེཡྻནུདྡཡཱ;

ཏེན སཙྩེན ཀཱཧཱམི, སཙྩཀིརིཡམུཏྟམཾ.

‘‘‘ཨཱཝེཛྫེཏྭཱ དྷམྨབལཾ, སརིཏྭཱ པུབྦཀེ ཛིནེ;

‘‘‘སནྟི ¶ པཀྑཱ ཨཔཏནཱ, སནྟི པཱདཱ ཨཝཉྩནཱ;

མཱཏཱཔིཏཱ ཙ ནིཀྑནྟཱ, ཛཱཏཝེད པཊིཀྐམ’.

‘‘སཧསཙྩེ ཀཏེ མཡ྄ཧཾ, མཧཱཔཛྫལིཏོ སིཁཱི;

ཝཛྫེསི སོལ༹སཀརཱིསཱནི, ཨུདཀཾ པཏྭཱ ཡཐཱ སིཁཱི;

སཙྩེན མེ སམོ ནཏྠི, ཨེསཱ མེ སཙྩཔཱརམཱི’’ཏི.

‘‘པུནཱཔརཾ ¶ ¶ ཡདཱ ཧོམི, མཙྪརཱཛཱ མཧཱསརེ;

ཨུཎྷེ སཱུརིཡསནྟཱཔེ, སརེ ཨུདཀ ཁཱིཡཐ.

‘‘ཏཏོ ཀཱཀཱ ཙ གིཛ྄ཛྷཱ ཙ, ཀངྐཱ [བཀཱ (སཱི.)] ཀུལལསེནཀཱ;

བྷཀྑཡནྟི དིཝཱརཏྟིཾ, མཙྪེ ཨུཔནིསཱིདིཡ.

‘‘ཨེཝཾ ཙིནྟེསཧཾ ཏཏྠ, སཧ ཉཱཏཱིཧི པཱིལི༹ཏོ;

‘ཀེན ནུ ཁོ ཨུཔཱཡེན, ཉཱཏཱི དུཀྑཱ པམོཙཡེ’.

‘‘ཝིཙིནྟཡིཏྭཱ དྷམྨཏྠཾ, སཙྩཾ ཨདྡས པསྶཡཾ;

སཙྩེ ཋཏྭཱ པམོཙེསིཾ, ཉཱཏཱིནཾ ཏཾ ཨཏིཀྑཡཾ.

‘‘ཨནུསྶརིཏྭཱ སཏཾ དྷམྨཾ, པརམཏྠཾ ཝིཙིནྟཡཾ;

ཨཀཱསི སཙྩཀིརིཡཾ, ཡཾ ལོཀེ དྷུཝསསྶཏཾ.

‘‘‘ཡཏོ ¶ སརཱམི ཨཏྟཱནཾ, ཡཏོ པཏྟོསྨི ཝིཉྙུཏཾ;

ནཱབྷིཛཱནཱམི སཉྩིཙྩ, ཨེཀཔཱཎམྤི ཧིཾསིཏཾ.

‘‘‘ཨེཏེན ¶ སཙྩཝཛྫེན, པཛྫུནྣོ ཨབྷིཝསྶཏུ;

ཨབྷིཏྠནཡ པཛྫུནྣ, ནིདྷིཾ ཀཱཀསྶ ནཱསཡ;

ཀཱཀཾ སོཀཱཡ རནྡྷེཧི, མཙྪེ སོཀཱ པམོཙཡ’.

‘‘སཧཀཏེ སཙྩཝརེ, པཛྫུནྣོ ཨབྷིགཛྫིཡ;

ཐལཾ ནིནྣཉྩ པཱུརེནྟོ, ཁཎེན ཨབྷིཝསྶཐ.

‘‘ཨེཝརཱུཔཾ སཙྩཝརཾ, ཀཏྭཱ ཝཱིརིཡམུཏྟམཾ;

ཝསྶཱཔེསིཾ མཧཱམེགྷཾ, སཙྩཏེཛབལསྶིཏོ;

སཙྩེན མེ སམོ ནཏྠི, ཨེསཱ མེ སཙྩཔཱརམཱི’’ཏི.

‘‘པུནཱཔརཾ ¶ ཡདཱ ཧོམི, ཀཎྷདཱིཔཱཡནོ ཨིསི;

པརོཔཉྙཱསཝསྶཱནི, ཨནབྷིརཏོཙརིཾ ཨཧཾ.

‘‘ན ཀོཙི ཨེཏཾ ཛཱནཱཏི, ཨནབྷིརཏིམནཾ མམ;

ཨཧཉྷི ཀསྶཙི ནཱཙིཀྑིཾ, ཨརཏི མེ ཙརཏི མཱནསེ.

‘‘སབྲཧྨཙཱརཱི ¶ མཎྜབྱོ, སཧཱཡོ མེ མཧཱཨིསི;

པུབྦཀམྨསམཱཡུཏྟོ, སཱུལམཱརོཔནཾ ལབྷི.

‘‘ཏམཧཾ ཨུཔཊྛཧིཏྭཱན, ཨཱརོགྱམནུཔཱཔཡིཾ;

ཨཱཔུཙྪིཏྭཱན ཨཱགཉྪིཾ, ཡཾ མཡ྄ཧཾ སཀམསྶམཾ.

‘‘སཧཱཡོ ¶ བྲཱཧྨཎོ མཡ྄ཧཾ, བྷརིཡཾ ཨཱདཱཡ པུཏྟཀཾ;

ཏཡོ ཛནཱ སམཱགནྟྭཱ, ཨཱགཉྪུཾ པཱཧུནཱགཏཾ.

‘‘སམྨོདམཱནོ ཏེཧི སཧ, ནིསིནྣོ སཀམསྶམེ;

དཱརཀོ ཝཊྚམནུཀྑིཔཾ, ཨཱསཱིཝིསམཀོཔཡི.

‘‘ཏཏོ སོ ཝཊྚགཏཾ མགྒཾ, ཨནྭེསནྟོ ཀུམཱརཀོ;

ཨཱསཱིཝིསསྶ ཧཏྠེན, ཨུཏྟམངྒཾ པརཱམསི.

‘‘ཏསྶ ¶ ཨཱམསནེ ཀུདྡྷོ, སཔྤོ ཝིསབལསྶིཏོ;

ཀུཔིཏོ པརམཀོཔེན, ཨཌཾསི དཱརཀཾ ཁཎེ.

‘‘སཧདཊྛོ ཨཱསཱིཝིསེན [ཨཏིཝིསེན (པཱི. ཀ.)], དཱརཀོ པཔཏི [པཏཏི (ཀ.)] བྷཱུམིཡཾ;

ཏེནཱཧཾ དུཀྑིཏོ ཨཱསིཾ, མམ ཝཱཧསི ཏཾ དུཀྑཾ.

‘‘ཏྱཱཧཾ ཨསྶཱསཡིཏྭཱན, དུཀྑིཏེ སོཀསལླིཏེ;

པཋམཾ ཨཀཱསིཾ ཀིརིཡཾ, ཨགྒཾ སཙྩཾ ཝརུཏྟམཾ.

‘‘‘སཏྟཱཧམེཝཱཧཾ པསནྣཙིཏྟོ, པུཉྙཏྠིཀོ ཨཙརིཾ བྲཧྨཙརིཡཾ;

ཨཐཱཔརཾ ཡཾ ཙརིཏཾ མམེདཾ, ཝསྶཱནི པཉྙཱསསམཱདྷིཀཱནི.

‘‘‘ཨཀཱམཀོ ཝཱཧི ཨཧཾ ཙརཱམི, ཨེཏེན སཙྩེན སུཝཏྠི ཧོཏུ;

‘‘སཧ ¶ ¶ སཙྩེ ཀཏེ མཡ྄ཧཾ, ཝིསཝེགེན ཝེདྷིཏོ;

ཨབུཛ྄ཛྷིཏྭཱན ཝུཊྛཱསི, ཨརོགོ ཙཱསི མཱཎཝོ;

སཙྩེན མེ སམོ ནཏྠི, ཨེསཱ མེ སཙྩཔཱརམཱི’’ཏི.

‘‘པུནཱཔརཾ ཡདཱ ཧོམི, སུཏསོམོ མཧཱིཔཏི;

གཧིཏོ པོརིསཱདེན, བྲཱཧྨཎེ སངྒརཾ སརིཾ.

‘‘ཁཏྟིཡཱནཾ ཨེཀསཏཾ, ཨཱཝུཎིཏྭཱ ཀརཏྟལེ;

ཨེཏེསཾ པམིལཱཔེཏྭཱ, ཡཉྙཏྠེ ཨུཔནཡཱི མམཾ.

‘‘ཨཔུཙྪི ¶ མཾ པོརིསཱདོ, ‘ཀིཾ ཏྭཾ ཨིཙྪསི ནིསྶཛཾ;

ཡཐཱམཏི ཏེ ཀཱཧཱམི, ཡདི མེ ཏྭཾ པུནེཧིསི’.

‘‘ཏསྶ ¶ པཊིསྶུཎིཏྭཱན, པཎྷེ ཨཱགམནཾ མམ;

ཨུཔགནྟྭཱ པུརཾ རམྨཾ, རཛྫཾ ནིཡྻཱདཡིཾ ཏདཱ.

‘‘ཨནུསྶརིཏྭཱ སཏཾ དྷམྨཾ, པུབྦཀཾ ཛིནསེཝིཏཾ;

བྲཱཧྨཎསྶ དྷནཾ དཏྭཱ, པོརིསཱདཾ ཨུཔཱགམིཾ.

‘‘ནཏྠི མེ སཾསཡོ ཏཏྠ, གྷཱཏཡིསྶཏི ཝཱ ན ཝཱ;

སཙྩཝཱཙཱནུརཀྑནྟོ, ཛཱིཝིཏཾ ཙཛིཏུམུཔཱགམིཾ;

སཙྩེན མེ སམོ ནཏྠི, ཨེསཱ མེ སཙྩཔཱརམཱི’’ཏི.

‘‘སཱམོ ¶ ¶ ཡདཱ ཝནེ ཨཱསིཾ, སཀྐེན ཨབྷིནིམྨིཏོ;

པཝནེ སཱིཧབྱགྒྷེ ཙ, མེཏྟཱཡམུཔནཱམཡིཾ.

‘‘སཱིཧབྱགྒྷེཧི དཱིཔཱིཧི, ཨཙྪེཧི མཧིསེཧི ཙ;

པསདམིགཝརཱཧེཧི, པརིཝཱརེཏྭཱ ཝནེ ཝསིཾ.

‘‘ན མཾ ཀོཙི ཨུཏྟསཏི, ནཔི བྷཱཡཱམི ཀསྶཙི;

མེཏྟཱབལེནུཔཏྠདྡྷོ, རམཱམི པཝནེ ཏདཱ’’ཏི.

‘‘པུནཱཔརཾ ཡདཱ ཧོམི, ཨེཀརཱཛཱཏི ཝིསྶུཏོ;

པརམཾ སཱིལཾ ཨདྷིཊྛཱཡ, པསཱསཱམི མཧཱམཧིཾ.

‘‘དས ཀུསལཀམྨཔཐེ, ཝཏྟཱམི ཨནཝསེསཏོ;

ཙཏཱུཧི སངྒཧཝཏྠཱུཧི, སངྒཎྷཱམི [སངྒཧཱམི (ཀ.)] མཧཱཛནཾ.

‘‘ཨེཝཾ མེ ཨཔྤམཏྟསྶ, ཨིདྷ ལོཀེ པརཏྠ ཙ;

དབྦསེནོ ¶ ཨུཔགནྟྭཱ, ཨཙྪིནྡནྟོ པུརཾ མམ.

‘‘རཱཛཱུཔཛཱིཝེ ¶ ནིགམེ, སབལཊྛེ སརཊྛཀེ;

སབྦཾ ཧཏྠགཏཾ ཀཏྭཱ, ཀཱསུཡཱ ནིཁཎཱི མམཾ.

‘‘ཨམཙྩམཎྜལཾ རཛྫཾ, ཕཱིཏཾ ཨནྟེཔུརཾ མམ;

ཨཙྪིནྡིཏྭཱན གཧིཏཾ, པིཡཾ པུཏྟཾཝ པསྶཧཾ;

མེཏྟཱཡ མེ སམོ ནཏྠི, ཨེསཱ མེ མེཏྟཱཔཱརམཱི’’ཏི.

‘‘སུསཱནེ ¶ ¶ སེཡྻཾ ཀཔྤེམི, ཚཝཊྛིཀཾ ཨུཔནིདྷཱཡཧཾ;

གཱམཎྜལཱ [གོམཎྜལཱ (སཱི.), གཱམམཎྜལཱ (སྱཱ.)] ཨུཔཱགནྟྭཱ, རཱུཔཾ དསྶེནྟིནཔྤཀཾ.

‘‘ཨཔརེ གནྡྷམཱལཉྩ, བྷོཛནཾ ཝིཝིདྷཾ བཧུཾ;

ཨུཔཱཡནཱནཱུཔནེནྟི, ཧཊྛཱ སཾཝིགྒམཱནསཱ.

‘‘ཡེ མེ དུཀྑཾ ཨུཔཧརནྟི, ཡེ ཙ དེནྟི སུཁཾ མམ;

སབྦེསཾ སམཀོ ཧོམི, དཡཱ ཀོཔོ ན ཝིཛྫཏི.

‘‘སུཁདུཀྑེ ཏུལཱབྷཱུཏོ, ཡསེསུ ཨཡསེསུ ཙ;

སབྦཏྠ སམཀོ ཧོམི, ཨེསཱ མེ ཨུཔེཀྑཱཔཱརམཱི’’ཏི.

ཡུདྷཉྫཡོ སོམནསྶོ, ཨཡོགྷརབྷིསེན ཙ;

སོཎནནྡོ མཱུགཔཀྑོ, ཀཔིརཱཛཱ སཙྩསཝ྄ཧཡོ.

ཝཊྚཀོ མཙྪརཱཛཱ ཙ, ཀཎྷདཱིཔཱཡནོ ཨིསི;

སུཏསོམོ པུན ཨཱསིཾ [ཨཱསི (སྱཱ.)], སཱམོ ཙ ཨེཀརཱཛཧུ;

ཨུཔེཀྑཱཔཱརམཱི ཨཱསི, ཨིཏི ཝུཏྠཾ [ཝུཏྟཾ (སབྦཏྠ) ཨཊྛཀཐཱ ཨོལོཀེཏབྦཱ] མཧེསིནཱ.

ཨེཝཾ ¶ བཧུབྦིདྷཾ དུཀྑཾ, སམྤཏྟཱི ཙ བཧུབྦིདྷཱ [སམྤཏྟི ཙ བཧུཝིདྷཱ (སཱི.), སམྤཏྟིཾ ཙ བཧུཝིདྷཾ (ཀ.)];

བྷཝཱབྷཝེ ཨནུབྷཝིཏྭཱ, པཏྟོ སམྦོདྷིམུཏྟམཾ.

དཏྭཱ དཱཏབྦཀཾ དཱནཾ, སཱིལཾ པཱུརེཏྭཱ ཨསེསཏོ;

ནེཀྑམྨེ པཱརམིཾ གནྟྭཱ, པཏྟོ སམྦོདྷིམུཏྟམཾ.

པཎྜིཏེ ¶ པརིཔུཙྪིཏྭཱ, ཝཱིརིཡཾ ཀཏྭཱན མུཏྟམཾ;

ཁནྟིཡཱ པཱརམིཾ གནྟྭཱ, པཏྟོ སམྦོདྷིམུཏྟམཾ.

ཀཏྭཱ དལ༹ྷམདྷིཊྛཱནཾ, སཙྩཝཱཙཱནུརཀྑིཡ;

མེཏྟཱཡ ¶ པཱརམིཾ གནྟྭཱ, པཏྟོ སམྦོདྷིམུཏྟམཾ.

ལཱབྷཱལཱབྷེ ¶ ཡསཱཡསེ, སམྨཱནནཱཝམཱནནེ;

སབྦཏྠ སམཀོ ཧུཏྭཱ, པཏྟོ སམྦོདྷིམུཏྟམཾ.

ཀོསཛྫཾ བྷཡཏོ དིསྭཱ, ཝཱིརིཡཱརམྦྷཉྩ ཁེམཏོ;

ཨཱརདྡྷཝཱིརིཡཱ ཧོཐ, ཨེསཱ བུདྡྷཱནུསཱསནཱི.

ཝིཝཱདཾ བྷཡཏོ དིསྭཱ, ཨཝིཝཱདཉྩ ཁེམཏོ;

སམགྒཱ སཁིལཱ ཧོཐ, ཨེསཱ བུདྡྷཱནུསཱསནཱི.

པམཱདཾ བྷཡཏོ དིསྭཱ, ཨཔྤམཱདཉྩ ཁེམཏོ;

བྷཱཝེཐཊྛངྒིཀཾ མགྒཾ, ཨེསཱ བུདྡྷཱནུསཱསནཱི.

ཨིཏྠཾ སུདཾ བྷགཝཱ ཨཏྟནོ པུབྦཙརིཡཾ སམྦྷཱཝཡམཱནོ བུདྡྷཱཔདཱནིཡཾ ནཱམ དྷམྨཔརིཡཱཡཾ ཨབྷཱསིཏྠཱཏི.