📜

ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ

ཁུདྡཀནིཀཱཡེ

ཛཱཏཀ-ཨཊྛཀཐཱ

(པཋམོ བྷཱགོ)

གནྠཱརམྦྷཀཐཱ

ཛཱཏིཀོཊིསཧསྶེཧི ¶ ¶ ¶ , པམཱཎརཧིཏཾ ཧིཏཾ;

ལོཀསྶ ལོཀནཱཐེན, ཀཏཾ ཡེན མཧེསིནཱ.

ཏསྶ པཱདེ ནམསྶིཏྭཱ, ཀཏྭཱ དྷམྨསྶ ཙཉྫལིཾ;

སངྒྷཉྩ པཏིམཱནེཏྭཱ, སབྦསམྨཱནབྷཱཛནཾ.

ནམསྶནཱདིནོ ¶ ཨསྶ, པུཉྙསྶ རཏནཏྟཡེ;

པཝཏྟསྶཱནུབྷཱཝེན, ཚེཏྭཱ སབྦེ ཨུཔདྡཝེ.

ཏཾ ཏཾ ཀཱརཎམཱགམྨ, དེསིཏཱནི ཛུཏཱིམཏཱ;

ཨཔཎྞཀཱདཱིནི པུརཱ, ཛཱཏཀཱནི མཧེསིནཱ.

ཡཱནི ཡེསུ ཙིརཾ སཏྠཱ, ལོཀནིཏྠརཎཏྠིཀོ;

ཨནནྟེ བོདྷིསམྦྷཱརེ, པརིཔཱཙེསི ནཱཡཀོ.

ཏཱནི སབྦཱནི ཨེཀཛ྄ཛྷཾ, ཨཱརོཔེནྟེཧི སངྒཧཾ;

ཛཱཏཀཾ ནཱམ སངྒཱིཏཾ, དྷམྨསངྒཱཧཀེཧི ཡཾ.

བུདྡྷཝཾསསྶ ཨེཏསྶ, ཨིཙྪནྟེན ཙིརཊྛིཏིཾ;

ཡཱཙིཏོ ཨབྷིགནྟྭཱན, ཐེརེན ཨཏྠདསྶིནཱ.

ཨསཾསཊྛཝིཧཱརེ ¶ , སདཱ སུདྡྷཝིཧཱརིནཱ;

ཏཐེཝ བུདྡྷམིཏྟེན, སནྟཙིཏྟེན ཝིཉྙུནཱ.

མཧིཾསཱསཀཝཾསམྷི, སམྦྷཱུཏེན ནཡཉྙུནཱ;

བུདྡྷདེཝེན ཙ ཏཐཱ, བྷིཀྑུནཱ སུདྡྷབུདྡྷིནཱ.

མཧཱཔུརིསཙརིཡཱནཾ, ཨཱནུབྷཱཝཾ ཨཙིནྟིཡཾ;

ཏསྶ ཝིཛྫོཏཡནྟསྶ, ཛཱཏཀསྶཏྠཝཎྞནཾ.

མཧཱཝིཧཱརཝཱསཱིནཾ, ཝཱཙནཱམགྒནིསྶིཏཾ;

བྷཱསིསྶཾ བྷཱསཏོ ཏཾ མེ, སཱདྷུ གཎྷནྟུ སཱདྷཝོཏི.

ནིདཱནཀཐཱ

སཱ ¶ ¶ པནཱཡཾ ཛཱཏཀསྶ ཨཏྠཝཎྞནཱ དཱུརེནིདཱནཾ, ཨཝིདཱུརེནིདཱནཾ, སནྟིཀེནིདཱནནྟི ཨིམཱནི ཏཱིཎི ནིདཱནཱནི དསྶེཏྭཱ ཝཎྞིཡམཱནཱ ཡེ ནཾ སུཎནྟི, ཏེཧི སམུདཱགམཏོ པཊྛཱཡ ཝིཉྙཱཏཏྟཱ ཡསྨཱ སུཊྛུ ཝིཉྙཱཏཱ ནཱམ ཧོཏི, ཏསྨཱ ཏཾ ཏཱནི ནིདཱནཱནི དསྶེཏྭཱ ཝཎྞཡིསྶཱམ.

ཏཏྠ ཨཱདིཏོ ཏཱཝ ཏེསཾ ནིདཱནཱནཾ པརིཙྪེདོ ཝེདིཏབྦོ. དཱིཔངྐརཔཱདམཱུལསྨིཉྷི ཀཏཱབྷིནཱིཧཱརསྶ མཧཱསཏྟསྶ ཡཱཝ ཝེསྶནྟརཏྟབྷཱཝཱ ཙཝིཏྭཱ ཏུསིཏཔུརེ ནིབྦཏྟི, ཏཱཝ པཝཏྟོ ཀཐཱམགྒོ དཱུརེནིདཱནཾ ནཱམ. ཏུསིཏབྷཝནཏོ པན ཙཝིཏྭཱ ཡཱཝ བོདྷིམཎྜེ སབྦཉྙུཏཔྤཏྟི, ཏཱཝ པཝཏྟོ ཀཐཱམགྒོ ཨཝིདཱུརེནིདཱནཾ ནཱམ. སནྟིཀེནིདཱནཾ པན ཏེསུ ཏེསུ ཋཱནེསུ ཝིཧརཏོ ཏསྨིཾ ཏསྨིཾཡེཝ ཋཱནེ ལབྦྷཏཱིཏི.

༡. དཱུརེནིདཱནཀཐཱ

ཏཏྲིདཾ དཱུརེནིདཱནཾ ནཱམ – ཨིཏོ ཀིར ཀཔྤསཏསཧསྶཱདྷིཀཱནཾ ཙཏུནྣཾ ཨསངྑྱེཡྻཱནཾ མཏྠཀེ ཨམརཝཏཱི ནཱམ ནགརཾ ཨཧོསི. ཏཏྠ སུམེདྷོ ནཱམ བྲཱཧྨཎོ པཊིཝསཏི ཨུབྷཏོ སུཛཱཏོ མཱཏིཏོ ¶ ཙ པིཏིཏོ ཙ སཾསུདྡྷགཧཎིཀོ ཡཱཝ སཏྟམཱ ཀུལཔརིཝཊྚཱ ཨཀྑིཏྟོ ཨནུཔཀུཊྛོ ཛཱཏིཝཱདེན ཨབྷིརཱུཔོ དསྶནཱིཡོ པཱསཱདིཀོ པརམཱཡ ཝཎྞཔོཀྑརཏཱཡ སམནྣཱགཏོ. སོ ཨཉྙཾ ཀམྨཾ ཨཀཏྭཱ བྲཱཧྨཎསིཔྤམེཝ ཨུགྒཎྷི. ཏསྶ དཧརཀཱལེཡེཝ མཱཏཱཔིཏརོ ཀཱལམཀཾསུ. ཨཐསྶ རཱསིཝཌྜྷཀོ ཨམཙྩོ ཨཱཡཔོཏྠཀཾ ཨཱཧརིཏྭཱ སུཝཎྞརཛཏམཎིམུཏྟཱདིབྷརིཏེ གབྦྷེ ཝིཝརིཏྭཱ ‘‘ཨེཏྟཀཾ ཏེ, ཀུམཱར, མཱཏུ སནྟཀཾ, ཨེཏྟཀཾ པིཏུ སནྟཀཾ, ཨེཏྟཀཾ ཨཡྻཀཔཡྻཀཱན’’ནྟི ཡཱཝ སཏྟམཱ ཀུལཔརིཝཊྚཱ དྷནཾ ཨཱཙིཀྑིཏྭཱ ‘‘ཨེཏཾ པཊིཔཛྫཱཧཱི’’ཏི ཨཱཧ. སུམེདྷཔཎྜིཏོ ཙིནྟེསི – ‘‘ཨིམཾ དྷནཾ སཾཧརིཏྭཱ མཡ྄ཧཾ པིཏུཔིཏཱམཧཱདཡོ པརལོཀཾ གཙྪནྟཱ ཨེཀཾ ཀཧཱཔཎམྤི གཧེཏྭཱ ན གཏཱ, མཡཱ པན གཧེཏྭཱ གམནཀཱརཎཾ ཀཱཏུཾ ཝཊྚཏཱི’’ཏི. སོ རཉྙོ ཨཱརོཙེཏྭཱ ནགརེ བྷེརིཾ ཙརཱཔེཏྭཱ མཧཱཛནསྶ དཱནཾ དཏྭཱ ཏཱཔསཔབྦཛྫཾ པབྦཛི. ཨིམསྶ པནཏྠསྶ ཨཱཝིབྷཱཝཏྠཾ ཨིམསྨིཾ ཋཱནེ སུམེདྷཀཐཱ ཀཐེཏབྦཱ ¶ . སཱ པནེསཱ ཀིཉྩཱཔི བུདྡྷཝཾསེ ནིརནྟརཾ ཨཱགཏཱཡེཝ, གཱཐཱསམྦནྡྷེན པན ཨཱགཏཏྟཱ ན སུཊྛུ པཱཀཊཱ. ཏསྨཱ ཏཾ ཨནྟརནྟརཱ གཱཐཱཡ སམྦནྡྷདཱིཔཀེཧི ཝཙནེཧི སདྡྷིཾ ཀཐེསྶཱམ.

སུམེདྷཀཐཱ

ཀཔྤསཏསཧསྶཱདྷིཀཱནཉྷི ཙཏུནྣཾ ཨསངྑྱེཡྻཱནཾ མཏྠཀེ དསཧི སདྡེཧི ཨཝིཝིཏྟཾ ‘‘ཨམརཝཏཱི’’ཏི ཙ ‘‘ཨམར’’ནྟི ཙ ལདྡྷནཱམཾ ནགརཾ ཨཧོསི, ཡཾ སནྡྷཱཡ བུདྡྷཝཾསེ ཝུཏྟཾ –

‘‘ཀཔྤེ ¶ ཙ སཏསཧསྶེ, ཙཏུརོ ཙ ཨསངྑིཡེ;

ཨམརཾ ནཱམ ནགརཾ, དསྶནེཡྻཾ མནོརམཾ;

དསཧི སདྡེཧི ཨཝིཝིཏྟཾ, ཨནྣཔཱནསམཱཡུཏ’’ནྟི.

ཏཏྠ དསཧི སདྡེཧི ཨཝིཝིཏྟནྟི ཧཏྠིསདྡེན, ཨསྶསདྡེན, རཐསདྡེན, བྷེརིསདྡེན, མུདིངྒསདྡེན, ཝཱིཎཱསདྡེན, སམྨསདྡེན, ཏཱལ༹སདྡེན, སངྑསདྡེན ‘‘ཨསྣཱཐ, པིཝཐ, ཁཱདཐཱ’’ཏི དསམེན སདྡེནཱཏི ཨིམེཧི དསཧི སདྡེཧི ཨཝིཝིཏྟཾ ཨཧོསི. ཏེསཾ པན སདྡཱནཾ ཨེཀདེསམེཝ གཧེཏྭཱ –

‘‘ཧཏྠིསདྡཾ ¶ ཨསྶསདྡཾ, བྷེརིསངྑརཐཱནི ཙ;

ཁཱདཐ པིཝཐ ཙེཝ, ཨནྣཔཱནེན གྷོསིཏ’’ནྟི. –

བུདྡྷཝཾསེ ཨིམཾ གཱཐཾ ཝཏྭཱ –

‘‘ནགརཾ སབྦངྒསམྤནྣཾ, སབྦཀམྨམུཔཱགཏཾ;

སཏྟརཏནསམྤནྣཾ, ནཱནཱཛནསམཱཀུལཾ;

སམིདྡྷཾ དེཝནགརཾཝ, ཨཱཝཱསཾ པུཉྙཀམྨིནཾ.

‘‘ནགརེ ཨམརཝཏིཡཱ, སུམེདྷོ ནཱམ བྲཱཧྨཎོ;

ཨནེཀཀོཊིསནྣིཙཡོ, པཧཱུཏདྷནདྷཉྙཝཱ.

‘‘ཨཛ྄ཛྷཱཡཀོ ¶ མནྟདྷརོ, ཏིཎྞཾ ཝེདཱན པཱརགཱུ;

ལཀྑཎེ ཨིཏིཧཱསེ ཙ, སདྷམྨེ པཱརམིཾ གཏོ’’ཏི. – ཝུཏྟཾ;

ཨཐེཀདིཝསཾ སོ སུམེདྷཔཎྜིཏོ ཨུཔརིཔཱསཱདཝརཏལེ རཧོགཏོ ཧུཏྭཱ པལླངྐཾ ཨཱབྷུཛིཏྭཱ ནིསིནྣོ ཙིནྟེསི – ‘‘པུནབྦྷཝེ, པཎྜིཏ, པཊིསནྡྷིགྒཧཎཾ ནཱམ དུཀྑཾ, ཏཐཱ ནིབྦཏྟནིབྦཏྟཊྛཱནེ སརཱིརབྷེདནཾ, ཨཧཉྩ ཛཱཏིདྷམྨོ ཛརཱདྷམྨོ བྱཱདྷིདྷམྨོ མརཎདྷམྨོ, ཨེཝཾབྷཱུཏེན མཡཱ ཨཛཱཏིཾ ཨཛརཾ ཨབྱཱདྷིཾ ཨདུཀྑཾ སུཁཾ སཱིཏལཾ ཨམཏམཧཱནིབྦཱནཾ པརིཡེསིཏུཾ ཝཊྚཏི, ཨཝསྶཾ བྷཝཏོ མུཙྩིཏྭཱ ནིབྦཱནགཱམིནཱ ཨེཀེན མགྒེན བྷཝིཏབྦ’’ནྟི. ཏེན ཝུཏྟཾ –

‘‘རཧོགཏོ ནིསཱིདིཏྭཱ, ཨེཝཾ ཙིནྟེསཧཾ ཏདཱ;

དུཀྑོ པུནབྦྷཝོ ནཱམ, སརཱིརསྶ ཙ བྷེདནཾ.

‘‘ཛཱཏིདྷམྨོ ཛརཱདྷམྨོ, བྱཱདྷིདྷམྨོ སཧཾ ཏདཱ;

ཨཛརཾ ཨམཏཾ ཁེམཾ, པརིཡེསིསྶཱམི ནིབྦུཏིཾ.

‘‘ཡཾནཱུནིམཾ པཱུཏིཀཱཡཾ, ནཱནཱཀུཎཔཔཱུརིཏཾ;

ཚཌྜཡིཏྭཱན གཙྪེཡྻཾ, ཨནཔེཀྑོ ཨནཏྠིཀོ.

‘‘ཨཏྠི ¶ ཧེཧིཏི སོ མགྒོ, ན སོ སཀྐཱ ན ཧེཏུཡེ;

པརིཡེསིསྶཱམི ཏཾ མགྒཾ, བྷཝཏོ པརིམུཏྟིཡཱ’’ཏི.

ཏཏོ ¶ ཨུཏྟརིཔི ཨེཝཾ ཙིནྟེསི – ཡཐཱ ཧི ལོཀེ དུཀྑསྶ པཊིཔཀྑབྷཱུཏཾ སུཁཾ ནཱམ ཨཏྠི, ཨེཝཾ བྷཝེ སཏི ཏཔྤཊིཔཀྑེན ཝིབྷཝེནཱཔི བྷཝིཏབྦཾ. ཡཐཱ ཙ ཨུཎྷེ སཏི ཏསྶ ཝཱུཔསམབྷཱུཏཾ སཱིཏམྤི ཨཏྠི, ཨེཝཾ རཱགཱདཱིནཾ ཨགྒཱིནཾ ཝཱུཔསམེན ནིབྦཱནེནཱཔི བྷཝིཏབྦཾ. ཡཐཱ ཙ པཱཔསྶ ལཱམཀསྶ དྷམྨསྶ པཊིཔཀྑབྷཱུཏོ ཀལྱཱཎོ ཨནཝཛྫདྷམྨོཔི ཨཏྠིཡེཝ, ཨེཝམེཝ པཱཔིཀཱཡ ཛཱཏིཡཱ སཏི སབྦཛཱཏིཀྑེཔནཏོ ཨཛཱཏིསངྑཱཏེན ནིབྦཱནེནཱཔི བྷཝིཏབྦམེཝཱཏི. ཏེན ཝུཏྟཾ –

‘‘ཡཐཱཔི ¶ དུཀྑེ ཝིཛྫནྟེ, སུཁཾ ནཱམཔི ཝིཛྫཏི;

ཨེཝཾ བྷཝེ ཝིཛྫམཱནེ, ཝིབྷཝོཔི ཨིཙྪིཏབྦཀོ.

‘‘ཡཐཱཔི ཨུཎྷེ ཝིཛྫནྟེ, ཨཔརཾ ཝིཛྫཏི སཱིཏལཾ;

ཨེཝཾ ཏིཝིདྷགྒི ཝིཛྫནྟེ, ནིབྦཱནཾ ཨིཙྪིཏབྦཀཾ.

‘‘ཡཐཱཔི པཱཔེ ཝིཛྫནྟེ, ཀལྱཱཎམཔི ཝིཛྫཏི;

ཨེཝམེཝ ཛཱཏི ཝིཛྫནྟེ, ཨཛཱཏིཔིཙྪིཏབྦཀ’’ནྟི.

ཨཔརམྤི ཙིནྟེསི – ཡཐཱ ནཱམ གཱུཐརཱསིམྷི ནིམུགྒེན པུརིསེན དཱུརཏོ པཉྩཝཎྞཔདུམསཉྪནྣཾ མཧཱཏལཱ༹ཀཾ དིསྭཱ ‘‘ཀཏརེན ནུ ཁོ མགྒེན ཨེཏྠ གནྟབྦ’’ནྟི ཏཾ ཏལཱ༹ཀཾ གཝེསིཏུཾ ཡུཏྟཾ. ཡཾ ཏསྶ ཨགཝེསནཾ, ན སོ ཏལཱ༹ཀསྶ དོསོ. ཨེཝམེཝ ཀིལེསམལདྷོཝནེ ཨམཏམཧཱནིབྦཱནཏལཱ༹ཀེ ཝིཛྫནྟེ ཏསྶ ཨགཝེསནཾ ན ཨམཏནིབྦཱནམཧཱཏལཱ༹ཀསྶ དོསོ. ཡཐཱ ཙ ཙོརེཧི སམྤརིཝཱརིཏོ པུརིསོ པལཱཡནམགྒེ ཝིཛྫམཱནེཔི སཙེ ན པལཱཡཏི, ན སོ མགྒསྶ དོསོ, པུརིསསྶེཝ དོསོ. ཨེཝམེཝ ཀིལེསེཧི པརིཝཱརེཏྭཱ གཧིཏསྶ པུརིསསྶ ཝིཛྫམཱནེཡེཝ ནིབྦཱནགཱམིམྷི སིཝེ མགྒེ མགྒསྶ ཨགཝེསནཾ ནཱམ ན མགྒསྶ དོསོ, པུགྒལསྶེཝ དོསོ. ཡཐཱ ཙ བྱཱདྷིཔཱིལི༹ཏོ པུརིསོ ཝིཛྫམཱནེ བྱཱདྷིཏིཀིཙྪཀེ ཝེཛྫེ སཙེ ཏཾ ཝེཛྫཾ གཝེསིཏྭཱ བྱཱདྷིཾ ན ཏིཀིཙྪཱཔེཏི, ན སོ ཝེཛྫསྶ དོསོ, པུརིསསྶེཝ དོསོ. ཨེཝམེཝ ཡོ ཀིལེསབྱཱདྷིཔཱིལི༹ཏོ པུརིསོ ཀིལེསཝཱུཔསམམགྒཀོཝིདཾ ཝིཛྫམཱནམེཝ ཨཱཙརིཡཾ ན གཝེསཏི, ཏསྶེཝ དོསོ, ན ཀིལེསཝིནཱསཀསྶ ཨཱཙརིཡསྶཱཏི. ཏེན ཝུཏྟཾ –

‘‘ཡཐཱ གཱུཐགཏོ པུརིསོ, ཏལཱ༹ཀཾ དིསྭཱན པཱུརིཏཾ;

ན གཝེསཏི ཏཾ ཏལཱ༹ཀཾ, ན དོསོ ཏལཱ༹ཀསྶ སོ.

‘‘ཨེཝཾ ¶ ཀིལེསམལདྷོཝེ, ཝིཛྫནྟེ ཨམཏནྟལེ༹;

ན གཝེསཏི ཏཾ ཏལཱ༹ཀཾ, ན དོསོ ཨམཏནྟལེ༹.

‘‘ཡཐཱ ¶ ཨརཱིཧི པརིརུདྡྷོ, ཝིཛྫནྟེ གམནམྤཐེ;

ན པལཱཡཏི སོ པུརིསོ, ན དོསོ ཨཉྫསསྶ སོ.

‘‘ཨེཝཾ ¶ ཀིལེསཔརིརུདྡྷོ, ཝིཛྫམཱནེ སིཝེ པཐེ;

ན གཝེསཏི ཏཾ མགྒཾ, ན དོསོ སིཝམཉྫསེ.

‘‘ཡཐཱཔི བྱཱདྷིཏོ པུརིསོ, ཝིཛྫམཱནེ ཏིཀིཙྪཀེ;

ན ཏིཀིཙྪཱཔེཏི ཏཾ བྱཱདྷིཾ, ན དོསོ སོ ཏིཀིཙྪཀེ.

‘‘ཨེཝཾ ཀིལེསབྱཱདྷཱིཧི, དུཀྑིཏོ པརིཔཱིལི༹ཏོ;

ན གཝེསཏི ཏཾ ཨཱཙརིཡཾ, ན དོསོ སོ ཝིནཱཡཀེ’’ཏི.

ཨཔརམྤི ཙིནྟེསི – ཡཐཱ མཎྜནཛཱཏིཀོ པུརིསོ ཀཎྛེ ཨཱསཏྟཾ ཀུཎཔཾ ཚཌྜེཏྭཱ སུཁཱི གཙྪཏི, ཨེཝཾ མཡཱཔི ཨིམཾ པཱུཏིཀཱཡཾ ཚཌྜེཏྭཱ ཨནཔེཀྑེན ནིབྦཱནནགརཾ པཝིསིཏབྦཾ. ཡཐཱ ཙ ནརནཱརིཡོ ཨུཀྐཱརབྷཱུམིཡཾ ཨུཙྩཱརཔསྶཱཝཾ ཀཏྭཱ ན ཏཾ ཨུཙྪངྒེན ཝཱ ཨཱདཱཡ དསནྟེན ཝཱ ཝེཋེཏྭཱ གཙྪནྟི, ཛིགུཙྪམཱནཱ པན ཨནཔེཀྑཱཝ ཚཌྜེཏྭཱ གཙྪནྟི, ཨེཝཾ མཡཱཔི ཨིམཾ པཱུཏིཀཱཡཾ ཨནཔེཀྑེན ཚཌྜེཏྭཱ ཨམཏཾ ནིབྦཱནནགརཾ པཝིསིཏུཾ ཝཊྚཏི. ཡཐཱ ཙ ནཱཝིཀཱ ནཱམ ཛཛྫརཾ ནཱཝཾ ཨནཔེཀྑཱ ཚཌྜེཏྭཱ གཙྪནྟི, ཨེཝཾ ཨཧམྤི ཨིམཾ ནཝཧི ཝཎམུཁེཧི པགྒྷརནྟཾ ཀཱཡཾ ཚཌྜེཏྭཱ ཨནཔེཀྑོ ནིབྦཱནཔུརཾ པཝིསིསྶཱམི. ཡཐཱ ཙ པུརིསོ ནཱནཱརཏནཱནི ཨཱདཱཡ ཙོརེཧི སདྡྷིཾ མགྒཾ གཙྪནྟོ ཨཏྟནོ རཏནནཱསབྷཡེན ཏེ ཚཌྜེཏྭཱ ཁེམཾ མགྒཾ གཎྷཱཏི, ཨེཝཾ ཨཡམྤི ཀརཛཀཱཡོ རཏནཝིལོཔཀཙོརསདིསོ. སཙཱཧཾ ཨེཏྠ ཏཎྷཾ ཀརིསྶཱམི, ཨརིཡམགྒཀུསལདྷམྨརཏནཾ མེ ནསྶིསྶཏི. ཏསྨཱ མཡཱ ཨིམཾ ཙོརསདིསཾ ཀཱཡཾ ཚཌྜེཏྭཱ ནིབྦཱནནགརཾ པཝིསིཏུཾ ཝཊྚཏཱིཏི. ཏེན ཝུཏྟཾ –

‘‘ཡཐཱཔི ཀུཎཔཾ པུརིསོ, ཀཎྛེ བདྡྷཾ ཛིགུཙྪིཡ;

མོཙཡིཏྭཱན གཙྪེཡྻ, སུཁཱི སེརཱི སཡཾཝསཱི.

‘‘ཏཐེཝིམཾ ¶ པཱུཏིཀཱཡཾ, ནཱནཱཀུཎཔསཉྩཡཾ;

ཚཌྜཡིཏྭཱན གཙྪེཡྻཾ, ཨནཔེཀྑོ ཨནཏྠིཀོ.

‘‘ཡཐཱ ཨུཙྩཱརཊྛཱནམྷི, ཀརཱིསཾ ནརནཱརིཡོ;

ཚཌྜཡིཏྭཱན གཙྪནྟི, ཨནཔེཀྑཱ ཨནཏྠིཀཱ.

‘‘ཨེཝམེཝཱཧཾ ¶ ཨིམཾ ཀཱཡཾ, ནཱནཱཀུཎཔཔཱུརིཏཾ;

ཚཌྜཡིཏྭཱན གཙྪིསྶཾ, ཝཙྩཾ ཀཏྭཱ ཡཐཱ ཀུཊིཾ.

‘‘ཡཐཱཔི ཛཛྫརཾ ནཱཝཾ, པལུགྒཾ ཨུདགཱཧིནིཾ;

སཱམཱི ཚཌྜེཏྭཱ གཙྪནྟི, ཨནཔེཀྑཱ ཨནཏྠིཀཱ.

‘‘ཨེཝམེཝཱཧཾ ¶ ཨིམཾ ཀཱཡཾ, ནཝཙྪིདྡཾ དྷུཝསྶཝཾ;

ཚཌྜཡིཏྭཱན གཙྪིསྶཾ, ཛིཎྞནཱཝཾཝ སཱམིཀཱ.

‘‘ཡཐཱཔི པུརིསོ ཙོརེཧི, གཙྪནྟོ བྷཎྜམཱདིཡ;

བྷཎྜཙྪེདབྷཡཾ དིསྭཱ, ཚཌྜཡིཏྭཱན གཙྪཏི.

‘‘ཨེཝམེཝ ཨཡཾ ཀཱཡོ, མཧཱཙོརསམོ ཝིཡ;

པཧཱཡིམཾ གམིསྶཱམི, ཀུསལཙྪེདནཱབྷཡཱ’’ཏི.

ཨེཝཾ སུམེདྷཔཎྜིཏོ ནཱནཱཝིདྷཱཧི ཨུཔམཱཧི ཨིམཾ ནེཀྑམྨཱུཔསཾཧིཏཾ ཨཏྠཾ ཙིནྟེཏྭཱ སཀནིཝེསནེ ཨཔརིམིཏཾ བྷོགཀྑནྡྷཾ ཧེཊྛཱ ཝུཏྟནཡེན ཀཔཎདྡྷིཀཱདཱིནཾ ཝིསྶཛྫེཏྭཱ མཧཱདཱནཾ དཏྭཱ ཝཏྠུཀཱམེ ཙ ཀིལེསཀཱམེ ཙ པཧཱཡ ཨམརནགརཏོ ནིཀྑམིཏྭཱ ཨེཀཀོཝ ཧིམཝནྟེ དྷམྨིཀཾ ནཱམ པབྦཏཾ ནིསྶཱཡ ཨསྶམཾ ཀཏྭཱ ཏཏྠ པཎྞསཱལཉྩ ཙངྐམཉྩ མཱཔེཏྭཱ པཉྩཧི ནཱིཝརཎདོསེཧི ཝིཝཛྫིཏཾ ‘‘ཨེཝཾ སམཱཧིཏེ ཙིཏྟེ’’ཏིཨཱདིནཱ ནཡེན ཝུཏྟེཧི ཨཊྛཧི ཀཱརཎགུཎེཧི སམུཔེཏཾ ཨབྷིཉྙཱསངྑཱཏཾ བལཾ ཨཱཧརིཏུཾ ཏསྨིཾ ཨསྶམཔདེ ནཝདོསསམནྣཱགཏཾ སཱཊཀཾ པཛཧིཏྭཱ དྭཱདསགུཎསམནྣཱགཏཾ ཝཱཀཙཱིརཾ ནིཝཱསེཏྭཱ ཨིསིཔབྦཛྫཾ པབྦཛི. ཨེཝཾ པབྦཛིཏོ ཨཊྛདོསསམཱཀིཎྞཾ ཏཾ པཎྞསཱལཾ པཧཱཡ དསགུཎསམནྣཱགཏཾ རུཀྑམཱུལཾ ཨུཔགནྟྭཱ སབྦཾ དྷཉྙཝིཀཏིཾ པཧཱཡ པཝཏྟཕལབྷོཛནོ ཧུཏྭཱ ནིསཛྫཊྛཱནཙངྐམནཝསེནེཝ པདྷཱནཾ པདཧནྟོ སཏྟཱཧབྦྷནྟརེཡེཝ ཨཊྛནྣཾ སམཱཔཏྟཱིནཾ པཉྩནྣཉྩ ཨབྷིཉྙཱནཾ ལཱབྷཱི ཨཧོསི. ཨེཝཾ ཏཾ ཡཐཱཔཏྠིཏཾ ཨབྷིཉྙཱབལཾ པཱཔུཎི. ཏེན ཝུཏྟཾ –

‘‘ཨེཝཱཧཾ ¶ ཙིནྟཡིཏྭཱན, ནེཀཀོཊིསཏཾ དྷནཾ;

ནཱཐཱནཱཐཱནཾ དཏྭཱན, ཧིམཝནྟམུཔཱགམིཾ.

‘‘ཧིམཝནྟསྶཱཝིདཱུརེ ¶ , དྷམྨིཀོ ནཱམ པབྦཏོ;

ཨསྶམོ སུཀཏོ མཡ྄ཧཾ, པཎྞསཱལཱ སུམཱཔིཏཱ.

‘‘ཙངྐམཾ ཏཏྠ མཱཔེསིཾ, པཉྩདོསཝིཝཛྫིཏཾ;

ཨཊྛགུཎསམུཔེཏཾ, ཨབྷིཉྙཱབལམཱཧརིཾ.

‘‘སཱཊཀཾ པཛཧིཾ ཏཏྠ, ནཝདོསམུཔཱགཏཾ;

ཝཱཀཙཱིརཾ ནིཝཱསེསིཾ, དྭཱདསགུཎམུཔཱགཏཾ.

‘‘ཨཊྛདོསསམཱཀིཎྞཾ, པཛཧིཾ པཎྞསཱལཀཾ;

ཨུཔཱགམིཾ རུཀྑམཱུལཾ, གུཎེ དསཧུཔཱགཏཾ.

‘‘ཝཱཔིཏཾ རོཔིཏཾ དྷཉྙཾ, པཛཧིཾ ནིརཝསེསཏོ;

ཨནེཀགུཎསམྤནྣཾ, པཝཏྟཕལམཱདིཡིཾ.

‘‘ཏཏྠཔྤདྷཱནཾ ¶ པདཧིཾ, ནིསཛྫཊྛཱནཙངྐམེ;

ཨབྦྷནྟརམྷི སཏྟཱཧེ, ཨབྷིཉྙཱབལཔཱཔུཎི’’ནྟི.

ཏཏྠ ‘‘ཨསྶམོ སུཀཏོ མཡ྄ཧཾ, པཎྞསཱལཱ སུམཱཔིཏཱ’’ཏི ཨིམཱཡ པཱལི༹ཡཱ སུམེདྷཔཎྜིཏེན ཨསྶམཔཎྞསཱལཱཙངྐམཱ སཧཏྠཱ མཱཔིཏཱ ཝིཡ ཝུཏྟཱ. ཨཡཾ པནེཏྠ ཨཏྠོ – མཧཱསཏྟཾ ‘‘ཧིམཝནྟཾ ཨཛ྄ཛྷོགཱཧེཏྭཱ ཨཛྫ དྷམྨིཀཾ པབྦཏཾ པཝིསིསྶཱམཱི’’ཏི ནིཀྑནྟཾ དིསྭཱ སཀྐོ དེཝཱནམིནྡོ ཝིསྶཀམྨདེཝཔུཏྟཾ ཨཱམནྟེསི – ‘‘ཏཱཏ, ཨཡཾ སུམེདྷཔཎྜིཏོ པབྦཛིསྶཱམཱིཏི ནིཀྑནྟོ, ཨེཏསྶ ཝསནཊྛཱནཾ མཱཔེཧཱི’’ཏི. སོ ཏསྶ ཝཙནཾ སམྤཊིཙྪིཏྭཱ རམཎཱིཡཾ ཨསྶམཾ, སུགུཏྟཾ པཎྞསཱལཾ, མནོརམཾ ཙངྐམཉྩ མཱཔེསི. བྷགཝཱ པན ཏདཱ ཨཏྟནོ པུཉྙཱནུབྷཱཝེན ནིཔྥནྣཾ ཏཾ ཨསྶམཔདཾ སནྡྷཱཡ སཱརིཔུཏྟ, ཏསྨིཾ དྷམྨིཀཔབྦཏེ –

‘‘ཨསྶམོ སུཀཏོ མཡ྄ཧཾ, པཎྞསཱལཱ སུམཱཔིཏཱ;

ཙངྐམཾ ཏཏྠ མཱཔེསིཾ, པཉྩདོསཝིཝཛྫིཏ’’ནྟི. –

ཨཱཧ ¶ . ཏཏྠ སུཀཏོ མཡ྄ཧནྟི སུཀཏོ མཡཱ. པཎྞསཱལཱ སུམཱཔིཏཱཏི པཎྞཙྪདནསཱལཱཔི མེ སུམཱཔིཏཱ ཨཧོསི.

པཉྩདོསཝིཝཛྫིཏནྟི ¶ པཉྩིམེ ཙངྐམདོསཱ ནཱམ – ཐདྡྷཝིསམཏཱ, ཨནྟོརུཀྑཏཱ, གཧནཙྪནྣཏཱ, ཨཏིསམྦཱདྷཏཱ, ཨཏིཝིསཱལཏཱཏི. ཐདྡྷཝིསམབྷཱུམིབྷཱགསྨིཉྷི ཙངྐམེ ཙངྐམནྟསྶ པཱདཱ རུཛྫནྟི, ཕོཊཱ ཨུཊྛཧནྟི, ཙིཏྟཾ ཨེཀགྒཾ ན ལབྷཏི, ཀམྨཊྛཱནཾ ཝིཔཛྫཏི. མུདུསམཏལེ པན ཕཱསུཝིཧཱརཾ ཨཱགམྨ ཀམྨཊྛཱནཾ སམྤཛྫཏི. ཏསྨཱ ཐདྡྷཝིསམབྷཱུམིབྷཱགཏཱ ཨེཀོ དོསོཏི ཝེདིཏབྦོ. ཙངྐམསྶ ཨནྟོ ཝཱ མཛ྄ཛྷེ ཝཱ ཀོཊིཡཾ ཝཱ རུཀྑེ སཏི པམཱདམཱགམྨ ཙངྐམནྟསྶ ནལཱཊཾ ཝཱ སཱིསཾ ཝཱ པཊིཧཉྙཏཱིཏི ཨནྟོརུཀྑཏཱ དུཏིཡོ དོསོ. ཏིཎལཏཱདིགཧནཙྪནྣེ ཙངྐམེ ཙངྐམནྟོ ཨནྡྷཀཱརཝེལཱཡཾ ཨུརགཱདིཀེ པཱཎེ ཨཀྐམིཏྭཱ ཝཱ མཱརེཏི, ཏེཧི ཝཱ དཊྛོ དུཀྑཾ ཨཱཔཛྫཏཱིཏི གཧནཙྪནྣཏཱ ཏཏིཡོ དོསོ. ཨཏིསམྦཱདྷེ ཙངྐམེ ཝིཏྠཱརཏོ རཏནིཀེ ཝཱ ཨཌྜྷརཏནིཀེ ཝཱ ཙངྐམནྟསྶ པརིཙྪེདེ པཀྑལིཏྭཱ ནཁཱཔི ཨངྒུལིཡོཔི བྷིཛྫནྟཱིཏི ཨཏིསམྦཱདྷཏཱ ཙཏུཏྠོ དོསོ. ཨཏིཝིསཱལེ ཙངྐམེ ཙངྐམནྟསྶ ཙིཏྟཾ ཝིདྷཱཝཏི, ཨེཀགྒཏཾ ན ལབྷཏཱིཏི ཨཏིཝིསཱལཏཱ པཉྩམོ དོསོ. པུཐུལཏོ པན དིཡཌྜྷརཏནཾ དྭཱིསུ པསྶེསུ རཏནམཏྟཨནུཙངྐམཾ དཱིགྷཏོ སཊྛིཧཏྠཾ མུདུཏལཾ སམཝིཔྤཀིཎྞཝཱལུཀཾ ཙངྐམཾ ཝཊྚཏི ཙེཏིཡགིརིམྷི དཱིཔཔྤསཱདཀམཧིནྡཏྠེརསྶ ཙངྐམནཾ ཝིཡ, ཏཱདིསཾ ཏཾ ཨཧོསི. ཏེནཱཧ ‘‘ཙངྐམཾ ཏཏྠ མཱཔེསིཾ, པཉྩདོསཝིཝཛྫིཏ’’ནྟི.

ཨཊྛགུཎསམུཔེཏནྟི ཨཊྛཧི སམཎསུཁེཧི ཨུཔེཏཾ. ཨཊྛིམཱནི སམཎསུཁཱནི ནཱམ – དྷནདྷཉྙཔརིགྒཧཱབྷཱཝོ, ཨནཝཛྫཔིཎྜཔཱཏཔརིཡེསནབྷཱཝོ, ནིབྦུཏཔིཎྜཔཱཏབྷུཉྫནབྷཱཝོ, རཊྛཾ པཱིལེ༹ཏྭཱ དྷནསཱརཾ ཝཱ སཱིསཀཧཱཔཎཱདཱིནི ཝཱ གཎྷནྟེསུ རཱཛཀུལེསུ རཊྛཔཱིལ༹ནཀིལེསཱབྷཱཝོ, ཨུཔཀརཎེསུ ནིཙྪནྡརཱགབྷཱཝོ, ཙོརཝིལོཔེ ནིབྦྷཡབྷཱཝོ, རཱཛརཱཛམཧཱམཏྟེཧི ཨསཾསཊྛབྷཱཝོ, ཙཏཱུསུ དིསཱསུ ཨཔྤཊིཧཏབྷཱཝོཏི. ཨིདཾ ཝུཏྟཾ ¶ ཧོཏི – ཡཐཱ ཏསྨིཾ ཨསྶམེ ཝསནྟེན སཀྐཱ ཧོནྟི ཨིམཱནི ཨཊྛ སམཎསུཁཱནི ཝིནྡིཏུཾ, ཨེཝཾ ཨཊྛགུཎསམུཔེཏཾ ཏཾ ཨསྶམཾ མཱཔེསིནྟི.

ཨབྷིཉྙཱབལམཱཧརིནྟི པཙྪཱ ཏསྨིཾ ཨསྶམེ ཝསནྟོ ཀསིཎཔརིཀམྨཾ ཀཏྭཱ ཨབྷིཉྙཱནཾ སམཱཔཏྟཱིནཉྩ ཨུཔྤཱདནཏྠཱཡ ཨནིཙྩཏོ དུཀྑཏོ ཝིཔསྶནཾ ཨཱརབྷིཏྭཱ ཐཱམཔྤཏྟཾ ཝིཔསྶནཱབལཾ ཨཱཧརིཾ. ཡཐཱ ཏསྨིཾ ཝསནྟོ ཏཾ བལཾ ¶ ཨཱཧརིཏུཾ སཀྐོམི, ཨེཝཾ ཏཾ ཨསྶམཾ ཏསྶ ཨབྷིཉྙཏྠཱཡ ཝིཔསྶནཱབལསྶ ཨནུཙྪཝིཀཾ ཀཏྭཱ མཱཔེསིནྟི ཨཏྠོ.

སཱཊཀཾ ¶ པཛཧིཾ ཏཏྠ, ནཝདོསམུཔཱགཏནྟི ཨེཏྠཱཡཾ ཨནུཔུབྦིཀཐཱ – ཏདཱ ཀིར ཀུཊིལེཎཙངྐམཱདིཔཊིམཎྜིཏཾ པུཔྥཱུཔགཕལཱུཔགརུཀྑསཉྪནྣཾ རམཎཱིཡཾ མདྷུརསལིལཱསཡཾ ཨཔགཏཝཱལ༹མིགབྷིཾསནཀསཀུཎཾ པཝིཝེཀཀྑམཾ ཨསྶམཾ མཱཔེཏྭཱ ཨལངྐཏཙངྐམསྶ ཨུབྷོསུ ཨནྟེསུ ཨཱལམྦནཕལཀཾ སཾཝིདྷཱཡ ནིསཱིདནཏྠཱཡ ཙངྐམཝེམཛ྄ཛྷེ སམཏལཾ མུགྒཝཎྞསིལཾ མཱཔེཏྭཱ ཨནྟོཔཎྞསཱལཱཡཾ ཛཊཱམཎྜལཝཱཀཙཱིརཏིདཎྜཀུཎྜིཀཱདིཀེ ཏཱཔསཔརིཀྑཱརེ, མཎྜཔེ པཱནཱིཡགྷཊཔཱནཱིཡསངྑཔཱནཱིཡསརཱཝཱནི, ཨགྒིསཱལཱཡཾ ཨངྒཱརཀཔལླདཱརུཨཱདཱིནཱིཏི ཨེཝཾ ཡཾ ཡཾ པབྦཛིཏཱནཾ ཨུཔཀཱརཱཡ སཾཝཏྟཏི, ཏཾ ཏཾ སབྦཾ མཱཔེཏྭཱ པཎྞསཱལཱཡ བྷིཏྟིཡཾ ‘‘ཡེ ཀེཙི པབྦཛིཏུཀཱམཱ ཨིམེ པརིཀྑཱརེ གཧེཏྭཱ པབྦཛནྟཱུ’’ཏི ཨཀྑརཱནི ཚིནྡིཏྭཱ དེཝལོཀམེཝ གཏེ ཝིསྶཀམྨདེཝཔུཏྟེ སུམེདྷཔཎྜིཏོ ཧིམཝནྟཔབྦཏཔཱདེ གིརིཀནྡརཱནུསཱརེན ཨཏྟནོ ནིཝཱསཱནུརཱུཔཾ ཕཱསུཀཊྛཱནཾ ཨོལོཀེནྟོ ནདཱིནིཝཏྟནེ ཝིསྶཀམྨནིམྨིཏཾ སཀྐདཏྟིཡཾ རམཎཱིཡཾ ཨསྶམཾ དིསྭཱ ཙངྐམནཀོཊིཾ གནྟྭཱ པདཝལཉྫཾ ཨཔསྶནྟོ ‘‘དྷུཝཾ པབྦཛིཏཱ དྷུརགཱམེ བྷིཀྑཾ པརིཡེསིཏྭཱ ཀིལནྟརཱུཔཱ ཨཱགནྟྭཱ པཎྞསཱལཾ པཝིསིཏྭཱ ནིསིནྣཱ བྷཝིསྶནྟཱི’’ཏི ཙིནྟེཏྭཱ ཐོཀཾ ཨཱགམེཏྭཱ ‘‘ཨཏིཝིཡ ཙིརཱཡནྟི, ཛཱནིསྶཱམཱི’’ཏི པཎྞཱསཱལཱཀུཊིདྭཱརཾ ཝིཝརིཏྭཱ ཨནྟོ པཝིསིཏྭཱ ཨིཏོ ཙིཏོ ཙ ཨོལོཀེནྟོ མཧཱབྷིཏྟིཡཾ ཨཀྑརཱནི ཝཱཙེཏྭཱ ‘‘མཡ྄ཧཾ ཀཔྤིཡཔརིཀྑཱརཱ ཨེཏེ, ཨིམེ གཧེཏྭཱ པབྦཛིསྶཱམཱི’’ཏི ཨཏྟནོ ནིཝཏྠཔཱརུཏཾ སཱཊཀཡུགཾ པཛཧི. ཏེནཱཧ ‘‘སཱཊཀཾ པཛཧིཾ ཏཏྠཱ’’ཏི. ཨེཝཾ པཝིཊྛོ ཨཧཾ, སཱརིཔུཏྟ, ཏསྶཾ པཎྞསཱལཱཡཾ སཱཊཀཾ པཛཧིཾ.

ནཝདོསམུཔཱགཏནྟི སཱཊཀཾ པཛཧནྟོ ནཝ དོསེ དིསྭཱ པཛཧིནྟི དཱིཔེཏི. ཏཱཔསཔབྦཛྫཾ པབྦཛིཏཱནཉྷི སཱཊཀསྨིཾ ནཝ དོསཱ ཨུཔཊྛཧནྟི. ཏེསུ ཏསྶ མཧགྒྷབྷཱཝོ ཨེཀོ དོསོ, པརཔཊིབདྡྷཏཱཡ ཨུཔྤཛྫནབྷཱཝོ ཨེཀོ, པརིབྷོགེན ལཧུཾ ཀིལིསྶནབྷཱཝོ ཨེཀོ. ཀིལིཊྛོ ཧི དྷོཝིཏབྦོ ཙ རཛིཏབྦོ ཙ ཧོཏི. པརིབྷོགེན ཛཱིརཎབྷཱཝོ ཨེཀོ. ཛིཎྞསྶ ཧི ཏུནྣཾ ཝཱ ཨགྒལ༹དཱནཾ ཝཱ ཀཱཏབྦཾ ཧོཏི ¶ . པུན པརིཡེསནཱཡ དུརབྷིསམྦྷཝབྷཱཝོ ཨེཀོ, ཏཱཔསཔབྦཛྫཱཡ ཨསཱརུཔྤབྷཱཝོ ཨེཀོ, པཙྩཏྠིཀཱནཾ སཱདྷཱརཎབྷཱཝོ ཨེཀོ. ཡཐཱ ཧི ནཾ པཙྩཏྠིཀཱ ན གཎྷནྟི, ཨེཝཾ གོཔེཏབྦོ ཧོཏི. པརིབྷུཉྫནྟསྶ ཝིབྷཱུསནཊྛཱནབྷཱཝོ ཨེཀོ, གཧེཏྭཱ ཝིཙརནྟསྶ ཁནྡྷབྷཱརམཧིཙྪབྷཱཝོ ཨེཀོཏི.

ཝཱཀཙཱིརཾ ནིཝཱསེསིནྟི ཏདཱཧཾ, སཱརིཔུཏྟ, ཨིམེ ནཝ དོསེ དིསྭཱ སཱཊཀཾ པཧཱཡ ཝཱཀཙཱིརཾ ནིཝཱསེསིཾ, མུཉྫཏིཎཾ ¶ ཧཱིརཾ ཧཱིརཾ ཀཏྭཱ གནྠེཏྭཱ ཀཏཝཱཀཙཱིརཾ ནིཝཱསནཔཱརུཔནཏྠཱཡ ཨཱདིཡིནྟི ཨཏྠོ.

དྭཱདསགུཎམུཔཱགཏནྟི ¶ དྭཱདསཧི ཨཱནིསཾསེཧི སམནྣཱགཏཾ. ཝཱཀཙཱིརསྨིཉྷི དྭཱདས ཨཱནིསཾསཱ – ཨཔྤགྒྷཾ སུནྡརཾ ཀཔྤིཡནྟི ཨཡཾ ཏཱཝ ཨེཀོ ཨཱནིསཾསོ, སཧཏྠཱ ཀཱཏུཾ སཀྐཱཏི ཨཡཾ དུཏིཡོ, པརིབྷོགེན སཎིཀཾ ཀིལིསྶཏི, དྷོཝིཡམཱནེཔི པཔཉྩོ ནཏྠཱིཏི ཨཡཾ ཏཏིཡོ, པརིབྷོགེན ཛིཎྞེཔི སིབྦིཏབྦཱབྷཱཝོ ཙཏུཏྠོ, པུན པརིཡེསནྟསྶ སུཁེན ཀརཎབྷཱཝོ པཉྩམོ, ཏཱཔསཔབྦཛྫཱཡ སཱརུཔྤབྷཱཝོ ཚཊྛོ, པཙྩཏྠིཀཱནཾ ནིརུཔབྷོགབྷཱཝོ སཏྟམོ, པརིབྷུཉྫནྟསྶ ཝིབྷཱུསནཊྛཱནཱབྷཱཝོ ཨཊྛམོ, དྷཱརཎེ སལླཧུཀབྷཱཝོ ནཝམོ, ཙཱིཝརཔཙྩཡེ ཨཔྤིཙྪབྷཱཝོ དསམོ, ཝཱཀུཔྤཏྟིཡཱ དྷམྨིཀཨནཝཛྫབྷཱཝོ ཨེཀཱདསམོ, ཝཱཀཙཱིརེ ནཊྛེཔི ཨནཔེཀྑབྷཱཝོ དྭཱདསམོཏི.

ཨཊྛདོསསམཱཀིཎྞཾ, པཛཧིཾ པཎྞསཱལཀནྟི. ཀཐཾ པཛཧི? སོ ཀིར ཝརསཱཊཀཡུགཾ ཨོམུཉྩིཏྭཱ ཙཱིཝརཝཾསེ ལགྒིཏཾ ཨནོཛཔུཔྥདཱམསདིསཾ རཏྟཾ ཝཱཀཙཱིརཾ གཧེཏྭཱ ནིཝཱསེཏྭཱ, ཏསྶཱུཔརི ཨཔརཾ སུཝཎྞཝཎྞཾ ཝཱཀཙཱིརཾ པརིདཧིཏྭཱ, པུནྣཱགཔུཔྥསནྠརསདིསཾ སཁུརཾ ཨཛིནཙམྨཾ ཨེཀཾསཾ ཀཏྭཱ ཛཊཱམཎྜལཾ པཊིམུཉྩིཏྭཱ ཙཱུལཱ༹ཡ སདྡྷིཾ ནིཙྩལབྷཱཝཀརཎཏྠཾ སཱརསཱུཙིཾ པཝེསེཏྭཱ མུཏྟཛཱལསདིསཱཡ སིཀྐཱཡ པཝཱལ༹ཝཎྞཾ ཀུཎྜིཀཾ ཨོདཧིཏྭཱ ཏཱིསུ ཋཱནེསུ ཝངྐཀཱཛཾ ཨཱདཱཡ ཨེཀིསྶཱ ཀཱཛཀོཊིཡཱ ཀུཎྜིཀཾ, ཨེཀིསྶཱ ཨངྐུསཔཙྪིཏིདཎྜཀཱདཱིནི ཨོལགྒེཏྭཱ ཁཱརིབྷཱརཾ ཨཾསེ ཀཏྭཱ, དཀྑིཎེན ཧཏྠེན ཀཏྟརདཎྜཾ གཧེཏྭཱ པཎྞསཱལཏོ ནིཀྑམིཏྭཱ སཊྛིཧཏྠེ མཧཱཙངྐམེ ཨཔརཱཔརཾ ཙངྐམནྟོ ཨཏྟནོ ཝེསཾ ཨོལོཀེཏྭཱ – ‘‘མཡ྄ཧཾ མནོརཐོ མཏྠཀཾ པཏྟོ, སོབྷཏི ཝཏ མེ པབྦཛྫཱ, བུདྡྷཔཙྩེཀབུདྡྷཱདཱིཧི སབྦེཧི དྷཱིརཔུརིསེཧི ཝཎྞིཏཱ ཐོམིཏཱ ¶ ཨཡཾ པབྦཛྫཱ ནཱམ, པཧཱིནཾ མེ གིཧིབནྡྷནཾ, ནིཀྑནྟོསྨི ནེཀྑམྨཾ, ལདྡྷཱ མེ ཨུཏྟམཔབྦཛྫཱ, ཀརིསྶཱམི སམཎདྷམྨཾ, ལབྷིསྶཱམི མགྒཕལསུཁ’’ནྟི ཨུསྶཱཧཛཱཏོ ཁཱརིཀཱཛཾ ཨོཏཱརེཏྭཱ ཙངྐམཝེམཛ྄ཛྷེ མུགྒཝཎྞསིལཱཔཊྚེ སུཝཎྞཔཊིམཱ ཝིཡ ནིསིནྣོ དིཝསབྷཱགཾ ཝཱིཏིནཱམེཏྭཱ སཱཡནྷསམཡཾ པཎྞསཱལཾ པཝིསིཏྭཱ, བིདལམཉྩཀཔསྶེ ཀཊྛཏྠརིཀཱཡ ནིཔནྣོ སརཱིརཾ ཨུཏུཾ གཱཧཱཔེཏྭཱ, བལཝཔཙྩཱུསེ པབུཛ྄ཛྷིཏྭཱ ཨཏྟནོ ཨཱགམནཾ ཨཱཝཛྫེསི ‘‘ཨཧཾ གྷརཱཝཱསེ ཨཱདཱིནཝཾ དིསྭཱ ཨམིཏབྷོགཾ ཨནནྟཡསཾ པཧཱཡ ཨརཉྙཾ པཝིསིཏྭཱ ནེཀྑམྨགཝེསཀོ ཧུཏྭཱ པབྦཛིཏོ, ཨིཏོ དཱནི པཊྛཱཡ པམཱདཙཱརཾ ཙརིཏུཾ ན ཝཊྚཏི.

པཝིཝེཀཉྷི པཧཱཡ ཝིཙརནྟཾ མིཙྪཱཝིཏཀྐམཀྑིཀཱ ཁཱདནྟི, ཨིདཱནི མཡཱ ཝིཝེཀམནུབྲཱུཧེཏུཾ ཝཊྚཏི. ཨཧཉྷི གྷརཱཝཱསཾ པལིབོདྷཏོ དིསྭཱ ནིཀྑནྟོ, ཨཡཉྩ མནཱཔཱ པཎྞསཱལཱ, བེལུཝཔཀྐཝཎྞཔརིབྷཎྜཀཏཱ བྷཱུམི, རཛཏཝཎྞཱ སེཏབྷིཏྟིཡོ, ཀཔོཏཔཱདཝཎྞཾ པཎྞཙྪདནཾ ¶ , ཝིཙིཏྟཏྠརཎཝཎྞོ བིདལམཉྩཀོ, ནིཝཱསཕཱསུཀཾ ཝསནཊྛཱནཾ, ན ཨེཏྟོ ཨཏིརེཀཏརཱ ཝིཡ མེ གེཧསམྤདཱ པཉྙཱཡཏཱི’’ཏི པཎྞསཱལཱཡ དོསེ ཝིཙིནནྟོ ཨཊྛ དོསེ པསྶི.

པཎྞསཱལཱཔརིབྷོགསྨིཉྷི ཨཊྛ ཨཱདཱིནཝཱ – མཧཱསམཱརམྦྷེན དབྦསམྦྷཱརེ སམོདྷཱནེཏྭཱ ཀརཎཔརིཡེསནབྷཱཝོ ཨེཀོ ཨཱདཱིནཝོ, ཏིཎཔཎྞམཏྟིཀཱསུ པཏིཏཱསུ ཏཱསཾ ¶ པུནཔྤུནཾ ཋཔེཏབྦཏཱཡ ནིབནྡྷཛགྒནབྷཱཝོ དུཏིཡོ, སེནཱསནཾ ནཱམ མཧལླཀསྶ པཱཔུཎཱཏི, ཨཝེལཱཡ ཝུཊྛཱཔིཡམཱནསྶ ཙིཏྟེཀགྒཏཱ ན ཧོཏཱིཏི ཨུཊྛཱཔནིཡབྷཱཝོ ཏཏིཡོ, སཱིཏུཎྷཔཊིགྷཱཏེན ཀཱཡསྶ སུཁུམཱལཀརཎབྷཱཝོ ཙཏུཏྠོ, གེཧཾ པཝིཊྛེན ཡཾཀིཉྩི པཱཔཾ སཀྐཱ ཀཱཏུནྟི གརཧཱཔཊིཙྪཱདནབྷཱཝོ པཉྩམོ, ‘‘མཡ྄ཧ’’ནྟི པརིགྒཧཀརཎབྷཱཝོ ཚཊྛོ, གེཧསྶ ཨཏྠིབྷཱཝོ ནཱམ སདུཏིཡཀཝཱསོཏི སཏྟམོ, ཨཱུཀཱམངྒུལགྷརགོལི༹ཀཱདཱིནཾ སཱདྷཱརཎཏཱཡ བཧུསཱདྷཱརཎབྷཱཝོ ཨཊྛམོ. ཨིཏི ཨིམེ ཨཊྛ ཨཱདཱིནཝེ དིསྭཱ མཧཱསཏྟོ པཎྞསཱལཾ པཛཏི. ཏེནཱཧ ‘‘ཨཊྛདོསསམཱཀིཎྞཾ, པཛཧིཾ པཎྞསཱལཀ’’ནྟི.

ཨུཔཱགམིཾ རུཀྑམཱུལཾ, གུཎེ དསཧུཔཱགཏནྟི ཚནྣཾ པཊིཀྑིཔིཏྭཱ དསཧི གུཎེཧི ཨུཔེཏཾ རུཀྑམཱུལཾ ཨུཔགཏོསྨཱིཏི ཝདཏི. ཏཏྲིམེ དས གུཎཱ – ཨཔྤསམཱརམྦྷཏཱ ཨེཀོ གུཎོ, ཨུཔགམནམཏྟཀམེཝ ཧི ཏཏྠ ཧོཏི; ཨཔཊིཛགྒནཏཱ ¶ དུཏིཡོ, ཏཉྷི སམྨཊྛམྤི ཨསམྨཊྛམྤི པརིབྷོགཕཱསུཀཾ ཧོཏིཡེཝ. ཨནུཊྛཱཔརིཡབྷཱཝོ ཏཏིཡོ, གརཧཾ ནཔྤཊིཙྪཱདེཏི; ཏཏྠ ཧི པཱཔཾ ཀརོནྟོ ལཛྫཏཱིཏི གརཧཱཡ ཨཔྤཊིཙྪནྣབྷཱཝོ ཙཏུཏྠོ; ཨབྦྷོཀཱསཝཱསོ ཝིཡ ཀཱཡཾ ན སནྠམྦྷེཏཱིཏི ཀཱཡསྶ ཨསནྠམྦྷནབྷཱཝོ པཉྩམོ; པརིགྒཧཀརཎཱབྷཱཝོ ཚཊྛོ; གེཧཱལཡཔཊིཀྑེཔོ སཏྟམོ; བཧུསཱདྷཱརཎགེཧེ ཝིཡ ‘‘པཊིཛགྒིསྶཱམི ནཾ, ནིཀྑམཐཱ’’ཏི ནཱིཧརཎཀཱབྷཱཝོ ཨཊྛམོ; ཝསནྟསྶ སཔྤཱིཏིཀབྷཱཝོ ནཝམོ; རུཀྑམཱུལསེནཱསནསྶ གཏགཏཊྛཱནེ སུལབྷཏཱཡ ཨནཔེཀྑབྷཱཝོ དསམོཏི ཨིམེ དས གུཎེ དིསྭཱ རུཀྑམཱུལཾ ཨུཔཱགཏོསྨཱིཏི ཝདཏི.

ཨིམཱནི ཨེཏྟཀཱནི ཀཱརཎཱནི སལླཀྑེཏྭཱ མཧཱསཏྟོ པུནདིཝསེ བྷིཀྑཱཡ གཱམཾ པཱཝིསི. ཨཐསྶ སམྤཏྟགཱམེ མནུསྶཱ མཧནྟེན ཨུསྶཱཧེན བྷིཀྑཾ ཨདཾསུ. སོ བྷཏྟཀིཙྩཾ ནིཊྛཱཔེཏྭཱ ཨསྶམཾ ཨཱགམྨ ནིསཱིདིཏྭཱ ཙིནྟེསི ‘‘ནཱཧཾ ཨཱཧཱརཾ ན ལབྷཱམཱིཏི པབྦཛིཏོ, སིནིདྡྷཱཧཱརོ ནཱམེས མཱནམདཔུརིསམདེ ཝཌྜྷེཏི, ཨཱཧཱརམཱུལཀསྶ ཙ དུཀྑསྶ ཨནྟོ ནཏྠི. ཡཾནཱུནཱཧཾ ཝཱཔིཏརོཔིཏདྷཉྙནིབྦཏྟཾ ཨཱཧཱརཾ པཛཧིཏྭཱ པཝཏྟཕལབྷོཛནོ བྷཝེཡྻ’’ནྟི. སོ ཏཏོ ¶ ཊྛཱཡ ཏཐཱ ཀཏྭཱ གྷཊེནྟོ ཝཱཡམནྟོ སཏྟཱཧབྦྷནྟརེཡེཝ ཨཊྛ སམཱཔཏྟིཡོ པཉྩ ཨབྷིཉྙཱཡོ ཙ ནིབྦཏྟེསི. ཏེན ཝུཏྟཾ –

‘‘ཝཱཔིཏཾ རོཔིཏཾ དྷཉྙཾ, པཛཧིཾ ནིརཝསེསཏོ;

ཨནེཀགུཎསམྤནྣཾ, པཝཏྟཕལམཱདིཡིཾ.

‘‘ཏཏྠཔྤདྷཱནཾ པདཧིཾ, ནིསཛྫཊྛཱནཙངྐམེ;

ཨབྦྷནྟརམྷི སཏྟཱཧེ, ཨབྷིཉྙཱབལཔཱཔུཎི’’ནྟི.

ཨེཝཾ ཨབྷིཉྙཱབལཾ པཏྭཱ སུམེདྷཏཱཔསེ སམཱཔཏྟིསུཁེན ཝཱིཏིནཱམེནྟེ དཱིཔངྐརོ ནཱམ སཏྠཱ ལོཀེ ཨུདཔཱདི. ཏསྶ པཊིསནྡྷིཛཱཏིསམྦོདྷིདྷམྨཙཀྐཔྤཝཏྟནེསུ སཀལཱཔི དསསཧསྶཱི ལོཀདྷཱཏུ སཾཀམྤི ¶ སམྤཀམྤི སམྤཝེདྷི, མཧཱཝིརཝཾ ཝིརཝི, དྭཏྟིཾས པུབྦནིམིཏྟཱནི པཱཏུརཧེསུཾ. སུམེདྷཏཱཔསོ སམཱཔཏྟིསུཁེན ཝཱིཏིནཱམེནྟོ ནེཝ ཏཾ སདྡམསྶོསི, ན ཏཱནི ནིམིཏྟཱནི ཨདྡས. ཏེན ཝུཏྟཾ –

‘‘ཨེཝཾ ¶ མེ སིདྡྷིཔྤཏྟསྶ, ཝསཱིབྷཱུཏསྶ སཱསནེ;

དཱིཔངྐརོ ནཱམ ཛིནོ, ཨུཔྤཛྫི ལོཀནཱཡཀོ.

‘‘ཨུཔྤཛྫནྟེ ཙ ཛཱཡནྟེ, བུཛ྄ཛྷནྟེ དྷམྨདེསནེ;

ཙཏུརོ ནིམིཏྟེ ནཱདྡསཾ, ཛྷཱནརཏིསམཔྤིཏོ’’ཏི.

ཏསྨིཾ ཀཱལེ དཱིཔངྐརདསབལོ ཙཏཱུཧི ཁཱིཎཱསཝསཏསཧསྶེཧི པརིཝུཏོ ཨནུཔུབྦེན ཙཱརིཀཾ ཙརམཱནོ རམྨཾ ནཱམ ནགརཾ པཏྭཱ སུདསྶནམཧཱཝིཧཱརེ པཊིཝསཏི. རམྨནགརཝཱསིནོ ‘‘དཱིཔངྐརོ ཀིར སམཎིསྶརོ པརམཱཏིསམྦོདྷིཾ པཏྭཱ པཝཏྟཝརདྷམྨཙཀྐོ ཨནུཔུབྦེན ཙཱརིཀཾ ཙརམཱནོ རམྨནགརཾ པཏྭཱ སུདསྶནམཧཱཝིཧཱརེ པཊིཝསཏཱི’’ཏི སུཏྭཱ སཔྤིནཝནཱིཏཱདཱིནི ཙེཝ བྷེསཛྫཱནི ཝཏྠཙྪཱདནཱནི ཙ གཱཧཱཔེཏྭཱ གནྡྷམཱལཱདིཧཏྠཱ ཡེན བུདྡྷོ, ཡེན དྷམྨོ, ཡེན སངྒྷོ, ཏནྣིནྣཱ ཏཔྤོཎཱ ཏཔྤབྦྷཱརཱ ཧུཏྭཱ སཏྠཱརཾ ཨུཔསངྐམིཏྭཱ ཝནྡིཏྭཱ གནྡྷམཱལཱདཱིཧི པཱུཛེཏྭཱ ཨེཀམནྟཾ ནིསིནྣཱ དྷམྨདེསནཾ སུཏྭཱ སྭཱཏནཱཡ ནིམནྟེཏྭཱ ཨུཊྛཱཡཱསནཱ པཀྐམིཾསུ.

ཏེ པུནདིཝསེ མཧཱདཱནཾ སཛྫེཏྭཱ ནགརཾ ཨལངྐརིཏྭཱ དསབལསྶ ཨཱགམནམགྒཾ ཨལངྐརོནྟཱ ¶ ཨུདཀབྷིནྣཊྛཱནེསུ པཾསུཾ པཀྑིཔིཏྭཱ སམཾ བྷཱུམིཏལཾ ཀཏྭཱ རཛཏཔཊྚཝཎྞཾ ཝཱལུཀཾ ཨཱཀིརནྟི, ལཱཛཱནི ཙེཝ པུཔྥཱནི ཙ ཝིཀིརནྟི, ནཱནཱཝིརཱགེཧི ཝཏྠེཧི དྷཛཔཊཱཀེ ཨུསྶཱཔེནྟི, ཀདལིཡོ ཙེཝ པུཎྞགྷཊཔནྟིཡོ ཙ པཏིཊྛཱཔེནྟི. ཏསྨིཾ ཀཱལེ སུམེདྷཏཱཔསོ ཨཏྟནོ ཨསྶམཔདཱ ཨུགྒནྟྭཱ ཏེསཾ མནུསྶཱནཾ ཨུཔརིབྷཱགེན ཨཱཀཱསེན གཙྪནྟོ ཏེ ཧཊྛཏུཊྛེ མནུསྶེ དིསྭཱ ‘‘ཀིཾ ནུ ཁོ ཀཱརཎ’’ནྟི ཨཱཀཱསཏོ ཨོརུཡ྄ཧ ཨེཀམནྟཾ ཋིཏོ མནུསྶེ པུཙྪི – ‘‘ཨམྦྷོ ཀསྶ ཏུམྷེ ཨིམཾ མགྒཾ ཨལངྐརོཐཱ’’ཏི? ཏེན ཝུཏྟཾ –

‘‘པཙྩནྟདེསཝིསཡེ, ནིམནྟེཏྭཱ ཏཐཱགཏཾ;

ཏསྶ ཨཱགམནཾ མགྒཾ, སོདྷེནྟི ཏུཊྛམཱནསཱ.

‘‘ཨཧཾ ཏེན སམཡེན, ནིཀྑམིཏྭཱ སཀསྶམཱ;

དྷུནནྟོ ཝཱཀཙཱིརཱནི, གཙྪཱམི ཨམྦརེ ཏདཱ.

‘‘ཝེདཛཱཏཾ ཛནཾ དིསྭཱ, ཏུཊྛཧཊྛཾ པམོདིཏཾ;

ཨོརོཧིཏྭཱན གགནཱ, མནུསྶེ པུཙྪི ཏཱཝདེ.

‘‘‘ཏུཊྛཧཊྛོ ¶ ¶ པམུདིཏོ, ཝེདཛཱཏོ མཧཱཛནོ;

ཀསྶ སོདྷཱིཡཏི མགྒོ, ཨཉྫསཾ ཝཊུམཱཡན’’’ནྟི.

མནུསྶཱ ཨཱཧཾསུ ‘‘བྷནྟེ སུམེདྷ, ན ཏྭཾ ཛཱནཱསི, དཱིཔངྐརདསབལོ སམྨཱསམྦོདྷིཾ པཏྭཱ པཝཏྟིཏཝརདྷམྨཙཀྐོ ཙཱརིཀཾ ཙརམཱནོ ཨམྷཱཀཾ ནགརཾ པཏྭཱ སུདསྶནམཧཱཝིཧཱརེ པཊིཝསཏི. མཡཾ ཏཾ བྷགཝནྟཾ ནིམནྟཡིམྷཱ, ཏསྶེཏཾ བུདྡྷསྶ བྷགཝཏོ ཨཱགམནམགྒཾ ཨལངྐརོམཱ’’ཏི. སུམེདྷཏཱཔསོ ཙིནྟེསི – ‘‘བུདྡྷོཏི ཁོ གྷོསམཏྟཀམྤི ལོཀེ དུལླབྷཾ, པགེཝ བུདྡྷུཔྤཱདོ, མཡཱཔི ཨིམེཧི མནུསྶེཧི སདྡྷིཾ དསབལསྶ མགྒཾ ཨལངྐརིཏུཾ ཝཊྚཏཱི’’ཏི. སོ ཏེ མནུསྶེ ཨཱཧ – ‘‘སཙེ བྷོ ཏུམྷེ ཨེཏཾ མགྒཾ བུདྡྷསྶ ཨལངྐརོཐ, མཡ྄ཧམྤི ཨེཀཾ ཨོཀཱསཾ དེཐ, ཨཧམྤི ཏུམྷེཧི སདྡྷིཾ མགྒཾ ཨལངྐརིསྶཱམཱི’’ཏི. ཏེ ‘‘སཱདྷཱུ’’ཏི སམྤཊིཙྪིཏྭཱ ‘‘སུམེདྷཏཱཔསོ ཨིདྡྷིམཱ’’ཏི ཛཱནནྟཱ ཨུདཀབྷིནྣོཀཱསཾ སལླཀྑེཏྭཱ ‘‘ཏྭཾ ཨིམཾ ཋཱནཾ ཨལངྐརོཧཱི’’ཏི ཨདཾསུ. སུམེདྷོ བུདྡྷཱརམྨཎཾ པཱིཏིཾ གཧེཏྭཱ ཙིནྟེསི ‘‘ཨཧཾ ཨིམཾ ཨོཀཱསཾ ཨིདྡྷིཡཱ ཨལངྐརིཏུཾ སཀྐོམི, ཨེཝཾ ཨལངྐཏོ པན མམ མནཾ ན པརིཏོསེསྶཏི, ཨཛྫ མཡཱ ཀཱཡཝེཡྻཱཝཙྩཾ ཀཱཏུཾ ཝཊྚཏཱི’’ཏི པཾསུཾ ཨཱཧརིཏྭཱ ཏསྨིཾ པདེསེ པཀྑིཔི.

ཏསྶ ¶ ཏསྨིཾ པདེསེ ཨནལངྐཏེཡེཝ དཱིཔངྐརོ དསབལོ མཧཱནུབྷཱཝཱནཾ ཚལ༹བྷིཉྙཱནཾ ཁཱིཎཱསཝཱནཾ ཙཏཱུཧི སཏསཧསྶེཧི པརིཝུཏོ དེཝཏཱསུ དིབྦགནྡྷམཱལཱདཱིཧི པཱུཛཡནྟཱིསུ དིབྦསངྒཱིཏེསུ པཝཏྟནྟེསུ མནུསྶེསུ མཱནུསཀགནྡྷེཧི ཙེཝ མཱལཱདཱིཧི ཙ པཱུཛཡནྟེསུ ཨནནྟཱཡ བུདྡྷལཱིལཱ༹ཡ མནོསིལཱཏལེ ཝིཛམྦྷམཱནོ སཱིཧོ ཝིཡ ཏཾ ཨལངྐཏཔཊིཡཏྟཾ མགྒཾ པཊིཔཛྫི. སུམེདྷཏཱཔསོ ཨཀྑཱིནི ཨུམྨཱིལེཏྭཱ ཨལངྐཏམགྒེན ཨཱགཙྪནྟསྶ དསབལསྶ དྭཏྟིཾསམཧཱཔུརིསལཀྑཎཔཊིམཎྜིཏཾ ཨསཱིཏིཡཱ ཨནུབྱཉྫནེཧི ཨནུརཉྫིཏཾ བྱཱམཔྤབྷཱཡ སམྤརིཝཱརིཏཾ མཎིཝཎྞགགནཏལེ ནཱནཔྤཀཱརཱ ཝིཛྫུལཏཱ ཝིཡ ཨཱཝེལཱ༹ཝེལ༹བྷཱུཏཱ ཙེཝ ཡུགལཡུགལབྷཱུཏཱ ཙ ཚབྦཎྞགྷནབུདྡྷརསྨིཡོ ཝིསྶཛྫེནྟཾ རཱུཔགྒཔྤཏྟཾ ཨཏྟབྷཱཝཾ ཨོལོཀེཏྭཱ ‘‘ཨཛྫ མཡཱ དསབལསྶ ཛཱིཝིཏཔརིཙྩཱགཾ ཀཱཏུཾ ཝཊྚཏི, མཱ བྷགཝཱ ཀལལཾ ཨཀྐམི, མཎིཕལཀསེཏུཾ པན ཨཀྐམནྟོ ཝིཡ སདྡྷིཾ ཙཏཱུཧི ཁཱིཎཱསཝསཏསཧསྶེཧི མམ པིཊྛིཾ མདྡམཱནོ གཙྪཏུ, ཏཾ མེ ¶ བྷཝིསྶཏི དཱིགྷརཏྟཾ ཧིཏཱཡ སུཁཱཡཱ’’ཏི ཀེསེ མོཙེཏྭཱ ཨཛིནཙམྨཛཊཱམཎྜལཝཱཀཙཱིརཱནི ¶ ཀཱལ༹ཝཎྞེ ཀལལེ པཏྠརིཏྭཱ མཎིཕལཀསེཏུ ཝིཡ ཀལལཔིཊྛེ ནིཔཛྫི. ཏེན ཝུཏྟཾ –

‘‘ཏེ མེ པུཊྛཱ ཝིཡཱཀཾསུ, ‘བུདྡྷོ ལོཀེ ཨནུཏྟརོ;

དཱིཔངྐརོ ནཱམ ཛིནོ, ཨུཔྤཛྫི ལོཀནཱཡཀོ;

ཏསྶ སོདྷཱིཡཏི མགྒོ, ཨཉྫསཾ ཝཊུམཱཡནཾ’.

‘‘བུདྡྷོཏི མམ སུཏྭཱན, པཱིཏི ཨུཔྤཛྫི ཏཱཝདེ;

བུདྡྷོ བུདྡྷོཏི ཀཐཡནྟོ, སོམནསྶཾ པཝེདཡིཾ.

‘‘ཏཏྠ ཋཏྭཱ ཝིཙིནྟེསིཾ, ཏུཊྛོ སཾཝིགྒམཱནསོ;

‘ཨིདྷ བཱིཛཱནི རོཔིསྶཾ, ཁཎོ ཨེཝ མཱ ཨུཔཙྩགཱ’.

‘‘ཡདི བུདྡྷསྶ སོདྷེཐ, ཨེཀོཀཱསཾ དདཱཐ མེ;

ཨཧམྤི སོདྷཡིསྶཱམི, ཨཉྫསཾ ཝཊུམཱཡནཾ.

‘‘ཨདཾསུ ཏེ མམོཀཱསཾ, སོདྷེཏུཾ ཨཉྫསཾ ཏདཱ;

བུདྡྷོ བུདྡྷོཏི ཙིནྟེནྟོ, མགྒཾ སོདྷེམཧཾ ཏདཱ.

‘‘ཨནིཊྛིཏེ ¶ མམོཀཱསེ, དཱིཔངྐརོ མཧཱམུནི;

ཙཏཱུཧི སཏསཧསྶེཧི, ཚལ༹བྷིཉྙེཧི ཏཱདིཧི;

ཁཱིཎཱསཝེཧི ཝིམལེཧི, པཊིཔཛྫི ཨཉྫསཾ ཛིནོ.

‘‘པཙྩུགྒམནཱ ཝཏྟནྟི, ཝཛྫནྟི བྷེརིཡོ བཧཱུ;

ཨཱམོདིཏཱ ནརམརཱུ, སཱདྷུཀཱརཾ པཝཏྟཡུཾ.

‘‘དེཝཱ མནུསྶེ པསྶནྟི, མནུསྶཱཔི ཙ དེཝཏཱ;

ཨུབྷོཔི ཏེ པཉྫལིཀཱ, ཨནུཡནྟི ཏཐཱགཏཾ.

‘‘དེཝཱ དིབྦེཧི ཏུརིཡེཧི, མནུསྶཱ མཱནུསེཧི ཙ;

ཨུབྷོཔི ཏེ ཝཛྫཡནྟཱ, ཨནུཡནྟི ཏཐཱགཏཾ.

‘‘དིབྦཾ མནྡཱརཝཾ པུཔྥཾ, པདུམཾ པཱརིཚཏྟཀཾ;

དིསོདིསཾ ཨོཀིརནྟི, ཨཱཀཱསནབྷགཏཱ མརཱུ.

‘‘ཙམྤཀཾ ¶ སལལཾ ནཱིཔཾ, ནཱགཔུནྣཱགཀེཏཀཾ;

དིསོདིསཾ ཨུཀྑིཔནྟི, བྷཱུམིཏལགཏཱ ནརཱ.

‘‘ཀེསེ མུཉྩིཏྭཱཧཾ ཏཏྠ, ཝཱཀཙཱིརཉྩ ཙམྨཀཾ;

ཀལལེ པཏྠརིཏྭཱན, ཨཝཀུཛྫོ ནིཔཛྫཧཾ.

‘‘ཨཀྐམིཏྭཱན མཾ བུདྡྷོ, སཧ སིསྶེཧི གཙྪཏུ;

མཱ ནཾ ཀལལེ ཨཀྐམིཏྠོ, ཧིཏཱཡ མེ བྷཝིསྶཏཱི’’ཏི.

སོ ཀལལཔིཊྛེ ནིཔནྣཀོཝ པུན ཨཀྑཱིནི ཨུམྨཱིལེཏྭཱ དཱིཔངྐརདསབལསྶ བུདྡྷསིརིཾ སམྤསྶམཱནོ ཨེཝཾ ཙིནྟེསི – ‘‘སཙཱཧཾ ཨིཙྪེཡྻཾ, སབྦཀིལེསེ ཛྷཱཔེཏྭཱ སངྒྷནཝཀོ ཧུཏྭཱ རམྨནགརཾ པཝིསེཡྻཾ. ཨཉྙཱཏཀཝེསེན ¶ པན མེ ཀིལེསེ ཛྷཱཔེཏྭཱ ནིབྦཱནཔྤཏྟིཡཱ ཀིཙྩཾ ནཏྠི. ཡཾནཱུནཱཧཾ དཱིཔངྐརདསབལོ ཝིཡ པརམཱབྷིསམྦོདྷིཾ པཏྭཱ དྷམྨནཱཝཾ ཨཱརོཔེཏྭཱ མཧཱཛནཾ སཾསཱརསཱགརཱ ¶ ཨུཏྟཱརེཏྭཱ པཙྪཱ པརིནིབྦཱཡེཡྻཾ, ཨིདཾ མཡ྄ཧཾ པཏིརཱུཔ’’ནྟི. ཏཏོ ཨཊྛ དྷམྨེ སམོདྷཱནེཏྭཱ བུདྡྷབྷཱཝཱཡ ཨབྷིནཱིཧཱརཾ ཀཏྭཱ ནིཔཛྫི. ཏེན ཝུཏྟཾ –

‘‘པཐཝིཡཾ ནིཔནྣསྶ, ཨེཝཾ མེ ཨཱསི ཙེཏསོ;

‘ཨིཙྪམཱནོ ཨཧཾ ཨཛྫ, ཀིལེསེ ཛྷཱཔཡེ མམ.

‘ཀིཾ མེ ཨཉྙཱཏཝེསེན, དྷམྨཾ སཙྪིཀཏེནིདྷ;

སབྦཉྙུཏཾ པཱཔུཎིཏྭཱ, བུདྡྷོ ཧེསྶཾ སདེཝཀེ.

‘ཀིཾ མེ ཨེཀེན ཏིཎྞེན, པུརིསེན ཐཱམདསྶིནཱ;

སབྦཉྙུཏཾ པཱཔུཎིཏྭཱ, སནྟཱརེསྶཾ སདེཝཀེ.

‘ཨིམིནཱ མེ ཨདྷིཀཱརེན, ཀཏེན པུརིསུཏྟམེ;

སབྦཉྙུཏཾ པཱཔུཎིཏྭཱ, ཏཱརེམི ཛནཏཾ བཧུཾ.

‘སཾསཱརསོཏཾ ཚིནྡིཏྭཱ, ཝིདྡྷཾསེཏྭཱ ཏཡོ བྷཝེ;

དྷམྨནཱཝཾ སམཱརུཡ྄ཧ, སནྟཱརེསྶཾ སདེཝཀེ’’’ཏི. (བུ. ཝཾ. ༢.༥༤-༥༨);

ཡསྨཱ པན བུདྡྷཏྟཾ པཏྠེནྟསྶ –

‘‘མནུསྶཏྟཾ ལིངྒསམྤཏྟི, ཧེཏུ སཏྠཱརདསྶནཾ;

པབྦཛྫཱ གུཎསམྤཏྟི, ཨདྷིཀཱརོ ཙ ཚནྡཏཱ;

ཨཊྛདྷམྨསམོདྷཱནཱ, ཨབྷིནཱིཧཱརོ སམིཛ྄ཛྷཏཱི’’ཏི. (བུ. ཝཾ. ༢.༥༩);

མནུསྶཏྟབྷཱཝསྨིཾཡེཝ ¶ ཧི ཋཏྭཱ བུདྡྷཏྟཾ པཏྠེནྟསྶ པཏྠནཱ སམིཛ྄ཛྷཏི, ན ནཱགསྶ ཝཱ སུཔཎྞསྶ ཝཱ དེཝཏཱཡ ཝཱ པཏྠནཱ སམིཛ྄ཛྷཏི. མནུསྶཏྟབྷཱཝེཔི པུརིསལིངྒེ ཋིཏསྶེཝ པཏྠནཱ སམིཛ྄ཛྷཏི, ན ཨིཏྠིཡཱ ཝཱ པཎྜཀནཔུཾསཀཨུབྷཏོབྱཉྫནཀཱནཾ ཝཱ པཏྠནཱ སམིཛ྄ཛྷཏི. པུརིསསྶཱཔི ཏསྨིཾ ཨཏྟབྷཱཝེ ཨརཧཏྟཔྤཏྟིཡཱ ཧེཏུསམྤནྣསྶེཝ པཏྠནཱ སམིཛ྄ཛྷཏི, ནོ ཨིཏརསྶ. ཧེཏུསམྤནྣསྶཱཔི ཛཱིཝམཱནཀབུདྡྷསྶེཝ སནྟིཀེ པཏྠེནྟསྶ པཏྠནཱ སམིཛ྄ཛྷཏི, པརིནིབྦུཏེ བུདྡྷེ ཙེཏིཡསནྟིཀེ ཝཱ བོདྷིམཱུལེ ཝཱ པཏྠེནྟསྶ ན སམིཛ྄ཛྷཏི. བུདྡྷཱནཾ སནྟིཀེ པཏྠེནྟསྶཱཔི ¶ པབྦཛྫཱལིངྒེ ཋིཏསྶེཝ སམིཛ྄ཛྷཏི, ནོ གིཧིལིངྒེ ཋིཏསྶ. པབྦཛིཏསྶཱཔི པཉྩཱབྷིཉྙསྶ ཨཊྛསམཱཔཏྟིལཱབྷིནོཡེཝ སམིཛ྄ཛྷཏི, ན ཨིམཱཡ གུཎསམྤཏྟིཡཱ ཝིརཧིཏསྶ. གུཎསམྤནྣེནཱཔི ཡེན ཨཏྟནོ ཛཱིཝིཏཾ བུདྡྷཱནཾ པརིཙྩཏྟཾ ཧོཏི, ཏསྶ ཨིམིནཱ ཨདྷིཀཱརེན ཨདྷིཀཱརསམྤནྣསྶེཝ སམིཛ྄ཛྷཏི, ན ཨིཏརསྶ. ཨདྷིཀཱརསམྤནྣསྶཱཔི ཡསྶ བུདྡྷཀཱརཀདྷམྨཱནཾ ཨཏྠཱཡ མཧནྟོ ཚནྡོ ཙ ཨུསྶཱཧོ ཙ ཝཱཡཱམོ ཙ པརིཡེཊྛི ཙ, ཏསྶེཝ སམིཛ྄ཛྷཏི, ན ཨིཏརསྶ.

ཏཏྲིདཾ ཚནྡམཧནྟཏཱཡ ཨོཔམྨཾ – སཙེ ཧི ཨེཝམསྶ ‘‘ཡོ སཀལཙཀྐཝཱལ༹གབྦྷཾ ཨེཀོདཀཱིབྷཱུཏཾ ཨཏྟནོ བཱཧུབལེན ཨུཏྟརིཏྭཱ པཱརཾ གནྟུཾ སམཏྠོ ¶ , སོ བུདྡྷཏྟཾ པཱཔུཎཱཏི. ཡོ ཝཱ པན སཀལཙཀྐཝཱལ༹གབྦྷཾ ཝེལུ༹གུམྦསཉྪནྣཾ བྱཱུཧིཏྭཱ མདྡིཏྭཱ པདསཱ གཙྪནྟོ པཱརཾ གནྟུཾ སམཏྠོ, སོ བུདྡྷཏྟཾ པཱཔུཎཱཏི. ཡོ ཝཱ པན སཀལཙཀྐཝཱལ༹གབྦྷཾ སཏྟིཡོ ཨཱཀོཊེཏྭཱ ནིརནྟརཾ སཏྟིཕལསམཱཀིཎྞཾ པདསཱ ཨཀྐམམཱནོ པཱརཾ གནྟུཾ སམཏྠོ, སོ བུདྡྷཏྟཾ པཱཔུཎཱཏི. ཡོ ཝཱ པན སཀལཙཀྐཝཱལ༹གབྦྷཾ ཝཱིཏཙྩིཏངྒཱརབྷརིཏཾ པཱདེཧི མདྡམཱནོ པཱརཾ གནྟུཾ སམཏྠོ, སོ བུདྡྷཏྟཾ པཱཔུཎཱཏཱི’’ཏི. ཡོ ཨེཏེསུ ཨེཀམྤི ཨཏྟནོ དུཀྐརཾ ན མཉྙཏི, ‘‘ཨཧཾ ཨེཏམྤི ཏརིཏྭཱ ཝཱ གནྟྭཱ ཝཱ པཱརཾ གཧེསྶཱམཱི’’ཏི ཨེཝཾ མཧནྟེན ཚནྡེན ཙ ཨུསྶཱཧེན ཙ ཝཱཡཱམེན ཙ པརིཡེཊྛིཡཱ ཙ སམནྣཱགཏོ ཧོཏི, ཏསྶ པཏྠནཱ སམིཛ྄ཛྷཏི, ན ཨིཏརསྶ. སུམེདྷཏཱཔསོ པན ཨིམེ ཨཊྛ དྷམྨེ སམོདྷཱནེཏྭཱ བུདྡྷབྷཱཝཱཡ ཨབྷིནཱིཧཱརཾ ཀཏྭཱ ནིཔཛྫི.

དཱིཔངྐརོཔི ¶ བྷགཝཱ ཨཱགནྟྭཱ སུམེདྷཏཱཔསསྶ སཱིསབྷཱགེ ཋཏྭཱ མཎིསཱིཧཔཉྫརཾ ཨུགྒྷཱཊེནྟོ ཝིཡ པཉྩཝཎྞཔྤསཱདསམྤནྣཱནི ཨཀྑཱིནི ཨུམྨཱིལེཏྭཱ ཀལལཔིཊྛེ ནིཔནྣཾ སུམེདྷཏཱཔསཾ དིསྭཱ ‘‘ཨཡཾ ཏཱཔསོ བུདྡྷཏྟཱཡ ཨབྷིནཱིཧཱརཾ ཀཏྭཱ ནིཔནྣོ, ཨིཛ྄ཛྷིསྶཏི ནུ ཁོ ཨིམསྶ པཏྠནཱ, ཨུདཱཧུ ནོ’’ཏི ཨནཱགཏཾསཉཱཎཾ པེསེཏྭཱ ཨུཔདྷཱརེནྟོ ‘‘ཨིཏོ ཀཔྤསཏསཧསྶཱདྷིཀཱནི ཙཏྟཱརི ཨསངྑྱེཡྻཱནི ཨཏིཀྐམིཏྭཱ གོཏམོ ནཱམ བུདྡྷོ བྷཝིསྶཏཱི’’ཏི ཉཏྭཱ ཋིཏཀོཝ པརིསམཛ྄ཛྷེ བྱཱཀཱསི – ‘‘པསྶཐ ནོ ཏུམྷེ ཨིམཾ ཨུགྒཏཔཾ ཏཱཔསཾ ཀལལཔིཊྛེ ནིཔནྣ’’ནྟི? ‘‘ཨེཝཾ, བྷནྟེ’’ཏི. ‘‘ཨཡཾ བུདྡྷཏྟཱཡ ཨབྷིནཱིཧཱརཾ ཀཏྭཱ ནིཔནྣོ, སམིཛ྄ཛྷིསྶཏི ཨིམསྶ པཏྠནཱ, ཨིཏོ ཀཔྤསཏསཧསྶཱདྷིཀཱནཾ ཙཏུནྣཾ ཨསངྑྱེཡྻཱནཾ མཏྠཀེ གོཏམོ ནཱམ བུདྡྷོ བྷཝིསྶཏི. ཏསྨིཾ པནསྶ ཨཏྟབྷཱཝེ ཀཔིལཝཏྠུ ནཱམ ནགརཾ ནིཝཱསོ བྷཝིསྶཏི, མཱཡཱ ནཱམ དེཝཱི མཱཏཱ, སུདྡྷོདནོ ནཱམ རཱཛཱ པིཏཱ, ཨགྒསཱཝཀོ ཨུཔཏིསྶོ ནཱམ ཐེརོ, དུཏིཡསཱཝཀོ ཀོལིཏོ ནཱམ, བུདྡྷུཔཊྛཱཀོ ཨཱནནྡོ ནཱམ, ཨགྒསཱཝིཀཱ ཁེམཱ ནཱམ ¶ ཐེརཱི, དུཏིཡསཱཝིཀཱ ཨུཔྤལཝཎྞཱ ནཱམ ཐེརཱི བྷཝིསྶཏི, པརིཔཀྐཉཱཎོ མཧཱབྷིནིཀྑམནཾ ཀཏྭཱ མཧཱཔདྷཱནཾ པདཧིཏྭཱ ནིགྲོདྷམཱུལེ པཱཡཱསཾ པཊིགྒཧེཏྭཱ ནེརཉྫརཱཡ ཏཱིརེ པརིབྷུཉྫིཏྭཱ བོདྷིམཎྜཾ ཨཱརུཡ྄ཧ ཨསྶཏྠརུཀྑམཱུལེ ཨབྷིསམྦུཛ྄ཛྷིསྶཏཱི’’ཏི. ཏེན ཝུཏྟཾ –

‘‘དཱིཔངྐརོ ལོཀཝིདཱུ, ཨཱཧུཏཱིནཾ པཊིགྒཧོ;

ཨུསྶཱིསཀེ མཾ ཋཏྭཱན, ཨིདཾ ཝཙནམབྲཝི.

‘པསྶཐ ཨིམཾ ཏཱཔསཾ, ཛཊིལཾ ཨུགྒཏཱཔནཾ;

ཨཔརིམེཡྻེ ཨིཏོ ཀཔྤེ, བུདྡྷོ ལོཀེ བྷཝིསྶཏི.

‘ཨཧུ ¶ ཀཔིལཝ྄ཧཡཱ རམྨཱ, ནིཀྑམིཏྭཱ ཏཐཱགཏོ;

པདྷཱནཾ པདཧིཏྭཱན, ཀཏྭཱ དུཀྐརཀཱརིཀཾ.

‘ཨཛཔཱལརུཀྑམཱུལེ, ནིསཱིདིཏྭཱ ཏཐཱགཏོ;

ཏཏྠ པཱཡཱསཾ པགྒཡ྄ཧ, ནེརཉྫརམུཔེཧིཏི.

‘ནེརཉྫརཱཡ ཏཱིརམྷི, པཱཡཱསཾ ཨད སོ ཛིནོ;

པཊིཡཏྟཝརམགྒེན, བོདྷིམཱུལམཱུཔེཧིཏི.

‘ཏཏོ ¶ པདཀྑིཎཾ ཀཏྭཱ, བོདྷིམཎྜཾ ཨནུཏྟརོ;

ཨསྶཏྠརུཀྑམཱུལམྷི, བུཛ྄ཛྷིསྶཏི མཧཱཡསོ.

‘ཨིམསྶ ཛནིཀཱ མཱཏཱ, མཱཡཱ ནཱམ བྷཝིསྶཏི;

པིཏཱ སུདྡྷོདནོ ནཱམ, ཨཡཾ ཧེསྶཏི གོཏམོ.

‘ཨནཱསཝཱ ཝཱིཏརཱགཱ, སནྟཙིཏྟཱ སམཱཧིཏཱ;

ཀོལིཏོ ཨུཔཏིསྶོ ཙ, ཨགྒཱ ཧེསྶནྟི སཱཝཀཱ;

ཨཱནནྡོ ནཱམུཔཊྛཱཀོ, ཨུཔཊྛིསྶཏི ཏཾ ཛིནཾ.

‘ཁེམཱ ¶ ཨུཔྤལཝཎྞཱ ཙ, ཨགྒཱ ཧེསྶནྟི སཱཝིཀཱ;

ཨནཱསཝཱ ཝཱིཏརཱགཱ, སནྟཙིཏྟཱ སམཱཧིཏཱ;

བོདྷི ཏསྶ བྷགཝཏོ, ཨསྶཏྠོཏི པཝུཙྩཏཱི’’’ཏི.

སུམེདྷཏཱཔསོ ‘‘མཡ྄ཧཾ ཀིར པཏྠནཱ སམིཛ྄ཛྷིསྶཏཱི’’ཏི སོམནསྶཔྤཏྟོ ཨཧོསི. མཧཱཛནོ དཱིཔངྐརདསབལསྶ ཝཙནཾ སུཏྭཱ ‘‘སུམེདྷཏཱཔསོ ཀིར བུདྡྷབཱིཛཾ བུདྡྷངྐུརོ’’ཏི ཧཊྛཏུཊྛོ ཨཧོསི. ཨེཝཉྩསྶ ཨཧོསི ‘‘ཡཐཱ ནཱམ པུརིསོ ནདིཾ ཏརནྟོ ཨུཛུཀེན ཏིཏྠེན ཨུཏྟརིཏུཾ ཨསཀྐོནྟོ ཧེཊྛཱཏིཏྠེན ཨུཏྟརཏི, ཨེཝམེཝ མཡམྤི དཱིཔངྐརདསབལསྶ སཱསནེ མགྒཕལཾ ཨལབྷམཱནཱ ཨནཱགཏེ ཡདཱ ཏྭཾ བུདྡྷོ བྷཝིསྶསི, ཏདཱ ཏཝ སམྨུཁཱ མགྒཕལཾ སཙྪིཀཱཏུཾ སམཏྠཱ བྷཝེཡྻཱམཱ’’ཏི པཏྠནཾ ཋཔཡིཾསུ. དཱིཔངྐརདསབལོཔི བོདྷིསཏྟཾ པསཾསིཏྭཱ ཨཊྛཧི པུཔྥམུཊྛཱིཧི པཱུཛེཏྭཱ པདཀྑིཎཾ ཀཏྭཱ པཀྐཱམི, ཏེཔི ཙཏུསཏསཧསྶསངྑཱ ཁཱིཎཱསཝཱ བོདྷིསཏྟཾ གནྡྷེཧི ཙ མཱལེཧི ཙ པཱུཛེཏྭཱ པདཀྑིཎཾ ཀཏྭཱ པཀྐམིཾསུ. དེཝམནུསྶཱ པན ཏཐེཝ པཱུཛེཏྭཱ ཝནྡིཏྭཱ པཀྐནྟཱ.

བོདྷིསཏྟོ སབྦེསཾ པཊིཀྐནྟཀཱལེ སཡནཱ ཝུཊྛཱཡ ‘‘པཱརམིཡོ ཝིཙིནིསྶཱམཱི’’ཏི པུཔྥརཱསིམཏྠཀེ པལླངྐཾ ཨཱབྷུཛིཏྭཱ ནིསཱིདི. ཨེཝཾ ནིསིནྣེ བོདྷིསཏྟེ སཀལདསསཧསྶཙཀྐཝཱལ༹དེཝཏཱ སནྣིཔཏིཏྭཱ སཱདྷུཀཱརཾ དཏྭཱ ‘‘ཨཡྻ སུམེདྷཏཱཔས, པོརཱཎཀབོདྷིསཏྟཱནཾ པལླངྐཾ ཨཱབྷུཛིཏྭཱ ‘པཱརམིཡོ ཝིཙིནིསྶཱམཱ’ཏི ནིསིནྣཀཱལེ ཡཱནི པུབྦནིམིཏྟཱནི ནཱམ པཉྙཱཡནྟི, ཏཱནི སབྦཱནིཔི ཨཛྫ པཱཏུབྷཱུཏཱནི, ནིསྶཾསཡེན ¶ ཏྭཾ བུདྡྷོ བྷཝིསྶསི ¶ , མཡམྤེཏཾ ཛཱནཱམ ‘ཡསྶེཏཱནི ནིམིཏྟཱནི པཉྙཱཡནྟི, ཨེཀནྟེན སོ བུདྡྷོ ཧོཏི’, ཏྭཾ ཨཏྟནོ ཝཱིརིཡཾ དལ༹ྷཾ ཀཏྭཱ པགྒཎྷཱ’’ཏི བོདྷིསཏྟཾ ནཱནཔྤཀཱརཱཧི ཐུཏཱིཧི ཨབྷིཏྠུནིཾསུ. ཏེན ཝུཏྟཾ –

‘‘ཨིདཾ སུཏྭཱན ཝཙནཾ, ཨསམསྶ མཧེསིནོ;

ཨཱམོདིཏཱ ནརམརཱུ, བུདྡྷབཱིཛཾ ཀིར ཨཡཾ.

‘ཨུཀྐུཊྛིསདྡཱ ཝཏྟནྟི, ཨཔྥོཊེནྟི ཧསནྟི ཙ;

ཀཏཉྫལཱི ནམསྶནྟི, དསསཧསྶཱི སདེཝཀཱ.

‘ཡདིམསྶ ¶ ལོཀནཱཐསྶ, ཝིརཛ྄ཛྷིསྶཱམ སཱསནཾ;

ཨནཱགཏམྷི ཨདྡྷཱནེ, ཧེསྶཱམ སམྨུཁཱ ཨིམཾ.

‘ཡཐཱ མནུསྶཱ ནདིཾ ཏརནྟཱ, པཊིབྷིཏྠཾ ཝིརཛ྄ཛྷིཡ;

ཧེཊྛཱཏིཏྠེ གཧེཏྭཱན, ཨུཏྟརནྟི མཧཱནདིཾ.

‘ཨེཝམེཝ མཡཾ སབྦེ, ཡདི མུཉྩཱམིམཾ ཛིནཾ;

ཨནཱགཏམྷི ཨདྡྷཱནེ, ཧེསྶཱམ སམྨུཁཱ ཨིམཾ’.

‘དཱིཔངྐརོ ལོཀཝིདཱུ, ཨཱཧུཏཱིནཾ པཊིགྒཧོ;

མམ ཀམྨཾ པཀིཏྟེཏྭཱ, དཀྑིཎཾ པཱདམུདྡྷརི.

‘ཡེ ཏཏྠཱསུཾ ཛིནཔུཏྟཱ, སབྦེ པདཀྑིཎམཀཾསུ མཾ;

ནརཱ ནཱགཱ ཙ གནྡྷབྦཱ, ཨབྷིཝཱདེཏྭཱན པཀྐམུཾ.

‘དསྶནཾ མེ ཨཏིཀྐནྟེ, སསངྒྷེ ལོཀནཱཡཀེ;

ཧཊྛཏུཊྛེན ཙིཏྟེན, ཨཱསནཱ ཝུཊྛཧིཾ ཏདཱ.

‘སུཁེན སུཁིཏོ ཧོམི, པཱམོཛྫེན པམོདིཏོ;

པཱིཏིཡཱ ཙ ཨབྷིསྶནྣོ, པལླངྐཾ ཨཱབྷུཛིཾ ཏདཱ.

‘པལླངྐེན ནིསཱིདིཏྭཱ, ཨེཝཾ ཙིནྟེསཧཾ ཏདཱ;

‘ཝསཱིབྷཱུཏོ ཨཧཾ ཛྷཱནེ, ཨབྷིཉྙཱསུ པཱརམིཾ གཏོ.

‘སཧསྶིཡམྷི ལོཀམྷི, ཨིསཡོ ནཏྠི མེ སམཱ;

ཨསམོ ཨིདྡྷིདྷམྨེསུ, ཨལབྷིཾ ཨཱིདིསཾ སུཁཾ’.

‘པལླངྐཱབྷུཛནེ ¶ མཡ྄ཧཾ, དསསཧསྶཱདྷིཝཱསིནོ;

མཧཱནཱདཾ པཝཏྟེསུཾ, དྷུཝཾ བུདྡྷོ བྷཝིསྶསི.

‘ཡཱ ¶ པུབྦེ བོདྷིསཏྟཱནཾ, པལླངྐཝརམཱབྷུཛེ;

ནིམིཏྟཱནི པདིསྶནྟི, ཏཱནི ཨཛྫ པདིསྶརེ.

‘སཱིཏཾ བྱཔགཏཾ ཧོཏི, ཨུཎྷཉྩ ཨུཔསམྨཏི;

ཏཱནི ཨཛྫ པདིསྶནྟི, དྷུཝཾ བུདྡྷོ བྷཝིསྶསི.

‘དསསཧསྶཱི ལོཀདྷཱཏཱུ, ནིསྶདྡཱ ཧོནྟི ནིརཱཀུལཱ;

ཏཱནི ཨཛྫ པདིསྶནྟི, དྷུཝཾ བུདྡྷོ བྷཝིསྶསི.

‘མཧཱཝཱཏཱ ¶ ན ཝཱཡནྟི, ན སནྡནྟི སཝནྟིཡོ;

ཏཱནི ཨཛྫ པདིསྶནྟི, དྷུཝཾ བུདྡྷོ བྷཝིསྶསི.

‘ཐལཛཱ དཀཛཱ པུཔྥཱ, སབྦེ པུཔྥནྟི ཏཱཝདེ;

ཏེཔཛྫ པུཔྥིཏཱ སབྦེ, དྷུཝཾ བུདྡྷོ བྷཝིསྶསི.

‘ལཏཱ ཝཱ ཡདི ཝཱ རུཀྑཱ, ཕལབྷཱརཱ ཧོནྟི ཏཱཝདེ;

ཏེཔཛྫ ཕལིཏཱ སབྦེ, དྷུཝཾ བུདྡྷོ བྷཝིསྶསི.

‘ཨཱཀཱསཊྛཱ ཙ བྷཱུམཊྛཱ, རཏནཱ ཛོཏནྟི ཏཱཝདེ;

ཏེཔཛྫ རཏནཱ ཛོཏནྟི, དྷུཝཾ བུདྡྷོ བྷཝིསྶསི.

‘མཱནུསཀཱ ཙ དིབྦཱ ཙ, ཏུརིཡཱ ཝཛྫནྟི ཏཱཝདེ;

ཏེཔཛྫུབྷོ ཨབྷིརཝནྟི, དྷུཝཾ བུདྡྷོ བྷཝིསྶསི.

‘ཝིཙིཏྟཔུཔྥཱ གགནཱ, ཨབྷིཝསྶནྟི ཏཱཝདེ;

ཏེཔི ཨཛྫ པཝསྶནྟི, དྷུཝཾ བུདྡྷོ བྷཝིསྶསི.

‘མཧཱསམུདྡོ ཨཱབྷུཛཏི, དསསཧསྶཱི པཀམྤཏི;

ཏེཔཛྫུབྷོ ཨབྷིརཝནྟི, དྷུཝཾ བུདྡྷོ བྷཝིསྶསི.

‘ནིརཡེཔི ¶ དསསཧསྶེ, ཨགྒཱི ནིབྦནྟི ཏཱཝདེ;

ཏེཔཛྫ ནིབྦུཏཱ ཨགྒཱི, དྷུཝཾ བུདྡྷོ བྷཝིསྶསི.

‘ཝིམལོ ཧོཏི སཱུརིཡོ, སབྦཱ དིསྶནྟི ཏཱརཀཱ;

ཏེཔི ཨཛྫ པདིསྶནྟི, དྷུཝཾ བུདྡྷོ བྷཝིསྶསི.

‘ཨནོཝཊྛེན ¶ ཨུདཀཾ, མཧིཡཱ ཨུབྦྷིཛྫི ཏཱཝདེ;

ཏམྤཛྫུབྦྷིཛྫཏེ མཧིཡཱ, དྷུཝཾ བུདྡྷོ བྷཝིསྶསི.

‘ཏཱརཱགཎཱ ཝིརོཙནྟི, ནཀྑཏྟཱ གགནམཎྜལེ;

ཝིསཱཁཱ ཙནྡིམཱཡུཏྟཱ, དྷུཝཾ བུདྡྷོ བྷཝིསྶསི.

‘བིལཱསཡཱ དརཱིསཡཱ, ནིཀྑམནྟི སཀཱསཡཱ;

ཏེཔཛྫ ཨཱསཡཱ ཚུདྡྷཱ, དྷུཝཾ བུདྡྷོ བྷཝིསྶསི.

‘ན ཧོཏི ཨརཏི སཏྟཱནཾ, སནྟུཊྛཱ ཧོནྟི ཏཱཝདེ;

ཏེཔཛྫ སབྦེ སནྟུཊྛཱ, དྷུཝཾ བུདྡྷོ བྷཝིསྶསི.

‘རོགཱ ཏདཱུཔསམྨནྟི, ཛིགྷཙྪཱ ཙ ཝིནསྶཏི;

ཏཱནིཔཛྫ པདིསྶནྟི, དྷུཝཾ བུདྡྷོ བྷཝིསྶསི.

‘རཱགོ ཏདཱ ཏནུ ཧོཏི, དོསོ མོཧོ ཝིནསྶཏི;

ཏེཔཛྫ ཝིགཏཱ སབྦེ, དྷུཝཾ བུདྡྷོ བྷཝིསྶསི.

‘བྷཡཾ ཏདཱ ན བྷཝཏི, ཨཛྫཔེཏཾ པདིསྶཏི;

ཏེན ལིངྒེན ཛཱནཱམ, དྷུཝཾ བུདྡྷོ བྷཝིསྶསི.

‘རཛོ ནུདྡྷཾསཏི ཨུདྡྷཾ, ཨཛྫཔེཏཾ པདིསྶཏི;

ཏེན ལིངྒེན ཛཱནཱམ, དྷུཝཾ བུདྡྷོ བྷཝིསྶསི.

‘ཨནིཊྛགནྡྷོ ¶ པཀྐམཏི, དིཊྛགནྡྷོ པཝཱཡཏི;

སོཔཛྫ ཝཱཡཏི གནྡྷོ, དྷུཝཾ བུདྡྷོ བྷཝིསྶསི.

‘སབྦེ ¶ དེཝཱ པདིསྶནྟི, ཋཔཡིཏྭཱ ཨརཱུཔིནོ;

ཏེཔཛྫ སབྦེ དིསྶནྟི, དྷུཝཾ བུདྡྷོ བྷཝིསྶསི.

‘ཡཱཝཏཱ ནིརཡཱ ནཱམ, སབྦེ དིསྶནྟི ཏཱཝདེ;

ཏེཔཛྫ སབྦེ དིསྶནྟི, དྷུཝཾ བུདྡྷོ བྷཝིསྶསི.

‘ཀུཊྚཱ ཀཝཱཊཱ སེལཱ ཙ, ན ཧོནྟཱཝརཎཱ ཏདཱ;

ཨཱཀཱསབྷཱུཏཱ ཏེཔཛྫ, དྷུཝཾ བུདྡྷོ བྷཝིསྶསི.

‘ཙུཏཱི ཙ ཨུཔཔཏྟི ཙ, ཁཎེ ཏསྨིཾ ན ཝིཛྫཏི;

ཏཱནིཔཛྫ པདིསྶནྟི, དྷུཝཾ བུདྡྷོ བྷཝིསྶསི.

‘དལ༹ྷཾ ¶ པགྒཎྷ ཝཱིརིཡཾ, མཱ ནིཝཏྟ ཨབྷིཀྐམ;

མཡམྤེཏཾ ཝིཛཱནཱམ, དྷུཝཾ བུདྡྷོ བྷཝིསྶསཱི’’’ཏི.

བོདྷིསཏྟོ དཱིཔངྐརདསབལསྶ ཙ དསསཧསྶཙཀྐཝཱལ༹དེཝཏཱནཉྩ ཝཙནཾ སུཏྭཱ བྷིཡྻོསོ མཏྟཱཡ སཉྫཱཏུསྶཱཧོ ཧུཏྭཱ ཙིནྟེསི ‘‘བུདྡྷཱ ནཱམ ཨམོགྷཝཙནཱ, ནཏྠི བུདྡྷཱནཾ ཀཐཱཡ ཨཉྙཐཏྟཾ. ཡཐཱ ཧི ཨཱཀཱསེ ཁིཏྟལེཌྜུསྶ པཏནཾ དྷུཝཾ, ཛཱཏསྶ མརཎཾ དྷུཝཾ, ཨརུཎེ ཨུགྒཏེ སཱུརིཡསྶུཊྛཱནཾ, ཨཱསཡཱ ནིཀྑནྟསཱིཧསྶ སཱིཧནཱདནདནཾ, གརུགབྦྷཱཡ ཨིཏྠིཡཱ བྷཱརམོརོཔནཾ ཨཝསྶཾབྷཱཝཱི, ཨེཝམེཝ བུདྡྷཱནཾ ཝཙནཾ ནཱམ དྷུཝཾ ཨམོགྷཾ, ཨདྡྷཱ ཨཧཾ བུདྡྷོ བྷཝིསྶཱམཱི’’ཏི. ཏེན ཝུཏྟཾ –

‘‘བུདྡྷསྶ ཝཙནཾ སུཏྭཱ, དསསཧསྶཱིན ཙཱུབྷཡཾ;

ཏུཊྛཧཊྛོ པམོདིཏོ, ཨེཝཾ ཙིནྟེསཧཾ ཏདཱ.

‘‘ཨདྭེཛ྄ཛྷཝཙནཱ བུདྡྷཱ, ཨམོགྷཝཙནཱ ཛིནཱ;

ཝིཏཐཾ ནཏྠི བུདྡྷཱནཾ, དྷུཝཾ བུདྡྷོ བྷཝཱམཧཾ.

‘‘ཡཐཱ ¶ ཁིཏྟཾ ནབྷེ ལེཌྜུ, དྷུཝཾ པཏཏི བྷཱུམིཡཾ;

ཏཐེཝ བུདྡྷསེཊྛཱནཾ, ཝཙནཾ དྷུཝསསྶཏཾ.

‘‘ཡཐཱཔི སབྦསཏྟཱནཾ, མརཎཾ དྷུཝསསྶཏཾ;

ཏཐེཝ བུདྡྷསེཊྛཱནཾ, ཝཙནཾ དྷུཝསསྶཏཾ.

‘‘ཡཐཱ རཏྟིཀྑཡེ པཏྟེ, སཱུརིཡུགྒམནཾ དྷུཝཾ;

ཏཐེཝ བུདྡྷསེཊྛཱནཾ, ཝཙནཾ དྷུཝསསྶཏཾ.

‘‘ཡཐཱ ནིཀྑནྟསཡནསྶ, སཱིཧསྶ ནདནཾ དྷུཝཾ;

ཏཐེཝ བུདྡྷསེཊྛཱནཾ, ཝཙནཾ དྷུཝསསྶཏཾ.

‘‘ཡཐཱ ཨཱཔནྣསཏྟཱནཾ, བྷཱརམོརོཔནཾ དྷུཝཾ;

ཏཐེཝ བུདྡྷསེཊྛཱནཾ, ཝཙནཾ དྷུཝསསྶཏ’’ནྟི.

སོ ‘‘དྷུཝཱཧཾ བུདྡྷོ བྷཝིསྶཱམཱི’’ཏི ཨེཝཾ ཀཏསནྣིཊྛཱནོ བུདྡྷཀཱརཀེ དྷམྨེ ཨུཔདྷཱརེཏུཾ ‘‘ཀཧཾ ནུ ཁོ བུདྡྷཀཱརཀདྷམྨཱ, ཀིཾ ¶ ཨུདྡྷཾ, ཨུདཱཧུ ཨདྷོ, དིསཱསུ, ཝིདིསཱསཱུ’’ཏི ཨནུཀྐམེན སཀལཾ དྷམྨདྷཱཏུཾ ཝིཙིནནྟོ པོརཱཎཀབོདྷིསཏྟེཧི ཨཱསེཝིཏནིསེཝིཏཾ པཋམཾ དཱནཔཱརམིཾ དིསྭཱ ཨེཝཾ ཨཏྟཱནཾ ཨོཝདི – ‘‘སུམེདྷཔཎྜིཏ, ཏྭཾ ཨིཏོ པཊྛཱཡ པཋམཾ དཱནཔཱརམིཾ པཱུརེཡྻཱསི. ཡཐཱ ཧི ནིཀྐུཛྫིཏོ ཨུདཀཀུམྦྷོ ནིསྶེསཾ ཀཏྭཱ ཨུདཀཾ ¶ ཝམཏིཡེཝ, ན པཙྩཱཧརཏི, ཨེཝམེཝ དྷནཾ ཝཱ ཡསཾ ཝཱ པུཏྟཾ ཝཱ དཱརཾ ཝཱ ཨངྒཔཙྩངྒཾ ཝཱ ཨནོལོཀེཏྭཱ སམྤཏྟཡཱཙཀཱནཾ སབྦཾ ཨིཙྪིཏིཙྪིཏཾ ནིསྶེསཾ ཀཏྭཱ དདམཱནོ བོདྷིརུཀྑམཱུལེ ནིསཱིདིཏྭཱ བུདྡྷོ བྷཝིསྶསཱི’’ཏི པཋམཾ དཱནཔཱརམིཾ དལ༹ྷཾ ཀཏྭཱ ཨདྷིཊྛཱསི. ཏེན ཝུཏྟཾ –

‘‘ཧནྡ བུདྡྷཀརེ དྷམྨེ, ཝིཙིནཱམི ཨིཏོ ཙིཏོ;

ཨུདྡྷཾ ཨདྷོ དས དིསཱ, ཡཱཝཏཱ དྷམྨདྷཱཏུཡཱ.

‘‘ཝིཙིནནྟོ ཏདཱདཀྑིཾ, པཋམཾ དཱནཔཱརམིཾ;

པུབྦཀེཧི མཧེསཱིཧི, ཨནུཙིཎྞཾ མཧཱཔཐཾ.

‘‘ཨིམཾ ¶ ཏྭཾ པཋམཾ ཏཱཝ, དལ༹ྷཾ ཀཏྭཱ སམཱདིཡ;

དཱནཔཱརམིཏཾ གཙྪ, ཡདི བོདྷིཾ པཏྟུམིཙྪསི.

‘‘ཡཐཱཔི ཀུམྦྷོ སམྤུཎྞོ, ཡསྶ ཀསྶཙི ཨདྷོཀཏོ;

ཝམཏེཝུདཀཾ ནིསྶེསཾ, ན ཏཏྠ པརིརཀྑཏི.

‘‘ཏཐེཝ ཡཱཙཀེ དིསྭཱ, ཧཱིནམུཀྐཊྛམཛ྄ཛྷིམེ;

དདཱཧི དཱནཾ ནིསྶེསཾ, ཀུམྦྷོ ཝིཡ ཨདྷོཀཏོ’’ཏི.

ཨཐསྶ ‘‘ན ཨེཏྟཀེཧེཝ བུདྡྷཀཱརཀདྷམྨེཧི བྷཝིཏབྦ’’ནྟི ཨུཏྟརིཔི ཨུཔདྷཱརཡཏོ དུཏིཡཾ སཱིལཔཱརམིཾ དིསྭཱ ཨེཏདཧོསི – ‘‘སུམེདྷཔཎྜིཏ, ཏྭཾ ཨིཏོ པཊྛཱཡ སཱིལཔཱརམིམྤི པཱུརེཡྻཱསི. ཡཐཱ ཧི ཙམརཱིམིགོ ནཱམ ཛཱིཝིཏམྤི ཨནོལོཀེཏྭཱ ཨཏྟནོ ཝཱལམེཝ རཀྑཏི, ཨེཝཾ ཏྭམྤི ཨིཏོ པཊྛཱཡ ཛཱིཝིཏམྤི ཨནོལོཀེཏྭཱ སཱིལམེཝ རཀྑནྟོ བུདྡྷོ བྷཝིསྶསཱི’’ཏི དུཏིཡཾ སཱིལཔཱརམིཾ དལ༹ྷཾ ཀཏྭཱ ཨདྷིཊྛཱསི. ཏེན ཝུཏྟཾ –

‘‘ན ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

‘‘ཝིཙིནནྟོ ཏདཱདཀྑིཾ, དུཏིཡཾ སཱིལཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ དུཏིཡཾ ཏཱཝ, དལ༹ྷཾ ཀཏྭཱ སམཱདིཡ;

སཱིལཔཱརམིཏཾ གཙྪ, ཡདི བོདྷིཾ པཏྟུམིཙྪསི.

‘‘ཡཐཱཔི ཙམརཱི ཝཱལཾ, ཀིསྨིཉྩི པཊིལགྒིཏཾ;

ཨུཔེཏི མརཎཾ ཏཏྠ, ན ཝིཀོཔེཏི ཝཱལདྷིཾ.

‘‘ཏཐེཝ ¶ ཙཏཱུསུ ¶ , བྷཱུམཱིསུ, སཱིལཱནི པརིཔཱུརཡ;

པརིརཀྑ སབྦདཱ སཱིལཾ, ཙམརཱི ཝིཡ ཝཱལདྷི’’ནྟི.

ཨཐསྶ ¶ ‘‘ན ཨེཏྟཀེཧེཝ བུདྡྷཀཱརཀདྷམྨེཧི བྷཝིཏབྦ’’ནྟི ཨུཏྟརིཔི ཨུཔདྷཱརཡཏོ ཏཏིཡཾ ནེཀྑམྨཔཱརམིཾ དིསྭཱ ཨེཏདཧོསི ‘‘སུམེདྷཔཎྜིཏ, ཏྭཾ ཨིཏོ པཊྛཱཡ ནེཀྑམྨཔཱརམིམྤི པཱུརེཡྻཱསི. ཡཐཱ ཧི ཙིརཾ བནྡྷནཱགཱརེ ཝསམཱནོ པུརིསོ ན ཏཏྠ སིནེཧཾ ཀརོཏི, ཨཐ ཁོ ཨུཀྐཎྛིཏོཡེཝ ཨཝསིཏུཀཱམོ ཧོཏི, ཨེཝམེཝ ཏྭམྤི སབྦབྷཝེ བནྡྷནཱགཱརསདིསེ ཀཏྭཱ སབྦབྷཝེཧི ཨུཀྐཎྛིཏོ མུཙྩིཏུཀཱམོ ཧུཏྭཱ ནེཀྑམྨཱབྷིམུཁོཝ ཧོཧི, ཨེཝཾ བུདྡྷོ བྷཝིསྶསཱི’’ཏི ཏཏིཡཾ ནེཀྑམྨཔཱརམིཾ དལ༹ྷཾ ཀཏྭཱ ཨདྷིཊྛཱསི. ཏེན ཝུཏྟཾ –

‘‘ན ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

‘‘ཝིཙིནནྟོ ཏདཱདཀྑིཾ, ཏཏིཡཾ ནེཀྑམྨཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ ཏཏིཡཾ ཏཱཝ, དལ༹ྷཾ ཀཏྭཱ སམཱདིཡ;

ནེཀྑམྨཔཱརམིཏཾ གཙྪ, ཡདི བོདྷིཾ པཏྟུམིཙྪསི.

‘‘ཡཐཱ ཨནྡུགྷརེ པུརིསོ, ཙིརཝུཏྠོ དུཁཊྚིཏོ;

ན ཏཏྠ རཱགཾ ཛནེཏི, མུཏྟིམེཝ གཝེསཏི.

‘‘ཏཐེཝ ཏྭཾ སབྦབྷཝེ, པསྶ ཨནྡུགྷརེ ཝིཡ;

ནེཀྑམྨཱབྷིམུཁོ ཧོཧི, བྷཝཏོ པརིམུཏྟིཡཱ’’ཏི.

ཨཐསྶ ‘‘ན ཨེཏྟཀེཧེཝ བུདྡྷཀཱརཀདྷམྨེཧི བྷཝིཏབྦ’’ནྟི ཨུཏྟརིཔི ཨུཔདྷཱརཡཏོ ཙཏུཏྠཾ པཉྙཱཔཱརམིཾ དིསྭཱ ཨེཏདཧོསི – ‘‘སུམེདྷཔཎྜིཏ, ཏྭཾ ཨིཏོ པཊྛཱཡ པཉྙཱཔཱརམིམྤི པཱུརེཡྻཱསི. ཧཱིནམཛ྄ཛྷིམུཀྐཊྛེསུ ཀཉྩི ཨཝཛྫེཏྭཱ སབྦེཔི པཎྜིཏེ ཨུཔསངྐམིཏྭཱ པཉྷཾ པུཙྪེཡྻཱསི. ཡཐཱ ཧི པིཎྜཙཱརིཀོ བྷིཀྑུ ཧཱིནཱདིཀེསུ ཀུལེསུ ཀིཉྩི ཨཝཛྫེཏྭཱ པཊིཔཱཊིཡཱ པིཎྜཱཡ ཙརནྟོ ཁིཔྤཾ ཡཱཔནཾ ལབྷཏི, ཨེཝཾ ཏྭམྤི སབྦཔཎྜིཏེ ཨུཔསངྐམིཏྭཱ པཉྷཾ པུཙྪནྟོ བུདྡྷོ བྷཝིསྶསཱི’’ཏི ཙཏུཏྠཾ པཉྙཱཔཱརམིཾ དལ༹ྷཾ ཀཏྭཱ ཨདྷིཊྛཱསི. ཏེན ཝུཏྟཾ –

‘‘ན ¶ ¶ ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

‘‘ཝིཙིནནྟོ ཏདཱདཀྑིཾ, ཙཏུཏྠཾ པཉྙཱཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ ཙཏུཏྠཾ ཏཱཝ, དལ༹ྷཾ ཀཏྭཱ སམཱདིཡ;

པཉྙཱཔཱརམིཏཾ གཙྪ, ཡདི བོདྷིཾ པཏྟུམིཙྪསི.

‘‘ཡཐཱཔི ¶ བྷིཀྑུ བྷིཀྑནྟོ, ཧཱིནམུཀྐཊྛམཛ྄ཛྷིམེ;

ཀུལཱནི ན ཝིཝཛྫེནྟོ, ཨེཝཾ ལབྷཏི ཡཱཔནཾ.

‘‘ཏཐེཝ ཏྭཾ སབྦཀཱལཾ, པརིཔུཙྪནྟོ བུདྷཾ ཛནཾ;

པཉྙཱཔཱརམིཏཾ གནྟྭཱ, སམྦོདྷིཾ པཱཔུཎིསྶསཱི’’ཏི.

ཨཐསྶ ‘‘ན ཨེཏྟཀེཧེཝ བུདྡྷཀཱརཀདྷམྨེཧི བྷཝིཏབྦ’’ནྟི ཨུཏྟརིཔི ཨུཔདྷཱརཡཏོ པཉྩམཾ ཝཱིརིཡཔཱརམིཾ དིསྭཱ ཨེཏདཧོསི – ‘‘སུམེདྷཔཎྜིཏ, ཏྭཾ ཨིཏོ པཊྛཱཡ ཝཱིརིཡཔཱརམིམྤི པཱུརེཡྻཱསི. ཡཐཱ ཧི སཱིཧོ མིགརཱཛཱ སབྦཨིརིཡཱཔཐེསུ དལ༹ྷཝཱིརིཡོ ཧོཏི, ཨེཝཾ ཏྭམྤི སབྦབྷཝེསུ སབྦཨིརིཡཱཔཐེསུ དལ༹ྷཝཱིརིཡོ ཨནོལཱིནཝཱིརིཡོ སམཱནོ བུདྡྷོ བྷཝིསྶསཱི’’ཏི པཉྩམཾ ཝཱིརིཡཔཱརམིཾ དལ༹ྷཾ ཀཏྭཱ ཨདྷིཊྛཱསི. ཏེན ཝུཏྟཾ –

‘‘ན ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

‘‘ཝིཙིནནྟོ ཏདཱདཀྑིཾ, པཉྩམཾ ཝཱིརིཡཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ པཉྩམཾ ཏཱཝ, དལ༹ྷཾ ཀཏྭཱ སམཱདིཡ;

ཝཱིརིཡཔཱརམིཏཾ གཙྪ, ཡདི བོདྷིཾ པཏྟུམིཙྪསི.

‘‘ཡཐཱཔི ¶ སཱིཧོ མིགརཱཛཱ, ནིསཛྫཊྛཱནཙངྐམེ;

ཨལཱིནཝཱིརིཡོ ཧོཏི, པགྒཧིཏམནོ སདཱ.

‘‘ཏཐེཝ ཏྭཾ སབྦབྷཝེ, པགྒཎྷ ཝཱིརིཡཾ དལ༹ྷཾ;

ཝཱིརིཡཔཱརམིཏཾ གནྟྭཱ, སམྦོདྷིཾ པཱཔུཎིསྶསཱི’’ཏི.

ཨཐསྶ ‘‘ན ཨེཏྟཀེཧེཝ བུདྡྷཀཱརཀདྷམྨེཧི བྷཝིཏབྦ’’ནྟི ཨུཏྟརིཔི ཨུཔདྷཱརཡཏོ ཚཊྛཾ ཁནྟིཔཱརམིཾ དིསྭཱ ཨེཏདཧོསི – ‘‘སུམེདྷཔཎྜིཏ, ཏྭཾ ཨིཏོ ¶ པཊྛཱཡ ཁནྟིཔཱརམིམྤི པཱུརེཡྻཱསི. སམྨཱནནེཔི ཨཝམཱནནེཔི ཁམོཝ བྷཝེཡྻཱསི. ཡཐཱ ཧི པཐཝིཡཾ ནཱམ སུཙིམྤི པཀྑིཔནྟི ཨསུཙིམྤི, ན ཏེན པཐཝཱི སིནེཧཾ, ན པཊིགྷཾ ཀརོཏི, ཁམཏི སཧཏི ཨདྷིཝཱསེཏིཡེཝ, ཨེཝཾ ཏྭམྤི སམྨཱནནཱཝམཱནནཀྑམོཝ སམཱནོ བུདྡྷོ བྷཝིསྶསཱི’’ཏི ཚཊྛཾ ཁནྟིཔཱརམིཾ དལ༹ྷཾ ཀཏྭཱ ཨདྷིཊྛཱསི. ཏེན ཝུཏྟཾ –

‘‘ན ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

‘‘ཝིཙིནནྟོ ཏདཱདཀྑིཾ, ཚཊྛམཾ ཁནྟིཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ ཚཊྛམཾ ཏཱཝ, དལ༹ྷཾ ཀཏྭཱ སམཱདིཡ;

ཏཏྠ ཨདྭེཛ྄ཛྷམཱནསོ, སམྦོདྷིཾ པཱཔུཎིསྶསི.

‘‘ཡཐཱཔི ¶ པཐཝཱི ནཱམ, སུཙིམྤི ཨསུཙིམྤི ཙ;

སབྦཾ སཧཏི ནིཀྑེཔཾ, ན ཀརོཏི པཊིགྷཾ ཏཡཱ.

‘‘ཏཐེཝ ཏྭམྤི སབྦེསཾ, སམྨཱནཱཝམཱནཀྑམོ;

ཁནྟིཔཱརམིཏཾ གནྟྭཱ, སམྦོདྷིཾ པཱཔུཎིསྶསཱི’’ཏི.

ཨཐསྶ ‘‘ན ཨེཏྟཀེཧེཝ བུདྡྷཀཱརཀདྷམྨེཧི བྷཝིཏབྦ’’ནྟི ཨུཏྟརིཔི ཨུཔདྷཱརཡཏོ སཏྟམཾ སཙྩཔཱརམིཾ དིསྭཱ ཨེཏདཧོསི – ‘‘སུམེདྷཔཎྜིཏ, ཏྭཾ ཨིཏོ པཊྛཱཡ སཙྩཔཱརམིམྤི པཱུརེཡྻཱསི. ཨསནིཡཱ ¶ མཏྠཀེ པཏམཱནཱཡཔི དྷནཱདཱིནཾ ཨཏྠཱཡ ཚནྡཱདིཝསེན སམྤཛཱནམུསཱཝཱདཾ ནཱམ མཱཀཱསི. ཡཐཱ ཧི ཨོསདྷིཏཱརཀཱ ནཱམ སབྦཨུཏཱུསུ ཨཏྟནོ གམནཝཱིཐིཾ ཛཧིཏྭཱ ཨཉྙཱཡ ཝཱིཐིཡཱ ན གཙྪཏི, སཀཝཱིཐིཡཱཝ གཙྪཏི, ཨེཝམེཝ ཏྭམྤི སཙྩཾ པཧཱཡ མུསཱཝཱདཾ ནཱམ ཨཀརོནྟོཡེཝ བུདྡྷོ བྷཝིསྶསཱི’’ཏི སཏྟམཾ སཙྩཔཱརམིཾ དལ༹ྷཾ ཀཏྭཱ ཨདྷིཊྛཱསི. ཏེན ཝུཏྟཾ –

‘‘ན ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

‘‘ཝིཙིནནྟོ ཏདཱདཀྑིཾ, སཏྟམཾ སཙྩཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ¶ ཏྭཾ སཏྟམཾ ཏཱཝ, དལ༹ྷཾ ཀཏྭཱ སམཱདིཡ;

ཏཏྠ ཨདྭེཛ྄ཛྷཝཙནོ, སམྦོདྷིཾ པཱཔུཎིསྶསི.

‘‘ཡཐཱཔི ཨོསདྷཱི ནཱམ, ཏུལཱབྷཱུཏཱ སདེཝཀེ;

སམཡེ ཨུཏུཝསྶེ ཝཱ, ན ཝོཀྐམཏི ཝཱིཐིཏོ.

‘‘ཏཐེཝ ཏྭམྤི སཙྩེསུ, མཱ ཝོཀྐམསི ཝཱིཐིཏོ;

སཙྩཔཱརམིཏཾ གནྟྭཱ, སམྦོདྷིཾ པཱཔུཎིསྶསཱི’’ཏི.

ཨཐསྶ ‘‘ན ཨེཏྟཀེཧེཝ བུདྡྷཀཱརཀདྷམྨེཧི བྷཝིཏབྦ’’ནྟི ཨུཏྟརིཔི ཨུཔདྷཱརཡཏོ ཨཊྛམཾ ཨདྷིཊྛཱནཔཱརམིཾ དིསྭཱ ཨེཏདཧོསི – ‘‘སུམེདྷཔཎྜིཏ, ཏྭཾ ཨིཏོ པཊྛཱཡ ཨདྷིཊྛཱནཔཱརམིམྤི པཱུརེཡྻཱསི. ཡཾ ཨདྷིཊྛཱསི, ཏསྨིཾ ཨདྷིཊྛཱནེ ནིཙྩལོ བྷཝེཡྻཱསི. ཡཐཱ ཧི པབྦཏོ ནཱམ སབྦདིསཱསུ ཝཱཏེཧི པཧཊོཔི ན ཀམྤཏི ན ཙལཏི, ཨཏྟནོ ཋཱནེཡེཝ ཏིཊྛཏི, ཨེཝམེཝ ཏྭམྤི ཨཏྟནོ ཨདྷིཊྛཱནེ ནིཙྩལོ ཧོནྟོཝ བུདྡྷོ བྷཝིསྶསཱི’’ཏི ཨཊྛམཾ ཨདྷིཊྛཱནཔཱརམིཾ དལ༹ྷཾ ཀཏྭཱ ཨདྷིཊྛཱསི. ཏེན ཝུཏྟཾ –

‘‘ན ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

‘‘ཝིཙིནནྟོ ¶ ¶ ཏདཱདཀྑིཾ, ཨཊྛམཾ ཨདྷིཊྛཱནཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ ཨཊྛམཾ ཏཱཝ, དལ༹ྷཾ ཀཏྭཱ སམཱདིཡ;

ཏཏྠ ཏྭཾ ཨཙལོ ཧུཏྭཱ, སམྦོདྷིཾ པཱཔུཎིསྶསི.

‘‘ཡཐཱཔི པབྦཏོ སེལོ, ཨཙལོ སུཔྤཏིཊྛིཏོ;

ན ཀམྤཏི བྷུསཝཱཏེཧི, སཀཊྛཱནེཝ ཏིཊྛཏི.

‘‘ཏཐེཝ ཏྭམྤི ཨདྷིཊྛཱནེ, སབྦདཱ ཨཙལོ བྷཝ;

ཨདྷིཊྛཱནཔཱརམིཏཾ གནྟྭཱ, སམྦོདྷིཾ པཱཔུཎིསྶསཱི’’ཏི.

ཨཐསྶ ‘‘ན ཨེཏྟཀེཧེཝ བུདྡྷཀཱརཀདྷམྨེཧི བྷཝིཏབྦ’’ནྟི ཨུཏྟརིཔི ཨུཔདྷཱརཡཏོ ནཝམཾ མེཏྟཱཔཱརམིཾ དིསྭཱ ཨེཏདཧོསི – ‘‘སུམེདྷཔཎྜིཏ, ཏྭཾ ཨིཏོ པཊྛཱཡ ནཝམཾ མེཏྟཱཔཱརམིམྤི པཱུརེཡྻཱསི. ཨཧིཏེསུཔི ཧིཏེསུཔི ཨེཀཙིཏྟོ བྷཝེཡྻཱསི. ཡཐཱ ཧི ཨུདཀཾ ནཱམ པཱཔཛནསྶཱཔི ཀལྱཱཎཛནསྶཱཔི སཱིཏིབྷཱཝཾ ཨེཀསདིསཾ ཀཏྭཱ ཕརཏི, ཨེཝམེཝ ཏྭམྤི སབྦསཏྟེསུ ¶ མེཏྟཙིཏྟེན ཨེཀཙིཏྟོཝ ཧོནྟོ བུདྡྷོ བྷཝིསྶསཱི’’ཏི ནཝམཾ མེཏྟཱཔཱརམིཾ དལ༹ྷཾ ཀཏྭཱ ཨདྷིཊྛཱསི. ཏེན ཝུཏྟཾ –

‘‘ན ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

‘‘ཝིཙིནནྟོ ཏདཱདཀྑིཾ, ནཝམཾ མེཏྟཱཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ ནཝམཾ ཏཱཝ, དལ༹ྷཾ ཀཏྭཱ སམཱདིཡ;

མེཏྟཱཡ ཨསམོ ཧོཧི, ཡདི བོདྷིཾ པཏྟུམིཙྪསི.

‘‘ཡཐཱཔི ཨུདཀཾ ནཱམ, ཀལྱཱཎེ པཱཔཀེ ཛནེ;

སམཾ ཕརཏི སཱིཏེན, པཝཱཧེཏི རཛོམལཾ.

‘‘ཏཐེཝ ¶ ཏྭམྤི ཨཧིཏཧིཏེ, སམཾ མེཏྟཱཡ བྷཱཝཡ;

མེཏྟཱཔཱརམིཏཾ གནྟྭཱ, སམྦོདྷིཾ པཱཔུཎིསྶསཱི’’ཏི.

ཨཐསྶ ‘‘ན ཨེཏྟཀེཧེཝ བུདྡྷཀཱརཀདྷམྨེཧི བྷཝིཏབྦ’’ནྟི ཨུཏྟརིཔི ཨུཔདྷཱརཡཏོ དསམཾ ཨུཔེཀྑཱཔཱརམིཾ དིསྭཱ ཨེཏདཧོསི – ‘‘སུམེདྷཔཎྜིཏ, ཏྭཾ ཨིཏོ པཊྛཱཡ ཨུཔེཀྑཱཔཱརམིམྤི པཱུརེཡྻཱསི. སུཁེཔི དུཀྑེཔི མཛ྄ཛྷཏྟོཝ བྷཝེཡྻཱསི. ཡཐཱ ཧི པཐཝཱི ནཱམ སུཙིམྤི ཨསུཙིམྤི པཀྑིཔྤམཱནཱ མཛ྄ཛྷཏྟཱཝ ཧོཏི, ཨེཝམེཝ ཏྭམྤི སུཁདུཀྑེསུ མཛ྄ཛྷཏྟོཝ ཧོནྟོ བུདྡྷོ བྷཝིསྶསཱི’’ཏི དསམཾ ཨུཔེཀྑཱཔཱརམིཾ དལ༹ྷཾ ཀཏྭཱ ཨདྷིཊྛཱསི. ཏེན ཝུཏྟཾ –

‘‘ན ¶ ཧེཏེ ཨེཏྟཀཱཡེཝ, བུདྡྷདྷམྨཱ བྷཝིསྶརེ;

ཨཉྙེཔི ཝིཙིནིསྶཱམི, ཡེ དྷམྨཱ བོདྷིཔཱཙནཱ.

‘‘ཝིཙིནནྟོ ཏདཱདཀྑིཾ, དསམཾ ཨུཔེཀྑཱཔཱརམིཾ;

པུབྦཀེཧི མཧེསཱིཧི, ཨཱསེཝིཏནིསེཝིཏཾ.

‘‘ཨིམཾ ཏྭཾ དསམཾ ཏཱཝ, དལ༹ྷཾ ཀཏྭཱ སམཱདིཡ;

ཏུལཱབྷཱུཏོ དལ༹ྷོ ཧུཏྭཱ, སམྦོདྷིཾ པཱཔུཎིསྶསི.

‘‘ཡཐཱཔི པཐཝཱི ནཱམ, ནིཀྑིཏྟཾ ཨསུཙིཾ སུཙིཾ;

ཨུཔེཀྑཏི ཨུབྷོཔེཏེ, ཀོཔཱནུནཡཝཛྫིཏཱ.

‘‘ཏཐེཝ ཏྭམྤི སུཁདུཀྑེ, ཏུལཱབྷཱུཏོ སདཱ བྷཝ;

ཨུཔེཀྑཱཔཱརམིཏཾ གནྟྭཱ, སམྦོདྷིཾ པཱཔུཎིསྶསཱི’’ཏི.

ཏཏོ ¶ ཙིནྟེསི – ‘‘ཨིམསྨིཾ ལོཀེ བོདྷིསཏྟེཧི པཱུརེཏབྦཱ བོདྷིཔརིཔཱཙནཱ བུདྡྷཀཱརཀདྷམྨཱ ཨེཏྟཀཱཡེཝ, དས པཱརམིཡོ ཋཔེཏྭཱ ཨཉྙེ ནཏྠི, ཨིམཱཔི དས པཱརམིཡོ ཨུདྡྷཾ ཨཱཀཱསེཔི ནཏྠི, ཧེཊྛཱ པཐཝིཡམྤི, པུརཏྠིམཱདཱིསུ དིསཱསུཔི ནཏྠི, མཡ྄ཧམེཝ པན ཧདཡམཾསབྦྷནྟརེ པཏིཊྛིཏཱ’’ཏི. ཨེཝཾ ཏཱསཾ ཧདཡེ པཏིཊྛིཏབྷཱཝཾ དིསྭཱ སབྦཱཔི ཏཱ དལ༹ྷཾ ཀཏྭཱ ཨདྷིཊྛཱཡ པུནཔྤུནཾ སམྨསནྟོ ཨནུལོམཔཊིལོམཾ སམྨསཏི, པརིཡནྟེ གཧེཏྭཱ ཨཱདིཾ པཱཔེཏི, ཨཱདིམྷི གཧེཏྭཱ པརིཡནྟེ ཋཔེཏི, མཛ྄ཛྷེ གཧེཏྭཱ ཨུབྷཏོ ཨོསཱཔེཏི, ཨུབྷཏོ ཀོཊཱིསུ ¶ ཧེཏྭཱ མཛ྄ཛྷེ ཨོསཱཔེཏི. བཱཧིརཀབྷཎྜཔརིཙྩཱགོ དཱནཔཱརམཱི ནཱམ, ཨངྒཔརིཙྩཱགོ དཱནཨུཔཔཱརམཱི ནཱམ, ཛཱིཝིཏཔརིཙྩཱགོ དཱནཔརམཏྠཔཱརམཱི ནཱམཱཏི དས པཱརམིཡོ དས ཨུཔཔཱརམིཡོ དས པརམཏྠཔཱརམིཡོ ཡནྟཏེལཾ ཝིནིཝཊྚེནྟོ ཝིཡ མཧཱམེརུཾ མཏྠཾ ཀཏྭཱ ཙཀྐཝཱལ༹མཧཱསམུདྡཾ ཨཱལུལེ༹ནྟོ ཝིཡ ཙ སམྨསི. ཏསྶེཝཾ དས པཱརམིཡོ སམྨསནྟསྶ དྷམྨཏེཛེན ཙཏུནཧུཏཱདྷིཀདྭིཡོཛནསཏསཧསྶབཧལཱ ཨཡཾ མཧཱཔཐཝཱི ཧཏྠིནཱ ཨཀྐནྟནལ༹ཀལཱཔོ ཝིཡ, པཱིལི༹ཡམཱནཾ ཨུཙྪུཡནྟཾ ཝིཡ ཙ མཧཱཝིརཝཾ ཝིརཝམཱནཱ སངྐམྤི སམྤཀམྤི སམྤཝེདྷི, ཀུལཱལཙཀྐཾ ཝིཡ ཏེལཡནྟཙཀྐཾ ཝིཡ ཙ པརིབྦྷམི. ཏེན ཝུཏྟཾ –

‘‘ཨེཏྟཀཱཡེཝ ཏེ ལོཀེ, ཡེ དྷམྨཱ བོདྷིཔཱཙནཱ;

ཏཏུདྡྷཾ ནཏྠི ཨཉྙཏྲ, དལ༹ྷཾ ཏཏྠ པཏིཊྛཧ.

‘‘ཨིམེ དྷམྨེ སམྨསཏོ, སབྷཱཝསརསལཀྑཎེ;

དྷམྨཏེཛེན ཝསུདྷཱ, དསསཧསྶཱི པཀམྤཐ.

‘‘ཙལཏཱི རཝཏཱི པཐཝཱི, ཨུཙྪུཡནྟཾཝ པཱིལི༹ཏཾ;

ཏེལཡནྟེ ཡཐཱ ཙཀྐཾ, ཨེཝཾ ཀམྤཏི མེདནཱི’’ཏི.

མཧཱཔཐཝིཡཱ ¶ ཀམྤམཱནཱཡ རམྨནགརཝཱསིནོ སཎྛཱཏུཾ ཨསཀྐོནྟཱ ཡུགནྟཝཱཏབྦྷཱཧཏཱ མཧཱསཱལཱ ཝིཡ མུཙྪིཏམུཙྪིཏཱཝ པཔཏིཾསུ, གྷཊཱདཱིནི ¶ ཀུལཱལབྷཱཛནཱནི པཝཊྚནྟཱནི ཨཉྙམཉྙཾ པཧརནྟཱནི ཙུཎྞཝིཙུཎྞཱནི ཨཧེསུཾ. མཧཱཛནོ བྷཱིཏཏསིཏོ སཏྠཱརཾ ཨུཔསངྐམིཏྭཱ ‘‘ཀིཾ ནུ ཁོ བྷགཝཱ ནཱགཱཝཊྚོ ཨཡཾ བྷཱུཏཡཀྑདེཝཏཱསུ ཨཉྙཏརཱཝཊྚོཏི ན ཧི མཡཾ ཨེཏཾ ཛཱནཱམ, ཨཔིཙ ཁོ སབྦོཔི ཨཡཾ མཧཱཛནོ ཨུཔདྡུཏོ, ཀིཾ ནུ ཁོ ཨིམསྶ ལོཀསྶ པཱཔཀཾ བྷཝིསྶཏི, ཨུདཱཧུ ཀལྱཱཎཾ, ཀཐེཐ ནོ ཨེཏཾ ཀཱརཎ’’ནྟི ཨཱཧ. ཨཐ སཏྠཱ ཏེསཾ ཀཐཾ སུཏྭཱ ‘‘ཏུམྷེ མཱ བྷཱཡཐ མཱ ཙིནྟཡིཏྠ, ནཏྠི ཝོ ཨིཏོནིདཱནཾ བྷཡཾ. ཡོ སོ མཡཱ ཨཛྫ སུམེདྷཔཎྜིཏོ ‘ཨནཱགཏེ གོཏམོ ནཱམ བུདྡྷོ བྷཝིསྶཏཱི’ཏི བྱཱཀཏོ, སོ དས པཱརམིཡོ སམྨསཏི, ཏསྶ དས པཱརམིཡོ སམྨསནྟསྶ ཝིལོལེ༹ནྟསྶ དྷམྨཏེཛེན སཀལདསསཧསྶིལོཀདྷཱཏུ ཨེཀཔྤཧཱརེན ཀམྤཏི, ཙེཝ, རཝཏི ཙཱ’’ཏི ཨཱཧ. ཏེན ཝུཏྟཾ –

‘‘ཡཱཝཏཱ པརིསཱ ཨཱསི, བུདྡྷསྶ པརིཝེསནེ;

པཝེདྷམཱནཱ སཱ ཏཏྠ, མུཙྪིཏཱ སེསི བྷཱུམིཡཾ.

‘‘གྷཊཱནེཀསཧསྶཱནི ¶ , ཀུམྦྷཱིནཉྩ སཏཱ བཧཱུ;

སཉྩུཎྞམཐིཏཱ ཏཏྠ, ཨཉྙམཉྙཾ པགྷཊྚིཏཱ.

‘‘ཨུབྦིགྒཱ ཏསིཏཱ བྷཱིཏཱ, བྷནྟཱ བྱདྷིཏམཱནསཱ;

མཧཱཛནཱ སམཱགམྨ, དཱིཔངྐརམུཔཱགམུཾ.

‘ཀིཾ བྷཝིསྶཏི ལོཀསྶ, ཀལྱཱཎམཐ པཱཔཀཾ;

སབྦོ ཨུཔདྡུཏོ ལོཀོ, ཏཾ ཝིནོདེཧི ཙཀྑུམ’.

‘‘ཏེསཾ ཏདཱ སཉྙཱཔེསི, དཱིཔངྐརོ མཧཱམུནི;

ཝིསྶཏྠཱ ཧོཐ མཱ བྷཱཐ, ཨིམསྨིཾ པཐཝིཀམྤནེ.

‘‘ཡམཧཾ ཨཛྫ བྱཱཀཱསིཾ, བུདྡྷོ ལོཀེ བྷཝིསྶཏི;

ཨེསོ སམྨསཏི དྷམྨཾ, པུབྦཀཾ ཛིནསེཝིཏཾ.

‘‘ཏསྶ སམྨསཏོ དྷམྨཾ, བུདྡྷབྷཱུམིཾ ཨསེསཏོ;

ཏེནཱཡཾ ཀམྤིཏཱ པཐཝཱི, དསསཧསྶཱི སདེཝཀེ’’ཏི.

མཧཱཛནོ ཏཐཱགཏསྶ ཝཙནཾ སུཏྭཱ ཧཊྛཏུཊྛོ མཱལཱགནྡྷཝིལེཔནཾ ཨཱདཱཡ རམྨནགརཱ ནིཀྑམིཏྭཱ བོདྷིསཏྟཾ ཨུཔསངྐམིཏྭཱ མཱལཱདཱིཧི པཱུཛེཏྭཱ ¶ ཝནྡིཏྭཱ པདཀྑིཎཾ ཀཏྭཱ རམྨནགརམེཝ པཱཝིསི. བོདྷིསཏྟོཔི དས པཱརམིཡོ སམྨསིཏྭཱ ཝཱིརིཡཾ དལ༹ྷཾ ཀཏྭཱ ཨདྷིཊྛཱཡ ནིསིནྣཱསནཱ ཝུཊྛཱསི. ཏེན ཝུཏྟཾ –

‘‘བུདྡྷསྶ ¶ ཝཙནཾ སུཏྭཱ, མནོ ནིབྦཱཡི ཏཱཝདེ;

སབྦེ མཾ ཨུཔསངྐམྨ, པུནཱཔི ཨབྷིཝནྡིསུཾ.

‘‘སམཱདིཡིཏྭཱ བུདྡྷགུཎཾ, དལ༹ྷཾ ཀཏྭཱན མཱནསཾ;

དཱིཔངྐརཾ ནམསྶིཏྭཱ, ཨཱསནཱ ཝུཊྛཧིཾ ཏདཱ’’ཏི.

ཨཐ བོདྷིསཏྟཾ ཨཱསནཱ ཝུཊྛཧནྟཾ སཀལདསསཧསྶཙཀྐཝཱལ༹དེཝཏཱ སནྣིཔཏིཏྭཱ དིབྦེཧི མཱལཱགནྡྷེཧི ¶ པཱུཛེཏྭཱ ཝནྡིཏྭཱ ‘‘ཨཡྻ སུམེདྷཏཱཔས, ཏཡཱ ཨཛྫ དཱིཔངྐརདསབལསྶ པཱདམཱུལེ མཧཏཱི པཏྠནཱ པཏྠིཏཱ, སཱ ཏེ ཨནནྟརཱཡེན སམིཛ྄ཛྷཏུ, མཱ ཏེ བྷཡཾ ཝཱ ཚམྦྷིཏཏྟཾ ཝཱ ཨཧོསི, སརཱིརེ ཨཔྤམཏྟཀོཔི རོགོ མཱ ཨུཔྤཛྫི, ཁིཔྤཾ པཱརམིཡོ པཱུརེཏྭཱ སམྨཱསམྦོདྷིཾ པཊིཝིཛ྄ཛྷ. ཡཐཱ པུཔྥཱུཔགཕལཱུཔགཱ རུཀྑཱ སམཡེ པུཔྥནྟི ཙེཝ ཕལནྟི ཙ, ཏཐེཝ ཏྭམྤི སམཡཾ ཨནཏིཀྐམིཏྭཱ ཁིཔྤཾ སམྦོདྷིམུཏྟམཾ ཕུསསྶཱུ’’ཏིཨཱདཱིནི ཐུཏིམངྒལཱནི པཡིརུདཱཧཾསུ, ཨེཝཾ པཡིརུདཱཧིཏྭཱ ཨཏྟནོ ཨཏྟནོ དེཝཊྛཱནམེཝ ཨགམཾསུ. བོདྷིསཏྟོཔི དེཝཏཱཧི ཨབྷིཏྠུཏོ ‘‘ཨཧཾ དས པཱརམིཡོ པཱུརེཏྭཱ ཀཔྤསཏསཧསྶཱདྷིཀཱནཾ ཙཏུནྣཾ ཨསངྑྱེཡྻཱནཾ མཏྠཀེ བུདྡྷོ བྷཝིསྶཱམཱི’’ཏི ཝཱིརིཡཾ དལ༹ྷཾ ཀཏྭཱ ཨདྷིཊྛཱཡ ནབྷཾ ཨབྦྷུགྒནྟྭཱ ཧིམཝནྟམེཝ ཨགམཱསི. ཏེན ཝུཏྟཾ –

‘‘དིབྦཾ མཱནུསཀཾ པུཔྥཾ, དེཝཱ མཱནུསཀཱ ཨུབྷོ;

སམོཀིརནྟི པུཔྥེཧི, ཝུཊྛཧནྟསྶ ཨཱསནཱ.

‘‘ཝེདཡནྟི ཙ ཏེ སོཏྠིཾ, དེཝཱ མཱནུསཀཱ ཨུབྷོ;

མཧནྟཾ པཏྠིཏཾ ཏུཡ྄ཧཾ, ཏཾ ལབྷསྶུ ཡཐིཙྪིཏཾ.

‘‘སབྦཱིཏིཡོ ཝིཝཛྫནྟུ, སོཀོ རོགོ ཝིནསྶཏུ;

མཱ ཏེ བྷཝནྟྭནྟརཱཡཱ, ཕུས ཁིཔྤཾ བོདྷིམུཏྟམཾ.

‘‘ཡཐཱཔི སམཡེ པཏྟེ, པུཔྥནྟི པུཔྥིནོ དུམཱ;

ཏཐེཝ ཏྭཾ མཧཱཝཱིར, བུདྡྷཉཱཎེན པུཔྥསྶུ.

‘‘ཡཐཱ ¶ ཡེ ཀེཙི སམྦུདྡྷཱ, པཱུརཡུཾ དས པཱརམཱི;

ཏཐེཝ ཏྭཾ མཧཱཝཱིར, པཱུརཡ དས པཱརམཱི.

‘‘ཡཐཱ ཡེ ཀེཙི སམྦུདྡྷཱ, བོདྷིམཎྜམྷི བུཛ྄ཛྷརེ;

ཏཐེཝ ཏྭཾ མཧཱཝཱིར, བུཛ྄ཛྷསྶུ ཛིནབོདྷིཡཾ.

‘‘ཡཐཱ ཡེ ཀེཙི སམྦུདྡྷཱ, དྷམྨཙཀྐཾ པཝཏྟཡུཾ;

ཏཐེཝ ཏྭཾ མཧཱཝཱིར, དྷམྨཙཀྐཾ པཝཏྟཡ.

‘‘པུཎྞམཱཡེ ¶ ཡཐཱ ཙནྡོ, པརིསུདྡྷོ ཝིརོཙཏི;

ཏཐེཝ ཏྭཾ པུཎྞམནོ, ཝིརོཙ དསསཧསྶིཡཾ.

‘‘རཱཧུམུཏྟོ ¶ ཡཐཱ སཱུརིཡོ, ཏཱཔེན ཨཏིརོཙཏི;

ཏཐེཝ ལོཀཱ མུཙྩིཏྭཱ, ཝིརོཙ སིརིཡཱ ཏུཝཾ.

‘‘ཡཐཱ ཡཱ ཀཱཙི ནདིཡོ, ཨོསརནྟི མཧོདདྷིཾ;

ཨེཝཾ སདེཝཀཱ ལོཀཱ, ཨོསརནྟུ ཏཝནྟིཀེ.

‘‘ཏེཧི ཐུཏཔྤསཏྠོ སོ, དས དྷམྨེ སམཱདིཡ;

ཏེ དྷམྨེ པརིཔཱུརེནྟོ, པཝནཾ པཱཝིསཱི ཏདཱ’’ཏི.

སུམེདྷཀཐཱ ནིཊྛིཏཱ.

རམྨནགརཝཱསིནོཔི ཁོ ནགརཾ པཝིསིཏྭཱ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ ཨདཾསུ. སཏྠཱ ཏེསཾ དྷམྨཾ དེསེཏྭཱ མཧཱཛནཾ སརཎཱདཱིསུ པཏིཊྛཱཔེཏྭཱ རམྨནགརམྷཱ ནིཀྑམིཏྭཱ ཏཏོ ཨུདྡྷམྤི ཡཱཝཏཱཡུཀཾ ཏིཊྛནྟོ སབྦཾ བུདྡྷཀིཙྩཾ ཀཏྭཱ ཨནུཀྐམེན ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡི. ཏཏྠ ཡཾ ཝཏྟབྦཾ, ཏཾ སབྦཾ བུདྡྷཝཾསེ ཝུཏྟནཡེནེཝ ཝེདིཏབྦཾ. ཝུཏྟཉྷི ཏཏྠ –

‘‘ཏདཱ ཏེ བྷོཛཡིཏྭཱན, སསངྒྷཾ ལོཀནཱཡཀཾ;

ཨུཔགཙྪུཾ སརཎཾ ཏསྶ, དཱིཔངྐརསྶ སཏྠུནོ.

‘‘སརཎཱགམནེ ཀཉྩི, ནིཝེསེཏི ཏཐཱགཏོ;

ཀཉྩི པཉྩསུ སཱིལེསུ, སཱིལེ དསཝིདྷེ པརཾ.

‘‘ཀསྶཙི ¶ དེཏི སཱམཉྙཾ, ཙཏུརོ ཕལམུཏྟམེ;

ཀསྶཙི ཨསམེ དྷམྨེ, དེཏི སོ པཊིསམྦྷིདཱ.

‘‘ཀསྶཙི ¶ ཝརསམཱཔཏྟིཡོ, ཨཊྛ དེཏི ནརཱསབྷོ;

ཏིསྶོ ཀསྶཙི ཝིཛྫཱཡོ, ཚལ༹བྷིཉྙཱ པཝེཙྪཏི.

‘‘ཏེན ཡོགེན ཛནཀཱཡཾ, ཨོཝདཏི མཧཱམུནི;

ཏེན ཝིཏྠཱརིཀཾ ཨཱསི, ལོཀནཱཐསྶ སཱསནཾ.

‘‘མཧཱཧནུསབྷཀྑནྡྷོ, དཱིཔངྐརསནཱམཀོ;

བཧཱུ ཛནེ ཏཱརཡཏི, པརིམོཙེཏི དུགྒཏིཾ.

‘‘བོདྷནེཡྻཾ ཛནཾ དིསྭཱ, སཏསཧསྶེཔི ཡོཛནེ;

ཁཎེན ཨུཔགནྟྭཱན, བོདྷེཏི ཏཾ མཧཱམུནི.

‘‘པཋམཱབྷིསམཡེ བུདྡྷོ, ཀོཊིསཏམབོདྷཡི;

དུཏིཡཱབྷིསམཡེ ནཱཐོ, ནཝུཏིཀོཊིམབོདྷཡི.

‘‘ཡདཱ ཙ དེཝབྷཝནམྷི, བུདྡྷོ དྷམྨམདེསཡི;

ནཝུཏིཀོཊིསཧསྶཱནཾ, ཏཏིཡཱབྷིསམཡོ ཨཧུ.

‘‘སནྣིཔཱཏཱ ¶ ཏཡོ ཨཱསུཾ, དཱིཔངྐརསྶ སཏྠུནོ;

ཀོཊིསཏསཧསྶཱནཾ, པཋམོ ཨཱསི སམཱགམོ.

‘‘པུན ནཱརདཀཱུཊམྷི, པཝིཝེཀགཏེ ཛིནེ;

ཁཱིཎཱསཝཱ ཝཱིཏམལཱ, སམིཾསུ སཏཀོཊིཡོ.

‘‘ཡམྷི ཀཱལེ མཧཱཝཱིརོ, སུདསྶནསིལུཙྩཡེ;

ནཝུཏིཀོཊིསཧསྶེཧི, པཝཱརེསི མཧཱམུནི.

‘‘ཨཧཾ ཏེན སམཡེན, ཛཊིལོ ཨུགྒཏཱཔནོ;

ཨནྟལིཀྑམྷི ཙརཎོ, པཉྩཱབྷིཉྙཱསུ པཱརགཱུ.

‘‘དསཝཱིསསཧསྶཱནཾ ¶ , དྷམྨཱབྷིསམཡོ ཨཧུ;

ཨེཀདྭིནྣཾ ཨབྷིསམཡཱ, གཎནཱཏོ ཨསངྑིཡཱ.

‘‘ཝིཏྠཱརིཀཾ བཱཧུཛཉྙཾ, ཨིདྡྷཾ ཕཱིཏཾ ཨཧུ ཏདཱ;

དཱིཔངྐརསྶ བྷགཝཏོ, སཱསནཾ སུཝིསོདྷིཏཾ.

‘‘ཙཏྟཱརི ¶ སཏསཧསྶཱནི, ཚལ༹བྷིཉྙཱ མཧིདྡྷིཀཱ;

དཱིཔངྐརཾ ལོཀཝིདུཾ, པརིཝཱརེནྟི སབྦདཱ.

‘‘ཡེ ཀེཙི ཏེན སམཡེན, ཛཧནྟི མཱནུསཾ བྷཝཾ;

ཨཔཏྟམཱནསཱ སེཀྑཱ, གརཧིཏཱ བྷཝནྟི ཏེ.

‘‘སུཔུཔྥིཏཾ པཱཝཙནཾ, ཨརཧནྟེཧི ཏཱདིཧི;

ཁཱིཎཱསཝེཧི ཝིམལེཧི, ཨུཔསོབྷཏི སདེཝཀེ.

‘‘ནགརཾ རམྨཝཏཱི ནཱམ, སུདེཝོ ནཱམ ཁཏྟིཡོ;

སུམེདྷཱ ནཱམ ཛནིཀཱ, དཱིཔངྐརསྶ སཏྠུནོ.

‘‘སུམངྒལོ ཙ ཏིསྶོ ཙ, ཨཧེསུཾ ཨགྒསཱཝཀཱ;

སཱགཏོ ནཱམུཔཊྛཱཀོ, དཱིཔངྐརསྶ སཏྠུནོ.

‘‘ནནྡཱ ཙེཝ སུནནྡཱ ཙ, ཨཧེསུཾ ཨགྒསཱཝིཀཱ;

བོདྷི ཏསྶ བྷགཝཏོ, པིཔྥལཱིཏི པཝུཙྩཏི.

‘‘ཨསཱིཏིཧཏྠམུབྦེདྷོ, དཱིཔངྐརོ མཧཱམུནི;

སོབྷཏི དཱིཔརུཀྑོཝ, སཱལརཱཛཱཝ ཕུལླིཏོ.

‘‘སཏསཧསྶཝསྶཱནི, ཨཱཡུ ཏསྶ མཧེསིནོ;

ཏཱཝཏཱ ཏིཊྛམཱནོ སོ, ཏཱརེསི ཛནཏཾ བཧུཾ.

‘‘ཛོཏཡིཏྭཱན ¶ སདྡྷམྨཾ, སནྟཱརེཏྭཱ མཧཱཛནཾ;

ཛལིཏྭཱ ཨགྒིཁནྡྷོཝ, ནིབྦུཏོ སོ སསཱཝཀོ.

‘‘སཱ ཙ ཨིདྡྷི སོ ཙ ཡསོ, ཏཱནི ཙ པཱདེསུ ཙཀྐརཏནཱནི;

སབྦཾ ཏམནྟརཧིཏཾ, ནནུ རིཏྟཱ སབྦསངྑཱརཱ’’ཏི.

དཱིཔངྐརསྶ ¶ པན བྷགཝཏོ ཨཔརབྷཱགེ ཨེཀཾ ཨསངྑྱེཡྻཾ ཨཏིཀྐམིཏྭཱ ཀོཎྜཉྙོ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ཨཧེསུཾ. པཋམསནྣིཔཱཏེ ཀོཊིསཏསཧསྶཾ, དུཏིཡེ ཀོཊིསཧསྶཾ, ཏཏིཡེ ནཝུཏིཀོཊིཡོ. ཏདཱ བོདྷིསཏྟོ ཝིཛིཏཱཝཱི ནཱམ ཙཀྐཝཏྟཱི ཧུཏྭཱ ཀོཊིསཏསཧསྶསངྑསྶ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ ཨདཱསི. སཏྠཱ བོདྷིསཏྟཾ ‘‘བུདྡྷོ བྷཝིསྶསཱི’’ཏི བྱཱཀརིཏྭཱ དྷམྨཾ དེསེསི. སོ སཏྠུ དྷམྨཀཐཾ སུཏྭཱ རཛྫཾ ནིཡྻཱདེཏྭཱ པབྦཛི. སོ ཏཱིཎི ¶ པིཊཀཱནི ཨུགྒཧེཏྭཱ ཨཊྛ སམཱཔཏྟིཡོ པཉྩ ཨབྷིཉྙཱཡོ ཙ ཨུཔྤཱདེཏྭཱ ཨཔརིཧཱིནཛ྄ཛྷཱནོ བྲཧྨལོཀེ ནིབྦཏྟི. ཀོཎྜཉྙསྶ བུདྡྷསྶ པན རམྨཝཏཱི ནཱམ ནགརཾ, སུནནྡོ ནཱམ ཁཏྟིཡོ པིཏཱ, སུཛཱཏཱ ནཱམ དེཝཱི མཱཏཱ, བྷདྡོ ཙ སུབྷདྡོ ཙ དྭེ ཨགྒསཱཝཀཱ, ཨནུརུདྡྷོ ནཱམུཔཊྛཱཀོ, ཏིསྶཱ ཙ ཨུཔཏིསྶཱ ཙ དྭེ ཨགྒསཱཝིཀཱ, སཱལཀལྱཱཎཱི བོདྷི, ཨཊྛཱསཱིཏིཧཏྠུབྦེདྷཾ སརཱིརཾ, ཝསྶསཏསཧསྶཾ ཨཱཡུཔྤམཱཎཾ ཨཧོསི.

‘‘དཱིཔངྐརསྶ ཨཔརེན, ཀོཎྜཉྙོ ནཱམ ནཱཡཀོ;

ཨནནྟཏེཛོ ཨམིཏཡསོ, ཨཔྤམེཡྻོ དུརཱསདོ’’ཏི.

ཏསྶ ཨཔརབྷཱགེ ཨེཀཾ ཨསངྑྱེཡྻཾ ཨཏིཀྐམིཏྭཱ ཨེཀསྨིཾཡེཝ ཀཔྤེ ཙཏུརོ བུདྡྷཱ ནིབྦཏྟིཾསུ མངྒལོ, སུམནོ, རེཝཏོ, སོབྷིཏོཏི. མངྒལསྶ བྷགཝཏོ ཏཡོ སནྣིཔཱཏཱ ཨཧེསུཾ. ཏེསུ པཋམསནྣིཔཱཏེ ཀོཊིསཏསཧསྶཾ བྷིཀྑཱུ ཨཧེསུཾ, དུཏིཡེ ཀོཊིསཧསྶཾ, ཏཏིཡེ ནཝུཏིཀོཊིཡོ. ཝེམཱཏིཀབྷཱཏཱ ཀིརསྶ ཨཱནནྡཀུམཱརོ ནཱམ ནཝུཏིཀོཊིསངྑཱཡ པརིསཱཡ སདྡྷིཾ དྷམྨསྶཝནཏྠཱཡ སཏྠུ སནྟིཀཾ ཨགམཱསི. སཏྠཱ ཏསྶ ཨནུཔུབྦིཾ ཀཐཾ ཀཐེསི, སོ སདྡྷིཾ པརིསཱཡ སཧ པཊིསམྦྷིདཱཧི ཨརཧཏྟཾ པཱཔུཎི. སཏྠཱ ཏེསཾ ཀུལཔུཏྟཱནཾ པུབྦཙརིཏཾ ཨོལོཀེནྟོ ཨིདྡྷིམཡཔཏྟཙཱིཝརསྶ ཨུཔནིསྶཡཾ དིསྭཱ དཀྑིཎཧཏྠཾ པསཱརེཏྭཱ ‘‘ཨེཐ, བྷིཀྑཝོ’’ཏི ཨཱཧ. སབྦེ ཏངྑཎཉྙེཝ ཨིདྡྷིམཡཔཏྟཙཱིཝརདྷརཱ སཊྛིཝསྶམཧཱཐེརཱ ཝིཡ ཨཱཀཔྤསམྤནྣཱ ཧུཏྭཱ སཏྠཱརཾ ཝནྡིཏྭཱ པརིཝཱརཡིཾསུ. ཨཡམསྶ ཏཏིཡོ སཱཝཀསནྣིཔཱཏོ ཨཧོསི.

ཡཐཱ ¶ པན ཨཉྙེསཾ བུདྡྷཱནཾ སམནྟཱ ཨསཱིཏིཧཏྠཔྤམཱཎཱཡེཝ སརཱིརཔྤབྷཱ ཨཧོསི, ན ཨེཝཾ ཏསྶ ཏསྶ པན བྷགཝཏོ སརཱིརཔྤབྷཱ ནིཙྩཀཱལཾ དསསཧསྶིལོཀདྷཱཏུཾ ཕརིཏྭཱ ཨཊྛཱསི. རུཀྑཔཐཝིཔབྦཏསམུདྡཱདཡོ ཨནྟམསོ ཨུཀྑལིཀཱདཱིནི ཨུཔཱདཱཡ སུཝཎྞཔཊྚཔརིཡོནདྡྷཱ ཝིཡ ཨཧེསུཾ. ཨཱཡུཔྤམཱཎཾ པནསྶ ནཝུཏིཝསྶསཧསྶཱནི ཨཧོསི. ཨེཏྟཀཾ ཀཱལཾ ཙནྡིམསཱུརིཡཱདཡོ ཨཏྟནོ པབྷཱཡ ཝིརོཙིཏུཾ ནཱསཀྑིཾསུ, རཏྟིནྡིཝཔརིཙྪེདོ ན པཉྙཱཡིཏྠ. དིཝཱ སཱུརིཡཱལོཀེན ཝིཡ སཏྟཱ ནིཙྩཾ ¶ ¶ བུདྡྷཱལོཀེནེཝ ཝིཙརིཾསུ, སཱཡཾ པུཔྥིཏཀུསུམཱནཾ, པཱཏོ རཝནཀསཀུཎཱདཱིནཉྩ ཝསེན ལོཀོ རཏྟིནྡིཝཔརིཙྪེདཾ སལླཀྑེསི.

ཀིཾ པན ཨཉྙེསཾ བུདྡྷཱནཾ ཨཡམཱནུབྷཱཝོ ནཏྠཱིཏི? ནོ ནཏྠི. ཏེཔི ཧི ཨཱཀངྑམཱནཱ དསསཧསྶིཾ ཝཱ ལོཀདྷཱཏུཾ ཏཏོ ཝཱ བྷིཡྻོ ཨཱབྷཱཡ ཕརེཡྻུཾ. མངྒལསྶ པན བྷགཝཏོ པུབྦཔཏྠནཱཝསེན ཨཉྙེསཾ བྱཱམཔྤབྷཱ ཝིཡ སརཱིརཔྤབྷཱ ནིཙྩཀཱལམེཝ དསསཧསྶིལོཀདྷཱཏུཾ ཕརིཏྭཱ ཨཊྛཱསི. སོ ཀིར བོདྷིསཏྟཙརིཡཀཱལེ ཝེསྶནྟརསདིསེ ཨཏྟབྷཱཝེ ཋིཏོ སཔུཏྟདཱརོ ཝངྐཔབྦཏསདིསེ པབྦཏེ ཝསི. ཨཐེཀོ ཁརདཱཋིཀོ ནཱམ ཡཀྑོ མཧཱཔུརིསསྶ དཱནཛ྄ཛྷཱསཡཏཾ སུཏྭཱ བྲཱཧྨཎཝཎྞེན ཨུཔསངྐམིཏྭཱ མཧཱསཏྟཾ དྭེ དཱརཀེ ཡཱཙི. མཧཱསཏྟོ ‘‘དདཱམི བྲཱཧྨཎསྶ པུཏྟཀེ’’ཏི ཧཊྛཔཧཊྛོ ཨུདཀཔརིཡནྟཾ པཐཝིཾ ཀམྤེནྟོ དྭེཔི དཱརཀེ ཨདཱསི. ཡཀྑོ ཙངྐམནཀོཊིཡཾ ཨཱལམྦནཕལཀཾ ནིསྶཱཡ ཋཏྭཱ པསྶནྟསྶེཝ མཧཱསཏྟསྶ མཱུལཀལཱཔེ ཝིཡ དྭེ དཱརཀེ ཁཱདི. མཧཱཔུརིསསྶ ཡཀྑཾ ཨོལོཀེཏྭཱ མུཁེ ཝིཝཊམཏྟེ ཨགྒིཛཱལཾ ཝིཡ ལོཧིཏདྷཱརཾ ཨུགྒིརམཱནཾ ཏསྶ མུཁཾ དིསྭཱཔི ཀེསགྒམཏྟམྤི དོམནསྶཾ ན ཨུཔྤཛྫི. ‘‘སུདིནྣཾ ཝཏ མེ དཱན’’ནྟི ཙིནྟཡཏོ པནསྶ སརཱིརེ མཧནྟཾ པཱིཏིསོམནསྶ ཨུདཔཱདི. སོ ‘‘ཨིམསྶ མེ ནིསྶནྡེན ཨནཱགཏེ ཨིམིནཱཝ ནཱིཧཱརེན རསྨིཡོ ནིཀྑམནྟཱུ’’ཏི པཏྠནཾ ཨཀཱསི. ཏསྶ ཏཾ པཏྠནཾ ནིསྶཱཡ བུདྡྷབྷཱུཏསྶ སརཱིརཏོ རསྨིཡོ ནིཀྑམིཏྭཱ ཨེཏྟཀཾ ཋཱནཾ ཕརིཾསུ.

ཨཔརམྤིསྶ པུབྦཙརིཏཾ ཨཏྠི. སོ ཀིར བོདྷིསཏྟཀཱལེ ཨེཀསྶ བུདྡྷསྶ ཙེཏིཡཾ དིསྭཱ ‘‘ཨིམསྶ བུདྡྷསྶ མཡཱ ཛཱིཝིཏཾ པརིཙྩཛིཏུཾ ཝཊྚཏཱི’’ཏི དཎྜདཱིཔིཀཱཝེཋནནིཡཱམེན སཀལསརཱིརཾ ཝེཋཱཔེཏྭཱ རཏནམཏྟམཀུལ༹ཾ སཏསཧསྶགྒྷནིཀཾ སུཝཎྞཔཱཏིཾ སཔྤིསྶ པཱུརཱཔེཏྭཱ ཏཏྠ སཧསྶཝཊྚིཡོ ཛཱལཱཔེཏྭཱ ཏཾ སཱིསེནཱདཱཡ སཀལསརཱིརཾ ཛཱལཱཔེཏྭཱ ཙེཏིཡཾ པདཀྑིཎཾ ཀརོནྟོ སཀལརཏྟིཾ ཝཱིཏིནཱམེསི. ཨེཝཾ ཡཱཝ ཨརུཎུགྒམནཱ ཝཱཡམནྟསྶཱཔིསྶ ལོམཀཱུཔམཏྟམྤི ཨུསུམཾ ན གཎྷི. པདུམགབྦྷཾ པཝིཊྛཀཱལོ ཝིཡ ཨཧོསི. དྷམྨོ ཧི ནཱམེས ཨཏྟཱནཾ རཀྑནྟཾ རཀྑཏི. ཏེནཱཧ བྷགཝཱ –

‘‘དྷམྨོ ¶ ¶ ཧཝེ རཀྑཏི དྷམྨཙཱརིཾ, དྷམྨོ སུཙིཎྞོ སུཁམཱཝཧཱཏི;

ཨེསཱནིསཾསོ དྷམྨེ སུཙིཎྞེ, ན དུགྒཏིཾ གཙྪཏི དྷམྨཙཱརཱི’’ཏི. (ཐེརགཱ. ༣༠༣; ཛཱ. ༡.༡༠.༡༠༢; ༡.༡༥.༣༨༥);

ཨིམསྶཱཔི ¶ ཀམྨསྶ ནིསྶནྡེན ཏསྶ བྷགཝཏོ སརཱིརོབྷཱསོ དསསཧསྶིལོཀདྷཱཏུཾ ཕརིཏྭཱ ཨཊྛཱསི.

ཏདཱ ཨམྷཱཀཾ བོདྷིསཏྟོ སུརུཙི ནཱམ བྲཱཧྨཎོ ཧུཏྭཱ ‘‘སཏྠཱརཾ ནིམནྟེསྶཱམཱི’’ཏི ཨུཔསངྐམིཏྭཱ མདྷུརདྷམྨཀཐཾ སུཏྭཱ ‘‘སྭེ མཡ྄ཧཾ བྷིཀྑཾ གཎྷཐ, བྷནྟེ’’ཏི ཨཱཧ. བྲཱཧྨཎ, ཀིཏྟཀེཧི ཏེ བྷིཀྑཱུཧི ཨཏྠོཏི? ‘‘ཀིཏྟཀཱ པན ཝོ, བྷནྟེ, པརིཝཱརབྷིཀྑཱུ’’ཏི ཨཱཧ. ཏདཱ པན སཏྠུ པཋམསནྣིཔཱཏོཡེཝ ཧོཏི, ཏསྨཱ ‘‘ཀོཊིསཏསཧསྶ’’ནྟི ཨཱཧ. བྷནྟེ, སབྦེཧིཔི སདྡྷིཾ མཡ྄ཧཾ གེཧེ བྷིཀྑཾ གཎྷཐཱཏི. སཏྠཱ ཨདྷིཝཱསེསི. བྲཱཧྨཎོ སྭཱཏནཱཡ ནིམནྟེཏྭཱ གེཧཾ གཙྪནྟོ ཙིནྟེསི – ‘‘ཨཧཾ ཨེཏྟཀཱནཾ བྷིཀྑཱུནཾ ཡཱགུབྷཏྟཝཏྠཱདཱིནི དཱཏུཾ སཀྐོམི, ནིསཱིདནཊྛཱནཾ པན ཀཐཾ བྷཝིསྶཏཱི’’ཏི.

ཏསྶ སཱ ཙིནྟཱ ཙཏུརཱསཱིཏིཡོཛནསཧསྶམཏྠཀེ ཋིཏསྶ དེཝརཉྙོ པཎྜུཀམྦལསིལཱསནསྶ ཨུཎྷབྷཱཝཾ ཛནེསི. སཀྐོ ‘‘ཀོ ནུ ཁོ མཾ ཨིམམྷཱ ཋཱནཱ ཙཱཝེཏུཀཱམོ’’ཏི དིབྦཙཀྑུནཱ ཨོལོཀེནྟོ མཧཱཔུརིསཾ དིསྭཱ ‘‘སུརུཙི ནཱམ བྲཱཧྨཎོ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ ནིསཱིདནཊྛཱནཏྠཱཡ ཙིནྟེསི, མཡཱཔི ཏཏྠ གནྟྭཱ པུཉྙཀོཊྛཱསཾ གཧེཏུཾ ཝཊྚཏཱི’’ཏི ཝཌྜྷཀིཝཎྞཾ ནིམྨིནིཏྭཱ ཝཱསིཕརསུཧཏྠོ མཧཱཔུརིསསྶ པུརཏོ པཱཏུརཧོསི. སོ ‘‘ཨཏྠི ནུ ཁོ ཀསྶཙི བྷཏིཡཱ ཀཏྟབྦ’’ནྟི ཨཱཧ. མཧཱཔུརིསོ ཏཾ དིསྭཱ ‘‘ཀིཾ ཀམྨཾ ཀརིསྶསཱི’’ཏི ཨཱཧ. ‘‘མམ ཨཛཱནནསིཔྤཾ ནཱམ ནཏྠི, གེཧཾ ཝཱ མཎྜཔཾ ཝཱ ཡོ ཡཾ ཀཱརེཏི, ཏསྶ ཏཾ ཀཱཏུཾ ཛཱནཱམཱི’’ཏི. ‘‘ཏེན ཧི མཡ྄ཧཾ ཀམྨཾ ཨཏྠཱི’’ཏི. ‘‘ཀིཾ ཨཡྻཱ’’ཏི? ‘‘སྭཱཏནཱཡ མེ ཀོཊིསཏསཧསྶབྷིཀྑཱུ ནིམནྟིཏཱ, ཏེསཾ ནིསཱིདནམཎྜཔཾ ཀརིསྶསཱི’’ཏི. ‘‘ཨཧཾ ནཱམ ཀརེཡྻཾ, སཙེ མམ བྷཏིཾ དཱཏུཾ སཀྑིསྶཐཱ’’ཏི. ‘‘སཀྑིསྶཱམི ཏཱཏཱ’’ཏི. ‘‘སཱདྷུ ཀརིསྶཱམཱི’’ཏི གནྟྭཱ ཨེཀཾ པདེསཾ ཨོལོཀེསི, དྭཱདསཏེརསཡོཛནཔྤམཱཎོ པདེསོ ཀསིཎམཎྜལཾ ¶ ཝིཡ སམཏལོ ཨཧོསི. སོ ‘‘ཨེཏྟཀེ ཋཱནེ སཏྟརཏནམཡོ མཎྜཔོ ཨུཊྛཧཏཱུ’’ཏི ཙིནྟེཏྭཱ ཨོལོཀེསི. ཏཱཝདེཝ པཐཝིཾ བྷིནྡིཏྭཱ མཎྜཔོ ཨུཊྛཧི. ཏསྶ སོཝཎྞམཡེསུ ཐམྦྷེསུ རཛཏམཡཱ གྷཊཀཱ ཨཧེསུཾ, རཛཏམཡེསུ སོཝཎྞམཡཱ, མཎིཏྠམྦྷེསུ པཝཱལ༹མཡཱ, པཝཱལ༹ཏྠམྦྷེསུ མཎིམཡཱ, སཏྟརཏནམཡེསུ སཏྟརཏནམཡཱཝ གྷཊཀཱ ཨཧེསུཾ ¶ . ཏཏོ ‘‘མཎྜཔསྶ ཨནྟརནྟརེན ཀིངྐིཎིཀཛཱལཾ ཨོལམྦཏཱུ’’ཏི ཨོལོཀེསི, སཧ ཨོལོཀནེནེཝ ཀིངྐིཎིཀཛཱལཾ ཨོལམྦི, ཡསྶ མནྡཝཱཏེརིཏསྶ པཉྩངྒིཀསྶེཝ ཏཱུརིཡསྶ མདྷུརསདྡོ ནིགྒཙྪཏི, དིབྦསངྒཱིཏིཝཏྟནཀཱལོ ཝིཡ ཧོཏི. ‘‘ཨནྟརནྟརཱ གནྡྷདཱམམཱལཱདཱམཱནི ཨོལམྦནྟཱུ’’ཏི ཙིནྟེསི, དཱམཱནི ཨོལམྦིཾསུ. ‘‘ཀོཊིསཏསཧསྶསངྑཱནཾ བྷིཀྑཱུནཾ ¶ ཨཱསནཱནི ཙ ཨཱདྷཱརཀཱནི ཙ པཐཝིཾ བྷིནྡིཏྭཱ ཨུཊྛཧནྟཱུ’’ཏི ཙིནྟེསི, ཏཱཝདེཝ ཨུཊྛཧིཾསུ. ‘‘ཀོཎེ ཀོཎེ ཨེཀེཀཱ ཨུདཀཙཱཊིཡོ ཨུཊྛཧནྟཱུ’’ཏི ཙིནྟེསི, ཨུདཀཙཱཊིཡོ ཨུཊྛཧིཾསུ.

ཨེཏྟཀཾ མཱཔེཏྭཱ བྲཱཧྨཎསྶ སནྟིཀཾ གནྟྭཱ ‘‘ཨེཧི ཨཡྻ, ཏཝ མཎྜཔཾ ཨོལོཀེཏྭཱ མཡ྄ཧཾ བྷཏིཾ དེཧཱི’’ཏི ཨཱཧ. མཧཱཔུརིསོ གནྟྭཱ མཎྜཔཾ ཨོལོཀེསི, ཨོལོཀེནྟསྶེཝསྶ སཀལསརཱིརཾ པཉྩཝཎྞཱཡ པཱིཏིཡཱ ནིརནྟརཾ ཕུཊཾ ཨཧོསི. ཨཐསྶ མཎྜཔཾ ཨོལོཀཡཏོ ཨེཏདཧོསི – ‘‘ནཱཡཾ མཎྜཔོ མནུསྶབྷཱུཏེན ཀཏོ, མཡ྄ཧཾ པན ཨཛ྄ཛྷཱསཡཾ མཡ྄ཧཾ གུཎཾ ཨཱགམྨ ཨདྡྷཱ སཀྐབྷཝནཾ ཨུཎྷཾ ཨཧོསི, ཏཏོ སཀྐེན དེཝརཉྙཱ ཨཡཾ མཎྜཔོ ཀཱརིཏོ བྷཝིསྶཏཱི’’ཏི. ‘‘ན ཁོ པན མེ ཡུཏྟཾ ཨེཝརཱུཔེ མཎྜཔེ ཨེཀདིཝསཾཡེཝ དཱནཾ དཱཏུཾ, སཏྟཱཧཾ དསྶཱམཱི’’ཏི ཙིནྟེསི. བཱཧིརཀདཱནཉྷི ཀིཏྟཀམྤི སམཱནཾ བོདྷིསཏྟཱནཾ ཏུཊྛིཾ ཀཱཏུཾ ན སཀྐོཏི, ཨལངྐཏསཱིསཾ པན ཚིནྡིཏྭཱ ཨཉྫིཏཨཀྑཱིནི ཨུཔྤཱཊེཏྭཱ ཧདཡམཾསཾ ཝཱ ཨུབྦཊྚེཏྭཱ དིནྣཀཱལེ བོདྷིསཏྟཱནཾ ཙཱགཾ ནིསྶཱཡ ཏུཊྛི ནཱམ ཧོཏི. ཨམྷཱཀམྤི ཧི བོདྷིསཏྟསྶ སིཝིཛཱཏཀེ དེཝསིཀཾ པཉྩ ཀཧཱཔཎསཏསཧསྶཱནི ཝིསྶཛྫེཏྭཱ ཙཏཱུསུ དྭཱརེསུ ནགརམཛ྄ཛྷེ ཙ དཱནཾ དེནྟསྶ ཏཾ དཱནཾ ཙཱགཏུཊྛིཾ ཨུཔྤཱདེཏུཾ ནཱསཀྑི. ཡདཱ པནསྶ བྲཱཧྨཎཝཎྞེན ཨཱགནྟྭཱ སཀྐོ དེཝརཱཛཱ ཨཀྑཱིནི ཡཱཙི, ཏདཱ ཏཱནི ཨུཔྤཱཊེཏྭཱ དདམཱནསྶེཝ ཧཱསོ ཨུཔྤཛྫི, ཀེསགྒམཏྟམྤི ཙིཏྟསྶ ཨཉྙཐཏྟཾ ནཱཧོསི. ཨེཝཾ དཱནཾ ནིསྶཱཡ བོདྷིསཏྟཱནཾ ཏིཏྟི ནཱམ ནཏྠི. ཏསྨཱ སོཔི མཧཱཔུརིསོ ¶ ‘‘སཏྟཱཧཾ མཡཱ ཀོཊིསཏསཧསྶསངྑཱནཾ བྷིཀྑཱུནཾ དཱནཾ དཱཏུཾ ཝཊྚཏཱི’’ཏི ཙིནྟེཏྭཱ ཏསྨིཾ མཎྜཔེ བུདྡྷཔྤམུཁཾ བྷིཀྑུསངྒྷཾ ནིསཱིདཱཔེཏྭཱ སཏྟཱཧཾ གཝཔཱནཾ ནཱམ དཱནཾ ཨདཱསི. གཝཔཱནནྟི མཧནྟེ མཧནྟེ ཀོལམྦེ ཁཱིརསྶ པཱུརེཏྭཱ ཨུདྡྷནེསུ ཨཱརོཔེཏྭཱ གྷནཔཱཀཔཀྐེ ཁཱིརེ ཐོཀེ ཏཎྜུལེ པཀྑིཔིཏྭཱ པཀྐམདྷུསཀྐརཱཙུཎྞསཔྤཱིཧི ཨབྷིསངྑཏཾ བྷོཛནཾ ཝུཙྩཏི. མནུསྶཱཡེཝ པན པརིཝིསིཏུཾ ནཱསཀྑིཾསུ, དེཝཱཔི ཨེཀནྟརིཀཱ ཧུཏྭཱ པརིཝིསིཾསུ. དྭཱདསཏེརསཡོཛནཔྤམཱཎཾ ཋཱནམྤི བྷིཀྑཱུ གཎྷིཏུཾ ནཔྤཧོསིཡེཝ. ཏེ པན བྷིཀྑཱུ ཨཏྟནོ ཨཏྟནོ ཨཱནུབྷཱཝེན ནིསཱིདིཾསུ. པརིཡོསཱནདིཝསེ སབྦབྷིཀྑཱུནཾ པཏྟཱནི དྷོཝཱཔེཏྭཱ བྷེསཛྫཏྠཱཡ སཔྤིནཝནཱིཏམདྷུཕཱཎིཏཱདཱིནི པཱུརེཏྭཱ ཏིཙཱིཝརེཧི སདྡྷིཾ ཨདཱསི, སངྒྷནཝཀབྷིཀྑུནཱ ལདྡྷཙཱིཝརསཱཊཀཱ སཏསཧསྶགྒྷནཀཱ ཨཧེསུཾ.

སཏྠཱ ¶ ཨནུམོདནཾ ཀརོནྟོ ‘‘ཨཡཾ པུརིསོ ཨེཝརཱུཔཾ མཧཱདཱནཾ ཨདཱསི, ཀོ ནུ ཁོ བྷཝིསྶཏཱི’’ཏི ཨུཔདྷཱརེནྟོ ‘‘ཨནཱགཏེ ཀཔྤསཏསཧསྶཱདྷིཀཱནཾ དྭིནྣཾ ཨསངྑྱེཡྻཱནཾ མཏྠཀེ གོཏམོ ནཱམ བུདྡྷོ བྷཝིསྶཏཱི’’ཏི དིསྭཱ མཧཱཔུརིསཾ ཨཱམནྟེཏྭཱ ‘‘ཏྭཾ ཨེཏྟཀཾ ¶ ནཱམ ཀཱལཾ ཨཏིཀྐམིཏྭཱ གོཏམོ ནཱམ བུདྡྷོ བྷཝིསྶསཱི’’ཏི བྱཱཀཱསི. མཧཱཔུརིསོ བྱཱཀརཎཾ སུཏྭཱ ‘‘ཨཧཾ ཀིར བུདྡྷོ བྷཝིསྶཱམི, ཀོ མེ གྷརཱཝཱསེན ཨཏྠོ, པབྦཛིསྶཱམཱི’’ཏི ཙིནྟེཏྭཱ ཏཐཱརཱུཔཾ སམྤཏྟིཾ ཁེལ༹པིཎྜཾ ཝིཡ པཧཱཡ སཏྠུ སནྟིཀེ པབྦཛིཏྭཱ བུདྡྷཝཙནཾ ཨུགྒཎྷིཏྭཱ ཨབྷིཉྙཱ ཙ སམཱཔཏྟིཡོ ཙ ནིབྦཏྟེཏྭཱ ཨཱཡུཔརིཡོསཱནེ བྲཧྨལོཀེ ནིབྦཏྟི.

མངྒལསྶ པན བྷགཝཏོ ནགརཾ ཨུཏྟརཾ ནཱམ ཨཧོསི, པིཏཱཔི ཨུཏྟརོ ནཱམ ཁཏྟིཡོ, མཱཏཱཔི ཨུཏྟརཱ ནཱམ དེཝཱི, སུདེཝོ ཙ དྷམྨསེནོ ཙ དྭེ ཨགྒསཱཝཀཱ, པཱལིཏོ ནཱམུཔཊྛཱཀོ, སཱིཝལཱི ཙ ཨསོཀཱ ཙ དྭེ ཨགྒསཱཝིཀཱ, ནཱགརུཀྑོ བོདྷི, ཨཊྛཱསཱིཏིཧཏྠུབྦེདྷཾ སརཱིརཾ ཨཧོསི. ནཝུཏིཝསྶསཧསྶཱནི ཋཏྭཱ པརིནིབྦུཏེ པན ཏསྨིཾ བྷགཝཏི ཨེཀཔྤཧཱརེནེཝ དས ཙཀྐཝཱལ༹སཧསྶཱནི ཨེཀནྡྷཀཱརཱནི ཨཧེསུཾ. སབྦཙཀྐཝཱལེ༹སུ མནུསྶཱནཾ མཧནྟཾ ཨཱརོདནཔརིདེཝནཾ ཨཧོསི.

‘‘ཀོཎྜཉྙསྶ ¶ ཨཔརེན, མངྒལོ ནཱམ ནཱཡཀོ;

ཏམཾ ལོཀེ ནིཧནྟྭཱན, དྷམྨོཀྐམབྷིདྷཱརཡཱི’’ཏི.

ཨེཝཾ དསསཧསྶིལོཀདྷཱཏུཾ ཨནྡྷཀཱརཾ ཀཏྭཱ པརིནིབྦུཏསྶ ཏསྶ བྷགཝཏོ ཨཔརབྷཱགེ སུམནོ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ཨཧེསུཾ. པཋམསནྣིཔཱཏེ ཀོཊིསཏསཧསྶབྷིཀྑཱུ ཨཧེསུཾ, དུཏིཡེ ཀཉྩནཔབྦཏམྷི ནཝུཏིཀོཊིསཧསྶཱནི, ཏཏིཡེ ཨསཱིཏིཀོཊིསཧསྶཱནི. ཏདཱ མཧཱསཏྟོ ཨཏུལོ ནཱམ ནཱགརཱཛཱ ཨཧོསི མཧིདྡྷིཀོ མཧཱནུབྷཱཝོ. སོ ‘‘བུདྡྷོ ཨུཔྤནྣོ’’ཏི སུཏྭཱ ཉཱཏིསངྒྷཔརིཝུཏོ ནཱགབྷཝནཱ ནིཀྑམིཏྭཱ ཀོཊིསཏསཧསྶབྷིཀྑུཔརིཝཱརསྶ ཏསྶ བྷགཝཏོ དིབྦཏཱུརིཡེཧི ཨུཔཧཱརཾ ཀཱརེཏྭཱ མཧཱདཱནཾ པཝཏྟེཏྭཱ པཙྩེཀཾ དུསྶཡུགཱནི དཏྭཱ སརཎེསུ པཏིཊྛཱསི. སོཔི ནཾ སཏྠཱ ‘‘ཨནཱགཏེ བུདྡྷོ བྷཝིསྶསཱི’’ཏི བྱཱཀཱསི. ཏསྶ བྷགཝཏོ ནགརཾ ཁེམཾ ནཱམ ཨཧོསི, སུདཏྟོ ནཱམ རཱཛཱ པིཏཱ, སིརིམཱ ནཱམ མཱཏཱ, སརཎོ ཙ བྷཱཝིཏཏྟོ ཙ དྭེ ཨགྒསཱཝཀཱ, ཨུདེནོ ནཱམུཔཊྛཱཀོ, སོཎཱ ཙ ཨུཔསོཎཱ ཙ དྭེ ཨགྒསཱཝིཀཱ, ནཱགརུཀྑོ བོདྷི, ནཝུཏིཧཏྠུབྦེདྷཾ སརཱིརཾ, ནཝུཏིཡེཝ ཝསྶསཧསྶཱནི ཨཱཡུཔྤམཱཎཾ ཨཧོསི.

‘‘མངྒལསྶ ¶ ཨཔརེན, སུམནོ ནཱམ ནཱཡཀོ;

སབྦདྷམྨེཧི ཨསམོ, སབྦསཏྟཱནམུཏྟམོ’’ཏི.

ཏསྶ ¶ ཨཔརབྷཱགེ རེཝཏོ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ཨཧེསུཾ. པཋམསནྣིཔཱཏེ གཎནཱ ནཏྠི, དུཏིཡེ ཀོཊིསཏསཧསྶབྷིཀྑཱུ ཨཧེསུཾ, ཏཐཱ ཏཏིཡེ. ཏདཱ བོདྷིསཏྟོ ཨཏིདེཝོ ནཱམ བྲཱཧྨཎོ ཧུཏྭཱ སཏྠུ དྷམྨདེསནཾ སུཏྭཱ སརཎེསུ པཏིཊྛཱཡ སིརསྨིཾ ཨཉྫལིཾ ཋཔེཏྭཱ ཏསྶ སཏྠུནོ ཀིལེསཔྤཧཱནེ ཝཎྞཾ ཝཏྭཱ ཨུཏྟརཱསངྒེན པཱུཛཾ ཨཀཱསི. སོཔི ནཾ ‘‘བུདྡྷོ བྷཝིསྶསཱི’’ཏི བྱཱཀཱསི. ཏསྶ པན བྷགཝཏོ ནགརཾ དྷཉྙཝཏཱི ནཱམ ཨཧོསི, པིཏཱ ཝིཔུལོ ནཱམ ཁཏྟིཡོ, མཱཏཱཔི ཝིཔུལཱ ནཱམ དེཝཱི, ཝརུཎོ ཙ བྲཧྨདེཝོ ཙ དྭེ ཨགྒསཱཝཀཱ, སམྦྷཝོ ནཱམུཔཊྛཱཀོ, བྷདྡཱ ཙ སུབྷདྡཱ ཙ དྭེ ཨགྒསཱཝིཀཱ, ནཱགརུཀྑོཝ བོདྷི, སརཱིརཾ ཨསཱིཏིཧཏྠུབྦེདྷཾ ཨཧོསི, ཨཱཡུ སཊྛི ཝསྶསཧསྶཱནཱིཏི.

‘‘སུམནསྶ ¶ ཨཔརེན, རེཝཏོ ནཱམ ནཱཡཀོ;

ཨནཱུཔམོ ཨསདིསོ, ཨཏུལོ ཨུཏྟམོ ཛིནོ’’ཏི.

ཏསྶ ཨཔརབྷཱགེ སོབྷིཏོ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ཨཧེསུཾ. པཋམསནྣིཔཱཏེ ཀོཊིསཏབྷིཀྑཱུ ཨཧེསུཾ, དུཏིཡེ ནཝུཏིཀོཊིཡོ, ཏཏིཡེ ཨསཱིཏིཀོཊིཡོ. ཏདཱ བོདྷིསཏྟོ ཨཛིཏོ ནཱམ བྲཱཧྨཎོ ཧུཏྭཱ སཏྠུ དྷམྨདེསནཾ སུཏྭཱ སརཎེསུ པཏིཊྛཱཡ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ ཨདཱསི. སོཔི ནཾ ‘‘བུདྡྷོ བྷཝིསྶསཱི’’ཏི བྱཱཀཱསི. ཏསྶ པན བྷགཝཏོ སུདྷམྨཾ ནཱམ ནགརཾ ཨཧོསི, པིཏཱཔི སུདྷམྨོ ནཱམ རཱཛཱ, མཱཏཱཔི སུདྷམྨཱ ནཱམ དེཝཱི, ཨསམོ ཙ སུནེཏྟོ ཙ དྭེ ཨགྒསཱཝཀཱ, ཨནོམོ ནཱམུཔཊྛཱཀོ, ནཀུལཱ ཙ སུཛཱཏཱ ཙ དྭེ ཨགྒསཱཝིཀཱ, ནཱགརུཀྑོཝ བོདྷི, ཨཊྛཔཎྞཱསཧཏྠུབྦེདྷཾ སརཱིརཾ ཨཧོསི, ནཝུཏི ཝསྶསཧསྶཱནི ཨཱཡུཔྤམཱཎནྟི.

‘‘རེཝཏསྶ ཨཔརེན, སོབྷིཏོ ནཱམ ནཱཡཀོ;

སམཱཧིཏོ སནྟཙིཏྟོ, ཨསམོ ཨཔྤཊིཔུགྒལོ’’ཏི.

ཏསྶ ཨཔརབྷཱགེ ཨེཀཾ ཨསངྑྱེཡྻཾ ཨཏིཀྐམིཏྭཱ ཨེཀསྨིཾཡེཝ ཀཔྤེ ཏཡོ བུདྡྷཱ ནིབྦཏྟིཾསུ ཨནོམདསྶཱི པདུམོ ནཱརདོཏི. ཨནོམདསྶིསྶ བྷགཝཏོ ཏཡོ སཱཝཀསནྣིཔཱཏཱ ཨཧེསུཾ. པཋམསནྣིཔཱཏེ བྷིཀྑཱུ ཨཊྛསཏསཧསྶཱནི ཨཧེསུཾ, དུཏིཡེ སཏྟ, ཏཏིཡེ ཚ. ཏདཱ བོདྷིསཏྟོ ¶ ཨེཀོ ཡཀྑསེནཱཔཏི ཨཧོསི མཧིདྡྷིཀོ མཧཱནུབྷཱཝོ ཨནེཀཀོཊིསཏསཧསྶཱནཾ ¶ ཡཀྑཱནཾ ཨདྷིཔཏི. སོ ‘‘བུདྡྷོ ཨུཔྤནྣོ’’ཏི སུཏྭཱ ཨཱགནྟྭཱ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ ཨདཱསི. སཏྠཱཔི ནཾ ‘‘ཨནཱགཏེ བུདྡྷོ བྷཝིསྶསཱི’’ཏི བྱཱཀཱསི. ཨནོམདསྶིསྶ པན བྷགཝཏོ ཙནྡཝཏཱི ནཱམ ནགརཾ ཨཧོསི, ཡསཝཱ ནཱམ རཱཛཱ པིཏཱ, ཡསོདྷརཱ ནཱམ མཱཏཱ, ནིསབྷོ ཙ ཨནོམོ ཙ དྭེ ཨགྒསཱཝཀཱ, ཝརུཎོ ནཱམུཔཊྛཱཀོ, སུནྡརཱི ཙ སུམནཱ ཙ དྭེ ཨགྒསཱཝིཀཱ, ཨཛྫུནརུཀྑོ བོདྷི, ཨཊྛཔཎྞཱསཧཏྠུབྦེདྷཾ སརཱིརཾ ཨཧོསི, ཝསྶསཏསཧསྶཾ ཨཱཡཱུཏི.

‘‘སོབྷིཏསྶ ཨཔརེན, སམྦུདྡྷོ དྭིཔདུཏྟམོ;

ཨནོམདསྶཱི ཨམིཏཡསོ, ཏེཛསྶཱི དུརཏིཀྐམོ’’ཏི.

ཏསྶ ¶ ཨཔརབྷཱགེ པདུམོ ནཱམ སཏྠཱ ཨུདཔཱདི. ཏསྶཱཔི ཏཡོ བྷཱཝཀསནྣིཔཱཏཱ ཨཧེསུཾ. པཋམསནྣིཔཱཏེ ཀོཊིསཏསཧསྶབྷིཀྑཱུ ཨཧེསུཾ, དུཏིཡེ ཏཱིཎི སཏསཧསྶཱནི, ཏཏིཡེ ཨགཱམཀེ ཨརཉྙེ མཧཱཝནསཎྜཝཱསཱིནཾ བྷིཀྑཱུནཾ དྭེ སཏསཧསྶཱནི. ཏདཱ ཏཐཱགཏེ ཏསྨིཾ ཝནསཎྜེ ཝསནྟེ བོདྷིསཏྟོ སཱིཧོ ཧུཏྭཱ སཏྠཱརཾ ནིརོདྷསམཱཔཏྟིཾ སམཱཔནྣཾ དིསྭཱ པསནྣཙིཏྟོ ཝནྡིཏྭཱ པདཀྑིཎཾ ཀཏྭཱ པཱིཏིསོམནསྶཛཱཏོ ཏིཀྑཏྟུཾ སཱིཧནཱདཾ ནདིཏྭཱ སཏྟཱཧཾ བུདྡྷཱརམྨཎཔཱིཏིཾ ཨཝིཛཧིཏྭཱ པཱིཏིསུཁེནེཝ གོཙརཱཡ ཨཔཀྐམིཏྭཱ ཛཱིཝིཏཔརིཙྩཱགཾ ཀཏྭཱ པཡིརུཔཱསམཱནོ ཨཊྛཱསི. སཏྠཱ སཏྟཱཧཙྩཡེན ནིརོདྷཱ ཝུཊྛིཏོ སཱིཧཾ ཨོལོཀེཏྭཱ ‘‘བྷིཀྑུསངྒྷེཔི ཙིཏྟཾ པསཱདེཏྭཱ སངྒྷཾ ཝནྡིསྶཏཱིཏི བྷིཀྑུསངྒྷོ ཨཱགཙྪཏཱུ’’ཏི ཙིནྟེསི. བྷིཀྑཱུ ཏཱཝདེཝ ཨཱགམིཾསུ. སཱིཧོ སངྒྷེ ཙིཏྟཾ པསཱདེསི. སཏྠཱ ཏསྶ མནཾ ཨོལོཀེཏྭཱ ‘‘ཨནཱགཏེ བུདྡྷོ བྷཝིསྶསཱི’’ཏི བྱཱཀཱསི. པདུམསྶ པན བྷགཝཏོ ཙམྤཀཾ ནཱམ ནགརཾ ཨཧོསི, ཨསམོ ནཱམ རཱཛཱ པིཏཱ, ཨསམཱ ནཱམ དེཝཱི མཱཏཱ, སཱལོ ཙ ཨུཔསཱལོ ཙ དྭེ ཨགྒསཱཝཀཱ, ཝརུཎོ ནཱམུཔཊྛཱཀོ, རཱམཱ ཙ སུརཱམཱ ཙ དྭེ ཨགྒསཱཝིཀཱ, སོཎརུཀྑོ ནཱམ བོདྷི, ཨཊྛཔཎྞཱསཧཏྠུབྦེདྷཾ སརཱིརཾ ཨཧོསི, ཨཱཡུ ཝསྶསཏསཧསྶནྟི.

‘‘ཨནོམདསྶིསྶ ཨཔརེན, སམྦུདྡྷོ དྭིཔདུཏྟམོ;

པདུམོ ནཱམ ནཱམེན, ཨསམོ ཨཔྤཊིཔུགྒལོ’’ཏི.

ཏསྶ ཨཔརབྷཱགེ ནཱརདོ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ཨཧེསུཾ. པཋམསནྣིཔཱཏེ ཀོཊིསཏསཧསྶབྷིཀྑཱུ ཨཧེསུཾ, དུཏིཡེ ¶ ནཝུཏིཀོཊིསཧསྶཱནི, ཏཏིཡེ ཨསཱིཏིཀོཊིསཧསྶཱནི ¶ . ཏདཱ བོདྷིསཏྟོ ཨིསིཔབྦཛྫཾ པབྦཛིཏྭཱ པཉྩསུ ཨབྷིཉྙཱསུ ཨཊྛསུ ཙ སམཱཔཏྟཱིསུ ཙིཎྞཝསཱི ཧུཏྭཱ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ དཏྭཱ ལོཧིཏཙནྡནེན པཱུཛཾ ཨཀཱསི. སོཔི ནཾ ‘‘ཨནཱགཏེ བུདྡྷོ བྷཝིསྶསཱི’’ཏི བྱཱཀཱསི. ཏསྶ བྷགཝཏོ དྷཉྙཝཏཱི ནཱམ ནགརཾ ཨཧོསི, སུདེཝོ ནཱམ ཁཏྟིཡོ པིཏཱ, ཨནོམཱ ནཱམ མཱཏཱ, སདྡསཱལོ ཙ ཛིཏམིཏྟོ ཙ དྭེ ཨགྒསཱཝཀཱ, ཝཱསེཊྛོ ནཱམུཔཊྛཱཀོ ¶ , ཨུཏྟརཱ ཙ ཕགྒུནཱི ཙ དྭེ ཨགྒསཱཝིཀཱ, མཧཱསོཎརུཀྑོ ནཱམ བོདྷི, སརཱིརཾ ཨཊྛཱསཱིཏིཧཏྠུབྦེདྷཾ ཨཧོསི, ནཝུཏིཝསྶསཧསྶཱནི ཨཱཡཱུཏི.

‘‘པདུམསྶ ཨཔརེན, སམྦུདྡྷོ དྭིཔདུཏྟམོ;

ནཱརདོ ནཱམ ནཱམེན, ཨསམོ ཨཔྤཊིཔུགྒལོ’’ཏི.

ནཱརདབུདྡྷསྶ ཨཔརབྷཱགེ ཨེཀཾ ཨསངྑྱེཡྻཾ ཨཏིཀྐམིཏྭཱ ཨིཏོ སཏསཧསྶཀཔྤམཏྠཀེ ཨེཀསྨིཾ ཀཔྤེ ཨེཀོཝ པདུམུཏྟརབུདྡྷོ ནཱམ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ཨཧེསུཾ. པཋམེ ཀོཊིསཏསཧསྶབྷིཀྑཱུ ཨཧེསུཾ, དུཏིཡེ ཝེབྷཱརཔབྦཏེ ནཝུཏིཀོཊིསཧསྶཱནི, ཏཏིཡེ ཨསཱིཏིཀོཊིསཧསྶཱནི. ཏདཱ བོདྷིསཏྟོ ཛཊིལོ ནཱམ མཧཱརཊྛིཡོ ཧུཏྭཱ བུདྡྷཔྤམུཁསྶ བྷིཀྑུསངྒྷསྶ སཙཱིཝརཾ དཱནཾ ཨདཱསི. སོཔི ནཾ ‘‘ཨནཱགཏེ བུདྡྷོ བྷཝིསྶསཱི’’ཏི བྱཱཀཱསི. པདུམུཏྟརསྶ པན བྷགཝཏོ ཀཱལེ ཏིཏྠིཡཱ ནཱམ ནཱཧེསུཾ. སབྦེ དེཝམནུསྶཱ བུདྡྷམེཝ སརཎཾ ཨགམཾསུ. ཏསྶ ནགརཾ ཧཾསཝཏཱི ནཱམ ཨཧོསི, པིཏཱ ཨཱནནྡོ ནཱམ ཁཏྟིཡོ, མཱཏཱ སུཛཱཏཱ ནཱམ དེཝཱི, དེཝལོ ཙ སུཛཱཏོ ཙ དྭེ ཨགྒསཱཝཀཱ, སུམནོ ནཱམུཔཊྛཱཀོ, ཨམིཏཱ ཙ ཨསམཱ ཙ དྭེ ཨགྒསཱཝིཀཱ, སལལརུཀྑོ བོདྷི, སརཱིརཾ ཨཊྛཔཎྞཱསཧཏྠུབྦེདྷཾ ཨཧོསི, སརཱིརཔྤབྷཱ སམནྟཏོ དྭཱདས ཡོཛནཱནི གཎྷི, ཝསྶསཏསཧསྶཾ ཨཱཡཱུཏི.

‘‘ནཱརདསྶ ཨཔརེན, སམྦུདྡྷོ དྭིཔདུཏྟམོ;

པདུམུཏྟརོ ནཱམ ཛིནོ, ཨཀྑོབྷོ སཱགརཱུཔམོ’’ཏི.

ཏསྶ ཨཔརབྷཱགེ སཏྟཏི ཀཔྤསཧསྶཱནི ཨཏིཀྐམིཏྭཱ སུམེདྷོ སུཛཱཏོ ཙཱཏི ཨེཀསྨིཾ ཀཔྤེ དྭེ བུདྡྷཱ ནིབྦཏྟིཾསུ. སུམེདྷསྶཱཔི ཏཡོ སཱཝཀསནྣིཔཱཏཱ ཨཧེསུཾ, པཋམསནྣིཔཱཏེ སུདསྶནནགརེ ཀོཊིསཏཁཱིཎཱསཝཱ ཨཧེསུཾ, དུཏིཡེ པན ནཝུཏིཀོཊིཡོ, ཏཏིཡེ ཨསཱིཏིཀོཊིཡོ. ཏདཱ བོདྷིསཏྟོ ཨུཏྟརོ ནཱམ མཱཎཝོ ཧུཏྭཱ ནིདཧིཏྭཱ ཋཔིཏཾཡེཝ ཨསཱིཏིཀོཊིདྷནཾ ¶ ¶ ཝིསྶཛྫེཏྭཱ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ དཏྭཱ དྷམྨཾ སུཏྭཱ སརཎེསུ པཏིཊྛཱཡ ¶ ནིཀྑམིཏྭཱ པབྦཛི. སོཔི ནཾ ‘‘ཨནཱགཏེ བུདྡྷོ བྷཝིསྶསཱི’’ཏི བྱཱཀཱསི. སུམེདྷསྶ བྷགཝཏོ སུདསྶནཾ ནཱམ ནགརཾ ཨཧོསི, སུདཏྟོ ནཱམ རཱཛཱ པིཏཱ, མཱཏཱཔི སུདཏྟཱ ནཱམ, སརཎོ ཙ སབྦཀཱམོ ཙ དྭེ ཨགྒསཱཝཀཱ, སཱགརོ ནཱམུཔཊྛཱཀོ, རཱམཱ ཙ སུརཱམཱ ཙ དྭེ ཨགྒསཱཝིཀཱ, མཧཱནཱིཔརུཀྑོ བོདྷི, སརཱིརཾ ཨཊྛཱསཱིཏིཧཏྠུབྦེདྷཾ ཨཧོསི, ཨཱཡུ ནཝུཏི ཝསྶསཧསྶཱནཱིཏི.

‘‘པདུམུཏྟརསྶ ཨཔརེན, སུམེདྷོ ནཱམ ནཱཡཀོ;

དུརཱསདོ ཨུགྒཏེཛོ, སབྦལོཀུཏྟམོ མུནཱི’’ཏི.

ཏསྶ ཨཔརབྷཱགེ སུཛཱཏོ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ཨཧེསུཾ. པཋམསནྣིཔཱཏེ སཊྛི བྷིཀྑུསཏསཧསྶཱནི ཨཧེསུཾ, དུཏིཡེ པཉྙཱསཾ, ཏཏིཡེ ཙཏྟཱལཱིསཾ. ཏདཱ བོདྷིསཏྟོ ཙཀྐཝཏྟིརཱཛཱ ཧུཏྭཱ ‘‘བུདྡྷོ ཨུཔྤནྣོ’’ཏི སུཏྭཱ ཨུཔསངྐམིཏྭཱ དྷམྨཾ སུཏྭཱ བུདྡྷཔྤམུཁསྶ བྷིཀྑུསངྒྷསྶ སདྡྷིཾ སཏྟཧི རཏནེཧི ཙཏུམཧཱདཱིཔརཛྫཾ དཏྭཱ སཏྠུ སནྟིཀེ པབྦཛི. སཀལརཊྛཝཱསིནོ རཊྛུཔྤཱདཾ གཧེཏྭཱ ཨཱརཱམིཀཀིཙྩཾ སཱདྷེནྟཱ བུདྡྷཔྤམུཁསྶ བྷིཀྑུསངྒྷསྶ ནིཙྩཾ མཧཱདཱནཾ ཨདཾསུ. སོཔི ནཾ སཏྠཱ ‘‘ཨནཱགཏེ བུདྡྷོ བྷཝིསྶསཱི’’ཏི བྱཱཀཱསི. ཏསྶ བྷགཝཏོ ནགརཾ སུམངྒལཾ ནཱམ ཨཧོསི, ཨུགྒཏོ ནཱམ རཱཛཱ པིཏཱ, པབྷཱཝཏཱི ནཱམ མཱཏཱ, སུདསྶནོ ཙ སུདེཝོ ཙ དྭེ ཨགྒསཱཝཀཱ, ནཱརདོ ནཱམུཔཊྛཱཀོ, ནཱགཱ ཙ ནཱགསམཱལཱ ཙ དྭེ ཨགྒསཱཝིཀཱ, མཧཱཝེལུ༹རུཀྑོ བོདྷི. སོ ཀིར མནྡཙྪིདྡོ གྷནཀྑནྡྷོ ཨུཔརི ནིགྒཏཱཧི མཧཱསཱཁཱཧི མོརཔིཉྪཀལཱཔོ ཝིཡ ཝིརོཙིཏྠ. ཏསྶ བྷགཝཏོ སརཱིརཾ པཎྞཱསཧཏྠུབྦེདྷཾ ཨཧོསི, ཨཱཡུ ནཝུཏི ཝསྶསཧསྶཱནཱིཏི.

‘‘ཏཏྠེཝ མཎྜཀཔྤམྷི, སུཛཱཏོ ནཱམ ནཱཡཀོ;

སཱིཧཧནུསབྷཀྑནྡྷོ, ཨཔྤམེཡྻོ དུརཱསདོ’’ཏི.

ཏསྶ ཨཔརབྷཱགེ ཨིཏོ ཨཊྛཱརསཀཔྤསཏམཏྠཀེ ཨེཀསྨིཾ ཀཔྤེ པིཡདསྶཱི, ཨཏྠདསྶཱི, དྷམྨདསྶཱིཏི ཏཡོ བུདྡྷཱ ནིབྦཏྟིཾསུ. པིཡདསྶིསྶཱཔི ཏཡོ སཱཝཀསནྣིཔཱཏཱ ཨཧེསུཾ. པཋམེ ཀོཊིསཏསཧསྶཱ བྷིཀྑཱུ ཨཧེསུཾ, དུཏིཡེ ནཝུཏིཀོཊིཡོ, ཏཏིཡེ ཨསཱིཏིཀོཊིཡོ. ཏདཱ བོདྷིསཏྟོ ཀསྶཔོ ནཱམ མཱཎཝོ ཏིཎྞཾ ཝེདཱནཾ པཱརཾ གཏོ ཧུཏྭཱ ¶ སཏྠུ དྷམྨདེསནཾ སུཏྭཱ ཀོཊིསཏསཧསྶདྷནཔརིཙྩཱགེན སངྒྷཱརཱམཾ ¶ ཀཱརེཏྭཱ སརཎེསུ ཙ སཱིལེསུ ཙ པཏིཊྛཱསི. ཨཐ ནཾ ¶ སཏྠཱ ‘‘ཨཊྛཱརསཀཔྤསཏཙྩཡེན བུདྡྷོ བྷཝིསྶསཱི’’ཏི བྱཱཀཱསི. ཏསྶ བྷགཝཏོ ཨནོམཾ ནཱམ ནགརཾ ཨཧོསི, པིཏཱ སུདིནྣོ ནཱམ རཱཛཱ, མཱཏཱ ཙནྡཱ ནཱམ དེཝཱི, པཱལིཏོ ཙ སབྦདསྶཱི ཙ དྭེ ཨགྒསཱཝཀཱ, སོབྷིཏོ ནཱམུཔཊྛཱཀོ, སུཛཱཏཱ ཙ དྷམྨདིནྣཱ ཙ དྭེ ཨགྒསཱཝིཀཱ, ཀཀུདྷརུཀྑོ བོདྷི, སརཱིརཾ ཨསཱིཏིཧཏྠུབྦེདྷཾ ཨཧོསི, ནཝུཏི ཝསྶསཧསྶཱནི ཨཱཡཱུཏི.

‘‘སུཛཱཏསྶ ཨཔརེན, སཡམྦྷཱུ ལོཀནཱཡཀོ;

དུརཱསདོ ཨསམསམོ, པིཡདསྶཱི མཧཱཡསོ’’ཏི.

ཏསྶ ཨཔརབྷཱགེ ཨཏྠདསྶཱི ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ཨཧེསུཾ. པཋམེ ཨཊྛནཝུཏི བྷིཀྑུསཏསཧསྶཱནི ཨཧེསུཾ, དུཏིཡེ ཨཊྛཱསཱིཏིསཏསཧསྶཱནི, ཏཐཱ ཏཏིཡེ. ཏདཱ བོདྷིསཏྟོ སུསཱིམོ ནཱམ མཧིདྡྷིཀོ ཏཱཔསོ ཧུཏྭཱ དེཝལོཀཏོ མནྡཱརཝཔུཔྥཙྪཏྟཾ ཨཱཧརིཏྭཱ སཏྠཱརཾ པཱུཛེསི, སོཔི ནཾ ‘‘ཨནཱགཏེ བུདྡྷོ བྷཝིསྶསཱི’’ཏི བྱཱཀཱསི. ཏསྶ བྷགཝཏོ སོབྷིཏཾ ནཱམ ནགརཾ ཨཧོསི, སཱགརོ ནཱམ རཱཛཱ པིཏཱ, སུདསྶནཱ ནཱམ མཱཏཱ, སནྟོ ཙ ཨུཔསནྟོ ཙ དྭེ ཨགྒསཱཝཀཱ, ཨབྷཡོ ནཱམུཔཊྛཱཀོ, དྷམྨཱ ཙ སུདྷམྨཱ ཙ དྭེ ཨགྒསཱཝིཀཱ, ཙམྤཀརུཀྑོ བོདྷི, སརཱིརཾ ཨསཱིཏིཧཏྠུབྦེདྷཾ ཨཧོསི, སརཱིརཔྤབྷཱ སམནྟཏོ སབྦཀཱལཾ ཡོཛནམཏྟཾ ཕརིཏྭཱ ཨཊྛཱསི, ཨཱཡུ ཝསྶསཏསཧསྶནྟི.

‘‘ཏཏྠེཝ མཎྜཀཔྤམྷི, ཨཏྠདསྶཱི ནརཱསབྷོ;

མཧཱཏམཾ ནིཧནྟྭཱན, པཏྟོ སམྦོདྷིམུཏྟམ’’ནྟི.

ཏསྶ ཨཔརབྷཱགེ དྷམྨདསྶཱི ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ཨཧེསུཾ. པཋམེ ཀོཊིསཏཾ བྷིཀྑཱུ ཨཧེསུཾ, དུཏིཡེ སཏྟཏིཀོཊིཡོ, ཏཏིཡེ ཨསཱིཏིཀོཊིཡོ. ཏདཱ བོདྷིསཏྟོ སཀྐོ དེཝརཱཛཱ ཧུཏྭཱ དིབྦགནྡྷཔུཔྥེཧི ཙ དིབྦཏཱུརིཡེཧི ཙ པཱུཛཾ ཨཀཱསི, སོཔི ནཾ ‘‘ཨནཱགཏེ བུདྡྷོ བྷཝིསྶསཱི’’ཏི བྱཱཀཱསི. ཏསྶ བྷགཝཏོ སརཎཾ ནཱམ ནགརཾ ཨཧོསི, པིཏཱ སརཎོ ནཱམ རཱཛཱ, མཱཏཱ སུནནྡཱ ནཱམ, པདུམོ ཙ ཕུསྶདེཝོ ཙ དྭེ ཨགྒསཱཝཀཱ, སུནེཏྟོ ནཱམུཔཊྛཱཀོ ¶ , ཁེམཱ ཙ སབྦནཱམཱ ཙ དྭེ ཨགྒསཱཝིཀཱ, རཏྟངྐུརརུཀྑོ བོདྷི, ‘‘བིམྦིཛཱལོ’’ཏིཔི ཝུཙྩཏི, སརཱིརཾ པནསྶ ཨསཱིཏིཧཏྠུབྦེདྷཾ ཨཧོསི, ཝསྶསཏསཧསྶཾ ཨཱཡཱུཏི.

‘‘ཏཏྠེཝ ¶ མཎྜཀཔྤམྷི, དྷམྨདསྶཱི མཧཱཡསོ;

ཏམནྡྷཀཱརཾ ཝིདྷམིཏྭཱ, ཨཏིརོཙཏི སདེཝཀེ’’ཏི.

ཏསྶ ¶ ཨཔརབྷཱགེ ཨིཏོ ཙཏུནཝུཏིཀཔྤམཏྠཀེ ཨེཀསྨིཾ ཀཔྤེ ཨེཀོཝ སིདྡྷཏྠོ ནཱམ བུདྡྷོ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ཨཧེསུཾ. པཋམསནྣིཔཱཏེ ཀོཊིསཏསཧསྶཾ བྷིཀྑཱུ ཨཧེསུཾ, དུཏིཡེ ནཝུཏིཀོཊིཡོ, ཏཏིཡེ ཨསཱིཏིཀོཊིཡོ. ཏདཱ བོདྷིསཏྟོ ཨུགྒཏེཛོ ཨབྷིཉྙཱབལསམྤནྣོ མངྒལོ ནཱམ ཏཱཔསོ ཧུཏྭཱ མཧཱཛམྦུཕལཾ ཨཱཧརིཏྭཱ ཏཐཱགཏསྶ ཨདཱསི. སཏྠཱ ཏཾ ཕལཾ པརིབྷུཉྫིཏྭཱ ‘‘ཙཏུནཝུཏིཀཔྤམཏྠཀེ བུདྡྷོ བྷཝིསྶསཱི’’ཏི བོདྷིསཏྟཾ བྱཱཀཱསི. ཏསྶ བྷགཝཏོ ནགརཾ ཝེབྷཱརཾ ནཱམ ཨཧོསི, པིཏཱ ཛཡསེནོ ནཱམ རཱཛཱ, མཱཏཱ སུཕསྶཱ ནཱམ, སམྦལོ ཙ སུམིཏྟོ ཙ དྭེ ཨགྒསཱཝཀཱ, རེཝཏོ ནཱམུཔཊྛཱཀོ, སཱིཝལཱི ཙ སུརཱམཱ ཙ དྭེ ཨགྒསཱཝིཀཱ, ཀཎིཀཱརརུཀྑོ བོདྷི, སརཱིརཾ སཊྛིཧཏྠུབྦེདྷཾ ཨཧོསི, ཝསྶསཏསཧསྶཾ ཨཱཡཱུཏི.

‘‘དྷམྨདསྶིསྶ ཨཔརེན, སིདྡྷཏྠོ ནཱམ ནཱཡཀོ;

ནིཧནིཏྭཱ ཏམཾ སབྦཾ, སཱུརིཡོ ཨབྦྷུགྒཏོ ཡཐཱ’’ཏི.

ཏསྶ ཨཔརབྷཱགེ ཨིཏོ དྭཱནཝུཏིཀཔྤམཏྠཀེ ཏིསྶོ ཕུསྶོཏི ཨེཀསྨིཾ ཀཔྤེ དྭེ བུདྡྷཱ ནིབྦཏྟིཾསུ. ཏིསྶསྶ བྷགཝཏོ ཏཡོ སཱཝཀསནྣིཔཱཏཱ ཨཧེསུཾ. པཋམསནྣིཔཱཏེ བྷིཀྑཱུནཾ ཀོཊིསཏཾ ཨཧོསི, དུཏིཡེ ནཝུཏིཀོཊིཡོ, ཏཏིཡེ ཨསཱིཏིཀོཊིཡོ. ཏདཱ བོདྷིསཏྟོ མཧཱབྷོགོ མཧཱཡསོ སུཛཱཏོ ནཱམ ཁཏྟིཡོ ཧུཏྭཱ ཨིསིཔབྦཛྫཾ པབྦཛིཏྭཱ མཧིདྡྷིཀབྷཱཝཾ པཏྭཱ ‘‘བུདྡྷོ ཨུཔྤནྣོ’’ཏི སུཏྭཱ དིབྦམནྡཱརཝཔདུམཔཱརིཙྪཏྟཀཔུཔྥཱནི ཨཱདཱཡ ཙཏུཔརིསམཛ྄ཛྷེ གཙྪནྟཾ ཏཐཱགཏཾ པཱུཛེསི, ཨཱཀཱསེ པུཔྥཝིཏཱནཾ ཨཀཱསི. སོཔི ནཾ སཏྠཱ ‘‘ཨིཏོ དྭཱནཝུཏིཀཔྤེ བུདྡྷོ བྷཝིསྶསཱི’’ཏི བྱཱཀཱསི. ཏསྶ བྷགཝཏོ ཁེམཾ ནཱམ ནགརཾ ཨཧོསི, པིཏཱ ཛནསནྡྷོ ནཱམ ཁཏྟིཡོ, མཱཏཱ པདུམཱ ནཱམ ¶ , བྲཧྨདེཝོ ཙ ཨུདཡོ ཙ དྭེ ཨགྒསཱཝཀཱ, སམངྒོ ནཱམུཔཊྛཱཀོ, ཕུསྶཱ ཙ སུདཏྟཱ ཙ དྭེ ཨགྒསཱཝིཀཱ, ཨསནརུཀྑོ བོདྷི, སརཱིརཾ སཊྛིཧཏྠུབྦེདྷཾ ཨཧོསི, ཝསྶསཏསཧསྶཾ ཨཱཡཱུཏི.

‘‘སིདྡྷཏྠསྶ ཨཔརེན, ཨསམོ ཨཔྤཊིཔུགྒལོ;

ཨནནྟསཱིལོ ཨམིཏཡསོ, ཏིསྶོ ལོཀགྒནཱཡཀོ’’ཏི.

ཏསྶ ¶ ཨཔརབྷཱགེ ཕུསྶོ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ཨཧེསུཾ. པཋམསནྣིཔཱཏེ སཊྛི བྷིཀྑུསཏསཧསྶཱནི ཨཧེསུཾ, དུཏིཡེ པཎྞཱས, ཏཏིཡེ དྭཏྟིཾས. ཏདཱ བོདྷིསཏྟོ ཝིཛིཏཱཝཱི ནཱམ ཁཏྟིཡོ ཧུཏྭཱ མཧཱརཛྫཾ པཧཱཡ སཏྠུ སནྟིཀེ པབྦཛིཏྭཱ ཏཱིཎི པིཊཀཱནི ¶ ཨུགྒཧེཏྭཱ མཧཱཛནསྶ དྷམྨཀཐཾ ཀཐེསི, སཱིལཔཱརམིཉྩ པཱུརེསི. སོཔི ནཾ ‘‘བུདྡྷོ བྷཝིསྶསཱི’’ཏི ཏཐེཝ བྱཱཀཱསི. ཏསྶ བྷགཝཏོ ཀཱསཱི ནཱམ ནགརཾ ཨཧོསི, ཛཡསེནོ ནཱམ རཱཛཱ པིཏཱ, སིརིམཱ ནཱམ མཱཏཱ, སུརཀྑིཏོ ཙ དྷམྨསེནོ ཙ དྭེ ཨགྒསཱཝཀཱ, སབྷིཡོ ནཱམུཔཊྛཱཀོ, ཙཱལཱ ཙ ཨུཔཙཱལཱ ཙ དྭེ ཨགྒསཱཝིཀཱ, ཨཱམལཀརུཀྑོ བོདྷི, སརཱིརཾ ཨཊྛཔཎྞཱསཧཏྠུབྦེདྷཾ ཨཧོསི, ནཝུཏི ཝསྶསཧསྶཱནི ཨཱཡཱུཏི.

‘‘ཏཏྠེཝ མཎྜཀཔྤམྷི, ཨཧུ སཏྠཱ ཨནུཏྟརོ;

ཨནཱུཔམོ ཨསམསམོ, ཕུསྶོ ལོཀགྒནཱཡཀོ’’ཏི.

ཏསྶ ཨཔརབྷཱགེ ཨིཏོ ཨེཀནཝུཏིཀཔྤེ ཝིཔསྶཱི ནཱམ བྷགཝཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ཨཧེསུཾ. པཋམསནྣིཔཱཏེ ཨཊྛསཊྛི བྷིཀྑུསཏསཧསྶཾ ཨཧོསི, དུཏིཡེ ཨེཀསཏསཧསྶཾ, ཏཏིཡེ ཨསཱིཏིསཧསྶཱནི. ཏདཱ བོདྷིསཏྟོ མཧིདྡྷིཀོ མཧཱནུབྷཱཝོ ཨཏུལོ ནཱམ ནཱགརཱཛཱ ཧུཏྭཱ སཏྟརཏནཁཙིཏཾ སོཝཎྞམཡཾ མཧཱཔཱིཋཾ བྷགཝཏོ ཨདཱསི. སོཔི ནཾ ‘‘ཨིཏོ ཨེཀནཝུཏིཀཔྤེ བུདྡྷོ བྷཝིསྶསཱི’’ཏི བྱཱཀཱསི. ཏསྶ བྷགཝཏོ བནྡྷུམཏཱི ནཱམ ནགརཾ ཨཧོསི, བནྡྷུམཱ ནཱམ རཱཛཱ པིཏཱ, བནྡྷུམཏཱི ནཱམ མཱཏཱ, ཁཎྜོ ཙ ཏིསྶོ ཙ དྭེ ཨགྒསཱཝཀཱ, ཨསོཀོ ནཱམུཔཊྛཱཀོ, ཙནྡཱ ཙ ཙནྡམིཏྟཱ ཙ དྭེ ཨགྒསཱཝིཀཱ, པཱཊལིརུཀྑོ བོདྷི, སརཱིརཾ ཨསཱིཏིཧཏྠུབྦེདྷཾ ¶ ཨཧོསི, སརཱིརཔྤབྷཱ སདཱ སཏྟ ཡོཛནཱནི ཕརིཏྭཱ ཨཊྛཱསི, ཨསཱིཏི ཝསྶསཧསྶཱནི ཨཱཡཱུཏི.

‘‘ཕུསྶསྶ ཙ ཨཔརེན, སམྦུདྡྷོ དྭིཔདུཏྟམོ;

ཝིཔསྶཱི ནཱམ ནཱམེན, ལོཀེ ཨུཔྤཛྫི ཙཀྑུམཱ’’ཏི.

ཏསྶ ཨཔརབྷཱགེ ཨིཏོ ཨེཀཏིཾསཀཔྤེ སིཁཱི ཙ ཝེསྶབྷཱུ ཙཱཏི དྭེ བུདྡྷཱ ཨཧེསུཾ. སིཁིསྶཱཔི བྷགཝཏོ ཏཡོ སཱཝཀསནྣིཔཱཏཱ ཨཧེསུཾ. པཋམསནྣིཔཱཏེ བྷིཀྑུསཏསཧསྶཾ ཨཧོསི, དུཏིཡེ ཨསཱིཏིསཧསྶཱནི, ཏཏིཡེ སཏྟཏྟིསཧསྶཱནི. ཏདཱ བོདྷིསཏྟོ ཨརིནྡམོ ནཱམ རཱཛཱ ཧུཏྭཱ བུདྡྷཔྤམུཁསྶ བྷིཀྑུསངྒྷསྶ སཙཱིཝརཾ མཧཱདཱནཾ པཝཏྟེཏྭཱ སཏྟརཏནཔཊིམཎྜིཏཾ ཧཏྠིརཏནཾ དཏྭཱ ཧཏྠིཔྤམཱཎཾ ཀཏྭཱ ཀཔྤིཡབྷཎྜཾ ཨདཱསི. སོཔི ནཾ ‘‘ཨིཏོ ¶ ཀཏིཾསཀཔྤེ བུདྡྷོ བྷཝིསྶསཱི’’ཏི བྱཱཀཱསི. ཏསྶ བྷགཝཏོ ཨརུཎཝཏཱི ནཱམ ནགརཾ ཨཧོསི, ཨརུཎོ ནཱམ ཁཏྟིཡོ པིཏཱ, པབྷཱཝཏཱི ནཱམ མཱཏཱ, ཨབྷིབྷཱུ ཙ སམྦྷཝོ ཙ དྭེ ཨགྒསཱཝཀཱ, ཁེམངྐརོ ནཱམུཔཊྛཱཀོ, སཁིལཱ ཙ པདུམཱ ཙ དྭེ ཨགྒསཱཝིཀཱ, པུཎྜརཱིཀརུཀྑོ བོདྷི, སརཱིརཾ ¶ སཏྟཏིཧཏྠུབྦེདྷཾ ཨཧོསི, སརཱིརཔྤབྷཱ ཡོཛནཏྟཡཾ ཕརིཏྭཱ ཨཊྛཱསི, སཏྟཏི ཝསྶསཧསྶཱནི ཨཱཡཱུཏི.

‘‘ཝིཔསྶིསྶ ཨཔརེན, སམྦུདྡྷོ དྭིཔདུཏྟམོ;

སིཁིཝ྄ཧཡོ ནཱམ ཛིནོ, ཨསམོ ཨཔྤཊིཔུགྒལོ’’ཏི.

ཏསྶ ཨཔརབྷཱགེ ཝེསྶབྷཱུ ནཱམ སཏྠཱ ཨུདཔཱདི. ཏསྶཱཔི ཏཡོ སཱཝཀསནྣིཔཱཏཱ ཨཧེསུཾ. པཋམསནྣིཔཱཏེ ཨསཱིཏི བྷིཀྑུསཧསྶཱནི ཨཧེསུཾ, དུཏིཡེ སཏྟཏི, ཏཏིཡེ སཊྛི. ཏདཱ བོདྷིསཏྟོ སུདསྶནོ ནཱམ རཱཛཱ ཧུཏྭཱ བུདྡྷཔྤམུཁསྶ བྷིཀྑུསངྒྷསྶ སཙཱིཝརཾ མཧཱདཱནཾ དཏྭཱ ཏསྶ སནྟིཀེ པབྦཛིཏྭཱ ཨཱཙཱརགུཎསམྤནྣོ བུདྡྷརཏནེ ཙིཏྟཱིཀཱརཔཱིཏིབཧུལོ ཨཧོསི. སོཔི ནཾ བྷགཝཱ ‘‘ཨིཏོ ཨེཀཏིཾསཀཔྤེ བུདྡྷོ བྷཝིསྶསཱི’’ཏི བྱཱཀཱསི. ཏསྶ པན བྷགཝཏོ ཨནོམཾ ནཱམ ནགརཾ ཨཧོསི, སུཔྤཏཱིཏོ ནཱམ རཱཛཱ པིཏཱ, ཡསཝཏཱི ནཱམ མཱཏཱ ¶ , སོཎོ ཙ ཨུཏྟརོ ཙ དྭེ ཨགྒསཱཝཀཱ, ཨུཔསནྟོ ནཱམུཔཊྛཱཀོ, དཱམཱ ཙ སམཱལཱ ཙ དྭེ ཨགྒསཱཝིཀཱ, སཱལརུཀྑོ བོདྷི, སརཱིརཾ སཊྛིཧཏྠུབྦེདྷཾ ཨཧོསི, སཊྛི ཝསྶསཧསྶཱནི ཨཱཡཱུཏི.

‘‘ཏཏྠེཝ མཎྜཀཔྤམྷི, ཨསམོ ཨཔྤཊིཔུགྒལོ;

ཝེསྶབྷཱུ ནཱམ ནཱམེན, ལོཀེ ཨུཔྤཛྫི སོ ཛིནོ’’ཏི.

ཏསྶ ཨཔརབྷཱགེ ཨིམསྨིཾ ཀཔྤེ ཙཏྟཱརོ བུདྡྷཱ ནིབྦཏྟཱ ཀཀུསནྡྷོ, ཀོཎཱགམནོ, ཀསྶཔོ, ཨམྷཱཀཾ བྷགཝཱཏི. ཀཀུསནྡྷསྶ བྷགཝཏོ ཨེཀོཝ སཱཝཀསནྣིཔཱཏོ, ཏཏྠ ཙཏྟཱལཱིས བྷིཀྑུསཧསྶཱནི ཨཧེསུཾ. ཏདཱ བོདྷིསཏྟོ ཁེམོ ནཱམ རཱཛཱ ཧུཏྭཱ བུདྡྷཔྤམུཁསྶ བྷིཀྑུསངྒྷསྶ སཔཏྟཙཱིཝརཾ མཧཱདཱནཉྩེཝ ཨཉྫནཱདིབྷེསཛྫཱནི ཙ དཏྭཱ སཏྠུ དྷམྨདེསནཾ སུཏྭཱ པབྦཛི. སོཔི ནཾ སཏྠཱ བྱཱཀཱསི. ཀཀུསནྡྷསྶ པན བྷགཝཏོ ཁེམཾ ནཱམ ནགརཾ ཨཧོསི, ཨགྒིདཏྟོ ནཱམ བྲཱཧྨཎོ པིཏཱ, ཝིསཱཁཱ ནཱམ བྲཱཧྨཎཱི མཱཏཱ, ཝིདྷུརོ ཙ སཉྫཱིཝོ ཙ དྭེ ཨགྒསཱཝཀཱ, བུདྡྷིཛོ ནཱམུཔཊྛཱཀོ, སཱམཱ ཙ ཙམྤཀཱ ཙ དྭེ ཨགྒསཱཝིཀཱ ¶ , མཧཱསིརཱིསརུཀྑོ བོདྷི, སརཱིརཾ ཙཏྟཱལཱིསཧཏྠུབྦེདྷཾ ཨཧོསི, ཙཏྟཱལཱིས ཝསྶསཧསྶཱནི ཨཱཡཱུཏི.

‘‘ཝེསྶབྷུསྶ ཨཔརེན, སམྦུདྡྷོ དྭིཔདུཏྟམོ;

ཀཀུསནྡྷོ ནཱམ ནཱམེན, ཨཔྤམེཡྻོ དུརཱསདོ’’ཏི.

ཏསྶ ¶ ཨཔརབྷཱགེ ཀོཎཱགམནོ ནཱམ སཏྠཱ ཨུདཔཱདི. ཏསྶཱཔི ཨེཀོ སཱཝཀསནྣིཔཱཏོ, ཏཏྠ ཏིཾས བྷིཀྑུསཧསྶཱནི ཨཧེསུཾ. ཏདཱ བོདྷིསཏྟོ པབྦཏོ ནཱམ རཱཛཱ ཧུཏྭཱ ཨམཙྩགཎཔརིཝུཏོ སཏྠུ སནྟིཀཾ གནྟྭཱ དྷམྨདེསནཾ སུཏྭཱ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ མཧཱདཱནཾ པཝཏྟེཏྭཱ པཊྚུཎྞཙཱིནཔཊྚཀོསེཡྻཀམྦལདུཀཱུལཱནི ཙེཝ སུཝཎྞཔཱདུཀཉྩ དཏྭཱ སཏྠུ སནྟིཀེ པབྦཛི. སོཔི ནཾ བྱཱཀཱསི. ཏསྶ བྷགཝཏོ སོབྷཝཏཱི ནཱམ ནགརཾ ཨཧོསི, ཡཉྙདཏྟོ ནཱམ བྲཱཧྨཎོ པིཏཱ, ཨུཏྟརཱ ནཱམ བྲཱཧྨཎཱི མཱཏཱ, བྷིཡྻསོ ཙ ཨུཏྟརོ ཙ དྭེ ཨགྒསཱཝཀཱ, སོཏྠིཛོ ནཱམུཔཊྛཱཀོ, སམུདྡཱ ཙ ཨུཏྟརཱ ཙ དྭེ ཨགྒསཱཝིཀཱ, ཨུདུམྦརརུཀྑོ བོདྷི, སརཱིརཾ ཏིཾསཧཏྠུབྦེདྷཾ ཨཧོསི, ཏིཾས ཝསྶསཧསྶཱནི ཨཱཡཱུཏི.

‘‘ཀཀུསནྡྷསྶ ¶ ཨཔརེན, སམྦུདྡྷོ དྭིཔདུཏྟམོ;

ཀོཎཱགམནོ ནཱམ ཛིནོ, ལོཀཛེཊྛོ ནརཱསབྷོ’’ཏི.

ཏསྶ ཨཔརབྷཱགེ ཀསྶཔོ ནཱམ སཏྠཱ ཨུདཔཱདི. ཏསྶཱཔི ཨེཀོ སཱཝཀསནྣིཔཱཏོ, ཏཏྠ ཝཱིསཏི བྷིཀྑུསཧསྶཱནི ཨཧེསུཾ. ཏདཱ བོདྷིསཏྟོ ཛོཏིཔཱལོ ནཱམ མཱཎཝོ ཧུཏྭཱ ཏིཎྞཾ ཝེདཱནཾ པཱརགཱུ བྷཱུམིཡཉྩ ཨནྟལིཀྑེ ཙ པཱཀཊོ གྷཊཱིཀཱརསྶ ཀུམྦྷཀཱརསྶ མིཏྟོ ཨཧོསི. སོ ཏེན སདྡྷིཾ སཏྠཱརཾ ཨུཔསངྐམིཏྭཱ དྷམྨཀཐཾ སུཏྭཱ པབྦཛིཏྭཱ ཨཱརདྡྷཝཱིརིཡོ ཏཱིཎི པིཊཀཱནི ཨུགྒཧེཏྭཱ ཝཏྟཱཝཏྟསམྤཏྟིཡཱ བུདྡྷསྶ སཱསནཾ སོབྷེསི. སོཔི ནཾ བྱཱཀཱསི. ཏསྶ བྷགཝཏོ ཛཱཏནགརཾ བཱརཱཎསཱི ནཱམ ཨཧོསི, བྲཧྨདཏྟོ ནཱམ བྲཱཧྨཎོ པིཏཱ, དྷནཝཏཱི ནཱམ བྲཱཧྨཎཱི མཱཏཱ, ཏིསྶོ ཙ བྷཱརདྭཱཛོ ཙ དྭེ ཨགྒསཱཝཀཱ, སབྦམིཏྟོ ནཱམུཔཊྛཱཀོ, ཨནུལཱ༹ ཙ ཨུརུཝེལཱ༹ ཙ དྭེ ཨགྒསཱཝིཀཱ, ནིགྲོདྷརུཀྑོ བོདྷི, སརཱིརཾ ཝཱིསཏིཧཏྠུབྦེདྷཾ ཨཧོསི, ཝཱིསཏི ཝསྶསཧསྶཱནི ཨཱཡཱུཏི.

‘‘ཀོཎཱགམནསྶ ཨཔརེན, སམྦུདྡྷོ དྭིཔདུཏྟམོ;

ཀསྶཔོ ནཱམ གོཏྟེན, དྷམྨརཱཛཱ པབྷངྐརོ’’ཏི.

ཡསྨིཾ ¶ པན ཀཔྤེ དཱིཔངྐརོ དསབལོ ཨུདཔཱདི, ཏསྨིཾ ཨཉྙེཔི ཏཡོ བུདྡྷཱ ཨཧེསུཾ. ཏེསཾ སནྟིཀཱ བོདྷིསཏྟསྶ བྱཱཀརཎཾ ནཏྠི, ཏསྨཱ ¶ ཏེ ཨིདྷ ན དསྶིཏཱ. ཨཊྛཀཐཱཡཾ པན ཏམྷཱ ཀཔྤཱ པཊྛཱཡ སབྦེཔི བུདྡྷེ དསྶེཏུཾ ཨིདཾ ཝུཏྟཾ –

‘‘ཏཎྷངྐརོ མེདྷངྐརོ, ཨཐོཔི སརཎངྐརོ;

དཱིཔངྐརོ ཙ སམྦུདྡྷོ, ཀོཎྜཉྙོ དྭིཔདུཏྟམོ.

‘‘མངྒལོ ཙ སུམནོ ཙ, རེཝཏོ སོབྷིཏོ མུནི;

ཨནོམདསྶཱི པདུམོ, ནཱརདོ པདུམུཏྟརོ.

‘‘སུམེདྷོ ཙ སུཛཱཏོ ཙ, པིཡདསྶཱི མཧཱཡསོ;

ཨཏྠདསྶཱི དྷམྨདསྶཱི, སིདྡྷཏྠོ ལོཀནཱཡཀོ.

‘‘ཏིསྶོ ཕུསྶོ ཙ སམྦུདྡྷོ, ཝིཔསྶཱི སིཁི ཝེསྶབྷཱུ;

ཀཀུསནྡྷོ ཀོཎཱགམནོ, ཀསྶཔོ ཙཱཏི ནཱཡཀོ.

‘‘ཨེཏེ ¶ ཨཧེསུཾ སམྦུདྡྷཱ, ཝཱིཏརཱགཱ སམཱཧིཏཱ;

སཏརཾསཱིཝ ཨུཔྤནྣཱ, མཧཱཏམཝིནོདནཱ;

ཛལིཏྭཱ ཨགྒིཁནྡྷཱཝ, ནིབྦུཏཱ ཏེ སསཱཝཀཱ’’ཏི.

ཏཏྠ ཨམྷཱཀཾ བོདྷིསཏྟོ དཱིཔངྐརཱདཱིནཾ ཙཏུཝཱིསཏིཡཱ བུདྡྷཱནཾ སནྟིཀེ ཨདྷིཀཱརཾ ཀརོནྟོ ཀཔྤསཏསཧསྶཱདྷིཀཱནི ཙཏྟཱརི ཨསངྑྱེཡྻཱནི ཨཱགཏོ. ཀསྶཔསྶ པན བྷགཝཏོ ཨོརབྷཱགེ ཋཔེཏྭཱ ཨིམཾ སམྨཱསམྦུདྡྷཾ ཨཉྙོ བུདྡྷོ ནཱམ ནཏྠི. ཨིཏི དཱིཔངྐརཱདཱིནཾ ཙཏུཝཱིསཏིཡཱ བུདྡྷཱནཾ སནྟིཀེ ལདྡྷབྱཱཀརཎོ པན བོདྷིསཏྟོ ཡེནེན –

‘‘མནུསྶཏྟཾ ལིངྒསམྤཏྟི, ཧེཏུ སཏྠཱརདསྶནཾ;

པབྦཛྫཱ གུཎསམྤཏྟི, ཨདྷིཀཱརོ ཙ ཚནྡཏཱ;

ཨཊྛདྷམྨསམོདྷཱནཱ, ཨབྷིནཱིཧཱརོ སམིཛ྄ཛྷཏཱི’’ཏི. (བུ. ཝཾ. ༢.༥༩) –

ཨིམེ ཨཊྛ དྷམྨེ སམོདྷཱནེཏྭཱ དཱིཔངྐརཔཱདམཱུལེ ཀཏཱབྷིནཱིཧཱརེན ‘‘ཧནྡ བུདྡྷཀརེ དྷམྨེ, ཝིཙིནཱམི ཨིཏོ ¶ ཙིཏོ’’ཏི ཨུསྶཱཧཾ ཀཏྭཱ ‘‘ཝིཙིནནྟོ ཏདཱདཀྑིཾ, པཋམཾ དཱནཔཱརམི’’ནྟི དཱནཔཱརམིཏཱདཡོ བུདྡྷཀཱརཀདྷམྨཱ དིཊྛཱ, ཏེ པཱུརེནྟོཡེཝ ཡཱཝ ཝེསྶནྟརཏྟབྷཱཝཱ ཨཱགམི. ཨཱགཙྪནྟོ ཙ ཡེ ཏེ ཀཏཱབྷིནཱིཧཱརཱནཾ བོདྷིསཏྟཱནཾ ཨཱནིསཾསཱ སཾཝཎྞིཏཱ –

‘‘ཨེཝཾ སབྦངྒསམྤནྣཱ, བོདྷིཡཱ ནིཡཏཱ ནརཱ;

སཾསརཾ དཱིགྷམདྡྷཱནཾ, ཀཔྤཀོཊིསཏེཧིཔི.

‘‘ཨཝཱིཙིམྷི ནུཔྤཛྫནྟི, ཏཐཱ ལོཀནྟརེསུ ཙ;

ནིཛ྄ཛྷཱམཏཎྷཱ ཁུཔྤིཔཱསཱ, ན ཧོནྟི ཀཱལཀཉྫཀཱ.

‘‘ན ཧོནྟི ཁུདྡཀཱ པཱཎཱ, ཨུཔྤཛྫནྟཱཔི དུགྒཏིཾ;

ཛཱཡམཱནཱ ¶ མནུསྶེསུ, ཛཙྩནྡྷཱ ན བྷཝནྟི ཏེ.

‘‘སོཏཝེཀལླཏཱ ནཏྠི, ན བྷཝནྟི མཱུགཔཀྑིཀཱ;

ཨིཏྠིབྷཱཝཾ ན གཙྪནྟི, ཨུབྷཏོབྱཉྫནཔཎྜཀཱ.

‘‘ན བྷཝནྟི པརིཡཱཔནྣཱ, བོདྷིཡཱ ནིཡཏཱ ནརཱ;

མུཏྟཱ ཨཱནནྟརིཀེཧི, སབྦཏྠ སུདྡྷགོཙརཱ.

‘‘མིཙྪཱདིཊྛིཾ ¶ ན སེཝནྟི, ཀམྨཀིརིཡདསྶནཱ;

ཝསམཱནཱཔི སགྒེསུ, ཨསཉྙཾ ནཱུཔཔཛྫརེ.

‘‘སུདྡྷཱཝཱསེསུ དེཝེསུ, ཧེཏུ ནཱམ ན ཝིཛྫཏི;

ནེཀྑམྨནིནྣཱ སཔྤུརིསཱ, ཝིསཾཡུཏྟཱ བྷཝཱབྷཝེ;

ཙརནྟི ལོཀཏྠཙརིཡཱཡོ, པཱུརེནྟི སབྦཔཱརམཱི’’ཏི.

ཏེ ཨཱནིསཾསེ ཨདྷིགནྟྭཱཝ ཨཱགཏོ. པཱརམིཡོ པཱུརེནྟསྶ ཙསྶ ཨཀིཏྟིབྲཱཧྨཎཀཱལེ སངྑབྲཱཧྨཎཀཱལེ དྷནཉྩཡརཱཛཀཱལེ མཧཱསུདསྶནཀཱལེ མཧཱགོཝིནྡཀཱལེ ནིམིམཧཱརཱཛཀཱལེ ཙནྡཀུམཱརཀཱལེ ཝིསཡ྄ཧསེཊྛིཀཱལེ སིཝིརཱཛཀཱལེ ཝེསྶནྟརཀཱལེཏི དཱནཔཱརམིཏཱཡ པཱུརིཏཏྟབྷཱཝཱནཾ པརིམཱཎཾ ནཱམ ནཏྠི. ཨེཀནྟེན པནསྶ སསཔཎྜིཏཛཱཏཀེ –

‘‘བྷིཀྑཱཡ ¶ ཨུཔགཏཾ དིསྭཱ, སཀཏྟཱནཾ པརིཙྩཛིཾ;

དཱནེན མེ སམོ ནཏྠི, ཨེསཱ མེ དཱནཔཱརམཱི’’ཏི. (ཙརིཡཱ. ༡.ཏསྶུདཱནཾ) –

ཨེཝཾ ཨཏྟཔརིཙྩཱགཾ ཀརོནྟསྶ དཱནཔཱརམིཏཱ པརམཏྠཔཱརམཱི ནཱམ ཛཱཏཱ. ཏཐཱ སཱིལཝརཱཛཀཱལེ ཙམྤེཡྻནཱགརཱཛཀཱལེ བྷཱུརིདཏྟནཱགརཱཛཀཱལེ ཚདྡནྟནཱགརཱཛཀཱལེ ཛཡདྡིསརཱཛཔུཏྟཀཱལེ ཨལཱིནསཏྟུཀུམཱརཀཱལེཏི སཱིལཔཱརམིཏཱཡ པཱུརིཏཏྟབྷཱཝཱནཾ པརིམཱཎཾ ནཱམ ནཏྠི. ཨེཀནྟེན པནསྶ སངྑཔཱལཛཱཏཀེ –

‘‘སཱུལེཧི ཝིཛ྄ཛྷིཡནྟོཔི, ཀོཊྚིཡནྟོཔི སཏྟིཧི;

བྷོཛཔུཏྟེ ན ཀུཔྤཱམི, ཨེསཱ མེ སཱིལཔཱརམཱི’’ཏི. (ཙརིཡཱ. ༢.༩༡) –

ཨེཝཾ ཨཏྟཔརིཙྩཱགཾ ཀརོནྟསྶ སཱིལཔཱརམིཏཱ པརམཏྠཔཱརམཱི ནཱམ ཛཱཏཱ. ཏཐཱ སོམནསྶཀུམཱརཀཱལེ, ཧཏྠིཔཱལཀུམཱརཀཱལེ, ཨཡོགྷརཔཎྜིཏཀཱལེཏི མཧཱརཛྫཾ པཧཱཡ ནེཀྑམྨཔཱརམིཏཱཡ པཱུརིཏཏྟབྷཱཝཱནཾ པརིམཱཎཾ ནཱམ ནཏྠི. ཨེཀནྟེན པནསྶ ཙཱུལ༹སུཏསོམཛཱཏཀེ –

‘‘མཧཱརཛྫཾ ¶ ཧཏྠགཏཾ, ཁེལ༹པིཎྜཾཝ ཚཌྜཡིཾ;

ཙཛཏོ ན ཧོཏི ལགྒཾ, ཨེསཱ མེ ནེཀྑམྨཔཱརམཱི’’ཏི. –

ཨེཝཾ ¶ ནིསྶངྒཏཱཡ རཛྫཾ ཚཌྜེཏྭཱ ནིཀྑམནྟསྶ ནེཀྑམྨཔཱརམིཏཱ པརམཏྠཔཱརམཱི ནཱམ ཛཱཏཱ. ཏཐཱ ཝིདྷུརཔཎྜིཏཀཱལེ, མཧཱགོཝིནྡཔཎྜིཏཀཱལེ, ཀུདྡཱལཔཎྜིཏཀཱལེ, ཨརཀཔཎྜིཏཀཱལེ, བོདྷིཔརིབྦཱཛཀཀཱལེ, མཧོསདྷཔཎྜིཏཀཱལེཏི, པཉྙཱཔཱརམིཏཱཡ པཱུརིཏཏྟབྷཱཝཱནཾ པརིམཱཎཾ ནཱམ ནཏྠི. ཨེཀནྟེན པནསྶ སཏྟུབྷསྟཛཱཏཀེ སེནཀཔཎྜིཏཀཱལེ –

‘‘པཉྙཱཡ ཝིཙིནནྟོཧཾ, བྲཱཧྨཎཾ མོཙཡིཾ དུཁཱ;

པཉྙཱཡ མེ སམོ ནཏྠི, ཨེསཱ མེ པཉྙཱཔཱརམཱི’’ཏི. –

ཨནྟོབྷསྟགཏཾ སཔྤཾ དསྶེནྟསྶ པཉྙཱཔཱརམིཏཱ པརམཏྠཔཱརམཱི ནཱམ ཛཱཏཱ. ཏཐཱ ཝཱིརིཡཔཱརམིཏཱདཱིནམྤི པཱུརིཏཏྟབྷཱཝཱནཾ པརིམཱཎཾ ནཱམ ནཏྠི. ཨེཀནྟེན པནསྶ མཧཱཛནཀཛཱཏཀེ –

‘‘ཨཏཱིརདསྶཱི ¶ ཛལམཛ྄ཛྷེ, ཧཏཱ སབྦེཝ མཱནུསཱ;

ཙིཏྟསྶ ཨཉྙཐཱ ནཏྠི, ཨེསཱ མེ ཝཱིརིཡཔཱརམཱི’’ཏི. –

ཨེཝཾ མཧཱསམུདྡཾ ཏརནྟསྶ པཝཏྟཱ ཝཱིརིཡཔཱརམིཏཱ པརམཏྠཔཱརམཱི ནཱམ ཛཱཏཱ. ཁནྟིཝཱདིཛཱཏཀེ –

‘‘ཨཙེཏནཾཝ ཀོཊྚེནྟེ, ཏིཎྷེན ཕརསུནཱ མམཾ;

ཀཱསིརཱཛེ ན ཀུཔྤཱམི, ཨེསཱ མེ ཁནྟིཔཱརམཱི’’ཏི. –

ཨེཝཾ ཨཙེཏནབྷཱཝེན ཝིཡ མཧཱདུཀྑཾ ཨདྷིཝཱསེནྟསྶ ཁནྟིཔཱརམིཏཱ པརམཏྠཔཱརམཱི ནཱམ ཛཱཏཱ. མཧཱསུཏསོམཛཱཏཀེ –

‘‘སཙྩཝཱཙཾ ཨནུརཀྑནྟོ, ཙཛིཏྭཱ མམ ཛཱིཝིཏཾ;

མོཙེསིཾ ཨེཀསཏཾ ཁཏྟིཡེ, ཨེསཱ མེ སཙྩཔཱརམཱི’’ཏི. –

ཨེཝཾ ཛཱིཝིཏཾ ཙཛིཏྭཱ སཙྩམནུརཀྑནྟསྶ སཙྩཔཱརམིཏཱ པརམཏྠཔཱརམཱི ནཱམ ཛཱཏཱ. མཱུགཔཀྑཛཱཏཀེ –

‘‘མཱཏཱ པིཏཱ ན མེ དེསྶཱ, ནཔི མེ དེསྶཾ མཧཱཡསཾ;

སབྦཉྙུཏཾ པིཡཾ མཡ྄ཧཾ, ཏསྨཱ ཝཏམདྷིཊྛཧི’’ནྟི. (ཙརིཡཱ. ༣.༦ ཐོཀཾ ཝིསདིསཾ) –

ཨེཝཾ ¶ ཛཱིཝིཏམྤི ཙཛིཏྭཱ ཝཏཾ ཨདྷིཊྛཧནྟསྶ ཨདྷིཊྛཱནཔཱརམིཏཱ པརམཏྠཔཱརམཱི ནཱམ ཛཱཏཱ. ཨེཀརཱཛཛཱཏཀེ –

‘‘ན ¶ མཾ ཀོཙི ཨུཏྟསཏི, ནཔིཧཾ བྷཱཡཱམི ཀསྶཙི;

མེཏྟཱབལེནུཔཏྠདྡྷོ, རམཱམི པཝནེ ཏདཱ’’ཏི. (ཙརིཡཱ. ༣.༡༡༣) –

ཨེཝཾ ཛཱིཝིཏམྤི ཨནོལོཀེཏྭཱ མེཏྟཱཡནྟསྶ མེཏྟཱཔཱརམིཏཱ པརམཏྠཔཱརམཱི ནཱམ ཛཱཏཱ. ལོམཧཾསཛཱཏཀེ –

‘‘སུསཱནེ ¶ སེཡྻཾ ཀཔྤེམི, ཚཝཊྛིཀཾ ཨུཔདྷཱཡཧཾ;

གཱམཎྜལཱ ཨུཔཱགནྟྭཱ, རཱུཔཾ དསྶེནྟིནཔྤཀ’’ནྟི. (ཙརིཡཱ. ༣.༡༡༩) –

ཨེཝཾ གཱམདཱརཀེསུ ནིཊྛུབྷནཱདཱིཧི ཙེཝ མཱལཱགནྡྷཱུཔཧཱརཱདཱིཧི ཙ སུཁདུཀྑཾ ཨུཔྤཱདེནྟེསུཔི ཨུཔེཀྑཾ ཨནཏིཝཏྟནྟསྶ ཨུཔེཀྑཱཔཱརམིཏཱ པརམཏྠཔཱརམཱི ནཱམ ཛཱཏཱ. ཨཡམེཏྠ སངྑེཔོ, ཝིཏྠཱརཏོ པནེས ཨཏྠོ ཙརིཡཱཔིཊཀཏོ གཧེཏབྦོ. ཨེཝཾ པཱརམིཡོ པཱུརེཏྭཱ ཝེསྶནྟརཏྟབྷཱཝེ ཋིཏོ –

‘‘ཨཙེཏནཱཡཾ པཐཝཱི, ཨཝིཉྙཱཡ སུཁཾ དུཁཾ;

སཱཔི དཱནབལཱ མཡ྄ཧཾ, སཏྟཀྑཏྟུཾ པཀམྤཐཱ’’ཏི. (ཙརིཡཱ. ༡.༡༢༤) –

ཨེཝཾ མཧཱཔཐཝིཀམྤནཱདཱིནི མཧཱཔུཉྙཱནི ཀཏྭཱ ཨཱཡུཔརིཡོསཱནེ ཏཏོ ཙུཏོ ཏུསིཏབྷཝནེ ནིབྦཏྟི. ཨིཏི དཱིཔངྐརཔཱདམཱུལཏོ པཊྛཱཡ ཡཱཝ ཨཡཾ ཏུསིཏཔུརེ ནིབྦཏྟི, ཨེཏྟཀཾ ཋཱནཾ དཱུརེནིདཱནཾ ནཱམཱཏི ཝེདིཏབྦཾ.

དཱུརེནིདཱནཀཐཱ ནིཊྛིཏཱ.

༢. ཨཝིདཱུརེནིདཱནཀཐཱ

ཏུསིཏཔུརེ ཝསནྟེཡེཝ པན བོདྷིསཏྟེ བུདྡྷཀོལཱཧལཾ ནཱམ ཨུདཔཱདི. ལོཀསྨིཉྷི ཏཱིཎི ཀོལཱཧལཱནི ཨུཔྤཛྫནྟི – ཀཔྤཀོལཱཧལཾ, བུདྡྷཀོལཱཧལཾ, ཙཀྐཝཏྟིཀོལཱཧལནྟི. ཏཏྠ ‘‘ཝསྶསཏསཧསྶསྶ ཨཙྩཡེན ཀཔྤུཊྛཱནཾ བྷཝིསྶཏཱི’’ཏི ལོཀབྱཱུཧཱ ནཱམ ཀཱམཱཝཙརདེཝཱ མུཏྟསིརཱ ཝིཀིཎྞཀེསཱ རུདམུཁཱ ཨསྶཱུནི ཧཏྠེཧི པུཉྪམཱནཱ རཏྟཝཏྠནིཝཏྠཱ ཨཏིཝིཡ ཝིརཱུཔཝེསདྷཱརིནོ ཧུཏྭཱ མནུསྶཔཐེ ཝིཙརནྟཱ ཨེཝཾ ཨཱརོཙེནྟི ‘‘མཱརིསཱ ¶ ཨིཏོ ཝསྶསཏསཧསྶསྶ ཨཙྩཡེན ཀཔྤུཊྛཱནཾ བྷཝིསྶཏི, ཨཡཾ ལོཀོ ཝིནསྶིསྶཏི, མཧཱསམུདྡོཔི སུསྶིསྶཏི ¶ , ཨཡཉྩ མཧཱཔཐཝཱི སིནེརུ ཙ པབྦཏརཱཛཱ ཨུཌྜཡ྄ཧིསྶནྟི ཝིནསྶིསྶནྟི, ཡཱཝ བྲཧྨལོཀཱ ལོཀཝིནཱསོ བྷཝིསྶཏི, མེཏྟཾ མཱརིསཱ བྷཱཝེཐ, ཀརུཎཾ, མུདིཏཾ, ཨུཔེཀྑཾ མཱརིསཱ བྷཱཝེཐ, མཱཏརཾ ཨུཔཊྛཧཐ, པིཏརཾ ཨུཔཊྛཧཐ, ཀུལེ ཛེཊྛཱཔཙཱཡིནོ ཧོཐཱ’’ཏི. ཨིདཾ ཀཔྤཀོལཱཧལཾ ནཱམ. ཝསྶསཧསྶསྶ ཨཙྩཡེན པན སབྦཉྙུབུདྡྷོ ལོཀེ ཨུཔྤཛྫིསྶཏཱིཏི ལོཀཔཱལདེཝཏཱ ‘‘ཨིཏོ ¶ མཱརིསཱ ཝསྶསཧསྶསྶ ཨཙྩཡེན བུདྡྷོ ལོཀེ ཨུཔྤཛྫིསྶཏཱི’’ཏི ཨུགྒྷོསེནྟཱ ཨཱཧིཎྜནྟི. ཨིདཾ བུདྡྷཀོལཱཧལཾ ནཱམ. ཝསྶསཏསྶ ཨཙྩཡེན ཙཀྐཝཏྟཱི རཱཛཱ ཨུཔྤཛྫིསྶཏཱིཏི དེཝཏཱ ‘‘ཨིཏོ མཱརིསཱ ཝསྶསཏསྶ ཨཙྩཡེན ཙཀྐཝཏྟཱི རཱཛཱ ལོཀེ ཨུཔྤཛྫིསྶཏཱི’’ཏི ཨུགྒྷོསེནྟིཡོ ཨཱཧིཎྜནྟི. ཨིདཾ ཙཀྐཝཏྟིཀོལཱཧལཾ ནཱམ. ཨིམཱནི ཏཱིཎི ཀོལཱཧལཱནི མཧནྟཱནི ཧོནྟི.

ཏེསུ བུདྡྷཀོལཱཧལསདྡཾ སུཏྭཱ སཀལདསསཧསྶཙཀྐཝཱལ༹དེཝཏཱ ཨེཀཏོ སནྣིཔཏིཏྭཱ ‘‘ཨསུཀོ ནཱམ སཏྟོ བུདྡྷོ བྷཝིསྶཏཱི’’ཏི ཉཏྭཱ ཏཾ ཨུཔསངྐམིཏྭཱ ཨཱཡཱཙནྟི. ཨཱཡཱཙམཱནཱ ཙ པུབྦནིམིཏྟེསུ ཨུཔྤནྣེསུ ཨཱཡཱཙནྟི. ཏདཱ པན སབྦཱཔི དེཝཏཱ ཨེཀེཀཙཀྐཝཱལེ༹ ཙཏུམཧཱརཱཛསཀྐསུཡཱམསནྟུསིཏསུནིམྨིཏཝསཝཏྟིམཧཱབྲཧྨེཧི སདྡྷིཾ ཨེཀཙཀྐཝཱལེ༹ སནྣིཔཏིཏྭཱ ཏུསིཏབྷཝནེ བོདྷིསཏྟསྶ སནྟིཀཾ གནྟྭཱ ‘‘མཱརིསཱ ཏུམྷེཧི དས པཱརམིཡོ པཱུརེནྟེཧི ན སཀྐསམྤཏྟིཾ, ན མཱརསམྤཏྟིཾ, ན བྲཧྨསམྤཏྟིཾ, ན ཙཀྐཝཏྟིསམྤཏྟིཾ པཏྠེནྟེཧི པཱུརིཏཱ, ལོཀནིཏྠརཎཏྠཱཡ པན སབྦཉྙུཏཾ པཏྠེནྟེཧི པཱུརིཏཱ, སོ ཝོ ཨིདཱནི ཀཱལོ མཱརིསཱ བུདྡྷཏྟཱཡ སམཡོ, མཱརིསཱ བུདྡྷཏྟཱཡ སམཡོ’’ཏི ཡཱཙིཾསུ.

ཨཐ མཧཱསཏྟོ དེཝཏཱནཾ པཊིཉྙཾ ཨདཏྭཱཝ ཀཱལདཱིཔདེསཀུལཛནེཏྟིཨཱཡུཔརིཙྪེདཝསེན པཉྩམཧཱཝིལོཀནཾ ནཱམ ཝིལོཀེསི. ཏཏྠ ‘‘ཀཱལོ ནུ ཁོ, ཨཀཱལོ ནུ ཁོ’’ཏི པཋམཾ ཀཱལཾ ཝིལོཀེསི. ཏཏྠ ཝསྶསཏསཧསྶཏོ ཨུདྡྷཾ ཝཌྜྷིཏཨཱཡུཀཱལོ ཀཱལོ ནཱམ ན ཧོཏི. ཀསྨཱ? ཏདཱ ཧི སཏྟཱནཾ ཛཱཏིཛརཱམརཎཱནི ན པཉྙཱཡནྟི. བུདྡྷཱནཉྩ དྷམྨདེསནཱ ཏིལཀྑཎམུཏྟཱ ནཱམ ནཏྠི. ཏེསཾ ‘‘ཨནིཙྩཾ, དུཀྑཾ, ཨནཏྟཱ’’ཏི ཀཐེནྟཱནཾ ‘‘ཀིཾ ནཱམེཏཾ ཀཐེནྟཱི’’ཏི ནེཝ སོཏབྦཾ ན སདྡྷཱཏབྦཾ ¶ མཉྙནྟི, ཏཏོ ཨབྷིསམཡོ ན ཧོཏི, ཏསྨིཾ ཨསཏི ཨནིཡྻཱནིཀཾ སཱསནཾ ཧོཏི. ཏསྨཱ སོ ཨཀཱལོ. ཝསྶསཏཏོ ཨཱུནཨཱཡུཀཱལོཔི ཀཱལོ ན ཧོཏི. ཀསྨཱ? ཏདཱ སཏྟཱ ཨུསྶནྣཀིལེསཱ ཧོནྟི, ཨུསྶནྣཀིལེསཱནཉྩ དིནྣོ ཨོཝཱདོ ཨོཝཱདཊྛཱནེ ན ཏིཊྛཏི, ཨུདཀེ དཎྜརཱཛི ཝིཡ ཁིཔྤཾ ཝིགཙྪཏི ¶ . ཏསྨཱ སོཔི ཨཀཱལོ. ཝསྶསཏསཧསྶཏོ པན པཊྛཱཡ ཧེཊྛཱ, ཝསྶསཏཏོ པཊྛཱཡ ཨུདྡྷཾ ཨཱཡུཀཱལོ ཀཱལོ ནཱམ. ཏདཱ ཙ ཝསྶསཏཀཱལོ. ཨཐ མཧཱསཏྟོ ‘‘ནིབྦཏྟིཏབྦཀཱལོ’’ཏི ཀཱལཾ པསྶི.

ཏཏོ དཱིཔཾ ཝིལོཀེནྟོ སཔརིཝཱརེ ཙཏྟཱརོ དཱིཔེ ཨོལོཀེཏྭཱ ‘‘ཏཱིསུ དཱིཔེསུ བུདྡྷཱ ན ནིབྦཏྟནྟི, ཛམྦུདཱིཔེཡེཝ ནིབྦཏྟནྟཱི’’ཏི དཱིཔཾ པསྶི.

ཏཏོ ¶ ‘‘ཛམྦུདཱིཔོ ནཱམ མཧཱ དསཡོཛནསཧསྶཔརིམཱཎོ, ཀཏརསྨིཾ ནུ ཁོ པདེསེ བུདྡྷཱ ནིབྦཏྟནྟཱི’’ཏི ཨོཀཱསཾ ཝིལོཀེནྟོ མཛ྄ཛྷིམདེསཾ པསྶི. མཛ྄ཛྷིམདེསོ ནཱམ – ‘‘པུརཏྠིམཱཡ དིསཱཡ གཛངྒལཾ ནཱམ ནིགམོ, ཏསྶ ཨཔརེན མཧཱསཱལོ, ཏཏོ པརཾ པཙྩནྟིམཱ ཛནཔདཱ, ཨོརཏོ མཛ྄ཛྷེ. པུབྦདཀྑིཎཱཡ དིསཱཡ སལླཝཏཱི ནཱམ ནདཱི, ཏཏོ པརཾ པཙྩནྟིམཱ ཛནཔདཱ, ཨོརཏོ མཛ྄ཛྷེ. དཀྑིཎཱཡ དིསཱཡ སེཏཀཎྞིཀཾ ནཱམ ནིགམོ, ཏཏོ པརཾ པཙྩནྟིམཱ ཛནཔདཱ, ཨོརཏོ མཛ྄ཛྷེ. པཙྪིམཱཡ དིསཱཡ ཐཱུཎཾ ནཱམ བྲཱཧྨཎགཱམོ, ཏཏོ པརཾ པཙྩནྟིམཱ ཛནཔདཱ, ཨོརཏོ མཛ྄ཛྷེ. ཨུཏྟརཱཡ དིསཱཡ ཨུསཱིརདྡྷཛོ ནཱམ པབྦཏོ, ཏཏོ པརཾ པཙྩནྟིམཱ ཛནཔདཱ, ཨོརཏོ མཛ྄ཛྷེ’’ཏི ཨེཝཾ ཝིནཡེ (མཧཱཝ. ༢༥༩) ཝུཏྟོ པདེསོ. སོ ཨཱཡཱམཏོ ཏཱིཎི ཡོཛནསཏཱནི, ཝིཏྠཱརཏོ ཨཌྜྷཏེཡྻཱནི, པརིཀྑེཔཏོ ནཝ ཡོཛནསཏཱནཱིཏི ཨེཏསྨིཾ པདེསེ བུདྡྷཱ, པཙྩེཀབུདྡྷཱ, ཨགྒསཱཝཀཱ, ཨསཱིཏི མཧཱསཱཝཀཱ, ཙཀྐཝཏྟིརཱཛཱ ཨཉྙེ ཙ མཧེསཀྑཱ ཁཏྟིཡབྲཱཧྨཎགཧཔཏིམཧཱསཱལཱ ཨུཔྤཛྫནྟི. ཨིདཉྩེཏྠ ཀཔིལཝཏྠུ ནཱམ ནགརཾ, ཏཏྠ མཡཱ ནིབྦཏྟིཏབྦནྟི ནིཊྛཾ ཨགམཱསི.

ཏཏོ ཀུལཾ ཝིལོཀེནྟོ ‘‘བུདྡྷཱ ནཱམ ཝེསྶཀུལེ ཝཱ སུདྡཀུལེ ཝཱ ན ནིབྦཏྟནྟི, ལོཀསམྨཏེ པན ཁཏྟིཡཀུལེ ཝཱ བྲཱཧྨཎཀུལེཝཱཏི དྭཱིསུཡེཝ ཀུལེསུ ནིབྦཏྟནྟི. ཨིདཱནི ཙ ཁཏྟིཡཀུལཾ ལོཀསམྨཏཾ ¶ , ཏཏྠ ནིབྦཏྟིསྶཱམི. སུདྡྷོདནོ ནཱམ རཱཛཱ མེ པིཏཱ བྷཝིསྶཏཱི’’ཏི ཀུལཾ པསྶི.

ཏཏོ མཱཏརཾ ཝིལོཀེནྟོ ‘‘བུདྡྷམཱཏཱ ནཱམ ལོལཱ སུརཱདྷུཏྟཱ ན ཧོཏི, ཀཔྤསཏསཧསྶཾ པན པཱུརིཏཔཱརམཱི ཛཱཏིཏོ པཊྛཱཡ ཨཁཎྜཔཉྩསཱིལཱཡེཝ ཧོཏི. ཨཡཉྩ མཧཱམཱཡཱ ནཱམ དེཝཱི ཨེདིསཱི, ཨཡཾ མེ མཱཏཱ བྷཝིསྶཏི, ཀིཏྟཀཾ པནསྶཱ ཨཱཡཱུཏི དསནྣཾ མཱསཱནཾ ཨུཔརི སཏྟ དིཝསཱནཱི’’ཏི པསྶི.

ཨིཏི ཨིམཾ པཉྩམཧཱཝིལོཀནཾ ཝིལོཀེཏྭཱ ‘‘ཀཱལོ མེ མཱརིསཱ བུདྡྷབྷཱཝཱཡཱ’’ཏི དེཝཏཱནཾ སངྒཧཾ ཀརོནྟོ པཊིཉྙཾ དཏྭཱ ‘‘གཙྪཐ, ཏུམྷེ’’ཏི ཏཱ དེཝཏཱ ཨུཡྻོཛེཏྭཱ ཏུསིཏདེཝཏཱཧི པརིཝུཏོ ཏུསིཏཔུརེ ནནྡནཝནཾ པཱཝིསི. སབྦདེཝལོཀེསུ ཧི ནནྡནཝནཾ ཨཏྠིཡེཝ. ཏཏྠ ནཾ དེཝཏཱ ‘‘ཨིཏོ ཙུཏོ སུགཏིཾ གཙྪ, ཨིཏོ ཙུཏོ སུགཏིཾ གཙྪཱ’’ཏི པུབྦེ ཀཏཀུསལཀམྨོཀཱསཾ སཱརཡམཱནཱ ¶ ཝིཙརནྟི. སོ ཨེཝཾ དེཝཏཱཧི ཀུསལཾ སཱརཡམཱནཱཧི པརིཝུཏོ ཏཏྠ ཝིཙརནྟོ ཙཝིཏྭཱ མཧཱམཱཡཱཡ དེཝིཡཱ ཀུཙྪིསྨིཾ པཊིསནྡྷིཾ གཎྷི.

ཏསྶ ¶ ཨཱཝིབྷཱཝཏྠཾ ཨཡམནུཔུབྦིཀཐཱ – ཏདཱ ཀིར ཀཔིལཝཏྠུནགརེ ཨཱསཱལ༹ྷིནཀྑཏྟཾ སངྒྷུཊྛཾ ཨཧོསི, མཧཱཛནོ ནཀྑཏྟཾ ཀཱིལ༹ཏི. མཧཱམཱཡཱཔི དེཝཱི པུརེ པུཎྞམཱཡ སཏྟམདིཝསཏོ པཊྛཱཡ ཝིགཏསུརཱཔཱནཾ མཱལཱགནྡྷཝིབྷཱུཏིསམྤནྣཾ ནཀྑཏྟཀཱིལ༹ཾ ཨནུབྷཝམཱནཱ སཏྟམེ དིཝསེ པཱཏོཝ ཨུཊྛཱཡ གནྡྷོདཀེན ནྷཱཡིཏྭཱ ཙཏྟཱརི སཏསཧསྶཱནི ཝིསྶཛྫེཏྭཱ མཧཱདཱནཾ དཏྭཱ སབྦཱལངྐཱརཝིབྷཱུསིཏཱ ཝརབྷོཛནཾ བྷུཉྫིཏྭཱ ཨུཔོསཐངྒཱནི ཨདྷིཊྛཱཡ ཨལངྐཏཔཊིཡཏྟཾ སིརིགབྦྷཾ པཝིསིཏྭཱ སིརིསཡནེ ནིཔནྣཱ ནིདྡཾ ཨོཀྐམམཱནཱ ཨིམཾ སུཔིནཾ ཨདྡས – ‘ཙཏྟཱརོ ཀིར ནཾ མཧཱརཱཛཱནོ སཡནེནེཝ སདྡྷིཾ ཨུཀྑིཔིཏྭཱ ཧིམཝནྟཾ ནེཏྭཱ སཊྛིཡོཛནིཀེ མནོསིལཱཏལེ སཏྟཡོཛནིཀསྶ མཧཱསཱལརུཀྑསྶ ཧེཊྛཱ ཋཔེཏྭཱ ཨེཀམནྟཾ ཨཊྛཾསུ. ཨཐ ནེསཾ དེཝིཡོ ཨཱགནྟྭཱ དེཝིཾ ཨནོཏཏྟདཧཾ ནེཏྭཱ མནུསྶམལཧརཎཏྠཾ ནྷཱཔེཏྭཱ དིབྦཝཏྠཾ ནིཝཱསཱཔེཏྭཱ གནྡྷེཧི ཝིལིམྤཱཔེཏྭཱ དིབྦཔུཔྥཱནི པིལ༹ནྡྷཱཔེཏྭཱ ཏཏོ ཨཝིདཱུརེ ཨེཀོ རཛཏཔབྦཏོ ཨཏྠི, ཏསྶ ཨནྟོ ཀནཀཝིམཱནཾ ཨཏྠི ¶ , ཏཏྠ པཱཙཱིནསཱིསཀཾ དིབྦསཡནཾ པཉྙཱཔེཏྭཱ ནིཔཛྫཱཔེསུཾ. ཨཐ བོདྷིསཏྟོ སེཏཝརཝཱརཎོ ཧུཏྭཱ ཏཏོ ཨཝིདཱུརེ ཨེཀོ སུཝཎྞཔབྦཏོ ཨཏྠི, ཏཏྠ ཝིཙརིཏྭཱ ཏཏོ ཨོརུཡ྄ཧ རཛཏཔབྦཏཾ ཨབྷིརུཧིཏྭཱ ཨུཏྟརདིསཏོ ཨཱགམྨ རཛཏདཱམཝཎྞཱཡ སོཎྜཱཡ སེཏཔདུམཾ གཧེཏྭཱ ཀོཉྩནཱདཾ ནདིཏྭཱ ཀནཀཝིམཱནཾ པཝིསིཏྭཱ མཱཏུསཡནཾ ཏིཀྑཏྟུཾ པདཀྑིཎཾ ཀཏྭཱ དཀྑིཎཔསྶཾ ཕཱལེཏྭཱ ཀུཙྪིཾ པཝིཊྛསདིསོ ཨཧོསཱི’ཏི. ཨེཝཾ ཨུཏྟརཱསཱལ༹ྷནཀྑཏྟེན པཊིསནྡྷིཾ གཎྷི.

པུནདིཝསེ པབུདྡྷཱ དེཝཱི ཏཾ སུཔིནཾ རཉྙོ ཨཱརོཙེསི. རཱཛཱ ཙཏུསཊྛིམཏྟེ བྲཱཧྨཎཔཱམོཀྑེ པཀྐོསཱཔེཏྭཱ གོམཡཧརིཏཱུཔལིཏྟཱཡ ལཱཛཱདཱིཧི ཀཏམངྒལསཀྐཱརཱཡ བྷཱུམིཡཱ མཧཱརཧཱནི ཨཱསནཱནི པཉྙཱཔེཏྭཱ ཏཏྠ ནིསིནྣཱནཾ བྲཱཧྨཎཱནཾ སཔྤིམདྷུསཀྑརཱབྷིསངྑཏསྶ ཝརཔཱཡཱསསྶ སུཝཎྞརཛཏཔཱཏིཡོ པཱུརེཏྭཱ སུཝཎྞརཛཏཔཱཏཱིཧིཡེཝ པཊིཀུཛྫིཏྭཱ ཨདཱསི, ཨཉྙེཧི ཙ ཨཧཏཝཏྠཀཔིལགཱཝིདཱནཱདཱིཧི ཏེ སནྟཔྤེསི. ཨཐ ནེསཾ སབྦཀཱམེཧི སནྟཔྤིཏཱནཾ སུཔིནཾ ཨཱརོཙཱཔེཏྭཱ ‘‘ཀིཾ བྷཝིསྶཏཱི’’ཏི པུཙྪི. བྲཱཧྨཎཱ ཨཱཧཾསུ ‘‘མཱ ཙིནྟཡི, མཧཱརཱཛ, དེཝིཡཱ ཏེ ཀུཙྪིམྷི གབྦྷོ པཏིཊྛིཏོ, སོ ཙ ¶ ཁོ པུརིསགབྦྷོ, ན ཨིཏྠིགབྦྷོ, པུཏྟོ ཏེ བྷཝིསྶཏི. སོ སཙེ ཨགཱརཾ ཨཛ྄ཛྷཱཝསིསྶཏི, རཱཛཱ བྷཝིསྶཏི ཙཀྐཝཏྟཱི; སཙེ ཨགཱརཱ ནིཀྑམྨ པབྦཛིསྶཏི, བུདྡྷོ བྷཝིསྶཏི ལོཀེ ཝིཝཊྚཙྪདོ’’ཏི.

བོདྷིསཏྟསྶ པན མཱཏུཀུཙྪིམྷི པཊིསནྡྷིགྒཧཎཀྑཎེ ཨེཀཔྤཧཱརེནེཝ སཀལདསསཧསྶཱི ལོཀདྷཱཏུ སངྐམྤི སམྤཀམྤི སམྤཝེདྷི. བཱཏྟིཾསཔུབྦནིམིཏྟཱནི པཱཏུརཧེསུཾ – དསསུ ཙཀྐཝཱལ༹སཧསྶེསུ ཨཔྤམཱཎོ ཨོབྷཱསོ ཕརི. ཏསྶ ཏཾ སིརིཾ དཊྛུཀཱམཱ ཝིཡ ཨནྡྷཱ ཙཀྑཱུནི ¶ པཊིལབྷིཾསུ, བདྷིརཱ སདྡཾ སུཎིཾསུ, མཱུགཱ སམཱལཔིཾསུ, ཁུཛྫཱ ཨུཛུགཏྟཱ ཨཧེསུཾ, པངྒུལཱ པདསཱ གམནཾ པཊིལབྷིཾསུ, བནྡྷནགཏཱ སབྦསཏྟཱ ཨནྡུབནྡྷནཱདཱིཧི མུཙྩིཾསུ, སབྦནརཀེསུ ཨགྒི ནིབྦཱཡི, པེཏྟིཝིསཡེ ཁུཔྤིཔཱསཱ ཝཱུཔསམི, ཏིརཙྪཱནཱནཾ བྷཡཾ ནཱཧོསི, སབྦསཏྟཱནཾ རོགོ ཝཱུཔསམི, སབྦསཏྟཱ པིཡཾཝདཱ ཨཧེསུཾ, མདྷུརེནཱཀཱརེན ཨསྶཱ ཧསིཾསུ, ཝཱརཎཱ གཛྫིཾསུ, སབྦཏཱུརིཡཱནི སཀསཀནིནྣཱདཾ མུཉྩིཾསུ, ཨགྷཊྚིཏཱནིཡེཝ མནུསྶཱནཾ ཧཏྠཱུཔགཱདཱིནི ཨཱབྷརཎཱནི ཝིརཝིཾསུ, སབྦདིསཱ ཝིཔྤསནྣཱ ཨཧེསུཾ ¶ , སཏྟཱནཾ སུཁཾ ཨུཔྤཱདཡམཱནོ མུདུསཱིཏལཝཱཏོ ཝཱཡི, ཨཀཱལམེགྷོ ཝསྶི, པཐཝིཏོཔི ཨུདཀཾ ཨུབྦྷིཛྫིཏྭཱ ཝིསྶནྡི, པཀྑིནོ ཨཱཀཱསགམནཾ ཝིཛཧིཾསུ, ནདིཡོ ཨསནྡམཱནཱ ཨཊྛཾསུ, མཧཱསམུདྡེ མདྷུརཾ ཨུདཀཾ ཨཧོསི, སབྦཏྠཀམེཝ པཉྩཝཎྞེཧི པདུམེཧི སཉྪནྣཏལོ ཨཧོསི, ཐལཛཛལཛཱདཱིནི སབྦཔུཔྥཱནི པུཔྥིཾསུ, རུཀྑཱནཾ ཁནྡྷེསུ ཁནྡྷཔདུམཱནི, སཱཁཱསུ སཱཁཱཔདུམཱནི, ལཏཱསུ ལཏཱཔདུམཱནི པུཔྥིཾསུ, ཐལེ སིལཱཏལཱནི བྷིནྡིཏྭཱ ཨུཔརཱུཔརི སཏྟ སཏྟ ཧུཏྭཱ དཎྜཔདུམཱནི ནཱམ ནིཀྑམིཾསུ, ཨཱཀཱསེ ཨོལམྦཀཔདུམཱནི ནཱམ ནིབྦཏྟིཾསུ, སམནྟཏོ པུཔྥཝསྶཱ ཝསྶིཾསུ, ཨཱཀཱསེ དིབྦཏཱུརིཡཱནི ཝཛྫིཾསུ, སཀལདསསཧསྶིལོཀདྷཱཏུ ཝཊྚེཏྭཱ ཝིསྶཊྛམཱལཱགུལོ༹ ཝིཡ, ཨུཔྤཱིལེ༹ཏྭཱ བདྡྷམཱལཱཀལཱཔོ ཝིཡ, ཨལངྐཏཔཊིཡཏྟཾ མཱལཱསནཾ ཝིཡ ཙ ཨེཀམཱལཱམཱལིནཱི ཝིཔྥུརནྟཝཱལ༹བཱིཛནཱི པུཔྥདྷཱུམགནྡྷཔརིཝཱསིཏཱ པརམསོབྷགྒཔྤཏྟཱ ཨཧོསི.

ཨེཝཾ གཧིཏཔཊིསནྡྷིཀསྶ བོདྷིསཏྟསྶ པཊིསནྡྷིཏོ པཊྛཱཡ བོདྷིསཏྟསྶ ཙེཝ བོདྷིསཏྟམཱཏུཡཱ ཙ ཨུཔདྡཝནིཝཱརཎཏྠཾ ཁགྒཧཏྠཱ ཙཏྟཱརོ དེཝཔུཏྟཱ ཨཱརཀྑཾ གཎྷིཾསུ. བོདྷིསཏྟམཱཏུ པན པུརིསེསུ རཱགཙིཏྟཾ ནུཔྤཛྫི, ལཱབྷགྒཡསགྒཔྤཏྟཱ ཙ ཨཧོསི སུཁིནཱི ཨཀིལནྟཀཱཡཱ. བོདྷིསཏྟཉྩ ཨནྟོཀུཙྪིགཏཾ ¶ ཝིཔྤསནྣེ མཎིརཏནེ ཨཱཝུཏཔཎྜུསུཏྟཾ ཝིཡ པསྶཏི. ཡསྨཱ ཙ བོདྷིསཏྟེན ཝསིཏཀུཙྪི ནཱམ ཙེཏིཡགབྦྷསདིསཱ ཧོཏི, ན སཀྐཱ ཨཉྙེན སཏྟེན ཨཱཝསིཏུཾ ཝཱ པརིབྷུཉྫིཏུཾ ཝཱ, ཏསྨཱ བོདྷིསཏྟམཱཏཱ སཏྟཱཧཛཱཏེ བོདྷིསཏྟེ ཀཱལཾ ཀཏྭཱ ཏུསིཏཔུརེ ནིབྦཏྟཏི. ཡཐཱ ཙ ཨཉྙཱ ཨིཏྠིཡོ དས མཱསེ ཨཔཏྭཱཔི ཨཏིཀྐམིཏྭཱཔི ནིསིནྣཱཔི ནིཔནྣཱཔི ཝིཛཱཡནྟི, ན ཨེཝཾ བོདྷིསཏྟམཱཏཱ. སཱ པན བོདྷིསཏྟཾ དས མཱསེ ཀུཙྪིནཱ པརིཧརིཏྭཱ ཋིཏཱཝ ཝིཛཱཡཏི. ཨཡཾ བོདྷིསཏྟམཱཏུདྷམྨཏཱ.

མཧཱམཱཡཱཔི དེཝཱི པཏྟེན ཏེལཾ ཝིཡ དས མཱསེ ཀུཙྪིནཱ བོདྷིསཏྟཾ པརིཧརིཏྭཱ པརིཔུཎྞགབྦྷཱ ཉཱཏིགྷརཾ གནྟུཀཱམཱ སུདྡྷོདནམཧཱརཱཛསྶ ཨཱརོཙེསི – ‘‘ཨིཙྪཱམཧཾ, དེཝ, ཀུལསནྟཀཾ དེཝདཧནགརཾ གནྟུ’’ནྟི. རཱཛཱ ‘‘སཱདྷཱུ’’ཏི སམྤཊིཙྪིཏྭཱ ཀཔིལཝཏྠུཏོ ཡཱཝ དེཝདཧནགརཱ མགྒཾ སམཾ ཀཱརེཏྭཱ ཀདལིཔུཎྞགྷཊདྷཛཔཊཱཀཱདཱིཧི ཨལངྐཱརཱཔེཏྭཱ དེཝི སུཝཎྞསིཝིཀཱཡ ¶ ནིསཱིདཱཔེཏྭཱ ཨམཙྩསཧསྶེན ཨུཀྑིཔཱཔེཏྭཱ མཧནྟེན ¶ པརིཝཱརེན པེསེསི. དྭིནྣཾ པན ནགརཱནཾ ཨནྟརེ ཨུབྷཡནགརཝཱསཱིནམྤི ལུམྦིནཱིཝནཾ ནཱམ མངྒལསཱལཝནཾ ཨཏྠི, ཏསྨིཾ སམཡེ མཱུལཏོ པཊྛཱཡ ཡཱཝ ཨགྒསཱཁཱ སབྦཾ ཨེཀཔཱལིཕུལླཾ ཨཧོསི, སཱཁནྟརེཧི ཙེཝ པུཔྥནྟརེཧི ཙ པཉྩཝཎྞཱ བྷམརགཎཱ ནཱནཔྤཀཱརཱ ཙ སཀུཎསངྒྷཱ མདྷུརསྶརེན ཝིཀཱུཛནྟཱ ཝིཙརནྟི. སཀལཾ ལུམྦིནཱིཝནཾ ཙིཏྟལཏཱཝནསདིསཾ, མཧཱནུབྷཱཝསྶ རཉྙོ སུསཛྫིཏཾ ཨཱཔཱནམཎྜལཾ ཝིཡ ཨཧོསི. དེཝིཡཱ ཏཾ དིསྭཱ སཱལཝནཀཱིལ༹ཾ ཀཱིལི༹ཏུཀཱམཏཱཙིཏྟཾ ཨུདཔཱདི. ཨམཙྩཱ དེཝིཾ གཧེཏྭཱ སཱལཝནཾ པཝིསིཾསུ. སཱ མངྒལསཱལམཱུལཾ གནྟྭཱ སཱལསཱཁཾ གཎྷིཏུཀཱམཱ ཨཧོསི, སཱལསཱཁཱ སུསེདིཏཝེཏྟགྒཾ ཝིཡ ཨོནམིཏྭཱ དེཝིཡཱ ཧཏྠཔཐཾ ཨུཔགཉྪི. སཱ ཧཏྠཾ པསཱརེཏྭཱ སཱཁཾ ཨགྒཧེསི. ཏཱཝདེཝ ཙསྶཱ ཀམྨཛཝཱཏཱ ཙལིཾསུ. ཨཐསྶཱ སཱཎིཾ པརིཀྑིཔིཏྭཱ མཧཱཛནོ པཊིཀྐམི. སཱལསཱཁཾ གཧེཏྭཱ ཏིཊྛམཱནཱཡ ཨེཝསྶཱ གབྦྷཝུཊྛཱནཾ ཨཧོསི. ཏངྑཎཾཡེཝ ཙཏྟཱརོ ཝིསུདྡྷཙིཏྟཱ མཧཱབྲཧྨཱནོ སུཝཎྞཛཱལཾ ཨཱདཱཡ སམྤཏྟཱ ཏེན སུཝཎྞཛཱལེན བོདྷིསཏྟཾ སམྤཊིཙྪིཏྭཱ མཱཏུ པུརཏོ ཋཔེཏྭཱ ‘‘ཨཏྟམནཱ, དེཝི, ཧོཧི, མཧེསཀྑོ ཏེ པུཏྟོ ཨུཔྤནྣོ’’ཏི ཨཱཧཾསུ.

ཡཐཱ པན ཨཉྙེ སཏྟཱ མཱཏུཀུཙྪིཏོ ནིཀྑམནྟཱ པཊིཀཱུལེན ཨསུཙིནཱ མཀྑིཏཱ ནིཀྑམནྟི, ན ཨེཝཾ བོདྷིསཏྟོ. སོ པན ¶ དྷམྨཱསནཏོ ཨོཏརནྟོ དྷམྨཀཐིཀོ ཝིཡ, ནིསྶེཎིཏོ ཨོཏརནྟོ པུརིསོ ཝིཡ, ཙ དྭེ ཙ ཧཏྠེ དྭེ ཙ པཱདེ པསཱརེཏྭཱ ཋིཏཀོཝ མཱཏུཀུཙྪིསམྦྷཝེན ཀེནཙི ཨསུཙིནཱ ཨམཀྑིཏོ སུདྡྷོ ཝིསདོ ཀཱསིཀཝཏྠེ ནིཀྑིཏྟམཎིརཏནཾ ཝིཡ ཛོཏཡནྟོ མཱཏུཀུཙྪིཏོ ནིཀྑམི. ཨེཝཾ སནྟེཔི བོདྷིསཏྟསྶ ཙ བོདྷིསཏྟམཱཏུཡཱ ཙ སཀྐཱརཏྠཾ ཨཱཀཱསཏོ དྭེ ཨུདཀདྷཱརཱ ནིཀྑམིཏྭཱ བོདྷིསཏྟསྶ ཙ མཱཏུཡཱ ཙ སརཱིརེ ཨུཏུཾ གཱཧཱཔེསུཾ.

ཨཐ ནཾ སུཝཎྞཛཱལེན པཊིགྒཧེཏྭཱ ཋིཏཱནཾ བྲཧྨཱནཾ ཧཏྠཏོ ཙཏྟཱརོ མཧཱརཱཛཱནོ མངྒལསམྨཏཱཡ སུཁསམྥསྶཱཡ ཨཛིནཔྤཝེཎིཡཱ གཎྷིཾསུ, ཏེསཾ ཧཏྠཏོ མནུསྶཱ དུཀཱུལཙུམྦཊཀེན. མནུསྶཱནཾ ཧཏྠཏོ མུཙྩིཏྭཱ པཐཝིཡཾ པཏིཊྛཱཡ པུརཏྠིམདིསཾ ཨོལོཀེསི, ཨནེཀཱནི ཙཀྐཝཱལ༹སཧསྶཱནི ཨེཀངྒཎཱནི ཨཧེསུཾ. ཏཏྠ དེཝམནུསྶཱ གནྡྷམཱལཱདཱིཧི ¶ པཱུཛཡམཱནཱ ‘‘མཧཱཔུརིས, ཨིདྷ ཏུམྷེཧི སདིསོ ཨཉྙོ ནཏྠི, ཀུཏེཏྠ ཨུཏྟརིཏརོ’’ཏི ཨཱཧཾསུ. ཨེཝཾ ཙཏསྶོ དིསཱ, ཙཏསྶོ ཨནུདིསཱ, ཧེཊྛཱ, ཨུཔརཱིཏི དས དིསཱ ཨནུཝིལོཀེཏྭཱ ཨཏྟནཱ སདིསཾ ཀཉྩི ཨདིསྭཱ ‘‘ཨཡཾ ཨུཏྟརཱདིསཱ’’ཏི སཏྟཔདཝཱིཏིཧཱརེན ཨགམཱསི, མཧཱབྲཧྨུནཱ སེཏཙྪཏྟཾ དྷཱརིཡམཱནོ, སུཡཱམེན ཝཱལ༹བཱིཛནིཾ, ཨཉྙཱཧི ཙ དེཝཏཱཧི སེསརཱཛཀཀུདྷབྷཎྜཧཏྠཱཧི ¶ ཨནུགམྨམཱནོ. ཏཏོ སཏྟམཔདེ ཋིཏོ ‘‘ཨགྒོཧམསྨིཾ ལོཀསྶཱ’’ཏིཨཱདིཀཾ ཨཱསབྷིཾ ཝཱཙཾ ནིཙྪཱརེནྟོ སཱིཧནཱདཾ ནདི.

བོདྷིསཏྟོ ཧི ཏཱིསུ ཨཏྟབྷཱཝེསུ མཱཏུཀུཙྪིཏོ ནིཀྑནྟམཏྟོཝ ཝཱཙཾ ནིཙྪཱརེསི མཧོསདྷཏྟབྷཱཝེ, ཝེསྶནྟརཏྟབྷཱཝེ, ཨིམསྨིཾ ཨཏྟབྷཱཝེཏི. མཧོསདྷཏྟབྷཱཝེ ཀིརསྶ མཱཏུཀུཙྪིཏོ ནིཀྑནྟམཏྟསྶེཝ སཀྐོ དེཝརཱཛཱ ཨཱགནྟྭཱ ཙནྡནསཱརཾ ཧཏྠེ ཋཔེཏྭཱ གཏོ, སོ ཏཾ མུཊྛིཡཾ ཀཏྭཱཝ ནིཀྑནྟོ. ཨཐ ནཾ མཱཏཱ ‘‘ཏཱཏ, ཀིཾ གཧེཏྭཱ ཨཱགཏོསཱི’’ཏི པུཙྪི. ‘‘ཨོསདྷཾ, ཨམྨཱ’’ཏི. ཨིཏི ཨོསདྷཾ གཧེཏྭཱ ཨཱགཏཏྟཱ ‘‘ཨོསདྷདཱརཀོ’’ཏྭེཝསྶ ནཱམཾ ཨཀཾསུ. ཏཾ ཨོསདྷཾ གཧེཏྭཱ ཙཱཊིཡཾ པཀྑིཔིཾསུ, ཨཱགཏཱགཏཱནཾ ཨནྡྷབདྷིརཱདཱིནཾ ཏདེཝ སབྦརོགཝཱུཔསམཱཡ བྷེསཛྫཾ ཨཧོསི. ཏཏོ ‘‘མཧནྟཾ ཨིདཾ ཨོསདྷཾ, མཧནྟཾ ཨིདཾ ཨོསདྷ’’ནྟི ཨུཔྤནྣཝཙནཾ ཨུཔཱདཱཡ ‘‘མཧོསདྷོ’’ཏྭེཝསྶ ནཱམཾ ཛཱཏཾ. ཝེསྶནྟརཏྟབྷཱཝེ པན མཱཏུཀུཙྪིཏོ ནིཀྑནྟོ དཀྑིཎཧཏྠཾ པསཱརེཏྭཱ ‘‘ཨཏྠི ནུ ཁོ, ཨམྨ, ཀིཉྩི གེཧསྨིཾ, དཱནཾ དསྶཱམཱི’’ཏི ཝདནྟོ ནིཀྑམི. ཨཐསྶ མཱཏཱ ‘‘སདྷནེ ཀུལེ ནིབྦཏྟོསི, ཏཱཏཱ’’ཏི པུཏྟསྶ ཧཏྠཾ ཨཏྟནོ ¶ ཧཏྠཏལེ ཀཏྭཱ སཧསྶཏྠཝིཀཾ ཋཔེསི. ཨིམསྨིཾ པན ཨཏྟབྷཱཝེ ཨིམཾ སཱིཧནཱདཾ ནདཱིཏི ཨེཝཾ བོདྷིསཏྟོ ཏཱིསུ ཨཏྟབྷཱཝེསུ མཱཏུཀུཙྪིཏོ ནིཀྑནྟམཏྟོཝ ཝཱཙཾ ནིཙྪཱརེསི. ཡཐཱ ཙ པཊིསནྡྷིགྒཧཎཀྑཎེ, ཛཱཏཀྑཎེཔིསྶ དྭཏྟིཾས པུབྦནིམིཏྟཱནི པཱཏུརཧེསུཾ. ཡསྨིཾ པན སམཡེ ཨམྷཱཀཾ བོདྷིསཏྟོ ལུམྦིནཱིཝནེ ཛཱཏོ, ཏསྨིཾཡེཝ སམཡེ རཱཧུལམཱཏཱ དེཝཱི, ཨཱནནྡཏྠེརོ, ཚནྣོ ཨམཙྩོ, ཀཱལུ༹དཱཡཱི ཨམཙྩོ, ཀཎྜཀོ ཨསྶརཱཛཱ, མཧཱབོདྷིརུཀྑོ, ཙཏསྶོ ནིདྷིཀུམྦྷིཡོ ¶ ཙ ཛཱཏཱ. ཏཏྠ ཨེཀཱ གཱཝུཏཔྤམཱཎཱ, ཨེཀཱ ཨཌྜྷཡོཛནཔྤམཱཎཱ, ཨེཀཱ ཏིགཱཝུཏཔྤམཱཎཱ, ཨེཀཱ ཡོཛནཔྤམཱཎཱ ཨཧོསཱིཏི. ཨིམེ སཏྟ སཧཛཱཏཱ ནཱམ.

ཨུབྷཡནགརཝཱསིནོ བོདྷིསཏྟཾ གཧེཏྭཱ ཀཔིལཝཏྠུནགརམེཝ ཨགམཾསུ. ཏཾ དིཝསཾཡེཝ ཙ ‘‘ཀཔིལཝཏྠུནགརེ སུདྡྷོདནམཧཱརཱཛསྶ པུཏྟོ ཛཱཏོ, ཨཡཾ ཀུམཱརོ བོདྷིཏལེ ནིསཱིདིཏྭཱ བུདྡྷོ བྷཝིསྶཏཱི’’ཏི ཏཱཝཏིཾསབྷཝནེ ཧཊྛཏུཊྛཱ དེཝསངྒྷཱ ཙེལུཀྑེཔཱདཱིནི པཝཏྟེནྟཱ ཀཱིལི༹ཾསུ. ཏསྨིཾ སམཡེ སུདྡྷོདནམཧཱརཱཛསྶ ཀུལཱུཔཀོ ཨཊྛསམཱཔཏྟིལཱབྷཱི ཀཱལ༹དེཝཱིལོ ནཱམ ཏཱཔསོ བྷཏྟཀིཙྩཾ ཀཏྭཱ དིཝཱཝིཧཱརཏྠཱཡ ཏཱཝཏིཾསབྷཝནཾ གནྟྭཱ ཏཏྠ དིཝཱཝིཧཱརཾ ནིསིནྣོ ཏཱ དེཝཏཱ ཀཱིལ༹མཱནཱ དིསྭཱ ‘‘ཀིཾཀཱརཎཱ ཏུམྷེ ཨེཝཾ ཏུཊྛམཱནསཱ ཀཱིལ༹ཐ, མཡ྄ཧམྤེཏཾ ཀཱརཎཾ ཀཐེཐཱ’’ཏི པུཙྪི. དེཝཏཱ ཨཱཧཾསུ ‘‘མཱརིས, སུདྡྷོདནརཉྙོ པུཏྟོ ཛཱཏོ, སོ བོདྷིཏལེ ནིསཱིདིཏྭཱ བུདྡྷོ ཧུཏྭཱ དྷམྨཙཀྐཾ པཝཏྟེསྶཏི, ཏསྶ ཨནནྟཾ བུདྡྷལཱིལ༹ཾ དཊྛུཾ དྷམྨཉྩ སོཏུཾ ལཙྪཱམཱཏི ཨིམིནཱ ཀཱརཎེན ཏུཊྛཱམྷཱ’’ཏི. ཏཱཔསོ ཏཱསཾ ཝཙནཾ སུཏྭཱ ཁིཔྤཾ དེཝལོཀཏོ ཨོརུཡ྄ཧ རཱཛནིཝེསནཾ ¶ པཝིསིཏྭཱ པཉྙཏྟཱསནེ ནིསིནྣོ ‘‘པུཏྟོ ཀིར ཏེ, མཧཱརཱཛ, ཛཱཏོ, པསྶིསྶཱམི ན’’ནྟི ཨཱཧ. རཱཛཱ ཨལངྐཏཔཊིཡཏྟཾ ཀུམཱརཾ ཨཱཧརཱཔེཏྭཱ ཏཱཔསཾ ཝནྡཱཔེཏུཾ ཨབྷིཧརི, བོདྷིསཏྟསྶ པཱདཱ པརིཝཏྟིཏྭཱ ཏཱཔསསྶ ཛཊཱསུ པཏིཊྛཧིཾསུ. བོདྷིསཏྟསྶ ཧི ཏེནཏྟབྷཱཝེན ཝནྡིཏབྦཡུཏྟཀོ ནཱམ ཨཉྙོ ནཏྠི. སཙེ ཧི ཨཛཱནནྟཱ བོདྷིསཏྟསྶ སཱིསཾ ཏཱཔསསྶ པཱདམཱུལེ ཋཔེཡྻུཾ, སཏྟདྷཱ ཏསྶ མུདྡྷཱ ཕལེཡྻ. ཏཱཔསོ ‘‘ན མེ ཨཏྟཱནཾ ནཱསེཏུཾ ཡུཏྟ’’ནྟི ཨུཊྛཱཡཱསནཱ བོདྷིསཏྟསྶ ཨཉྫལིཾ པགྒཧེསི. རཱཛཱ ཏཾ ཨཙྪརིཡཾ དིསྭཱ ཨཏྟནོ པུཏྟཾ ཝནྡི.

ཏཱཔསོ ཨཏཱིཏེ ཙཏྟཱལཱིས ཀཔྤེ, ཨནཱགཏེ ཙཏྟཱལཱིསཱཏི ཨསཱིཏི ཀཔྤེ ཨནུསྶརཏི. བོདྷིསཏྟསྶ ལཀྑཎསམྤཏྟིཾ དིསྭཱ ‘‘བྷཝིསྶཏི ནུ ཁོ བུདྡྷོ, ཨུདཱཧུ ནོ’’ཏི ཨཱཝཛྫེཏྭཱ ཨུཔདྷཱརེནྟོ ‘‘ནིསྶཾསཡཾ བུདྡྷོ བྷཝིསྶཏཱི’’ཏི ཉཏྭཱ ‘‘ཨཙྪརིཡཔུརིསོ ཨཡ’’ནྟི སིཏཾ ¶ ཨཀཱསི. ཏཏོ ‘‘ཨཧཾ ཨིམཾ བུདྡྷབྷཱུཏཾ དཊྛུཾ ལབྷིསྶཱམི ནུ ཁོ, ནོ’’ཏི ཨུཔདྷཱརེནྟོ ‘‘ན ལབྷིསྶཱམི, ཨནྟརཱཡེཝ ཀཱལཾ ཀཏྭཱ བུདྡྷསཏེནཔི ¶ བུདྡྷསཧསྶེནཔི གནྟྭཱ བོདྷེཏུཾ ཨསཀྐུཎེཡྻེ ཨརཱུཔབྷཝེ ནིབྦཏྟིསྶཱམཱི’’ཏི དིསྭཱ ‘‘ཨེཝརཱུཔཾ ནཱམ ཨཙྪརིཡཔུརིསཾ བུདྡྷབྷཱུཏཾ དཊྛུཾ ན ལབྷིསྶཱམི, མཧཏཱི ཝཏ མེ ཛཱནི བྷཝིསྶཏཱི’’ཏི པརོདི.

མནུསྶཱ དིསྭཱ ‘‘ཨམྷཱཀཾ ཨཡྻོ ཨིདཱནེཝ ཧསིཏྭཱ པུན པརོདི. ཀིཾ ནུ ཁོ, བྷནྟེ, ཨམྷཱཀཾ ཨཡྻཔུཏྟསྶ ཀོཙི ཨནྟརཱཡོ བྷཝིསྶཏཱི’’ཏི པུཙྪིཾསུ. ‘‘ནཏྠེཏསྶ ཨནྟརཱཡོ, ནིསྶཾསཡེན བུདྡྷོ བྷཝིསྶཏཱི’’ཏི. ཨཐ ‘‘ཀསྨཱ པརོདིཏྠཱ’’ཏི? ‘‘ཨེཝརཱུཔཾ པུརིསཾ བུདྡྷབྷཱུཏཾ དཊྛུཾ ན ལབྷིསྶཱམི, ‘མཧཏཱི ཝཏ མེ ཛཱནི བྷཝིསྶཏཱི’ཏི ཨཏྟཱནཾ ཨནུསོཙནྟོ རོདཱམཱི’’ཏི ཨཱཧ. ཏཏོ སོ ‘‘ཀིཾ ནུ ཁོ མེ ཉཱཏཀེསུ ཀོཙི ཨེཏཾ བུདྡྷབྷཱུཏཾ དཊྛུཾ ལབྷིསྶཏི, ན ལབྷིསྶཏཱི’’ཏི ཨུཔདྷཱརེནྟོ ཨཏྟནོ བྷཱགིནེཡྻཾ ནཱལ༹ཀདཱརཀཾ ཨདྡས. སོ བྷགིནིཡཱ གེཧཾ གནྟྭཱ ‘‘ཀཧཾ ཏེ པུཏྟོ ནཱལ༹ཀོ’’ཏི? ‘‘ཨཏྠི གེཧེ, ཨཡྻཱ’’ཏི. ‘‘པཀྐོསཱཧི ན’’ནྟི པཀྐོསཱཔེཏྭཱ ཨཏྟནོ སནྟིཀཾ ཨཱགཏཾ ཀུམཱརཾ ཨཱཧ – ‘‘ཏཱཏ, སུདྡྷོདནམཧཱརཱཛསྶ ཀུལེ པུཏྟོ ཛཱཏོ, བུདྡྷངྐུརོ ཨེས, པཉྩཏིཾས ཝསྶཱནི ཨཏིཀྐམིཏྭཱ བུདྡྷོ བྷཝིསྶཏི, ཏྭཾ ཨེཏཾ དཊྛུཾ ལབྷིསྶསི, ཨཛྫེཝ པབྦཛཱཧཱི’’ཏི. སཏྟཱསཱིཏིཀོཊིདྷནེ ཀུལེ ནིབྦཏྟདཱརཀོཔི ‘‘ན མཾ མཱཏུལོ ཨནཏྠེ ནིཡོཛེསྶཏཱི’’ཏི ཙིནྟེཏྭཱ ཏཱཝདེཝ ཨནྟརཱཔཎཏོ ཀཱསཱཡཱནི ཙེཝ མཏྟིཀཱཔཏྟཉྩ ཨཱཧརཱཔེཏྭཱ ཀེསམསྶུཾ ཨོཧཱརེཏྭཱ ཀཱསཱཡཱནི ཝཏྠཱནི ཨཙྪཱདེཏྭཱ ‘‘ཡོ ལོཀེ ཨུཏྟམཔུགྒལོ, ཏཾ ཨུདྡིསྶ མཡ྄ཧཾ པབྦཛྫཱ’’ཏི བོདྷིསཏྟཱབྷིམུཁཾ ཨཉྫལིཾ པགྒཡ྄ཧ པཉྩཔཏིཊྛིཏེན ཝནྡིཏྭཱ པཏྟཾ ཐཝིཀཱཡ པཀྑིཔིཏྭཱ ཨཾསཀཱུཊེ ལགྒེཏྭཱ ཧིམཝནྟཾ པཝིསིཏྭཱ སམཎདྷམྨཾ ¶ ཨཀཱསི. སོ པརམཱབྷིསམྦོདྷིཾ པཏྟཾ ཏཐཱགཏཾ ཨུཔསངྐམིཏྭཱ ནཱལ༹ཀཔཊིཔདཾ ཀཐཱཔེཏྭཱ པུན ཧིམཝནྟཾ པཝིསིཏྭཱ ཨརཧཏྟཾ པཏྭཱ ཨུཀྐཊྛཔཊིཔདཾ པཊིཔནྣོ སཏྟེཝ མཱསེ ཨཱཡུཾ པཱལེཏྭཱ ཨེཀཾ སུཝཎྞཔབྦཏཾ ནིསྶཱཡ ཋིཏཀོཝ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡི.

བོདྷིསཏྟམྤི ཁོ པཉྩམེ དིཝསེ སཱིསཾ ནྷཱཔེཏྭཱ ‘‘ནཱམགྒཧཎཾ གཎྷིསྶཱམཱ’’ཏི རཱཛབྷཝནཾ ཙཏུཛྫཱཏིཀགནྡྷེཧི ཝིལིམྤིཏྭཱ ལཱཛཱཔཉྩམཀཱནི པུཔྥཱནི ཝིཀིརིཏྭཱ ཨསམྦྷིནྣཔཱཡཱསཾ པཙཱཔེཏྭཱ ཏིཎྞཾ ཝེདཱནཾ པཱརངྒཏེ ཨཊྛསཏབྲཱཧྨཎེ ནིམནྟེཏྭཱ རཱཛབྷཝནེ ནིསཱིདཱཔེཏྭཱ སུབྷོཛནཾ ¶ བྷོཛེཏྭཱ མཧཱསཀྐཱརཾ ¶ ཀཏྭཱ ‘‘ཀིཾ ནུ ཁོ བྷཝིསྶཏཱི’’ཏི ལཀྑཎཱནི པརིགྒཧཱཔེསུཾ. ཏེསུ –

‘‘རཱམོ དྷཛོ ལཀྑཎོ ཙཱཔི མནྟཱི, ཀོཎྜཉྙོ ཙ བྷོཛོ སུཡཱམོ སུདཏྟོ;

ཨེཏེ ཏདཱ ཨཊྛ ཨཧེསུཾ བྲཱཧྨཎཱ, ཚལ༹ངྒཝཱ མནྟཾ ཝིཡཱཀརིཾསཱུ’’ཏི. –

ཨིམེ ཨཊྛེཝ བྲཱཧྨཎཱ ལཀྑཎཔརིགྒཱཧཀཱ ཨཧེསུཾ. པཊིསནྡྷིགྒཧཎདིཝསེ སུཔིནོཔི ཨེཏེཧེཝ པརིགྒཧིཏོ. ཏེསུ སཏྟ ཛནཱ དྭེ ཨངྒུལིཡོ ཨུཀྑིཔིཏྭཱ དྭེདྷཱ བྱཱཀརིཾསུ – ‘‘ཨིམེཧི ལཀྑཎེཧི སམནྣཱགཏོ ཨགཱརཾ ཨཛ྄ཛྷཱཝསམཱནོ རཱཛཱ ཧོཏི ཙཀྐཝཏྟཱི, པབྦཛམཱནོ བུདྡྷོ’’ཏི, སབྦཾ ཙཀྐཝཏྟིརཉྙོ སིརིཝིབྷཝཾ ཨཱཙིཀྑིཾསུ. ཏེསཾ པན སབྦདཧརོ གོཏྟཏོ ཀོཎྜཉྙོ ནཱམ མཱཎཝོ བོདྷིསཏྟསྶ ཝརལཀྑཎནིཔྥཏྟིཾ ཨོལོཀེཏྭཱ – ‘‘ཨིམསྶ ཨགཱརམཛ྄ཛྷེ ཋཱནཀཱརཎཾ ནཏྠི, ཨེཀནྟེནེས ཝིཝཊྚཙྪདོ བུདྡྷོ བྷཝིསྶཏཱི’’ཏི ཨེཀམེཝ ཨངྒུལིཾ ཨུཀྑིཔིཏྭཱ ཨེཀཾསབྱཱཀརཎཾ བྱཱཀཱསི. ཨཡཉྷི ཀཏཱདྷིཀཱརོ པཙྪིམབྷཝིཀསཏྟོ པཉྙཱཡ ཨིཏརེ སཏྟ ཛནེ ཨབྷིབྷཝིཏྭཱ ‘‘ཨིམེཧི ལཀྑཎེཧི སམནྣཱགཏསྶ ཨགཱརམཛ྄ཛྷེ ཋཱནཾ ནཱམ ནཏྠི, ཨསཾསཡཾ བུདྡྷོ བྷཝིསྶཏཱི’’ཏི ཨེཀམེཝ གཏིཾ ཨདྡས, ཏསྨཱ ཨེཀཾ ཨངྒུལིཾ ཨུཀྑིཔིཏྭཱ ཨེཝཾ བྱཱཀཱསི. ཨཐསྶ ནཱམཾ གཎྷནྟཱ སབྦལོཀསྶ ཨཏྠསིདྡྷིཀརཏྟཱ ‘‘སིདྡྷཏྠོ’’ཏི ནཱམམཀཾསུ.

ཨཐ ཏེ བྲཱཧྨཎཱ ཨཏྟནོ གྷརཱནི གནྟྭཱ པུཏྟེ ཨཱམནྟཡིཾསུ – ‘‘ཏཱཏཱ, ཨམྷེ མཧལླཀཱ, སུདྡྷོདནམཧཱརཱཛསྶ པུཏྟཾ སབྦཉྙུཏཾ པཏྟཾ མཡཾ སམྦྷཝེཡྻཱམ ཝཱ ནོ ཝཱ, ཏུམྷེ ཏསྨིཾ ཀུམཱརེ སབྦཉྙུཏཾ པཏྟེ ཏསྶ སཱསནེ པབྦཛེཡྻཱཐཱ’’ཏི. ཏེ སཏྟཔི ཛནཱ ཡཱཝཏཱཡུཀཾ ཋཏྭཱ ཡཐཱཀམྨཾ གཏཱ, ཀོཎྜཉྙམཱཎཝོཝ ཨརོགོ ཨཧོསི. སོ མཧཱསཏྟེ ཝུཌྜྷིམནྭཱཡ མཧཱབྷིནིཀྑམནཾ ¶ ཨབྷིནིཀྑམིཏྭཱ ཨནུཀྐམེན ཨུརུཝེལཾ གནྟྭཱ ‘‘རམཎཱིཡོ, ཝཏ ཨཡཾ བྷཱུམིབྷཱགོ, ཨལཾ ཝཏིདཾ ཀུལཔུཏྟསྶ ¶ པདྷཱནཏྠིཀསྶ པདྷཱནཱཡཱ’’ཏི ཙིཏྟཾ ཨུཔྤཱདེཏྭཱ ཏཏྠ ཝཱསཾ ཨུཔགཏེ ‘‘མཧཱཔུརིསོ པབྦཛིཏོ’’ཏི སུཏྭཱ ཏེསཾ བྲཱཧྨཎཱནཾ པུཏྟེ ཨུཔསངྐམིཏྭཱ ཨེཝམཱཧ ‘‘སིདྡྷཏྠཀུམཱརོ ཀིར པབྦཛིཏོ, སོ ནིསྶཾསཡཾ བུདྡྷོ བྷཝིསྶཏི. སཙེ ཏུམྷཱཀཾ པིཏརོ ཨརོགཱ ཨསྶུ, ཨཛྫ ནིཀྑམིཏྭཱ པབྦཛེཡྻུཾ. སཙེ ཏུམྷེཔི ཨིཙྪེཡྻཱཐ, ཨེཐ, ཨཧཾ ཏཾ པུརིསཾ ཨནུཔབྦཛིསྶཱམཱི’’ཏི. ཏེ སབྦེ ཨེཀཙྪནྡཱ བྷཝིཏུཾ ནཱསཀྑིཾསུ ¶ , ཏཡོ ཛནཱ ན པབྦཛིཾསུ. ཀོཎྜཉྙབྲཱཧྨཎཾ ཛེཊྛཀཾ ཀཏྭཱ ཨིཏརེ ཙཏྟཱརོ པབྦཛིཾསུ. ཏེ པཉྩཔི ཛནཱ པཉྩཝགྒིཡཏྠེརཱ ནཱམ ཛཱཏཱ.

ཏདཱ པན རཱཛཱ ‘‘ཀིཾ དིསྭཱ མཡ྄ཧཾ པུཏྟོ པབྦཛིསྶཏཱི’’ཏི པུཙྪི. ‘‘ཙཏྟཱརི པུབྦནིམིཏྟཱནཱི’’ཏི. ‘‘ཀཏརཉྩ ཀཏརཉྩཱ’’ཏི? ‘‘ཛརཱཛིཎྞཾ, བྱཱདྷིཏཾ, ཀཱལཀཏཾ, པབྦཛིཏ’’ནྟི. རཱཛཱ ‘‘ཨིཏོ པཊྛཱཡ ཨེཝརཱུཔཱནཾ མམ པུཏྟསྶ སནྟིཀཾ ཨུཔསངྐམིཏུཾ མཱ ཨདཏྠ, མཡ྄ཧཾ པུཏྟསྶ བུདྡྷབྷཱཝེན ཀམྨཾ ནཏྠི, ཨཧཾ མམ པུཏྟཾ དྭིསཧསྶདཱིཔཔརིཝཱརཱནཾ ཙཏུནྣཾ མཧཱདཱིཔཱནཾ ཨིསྶརིཡཱདྷིཔཙྩཾ རཛྫཾ ཀཱརེནྟཾ ཚཏྟིཾསཡོཛནཔརིམཎྜལཱཡ པརིསཱཡ པརིཝུཏཾ གགནཏལེ ཝིཙརམཱནཾ པསྶིཏུཀཱམོ’’ཏི. ཨེཝཉྩ པན ཝཏྭཱ ཨིམེསཾ ཙཏུཔྤཀཱརཱནཾ ནིམིཏྟཱནཾ ཀུམཱརསྶ ཙཀྑུཔཐེ ཨཱགམནནིཝཱརཎཏྠཾ ཙཏཱུསུ དིསཱསུ གཱཝུཏེ གཱཝུཏེ ཨཱརཀྑཾ ཋཔེསི. ཏཾ དིཝསཾ པན མངྒལཊྛཱནེ སནྣིཔཏིཏེསུ ཨསཱིཏིཡཱ ཉཱཏིཀུལསཧསྶེསུ ཨེཀེཀོ ཨེཀམེཀཾ པུཏྟཾ པཊིཛཱནི – ‘‘ཨཡཾ བུདྡྷོ ཝཱ ཧོཏུ རཱཛཱ ཝཱ, མཡཾ ཨེཀམེཀཾ པུཏྟཾ དསྶཱམ. སཙེཔི བུདྡྷོ བྷཝིསྶཏི, ཁཏྟིཡསམཎེཧེཝ པུརཀྑཏཔརིཝཱརིཏོ ཝིཙརིསྶཏི. སཙེཔི རཱཛཱ བྷཝིསྶཏི, ཁཏྟིཡཀུམཱརེཧེཝ པུརཀྑཏཔརིཝཱརིཏོ ཝིཙརིསྶཏཱི’’ཏི. རཱཛཱཔི བོདྷིསཏྟསྶ ཨུཏྟམརཱུཔསམྤནྣཱ ཝིགཏསབྦདོསཱ དྷཱཏིཡོ པཙྩུཔཊྛཱཔེསི. བོདྷིསཏྟོ ཨནནྟེན པརིཝཱརེན མཧནྟེན སིརིསོབྷགྒེན ཝཌྜྷཏི.

ཨཐེཀདིཝསཾ རཉྙོ ཝཔྤམངྒལཾ ནཱམ ཨཧོསི. ཏཾ དིཝསཾ སཀལནགརཾ དེཝཝིམཱནཾ ཝིཡ ཨལངྐརོནྟི. སབྦེ དཱསཀམྨཀརཱདཡོ ཨཧཏཝཏྠནིཝཏྠཱ གནྡྷམཱལཱདིཔཊིམཎྜིཏཱ རཱཛཀུལེ སནྣིཔཏནྟི. རཉྙོ ཀམྨནྟེ ནངྒལསཧསྶཾ ཡོཛཱིཡཏི. ཏསྨིཾ པན དིཝསེ ཨེཀེནཱུནཨཊྛསཏནངྒལཱནི སདྡྷིཾ བལིབདྡརསྨིཡོཏྟེཧི རཛཏཔརིཀྑཏཱནི ཧོནྟི, རཉྙོ ཨཱལམྦནནངྒལཾ ¶ པན རཏྟསུཝཎྞཔརིཀྑཏཾ ཧོཏི. བལིབདྡཱནཾ སིངྒརསྨིཔཏོདཱཔི སུཝཎྞཔརིཀྑཏཱཝ ཧོནྟི. རཱཛཱ མཧཏཱ པརིཝཱརེན ནིཀྑནྟོ པུཏྟཾ གཧེཏྭཱ ཨགམཱསི. ཀམྨནྟཊྛཱནེ ཨེཀོ ཛམྦུརུཀྑོ བཧལཔལཱསོ སནྡཙྪཱཡོ ཨཧོསི. ཏསྶ ཧེཊྛཱ ཀུམཱརསྶ སཡནཾ ¶ པཉྙཔཱཔེཏྭཱ ཨུཔརི སུཝཎྞཏཱརཀཁཙིཏཾ ཝིཏཱནཾ བནྡྷཱཔེཏྭཱ སཱཎིཔཱཀཱརེན པརིཀྑིཔཱཔེཏྭཱ ཨཱརཀྑཾ ཋཔཱཔེཏྭཱ རཱཛཱ སབྦཱལངྐཱརཾ ཨལངྐརིཏྭཱ ཨམཙྩགཎཔརིཝུཏོ ནངྒལཀརཎཊྛཱནཾ ཨགམཱསི. ཏཏྠ རཱཛཱ སུཝཎྞནངྒལཾ གཎྷཱཏི, ཨམཙྩཱ ཨེཀེནཱུནཊྛསཏརཛཏནངྒལཱནི, ཀསྶཀཱ སེསནངྒལཱནི. ཏེ ཏཱནི གཧེཏྭཱ ཨིཏོ ཙིཏོ ཙ ཀསནྟི. རཱཛཱ པན ཨོརཏོ ཝཱ པཱརཾ གཙྪཏི, པཱརཏོ ཝཱ ཨོརཾ ཨཱགཙྪཏི. ཨེཏསྨིཾ ཋཱནེ མཧཱསམྤཏྟི ¶ ཨཧོསི. བོདྷིསཏྟཾ པརིཝཱརེཏྭཱ ནིསིནྣཱ དྷཱཏིཡོ ‘‘རཉྙོ སམྤཏྟིཾ པསྶིསྶཱམཱ’’ཏི ཨནྟོསཱཎིཏོ བཧི ནིཀྑནྟཱ. བོདྷིསཏྟོ ཨིཏོ ཙིཏོ ཙ ཨོལོཀེནྟོ ཀཉྩི ཨདིསྭཱ ཝེགེན ཨུཊྛཱཡ པལླངྐཾ ཨཱབྷུཛིཏྭཱ ཨཱནཱཔཱནེ པརིགྒཧེཏྭཱ པཋམཛ྄ཛྷཱནཾ ནིབྦཏྟེསི. དྷཱཏིཡོ ཁཛྫབྷོཛྫནྟརེ ཝིཙརམཱནཱ ཐོཀཾ ཙིརཱཡིཾསུ. སེསརུཀྑཱནཾ ཚཱཡཱ ནིཝཏྟཱ, ཏསྶ པན རུཀྑསྶ པརིམཎྜལཱ ཧུཏྭཱ ཨཊྛཱསི. དྷཱཏིཡོ ‘‘ཨཡྻཔུཏྟོ ཨེཀཏོ’’ཏི ཝེགེན སཱཎིཾ ཨུཀྑིཔིཏྭཱ ཨནྟོ པཝིསམཱནཱ བོདྷིསཏྟཾ སཡནེ པལླངྐེན ནིསིནྣཾ ཏཉྩ པཱཊིཧཱརིཡཾ དིསྭཱ གནྟྭཱ རཉྙོ ཨཱརོཙེསུཾ – ‘‘དེཝ, ཀུམཱརོ ཨེཝཾ ནིསིནྣོ, ཨཉྙེསཾ རུཀྑཱནཾ ཚཱཡཱ ནིཝཏྟཱ, ཛམྦུརུཀྑསྶ པན པརིམཎྜལཱ ཋིཏཱ’’ཏི. རཱཛཱ ཝེགེནཱགནྟྭཱ པཱཊིཧཱརིཡཾ དིསྭཱ – ‘‘ཨིདཾ ཏེ, ཏཱཏ, དུཏིཡཾ ཝནྡན’’ནྟི པུཏྟཾ ཝནྡི.

ཨཐ ཨནུཀྐམེན བོདྷིསཏྟོ སོལ༹སཝསྶུདྡེསིཀོ ཛཱཏོ. རཱཛཱ བོདྷིསཏྟསྶ ཏིཎྞཾ ཨུཏཱུནཾ ཨནུཙྪཝིཀེ ཏཡོ པཱསཱདེ ཀཱརེསི – ཨེཀཾ ནཝབྷཱུམཀཾ, ཨེཀཾ སཏྟབྷཱུམཀཾ, ཨེཀཾ པཉྩབྷཱུམཀཾ, ཙཏྟཱལཱིསསཧསྶཱ ཙ ནཱཊཀིཏྠིཡོ ཨུཔཊྛཱཔེསི. བོདྷིསཏྟོ དེཝོ ཝིཡ ཨཙྪརཱསངྒྷཔརིཝུཏོ, ཨལངྐཏནཱཊཀཔརིཝུཏོ, ནིཔྤུརིསེཧི ཏཱུརིཡེཧི པརིཙཱརིཡམཱནོ མཧཱསམྤཏྟིཾ ཨནུབྷཝནྟོ ཨུཏུཝཱརེན ཏེསུ པཱསཱདེསུ ཝིཧརཏི. རཱཧུལམཱཏཱ པནསྶ དེཝཱི ཨགྒམཧེསཱི ཨཧོསི.

ཏསྶེཝཾ ¶ མཧཱསམྤཏྟིཾ ཨནུབྷཝནྟསྶ ཨེཀདིཝསཾ ཉཱཏིསངྒྷསྶ ཨབྦྷནྟརེ ཨཡཾ ཀཐཱ ཨུདཔཱདི – ‘‘སིདྡྷཏྠོ ཀཱིལཱ༹པསུཏོཝ ཝིཙརཏི, ཀིཉྩི སིཔྤཾ ན སིཀྑཏི, སངྒཱམེ པཙྩུཔཊྛིཏེ ཀིཾ ཀརིསྶཏཱི’’ཏི. རཱཛཱ བོདྷིསཏྟཾ པཀྐོསཱཔེཏྭཱ – ‘‘ཏཱཏ, ཏཝ ཉཱཏཀཱ ‘སིདྡྷཏྠོ ཀིཉྩི སིཔྤཾ ཨསིཀྑིཏྭཱ ཀཱིལཱ༹པསུཏོཝ ཝིཙརཏཱི’ཏི ཝདནྟི, ཨེཏྠ ཀིཾ པཏྟཀཱལེ མཉྙསཱི’’ཏི. དེཝ, མམ སིཔྤཾ སིཀྑནཀིཙྩཾ ནཏྠི, ནགརེ མམ སིཔྤདསྶནཏྠཾ བྷེརིཾ ཙརཱཔེཐ ‘‘ཨིཏོ སཏྟམེ དིཝསེ ཉཱཏཀཱནཾ སིཔྤཾ དསྶེསྶཱམཱི’’ཏི. རཱཛཱ ཏཐཱ ཨཀཱསི. བོདྷིསཏྟོ ཨཀྑཎཝེདྷིཝཱལཝེདྷིདྷནུགྒཧེ སནྣིཔཱཏཱཔེཏྭཱ མཧཱཛནསྶ མཛ྄ཛྷེ ཨཉྙེཧི དྷནུགྒཧེཧི ཨསཱདྷཱརཎཾ ¶ ཉཱཏཀཱནཾ དྭཱདསཝིདྷཾ སིཔྤཾ དསྶེསི. ཏཾ སརབྷངྒཛཱཏཀེ ཨཱགཏནཡེནེཝ ཝེདིཏབྦཾ. ཏདཱསྶ ཉཱཏིསངྒྷོ ནིཀྐངྑོ ཨཧོསི.

ཨཐེཀདིཝསཾ བོདྷིསཏྟོ ཨུཡྻཱནབྷཱུམིཾ གནྟུཀཱམོ སཱརཐིཾ ཨཱམནྟེཏྭཱ ‘‘རཐཾ ཡོཛེཧཱི’’ཏི ཨཱཧ. སོ ‘‘སཱདྷཱུ’’ཏི པཊིསྶུཎིཏྭཱ མཧཱརཧཾ ཨུཏྟམརཐཾ སབྦཱལངྐཱརེན ཨལངྐརིཏྭཱ ཀུམུདཔཏྟཝཎྞེ ཙཏྟཱརོ ¶ མངྒལསིནྡྷཝེ ཡོཛེཏྭཱ བོདྷིསཏྟསྶ པཊིཝེདེསི. བོདྷིསཏྟོ དེཝཝིམཱནསདིསཾ རཐཾ ཨབྷིརུཧིཏྭཱ ཨུཡྻཱནཱབྷིམུཁོ ཨགམཱསི. དེཝཏཱ ‘‘སིདྡྷཏྠཀུམཱརསྶ ཨབྷིསམྦུཛ྄ཛྷནཀཱལོ ཨཱསནྣོ, པུབྦནིམིཏྟཾ དསྶེསྶཱམཱ’’ཏི ཨེཀཾ དེཝཔུཏྟཾ ཛརཱཛཛྫརཾ ཁཎྜདནྟཾ པལིཏཀེསཾ ཝངྐཾ ཨོབྷགྒསརཱིརཾ དཎྜཧཏྠཾ པཝེདྷམཱནཾ ཀཏྭཱ དསྶེསུཾ. ཏཾ བོདྷིསཏྟོ ཙེཝ སཱརཐི ཙ པསྶནྟི. ཏཏོ བོདྷིསཏྟོ སཱརཐིཾ – ‘‘སམྨ, ཀོ ནཱམེས པུརིསོ, ཀེསཱཔིསྶ ན ཡཐཱ ཨཉྙེས’’ནྟི མཧཱཔདཱནེ ཨཱགཏནཡེན པུཙྪིཏྭཱ ཏསྶ ཝཙནཾ སུཏྭཱ ‘‘དྷཱིརཏྠུ ཝཏ བྷོ ཛཱཏི, ཡཏྲ ཧི ནཱམ ཛཱཏསྶ ཛརཱ པཉྙཱཡིསྶཏཱི’’ཏི སཾཝིགྒཧདཡོ ཏཏོཝ པཊིནིཝཏྟིཏྭཱ པཱསཱདམེཝ ཨབྷིརུཧི. རཱཛཱ ‘‘ཀིཾ ཀཱརཎཱ མམ པུཏྟོ ཁིཔྤཾ པཊིནིཝཏྟཱི’’ཏི པུཙྪི. ‘‘ཛིཎྞཀཾ པུརིསཾ དིསྭཱ དེཝཱ’’ཏི. ‘‘ཛིཎྞཀཾ དིསྭཱ པབྦཛིསྶཏཱིཏི ཨཱཧཾསུ, ཀསྨཱ མཾ ནཱསེཐ, སཱིགྷཾ པུཏྟསྶ ནཱཊཀཱནི སཛྫེཐ, སམྤཏྟིཾ ཨནུབྷཝནྟོ པབྦཛྫཱཡ སཏིཾ ན ཀརིསྶཏཱི’’ཏི ཝཏྭཱ ཨཱརཀྑཾ ཝཌྜྷེཏྭཱ སབྦདིསཱསུ ཨཌྜྷཡོཛནེ ཨཌྜྷཡོཛནེ ཋཔེསི.

པུནེཀདིཝསཾ ¶ བོདྷིསཏྟོ ཏཐེཝ ཨུཡྻཱནཾ གཙྪནྟོ དེཝཏཱཧི ནིམྨིཏཾ བྱཱདྷིཏཾ པུརིསཾ དིསྭཱ པུརིམནཡེནེཝ པུཙྪིཏྭཱ སཾཝིགྒཧདཡོ ནིཝཏྟིཏྭཱ པཱསཱདཾ ཨབྷིརུཧི. རཱཛཱཔི པུཙྪིཏྭཱ ཧེཊྛཱ ཝུཏྟནཡེནེཝ སཾཝིདཧིཏྭཱ པུན ཝཌྜྷེཏྭཱ སམནྟཱ ཏིགཱཝུཏཔྤམཱཎེ པདེསེ ཨཱརཀྑཾ ཋཔེསི. ཨཔརཾ ཨེཀདིཝསཾ བོདྷིསཏྟོ ཏཐེཝ ཨུཡྻཱནཾ གཙྪནྟོ དེཝཏཱཧི ནིམྨིཏཾ ཀཱལཀཏཾ དིསྭཱ པུརིམནཡེནེཝ པུཙྪིཏྭཱ སཾཝིགྒཧདཡོ པུན ནིཝཏྟིཏྭཱ པཱསཱདཾ ཨབྷིརུཧི. རཱཛཱཔི པུཙྪིཏྭཱ ཧེཊྛཱ ཝུཏྟནཡེནེཝ སཾཝིདཧིཏྭཱ པུན ཝཌྜྷེཏྭཱ སམནྟཱ ཡོཛནཔྤམཱཎེ པདེསེ ཨཱརཀྑཾ ཋཔེསི. ཨཔརཾ པན ཨེཀདིཝསཾ ཨུཡྻཱནཾ གཙྪནྟོ ཏཐེཝ དེཝཏཱཧི ནིམྨིཏཾ སུནིཝཏྠཾ སུཔཱརུཏཾ པབྦཛིཏཾ དིསྭཱ ‘‘ཀོ ནཱམེསོ སམྨཱ’’ཏི སཱརཐིཾ པུཙྪི. སཱརཐི ཀིཉྩཱཔི བུདྡྷུཔྤཱདསྶ ཨབྷཱཝཱ པབྦཛིཏཾ ཝཱ པབྦཛིཏགུཎེ ཝཱ ན ཛཱནཱཏི, དེཝཏཱནུབྷཱཝེན པན ‘‘པབྦཛིཏོ ནཱམཱཡཾ དེཝཱ’’ཏི ཝཏྭཱ པབྦཛྫཱཡ གུཎེ ཝཎྞེསི. བོདྷིསཏྟོ པབྦཛྫཱཡ རུཙིཾ ཨུཔྤཱདེཏྭཱ ཏཾ དིཝསཾ ཨུཡྻཱནཾ ཨགམཱསི. དཱིགྷབྷཱཎཀཱ པནཱཧུ ‘‘ཙཏྟཱརི ནིམིཏྟཱནི ཨེཀདིཝསེནེཝ དིསྭཱ ཨགམཱསཱི’’ཏི.

སོ ¶ ཏཏྠ དིཝསབྷཱགཾ ཀཱིལི༹ཏྭཱ མངྒལཔོཀྑརཎིཡཾ ནྷཱཡིཏྭཱ ཨཏྠངྒཏེ སཱུརིཡེ མངྒལསིལཱཔཊྚེ ནིསཱིདི ཨཏྟཱནཾ ཨལངྐཱརཱཔེཏུཀཱམོ. ཨཐསྶ པརིཙཱརཀཔུརིསཱ ནཱནཱཝཎྞཱནི དུསྶཱནི ནཱནཔྤཀཱརཱ ཨཱབྷརཎཝིཀཏིཡོ མཱལཱགནྡྷཝིལེཔནཱནི ཙ ཨཱདཱཡ སམནྟཱ པརིཝཱརེཏྭཱ ཨཊྛཾསུ. ཏསྨིཾ ཁཎེ སཀྐསྶ ནིསིནྣཱསནཾ ཨུཎྷཾ ཨཧོསི ¶ . སོ ‘‘ཀོ ནུ ཁོ མཾ ཨིམམྷཱ ཋཱནཱ ཙཱཝེཏུཀཱམོ’’ཏི ཨུཔདྷཱརེནྟོ བོདྷིསཏྟསྶ ཨལངྐཱརེཏུཀཱམཏཾ ཉཏྭཱ ཝིསྶཀམྨཾ ཨཱམནྟེསི ‘‘སམྨ ཝིསྶཀམྨ, སིདྡྷཏྠཀུམཱརོ ཨཛྫ ཨཌྜྷརཏྟསམཡེ མཧཱབྷིནིཀྑམནཾ ནིཀྑམིསྶཏི, ཨཡམསྶ པཙྪིམོ ཨལངྐཱརོ, ཨུཡྻཱནཾ གནྟྭཱ མཧཱཔུརིསཾ དིབྦཱལངྐཱརེཧི ཨལངྐརོཧཱི’’ཏི. སོ ‘‘སཱདྷཱུ’’ཏི པཊིསྶུཎིཏྭཱ དེཝཏཱནུབྷཱཝེན ཏངྑཎཾཡེཝ ཨུཔསངྐམིཏྭཱ ཏསྶེཝ ཀཔྤཀསདིསོ ཧུཏྭཱ ཀཔྤཀསྶ ཧཏྠཏོ ཝེཋནདུསྶཾ གཧེཏྭཱ བོདྷིསཏྟསྶ སཱིསཾ ཝེཋེསི. བོདྷིསཏྟོ ཧཏྠསམྥསྶེནེཝ ‘‘ནཱཡཾ མནུསྶོ, དེཝཔུཏྟོ ཨེསོ’’ཏི ཨཉྙཱསི. ཝེཋནེན ཝེཋིཏམཏྟེ སཱིསེ མོལི༹ཡཾ མཎིརཏནཱཀཱརེན དུསྶསཧསྶཾ ཨབྦྷུགྒཉྪི. པུན ཝེཋེནྟསྶ དུསྶསཧསྶནྟི དསཀྑཏྟུཾ ཝེཋེནྟསྶ དས དུསྶསཧསྶཱནི ཨབྦྷུགྒཙྪིཾསུ ¶ . ‘‘སཱིསཾ ཁུདྡཀཾ, དུསྶཱནི བཧཱུནི, ཀཐཾ ཨབྦྷུགྒཏཱནཱི’’ཏི ན ཙིནྟེཏབྦཾ. ཏེསུ ཧི སབྦམཧནྟཾ ཨཱམལཀཔུཔྥཔྤམཱཎཾ, ཨཝསེསཱནི ཀུསུམྦཀཔུཔྥཔྤམཱཎཱནི ཨཧེསུཾ. བོདྷིསཏྟསྶ སཱིསཾ ཀིཉྫཀྑགཝཙྪིཏཾ ཝིཡ ཀུཡྻཀཔུཔྥཾ ཨཧོསི.

ཨཐསྶ སབྦཱལངྐཱརཔཊིམཎྜིཏསྶ སབྦཏཱལཱཝཙརེསུ སཀཱནི སཀཱནི པཊིབྷཱནཱནི དསྶཡནྟེསུ, བྲཱཧྨཎེསུ ‘‘ཛཡནནྡཱ’’ཏིཨཱདིཝཙནེཧི, སཱུཏམཱགདྷཱདཱིསུ ནཱནཔྤཀཱརེཧི མངྒལཝཙནཏྠུཏིགྷོསེཧི སམྦྷཱཝེནྟེསུ སབྦཱལངྐཱརཔཊིམཎྜིཏཾ རཐཝརཾ ཨབྷིརུཧི. ཏསྨིཾ སམཡེ ‘‘རཱཧུལམཱཏཱ པུཏྟཾ ཝིཛཱཏཱ’’ཏི སུཏྭཱ སུདྡྷོདནམཧཱརཱཛཱ ‘‘པུཏྟསྶ མེ ཏུཊྛིཾ ནིཝེདེཐཱ’’ཏི སཱསནཾ པཧིཎི. བོདྷིསཏྟོ ཏཾ སུཏྭཱ ‘‘རཱཧུ ཛཱཏོ, བནྡྷནཾ ཛཱཏ’’ནྟི ཨཱཧ. རཱཛཱ ‘‘ཀིཾ མེ པུཏྟོ ཨཝཙཱ’’ཏི པུཙྪིཏྭཱ ཏཾ ཝཙནཾ སུཏྭཱ ‘‘ཨིཏོ པཊྛཱཡ མེ ནཏྟཱ རཱཧུལཀུམཱརོཡེཝ ནཱམ ཧོཏཱུ’’ཏི ཨཱཧ.

བོདྷིསཏྟོཔི ཁོ རཐཝརཾ ཨཱརུཡ྄ཧ མཧནྟེན ཡསེན ཨཏིམནོརམེན སིརིསོབྷགྒེན ནགརཾ པཱཝིསི. ཏསྨིཾ སམཡེ ཀིསཱགོཏམཱི ནཱམ ཁཏྟིཡཀཉྙཱ ཨུཔརིཔཱསཱདཝརཏལགཏཱ ནགརཾ པདཀྑིཎཾ ཀུརུམཱནསྶ བོདྷིསཏྟསྶ རཱུཔསིརིཾ དིསྭཱ པཱིཏིསོམནསྶཛཱཏཱ ཨིདཾ ཨུདཱནཾ ཨུདཱནེསི –

‘‘ནིབྦུཏཱ ¶ ནཱུན སཱ མཱཏཱ, ནིབྦུཏོ ནཱུན སོ པིཏཱ;

ནིབྦུཏཱ ནཱུན སཱ ནཱརཱི, ཡསྶཱཡཾ ཨཱིདིསོ པཏཱི’’ཏི.

བོདྷིསཏྟོ ¶ ཏཾ སུཏྭཱ ཙིནྟེསི ‘‘ཨཡཾ ཨེཝམཱཧ ‘ཨེཝརཱུཔཾ ཨཏྟབྷཱཝཾ པསྶནྟིཡཱ མཱཏུ ཧདཡཾ ནིབྦཱཡཏི, པིཏུ ཧདཡཾ ནིབྦཱཡཏི, པཛཱཔཏིཡཱ ཧདཡཾ ནིབྦཱཡཏཱི’ཏི! ཀིསྨིཾ ནུ ཁོ ནིབྦུཏེ ཧདཡཾ ནིབྦུཏཾ ནཱམ ཧོཏཱི’’ཏི? ཨཐསྶ ཀིལེསེསུ ཝིརཏྟམཱནསསྶ ཨེཏདཧོསི – ‘‘རཱགགྒིམྷི ནིབྦུཏེ ནིབྦུཏཾ ནཱམ ཧོཏི, དོསགྒིམྷི ནིབྦུཏེ ནིབྦུཏཾ ནཱམ ཧོཏི, མོཧགྒིམྷི ནིབྦུཏེ ནིབྦུཏཾ ནཱམ ཧོཏི, མཱནདིཊྛིཨཱདཱིསུ སབྦཀིལེསདརཐེསུ ནིབྦུཏེསུ ནིབྦུཏཾ ནཱམ ཧོཏི. ཨཡཾ མེ སུསྶཝནཾ སཱཝེསི, ཨཧཉྷི ནིབྦཱནཾ གཝེསནྟོ ཙརཱམི, ཨཛྫེཝ མཡཱ གྷརཱཝཱསཾ ཚཌྜེཏྭཱ ནིཀྑམྨ པབྦཛིཏྭཱ ¶ ནིབྦཱནཾ གཝེསིཏུཾ ཝཊྚཏི, ཨཡཾ ཨིམིསྶཱ ཨཱཙརིཡབྷཱགོ ཧོཏཱུ’’ཏི ཀཎྛཏོ ཨོམུཉྩིཏྭཱ ཀིསཱགོཏམིཡཱ སཏསཧསྶགྒྷནཀཾ མུཏྟཱཧཱརཾ པེསེསི. སཱ ‘‘སིདྡྷཏྠཀུམཱརོ མཡི པཊིབདྡྷཙིཏྟོ ཧུཏྭཱ པཎྞཱཀཱརཾ པེསེསཱི’’ཏི སོམནསྶཛཱཏཱ ཨཧོསི.

བོདྷིསཏྟོཔི མཧནྟེན སིརིསོབྷགྒེན ཨཏྟནོ པཱསཱདཾ ཨབྷིརུཧིཏྭཱ སིརིསཡནེ ནིཔཛྫི. ཏཱཝདེཝ ཙ ནཾ སབྦཱལངྐཱརཔཊིམཎྜིཏཱ ནཙྩགཱིཏཱདཱིསུ སུསིཀྑིཏཱ དེཝཀཉྙཱ ཝིཡ རཱུཔསོབྷགྒཔྤཏྟཱ ཨིཏྠིཡོ ནཱནཱཏཱུརིཡཱནི གཧེཏྭཱ སམྤརིཝཱརཡིཏྭཱ ཨབྷིརམཱཔེནྟིཡོ ནཙྩགཱིཏཝཱདིཏཱནི པཡོཛཡིཾསུ. བོདྷིསཏྟོ ཀིལེསེསུ ཝིརཏྟཙིཏྟཏཱཡ ནཙྩཱདཱིསུ ཨནབྷིརཏོ མུཧུཏྟཾ ནིདྡཾ ཨོཀྐམི. ཏཱཔི ཨིཏྠིཡོ ‘‘ཡསྶཏྠཱཡ མཡཾ ནཙྩཱདཱིནི པཡོཛེམ, སོ ནིདྡཾ ཨུཔགཏོ, ཨིདཱནི ཀིམཏྠཾ ཀིལམཱམཱ’’ཏི གཧིཏགྒཧིཏཱནི ཏཱུརིཡཱནི ཨཛ྄ཛྷོཏྠརིཏྭཱ ནིཔཛྫིཾསུ, གནྡྷཏེལཔྤདཱིཔཱ ཛྷཱཡནྟི. བོདྷིསཏྟོ པབུཛ྄ཛྷིཏྭཱ སཡནཔིཊྛེ པལླངྐེན ནིསིནྣོ ཨདྡས ཏཱ ཨིཏྠིཡོ ཏཱུརིཡབྷཎྜཱནི ཨཝཏྠརིཏྭཱ ནིདྡཱཡནྟིཡོ – ཨེཀཙྩཱ པགྒྷརིཏཁེལཱ༹, ལཱལཱཀིལིནྣགཏྟཱ, ཨེཀཙྩཱ དནྟེ ཁཱདནྟིཡོ, ཨེཀཙྩཱ ཀཱཀཙྪནྟིཡོ, ཨེཀཙྩཱ ཝིཔྤལཔནྟིཡོ, ཨེཀཙྩཱ ཝིཝཊམུཁཱ, ཨེཀཙྩཱ ཨཔགཏཝཏྠཱ, པཱཀཊབཱིབྷཙྪསམྦཱདྷཊྛཱནཱ. སོ ཏཱསཾ ཏཾ ཝིཔྤཀཱརཾ དིསྭཱ བྷིཡྻོསོམཏྟཱཡ ཀཱམེསུ ཝིརཏྟཙིཏྟོ ཨཧོསི. ཏསྶ ཨལངྐཏཔཊིཡཏྟཾ སཀྐབྷཝནསདིསམྤི ཏཾ མཧཱཏལཾ ཨཔཝིདྡྷནཱནཱཀུཎཔབྷརིཏཾ ཨཱམཀསུསཱནཾ ཝིཡ ཨུཔཊྛཱསི, ཏཡོ བྷཝཱ ཨཱདིཏྟགེཧསདིསཱ ཁཱཡིཾསུ – ‘‘ཨུཔདྡུཏཾ ཝཏ བྷོ, ཨུཔསྶཊྛཾ ཝཏ བྷོ’’ཏི ཨུདཱནཾ པཝཏྟེསི, ཨཏིཝིཡ པབྦཛྫཱཡ ཙིཏྟཾ ནམི.

སོ ‘‘ཨཛྫེཝ མཡཱ མཧཱབྷིནིཀྑམནཾ ནིཀྑམིཏུཾ ཝཊྚཏཱི’’ཏི སཡནཱ ཨུཊྛཱཡ དྭཱརསམཱིཔཾ ¶ གནྟྭཱ ‘‘ཀོ ཨེཏྠཱ’’ཏི ཨཱཧ. ཨུམྨཱརེ ¶ སཱིསཾ ཀཏྭཱ ནིཔནྣོ ཚནྣོ ‘‘ཨཧཾ ཨཡྻཔུཏྟ ཚནྣོ’’ཏི ཨཱཧ. ‘‘ཨཧཾ ཨཛྫ མཧཱབྷིནིཀྑམནཾ ནིཀྑམིཏུཀཱམོ, ཨེཀཾ མེ ཨསྶཾ ཀཔྤེཧཱི’’ཏི ཨཱཧ. སོ ‘‘སཱདྷུ དེཝཱ’’ཏི ཨསྶབྷཎྜིཀཾ གཧེཏྭཱ ཨསྶསཱལཾ གནྟྭཱ གནྡྷཏེལཔདཱིཔེསུ ཛལནྟེསུ སུམནཔཊྚཝིཏཱནསྶ ཧེཊྛཱ རམཎཱིཡེ བྷཱུམིབྷཱགེ ཋིཏཾ ཀཎྜཀཾ ཨསྶརཱཛཱནཾ དིསྭཱ ‘‘ཨཛྫ མཡཱ ཨིམམེཝ ཀཔྤེཏུཾ ཝཊྚཏཱི’’ཏི ཀཎྜཀཾ ཀཔྤེསི. སོ ཀཔྤིཡམཱནོཝ ཨཉྙཱསི ‘‘ཨཡཾ ཀཔྤནཱ ཨཏིགཱལ༹ྷཱ ¶ , ཨཉྙེསུ དིཝསེསུ ཨུཡྻཱནཀཱིལཱ༹དིགམནེ ཀཔྤནཱ ཝིཡ ན ཧོཏི, མཡ྄ཧཾ ཨཡྻཔུཏྟོ ཨཛྫ མཧཱབྷིནིཀྑམནཾ ནིཀྑམིཏུཀཱམོ བྷཝིསྶཏཱི’’ཏི. ཏཏོ ཏུཊྛམཱནསོ མཧཱཧསིཏཾ ཧསི. སོ སདྡོ སཀལནགརཾ པཏྠརིཏྭཱ གཙྪེཡྻ, དེཝཏཱ པན ཏཾ སདྡཾ ནིརུམྦྷིཏྭཱ ན ཀསྶཙི སོཏུཾ ཨདཾསུ.

བོདྷིསཏྟོཔི ཁོ ཚནྣཾ པེསེཏྭཱཝ ‘‘པུཏྟཾ ཏཱཝ པསྶིསྶཱམཱི’’ཏི ཙིནྟེཏྭཱ ནིསིནྣཔལླངྐཏོ ཨུཊྛཱཡ རཱཧུལམཱཏཱཡ ཝསནཊྛཱནཾ གནྟྭཱ གབྦྷདྭཱརཾ ཝིཝརི. ཏསྨིཾ ཁཎེ ཨནྟོགབྦྷེ གནྡྷཏེལཔདཱིཔོ ཛྷཱཡཏི, རཱཧུལམཱཏཱ སུམནམལླིཀཱདཱིནཾ པུཔྥཱནཾ ཨམྦཎམཏྟེན ཨབྷིཔྤཀིཎྞསཡནེ པུཏྟསྶ མཏྠཀེ ཧཏྠཾ ཋཔེཏྭཱ ནིདྡཱཡཏི. བོདྷིསཏྟོ ཨུམྨཱརེ པཱདཾ ཋཔེཏྭཱ ཋིཏཀོཝ ཨོལོཀེཏྭཱ ‘‘སཙཱཧཾ དེཝིཡཱ ཧཏྠཾ ཨཔནེཏྭཱ མམ པུཏྟཾ གཎྷིསྶཱམི, དེཝཱི པབུཛ྄ཛྷིསྶཏི, ཨེཝཾ མེ གམནནྟརཱཡོ བྷཝིསྶཏི, བུདྡྷོ ཧུཏྭཱཝ ཨཱགནྟྭཱ པུཏྟཾ པསྶིསྶཱམཱི’’ཏི པཱསཱདཏལཏོ ཨོཏརི. ཡཾ པན ཛཱཏཀཊྛཀཐཱཡཾ ‘‘ཏདཱ སཏྟཱཧཛཱཏོ རཱཧུལཀུམཱརོ ཧོཏཱི’’ཏི ཝུཏྟཾ, ཏཾ སེསཊྛཀཐཱསུ ནཏྠི, ཏསྨཱ ཨིདམེཝ གཧེཏབྦཾ.

ཨེཝཾ བོདྷིསཏྟོ པཱསཱདཏལཱ ཨོཏརིཏྭཱ ཨསྶསམཱིཔཾ གནྟྭཱ ཨེཝམཱཧ – ‘‘ཏཱཏ ཀཎྜཀ, ཏྭཾ ཨཛྫ ཨེཀརཏྟིཾ མཾ ཏཱརཡ, ཨཧཾ ཏཾ ནིསྶཱཡ བུདྡྷོ ཧུཏྭཱ སདེཝཀཾ ལོཀཾ ཏཱརེསྶཱམཱི’’ཏི. ཏཏོ ཨུལླངྒྷིཏྭཱ ཀཎྜཀསྶ པིཊྛིཾ ཨབྷིརུཧི. ཀཎྜཀོ གཱིཝཏོ པཊྛཱཡ ཨཱཡཱམེན ཨཊྛཱརསཧཏྠོ ཧོཏི ཏདནུཙྪཝིཀེན ཨུབྦེདྷེན སམནྣཱགཏོ ཐཱམཛཝསམྤནྣོ སབྦསེཏོ དྷོཏསངྑསདིསོ. སོ སཙེ ཧསེཡྻ ཝཱ པདསདྡཾ ཝཱ ཀརེཡྻ, སདྡོ སཀལནགརཾ ཨཝཏྠརེཡྻ. ཏསྨཱ དེཝཏཱ ཨཏྟནོ ཨཱནུབྷཱཝེན ཏསྶ ཡཐཱ ན ཀོཙི སུཎཱཏི, ཨེཝཾ ཧསིཏསདྡཾ སནྣིརུམྦྷིཏྭཱ ཨཀྐམནཨཀྐམནཔདཝཱརེ ཧཏྠཏལཱནི ཨུཔནཱམེསུཾ. བོདྷིསཏྟོ ཨསྶཝརསྶ པིཊྛིཝེམཛ྄ཛྷགཏོ ཚནྣཾ ཨསྶསྶ ¶ ཝཱལདྷིཾ གཱཧཱཔེཏྭཱ ཨཌྜྷརཏྟསམཡེ མཧཱདྭཱརསམཱིཔཾ པཏྟོ. ཏདཱ པན རཱཛཱ ‘‘ཨེཝཾ བོདྷིསཏྟོ ཡཱཡ ཀཱཡཙི ཝེལཱཡ ནགརདྭཱརཾ ཝིཝརིཏྭཱ ནིཀྑམིཏུཾ ན སཀྑིསྶཏཱི’’ཏི དྭཱིསུ དྭཱརཀཝཱཊེསུ ཨེཀེཀཾ པུརིསསཧསྶེན ཝིཝརིཏབྦཾ ཀཱརཱཔེསི. བོདྷིསཏྟོ ཐཱམབལསམྤནྣོ, ཧཏྠིགཎནཱཡ ཀོཊིསཧསྶཧཏྠཱིནཾ བལཾ དྷཱརེཏི, པུརིསགཎནཱཡ དསཀོཊིསཧསྶཔུརིསཱནཾ ¶ ¶ . སོ ཙིནྟེསི ‘‘སཙེ དྭཱརཾ ན ཝིཝརཱིཡཏི, ཨཛྫ ཀཎྜཀསྶ པིཊྛེ ནིསིནྣོཝ ཝཱལདྷིཾ གཧེཏྭཱ ཋིཏེན ཚནྣེན སདྡྷིཾཡེཝ ཀཎྜཀཾ ཨཱུརཱུཧི ནིཔྤཱིལེ༹ཏྭཱ ཨཊྛཱརསཧཏྠུབྦེདྷཾ པཱཀཱརཾ ཨུཔྤཏིཏྭཱ ཨཏིཀྐམིསྶཱམཱི’’ཏི. ཚནྣོཔི ཙིནྟེསི ‘‘སཙེ དྭཱརཾ ན ཝིཝརཱིཡཏི, ཨཧཾ ཨཡྻཔུཏྟཾ ཁནྡྷེ ནིསཱིདཱཔེཏྭཱ ཀཎྜཀཾ དཀྑིཎེན ཧཏྠེན ཀུཙྪིཡཾ པརིཀྑིཔནྟོ ཨུཔཀཙྪནྟརེ ཀཏྭཱ པཱཀཱརཾ ཨུཔྤཏིཏྭཱ ཨཏིཀྐམིསྶཱམཱི’’ཏི. ཀཎྜཀོཔི ཙིནྟེསི ‘‘སཙེ དྭཱརཾ ན ཝིཝརཱིཡཏི, ཨཧཾ ཨཏྟནོ སཱམིཀཾ པིཊྛིཡཾ ཡཐཱནིསིནྣམེཝ ཚནྣེན ཝཱལདྷིཾ གཧེཏྭཱ ཋིཏེན སདྡྷིཾཡེཝ ཨུཀྑིཔིཏྭཱ པཱཀཱརཾ ཨུཔྤཏིཏྭཱ ཨཏིཀྐམིསྶཱམཱི’’ཏི. སཙེ དྭཱརཾ ན ཨཝཱཔུརཱིཡིཏྠ, ཡཐཱཙིནྟིཏམེཝ ཏེསུ ཏཱིསུ ཛནེསུ ཨཉྙཏརོ སམྤཱདེཡྻ. དྭཱརེ ཨདྷིཝཏྠཱ དེཝཏཱ པན དྭཱརཾ ཝིཝརི.

ཏསྨིཾཡེཝ ཁཎེ མཱརོ ‘‘བོདྷིསཏྟཾ ནིཝཏྟེསྶཱམཱི’’ཏི ཨཱགནྟྭཱ ཨཱཀཱསེ ཋིཏོ ཨཱཧ – ‘‘མཱརིས, མཱ ནིཀྑམ, ཨིཏོ ཏེ སཏྟམེ དིཝསེ ཙཀྐརཏནཾ པཱཏུབྷཝིསྶཏི, དྭིསཧསྶཔརིཏྟདཱིཔཔརིཝཱརཱནཾ ཙཏུནྣཾ མཧཱདཱིཔཱནཾ རཛྫཾ ཀཱརེསྶསི, ནིཝཏྟ མཱརིསཱ’’ཏི. ‘‘ཀོསི ཏྭ’’ནྟི? ‘‘ཨཧཾ ཝསཝཏྟཱི’’ཏི. ‘‘མཱར, ཛཱནཱམཧཾ མཡ྄ཧཾ ཙཀྐརཏནསྶ པཱཏུབྷཱཝཾ, ཨནཏྠིཀོཧཾ རཛྫེན, དསསཧསྶིལོཀདྷཱཏུཾ ཨུནྣཱདེཏྭཱ བུདྡྷོ བྷཝིསྶཱམཱི’’ཏི ཨཱཧ. མཱརོ ‘‘ཨིཏོ དཱནི ཏེ པཊྛཱཡ ཀཱམཝིཏཀྐཾ ཝཱ བྱཱཔཱདཝིཏཀྐཾ ཝཱ ཝིཧིཾསཱཝིཏཀྐཾ ཝཱ ཙིནྟིཏཀཱལེ ཛཱནིསྶཱམཱི’’ཏི ཨོཏཱརཱཔེཀྑོ ཚཱཡཱ ཝིཡ ཨནཔགཙྪནྟོ ཨནུབནྡྷི.

བོདྷིསཏྟོཔི ཧཏྠགཏཾ ཙཀྐཝཏྟིརཛྫཾ ཁེལ༹པིཎྜཾ ཝིཡ ཨནཔེཀྑོ ཚཌྜེཏྭཱ མཧནྟེན སཀྐཱརེན ནགརཱ ནིཀྑམི ཨཱསཱལ༹ྷིཔུཎྞམཱཡ ཨུཏྟརཱསཱལ༹ྷནཀྑཏྟེ ཝཏྟམཱནེ. ནིཀྑམིཏྭཱ ཙ པུན ནགརཾ ཨོལོཀེཏུཀཱམོ ཛཱཏོ. ཨེཝཉྩ པནསྶ ཙིཏྟེ ཨུཔྤནྣམཏྟེཡེཝ ‘‘མཧཱཔུརིས, ན ཏཡཱ ནིཝཏྟིཏྭཱ ཨོལོཀནཀམྨཾ ཀཏ’’ནྟི ཝདམཱནཱ ཝིཡ མཧཱཔཐཝཱི ཀུལཱལཙཀྐཾ ཝིཡ བྷིཛྫིཏྭཱ པརིཝཏྟི. བོདྷིསཏྟོ ནགརཱབྷིམུཁོ ཋཏྭཱ ནགརཾ ཨོལོཀེཏྭཱ ཏསྨིཾ པཐཝིཔྤདེསེ ཀཎྜཀནིཝཏྟནཙེཏིཡཊྛཱནཾ དསྶེཏྭཱ གནྟབྦམགྒཱབྷིམུཁཾ ཀཎྜཀཾ ཀཏྭཱ ¶ པཱཡཱསི མཧནྟེན སཀྐཱརེན ཨུལཱ༹རེན སིརིསོབྷགྒེན. ཏདཱ ཀིརསྶ དེཝཏཱ པུརཏོ སཊྛི ཨུཀྐཱསཧསྶཱནི དྷཱརཡིཾསུ, པཙྪཏོ སཊྛི, དཀྑིཎཔསྶཏོ སཊྛི, ཝཱམཔསྶཏོ ¶ སཊྛི, ཨཔརཱ དེཝཏཱ ཙཀྐཝཱལ༹མུཁཝཊྚིཡཾ ཨཔརིམཱཎཱ ཨུཀྐཱ དྷཱརཡིཾསུ, ཨཔརཱ དེཝཏཱ ཙ ནཱགསུཔཎྞཱདཡོ ཙ དིབྦེཧི གནྡྷེཧི མཱལཱཧི ཙུཎྞེཧི དྷཱུམེཧི པཱུཛཡམཱནཱ གཙྪནྟི. པཱརིཙྪཏྟཀཔུཔྥེཧི ཙེཝ མནྡཱརཝཔུཔྥེཧི ཙ གྷནམེགྷཝུཊྛིཀཱལེ དྷཱརཱཧི ཝིཡ ནབྷཾ ནིརནྟརཾ ཨཧོསི, དིབྦཱནི སཾགཱིཏཱནི པཝཏྟིཾསུ ¶ , སམནྟཏོ ཨཊྛསཊྛི ཏཱུརིཡསཏསཧསྶཱནི པཝཛྫིཾསུ, སམུདྡཀུཙྪིཡཾ མེགྷཏྠནིཏཀཱལོ ཝིཡ ཡུགནྡྷརཀུཙྪིཡཾ སཱགརནིགྒྷོསཀཱལོ ཝིཡ ཝཏྟཏི.

ཨིམིནཱ སིརིསོབྷགྒེན གཙྪནྟོ བོདྷིསཏྟོ ཨེཀརཏྟེནེཝ ཏཱིཎི རཛྫཱནི ཨཏིཀྐམྨ ཏིཾསཡོཛནམཏྠཀེ ཨནོམཱནདཱིཏཱིརཾ པཱཔུཎི. ‘‘ཀིཾ པན ཨསྶོ ཏཏོ པརཾ གནྟུཾ ན སཀྐོཏཱི’’ཏི? ‘‘ནོ, ན སཀྐོ’’ཏི. སོ ཧི ཨེཀཾ ཙཀྐཝཱལ༹གབྦྷཾ ནཱབྷིཡཱ ཋིཏཙཀྐསྶ ནེམིཝཊྚིཾ མདྡནྟོ ཝིཡ ཨནྟནྟེན ཙརིཏྭཱ པུརེཔཱཏརཱསམེཝ ཨཱགནྟྭཱ ཨཏྟནོ སམྤཱདིཏཾ བྷཏྟཾ བྷུཉྫིཏུཾ སམཏྠོ. ཏདཱ པན དེཝནཱགསུཔཎྞཱདཱིཧི ཨཱཀཱསེ ཋཏྭཱ ཨོསྶཊྛེཧི གནྡྷམཱལཱདཱིཧི ཡཱཝ ཨཱུརུཔྤདེསཱ སཉྪནྣཾ སརཱིརཾ ཨཱཀཌྜྷིཏྭཱ གནྡྷམཱལཱཛཊཾ ཚིནྡནྟསྶ ཨཏིཔྤཔཉྩོ ཨཧོསི, ཏསྨཱ ཏིཾསཡོཛནམཏྟམེཝ ཨགམཱསི. ཨཐ བོདྷིསཏྟོ ནདཱིཏཱིརེ ཋཏྭཱ ཚནྣཾ པུཙྪི – ‘‘ཀིནྣཱམཱ ཨཡཾ ནདཱི’’ཏི? ‘‘ཨནོམཱ ནཱམ, དེཝཱ’’ཏི. ‘‘ཨམྷཱཀམྤི པབྦཛྫཱ ཨནོམཱ བྷཝིསྶཏཱི’’ཏི པཎྷིཡཱ གྷཊྚེནྟོ ཨསྶསྶ སཉྙཾ ཨདཱསི. ཨསྶོ ཨུཔྤཏིཏྭཱ ཨཊྛཱུསབྷཝིཏྠཱརཱཡ ནདིཡཱ པཱརིམཏཱིརེ ཨཊྛཱསི.

བོདྷིསཏྟོ ཨསྶཔིཊྛིཏོ ཨོརུཡ྄ཧ རཛཏཔཊྚསདིསེ ཝཱལུཀཱཔུལིནེ ཋཏྭཱ ཚནྣཾ ཨཱམནྟེསི – ‘‘སམྨ, ཚནྣ, ཏྭཾ མཡ྄ཧཾ ཨཱབྷརཎཱནི ཙེཝ ཀཎྜཀཉྩ ཨཱདཱཡ གཙྪ, ཨཧཾ པབྦཛིསྶཱམཱི’’ཏི. ‘‘ཨཧམྤི, དེཝ, པབྦཛིསྶཱམཱི’’ཏི. བོདྷིསཏྟོ ‘‘ན ལབྦྷཱ ཏཡཱ པབྦཛིཏུཾ, གཙྪ ཏྭ’’ནྟི ཏིཀྑཏྟུཾ པཊིབཱཧིཏྭཱ ཨཱབྷརཎཱནི ཙེཝ ཀཎྜཀཉྩ པཊིཙྪཱཔེཏྭཱ ཙིནྟེསི ‘‘ཨིམེ མཡ྄ཧཾ ཀེསཱ སམཎསཱརུཔྤཱ ན ཧོནྟཱི’’ཏི. ཨཉྙོ བོདྷིསཏྟསྶ ཀེསེ ཚིནྡིཏུཾ ཡུཏྟརཱུཔོ ནཏྠི, ཏཏོ ‘‘སཡམེཝ ཁགྒེན ཚིནྡིསྶཱམཱི’’ཏི དཀྑིཎེན ཧཏྠེན ཨསིཾ གཎྷིཏྭཱ ཝཱམཧཏྠེན མོལི༹ཡཱ ¶ སདྡྷིཾ ཙཱུལ༹ཾ གཧེཏྭཱ ཚིནྡི, ཀེསཱ དྭངྒུལམཏྟཱ ཧུཏྭཱ དཀྑིཎཏོ ཨཱཝཏྟམཱནཱ སཱིསཾ ཨལླཱིཡིཾསུ. ཏེསཾ ཡཱཝཛཱིཝཾ ཏདེཝ པམཱཎཾ ཨཧོསི, མསྶུ ཙ ཏདནུརཱུཔཾ, པུན ཀེསམསྶུཨོཧཱརཎཀིཙྩཾ ནཱམ ནཱཧོསི. བོདྷིསཏྟོ ¶ སཧ མོལི༹ཡཱ ཙུལ༹ཾ གཧེཏྭཱ ‘‘སཙཱཧཾ བུདྡྷོ བྷཝིསྶཱམི, ཨཱཀཱསེ ཏིཊྛཏུ, ནོ ཙེ, བྷཱུམིཡཾ པཏཏཱུ’’ཏི ཨནྟལིཀྑེ ཁིཔི. ཏཾ ཙཱུལཱ༹མཎིཝེཋནཾ ཡོཛནཔྤམཱཎཾ ཋཱནཾ གནྟྭཱ ཨཱཀཱསེ ཨཊྛཱསི. སཀྐོ དེཝརཱཛཱ དིབྦཙཀྑུནཱ ཨོལོཀེཏྭཱ ཡོཛནིཡརཏནཙངྐོཊཀེན སམྤཊིཙྪིཏྭཱ ཏཱཝཏིཾསབྷཝནེ ཙཱུལཱ༹མཎིཙེཏིཡཾ ནཱམ པཏིཊྛཱཔེསི.

‘‘ཚེཏྭཱན མོལི༹ཾ ཝརགནྡྷཝཱསིཏཾ, ཝེཧཱཡསཾ ཨུཀྑིཔི ཨགྒཔུགྒལོ;

སཧསྶནེཏྟོ སིརསཱ པཊིགྒཧི, སུཝཎྞཙངྐོཊཝརེན ཝཱསཝོ’’ཏི.

པུན ¶ བོདྷིསཏྟོ ཙིནྟེསི ‘‘ཨིམཱནི ཀཱསིཀཝཏྠཱནི མཡ྄ཧཾ ན སམཎསཱརུཔྤཱནཱི’’ཏི. ཨཐསྶ ཀསྶཔབུདྡྷཀཱལེ པུརཱཎསཧཱཡཀོ གྷཊཱིཀཱརམཧཱབྲཧྨཱ ཨེཀཾ བུདྡྷནྟརཾ ཛརཾ ཨཔཏྟེན མིཏྟབྷཱཝེན ཙིནྟེསི – ‘‘ཨཛྫ མེ སཧཱཡཀོ མཧཱབྷིནིཀྑམནཾ ནིཀྑནྟོ, སམཎཔརིཀྑཱརམསྶ གཧེཏྭཱ གཙྪིསྶཱམཱི’’ཏི.

‘‘ཏིཙཱིཝརཉྩ པཏྟོ ཙ, ཝཱསཱི སཱུཙི ཙ བནྡྷནཾ;

པརིསྶཱཝནེན ཨཊྛེཏེ, ཡུཏྟཡོགསྶ བྷིཀྑུནོ’’ཏི. –

ཨིམེ ཨཊྛ སམཎཔརིཀྑཱརེ ཨཱཧརིཏྭཱ ཨདཱསི. བོདྷིསཏྟོ ཨརཧདྡྷཛཾ ནིཝཱསེཏྭཱ ཨུཏྟམཔབྦཛྫཱཝེསཾ གཎྷིཏྭཱ ‘‘ཚནྣ, མམ ཝཙནེན མཱཏཱཔིཏཱུནཾ ཨཱརོགྱཾ ཝདེཧཱི’’ཏི ཝཏྭཱ ཨུཡྻོཛེསི. ཚནྣོ བོདྷིསཏྟཾ ཝནྡིཏྭཱ པདཀྑིཎཾ ཀཏྭཱ པཀྐཱམི. ཀཎྜཀོ པན ཚནྣེན སདྡྷིཾ མནྟཡམཱནསྶ བོདྷིསཏྟསྶ ཝཙནཾ སུཎནྟོ ཋཏྭཱ ‘‘ནཏྠི དཱནི མཡ྄ཧཾ པུན སཱམིནོ དསྶན’’ནྟི ཙཀྑུཔཐཾ ཝིཛཧནྟོ སོཀཾ ཨདྷིཝཱསེཏུཾ ཨསཀྐོནྟོ ཧདཡེན ཕལིཏེན ཀཱལཾ ཀཏྭཱ ཏཱཝཏིཾསབྷཝནེ ཀཎྜཀོ ནཱམ དེཝཔུཏྟོ ཧུཏྭཱ ནིབྦཏྟི. ཚནྣསྶ པཋམཾ ཨེཀོཝ སོཀོ ¶ ཨཧོསི, ཀཎྜཀསྶ པན ཀཱལཀིརིཡཱཡ དུཏིཡེན སོཀེན པཱིལི༹ཏོ རོདནྟོ པརིདེཝནྟོ ནགརཾ ཨགམཱསི.

བོདྷིསཏྟོཔི པབྦཛིཏྭཱ ཏསྨིཾཡེཝ པདེསེ ཨནུཔིཡཾ ནཱམ ཨམྦཝནཾ ཨཏྠི, ཏཏྠ སཏྟཱཧཾ པབྦཛྫཱསུཁེན ཝཱིཏིནཱམེཏྭཱ ཨེཀདིཝསེནེཝ ¶ ཏིཾསཡོཛནམགྒཾ པདསཱ གནྟྭཱ རཱཛགཧཾ པཱཝིསི. པཝིསིཏྭཱ སཔདཱནཾ པིཎྜཱཡ ཙརི. སཀལནགརཾ བོདྷིསཏྟསྶ རཱུཔདསྶནེན དྷནཔཱལཀེན པཝིཊྛརཱཛགཧཾ ཝིཡ ཨསུརིནྡེན པཝིཊྛདེཝནགརཾ ཝིཡ ཙ སངྑོབྷཾ ཨགམཱསི. རཱཛཔུརིསཱ གནྟྭཱ ‘‘དེཝ, ཨེཝརཱུཔོ ནཱམ སཏྟོ ནགརེ པིཎྜཱཡ ཙརཏི, ‘དེཝོ ཝཱ མནུསྶོ ཝཱ ནཱགོ ཝཱ སུཔཎྞོ ཝཱ ཀོ ནཱམེསོ’ཏི ན ཛཱནཱམཱ’’ཏི ཨཱརོཙེསུཾ. རཱཛཱ པཱསཱདཏལེ ཋཏྭཱ མཧཱཔུརིསཾ དིསྭཱ ཨཙྪརིཡབྦྷུཏཛཱཏོ པུརིསེ ཨཱཎཱཔེསི – ‘‘གཙྪཐ བྷཎེ, ཝཱིམཾསཐ, སཙེ ཨམནུསྶོ བྷཝིསྶཏི, ནགརཱ ནིཀྑམིཏྭཱ ཨནྟརདྷཱཡིསྶཏི, སཙེ དེཝཏཱ བྷཝིསྶཏི, ཨཱཀཱསེན གཙྪིསྶཏི, སཙེ ནཱགོ བྷཝིསྶཏི, པཐཝིཡཾ ནིམུཛྫིཏྭཱ གམིསྶཏི, སཙེ མནུསྶོ བྷཝིསྶཏི, ཡཐཱལདྡྷཾ བྷིཀྑཾ པརིབྷུཉྫིསྶཏཱི’’ཏི.

མཧཱཔུརིསོཔི ཁོ མིསྶཀབྷཏྟཾ སཾཧརིཏྭཱ ‘‘ཨལཾ མེ ཨེཏྟཀཾ ཡཱཔནཱཡཱ’’ཏི ཉཏྭཱ པཝིཊྛདྭཱརེནེཝ ནགརཱ ནིཀྑམིཏྭཱ པཎྜཝཔབྦཏཙྪཱཡཱཡ པུརཏྠཱབྷིམུཁོ ནིསཱིདིཏྭཱ ཨཱཧཱརཾ པརིབྷུཉྫིཏུཾ ¶ ཨཱརདྡྷོ. ཨཐསྶ ཨནྟཱནི པརིཝཏྟིཏྭཱ མུཁེན ནིཀྑམནཱཀཱརཔྤཏྟཱནི ཝིཡ ཨཧེསུཾ. ཏཏོ ཏེན ཨཏྟབྷཱཝེན ཨེཝརཱུཔསྶ ཨཱཧཱརསྶ ཙཀྑུནཱཔི ཨདིཊྛཔུབྦཏཱཡ ཏེན པཊིཀཱུལཱཧཱརེན ཨཊྚིཡམཱནོ ཨེཝཾ ཨཏྟནཱཝ ཨཏྟཱནཾ ཨོཝདི ‘‘སིདྡྷཏྠ, ཏྭཾ སུལབྷནྣཔཱནེ ཀུལེ ཏིཝསྶིཀགནྡྷསཱལིབྷོཛནཾ ནཱནགྒརསེཧི བྷུཉྫནཊྛཱནེ ནིབྦཏྟིཏྭཱཔི ཨེཀཾ པཾསུཀཱུལིཀཾ དིསྭཱ ‘ཀདཱ ནུ ཁོ ཨཧམྤི ཨེཝརཱུཔོ ཧུཏྭཱ པིཎྜཱཡ ཙརིཏྭཱ བྷུཉྫིསྶཱམི, བྷཝིསྶཏི ནུ ཁོ མེ སོ ཀཱལོ’ཏི ཙིནྟེཏྭཱ ནིཀྑནྟོ, ཨིདཱནི ཀིཾ ནཱམེཏཾ ཀརོསཱི’’ཏི. ཨེཝཾ ཨཏྟནཱཝ ཨཏྟཱནཾ ཨོཝདིཏྭཱ ནིབྦིཀཱརོ ཧུཏྭཱ ཨཱཧཱརཾ པརིབྷུཉྫི.

རཱཛཔུརིསཱ ཏཾ པཝཏྟིཾ དིསྭཱ གནྟྭཱ རཉྙོ ཨཱརོཙེསུཾ. རཱཛཱ དཱུཏཝཙནཾ སུཏྭཱ ཝེགེན ནགརཱ ནིཀྑམིཏྭཱ བོདྷིསཏྟསྶ སནྟིཀཾ གནྟྭཱ ཨིརིཡཱཔཐསྨིཾཡེཝ པསཱིདིཏྭཱ བོདྷིསཏྟསྶ སབྦཾ ཨིསྶརིཡཾ ནིཡྻཱདེསི ¶ . བོདྷིསཏྟོ ‘‘མཡ྄ཧཾ, མཧཱརཱཛ, ཝཏྠུཀཱམེཧི ཝཱ ཀིལེསཀཱམེཧི ཝཱ ཨཏྠོ ནཏྠི, ཨཧཾ པརམཱབྷིསམྦོདྷིཾ པཏྠཡནྟོ ནིཀྑནྟོ’’ཏི ཨཱཧ. རཱཛཱ ཨནེཀཔྤཀཱརཾ ཡཱཙནྟོཔི ཏསྶ ཙིཏྟཾ ཨལབྷིཏྭཱ ‘‘ཨདྡྷཱ ཏྭཾ བུདྡྷོ བྷཝིསྶསི, བུདྡྷབྷཱུཏེན པན ཏེ པཋམཾ མམ ཝིཛིཏཾ ཨཱགནྟབྦ’’ནྟི པཊིཉྙཾ གཎྷི. ཨཡམེཏྠ སངྑེཔོ, ཝིཏྠཱརོ པན ‘‘པབྦཛྫཾ ཀིཏྟཡིསྶཱམི, ཡཐཱ པབྦཛི ཙཀྑུམཱ’’ཏི ཨིམཾ པབྦཛྫཱསུཏྟཾ (སུ. ནི. ༤༠༧ ཨཱདཡོ) སདྡྷིཾ ཨཊྛཀཐཱཡ ཨོལོཀེཏྭཱ ཝེདིཏབྦོ.

བོདྷིསཏྟོཔི རཉྙོ པཊིཉྙཾ དཏྭཱ ཨནུཔུབྦེན ཙཱརིཀཾ ཙརམཱནོ ཨཱལཱ༹རཉྩ ཀཱལཱམཾ ཨུདཀཉྩ རཱམཔུཏྟཾ ཨུཔསངྐམིཏྭཱ སམཱཔཏྟིཡོ ནིབྦཏྟེཏྭཱ ‘‘ནཱཡཾ མགྒོ བོདྷཱཡཱ’’ཏི ཏམྤི ¶ སམཱཔཏྟིབྷཱཝནཾ ཨནལངྐརིཏྭཱ སདེཝཀསྶ ལོཀསྶ ཨཏྟནོ ཐཱམཝཱིརིཡསནྡསྶནཏྠཾ མཧཱཔདྷཱནཾ པདཧིཏུཀཱམོ ཨུརུཝེལཾ གནྟྭཱ ‘‘རམཎཱིཡོ ཝཏཱཡཾ བྷཱུམིབྷཱགོ’’ཏི ཏཏྠེཝ ཝཱསཾ ཨུཔགནྟྭཱ མཧཱཔདྷཱནཾ པདཧི. ཏེཔི ཁོ ཀོཎྜཉྙཔྤམུཁཱ པཉྩ པབྦཛིཏཱ གཱམནིགམརཱཛདྷཱནཱིསུ བྷིཀྑཱཡ ཙརནྟཱ ཏཏྠ བོདྷིསཏྟཾ སམྤཱཔུཎིཾསུ. ཨཐ ནཾ ཚབྦསྶཱནི མཧཱཔདྷཱནཾ པདཧནྟཾ ‘‘ཨིདཱནི བུདྡྷོ བྷཝིསྶཏི, ཨིདཱནི བུདྡྷོ བྷཝིསྶཏཱི’’ཏི པརིཝེཎསམྨཛྫནཱདིཀཱཡ ཝཏྟཔཊིཔཏྟིཡཱ ཨུཔཊྛཧམཱནཱ སནྟིཀཱཝཙརཱཝསྶ ཨཧེསུཾ. བོདྷིསཏྟོཔི ཁོ ‘‘ཀོཊིཔྤཏྟཾ དུཀྐརཀཱརིཡཾ ཀརིསྶཱམཱི’’ཏི ཨེཀཏིལཏཎྜུལཱདཱིཧིཔི ཝཱིཏིནཱམེསི, སབྦསོཔི ཨཱཧཱརཱུཔཙྪེདཾ ཨཀཱསི, དེཝཏཱཔི ལོམཀཱུཔེཧི ཨོཛཾ ཨུཔསཾཧརམཱནཱ པཊིཀྑིཔི.

ཨཐསྶ ཏཱཡ ནིརཱཧཱརཏཱཡ པརམཀསིམཱནཔྤཏྟཀཱཡསྶ སུཝཎྞཝཎྞོ ཀཱཡོ ཀཱལ༹ཝཎྞོ ཨཧོསི. བཱཏྟིཾསམཧཱཔུརིསལཀྑཎཱནི པཊིཙྪནྣཱནི ཨཧེསུཾ. ཨཔྤེཀདཱ ཨཔྤཱཎཀཾ ཛྷཱནཾ ཛྷཱཡནྟོ ¶ མཧཱཝེདནཱཧི ཨབྷིཏུནྣོ ཝིསཉྙཱིབྷཱུཏོ ཙངྐམནཀོཊིཡཾ པཏཏི. ཨཐ ནཾ ཨེཀཙྩཱ དེཝཏཱ ‘‘ཀཱལཀཏོ སམཎོ གོཏམོ’’ཏི ཝདནྟི, ཨེཀཙྩཱ ‘‘ཝིཧཱརོཝེསོ ཨརཧཏ’’ནྟི ཨཱཧཾསུ. ཏཏྠ ཡཱསཾ ‘‘ཀཱལཀཏོ’’ཏི ཨཧོསི, ཏཱ གནྟྭཱ སུདྡྷོདནམཧཱརཱཛསྶ ཨཱརོཙེསུཾ ‘‘ཏུམྷཱཀཾ པུཏྟོ ཀཱལཀཏོ’’ཏི. མམ པུཏྟོ བུདྡྷོ ཧུཏྭཱ ཀཱལཀཏོ, ཨཧུཏྭཱཏི? བུདྡྷོ བྷཝིཏུཾ ནཱསཀྑི, པདྷཱནབྷཱུམིཡཾཡེཝ པཏིཏྭཱ ¶ ཀཱལཀཏོཏི. ཨིདཾ སུཏྭཱ རཱཛཱ ‘‘ནཱཧཾ སདྡཧཱམི, མམ པུཏྟསྶ བོདྷིཾ ཨཔྤཏྭཱ ཀཱལཀིརིཡཱ ནཱམ ནཏྠཱི’’ཏི པཊིཀྑིཔི. ཀསྨཱ པན རཱཛཱ ན སདྡཧཏཱིཏི? ཀཱལ༹དེཝཱིལཏཱཔསསྶ ཝནྡཱཔནདིཝསེ ཛམྦུརུཀྑམཱུལེ ཙ པཱཊིཧཱརིཡཱནཾ དིཊྛཏྟཱ.

པུན བོདྷིསཏྟེ སཉྙཾ པཊིལབྷིཏྭཱ ཨུཊྛིཏེ ཏཱ དེཝཏཱ གནྟྭཱ ‘‘ཨརོགོ ཏེ མཧཱརཱཛ པུཏྟོ’’ཏི ཨཱརོཙེནྟི. རཱཛཱ ‘‘ཛཱནཱམཧཾ པུཏྟསྶ ཨམརཎབྷཱཝ’’ནྟི ཝདཏི. མཧཱསཏྟསྶ ཚབྦསྶཱནི དུཀྐརཀཱརིཡཾ ཀརོནྟསྶ ཨཱཀཱསེ གཎྛིཀརཎཀཱལོ ཝིཡ ཨཧོསི. སོ ‘‘ཨཡཾ དུཀྐརཀཱརིཀཱ ནཱམ བོདྷཱཡ མགྒོ ན ཧོཏཱི’’ཏི ཨོལཱ༹རིཀཾ ཨཱཧཱརཾ ཨཱཧཱརེཏུཾ གཱམནིགམེསུ པིཎྜཱཡ ཙརིཏྭཱ ཨཱཧཱརཾ ཨཱཧརི, ཨཐསྶ བཱཏྟིཾསམཧཱཔུརིསལཀྑཎཱནི པཱཀཏིཀཱནི ཨཧེསུཾ, ཀཱཡོ སུཝཎྞཝཎྞོ ཨཧོསི. པཉྩཝགྒིཡཱ བྷིཀྑཱུ ‘‘ཨཡཾ ཚབྦསྶཱནི དུཀྐརཀཱརིཀཾ ཀརོནྟོཔི སབྦཉྙུཏཾ པཊིཝིཛ྄ཛྷིཏུཾ ནཱསཀྑི, ཨིདཱནི གཱམཱདཱིསུ ¶ པིཎྜཱཡ ཙརིཏྭཱ ཨོལཱ༹རིཀཾ ཨཱཧཱརཾ ཨཱཧརིཡམཱནོ ཀིཾ སཀྑིསྶཏི, བཱཧུལིཀོ ཨེས པདྷཱནཝིབྦྷནྟོ, སཱིསཾ ནྷཱཡིཏུཀཱམསྶ ཨུསྶཱཝབིནྡུཏཀྐནཾ ཝིཡ ཨམྷཱཀཾ ཨེཏསྶ སནྟིཀཱ ཝིསེསཏཀྐནཾ, ཀིཾ ནོ ཨིམིནཱ’’ཏི མཧཱཔུརིསཾ པཧཱཡ ཨཏྟནོ ཨཏྟནོ པཏྟཙཱིཝརཾ གཧེཏྭཱ ཨཊྛཱརསཡོཛནམགྒཾ གནྟྭཱ ཨིསིཔཏནཾ པཝིསིཾསུ.

ཏེན ཁོ པན སམཡེན ཨུརུཝེལཱཡཾ སེནཱནིགམེ སེནཱནིཀུཊུམྦིཀསྶ གེཧེ ནིབྦཏྟཱ སུཛཱཏཱ ནཱམ དཱརིཀཱ ཝཡཔྤཏྟཱ ཨེཀསྨིཾ ནིགྲོདྷརུཀྑེ པཏྠནཾ ཨཀཱསི ‘‘སཙེ སམཛཱཏིཀཾ ཀུལགྷརཾ གནྟྭཱ པཋམགབྦྷེ པུཏྟཾ ལབྷིསྶཱམི, ཨནུསཾཝཙྪརཾ ཏེ སཏསཧསྶཔརིཙྩཱགེན བལིཀམྨཾ ཀརིསྶཱམཱི’’ཏི. ཏསྶཱ སཱ པཏྠནཱ སམིཛ྄ཛྷི. སཱ མཧཱསཏྟསྶ དུཀྐརཀཱརིཀཾ ཀརོནྟསྶ ཚཊྛེ ཝསྶེ པརིཔུཎྞེ ཝིསཱཁཔུཎྞམཱཡཾ བལིཀམྨཾ ཀཱཏུཀཱམཱ ཧུཏྭཱ པུརེཏརཾ དྷེནུསཧསྶཾ ལཊྛིམདྷུཀཝནེ ཙརཱཔེཏྭཱ ཏཱསཾ ཁཱིརཾ པཉྩ དྷེནུསཏཱནི པཱཡེཏྭཱ ཏཱསཾ ཁཱིརཾ ཨཌྜྷཏིཡཱནཱིཏི ཨེཝཾ ཡཱཝ སོལ༹སནྣཾ དྷེནཱུནཾ ཁཱིརཾ ཨཊྛ དྷེནུཡོ པིཝནྟི, ཏཱཝ ཁཱིརསྶ བཧལཏཉྩ མདྷུརཏཉྩ ཨོཛཝནྟཏཉྩ པཏྠཡམཱནཱ ཁཱིརཔརིཝཏྟནཾ ནཱམ ཨཀཱསི. སཱ ཝིསཱཁཔུཎྞམདིཝསེ ‘‘པཱཏོཝ བལིཀམྨཾ ཀརིསྶཱམཱི’’ཏི རཏྟིཡཱ པཙྩཱུསསམཡཾ པཙྩུཊྛཱཡ ཏཱ ཨཊྛ དྷེནུཡོ དུཧཱཔེསི. ཝཙྪཀཱ ¶ ¶ དྷེནཱུནཾ ཐནམཱུལཾ ནཱགམིཾསུ, ཐནམཱུལེ པན ནཝབྷཱཛནེ ཨུཔནཱིཏམཏྟེ ཨཏྟནོ དྷམྨཏཱཡ ཁཱིརདྷཱརཱ པཝཏྟིཾསུ. ཏཾ ཨཙྪརིཡཾ དིསྭཱ སུཛཱཏཱ སཧཏྠེནེཝ ཁཱིརཾ གཧེཏྭཱ ནཝབྷཱཛནེ པཀྑིཔིཏྭཱ སཧཏྠེནེཝ ཨགྒིཾ ཀཏྭཱ པཙིཏུཾ ཨཱརབྷི.

ཏསྨིཾ པཱཡཱསེ པཙྩམཱནེ མཧནྟམཧནྟཱ བུབྦུལཱ༹ ཨུཊྛཧིཏྭཱ དཀྑིཎཱཝཏྟཱ ཧུཏྭཱ སཉྩརནྟི, ཨེཀཕུསིཏམྤི བཧི ན པཏཏི, ཨུདྡྷནཏོ ཨཔྤམཏྟཀོཔི དྷཱུམོ ན ཨུཊྛཧཏི. ཏསྨིཾ སམཡེ ཙཏྟཱརོ ལོཀཔཱལཱ ཨཱགནྟྭཱ ཨུདྡྷནེ ཨཱརཀྑཾ གཎྷིཾསུ, མཧཱབྲཧྨཱ ཚཏྟཾ དྷཱརེསི, སཀྐོ ཨལཱཏཱནི སམཱནེནྟོ ཨགྒིཾ ཛཱལེསི. དེཝཏཱ དྭིསཧསྶདཱིཔཔརིཝཱརེསུ ཙཏཱུསུ མཧཱདཱིཔེསུ དེཝཱནཉྩ མནུསྶཱནཉྩ ཨུཔཀཔྤནཨོཛཾ ཨཏྟནོ དེཝཱནུབྷཱཝེན དཎྜཀབདྡྷཾ མདྷུཔཊལཾ པཱིལེ༹ཏྭཱ མདྷུཾ གཎྷམཱནཱ ཝིཡ སཾཧརིཏྭཱ ཏཏྠ པཀྑིཔིཾསུ. ཨཉྙེསུ ཧི ཀཱལེསུ དེཝཏཱ ཀབལེ༹ ཀབལེ༹ ཨོཛཾ པཀྑིཔནྟི, སམྦོདྷིདིཝསེ ཙ པན པརིནིབྦཱནདིཝསེ ཙ ཨུཀྑལིཡཾཡེཝ པཀྑིཔནྟི. སུཛཱཏཱ ཨེཀདིཝསེཡེཝ ¶ ཏཏྠ ཨཏྟནོ པཱཀཊཱནི ཨནེཀཱནི ཨཙྪརིཡཱནི དིསྭཱ པུཎྞཾ དཱསིཾ ཨཱམནྟེསི ‘‘ཨམྨ པུཎྞེ, ཨཛྫ ཨམྷཱཀཾ དེཝཏཱ ཨཏིཝིཡ པསནྣཱ, མཡཱ ཨེཏྟཀེ ཀཱལེ ཨེཝརཱུཔཾ ཨཙྪརིཡཾ ནཱམ ན དིཊྛཔུབྦཾ, ཝེགེན གནྟྭཱ དེཝཊྛཱནཾ པཊིཛགྒཱཧཱི’’ཏི. སཱ ‘‘སཱདྷུ, ཨཡྻེ’’ཏི ཏསྶཱ ཝཙནཾ སམྤཊིཙྪིཏྭཱ ཏུརིཏཏུརིཏཱ རུཀྑམཱུལཾ ཨགམཱསི.

བོདྷིསཏྟོཔི ཁོ ཏསྨིཾ རཏྟིབྷཱགེ པཉྩ མཧཱསུཔིནེ དིསྭཱ པརིགྒཎྷནྟོ ‘‘ནིསྶཾསཡེནཱཧཾ ཨཛྫ བུདྡྷོ བྷཝིསྶཱམཱི’’ཏི ཀཏསནྣིཊྛཱནོ ཏསྶཱ རཏྟིཡཱ ཨཙྩཡེན ཀཏསརཱིརཔཊིཛགྒནོ བྷིཀྑཱཙཱརཀཱལཾ ཨཱགམཡམཱནོ པཱཏོཝ ཨཱགནྟྭཱ ཏསྨིཾ རུཀྑམཱུལེ ནིསཱིདི ཨཏྟནོ པབྷཱཡ སཀལརུཀྑཾ ཨོབྷཱསཡམཱནོ. ཨཐ ཁོ སཱ པུཎྞཱ ཨཱགནྟྭཱ ཨདྡས བོདྷིསཏྟཾ རུཀྑམཱུལེ པཱཙཱིནལོཀདྷཱཏུཾ ཨོལོཀཡམཱནཾ ནིསིནྣཾ, སརཱིརཏོ ཙསྶ ནིཀྑནྟཱཧི པབྷཱཧི སཀལརུཀྑཾ སུཝཎྞཝཎྞཾ. དིསྭཱ ཏསྶཱ ཨེཏདཧོསི – ‘‘ཨཛྫ ཨམྷཱཀཾ དེཝཏཱ རུཀྑཏོ ཨོརུཡ྄ཧ སཧཏྠེནེཝ བལིཀམྨཾ སམྤཊིཙྪིཏུཾ ནིསིནྣཱ མཉྙེ’’ཏི ཨུབྦེགཔྤཏྟཱ ཧུཏྭཱ ཝེགེནཱགནྟྭཱ སུཛཱཏཱཡ ཨེཏམཏྠཾ ཨཱརོཙེསི.

སུཛཱཏཱ ¶ ཏསྶཱ ཝཙནཾ སུཏྭཱ ཏུཊྛམཱནསཱ ཧུཏྭཱ ‘‘ཨཛྫ དཱནི པཊྛཱཡ མམ ཛེཊྛདྷཱིཏུཊྛཱནེ ཏིཊྛཱཧཱི’’ཏི དྷཱིཏུ ཨནུཙྪཝིཀཾ སབྦཱལངྐཱརཾ ཨདཱསི. ཡསྨཱ པན བུདྡྷབྷཱཝཾ པཱཔུཎནདིཝསེ སཏསཧསྶགྒྷནིཀཾ སུཝཎྞཔཱཏིཾ ལདྡྷུཾ ཝཊྚཏི, ཏསྨཱ སཱ ‘‘སུཝཎྞཔཱཏིཡཾ པཱཡཱསཾ པཀྑིཔིསྶཱམཱི’’ཏི ཙིཏྟཾ ཨུཔྤཱདེཏྭཱ སཏསཧསྶགྒྷནིཀཾ སུཝཎྞཔཱཏིཾ ནཱིཧརཱཔེཏྭཱ ཏཏྠ པཱཡཱསཾ ¶ པཀྑིཔིཏུཀཱམཱ པཀྐབྷཱཛནཾ ཨཱཝཛྫེསི. ‘སབྦོ པཱཡཱསོ པདུམཔཏྟཱ ཨུདཀཾ ཝིཡ ཝིནིཝཏྟིཏྭཱ པཱཏིཡཾ པཏིཊྛཱསི, ཨེཀཔཱཏིཔཱུརམཏྟོཝ ཨཧོསི’. སཱ ཏཾ པཱཏིཾ ཨཉྙཱཡ སུཝཎྞཔཱཏིཡཱ པཊིཀུཛྫིཏྭཱ ཨོདཱཏཝཏྠེན ཝེཋེཏྭཱ སབྦཱལངྐཱརེཧི ཨཏྟབྷཱཝཾ ཨལངྐརིཏྭཱ ཏཾ པཱཏིཾ ཨཏྟནོ སཱིསེ ཋཔེཏྭཱ མཧནྟེན ཨཱནུབྷཱཝེན ནིགྲོདྷརུཀྑམཱུལཾ གནྟྭཱ བོདྷིསཏྟཾ ཨོལོཀེཏྭཱ བལཝསོམནསྶཛཱཏཱ ‘‘རུཀྑདེཝཏཱ’’ཏི སཉྙཱཡ དིཊྛཊྛཱནཏོ པཊྛཱཡ ཨོནཏོནཏཱ གནྟྭཱ སཱིསཏོ པཱཏིཾ ཨོཏཱརེཏྭཱ ཝིཝརིཏྭཱ སུཝཎྞབྷིངྐཱརེན གནྡྷཔུཔྥཝཱསིཏཾ ཨུདཀཾ གཧེཏྭཱ བོདྷིསཏྟཾ ཨུཔགནྟྭཱ ཨཊྛཱསི. གྷཊཱིཀཱརམཧཱབྲཧྨུནཱ དིནྣོ མཏྟིཀཱཔཏྟོ ཨེཏྟཀཾ ཨདྡྷཱནཾ བོདྷིསཏྟཾ ཨཝིཛཧིཏྭཱ ཏསྨིཾ ཁཎེ ཨདསྶནཾ གཏོ, བོདྷིསཏྟོ པཏྟཾ ཨཔསྶནྟོ དཀྑིཎཧཏྠཾ པསཱརེཏྭཱ ཨུདཀཾ སམྤཊིཙྪི. སུཛཱཏཱ སཧེཝ པཱཏིཡཱ པཱཡཱསཾ མཧཱཔུརིསསྶ ཧཏྠེ ཋཔེསི, མཧཱཔུརིསོ སུཛཱཏཾ ཨོལོཀེསི. སཱ ཨཱཀཱརཾ སལླཀྑེཏྭཱ ‘‘ཨཡྻ, མཡཱ ཏུམྷཱཀཾ པརིཙྩཏྟཾ, གཎྷིཏྭཱ ཡཐཱརུཙིཾ གཙྪཐཱ’’ཏི ཝནྡིཏྭཱ ‘‘ཡཐཱ མཡ྄ཧཾ མནོརཐོ ནིཔྥནྣོ ¶ , ཨེཝཾ ཏུམྷཱཀམྤི ནིཔྥཛྫཏཱུ’’ཏི ཝཏྭཱ སཏསཧསྶགྒྷནིཀཱཡ སུཝཎྞཔཱཏིཡཱ པུརཱཎཔཎྞེ ཝིཡ ཨནཔེཀྑཱ ཧུཏྭཱ པཀྐཱམི.

བོདྷིསཏྟོཔི ཁོ ནིསིནྣཊྛཱནཱ ཨུཊྛཱཡ རུཀྑཾ པདཀྑིཎཾ ཀཏྭཱ པཱཏིཾ ཨཱདཱཡ ནེརཉྫརཱཡ ཏཱིརཾ གནྟྭཱ ཨནེཀེསཾ བོདྷིསཏྟསཧསྶཱནཾ ཨབྷིསམྦུཛ྄ཛྷནདིཝསེ ཨོཏརིཏྭཱ ནྷཱནཊྛཱནཾ སུཔྤཏིཊྛིཏཏིཏྠཾ ནཱམ ཨཏྠི, ཏསྶ ཏཱིརེ པཱཏིཾ ཋཔེཏྭཱ ཨོཏརིཏྭཱ ནྷཏྭཱ ཨནེཀབུདྡྷསཏསཧསྶཱནཾ ནིཝཱསནཾ ཨརཧདྡྷཛཾ ནིཝཱསེཏྭཱ པུརཏྠཱབྷིམུཁོ ནིསཱིདིཏྭཱ ཨེཀཊྛིཏཱལཔཀྐཔྤམཱཎེ ཨེཀཱུནཔཉྙཱས པིཎྜེ ཀཏྭཱ སབྦཾ ཨཔྤོདཀཾ མདྷུཔཱཡཱསཾ པརིབྷུཉྫི. སོ ཨེཝ ཧིསྶ བུདྡྷབྷཱུཏསྶ སཏྟསཏྟཱཧཾ བོདྷིམཎྜེ ཝསནྟསྶ ཨེཀཱུནཔཉྙཱས དིཝསཱནི ཨཱཧཱརོ ཨཧོསི. ཨེཏྟཀཾ ཀཱལཾ ¶ ནེཝ ཨཉྙོ ཨཱཧཱརོ ཨཏྠི, ན ནྷཱནཾ, ན མུཁདྷོཝནཾ, ན སརཱིརཝལ༹ཉྫོ, ཛྷཱནསུཁེན མགྒསུཁེན ཕལསུཁེན ཙ ཝཱིཏིནཱམེསི. ཏཾ པན པཱཡཱསཾ པརིབྷུཉྫིཏྭཱ སུཝཎྞཔཱཏིཾ གཧེཏྭཱ ‘‘སཙཱཧཾ, ཨཛྫ བུདྡྷོ བྷཝིཏུཾ སཀྑིསྶཱམི, ཨཡཾ པཱཏི པཊིསོཏཾ གཙྪཏུ, ནོ ཙེ སཀྑིསྶཱམི, ཨནུསོཏཾ གཙྪཏཱུ’’ཏི ཝཏྭཱ ནདཱིསོཏེ པཀྑིཔི. སཱ སོཏཾ ཚིནྡམཱནཱ ནདཱིམཛ྄ཛྷཾ གནྟྭཱ མཛ྄ཛྷམཛ྄ཛྷཊྛཱནེནེཝ ཛཝསམྤནྣོ ཨསྶོ ཝིཡ ཨསཱིཏིཧཏྠམཏྟཊྛཱནཾ པཊིསོཏཾ གནྟྭཱ ཨེཀསྨིཾ ཨཱཝཊྚེ ནིམུཛྫིཏྭཱ ཀཱལ༹ནཱགརཱཛབྷཝནཾ གནྟྭཱ ཏིཎྞཾ བུདྡྷཱནཾ པརིབྷོགཔཱཏིཡོ ‘‘ཀིལི ཀིལཱི’’ཏི རཝཾ ཀཱརཡམཱནཱ པཧརིཏྭཱཝ ཏཱསཾ སབྦཧེཊྛིམཱ ཧུཏྭཱ ཨཊྛཱསི. ཀཱལོ༹ ནཱགརཱཛཱ ཏཾ སདྡཾ སུཏྭཱ ‘‘ཧིཡྻོ ཨེཀོ བུདྡྷོ ནིབྦཏྟོ, པུན ཨཛྫ ཨེཀོ ནིབྦཏྟོ’’ཏི ཝཏྭཱ ཨནེཀེཧི པདསཏེཧི ཐུཏིཡོ ཝདམཱནོ ཨུཊྛཱསི. ཏསྶ ཀིར ¶ མཧཱཔཐཝིཡཱ ཨེཀཡོཛནཏིགཱཝུཏཔྤམཱཎཾ ནབྷཾ པཱུརེཏྭཱ ཨཱརོཧནཀཱལོ ‘‘ཨཛྫ ཝཱ ཧིཡྻོ ཝཱ’’ཏི སདིསོ ཨཧོསི.

བོདྷིསཏྟོཔི ནདཱིཏཱིརམྷི སུཔུཔྥིཏསཱལཝནེ དིཝཱཝིཧཱརཾ ཀཏྭཱ སཱཡནྷསམཡེ པུཔྥཱནཾ ཝཎྚཏོ མུཙྩནཀཱལེ དེཝཏཱཧི ཨལངྐཏེན ཨཊྛཱུསབྷཝིཏྠཱརེན མགྒེན སཱིཧོ ཝིཡ ཝིཛམྦྷམཱནོ བོདྷིརུཀྑཱབྷིམུཁོ པཱཡཱསི. ནཱགཡཀྑསུཔཎྞཱདཡོ དིབྦེཧི གནྡྷཔུཔྥཱདཱིཧི པཱུཛཡིཾསུ, དིབྦསངྒཱིཏཱདཱིནི པཝཏྟཡིཾསུ, དསསཧསྶཱི ལོཀདྷཱཏུ ཨེཀགནྡྷཱ ཨེཀམཱལཱ ཨེཀསཱདྷུཀཱརཱ ཨཧོསི. ཏསྨིཾ སམཡེ སོཏྠིཡོ ནཱམ ཏིཎཧཱརཀོ ཏིཎཾ ཨཱདཱཡ པཊིཔཐེ ཨཱགཙྪནྟོ མཧཱཔུརིསསྶ ཨཱཀཱརཾ ཉཏྭཱ ཨཊྛ ཏིཎམུཊྛིཡོ ཨདཱསི. བོདྷིསཏྟོ ཏིཎཾ གཧེཏྭཱ བོདྷིམཎྜཾ ¶ ཨཱརུཡ྄ཧ དཀྑིཎདིསཱབྷཱགེ ཨུཏྟརཱབྷིམུཁོ ཨཊྛཱསི. ཏསྨིཾ ཁཎེ དཀྑིཎཙཀྐཝཱལ༹ཾ ཨོསཱིདིཏྭཱ ཧེཊྛཱ ཨཝཱིཙིསམྤཏྟཾ ཝིཡ ཨཧོསི, ཨུཏྟརཙཀྐཝཱལ༹ཾ ཨུལླངྒྷིཏྭཱ ཨུཔརི བྷཝགྒཔྤཏྟཾ ཝིཡ ཨཧོསི. བོདྷིསཏྟོ ‘‘ཨིདཾ སམྦོདྷིཾ པཱཔུཎནཊྛཱནཾ ན བྷཝིསྶཏི མཉྙེ’’ཏི པདཀྑིཎཾ ཀརོནྟོ པཙྪིམདིསཱབྷཱགཾ གནྟྭཱ པུརཏྠཱབྷིམུཁོ ཨཊྛཱསི, ཏཏོ པཙྪིམཙཀྐཝཱལ༹ཾ ཨོསཱིདིཏྭཱ ཧེཊྛཱ ཨཝཱིཙིསམྤཏྟཾ ཝིཡ ཨཧོསི, པུརཏྠིམཙཀྐཝཱལ༹ཾ ཨུལླངྒྷིཏྭཱ ཨུཔརི བྷཝགྒཔྤཏྟཾ ཝིཡ ཨཧོསི. ཋིཏཊྛིཏཊྛཱནེ ཀིརསྶ ནེམིཝཊྚིཔརིཡནྟེ ཨཀྐནྟེ ནཱབྷིཡཱ པཏིཊྛིཏམཧཱསཀཊཙཀྐཾ ཝིཡ ¶ མཧཱཔཐཝཱི ཨོནཏུནྣཏཱ ཨཧོསི. བོདྷིསཏྟོ ‘‘ཨིདམྤི སམྦོདྷིཾ པཱཔུཎནཊྛཱནཾ ན བྷཝིསྶཏི མཉྙེ’’ཏི པདཀྑིཎཾ ཀརོནྟོ ཨུཏྟརདིསཱབྷཱགཾ གནྟྭཱ དཀྑིཎཱབྷིམུཁོ ཨཊྛཱསི, ཏཏོ ཨུཏྟརཙཀྐཝཱལ༹ཾ ཨོསཱིདིཏྭཱ ཧེཊྛཱ ཨཝཱིཙིསམྤཏྟཾ ཝིཡ ཨཧོསི, དཀྑིཎཙཀྐཝཱལ༹ཾ ཨུལླངྒྷིཏྭཱ ཨུཔརི བྷཝགྒཔྤཏྟཾ ཝིཡ ཨཧོསི. བོདྷིསཏྟོ ‘‘ཨིདམྤི སམྦོདྷིཾ པཱཔུཎནཊྛཱནཾ ན བྷཝིསྶཏི མཉྙེ’’ཏི པདཀྑིཎཾ ཀརོནྟོ པུརཏྠིམདིསཱབྷཱགཾ གནྟྭཱ པཙྪིམཱབྷིམུཁོ ཨཊྛཱསི. པུརཏྠིམདིསཱབྷཱགེ པན སབྦབུདྡྷཱནཾ པལླངྐཊྛཱནཾ, ཏཾ ནེཝ ཚམྦྷཏི, ན ཀམྤཏི. མཧཱསཏྟོ ‘‘ཨིདཾ སབྦབུདྡྷཱནཾ ཨཝིཛཧིཏཾ ཨཙལཊྛཱནཾ ཀིལེསཔཉྫརཝིདྡྷཾསནཊྛཱན’’ནྟི ཉཏྭཱ ཏཱནི ཏིཎཱནི ཨགྒེ གཧེཏྭཱ ཙཱལེསི, ཏཱཝདེཝ ཙུདྡསཧཏྠོ པལླངྐོ ཨཧོསི. ཏཱནིཔི ཁོ ཏིཎཱནི ཏཐཱརཱུཔེན སཎྛཱནེན སཎྛཧིཾསུ, ཡཐཱརཱུཔཾ སུཀུསལོཔི ཙིཏྟཀཱརོ ཝཱ པོཏྠཀཱརོ ཝཱ ཨཱལིཁིཏུམྤི སམཏྠོ ནཏྠི. བོདྷིསཏྟོ བོདྷིཀྑནྡྷཾ པིཊྛིཏོ ཀཏྭཱ པུརཏྠཱབྷིམུཁོ དལ༹ྷམཱནསོ ཧུཏྭཱ –

‘‘ཀཱམཾ ཏཙོ ཙ ནྷཱརུ ཙ, ཨཊྛི ཙ ཨཝསིསྶཏུ;

ཨུཔསུསྶཏུ ནིསྶེསཾ, སརཱིརེ མཾསལོཧིཏཾ’’.

ན ¶ ཏྭེཝཱཧཾ སམྨཱསམྦོདྷིཾ ཨཔྤཏྭཱ ཨིམཾ པལླངྐཾ བྷིནྡིསྶཱམཱིཏི ཨསནིསཏསནྣིཔཱཏེནཔི ཨབྷེཛྫརཱུཔཾ ཨཔརཱཛིཏཔལླངྐཾ ཨཱབྷུཛིཏྭཱ ནིསཱིདི.

ཏསྨིཾ སམཡེ མཱརོ དེཝཔུཏྟོ ‘‘སིདྡྷཏྠཀུམཱརོ མཡ྄ཧཾ ཝསཾ ཨཏིཀྐམིཏུཀཱམོ, ན དཱནིསྶ ཨཏིཀྐམིཏུཾ དསྶཱམཱི’’ཏི མཱརབལསྶ སནྟིཀཾ གནྟྭཱ ཨེཏམཏྠཾ ཨཱརོཙེཏྭཱ མཱརགྷོསནཾ ནཱམ གྷོསཱཔེཏྭཱ མཱརབལཾ ཨཱདཱཡ ནིཀྑམི. སཱ མཱརསེནཱ མཱརསྶ པུརཏོ དྭཱདསཡོཛནཱ ཧོཏི, དཀྑིཎཏོ ཙ ཝཱམཏོ ཙ དྭཱདསཡོཛནཱ, པཙྪཏོ ཡཱཝ ཙཀྐཝཱལ༹པརིཡནྟཾ ཀཏྭཱ ཋིཏཱ, ཨུདྡྷཾ ནཝཡོཛནུབྦེདྷཱ, ཡསྶཱ ཨུནྣདནྟིཡཱ ཨུནྣཱདསདྡོ ཡོཛནསཧསྶཏོ ¶ པཊྛཱཡ པཐཝིཨུནྡྲིཡནསདྡོ ཝིཡ སུཡྻཏི. ཨཐ མཱརོ དེཝཔུཏྟོ དིཡཌྜྷཡོཛནསཏིཀཾ གིརིམེཁལཾ ནཱམ ཧཏྠིཾ ཨབྷིརུཧིཏྭཱ བཱཧུསཧསྶཾ མཱཔེཏྭཱ ནཱནཱཝུདྷཱནི ཨགྒཧེསི. ཨཝསེསཱཡཔི མཱརཔརིསཱཡ དྭེ ཛནཱ ཨེཀསདིསཾ ཨཱཝུདྷཾ ན གཎྷིཾསུ, ནཱནཔྤཀཱརཝཎྞཱ ནཱནཔྤཀཱརམུཁཱ ཧུཏྭཱ མཧཱསཏྟཾ ཨཛ྄ཛྷོཏྠརམཱནཱ ཨཱགམིཾསུ.

དསསཧསྶཙཀྐཝཱལ༹དེཝཏཱ ¶ པན མཧཱསཏྟསྶ ཐུཏིཡོ ཝདམཱནཱ ཨཊྛཾསུ. སཀྐོ དེཝརཱཛཱ ཝིཛཡུཏྟརསངྑཾ དྷམམཱནོ ཨཊྛཱསི. སོ ཀིར སངྑོ ཝཱིསཧཏྠསཏིཀོ ཧོཏི. སཀིཾ ཝཱཏཾ གཱཧཱཔེཏྭཱ དྷམནྟོ ཙཏྟཱརོ མཱསེ སདྡཾ ཀརིཏྭཱ ནིསྶདྡོ ཧོཏི. མཧཱཀཱལ༹ནཱགརཱཛཱ ཨཏིརེཀཔདསཏེན ཝཎྞཾ ཝདནྟོ ཨཊྛཱསི, མཧཱབྲཧྨཱ སེཏཙྪཏྟཾ དྷཱརཡམཱནོ ཨཊྛཱསི. མཱརབལེ པན བོདྷིམཎྜཾ ཨུཔསངྐམནྟེ ཏེསཾ ཨེཀོཔི ཋཱཏུཾ ནཱསཀྑི, སམྨུཁསམྨུཁཊྛཱནེནེཝ པལཱཡིཾསུ. ཀཱལོ༹ ནཱགརཱཛཱ པཐཝིཡཾ ནིམུཛྫིཏྭཱ པཉྩཡོཛནསཏིཀཾ མཉྫེརིཀནཱགབྷཝནཾ གནྟྭཱ ཨུབྷོཧི ཧཏྠེཧི མུཁཾ པིདཧིཏྭཱ ནིཔནྣོ. སཀྐོ ཝིཛཡུཏྟརསངྑཾ པིཊྛིཡཾ ཀཏྭཱ ཙཀྐཝཱལ༹མུཁཝཊྚིཡཾ ཨཊྛཱསི. མཧཱབྲཧྨཱ སེཏཙྪཏྟཾ ཙཀྐཝཱལ༹ཀོཊིཡཾ ཋཔེཏྭཱ བྲཧྨལོཀམེཝ ཨགམཱསི. ཨེཀཱ དེཝཏཱཔི ཋཱཏུཾ སམཏྠཱ ནཱཧོསི, མཧཱཔུརིསོ ཨེཀཀོཝ ནིསཱིདི.

མཱརོཔི ཨཏྟནོ པརིསཾ ཨཱཧ ‘‘ཏཱཏཱ སུདྡྷོདནཔུཏྟེན སིདྡྷཏྠེན སདིསོ ཨཉྙོ པུརིསོ ནཱམ ནཏྠི, མཡཾ སམྨུཁཱ ཡུདྡྷཾ དཱཏུཾ ན སཀྑིསྶཱམ, པཙྪཱབྷཱགེན དསྶཱམཱ’’ཏི. མཧཱཔུརིསོཔི ཏཱིཎི པསྶཱནི ཨོལོཀེཏྭཱ སབྦདེཝཏཱནཾ པལཱཏཏྟཱ སུཉྙཱནི ཨདྡས. པུན ཨུཏྟརཔསྶེན མཱརབལཾ ཨཛ྄ཛྷོཏྠརམཱནཾ དིསྭཱ ‘‘ཨཡཾ ཨེཏྟཀོ ཛནོ མཾ ཨེཀཀཾ སནྡྷཱཡ མཧནྟཾ ཝཱཡཱམཾ པརཀྐམཾ ཀརོཏི, ཨིམསྨིཾ ཋཱནེ མཡ྄ཧཾ མཱཏཱ ཝཱ པིཏཱ ཝཱ བྷཱཏཱ ཝཱ ཨཉྙོ ཝཱ ཀོཙི ཉཱཏཀོ ནཏྠི, ཨིམཱ པན དས པཱརམིཡོཝ མཡ྄ཧཾ དཱིགྷརཏྟཾ པུཊྛཔརིཛནསདིསཱ, ཏསྨཱ པཱརམིཡོཝ ¶ ཕལཀཾ ཀཏྭཱ པཱརམིསཏྠེནེཝ པཧརིཏྭཱ ཨཡཾ བལཀཱཡོ མཡཱ ཝིདྡྷཾསེཏུཾ ཝཊྚཏཱི’’ཏི དས པཱརམིཡོ ཨཱཝཛྫམཱནོ ནིསཱིདི.

ཨཐ ཁོ མཱརོ དེཝཔུཏྟོ ‘‘ཨེཏེནེཝ སིདྡྷཏྠཾ པལཱཔེསྶཱམཱི’’ཏི ཝཱཏམཎྜལཾ སམུཊྛཱཔེསི. ཏངྑཎཾཡེཝ པུརཏྠིམཱདིབྷེདཱ ཝཱཏཱ སམུཊྛཧིཏྭཱ ཨཌྜྷཡོཛནཨེཀཡོཛནདྭིཡོཛནཏིཡོཛནཔྤམཱཎཱནི ¶ པབྦཏཀཱུཊཱནི པདཱལེཏྭཱ ཝནགཙྪརུཀྑཱདཱིནི ཨུམྨཱུལེཏྭཱ སམནྟཱ གཱམནིགམེ ཙུཎྞཝིཙུཎྞཾ ཀཱཏུཾ སམཏྠཱཔི མཧཱཔུརིསསྶ པུཉྙཏེཛེན ཝིཧཏཱནུབྷཱཝཱ བོདྷིསཏྟཾ པཏྭཱ ཙཱིཝརཀཎྞམཏྟམྤི ཙཱལེཏུཾ ནཱསཀྑིཾསུ. ཏཏོ ‘‘ཨུདཀེན ན ཨཛ྄ཛྷོཏྠརིཏྭཱ མཱརེསྶཱམཱི’’ཏི མཧཱཝསྶཾ ¶ སམུཊྛཱཔེསི. ཏསྶཱནུབྷཱཝེན ཨུཔརཱུཔརི སཏཔཊལསཧསྶཔཊལཱདིབྷེདཱ ཝལཱཧཀཱ ཨུཊྛཧིཏྭཱ ཝསྶིཾསུ. ཝུཊྛིདྷཱརཱཝེགེན པཐཝཱི ཚིདྡཱ ཨཧོསི. ཝནརུཀྑཱདཱིནཾ ཨུཔརིབྷཱགེན མཧཱམེགྷོ ཨཱགནྟྭཱ མཧཱསཏྟསྶ ཙཱིཝརེ ཨུསྶཱཝབིནྡུཊྛཱནམཏྟམྤི ཏེམེཏུཾ ནཱསཀྑི. ཏཏོ པཱསཱཎཝསྶཾ སམུཊྛཱཔེསི. མཧནྟཱནི མཧནྟཱནི པབྦཏཀཱུཊཱནི དྷཱུམཱཡནྟཱནི པཛྫལནྟཱནི ཨཱཀཱསེནཱགནྟྭཱ བོདྷིསཏྟཾ པཏྭཱ དིབྦམཱལཱགུལ༹བྷཱཝཾ ཨཱཔཛྫིཾསུ. ཏཏོ པཧརཎཝསྶཾ སམུཊྛཱཔེསི. ཨེཀཏོདྷཱརཱཨུབྷཏོདྷཱརཱཨསིསཏྟིཁུརཔྤཱདཡོ དྷཱུམཱཡནྟཱ པཛྫལནྟཱ ཨཱཀཱསེནཱགནྟྭཱ བོདྷིསཏྟཾ པཏྭཱ དིབྦཔུཔྥཱནི ཨཧེསུཾ. ཏཏོ ཨངྒཱརཝསྶཾ སམུཊྛཱཔེསི. ཀིཾསུཀཝཎྞཱ ཨངྒཱརཱ ཨཱཀཱསེནཱགནྟྭཱ བོདྷིསཏྟསྶ པཱདམཱུལེ དིབྦཔུཔྥཱནི ཧུཏྭཱ ཝིཀིརིཾསུ. ཏཏོ ཀུཀྐུལ༹ཝསྶཾ སམུཊྛཱཔེསི. ཨཙྩུཎྷོ ཨགྒིཝཎྞོ ཀུཀྐུལོ༹ ཨཱཀཱསེནཱགནྟྭཱ བོདྷིསཏྟསྶ པཱདམཱུལེ དིབྦཙནྡནཙུཎྞཾ ཧུཏྭཱ ནིཔཏི. ཏཏོ ཝཱལུཀཱཝསྶཾ སམུཊྛཱཔེསི. ཨཏིསུཁུམཝཱལུཀཱ དྷཱུམཱཡནྟཱ པཛྫལནྟཱ ཨཱཀཱསེནཱགནྟྭཱ བོདྷིསཏྟསྶ པཱདམཱུལེ དིབྦཔུཔྥཱནི ཧུཏྭཱ ནིཔཏིཾསུ. ཏཏོ ཀལལཝསྶཾ སམུཊྛཱཔེསི. ཏཾ ཀལལཾ དྷཱུམཱཡནྟཾ པཛྫལནྟཾ ཨཱཀཱསེནཱགནྟྭཱ བོདྷིསཏྟསྶ པཱདམཱུལེ དིབྦཝིལེཔནཾ ཧུཏྭཱ ནིཔཏི. ཏཏོ ‘‘ཨིམིནཱ བྷིཾསེཏྭཱ སིདྡྷཏྠཾ པལཱཔེསྶཱམཱི’’ཏི ཨནྡྷཀཱརཾ སམུཊྛཱཔེསི. ཏཾ ཙཏུརངྒསམནྣཱགཏཾ ཝིཡ མཧཱཏམཾ ཧུཏྭཱ བོདྷིསཏྟཾ པཏྭཱ སཱུརིཡཔྤབྷཱཝིཧཏཾ ཝིཡ ཨནྡྷཀཱརཾ ཨནྟརདྷཱཡི.

ཨེཝཾ མཱརོ ཨིམཱཧི ནཝཧི ཝཱཏཝསྶཔཱསཱཎཔཧརཎཨངྒཱརཀུཀྐུལ༹ཝཱལུཀཱཀལལཨནྡྷཀཱརཝུཊྛཱིཧི བོདྷིསཏྟཾ པལཱཔེཏུཾ ཨསཀྐོནྟོ ‘‘ཀིཾ བྷཎེ, ཏིཊྛཐ, ཨིམཾ སིདྡྷཏྠཀུམཱརཾ གཎྷཐ ཧནཐ པལཱཔེཐཱ’’ཏི པརིསཾ ཨཱཎཱཔེཏྭཱ སཡམྤི གིརིམེཁལསྶ ཧཏྠིནོ ཁནྡྷེ ནིསིནྣོ ཙཀྐཱཝུདྷཾ ཨཱདཱཡ བོདྷིསཏྟཾ ཨུཔསངྐམིཏྭཱ ‘‘སིདྡྷཏྠ ཨུཊྛཱཧི ཨེཏསྨཱ པལླངྐཱ, ནཱཡཾ ཏུཡ྄ཧཾ པཱཔུཎཱཏི, མཡ྄ཧཾ ཨེཝ པཱཔུཎཱཏཱི’’ཏི ཨཱཧ. མཧཱསཏྟོ ཏསྶ ཝཙནཾ སུཏྭཱ ཨཝོཙ – ‘‘མཱར, ནེཝ ཏཡཱ དས པཱརམིཡོ པཱུརིཏཱ, ན ཨུཔཔཱརམིཡོ, ན པརམཏྠཔཱརམིཡོ, ནཱཔི པཉྩ མཧཱཔརིཙྩཱགཱ པརིཙྩཏྟཱ ¶ , ན ཉཱཏཏྠཙརིཡཱ, ན ལོཀཏྠཙརིཡཱ, ན བུདྡྷིཙརིཡཱ པཱུརིཏཱ, སབྦཱ ¶ ཏཱ མཡཱཡེཝ པཱུརིཏཱ, ཏསྨཱ ནཱཡཾ པལླངྐོ ཏུཡ྄ཧཾ པཱཔུཎཱཏི ¶ , མཡ྄ཧེཝེསོ པཱཔུཎཱཏཱི’’ཏི.

མཱརོ ཀུདྡྷོ ཀོདྷཝེགཾ ཨསཧནྟོ མཧཱཔུརིསསྶ ཙཀྐཱཝུདྷཾ ཝིསྶཛྫེསི. ཏཾ ཏསྶ དས པཱརམིཡོ ཨཱཝཛྫེནྟསྶ ཨུཔརིབྷཱགེ མཱལཱཝིཏཱནཾ ཧུཏྭཱ ཨཊྛཱསི. ཏཾ ཀིར ཁུརདྷཱརཙཀྐཱཝུདྷཾ ཨཉྙདཱ ཏེན ཀུདྡྷེན ཝིསྶཊྛཾ ཨེཀགྷནཔཱསཱཎཏྠམྦྷེ ཝཾསཀལཱི༹རེ ཝིཡ ཚིནྡནྟཾ གཙྪཏི, ཨིདཱནི པན ཏསྨིཾ མཱལཱཝིཏཱནཾ ཧུཏྭཱ ཋིཏེ ཨཝསེསཱ མཱརཔརིསཱ ‘‘ཨིདཱནི པལླངྐཏོ ཝུཊྛཱཡ པལཱཡིསྶཏཱི’’ཏི མཧནྟམཧནྟཱནི སེལཀཱུཊཱནི ཝིསྶཛྫེསུཾ. ཏཱནིཔི མཧཱཔུརིསསྶ དས པཱརམིཡོ ཨཱཝཛྫེནྟསྶ མཱལཱགུལ༹བྷཱཝཾ ཨཱཔཛྫིཏྭཱ བྷཱུམིཡཾ པཏིཾསུ. དེཝཏཱ ཙཀྐཝཱལ༹མུཁཝཊྚིཡཾ ཋིཏཱ གཱིཝཾ པསཱརེཏྭཱ སཱིསཾ ཨུཀྑིཔིཏྭཱ ‘‘ནཊྛོ ཝཏ སོ སིདྡྷཏྠཀུམཱརསྶ རཱུཔགྒཔྤཏྟོ ཨཏྟབྷཱཝོ, ཀིཾ ནུ ཁོ ཀརིསྶཏཱི’’ཏི ཨོལོཀེནྟི.

ཏཏོ མཧཱཔུརིསོ ‘‘པཱུརིཏཔཱརམཱིནཾ བོདྷིསཏྟཱནཾ ཨབྷིསམྦུཛ྄ཛྷནདིཝསེ པཏྟཔལླངྐོ མཡ྄ཧཾཝ པཱཔུཎཱཏཱི’’ཏི ཝཏྭཱ ཋིཏཾ མཱརཾ ཨཱཧ – ‘‘མཱར ཏུཡ྄ཧཾ དཱནསྶ དིནྣབྷཱཝེ ཀོ སཀྑཱི’’ཏི. མཱརོ ‘‘ཨིམེ ཨེཏྟཀཱ ཛནཱ སཀྑིནོ’’ཏི མཱརབལཱབྷིམུཁཾ ཧཏྠཾ པསཱརེསི. ཏསྨིཾ ཁཎེ མཱརཔརིསཱཡ ‘‘ཨཧཾ སཀྑཱི, ཨཧཾ སཀྑཱི’’ཏི པཝཏྟསདྡོ པཐཝིཨུནྡྲིཡནསདྡསདིསོ ཨཧོསི. ཨཐ མཱརོ མཧཱཔུརིསཾ ཨཱཧ ‘‘སིདྡྷཏྠ, ཏུཡ྄ཧཾ དཱནསྶ དིནྣབྷཱཝེ ཀོ སཀྑཱི’’ཏི. མཧཱཔུརིསོ ‘‘ཏུཡ྄ཧཾ ཏཱཝ དཱནསྶ དིནྣབྷཱཝེ སཙེཏནཱ སཀྑིནོ, མཡ྄ཧཾ པན ཨིམསྨིཾ ཋཱནེ སཙེཏནོ ཀོཙི སཀྑཱི ནཱམ ནཏྠི, ཏིཊྛཏུ ཏཱཝ མེ ཨཝསེསཏྟབྷཱཝེསུ དིནྣདཱནཾ, ཝེསྶནྟརཏྟབྷཱཝེ པན ཋཏྭཱ མཡ྄ཧཾ སཏྟསཏཀམཧཱདཱནསྶ དིནྣབྷཱཝེ ཨཡཾ ཨཙེཏནཱཔི གྷནམཧཱཔཐཝཱི སཀྑཱི’’ཏི ཙཱིཝརགབྦྷནྟརཏོ དཀྑིཎཧཏྠཾ ཨབྷིནཱིཧརིཏྭཱ ‘‘ཝེསྶནྟརཏྟབྷཱཝེ ཋཏྭཱ མཡ྄ཧཾ སཏྟསཏཀམཧཱདཱནསྶ དིནྣབྷཱཝེ ཏྭཾ སཀྑཱི ན སཀྑཱི’’ཏི མཧཱཔཐཝིཨབྷིམུཁཾ ཧཏྠཾ པསཱརེསི. མཧཱཔཐཝཱི ‘‘ཨཧཾ ཏེ ཏདཱ སཀྑཱི’’ཏི ཝིརཝསཏེན ཝིརཝསཧསྶེན ཝིརཝསཏསཧསྶེན མཱརབལཾ ཨཝཏྠརམཱནཱ ཝིཡ ཨུནྣདི.

ཏཏོ ¶ མཧཱཔུརིསེ ‘‘དིནྣཾ ཏེ སིདྡྷཏྠ མཧཱདཱནཾ ཨུཏྟམདཱན’’ནྟི ཝེསྶནྟརདཱནཾ སམྨསནྟེ དིཡཌྜྷཡོཛནསཏིཀོ གིརིམེཁལཧཏྠཱི ཛཎྞུཀེཧི པཐཝིཡཾ པཏིཊྛཱསི, མཱརཔརིསཱ དིསཱཝིདིསཱ པལཱཡི, དྭེ ཨེཀམགྒེན གཏཱ ནཱམ ནཏྠི, སཱིསཱབྷརཎཱནི ཙེཝ ནིཝཏྠཝཏྠཱནི ཙ པཧཱཡ སམྨུཁསམྨུཁདིསཱཧིཡེཝ པལཱཡིཾསུ. ཏཏོ དེཝསངྒྷཱ པལཱཡམཱནཾ མཱརབལཾ དིསྭཱ ‘‘མཱརསྶ ¶ པརཱཛཡོ ཛཱཏོ, སིདྡྷཏྠཀུམཱརསྶ ཛཡོ, ཛཡཔཱུཛཾ ཀརིསྶཱམཱ’’ཏི ནཱགཱ ནཱགཱནཾ, སུཔཎྞཱ སུཔཎྞཱནཾ ¶ , དེཝཏཱ དེཝཏཱནཾ, བྲཧྨཱནོ བྲཧྨཱནཾ, ཨུགྒྷོསེཏྭཱ གནྡྷམཱལཱདིཧཏྠཱ མཧཱཔུརིསསྶ སནྟིཀཾ བོདྷིཔལླངྐཾ ཨགམཾསུ.

ཨེཝཾ གཏེསུ ཙ པན ཏེསུ –

‘‘ཛཡོ ཧི བུདྡྷསྶ སིརཱིམཏོ ཨཡཾ, མཱརསྶ ཙ པཱཔིམཏོ པརཱཛཡོ;

ཨུགྒྷོསཡུཾ བོདྷིམཎྜེ པམོདིཏཱ, ཛཡཾ ཏདཱ ནཱགགཎཱ མཧེསིནོ.

‘‘ཛཡོ ཧི བུདྡྷསྶ སིརཱིམཏོ ཨཡཾ, མཱརསྶ ཙ པཱཔིམཏོ པརཱཛཡོ;

ཨུགྒྷོསཡུཾ བོདྷིམཎྜེ པམོདིཏཱ, སུཔཎྞསངྒྷཱཔི ཛཡཾ མཧེསིནོ.

‘‘ཛཡོ ཧི བུདྡྷསྶ སིརཱིམཏོ ཨཡཾ, མཱརསྶ ཙ པཱཔིམཏོ པརཱཛཡོ;

ཨུགྒྷོསཡུཾ བོདྷིམཎྜེ པམོདིཏཱ, ཛཡཾ ཏདཱ དེཝགཎཱ མཧེསིནོ.

‘‘ཛཡོ ཧི བུདྡྷསྶ སིརཱིམཏོ ཨཡཾ, མཱརསྶ ཙ པཱཔིམཏོ པརཱཛཡོ;

ཨུགྒྷོསཡུཾ བོདྷིམཎྜེ པམོདིཏཱ, ཛཡཾ ཏདཱ བྲཧྨགཎཱཔི ཏཱདིནོ’’ཏི.

ཨཝསེསཱ དསསུ ཙཀྐཝཱལ༹སཧསྶེསུ དེཝཏཱ མཱལཱགནྡྷཝིལེཔནེཧི ཙ པཱུཛཡམཱནཱ ནཱནཔྤཀཱརཱ ཐུཏིཡོ ཙ ཝདམཱནཱ ཨཊྛཾསུ. ཨེཝཾ ཨནཏྠངྒཏེཡེཝ ¶ སཱུརིཡེ མཧཱཔུརིསོ མཱརབལཾ ཝིདྷམེཏྭཱ ཙཱིཝརཱུཔརི པཏམཱནེཧི བོདྷིརུཀྑངྐུརེཧི རཏྟཔཝཱལ༹པལླཝེཧི ཝིཡ པཱུཛིཡམཱནོ པཋམཡཱམེ པུབྦེནིཝཱསཉཱཎཾ ཨནུསྶརིཏྭཱ, མཛ྄ཛྷིམཡཱམེ དིབྦཙཀྑུཾ ཝིསོདྷེཏྭཱ, པཙྪིམཡཱམེ པཊིཙྩསམུཔྤཱདེ ཉཱཎཾ ཨོཏཱརེསི. ཨཐསྶ དྭཱདསཔདིཀཾ པཙྩཡཱཀཱརཾ ཝཊྚཝིཝཊྚཝསེན ཨནུལོམཔཊིལོམཏོ སམྨསནྟསྶ དསསཧསྶཱི ལོཀདྷཱཏུ ཨུདཀཔརིཡནྟཾ ཀཏྭཱ དྭཱདསཀྑཏྟུཾ སམྤཀམྤི.

མཧཱཔུརིསེ པན དསསཧསྶིལོཀདྷཱཏུཾ ཨུནྣཱདེཏྭཱ ཨརུཎུགྒམནཝེལཱཡ སབྦཉྙུཏཉྙཱཎཾ པཊིཝིཛ྄ཛྷནྟེ ¶ སཀལདསསཧསྶཱི ལོཀདྷཱཏུ ཨལངྐཏཔཊིཡཏྟཱ ཨཧོསི. པཱཙཱིནཙཀྐཝཱལ༹མུཁཝཊྚིཡཾ ཨུསྶཱཔིཏཱནཾ དྷཛཱནཾ པཊཱཀཱནཾ རཾསིཡོ པཙྪིམཙཀྐཝཱལ༹མུཁཝཊྚིཡཾ པཧརནྟི, ཏཐཱ པཙྪིམཙཀྐཝཱལ༹མུཁཝཊྚིཡཾ ཨུསྶཱཔིཏཱནཾ པཱཙཱིནཙཀྐཝཱལ༹མུཁཝཊྚིཡཾ, དཀྑིཎཙཀྐཝཱལ༹མུཁཝཊྚིཡཾ ཨུསྶཱཔིཏཱནཾ ཨུཏྟརཙཀྐཝཱལ༹མུཁཝཊྚིཡཾ, ཨུཏྟརཙཀྐཝཱལ༹མུཁཝཊྚིཡཾ ཨུསྶཱཔིཏཱནཾ ¶ དཀྑིཎཙཀྐཝཱལ༹མུཁཝཊྚིཡཾ པཧརནྟི, པཐཝིཏལེ ཨུསྶཱཔིཏཱནཾ པན དྷཛཱནཾ པཊཱཀཱནཾ བྲཧྨལོཀཾ ཨཱཧཙྩ ཨཊྛཾསུ, བྲཧྨལོཀེ བདྡྷཱནཾ པཐཝིཏལེ པཏིཊྛཧིཾསུ, དསསཧསྶཙཀྐཝཱལེ༹སུ པུཔྥཱུཔགརུཀྑཱ པུཔྥཾ གཎྷིཾསུ, ཕལཱུཔགརུཀྑཱ ཕལཔིཎྜཱིབྷཱརབྷརིཏཱ ཨཧེསུཾ. ཁནྡྷེསུ ཁནྡྷཔདུམཱནི པུཔྥིཾསུ, སཱཁཱསུ སཱཁཱཔདུམཱནི, ལཏཱསུ ལཏཱཔདུམཱནི, ཨཱཀཱསེ ཨོལམྦཀཔདུམཱནི, སིལཱཏལཱནི བྷིནྡིཏྭཱ ཨུཔརཱུཔརི སཏྟ སཏྟ ཧུཏྭཱ དཎྜཀཔདུམཱནི ཨུཊྛཧིཾསུ. དསསཧསྶཱི ལོཀདྷཱཏུ ཝཊྚེཏྭཱ ཝིསྶཊྛམཱལཱགུལཱ༹ ཝིཡ སུསནྠཏཔུཔྥསནྠཱརོ ཝིཡ ཙ ཨཧོསི. ཙཀྐཝཱལ༹ནྟརེསུ ཨཊྛཡོཛནསཧསྶལོཀནྟརིཀཱ སཏྟསཱུརིཡཔྤབྷཱཡཔི ཨནོབྷཱསིཏཔུབྦཱ ཨེཀོབྷཱསཱ ཨཧེསུཾ, ཙཏུརཱསཱིཏིཡོཛནསཧསྶགམྦྷཱིརོ མཧཱསམུདྡོ མདྷུརོདཀོ ཨཧོསི, ནདིཡོ ནཔྤཝཏྟིཾསུ, ཛཙྩནྡྷཱ རཱུཔཱནི པསྶིཾསུ, ཛཱཏིབདྷིརཱ སདྡཾ སུཎིཾསུ, ཛཱཏིཔཱིཋསཔྤིནོ པདསཱ གཙྪིཾསུ, ཨནྡུབནྡྷནཱདཱིནི ཚིཛྫིཏྭཱ པཏིཾསུ.

ཨེཝཾ ཨཔརིམཱཎེན སིརིཝིབྷཝེན པཱུཛིཡམཱནོ མཧཱཔུརིསོ ཨནེཀཔྤཀཱརེསུ ཨཙྪརིཡདྷམྨེསུ པཱཏུབྷཱུཏེསུ སབྦཉྙུཏཉྙཱཎཾ པཊིཝིཛ྄ཛྷིཏྭཱ སབྦབུདྡྷཱནཾ ཨཝིཛཧིཏཾ ཨུདཱནཾ ཨུདཱནེསི –

‘‘ཨནེཀཛཱཏིསཾསཱརཾ ¶ , སནྡྷཱཝིསྶཾ ཨནིབྦིསཾ;

གཧཀཱརཾ གཝེསནྟོ, དུཀྑཱ ཛཱཏི པུནཔྤུནཾ.

‘‘གཧཀཱརཀ དིཊྛོསི, པུན གེཧཾ ན ཀཱཧསི;

སབྦཱ ཏེ ཕཱསུཀཱ བྷགྒཱ, གཧཀཱུཊཾ ཝིསངྑཏཾ;

ཝིསངྑཱརགཏཾ ཙིཏྟཾ, ཏཎྷཱནཾ ཁཡམཛ྄ཛྷགཱ’’ཏི. (དྷ. པ. ༡༥༣-༡༥༤);

ཨིཏི ¶ ཏུསིཏཔུརཏོ པཊྛཱཡ ཡཱཝ ཨཡཾ བོདྷིམཎྜེ སབྦཉྙུཏཔྤཏྟི, ཨེཏྟཀཾ ཋཱནཾ ཨཝིདཱུརེནིདཱནཾ ནཱམཱཏི ཝེདིཏབྦཾ.

ཨཝིདཱུརེནིདཱནཀཐཱ ནིཊྛིཏཱ.

༣. སནྟིཀེནིདཱནཀཐཱ

‘‘སནྟིཀེནིདཱནཾ ¶ པན ‘བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ. ཝེསཱལིཡཾ ཝིཧརཏི མཧཱཝནེ ཀཱུཊཱགཱརསཱལཱཡ’ནྟི ཨེཝཾ ཏེསུ ཏེསུ ཋཱནེསུ ཝིཧརཏོ ཏསྨིཾ ཏསྨིཾ ཋཱནེཡེཝ ལབྦྷཏཱི’’ཏི ཝུཏྟཾ. ཀིཉྩཱཔི ཨེཝཾ ཝུཏྟཾ, ཨཐ ཁོ པན ཏམྤི ཨཱདིཏོ པཊྛཱཡ ཨེཝཾ ཝེདིཏབྦཾ – ཨུདཱནཾ ཨུདཱནེཏྭཱ ཛཡཔལླངྐེ ནིསིནྣསྶ ཧི བྷགཝཏོ ཨེཏདཧོསི ‘‘ཨཧཾ ཀཔྤསཏསཧསྶཱདྷིཀཱནི ཙཏྟཱརི ཨསངྑྱེཡྻཱནི ཨིམསྶ པལླངྐསྶ ཀཱརཎཱ སནྡྷཱཝིཾ, ཨེཏྟཀཾ མེ ཀཱལཾ ཨིམསྶེཝ པལླངྐསྶ ཀཱརཎཱ ཨལངྐཏསཱིསཾ གཱིཝཱཡ ཚིནྡིཏྭཱ དིནྣཾ, སུཨཉྫིཏཱནི ཨཀྑཱིནི ཧདཡམཾསཉྩ ཨུབྦཊྚེཏྭཱ དིནྣཾ, ཛཱལཱིཀུམཱརསདིསཱ པུཏྟཱ ཀཎྷཱཛིནཀུམཱརིསདིསཱ དྷཱིཏརོ མདྡཱིདེཝིསདིསཱ བྷརིཡཱཡོ ཙ པརེསཾ དཱསཏྠཱཡ དིནྣཱ, ཨཡཾ མེ པལླངྐོ ཛཡཔལླངྐོ ཝརཔལླངྐོ ཙ. ཨེཏྠ མེ ནིསིནྣསྶ སངྐཔྤཱ པརིཔུཎྞཱ, ན ཏཱཝ ཨིཏོ ཨུཊྛཧིསྶཱམཱི’’ཏི ཨནེཀཀོཊིསཏསཧསྶཱ སམཱཔཏྟིཡོ སམཱཔཛྫནྟོ སཏྟཱཧཾ ཏཏྠེཝ ནིསཱིདི. ཡཾ སནྡྷཱཡ ཝུཏྟཾ ‘‘ཨཐ ཁོ བྷགཝཱ སཏྟཱཧཾ ཨེཀཔལླངྐེན ནིསཱིདི ཝིམུཏྟིསུཁཔཊིསཾཝེདཱི’’ཏི (ཨུདཱ. ༡; མཧཱཝ. ༡).

ཨཐ ཨེཀཙྩཱནཾ དེཝཏཱནཾ ‘‘ཨཛྫཱཔི ནཱུན སིདྡྷཏྠསྶ ཀཏྟབྦཀིཙྩཾ ཨཏྠི, པལླངྐསྨིཉྷི ཨཱལཡཾ ན ཝིཛཧཏཱི’’ཏི པརིཝིཏཀྐོ ཨུདཔཱདི. སཏྠཱ དེཝཏཱནཾ ¶ པརིཝིཏཀྐཾ ཉཏྭཱ ཏཱསཾ ཝིཏཀྐཝཱུཔསམནཏྠཾ ཝེཧཱསཾ ཨབྦྷུགྒནྟྭཱ ཡམཀཔཱཊིཧཱརིཡཾ དསྶེསི. མཧཱབོདྷིམཎྜསྨིཉྷི ཀཏཔཱཊིཧཱརིཡཉྩ, ཉཱཏིསམཱགམེ ཀཏཔཱཊིཧཱརིཡཉྩ, པཱཐིཀཔུཏྟསམཱགམེ ཀཏཔཱཊིཧཱརིཡཉྩ, སབྦཾ ཀཎྜམྦརུཀྑམཱུལེ ཡམཀཔཱཊིཧཱརིཡསདིསཾ ཨཧོསི.

ཨེཝཾ སཏྠཱ ཨིམིནཱ པཱཊིཧཱརིཡེན དེཝཏཱནཾ ཝིཏཀྐཾ ཝཱུཔསམེཏྭཱ པལླངྐཏོ ཨཱིསཀཾ པཱཙཱིནནིསྶིཏེ ཨུཏྟརདིསཱབྷཱགེ ཋཏྭཱ ‘‘ཨིམསྨིཾ ཝཏ མེ པལླངྐེ སབྦཉྙུཏཉྙཱཎཾ པཊིཝིདྡྷ’’ནྟི ཙཏྟཱརི ཨསངྑྱེཡྻཱནི ཀཔྤསཏསཧསྶཉྩ པཱུརིཏཱནཾ པཱརམཱིནཾ ཕལཱདྷིགམཊྛཱནཾ པལླངྐཾ བོདྷིརུཀྑཉྩ ཨནིམིསེཧི ཨཀྑཱིཧི ཨོལོཀཡམཱནོ སཏྟཱཧཾ ཝཱིཏིནཱམེསི, ཏཾ ཋཱནཾ ཨནིམིསཙེཏིཡཾ ནཱམ ཛཱཏཾ. ཨཐ པལླངྐསྶ ཙ ཋིཏཊྛཱནསྶ ཙ ཨནྟརཱ ཙངྐམཾ མཱཔེཏྭཱ པུརཏྠིམཔཙྪིམཏོ ཨཱཡཏེ རཏནཙངྐམེ ¶ ཙངྐམནྟོ སཏྟཱཧཾ ཝཱིཏིནཱམེསི, ཏཾ ཋཱནཾ རཏནཙངྐམཙེཏིཡཾ ནཱམ ཛཱཏཾ.

ཙཏུཏྠེ པན སཏྟཱཧེ བོདྷིཏོ པཙྪིམུཏྟརདིསཱབྷཱགེ དེཝཏཱ རཏནགྷརཾ མཱཔཡིཾསུ, ཏཏྠ པལླངྐེན ¶ ནིསཱིདིཏྭཱ ཨབྷིདྷམྨཔིཊཀཾ ཝིསེསཏོ ཙེཏྠ ཨནནྟནཡཾ སམནྟཔཊྛཱནཾ ཝིཙིནནྟོ སཏྟཱཧཾ ཝཱིཏིནཱམེསི. ཨཱབྷིདྷམྨིཀཱ པནཱཧུ ‘‘རཏནགྷརཾ ནཱམ ན སཏྟརཏནམཡཾ གེཧཾ, སཏྟནྣཾ པན པཀརཎཱནཾ སམྨསིཏཊྛཱནཾ ‘རཏནགྷར’ནྟི ཝུཙྩཏཱི’’ཏི. ཡསྨཱ པནེཏྠ ཨུབྷོཔེཏེ པརིཡཱཡཱ ཡུཛྫནྟི, ཏསྨཱ ཨུབྷཡམྤེཏཾ གཧེཏབྦམེཝ. ཏཏོ པཊྛཱཡ པན ཏཾ ཋཱནཾ རཏནགྷརཙེཏིཡཾ ནཱམ ཛཱཏཾ. ཨེཝཾ བོདྷིསམཱིཔེཡེཝ ཙཏྟཱརི སཏྟཱཧཱནི ཝཱིཏིནཱམེཏྭཱ པཉྩམེ སཏྟཱཧེ བོདྷིརུཀྑམཱུལཱ ཡེན ཨཛཔཱལནིགྲོདྷོ ཏེནུཔསངྐམི, ཏཏྲཱཔི དྷམྨཾ ཝིཙིནནྟོཡེཝ ཝིམུཏྟིསུཁཾ པཊིསཾཝེདེནྟོ ནིསཱིདི.

ཏསྨིཾ སམཡེ མཱརོ དེཝཔུཏྟོ ‘‘ཨེཏྟཀཾ ཀཱལཾ ཨནུབནྡྷནྟོ ཨོཏཱརཱཔེཀྑོཔི ཨིམསྶ ན ཀིཉྩི ཁལིཏཾ ཨདྡསཾ, ཨཏིཀྐནྟོདཱནི ཨེས མམ ཝས’’ནྟི དོམནསྶཔྤཏྟོ མཧཱམགྒེ ནིསཱིདིཏྭཱ སོལ༹ས ཀཱརཎཱནི ཙིནྟེནྟོ བྷཱུམིཡཾ སོལ༹ས ལེཁཱ ཀཌྜྷི – ‘‘ཨཧཾ ཨེསོ ཝིཡ དཱནཔཱརམིཾ ན པཱུརེསིཾ, ཏེནམྷི ཨིམིནཱ སདིསོ ན ཛཱཏོ’’ཏི ཨེཀཾ ལེཁཾ ཀཌྜྷི. ཏཐཱ ‘‘ཨཧཾ ཨེསོ ཝིཡ སཱིལཔཱརམིཾ, ནེཀྑམྨཔཱརམིཾ, པཉྙཱཔཱརམིཾ, ཝཱིརིཡཔཱརམིཾ, ཁནྟིཔཱརམིཾ, སཙྩཔཱརམིཾ, ཨདྷིཊྛཱནཔཱརམིཾ, མེཏྟཱཔཱརམིཾ, ཨུཔེཀྑཱཔཱརམིཾ ན པཱུརེསིཾ ¶ , ཏེནམྷི ཨིམིནཱ སདིསོ ན ཛཱཏོ’’ཏི དསམཾ ལེཁཾ ཀཌྜྷི. ཏཐཱ ‘‘ཨཧཾ ཨེསོ ཝིཡ ཨསཱདྷཱརཎསྶ ཨིནྡྲིཡཔརོཔརིཡཏྟཉཱཎསྶ པཊིཝེདྷཱཡ ཨུཔནིསྶཡབྷཱུཏཱ དས པཱརམིཡོ ན པཱུརེསིཾ, ཏེནམྷི ཨིམིནཱ སདིསོ ན ཛཱཏོ’’ཏི ཨེཀཱདསམཾ ལེཁཾ ཀཌྜྷི. ཏཐཱ ‘‘ཨཧཾ ཨེསོ ཝིཡ ཨསཱདྷཱརཎསྶ ཨཱསཡཱནུསཡཉཱཎསྶ, མཧཱཀརུཎཱསམཱཔཏྟིཉཱཎསྶ, ཡམཀཔཱཊིཧཱིརཉཱཎསྶ, ཨནཱཝརཎཉཱཎསྶ, སབྦཉྙུཏཉྙཱཎསྶ པཊིཝེདྷཱཡ ཨུཔནིསྶཡབྷཱུཏཱ དས པཱརམིཡོ ན པཱུརེསིཾ, ཏེནམྷི ཨིམིནཱ སདིསོ ན ཛཱཏོ’’ཏི སོལ༹སམཾ ལེཁཾ ཀཌྜྷི. ཨེཝཾ ཨིམེཧི ཀཱརཎེཧི མཧཱམགྒེ སོལ༹ས ལེཁཱ ཀཌྜྷམཱནོ ནིསཱིདི.

ཏསྨིཾ སམཡེ ཏཎྷཱ, ཨརཏི, རགཱཏི ཏིསྶོ མཱརདྷཱིཏརོ ‘‘པིཏཱ ནོ ན པཉྙཱཡཏི, ཀཧཾ ནུ ཁོ ཨེཏརཧཱི’’ཏི ཨོལོཀཡམཱནཱ ཏཾ དོམནསྶཔྤཏྟཾ བྷཱུམིཾ ཝིལེཁམཱནཾ ནིསིནྣཾ དིསྭཱ པིཏུ སནྟིཀཾ གནྟྭཱ ‘‘ཀསྨཱ, ཏཱཏ, དུཀྑཱི དུམྨནོ’’ཏི པུཙྪིཾསུ. ཨམྨཱ, ཨཡཾ མཧཱསམཎོ མཡ྄ཧཾ ཝསཾ ཨཏིཀྐནྟོ, ཨེཏྟཀཾ ཀཱལཾ ཨོལོཀེནྟོ ཨོཏཱརམསྶ དཊྛུཾ ནཱསཀྑིཾ, ཏེནཱཧཾ དུཀྑཱི དུམྨནོཏི. ཡདི ¶ ཨེཝཾ མཱ ཙིནྟཡིཏྠ, མཡམེཏཾ ཨཏྟནོ ཝསེ ཀཏྭཱ ཨཱདཱཡ ཨཱགམིསྶཱམཱཏི. ན སཀྐཱ, ཨམྨཱ, ཨེསོ ཀེནཙི ཝསེ ཀཱཏུཾ, ཨཙལཱཡ སདྡྷཱཡ པཏིཊྛིཏོ ཨེསོ པུརིསོཏི. ‘‘ཏཱཏ མཡཾ ཨིཏྠིཡོ ནཱམ ཨིདཱནེཝ ནཾ རཱགཔཱསཱདཱིཧི བནྡྷིཏྭཱ ཨཱནེསྶཱམ, ཏུམྷེ མཱ ཙིནྟཡིཏྠཱ’’ཏི བྷགཝནྟཾ ཨུཔསངྐམིཏྭཱ ‘‘པཱདེ ཏེ སམཎ པརིཙཱརེམཱ’’ཏི ཨཱཧཾསུ. བྷགཝཱ ¶ ཝ ཏཱསཾ ཝཙནཾ མནསི ཨཀཱསི, ན ཨཀྑཱིནི ཨུམྨཱིལེཏྭཱ ཨོལོཀེསི, ཨནུཏྟརེ ཨུཔདྷིསངྑཡེ ཝིམུཏྟམཱནསོ ཝིཝེཀསུཁཉྙེཝ ཨནུབྷཝནྟོ ནིསཱིདི.

པུན མཱརདྷཱིཏརོ ‘‘ཨུཙྩཱཝཙཱ ཁོ པུརིསཱནཾ ཨདྷིཔྤཱཡཱ, ཀེསཉྩི ཀུམཱརིཀཱསུ པེམཾ ཧོཏི, ཀེསཉྩི པཋམཝཡེ ཋིཏཱསུ, ཀེསཉྩི མཛ྄ཛྷིམཝཡེ ཋིཏཱསུ, ཡཾནཱུན མཡཾ ནཱནཔྤཀཱརེཧི རཱུཔེཧི པལོབྷེཡྻཱམཱ’’ཏི ཨེཀམེཀཱ ཀུམཱརིཝཎྞཱདིཝསེན སཏཾ སཏཾ ཨཏྟབྷཱཝེ ཨབྷིནིམྨིནིཏྭཱ ཀུམཱརིཡོ, ཨཝིཛཱཏཱ, སཀིཾཝིཛཱཏཱ, དུཝིཛཱཏཱ, མཛ྄ཛྷིམིཏྠིཡོ, མཧིཏྠིཡོ ཙ ཧུཏྭཱ ཚཀྑཏྟུཾ བྷགཝནྟཾ ཨུཔསངྐམིཏྭཱ ‘‘པཱདེ ཏེ སམཎ པརིཙཱརེམཱ’’ཏི ཨཱཧཾསུ. ཏམྤི བྷགཝཱ ན མནསཱཀཱསི, ཡཐཱ ཏཾ ཨནུཏྟརེ ཨུཔདྷིསངྑཡེཝ ཝིམུཏྟོ. ཀེཙི པནཱཙརིཡཱ ཝདནྟི ‘‘ཏཱ མཧིཏྠིབྷཱཝེན ¶ ཨུཔགཏཱ དིསྭཱ བྷགཝཱ ‘ཨེཝམེཝཾ ཨེཏཱ ཁཎྜདནྟཱ པལིཏཀེསཱ ཧོནྟཱུ’ཏི ཨདྷིཊྛཱསཱི’’ཏི, ཏཾ ན གཧེཏབྦཾ. ན ཧི སཏྠཱ ཨེཝརཱུཔཾ ཨདྷིཊྛཱནཾ ཀརོཏི. བྷགཝཱ པན ‘‘ཨཔེཐ ཏུམྷེ, ཀིཾ དིསྭཱ ཨེཝཾ ཝཱཡམཐ, ཨེཝརཱུཔཾ ནཱམ ཨཝཱིཏརཱགཱདཱིནཾ པུརཏོ ཀཱཏུཾ ཡུཏྟཾ, ཏཐཱགཏསྶ པན རཱགོ པཧཱིནོ, དོསོ པཧཱིནོ, མོཧོ པཧཱིནོ’’ཏི ཨཏྟནོ ཀིལེསཔྤཧཱནཾ ཨཱརབྦྷ –

‘‘ཡསྶ ཛིཏཾ ནཱཝཛཱིཡཏི, ཛིཏམསྶ ནོཡཱཏི ཀོཙི ལོཀེ;

ཏཾ བུདྡྷམནནྟགོཙརཾ, ཨཔདཾ ཀེན པདེན ནེསྶཐ.

‘‘ཡསྶ ཛཱལིནཱི ཝིསཏྟིཀཱ, ཏཎྷཱ ནཏྠི ཀུཧིཉྩི ནེཏཝེ;

ཏཾ བུདྡྷམནནྟགོཙརཾ, ཨཔདཾ ཀེན པདེན ནེསྶཐཱ’’ཏི. (དྷ. པ. ༡༧༩-༡༨༠) –

ཨིམཱ དྷམྨཔདེ བུདྡྷཝགྒེ དྭེ གཱཐཱ ཝདནྟོ དྷམྨཾ ཀཐེསི. ཏཱ ‘‘སཙྩཾ ཀིར ནོ པིཏཱ ཨཝོཙ, ཨརཧཾ སུགཏོ ལོཀེ ན རཱགེན སུཝཱནཡོ’’ཏིཨཱདཱིནི ¶ ཝཏྭཱ པིཏུ སནྟིཀཾ ཨགམཾསུ.

བྷགཝཱཔི ཏཏྠ སཏྟཱཧཾ ཝཱིཏིནཱམེཏྭཱ མུཙལིནྡམཱུལཾ ཨགམཱསི. ཏཏྠ སཏྟཱཧཝདྡལིཀཱཡ ཨུཔྤནྣཱཡ སཱིཏཱདིཔཊིབཱཧནཏྠཾ མུཙལིནྡེན ནཱགརཱཛེན སཏྟཀྑཏྟུཾ བྷོགེཧི པརིཀྑིཏྟོ ཨསམྦཱདྷཱཡ གནྡྷཀུཊིཡཾ ཝིཧརནྟོ ཝིཡ ཝིམུཏྟིསུཁཾ པཊིསཾཝེདིཡམཱནོ སཏྟཱཧཾ ཝཱིཏིནཱམེཏྭཱ རཱཛཱཡཏནཾ ཨུཔསངྐམི, ཏཏྠཱཔི ཝིམུཏྟིསུཁཾ པཊིསཾཝེདིཡམཱནོཡེཝ ནིསཱིདི. ཨེཏྟཱཝཏཱ སཏྟ སཏྟཱཧཱནི ¶ པརིཔུཎྞཱནི. ཨེཏྠནྟརེ ནེཝ མུཁདྷོཝནཾ, ན སརཱིརཔཊིཛགྒནཾ, ན ཨཱཧཱརཀིཙྩཾ ཨཧོསི, ཛྷཱནསུཁཕལསུཁེནེཝ ཝཱིཏིནཱམེསི.

ཨཐསྶ ཏསྨིཾ སཏྟསཏྟཱཧམཏྠཀེ ཨེཀཱུནཔཉྙཱསཏིམེ དིཝསེ ཏཏྠ ནིསིནྣསྶ ‘‘མུཁཾ དྷོཝིསྶཱམཱི’’ཏི ཙིཏྟཾ ཨུདཔཱདི. སཀྐོ དེཝཱནམིནྡོ ཨགདཧརཱིཊཀཾ ཨཱཧརིཏྭཱ ཨདཱསི, སཏྠཱ ཏཾ པརིབྷུཉྫི, ཏེནསྶ སརཱིརཝལ༹ཉྫཾ ཨཧོསི. ཨཐསྶ སཀྐོཡེཝ ནཱགལཏཱདནྟཀཊྛཉྩེཝ མུཁདྷོཝནཨུདཀཉྩ ¶ ཨདཱསི. སཏྠཱ ཏཾ དནྟཀཊྛཾ ཁཱདིཏྭཱ ཨནོཏཏྟདཧོདཀེན མུཁཾ དྷོཝིཏྭཱ ཏཏྠེཝ རཱཛཱཡཏནམཱུལེ ནིསཱིདི.

ཏསྨིཾ སམཡེ ཏཔུསྶབྷལླིཀཱ ནཱམ དྭེ ཝཱཎིཛཱ པཉྩཧི སཀཊསཏེཧི ཨུཀྐལཱཛནཔདཱ མཛ྄ཛྷིམདེསཾ གཙྪནྟཱ ཨཏྟནོ ཉཱཏིསཱལོཧིཏཱཡ དེཝཏཱཡ སཀཊཱནི སནྣིརུམྦྷིཏྭཱ སཏྠུ ཨཱཧཱརསམྤཱདནེ ཨུསྶཱཧིཏཱ མནྠཉྩ མདྷུཔིཎྜིཀཉྩ ཨཱདཱཡ ‘‘པཊིགྒཎྷཱཏུ ནོ, བྷནྟེ, བྷགཝཱ ཨིམཾ ཨཱཧཱརཾ ཨནུཀམྤཾ ཨུཔཱདཱཡཱ’’ཏི སཏྠཱརཾ ཨུཔསངྐམིཏྭཱ ཨཊྛཾསུ. བྷགཝཱ པཱཡཱསཔཊིགྒཧཎདིཝསེཡེཝ པཏྟསྶ ཨནྟརཧིཏཏྟཱ ‘‘ན ཁོ ཏཐཱགཏཱ ཧཏྠེསུ པཊིགྒཎྷནྟི, ཀིམྷི ནུ ཁོ ཨཧཾ པཊིགྒཎྷེཡྻ’’ནྟི ཙིནྟེསི. ཨཐསྶ ཙིཏྟཾ ཉཏྭཱ ཙཏཱུཧི དིསཱཧི ཙཏྟཱརོ མཧཱརཱཛཱནོ ཨིནྡནཱིལམཎིམཡེ པཏྟེ ཨུཔནཱམེསུཾ, བྷགཝཱ ཏེ པཊིཀྑིཔི. པུན མུགྒཝཎྞསེལམཡེ ཙཏྟཱརོ པཏྟེ ཨུཔནཱམེསུཾ. བྷགཝཱ ཙཏུནྣམྤི དེཝཔུཏྟཱནཾ ཨནུཀམྤཱཡ ཙཏྟཱརོཔི པཏྟེ པཊིགྒཧེཏྭཱ ཨུཔརཱུཔརི ཋཔེཏྭཱ ‘‘ཨེཀོ ཧོཏཱུ’’ཏི ཨདྷིཊྛཱསི, ཙཏྟཱརོཔི མུཁཝཊྚིཡཾ པཉྙཱཡམཱནལེཁཱ ཧུཏྭཱ མཛ྄ཛྷིམེན པམཱཎེན ཨེཀཏྟཾ ཨུཔགམིཾསུ. བྷགཝཱ ཏསྨིཾ པཙྩགྒྷེ སེལམཡེ པཏྟེ ཨཱཧཱརཾ པཊིགྒཎྷིཏྭཱ པརིབྷུཉྫིཏྭཱ ཨནུམོདནཾ ཨཀཱསི. དྭེ བྷཱཏརོ ཝཱཎིཛཱ བུདྡྷཉྩ དྷམྨཉྩ སརཎཾ གནྟྭཱ ¶ དྭེཝཱཙིཀཱ ཨུཔཱསཀཱ ཨཧེསུཾ. ཨཐ ནེསཾ ‘‘ཨེཀཾ ནོ, བྷནྟེ, པརིཙརིཏབྦཊྛཱནཾ དེཐཱ’’ཏི ཝདནྟཱནཾ དཀྑིཎཧཏྠེན ཨཏྟནོ སཱིསཾ པརཱམསིཏྭཱ ཀེསདྷཱཏུཡོ ཨདཱསི. ཏེ ཨཏྟནོ ནགརེ ཏཱ དྷཱཏུཡོ སུཝཎྞསམུགྒསྶ ཨནྟོ པཀྑིཔིཏྭཱ ཙེཏིཡཾ པཏིཊྛཱཔེསུཾ.

སམྨཱསམྦུདྡྷོཔི ཁོ ཏཏོ ཨུཊྛཱཡ པུན ཨཛཔཱལནིགྲོདྷམེཝ གནྟྭཱ ནིགྲོདྷམཱུལེ ནིསཱིདི. ཨཐསྶ ཏཏྠ ནིསིནྣམཏྟསྶེཝ ཨཏྟནཱ ཨདྷིགཏསྶ དྷམྨསྶ གམྦྷཱིརཏཾ པཙྩཝེཀྑནྟསྶ སབྦབུདྡྷཱནཾ ཨཱཙིཎྞོ ‘‘ཨདྷིགཏོ ཁོ མྱཱཡཾ དྷམྨོ’’ཏི པརེསཾ དྷམྨཾ ཨདེསེཏུཀམྱཏཱཀཱརཔཝཏྟོ ཝིཏཀྐོ ཨུདཔཱདི. ཨཐ བྲཧྨཱ སཧམྤཏི ‘‘ནསྶཏི ཝཏ བྷོ ལོཀོ, ཝིནསྶཏི ཝཏ བྷོ ལོཀོ’’ཏི དསཧི ཙཀྐཝཱལ༹སཧསྶེཧི སཀྐསུཡཱམསནྟུསིཏསུནིམྨིཏཝསཝཏྟིམཧཱབྲཧྨཱནོ ¶ ཨཱདཱཡ སཏྠུ སནྟིཀཾ གནྟྭཱ ‘‘དེསེཏུ, བྷནྟེ, བྷགཝཱ དྷམྨ’’ནྟིཨཱདིནཱ ནཡེན དྷམྨདེསནཾ ཨཱཡཱཙི.

སཏྠཱ ¶ ཏསྶ པཊིཉྙཾ དཏྭཱ ‘‘ཀསྶ ནུ ཁོ ཨཧཾ པཋམཾ དྷམྨཾ དེསེཡྻ’’ནྟི ཙིནྟེནྟོ ‘‘ཨཱལཱ༹རོ པཎྜིཏོ, སོ ཨིམཾ དྷམྨཾ ཁིཔྤཾ ཨཱཛཱནིསྶཏཱི’’ཏི ཙིཏྟཾ ཨུཔྤཱདེཏྭཱ པུན ཨོལོཀེནྟོ ཏསྶ སཏྟཱཧཀཱལཀཏབྷཱཝཾ ཉཏྭཱ ཨུདཀཾ ཨཱཝཛྫེསི. ཏསྶཱཔི ཨབྷིདོསཀཱལཀཏབྷཱཝཾ ཉཏྭཱ ‘‘བཧཱུཔཀཱརཱ ཁོ མེ པཉྩཝགྒིཡཱ བྷིཀྑཱུ’’ཏི པཉྩཝགྒིཡེ ཨཱརབྦྷ མནསིཀཱརཾ ཀཏྭཱ ‘‘ཀཧཾ ནུ ཁོ ཏེ ཨེཏརཧི ཝིཧརནྟཱི’’ཏི ཨཱཝཛྫེནྟོ ‘‘བཱརཱཎསིཡཾ ཨིསིཔཏནེ མིགདཱཡེ’’ཏི ཉཏྭཱ ‘‘ཏཏྠ གནྟྭཱ དྷམྨཙཀྐཾ པཝཏྟེསྶཱམཱི’’ཏི ཀཏིཔཱཧཾ བོདྷིམཎྜསཱམནྟཱཡེཝ པིཎྜཱཡ ཙརནྟོ ཝིཧརིཏྭཱ ཨཱསཱལ༹ྷིཔུཎྞམཱསིཡཾ ‘‘བཱརཱཎསིཾ གམིསྶཱམཱི’’ཏི ཙཱཏུདྡསིཡཾ པཙྩཱུསསམཡེ ཝིབྷཱཏཱཡ རཏྟིཡཱ ཀཱལསྶེཝ པཏྟཙཱིཝརམཱདཱཡ ཨཊྛཱརསཡོཛནམགྒཾ པཊིཔནྣོ ཨནྟརཱམགྒེ ཨུཔཀཾ ནཱམ ཨཱཛཱིཝཀཾ དིསྭཱ ཏསྶ ཨཏྟནོ བུདྡྷབྷཱཝཾ ཨཱཙིཀྑིཏྭཱ ཏཾ དིཝསཾཡེཝ སཱཡནྷསམཡེ ཨིསིཔཏནཾ ཨགམཱསི.

པཉྩཝགྒིཡཱ ཐེརཱ ཏཐཱགཏཾ དཱུརཏོཝ ཨཱགཙྪནྟཾ དིསྭཱ ‘‘ཨཡཾ ཨཱཝུསོ སམཎོ གོཏམོ པཙྩཡབཱཧུལླཱཡ ཨཱཝཏྟིཏྭཱ པརིཔུཎྞཀཱཡོ པཱིཎིནྡྲིཡོ སུཝཎྞཝཎྞོ ཧུཏྭཱ ཨཱགཙྪཏི, ཨིམསྶ ཨབྷིཝཱདནཱདཱིནི ན ཀརིསྶཱམ, མཧཱཀུལཔསུཏོ ཁོ པནེས ཨཱསནཱབྷིཧཱརཾ ཨརཧཏི, ཏེནསྶ ཨཱསནམཏྟཾ པཉྙཱཔེསྶཱམཱ’’ཏི ཀཏིཀཾ ཨཀཾསུ. བྷགཝཱ སདེཝཀསྶ ལོཀསྶ ཙིཏྟཱཙཱརཾ ཛཱནནསམཏྠེན ཉཱཎེན ‘‘ཀིཾ ནུ ཁོ ཨིམེ ཙིནྟཡིཾསཱུ’’ཏི ཨཱཝཛྫེཏྭཱ ཙིཏྟཾ ཨཉྙཱསི. ཨཐ ནེ སབྦདེཝམནུསྶེསུ ཨནོདིསྶཀཝསེན ཕརཎསམཏྠཾ ¶ མེཏྟཙིཏྟཾ སངྑིཔིཏྭཱ ཨོདིསྶཀཝསེན མེཏྟཙིཏྟེན ཕརི. ཏེ བྷགཝཏཱ མེཏྟཙིཏྟེན ཕུཊྛཱ ཏཐཱགཏེ ཨུཔསངྐམནྟེ སཀཱཡ ཀཏིཀཱཡ སཎྛཱཏུཾ ཨསཀྐོནྟཱ ཨབྷིཝཱདནཔཙྩུཊྛཱནཱདཱིནི སབྦཀིཙྩཱནི ཨཀཾསུ, སམྨཱསམྦུདྡྷབྷཱཝཾ པནསྶ ཨཛཱནམཱནཱ ཀེཝལཾ ནཱམེན ཙ ཨཱཝུསོཝཱདེན ཙ སམུདཱཙརནྟི.

ཨཐ ནེ བྷགཝཱ ‘‘མཱ ཝོ, བྷིཀྑཝེ, ཏཐཱགཏཾ ནཱམེན ཙ ཨཱཝུསོཝཱདེན ཙ སམུདཱཙརཐ, ཨརཧཾ, བྷིཀྑཝེ, ཏཐཱགཏོ སམྨཱསམྦུདྡྷོ’’ཏི ཨཏྟནོ བུདྡྷབྷཱཝཾ སཉྙཱཔེཏྭཱ པཉྙཏྟེ ཝརབུདྡྷཱསནེ ནིསིནྣོ ཨུཏྟརཱསཱལ༹ྷནཀྑཏྟཡོགེ ཝཏྟམཱནེ ཨཊྛཱརསཧི བྲཧྨཀོཊཱིཧི པརིཝུཏོ པཉྩཝགྒིཡེ ¶ ཐེརེ ཨཱམནྟེཏྭཱ དྷམྨཙཀྐཔྤཝཏྟནསུཏྟནྟཾ དེསེསི. ཏེསུ ཨཉྙཱསིཀོཎྜཉྙཏྠེརོ དེསནཱནུསཱརེན ཉཱཎཾ པེསེནྟོ སུཏྟཔརིཡོསཱནེ ཨཊྛཱརསཧི བྲཧྨཀོཊཱིཧི སདྡྷིཾ སོཏཱཔཏྟིཕལེ པཏིཊྛཱསི. སཏྠཱ ཏཏྠེཝ ཝསྶཾ ཨུཔགནྟྭཱ པུནདིཝསེ ཝཔྤཏྠེརཾ ཨོཝདནྟོ ཝིཧཱརེཡེཝ ¶ ནིསཱིདི, སེསཱ ཙཏྟཱརོ པིཎྜཱཡ ཙརིཾསུ. ཝཔྤཏྠེརོ པུབྦཎྷེཡེཝ སོཏཱཔཏྟིཕལཾ པཱཔུཎི. ཨེཏེནེཝ ཨུཔཱཡེན པུནདིཝསེ བྷདྡིཡཏྠེརཾ, པུནདིཝསེ མཧཱནཱམཏྠེརཾ, པུནདིཝསེ ཨསྶཛིཏྠེརནྟི སབྦེ སོཏཱཔཏྟིཕལེ པཏིཊྛཱཔེཏྭཱ པཉྩམིཡཾ པཀྑསྶ པཉྩཔི ཛནེ སནྣིཔཱཏེཏྭཱ ཨནཏྟལཀྑཎསུཏྟནྟཾ (སཾ. ནི. ༣.༥༩; མཧཱཝ. ༢༠ ཨཱདཡོ) དེསེསི. དེསནཱཔརིཡོསཱནེ པཉྩཔི ཐེརཱ ཨརཧཏྟཕལེ པཏིཊྛཧིཾསུ. ཨཐ སཏྠཱ ཡསཀུལཔུཏྟསྶ ཨུཔནིསྶཡཾ དིསྭཱ ཏཾ རཏྟིབྷཱགེ ནིབྦིཛྫིཏྭཱ གེཧཾ པཧཱཡ ནིཀྑནྟཾ ‘‘ཨེཧི ཡསཱ’’ཏི པཀྐོསིཏྭཱ ཏསྨིཾཡེཝ རཏྟིབྷཱགེ སོཏཱཔཏྟིཕལེ, པུནདིཝསེ ཨརཧཏྟེ པཏིཊྛཱཔེཏྭཱ, ཨཔརེཔི ཏསྶ སཧཱཡཀེ ཙཏུཔཎྞཱས ཛནེ ཨེཧིབྷིཀྑུཔབྦཛྫཱཡ པབྦཱཛེཏྭཱ ཨརཧཏྟཾ པཱཔེསི.

ཨེཝཾ ལོཀེ ཨེཀསཊྛིཡཱ ཨརཧནྟེསུ ཛཱཏེསུ སཏྠཱ ཝུཏྠཝསྶོ པཝཱརེཏྭཱ ‘‘ཙརཐ, བྷིཀྑཝེ, ཙཱརིཀ’’ནྟི སཊྛི བྷིཀྑཱུ དིསཱསུ པེསེཏྭཱ སཡཾ ཨུརུཝེལཾ གཙྪནྟོ ཨནྟརཱམགྒེ ཀཔྤཱསིཀཝནསཎྜེ ཏིཾས ཛནེ བྷདྡཝགྒིཡཀུམཱརེ ཝིནེསི. ཏེསུ སབྦཔཙྪིམཀོ སོཏཱཔནྣོ, སབྦུཏྟམོ ཨནཱགཱམཱི ཨཧོསི. ཏེཔི སབྦེ ཨེཧིབྷིཀྑུབྷཱཝེནེཝ པབྦཱཛེཏྭཱ དིསཱསུ པེསེཏྭཱ ཨུརུཝེལཾ གནྟྭཱ ཨཌྜྷུཌྜྷཱནི པཱཊིཧཱརིཡསཧསྶཱནི དསྶེཏྭཱ ཨུརུཝེལཀསྶཔཱདཡོ སཧསྶཛཊིལཔརིཝཱརེ ཏེབྷཱཏིཀཛཊིལེ ཝིནེཏྭཱ ཨེཧིབྷིཀྑུབྷཱཝེནེཝ པབྦཱཛེཏྭཱ གཡཱསཱིསེ ནིསཱིདཱཔེཏྭཱ ཨཱདིཏྟཔརིཡཱཡདེསནཱཡ (མཧཱཝ. ༥༤) ཨརཧཏྟེ པཏིཊྛཱཔེཏྭཱ ཏེན ཨརཧནྟསཧསྶེན པརིཝུཏོ ‘‘བིམྦིསཱརརཉྙོ དིནྣཾ པཊིཉྙཾ ¶ མོཙེསྶཱམཱི’’ཏི རཱཛགཧཾ གནྟྭཱ ནགརཱུཔཙཱརེ ལཊྛིཝནུཡྻཱནཾ ཨགམཱསི. རཱཛཱ ཨུཡྻཱནཔཱལསྶ སནྟིཀཱ ‘‘སཏྠཱ ཨཱགཏོ’’ཏི སུཏྭཱ དྭཱདསནཧུཏེཧི བྲཱཧྨཎགཧཔཏིཀེཧི པརིཝུཏོ སཏྠཱརཾ ཨུཔསངྐམིཏྭཱ ¶ ཙཀྐཝིཙིཏྟཏལེསུ སུཝཎྞཔཊྚཝིཏཱནཾ ཝིཡ པབྷཱསམུདཡཾ ཝིསྶཛྫནྟེསུ ཏཐཱགཏསྶ པཱདེསུ སིརསཱ ནིཔཏིཏྭཱ ཨེཀམནྟཾ ནིསཱིདི སདྡྷིཾ པརིསཱཡ.

ཨཐ ཁོ ཏེསཾ བྲཱཧྨཎགཧཔཏིཀཱནཾ ཨེཏདཧོསི ‘‘ཀིཾ ནུ ཁོ མཧཱསམཎོ ཨུརུཝེལཀསྶཔེ བྲཧྨཙརིཡཾ ཙརཏི, ཨུདཱཧུ ཨུརུཝེལཀསྶཔོ མཧཱསམཎེ’’ཏི. བྷགཝཱ ཏེསཾ ཙེཏསཱ ཙེཏོཔརིཝིཏཀྐམཉྙཱཡ ཐེརཾ གཱཐཱཡ ཨཛ྄ཛྷབྷཱསི –

‘‘ཀིམེཝ དིསྭཱ ཨུརུཝེལཝཱསི, པཧཱསི ཨགྒིཾ ཀིསཀོ ཝདཱནོ;

པུཙྪཱམི ཏཾ ཀསྶཔ ཨེཏམཏྠཾ, ཀཐཾ པཧཱིནཾ ཏཝ ཨགྒིཧུཏྟ’’ནྟི. (མཧཱཝ. ༥༥);

ཐེརོཔི ¶ བྷགཝཏོ ཨདྷིཔྤཱཡཾ ཝིདིཏྭཱ –

‘‘རཱུཔེ ཙ སདྡེ ཙ ཨཐོ རསེ ཙ, ཀཱམིཏྠིཡོ ཙཱབྷིཝདནྟི ཡཉྙཱ;

ཨེཏཾ མལནྟི ཨུཔདྷཱིསུ ཉཏྭཱ, ཏསྨཱ ན ཡིཊྛེ ན ཧུཏེ ཨརཉྫི’’ནྟི. (མཧཱཝ. ༥༥) –

ཨིམཾ གཱཐཾ ཝཏྭཱ ཨཏྟནོ སཱཝཀབྷཱཝཔཀཱསནཏྠཾ ཏཐཱགཏསྶ པཱདཔིཊྛེ སཱིསཾ ཋཔེཏྭཱ ‘‘སཏྠཱ མེ, བྷནྟེ, བྷགཝཱ, སཱཝཀོཧམསྨཱི’’ཏི ཝཏྭཱ ཨེཀཏཱལཾ དྭིཏཱལཾ ཏིཏཱལནྟི ཡཱཝ སཏྟཏཱལཔྤམཱཎཾ སཏྟཀྑཏྟུཾ ཝེཧཱསཾ ཨབྦྷུགྒནྟྭཱ ཨོརུཡ྄ཧ ཏཐཱགཏཾ ཝནྡིཏྭཱ ཨེཀམནྟཾ ནིསཱིདི. ཏཾ པཱཊིཧཱརིཡཾ དིསྭཱ མཧཱཛནོ ‘‘ཨཧོ མཧཱནུབྷཱཝཱ བུདྡྷཱ, ཨེཝཾ ཐཱམགཏདིཊྛིཀོ ནཱམ ‘ཨརཧཱ’ཏི མཉྙམཱནོ ཨུརུཝེལཀསྶཔོཔི དིཊྛིཛཱལཾ བྷིནྡིཏྭཱ ཏཐཱགཏེན དམིཏོ’’ཏི སཏྠུ གུཎཀཐཾཡེཝ ཀཐེསི. བྷགཝཱ ‘‘ནཱཧཾ ཨིདཱནིཡེཝ ཨུརུཝེལཀསྶཔཾ དམེམི, ཨཏཱིཏེཔི ཨེས མཡཱ དམིཏོཡེཝཱ’’ཏི ཝཏྭཱ ཨིམིསྶཱ ཨཊྛུཔྤཏྟིཡཱ མཧཱནཱརདཀསྶཔཛཱཏཀཾ (ཛཱ. ༢.༢༢.༥༤༥ ཨཱདཡོ) ཀཐེཏྭཱ ཙཏྟཱརི སཙྩཱནི པཀཱསེསི. མགདྷརཱཛཱ ཨེཀཱདསཧི ནཧུཏེཧི སདྡྷིཾ སོཏཱཔཏྟིཕལེ པཏིཊྛཱསི, ཨེཀཾ ནཧུཏཾ ཨུཔཱསཀཏྟཾ པཊིཝེདེསི. རཱཛཱ ¶ སཏྠུ སནྟིཀེ ནིསིནྣོཡེཝ པཉྩ ཨསྶཱསཀེ པཝེདེཏྭཱ ¶ སརཎཾ གནྟྭཱ སྭཱཏནཱཡ ནིམནྟེཏྭཱ ཨཱསནཱ ཝུཊྛཱཡ བྷགཝནྟཾ པདཀྑིཎཾ ཀཏྭཱ པཀྐཱམི.

པུནདིཝསེ ཡེཧི ཙ བྷགཝཱ དིཊྛོ, ཡེཧི ཙ ཨདིཊྛོ, སབྦེཔི རཱཛགཧཝཱསིནོ ཨཊྛཱརསཀོཊིསངྑཱ མནུསྶཱ ཏཐཱགཏཾ དཊྛུཀཱམཱ པཱཏོཝ རཱཛགཧཏོ ལཊྛིཝནུཡྻཱནཾ ཨགམཾསུ. ཏིགཱཝུཏོ མགྒོ ནཔྤཧོསི, སཀལལཊྛིཝནུཡྻཱནཾ ནིརནྟརཾ ཕུཊཾ ཨཧོསི. མཧཱཛནོ དསབལསྶ རཱུཔསོབྷགྒཔྤཏྟཾ ཨཏྟབྷཱཝཾ པསྶནྟོ ཏིཏྟིཾ ཀཱཏུཾ ནཱསཀྑི. ཝཎྞབྷཱུམི ནཱམེསཱ. ཨེཝརཱུཔེསུ ཧི ཋཱནེསུ ཏཐཱགཏསྶ ལཀྑཎཱནུབྱཉྫནཱདིཔྤབྷེདཱ སབྦཱཔི རཱུཔཀཱཡསིརཱི ཝཎྞེཏབྦཱ. ཨེཝཾ རཱུཔསོབྷགྒཔྤཏྟཾ དསབལསྶ སརཱིརཾ པསྶམཱནེན མཧཱཛནེན ནིརནྟརཾ ཕུཊེ ཨུཡྻཱནེ ཙ མགྒེ ཙ ཨེཀབྷིཀྑུསྶཔི ནིཀྑམནོཀཱསོ ནཱཧོསི. ཏཾ དིཝསཾ ཀིར བྷགཝཱ ཚིནྣབྷཏྟོ བྷཝེཡྻ, ཏཾ མཱ ཨཧོསཱིཏི སཀྐསྶ ནིསིནྣཱསནཾ ཨུཎྷཱཀཱརཾ དསྶེསི. སོ ཨཱཝཛྫམཱནོ ཏཾ ཀཱརཎཾ ཉཏྭཱ མཱཎཝཀཝཎྞཾ ཨབྷིནིམྨིནིཏྭཱ བུདྡྷདྷམྨསངྒྷཔཊིསཾཡུཏྟཱ ཐུཏིཡོ ཝདམཱནོ དསབལསྶ པུརཏོ ཨོཏརིཏྭཱ དེཝཏཱནུབྷཱཝེན ཨོཀཱསཾ ཀཏྭཱ –

‘‘དནྟོ དནྟེཧི སཧ པུརཱཎཛཊིལེཧི, ཝིཔྤམུཏྟོ ཝིཔྤམུཏྟེཧི;

སིངྒཱིནིཀྑསཝཎྞོ, རཱཛགཧཾ པཱཝིསི བྷགཝཱ.

‘‘མུཏྟོ ¶ མུཏྟེཧི སཧ པུརཱཎཛཊིལེཧི, ཝིཔྤམུཏྟོ ཝིཔྤམུཏྟེཧི;

སིངྒཱིནིཀྑསཝཎྞོ, རཱཛགཧཾ པཱཝིསི བྷགཝཱ.

‘‘ཏིཎྞོ ཏིཎྞེཧི སཧ པུརཱཎཛཊིལེཧི, ཝིཔྤམུཏྟོ ཝིཔྤམུཏྟེཧི;

སིངྒཱིནིཀྑསཝཎྞོ, རཱཛགཧཾ པཱཝིསི བྷགཝཱ.

‘‘དསཝཱསོ ¶ དསབལོ, དསདྷམྨཝིདཱུ དསབྷི ཙུཔེཏོ;

སོ དསསཏཔརིཝཱརོ, རཱཛགཧཾ པཱཝིསི བྷགཝཱ’’ཏི. (མཧཱཝ. ༥༨) –

ཨིམཱཧི གཱཐཱཧི སཏྠུ ཝཎྞཾ ཝདམཱནོ པུརཏོ པཱཡཱསི. ཏདཱ མཧཱཛནོ མཱཎཝཀསྶ རཱུཔསིརིཾ དིསྭཱ ‘‘ཨཏིཝིཡ ཨབྷིརཱུཔོ ཨཡཾ མཱཎཝཀོ, ན ཁོ པན ཨམྷེཧི དིཊྛཔུབྦོ’’ཏི ཙིནྟེཏྭཱ ‘‘ཀུཏོ ཨཡཾ མཱཎཝཀོ, ཀསྶ ཝཱཡ’’ནྟི ཨཱཧ. ཏཾ སུཏྭཱ མཱཎཝོ –

‘‘ཡོ དྷཱིརོ སབྦདྷི དནྟོ, སུདྡྷོ ཨཔྤཊིཔུགྒལོ;

ཨརཧཾ སུགཏོ ལོཀེ, ཏསྶཱཧཾ པརིཙཱརཀོ’’ཏི. (མཧཱཝ. ༥༨) – གཱཐམཱཧ;

སཏྠཱ སཀྐེན ཀཏོཀཱསཾ མགྒཾ པཊིཔཛྫིཏྭཱ བྷིཀྑུསཧསྶཔརིཝུཏོ ¶ རཱཛགཧཾ པཱཝིསི. རཱཛཱ བུདྡྷཔྤམུཁསྶ སངྒྷསྶ མཧཱདཱནཾ དཏྭཱ ‘‘ཨཧཾ, བྷནྟེ, ཏཱིཎི རཏནཱནི ཝིནཱ ཝཏྟིཏུཾ ན སཀྑིསྶཱམི, ཝེལཱཡ ཝཱ ཨཝེལཱཡ ཝཱ བྷགཝཏོ སནྟིཀཾ ཨཱགམིསྶཱམི, ལཊྛིཝནུཡྻཱནཾ ནཱམ ཨཏིདཱུརེ, ཨིདཾ པན ཨམྷཱཀཾ ཝེལུ༹ཝནཾ ནཱམ ཨུཡྻཱནཾ ནཱཏིདཱུརེ ནཱཙྩཱསནྣེ གམནཱགམནསམྤནྣཾ བུདྡྷཱརཧཾ སེནཱསནཾ. ཨིདཾ མེ བྷགཝཱ པཊིགྒཎྷཱཏཱུ’’ཏི སུཝཎྞབྷིངྐཱརེན པུཔྥགནྡྷཝཱསིཏཾ མཎིཝཎྞཾ ཨུདཀཾ ཨཱདཱཡ ཝེལུ༹ཝནུཡྻཱནཾ པརིཙྩཛནྟོ དསབལསྶ ཧཏྠེ ཨུདཀཾ པཱཏེསི. ཏསྨིཾ ཨཱརཱམཔཊིགྒཧཎེ ‘‘བུདྡྷསཱསནསྶ མཱུལཱནི ཨོཏིཎྞཱནཱི’’ཏི མཧཱཔཐཝཱི ཀམྤི. ཛམྦུདཱིཔསྨིཉྷི ཋཔེཏྭཱ ཝེལུ༹ཝནཾ ཨཉྙཾ མཧཱཔཐཝིཾ ཀམྤེཏྭཱ གཧིཏསེནཱསནཾ ནཱམ ནཏྠི. ཏམྦཔཎྞིདཱིཔེཔི ཋཔེཏྭཱ མཧཱཝིཧཱརཾ ཨཉྙཾ པཐཝིཾ ཀམྤེཏྭཱ གཧིཏསེནཱསནཾ ནཱམ ནཏྠི. སཏྠཱ ཝེལུ༹ཝནཱརཱམཾ པཊིགྒཧེཏྭཱ རཉྙོ ཨནུམོདནཾ ཀཏྭཱ ཨུཊྛཱཡཱསནཱ བྷིཀྑུསངྒྷཔརིཝུཏོ ཝེལུ༹ཝནཾ ཨགམཱསི.

ཏསྨིཾ ཁོ པན སམཡེ སཱརིཔུཏྟོ ཙ མོགྒལླཱནོ ཙཱཏི དྭེ པརིབྦཱཛཀཱ རཱཛགཧཾ ཨུཔནིསྶཱཡ ཝིཧརནྟི ཨམཏཾ པརིཡེསམཱནཱ. ཏེསུ སཱརིཔུཏྟོ ཨསྶཛིཏྠེརཾ པིཎྜཱཡ པཝིཊྛཾ དིསྭཱ ¶ པསནྣཙིཏྟོ པཡིརུཔཱསིཏྭཱ ¶ ‘‘ཡེ དྷམྨཱ ཧེཏུཔྤབྷཝཱ’’ཏི གཱཐཾ སུཏྭཱ སོཏཱཔཏྟིཕལེ པཏིཊྛཱཡ ཨཏྟནོ སཧཱཡཀསྶ མོགྒལླཱནཔརིབྦཱཛཀསྶཔི ཏམེཝ གཱཐཾ ཨབྷཱསི. སོཔི སོཏཱཔཏྟིཕལེ པཏིཊྛཱསི. ཏེ ཨུབྷོཔི ཛནཱ སཉྩཡཾ ཨོལོཀེཏྭཱ ཨཏྟནོ པརིསཱཡ སདྡྷིཾ བྷགཝཏོ སནྟིཀེ པབྦཛིཾསུ. ཏེསུ མཧཱམོགྒལླཱནོ སཏྟཱཧེན ཨརཧཏྟཾ པཱཔུཎི, སཱརིཔུཏྟཏྠེརོ ཨཌྜྷམཱསེན. ཨུབྷོཔི ཙ ནེ སཏྠཱ ཨགྒསཱཝཀཊྛཱནེ ཋཔེསི. སཱརིཔུཏྟཏྠེརེན ཨརཧཏྟཔྤཏྟདིཝསེཡེཝ སཱཝཀསནྣིཔཱཏཾ ཨཀཱསི.

ཏཐཱགཏེ པན ཏསྨིཾཡེཝ ཝེལུ༹ཝནུཡྻཱནེ ཝིཧརནྟེ སུདྡྷོདནམཧཱརཱཛཱ ‘‘པུཏྟོ ཀིར མེ ཚབྦསྶཱནི དུཀྐརཀཱརིཀཾ ཙརིཏྭཱ པརམཱབྷིསམྦོདྷིཾ པཏྭཱ པཝཏྟཝརདྷམྨཙཀྐོ རཱཛགཧཾ ཨུཔནིསྶཱཡ ཝེལུ༹ཝནེ ཝིཧརཏཱི’’ཏི སུཏྭཱ ཨཉྙཏརཾ ཨམཙྩཾ ཨཱམནྟེསི ‘‘ཨེཧི, བྷཎེ, པུརིསསཧསྶཔརིཝཱརོ རཱཛགཧཾ གནྟྭཱ མམ ཝཙནེན ‘པིཏཱ ཝོ སུདྡྷོདནམཧཱརཱཛཱ དཊྛུཀཱམོ’ཏི ཝཏྭཱ པུཏྟཾ མེ གཎྷིཏྭཱ ཨེཧཱི’’ཏི ཨཱཧ. སོ ‘‘ཨེཝཾ, དེཝཱ’’ཏི རཉྙོ ཝཙནཾ སིརསཱ སམྤཊིཙྪིཏྭཱ པུརིསསཧསྶཔརིཝཱརོ ཁིཔྤམེཝ སཊྛིཡོཛནམགྒཾ གནྟྭཱ དསབལསྶ ཙཏུཔརིསམཛ྄ཛྷེ ནིསཱིདིཏྭཱ དྷམྨདེསནཱཝེལཱཡ ཝིཧཱརཾ པཱཝིསི. སོ ‘‘ཏིཊྛཏུ ཏཱཝ རཉྙོ པཧིཏསཱསན’’ནྟི པརིཡནྟེ ཋིཏོ སཏྠུ དྷམྨདེསནཾ སུཏྭཱ ཡཐཱཋིཏོཝ སདྡྷིཾ པུརིསསཧསྶེན ¶ ཨརཧཏྟཾ པཏྭཱ པབྦཛྫཾ ཡཱཙི. བྷགཝཱ ‘‘ཨེཐ བྷིཀྑཝོ’’ཏི ཧཏྠཾ པསཱརེསི, སབྦེ ཏངྑཎཾཡེཝ ཨིདྡྷིམཡཔཏྟཙཱིཝརདྷརཱ སཊྛིཝསྶཏྠེརཱ ཝིཡ ཨཧེསུཾ. ཨརཧཏྟཾ པཏྟཀཱལཏོ པཊྛཱཡ པན ཨརིཡཱ ནཱམ མཛ྄ཛྷཏྟཱཝ ཧོནྟཱིཏི སོ རཉྙཱ པཧིཏསཱསནཾ དསབལསྶ ན ཀཐེསི. རཱཛཱ ‘‘ནེཝ གཏོ ཨཱགཙྪཏི, ན སཱསནཾ སུཡྻཏཱི’’ཏི ‘‘ཨེཧི, བྷཎེ, ཏྭཾ གཙྪཱཧཱི’’ཏི ཏེནེཝ ནིཡཱམེན ཨཉྙཾ ཨམཙྩཾ པེསེསི. སོཔི གནྟྭཱ པུརིམནཡེནེཝ སདྡྷིཾ པརིསཱཡ ཨརཧཏྟཾ པཏྭཱ ཏུཎྷཱི ཨཧོསི. རཱཛཱ ཨེཏེནེཝ ནིཡཱམེན པུརིསསཧསྶཔརིཝཱརེ ནཝ ཨམཙྩེ པེསེསི, སབྦེ ཨཏྟནོ ཀིཙྩཾ ནིཊྛཱཔེཏྭཱ ཏུཎྷཱིབྷཱུཏཱ ཏཏྠེཝ ཝིཧརིཾསུ.

རཱཛཱ ¶ སཱསནམཏྟམྤི ཨཱཧརིཏྭཱ ཨཱཙིཀྑནྟཾ ཨལབྷིཏྭཱ ཙིནྟེསི ‘‘ཨེཏྟཀཱ ཛནཱ མཡི སིནེཧཱབྷཱཝེན སཱསནམཏྟམྤི ན པཙྩཱཧརིཾསུ, ཀོ ནུ ཁོ མམ ཝཙནཾ ཀརིསྶཏཱི’’ཏི སབྦཾ རཱཛབལཾ ཨོལོཀེནྟོ ཀཱལུ༹དཱཡིཾ ཨདྡས. སོ ཀིར རཉྙོ སབྦཏྠསཱདྷཀོ ཨམཙྩོ ཨབྦྷནྟརིཀོ ཨཏིཝིསྶཱསིཀོ བོདྷིསཏྟེན སདྡྷིཾ ཨེཀདིཝསེ ཛཱཏོ སཧཔཾསུཀཱིལ༹ཀོ སཧཱཡོ. ཨཐ ནཾ རཱཛཱ ཨཱམནྟེསི ‘‘ཏཱཏ, ཀཱལུ༹དཱཡི ཨཧཾ མམ པུཏྟཾ པསྶིཏུཀཱམོ ནཝ པུརིསསཧསྶཱནི པེསེསིཾ, ཨེཀཔུརིསོཔི ཨཱགནྟྭཱ སཱསནམཏྟཾ ཨཱརོཙེནྟོཔི ནཏྠི, དུཛྫཱནོ ཁོ པན ཛཱིཝིཏནྟརཱཡོ, ཨཧཾ ཛཱིཝམཱནོཝ པུཏྟཾ དཊྛུཾ ཨིཙྪཱམི, སཀྑིསྶསི ནུ ཁོ མེ པུཏྟཾ ¶ དསྶེཏུ’’ནྟི. སཀྑིསྶཱམི, དེཝ, སཙེ པབྦཛིཏུཾ ལབྷིསྶཱམཱིཏི. ཏཱཏ, ཏྭཾ པབྦཛིཏྭཱ ཝཱ ཨཔབྦཛིཏྭཱ ཝཱ མཡ྄ཧཾ པུཏྟཾ དསྶེཧཱིཏི. སོ ‘‘སཱདྷུ, དེཝཱ’’ཏི རཉྙོ སཱསནཾ ཨཱདཱཡ རཱཛགཧཾ གནྟྭཱ སཏྠུ དྷམྨདེསནཱཝེལཱཡ པརིསཔརིཡནྟེ ཋིཏོ དྷམྨཾ སུཏྭཱ སཔརིཝཱརོ ཨརཧཏྟཕལཾ པཏྭཱ ཨེཧིབྷིཀྑུབྷཱཝེ པཏིཊྛཱསི.

སཏྠཱ བུདྡྷོ ཧུཏྭཱ པཋམཾ ཨནྟོཝསྶཾ ཨིསིཔཏནེ ཝསིཏྭཱ ཝུཏྠཝསྶོ པཝཱརེཏྭཱ ཨུརུཝེལཾ གནྟྭཱ ཏཏྠ ཏཡོ མཱསེ ཝསནྟོ ཏེབྷཱཏིཀཛཊིལེ ཝིནེཏྭཱ བྷིཀྑུསཧསྶཔརིཝཱརོ ཕུསྶམཱསཔུཎྞམཱཡཾ རཱཛགཧཾ གནྟྭཱ དྭེ མཱསེ ཝསི. ཨེཏྟཱཝཏཱ བཱརཱཎསིཏོ ནིཀྑནྟསྶ པཉྩ མཱསཱ ཛཱཏཱ, སཀལོ ཧེམནྟོ ཨཏིཀྐནྟོ. ཀཱལུ༹དཱཡིཏྠེརསྶ ཨཱགཏདིཝསཏོ སཏྟཊྛ དིཝསཱ ཝཱིཏིཝཏྟཱ, སོ ཕགྒུཎཱིཔུཎྞམཱསིཡཾ ཙིནྟེསི ‘‘ཨཏིཀྐནྟོ ཧེམནྟོ, ཝསནྟསམཡོ ཨནུཔྤཏྟོ, མནུསྶེཧི སསྶཱདཱིནི ཨུདྡྷརིཏྭཱ སམྨུཁསམྨུཁཊྛཱནེཧི མགྒཱ དིནྣཱ, ཧརིཏཏིཎསཉྪནྣཱ པཐཝཱི, སུཔུཔྥིཏཱ ཝནསཎྜཱ, པཊིཔཛྫནཀྑམཱ མགྒཱ, ཀཱལོ དསབལསྶ ཉཱཏིསངྒཧཾ ཀཱཏུ’’ནྟི. ཨཐ བྷགཝནྟཾ ཨུཔསངྐམིཏྭཱ –

‘‘ཨངྒཱརིནོ ¶ དཱནི དུམཱ བྷདནྟེ, ཕལེསིནོ ཚདནཾ ཝིཔྤཧཱཡ;

ཏེ ཨཙྩིམནྟོཝ པབྷཱསཡནྟི, སམཡོ མཧཱཝཱིར ཨངྒཱིརསཱནཾ…པེ….

‘‘ནཱཏིསཱིཏཾ ¶ ནཱཏིཨུཎྷཾ, ནཱཏིདུབྦྷིཀྑཚཱཏཀཾ;

སདྡལཱ ཧརིཏཱ བྷཱུམི, ཨེས ཀཱལོ མཧཱམུནཱི’’ཏི. –

སཊྛིམཏྟཱཧི གཱཐཱཧི དསབལསྶ ཀུལནགརཾ གམནཏྠཱཡ གམནཝཎྞཾ ཝཎྞེསི. ཨཐ ནཾ སཏྠཱ ‘‘ཀིཾ ནུ ཁོ ཨུདཱཡི མདྷུརསྶརེན གམནཝཎྞཾ ཝཎྞེསཱི’’ཏི ཨཱཧ. བྷནྟེ, ཏུམྷཱཀཾ པིཏཱ སུདྡྷོདནམཧཱརཱཛཱ པསྶིཏུཀཱམོ, ཀརོཐ ཉཱཏཀཱནཾ སངྒཧནྟི. སཱདྷུ ཨུདཱཡི, ཀརིསྶཱམི ཉཱཏཀཱནཾ སངྒཧཾ, བྷིཀྑུསངྒྷསྶ ཨཱརོཙེཧི, གམིཀཝཏྟཾ པཱུརེསྶནྟཱིཏི. ‘‘སཱདྷུ, བྷནྟེ’’ཏི ཐེརོ ཏེསཾ ཨཱརོཙེསི.

བྷགཝཱ ཨངྒམགདྷཝཱསཱིནཾ ཀུལཔུཏྟཱནཾ དསཧི སཧསྶེཧི, ཀཔིལཝཏྠུཝཱསཱིནཾ དསཧི སཧསྶེཧཱིཏི སབྦེཧེཝ ཝཱིསཏིསཧསྶེཧི ཁཱིཎཱསཝབྷིཀྑཱུཧི པརིཝུཏོ རཱཛགཧཱ ནིཀྑམིཏྭཱ དིཝསེ དིཝསེ ཡོཛནཾ གཙྪཏི. ‘‘རཱཛགཧཏོ སཊྛིཡོཛནཾ ཀཔིལཝཏྠུཾ དྭཱིཧི མཱསེཧི པཱཔུཎིསྶཱམཱི’’ཏི ཨཏུརིཏཙཱརིཀཾ པཀྐཱམི. ཐེརོཔི ‘‘བྷགཝཏོ ནིཀྑནྟབྷཱཝཾ རཉྙོ ཨཱརོཙེསྶཱམཱི’’ཏི ¶ ཝེཧཱསཾ ཨབྦྷུགྒནྟྭཱ རཉྙོ ནིཝེསནེ པཱཏུརཧོསི. རཱཛཱ ཐེརཾ དིསྭཱ ཏུཊྛཙིཏྟོ མཧཱརཧེ པལླངྐེ ནིསཱིདཱཔེཏྭཱ ཨཏྟནོ པཊིཡཱདིཏསྶ ནཱནགྒརསབྷོཛནསྶ པཏྟཾ པཱུརེཏྭཱ ཨདཱསི. ཐེརོ ཨུཊྛཱཡ གམནཱཀཱརཾ དསྶེསི. ནིསཱིདིཏྭཱ བྷུཉྫཐ, ཏཱཏཱཏི. སཏྠུ སནྟིཀཾ གནྟྭཱ བྷུཉྫིསྶཱམི, མཧཱརཱཛཱཏི. ཀཧཾ པན, ཏཱཏ, སཏྠཱཏི? ཝཱིསཏིསཧསྶབྷིཀྑུཔརིཝཱརོ ཏུམྷཱཀཾ དསྶནཏྠཱཡ ཙཱརིཀཾ ནིཀྑནྟོ, མཧཱརཱཛཱཏི. རཱཛཱ ཏུཊྛམཱནསོ ཨཱཧ ‘‘ཏུམྷེ ཨིམཾ པརིབྷུཉྫིཏྭཱ ཡཱཝ མམ པུཏྟོ ཨིམཾ ནགརཾ པཱཔུཎཱཏི, ཏཱཝསྶ ཨིཏོཝ པིཎྜཔཱཏཾ ཧརཐཱ’’ཏི. ཐེརོ ཨདྷིཝཱསེསི. རཱཛཱ ཐེརཾ པརིཝིསིཏྭཱ པཏྟཾ གནྡྷཙུཎྞེན ཨུབྦཊྚེཏྭཱ ཨུཏྟམབྷོཛནསྶ པཱུརེཏྭཱ ‘‘ཏཐཱགཏསྶ དེཐཱ’’ཏི ཐེརསྶ ཧཏྠེ པཏིཊྛཱཔེསི. ཐེརོ སབྦེསཾ པསྶནྟཱནཾཡེཝ པཏྟཾ ཨཱཀཱསེ ཁིཔིཏྭཱ སཡམྤི ཝེཧཱསཾ ཨབྦྷུགྒནྟྭཱ པིཎྜཔཱཏཾ ཨཱཧརིཏྭཱ སཏྠུ ཧཏྠེ ཋཔེསི. སཏྠཱ ཏཾ པརིབྷུཉྫི. ཨེཏེནུཔཱཡེན ཐེརོ དིཝསེ དིཝསེ ཨཱཧརི, སཏྠཱཔི ཨནྟརཱམགྒེ རཉྙོཡེཝ པིཎྜཔཱཏཾ པརིབྷུཉྫི. ཐེརོཔི བྷཏྟཀིཙྩཱཝསཱནེ དིཝསེ དིཝསེ ‘‘ཨཛྫ ཨེཏྟཀཾ བྷགཝཱ ཨཱགཏོ, ཨཛྫ ཨེཏྟཀ’’ནྟི ¶ བུདྡྷགུཎཔཊིསཾཡུཏྟཱཡ ཀཐཱཡ སཀལཾ རཱཛཀུལཾ སཏྠུ དསྶནཾ ཝིནཱཡེཝ སཏྠརི སཉྫཱཏཔྤསཱདཾ ཨཀཱསི. ཏེནེཝ ནཾ བྷགཝཱ ‘‘ཨེཏདགྒཾ, བྷིཀྑཝེ, མམ སཱཝཀཱནཾ ¶ བྷིཀྑཱུནཾ ཀུལཔྤསཱདཀཱནཾ ཡདིདཾ ཀཱལུ༹དཱཡཱི’’ཏི (ཨ. ནི. ༡.༢༡༩, ༢༢༥) ཨེཏདགྒེ ཋཔེསི.

སཱཀིཡཱཔི ཁོ ‘‘ཨནུཔྤཏྟེ བྷགཝཏི ཨམྷཱཀཾ ཉཱཏིསེཊྛཾ པསྶིསྶཱམཱ’’ཏི སནྣིཔཏིཏྭཱ བྷགཝཏོ ཝསནཊྛཱནཾ ཝཱིམཾསམཱནཱ ‘‘ནིགྲོདྷསཀྐསྶ ཨཱརཱམོ རམཎཱིཡོ’’ཏི སལླཀྑེཏྭཱ ཏཏྠ སབྦཾ པཊིཛགྒནཝིདྷིཾ ཀཱརེཏྭཱ གནྡྷཔུཔྥཧཏྠཱ པཙྩུགྒམནཾ ཀརོནྟཱ སབྦཱལངྐཱརཔཊིམཎྜིཏེ དཧརདཧརེ ནཱགརདཱརཀེ ཙ ནཱགརདཱརིཀཱཡོ ཙ པཋམཾ པཧིཎིཾསུ, ཏཏོ རཱཛཀུམཱརེ ཙ རཱཛཀུམཱརིཀཱཡོ ཙ, ཏེསཾ ཨནནྟརཾ སཱམཾ གནྡྷཔུཔྥཙུཎྞཱདཱིཧི པཱུཛཡམཱནཱ བྷགཝནྟཾ གཧེཏྭཱ ནིགྲོདྷཱརཱམམེཝ ཨགམཾསུ. ཏཏྲ བྷགཝཱ ཝཱིསཏིསཧསྶཁཱིཎཱསཝཔརིཝུཏོ པཉྙཏྟཝརབུདྡྷཱསནེ ནིསཱིདི. སཱཀིཡཱ ནཱམ མཱནཛཱཏིཀཱ མཱནཏྠདྡྷཱ, ཏེ ‘‘སིདྡྷཏྠཀུམཱརོ ཨམྷེཧི དཧརཏརོ, ཨམྷཱཀཾ ཀནིཊྛོ, བྷཱགིནེཡྻོ, པུཏྟོ, ནཏྟཱ’’ཏི ཙིནྟེཏྭཱ དཧརདཧརེ རཱཛཀུམཱརེ ཨཱཧཾསུ ‘‘ཏུམྷེ ཝནྡཐ, མཡཾ ཏུམྷཱཀཾ པིཊྛིཏོ ནིསཱིདིསྶཱམཱ’’ཏི.

ཏེསུ ཨེཝཾ ཨཝནྡིཏྭཱ ནིསིནྣེསུ བྷགཝཱ ཏེསཾ ཨཛ྄ཛྷཱསཡཾ ཨོལོཀེཏྭཱ ‘‘ན མཾ ཉཱཏཡོ ཝནྡནྟི, ཧནྡ དཱནི ནེ ཝནྡཱཔེསྶཱམཱི’’ཏི ཨབྷིཉྙཱཔཱདཀཾ ཙཏུཏྠཛ྄ཛྷཱནཾ སམཱཔཛྫིཏྭཱ ཏཏོ ཝུཊྛཱཡ ཨཱཀཱསཾ ཨབྦྷུགྒནྟྭཱ ཏེསཾ སཱིསེ པཱདཔཾསུཾ ཨོཀིརམཱནོ ཝིཡ ཀཎྜམྦརུཀྑམཱུལེ ཡམཀཔཱཊིཧཱརིཡསདིསཾ པཱཊིཧཱརིཡཾ ཨཀཱསི. རཱཛཱ ཏཾ ཨཙྪརིཡཾ དིསྭཱ ཨཱཧ – ‘‘བྷགཝཱ ཏུམྷཱཀཾ ¶ ཛཱཏདིཝསེ ཀཱལ༹དེཝལསྶ ཝནྡནཏྠཾ ཨུཔནཱིཏཱནཾ པཱདེ ཝོ པརིཝཏྟིཏྭཱ བྲཱཧྨཎསྶ མཏྠཀེ པཏིཊྛིཏེ དིསྭཱཔི ཨཧཾ ཏུམྷེ ཝནྡིཾ, ཨཡཾ མེ པཋམཝནྡནཱ. ཝཔྤམངྒལདིཝསེ ཛམྦུཙྪཱཡཱཡ སིརིསཡནེ ནིསིནྣཱནཾ ཝོ ཛམྦུཙྪཱཡཱཡ ཨཔརིཝཏྟནཾ དིསྭཱཔི པཱདེ ཝནྡིཾ, ཨཡཾ མེ དུཏིཡཝནྡནཱ. ཨིདཱནི ཨིམཾ ཨདིཊྛཔུབྦཾ པཱཊིཧཱརིཡཾ དིསྭཱཔི ཨཧཾ ཏུམྷཱཀཾ པཱདེ ཝནྡཱམི, ཨཡཾ མེ ཏཏིཡཝནྡནཱ’’ཏི. རཉྙཱ པན ཝནྡིཏེ བྷགཝནྟཾ ཨཝནྡིཏྭཱ ཋཱཏུཾ སམཏྠོ ནཱམ ཨེཀསཱཀིཡོཔི ནཱཧོསི, སབྦེ ཝནྡིཾསུཡེཝ.

ཨིཏི བྷགཝཱ ཉཱཏཡོ ཝནྡཱཔེཏྭཱ ཨཱཀཱསཏོ ཨོཏརིཏྭཱ པཉྙཏྟཱསནེ ནིསཱིདི. ནིསིནྣེ བྷགཝཏི སིཁཱཔཏྟོ ཉཱཏིསམཱགམོ ཨཧོསི ¶ , སབྦེ ཨེཀགྒཙིཏྟཱ ཧུཏྭཱ ནིསཱིདིཾསུ. ཏཏོ མཧཱམེགྷོ པོཀྑརཝསྶཾ ཝསྶི. ཏམྦཝཎྞཾ ཨུདཀཾ ཧེཊྛཱ ཝིརཝནྟཾ གཙྪཏི, ཏེམིཏུཀཱམོཝ ཏེམེཏི, ཨཏེམིཏུཀཱམསྶ སརཱིརེ ཨེཀབིནྡུམཏྟམྤི ན པཏཏི. ཏཾ དིསྭཱ སབྦེ ཨཙྪརིཡབྦྷུཏཙིཏྟཛཱཏཱ ‘‘ཨཧོ ཨཙྪརིཡཾ, ཨཧོ ཨབྦྷུཏ’’ནྟི ཀཐཾ སམུཊྛཱཔེསུཾ. སཏྠཱ ‘‘ན ཨིདཱནེཝ ¶ མཡ྄ཧཾ ཉཱཏིསམཱགམེ པོཀྑརཝསྶཾ ཝསྶཏི, ཨཏཱིཏེཔི ཝསྶཱི’’ཏི ཨིམིསྶཱ ཨཊྛུཔྤཏྟིཡཱ ཝེསྶནྟརཛཱཏཀཾ ཀཐེསི. དྷམྨདེསནཾ སུཏྭཱ སབྦེ ཨུཊྛཱཡ ཝནྡིཏྭཱ པཀྐམིཾསུ. ཨེཀོཔི རཱཛཱ ཝཱ རཱཛམཧཱམཏྟོ ཝཱ ‘‘སྭེ ཨམྷཱཀཾ བྷིཀྑཾ གཎྷཐཱ’’ཏི ཝཏྭཱ གཏོ ནཱམ ནཏྠི.

སཏྠཱ པུནདིཝསེ ཝཱིསཏིསཧསྶབྷིཀྑུཔརིཝུཏོ ཀཔིལཝཏྠུཾ པིཎྜཱཡ པཱཝིསི. ཏཾ ན ཀོཙི གནྟྭཱ ནིམནྟེསི, པཏྟཾ ཝཱ ཨགྒཧོསི. བྷགཝཱ ཨིནྡཁཱིལེ ཋིཏོཝ ཨཱཝཛྫེསི ‘‘ཀཐཾ ནུ ཁོ པུབྦབུདྡྷཱ ཀུལནགརེ པིཎྜཱཡ ཙརིཾསུ, ཀིཾ ཨུཔྤཊིཔཱཊིཡཱ ཨིསྶརཛནཱནཾ གྷརཱནི ཨགམཾསུ, ཨུདཱཧུ སཔདཱནཙཱརིཀཾ ཙརིཾསཱུ’’ཏི. ཏཏོ ཨེཀབུདྡྷསྶཔི ཨུཔྤཊིཔཱཊིཡཱ གམནཾ ཨདིསྭཱ ‘‘མཡཱཔི ཨིདཱནི ཨཡམེཝ ཝཾསོ, ཨཡཾ པཝེཎཱི པགྒཧེཏབྦཱ, ཨཱཡཏིཉྩ མེ སཱཝཀཱཔི མམཉྙེཝ ཨནུསིཀྑནྟཱ པིཎྜཙཱརིཀཝཏྟཾ པརིཔཱུརེསྶནྟཱི’’ཏི ཀོཊིཡཾ ནིཝིཊྛགེཧཏོ པཊྛཱཡ སཔདཱནཾ པིཎྜཱཡ ཙརི. ‘‘ཨཡྻོ ཀིར སིདྡྷཏྠཀུམཱརོ པིཎྜཱཡ ཙརཏཱི’’ཏི དྭིབྷཱུམཀཏིབྷཱུམཀཱདཱིསུ པཱསཱདེསུ སཱིཧཔཉྫརེ ཝིཝརིཏྭཱ མཧཱཛནོ དསྶནབྱཱཝཊོ ཨཧོསི.

རཱཧུལམཱཏཱཔི དེཝཱི ‘‘ཨཡྻཔུཏྟོ ཀིར ཨིམསྨིཾཡེཝ ནགརེ མཧནྟེན རཱཛཱནུབྷཱཝེན སུཝཎྞསིཝིཀཱདཱིཧི ཝིཙརིཏྭཱ ཨིདཱནི ཀེསམསྶུཾ ཨོཧཱརེཏྭཱ ཀཱསཱཡཝཏྠཝསནོ ཀཔཱལཧཏྠོ པིཎྜཱཡ ཙརཏི, སོབྷཏི ནུ ཁོ’’ཏི སཱིཧཔཉྫརཾ ཝིཝརིཏྭཱ ཨོལོཀཡམཱནཱ བྷགཝནྟཾ ནཱནཱཝིརཱགསམུཛྫལཱཡ སརཱིརཔྤབྷཱཡ ནགརཝཱིཐིཡོ ཨོབྷཱསེཏྭཱ བྱཱམཔྤབྷཱཔརིཀྑེཔསམངྒཱིབྷཱུཏཱཡ ཨསཱིཏིཨནུབྱཉྫནཱཝབྷཱསིཏཱཡ ¶ དྭཏྟིཾསམཧཱཔུརིསལཀྑཎཔཊིམཎྜིཏཱཡ ཨནོཔམཱཡ བུདྡྷསིརིཡཱ ཝིརོཙམཱནཾ དིསྭཱ ཨུཎྷཱིསཏོ པཊྛཱཡ ཡཱཝ པཱདཏལཱ –

‘‘སིནིདྡྷནཱིལམུདུཀུཉྩིཏཀེསོ ¶ , སཱུརིཡནིམྨལཏལཱབྷིནལཱཊོ;

ཡུཏྟཏུངྒམུདུཀཱཡཏནཱསོ, རཾསིཛཱལཝིཏཏོ ནརསཱིཧོ.

‘‘ཙཀྐཝརངྐིཏརཏྟསུཔཱདོ, ལཀྑཎམཎྜིཏཨཱཡཏཔཎྷི;

ཙཱམརིཧཏྠཝིབྷཱུསིཏཔཎྷོ, ཨེས ཧི ཏུཡ྄ཧཾ པིཏཱ ནརསཱིཧོ.

‘‘སཀྱཀུམཱརོ ཝརདོ སུཁུམཱལོ, ལཀྑཎཝིཙིཏྟཔསནྣསརཱིརོ;

ལོཀཧིཏཱཡ ཨཱགཏོ ནརཝཱིརོ, ཨེས ཧི ཏུཡ྄ཧཾ པིཏཱ ནརསཱིཧོ.

‘‘ཨཱཡཏཡུཏྟསུསཎྛིཏསོཏོ, གོཔཁུམོ ཨབྷིནཱིལནེཏྟོ;

ཨིནྡདྷནུཨབྷིནཱིལབྷམུཀོ, ཨེས ཧི ཏུཡ྄ཧཾ པིཏཱ ནརསཱིཧོ.

‘‘པུཎྞཙནྡནིབྷོ མུཁཝཎྞོ, དེཝནརཱནཾ པིཡོ ནརནཱགོ;

མཏྟགཛིནྡཝིལཱསིཏགཱམཱི, ཨེས ཧི ཏུཡ྄ཧཾ པིཏཱ ནརསཱིཧོ.

‘‘སིནིདྡྷསུགམྦྷཱིརམཉྫུསགྷོསོ, ཧིངྒུལཝཎྞརཏྟསུཛིཝ྄ཧོ;

ཝཱིསཏིཝཱིསཏིསེཏསུདནྟོ, ཨེས ཧི ཏུཡ྄ཧཾ པིཏཱ ནརསཱིཧོ.

‘‘ཁཏྟིཡསམྦྷཝཨགྒཀུལིནྡོ, དེཝམནུསྶནམསྶིཏཔཱདོ;

སཱིལསམཱདྷིཔཏིཊྛིཏཙིཏྟོ, ཨེས ཧི ཏུཡ྄ཧཾ པིཏཱ ནརསཱིཧོ.

‘‘ཝཊྚསུཝཊྚསུསཎྛིཏགཱིཝོ ¶ , སཱིཧཧནུམིགརཱཛསརཱིརོ;

ཀཉྩནསུཙྪཝིཨུཏྟམཝཎྞོ, ཨེས ཧི ཏུཡ྄ཧཾ པིཏཱ ནརསཱིཧོ.

‘‘ཨཉྫནསམཝཎྞསུནཱིལཀེསོ, ཀཉྩནཔཊྚཝིསུདྡྷནལཱཊོ;

ཨོསདྷིཔཎྜརསུདྡྷསུཨུཎྞོ, ཨེས ཧི ཏུཡ྄ཧཾ པིཏཱ ནརསཱིཧོ.

‘‘གཙྪནྟོནིལཔཐེ ¶ ཝིཡ ཙནྡོ, ཏཱརཱགཎཔརིཝཌྜྷིཏརཱུཔོ;

སཱཝཀམཛ྄ཛྷགཏོ སམཎིནྡོ, ཨེས ཧི ཏུཡ྄ཧཾ པིཏཱ ནརསཱིཧོ’’ཏི. –

ཨེཝམིམཱཧི དསཧི ནརསཱིཧགཱཐཱཧི ནཱམ ཨབྷིཏྠཝིཏྭཱ ‘‘ཏུམྷཱཀཾ པུཏྟོ ཀིར ཨིདཱནི པིཎྜཱཡ ཙརཏཱི’’ཏི རཉྙོ ཨཱརོཙེསི. རཱཛཱ སཾཝིགྒཧདཡོ ཧཏྠེན སཱཊཀཾ སཎྛཔེནྟོ ཏུརིཏཏུརིཏཾ ནིཀྑམིཏྭཱ ཝེགེན གནྟྭཱ བྷགཝཏོ པུརཏོ ཋཏྭཱ ཨཱཧ – ‘‘ཀིཾ, བྷནྟེ, ཨམྷེ ལཛྫཱཔེཐ, ཀིམཏྠཾ པིཎྜཱཡ ཙརཐ, ཀིཾ ‘ཨེཏྟཀཱནཾ བྷིཀྑཱུནཾ ན སཀྐཱ བྷཏྟཾ ལདྡྷུ’ནྟི སཉྙཾ ¶ ཀརིཏྠཱ’’ཏི. ཝཾསཙཱརིཏྟམེཏཾ, མཧཱརཱཛ, ཨམྷཱཀནྟི. ནནུ, བྷནྟེ, ཨམྷཱཀཾ མཧཱསམྨཏཁཏྟིཡཝཾསོ ནཱམ ཝཾསོ, ཏཏྠ ཙ ཨེཀཁཏྟིཡོཔི བྷིཀྑཱཙརོ ནཱམ ནཏྠཱིཏི. ‘‘ཨཡཾ, མཧཱརཱཛ, རཱཛཝཾསོ ནཱམ ཏཝ ཝཾསོ, ཨམྷཱཀཾ པན དཱིཔངྐརོ ཀོཎྜཉྙོ…པེ… ཀསྶཔོཏི ཨཡཾ བུདྡྷཝཾསོ ནཱམ. ཨེཏེ ཙ ཨཉྙེ ཙ ཨནེཀསཧསྶསངྑཱ བུདྡྷཱ བྷིཀྑཱཙརཱ, བྷིཀྑཱཙཱརེནེཝ ཛཱིཝིཀཾ ཀཔྤེསུ’’ནྟི ཨནྟརཝཱིཐིཡཾ ཋིཏོཝ –

‘‘ཨུཏྟིཊྛེ ནཔྤམཛྫེཡྻ, དྷམྨཾ སུཙརིཏཾ ཙརེ;

དྷམྨཙཱརཱི སུཁཾ སེཏི, ཨསྨིཾ ལོཀེ པརམྷི ཙཱ’’ཏི. (དྷ. པ. ༡༦༨) –

ཨིམཾ གཱཐམཱཧ. གཱཐཱཔརིཡོསཱནེ རཱཛཱ སོཏཱཔཏྟིཕལེ པཏིཊྛཱསི.

‘‘དྷམྨཾ ཙརེ སུཙརིཏཾ, ན ནཾ དུཙྩརིཏཾ ཙརེ;

དྷམྨཙཱརཱི སུཁཾ སེཏི, ཨསྨིཾ ལོཀེ པརམྷི ཙཱ’’ཏི. (དྷ. པ. ༡༦༩) –

ཨིམཾ ¶ པན གཱཐཾ སུཏྭཱ སཀདཱགཱམིཕལེ པཏིཊྛཱསི. མཧཱདྷམྨཔཱལཛཱཏཀཾ (ཛཱ. ༡.༡༠.༩༢ ཨཱདཡོ) སུཏྭཱ ཨནཱགཱམིཕལེ པཏིཊྛཱསི, མརཎསམཡེ སེཏཙྪཏྟསྶ ཧེཊྛཱ སིརིསཡནེ ནིཔནྣོཡེཝ ཨརཧཏྟཾ པཱཔུཎི. ཨརཉྙཝཱསེན པན པདྷཱནཱནུཡོགཀིཙྩཾ རཉྙོ ནཱཧོསི. སོཏཱཔཏྟིཕལཾ སཙྪིཀཏྭཱཡེཝ པན བྷགཝཏོ པཏྟཾ གཧེཏྭཱ སཔརིསཾ བྷགཝནྟཾ མཧཱཔཱསཱདཾ ཨཱརོཔེཏྭཱ པཎཱིཏེན ཁཱདནཱིཡེན བྷོཛནཱིཡེན པརིཝིསི. བྷཏྟཀིཙྩཔརིཡོསཱནེ སབྦཾ ཨིཏྠཱགཱརཾ ཨཱགནྟྭཱ བྷགཝནྟཾ ཝནྡི ཋཔེཏྭཱ རཱཧུལམཱཏརཾ. སཱ པན ‘‘གཙྪ, ཨཡྻཔུཏྟཾ ཝནྡཱཧཱི’’ཏི པརིཛནེན ཝུཙྩམཱནཱཔི ‘‘སཙེ མཡ྄ཧཾ གུཎོ ཨཏྠི, སཡམེཝ མམ སནྟིཀཾ ཨཡྻཔུཏྟོ ཨཱགམིསྶཏི, ཨཱགཏམེཝ ནཾ ཝནྡིསྶཱམཱི’’ཏི ཝཏྭཱ ན ཨགམཱསི.

བྷགཝཱ ¶ རཱཛཱནཾ པཏྟཾ གཱཧཱཔེཏྭཱ དྭཱིཧི ཨགྒསཱཝཀེཧི སདྡྷིཾ རཱཛདྷཱིཏཱཡ སིརིགབྦྷཾ གནྟྭཱ ‘‘རཱཛདྷཱིཏཱ ཡཐཱརུཙི ཝནྡམཱནཱ ན ཀིཉྩི ཝཏྟབྦཱ’’ཏི ཝཏྭཱ པཉྙཏྟཱསནེ ནིསཱིདི. སཱ ཝེགེནཱགནྟྭཱ གོཔྥཀེསུ གཧེཏྭཱ པཱདཔིཊྛིཡཾ སཱིསཾ པརིཝཏྟེཏྭཱ ཡཐཱཨཛ྄ཛྷཱསཡཾ ཝནྡི. རཱཛཱ རཱཛདྷཱིཏཱཡ བྷགཝཏི སིནེཧབཧུམཱནཱདིགུཎསམྤཏྟིཡོ ཀཐེསི ‘‘བྷནྟེ, མམ དྷཱིཏཱ ‘ཏུམྷེཧི ཀཱསཱཡཱནི ཝཏྠཱནི ནིཝཱསིཏཱནཱི’ཏི ¶ སུཏྭཱ ཏཏོ པཊྛཱཡ ཀཱསཱཡཝཏྠནིཝཏྠཱ ཛཱཏཱ, ཏུམྷཱཀཾ ཨེཀབྷཏྟིཀབྷཱཝཾ སུཏྭཱ ཨེཀབྷཏྟིཀཱཝ ཛཱཏཱ, ཏུམྷེཧི མཧཱསཡནསྶ ཚཌྜིཏབྷཱཝཾ སུཏྭཱ པཊྚིཀཱམཉྩཀེཡེཝ ནིཔནྣཱ, ཏུམྷཱཀཾ མཱལཱགནྡྷཱདཱིཧི ཝིརཏབྷཱཝཾ ཉཏྭཱ ཝིརཏམཱལཱགནྡྷཱཝ ཛཱཏཱ, ཨཏྟནོ ཉཱཏཀེཧི ‘མཡཾ པཊིཛགྒིསྶཱམཱ’ཏི སཱསནེ པེསིཏེཔི ཨེཀཉཱཏཀམྤི ན ཨོལོཀེསི, ཨེཝཾ གུཎསམྤནྣཱ མེ དྷཱིཏཱ བྷགཝཱ’’ཏི. ‘‘ཨནཙྪརིཡཾ, མཧཱརཱཛ, ཡཾ ཨིདཱནི ཏཡཱ རཀྑིཡམཱནཱ རཱཛདྷཱིཏཱ པརིཔཀྐེ ཉཱཎེ ཨཏྟཱནཾ རཀྑེཡྻ, ཨེསཱ པུབྦེ ཨནཱརཀྑཱ པབྦཏཔཱདེ ཝིཙརམཱནཱ ཨཔརིཔཀྐེ ཉཱཎེ ཨཏྟཱནཾ རཀྑཱི’’ཏི ཝཏྭཱ ཙནྡཀིནྣརཱིཛཱཏཀཾ (ཛཱ. ༡.༡༤.༡༨ ཨཱདཡོ) ཀཐེཏྭཱ ཨུཊྛཱཡཱསནཱ པཀྐཱམི.

དུཏིཡདིཝསེ པན ནནྡསྶ རཱཛཀུམཱརསྶ ཨབྷིསེཀགེཧཔྤཝེསནཝིཝཱཧམངྒལེསུ ཝཏྟམཱནེསུ ཏསྶ གེཧཾ གནྟྭཱ ཀུམཱརཾ པཏྟཾ གཱཧཱཔེཏྭཱ པབྦཱཛེཏུཀཱམོ མངྒལཾ ཝཏྭཱ ཨུཊྛཱཡཱསནཱ པཀྐཱམི. ཛནཔདཀལྱཱཎཱི ཀུམཱརཾ གཙྪནྟཾ དིསྭཱ ‘‘ཏུཝཊཾ ཁོ, ཨཡྻཔུཏྟ, ཨཱགཙྪེཡྻཱསཱི’’ཏི ཝཏྭཱ ¶ གཱིཝཾ པསཱརེཏྭཱ ཨོལོཀེསི. སོཔི བྷགཝནྟཾ ‘‘པཏྟཾ གཎྷཐཱ’’ཏི ཝཏྟུཾ ཨཝིསཧམཱནོ ཝིཧཱརཾཡེཝ ཨགམཱསི, ཏཾ ཨནིཙྪམཱནཾཡེཝ བྷགཝཱ པབྦཱཛེསི. ཨིཏི བྷགཝཱ ཀཔིལཝཏྠུཾ གནྟྭཱ ཏཏིཡདིཝསེ ནནྡཾ པབྦཱཛེསི.

སཏྟམེ དིཝསེ རཱཧུལམཱཏཱ ཀུམཱརཾ ཨལངྐརིཏྭཱ བྷགཝཏོ སནྟིཀཾ པེསེསི ‘‘པསྶ, ཏཱཏ, ཨེཏཾ ཝཱིསཏིསཧསྶསམཎཔརིཝུཏཾ སུཝཎྞཝཎྞཾ བྲཧྨརཱུཔཝཎྞཾ སམཎཾ, ཨཡཾ ཏེ པིཏཱ, ཨེཏསྶ མཧནྟཱ ནིདྷཡོ ཨཧེསུཾ, ཏྱཱསྶ ནིཀྑམནཀཱལཏོ པཊྛཱཡ ན པསྶཱམ, གཙྪ, ནཾ དཱཡཛྫཾ ཡཱཙཱཧི – ‘ཨཧཾ ཏཱཏ ཀུམཱརོ ཨབྷིསེཀཾ པཏྭཱ ཙཀྐཝཏྟཱི བྷཝིསྶཱམི, དྷནེན མེ ཨཏྠོ, དྷནཾ མེ དེཧི. སཱམིཀོ ཧི པུཏྟོ པིཏུ སནྟཀསྶཱ’ཏི’’. ཀུམཱརོ ཙ བྷགཝཏོ སནྟིཀཾ གནྟྭཱ པིཏུ སིནེཧཾ པཊིལབྷིཏྭཱ ཧཊྛཏུཊྛོ ‘‘སུཁཱ ཏེ, སམཎ, ཚཱཡཱ’’ཏི ཝཏྭཱ ཨཉྙཉྩ བཧུཾ ཨཏྟནོ ཨནུརཱུཔཾ ཝདནྟོ ཨཊྛཱསི. བྷགཝཱ ཀཏབྷཏྟཀིཙྩོ ཨནུམོདནཾ ཀཏྭཱ ཨུཊྛཱཡཱསནཱ པཀྐཱམི. ཀུམཱརོཔི ‘‘དཱཡཛྫཾ མེ, སམཎ, དེཧི, དཱཡཛྫཾ མེ, སམཎ, དེཧཱི’’ཏི བྷགཝནྟཾ ཨནུབནྡྷི. བྷགཝཱ ཀུམཱརཾ ན ནིཝཏྟཱཔེསི, པརིཛནོཔི བྷགཝཏཱ སདྡྷིཾ གཙྪནྟཾ ནིཝཏྟེཏུཾ ནཱསཀྑི. ཨིཏི སོ བྷགཝཏཱ སདྡྷིཾ ཨཱརཱམམེཝ ཨགམཱསི.

ཏཏོ ¶ བྷགཝཱ ཙིནྟེསི ‘‘ཡཾ ཨཡཾ པིཏུ སནྟཀཾ དྷནཾ ཨིཙྪཏི, ཏཾ ཝཊྚཱནུགཏཾ སཝིགྷཱཏཾ, ཧནྡསྶ བོདྷིམཎྜེ པཊིལདྡྷཾ སཏྟཝིདྷཾ ཨརིཡདྷནཾ དེམི, ལོཀུཏྟརདཱཡཛྫསྶ ནཾ སཱམིཀཾ ཀརོམཱི’’ཏི ཨཱཡསྨནྟཾ སཱརིཔུཏྟཾ ཨཱམནྟེསི ‘‘ཏེན ཧི, ཏྭཾ ¶ སཱརིཔུཏྟ, རཱཧུལཀུམཱརཾ པབྦཱཛེཧཱི’’ཏི. ཐེརོ ཏཾ པབྦཱཛེསི. པབྦཛིཏེ པན ཀུམཱརེ རཉྙོ ཨདྷིམཏྟཾ དུཀྑཾ ཨུཔྤཛྫི. ཏཾ ཨདྷིཝཱསེཏུཾ ཨསཀྐོནྟོ བྷགཝཏོ ནིཝེདེཏྭཱ ‘‘སཱདྷུ, བྷནྟེ, ཨཡྻཱ མཱཏཱཔིཏཱུཧི ཨནནུཉྙཱཏཾ པུཏྟཾ ན པབྦཱཛེཡྻུ’’ནྟི ཝརཾ ཡཱཙི. བྷགཝཱ ཏསྶ ཏཾ ཝརཾ དཏྭཱ པུནདིཝསེ རཱཛནིཝེསནེ ཀཏཔཱཏརཱསོ ཨེཀམནྟཾ ནིསིནྣེན རཉྙཱ ‘‘བྷནྟེ, ཏུམྷཱཀཾ དུཀྐརཀཱརིཀཀཱལེ ཨེཀཱ དེཝཏཱ མཾ ཨུཔསངྐམིཏྭཱ ‘པུཏྟོ ཏེ ཀཱལཀཏོ’ཏི ཨཱཧ, ཏསྶཱ ཝཙནཾ ཨསདྡཧནྟོ ‘ན མཡ྄ཧཾ པུཏྟོ བོདྷིཾ ཨཔྤཏྭཱ ཀཱལཾ ཀརོཏཱི’ཏི ཏཾ པཊིཀྑིཔི’’ནྟི ཝུཏྟེ ‘‘ཨིདཱནི ཀིཾ སདྡཧིསྶཐ, ཡེ ཏུམྷེ པུབྦེཔི ¶ ཨཊྛིཀཱནི དསྶེཏྭཱ ‘པུཏྟོ ཏེ མཏོ’ཏི ཝུཏྟེ ན སདྡཧིཏྠཱ’’ཏི ཨིམིསྶཱ ཨཊྛུཔྤཏྟིཡཱ མཧཱདྷམྨཔཱལཛཱཏཀཾ ཀཐེསི. ཀཐཱཔརིཡོསཱནེ རཱཛཱ ཨནཱགཱམིཕལེ པཏིཊྛཱསི.

ཨིཏི བྷགཝཱ པིཏརཾ ཏཱིསུ ཕལེསུ པཏིཊྛཱཔེཏྭཱ བྷིཀྑུསངྒྷཔརིཝུཏོ པུནདེཝ རཱཛགཧཾ གནྟྭཱ ཝེལུ༹ཝནེ ཝིཧཱསི. ཏསྨིཾ སམཡེ ཨནཱཐཔིཎྜིཀོ གཧཔཏི པཉྩཧི སཀཊསཏེཧི བྷཎྜཾ ཨཱདཱཡ རཱཛགཧེ ཨཏྟནོ པིཡསཧཱཡཀསྶ སེཊྛིནོ གེཧཾ གནྟྭཱ ཏཏྠ བུདྡྷསྶ བྷགཝཏོ ཨུཔྤནྣབྷཱཝཾ སུཏྭཱ བལཝཔཙྩཱུསསམཡེ དེཝཏཱནུབྷཱཝེན ཝིཝཊེན དྭཱརེན སཏྠཱརཾ ཨུཔསངྐམིཏྭཱ དྷམྨཾ སུཏྭཱ སོཏཱཔཏྟིཕལེ པཏིཊྛཱཡ དུཏིཡདིཝསེ བུདྡྷཔྤམུཁསྶ བྷིཀྑུསངྒྷསྶ མཧཱདཱནཾ དཏྭཱ སཱཝཏྠིཾ ཨཱགམནཏྠཱཡ སཏྠུ པཊིཉྙཾ གཧེཏྭཱ ཨནྟརཱམགྒེ པཉྩཙཏྟཱལཱིསཡོཛནཊྛཱནེ སཏསཧསྶཾ སཏསཧསྶཾ དཏྭཱ ཡོཛནིཀེ ཡོཛནིཀེ ཝིཧཱརེ ཀཱརེཏྭཱ ཛེཏཝནཾ ཀོཊིསནྠཱརེན ཨཊྛཱརསཧིརཉྙཀོཊཱིཧི ཀིཎིཏྭཱ ནཝཀམྨཾ པཊྛཔེསི. སོ མཛ྄ཛྷེ དསབལསྶ གནྡྷཀུཊིཾ ཀཱརེསི, ཏཾ པརིཝཱརེཏྭཱ ཨསཱིཏིམཧཱཐེརཱནཾ པཱཊིཡེཀྐསནྣིཝེསནེ ཨཱཝཱསེ ཨེཀཀཱུཊཱགཱརདྭིཀཱུཊཱགཱརཧཾསཝཊྚཀདཱིགྷསཱལཱམཎྜཔཱདིཝསེན སེསསེནཱསནཱནི པོཀྑརཎཱིཙངྐམནརཏྟིཊྛཱནདིཝཱཊྛཱནཱནི ཙཱཏི ཨཊྛཱརསཀོཊིཔརིཙྩཱགེན རམཎཱིཡེ བྷཱུམིབྷཱགེ མནོརམཾ ཝིཧཱརཾ ཀཱརཱཔེཏྭཱ དསབལསྶ ཨཱགམནཏྠཱཡ དཱུཏཾ པེསེསི. སཏྠཱ དཱུཏསྶ ཝཙནཾ སུཏྭཱ མཧཱབྷིཀྑུསངྒྷཔརིཝུཏོ རཱཛགཧཱ ནིཀྑམིཏྭཱ ཨནུཔུབྦེན སཱཝཏྠིནགརཾ པཱཔུཎི.

མཧཱསེཊྛིཔི ཁོ ཝིཧཱརམཧཾ སཛྫེཏྭཱ ཏཐཱགཏསྶ ཛེཏཝནཔྤཝིསནདིཝསེ པུཏྟཾ སབྦཱལངྐཱརཔཊིམཎྜིཏཾ ཀཏྭཱ ཨལངྐཏཔཊིཡཏྟེཧེཝ པཉྩཧི ཀུམཱརསཏེཧི སདྡྷིཾ པེསེསི. སོ སཔརིཝཱརོ པཉྩཝཎྞཝཏྠསམུཛྫལཱནི པཉྩ དྷཛསཏཱནི གཧེཏྭཱ དསབལསྶ ¶ པུརཏོ ཨཧོསི. ཏེསཾ ¶ པཙྪཏོ མཧཱསུབྷདྡཱ ཙཱུལ༹སུབྷདྡཱཏི དྭེ སེཊྛིདྷཱིཏརོ པཉྩཧི ཀུམཱརིཀཱསཏེཧི སདྡྷིཾ པུཎྞགྷཊེ གཧེཏྭཱ ནིཀྑམིཾསུ. ཏཱསཾ པཙྪཏོ སེཊྛིབྷརིཡཱ སབྦཱལངྐཱརཔཊིམཎྜིཏཱ པཉྩཧི མཱཏུགཱམསཏེཧི སདྡྷིཾ པུཎྞཔཱཏིཡོ གཧེཏྭཱ ནིཀྑམི. སབྦེསཾ པཙྪཏོ སཡཾ མཧཱསེཊྛི ཨཧཏཝཏྠནིཝཏྠོ ¶ ཨཧཏཝཏྠནིཝཏྠེཧེཝ པཉྩཧི སེཊྛིསཏེཧི སདྡྷིཾ བྷགཝནྟཾ ཨབྦྷུགྒཉྪི. བྷགཝཱ ཨིམཾ ཨུཔཱསཀཔརིསཾ པུརཏོ ཀཏྭཱ མཧཱབྷིཀྑུསངྒྷཔརིཝུཏོ ཨཏྟནོ སརཱིརཔྤབྷཱཡ སུཝཎྞརསསེཀཔིཉྫརཱནི ཝིཡ ཝནནྟརཱནི ཀུརུམཱནོ ཨནནྟཱཡ བུདྡྷལཱིལཱ༹ཡ ཨཔཊིསམཱཡ བུདྡྷསིརིཡཱ ཛེཏཝནཝིཧཱརཾ པཱཝིསི.

ཨཐ ནཾ ཨནཱཐཔིཎྜིཀོ པུཙྪི – ‘‘ཀཐཱཧཾ, བྷནྟེ, ཨིམསྨིཾ ཝིཧཱརེ པཊིཔཛྫཱམཱི’’ཏི. ཏེན ཧི གཧཔཏི ཨིམཾ ཝིཧཱརཾ ཨཱགཏཱནཱགཏསྶ ཙཱཏུདྡིསསྶ བྷིཀྑུསངྒྷསྶ དེཧཱིཏི. ‘‘སཱདྷུ, བྷནྟེ’’ཏི མཧཱསེཊྛི སུཝཎྞབྷིངྐཱརཾ ཨཱདཱཡ དསབལསྶ ཧཏྠེ ཨུདཀཾ པཱཏེཏྭཱ ‘‘ཨིམཾ ཛེཏཝནཝིཧཱརཾ ཨཱགཏཱནཱགཏསྶ ཙཱཏུདྡིསསྶ བྷིཀྑུསངྒྷསྶ དམྨཱི’’ཏི ཨདཱསི. སཏྠཱ ཝིཧཱརཾ པཊིགྒཧེཏྭཱ ཨནུམོདནཾ ཀརོནྟོ –

‘‘སཱིཏཾ ཨུཎྷཾ པཊིཧནྟི, ཏཏོ ཝཱལ༹མིགཱནི ཙ;

སརཱིསཔེ ཙ མཀསེ, སིསིརེ ཙཱཔི ཝུཊྛིཡོ.

‘‘ཏཏོ ཝཱཏཱཏཔོ གྷོརོ, སཉྫཱཏོ པཊིཧཉྙཏི;

ལེཎཏྠཉྩ སུཁཏྠཉྩ, ཛྷཱཡིཏུཉྩ ཝིཔསྶིཏུཾ.

‘‘ཝིཧཱརདཱནཾ སངྒྷསྶ, ཨགྒཾ བུདྡྷེན ཝཎྞིཏཾ;

ཏསྨཱ ཧི པཎྜིཏོ པོསོ, སམྤསྶཾ ཨཏྠམཏྟནོ.

‘‘ཝིཧཱརེ ཀཱརཡེ རམྨེ, ཝཱསཡེཏྠ བཧུསྶུཏེ;

ཏེསཾ ཨནྣཉྩ པཱནཉྩ, ཝཏྠསེནཱསནཱནི ཙ.

‘‘དདེཡྻ ཨུཛུབྷཱུཏེསུ, ཝིཔྤསནྣེན ཙེཏསཱ;

ཏེ ¶ ཏསྶ དྷམྨཾ དེསེནྟི, སབྦདུཀྑཱཔནཱུདནཾ;

ཡཾ སོ དྷམྨཾ ཨིདྷཉྙཱཡ, པརིནིབྦཱཏི ཨནཱསཝོ’’ཏི. (ཙཱུལ༹ཝ. ༢༩༥) –

ཝིཧཱརཱནིསཾསཾ ¶ ཀཐེསི. ཨནཱཐཔིཎྜིཀོ དུཏིཡདིཝསཏོ པཊྛཱཡ ཝིཧཱརམཧཾ ཨཱརབྷི. ཝིསཱཁཱཡ པཱསཱདམཧོ ཙཏཱུཧི མཱསེཧི ནིཊྛིཏོ, ཨནཱཐཔིཎྜིཀསྶ པན ཝིཧཱརམཧོ ནཝཧི མཱསེཧི ནིཊྛཱསི. ཝིཧཱརམཧེཔི ཨཊྛཱརསེཝ ཀོཊིཡོ པརིཙྩཱགཾ ཨགམཾསུ. ཨིཏི ཨེཀསྨིཾཡེཝ ཝིཧཱརེ ཙཏུཔཎྞཱསཀོཊིསངྑྱཾ དྷནཾ པརིཙྩཛི.

ཨཏཱིཏེ ¶ པན ཝིཔསྶིསྶ བྷགཝཏོ ཀཱལེ པུནབྦསུམིཏྟོ ནཱམ སེཊྛི སུཝཎྞིཊྛཀཱསནྠཱརེན ཀིཎིཏྭཱ ཏསྨིཾཡེཝ ཋཱནེ ཡོཛནཔྤམཱཎཾ སངྒྷཱརཱམཾ ཀཱརེསི. སིཁིསྶ བྷགཝཏོ ཀཱལེ སིརིཝཌྜྷོ ནཱམ སེཊྛི སུཝཎྞཕཱལསནྠཱརེན ཀིཎིཏྭཱ ཏསྨིཾཡེཝ ཋཱནེ ཏིགཱཝུཏཔྤམཱཎཾ སངྒྷཱརཱམཾ ཀཱརེསི. ཝེསྶབྷུསྶ བྷགཝཏོ ཀཱལེ སོཏྠིཛོ ནཱམ སེཊྛི སུཝཎྞཧཏྠིཔདསནྠཱརེན ཀིཎིཏྭཱ ཏསྨིཾཡེཝ ཋཱནེ ཨཌྜྷཡོཛནཔྤམཱཎཾ སངྒྷཱརཱམཾ ཀཱརེསི. ཀཀུསནྡྷསྶ བྷགཝཏོ ཀཱལེ ཨཙྩུཏོ ནཱམ སེཊྛི སུཝཎྞིཊྛཀཱསནྠཱརེན ཀིཎིཏྭཱ ཏསྨིཾཡེཝ ཋཱནེ གཱཝུཏཔྤམཱཎཾ སངྒྷཱརཱམཾ ཀཱརེསི. ཀོཎཱགམནསྶ བྷགཝཏོ ཀཱལེ ཨུགྒོ ནཱམ སེཊྛི སུཝཎྞཀཙྪཔསནྠཱརེན ཀིཎིཏྭཱ ཏསྨིཾཡེཝ ཋཱནེ ཨཌྜྷགཱཝུཏཔྤམཱཎཾ སངྒྷཱརཱམཾ ཀཱརེསི. ཀསྶཔསྶ བྷགཝཏོ ཀཱལེ སུམངྒལོ ནཱམ སེཊྛི སུཝཎྞཀཊྚིསནྠཱརེན ཀིཎིཏྭཱ ཏསྨིཾཡེཝ ཋཱནེ སོལ༹སཀརཱིསཔྤམཱཎཾ སངྒྷཱརཱམཾ ཀཱརེསི. ཨམྷཱཀཾ པན བྷགཝཏོ ཀཱལེ ཨནཱཐཔིཎྜིཀོ ནཱམ སེཊྛི ཀཧཱཔཎཀོཊིསནྠཱརེན ཀིཎིཏྭཱ ཏསྨིཾཡེཝ ཋཱནེ ཨཊྛཀརཱིསཔྤམཱཎཾ སངྒྷཱརཱམཾ ཀཱརེསི. ཨིདཾ ཀིར ཋཱནཾ སབྦབུདྡྷཱནཾ ཨཝིཛཧིཏཊྛཱནམེཝ.

ཨིཏི མཧཱབོདྷིམཎྜེ སབྦཉྙུཏཔྤཏྟིཏོ ཡཱཝ མཧཱཔརིནིབྦཱནམཉྩཱ ཡསྨིཾ ཡསྨིཾ ཋཱནེ བྷགཝཱ ཝིཧཱསི, ཨིདཾ སནྟིཀེནིདཱནཾ ནཱམ, ཏསྶ ཝསེན སབྦཛཱཏཀཱནི ཝཎྞཡིསྶཱམ.

ནིདཱནཀཐཱ ནིཊྛིཏཱ.

༡. ཨེཀཀནིཔཱཏོ

༡. ཨཔཎྞཀཝགྒོ

༡. ཨཔཎྞཀཛཱཏཀཝཎྞནཱ

ཨིམཾ ¶ ¶ ཏཱཝ ¶ ཨཔཎྞཀདྷམྨདེསནཾ བྷགཝཱ སཱཝཏྠིཾ ཨུཔནིསྶཱཡ ཛེཏཝནམཧཱཝིཧཱརེ ཝིཧརནྟོ ཀཐེསི. ཀཾ པན ཨཱརབྦྷ ཨཡཾ ཀཐཱ སམུཊྛིཏཱཏི? སེཊྛིསྶ སཧཱཡཀེ པཉྩསཏེ ཏིཏྠིཡསཱཝཀེ. ཨེཀསྨིཉྷི དིཝསེ ཨནཱཐཔིཎྜིཀོ སེཊྛི ཨཏྟནོ སཧཱཡཀེ པཉྩསཏེ ཨཉྙཏིཏྠིཡསཱཝཀེ ཨཱདཱཡ བཧུཾ མཱལཱགནྡྷཝིལེཔནཉྩེཝ སཔྤིཏེལམདྷུཕཱཎིཏཝཏྠཙྪཱདནཱནི ཙ གཱཧཱཔེཏྭཱ ཛེཏཝནཾ གནྟྭཱ བྷགཝནྟཾ ཝནྡིཏྭཱ གནྡྷམཱལཱདཱིཧི པཱུཛེཏྭཱ བྷེསཛྫཱནི ཙེཝ ཝཏྠཱནི ཙ བྷིཀྑུསངྒྷསྶ ཝིསྶཛྫེཏྭཱ ཚ ནིསཛྫཱདོསེ ཝཛྫེཏྭཱ ཨེཀམནྟཾ ནིསཱིདི. ཏེཔི ཨཉྙཏིཏྠིཡསཱཝཀཱ ཏཐཱགཏཾ ཝནྡིཏྭཱ སཏྠུ པུཎྞཙནྡསསྶིརིཀཾ མུཁཾ, ལཀྑཎཱནུབྱཉྫནཔཊིམཎྜིཏཾ བྱཱམཔྤབྷཱཔརིཀྑིཏྟཾ བྲཧྨཀཱཡཾ, ཨཱཝེལཱ༹ཝེལཱ༹ ཡམཀཡམཀཱ ཧུཏྭཱ ནིཙྪརནྟིཡོ གྷནབུདྡྷརསྨིཡོ ཙ ཨོལོཀཡམཱནཱ ཨནཱཐཔིཎྜིཀསྶ སམཱིཔེཡེཝ ནིསཱིདིཾསུ.

ཨཐ ནེསཾ སཏྠཱ མནོསིལཱཏལེ སཱིཧནཱདཾ ནདནྟོ ཏརུཎསཱིཧོ ཝིཡ གཛྫནྟོ པཱཝུསྶཀམེགྷོ ཝིཡ ཙ ཨཱཀཱསགངྒཾ ཨོཏཱརེནྟོ ¶ ཝིཡ ཙ རཏནདཱམཾ གནྠེནྟོ ཝིཡ ཙ ཨཊྛངྒསམནྣཱགཏེན སཝནཱིཡེན ཀམནཱིཡེན བྲཧྨསྶརེན ནཱནཱནཡཝིཙིཏྟཾ མདྷུརདྷམྨཀཐཾ ཀཐེསི. ཏེ སཏྠུ དྷམྨདེསནཾ སུཏྭཱ པསནྣཙིཏྟཱ ཨུཊྛཱཡ དསབལཾ ཝནྡིཏྭཱ ཨཉྙཏིཏྠིཡསརཎཾ བྷིནྡིཏྭཱ བུདྡྷཾ སརཎཾ ཨགམཾསུ. ཏེ ཏཏོ པཊྛཱཡ ནིཙྩཀཱལཾ ཨནཱཐཔིཎྜིཀེན སདྡྷིཾ གནྡྷམཱལཱདིཧཏྠཱ ཝིཧཱརཾ གནྟྭཱ དྷམྨཾ སུཎནྟི, དཱནཾ དེནྟི, སཱིལཾ རཀྑནྟི, ཨུཔོསཐཀམྨཾ ཀརོནྟི.

ཨཐ བྷགཝཱ སཱཝཏྠིཏོ པུནདེཝ རཱཛགཧཾ ཨགམཱསི. ཏེ ཏཐཱགཏསྶ གཏཀཱལེ ཏཾ སརཎཾ བྷིནྡིཏྭཱ པུན ཨཉྙཏིཏྠིཡསརཎཾ གནྟྭཱ ཨཏྟནོ ¶ མཱུལཊྛཱནེཡེཝ པཏིཊྛིཏཱ. བྷགཝཱཔི སཏྟཊྛ མཱསེ ¶ ཝཱིཏིནཱམེཏྭཱ པུན ཛེཏཝནམེཝ ཨགམཱསི. ཨནཱཐཔིཎྜིཀོ པུནཔི ཏེ ཨཱདཱཡ སཏྠུ སནྟིཀཾ གནྟྭཱ སཏྠཱརཾ གནྡྷམཱལཱདཱིཧི པཱུཛེཏྭཱ ཝནྡིཏྭཱ ཨེཀམནྟཾ ནིསཱིདི. ཏེཔི བྷགཝནྟཾ ཝནྡིཏྭཱ ཨེཀམནྟཾ ནིསཱིདིཾསུ. ཨཐ ནེསཾ ཏཐཱགཏེ ཙཱརིཀཾ པཀྐནྟེ གཧིཏསརཎཾ བྷིནྡིཏྭཱ པུན ཨཉྙཏིཏྠིཡསརཎམེཝ གཧེཏྭཱ མཱུལེ པཏིཊྛིཏབྷཱཝཾ བྷགཝཏོ ཨཱརོཙེསི.

བྷགཝཱ ཨཔརིམིཏཀཔྤཀོཊིཡོ ནིརནྟརཾ པཝཏྟིཏཝཙཱིསུཙརིཏཱནུབྷཱཝེན དིབྦགནྡྷགནྡྷིཏཾ ནཱནཱགནྡྷཔཱུརིཏཾ རཏནཀརཎྜཀཾ ཝིཝརནྟོ ཝིཡ མུཁཔདུམཾ ཝིཝརིཏྭཱ མདྷུརསྶརཾ ནིཙྪཱརེནྟོ ‘‘སཙྩཾ ཀིར ཏུམྷེ ཨུཔཱསཀཱ ཏཱིཎི སརཎཱནི བྷིནྡིཏྭཱ ཨཉྙཏིཏྠིཡསརཎཾ གཏཱ’’ཏི པུཙྪི. ཨཐ ཏེཧི པཊིཙྪཱདེཏུཾ ཨསཀྐོནྟེཧི ‘‘སཙྩཾ བྷགཝཱ’’ཏི ཝུཏྟེ སཏྠཱ ‘‘ཨུཔཱསཀཱ ཧེཊྛཱ ཨཝཱིཙིཾ ཨུཔརི བྷཝགྒཾ པརིཙྪེདཾ ཀཏྭཱ ཏིརིཡཾ ཨཔརིམཱཎཱསུ ལོཀདྷཱཏཱུསུ སཱིལཱདཱིཧི གུཎེཧི བུདྡྷེན སདིསོ ནཱམ ནཏྠི, ཀུཏོ ཨདྷིཀཏརོ’’ཏི. ‘‘ཡཱཝཏཱ, བྷིཀྑཝེ, སཏྟཱ ཨཔདཱ ཝཱ དྭིཔདཱ ཝཱ ཙཏུཔྤདཱ ཝཱ བཧུཔྤདཱ ཝཱ, ཏཐཱགཏོ ཏེསཾ ཨགྒམཀྑཱཡཏི (སཾ. ནི. ༥.༡༣༩; ཨ. ནི. ༤.༣༤), ཡཾ ཀིཉྩི ཝིཏྟཾ ཨིདྷ ཝཱ ཧུརཾ ཝཱ…པེ… (ཁུ. པཱ. ༦.༣; སུ. ནི. ༢༢༦) ཨགྒཏོ ཝེ པསནྣཱན’’ནྟིཨཱདཱིཧི (ཨ. ནི. ༤.༣༤; ཨིཏིཝུ. ༩༠) སུཏྟེཧི པཀཱསིཏེ རཏནཏྟཡགུཎེ པཀཱསེཏྭཱ ‘‘ཨེཝཾ ཨུཏྟམགུཎེཧི སམནྣཱགཏཾ རཏནཏྟཡཾ སརཎཾ གཏཱ ཨུཔཱསཀཱ ཝཱ ཨུཔཱསིཀཱ ཝཱ ནིརཡཱདཱིསུ ནིབྦཏྟཀཱ ནཱམ ནཏྠི, ཨཔཱཡནིབྦཏྟིཏོ པན མུཙྩིཏྭཱ དེཝལོཀེ ཨུཔྤཛྫིཏྭཱ མཧཱསམྤཏྟིཾ ཨནུབྷོནྟི, ཏསྨཱ ཏུམྷེཧི ཨེཝརཱུཔཾ སརཎཾ བྷིནྡིཏྭཱ ཨཉྙཏིཏྠིཡསརཎཾ གཙྪནྟེཧི ཨཡུཏྟཾ ཀཏ’’ནྟི ཨཱཧ.

ཨེཏྠ ཙ ཏཱིཎི རཏནཱནི མོཀྑཝསེན ཨུཏྟམཝསེན སརཎགཏཱནཾ ཨཔཱཡེསུ ནིབྦཏྟིཡཱ ཨབྷཱཝདཱིཔནཏྠཾ ཨིམཱནི སུཏྟཱནི དསྶེཏབྦཱནི –

‘‘ཡེ ¶ ཀེཙི བུདྡྷཾ སརཎཾ གཏཱསེ, ན ཏེ གམིསྶནྟི ཨཔཱཡབྷཱུམིཾ;

པཧཱཡ མཱནུསཾ དེཧཾ, དེཝཀཱཡཾ པརིཔཱུརེསྶནྟི. (དཱི. ནི. ༢.༣༣༢; སཾ. ནི. ༡.༣༧);

‘‘ཡེ ¶ ཀེཙི དྷམྨཾ སརཎཾ གཏཱསེ, ན ཏེ གམིསྶནྟི ཨཔཱཡབྷཱུམིཾ;

པཧཱཡ མཱནུསཾ དེཧཾ, དེཝཀཱཡཾ པརིཔཱུརེསྶནྟི.

‘‘ཡེ ¶ ཀེཙི སངྒྷཾ སརཎཾ གཏཱསེ, ན ཏེ གམིསྶནྟི ཨཔཱཡབྷཱུམིཾ;

པཧཱཡ མཱནུསཾ དེཧཾ, དེཝཀཱཡཾ པརིཔཱུརེསྶནྟི.

‘‘བཧུཾ ཝེ སརཎཾ ཡནྟི, པབྦཏཱནི ཝནཱནི ཙ;

ཨཱརཱམརུཀྑཙེཏྱཱནི, མནུསྶཱ བྷཡཏཛྫིཏཱ.

‘‘ནེཏཾ ཁོ སརཎཾ ཁེམཾ, ནེཏཾ སརཎམུཏྟམཾ;

ནེཏཾ སརཎམཱགམྨ, སབྦདུཀྑཱ པམུཙྩཏི.

‘‘ཡོ ཙ བུདྡྷཉྩ དྷམྨཉྩ, སངྒྷཉྩ སརཎཾ གཏོ;

ཙཏྟཱརི ཨརིཡསཙྩཱནི, སམྨཔྤཉྙཱཡ པསྶཏི.

‘‘དུཀྑཾ དུཀྑསམུཔྤཱདཾ, དུཀྑསྶ ཙ ཨཏིཀྐམཾ;

ཨརིཡཉྩཊྛངྒིཀཾ མགྒཾ, དུཀྑཱུཔསམགཱམིནཾ.

‘‘ཨེཏཾ ཁོ སརཎཾ ཁེམཾ, ཨེཏཾ སརཎམུཏྟམཾ;

ཨེཏཾ སརཎམཱགམྨ, སབྦདུཀྑཱ པམུཙྩཏཱི’’ཏི. (དྷ. པ. ༡༨༨-༡༩༢);

ན ཀེཝལཉྩ ནེསཾ སཏྠཱ ཨེཏྟཀཾཡེཝ དྷམྨཾ དེསེསི, ཨཔིཙ ཁོ ‘‘ཨུཔཱསཀཱ བུདྡྷཱནུསྶཏིཀམྨཊྛཱནཾ ནཱམ, དྷམྨཱནུསྶཏིཀམྨཊྛཱནཾ ནཱམ, སངྒྷཱནུསྶཏིཀམྨཊྛཱནཾ ནཱམ སོཏཱཔཏྟིམགྒཾ དེཏི, སོཏཱཔཏྟིཕལཾ དེཏི, སཀདཱགཱམིམགྒཾ དེཏི, སཀདཱགཱམིཕལཾ དེཏི, ཨནཱགཱམིམགྒཾ དེཏི, ཨནཱགཱམིཕལཾ དེཏི, ཨརཧཏྟམགྒཾ དེཏི, ཨརཧཏྟཕལཾ དེཏཱི’’ཏིཨེཝམཱདཱིཧིཔི ནཡེཧི དྷམྨཾ དེསེཏྭཱ ‘‘ཨེཝརཱུཔཾ ནཱམ སརཎཾ བྷིནྡནྟེཧི ཨཡུཏྟཾ ཏུམྷེཧི ཀཏ’’ནྟི ཨཱཧ. ཨེཏྠ ཙ བུདྡྷཱནུསྶཏིཀམྨཊྛཱནཱདཱིནཾ སོཏཱཔཏྟིམགྒཱདིཔྤདཱནཾ ‘‘ཨེཀདྷམྨོ, བྷིཀྑཝེ, བྷཱཝིཏོ བཧུལཱིཀཏོ ཨེཀནྟནིབྦིདཱཡ ཝིརཱགཱཡ ནིརོདྷཱཡ ཨུཔསམཱཡ ཨབྷིཉྙཱཡ སམྦོདྷཱཡ ནིབྦཱནཱཡ ¶ སཾཝཏྟཏི. ཀཏམོ ཨེཀདྷམྨོ? བུདྡྷཱནུསྶཏཱི’’ཏིཨེཝམཱདཱིཧི (ཨ. ནི. ༡.༢༩༦) སུཏྟེཧི དཱིཔེཏབྦཾ.

ཨེཝཾ བྷགཝཱ ནཱནཔྤཀཱརེཧི ཨུཔཱསཀེ ཨོཝདིཏྭཱ ‘‘ཨུཔཱསཀཱ པུབྦེཔི མནུསྶཱ ཨསརཎཾ ‘སརཎ’ནྟི ཏཀྐགྒཱཧེན ཝིརདྡྷགྒཱཧེན གཧེཏྭཱ ཨམནུསྶཔརིགྒཧིཏེ ཀནྟཱརེ ཡཀྑབྷཀྑཱ ཧུཏྭཱ ¶ མཧཱཝིནཱསཾ པཏྟཱ, ཨཔཎྞཀགྒཱཧཾ པན ཨེཀཾསིཀགྒཱཧཾ ཨཝིརདྡྷགྒཱཧཾ གཧིཏམནུསྶཱ ཏསྨིཾཡེཝ ཀནྟཱརེ སོཏྠིབྷཱཝཾ པཏྟཱ’’ཏི ཝཏྭཱ ཏུཎྷཱི ཨཧོསི. ཨཐ ཁོ ཨནཱཐཔིཎྜིཀོ གཧཔཏི ཨུཊྛཱཡཱསནཱ བྷགཝནྟཾ ཝནྡིཏྭཱ ཨབྷིཏྠཝིཏྭཱ སིརསྨིཾ ཨཉྫལིཾ པཏིཊྛཱཔེཏྭཱ ཨེཝམཱཧ ‘‘བྷནྟེ, ཨིདཱནི ཏཱཝ ཨིམེསཾ ཨུཔཱསཀཱནཾ ཨུཏྟམསརཎཾ བྷིནྡིཏྭཱ ཏཀྐགྒཧཎཾ ཨམྷཱཀཾ པཱཀཊཾ, པུབྦེ པན ཨམནུསྶཔརིགྒཧིཏེ ཀནྟཱརེ ཏཀྐིཀཱནཾ ཝིནཱསོ, ཨཔཎྞཀགྒཱཧཾ གཧིཏམནུསྶཱནཉྩ སོཏྠིབྷཱཝོ ཨམྷཱཀཾ པཊིཙྪནྣོ, ཏུམྷཱཀམེཝ ¶ པཱཀཊོ, སཱདྷུ ཝཏ ནོ བྷགཝཱ ཨཱཀཱསེ པུཎྞཙནྡཾ ཨུཊྛཱཔེནྟོ ཝིཡ ཨིམཾ ཀཱརཎཾ པཱཀཊཾ ཀརོཏཱུ’’ཏི. ཨཐ བྷགཝཱ ‘‘མཡཱ ཁོ, གཧཔཏི, ཨཔརིམིཏཀཱལཾ དས པཱརམིཡོ པཱུརེཏྭཱ ལོཀསྶ ཀངྑཙྪེདནཏྠམེཝ སབྦཉྙུཏཉྙཱཎཾ པཊིཝིདྡྷཾ, སཱིཧཝསཱཡ སུཝཎྞནཱལི༹ཾ པཱུརེནྟོ ཝིཡ སཀྐཙྩཾ སོཏཾ ཨོདཧིཏྭཱ སུཎོཧཱི’’ཏི སེཊྛིནོ སཏུཔྤཱདཾ ཛནེཏྭཱ ཧིམགབྦྷཾ པདཱལེཏྭཱ པུཎྞཙནྡཾ ནཱིཧརནྟོ ཝིཡ བྷཝནྟརེན པཊིཙྪནྣཀཱརཎཾ པཱཀཊཾ ཨཀཱསི.

ཨཏཱིཏེ ཀཱསིརཊྛེ བཱརཱཎསིནགརེ བྲཧྨདཏྟོ ནཱམ རཱཛཱ ཨཧོསི. ཏདཱ བོདྷིསཏྟོ སཏྠཝཱཧཀུལེ པཊིསནྡྷིཾ གཧེཏྭཱ དསམཱསཙྩཡེན མཱཏུཀུཙྪིཏོ ནིཀྑམིཏྭཱ ཨནུཔུབྦེན ཝཡཔྤཏྟོ པཉྩཧི སཀཊསཏེཧི ཝཎིཛྫཾ ཀརོནྟོ ཝིཙརཏི. སོ ཀདཱཙི པུབྦནྟཏོ ཨཔརནྟཾ གཙྪཏི, ཀདཱཙི ཨཔརནྟཏོ པུབྦནྟཾ. བཱརཱཎསིཡཾཡེཝ ཨཉྙོཔི སཏྠཝཱཧཔུཏྟོ ཨཏྠི བཱལོ ཨབྱཏྟོ ཨནུཔཱཡཀུསལོ. ཏདཱ བོདྷིསཏྟོ བཱརཱཎསིཏོ མཧགྒྷཾ བྷཎྜཾ གཧེཏྭཱ པཉྩ སཀཊསཏཱནི པཱུརེཏྭཱ གམནསཛྫཱནི ཀཏྭཱ ཋཔེསི. སོཔི བཱལསཏྠཝཱཧཔུཏྟོ ཏཐེཝ པཉྩ སཀཊསཏཱནི པཱུརེཏྭཱ གམནསཛྫཱནི ཀཏྭཱ ཋཔེསི.

ཏདཱ བོདྷིསཏྟོ ཙིནྟེསི ‘‘སཙེ ཨཡཾ བཱལསཏྠཝཱཧཔུཏྟོ མཡཱ སདྡྷིཾཡེཝ གམིསྶཏི, སཀཊསཧསྶེ ཨེཀཏོ མགྒཾ གཙྪནྟེ མགྒོཔི ¶ ནཔྤཧོསྶཏི, མནུསྶཱནཾ དཱརུདཀཱདཱིནིཔི, བལིབདྡཱནཾ ཏིཎཱནིཔི དུལླབྷཱནི བྷཝིསྶནྟི, ཨེཏེན ཝཱ མཡཱ ཝཱ པུརཏོ གནྟུཾ ཝཊྚཏཱི’’ཏི. སོ ཏཾ པཀྐོསཱཔེཏྭཱ ཨེཏམཏྠཾ ཨཱརོཙེཏྭཱ ‘‘དྭཱིཧིཔི ཨམྷེཧི ཨེཀཏོ གནྟུཾ ན སཀྐཱ, ཀིཾ ཏྭཾ པུརཏོ གམིསྶསི, ཨུདཱཧུ པཙྪཏོ’’ཏི ཨཱཧ. སོ ཙིནྟེསི ‘‘མཡི པུརཏོ གཙྪནྟེ བཧཱུ ཨཱནིསཾསཱ, མགྒེན ཨབྷིནྣེནེཝ གམིསྶཱམི, གོཎཱ ཨནཱམཊྛཏིཎཾ ཁཱདིསྶནྟི, མནུསྶཱནཾ ཨནཱམཊྛཾ སཱུཔེཡྻཔཎྞཾ བྷཝིསྶཏི, པསནྣཾ ཨུདཀཾ བྷཝིསྶཏི, ཡཐཱརུཙིཾ ཨགྒྷཾ ཋཔེཏྭཱ བྷཎྜཾ ཝིཀྐིཎིསྶཱམཱི’’ཏི. སོ ‘‘ཨཧཾ, སམྨ, པུརཏོ གམིསྶཱམཱི’’ཏི ¶ ཨཱཧ. བོདྷིསཏྟོཔི པཙྪཏོ གམནེ བཧཱུ ཨཱནིསཾསེ ཨདྡས. ཨེཝཾ ཧིསྶ ཨཧོསི – ‘‘པུརཏོ གཙྪནྟཱ མགྒེ ཝིསམཊྛཱནཾ སམཾ ཀརིསྶནྟི, ཨཧཾ ཏེཧི གཏམགྒེན གམིསྶཱམི, པུརཏོ གཏེཧི བལིབདྡེཧི པརིཎཏཐདྡྷཏིཎེ ¶ ཁཱདིཏེ མམ གོཎཱ པུན ཨུཊྛིཏཱནི མདྷུརཏིཎཱནི ཁཱདིསྶནྟི, གཧིཏཔཎྞཊྛཱནཏོ ཨུཊྛིཏཾ མནུསྶཱནཾ སཱུཔེཡྻཔཎྞཾ མདྷུརཾ བྷཝིསྶཏི, ཨནུདཀེ ཋཱནེ ཨཱཝཱཊཾ ཁནིཏྭཱ ཨེཏེ ཨུདཀཾ ཨུཔྤཱདེསྶནྟི, ཏེཧི ཀཏེསུ ཨཱཝཱཊེསུ མཡཾ ཨུདཀཾ པིཝིསྶཱམ, ཨགྒྷཊྛཔནཾ ནཱམ མནུསྶཱནཾ ཛཱིཝིཏཱ ཝོརོཔནསདིསཾ, ཨཧཾ པཙྪཏོ གནྟྭཱ ཨེཏེཧི ཋཔིཏགྒྷེན བྷཎྜཾ ཝིཀྐིཎིསྶཱམཱི’’ཏི. ཨཐ སོ ཨེཏྟཀེ ཨཱནིསཾསེ དིསྭཱ ‘‘སམྨ, ཏྭཾ པུརཏོ གཙྪཱཧཱི’’ཏི ཨཱཧ. ‘‘སཱདྷུ, སམྨཱ’’ཏི བཱལསཏྠཝཱཧོ སཀཊཱནི ཡོཛེཏྭཱ ནིཀྑནྟོ ཨནུཔུབྦེན མནུསྶཱཝཱསཾ ཨཏིཀྐམིཏྭཱ ཀནྟཱརམུཁཾ པཱཔུཎི.

ཀནྟཱརཾ ནཱམ – ཙོརཀནྟཱརཾ, ཝཱལ༹ཀནྟཱརཾ, ནིརུདཀཀནྟཱརཾ, ཨམནུསྶཀནྟཱརཾ, ཨཔྤབྷཀྑཀནྟཱརནྟི པཉྩཝིདྷཾ. ཏཏྠ ཙོརེཧི ཨདྷིཊྛིཏམགྒོ ཙོརཀནྟཱརཾ ནཱམ. སཱིཧཱདཱིཧི ཨདྷིཊྛིཏམགྒོ ཝཱལ༹ཀནྟཱརཾ ནཱམ. ཡཏྠ ནྷཱཡིཏུཾ ཝཱ པཱཏུཾ ཝཱ ཨུདཀཾ ནཏྠི, ཨིདཾ ནིརུདཀཀནྟཱརཾ ནཱམ. ཨམནུསྶཱདྷིཊྛིཏཾ ཨམནུསྶཀནྟཱརཾ ནཱམ. མཱུལཁཱདནཱིཡཱདིཝིརཧིཏཾ ཨཔྤབྷཀྑཀནྟཱརཾ ནཱམ. ཨིམསྨིཾ པཉྩཝིདྷེ ཀནྟཱརེ ཏཾ ཀནྟཱརཾ ནིརུདཀཀནྟཱརཉྩེཝ ཨམནུསྶཀནྟཱརཉྩ. ཏསྨཱ སོ བཱལསཏྠཝཱཧཔུཏྟོ སཀཊེསུ མཧནྟམཧནྟཱ ཙཱཊིཡོ ཋཔེཏྭཱ ཨུདཀསྶ པཱུརཱཔེཏྭཱ སཊྛིཡོཛནིཀཾ ཀནྟཱརཾ པཊིཔཛྫི.

ཨཐསྶ ཀནྟཱརམཛ྄ཛྷཾ གཏཀཱལེ ཀནྟཱརེ ཨདྷིཝཏྠཡཀྑོ ‘‘ཨིམེཧི མནུསྶེཧི གཧིཏཾ ཨུདཀཾ ཚཌྜཱཔེཏྭཱ དུབྦལེ ཀཏྭཱ སབྦེཝ ནེ ཁཱདིསྶཱམཱི’’ཏི ¶ སབྦསེཏཏརུཎབལིབདྡཡུཏྟཾ ¶ མནོརམཾ ཡཱནཀཾ མཱཔེཏྭཱ དྷནུཀལཱཔཕལཀཱཝུདྷཧཏྠེཧི དསཧི དྭཱདསཧི ཨམནུསྶེཧི པརིཝུཏོ ཨུཔྤལཀུམུདཱནི པིལ༹ནྡྷིཏྭཱ ཨལླཀོསོ ཨལླཝཏྠོ ཨིསྶརཔུརིསོ ཝིཡ ཏསྨིཾ ཡཱནཀེ ནིསཱིདིཏྭཱ ཀདྡམམཀྑིཏེཧི ཙཀྐེཧི པཊིཔཐཾ ཨགམཱསི. པརིཝཱརཨམནུསྶཱཔིསྶ པུརཏོ ཙ པཙྪཏོ ཙ གཙྪནྟཱ ཨལླཀེསཱ ཨལླཝཏྠཱ ཨུཔྤལཀུམུདམཱལཱ པིལ༹ནྡྷིཏྭཱ པདུམཔུཎྜརཱིཀཀལཱཔེ གཧེཏྭཱ བྷིསམུལཱ༹ལཱནི ཁཱདནྟཱ ཨུདཀབིནྡཱུཧི ཙེཝ ཀལལེཧི ཙ པགྒྷརནྟེཧི ཨགམཾསུ. སཏྠཝཱཧཱ ཙ ནཱམ ཡདཱ དྷུརཝཱཏོ ཝཱཡཏི, ཏདཱ ཡཱནཀེ ནིསཱིདིཏྭཱ ཨུཔཊྛཱཀཔརིཝུཏཱ རཛཾ པརིཧརནྟཱ པུརཏོ གཙྪནྟི. ཡདཱ པཙྪཏོ ཝཱཏོ ཝཱཡཏི, ཏདཱ ཏེནེཝ ནཡེན པཙྪཏོ གཙྪནྟི. ཏདཱ པན དྷུརཝཱཏོ ཨཧོསི, ཏསྨཱ སོ སཏྠཝཱཧཔུཏྟོ པུརཏོ ཨགམཱསི.

ཡཀྑོ ཏཾ ཨཱགཙྪནྟཾ དིསྭཱ ཨཏྟནོ ཡཱནཀཾ མགྒཱ ཨོཀྐམཱཔེཏྭཱ ‘‘ཀཧཾ གཙྪཐཱ’’ཏི ཏེན སདྡྷིཾ པཊིསནྠཱརཾ ཨཀཱསི. སཏྠཝཱཧོཔི ཨཏྟནོ ཡཱནཀཾ མགྒཱ ཨོཀྐམཱཔེཏྭཱ སཀཊཱནཾ གམནོཀཱསཾ དཏྭཱ ཨེཀམནྟེ ཋིཏོ ཏཾ ཡཀྑཾ ཨཝོཙ ‘‘བྷོ, ཨམྷེ ཏཱཝ ¶ བཱརཱཎསིཏོ ཨཱགཙྪཱམ. ཏུམྷེ པན ཨུཔྤལཀུམུདཱནི པིལ༹ནྡྷིཏྭཱ པདུམཔུཎྜརཱིཀཧཏྠཱ བྷིསམུལཱ༹ལཱནི ཁཱདནྟཱ ཀདྡམམཀྑིཏཱ ཨུདཀབིནྡཱུཧི པགྒྷརནྟེཧི ཨཱགཙྪཐ. ཀིཾ ནུ ཁོ ཏུམྷེཧི ཨཱགཏམགྒེ དེཝོ ཝསྶཏི, ཨུཔྤལཱདིསཉྪནྣཱནི ཝཱ སརཱནི ཨཏྠཱི’’ཏི པུཙྪི. ཡཀྑོ ཏསྶ ཀཐཾ སུཏྭཱ ‘‘སམྨ, ཀིཾ ནཱམེཏཾ ཀཐེསི. ཨེསཱ ནཱིལཝནརཱཛི པཉྙཱཡཏི. ཏཏོ པཊྛཱཡ སཀལཾ ཨརཉྙཾ ཨེཀོདཀཾ, ནིབདྡྷཾ དེཝོ ཝསྶཏི, ཀནྡརཱ པཱུརཱ, ཏསྨིཾ ཏསྨིཾ ཋཱནེ པདུམཱདིསཉྪནྣཱནི སརཱནི ཨཏྠཱི’’ཏི ཝཏྭཱ པཊིཔཱཊིཡཱ གཙྪནྟེསུ ¶ སཀཊེསུ ‘‘ཨིམཱནི སཀཊཱནི ཨཱདཱཡ ཀཧཾ གཙྪཐཱ’’ཏི པུཙྪི. ‘‘ཨསུཀཛནཔདཾ ནཱམཱ’’ཏི. ‘‘ཨིམསྨིཾ ཙིམསྨིཉྩ སཀཊེ ཀིཾ ནཱམ བྷཎྜ’’ནྟི? ‘‘ཨསུཀཉྩ ཨསུཀཉྩཱ’’ཏི. ‘‘པཙྪཏོ ཨཱགཙྪནྟཾ སཀཊཾ ཨཏིཝིཡ གརུཀཾ ཧུཏྭཱ ཨཱགཙྪཏི, ཨེཏསྨིཾ ཀིཾ བྷཎྜ’’ནྟི? ‘‘ཨུདཀཾ ཨེཏྠཱ’’ཏི. ‘‘པརཏོ ཏཱཝ ཨུདཀཾ ཨཱནེནྟེཧི ཝོ མནཱཔཾ ཀཏཾ, ཨིཏོ པཊྛཱཡ པན ཨུདཀེན ཀིཙྩཾ ནཏྠི, པུརཏོ བཧུ ཨུདཀཾ, ཙཱཊིཡོ བྷིནྡིཏྭཱ ཨུདཀཾ ཚཌྜེཏྭཱ སུཁེན གཙྪཐཱ’’ཏི ཨཱཧ. ཨེཝཉྩ པན ཝཏྭཱ ‘‘ཏུམྷེ གཙྪཐ, ཨམྷཱཀཾ པཔཉྩོ ཧོཏཱི’’ཏི ཐོཀཾ གནྟྭཱ ཏེསཾ ཨདསྶནཾ པཏྭཱ ཨཏྟནོ ཡཀྑནགརམེཝ ཨགམཱསི.

སོཔི ¶ བཱལསཏྠཝཱཧོ ཨཏྟནོ བཱལཏཱཡ ཡཀྑསྶ ཝཙནཾ གཧེཏྭཱ ཙཱཊིཡོ བྷིནྡཱཔེཏྭཱ པསཏམཏྟམྤི ཨུདཀཾ ཨནཝསེསེཏྭཱ སབྦཾ ཚཌྜཱཔེཏྭཱ སཀཊཱནི པཱཛཱཔེསི, པུརཏོ ཨཔྤམཏྟཀམྤི ཨུདཀཾ ནཱཧོསི, མནུསྶཱ པཱནཱིཡཾ ཨལབྷནྟཱ ཀིལམིཾསུ. ཏེ ཡཱཝ སཱུརིཡཏྠངྒམནཱ གནྟྭཱ སཀཊཱནི མོཙེཏྭཱ པརིཝཊྚཀེན ཋཔེཏྭཱ གོཎེ ཙཀྐེསུ བནྡྷིཾསུ. ནེཝ གོཎཱནཾ ཨུདཀཾ ཨཧོསི, ན མནུསྶཱནཾ ཡཱགུབྷཏྟཾ ཝཱ. དུབྦལམནུསྶཱ ཏཏྠ ཏཏྠ ནིཔཛྫིཏྭཱ སཡིཾསུ. རཏྟིབྷཱགསམནནྟརེ ཡཀྑཱ ཡཀྑནགརཏོ ཨཱགནྟྭཱ སབྦེཔི གོཎེ ཙ མནུསྶེ ཙ ཛཱིཝིཏཀྑཡཾ པཱཔེཏྭཱ མཾསཾ ཁཱདིཏྭཱ ཨཊྛཱིནི ཨཝསེསེཏྭཱ ཨགམཾསུ. ཨེཝམེཀཾ བཱལསཏྠཝཱཧཔུཏྟཾ ནིསྶཱཡ སབྦེཔི ཏེ ཝིནཱསཾ པཱཔུཎིཾསུ, ཧཏྠཊྛིཀཱདཱིནི དིསཱཝིདིསཱསུ ཝིཔྤཀིཎྞཱནི ཨཧེསུཾ. པཉྩ སཀཊསཏཱནི ཡཐཱཔཱུརིཏཱནེཝ ཨཊྛཾསུ.

བོདྷིསཏྟོཔི ཁོ བཱལསཏྠཝཱཧཔུཏྟསྶ ནིཀྑནྟདིཝསཏོ མཱསཌྜྷམཱསཾ ཝཱིཏིནཱམེཏྭཱ པཉྩཧི སཀཊསཏེཧི ནགརཱ ནིཀྑམྨ ཨནུཔུབྦེན ཀནྟཱརམུཁཾ པཱཔུཎི. སོ ཏཏྠ ཨུདཀཙཱཊིཡོ པཱུརེཏྭཱ བཧུཾ ཨུདཀཾ ཨཱདཱཡ ཁནྡྷཱཝཱརེ བྷེརིཾ ཙརཱཔེཏྭཱ མནུསྶེ སནྣིཔཱཏེཏྭཱ ¶ ཨེཝམཱཧ ‘‘ཏུམྷེ མཾ ཨནཱཔུཙྪིཏྭཱ པསཏམཏྟམྤི ཨུདཀཾ མཱ ཝལ༹ཉྫཡིཏྠ, ཀནྟཱརེ ཝིསརུཀྑཱ ནཱམ ཧོནྟི, པཏྟཾ ཝཱ པུཔྥཾ ཝཱ ཕལཾ ཝཱ ཏུམྷེཧི པུརེ ཨཁཱདིཏཔུབྦཾ མཾ ཨནཱཔུཙྪིཏྭཱ མཱ ཁཱདིཏྠཱ’’ཏི. ཨེཝཾ མནུསྶཱནཾ ཨོཝཱདཾ དཏྭཱ པཉྩཧི སཀཊསཏེཧི ཀནྟཱརཾ པཊིཔཛྫི. ཏསྨིཾ ཀནྟཱརམཛ྄ཛྷཾ སམྤཏྟེ སོ ¶ ཡཀྑོ པུརིམནཡེནེཝ བོདྷིསཏྟསྶ པཊིཔཐེ ཨཏྟཱནཾ དསྶེསི. བོདྷིསཏྟོ ཏཾ དིསྭཱཝ ཨཉྙཱསི ‘‘ཨིམསྨིཾ ཀནྟཱརེ ཨུདཀཾ ནཏྠི, ནིརུདཀཀནྟཱརོ ནཱམེས, ཨཡཉྩ ནིབྦྷཡོ རཏྟནེཏྟོ, ཚཱཡཱཔིསྶ ན པཉྙཱཡཏི, ནིསྶཾསཡཾ ཨིམིནཱ པུརཏོ གཏོ བཱལསཏྠཝཱཧཔུཏྟོ སབྦཾ ཨུདཀཾ ཚཌྜཱཔེཏྭཱ ཀིལམེཏྭཱ སཔརིསོ ཁཱདིཏོ བྷཝིསྶཏི, མཡ྄ཧཾ པན པཎྜིཏབྷཱཝཾ ཨུཔཱཡཀོསལླཾ ན ཛཱནཱཏི མཉྙེ’’ཏི. ཏཏོ ནཾ ཨཱཧ ‘‘གཙྪཐ ཏུམྷེ, མཡཾ ཝཱཎིཛཱ ནཱམ ཨཉྙཾ ཨུདཀཾ ཨདིསྭཱ གཧིཏཨུདཀཾ ན ཚཌྜེམ, དིཊྛཊྛཱནེ པན ཚཌྜེཏྭཱ སཀཊཱནི སལླཧུཀཱནི ཀཏྭཱ གམིསྶཱམཱ’’ཏི ཡཀྑོ ཐོཀཾ གནྟྭཱ ཨདསྶནཾ ཨུཔགམྨ ཨཏྟནོ ཡཀྑནགརམེཝ གཏོ.

ཡཀྑེ པན གཏེ མནུསྶཱ བོདྷིསཏྟཾ ཨཱཧཾསུ ‘‘ཨཡྻ, ཨེཏེ མནུསྶཱ ‘ཨེསཱ ནཱིལཝནརཱཛི པཉྙཱཡཏི, ཏཏོ པཊྛཱཡ ནིབདྡྷཾ དེཝོ ཝསྶཏཱི’ཏི ཝཏྭཱ ¶ ཨུཔྤལཀུམུདམཱལཱདྷཱརིནོ པདུམཔུཎྜརཱིཀཀལཱཔེ ཨཱདཱཡ བྷིསམུལཱ༹ལཱནི ཁཱདནྟཱ ཨལླཝཏྠཱ ཨལླཀེསཱ ཨུདཀབིནྡཱུཧི པགྒྷརནྟེཧི ཨཱགཏཱ, ཨུདཀཾ ཚཌྜེཏྭཱ སལླཧུཀེཧི སཀཊེཧི ཁིཔྤཾ གཙྪཱམཱ’’ཏི. བོདྷིསཏྟོ ཏེསཾ ཀཐཾ སུཏྭཱ སཀཊཱནི ཋཔཱཔེཏྭཱ སབྦེ མནུསྶེ སནྣིཔཱཏཱཔེཏྭཱ ‘‘ཏུམྷེཧི ‘ཨིམསྨིཾ ཀནྟཱརེ སརོ ཝཱ པོཀྑརཎཱི ཝཱ ཨཏྠཱི’ཏི ཀསྶཙི སུཏཔུབྦ’’ནྟི པུཙྪི. ‘‘ན, ཨཡྻ, སུཏཔུབྦ’’ནྟི. ནིརུདཀཀནྟཱརོ ནཱམ ཨེསོ, ཨིདཱནི ཨེཀཙྩེ མནུསྶཱ ‘‘ཨེཏཱཡ ནཱིལཝནརཱཛིཡཱ པུརཏོ དེཝོ ཝསྶཏཱི’’ཏི ཝདནྟི, ‘‘ཝུཊྛིཝཱཏོ ནཱམ ཀིཏྟཀཾ ཋཱནཾ ¶ ཝཱཡཏཱི’’ཏི? ‘‘ཡོཛནམཏྟཾ, ཨཡྻཱ’’ཏི. ‘‘ཀཙྩི པན ཝོ ཨེཀསྶཱཔི སརཱིརཾ ཝུཊྛིཝཱཏོ པཧརཏཱི’’ཏི? ‘‘ནཏྠི ཨཡྻཱ’’ཏི. ‘‘མེགྷསཱིསཾ ནཱམ ཀིཏྟཀེ ཋཱནེ པཉྙཱཡཏཱི’’ཏི? ‘‘ཏིཡོཛནམཏྟེ ཨཡྻཱ’’ཏི. ‘‘ཨཏྠི པན ཝོ ཀེནཙི ཨེཀམྤི མེགྷསཱིསཾ དིཊྛ’’ནྟི? ‘‘ནཏྠི, ཨཡྻཱ’’ཏི. ‘‘ཝིཛྫུལཏཱ ནཱམ ཀིཏྟཀེ ཋཱནེ པཉྙཱཡཏཱི’’ཏི? ‘‘ཙཏུཔྤཉྩཡོཛནམཏྟེ, ཨཡྻཱ’’ཏི. ‘‘ཨཏྠི པན ཝོ ཀེནཙི ཝིཛྫུལཏོབྷཱསོ དིཊྛོ’’ཏི? ‘‘ནཏྠི, ཨཡྻཱ’’ཏི. ‘‘མེགྷསདྡོ ནཱམ ཀིཏྟཀེ ཋཱནེ སུཡྻཏཱི’’ཏི? ‘‘ཨེཀདྭིཡོཛནམཏྟེ, ཨཡྻཱ’’ཏི. ‘‘ཨཏྠི པན ཝོ ཀེནཙི མེགྷསདྡོ སུཏོ’’ཏི? ‘‘ནཏྠི, ཨཡྻཱ’’ཏི. ‘‘ན ཨེཏེ མནུསྶཱ, ཡཀྑཱ ཨེཏེ, ཨམྷེ ཨུདཀཾ ཚཌྜཱཔེཏྭཱ དུབྦལེ ཀཏྭཱ ཁཱདིཏུཀཱམཱ ཨཱགཏཱ བྷཝིསྶནྟི. པུརཏོ གཏོ བཱལསཏྠཝཱཧཔུཏྟོ ན ཨུཔཱཡཀུསལོ. ཨདྡྷཱ སོ ཨེཏེཧི ཨུདཀཾ ཚཌྜཱཔེཏྭཱ ཀིལམེཏྭཱ ཁཱདིཏོ བྷཝིསྶཏི, པཉྩ སཀཊསཏཱནི ཡཐཱཔཱུརིཏཱནེཝ ཋིཏཱནི བྷཝིསྶནྟི. ཨཛྫ མཡཾ ཏཱནི པསྶིསྶཱམ, པསཏམཏྟམྤི ཨུདཀཾ ཨཚཌྜེཏྭཱ སཱིགྷསཱིགྷཾ པཱཛེཐཱ’’ཏི པཱཛཱཔེསི.

སོ གཙྪནྟོ ཡཐཱཔཱུརིཏཱནེཝ པཉྩ སཀཊསཏཱནི གོཎམནུསྶཱནཉྩ ཧཏྠཊྛིཀཱདཱིནི དིསཱཝིདིསཱསུ ཝིཔྤཀིཎྞཱནི དིསྭཱ སཀཊཱནི མོཙཱཔེཏྭཱ སཀཊཔརིཝཊྚཀེན ཁནྡྷཱཝཱརཾ བནྡྷཱཔེཏྭཱ ¶ ཀཱལསྶེཝ མནུསྶེ ཙ གོཎེ ཙ སཱཡམཱསབྷཏྟཾ བྷོཛཱཔེཏྭཱ མནུསྶཱནཾ མཛ྄ཛྷེ གོཎེ ནིཔཛྫཱཔེཏྭཱ སཡཾ བལནཱཡཀོ ཧུཏྭཱ ཁགྒཧཏྠོ ཏིཡཱམརཏྟིཾ ཨཱརཀྑཾ གཧེཏྭཱ ཋིཏཀོཝ ཨརུཎཾ ཨུཊྛཱཔེསི. པུནདིཝསེ པན པཱཏོཝ ¶ སབྦཀིཙྩཱནི ནིཊྛཱཔེཏྭཱ གོཎེ བྷོཛེཏྭཱ དུབྦལསཀཊཱནི ཚཌྜཱཔེཏྭཱ ཐིརཱནི གཱཧཱཔེཏྭཱ ཨཔྤགྒྷཾ བྷཎྜཾ ཚཌྜཱཔེཏྭཱ མཧགྒྷཾ བྷཎྜཾ ཨཱརོཔཱཔེཏྭཱ ཡཐཱདྷིཔྤེཏཾ ཋཱནཾ གནྟྭཱ དིགུཎཏིགུཎེན མཱུལེན བྷཎྜཾ ཝིཀྐིཎིཏྭཱ སབྦཾ པརིསཾ ཨཱདཱཡ པུན ཨཏྟནོ ནགརམེཝ ཨགམཱསི.

སཏྠཱ ¶ ཨིམཾ དྷམྨཀཐཾ ཀཐེཏྭཱ ‘‘ཨེཝཾ, གཧཔཏི, པུབྦེ ཏཀྐགྒཱཧགཱཧིནོ མཧཱཝིནཱསཾ པཏྟཱ, ཨཔཎྞཀགྒཱཧགཱཧིནོ པན ཨམནུསྶཱནཾ ཧཏྠཏོ མུཙྩིཏྭཱ སོཏྠིནཱ ཨིཙྪིཏཊྛཱནཾ གནྟྭཱ པུན སཀཊྛཱནམེཝ པཙྩཱགམིཾསཱུ’’ཏི ཝཏྭཱ དྭེཔི ཝཏྠཱུནི གྷཊེཏྭཱ ཨིམིསྶཱ ཨཔཎྞཀདྷམྨདེསནཱཡ ཨབྷིསམྦུདྡྷོ ཧུཏྭཱ ཨིམཾ གཱཐམཱཧ –

༡.

‘‘ཨཔཎྞཀཾ ཋཱནམེཀེ, དུཏིཡཾ ཨཱཧུ ཏཀྐིཀཱ;

ཨེཏདཉྙཱཡ མེདྷཱཝཱི, ཏཾ གཎྷེ ཡདཔཎྞཀ’’ནྟི.

ཏཏྠ ཨཔཎྞཀནྟི ཨེཀཾསིཀཾ ཨཝིརདྡྷཾ ནིཡྻཱནིཀཾ. ཋཱནནྟི ཀཱརཎཾ. ཀཱརཎཉྷི ཡསྨཱ ཏདཱཡཏྟཝུཏྟིཏཱཡ ཕལཾ ཏིཊྛཏི ནཱམ, ཏསྨཱ ‘‘ཋཱན’’ནྟི ཝུཙྩཏི, ‘‘ཋཱནཉྩ ཋཱནཏོ ཨཊྛཱནཉྩ ཨཊྛཱནཏོ’’ཏིཨཱདཱིསུ (ཝིབྷ. ༨༠༩) ཙསྶ པཡོགོ ཝེདིཏབྦོ. ཨིཏི ‘‘ཨཔཎྞཀཾ ཋཱན’’ནྟི པདདྭཡེནཱཔི ‘‘ཡཾ ཨེཀནྟཧིཏསུཁཱཝཧཏྟཱ པཎྜིཏེཧི པཊིཔནྣཾ ཨེཀཾསིཀཀཱརཎཾ ཨཝིརདྡྷཀཱརཎཾ ནིཡྻཱནིཀཀཱརཎཾ, ཏཾ ཨིད’’ནྟི དཱིཔེཏི. ཨཡམེཏྠ སངྑེཔོ, པབྷེདཏོ པན ཏཱིཎི སརཎགམནཱནི, པཉྩ སཱིལཱནི, དས སཱིལཱནི, པཱཏིམོཀྑསཾཝརོ, ཨིནྡྲིཡསཾཝརོ, ཨཱཛཱིཝཔཱརིསུདྡྷི, པཙྩཡཔཊིསེཝནཾ, སབྦམྤི ཙཏུཔཱརིསུདྡྷིསཱིལཾ; ཨིནྡྲིཡེསུ གུཏྟདྭཱརཏཱ, བྷོཛནེ མཏྟཉྙུཏཱ, ཛཱགརིཡཱནུཡོགོ, ཛྷཱནཾ, ཝིཔསྶནཱ, ཨབྷིཉྙཱ, སམཱཔཏྟི, ཨརིཡམགྒོ, ཨརིཡཕལཾ, སབྦམྤེཏཾ ཨཔཎྞཀཊྛཱནཾ ཨཔཎྞཀཔཊིཔདཱ, ནིཡྻཱནིཀཔཊིཔདཱཏི ཨཏྠོ.

ཡསྨཱ ཙ པན ནིཡྻཱནིཀཔཊིཔདཱཡ ཨེཏཾ ནཱམཾ, ཏསྨཱཡེཝ བྷགཝཱ ཨཔཎྞཀཔཊིཔདཾ དསྶེནྟོ ཨིམཾ སུཏྟམཱཧ –

‘‘ཏཱིཧི, བྷིཀྑཝེ, དྷམྨེཧི སམནྣཱགཏོ བྷིཀྑུ ཨཔཎྞཀཔཊིཔདཾ པཊིཔནྣོ ཧོཏི, ཡོནི ཙསྶ ཨཱརདྡྷཱ ཧོཏི ཨཱསཝཱནཾ ཁཡཱཡ ¶ . ཀཏམེཧི ཏཱིཧི? ཨིདྷ, བྷིཀྑཝེ ¶ , བྷིཀྑུ ཨིནྡྲིཡེསུ གུཏྟདྭཱརོ ཧོཏི, བྷོཛནེ མཏྟཉྙཱུ ཧོཏི, ཛཱགརིཡཾ ཨནུཡུཏྟོ ཧོཏི. ཀཐཉྩ, བྷིཀྑཝེ, བྷིཀྑུ ཨིནྡྲིཡེསུ གུཏྟདྭཱརོ ཧོཏི? ཨིདྷ, བྷིཀྑཝེ, བྷིཀྑུ ཙཀྑུནཱ རཱུཔཾ དིསྭཱ ན ནིམིཏྟགྒཱཧཱི ཧོཏི…པེ… ཨེཝཾ ཁོ, བྷིཀྑཝེ, བྷིཀྑུ ཨིནྡྲིཡེསུ གུཏྟདྭཱརོ ཧོཏི.

‘‘ཀཐཉྩ, བྷིཀྑཝེ, བྷིཀྑུ བྷོཛནེ མཏྟཉྙཱུ ཧོཏི? ཨིདྷ, བྷིཀྑཝེ, བྷིཀྑུ པཊིསངྑཱ ཡོནིསོ ཨཱཧཱརཾ ཨཱཧཱརེཏི ནེཝ དཝཱཡ ན མདཱཡ…པེ… ཨེཝཾ ཁོ, བྷིཀྑཝེ, བྷིཀྑུ བྷོཛནེ མཏྟཉྙཱུ ཧོཏི.

‘‘ཀཐཉྩ, བྷིཀྑཝེ, བྷིཀྑུ ཛཱགརིཡཾ ཨནུཡུཏྟོ ཧོཏི. ཨིདྷ, བྷིཀྑཝེ, བྷིཀྑུ དིཝསཾ ཙངྐམེན ནིསཛྫཱཡ…པེ… ཨེཝཾ ཁོ, བྷིཀྑཝེ, བྷིཀྑུ ཛཱགརིཡཾ ཨནུཡུཏྟོ ཧོཏཱི’’ཏི (ཨ. ནི. ༣.༡༦).

ཨིམསྨིཉྩཱཔི སུཏྟེ ཏཡོཝ དྷམྨཱ ཝུཏྟཱ. ཨཡཾ པན ཨཔཎྞཀཔཊིཔདཱ ཡཱཝ ཨརཧཏྟཕལཾ ལབྦྷཏེཝ ¶ . ཏཏྠ ཨརཧཏྟཕལམྤི, ཕལསམཱཔཏྟིཝིཧཱརསྶ ཙེཝ, ཨནུཔཱདཱཔརིནིབྦཱནསྶ ཙ, པཊིཔདཱཡེཝ ནཱམ ཧོཏི.

ཨེཀེཏི ཨེཀཙྩེ པཎྜིཏམནུསྶཱ. ཏཏྠ ཀིཉྩཱཔི ‘‘ཨསུཀཱ ནཱམཱ’’ཏི ནིཡམོ ནཏྠི, ཨིདཾ པན སཔརིསཾ བོདྷིསཏྟཾཡེཝ སནྡྷཱཡ ཝུཏྟནྟི ཝེདིཏབྦཾ. དུཏིཡཾ ཨཱཧུ ཏཀྐིཀཱཏི དུཏིཡནྟི པཋམཏོ ཨཔཎྞཀཊྛཱནཏོ ནིཡྻཱནིཀཀཱརཎཏོ དུཏིཡཾ ཏཀྐགྒཱཧཀཱརཎཾ ཨནིཡྻཱནིཀཀཱརཎཾ. ཨཱཧུ ཏཀྐིཀཱཏི ཨེཏྠ པན སདྡྷིཾ པུརིམཔདེན ཨཡཾ ཡོཛནཱ – ཨཔཎྞཀཊྛཱནཾ ཨེཀཾསིཀཀཱརཎཾ ཨཝིརདྡྷཀཱརཎཾ ནིཡྻཱནིཀཀཱརཎཾ ཨེཀེ བོདྷིསཏྟཔྤམུཁཱ པཎྜིཏམནུསྶཱ གཎྷིཾསུ. ཡེ པན བཱལསཏྠཝཱཧཔུཏྟཔྤམུཁཱ ཏཀྐིཀཱ ཨཱཧུ, ཏེ དུཏིཡཾ སཱཔརཱདྷཾ ཨནེཀཾསིཀཊྛཱནཾ ཝིརདྡྷཀཱརཎཾ ཨནིཡྻཱནིཀཀཱརཎཾ ཨགྒཧེསུཾ. ཏེསུ ཡེ ཨཔཎྞཀཊྛཱནཾ ཨགྒཧེསུཾ, ཏེ སུཀྐཔཊིཔདཾ པཊིཔནྣཱ. ཡེ དུཏིཡཾ ‘‘པུརཏོ བྷཝིཏབྦཾ ཨུདཀེནཱ’’ཏི ཏཀྐགྒཱཧསངྑཱཏཾ ཨནིཡྻཱནིཀཀཱརཎཾ ཨགྒཧེསུཾ. ཏེ ཀཎྷཔཊིཔདཾ པཊིཔནྣཱ.

ཏཏྠ ¶ སུཀྐཔཊིཔདཱ ཨཔརིཧཱནིཔཊིཔདཱ, ཀཎྷཔཊིཔདཱ པརིཧཱནིཔཊིཔདཱ. ཏསྨཱ ཡེ སུཀྐཔཊིཔདཾ པཊིཔནྣཱ, ཏེ ཨཔརིཧཱིནཱ སོཏྠིབྷཱཝཾ པཏྟཱ. ཡེ པན ཀཎྷཔཊིཔདཾ པཊིཔནྣཱ, ཏེ ¶ པརིཧཱིནཱ ཨནཡབྱསནཾ ཨཱཔནྣཱཏི ཨིམམཏྠཾ བྷགཝཱ ཨནཱཐཔིཎྜིཀསྶ གཧཔཏིནོ ཝཏྭཱ ཨུཏྟརི ཨིདམཱཧ ‘‘ཨེཏདཉྙཱཡ མེདྷཱཝཱི, ཏཾ གཎྷེ ཡདཔཎྞཀ’’ནྟི.

ཏཏྠ ཨེཏདཉྙཱཡ མེདྷཱཝཱིཏི ‘‘མེདྷཱ’’ཏི ལདྡྷནཱམཱཡ ཝིཔུལཱཡ ཝིསུདྡྷཱཡ ཨུཏྟམཱཡ པཉྙཱཡ སམནྣཱགཏོ ཀུལཔུཏྟོ ཨེཏཾ ཨཔཎྞཀེ ཙེཝ སཔཎྞཀེ ཙཱཏི དྭཱིསུ ཨཏཀྐགྒཱཧཏཀྐགྒཱཧསངྑཱཏེསུ ཋཱནེསུ གུཎདོསཾ ཝུདྡྷིཧཱནིཾ ཨཏྠཱནཏྠཾ ཉཏྭཱཏི ཨཏྠོ. ཏཾ གཎྷེ ཡདཔཎྞཀནྟི ཡཾ ཨཔཎྞཀཾ ཨེཀཾསིཀཾ སུཀྐཔཊིཔདཱཨཔརིཧཱནིཡཔཊིཔདཱསངྑཱཏཾ ནིཡྻཱནིཀཀཱརཎཾ, ཏདེཝ གཎྷེཡྻ. ཀསྨཱ? ཨེཀཾསིཀཱདིབྷཱཝཏོཡེཝ. ཨིཏརཾ པན ན གཎྷེཡྻ. ཀསྨཱ? ཨནེཀཾསིཀཱདིབྷཱཝཏོཡེཝ. ཨཡཉྷི ཨཔཎྞཀཔཊིཔདཱ ནཱམ སབྦེསཾ བུདྡྷཔཙྩེཀབུདྡྷབུདྡྷཔུཏྟཱནཾ པཊིཔདཱ. སབྦབུདྡྷཱ ཧི ཨཔཎྞཀཔཊིཔདཱཡམེཝ ཋཏྭཱ དལ༹ྷེན ཝཱིརིཡེན པཱརམིཡོ པཱུརེཏྭཱ བོདྷིམཱུལེ བུདྡྷཱ ནཱམ ཧོནྟི, པཙྩེཀབུདྡྷཱ པཙྩེཀབོདྷིཾ ཨུཔྤཱདེནྟི, བུདྡྷཔུཏྟཱ སཱཝཀཔཱརམིཉཱཎཾ པཊིཝིཛ྄ཛྷནྟི.

ཨིཏི བྷགཝཱ ཏེསཾ ཨུཔཱསཀཱནཾ ཏིསྶོ ཀུལསམྤཏྟིཡོ ཙ ཚ ཀཱམསགྒེ བྲཧྨལོཀསམྤཏྟིཡོ ཙ དཏྭཱཔི པརིཡོསཱནེ ཨརཧཏྟམགྒཕལདཱཡིཀཱ ¶ ཨཔཎྞཀཔཊིཔདཱ ནཱམ, ཙཏཱུསུ ཨཔཱཡེསུ པཉྩསུ ཙ ནཱིཙཀུལེསུ ནིབྦཏྟིདཱཡིཀཱ སཔཎྞཀཔཊིཔདཱ ནཱམཱཏི ཨིམཾ ཨཔཎྞཀདྷམྨདེསནཾ དསྶེཏྭཱ ཨུཏྟརི ཙཏྟཱརི སཙྩཱནི སོལ༹སཧི ཨཱཀཱརེཧི པཀཱསེསི. ཙཏུསཙྩཔརིཡོསཱནེ སབྦེཔི ཏེ པཉྩསཏཱ ཨུཔཱསཀཱ སོཏཱཔཏྟིཕལེ པཏིཊྛཧིཾསུ.

སཏྠཱ ཨིམཾ དྷམྨདེསནཾ ཨཱཧརིཏྭཱ དསྶེཏྭཱ དྭེ ཝཏྠཱུནི ཀཐེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེཏྭཱ དསྶེསི – ‘‘ཏསྨིཾ སམཡེ བཱལསཏྠཝཱཧཔུཏྟོ དེཝདཏྟོ ཨཧོསི, ཏསྶ པརིསཱ དེཝདཏྟཔརིསཱཝ, པཎྜིཏསཏྠཝཱཧཔུཏྟཔརིསཱ བུདྡྷཔརིསཱ, པཎྜིཏསཏྠཝཱཧཔུཏྟོ པན ཨཧམེཝ ཨཧོསི’’ནྟི དེསནཾ ནིཊྛཱཔེསི.

ཨཔཎྞཀཛཱཏཀཝཎྞནཱ པཋམཱ.

༢. ཝཎྞུཔཐཛཱཏཀཝཎྞནཱ

ཨཀིལཱསུནོཏི ¶ ¶ ཨིམཾ དྷམྨདེསནཾ བྷགཝཱ སཱཝཏྠིཡཾ ཝིཧརནྟོ ཀཐེསི. ཀཾ པན ཨཱརབྦྷཱཏི? ཨེཀཾ ཨོསྶཊྛཝཱིརིཡཾ བྷིཀྑུཾ. ཏཐཱགཏེ ཀིར སཱཝཏྠིཡཾ ཝིཧརནྟེ ཨེཀོ སཱཝཏྠིཝཱསཱི ཀུལཔུཏྟོ ཛེཏཝནཾ གནྟྭཱ སཏྠུ སནྟིཀེ དྷམྨདེསནཾ སུཏྭཱ པསནྣཙིཏྟོ ཀཱམེསུ ཨཱདཱིནཝཾ དིསྭཱ པབྦཛིཏྭཱ ཨུཔསམྤདཱཡ པཉྩཝསྶིཀོ ཧུཏྭཱ དྭེ མཱཏིཀཱ ཨུགྒཎྷིཏྭཱ ཝིཔསྶནཱཙཱརཾ སིཀྑིཏྭཱ སཏྠུ སནྟིཀེ ཨཏྟནོ ཙིཏྟརུཙིཡཾ ཀམྨཊྛཱནཾ གཧེཏྭཱ ཨེཀཾ ཨརཉྙཾ པཝིསིཏྭཱ ཝསྶཾ ཨུཔགནྟྭཱ ཏེམཱསཾ ཝཱཡམནྟོཔི ཨོབྷཱསམཏྟཾ ཝཱ ནིམིཏྟམཏྟཾ ཝཱ ཨུཔྤཱདེཏུཾ ནཱསཀྑི.

ཨཐསྶ ཨེཏདཧོསི ‘‘སཏྠཱརཱ ཙཏྟཱརོ པུགྒལཱ ཀཐིཏཱ, ཏེསུ མཡཱ པདཔརམེན བྷཝིཏབྦཾ, ནཏྠི མཉྙེ མཡ྄ཧཾ ཨིམསྨིཾ ཨཏྟབྷཱཝེ མགྒོ ཝཱ ཕལཾ ཝཱ, ཀིཾ ཀརིསྶཱམི ཨརཉྙཝཱསེན, སཏྠུ སནྟིཀཾ གནྟྭཱ རཱུཔསོབྷགྒཔྤཏྟཾ བུདྡྷསརཱིརཾ ཨོལོཀེནྟོ མདྷུརཾ དྷམྨདེསནཾ སུཎནྟོ ཝིཧརིསྶཱམཱི’’ཏི པུན ཛེཏཝནམེཝ པཙྩཱགམཱསི. ཨཐ ནཾ སནྡིཊྛསམྦྷཏྟཱ ཨཱཧཾསུ – ‘‘ཨཱཝུསོ, ཏྭཾ སཏྠུ སནྟིཀེ ཀམྨཊྛཱནཾ གཧེཏྭཱ ‘སམཎདྷམྨཾ ཀརིསྶཱམཱི’ཏི གཏོ, ཨིདཱནི པན ཨཱགནྟྭཱ སངྒཎིཀཱཡ ཨབྷིརམམཱནོ ཙརསི, ཀིཾ ནུ ཁོ ཏེ པབྦཛིཏཀིཙྩཾ མཏྠཀཾ པཏྟཾ, ཨཔྤཊིསནྡྷིཀོ ཛཱཏོསཱི’’ཏི? ཨཱཝུསོ, ཨཧཾ མགྒཾ ཝཱ ཕལཾ ཝཱ ཨལབྷིཏྭཱ ‘‘ཨབྷབྦཔུགྒལེན མཡཱ བྷཝིཏབྦ’’ནྟི ཝཱིརིཡཾ ཨོསྶཛིཏྭཱ ཨཱགཏོམྷཱིཏི. ‘‘ཨཀཱརཎཾ ཏེ, ཨཱཝུསོ, ཀཏཾ དལ༹ྷཝཱིརིཡསྶ སཏྠུ སཱསནེ པབྦཛིཏྭཱ ཝཱིརིཡཾ ཨོསྶཛནྟེན, ཨཡུཏྟཾ ཏེ ཀཏཾ, ཨེཧི ཏཐཱགཏསྶ ¶ དསྶེམཱ’’ཏི ཏཾ ཨཱདཱཡ སཏྠུ སནྟིཀཾ ཨགམཾསུ.

སཏྠཱ ཏཾ དིསྭཱ ཨེཝམཱཧ ‘‘བྷིཀྑཝེ, ཏུམྷེ ཨེཏཾ བྷིཀྑུཾ ཨནིཙྪམཱནཾ ཨཱདཱཡ ཨཱགཏཱ, ཀིཾ ཀཏཾ ཨིམིནཱ’’ཏི? ‘‘བྷནྟེ, ཨཡཾ བྷིཀྑུ ཨེཝརཱུཔེ ནིཡྻཱནིཀསཱསནེ པབྦཛིཏྭཱ སམཎདྷམྨཾ ཀརོནྟོ ཝཱིརིཡཾ ཨོསྶཛིཏྭཱ ཨཱགཏོ’’ཏི ཨཱཧཾསུ. ཨཐ ནཾ སཏྠཱ ཨཱཧ ‘‘སཙྩཾ ཀིར ཏཡཱ བྷིཀྑུ ཝཱིརིཡཾ ཨོསྶཊྛ’’ནྟི? ‘‘སཙྩཾ, བྷགཝཱ’’ཏི. ‘‘ཀིཾ པན ཏྭཾ བྷིཀྑུ ཨེཝརཱུཔེ མམ སཱསནེ པབྦཛིཏྭཱ ‘ཨཔྤིཙྪོ’ཏི ཝཱ ‘སནྟུཊྛོ’ཏི ཝཱ ‘པཝིཝིཏྟོ’ཏི ཝཱ ‘ཨཱརདྡྷཝཱིརིཡོ’ཏི ཝཱ ཨེཝཾ ཨཏྟཱནཾ ཨཛཱནཱཔེཏྭཱ ‘ཨོསྶཊྛཝཱིརིཡོ བྷིཀྑཱུ’ཏི ཛཱནཱཔེསི. ནནུ ཏྭཾ པུབྦེ ཝཱིརིཡཝཱ ཨཧོསི, ཏཡཱ ཨེཀེན ཀཏཾ ཝཱིརིཡཾ ནིསྶཱཡ མརུཀནྟཱརེ པཉྩསུ སཀཊསཏེསུ མནུསྶཱ ཙ གོཎཱ ¶ ཙ པཱནཱིཡཾ ལབྷིཏྭཱ སུཁིཏཱ ཛཱཏཱ ¶ , ཨིདཱནི ཀསྨཱ ཝཱིརིཡཾ ཨོསྶཛསཱི’’ཏི. སོ བྷིཀྑུ ཨེཏྟཀེན ཝཙནེན ཨུཔཏྠམྦྷིཏོ ཨཧོསི.

ཏཾ པན ཀཐཾ སུཏྭཱ བྷིཀྑཱུ བྷགཝནྟཾ ཡཱཙིཾསུ – ‘‘བྷནྟེ, ཨིདཱནི ཨིམིནཱ བྷིཀྑུནཱ ཝཱིརིཡསྶ ཨོསྶཊྛབྷཱཝོ ཨམྷཱཀཾ པཱཀཊོ, པུབྦེ པནསྶ ཨེཀསྶ ཝཱིརིཡཾ ནིསྶཱཡ མརུཀནྟཱརེ གོཎམནུསྶཱནཾ པཱནཱིཡཾ ལབྷིཏྭཱ སུཁིཏབྷཱཝོ པཊིཙྪནྣོ, ཏུམྷཱཀཾ སབྦཉྙུཏཉྙཱཎསྶེཝ པཱཀཊོ, ཨམྷཱཀམྤེཏཾ ཀཱརཎཾ ཀཐེཐཱ’’ཏི. ‘‘ཏེན ཧི, བྷིཀྑཝེ, སུཎཱཐཱ’’ཏི བྷགཝཱ ཏེསཾ བྷིཀྑཱུནཾ སཏུཔྤཱདཾ ཛནེཏྭཱ བྷཝནྟརེན པཊིཙྪནྣཀཱརཎཾ པཱཀཊམཀཱསི.

ཨཏཱིཏེ ཀཱསིརཊྛེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ སཏྠཝཱཧཀུལེ པཊིསནྡྷིཾ གཧེཏྭཱ ཝཡཔྤཏྟོ པཉྩཧི སཀཊསཏེཧི ཝཎིཛྫཾ ཀརོནྟོ ཝིཙརཏི. སོ ཨེཀདཱ སཊྛིཡོཛནིཀཾ མརུཀནྟཱརཾ པཊིཔཛྫི. ཏསྨིཾ ཀནྟཱརེ སུཁུམཝཱལུཀཱ མུཊྛིནཱ གཧིཏཱ ཧཏྠེ ན ཏིཊྛཏི, སཱུརིཡུགྒམནཏོ པཊྛཱཡ ཨངྒཱརརཱསི ཝིཡ ཨུཎྷཱ ཧོཏི, ན སཀྐཱ ཨཀྐམིཏུཾ. ཏསྨཱ ཏཾ པཊིཔཛྫནྟཱ དཱརུདཀཏིལཏཎྜུལཱདཱིནི སཀཊེཧི ཨཱདཱཡ རཏྟིམེཝ གནྟྭཱ ཨརུཎུགྒམནེ སཀཊཱནི པརིཝཊྚཾ ཀཏྭཱ མཏྠཀེ མཎྜཔཾ ཀཱརེཏྭཱ ཀཱལསྶེཝ ཨཱཧཱརཀིཙྩཾ ནིཊྛཱཔེཏྭཱ ཚཱཡཱཡ ནིསིནྣཱ དིཝསཾ ཁེཔེཏྭཱ ཨཏྠངྒཏེ སཱུརིཡེ སཱཡམཱསཾ བྷུཉྫིཏྭཱ བྷཱུམིཡཱ སཱིཏལཱཡ ཛཱཏཱཡ སཀཊཱནི ཡོཛེཏྭཱ གཙྪནྟི, སམུདྡགམནསདིསམེཝ གམནཾ ཧོཏི. ཐལནིཡཱམཀོ ནཱམ ལདྡྷུཾ ཝཊྚཏི, སོ ཏཱརཀསཉྙཱ ¶ སཏྠཾ ཏཱརེཏི.

སོཔི སཏྠཝཱཧོ ཏསྨིཾ ཀཱལེ ཨིམིནཱཝ ནིཡཱམེན ཏཾ ཀནྟཱརཾ གཙྪནྟོ ཨེཀཱུནསཊྛི ཡོཛནཱནི གནྟྭཱ ‘‘ཨིདཱནི ཨེཀརཏྟེནེཝ མརུཀནྟཱརཱ ནིཀྑམནཾ བྷཝིསྶཏཱི’’ཏི སཱཡམཱསཾ བྷུཉྫིཏྭཱ སབྦཾ དཱརུདཀཾ ཁེཔེཏྭཱ སཀཊཱནི ཡོཛེཏྭཱ པཱཡཱསི. ནིཡཱམཀོ པན པུརིམསཀཊེ ཨཱསནཾ པཏྠརཱཔེཏྭཱ ཨཱཀཱསེ ཏཱརཀཾ ཨོལོཀེནྟོ ‘‘ཨིཏོ པཱཛེཐ, ཨིཏོ པཱཛེཐཱ’’ཏི ཝདམཱནོ ནིཔཛྫི. སོ དཱིགྷམདྡྷཱནཾ ཨནིདྡཱཡནབྷཱཝེན ཀིལནྟོ ནིདྡཾ ཨོཀྐམི, གོཎེ ནིཝཏྟིཏྭཱ ཨཱགཏམགྒམེཝ གཎྷནྟེ ན ¶ ཨཉྙཱསི. གོཎཱ སབྦརཏྟིཾ ཨགམཾསུ. ནིཡཱམཀོ ཨརུཎུགྒམནཝེལཱཡ པབུདྡྷོ ནཀྑཏྟཾ ཨོལོཀེཏྭཱ ‘‘སཀཊཱནི ནིཝཏྟེཐ ནིཝཏྟེཐཱ’’ཏི ཨཱཧ. སཀཊཱནི ནིཝཏྟེཏྭཱ པཊིཔཱཊིཾ ཀརོནྟཱནཉྙེཝ ཨརུཎོ ཨུགྒཏོ. མནུསྶཱ ‘‘ཧིཡྻོ ཨམྷཱཀཾ ནིཝིཊྛཁནྡྷཱཝཱརཊྛཱནམེཝེཏཾ, དཱརུདཀམྤི ནོ ཁཱིཎཾ, ཨིདཱནི ནཊྛམྷཱ’’ཏི སཀཊཱནི མོཙེཏྭཱ པརིཝཊྚཀེན ཋཔེཏྭཱ མཏྠཀེ མཎྜཔཾ ཀཏྭཱ ཨཏྟནོ ཨཏྟནོ སཀཊསྶ ཧེཊྛཱ ཨནུསོཙནྟཱ ནིཔཛྫིཾསུ.

བོདྷིསཏྟོ ¶ ‘‘མཡི ཝཱིརིཡཾ ཨོསྶཛནྟེ སབྦེ ཝིནསྶིསྶནྟཱི’’ཏི པཱཏོ སཱིཏལཝེལཱཡམེཝ ཨཱཧིཎྜནྟོ ཨེཀཾ དབྦཏིཎགཙྪཾ དིསྭཱ ‘‘ཨིམཱནི ཏིཎཱནི ཧེཊྛཱ ཨུདཀསིནེཧེན ཨུཊྛིཏཱནི བྷཝིསྶནྟཱི’’ཏི ཙིནྟེཏྭཱ ཀུདྡཱལཾ གཱཧཱཔེཏྭཱ ཏཾ པདེསཾ ཁཎཱཔེསི, ཏེ སཊྛིཧཏྠཊྛཱནཾ ཁཎིཾསུ. ཨེཏྟཀཾ ཋཱནཾ ཁཎིཏྭཱ པཧརནྟཱནཾ ཀུདྡཱལོ ཧེཊྛཱཔཱསཱཎེ པཊིཧཉྙི, པཧཊམཏྟེ སབྦེ ཝཱིརིཡཾ ཨོསྶཛིཾསུ. བོདྷིསཏྟོ པན ‘‘ཨིམསྶ པཱསཱཎསྶ ཧེཊྛཱ ཨུདཀེན བྷཝིཏབྦ’’ནྟི ཨོཏརིཏྭཱ པཱསཱཎེ ཋིཏོ ཨོཎམིཏྭཱ སོཏཾ ཨོདཧིཏྭཱ སདྡཾ ཨཱཝཛྫེནྟོ ཧེཊྛཱ ཨུདཀསྶ པཝཏྟནསདྡཾ སུཏྭཱ ཨུཏྟརིཏྭཱ ཙཱུལུ༹པཊྛཱཀཾ ཨཱཧ – ‘‘ཏཱཏ, ཏཡཱ ཝཱིརིཡེ ཨོསྶཊྛེ སབྦེ ཝིནསྶིསྶཱམ, ཏྭཾ ཝཱིརིཡཾ ཨནོསྶཛནྟོ ཨིམཾ ཨཡཀཱུཊཾ གཧེཏྭཱ ཨཱཝཱཊཾ ཨོཏརིཏྭཱ ཨེཏསྨིཾ པཱསཱཎེ པཧཱརཾ དེཧཱི’’ཏི. སོ ཏསྶ ཝཙནཾ སམྤཊིཙྪིཏྭཱ སབྦེསུ ¶ ཝཱིརིཡཾ ཨོསྶཛིཏྭཱ ཋིཏེསུཔི ཝཱིརིཡཾ ཨནོསྶཛནྟོ ཨོཏརིཏྭཱ པཱསཱཎེ པཧཱརཾ ཨདཱསི. པཱསཱཎོ མཛ྄ཛྷེ བྷིཛྫིཏྭཱ ཧེཊྛཱ པཏིཏྭཱ སོཏཾ སནྣིརུམྦྷིཏྭཱ ཨཊྛཱསི, ཏཱལཀྑནྡྷཔྤམཱཎཱ ཨུདཀཝཊྚི ཨུགྒཉྪི. སབྦེ པཱནཱིཡཾ པིཝིཏྭཱ ནྷཱཡིཾསུ, ཨཏིརེཀཱནི ཨཀྑཡུགཱདཱིནི ཕཱལེཏྭཱ ཡཱགུབྷཏྟཾ པཙིཏྭཱ བྷུཉྫིཏྭཱ གོཎེ ཙ བྷོཛེཏྭཱ སཱུརིཡེ ཨཏྠངྒཏེ ཨུདཀཱཝཱཊསམཱིཔེ དྷཛཾ བནྡྷིཏྭཱ ཨིཙྪིཏཊྛཱནཾ ཨགམཾསུ. ཏེ ཏཏྠ བྷཎྜཾ ཝིཀྐིཎིཏྭཱ དིགུཎཾ ཏིགུཎཾ ཙཏུགྒུཎཾ ལཱབྷཾ ལབྷིཏྭཱ ཨཏྟནོ ཝསནཊྛཱནམེཝ ཨགམཾསུ. ཏེ ཏཏྠ ཡཱཝཏཱཡུཀཾ ཋཏྭཱ ཡཐཱཀམྨཾ གཏཱ, བོདྷིསཏྟོཔི དཱནཱདཱིནི པུཉྙཱནི ཀཏྭཱ ཡཐཱཀམྨམེཝ གཏོ.

སམྨཱསམྦུདྡྷོ ཨིམཾ དྷམྨདེསནཾ ཀཐེཏྭཱ ཨབྷིསམྦུདྡྷོཝ ཨིམཾ གཱཐཾ ཀཐེསི –

༢.

‘‘ཨཀིལཱསུནོ ¶ ཝཎྞུཔཐེ ཁཎནྟཱ, ཨུདངྒཎེ ཏཏྠ པཔཾ ཨཝིནྡུཾ;

ཨེཝཾ མུནཱི ཝཱིརིཡབལཱུཔཔནྣོ, ཨཀིལཱསུ ཝིནྡེ ཧདཡསྶ སནྟི’’ནྟི.

ཏཏྠ ཨཀིལཱསུནོཏི ནིཀྐོསཛྫཱ ཨཱརདྡྷཝཱིརིཡཱ. ཝཎྞུཔཐེཏི ཝཎྞུ ཝུཙྩཏི ཝཱལུཀཱ, ཝཱལུཀཱམགྒེཏི ཨཏྠོ. ཁཎནྟཱཏི བྷཱུམིཾ ཁཎམཱནཱ. ཨུདངྒཎེཏི ཨེཏྠ ཨུདཱཏི ནིཔཱཏོ, ཨངྒཎེཏི མནུསྶཱནཾ སཉྩརཎཊྛཱནེ, ཨནཱཝཱཊེ བྷཱུམིབྷཱགེཏི ཨཏྠོ. ཏཏྠཱཏི ཏསྨིཾ ཝཎྞུཔཐེ. པཔཾ ཨཝིནྡུནྟི ཨུདཀཾ པཊིལབྷིཾསུ. ཨུདཀཉྷི པཔཱིཡནབྷཱཝེན ‘‘པཔཱ’’ཏི ཝུཙྩཏི. པཝདྡྷཾ ཝཱ ཨཱཔཾ པཔཾ, མཧོདཀནྟི ཨཏྠོ.

ཨེཝནྟི ཨོཔམྨཔཊིཔཱདནཾ. མུནཱིཏི མོནཾ ཝུཙྩཏི ཉཱཎཾ, ཀཱཡམོནེཡྻཱདཱིསུ ཝཱ ཨཉྙཏརཾ, ཏེན སམནྣཱགཏཏྟཱ པུགྒལོ ‘‘མུནཱི’’ཏི ཝུཙྩཏི. སོ པནེས ཨགཱརིཡམུནི, ཨནགཱརིཡམུནི ¶ , སེཀྑམུནི, ཨསེཀྑམུནི, པཙྩེཀབུདྡྷམུནི, མུནིམུནཱིཏི ཨནེཀཝིདྷོ. ཏཏྠ ཨགཱརིཡམུནཱིཏི གིཧཱི ཨཱགཏཕལོ ཝིཉྙཱཏསཱསནོ. ཨནགཱརིཡམུནཱིཏི ཏཐཱརཱུཔོཝ པབྦཛིཏོ. སེཀྑམུནཱིཏི སཏྟ སེཀྑཱ. ཨསེཀྑམུནཱིཏི ཁཱིཎཱསཝོ. པཙྩེཀབུདྡྷམུནཱིཏི པཙྩེཀསམྦུདྡྷོ. མུནིམུནཱིཏི སམྨཱསམྦུདྡྷོ. ཨིམསྨིཾ པནཏྠེ སབྦསངྒཱཧཀཝསེན ¶ མོནེཡྻསངྑཱཏཱཡ པཉྙཱཡ སམནྣཱགཏོ ‘‘མུནཱི’’ཏི ཝེདིཏབྦོ. ཝཱིརིཡབལཱུཔཔནྣོཏི ཝཱིརིཡེན ཙེཝ ཀཱཡབལཉཱཎབལེན ཙ སམནྣཱགཏོ. ཨཀིལཱསཱུཏི ནིཀྐོསཛྫོ –

‘‘ཀཱམཾ ཏཙོ ཙ ནྷཱརུ ཙ, ཨཊྛི ཙ ཨཝསིསྶཏུ;

ཨུཔསུསྶཏུ ནིསྶེསཾ, སརཱིརེ མཾསལོཧིཏ’’ནྟི. –

ཨེཝཾ ཝུཏྟེན ཙཏུརངྒསམནྣཱགཏེན ཝཱིརིཡེན སམནྣཱགཏཏྟཱ ཨནལསོ. ཝིནྡེ ཧདཡསྶ སནྟིནྟི ཙིཏྟསྶཔི ཧདཡརཱུཔསྶཔི སཱིཏལབྷཱཝཀརཎེན ‘‘སནྟི’’ནྟི སངྑཾ གཏཾ ཛྷཱནཝིཔསྶནཱབྷིཉྙཱཨརཧཏྟམགྒཉཱཎསངྑཱཏཾ ཨརིཡདྷམྨཾ ཝིནྡཏི པཊིལབྷཏཱིཏི ཨཏྠོ. བྷགཝཏཱ ཧི –

‘‘དུཀྑཾ, བྷིཀྑཝེ, ཀུསཱིཏོ ཝིཧརཏི ཝོཀིཎྞོ པཱཔཀེཧི ཨཀུསལེཧི དྷམྨེཧི, མཧནྟཉྩ སདཏྠཾ པརིཧཱཔེཏི. ཨཱརདྡྷཝཱིརིཡོ ཙ ཁོ, བྷིཀྑཝེ, སུཁཾ ཝིཧརཏི པཝིཝིཏྟོ པཱཔཀེཧི ཨཀུསལེཧི ¶ དྷམྨེཧི, མཧནྟཉྩ སདཏྠཾ པརིཔཱུརེཏི, ན, བྷིཀྑཝེ, ཧཱིནེན ཨགྒསྶ པཏྟི ཧོཏཱི’’ཏི (སཾ. ནི. ༢.༢༢) –

ཨེཝཾ ཨནེཀེཧི སུཏྟེཧི ཀུསཱིཏསྶ དུཀྑཝིཧཱརོ, ཨཱརདྡྷཝཱིརིཡསྶ ཙ སུཁཝིཧཱརོ སཾཝཎྞིཏོ. ཨིདྷཱཔི ཨཱརདྡྷཝཱིརིཡསྶ ཨཀཏཱབྷིནིཝེསསྶ ཝིཔསྶཀསྶ ཝཱིརིཡབལེན ཨདྷིགནྟབྦཾ ཏམེཝ སུཁཝིཧཱརཾ དསྶེནྟོ ‘‘ཨེཝཾ མུནཱི ཝཱིརིཡབལཱུཔཔནྣོ, ཨཀིལཱསུ ཝིནྡེ ཧདཡསྶ སནྟི’’ནྟི ཨཱཧ. ཨིདཾ ཝུཏྟཾ ཧོཏི – ཡཐཱ ཏེ ཝཱཎིཛཱ ཨཀིལཱསུནོ ཝཎྞུཔཐེ ཁཎནྟཱ ཨུདཀཾ ལབྷིཾསུ, ཨེཝཾ ཨིམསྨིམྤི སཱསནེ ཨཀིལཱསུ ཧུཏྭཱ ཝཱཡམམཱནོ པཎྜིཏོ བྷིཀྑུ ཨིམཾ ཛྷཱནཱདིབྷེདཾ ཧདཡསྶ སནྟིཾ ལབྷཏི. སོ ཏྭཾ བྷིཀྑུ པུབྦེ ཨུདཀམཏྟསྶ ཨཏྠཱཡ ཝཱིརིཡཾ ཀཏྭཱ ཨིདཱནི ཨེཝརཱུཔེ མགྒཕལདཱཡཀེ ནིཡྻཱནིཀསཱསནེ ཀསྨཱ ཝཱིརིཡཾ ཨོསྶཛསཱིཏི ཨེཝཾ ཨིམཾ དྷམྨདེསནཾ དསྶེཏྭཱ ཙཏྟཱརི སཙྩཱནི པཀཱསེསི, སཙྩཔརིཡོསཱནེ ཨོསྶཊྛཝཱིརིཡོ བྷིཀྑུ ཨགྒཕལེ ཨརཧཏྟེ པཏིཊྛཱསི.

སཏྠཱཔི ¶ དྭེ ཝཏྠཱུནི ཀཐེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེཏྭཱ དསྶེསི ‘‘ཏསྨིཾ སམཡེ ཝཱིརིཡཾ ཨནོསྶཛིཏྭཱ པཱསཱཎཾ བྷིནྡིཏྭཱ མཧཱཛནསྶ ཨུདཀདཱཡཀོ ཙཱུལུ༹པཊྛཱཀོ ཨཡཾ ཨོསྶཊྛཝཱིརིཡོ བྷིཀྑུ ཨཧོསི, ཨཝསེསཔརིསཱ ཨིདཱནི བུདྡྷཔརིསཱ ཛཱཏཱ, སཏྠཝཱཧཛེཊྛཀོ པན ཨཧམེཝ ཨཧོསི’’ནྟི དེསནཾ ནིཊྛཱཔེསི.

ཝཎྞུཔཐཛཱཏཀཝཎྞནཱ དུཏིཡཱ.

༣. སེརིཝཝཱཎིཛཛཱཏཀཝཎྞནཱ

ཨིདྷ ཙེ ནཾ ཝིརཱདྷེསཱིཏི ཨིམམྤི དྷམྨདེསནཾ བྷགཝཱ སཱཝཏྠིཡཾ ཝིཧརནྟོ ཨེཀཾ ཨོསྶཊྛཝཱིརིཡམེཝ བྷིཀྑུཾ ཨཱརབྦྷ ཀཐེསི. ཏཉྷི པུརིམནཡེནེཝ བྷིཀྑཱུཧི ཨཱནཱིཏཾ དིསྭཱ སཏྠཱ ཨཱཧ – ‘‘ཏྭཾ བྷིཀྑུ, ཨེཝརཱུཔེ མགྒཕལདཱཡཀེ སཱསནེ ¶ པབྦཛིཏྭཱ ཝཱིརིཡཾ ཨོསྶཛནྟོ སཏསཧསྶགྒྷནིཀཱཡ ཀཉྩནཔཱཏིཡཱ པརིཧཱིནོ སེརིཝཝཱཎིཛོ ཝིཡ ཙིརཾ སོཙིསྶསཱི’’ཏི. བྷིཀྑཱུ ཏསྶཏྠསྶ ¶ ཨཱཝིབྷཱཝཏྠཾ བྷགཝནྟཾ ཡཱཙིཾསུ, བྷགཝཱ བྷཝནྟརེན པཊིཙྪནྣཀཱརཎཾ པཱཀཊམཀཱསི.

ཨཏཱིཏེ ཨིཏོ པཉྩམེ ཀཔྤེ བོདྷིསཏྟོ སེརིཝརཊྛེ ཀཙྪཔུཊཝཱཎིཛོ ཨཧོསི. སོ སེརིཝནཱམཀེན ཨེཀེན ལོལཀཙྪཔུཊཝཱཎིཛེན སདྡྷིཾ ཝོཧཱརཏྠཱཡ གཙྪནྟོ ནཱིལཝཱཧཾ ནཱམ ནདིཾ ཨུཏྟརིཏྭཱ ཨརིཊྛཔུརཾ ནཱམ ནགརཾ པཝིསནྟོ ནགརཝཱིཐིཡོ བྷཱཛེཏྭཱ ཨཏྟནོ པཏྟཝཱིཐིཡཱ བྷཎྜཾ ཝིཀྐིཎནྟོ ཝིཙརི. ཨིཏརོཔི ཨཏྟནོ པཏྟཝཱིཐིཾ གཎྷི. ཏསྨིཉྩ ནགརེ ཨེཀཾ སེཊྛིཀུལཾ པརིཛིཎྞཾ ཨཧོསི, སབྦེ པུཏྟབྷཱཏིཀཱ ཙ དྷནཉྩ པརིཀྑཡཾ ཨགམཾསུ, ཨེཀཱ དཱརིཀཱ ཨཡྻིཀཱཡ སདྡྷིཾ ཨཝསེསཱ ཨཧོསི, ཏཱ དྭེཔི པརེསཾ བྷཏིཾ ཀཏྭཱ ཛཱིཝནྟི. གེཧེ པན ཏཱསཾ མཧཱསེཊྛིནཱ པརིབྷུཏྟཔུབྦཱ སུཝཎྞཔཱཏི བྷཱཛནནྟརེ ནིཀྑིཏྟཱ དཱིགྷརཏྟཾ ཨཝལཉྫིཡམཱནཱ མལགྒཧིཏཱ ཨཧོསི, ཏཱ ཏསྶཱ སུཝཎྞཔཱཏིབྷཱཝམྤི ན ཛཱནནྟི. སོ ལོལཝཱཎིཛོ ཏསྨིཾ སམཡེ ‘‘མཎིཀེ གཎྷཐ, མཎིཀེ གཎྷཐཱ’’ཏི ཝིཙརནྟོ ཏཾ གྷརདྭཱརཾ པཱཔུཎི. སཱ ཀུམཱརིཀཱ ཏཾ དིསྭཱ ཨཡྻིཀཾ ཨཱཧ ‘‘ཨམྨ མཡ྄ཧཾ ཨེཀཾ པིལ༹ནྡྷནཾ གཎྷཱ’’ཏི. ཨམྨ མཡཾ དུགྒཏཱ, ཀིཾ དཏྭཱ གཎྷིསྶཱམཱཏི. ཨཡཾ ནོ པཱཏི ཨཏྠི, ནོ ཙ ཨམྷཱཀཾ ཨུཔཀཱརཱ, ཨིམཾ དཏྭཱ གཎྷཱཏི. སཱ ཝཱཎིཛཾ པཀྐོསཱཔེཏྭཱ ཨཱསནེ ནིསཱིདཱཔེཏྭཱ ཏཾ པཱཏིཾ དཏྭཱ ‘‘ཨཡྻ, ཨིམཾ གཧེཏྭཱ ཏཝ བྷགིནིཡཱ ཀིཉྩིདེཝ དེཧཱི’’ཏི ཨཱཧ. ཝཱཎིཛོ པཱཏིཾ ཧཏྠེན གཧེཏྭཱཝ ‘‘སུཝཎྞཔཱཏི བྷཝིསྶཏཱི’’ཏི པརིཝཏྟེཏྭཱ པཱཏིཔིཊྛིཡཾ སཱུཙིཡཱ ལེཁཾ ཀཌྜྷིཏྭཱ སུཝཎྞབྷཱཝཾ ཉཏྭཱ ¶ ‘‘ཨིམཱསཾ ཀིཉྩི ཨདཏྭཱཝ ཨིམཾ པཱཏིཾ ཧརིསྶཱམཱི’’ཏི ‘‘ཨཡཾ ཀིཾ ཨགྒྷཏི, ཨཌྜྷམཱསཀོཔིསྶཱ མཱུལཾ ན ¶ ཧོཏཱི’’ཏི བྷཱུམིཡཾ ཁིཔིཏྭཱ ཨུཊྛཱཡཱསནཱ པཀྐཱམི. ཨེཀེན པཝིསིཏྭཱ ནིཀྑནྟཝཱིཐིཾ ཨིཏརོ པཝིསིཏུཾ ལབྷཏཱིཏི བོདྷིསཏྟོ ཏཾ ཝཱིཐིཾ པཝིསིཏྭཱ ‘‘མཎིཀེ གཎྷཐ, མཎིཀེ གཎྷཐཱ’’ཏི ཝིཙརནྟོ ཏམེཝ གྷརདྭཱརཾ པཱཔུཎི.

པུན སཱ ཀུམཱརིཀཱ ཏཐེཝ ཨཡྻིཀཾ ཨཱཧ. ཨཐ ནཾ ཨཡྻིཀཱ ‘‘ཨམྨ, པཋམཾ ཨཱགཏཝཱཎིཛོ པཱཏིཾ བྷཱུམིཡཾ ཁིཔིཏྭཱ གཏོ, ཨིདཱནི ཀིཾ དཏྭཱ གཎྷིསྶཱམཱ’’ཏི ཨཱཧ. ཨམྨ, སོ ཝཱཎིཛོ ཕརུསཝཱཙོ, ཨཡཾ པན པིཡདསྶནོ མུདུསལླཱཔོ, ཨཔྤེཝ ནཱམ ནཾ གཎྷེཡྻཱཏི. ཨམྨ, ཏེན ཧི པཀྐོསཱཧཱིཏི. སཱ ཏཾ པཀྐོསི. ཨཐསྶ གེཧཾ པཝིསིཏྭཱ ནིསིནྣསྶ ¶ ཏཾ པཱཏིཾ ཨདཾསུ. སོ ཏསྶཱ སུཝཎྞཔཱཏིབྷཱཝཾ ཉཏྭཱ ‘‘ཨམྨ, ཨཡཾ པཱཏི སཏསཧསྶཾ ཨགྒྷཏི, སཏསཧསྶགྒྷནཀབྷཎྜཾ མཡ྄ཧཾ ཧཏྠེ ནཏྠཱི’’ཏི ཨཱཧ. ཨཡྻ, པཋམཾ ཨཱགཏཝཱཎིཛོ ‘‘ཨཡཾ ཨཌྜྷམཱསཀམྤི ན ཨགྒྷཏཱི’’ཏི ཝཏྭཱ བྷཱུམིཡཾ ཁིཔིཏྭཱ གཏོ, ཨཡཾ པན ཏཝ པུཉྙེན སུཝཎྞཔཱཏི ཛཱཏཱ བྷཝིསྶཏི, མཡཾ ཨིམཾ ཏུཡ྄ཧཾ དེམ, ཀིཉྩིདེཝ ནོ དཏྭཱ ཨིམཾ གཧེཏྭཱ ཡཱཧཱིཏི. བོདྷིསཏྟོ ཏསྨིཾ ཁཎེ ཧཏྠགཏཱནི པཉྩ ཀཧཱཔཎསཏཱནི པཉྩསཏགྒྷནཀཉྩ བྷཎྜཾ སབྦཾ དཏྭཱ ‘‘མཡ྄ཧཾ ཨིམཾ ཏུལཉྩ པསིབྦཀཉྩ ཨཊྛ ཙ ཀཧཱཔཎེ དེཐཱ’’ཏི ཨེཏྟཀཾ ཡཱཙིཏྭཱ ཨཱདཱཡ པཀྐཱམི. སོ སཱིགྷམེཝ ནདཱིཏཱིརཾ གནྟྭཱ ནཱཝིཀསྶ ཨཊྛ ཀཧཱཔཎེ དཏྭཱ ནཱཝཾ ཨབྷིརུཧི.

ཏཏོ ལོལཝཱཎིཛོཔི པུན ཏཾ གེཧཾ གནྟྭཱ ‘‘ཨཱཧརཐ ཏཾ པཱཏིཾ, ཏུམྷཱཀཾ ཀིཉྩིདེཝ དསྶཱམཱི’’ཏི ཨཱཧ. སཱ ཏཾ པརིབྷཱསིཏྭཱ ‘‘ཏྭཾ ཨམྷཱཀཾ སཏསཧསྶགྒྷནིཀཾ སུཝཎྞཔཱཏིཾ ཨཌྜྷམཱསགྒྷནིཀམྤི ན ཨཀཱསི, ཏུཡ྄ཧཾ པན སཱམིཀསདིསོ ཨེཀོ དྷམྨིཀོ ཝཱཎིཛོ ཨམྷཱཀཾ སཧསྶཾ དཏྭཱ ཏཾ ཨཱདཱཡ གཏོ’’ཏི ཨཱཧ. ཏཾ སུཏྭཱཝ ‘‘སཏསཧསྶགྒྷནིཀཱཡ སུཝཎྞཔཱཏིཡཱ པརིཧཱིནོམྷི, མཧཱཛཱནིཀརོ ཝཏ མེ ཨཡ’’ནྟི སཉྫཱཏབལཝསོཀོ སཏིཾ པཙྩུཔཊྛཱཔེཏུཾ ཨསཀྐོནྟོ ¶ ཝིསཉྙཱི ཧུཏྭཱ ཨཏྟནོ ཧཏྠགཏེ ཀཧཱཔཎེ ཙེཝ བྷཎྜིཀཉྩ གྷརདྭཱརེཡེཝ ཝིཀིརིཏྭཱ ནིཝཱསནཔཱརུཔནཾ པཧཱཡ ཏུལཱདཎྜཾ མུགྒརཾ ཀཏྭཱ ཨཱདཱཡ བོདྷིསཏྟསྶ ཨནུཔདཾ པཀྐནྟོ ནདཱིཏཱིརཾ གནྟྭཱ བོདྷིསཏྟཾ གཙྪནྟཾ དིསྭཱ ‘‘ཨམྦྷོ, ནཱཝིཀ, ནཱཝཾ ནིཝཏྟེཧཱི’’ཏི ཨཱཧ. བོདྷིསཏྟོ པན ‘‘ཏཱཏ, མཱ ནིཝཏྟཡཱི’’ཏི པཊིསེདྷེསི. ཨིཏརསྶཔི བོདྷིསཏྟཾ གཙྪནྟཾ པསྶནྟསྶེཝ བལཝསོཀོ ཨུདཔཱདི, ཧདཡཾ ཨུཎྷཾ ཨཧོསི, མུཁཏོ ལོཧིཏཾ ཨུགྒཉྪི, ཝཱཔིཀདྡམོ ཝིཡ ཧདཡཾ ཕལི. སོ བོདྷིསཏྟེ ཨཱགྷཱཏཾ བནྡྷིཏྭཱ ཏཏྠེཝ ཛཱིཝིཏཀྑཡཾ པཱཔུཎི ¶ . ཨིདཾ པཋམཾ དེཝདཏྟསྶ བོདྷིསཏྟེ ཨཱགྷཱཏབནྡྷནཾ. བོདྷིསཏྟོ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སམྨཱསམྦུདྡྷོ ཨིམཾ དྷམྨདེསནཾ ཀཐེཏྭཱ ཨབྷིསམྦུདྡྷོཝ ཨིམཾ གཱཐཾ ཀཐེསི –

༣.

‘‘ཨིདྷ ¶ ཙེ ནཾ ཝིརཱདྷེསི, སདྡྷམྨསྶ ནིཡཱམཏཾ;

ཙིརཾ ཏྭཾ ཨནུཏཔྤེསི, སེརིཝཱཡཾཝ ཝཱཎིཛོ’’ཏི.

ཏཏྠ ཨིདྷ ཙེ ནཾ ཝིརཱདྷེསི, སདྡྷམྨསྶ ནིཡཱམཏནྟི ཨིམསྨིཾ སཱསནེ ཨེཏཾ སདྡྷམྨསྶ ནིཡཱམཏཱསངྑཱཏཾ སོཏཱཔཏྟིམགྒཾ ཝིརཱདྷེསི. ཡདི ཝིརཱདྷེསི, ཝཱིརིཡཾ ཨོསྶཛནྟོ ནཱདྷིགཙྪསི ན པཊིལབྷསཱིཏི ཨཏྠོ. ཙིརཾ ཏྭཾ ཨནུཏཔྤེསཱིཏི ཨེཝཾ སནྟེ ཏྭཾ དཱིགྷམདྡྷཱནཾ སོཙནྟོ པརིདེཝནྟོ ཨནུཏཔེསྶསི, ཨཐ ཝཱ ཨོསྶཊྛཝཱིརིཡཏཱཡ ཨརིཡམགྒསྶ ཝིརཱདྷིཏཏྟཱ དཱིགྷརཏྟཾ ནིརཡཱདཱིསུ ཨུཔྤནྣོ ནཱནཔྤཀཱརཱནི དུཀྑཱནི ཨནུབྷཝནྟོ ཨནུཏཔྤིསྶསི ཀིལམིསྶསཱིཏི ཨཡམེཏྠ ཨཏྠོ. ཀཐཾ? སེརིཝཱཡཾཝ ཝཱཎིཛོཏི ‘‘སེརིཝཱ’’ཏི ཨེཝཾནཱམཀོ ཨཡཾ ཝཱཎིཛོ ཡཐཱ. ཨིདཾ ཝུཏྟཾ ཧོཏི – ཡཐཱ པུབྦེ སེརིཝནཱམཀོ ཝཱཎིཛོ སཏསཧསྶགྒྷནིཀཾ སུཝཎྞཔཱཏིཾ ལབྷིཏྭཱ ཏསྶཱ གཧཎཏྠཱཡ ཝཱིརིཡཾ ཨཀཏྭཱ ཏཏོ པརིཧཱིནོ ཨནུཏཔྤི, ཨེཝམེཝ ཏྭམྤི ཨིམསྨིཾ སཱསནེ པཊིཡཏྟསུཝཎྞཔཱཏིསདིསཾ ཨརིཡམགྒཾ ཨོསྶཊྛཝཱིརིཡཏཱཡ ཨནདྷིགཙྪནྟོ ཏཏོ པརིཧཱིནོ དཱིགྷརཏྟཾ ཨནུཏཔྤིསྶསི. སཙེ པན ཝཱིརིཡཾ ན ཨོསྶཛིསྶསི, པཎྜིཏཝཱཎིཛོ སུཝཎྞཔཱཏིཾ ཝིཡ མམ སཱསནེ ནཝཝིདྷམྤི ལོཀུཏྟརདྷམྨཾ པཊིལབྷིསྶསཱིཏི.

ཨེཝམསྶ ¶ སཏྠཱ ཨརཧཏྟེན ཀཱུཊཾ གཎྷནྟོ ཨིམཾ དྷམྨདེསནཾ དསྶེཏྭཱ ཙཏྟཱརི སཙྩཱནི པཀཱསེསི, སཙྩཔརིཡོསཱནེ ཨོསྶཊྛཝཱིརིཡོ བྷིཀྑུ ཨགྒཕལེ ཨརཧཏྟེ པཏིཊྛཱསི.

སཏྠཱཔི དྭེ ཝཏྠཱུནི ཀཐེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེཏྭཱ དསྶེསི – ‘‘ཏདཱ བཱལཝཱཎིཛོ དེཝདཏྟོ ཨཧོསི, པཎྜིཏཝཱཎིཛོ པན ཨཧམེཝ ཨཧོསི’’ནྟི དེསནཾ ནིཊྛཱཔེསི.

སེརིཝཝཱཎིཛཛཱཏཀཝཎྞནཱ ཏཏིཡཱ.

༤. ཙཱུལ༹སེཊྛིཛཱཏཀཝཎྞནཱ

ཨཔྤཀེནཔི ¶ ¶ མེདྷཱཝཱིཏི ཨིམཾ དྷམྨདེསནཾ བྷགཝཱ རཱཛགཧཾ ཨུཔནིསྶཱཡ ཛཱིཝཀམྦཝནེ ཝིཧརནྟོ ཙཱུལ༹པནྠཀཏྠེརཾ ཨཱརབྦྷ ཀཐེསི.

ཏཏྠ ཙཱུལ༹པནྠཀསྶ ཏཱཝ ནིབྦཏྟི ཀཐེཏབྦཱ. རཱཛགཧེ ཀིར དྷནསེཊྛིཀུལསྶ དྷཱིཏཱ ཨཏྟནོ དཱསེནེཝ སདྡྷིཾ སནྠཝཾ ཀཏྭཱ ‘‘ཨཉྙེཔི མེ ཨིམཾ ཀམྨཾ ཛཱནེཡྻུ’’ནྟི བྷཱིཏཱ ཨེཝམཱཧ ‘‘ཨམྷེཧི ཨིམསྨིཾ ཋཱནེ ཝསིཏུཾ ན སཀྐཱ, སཙེ མེ མཱཏཱཔིཏརོ ཨིམཾ དོསཾ ཛཱནིསྶནྟི, ཁཎྜཱཁཎྜཾ ཀརིསྶནྟི, ཝིདེསཾ གནྟྭཱ ཝསིསྶཱམཱ’’ཏི ཧཏྠསཱརཾ གཧེཏྭཱ ཨགྒདྭཱརེན ནིཀྑམིཏྭཱ ‘‘ཡཏྠ ཝཱ ཏཏྠ ཝཱ ཨཉྙེཧི ཨཛཱནནཊྛཱནཾ གནྟྭཱ ཝསིསྶཱམཱ’’ཏི ཨུབྷོཔི ཨགམཾསུ.

ཏེསཾ ཨེཀསྨིཾ ཋཱནེ ཝསནྟཱནཾ སཾཝཱསམནྭཱཡ ཏསྶཱ ཀུཙྪིཡཾ གབྦྷོ པཏིཊྛཱསི. སཱ གབྦྷཔརིཔཱཀཾ ཨཱགམྨ སཱམིཀེན སདྡྷིཾ མནྟེསི ‘‘གབྦྷོ མེ པརིཔཱཀཾ གཏོ, ཉཱཏིབནྡྷུཝིརཧིཏེ ཋཱནེ གབྦྷཝུཊྛཱནཾ ནཱམ ཨུབྷིནྣམྤི ཨམྷཱཀཾ དུཀྑམེཝ, ཀུལགེཧམེཝ གཙྪཱམཱ’’ཏི. སོ ‘‘སཙཱཧཾ གམིསྶཱམི, ཛཱིཝིཏཾ མེ ནཏྠཱི’’ཏི ཙིནྟེཏྭཱ ‘‘ཨཛྫ གཙྪཱམ, སྭེ གཙྪཱམཱ’’ཏི དིཝསེ ཨཏིཀྐཱམེསི. སཱ ཙིནྟེསི ‘‘ཨཡཾ བཱལོ ཨཏྟནོ དོསམཧནྟཏཱཡ གནྟུཾ ན ཨུསྶཧཏི, མཱཏཱཔིཏརོ ནཱམ ཨེཀནྟཧིཏཱ, ཨཡཾ གཙྪཏུ ཝཱ མཱ ཝཱ, མཡཱ གནྟུཾ ཝཊྚཏཱི’’ཏི. སཱ ཏསྨིཾ གེཧཱ ནིཀྑནྟེ གེཧཔརིཀྑཱརཾ པཊིསཱམེཏྭཱ ཨཏྟནོ ཀུལགྷརཾ གཏབྷཱཝཾ ཨནནྟརགེཧཝཱསཱིནཾ ཨཱརོཙེཏྭཱ མགྒཾ པཊིཔཛྫི.

ཨཐ སོ པུརིསོ གྷརཾ ཨཱགཏོ ཏཾ ཨདིསྭཱ པཊིཝིསྶཀེ པུཙྪིཏྭཱ ‘‘ཀུལགྷརཾ གཏཱ’’ཏི སུཏྭཱ ཝེགེན ཨནུབནྡྷིཏྭཱ ཨནྟརཱམགྒེ སམྤཱཔུཎི. ཏསྶཱཔི ཏཏྠེཝ གབྦྷཝུཊྛཱནཾ ཨཧོསི. སོ ‘‘ཀིཾ ཨིདཾ བྷདྡེ’’ཏི པུཙྪི. ‘‘སཱམི, ཨེཀོ པུཏྟོ ཛཱཏོ’’ཏི. ‘‘ཨིདཱནི ཀིཾ ཀརིསྶཱམཱ’’ཏི? ‘‘ཡསྶཏྠཱཡ མཡཾ ཀུལགྷརཾ གཙྪེཡྻཱམ, ཏཾ ཀམྨཾ ཨནྟརཱཝ ནིཔྥནྣཾ, ཏཏྠ གནྟྭཱ ཀིཾ ཀརིསྶཱམ, ནིཝཏྟཱམཱ’’ཏི དྭེཔི ཨེཀཙིཏྟཱ ཧུཏྭཱ ནིཝཏྟིཾསུ. ཏསྶ ཙ དཱརཀསྶ པནྠེ ཛཱཏཏྟཱ ‘‘པནྠཀོ’’ཏི ནཱམཾ ཨཀཾསུ ¶ . ཏསྶཱ ན ཙིརསྶེཝ ཨཔརོཔི གབྦྷོ པཏིཊྛཧི. སབྦཾ པུརིམནཡེནེཝ ཝིཏྠཱརེཏབྦཾ. ཏསྶཱཔི དཱརཀསྶ པནྠེ ཛཱཏཏྟཱ པཋམཛཱཏསྶ ‘‘མཧཱཔནྠཀོ’’ཏི ནཱམཾ ¶ ཀཏྭཱ ཨིཏརསྶ ‘‘ཙཱུལ༹པནྠཀོ’’ཏི ནཱམཾ ཨཀཾསུ. ཏེ དྭེཔི དཱརཀེ གཧེཏྭཱ ཨཏྟནོ ཝསནཊྛཱནམེཝ ཨཱགཏཱ.

ཏེསཾ ¶ ཏཏྠ ཝསནྟཱནཾ ཨཡཾ མཧཱཔནྠཀདཱརཀོ ཨཉྙེ དཱརཀེ ‘‘ཙཱུལ༹པིཏཱ མཧཱཔིཏཱ’’ཏི, ‘‘ཨཡྻཀོ ཨཡྻིཀཱ’’ཏི ཙ ཝདནྟེ སུཏྭཱ མཱཏརཾ པུཙྪི ‘‘ཨམྨ, ཨཉྙེ དཱརཀཱ ‘ཙཱུལ༹པིཏཱ མཧཱཔིཏཱ’ཏིཔི ཝདནྟི, ‘ཨཡྻཀོ ཨཡྻིཀཱ’ཏིཔི ཝདནྟི, ཨམྷཱཀཾ ཉཱཏཀཱ ནཏྠཱི’’ཏི. ‘‘ཨཱམ, ཏཱཏ, ཏུམྷཱཀཾ ཨེཏྠ ཉཱཏཀཱ ནཏྠི, རཱཛགཧནགརེ པན ཝོ དྷནསེཊྛི ནཱམ ཨཡྻཀོ, ཏཏྠ ཏུམྷཱཀཾ བཧཱུ ཉཱཏཀཱ’’ཏི. ‘‘ཀསྨཱ ཏཏྠ ན གཙྪཐ, ཨམྨཱ’’ཏི? སཱ ཨཏྟནོ ཨགམནཀཱརཎཾ པུཏྟསྶ ཨཀཐེཏྭཱ པུཏྟེསུ པུནཔྤུནཾ ཀཐེནྟེསུ སཱམིཀཾ ཨཱཧ – ‘‘ཨིམེ དཱརཀཱ མཾ ཨཏིཝིཡ ཀིལམེནྟི, ཀིཾ ནོ མཱཏཱཔིཏརོ དིསྭཱ མཾསཾ ཁཱདིསྶནྟི, ཨེཧི དཱརཀཱནཾ ཨཡྻཀཀུལཾ དསྶེསྶཱམཱ’’ཏི. ‘‘ཨཧཾ སམྨུཁཱ བྷཝིཏུཾ ན སཀྑིསྶཱམི, ཏཾ པན ཏཏྠ ནཡིསྶཱམཱི’’ཏི. ‘‘སཱདྷུ, ཨཡྻ, ཡེན ཀེནཙི ཨུཔཱཡེན དཱརཀཱནཾ ཨཡྻཀཀུལམེཝ དཊྛུཾ ཝཊྚཏཱི’’ཏི དྭེཔི ཛནཱ དཱརཀེ ཨཱདཱཡ ཨནུཔུབྦེན རཱཛགཧཾ པཏྭཱ ནགརདྭཱརེ ཨེཀིསྶཱ སཱལཱཡ ནིཝཱསཾ ཀཏྭཱ དཱརཀམཱཏཱ དྭེ དཱརཀེ གཧེཏྭཱ ཨཱགཏབྷཱཝཾ མཱཏཱཔིཏཱུནཾ ཨཱརོཙཱཔེསི.

ཏེ ཏཾ སཱསནཾ སུཏྭཱ ‘‘སཾསཱརེ ཝིཙརནྟཱནཾ ན པུཏྟོ ན དྷཱིཏཱ ནཱམ ནཏྠི, ཏེ ཨམྷཱཀཾ མཧཱཔརཱདྷིཀཱ, ན སཀྐཱ ཏེཧི ཨམྷཱཀཾ ཙཀྑུཔཐེ ཋཱཏུཾ, ཨེཏྟཀཾ པན དྷནཾ གཧེཏྭཱ དྭེཔི ཛནཱ ཕཱསུཀཊྛཱནཾ གནྟྭཱ ཛཱིཝནྟུ, དཱརཀེ པན ཨིདྷ པེསེནྟཱུ’’ཏི. སེཊྛིདྷཱིཏཱ མཱཏཱཔིཏཱུཧི པེསིཏཾ དྷནཾ གཧེཏྭཱ དཱརཀེ ཨཱགཏདཱུཏཱནཾཡེཝ ཧཏྠེ དཏྭཱ པེསེསི, དཱརཀཱ ཨཡྻཀཀུལེ ཝཌྜྷནྟི. ཏེསུ ཙཱུལ༹པནྠཀོ ཨཏིདཧརོ, མཧཱཔནྠཀོ པན ཨཡྻཀེན སདྡྷིཾ དསབལསྶ དྷམྨཀཐཾ སོཏུཾ གཙྪཏི. ཏསྶ ནིཙྩཾ སཏྠུ སམྨུཁཱ དྷམྨཾ སུཎནྟསྶ པབྦཛྫཱཡ ཙིཏྟཾ ནམི. སོ ཨཡྻཀཾ ཨཱཧ ‘‘སཙེ ཏུམྷེ སམྤཊིཙྪཐ, ཨཧཾ པབྦཛེཡྻ’’ནྟི. ‘‘ཀིཾ ཝདེསི, ཏཱཏ, མཡ྄ཧཾ སཀལལོཀསྶཔི པབྦཛྫཱཏོ ཏཝེཝ པབྦཛྫཱ བྷདྡིཀཱ, སཙེ སཀྐོསི, པབྦཛ ཏཱཏཱ’’ཏི སམྤཊིཙྪིཏྭཱ སཏྠུ སནྟིཀཾ གཏོ. སཏྠཱ ‘‘ཀིཾ མཧཱསེཊྛི དཱརཀོ ཏེ ལདྡྷོ’’ཏི. ‘‘ཨཱམ, བྷནྟེ ཨཡཾ དཱརཀོ མཡ྄ཧཾ ནཏྟཱ, ཏུམྷཱཀཾ ¶ སནྟིཀེ པབྦཛཱམཱིཏི ཝདཏཱི’’ཏི ཨཱཧ. སཏྠཱ ཨཉྙཏརཾ ¶ པིཎྜཙཱརིཀཾ བྷིཀྑུཾ ‘‘ཨིམཾ དཱརཀཾ པབྦཱཛེཧཱི’’ཏི ཨཱཎཱཔེསི. ཐེརོ ཏསྶ ཏཙཔཉྩཀཀམྨཊྛཱནཾ ཨཱཙིཀྑིཏྭཱ པབྦཱཛེསི. སོ བཧུཾ བུདྡྷཝཙནཾ ཨུགྒཎྷིཏྭཱ པརིཔུཎྞཝསྶོ ཨུཔསམྤདཾ ལབྷི. ཨུཔསམྤནྣོ ཧུཏྭཱ ཡོནིསོ མནསིཀཱརེ ཀམྨཾ ཀརོནྟོ ཨརཧཏྟཾ པཱཔུཎི.

སོ ཛྷཱནསུཁེན, མགྒསུཁེན, ཕལསུཁེན ཝཱིཏིནཱམེནྟོ ཙིནྟེསི ‘‘སཀྐཱ ནུ ཁོ ཨིམཾ སུཁཾ ཙཱུལ༹པནྠཀསྶ དཱཏུ’’ནྟི. ཏཏོ ཨཡྻཀསེཊྛིསྶ སནྟིཀཾ གནྟྭཱ ‘‘མཧཱསེཊྛི སཙེ ཏུམྷེ སམྤཊིཙྪཐ, ཨཧཾ ཙཱུལ༹པནྠཀཾ པབྦཱཛེཡྻ’’ནྟི ཨཱཧ. ‘‘པབྦཱཛེཐ, བྷནྟེ’’ཏི. ཐེརོ ཙཱུལ༹པནྠཀདཱརཀཾ ¶ པབྦཱཛེཏྭཱ དསསུ སཱིལེསུ པཏིཊྛཱཔེསི. ཙཱུལ༹པནྠཀསཱམཎེརོ པབྦཛིཏྭཱཝ དནྡྷོ ཨཧོསི.

‘‘པདུམཾ ཡཐཱ ཀོཀནདཾ སུགནྡྷཾ, པཱཏོ སིཡཱ ཕུལླམཝཱིཏགནྡྷཾ;

ཨངྒཱིརསཾ པསྶ ཝིརོཙམཱནཾ, ཏཔནྟམཱདིཙྩམིཝནྟལིཀྑེ’’ཏི. (སཾ. ནི. ༡.༡༢༣; ཨ. ནི. ༥.༡༩༥) –

ཨིམཾ ཨེཀགཱཐཾ ཙཏཱུཧི མཱསེཧི གཎྷིཏུཾ ནཱསཀྑི. སོ ཀིར ཀསྶཔསམྨཱསམྦུདྡྷཀཱལེ པབྦཛིཏྭཱ པཉྙཝཱ ཧུཏྭཱ ཨཉྙཏརསྶ དནྡྷབྷིཀྑུནོ ཨུདྡེསགྒཧཎཀཱལེ པརིཧཱསཀེལི༹ཾ ཨཀཱསི. སོ བྷིཀྑུ ཏེན པརིཧཱསེན ལཛྫིཏོ ནེཝ ཨུདྡེསཾ གཎྷི, ན སཛ྄ཛྷཱཡམཀཱསི. ཏེན ཀམྨེན ཨཡཾ པབྦཛིཏྭཱཝ དནྡྷོ ཛཱཏོ, གཧིཏགཧིཏཾ པདཾ ཨུཔརཱུཔརི པདཾ གཎྷནྟསྶ ནསྶཏི. ཏསྶ ཨིམམེཝ གཱཐཾ གཧེཏུཾ ཝཱཡམནྟསྶ ཙཏྟཱརོ མཱསཱ ཨཏིཀྐནྟཱ.

ཨཐ ནཾ མཧཱཔནྠཀོ ཨཱཧ ‘‘ཙཱུལ༹པནྠཀ, ཏྭཾ ཨིམསྨིཾ སཱསནེ ཨབྷབྦོ, ཙཏཱུཧི མཱསེཧི ཨེཀམྤི གཱཐཾ གཧེཏུཾ ན སཀྐོསི, པབྦཛིཏཀིཙྩཾ པན ཏྭཾ ཀཐཾ མཏྠཀཾ པཱཔེསྶསི, ནིཀྑམ ཨིཏོ’’ཏི ཝིཧཱརཱ ནིཀྐཌྜྷི. ཙཱུལ༹པནྠཀོ བུདྡྷསཱསནེ སིནེཧེན གིཧིབྷཱཝཾ ན པཏྠེཏི. ཏསྨིཉྩ ཀཱལེ མཧཱཔནྠཀོ བྷཏྟུདྡེསཀོ ཧོཏི. ཛཱིཝཀོ ཀོམཱརབྷཙྩོ བཧུཾ གནྡྷམཱལཾ ཨཱདཱཡ ཨཏྟནོ ཨམྦཝནཾ གནྟྭཱ སཏྠཱརཾ པཱུཛེཏྭཱ དྷམྨཾ སུཏྭཱ ཨུཊྛཱཡཱསནཱ དསབལཾ ཝནྡིཏྭཱ མཧཱཔནྠཀཾ ཨུཔསངྐམིཏྭཱ ‘‘ཀིཏྟཀཱ ¶ , བྷནྟེ, སཏྠུ སནྟིཀེ བྷིཀྑཱུ’’ཏི པུཙྪི. ‘‘པཉྩམཏྟཱནི བྷིཀྑུསཏཱནཱི’’ཏི. ‘‘སྭེ, བྷནྟེ, བུདྡྷཔྤམུཁཱནི པཉྩ བྷིཀྑུསཏཱནི ཨཱདཱཡ ཨམྷཱཀཾ ནིཝེསནེ བྷིཀྑཾ གཎྷཐཱ’’ཏི. ‘‘ཨུཔཱསཀ, ཙཱུལ༹པནྠཀོ ནཱམ བྷིཀྑུ དནྡྷོ ཨཝིརུལ༹ྷིདྷམྨོ, ཏཾ ཋཔེཏྭཱ སེསཱནཾ ནིམནྟནཾ སམྤཊིཙྪཱམཱི’’ཏི ¶ ཐེརོ ཨཱཧ. ཏཾ སུཏྭཱ ཙཱུལ༹པནྠཀོ ཙིནྟེསི ‘‘ཐེརོ ཨེཏྟཀཱནཾ བྷིཀྑཱུནཾ ནིམནྟནཾ སམྤཊིཙྪནྟོ མཾ བཱཧིརཾ ཀཏྭཱ སམྤཊིཙྪཏི, ནིསྶཾསཡཾ མཡ྄ཧཾ བྷཱཏིཀསྶ མཡི ཙིཏྟཾ བྷིནྣཾ བྷཝིསྶཏི, ཀིཾ ཨིདཱནི མཡ྄ཧཾ ཨིམིནཱ སཱསནེན, གིཧཱི ཧུཏྭཱ དཱནཱདཱིནི པུཉྙཱནི ཀརོནྟོ ཛཱིཝིསྶཱམཱི’’ཏི.

སོ པུནདིཝསེ པཱཏོཝ ‘‘གིཧཱི བྷཝིསྶཱམཱི’’ཏི པཱཡཱསི. སཏྠཱ པཙྩཱུསཀཱལེཡེཝ ལོཀཾ ཨོལོཀེནྟོ ཨིམཾ ཀཱརཎཾ དིསྭཱ པཋམཏརཾ གནྟྭཱ ཙཱུལ༹པནྠཀསྶ གམནམགྒེ དྭཱརཀོཊྛཀེ ཙངྐམནྟོ ཨཊྛཱསི. ཙཱུལ༹པནྠཀོ གྷརཾ གཙྪནྟོ སཏྠཱརཾ དིསྭཱ ཨུཔསངྐམིཏྭཱ ཝནྡི. ཨཐ ནཾ སཏྠཱ ‘‘ཀཧཾ པན, ཏྭཾ ཙཱུལ༹པནྠཀ, ཨིམཱཡ ཝེལཱཡ གཙྪསཱི’’ཏི ཨཱཧ. བྷཱཏཱ མཾ, བྷནྟེ, ནིཀྐཌྜྷཏི ¶ , ཏེནཱཧཾ ཝིབྦྷམིཏུཾ གཙྪཱམཱིཏི. ཙཱུལ༹པནྠཀ, ཏཝ པབྦཛྫཱ ནཱམ མམ སནྟཀཱ, བྷཱཏརཱ ནིཀྐཌྜྷིཏོ ཀསྨཱ མམ སནྟིཀཾ ནཱགཉྪི? ཨེཧི ཀིཾ ཏེ གིཧིབྷཱཝེན, མམ སནྟིཀེ བྷཝིསྶསཱི’’ཏི བྷགཝཱ ཙཱུལ༹པནྠཀཾ ཨཱདཱཡ གནྟྭཱ གནྡྷཀུཊིཔྤམུཁེ ནིསཱིདཱཔེཏྭཱ ‘‘ཙཱུལ༹པནྠཀ, ཏྭཾ པུརཏྠཱབྷིམུཁོ ཧུཏྭཱ ཨིམཾ པིལོཏིཀཾ ‘རཛོཧརཎཾ རཛོཧརཎ’ནྟི པརིམཛྫནྟོ ཨིདྷེཝ ཧོཧཱི’’ཏི ཨིདྡྷིཡཱ ཨབྷིསངྑཏཾ པརིསུདྡྷཾ པིལོཏིཀཱཁཎྜཾ དཏྭཱ ཀཱལེ ཨཱརོཙིཏེ བྷིཀྑུསངྒྷཔརིཝུཏོ ཛཱིཝཀསྶ གེཧཾ གནྟྭཱ པཉྙཏྟཱསནེ ནིསཱིདི.

ཙཱུལ༹པནྠཀོཔི སཱུརིཡཾ ཨོལོཀེནྟོ ཏཾ པིལོཏིཀཱཁཎྜཾ ‘‘རཛོཧརཎཾ རཛོཧརཎ’’ནྟི པརིམཛྫནྟོ ནིསཱིདི, ཏསྶ ཏཾ པིལོཏིཀཱཁཎྜཾ པརིམཛྫནྟསྶ པརིམཛྫནྟསྶ ཀིལིཊྛཾ ཨཧོསི. ཏཏོ ཙིནྟེསི ‘‘ཨིདཾ པིལོཏིཀཱཁཎྜཾ ཨཏིཝིཡ པརིསུདྡྷཾ, ཨིམཾ པན ཨཏྟབྷཱཝཾ ནིསྶཱཡ པུརིམཔཀཏིཾ ཝིཛཧིཏྭཱ ཨེཝཾ ཀིལིཊྛཾ ཛཱཏཾ, ཨནིཙྩཱ ཝཏ སངྑཱརཱ’’ཏི ཁཡཝཡཾ པཊྛཔེནྟོ ཝིཔསྶནཾ ཝཌྜྷེསི. སཏྠཱ ‘‘ཙཱུལ༹པནྠཀསྶ ཙིཏྟཾ ཝིཔསྶནཾ ཨཱརུལ༹ྷ’’ནྟི ཉཏྭཱ ‘‘ཙཱུལ༹པནྠཀ, ཏྭཾ ཨེཏཾ པིལོཏིཀཱཁཎྜམེཝ སཾཀིལིཊྛཾ རཛོརཉྫིཏཾ ཛཱཏནྟི མཱ སཉྙཾ ཀརི, ཨབྦྷནྟརེ པན ཏེ རཱགརཛཱདཡོ ཨཏྠི, ཏེ ཧརཱཧཱི’’ཏི ཝཏྭཱ ཨོབྷཱསཾ ཝིསྶཛྫེཏྭཱ པུརཏོ ནིསིནྣོ ཝིཡ པཉྙཱཡམཱནརཱུཔོ ཧུཏྭཱ ཨིམཱ གཱཐཱ ཨབྷཱསི –

‘‘རཱགོ ¶ རཛོ ན ཙ པན རེཎུ ཝུཙྩཏི, རཱགསྶེཏཾ ཨདྷིཝཙནཾ རཛོཏི;

ཨེཏཾ རཛཾ ཝིཔྤཛཧིཏྭ བྷིཀྑཝོ, ཝིཧརནྟི ཏེ ཝིགཏརཛསྶ སཱསནེ.

‘‘དོསོ ¶ རཛོ ན ཙ པན རེཎུ ཝུཙྩཏི, དོསསྶེཏཾ ཨདྷིཝཙནཾ རཛོཏི;

ཨེཏཾ རཛཾ ཝིཔྤཛཧིཏྭ བྷིཀྑཝོ, ཝིཧརནྟི ཏེ ཝིགཏརཛསྶ སཱསནེ.

‘‘མོཧོ རཛོ ན ཙ པན རེཎུ ཝུཙྩཏི, མོཧསྶེཏཾ ཨདྷིཝཙནཾ རཛོཏི;

ཨེཏཾ རཛཾ ཝིཔྤཛཧིཏྭ བྷིཀྑཝོ, ཝིཧརནྟི ཏེ ཝིགཏརཛསྶ སཱསནེ’’ཏི. (མཧཱནི. ༢༠༩; ཙཱུལ༹ནི. ཨུདཡམཱཎཝཔུཙྪཱནིདྡེས ༧༤);

གཱཐཱཔརིཡོསཱནེ ཙཱུལ༹པནྠཀོ སཧ པཊིསམྦྷིདཱཧི ཨརཧཏྟཾ པཱཔུཎི, པཊིསམྦྷིདཱཧིཡེཝསྶ ཏཱིཎི པིཊཀཱནི ཨཱགམཾསུ. སོ ཀིར པུབྦེ རཱཛཱ ཧུཏྭཱ ནགརཾ པདཀྑིཎཾ ཀརོནྟོ ནལཱཊཏོ སེདེ མུཙྩནྟེ པརིསུདྡྷེན སཱཊཀེན ནལཱཊནྟཾ པུཉྪི, སཱཊཀོ ཀིལིཊྛོ ཨཧོསི. སོ ‘‘ཨིམཾ སརཱིརཾ ¶ ནིསྶཱཡ ཨེཝརཱུཔོ པརིསུདྡྷོ སཱཊཀོ པཀཏིཾ ཛཧིཏྭཱ ཀིལིཊྛོ ཛཱཏོ, ཨནིཙྩཱ ཝཏ སངྑཱརཱ’’ཏི ཨནིཙྩསཉྙཾ པཊིལབྷི. ཏེན ཀཱརཎེནསྶ རཛོཧརཎམེཝ པཙྩཡོ ཛཱཏོ.

ཛཱིཝཀོཔི ཁོ ཀོམཱརབྷཙྩོ དསབལསྶ དཀྑིཎོདཀཾ ཨུཔནཱམེསི. སཏྠཱ ‘‘ནནུ, ཛཱིཝཀ, ཝིཧཱརེ བྷིཀྑཱུ ཨཏྠཱི’’ཏི ཧཏྠེན པཏྟཾ པིདཧི. མཧཱཔནྠཀོ ‘‘བྷནྟེ, ཝིཧཱརེ ནཏྠི བྷིཀྑཱུ’’ཏི ཨཱཧ. སཏྠཱ ‘‘ཨཏྠི ཛཱིཝཀཱ’’ཏི ཨཱཧ. ཛཱིཝཀོ ‘‘ཏེན ཧི, བྷཎེ, གཙྪ, ཝིཧཱརེ བྷིཀྑཱུནཾ ཨཏྠིབྷཱཝཾ ཝཱ ནཏྠིབྷཱཝཾ ཝཱ ཛཱནཱཧཱི’’ཏི པུརིསཾ པེསེསི. ཏསྨིཾ ཁཎེ ཙཱུལ༹པནྠཀོ ‘‘མཡ྄ཧཾ བྷཱཏིཀོ ‘ཝིཧཱརེ བྷིཀྑཱུ ནཏྠཱི’ཏི བྷཎཏི, ཝིཧཱརེ བྷིཀྑཱུནཾ ཨཏྠིབྷཱཝམསྶ པཀཱསེསྶཱམཱི’’ཏི སཀལཾ ཨམྦཝནཾ བྷིཀྑཱུནཾཡེཝ པཱུརེསི. ཨེཀཙྩེ བྷིཀྑཱུ ཙཱིཝརཀམྨཾ ཀརོནྟི, ཨེཀཙྩེ རཛནཀམྨཾ, ཨེཀཙྩེ སཛ྄ཛྷཱཡཾ ཀརོནྟཱིཏི ཨེཝཾ ཨཉྙམཉྙཾ ཨསདིསཾ བྷིཀྑུསཧསྶཾ མཱཔེསི. སོ པུརིསོ ཝིཧཱརེ བཧཱུ བྷིཀྑཱུ དིསྭཱ ནིཝཏྟིཏྭཱ ‘‘ཨཡྻ ¶ , སཀལཾ ཨམྦཝནཾ བྷིཀྑཱུཧི པརིཔུཎྞ’’ནྟི ཛཱིཝཀསྶ ཨཱརོཙེསི. ཐེརོཔི ཁོ ཏཏྠེཝ –

‘‘སཧསྶཀྑཏྟུམཏྟཱནཾ, ནིམྨིནིཏྭཱན པནྠཀོ;

ནིསཱིདམྦཝནེ རམྨེ, ཡཱཝ ཀཱལཔྤཝེདནཱ’’ཏི. (ཐེརགཱ. ༥༦༣);

ཨཐ སཏྠཱ ཏཾ པུརིསཾ ཨཱཧ – ‘‘ཝིཧཱརཾ གནྟྭཱ ‘སཏྠཱ ཙཱུལ༹པནྠཀཾ ནཱམ པཀྐོསཏཱི’ཏི ཝདེཧཱི’’ཏི. ཏེན གནྟྭཱ ཏཐཱཝུཏྟེ ‘‘ཨཧཾ ཙཱུལ༹པནྠཀོ, ཨཧཾ ཙཱུལ༹པནྠཀོ’’ཏི མུཁསཧསྶཾ ཨུཊྛཧི. པུརིསོ གནྟྭཱ ‘‘སབྦེཔི ཀིར ཏེ, བྷནྟེ, ཙཱུལ༹པནྠཀཱཡེཝ ནཱམཱ’’ཏི ཨཱཧ. ཏེན ཧི ཏྭཾ གནྟྭཱ ཡོ པཋམཾ ‘‘ཨཧཾ ཙཱུལ༹པནྠཀོ’’ཏི ཝདཏི, ཏཾ ¶ ཧཏྠེ གཎྷ, ཨཝསེསཱ ཨནྟརདྷཱཡིསྶནྟཱིཏི. སོ ཏཐཱ ཨཀཱསི, ཏཱཝདེཝ སཧསྶམཏྟཱ བྷིཀྑཱུ ཨནྟརདྷཱཡིཾསུ. ཐེརོ ཏེན པུརིསེན སདྡྷིཾ ཨགམཱསི. སཏྠཱ བྷཏྟཀིཙྩཔརིཡོསཱནེ ཛཱིཝཀཾ ཨཱམནྟེསི ‘‘ཛཱིཝཀ, ཙཱུལ༹པནྠཀསྶ པཏྟཾ གཎྷ, ཨཡཾ ཏེ ཨནུམོདནཾ ཀརིསྶཏཱི’’ཏི. ཛཱིཝཀོ ཏཐཱ ཨཀཱསི. ཐེརོ སཱིཧནཱདཾ ནདནྟོ ཏརུཎསཱིཧོ ཝིཡ ཏཱིཎི པིཊཀཱནི སཾཁོབྷེཏྭཱ ཨནུམོདནཾ ཨཀཱསི.

སཏྠཱ ཨུཊྛཱཡཱསནཱ བྷིཀྑུསངྒྷཔརིཝཱརོ ཝིཧཱརཾ གནྟྭཱ བྷིཀྑཱུཧི ཝཏྟེ དསྶིཏེ ཨུཊྛཱཡཱསནཱ གནྡྷཀུཊིཔྤམུཁེ ཋཏྭཱ བྷིཀྑུསངྒྷསྶ སུགཏོཝཱདཾ དཏྭཱ ཀམྨཊྛཱནཾ ཀཐེཏྭཱ བྷིཀྑུསངྒྷཾ ཨུཡྻོཛེཏྭཱ སུརབྷིགནྡྷཝཱསིཏཾ གནྡྷཀུཊིཾ པཝིསིཏྭཱ དཀྑིཎེན པསྶེན སཱིཧསེཡྻཾ ཨུཔགཏོ. ཨཐ སཱཡནྷསམཡེ དྷམྨསབྷཱཡཾ བྷིཀྑཱུ ཨིཏོ ཙིཏོ ཙ སམོསརིཏྭཱ རཏྟཀམྦལསཱཎིཾ པརིཀྑིཔནྟཱ ¶ ཝིཡ ནིསཱིདིཏྭཱ སཏྠུ གུཎཀཐཾ ཨཱརབྷིཾསུ ‘‘ཨཱཝུསོ, མཧཱཔནྠཀོ ཙཱུལ༹པནྠཀསྶ ཨཛ྄ཛྷཱསཡཾ ཨཛཱནནྟོ ‘ཙཏཱུཧི མཱསེཧི ཨེཀགཱཐཾ གཎྷིཏུཾ ན སཀྐོཏི, དནྡྷོ ཨཡ’ནྟི ཝིཧཱརཱ ནིཀྐཌྜྷི, སམྨཱསམྦུདྡྷོ པན ཨཏྟནོ ཨནུཏྟརདྷམྨརཱཛཏཱཡ ཨེཀསྨིཾཡེཝསྶ ཨནྟརབྷཏྟེ སཧ པཊིསམྦྷིདཱཧི ཨརཧཏྟཾ ཨདཱསི, ཏཱིཎི པིཊཀཱནི པཊིསམྦྷིདཱཧིཡེཝ ཨཱགཏཱནི, ཨཧོ བུདྡྷཱནཾ བལཾ ནཱམ མཧནྟ’’ནྟི.

ཨཐ བྷགཝཱ དྷམྨསབྷཱཡཾ ཨིམཾ ཀཐཱཔཝཏྟིཾ ཉཏྭཱ ‘‘ཨཛྫ མཡཱ གནྟུཾ ཝཊྚཏཱི’’ཏི བུདྡྷསེཡྻཱཡ ཨུཊྛཱཡ སུརཏྟདུཔཊྚཾ ནིཝཱསེཏྭཱ ཝིཛྫུལཏཾ ཝིཡ ཀཱཡབནྡྷནཾ ¶ བནྡྷིཏྭཱ རཏྟཀམྦལསདིསཾ སུགཏམཧཱཙཱིཝརཾ པཱརུཔིཏྭཱ སུརབྷིགནྡྷཀུཊིཏོ ནིཀྑམྨ མཏྟཝཱརཎོ ཝིཡ སཱིཧཝིཀྐནྟཝིལཱསེན ཝིཛམྦྷམཱནོ སཱིཧོ ཝིཡ ཨནནྟཱཡ བུདྡྷལཱིལཱཡ དྷམྨསབྷཾ གནྟྭཱ ཨལངྐཏམཎྜཔམཛ྄ཛྷེ སུཔཉྙཏྟཝརབུདྡྷཱསནཾ ཨབྷིརུཡ྄ཧ ཚབྦཎྞབུདྡྷརསྨིཡོ ཝིསྶཛྫེནྟོ ཨཎྞཝཀུཙྪིཾ ཨོབྷཱསཡམཱནོ ཡུགནྡྷརམཏྠཀེ བཱལསཱུརིཡོ ཝིཡ ཨཱསནམཛ྄ཛྷེ ནིསཱིདི. སམྨཱསམྦུདྡྷེ པན ཨཱགཏམཏྟེ བྷིཀྑུསངྒྷོ ཀཐཾ པཙྪིནྡིཏྭཱ ཏུཎྷཱི ཨཧོསི.

སཏྠཱ མུདུཀེན མེཏྟཙིཏྟེན པརིསཾ ཨོལོཀེཏྭཱ ‘‘ཨཡཾ པརིསཱ ཨཏིཝིཡ སོབྷཏི, ཨེཀསྶཔི ཧཏྠཀུཀྐུཙྩཾ ཝཱ པཱདཀུཀྐུཙྩཾ ཝཱ ཨུཀྐཱསིཏསདྡོ ཝཱ ཁིཔིཏསདྡོ ཝཱ ནཏྠི, སབྦེཔིམེ བུདྡྷགཱརཝེན སགཱརཝཱ བུདྡྷཏེཛེན ཏཛྫིཏཱ མཡི ཨཱཡུཀཔྤམྤི ཨཀཐེཏྭཱ ནིསིནྣེ པཋམཾ ཀཐཾ སམུཊྛཱཔེཏྭཱ ན ཀཐེསྶནྟི, ཀཐཱསམུཊྛཱཔནཝཏྟཾ ནཱམ མཡཱཝ ཛཱནིཏབྦཾ, ཨཧམེཝ པཋམཾ ཀཐེསྶཱམཱི’’ཏི མདྷུརེན བྲཧྨསྶརེན བྷིཀྑཱུ ཨཱམནྟེཏྭཱ ‘‘ཀཱཡ ནུཏྠ, བྷིཀྑཝེ ¶ , ཨེཏརཧི ཀཐཱཡ སནྣིསིནྣཱ, ཀཱ ཙ པན ཝོ ཨནྟརཱཀཐཱ ཝིཔྤཀཏཱ’’ཏི ཨཱཧ. བྷནྟེ, ན མཡཾ ཨིམསྨིཾ ཋཱནེ ནིསིནྣཱ ཨཉྙཾ ཏིརཙྪཱནཀཐཾ ཀཐེམ, ཏུམྷཱཀཾཡེཝ པན གུཎེ ཝཎྞཡམཱནཱ ནིསིནྣཱམྷ ‘‘ཨཱཝུསོ མཧཱཔནྠཀོ ཙཱུལ༹པནྠཀསྶ ཨཛ྄ཛྷཱསཡཾ ཨཛཱནནྟོ ‘ཙཏཱུཧི མཱསེཧི ཨེཀཾ གཱཐཾ གཎྷིཏུཾ ན སཀྐོཏི, དནྡྷོ ཨཡ’ནྟི ཝིཧཱརཱ ནིཀྐཌྜྷི, སམྨཱསམྦུདྡྷོ པན ཨནུཏྟརདྷམྨརཱཛཏཱཡ ཨེཀསྨིཾཡེཝསྶ ཨནྟརབྷཏྟེ སཧ པཊིསམྦྷིདཱཧི ཨརཧཏྟཾ ཨདཱསི, ཨཧོ བུདྡྷཱནཾ བལཾ ནཱམ མཧནྟ’’ནྟི. སཏྠཱ བྷིཀྑཱུནཾ ཀཐཾ སུཏྭཱ ‘‘བྷིཀྑཝེ, ཙཱུལ༹པནྠཀོ མཾ ནིསྶཱཡ ཨིདཱནི ཏཱཝ དྷམྨེསུ དྷམྨམཧནྟཏཾ པཏྟོ, པུབྦེ པན མཾ ནིསྶཱཡ བྷོགེསུཔི བྷོགམཧནྟཏཾ པཱཔུཎཱི’’ཏི ཨཱཧ. བྷིཀྑཱུ ཏསྶཏྠསྶ ཨཱཝིབྷཱཝཏྠཾ བྷགཝནྟཾ ཡཱཙིཾསུ. བྷགཝཱ བྷཝནྟརེན པཊིཙྪནྣཾ ཀཱརཎཾ པཱཀཊཾ ཨཀཱསི.

ཨཏཱིཏེ ཀཱསིརཊྛེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ སེཊྛིཀུལེ ནིབྦཏྟིཏྭཱ ཝཡཔྤཏྟོ ¶ སེཊྛིཊྛཱནཾ ལབྷིཏྭཱ ཙཱུལ༹སེཊྛི ནཱམ ཨཧོསི, སོ པཎྜིཏོ བྱཏྟོ སབྦནིམིཏྟཱནི ཛཱནཱཏི. སོ ཨེཀདིཝསཾ རཱཛུཔཊྛཱནཾ གཙྪནྟོ ཨནྟརཝཱིཐིཡཾ མཏམཱུསིཀཾ དིསྭཱ ཏངྑཎཉྙེཝ ནཀྑཏྟཾ ¶ སམཱནེཏྭཱ ཨིདམཱཧ ‘‘སཀྐཱ ཙཀྑུམཏཱ ཀུལཔུཏྟེན ཨིམཾ ཨུནྡཱུརཾ གཧེཏྭཱ པུཏྟདཱརབྷརཎཉྩ ཀཱཏུཾ ཀམྨནྟེ ཙ པཡོཛེཏུ’’ནྟི? ཨཉྙཏརོ དུགྒཏཀུལཔུཏྟོ ཏཾ སེཊྛིསྶ ཝཙནཾ སུཏྭཱ ‘‘ནཱཡཾ ཨཛཱནིཏྭཱ ཀཐེསྶཏཱི’’ཏི ཏཾ མཱུསིཀཾ གཧེཏྭཱ ཨེཀསྨིཾ ཨཱཔཎེ བིལཱ༹ལསྶཏྠཱཡ ཝིཀྐིཎིཏྭཱ ཀཱཀཎིཀཾ ལབྷིཏྭཱ ཏཱཡ ཀཱཀཎིཀཱཡ ཕཱཎིཏཾ གཧེཏྭཱ ཨེཀེན གྷཊེན པཱནཱིཡཾ གཎྷི. སོ ཨརཉྙཏོ ཨཱགཙྪནྟེ མཱལཱཀཱརེ དིསྭཱ ཐོཀཾ ཐོཀཾ ཕཱཎིཏཁཎྜཾ དཏྭཱ ཨུལུ༹ངྐེན པཱནཱིཡཾ ཨདཱསི, ཏེ ཙསྶ ཨེཀེཀཾ པུཔྥམུཊྛིཾ ཨདཾསུ. སོ ཏེན པུཔྥམཱུལེན པུནདིཝསེཔི ཕཱཎིཏཉྩ པཱནཱིཡགྷཊཉྩ གཧེཏྭཱ པུཔྥཱརཱམམེཝ གཏོ. ཏསྶ ཏཾ དིཝསཾ མཱལཱཀཱརཱ ཨཌྜྷོཙིཏཀེ པུཔྥགཙྪེ དཏྭཱ ཨགམཾསུ. སོ ན ཙིརསྶེཝ ཨིམིནཱ ཨུཔཱཡེན ཨཊྛ ཀཧཱཔཎེ ལབྷི.

པུན ཨེཀསྨིཾ ཝཱཏཝུཊྛིདིཝསེ རཱཛུཡྻཱནེ བཧཱུ སུཀྑདཎྜཀཱ ཙ སཱཁཱ ཙ པལཱསཉྩ ཝཱཏེན པཱཏིཏཾ ཧོཏི, ཨུཡྻཱནཔཱལོ ཚཌྜེཏུཾ ཨུཔཱཡཾ ན པསྶཏི ¶ . སོ ཏཏྠ གནྟྭཱ ‘‘སཙེ ཨིམཱནི དཱརུཔཎྞཱནི མཡ྄ཧཾ དསྶསི, ཨཧཾ ཏེ ཨིམཱནི སབྦཱནི ནཱིཧརིསྶཱམཱི’’ཏི ཨུཡྻཱནཔཱལཾ ཨཱཧ, སོ ‘‘གཎྷ ཨཡྻཱ’’ཏི སམྤཊིཙྪི. ཙཱུལ༹ནྟེཝཱསིཀོ དཱརཀཱནཾ ཀཱིལ༹ནམཎྜལཾ གནྟྭཱ ཕཱཎིཏཾ དཏྭཱ མུཧུཏྟེན སབྦཱནི དཱརུཔཎྞཱནི ནཱིཧརཱཔེཏྭཱ ཨུཡྻཱནདྭཱརེ རཱསིཾ ཀཱརེསི. ཏདཱ རཱཛཀུམྦྷཀཱརོ རཱཛཀུལེ བྷཱཛནཱནཾ པཙནཏྠཱཡ དཱརཱུནི པརིཡེསམཱནོ ཨུཡྻཱནདྭཱརེ ཏཱནི དིསྭཱ ཏསྶ ཧཏྠཏོ ཀིཎིཏྭཱ གཎྷི. ཏཾ དིཝསཾ ཙཱུལ༹ནྟེཝཱསིཀོ དཱརུཝིཀྐཡེན སོལ༹ས ཀཧཱཔཎེ ཙཱཊིཨཱདཱིནི ཙ པཉྩ བྷཱཛནཱནི ལབྷི.

སོ ཙཏུཝཱིསཏིཡཱ ཀཧཱཔཎེསུ ཛཱཏེསུ ‘‘ཨཏྠི ཨཡཾ ཨུཔཱཡོ མཡ྄ཧ’’ནྟི ནགརདྭཱརཏོ ཨཝིདཱུརེ ཋཱནེ ཨེཀཾ པཱནཱིཡཙཱཊིཾ ཋཔེཏྭཱ པཉྩསཏེ ཏིཎཧཱརཀེ པཱནཱིཡེན ཨུཔཊྛཧི. ཏེ ཨཱཧཾསུ ‘‘སམྨ, ཏྭཾ ཨམྷཱཀཾ བཧཱུཔཀཱརོ, ཀིཾ ཏེ ཀརོམཱ’’ཏི? སོ ‘‘མཡ྄ཧཾ ཀིཙྩེ ཨུཔྤནྣེ ཀརིསྶཐཱ’’ཏི ཝཏྭཱ ཨིཏོ ཙིཏོ ཙ ཝིཙརནྟོ ཐལཔཐཀམྨིཀེན ཙ ཛལཔཐཀམྨིཀེན ཙ སདྡྷིཾ མིཏྟསནྠཝཾ ཨཀཱསི. ཏསྶ ཐལཔཐཀམྨིཀོ ‘‘སྭེ ཨིམཾ ནགརཾ ཨསྶཝཱཎིཛཀོ པཉྩ ཨསྶསཏཱནི གཧེཏྭཱ ཨཱགམིསྶཏཱི’’ཏི ཨཱཙིཀྑི. སོ ཏསྶ ཝཙནཾ སུཏྭཱ ཏིཎཧཱརཀེ ཨཱཧ ‘‘ཨཛྫ མཡ྄ཧཾ ཨེཀེཀཾ ཏིཎཀལཱཔཾ དེཐ, མཡཱ ཙ ཏིཎེ ཨཝིཀྐིཎིཏེ ཨཏྟནོ ཏིཎཾ མཱ ཝིཀྐིཎཐཱ’’ཏི. ཏེ ‘‘སཱདྷཱུ’’ཏི སམྤཊིཙྪིཏྭཱ ¶ པཉྩ ཏིཎཀལཱཔསཏཱནི ཨཱཧརིཏྭཱ ཏསྶ ¶ གྷརེ པཱཔཡིཾསུ. ཨསྶཝཱཎིཛོ སཀལནགརེ ཨསྶཱནཾ གོཙརཾ ཨལབྷིཏྭཱ ཏསྶ སཧསྶཾ དཏྭཱ ཏཾ ཏིཎཾ གཎྷི.

ཏཏོ ཀཏིཔཱཧཙྩཡེནསྶ ཛལཔཐཀམྨིཀོ སཧཱཡཀོ ཨཱརོཙེསི ‘‘པཊྚནམྷི མཧཱནཱཝཱ ཨཱགཏཱ’’ཏི. སོ ‘‘ཨཏྠི ཨཡཾ ཨུཔཱཡོ’’ཏི ཨཊྛཧི ཀཧཱཔཎེཧི སབྦཔརིཝཱརསམྤནྣཾ ཏཱཝཀཱལིཀཾ རཐཾ གཧེཏྭཱ མཧནྟེན ཡསེན ནཱཝཱཔཊྚནཾ གནྟྭཱ ཨེཀཾ ཨངྒུལིམུདྡིཀཾ ནཱཝིཀསྶ སཙྩཀཱརཾ དཏྭཱ ཨཝིདཱུརེ ཋཱནེ སཱཎིཡཱ པརིཀྑིཔཱཔེཏྭཱ ནིསིནྣོ པུརིསེ ཨཱཎཱཔེསི ‘‘བཱཧིརཏོ ཝཱཎིཛེསུ ཨཱགཏེསུ ཏཏིཡེན པཊིཧཱརེན མཾ ཨཱརོཙེཐཱ’’ཏི ¶ . ‘‘ནཱཝཱ ཨཱགཏཱ’’ཏི སུཏྭཱ བཱརཱཎསིཏོ སཏམཏྟཱ ཝཱཎིཛཱ ‘‘བྷཎྜཾ གཎྷཱམཱ’’ཏི ཨཱགམིཾསུ. བྷཎྜཾ ཏུམྷེ ན ལབྷིསྶཐ, ཨསུཀཊྛཱནེ ནཱམ མཧཱཝཱཎིཛེན སཙྩཀཱརོ དིནྣོཏི. ཏེ ཏཾ སུཏྭཱ ཏསྶ སནྟིཀཾ ཨཱགཏཱ. པཱདམཱུལིཀཔུརིསཱ པུརིམསཉྙཱཝསེན ཏཏིཡེན པཊིཧཱརེན ཏེསཾ ཨཱགཏབྷཱཝཾ ཨཱརོཙེསུཾ. ཏེ སཏམཏྟཱ ཝཱཎིཛཱ ཨེཀེཀཾ སཧསྶཾ དཏྭཱ ཏེན སདྡྷིཾ ནཱཝཱཡ པཏྟིཀཱ ཧུཏྭཱ པུན ཨེཀེཀཾ སཧསྶཾ དཏྭཱ པཏྟིཾ ཝིསྶཛྫཱཔེཏྭཱ བྷཎྜཾ ཨཏྟནོ སནྟཀམཀཾསུ.

ཙཱུལ༹ནྟེཝཱསིཀོ དྭེ སཏསཧསྶཱནི གཎྷིཏྭཱ བཱརཱཎསིཾ ཨཱགནྟྭཱ ‘‘ཀཏཉྙུནཱ མེ བྷཝིཏུཾ ཝཊྚཏཱི’’ཏི ཨེཀཾ སཏསཧསྶཾ གཱཧཱཔེཏྭཱ ཙཱུལ༹སེཊྛིསྶ སམཱིཔཾ གཏོ. ཨཐ ནཾ སེཊྛི ‘‘ཀིཾ ཏེ, ཏཱཏ, ཀཏྭཱ ཨིདཾ དྷནཾ ལདྡྷ’’ནྟི པུཙྪི. སོ ‘‘ཏུམྷེཧི ཀཐིཏཨུཔཱཡེ ཋཏྭཱ ཙཏུམཱསམྦྷནྟརེཡེཝ ལདྡྷ’’ནྟི མཏམཱུསིཀཾ ཨཱདིཾ ཀཏྭཱ སབྦཾ ཝཏྠུཾ ཀཐེསི. ཙཱུལ༹སེཊྛི ཏསྶ ཝཙནཾ སུཏྭཱ ‘‘ཨིདཱནི ཨེཝརཱུཔཾ དཱརཀཾ མམ སནྟཀཾ ཀཱཏུཾ ཝཊྚཏཱི’’ཏི ཝཡཔྤཏྟཾ ཨཏྟནོ དྷཱིཏརཾ དཏྭཱ སཀལཀུཊུམྦསྶ སཱམིཀཾ ཨཀཱསི. སོ སེཊྛིནོ ཨཙྩཡེན ཏསྨིཾ ནགརེ སེཊྛིཊྛཱནཾ ལབྷི. བོདྷིསཏྟོཔི ཡཐཱཀམྨཾ ཨགམཱསི.

སམྨཱསམྦུདྡྷོཔི ཨིམཾ དྷམྨདེསནཾ ཀཐེཏྭཱ ཨབྷིསམྦུདྡྷོཝ ཨིམཾ གཱཐཾ ཀཐེསི –

༤.

‘‘ཨཔྤཀེནཔི མེདྷཱཝཱི, པཱབྷཏེན ཝིཙཀྑཎོ;

སམུཊྛཱཔེཏི ཨཏྟཱནཾ, ཨཎུཾ ཨགྒིཾཝ སནྡྷམ’’ནྟི.

ཏཏྠ ¶ ཨཔྤཀེནཔཱིཏི ཐོཀེནཔི པརིཏྟཀེནཔི. མེདྷཱཝཱིཏི པཉྙཝཱ. པཱབྷཏེནཱཏི བྷཎྜམཱུལེན. ཝིཙཀྑཎོཏི ཝོཧཱརཀུསལོ. སམུཊྛཱཔེཏི ཨཏྟཱནནྟི མཧནྟཾ དྷནཉྩ ཡསཉྩ ཨུཔྤཱདེཏྭཱ ཏཏྠ ཨཏྟཱནཾ སཎྛཱཔེཏི པཏིཊྛཱཔེཏི. ཡཐཱ ཀིཾ? ཨཎུཾ ཨགྒིཾཝ སནྡྷམཾ, ཡཐཱ པཎྜིཏཔུརིསོ ¶ པརིཏྟཾ ཨགྒིཾ ཨནུཀྐམེན གོམཡཙུཎྞཱདཱིནི པཀྑིཔིཏྭཱ མུཁཝཱཏེན དྷམནྟོ སམུཊྛཱཔེཏི ཝཌྜྷེཏི མཧནྟཾ ཨགྒིཀྑནྡྷཾ ཀརོཏི, ཨེཝམེཝ པཎྜིཏོ ཐོཀམྤི པཱབྷཏཾ ལབྷིཏྭཱ ནཱནཱཨུཔཱཡེཧི པཡོཛེཏྭཱ དྷནཉྩ ཡསཉྩ ཝཌྜྷེཏི ¶ , ཝཌྜྷེཏྭཱ ཙ པན ཏཏྠ ཨཏྟཱནཾ པཏིཊྛཱཔེཏི, ཏཱཡ ཨེཝ ཝཱ པན དྷནཡསམཧནྟཏཱཡ ཨཏྟཱནཾ སམུཊྛཱཔེཏི, ཨབྷིཉྙཱཏཾ པཱཀཊཾ ཀརོཏཱིཏི ཨཏྠོ.

ཨིཏི བྷགཝཱ ‘‘བྷིཀྑཝེ, ཙཱུལ༹པནྠཀོ མཾ ནིསྶཱཡ ཨིདཱནི དྷམྨེསུ དྷམྨམཧནྟཏཾ པཏྟོ, པུབྦེ པན བྷོགེསུཔི བྷོགམཧནྟཏཾ པཱཔུཎཱི’’ཏི ཨེཝཾ ཨིམཾ དྷམྨདེསནཾ དསྶེཏྭཱ དྭེ ཝཏྠཱུནི ཀཐེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི ‘‘ཏདཱ ཙཱུལ༹ནྟེཝཱསིཀོ ཙཱུལ༹པནྠཀོ ཨཧོསི, ཙཱུལ༹ཀསེཊྛི པན ཨཧམེཝ ཨཧོསི’’ནྟི དེསནཾ ནིཊྛཱཔེསི.

ཙཱུལ༹སེཊྛིཛཱཏཀཝཎྞནཱ ཙཏུཏྠཱ.

༥. ཏཎྜུལནཱལི༹ཛཱཏཀཝཎྞནཱ

ཀིམགྒྷཏི ཏཎྜུལནཱལི༹ཀཱཏི ཨིདཾ སཏྠཱ ཛེཏཝནེ ཝིཧརནྟོ ལཱལུདཱཡིཏྠེརཾ ཨཱརབྦྷ ཀཐེསི. ཏསྨིཾ སམཡེ ཨཱཡསྨཱ དབྦོ མལླཔུཏྟོ སངྒྷསྶ བྷཏྟུདྡེསཀོ ཧོཏི. ཏསྨིཾ པཱཏོཝ སལཱཀབྷཏྟཱནི ཨུདྡིསམཱནེ ལཱལུདཱཡིཏྠེརསྶ ཀདཱཙི ཝརབྷཏྟཾ པཱཔུཎཱཏི, ཀདཱཙི ལཱམཀབྷཏྟཾ. སོ ལཱམཀབྷཏྟསྶ པཏྟདིཝསེ སལཱཀགྒཾ ཨཱཀུལཾ ཀརོཏི, ‘‘ཀིཾ དབྦོཝ སལཱཀཾ དཱཏུཾ ཛཱནཱཏི, ཨམྷེ ན ཛཱནཱམཱ’’ཏི ཝདཏི. ཏསྨིཾ སལཱཀགྒཾ ཨཱཀུལཾ ཀརོནྟེ ‘‘ཧནྡ དཱནི ཏྭམེཝ སལཱཀཾ དེཧཱི’’ཏི སལཱཀཔཙྪིཾ ཨདཾསུ. ཏཏོ པཊྛཱཡ སོ སངྒྷསྶ སལཱཀཾ ཨདཱསི. དེནྟོ ཙ པན ‘‘ཨིདཾ ཝརབྷཏྟ’’ནྟི ཝཱ ‘‘ལཱམཀབྷཏྟ’’ནྟི ཝཱ ‘‘ཨསུཀཝསྶགྒེ ཝརབྷཏྟ’’ནྟི ཝཱ ‘‘ཨསུཀཝསྶགྒེ ལཱམཀབྷཏྟ’’ནྟི ཝཱ ན ཛཱནཱཏི, ཋིཏིཀཾ ཀརོནྟོཔི ‘‘ཨསུཀཝསྶགྒེ ཋིཏིཀཱ’’ཏི ན ¶ སལླཀྑེཏི. བྷིཀྑཱུནཾ ཋིཏཝེལཱཡ ‘‘ཨིམསྨིཾ ཋཱནེ ཨཡཾ ཋིཏིཀཱ ཋིཏཱ, ཨིམསྨིཾ ཋཱནེ ཨཡ’’ནྟི བྷཱུམིཡཾ ཝཱ བྷིཏྟིཡཾ ཝཱ ལེཁཾ ཀཌྜྷཏི. པུནདིཝསེ སལཱཀགྒེ བྷིཀྑཱུ མནྡཏརཱ ཝཱ ཧོནྟི བཧུཏརཱ ཝཱ, ཏེསུ མནྡཏརེསུ ལེཁཱ ཧེཊྛཱ ཧོཏི, བཧུཏརེསུ ཨུཔརི. སོ ཋིཏིཀཾ ཨཛཱནནྟོ ལེཁཱསཉྙཱཡ སལཱཀཾ དེཏི.

ཨཐ ནཾ བྷིཀྑཱུ ‘‘ཨཱཝུསོ, ཨུདཱཡི, ལེཁཱ ནཱམ ཧེཊྛཱ ཝཱ ཧོཏི ཨུཔརི ཝཱ, ཝརབྷཏྟཾ པན ཨསུཀཝསྶགྒེ ཋིཏཾ, ལཱམཀབྷཏྟཾ ཨསུཀཝསྶགྒེ’’ཏི ཨཱཧཾསུ. སོ བྷིཀྑཱུ པཊིཔྥརནྟོ ‘‘ཡདི ¶ ཨེཝཾ ཨཡཾ ལེཁཱ ཀསྨཱ ཨེཝཾ ཋིཏཱ, ཀིཾ ཨཧཾ ཏུམྷཱཀཾ སདྡཧཱམི, ཨིམིསྶཱ ལེཁཱཡ སདྡཧཱམཱི’’ཏི ཝདཏི. ཨཐ ནཾ དཧརཱ ཙ སཱམཎེརཱ ཙ ‘‘ཨཱཝུསོ ལཱལུདཱཡི ¶ ཏཡི སལཱཀཾ དེནྟེ བྷིཀྑཱུ ལཱབྷེན པརིཧཱཡནྟི, ན ཏྭཾ དཱཏུཾ ཨནུཙྪཝིཀོ, གཙྪ ཨིཏོ’’ཏི སལཱཀགྒཏོ ནིཀྐཌྜྷིཾསུ. ཏསྨིཾ ཁཎེ སལཱཀགྒེ མཧནྟཾ ཀོལཱཧལཾ ཨཧོསི. ཏཾ སུཏྭཱ སཏྠཱ ཨཱནནྡཏྠེརཾ པུཙྪི ‘‘ཨཱནནྡ, སལཱཀགྒེ མཧནྟཾ ཀོལཱཧལཾ, ཀིཾ སདྡོ ནཱམེསོ’’ཏི. ཐེརོ ཏཐཱགཏསྶ ཏམཏྠཾ ཨཱརོཙེསི. ‘‘ཨཱནནྡ, ན ཨིདཱནེཝ ལཱལུདཱཡི ཨཏྟནོ བཱལཏཱཡ པརེསཾ ལཱབྷཧཱནིཾ ཀརོཏི, པུབྦེཔི ཨཀཱསིཡེཝཱ’’ཏི ཨཱཧ. ཐེརོ ཏསྶཏྠསྶ ཨཱཝིབྷཱཝཏྠཾ བྷགཝནྟཾ ཡཱཙི. བྷགཝཱ བྷཝནྟརེན པཊིཙྪནྣཾ ཀཱརཎཾ པཱཀཊཾ ཨཀཱསི.

ཨཏཱིཏེ ཀཱསིརཊྛེ བཱརཱཎསིཡཾ བྲཧྨདཏྟོ རཱཛཱ ཨཧོསི. ཏདཱ ཨམྷཱཀཾ བོདྷིསཏྟོ ཏསྶ ཨགྒྷཱཔནིཀོ ཨཧོསི. ཧཏྠིཨསྶཱདཱིནི ཙེཝ མཎིསུཝཎྞཱདཱིནི ཙ ཨགྒྷཱཔེསི, ཨགྒྷཱཔེཏྭཱ བྷཎྜསཱམིཀཱནཾ བྷཎྜཱནུརཱུཔམེཝ མཱུལཾ དཱཔེསི. རཱཛཱ པན ལུདྡྷོ ཧོཏི, སོ ལོབྷཔཀཏིཏཱཡ ཨེཝཾ ཙིནྟེསི ‘‘ཨཡཾ ཨགྒྷཱཔནིཀོ ཨེཝཾ ཨགྒྷཱཔེནྟོ ན ཙིརསྶེཝ མམ གེཧེ དྷནཾ པརིཀྑཡཾ གམེསྶཏི, ཨཉྙཾ ཨགྒྷཱཔནིཀཾ ཀརིསྶཱམཱི’’ཏི. སོ སཱིཧཔཉྫརཾ ཨུགྒྷཱཊེཏྭཱ རཱཛངྒཎཾ ཨོལོཀེནྟོ ཨེཀཾ གཱམིཀམནུསྶཾ ལོལབཱལཾ རཱཛངྒཎེན གཙྪནྟཾ དིསྭཱ ‘‘ཨེས མཡ྄ཧཾ ཨགྒྷཱཔནིཀཀམྨཾ ཀཱཏུཾ སཀྑིསྶཏཱི’’ཏི ཏཾ པཀྐོསཱཔེཏྭཱ ‘‘སཀྑིསྶསི, བྷཎེ, ཨམྷཱཀཾ ཨགྒྷཱཔནིཀཀམྨཾ ཀཱཏུ’’ནྟི ཨཱཧ. སཀྑིསྶཱམི, དེཝཱཏི. རཱཛཱ ཨཏྟནོ དྷནརཀྑཎཏྠཱཡ ཏཾ བཱལཾ ཨགྒྷཱཔནིཀཀམྨེ ཋཔེསི. ཏཏོ པཊྛཱཡ སོ བཱལོ ཧཏྠིཨསྶཱདཱིནི ཨགྒྷཱཔེནྟོ ཨགྒྷཾ ཧཱཔེཏྭཱ ¶ ཡཐཱརུཙིཡཱ ཀཐེཏི. ཏསྶ ཋཱནནྟརེ ཋིཏཏྟཱ ཡཾ སོ ཀཐེཏི, ཏམེཝ མཱུལཾ ཧོཏི.

ཏསྨིཾ ཀཱལེ ཨུཏྟརཱཔཐཏོ ཨེཀོ ཨསྶཝཱཎིཛོ པཉྩ ཨསྶསཏཱནི ཨཱནེསི. རཱཛཱ ཏཾ པུརིསཾ པཀྐོསཱཔེཏྭཱ ཨསྶེ ཨགྒྷཱཔེསི. སོ པཉྩནྣཾ ཨསྶསཏཱནཾ ཨེཀཾ ཏཎྜུལནཱལི༹ཀཾ ཨགྒྷམཀཱསི. ཀཏྭཱ ཙ པན ‘‘ཨསྶཝཱཎིཛསྶ ཨེཀཾ ཏཎྜུལནཱལི༹ཀཾ དེཐཱ’’ཏི ཝཏྭཱ ཨསྶེ ཨསྶསཱལཱཡཾ ¶ སཎྛཱཔེསི. ཨསྶཝཱཎིཛོ པོརཱཎཨགྒྷཱཔནིཀསྶ སནྟིཀཾ གནྟྭཱ ཏཾ པཝཏྟིཾ ཨཱརོཙེཏྭཱ ‘‘ཨིདཱནི ཀིཾ ཀཏྟབྦ’’ནྟི པུཙྪི. སོ ཨཱཧ ‘‘ཏསྶ པུརིསསྶ ལཉྫཾ དཏྭཱ ཨེཝཾ པུཙྪཐ ‘ཨམྷཱཀཾ ཏཱཝ ཨསྶཱ ཨེཀཾ ཏཎྜུལནཱལི༹ཀཾ ཨགྒྷནྟཱིཏི ཉཱཏམེཏཾ, ཏུམྷེ པན ནིསྶཱཡ ཏཎྜུལནཱལི༹ཡཱ ཨགྒྷཾ ཛཱནིཏུཀཱམམྷཱ, སཀྑིསྶཐ ནོ རཉྙོ སནྟིཀེ ཋཏྭཱ སཱ ཏཎྜུལནཱལི༹ཀཱ ཨིདཾ ནཱམ ཨགྒྷཏཱིཏི ཝཏྟུ’ནྟི, སཙེ སཀྐོམཱིཏི ཝདཏི, ཏཾ གཧེཏྭཱ རཉྙོ སནྟིཀཾ གཙྪཐ, ཨཧམྤི ཏཏྠ ཨཱགམིསྶཱམཱི’’ཏི.

ཨསྶཝཱཎིཛོ ¶ ‘‘སཱདྷཱུ’’ཏི བོདྷིསཏྟསྶ ཝཙནཾ སམྤཊིཙྪིཏྭཱ ཨགྒྷཱཔནིཀསྶ ལཉྫཾ དཏྭཱ ཏམཏྠཾ ཨཱརོཙེསི. སོ ལཉྫཾ ལབྷིཏྭཱཝ ‘‘སཀྑིསྶཱམི ཏཎྜུལནཱལི༹ཾ ཨགྒྷཱཔེཏུ’’ནྟི. ‘‘ཏེན ཧི གཙྪཱམ རཱཛཀུལ’’ནྟི ཏཾ ཨཱདཱཡ རཉྙོ སནྟིཀཾ ཨགམཱསི. བོདྷིསཏྟོཔི ཨཉྙེཔི བཧཱུ ཨམཙྩཱ ཨགམིཾསུ. ཨསྶཝཱཎིཛོ རཱཛཱནཾ ཝནྡིཏྭཱ ཨཱཧ – ‘‘དེཝ, པཉྩནྣཾ ཨསྶསཏཱནཾ ཨེཀཾ ཏཎྜུལནཱལི༹ཾ ཨགྒྷནཀབྷཱཝཾ ཛཱནཱམ, སཱ པན ཏཎྜུལནཱལི༹ ཀིཾ ཨགྒྷཏཱིཏི ཨགྒྷཱཔནིཀཾ པུཙྪཐ དེཝཱ’’ཏི. རཱཛཱ ཏཾ པཝཏྟིཾ ཨཛཱནནྟོ ‘‘ཨམྦྷོ ཨགྒྷཱཔནིཀ, པཉྩ ཨསྶསཏཱནི ཀིཾ ཨགྒྷནྟཱི’’ཏི པུཙྪི. ཏཎྜུལནཱལི༹ཾ, དེཝཱཏི. ‘‘ཧོཏུ, བྷཎེ, ཨསྶཱ ཏཱཝ ཏཎྜུལནཱལི༹ཾ ཨགྒྷནྟུ. སཱ པན ཀིཾ ཨགྒྷཏི ཏཎྜུལནཱལི༹ཀཱ’’ཏི པུཙྪི. སོ བཱལཔུརིསོ ‘‘བཱརཱཎསིཾ སནྟརབཱཧིརཾ ཨགྒྷཏི ཏཎྜུལནཱལི༹ཀཱ’’ཏི ཨཱཧ. སོ ཀིར པུབྦེ རཱཛཱནཾ ཨནུཝཏྟནྟོ ཨེཀཾ ཏཎྜུལནཱལི༹ཾ ཨསྶཱནཾ ཨགྒྷམཀཱསི. པུན ཝཱཎིཛསྶ ཧཏྠཏོ ལཉྫཾ ལབྷིཏྭཱ ཏསྶཱ ཏཎྜུལནཱལི༹ཀཱཡ བཱརཱཎསིཾ སནྟརབཱཧིརཾ ཨགྒྷམཀཱསི. ཏདཱ པན བཱརཱཎསིཡཱ པཱཀཱརཔརིཀྑེཔོ དྭཱདསཡོཛནིཀོ ཧོཏི. ཨིདམསྶ ཨནྟརཾ, བཱཧིརཾ པན ཏིཡོཛནསཏིཀཾ རཊྛཾ. ཨིཏི སོ བཱལོ ¶ ཨེཝཾ མཧནྟཾ བཱརཱཎསིཾ སནྟརབཱཧིརཾ ཏཎྜུལནཱལི༹ཀཱཡ ཨགྒྷམཀཱསི.

ཏཾ སུཏྭཱ ཨམཙྩཱ པཱཎིཾ ¶ པཧརིཏྭཱ ཧསམཱནཱ ‘‘མཡཾ པུབྦེ པཐཝིཉྩ རཛྫཉྩ ཨནགྒྷནྟི སཉྙིནོ ཨཧུམྷ, ཨེཝཾ མཧནྟཾ ཀིར སརཱཛཀཾ བཱརཱཎསིརཛྫཾ ཏཎྜུལནཱལི༹མཏྟཾ ཨགྒྷཏི, ཨཧོ ཨགྒྷཱཔནིཀསྶ ཉཱཎསམྤདཱ. ཀཧཾ ཨེཏྟཀཾ ཀཱལཾ ཨཡཾ ཨགྒྷཱཔནིཀོ ཝིཧཱསི, ཨམྷཱཀཾ རཉྙོ ཨེཝ ཨནུཙྪཝིཀོ’’ཏི པརིཧཱསཾ ཨཀཾསུ –

༥.

‘‘ཀིམགྒྷཏི ཏཎྜུལནཱལི༹ཀཱཡཾ, ཨསྶཱན མཱུལཱཡ ཝདེཧི རཱཛ;

བཱརཱཎསིཾ སནྟརབཱཧིརཾ, ཨཡམགྒྷཏི ཏཎྜུལནཱལི༹ཀཱ’’ཏི.

ཏསྨིཾ ཀཱལེ རཱཛཱ ལཛྫིཏོ ཏཾ བཱལཾ ནིཀྐཌྜྷཱཔེཏྭཱ བོདྷིསཏྟསྶེཝ ཨགྒྷཱཔནིཀཊྛཱནཾ ཨདཱསི. བོདྷིསཏྟོཔི ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ དྭེ ཝཏྠཱུནི ཀཐེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི ‘‘ཏདཱ གཱམིཀབཱལཨགྒྷཱཔནིཀོ ལཱལུདཱཡཱི ཨཧོསི, པཎྜིཏཨགྒྷཱཔནིཀོ པན ཨཧམེཝ ཨཧོསི’’ནྟི དེསནཾ ནིཊྛཱཔེསི.

ཏཎྜུལནཱལི༹ཛཱཏཀཝཎྞནཱ པཉྩམཱ.

༦. དེཝདྷམྨཛཱཏཀཝཎྞནཱ

ཧིརིཨོཏྟཔྤསམྤནྣཱཏི ¶ ཨིདཾ བྷགཝཱ ཛེཏཝནེ ཝིཧརནྟོ ཨཉྙཏརཾ བཧུབྷཎྜིཀཾ བྷིཀྑུཾ ཨཱརབྦྷ ཀཐེསི. སཱཝཏྠིཝཱསཱི ཀིརེཀོ ཀུཊུམྦིཀོ བྷརིཡཱཡ ཀཱལཀཏཱཡ པབྦཛི. སོ པབྦཛནྟོ ཨཏྟནོ པརིཝེཎཉྩ ཨགྒིསཱལཉྩ བྷཎྜགབྦྷཉྩ ཀཱརེཏྭཱ བྷཎྜགབྦྷཾ སཔྤིཏཎྜུལཱདཱིཧི པཱུརེཏྭཱ པབྦཛི. པབྦཛིཏྭཱ ཙ པན ཨཏྟནོ དཱསེ པཀྐོསཱཔེཏྭཱ ཡཐཱརུཙིཏཾ ཨཱཧཱརཾ པཙཱཔེཏྭཱ བྷུཉྫཏི, བཧུཔརིཀྑཱརོ ཙ ཨཧོསི ¶ , རཏྟིཾ ཨཉྙཾ ནིཝཱསནཔཱརུཔནཾ ཧོཏི, དིཝཱ ཨཉྙཾ. ཝིཧཱརཔཙྩནྟེ ཝསཏི. ཏསྶེཀདིཝསཾ ཙཱིཝརཔཙྩཏྠརཎཱདཱིནི ནཱིཧརིཏྭཱ པརིཝེཎེ པཏྠརིཏྭཱ སུཀྑཱཔེནྟསྶ སམྦཧུལཱ ཛཱནཔདཱ བྷིཀྑཱུ སེནཱསནཙཱརིཀཾ ཨཱཧིཎྜནྟཱ པརིཝེཎཾ གནྟྭཱ ཙཱིཝརཱདཱིནི དིསྭཱ ‘‘ཀསྶིམཱནཱི’’ཏི པུཙྪིཾསུ. སོ ‘‘མཡ྄ཧཾ, ཨཱཝུསོ’’ཏི ཨཱཧ. ‘‘ཨཱཝུསོ, ཨིདམྤི ཙཱིཝརཾ, ཨིདམྤི ནིཝཱསནཾ, ཨིདམྤི པཙྩཏྠརཎཾ, སབྦཾ ཏུཡ྄ཧམེཝཱ’’ཏི? ‘‘ཨཱམ མཡ྄ཧམེཝཱ’’ཏི. ‘‘ཨཱཝུསོ བྷགཝཏཱ ཏཱིཎི ཙཱིཝརཱནི ཨནུཉྙཱཏཱནི, ཏྭཾ ཨེཝཾ ཨཔྤིཙྪསྶ བུདྡྷསྶ སཱསནེ པབྦཛིཏྭཱ ཨེཝཾ བཧུཔརིཀྑཱརོ ཛཱཏོ, ཨེཧི ཏཾ དསབལསྶ སནྟིཀཾ ནེསྶཱམཱ’’ཏི ཏཾ ཨཱདཱཡ སཏྠུ སནྟིཀཾ ཨགམཾསུ.

སཏྠཱ དིསྭཱཝ ‘‘ཀིཾ ནུ ཁོ, བྷིཀྑཝེ ¶ , ཨནིཙྪམཱནཀཾཡེཝ བྷིཀྑུཾ གཎྷིཏྭཱ ཨཱགཏཏྠཱ’’ཏི ཨཱཧ. ‘‘བྷནྟེ, ཨཡཾ བྷིཀྑུ བཧུབྷཎྜོ བཧུཔརིཀྑཱརོ’’ཏི. ‘‘སཙྩཾ ཀིར ཏྭཾ བྷིཀྑུ བཧུབྷཎྜོ’’ཏི? ‘‘སཙྩཾ, བྷགཝཱ’’ཏི. ‘‘ཀསྨཱ པན ཏྭཾ བྷིཀྑུ བཧུབྷཎྜོ ཛཱཏོ’’? ‘‘ནནུ ཨཧཾ ཨཔྤིཙྪཏཱཡ སནྟུཊྛིཏཱཡ པཝིཝེཀསྶ ཝཱིརིཡཱརམྦྷསྶ ཝཎྞཾ ཝདཱམཱི’’ཏི. སོ སཏྠུ ཝཙནཾ སུཏྭཱ ཀུཔིཏོ ‘‘ཨིམིནཱ དཱནི ནཱིཧཱརེན ཙརིསྶཱམཱི’’ཏི པཱརུཔནཾ ཚཌྜེཏྭཱ པརིསམཛ྄ཛྷེ ཨེཀཙཱིཝརོ ཨཊྛཱསི.

ཨཐ ནཾ སཏྠཱ ཨུཔཏྠམྦྷཡམཱནོ ‘‘ནནུ ཏྭཾ བྷིཀྑུ པུབྦེ ཧིརོཏྟཔྤགཝེསཀོ དཀརཀྑསཀཱལེཔི ཧིརོཏྟཔྤཾ གཝེསམཱནོ དྭཱདས སཾཝཙྪརཱནི ཝིཧཱསི, ཨཐ ཀསྨཱ ཨིདཱནི ཨེཝཾ གརུཀེ བུདྡྷསཱསནེ པབྦཛིཏྭཱ ཙཏུཔརིསམཛ྄ཛྷེ པཱརུཔནཾ ཚཌྜེཏྭཱ ཧིརོཏྟཔྤཾ པཧཱཡ ཋིཏོསཱི’’ཏི? སོ སཏྠུ ཝཙནཾ སུཏྭཱ ཧིརོཏྟཔྤཾ པཙྩུཔཊྛཱཔེཏྭཱ ཏཾ ཙཱིཝརཾ པཱརུཔིཏྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདི. བྷིཀྑཱུ ཏསྶཏྠསྶ ཨཱཝིབྷཱཝཏྠཾ བྷགཝནྟཾ ཡཱཙིཾསུ, བྷགཝཱ བྷཝནྟརེན པཊིཙྪནྣཾ ཀཱརཎཾ པཱཀཊཾ ཨཀཱསི.

ཨཏཱིཏེ ཀཱསིརཊྛེ བཱརཱཎསིཡཾ བྲཧྨདཏྟོ ནཱམ རཱཛཱ ཨཧོསི. ཏདཱ བོདྷིསཏྟོ ཏསྶ ཨགྒམཧེསིཡཱ ¶ ཀུཙྪིམྷི པཊིསནྡྷིཾ གཎྷི. ཏསྶ ནཱམགྒཧཎདིཝསེ ‘‘མཧིསཱསཀུམཱརོ’’ཏི ནཱམཾ ཨཀཾསུ. ཏསྶ ཨཱདྷཱཝིཏྭཱ པརིདྷཱཝིཏྭཱ ཝིཙརཎཀཱལེ རཉྙོ ཨཉྙོཔི པུཏྟོ ཛཱཏོ, ཏསྶ ‘‘ཙནྡཀུམཱརོ’’ཏི ནཱམཾ ཨཀཾསུ. ཏསྶ པན ཨཱདྷཱཝིཏྭཱ པརིདྷཱཝིཏྭཱ ཝིཙརཎཀཱལེ བོདྷིསཏྟསྶ མཱཏཱ ཀཱལམཀཱསི, རཱཛཱ ཨཉྙཾ ¶ ཨགྒམཧེསིཊྛཱནེ ཋཔེསི. སཱ རཉྙོ པིཡཱ ཨཧོསི མནཱཔཱ, སཱཔི སཾཝཱསམནྭཱཡ ཨེཀཾ པུཏྟཾ ཝིཛཱཡི, ‘‘སཱུརིཡཀུམཱརོ’’ཏིསྶ ནཱམཾ ཨཀཾསུ. རཱཛཱ པུཏྟཾ དིསྭཱ ཏུཊྛཙིཏྟོ ‘‘བྷདྡེ, པུཏྟསྶ ཏེ ཝརཾ དམྨཱི’’ཏི ཨཱཧ. དེཝཱི, ཝརཾ ཨིཙྪིཏཀཱལེ གཧེཏབྦཾ ཀཏྭཱ ཋཔེསི. སཱ པུཏྟེ ཝཡཔྤཏྟེ རཱཛཱནཾ ཨཱཧ – ‘‘དེཝེན མཡ྄ཧཾ པུཏྟསྶ ཛཱཏཀཱལེ ཝརོ དིནྣོ, པུཏྟསྶ མེ རཛྫཾ དེཧཱི’’ཏི. རཱཛཱ ‘‘མཡ྄ཧཾ དྭེ པུཏྟཱ ཨགྒིཀྑནྡྷཱ ཝིཡ ཛལམཱནཱ ཝིཙརནྟི, ན སཀྐཱ ཏཝ པུཏྟསྶ རཛྫཾ དཱཏུ’’ནྟི པཊིཀྑིཔིཏྭཱཔི ཏཾ པུནཔྤུནཾ ཡཱཙམཱནམེཝ དིསྭཱ ‘‘ཨཡཾ མཡ྄ཧཾ ¶ པུཏྟཱནཾ པཱཔཀམྤི ཙིནྟེཡྻཱ’’ཏི པུཏྟེ པཀྐོསཱཔེཏྭཱ ཨཱཧ – ‘‘ཏཱཏཱ, ཨཧཾ སཱུརིཡཀུམཱརསྶ ཛཱཏཀཱལེ ཝརཾ ཨདཱསིཾ. ཨིདཱནིསྶ མཱཏཱ རཛྫཾ ཡཱཙཏི, ཨཧཾ ཏསྶ ན དཱཏུཀཱམོ, མཱཏུགཱམོ ནཱམ པཱཔོ, ཏུམྷཱཀཾ པཱཔཀམྤི ཙིནྟེཡྻ, ཏུམྷེ ཨརཉྙཾ པཝིསིཏྭཱ མམ ཨཙྩཡེན ཀུལསནྟཀེ ནགརེ རཛྫཾ ཀརེཡྻཱཐཱ’’ཏི རོདིཏྭཱ ཀནྡིཏྭཱ སཱིསེ ཙུམྦིཏྭཱ ཨུཡྻོཛེསི. ཏེ པིཏརཾ ཝནྡིཏྭཱ པཱསཱདཱ ཨོཏརནྟེ རཱཛངྒཎེ ཀཱིལ༹མཱནོ སཱུརིཡཀུམཱརོ དིསྭཱ ཏཾ ཀཱརཎཾ ཉཏྭཱ ‘‘ཨཧམྤི བྷཱཏིཀེཧི སདྡྷིཾ གམིསྶཱམཱི’’ཏི ཏེཧི སདྡྷིཾཡེཝ ནིཀྑམི. ཏེ ཧིམཝནྟཾ པཝིསིཾསུ.

བོདྷིསཏྟོ ¶ མགྒཱ ཨོཀྐམྨ རུཀྑམཱུལེ ནིསཱིདིཏྭཱ སཱུརིཡཀུམཱརཾ ཨཱམནྟེསི ‘‘ཏཱཏ སཱུརིཡཀུམཱར, ཨེཏཾ སརཾ གནྟྭཱ ནྷཏྭཱ ཙ པིཝིཏྭཱ ཙ པདུམིནིཔཎྞེཧི ཨམྷཱཀམྤི པཱནཱིཡཾ ཨཱནེཧཱི’’ཏི. ཏཾ པན སརཾ ཝེསྶཝཎསྶ སནྟིཀཱ ཨེཀེན དཀརཀྑསེན ལདྡྷཾ ཧོཏི, ཝེསྶཝཎོ ཙ ཏཾ ཨཱཧ – ‘‘ཋཔེཏྭཱ དེཝདྷམྨཛཱནནཀེ ཡེ ཨཉྙེ ཨིམཾ སརཾ ཨོཏརནྟི, ཏེ ཁཱདིཏུཾ ལབྷསི. ཨནོཏིཎྞེ ན ལབྷསཱི’’ཏི. ཏཏོ པཊྛཱཡ སོ རཀྑསོ ཡེ ཏཾ སརཾ ཨོཏརནྟི, ཏེ དེཝདྷམྨེ པུཙྪིཏྭཱ ཡེ ན ཛཱནནྟི, ཏེ ཁཱདཏི. ཨཐ ཁོ སཱུརིཡཀུམཱརོ ཏཾ སརཾ གནྟྭཱ ཨཝཱིམཾསིཏྭཱཝ ཨོཏརི. ཨཐ ནཾ སོ རཀྑསོ གཧེཏྭཱ ‘‘དེཝདྷམྨེ ཛཱནཱསཱི’’ཏི པུཙྪི. སོ ‘‘དེཝདྷམྨཱ ནཱམ ཙནྡིམསཱུརིཡཱ’’ཏི ཨཱཧ. ཨཐ ནཾ ‘‘ཏྭཾ དེཝདྷམྨེ ན ཛཱནཱསཱི’’ཏི ཝཏྭཱ ཨུདཀཾ པཝེསེཏྭཱ ཨཏྟནོ ཝསནཊྛཱནེ ཋཔེསི. བོདྷིསཏྟོཔི ཏཾ ཨཏིཙིརཱཡནྟཾ དིསྭཱ ཙནྡཀུམཱརཾ པེསེསི. རཀྑསོ ཏམྤི གཧེཏྭཱ ‘‘དེཝདྷམྨེ ཛཱནཱསཱི’’ཏི པུཙྪི. ‘‘ཨཱམ ཛཱནཱམི, དེཝདྷམྨཱ ནཱམ ཙཏསྶོ དིསཱ’’ཏི. རཀྑསོ ‘‘ན ཏྭཾ དེཝདྷམྨེ ཛཱནཱསཱི’’ཏི ཏམྤི གཧེཏྭཱ ཏཏྠེཝ ཋཔེསི.

བོདྷིསཏྟོ ¶ ཏསྨིམྤི ཙིརཱཡནྟེ ‘‘ཨེཀེན ཨནྟརཱཡེན བྷཝིཏབྦ’’ནྟི སཡཾ ཏཏྠ གནྟྭཱ དྭིནྣམྤི ཨོཏརཎཔདཝལ༹ཉྫཾ ¶ དིསྭཱ ‘‘རཀྑསཔརིགྒཧིཏེན ཨིམིནཱ སརེན བྷཝིཏབྦ’’ནྟི ཁགྒཾ སནྣཡ྄ཧིཏྭཱ དྷནུཾ གཧེཏྭཱ ཨཊྛཱསི. དཀརཀྑསོ བོདྷིསཏྟཾ ཨུདཀཾ ཨནོཏརནྟཾ དིསྭཱ ཝནཀམྨིཀཔུརིསོ ཝིཡ ཧུཏྭཱ བོདྷིསཏྟཾ ཨཱཧ – ‘‘བྷོ, པུརིས, ཏྭཾ མགྒཀིལནྟོ ཀསྨཱ ཨིམཾ སརཾ ཨོཏརིཏྭཱ ནྷཏྭཱ པིཝིཏྭཱ བྷིསམུལཱ༹ལཾ ཁཱདིཏྭཱ པུཔྥཱནི པིལ༹ནྡྷིཏྭཱ ཡཐཱསུཁཾ ན གཙྪསཱི’’ཏི? བོདྷིསཏྟོ ཏཾ དིསྭཱ ‘‘ཨེསོ ཡཀྑོ བྷཝིསྶཏཱི’’ཏི ཉཏྭཱ ‘‘ཏཡཱ མེ བྷཱཏིཀཱ གཧིཏཱ’’ཏི ཨཱཧ. ‘‘ཨཱམ, གཧིཏཱ’’ཏི. ‘‘ཀིཾ ཀཱརཎཱ’’ཏི? ‘‘ཨཧཾ ཨིམཾ སརཾ ཨོཏིཎྞཀེ ལབྷཱམཱི’’ཏི. ‘‘ཀིཾ པན སབྦེཝ ལབྷསཱི’’ཏི? ‘‘ཡེ དེཝདྷམྨེ ཛཱནནྟི, ཏེ ཋཔེཏྭཱ ཨཝསེསེ ལབྷཱམཱི’’ཏི. ‘‘ཨཏྠི པན ཏེ དེཝདྷམྨེཧི ཨཏྠོ’’ཏི? ‘‘ཨཱམ, ཨཏྠཱི’’ཏི. ‘‘ཡདི ཨེཝཾ ཨཧཾ ཏེ དེཝདྷམྨེ ཀཐེསྶཱམཱི’’ཏི. ‘‘ཏེན ཧི ཀཐེཧི, ཨཧཾ དེཝདྷམྨེ སུཎིསྶཱམཱི’’ཏི. བོདྷིསཏྟོ ཨཱཧ ‘‘ཨཧཾ དེཝདྷམྨེ ཀཐེཡྻཾ, ཀིལིཊྛགཏྟོ པནམྷཱི’’ཏི. ཡཀྑོ བོདྷིསཏྟཾ ནྷཱཔེཏྭཱ བྷོཛནཾ བྷོཛེཏྭཱ པཱནཱིཡཾ པཱཡེཏྭཱ པུཔྥཱནི པིལ༹ནྡྷཱཔེཏྭཱ གནྡྷེཧི ཝིལིམྤཱཔེཏྭཱ ཨལངྐཏམཎྜཔམཛ྄ཛྷེ པལླངྐཾ ཨཏྠརིཏྭཱ ཨདཱསི.

བོདྷིསཏྟོ ཨཱསནེ ནིསཱིདིཏྭཱ ཡཀྑཾ པཱདམཱུལེ ནིསཱིདཱཔེཏྭཱ ‘‘ཏེན ཧི ཨོཧིཏསོཏོ སཀྐཙྩཾ དེཝདྷམྨེ སུཎཱཧཱི’’ཏི ཨིམཾ གཱཐམཱཧ –

༦.

‘‘ཧིརིཨོཏྟཔྤསམྤནྣཱ, སུཀྐདྷམྨསམཱཧིཏཱ;

སནྟོ སཔྤུརིསཱ ལོཀེ, དེཝདྷམྨཱཏི ཝུཙྩརེ’’ཏི.

ཏཏྠ ཧིརིཨོཏྟཔྤསམྤནྣཱཏི ཧིརིཡཱ ཙ ཨོཏྟཔྤེན ཙ སམནྣཱགཏཱ. ཏེསུ ཀཱཡདུཙྩརིཏཱདཱིཧི ཧིརིཡཏཱིཏི ཧིརཱི, ལཛྫཱཡེཏཾ ཨདྷིཝཙནཾ. ཏེཧིཡེཝ ཨོཏྟཔྤཏཱིཏི ཨོཏྟཔྤཾ, པཱཔཏོ ཨུབྦེགསྶེཏཾ ཨདྷིཝཙནཾ. ཏཏྠ ཨཛ྄ཛྷཏྟསམུཊྛཱནཱ ཧིརཱི, བཧིདྡྷཱསམུཊྛཱནཾ ཨོཏྟཔྤཾ. ཨཏྟཱདྷིཔཏེཡྻཱ ཧིརཱི, ལོཀཱདྷིཔཏེཡྻཾ ཨོཏྟཔྤཾ. ལཛྫཱསབྷཱཝསཎྛིཏཱ ཧིརཱི, བྷཡསབྷཱཝསཎྛིཏཾ ཨོཏྟཔྤཾ. སཔྤཏིསྶཝལཀྑཎཱ ཧིརཱི, ཝཛྫབྷཱིརུཀབྷཡདསྶཱཝིལཀྑཎཾ ཨོཏྟཔྤཾ.

ཏཏྠ ཨཛ྄ཛྷཏྟསམུཊྛཱནཾ ཧིརིཾ ཙཏཱུཧི ཀཱརཎེཧི སམུཊྛཱཔེཏི – ཛཱཏིཾ པཙྩཝེཀྑིཏྭཱ ཝཡཾ པཙྩཝེཀྑིཏྭཱ ¶ སཱུརབྷཱཝཾ པཙྩཝེཀྑིཏྭཱ བཱཧུསཙྩཾ པཙྩཝེཀྑིཏྭཱ ¶ . ཀཐཾ? ‘‘པཱཔཀརཎཾ ནཱམེཏཾ ན ཛཱཏིསམྤནྣཱནཾ ཀམྨཾ, ཧཱིནཛཙྩཱནཾ ཀེཝཊྚཱདཱིནཾ ཀམྨཾ, མཱདིསསྶ ཛཱཏིསམྤནྣསྶ ཨིདཾ ཀམྨཾ ཀཱཏུཾ ན ཡུཏྟ’’ནྟི ཨེཝཾ ཏཱཝ ཛཱཏིཾ པཙྩཝེཀྑིཏྭཱ པཱཎཱཏིཔཱཏཱདིཔཱཔཾ ཨཀརོནྟོ ¶ ཧིརིཾ སམུཊྛཱཔེཏི. ཏཐཱ ‘‘པཱཔཀརཎཾ ནཱམེཏཾ དཧརེཧི ཀཏྟབྦཾ ཀམྨཾ, མཱདིསསྶ ཝཡེ ཋིཏསྶ ཨིདཾ ཀམྨཾ ཀཱཏུཾ ན ཡུཏྟ’’ནྟི ཨེཝཾ ཝཡཾ པཙྩཝེཀྑིཏྭཱ པཱཎཱཏིཔཱཏཱདིཔཱཔཾ ཨཀརོནྟོ ཧིརིཾ སམུཊྛཱཔེཏི. ཏཐཱ ‘‘པཱཔཀམྨཾ ནཱམེཏཾ དུབྦལཛཱཏིཀཱནཾ ཀམྨཾ, མཱདིསསྶ སཱུརབྷཱཝསམྤནྣསྶ ཨིདཾ ཀམྨཾ ཀཱཏུཾ ན ཡུཏྟ’’ནྟི ཨེཝཾ སཱུརབྷཱཝཾ པཙྩཝེཀྑིཏྭཱ པཱཎཱཏིཔཱཏཱདིཔཱཔཾ ཨཀརོནྟོ ཧིརིཾ སམུཊྛཱཔེཏི. ཏཐཱ ‘‘པཱཔཀམྨཾ ནཱམེཏཾ ཨནྡྷབཱལཱནཾ ཀམྨཾ, ན པཎྜིཏཱནཾ, མཱདིསསྶ པཎྜིཏསྶ བཧུསྶུཏསྶ ཨིདཾ ཀམྨཾ ཀཱཏུཾ ན ཡུཏྟ’’ནྟི ཨེཝཾ བཱཧུསཙྩཾ པཙྩཝེཀྑིཏྭཱ པཱཎཱཏིཔཱཏཱདིཔཱཔཾ ཨཀརོནྟོ ཧིརིཾ སམུཊྛཱཔེཏི. ཨེཝཾ ཨཛ྄ཛྷཏྟསམུཊྛཱནཾ ཧིརིཾ ཙཏཱུཧི ཀཱརཎེཧི སམུཊྛཱཔེཏི. སམུཊྛཱཔེཏྭཱ ཙ པན ཨཏྟནོ ཙིཏྟེ ཧིརིཾ པཝེསེཏྭཱ པཱཔཀམྨཾ ན ཀརོཏི. ཨེཝཾ ཧིརཱི ཨཛ྄ཛྷཏྟསམུཊྛཱནཱ ནཱམ ཧོཏི.

ཀཐཾ ཨོཏྟཔྤཾ བཧིདྡྷཱསམུཊྛཱནཾ ནཱམ? ‘‘སཙེ ཏྭཾ པཱཔཀམྨཾ ཀརིསྶསི, ཙཏཱུསུ པརིསཱསུ གརཧཔྤཏྟོ བྷཝིསྶསི.

‘‘གརཧིསྶནྟི ཏཾ ཝིཉྙཱུ, ཨསུཙིཾ ནཱགརིཀོ ཡཐཱ;

ཝཛྫིཏོ སཱིལཝནྟེཧི, ཀཐཾ བྷིཀྑུ ཀརིསྶསཱི’’ཏི. (དྷ. ས. ཨཊྛ. ༡ བལརཱསིཝཎྞནཱ) –

ཨེཝཾ པཙྩཝེཀྑནྟོ ཧི བཧིདྡྷཱསམུཊྛིཏེན ཨོཏྟཔྤེན པཱཔཀམྨཾ ན ཀརོཏི. ཨེཝཾ ཨོཏྟཔྤཾ བཧིདྡྷཱསམུཊྛཱནཾ ནཱམ ཧོཏི.

ཀཐཾ ཧིརཱི ཨཏྟཱདྷིཔཏེཡྻཱ ནཱམ? ཨིདྷེཀཙྩོ ཀུལཔུཏྟོ ཨཏྟཱནཾ ཨདྷིཔཏིཾ ཛེཊྛཀཾ ཀཏྭཱ ‘‘མཱདིསསྶ སདྡྷཱཔབྦཛིཏསྶ བཧུསྶུཏསྶ དྷུཏངྒདྷརསྶ ན ཡུཏྟཾ པཱཔཀམྨཾ ཀཱཏུ’’ནྟི པཱཔཾ ན ཀརོཏི. ཨེཝཾ ཧིརཱི ཨཏྟཱདྷིཔཏེཡྻཱ ནཱམ ཧོཏི. ཏེནཱཧ བྷགཝཱ –

‘‘སོ ཨཏྟཱནཾཡེཝ ཨདྷིཔཏིཾ ཀཏྭཱ ཨཀུསལཾ པཛཧཏི, ཀུསལཾ བྷཱཝེཏི. སཱཝཛྫཾ པཛཧཏི, ཨནཝཛྫཾ བྷཱཝེཏི. སུདྡྷམཏྟཱནཾ པརིཧརཏཱི’’ཏི (ཨ. ནི. ༣.༤༠).

ཀཐཾ ཨོཏྟཔྤཾ ལོཀཱདྷིཔཏེཡྻཾ ནཱམ? ཨིདྷེཀཙྩོ ཀུལཔུཏྟོ ལོཀཾ ཨདྷིཔཏིཾ ཛེཊྛཀཾ ཀཏྭཱ པཱཔཀམྨཾ ན ཀརོཏི. ཡཐཱཧ –

‘‘མཧཱ ¶ ¶ ཁོ པནཱཡཾ ལོཀསནྣིཝཱསོ. མཧནྟསྨིཾ ཁོ པན ལོཀསནྣིཝཱསེ སནྟི སམཎབྲཱཧྨཎཱ ཨིདྡྷིམནྟོ དིབྦཙཀྑུཀཱ པརཙིཏྟཝིདུནོ, ཏེ དཱུརཏོཔི པསྶནྟི, ཨཱསནྣཱཔི ན དིསྶནྟི, ཙེཏསཱཔི ཙིཏྟཾ ཛཱནནྟི, ཏེཔི མཾ ཨེཝཾ ཛཱནིསྶནྟི ‘པསྶཐ བྷོ, ཨིམཾ ཀུལཔུཏྟཾ, སདྡྷཱ ཨགཱརསྨཱ ཨནགཱརིཡཾ པབྦཛིཏོ སམཱནོ ཝོཀིཎྞོ ཝིཧརཏི པཱཔཀེཧི ཨཀུསལེཧི དྷམྨེཧཱི’ཏི.

‘‘སནྟི དེཝཏཱ ཨིདྡྷིམནྟིཡོ དིབྦཙཀྑུཀཱ པརཙིཏྟཝིདུནིཡོ, ཏཱ དཱུརཏོཔི པསྶནྟི, ཨཱསནྣཱཔི ན དིསྶནྟི, ཙེཏསཱཔི ཙིཏྟཾ ཛཱནནྟི, ཏཱཔི མཾ ཨེཝཾ ཛཱནིསྶནྟི ‘པསྶཐ བྷོ, ཨིམཾ ཀུལཔུཏྟཾ, སདྡྷཱ ཨགཱརསྨཱ ཨནགཱརིཡཾ པབྦཛིཏོ ¶ སམཱནོ ཝོཀིཎྞོ ཝིཧརཏི པཱཔཀེཧི ཨཀུསལེཧི དྷམྨེཧཱི’ཏི. སོ ལོཀཾཡེཝ ཨདྷིཔཏིཾ ཛེཊྛཀཾ ཀརིཏྭཱ ཨཀུསལཾ པཛཧཏི, ཀུསལཾ བྷཱཝེཏི. སཱཝཛྫཾ པཛཧཏི, ཨནཝཛྫཾ བྷཱཝེཏི. སུདྡྷམཏྟཱནཾ པརིཧརཏཱི’’ཏི (ཨ. ནི. ༣.༤༠).

ཨེཝཾ ཨོཏྟཔྤཾ ལོཀཱདྷིཔཏེཡྻཾ ནཱམ ཧོཏི.

‘‘ལཛྫཱསབྷཱཝསཎྛིཏཱ ཧིརཱི, བྷཡསབྷཱཝསཎྛིཏཾ ཨོཏྟཔྤ’’ནྟི ཨེཏྠ པན ལཛྫཱཏི ལཛྫནཱཀཱརོ, ཏེན སབྷཱཝེན སཎྛིཏཱ ཧིརཱི. བྷཡནྟི ཨཔཱཡབྷཡཾ, ཏེན སབྷཱཝེན སཎྛིཏཾ ཨོཏྟཔྤཾ. ཏདུབྷཡམྤི པཱཔཔརིཝཛྫནེ པཱཀཊཾ ཧོཏི. ཨེཀཙྩོ ཧི ཡཐཱ ནཱམེཀོ ཀུལཔུཏྟོ ཨུཙྩཱརཔསྶཱཝཱདཱིནི ཀརོནྟོ ལཛྫིཏབྦཡུཏྟཀཾ ཨེཀཾ དིསྭཱ ལཛྫནཱཀཱརཔྤཏྟོ བྷཝེཡྻ ཧཱིལི༹ཏོ, ཨེཝམེཝཾ ཨཛ྄ཛྷཏྟཾ ལཛྫིདྷམྨཾ ཨོཀྐམིཏྭཱ པཱཔཀམྨཾ ན ཀརོཏི. ཨེཀཙྩོ ཨཔཱཡབྷཡབྷཱིཏོ ཧུཏྭཱ པཱཔཀམྨཾ ན ཀརོཏི. ཏཏྲིདཾ ཨོཔམྨཾ – ཡཐཱ ཧི དྭཱིསུ ཨཡོགུལེ༹སུ ཨེཀོ སཱིཏལོ བྷཝེཡྻ གཱུཐམཀྑིཏོ, ཨེཀོ ཨུཎྷོ ཨཱདིཏྟོ. ཏཏྠ པཎྜིཏོ སཱིཏལཾ གཱུཐམཀྑིཏཏྟཱ ཛིགུཙྪནྟོ ན གཎྷཱཏི, ཨིཏརཾ ཌཱཧབྷཡེན. ཏཏྠ སཱིཏལསྶ གཱུཐམཀྑིཏསྶ ཛིགུཙྪཱཡ ཨགཎྷནཾ ཝིཡ ཨཛ྄ཛྷཏྟཾ ལཛྫིདྷམྨཾ ཨོཀྐམིཏྭཱ པཱཔསྶ ཨཀརཎཾ, ཨུཎྷསྶ ཌཱཧབྷཡེན ཨགཎྷནཾ ཝིཡ ཨཔཱཡབྷཡེན པཱཔསྶ ཨཀརཎཾ ཝེདིཏབྦཾ.

‘‘སཔྤཏིསྶཝལཀྑཎཱ ¶ ཧིརཱི, ཝཛྫབྷཱིརུཀབྷཡདསྶཱཝིལཀྑཎཾ ཨོཏྟཔྤ’’ནྟི ཨིདམྤི དྭཡཾ པཱཔཔརིཝཛྫནེཡེཝ པཱཀཊཾ ཧོཏི. ཨེཀཙྩོ ཧི ཛཱཏིམཧཏྟཔཙྩཝེཀྑཎཱ, སཏྠུམཧཏྟཔཙྩཝེཀྑཎཱ, དཱཡཛྫམཧཏྟཔཙྩཝེཀྑཎཱ, སབྲཧྨཙཱརིམཧཏྟཔཙྩཝེཀྑཎཱཏི ཙཏཱུཧི ཀཱརཎེཧི སཔྤཏིསྶཝལཀྑཎཾ ཧིརིཾ སམུཊྛཱཔེཏྭཱ པཱཔཾ ན ཀརོཏི. ཨེཀཙྩོ ཨཏྟཱནུཝཱདབྷཡཾ, པརཱནུཝཱདབྷཡཾ ¶ , དཎྜབྷཡཾ, དུགྒཏིབྷཡནྟི ཙཏཱུཧི ཀཱརཎེཧི ཝཛྫབྷཱིརུཀབྷཡདསྶཱཝིལཀྑཎཾ ཨོཏྟཔྤཾ སམུཊྛཱཔེཏྭཱ པཱཔཾ ན ཀརོཏི. ཏཏྠ ཛཱཏིམཧཏྟཔཙྩཝེཀྑཎཱདཱིནི ཙེཝ ཨཏྟཱནུཝཱདབྷཡཱདཱིནི ཙ ཝིཏྠཱརེཏྭཱ ཀཐེཏབྦཱནི. ཏེསཾ ཝིཏྠཱརོ ཨངྒུཏྟརནིཀཱཡཊྛཀཐཱཡཾ ཝུཏྟོ.

སུཀྐདྷམྨསམཱཧིཏཱཏི ཨིདམེཝ ཧིརོཏྟཔྤཾ ཨཱདིཾ ཀཏྭཱ ཀཏྟབྦཱ ཀུསལཱ དྷམྨཱ སུཀྐདྷམྨཱ ནཱམ, ཏེ སབྦསངྒཱཧཀནཡེན ཙཏུབྷཱུམཀལོཀིཡལོཀུཏྟརདྷམྨཱ. ཏེཧི སམཱཧིཏཱ སམནྣཱགཏཱཏི ཨཏྠོ. སནྟོ སཔྤུརིསཱ ལོཀེཏི ཀཱཡཀམྨཱདཱིནཾ སནྟཏཱཡ སནྟོ, ཀཏཉྙུཀཏཝེདིཏཱཡ སོབྷནཱ པུརིསཱཏི སཔྤུརིསཱ. ལོཀོ པན སངྑཱརལོཀོ, སཏྟལོཀོ, ཨོཀཱསལོཀོ, ཁནྡྷལོཀོ, ཨཱཡཏནལོཀོ, དྷཱཏུལོཀོཏི ཨནེཀཝིདྷོ. ཏཏྠ ‘‘ཨེཀོ ལོཀོ སབྦེ སཏྟཱ ཨཱཧཱརཊྛིཏིཀཱ…པེ… ཨཊྛཱརས ལོཀཱ ཨཊྛཱརས དྷཱཏུཡོ’’ཏི (པཊི. མ. ༡.༡༡༢) ཨེཏྠ སངྑཱརལོཀོ ཝུཏྟོ. ཁནྡྷལོཀཱདཡོ ཏདནྟོགདྷཱཡེཝ. ‘‘ཨཡཾ ལོཀོ པརལོཀོ, དེཝལོཀོ མནུསྶལོཀོ’’ཏིཨཱདཱིསུ (མཧཱནི. ༣; ཙཱུལ༹ནི. ཨཛིཏམཱཎཝཔུཙྪཱནིདྡེས ༢) པན སཏྟལོཀོ ཝུཏྟོ.

‘‘ཡཱཝཏཱ ¶ ཙནྡིམསཱུརིཡཱ, པརིཧརནྟི དིསཱ བྷནྟི ཝིརོཙམཱནཱ;

ཏཱཝ སཧསྶདྷཱ ལོཀོ, ཨེཏྠ ཏེ ཝཏྟཏེ ཝསོ’’ཏི. (མ. ནི. ༡.༥༠༣) –

ཨེཏྠ ཨོཀཱསལོཀོ ཝུཏྟོ. ཏེསུ ཨིདྷ སཏྟལོཀོ ཨདྷིཔྤེཏོ. སཏྟལོཀསྨིཉྷི ཡེ ཨེཝརཱུཔཱ སཔྤུརིསཱ, ཏེ དེཝདྷམྨཱཏི ཝུཙྩནྟི.

ཏཏྠ ¶ དེཝཱཏི སམྨུཏིདེཝཱ, ཨུཔཔཏྟིདེཝཱ, ཝིསུདྡྷིདེཝཱཏི ཏིཝིདྷཱ. ཏེསུ མཧཱསམྨཏཀཱལཏོ པཊྛཱཡ ལོཀེན ‘‘དེཝཱ’’ཏི སམྨཏཏྟཱ རཱཛརཱཛཀུམཱརཱདཡོ སམྨུཏིདེཝཱ ནཱམ. དེཝལོཀེ ཨུཔྤནྣཱ ཨུཔཔཏྟིདེཝཱ ནཱམ. ཁཱིཎཱསཝཱ པན ཝིསུདྡྷིདེཝཱ ནཱམ. ཝུཏྟམྤི ཙེཏཾ –

‘‘སམྨུཏིདེཝཱ ནཱམ རཱཛཱནོ དེཝིཡོ རཱཛཀུམཱརཱ. ཨུཔཔཏྟིདེཝཱ ནཱམ བྷུམྨདེཝེ ཨུཔཱདཱཡ ཏདུཏྟརིདེཝཱ. ཝིསུདྡྷིདེཝཱ ནཱམ བུདྡྷཱ པཙྩེཀབུདྡྷཱ ཁཱིཎཱསཝཱ’’ཏི (ཙཱུལ༹ནི. དྷོཏཀམཱཎཝཔུཙྪཱནིདྡེས ༣༢; པཱརཱཡནཱནུགཱིཏིགཱཐཱནིདྡེས ༡༡༩).

ཨིམེསཾ དེཝཱནཾ དྷམྨཱཏི དེཝདྷམྨཱ. ཝུཙྩརེཏི ཝུཙྩནྟི. ཧིརོཏྟཔྤམཱུལཀཱ ཧི ཀུསལཱ དྷམྨཱ ཀུལསམྤདཱཡ ¶ ཙེཝ དེཝལོཀེ ནིབྦཏྟིཡཱ ཙ ཝིསུདྡྷིབྷཱཝསྶ ཙ ཀཱརཎཏྟཱ ཀཱརཎཊྛེན ཏིཝིདྷཱནམྤི ཏེསཾ དེཝཱནཾ དྷམྨཱཏི དེཝདྷམྨཱ, ཏེཧི དེཝདྷམྨེཧི སམནྣཱགཏཱ པུགྒལཱཔི དེཝདྷམྨཱ. ཏསྨཱ པུགྒལཱདྷིཊྛཱནདེསནཱཡ ཏེ དྷམྨེ དསྶེནྟོ ‘‘སནྟོ སཔྤུརིསཱ ལོཀེ, དེཝདྷམྨཱཏི ཝུཙྩརེ’’ཏི ཨཱཧ.

ཡཀྑོ ཨིམཾ དྷམྨདེསནཾ སུཏྭཱ པསནྣཙིཏྟོ བོདྷིསཏྟཾ ཨཱཧ – ‘‘པཎྜིཏ, ཨཧཾ ཏུམྷཱཀཾ པསནྣོ, ཨེཀཾ བྷཱཏརཾ དེམི, ཀཏརཾ ཨཱནེམཱི’’ཏི? ‘‘ཀནིཊྛཾ ཨཱནེཧཱི’’ཏི. ‘‘པཎྜིཏ, ཏྭཾ ཀེཝལཾ དེཝདྷམྨེ ཛཱནཱསིཡེཝ, ན པན ཏེསུ ཝཏྟསཱི’’ཏི. ‘‘ཀིཾ ཀཱརཎཱ’’ཏི? ‘‘ཡཾཀཱརཎཱ ཛེཊྛཀཾ ཋཔེཏྭཱ ཀནིཊྛཾ ཨཱཎཱཔེནྟོ ཛེཊྛཱཔཙཱཡིཀཀམྨཾ ན ཀརོསཱི’’ཏི. དེཝདྷམྨེ ཙཱཧཾ, ཡཀྑ, ཛཱནཱམི, ཏེསུ ཙ ཝཏྟཱམི. མཡཉྷི ཨིམཾ ཨརཉྙཾ ཨེཏཾ ནིསྶཱཡ པཝིཊྛཱ. ཨེཏསྶ ཧི ཨཏྠཱཡ ཨམྷཱཀཾ པིཏརཾ ཨེཏསྶ མཱཏཱ རཛྫཾ ཡཱཙི, ཨམྷཱཀཾ པན པིཏཱ ཏཾ ཝརཾ ཨདཏྭཱ ཨམྷཱཀཾ ཨནུརཀྑཎཏྠཱཡ ཨརཉྙཝཱསཾ ཨནུཛཱནི. སོ ཀུམཱརོ ཨནུཝཏྟིཏྭཱ ཨམྷེཧི སདྡྷིཾ ཨཱགཏོ. ‘‘ཏཾ ཨརཉྙེ ཨེཀོ ཡཀྑོ ཁཱདཱི’’ཏི ཝུཏྟེཔི ན ཀོཙི སདྡཧིསྶཏི, ཏེནཱཧཾ གརཧབྷཡབྷཱིཏོ ཏམེཝ ཨཱཎཱཔེམཱིཏི. ‘‘སཱདྷུ སཱདྷུ པཎྜིཏ, ཏྭཾ དེཝདྷམྨེ ཙ ཛཱནཱསི, ཏེསུ ཙ ཝཏྟསཱི’’ཏི ¶ པསནྣོ ཡཀྑོ བོདྷིསཏྟསྶ སཱདྷུཀཱརཾ དཏྭཱ དྭེཔི བྷཱཏརོ ཨཱནེཏྭཱ ཨདཱསི.

ཨཐ ནཾ བོདྷིསཏྟོ ཨཱཧ – ‘‘སམྨ, ཏྭཾ པུབྦེ ཨཏྟནཱ ཀཏེན པཱཔཀམྨེན པརེསཾ མཾསལོཧིཏཁཱདཀོ ཡཀྑོ ཧུཏྭཱ ནིབྦཏྟོ, ཨིདཱནིཔི པཱཔམེཝ ཀརོསི, ཨིདཾ ཏེ པཱཔཀམྨཾ ནིརཡཱདཱིཧི མུཙྩིཏུཾ ཨོཀཱསཾ ན དསྶཏི ¶ , ཏསྨཱ ཨིཏོ པཊྛཱཡ པཱཔཾ པཧཱཡ ཀུསལཾ ཀརོཧཱི’’ཏི. ཨསཀྑི ཙ པན ཏཾ དམེཏུཾ. སོ ཏཾ ཡཀྑཾ དམེཏྭཱ ཏེན སཾཝིཧིཏཱརཀྑོ ཏཏྠེཝ ཝསནྟོ ཨེཀདིཝསཾ ནཀྑཏྟཾ ཨོལོཀེཏྭཱ པིཏུ ཀཱལཀཏབྷཱཝཾ ཉཏྭཱ ཡཀྑཾ ཨཱདཱཡ བཱརཱཎསིཾ གནྟྭཱ རཛྫཾ གཧེཏྭཱ ཙནྡཀུམཱརསྶ ཨོཔརཛྫཾ, སཱུརིཡཀུམཱརསྶ སེནཱཔཏིཊྛཱནཾ, དཏྭཱ ཡཀྑསྶ རམཎཱིཡེ ཋཱནེ ཨཱཡཏནཾ ཀཱརེཏྭཱ, ཡཐཱ སོ ཨགྒམཱལཾ ཨགྒཔུཔྥཾ ཨགྒབྷཏྟཉྩ ལབྷཏི, ཏཐཱ ཨཀཱསི. སོ དྷམྨེན རཛྫཾ ཀཱརེཏྭཱ ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ དསྶེཏྭཱ སཙྩཱནི པཀཱསེསི, སཙྩཔརིཡོསཱནེ སོ བྷིཀྑུ སོཏཱཔཏྟིཕལེ པཏིཊྛཧི. སམྨཱསམྦུདྡྷོཔི དྭེ ཝཏྠཱུནི ཀཐེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ དཀརཀྑསོ བཧུབྷཎྜིཀབྷིཀྑུ ཨཧོསི, སཱུརིཡཀུམཱརོ ཨཱནནྡོ, ཙནྡཀུམཱརོ སཱརིཔུཏྟོ, ཛེཊྛཀབྷཱཏཱ མཧིསཱསཀུམཱརོ པན ཨཧམེཝ ཨཧོསི’’ནྟི.

དེཝདྷམྨཛཱཏཀཝཎྞནཱ ཚཊྛཱ.

༧. ཀཊྛཧཱརིཛཱཏཀཝཎྞནཱ

པུཏྟོ ¶ ཏྱཱཧཾ མཧཱརཱཛཱཏི ཨིདཾ སཏྠཱ ཛེཏཝནེ ཝིཧརནྟོ ཝཱསབྷཁཏྟིཡཾ ཨཱརབྦྷ ཀཐེསི. ཝཱསབྷཁཏྟིཡཱཡ ཝཏྠུ དྭཱདསཀནིཔཱཏེ བྷདྡསཱལཛཱཏཀེ ཨཱཝིབྷཝིསྶཏི. སཱ ཀིར མཧཱནཱམསྶ སཀྐསྶ དྷཱིཏཱ ནཱགམུཎྜཱཡ ནཱམ དཱསིཡཱ ཀུཙྪིསྨིཾ ཛཱཏཱ ཀོསལརཱཛསྶ ཨགྒམཧེསཱི ཨཧོསི. སཱ རཉྙོ པུཏྟཾ ཝིཛཱཡི. རཱཛཱ པནསྶཱ པཙྪཱ དཱསིབྷཱཝཾ ཉཏྭཱ ཋཱནཾ པརིཧཱཔེསི, པུཏྟསྶ ཝིཊཊཱུབྷསྶཱཔི ཋཱནཾ པརིཧཱཔེསིཡེཝ. ཏེ ཨུབྷོཔི ཨནྟོནིཝེསནེཡེཝ ཝསནྟི. སཏྠཱ ཏཾ ཀཱརཎཾ ཉཏྭཱ པུབྦཎྷསམཡེ པཉྩསཏབྷིཀྑུཔརིཝུཏོ ¶ རཉྙོ ནིཝེསནཾ གནྟྭཱ པཉྙཏྟཱསནེ ནིསཱིདིཏྭཱ ‘‘མཧཱརཱཛ, ཀཧཾ ཝཱསབྷཁཏྟིཡཱ’’ཏི ཨཱཧ. ‘‘རཱཛཱ ཏཾ ཀཱརཎཾ ཨཱརོཙེསི. མཧཱརཱཛ ཝཱསབྷཁཏྟིཡཱ ཀསྶ དྷཱིཏཱ’’ཏི? ‘‘མཧཱནཱམསྶ བྷནྟེ’’ཏི. ‘‘ཨཱགཙྪམཱནཱ ཀསྶ ཨཱགཏཱ’’ཏི? ‘‘མཡ྄ཧཾ བྷནྟེ’’ཏི. མཧཱརཱཛ སཱ རཉྙོ དྷཱིཏཱ, རཉྙོཝ ཨཱགཏཱ, རཱཛཱནཾཡེཝ པཊིཙྩ པུཏྟཾ ¶ ལབྷི, སོ པུཏྟོ ཀིཾཀཱརཎཱ པིཏུ སནྟཀསྶ རཛྫསྶ སཱམིཀོ ན ཧོཏི, པུབྦེ རཱཛཱནོ མུཧུཏྟིཀཱཡ ཀཊྛཧཱརིཀཱཡ ཀུཙྪིསྨིམྤི པུཏྟཾ ལབྷིཏྭཱ པུཏྟསྶ རཛྫཾ ཨདཾསཱུཏི. རཱཛཱ ཏསྶཏྠསྶཱཝིབྷཱཝཏྠཱཡ བྷགཝནྟཾ ཡཱཙི, བྷགཝཱ བྷཝནྟརེན པཊིཙྪནྣཾ ཀཱརཎཾ པཱཀཊཾ ཨཀཱསི.

ཨཏཱིཏེ བཱརཱཎསིཡཾ བྲཧྨདཏྟོ རཱཛཱ མཧནྟེན ཡསེན ཨུཡྻཱནཾ གནྟྭཱ ཏཏྠ པུཔྥཕལལོབྷེན ཝིཙརནྟོ ཨུཡྻཱནཝནསཎྜེ གཱཡིཏྭཱ དཱརཱུནི ཨུདྡྷརམཱནཾ ཨེཀཾ ཨིཏྠིཾ དིསྭཱ པཊིབདྡྷཙིཏྟོ སཾཝཱསཾ ཀཔྤེསི. ཏངྑཎཉྙེཝ བོདྷིསཏྟོ ཏསྶཱ ཀུཙྪིཡཾ པཊིསནྡྷིཾ གཎྷི, ཏཱཝདེཝ ཏསྶཱ ཝཛིརཔཱུརིཏཱ ཝིཡ གརུཀཱ ཀུཙྪི ཨཧོསི. སཱ གབྦྷསྶ པཏིཊྛིཏབྷཱཝཾ ཉཏྭཱ ‘‘གབྦྷོ མེ, དེཝ, པཏིཊྛིཏོ’’ཏི ཨཱཧ. རཱཛཱ ཨངྒུལིམུདྡིཀཾ དཏྭཱ ‘‘སཙེ དྷཱིཏཱ ཧོཏི, ཨིམཾ ཝིསྶཛྫེཏྭཱ པོསེཡྻཱསི, སཙེ པུཏྟོ ཧོཏི, ཨངྒུལིམུདྡིཀཱཡ སདྡྷིཾ མམ སནྟིཀཾ ཨཱནེཡྻཱསཱི’’ཏི ཝཏྭཱ པཀྐཱམི.

སཱཔི པརིཔཀྐགབྦྷཱ བོདྷིསཏྟཾ ཝིཛཱཡི. ཏསྶ ཨཱདྷཱཝིཏྭཱ པརིདྷཱཝིཏྭཱ ཝིཙརཎཀཱལེ ཀཱིལཱ༹མཎྜལེ ཀཱིལ༹ནྟསྶ ཨེཝཾ ཝཏྟཱརོ ཧོནྟི ‘‘ནིཔྤིཏིཀེནམྷཱ པཧཊཱ’’ཏི. ཏཾ སུཏྭཱ བོདྷིསཏྟོ མཱཏུ སནྟིཀཾ གནྟྭཱ ‘‘ཨམྨ, ཀོ མཡ྄ཧཾ པིཏཱ’’ཏི པུཙྪི. ‘‘ཏཱཏ, ཏྭཾ བཱརཱཎསིརཉྙོ པུཏྟོ’’ཏི. ‘‘ཨམྨ, ཨཏྠི པན ཀོཙི སཀྑཱི’’ཏི? ཏཱཏ རཱཛཱ ཨིམཾ མུདྡིཀཾ དཏྭཱ ‘‘སཙེ དྷཱིཏཱ ཧོཏི, ཨིམཾ ཝིསྶཛྫེཏྭཱ པོསེཡྻཱསི, སཙེ པུཏྟོ ཧོཏི, ཨིམཱཡ ཨངྒུལིམུདྡིཀཱཡ སདྡྷིཾ ཨཱནེཡྻཱསཱི’’ཏི ཝཏྭཱ གཏོཏི. ‘‘ཨམྨ, ཨེཝཾ སནྟེ ཀསྨཱ མཾ པིཏུ སནྟིཀཾ ¶ ན ནེསཱི’’ཏི ¶ . སཱ པུཏྟསྶ ཨཛ྄ཛྷཱསཡཾ ཉཏྭཱ རཱཛདྭཱརཾ གནྟྭཱ རཉྙོ ཨཱརོཙཱཔེསི. རཉྙཱ ཙ པཀྐོསཱཔིཏཱ པཝིསིཏྭཱ རཱཛཱནཾ ཝནྡིཏྭཱ ‘‘ཨཡཾ ཏེ, དེཝ, པུཏྟོ’’ཏི ཨཱཧ. རཱཛཱ ཛཱནནྟོཔི པརིསམཛ྄ཛྷེ ལཛྫཱཡ ‘‘ན མཡ྄ཧཾ པུཏྟོ’’ཏི ཨཱཧ. ‘‘ཨཡཾ ཏེ, དེཝ, མུདྡིཀཱ, ཨིམཾ སཉྫཱནཱསཱི’’ཏི. ‘‘ཨཡམྤི མཡ྄ཧཾ མུདྡིཀཱ ན ཧོཏཱི’’ཏི. ‘‘དེཝ, ཨིདཱནི ཋཔེཏྭཱ སཙྩཀིརིཡཾ ཨཉྙོ མམ སཀྑི ནཏྠི, སཙཱཡཾ དཱརཀོ ཏུམྷེ པཊིཙྩ ཛཱཏོ, ཨཱཀཱསེ ཏིཊྛཏུ, ནོ ཙེ, བྷཱུམིཡཾ པཏིཏྭཱ མརཏཱུ’’ཏི བོདྷིསཏྟསྶ པཱདེ གཧེཏྭཱ ཨཱཀཱསེ ཁིཔི. བོདྷིསཏྟོ ཨཱཀཱསེ པལླངྐམཱབྷུཛིཏྭཱ ནིསིནྣོ མདྷུརསྶརེན པིཏུ དྷམྨཾ ཀཐེནྟོ ཨིམཾ གཱཐམཱཧ –

༧.

‘‘པུཏྟོ ¶ ཏྱཱཧཾ མཧཱརཱཛ, ཏྭཾ མཾ པོས ཛནཱདྷིཔ;

ཨཉྙེཔི དེཝོ པོསེཏི, ཀིཉྩ དེཝོ སཀཾ པཛ’’ནྟི.

ཏཏྠ པུཏྟོ ཏྱཱཧནྟི པུཏྟོ ཏེ ཨཧཾ. པུཏྟོ ཙ ནཱམེས ཨཏྲཛོ, ཁེཏྟཛོ, ཨནྟེཝཱསིཀོ, དིནྣཀོཏི ཙཏུབྦིདྷོ. ཏཏྠ ཨཏྟཱནཾ པཊིཙྩ ཛཱཏོ ཨཏྲཛོ ནཱམ. སཡནཔིཊྛེ པལླངྐེ ཨུརེཏིཨེཝམཱདཱིསུ ནིབྦཏྟོ ཁེཏྟཛོ ནཱམ. སནྟིཀེ སིཔྤུགྒཎྷནཀོ ཨནྟེཝཱསིཀོ ནཱམ. པོསཱཝནཏྠཱཡ དིནྣོ དིནྣཀོ ནཱམ. ཨིདྷ པན ཨཏྲཛཾ སནྡྷཱཡ ‘‘པུཏྟོ’’ཏི ཝུཏྟཾ. ཙཏཱུཧི སངྒཧཝཏྠཱུཧི ཛནཾ རཉྫེཏཱིཏི རཱཛཱ, མཧནྟོ རཱཛཱ མཧཱརཱཛཱ. ཏམཱལཔནྟོ ཨཱཧ ‘‘མཧཱརཱཛཱ’’ཏི. ཏྭཾ མཾ པོས ཛནཱདྷིཔཱཏི ཛནཱདྷིཔ མཧཱཛནཛེཊྛཀ ཏྭཾ མཾ པོས བྷརསྶུ ཝཌྜྷེཧི. ཨཉྙེཔི དེཝོ པོསེཏཱིཏི ཨཉྙེཔི ཧཏྠིབནྡྷཱདཡོ མནུསྶེ, ཧཏྠིཨསྶཱདཡོ ཏིརཙྪཱནགཏེ ཙ བཧུཛནེ དེཝོ པོསེཏི. ཀིཉྩ དེཝོ སཀཾ པཛནྟི ཨེཏྠ པན ཀིཉྩཱཏི གརཧཏྠེ ཙ ཨནུགྒཧཎཏྠེ ཙ ནིཔཱཏོ. ‘‘སཀཾ པཛཾ ཨཏྟནོ པུཏྟཾ མཾ དེཝོ ན པོསེཏཱི’’ཏི ཝདནྟོ གརཧཏི ནཱམ, ‘‘ཨཉྙེ བཧུཛནེ པོསེཏཱི’’ཏི ཝདནྟོ ཨནུགྒཎྷཏི ནཱམ. ཨིཏི བོདྷིསཏྟོ གརཧནྟོཔི ཨནུགྒཎྷནྟོཔི ‘‘ཀིཉྩ དེཝོ སཀཾ པཛ’’ནྟི ཨཱཧ.

རཱཛཱ བོདྷིསཏྟསྶ ཨཱཀཱསེ ནིསཱིདིཏྭཱ ཨེཝཾ དྷམྨཾ དེསེནྟསྶ སུཏྭཱ ‘‘ཨེཧི, ཏཱཏཱ’’ཏི ཧཏྠཾ པསཱརེསི, ‘‘ཨཧམེཝ པོསེསྶཱམི, ཨཧམེཝ པོསེསྶཱམཱི’’ཏི ཧཏྠསཧསྶཾ པསཱརིཡིཏྠ. བོདྷིསཏྟོ ¶ ཨཉྙསྶ ཧཏྠེ ཨནོཏརིཏྭཱ རཉྙོཝ ཧཏྠེ ཨོཏརིཏྭཱ ཨངྐེ ནིསཱིདི. རཱཛཱ ཏསྶ ཨོཔརཛྫཾ དཏྭཱ མཱཏརཾ ཨགྒམཧེསིཾ ཨཀཱསི. སོ པིཏུ ཨཙྩཡེན ཀཊྛཝཱཧནརཱཛཱ ནཱམ ཧུཏྭཱ དྷམྨེན རཛྫཾ ཀཱརེཏྭཱ ཡཐཱཀམྨཾ གཏོ.

སཏྠཱ ¶ ཀོསལརཉྙོ ཨིམཾ དྷམྨདེསནཾ ཨཱཧརིཏྭཱ དྭེ ཝཏྠཱུནི དསྶེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ མཱཏཱ མཧཱམཱཡཱ ཨཧོསི, པིཏཱ སུདྡྷོདནམཧཱརཱཛཱ, ཀཊྛཝཱཧནརཱཛཱ པན ཨཧམེཝ ཨཧོསི’’ནྟི.

ཀཊྛཧཱརིཛཱཏཀཝཎྞནཱ སཏྟམཱ.

༨. གཱམཎིཛཱཏཀཝཎྞནཱ

ཨཔི ¶ ཨཏརམཱནཱནནྟི ཨིདཾ སཏྠཱ ཛེཏཝནེ ཝིཧརནྟོ ཨོསྶཊྛཝཱིརིཡཾ བྷིཀྑུཾ ཨཱརབྦྷ ཀཐེསི. ཨིམསྨིཾ པན ཛཱཏཀེ པཙྩུཔྤནྣཝཏྠུ ཙ ཨཏཱིཏཝཏྠུ ཙ ཨེཀཱདསཀནིཔཱཏེ སཾཝརཛཱཏཀེ ཨཱཝིབྷཝིསྶཏི. ཝཏྠུ ཧི ཏསྨིཉྩ ཨིམསྨིཉྩ ཨེཀསདིསམེཝ, གཱཐཱ པན ནཱནཱ. གཱམཎིཀུམཱརོ བོདྷིསཏྟསྶ ཨོཝཱདེ ཋཏྭཱ བྷཱཏིཀསཏསྶ ཀནིཊྛོཔི ཧུཏྭཱ བྷཱཏིཀསཏཔརིཝཱརིཏོ སེཏཙྪཏྟསྶ ཧེཊྛཱ ཝརཔལླངྐེ ནིསིནྣོ ཨཏྟནོ ཡསསམྤཏྟིཾ ཨོལོཀེཏྭཱ ‘‘ཨཡཾ མཡ྄ཧཾ ཡསསམྤཏྟི ཨམྷཱཀཾ ཨཱཙརིཡསྶ སནྟཀཱ’’ཏི ཏུཊྛོ ཨིམཾ ཨུདཱནཾ ཨུདཱནེསི –

༨.

‘‘ཨཔི ཨཏརམཱནཱནཾ, ཕལཱསཱཝ སམིཛ྄ཛྷཏི;

ཝིཔཀྐབྲཧྨཙརིཡོསྨི, ཨེཝཾ ཛཱནཱཧི གཱམཎཱི’’ཏི.

ཏཏྠ ཨཔཱིཏི ནིཔཱཏམཏྟཾ. ཨཏརམཱནཱནནྟི པཎྜིཏཱནཾ ཨོཝཱདེ ཋཏྭཱ ཨཏརིཏྭཱ ཨཝེགཱཡིཏྭཱ ཨུཔཱཡེན ཀམྨཾ ཀརོནྟཱནཾ. ཕལཱསཱཝ སམིཛ྄ཛྷཏཱིཏི ཡཐཱཔཏྠིཀེ ཕལེ ཨཱསཱ ཏསྶ ཕལསྶ ནིཔྥཏྟིཡཱ སམིཛ྄ཛྷཏིཡེཝ. ཨཐ ཝཱ ཕལཱསཱཏི ཨཱསཱཕལཾ, ཡཐཱཔཏྠིཏཾ ཕལཾ སམིཛ྄ཛྷཏིཡེཝཱཏི ཨཏྠོ. ཝིཔཀྐབྲཧྨཙརིཡོསྨཱིཏི ཨེཏྠ ཙཏྟཱརི སངྒཧཝཏྠཱུནི སེཊྛཙརིཡཏྟཱ བྲཧྨཙརིཡཾ ནཱམ, ཏཉྩ ཏམྨཱུལིཀཱཡ ཡསསམྤཏྟིཡཱ པཊིལདྡྷཏྟཱ ཝིཔཀྐཾ ནཱམ. ཡོ ཝཱསྶ ཡསོ ནིཔྥནྣོ, སོཔི སེཊྛཊྛེན བྲཧྨཙརིཡཾ ནཱམ. ཏེནཱཧ ‘‘ཝིཔཀྐབྲཧྨཙརིཡོསྨཱི’’ཏི. ཨེཝཾ ཛཱནཱཧི གཱམཎཱིཏི ¶ ཀཏྠཙི གཱམིཀཔུརིསོཔི གཱམཛེཊྛཀོཔི གཱམཎཱི. ཨིདྷ པན སབྦཛནཛེཊྛཀཾ ཨཏྟཱནཾ སནྡྷཱཡཱཧ. ཨམྦྷོ གཱམཎི, ཏྭཾ ཨེཏཾ ཀཱརཎཾ ཨེཝཾ ཛཱནཱཧི, ཨཱཙརིཡཾ ནིསྶཱཡ བྷཱཏིཀསཏཾ ཨཏིཀྐམིཏྭཱ ཨིདཾ མཧཱརཛྫཾ པཏྟོསྨཱིཏི ཨུདཱནཾ ཨུདཱནེསི.

ཏསྨིཾ པན རཛྫཾ པཏྟེ སཏྟཊྛདིཝསཙྩཡེན སབྦེཔི བྷཱཏརོ ཨཏྟནོ ཨཏྟནོ ཝསནཊྛཱནཾ གཏཱ ¶ . གཱམཎིརཱཛཱ དྷམྨེན རཛྫཾ ཀཱརེཏྭཱ ཡཐཱཀམྨཾ གཏོ, བོདྷིསཏྟོཔི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ དསྶེཏྭཱ སཙྩཱནི པཀཱསེསི, སཙྩཔརིཡོསཱནེ ཨོསྶཊྛཝཱིརིཡོ བྷིཀྑུ ཨརཧཏྟེ པཏིཊྛིཏོ. སཏྠཱ དྭེ ¶ ཝཏྠཱུནི ཀཐེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ གཱམཎིཀུམཱརོ ཨོསྶཊྛཝཱིརིཡོ བྷིཀྑུ ཨཧོསི, ཨཱཙརིཡོ པན ཨཧམེཝ ཨཧོསི’’ནྟི.

གཱམཎིཛཱཏཀཝཎྞནཱ ཨཊྛམཱ.

༩. མགྷདེཝཛཱཏཀཝཎྞནཱ

ཨུཏྟམངྒརུཧཱ མཡ྄ཧནྟི ཨིདཾ སཏྠཱ ཛེཏཝནེ ཝིཧརནྟོ མཧཱབྷིནིཀྑམནཾ ཨཱརབྦྷ ཀཐེསི. ཏཾ ཧེཊྛཱ ནིདཱནཀཐཱཡཾ ཀཐིཏམེཝ. ཏསྨིཾ པན ཀཱལེ བྷིཀྑཱུ དསབལསྶ ནེཀྑམྨཾ ཝཎྞཡནྟཱ ནིསཱིདིཾསུ. ཨཐ སཏྠཱ དྷམྨསབྷཾ ཨཱགནྟྭཱ བུདྡྷཱསནེ ནིསིནྣོ བྷིཀྑཱུ ཨཱམནྟེསི ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི. ‘‘བྷནྟེ, ན ཨཉྙཱཡ ཀཐཱཡ, ཏུམྷཱཀཾཡེཝ པན ནེཀྑམྨཾ ཝཎྞཡམཱནཱ ནིསིནྣཱམྷཱ’’ཏི ཝུཏྟེ ‘‘ན, བྷིཀྑཝེ, ཏཐཱགཏོ ཨེཏརཧིཡེཝ ནེཀྑམྨཾ ནིཀྑནྟོ, པུབྦེཔི ནིཀྑནྟོཡེཝཱ’’ཏི ཨཱཧ. བྷིཀྑཱུ ཏསྶཏྠསྶཱཝིབྷཱཝཏྠཾ བྷགཝནྟཾ ཡཱཙིཾསུ, བྷགཝཱ བྷཝནྟརེན པཊིཙྪནྣཾ ཀཱརཎཾ པཱཀཊཾ ཨཀཱསི.

ཨཏཱིཏེ ཝིདེཧརཊྛེ མིཐིལཱཡཾ མགྷདེཝོ ནཱམ རཱཛཱ ཨཧོསི དྷམྨིཀོ དྷམྨརཱཛཱ. སོ ཙཏུརཱསཱིཏི ཝསྶསཧསྶཱནི ཀུམཱརཀཱིལ༹ཾ ཀཱིལི༹, ཏཐཱ ཨོཔརཛྫཾ, ཏཐཱ མཧཱརཛྫཾ ཀཏྭཱ དཱིགྷམདྡྷཱནཾ ཁེཔེཏྭཱ ཨེཀདིཝསཾ ཀཔྤཀཾ ཨཱམནྟེསི ‘‘ཡདཱ མེ, སམྨ ཀཔྤཀ, སིརསྨིཾ པལིཏཱནི པསྶེཡྻཱསི, ཨཐ མེ ཨཱརོཙེཡྻཱསཱི’’ཏི. ཀཔྤཀོཔི དཱིགྷམདྡྷཱནཾ ཁེཔེཏྭཱ ཨེཀདིཝསཾ ¶ རཉྙོ ཨཉྫནཝཎྞཱནཾ ཀེསཱནཾ ཨནྟརེ ཨེཀམེཝ པལིཏཾ དིསྭཱ ‘‘དེཝ, ཨེཀཾ ཏེ པལིཏཾ དིསྶཏཱི’’ཏི ཨཱརོཙེསི. ‘‘ཏེན ཧི མེ, སམྨ, ཏཾ པལིཏཾ ཨུདྡྷརིཏྭཱ པཱཎིམྷི ཋཔེཧཱི’’ཏི ཙ ཝུཏྟེ སུཝཎྞསཎྜཱསེན ཨུདྡྷརིཏྭཱ རཉྙོ པཱཎིམྷི པཏིཊྛཱཔེསི. ཏདཱ རཉྙོ ཙཏུརཱསཱིཏི ཝསྶསཧསྶཱནི ཨཱཡུ ཨཝསིཊྛཾ ཧོཏི. ཨེཝཾ སནྟེཔི པལིཏཾ དིསྭཱཝ མཙྩུརཱཛཱནཾ ཨཱགནྟྭཱ སམཱིཔེ ཋིཏཾ ཝིཡ ཨཏྟཱནཾ ཨཱདིཏྟཔཎྞསཱལཾ པཝིཊྛཾ ཝིཡ ཙ མཉྙམཱནོ སཾཝེགཾ ཨཱཔཛྫིཏྭཱ ¶ ‘‘བཱལ མགྷདེཝ, ཡཱཝ པལིཏསྶུཔྤཱདཱཝ ཨིམེ ཀིལེསེ ཛཧིཏུཾ ནཱསཀྑཱི’’ཏི ཙིནྟེསི.

ཏསྶེཝཾ ¶ པལིཏཔཱཏུབྷཱཝཾ ཨཱཝཛྫེནྟསྶ ཨནྟོཌཱཧོ ཨུཔྤཛྫི, སརཱིརཱ སེདཱ མུཙྩིཾསུ, སཱཊཀཱ པཱིལེ༹ཏྭཱ ཨཔནེཏབྦཱཀཱརཔྤཏྟཱ ཨཧེསུཾ. སོ ‘‘ཨཛྫེཝ མཡཱ ནིཀྑམིཏྭཱ པབྦཛིཏུཾ ཝཊྚཏཱི’’ཏི ཀཔྤཀསྶ སཏསཧསྶུཊྛཱནཀཾ གཱམཝརཾ དཏྭཱ ཛེཊྛཔུཏྟཾ པཀྐོསཱཔེཏྭཱ ‘‘ཏཱཏ, མམ སཱིསེ པལིཏཾ པཱཏུབྷཱུཏཾ, མཧལླཀོམྷི ཛཱཏོ, བྷུཏྟཱ ཁོ པན མེ མཱནུསཀཱ ཀཱམཱ, ཨིདཱནི དིབྦེ ཀཱམེ པརིཡེསིསྶཱམི, ནེཀྑམྨཀཱལོ མཡ྄ཧཾ, ཏྭཾ ཨིམཾ རཛྫཾ པཊིཔཛྫ, ཨཧཾ པན པབྦཛིཏྭཱ མགྷདེཝཨམྦཝནུཡྻཱནེ ཝསནྟོ སམཎདྷམྨཾ ཀརིསྶཱམཱི’’ཏི ཨཱཧ. ཏཾ ཨེཝཾ པབྦཛིཏུཀཱམཾ ཨམཙྩཱ ཨུཔསངྐམིཏྭཱ ‘‘དེཝ, ཀིཾ ཏུམྷཱཀཾ པབྦཛྫཱཀཱརཎ’’ནྟི པུཙྪིཾསུ. རཱཛཱ པལིཏཾ ཧཏྠེན གཧེཏྭཱ ཨམཙྩཱནཾ ཨིམཾ གཱཐམཱཧ –

༩.

‘‘ཨུཏྟམངྒརུཧཱ མཡ྄ཧཾ, ཨིམེ ཛཱཏཱ ཝཡོཧརཱ;

པཱཏུབྷཱུཏཱ དེཝདཱུཏཱ, པབྦཛྫཱསམཡོ མམཱ’’ཏི.

ཏཏྠ ཨུཏྟམངྒརུཧཱཏི ཀེསཱ. ཀེསཱ ཧི སབྦེསཾ ཧཏྠཔཱདཱདཱིནཾ ཨངྒཱནཾ ཨུཏྟམེ སིརསྨིཾ རུཧཏྟཱ ‘‘ཨུཏྟམངྒརུཧཱ’’ཏི ཝུཙྩནྟི. ཨིམེ ཛཱཏཱ ཝཡོཧརཱཏི པསྶཐ, ཏཱཏཱ, པལིཏཔཱཏུབྷཱཝེན ཏིཎྞཾ ཝཡཱནཾ ཧརཎཏོ ¶ ཨིམེ ཛཱཏཱ ཝཡོཧརཱ. པཱཏུབྷཱུཏཱཏི ནིབྦཏྟཱ. དེཝདཱུཏཱཏི དེཝོ ཝུཙྩཏི མཙྩུ, ཏསྶ དཱུཏཱཏི དེཝདཱུཏཱ. སིརསྨིཉྷི པལིཏེསུ པཱཏུབྷཱུཏེསུ མཙྩུརཱཛསྶ སནྟིཀེ ཋིཏོ ཝིཡ ཧོཏི, ཏསྨཱ པལིཏཱནི ‘‘མཙྩུདེཝསྶ དཱུཏཱ’’ཏི ཝུཙྩནྟི. དེཝཱ ཝིཡ དཱུཏཱཏིཔི དེཝདཱུཏཱ. ཡཐཱ ཧི ཨལངྐཏཔཊིཡཏྟཱཡ དེཝཏཱཡ ཨཱཀཱསེ ཋཏྭཱ ‘‘ཨསུཀདིཝསེ ཏྭཾ མརིསྶསཱི’’ཏི ཝུཏྟེ ཏཾ ཏཐེཝ ཧོཏི, ཨེཝཾ སིརསྨིཾ པལིཏེསུ པཱཏུབྷཱུཏེསུ དེཝཏཱཡ བྱཱཀརཎསདིསམེཝ ཧོཏི, ཏསྨཱ པལིཏཱནི ‘‘དེཝསདིསཱ དཱུཏཱ’’ཏི ཝུཙྩནྟི. ཝིསུདྡྷིདེཝཱནཾ དཱུཏཱཏིཔི དེཝདཱུཏཱ. སབྦབོདྷིསཏྟཱ ཧི ཛིཎྞབྱཱདྷིམཏཔབྦཛིཏེ དིསྭཱཝ སཾཝེགམཱཔཛྫིཏྭཱ ནིཀྑམྨ པབྦཛནྟི. ཡཐཱཧ –

‘‘ཛིཎྞཉྩ དིསྭཱ དུཁིཏཉྩ བྱཱདྷིཏཾ, མཏཉྩ དིསྭཱ གཏམཱཡུསངྑཡཾ;

ཀཱསཱཡཝཏྠཾ པབྦཛིཏཉྩ དིསྭཱ, ཏསྨཱ ཨཧཾ པབྦཛིཏོམྷི རཱཛཱ’’ཏི. (ཐེརགཱ. ༧༣ ཐོཀཾ ཝིསདིསཾ);

ཨིམིནཱ ¶ ¶ པརིཡཱཡེན པལིཏཱནི ཝིསུདྡྷིདེཝཱནཾ དཱུཏཏྟཱ ‘‘དེཝདཱུཏཱ’’ཏི ཝུཙྩནྟི. པབྦཛྫཱསམཡོ མམཱཏི གིཧིབྷཱཝཏོ ནིཀྑནྟཊྛེན ‘‘པབྦཛྫཱ’’ཏི ལདྡྷནཱམསྶ སམཎལིངྒགཧཎསྶ ཀཱལོ མཡ྄ཧནྟི དསྶེཏི.

སོ ཨེཝཾ ཝཏྭཱ ཏཾ དིཝསམེཝ རཛྫཾ པཧཱཡ ཨིསིཔབྦཛྫཾ པབྦཛིཏྭཱ ཏསྨིཾཡེཝ མགྷདེཝཨམྦཝནེ ཝིཧརནྟོ ཙཏུརཱསཱིཏི ཝསྶསཧསྶཱནི ཙཏྟཱརོ བྲཧྨཝིཧཱརེ བྷཱཝེཏྭཱ ཨཔརིཧཱིནཛ྄ཛྷཱནེ ཋིཏོ ཀཱལཾ ཀཏྭཱ བྲཧྨལོཀེ ནིབྦཏྟིཏྭཱ པུན ཏཏོ ཙུཏོ མིཐིལཱཡཾཡེཝ ནིམི ནཱམ རཱཛཱ ཧུཏྭཱ ཨོསཀྐམཱནཾ ཨཏྟནོ ཝཾསཾ གྷཊེཏྭཱ ཏཏྠེཝ ཨམྦཝནེ པབྦཛིཏྭཱ བྲཧྨཝིཧཱརེ བྷཱཝེཏྭཱ པུན བྲཧྨལོཀཱུཔགོཝ ཨཧོསི.

སཏྠཱཔི ‘‘ན, བྷིཀྑཝེ, ཏཐཱགཏོ ཨིདཱནེཝ མཧཱབྷིནིཀྑམནཾ ནིཀྑནྟོ, པུབྦེཔི ནིཀྑནྟོཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ དསྶེཏྭཱ ཙཏྟཱརི སཙྩཱནི པཀཱསེསི, སཙྩཔརིཡོསཱནེ ཀེཙི སོཏཱཔནྣཱ ཨཧེསུཾ, ཀེཙི སཀདཱགཱམིནོ, ཀེཙི ཨནཱགཱམིནོ. ཨིཏི བྷགཝཱ ཨིམཱནི དྭེ ཝཏྠཱུནི ཀཐེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི ‘‘ཏདཱ ཀཔྤཀོ ཨཱནནྡོ ཨཧོསི, པུཏྟོ རཱཧུལོ, མགྷདེཝརཱཛཱ པན ཨཧམེཝ ཨཧོསི’’ནྟི.

མགྷདེཝཛཱཏཀཝཎྞནཱ ནཝམཱ.

༡༠. སུཁཝིཧཱརིཛཱཏཀཝཎྞནཱ

ཡཉྩ ¶ ཨཉྙེ ན རཀྑནྟཱིཏི ཨིདཾ སཏྠཱ ཨནུཔིཡནགརཾ ནིསྶཱཡ ཨནུཔིཡཨམྦཝནེ ཝིཧརནྟོ སུཁཝིཧཱརིཾ བྷདྡིཡཏྠེརཾ ཨཱརབྦྷ ཀཐེསི. སུཁཝིཧཱརཱི བྷདྡིཡཏྠེརོ ཚཁཏྟིཡསམཱགམེ ཨུཔཱལིསཏྟམོ པབྦཛིཏོ. ཏེསུ བྷདྡིཡཏྠེརོ ཙ, ཀིམིལཏྠེརོ ཙ, བྷགུཏྠེརོ ཙ, ཨུཔཱལིཏྠེརོ ཙ ཨརཧཏྟཾ པཏྟཱ, ཨཱནནྡཏྠེརོ སོཏཱཔནྣོ ཛཱཏོ, ཨནུརུདྡྷཏྠེརོ དིབྦཙཀྑུཀོ, དེཝདཏྟོ ཛྷཱནལཱབྷཱི ཛཱཏོ. ཚནྣཾ པན ཁཏྟིཡཱནཾ ཝཏྠུ ཡཱཝ ཨནུཔིཡནགརཱ ཁཎྜཧཱལཛཱཏཀེ ཨཱཝིབྷཝིསྶཏི. ཨཱཡསྨཱ པན བྷདྡིཡོ རཱཛཀཱལེ ཨཏྟནོ རཀྑསཾཝིདྷཱནཉྩེཝ ཏཱཝ བཧཱུཧི ¶ རཀྑཱཧི རཀྑིཡམཱནསྶ ཨུཔརིཔཱསཱདཝརཏལེ མཧཱསཡནེ སམྤརིཝཏྟམཱནསྶཱཔི ཨཏྟནོ བྷཡུཔྤཏྟིཉྩ ཨིདཱནི ཨརཧཏྟཾ པཏྭཱ ཨརཉྙཱདཱིསུ ཡཏྠ ཀཏྠཙི ཝིཧརནྟོཔི ཨཏྟནོ ཝིགཏབྷཡཏཉྩ སམནུསྶརནྟོ ‘‘ཨཧོ སུཁཾ, ཨཧོ སུཁ’’ནྟི ཨུདཱནཾ ཨུདཱནེསི. ཏཾ སུཏྭཱ བྷིཀྑཱུ ‘‘ཨཱཡསྨཱ བྷདྡིཡོ ཨཉྙཾ བྱཱཀརོཏཱི’’ཏི བྷགཝཏོ ཨཱརོཙེསུཾ. བྷགཝཱ ‘‘ན, བྷིཀྑཝེ ¶ , བྷདྡིཡོ ཨིདཱནེཝ སུཁཝིཧཱརཱི, པུབྦེཔི སུཁཝིཧཱརཱིཡེཝཱ’’ཏི ཨཱཧ. བྷིཀྑཱུ ཏསྶཏྠསྶཱཝིབྷཱཝཏྠཱཡ བྷགཝནྟཾ ཡཱཙིཾསུ. བྷགཝཱ བྷཝནྟརེན པཊིཙྪནྣཾ ཀཱརཎཾ པཱཀཊཾ ཨཀཱསི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརཡམཱནེ བོདྷིསཏྟོ ཨུདིཙྩབྲཱཧྨཎམཧཱསཱལོ ཧུཏྭཱ ཀཱམེསུ ཨཱདཱིནཝཾ, ནེཀྑམྨེ ཙཱནིསཾསཾ དིསྭཱ ཀཱམེ པཧཱཡ ཧིམཝནྟཾ པཝིསིཏྭཱ ཨིསིཔབྦཛྫཾ པབྦཛིཏྭཱ ཨཊྛ སམཱཔཏྟིཡོ ནིབྦཏྟེསི, པརིཝཱརོཔིསྶ མཧཱ ཨཧོསི པཉྩ ཏཱཔསསཏཱནི. སོ ཝསྶཀཱལེ ཧིམཝནྟཏོ ནིཀྑམིཏྭཱ ཏཱཔསགཎཔརིཝུཏོ གཱམནིགམཱདཱིསུ ཙཱརིཀཾ ཙརནྟོ བཱརཱཎསིཾ པཏྭཱ རཱཛཱནཾ ནིསྶཱཡ རཱཛུཡྻཱནེ ཝཱསཾ ཀཔྤེསི. ཏཏྠ ཝསྶིཀེ ཙཏྟཱརོ མཱསེ ཝསིཏྭཱ རཱཛཱནཾ ཨཱཔུཙྪི. ཨཐ ནཾ རཱཛཱ ‘‘ཏུམྷེ, བྷནྟེ, མཧལླཀཱ, ཀིཾ ཝོ ཧིམཝནྟེན, ཨནྟེཝཱསིཀེ ཧིམཝནྟཾ པེསེཏྭཱ ¶ ཨིདྷེཝ ཝསཐཱ’’ཏི ཡཱཙི. བོདྷིསཏྟོ ཛེཊྛནྟེཝཱསིཀཾ པཉྩ ཏཱཔསསཏཱནི པཊིཙྪཱཔེཏྭཱ ‘‘གཙྪ, ཏྭཾ ཨིམེཧི སདྡྷིཾ ཧིམཝནྟེ ཝས, ཨཧཾ པན ཨིདྷེཝ ཝསིསྶཱམཱི’’ཏི ཏེ ཨུཡྻོཛེཏྭཱ སཡཾ ཏཏྠེཝ ཝཱསཾ ཀཔྤེསི.

སོ པནསྶ ཛེཊྛནྟེཝཱསིཀོ རཱཛཔབྦཛིཏོ མཧནྟཾ རཛྫཾ པཧཱཡ པབྦཛིཏྭཱ ཀསིཎཔརིཀམྨཾ ཀཏྭཱ ཨཊྛསམཱཔཏྟིལཱབྷཱི ཨཧོསི. སོ ཏཱཔསེཧི སདྡྷིཾ ཧིམཝནྟེ ཝསམཱནོ ཨེཀདིཝསཾ ཨཱཙརིཡཾ དཊྛུཀཱམོ ཧུཏྭཱ ཏེ ཏཱཔསེ ཨཱམནྟེཏྭཱ ‘‘ཏུམྷེ ཨནུཀྐཎྛམཱནཱ ཨིདྷེཝ ཝསཐ, ཨཧཾ ཨཱཙརིཡཾ ཝནྡིཏྭཱ ཨཱགམིསྶཱམཱི’’ཏི ཨཱཙརིཡསྶ སནྟིཀཾ གནྟྭཱ ཝནྡིཏྭཱ པཊིསནྠཱརཾ ཀཏྭཱ ཨེཀཾ ཀཊྛཏྠརིཀཾ ཨཏྠརིཏྭཱ ཨཱཙརིཡསྶ སནྟིཀེཡེཝ ནིཔཛྫི. ཏསྨིཉྩ སམཡེ རཱཛཱ ‘‘ཏཱཔསཾ པསྶིསྶཱམཱི’’ཏི ཨུཡྻཱནཾ གནྟྭཱ ཝནྡིཏྭཱ ཨེཀམནྟཾ ནིསཱིདི. ཨནྟེཝཱསིཀཏཱཔསོ རཱཛཱནཾ དིསྭཱ ནེཝ ཝུཊྛཱསི, ནིཔནྣོཡེཝ པན ‘‘ཨཧོ སུཁཾ, ཨཧོ སུཁ’’ནྟི ཨུདཱནཾ ཨུདཱནེསི. རཱཛཱ ‘‘ཨཡཾ ཏཱཔསོ མཾ དིསྭཱཔི ན ཨུཊྛིཏོ’’ཏི ¶ ཨནཏྟམནོ བོདྷིསཏྟཾ ཨཱཧ – ‘‘བྷནྟེ, ཨཡཾ ཏཱཔསོ ཡདིཙྪཀཾ བྷུཏྟོ བྷཝིསྶཏི, ཨུདཱནཾ ཨུདཱནེནྟོ སུཁསེཡྻམེཝ ཀཔྤེཏཱི’’ཏི. མཧཱརཱཛ, ཨཡཾ ཏཱཔསོ པུབྦེ ཏུམྷཱདིསོ ཨེཀོ རཱཛཱ ཨཧོསི, སྭཱཡཾ ‘‘ཨཧཾ པུབྦེ གིཧིཀཱལེ རཛྫསིརིཾ ཨནུབྷཝནྟོ ཨཱཝུདྷཧཏྠེཧི བཧཱུཧི རཀྑིཡམཱནོཔི ཨེཝརཱུཔཾ སུཁཾ ནཱམ ནཱལཏྠ’’ནྟི ཨཏྟནོ པབྦཛྫཱསུཁཾ ཛྷཱནསུཁཉྩ ཨཱརབྦྷ ཨིམཾ ཨུདཱནཾ ཨུདཱནེཏཱིཏི. ཨེཝཉྩ པན ཝཏྭཱ བོདྷིསཏྟོ རཉྙོ དྷམྨཀཐཾ ཀཐེཏུཾ ཨིམཾ གཱཐམཱཧ –

༡༠.

‘‘ཡཉྩ ཨཉྙེ ན རཀྑནྟི, ཡོ ཙ ཨཉྙེ ན རཀྑཏི;

ས ཝེ རཱཛ སུཁཾ སེཏི, ཀཱམེསུ ཨནཔེཀྑཝཱ’’ཏི.

ཏཏྠ ¶ ཡཉྩ ཨཉྙེ ན རཀྑནྟཱིཏི ཡཾ པུགྒལཾ ཨཉྙེ བཧཱུ པུགྒལཱ ན རཀྑནྟི. ཡོ ཙ ཨཉྙེ ན རཀྑཏཱིཏི ཡོ ཙ ‘‘ཨེཀཀོ ཨཧཾ རཛྫཾ ཀཱརེམཱི’’ཏི ཨཉྙེ བཧཱུ ཛནེ ན རཀྑཏི. ས ཝེ རཱཛ སུཁཾ སེཏཱིཏི མཧཱརཱཛ སོ ¶ པུགྒལོ ཨེཀོ ཨདུཏིཡོ པཝིཝིཏྟོ ཀཱཡིཀཙེཏསིཀསུཁསམངྒཱི ཧུཏྭཱ སུཁཾ སེཏི. ཨིདཉྩ དེསནཱསཱིསམེཝ. ན ཀེཝལཾ པན སེཏིཡེཝ, ཨེཝརཱུཔོ པན པུགྒལོ སུཁཾ གཙྪཏི ཏིཊྛཏི ནིསཱིདཏི སཡཏཱིཏི སབྦིརིཡཱཔཐེསུ སུཁཔྤཏྟོཝ ཧོཏི. ཀཱམེསུ ཨནཔེཀྑཝཱཏི ཝཏྠུ ཀཱམཀིལེསཀཱམེསུ ཨཔེཀྑཱརཧིཏོ ཝིགཏཙྪནྡརཱགོ ནིཏྟཎྷོ ཨེཝརཱུཔོ པུགྒལོ སབྦིརིཡཱཔཐེསུ སུཁཾ ཝིཧརཏི མཧཱརཱཛཱཏི.

རཱཛཱ དྷམྨདེསནཾ སུཏྭཱ ཏུཊྛམཱནསོ ཝནྡིཏྭཱ ནིཝེསནམེཝ གཏོ, ཨནྟེཝཱསིཀོཔི ཨཱཙརིཡཾ ཝནྡིཏྭཱ ཧིམཝནྟམེཝ གཏོ. བོདྷིསཏྟོ པན ཏཏྠེཝ ཝིཧརནྟོ ཨཔརིཧཱིནཛ྄ཛྷཱནོ ཀཱལཾ ཀཏྭཱ བྲཧྨལོཀེ ནིབྦཏྟི.

སཏྠཱ ཨིམཾ དྷམྨདེསནཾ ཨཱཧརིཏྭཱ དསྶེཏྭཱ དྭེ ཝཏྠཱུནི ཀཐེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཨནྟེཝཱསིཀོ བྷདྡིཡཏྠེརོ ཨཧོསི, གཎསཏྠཱ པན ཨཧམེཝ ཨཧོསི’’ནྟི.

སུཁཝིཧཱརིཛཱཏཀཝཎྞནཱ དསམཱ.

ཨཔཎྞཀཝགྒོ པཋམོ.

ཏསྶུདྡཱནཾ –

ཨཔཎྞཀཾ ¶ ཝཎྞུཔཐཾ, སེརིཝཾ ཙཱུལ༹སེཊྛི ཙ;

ཏཎྜུལཾ དེཝདྷམྨཉྩ, ཀཊྛཝཱཧནགཱམཎི;

མགྷདེཝཾ ཝིཧཱརཱིཏི, པིཎྜིཏཱ དས ཛཱཏཀཱཏི.

༢. སཱིལཝགྒོ

[༡༡] ༡. ལཀྑཎམིགཛཱཏཀཝཎྞནཱ

ཧོཏི ¶ སཱིལཝཏཾ ཨཏྠོཏི ཨིདཾ སཏྠཱ རཱཛགཧཾ ཨུཔནིསྶཱཡ ཝེལུ༹ཝནེ ཝིཧརནྟོ དེཝདཏྟཾ ཨཱརབྦྷ ཀཐེསི. དེཝདཏྟསྶ ཝཏྠུ ཡཱཝ ཨབྷིམཱརཔྤཡོཛནཱ ཁཎྜཧཱལཛཱཏཀེ ཨཱཝིབྷཝིསྶཏི, ཡཱཝ དྷནཔཱལཀཝིསྶཛྫནཱ པན ཙཱུལ༹ཧཾསཛཱཏཀེ ཨཱཝིབྷཝིསྶཏི, ཡཱཝ པཐཝིཔྤཝེསནཱ དྭཱདསནིཔཱཏེ སམུདྡཝཱཎིཛཛཱཏཀེ ཨཱཝིབྷཝིསྶཏི.

ཨེཀསྨིཉྷི སམཡེ དེཝདཏྟོ པཉྩ ཝཏྠཱུནི ཡཱཙིཏྭཱ ཨལབྷནྟོ སངྒྷཾ བྷིནྡིཏྭཱ པཉྩ བྷིཀྑུསཏཱནི ཨཱདཱཡ གཡཱསཱིསེ ཝིཧརཏི. ཨཐ ཏེསཾ བྷིཀྑཱུནཾ ཉཱཎཾ པརིཔཱཀཾ ཨགམཱསི. ཏཾ ཉཏྭཱ སཏྠཱ དྭེ ཨགྒསཱཝཀེ ཨཱམནྟེསི ‘‘སཱརིཔུཏྟཱ, ཏུམྷཱཀཾ ནིསྶིཏཀཱ པཉྩསཏཱ བྷིཀྑཱུ དེཝདཏྟསྶ ལདྡྷིཾ རོཙེཏྭཱ ཏེན སདྡྷིཾ གཏཱ, ཨིདཱནི པན ཏེསཾ ཉཱཎཾ པརིཔཱཀཾ གཏཾ, ཏུམྷེ བཧཱུཧི བྷིཀྑཱུཧི སདྡྷིཾ ཏཏྠ གནྟྭཱ ཏེསཾ དྷམྨཾ དེསེཏྭཱ ཏེ བྷིཀྑཱུ མགྒཕལེཧི པབོདྷེཏྭཱ གཧེཏྭཱ ཨཱགཙྪཐཱ’’ཏི. ཏེ ཏཐེཝ གནྟྭཱ ཏེསཾ དྷམྨཾ དེསེཏྭཱ མགྒཕལེཧི པབོདྷེཏྭཱ པུནདིཝསེ ཨརུཎུགྒམནཝེལཱཡ ¶ ཏེ བྷིཀྑཱུ ཨཱདཱཡ ཝེལུ༹ཝནམེཝ ཨཱགམཾསུ. ཨཱགནྟྭཱ ཙ པན སཱརིཔུཏྟཏྠེརསྶ བྷགཝནྟཾ ཝནྡིཏྭཱ ཋིཏཀཱལེ བྷིཀྑཱུ ཐེརཾ པསཾསིཏྭཱ བྷགཝནྟཾ ཨཱཧཾསུ – ‘‘བྷནྟེ, ཨམྷཱཀཾ ཛེཊྛབྷཱཏིཀོ དྷམྨསེནཱཔཏི པཉྩཧི བྷིཀྑུསཏེཧི པརིཝུཏོ ཨཱགཙྪནྟོ ཨཏིཝིཡ སོབྷཏི, དེཝདཏྟོ པན པརིཧཱིནཔརིཝཱརོ ཛཱཏོ’’ཏི. ན, བྷིཀྑཝེ, སཱརིཔུཏྟོ ཨིདཱནེཝ ཉཱཏིསངྒྷཔརིཝུཏོ ཨཱགཙྪནྟོ སོབྷཏི, པུབྦེཔི སོབྷིཡེཝ. དེཝདཏྟོཔི ¶ ན ཨིདཱནེཝ གཎཏོ པརིཧཱིནོ, པུབྦེཔི པརིཧཱིནོཡེཝཱཏི. བྷིཀྑཱུ ཏསྶཏྠསྶཱཝིབྷཱཝཏྠཱཡ བྷགཝནྟཾ ཡཱཙིཾསུ, བྷགཝཱ བྷཝནྟརེན པཊིཙྪནྣཾ ཀཱརཎཾ པཱཀཊཾ ཨཀཱསི.

ཨཏཱིཏེ མགདྷརཊྛེ རཱཛགཧནགརེ ཨེཀོ མགདྷརཱཛཱ རཛྫཾ ཀཱརེསི. ཏདཱ བོདྷིསཏྟོ མིགཡོནིཡཾ པཊིསནྡྷིཾ གཧེཏྭཱ ཝུདྡྷིཔྤཏྟོ མིགསཧསྶཔརིཝཱརོ ཨརཉྙེ ཝསཏི. ཏསྶ ལཀྑཎོ ཙ ཀཱལོ༹ ཙཱཏི དྭེ པུཏྟཱ ཨཧེསུཾ. སོ ཨཏྟནོ མཧལླཀཀཱལེ ‘‘ཏཱཏཱ, ཨཧཾ ཨིདཱནི མཧལླཀོ, ཏུམྷེ ཨིམཾ གཎཾ པརིཧརཐཱ’’ཏི པཉྩ པཉྩ མིགསཏཱནི ཨེཀེཀཾ པུཏྟཾ པཊིཙྪཱཔེསི ¶ . ཏཏོ པཊྛཱཡ ཏེ དྭེ ཛནཱ མིགགཎཾ པརིཧརནྟི. མགདྷརཊྛསྨིཉྩ སསྶཔཱཀསམཡེ ཀིཊྛསམྦཱདྷེ ཨརཉྙེ མིགཱནཾ པརིཔནྠོ ཧོཏི. མནུསྶཱ སསྶཁཱདཀཱནཾ མིགཱནཾ མཱརཎཏྠཱཡ ཏཏྠ ཏཏྠ ཨོཔཱཏཾ ཁཎནྟི, སཱུལཱནི རོཔེནྟི, པཱསཱཎཡནྟཱནི སཛྫེནྟི, ཀཱུཊཔཱསཱདཡོ པཱསེ ཨོཌྜེནྟི, བཧཱུ མིགཱ ཝིནཱསཾ ཨཱཔཛྫནྟི. བོདྷིསཏྟོ ཀིཊྛསམྦཱདྷསམཡཾ ཉཏྭཱ དྭེ པུཏྟེ པཀྐོསཱཔེཏྭཱ ཨཱཧ – ‘‘ཏཱཏཱ, ཨཡཾ ཀིཊྛསམྦཱདྷསམཡོ, བཧཱུ མིགཱ ཝིནཱསཾ པཱཔུཎནྟི, མཡཾ མཧལླཀཱ ཡེན ཀེནཙི ཨུཔཱཡེན ཨེཀསྨིཾ ཋཱནེ ཝཱིཏིནཱམེསྶཱམ, ཏུམྷེ ཏུམྷཱཀཾ མིགགཎེ གཧེཏྭཱ ཨརཉྙེ པབྦཏཔཱདཾ པཝིསིཏྭཱ སསྶཱནཾ ཨུདྡྷཊཀཱལེ ཨཱགཙྪེཡྻཱཐཱ’’ཏི. ཏེ ‘‘སཱདྷཱུ’’ཏི པིཏུ ཝཙནཾ སུཏྭཱ སཔརིཝཱརཱ ནིཀྑམིཾསུ. ཏེསཾ པན གམནམགྒཾ མནུསྶཱ ཛཱནནྟི ‘‘ཨིམསྨིཾ ཀཱལེ མིགཱ པབྦཏམཱརོཧནྟི, ཨིམསྨིཾ ཀཱལེ ཨོརོཧནྟཱི’’ཏི. ཏེ ཏཏྠ ཏཏྠ པཊིཙྪནྣཊྛཱནེ ¶ ནིལཱིནཱ བཧཱུ མིགེ ཝིཛ྄ཛྷིཏྭཱ མཱརེནྟི.

ཀཱལ༹མིགོ ཨཏྟནོ དནྡྷཏཱཡ ‘‘ཨིམཱཡ ནཱམ ཝེལཱཡ གནྟབྦཾ, ཨིམཱཡ ཝེལཱཡ ན གནྟབྦ’’ནྟི ཨཛཱནནྟོ མིགགཎཾ ཨཱདཱཡ པུབྦཎྷེཔི སཱཡནྷེཔི པདོསེཔི པཙྩཱུསེཔི གཱམདྭཱརེན གཙྪཏི. མནུསྶཱ ཏཏྠ ཏཏྠ པཀཏིཡཱ ཋིཏཱ ཙ ནིལཱིནཱ ཙ བཧཱུ མིགེ ཝིནཱསཾ པཱཔེནྟི. ཨེཝཾ སོ ཨཏྟནོ དནྡྷཏཱཡ བཧཱུ མིགེ ཝིནཱསཾ པཱཔེཏྭཱ ཨཔྤཀེཧེཝ མིགེཧི ཨརཉྙཾ པཱཝིསི. ལཀྑཎམིགོ པན པཎྜིཏོ བྱཏྟོ ཨུཔཱཡཀུསལོ ‘‘ཨིམཱཡ ཝེལཱཡ གནྟབྦཾ, ཨིམཱཡ ཝེལཱཡ ན གནྟབྦ’’ནྟི ཛཱནཱཏི. སོ གཱམདྭཱརེནཔི ན གཙྪཏི ¶ , དིཝཱཔི ན གཙྪཏི, པདོསེཔི ན གཙྪཏི, པཙྩཱུསེཔི ན གཙྪཏི, མིགགཎཾ ཨཱདཱཡ ཨཌྜྷརཏྟསམཡེཡེཝ གཙྪཏི. ཏསྨཱ ཨེཀམྤི མིགཾ ཨཝིནཱསེཏྭཱ ཨརཉྙཾ པཱཝིསི. ཏེ ཏཏྠ ཙཏྟཱརོ མཱསེ ཝསིཏྭཱ སསྶེསུ ཨུདྡྷཊེསུ པབྦཏཱ ཨོཏརིཾསུ.

ཀཱལོ༹ པཙྩཱགཙྪནྟོཔི པུརིམནཡེནེཝ ཨཝསེསམིགེ ཝིནཱསཾ པཱཔེནྟོ ཨེཀཀོཝ ཨཱགམི. ལཀྑཎོ པན ཨེཀམིགམྤི ཨཝིནཱསེཏྭཱ པཉྩཧི མིགསཏེཧི པརིཝུཏོ མཱཏཱཔིཏཱུནཾ སནྟིཀཾ ཨཱགམི. བོདྷིསཏྟོ དྭེཔི པུཏྟེ ཨཱགཙྪནྟེ དིསྭཱ མིགགཎེན སདྡྷིཾ མནྟེནྟོ ཨིམཾ གཱཐཾ སམུཊྛཱཔེསི –

༡༡.

‘‘ཧོཏི སཱིལཝཏཾ ཨཏྠོ, པཊིསནྠཱརཝུཏྟིནཾ;

ལཀྑཎཾ པསྶ ཨཱཡནྟཾ, ཉཱཏིསངྒྷཔུརཀྑཏཾ;

ཨཐ པསྶསིམཾ ཀཱལ༹ཾ, སུཝིཧཱིནཾཝ ཉཱཏིབྷཱི’’ཏི.

ཏཏྠ ¶ སཱིལཝཏནྟི སུཁསཱིལཏཱཡ སཱིལཝནྟཱནཾ ཨཱཙཱརསམྤནྣཱནཾ. ཨཏྠོཏི ཝུཌྜྷི. པཊིསནྠཱརཝུཏྟིནནྟི དྷམྨཔཊིསནྠཱརོ ཙ ཨཱམིསཔཊིསནྠཱརོ ཙ ཨེཏེསཾ ཝུཏྟཱིཏི པཊིསནྠཱརཝུཏྟིནོ, ཏེསཾ པཊིསནྠཱརཝུཏྟིནཾ. ཨེཏྠ ཙ པཱཔནིཝཱརཎཨོཝཱདཱནུསཱསནིཝསེན དྷམྨཔཊིསནྠཱརོ ཙ, གོཙརལཱབྷཱཔནགིལཱནུཔཊྛཱནདྷམྨིཀརཀྑཱཝསེན ཨཱམིསཔཊིསནྠཱརོ ཙ ཝེདིཏབྦོ. ཨིདཾ ཝུཏྟཾ ཧོཏི – ཨིམེསུ དྭཱིསུ པཊིསནྠཱརེསུ ཋིཏཱནཾ ཨཱཙཱརསམྤནྣཱནཾ པཎྜིཏཱནཾ ཝུཌྜྷི ནཱམ ཧོཏཱིཏི. ཨིདཱནི ཏཾ ཝུཌྜྷིཾ དསྶེཏུཾ པུཏྟམཱཏརཾ ཨཱལཔནྟོ ཝིཡ ‘‘ལཀྑཎཾ པསྶཱ’’ཏིཨཱདིམཱཧ. ཏཏྲཱཡཾ སངྑེཔཏྠོ – ཨཱཙཱརཔཊིསནྠཱརསམྤནྣཾ ཨཏྟནོ པུཏྟཾ ¶ ཨེཀམིགམྤི ཨཝིནཱསེཏྭཱ ཉཱཏིསངྒྷེན པུརཀྑཏཾ པརིཝཱརིཏཾ ཨཱགཙྪནྟཾ པསྶ. ཏཱཡ པན ཨཱཙཱརཔཊིསནྠཱརསམྤདཱཡ ཝིཧཱིནཾ དནྡྷཔཉྙཾ ཨཐ པསྶསིམཾ ཀཱལ༹ཾ ཨེཀམྤི ཉཱཏིཾ ཨནཝསེསེཏྭཱ སུཝིཧཱིནམེཝ ཉཱཏཱིཧི ཨེཀཀཾ ཨཱགཙྪནྟནྟི. ཨེཝཾ པུཏྟཾ ཨབྷིནནྡིཏྭཱ པན བོདྷིསཏྟོ ཡཱཝཏཱཡུཀཾ ཋཏྭཱ ཡཐཱཀམྨཾ གཏོ.

སཏྠཱཔི ‘‘ན, བྷིཀྑཝེ, སཱརིཔུཏྟོ ཨིདཱནེཝ ཉཱཏིསངྒྷཔརིཝཱརིཏོ སོབྷཏི, པུབྦེཔི སོབྷཏིཡེཝ. ན ཙ དེཝདཏྟོ ཨེཏརཧིཡེཝ གཎམྷཱ པརིཧཱིནོ, པུབྦེཔི པརིཧཱིནོཡེཝཱ’’ཏི ཨིམཾ དྷམྨདེསནཾ དསྶེཏྭཱ དྭེ ཝཏྠཱུནི ཀཐེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ¶ ཀཱལོ༹ དེཝདཏྟོ ཨཧོསི, པརིསཱཔིསྶ དེཝདཏྟཔརིསཱཝ, ལཀྑཎོ སཱརིཔུཏྟོ, པརིསཱ པནསྶ བུདྡྷཔརིསཱ, མཱཏཱ རཱཧུལམཱཏཱ, པིཏཱ པན ཨཧམེཝ ཨཧོསི’’ནྟི.

ལཀྑཎམིགཛཱཏཀཝཎྞནཱ པཋམཱ.

[༡༢] ༢. ནིགྲོདྷམིགཛཱཏཀཝཎྞནཱ

ནིགྲོདྷམེཝ སེཝེཡྻཱཏི ཨིདཾ སཏྠཱ ཛེཏཝནེ ཝིཧརནྟོ ཀུམཱརཀསྶཔཏྠེརསྶ མཱཏརཾ ཨཱརབྦྷ ཀཐེསི. སཱ ཀིར རཱཛགཧནགརེ མཧཱཝིབྷཝསྶ སེཊྛིནོ དྷཱིཏཱ ཨཧོསི ཨུསྶནྣཀུསལམཱུལཱ པརིམདྡིཏསངྑཱརཱ པཙྪིམབྷཝིཀཱ, ཨནྟོགྷཊེ པདཱིཔོ ཝིཡ ཏསྶཱ ཧདཡེ ཨརཧཏྟཱུཔནིསྶཡོ ཛལཏི. སཱ ཨཏྟཱནཾ ཛཱནནཀཱལཏོ པཊྛཱཡ གེཧེ ཨནབྷིརཏཱ པབྦཛིཏུཀཱམཱ ཧུཏྭཱ མཱཏཱཔིཏརོ ཨཱཧ – ‘‘ཨམྨཏཱཏཱ, མཡ྄ཧཾ གྷརཱཝཱསེ ཙིཏྟཾ ནཱབྷིརམཏི, ཨཧཾ ནིཡྻཱནིཀེ བུདྡྷསཱསནེ པབྦཛིཏུཀཱམཱ, པབྦཱཛེཐ མ’’ནྟི. ཨམྨ, ཀིཾ ཝདེསི, ཨིདཾ ཀུལཾ བཧུཝིབྷཝཾ, ཏྭཉྩ ཨམྷཱཀཾ ཨེཀདྷཱིཏཱ, ན ལབྦྷཱ ཏཡཱ པབྦཛིཏུནྟི. སཱ པུནཔྤུནཾ ཡཱཙིཏྭཱཔི མཱཏཱཔིཏཱུནཾ སནྟིཀཱ པབྦཛྫཾ ཨལབྷམཱནཱ ཙིནྟེསི ‘‘ཧོཏུ, པཏིཀུལཾ གཏཱ སཱམིཀཾ ཨཱརཱདྷེཏྭཱ ¶ པབྦཛིསྶཱམཱི’’ཏི. སཱ ཝཡཔྤཏྟཱ པཏིཀུལཾ གནྟྭཱ པཏིདེཝཏཱ ཧུཏྭཱ སཱིལཝཏཱི ཀལྱཱཎདྷམྨཱ ཨགཱརཾ ཨཛ྄ཛྷཱཝསི.

ཨཐསྶཱ སཾཝཱསམནྭཱཡ ཀུཙྪིཡཾ གབྦྷོ པཏིཊྛཧི. སཱ གབྦྷསྶ པཏིཊྛིཏབྷཱཝཾ ན ཨཉྙཱསི. ཨཐ ཏསྨིཾ ནགརེ ནཀྑཏྟཾ གྷོསཡིཾསུ, སཀལནགརཝཱསིནོ ¶ ནཀྑཏྟཾ ཀཱིལི༹ཾསུ, ནགརཾ དེཝནགརཾ ཝིཡ ཨལངྐཏཔཊིཡཏྟཾ ཨཧོསི. སཱ པན ཏཱཝ ཨུལཱ༹རཱཡཔི ནཀྑཏྟཀཱིལཱ༹ཡ ཝཏྟམཱནཱཡ ཨཏྟནོ སརཱིརཾ ན ཝིལིམྤཏི ནཱལངྐརོཏི, པཀཏིཝེསེནེཝ ཝིཙརཏི.

ཨཐ ནཾ སཱམིཀོ ཨཱཧ – ‘‘བྷདྡེ, སཀལནགརཾ ནཀྑཏྟནིསྶིཏཾ, ཏྭཾ པན སརཱིརཾ ནཔྤཊིཛགྒསཱི’’ཏི. ཨཡྻཔུཏྟ, དྭཏྟིཾསཱཡ མེ ཀུཎཔེཧི པཱུརིཏཾ སརཱིརཾ, ཀིཾ ཨིམིནཱ ཨལངྐཏེན, ཨཡཉྷི ཀཱཡོ ནེཝ དེཝནིམྨིཏོ, ན བྲཧྨནིམྨིཏོ, ན སུཝཎྞམཡོ, ན མཎིམཡོ, ན ཧརིཙནྡནམཡོ, ན པུཎྜརཱིཀཀུམུདུཔྤལགབྦྷསམྦྷཱུཏོ ¶ , ན ཨམཏོསདྷཔཱུརིཏོ, ཨཐ ཁོ ཀུཎཔེ ཛཱཏོ, མཱཏཱཔེཏྟིཀསམྦྷཝོ, ཨནིཙྩུཙྪཱདནཔརིམདྡནབྷེདནཝིདྡྷཾསནདྷམྨོ, ཀཊསིཝཌྜྷནོ, ཏཎྷཱུཔཱདིནྣོ, སོཀཱནཾ ནིདཱནཾ, པརིདེཝཱནཾ ཝཏྠུ, སབྦརོགཱནཾ ཨཱལཡོ, ཀམྨཀརཎཱནཾ པཊིགྒཧོ, ཨནྟོཔཱུཏི, བཧི ནིཙྩཔགྒྷརཎོ, ཀིམིཀུལཱནཾ ཨཱཝཱསོ, སིཝཐིཀཔཡཱཏོ, མརཎཔརིཡོསཱནོ, སབྦལོཀསྶ ཙཀྑུཔཐེ ཝཏྟམཱནོཔི –

‘‘ཨཊྛིནཧཱརུསཾཡུཏྟོ, ཏཙམཾསཱཝལེཔནོ;

ཚཝིཡཱ ཀཱཡོ པཊིཙྪནྣོ, ཡཐཱབྷཱུཏཾ ན དིསྶཏི.

‘‘ཨནྟཔཱུརོ ཨུདརཔཱུརོ, ཡཀནཔེལ༹སྶ ཝཏྠིནོ;

ཧདཡསྶ པཔྥཱསསྶ, ཝཀྐསྶ པིཧཀསྶ ཙ.

‘‘སིངྒྷཱཎིཀཱཡ ཁེལ༹སྶ, སེདསྶ ཙ མེདསྶ ཙ;

ལོཧིཏསྶ ལསིཀཱཡ, པིཏྟསྶ ཙ ཝསཱཡ ཙ.

‘‘ཨཐསྶ ནཝཧི སོཏེཧི, ཨསུཙཱི སཝཏི སབྦདཱ;

ཨཀྑིམྷཱ ཨཀྑིགཱུཐཀོ, ཀཎྞམྷཱ ཀཎྞགཱུཐཀོ.

‘‘སིངྒྷཱཎིཀཱ ¶ ཙ ནཱསཏོ, མུཁེན ཝམཏེཀདཱ;

པིཏྟཾ སེམྷཉྩ ཝམཏི, ཀཱཡམྷཱ སེདཛལླིཀཱ.

‘‘ཨཐསྶ སུསིརཾ སཱིསཾ, མཏྠལུངྒསྶ པཱུརིཏཾ;

སུབྷཏོ ནཾ མཉྙཏི བཱལོ, ཨཝིཛྫཱཡ པུརཀྑཏོ. (སུ. ནི. ༡༩༦-༢༠༡);

‘‘ཨནནྟཱདཱིནཝོ ཀཱཡོ, ཝིསརུཀྑསམཱུཔམོ;

ཨཱཝཱསོ སབྦརོགཱནཾ, པུཉྫོ དུཀྑསྶ ཀེཝལོ. (ཨཔ. ཐེར ༢.༥༤.༥༥);

‘‘སཙེ ཨིམསྶ ཀཱཡསྶ, ཨནྟོ བཱཧིརཀོ སིཡཱ;

དཎྜཾ ནཱུན གཧེཏྭཱན, ཀཱཀེ སོཎེ ཙ ཝཱརཡེ.

‘‘དུགྒནྡྷོ ཨསུཙི ཀཱཡོ, ཀུཎཔོ ཨུཀྐརཱུཔམོ;

ནིནྡིཏོ ཙཀྑུབྷཱུཏེཧི, ཀཱཡོ བཱལཱབྷིནནྡིཏོ.

‘‘ཨལླཙམྨཔཊིཙྪནྣོ, ནཝདྭཱརོ མཧཱཝཎོ;

སམནྟཏོ པགྒྷརཏི, ཨསུཙཱི པཱུཏིགནྡྷིཡོ’’ཏི. (ཝིསུདྡྷི. ༡.༡༢༢);

ཨཡྻཔུཏྟ ¶ ¶ , ཨིམཾ ཀཱཡཾ ཨལངྐརིཏྭཱ ཀིཾ ཀརིསྶཱམི? ནནུ ཨིམསྶ ཨལངྐཏཀརཎཾ གཱུཐཔུཎྞགྷཊསྶ བཧི ཙིཏྟཀམྨཀརཎཾ ཝིཡ ཧོཏཱིཏི? སེཊྛིཔུཏྟོ ཏསྶཱ ཝཙནཾ སུཏྭཱ ཨཱཧ ‘‘བྷདྡེ, ཏྭཾ ཨིམསྶ སརཱིརསྶ ཨིམེ དོསེ པསྶམཱནཱ ཀསྨཱ ན པབྦཛསཱི’’ཏི? ‘‘ཨཡྻཔུཏྟ, ཨཧཾ པབྦཛྫཾ ལབྷམཱནཱ ཨཛྫེཝ པབྦཛེཡྻ’’ནྟི. སེཊྛིཔུཏྟོ ‘‘སཱདྷུ, ཨཧཾ ཏཾ པབྦཱཛེསྶཱམཱི’’ཏི ཝཏྭཱ མཧཱདཱནཾ པཝཏྟེཏྭཱ མཧཱསཀྐཱརཾ ཀཏྭཱ མཧནྟེན པརིཝཱརེན བྷིཀྑུནུཔསྶཡཾ ནེཏྭཱ ཏཾ པབྦཱཛེནྟོ དེཝདཏྟཔཀྑིཡཱནཾ བྷིཀྑུནཱིནཾ སནྟིཀེ པབྦཱཛེསི. སཱ པབྦཛྫཾ ལབྷིཏྭཱ པརིཔུཎྞསངྐཔྤཱ ཨཏྟམནཱ ཨཧོསི.

ཨཐསྶཱ གབྦྷེ པརིཔཱཀཾ གཙྪནྟེ ཨིནྡྲིཡཱནཾ ཨཉྙཐཏྟཾ ཧཏྠཔཱདཔིཊྛཱིནཾ བཧལཏྟཾ ཨུདརཔཊལསྶ ཙ མཧནྟཏཾ དིསྭཱ བྷིཀྑུནིཡོ ཏཾ པུཙྪིཾསུ ‘‘ཨཡྻེ, ཏྭཾ གབྦྷིནཱི ཝིཡ པཉྙཱཡསི, ཀིཾ ཨེཏ’’ནྟི? ཨཡྻེ, ‘‘ཨིདཾ ནཱམ ཀཱརཎ’’ནྟི ན ཛཱནཱམི, སཱིལཾ པན མེ པརིཔུཎྞནྟི ¶ . ཨཐ ནཾ ཏཱ བྷིཀྑུནིཡོ དེཝདཏྟསྶ སནྟིཀཾ ནེཏྭཱ དེཝདཏྟཾ པུཙྪིཾསུ ‘‘ཨཡྻ, ཨཡཾ ཀུལདྷཱིཏཱ ཀིཙྪེན སཱམིཀཾ ཨཱརཱདྷེཏྭཱ པབྦཛྫཾ ལབྷི, ཨིདཱནི པནསྶཱ གབྦྷོ པཉྙཱཡཏི, མཡཾ ཨིམསྶ གབྦྷསྶ གིཧིཀཱལེ ཝཱ པབྦཛིཏཀཱལེ ཝཱ ལདྡྷབྷཱཝཾ ན ཛཱནཱམ, ཀིཾདཱནི ཀརོམཱ’’ཏི? དེཝདཏྟོ ཨཏྟནོ ཨབུདྡྷབྷཱཝེན ཙ ཁནྟིམེཏྟཱནུདྡཡཱནཉྩ ནཏྠིཏཱཡ ཨེཝཾ ཙིནྟེསི ‘‘དེཝདཏྟཔཀྑིཀཱ བྷིཀྑུནཱི ཀུཙྪིནཱ གབྦྷཾ པརིཧརཏི, དེཝདཏྟོ ཙ ཏཾ ཨཛ྄ཛྷུཔེཀྑཏིཡེཝཱཏི མཡ྄ཧཾ གརཧཱ ཨུཔྤཛྫིསྶཏི, མཡཱ ཨིམཾ ཨུཔྤབྦཱཛེཏུཾ ཝཊྚཏཱི’’ཏི. སོ ཨཝཱིམཾསིཏྭཱཝ སེལགུལ༹ཾ པཝཊྚཡམཱནོ ཝིཡ པཀྑནྡིཏྭཱ ‘‘གཙྪཐ, ཨིམཾ ཨུཔྤབྦཱཛེཐཱ’’ཏི ཨཱཧ. ཏཱ ཏསྶ ཝཙནཾ སུཏྭཱ ཨུཊྛཱཡ ཝནྡིཏྭཱ ཨུཔསྶཡཾ གཏཱ.

ཨཐ སཱ དཧརཱ ཏཱ བྷིཀྑུནིཡོ ཨཱཧ – ‘‘ཨཡྻེ, ན དེཝདཏྟཏྠེརོ བུདྡྷོ, ནཱཔི མཡ྄ཧཾ ཏསྶ སནྟིཀེ པབྦཛྫཱ, ལོཀེ པན ཨགྒཔུགྒལསྶ སམྨཱསམྦུདྡྷསྶ སནྟིཀེ མཡ྄ཧཾ པབྦཛྫཱ, སཱ ཙ པན མེ དུཀྑེན ལདྡྷཱ, མཱ ནཾ ཨནྟརདྷཱཔེཐ, ཨེཐ མཾ གཧེཏྭཱ སཏྠུ སནྟིཀཾ ཛེཏཝནཾ གཙྪཐཱ’’ཏི. ཏཱ ཏཾ ཨཱདཱཡ རཱཛགཧཱ པཉྩཙཏྟཱལཱིསཡོཛནིཀཾ མགྒཾ ཨཏིཀྐམྨ ཨནུཔུབྦེན ཛེཏཝནཾ པཏྭཱ སཏྠཱརཾ ཝནྡིཏྭཱ ཏམཏྠཾ ཨཱརོཙེསུཾ. སཏྠཱ ཙིནྟེསི – ‘‘ཀིཉྩཱཔི གིཧིཀཱལེ ཨེཏིསྶཱ གབྦྷོ པཏིཊྛིཏོ, ཨེཝཾ སནྟེཔི ‘སམཎོ གོཏམོ དེཝདཏྟེན ¶ ཛཧིཏཾ ཨཱདཱཡ ཙརཏཱི’ཏི ཏིཏྠིཡཱནཾ ཨོཀཱསོ བྷཝིསྶཏི. ཏསྨཱ ཨིམཾ ཀཐཾ པཙྪིནྡིཏུཾ སརཱཛིཀཱཡ པརིསཱཡ ¶ མཛ྄ཛྷེ ཨིམཾ ཨདྷིཀརཎཾ ཝིནིཙྪིཏུཾ ཝཊྚཏཱི’’ཏི. པུནདིཝསེ རཱཛཱནཾ པསེནདིཀོསལཾ མཧཱཨནཱཐཔིཎྜིཀཾ ཙཱུལ༹ཨནཱཐཔིཎྜིཀཾ ཝིསཱཁཾ མཧཱཨུཔཱསིཀཾ ཨཉྙཱནི ཙ ཨབྷིཉྙཱཏཱནི མཧཱཀུལཱནི པཀྐོསཱཔེཏྭཱ སཱཡནྷསམཡེ ཙཏཱུསུ པརིསཱསུ སནྣིཔཏིཏཱསུ ཨུཔཱལིཏྠེརཾ ཨཱམནྟེསི ‘‘གཙྪ, ཏྭཾ ཙཏུཔརིསམཛ྄ཛྷེ ཨིམིསྶཱ དཧརབྷིཀྑུནིཡཱ ཀམྨཾ སོདྷེཧཱི’’ཏི. ‘‘སཱདྷུ, བྷནྟེ’’ཏི ཐེརོ པརིསམཛ྄ཛྷཾ གནྟྭཱ ཨཏྟནོ པཉྙཏྟཱསནེ ནིསཱིདིཏྭཱ རཉྙོ པུརཏོ ཝིསཱཁཾ ཨུཔཱསིཀཾ པཀྐོསཱཔེཏྭཱ ཨིམཾ ཨདྷིཀརཎཾ པཊིཙྪཱཔེསི ‘‘གཙྪ ཝིསཱཁེ, ‘ཨཡཾ དཧརཱ ཨསུཀམཱསེ ཨསུཀདིཝསེ པབྦཛིཏཱ’ཏི ཏཐཏོ ཉཏྭཱ ཨིམསྶ གབྦྷསྶ པུརེ ཝཱ པཙྪཱ ཝཱ ལདྡྷབྷཱཝཾ ཛཱནཱཧཱི’’ཏི. ཨུཔཱསིཀཱ ‘‘སཱདྷཱུ’’ཏི སམྤཊིཙྪིཏྭཱ སཱཎིཾ པརིཀྑིཔཱཔེཏྭཱ ཨནྟོསཱཎིཡཾ དཧརབྷིཀྑུནིཡཱ ཧཏྠཔཱདནཱབྷིཨུདརཔརིཡོསཱནཱདཱིནི ཨོལོཀེཏྭཱ མཱསདིཝསེ སམཱནེཏྭཱ གིཧིབྷཱཝེ གབྦྷསྶ ལདྡྷབྷཱཝཾ ཏཐཏོ ཉཏྭཱ ཐེརསྶ སནྟིཀཾ གནྟྭཱ ཏམཏྠཾ ཨཱརོཙེསི. ཐེརོ ཙཏུཔརིསམཛ྄ཛྷེ ཏཾ བྷིཀྑུནིཾ སུདྡྷཾ ཨཀཱསི. སཱ སུདྡྷཱ ཧུཏྭཱ བྷིཀྑུསངྒྷཉྩ སཏྠཱརཉྩ ཝནྡིཏྭཱ བྷིཀྑུནཱིཧི སདྡྷིཾ ཨུཔསྶཡམེཝ གཏཱ. སཱ གབྦྷཔརིཔཱཀམནྭཱཡ པདུམུཏྟརཔཱདམཱུལེ པཏྠིཏཔཏྠནཾ མཧཱནུབྷཱཝཾ པུཏྟཾ ཝིཛཱཡི.

ཨཐེཀདིཝསཾ ¶ རཱཛཱ བྷིཀྑུནུཔསྶཡསམཱིཔེན གཙྪནྟོ དཱརཀསདྡཾ སུཏྭཱ ཨམཙྩེ པུཙྪི. ཨམཙྩཱ ཏཾ ཀཱརཎཾ ཉཏྭཱ ‘‘དེཝ, དཧརབྷིཀྑུནཱི པུཏྟཾ ཝིཛཱཏཱ, ཏསྶེསོ སདྡོ’’ཏི ཨཱཧཾསུ. ‘‘བྷིཀྑུནཱིནཾ, བྷཎེ, དཱརཀཔཊིཛགྒནཾ ནཱམ པལིབོདྷོ, མཡཾ ནཾ པཊིཛགྒིསྶཱམཱ’’ཏི རཱཛཱ ཏཾ དཱརཀཾ ནཱཊཀིཏྠཱིནཾ དཱཔེཏྭཱ ཀུམཱརཔརིཧཱརེན ཝཌྜྷཱཔེསི. ནཱམགྒཧཎདིཝསེ ཙསྶ ‘‘ཀསྶཔོ’’ཏི ནཱམཾ ཨཀཾསུ. ཨཐ ནཾ ཀུམཱརཔརིཧཱརེན ཝཌྜྷིཏཏྟཱ ‘‘ཀུམཱརཀསྶཔོ’’ཏི སཉྫཱནིཾསུ. སོ སཏྟཝསྶིཀཀཱལེ སཏྠུ སནྟིཀེ པབྦཛིཏྭཱ པརིཔུཎྞཝསྶོ ཨུཔསམྤདཾ ལབྷིཏྭཱ གཙྪནྟེ གཙྪནྟེ ཀཱལེ དྷམྨཀཐིཀེསུ ཙིཏྲཀཐཱི ཨཧོསི. ཨཐ ནཾ སཏྠཱ ‘‘ཨེཏདགྒཾ, བྷིཀྑཝེ, མམ སཱཝཀཱནཾ བྷིཀྑཱུནཾ ཙིཏྟཀཐིཀཱནཾ ཡདིདཾ ཀུམཱརཀསྶཔོ’’ཏི (ཨ. ནི. ༡.༢༠༩, ༢༡༧) ཨེཏདགྒེ ཋཔེསི. སོ པཙྪཱ ཝམྨིཀསུཏྟེ (མ. ནི. ༡.༢༤༩ ཨཱདཡོ) ཨརཧཏྟཾ པཱཔུཎི. མཱཏཱཔིསྶ བྷིཀྑུནཱི ཝིཔསྶནཾ ཝཌྜྷེཏྭཱ ཨགྒཕལཾ པཏྟཱ. ཀུམཱརཀསྶཔཏྠེརོ བུདྡྷསཱསནེ གགནམཛ྄ཛྷེ ¶ པུཎྞཙནྡོ ཝིཡ པཱཀཊོ ཛཱཏོ.

ཨཐེཀདིཝསཾ ¶ ཏཐཱགཏོ པཙྪཱབྷཏྟཾ པིཎྜཔཱཏཔཊིཀྐནྟོ བྷིཀྑཱུནཾ ཨོཝཱདཾ དཏྭཱ གནྡྷཀུཊིཾ པཱཝིསི. བྷིཀྑཱུ ཨོཝཱདཾ གཧེཏྭཱ ཨཏྟནོ ཨཏྟནོ རཏྟིཊྛཱནདིཝཱཊྛཱནེསུ དིཝསབྷཱགཾ ཁེཔེཏྭཱ སཱཡནྷསམཡེ དྷམྨསབྷཱཡཾ སནྣིཔཏིཏྭཱ ‘‘ཨཱཝུསོ, དེཝདཏྟེན ཨཏྟནོ ཨབུདྡྷབྷཱཝེན ཙེཝ ཁནྟིམེཏྟཱདཱིནཉྩ ཨབྷཱཝེན ཀུམཱརཀསྶཔཏྠེརོ ཙ ཐེརཱི ཙ ཨུབྷོ ནཱསིཏཱ, སམྨཱསམྦུདྡྷོ པན ཨཏྟནོ དྷམྨརཱཛཏཱཡ ཙེཝ ཁནྟིམེཏྟཱནུདྡཡསམྤཏྟིཡཱ ཙ ཨུབྷིནྣམྤི ཏེསཾ པཙྩཡོ ཛཱཏོ’’ཏི བུདྡྷགུཎེ ཝཎྞཡམཱནཱ ནིསཱིདིཾསུ. སཏྠཱ བུདྡྷལཱིལཱཡ དྷམྨསབྷཾ ཨཱགནྟྭཱ པཉྙཏྟཱསནེ ནིསཱིདིཏྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪི. ‘‘བྷནྟེ, ཏུམྷཱཀམེཝ གུཎཀཐཱཡཱ’’ཏི སབྦཾ ཨཱརོཙཡིཾསུ. ན, བྷིཀྑཝེ, ཏཐཱགཏོ ཨིདཱནེཝ ཨིམེསཾ ཨུབྷིནྣཾ པཙྩཡོ ཙ པཏིཊྛཱ ཙ ཛཱཏོ, པུབྦེཔི ཨཧོསིཡེཝཱཏི. བྷིཀྑཱུ ཏསྶཏྠསྶཱཝིབྷཱཝཏྠཱཡ བྷགཝནྟཾ ཡཱཙིཾསུ. བྷགཝཱ བྷཝནྟརེན པཊིཙྪནྣཾ ཀཱརཎཾ པཱཀཊཾ ཨཀཱསི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརཡམཱནེ བོདྷིསཏྟོ མིགཡོནིཡཾ པཊིསནྡྷིཾ གཎྷི. སོ མཱཏུཀུཙྪིཏོ ནིཀྑནྟོ སུཝཎྞཝཎྞོ ཨཧོསི, ཨཀྑཱིནི པནསྶ མཎིགུལ༹སདིསཱནི ཨཧེསུཾ, སིངྒཱནི རཛཏཝཎྞཱནི, མུཁཾ རཏྟཀམྦལཔུཉྫཝཎྞཾ, ཧཏྠཔཱདཔརིཡནྟཱ ལཱཁཱརསཔརིཀམྨཀཏཱ ཝིཡ, ཝཱལདྷི ཙམརསྶ ཝིཡ ཨཧོསི, སརཱིརཾ པནསྶ མཧནྟཾ ཨསྶཔོཏཀཔྤམཱཎཾ ཨཧོསི. སོ པཉྩསཏམིགཔརིཝཱརོ ཨརཉྙེ ཝཱསཾ ཀཔྤེསི ནཱམེན ནིགྲོདྷམིགརཱཛཱ ¶ ནཱམ. ཨཝིདཱུརེ པནསྶ ཨཉྙོཔི པཉྩསཏམིགཔརིཝཱརོ སཱཁམིགོ ནཱམ ཝསཏི, སོཔི སུཝཎྞཝཎྞོཝ ཨཧོསི.

ཏེན སམཡེན བཱརཱཎསིརཱཛཱ མིགཝདྷཔྤསུཏོ ཧོཏི, ཝིནཱ མཾསེན ན བྷུཉྫཏི, མནུསྶཱནཾ ཀམྨཙྪེདཾ ཀཏྭཱ སབྦེ ནེགམཛཱནཔདེ སནྣིཔཱཏེཏྭཱ དེཝསིཀཾ མིགཝཾ གཙྪཏི. མནུསྶཱ ཙིནྟེསུཾ – ‘‘ཨཡཾ རཱཛཱ ཨམྷཱཀཾ ཀམྨཙྪེདཾ ཀརོཏི, ཡཾནཱུན མཡཾ ཨུཡྻཱནེ ¶ མིགཱནཾ ནིཝཱཔཾ ཝཔིཏྭཱ པཱནཱིཡཾ སམྤཱདེཏྭཱ བཧཱུ མིགེ ཨུཡྻཱནཾ པཝེསེཏྭཱ དྭཱརཾ བནྡྷིཏྭཱ རཉྙོ ནིཡྻཱདེཡྻཱམཱ’’ཏི. ཏེ སབྦེ ཨུཡྻཱནེ མིགཱནཾ ནིཝཱཔཏིཎཱནི རོཔེཏྭཱ ཨུདཀཾ སམྤཱདེཏྭཱ དྭཱརཾ ཡོཛེཏྭཱ ཝཱགུརཱནི ཨཱདཱཡ མུགྒརཱདིནཱནཱཝུདྷཧཏྠཱ ¶ ཨརཉྙཾ པཝིསིཏྭཱ མིགེ པརིཡེསམཱནཱ ‘‘མཛ྄ཛྷེ ཋིཏེ མིགེ གཎྷིསྶཱམཱ’’ཏི ཡོཛནམཏྟཾ ཋཱནཾ པརིཀྑིཔིཏྭཱ སངྑིཔམཱནཱ ནིགྲོདྷམིགསཱཁམིགཱནཾ ཝསནཊྛཱནཾ མཛ྄ཛྷེ ཀཏྭཱ པརིཀྑིཔིཾསུ. ཨཐ ནཾ མིགགཎཾ དིསྭཱ རུཀྑགུམྦཱདཡོ ཙ བྷཱུམིཉྩ མུགྒརེཧི པཧརནྟཱ མིགགཎཾ གཧནཊྛཱནཏོ ནཱིཧརིཏྭཱ ཨསིསཏྟིདྷནུཨཱདཱིནི ཨཱཝུདྷཱནི ཨུགྒིརིཏྭཱ མཧཱནཱདཾ ནདནྟཱ ཏཾ མིགགཎཾ ཨུཡྻཱནཾ པཝེསེཏྭཱ དྭཱརཾ པིདྷཱཡ རཱཛཱནཾ ཨུཔསངྐམིཏྭཱ ‘‘དེཝ, ནིབདྡྷཾ མིགཝཾ གཙྪནྟཱ ཨམྷཱཀཾ ཀམྨཾ ནཱསེཐ, ཨམྷེཧི ཨརཉྙཏོ མིགེ ཨཱནེཏྭཱ ཏུམྷཱཀཾ ཨུཡྻཱནཾ པཱུརིཏཾ, ཨིཏོ པཊྛཱཡ ཏེསཾ མཾསཱནི ཁཱདཐཱ’’ཏི རཱཛཱནཾ ཨཱཔུཙྪིཏྭཱ པཀྐམིཾསུ.

རཱཛཱ ཏེསཾ ཝཙནཾ སུཏྭཱ ཨུཡྻཱནཾ གནྟྭཱ མིགེ ཨོལོཀེནྟོ དྭེ སུཝཎྞམིགེ དིསྭཱ ཏེསཾ ཨབྷཡཾ ཨདཱསི. ཏཏོ པཊྛཱཡ པན ཀདཱཙི སཡཾ གནྟྭཱ ཨེཀཾ མིགཾ ཝིཛ྄ཛྷིཏྭཱ ཨཱནེཏི, ཀདཱཙིསྶ བྷཏྟཀཱརཀོ གནྟྭཱ ཝིཛ྄ཛྷིཏྭཱ ཨཱཧརཏི. མིགཱ དྷནུཾ དིསྭཱཝ མརཎབྷཡེན ཏཛྫིཏཱ པལཱཡནྟི, དྭེ ཏཡོ པཧཱརེ ལབྷིཏྭཱ ཀིལམནྟིཔི, གིལཱནཱཔི ཧོནྟི, མརཎམྤི པཱཔུཎནྟི. མིགགཎོ ཏཾ པཝཏྟིཾ བོདྷིསཏྟསྶ ཨཱརོཙེསི. སོ སཱཁཾ པཀྐོསཱཔེཏྭཱ ཨཱཧ – ‘‘སམྨ, བཧཱུ མིགཱ ནསྶནྟི, ཨེཀཾསེན མརིཏབྦེ སཏི ཨིཏོ པཊྛཱཡ མཱ ཀཎྜེན མིགེ ཝིཛ྄ཛྷནྟུ, དྷམྨགཎྜིཀཊྛཱནེ མིགཱནཾ ཝཱརོ ཧོཏུ. ཨེཀདིཝསཾ མམ པརིསཱཡ ཝཱརོ པཱཔུཎཱཏུ, ཨེཀདིཝསཾ ཏཝ པརིསཱཡ, ཝཱརཔྤཏྟོ མིགོ གནྟྭཱ དྷམྨགཎྜིཀཱཡ གཱིཝཾ ཋཔེཏྭཱ ནིཔཛྫཏུ, ཨེཝཾ སནྟེ མིགཱ ཀིལནྟཱ ན བྷཝིསྶནྟཱི’’ཏི. སོ ‘‘སཱདྷཱུ’’ཏི སམྤཊིཙྪི. ཏཏོ པཊྛཱཡ ཝཱརཔྤཏྟོཝ མིགོ གནྟྭཱ དྷམྨགཎྜིཀཱཡ ¶ གཱིཝཾ ཋཔེཏྭཱ ནིཔཛྫཏི, བྷཏྟཀཱརཀོ ཨཱགནྟྭཱ ཏཏྠ ནིཔནྣཀམེཝ གཧེཏྭཱ གཙྪཏི.

ཨཐེཀདིཝསཾ ¶ སཱཁམིགསྶ པརིསཱཡ ཨེཀིསྶཱ གབྦྷིནིམིགིཡཱ ཝཱརོ པཱཔུཎི. སཱ སཱཁཾ ཨུཔསངྐམིཏྭཱ ‘‘སཱམི, ཨཧཾ གབྦྷིནཱི, པུཏྟཾ ཝིཛཱཡིཏྭཱ དྭེ ཛནཱ ཝཱརཾ གམིསྶཱམ, མཡ྄ཧཾ ཝཱརཾ ཨཏིཀྐཱམེཧཱི’’ཏི ཨཱཧ. སོ ‘‘ན སཀྐཱ ཏཝ ཝཱརཾ ཨཉྙེསཾ པཱཔེཏུཾ, ཏྭམེཝ ཏུཡ྄ཧཾ ཝཱརཾ ཛཱནིསྶསི, གཙྪཱཧཱི’’ཏི ཨཱཧ. སཱ ཏསྶ སནྟིཀཱ ཨནུགྒཧཾ ཨལབྷམཱནཱ བོདྷིསཏྟཾ ཨུཔསངྐམིཏྭཱ ཏམཏྠཾ ཨཱརོཙེསི. སོ ཏསྶཱ ཝཙནཾ སུཏྭཱ ‘‘ཧོཏུ གཙྪ ཏྭཾ, ཨཧཾ ཏེ ཝཱརཾ ཨཏིཀྐཱམེསྶཱམཱི’’ཏི སཡཾ ¶ གནྟྭཱ དྷམྨགཎྜིཀཱཡ སཱིསཾ ཀཏྭཱ ནིཔཛྫི. བྷཏྟཀཱརཀོ ཏཾ དིསྭཱ ‘‘ལདྡྷཱབྷཡོ མིགརཱཛཱ དྷམྨགཎྜིཀཱཡ ནིཔནྣོ, ཀིཾ ནུ ཁོ ཀཱརཎ’’ནྟི ཝེགེན གནྟྭཱ རཉྙོ ཨཱརོཙེསི.

རཱཛཱ ཏཱཝདེཝ རཐཾ ཨཱརུཡ྄ཧ མཧནྟེན པརིཝཱརེན ཨཱགནྟྭཱ བོདྷིསཏྟཾ དིསྭཱ ཨཱཧ ‘‘སམྨ མིགརཱཛ, ནནུ མཡཱ ཏུཡ྄ཧཾ ཨབྷཡཾ དིནྣཾ, ཀསྨཱ ཏྭཾ ཨིདྷ ནིཔནྣོ’’ཏི. མཧཱརཱཛ, གབྦྷིནཱི མིགཱི ཨཱགནྟྭཱ ‘‘མམ ཝཱརཾ ཨཉྙསྶ པཱཔེཧཱི’’ཏི ཨཱཧ, ན སཀྐཱ ཁོ པན མཡཱ ཨེཀསྶ མརཎདུཀྑཾ ཨཉྙསྶ ཨུཔརི ནིཀྑིཔིཏུཾ, སྭཱཧཾ ཨཏྟནོ ཛཱིཝིཏཾ ཏསྶཱ དཏྭཱ ཏསྶཱ སནྟཀཾ མརཎཾ གཧེཏྭཱ ཨིདྷ ནིཔནྣོ, མཱ ཨཉྙཾ ཀིཉྩི ཨཱསངྐིཏྠ, མཧཱརཱཛཱཏི. རཱཛཱ ཨཱཧ – ‘‘སཱམི, སུཝཎྞཝཎྞམིགརཱཛ, མཡཱ ན ཏཱདིསོ ཁནྟིམེཏྟཱནུདྡཡསམྤནྣོ མནུསྶེསུཔི དིཊྛཔུབྦོ, ཏེན ཏེ པསནྣོསྨི, ཨུཊྛེཧི, ཏུཡ྄ཧཉྩ ཏསྶཱ ཙ ཨབྷཡཾ དམྨཱི’’ཏི. ‘‘དྭཱིཧི ཨབྷཡེ ལདྡྷེ ཨཝསེསཱ ཀིཾ ཀརིསྶནྟི, ནརིནྡཱ’’ཏི? ‘‘ཨཝསེསཱནམྤི ཨབྷཡཾ དམྨི, སཱམཱི’’ཏི. ‘‘མཧཱརཱཛ, ཨེཝམྤི ཨུཡྻཱནེཡེཝ མིགཱ ཨབྷཡཾ ལབྷིསྶནྟི, སེསཱ ཀིཾ ཀརིསྶནྟཱི’’ཏི? ‘‘ཨེཏེསམྤི ཨབྷཡཾ དམྨི, སཱམཱི’’ཏི. ‘‘མཧཱརཱཛ, མིགཱ ཏཱཝ ཨབྷཡཾ ལབྷནྟུ, སེསཱ ཙཏུཔྤདཱ ཀིཾ ཀརིསྶནྟཱི’’ཏི ¶ ? ‘‘ཨེཏེསམྤི ཨབྷཡཾ དམྨི, སཱམཱི’’ཏི. ‘‘མཧཱརཱཛ, ཙཏུཔྤདཱ ཏཱཝ ཨབྷཡཾ ལབྷནྟུ, དིཛགཎཱ ཀིཾ ཀརིསྶནྟཱི’’ཏི? ‘‘ཨེཏེསམྤི ཨབྷཡཾ དམྨི, སཱམཱི’’ཏི. ‘‘མཧཱརཱཛ, དིཛགཎཱ ཏཱཝ ཨབྷཡཾ ལབྷནྟུ, ཨུདཀེ ཝསནྟཱ མཙྪཱ ཀིཾ ཀརིསྶནྟཱི’’ཏི? ‘‘ཨེཏེསམྤི ཨབྷཡཾ དམྨི, སཱམཱི’’ཏི. ཨེཝཾ མཧཱསཏྟོ རཱཛཱནཾ སབྦསཏྟཱནཾ ཨབྷཡཾ ཡཱཙིཏྭཱ ཨུཊྛཱཡ རཱཛཱནཾ པཉྩསུ སཱིལེསུ པཏིཊྛཱཔེཏྭཱ ‘‘དྷམྨཾ ཙར, མཧཱརཱཛ, མཱཏཱཔིཏཱུསུ པུཏྟདྷཱིཏཱསུ བྲཱཧྨཎགཧཔཏིཀེསུ ནེགམཛཱནཔདེསུ དྷམྨཾ ཙརནྟོ སམཾ ཙརནྟོ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ གམིསྶསཱི’’ཏི རཉྙོ བུདྡྷལཱིལཱཡ དྷམྨཾ དེསེཏྭཱ ཀཏིཔཱཧཾ ཨུཡྻཱནེ ཝསིཏྭཱ རཉྙོ ཨོཝཱདཾ དཏྭཱ མིགགཎཔརིཝུཏོ ཨརཉྙཾ པཱཝིསི. སཱཔི ཁོ མིགདྷེནུ པུཔྥཀཎྞིཀསདིསཾ པུཏྟཾ ཝིཛཱཡི. སོ ཀཱིལ༹མཱནོ སཱཁམིགསྶ སནྟིཀཾ གཙྪཏི. ཨཐ ནཾ མཱཏཱ ཏསྶ སནྟིཀཾ གཙྪནྟཾ དིསྭཱ ‘‘པུཏྟ, ཨིཏོ པཊྛཱཡ མཱ ཨེཏསྶ སནྟིཀཾ གཙྪ, ནིགྲོདྷསྶེཝ སནྟིཀཾ གཙྪེཡྻཱསཱི’’ཏི ཨོཝདནྟཱི ཨིམཾ གཱཐམཱཧ –

༡༢.

‘‘ནིགྲོདྷམེཝ ¶ ¶ སེཝེཡྻ, ན སཱཁམུཔསཾཝསེ;

ནིགྲོདྷསྨིཾ མཏཾ སེཡྻོ, ཡཉྩེ སཱཁསྨི ཛཱིཝིཏ’’ནྟི.

ཏཏྠ ནིགྲོདྷམེཝ སེཝེཡྻཱཏི ཏཱཏ ཏྭཾ ཝཱ ཨཉྙོ ཝཱ ཨཏྟནོ ཧིཏཀཱམོ ནིགྲོདྷམེཝ སེཝེཡྻ བྷཛེཡྻ ཨུཔསངྐམེཡྻ, ན སཱཁམུཔསཾཝསེཏི སཱཁམིགཾ པན ན ཨུཔསཾཝསེ ཨུཔགམྨ ན སཾཝསེཡྻ, ཨེཏཾ ནིསྶཱཡ ཛཱིཝིཀཾ ན ཀཔྤེཡྻ. ནིགྲོདྷསྨིཾ མཏཾ སེཡྻོཏི ནིགྲོདྷརཉྙོ པཱདམཱུལེ མརཎམྤི སེཡྻོ ཝརཾ ཨུཏྟམཾ. ཡཉྩེ སཱཁསྨི ཛཱིཝིཏནྟི ཡཾ པན སཱཁསྶ སནྟིཀེ ཛཱིཝིཏཾ, ཏཾ ནེཝ སེཡྻོ ན ཝརཾ ན ཨུཏྟམནྟི ཨཏྠོ.

ཏཏོ པཊྛཱཡ ཙ པན ཨབྷཡལདྡྷཀཱ མིགཱ མནུསྶཱནཾ སསྶཱནི ཁཱདནྟི, མནུསྶཱ ‘‘ལདྡྷཱབྷཡཱ ཨིམེ མིགཱ’’ཏི མིགེ པཧརིཏུཾ ཝཱ པལཱཔེཏུཾ ཝཱ ན ཝིསཧནྟི, ཏེ རཱཛངྒཎེ སནྣིཔཏིཏྭཱ རཉྙོ ཏམཏྠཾ ཨཱརོཙེསུཾ. རཱཛཱ ‘‘མཡཱ པསནྣེན ནིགྲོདྷམིགརཱཛསྶ ¶ ཝརོ དིནྣོ, ཨཧཾ རཛྫཾ ཛཧེཡྻཾ, ན ཙ ཏཾ པཊིཉྙཾ བྷིནྡཱམི, གཙྪཐ ན ཀོཙི མམ ཝིཛིཏེ མིགེ པཧརིཏུཾ ལབྷཏཱི’’ཏི ཨཱཧ. ནིགྲོདྷམིགོ ཏཾ པཝཏྟིཾ སུཏྭཱ མིགགཎཾ སནྣིཔཱཏཱཔེཏྭཱ ‘‘ཨིཏོ པཊྛཱཡ པརེསཾ སསྶཾ ཁཱདིཏུཾ ན ལབྷིསྶཐཱ’’ཏི མིགེ ཨོཝདིཏྭཱ མནུསྶཱནཾ ཨཱརོཙཱཔེསི ‘‘ཨིཏོ པཊྛཱཡ སསྶཀཱརཀཱ མནུསྶཱ སསྶརཀྑཎཏྠཾ ཝཏིཾ མཱ ཀརོནྟུ, ཁེཏྟཾ པན ཨཱཝིཛ྄ཛྷིཏྭཱ པཎྞསཉྙཾ བནྡྷནྟཱུ’’ཏི. ཏཏོ པཊྛཱཡ ཀིར ཁེཏྟེསུ པཎྞབནྡྷནསཉྙཱ ཨུདཔཱདི. ཏཏོ པཊྛཱཡ པཎྞསཉྙཾ ཨཏིཀྐམནམིགོ ནཱམ ནཏྠི. ཨཡཾ ཀིར ནེསཾ བོདྷིསཏྟཏོ ལདྡྷཨོཝཱདོ. ཨེཝཾ མིགགཎཾ ཨོཝདིཏྭཱ བོདྷིསཏྟོ ཡཱཝཏཱཡུཀཾ ཋཏྭཱ སདྡྷིཾ མིགེཧི ཡཐཱཀམྨཾ གཏོ, རཱཛཱཔི བོདྷིསཏྟསྶ ཨོཝཱདེ ཋཏྭཱ པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ‘‘ན, བྷིཀྑཝེ, ཨིདཱནེཝཱཧཾ ཐེརིཡཱ ཙ ཀུམཱརཀསྶཔསྶ ཙ ཨཝསྶཡོ, པུབྦེཔི ཨཝསྶཡོ ཨེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཙཏུསཙྩདྷམྨདེསནཾ ཝིནིཝཊྚེཏྭཱ དྭེ ཝཏྠཱུནི ཀཐེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི ‘‘ཏདཱ སཱཁམིགོ དེཝདཏྟོ ཨཧོསི, པརིསཱཔིསྶ དེཝདཏྟཔརིསཱཝ, མིགདྷེནུ ཐེརཱི ཨཧོསི, པུཏྟོ ཀུམཱརཀསྶཔོ, རཱཛཱ ཨཱནནྡོ, ནིགྲོདྷམིགརཱཛཱ པན ཨཧམེཝ ཨཧོསི’’ནྟི.

ནིགྲོདྷམིགཛཱཏཀཝཎྞནཱ དུཏིཡཱ.

[༡༣] ༣. ཀཎྜིཛཱཏཀཝཎྞནཱ

དྷིརཏྠུ ¶ ¶ ཀཎྜིནཾ སལླནྟི ཨིདཾ སཏྠཱ ཛེཏཝནེ ཝིཧརནྟོ པུརཱཎདུཏིཡིཀཱཔལོབྷནཾ ཨཱརབྦྷ ཀཐེསི. ཏཾ ཨཊྛཀནིཔཱཏེ ཨིནྡྲིཡཛཱཏཀེ ཨཱཝིབྷཝིསྶཏི. བྷགཝཱ པན ཏཾ བྷིཀྑུཾ ཨེཏདཝོཙ ‘‘བྷིཀྑུ, པུབྦེཔི ཏྭཾ ཨེཏཾ མཱཏུགཱམཾ ནིསྶཱཡ ཛཱིཝིཏཀྑཡཾ པཏྭཱ ཝཱིཏཙྩིཏེསུ ཨངྒཱརེསུ པཀྐོ’’ཏི. བྷིཀྑཱུ ཏསྶཏྠསྶཱཝིབྷཱཝཏྠཱཡ བྷགཝནྟཾ ཡཱཙིཾསུ, བྷགཝཱ བྷཝནྟརེན པཊིཙྪནྣཀཱརཎཾ པཱཀཊཾ ཨཀཱསི. ཨིཏོ པརཾ པན བྷིཀྑཱུནཾ ཡཱཙནཾ ¶ བྷཝནྟརཔཊིཙྪནྣཏཉྩ ཨཝཏྭཱ ‘‘ཨཏཱིཏཾ ཨཱཧརཱི’’ཏི ཨེཏྟཀམེཝ ཝཀྑཱམ, ཨེཏྟཀེ ཝུཏྟེཔི ཡཱཙནཉྩ ཝལཱཧཀགབྦྷཏོ ཙནྡནཱིཧརཎཱུཔམཱཡ བྷཝནྟརཔཊིཙྪནྣཀཱརཎབྷཱཝོ ཙཱཏི སབྦམེཏཾ ཧེཊྛཱ ཝུཏྟནཡེནེཝ ཡོཛེཏྭཱ ཝེདིཏབྦཾ.

ཨཏཱིཏེ མགདྷརཊྛེ རཱཛགཧེ མགདྷརཱཛཱ རཛྫཾ ཀཱརེསི. མགདྷཝཱསིཀཱནཾ སསྶསམཡེ མིགཱནཾ མཧཱཔརིཔནྠོ ཧོཏི. ཏེ ཨརཉྙེ པབྦཏཔཱདཾ པཝིསནྟི. ཏཏྠ ཨེཀོ ཨརཉྙཝཱསཱི པབྦཏེཡྻམིགོ ཨེཀཱཡ གཱམནྟཝཱསིནིཡཱ མིགཔོཏིཀཱཡ སདྡྷིཾ སནྠཝཾ ཀཏྭཱ ཏེསཾ མིགཱནཾ པབྦཏཔཱདཏོ ཨོརུཡ྄ཧ པུན གཱམནྟཾ ཨོཏརཎཀཱལེ མིགཔོཏིཀཱཡ པཊིབདྡྷཙིཏྟཏྟཱ ཏེཧི སདྡྷིཾཡེཝ ཨོཏརི. ཨཐ ནཾ སཱ ཨཱཧ – ‘‘ཏྭཾ ཁོསི, ཨཡྻ, པབྦཏེཡྻོ བཱལམིགོ, གཱམནྟོ ཙ ནཱམ སཱསངྐོ སཔྤཊིབྷཡོ, མཱ ཨམྷེཧི སདྡྷིཾ ཨོཏརཱི’’ཏི. སོ ཏསྶཱ པཊིབདྡྷཙིཏྟཏྟཱ ཨནིཝཏྟིཏྭཱ སདྡྷིཾཡེཝ ཨགམཱསི. མགདྷཝཱསིནོ ‘‘ཨིདཱནི མིགཱནཾ པབྦཏཔཱདཱ ཨོཏརཎཀཱལོ’’ཏི ཉཏྭཱ མགྒེ པཊིཙྪནྣཀོཊྛཀེསུ ཏིཊྛནྟི. ཏེསམྤི དྭིནྣཾ ཨཱགམནམགྒེ ཨེཀོ ལུདྡཀོ པཊིཙྪནྣཀོཊྛཀེ ཋིཏོ ཧོཏི. མིགཔོཏིཀཱ མནུསྶགནྡྷཾ གྷཱཡིཏྭཱ ‘‘ཨེཀོ ལུདྡཀོ ཋིཏོ བྷཝིསྶཏཱི’’ཏི ཏཾ བཱལམིགཾ པུརཏོ ཀཏྭཱ སཡཾ པཙྪཏོ ཨཧོསི. ལུདྡཀོ ཨེཀེནེཝ སརཔྤཧཱརེན མིགཾ ཏཏྠེཝ པཱཏེཏི. མིགཔོཏིཀཱ ཏསྶ ཝིདྡྷབྷཱཝཾ ཉཏྭཱ ཨུཔྤཏིཏྭཱ ཝཱཏགཏིཡཱཝ པལཱཡི. ལུདྡཀོ ཀོཊྛཀཏོ ནིཀྑམིཏྭཱ མིགཾ ཨོཀྐནྟིཏྭཱ ཨགྒིཾ ཀཏྭཱ ཝཱིཏཙྩིཏེསུ ཨངྒཱརེསུ མདྷུརམཾསཾ པཙིཏྭཱ ཁཱདིཏྭཱ པཱནཱིཡཾ པིཝིཏྭཱ ཨཝསེསཾ ལོཧིཏབིནྡཱུཧི པགྒྷརནྟེཧི ཀཱཛེནཱདཱཡ དཱརཀེ ཏོསེནྟོ གྷརཾ ཨགམཱསི.

ཏདཱ ¶ བོདྷིསཏྟོ ཏསྨིཾ ཝནསཎྜེ རུཀྑདེཝཏཱ ཧུཏྭཱ ནིབྦཏྟོ ཧོཏི. སོ ཏཾ ཀཱརཎཾ དིསྭཱ ‘‘ཨིམསྶ བཱལམིགསྶ མརཎཾ ནེཝ མཱཏརཾ ནིསྶཱཡ, ན པིཏརཾ ནིསྶཱཡ, ཨཐ ཁོ ཀཱམཾ ནིསྶཱཡ. ཀཱམནིམིཏྟཉྷི ¶ སཏྟཱ སུགཏིཡཾ ཧཏྠཙྪེདཱདིཀཾ, དུགྒཏིཡཉྩ པཉྩཝིདྷབནྡྷནཱདིནཱནཔྤཀཱརཀཾ དུཀྑཾ པཱཔུཎནྟི, པརེསཾ མརཎདུཀྑུཔྤཱདནམྤི ནཱམ ཨིམསྨིཾ ལོཀེ ¶ གརཧིཏམེཝ. ཡཾ ཛནཔདཾ མཱཏུགཱམོ ཝིཙཱརེཏི ཨནུསཱསཏི, སོ ཨིཏྠིཔརིཎཱཡཀོ ཛནཔདོཔི གརཧིཏོཡེཝ. ཡེ སཏྟཱ མཱཏུགཱམསྶ ཝསཾ གཙྪནྟི, ཏེཔི གརཧིཏཱཡེཝཱ’’ཏི ཨེཀཱཡ གཱཐཱཡ ཏཱིཎི གརཧཝཏྠཱུནི དསྶེཏྭཱ ཝནདེཝཏཱསུ སཱདྷུཀཱརཾ དཏྭཱ གནྡྷཔུཔྥཱདཱིཧི པཱུཛཡམཱནཱསུ མདྷུརེན སརེན ཏཾ ཝནསཎྜཾ ཨུནྣཱདེནྟོ ཨིམཱཡ གཱཐཱཡ དྷམྨཾ དེསེསི –

༡༣.

‘‘དྷིརཏྠུ ཀཎྜིནཾ སལླཾ, པུརིསཾ གཱལ༹ྷཝེདྷིནཾ;

དྷིརཏྠུ ཏཾ ཛནཔདཾ, ཡཏྠིཏྠཱི པརིཎཱཡིཀཱ;

ཏེ ཙཱཔི དྷིཀྐིཏཱ སཏྟཱ, ཡེ ཨིཏྠཱིནཾ ཝསཾ གཏཱ’’ཏི.

ཏཏྠ དྷིརཏྠཱུཏི གརཧཎཏྠེ ནིཔཱཏོ, སྭཱཡམིདྷ ཨུཏྟཱསུབྦེགཝསེན གརཧཎེ དཊྛབྦོ. ཨུཏྟསིཏུབྦིགྒོ ཧི ཧོནྟོ བོདྷིསཏྟོ ཨེཝམཱཧ. ཀཎྜམསྶ ཨཏྠཱིཏི ཀཎྜཱི, ཏཾ ཀཎྜིནཾ. ཏཾ པན ཀཎྜཾ ཨནུཔཝིསནཊྛེན ‘‘སལླ’’ནྟི ཝུཙྩཏི, ཏསྨཱ ཀཎྜིནཾ སལླནྟི ཨེཏྠ སལླཀཎྜིནནྟི ཨཏྠོ. སལླཾ ཝཱ ཨསྶཏྠཱིཏིཔི སལློ, ཏཾ སལླཾ. མཧནྟཾ ཝཎམུཁཾ ཀཏྭཱ བལཝཔྤཧཱརཾ དེནྟོ གཱལ༹ྷཾ ཝིཛ྄ཛྷཏཱིཏི གཱལ༹ྷཝེདྷཱི, ཏཾ གཱལ༹ྷཝེདྷིནཾ. ནཱནཔྤཀཱརེན ཀཎྜེན, ཀུམུདཔཏྟསཎྛཱནཐལེན ཨུཛུཀགམནེནེཝ སལླེན ཙ སམནྣཱགཏཾ གཱལ༹ྷཝེདྷིནཾ པུརིསཾ དྷིརཏྠཱུཏི ཨཡམེཏྠ ཨཏྠོ. པརིཎཱཡིཀཱཏི ཨིསྶརཱ སཾཝིདྷཱཡིཀཱ. དྷིཀྐིཏཱཏི གརཧིཏཱ. སེསམེཏྠ ཨུཏྟཱནཏྠམེཝ. ཨིཏོ པརཾ པན ཨེཏྟཀམྤི ཨཝཏྭཱ ཡཾ ཡཾ ཨནུཏྟཱནཾ, ཏཾ ཏདེཝ ཝཎྞཡིསྶཱམ. ཨེཝཾ ཨེཀཱཡ གཱཐཱཡ ཏཱིཎི གརཧཝཏྠཱུནི དསྶེཏྭཱ བོདྷིསཏྟོ ཝནཾ ཨུནྣཱདེཏྭཱ བུདྡྷལཱིལཱཡ དྷམྨཾ དེསེསི.

སཏྠཱ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེསི, སཙྩཔརིཡོསཱནེ ཨུཀྐཎྛིཏབྷིཀྑུ སོཏཱཔཏྟིཕལེ པཏིཊྛཧི. སཏྠཱ དྭེ ཝཏྠཱུནི ¶ ཀཐེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི. ཨིཏོ པརཾ པན ‘‘དྭེ ¶ ཝཏྠཱུནི ཀཐེཏྭཱ’’ཏི ཨིདཾ ཨཝཏྭཱ ‘‘ཨནུསནྡྷིཾ གྷཊེཏྭཱ’’ཏི ཨེཏྟཀམེཝ ཝཀྑཱམ, ཨཝུཏྟམྤི པན ཧེཊྛཱ ཝུཏྟནཡེནེཝ ཡོཛེཏྭཱ གཧེཏབྦཾ.

ཏདཱ པབྦཏེཡྻམིགོ ཨུཀྐཎྛིཏབྷིཀྑུ ཨཧོསི, མིགཔོཏིཀཱ པུརཱཎདུཏིཡིཀཱ, ཀཱམེསུ དོསཾ དསྶེཏྭཱ དྷམྨདེསཀདེཝཏཱ པན ཨཧམེཝ ཨཧོསིནྟི.

ཀཎྜིཛཱཏཀཝཎྞནཱ ཏཏིཡཱ.

[༡༤] ༤. ཝཱཏམིགཛཱཏཀཝཎྞནཱ

ན ¶ ཀིརཏྠི རསེཧི པཱཔིཡོཏི ཨིདཾ སཏྠཱ ཛེཏཝནེ ཝིཧརནྟོ ཙཱུལ༹པིཎྜཔཱཏིཀཏིསྶཏྠེརཾ ཨཱརབྦྷ ཀཐེསི. སཏྠརི ཀིར རཱཛགཧཾ ཨུཔནིསྶཱཡ ཝེལུ༹ཝནེ ཝིཧརནྟེ ཏིསྶཀུམཱརོ ནཱམ མཧཱཝིབྷཝསྶ སེཊྛིཀུལསྶ པུཏྟོ ཨེཀདིཝསཾ ཝེལུ༹ཝནཾ གནྟྭཱ སཏྠུ དྷམྨདེསནཾ སུཏྭཱ པབྦཛིཏུཀཱམོ པབྦཛྫཾ ཡཱཙིཏྭཱ མཱཏཱཔིཏཱུཧི ཨནནུཉྙཱཏཏྟཱ པཊིཀྑིཏྟོ སཏྟཱཧཾ བྷཏྟཙྪེདཾ ཀཏྭཱ རཊྛཔཱལཏྠེརོ ཝིཡ མཱཏཱཔིཏརོ ཨནུཛཱནཱཔེཏྭཱ སཏྠུ སནྟིཀེ པབྦཛི. སཏྠཱ ཏཾ པབྦཱཛེཏྭཱ ཨཌྜྷམཱསམཏྟཾ ཝེལུ༹ཝནེ ཝིཧརིཏྭཱ ཛེཏཝནཾ ཨགམཱསི. ཏཏྲཱཡཾ ཀུལཔུཏྟོ ཏེརས དྷུཏངྒཱནི སམཱདཱཡ སཱཝཏྠིཡཾ སཔདཱནཾ པིཎྜཱཡ ཙརམཱནོ ཀཱལཾ ཝཱིཏིནཱམེཏི, ‘‘ཙཱུལ༹པིཎྜཔཱཏིཀཏིསྶཏྠེརོ ནཱམཱ’’ཏི ཝུཏྟེ གགནཏལེ པུཎྞཙནྡོ ཝིཡ བུདྡྷསཱསནེ པཱཀཊོ པཉྙཱཏོ ཨཧོསི.

ཏསྨིཾ ཀཱལེ རཱཛགཧེ ནཀྑཏྟཀཱིལཱ༹ཡ ཝཏྟམཱནཱཡ ཐེརསྶ མཱཏཱཔིཏརོ ཡཾ ཏསྶ གིཧིཀཱལེ ཨཧོསི ཨཱབྷརཎབྷཎྜཀཾ, ཏཾ རཏནཙངྐོཊཀེ ནིཀྑིཔིཏྭཱ ཨུརེ ཋཔེཏྭཱ ‘‘ཨཉྙཱསུ ནཀྑཏྟཀཱིལཱ༹སུ ཨམྷཱཀཾ པུཏྟོ ཨིམིནཱ ཨལངྐཱརེན ཨལངྐཏོ ནཀྑཏྟཾ ཀཱིལ༹ཏི, ཏཾ ནོ ཨེཀཔུཏྟཾ གཧེཏྭཱ སམཎོ གོཏམོ སཱཝཏྠིནགརཾ གཏོ, ཀཧཾ ནུ ཁོ སོ ཨེཏརཧི ནིསིནྣོ, ཀཧཾ ཋིཏོ’’ཏི ཝཏྭཱ རོདནྟི.

ཨཐེཀཱ ཝཎྞདཱསཱི ཏཾ ཀུལཾ གནྟྭཱ སེཊྛིབྷརིཡཾ རོདནྟིཾ དིསྭཱ པུཙྪི ‘‘ཀིཾ པན, ཨཡྻེ, རོདསཱི’’ཏི? ‘‘སཱ ཏམཏྠཾ ཨཱརོཙེསི’’. ‘‘ཀིཾ པན, ཨཡྻེ, ཨཡྻཔུཏྟོ པིཡཱཡཏཱི’’ཏི? ‘‘ཨསུཀཉྩ ཨསུཀཉྩཱ’’ཏི. ‘‘སཙེ ཏུམྷེ ¶ ཨིམསྨིཾ གེཧེ སབྦཾ ཨིསྶརིཡཾ མཡ྄ཧཾ དེཐ, ཨཧཾ ཝོ པུཏྟཾ ཨཱནེསྶཱམཱི’’ཏི. སེཊྛིབྷརིཡཱ ‘‘སཱདྷཱུ’’ཏི སམྤཊིཙྪིཏྭཱ པརིབྦཡཾ དཏྭཱ མཧནྟེན པརིཝཱརེན ཏཾ ཨུཡྻོཛེསི ‘‘གཙྪ, ཨཏྟནོ བལེན མམ པུཏྟཾ ཨཱནེཧཱི’’ཏི. སཱ པཊིཙྪནྣཡཱནེ ནིསིནྣཱ སཱཝཏྠིཾ གནྟྭཱ ཐེརསྶ བྷིཀྑཱཙཱརཝཱིཐིཡཾ ནིཝཱསཾ གཧེཏྭཱ སེཊྛིཀུལཱ ཨཱགཏེ མནུསྶེ ¶ ཐེརསྶ ཨདསྶེཏྭཱ ཨཏྟནོ པརིཝཱརེནེཝ པརིཝུཏཱ ཐེརསྶ པིཎྜཱཡ པཝིཊྛསྶ ཨཱདིཏོཝ ཨུལུ༹ངྐཡཱགུཉྩ རསཀབྷིཀྑཉྩ དཏྭཱ རསཏཎྷཱཡ བནྡྷིཏྭཱ ཨནུཀྐམེན གེཧེ ནིསཱིདཱཔེཏྭཱ བྷིཀྑཾ དདམཱནཱ ཙ ཨཏྟནོ ཝསཾ ཨུཔགཏབྷཱཝཾ ཉཏྭཱ གིལཱནཱལཡཾ དསྶེཏྭཱ ཨནྟོགབྦྷེ ནིཔཛྫི. ཐེརོཔི བྷིཀྑཱཙཱརཝེལཱཡ སཔདཱནཾ ཙརནྟོ གེཧདྭཱརཾ ཨགམཱསི. པརིཛནོ ཐེརསྶ པཏྟཾ གཧེཏྭཱ ཐེརཾ གྷརེ ནིསཱིདཱཔེསི. ཐེརོ ནིསཱིདིཏྭཱཝ ‘‘ཀཧཾ ཨུཔཱསིཀཱ’’ཏི པུཙྪི. ‘‘གིལཱནཱ, བྷནྟེ, ཏུམྷཱཀཾ དསྶནཾ ཨིཙྪཏཱི’’ཏི. སོ རསཏཎྷཱཡ བདྡྷོ ཨཏྟནོ ཝཏསམཱདཱནཾ ¶ བྷིནྡིཏྭཱ ཏསྶཱ ནིཔནྣཊྛཱནཾ པཱཝིསི. སཱ ཨཏྟནོ ཨཱགཏཀཱརཎཾ ཀཐེཏྭཱ ཏཾ པལོབྷེཏྭཱ རསཏཎྷཱཡ བནྡྷིཏྭཱ ཨུཔྤབྦཱཛེཏྭཱ ཨཏྟནོ ཝསེ ཋཔེཏྭཱ ཡཱནེ ནིསཱིདཱཔེཏྭཱ མཧནྟེན པརིཝཱརེན རཱཛགཧམེཝ ཨགམཱསི. སཱ པཝཏྟི པཱཀཊཱ ཛཱཏཱ.

བྷིཀྑཱུ དྷམྨསབྷཱཡཾ སནྣིསིནྣཱ ‘‘ཙཱུལ༹པིཎྜཔཱཏིཀཏིསྶཏྠེརཾ ཀིར ཨེཀཱ ཝཎྞདཱསཱི རསཏཎྷཱཡ བནྡྷིཏྭཱ ཨཱདཱཡ གཏཱ’’ཏི ཀཐཾ སམུཊྛཱཔེསུཾ. སཏྠཱ དྷམྨསབྷཾ ཨུཔགནྟྭཱ ཨལངྐཏདྷམྨཱསནེ ནིསཱིདིཏྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི ཨཱཧ. ཏེ ཏཾ པཝཏྟིཾ ཀཐཡིཾསུ. ‘‘ན, བྷིཀྑཝེ, ཨིདཱནེཝ ཨེསོ བྷིཀྑུ རསཏཎྷཱཡ བཛ྄ཛྷིཏྭཱ ཏསྶཱ ཝསཾ གཏོ, པུབྦེཔི ཏསྶཱ ཝསཾ གཏོཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ རཉྙོ བྲཧྨདཏྟསྶ སཉྫཡོ ནཱམ ཨུཡྻཱནཔཱལོ ཨཧོསི. ཨཐེཀོ ཝཱཏམིགོ ཏཾ ཨུཡྻཱནཾ ཨཱགནྟྭཱ སཉྫཡཾ དིསྭཱ པལཱཡཏི, སཉྫཡོཔི ན ཏཾ ཏཛྫེཏྭཱ ནཱིཧརཏི. སོ པུནཔྤུནཾ ཨཱགནྟྭཱ ཨུཡྻཱནེཡེཝ ཙརཏི. ཨུཡྻཱནཔཱལོ ཨུཡྻཱནེ ནཱནཔྤཀཱརཱནི པུཔྥཕལཱནི གཧེཏྭཱ དིཝསེ དིཝསེ རཉྙོ ཨབྷིཧརཏི. ཨཐ ནཾ ཨེཀདིཝསཾ རཱཛཱ པུཙྪི ‘‘སམྨ ཨུཡྻཱནཔཱལ, ཨུཡྻཱནེ ཀིཉྩི ཨཙྪརིཡཾ ¶ པསྶསཱི’’ཏི? ‘‘དེཝ, ཨཉྙཾ ན པསྶཱམི, ཨེཀོ པན ཝཱཏམིགོ ཨཱགནྟྭཱ ཨུཡྻཱནེ ཙརཏི, ཨེཏཾ པསྶཱམཱི’’ཏི. ‘‘སཀྑིསྶཏི པན ཏཾ གཧེཏུ’’ནྟི. ‘‘ཐོཀཾ མདྷུཾ ལབྷནྟོ ཨནྟོ རཱཛནིཝེསནམྤི ནཾ ཨཱནེཏུཾ སཀྑིསྶཱམི, དེཝཱ’’ཏི. རཱཛཱ ཏསྶ མདྷུཾ དཱཔེསི. སོ ཏཾ གཧེཏྭཱ ཨུཡྻཱནཾ གནྟྭཱ ཝཱཏམིགསྶ ཙརཎཊྛཱནེ ཏིཎཱནི མདྷུནཱ ¶ མཀྑེཏྭཱ ནིལཱིཡི. མིགོ ཨཱགནྟྭཱ མདྷུམཀྑིཏཱནི ཏིཎཱནི ཁཱདིཏྭཱ རསཏཎྷཱཡ བདྡྷོ ཨཉྙཏྲ ཨགནྟྭཱ ཨུཡྻཱནམེཝ ཨཱགཙྪཏི. ཨུཡྻཱནཔཱལོ ཏསྶ མདྷུམཀྑིཏཏིཎེསུ པལུདྡྷབྷཱཝཾ ཉཏྭཱ ཨནུཀྐམེན ཨཏྟཱནཾ དསྶེསི. སོ ཏཾ དིསྭཱ ཀཏིཔཱཧཾ པལཱཡིཏྭཱ པུནཔྤུནཾ པསྶནྟོ ཝིསྶཱསཾ ཨཱཔཛྫིཏྭཱ ཨནུཀྐམེན ཨུཡྻཱནཔཱལསྶ ཧཏྠེ ཋིཏཏིཎཱནི ཁཱདིཏུཾ ཨཱརབྷི.

སོ ཏསྶ ཝིསྶཱསཾ ཨཱཔནྣབྷཱཝཾ ཉཏྭཱ ཡཱཝ རཱཛནིཝེསནཱ ཝཱིཐིཾ ཀིལཉྫེཧི པརིཀྑིཔིཏྭཱ ཏཧིཾ ཏཧིཾ སཱཁཱབྷངྒཾ པཱཏེཏྭཱ མདྷུལཱབུཀཾ ཨཾསེ ལགྒེཏྭཱ ཏིཎཀལཱཔཾ ཨུཔཀཙྪཀེ ཋཔེཏྭཱ མདྷུམཀྑིཏཱནི ཏིཎཱནི མིགསྶ པུརཏོ པུརཏོ ཝིཀིརནྟོ ཨནྟོརཱཛནིཝེསནཾཡེཝ ཨགམཱསི. མིགེ ཨནྟོ པཝིཊྛེ དྭཱརཾ པིདཧིཾསུ. མིགོ མནུསྶེ དིསྭཱ ཀམྤམཱནོ མརཎབྷཡཏཛྫིཏོ ཨནྟོནིཝེསནངྒཎེ ཨཱདྷཱཝཏི པརིདྷཱཝཏི. རཱཛཱ པཱསཱདཱ ཨོརུཡ྄ཧ ཏཾ ཀམྤམཱནཾ དིསྭཱ ‘‘ཝཱཏམིགོ ནཱམ མནུསྶཱནཾ དིཊྛཊྛཱནཾ སཏྟཱཧཾ ན གཙྪཏི, ཏཛྫིཏཊྛཱནཾ ¶ ཡཱཝཛཱིཝཾ ན གཙྪཏི, སོ ཨེཝརཱུཔོ གཧནནིསྶིཏོ ཝཱཏམིགོ རསཏཎྷཱཡ བདྡྷོ ཨིདཱནི ཨེཝརཱུཔཾ ཋཱནཾ ཨཱགཏོ, ནཏྠི ཝཏ བྷོ ལོཀེ རསཏཎྷཱཡ པཱཔཏརཾ ནཱམཱ’’ཏི ཨིམཱཡ གཱཐཱཡ དྷམྨདེསནཾ པཊྛཔེསི –

༡༤.

‘‘ན ཀིརཏྠི རསེཧི པཱཔིཡོ, ཨཱཝཱསེཧིཝ སནྠཝེཧི ཝཱ;

ཝཱཏམིགཾ གཧནནིསྶིཏཾ, ཝསམཱནེསི རསེཧི སཉྫཡོ’’ཏི.

ཏཏྠ ཀིརཱཏི ཨནུསྶཝནཏྠེ ནིཔཱཏོ. རསེཧཱིཏི ཛིཝ྄ཧཱཝིཉྙེཡྻེཧི མདྷུརམྦིལཱདཱིཧི. པཱཔིཡོཏི པཱཔཏརོ. ཨཱཝཱསེཧིཝ སནྠཝེཧི ཝཱཏི ནིབདྡྷཝསནཊྛཱནསངྑཱཏེསུ ཧི ཨཱཝཱསེསུཔི མིཏྟསནྠཝེསུཔི ཚནྡརཱགོ པཱཔཀོཝ, ཏེཧི པན སཙྪནྡརཱགཔརིབྷོགེཧི ཨཱཝཱསེཧི ཝཱ མིཏྟསནྠཝེཧི ¶ ཝཱ སཏགུཎེན ཙ སཧསྶགུཎེན ཙ སཏསཧསྶགུཎེན ཙ དྷུཝཔཊིསེཝནཊྛེན ཨཱཧཱརཾ ཝིནཱ ཛཱིཝིཏིནྡྲིཡཔཱལནཱཡ ཨབྷཱཝེན ཙ སཙྪནྡརཱགཔརིབྷོགརསཱཝ པཱཔཏརཱཏི. བོདྷིསཏྟོ པན ཨནུསྶཝཱགཏཾ ¶ ཝིཡ ཨིམམཏྠཾ ཀཏྭཱ ‘‘ན ཀིརཏྠི རསེཧི པཱཔིཡོ, ཨཱཝཱསེཧིཝ སནྠཝེཧི ཝཱ’’ཏི ཨཱཧ. ཨིདཱནི ཏེསཾ པཱཔིཡབྷཱཝཾ དསྶེནྟོ ‘‘ཝཱཏམིག’’ནྟིཨཱདིམཱཧ. ཏཏྠ གཧནནིསྶིཏནྟི གཧནཊྛཱནནིསྶིཏཾ. ཨིདཾ ཝུཏྟཾ ཧོཏི – པསྶཐ རསཱནཾ པཱཔིཡབྷཱཝཾ, ཨིདཾ ནཱམ ཨརཉྙཱཡཏནེ གཧནནིསྶིཏཾ ཝཱཏམིགཾ སཉྫཡོ ཨུཡྻཱནཔཱལོ མདྷུརསེཧི ཨཏྟནོ ཝསཾ ཨཱནེསི, སབྦཐཱཔི སཙྪནྡརཱགཔརིབྷོགེཧི རསེཧི ནཱམ ཨཉྙཾ པཱཔཏརཾ ལཱམཀཏརཾ ནཏྠཱིཏི རསཏཎྷཱཡ ཨཱདཱིནཝཾ ཀཐེསི. ཀཐེཏྭཱ ཙ པན ཏཾ མིགཾ ཨརཉྙམེཝ པེསེསི.

སཏྠཱཔི ‘‘ན, བྷིཀྑཝེ, སཱ ཝཎྞདཱསཱི ཨིདཱནེཝ ཨེཏཾ རསཏཎྷཱཡ བནྡྷིཏྭཱ ཨཏྟནོ ཝསེ ཀརོཏི, པུབྦེཔི ཨཀཱསིཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི. ‘‘ཏདཱ སཉྫཡོ ཨཡཾ ཝཎྞདཱསཱི ཨཧོསི, ཝཱཏམིགོ ཙཱུལ༹པིཎྜཔཱཏིཀོ, བཱརཱཎསིརཱཛཱ པན ཨཧམེཝ ཨཧོསི’’ནྟི.

ཝཱཏམིགཛཱཏཀཝཎྞནཱ ཙཏུཏྠཱ.

[༡༥] ༥. ཁརཱདིཡཛཱཏཀཝཎྞནཱ

ཨཊྛཀྑུརཾ ¶ ཁརཱདིཡེཏི ཨིདཾ སཏྠཱ ཛེཏཝནེ ཝིཧརནྟོ ཨཉྙཏརཾ དུབྦཙབྷིཀྑུཾ ཨཱརབྦྷ ཀཐེསི. སོ ཀིར བྷིཀྑུ དུབྦཙོ ཨོཝཱདཾ ན གཎྷཱཏི. ཨཐ ནཾ སཏྠཱ པུཙྪི ‘‘སཙྩཾ ཀིར ཏྭཾ བྷིཀྑུ དུབྦཙོ ཨོཝཱདཾ ན གཎྷཱསཱི’’ཏི? ‘‘སཙྩཾ བྷགཝཱ’’ཏི. སཏྠཱ ‘‘པུབྦེཔི ཏྭཾ དུབྦཙཏཱཡ པཎྜིཏཱནཾ ཨོཝཱདཾ ཨགྒཧེཏྭཱ པཱསེན བདྡྷོ ཛཱིཝིཏཀྑཡཾ པཏྟོ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ མིགོ ཧུཏྭཱ མིགགཎཔརིཝུཏོ ཨརཉྙེ ཝསཏི. ཨཐསྶ བྷགིནིམིགཱི པུཏྟཀཾ དསྶེཏྭཱ ‘‘བྷཱཏིཀ, ཨཡཾ ཏེ བྷཱགིནེཡྻོ, ཨེཏཾ མིགམཱཡཾ ཨུགྒཎྷཱཔེཧཱི’’ཏི པཊིཙྪཱཔེསི. སོ ཏཾ བྷཱགིནེཡྻཾ ‘‘ཨསུཀཝེལཱཡ ནཱམ ཨཱགནྟྭཱ ཨུགྒཎྷཱཧཱི’’ཏི ཨཱཧ. སོ ཝུཏྟཝེལཱཡ ནཱགཙྪཏི. ཡཐཱ ¶ ཙ ཨེཀདིཝསཾ, ཨེཝཾ སཏྟ དིཝསེ སཏྟོཝཱདེ ཨཏིཀྐནྟོ སོ མིགམཱཡཾ ཨནུགྒཎྷིཏྭཱཝ ཝིཙརནྟོ པཱསེ བཛ྄ཛྷི. མཱཏཱཔིསྶ བྷཱཏརཾ ཨུཔསངྐམིཏྭཱ ‘‘ཀིཾ ཏེ, བྷཱཏིཀ, བྷཱགིནེཡྻོ མིགམཱཡཾ ཨུགྒཎྷཱཔིཏོ’’ཏི པུཙྪི. བོདྷིསཏྟོ ཙ ‘‘ཏསྶ ཨནོཝཱདཀསྶ མཱ ཙིནྟཡི, ན ¶ ཏེ པུཏྟེན མིགམཱཡཱ ཨུགྒཧིཏཱ’’ཏི ཝཏྭཱ ཨིདཱནིཔི ཏཾ ཨནོཝདིཏུཀཱམོཝ ཧུཏྭཱ ཨིམཾ གཱཐམཱཧ –

༡༥.

‘‘ཨཊྛཀྑུརཾ ཁརཱདིཡེ, མིགཾ ཝངྐཱཏིཝངྐིནཾ;

སཏྟཧི ཀཱལཱཏིཀྐནྟཾ, ན ནཾ ཨོཝདིཏུསྶཧེ’’ཏི.

ཏཏྠ ཨཊྛཀྑུརནྟི ཨེཀེཀསྨིཾ པཱདེ དྭིནྣཾ དྭིནྣཾ ཝསེན ཨཊྛཀྑུརཾ. ཁརཱདིཡེཏི ཏཾ ནཱམེན ཨཱལཔཏི. མིགནྟི སབྦསངྒཱཧིཀཝཙནཾ. ཝངྐཱཏིཝངྐིནནྟི མཱུལེ ཝངྐཱནི, ཨགྒེ ཨཏིཝངྐཱནཱིཏི ཝངྐཱཏིཝངྐཱནི, ཏཱདིསཱནི སིངྒཱནི ཨསྶ ཨཏྠཱིཏི ཝངྐཱཏིཝངྐཱི, ཏཾ ཝངྐཱཏིཝངྐིནཾ. སཏྟཧི ཀཱལཱཏིཀྐནྟནྟི སཏྟཧི ཨོཝཱདཀཱལེཧི ཨོཝཱདཾ ཨཏིཀྐནྟཾ. ན ནཾ ཨོཝདིཏུསྶཧེཏི ཨེཏཾ དུབྦཙམིགཾ ཨཧཾ ཨོཝདིཏུཾ ན ཨུསྶཧཱམི, ཨེཏསྶ མེ ཨོཝཱདཏྠཱཡ ཙིཏྟམྤི ན ཨུཔྤཛྫཏཱིཏི དསྶེཏི. ཨཐ ནཾ དུབྦཙམིགཾ པཱསེ བདྡྷཾ ལུདྡོ མཱརེཏྭཱ མཾསཾ ཨཱདཱཡ པཀྐཱམི.

སཏྠཱཔི ¶ ‘‘ན ཏྭཾ བྷིཀྑུ ཨིདཱནེཝ དུབྦཙོ, པུབྦེཔི དུབྦཙོཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི. ‘‘ཏདཱ བྷཱགིནེཡྻོ མིགོ དུབྦཙབྷིཀྑུ ཨཧོསི, བྷགིནཱི ཨུཔྤལཝཎྞཱ, ཨོཝཱདམིགོ པན ཨཧམེཝ ཨཧོསི’’ནྟི.

ཁརཱདིཡཛཱཏཀཝཎྞནཱ པཉྩམཱ.

[༡༦] ༦. ཏིཔལླཏྠམིགཛཱཏཀཝཎྞནཱ

མིགཾ ¶ ཏིཔལླཏྠནྟི ཨིདཾ སཏྠཱ ཀོསམྦིཡཾ བདརིཀཱརཱམེ ཝིཧརནྟོ སིཀྑཱཀཱམཾ རཱཧུལཏྠེརཾ ཨཱརབྦྷ ཀཐེསི. ཨེཀསྨིཉྷི ཀཱལེ སཏྠརི ཨཱལ༹ཝིནགརཾ ཨུཔནིསྶཱཡ ཨགྒཱལ༹ཝེ ཙེཏིཡེ ཝིཧརནྟེ བཧཱུ ཨུཔཱསཀཱ ཨུཔཱསིཀཱ བྷིཀྑཱུ བྷིཀྑུནིཡོ ཙ ཝིཧཱརཾ དྷམྨསྶཝནཏྠཱཡ གཙྪནྟི, དིཝཱ དྷམྨསྶཝནཾ ཧོཏི. གཙྪནྟེ པན ཀཱལེ ཨུཔཱསིཀཱཡོ བྷིཀྑུནིཡོ ཙ ན གཙྪིཾསུ, བྷིཀྑཱུ ཙེཝ ཨུཔཱསཀཱ ཙ ཨཧེསུཾ. ཏཏོ པཊྛཱཡ རཏྟིཾ དྷམྨསྶཝནཾ ཛཱཏཾ. དྷམྨསྶཝནཔརིཡོསཱནེ ཐེརཱ བྷིཀྑཱུ ཨཏྟནོ ཨཏྟནོ ཝསནཊྛཱནཱནི གཙྪནྟི. དཧརཱ སཱམཎེརཱ ཙ ཨུཔཱསཀེཧི སདྡྷིཾ ཨུཔཊྛཱནསཱལཱཡཾ སཡནྟི. ཏེསུ ནིདྡཾ ཨུཔགཏེསུ ཨེཀཙྩེ གྷུརུགྷུརུཔསྶཱསཱ ཀཱཀཙྪམཱནཱ དནྟེ ཁཱདནྟཱ ནིཔཛྫིཾསུ, ཨེཀཙྩེ ¶ མུཧུཏྟཾ ནིདྡཱཡིཏྭཱ ཨུཊྛཧིཾསུ. ཏེ ཏཾ ཝིཔྤཀཱརཾ དིསྭཱ བྷགཝཏོ ཨཱརོཙེསུཾ. བྷགཝཱ ‘‘ཡོ པན བྷིཀྑུ ཨནུཔསམྤནྣེན སཧསེཡྻཾ ཀཔྤེཡྻ པཱཙིཏྟིཡ’’ནྟི (པཱཙི. ༤༩) སིཀྑཱཔདཾ པཉྙཔེཏྭཱ ཀོསམྦིཾ ཨགམཱསི.

ཏཏྠ བྷིཀྑཱུ ཨཱཡསྨནྟཾ རཱཧུལཾ ཨཱཧཾསུ – ‘‘ཨཱཝུསོ རཱཧུལ, བྷགཝཏཱ སིཀྑཱཔདཾ པཉྙཏྟཾ, ཨིདཱནི ཏྭཾ ཨཏྟནོ ཝསནཊྛཱནཾ ཛཱནཱཧཱི’’ཏི. པུབྦེ པན ཏེ བྷིཀྑཱུ བྷགཝཏི ཙ གཱརཝཾ ཏསྶ ཙཱཡསྨཏོ སིཀྑཱཀཱམཏཾ པཊིཙྩ ཏཾ ཨཏྟནོ ཝསནཊྛཱནཾ ཨཱགཏཾ ཨཏིཝིཡ སངྒཎྷནྟི, ཁུདྡཀམཉྩཀཾ པཉྙཔེཏྭཱ ཨུསྶཱིསཀཀརཎཏྠཱཡ ཙཱིཝརཾ དེནྟི. ཏཾ དིཝསཾ པན སིཀྑཱཔདབྷཡེན ཝསནཊྛཱནམྤི ན ཨདཾསུ. རཱཧུལབྷདྡོཔི ‘‘པིཏཱ མེ’’ཏི དསབལསྶ ཝཱ, ‘‘ཨུཔཛ྄ཛྷཱཡོ མེ’’ཏི དྷམྨསེནཱཔཏིནོ ཝཱ, ‘‘ཨཱཙརིཡོ མེ’’ཏི མཧཱམོགྒལླཱནསྶ ཝཱ, ‘‘ཙཱུལ༹པིཏཱ མེ’’ཏི ཨཱནནྡཏྠེརསྶ ཝཱ སནྟིཀཾ ཨགནྟྭཱ དསབལསྶ ཝལ༹ཉྫནཝཙྩཀུཊིཾ བྲཧྨཝིམཱནཾ པཝིསནྟོ ཝིཡ པཝིསིཏྭཱ ཝཱསཾ ཀཔྤེསི. བུདྡྷཱནཉྷི ཝལ༹ཉྫནཀུཊིཡཾ དྭཱརཾ སུཔིཧིཏཾ ཧོཏི, གནྡྷཔརིབྷཎྜཀཏཱ བྷཱུམི, གནྡྷདཱམམཱལཱདཱམཱནི ཨོསཱརིཏཱནེཝ ཧོནྟི, སབྦརཏྟིཾ དཱིཔོ ཛྷཱཡཏི. རཱཧུལབྷདྡོ པན ན ཏསྶཱ ཀུཊིཡཱ ཨིམཾ སམྤཏྟིཾ པཊིཙྩ ཏཏྠ ཝཱསཾ ཨུཔགཏོ, བྷིཀྑཱུཧི པན ‘‘ཝསནཊྛཱནཾ ཛཱནཱཧཱི’’ཏི ཝུཏྟཏྟཱ ཨོཝཱདགཱརཝེན སིཀྑཱཀཱམཏཱཡ ¶ ཏཏྠ ཝཱསཾ ཨུཔགཏོ. ཨནྟརནྟརཱ ཧི བྷིཀྑཱུ ཏཾ ཨཱཡསྨནྟཾ དཱུརཏོཝ ཨཱགཙྪནྟཾ དིསྭཱ ཏསྶ ཝཱིམཾསནཏྠཱཡ མུཊྛིསམྨཛྫནིཾ ཝཱ ཀཙཝརཚཌྜནཀཾ ཝཱ བཧི ཁིཔིཏྭཱ ཏསྨིཾ ཨཱགཏེ ¶ ‘‘ཨཱཝུསོ, ཨིམཾ ཀེན ཚཌྜིཏ’’ནྟི ཝདནྟི. ཏཏྠ ཀེཧིཙི ‘‘རཱཧུལོ ཨིམིནཱ མགྒེན གཏོ’’ཏི ཝུཏྟེ སོ ཨཱཡསྨཱ ‘‘ནཱཧཾ, བྷནྟེ, ཨེཏཾ ཛཱནཱམཱི’’ཏི ཨཝཏྭཱཝ ཏཾ པཊིསཱམེཏྭཱ ‘‘ཁམཐ མེ, བྷནྟེ’’ཏི ཁམཱཔེཏྭཱ གཙྪཏི. ཨེཝམེས སིཀྑཱཀཱམོ.

སོ ཏཾ སིཀྑཱཀཱམཏཾཡེཝ པཊིཙྩ ཏཏྠ ཝཱསཾ ཨུཔགཏོ. ཨཐ སཏྠཱ པུརེཨརུཎཾཡེཝ ཝཙྩཀུཊིདྭཱརེ ཋཏྭཱ ཨུཀྐཱསི, སོཔཱཡསྨཱ ཨུཀྐཱསི. ‘‘ཀོ ཨེསོ’’ཏི? ‘‘ཨཧཾ རཱཧུལོ’’ཏི ནིཀྑམིཏྭཱ ཝནྡི. ‘‘ཀསྨཱ ཏྭཾ རཱཧུལ ཨིདྷ ནིཔནྣོསཱི’’ཏི? ‘‘ཝསནཊྛཱནསྶ ཨབྷཱཝཏོ’’. ‘‘པུབྦེ ཧི, བྷནྟེ, བྷིཀྑཱུ མམ སངྒཧཾ ཀརོནྟི, ཨིདཱནི ཨཏྟནོ ཨཱཔཏྟིབྷཡེན ཝསནཊྛཱནཾ ¶ ན དེནྟི, སྭཱཧཾ ‘ཨིདཾ ཨཉྙེསཾ ཨསངྒྷཊྚནཊྛཱན’ནྟི ཨིམིནཱ ཀཱརཎེན ཨིདྷ ནིཔནྣོསྨཱིཏི. ཨཐ བྷགཝཏོ ‘‘རཱཧུལཾ ཏཱཝ བྷིཀྑཱུ ཨེཝཾ པརིཙྩཛནྟི, ཨཉྙེ ཀུལདཱརཀེ པབྦཱཛེཏྭཱ ཀིཾ ཀརིསྶནྟཱི’’ཏི དྷམྨསཾཝེགོ ཨུདཔཱདི.

ཨཐ བྷགཝཱ པཱཏོཝ བྷིཀྑཱུ སནྣིཔཱཏཱཔེཏྭཱ དྷམྨསེནཱཔཏིཾ པུཙྪི ‘‘ཛཱནཱསི པན ཏྭཾ, སཱརིཔུཏྟ, ཨཛྫ ཀཏྠཙི རཱཧུལསྶ ཝུཏྠབྷཱཝ’’ནྟི? ‘‘ན ཛཱནཱམི, བྷནྟེ’’ཏི. ‘‘སཱརིཔུཏྟ, ཨཛྫ རཱཧུལོ ཝཙྩཀུཊིཡཾ ཝསི, སཱརིཔུཏྟ, ཏུམྷེ རཱཧུལཾ ཨེཝཾ པརིཙྩཛནྟཱ ཨཉྙེ ཀུལདཱརཀེ པབྦཱཛེཏྭཱ ཀིཾ ཀརིསྶཐ? ཨེཝཉྷི སནྟེ ཨིམསྨིཾ སཱསནེ པབྦཛིཏཱ ན པཏིཊྛཱ བྷཝིསྶནྟི, ཨིཏོ དཱནི པཊྛཱཡ ཨནུཔསམྤནྣེན ཨེཀཾ དྭེ དིཝསེ ཨཏྟནོ སནྟིཀེ ཝསཱཔེཏྭཱ ཏཏིཡདིཝསེ ཏེསཾ ཝསནཊྛཱནཾ ཉཏྭཱ བཧི ཝཱསེཐཱ’’ཏི ཨིམཾ ཨནུཔཉྙཏྟིཾ ཀཏྭཱ པུན སིཀྑཱཔདཾ པཉྙཔེསི.

ཏསྨིཾ སམཡེ དྷམྨསབྷཱཡཾ སནྣིསིནྣཱ བྷིཀྑཱུ རཱཧུལསྶ གུཎཀཐཾ ཀཐེནྟི ‘‘པསྶཐཱཝུསོ, ཡཱཝ སིཀྑཱཀཱམོ ཝཏཱཡཾ རཱཧུལོ, ‘ཏཝ ཝསནཊྛཱནཾ ཛཱནཱཧཱི’ཏི ཝུཏྟོ ནཱམ ‘ཨཧཾ དསབལསྶ པུཏྟོ, ཏུམྷཱཀཾ སེནཱསནསྨཱ ཏུམྷེཡེཝ ནིཀྑམཐཱ’ཏི ཨེཀཾ བྷིཀྑུམྤི ཨཔྤཊིཔྥརིཏྭཱ ཝཙྩཀུཊིཡཾ ཝཱསཾ ཀཔྤེསཱི’’ཏི. ཨེཝཾ ཏེསུ ཀཐཡམཱནེསུ སཏྠཱ དྷམྨསབྷཾ གནྟྭཱ ཨལངྐཏཱསནེ ནིསཱིདིཏྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི ཨཱཧ. ‘‘བྷནྟེ, རཱཧུལསྶ སིཀྑཱཀཱམཀཐཱཡ, ན ཨཉྙཱཡ ཀཐཱཡཱ’’ཏི. སཏྠཱ ‘‘ན, བྷིཀྑཝེ, རཱཧུལོ ཨིདཱནེཝ སིཀྑཱཀཱམོ, པུབྦེ ཏིརཙྪཱནཡོནིཡཾ ནིབྦཏྟོཔི སིཀྑཱཀཱམོཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ ¶ རཱཛགཧེ ཨེཀོ མགདྷརཱཛཱ རཛྫཾ ཀཱརེསི. ཏདཱ བོདྷིསཏྟོ མིགཡོནིཡཾ ནིབྦཏྟིཏྭཱ མིགགཎཔརིཝུཏོ ཨརཉྙེ ཝསཏི. ཨཐསྶ བྷགིནཱི ཨཏྟནོ པུཏྟཀཾ ཨུཔནེཏྭཱ ‘‘བྷཱཏིཀ, ཨིམཾ ཏེ བྷཱགིནེཡྻཾ མིགམཱཡཾ སིཀྑཱཔེཧཱི’’ཏི ཨཱཧ. བོདྷིསཏྟོ ‘‘སཱདྷཱུ’’ཏི པཊིསྶུཎིཏྭཱ ‘‘གཙྪ, ཏཱཏ, ཨསུཀཝེལཱཡ ནཱམ ཨཱགནྟྭཱ སིཀྑེཡྻཱསཱི’’ཏི ཨཱཧ. སོ མཱཏུལེན ཝུཏྟཝེལཾ ཨནཏིཀྐམིཏྭཱ ཏཾ ཨུཔསངྐམིཏྭཱ མིགམཱཡཾ སིཀྑི. སོ ཨེཀདིཝསཾ ཝནེ ཝིཙརནྟོ པཱསེན བདྡྷོ བདྡྷརཝཾ རཝི, མིགགཎོ པལཱཡིཏྭཱ ‘‘པུཏྟོ ཏེ པཱསེན བདྡྷོ’’ཏི ཏསྶ མཱཏུཡཱ ཨཱརོཙེསི. སཱ བྷཱཏུ སནྟིཀཾ གནྟྭཱ ‘‘བྷཱཏིཀ, བྷཱགིནེཡྻོ ཏེ མིགམཱཡཾ སིཀྑཱཔིཏོ’’ཏི པུཙྪི. བོདྷིསཏྟོ ‘‘མཱ ཏྭཾ པུཏྟསྶ ¶ ཀིཉྩི པཱཔཀཾ ཨཱསངྐི, སུགྒཧིཏཱ ཏེན མིགམཱཡཱ, ཨིདཱནི ཏཾ ཧཱསཡམཱནོ ཨཱགཙྪིསྶཏཱི’’ཏི ཝཏྭཱ ཨིམཾ གཱཐམཱཧ –

༡༦.

‘‘མིགཾ ཏིཔལླཏྠམནེཀམཱཡཾ, ཨཊྛཀྑུརཾ ཨཌྜྷརཏྟཱཔཔཱཡིཾ;

ཨེཀེན སོཏེན ཚམཱསྶསནྟོ, ཚཧི ཀལཱཧིཏིབྷོཏི བྷཱགིནེཡྻོ’’ཏི.

ཏཏྠ མིགནྟི བྷཱགིནེཡྻམིགཾ. ཏིཔལླཏྠནྟི པལླཏྠཾ ཝུཙྩཏི སཡནཾ, ཨུབྷོཧི པསྶེཧི ཨུཛུཀམེཝ ཙ ནིཔནྣཀཝསེནཱཏི ཏཱིཧཱཀཱརེཧི པལླཏྠཾ ཨསྶ, ཏཱིཎི ཝཱ པལླཏྠཱནི ཨསྶཱཏི ཏིཔལླཏྠོ, ཏཾ ཏིཔལླཏྠཾ. ཨནེཀམཱཡནྟི བཧུམཱཡཾ བཧུཝཉྩནཾ. ཨཊྛཀྑུརནྟི ཨེཀེཀསྨིཾ པཱདེ དྭིནྣཾ དྭིནྣཾ ཝསེན ཨཊྛཧི ཁུརེཧི སམནྣཱགཏཾ. ཨཌྜྷརཏྟཱཔཔཱཡིནྟི པུརིམཡཱམཾ ཨཏིཀྐམིཏྭཱ མཛ྄ཛྷིམཡཱམེ ཨརཉྙཏོ ཨཱགམྨ པཱནཱིཡསྶ པིཝནཏོ ཨཌྜྷརཏྟེ ཨཱཔཾ པིཝཏཱིཏི ཨཌྜྷརཏྟཱཔཔཱཡཱི. ཏཾ ཨཌྜྷརཏྟེ ཨཔཱཡིནྟི ཨཏྠོ. མམ བྷཱགིནེཡྻཾ མིགཾ ཨཧཾ སཱདྷུཀཾ མིགམཱཡཾ ཨུགྒཎྷཱཔེསིཾ. ཀཐཾ? ཡཐཱ ཨེཀེན སོཏེན ཚམཱསྶསནྟོ, ཚཧི ཀལཱཧིཏིབྷོཏི བྷཱགིནེཡྻོཏི. ཨིདཾ ཝུཏྟཾ ཧོཏི – ཨཧཉྷི ཏཝ པུཏྟཾ ཏཐཱ ཨུགྒཎྷཱཔེསིཾ, ཡཐཱ ཨེཀསྨིཾ ཨུཔརིམནཱསིཀཱསོཏེ ཝཱཏཾ སནྣིརུམྦྷིཏྭཱ པཐཝིཡཱ ཨལླཱིནེན ཨེཀེན ཧེཊྛིམསོཏེན ཏཏྠེཝ ཚམཱཡཾ ཨསྶསནྟོ ཚཧི ཀལཱཧི ¶ ལུདྡཀཾ ཨཏིབྷོཏི, ཚཧི ཀོཊྛཱསེཧི ཨཛ྄ཛྷོཏྠརཏི ཝཉྩེཏཱིཏི ཨཏྠོ. ཀཏམཱཧི ཚཧི? ཙཏྟཱརོ པཱདེ པསཱརེཏྭཱ ཨེཀེན པསྶེན སེཡྻཱཡ, ཁུརེཧི ཏིཎཔཾསུཁཎནེན, ཛིཝ྄ཧཱནིནྣཱམནེན ཨུདརསྶ ཨུདྡྷུམཱཏབྷཱཝཀརཎེན, ཨུཙྩཱརཔསྶཱཝཝིསྶཛྫནེན, ཝཱཏསནྣིརུམྦྷནེནཱཏི.

ཨཔརོ ¶ ནཡོ – པཱདེན པཾསུཾ གཧེཏྭཱ ཨབྷིམུཁཱཀཌྜྷནེན, པཊིཔཎཱམནེན, ཨུབྷོསུ པསྶེསུ སཉྩརཎེན, ཨུདརཾ ཨུདྡྷཾ པཀྑིཔནེན, ཨདྷོ ཨཝཀྑིཔནེནཱཏི ཨིམཱཧི ཚཧི ཀལཱཧི ཡཐཱ ཨཏིབྷོཏི, ‘‘མཏོ ཨཡ’’ནྟི སཉྙཾ ཨུཔྤཱདེཏྭཱ ཝཉྩེཏི, ཨེཝཾ ཏཾ མིགམཱཡཾ ཨུགྒཎྷཱཔེསིནྟི དཱིཔེཏི.

ཨཔརོ ནཡོ – ཏཐཱ ནཾ ཨུགྒཎྷཱཔེསིཾ, ཡཐཱ ཨེཀེན སོཏེན ཚམཱསྶསནྟོ ཚཧི ཀལཱཧིཏི དྭཱིསུཔི ནཡེསུ དསྶིཏེཧི ཚཧི ཀཱརཎེཧི ཀལཱཧིཏི ཀལཱཡིསྶཏི, ལུདྡཾ ཝཉྩེསྶཏཱིཏི ¶ ཨཏྠོ. བྷོཏཱིཏི བྷགིནིཾ ཨཱལཔཏི. བྷཱགིནེཡྻོཏི ཨེཝཾ ཚཧི ཀཱརཎེཧི ཝཉྩནཀཾ བྷཱགིནེཡྻཾ ནིདྡིསཏི. ཨེཝཾ བོདྷིསཏྟོ བྷཱགིནེཡྻསྶ མིགམཱཡཱཡ སཱདྷུཀཾ ཨུགྒཧིཏབྷཱཝཾ དསྶེནྟོ བྷགིནིཾ སམསྶཱསེཏི.

སོཔི མིགཔོཏཀོ པཱསེ བདྡྷོ ཨཝིཔྥནྡིཏྭཱཡེཝ བྷཱུམིཡཾ མཧཱཕཱསུཀཔསྶེན པཱདེ པསཱརེཏྭཱ ནིཔནྣོ པཱདཱནཾ ཨཱསནྣཊྛཱནེ ཁུརེཧེཝ པཧརིཏྭཱ པཾསུཉྩ ཏིཎཱནི ཙ ཨུཔྤཱཊེཏྭཱ ཨུཙྩཱརཔསྶཱཝཾ ཝིསྶཛྫེཏྭཱ སཱིསཾ པཱཏེཏྭཱ ཛིཝ྄ཧཾ ནིནྣཱམེཏྭཱ སརཱིརཾ ཁེལ༹ཀིལིནྣཾ ཀཏྭཱ ཝཱཏགྒཧཎེན ཨུདརཾ ཨུདྡྷུམཱཏཀཾ ཀཏྭཱ ཨཀྑཱིནི པརིཝཏྟེཏྭཱ ཧེཊྛཱ ནཱསིཀཱསོཏེན ཝཱཏཾ སཉྩརཱཔེནྟོ ཨུཔརིམནཱསིཀཱསོཏེན ཝཱཏཾ སནྣིརུམྦྷིཏྭཱ སཀལསརཱིརཾ ཐདྡྷབྷཱཝཾ གཱཧཱཔེཏྭཱ མཏཱཀཱརཾ དསྶེསི. ནཱིལམཀྑིཀཱཔི ནཾ སམྤརིཝཱརེསུཾ, ཏསྨིཾ ཏསྨིཾ ཋཱནེ ཀཱཀཱ ནིལཱིཡིཾསུ. ལུདྡོ ཨཱགནྟྭཱ ཨུདརཾ ཧཏྠེན པཧརིཏྭཱ ‘‘ཨཏིཔཱཏོཝ བདྡྷོ བྷཝིསྶཏི, པཱུཏིཀོ ཛཱཏོ’’ཏི ཏསྶ བནྡྷནརཛྫུཀཾ མོཙེཏྭཱ ‘‘ཨེཏྠེཝདཱནི ནཾ ཨུཀྐནྟིཏྭཱ མཾསཾ ཨཱདཱཡ གམིསྶཱམཱི’’ཏི ནིརཱསངྐོ ཧུཏྭཱ སཱཁཱཔལཱསཾ གཧེཏུཾ ཨཱརདྡྷོ. མིགཔོཏཀོཔི ཨུཊྛཱཡ ཙཏཱུཧི པཱདེཧི ཋཏྭཱ ཀཱཡཾ ཝིདྷུནིཏྭཱ གཱིཝཾ པསཱརེཏྭཱ མཧཱཝཱཏེན ཚིནྣཝལཱཧཀོ ཝིཡ ཝེགེན མཱཏུ སནྟིཀཾ ཨགམཱསི.

སཏྠཱཔི ¶ ‘‘ན, བྷིཀྑཝེ, རཱཧུལོ ཨིདཱནེཝ སིཀྑཱཀཱམོ, པུབྦེཔི སིཀྑཱཀཱམོཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ བྷཱགིནེཡྻམིགཔོཏཀོ རཱཧུལོ ཨཧོསི, མཱཏཱ ཨུཔྤལཝཎྞཱ, མཱཏུལམིགོ པན ཨཧམེཝ ཨཧོསི’’ནྟི.

ཏིཔལླཏྠམིགཛཱཏཀཝཎྞནཱ ཚཊྛཱ.

[༡༧] ༧. མཱལུཏཛཱཏཀཝཎྞནཱ

ཀཱལེ༹ ¶ ཝཱ ཡདི ཝཱ ཛུཎྷེཏི ཨིདཾ སཏྠཱ ཛེཏཝནེ ཝིཧརནྟོ དྭེ ཝུཌྜྷཔབྦཛིཏེ ཨཱརབྦྷ ཀཐེསི. ཏེ ཀིར ཀོསལཛནཔདེ ¶ ཨེཀསྨིཾ ཨརཉྙཱཝཱསེ ཝསནྟི. ཨེཀོ ཀཱལ༹ཏྠེརོ ནཱམ, ཨེཀོ ཛུཎྷཏྠེརོ ནཱམ. ཨཐེཀདིཝསཾ ཛུཎྷོ ཀཱལ༹ཾ པུཙྪི ‘‘བྷནྟེ ཀཱལ༹, སཱིཏཾ ནཱམ ཀསྨིཾ ཀཱལེ ཧོཏཱི’’ཏི. སོ ‘‘ཀཱལེ༹ ཧོཏཱི’’ཏི ཨཱཧ. ཨཐེཀདིཝསཾ ཀཱལོ༹ ཛུཎྷཾ པུཙྪི – ‘‘བྷནྟེ ཛུཎྷ, སཱིཏཾ ནཱམ ཀསྨིཾ ཀཱལེ ཧོཏཱི’’ཏི. སོ ‘‘ཛུཎྷེ ཧོཏཱི’’ཏི ཨཱཧ. ཏེ ཨུབྷོཔི ཨཏྟནོ ཀངྑཾ ཚིནྡིཏུཾ ཨསཀྐོནྟཱ སཏྠུ སནྟིཀཾ གནྟྭཱ སཏྠཱརཾ ཝནྡིཏྭཱ ‘‘བྷནྟེ, སཱིཏཾ ནཱམ ཀསྨིཾ ཀཱལེ ཧོཏཱི’’ཏི པུཙྪིཾསུ. སཏྠཱ ཏེསཾ ཀཐཾ སུཏྭཱ ‘‘པུབྦེཔི ཨཧཾ, བྷིཀྑཝེ, ཏུམྷཱཀཾ ཨིམཾ པཉྷཾ ཀཐེསིཾ, བྷཝསངྑེཔགཏཏྟཱ པན ན སལླཀྑཡིཏྠཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ཨེཀསྨིཾ པབྦཏཔཱདེ སཱིཧོ ཙ བྱགྒྷོ ཙ དྭེ སཧཱཡཱ ཨེཀིསྶཱཡེཝ གུཧཱཡ ཝསནྟི. ཏདཱ བོདྷིསཏྟོཔི ཨིསིཔབྦཛྫཾ པབྦཛིཏྭཱ ཏསྨིཾཡེཝ པབྦཏཔཱདེ ཝསཏི. ཨཐེཀདིཝསཾ ཏེསཾ སཧཱཡཀཱནཾ སཱིཏཾ ནིསྶཱཡ ཝིཝཱདོ ཨུདཔཱདི. བྱགྒྷོ ‘‘ཀཱལེ༹ཡེཝ སཱིཏཾ ཧོཏཱི’’ཏི ཨཱཧ. སཱིཧོ ‘‘ཛུཎྷེཡེཝ སཱིཏཾ ཧོཏཱི’’ཏི ཨཱཧ. ཏེ ཨུབྷོཔི ཨཏྟནོ ཀངྑཾ ཚིནྡིཏུཾ ཨསཀྐོནྟཱ བོདྷིསཏྟཾ པུཙྪིཾསུ. བོདྷིསཏྟོ ཨིམཾ གཱཐམཱཧ –

༡༧.

‘‘ཀཱལེ༹ ཝཱ ཡདི ཝཱ ཛུཎྷེ, ཡདཱ ཝཱཡཏི མཱལུཏོ;

ཝཱཏཛཱནི ཧི སཱིཏཱནི, ཨུབྷོཏྠམཔརཱཛིཏཱ’’ཏི.

ཏཏྠ ¶ ཀཱལེ༹ ཝཱ ཡདི ཝཱ ཛུཎྷེཏི ཀཱལ༹པཀྑེ ཝཱ ཛུཎྷཔཀྑེ ཝཱ. ཡདཱ ཝཱཡཏི མཱལུཏོཏི ཡསྨིཾ སམཡེ པུརཏྠིམཱདིབྷེདོ ཝཱཏོ ཝཱཡཏི, ཏསྨིཾ སམཡེ སཱིཏཾ ཧོཏི. ཀིཾཀཱརཎཱ? ཝཱཏཛཱནི ཧི སཱིཏཱནི, ཡསྨཱ ཝཱཏེ ཝིཛྫནྟེཡེཝ སཱིཏཱནི ཧོནྟི, ཀཱལ༹པཀྑོ ཝཱ ཛུཎྷཔཀྑོ ཝཱ ཨེཏྠ ཨཔམཱཎནྟི ཝུཏྟཾ ཧོཏི. ཨུབྷོཏྠམཔརཱཛིཏཱཏི ཨུབྷོཔི ཏུམྷེ ཨིམསྨིཾ པཉྷེ ཨཔརཱཛིཏཱཏི. ཨེཝཾ བོདྷིསཏྟོ ཏེ སཧཱཡཀེ སཉྙཱཔེསི.

སཏྠཱཔི ‘‘བྷིཀྑཝེ, པུབྦེཔི མཡཱ ཏུམྷཱཀཾ ཨཡཾ པཉྷོ ཀཐིཏོ’’ཏི ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེསི, སཙྩཔརིཡོསཱནེ ¶ དྭེཔི ཐེརཱ སོཏཱཔཏྟིཕལེ པཏིཊྛཧིཾསུ. སཏྠཱ ཨནུསནྡྷིཾ ¶ གྷཊེཏྭཱ ཛཱཏཀཾ སམོདྷཱནེསི ‘‘ཏདཱ བྱགྒྷོ ཀཱལོ༹ ཨཧོསི, སཱིཧོ ཛུཎྷོ, པཉྷཝིསྶཛྫནཀཏཱཔསོ པན ཨཧམེཝ ཨཧོསི’’ནྟི.

མཱལུཏཛཱཏཀཝཎྞནཱ སཏྟམཱ.

[༡༨] ༨. མཏཀབྷཏྟཛཱཏཀཝཎྞནཱ

ཨེཝཾ ཙེ སཏྟཱ ཛཱནེཡྻུནྟི ཨིདཾ སཏྠཱ ཛེཏཝནེ ཝིཧརནྟོ མཏཀབྷཏྟཾ ཨཱརབྦྷ ཀཐེསི. ཏསྨིཉྷི ཀཱལེ མནུསྶཱ བཧཱུ ཨཛེལ༹ཀཱདཡོ མཱརེཏྭཱ ཀཱལཀཏེ ཉཱཏཀེ ཨུདྡིསྶ མཏཀབྷཏྟཾ ནཱམ དེནྟི. བྷིཀྑཱུ ཏེ མནུསྶེ ཏཐཱ ཀརོནྟེ དིསྭཱ སཏྠཱརཾ པུཙྪིཾསུ ‘‘ཨེཏརཧི, བྷནྟེ, མནུསྶཱ བཧཱུ པཱཎེ ཛཱིཝིཏཀྑཡཾ པཱཔེཏྭཱ མཏཀབྷཏྟཾ ནཱམ དེནྟི. ཨཏྠི ནུ ཁོ, བྷནྟེ, ཨེཏྠ ཝུཌྜྷཱི’’ཏི? སཏྠཱ ‘‘ན, བྷིཀྑཝེ, ‘མཏཀབྷཏྟཾ དསྶཱམཱ’ཏི ཀཏེཔི པཱཎཱཏིཔཱཏེ ཀཱཙི ཝུཌྜྷི ནཱམ ཨཏྠི, པུབྦེ པཎྜིཏཱ ཨཱཀཱསེ ནིསཛྫ དྷམྨཾ དེསེཏྭཱ ཨེཏྠ ཨཱདཱིནཝཾ ཀཐེཏྭཱ སཀལཛམྦུདཱིཔཝཱསིཀེ ཨེཏཾ ཀམྨཾ ཛཧཱཔེསུཾ. ཨིདཱནི པན བྷཝསངྑེཔགཏཏྟཱ པུན པཱཏུབྷཱུཏ’’ནྟི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ ཨེཀོ ཏིཎྞཾ ཝེདཱནཾ པཱརགཱུ དིསཱཔཱམོཀྑོ ཨཱཙརིཡབྲཱཧྨཎོ ‘‘མཏཀབྷཏྟཾ དསྶཱམཱི’’ཏི ཨེཀཾ ཨེལ༹ཀཾ གཱཧཱཔེཏྭཱ ཨནྟེཝཱསིཀེ ཨཱཧ – ‘‘ཏཱཏཱ, ཨིམཾ ཨེལ༹ཀཾ ནདིཾ ¶ ནེཏྭཱ ནྷཱཔེཏྭཱ ཀཎྛེ མཱལཾ པརིཀྑིཔིཏྭཱ པཉྩངྒུལིཀཾ དཏྭཱ མཎྜེཏྭཱ ཨཱནེཐཱ’’ཏི. ཏེ ‘‘སཱདྷཱུ’’ཏི པཊིསྶུཎིཏྭཱ ཏཾ ཨཱདཱཡ ནདིཾ གནྟྭཱ ནྷཱཔེཏྭཱ མཎྜེཏྭཱ ནདཱིཏཱིརེ ཋཔེསུཾ. སོ ཨེལ༹ཀོ ཨཏྟནོ པུབྦཀམྨཾ དིསྭཱ ‘‘ཨེཝརཱུཔཱ ནཱམ དུཀྑཱ ཨཛྫ མུཙྩིསྶཱམཱི’’ཏི སོམནསྶཛཱཏོ མཏྟིཀཱགྷཊཾ བྷིནྡནྟོ ཝིཡ མཧཱཧསིཏཾ ཧསིཏྭཱ པུན ‘‘ཨཡཾ བྲཱཧྨཎོ མཾ གྷཱཏེཏྭཱ མཡཱ ལདྡྷདུཀྑཾ ལབྷིསྶཏཱི’’ཏི བྲཱཧྨཎེ ཀཱརུཉྙཾ ཨུཔྤཱདེཏྭཱ མཧནྟེན སདྡེན པརོདི.

ཨཐ ནཾ ཏེ མཱཎཝཱ པུཙྪིཾསུ ‘‘སམྨ ཨེལ༹ཀ ¶ , ཏྭཾ མཧཱསདྡེན ཧསི ཙེཝ རོདི ཙ, ཀེན ནུ ཁོ ཀཱརཎེན ཧསི, ཀེན ཀཱརཎེན པརོདཱི’’ཏི? ‘‘ཏུམྷེ མཾ ཨིམཾ ཀཱརཎཾ ཨཏྟནོ ཨཱཙརིཡསྶ སནྟིཀེ པུཙྪེཡྻཱཐཱ’’ཏི. ཏེ ཏཾ ཨཱདཱཡ གནྟྭཱ ཨིདཾ ཀཱརཎཾ ཨཱཙརིཡསྶ ཨཱརོཙེསུཾ. ཨཱཙརིཡོ ཏེསཾ ཝཙནཾ སུཏྭཱ ཨེལ༹ཀཾ པུཙྪི ‘‘ཀསྨཱ ཏྭཾ ཨེལ༹ཀ, ཧསི, ཀསྨཱ རོདཱི’’ཏི? ཨེལ༹ཀོ ཨཏྟནཱ ཀཏཀམྨཾ ཛཱཏིསྶརཉཱཎེན ཨནུསྶརིཏྭཱ བྲཱཧྨཎསྶ ཀཐེསི ‘‘ཨཧཾ, བྲཱཧྨཎ, པུབྦེ ཏཱདིསོཝ མནྟཛ྄ཛྷཱཡཀབྲཱཧྨཎོ ཧུཏྭཱ ‘མཏཀབྷཏྟཾ དསྶཱམཱི’ཏི ཨེཀཾ ཨེལ༹ཀཾ མཱརེཏྭཱ མཏཀབྷཏྟཾ ཨདཱསིཾ, སྭཱཧཾ ཨེཀསྶ ཨེལ༹ཀསྶ གྷཱཏིཏཏྟཱ ཨེཀེནཱུནེསུ པཉྩསུ ཨཏྟབྷཱཝསཏེསུ སཱིསཙྪེདཾ པཱཔུཎིཾ, ཨཡཾ མེ ¶ ཀོཊིཡཾ ཋིཏོ པཉྩསཏིམོ ཨཏྟབྷཱཝོ, སྭཱཧཾ ‘ཨཛྫ ཨེཝརཱུཔཱ དུཀྑཱ མུཙྩིསྶཱམཱི’ཏི སོམནསྶཛཱཏོ ཨིམིནཱ ཀཱརཎེན ཧསིཾ. རོདནྟོ པན ‘ཨཧཾ ཏཱཝ ཨེཀཾ ཨེལ༹ཀཾ མཱརེཏྭཱ པཉྩ ཛཱཏིསཏཱནི སཱིསཙྪེདདུཀྑཾ པཏྭཱ ཨཛྫ ཏམྷཱ དུཀྑཱ མུཙྩིསྶཱམི, ཨཡཾ པན བྲཱཧྨཎོ མཾ མཱརེཏྭཱ ཨཧཾ ཝིཡ པཉྩ ཛཱཏིསཏཱནི སཱིསཙྪེདདུཀྑཾ ལབྷིསྶཏཱི’ཏི ཏཡི ཀཱརུཉྙེན རོདི’’ནྟི. ‘‘ཨེལ༹ཀ, མཱ བྷཱཡི, ནཱཧཾ ཏཾ མཱརེསྶཱམཱི’’ཏི. ‘‘བྲཱཧྨཎ, ཀིཾ ཝདེསི, ཏཡི མཱརེནྟེཔི ཨམཱརེནྟེཔི ན སཀྐཱ ཨཛྫ མཡཱ མརཎཱ མུཙྩིཏུ’’ནྟི. ‘‘ཨེལ༹ཀ, མཱ བྷཱཡི, ཨཧཾ ཏེ ཨཱརཀྑཾ གཧེཏྭཱ ཏཡཱ སདྡྷིཾཡེཝ ཝིཙརིསྶཱམཱི’’ཏི. ‘‘བྲཱཧྨཎ, ཨཔྤམཏྟཀོ ཏཝ ཨཱརཀྑོ, མཡཱ ཀཏཔཱཔཾ པན མཧནྟཾ བལཝ’’ནྟི.

བྲཱཧྨཎོ ཨེལ༹ཀཾ མུཉྩིཏྭཱ ‘‘ཨིམཾ ཨེལ༹ཀཾ ཀསྶཙིཔི མཱརེཏུཾ ན དསྶཱམཱི’’ཏི ཨནྟེཝཱསིཀེ ཨཱདཱཡ ཨེལ༹ཀེནེཝ སདྡྷིཾ ཝིཙརི. ཨེལ༹ཀོ ཝིསྶཊྛམཏྟོཝ ཨེཀཾ པཱསཱཎཔིཊྛིཾ ནིསྶཱཡ ཛཱཏགུམྦེ གཱིཝཾ ཨུཀྑིཔིཏྭཱ པཎྞཱནི ཁཱདིཏུཾ ཨཱརདྡྷོ. ཏངྑཎཉྙེཝ ཏསྨིཾ པཱསཱཎཔིཊྛེ ཨསནི པཏི, ཏཏོ ¶ ཨེཀཱ པཱསཱཎསཀལིཀཱ ཚིཛྫིཏྭཱ ཨེལ༹ཀསྶ པསཱརིཏགཱིཝཱཡ པཏིཏྭཱ སཱིསཾ ཚིནྡི, མཧཱཛནོ སནྣིཔཏི. ཏདཱ བོདྷིསཏྟོ ¶ ཏསྨིཾ ཋཱནེ རུཀྑདེཝཏཱ ཧུཏྭཱ ནིབྦཏྟོ. སོ པསྶནྟསྶེཝ ཏསྶ མཧཱཛནསྶ དེཝཏཱནུབྷཱཝེན ཨཱཀཱསེ པལླངྐེན ནིསཱིདིཏྭཱ ‘‘ཨིམེ སཏྟཱ ཨེཝཾ པཱཔསྶ ཕལཾ ཛཱནམཱནཱ ཨཔྤེཝནཱམ པཱཎཱཏིཔཱཏཾ ན ཀརེཡྻུ’’ནྟི མདྷུརསྶརེན དྷམྨཾ དེསེནྟོ ཨིམཾ གཱཐམཱཧ –

༡༨.

‘‘ཨེཝཾ ཙེ སཏྟཱ ཛཱནེཡྻུཾ, དུཀྑཱཡཾ ཛཱཏིསམྦྷཝོ;

ན པཱཎོ པཱཎིནཾ ཧཉྙེ, པཱཎགྷཱཏཱི ཧི སོཙཏཱི’’ཏི.

ཏཏྠ ཨེཝཾ ཙེ སཏྟཱ ཛཱནེཡྻུནྟི ཨིམེ སཏྟཱ ཨེཝཾ ཙེ ཛཱནེཡྻུཾ. ཀཐཾ? དུཀྑཱཡཾ ཛཱཏིསམྦྷཝོཏི ཨཡཾ ཏཏྠ ཏཏྠ ཛཱཏི ཙ ཛཱཏསྶ ཨནུཀྐམེན ཝཌྜྷིསངྑཱཏོ སམྦྷཝོ ཙ ཛརཱབྱཱདྷིམརཎཨཔྤིཡསམྤཡོགཔིཡཝིཔྤཡོགཧཏྠཔཱདཙྪེདཱདཱིནཾ དུཀྑཱནཾ ཝཏྠུབྷཱུཏཏྟཱ ‘‘དུཀྑོ’’ཏི ཡདི ཛཱནེཡྻུཾ. ན པཱཎོ པཱཎིནཾ ཧཉྙེཏི ‘‘པརཾ ཝདྷནྟོ ཛཱཏིསམྦྷཝེ ཝདྷཾ ལབྷཏི, པཱིལེ༹ནྟོ པཱིལ༹ཾ ལབྷཏཱི’’ཏི ཛཱཏིསམྦྷཝསྶ དུཀྑཝཏྠུཏཱཡ དུཀྑབྷཱཝཾ ཛཱནནྟོ ཀོཙི པཱཎོ ཨཉྙཾ པཱཎིནཾ ན ཧཉྙེ, སཏྟོ སཏྟཾ ན ཧནེཡྻཱཏི ཨཏྠོ. ཀིཾཀཱརཎཱ? པཱཎགྷཱཏཱི ཧི སོཙཏཱིཏི, ཡསྨཱ སཱཧཏྠིཀཱདཱིསུ ཚསུ པཡོགེསུ ཡེན ཀེནཙི པཡོགེན པརསྶ ཛཱིཝིཏིནྡྲིཡུཔཙྪེདནེན པཱཎགྷཱཏཱི པུགྒལོ ཨཊྛསུ མཧཱནིརཡེསུ སོལ༹སསུ ཨུསྶདནིརཡེསུ ནཱནཔྤཀཱརཱཡ ཏིརཙྪཱནཡོནིཡཱ པེཏྟིཝིསཡེ ཨསུརཀཱཡེཏི ཨིམེསུ ཙཏཱུསུ ཨཔཱཡེསུ མཧཱདུཀྑཾ ཨནུབྷཝམཱནོ དཱིགྷརཏྟཾ ཨནྟོནིཛ྄ཛྷཱཡནལཀྑཎེན སོཀེན ¶ སོཙཏི. ཡཐཱ ཝཱཡཾ ཨེལ༹ཀོ མརཎབྷཡེན སོཙཏི, ཨེཝཾ དཱིགྷརཏྟཾ སོཙཏཱིཏིཔི ཉཏྭཱ ན པཱཎོ པཱཎིནཾ ཧཉྙེ, ཀོཙི པཱཎཱཏིཔཱཏཀམྨཾ ནཱམ ན ཀརེཡྻ. མོཧེན པན མཱུལ༹ྷཱ ཨཝིཛྫཱཡ ཨནྡྷཱིཀཏཱ ཨིམཾ ཨཱདཱིནཝཾ ཨཔསྶནྟཱ པཱཎཱཏིཔཱཏཾ ཀརོནྟཱིཏི.

ཨེཝཾ མཧཱསཏྟོ ནིརཡབྷཡེན ཏཛྫེཏྭཱ དྷམྨཾ དེསེསི. མནུསྶཱ ཏཾ དྷམྨདེསནཾ སུཏྭཱ ནིརཡབྷཡབྷཱིཏཱ པཱཎཱཏིཔཱཏཱ ཝིརམིཾསུ. བོདྷིསཏྟོཔི དྷམྨཾ དེསེཏྭཱ མཧཱཛནཾ སཱིལེ པཏིཊྛཱཔེཏྭཱ ཡཐཱཀམྨཾ གཏོ, མཧཱཛནོཔི བོདྷིསཏྟསྶ ཨོཝཱདེ ཋཏྭཱ དཱནཱདཱིནི པུཉྙཱནི ཀཏྭཱ ¶ དེཝནགརཾ པཱུརེསི. སཏྠཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི ‘‘ཨཧཾ ཏེན སམཡེན རུཀྑདེཝཏཱ ཨཧོསི’’ནྟི.

མཏཀབྷཏྟཛཱཏཀཝཎྞནཱ ཨཊྛམཱ.

[༡༩] ༩. ཨཱཡཱཙིཏབྷཏྟཛཱཏཀཝཎྞནཱ

སཙེ ¶ མུཙྩེ པེཙྩ མུཙྩེཏི ཨིདཾ སཏྠཱ ཛེཏཝནེ ཝིཧརནྟོ དེཝཏཱནཾ ཨཱཡཱཙནབལིཀམྨཾ ཨཱརབྦྷ ཀཐེསི. ཏདཱ ཀིར མནུསྶཱ ཝཎིཛྫཱཡ གཙྪནྟཱ པཱཎེ ཝདྷིཏྭཱ དེཝཏཱནཾ བལིཀམྨཾ ཀཏྭཱ ‘‘མཡཾ ཨནནྟརཱཡེན ཨཏྠསིདྡྷིཾ པཏྭཱ ཨཱགནྟྭཱ པུན ཏུམྷཱཀཾ བལིཀམྨཾ ཀརིསྶཱམཱ’’ཏི ཨཱཡཱཙིཏྭཱ གཙྪནྟི. ཏཏྠཱནནྟརཱཡེན ཨཏྠསིདྡྷིཾ པཏྭཱ ཨཱགཏཱ ‘‘དེཝཏཱནུབྷཱཝེན ཨིདཾ ཛཱཏ’’ནྟི མཉྙམཱནཱ བཧཱུ པཱཎེ ཝདྷིཏྭཱ ཨཱཡཱཙནཏོ མུཙྩིཏུཾ བལིཀམྨཾ ཀརོནྟི, ཏཾ དིསྭཱ བྷིཀྑཱུ ‘‘ཨཏྠི ནུ ཁོ, བྷནྟེ, ཨེཏྠ ཨཏྠོ’’ཏི བྷགཝནྟཾ པུཙྪིཾསུ. བྷགཝཱ ཨཏཱིཏཾ ཨཱཧརི.

ཨཏཱིཏེ ཀཱསིརཊྛེ ཨེཀསྨིཾ གཱམཀེ ཀུཊུམྦིཀོ གཱམདྭཱརེ ཋིཏནིགྲོདྷརུཀྑེ དེཝཏཱཡ བལིཀམྨཾ པཊིཛཱནིཏྭཱ ཨནནྟརཱཡེན ཨཱགནྟྭཱ བཧཱུ པཱཎེ ཝདྷིཏྭཱ ‘‘ཨཱཡཱཙནཏོ མུཙྩིསྶཱམཱི’’ཏི རུཀྑམཱུལཾ གཏོ. རུཀྑདེཝཏཱ ཁནྡྷཝིཊཔེ ཋཏྭཱ ཨིམཾ གཱཐམཱཧ –

༡༩.

‘‘སཙེ མུཙྩེ པེཙྩ མུཙྩེ, མུཙྩམཱནོ ཧི བཛ྄ཛྷཏི;

ན ཧེཝཾ དྷཱིརཱ མུཙྩནྟི, མུཏྟི བཱལསྶ བནྡྷན’’ནྟི.

ཏཏྠ སཙེ མུཙྩེ པེཙྩ མུཙྩེཏི བྷོ པུརིས, ཏྭཾ སཙེ མུཙྩེ ཡདི མུཙྩིཏུཀཱམོསི. པེཙྩ མུཙྩེཏི ཡཐཱ པརལོཀེ ན བཛ྄ཛྷསི, ཨེཝཾ མུཙྩཱཧི. མུཙྩམཱནོ ཧི བཛ྄ཛྷཏཱིཏི ཡཐཱ པན ཏྭཾ ¶ པཱཎཾ ཝདྷིཏྭཱ མུཙྩིཏུཾ ཨིཙྪསི, ཨེཝཾ མུཙྩམཱནོ ཧི པཱཔཀམྨེན བཛ྄ཛྷཏི. ཏསྨཱ ན ཧེཝཾ དྷཱིརཱ མུཙྩནྟཱིཏི ཡེ པཎྜིཏཔུརིསཱ, ཏེ ཨེཝཾ པཊིསྶཝཏོ ན མུཙྩནྟི. ཀིཾཀཱརཎཱ? ཨེཝརཱུཔཱ ཧི མུཏྟི བཱལསྶ བནྡྷནཾ, ཨེསཱ པཱཎཱཏིཔཱཏཾ ཀཏྭཱ མུཏྟི ནཱམ བཱལསྶ བནྡྷནམེཝ ཧོཏཱིཏི དྷམྨཾ དེསེསི. ཏཏོ ¶ པཊྛཱཡ མནུསྶཱ ཨེཝརཱུཔཱ པཱཎཱཏིཔཱཏཀམྨཱ ཝིརཏཱ དྷམྨཾ ཙརིཏྭཱ དེཝནགརཾ པཱུརཡིཾསུ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི ‘‘ཨཧཾ ཏེན སམཡེན རུཀྑདེཝཏཱ ཨཧོསི’’ནྟི.

ཨཱཡཱཙིཏབྷཏྟཛཱཏཀཝཎྞནཱ ནཝམཱ.

[༢༠] ༡༠. ནལ༹པཱནཛཱཏཀཝཎྞནཱ

དིསྭཱ ¶ པདམནུཏྟིཎྞནྟི ཨིདཾ སཏྠཱ ཀོསལེསུ ཙཱརིཀཾ ཙརམཱནོ ནལ༹ཀཔཱནགཱམཾ པཏྭཱ ནལ༹ཀཔཱནཔོཀྑརཎིཡཾ ཀེཏཀཝནེ ཝིཧརནྟོ ནལ༹དཎྜཀེ ཨཱརབྦྷ ཀཐེསི. ཏདཱ ཀིར བྷིཀྑཱུ ནལ༹ཀཔཱནཔོཀྑརཎིཡཾ ནྷཏྭཱ སཱུཙིགྷརཏྠཱཡ སཱམཎེརེཧི ནལ༹དཎྜཀེ གཱཧཱཔེཏྭཱ ཏེ སབྦཏྠཀམེཝ ཚིདྡེ དིསྭཱ སཏྠཱརཾ ཨུཔསངྐམིཏྭཱ ‘‘བྷནྟེ, མཡཾ སཱུཙིགྷརཏྠཱཡ ནལ༹དཎྜཀེ གཎྷཱཔེམ, ཏེ མཱུལཏོ ཡཱཝ ཨགྒཱ སབྦཏྠཀམེཝ ཚིདྡཱ, ཀིཾ ནུ ཁོ ཨེཏ’’ནྟི པུཙྪིཾསུ. སཏྠཱ ‘‘ཨིདཾ, བྷིཀྑཝེ, མཡ྄ཧཾ པོརཱཎཀཨདྷིཊྛཱན’’ནྟི ཝཏྭཱ ཨཏཱིཏཾ ཨཱཧརི.

པུབྦེ ཀིར སོ ཝནསཎྜོ ཨརཉྙོ ཨཧོསི. ཏསྶཱཔི པོཀྑརཎིཡཱ ཨེཀོ དཀརཀྑསོ ཨོཏིཎྞོཏིཎྞེ ཁཱདཏི. ཏདཱ བོདྷིསཏྟོ རོཧིཏམིགཔོཏཀཔྤམཱཎོ ཀཔིརཱཛཱ ཧུཏྭཱ ཨསཱིཏིསཧསྶམཏྟཝཱནརཔརིཝུཏོ ཡཱུཐཾ པརིཧརནྟོ ཏསྨིཾ ཨརཉྙེ ཝསཏི. སོ ཝཱནརགཎསྶ ཨོཝཱདཾ ཨདཱསི ‘‘ཏཱཏཱ, ཨིམསྨིཾ ཨརཉྙེ ཝིསརུཀྑཱཔི ཨམནུསྶཔརིགྒཧིཏཔོཀྑརཎིཡོཔི ཧོནྟི, ཏུམྷེ ཨཁཱདིཏཔུབྦཾ ཕལཱཕལཾ ཁཱདནྟཱ ཝཱ ཨཔཱིཏཔུབྦཾ པཱནཱིཡཾ པིཝནྟཱ ཝཱ མཾ པཊིཔུཙྪེཡྻཱཐཱ’’ཏི. ཏེ ‘‘སཱདྷཱུ’’ཏི པཊིསྶུཎིཏྭཱ ཨེཀདིཝསཾ ཨགཏཔུབྦཊྛཱནཾ གཏཱ ཏཏྠ བཧུདེཝ དིཝསཾ ཙརིཏྭཱ པཱནཱིཡཾ གཝེསམཱནཱ ཨེཀཾ པོཀྑརཎིཾ དིསྭཱ པཱནཱིཡཾ ཨཔིཝིཏྭཱཝ བོདྷིསཏྟསྶཱགམནཾ ཨོལོཀཡམཱནཱ ནིསཱིདིཾསུ. བོདྷིསཏྟོ ཨཱགནྟྭཱ ‘‘ཀིཾ ཏཱཏཱ, པཱནཱིཡཾ ན པིཝཐཱ’’ཏི ཨཱཧ. ‘‘ཏུམྷཱཀཾ ཨཱགམནཾ ཨོལོཀེམཱ’’ཏི. ‘‘སུཊྛུ, ཏཱཏཱ’’ཏི བོདྷིསཏྟོ པོཀྑརཎིཾ ཨཱཝིཛ྄ཛྷིཏྭཱ པདཾ པརིཙྪིནྡནྟོ ཨོཏིཎྞམེཝ ¶ པསྶི, ན ཨུཏྟིཎྞཾ. སོ ‘‘ནིསྶཾསཡཾ ཨེསཱ ཨམནུསྶཔརིགྒཧིཏཱ’’ཏི ཉཏྭཱ ‘‘སུཊྛུ ཝོ ཀཏཾ, ཏཱཏཱ, པཱནཱིཡཾ ཨཔིཝནྟེཧི, ཨམནུསྶཔརིགྒཧིཏཱ ཨཡ’’ནྟི ཨཱཧ.

དཀརཀྑསོཔི ¶ ཏེསཾ ཨནོཏརཎབྷཱཝཾ ¶ ཉཏྭཱ ནཱིལོདརོ པཎྜརམུཁོ སུརཏྟཧཏྠཔཱདོ བཱིབྷཙྪདསྶནོ ཧུཏྭཱ ཨུདཀཾ དྭིདྷཱ ཀཏྭཱ ནིཀྑམིཏྭཱ ‘‘ཀསྨཱ ནིསིནྣཱཏྠ, ཨོཏརིཏྭཱ པཱནཱིཡཾ པིཝཐཱ’’ཏི ཨཱཧ. ཨཐ ནཾ བོདྷིསཏྟོ པུཙྪི ‘‘ཏྭཾ ཨིདྷ ནིབྦཏྟདཀརཀྑསོསཱི’’ཏི? ‘‘ཨཱམ, ཨཧ’’ནྟི. ‘‘ཏྭཾ པོཀྑརཎིཾ ཨོཏིཎྞཀེ ལབྷསཱི’’ཏི? ‘‘ཨཱམ, ལབྷཱམི, ཨཧཾ ཨིདྷོཏིཎྞཾ ཨནྟམསོ སཀུཎིཀཾ ཨུཔཱདཱཡ ན ཀིཉྩི མུཉྩཱམི, ཏུམྷེཔི སབྦེ ཁཱདིསྶཱམཱི’’ཏི. ‘‘ན མཡཾ ཨཏྟཱནཾ ཏུཡ྄ཧཾ ཁཱདིཏུཾ དསྶཱམཱ’’ཏི. ‘‘པཱནཱིཡཾ པན པིཝིསྶཐཱ’’ཏི. ‘‘ཨཱམ, པཱནཱིཡཾ པིཝིསྶཱམ, ན ཙ ཏེ ཝསཾ གམིསྶཱམཱ’’ཏི. ‘‘ཨཐ ཀཐཾ པཱནཱིཡཾ པིཝིསྶཐཱ’’ཏི? ཀིཾ པན ཏྭཾ མཉྙསི ‘‘ཨོཏརིཏྭཱ པིཝིསྶནྟཱི’’ཏི. ‘‘མཡཉྷི ཨནོཏརིཏྭཱ ཨསཱིཏིསཧསྶཱནིཔི ཨེཀམེཀཾ ནལ༹དཎྜཀཾ གཧེཏྭཱ ཨུཔྤལནཱལེ༹ན ཨུདཀཾ པིཝནྟཱ ཝིཡ ཏཝ པོཀྑརཎིཡཱ པཱནཱིཡཾ པིཝིསྶཱམ, ཨེཝཾ ནོ ཏྭཾ ཁཱདིཏུཾ ན སཀྑིསྶསཱི’’ཏི. ཨེཏམཏྠཾ ཝིདིཏྭཱ སཏྠཱ ཨབྷིསམྦུདྡྷོ ཧུཏྭཱ ཨིམིསྶཱ གཱཐཱཡ པུརིམཔདདྭཡཾ ཨབྷཱསི –

༢༠.

‘‘དིསྭཱ པདམནུཏྟིཎྞཾ, དིསྭཱནོཏརིཏཾ པད’’ནྟི.

ཏསྶཏྠོ – བྷིཀྑཝེ, སོ ཀཔིརཱཛཱ ཏསྶཱ པོཀྑརཎིཡཱ ཨེཀམྤི ཨུཏྟིཎྞཔདཾ ནཱདྡས, ཨོཏརིཏཾ པན ཨོཏིཎྞཔདམེཝ ཨདྡས. ཨེཝཾ དིསྭཱ པདཾ ཨནུཏྟིཎྞཾ དིསྭཱན ཨོཏརིཏཾ པདཾ ‘‘ཨདྡྷཱཡཾ པོཀྑརཎཱི ཨམནུསྶཔརིགྒཧིཏཱ’’ཏི ཉཏྭཱ ཏེན སདྡྷིཾ སལླཔནྟོ སཔརིསོ ཨཱཧ –

‘‘ནལེ༹ན ཝཱརིཾ པིསྶཱམཱ’’ཏི;

ཏསྶཏྠོ – མཡཾ ཏཝ པོཀྑརཎིཡཾ ནལེ༹ན པཱནཱིཡཾ པིཝིསྶཱམཱཏི. པུན མཧཱསཏྟོ ཨཱཧ –

‘‘ནེཝ མཾ ཏྭཾ ཝདྷིསྶསཱི’’ཏི;

ཨེཝཾ ནལེ༹ན པཱནཱིཡཾ པིཝནྟཾ སཔརིསམྤི མཾ ཏྭཾ ནེཝ ཝདྷིསྶསཱིཏི ཨཏྠོ.

ཨེཝཉྩ པན ཝཏྭཱ བོདྷིསཏྟོ ཨེཀཾ ནལ༹དཎྜཀཾ ཨཱཧརཱཔེཏྭཱ པཱརམིཡོ ཨཱཝཛྫེཏྭཱ སཙྩཀིརིཡཾ ཀཏྭཱ མུཁེན དྷམི, ནལོ༹ ¶ ཨནྟོ ཀིཉྩི གཎྛིཾ ཨསེསེཏྭཱ སབྦཏྠཀམེཝ སུསིརོ ཨཧོསི ¶ . ཨིམིནཱ ནིཡཱམེན ཨཔརམྤི ཨཔརམྤི ཨཱཧརཱཔེཏྭཱ མུཁེན དྷམིཏྭཱ ཨདཱསི. ཨེཝཾ སནྟེཔི ན སཀྐཱ ནིཊྛཱཔེཏུཾ, ཏསྨཱ ཨེཝཾ ན གཧེཏབྦཾ. བོདྷིསཏྟོ པན ‘‘ཨིམཾ པོཀྑརཎིཾ པརིཝཱརེཏྭཱ ཛཱཏཱ སབྦེཔི ནལཱ༹ ཨེཀཙྪིདྡཱ ཧོནྟཱུ’’ཏི ཨདྷིཊྛཱསི ¶ . བོདྷིསཏྟཱནཉྷི ཧིཏཱུཔཙཱརསྶ མཧནྟཏཱཡ ཨདྷིཊྛཱནཾ སམིཛ྄ཛྷཏི. ཏཏོ པཊྛཱཡ སབྦེཔི ཏཾ པོཀྑརཎིཾ པརིཝཱརེཏྭཱ ཨུཊྛིཏནལཱ༹ ཨེཀཙྪིདྡཱ ཛཱཏཱ. ཨིམསྨིཉྷི ཀཔྤེ ཙཏྟཱརི ཀཔྤཊྛིཡཔཱཊིཧཱརིཡཱནི ནཱམ. ཀཏམཱནི ཙཏྟཱརི? ཙནྡེ སསལཀྑཎཾ སཀལམྤི ཨིམཾ ཀཔྤཾ ཋསྶཏི, ཝཊྚཀཛཱཏཀེ ཨགྒིནོ ནིབྦུཏཊྛཱནཾ སཀལམྤི ཨིམཾ ཀཔྤཾ ཨགྒི ན ཛྷཱཡིསྶཏི, གྷཊཱིཀཱརནིཝེསནཊྛཱནཾ སཀལམྤི ཨིམཾ ཀཔྤཾ ཨནོཝསྶཀཾ ཋསྶཏི, ཨིམཾ པོཀྑརཎིཾ པརིཝཱརེཏྭཱ ཨུཊྛིཏནལཱ༹ སཀལམྤི ཨིམཾ ཀཔྤཾ ཨེཀཙྪིདྡཱ བྷཝིསྶནྟཱིཏི ཨིམཱནི ཙཏྟཱརི ཀཔྤཊྛིཡཔཱཊིཧཱརིཡཱནི ནཱམ.

བོདྷིསཏྟོ ཨེཝཾ ཨདྷིཊྛཧིཏྭཱ ཨེཀཾ ནལ༹ཾ ཨཱདཱཡ ནིསཱིདི. ཏེཔི ཨསཱིཏིསཧསྶཝཱནརཱ ཨེཀེཀཾ ཨཱདཱཡ པོཀྑརཎིཾ པརིཝཱརེཏྭཱ ནིསཱིདིཾསུ. ཏེཔི བོདྷིསཏྟསྶ ནལེ༹ན ཨཱཀཌྜྷིཏྭཱ པཱནཱིཡཾ པིཝནཀཱལེ སབྦེ ཏཱིརེ ནིསིནྣཱཝ པིཝིཾསུ. ཨེཝཾ ཏེཧི པཱནཱིཡེ པིཝིཏེ དཀརཀྑསོ ཀིཉྩི ཨལབྷིཏྭཱ ཨནཏྟམནོ སཀནིཝེསནམེཝ གཏོ. བོདྷིསཏྟོཔི སཔརིཝཱརོ ཨརཉྙམེཝ པཱཝིསི.

སཏྠཱ པན ‘‘ཨིམེསཾ, བྷིཀྑཝེ, ནལཱ༹ནཾ ཨེཀཙྪིདྡབྷཱཝོ ནཱམ མཡ྄ཧམེཝེཏཾ པོརཱཎཀཨདྷིཊྛཱན’’ནྟི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ དཀརཀྑསོ དེཝདཏྟོ ཨཧོསི, ཨསཱིཏིསཧསྶཝཱནརཱ བུདྡྷཔརིསཱ, ཨུཔཱཡཀུསལོ པན ཀཔིརཱཛཱ ཨཧམེཝ ཨཧོསི’’ནྟི.

ནལ༹པཱནཛཱཏཀཝཎྞནཱ དསམཱ.

སཱིལཝགྒོ དུཏིཡོ.

ཏསྶུདྡཱནཾ –

ནིགྲོདྷཾ ལཀྑཎཾ ཀཎྜི, ཝཱཏམིགཾ ཁརཱདིཡཾ;

ཏིཔལླཏྠཾ མཱལུཏཉྩ, མཏབྷཏྟ ཨཡཱཙིཏཾ;

ནལ༹པཱནནྟི ཏེ དསཱཏི.

༣. ཀུརུངྒཝགྒོ

[༢༡] ༡. ཀུརུངྒམིགཛཱཏཀཝཎྞནཱ

ཉཱཏམེཏཾ ¶ ¶ ¶ ཀུརུངྒསྶཱཏི ཨིདཾ སཏྠཱ ཝེལུ༹ཝནེ ཝིཧརནྟོ དེཝདཏྟཾ ཨཱརབྦྷ ཀཐེསི. ཨེཀསྨིཉྷི སམཡེ དྷམྨསབྷཱཡཾ སནྣིཔཏིཏཱ བྷིཀྑཱུ ‘‘ཨཱཝུསོ དེཝདཏྟོ ཏཐཱགཏསྶ གྷཱཏནཏྠཱཡ དྷནུགྒཧེ པཡོཛེསི, སིལཾ པཝིཛ྄ཛྷི, དྷནཔཱལཾ ཝིསྶཛྫེསི, སབྦཐཱཔི དསབལསྶ ཝདྷཱཡ པརིསཀྐཏཱི’’ཏི དེཝདཏྟསྶ ཨཝཎྞཾ ཀཐེནྟཱ ནིསཱིདིཾསུ. སཏྠཱ ཨཱགནྟྭཱ པཉྙཏྟཱསནེ ནིསིནྣོ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪི. བྷནྟེ, དེཝདཏྟོ ཏུམྷཱཀཾ ཝདྷཱཡ པརིསཀྐཏཱིཏི ཏསྶ ཨགུཎཀཐཱཡ སནྣིསིནྣཱམྷཱཏི. སཏྠཱ ‘‘ན, བྷིཀྑཝེ, དེཝདཏྟོ ཨིདཱནེཝ མམ ཝདྷཱཡ པརིསཀྐཏི, པུབྦེཔི མམ ཝདྷཱཡ པརིསཀྐིཡེཝ, ན ཙ པན མཾ ཝདྷིཏུཾ ཨསཀྑཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཀུརུངྒམིགོ ཧུཏྭཱ ཨེཀསྨིཾ ཨརཉྙཱཡཏནེ ཕལཱནི ཁཱདནྟོ ཝསཏི. སོ ཨེཀསྨིཾ ཀཱལེ ཕལསམྤནྣེ སེཔཎྞིརུཀྑེ སེཔཎྞིཕལཱནི ཁཱདཏི. ཨཐེཀོ གཱམཝཱསཱི ཨཊྚཀལུདྡཀོ ཕལརུཀྑམཱུལེསུ མིགཱནཾ པདཱནི ཨུཔདྷཱརེཏྭཱ ཨུཔརིརུཀྑེ ཨཊྚཀཾ བནྡྷིཏྭཱ ཏཏྠ ནིསཱིདིཏྭཱ ཕལཱནི ཁཱདིཏུཾ ཨཱགཏཱགཏེ མིགེ སཏྟིཡཱ ཝིཛ྄ཛྷིཏྭཱ ཏེསཾ མཾསཾ ཝིཀྐིཎནྟོ ཛཱིཝིཀཾ ཀཔྤེཏི. སོ ཨེཀདིཝསཾ ཏསྨིཾ རུཀྑམཱུལེ བོདྷིསཏྟསྶ པདཝལ༹ཉྫཾ དིསྭཱ ཏསྨིཾ སེཔཎྞིརུཀྑེ ཨཊྚཀཾ བནྡྷིཏྭཱ པཱཏོཝ བྷུཉྫིཏྭཱ སཏྟིཾ ཨཱདཱཡ ཝནཾ པཝིསིཏྭཱ ཏཾ རུཀྑཾ ཨཱརུཧིཏྭཱ ཨཊྚཀེ ནིསཱིདི. བོདྷིསཏྟོཔི པཱཏོཝ ཝསནཊྛཱནཱ ནིཀྑམིཏྭཱ ‘‘སེཔཎྞིཕལཱནི ཁཱདིསྶཱམཱི’’ཏི ཨཱགམྨ ཏཾ རུཀྑམཱུལཾ སཧསཱཝ ཨཔཝིསིཏྭཱ ‘‘ཀདཱཙི ཨཊྚཀལུདྡཀཱ རུཀྑེསུ ཨཊྚཀཾ བནྡྷནྟི, ཨཏྠི ནུ ཁོ ཨེཝརཱུཔོ ཨུཔདྡཝོ’’ཏི པརིགྒཎྷནྟོ བཱཧིརཏོཝ ཨཊྛཱསི.

ལུདྡཀོཔི བོདྷིསཏྟསྶ ཨནཱགམནབྷཱཝཾ ཉཏྭཱ ཨཊྚཀེ ནིསིནྣོཝ ¶ སེཔཎྞིཕལཱནི ཁིཔིཏྭཱ ཁིཔིཏྭཱ ཏསྶ པུརཏོ པཱཏེསི. བོདྷིསཏྟོ ‘‘ཨིམཱནི ཕལཱནི ཨཱགནྟྭཱ མཡ྄ཧཾ པུརཏོ པཏནྟི, ཨཏྠི ནུ ཁོ ཨུཔརི ལུདྡཀོ’’ཏི པུནཔྤུནཾ ཨུལློཀེནྟོ ལུདྡཀཾ དིསྭཱ ཨཔསྶནྟོ ¶ ཝིཡ ཧུཏྭཱ ‘‘ཨམྦྷོ, རུཀྑ-པུབྦེ ཏྭཾ ཨོལམྦཀཾ ཙཱརེནྟོ ¶ ཝིཡ ཨུཛུཀམེཝ ཕལཱནི པཱཏེསི, ཨཛྫ པན ཏེ རུཀྑདྷམྨོ པརིཙྩཏྟོ, ཨེཝཾ ཏཡཱ རུཀྑདྷམྨེ པརིཙྩཏྟེ ཨཧམྤི ཨཉྙཾ རུཀྑམཱུལཾ ཨུཔསངྐམིཏྭཱ མཡ྄ཧཾ ཨཱཧཱརཾ པརིཡེསིསྶཱམཱི’’ཏི ཝཏྭཱ ཨིམཾ གཱཐམཱཧ –

༢༡.

‘‘ཉཱཏམེཏཾ ཀུརུངྒསྶ, ཡཾ ཏྭཾ སེཔཎྞི སེཡྻསི;

ཨཉྙཾ སེཔཎྞི གཙྪཱམི, ན མེ ཏེ རུཙྩཏེ ཕལ’’ནྟི.

ཏཏྠ ཉཱཏནྟི པཱཀཊཾ ཛཱཏཾ. ཨེཏནྟི ཨིདཾ. ཀུརུངྒསྶཱཏི ཀུརུངྒམིགསྶ. ཡཾ ཏྭཾ སེཔཎྞི སེཡྻསཱིཏི ཡཾ ཏྭཾ ཨམྦྷོ སེཔཎྞིརུཀྑ པུརཏོ ཕལཱནི པཱཏཡམཱནོ སེཡྻསི ཝིསེཡྻསི ཝིསིཎྞཕལོ ཧོསི, ཏཾ སབྦཾ ཀུརུངྒམིགསྶ པཱཀཊཾ ཛཱཏཾ. ན མེ ཏེ རུཙྩཏེ ཕལནྟི ཨེཝཾ ཕལཾ དདམཱནཱཡ ན མེ ཏཝ ཕལཾ རུཙྩཏི, ཏིཊྛ ཏྭཾ, ཨཧཾ ཨཉྙཏྠ གཙྪིསྶཱམཱིཏི ཨགམཱསི.

ཨཐསྶ ལུདྡཀོ ཨཊྚཀེ ནིསིནྣོཝ སཏྟིཾ ཁིཔིཏྭཱ ‘‘གཙྪ, ཝིརདྡྷོ དཱནིམྷི ཏ’’ནྟི ཨཱཧ. བོདྷིསཏྟོ ནིཝཏྟིཏྭཱ ཋིཏོ ཨཱཧ ‘‘ཨམྦྷོ པུརིས, ཨིདཱནཱིསི ཀིཉྩཱཔི མཾ ཝིརདྡྷོ, ཨཊྛ པན མཧཱནིརཡེ སོལ༹སཨུསྶདནིརཡེ པཉྩཝིདྷབནྡྷནཱདཱིནི ཙ ཀམྨཀཱརཎཱནི ཨཝིརདྡྷོཡེཝཱསཱི’’ཏི. ཨེཝཉྩ པན ཝཏྭཱ པལཱཡིཏྭཱ ཡཐཱརུཙིཾ གཏོ, ལུདྡོཔི ཨོཏརིཏྭཱ ཡཐཱརུཙིཾ གཏོ.

སཏྠཱཔི ‘‘ན, བྷིཀྑཝེ, དེཝདཏྟོ ཨིདཱནེཝ མམ ཝདྷཱཡ པརིསཀྐཏི, པུབྦེཔི པརིསཀྐིཡེཝ, ན ཙ པན མཾ ཝདྷིཏུཾ ཨསཀྑཱི’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཨཊྚཀལུདྡཀོ དེཝདཏྟོ ཨཧོསི, ཀུརུངྒམིགོ པན ཨཧམེཝ ཨཧོསི’’ནྟི.

ཀུརུངྒམིགཛཱཏཀཝཎྞནཱ པཋམཱ.

[༢༢] ༢. ཀུཀྐུརཛཱཏཀཝཎྞནཱ

ཡེ ¶ ¶ ཀུཀྐུརཱཏི ཨིདཾ སཏྠཱ ཛེཏཝནེ ཝིཧརནྟོ ཉཱཏཏྠཙརིཡཾ ཨཱརབྦྷ ཀཐེསི. སཱ དྭཱདསཀནིཔཱཏེ བྷདྡསཱལཛཱཏཀེ ཨཱཝིབྷཝིསྶཏི. ཨིདཾ པན ཝཏྠུཾ པཏིཊྛཔེཏྭཱ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཏཐཱརཱུཔཾ ཀམྨཾ པཊིཙྩ ཀུཀྐུརཡོནིཡཾ ནིབྦཏྟིཏྭཱ ཨནེཀསཏཀུཀྐུརཔརིཝུཏོ མཧཱསུསཱནེ ཝསཏི. ཨཐེཀདིཝསཾ རཱཛཱ སེཏསིནྡྷཝཡུཏྟཾ སབྦཱལངྐཱརཔཊིམཎྜིཏཾ རཐཾ ཨཱརུཡ྄ཧ ཨུཡྻཱནཾ གནྟྭཱ ཏཏྠ དིཝསབྷཱགཾ ཀཱིལི༹ཏྭཱ ཨཏྠངྒཏེ སཱུརིཡེ ནགརཾ པཱཝིསི. ཏསྶ ཏཾ རཐཝརཏྟཾ ཡཐཱནདྡྷམེཝ རཱཛངྒཎེ ཋཔཡིཾསུ, སོ རཏྟིབྷཱགེ དེཝེ ཝསྶནྟེ ཏིནྟོ. ཨུཔརིཔཱསཱདཏོ ཀོལེཡྻཀསུནཁཱ ཨོཏརིཏྭཱ ཏསྶ ཙམྨཉྩ ནདྡྷིཉྩ ཁཱདིཾསུ. པུནདིཝསེ རཉྙོ ཨཱརོཙེསུཾ ‘‘དེཝ, ནིདྡྷམནམུཁེན སུནཁཱ པཝིསིཏྭཱ རཐསྶ ཙམྨཉྩ ནདྡྷིཉྩ ཁཱདིཾསཱུ’’ཏི. རཱཛཱ སུནཁཱནཾ ཀུཛ྄ཛྷིཏྭཱ ‘‘དིཊྛདིཊྛཊྛཱནེ སུནཁེ གྷཱཏེཐཱ’’ཏི ཨཱཧ. ཏཏོ པཊྛཱཡ སུནཁཱནཾ མཧཱབྱསནཾ ཨུདཔཱདི. ཏེ དིཊྛིདིཊྛཊྛཱནེ གྷཱཏིཡམཱནཱ པལཱཡིཏྭཱ སུསཱནཾ གནྟྭཱ བོདྷིསཏྟསྶ སནྟིཀཾ ཨགམཾསུ.

བོདྷིསཏྟོ ‘ཏུམྷེ བཧཱུ སནྣིཔཏིཏཱ, ཀིཾ ནུ ཁོ ཀཱརཎ’’ནྟི པུཙྪི. ཏེ ‘‘ཨནྟེཔུརེ ཀིར རཐསྶ ཙམྨཉྩ ནདྡྷི ཙ སུནཁེཧི ཁཱདིཏཱ’ཏི ཀུདྡྷོ རཱཛཱ སུནཁཝདྷཾ ཨཱཎཱཔེསི, བཧཱུ སུནཁཱ ཝིནསྶནྟི, མཧཱབྷཡཾ ཨུཔྤནྣ’’ནྟི ཨཱཧཾསུ. བོདྷིསཏྟོ ཙིནྟེསི ‘‘ཨཱརཀྑཊྛཱནེ བཧི སུནཁཱནཾ ཨོཀཱསོ ནཏྠི, ཨནྟོརཱཛནིཝེསནེ ཀོལེཡྻཀསུནཁཱནམེཝ ཏཾ ཀམྨཾ བྷཝིསྶཏི. ཨིདཱནི པན ཙོརཱནཾ ཀིཉྩི བྷཡཾ ནཏྠི, ཨཙོརཱ མརཎཾ ལབྷནྟི, ཡཾནཱུནཱཧཾ ཙོརེ རཉྙོ དསྶེཏྭཱ ཉཱཏིསངྒྷསྶ ཛཱིཝིཏདཱནཾ དདེཡྻ’’ནྟི. སོ ཉཱཏཀེ སམསྶཱསེཏྭཱ ‘‘ཏུམྷེ མཱ བྷཱཡིཏྠ, ཨཧཾ ཝོ ཨབྷཡཾ ཨཱཧརིསྶཱམི, ཡཱཝ ¶ རཱཛཱནཾ པསྶཱམི, ཏཱཝ ཨིདྷེཝ ཧོཐཱ’’ཏི པཱརམིཡོ ཨཱཝཛྫེཏྭཱ མེཏྟཱབྷཱཝནཾ པུརེཙཱརིཀཾ ཀཏྭཱ ‘‘མཡ྄ཧཾ ཨུཔརི ལེཌྜུཾ ཝཱ མུགྒརཾ ཝཱ མཱ ཀོཙི ཁིཔིཏུཾ ཨུསྶཧཱི’’ཏི ཨདྷིཊྛཱཡ ཨེཀཀོཝ ཨནྟོནགརཾ པཱཝིསི. ཨཐ ནཾ དིསྭཱ ཨེཀསཏྟོཔི ཀུཛ྄ཛྷིཏྭཱ ཨོལོཀེནྟོ ནཱམ ནཱཧོསི. རཱཛཱཔི སུནཁཝདྷཾ ཨཱཎཱཔེཏྭཱ སཡཾ ཝིནིཙྪཡེ ནིསིནྣོ ཧོཏི. བོདྷིསཏྟོ ཏཏྠེཝ གནྟྭཱ པཀྑནྡིཏྭཱ རཉྙོ ཨཱསནསྶ ཧེཊྛཱ པཱཝིསི. ཨཐ ནཾ རཱཛཔུརིསཱ ནཱིཧརིཏུཾ ཨཱརདྡྷཱ, རཱཛཱ པན ཝཱརེསི.

སོ ཐོཀཾ ཝིསྶམིཏྭཱ ཧེཊྛཱསནཱ ནིཀྑམིཏྭཱ རཱཛཱནཾ ཝནྡིཏྭཱ ‘‘དེཝ, ཏུམྷེ ཀུཀྐུརེ མཱརཱཔེཐཱ’’ཏི པུཙྪི. ‘‘ཨཱམ, མཱརཱཔེམཧ’’ནྟི ¶ . ‘‘ཀོ ནེསཾ ཨཔརཱདྷོ ནརིནྡཱ’’ཏི? ‘‘རཐསྶ མེ ¶ པརིཝཱརཙམྨཉྩ ནདྡྷིཉྩ ཁཱདིཾསཱུ’’ཏི. ‘‘ཡེ ཁཱདིཾསུ, ཏེ ཛཱནཱཐཱ’’ཏི? ‘‘ན ཛཱནཱམཱ’’ཏི. ‘‘‘ཨིམེ ནཱམ ཙམྨཁཱདཀཙོརཱ’ཏི ཏཐཏོ ཨཛཱནིཏྭཱ དིཊྛདིཊྛཊྛཱནེཡེཝ མཱརཱཔནཾ ན ཡུཏྟཾ, དེཝཱ’’ཏི. ‘‘རཐཙམྨསྶ ཀུཀྐུརེཧི ཁཱདིཏཏྟཱ ‘དིཊྛདིཊྛེ སབྦེཝ མཱརེཐཱ’ཏི སུནཁཝདྷཾ ཨཱཎཱཔེསི’’ནྟི. ‘‘ཀིཾ པན ཝོ མནུསྶཱ སབྦེཝ ཀུཀྐུརེ མཱརེནྟི, ཨུདཱཧུ མརཎཾ ཨལབྷནྟཱཔི ཨཏྠཱི’’ཏི? ‘‘ཨཏྠི, ཨམྷཱཀཾ གྷརེ ཀོལེཡྻཀཱ མརཎཾ ན ལབྷནྟཱི’’ཏི. མཧཱརཱཛ ཨིདཱནེཝ ཏུམྷེ ‘‘རཐཙམྨསྶ ཀུཀྐུརེཧི ཁཱདིཏཏྟཱ ‘དིཊྛདིཊྛེ སབྦེཝ མཱརེཐཱ’ཏི སུནཁཝདྷཾ ཨཱཎཱཔེསི’’ནྟི ཨཝོཙུཏྠ, ཨིདཱནི པན ‘‘ཨམྷཱཀཾ གྷརེ ཀོལེཡྻཀཱ མརཎཾ ན ལབྷནྟཱི’’ཏི ཝདེཐ. ‘‘ནནུ ཨེཝཾ སནྟེ ཏུམྷེ ཚནྡཱདིཝསེན ཨགཏིགམནཾ གཙྪཐ, ཨགཏིགམནཉྩ ནཱམ ན ཡུཏྟཾ, ན ཙ རཱཛདྷམྨོ, རཉྙཱ ནཱམ ཀཱརཎགཝེསཀེན ཏུལཱསདིསེན བྷཝིཏུཾ ཝཊྚཏི, ཨིདཱནི ཙ ཀོལེཡྻཀཱ མརཎཾ ན ལབྷནྟི, དུབྦལསུནཁཱཝ ལབྷནྟི, ཨེཝཾ སནྟེ ནཱཡཾ སབྦསུནཁགྷཙྩཱ, དུབྦལགྷཱཏིཀཱ ནཱམེསཱ’’ཏི. ཨེཝཉྩ པན ཝཏྭཱ མཧཱསཏྟོ མདྷུརསྶརཾ ནིཙྪཱརེཏྭཱ ‘‘མཧཱརཱཛ, ཡཾ ཏུམྷེ ཀརོཐ, ནཱཡཾ དྷམྨོ’’ཏི རཉྙོ དྷམྨཾ དེསེནྟོ ཨིམཾ གཱཐམཱཧ –

༢༢.

‘‘ཡེ ¶ ཀུཀྐུརཱ རཱཛཀུལམྷི ཝདྡྷཱ, ཀོལེཡྻཀཱ ཝཎྞབལཱུཔཔནྣཱ;

ཏེམེ ན ཝཛ྄ཛྷཱ མཡམསྨ ཝཛ྄ཛྷཱ, ནཱཡཾ སགྷཙྩཱ དུབྦལགྷཱཏིཀཱཡ’’ནྟི.

ཏཏྠ ཡེ ཀུཀྐུརཱཏི ཡེ སུནཁཱ. ཡཐཱ ཧི དྷཱརུཎྷོཔི པསྶཱཝོ ‘‘པཱུཏིམུཏྟ’’ནྟི, ཏདཧུཛཱཏོཔི སིངྒཱལོ ‘‘ཛརསིངྒཱལོ’’ཏི, ཀོམལཱཔི གལོཙིལཏཱ ‘‘པཱུཏིལཏཱ’’ཏི, སུཝཎྞཝཎྞོཔི ཀཱཡོ ‘‘པཱུཏིཀཱཡོ’’ཏི ཝུཙྩཏི, ཨེཝམེཝཾ ཝསྶསཏིཀོཔི སུནཁོ ‘‘ཀུཀྐུརོ’’ཏི ཝུཙྩཏི. ཏསྨཱ མཧལླཀཱ ཀཱཡབལཱུཔཔནྣཱཔི ཏེ ‘‘ཀུཀྐུརཱ’’ཏྭེཝ ཝུཏྟཱ. ཝདྡྷཱཏི ཝཌྜྷིཏཱ. ཀོལེཡྻཀཱཏི རཱཛཀུལེ ཛཱཏཱ སམྦྷཱུཏཱ སཾཝཌྜྷཱ. ཝཎྞབལཱུཔཔནྣཱཏི སརཱིརཝཎྞེན ཙེཝ ཀཱཡབལེན ཙ སམྤནྣཱ. ཏེམེ ན ཝཛ྄ཛྷཱཏི ཏེ ཨིམེ སསྶཱམིཀཱ སཱརཀྑཱ ན ཝཛ྄ཛྷཱ. མཡམསྨ ཝཛ྄ཛྷཱཏི ཨསྶཱམིཀཱ ཨནཱརཀྑཱ མཡཾ ཝཛ྄ཛྷཱ ནཱམ ཛཱཏཱ. ནཱཡཾ སགྷཙྩཱཏི ཨེཝཾ སནྟེ ཨཡཾ ཨཝིསེསེན སགྷཙྩཱ ནཱམ ན ཧོཏི. དུབྦལགྷཱཏིཀཱཡནྟི ¶ ཨཡཾ པན དུབྦལཱནཾཡེཝ གྷཱཏནཏོ དུབྦལགྷཱཏིཀཱ ནཱམ ཧོཏི. རཱཛཱུཧི ནཱམ ཙོརཱ ནིགྒཎྷིཏབྦཱ, ནོ ཨཙོརཱ. ཨིདྷ པན ཙོརཱནཾ ཀིཉྩི བྷཡཾ ནཏྠི, ཨཙོརཱ མརཎཾ ལབྷནྟི. ཨཧོ ཨིམསྨིཾ ལོཀེ ཨཡུཏྟཾ ཝཏྟཏི, ཨཧོ ཨདྷམྨོ ཝཏྟཏཱིཏི.

རཱཛཱ ¶ བོདྷིསཏྟསྶ ཝཙརཾ སུཏྭཱ ཨཱཧ – ‘‘ཛཱནཱསི ཏྭཾ, པཎྜིཏ, ཨསུཀེཧི ནཱམ རཐཙམྨཾ ཁཱདིཏ’’ནྟི? ‘‘ཨཱམ, ཛཱནཱམཱི’’ཏི. ‘‘ཀེཧི ཁཱདིཏ’’ནྟི? ‘‘ཏུམྷཱཀཾ གེཧེ ཝསནཀེཧི ཀོལེཡྻཀསུནཁེཧཱི’’ཏི. ‘‘ཀཐཾ ཏེཧི ཁཱདིཏབྷཱཝོ ཛཱནིཏབྦོ’’ཏི? ‘‘ཨཧཾ ཏེཧི ཁཱདིཏབྷཱཝཾ དསྶེསཱམཱི’’ཏི. ‘‘དསྶེཧི པཎྜིཏཱ’’ཏི. ‘‘ཏུམྷཱཀཾ གྷརེ ཀོལེཡྻཀསུནཁེ ཨཱཧརཱཔེཏྭཱ ཐོཀཾ ཏཀྐཉྩ དབྦཏིཎཱནི ཙ ཨཱཧརཱཔེཐཱ’’ཏི. རཱཛཱ ཏཐཱ ཨཀཱསི. ཨཐ ནཾ མཧཱསཏྟོ ‘‘ཨིམཱནི ཏིཎཱནི ཏཀྐེན མདྡཱཔེཏྭཱ ཨེཏེ སུནཁེ པཱཡེཐཱ’’ཏི ཨཱཧ. རཱཛཱ ཏཐཱ ཀཏྭཱ པཱཡཱཔེསི, པཱིཏཱ པཱིཏཱ སུནཁཱ སདྡྷིཾ ཙམྨེཧི ཝམིཾསུ. རཱཛཱ ‘‘སབྦཉྙུབུདྡྷསྶ བྱཱཀརཎཾ ཝིཡཱ’’ཏི ཏུཊྛོ བོདྷིསཏྟསྶ སེཏཙྪཏྟེན པཱུཛཾ ཨཀཱསི. བོདྷིསཏྟོ ‘‘དྷམྨཾ ཙར, མཧཱརཱཛ, མཱཏཱཔིཏཱུསུ ཁཏྟིཡཱ’’ཏིཨཱདཱིཧི (ཛཱ. ༢.༡༧.༣༩) ཏེསཀུཎཛཱཏཀེ ཨཱགཏཱཧི དསཧི དྷམྨཙརིཡགཱཐཱཧི རཉྙོ དྷམྨཾ དེསེཏྭཱ ‘‘མཧཱརཱཛ, ཨིཏོ པཊྛཱཡ ཨཔྤམཏྟོ ཧོཧཱི’’ཏི རཱཛཱནཾ པཉྩསུ སཱིལེསུ པཏིཊྛཱཔེཏྭཱ སེཏཙྪཏྟཾ རཉྙོཝ པཊིཨདཱསི.

རཱཛཱ མཧཱསཏྟསྶ དྷམྨཀཐཾ ¶ སུཏྭཱ སབྦསཏྟཱནཾ ཨབྷཡཾ དཏྭཱ བོདྷིསཏྟཾ ཨཱདིཾ ཀཏྭཱ སབྦསུནཁཱནཾ ཨཏྟནོ བྷོཛནསདིསམེཝ ནིཙྩབྷཏྟཾ པཊྛཔེཏྭཱ བོདྷིསཏྟསྶ ཨོཝཱདེ ཋིཏོ ཡཱཝཏཱཡུཀཾ དཱནཱདཱིནི པུཉྙཱནི ཀཏྭཱ ཀཱལཾ ཀཏྭཱ དེཝལོཀེ ཨུཔྤཛྫི. ཀུཀྐུརོཝཱདོ དས ཝསྶསཧསྶཱནི པཝཏྟི. བོདྷིསཏྟོཔི ཡཱཝཏཱཡུཀཾ ཋཏྭཱ ཡཐཱཀམྨཾ གཏོ.

སཏྠཱ ‘‘ན, བྷིཀྑཝེ, ཏཐཱགཏོ ཨིདཱནེཝ ཉཱཏཀཱནཾ ཨཏྠཾ ཙརཏི, པུབྦེཔི ཙརིཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ རཱཛཱ ཨཱནནྡོ ཨཧོསི, ཨཝསེསཱ པརིསཱ བུདྡྷཔརིསཱ, ཀུཀྐུརཔཎྜིཏོ པན ཨཧམེཝ ཨཧོསི’’ནྟི.

ཀུཀྐུརཛཱཏཀཝཎྞནཱ དུཏིཡཱ.

[༢༣] ༣. བྷོཛཱཛཱནཱིཡཛཱཏཀཝཎྞནཱ

ཨཔི ¶ པསྶེན སེམཱནོཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཨོསྶཊྛཝཱིརིཡཾ བྷིཀྑུཾ ཨཱརབྦྷ ཀཐེསི. ཏསྨིཉྷི སམཡེ སཏྠཱ ཏཾ བྷིཀྑུཾ ཨཱམནྟེཏྭཱ ‘‘བྷིཀྑུ, པུབྦེ པཎྜིཏཱ ཨནཱཡཏནེཔི ཝཱིརིཡཾ ཨཀཾསུ, པཧཱརཾ ལདྡྷཱཔི ནེཝ ཨོསྶཛིཾསཱུ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ བྷོཛཱཛཱནཱིཡསིནྡྷཝཀུལེ ནིབྦཏྟོ སབྦཱལངྐཱརསམྤནྣོ བཱརཱཎསིརཉྙོ མངྒལསྶོ ཨཧོསི. སོ སཏསཧསྶགྒྷནིཀཱཡ སུཝཎྞཔཱཏིཡཾཡེཝ ནཱནགྒརསསམྤནྣཾ ཏིཝསྶིཀགནྡྷསཱལིབྷོཛནཾ བྷུཉྫཏི, ཙཱཏུཛྫཱཏིཀགནྡྷཱུཔལིཏྟཱཡམེཝ བྷཱུམིཡཾ ཏིཊྛཏི, ཏཾ ཋཱནཾ རཏྟཀམྦལསཱཎིཔརིཀྑིཏྟཾ ཨུཔརི སུཝཎྞཏཱརཀཁཙིཏཙེལཝིཏཱནཾ སམོསརིཏགནྡྷདཱམམཱལཱདཱམཾ ཨཝིཛཧིཏགནྡྷཏེལཔདཱིཔཾ ཧོཏི. བཱརཱཎསིརཛྫཾ པན ཨཔཏྠེནྟཱ རཱཛཱནོ ནཱམ ནཏྠི. ཨེཀཾ སམཡཾ སཏྟ རཱཛཱནོ བཱརཱཎསིཾ པརིཀྑིཔིཏྭཱ ‘‘ཨམྷཱཀཾ རཛྫཾ ཝཱ དེཏུ, ཡུདྡྷཾ ཝཱ’’ཏི བཱརཱཎསིརཉྙོ པཎྞཾ པེསེསུཾ. རཱཛཱ ཨམཙྩེ སནྣིཔཱཏེཏྭཱ ཏཾ པཝཏྟིཾ ཨཱཙིཀྑིཏྭཱ ‘‘ཨིདཱནི ཀིཾ ཀརོམ, ཏཱཏཱ’’ཏི པུཙྪི. ‘‘དེཝ, ཏུམྷེཧི ཏཱཝ ཨཱདིཏོཝ ཡུདྡྷཱཡ ན གནྟབྦཾ, ཨསུཀཾ ¶ ནཱམ ཨསྶཱརོཧཾ པེསེཏྭཱ ཡུདྡྷཾ ཀཱརེཐ, ཏསྨིཾ ཨསཀྐོནྟེ པཙྪཱ ཛཱནིསྶཱམཱ’’ཏི. རཱཛཱ ཏཾ པཀྐོསཱཔེཏྭཱ ‘‘སཀྑིསྶསི, ཏཱཏ, སཏྟཧི རཱཛཱུཧི སདྡྷིཾ ཡུདྡྷཾ ཀཱཏུ’’ནྟི ཨཱཧ. ‘‘དེཝ, སཙེ བྷོཛཱཛཱནཱིཡསིནྡྷཝཾ ལབྷཱམི, ཏིཊྛནྟུ སཏྟ རཱཛཱནོ, སཀལཛམྦུདཱིཔེ རཱཛཱུཧིཔི སདྡྷིཾ ཡུཛ྄ཛྷིཏུཾ སཀྑིསྶཱམཱི’’ཏི. ‘‘ཏཱཏ, བྷོཛཱཛཱནཱིཡསིནྡྷཝོ ཝཱ ཧོཏུ ཨཉྙོ ཝཱ, ཡཾ ཨིཙྪསི, ཏཾ གཧེཏྭཱ ཡུདྡྷཾ ཀརོཧཱི’’ཏི.

སོ ‘‘སཱདྷུ, དེཝཱ’’ཏི རཱཛཱནཾ ཝནྡིཏྭཱ པཱསཱདཱ ཨོརུཡ྄ཧ བྷོཛཱཛཱནཱིཡསིནྡྷཝཾ ཨཱཧརཱཔེཏྭཱ སུཝམྨིཏཾ ཀཏྭཱ ཨཏྟནཱཔི སབྦསནྣཱཧསནྣདྡྷོ ཁགྒཾ བནྡྷིཏྭཱ སིནྡྷཝཔིཊྛིཝརགཏོ ནགརཱ ནིཀྑམྨ ཝིཛྫུལཏཱ ཝིཡ ཙརམཱནོ པཋམཾ བལཀོཊྛཀཾ བྷིནྡིཏྭཱ ཨེཀཾ རཱཛཱནཾ ཛཱིཝགྒཱཧམེཝ གཧེཏྭཱ ཨཱགནྟྭཱ ནགརེ བལསྶ ནིཡྻཱདེཏྭཱ པུན གནྟྭཱ དུཏིཡཾ བལཀོཊྛཀཾ བྷིནྡིཏྭཱ ཏཐཱ ཏཏིཡནྟི ཨེཝཾ པཉྩ རཱཛཱནོ ཛཱིཝགྒཱཧཾ གཧེཏྭཱ ཚཊྛཾ བལཀོཊྛཀཾ ¶ བྷིནྡིཏྭཱ ཚཊྛསྶ རཉྙོ གཧིཏཀཱལེ བྷོཛཱཛཱནཱིཡོ པཧཱརཾ ལབྷཏི, ལོཧིཏཾ པགྒྷརཏི, ཝེདནཱ བལཝཏིཡོ ཝཏྟནྟི. ཨསྶཱརོཧོ ཏསྶ པཧཊབྷཱཝཾ ཉཏྭཱ བྷོཛཱཛཱནཱིཡསིནྡྷཝཾ རཱཛདྭཱརེ ནིཔཛྫཱཔེཏྭཱ སནྣཱཧཾ སིཐིལཾ ཀཏྭཱ ཨཉྙཾ ཨསྶཾ སནྣཡ྄ཧིཏུཾ ཨཱརདྡྷོ. བོདྷིསཏྟོ མཧཱཕཱསུཀཔསྶེན ནིཔནྣོཝ ཨཀྑཱིནི ཨུམྨིལེཏྭཱ ཨསྶཱརོཧཾ དིསྭཱ ‘‘ཨཡཾ ཨཉྙཾ ཨསྶཾ སནྣཡ྄ཧཏི, ཨཡཉྩ ཨསྶོ སཏྟམཾ བལཀོཊྛཀཾ བྷིནྡིཏྭཱ སཏྟམཾ རཱཛཱནཾ གཎྷིཏུཾ ན སཀྑིསྶཏི, མཡཱ ཀཏཀམྨཉྩ ནསྶིསྶཏི, ཨཔྤཊིསམོ ཨསྶཱརོཧོཔི ནསྶིསྶཏི, རཱཛཱཔི པརཧཏྠཾ གམིསྶཏི, ཋཔེཏྭཱ མཾ ཨཉྙོ ཨསྶོ སཏྟམཾ བལཀོཊྛཀཾ བྷིནྡིཏྭཱ སཏྟམཾ རཱཛཱནཾ གཧེཏུཾ སམཏྠོ ནཱམ ནཏྠཱི’’ཏི ནིཔནྣཀོཝ ཨསྶཱརོཧཾ པཀྐོསཱཔེཏྭཱ ‘‘སམྨ ཨསྶཱརོཧ, སཏྟམཾ བལཀོཊྛཀཾ བྷིནྡིཏྭཱ སཏྟམཾ རཱཛཱནཾ གཧེཏུཾ སམཏྠོ ཋཔེཏྭཱ མཾ ཨཉྙོ ཨསྶོ ནཱམ ནཏྠི, ནཱཧཾ མཡཱ ཀཏཀམྨཾ ནཱསེསྶཱམི, མམཉྙེཝ ཨུཊྛཱཔེཏྭཱ སནྣཡ྄ཧཱཧཱི’’ཏི ཝཏྭཱ ཨིམཾ གཱཐམཱཧ –

༢༣.

‘‘ཨཔི ¶ ¶ པསྶེན སེམཱནོ, སལླེབྷི སལླལཱིཀཏོ;

སེཡྻོཝ ཝལ༹ཝཱ བྷོཛ྄ཛྷོ, ཡུཉྫ མཉྙེཝ སཱརཐཱི’’ཏི.

ཏཏྠ ཨཔི པསྶེན སེམཱནོཏི ཨེཀེན པསྶེན སཡམཱནཀོཔི. སལླེབྷི སལླལཱིཀཏོཏི སལླེཧི ཝིདྡྷོཔི སམཱནོ. སེཡྻོཝ ཝལ༹ཝཱ བྷོཛ྄ཛྷོཏི ཝལ༹ཝཱཏི སིནྡྷཝཀུལེསུ ཨཛཱཏོ ཁལུངྐསྶོ. བྷོཛ྄ཛྷོཏི བྷོཛཱཛཱནཱིཡསིནྡྷཝོ. ཨིཏི ཨེཏསྨཱ ཝལ༹ཝཱ སལླེཧི ཝིདྡྷོཔི བྷོཛཱཛཱནཱིཡསིནྡྷཝོཝ སེཡྻོ ཝརོ ཨུཏྟམོ. ཡུཉྫ མཉྙེཝ སཱརཐཱིཏི ཡསྨཱ ཨེཝ གཏོཔི ཨཧམེཝ སེཡྻོ, ཏསྨཱ མམཉྙེཝ ཡོཛེཧི, མཾ ཝམྨེཧཱིཏི ཝདཏི.

ཨསྶཱརོཧོ བོདྷིསཏྟཾ ཨུཊྛཱཔེཏྭཱ ཝཎཾ བནྡྷིཏྭཱ སུསནྣདྡྷཾ སནྣཡ྄ཧིཏྭཱ ཏསྶ པིཊྛིཡཾ ནིསཱིདིཏྭཱ སཏྟམཾ བལཀོཊྛཀཾ བྷིནྡིཏྭཱ སཏྟམཾ རཱཛཱནཾ ཛཱིཝགྒཱཧཾ གཧེཏྭཱ རཱཛབལསྶ ནིཡྻཱདེསི, བོདྷིསཏྟམྤི རཱཛདྭཱརཾ ཨཱནཡིཾསུ. རཱཛཱ ཏསྶ དསྶནཏྠཱཡ ནིཀྑམི. མཧཱསཏྟོ རཱཛཱནཾ ཨཱཧ – ‘‘མཧཱརཱཛ, སཏྟ རཱཛཱནོ མཱ གྷཱཏཡིཏྠ, སཔཐཾ ཀཱརེཏྭཱ ཝིསྶཛྫེཐ, མཡ྄ཧཉྩ ཨསྶཱརོཧསྶ ཙ དཱཏབྦཾ ཡསཾ ཨསྶཱརོཧསྶེཝ དེཐ ¶ , སཏྟ རཱཛཱནོ གཧེཏྭཱ དིནྣཡོདྷཾ ནཱམ ནཱསེཏུཾ ན ཝཊྚཏི. ཏུམྷེཔི དཱནཾ དེཐ, སཱིལཾ རཀྑཐ, དྷམྨེན སམེན རཛྫཾ ཀཱརེཐཱ’’ཏི. ཨེཝཾ བོདྷིསཏྟེན རཉྙོ ཨོཝཱདེ དིནྣེ བོདྷིསཏྟསྶ སནྣཱཧཾ མོཙཡིཾསུ, སོ སནྣཱཧེ མུཏྟམཏྟེཡེཝ ནིརུཛ྄ཛྷི. རཱཛཱ ཏསྶ སརཱིརཀིཙྩཾ ཀཱརེཏྭཱ ཨསྶཱརོཧསྶ མཧནྟཾ ཡསཾ དཏྭཱ སཏྟ རཱཛཱནོ པུན ཨཏྟནྣོ ཨདུབྦྷཱཡ སཔཐཾ ཀཱརེཏྭཱ སཀསཀཊྛཱནཱནི པེསེཏྭཱ དྷམྨེན སམེན རཛྫཾ ཀཱརེཏྭཱ ཛཱིཝིཏཔརིཡོསཱནེ ཡཐཱཀམྨཾ གཏོ.

སཏྠཱ ‘‘ཨེཝཾ བྷིཀྑུ པུབྦེ པཎྜིཏཱ ཨནཱཡཏནེཔི ཝཱིརིཡཾ ཨཀཾསུ, ཨེཝརཱུཔཾ པཧཱརཾ ལདྡྷཱཔི ན ཨོསྶཛིཾསུ, ཏྭཾ པན ཨེཝརཱུཔེ ནིཡྻཱནིཀསཱསནེ པབྦཛིཏྭཱ ཀསྨཱ ཝཱིརིཡཾ ཨོསྶཛསཱི’’ཏི ཝཏྭཱ ཙཏྟཱརི སཙྩཱནི པཀཱསེསི, སཙྩཔརིཡོསཱནེ ཨོསྶཊྛཝཱིརིཡོ བྷིཀྑུ ཨརཧཏྟཕལེ པཏིཊྛཱསི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ ¶ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ རཱཛཱ ཨཱནནྡོ ཨཧོསི, ཨསྶཱརོཧོ སཱརིཔུཏྟོ, བྷོཛཱཛཱནཱིཡསིནྡྷཝོ པན ཨཧམེཝ ཨཧོསི’’ནྟི.

བྷོཛཱཛཱནཱིཡཛཱཏཀཝཎྞནཱ ཏཏིཡཱ.

[༢༤] ༤. ཨཱཛཉྙཛཱཏཀཝཎྞནཱ

ཡདཱ ¶ ཡདཱཏི ཨིདམྤི སཏྠཱ ཛེཏཝནེ ཝིཧརནྟོ ཨོསྶཊྛཝཱིརིཡམེཝ བྷིཀྑུཾ ཨཱརབྦྷ ཀཐེསི. ཏཾ པན བྷིཀྑུཾ སཏྠཱ ཨཱམནྟེཏྭཱ ‘‘བྷིཀྑུ པུབྦེ པཎྜིཏཱ ཨནཱཡཏནེཔི ལདྡྷཔྤཧཱརཱཔི ཧུཏྭཱ ཝཱིརིཡཾ ཨཀཾསཱུ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ པུརིམནཡེནེཝ སཏྟ རཱཛཱནོ ནགརཾ པརིཝཱརཡིཾསུ. ཨཐེཀོ རཐིཀཡོདྷོ དྭེ བྷཱཏིཀསིནྡྷཝེ རཐེ ཡོཛེཏྭཱ ནགརཱ ནིཀྑམྨ ཚ བལཀོཊྛཀེ བྷིནྡིཏྭཱ ཚ རཱཛཱནོ ཨགྒཧེསི. ཏསྨིཾ ཁཎེ ཛེཊྛཀཨསྶོ པཧཱརཾ ལབྷི. རཐིཀོ རཐཾ པེསེནྟོ རཱཛདྭཱརཾ ཨཱགནྟྭཱ ཛེཊྛབྷཱཏིཀཾ རཐཱ མོཙེཏྭཱ སནྣཱཧཾ སིཐིལཾ ཀཏྭཱ ཨེཀེནེཝ པསྶེན ནིཔཛྫཱཔེཏྭཱ ¶ ཨཉྙཾ ཨསྶཾ སནྣཡ྄ཧིཏུཾ ཨཱརདྡྷོ. བོདྷིསཏྟོ ཏཾ དིསྭཱ པུརིམནཡེནེཝ ཙིནྟེཏྭཱ རཐིཀཾ པཀྐོསཱཔེཏྭཱ ནིཔནྣཀོཝ ཨིམཾ གཱཐམཱཧ –

༢༤.

‘‘ཡདཱ ཡདཱ ཡཏྠ ཡདཱ, ཡཏྠ ཡཏྠ ཡདཱ ཡདཱ;

ཨཱཛཉྙོ ཀུརུཏེ ཝེགཾ, ཧཱཡནྟི ཏཏྠ ཝཱལ༹ཝཱ’’ཏི.

ཏཏྠ ཡདཱ ཡདཱཏི པུབྦཎྷཱདཱིསུ ཡསྨིཾ ཡསྨིཾ ཀཱལེ. ཡཏྠཱཏི ཡསྨིཾ ཋཱནེ མགྒེ ཝཱ སངྒཱམསཱིསེ ཝཱ. ཡདཱཏི ཡསྨིཾ ཁཎེ. ཡཏྠ ཡཏྠཱཏི སཏྟནྣཾ བལཀོཊྛཀཱནཾ ཝསེན བཧཱུསུ ཡུདྡྷམཎྜལེསུ. ཡདཱ ཡདཱཏི ཡསྨིཾ ཡསྨིཾ ཀཱལེ པཧཱརཾ ལདྡྷཀཱལེ ཝཱ ཨལདྡྷཀཱལེ ཝཱ. ཨཱཛཉྙོ ཀུརུཏེ ཝེགནྟི སཱརཐིསྶ ཙིཏྟརུཙིཏཾ ཀཱརཎཾ ཨཱཛཱནནསབྷཱཝོ ཨཱཛཉྙོ ཝརསིནྡྷཝོ ཝེགཾ ཀརོཏི ཝཱཡམཏི ཝཱིརིཡཾ ཨཱརབྷཏི. ཧཱཡནྟི ཏཏྠ ཝཱལ༹ཝཱཏི ཏསྨིཾ ཝེགེ ཀརིཡམཱནེ ཨིཏརེ ཝལ༹ཝསངྑཱཏཱ ཁལུ༹ངྐསྶཱ ཧཱཡནྟི པརིཧཱཡནྟི, ཏསྨཱ ཨིམསྨིཾ རཐེ མཾཡེཝ ཡོཛེཧཱིཏི ཨཱཧ.

སཱརཐི བོདྷིསཏྟཾ ཨུཊྛཱཔེཏྭཱ རཐེ ཡོཛེཏྭཱ སཏྟམཾ བལཀོཊྛཀཾ བྷིནྡིཏྭཱ སཏྟམཾ རཱཛཱནཾ ཨཱདཱཡ རཐཾ པེསེནྟོ རཱཛདྭཱརཾ ¶ ཨཱགནྟྭཱ སིནྡྷཝཾ མོཙེསི. བོདྷིསཏྟོ ཨེཀེན པསྶེན ནིཔནྣོ པུརིམནཡེནེཝ རཉྙོ ཨོཝཱདཾ དཏྭཱ ནིརུཛ྄ཛྷི. རཱཛཱ ཏསྶ སརཱིརཀིཙྩཾ ཀཱརེཏྭཱ སཱརཐིསྶ སམྨཱནཾ ཀཏྭཱ དྷམྨེན རཛྫཾ ཀཱརེཏྭཱ ཡཐཱཀམྨཾ གཏོ.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེསི, སཙྩཔརིཡོསཱནེ སོ བྷིཀྑུ ཨརཧཏྟེ པཏིཊྛཱསི. སཏྠཱ ཛཱཏཀཾ སམོདྷཱནེསི ‘‘ཏདཱ རཱཛཱ ཨཱནནྡཏྠེརོ ཨཧོསི, ཨསྶོ སམྨཱསམྦུདྡྷོ’’ཏི.

ཨཱཛཉྙཛཱཏཀཝཎྞནཱ ཙཏུཏྠཱ.

[༢༥] ༥. ཏིཏྠཛཱཏཀཝཎྞནཱ

ཨཉྙམཉྙེཧི ¶ ཏིཏྠེཧཱིཏི ཨིདཾ སཏྠཱ ཛེཏཝནེ ཝིཧརནྟོ དྷམྨསེནཱཔཏིསྶ སདྡྷིཝིཧཱརིཀཾ ཨེཀཾ སུཝཎྞཀཱརཔུབྦཀཾ བྷིཀྑུཾ ཨཱརབྦྷ ཀཐེསི. ཨཱསཡཱནུསཡཉཱཎཉྷི བུདྡྷཱནཾཡེཝ ཧོཏི, ན ཨཉྙེསཾ. ཏསྨཱ དྷམྨསེནཱཔཏི ཨཏྟནོ ཨཱསཡཱནུསཡཉཱཎསྶ ནཏྠིཏཱཡ སདྡྷིཝིཧཱརིཀསྶ ཨཱསཡཱནུསཡཾ ཨཛཱནནྟོ ཨསུབྷཀམྨཊྛཱནམེཝ ཀཐེསི, ཏསྶ ཏཾ ན སཔྤཱཡམཧོསི. ཀསྨཱ? སོ ཀིར པཊིཔཱཊིཡཱ པཉྩ ཛཱཏིསཏཱནི སུཝཎྞཀཱརགེཧེཡེཝ པཊིསནྡྷིཾ གཎྷི, ཨཐསྶ དཱིགྷརཏྟཾ པརིསུདྡྷསུཝཎྞདསྶནཝསེན པརིཙིཏཏྟཱ ཨསུབྷཾ ན སཔྤཱཡམཧོསི. སོ ཏཏྠ ནིམིཏྟམཏྟམྤི ཨུཔྤཱདེཏུཾ ཨསཀྐོནྟོ ཙཏྟཱརོ མཱསེ ཁེཔེསི.

དྷམྨསེནཱཔཏི ཨཏྟནོ སདྡྷིཝིཧཱརིཀསྶ ཨརཧཏྟཾ དཱཏུཾ ཨསཀྐོནྟོ ‘‘ཨདྡྷཱ ཨཡཾ བུདྡྷཝེནེཡྻོ བྷཝིསྶཏི, ཏཐཱགཏསྶ སནྟིཀཾ ནེསྶཱམཱི’’ཏི ཙིནྟེཏྭཱ པཱཏོཝ ཏཾ ཨཱདཱཡ སཏྠུ སནྟིཀཾ ཨགམཱསི. སཏྠཱ ‘‘ཀིཾ ནུ ཁོ, སཱརིཔུཏྟ, ཨེཀཾ བྷིཀྑུཾ ཨཱདཱཡ ཨཱགཏོསཱི’’ཏི པུཙྪི. ‘‘ཨཧཾ, བྷནྟེ, ཨིམསྶ ཀམྨཊྛཱནཾ ཨདཱསིཾ, ཨཡཾ པན ཙཏཱུཧི མཱསེཧི ནིམིཏྟམཏྟམྤི ན ཨུཔྤཱདེསི, སྭཱཧཾ ‘བུདྡྷཝེནེཡྻོ ཨེསོ བྷཝིསྶཏཱི’ཏི ཙིནྟེཏྭཱ ཏུམྷཱཀཾ སནྟིཀཾ ཨཱདཱཡ ཨཱགཏོ’’ཏི. ‘‘སཱརིཔུཏྟ, ཀཏརཾ པན ཏེ ཀམྨཊྛཱནཾ སདྡྷིཝིཧཱརིཀསྶ དིནྣ’’ནྟི? ‘‘ཨསུབྷཀམྨཊྛཱནཾ བྷགཝཱ’’ཏི. ‘‘སཱརིཔུཏྟ, ནཏྠི ཏཝ སནྟཱནེ ཨཱསཡཱནུསཡཉཱཎཾ, གཙྪ, ཏྭཾ སཱཡནྷསམཡེ ཨཱགནྟྭཱ ཏཝ སདྡྷིཝིཧཱརིཀཾ ཨཱདཱཡ གཙྪེཡྻཱསཱི’’ཏི. ཨེཝཾ སཏྠཱ ཐེརཾ ཨུཡྻོཛེཏྭཱ ཏསྶ བྷིཀྑུསྶ མནཱཔཾ ཙཱིཝརཉྩ ནིཝཱསནཉྩ དཱཔེཏྭཱ ཏཾ ཨཱདཱཡ གཱམཾ པིཎྜཱཡ པཝིསིཏྭཱ པཎཱིཏཾ ཁཱདནཱིཡབྷོཛནཱིཡཾ དཱཔེཏྭཱ མཧཱབྷིཀྑུསངྒྷཔརིཝཱརོ པུན ཝིཧཱརཾ ཨཱགནྟྭཱ གནྡྷཀུཊིཡཾ དིཝསབྷཱགཾ ཁེཔེཏྭཱ ¶ སཱཡནྷསམཡེ ཏཾ བྷིཀྑུཾ གཧེཏྭཱ ཝིཧཱརཙཱརིཀཾ ཙརམཱནོ ཨམྦཝནེ ཨེཀཾ པོཀྑརཎིཾ མཱཔེཏྭཱ ཏཏྠ མཧནྟཾ པདུམིནིགཙྪཾ, ཏཏྲཱཔི ཙ མཧནྟཾ ཨེཀཾ པདུམཔུཔྥཾ མཱཔེཏྭཱ ‘‘བྷིཀྑུ ཨིམཾ པུཔྥཾ ཨོལོཀེནྟོ ནིསཱིདཱ’’ཏི ནིསཱིདཱཔེཏྭཱ གནྡྷཀུཊིཾ པཱཝིསི.

སོ ¶ བྷིཀྑུ ཏཾ པུཔྥཾ པུནཔྤུནཾ ཨོལོཀེཏི. བྷགཝཱ ཏཾ པུཔྥཾ ཛརཾ པཱཔེསི, ཏཾ ཏསྶ པསྶནྟསྶེཝ ཛརཾ པཏྭཱ ཝིཝཎྞཾ ཨཧོསི. ཨཐསྶ པརིཡནྟཏོ པཊྛཱཡ ¶ པཏྟཱནི པཏནྟཱནི མུཧུཏྟེན སབྦཱནི པཏིཾསུ. ཏཏོ ཀིཉྫཀྑཾ པཏི, ཀཎྞིཀཱཝ ཨཝསིསྶི. སོ བྷིཀྑུ ཏཾ པསྶནྟོ ཙིནྟེསི ‘‘ཨིདཾ པདུམཔུཔྥཾ ཨིདཱནེཝ ཨབྷིརཱུཔཾ ཨཧོསི དསྶནཱིཡཾ, ཨཐསྶ ཝཎྞོ པརིཎཏོ, པཏྟཱནི ཙ ཀིཉྩཀྑཉྩ པཏིཏཾ, ཀཎྞིཀཱམཏྟམེཝ ཨཝསིཊྛཾ, ཨེཝརཱུཔསྶ ནཱམ པདུམསྶ ཛརཱ པཏྟཱ, མཡ྄ཧཾ སརཱིརསྶ ཀིཾ ན པཱཔུཎིསྶཏི, སབྦེ སངྑཱརཱ ཨནིཙྩཱ’’ཏི ཝིཔསྶནཾ པཊྛཔེསི. སཏྠཱ ‘‘ཏསྶ ཙིཏྟཾ ཝིཔསྶནཾ ཨཱརུལ༹ྷ’’ནྟི ཉཏྭཱ གནྡྷཀུཊིཡཾ ནིསིནྣོཝ ཨོབྷཱསཾ ཕརིཏྭཱ ཨིམཾ གཱཐམཱཧ –

‘‘ཨུཙྪིནྡ སིནེཧམཏྟནོ, ཀུམུདཾ སཱརདིཀཾཝ པཱཎིནཱ;

སནྟིམགྒམེཝ བྲཱུཧཡ, ནིབྦཱནཾ སུགཏེན དེསིཏ’’ནྟི. (དྷ. པ. ༢༨༥);

སོ བྷིཀྑུ གཱཐཱཔརིཡོསཱནེ ཨརཧཏྟཾ པཏྭཱ ‘‘མུཏྟོ ཝཏམྷི སབྦབྷཝེཧཱི’’ཏི ཙིནྟེཏྭཱ –

‘‘སོ ཝུཏྠཝཱསོ པརིཔུཎྞམཱནསོ, ཁཱིཎཱསཝོ ཨནྟིམདེཧདྷཱརཱི;

ཝིསུདྡྷསཱིལོ སུསམཱཧིཏིནྡྲིཡོ, ཙནྡོ ཡཐཱ རཱཧུམུཁཱ པམུཏྟོ.

‘‘སམོཏཏཾ མོཧམཧནྡྷཀཱརཾ, ཝིནོདཡིཾ སབྦམལཾ ཨསེསཾ;

ཨཱལོཀཔཛྫོཏཀརོ པབྷངྐརོ, སཧསྶརཾསཱི ཝིཡ བྷཱཎུམཱ ནབྷེ’’ཏི. –

ཨཱདཱིཧི གཱཐཱཧི ཨུདཱནཾ ཨུདཱནེསི. ཨུདཱནེཏྭཱ ཙ པན གནྟྭཱ བྷགཝནྟཾ ཝནྡི. ཐེརོཔི ཨཱགནྟྭཱ སཏྠཱརཾ ཝནྡིཏྭཱ ཨཏྟནོ སདྡྷིཝིཧཱརིཀཾ གཧེཏྭཱ ཨགམཱསི. ཨཡཾ པཝཏྟི བྷིཀྑཱུནཾ ཨནྟརེ པཱཀཊཱ ཛཱཏཱ. བྷིཀྑཱུ ¶ དྷམྨསབྷཱཡཾ དསབལསྶ གུཎེ ཝཎྞཡམཱནཱ ནིསཱིདིཾསུ – ‘‘ཨཱཝུསོ, སཱརིཔུཏྟཏྠེརོ ཨཱསཡཱནུསཡཉཱཎསྶ ཨབྷཱཝེན ཨཏྟནོ སདྡྷིཝིཧཱརིཀསྶ ཨཱསཡཾ ན ཛཱནཱཏི, སཏྠཱ པན ཉཏྭཱ ཨེཀདིཝསེནེཝ ཏསྶ སཧ པཊིསམྦྷིདཱཧི ཨརཧཏྟཾ ཨདཱསི, ཨཧོ བུདྡྷཱ ནཱམ མཧཱནུབྷཱཝཱ’’ཏི.

སཏྠཱ ¶ ཨཱགནྟྭཱ པཉྙཏྟཱསནེ ནིསཱིདིཏྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪི. ‘‘ན བྷགཝཱ ཨཉྙཱཡ ཀཐཱཡ, ཏུམྷཱཀཉྙེཝ པན དྷམྨསེནཱཔཏིནོ སདྡྷིཝིཧཱརིཀསྶ ཨཱསཡཱནུསཡཉཱཎཀཐཱཡཱ’’ཏི. སཏྠཱ ‘‘ན, བྷིཀྑཝེ, ཨེཏཾ ཨཙྪརིཡཾ, སྭཱཧཾ ¶ ཨེཏརཧི བུདྡྷོ ཧུཏྭཱ ཏསྶ ཨཱསཡཾ ཛཱནཱམི, པུབྦེཔཱཧཾ ཏསྶ ཨཱསཡཾ ཛཱནཱམིཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟོ རཛྫཾ ཀཱརེསི. ཏདཱ བོདྷིསཏྟོ ཏཾ རཱཛཱནཾ ཨཏྠེ ཙ དྷམྨེ ཙ ཨནུསཱསཏི. ཏདཱ རཉྙོ མངྒལཨསྶནྷཱནཏིཏྠེ ཨཉྙཏརཾ ཝལ༹ཝཾ ཁལུ༹ངྐསྶཾ ནྷཱཔེསུཾ. མངྒལསྶོ ཝལ༹ཝེན ནྷཱནཏིཏྠཾ ཨོཏཱརིཡམཱནོ ཛིགུཙྪིཏྭཱ ཨོཏརིཏུཾ ན ཨིཙྪི. ཨསྶགོཔཀོ གནྟྭཱ རཉྙོ ཨཱརོཙེསི ‘‘དེཝ, མངྒལསྶོ ཏིཏྠཾ ཨོཏརིཏུཾ ན ཨིཙྪཏཱི’’ཏི. རཱཛཱ བོདྷིསཏྟཾ པེསེསི – ‘‘གཙྪ, པཎྜིཏ, ཛཱནཱཧི ཀེན ཀཱརཎེན ཨསྶོ ཏིཏྠཾ ཨོཏཱརིཡམཱནོ ན ཨོཏརཏཱི’’ཏི. བོདྷིསཏྟོ ‘‘སཱདྷུ, དེཝཱ’’ཏི ནདཱིཏཱིརཾ གནྟྭཱ ཨསྶཾ ཨོལོཀེཏྭཱ ནིརོགབྷཱཝམསྶ ཉཏྭཱ ‘‘ཀེན ནུ ཁོ ཀཱརཎེན ཨཡཾ ཨིམཾ ཏིཏྠཾ ན ཨོཏརཏཱི’’ཏི ཨུཔདྷཱརེནྟོ ‘‘པཋམཏརཾ ཨེཏྠ ཨཉྙོ ནྷཱཔིཏོ བྷཝིསྶཏི, ཏེནེས ཛིགུཙྪམཱནོ ཏིཏྠཾ ན ཨོཏརཏི མཉྙེ’’ཏི ཙིནྟེཏྭཱ ཨསྶགོཔཀེ པུཙྪི ‘‘ཨམྦྷོ, ཨིམསྨིཾ ཏིཏྠེ ཀཾ པཋམཾ ནྷཱཔཡིཏྠཱ’’ཏི? ‘‘ཨཉྙཏརཾ ཝལ༹ཝསྶཾ, སཱམཱི’’ཏི.

བོདྷིསཏྟོ ‘‘ཨེས ཨཏྟནོ སིནྡྷཝཏཱཡ ཛིགུཙྪནྟོ ཨེཏྠ ནྷཱཡིཏུཾ ན ཨིཙྪཏི, ཨིམཾ ཨཉྙཏིཏྠེ ནྷཱཔེཏུཾ ཝཊྚཏཱི’’ཏི ཏསྶ ཨཱསཡཾ ཉཏྭཱ ‘‘བྷོ ཨསྶགོཔཀ, སཔྤིམདྷུཕཱཎིཏཱདིབྷིསངྑཏཔཱཡཱསམྤི ཏཱཝ པུནཔྤུནཾ བྷུཉྫནྟསྶ ཏིཏྟི ཧོཏི. ཨཡཾ ཨསྶོ བཧཱུ ཝཱརེ ཨིདྷ ཏིཏྠེ ནྷཱཏོ, ཨཉྙམྤི ཏཱཝ ནཾ ཏིཏྠཾ ¶ ཨོཏཱརེཏྭཱ ནྷཱཔེཐ ཙ པཱཡེཐ ཙཱ’’ཏི ཝཏྭཱ ཨིམཾ གཱཐམཱཧ –

༢༥.

‘‘ཨཉྙམཉྙེཧི ཏིཏྠེཧི, ཨསྶཾ པཱཡེཧི སཱརཐི;

ཨཙྩཱསནསྶ པུརིསོ, པཱཡཱསསྶཔི ཏཔྤཏཱི’’ཏི.

ཏཏྠ ཨཉྙམཉྙེཧཱིཏི ཨཉྙེཧི ཨཉྙེཧི. པཱཡེཧཱིཏི དེསནཱསཱིསམེཏཾ, ནྷཱཔེཧི ཙ པཱཡེཧི ཙཱཏི ཨཏྠོ. ཨཙྩཱསནསྶཱཏི ཀརཎཏྠེ སཱམིཝཙནཾ ¶ , ཨཏིཨསནེན ཨཏིབྷུཏྟེནཱཏི ཨཏྠོ. པཱཡཱསསྶཔི ཏཔྤཏཱིཏི སཔྤིཨཱདཱིཧི ཨབྷིསངྑཏེན མདྷུརཔཱཡཱསེན ཏཔྤཏི ཏིཏྟོ ཧོཏི, དྷཱཏོ སུཧིཏོ ན པུན བྷུཉྫིཏུཀཱམཏཾ ཨཱཔཛྫཏི. ཏསྨཱ ཨཡམྤི ཨསྶོ ཨིམསྨིཾ ཏིཏྠེ ནིབདྡྷཾ ནྷཱནེན པརིཡཏྟིཾ ཨཱཔནྣོ བྷཝིསྶཏི, ཨཉྙཏྠ ནཾ ནྷཱཔེཐཱཏི.

ཏེ ཏསྶ ཝཙནཾ སུཏྭཱ ཨསྶཾ ཨཉྙཏིཏྠཾ ཨོཏཱརེཏྭཱ པཱཡིཾསུ ཙེཝ ནྷཱཔཡིཾསུ ཙ. བོདྷིསཏྟོ ¶ ཨསྶསྶ པཱནཱིཡཾ པིཝིཏྭཱ ནྷཱནཀཱལེ རཉྙོ སནྟིཀཾ ཨགམཱསི. རཱཛཱ ‘‘ཀིཾ, ཏཱཏ, ཨསྶོ ནྷཱཏོ ཙ པཱིཏོ ཙཱ’’ཏི པུཙྪི. ‘‘ཨཱམ, དེཝཱ’’ཏི. ‘‘པཋམཾ ཀིཾ ཀཱརཎཱ ན ཨིཙྪཏཱི’’ཏི? ‘‘ཨིམིནཱ ནཱམ ཀཱརཎེནཱ’’ཏི སབྦཾ ཨཱཙིཀྑི. རཱཛཱ ‘‘ཨེཝརཱུཔསྶ ཏིརཙྪཱནསྶཱཔི ནཱམ ཨཱསཡཾ ཛཱནཱཏི, ཨཧོ པཎྜིཏོ’’ཏི བོདྷིསཏྟསྶ མཧནྟཾ ཡསཾ དཏྭཱ ཛཱིཝིཏཔརིཡོསཱནེ ཡཐཱཀམྨཾ གཏོ. བོདྷིསཏྟོཔི ཡཐཱཀམྨམེཝ གཏོ.

སཏྠཱ ‘‘ན, བྷིཀྑཝེ, ཨཧཾ ཨེཏསྶ ཨིདཱནེཝ ཨཱསཡཾ ཛཱནཱམི, པུབྦེཔི ཛཱནཱམིཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ མངྒལཨསྶོ ཨཡཾ བྷིཀྑུ ཨཧོསི, རཱཛཱ ཨཱནནྡོ, པཎྜིཏཱམཙྩོ པན ཨཧམེཝ ཨཧོསི’’ནྟི.

ཏིཏྠཛཱཏཀཝཎྞནཱ པཉྩམཱ.

[༢༦] ༦. མཧིལཱ༹མུཁཛཱཏཀཝཎྞནཱ

པུརཱཎཙོརཱན ཝཙོ ནིསམྨཱཏི ཨིདཾ སཏྠཱ ཝེལུ༹ཝནེ ཝིཧརནྟོ དེཝདཏྟཾ ཨཱརབྦྷ ཀཐེསི. དེཝདཏྟོ ཨཛཱཏསཏྟུཀུམཱརཾ པསཱདེཏྭཱ ལཱབྷསཀྐཱརཾ ནིཔྥཱདེསི. ཨཛཱཏསཏྟུཀུམཱརོ དེཝདཏྟསྶ གཡཱསཱིསེ ཝིཧཱརཾ ཀཱརེཏྭཱ ནཱནགྒརསེཧི ཏིཝསྶིཀགནྡྷསཱལིབྷོཛནསྶ ¶ དིཝསེ དིཝསེ པཉྩ ཐཱལིཔཱཀསཏཱནི ཨབྷིཧརི. ལཱབྷསཀྐཱརཾ ནིསྶཱཡ དེཝདཏྟསྶ པརིཝཱརོ མཧནྟོ ཛཱཏོ, དེཝདཏྟོ པརིཝཱརེན སདྡྷིཾ ཝིཧཱརེཡེཝ ཧོཏི. ཏེན སམཡེན རཱཛགཧཝཱསིཀཱ དྭེ སཧཱཡཱ. ཏེསུ ཨེཀོ སཏྠུ སནྟིཀེ པབྦཛིཏོ, ཨེཀོ དེཝདཏྟསྶ. ཏེ ཨཉྙམཉྙཾ ཏསྨིཾ ཏསྨིཾ ཋཱནེཔི པསྶནྟི, ཝིཧཱརཾ གནྟྭཱཔི པསྶནྟིཡེཝ.

ཨཐེཀདིཝསཾ ¶ དེཝདཏྟསྶ ནིསྶིཏཀོ ཨིཏརཾ ཨཱཧ – ‘‘ཨཱཝུསོ, ཀིཾ ཏྭཾ དེཝསིཀཾ སེདེཧི མུཙྩམཱནེཧི པིཎྜཱཡ ཙརསི, དེཝདཏྟོ གཡཱསཱིསཝིཧཱརེ ནིསཱིདིཏྭཱཝ ནཱནགྒརསེཧི སུབྷོཛནཾ བྷུཉྫཏི, ཨེཝརཱུཔོ ཨུཔཱཡོ ནཏྠི, ཀིཾ ཏྭཾ དུཀྑཾ ཨནུབྷོསི, ཀིཾ ཏེ པཱཏོཝ གཡཱསཱིསཾ ཨཱགནྟྭཱ སཨུཏྟརིབྷངྒཾ ཡཱགུཾ པིཝིཏྭཱ ཨཊྛཱརསཝིདྷཾ ཁཛྫཀཾ ཁཱདིཏྭཱ ནཱནགྒརསེཧི སུབྷོཛནཾ བྷུཉྫིཏུཾ ན ཝཊྚཏཱི’’ཏི? སོ པུནཔྤུནཾ ཝུཙྩམཱནོ གནྟུཀཱམོ ཧུཏྭཱ ཏཏོ པཊྛཱཡ གཡཱསཱིསཾ གནྟྭཱ བྷུཉྫིཏྭཱ ཀཱལསྶེཝ ཝེལུ༹ཝནཾ ཨཱགཙྪཏི. སོ སབྦཀཱལཾ པཊིཙྪཱདེཏུཾ ནཱསཀྑི, ‘‘གཡཱསཱིསཾ གནྟྭཱ དེཝདཏྟསྶ པཊྛཔིཏཾ བྷཏྟཾ བྷུཉྫཏཱི’’ཏི ན ཙིརསྶེཝ པཱཀཊོ ཛཱཏོ ¶ . ཨཐ ནཾ སཧཱཡཱ པུཙྪིཾསུ ‘‘སཙྩཾ ཀིར, ཏྭཾ ཨཱཝུསོ, དེཝདཏྟསྶ པཊྛཔིཏཾ བྷཏྟཾ བྷུཉྫསཱི’’ཏི. ‘‘ཀོ ཨེཝམཱཧཱ’’ཏི? ‘‘ཨསུཀོ ཙ ཨསུཀོ ཙཱ’’ཏི. ‘‘སཙྩཾ ཨཧཾ ཨཱཝུསོ གཡཱསཱིསཾ གནྟྭཱ བྷུཉྫཱམི, ན པན མེ དེཝདཏྟོ བྷཏྟཾ དེཏི, ཨཉྙེ མནུསྶཱ དེནྟཱི’’ཏི. ‘‘ཨཱཝུསོ, དེཝདཏྟོ བུདྡྷཱནཾ པཊིཀཎྚཀོ དུསྶཱིལོ ཨཛཱཏསཏྟུཾ པསཱདེཏྭཱ ཨདྷམྨེན ཨཏྟནོ ལཱབྷསཀྐཱརཾ ཨུཔྤཱདེསི, ཏྭཾ ཨེཝརཱུཔེ ནིཡྻཱནིཀེ བུདྡྷསཱསནེ པབྦཛིཏྭཱ དེཝདཏྟསྶ ཨདྷམྨེན ཨུཔྤནྣཾ བྷོཛནཾ བྷུཉྫསི, ཨེཧི ཏཾ སཏྠུ སནྟིཀཾ ནེསྶཱམཱ’’ཏི ཏཾ བྷིཀྑུཾ ཨཱདཱཡ དྷམྨསབྷཾ ཨཱགམིཾསུ.

སཏྠཱ དིསྭཱཝ ‘‘ཀིཾ, བྷིཀྑཝེ, ཨེཏཾ བྷིཀྑུཾ ཨནིཙྪནྟཉྙེཝ ཨཱདཱཡ ཨཱགཏཏྠཱ’’ཏི? ‘‘ཨཱམ བྷནྟེ, ཨཡཾ བྷིཀྑུ ཏུམྷཱཀཾ སནྟིཀེ པབྦཛིཏྭཱ དེཝདཏྟསྶ ཨདྷམྨེན ཨུཔྤནྣཾ བྷོཛནཾ བྷུཉྫཏཱི’’ཏི. ‘‘སཙྩཾ ཀིར ཏྭཾ བྷིཀྑུ དེཝདཏྟསྶ ཨདྷམྨེན ཨུཔྤནྣཾ བྷོཛནཾ བྷུཉྫསཱི’’ཏི? ‘‘ན བྷནྟེ, དེཝདཏྟོ མཡ྄ཧཾ དེཏི, ཨཉྙེ མནུསྶཱ དེནྟི, ཏམཧཾ བྷུཉྫཱམཱི’’ཏི. སཏྠཱ ‘‘མཱ བྷིཀྑུ ཨེཏྠ པརིཧཱརཾ ཀརི, དེཝདཏྟོ ཨནཱཙཱརོ དུསྶཱིལོ, ཀཐཉྷི ནཱམ ཏྭཾ ཨིདྷ པབྦཛིཏྭཱ མམ སཱསནཾ བྷཛནྟོཡེཝ དེཝདཏྟསྶ བྷཏྟཾ བྷུཉྫསི, ནིཙྩཀཱལམྤི བྷཛནསཱིལཀོཝ ཏྭཾ དིཊྛདིཊྛེཡེཝ བྷཛསཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཏསྶ ཨམཙྩོ ཨཧོསི. ཏདཱ རཉྙོ མཧིལཱ༹མུཁོ ནཱམ ¶ མངྒལཧཏྠཱི ཨཧོསི སཱིལཝཱ ཨཱཙཱརསམྤནྣོ, ན ཀཉྩི ཝིཧེཋེཏི. ཨཐེཀདིཝསཾ ཏསྶ སཱལཱཡ སམཱིཔེ རཏྟིབྷཱགསམནནྟརེ ཙོརཱ ཨཱགནྟྭཱ ཏསྶ ཨཝིདཱུརེ ¶ ནིསིནྣཱ ཙོརམནྟཾ མནྟཡིཾསུ ‘‘ཨེཝཾ ཨུམྨངྒོ བྷིནྡིཏབྦོ, ཨེཝཾ སནྡྷིཙྪེདཀམྨཾ ཀཏྟབྦཾ, ཨུམྨངྒཉྩ སནྡྷིཙྪེདཉྩ མགྒསདིསཾ ཏིཏྠསདིསཾ ནིཛྫཊཾ ནིགྒུམྦཾ ཀཏྭཱ བྷཎྜཾ ཧརིཏུཾ ཝཊྚཏི, ཧརནྟེན མཱརེཏྭཱཝ ཧརིཏབྦཾ, ཨེཝཾ ཨུཊྛཱཏུཾ སམཏྠོ ནཱམ ན བྷཝིསྶཏི, ཙོརེན ཙ ནཱམ སཱིལཱཙཱརཡུཏྟེན ན བྷཝིཏབྦཾ, ཀཀྑལེ༹ན ཕརུསེན སཱཧསིཀེན བྷཝིཏབྦ’’ནྟི. ཨེཝཾ མནྟེཏྭཱ ཨཉྙམཉྙཾ ཨུགྒཎྷཱཔེཏྭཱ ཨགམཾསུ. ཨེཏེནེཝ ཨུཔཱཡེན པུནདིཝསེཔི པུནདིཝསེཔཱིཏི བཧཱུ དིཝསེ ཏཏྠ ཨཱགནྟྭཱ མནྟཡིཾསུ. སོ ཏེསཾ ཝཙནཾ སུཏྭཱ ‘‘ཏེ མཾ སིཀྑཱཔེནྟཱི’’ཏི སཉྙཱཡ ‘‘ཨིདཱནི མཡཱ ཀཀྑལེ༹ན ཕརུསེན སཱཧསིཀེན བྷཝིཏབྦ’’ནྟི ཏཐཱརཱུཔོཝ ཨཧོསི. པཱཏོཝ ཨཱགཏཾ ཧཏྠིགོཔཀཾ སོཎྜཱཡ གཧེཏྭཱ བྷཱུམིཡཾ པོཐེཏྭཱ མཱརེསི. ཨཔརམྤི ཏཐཱ ཨཔརམྤི ཏཐཱཏི ཨཱགཏཱགཏཾ མཱརེཏིཡེཝ.

‘‘མཧིལཱ༹མུཁོ ¶ ཨུམྨཏྟཀོ ཛཱཏོ དིཊྛདིཊྛེ མཱརེཏཱི’’ཏི རཉྙོ ཨཱརོཙཡིཾསུ. རཱཛཱ བོདྷིསཏྟཾ པཧིཎི ‘‘གཙྪ པཎྜིཏ, ཛཱནཱཧི ཀེན ཀཱརཎེན སོ དུཊྛོ ཛཱཏོ’’ཏི. བོདྷིསཏྟོ གནྟྭཱ ཏསྶ སརཱིརེ ཨརོགབྷཱཝཾ ཉཏྭཱ ‘‘ཀེན ནུ ཁོ ཀཱརཎེན ཨེས དུཊྛོ ཛཱཏོ’’ཏི ཨུཔདྷཱརེནྟོ ‘‘ཨདྡྷཱ ཨཝིདཱུརེ ཀེསཉྩི ཝཙནཾ སུཏྭཱ ‘མཾ ཨེཏེ སིཀྑཱཔེནྟཱི’ཏི སཉྙཱཡ དུཊྛོ ཛཱཏོ’’ཏི སནྣིཊྛཱནཾ ཀཏྭཱ ཧཏྠིགོཔཀེ པུཙྪི ‘‘ཨཏྠི ནུ ཁོ ཧཏྠིསཱལཱཡ སམཱིཔེ རཏྟིབྷཱགེ ཀེཧིཙི ཀིཉྩི ཀཐིཏཔུབྦ’’ནྟི? ‘‘ཨཱམ, སཱམི, ཙོརཱ ཨཱགནྟྭཱ ཀཐཡིཾསཱུ’’ཏི. བོདྷིསཏྟོ གནྟྭཱ རཉྙོ ཨཱརོཙེསི ‘‘དེཝ, ཨཉྙོ ཧཏྠིསྶ སརཱིརེ ཝིཀཱརོ ནཏྠི, ཙོརཱནཾ ཀཐཾ སུཏྭཱ དུཊྛོ ཛཱཏོ’’ཏི. ‘‘ཨིདཱནི ཀིཾ ཀཱཏུཾ ཝཊྚཏཱི’’ཏི? ‘‘སཱིལཝནྟེ སམཎབྲཱཧྨཎེ ཧཏྠིསཱལཱཡཾ ནིསཱིདཱཔེཏྭཱ སཱིལཱཙཱརཀཐཾ ཀཐཱཔེཏུཾ ཝཊྚཏཱི’’ཏི. ‘‘ཨེཝཾ ཀཱརེཧི, ཏཱཏཱ’’ཏི.

བོདྷིསཏྟོ གནྟྭཱ སཱིལཝནྟེ སམཎབྲཱཧྨཎེ ཧཏྠིསཱལཱཡཾ ནིསཱིདཱཔེཏྭཱ ‘‘སཱིལཀཐཾ ¶ ཀཐེཐ, བྷནྟེ’’ཏི ཨཱཧ. ཏེ ཧཏྠིསྶ ཨཝིདཱུརེ ནིསིནྣཱ ‘‘ན ཀོཙི པརཱམསིཏབྦོ ན མཱརེཏབྦོ, སཱིལཱཙཱརསམྤནྣེན ཁནྟིམེཏྟཱནུདྡཡཡུཏྟེན བྷཝིཏུཾ ཝཊྚཏཱི’’ཏི སཱིལཀཐཾ ཀཐཡིཾསུ. སོ ཏཾ སུཏྭཱ ‘‘མཾ ཨིམེ སིཀྑཱཔེནྟི, ཨིཏོ དཱནི པཊྛཱཡ སཱིལཝནྟེན བྷཝིཏབྦ’’ནྟི སཱིལཝཱ ཨཧོསི. རཱཛཱ བོདྷིསཏྟཾ པུཙྪི ‘‘ཀིཾ, ཏཱཏ, སཱིལཝཱ ཛཱཏོ’’ཏི ¶ ? བོདྷིསཏྟོ ‘‘ཨཱམ, དེཝཱ’’ཏི. ‘‘ཨེཝརཱུཔོ དུཊྛཧཏྠཱི པཎྜིཏེ ནིསྶཱཡ པོརཱཎཀདྷམྨེཡེཝ པཏིཊྛིཏོ’’ཏི ཝཏྭཱ ཨིམཾ གཱཐམཱཧ –

༢༦.

‘‘པུརཱཎཙོརཱན ཝཙོ ནིསམྨ, མཧིལཱ༹མུཁོ པོཐཡམནྭཙཱརཱི;

སུསཉྙཏཱནཉྷི ཝཙོ ནིསམྨ, གཛུཏྟམོ སབྦགུཎེསུ ཨཊྛཱ’’ཏི.

ཏཏྠ པུརཱཎཙོརཱནནྟི པོརཱཎཙོརཱནཾ. ནིསམྨཱཏི སུཏྭཱ, པཋམཾ ཙོརཱནཾ ཝཙནཾ སུཏྭཱཏི ཨཏྠོ. མཧིལཱ༹མུཁོཏི ཧཏྠིནིམུཁེན སདིསམུཁོ. ཡཐཱ མཧིལཱ༹ པུརཏོ ཨོལོཀིཡམཱནཱ སོབྷཏི, ན པཙྪཏོ, ཏཐཱ སོཔི པུརཏོ ཨོལོཀིཡམཱནོ སོབྷཏི. ཏསྨཱ ‘‘མཧིལཱ༹མུཁོ’’ཏིསྶ ནཱམཾ ཨཀཾསུ. པོཐཡམནྭཙཱརཱིཏི པོཐཡནྟོ མཱརེནྟོ ཨནུཙཱརཱི. ཨཡམེཝ ཝཱ པཱཋོ. སུསཉྙཏཱནནྟི སུཊྛུ སཉྙཏཱནཾ སཱིལཝནྟཱནཾ. གཛུཏྟམོཏི ཨུཏྟམགཛོ མངྒལཧཏྠཱི. སབྦགུཎེསུ ཨཊྛཱཏི སབྦེསུ པོརཱཎགུཎེསུ པཏིཊྛིཏོ. རཱཛཱ ‘‘ཏིརཙྪཱནགཏསྶཱཔི ཨཱསཡཾ ཛཱནཱཏཱི’’ཏི བོདྷིསཏྟསྶ མཧནྟཾ ཡསཾ ཨདཱསི. སོ ཡཱཝཏཱཡུཀཾ ཋཏྭཱ སདྡྷིཾ བོདྷིསཏྟེན ཡཐཱཀམྨཾ གཏོ.

སཏྠཱ ¶ ‘‘པུབྦེཔི ཏྭཾ བྷིཀྑུ དིཊྛདིཊྛེཡེཝ བྷཛི, ཙོརཱནཾ ཝཙནཾ སུཏྭཱ ཙོརེ བྷཛི, དྷམྨིཀཱནཾ ཝཙནཾ སུཏྭཱ དྷམྨིཀེ བྷཛཱི’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ མཧིལཱ༹མུཁོ ཝིཔཀྑསེཝཀབྷིཀྑུ ཨཧོསི, རཱཛཱ ཨཱནནྡོ, ཨམཙྩོ པན ཨཧམེཝ ཨཧོསི’’ནྟི.

མཧིལཱ༹མུཁཛཱཏཀཝཎྞནཱ ཚཊྛཱ.

[༢༧] ༧. ཨབྷིཎྷཛཱཏཀཝཎྞནཱ

ནཱལཾ ¶ ཀབལ༹ཾ པདཱཏཝེཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཨུཔཱསཀཉྩ མཧལླཀཏྠེརཉྩ ཨཱརབྦྷ ཀཐེསི ¶ . སཱཝཏྠིཡཾ ཀིར དྭེ སཧཱཡཀཱ. ཏེསུ ཨེཀོ པབྦཛིཏྭཱ དེཝསིཀཾ ཨིཏརསྶ གྷརཾ གཙྪཏི. སོ ཏསྶ བྷིཀྑཾ དཏྭཱ སཡམྤི བྷུཉྫིཏྭཱ ཏེནེཝ སདྡྷིཾ ཝིཧཱརཾ གནྟྭཱ ཡཱཝ སཱུརིཡཏྠངྒམནཱ ཨཱལཱཔསལླཱཔེན ནིསཱིདིཏྭཱ ནགརཾ པཝིསཏི, ཨིཏརོཔི ནཾ ཡཱཝ ནགརདྭཱརཱ ཨནུགནྟྭཱ ནིཝཏྟཏི. སོ ཏེསཾ ཝིསྶཱསོ བྷིཀྑཱུནཾ ཨནྟརེ པཱཀཊོ ཛཱཏོ. ཨཐེཀདིཝསཾ བྷིཀྑཱུ ཏེསཾ ཝིསྶཱསཀཐཾ ཀཐེནྟཱ དྷམྨསབྷཱཡཾ ནིསཱིདིཾསུ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪི, ཏེ ‘‘ཨིམཱཡ ནཱམ, བྷནྟེ’’ཏི ཀཐཡིཾསུ. སཏྠཱ ‘‘ན, བྷིཀྑཝེ, ཨིདཱནེཝ ཨིམེ ཝིསྶཱསིཀཱ, པུབྦེཔི ཝིསྶཱསིཀཱཡེཝ ཨཧེསུ’’ནྟི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཏསྶ ཨམཙྩོ ཨཧོསི. ཏདཱ ཨེཀོ ཀུཀྐུརོ མངྒལཧཏྠིསཱལཾ གནྟྭཱ མངྒལཧཏྠིསྶ བྷུཉྫནཊྛཱནེ པཏིཏཱནི བྷཏྟསིཏྠཱནི ཁཱདཏི. སོ ཏེནེཝ བྷོཛནེན སཾཝདྡྷམཱནོ མངྒལཧཏྠིསྶ ཝིསྶཱསིཀོ ཛཱཏོ ཧཏྠིསྶེཝ སནྟིཀེ བྷུཉྫཏི, ཨུབྷོཔི ཝིནཱ ཝཏྟིཏུཾ ན སཀྐོནྟི. སོ ཧཏྠཱི ནཾ སོཎྜཱཡ གཧེཏྭཱ ཨཔརཱཔརཾ ཀརོནྟོ ཀཱིལ༹ཏི, ཨུཀྑིཔིཏྭཱ ཀུམྦྷེ པཏིཊྛཱཔེཏི. ཨཐེཀདིཝསཾ ཨེཀོ གཱམིཀམནུསྶོ ཧཏྠིགོཔཀསྶ མཱུལཾ དཏྭཱ ཏཾ ཀུཀྐུརཾ ཨཱདཱཡ ཨཏྟནོ གཱམཾ ཨགམཱསི. ཏཏོ པཊྛཱཡ སོ ཧཏྠཱི ཀུཀྐུརཾ ཨཔསྶནྟོ ནེཝ ཁཱདཏི ན པིཝཏི ན ནྷཱཡཏི. ཏམཏྠཾ རཉྙོ ཨཱརོཙེསུཾ. རཱཛཱ བོདྷིསཏྟཾ པཧིཎི ‘‘གཙྪ པཎྜིཏ, ཛཱནཱཧི ཀིཾཀཱརཎཱ ཧཏྠཱི ཨེཝཾ ཀརོཏཱི’’ཏི.

བོདྷིསཏྟོ ¶ ཧཏྠིསཱལཾ གནྟྭཱ ཧཏྠིསྶ དུམྨནབྷཱཝཾ ཉཏྭཱ ‘‘ཨིམསྶ སརཱིརེ རོགོ ན པཉྙཱཡཏི, ཀེནཙི པནསྶ སདྡྷིཾ མིཏྟསནྠཝེན བྷཝིཏབྦཾ, ཏཾ ཨཔསྶནྟོ ཨེས མཉྙེ སོཀཱབྷིབྷཱུཏོ’’ཏི ཧཏྠིགོཔཀེ པུཙྪི ‘‘ཨཏྠི ནུ ཁོ ཨིམསྶ ཀེནཙི སདྡྷིཾ ཝིསྶཱསོ’’ཏི? ‘‘ཨཱམ, ཨཏྠི སཱམི ཨེཀེན སུནཁེན སདྡྷིཾ བལཝཱ མེཏྟཱི’’ཏི. ‘‘ཀཧཾ སོ ཨེཏརཧཱི’’ཏི? ‘‘ཨེཀེན མནུསྶེན ནཱིཏོ’’ཏི. ‘‘ཛཱནཱཐ པནསྶ ནིཝཱསནཊྛཱན’’ནྟི? ‘‘ན ཛཱནཱམ, སཱམཱི’’ཏི. བོདྷིསཏྟོ རཉྙོ སནྟིཀཾ གནྟྭཱ ‘‘ནཏྠི, དེཝ, ཧཏྠིསྶ ཀོཙི ཨཱབཱདྷོ ¶ , ཨེཀེན པནསྶ སུནཁེན སདྡྷིཾ བལཝཝིསྶཱསོ ¶ , ཏཾ ཨཔསྶནྟོ ན བྷུཉྫཏི མཉྙེ’’ཏི ཝཏྭཱ ཨིམཾ གཱཐམཱཧ –

༢༧.

‘‘ནཱལཾ ཀབལ༹ཾ པདཱཏཝེ, ན ཙ པིཎྜཾ ན ཀུསེ ན གྷཾསིཏུཾ;

མཉྙཱམི ཨབྷིཎྷདསྶནཱ, ནཱགོ སྣེཧམཀཱསི ཀུཀྐུརེ’’ཏི.

ཏཏྠ ནཱལནྟི ན སམཏྠོ. ཀབལ༹ནྟི བྷོཛནཀཱལེ པཋམམེཝ དིནྣཾ ཀཊུཀཀབལ༹ཾ. པདཱཏཝེཏི པཨཱདཱཏཝེ, སནྡྷིཝསེན ཨཱཀཱརལོཔོ ཝེདིཏབྦོ, གཧེཏུནྟི ཨཏྠོ. ན ཙ པིཎྜནྟི ཝཌྜྷེཏྭཱ དཱིཡམཱནཾ བྷཏྟཔིཎྜམྤི ནཱལཾ གཧེཏུཾ. ན ཀུསེཏི ཁཱདནཏྠཱཡ དིནྣཱནི ཏིཎཱནིཔི ནཱལཾ གཧེཏུཾ. ན གྷཾསིཏུནྟི ནྷཱཔིཡམཱནོ སརཱིརམྤི གྷཾསིཏུཾ ནཱལཾ. ཨེཝཾ ཡཾ ཡཾ སོ ཧཏྠཱི ཀཱཏུཾ ན སམཏྠོ, ཏཾ ཏཾ སབྦཾ རཉྙོ ཨཱརོཙེཏྭཱ ཏསྶ ཨསམཏྠབྷཱཝེ ཨཏྟནཱ སལླཀྑིཏཀཱརཎཾ ཨཱརོཙེནྟོ ‘‘མཉྙཱམཱི’’ཏིཨཱདིམཱཧ.

རཱཛཱ ཏསྶ ཝཙནཾ སུཏྭཱ ‘‘ཨིདཱནི ཀིཾ ཀཱཏབྦཾ པཎྜིཏཱ’’ཏི པུཙྪི. ‘‘‘ཨམྷཱཀཾ ཀིར མངྒལཧཏྠིསྶ སཧཱཡཾ སུནཁཾ ཨེཀོ མནུསྶོ གཧེཏྭཱ གཏོ, ཡསྶ གྷརེ ཏཾ སུནཁཾ པསྶནྟི, ཏསྶ ཨཡཾ ནཱམ དཎྜོ’ཏི བྷེརིཾ ཙརཱཔེཐ དེཝཱ’’ཏི. རཱཛཱ ཏཐཱ ཀཱརེསི. ཏཾ པཝཏྟིཾ སུཏྭཱ སོ པུརིསོ སུནཁཾ ཝིསྶཛྫེསི, སུནཁོ ཝེགེནཱགནྟྭཱ ཧཏྠིསྶ སནྟིཀམེཝ ཨགམཱསི. ཧཏྠཱི ཏཾ སོཎྜཱཡ གཧེཏྭཱ ཀུམྦྷེ ཋཔེཏྭཱ རོདིཏྭཱ པརིདེཝིཏྭཱ ཀུམྦྷཱ ཨོཏཱརེཏྭཱ ཏེན བྷུཏྟེ པཙྪཱ ཨཏྟནཱཔི བྷུཉྫི. ‘‘ཏིརཙྪཱནགཏསྶ ཨཱསཡཾ ཛཱནཱཏཱི’’ཏི རཱཛཱ བོདྷིསཏྟསྶ མཧནྟཾ ཡསཾ ཨདཱསི.

སཏྠཱ ¶ ‘‘ན, བྷིཀྑཝེ, ཨིམེ ཨིདཱནེཝ ཝིསྶཱསིཀཱ, པུབྦེཔི ཝིསྶཱསིཀཱཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཙཏུསཙྩཀཐཱཡ ཝིནིཝཊྚེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི. ཨིདཾ ཙཏུསཙྩཀཐཱཡ ཝིནིཝཊྚནཾ ནཱམ སབྦཛཱཏཀེསུཔི ཨཏྠིཡེཝ. མཡཾ པན ཡཏྠསྶ ཨཱནིསཾསོ པཉྙཱཡཏི ¶ , ཏཏྠེཝ དསྶཡིསྶཱམ.

ཏདཱ སུནཁོ ཨུཔཱསཀོ ཨཧོསི, ཧཏྠཱི མཧལླཀཏྠེརོ, རཱཛཱ ཨཱནནྡོ, ཨམཙྩཔཎྜིཏོ པན ཨཧམེཝ ཨཧོསིནྟི.

ཨབྷིཎྷཛཱཏཀཝཎྞནཱ སཏྟམཱ.

[༢༨] ༨. ནནྡིཝིསཱལཛཱཏཀཝཎྞནཱ

མནུཉྙམེཝ ¶ བྷཱསེཡྻཱཏི ཨིདཾ སཏྠཱ ཛེཏཝནེ ཝིཧརནྟོ ཚབྦགྒིཡཱནཾ བྷིཀྑཱུནཾ ཨོམསཝཱདཾ ཨཱརབྦྷ ཀཐེསི. ཏསྨིཉྷི སམཡེ ཚབྦགྒིཡཱ ཀལཧཾ ཀརོནྟཱ པེསལེ བྷིཀྑཱུ ཁུཾསེནྟི ཝམྦྷེནྟི ཨོཝིཛ྄ཛྷནྟི, དསཧི ཨཀྐོསཝཏྠཱུཧི ཨཀྐོསནྟི. བྷིཀྑཱུ བྷགཝཏོ ཨཱརོཙེསུཾ. བྷགཝཱ ཚབྦགྒིཡེ པཀྐོསཱཔེཏྭཱ ‘‘སཙྩཾ ཀིར བྷིཀྑཝོ’’ཏི པུཙྪིཏྭཱ ‘‘སཙྩ’’ནྟི ཝུཏྟེ ཝིགརཧིཏྭཱ ‘‘བྷིཀྑཝེ, ཕརུསཝཱཙཱ ནཱམ ཏིརཙྪཱནགཏཱནམྤི ཨམནཱཔཱ, པུབྦེཔི ཨེཀོ ཏིརཙྪཱནགཏོ ཨཏྟཱནཾ ཕརུསེན སམུདཱཙརནྟཾ སཧསྶཾ པརཱཛེསཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ གནྡྷཱརརཊྛེ ཏཀྐསིལཱཡཾ གནྡྷཱརརཱཛཱ རཛྫཾ ཀཱརེསི. ཏདཱ བོདྷིསཏྟོ གོཡོནིཡཾ ནིབྦཏྟི. ཨཐ ནཾ ཏརུཎཝཙྪཀཀཱལེཡེཝ ཨེཀོ བྲཱཧྨཎོ གོདཀྑིཎཱདཱཡཀཱནཾ སནྟིཀཱ ལབྷིཏྭཱ ‘‘ནནྡིཝིསཱལོ’’ཏི ནཱམཾ ཀཏྭཱ པུཏྟཊྛཱནེ ཋཔེཏྭཱ སམྤིཡཱཡམཱནོ ཡཱགུབྷཏྟཱདཱིནི དཏྭཱ པོསེསི. བོདྷིསཏྟོ ཝཡཔྤཏྟོ ཙིནྟེསི ‘‘ཨཧཾ ཨིམིནཱ བྲཱཧྨཎེན ཀིཙྪེན པཊིཛགྒིཏོ, མཡཱ ཙ སདྡྷིཾ སཀལཛམྦུདཱིཔེ ཨཉྙོ སམདྷུརོ གོཎོ ནཱམ ནཏྠི, ཡཾནཱུནཱཧཾ ཨཏྟནོ བལཾ དསྶེཏྭཱ བྲཱཧྨཎསྶ པོསཱཝནིཡཾ དདེཡྻ’’ནྟི སོ ཨེཀདིཝསཾ བྲཱཧྨཎཾ ཨཱཧ ‘‘གཙྪ, བྲཱཧྨཎ, ཨེཀཾ གོཝིཏྟཀསེཊྛིཾ ཨུཔསངྐམིཏྭཱ ‘མཡ྄ཧཾ བལིབདྡོ ཨཏིབདྡྷཾ སཀཊསཏཾ པཝཊྚེཏཱི’ཏི ཝཏྭཱ སཧསྶེན ཨབྦྷུཏཾ ཀརོཧཱི’’ཏི. སོ བྲཱཧྨཎོ སེཊྛིསྶ སནྟིཀཾ གནྟྭཱ ཀཐཾ སམུཊྛཱཔེསི ‘‘ཨིམསྨིཾ ནགརེ ཀསྶ གོཎོ ཐཱམསམྤནྣོ’’ཏི. ཨཐ ནཾ སེཊྛི ‘‘ཨསུཀསྶ ཙ ཨསུཀསྶ ཙཱ’’ཏི ཝཏྭཱ ‘‘སཀལནགརེ པན ཨམྷཱཀཾ གོཎེཧི སདིསོ ནཱམ ནཏྠཱི’’ཏི ཨཱཧ. བྲཱཧྨཎོ ¶ ‘‘མཡ྄ཧཾ ཨེཀོ ¶ གོཎོ ཨཏིབདྡྷཾ སཀཊསཏཾ པཝཊྚེཏུཾ སམཏྠོ ཨཏྠཱི’’ཏི ཨཱཧ. སེཊྛི གཧཔཏི ‘‘ཀུཏོ ཨེཝརཱུཔོ གོཎོ’’ཏི ཨཱཧ. བྲཱཧྨཎོ ‘‘མཡ྄ཧཾ གེཧེ ཨཏྠཱི’’ཏི. ‘‘ཏེན ཧི ཨབྦྷུཏཾ ཀརོཧཱི’’ཏི. ‘‘སཱདྷུ ཀརོམཱི’’ཏི སཧསྶེན ཨབྦྷུཏཾ ¶ ཨཀཱསི.

སོ སཀཊསཏཾ ཝཱལུཀཱསཀྑརཔཱསཱཎཱནཾཡེཝ པཱུརེཏྭཱ པཊིཔཱཊིཡཱ ཋཔེཏྭཱ སབྦཱནི ཨཀྑབནྡྷནཡོཏྟེན ཨེཀཏོ བནྡྷིཏྭཱ ནནྡིཝིསཱལཾ ནྷཱཔེཏྭཱ གནྡྷཔཉྩངྒུལིཀཾ ཀཏྭཱ ཀཎྛེ མཱལཾ པིལ༹ནྡྷིཏྭཱ པུརིམསཀཊདྷུརེ ཨེཀཀམེཝ ཡོཛེཏྭཱ སཡཾ དྷུརེ ནིསཱིདིཏྭཱ པཏོདཾ ཨུཀྑིཔིཏྭཱ ‘‘གཙྪ ཀཱུཊ, ཝཧསྶུ ཀཱུཊཱ’’ཏི ཨཱཧ. བོདྷིསཏྟོ ‘‘ཨཡཾ མཾ ཨཀཱུཊཾ ཀཱུཊཝཱདེན སམུདཱཙརཏཱི’’ཏི ཙཏྟཱརོ པཱདེ ཐམྦྷེ ཝིཡ ནིཙྩལེ ཀཏྭཱ ཨཊྛཱསི. སེཊྛི ཏངྑཎཉྙེཝ བྲཱཧྨཎཾ སཧསྶཾ ཨཱཧརཱཔེསི. བྲཱཧྨཎོ སཧསྶཔརཱཛིཏོ གོཎཾ མུཉྩིཏྭཱ གྷརཾ གནྟྭཱ སོཀཱབྷིབྷཱུཏོ ནིཔཛྫི. ནནྡིཝིསཱལོ ཙརིཏྭཱ ཨཱགཏོ བྲཱཧྨཎཾ སོཀཱབྷིབྷཱུཏཾ དིསྭཱ ཨུཔསངྐམིཏྭཱ ‘‘ཀིཾ, བྲཱཧྨཎ, ནིདྡཱཡསཱི’’ཏི ཨཱཧ. ‘‘ཀུཏོ མེ, ནིདྡཱ, སཧསྶཔརཱཛིཏསྶཱཏི, བྲཱཧྨཎ, མཡཱ ཨེཏྟཀཾ ཀཱལཾ ཏཝ གེཧེ ཝསནྟེན ཨཏྠི ཀིཉྩི བྷཱཛནཾ ཝཱ བྷིནྡིཏཔུབྦཾ, ཀོཙི ཝཱ མདྡིཏཔུབྦོ, ཨཊྛཱནེ ཝཱ པན ཨུཙྩཱརཔསྶཱཝོ ཀཏཔུབྦོ’’ཏི? ‘‘ནཏྠི ཏཱཏཱ’’ཏི. ཨཐ ཏྭཾ མཾ ཀསྨཱ ཀཱུཊཝཱདེན སམུདཱཙརསི, ཏཝེཝེསོ དོསོ, མཡ྄ཧཾ དོསོ ནཏྠི, གཙྪ, ཏེན སདྡྷིཾ དྭཱིཧི སཧསྶེཧི ཨབྦྷུཏཾ ཀརོཧི, ཀེཝལཾ མཾ ཨཀཱུཊཾ ཀཱུཊཝཱདེན མཱ སམུདཱཙརསཱིཏི.

བྲཱཧྨཎོ ཏསྶ ཝཙནཾ སུཏྭཱ གནྟྭཱ དྭཱིཧི སཧསྶེཧི ཨབྦྷུཏཾ ཀཏྭཱ པུརིམནཡེནེཝ སཀཊསཏཾ ཨཏིབནྡྷིཏྭཱ ནནྡིཝིསཱལཾ མཎྜེཏྭཱ པུརིམསཀཊདྷུརེ ཡོཛེསི. ཀཐཾ ཡོཛེསཱིཏི? ཡུགཾ དྷུརེ ནིཙྩལཾ བནྡྷིཏྭཱ ཨེཀཱཡ ཀོཊིཡཱ ནནྡིཝིསཱལཾ ཡོཛེཏྭཱ ཨེཀཾ ཀོཊིཾ དྷུརཡོཏྟེན པལིཝེཋེཏྭཱ ཡུགཀོཊིཉྩ ཨཀྑཔཱདཉྩ ནིསྶཱཡ མུཎྜརུཀྑདཎྜཀཾ དཏྭཱ ཏེན ཡོཏྟེན ནིཙྩལཾ བནྡྷིཏྭཱ ཋཔེསི. ཨེཝཉྷི ཀཏེ ཡུགཾ ཨེཏྟོ ཝཱ ཨིཏོ ཝཱ ན གཙྪཏི, སཀྐཱ ཧོཏི ཨེཀེནེཝ གོཎེན ཨཱཀཌྜྷིཏུཾ. ཨཐསྶ བྲཱཧྨཎོ དྷུརེ ནིསཱིདིཏྭཱ ནནྡིཝིསཱལསྶ པིཊྛིཾ པརིམཛྫིཏྭཱ ‘‘གཙྪ བྷདྲ, ཝཧསྶུ, བྷནྡྲཱ’’ཏི ཨཱཧ. བོདྷིསཏྟོ ཨཏིབདྡྷཾ སཀཊསཏཾ ཨེཀཝེགེནེཝ ཨཱཀཌྜྷིཏྭཱ པཙྪཱ ཋིཏཾ སཀཊཾ པུརཏོ ཋིཏསྶ སཀཊསྶ ¶ ཋཱནེ ཋཔེསི ¶ . གོཝིཏྟཀསེཊྛི པརཱཛིཏོ བྲཱཧྨཎསྶ དྭེ སཧསྶཱནི ཨདཱསི. ཨཉྙེཔི མནུསྶཱ བོདྷིསཏྟསྶ བཧུཾ དྷནཾ ཨདཾསུ, སབྦཾ བྲཱཧྨཎསྶེཝ ཨཧོསི. ཨེཝཾ སོ བོདྷིསཏྟཾ ནིསྶཱཡ བཧུཾ དྷནཾ ལབྷི.

སཏྠཱ ‘‘ན, བྷིཀྑཝེ, ཕརུསཝཙནཾ ནཱམ ཀསྶཙི མནཱཔ’’ནྟི ཚབྦགྒིཡེ བྷིཀྑཱུ གརཧིཏྭཱ སིཀྑཱཔདཾ པཉྙཔེཏྭཱ ཨབྷིསམྦུདྡྷོ ཧུཏྭཱ ཨིམཾ གཱཐམཱཧ –

༢༨.

‘‘མནུཉྙམེཝ ¶ བྷཱསེཡྻ, ནཱམནུཉྙཾ ཀུདཱཙནཾ;

མནུཉྙཾ བྷཱསམཱནསྶ, གརུཾ བྷཱརཾ ཨུདདྡྷརི;

དྷནཉྩ ནཾ ཨལཱབྷེསི, ཏེན ཙཏྟམནོ ཨཧཱུ’’ཏི.

ཏཏྠ མནུཉྙམེཝ བྷཱསེཡྻཱཏི པརེན སདྡྷིཾ བྷཱསམཱནོ ཙཏུདོསཝིརཧིཏཾ མདྷུརཾ མནཱཔཾ སཎྷཾ མུདུཀཾ པིཡཝཙནམེཝ བྷཱསེཡྻ. གརུཾ བྷཱརཾ ཨུདདྡྷརཱིཏི ནནྡིཝིསཱལོ བལིབདྡོ ཨམནཱཔཾ བྷཱསམཱནསྶ བྷཱརཾ ཨནུདྡྷརིཏྭཱ པཙྪཱ མནཱཔཾ པིཡཝཙནཾ བྷཱསམཱནསྶ བྲཱཧྨཎསྶ གརུཾ བྷཱརཾ ཨུདྡྷརི, ཨུདྡྷརིཏྭཱ ཀཌྜྷིཏྭཱ པཝཊྚེསཱིཏི ཨཏྠོ, ད-ཀཱརོ པནེཏྠ བྱཉྫནསནྡྷིཝསེན པདསནྡྷིཀརོ.

ཨིཏི སཏྠཱ ‘‘མནུཉྙམེཝ བྷཱསེཡྻཱ’’ཏི ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ བྲཱཧྨཎོ ཨཱནནྡོ ཨཧོསི, ནནྡིཝིསཱལོ པན ཨཧམེཝ ཨཧོསི’’ནྟི.

ནནྡིཝིསཱལཛཱཏཀཝཎྞནཱ ཨཊྛམཱ.

[༢༩] ༩. ཀཎྷཛཱཏཀཝཎྞནཱ

ཡཏོ ཡཏོ གརུ དྷུརནྟི ཨིདཾ སཏྠཱ ཛེཏཝནེ ཝིཧརནྟོ ཡམཀཔཱཊིཧཱརིཡཾ ཨཱརབྦྷ ཀཐེསི. ཏཾ སདྡྷིཾ དེཝོརོཧཎེན ཏེརསཀནིཔཱཏེ སརབྷམིགཛཱཏཀེ (ཛཱ. ༡.༡༣.༡༣༤ ཨཱདཡོ) ཨཱཝི བྷཝིསྶཏི. སམྨཱསམྦུདྡྷེ པན ཡམཀཔཱཊིཧཱརིཡཾ ཀཏྭཱ དེཝལོཀེ ཏེམཱསཾ ཝསིཏྭཱ མཧཱཔཝཱརཎཱཡ སངྐསྶནགརདྭཱརེ ཨོརུཡ྄ཧ མཧནྟེན པརིཝཱརེན ཛེཏཝནཾ པཝིཊྛེ བྷིཀྑཱུ དྷམྨསབྷཱཡཾ སནྣིཔཏིཏྭཱ ‘‘ཨཱཝུསོ, ཏཐཱགཏོ ནཱམ ཨསམདྷུརོ, ཏཐཱགཏེན ཝུལ༹ྷདྷུརཾ ཨཉྙོ ཝཧིཏུཾ སམཏྠོ ནཱམ ནཏྠི, ཚ སཏྠཱརོ ‘མཡམེཝ ¶ པཱཊིཧཱརིཡཾ ཀརིསྶཱམ, མཡམེཝ པཱཊིཧཱརིཡཾ ཀརིསྶཱམཱ’ཏི ཝཏྭཱ ཨེཀམྤི པཱཊིཧཱརིཡཾ ན ཨཀཾསུ, ཨཧོ སཏྠཱ ཨསམདྷུརོ’’ཏི སཏྠུ གུཎཀཐཾ ཀཐེནྟཱ ནིསཱིདིཾསུ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི ¶ པུཙྪི. ‘‘མཡཾ, བྷནྟེ, ན ཨཉྙཱཡ ཀཐཱཡ, ཨེཝརཱུཔཱཡ ནཱམ ཏུམྷཱཀམེཝ གུཎཀཐཱཡཱ’’ཏི. སཏྠཱ ‘‘བྷིཀྑཝེ, ཨིདཱནི མཡཱ ཝུལ༹ྷདྷུརཾ ཀོ ཝཧིསྶཏི, པུབྦེ ཏིརཙྪཱནཡོནིཡཾ ནིབྦཏྟོཔི ཨཧཾ ཨཏྟནཱ སམདྷུརཾ ཀཉྩི ནཱལཏྠ’’ནྟི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ གོཡོནིཡཾ པཊིསནྡྷིཾ གཎྷི. ཨཐ ནཾ སཱམིཀཱ ཏརུཎཝཙྪཀཀཱལེཡེཝ ཨེཀིསྶཱ མཧལླིཀཱཡ གྷརེ ཝསིཏྭཱ ཏསྶཱ ནིཝཱསཝེཏནཏོ པརིཙྪིནྡིཏྭཱ ཨདཾསུ. སཱ ཏཾ ཡཱགུབྷཏྟཱདཱིཧི པཊིཛགྒམཱནཱ པུཏྟཊྛཱནེ ཋཔེཏྭཱ ཝཌྜྷེསི. སོ ‘‘ཨཡྻིཀཱཀཱལ༹ཀོ’’ ཏྭེཝ ནཱམཾ པཉྙཱཡིཏྠ. ཝཡཔྤཏྟོ ཙ ཨཉྫནཝཎྞོ ཧུཏྭཱ གཱམགོཎེཧི སདྡྷིཾ ཙརཏི, སཱིལཱཙཱརསམྤནྣོ ཨཧོསི. གཱམདཱརཀཱ སིངྒེསུཔི ཀཎྞེསུཔི གལེཔི གཧེཏྭཱ ཨོལམྦནྟི, ནངྒུཊྛེཔི གཧེཏྭཱ ཀཱིལ༹ནྟི, པིཊྛིཡམྤི ནིསཱིདནྟི. སོ ཨེཀདིཝསཾ ཙིནྟེསི ‘‘མཡ྄ཧཾ མཱཏཱ དུགྒཏཱ, མཾ པུཏྟཊྛཱནེ ཋཔེཏྭཱ དུཀྑེན པོསེསི, ཡཾནཱུནཱཧཾ བྷཏིཾ ཀཏྭཱ ཨིམཾ དུགྒཏབྷཱཝཏོ མོཙེཡྻ’’ནྟི. སོ ཏཏོ པཊྛཱཡ བྷཏིཾ ཨུཔདྷཱརེནྟོ ཙརཏི.

ཨཐེཀདིཝསཾ ཨེཀོ སཏྠཝཱཧཔུཏྟོ པཉྩཧི སཀཊསཏེཧི ཝིསམཏིཏྠཾ སམྤཏྟོ, ཏསྶ གོཎཱ སཀཊཱནི ཨུཏྟཱརེཏུཾ ན སཀྐོནྟི, པཉྩསུ སཀཊསཏེསུ གོཎཱ ཡུགཔརམྤརཱཡ ཡོཛིཏཱ ཨེཀམྤི སཀཊཾ ཨུཏྟཱརེཏུཾ ནཱསཀྑིཾསུ. བོདྷིསཏྟོཔི གཱམགོཎེཧི སདྡྷིཾ ཏཏྠ སམཱིཔེ ཙརཏི. སཏྠཝཱཧཔུཏྟོཔི གོསུཏྟཝིཏྟཀོ, སོ ‘‘ཨཏྠི ནུ ཁོ ཨེཏེསཾ གུནྣཾ ཨནྟརེ ཨིམཱནི སཀཊཱནི ཨུཏྟཱརེཏུཾ སམཏྠོ ཨུསབྷཱཛཱནཱིཡོ’’ཏི ཨུཔདྷཱརཡམཱནོ བོདྷིསཏྟཾ དིསྭཱ ‘‘ཨཡཾ ཨཱཛཱནཱིཡོ སཀྑིསྶཏི མཡ྄ཧཾ སཀཊཱནི ཨུཏྟཱརེཏུཾ, ཀོ ནུ ཁོ ཨསྶ སཱམིཀོ’’ཏི གོཔཱལཀེ པུཙྪི ‘‘ཀོ ནུ ཁོ བྷོ ཨིམསྶ སཱམིཀོ, ཨཧཾ ཨིམཾ སཀཊེ ཡོཛེཏྭཱ སཀཊེསུ ཨུཏྟཱརིཏེསུ ཝེཏནཾ དསྶཱམཱི’’ཏི. ཏེ ཨཱཧཾསུ ‘‘གཧེཏྭཱ ནཾ ཡོཛེཐ, ནཏྠི ཨིམསྶ ཨིམསྨིཾ ཋཱནེ སཱམིཀོ’’ཏི. སོ ནཾ ནཱསཱཡ རཛྫུཀེན བནྡྷིཏྭཱ ¶ ཨཱཀཌྜྷེནྟོ ཙཱལེཏུམྤི ནཱསཀྑི. བོདྷིསཏྟོ ཀིར ‘‘བྷཏིཡཱ ཀཐིཏཱཡ ¶ གམིསྶཱམཱི’’ཏི ན ཨགམཱསི. སཏྠཝཱཧཔུཏྟོ ཏསྶཱདྷིཔྤཱཡཾ ཉཏྭཱ ‘‘སཱམི, ཏཡཱ པཉྩསུ སཀཊསཏེསུ ཨུཏྟཱརིཏེསུ ཨེཀེཀསྶ སཀཊསྶ དྭེ དྭེ ཀཧཱཔཎེ བྷཏིཾ ཀཏྭཱ སཧསྶཾ དསྶཱམཱི’’ཏི ཨཱཧ. ཏདཱ བོདྷིསཏྟོ སཡམེཝ ཨགམཱསི. ཨཐ ནཾ པུརིསཱ པུརིམསཀཊེསུ ཡོཛེསུཾ. ཨཐ ནཾ ཨེཀཝེགེནེཝ ཨུཀྑིཔིཏྭཱ ཐལེ པཏིཊྛཱཔེསི. ཨེཏེནུཔཱཡེན སབྦསཀཊཱནི ཨུཏྟཱརེསི.

སཏྠཝཱཧཔུཏྟོ ཨེཀེཀསྶ སཀཊསྶ ཨེཀེཀཾ ཀཏྭཱ པཉྩསཏཱནི བྷཎྜིཀཾ ཀཏྭཱ ཏསྶ གལེ བནྡྷི. སོ ‘‘ཨཡཾ མཡ྄ཧཾ ཡཐཱཔརིཙྪིནྣཾ བྷཏིཾ ན དེཏི, ན དཱནིསྶ གནྟུཾ དསྶཱམཱི’’ཏི གནྟྭཱ སབྦཔུརིམསཀཊསྶ པུརཏོ མགྒཾ ནིཝཱརེཏྭཱ ཨཊྛཱསི. ཨཔནེཏུཾ ཝཱཡམནྟཱཔི ནཾ ཨཔནེཏུཾ ནཱསཀྑིཾསུ. སཏྠཝཱཧཔུཏྟོ ‘‘ཛཱནཱཏི མཉྙེ ཨེས ཨཏྟནོ བྷཏིཡཱ ཨཱུནབྷཱཝ’’ནྟི ཨེཀེཀསྨིཾ སཀཊེ དྭེ དྭེ ཀཏྭཱ སཧསྶབྷཎྜིཀཾ བནྡྷིཏྭཱ ‘‘ཨཡཾ ཏེ སཀཊུཏྟརཎབྷཏཱི’’ཏི གཱིཝཱཡཾ ལགྒེསི. སོ སཧསྶབྷཎྜིཀཾ ཨཱདཱཡ མཱཏུ སནྟིཀཾ ཨགམཱསི. གཱམདཱརཀཱ ‘‘ཀིཾ ནཱམེཏཾ ¶ ཨཡྻིཀཱཀཱལ༹ཀསྶ གལེ’’ཏི བོདྷིསཏྟསྶ སནྟིཀཾ ཨཱགཙྪནྟི. སོ ཏེ ཨནུབནྡྷིཏྭཱ དཱུརཏོཝ པལཱཔེནྟོ མཱཏུ སནྟིཀཾ གཏོ. པཉྩནྣཾ པན སཀཊསཏཱནཾ ཨུཏྟཱརིཏཏྟཱ རཏྟེཧི ཨཀྑཱིཧི ཀིལནྟརཱུཔོ པཉྙཱཡིཏྠ. ཨཡྻིཀཱ ཏསྶ གཱིཝཱཡ སཧསྶཏྠཝིཀཾ དིསྭཱ ‘‘ཏཱཏ, ཨཡཾ ཏེ ཀཧཾ ལདྡྷཱ’’ཏི གོཔཱལཀདཱརཀེ པུཙྪིཏྭཱ ཏམཏྠཾ སུཏྭཱ ‘‘ཏཱཏ, ཀིཾ ཨཧཾ ཏཡཱ ལདྡྷབྷཏིཡཱ ཛཱིཝིཏུཀཱམཱ, ཀིཾཀཱརཎཱ ཨེཝརཱུཔཾ དུཀྑཾ ཨནུབྷོསཱི’’ཏི ཝཏྭཱ བོདྷིསཏྟཾ ཨུཎྷོདཀེན ནྷཱཔེཏྭཱ སཀལསརཱིརཾ ཏེལེན མཀྑེཏྭཱ པཱནཱིཡཾ པཱཡེཏྭཱ སཔྤཱཡཾ བྷོཛནཾ བྷོཛེཏྭཱ ཛཱིཝིཏཔརིཡོསཱནེ སདྡྷིཾ བོདྷིསཏྟེན ཡཐཱཀམྨཾ གཏཱ.

སཏྠཱ ‘‘ན, བྷིཀྑཝེ, ཏཐཱགཏོ ཨིདཱནེཝ ཨསམདྷུརོ, པུབྦེཔི ཨསམདྷུརོཡེཝཱ’’ཏི ཝཏྭཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཨབྷིསམྦུདྡྷོ ཧུཏྭཱ ཨིམཾ གཱཐམཱཧ –

༢༩.

‘‘ཡཏོ ¶ ཡཏོ གརུ དྷུརཾ, ཡཏོ གམྦྷཱིརཝཏྟནཱི;

ཏདཱསྶུ ཀཎྷཾ ཡུཉྫནྟི, སྭཱསྶུ ཏཾ ཝཧཏེ དྷུར’’ནྟི.

ཏཏྠ ཡཏོ ཡཏོ གརུ དྷུརནྟི ཡསྨིཾ ཡསྨིཾ ཋཱནེ དྷུརཾ གརུ བྷཱརིཡཾ ཧོཏི, ཨཉྙེ བལིབདྡཱ ཨུཀྑིཔིཏུཾ ན སཀྐོནྟི. ཡཏོ གམྦྷཱིརཝཏྟནཱིཏི ¶ ཝཏྟནྟི ཨེཏྠཱཏི ཝཏྟནཱི, མགྒསྶེཏཾ ནཱམཾ, ཡསྨིཾ ཋཱནེ ཨུདཀཙིཀྑལླམཧནྟཏཱཡ ཝཱ ཝིསམཙྪིནྣཏཊབྷཱཝེན ཝཱ མགྒོ གམྦྷཱིརོ ཧོཏཱིཏི ཨཏྠོ. ཏདཱསྶུ ཀཎྷཾ ཡུཉྫནྟཱིཏི ཨེཏྠ ཨསྶཱུཏི ནིཔཱཏམཏྟཾ, ཏདཱ ཀཎྷཾ ཡུཉྫནྟཱིཏི ཨཏྠོ. ཡདཱ དྷུརཉྩ གརུ ཧོཏི མགྒོ ཙ གམྦྷཱིརོ, ཏདཱ ཨཉྙེ བལིབདྡེ ཨཔནེཏྭཱ ཀཎྷམེཝ ཡོཛེནྟཱིཏི ཝུཏྟཾ ཧོཏི. སྭཱསྶུ ཏཾ ཝཧཏེ དྷུརནྟི ཨེཏྠཱཔི ཨསྶཱུཏི ནིཔཱཏམཏྟམེཝ, སོ ཏཾ དྷུརཾ ཝཧཏཱིཏི ཨཏྠོ.

ཨེཝཾ བྷགཝཱ ‘‘ཏདཱ, བྷིཀྑཝེ, ཀཎྷོཝ ཏཾ དྷུརཾ ཝཧཏཱི’’ཏི དསྶེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ མཧལླིཀཱ ཨུཔྤལཝཎྞཱ ཨཧོསི, ཨཡྻིཀཱཀཱལ༹ཀོ པན ཨཧམེཝ ཨཧོསི’’ནྟི.

ཀཎྷཛཱཏཀཝཎྞནཱ ནཝམཱ.

[༣༠] ༡༠. མུནིཀཛཱཏཀཝཎྞནཱ

མཱ ¶ མུནིཀསྶ པིཧཡཱིཏི ཨིདཾ སཏྠཱ ཛེཏཝནེ ཝིཧརནྟོ ཐུལླཀུམཱརིཀཱཔལོབྷནཾ ཨཱརབྦྷ ཀཐེསི. ཏཾ ཏེརསཀནིཔཱཏེ ཙཱུལ༹ནཱརདཀསྶཔཛཱཏཀེ (ཛཱ. ༡.༡༣.༤༠ ཨཱདཡོ) ཨཱཝི བྷཝིསྶཏི. སཏྠཱ པན ཏཾ བྷིཀྑུཾ ‘‘སཙྩཾ ཀིར ཏྭཾ བྷིཀྑུ ཨུཀྐཎྛིཏོསཱི’’ཏི པུཙྪི. ‘‘ཨཱམ, བྷནྟེ’’ཏི. ‘‘ཀིཾ ནིསྶཱཡཱ’’ཏི? ‘‘ཐུལླཀུམཱརིཀཱཔལོབྷནཾ བྷནྟེ’’ཏི. སཏྠཱ ‘‘བྷིཀྑུ ཨེསཱ ཏཝ ཨནཏྠཀཱརིཀཱ, པུབྦེཔི ཏྭཾ ཨིམིསྶཱ ཝིཝཱཧདིཝསེ ཛཱིཝིཏཀྑཡཾ པཏྭཱ མཧཱཛནསྶ ཨུཏྟརིབྷངྒབྷཱཝཾ པཏྟོ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨེཀསྨིཾ གཱམཀེ ཨེཀསྶ ཀུཊུམྦིཀསྶ གེཧེ གོཡོནིཡཾ ནིབྦཏྟི ‘‘མཧཱལོཧིཏོ’’ཏི ནཱམེན, ཀནིཊྛབྷཱཏཱཔིསྶ ཙཱུལ༹ལོཧིཏོ ནཱམ ཨཧོསི. ཏེཡེཝ དྭེ བྷཱཏིཀེ ནིསྶཱཡ ཏསྨིཾ ཀུལེ ཀམྨདྷུརཾ ཝཏྟཏི. ཏསྨིཾ པན ཀུལེ ཨེཀཱ ཀུམཱརིཀཱ ཨཏྠི, ཏཾ ཨེཀོ ནགརཝཱསཱི ཀུལཔུཏྟོ ཨཏྟནོ པུཏྟསྶ ཝཱརེསི. ཏསྶཱ མཱཏཱཔིཏརོ ‘‘ཀུམཱརིཀཱཡ ཝིཝཱཧཀཱལེ ཨཱགཏཱནཾ པཱཧུནཀཱནཾ ¶ ཨུཏྟརིབྷངྒོ བྷཝིསྶཏཱི’’ཏི ཡཱགུབྷཏྟཾ དཏྭཱ མུནིཀཾ ནཱམ སཱུཀརཾ པོསེསུཾ. ཏཾ དིསྭཱ ཙཱུལ༹ལོཧིཏོ ¶ བྷཱཏརཾ པུཙྪི ‘‘ཨིམསྨིཾ ཀུལེ ཀམྨདྷུརཾ ཝཏྟམཱནཾ ཨམྷེ དྭེ བྷཱཏིཀེ ནིསྶཱཡ ཝཏྟཏི, ཨིམེ པན ཨམྷཱཀཾ ཏིཎཔལཱལཱདཱིནེཝ དེནྟི, སཱུཀརཾ ཡཱགུབྷཏྟེན པོསེནྟི, ཀེན ནུ ཁོ ཀཱརཎེན ཨེས ཨེཏཾ ལབྷཏཱི’’ཏི. ཨཐསྶ བྷཱཏཱ ‘‘ཏཱཏ ཙཱུལ༹ལོཧིཏ, མཱ ཏྭཾ ཨེཏསྶ བྷོཛནཾ པིཧཡི, ཨཡཾ སཱུཀརོ མརཎབྷཏྟཾ བྷུཉྫཏི. ཨེཏིསྶཱ ཧི ཀུམཱརིཀཱཡ ཝིཝཱཧཀཱལེ ཨཱགཏཱནཾ པཱཧུནཀཱནཾ ཨུཏྟརིབྷངྒོ བྷཝིསྶཏཱིཏི ཨིམེ ཨེཏཾ སཱུཀརཾ པོསེནྟི, ཨིཏོ ཀཏིཔཱཧཙྩཡེན ཏེ མནུསྶཱ ཨཱགམིསྶནྟི, ཨཐ ནཾ སཱུཀརཾ པཱདེསུ གཧེཏྭཱ ཀཌྜྷེནྟཱ ཧེཊྛཱམཉྩཏོ ནཱིཧརིཏྭཱ ཛཱིཝིཏཀྑཡཾ པཱཔེཏྭཱ པཱཧུནཀཱནཾ སཱུཔབྱཉྫནཾ ཀརིཡམཱནཾ པསྶིསྶསཱི’’ཏི ཝཏྭཱ ཨིམཾ གཱཐམཱཧ –

༣༠.

‘‘མཱ མུནིཀསྶ པིཧཡི, ཨཱཏུརནྣཱནི བྷུཉྫཏི;

ཨཔྤོསྶུཀྐོ བྷུསཾ ཁཱད, ཨེཏཾ དཱིགྷཱཡུལཀྑཎ’’ནྟི.

ཏཏྠ མཱ མུནིཀསྶ པིཧཡཱིཏི མུནིཀསྶ བྷོཛནེ པིཧཾ མཱ ཨུཔྤཱདཡི, ‘‘ཨེས མུནིཀོ སུབྷོཛནཾ བྷུཉྫཏཱི’’ཏི མཱ མུནིཀསྶ པིཧཡི, ‘‘ཀདཱ ནུ ཁོ ཨཧམྤི ཨེཝཾ སུཁིཏོ བྷཝེཡྻ’’ནྟི མཱ མུནིཀབྷཱཝཾ པཏྠཡི. ཨཡཉྷི ཨཱཏུརནྣཱནི བྷུཉྫཏི. ཨཱཏུརནྣཱནཱིཏི མརཎབྷོཛནཱནི. ཨཔྤོསྶུཀྐོ བྷུསཾ ཁཱདཱཏི ཏསྶ བྷོཛནེ ནིརུསྶུཀྐོ ཧུཏྭཱ ཨཏྟནཱ ལདྡྷཾ བྷུསཾ ¶ ཁཱད. ཨེཏཾ དཱིགྷཱཡུལཀྑཎནྟི ཨེཏཾ དཱིགྷཱཡུབྷཱཝསྶ ཀཱརཎཾ. ཏཏོ ན ཙིརསྶེཝ ཏེ མནུསྶཱ ཨཱགམིཾསུ, མུནིཀཾ གྷཱཏེཏྭཱ ནཱནཔྤཀཱརེཧི པཙིཾསུ. བོདྷིསཏྟོ ཙཱུལ༹ལོཧིཏཾ ཨཱཧ ‘‘དིཊྛོ ཏེ, ཏཱཏ, མུནིཀོ’’ཏི. དིཊྛཾ མེ, བྷཱཏིཀ, མུནིཀསྶ བྷོཛནཕལཾ, ཨེཏསྶ བྷོཛནཏོ སཏགུཎེན སཧསྶགུཎེན ཨམྷཱཀཾ ཏིཎཔལཱལབྷུསམཏྟམེཝ ཨུཏྟམཉྩ ཨནཝཛྫཉྩ དཱིགྷཱཡུལཀྑཎཉྩཱཏི.

སཏྠཱ ‘‘ཨེཝཾ ཁོ ཏྭཾ བྷིཀྑུ པུབྦེཔི ཨིམཾ ཀུམཱརིཀཾ ནིསྶཱཡ ཛཱིཝིཏཀྑཡཾ པཏྭཱ མཧཱཛནསྶ ཨུཏྟརིབྷངྒབྷཱཝཾ གཏོ’’ཏི ¶ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེསི, སཙྩཔརིཡོསཱནེ ཨུཀྐཎྛིཏོ བྷིཀྑུ སོཏཱཔཏྟིཕལེ པཏིཊྛཱསི. སཏྠཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི ¶ – ‘‘ཏདཱ མུནིཀསཱུཀརོ ཨུཀྐཎྛིཏབྷིཀྑུ ཨཧོསི, ཐུལླཀུམཱརིཀཱ ཨེསཱ ཨེཝ, ཙཱུལ༹ལོཧིཏོ ཨཱནནྡོ, མཧཱལོཧིཏོ པན ཨཧམེཝ ཨཧོསི’’ནྟི.

མུནིཀཛཱཏཀཝཎྞནཱ དསམཱ.

ཀུརུངྒཝགྒོ ཏཏིཡོ.

ཏསྶུདྡཱནཾ –

ཀུརུངྒཾ ཀུཀྐུརཉྩེཝ, བྷོཛཱཛཱནཱིཡཉྩ ཨཱཛཉྙཾ;

ཏིཏྠཾ མཧིལཱ༹མུཁཱབྷིཎྷཾ, ནནྡིཀཎྷཉྩ མུནིཀནྟི.

༤. ཀུལཱཝཀཝགྒོ

[༣༡] ༡. ཀུལཱཝཀཛཱཏཀཝཎྞནཱ

ཀུལཱཝཀཱཏི ¶ ཨིདཾ སཏྠཱ ཛེཏཝནེ ཝིཧརནྟོ ཨཔརིསྶཱཝེཏྭཱ པཱནཱིཡཾ པཱིཏཾ བྷིཀྑུཾ ཨཱརབྦྷ ཀཐེསི. སཱཝཏྠིཏོ ཀིར དྭེ སཧཱཡཀཱ དཧརབྷིཀྑཱུ ཛནཔདཾ གནྟྭཱ ཨེཀསྨིཾ ཕཱསུཀཊྛཱནེ ཡཐཱཛ྄ཛྷཱསཡཾ ཝསིཏྭཱ ‘‘སམྨཱསམྦུདྡྷཾ པསྶིསྶཱམཱ’’ཏི པུན ཏཏོ ནིཀྑམིཏྭཱ ཛེཏཝནཱབྷིམུཁཱ པཱཡིཾསུ. ཨེཀསྶ ཧཏྠེ པརིསྶཱཝནཾ ཨཏྠི, ཨེཀསྶ ནཏྠི. དྭེཔི ཨེཀཏོ པཱནཱིཡཾ པརིསྶཱཝེཏྭཱ པིཝནྟི. ཏེ ཨེཀདིཝསཾ ཝིཝཱདཾ ཨཀཾསུ. པརིསྶཱཝནསཱམིཀོ ཨིཏརསྶ པརིསྶཱཝནཾ ཨདཏྭཱ སཡམེཝ པཱནཱིཡཾ པརིསྶཱཝེཏྭཱ པིཝི, ཨིཏརོ པན པརིསྶཱཝནཾ ཨལབྷིཏྭཱ པིཔཱསཾ སནྡྷཱརེཏུཾ ཨསཀྐོནྟོ ཨཔརིསྶཱཝེཏྭཱ པཱནཱིཡཾ པིཝི. ཏེ ཨུབྷོཔི ཨནུཔུབྦེན ཛེཏཝནཾ པཏྭཱ སཏྠཱརཾ ཝནྡིཏྭཱ ནིསཱིདིཾསུ. སཏྠཱ སམྨོདནཱིཡཾ ཀཐཾ ཀཐེཏྭཱ ‘‘ཀུཏོ ཨཱགཏཏྠཱ’’ཏི པུཙྪི. ‘‘བྷནྟེ, མཡཾ ཀོསལཛནཔདེ ཨེཀསྨིཾ གཱམཀེ ཝསིཏྭཱ ཏཏོ ནིཀྑམིཏྭཱ ཏུམྷཱཀཾ དསྶནཏྠཱཡ ཨཱགཏཱ’’ཏི. ‘‘ཀཙྩི པན ཝོ སམགྒཱ ཨཱགཏཏྠཱ’’ཏི? ཨཔརིསྶཱཝནཀོ ཨཱཧ ‘‘ཨཡཾ, བྷནྟེ, ཨནྟརཱམགྒེ མཡཱ སདྡྷིཾ ཝིཝཱདཾ ཀཏྭཱ པརིསྶཱཝནཾ ནཱདཱསཱི’’ཏི. ཨིཏརོཔི ཨཱཧ ‘‘ཨཡཾ, བྷནྟེ, ཨཔརིསྶཱཝེཏྭཱཝ ཛཱནཾ སཔཱཎཀཾ ཨུདཀཾ པིཝཱི’’ཏི. ‘‘སཙྩཾ ཀིར ཏྭཾ བྷིཀྑུ ཛཱནཾ སཔཱཎཀཾ ཨུདཀཾ པིཝཱི’’ཏི? ‘‘ཨཱམ, བྷནྟེ, ཨཔརིསྶཱཝིཏཾ ཨུདཀཾ པིཝིནྟི ¶ . སཏྠཱ ‘‘བྷིཀྑུ པུབྦེ པཎྜིཏཱ དེཝནགརེ རཛྫཾ ཀཱརེནྟཱ ཡུདྡྷཔརཱཛིཏཱ སམུདྡཔིཊྛེན པལཱཡནྟཱ ‘ཨིསྶརིཡཾ ནིསྶཱཡ པཱཎཝདྷཾ ན ཀརིསྶཱམཱ’ཏི ཏཱཝ མཧནྟཾ ཡསཾ པརིཙྩཛིཏྭཱ སུཔཎྞཔོཏཀཱནཾ ཛཱིཝིཏཾ དཏྭཱ རཐཾ ནིཝཏྟཡིཾསཱུ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ མགདྷརཊྛེ རཱཛགཧེ ཨེཀོ མཱགདྷརཱཛཱ རཛྫཾ ཀཱརེསི. ཏདཱ བོདྷིསཏྟོ ཡཐཱ ཨེཏརཧི སཀྐོ པུརིམཏྟབྷཱཝེ མགདྷརཊྛེ མཙལགཱམཀེ ནིབྦཏྟི, ཨེཝཾ ཏསྨིཾཡེཝ མཙལགཱམཀེ མཧཱཀུལསྶ པུཏྟོ ཧུཏྭཱ ནིབྦཏྟི. ནཱམགྒཧཎདིཝསེ ཙསྶ ‘‘མགྷཀུམཱརོ’’ཏྭེཝ ནཱམཾ ཨཀཾསུ. སོ ཝཡཔྤཏྟོ ‘‘མགྷམཱཎཝོ’’ཏི པཉྙཱཡིཏྠ. ཨཐསྶ མཱཏཱཔིཏརོ སམཱནཛཱཏིཀཀུལཏོ དཱརིཀཾ ཨཱནཡིཾསུ. སོ པུཏྟདྷཱིཏཱཧི ཝཌྜྷམཱནོ དཱནཔཏི ཨཧོསི, པཉྩ སཱིལཱནི རཀྑཏི. ཏསྨིཉྩ གཱམེ ཏེཏྟིཾསེཝ ཀུལཱནི ཧོནྟི, ཏེཔི ཏེཏྟིཾས ཀུལཱ མནུསྶཱ ཨེཀདིཝསཾ གཱམམཛ྄ཛྷེ ཋཏྭཱ གཱམཀམྨཾ ¶ ཀརོནྟི. བོདྷིསཏྟོ ཋིཏཊྛཱནེ པཱདེཧི པཾསུཾ ཝིཡཱུཧིཏྭཱ ཏཾ པདེསཾ རམཎཱིཡཾ ཀཏྭཱ ཨཊྛཱསི, ཨཐཉྙོ ཨེཀོ ཨཱགནྟྭཱ ཏསྨིཾ ཋཱནེ ཋིཏོ. བོདྷིསཏྟོ ཨཔརཾ ཋཱནཾ རམཎཱིཡཾ ཀཏྭཱ ཨཊྛཱསི, ཏཏྲཱཔི ཨཉྙོ ཋིཏོ. བོདྷིསཏྟོ ཨཔརམྤི ཨཔརམྤཱིཏི སབྦེསམྤི ཋིཏཊྛཱནཾ རམཎཱིཡཾ ཀཏྭཱ ཨཔརེན སམཡེན ཏསྨིཾ ཋཱནེ མཎྜཔཾ ཀཱརེསི, མཎྜཔམྤི ཨཔནེཏྭཱ སཱལཾ ཀཱརེསི, ཏཏྠ ཕལཀཱསནཱནི སནྠརིཏྭཱ པཱནཱིཡཙཱཊིཾ ཋཔེསི.

ཨཔརེན སམཡེན ཏེཔི ཏེཏྟིཾསཛནཱ བོདྷིསཏྟེན སམཱནཙྪནྡཱ ཨཧེསུཾ. ཏེ བོདྷིསཏྟོ པཉྩསུ སཱིལེསུ པཏིཊྛཱཔེཏྭཱ ཏཏོ པཊྛཱཡ ཏེཧི སདྡྷིཾ པུཉྙཱནི ཀརོནྟོ ཝིཙརཏི. ཏེཔི ཏེནེཝ སདྡྷིཾ པུཉྙཱནི ཀརོནྟཱ ཀཱལསྶེཝ ཝུཊྛཱཡ ཝཱསིཕརསུམུསལཧཏྠཱ ཙཏུམཧཱཔཐཱདཱིསུ མུསལེན པཱསཱཎེ ཨུབྦཏྟེཏྭཱ པཝཊྚེནྟི, ཡཱནཱནཾ ཨཀྑཔཊིགྷཱཏརུཀྑེ ཧརནྟི, ཝིསམཾ སམཾ ཀརོནྟི, སེཏུཾ ཨཏྠརནྟི, པོཀྑརཎིཡོ ཁཎནྟི, སཱལཾ ཀརོནྟི, དཱནཱནི དེནྟི, སཱིལཱནི རཀྑནྟི. ཨེཝཾ ཡེབྷུཡྻེན སཀལགཱམཝཱསིནོ བོདྷིསཏྟསྶ ཨོཝཱདེ ཋཏྭཱ སཱིལཱནི རཀྑིཾསུ.

ཨཐ ¶ ནེསཾ གཱམབྷོཛཀོ ཙིནྟེསི ‘‘ཨཧཾ པུབྦེ ཨེཏེསུ སུརཾ པིཝནྟེསུ པཱཎཱཏིཔཱཏཱདཱིནི ཀརོནྟེསུ ཙཱཊིཀཧཱཔཎཱདིཝསེན ཙེཝ དཎྜབལིཝསེན ཙ དྷནཾ ལབྷཱམི, ཨིདཱནི པན མགྷོ མཱཎཝོ སཱིལཾ རཀྑཱཔེཏི, ཏེསཾ པཱཎཱཏིཔཱཏཱདཱིནི ཀཱཏུཾ ¶ ན དེཏི, ཨིདཱནི པན ཏེ པཉྩ སཱིལཱནི ན རཀྑཱཔེསྶཱམཱི’’ཏི ཀུདྡྷོ རཱཛཱནཾ ཨུཔསངྐམིཏྭཱ ‘‘དེཝ, བཧཱུ ཙོརཱ གཱམགྷཱཏཱདཱིནི ཀརོནྟཱ ཝིཙརནྟཱི’’ཏི ཨཱཧ. རཱཛཱ ཏསྶ ཝཙནཾ སུཏྭཱ ‘‘གཙྪ, ཏེ ཨཱནེཧཱི’’ཏི ཨཱཧ. སོ གནྟྭཱ སབྦེཔི ཏེ བནྡྷིཏྭཱ ཨཱནེཏྭཱ ‘‘ཨཱནཱིཏཱ, དེཝ, ཙོརཱ’’ཏི རཉྙོ ཨཱརོཙེསི. རཱཛཱ ཏེསཾ ཀམྨཾ ཨསོདྷེཏྭཱཝ ‘‘ཧཏྠིནཱ ནེ མདྡཱཔེཐཱ’’ཏི ཨཱཧ. ཏཏོ སབྦེཔི ཏེ རཱཛངྒཎེ ནིཔཛྫཱཔེཏྭཱ ཧཏྠིཾ ཨཱནཡིཾསུ. བོདྷིསཏྟོ ཏེསཾ ཨོཝཱདཾ ཨདཱསི ‘‘ཏུམྷེ སཱིལཱནི ཨཱཝཛྫེཐ, པེསུཉྙཀཱརཀེ ཙ རཉྙེ ཙ ཧཏྠིམྷི ཙ ཨཏྟནོ སརཱིརེ ཙ ཨེཀསདིསམེཝ མེཏྟཾ བྷཱཝེཐཱ’’ཏི. ཏེ ཏཐཱ ཨཀཾསུ. ཨཐ ནེསཾ མདྡནཏྠཱཡ ཧཏྠིཾ ཨུཔནེསུཾ. སོ ཨུཔནཱིཡམཱནོཔི ན ཨུཔགཙྪཏི, མཧཱཝིརཝཾ ཝིརཝིཏྭཱ པལཱཡཏི. ཨཉྙཾ ཨཉྙཾ ཧཏྠིཾ ཨཱནཡིཾསུ, ཏེཔི ཏཐེཝ པལཱཡིཾསུ.

རཱཛཱ ‘‘ཨེཏེསཾ ཧཏྠེ ཀིཉྩི ཨོསདྷཾ བྷཝིསྶཏཱི’’ཏི ཙིནྟེཏྭཱ ‘‘ཝིཙིནཐཱ’’ཏི ཨཱཧ. ཝིཙིནནྟཱ ཨདིསྭཱ ‘‘ནཏྠི, དེཝཱ’’ཏི ཨཱཧཾསུ. ཏེན ཧི ཀིཉྩི མནྟཾ པརིཝཏྟེསྶནྟི, པུཙྪཐ ནེ ‘‘ཨཏྠི ཝོ པརིཝཏྟནམནྟོ’’ཏི? རཱཛཔུརིསཱ པུཙྪིཾསུ, བོདྷིསཏྟོ ‘‘ཨཏྠཱི’’ཏི ཨཱཧ. རཱཛཔུརིསཱ ‘‘ཨཏྠི ཀིར, དེཝཱ’’ཏི ཨཱརོཙཡིཾསུ, རཱཛཱ སབྦེཔི ཏེ པཀྐོསཱཔེཏྭཱ ‘‘ཏུམྷཱཀཾ ¶ ཛཱནནམནྟཾ ཀཐེཐཱ’’ཏི ཨཱཧ. བོདྷིསཏྟོ ཨཝོཙ ‘‘དེཝ, ཨཉྙོ ཨམྷཱཀཾ མནྟོ ནཱམ ནཏྠི, ཨམྷེ པན ཏེཏྟིཾསམཏྟཱ ཛནཱ པཱཎཾ ན ཧནཱམ, ཨདིནྣཾ ནཱདིཡཱམ, མིཙྪཱཙཱརཾ ན ཙརཱམ, མུསཱཝཱདཾ ན བྷཎཱམ, མཛྫཾ ན པིཝཱམ, མེཏྟཾ བྷཱཝེམ, དཱནཾ དེམ, མགྒཾ སམཾ ཀརོམ, པོཀྑརཎིཡོ ཁཎཱམ, སཱལཾ ཀརོམ, ཨཡཾ ཨམྷཱཀཾ མནྟོ ཙ པརིཏྟཉྩ ཝུཌྜྷི ཙཱ’’ཏི. རཱཛཱ ཏེསཾ པསནྣོ པེསུཉྙཀཱརཀསྶ སབྦཾ གེཧཝིབྷཝཾ ཏཉྩ ཏེསཾཡེཝ དཱསཾ ཀཏྭཱ ཨདཱསི, ཏཾ ཧཏྠིཉྩ གཱམཉྩ ཏེསཾཡེཝ ཨདཱསི.

ཏེ ཏཏོ པཊྛཱཡ ཡཐཱརུཙིཡཱ པུཉྙཱནི ཀརོནྟཱ ‘‘ཙཏུམཧཱཔཐེ མཧནྟཾ སཱལཾ ཀཱརེསྶཱམཱ’’ཏི ཝཌྜྷཀིཾ པཀྐོསཱཔེཏྭཱ སཱལཾ ¶ པཊྛཔེསུཾ. མཱཏུགཱམེསུ པན ཝིགཏཙྪནྡཏཱཡ ¶ ཏསྶཱ སཱལཱཡ མཱཏུགཱམཱནཾ པཏྟིཾ ནཱདཾསུ. ཏེན ཙ སམཡེན བོདྷིསཏྟསྶ གེཧེ སུདྷམྨཱ, ཙིཏྟཱ, ནནྡཱ, སུཛཱཏི ཙཏསྶོ ཨིཏྠིཡོ ཧོནྟི. ཏཱསུ སུདྷམྨཱ ཝཌྜྷཀིནཱ སདྡྷིཾ ཨེཀཏོ ཧུཏྭཱ ‘‘བྷཱཏིཀ, ཨིམིསྶཱ སཱལཱཡ མཾ ཛེཊྛིཀཾ ཀརོཧཱི’’ཏི ཝཏྭཱ ལཉྫཾ ཨདཱསི. སོ ‘‘སཱདྷཱུ’’ཏི སམྤཊིཙྪིཏྭཱ པཋམམེཝ ཀཎྞིཀཱརུཀྑཾ སུཀྑཱཔེཏྭཱ ཏཙྪེཏྭཱ ཝིཛ྄ཛྷིཏྭཱ ཀཎྞིཀཾ ནིཊྛཱཔེཏྭཱ ཝཏྠེན པལིཝེཋེཏྭཱ ཋཔེསི. ཨཐ སཱལཾ ནིཊྛཱཔེཏྭཱ ཀཎྞིཀཱརོཔནཀཱལེ ‘‘ཨཧོ, ཨཡྻཱ, ཨེཀཾ ན སརིམྷཱ’’ཏི ཨཱཧ. ‘‘ཀིཾ ནཱམ, བྷོ’’ཏི. ‘‘ཀཎྞིཀཱ ལདྡྷུཾ ཝཊྚཏཱི’’ཏི. ‘‘ཧོཏུ ཨཱཧརིསྶཱམཱ’’ཏི? ‘‘ཨིདཱནི ཚིནྣརུཀྑེན ཀཱཏུཾ ན སཀྐཱ, པུབྦེཡེཝ ཚིནྡིཏྭཱ ཏཙྪེཏྭཱ ཝིཛ྄ཛྷིཏྭཱ ཋཔིཏཀཎྞིཀཱ ལདྡྷུཾ ཝཊྚཏཱི’’ཏི. ‘‘ཨིདཱནི ཀིཾ ཀཱཏབྦ’’ནྟི? ‘‘སཙེ ཀསྶཙི གེཧེ ནིཊྛཱཔེཏྭཱ ཋཔིཏཱ ཝིཀྐཱཡིཀཀཎྞིཀཱ ཨཏྠི, སཱ པརིཡེསིཏབྦཱ’’ཏི. ཏེ པརིཡེསནྟཱ སུདྷམྨཱཡ གེཧེ དིསྭཱ མཱུལེན ན ལབྷིཾསུ. ‘‘སཙེ མཾ སཱལཱཡ པཏྟིཀཾ ཀརོཐ, དསྶཱམཱི’’ཏི ཝུཏྟེ ‘‘ན མཡཾ མཱཏུགཱམཱནཾ པཏྟིཾ དམྷཱ’’ཏི ཨཱཧཾསུ.

ཨཐ ནེ ཝཌྜྷཀཱི ཨཱཧ ‘‘ཨཡྻཱ, ཏུམྷེ ཀིཾ ཀཐེཐ, ཋཔེཏྭཱ བྲཧྨལོཀཾ ཨཉྙཾ མཱཏུགཱམརཧིཏཊྛཱནཾ ནཱམ ནཏྠི, གཎྷཐ ཀཎྞིཀཾ, ཨེཝཾ སནྟེ ཨམྷཱཀཾ ཀམྨཾ ནིཊྛཾ གམིསྶཏཱི’’ཏི. ཏེ ‘‘སཱདྷཱུ’’ཏི ཀཎྞིཀཾ གཧེཏྭཱ སཱལཾ ནིཊྛཱཔེཏྭཱ ཨཱསནཕལཀཱནི སནྠརིཏྭཱ པཱནཱིཡཙཱཊིཡོ ཋཔེཏྭཱ ཡཱགུབྷཏྟཾ ནིབནྡྷིཾསུ. སཱལཾ པཱཀཱརེན པརིཀྑིཔིཏྭཱ དྭཱརཾ ཡོཛེཏྭཱ ཨནྟོཔཱཀཱརེ ཝཱལུཀཾ ཨཱཀིརིཏྭཱ བཧིཔཱཀཱརེ ཏཱལཔནྟིཡོ རོཔེསུཾ. ཙིཏྟཱཔི ཏསྨིཾ ཋཱནེ ཨུཡྻཱནཾ ཀཱརེསི, ‘‘པུཔྥཱུཔགཕལཱུཔགརུཀྑོ ཨསུཀོ ནཱམ ཏསྨིཾ ནཏྠཱི’’ཏི ནཱཧོསི. ནནྡཱཔི ཏསྨིཾཡེཝ ཋཱནེ པོཀྑརཎིཾ ཀཱརེསི པཉྩཝཎྞེཧི པདུམེཧི སཉྪནྣཾ རམཎཱིཡཾ. སུཛཱ ན ཀིཉྩི ཨཀཱསི.

བོདྷིསཏྟོ ¶ མཱཏུ ཨུཔཊྛཱནཾ པིཏུ ཨུཔཊྛཱནཾ ཀུལེ ཛེཊྛཱཔཙཱཡིཀཀམྨཾ སཙྩཝཱཙཾ ཨཕརུསཝཱཙཾ ¶ ཨཔིསུཎཝཱཙཾ མཙྪེརཝིནཡནྟི ཨིམཱནི སཏྟ ཝཏཔདཱནི པཱུརེཏྭཱ –

‘‘མཱཏཱཔེཏྟིབྷརཾ ཛནྟུཾ, ཀུལེ ཛེཊྛཱཔཙཱཡིནཾ;

སཎྷཾ སཁིལསམྦྷཱསཾ, པེསུཎེཡྻཔྤཧཱཡིནཾ.

‘‘མཙྪེརཝིནཡེ ¶ ཡུཏྟཾ, སཙྩཾ ཀོདྷཱབྷིབྷུཾ ནརཾ;

ཏཾ ཝེ དེཝཱ ཏཱཝཏིཾསཱ, ཨཱཧུ སཔྤུརིསོ ཨིཏཱི’’ཏི. (སཾ. ནི. ༡.༢༥༧) –

ཨེཝཾ པསཾསིཡབྷཱཝཾ ཨཱཔཛྫིཏྭཱ ཛཱིཝིཏཔརིཡོསཱནེ ཏཱཝཏིཾསབྷཝནེ སཀྐོ དེཝརཱཛཱ ཧུཏྭཱ ནིབྦཏྟི, ཏེཔིསྶ སཧཱཡཱ ཏཏྠེཝ ནིབྦཏྟིཾསུ. ཏསྨིཾ ཀཱལེ ཏཱཝཏིཾསབྷཝནེ ཨསུརཱ པཊིཝསནྟི. སཀྐོ དེཝརཱཛཱ ‘‘ཀིཾ ནོ སཱདྷཱརཎེན རཛྫེནཱ’’ཏི ཨསུརེ དིབྦཔཱནཾ པཱཡེཏྭཱ མཏྟེ སམཱནེ པཱདེསུ གཱཧཱཔེཏྭཱ སིནེརུཔབྦཏཔཱདེ ཁིཔཱཔེསི. ཏེ ཨསུརབྷཝནམེཝ སམྤཱཔུཎིཾསུ.

ཨསུརབྷཝནཾ ནཱམ སིནེརུསྶ ཧེཊྛིམཏལེ ཏཱཝཏིཾསདེཝལོཀཔྤམཱཎམེཝ, ཏཏྠ དེཝཱནཾ པཱརིཙྪཏྟཀོ ཝིཡ ཙིཏྟཔཱཊལི ནཱམ ཀཔྤཊྛིཡརུཀྑོ ཧོཏི. ཏེ ཙིཏྟཔཱཊལིཡཱ པུཔྥིཏཱཡ ཛཱནནྟི ‘‘ནཱཡཾ ཨམྷཱཀཾ དེཝལོཀོ, དེཝལོཀསྨིཉྷི པཱརིཙྪཏྟཀོ པུཔྥཏཱི’’ཏི. ཨཐ ཏེ ‘‘ཛརསཀྐོ ཨམྷེ མཏྟེ ཀཏྭཱ མཧཱསམུདྡཔིཊྛེ ཁིཔིཏྭཱ ཨམྷཱཀཾ དེཝནགརཾ གཎྷི, ཏེ མཡཾ ཏེན སདྡྷིཾ ཡུཛ྄ཛྷིཏྭཱ ཨམྷཱཀཾ དེཝནགརམེཝ གཎྷིསྶཱམཱ’’ཏི ཀིཔིལླིཀཱ ཝིཡ ཐམྦྷཾ སིནེརུཾ ཨནུསཉྩརམཱནཱ ཨུཊྛཧིཾསུ. སཀྐོ ‘‘ཨསུརཱ ཀིར ཨུཊྛིཏཱ’’ཏི སུཏྭཱ སམུདྡཔིཊྛེཡེཝ ཨབྦྷུགྒནྟྭཱ ཡུཛ྄ཛྷམཱནོ ཏེཧི པརཱཛིཏོ དིཡཌྜྷཡོཛནསཏིཀེན ཝེཛཡནྟརཐེན དཀྑིཎསམུདྡསྶ མཏྠཀེན པལཱཡིཏུཾ ཨཱརདྡྷོ. ཨཐསྶ རཐོ སམུདྡཔིཊྛེན ཝེགེན གཙྪནྟོ སིམྦལིཝནཾ པཀྑནྟོ, ཏསྶ གམནམགྒེ སིམྦལིཝནཾ ནལ༹ཝནཾ ཝིཡ ཚིཛྫིཏྭཱ ཚིཛྫིཏྭཱ སམུདྡཔིཊྛེ པཏཏི. སུཔཎྞཔོཏཀཱ སམུདྡཔིཊྛེ པརིཔཏནྟཱ མཧཱཝིརཝཾ རཝིཾསུ. སཀྐོ མཱཏལིཾ པུཙྪི ‘‘སམྨ མཱཏལི, ཀིཾ སདྡོ ནཱམེས, ཨཏིཀཱརུཉྙརཝོ ¶ ཝཏྟཏཱི’’ཏི? ‘‘དེཝ, ཏུམྷཱཀཾ རཐཝེགེན ཝིཙུཎྞིཏེ སིམྦལིཝནེ པཏནྟེ སུཔཎྞཔོཏཀཱ མརཎབྷཡཏཛྫིཏཱ ཨེཀཝིརཝཾ ཝིརཝནྟཱི’’ཏི.

མཧཱསཏྟོ ¶ ‘‘སམྨ མཱཏལི, མཱ ཨམྷེ ནིསྶཱཡ ཨེཏེ ཀིལམནྟུ, ན མཡཾ ཨིསྶརིཡཾ ནིསྶཱཡ པཱཎཝདྷཀམྨཾ ཀརོམ, ཨེཏེསཾ པན ཨཏྠཱཡ མཡཾ ཛཱིཝིཏཾ པརིཙྩཛིཏྭཱ ཨསུརཱནཾ དསྶཱམ, ནིཝཏྟཡེཏཾ རཐ’’ནྟི ཝཏྭཱ ཨིམཾ གཱཐམཱཧ –

༣༡.

‘‘ཀུལཱཝཀཱ ¶ མཱཏལི སིམྦལིསྨིཾ, ཨཱིསཱམུཁེན པརིཝཛྫཡསྶུ;

ཀཱམཾ ཙཛཱམ ཨསུརེསུ པཱཎཾ, མཱམེ དིཛཱ ཝིཀུལཱཝཱ ཨཧེསུ’’ནྟི.

ཏཏྠ ཀུལཱཝཀཱཏི སུཔཎྞཔོཏཀཱ. མཱཏལཱིཏི སཱརཐིཾ ཨཱམནྟེསི. སིམྦལིསྨིནྟི པསྶ ཨེཏེ སིམྦལིརུཀྑེ ཨོལམྦནྟཱ ཋིཏཱཏི དསྶེཏི. ཨཱིསཱམུཁེན པརིཝཛྫཡསྶཱུཏི ཨེཏེ ཨེཏསྶ རཐསྶ ཨཱིསཱམུཁེན ཡཐཱ ན ཧཉྙནྟི, ཨེཝཾ ཏེ པརིཝཛྫཡསྶུ. ཀཱམཾ ཙཛཱམ ཨསུརེསུ པཱཎནྟི ཡདི ཨམྷེསུ ཨསུརཱནཾ པཱཎཾ ཙཛནྟེསུ ཨེཏེསཾ སོཏྠི ཧོཏི, ཀཱམཾ ཙཛཱམ ཨེཀཾསེནེཝ མཡཾ ཨསུརེསུ ཨམྷཱཀཾ པཱཎཾ ཙཛཱམ. མཱམེ དིཛཱ ཝིཀུལཱཝཱ ཨཧེསུནྟི ཨིམེ པན དིཛཱ ཨིམེ གརུལ༹པོཏཀཱ ཝིདྡྷསྟཝིཙུཎྞིཏཀུལཱཝཀཏཱཡ ཝིཀུལཱཝཱ མཱ ཨཧེསུཾ, མཱ ཨམྷཱཀཾ དུཀྑཾ ཨེཏེསཾ ཨུཔརི ཁིཔ, ནིཝཏྟཡ ནིཝཏྟཡ རཐནྟི. མཱཏལིསངྒཱཧཀོ ཏསྶ ཝཙནཾ སུཏྭཱ རཐཾ ནིཝཏྟེཏྭཱ ཨཉྙེན མགྒེན དེཝལོཀཱབྷིམུཁཾ ཨཀཱསི. ཨསུརཱ པན ཏཾ ནིཝཏྟཡམཱནམེཝ དིསྭཱ ‘‘ཨདྡྷཱ ཨཉྙེཧིཔི ཙཀྐཝཱལེ༹ཧི སཀྐཱ ཨཱགཙྪནྟི, བལཾ ལབྷིཏྭཱ རཐོ ནིཝཏྟོ བྷཝིསྶཏཱི’’ཏི མརཎབྷཡབྷཱིཏཱ པལཱཡིཏྭཱ ཨསུརབྷཝནམེཝ པཝིསིཾསུ.

སཀྐོཔི དེཝནགརཾ པཝིསིཏྭཱ དྭཱིསུ དེཝལོཀེསུ དེཝགཎེན པརིཝུཏོ ནགརམཛ྄ཛྷེ ཨཊྛཱསི. ཏསྨིཾ ཁཎེ པཐཝིཾ བྷིནྡིཏྭཱ ཡོཛནསཧསྶུབྦེདྷོ ཝེཛཡནྟཔཱསཱདོ ཨུཊྛཧི. ཝིཛཡནྟེ ཨུཊྛིཏཏྟཱ ‘‘ཝེཛཡནྟོ’’ ཏྭེཝ ནཱམཾ ཨཀཾསུ. ཨཐ སཀྐོ པུན ཨསུརཱནཾ ཨནཱགམནཏྠཱཡ པཉྩསུ ཋཱནེསུ ཨཱརཀྑཾ ཋཔེསི. ཡཾ སནྡྷཱཡ ཝུཏྟཾ –

‘‘ཨནྟརཱ ¶ དྭིནྣཾ ཨཡུཛ྄ཛྷཔུརཱནཾ, པཉྩཝིདྷཱ ཋཔིཏཱ ཨབྷིརཀྑཱ;

ཨུརགཀརོཊིཔཡསྶ ཙ ཧཱརཱི, མདནཡུཏཱ ཙཏུརོ ཙ མཧནྟཱ’’ཏི. (སཾ. ནི. ཨཊྛ. ༡.༡.༢༤༧);

དྭེ ¶ ནགརཱནིཔི ཡུདྡྷེན གཧེཏུཾ ཨསཀྐུཎེཡྻཏཱཡ ཨཡུཛ྄ཛྷཔུརཱནི ནཱམ ཛཱཏཱནི དེཝནགརཉྩ ཨསུརནགརཉྩ. ཡདཱ ཧི ཨསུརཱ བལཝནྟཱ ཧོནྟི, ཨཐ དེཝེཧི པལཱཡིཏྭཱ དེཝནགརཾ པཝིསིཏྭཱ དྭཱརེ པིཧིཏེ ཨསུརཱནཾ སཏསཧསྶམྤི ¶ ཀིཉྩི ཀཱཏུཾ ན སཀྐོཏི. ཡདཱ དེཝཱ བལཝནྟཱ ཧོནྟི, ཨཐ ཨསུརེཧི པལཱཡིཏྭཱ ཨསུརནགརཾ པཝིསིཏྭཱ དྭཱརེ པིཧིཏེ སཀྐཱནཾ སཏསཧསྶམྤི ཀིཉྩི ཀཱཏུཾ ན སཀྐོཏི. ཨིཏི ཨིམཱནི དྭེ ནགརཱནི ཨཡུཛ྄ཛྷཔུརཱནི ནཱམ. ཏེསཾ ཨནྟརཱ ཨེཏེསུ ཨུརགཱདཱིསུ པཉྩསུ ཋཱནེསུ སཀྐེན ཨཱརཀྑཱ ཋཔིཏཱ. ཏཏྠ ཨུརག-སདྡེན ནཱགཱ གཧིཏཱ. ཏེ ཨུདཀེ བལཝནྟཱ ཧོནྟི, ཏསྨཱ སིནེརུསྶ པཋམཱལིནྡེ ཏེསཾ ཨཱརཀྑཱ. ཀརོཊི-སདྡེན སུཔཎྞཱ གཧིཏཱ. ཏེསཾ ཀིར ཀརོཊི ནཱམ པཱནབྷོཛནཾ, ཏེན ཏཾ ནཱམཾ ལབྷིཾསུ, དུཏིཡཱལིནྡེ ཏེསཾ ཨཱརཀྑཱ. པཡསྶཧཱརི-སདྡེན ཀུམྦྷཎྜཱ གཧིཏཱ. དཱནཝརཀྑསཱ ཀིརེཏེ, ཏཏིཡཱལིནྡེ ཏེསཾ ཨཱརཀྑཱ. མདནཡུཏ-སདྡེན ཡཀྑཱ གཧིཏཱ. ཝིསམཙཱརིནོ ཀིར ཏེ ཡུདྡྷསོཎྜཱ, ཙཏུཏྠཱལིནྡེ ཏེསཾ ཨཱརཀྑཱ. ཙཏུརོ ཙ མཧནྟཱཏི ཙཏྟཱརོ མཧཱརཱཛཱནོ ཝུཏྟཱ, པཉྩམཱལིནྡེ ཏེསཾ ཨཱརཀྑཱ. ཏསྨཱ ཡདི ཨསུརཱ ཀུཔིཏཱ ཨཱཝིལཙིཏྟཱ དེཝཔུརཾ ཨུཔཡནྟི, པཉྩཝིདྷེསུ ཡཾ གིརིནོ པཋམཾ པརིབྷཎྜཾ, ཏཾ ཨུརགཱ པརིབཱཧིཡ ཏིཊྛནྟི. ཨེཝཾ སེསེསུ སེསཱ.

ཨིམེསུ པན པཉྩསུ ཋཱནེསུ ཨཱརཀྑཾ ཋཔེཏྭཱ སཀྐེ དེཝཱནམིནྡེ དིབྦསམྤཏྟིཾ ཨནུབྷཝམཱནེ སུདྷམྨཱ ཙཝིཏྭཱ ཏསྶེཝ པཱདཔརིཙཱརིཀཱ ཧུཏྭཱ ནིབྦཏྟི, ཀཎྞིཀཱཡ དིནྣནིསྶནྡེན ཙསྶཱ པཉྩཡོཛནསཏིཀཱ སུདྷམྨཱ ནཱམ དེཝསབྷཱ ཨུདཔཱདི, ཡཏྠ དིབྦསེཏཙྪཏྟསྶ ཧེཊྛཱ ཡོཛནཔྤམཱཎེ ཀཉྩནཔལླངྐེ ནིསིནྣོ སཀྐོ དེཝཱནམིནྡོ དེཝམནུསྶཱནཾ ཀཏྟབྦཀིཙྩཱནི ཀརོཏི. ཙིཏྟཱཔི ཙཝིཏྭཱ ཏསྶེཝ པཱདཔརིཙཱརིཀཱ ཧུཏྭཱ ནིབྦཏྟི, ཨུཡྻཱནསྶ ཀརཎནིསྶནྡེན ཙསྶཱ ཙིཏྟལཏཱཝནཾ ནཱམ ཨུཡྻཱནཾ ཨུདཔཱདི. ནནྡཱཔི ཙཝིཏྭཱ ཏསྶེཝ པཱདཔརིཙཱརིཀཱ ཧུཏྭཱ ནིབྦཏྟི, པོཀྑརཎིཡཱ ནིསྶནྡེན ཙསྶཱ ནནྡཱ ནཱམ པོཀྑརཎཱི ཨུདཔཱདི.

སུཛཱ པན ¶ ཀུསལཀམྨསྶ ཨཀཏཏྟཱ ཨེཀསྨིཾ ཨརཉྙེ ཀནྡརཱཡ བཀསཀུཎིཀཱ ཧུཏྭཱ ནིབྦཏྟཱ. སཀྐོ ‘‘སུཛཱ ན པཉྙཱཡཏི, ཀཏྠ ནུ ཁོ ནིབྦཏྟཱ’’ཏི ཨཱཝཛྫེནྟོ ཏཾ དིསྭཱ ཏཏྠ གནྟྭཱ ཏཾ ཨཱདཱཡ དེཝལོཀཾ ཨཱགནྟྭཱ ཏསྶཱ རམཎཱིཡཾ དེཝནགརཾ སུདྷམྨཾ དེཝསབྷཾ ཙིཏྟལཏཱཝནཾ ནནྡཱཔོཀྑརཎིཉྩ དསྶེཏྭཱ ‘‘ཨེཏཱ ཀུསལཾ ཀཏྭཱ མཡ྄ཧཾ པཱདཔརིཙཱརིཀཱ ཧུཏྭཱ ནིབྦཏྟཱ, ཏྭཾ པན ཀུསལཾ ཨཀཏྭཱ ཏིརཙྪཱནཡོནིཡཾ ནིབྦཏྟཱ ¶ , ཨིཏོ པཊྛཱཡ སཱིལཾ རཀྑཱཧཱི’’ཏི ཏཾ ཨོཝདིཏྭཱ པཉྩསུ སཱིལེསུ པཏིཊྛཱཔེཏྭཱ ཏཏྠེཝ ནེཏྭཱ ཝིསྶཛྫེསི. སཱཔི ཏཏོ ¶ པཊྛཱཡ སཱིལཾ རཀྑཏི. སཀྐོ ཀཏིཔཱཧཙྩཡེན ‘‘སཀྐཱ ནུ ཁོ སཱིལཾ རཀྑིཏུ’’ནྟི གནྟྭཱ མཙྪརཱུཔེན ཨུཏྟཱནོ ཧུཏྭཱ པུརཏོ ནིཔཛྫི, སཱ ‘‘མཏམཙྪཀོ’’ཏི སཉྙཱཡ སཱིསེ ཨགྒཧེསི, མཙྪོ ནངྒུཊྛཾ ཙཱལེསི, ཨཐ ནཾ ‘‘ཛཱིཝཏི མཉྙེ’’ཏི ཝིསྶཛྫེསི. སཀྐོ ‘‘སཱདྷུ སཱདྷུ, སཀྑིསྶསི སཱིལཾ རཀྑིཏུ’’ནྟི ཨགམཱསི. སཱ ཏཏོ ཙུཏཱ བཱརཱཎསིཡཾ ཀུམྦྷཀཱརགེཧེ ནིབྦཏྟི.

སཀྐོ ‘‘ཀཧཾ ནུ ཁོ ནིབྦཏྟཱ’’ཏི ཏཏྠ ནིབྦཏྟབྷཱཝཾ ཉཏྭཱ སུཝཎྞཨེལཱ༹ལུཀཱནཾ ཡཱནཀཾ པཱུརེཏྭཱ མཛ྄ཛྷེ གཱམསྶ མཧལླཀཝེསེན ནིསཱིདིཏྭཱ ‘‘ཨེལཱ༹ལུཀཱནི གཎྷཐ, ཨེལཱ༹ལུཀཱནི གཎྷཐཱ’’ཏི ཨུགྒྷོསེསི. མནུསྶཱ ཨཱགནྟྭཱ ‘‘དེཧི, ཏཱཏཱ’’ཏི ཨཱཧཾསུ. ‘‘ཨཧཾ སཱིལརཀྑཀཱནཾ དམྨི, ཏུམྷེ སཱིལཾ རཀྑཐཱ’’ཏི? ‘‘མཡཾ སཱིལཾ ནཱམ ན ཛཱནཱམ, མཱུལེན དེཧཱི’’ཏི. ‘‘ན མཡ྄ཧཾ མཱུལེན ཨཏྠོ, སཱིལརཀྑཀཱནཉྙེཝཱཧཾ དམྨཱི’’ཏི. མནུསྶཱ ‘‘ཀོ ཙཱཡཾ ཨེལཱ༹ལུཀོ’’ཏི པཀྐམིཾསུ. སུཛཱ ཏཾ པཝཏྟིཾ སུཏྭཱ ‘‘མཡ྄ཧཾ ཨཱནཱིཏཾ བྷཝིསྶཏཱི’’ཏི ཙིནྟེཏྭཱ གནྟྭཱ ཏཾ ‘‘དེཧི, ཏཱཏཱ’’ཏི ཨཱཧ. ‘‘སཱིལཾ རཀྑསི, ཨམྨཱ’’ཏི? ‘‘ཨཱམ, རཀྑཱམཱི’’ཏི. ‘‘ཨིདཾ མཡཱ ཏུཡ྄ཧམེཝ ཨཏྠཱཡ ཨཱབྷཏ’’ནྟི སདྡྷིཾ ཡཱནཀེན གེཧདྭཱརེ ཋཔེཏྭཱ པཀྐཱམི.

སཱཔི ཡཱཝཛཱིཝཾ སཱིལཾ རཀྑིཏྭཱ ཏཏོ ཙུཏཱ ཝེཔཙིཏྟིསྶ ཨསུརིནྡསྶ དྷཱིཏཱ ཧུཏྭཱ ནིབྦཏྟི, སཱིལཱནིསཾསེན ཨབྷིརཱུཔཱ ཨཧོསི. སོ ཏསྶཱ ཝཡཔྤཏྟཀཱལེ ‘‘མཡ྄ཧཾ དྷཱིཏཱ ཨཏྟནོ ཙིཏྟརུཙིཏཾ སཱམིཀཾ གཎྷཏཱུ’’ཏི ཨསུརེ སནྣིཔཱཏེསི ¶ . སཀྐོ ‘‘ཀཧཾ ནུ ཁོ སཱ ནིབྦཏྟཱ’’ཏི ཨོལོཀེནྟོ ཏཏྠ ནིབྦཏྟབྷཱཝཾ ཉཏྭཱ ‘‘སུཛཱ ཙིཏྟརུཙིཏཾ སཱམིཀཾ གཎྷནྟཱི མཾ གཎྷིསྶཏཱི’’ཏི ཨསུརཝཎྞཾ མཱཔེཏྭཱ ཏཏྠ ཨགམཱསི. སུཛཾ ཨལངྐརིཏྭཱ སནྣིཔཱཏཊྛཱནཾ ཨཱནེཏྭཱ ‘‘ཙིཏྟརུཙིཏཾ སཱམིཀཾ གཎྷཱ’’ཏི ཨཱཧཾསུ. སཱ ཨོལོཀེནྟཱི སཀྐཾ དིསྭཱ པུབྦེཔི སིནེཧཝསེན ཨུཔྤནྣཔེམེན མཧོགྷེན ཝིཡ ཨཛ྄ཛྷོཏྠཊཧདཡཱ ཧུཏྭཱ ‘‘ཨཡཾ མེ སཱམིཀོ’’ཏི ཝཏྭཱ ཏསྶ ཨུཔརི པུཔྥདཱམཾ ཁིཔིཏྭཱ ཨགྒཧེསི. ཨསུརཱ ‘‘ཨམྷཱཀཾ རཱཛཱ ཨེཏྟཀཾ ཀཱལཾ དྷཱིཏུ ཨནུཙྪཝིཀཾ ཨལབྷིཏྭཱ ཨིདཱནི ལབྷཏི ¶ , ཨཡམེཝསྶཱ དྷཱིཏུ པིཏཱམཧཏོ མཧལླཀོ ཨནུཙྪཝིཀོ’’ཏི ལཛྫམཱནཱ པཀྐམིཾསུ. སོ ཏཾ དེཝནགརཾ ཨཱནེཏྭཱ ཨཌྜྷཏེཡྻཱནཾ ནཱཊིཀཱཀོཊཱིནཾ ཛེཊྛིཀཾ ཀཏྭཱ ཡཱཝཏཱཡུཀཾ ཋཏྭཱ ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ ‘‘ཨེཝཾ བྷིཀྑུ པུབྦེ པཎྜིཏཱ དེཝནགརེ རཛྫཾ ཀཱརཡམཱནཱ ཨཏྟནོ ཛཱིཝིཏཾ པརིཙྩཛནྟཱཔི པཱཎཱཏིཔཱཏཾ ན ཀརིཾསུ, ཏྭཾ ནཱམ ཨེཝརཱུཔེ ནིཡྻཱནིཀེ ¶ སཱསནེ པབྦཛིཏྭཱ ཨཔརིསྶཱཝིཏཾ སཔཱཎཀཾ ཨུདཀཾ པིཝིསྶསཱི’’ཏི ཏཾ བྷིཀྑུཾ གརཧིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ མཱཏལིསངྒཱཧཀོ ཨཱནནྡོ ཨཧོསི, སཀྐོ པན ཨཧམེཝ ཨཧོསི’’ནྟི.

ཀུལཱཝཀཛཱཏཀཝཎྞནཱ པཋམཱ.

[༣༢] ༢. ནཙྩཛཱཏཀཝཎྞནཱ

རུདཾ མནུཉྙནྟི ཨིདཾ སཏྠཱ ཛེཏཝནེ ཝིཧརནྟོ ཨེཀཾ བཧུབྷཎྜིཀཾ བྷིཀྑུཾ ཨཱརབྦྷ ཀཐེསི. ཝཏྠུ ཧེཊྛཱ དེཝདྷམྨཛཱཏཀེ (ཛཱ. ༡.༡.༦) ཝུཏྟསདིསམེཝ. སཏྠཱ ཏཾ བྷིཀྑུཾ ‘‘སཙྩཾ ཀིར ཏྭཾ བྷིཀྑུ བཧུབྷཎྜོ’’ཏི པུཙྪི. ‘‘ཨཱམ, བྷནྟེ’’ཏི. ‘‘ཀིཾཀཱརཎཱ ཏྭཾ བྷིཀྑུ བཧུབྷཎྜོ ཛཱཏོསཱི’’ཏི? སོ ཨེཏྟཀཾ སུཏྭཱཝ ཀུདྡྷོ ནིཝཱསནཔཱརུཔནཾ ཚཌྜེཏྭཱ ‘‘ཨིམིནཱ དཱནི ནཱིཧཱརེན ཝིཙརཱམཱི’’ཏི སཏྠུ པུརཏོ ནགྒོ ཨཊྛཱསི. མནུསྶཱ ‘‘དྷཱི དྷཱི’’ཏི ཨཱཧཾསུ. སོ ཏཏོ པལཱཡིཏྭཱ ཧཱིནཱཡཱཝཏྟོ. བྷིཀྑཱུ དྷམྨསབྷཱཡཾ སནྣིསིནྣཱ ‘‘སཏྠུ ནཱམ པུརཏོ ཨེཝརཱུཔཾ ཀརིསྶཏཱི’’ཏི ཏསྶ ཨགུཎཀཐཾ ཀཐེསུཾ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི བྷིཀྑཱུ པུཙྪི. བྷནྟེ, ‘‘སོ ཧི ནཱམ བྷིཀྑུ ཏུམྷཱཀཾ པུརཏོ ཙཏུཔརིསམཛ྄ཛྷེ ཧིརོཏྟཔྤཾ པཧཱཡ གཱམདཱརཀོ ཝིཡ ནགྒོ ཋཏྭཱ མནུསྶེཧི ཛིགུཙྪིཡམཱནོ ཧཱིནཱཡཱཝཏྟིཏྭཱ སཱསནཱ པརིཧཱིནོ’’ཏི ཏསྶ ཨགུཎཀཐཱཡ ནིསིནྣཱམྷཱཏི. སཏྠཱ ‘‘ན, བྷིཀྑཝེ, ཨིདཱནེཝ སོ བྷིཀྑུ ཧིརོཏྟཔྤཱབྷཱཝེན རཏནསཱསནཱ པརིཧཱིནོ, པུབྦེ ཨིཏྠིརཏནཔཊིལཱབྷཏོཔི པརིཧཱིནོཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ ¶ པཋམཀཔྤེ ཙཏུཔྤདཱ སཱིཧཾ རཱཛཱནཾ ཨཀཾསུ, མཙྪཱ ཨཱནནྡམཙྪཾ, སཀུཎཱ སུཝཎྞཧཾསཾ. ཏསྶ པན སུཝཎྞཧཾསརཱཛསྶ དྷཱིཏཱ ཧཾསཔོཏིཀཱ ཨབྷིརཱུཔཱ ཨཧོསི. སོ ཏསྶཱ ཝརཾ ཨདཱསི, སཱ ཨཏྟནོ ཙིཏྟརུཙིཏཾ སཱམིཀཾ ཝཱརེསི. ཧཾསརཱཛཱ ཏསྶཱ ཝརཾ དཏྭཱ ཧིམཝནྟེ སབྦེ སཀུཎེ སནྣིཔཱཏཱཔེསི, ནཱནཔྤཀཱརཱ ཧཾསམོརཱདཡོ སཀུཎགཎཱ སམཱགནྟྭཱ ཨེཀསྨིཾ མཧནྟེ པཱསཱཎཏལེ སནྣིཔཏིཾསུ. ཧཾསརཱཛཱ ‘‘ཨཏྟནོ ཙིཏྟརུཙིཏཾ སཱམིཀཾ ཨཱགནྟྭཱ གཎྷཱཏཱུ’’ཏི དྷཱིཏརཾ པཀྐོསཱཔེསི. སཱ སཀུཎསངྒྷཾ ཨོལོཀེནྟཱི མཎིཝཎྞགཱིཝཾ ཙིཏྲཔེཁུཎཾ མོརཾ དིསྭཱ ‘‘ཨཡཾ མེ སཱམིཀོ ཧོཏཱུ’’ཏི ཨཱརོཙེསི. སཀུཎསངྒྷཱ མོརཾ ཨུཔསངྐམིཏྭཱ ཨཱཧཾསུ ‘‘སམྨ མོར, ཨཡཾ རཱཛདྷཱིཏཱ ཨེཏྟཀཱནཾ སཀུཎཱནཾ མཛ྄ཛྷེ སཱམིཀཾ རོཙེནྟཱི ཏཡི རུཙིཾ ཨུཔྤཱདེསཱི’’ཏི. མོརོ ‘‘ཨཛྫཱཔི ཏཱཝ མེ བལཾ ན པསྶཏཱི’’ཏི ཨཏིཏུཊྛིཡཱ ཧིརོཏྟཔྤཾ བྷིནྡིཏྭཱ ¶ ཏཱཝ མཧཏོ སཀུཎསངྒྷསྶ མཛ྄ཛྷེ པཀྑེ པསཱརེཏྭཱ ནཙྩིཏུཾ ཨཱརབྷི, ནཙྩནྟོ ཨཔྤཊིཙྪནྣོ ཨཧོསི.

སུཝཎྞཧཾསརཱཛཱ ལཛྫིཏོ ‘‘ཨིམསྶ ནེཝ ཨཛ྄ཛྷཏྟསམུཊྛཱནཱ ཧིརཱི ཨཏྠི, ན བཧིདྡྷཱསམུཊྛཱནཾ ཨོཏྟཔྤཾ, ནཱསྶ བྷིནྣཧིརོཏྟཔྤསྶ མམ དྷཱིཏརཾ དསྶཱམཱི’’ཏི སཀུཎསངྒྷམཛ྄ཛྷེ ཨིམཾ གཱཐམཱཧ –

༣༢.

‘‘རུདཾ མནུཉྙཾ རུཙིརཱ ཙ པིཊྛི, ཝེལུ༹རིཡཝཎྞཱུཔནིབྷཱ ཙ གཱིཝཱ;

བྱཱམམཏྟཱནི ཙ པེཁུཎཱནི, ནཙྩེན ཏེ དྷཱིཏརཾ ནོ དདཱམཱི’’ཏི.

ཏཏྠ རུདཾ མནུཉྙནྟི ཏ-ཀཱརསྶ ད-ཀཱརོ ཀཏོ, རུཏཾ མནཱཔཾ, ཝསྶིཏསདྡོ མདྷུརོཏི ཨཏྠོ. རུཙིརཱ ཙ པིཊྛཱིཏི པིཊྛིཔི ཏེ ཙིཏྲཱ ཙེཝ སོབྷནཱ ཙ. ཝེལུ༹རིཡཝཎྞཱུཔནིབྷཱཏི ཝེལུ༹རིཡམཎིཝཎྞསདིསཱ. བྱཱམམཏྟཱནཱིཏི ཨེཀབྱཱམཔྤམཱཎཱནི. པེཁུཎཱནཱིཏི པིཉྪཱནི. ནཙྩེན ཏེ དྷཱིཏརཾ ནོ དདཱམཱིཏི ཧིརོཏྟཔྤཾ བྷིནྡིཏྭཱ ནཙྩིཏབྷཱཝེནེཝ ཏེ ཨེཝརཱུཔསྶ ནིལླཛྫསྶ དྷཱིཏརཾ ནོ དདཱམཱིཏི ཝཏྭཱ ཧཾསརཱཛཱ ཏསྨིཾཡེཝ པརིསམཛ྄ཛྷེ ཨཏྟནོ བྷཱགིནེཡྻསྶ ཧཾསཔོཏཀསྶ དྷཱིཏརཾ ཨདཱསི. མོརོ ཧཾསཔོཏིཀཾ ཨལབྷིཏྭཱ ¶ ལཛྫིཏྭཱ ཏཏོཝ ཨུཔྤཏིཏྭཱ པལཱཡི. ཧཾསརཱཛཱཔི ཨཏྟནོ ཝསནཊྛཱནམེཝ གཏོ.

སཏྠཱ ¶ ‘‘ན, བྷིཀྑཝེ, ཨིདཱནེཝ ཨེས ཧིརོཏྟཔྤཾ བྷིནྡིཏྭཱ རཏནསཱསནཱ པརིཧཱིནོ, པུབྦེཔི ཨིཏྠིརཏནཔཊིལཱབྷཏོ པརིཧཱིནོཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ མོརོ བཧུབྷཎྜིཀོ ཨཧོསི, ཧཾསརཱཛཱ པན ཨཧམེཝ ཨཧོསི’’ནྟི.

ནཙྩཛཱཏཀཝཎྞནཱ དུཏིཡཱ.

[༣༣] ༣. སམྨོདམཱནཛཱཏཀཝཎྞནཱ

སམྨོདམཱནཱཏི ཨིདཾ སཏྠཱ ཀཔིལཝཏྠུཾ ཨུཔནིསྶཱཡ ནིགྲོདྷཱརཱམེ ཝིཧརནྟོ ཙུམྦཊཀཀལཧཾ ཨཱརབྦྷ ཀཐེསི. སོ ཀུཎཱལཛཱཏཀེ (ཛཱ. ༢.༢༡.ཀུཎཱལཛཱཏཀ) ཨཱཝི བྷཝིསྶཏི. ཏདཱ པན སཏྠཱ ཉཱཏཀེ ཨཱམནྟེཏྭཱ ‘‘མཧཱརཱཛཱ ཉཱཏཀཱནཾ ཨཉྙམཉྙཾ ཝིགྒཧོ ནཱམ ན ཡུཏྟོ, ཏིརཙྪཱནགཏཱཔི ¶ ཧི པུབྦེ སམགྒཀཱལེ པཙྩཱམིཏྟེ ཨབྷིབྷཝིཏྭཱ སོཏྠིཾ པཏྟཱ ཡདཱ ཝིཝཱདམཱཔནྣཱ, ཏདཱ མཧཱཝིནཱསཾ པཏྟཱ’’ཏི ཝཏྭཱ ཉཱཏིརཱཛཀུལེཧི ཨཱཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཝཊྚཀཡོནིཡཾ ནིབྦཏྟིཏྭཱ ཨནེཀཝཊྚཀསཧསྶཔརིཝཱརོ ཨརཉྙེ པཊིཝསཏི. ཏདཱ ཨེཀོ ཝཊྚཀལུདྡཀོ ཏེསཾ ཝསནཊྛཱནཾ གནྟྭཱ ཝཊྚཀཝསྶིཏཾ ཀཏྭཱ ཏེསཾ སནྣིཔཏིཏབྷཱཝཾ ཉཏྭཱ ཏེསཾ ཨུཔརི ཛཱལཾ ཁིཔིཏྭཱ པརིཡནྟེསུ མདྡནྟོ སབྦེ ཨེཀཏོ ཀཏྭཱ པཙྪིཾ པཱུརེཏྭཱ གྷརཾ གནྟྭཱ ཏེ ཝིཀྐིཎིཏྭཱ ཏེན མཱུལེན ཛཱིཝིཀཾ ཀཔྤེཏི. ཨཐེཀདིཝསཾ བོདྷིསཏྟོ ཏེ ཝཊྚཀེ ཨཱཧ – ‘‘ཨཡཾ སཱཀུཎིཀོ ཨམྷཱཀཾ ཉཱཏཀེ ཝིནཱསཾ པཱཔེཏི, ཨཧཾ ཨེཀཾ ཨུཔཱཡཾ ཛཱནཱམི, ཨེནེས ཨམྷེ གཎྷིཏུཾ ན སཀྑིསྶཏི, ཨིཏོ དཱནི པཊྛཱཡ ཨེཏེན ཏུམྷཱཀཾ ཨུཔརི ཛཱལེ ཁིཏྟམཏྟེ ཨེཀེཀོ ཨེཀེཀསྨིཾ ཛཱལཀྑིཀེ སཱིསཾ ཋཔེཏྭཱ ཛཱལཾ ཨུཀྑིཔིཏྭཱ ཨིཙྪིཏཊྛཱནཾ ཧརིཏྭཱ ཨེཀསྨིཾ ཀཎྚཀགུམྦེ པཀྑིཔཐ, ཨེཝཾ སནྟེ ཧེཊྛཱ ཏེན ཏེན ཋཱནེན པལཱཡིསྶཱམཱ’’ཏི. ཏེ སབྦེ ‘‘སཱདྷཱུ’’ཏི པཊིསྶུཎིཾསུ. དུཏིཡདིཝསེ ཨུཔརི ཛཱལེ ཁིཏྟེ ཏེ བོདྷིསཏྟེན ཝུཏྟནཡེནེཝ ཛཱལཾ ཨུཀྑིཔིཏྭཱ ¶ ཨེཀསྨིཾ ¶ ཀཎྚཀགུམྦེ ཁིཔིཏྭཱ སཡཾ ཧེཊྛཱབྷཱགེན ཏཏོ ཏཏོ པལཱཡིཾསུ. སཱཀུཎིཀསྶ གུམྦཏོ ཛཱལཾ མོཙེནྟསྶེཝ ཝིཀཱལོ ཛཱཏོ, སོ ཏུཙྪཧཏྠོཝ ཨགམཱསི.

པུནདིཝསཏོ པཊྛཱཡཔི ཝཊྚཀཱ ཏཐེཝ ཀརོནྟི. སོཔི ཡཱཝ སཱུརིཡཏྠངྒམནཱ ཛཱལམེཝ མོཙེནྟོ ཀིཉྩི ཨལབྷིཏྭཱ ཏུཙྪཧཏྠོཝ གེཧཾ གཙྪཏི. ཨཐསྶ བྷརིཡཱ ཀུཛ྄ཛྷིཏྭཱ ‘‘ཏྭཾ དིཝསེ དིཝསེ ཏུཙྪཧཏྠོ ཨཱགཙྪསི, ཨཉྙམྤི ཏེ བཧི པོསིཏབྦཊྛཱནཾ ཨཏྠི མཉྙེ’’ཏི ཨཱཧ. སཱཀུཎིཀོ ‘‘བྷདྡེ, མམ ཨཉྙཾ པོསིཏབྦཊྛཱནཾ ནཏྠི, ཨཔིཙ ཁོ པན ཏེ ཝཊྚཀཱ སམགྒཱ ཧུཏྭཱ ཙརནྟི, མཡཱ ཁིཏྟམཏྟེ ཛཱལཾ ཨཱདཱཡ ཀཎྚཀགུམྦེ ཁིཔིཏྭཱ གཙྪནྟི, ན ཁོ པནེཏེ སབྦཀཱལམེཝ སམྨོདམཱནཱ ཝིཧརིསྶནྟི, ཏྭཾ མཱ ཙིནྟཡི, ཡདཱ ཏེ ཝིཝཱདམཱཔཛྫིསྶནྟི, ཏདཱ ཏེ སབྦེཝ ཨཱདཱཡ ཏཝ མུཁཾ ཧཱསཡམཱནོ ཨཱགཙྪིསྶཱམཱི’’ཏི ཝཏྭཱ བྷརིཡཱཡ ཨིམཾ གཱཐམཱཧ –

༣༣.

‘‘སམྨོདམཱནཱ གཙྪནྟི, ཛཱལམཱདཱཡ པཀྑིནོ;

ཡདཱ ཏེ ཝིཝདིསྶནྟི, ཏདཱ ཨེཧིནྟི མེ ཝས’’ནྟི.

ཏཏྠ ¶ ཡདཱ ཏེ ཝིཝདིསྶནྟཱིཏི ཡསྨིཾ ཀཱལེ ཏེ ཝཊྚཀཱ ནཱནཱལདྡྷིཀཱ ནཱནཱགཱཧཱ ཧུཏྭཱ ཝིཝདིསྶནྟི, ཀལཧཾ ཀརིསྶནྟཱིཏི ཨཏྠོ. ཏདཱ ཨེཧིནྟི མེ ཝསནྟི ཏསྨིཾ ཀཱལེ སབྦེཔི ཏེ མམ ཝསཾ ཨཱགཙྪིསྶནྟི. ཨཐཱཧཾ ཏེ གཧེཏྭཱ ཏཝ མུཁཾ ཧཱསེནྟོ ཨཱགཙྪིསྶཱམཱིཏི བྷརིཡཾ སམསྶཱསེསི.

ཀཏིཔཱཧསྶེཝ པན ཨཙྩཡེན ཨེཀོ ཝཊྚཀོ གོཙརབྷཱུམིཾ ཨོཏརནྟོ ཨསལླཀྑེཏྭཱ ཨཉྙསྶ སཱིསཾ ཨཀྐམི, ཨིཏརོ ‘‘ཀོ མཾ སཱིསེ ཨཀྐམཱི’’ཏི ཀུཛ྄ཛྷིཾ. ‘‘ཨཧཾ ཨསལླཀྑེཏྭཱ ཨཀྐམིཾ, མཱ ཀུཛ྄ཛྷཱི’’ཏི ཝུཏྟེཔི ཀུཛ྄ཛྷིཡེཝ. ཏེ པུནཔྤུནཾ ཀཐེནྟཱ ‘‘ཏྭམེཝ མཉྙེ ཛཱལཾ ཨུཀྑིཔསཱི’’ཏི ཨཉྙམཉྙཾ ཝིཝཱདཾ ཀརིཾསུ. ཏེསུ ཝིཝདནྟེསུ བོདྷིསཏྟོ ཙིནྟེསི ‘‘ཝིཝཱདཀེ སོཏྠིབྷཱཝོ ནཱམ ནཏྠི, ཨིདཱནེཝ ཏེ ཛཱལཾ ན ཨུཀྑིཔིསྶནྟི, ཏཏོ མཧནྟཾ ཝིནཱསཾ པཱཔུཎིསྶནྟི, སཱཀུཎིཀོ ཨོཀཱསཾ ལབྷིསྶཏི, མཡཱ ཨིམསྨིཾ ཋཱནེ ན སཀྐཱ ཝསིཏུ’’ནྟི. སོ ཨཏྟནོ པརིསཾ ཨཱདཱཡ ཨཉྙཏྠ གཏོ. སཱཀུཎིཀོཔི ཁོ ཀཏིཔཱཧཙྩཡེན ¶ ཨཱགནྟྭཱ ཝཊྚཀཝསྶིཏཾ ཝསྶིཏྭཱ ཏེསཾ སནྣིཔཏིཏཱནཾ ཨུཔརི ཛཱལཾ ¶ ཁིཔི. ཨཐེཀོ ཝཊྚཀོ ‘‘ཏུཡ྄ཧཾ ཀིར ཛཱལཾ ཨུཀྑིཔནྟསྶེཝ མཏྠཀེ ལོམཱནི པཏིཏཱནི, ཨིདཱནི ཨུཀྑིཔཱ’’ཏི ཨཱཧ. ཨཔརོ ‘‘ཏུཡ྄ཧཾ ཀིར ཛཱལཾ ཨུཀྑིཔནྟསྶེཝ དྭཱིསུ པཀྑེསུ པཏྟཱནི པཏིཏཱནི, ཨིདཱནི ཨུཀྑིཔཱ’’ཏི ཨཱཧ. ཨིཏི ཏེསཾ ‘‘ཏྭཾ ཨུཀྑིཔ, ཏྭཾ ཨུཀྑིཔཱ’’ཏི ཝདནྟཱནཉྙེཝ སཱཀུཎིཀོ ཛཱལཾ ཨུཀྑིཔིཏྭཱ སབྦེཝ ཏེ ཨེཀཏོ ཀཏྭཱ པཙྪིཾ པཱུརེཏྭཱ བྷརིཡཾ ཧཱསཡམཱནོ གེཧཾ ཨགམཱསི.

སཏྠཱ ‘‘ཨེཝཾ མཧཱརཱཛཱ ཉཱཏཀཱནཾ ཀལཧོ ནཱམ ན ཡུཏྟོ, ཀལཧོ ཝིནཱསམཱུལམེཝ ཧོཏཱི’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཨཔཎྜིཏཝཊྚཀོ དེཝདཏྟོ ཨཧོསི, པཎྜིཏཝཊྚཀོ པན ཨཧམེཝ ཨཧོསི’’ནྟི.

སམྨོདམཱནཛཱཏཀཝཎྞནཱ ཏཏིཡཱ.

[༣༤] ༤. མཙྪཛཱཏཀཝཎྞནཱ

ན མཾ སཱིཏཾ ན མཾ ཨུཎྷནྟི ཨིདཾ སཏྠཱ ཛེཏཝནེ ཝིཧརནྟོ པུརཱཎདུཏིཡིཀཱཔལོབྷནཾ ཨཱརབྦྷ ཀཐེསི. ཏདཱ ཧི སཏྠཱ ཏཾ བྷིཀྑུཾ ‘‘སཙྩཾ ཀིར ཏྭཾ བྷིཀྑུ ཨུཀྐཎྛིཏོསཱི’’ཏི པུཙྪི. ‘‘སཙྩཾ, བྷགཝཱ’’ཏི. ‘‘ཀེནཱསི ཨུཀྐཎྛཱཔིཏོ’’ཏི? ‘‘པུརཱཎདུཏིཡིཀཱ མེ, བྷནྟེ མདྷུརཧཏྠརསཱ, ཏཾ ཛཧིཏུཾ ན སཀྐོམཱི’’ཏི. ཨཐ ནཾ སཏྠཱ ‘‘བྷིཀྑུ ཨེསཱ ཨིཏྠཱི ཏཝ ཨནཏྠཀཱརིཀཱ ¶ , པུབྦེཔི ཏྭཾ ཨེཏཾ ནིསྶཱཡ མརཎཾ པཱཔུཎནྟོ མཾ ཨཱགམྨ མརཎཱ མུཏྟོ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཏསྶ པུརོཧིཏོ ཨཧོསི. ཏདཱ ཀེཝཊྚཱ ནདིཡཾ ཛཱལཾ ཁིཔིཾསུ. ཨཐེཀོ མཧཱམཙྪོ རཏིཝསེན ཨཏྟནོ མཙྪིཡཱ སདྡྷིཾ ཀཱིལ༹མཱནོ ཨཱགཙྪཏི. ཏསྶ སཱ མཙྪཱི པུརཏོ གཙྪམཱནཱ ཛཱལགནྡྷཾ གྷཱཡིཏྭཱ ཛཱལཾ པརིཧརམཱནཱ གཏཱ. སོ པན ཀཱམགིདྡྷོ ལོལམཙྪོ ཛཱལཀུཙྪིམེཝ པཝིཊྛོ. ཀེཝཊྚཱ ཏསྶ ཛཱལཾ པཝིཊྛབྷཱཝཾ ཉཏྭཱ ཛཱལཾ ཨུཀྑིཔིཏྭཱ མཙྪཾ གཧེཏྭཱ ཨམཱརེཏྭཱཝ ཝཱལིཀཱཔིཊྛེ ཁིཔིཏྭཱ ¶ ‘‘ཨིམཾ ཨངྒཱརེསུ པཙིཏྭཱ ཁཱདིསྶཱམཱ’’ཏི ཨངྒཱརེ ཀརོནྟི, སཱུལཾ ཏཙྪེནྟི. མཙྪོ ‘‘ཨེཏཾ ཨངྒཱརཏཱཔནཾ ཝཱ སཱུལཝིཛ྄ཛྷནཾ ཝཱ ཨཉྙཾ ཝཱ པན དུཀྑཾ ན མཾ ཀིལམེཏི, ཡཾ ¶ པནེསཱ མཙྪཱི ‘ཨཉྙཾ སོ ནཱུན རཏིཡཱ གཏོ’ཏི མཡི དོམནསྶཾ ཨཱཔཛྫཏི, ཏམེཝ མཾ བཱདྷཏཱི’’ཏི པརིདེཝམཱནོ ཨིམཾ གཱཐམཱཧ –

༣༤.

‘‘ན མཾ སཱིཏཾ ན མཾ ཨུཎྷཾ, ན མཾ ཛཱལསྨི བཱདྷནཾ;

ཡཉྩ མཾ མཉྙཏེ མཙྪཱི, ཨཉྙཾ སོ རཏིཡཱ གཏོ’’ཏི.

ཏཏྠ ན མཾ སཱིཏཾ ན མཾ ཨུཎྷནྟི མཙྪཱནཾ ཨུདཀཱ ནཱིཧཊཀཱལེ སཱིཏཾ ཧོཏི, ཏསྨིཾ ཝིགཏེ ཨུཎྷཾ ཧོཏི, ཏདུབྷཡམྤི སནྡྷཱཡ ‘‘ན མཾ སཱིཏཾ ན མཾ ཨུཎྷཾ བཱདྷཏཱི’’ཏི པརིདེཝཏི. ཡམྤི ཨངྒཱརེསུ པཙྩནམཱུལཀཾ དུཀྑཾ བྷཝིསྶཏི, ཏམྤི སནྡྷཱཡ ‘‘ན མཾ ཨུཎྷ’’ནྟི པརིདེཝཏེཝ. ན མཾ ཛཱལསྨི བཱདྷནནྟི ཡམྤི མེ ཛཱལསྨིཾ བཱདྷནཾ ཨཧོསི, ཏམྤི མཾ ན བཱདྷེཏཱིཏི པརིདེཝཏི. ‘‘ཡཉྩ མ’’ནྟིཨཱདཱིསུ ཨཡཾ པིཎྜཏྠོ – སཱ མཙྪཱི མམ ཛཱལེ པཏིཏསྶ ཨིམེཧི ཀེཝཊྚེཧི གཧིཏབྷཱཝཾ ཨཛཱནནྟཱི མཾ ཨཔསྶམཱནཱ ‘‘སོ མཙྪོ ཨིདཱནི ཨཉྙཾ མཙྪིཾ ཀཱམརཏིཡཱ གཏོ བྷཝིསྶཏཱི’’ཏི ཙིནྟེཏི, ཏཾ ཏསྶཱ དོམནསྶཔྤཏྟཱཡ ཙིནྟནཾ མཾ བཱདྷཏཱིཏི ཝཱལིཀཱཔིཊྛེ ནིཔནྣོ པརིདེཝཏི.

ཏསྨིཾ སམཡེ པུརོཧིཏོ དཱསཔརིཝུཏོ ནྷཱནཏྠཱཡ ནདཱིཏཱིརཾ ཨཱགཏོ. སོ པན སབྦརུཏཉྙཱུ ཧོཏི. ཏེནསྶ མཙྪཔརིདེཝནཾ སུཏྭཱ ཨེཏདཧོསི ‘‘ཨཡཾ མཙྪོ ཀིལེསཝསེན པརིདེཝཏི, ཨེཝཾ ཨཱཏུརཙིཏྟོ ཁོ པནེས མཱིཡམཱནོ ནིརཡེཡེཝ ནིབྦཏྟིསྶཏི, ཨཧམསྶ ཨཝསྶཡོ བྷཝིསྶཱམཱི’’ཏི ཀེཝཊྚཱནཾ སནྟིཀཾ གནྟྭཱ ‘‘ཨམྦྷོ ཏུམྷེ ཨམྷཱཀཾ ཨེཀདིཝསམྤི བྱཉྫནཏྠཱཡ མཙྪཾ ན དེཐཱ’’ཏི ཨཱཧ. ཀེཝཊྚཱ ‘‘ཀིཾ ཝདེཐ, སཱམི, ཏུམྷཱཀཾ རུཙྩནཀམཙྪཾ གཎྷིཏྭཱ ¶ གཙྪཐཱ’’ཏི ཨཱཧཾསུ. ‘‘ཨམྷཱཀཾ ཨཉྙེན ཀམྨཾ ནཏྠི, ཨིམཉྙེཝ དེཐཱ’’ཏི. ‘‘གཎྷཐ སཱམཱི’’ཏི. བོདྷིསཏྟོ ཏཾ ཨུབྷོཧི ཧཏྠེཧི གཧེཏྭཱ ནདཱིཏཱིརེ ནིསཱིདིཏྭཱ ‘‘ཨམྦྷོ མཙྪ, སཙེ ཏཱཧཾ ཨཛྫ ན པསྶེཡྻཾ, ཛཱིཝིཏཀྑཡཾ པཱཔུཎེཡྻཱསི, ཨིདཱནི ཨིཏོ པཊྛཱཡ མཱ ཀིལེསཝསིཀོ ཨཧོསཱི’’ཏི ཨོཝདིཏྭཱ ཨུདཀེ ཝིསྶཛྫེཏྭཱ ནྷཏྭཱ ནགརཾ པཱཝིསི.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེསི, སཙྩཔརིཡོསཱནེ ཨུཀྐཎྛིཏབྷིཀྑུ སོཏཱཔཏྟིཕལེ པཏིཊྛཱསི. སཏྠཱཔི ཨནུསནྡྷིཾ གྷཊེཏྭཱ ¶ ཛཱཏཀཾ སམོདྷཱནེསི – ‘‘ཏདཱ མཙྪཱི པུརཱཎདུཏིཡིཀཱ ཨཧོསི, མཙྪོ ཨུཀྐཎྛིཏབྷིཀྑུ པུརོཧིཏོ པན ཨཧམེཝ ཨཧོསི’’ནྟི.

མཙྪཛཱཏཀཝཎྞནཱ ཙཏུཏྠཱ.

[༣༥] ༥. ཝཊྚཀཛཱཏཀཝཎྞནཱ

སནྟི པཀྑཱ ཨཔཏནཱཏི ཨིདཾ སཏྠཱ མགདྷེསུ ཙཱརིཀཾ ཙརམཱནོ དཱཝགྒིནིབྦཱནཾ ཨཱརབྦྷ ཀཐེསི. ཨེཀསྨིཉྷི སམཡེ སཏྠཱ མགདྷེསུ ཙཱརིཀཾ ཙརམཱནོ ཨཉྙཏརསྨིཾ མགདྷགཱམཀེ པིཎྜཱཡ ཙརིཏྭཱ པཙྪཱབྷཏྟཾ པིཎྜཔཱཏཔཊིཀྐནྟོ བྷིཀྑུགཎཔརིཝུཏོ མགྒཾ པཊིཔཛྫི. ཏསྨིཾ སམཡེ མཧཱཌཱཧོ ཨུཊྛཧི, པུརཏོ ཙ པཙྪཏོ ཙ བཧཱུ བྷིཀྑཱུ དིསྶནྟི, སོཔི ཁོ ཨགྒི ཨེཀདྷཱུམོ ཨེཀཛཱལོ ཧུཏྭཱ ཨཝཏྠརམཱནོ ཨཱགཙྪཏེཝ. ཏཏྠེཀེ པུཐུཛྫནབྷིཀྑཱུ མརཎབྷཡབྷཱིཏཱ ‘‘པཊགྒིཾ དསྶཱམ, ཏེན དཌྜྷཊྛཱནཾ ཨིཏརོ ཨགྒི ན ཨོཏྠརིསྶཏཱི’’ཏི ཨརཎིསཧིཏཾ ནཱིཧརིཏྭཱ ཨགྒིཾ ཀརོནྟི. ཨཔརེ ཨཱཧཾསུ ‘‘ཨཱཝུསོ, ཏུམྷེ ཀིཾ ནཱམ ཀརོཐ, གགནམཛ྄ཛྷེ ཋིཏཾ ཙནྡམཎྜལཾ, པཱཙཱིནལོཀདྷཱཏུཏོ ཨུགྒཙྪནྟཾ སཧསྶརཾསིཔཊིམཎྜིཏཾ སཱུརིཡམཎྜལཾ, ཝེལཱཡ ཏཱིརེ ཋིཏཱ སམུདྡཾ, སིནེརུཾ ནིསྶཱཡ ཋིཏཱ སིནེརུཾ ཨཔསྶནྟཱ ཝིཡ སདེཝཀེ ལོཀེ ཨགྒཔུགྒལཾ ཨཏྟནཱ སདྡྷིཾ གཙྪནྟམེཝ སམྨཱསམྦུདྡྷཾ ཨནོལོཀེཏྭཱ ‘པཊགྒིཾ དེམཱ’ཏི ཝདཐ, བུདྡྷབལཾ ནཱམ ན ཛཱནཱཐ, ཨེཐ སཏྠུ སནྟིཀཾ གམིསྶཱམཱ’’ཏི. ཏེ པུརཏོ ཙ པཙྪཏོ ཙ གཙྪནྟཱ སབྦེཔི ཨེཀཏོ ཧུཏྭཱ དསབལསྶ སནྟིཀཾ ཨགམཾསུ. སཏྠཱ མཧཱབྷིཀྑུསངྒྷཔརིཝཱརོ ཨཉྙཏརསྨིཾ པདེསེ ཨཊྛཱསི. དཱཝགྒི ཨབྷིབྷཝནྟོ ཝིཡ ཝིརཝནྟོ ཨཱགཙྪཏི. ཨཱགནྟྭཱ ཏཐཱགཏསྶ ཋིཏཊྛཱནཾ པཏྭཱ ཏསྶ པདེསསྶ སམནྟཱ སོལ༹སཀརཱིསམཏྟཊྛཱནཾ པཏྟོ ཨུདཀེ ཨོཔིལཱཔིཏཏིཎུཀྐཱ ཝིཡ ནིབྦཱཡི, ཝིནིབྦེདྷཏོ དྭཏྟིཾསཀརཱིསམཏྟཊྛཱནཾ ཨཝཏྠརིཏུཾ ནཱསཀྑི.

བྷིཀྑཱུ ¶ སཏྠུ གུཎཀཐཾ ཨཱརབྷིཾསུ – ‘‘ཨཧོ བུདྡྷཱནཾ གུཎཱ ནཱམ, ཨཡཉྷི ནཱམ ཨཙེཏནོ ཨགྒི བུདྡྷཱནཾ ཋིཏཊྛཱནཾ ཨཝཏྠརིཏུཾ ན སཀྐོཏི, ཨུདཀེ ¶ ཏིཎུཀྐཱ ཝིཡ ནིབྦཱཡཏི, ཨཧོ བུདྡྷཱནཾ ¶ ཨཱནུབྷཱཝོ ནཱམཱ’’ཏི. སཏྠཱ ཏེསཾ ཀཐཾ སུཏྭཱ ‘‘ན, བྷིཀྑཝེ, ཨེཏཾ ཨེཏརཧི མཡ྄ཧཾ བལཾ, ཡཾ ཨིམཾ བྷཱུམིཔྤདེསཾ པཏྭཱ ཨེས ཨགྒི ནིབྦཱཡཏི. ཨིདཾ པན མཡ྄ཧཾ པོརཱཎཀསཙྩབལཾ. ཨིམསྨིཉྷི པདེསེ སཀལམྤི ཨིམཾ ཀཔྤཾ ཨགྒི ན ཛལིསྶཏི, ཀཔྤཊྛིཡཔཱཊིཧཱརིཡཾ ནཱམེཏ’’ནྟི ཨཱཧ. ཨཐཱཡསྨཱ ཨཱནནྡོ སཏྠུ ནིསཱིདནཏྠཱཡ ཙཏུགྒུཎཾ སངྒྷཱཊིཾ པཉྙཔེསི, ནིསཱིདི སཏྠཱ པལླངྐཾ ཨཱབྷུཛིཏྭཱ. བྷིཀྑུསངྒྷོཔི ཏཐཱགཏཾ ཝནྡིཏྭཱ པརིཝཱརེཏྭཱ ནིསཱིདི. ཨཐ སཏྠཱ ‘‘ཨིདཾ ཏཱཝ, བྷནྟེ, ཨམྷཱཀཾ པཱཀཊཾ, ཨཏཱིཏཾ པཊིཙྪནྣཾ, ཏཾ ནོ པཱཀཊཾ ཀརོཐཱ’’ཏི བྷིཀྑཱུཧི ཨཱཡཱཙིཏོ ཨཏཱིཏཾ ཨཱཧརི.

ཨཏཱིཏེ མགདྷརཊྛེ ཏསྨིཾཡེཝ པདེསེ བོདྷིསཏྟོ ཝཊྚཀཡོནིཡཾ པཊིསནྡྷིཾ གཧེཏྭཱ མཱཏུཀུཙྪིཏོ ཛཱཏོ ཨཎྜཀོསཾ པདཱལེཏྭཱ ནིཀྑནྟཀཱལེ མཧཱགེཎྜུཀཔྤམཱཎོ ཝཊྚཀཔོཏཀོ ཨཧོསི. ཨཐ ནཾ མཱཏཱཔིཏརོ ཀུལཱཝཀེ ནིཔཛྫཱཔེཏྭཱ མུཁཏུཎྜཀེན གོཙརཾ ཨཱཧརིཏྭཱ པོསེནྟི. ཏསྶ པཀྑེ པསཱརེཏྭཱ ཨཱཀཱསེ གམནབལཾ ཝཱ པཱདེ ཨུཀྑིཔིཏྭཱ ཐལེ གམནབལཾ ཝཱ ནཏྠི. ཏཉྩ པདེསཾ སཾཝཙྪརེ སཾཝཙྪརེ དཱཝགྒི གཎྷཱཏི, སོ ཏསྨིམྤི སམཡེ མཧཱརཝཾ རཝནྟོ ཏཾ པདེསཾ གཎྷི, སཀུཎསངྒྷཱ ཨཏྟནོ ཨཏྟནོ ཀུལཱཝཀེཧི ནིཀྑམིཏྭཱ མརཎབྷཡབྷཱིཏཱ ཝིརཝནྟཱ པལཱཡནྟི, བོདྷིསཏྟསྶཔི མཱཏཱཔིཏརོ མརཎབྷཡབྷཱིཏཱ བོདྷིསཏྟཾ ཚཌྜེཏྭཱ པལཱཡིཾསུ. བོདྷིསཏྟོ ཀུལཱཝཀེ ནིཔནྣཀོཝ གཱིཝཾ ཨུཀྑིཔིཏྭཱ ཨཝཏྠརིཏྭཱ ཨཱགཙྪནྟཾ ཨགྒིཾ དིསྭཱ ཙིནྟེསི ‘‘སཙེ མཡ྄ཧཾ པཀྑེ པསཱརེཏྭཱ ཨཱཀཱསེན གམནབལཾ བྷཝེཡྻ, ཨུཔྤཏིཏྭཱ ཨཉྙཏྠ གཙྪེཡྻཾ. སཙེ པཱདེ ཨུཀྑིཔིཏྭཱ གམནབལཾ བྷཝེཡྻ, པདཝཱརེན ཨཉྙཏྠ གཙྪེཡྻཾ. མཱཏཱཔིཏརོཔི ཁོ མེ མརཎབྷཡབྷཱིཏཱ མཾ ཨེཀཀཾ པཧཱཡ ཨཏྟཱནཾ པརིཏྟཱཡནྟཱ པལཱཏཱ. ཨིདཱནི མེ ཨཉྙཾ པཊིསརཎཾ ནཏྠི, ཨཏཱཎོམྷི ཨསརཎོ, ཀིཾ ནུ ཁོ ཨཛྫ མཡཱ ཀཱཏུཾ ཝཊྚཏཱི’’ཏི.

ཨཐསྶ ཨེཏདཧོསི ‘‘ཨིམསྨིཾ ལོཀེ སཱིལགུཎོ ནཱམ ཨཏྠི, སཙྩགུཎོ ནཱམ ཨཏྠི, ཨཏཱིཏེ པཱརམིཡོ པཱུརེཏྭཱ བོདྷིམཱུལེ ནིསཱིདིཏྭཱ ཨབྷིསམྦུདྡྷཱ སཱིལསམཱདྷིཔཉྙཱཝིམུཏྟིཝིམུཏྟིཉཱཎདསྶནསམྤནྣཱ ¶ སཙྩཱནུདྡཡཀཱརུཉྙཁནྟིསམནྣཱགཏཱ སབྦསཏྟེསུ སམཔྤཝཏྟམེཏྟཱབྷཱཝནཱ སབྦཉྙུབུདྡྷཱ ¶ ནཱམ ཨཏྠི, ཏེཧི ཙ པཊིཝིདྡྷཱ དྷམྨགུཎཱ ནཱམ ཨཏྠི, མཡི ཙཱཔི ཨེཀཾ སཙྩཾ ཨཏྠི, སཾཝིཛྫམཱནོ ཨེཀོ སབྷཱཝདྷམྨོ པཉྙཱཡཏི, ཏསྨཱ ཨཏཱིཏེ བུདྡྷེ ཙེཝ ཏེཧི པཊིཝིདྡྷགུཎེ ཙ ཨཱཝཛྫེཏྭཱ མཡི ཝིཛྫམཱནཾ སཙྩསབྷཱཝདྷམྨཾ གཧེཏྭཱ སཙྩཀིརིཡཾ ཀཏྭཱ ཨགྒིཾ ¶ པཊིཀྐམཱཔེཏྭཱ ཨཛྫ མཡཱ ཨཏྟནོ ཙེཝ སེསསཀུཎཱནཉྩ སོཏྠིབྷཱཝཾ ཀཱཏུཾ ཝཊྚཏཱི’’ཏི. ཏེན ཝུཏྟཾ –

‘‘ཨཏྠི ལོཀེ སཱིལགུཎོ, སཙྩཾ སོཙེཡྻནུདྡཡཱ;

ཏེན སཙྩེན ཀཱཧཱམི, སཙྩཀིརིཡམནུཏྟརཾ.

‘‘ཨཱཝཛྫེཏྭཱ དྷམྨབལཾ, སརིཏྭཱ པུབྦཀེ ཛིནེ;

སཙྩབལམཝསྶཱཡ, སཙྩཀིརིཡམཀཱསཧ’’ནྟི. (ཙརིཡཱ. ༣.༧༩-༨༠);

ཨཐ བོདྷིསཏྟོ ཨཏཱིཏེ པརིནིབྦུཏཱནཾ བུདྡྷཱནཾ གུཎེ ཨཱཝཛྫེཏྭཱ ཨཏྟནི ཝིཛྫམཱནཾ སཙྩསབྷཱཝཾ ཨཱརབྦྷ སཙྩཀིརིཡཾ ཀརོནྟོ ཨིམཾ གཱཐམཱཧ –

༣༥.

‘‘སནྟི པཀྑཱ ཨཔཏནཱ, སནྟི པཱདཱ ཨཝཉྩནཱ;

མཱཏཱཔིཏཱ ཙ ནིཀྑནྟཱ, ཛཱཏཝེད པཊིཀྐམཱ’’ཏི.

ཏཏྠ སནྟི པཀྑཱ ཨཔཏནཱཏི མཡ྄ཧཾ པཀྑཱ ནཱམ ཨཏྠི ཨུཔལབྦྷནྟི, ནོ ཙ ཁོ སཀྐཱ ཨེཏེཧི ཨུཔྤཏིཏུཾ ཨཱཀཱསེན གནྟུནྟི ཨཔཏནཱ. སནྟི པཱདཱ ཨཝཉྩནཱཏི པཱདཱཔི མེ ཨཏྠི, ཏེཧི པན ཝཉྩིཏུཾ པདཝཱརགམནེན གནྟུཾ ན སཀྐཱཏི ཨཝཉྩནཱ. མཱཏཱཔིཏཱ ཙ ནིཀྑནྟཱཏི ཡེ ཙ མཾ ཨཉྙཏྠ ནེཡྻུཾ, ཏེཔི མརཎབྷཡེན མཱཏཱཔིཏརོ ནིཀྑནྟཱ. ཛཱཏཝེདཱཏི ཨགྒིཾ ཨཱལཔཏི. སོ ཧི ཛཱཏོཝ ཝེདཡཏི པཉྙཱཡཏི, ཏསྨཱ ‘‘ཛཱཏཝེདོ’’ཏི ཝུཙྩཏི. པཊིཀྐམཱཏི པཊིགཙྪ ནིཝཏྟཱཏི ཛཱཏཝེདཾ ཨཱཎཱཔེཏི.

ཨིཏི མཧཱསཏྟོ ‘‘སཙེ མཡ྄ཧཾ པཀྑཱནཾ ཨཏྠིབྷཱཝོ, ཏེ ཙ པསཱརེཏྭཱ ཨཱཀཱསེ ཨཔཏནབྷཱཝོ, པཱདཱནཾ ཨཏྠིབྷཱཝོ, ཏེ ཙ ཨུཀྑིཔིཏྭཱ ཨཝཉྩནབྷཱཝོ, མཱཏཱཔིཏཱུནཾ མཾ ཀུལཱཝཀེཡེཝ ཚཌྜེཏྭཱ པལཱཏབྷཱཝོ ཙ སཙྩོ སབྷཱཝབྷཱུཏོཡེཝ, ཛཱཏཝེད, ཨེཏེན ¶ སཙྩེན ཏྭཾ ཨིཏོ པཊིཀྐམཱ’’ཏི ཀུལཱཝཀེ ནིཔནྣཀོཝ སཙྩཀིརིཡཾ ཨཀཱསི. ཏསྶ སཧ སཙྩཀིརིཡཱཡ སོལ༹སཀརཱིསམཏྟེ ཋཱནེ ཛཱཏཝེདོ པཊིཀྐམི. པཊིཀྐམནྟོ ཙ ན ཛྷཱཡམཱནོཝ ཨཉྙཾ གཏོ, ཨུདཀེ པན ཨོཔིལཱཔིཏཱ ཨུཀྐཱ ཝིཡ ཏཏྠེཝ ནིབྦཱཡི. ཏེན ཝུཏྟཾ –

‘‘སཧ ¶ ¶ སཙྩེ ཀཏེ མཡ྄ཧཾ, མཧཱཔཛྫལིཏོ སིཁཱི;

ཝཛྫེསི སོལ༹ས ཀརཱིསཱནི, ཨུདཀཾ པཏྭཱ ཡཐཱ སིཁཱི’’ཏི. (ཙརིཡཱ. ༣.༨༢);

ཏཾ པན ཋཱནཾ སཀལེཔི ཨིམསྨིཾ ཀཔྤེ ཨགྒིནཱ ཨནབྷིབྷཝནཱིཡཏྟཱ ཀཔྤཊྛིཡཔཱཊིཧཱརིཡཾ ནཱམ ཛཱཏཾ. ཨེཝཾ བོདྷིསཏྟོ སཙྩཀིརིཡཾ ཀཏྭཱ ཛཱིཝིཏཔརིཡོསཱནེ ཡཐཱཀམྨཾ གཏོ.

སཏྠཱ ‘‘ན, བྷིཀྑཝེ, ཨིམསྶ ཝནསྶ ཨགྒིནཱ ཨནཛ྄ཛྷོཏྠརཎཾ ཨེཏརཧི མཡ྄ཧཾ བལཾ, པོརཱཎཾ པནེཏཾ ཝཊྚཔོཏཀཀཱལེ མཡ྄ཧམེཝ སཙྩབལ’’ནྟི ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེསི. སཙྩཔརིཡོསཱནེ ཀེཙི སོཏཱཔནྣཱ ཨཧེསུཾ, ཀེཙི སཀདཱགཱམིནོ, ཀེཙི ཨནཱགཱམིནོ, ཀེཙི ཨརཧཏྟཾ པཏྟཱཏི. སཏྠཱཔི ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ མཱཏཱཔིཏརོ ཨེཏརཧི མཱཏཱཔིཏརོཝ ཨཧེསུཾ, ཝཊྚཀརཱཛཱ པན ཨཧམེཝ ཨཧོསི’’ནྟི.

ཝཊྚཀཛཱཏཀཝཎྞནཱ པཉྩམཱ.

[༣༦] ༦. སཀུཎཛཱཏཀཝཎྞནཱ

ཡཾ ནིསྶིཏཱཏི ཨིདཾ སཏྠཱ ཛེཏཝནེ ཝིཧརནྟོ དཌྜྷཔཎྞསཱལཾ བྷིཀྑུཾ ཨཱརབྦྷ ཀཐེསི. ཨེཀོ ཀིར བྷིཀྑུ སཏྠུ སནྟིཀེ ཀམྨཊྛཱནཾ གཧེཏྭཱ ཛེཏཝནཏོ ནིཀྑམྨ ཀོསལེསུ ཨེཀཾ པཙྩནྟགཱམཾ ནིསྶཱཡ ཨེཀསྨིཾ ཨརཉྙསེནཱསནེ ཝསཏི. ཨཐསྶ པཋམམཱསེཡེཝ པཎྞསཱལཱ ཌཡ྄ཧིཏྠ. སོ ‘‘པཎྞསཱལཱ མེ དཌྜྷཱ, དུཀྑཾ ཝསཱམཱི’’ཏི མནུསྶཱནཾ ཨཱཙིཀྑི. མནུསྶཱ ‘‘ཨིདཱནི ནོ ཁེཏྟཾ པརིསུཀྑཾ, ཀེདཱརེ པཱཡེཏྭཱ ཀརིསྶཱམ’’, ཏསྨིཾ པཱཡིཏེ ‘‘བཱིཛཾ ཝཔིཏྭཱ’’, བཱིཛེ ཝུཏྟེ ‘‘ཝཏིཾ ཀཏྭཱ’’, ཝཏིཡཱ ཀཏཱཡ ‘‘ནིདྡཱཡིཏྭཱ, ལཱཡིཏྭཱ, མདྡིཏྭཱ’’ཏི ཨེཝཾ ཏཾ ཏཾ ཀམྨཾ ཨཔདིསནྟཱཡེཝ ཏེམཱསཾ ཝཱིཏིནཱམེསུཾ. སོ བྷིཀྑུ ཏེམཱསཾ ཨཛ྄ཛྷོཀཱསེ དུཀྑཾ ཝསནྟོ ¶ ཀམྨཊྛཱནཾ ཝཌྜྷེཏྭཱ ཝིསེསཾ ནིབྦཏྟེཏུཾ ནཱསཀྑི. པཝཱརེཏྭཱ པན སཏྠུ སནྟིཀཾ གནྟྭཱ ཝནྡིཏྭཱ ཨེཀམནྟཾ ནིསཱིདི. སཏྠཱ ཏེན སདྡྷིཾ པཊིསནྠཱརཾ ཀཏྭཱ ‘‘ཀིཾ བྷིཀྑུ སུཁེན ཝསྶཾཝུཏྠོསི, ཀམྨཊྛཱནཾ ཏེ མཏྠཀཾ པཏྟ’’ནྟི པུཙྪི. སོ ཏཾ པཝཏྟིཾ ཨཱཙིཀྑིཏྭཱ ‘‘སེནཱསནསཔྤཱཡསྶ མེ ཨབྷཱཝེན ཀམྨཊྛཱནཾ མཏྠཀཾ ན པཏྟ’’ནྟི ཨཱཧ. སཏྠཱ ‘‘པུབྦེ བྷིཀྑུ ཏིརཙྪཱནགཏཱཔི ཨཏྟནོ སཔྤཱཡཱསཔྤཱཡཾ ཛཱནིཾསུ, ཏྭཾ ཀསྨཱ ན ཨཉྙཱསཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ སཀུཎཡོནིཡཾ ནིབྦཏྟིཏྭཱ སཀུཎསངྒྷཔརིཝུཏོ ཨརཉྙཱཡཏནེ སཱཁཱཝིཊཔསམྤནྣཾ མཧཱརུཀྑཾ ནིསྶཱཡ ཝསཏི. ཨཐེཀདིཝསཾ ཏསྶ རུཀྑསྶ སཱཁཱསུ ཨཉྙམཉྙཾ གྷཾསནྟཱིསུ ཙུཎྞཾ པཏཏི, དྷཱུམོ ཨུཊྛཱཏི. ཏཾ དིསྭཱ བོདྷིསཏྟོ ཙིནྟེསི ‘‘ཨིམཱ དྭེ སཱཁཱ ཨེཝཾ གྷཾསམཱནཱ ཨགྒིཾ ཝིསྶཛྫེསྶནྟི, སོ པཏིཏྭཱ པུརཱཎཔཎྞཱནི གཎྷིསྶཏི, ཏཏོ པཊྛཱཡ ཨིམམྤི རུཀྑཾ ཛྷཱཔེསྶཏི, ན སཀྐཱ ཨིདྷ ཨམྷེཧི ཝསིཏུཾ, ཨིཏོ པལཱཡིཏྭཱ ཨཉྙཏྠ གནྟུཾ ཝཊྚཏཱི’’ཏི. སོ སཀུཎསངྒྷསྶ ཨིམཾ གཱཐམཱཧ –

༣༦.

‘‘ཡཾ ནིསྶིཏཱ ཛགཏིརུཧཾ ཝིཧངྒམཱ, སྭཱཡཾ ཨགྒིཾ པམུཉྩཏི;

དིསཱ བྷཛཐ ཝཀྐངྒཱ, ཛཱཏཾ སརཎཏོ བྷཡ’’ནྟི.

ཏཏྠ ཛགཏིརུཧནྟི ཛགཏི ཝུཙྩཏི པཐཝཱི, ཏཏྠ ཛཱཏཏྟཱ རུཀྑོ ‘‘ཛགཏིརུཧོ’’ཏི ཝུཙྩཏི. ཝིཧངྒམཱཏི ཝིཧཾ ཝུཙྩཏི ཨཱཀཱསཾ, ཏཏྠ གམནཏོ པཀྑཱི ‘‘ཝིཧངྒམཱ’’ཏི ཝུཙྩནྟི. དིསཱ བྷཛཐཱཏི ཨིམཾ རུཀྑཾ མུཉྩིཏྭཱ ཨིཏོ པལཱཡནྟཱ ཙཏསྶོ དིསཱ བྷཛཐ. ཝཀྐངྒཱཏི སཀུཎེ ཨཱལཔཏི. ཏེ ཧི ཨུཏྟམངྒཾ གལཾ ཀདཱཙི ཀདཱཙི ཝངྐཾ ཀརོནྟི, ཏསྨཱ ‘‘ཝཀྐངྒཱ’’ཏི ཝུཙྩནྟི. ཝངྐཱ ཝཱ ཏེསཾ ཨུབྷོསུ པསྶེསུ པཀྑཱ ཛཱཏཱཏི ཝཀྐངྒཱ. ཛཱཏཾ སརཎཏོ བྷཡནྟི ཨམྷཱཀཾ ཨཝསྶཡརུཀྑཏོཡེཝ བྷཡཾ ནིབྦཏྟཾ, ཨེཐ ཨཉྙཏྠ གཙྪཱམཱཏི.

བོདྷིསཏྟསྶ ཝཙནཀརཱ པཎྜིཏསཀུཎཱ ཏེན སདྡྷིཾ ཨེཀཔྤཧཱརེནེཝ ཨུཔྤཏིཏྭཱ ཨཉྙཏྠ གཏཱ. ཡེ པན ཨཔཎྜིཏཱ, ཏེ ‘‘ཨེཝམེཝ ཨེས བིནྡུམཏྟེ ཨུདཀེ ཀུམྦྷཱིལེ པསྶཏཱི’’ཏི ཏསྶ ཝཙནཾ ཨགྒཧེཏྭཱ ཏཏྠེཝ ཝསིཾསུ. ཏཏོ ན ཙིརསྶེཝ བོདྷིསཏྟེན ཙིནྟིཏཱཀཱརེནེཝ ཨགྒི ནིབྦཏྟིཏྭཱ ཏཾ རུཀྑཾ ཨགྒཧེསི. དྷཱུམེསུ ཙ ཛཱལཱསུ ཙ ཨུཊྛིཏཱསུ དྷཱུམནྡྷཱ ¶ སཀུཎཱ ཨཉྙཏྠ གནྟུཾ ནཱསཀྑིཾསུ, ཨགྒིམྷི པཏིཏྭཱ པཏིཏྭཱ ཝིནཱསཾ པཱཔུཎིཾསུ.

སཏྠཱ ‘‘ཨེཝཾ བྷིཀྑུ པུབྦེ ཏིརཙྪཱནགཏཱཔི རུཀྑགྒེ ཝསནྟཱ ཨཏྟནོ སཔྤཱཡཱསཔྤཱཡཾ ཛཱནནྟི, ཏྭཾ ཀསྨཱ ན ཨཉྙཱསཱི’’ཏི ཨིམཾ ¶ དྷམྨདེསནཾ ཨཱཧརིཏྭཱ སཙྩཱནི པཀཱསེསི. སཙྩཔརིཡོསཱནེ སོ བྷིཀྑུ སོཏཱཔཏྟིཕལེ པཏིཊྛིཏོ. སཏྠཱཔི ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ བོདྷིསཏྟསྶ ཝཙནཀརཱ སཀུཎཱ བུདྡྷཔརིསཱ ཨཧེསུཾ, པཎྜིཏསཀུཎོ པན ཨཧམེཝ ཨཧོསི’’ནྟི.

སཀུཎཛཱཏཀཝཎྞནཱ ཚཊྛཱ.

[༣༧] ༧. ཏིཏྟིརཛཱཏཀཝཎྞནཱ

ཡེ ¶ ཝུཌྜྷམཔཙཱཡནྟཱིཏི ཨིདཾ སཏྠཱ སཱཝཏྠིཾ གཙྪནྟོ སཱརིཔུཏྟཏྠེརསྶ སེནཱསནཔཊིབཱཧནཾ ཨཱརབྦྷ ཀཐེསི. ཨནཱཐཔིཎྜིཀེན ཧི ཝིཧཱརཾ ཀཱརེཏྭཱ དཱུཏེ པེསིཏེ སཏྠཱ རཱཛགཧཱ ནིཀྑམྨ ཝེསཱལིཾ པཏྭཱ ཏཏྠ ཡཐཱབྷིརནྟཾ ཝིཧརིཏྭཱ ‘‘སཱཝཏྠིཾ གམིསྶཱམཱི’’ཏི མགྒཾ པཊིཔཛྫི. ཏེན ཙ སམཡེན ཚབྦགྒིཡཱནཾ ཨནྟེཝཱསིཀཱ པུརཏོ པུརཏོ གནྟྭཱ ཐེརཱནཾ སེནཱསནེསུ ཨགྒཧིཏེསྭེཝ ‘‘ཨིདཾ སེནཱསནཾ ཨམྷཱཀཾ ཨུཔཛ྄ཛྷཱཡསྶ, ཨིདཾ ཨཱཙརིཡསྶ, ཨིདཾ ཨམྷཱཀམེཝ བྷཝིསྶཏཱི’’ཏི སེནཱསནཱནི པལིབུནྡྷེནྟི. པཙྪཱ ཨཱགཏཱ ཐེརཱ སེནཱསནཱནི ན ལབྷནྟི. སཱརིཔུཏྟཏྠེརསྶཱཔི ཨནྟེཝཱསིཀཱ ཐེརསྶ སེནཱསནཾ པརིཡེསནྟཱ ན ལབྷིཾསུ. ཐེརོ སེནཱསནཾ ཨལབྷནྟོ སཏྠུ སེནཱསནསྶ ཨཝིདཱུརེ ཨེཀསྨིཾ རུཀྑམཱུལེ ནིསཛྫཱཡ ཙ ཙངྐམེན ཙ རཏྟིཾ ཝཱིཏིནཱམེསི. སཏྠཱ པཙྩཱུསསམཡེ ནིཀྑམིཏྭཱ ཨུཀྐཱསི, ཐེརོཔི ཨུཀྐཱསི. ‘‘ཀོ ཨེསོ’’ཏི? ‘‘ཨཧཾ, བྷནྟེ, སཱརིཔུཏྟོ’’ཏི. ‘‘སཱརིཔུཏྟ, ཨིམཱཡ ཝེལཱཡ ཨིདྷ ཀིཾ ཀརོསཱི’’ཏི? ‘‘སོ ཏཾ པཝཏྟིཾ ཨཱརོཙེསི’’. སཏྠཱ ཐེརསྶ ཝཙནཾ སུཏྭཱ ‘‘ཨིདཱནི ཏཱཝ མཡི ཛཱིཝནྟེཡེཝ བྷིཀྑཱུ ཨཉྙམཉྙཾ ཨགཱརཝཱ ཨཔཏིསྶཱ ཝིཧརནྟི, པརིནིབྦུཏེ ཀིཾ ནུ ཁོ ཀརིསྶནྟཱི’’ཏི ཨཱཝཛྫེནྟསྶ དྷམྨསཾཝེགོ ཨུདཔཱདི.

སོ པབྷཱཏཱཡ རཏྟིཡཱ བྷིཀྑུསངྒྷཾ སནྣིཔཱཏཱཔེཏྭཱ བྷིཀྑཱུ པུཙྪི ‘‘སཙྩཾ ཀིར, བྷིཀྑཝེ, ཚབྦགྒིཡཱ བྷིཀྑཱུ པུརཏོ པུརཏོ གནྟྭཱ ཐེརཱནཾ བྷིཀྑཱུནཾ ¶ སེནཱསནཾ པཊིབཱཧནྟཱི’’ཏི. ‘‘སཙྩཾ, བྷགཝཱ’’ཏི? ཏཏོ ཚབྦགྒིཡེ གརཧིཏྭཱ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི ‘‘ཀོ ནུ ཁོ, བྷིཀྑཝེ, ཨགྒཱསནཾ ཨགྒོདཀཾ ཨགྒཔིཎྜཾ ཨརཧཏཱི’’ཏི? ཨེཀཙྩེ ‘‘ཁཏྟིཡཀུལཱ པབྦཛིཏོ’’ཏི ཨཱཧཾསུ, ཨེཀཙྩེ ‘‘བྲཱཧྨཎཀུལཱ, གཧཔཏིཀུལཱ པབྦཛིཏོ’’ཏི, ཨཔརེ ‘‘ཝིནཡདྷརོ, དྷམྨཀཐིཀོ, པཋམསྶ ཛྷཱནསྶ ལཱབྷཱི, དུཏིཡསྶ, ཏཏིཡསྶ, ཙཏུཏྠསྶ ཛྷཱནསྶ ལཱབྷཱི’’ཏི. ཨཔརེ ‘‘སོཏཱཔནྣོ, སཀདཱགཱམཱི, ཨནཱགཱམཱི, ཨརཧཱ, ཏེཝིཛྫོ, ཚལ༹བྷིཉྙོ’’ཏི ཨཱཧཾསུ. ཨེཝཾ ཏེཧི བྷིཀྑཱུཧི ཨཏྟནོ ཨཏྟནོ རུཙིཝསེན ཨགྒཱསནཱདིརཧཱནཾ ཀཐིཏཀཱལེ སཏྠཱ ཨཱཧ – ‘‘ན, བྷིཀྑཝེ, མཡ྄ཧཾ ¶ སཱསནེ ཨགྒཱསནཱདཱིནི པཏྭཱ ཁཏྟིཡཀུལཱ པབྦཛིཏོ པམཱཎཾ, ན བྲཱཧྨཎཀུལཱ པབྦཛིཏོ, ན གཧཔཏིཀུལཱ པབྦཛིཏོ, ན ཝིནཡདྷརོ, ན སུཏྟནྟིཀོ, ན ཨཱབྷིདྷམྨིཀོ, ན པཋམཛ྄ཛྷཱནཱདིལཱབྷིནོ, ན སོཏཱཔནྣཱདཡོ པམཱཎཾ, ཨཐ ཁོ, བྷིཀྑཝེ, ཨིམསྨིཾ སཱསནེ ཡཐཱཝུཌྜྷཾ ཨབྷིཝཱདནཾ པཙྩུཊྛཱནཾ ཨཉྫལིཀམྨཾ སཱམཱིཙིཀམྨཾ ཀཱཏབྦཾ, ཨགྒཱསནཾ ཨགྒོདཀཾ ཨགྒཔིཎྜོ ལདྡྷབྦོ. ཨིདམེཏྠ པམཱཎཾ. ཏསྨཱ ཝུཌྜྷཏརོ བྷིཀྑུ ཨེཏེསཾ ཨནུཙྪཝིཀོ. ཨིདཱནི ཁོ པན, བྷིཀྑཝེ, སཱརིཔུཏྟོ མཡ྄ཧཾ ¶ ཨགྒསཱཝཀོ ཨནུདྷམྨཙཀྐཔྤཝཏྟཀོ མམཱནནྟརཾ སེནཱསནཾ ལདྡྷུཾ ཨརཧཏི, སོ ཨིམཾ རཏྟིཾ སེནཱསནཾ ཨལབྷནྟོ རུཀྑམཱུལེ ཝཱིཏིནཱམེསི, ཏུམྷེ ཨིདཱནེཝ ཨེཝཾ ཨགཱརཝཱ ཨཔཏིསྶཱ, གཙྪནྟེ གཙྪནྟེ ཀཱལེ ཀིནྟི ཀཏྭཱ ཝིཧརིསྶཐཱ’’ཏི. ཨཐ ནེསཾ ཨོཝཱདདཱནཏྠཱཡ ‘‘པུབྦེ, བྷིཀྑཝེ, ཏིརཙྪཱནགཏཱཔི ‘ན ཁོ པནེཏཾ ཨམྷཱཀཾ པཏིརཱུཔཾ, ཡཾ མཡཾ ཨཉྙམཉྙཾ ཨགཱརཝཱ ཨཔཏིསྶཱ ཨསབྷཱགཝུཏྟིནོ ཝིཧརེཡྻཱམ, ཨམྷེསུ མཧལླཀཏརཾ ཛཱནིཏྭཱ ཏསྶ ཨབྷིཝཱདནཱདཱིནི ཀརིསྶཱམཱ’ཏི སཱདྷུཀཾ ཝཱིམཾསིཏྭཱ ‘ཨཡཾ ནོ མཧལླཀོ’ཏི ཉཏྭཱ ཏསྶ ཨབྷིཝཱདནཱདཱིནི ཀཏྭཱ དེཝཔཐཾ པཱུརཡམཱནཱ གཏཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ཧིམཝནྟཔྤདེསེ ཨེཀཾ མཧཱནིགྲོདྷཾ ཨུཔནིསྶཱཡ ཏཡོ སཧཱཡཱ ཝིཧརིཾསུ – ཏིཏྟིརོ, མཀྐཊོ, ཧཏྠཱིཏི. ཏེ ཨཉྙམཉྙཾ ཨགཱརཝཱ ཨཔཏིསྶཱ ཨསབྷཱགཝུཏྟིནོ ཨཧེསུཾ. ཨཐ ནེསཾ ཨེཏདཧོསི ‘‘ན ཡུཏྟཾ ཨམྷཱཀཾ ཨེཝཾ ཝིཧརིཏུཾ, ཡཾནཱུན མཡཾ ཡོ ནོ མཧལླཀཏརོ, ཏསྶ ¶ ཨབྷིཝཱདནཱདཱིནི ཀརོནྟཱ ཝིཧརེཡྻཱམཱ’’ཏི. ‘‘ཀོ པན ནོ མཧལླཀཏརོ’’ཏི ཙིནྟེནྟཱ ཨེཀདིཝསཾ ‘‘ཨཏྠེསོ ཨུཔཱཡོ’’ཏི ཏཡོཔི ཛནཱ ནིགྲོདྷམཱུལེ ནིསཱིདིཏྭཱ ཏིཏྟིརོ ཙ མཀྐཊོ ཙ ཧཏྠིཾ པུཙྪིཾསུ ‘‘སམྨ ཧཏྠི, ཏྭཾ ཨིམཾ ནིགྲོདྷརུཀྑཾ ཀཱིཝཔྤམཱཎཀཱལཏོ པཊྛཱཡ ཛཱནཱསཱི’’ཏི? སོ ཨཱཧ ‘‘སམྨཱ, ཨཧཾ ཏརུཎཔོཏཀཀཱལེ ཨིམཾ ནིགྲོདྷགཙྪཾ ཨནྟརསཏྠཱིསུ ཀཏྭཱ གཙྪཱམི, ཨཝཏྠརིཏྭཱ ཋིཏཀཱལེ ཙ པན མེ ཨེཏསྶ ཨགྒསཱཁཱ ནཱབྷིཾ གྷཊྚེཏི, ཨེཝཱཧཾ ཨིམཾ གཙྪཀཱལཏོ པཊྛཱཡ ཛཱནཱམཱི’’ཏི པུན ཨུབྷོཔི ཛནཱ པུརིམནཡེནེཝ མཀྐཊཾ པུཙྪིཾསུ. སོ ཨཱཧ ‘‘ཨཧཾ སམྨཱ མཀྐཊཙྪཱཔཀོ སམཱནོ བྷཱུམིཡཾ ནིསཱིདིཏྭཱ གཱིཝཾ ¶ ཨནུཀྑིཔིཏྭཱཝ ཨིམསྶ ནིགྲོདྷཔོཏཀསྶ ཨགྒངྐུརེ ཁཱདཱམི, ཨེཝཱཧཾ ཨིམཾ ཁུདྡཀཀཱལཏོ པཊྛཱཡ ཛཱནཱམཱི’’ཏི. ཨཐ ཨིཏརེ ཨུབྷོཔི པུརིམནཡེནེཝ ཏིཏྟིརཾ པུཙྪིཾསུ. སོ ཨཱཧ ‘‘སམྨཱ, པུབྦེ ཨསུཀསྨིཾ ནཱམ ཋཱནེ མཧཱནིགྲོདྷརུཀྑོ ཨཧོསི, ཨཧཾ ཏསྶ ཕལཱནི ཁཱདིཏྭཱ ཨིམསྨིཾ ཋཱནེ ཝཙྩཾ པཱཏེསིཾ, ཏཏོ ཨེས རུཀྑོ ཛཱཏོ, ཨེཝཱཧཾ ཨིམཾ ཨཛཱཏཀཱལཏོ པཊྛཱཡ ཛཱནཱམི, ཏསྨཱ ཨཧཾ ཏུམྷེཧི ཛཱཏིཡཱ མཧལླཀཏརོ’’ཏི.

ཨེཝཾ ཝུཏྟེ མཀྐཊོ ཙ ཧཏྠཱི ཙ ཏིཏྟིརཔཎྜིཏཾ ཨཱཧཾསུ ‘‘སམྨ, ཏྭཾ ཨམྷེཧི མཧལླཀཏརོ, ཨིཏོ པཊྛཱཡ མཡཾ ཏཝ སཀྐཱརགརུཀཱརམཱནནཝནྡནཔཱུཛནཱནི ཙེཝ ཨབྷིཝཱདནཔཙྩུཊྛཱནཨཉྫལིཀམྨསཱམཱིཙིཀམྨཱནི ཙ ཀརིསྶཱམ, ཨོཝཱདེ ཙ ཏེ ཋསྶཱམ, ཏྭཾ པན ཨིཏོ པཊྛཱཡ ཨམྷཱཀཾ ཨོཝཱདཱནུསཱསནིཾ དདེཡྻཱསཱི’’ཏི. ཏཏོ པཊྛཱཡ ཏིཏྟིརོ ཏེསཾ ཨོཝཱདཾ ཨདཱསི, སཱིལེསུ པཏིཊྛཱཔེསི, སཡམྤི སཱིལཱནི སམཱདིཡི. ཏེ ཏཡོཔི ཛནཱ པཉྩསུ སཱིལེསུ པཏིཊྛཱཡ ཨཉྙམཉྙཾ སགཱརཝཱ སཔྤཏིསྶཱ སབྷཱགཝུཏྟིནོ ཧུཏྭཱ ཛཱིཝིཏཔརིཡོསཱནེ ¶ དེཝལོཀཔརཱཡཎཱ ཨཧེསུཾ. ཏེསཾ ཏིཎྞཾ སམཱདཱནཾ ཏིཏྟིརིཡཾ བྲཧྨཙརིཡཾ ནཱམ ཨཧོསི.

ཏེ ཧི ནཱམ, བྷིཀྑཝེ, ཏིརཙྪཱནགཏཱ ཨཉྙམཉྙཾ སགཱརཝཱ སཔྤཏིསྶཱ ཝིཧརིཾསུ, ཏུམྷེ ཨེཝཾ སྭཱཁཱཏེ དྷམྨཝིནཡེ པབྦཛིཏྭཱ ཀསྨཱ ཨཉྙམཉྙཾ ཨགཱརཝཱ ཨཔཏིསྶཱ ཝིཧརཐ. ཨནུཛཱནཱམི, བྷིཀྑཝེ, ཨིཏོ པཊྛཱཡ ཏུམྷཱཀཾ ཡཐཱཝུཌྜྷཾ ཨབྷིཝཱདནཾ པཙྩུཊྛཱནཾ ཨཉྫལིཀམྨཾ སཱམཱིཙིཀམྨཾ, ཡཐཱཝུཌྜྷཾ ཨགྒཱསནཾ ཨགྒོདཀཾ ཨགྒཔིཎྜཾ, ན ཨིཏོ པཊྛཱཡ ཙ ནཝཀཏརེན ཝུཌྜྷཏརོ ¶ སེནཱསནེན པཊིབཱཧིཏབྦོ, ཡོ པཊིབཱཧེཡྻ, ཨཱཔཏྟིདུཀྐཊསྶཱཏི ཨེཝཾ སཏྠཱ ཨིམཾ དྷམྨདེསནཾ ཨཱཧརིཏྭཱ ཨབྷིསམྦུདྡྷོ ཧུཏྭཱ ཨིམཾ གཱཐམཱཧ –

༣༧.

‘‘ཡེ ཝུཌྜྷམཔཙཱཡནྟི, ནརཱ དྷམྨསྶ ཀོཝིདཱ;

དིཊྛེཝ དྷམྨེ པཱསཾསཱ, སམྤརཱཡེ ཙ སུགྒཏཱི’’ཏི.

ཏཏྠ ཡེ ཝུཌྜྷམཔཙཱཡནྟཱིཏི ཛཱཏིཝུཌྜྷོ, ཝཡོཝུཌྜྷོ, གུཎཝུཌྜྷོཏི ཏཡོ ཝུཌྜྷཱ. ཏེསུ ཛཱཏིསམྤནྣོ ཛཱཏིཝུཌྜྷོ ནཱམ, ཝཡེ ཋིཏོ ཝཡོཝུཌྜྷོ ནཱམ ¶ , གུཎསམྤནྣོ གུཎཝུཌྜྷོ ནཱམ. ཏེསུ གུཎསམྤནྣོ ཝཡོཝུཌྜྷོ ཨིམསྨིཾ ཋཱནེ ‘‘ཝུཌྜྷོ’’ཏི ཨདྷིཔྤེཏོ. ཨཔཙཱཡནྟཱིཏི ཛེཊྛཱཔཙཱཡིཀཀམྨེན པཱུཛེནྟི. དྷམྨསྶ ཀོཝིདཱཏི ཛེཊྛཱཔཙཱཡནདྷམྨསྶ ཀོཝིདཱ ཀུསལཱ. དིཊྛེཝ དྷམྨེཏི ཨིམསྨིཾཡེཝ ཨཏྟབྷཱཝེ. པཱསཾསཱཏི པསཾསཱརཧཱ. སམྤརཱཡེ ཙ སུགྒཏཱིཏི སམྤརེཏབྦེ ཨིམཾ ལོཀཾ ཧིཏྭཱ གནྟབྦེ པརལོཀེཔི ཏེསཾ སུགཏིཡེཝ ཧོཏཱིཏི. ཨཡཾ པནེཏྠ པིཎྜཏྠོ – བྷིཀྑཝེ, ཁཏྟིཡཱ ཝཱ ཧོནྟུ བྲཱཧྨཎཱ ཝཱ ཝེསྶཱ ཝཱ སུདྡཱ ཝཱ གཧཊྛཱ ཝཱ པབྦཛིཏཱ ཝཱ ཏིརཙྪཱནགཏཱ ཝཱ, ཡེ ཀེཙི སཏྟཱ ཛེཊྛཱཔཙིཏིཀམྨེ ཚེཀཱ ཀུསལཱ གུཎསམྤནྣཱནཾ ཝཡོཝུཌྜྷཱནཾ ཨཔཙིཏིཾ ཀརོནྟི, ཏེ ཨིམསྨིཉྩ ཨཏྟབྷཱཝེ ཛེཊྛཱཔཙིཏིཀཱརཀཱཏི པསཾསཾ ཝཎྞནཾ ཐོམནཾ ལབྷནྟི, ཀཱཡསྶ ཙ བྷེདཱ སགྒེ ནིབྦཏྟནྟཱིཏི.

ཨེཝཾ སཏྠཱ ཛེཊྛཱཔཙིཏིཀམྨསྶ གུཎཾ ཀཐེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཧཏྠིནཱགོ མོགྒལླཱནོ ཨཧོསི, མཀྐཊོ སཱརིཔུཏྟོ, ཏིཏྟིརཔཎྜིཏོ པན ཨཧམེཝ ཨཧོསི’’ནྟི.

ཏིཏྟིརཛཱཏཀཝཎྞནཱ སཏྟམཱ.

[༣༨] ༨. བཀཛཱཏཀཝཎྞནཱ

ནཱཙྩནྟཾ ¶ ¶ ནིཀཏིཔྤཉྙོཏི ཨིདཾ སཏྠཱ ཛེཏཝནེ ཝིཧརནྟོ ཙཱིཝརཝཌྜྷཀཾ བྷིཀྑུ ཨཱརབྦྷ ཀཐེསི. ཨེཀོ ཀིར ཛེཏཝནཝཱསིཀོ བྷིཀྑུ ཡཾཀིཉྩི ཙཱིཝརེ ཀཏྟབྦཾ ཚེདནགྷཊྚནཝིཙཱརཎསིབྦནཱདིཀཾ ཀམྨཾ, ཏཏྠ སུཀུསལོ. སོ ཏཱཡ ཀུསལཏཱཡ ཙཱིཝརཾ ཝཌྜྷེཏི, ཏསྨཱ ‘‘ཙཱིཝརཝཌྜྷཀོ’’ ཏྭེཝ པཉྙཱཡིཏྠ. ཀིཾ པནེས ཀརོཏཱིཏི? ཛིཎྞཔིལོཏིཀཱསུ ཧཏྠཀམྨཾ དསྶེཏྭཱ སུཕསྶིཀཾ མནཱཔཾ ཙཱིཝརཾ ཀཏྭཱ རཛནཔརིཡོསཱནེ པིཊྛོདཀེན རཛིཏྭཱ སངྑེན གྷཾསིཏྭཱ ཨུཛྫལཾ མནུཉྙཾ ཀཏྭཱ ནིཀྑིཔཏི. ཙཱིཝརཀམྨཾ ཀཱཏུཾ ཨཛཱནནྟཱ བྷིཀྑཱུ ཨཧཏེ སཱཊཀེ གཧེཏྭཱ ཏསྶ སནྟིཀཾ ཨཱགནྟྭཱ ‘‘མཡཾ ཙཱིཝརཾ ཀཱཏུཾ ན ཛཱནཱམ, ཙཱིཝརཾ ནོ ཀཏྭཱ དེཐཱ’’ཏི ཝདནྟི. སོ ‘‘ཙཱིཝརཾ ཨཱཝུསོ ཀརིཡམཱནཾ ཙིརེན ནིཊྛཱཏི, མཡཱ ཀཏཙཱིཝརམེཝ ཨཏྠི, ཨིམེ སཱཊཀེ ཋཔེཏྭཱ ཏཾ གཎྷིཏྭཱ གཙྪཐཱ’’ཏི ནཱིཧརིཏྭཱ དསྶེཏི. ཏེ ཏསྶ ཝཎྞསམྤཏྟིམེཝ དིསྭཱ ཨནྟརཾ ཨཛཱནནྟཱ ‘‘ཐིར’’ནྟི སཉྙཱཡ ཨཧཏསཱཊཀེ ཙཱིཝརཝཌྜྷཀསྶ དཏྭཱ ཏཾ གཎྷིཏྭཱ གཙྪནྟི. ཏཾ ཏེཧི ཐོཀཾ ཀིལིཊྛཀཱལེ ཨུཎྷོདཀེན དྷོཝིཡམཱནཾ ཨཏྟནོ པཀཏིཾ དསྶེཏི, ཏཏྠ ཏཏྠ ཛིཎྞཊྛཱནཾ པཉྙཱཡཏི, ཏེ ཝིཔྤཊིསཱརིནོ ཧོནྟི. ཨེཝཾ ཨཱགཏཱགཏེ པིལོཏིཀཱཧི ཝཉྩེནྟོ སོ བྷིཀྑུ སབྦཏྠ པཱཀཊོ ཛཱཏོ.

ཡཐཱ ཙེས ཛེཏཝནེ, ཏཐཱ ཨཉྙཏརསྨིཾ གཱམཀེཔི ཨེཀོ ཙཱིཝརཝཌྜྷཀོ ལོཀཾ ཝཉྩེཏི. ཏསྶ ¶ སམྦྷཏྟཱ བྷིཀྑཱུ ‘‘བྷནྟེ, ཛེཏཝནེ ཀིར ཨེཀོ ཙཱིཝརཝཌྜྷཀོ ཨེཝཾ ལོཀཾ ཝཉྩེཏཱི’’ཏི ཨཱརོཙེསུཾ. ཨཐསྶ ཨེཏདཧོསི ‘‘ཧནྡཱཧཾ, ཏཾ ནགརཝཱསིཀཾ ཝཉྩེམཱི’’ཏི པིལོཏིཀཙཱིཝརཾ ཨཏིམནཱཔཾ ཀཏྭཱ སུརཏྟཾ རཛིཏྭཱ ཏཾ པཱརུཔིཏྭཱ ཛེཏཝནཾ ཨགམཱསི. ཨིཏརོ ཏཾ དིསྭཱཝ ལོབྷཾ ཨུཔྤཱདེཏྭཱ ‘‘བྷནྟེ, ཨིམཾ ཙཱིཝརཾ ཏུམྷེཧི ཀཏ’’ནྟི པུཙྪི. ‘‘ཨཱམཱཝུསོ’’ཏི. ‘‘བྷནྟེ, ཨིམཾ ཙཱིཝརཾ མཡ྄ཧཾ དེཐ, ཏུམྷེ ཨཉྙཾ ལབྷིསྶཐཱ’’ཏི? ‘‘ཨཱཝུསོ, མཡཾ གཱམཝཱསིཀཱ དུལླབྷཔཙྩཡཱ, ཨིམཱཧཾ ཏུཡ྄ཧཾ དཏྭཱ ཨཏྟནཱ ཀིཾ པཱརུཔིསྶཱམཱི’’ཏི? ‘‘བྷནྟེ, མམ སནྟིཀེ ཨཧཏསཱཊཀཱ ཨཏྠི, ཏེ གཧེཏྭཱ ཏུམྷཱཀཾ ཙཱིཝརཾ ཀརོཐཱ’’ཏི. ‘‘ཨཱཝུསོ, མཡཱ ཨེཏྠ ཧཏྠཀམྨཾ དསྶིཏཾ, ཏཡི པན ཨེཝཾ ཝདནྟེ ཀིཾ སཀྐཱ ཀཱཏུཾ, གཎྷཱཧི ན’’ནྟི ཏསྶ པིལོཏིཀཙཱིཝརཾ དཏྭཱ ཨཧཏསཱཊཀེ ཨཱདཱཡ ཏཾ ཝཉྩེཏྭཱ པཀྐཱམི. ཛེཏཝནཝཱསིཀོཔི ¶ ཏཾ ཙཱིཝརཾ པཱརུཔིཏྭཱ ཀཏིཔཱཧཙྩཡེན ཨུཎྷོདཀེན དྷོཝནྟོ ཛིཎྞཔིལོཏིཀབྷཱཝཾ དིསྭཱ ལཛྫིཏོ ‘‘གཱམཝཱསིཙཱིཝརཝཌྜྷཀེན ཀིར ཛེཏཝནཝཱསིཀོ ཝཉྩིཏོ’’ཏི ཏསྶ ཝཉྩིཏབྷཱཝོ སངྒྷམཛ྄ཛྷེ པཱཀཊོ ཛཱཏོ.

ཨཐེཀདིཝསཾ ¶ བྷིཀྑཱུ དྷམྨསབྷཱཡཾ ཏཾ ཀཐཾ ཀཐེནྟཱ ནིསཱིདིཾསུ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪི. ཏེ ཏམཏྠཾ ཨཱརོཙེསུཾ. སཏྠཱ ‘‘ན, བྷིཀྑཝེ, ཛེཏཝནཝཱསཱི ཙཱིཝརཝཌྜྷཀོ ཨིདཱནེཝ ཨཉྙེ ཝཉྩེཏི, པུབྦེཔི ཝཉྩེསིཡེཝ. ན གཱམཝཱསིཀེནཱཔི ཨིདཱནེཝ ཨེས ཛེཏཝནཝཱསཱི ཙཱིཝརཝཌྜྷཀོ ཝཉྩིཏོ, པུབྦེཔི ཝཉྩིཏོཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ཨེཀསྨིཾ ཨརཉྙཱཡཏནེ བོདྷིསཏྟོ ཨཉྙཏརཾ པདུམསརཾ ནིསྶཱཡ ཋིཏེ ཝརཎརུཀྑེ རུཀྑདེཝཏཱ ཧུཏྭཱ ནིབྦཏྟི. ཏདཱ ཨཉྙཏརསྨིཾ ནཱཏིམཧནྟེ སརེ ནིདཱགྷསམཡེ ཨུདཀཾ མནྡཾ ཨཧོསི, བཧཱུ ཙེཏྠ མཙྪཱ ཧོནྟི. ཨཐེཀོ བཀོ ཏེ མཙྪེ དིསྭཱ ‘‘ཨེཀེན ཨུཔཱཡེན ཨིམེ མཙྪེ ཝཉྩེཏྭཱ ཁཱདིསྶཱམཱི’’ཏི གནྟྭཱ ཨུདཀཔརིཡནྟེ ཙིནྟེནྟོ ནིསཱིདི. ཨཐ ནཾ མཙྪཱ དིསྭཱ ‘‘ཀིཾ, ཨཡྻ, ཙིནྟེནྟོ ནིསིནྣོསཱི’’ཏི པུཙྪིཾསུ. ‘‘ཏུམྷཱཀཾ ཙིནྟེནྟོ ནིསིནྣོམྷཱི’’ཏི. ‘‘ཀིཾ ཨམྷཱཀཾ ཙིནྟེསི, ཨཡྻཱ’’ཏི? ‘‘‘ཨིམསྨིཾ སརེ ཨུདཀཾ པརིཏྟཾ, གོཙརོ མནྡོ, ནིདཱགྷོ ཙ མཧནྟོ, ཨིདཱནིམེ མཙྪཱ ཀིཾ ནཱམ ཀརིསྶནྟཱི’ཏི ཏུམྷཱཀཾ ཙིནྟེནྟོ ནིསིནྣོམྷཱི’’ཏི. ‘‘ཨཐ ཀིཾ ཀརོམ, ཨཡྻཱ’’ཏི? ‘‘ཏུམྷེ སཙེ མཡ྄ཧཾ ཝཙནཾ ཀརེཡྻཱཐ ¶ , ཨཧཾ ཝོ ཨེཀེཀཾ མུཁཏུཎྜཀེན གཧེཏྭཱ ཨེཀཾ པཉྩཝཎྞཔདུམསཉྪནྣཾ མཧཱསརཾ ནེཏྭཱ ཝིསྶཛྫེཡྻ’’ནྟི. ‘‘ཨཡྻ, པཋམཀཔྤིཀཏོ པཊྛཱཡ མཙྪཱནཾ ཙིནྟནཀབཀོ ནཱམ ནཏྠི, ཏྭཾ ཨམྷེསུ ཨེཀེཀཾ ཁཱདིཏུཀཱམོསཱི’’ཏི. ‘‘ནཱཧཾ ཏུམྷེ མཡ྄ཧཾ སདྡཧནྟེ ཁཱདིསྶཱམི’’. ‘‘སཙེ པན སརསྶ ཨཏྠིབྷཱཝཾ མཡ྄ཧཾ ན སདྡཧཐ, ཨེཀཾ མཙྪཾ མཡཱ སདྡྷིཾ སརཾ པསྶིཏུཾ པེསེཐཱ’’ཏི. མཙྪཱ ཏསྶ སདྡཧིཏྭཱ ‘‘ཨཡཾ ཛལེཔི ཐལེཔི སམཏྠོ’’ཏི ཨེཀཾ ཀཱལ༹མཧཱམཙྪཾ ཨདཾསུ ‘‘ཨིམཾ གཧེཏྭཱ གཙྪཐཱ’’ཏི. སོ ཏཾ གཧེཏྭཱ ནེཏྭཱ སརེ ཝིསྶཛྫེཏྭཱ སབྦཾ སརཾ དསྶེཏྭཱ པུན ཨཱནེཏྭཱ ཏེསཾ མཙྪཱནཾ སནྟིཀེ ཝིསྶཛྫེསི. སོ ཏེསཾ མཙྪཱནཾ སརསྶ སམྤཏྟིཾ ཝཎྞེསི. ཏེ ¶ ཏསྶ ཀཐཾ སུཏྭཱ གནྟུཀཱམཱ ཧུཏྭཱ ‘‘སཱདྷུ, ཨཡྻ, ཨམྷེ གཎྷིཏྭཱ གཙྪཱཧཱི’’ཏི ཨཱཧཾསུ.

བཀོ པཋམཾ ཏཾ ཀཱལ༹མཧཱམཙྪམེཝ གཧེཏྭཱ སརཏཱིརཾ ནེཏྭཱ སརཾ དསྶེཏྭཱ སརཏཱིརེ ཛཱཏེ ཝརཎརུཀྑེ ནིལཱིཡིཏྭཱ ཏཾ ཝིཊཔནྟརེ པཀྑིཔིཏྭཱ ཏུཎྜེན ཝིཛ྄ཛྷནྟོ ཛཱིཝིཏཀྑཡཾ པཱཔེཏྭཱ མཾསཾ ཁཱདིཏྭཱ ཀཎྚཀེ རུཀྑམཱུལེ པཱཏེཏྭཱ པུན གནྟྭཱ ‘‘ཝིསྶཊྛོ, མེ སོ མཙྪོ, ཨཉྙོ ཨཱགཙྪཏཱུ’’ཏི ཨེཏེནུཔཱཡེན ཨེཀེཀཾ གཧེཏྭཱ སབྦེ མཙྪེ ཁཱདིཏྭཱ པུན ཨཱགཏོ ཨེཀཾ མཙྪམྤི ནཱདྡས. ཨེཀོ པནེཏྠ ཀཀྐཊཀོ ཨཝསིཊྛོ. བཀོ ཏམྤི ཁཱདིཏུཀཱམོ ཧུཏྭཱ ‘‘བྷོ, ཀཀྐཊཀ, མཡཱ སབྦེཏེ མཙྪཱ ནེཏྭཱ པདུམསཉྪནྣེ མཧཱསརེ ཝིསྶཛྫིཏཱ, ཨེཧི ཏམྤི ནེསྶཱམཱི’’ཏི. ‘‘མཾ གཧེཏྭཱ གཙྪནྟོ ཀཐཾ གཎྷིསྶསཱི’’ཏི? ‘‘ཌཾསིཏྭཱ གཎྷིསྶཱམཱི’’ཏི. ‘‘ཏྭཾ ¶ ཨེཝཾ གཧེཏྭཱ གཙྪནྟོ མཾ པཱཏེསྶསི, ནཱཧཾ ཏཡཱ སདྡྷིཾ གམིསྶཱམཱི’’ཏི. ‘‘མཱ བྷཱཡི, ཨཧཾ ཏཾ སུགྒཧིཏཾ གཧེཏྭཱ གམིསྶཱམཱི’’ཏི. ཀཀྐཊཀོ ཙིནྟེསི ‘‘ཨིམསྶ མཙྪེ ནེཏྭཱ སརེ ཝིསྶཛྫནཾ ནཱམ ནཏྠི. སཙེ པན མཾ སརེ ཝིསྶཛྫེསྶཏི, ཨིཙྩེཏཾ ཀུསལཾ. ནོ ཙེ ཝིསྶཛྫེསྶཏི, གཱིཝམསྶ ཚིནྡིཏྭཱ ཛཱིཝིཏཾ ཧརིསྶཱམཱི’’ཏི.

ཨཐ ནཾ ཨེཝམཱཧ ‘‘སམྨ བཀ, ན ཁོ ཏྭཾ སུགྒཧིཏཾ གཧེཏུཾ སཀྑིསྶསི, ཨམྷཱཀཾ པན གཧཎཾ སུགྒཧཎཾ ¶ , སཙཱཧཾ ཨལེ༹ཧི ཏཝ གཱིཝཾ གཧེཏུཾ ལབྷིསྶཱམི, ཏཝ གཱིཝཾ སུགྒཧིཏཾ ཀཏྭཱ ཏཡཱ སདྡྷིཾ གམིསྶཱམཱི’’ཏི. སོ ཏཾ ‘‘ཝཉྩེཏུཀཱམོ ཨེས མ’’ནྟི ཨཛཱནནྟོ ‘‘སཱདྷཱུ’’ཏི སམྤཊིཙྪི. ཀཀྐཊཀོ ཨཏྟནོ ཨལེ༹ཧི ཀམྨཱརསཎྜཱསེན ཝིཡ ཏསྶ གཱིཝཾ སུགྒཧིཏཾ ཀཏྭཱ ‘‘ཨིདཱནི གཙྪཱ’’ཏི ཨཱཧ. སོ ཏཾ ནེཏྭཱ སརཾ དསྶེཏྭཱ ཝརཎརུཀྑཱབྷིམུཁོ པཱཡཱསི. ཀཀྐཊཀོ ཨཱཧ ‘‘མཱཏུལ, ཨཡཾ སརོ ཨེཏྟོ, ཏྭཾ པན ཨིཏོ ཀིཾ ནེསཱི’’ཏི? བཀོ ‘‘ན ཏེ མཱཏུལོ ཨཧཾ, ན བྷགིནིཔུཏྟོསི ཝཏ མེ ཏྭ’’ནྟི ཝཏྭཱ ‘‘ཏྭཾ ‘ཨེས མཾ ཨུཀྑིཔིཏྭཱ ཝིཙརནྟོ མཡ྄ཧཾ དཱསོ’ཏི སཉྙཾ ཀརོསི མཉྙེ, པསྶེཏཾ ཝརཎརུཀྑསྶ མཱུལེ ཀཎྚཀརཱསིཾ, ཡཐཱ མེ ཏེ སབྦེ མཙྪཱ ཁཱདིཏཱ, ཏམྤི ཏཐེཝ ཁཱདིསྶཱམཱི’’ཏི ཨཱཧ. ཀཀྐཊཀོ ‘‘ཨེཏེ མཙྪཱ ཨཏྟནོ བཱལཏཱཡ ཏཡཱ ཁཱདིཏཱ, ཨཧཾ པན ཏེ མཾ ཁཱདིཏུཾ ན དསྶཱམི, ཏཉྙེཝ པན ཝིནཱསཾ པཱཔེསྶཱམི. ཏྭཉྷི ¶ བཱལཏཱཡ མཡཱ ཝཉྩིཏབྷཱཝཾ ན ཛཱནཱསི, མརནྟཱ ཨུབྷོཔི མརིསྶཱམ, ཨཧཾ ཏེ སཱིསཾ ཚིནྡིཏྭཱ བྷཱུམིཡཾ ཁིཔིསྶཱམཱི’’ཏི ཝཏྭཱ ཀམྨཱརསཎྜཱསེན ཝིཡ ཨལེ༹ཧི ཏསྶ གཱིཝཾ ནིཔྤཱིལེ༹སི. སོ ཝིཝཊེན མུཁེན ཨཀྑཱིཧི ཨསྶུནཱ པགྒྷརནྟེན མརཎབྷཡཏཛྫིཏོ ‘‘སཱམི, ཨཧཾ ཏཾ ན ཁཱདིསྶཱམི, ཛཱིཝིཏཾ མེ དེཧཱི’’ཏི ཨཱཧ. ‘‘ཡདི ཨེཝཾ ཨོཏརིཏྭཱ མཾ སརསྨིཾ ཝིསྶཛྫེཧཱི’’ཏི. སོ ནིཝཏྟིཏྭཱ སརམེཝ ཨོཏརིཏྭཱ ཀཀྐཊཀཾ སརཔརིཡནྟེ པངྐཔིཊྛེ ཋཔེསི, ཀཀྐཊཀོ ཀཏྟརིཀཱཡ ཀུམུདནཱལ༹ཾ ཀཔྤེནྟོ ཝིཡ ཏསྶ གཱིཝཾ ཀཔྤེཏྭཱ ཨུདཀཾ པཱཝིསི.

ཏཾ ཨཙྪརིཡཾ དིསྭཱ ཝརཎརུཀྑེ ཨདྷིཝཏྠཱ དེཝཏཱ སཱདྷུཀཱརཾ དདམཱནཱ ཝནཾ ཨུནྣཱདཡམཱནཱ མདྷུརསྶརེན ཨིམཾ གཱཐམཱཧ –

༣༨.

‘‘ནཱཙྩནྟཾ ནིཀཏིཔྤཉྙོ, ནིཀཏྱཱ སུཁམེདྷཏི;

ཨཱརཱདྷེཏི ནིཀཏིཔྤཉྙོ, བཀོ ཀཀྐཊཀཱམིཝཱ’’ཏི.

ཏཏྠ ནཱཙྩནྟཾ ནིཀཏིཔྤཉྙོ, ནིཀཏྱཱ སུཁམེདྷཏཱིཏི ནིཀཏི ཝུཙྩཏི ཝཉྩནཱ, ནིཀཏིཔྤཉྙོ ¶ ཝཉྩནཔཉྙོ པུགྒལོ ཏཱཡ ནིཀཏྱཱ ནིཀཏིཡཱ ཝཉྩནཱཡ ¶ ན ཨཙྩནྟཾ སུཁམེདྷཏི, ནིཙྩཀཱལེ སུཁསྨིཾཡེཝ པཏིཊྛཱཏུཾ ན སཀྐོཏི, ཨེཀཾསེན པན ཝིནཱསཾ པཱཔུཎཱཏིཡེཝཱཏི ཨཏྠོ. ཨཱརཱདྷེཏཱིཏི པཊིལབྷཏི. ནིཀཏིཔྤཉྙོཏི ཀེརཱཊིཀབྷཱཝཾ སིཀྑིཏཔཉྙོ པཱཔཔུགྒལོ ཨཏྟནཱ ཀཏསྶ པཱཔསྶ ཕལཾ ཨཱརཱདྷེཏི པཊིལབྷཏི ཝིནྡཏཱིཏི ཨཏྠོ. ཀཐཾ? བཀོ ཀཀྐཊཀཱམིཝ, ཡཐཱ བཀོ ཀཀྐཊཀཱ གཱིཝཙྪེདཾ པཱཔུཎཱཏི, ཨེཝཾ པཱཔཔུགྒལོ ཨཏྟནཱ ཀཏཔཱཔཏོ དིཊྛདྷམྨེ ཝཱ སམྤརཱཡེ ཝཱ བྷཡཾ ཨཱརཱདྷེཏི པཊིལབྷཏཱིཏི ཨིམམཏྠཾ པཀཱསེནྟོ མཧཱསཏྟོ ཝནཾ ཨུནྣཱདེནྟོ དྷམྨཾ དེསེསི.

སཏྠཱ ‘‘ན, བྷིཀྑཝེ, ཨིདཱནེཝ གཱམཝཱསིཙཱིཝརཝཌྜྷཀེནེས ཝཉྩིཏོ, ཨཏཱིཏེཔི ཝཉྩིཏོཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ སོ བཀོ ཛེཏཝནཝཱསཱི ཙཱིཝརཝཌྜྷཀོ ཨཧོསི, ཀཀྐཊཀོ གཱམཝཱསཱི ཙཱིཝརཝཌྜྷཀོ, རུཀྑདེཝཏཱ པན ཨཧམེཝ ཨཧོསི’’ནྟི.

བཀཛཱཏཀཝཎྞནཱ ཨཊྛམཱ.

[༣༩] ༩. ནནྡཛཱཏཀཝཎྞནཱ

མཉྙེ ¶ སོཝཎྞཡོ རཱསཱིཏི ཨིདཾ སཏྠཱ ཛེཏཝནེ ཝིཧརནྟོ སཱརིཔུཏྟཏྠེརསྶ སདྡྷིཝིཧཱརིཀཾ ཨཱརབྦྷ ཀཐེསི. སོ ཀིར བྷིཀྑུ སུབྦཙོ ཨཧོསི ཝཙནཀྑམོ, ཐེརསྶ མཧནྟེནུསྶཱཧེན ཨུཔཀཱརཾ ཀརོཏི. ཨཐེཀཾ སམཡཾ ཐེརོ སཏྠཱརཾ ཨཱཔུཙྪིཏྭཱ ཙཱརིཀཾ ཙརནྟོ དཀྑིཎཱགིརིཛནཔདཾ ཨགམཱསི. སོ བྷིཀྑུ ཏཏྠ གཏཀཱལེ མཱནཏྠདྡྷོ ཧུཏྭཱ ཐེརསྶ ཝཙནཾ ན ཀརོཏི ‘‘ཨཱཝུསོ, ཨིདཾ ནཱམ ཀརོཧཱི’’ཏི ཝུཏྟེ པན ཐེརསྶ པཊིཔཀྑོ ཧོཏི. ཐེརོ ཏསྶ ཨཱསཡཾ ན ཛཱནཱཏི. སོ ཏཏྠ ཙཱརིཀཾ ཙརིཏྭཱ པུན ཛེཏཝནཾ ཨཱགཏོ. སོ བྷིཀྑུ ཐེརསྶ ཛེཏཝནཝིཧཱརཾ ཨཱགཏཀཱལཏོ པཊྛཱཡ པུན ཏཱདིསོཝ ཛཱཏོ. ཐེརོ ཏཐཱགཏསྶ ཨཱརོཙེསི ‘‘བྷནྟེ, མཡ྄ཧཾ ཨེཀོ སདྡྷིཝིཧཱརིཀོ ཨེཀསྨིཾ ཋཱནེ སཏེན ཀཱིཏདཱསོ ཝིཡ ཧོཏི, ཨེཀསྨིཾ ཋཱནེ མཱནཏྠདྡྷོ ཧུཏྭཱ ‘ཨིདཾ ནཱམ ཀརོཧཱི’ཏི ཝུཏྟེ པཊིཔཀྑོ ཧོཏཱི’’ཏི. སཏྠཱ ‘‘ནཱཡཾ, སཱརིཔུཏྟ, བྷིཀྑུ ཨིདཱནེཝ ཨེཝཾསཱིལོ, པུབྦེཔེས ཨེཀཾ ཋཱནཾ གཏོ སཏེན ཀཱིཏདཱསོ ཝིཡ ཧོཏི. ཨེཀཾ ཋཱནཾ གཏོ པཊིཔཀྑོ པཊིསཏྟུ ཧོཏཱི’’ཏི ཝཏྭཱ ཐེརེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨེཀསྨིཾ ཀུཊུམྦིཡཀུལེ པཊིསནྡྷིཾ གཎྷི. ཏསྶེཀོ སཧཱཡཀོ ཀུཊུམྦིཀོ སཡཾ མཧལླཀོ, བྷརིཡཱ པནསྶ ¶ ཏརུཎཱི. སཱ ཏཾ ནིསྶཱཡ པུཏྟཾ པཊིལབྷི. སོ ཙིནྟེསི ‘‘ཨཡཾ ཨིཏྠཱི ཏརུཎཏྟཱ མམཙྩཡེན ཀཉྩིདེཝ པུརིསཾ གཧེཏྭཱ ཨིམཾ དྷནཾ ཝིནཱསེཡྻ, པུཏྟསྶ མེ ན དདེཡྻ, ཡཾནཱུནཱཧཾ ཨིམཾ དྷནཾ པཐཝིགཏཾ ཀརེཡྻ’’ནྟི གྷརེ ནནྡཾ ནཱམ དཱསཾ གཧེཏྭཱ ཨརཉྙཾ གནྟྭཱ ཨེཀསྨིཾ ཋཱནེ ཏཾ དྷནཾ ནིདཧིཏྭཱ ཏསྶ ཨཱཙིཀྑིཏྭཱ ‘‘ཏཱཏ, ནནྡ, ཨིམཾ དྷནཾ མམཙྩཡེན མཡ྄ཧཾ པུཏྟསྶ ཨཱཙིཀྑེཡྻཱསི, མཱ ཙ ནཾ པརིཙྩཛསཱི’’ཏི ཨོཝདིཏྭཱ ཀཱལམཀཱསི.

པུཏྟོཔིསྶ ཨནུཀྐམེན ཝཡཔྤཏྟོ ཛཱཏོ. ཨཐ ནཾ མཱཏཱ ཨཱཧ – ‘‘ཏཱཏ, ཏཝ པིཏཱ ནནྡཾ དཱསཾ གཧེཏྭཱ དྷནཾ ནིདྷེསི, ཏཾ ཨཱཧརཱཔེཏྭཱ ཀུཊུམྦཾ སཎྛཔེཧཱི’’ཏི. སོ ཨེཀདིཝསཾ ནནྡཾ ཨཱཧ – ‘‘མཱཏུལ, ཨཏྠི ཀིཉྩི མཡ྄ཧཾ པིཏརཱ དྷནཾ ནིདཧིཏ’’ནྟི. ‘‘ཨཱམ, སཱམཱི’’ཏི. ‘‘ཀུཧིཾ ¶ ཏཾ ནིདཧིཏ’’ནྟི. ‘‘ཨརཉྙེ, སཱམཱི’’ཏི. ‘‘ཏེན ཧི གཙྪཱམཱ’’ཏི ཀུདྡཱལཔིཊཀཾ ཨཱདཱཡ ནིདྷིཊྛཱནཾ གནྟྭཱ ‘‘ཀཧཾ མཱཏུལ, དྷན’’ནྟི ཨཱཧ. ནནྡོ ཨཱརུཡ྄ཧ དྷནམཏྠཀེ ཋཏྭཱ དྷནཾ ནིསྶཱཡ མཱནཾ ཨུཔྤཱདེཏྭཱ ‘‘ཨརེ དཱསིཔུཏྟ ཙེཊཀ, ཀུཏོ ཏེ ཨིམསྨིཾ ཋཱནེ དྷན’’ནྟི ཀུམཱརཾ ཨཀྐོསཏི. ཀུམཱརོ ཏསྶ ཕརུསཝཙནཾ སུཏྭཱ ཨསུཎནྟོ ཝིཡ ‘‘ཏེན ཧི གཙྪཱམཱ’’ཏི ཏཾ གཧེཏྭཱ པཊིནིཝཏྟིཏྭཱ པུན དྭེ ཏཡོ དིཝསེ ཨཏིཀྐམིཏྭཱ ཨགམཱསི, ནནྡོ ཏཐེཝ ཨཀྐོསཏི. ཀུམཱརོ ཏེན སདྡྷིཾ ཕརུསཝཙནཾ ཨཝཏྭཱཝ ནིཝཏྟིཏྭཱ ‘‘ཨཡཾ དཱསོ ཨིཏོ པཊྛཱཡ ‘དྷནཾ ཨཱཙིཀྑིསྶཱམཱི’ཏི གཙྪཏི, གནྟྭཱ པན མཾ ཨཀྐོསཏི, ཏཏྠ ཀཱརཎཾ ན ཛཱནཱམི, ཨཏྠི ཁོ པན མེ པིཏུ སཧཱཡོ ཀུཊུམྦིཀོ, ཏཾ པཊིཔུཙྪིཏྭཱ ཛཱནིསྶཱམཱི’’ཏི བོདྷིསཏྟསྶ སནྟིཀཾ གནྟྭཱ སབྦཾ ཏཾ པཝཏྟིཾ ཨཱརོཙེཏྭཱ ‘‘ཀིཾ ནུ ཁོ, ཏཱཏ, ཀཱརཎ’’ནྟི པུཙྪི.

བོདྷིསཏྟོ ‘‘ཡསྨིཾ ཏེ, ཏཱཏ, ཋཱནེ ཋིཏོ ནནྡོ ཨཀྐོསཏི, ཏཏྠེཝ ཏེ པིཏུ སནྟཀཾ དྷནཾ, ཏསྨཱ ཡདཱ ཏེ ནནྡོ ཨཀྐོསཏི, ཏདཱ ནཾ ‘ཨེཧི རེ དཱས, ཀིཾ ཨཀྐོསསཱི’ཏི ཨཱཀཌྜྷིཏྭཱ ཏཾ ཋཱནཾ བྷིནྡིཏྭཱ ཀུལསནྟཀཾ དྷནཾ ནཱིཧརིཏྭཱ དཱསཾ ཨུཀྑིཔཱཔེཏྭཱ དྷནཾ ཨཱཧརཱ’’ཏི ཝཏྭཱ ཨིམཾ གཱཐམཱཧ –

༣༩.

‘‘མཉྙེ ¶ སོཝཎྞཡོ རཱསི, སོཝཎྞམཱལཱ ཙ ནནྡཀོ;

ཡཏྠ དཱསོ ཨཱམཛཱཏོ, ཋིཏོ ཐུལླཱནི གཛྫཏཱི’’ཏི.

ཏཏྠ ¶ མཉྙེཏི ཨེཝཾ ཨཧཾ ཛཱནཱམི. སོཝཎྞཡོཏི སུནྡརོ ཝཎྞོ ཨེཏེསནྟི སོཝཎྞཱནི. ཀཱནི ཏཱནི? རཛཏམཎིཀཉྩནཔཝཱལཱ༹དཱིནི རཏནཱནི. ཨིམསྨིཉྷི ཋཱནེ སབྦཱནེཏཱནི ‘‘སུཝཎྞཱནཱི’’ཏི ཨདྷིཔྤེཏཱནི, ཏེསཾ རཱསི སོཝཎྞཡོ རཱསི. སོཝཎྞམཱལཱ ཙཱཏི ཏུཡ྄ཧཾ པིཏུསནྟཀཱ སུཝཎྞམཱལཱ ཙ ཨེཏྠེཝཱཏི མཉྙཱམི. ནནྡཀོ ཡཏྠ དཱསོཏི ཡསྨིཾ ཋཱནེ ཋིཏོ ནནྡཀོ དཱསོ. ཨཱམཛཱཏོཏི ‘‘ཨཱམ, ཨཧཾ ཝོ དཱསཱི’’ཏི ཨེཝཾ དཱསབྱཾ ཨུཔགཏཱཡ ཨཱམདཱསིསངྑཱཏཱཡ དཱསིཡཱ པུཏྟོ. ཋིཏོ ཐུལླཱནི གཛྫཏཱིཏི ‘‘སོ ཡསྨིཾ ཋཱནེ ཋིཏོ ཐུལླཱནི ཕརུསཝཙནཱནི ཝདཏི, ཏཏྠེཝ ཏེ ཀུལསནྟཀཾ དྷནཾ, ཨེཝཾ ཨཧཾ ཏཾ མཉྙཱམཱི’’ཏི བོདྷིསཏྟོ ཀུམཱརསྶ དྷནགྒཧཎཱུཔཱཡཾ ཨཱཙིཀྑི.

ཀུམཱརོ ¶ བོདྷིསཏྟཾ ཝནྡིཏྭཱ གྷརཾ གནྟྭཱ ནནྡཾ ཨཱདཱཡ ནིདྷིཊྛཱནཾ གནྟྭཱ ཡཐཱནུསིཊྛཾ པཊིཔཛྫིཏྭཱ ཏཾ དྷནཾ ཨཱཧརིཏྭཱ ཀུཊུམྦཾ སཎྛཔེཏྭཱ བོདྷིསཏྟསྶ ཨོཝཱདེ ཋིཏོ དཱནཱདཱིནི པུཉྙཱནི ཀཏྭཱ ཛཱིཝིཏཔརིཡོསཱནེ ཡཐཱཀམྨཾ གཏོ.

སཏྠཱ ‘‘པུབྦེཔེས ཨེཝཾསཱིལོཡེཝཱ’’ཏི ཝཏྭཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ནནྡོ སཱརིཔུཏྟསྶ སདྡྷིཝིཧཱརིཀོ ཨཧོསི, པཎྜིཏཀུཊུམྦིཀོ པན ཨཧམེཝ ཨཧོསི’’ནྟི.

ནནྡཛཱཏཀཝཎྞནཱ ནཝམཱ.

[༤༠] ༡༠. ཁདིརངྒཱརཛཱཏཀཝཎྞནཱ

ཀཱམཾ པཏཱམི ནིརཡནྟི ཨིདཾ སཏྠཱ ཛེཏཝནེ ཝིཧརནྟོ ཨནཱཐཔིཎྜིཀཾ ཨཱརབྦྷ ཀཐེསི. ཨནཱཐཔིཎྜིཀོ ཧི ཝིཧཱརམེཝ ཨཱརབྦྷ ཙཏུཔཉྙཱསཀོཊིདྷནཾ བུདྡྷསཱསནེ པརིཙྩཛིཏྭཱ ཝིཀིརིཏྭཱ ཋཔེཏྭཱ ཏཱིཎི རཏནཱནི ཨཉྙཏྠ རཏནསཉྙམེཝ ཨནུཔྤཱདེཏྭཱ སཏྠརི ཛེཏཝནེ ཝིཧརནྟེ དེཝསིཀཾ ཏཱིཎི མཧཱཨུཔཊྛཱནཱནི གཙྪཏི. པཱཏོཝ ཨེཀཝཱརཾ གཙྪཏི, ཀཏཔཱཏརཱསོ ཨེཀཝཱརཾ, སཱཡནྷེ ཨེཀཝཱརཾ. ཨཉྙཱནིཔི ཨནྟརནྟརུཔཊྛཱནཱནི ཧོནྟིཡེཝ. གཙྪནྟོ ཙ ‘‘ཀིཾ ནུ ཁོ ཨཱདཱཡ ཨཱགཏོཏི སཱམཎེརཱ ཝཱ དཧརཱ ཝཱ ཧཏྠམྤི མེ ཨོལོཀེཡྻུ’’ནྟི ཏུཙྪཧཏྠོ ནཱམ ན གཏཔུབྦོ. པཱཏོཝ གཙྪནྟོ ཡཱགུཾ གཱཧཱཔེཏྭཱ ¶ གཙྪཏི, ཀཏཔཱཏརཱསོ སཔྤིནཝནཱིཏམདྷུཕཱཎིཏཱདཱིནིཔི, སཱཡནྷསམཡེ གནྡྷམཱལཱཝཏྠཱདིཧཏྠོཏི. ཨེཝཾ དིཝསེ དིཝསེ པརིཙྩཛནྟསྶ པནསྶ པརིཙྩཱགེ པམཱཎཾ ནཏྠི.

བཧཱུ ¶ ཝོཧཱརཱུཔཛཱིཝིནོཔིསྶ ཧཏྠཏོ པཎྞེ ཨཱརོཔེཏྭཱ ཨཊྛཱརསཀོཊིསངྑྱཾ དྷནཾ ཨིཎཾ གཎྷིཾསུ, ཏེ མཧཱསེཊྛི ན ཨཱཧརཱཔེཏི. ཨཉྙཱ པནསྶ ཀུལསནྟཀཱ ཨཊྛཱརས ཀོཊིཡོ ནདཱིཏཱིརེ ནིདཧིཏྭཱ ཋཔིཏཱ ཨཙིརཝཏོདཀེན ནདཱིཀཱུལེ བྷིནྣེ མཧཱསམུདྡཾ པཝིཊྛཱ, ཏཱ ཡཐཱཔིཧིཏལཉྪི ཏཱཝ ལོཧཙཱཊིཡོ ཨཎྜཝཀུཙྪིཡཾ པཝཊྚནྟཱ ཝིཙརནྟི. གེཧེ ¶ པནསྶ པཉྩནྣཾ བྷིཀྑུསཏཱནཾ ནིཙྩབྷཏྟཾ ནིབདྡྷམེཝ ཧོཏི. སེཊྛིནོ ཧི གེཧཾ བྷིཀྑུསངྒྷསྶ ཙཏུམཧཱཔཐེ ཁཏཔོཀྑརཎིསདིསཾ, སབྦབྷིཀྑཱུནཾ མཱཏཱཔིཏུཊྛཱནེ ཋིཏཾ. ཏེནསྶ གྷརཾ སམྨཱསམྦུདྡྷོཔི གཙྪཏི, ཨསཱིཏིམཧཱཐེརཱཔི གཙྪནྟིཡེཝ. སེསབྷིཀྑཱུནཾ པན གཙྪནྟཱནཉྩ ཨཱགཙྪནྟཱནཉྩ པམཱཎཾ ནཏྠི. ཏཾ པན གྷརཾ སཏྟབྷཱུམཀཾ སཏྟདྭཱརཀོཊྛཀཔཊིམཎྜིཏཾ, ཏསྶ ཙཏུཏྠེ དྭཱརཀོཊྛཀེ ཨེཀཱ མིཙྪཱདིཊྛིཀཱ དེཝཏཱ ཝསཏི, སཱ སམྨཱསམྦུདྡྷེ གེཧཾ པཝིསནྟེ ཨཏྟནོ ཝིམཱནེ ཋཱཏུཾ ན སཀྐོཏི, དཱརཀེ གཧེཏྭཱ ཨོཏརིཏྭཱ བྷཱུམིཡཾ ཏིཊྛཏི. ཨསཱིཏིམཧཱཐེརེསུཔི ཨཝསེསཏྠེརེསུཔི པཝིསནྟེསུ ཙ ནིཀྑམནྟེསུ ཙ ཏཐེཝ ཀརོཏི. སཱ ཙིནྟེསི ‘‘སམཎེ གོཏམེ ཙ སཱཝཀེསུ ཙསྶ ཨིམཾ གེཧཾ པཝིསནྟེསུ མཡ྄ཧཾ སུཁཾ ནཱམ ནཏྠི, ནིཙྩཀཱལཾ ཨོཏརིཏྭཱ ཨོཏརིཏྭཱ བྷཱུམིཡཾ ཋཱཏུཾ ན སཀྑིསྶཱམི. ཡཐཱ ཨིམེ ཨེཏཾ གྷརཾ ན པཝིསནྟི, ཏཐཱ མཡཱ ཀཱཏུཾ ཝཊྚཏཱི’’ཏི. ཨཐེཀདིཝསཾ སཡནཱུཔགཏསྶེཝ མཧཱཀམྨནྟིཀསྶ སནྟིཀཾ གནྟྭཱ ཨོབྷཱསཾ ཕརིཏྭཱ ཨཊྛཱསི. ‘‘ཀོ ཨེཏྠཱ’’ཏི ཙ ཝུཏྟེ ‘‘ཨཧཾ ཙཏུཏྠདྭཱརཀོཊྛཀེ ནིབྦཏྟདེཝཏཱ’’ཏི ཨཱཧ. ‘‘ཀསྨཱ ཨཱགཏཱསཱི’’ཏི? ‘‘ཀིཾ ཏུམྷེ སེཊྛིསྶ ཀིརིཡཾ ན པསྶཐ, ཨཏྟནོ པཙྪིམཀཱལཾ ཨནོལོཀེཏྭཱ དྷནཾ ནཱིཧརིཏྭཱ སམཎཾ གོཏམཾཡེཝ པཱུཛེཏི, ནེཝ ཝཎིཛྫཾ པཡོཛེཏི, ན ཀམྨནྟེ པཊྛཔེཏི, ཏུམྷེ སེཊྛིཾ ཏཐཱ ཨོཝདཐ, ཡཐཱ ཨཏྟནོ ཀམྨནྟཾ ཀརོཏི. ཡཐཱ ཙ སམཎོ གོཏམོ སསཱཝཀོ ཨིམཾ གྷརཾ ན པཝིསཏི, ཏཐཱ ཀརོཐཱ’’ཏི. ཨཐ ནཾ སོ ཨཱཧ ‘‘བཱལདེཝཏེ, སེཊྛི དྷནཾ ཝིསྶཛྫེནྟོ ནིཡྻཱནིཀེ བུདྡྷསཱསནེ ཝིསྶཛྫེཏི, སོ སཙེ མཾ ཙཱུལཱ༹ཡཾ གཧེཏྭཱ ཝིཀྐིཎིསྶཏི, ནེཝཱཧཾ ཀིཉྩི ཀཐེསྶཱམི, གཙྪ ཏྭཾ’’ནྟི. སཱ པུནེཀདིཝསཾ སེཊྛིནོ ཛེཊྛཔུཏྟཾ ཨུཔསངྐམིཏྭཱ ཏཐེཝ ཨོཝདི, སོཔི ཏཾ པུརིམནཡེནེཝ ཏཛྫེསི. སེཊྛིནཱ པན སདྡྷིཾ ཀཐེཏུཾཡེཝ ན སཀྐོཏི.

སེཊྛིནོཔི ནིརནྟརཾ དཱནཾ དེནྟསྶ ¶ ཝོཧཱརེ ཨཀརོནྟསྶ ཨཱཡེ མནྡཱིབྷཱུཏེ དྷནཾ པརིཀྑཡཾ ཨགམཱསི. ཨཐསྶ ཨནུཀྐམེན དཱལིདྡིཡཔྤཏྟསྶ པརིབྷོགསཱཊཀསཡནབྷོཛནཱནིཔི པུརཱཎསདིསཱནི ན བྷཝིཾསུ. ཨེཝཾབྷཱུཏོཔི བྷིཀྑུསངྒྷསྶ དཱནཾ དེཏི, པཎཱིཏཾ པན ཀཏྭཱ དཱཏུཾ ན སཀྐོཏི ¶ . ཨཐ ནཾ ཨེཀདིཝསཾ ཝནྡིཏྭཱ ནིསིནྣཾ སཏྠཱ ‘‘དཱིཡཏི པན ཏེ, གཧཔཏི, ཀུལེ དཱན’’ནྟི པུཙྪི. སོ ‘‘དཱིཡཏི, བྷནྟེ, ཏཉྩ ཁོ ཀཎཱཛཀཾ བིལངྒདུཏིཡ’’ནྟི ཨཱཧ. ཨཐ ནཾ སཏྠཱ ‘‘གཧཔཏི, ‘ལཱུཁཾ དཱནཾ དེམཱི’ཏི མཱ ཙིཏྟཾ སངྐོཙཡིཏྠ ¶ . ཙིཏྟསྨིཉྷི པཎཱིཏེ བུདྡྷཔཙྩེཀབུདྡྷབུདྡྷསཱཝཀཱནཾ དིནྣདཱནཾ ལཱུཁཾ ནཱམ ན ཧོཏི. ཀསྨཱ? ཝིཔཱཀམཧནྟཏྟཱ’’ཏི ཨཱཧ. ཙིཏྟཉྷི པཎཱིཏཾ ཀཱཏུཾ སཀྐོནྟསྶ དཱནཾ ལཱུཁཾ ནཱམ ནཏྠཱིཏི ཙེཏཾ ཨེཝཾ ཝེདིཏབྦཾ –

‘‘ནཏྠི ཙིཏྟེ པསནྣམྷི, ཨཔྤཀཱ ནཱམ དཀྑིཎཱ;

ཏཐཱགཏེ ཝཱ སམྦུདྡྷེ, ཨཐ ཝཱ ཏསྶ སཱཝཀེ. (ཝི. ཝ. ༨༠༤);

‘‘ན ཀིརཏྠི ཨནོམདསྶིསུ, པཱརིཙརིཡཱ བུདྡྷེསུ ཨཔྤཀཱ;

སུཀྑཱཡ ཨལོཎིཀཱཡ ཙ, པསྶ ཕལཾ ཀུམྨཱསཔིཎྜིཡཱ’’ཏི.

ཨཔརམྤི ནཾ ཨཱཧ ‘‘གཧཔཏི, ཏྭཾ ཏཱཝ ལཱུཁཾ དཱནཾ དདམཱནོ ཨཊྛནྣཾ ཨརིཡཔུགྒལཱནཾ དེསི, ཨཧཾ ཝེལཱམཀཱལེ སཀལཛམྦུདཱིཔཾ ཨུནྣངྒལཾ ཀཏྭཱ སཏྟ རཏནཱནི དདམཱནོ པཉྩ མཧཱནདིཡོ ཨེཀོགྷཔུཎྞཾ ཀཏྭཱ ཝིཡ ཙ མཧཱདཱནཾ པཝཏྟཡམཱནོ ཏིསརཎགཏཾ ཝཱ པཉྩསཱིལརཀྑནཀཾ ཝཱ ཀཉྩི ནཱལཏྠཾ, དཀྑིཎེཡྻཔུགྒལཱ ནཱམ ཨེཝཾ དུལླབྷཱ. ཏསྨཱ ‘ལཱུཁཾ མེ དཱན’ནྟི མཱ ཙིཏྟཾ སངྐོཙཡིཏྠཱ’’ཏི ཨེཝཉྩ པན ཝཏྭཱ ཝེལཱམསུཏྟཾ (ཨ. ནི. ༩.༢༠) ཀཐེསི.

ཨཐ ཁོ སཱ དེཝཏཱ ཨིསྶརཀཱལེ སེཊྛིནཱ སདྡྷིཾ ཀཐེཏུམྤི ཨསཀྐོནྟཱི ‘‘ཨིདཱནཱཡཾ དུགྒཏཏྟཱ མམ ཝཙནཾ གཎྷིསྶཏཱི’’ཏི མཉྙམཱནཱ ཨཌྜྷརཏྟསམཡེ སིརིགབྦྷཾ པཝིསིཏྭཱ ཨོབྷཱསཾ ཕརིཏྭཱ ཨཱཀཱསེ ཨཊྛཱསི. སེཊྛི ཏཾ དིསྭཱ ‘‘ཀོ ཨེསོ’’ཏི ཨཱཧ. ‘‘ཨཧཾ མཧཱསེཊྛི ཙཏུཏྠདྭཱརཀོཊྛཀེ ཨདྷིཝཏྠཱ, དེཝཏཱ’’ཏི. ‘‘ཀིམཏྠམཱགཏཱསཱི’’ཏི? ‘‘ཏུཡ྄ཧཾ ཨོཝཱདཾ ཀཐེཏུཀཱམཱ ཧུཏྭཱ ཨཱགཙྪཱམཱི’’ཏི. ‘‘ཏེན ཧི ཀཐེཧཱི’’ཏི. མཧཱསེཊྛི ཏྭཾ པཙྪིམཀཱལཾ ན ཙིནྟེསི, པུཏྟདྷཱིཏརོ ན ཨོལོཀེསི, སམཎསྶ ཏེ གོཏམསྶ སཱསནེ བཧུཾ དྷནཾ ཝིཔྤཀིཎྞཾ, སོ ཏྭཾ ཨཏིཝེལཾ དྷནཝིསྶཛྫནེན ¶ ཝཱ ཝཎིཛྫཱདིཀམྨཱནཾ ཨཀརཎེན ཝཱ ¶ སམཎཾ གོཏམཾ ནིསྶཱཡ དུགྒཏོ ཛཱཏོ, ཨེཝཾབྷཱུཏོཔི སམཎཾ གོཏམཾ ན མུཉྩསི, ཨཛྫཔི ཏེ སམཎཱ གྷརཾ པཝིསནྟིཡེཝ. ཡཾ ཏཱཝ ཏེཧི ནཱིཏཾ, ཏཾ ན སཀྐཱ པཙྩཱཧརཱཔེཏུཾ, གཧིཏཾ གཧིཏམེཝ ཧོཏུ, ཨིཏོ པཊྛཱཡ པན སཡཉྩ སམཎསྶ གོཏམསྶ སནྟིཀཾ མཱ གམིཏྠ, སཱཝཀཱནཉྩསྶ ཨིམཾ གྷརཾ པཝིསིཏུཾ མཱ ཨདཱསི, སམཎཾ གོཏམཾ ནིཝཏྟིཏྭཱཔི ཨནོལོཀེནྟོ ཨཏྟནོ ཝོཧཱརེ ཙ ཝཎིཛྫཉྩ ཀཏྭཱ ཀུཊུམྦཾ སཎྛཔེཧཱི’’ཏི. ཨཐ ནཾ སོ ཨེཝམཱཧ ‘‘ཨཡཾ ཏཡཱ མཡ྄ཧཾ དཱཏབྦཨོཝཱདོ’’ཏི. ‘‘ཨཱམ, ཨཡྻཱ’’ཏི. ཏཱདིསཱནཾ དེཝཏཱནཾ སཏེནཔི སཧསྶེནཔི སཏསཧསྶེནཔི ¶ ཨཀམྤནཱིཡོ ཨཧཾ དསབལེན ཀཏོ. མམ ཧི སདྡྷཱ སིནེརུ ཝིཡ ཨཙལཱ སུཔྤཏིཊྛིཏཱ, མཡཱ ནིཡྻཱནིཀེ རཏནསཱསནེ དྷནཾ ཝིསྶཛྫིཏཾ, ཨཡུཏྟཾ ཏེ ཀཐིཏཾ, བུདྡྷསཱསནེ པཧཱརོ དིནྣོ, ཨེཝརཱུཔཱཡ ཨནཱཙཱརཱཡ དུསྶཱིལཱཡ ཀཱལ༹ཀཎྞིཡཱ སདྡྷིཾ ཏཡཱ མམ ཨེཀགེཧེ ཝསནཀིཙྩཾ ནཏྠི, སཱིགྷཾ མམ གེཧཱ ནིཀྑམིཏྭཱ ཨཉྙཏྠ གཙྪཱཏི.

སཱ སོཏཱཔནྣསྶ ཨརིཡསཱཝཀསྶ ཝཙནཾ སུཏྭཱ ཋཱཏུཾ ཨསཀྐོནྟཱི ཨཏྟནོ ཝསནཊྛཱནཾ གནྟྭཱ དཱརཀེ ཧཏྠེན གཧེཏྭཱ ནིཀྑམི. ནིཀྑམིཏྭཱ ཙ པན ཨཉྙཏྠ ཝསནཊྛཱནཾ ཨལབྷམཱནཱ ‘‘སེཊྛིཾ ཁམཱཔེཏྭཱ ཏཏྠེཝ ཝསིསྶཱམཱི’’ཏི ཙིནྟེཏྭཱ ནགརཔརིགྒཱཧཀདེཝཔུཏྟསྶ སནྟིཀཾ གནྟྭཱ ཏཾ ཝནྡིཏྭཱ ཨཊྛཱསི. ‘‘ཀེནཊྛེན ཨཱགཏཱསཱི’’ཏི ཙ ཝུཏྟེ ‘‘ཨཧཾ སཱམི, ཨཏྟནོ བཱལཏཱཡ ཨནུཔདྷཱརེཏྭཱ ཨནཱཐཔིཎྜིཀེན སེཊྛིནཱ སདྡྷིཾ ཀཐེསིཾ, སོ མཾ ཀུཛ྄ཛྷིཏྭཱ ཝསནཊྛཱནཱ ནིཀྐཌྜྷི, མཾ སེཊྛིསྶ སནྟིཀཾ ནེཏྭཱ ཁམཱཔེཏྭཱ ཝསནཊྛཱནཾ མེ དེཐཱ’’ཏི. ‘‘ཀིཾ པན ཏཡཱ སེཊྛི ཝུཏྟོ’’ཏི ‘‘ཨིཏོ པཊྛཱཡ བུདྡྷུཔཊྛཱནཾ སངྒྷུཔཊྛཱནཾ མཱ ཀརི, སམཎསྶ གོཏམསྶ གྷརཔྤཝེསནཾ མཱ ཨདཱསཱི’’ཏི ‘‘ཨེཝཾ མེ ཝུཏྟོ, སཱམཱི’’ཏི. ཨཡུཏྟཾ ཏཡཱ ཝུཏྟཾ, སཱསནེ པཧཱརོ དིནྣོ, ‘‘ཨཧཾ ཏཾ ཨཱདཱཡ སེཊྛིནོ སནྟིཀཾ གནྟུཾ ན ཨུསྶཧཱམཱི’’ཏི. སཱ ཏསྶ སནྟིཀཱ སངྒཧཾ ཨལབྷིཏྭཱ ཙཏུནྣཾ མཧཱརཱཛཱནཾ སནྟིཀཾ ཨགམཱསི.

ཏེཧིཔི ཏཐེཝ པཊིཀྑིཏྟཱ སཀྐཾ དེཝརཱཛཾ ཨུཔསངྐམིཏྭཱ ཏཾ པཝཏྟིཾ ཨཱཙིཀྑིཏྭཱ ‘‘ཨཧཾ, དེཝ, ཝསནཊྛཱནཾ ཨལབྷམཱནཱ དཱརཀེ ཧཏྠེན གཧེཏྭཱ ཨནཱཐཱ ཝིཙརཱམི, ཏུམྷཱཀཾ སིརིཡཱ མཡ྄ཧཾ ཝསནཊྛཱནཾ དཱཔེཐཱ’’ཏི སུཊྛུཏརཾ ¶ ཡཱཙི. སོཔི ནཾ ཨཱཧ ‘‘ཏཡཱ ཨཡུཏྟཾ ཀཏཾ, ཛིནསཱསནེ པཧཱརོ དིནྣོ, ཨཧམྤི ཏཾ ནིསྶཱཡ སེཊྛིནཱ སདྡྷིཾ ཀཐེཏུཾ ན སཀྐོམི, ཨེཀཾ པན ཏེ སེཊྛིསྶ ཁམནཱུཔཱཡཾ ¶ ཀཐེསྶཱམཱི’’ཏི. ‘‘སཱདྷུ, དེཝ, ཀཐེཧཱི’’ཏི. མཧཱསེཊྛིསྶ ཧཏྠཏོ མནུསྶེཧི པཎྞེ ཨཱརོཔེཏྭཱ ཨཊྛཱརསཀོཊིསངྑྱཾ དྷནཾ གཧིཏཾ ཨཏྠི, ཏྭཾ ཏསྶ ཨཱཡུཏྟཀཝེསཾ གཧེཏྭཱ ཀཉྩི ཨཛཱནཱཔེཏྭཱ ཏཱནི པཎྞཱནི ཨཱདཱཡ ཀཏིཔཡེཧི ཡཀྑཏརུཎེཧི པརིཝཱརིཏཱ ཨེཀེན ཧཏྠེན པཎྞཾ, ཨེཀེན ལེཁནིཾ གཧེཏྭཱ ཏེསཾ གེཧཾ གནྟྭཱ གེཧམཛ྄ཛྷེ ཋིཏཱ ཨཏྟནོ ཡཀྑཱནུབྷཱཝེན ཏེ ཨུཏྟཱསེཏྭཱ ‘‘ཨིདཾ ཏུམྷཱཀཾ ཨིཎཔཎྞཾ, ཨམྷཱཀཾ སེཊྛི ཨཏྟནོ ཨིསྶརཀཱལེ ཏུམྷེ ན ཀིཉྩི ཨཱཧ, ཨིདཱནི དུགྒཏོ ཛཱཏོ, ཏུམྷེཧི གཧིཏཀཧཱཔཎཱནི དེཐཱ’’ཏི ཨཏྟནོ ཡཀྑཱནུབྷཱཝཾ དསྶེཏྭཱ སབྦཱཔི ཏཱ ཨཊྛཱརས ཧིརཉྙཀོཊིཡོ སཱདྷེཏྭཱ སེཊྛིསྶ ཏུཙྪཀོཊྛཀེ པཱུརེཏྭཱ ཨཉྙཾ ཨཙིརཝཏིནདཱིཏཱིརེ ནིདཧིཏཾ དྷནཾ ནདཱིཀཱུལེ བྷིནྣེ སམུདྡཾ པཝིཊྛཾ ཨཏྠི, ཏམྤི ཨཏྟནོ ཨཱནུབྷཱཝེན ཨཱཧརིཏྭཱ ཏུཙྪཀོཊྛཀེ པཱུརེཏྭཱ, ཨཉྙམྤི ཨསུཀཊྛཱནེ ནཱམ ཨསྶཱམིཀཾ ཨཊྛཱརསཀོཊིམཏྟམེཝ ¶ དྷནཾ ཨཏྠི, ཏམྤི ཨཱཧརིཏྭཱ ཏུཙྪཀོཊྛཀེ པཱུརེཧི, ཨིམཱཧི ཙཏུཔཉྙཱསཀོཊཱིཧི ཨིམཾ ཏུཙྪཀོཊྛཀཔཱུརཀཾ དཎྜཀམྨཾ ཀཏྭཱ མཧཱསེཊྛིཾ ཁམཱཔེཧཱིཏི.

སཱ ‘‘སཱདྷུ, དེཝཱ’’ཏི ཏསྶ ཝཙནཾ སམྤཊིཙྪིཏྭཱ ཝུཏྟནཡེནེཝ སབྦཾ དྷནཾ ཨཱཧརིཏྭཱ ཀོཊྛཀེ པཱུརེཏྭཱ ཨཌྜྷརཏྟསམཡེ སེཊྛིསྶ སིརིགབྦྷཾ པཝིསིཏྭཱ ཨོབྷཱསཾ ཕརིཏྭཱ ཨཱཀཱསེ ཨཊྛཱསི. ‘‘ཀོ ཨེསོ’’ཏི ཝུཏྟེ ‘‘ཨཧཾ ཏེ མཧཱསེཊྛི ཙཏུཏྠདྭཱརཀོཊྛཀེ ཨདྷིཝཏྠཱ ཨནྡྷབཱལདེཝཏཱ, མཡཱ མཧཱམོཧམཱུལ༹ྷཱཡ བུདྡྷགུཎེ ཨཛཱནིཏྭཱ པུརིམེསུ དིཝསེསུ ཏུམྷེཧི སདྡྷིཾ ཀིཉྩི ཀཐིཏཾ ཨཏྠི, ཏཾ མེ དོསཾ ཁམཐ. སཀྐསྶ ཧི མེ དེཝརཱཛསྶ ཝཙནེན ཏུམྷཱཀཾ ཨིཎཾ སོདྷེཏྭཱ ཨཊྛཱརས ཀོཊིཡོ, སམུདྡཾ གཏཱ ཨཊྛཱརས ཀོཊིཡོ, ཏསྨིཾ ཏསྨིཾ ཋཱནེ ཨསྶཱམིཀདྷནསྶ ཨཊྛཱརས ཀོཊིཡོཏི ཙཏུཔཎྞཱས ཀོཊིཡོ ཨཱཧརིཏྭཱ ཏུཙྪཀོཊྛཀཔཱུརཎེན དཎྜཀམྨཾ ཀཏཾ, ཛེཏཝནཝིཧཱརཾ ཨཱརབྦྷ པརིཀྑཡཾ གཏདྷནཾ སབྦཾ སམྤིཎྜིཏཾ, ཝསནཊྛཱནཾ ཨལབྷམཱནཱ ཀིལམཱམི, མཡཱ ¶ ཨཉྙཱཎཏཱཡ ཀཐིཏཾ མནསི ཨཀཏྭཱ ཁམཐ མཧཱསེཊྛཱི’’ཏི ཨཱཧ.

ཨནཱཐཔིཎྜིཀོ ཏསྶཱ ཝཙནཾ སུཏྭཱ ཙིནྟེསི ‘‘ཨཡཾ དེཝཏཱ ‘དཎྜཀམྨཉྩ མེ ཀཏ’ནྟི ཝདཏི, ཨཏྟནོ ཙ དོསཾ པཊིཛཱནཱཏི, སཏྠཱ ཨིམཾ ཝིནེཏྭཱ ཨཏྟནོ གུཎེ ཛཱནཱཔེསྶཏི, སམྨཱསམྦུདྡྷསྶ ནཾ དསྶེསྶཱམཱི’’ཏི. ཨཐ ནཾ ཨཱཧ ‘‘ཨམྨ, དེཝཏེ, སཙེསི མཾ ཁམཱཔེཏུཀཱམཱ, སཏྠུ སནྟིཀེ མཾ ཁམཱཔེཧཱི’’ཏི. སཱདྷུ ཨེཝཾ ཀརིསྶཱམི, ‘‘སཏྠུ པན མཾ སནྟིཀཾ གཧེཏྭཱ གཙྪཱཧཱི’’ཏི. སོ ‘‘སཱདྷཱུ’’ཏི ཝཏྭཱ ཝིབྷཱཏཱཡ རཏྟིཡཱ པཱཏོཝ ཏཾ གཧེཏྭཱ སཏྠུ སནྟིཀཾ གནྟྭཱ ཏཱཡ ཀཏཀམྨཾ སབྦཾ ཏཐཱགཏསྶ ཨཱརོཙེསི. སཏྠཱ ཏསྶ ཝཙནཾ སུཏྭཱ ‘‘ཨིདྷ, གཧཔཏི, པཱཔཔུགྒལོཔི ཡཱཝ པཱཔཾ ན པཙྩཏི ¶ , ཏཱཝ བྷདྲཱནི པསྶཏི. ཡདཱ པནསྶ པཱཔཾ པཙྩཏི, ཏདཱ པཱཔམེཝ པསྶཏི. བྷདྲཔུགྒལོཔི ཡཱཝ བྷདྲཾ ན པཙྩཏི, ཏཱཝ པཱཔཱནི པསྶཏི. ཡདཱ པནསྶ བྷདྲཾ པཙྩཏི, ཏདཱ བྷདྲམེཝ པསྶཏཱི’’ཏི ཝཏྭཱ ཨིམཱ དྷམྨཔདེ དྭེ གཱཐཱ ཨབྷཱསི –

‘‘པཱཔོཔི པསྶཏཱི བྷདྲཾ, ཡཱཝ པཱཔཾ ན པཙྩཏི;

ཡདཱ ཙ པཙྩཏཱི པཱཔཾ, ཨཐ པཱཔོ པཱཔཱནི པསྶཏི.

‘‘བྷདྲོཔི ¶ པསྶཏཱི པཱཔཾ, ཡཱཝ བྷདྲཾ ན པཙྩཏི;

ཡདཱ ཙ པཙྩཏཱི བྷདྲཾ, ཨཐ བྷདྲོ བྷདྲཱནི པསྶཏཱི’’ཏི. (དྷ. པ. ༡༡༩-༡༢༠);

ཨིམཱསཉྩ པན གཱཐཱནཾ པརིཡོསཱནེ སཱ དེཝཏཱ སོཏཱཔཏྟིཕལེ པཏིཊྛཱསི. སཱ ཙཀྐངྐིཏེསུ སཏྠུ པཱདེསུ ནིཔཏིཏྭཱ ‘‘མཡཱ, བྷནྟེ, རཱགརཏྟཱཡ དོསཔདུཊྛཱཡ མོཧམཱུལ༹ྷཱཡ ཨཝིཛྫནྡྷཱཡ ཏུམྷཱཀཾ གུཎེ ཨཛཱནནྟིཡཱ པཱཔཀཾ ཝཙནཾ ཝུཏྟཾ, ཏཾ མེ ཁམཐཱ’’ཏི སཏྠཱརཾ ཁམཱཔེཏྭཱ མཧཱསེཊྛིམྤི ཁམཱཔེསི.

ཏསྨིཾ སམཡེ ཨནཱཐཔིཎྜིཀོ སཏྠུ པུརཏོ ཨཏྟནོ གུཎཾ ཀཐེསི ‘‘བྷནྟེ, ཨཡཾ དེཝཏཱ ‘བུདྡྷུཔཊྛཱནཱདཱིནི མཱ ཀརོཧཱི’ཏི ཝཱརཡམཱནཱཔི མཾ ཝཱརེཏུཾ ནཱསཀྑི, ‘དཱནཾ ན དཱཏབྦ’ནྟི ཨིམཱཡ ཝཱརིཡམཱནོཔཧཾ དཱནཾ ཨདཱསིམེཝ, ནཱུན ཨེས, བྷནྟེ, མཡ྄ཧཾ གུཎོ’’ཏི. སཏྠཱ ‘‘ཏྭཾ ཁོསི གཧཔཏི སོཏཱཔནྣོ ཨརིཡསཱཝཀོ ཨཙལསདྡྷོ ཝིསུདྡྷདསྶནོ, ཏུཡ྄ཧཾ ཨིམཱཡ ཨཔྤེསཀྑདེཝཏཱཡ ཝཱརེནྟིཡཱ ཨཝཱརིཏབྷཱཝོ ན ཨཙྪརིཡོ ¶ . ཡཾ པན པུབྦེ པཎྜིཏཱ ཨནུཔྤནྣེ བུདྡྷེ ཨཔརིཔཀྐཉཱཎེ ཋིཏཱ ཀཱམཱཝཙརིསྶརེན མཱརེན ཨཱཀཱསེ ཋཏྭཱ ‘སཙེ དཱནཾ དསྶསི, ཨིམསྨིཾ ནིརཡེ པཙྩིསྶསཱི’ཏི ཨསཱིཏིཧཏྠགམྦྷཱིརཾ ཨངྒཱརཀཱསུཾ དསྶེཏྭཱ ‘མཱ དཱནཾ ཨདཱསཱི’ཏི ཝཱརིཏཱཔི པདུམཀཎྞིཀཱམཛ྄ཛྷེ ཋཏྭཱ དཱནཾ ཨདཾསུ, ཨིདཾ ཨཙྪརིཡ’’ནྟི ཝཏྭཱ ཨནཱཐཔིཎྜིཀེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ བཱརཱཎསིསེཊྛིསྶ ཀུལེ ནིབྦཏྟིཏྭཱ ནཱནཔྤཀཱརེཧི སུཁཱུཔཀརཎེཧི དེཝཀུམཱརོ ཝིཡ སཾཝཌྜྷིཡམཱནོ ཨནུཀྐམེན ཝིཉྙུཏཾ པཏྭཱ སོལ༹སཝསྶཀཱལེཡེཝ སབྦསིཔྤེསུ ནིཔྥཏྟིཾ པཏྟོ. སོ པིཏུ ཨཙྩཡེན སེཊྛིཊྛཱནེ ཋཏྭཱ ཙཏཱུསུ ནགརདྭཱརེསུ ཙཏསྶོ དཱནསཱལཱཡོ, མཛ྄ཛྷེ ནགརསྶ ཨེཀཾ, ཨཏྟནོ ནིཝེསནདྭཱརེ ཨེཀནྟི ཚ དཱནསཱལཱཡོ ཀཱརེཏྭཱ མཧཱདཱནཾ དེཏི, སཱིལཾ ¶ རཀྑཏི, ཨུཔོསཐཀམྨཾ ཀརོཏི.

ཨཐེཀདིཝསཾ པཱཏརཱསཝེལཱཡ བོདྷིསཏྟསྶ ནཱནགྒརསེ མནུཉྙབྷོཛནེ ཨུཔནཱིཡམཱནེ ཨེཀོ པཙྩེཀབུདྡྷོ སཏྟཱཧཙྩཡེན ནིརོདྷཱ ཝུཊྛཱཡ བྷིཀྑཱཙཱརཝེལཾ སལླཀྑེཏྭཱ ‘‘ཨཛྫ མཡཱ བཱརཱཎསིསེཊྛིསྶ གེཧདྭཱརཾ གནྟུཾ ཝཊྚཏཱི’’ཏི ནཱགལཏཱདནྟཀཊྛཾ ཁཱདིཏྭཱ ཨནོཏཏྟདཧེ མུཁདྷོཝནཾ ཀཏྭཱ མནོསིལཱཏལེ ཋིཏོ ནིཝཱསེཏྭཱ ཝིཛྫུལཏཱསདིསཾ ཀཱཡབནྡྷནཾ བནྡྷིཏྭཱ ཙཱིཝརཾ པཱརུཔིཏྭཱ ཨིདྡྷིམཡམཏྟིཀཱཔཏྟཾ ཨཱདཱཡ ཨཱཀཱསེནཱགནྟྭཱ བོདྷིསཏྟསྶ བྷཏྟེ ཨུཔནཱིཏམཏྟེ གེཧདྭཱརེ ¶ ཨཊྛཱསི. བོདྷིསཏྟོ ཏཾ དིསྭཱཝ ཨཱསནཱ ཝུཊྛཱཡ ནིཔཙྩཀཱརཾ དསྶེཏྭཱ པརིཀམྨཀཱརཀཾ ཨོལོཀེསི. ‘‘ཀིཾ ཀརོམི, སཱམཱི’’ཏི ཙ ཝུཏྟེ ‘‘ཨཡྻསྶ པཏྟཾ ཨཱཧརཐཱ’’ཏི ཨཱཧ. ཏངྑཎཉྙེཝ མཱརོ པཱཔིམཱ ཝིཀམྤམཱནོ ཨུཊྛཱཡ ‘‘ཨཡཾ པཙྩེཀབུདྡྷོ ཨིཏོ སཏྟམེ དིཝསེ ཨཱཧཱརཾ ལབྷི, ཨཛྫ ཨལབྷམཱནོ ཝིནསྶིསྶཏི, ཨིམཉྩ ཝིནཱསེསྶཱམི, སེཊྛིནོ ཙ དཱནནྟརཱཡཾ ཀརིསྶཱམཱི’’ཏི ཏངྑཎཉྙེཝ ཨཱགནྟྭཱ ཨནྟརཝཏྠུམྷི ཨསཱིཏིཧཏྠམཏྟཾ ཨངྒཱརཀཱསུཾ ནིམྨིནི. སཱ ཁདིརངྒཱརཔུཎྞཱ སམྤཛྫལིཏཱ སཛོཏིབྷཱུཏཱ ཨཝཱིཙིམཧཱནིརཡོ ཝིཡ ཁཱཡིཏྠ. ཏཾ པན མཱཔེཏྭཱ སཡཾ ཨཱཀཱསེ ཨཊྛཱསི. པཏྟཱཧརཎཏྠཱཡ གཙྪམཱནོ པུརིསོ ཏཾ དིསྭཱ མཧཱབྷཡཔྤཏྟོ ནིཝཏྟི. བོདྷིསཏྟོ ‘‘ཀིཾ, ཏཱཏ, ནིཝཏྟོསཱི’’ཏི པུཙྪི. ཨཡཾ སཱམི ཨནྟརཝཏྠུམྷི མཧཏཱི ཨངྒཱརཀཱསུ སམྤཛྫལིཏཱ སཛོཏིབྷཱུཏཱཏི ¶ . ཨཐཉྙོ ཨཐཉྙོཏི ཨེཝཾ ཨཱགཏཱགཏཱ སབྦེཔི བྷཡཔྤཏྟཱ ཝེགེན པལཱཡིཾསུ.

བོདྷིསཏྟོ ཙིནྟེསི ‘‘ཨཛྫ མཡ྄ཧཾ དཱནནྟརཱཡཾ ཀཱཏུཀཱམོ ཝསཝཏྟཱི མཱརོ ཨུཡྻུཏྟོ བྷཝིསྶཏི, ན ཁོ པན ཛཱནཱཏི མཱརསཏེན མཱརསཧསྶེནཔི མཡ྄ཧཾ ཨཀམྤིཡབྷཱཝཾ, ཨཛྫ དཱནི མཡ྄ཧཾ ཝཱ མཱརསྶ ཝཱ བལམཧནྟཏཾ, ཨཱནུབྷཱཝམཧནྟཏཾ ཛཱནིསྶཱམཱི’’ཏི ཏཾ ཡཐཱསཛྫིཏམེཝ བྷཏྟཔཱཏིཾ སཡཾ ཨཱདཱཡ གེཧཱ ནིཀྑམྨ ཨངྒཱརཀཱསུཏཊེ ཋཏྭཱ ཨཱཀཱསཾ ཨུལློཀེཏྭཱ མཱརཾ དིསྭཱ ‘‘ཀོསི ཏྭ’’ནྟི ཨཱཧ. ‘‘ཨཧཾ, མཱརོ’’ཏི. ‘‘ཨཡཾ ཨངྒཱརཀཱསུ ཏཡཱ ནིམྨིཏཱ’’ཏི? ‘‘ཨཱམ, མཡཱ’’ཏི ¶ . ‘‘ཀིམཏྠཱཡཱ’’ཏི. ‘‘ཏཝ དཱནསྶ ཨནྟརཱཡཀརཎཏྠཱཡ ཙ པཙྩེཀབུདྡྷསྶ ཙ ཛཱིཝིཏནཱསནཏྠཱཡཱ’’ཏི. བོདྷིསཏྟོ ‘‘ནེཝ ཏེ ཨཧཾ ཨཏྟནོ དཱནསྶ ཨནྟརཱཡཾ, ན པཙྩེཀབུདྡྷསྶ ཛཱིཝིཏནྟརཱཡཾ ཀཱཏུཾ དསྶཱམི, ཨཛྫ དཱནི མཡ྄ཧཾ ཝཱ ཏུཡ྄ཧཾ ཝཱ བལམཧནྟཏཾ, ཨཱནུབྷཱཝམཧནྟཏཾ ཛཱནིསྶཱམཱི’’ཏི ཨངྒཱརཀཱསུཏཊེ ཋཏྭཱ ‘‘བྷནྟེ, པཙྩེཀབུདྡྷ ཨཧཾ ཨིམིསྶཱ ཨངྒཱརཀཱསུཡཱ ཨདྷོསཱིསོ པཏམཱནོཔི ན ནིཝཏྟིསྶཱམི, ཀེཝལཾ ཏུམྷེ མཡཱ དིནྣཾ བྷོཛནཾ པཊིགྒཎྷཐཱ’’ཏི ཝཏྭཱ ཨིམཾ གཱཐམཱཧ –

༤༠.

‘‘ཀཱམཾ པཏཱམི ནིརཡཾ, ཨུདྡྷཾཔཱདོ ཨཝཾསིརོ;

ནཱནརིཡཾ ཀརིསྶཱམི, ཧནྡ པིཎྜཾ པཊིགྒཧཱ’’ཏི.

ཏཏྠཱཡཾ པིཎྜཏྠོ – བྷནྟེ, པཙྩེཀཝརབུདྡྷ སཙེཔཧཾ ཏུམྷཱཀཾ པིཎྜཔཱཏཾ དེནྟོ ཨེཀཾསེནེཝ ཨིམཾ ནིརཡཾ ཨུདྡྷཾཔཱདོ ཨཝཾསིརོ ཧུཏྭཱ པཏཱམི, ཏཐཱཔི ཡདིདཾ ཨདཱནཉྩ ཨསཱིལཉྩ ཨརིཡེཧི ཨཀཏྟབྦཏྟཱ ཨནརིཡེཧི ཙ ཀཏྟབྦཏྟཱ ‘‘ཨནརིཡ’’ནྟི ཝུཙྩཏི, ‘‘ན ཏཾ ཨནརིཡཾ ཀརིསྶཱམི ¶ , ཧནྡ ཨིམཾ མཡཱ དཱིཡམཱནཾ པིཎྜཾ པཊིགྒཧ པཊིགྒཎྷཱཧཱི’’ཏི. ཨེཏྠ ཙ ཧནྡཱཏི ཝོསྶགྒཏྠེ ནིཔཱཏོ.

ཨེཝཾ ཝཏྭཱ བོདྷིསཏྟོ དལ༹ྷསམཱདཱནེན བྷཏྟཔཱཏིཾ གཧེཏྭཱ ཨངྒཱརཀཱསུམཏྠཀེན པཀྑནྟོ, ཏཱཝདེཝ ཨསཱིཏིཧཏྠགམྦྷཱིརཱཡ ཨངྒཱརཀཱསུཡཱ ཏལཏོ ཨུཔརཱུཔརིཛཱཏཾ སཏཔཏྟཔུཔྥིཏཾ ཨེཀཾ མཧཱཔདུམཾ ཨུགྒནྟྭཱ བོདྷིསཏྟསྶ པཱདེ སམྤཊིཙྪི. ཏཏོ མཧཱཏུམྦམཏྟཱ རེཎུ ཨུགྒནྟྭཱ ¶ མཧཱསཏྟསྶ མུདྡྷནི ཋཏྭཱ སཀལསརཱིརཾ སུཝཎྞཙུཎྞསམོཀིཎྞམིཝ ཨཀཱསི. སོ པདུམཀཎྞིཀཱཡ ཋཏྭཱ ནཱནགྒརསབྷོཛནཾ པཙྩེཀབུདྡྷསྶ པཏྟེ པཏིཊྛཱཔེསི. སོ ཏཾ པཊིགྒཧེཏྭཱ ཨནུམོདནཾ ཀཏྭཱ པཏྟཾ ཨཱཀཱསེ ཁིཔིཏྭཱ པསྶནྟསྶེཝ མཧཱཛནསྶ སཡམྤི ཝེཧཱསཾ ཨབྦྷུགྒནྟྭཱ ནཱནཔྤཀཱརཾ ཝལཱཧཀཔནྟིཾ མདྡམཱནོ ཝིཡ ཧིམཝནྟམེཝ གཏོ. མཱརོཔི པརཱཛིཏོ དོམནསྶཾ པཏྭཱ ཨཏྟནོ ཝསནཊྛཱནམེཝ གཏོ. བོདྷིསཏྟོ པན པདུམཀཎྞིཀཱཡ ཋིཏཀོཝ མཧཱཛནསྶ དཱནསཱིལསཾཝཎྞནེན ¶ དྷམྨཾ དེསེཏྭཱ མཧཱཛནེན པརིཝུཏོ ཨཏྟནོ ནིཝེསནམེཝ པཝིསིཏྭཱ ཡཱཝཛཱིཝཾ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ‘‘ནཡིདཾ, གཧཔཏི, ཨཙྪརིཡཾ, ཡཾ ཏྭཾ ཨེཝཾ དསྶནསམྤནྣོ ཨེཏརཧི དེཝཏཱཡ ན ཀམྤིཏོ, པུབྦེ པཎྜིཏེཧི ཀཏམེཝ ཨཙྪརིཡ’’ནྟི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི ‘‘ཏདཱ པཙྩེཀབུདྡྷོ ཏཏྠེཝ པརིནིབྦཱཡི, མཱརཾ པརཱཛེཏྭཱ པདུམཀཎྞིཀཱཡ ཋཏྭཱ པཙྩེཀབུདྡྷསྶ པིཎྜཔཱཏདཱཡཀོ བཱརཱཎསིསེཊྛི པན ཨཧམེཝ ཨཧོསི’’ནྟི.

ཁདིརངྒཱརཛཱཏཀཝཎྞནཱ དསམཱ.

ཀུལཱཝཀཝགྒོ ཙཏུཏྠོ.

ཏསྶུདྡཱནཾ –

ཀུལཱཝཀཉྩ ནཙྩཉྩ, སམྨོདམཙྪཝཊྚཀཾ;

སཀུཎཾ ཏིཏྟིརཾ བཀཾ, ནནྡཉྩ ཁདིརངྒཱརནྟི.

༥. ཨཏྠཀཱམཝགྒོ

[༤༡] ༡. ལོསཀཛཱཏཀཝཎྞནཱ

ཡོ ¶ ཨཏྠཀཱམསྶཱཏི ཨིདཾ སཏྠཱ ཛེཏཝནེ ཝིཧརནྟོ ལོསཀཏིསྶཏྠེརཾ ནཱམ ཨཱརབྦྷ ཀཐེསི. ཀོ པནེས ལོསཀཏིསྶཏྠེརོ ནཱམཱཏི? ཀོསལརཊྛེ ཨེཀོ ཨཏྟནོ ཀུལནཱསཀོ ཀེཝཊྚཔུཏྟཀོ ¶ ཨལཱབྷཱི བྷིཀྑུ. སོ ཀིར ནིབྦཏྟཊྛཱནེཏཱ ཙཝིཏྭཱ ཀོསལརཊྛེ ཨེཀསྨིཾ ཀུལསཧསྶཝཱསེ ཀེཝཊྚགཱམེ ཨེཀིསྶཱ ཀེཝཊྚིཡཱ ཀུཙྪིསྨིཾ པཊིསནྡྷིཾ གཎྷི. ཏསྶ པཊིསནྡྷིགྒཧཎདིཝསེ ཏཾ ཀུལསཧསྶཾ ཛཱལཧཏྠཾ ནདིཡཉྩ ཏལཱ༹ཀཱདཱིསུ ཙ མཙྪེ པརིཡེསནྟཾ ཨེཀཾ ཁུདྡཀམཙྪམྤི ནཱལཏྠ. ཏཏོ པཊྛཱཡ ཙ ཏེ ཀེཝཊྚཱ པརིཧཱཡནྟིཡེཝ. ཏསྨིཉྷི ཀུཙྪིགཏེཡེཝ ནེསཾ གཱམོ སཏྟ ཝཱརེ ཨགྒིནཱ དཌྜྷོ, སཏྟ ཝཱརེ རཉྙཱ དཎྜིཏོ. ཨེཝཾ ཨནུཀྐམེན དུགྒཏཱ ཛཱཏཱ. ཏེ ཙིནྟཡིཾསུ ‘‘པུབྦེ ཨམྷཱཀཾ ཨེཝརཱུཔཾ ནཏྠི, ཨིདཱནི པན པརིཧཱཡཱམ, ཨམྷཱཀཾ ཨནྟརེ ཨེཀཱཡ ཀཱལ༹ཀཎྞིཡཱ བྷཝིཏབྦཾ, དྭེ བྷཱགཱ ཧོམཱ’’ཏི པཉྩ པཉྩ ཀུལསཏཱནི ཨེཀཏོ ཨཧེསུཾ. ཏཏོ ཡཏྠ ཏསྶ མཱཏཱཔིཏརོ, སོཝ ཀོཊྛཱསོ པརིཧཱཡཏི, ཨིཏརོ ཝཌྜྷཏི. ཏེ ཏམྤི ཀོཊྛཱསཾ དྭིདྷཱ, ཏམྤི དྭིདྷཱཏི ཨེཝཾ ཡཱཝ ཏམེཝ ཀུལཾ ཨེཀཾ ཨཧོསི, ཏཱཝ ཝིབྷཛིཏྭཱ ཏེསཾ ཀཱལ༹ཀཎྞིབྷཱཝཾ ཉཏྭཱ པོཐེཏྭཱ ནིཀྐཌྜྷིཾསུ.

ཨཐསྶ ¶ མཱཏཱ ཀིཙྪེན ཛཱིཝམཱནཱ པརིཔཀྐེ གབྦྷེ ཨེཀསྨིཾ ཋཱནེ ཝིཛཱཡི. པཙྪིམབྷཝིཀསཏྟཾ ན སཀྐཱ ནཱསེཏུཾ, ཨནྟོགྷཊེ པདཱིཔོ ཝིཡ ཏསྶ ཧདཡེ ཨརཧཏྟསྶ ཨུཔནིསྶཡོ ཛལཏི. སཱ ཏཾ དཱརཀཾ པཊིཛགྒིཏྭཱ ཨཱདྷཱཝིཏྭཱ པརིདྷཱཝིཏྭཱ ཝིཙརཎཀཱལེ ཨེཀམསྶ ཀཔཱལཀཾ ཧཏྠེ དཏྭཱ ‘‘པུཏྟ, ཨེཏཾ གྷརཾ པཝིསཱ’’ཏི པེསེཏྭཱ པལཱཏཱ. སོ ཏཏོ པཊྛཱཡ ཨེཀཀོཝ ཧུཏྭཱ ཏཏྠ ཏཏྠ བྷིཀྑཾ པརིཡེསིཏྭཱ ཨེཀསྨིཾ ཋཱནེ སཡཏི, ན ནྷཱཡཏི, ན སརཱིརཾ པཊིཛགྒཏི, པཾསུཔིསཱཙཀོ ཝིཡ ཀིཙྪེན ཛཱིཝིཀཾ ཀཔྤེཏི. སོ ཨནུཀྐམེན སཏྟཝསྶིཀོ ཧུཏྭཱ ཨེཀསྨིཾ གེཧདྭཱརེ ཨུཀྑལིདྷོཝནསྶ ཚཌྜིཏཊྛཱནེ ཀཱཀོ ཝིཡ ཨེཀེཀཾ བྷཏྟསིཏྠཾ ཨུཙྩིནིཏྭཱ ཁཱདཏི.

ཨཐ ནཾ དྷམྨསེནཱཔཏི སཱཝཏྠིཡཾ པིཎྜཱཡ ཙརམཱནོ དིསྭཱ ‘‘ཨཡཾ སཏྟོ ཨཏིཀཱརུཉྙཔྤཏྟོ ¶ , ཀཏརགཱམཝཱསིཀོ ནུ ཁོ’’ཏི ཏསྨིཾ མེཏྟཙིཏྟཾ ཝཌྜྷེཏྭཱ ‘‘ཨེཧི, རེ’’ཏི ཨཱཧ. སོ ཨཱགནྟྭཱ ཐེརཾ ཝནྡིཏྭཱ ཨཊྛཱསི. ཨཐ ནཾ ཐེརོ ‘‘ཀཏརགཱམཝཱསིཀོསི, ཀཧཾ ཝཱ ཏེ མཱཏཱཔིཏརོ’’ཏི པུཙྪི. ‘‘ཨཧཾ, བྷནྟེ, ནིཔྤཙྩཡོ, མཡ྄ཧཾ མཱཏཱཔིཏརོ མཾ ནིསྶཱཡ ‘ཀིལནྟམྷཱ’ཏི མཾ ཚཌྜེཏྭཱ པལཱཏཱ’’ཏི. ‘‘ཨཔི པན པབྦཛིསྶསཱི’’ཏི. ‘‘བྷནྟེ, ཨཧཾ ཏཱཝ པབྦཛེཡྻཾ, མཱདིསཾ པན ཀཔཎཾ ཀོ པབྦཱཛེསྶསཱི’’ཏི? ‘‘ཨཧཾ ¶ པབྦཱཛེསྶཱམཱི’’ཏི. ‘‘སཱདྷུ, བྷནྟེ, པབྦཱཛེཐཱ’’ཏི. ཐེརོ ཏསྶ ཁཱདནཱིཡབྷོཛནཱིཡཾ དཏྭཱ ཏཾ ཝིཧཱརཾ ནེཏྭཱ སཧཏྠེནེཝ ནྷཱཔེཏྭཱ པབྦཱཛེཏྭཱ པརིཔུཎྞཝསྶཾ ཨུཔསམྤཱདེསི. སོ མཧལླཀཀཱལེ ‘‘ལོསཀཏིསྶཏྠེརོ’’ཏི པཉྙཱཡིཏྠ ཨཔྤཔུཉྙོ ཨཔྤལཱབྷོ. ཏེན ཀིར ཨསདིསདཱནེཔི ཀུཙྪིཔཱུརོ ན ལདྡྷཔུབྦོ, ཛཱིཝིཏགྷཊནམཏྟམེཝ ལབྷཏི. ཏསྶ ཧི པཏྟེ ཨེཀསྨིཾཡེཝ ཡཱགུཨུལུ༹ངྐེ དིནྣེ པཏྟོ སམཏིཏྟིཀོ ཝིཡ ཧུཏྭཱ པཉྙཱཡཏི. ཨཐ མནུསྶཱ ‘‘ཨིམསྶ པཏྟོ པཱུརོ’’ཏི ཧེཊྛཱ ཡཱགུཾ དེནྟི. ཏསྶ པཏྟེ ཡཱགུཾ དཱནཀཱལེ མནུསྶཱནཾ བྷཱཛནེ ཡཱགུ ཨནྟརདྷཱཡཏཱིཏིཔི ཝདནྟི. ཁཛྫཀཱདཱིསུཔི ཨེསེཝ ནཡོ.

སོ ཨཔརེན སམཡེན ཝིཔསྶནཾ ཝཌྜྷེཏྭཱ ཨགྒཕལེ ཨརཧཏྟེ པཏིཊྛིཏོཔི ཨཔྤལཱབྷོཝ ཨཧོསི. ཨཐསྶ ཨནུཔུབྦེན ཨཱཡུསངྑཱརེསུ པརིཧཱིནེསུ པརིནིབྦཱནདིཝསོ སམྤཱཔུཎི. དྷམྨསེནཱཔཏི ཨཱཝཛྫེནྟོ ཏསྶ པརིནིབྦཱནབྷཱཝཾ ཉཏྭཱ ‘‘ཨཡཾ ལོསཀཏིསྶཏྠེརོ ཨཛྫ པརིནིབྦཱཡིསྶཏི, ཨཛྫ མཡཱ ཨེཏསྶ ཡཱཝདཏྠཾ ཨཱཧཱརཾ དཱཏུཾ ཝཊྚཏཱི’’ཏི ཏཾ ཨཱདཱཡ སཱཝཏྠིཾ པིཎྜཱཡ པཱཝིསི. ཐེརོ ཏཾ ནིསྶཱཡ ཏཱཝ བཧུམནུསྶཱཡ སཱཝཏྠིཡཱ ཧཏྠཾ པསཱརེཏྭཱ ཝནྡནམཏྟམྤི ནཱལཏྠ. ཨཐ ནཾ ཐེརོ ‘‘གཙྪཱཝུསོ, ཨཱསནསཱལཱཡ ནིསཱིདཱ’’ཏི ཨུཡྻོཛེཏྭཱ གཏོ. ཏཾ ཨཱགཏམེཝ མནུསྶཱ ‘‘ཨཡྻོ, ཨཱགཏོ’’ཏི ཨཱསནེ ནིསཱིདཱཔེཏྭཱ བྷོཛེསི. ཐེརོཔི ‘‘ཨིམཾ ལོསཀསྶ དེཐཱ’’ཏི ¶ ལདྡྷཱཧཱརཾ པེསེསི. ཏཾ གཧེཏྭཱ གཏཱ ལོསཀཏིསྶཏྠེརཾ ཨསརིཏྭཱ སཡམེཝ བྷུཉྫིཾསུ. ཨཐ ཐེརསྶ ཨུཊྛཱཡ ཝིཧཱརཾ གམནཀཱལེ ལོསཀཏིསྶཏྠེརོ ཨཱགནྟྭཱ ཐེརཾ ཝནྡི, ཐེརོ ནིཝཏྟིཏྭཱ ཋིཏཀོཝ ‘‘ལདྡྷཾ ཏེ, ཨཱཝུསོ, བྷཏྟ’’ནྟི པུཙྪི. ལབྷིསྶཱམ ནོ, བྷནྟེཏི. ཐེརོ སཾཝེགཔཏྟོ ཀཱལཾ ཨོལོཀེསི, ཀཱལོ ཨཏིཀྐནྟོ. ཐེརོ ‘‘ཧོཏཱཝུསོ, ཨིདྷེཝ ནིསཱིདཱ’’ཏི ལོསཀཏྠེརཾ ཨཱསནསཱལཱཡཾ ནིསཱིདཱཔེཏྭཱ ཀོསལརཉྙོ ནིཝེསནཾ ཨགམཱསི. རཱཛཱ ཐེརསྶ པཏྟཾ གཱཧཱཔེཏྭཱ ‘‘བྷཏྟསྶ ཨཀཱལོ’’ཏི པཏྟཔཱུརཾ ཙཏུམདྷུརཾ དཱཔེསི. ཐེརོ ཏཾ ཨཱདཱཡ གནྟྭཱ ‘‘ཨེཧཱཝུསོ, ཏིསྶ ཨིམཾ ཙཏུམདྷུརཾ བྷུཉྫཱ’’ཏི ཝཏྭཱ པཏྟཾ གཧེཏྭཱ ཨཊྛཱསི. སོ ཐེརེ གཱརཝེན ལཛྫནྟོ ན པརིབྷུཉྫཏི. ཨཐ ནཾ ཐེརོ ‘‘ཨེཧཱཝུསོ ཏིསྶ, ཨཧཾ ཨིམཾ པཏྟཾ གཧེཏྭཱཝ ཋསྶཱམི, ཏྭཾ ནིསཱིདིཏྭཱ པརིབྷུཉྫ. སཙེ ཨཧཾ པཏྟཾ ཧཏྠཏོ ¶ མུཉྩེཡྻཾ, ཀིཉྩི ན བྷཝེཡྻཱ’’ཏི ཨཱཧ. ཨཐཱཡསྨཱ ལོསཀཏིསྶཏྠེརོ ཨགྒསཱཝཀེ དྷམྨསེནཱཔཏིམྷི པཏྟཾ གཧེཏྭཱ ཋིཏེ ¶ ཙཏུམདྷུརཾ པརིབྷུཉྫི. ཏཾ ཐེརསྶ ཨརིཡིདྡྷིབལེན པརིཀྑཡཾ ན ཨགམཱསི. ཏདཱ ལོསཀཏིསྶཏྠེརོ ཡཱཝདཏྠཾ ཨུདརཔཱུརཾ ཀཏྭཱ པརིབྷུཉྫི, ཏཾ དིཝསཾཡེཝ ཙ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡི. སམྨཱསམྦུདྡྷོ སནྟིཀེ ཋཏྭཱ སརཱིརནིཀྑེཔཾ ཀཱརེསི, དྷཱཏུཡོ གཧེཏྭཱ ཙེཏིཡཾ ཀརིཾསུ.

ཏདཱ བྷིཀྑཱུ དྷམྨསབྷཱཡཾ སནྣིཔཏིཏྭཱ ‘‘ཨཱཝུསོ, ཨཧོ ལོསཀཏིསྶཏྠེརོ ཨཔྤཔུཉྙོ ཨཔྤལཱབྷཱི, ཨེཝརཱུཔེན ནཱམ ཨཔྤཔུཉྙེན ཨཔྤལཱབྷིནཱ ཀཐཾ ཨརིཡདྷམྨོ ལདྡྷོ’’ཏི ཀཐེནྟཱ ནིསཱིདིཾསུ. སཏྠཱ དྷམྨསབྷཾ གནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪི. ཏེ ‘‘ཨིམཱཡ ནཱམ, བྷནྟེ’’ཏི ཨཱརོཙཡིཾསུ. སཏྠཱ ‘‘བྷིཀྑཝེ, ཨེསོ བྷིཀྑུ ཨཏྟནོ ཨལཱབྷིབྷཱཝཉྩ ཨརིཡདྷམྨལཱབྷིབྷཱཝཉྩ ཨཏྟནཱཝ ཨཀཱསི. ཨཡཉྷི པུབྦེ པརེསཾ ལཱབྷནྟརཱཡཾ ཀཏྭཱ ཨཔྤལཱབྷཱི ཛཱཏོ, ‘‘ཨནིཙྩཾ, དུཀྑཾ, ཨནཏྟཱ’’ཏི ཝིཔསྶནཱཡ ཡུཏྟབྷཱཝསྶ བལེན ཨརིཡདྷམྨལཱབྷཱི ཛཱཏོ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ཀིར ཀསྶཔསམྨཱསམྦུདྡྷཀཱལེ ཨཉྙཏརོ བྷིཀྑུ ཨེཀཾ ཀུཊུམྦིཀཾ ནིསྶཱཡ གཱམཀཱཝཱསེ ཝསཏི པཀཏཏྟོ སཱིལཝཱ ཝིཔསྶནཱཡ ཡུཏྟཔྤཡུཏྟོ. ཨཐེཀོ ཁཱིཎཱསཝཏྠེརོ སམཝཏྟཝཱསཾ ཝསམཱནོ ཨནུཔུབྦེན ཏསྶ བྷིཀྑུནོ ཨུཔཊྛཱཀཀུཊུམྦིཀསྶ ཝསནགཱམཾ སམྤཏྟོ. ཀུཊུམྦིཀོ ཐེརསྶ ¶ ཨིརིཡཱཔཐེཡེཝ པསཱིདིཏྭཱ པཏྟཾ ཨཱདཱཡ གྷརཾ པཝེསེཏྭཱ སཀྐཙྩཾ བྷོཛེཏྭཱ ཐོཀཾ དྷམྨཀཐཾ སུཏྭཱ ཐེརཾ ཝནྡིཏྭཱ ‘‘བྷནྟེ, ཨམྷཱཀཾ དྷུརཝིཧཱརམེཝ གཙྪཐ, མཡཾ སཱཡནྷསམཡེ ཨཱགནྟྭཱ པསྶིསྶཱམཱ’’ཏི ཨཱཧ. ཐེརོ ཝིཧཱརཾ གནྟྭཱ ནེཝཱསིཀཏྠེརཾ ཝནྡིཏྭཱ ཨཱཔུཙྪིཏྭཱ ཨེཀམནྟཾ ནིསཱིདི. སོཔི ཏེན སདྡྷིཾ པཊིསནྠཱརཾ ཀཏྭཱ ‘‘ལདྡྷོ ཏེ, ཨཱཝུསོ, བྷིཀྑཱཧཱརོ’’ཏི པུཙྪི. ‘‘ཨཱམ, ལདྡྷོ’’ཏི. ‘‘ཀཧཾ ལདྡྷོ’’ཏི? ‘‘ཏུམྷཱཀཾ དྷུརགཱམེ ཀུཊུམྦིཀགྷརེ’’ཏི. ཨེཝཉྩ པན ཝཏྭཱ ཨཏྟནོ སེནཱསནཾ པུཙྪིཏྭཱ པཊིཛགྒིཏྭཱ པཏྟཙཱིཝརཾ པཊིསཱམེཏྭཱ ཛྷཱནསུཁེན ཕལསུཁེན ཙ ཝཱིཏིནཱམེནྟོ ནིསཱིདི.

སོཔི ¶ ཀུཊུམྦིཀོ སཱཡནྷེ གནྡྷམཱལཉྩེཝ པདཱིཔེཡྻཉྩ གཱཧཱཔེཏྭཱ ཝིཧཱརཾ གནྟྭཱ ནེཝཱསིཀཏྠེརཾ ཝནྡིཏྭཱ ‘‘བྷནྟེ, ཨེཀོ ཨཱགནྟུཀཏྠེརོ ཨཏྠི, ཨཱགཏོ ནུ ཁོ’’ཏི པུཙྪི. ‘‘ཨཱམ, ཨཱགཏོ’’ཏི. ‘‘ཨིདཱནི ཀཧ’’ནྟི. ‘‘ཨསུཀསེནཱསནེ ནཱམཱ’’ཏི. སོ ཏསྶ སནྟིཀཾ གནྟྭཱ ཝནྡིཏྭཱ ཨེཀམནྟཾ ནིསིནྣོ དྷམྨཀཐཾ སུཏྭཱ སཱིཏལཝེལཱཡ ཙེཏིཡཉྩ བོདྷིཉྩ པཱུཛེཏྭཱ དཱིཔེ ཛཱལེཏྭཱ ཨུབྷོཔི ཛནེ ནིམནྟེཏྭཱ གཏོ. ནེཝཱསིཀཏྠེརོཔི ཁོ ‘‘ཨཡཾ ཀུཊུམྦིཀོ པརིབྷིནྣོ, སཙཱཡཾ བྷིཀྑུ ཨིམསྨིཾ ཝིཧཱརེ ཝསིསྶཏི, ན མཾ ཨེས ཀིསྨིཉྩི གཎཡིསྶཏཱི’’ཏི ¶ ཐེརེ ཨནཏྟམནཏཾ ཨཱཔཛྫིཏྭཱ ‘‘ཨིམསྨིཾ ཝིཧཱརེ ཨེཏསྶ ཨཝསནཱཀཱརོ མཡཱ ཀཱཏུཾ ཝཊྚཏཱི’’ཏི ཏེན ཨུཔཊྛཱནཝེལཱཡ ཨཱགཏེན སདྡྷིཾ ཀིཉྩི ན ཀཐེསི. ཁཱིཎཱསཝཏྠེརོ ཏསྶ ཨཛ྄ཛྷཱསཡཾ ཛཱནིཏྭཱ ‘‘ཨཡཾ ཐེརོ མམ ཀུལེ ཝཱ གཎེ ཝཱ ཨཔལིབུདྡྷབྷཱཝཾ ན ཛཱནཱཏཱི’’ཏི ཨཏྟནོ ཝསནཊྛཱནཾ གནྟྭཱ ཛྷཱནསུཁེན ཕལསུཁེན ཝཱིཏིནཱམེསི.

ནེཝཱསིཀོཔི པུནདིཝསེ ནཁཔིཊྛེན གཎྜིཾ པཧརིཏྭཱ ནཁེན དྭཱརཾ ཨཱཀོཊེཏྭཱ ཀུཊུམྦིཀསྶ གེཧཾ ཨགམཱསི. སོ ཏསྶ པཏྟཾ གཧེཏྭཱ པཉྙཏྟཱསནེ ནིསཱིདཱཔེཏྭཱ ‘‘ཨཱགནྟུཀཏྠེརོ ཀཧཾ, བྷནྟེ’’ཏི པུཙྪི. ‘‘ནཱཧཾ ཏཝ ཀུལཱུཔཀསྶ པཝཏྟིཾ ཛཱནཱམི, གཎྜིཾ པཧརནྟོཔི དྭཱརཾ ཨཱཀོཊེནྟོཔི པབོདྷེཏུཾ ནཱསཀྑིཾ, ཧིཡྻོ ཏཝ གེཧེ པཎཱིཏབྷོཛནཾ བྷུཉྫིཏྭཱ ¶ ཛཱིརཱཔེཏུཾ ཨསཀྐོནྟོ ཨིདཱནི ནིདྡཾ ཨོཀྐནྟོཡེཝ བྷཝིསྶཏི, ཏྭཾ པསཱིདམཱནོ ཨེཝརཱུཔེསུཡེཝ ཋཱནེསུ པསཱིདསཱི’’ཏི ཨཱཧ – ‘‘ཁཱིཎཱསཝཏྠེརོཔི ཨཏྟནོ བྷིཀྑཱཙཱརཝེལཾ སལླཀྑེཏྭཱ སརཱིརཾ པཊིཛགྒིཏྭཱ པཏྟཙཱིཝརམཱདཱཡ ཨཱཀཱསེ ཨུཔྤཏིཏྭཱ ཨཉྙཏྠ ཨགམཱསི. སོ ཀུཊུམྦིཀོ ནེཝཱསིཀཏྠེརཾ སཔྤིམདྷུསཀྑརཱབྷིསངྑཏཾ པཱཡཱསཾ པཱཡེཏྭཱ པཏྟཾ གནྡྷཙུཎྞེཧི ཨུབྦཊྚེཏྭཱ པུན པཱུརེཏྭཱ ‘‘བྷནྟེ, སོ ཐེརོ མགྒཀིལནྟོ བྷཝིསྶཏི, ཨིདམསྶ ཧརཐཱ’’ཏི ཨདཱསི. ཨིཏརོ ཨཔཊིཀྑིཔིཏྭཱཝ གཧེཏྭཱ གཙྪནྟོ ‘‘སཙེ སོ བྷིཀྑུ ཨིམཾ པཱཡཱསཾ པིཝིསྶཏི, གཱིཝཱཡཾ གཧེཏྭཱ ནིཀྐཌྜྷིཡམཱནོཔི ན གམིསྶཏི. སཙེ པནཱཧཾ ཨིམཾ པཱཡཱསཾ མནུསྶཱནཾ དསྶཱམི, པཱཀཊཾ མེ ཀམྨཾ བྷཝིསྶཏི. སཙེ ཨུདཀེ ཨོཔིལཱཔེསྶཱམི, ཨུདཀཔིཊྛེ སཔྤི པཉྙཱཡིསྶཏི ¶ . སཙེ བྷཱུམིཡཾ ཚཌྜེསྶཱམི, ཀཱཀསནྣིཔཱཏེན པཉྙཱཡིསྶཏི. ཀཏྠ ནུ ཁོ ཨིམཾ ཚཌྜེཡྻ’’ནྟི ཨུཔདྷཱརེནྟོ ཨེཀཾ ཛྷཱམཀྑེཏྟཾ དིསྭཱ ཨངྒཱརེ ཝིཡཱུཧིཏྭཱ ཏཏྠ པཀྑིཔིཏྭཱ ཨུཔརི ཨངྒཱརེཧི པཊིཙྪཱདེཏྭཱ ཝིཧཱརཾ གཏོ ཏཾ བྷིཀྑུཾ ཨདིསྭཱ ཙིནྟེསི ‘‘ཨདྡྷཱ སོ བྷིཀྑུ ཁཱིཎཱསཝོ མམ ཨཛ྄ཛྷཱསཡཾ ཝིདིཏྭཱ ཨཉྙཏྠ གཏོ བྷཝིསྶཏི, ཨཧོ མཡཱ ཨུདརཧེཏུ ཨཡུཏྟཾ ཀཏ’’ནྟི ཏཱཝདེཝསྶ མཧནྟཾ དོམནསྶཾ ཨུདཔཱདི. ཏཏོ པཊྛཱཡེཝ ཙ མནུསྶཔེཏོ ཧུཏྭཱ ན ཙིརསྶེཝ ཀཱལཾ ཀཏྭཱ ནིརཡེ ནིབྦཏྟི.

སོ བཧཱུནི ཝསྶསཏསཧསྶཱནི ནིརཡེ པཙྩིཏྭཱ པཀྐཱཝསེསེན པཊིཔཱཊིཡཱ པཉྩཛཱཏིསཏེསུ ཡཀྑོ ཧུཏྭཱ ཨེཀདིཝསམྤི ཨུདརཔཱུརཾ ཨཱཧཱརཾ ན ལབྷི. ཨེཀདིཝསཾ པན གབྦྷམལཾ ཨུདརཔཱུརཾ ལབྷི. པུན པཉྩཛཱཏིསཏེསུ སུནཁོ ཨཧོསི. ཏདཱཔི ཨེཀདིཝསཾ བྷཏྟཝམནཾ ཨུདརཔཱུརཾ ལབྷི, སེསཀཱལེ པན ཏེན ཨུདརཔཱུརོ ཨཱཧཱརོ ནཱམ ན ལདྡྷཔུབྦོ. སུནཁཡོནིཏོ པན ཙཝིཏྭཱ ཀཱསིརཊྛེ ཨེཀསྨིཾ གཱམེ དུགྒཏཀུལེ ནིབྦཏྟི. ཏསྶ ནིབྦཏྟིཏོ པཊྛཱཡ ཏཾ ཀུལཾ པརམདུགྒཏམེཝ ཛཱཏཾ, ཛཱཏིཏོ ཨུདྡྷཾ ཨུདཀཀཉྫིཀཱམཏྟམྤི ན ལབྷི. ཏསྶ པན ¶ ‘‘མིཏྟཝིནྡཀོ’’ཏི ནཱམཾ ཨཧོསི. མཱཏཱཔིཏརོ ¶ ཚཱཏཀདུཀྑཾ ཨདྷིཝཱསེཏུཾ ཨསཀྐོནྟཱ ‘‘གཙྪ ཀཱལ༹ཀཎྞཱི’’ཏི ཏཾ པོཐེཏྭཱ ནཱིཧརིཾསུ. སོ ཨཔཊིསརཎོ ཝིཙརནྟོ བཱརཱཎསིཾ ཨགམཱསི. ཏདཱ བོདྷིསཏྟོ བཱརཱཎསིཡཾ དིསཱཔཱམོཀྑོ ཨཱཙརིཡོ ཧུཏྭཱ པཉྩ མཱཎཝཀསཏཱནི སིཔྤཾ ཝཱཙེཏི. ཏདཱ བཱརཱཎསིཝཱསིནོ དུགྒཏཱནཾ པརིབྦཡཾ དཏྭཱ སིཔྤཾ སིཀྑཱཔེནྟི. ཨཡམྤི མིཏྟཝིནྡཀོ བོདྷིསཏྟསྶ སནྟིཀེ སིཔྤཾ སིཀྑཏི. སོ ཕརུསོ ཨནོཝཱདཀྑམོ ཏཾ ཏཾ པཧརནྟོ ཝིཙརཏི, བོདྷིསཏྟེན ཨོཝདིཡམཱནོཔི ཨོཝཱདཾ ན གཎྷཱཏི. ཏཾ ནིསྶཱཡ ཨཱཡོཔིསྶ མནྡོ ཛཱཏོ.

ཨཐ སོ མཱཎཝཀེཧི སདྡྷིཾ བྷཎྜིཏྭཱ ཨོཝཱདཾ ཨགྒཎྷནྟོ ཏཏོ པལཱཡིཏྭཱ ཨཱཧིཎྜནྟོ ཨེཀཾ པཙྩནྟགཱམཾ པཏྭཱ བྷཏིཾ ཀཏྭཱ ཛཱིཝཏི. སོ ཏཏྠ ཨེཀཱཡ དུགྒཏིཏྠིཡཱ སདྡྷིཾ སཾཝཱསཾ ཀཔྤེསི. སཱ ཏཾ ནིསྶཱཡ དྭེ དཱརཀེ ཝིཛཱཡི. གཱམཝཱསིནོ ‘‘ཨམྷཱཀཾ སུསཱསནཾ དུསྶཱསནཾ ཨཱརོཙེཡྻཱསཱི’’ཏི མིཏྟཝིནྡཀསྶ བྷཏིཾ དཏྭཱ ཏཾ གཱམདྭཱརེ ཀུཊིཀཱཡ ¶ ཝསཱཔེསུཾ. ཏཾ པན མིཏྟཝིནྡཀཾ ནིསྶཱཡ ཏེ པཙྩནྟགཱམཝཱསིནོ སཏྟཀྑཏྟུཾ རཱཛདཎྜཾ ཨགམཾསུ, སཏྟཀྑཏྟུཾ ནེསཾ གེཧཱནི ཛྷཱཡིཾསུ, སཏྟཀྑཏྟུཾ ཏལཱ༹ཀཾ བྷིཛྫི. ཏེ ཙིནྟཡིཾསུ ‘‘ཨམྷཱཀཾ པུབྦེ ཨིམསྶ མིཏྟཝིནྡཀསྶ ཨནཱགམནཀཱལེ ཨེཝརཱུཔཾ ནཏྠི, ཨིདཱནི པནསྶ ཨཱགཏཀཱལཏོ པཊྛཱཡ པརིཧཱཡཱམཱ’’ཏི ཏཾ པོཐེཏྭཱ ནཱིཧརིཾསུ.

སོ ཨཏྟནོ དཱརཀེ གཧེཏྭཱ ཨཉྙཏྠ གཙྪནྟོ ཨེཀཾ ཨམནུསྶཔརིགྒཧཾ ཨཊཝིཾ པཱཝིསི. ཏཏྠསྶ ཨམནུསྶཱ དཱརཀེ ཙ བྷརིཡཉྩ མཱརེཏྭཱ མཾསཾ ཁཱདིཾསུ. སོ ཏཏོ པལཱཡིཏྭཱ ཏཏོ ཏཏོ ཨཱཧིཎྜནྟོ ཨེཀཾ གམྦྷཱིརཾ ནཱམ པཊྚནགཱམཾ ནཱཝཱཝིསྶཛྫནདིཝསེཡེཝ པཏྭཱ ཀམྨཀཱརཀོ ཧུཏྭཱ ནཱཝཾ ཨབྷིརུཧི. ནཱཝཱ སམུདྡཔིཊྛེ སཏྟཱཧཾ གནྟྭཱ སཏྟམེ དིཝསེ སམུདྡམཛ྄ཛྷེ ཨཱཀོཊེཏྭཱ ཋཔིཏཱ ཝིཡ ཨཊྛཱསི. ཏེ ཀཱལ༹ཀཎྞིསལཱཀཾ ཙཱརེསུཾ, སཏྟཀྑཏྟུཾ མིཏྟཝིནྡཀསྶེཝ པཱཔུཎི. མནུསྶཱ ཏསྶེཀཾ ཝེལུ༹ཀལཱཔཾ དཏྭཱ ཧཏྠེ གཧེཏྭཱ སམུདྡཔིཊྛེ ཁིཔིཾསུ, ཏསྨིཾ ཁིཏྟམཏྟེ ནཱཝཱ ཨགམཱསི. མིཏྟཝིནྡཀོ ¶ ཝེལུ༹ཀལཱཔེ ནིཔཛྫིཏྭཱ སམུདྡཔིཊྛེ གཙྪནྟོ ཀསྶཔསམྨཱསམྦུདྡྷཀཱལེ རཀྑིཏསཱིལསྶ ཕལེན སམུདྡཔིཊྛེ ཨེཀསྨིཾ ཕལིཀཝིམཱནེ ཙཏསྶོ དེཝདྷཱིཏརོ པཊིལབྷིཏྭཱ ཏཱསཾ སནྟིཀེ སུཁཾ ཨནུབྷཝམཱནོ སཏྟཱཧཾ ཝསི. ཏཱ པན ཝིམཱནཔེཏིཡོ སཏྟཱཧཾ སུཁཾ ཨནུབྷཝནྟི, སཏྟཱཧཾ དུཀྑཾ. སཏྟཱཧཾ དུཀྑཾ ཨནུབྷཝིཏུཾ གཙྪམཱནཱ ‘‘ཡཱཝ མཡཾ ཨཱགཙྪཱམ, ཏཱཝ ཨིདྷེཝ ཧོཧཱི’’ཏི ཝཏྭཱ ཨགམཾསུ.

མིཏྟཝིནྡཀོ ¶ ཏཱསཾ གཏཀཱལེ ཝེལུ༹ཀལཱཔེ ནིཔཛྫིཏྭཱ པུརཏོ གཙྪནྟོ རཛཏཝིམཱནེ ཨཊྛ དེཝདྷཱིཏརོ ལབྷི. ཏཏོཔི པརཾ གཙྪནྟོ མཎིཝིམཱནེ སོལ༹ས, ཀནཀཝིམཱནེ དྭཏྟིཾས དེཝདྷཱིཏརོ ལབྷི. ཏཱསམྤི ཝཙནཾ ཨཀཏྭཱ པརཏོ གཙྪནྟོ ཨནྟརདཱིཔཀེ ཨེཀཾ ཡཀྑནགརཾ ཨདྡས. ཏཏྠེཀཱ ཡཀྑིནཱི ཨཛརཱུཔེན ཝིཙརཏི. མིཏྟཝིནྡཀོ ཏསྶཱ ཡཀྑིནིབྷཱཝཾ ཨཛཱནནྟོ ‘‘ཨཛམཾསཾ ཁཱདིསྶཱམཱི’’ཏི ཏཾ པཱདེ ཨགྒཧེསི, སཱ ཡཀྑཱནུབྷཱཝེན ཏཾ ཨུཀྑིཔིཏྭཱ ཁིཔི. སོ ཏཱཡ ཁིཏྟོ སམུདྡམཏྠཀེན གནྟྭཱ བཱརཱཎསིཡཾ པརིཁཱཔིཊྛེ ཨེཀསྨིཾ ཀཎྚཀགུམྦམཏྠཀེ པཏིཏྭཱ པཝཊྚམཱནོ བྷཱུམིཡཾ པཏིཊྛཱསི. ཏསྨིཉྩ སམཡེ ཏསྨིཾ པརིཁཱཔིཊྛེ རཉྙོ ཨཛིཀཱ ཙརམཱནཱ ཙོརཱ ཧརནྟི. ཨཛིཀགོཔཀཱ ‘‘ཙོརེ གཎྷིསྶཱམཱ’’ཏི ¶ ཨེཀམནྟཾ ནིལཱིནཱ ཨཊྛཾསུ. མིཏྟཝིནྡཀོ པཝཊྚིཏྭཱ བྷཱུམིཡཾ ཋིཏོ ཏཱ ཨཛིཀཱ དིསྭཱ ཙིནྟེསི ‘‘ཨཧཾ སམུདྡེ ཨེཀསྨིཾ དཱིཔཀེ ཨཛིཀཾ པཱདེ གཧེཏྭཱ ཏཱཡ ཁིཏྟོ ཨིདྷ པཏིཏོ. སཙེ ཨིདཱནི ཨེཀཾ ཨཛིཀཾ པཱདེ གཧེསྶཱམི, སཱ མཾ པརཏོ སམུདྡཔིཊྛེ ཝིམཱནདེཝཏཱནཾ སནྟིཀེ ཁིཔིསྶཏཱི’’ཏི. སོ ཨེཝཾ ཨཡོནིསོ མནསིཀརིཏྭཱ ཨཛིཀཾ པཱདེ གཎྷི, སཱ གཧིཏམཏྟཱ ཝིརཝི. ཨཛིཀགོཔཀཱ ཨིཏོ ཙིཏོ ཙ ཨཱགནྟྭཱ ཏཾ གཧེཏྭཱ ‘‘ཨེཏྟཀཾ ཀཱལཾ རཱཛཀུལེ ཨཛིཀཁཱདཀོ ཨེས ཙོརོ’’ཏི ཏཾ ཀོཊྚེཏྭཱ བནྡྷིཏྭཱ རཉྙོ སནྟིཀཾ ནེནྟི.

ཏསྨིཾ ཁཎེ བོདྷིསཏྟོ པཉྩསཏམཱཎཝཀཔརིཝུཏོ ནགརཱ ནིཀྑམྨ ནྷཱཡིཏུཾ གཙྪནྟོ མིཏྟཝིནྡཀཾ དིསྭཱ སཉྫཱནིཏྭཱ ཏེ མནུསྶེ ཨཱཧ – ‘‘ཏཱཏཱ, ཨཡཾ ཨམྷཱཀཾ ཨནྟེཝཱསིཀོ, ཀསྨཱ ནཾ གཎྷཐཱ’’ཏི? ‘‘ཨཛིཀཙོརཀོ, ཨཡྻ, ཨེཀཾ ཨཛིཀཾ པཱདེ གཎྷི, ཏསྨཱ གཧིཏོ’’ཏི. ‘‘ཏེན ཧེཏཾ ¶ ཨམྷཱཀཾ དཱསཾ ཀཏྭཱ དེཐ, ཨམྷེ ནིསྶཱཡ ཛཱིཝིསྶཏཱི’’ཏི. ཏེ, ‘‘སཱདྷུ ཨཡྻཱ’’ཏི ཏཾ ཝིསྶཛྫེཏྭཱ ཨགམཾསུ. ཨཐ ནཾ བོདྷིསཏྟོ ‘‘མིཏྟཝིནྡཀ, ཏྭཾ ཨེཏྟཀཾ ཀཱལཾ ཀཧཾ ཝསཱི’’ཏི པུཙྪི. སོ སབྦཾ ཨཏྟནཱ ཀཏཀམྨཾ ཨཱརོཙེསི. བོདྷིསཏྟོ ‘‘ཨཏྠཀཱམཱནཾ ཝཙནཾ ཨཀརོནྟོ ཨེཝཾ དུཀྑཾ པཱཔུཎཱཏཱི’’ཏི ཝཏྭཱ ཨིམཾ གཱཐམཱཧ –

༤༡.

‘‘ཡོ ཨཏྠཀཱམསྶ ཧིཏཱནུཀམྤིནོ, ཨོཝཛྫམཱནོ ན ཀརོཏི སཱསནཾ;

ཨཛིཡཱ པཱདམོལམྦ, མིཏྟཀོ ཝིཡ སོཙཏཱི’’ཏི.

ཏཏྠ ཨཏྠཀཱམསྶཱཏི ཝུཌྜྷིཾ ཨིཙྪནྟསྶ. ཧིཏཱནུཀམྤིནོཏི ཧིཏེན ཨནུཀམྤམཱནསྶ. ཨོཝཛྫམཱནོཏི མུདུཀེན ཧིཏཙིཏྟེན ཨོཝདིཡམཱནོ. ན ཀརོཏི སཱསནནྟི ཨནུསིཊྛཾ ན ཀརོཏི, དུབྦཙོ ཨནོཝཱདཀོ ཧོཏི. མིཏྟཀོ ཝིཡ སོཙཏཱིཏི ཡཐཱཡཾ མིཏྟཝིནྡཀོ ཨཛིཀཱཡ ¶ པཱདཾ གཧེཏྭཱ སོཙཏི ཀིལམཏི, ཨེཝཾ ནིཙྩཀཱལཾ སོཙཏཱིཏི ཨིམཱཡ གཱཐཱཡ བོདྷིསཏྟོ དྷམྨཾ དེསེསི.

ཨེཝཾ ཏེན ཐེརེན ཨེཏྟཀེ ཨདྡྷཱནེ ཏཱིསུཡེཝ ཨཏྟབྷཱཝེསུ ཀུཙྪིཔཱུརོ ལདྡྷཔུབྦོ. ཡཀྑེན ཧུཏྭཱ ཨེཀདིཝསཾ གབྦྷམལཾ ལདྡྷཾ, སུནཁེན ཧུཏྭཱ ཨེཀདིཝསཾ ¶ བྷཏྟཝམནཾ, པརིནིབྦཱནདིཝསེ དྷམྨསེནཱཔཏིསྶཱནུབྷཱཝེན ཙཏུམདྷུརཾ ལདྡྷཾ. ཨེཝཾ པརསྶ ལཱབྷནྟརཱཡཀརཎཾ ནཱམ མཧཱདོསནྟི ཝེདིཏབྦཾ. ཏསྨིཾ པན ཀཱལེ སོཔི ཨཱཙརིཡོ མིཏྟཝིནྡཀོཔི ཡཐཱཀམྨཾ གཏོ.

སཏྠཱ ‘‘ཨེཝཾ, བྷིཀྑཝེ, ཨཏྟནོ ཨཔྤལཱབྷིབྷཱཝཉྩ ཨརིཡདྷམྨལཱབྷིབྷཱཝཉྩ སཡམེཝ ཨེས ཨཀཱསཱི’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ མིཏྟཝིནྡཀོ ལོསཀཏིསྶཏྠེརོ ཨཧོསི, དིསཱཔཱམོཀྑཱཙརིཡོ པན ཨཧམེཝ ཨཧོསི’’ནྟི.

ལོསཀཛཱཏཀཝཎྞནཱ པཋམཱ.

[༤༢] ༢. ཀཔོཏཛཱཏཀཝཎྞནཱ

ཡོ ཨཏྠཀཱམསྶཱཏི ཨིདཾ སཏྠཱ ཛེཏཝནེ ཝིཧརནྟོ ཨཉྙཏརཾ ལོལབྷིཀྑུཾ ཨཱརབྦྷ ཀཐེསི. ཏསྶ ལོལབྷཱཝོ ནཝཀནིཔཱཏེ ཀཱཀཛཱཏཀེ ཨཱཝི བྷཝིསྶཏི. ཏདཱ པན ཏཾ བྷིཀྑཱུ ‘‘ཨཡཾ, བྷནྟེ, བྷིཀྑུ ལོལོ’’ཏི སཏྠུ ཨཱརོཙེསུཾ. ཨཐ ནཾ སཏྠཱ ‘‘སཙྩཾ ཀིར ¶ ཏྭཾ བྷིཀྑུ ལོལོསཱི’’ཏི པུཙྪི. ‘‘ཨཱམ, བྷནྟེ’’ཏི. སཏྠཱ ‘‘པུབྦེཔི ཏྭཾ བྷིཀྑུ ལོལོ ལོལཀཱརཎཱ ཛཱིཝིཏཀྑཡཾ པཏྟོ, པཎྜིཏཱཔི ཏཾ ནིསྶཱཡ ཨཏྟནོ ཝསནཊྛཱནཱ པརིཧཱིནཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ པཱརཱཝཏཡོནིཡཾ ནིབྦཏྟི. ཏདཱ བཱརཱཎསིཝཱསིནོ པུཉྙཀཱམཏཱཡ ཏསྨིཾ ཏསྨིཾ ཋཱནེ སཀུཎཱནཾ སུཁཝསནཏྠཱཡ ཐུསཔཙྪིཡོ ཨོལམྦེནྟི. བཱརཱཎསིསེཊྛིནོཔི བྷཏྟཀཱརཀོ ཨཏྟནོ མཧཱནསེ ཨེཀཾ ཐུསཔཙྪིཾ ཨོལམྦེཏྭཱ ཋཔེསི, བོདྷིསཏྟོ ཏཏྠ ཝཱསཾ ཀཔྤེསི. སོ པཱཏོཝ ནིཀྑམིཏྭཱ གོཙརེ ཙརིཏྭཱ སཱཡཾ ཨཱགནྟྭཱ ཏཏྠ ཝསནྟོ ཀཱལཾ ཁེཔེསི. ཨཐེཀདིཝསཾ ཨེཀོ ཀཱཀོ མཧཱནསམཏྠཀེན གཙྪནྟོ ཨམྦིལཱནམྦིལམཙྪམཾསཱནཾ དྷཱུཔནཝཱསཾ གྷཱཡིཏྭཱ ལོབྷཾ ཨུཔྤཱདེཏྭཱ ‘‘ཀཾ ནུ ཁོ ནིསྶཱཡ ཨིམཾ མཙྪམཾསཾ ལབྷིསྶཱམཱི’’ཏི ཨཝིདཱུརེ ¶ ནིསཱིདིཏྭཱ པརིགྒཎྷནྟོ སཱཡཾ བོདྷིསཏྟཾ ཨཱགནྟྭཱ མཧཱནསཾ ¶ པཝིསནྟཾ དིསྭཱ ‘‘ཨིམཾ པཱརཱཝཏཾ ནིསྶཱཡ མཙྪམཾསཾ ལབྷིསྶཱམཱི’’ཏི པུནདིཝསེ པཱཏོཝ ཨཱགནྟྭཱ བོདྷིསཏྟསྶ ནིཀྑམིཏྭཱ གོཙརཏྠཱཡ གམནཀཱལེ པིཊྛིཏོ པིཊྛིཏོ ཨགམཱསི. ཨཐ ནཾ བོདྷིསཏྟོ ‘‘ཀསྨཱ ཏྭཾ, སམྨ, ཨམྷེཧི སདྡྷིཾ ཙརསཱི’’ཏི ཨཱཧ. ‘‘སཱམི, ཏུམྷཱཧཾ ཀིརིཡཱ མཡ྄ཧཾ རུཙྩཏི, ཨིཏོ པཊྛཱཡ ཏུམྷེ ཨུཔཊྛཧིསྶཱམཱི’’ཏི. ‘‘སམྨ, ཏུམྷེ ཨཉྙགོཙརཱ, མཡཾ ཨཉྙགོཙརཱ, ཏུམྷེཧི ཨམྷཱཀཾ ཨུཔཊྛཱནཾ དུཀྐར’’ནྟི. ‘‘སཱམི, ཏུམྷཱཀཾ གོཙརགྒཧཎཀཱལེ ཨཧམྤི གོཙརཾ གཧེཏྭཱ ཏུམྷེཧི སདྡྷིཾཡེཝ གམིསྶཱམཱི’’ཏི. ‘‘སཱདྷུ, ཀེཝལཾ ཏེ ཨཔྤམཏྟེན བྷཝིཏབྦ’’ནྟི ཨེཝཾ བོདྷིསཏྟོ ཀཱཀཾ ཨོཝདིཏྭཱ གོཙརཾ ཙརནྟོ ཏིཎབཱིཛཱདཱིནི ཁཱདཏི. བོདྷིསཏྟསྶ པན གོཙརགྒཧཎཀཱལེ ཀཱཀོ གནྟྭཱ གོམཡཔིཎྜཾ ཨཔནེཏྭཱ པཱཎཀེ ཁཱདིཏྭཱ ཨུདརཾ པཱུརེཏྭཱ བོདྷིསཏྟསྶ སནྟིཀཾ ཨཱགནྟྭཱ ‘‘སཱམི, ཏུམྷེ ཨཏིཝེལཾ ཙརཐ, ཨཏིབཧུབྷཀྑེན ནཱམ བྷཝིཏུཾ ན ཝཊྚཏཱི’’ཏི ཝཏྭཱ བོདྷིསཏྟེན གོཙརཾ གཧེཏྭཱ སཱཡཾ ཨཱགཙྪནྟེན སདྡྷིཾཡེཝ མཧཱནསཾ པཱཝིསི. བྷཏྟཀཱརཀོ ¶ ‘‘ཨམྷཱཀཾ ཀཔོཏོ ཨཉྙམྤི གཧེཏྭཱ ཨཱགཏོ’’ཏི ཀཱཀསྶཔི པཙྪིཾ ཋཔེསི. ཏཏོ པཊྛཱཡ དྭེ ཛནཱ ཝསནྟི.

ཨཐེཀདིཝསཾ སེཊྛིསྶ བཧུཾ མཙྪམཾསཾ ཨཱཧརིཾསུ. ཏཾ ཨཱདཱཡ བྷཏྟཀཱརཀོ མཧཱནསེ ཏཏྠ ཏཏྠ ཨོལམྦེསི. ཀཱཀོ ཏཾ དིསྭཱ ལོབྷཾ ཨུཔྤཱདེཏྭཱ ‘‘སྭེ གོཙརབྷཱུམིཾ ཨགནྟྭཱ མཡཱ ཨིདམེཝ ཁཱདིཏབྦ’’ནྟི རཏྟིཾ ནིཏྠུནནྟོ ནིཔཛྫི. པུནདིཝསེ བོདྷིསཏྟོ གོཙརཱཡ གཙྪནྟོ ‘‘ཨེཧི, སམྨ, ཀཱཀཱ’’ཏི ཨཱཧ. ‘‘སཱམི, ཏུམྷེ གཙྪཐ, མཡ྄ཧཾ ཀུཙྪིརོགོ ཨཏྠཱི’’ཏི. ‘‘སམྨ, ཀཱཀཱནཾ ཀུཙྪིརོགོ ནཱམ ན ཀདཱཙི བྷཱུཏཔུབྦོ, རཏྟིཾ ཏཱིསུ ཡཱམེསུ ཨེཀེཀསྨིཾ ཡཱམེ མུཙྪིཏཱ ཧོནྟི, དཱིཔཝཊྚིཾ གིལིཏཀཱལེ པན ནེསཾ མུཧུཏྟཾ ཏིཏྟི ཧོཏི, ཏྭཾ ཨིམཾ མཙྪམཾསཾ ཁཱདིཏུཀཱམོ བྷཝིསྶསི, ཨེཧི མནུསྶཔརིབྷོགོ ནཱམ ཏུམྷཱཀཾ དུཔྤརིབྷུཉྫིཡོ, མཱ ཨེཝརཱུཔཾ ཨཀཱསི, མཡཱ སདྡྷིཾཡེཝ གོཙརཱཡ གཙྪཱཧཱི’’ཏི. ‘‘ན སཀྐོམི, སཱམཱི’’ཏི. ‘‘ཏེན ཧི པཉྙཱཡིསྶསི སཀེན ཀམྨེན, ལོབྷཝསཾ ཨགནྟྭཱ ཨཔྤམཏྟོ ཧོཧཱི’’ཏི ཏཾ ཨོཝདིཏྭཱ བོདྷིསཏྟོ གོཙརཱཡ གཏོ.

བྷཏྟཀཱརཀོ ¶ ནཱནཔྤཀཱརཾ མཙྪམཾསཝིཀཏིཾ སམྤཱདེཏྭཱ ཨུསུམནིཀྑམནཏྠཾ བྷཱཛནཱནི ཐོཀཾ ཝིཝརིཏྭཱ རསཔརིསྶཱཝནཀརོཊིཾ བྷཱཛནམཏྠཀེ ཋཔེཏྭཱ བཧི ནིཀྑམིཏྭཱ སེདཾ པུཉྪམཱནོ ཨཊྛཱསི. ཏསྨིཾ ཁཎེ ཀཱཀོ པཙྪིཏོ སཱིསཾ ཨུཀྑིཔིཏྭཱ བྷཏྟགེཧཾ ཨོལོཀེནྟོ ཏསྶ ནིཀྑནྟབྷཱཝཾ ཉཏྭཱ ‘‘ཨཡཾདཱནི མཡ྄ཧཾ མནོརཐཾ པཱུརེཏྭཱ མཾསཾ ཁཱདིཏུཾ ཀཱལོ, ཀིཾ ནུ ཁོ མཧཱམཾསཾ ཁཱདཱམི, ཨུདཱཧུ ཙུཎྞིཀམཾས’’ནྟི ཙིནྟེཏྭཱ ‘‘ཙུཎྞིཀམཾསེན ནཱམ ཁིཔྤཾ ཀུཙྪིཾ པཱུརེཏུཾ ན སཀྐཱ, མཧནྟཾ མཾསཁཎྜཾ ཨཱཧརིཏྭཱ པཙྪིཡཾ ནིཀྑིཔིཏྭཱ ཁཱདམཱནོ ནིཔཛྫིསྶཱམཱི’’ཏི ¶ པཙྪིཏོ ཨུཔྤཏིཏྭཱ རསཀརོཊིཡཾ ནིལཱིཡི. སཱ ‘‘ཀིརཱི’’ཏི སདྡམཀཱསི. བྷཏྟཀཱརཀོ ཏཾ སདྡཾ སུཏྭཱ ‘‘ཀིཾ ནུ ཁོ ཨེཏ’’ནྟི པཝིཊྛོ ཀཱཀཾ དིསྭཱ ‘‘ཨཡཾ དུཊྛཀཱཀོ མཧཱསེཊྛིནོ པཀྐམཾསཾ ཁཱདིཏུཀཱམོ, ཨཧཾ ཁོ པན སེཊྛིཾ ནིསྶཱཡ ཛཱིཝཱམི, ན ཨིམཾ བཱལཾ, ཀིཾ མེ ཨིམིནཱ’’ཏི དྭཱརཾ པིདྷཱཡ ཀཱཀཾ གཧེཏྭཱ སཀལསརཱིརེ པཏྟཱནི ¶ ལུཉྩིཏྭཱ ཨལླསིངྒཱིཝེརལོཎཛཱིརཀཱདཡོ ཀོཊྚེཏྭཱ ཨམྦིལཏཀྐེན ཨཱལོལེ༹ཏྭཱ ཏེནསྶ སཀལསརཱིརཾ མཀྑེཏྭཱ ཏཾ ཀཱཀཾ པཙྪིཡཾ ཁིཔི. སོ ཨདྷིམཏྟཝེདནཱབྷིབྷཱུཏོ ནིཏྠུནནྟོ ནིཔཛྫི.

བོདྷིསཏྟོ སཱཡཾ ཨཱགནྟྭཱ ཏཾ བྱསནཔྤཏྟཾ དིསྭཱ ‘‘ལོལཀཱཀ, མམ ཝཙནཾ ཨཀཏྭཱ ཏཝ ལོབྷཾ ནིསྶཱཡ མཧཱདུཀྑཾ པཏྟོསཱི’’ཏི ཝཏྭཱ ཨིམཾ གཱཐམཱཧ –

༤༢.

‘‘ཡོ ཨཏྠཀཱམསྶ ཧིཏཱནུཀམྤིནོ, ཨོཝཛྫམཱནོ ན ཀརོཏི སཱསནཾ;

ཀཔོཏཀསྶ ཝཙནཾ ཨཀཏྭཱ, ཨམིཏྟཧཏྠཏྠགཏོཝ སེཏཱི’’ཏི.

ཏཏྠ ཀཔོཏཀསྶ ཝཙནཾ ཨཀཏྭཱཏི པཱརཱཝཏསྶ ཧིཏཱནུསཱསནཝཙནཾ ཨཀཏྭཱ. ཨམིཏྟཧཏྠཏྠགཏོཝ སེཏཱིཏི ཨམིཏྟཱནཾ ཨནཏྠཀཱརཀཱནཾ དུཀྑུཔྤཱདཀཔུགྒལཱནཾ ཧཏྠཏྠཾ ཧཏྠཔཐཾ གཏོ ཨཡཾ ཀཱཀོ ཝིཡ སོ པུགྒལོ མཧནྟཾ བྱསནཾ པཏྭཱ ཨནུསོཙམཱནོ སེཏཱིཏི.

བོདྷིསཏྟོ ¶ ཨིམཾ གཱཐཾ ཝཏྭཱ ‘‘ཨིདཱནི མཡཱ ཙ ཨིམསྨིཾ ཋཱནེ ན སཀྐཱ ཝསིཏུ’’ནྟི ཨཉྙཏྠ གཏོ. ཀཱཀོཔི ཏཏྠེཝ ཛཱིཝིཏཀྑཡཾ པཏྟོ. ཨཐ ནཾ བྷཏྟཀཱརཀོ སདྡྷིཾ པཙྪིཡཱ གཧེཏྭཱ སངྐཱརཊྛཱནེ ཚཌྜེསི.

སཏྠཱཔི ‘‘ན ཏྭཾ བྷིཀྑུ ཨིདཱནེཝ ལོལོ, པུབྦེཔི ལོལོཡེཝ, ཏཉྩ པན ཏེ ལོལྱཾ ནིསྶཱཡ པཎྜིཏཱཔི སཀཱཝཱསཱ པརིཧཱིནཱ’’ཏི ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེསི, སཙྩཔརིཡོསཱནེ སོ བྷིཀྑུ ཨནཱགཱམིཕལཾ པཏྟོ. སཏྠཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཀཱཀོ ལོལབྷིཀྑུ ཨཧོསི, པཱརཱཝཏོ པན ཨཧམེཝ ཨཧོསི’’ནྟི.

ཀཔོཏཛཱཏཀཝཎྞནཱ དུཏིཡཱ.

[༤༣] ༣. ཝེལུ༹ཀཛཱཏཀཝཎྞནཱ

ཡོ ¶ ཨཏྠཀཱམསྶཱཏི ཨིདཾ སཏྠཱ ཛེཏཝནེ ཝིཧརནྟོ ཨཉྙཏརཾ དུབྦཙབྷིཀྑུཾ ཨཱརབྦྷ ཀཐེསི. ཏཉྷི བྷགཝཱ ‘‘སཙྩཾ ཀིར ཏྭཾ བྷིཀྑུ དུབྦཙོསཱི’’ཏི པུཙྪིཏྭཱ ‘‘སཙྩཾ, བྷནྟེ’’ཏི ཝུཏྟེ ‘‘ན ཏྭཾ བྷིཀྑུ ཨིདཱནེཝ དུབྦཙོ, པུབྦེཔི དུབྦཙོཡེཝ, དུབྦཙཏྟཱཡེཝ ¶ ཙ པཎྜིཏཱནཾ ཝཙནཾ ཨཀཏྭཱ སཔྤམུཁེ ཛཱིཝིཏཀྑཡཾ པཏྟོ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཀཱསིརཊྛེ མཧཱབྷོགཀུལེ ནིབྦཏྟོ ཝིཉྙུཏཾ པཏྭཱ ཀཱམེསུ ཨཱདཱིནཝཾ ནེཀྑམྨེ ཙཱནིསཾསཾ དིསྭཱ ཀཱམེ པཧཱཡ ཧིམཝནྟཾ པཝིསིཏྭཱ ཨིསིཔབྦཛྫཾ པབྦཛིཏྭཱ ཀསིཎཔརིཀམྨཾ ཀཏྭཱ པཉྩཱབྷིཉྙཱ ཨཊྛ སམཱཔཏྟིཡོ ཙ ཨུཔྤཱདེཏྭཱ ཛྷཱནསུཁེན ཝཱིཏིནཱམེནྟོ ཨཔརབྷཱགེ མཧཱཔརིཝཱརོ པཉྩཧི ཏཱཔསསཏེཧི པརིཝུཏོ གཎསྶ སཏྠཱ ཧུཏྭཱ ཝིཧཱསི. ཨཐེཀོ ཨཱསིཝིསཔོཏཀོ ཨཏྟནོ དྷམྨཏཱཡ ཙརནྟོ ཨཉྙཏརསྶ ཏཱཔསསྶ ཨསྶམཔདཾ པཏྟོ. ཏཱཔསོ ཏསྨིཾ པུཏྟསིནེཧཾ ཨུཔྤཱདེཏྭཱ ཏཾ ཨེཀསྨིཾ ཝེལུ༹པབྦེ སཡཱཔེཏྭཱ པཊིཛགྒཏི. ཏསྶ ཝེལུ༹པབྦེ སཡནཏོ ‘‘ཝེལུ༹ཀོ’’ཏྭེཝ ནཱམཾ ཨཀཾསུ. ཏཾ པུཏྟསིནེཧེན པཊིཛགྒནཏོ ཏཱཔསསྶ ‘‘ཝེལུ༹ཀཔིཏཱ’’ཏྭེཝ ནཱམཾ ཨཀཾསུ.

ཏདཱ ¶ བོདྷིསཏྟོ ‘‘ཨེཀོ ཀིར ཏཱཔསོ ཨཱསིཝིསཾ པཊིཛགྒཏཱི’’ཏི སུཏྭཱ ཏཾ པཀྐོསཱཔེཏྭཱ ‘‘སཙྩཾ ཀིར ཏྭཾ ཨཱསིཝིསཾ པཊིཛགྒསཱི’’ཏི པུཙྪིཏྭཱ ‘‘སཙྩ’’ནྟི ཝུཏྟེ ‘‘ཨཱསིཝིསེན སདྡྷིཾ ཝིསྶཱསོ ནཱམ ནཏྠི, མཱ ཨེཝཾ ཛགྒཱཧཱི’’ཏི ཨཱཧ. ‘‘སོ མེ ཨཱཙརིཡ པུཏྟོ, ནཱཧཾ ཏེན ཝིནཱ ཝཏྟིཏུཾ སཀྑིསྶཱམཱི’’ཏི. ‘‘ཏེན ཧི ཨེཏསྶེཝ སནྟིཀཱ ཛཱིཝིཏཀྑཡཾ པཱཔུཎིསྶསཱི’’ཏི. ཏཱཔསོ བོདྷིསཏྟསྶ ཝཙནཾ ན གཎྷི, ཨཱསིཝིསམྤི ཛཧིཏུཾ ནཱསཀྑི. ཏཏོ ཀཏིཔཱཧཙྩཡེནེཝ སབྦེ ཏཱཔསཱ ཕལཱཕལཏྠཱཡ གནྟྭཱ གཏཊྛཱནེ ཕལཱཕལསྶ སུལབྷབྷཱཝཾ དིསྭཱ དྭེ ཏཡོ དིཝསེ ཏཏྠེཝ ཝསིཾསུ, ཝེལུ༹ཀཔིཏཱཔི ཏེཧི སདྡྷིཾ གཙྪནྟོ ཨཱསིཝིསཾ ཝེལུ༹པབྦེཡེཝ སཡཱཔེཏྭཱ པིདཧིཏྭཱ གཏོ. སོ པུན ཏཱཔསེཧི སདྡྷིཾ དྭཱིཧཏཱིཧཙྩཡེན ཨཱགནྟྭཱ ‘‘ཝེལུ༹ཀསྶ གོཙརཾ དསྶཱམཱི’’ཏི ཝེལུ༹པབྦཾ ཨུགྒྷཱཊེཏྭཱ ‘‘ཨེཧི, པུཏྟཀ, ཚཱཏཀོསཱི’’ཏི ཧཏྠཾ པསཱརེསི. ཨཱསིཝིསོ དྭཱིཧཏཱིཧཾ ནིརཱཧཱརཏཱཡ ཀུཛ྄ཛྷིཏྭཱ པསཱརིཏཧཏྠཾ ཌཾསིཏྭཱ ཏཱཔསཾ ཏཏྠེཝ ཛཱིཝིཏཀྑཡཾ པཱཔེཏྭཱ ཨརཉྙཾ པཱཝིསི. ཏཱཔསཱ ཏཾ དིསྭཱ བོདྷིསཏྟསྶ ཨཱརོཙེསུཾ. བོདྷིསཏྟོ ¶ ཏསྶ སརཱིརཀིཙྩཾ ཀཱརེཏྭཱ ཨིསིགཎསྶ མཛ྄ཛྷེ ནིསཱིདིཏྭཱ ཨིསཱིནཾ ཨོཝཱདཝསེན ཨིམཾ གཱཐམཱཧ –

༤༣.

‘‘ཡོ ¶ ཨཏྠཀཱམསྶ ཧིཏཱནུཀམྤིནོ, ཨོཝཛྫམཱནོ ན ཀརོཏི སཱསནཾ;

ཨེཝཾ སོ ནིཧཏོ སེཏི, ཝེལུ༹ཀསྶ ཡཐཱ པིཏཱ’’ཏི.

ཏཏྠ ཨེཝཾ སོ ནིཧཏོ སེཏཱིཏི ཡོ ཧི ཨིསཱིནཾ ཨོཝཱདཾ ན གཎྷཱཏི, སོ ཡཐཱ ཨེས ཏཱཔསོ ཨཱསིཝིསམུཁེ པཱུཏིབྷཱཝཾ པཏྭཱ ནིཧཏོ སེཏི, ཨེཝཾ མཧཱཝིནཱསཾ པཏྭཱ ནིཧཏོ སེཏཱིཏི ཨཏྠོ. ཨེཝཾ བོདྷིསཏྟོ ཨིསིགཎཾ ཨོཝདིཏྭཱ ཙཏྟཱརོ བྲཧྨཝིཧཱརེ བྷཱཝེཏྭཱ ཨཱཡུཔརིཡོསཱནེ བྲཧྨལོཀེ ཨུཔྤཛྫི.

སཏྠཱ ‘‘ན ཏྭཾ བྷིཀྑུ ཨིདཱནེཝ དུབྦཙོ, པུབྦེཔི དུབྦཙོཡེཝ, དུབྦཙབྷཱཝེནེཝ ཙ ཨཱསིཝིསམུཁེ པཱུཏིབྷཱཝཾ པཏྟོ’’ཏི ཨིམཾ དྷམྨདེསནཾ ཨཱཧརིཏྭཱ ¶ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཝེལུ༹ཀཔིཏཱ དུབྦཙབྷིཀྑུ ཨཧོསི, སེསཔརིསཱ བུདྡྷཔརིསཱ, གཎསཏྠཱ པན ཨཧམེཝ ཨཧོསི’’ནྟི.

ཝེལུ༹ཀཛཱཏཀཝཎྞནཱ ཏཏིཡཱ.

[༤༤] ༤. མཀསཛཱཏཀཝཎྞནཱ

སེཡྻོ ཨམིཏྟོཏི ཨིདཾ སཏྠཱ མགདྷེསུ ཙཱརིཀཾ ཙརམཱནོ ཨཉྙཏརསྨིཾ གཱམཀེ བཱལགཱམིཀམནུསྶེ ཨཱརབྦྷ ཀཐེསི. ཏཐཱགཏོ ཀིར ཨེཀསྨིཾ སམཡེ སཱཝཏྠིཏོ མགདྷརཊྛཾ གནྟྭཱ ཏཏྠ ཙཱརིཀཾ ཙརམཱནོ ཨཉྙཏརཾ གཱམཀཾ སམྤཱཔུཎི. སོ ཙ གཱམཀོ ཡེབྷུཡྻེན ཨནྡྷབཱལམནུསྶེཧིཡེཝ ཨུསྶནྣོ. ཏཏྠེཀདིཝསཾ ཏེ ཨནྡྷབཱལམནུསྶཱ སནྣིཔཏིཏྭཱ ‘‘བྷོ, ཨམྷེ ཨརཉྙཾ པཝིསིཏྭཱ ཀམྨཾ ཀརོནྟེ མཀསཱ ཁཱདནྟི, ཏཔྤཙྩཡཱ ཨམྷཱཀཾ ཀམྨཙྪེདོ ཧོཏི, སབྦེཝ དྷནཱུནི ཙེཝ ཨཱཝུདྷཱནི ཙ ཨཱདཱཡ གནྟྭཱ མཀསེཧི སདྡྷིཾ ཡུཛ྄ཛྷིཏྭཱ སབྦམཀསེ ཝིཛ྄ཛྷིཏྭཱ ཚིནྡིཏྭཱ ཙ མཱརེསྶཱམཱ’’ཏི མནྟཡིཏྭཱ ཨརཉྙཾ གནྟྭཱ ‘‘མཀསེ ཝིཛ྄ཛྷིསྶཱམཱ’’ཏི ཨཉྙམཉྙཾ ཝིཛ྄ཛྷིཏྭཱ ཙ པཧརིཏྭཱ ཙ དུཀྑཔྤཏྟཱ ཨཱགནྟྭཱ ཨནྟོགཱམེ ཙ གཱམམཛ྄ཛྷེ ཙ གཱམདྭཱརེ ཙ ནིཔཛྫིཾསུ.

སཏྠཱ བྷིཀྑུསངྒྷཔརིཝུཏོ ཏཾ གཱམཾ པིཎྜཱཡ པཱཝིསི. ཨཝསེསཱ པཎྜིཏམནུསྶཱ བྷགཝནྟཾ དིསྭཱ གཱམདྭཱརེ མཎྜཔཾ ཀཱརེཏྭཱ བུདྡྷཔྤམུཁསྶ བྷིཀྑུསངྒྷསྶ ¶ མཧཱདཱནཾ དཏྭཱ སཏྠཱརཾ ཝནྡིཏྭཱ ནིསཱིདིཾསུ. སཏྠཱ ཏསྨིཾ ཏསྨིཾ ཋཱནེ པཏིཏམནུསྶེ དིསྭཱ ཏེ ཨུཔཱསཀེ པུཙྪི ¶ ‘‘བཧཱུ ཨིམེ གིལཱནཱ མནུསྶཱ, ཀིཾ ཨེཏེཧི ཀཏ’’ནྟི? ‘‘བྷནྟེ, ཨེཏེ མནུསྶཱ ‘མཀསཡུདྡྷཾ ཀརིསྶཱམཱ’ཏི གནྟྭཱ ཨཉྙམཉྙཾ ཝིཛ྄ཛྷིཏྭཱ སཡཾ གིལཱནཱ ཛཱཏཱ’’ཏི. སཏྠཱ ‘‘ན ཨིདཱནེཝ ཨནྡྷབཱལམནུསྶཱ ‘མཀསེ པཧརིསྶཱམཱ’ཏི ཨཏྟཱནཾ པཧརནྟི, པུབྦེཔི ‘མཀསཾ པཧརིསྶཱམཱ’ཏི པརཾ པཧརཎཀམནུསྶཱ ཨཧེསུཾཡེཝཱ’’ཏི ཝཏྭཱ ཏེཧི མནུསྶེཧི ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཝཎིཛྫཱཡ ཛཱིཝིཀཾ ཀཔྤེཏི. ཏདཱ ཀཱསིརཊྛེ ཨེཀསྨིཾ པཙྩནྟགཱམེ བཧཱུ ¶ ཝཌྜྷཀཱི ཝསནྟི. ཏཏྠེཀོ ཁལིཏཝཌྜྷཀཱི རུཀྑཾ ཏཙྪཏི, ཨཐསྶ ཨེཀོ མཀསོ ཏམྦལོཧཐཱལཀཔིཊྛིསདིསེ སཱིསེ ནིསཱིདིཏྭཱ སཏྟིཡཱ པཧརནྟོ ཝིཡ སཱིསཾ མུཁཏུཎྜཀེན ཝིཛ྄ཛྷི. སོ ཨཏྟནོ སནྟིཀེ ནིསིནྣཾ པུཏྟཾ ཨཱཧ – ‘‘ཏཱཏ, མཡ྄ཧཾ སཱིསཾ མཀསོ སཏྟིཡཱ པཧརནྟོ ཝིཡ ཝིཛ྄ཛྷཏི, ཝཱརེཧི ན’’ནྟི. ‘‘ཏཱཏ, ཨདྷིཝཱསེཧི, ཨེཀཔྤཧཱརེནེཝ ཏཾ མཱརེསྶཱམཱི’’ཏི. ཏསྨིཾ སམཡེ བོདྷིསཏྟོཔི ཨཏྟནོ བྷཎྜཾ པརིཡེསམཱནོ ཏཾ གཱམཾ པཏྭཱ ཏསྶཱ ཝཌྜྷཀིསཱལཱཡ ནིསིནྣོ ཧོཏི. ཨཐ སོ ཝཌྜྷཀཱི པུཏྟཾ ཨཱཧ – ‘‘ཏཱཏ, ཨིམཾ མཀསཾ ཝཱརེཧཱི’’ཏི. སོ ‘‘ཝཱརེསྶཱམི, ཏཱཏཱ’’ཏི ཏིཁིཎཾ མཧཱཕརསུཾ ཨུཀྑིཔིཏྭཱ པིཏུ པིཊྛིཔསྶེ ཋཏྭཱ ‘‘མཀསཾ པཧརིསྶཱམཱི’’ཏི པིཏུ མཏྠཀཾ དྭིདྷཱ བྷིནྡི, ཝཌྜྷཀཱི ཏཏྠེཝ ཛཱིཝིཏཀྑཡཾ པཏྟོ.

བོདྷིསཏྟོ ཏསྶ ཏཾ ཀམྨཾ དིསྭཱ ‘‘པཙྩཱམིཏྟོཔི པཎྜིཏོཝ སེཡྻོ. སོ ཧི དཎྜབྷཡེནཔི མནུསྶེ ན མཱརེསྶཏཱི’’ཏི ཙིནྟེཏྭཱ ཨིམཾ གཱཐམཱཧ –

༤༤.

‘‘སེཡྻོ ཨམིཏྟོ མཏིཡཱ ཨུཔེཏོ, ན ཏྭེཝ མིཏྟོ མཏིཝིཔྤཧཱིནོ;

‘མཀསཾ ཝདྷིསྶ’ནྟི ཧི ཨེལ༹མཱུགོ, པུཏྟོ པིཏུ ཨབྦྷིདཱ ཨུཏྟམངྒ’’ནྟི.

ཏཏྠ ¶ སེཡྻོཏི པཝརོ ཨུཏྟམོ. མཏིཡཱ ཨུཔེཏོཏི པཉྙཱཡ སམནྣཱགཏོ. ཨེལ༹མཱུགོཏི ལཱལཱམུཁོ བཱལོ. པུཏྟོ པིཏུ ཨབྦྷིདཱ ཨུཏྟམངྒནྟི ཨཏྟནོ བཱལཏཱཡ པུཏྟོཔི ཧུཏྭཱ པིཏུ ཨུཏྟམངྒཾ མཏྠཀཾ ‘‘མཀསཾ པཧརིསྶཱམཱི’’ཏི དྭིདྷཱ བྷིནྡི. ཏསྨཱ བཱལམིཏྟཏོ པཎྜིཏཨམིཏྟོཝ སེཡྻོཏི ཨིམཾ གཱཐཾ ཝཏྭཱ བོདྷིསཏྟོ ཨུཊྛཱཡ ཡཐཱཀམྨཾ གཏོ. ཝཌྜྷཀིསྶཔི ཉཱཏཀཱ སརཱིརཀིཙྩཾ ཨཀཾསུ.

སཏྠཱ ¶ ‘‘ཨེཝཾ ཨུཔཱསཀཱ པུབྦེཔི ‘མཀསཾ པཧརིསྶཱམཱ’ཏི པརཾ པཧརཎཀམནུསྶཱ ཨཧེསུཾཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི ‘‘ཏདཱ གཱཐཾ ཝཏྭཱ པཀྐནྟོ པཎྜིཏཝཱཎིཛོ པན ཨཧམེཝ ཨཧོསི’’ནྟི.

མཀསཛཱཏཀཝཎྞནཱ ཙཏུཏྠཱ.

[༤༥] ༥. རོཧིཎིཛཱཏཀཝཎྞནཱ

སེཡྻོ ¶ ཨམིཏྟོཏིཨིདཾ སཏྠཱ ཛེཏཝནེ ཝིཧརནྟོ ཨེཀཾ ཨནཱཐཔིཎྜིཀསེཊྛིནོ དཱསིཾ ཨཱརབྦྷ ཀཐེསི. ཨནཱཐཔིཎྜིཀསྶ ཀིར ཨེཀཱ རོཧིཎཱི ནཱམ དཱསཱི ཨཧོསི. ཏསྶཱ ཝཱིཧིཔཧརཎཊྛཱནེ ཨཱགནྟྭཱ མཧལླིཀཱ མཱཏཱ ནིཔཛྫི, ཏཾ མཀྑིཀཱ པརིཝཱརེཏྭཱ སཱུཙིཡཱ ཝིཛ྄ཛྷམཱནཱ ཝིཡ ཁཱདནྟི. སཱ དྷཱིཏརཾ ཨཱཧ – ‘‘ཨམྨ, མཀྑིཀཱ མཾ ཁཱདནྟི, ཨེཏཱ ཝཱརེཧཱི’’ཏི. སཱ ‘‘ཝཱརེསྶཱམི, ཨམྨཱ’’ཏི མུསལཾ ཨུཀྑིཔིཏྭཱ ‘‘མཱཏུ སརཱིརེ མཀྑིཀཱ མཱརེཏྭཱ ཝིནཱསཾ པཱཔེསྶཱམཱི’’ཏི མཱཏརཾ མུསལེན པཧརིཏྭཱ ཛཱིཝིཏཀྑཡཾ པཱཔེསི. ཏཾ དིསྭཱ ‘‘མཱཏཱ མེ མཏཱ’’ཏི རོདིཏུཾ ཨཱརབྷི. ཏཾ པཝཏྟིཾ སེཊྛིསྶ ཨཱརོཙེསུཾ. སེཊྛི ཏསྶཱ སརཱིརཀིཙྩཾ ཀཱརེཏྭཱ ཝིཧཱརཾ གནྟྭཱ སབྦཾ ཏཾ པཝཏྟིཾ སཏྠུ ཨཱརོཙེསི. སཏྠཱ ‘‘ན ཁོ, གཧཔཏི, ཨེསཱ ‘མཱཏུ སརཱིརེ མཀྑིཀཱ མཱརེསྶཱམཱི’ཏི ཨིདཱནེཝ མུསལེན པཧརིཏྭཱ མཱཏརཾ མཱརེསི, པུབྦེཔི མཱརེསིཡེཝཱ’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ སེཊྛིཀུལེ ནིབྦཏྟིཏྭཱ པིཏུཨཙྩཡེན སེཊྛིཊྛཱནཾ པཱཔུཎི. ཏསྶཱཔི རོཧིཎཱིཡེཝ ནཱམ དཱསཱི ཨཧོསི. སཱཔི ཨཏྟནོ ཝཱིཧིཔཧརཎཊྛཱནཾ ཨཱགནྟྭཱ ནིཔནྣཾ མཱཏརཾ ‘‘མཀྑིཀཱ མེ, ཨམྨ, ཝཱརེཧཱི’’ཏི ཝུཏྟཱ ཨེཝམེཝ མུསལེན པཧརིཏྭཱ མཱཏརཾ ཛཱིཝིཏཀྑཡཾ པཱཔེཏྭཱ རོདིཏུཾ ཨཱརབྷི. བོདྷིསཏྟོ ཏཾ པཝཏྟིཾ ¶ སུཏྭཱ ‘‘ཨམིཏྟོཔི ཧི ཨིམསྨིཾ ལོཀེ པཎྜིཏོཝ སེཡྻོ’’ཏི ཙིནྟེཏྭཱ ཨིམཾ གཱཐམཱཧ –

༤༥.

‘‘སེཡྻོ ཨམིཏྟོ མེདྷཱཝཱི, ཡཉྩེ བཱལཱནུཀམྤཀོ;

པསྶ རོཧིཎིཀཾ ཛམྨིཾ, མཱཏརཾ ཧནྟྭཱན སོཙཏཱི’’ཏི.

ཏཏྠ མེདྷཱཝཱིཏི པཎྜིཏོ ཉཱཎཱི ཝིབྷཱཝཱི. ཡཉྩེ བཱལཱནུཀམྤཀོཏི ཨེཏྠ ཡནྟི ལིངྒཝིཔལླཱསོ ཀཏོ, ཙེཏི ནཱམཏྠེ ནིཔཱཏོ. ཡོ ནཱམ བཱལོ ཨནུཀམྤཀོ, ཏཏོ སཏགུཎེན སཧསྶགུཎེན ¶ པཎྜིཏོ ཨམིཏྟོ ཧོནྟོཔི སེཡྻོཡེཝཱཏི ཨཏྠོ. ཨཐ ཝཱ ཡནྟི པཊིསེདྷནཏྠེ ནིཔཱཏོ, ནོ ཙེ བཱལཱནུཀམྤཀོཏི ཨཏྠོ. ཛམྨིནྟི ལཱམིཀཾ དནྡྷཾ. མཱཏརཾ ཧནྟྭཱན སོཙཏཱིཏི ‘‘མཀྑིཀཱ མཱརེསྶཱམཱི’’ཏི མཱཏརཾ ཧནྟྭཱ ཨིདཱནི ཨཡཾ བཱལཱ སཡམེཝ རོདཏི པརིདེཝཏི. ཨིམིནཱ ཀཱརཎེན ¶ ཨིམསྨིཾ ལོཀེ ཨམིཏྟོཔི པཎྜིཏོ སེཡྻོཏི བོདྷིསཏྟོ པཎྜིཏཾ པསཾསནྟོ ཨིམཱཡ གཱཐཱཡ དྷམྨཾ དེསེསི.

སཏྠཱ ‘‘ན ཁོ, གཧཔཏི, ཨེསཱ ཨིདཱནེཝ ‘མཀྑིཀཱ མཱརེསྶཱམཱི’ཏི མཱཏརཾ གྷཱཏེསི, པུབྦེཔི གྷཱཏེསིཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ མཱཏཱཡེཝ མཱཏཱ ཨཧོསི, དྷཱིཏཱཡེཝ དྷཱིཏཱ, མཧཱསེཊྛི པན ཨཧམེཝ ཨཧོསི’’ནྟི.

རོཧིཎིཛཱཏཀཝཎྞནཱ པཉྩམཱ.

[༤༦] ༦. ཨཱརཱམདཱུསཀཛཱཏཀཝཎྞནཱ

ན ཝེ ཨནཏྠཀུསལེནཱཏི ཨིདཾ སཏྠཱ ཨཉྙཏརསྨིཾ ཀོསལགཱམཀེ ཝིཧརནྟོ ཨུཡྻཱནདཱུསཀཾ ཨཱརབྦྷ ཀཐེསི. སཏྠཱ ཀིར ཀོསལེསུ ཙཱརིཀཾ ཙརམཱནོ ཨཉྙཏརཾ གཱམཀཾ སམྤཱཔུཎི. ཏཏྠེཀོ ཀུཊུམྦིཀོ ཏཐཱགཏཾ ནིམནྟེཏྭཱ ཨཏྟནོ ཨུཡྻཱནེ ནིསཱིདཱཔེཏྭཱ བུདྡྷཔྤམུཁསྶ སངྒྷསྶ མཧཱདཱནཾ དཏྭཱ ‘‘བྷནྟེ, ཡཐཱརུཙིཡཱ ཨིམསྨིཾ ཨུཡྻཱནེ ཝིཙརཐཱ’’ཏི ཨཱཧ. བྷིཀྑཱུ ཨུཊྛཱཡ ཨུཡྻཱནཔཱལཾ གཧེཏྭཱ ཨུཡྻཱནེ ཝིཙརནྟཱ ཨེཀཾ ཨངྒཎཊྛཱནཾ དིསྭཱ ཨུཡྻཱནཔཱལཾ པུཙྪིཾསུ ‘‘ཨུཔཱསཀ, ཨིམཾ ཨུཡྻཱནཾ ཨཉྙཏྠ སནྡཙྪཱཡཾ, ཨིམསྨིཾ པན ཋཱནེ ན ཀོཙི རུཀྑོ ཝཱ གཙྪོ ཝཱ ཨཏྠི, ཀིཾ ནུ ཁོ ཀཱརཎ’’ནྟི? ‘‘བྷནྟེ, ཨིམསྶ ཨུཡྻཱནསྶ རོཔནཀཱལེ ཨེཀོ གཱམདཱརཀོ ཨུདཀཾ སིཉྩནྟོ ཨིམསྨིཾ ཋཱནེ རུཀྑཔོཏཀེ ཨུམྨཱུལཾ ཀཏྭཱ མཱུལཔྤམཱཎེན ཨུདཀཾ སིཉྩི ¶ . ཏེ རུཀྑཔོཏཀཱ མིལཱཡིཏྭཱ མཏཱ. ཨིམིནཱ ཀཱརཎེན ཨིདཾ ཋཱནཾ ཨངྒཎཾ ཛཱཏ’’ནྟི. བྷིཀྑཱུ སཏྠཱརཾ ཨུཔསངྐམིཏྭཱ ཨེཏམཏྠཾ ཨཱརོཙེསུཾ. སཏྠཱ ‘‘ན, བྷིཀྑཝེ, སོ གཱམདཱརཀོ ཨིདཱནེཝ ཨཱརཱམདཱུསཀོ, པུབྦེཔི ཨཱརཱམདཱུསཀོཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བཱརཱཎསིཡཾ ནཀྑཏྟཾ གྷོསཡིཾསུ. ནཀྑཏྟབྷེརིསདྡསཝནཀཱལཏོ པཊྛཱཡ སཀལནགརཝཱསིནོ ནཀྑཏྟནིསྶིཏཀཱ ཧུཏྭཱ ཝིཙརནྟི. ཏདཱ རཉྙོ ཨུཡྻཱནེ བཧཱུ མཀྐཊཱ ཝསནྟི. ཨུཡྻཱནཔཱལོ ཙིནྟེསི ‘‘ནགརེ ནཀྑཏྟཾ གྷུཊྛཾ, ཨིམེ ཝཱནརེ ‘ཨུདཀཾ སིཉྩཐཱ’ཏི ཝཏྭཱ ཨཧཾ ནཀྑཏྟཾ ཀཱིལི༹སྶཱམཱི’’ཏི ཛེཊྛཀཝཱནརཾ ཨུཔསངྐམིཏྭཱ ¶ ¶ ‘‘སམྨ ཝཱནརཛེཊྛཀ, ཨིམཾ ཨུཡྻཱནཾ ཏུམྷཱཀམྤི བཧཱུཔཀཱརཾ, ཏུམྷེ ཨེཏྠ པུཔྥཕལཔལླཝཱནི ཁཱདཐ, ནགརེ ནཀྑཏྟཾ གྷུཊྛཾ, ཨཧཾ ནཀྑཏྟཾ ཀཱིལི༹སྶཱམི. ཡཱཝཱཧཾ ཨཱགཙྪཱམི, ཏཱཝ ཨིམསྨིཾ ཨུཡྻཱནེ རུཀྑཔོཏཀེསུ ཨུདཀཾ སིཉྩིཏུཾ སཀྑིསྶཐཱ’’ཏི པུཙྪི. ‘‘སཱདྷུ, སིཉྩིསྶཱམཱི’’ཏི. ‘‘ཏེན ཧི ཨཔྤམཏྟཱ ཧོཐཱ’’ཏི ཨུདཀསིཉྩནཏྠཱཡ ཏེསཾ ཙམྨཀུཊེ ཙ དཱརུཀུཊེ ཙ དཏྭཱ གཏོ. ཝཱནརཱ ཙམྨཀུཊེ ཙེཝ དཱརུཀུཊེ ཙ གཧེཏྭཱ རུཀྑཔོཏཀེསུ ཨུདཀཾ སིཉྩནྟི. ཨཐ ནེ ཝཱནརཛེཊྛཀོ ཨེཝམཱཧ ‘‘བྷོནྟོ ཝཱནརཱ, ཨུདཀཾ ནཱམ རཀྑིཏབྦཾ, ཏུམྷེ རུཀྑཔོཏཀེསུ ཨུདཀཾ སིཉྩནྟཱ ཨུཔྤཱཊེཏྭཱ ཨུཔྤཱཊེཏྭཱ མཱུལཾ ཨོལོཀེཏྭཱ གམྦྷཱིརགཏེསུ མཱུལེསུ བཧུཾ ཨུདཀཾ སིཉྩཐ, ཨགམྦྷཱིརགཏེསུ ཨཔྤཾ, པཙྪཱ ཨམྷཱཀཾ ཨུདཀཾ དུལླབྷཾ བྷཝིསྶཏཱི’’ཏི. ཏེ ‘‘སཱདྷཱུ’’ཏི སམྤཊིཙྪིཏྭཱ ཏཐཱ ཨཀཾསུ.

ཏསྨིཾ སམཡེ ཨེཀོ པཎྜིཏཔུརིསོ རཱཛུཡྻཱནེ ཏེ ཝཱནརེ ཏཐཱ ཀརོནྟེ དིསྭཱ ཨེཝམཱཧ ‘‘བྷོནྟོ ཝཱནརཱ, ཀསྨཱ ཏུམྷེ རུཀྑཔོཏཀེ ཨུཔྤཱཊེཏྭཱ ཨུཔྤཱཊེཏྭཱ མཱུལཔྤམཱཎེན ཨུདཀཾ སིཉྩཐཱ’’ཏི? ཏེ ‘‘ཨེཝཾ ནོ ཝཱནརཛེཊྛཀོ ཨོཝདཏཱི’’ཏི ཨཱཧཾསུ. སོ ཏཾ ཝཙནཾ སུཏྭཱ ‘‘ཨཧོ ཝཏ བྷོ བཱལཱ ཨཔཎྜིཏཱ, ‘ཨཏྠཾ ཀརིསྶཱམཱ’ཏི ཨནཏྠམེཝ ཀརོནྟཱི’’ཏི ཙིནྟེཏྭཱ ཨིམཾ གཱཐམཱཧ –

༤༦.

‘‘ན ¶ ཝེ ཨནཏྠཀུསལེན, ཨཏྠཙརིཡཱ སུཁཱཝཧཱ;

ཧཱཔེཏི ཨཏྠཾ དུམྨེདྷོ, ཀཔི ཨཱརཱམིཀོ ཡཐཱ’’ཏི.

ཏཏྠ ཝེཏི ནིཔཱཏམཏྟཾ. ཨནཏྠཀུསལེནཱཏི ཨནཏྠེ ཨནཱཡཏནེ ཀུསལེན, ཨཏྠེ ཨཱཡཏནེ ཀཱརཎེ ཨཀུསལེན ཝཱཏི ཨཏྠོ. ཨཏྠཙརིཡཱཏི ཝུཌྜྷིཀིརིཡཱ. སུཁཱཝཧཱཏི ཨེཝརཱུཔེན ཨནཏྠཀུསལེན ཀཱཡིཀཙེཏསིཀསུཁསངྑཱཏསྶ ཨཏྠསྶ ཙརིཡཱ ན སུཁཱཝཧཱ, ན སཀྐཱ ཨཱཝཧིཏུནྟི ཨཏྠོ. ཀིཾཀཱརཎཱ? ཨེཀནྟེནེཝ ཧི ཧཱཔེཏི ཨཏྠཾ དུམྨེདྷོཏི, བཱལཔུགྒལོ ‘‘ཨཏྠཾ ཀརིསྶཱམཱི’’ཏི ཨཏྠཾ ཧཱཔེཏྭཱ ཨནཏྠམེཝ ཀརོཏི. ཀཔི ཨཱརཱམིཀོ ཡཐཱཏི ཡཐཱ ཨཱརཱམེ ནིཡུཏྟོ ཨཱརཱམརཀྑནཀོ མཀྐཊོ ‘‘ཨཏྠཾ ཀརིསྶཱམཱི’’ཏི ཨནཏྠམེཝ ཀརོཏི, ཨེཝཾ ཡོ ཀོཙི ཨནཏྠཀུསལོ, ཏེན ན སཀྐཱ ཨཏྠཙརིཡཾ ཨཱཝཧིཏུཾ, སོ ཨེཀཾསེན ཨཏྠཾ ཧཱཔེཏིཡེཝཱཏི. ཨེཝཾ སོ པཎྜིཏོ པུརིསོ ཨིམཱཡ ¶ གཱཐཱཡ ཝཱནརཛེཊྛཀཾ གརཧིཏྭཱ ཨཏྟནོ པརིསཾ ཨཱདཱཡ ཨུཡྻཱནཱ ནིཀྑམི.

སཏྠཱཔི ¶ ‘‘ན, བྷིཀྑཝེ, ཨེས གཱམདཱརཀོ ཨིདཱནེཝ ཨཱརཱམདཱུསཀོ, པུབྦེཔི ཨཱརཱམདཱུསཀོཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཝཱནརཛེཊྛཀོ ཨཱརཱམདཱུསཀགཱམདཱརཀོ ཨཧོསི, པཎྜིཏཔུརིསོ པན ཨཧམེཝ ཨཧོསི’’ནྟི.

ཨཱརཱམདཱུསཀཛཱཏཀཝཎྞནཱ ཚཊྛཱ.

[༤༧] ༧. ཝཱརུཎིདཱུསཀཛཱཏཀཝཎྞནཱ

ན ཝེ ཨནཏྠཀུསལེནཱཏི ཨིདཾ སཏྠཱ ཛེཏཝནེ ཝིཧརནྟོ ཝཱརུཎིདཱུསཀཾ ཨཱརབྦྷ ཀཐེསི. ཨནཱཐཔིཎྜིཀསྶ ཀིར སཧཱཡོ ཨེཀོ ཝཱརུཎིཝཱཎིཛོ ཏིཁིཎཾ ཝཱརུཎིཾ ཡོཛེཏྭཱ ཧིརཉྙསུཝཎྞཱདཱིནི གཧེཏྭཱ ཝིཀྐིཎནྟོ མཧཱཛནེ སནྣིཔཏིཏེ ‘‘ཏཱཏ, ཏྭཾ མཱུལཾ གཧེཏྭཱ ཝཱརུཎིཾ དེཧཱི’’ཏི ཨནྟེཝཱསིཀཾ ཨཱཎཱཔེཏྭཱ སཡཾ ནྷཱཡིཏུཾ ཨགམཱསི. ཨནྟེཝཱསིཀོ མཧཱཛནསྶ ཝཱརུཎིཾ དེནྟོ མནུསྶེ ཨནྟརནྟརཱ ལོཎསཀྑརཱ ཨཱཧརཱཔེཏྭཱ ཁཱདནྟེ དིསྭཱ ‘‘ཨཡཾ སུརཱ ཨལོཎིཀཱ བྷཝིསྶཏི, ལོཎམེཏྠ པཀྑིཔིསྶཱམཱི’’ཏི སུརཱཙཱཊིཡཾ ནཱལི༹མཏྟཾ ལོཎཾ པཀྑིཔིཏྭཱ ཏེསཾ སུརཾ ཨདཱསི. ཏེ མུཁཾ པཱུརེཏྭཱ པཱུརེཏྭཱ ཚཌྜེཏྭཱ ‘‘ཀིཾ ཏེ ཀཏ’’ནྟི པུཙྪིཾསུ. ‘‘ཏུམྷེ སུརཾ པིཝིཏྭཱ ལོཎཾ ཨཱཧརཱཔེནྟེ དིསྭཱ ལོཎེན ཡོཛེསི’’ནྟི. ‘‘ཨེཝརཱུཔཾ ནཱམ མནཱཔཾ ཝཱརུཎིཾ ནཱསེསི བཱལཱ’’ཏི ཏཾ གརཧིཏྭཱ ཨུཊྛཱཡུཊྛཱཡ པཀྐནྟཱ. ཝཱརུཎིཝཱཎིཛོ ཨཱགནྟྭཱ ཨེཀམྤི ཨདིསྭཱ ¶ ‘‘ཝཱརུཎིཔཱཡཀཱ ཀཧཾ གཏཱ’’ཏི པུཙྪི, སོ ཏམཏྠཾ ཨཱརོཙེསི. ཨཐ ནཾ ཨཱཙརིཡོ ‘‘བཱལ, ཨེཝརཱུཔཱ ནཱམ ཏེ སུརཱ ནཱསིཏཱ’’ཏི གརཧིཏྭཱ ཨིམཾ ཀཱརཎཾ ཨནཱཐཔིཎྜིཀསྶ ཨཱརོཙེསི. ཨནཱཐཔིཎྜིཀོ ‘‘ཨཏྠིདཱནི མེ ཨིདཾ ཀཐཱཔཱབྷཏ’’ནྟི ཛེཏཝནཾ གནྟྭཱ སཏྠཱརཾ ཝནྡིཏྭཱ ཨེཏམཏྠཾ ཨཱརོཙེསི. སཏྠཱ ‘‘ན ཨེས, གཧཔཏི, ཨིདཱནེཝ ཝཱརུཎིདཱུསཀོ, པུབྦེཔི ཝཱརུཎིདཱུསཀོཡེཝཱ’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ བཱརཱཎསིཡཾ སེཊྛི ཨཧོསི. ཏཾ ཨུཔནིསྶཱཡ ཨེཀོ ཝཱརུཎིཝཱཎིཛོ ཛཱིཝཏི. སོ ཏིཁིཎཾ སུརཾ ཡོཛེཏྭཱ ‘‘ཨིམཾ ཝིཀྐིཎཱཧཱི’’ཏི ཨནྟེཝཱསིཀཾ ཝཏྭཱ ནྷཱཡིཏུཾ གཏོ. ཨནྟེཝཱསིཀོ ཏསྨིཾ གཏམཏྟེཡེཝ སུརཱཡ ལོཎཾ པཀྑིཔིཏྭཱ ཨིམིནཱཝ ནཡེན སུརཾ ཝིནཱསེསི. ཨཐསྶ ཨཱཙརིཡོ ཨཱགནྟྭཱ ཏཾ ཀཱརཎཾ ཉཏྭཱ སེཊྛིསྶ ཨཱརོཙེསི. སེཊྛི ‘‘ཨནཏྠཀུསལཱ ནཱམ བཱལཱ ‘ཨཏྠཾ ཀརིསྶཱམཱ’ཏི ཨནཏྠམེཝ ཀརོནྟཱི’’ཏི ཝཏྭཱ ཨིམཾ གཱཐམཱཧ –

༤༧.

‘‘ན ¶ ཝེ ཨནཏྠཀུསལེན, ཨཏྠཙརིཡཱ སུཁཱཝཧཱ;

ཧཱཔེཏི ཨཏྠཾ དུམྨེདྷོ, ཀོཎྜཉྙོ ཝཱརུཎིཾ ཡཐཱ’’ཏི.

ཏཏྠ ཀོཎྜཉྙོ ཝཱརུཎིཾ ཡཐཱཏི ཡཐཱ ཨཡཾ ཀོཎྜཉྙནཱམཀོ ཨནྟེཝཱསིཀོ ‘‘ཨཏྠཾ ཀརིསྶཱམཱི’’ཏི ལོཎཾ པཀྑིཔིཏྭཱ ཝཱརུཎིཾ ཧཱཔེསི པརིཧཱཔེསི ཝིནཱསེསི, ཨེཝཾ སབྦོཔི ཨནཏྠཀུསལོ ཨཏྠཾ ཧཱཔེཏཱིཏི བོདྷིསཏྟོ ཨིམཱཡ གཱཐཱཡ དྷམྨཾ དེསེསི.

སཏྠཱཔི ‘‘ན ཨེས གཧཔཏི ཨིདཱནེཝ ཝཱརུཎིདཱུསཀོ, པུབྦེཔི ཝཱརུཎིདཱུསཀོཡེཝཱ’’ཏི ཝཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཝཱརུཎིདཱུསཀོ ཨིདཱནིཔི ཝཱརུཎིདཱུསཀོཝ ཨཧོསི, བཱརཱཎསིསེཊྛི པན ཨཧམེཝ ཨཧོསི’’ནྟི.

ཝཱརུཎིདཱུསཀཛཱཏཀཝཎྞནཱ སཏྟམཱ.

[༤༨] ༨. ཝེདབྦཛཱཏཀཝཎྞནཱ

ཨནུཔཱཡེན ཡོ ཨཏྠནྟི ཨིདཾ སཏྠཱ ཛེཏཝནེ ཝིཧརནྟོ དུབྦཙབྷིཀྑུཾ ཨཱརབྦྷ ཀཐེསི. ཏཉྷི བྷིཀྑུཾ སཏྠཱ ‘‘ན ཏྭཾ བྷིཀྑུ ཨིདཱནེཝ དུབྦཙོ, པུབྦེཔི དུབྦཙོཡེཝ, ཏེནེཝ ¶ ཙ ཀཱརཎེན པཎྜིཏཱནཾ ཝཙནཾ ཨཀཏྭཱ ཏིཎྷེན ཨསིནཱ དྭིདྷཱ ཀཏྭཱ ཚིནྣོ ཧུཏྭཱ མགྒེ ནིཔཏིཏྠ, ཏཉྩ ཨེཀཀཾ ནིསྶཱཡ པུརིསསཧསྶཾ ཛཱིཝིཏཀྑཡཾ པཏྟ’’ནྟི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ ཨེཀསྨིཾ གཱམཀེ ཨཉྙཏརོ བྲཱཧྨཎོ ཝེདབྦཾ ནཱམ མནྟཾ ཛཱནཱཏི. སོ ཀིར མནྟོ ཨནགྒྷོ ¶ མཧཱརཧོ, ནཀྑཏྟཡོགེ ལདྡྷེ ཏཾ མནྟཾ པརིཝཏྟེཏྭཱ ཨཱཀཱསེ ཨུལློཀིཏེ ཨཱཀཱསཏོ སཏྟརཏནཝསྶཾ ཝསྶཏི. ཏདཱ བོདྷིསཏྟོ ཏསྶ བྲཱཧྨཎསྶ སནྟིཀེ སིཔྤཾ ཨུགྒཎྷཱཏི. ཨཐེཀདིཝསཾ བྲཱཧྨཎོ བོདྷིསཏྟཾ ཨཱདཱཡ ཀེནཙིདེཝ ཀརཎཱིཡེན ཨཏྟནོ གཱམཱ ནིཀྑམིཏྭཱ ཙེཏརཊྛཾ ཨགམཱསི, ཨནྟརཱམགྒེ ཙ ཨེཀསྨིཾ ཨརཉྙཊྛཱནེ པཉྩསཏཱ པེསནཀཙོརཱ ནཱམ པནྠགྷཱཏཾ ཀརོནྟི. ཏེ བོདྷིསཏྟཉྩ ཝེདབྦབྲཱཧྨཎཉྩ གཎྷིཾསུ. ཀསྨཱ པནེཏེ ‘‘པེསནཀཙོརཱ’’ཏི ཝུཙྩནྟི? ཏེ ཀིར དྭེ ཛནེ གཧེཏྭཱ ཨེཀཾ དྷནཱཧརཎཏྠཱཡ པེསེནྟི, ཏསྨཱ ‘‘པེསནཀཙོརཱ’’ཏྭེཝ ཝུཙྩནྟི. ཏེཔི ཙ པིཏཱཔུཏྟེ གཧེཏྭཱ པིཏརཾ ‘‘ཏྭཾ ཨམྷཱཀཾ དྷནཾ ཨཱཧརིཏྭཱ པུཏྟཾ གཧེཏྭཱ ཡཱཧཱི’’ཏི ཝདནྟི. ཨེཏེནུཔཱཡེན ¶ མཱཏུདྷཱིཏརོ གཧེཏྭཱ མཱཏརཾ ཝིསྶཛྫེནྟི, ཛེཊྛཀནིཊྛེ གཧེཏྭཱ ཛེཊྛབྷཱཏིཀཾ ཝིསྶཛྫེནྟི, ཨཱཙརིཡནྟེཝཱསིཀེ གཧེཏྭཱ ཨནྟེཝཱསིཀཾ ཝིསྶཛྫེནྟི. ཏེ ཏསྨིཾ ཀཱལེ ཝེདབྦབྲཱཧྨཎཾ གཧེཏྭཱ བོདྷིསཏྟཾ ཝིསྶཛྫེསུཾ.

བོདྷིསཏྟོ ཨཱཙརིཡཾ ཝནྡིཏྭཱ ‘‘ཨཧཾ ཨེཀཱཧདྭཱིཧཙྩཡེན ཨཱགམིསྶཱམི, ཏུམྷེ མཱ བྷཱཡིཏྠ, ཨཔིཙ ཁོ པན མམ ཝཙནཾ ཀརོཐ, ཨཛྫ དྷནཝསྶཱཔནཀནཀྑཏྟཡོགོ བྷཝིསྶཏི, མཱ ཁོ ཏུམྷེ དུཀྑཾ ཨསཧནྟཱ མནྟཾ པརིཝཏྟེཏྭཱ དྷནཾ ཝསྶཱཔཡིཏྠ. སཙེ ཝསྶཱཔེསྶཐ, ཏུམྷེ ཙ ཝིནཱསཾ པཱཔུཎིསྶཐ, ཨིམེ ཙ པཉྩསཏཱ ཙོརཱ’’ཏི ཨེཝཾ ཨཱཙརིཡཾ ཨོཝདིཏྭཱ དྷནཏྠཱཡ ཨགམཱསི. ཙོརཱཔི སཱུརིཡེ ཨཏྠངྒཏེ བྲཱཧྨཎཾ བནྡྷིཏྭཱ ནིཔཛྫཱཔེསུཾ. ཏངྑཎཉྙེཝ པཱཙཱིནལོཀདྷཱཏུཏོ པརིཔུཎྞཙནྡམཎྜལཾ ཨུཊྛཧི. བྲཱཧྨཎོ ནཀྑཏྟཾ ཨོལོཀེནྟོ ‘‘དྷནཝསྶཱཔནཀནཀྑཏྟཡོགོ ¶ ལདྡྷོ, ཀིཾ མེ དུཀྑེན ཨནུབྷཱུཏེན, མནྟཾ པརིཝཏྟེཏྭཱ རཏནཝསྶཾ ཝསྶཱཔེཏྭཱ ཙོརཱནཾ དྷནཾ དཏྭཱ ཡཐཱསུཁཾ གམིསྶཱམཱི’’ཏི ཙིནྟེཏྭཱ ཙོརེ ཨཱམནྟེསི ‘‘བྷོནྟོ ཙོརཱ, ཏུམྷེ མཾ ཀིམཏྠཱཡ གཎྷཐཱ’’ཏི? ‘‘དྷནཏྠཱཡ, ཨཡྻཱ’’ཏི. ‘‘སཙེ ཝོ, དྷནེན ཨཏྠོ, ཁིཔྤཾ མཾ བནྡྷནཱ མོཙེཏྭཱ སཱིསཾ ནྷཱཔེཏྭཱ ཨཧཏཝཏྠཱནི ཨཙྪཱདེཏྭཱ གནྡྷེཧི ཝིལིམྤཱཔེཏྭཱ པུཔྥཱནི པིལནྡྷཱཔེཏྭཱ ཋཔེཐཱ’’ཏི. ‘‘ཙོརཱ ཏསྶ ཀཐཾ སུཏྭཱ ཏཐཱ ཨཀཾསུ’’.

བྲཱཧྨཎོ ¶ ནཀྑཏྟཡོགཾ ཉཏྭཱ མནྟཾ པརིཝཏྟེཏྭཱ ཨཱཀཱསཾ ཨུལློཀེསི, ཏཱཝདེཝ ཨཱཀཱསཏོ རཏནཱནི པཏིཾསུ. ཙོརཱ ཏཾ དྷནཾ སངྐཌྜྷིཏྭཱ ཨུཏྟརཱསངྒེསུ བྷཎྜིཀཾ ཀཏྭཱ པཱཡིཾསུ. བྲཱཧྨཎོཔི ཏེསཾ པཙྪཏོཝ ཨགམཱསི. ཨཐ ཏེ ཙོརེ ཨཉྙེ པཉྩསཏཱ ཙོརཱ གཎྷིཾསུ. ‘‘ཀིམཏྠཾ ཨམྷེ གཎྷཐཱ’’ཏི ཙ ཝུཏྟཱ ‘‘དྷནཏྠཱཡཱ’’ཏི ཨཱཧཾསུ. ‘‘ཡདི ཝོ དྷནེན ཨཏྠོ, ཨེཏཾ བྲཱཧྨཎཾ གཎྷཐ, ཨེསོ ཨཱཀཱསཾ ཨུལློཀེཏྭཱ དྷནཾ ཝསྶཱཔེསི, ཨམྷཱཀམྤེཏཾ ཨེཏེནེཝ དིནྣ’’ནྟི. ཙོརཱ ཙོརེ ཝིསྶཛྫེཏྭཱ ‘‘ཨམྷཱཀམྤི དྷནཾ དེཧཱི’’ཏི བྲཱཧྨཎཾ གཎྷིཾསུ. བྲཱཧྨཎོ ‘‘ཨཧཾ ཏུམྷཱཀཾ དྷནཾ དདེཡྻཾ, དྷནཝསྶཱཔནཀནཀྑཏྟཡོགོ པན ཨིཏོ སཾཝཙྪརམཏྠཀེ བྷཝིསྶཏི. ཡདི ཝོ དྷནེནཏྠོ, ཨདྷིཝཱསེཐ, ཏདཱ དྷནཝསྶཾ ཝསྶཱཔེསྶཱམཱི’’ཏི ཨཱཧ. ཙོརཱ ཀུཛ྄ཛྷིཏྭཱ ‘‘ཨམྦྷོ, དུཊྛབྲཱཧྨཎ, ཨཉྙེསཾ ཨིདཱནེཝ དྷནཾ ཝསྶཱཔེཏྭཱ ཨམྷེ ཨཉྙཾ སཾཝཙྪརཾ ཨདྷིཝཱསཱཔེསཱི’’ཏི ཏིཎྷེན ཨསིནཱ བྲཱཧྨཎཾ དྭིདྷཱ ཚིནྡིཏྭཱ མགྒེ ཚཌྜེཏྭཱ ཝེགེན ཨནུབནྡྷིཏྭཱ ཏེཧི ཙོརེཧི སདྡྷིཾ ཡུཛ྄ཛྷིཏྭཱ ཏེ སབྦེཔི མཱརེཏྭཱ དྷནཾ ཨཱདཱཡ པུན དྭེ ཀོཊྛཱསཱ ཧུཏྭཱ ཨཉྙམཉྙཾ ཡུཛ྄ཛྷིཏྭཱ ཨཌྜྷཏེཡྻཱནི པུརིསསཏཱནི གྷཱཏེཏྭཱ ཨེཏེན ཨུཔཱཡེན ཡཱཝ དྭེ ཛནཱ ཨཝསིཊྛཱ ཨཧེསུཾ, ཏཱཝ ཨཉྙམཉྙཾ གྷཱཏཡིཾསུ. ཨེཝཾ ཏཾ པུརིསསཧསྶཾ ཝིནཱསཾ པཏྟཾ.

ཏེ ¶ པན དྭེ ཛནཱ ཨུཔཱཡེན ཏཾ དྷནཾ ཨཱཧརིཏྭཱ ཨེཀསྨིཾ གཱམསམཱིཔེ གཧནཊྛཱནེ དྷནཾ པཊིཙྪཱདེཏྭཱ ཨེཀོ ཁགྒཾ གཧེཏྭཱ ¶ རཀྑནྟོ ནིསཱིདི, ཨེཀོ ཏཎྜུལེ གཧེཏྭཱ བྷཏྟཾ པཙཱཔེཏུཾ གཱམཾ པཱཝིསི. ལོབྷོ ཙ ནཱམེས ཝིནཱསམཱུལམེཝཱཏི དྷནསནྟིཀེ ནིསིནྣོ ཙིནྟེསི ‘‘ཏསྨིཾ ཨཱགཏེ ཨིདཾ དྷནཾ དྭེ ཀོཊྛཱསཱ བྷཝིསྶནྟི, ཡཾནཱུནཱཧཾ ཏཾ ཨཱགཏམཏྟམེཝ ཁགྒེན པཧརིཏྭཱ གྷཱཏེཡྻ’’ནྟི. སོ ཁགྒཾ སནྣཡ྄ཧིཏྭཱ ཏསྶ ཨཱགམནཾ ཨོལོཀེནྟོ ནིསཱིདི. ཨིཏརོཔི ཙིནྟེསི ‘‘ཏཾ དྷནཾ དྭེ ཀོཊྛཱསཱ བྷཝིསྶནྟི, ཡཾནཱུནཱཧཾ བྷཏྟེ ཝིསཾ པཀྑིཔིཏྭཱ ཏཾ པུརིསཾ བྷོཛེཏྭཱ ཛཱིཝིཏཀྑཡཾ པཱཔེཏྭཱ ཨེཀཀོཝ དྷནཾ གཎྷེཡྻ’’ནྟི. སོ ནིཊྛིཏེ བྷཏྟེ སཡཾ བྷུཉྫིཏྭཱ སེསཀེ ཝིསཾ པཀྑིཔིཏྭཱ ཏཾ ཨཱདཱཡ ཏཏྠ ཨགམཱསི. ཏཾ བྷཏྟཾ ཨོཏཱརེཏྭཱ ཋིཏམཏྟམེཝ ཨིཏརོ ཁགྒེན དྭིདྷཱ ཚིནྡིཏྭཱ ཏཾ པཊིཙྪནྣཊྛཱནེ ཚཌྜེཏྭཱ ཏཉྩ བྷཏྟཾ བྷུཉྫིཏྭཱ སཡམྤི ཏཏྠེཝ ཛཱིཝིཏཀྑཡཾ པཱཔུཎི. ཨེཝཉྩ ཏཾ དྷནཾ ནིསྶཱཡ སབྦེཝ ཝིནཱསཾ པཱཔུཎིཾསུ.

བོདྷིསཏྟོཔི ¶ ཁོ ཨེཀཱཧདྭཱིཧཙྩཡེན དྷནཾ ཨཱདཱཡ ཨཱགཏོ ཏསྨིཾ ཋཱནེ ཨཱཙརིཡཾ ཨདིསྭཱ ཝིཔྤཀིཎྞཾ པན དྷནཾ དིསྭཱ ‘‘ཨཱཙརིཡེན མམ ཝཙནཾ ཨཀཏྭཱ དྷནཾ ཝསྶཱཔིཏཾ བྷཝིསྶཏི, སབྦེཧི ཝིནཱསཾ པཏྟེཧི བྷཝིཏབྦ’’ནྟི མཧཱམགྒེན པཱཡཱསི. གཙྪནྟོ ཨཱཙརིཡཾ མཧཱམགྒེ དྭིདྷཱ ཚིནྣཾ དིསྭཱ ‘‘མམ ཝཙནཾ ཨཀཏྭཱ མཏོ’’ཏི དཱརཱུནི ཨུདྡྷརིཏྭཱ ཙིཏཀཾ ཀཏྭཱ ཨཱཙརིཡཾ ཛྷཱཔེཏྭཱ ཝནཔུཔྥེཧི པཱུཛེཏྭཱ པུརཏོ གཙྪནྟོ ཛཱིཝིཏཀྑཡཾ པཏྟེ པཉྩསཏེ, པུརཏོ ཨཌྜྷཏེཡྻསཏེཏི ཨནུཀྐམེན ཨཝསཱནེ དྭེ ཛནེ ཛཱིཝིཏཀྑཡཾ པཏྟེ དིསྭཱ ཙིནྟེསི ‘‘ཨིམཾ དྭཱིཧི ཨཱུནཾ པུརིསསཧསྶཾ ཝིནཱསཾ པཏྟཾ, ཨཉྙེཧི དྭཱིཧི ཙོརེཧི བྷཝིཏབྦཾ, ཏེཔི སནྠམྦྷིཏུཾ ན སཀྑིསྶནྟི, ཀཧཾ ནུ ཁོ ཏེ གཏཱ’’ཏི གཙྪནྟོ ཏེསཾ དྷནཾ ཨཱདཱཡ གཧནཊྛཱནཾ པཝིཊྛམགྒཾ དིསྭཱ གཙྪནྟོ བྷཎྜིཀབདྡྷསྶ དྷནསྶ རཱསིཾ དིསྭཱ ཨེཀཾ བྷཏྟཔཱཏིཾ ཨཝཏྠརིཏྭཱ མཏཾ ཨདྡས. ཏཏོ ‘‘ཨིདཾ ནཱམ ཏེཧི ཀཏཾ བྷཝིསྶཏཱི’’ཏི སབྦཾ ཉཏྭཱ ‘‘ཀཧཾ ནུ ཁོ སོ པུརིསོ’’ཏི ཝིཙིནནྟོ ཏམྤི པཊིཙྪནྣཊྛཱནེ ཨཔཝིདྡྷཾ དིསྭཱ ‘‘ཨམྷཱཀཾ ¶ ཨཱཙརིཡོ མམ ཝཙནཾ ཨཀཏྭཱ ཨཏྟནོ དུབྦཙབྷཱཝེན ཨཏྟནཱཔི ཝིནཱསཾ པཏྟོ, ཨཔརམྤི ཏེན པུརིསསཧསྶཾ ཝིནཱསིཏཾ, ཨནུཔཱཡེན ཝཏ ཨཀཱརཎེན ཨཏྟནོ ཝུཌྜྷིཾ པཏྠཡམཱནཱ ཨམྷཱཀཾ ཨཱཙརིཡོ ཝིཡ མཧཱཝིནཱསམེཝ པཱཔུཎིསྶནྟཱི’’ཏི ཙིནྟེཏྭཱ ཨིམཾ གཱཐམཱཧ –

༤༨.

‘‘ཨནུཔཱཡེན ཡོ ཨཏྠཾ, ཨིཙྪཏི སོ ཝིཧཉྙཏི;

ཙེཏཱ ཧནིཾསུ ཝེདབྦཾ, སབྦེ ཏེ བྱསནམཛ྄ཛྷགཱུ’’ཏི.

ཏཏྠ ¶ སོ ཝིཧཉྙཏཱིཏི སོ ཨནུཔཱཡེན ‘‘ཨཏྟནོ ཨཏྠཾ ཝུཌྜྷིཾ སུཁཾ ཨིཙྪཱམཱི’’ཏི ཨཀཱལེ ཝཱཡཱམཾ ཀརོནྟོ པུགྒལོ ཝིཧཉྙཏི ཀིལམཏི མཧཱཝིནཱསཾ པཱཔུཎཱཏི. ཙེཏཱཏི ཙེཏརཊྛཝཱསིནོ ཙོརཱ. ཧནིཾསུ ཝེདབྦནྟི ཝེདབྦམནྟཝསེན ‘‘ཝེདབྦོ’’ཏི ལདྡྷནཱམཾ བྲཱཧྨཎཾ ཧནིཾསུ. སབྦེ ཏེ བྱསནམཛ྄ཛྷགཱུཏི ཏེཔི ཙ ཨནཝསེསཱ ཨཉྙམཉྙཾ གྷཱཏཡམཱནཱ བྱསནཾ ཨདྷིགཙྪིཾསུ པཊིལབྷིཾསཱུཏི.

ཨེཝཾ བོདྷིསཏྟོ ‘‘ཡཐཱ ཨམྷཱཀཾ ཨཱཙརིཡོ ཨནུཔཱཡེན ཨཊྛཱནེ པརཀྐམཾ ཀརོནྟོ དྷནཾ ཝསྶཱཔེཏྭཱ ཨཏྟནཱཔི ཛཱིཝིཏཀྑཡཾ པཏྟོ, ཨཉྙེསཉྩ ¶ ཝིནཱསཔཙྩཡོ ཛཱཏོ, ཨེཝམེཝ ཡོ ཨཉྙོཔི ཨནུཔཱཡེན ཨཏྟནོ ཨཏྠཾ ཨིཙྪནྟོ ཝཱཡཱམཾ ཀརིསྶཏི, སབྦོ སོ ཨཏྟནཱ ཙ ཝིནསྶིསྶཏི, པརེསཉྩ ཝིནཱསཔཙྩཡོ བྷཝིསྶཏཱི’’ཏི ཝནཾ ཨུནྣཱདེནྟོ དེཝཏཱསུ སཱདྷུཀཱརཾ དདམཱནཱསུ ཨིམཱཡ གཱཐཱཡ དྷམྨཾ དེསེཏྭཱ ཏཾ དྷནཾ ཨུཔཱཡེན ཨཏྟནོ གེཧཾ ཨཱཧརིཏྭཱ དཱནཱདཱིནི པུཉྙཱནི ཀརོནྟོ ཡཱཝཏཱཡུཀཾ ཋཏྭཱ ཛཱིཝིཏཔརིཡོསཱནེ སགྒཔཐཾ པཱུརཡམཱནོ ཨགམཱསི.

སཏྠཱཔི ‘‘ན ཏྭཾ བྷིཀྑུ ཨིདཱནེཝ དུབྦཙོ, པུབྦེཔི དུབྦཙོཝ, དུབྦཙཏྟཱ པན མཧཱཝིནཱསཾ པཏྟོ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཝེདབྦབྲཱཧྨཎོ དུབྦཙབྷིཀྑུ ཨཧོསི, ཨནྟེཝཱསིཀོ པན ཨཧམེཝ ཨཧོསི’’ནྟི.

ཝེདབྦཛཱཏཀཝཎྞནཱ ཨཊྛམཱ.

[༤༩] ༩. ནཀྑཏྟཛཱཏཀཝཎྞནཱ

ནཀྑཏྟཾ ¶ པཏིམཱནེནྟནྟི ཨིདཾ སཏྠཱ ཛེཏཝནེ ཝིཧརནྟོ ཨཉྙཏརཾ ཨཱཛཱིཝཀཾ ཨཱརབྦྷ ཀཐེསི. སཱཝཏྠིཡཾ ཀིརེཀཾ ཀུལདྷཱིཏརཾ ཛནཔདེ ཨེཀོ ཀུལཔུཏྟོ ཨཏྟནོ པུཏྟསྶ ཝཱརེཏྭཱ ‘‘ཨསུཀདིཝསེ ནཱམ གཎྷིསྶཱམཱི’’ཏི དིཝསཾ ཋཔེཏྭཱ ཏསྨིཾ དིཝསེ སམྤཏྟེ ཨཏྟནོ ཀུལཱུཔཀཾ ཨཱཛཱིཝཀཾ པུཙྪི ‘‘བྷནྟེ, ཨཛྫ མཡཾ ཨེཀཾ མངྒལཾ ཀརིསྶཱམ, སོབྷནཾ ནུ ཁོ ནཀྑཏྟ’’ནྟི. སོ ‘‘ཨཡཾ མཾ པཋམཾ ཨཔུཙྪིཏྭཱཝ དིཝསཾ ཋཔེཏྭཱ ཨིདཱནི པཊིཔུཙྪཏི, ཧོཏུ, སིཀྑཱཔེསྶཱམི ན’’ནྟི ཀུཛ྄ཛྷིཏྭཱ ‘‘ཨཛྫ ཨསོབྷནཾ ནཀྑཏྟཾ, མཱ ཨཛྫ མངྒལཾ ཀརིཏྠ, སཙེ ཀརིསྶཐ, མཧཱཝིནཱསོ བྷཝིསྶཏཱི’’ཏི ཨཱཧ. ཏསྨིཾ ཀུལེ མནུསྶཱ ཏསྶ སདྡཧིཏྭཱ ཏཾ དིཝསཾ ན གཙྪིཾསུ. ནགརཝཱསིནོ སབྦཾ མངྒལཀིརིཡཾ ཀཏྭཱ ཏེསཾ ཨནཱགམནཾ དིསྭཱ ‘‘ཏེཧི ཨཛྫ དིཝསོ ཋཔིཏོ, ནོ ¶ ཙ ཁོ ཨཱགཏཱ, ཨམྷཱཀམྤི བཧུ ཝཡཀམྨཾ ཀཏཾ, ཀིཾ ནོ ཏེཧི, ཨམྷཱཀཾ དྷཱིཏརཾ ཨཉྙསྶ དསྶཱམཱ’’ཏི ཡཐཱཀཏེནེཝ མངྒལེན དྷཱིཏརཾ ཨཉྙསྶ ཀུལསྶ ཨདཾསུ.

ཨིཏརེ པུནདིཝསེ ཨཱགནྟྭཱ ‘‘དེཐ ནོ དཱརིཀ’’ནྟི ཨཱཧཾསུ. ཨཐ ནེ སཱཝཏྠིཝཱསིནོ ‘‘ཛནཔདཝཱསིནོ ནཱམ ཏུམྷེ གཧཔཏིཀཱ པཱཔམནུསྶཱ དིཝསཾ ཋཔེཏྭཱ ཨཝཉྙཱཡ ན ཨཱགཏཱ, ཨཱགཏམགྒེནེཝ པཊིགཙྪཐ ¶ , ཨམྷེཧི ཨཉྙེསཾ དཱརིཀཱ དིནྣཱ’’ཏི པརིབྷཱསིཾསུ. ཏེ ཏེཧི སདྡྷིཾ ཀལཧཾ ཀཏྭཱ དཱརིཀཾ ཨལབྷིཏྭཱ ཡཐཱགཏམགྒེནེཝ གཏཱ. ཏེནཔི ཨཱཛཱིཝཀེན ཏེསཾ མནུསྶཱནཾ མངྒལནྟརཱཡསྶ ཀཏབྷཱཝོ བྷིཀྑཱུནཾ ཨནྟརེ པཱཀཊོ ཛཱཏོ. ཏེ བྷིཀྑཱུ དྷམྨསབྷཱཡཾ སནྣིཔཏིཏཱ ‘‘ཨཱཝུསོ, ཨཱཛཱིཝཀེན ཀུལསྶ མངྒལནྟརཱཡོ ཀཏོ’’ཏི ཀཐཡམཱནཱ ནིསཱིདིཾསུ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪི. ཏེ ‘‘ཨིམཱཡ ནཱམཱ’’ཏི ཀཐཡིཾསུ. ‘‘ན, བྷིཀྑཝེ, ཨིདཱནེཝ ཨཱཛཱིཝཀོ ཏསྶ ཀུལསྶ མངྒལནྟརཱཡཾ ཀརོཏི, པུབྦེཔི ཨེས ཏེསཾ ཀུཛ྄ཛྷིཏྭཱ མངྒལནྟརཱཡཾ ཨཀཱསིཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ ནགརཝཱསིནོ ཛནཔདཝཱསཱིནཾ དྷཱིཏརཾ ཝཱརེཏྭཱ དིཝསཾ ཋཔེཏྭཱ ཨཏྟནོ ཀུལཱུཔཀཾ ཨཱཛཱིཝཀཾ པུཙྪིཾསུ ‘‘བྷནྟེ, ཨཛྫ ཨམྷཱཀཾ ཨེཀཱ མངྒལཀིརིཡཱ, སོབྷནཾ ནུ ཁོ ནཀྑཏྟ’’ནྟི. སོ ‘‘ཨིམེ ཨཏྟནོ རུཙིཡཱ དིཝསཾ ཋཔེཏྭཱ ཨིདཱནི མཾ པུཙྪནྟཱི’’ཏི ཀུཛ྄ཛྷིཏྭཱ ‘‘ཨཛྫ ནེསཾ མངྒལནྟརཱཡཾ ཀརིསྶཱམཱི’’ཏི ཙིནྟེཏྭཱ ‘‘ཨཛྫ ཨསོབྷནཾ ¶ ནཀྑཏྟཾ, སཙེ ཀརོཐ, མཧཱཝིནཱསཾ པཱཔུཎིསྶཐཱ’’ཏི ཨཱཧ. ཏེ ཏསྶ སདྡཧིཏྭཱ ན གམིཾསུ. ཛནཔདཝཱསིནོ ཏེསཾ ཨནཱགམནཾ ཉཏྭཱ ‘‘ཏེ ཨཛྫ དིཝསཾ ཋཔེཏྭཱཔི ན ཨཱགཏཱ, ཀིཾ ནོ ཏེཧི, ཨཉྙེསཾ དྷཱིཏརཾ དསྶཱམཱ’’ཏི ཨཉྙེསཾ དྷཱིཏརཾ ཨདཾསུ. ནགརཝཱསིནོ པུནདིཝསེ ཨཱགནྟྭཱ དཱརིཀཾ ཡཱཙིཾསུ. ཛནཔདཝཱསིནོ ‘‘ཏུམྷེ ནགརཝཱསིནོ ནཱམ ཚིནྣཧིརིཀཱ གཧཔཏིཀཱ, དིཝསཾ ཋཔེཏྭཱ དཱརིཀཾ ན གཎྷིཏྠ, མཡཾ ཏུམྷཱཀཾ ཨནཱགམནབྷཱཝེན ཨཉྙེསཾ ཨདམྷཱ’’ཏི. མཡཾ ཨཱཛཱིཝཀཾ པཊིཔུཙྪིཏྭཱ ‘‘‘ནཀྑཏྟཾ ན སོབྷན’ནྟི ནཱགཏཱ, དེཐ ནོ དཱརིཀ’’ནྟི. ‘‘ཨམྷེཧི ཏུམྷཱཀཾ ཨནཱགམནབྷཱཝེན ཨཉྙེསཾ དིནྣཱ, ཨིདཱནི དིནྣདཱརིཀཾ ཀཐཾ པུན ཨཱནེསྶཱམཱ’’ཏི.

ཨེཝཾ ཏེསུ ཨཉྙམཉྙཾ ཀལཧཾ ཀརོནྟེསུ ཨེཀོ ནགརཝཱསཱི པཎྜིཏཔུརིསོ ཨེཀེན ཀམྨེན ཛནཔདཾ གཏོ ཏེསཾ ནགརཝཱསཱིནཾ ‘‘མཡཾ ཨཱཛཱིཝཀཾ པུཙྪིཏྭཱ ནཀྑཏྟསྶ ཨསོབྷནབྷཱཝེན ནཱགཏཱ’’ཏི ཀཐེནྟཱནཾ སུཏྭཱ ‘‘ནཀྑཏྟེན ཀོ ཨཏྠོ, ནནུ དཱརིཀཱཡ ལདྡྷབྷཱཝོཝ ནཀྑཏྟ’’ནྟི ཝཏྭཱ ཨིམཾ གཱཐམཱཧ –

༤༩.

‘‘ནཀྑཏྟཾ ¶ ¶ པཏིམཱནེནྟཾ, ཨཏྠོ བཱལཾ ཨུཔཙྩགཱ;

ཨཏྠོ ཨཏྠསྶ ནཀྑཏྟཾ, ཀིཾ ཀརིསྶནྟི ཏཱརཀཱ’’ཏི.

ཏཏྠ པཏིམཱནེནྟནྟི ཨོལོཀེནྟཾ, ‘‘ཨིདཱནི ནཀྑཏྟཾ བྷཝིསྶཏི, ཨིདཱནི ནཀྑཏྟཾ བྷཝིསྶཏཱི’’ཏི ཨཱགམཡམཱནཾ. ཨཏྠོ བཱལཾ ཨུཔཙྩགཱཏི ཨེཏཾ ནགརཝཱསིཀཾ བཱལཾ དཱརིཀཱཔཊིལཱབྷསངྑཱཏོ ཨཏྠོ ཨཏིཀྐནྟོ. ཨཏྠོ ཨཏྠསྶ ནཀྑཏྟནྟི ཡཾ ཨཏྠཾ པརིཡེསནྟོ ཙརཏི, སོ པཊིལདྡྷོ ཨཏྠོཝ ཨཏྠསྶ ནཀྑཏྟཾ ནཱམ. ཀིཾ ཀརིསྶནྟི ཏཱརཀཱཏི ཨིཏརེ པན ཨཱཀཱསེ ཏཱརཀཱ ཀིཾ ཀརིསྶནྟི, ཀཏརཾ ཨཏྠཾ སཱདྷེསྶནྟཱིཏི ཨཏྠོ. ནགརཝཱསིནོ ཀལཧཾ ཀཏྭཱ དཱརིཀཾ ཨལབྷིཏྭཱཝ ཨགམཾསུ.

སཏྠཱ ‘‘ན, བྷིཀྑཝེ, ཨེས ཨཱཛཱིཝཀོ ཨིདཱནེཝ ཀུལསྶ མངྒལནྟརཱཡཾ ཀརོཏི, པུབྦེཔི ཨཀཱསིཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཨཱཛཱིཝཀོ ཨེཏརཧི ¶ ཨཱཛཱིཝཀོཝ ཨཧོསི, ཏཱནིཔི ཀུལཱནི ཨེཏརཧི ཀུལཱནིཡེཝ, གཱཐཾ ཝཏྭཱ ཋིཏོ པཎྜིཏཔུརིསོ པན ཨཧམེཝ ཨཧོསི’’ནྟི.

ནཀྑཏྟཛཱཏཀཝཎྞནཱ ནཝམཱ.

[༥༠] ༡༠. དུམྨེདྷཛཱཏཀཝཎྞནཱ

དུམྨེདྷཱནནྟི ཨིདཾ སཏྠཱ ཛེཏཝནེ ཝིཧརནྟོ ལོཀཏྠཙརིཡཾ ཨཱརབྦྷ ཀཐེསི. སཱ དྭཱདསཀནིཔཱཏེ མཧཱཀཎྷཛཱཏཀེ (ཛཱ. ༡.༡༢.༦༡ ཨཱདཡོ) ཨཱཝི བྷཝིསྶཏི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཏསྶ རཉྙོ ཨགྒམཧེསིཡཱ ཀུཙྪིམྷི པཊིསནྡྷིཾ གཎྷི. ཏསྶ མཱཏུཀུཙྪིཏོ ནིཀྑནྟསྶ ནཱམགྒཧཎདིཝསེ ‘‘བྲཧྨདཏྟཀུམཱརོ’’ཏི ནཱམཾ ཨཀཾསུ. སོ སོལ༹སཝསྶུདྡེསིཀོ ཧུཏྭཱ ཏཀྐསིལཱཡཾ སིཔྤཾ ཨུགྒཎྷིཏྭཱ ཏིཎྞཾ ཝེདཱནཾ ¶ པཱརཾ གནྟྭཱ ཨཊྛཱརསནྣཾ ཝིཛྫཊྛཱནཱནཾ ནིཔྥཏྟིཾ པཱཔུཎི, ཨཐསྶ པིཏཱ ཨོཔརཛྫཾ ཨདཱསི. ཏསྨིཾ སམཡེ བཱརཱཎསིཝཱསིནོ དེཝཏཱམངྒལིཀཱ ཧོནྟི, དེཝཏཱ ནམསྶནྟི, བཧཱུ ཨཛེལ༹ཀཀུཀྐུཊབྷཱུཀརཱདཡོ ཝདྷིཏྭཱ ནཱནཔྤཀཱརེཧི པུཔྥགནྡྷེཧི ཙེཝ མཾསལོཧིཏེཧི ཙ བལིཀམྨཾ ཀརོནྟི. བོདྷིསཏྟོ ཙིནྟེསི ‘‘ཨིདཱནི སཏྟཱ དེཝཏཱམངྒལིཀཱ, བཧུཾ པཱཎཝདྷཾ ཀརོནྟི, མཧཱཛནོ ཡེབྷུཡྻེན ཨདྷམྨསྨིཾཡེཝ ནིཝིཊྛོ, ཨཧཾ པིཏུ ཨཙྩཡེན རཛྫཾ ¶ ལབྷིཏྭཱ ཨེཀམྤི ཨཀིལམེཏྭཱ ཨུཔཱཡེནེཝ པཱཎཝདྷཾ ཀཱཏུཾ ན དསྶཱམཱི’’ཏི. སོ ཨེཀདིཝསཾ རཐཾ ཨབྷིརུཡ྄ཧ ནགརཱ ནིཀྑནྟོ ཨདྡས ཨེཀསྨིཾ མཧནྟེ ཝཊརུཀྑེ མཧཱཛནཾ སནྣིཔཏིཏཾ, ཏསྨིཾ རུཀྑེ ནིབྦཏྟདེཝཏཱཡ སནྟིཀེ པུཏྟདྷཱིཏུཡསདྷནཱདཱིསུ ཡཾ ཡཾ ཨིཙྪཏི, ཏཾ ཏཾ པཏྠེནྟཾ. སོ ཏཾ དིསྭཱ རཐཱ ཨོརུཡ྄ཧ ཏཾ རུཀྑཾ ཨུཔསངྐམིཏྭཱ གནྡྷཔུཔྥེཧི པཱུཛེཏྭཱ ཨུདཀེན ཨབྷིསེཀཾ ཀཏྭཱ རུཀྑཾ པདཀྑིཎཾ ཀཏྭཱ དེཝཏཱམངྒལིཀོ ཝིཡ ཧུཏྭཱ དེཝཏཾ ནམསྶིཏྭཱ རཐཾ ཨབྷིརུཡ྄ཧ ནགརཾ པཱཝིསི. ཏཏོ པཊྛཱཡ ཨིམིནཱཝ ནིཡཱམེན ཨནྟརནྟརེ ཏཏྠ གནྟྭཱ དེཝཏཱམངྒལིཀོ ¶ ཝིཡ པཱུཛཾ ཀརོཏི.

སོ ཨཔརེན སམཡེན པིཏུ ཨཙྩཡེན རཛྫེ པཏིཊྛཱཡ ཙཏསྶོ ཨགཏིཡོ ཝཛྫེཏྭཱ དས རཱཛདྷམྨེ ཨཀོཔེནྟོ དྷམྨེན རཛྫཾ ཀཱརེནྟོ ཙིནྟེསི ‘‘མཡ྄ཧཾ མནོརཐོ མཏྠཀཾ པཏྟོ, རཛྫེ པཏིཊྛིཏོམྷི. ཡཾ པནཱཧཾ པུབྦེ ཨེཀཾ ཨཏྠཾ ཙིནྟཡིཾ, ཨིདཱནི ཏཾ མཏྠཀཾ པཱཔེསྶཱམཱི’’ཏི ཨམཙྩེ ཙ བྲཱཧྨཎགཧཔཏིཀཱདཡོ ཙ སནྣིཔཱཏཱཔེཏྭཱ ཨཱམནྟེསི ‘‘ཛཱནཱཐ བྷོ མཡཱ ཀེན ཀཱརཎེན རཛྫཾ པཏྟ’’ནྟི? ‘‘ན ཛཱནཱམ, དེཝཱ’’ཏི. ‘‘ཨཔི ཝོཧཾ ཨསུཀཾ ནཱམ ཝཊརུཀྑཾ གནྡྷཱདཱིཧི པཱུཛེཏྭཱ ཨཉྫལིཾ པགྒཧེཏྭཱ ནམསྶམཱནོ དིཊྛཔུབྦོ’’ཏི. ‘‘ཨཱམ, དེཝཱ’’ཏི. ཏདཱཧཾ པཏྠནཾ ཨཀཱསིཾ ‘‘སཙེ རཛྫཾ པཱཔུཎིསྶཱམི, བལིཀམྨཾ ཏེ ཀརིསྶཱམཱི’’ཏི. ‘‘ཏསྶཱ མེ དེཝཏཱཡ ཨཱནུབྷཱཝེན ཨིདཾ རཛྫཾ ལདྡྷཾ, ཨིདཱནིསྶཱ བལིཀམྨཾ ཀརིསྶཱམི, ཏུམྷེ པཔཉྩཾ ཨཀཏྭཱ ཁིཔྤཾ དེཝཏཱཡ བལིཀམྨཾ སཛྫེཐཱ’’ཏི. ‘‘ཀིཾ ཀིཾ གཎྷཱམ, དེཝཱ’’ཏི? བྷོ ཨཧཾ དེཝཏཱཡ ཨཱཡཱཙམཱནོ ‘‘ཡེ མཡ྄ཧཾ རཛྫེ པཱཎཱཏིཔཱཏཱདཱིནི པཉྩ དུསྶཱིལཀམྨཱནི དས ཨཀུསལཀམྨཔཐེ སམཱདཱཡ ཝཏྟིསྶནྟི, ཏེ གྷཱཏེཏྭཱ ཨནྟཝཊྚིམཾསལོཧིཏཱདཱིཧི བལིཀམྨཾ ཀརིསྶཱམཱི’’ཏི ཨཱཡཱཙིཾ. ཏསྨཱ ཏུམྷེ ཨེཝཾ བྷེརིཾ ཙརཱཔེཐ ‘‘ཨམྷཱཀཾ རཱཛཱ ཨུཔརཱཛཀཱལེཡེཝ ཨེཝཾ ཨཱཡཱཙི ‘སཙཱཧཾ རཛྫཾ པཱཔུཎིསྶཱམི, ཡེ ¶ མེ རཛྫེ དུསྶཱིལཱ བྷཝིསྶནྟི, ཏེ སབྦེ གྷཱཏེཏྭཱ བལིཀམྨཾ ཀརིསྶཱམཱི’ཏི, སོ ཨིདཱནི པཉྩཝིདྷཾ དུསྶཱིལཀམྨཾ དསཝིདྷཾ ཨཀུསལཀམྨཔཐཾ སམཱདཱཡ ཝཏྟམཱནཱནཾ དུསྶཱིལཱནཾ སཧསྶཾ གྷཱཏེཏྭཱ ཏེསཾ ཧདཡམཾསཱདཱིནི གཱཧཱཔེཏྭཱ དེཝཏཱཡ བལིཀམྨཾ ཀཱཏུཀཱམོ, ཨེཝཾ ནགརཝཱསིནོ ཛཱནནྟཱུ’’ཏི. ཨེཝཉྩ པན ཝཏྭཱ ‘‘ཡེདཱནི ཨིཏོ པཊྛཱཡ དུསྶཱིལཀམྨེ ཝཏྟིསྶནྟི, ཏེསཾ སཧསྶཾ གྷཱཏེཏྭཱ ཡཉྙཾ ཡཛིཏྭཱ ཨཱཡཱཙནཏོ མུཙྩིསྶཱམཱི’’ཏི ཨེཏམཏྠཾ པཀཱསེནྟོ ཨིམཾ གཱཐམཱཧ –

༥༠.

‘‘དུམྨེདྷཱནཾ སཧསྶེན, ཡཉྙོ མེ ཨུཔཡཱཙིཏོ;

ཨིདཱནི ཁོཧཾ ཡཛིསྶཱམི, བཧུ ཨདྷམྨིཀོ ཛནོ’’ཏི.

ཏཏྠ ¶ ¶ དུམྨེདྷཱནཾ སཧསྶེནཱཏི ‘‘ཨིདཾ ཀམྨཾ ཀཱཏུཾ ཝཊྚཏི, ཨིདཾ ན ཝཊྚཏཱི’’ཏི ཨཛཱནནབྷཱཝེན, དསསུ ཝཱ པན ཨཀུསལཀམྨཔཐེསུ སམཱདཱཡ ཝཏྟནབྷཱཝེན དུཊྛཱ མེདྷཱ ཨེཏེསནྟི དུམྨེདྷཱ, ཏེསཾ དུམྨེདྷཱནཾ ནིཔྤཉྙཱནཾ བཱལཔུགྒལཱནཾ གཎིཏྭཱ གཧིཏེན སཧསྶེན. ཡཉྙོ མེ ཨུཔཡཱཙིཏོཏི མཡཱ དེཝཏཾ ཨུཔསངྐམིཏྭཱ ‘‘ཨེཝཾ ཡཛིསྶཱམཱི’’ཏི ཡཉྙོ ཡཱཙིཏོ. ཨིདཱནི ཁོཧཾ ཡཛིསྶཱམཱིཏི སོ ཨཧཾ ཨིམིནཱ ཨཱཡཱཙནེན རཛྫསྶ པཊིལདྡྷཏྟཱ ཨིདཱནི ཡཛིསྶཱམི. ཀིཾཀཱརཎཱ? ཨིདཱནི ཧི བཧུ ཨདྷམྨིཀོ ཛནོ, ཏསྨཱ ཨིདཱནེཝ ནཾ གཧེཏྭཱ བལིཀམྨཾ ཀརིསྶཱམཱིཏི.

ཨམཙྩཱ བོདྷིསཏྟསྶ ཝཙནཾ སུཏྭཱ ‘‘སཱདྷུ, དེཝཱ’’ཏི དྭཱདསཡོཛནིཀེ བཱརཱཎསིནགརེ བྷེརིཾ ཙརཱཔེསུཾ. བྷེརིཡཱ ཨཱཎཾ སུཏྭཱ ཨེཀམྤི དུསྶཱིལཀམྨཾ སམཱདཱཡ ཋིཏོ ཨེཀཔུརིསོཔི ནཱཧོསི. ཨིཏི ཡཱཝ བོདྷིསཏྟོ རཛྫཾ ཀཱརེསི, ཏཱཝ ཨེཀཔུགྒལོཔི པཉྩསུ དསསུ ཝཱ དུསྶཱིལཀམྨེསུ ཨེཀམྤི ཀམྨཾ ཀརོནྟོ ན པཉྙཱཡིཏྠ. ཨེཝཾ བོདྷིསཏྟོ ཨེཀཔུགྒལམྤི ཨཀིལམེནྟོ སཀལརཊྛཝཱསིནོ སཱིལཾ རཀྑཱཔེཏྭཱ སཡམྤི དཱནཱདཱིནི པུཉྙཱནི ཀཏྭཱ ཛཱིཝིཏཔརིཡོསཱནེ ཨཏྟནོ པརིསཾ ཨཱདཱཡ དེཝནགརཾ པཱུརེནྟོ ཨགམཱསི.

སཏྠཱཔི ‘‘ན, བྷིཀྑཝེ, ཏཐཱགཏོ ཨིདཱནེཝ ལོཀསྶ ཨཏྠཾ ཙརཏི, པུབྦེཔི ཙརིཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ ¶ སམོདྷཱནེསི – ‘‘ཏདཱཔརིསཱ བུདྡྷཔརིསཱ ཨཧེསུཾ, བཱརཱཎསིརཱཛཱ པན ཨཧམེཝ ཨཧོསི’’ནྟི.

དུམྨེདྷཛཱཏཀཝཎྞནཱ དསམཱ.

ཨཏྠཀཱམཝགྒོ པཉྩམོ.

ཏསྶུདྡཱནཾ –

ལོསཀཏིསྶཀཔོཏ, ཝེལུ༹ཀཾ མཀསམྤི ཙ;

རོཧིཎཱི ཨཱརཱམདཱུསཾ, ཝཱརུཎཱིདཱུསཝེདབྦཾ;

ནཀྑཏྟཾ དུམྨེདྷཾ དསཱཏི.

པཋམོ པཎྞཱསཀོ.

༦. ཨཱསཱིསཝགྒོ

[༥༡] ༡. མཧཱསཱིལཝཛཱཏཀཝཎྞནཱ

ཨཱསཱིསེཐེཝ ¶ པུརིསོཏི ཨིདཾ སཏྠཱ ཛེཏཝནེ ཝིཧརནྟོ ཨོསྶཊྛཝཱིརིཡཾ བྷིཀྑུཾ ཨཱརབྦྷ ཀཐེསི. ཏཉྷི སཏྠཱ ‘‘སཙྩཾ ཀིར ཏྭཾ བྷིཀྑུ ཨོསྶཊྛཝཱིརིཡོསཱི’’ཏི པུཙྪི. ‘‘ཨཱམ, བྷནྟེ’’ཏི ¶ ཙ ཝུཏྟེ ‘‘ཀསྨཱ ཏྭཾ བྷིཀྑུ ཨེཝརཱུཔེ ནིཡྻཱནིཀསཱསནེ པབྦཛིཏྭཱ ཝཱིརིཡཾ ཨོསྶཛི, པུབྦེ པཎྜིཏཱ རཛྫཱ པརིཧཱཡིཏྭཱཔི ཨཏྟནོ ཝཱིརིཡེ ཋཏྭཱཝ ནཊྛམྤི ཡསཾ པུན ཨུཔྤཱདཡིཾསཱུ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ རཉྙོ ཨགྒམཧེསིཡཱ ཀུཙྪིམྷི ནིབྦཏྟོ. ཏསྶ ནཱམགྒཧཎདིཝསེ ‘‘སཱིལཝཀུམཱརོ’’ཏི ནཱམཾ ཨཀཾསུ. སོ སོལ༹སཝསྶུདྡེསིཀོཝ སབྦསིཔྤེསུ ནིཔྥཏྟིཾ པཏྭཱ ཨཔརབྷཱགེ པིཏུ ཨཙྩཡེན རཛྫེ པཏིཊྛིཏོ མཧཱསཱིལཝརཱཛཱ ནཱམ ཨཧོསི དྷམྨིཀོ དྷམྨརཱཛཱ. སོ ནགརསྶ ཙཏཱུསུ དྭཱརེསུ ཙཏསྶོ, མཛ྄ཛྷེ ཨེཀཾ, ནིཝེསནདྭཱརེ ཨེཀནྟི ནིཙྩཾ ཚ དཱནསཱལཱཡོ ཀཱརཱཔེཏྭཱ ཀཔཎདྡྷིཀཱནཾ དཱནཾ དེཏི, སཱིལཾ རཀྑཏི, ཨུཔོསཐཀམྨཾ ཀརོཏི, ཁནྟིམེཏྟཱནུདྡཡསམྤནྣོ ཨངྐེ ནིསིནྣཾ པུཏྟཾ པརིཏོསཡམཱནོ ¶ ཝིཡ སབྦསཏྟེ པརིཏོསཡམཱནོ དྷམྨེན རཛྫཾ ཀཱརེཏི. ཏསྶེཀོ ཨམཙྩོ ཨནྟེཔུརེ པདུབྦྷིཏྭཱ ཨཔརབྷཱགེ པཱཀཊོ ཛཱཏོ. ཨམཙྩཱ རཉྙོ ཨཱརོཙེསུཾ. རཱཛཱ པརིགྒཎྷནྟོ ཨཏྟནཱ པཙྩཀྑཏོ ཉཏྭཱ ཏཾ ཨམཙྩཾ པཀྐོསཱཔེཏྭཱ ‘‘ཨནྡྷབཱལ ཨཡུཏྟཾ ཏེ ཀཏཾ, ན ཏྭཾ མམ ཝིཛིཏེ ཝསིཏུཾ ཨརཧསི, ཨཏྟནོ དྷནཉྩ པུཏྟདཱརེ ཙ གཧེཏྭཱ ཨཉྙཏྠ ཡཱཧཱི’’ཏི རཊྛཱ པབྦཱཛེསི. སོ ནིཀྑམིཏྭཱ ཀཱསིརཊྛཾ ཨཏིཀྐམྨ ཀོསལཛནཔདཾ གནྟྭཱ ཀོསལརཱཛཱནཾ ཨུཔཊྛཧནྟོ ཨནུཀྐམེན རཉྙོ ཨབྦྷནྟརིཀོ ཝིསྶཱསིཀོ ཛཱཏོ.

སོ ཨེཀདིཝསཾ ཀོསལརཱཛཱནཾ ཨཱཧ – ‘‘དེཝ བཱརཱཎསིརཛྫཾ ནཱམ ནིམྨཀྑིཀམདྷུཔཊལསདིསཾ, རཱཛཱ ཨཏིམུདུཀོ, ཨཔྤེནེཝ བལཝཱཧནེན སཀྐཱ བཱརཱཎསིརཛྫཾ གཎྷིཏུ’’ནྟི. རཱཛཱ ཏསྶ ཝཙནཾ སུཏྭཱ ‘‘བཱརཱཎསིརཛྫཾ ནཱམ མཧཱ, ཨཡཉྩ ‘ཨཔྤེནེཝ བལཝཱཧནེན སཀྐཱ བཱརཱཎསིརཛྫཾ གཎྷིཏུ’ནྟི ཨཱཧ, ཀིཾ ནུ ཁོ པན པཡུཏྟཀཙོརོ སིཡཱ’’ཏི ¶ ཙིནྟེཏྭཱ ‘‘པཡུཏྟཀོསི མཉྙེ’’ཏི ཨཱཧ. ‘‘ནཱཧཾ, དེཝ, པཡུཏྟཀོ, སཙྩམེཝ ཝདཱམི. སཙེ མེ ན སདྡཧཐ, མནུསྶེ པེསེཏྭཱ པཙྩནྟགཱམཾ ཧནཱཔེཐ, ཏེ མནུསྶེ གཧེཏྭཱ ཨཏྟནོ སནྟིཀཾ ནཱིཏེ དྷནཾ དཏྭཱ ཝིསྶཛྫེསྶཏཱི’’ཏི. རཱཛཱ ‘‘ཨཡཾ ཨཏིཝིཡ སཱུརོ ཧུཏྭཱ ཝདཏི, ཝཱིམཾསིསྶཱམི ཏཱཝཱ’’ཏི ¶ ཨཏྟནོ པུརིསེ པེསེཏྭཱ པཙྩནྟགཱམཾ ཧནཱཔེསི. མནུསྶཱ ཏེ ཙོརེ གཧེཏྭཱ བཱརཱཎསིརཉྙོ དསྶེསུཾ. རཱཛཱ ཏེ དིསྭཱ ‘‘ཏཱཏཱ, ཀསྨཱ གཱམཾ ཧནཐཱ’’ཏི པུཙྪི. ‘‘ཛཱིཝིཏུཾ ཨསཀྐོནྟཱ, དེཝཱ’’ཏི ཝུཏྟེ རཱཛཱ ‘‘ཨཐ ཀསྨཱ མམ སནྟིཀཾ ནཱགམིཏྠ, ཨིཏོདཱནི པཊྛཱཡ ཨེཝརཱུཔཾ ཀམྨཾ མཱ ཀརིཏྠཱ’’ཏི ཏེསཾ དྷནཾ དཏྭཱ ཝིསྶཛྫེསི. ཏེ གནྟྭཱ ཀོསལརཉྙོ ཏཾ པཝཏྟིཾ ཨཱརོཙེསུཾ. སོ ཨེཏྟཀེནཱཔི གནྟུཾ ཨཝིསཧནྟོ པུན མཛ྄ཛྷེཛནཔདཾ ཧནཱཔེསི. ཏེཔི ཙོརེ རཱཛཱ ཏཐེཝ དྷནཾ དཏྭཱ ཝིསྶཛྫེསི. སོ ཨེཏྟཀེནཱཔི ཨགནྟྭཱ པུན པེསེཏྭཱ ཨནྟརཝཱིཐིཡཾ ཝིལུམྤཱཔེསི, རཱཛཱ ཏེསམྤི ཙོརཱནཾ དྷནཾ དཏྭཱ ཝིསྶཛྫེསིཡེཝ. ཏདཱ ཀོསལརཱཛཱ ‘‘ཨཏིཝིཡ དྷམྨིཀོ རཱཛཱ’’ཏི ཉཏྭཱ ‘‘བཱརཱཎསིརཛྫཾ གཧེསྶཱམཱི’’ཏི བལཝཱཧནཾ ཨཱདཱཡ ནིཡྻཱསི.

ཏདཱ པན བཱརཱཎསིརཉྙོ མཏྟཝཱརཎེཔི ཨབྷིམུཁཾ ཨཱགཙྪནྟེ ཨནིཝཏྟནདྷམྨཱ ཨསནིཡཱཔི སཱིསེ པཏནྟིཡཱ ཨསནྟསནསབྷཱཝཱ སཱིལཝམཧཱརཱཛསྶ ¶ རུཙིཡཱ སཏི སཀལཛམྦུདཱིཔེ རཛྫཾ གཧེཏུཾ སམཏྠཱ སཧསྶམཏྟཱ ཨབྷེཛྫཝརསཱུརཱ མཧཱཡོདྷཱ ཧོནྟི. ཏེ ‘‘ཀོསལརཱཛཱ ཨཱགཙྪཏཱི’’ཏི སུཏྭཱ རཱཛཱནཾ ཨུཔསངྐམིཏྭཱ ‘‘དེཝ, ཀོསལརཱཛཱ ཀིར ‘བཱརཱཎསིརཛྫཾ གཎྷིསྶཱམཱི’ཏི ཨཱགཙྪཏི, གཙྪཱམ, ནཾ ཨམྷཱཀཾ རཛྫསཱིམཾ ཨནོཀྐནྟམེཝ པོཐེཏྭཱ གཎྷཱམཱ’’ཏི ཝདིཾསུ. རཱཛཱ ‘‘ཏཱཏཱ, མཾ ནིསྶཱཡ ཨཉྙེསཾ ཀིལམནཀིཙྩཾ ནཏྠི, རཛྫཏྠིཀོ རཛྫཾ གཎྷཱཏུ, མཱགམིཏྠཱ’’ཏི ནིཝཱརེསི. ཀོསལརཱཛཱ རཛྫསཱིམཾ ཨཏིཀྐམིཏྭཱ ཛནཔདམཛ྄ཛྷཾ པཱཝིསི. ཨམཙྩཱ པུནཔི རཱཛཱནཾ ཨུཔསངྐམིཏྭཱ ཏཐེཝ ཝདིཾསུ, རཱཛཱ པུརིམནཡེནེཝ ནིཝཱརེསི. ཀོསལརཱཛཱ བཧིནགརེ ཋཏྭཱ ‘‘རཛྫཾ ཝཱ དེཏུ ཡུདྡྷཾ ཝཱ’’ཏི སཱིལཝམཧཱརཱཛསྶ སཱསནཾ པེསེསི. རཱཛཱ ཏཾ སུཏྭཱ ‘‘ནཏྠི མཡཱ སདྡྷིཾ ཡུདྡྷཾ, རཛྫཾ གཎྷཱཏཱུ’’ཏི པཊིསཱསནཾ པེསེསི. པུནཔི ཨམཙྩཱ རཱཛཱནཾ ཨུཔསངྐམིཏྭཱ ‘‘དེཝ, ན མཡཾ ཀོསལརཉྙོ ནགརཾ པཝིསིཏུཾ དེམ, བཧིནགརེཡེཝ ནཾ པོཐེཏྭཱ གཎྷཱམཱ’’ཏི ཨཱཧཾསུ, རཱཛཱ པུརིམནཡེནེཝ ནིཝཱརེཏྭཱ ནགརདྭཱརཱནི ཝིཝརཱཔེཏྭཱ སདྡྷིཾ ¶ ཨམཙྩསཧསྶེན མཧཱཏལེ པལླངྐམཛ྄ཛྷེ ནིསཱིདི.

ཀོསལརཱཛཱ མཧནྟེན བལཝཱཧནེན བཱརཱཎསིཾ པཱཝིསི. སོ ཨེཀམྤི པཊིསཏྟུཾ ཨཔསྶནྟོ རཉྙོ ནིཝེསནདྭཱརཾ གནྟྭཱ ཨམཙྩགཎཔརིཝུཏོ ཨཔཱརུཏདྭཱརེ ནིཝེསནེ ཨལངྐཏཔཊིཡཏྟཾ ¶ མཧཱཏལཾ ཨཱརུཡ྄ཧ ནིསིནྣཾ ནིརཱཔརཱདྷཾ སཱིལཝམཧཱརཱཛཱནཾ སདྡྷིཾ ཨམཙྩསཧསྶེན གཎྷཱཔེཏྭཱ ‘‘གཙྪཐ, ཨིམཾ རཱཛཱནཾ སདྡྷིཾ ཨམཙྩེཧི པཙྪཱབཱཧཾ གཱལ༹ྷབནྡྷནཾ བནྡྷིཏྭཱ ཨཱམཀསུསཱནཾ ནེཏྭཱ གལཔྤམཱཎེ ཨཱཝཱཊེ ཁནིཏྭཱ ཡཐཱ ཨེཀོཔི ཧཏྠཾ ཨུཀྑིཔིཏུཾ ན སཀྐོཏི, ཨེཝཾ པཾསུཾ པཀྑིཔིཏྭཱ ནིཁནཐ, རཏྟིཾ སིངྒཱལཱ ཨཱགནྟྭཱ ཨེཏེསཾ ཀཱཏབྦཡུཏྟཀཾ ཀརིསྶནྟཱི’’ཏི ཨཱཧ. མནུསྶཱ ཙོརརཉྙོ ཨཱཎཾ སུཏྭཱ རཱཛཱནཾ སདྡྷིཾ ཨམཙྩེཧི པཙྪཱབཱཧཾ གཱལ༹ྷབནྡྷནཾ བནྡྷིཏྭཱ ནིཀྑམིཾསུ. ཏསྨིམྤི ཀཱལེ སཱིལཝམཧཱརཱཛཱ ཙོརརཉྙོ ཨཱགྷཱཏམཏྟམྤི ནཱཀཱསི. ཏེསུཔི ཨམཙྩེསུ ཨེཝཾ བནྡྷིཏྭཱ ནཱིཡམཱནེསུ ཨེཀོཔི རཉྙོ ཝཙནཾ བྷིནྡིཏུཾ སམཏྠོ ནཱམ ནཱཧོསི. ཨེཝཾ སུཝིནཱིཏཱ ཀིརསྶ པརིསཱ. ཨཐ ཏེ རཱཛཔུརིསཱ སཱམཙྩཾ སཱིལཝམཧཱརཱཛཱནཾ ཨཱམཀསུསཱནཾ ནེཏྭཱ གལཔྤམཱཎེ ཨཱཝཱཊེ ཁནིཏྭཱ སཱིལཝམཧཱརཱཛཱནཾ མཛ྄ཛྷེ ¶ , ཨུབྷོསུ པསྶེསུ སེསཨམཙྩེཏི ཨེཝཾ སབྦེཔི ཨཱཝཱཊེསུ ཨོཏཱརེཏྭཱ པཾསུཾ ཨཱཀིརིཏྭཱ གྷནཾ ཨཱཀོཊེཏྭཱ ཨགམཾསུ. ཏདཱ སཱིལཝམཧཱརཱཛཱ ཨམཙྩེ ཨཱམནྟེཏྭཱ ‘‘ཙོརརཉྙོ ཨུཔརི ཀོཔཾ ཨཀཏྭཱ མེཏྟཾ ཨེཝ བྷཱཝེཐ, ཏཱཏཱ’’ཏི ཨོཝདི.

ཨཐ ཨཌྜྷརཏྟསམཡེ ‘‘མནུསྶམཾསཾ ཁཱདིསྶཱམཱ’’ཏི སིངྒཱལཱ ཨཱགམིཾསུ. ཏེ དིསྭཱ རཱཛཱ ཙ ཨམཙྩཱ ཙ ཨེཀཔྤཧཱརེནེཝ སདྡམཀཾསུ, སིངྒཱལཱ བྷཱིཏཱ པལཱཡིཾསུ. ཏེ ནིཝཏྟིཏྭཱ ཨོལོཀེནྟཱ པཙྪཏོ ཀསྶཙི ཨནཱགམནབྷཱཝཾ ཉཏྭཱ པུན པཙྩཱགམིཾསུ. ཨིཏརེཔི ཏཐེཝ སདྡམཀཾསུ. ཨེཝཾ ཡཱཝཏཏིཡཾ པལཱཡིཏྭཱ པུན ཨོལོཀེནྟཱ ཏེསུ ཨེཀསྶཔི ཨནཱགམནབྷཱཝཾ ཉཏྭཱ ‘‘ཝཛ྄ཛྷཔྤཏྟཱ ཨེཏེ བྷཝིསྶནྟཱི’’ཏི སཱུརཱ ཧུཏྭཱ ནིཝཏྟིཏྭཱ པུན ཏེསུ སདྡཾ ཀརོནྟེསུཔི ན པལཱཡིཾསུ. ཛེཊྛཀསིངྒཱལོ རཱཛཱནཾ ཨུཔགཉྪི, སེསཱ སིངྒཱལཱ སེསཱནཾ ཨམཙྩཱནཾ སནྟིཀཾ ཨགམཾསུ. ཨུཔཱཡཀུསལོ ¶ རཱཛཱ ཏསྶ ཨཏྟནོ སནྟིཀཾ ཨཱགཏབྷཱཝཾ ཉཏྭཱ ཌཾསིཏུཾ ཨོཀཱསཾ དེནྟོ ཝིཡ གཱིཝཾ ཨུཀྑིཔིཏྭཱ ཏཾ གཱིཝཱཡ ཌཾསམཱནཾ ཧནུཀཊྛིཀེན ཨཱཀཌྜྷིཏྭཱ ཡནྟེ པཀྑིཔིཏྭཱ ཝིཡ གཱལ༹ྷཾ གཎྷི, ནཱགབལེན རཉྙཱ ཧནུཀཊྛིཀེན ཨཱཀཌྜྷིཏྭཱ གཱིཝཱཡ གཱལ༹ྷཾ གཧིཏསིངྒཱལོ ཨཏྟཱནཾ མོཙེཏུཾ ཨསཀྐོནྟོ མརཎབྷཡཏཛྫིཏོ མཧཱཝིརཝཾ ཝིརཝི. ཨཝསེསཱ སིངྒཱལཱ ཏསྶ ཏཾ ཨཊྚསྶརཾ སུཏྭཱ ‘‘ཨེཀེན པུརིསེན སུགྒཧིཏོ བྷཝིསྶཏཱི’’ཏི ཨམཙྩེ ཨུཔསངྐམིཏུཾ ཨསཀྐོནྟཱ མརཎབྷཡཏཛྫིཏཱ སབྦེ པལཱཡིཾསུ. རཉྙོ ཧནུཀཊྛིཀེན དལ༹ྷཾ ཀཏྭཱ གཧིཏསིངྒཱལེ ཨཔརཱཔརཾ སཉྩརནྟེ པཾསུ སིཐིལཱ ཨཧོསི. སོཔི སིངྒཱལོ མརཎབྷཡབྷཱིཏོ ཙཏཱུཧི པཱདེཧི རཉྙོ ཨུཔརིབྷཱགེ པཾསུཾ ཨཔབྱཱུཧི, རཱཛཱ པཾསུནོ སིཐིལབྷཱཝཾ ཉཏྭཱ སིངྒཱལཾ ཝིསྶཛྫེཏྭཱ ནཱགབལོ ཐཱམསམྤནྣོ ཨཔརཱཔརཾ སཉྩརནྟོ ཨུབྷོ ཧཏྠེ ཨུཀྑིཔིཏྭཱ ཨཱཝཱཊམུཁཝཊྚིཡཾ ཨོལུབྦྷ ཝཱཏཙྪིནྣཝལཱཧཀོ ཝིཡ ནིཀྑམིཏྭཱ ཋིཏོ ཨམཙྩེ ཨསྶཱསེཏྭཱ པཾསུཾ ཝིཡཱུཧིཏྭཱ སབྦེ ཨུདྡྷརིཏྭཱ ཨམཙྩཔརིཝུཏོ ཨཱམཀསུསཱནེ ཨཊྛཱསི.

ཏསྨིཾ ¶ སམཡེ མནུསྶཱ ཨེཀཾ མཏམནུསྶཾ ཨཱམཀསུསཱནེ ཚཌྜེནྟཱ དྭིནྣཾ ཡཀྑཱནཾ སཱིམནྟརིཀཱཡ ཚཌྜེསུཾ. ཏེ ཡཀྑཱ ཏཾ མཏམནུསྶཾ བྷཱཛེཏུཾ ཨསཀྐོནྟཱ ‘‘ན མཡཾ ཨིམཾ བྷཱཛེཏུཾ སཀྐོམ, ཨཡཾ སཱིལཝརཱཛཱ དྷམྨིཀོ, ཨེས ནོ བྷཱཛེཏྭཱ དསྶཏི, ཨེཏསྶ སནྟིཀཾ གཙྪཱམཱ’’ཏི ¶ ཏཾ མཏམནུསྶཾ པཱདེ གཧེཏྭཱ ཨཱཀཌྜྷནྟཱ རཉྙོ སནྟིཀཾ གནྟྭཱ ‘‘དེཝ, ཨམྷཱཀཾ ཨིམཾ མཏཀཾ བྷཱཛེཏྭཱ དེཧཱི’’ཏི ཨཱཧཾསུ. ‘‘བྷོ ཡཀྑཱ, ཨཧཾ ཨིམཾ ཏུམྷཱཀཾ བྷཱཛེཏྭཱ དདེཡྻཾ, ཨཔརིསུདྡྷོ པནམྷི, ནྷཱཡིསྶཱམི ཏཱཝཱ’’ཏི. ཡཀྑཱ ཙོརརཉྙོ ཋཔིཏཾ ཝཱསིཏཨུདཀཾ ཨཏྟནོ ཨཱནུབྷཱཝེན ཨཱཧརིཏྭཱ རཉྙོ ནྷཱནཏྠཱཡ ཨདཾསུ. ནྷཏྭཱ ཋིཏསྶ སཾཧརིཏྭཱ ཋཔིཏེ ཙོརརཉྙོ སཱཊཀེ ཨཱཧརིཏྭཱ ཨདཾསུ, ཏེ ནིཝཱསེཏྭཱ ཋིཏསྶ ཙཏུཛྫཱཏིཡགནྡྷསམུགྒཾ ཨཱཧརིཏྭཱ ཨདཾསུ, གནྡྷེ ཝིལིམྤིཏྭཱ ཋིཏསྶ སུཝཎྞསམུགྒེ མཎིཏཱལཝཎྚེསུ ཋཔིཏཱནི ནཱནཱཔུཔྥཱནི ཨཱཧརིཏྭཱ ཨདཾསུ. པུཔྥཱནི པིལ༹ནྡྷིཏྭཱ ཋིཏཀཱལེ ‘‘ཨཉྙཾ ཀིཾ ཀརོམཱ’’ཏི པུཙྪིཾསུ. རཱཛཱ ཨཏྟནོ ཚཱཏཀཱཀཱརཾ ¶ དསྶེསི, ཏེ གནྟྭཱ ཙོརརཉྙོ སམྤཱདིཏཾ ནཱནགྒརསབྷོཛནཾ ཨཱཧརིཏྭཱ ཨདཾསུ, རཱཛཱ ནྷཱཏཱནུལིཏྟོ སུམཎྜིཏཔྤསཱདྷིཏོ ནཱནགྒརསབྷོཛནཾ བྷུཉྫི. ཡཀྑཱ ཙོརརཉྙོ ཋཔིཏཾ ཝཱསིཏཔཱནཱིཡཾ སུཝཎྞབྷིངྐཱརེནེཝ སུཝཎྞསརཀེནཔི སདྡྷིཾ ཨཱཧརིཾསུ. ཨཐསྶ པཱནཱིཡཾ པིཝིཏྭཱ མུཁཾ ཝིཀྑཱལེཏྭཱ ཧཏྠེ དྷོཝིཏྭཱ ཋིཏཀཱལེ ཙོརརཉྙོ སམྤཱདིཏཾ པཉྩསུགནྡྷིཀསུཔརིབྷཱཝིཏཾ ཏམྦཱུལཾ ཨཱཧརིཏྭཱ ཨདཾསུ. ཏཾ ཁཱདིཏྭཱ ཋིཏཀཱལེ ‘‘ཨཉྙཾ ཀིཾ ཀརོམཱ’’ཏི པུཙྪིཾསུ. གནྟྭཱ ཙོརརཉྙོ ཨུསྶཱིསཀེ ནིཀྑིཏྟཾ མངྒལཁགྒཾ ཨཱཧརཐཱཏི. ཏམྤི གནྟྭཱ ཨཱཧརིཾསུ. རཱཛཱ ཏཾ ཁགྒཾ གཧེཏྭཱ ཏཾ མཏམནུསྶཾ ཨུཛུཀཾ ཋཔཱཔེཏྭཱ མཏྠཀམཛ྄ཛྷེ ཨསིནཱ པཧརིཏྭཱ དྭེ ཀོཊྛཱསེ ཀཏྭཱ དྭིནྣཾ ཡཀྑཱནཾ སམཝིབྷཏྟམེཝ ཝིབྷཛིཏྭཱ ཨདཱསི, དཏྭཱ ཙ པན ཁགྒཾ དྷོཝིཏྭཱ སནྣཡ྄ཧིཏྭཱ ཨཊྛཱསི. ཨཐ ཏེ ཡཀྑཱ མནུསྶམཾསཾ ཁཱདིཏྭཱ སུཧིཏཱ ཧུཏྭཱ ཏུཊྛཙིཏྟཱ ‘‘ཨཉྙཾ ཏེ, མཧཱརཱཛ, ཀིཾ ཀརོམཱ’’ཏི པུཙྪིཾསུ. ཏེན ཧི ཏུམྷེ ཨཏྟནོ ཨཱནུབྷཱཝེན མཾ ཙོརརཉྙོ སིརིགབྦྷེ ཨོཏཱརེཐ, ཨིམེ ཙ ཨམཙྩེ ཨཏྟནོ ཨཏྟནོ གེཧེསུ པཏིཊྛཱཔེཐཱཏི. ཏེ ‘‘སཱདྷུ དེཝཱ’’ཏི སམྤཊིཙྪིཏྭཱ ཏཐཱ ཨཀཾསུ.

ཏསྨིཾ སམཡེ ཙོརརཱཛཱ ཨལངྐཏསིརིགབྦྷེ སིརིསཡནཔིཊྛེ ནིཔནྣོ ནིདྡཱཡཏི. རཱཛཱ ཏསྶ པམཏྟསྶ ནིདྡཱཡནྟསྶ ཁགྒཏལེན ཨུདརཾ པཧརི. སོ བྷཱིཏོ པབུཛ྄ཛྷིཏྭཱ དཱིཔཱལོཀེན སཱིལཝམཧཱརཱཛཱནཾ སཉྫཱནིཏྭཱ སཡནཱ ཨུཊྛཱཡ སཏིཾ ཨུཔཊྛཔེཏྭཱ ཋིཏོ རཱཛཱནཾ ཨཱཧ ‘‘མཧཱརཱཛ, ཨེཝརཱུཔཱཡ ¶ རཏྟིཡཱ གཧིཏཱརཀྑེ པིཧིཏདྭཱརེ བྷཝནེ ཨཱརཀྑམནུསྶེཧི ནིརོཀཱསེ ཋཱནེ ཁགྒཾ སནྣཡ྄ཧིཏྭཱ ཨལངྐཏཔཊིཡཏྟོ ཀཐཾ ནཱམ ཏྭཾ ཨིམཾ སཡནཔིཊྛཾ ཨཱགཏོསཱི’’ཏི. རཱཛཱ ཨཏྟནོ ཨཱགམནཱཀཱརཾ སབྦཾ ཝིཏྠཱརཏོ ཀཐེསི. ཏཾ སུཏྭཱ ཙོརརཱཛཱ སཾཝིགྒམཱནསོ ‘‘མཧཱརཱཛ, ཨཧཾ མནུསྶབྷཱུཏོཔི སམཱནོ ཏུམྷཱཀཾ གུཎེ ན ཛཱནཱམི, པརེསཾ ལོཧིཏམཾསཁཱདཀེཧི ¶ པན ཀཀྑལེ༹ཧི ཕརུསེཧི ཡཀྑེཧི ཏཝ གུཎཱ ཉཱཏཱ, ན དཱནཱཧཾ, ནརིནྡ ¶ , ཨེཝརཱུཔེ སཱིལསམྤནྣེ ཏཡི དུབྦྷིསྶཱམཱི’’ཏི ཁགྒཾ ཨཱདཱཡ སཔཐཾ ཀཏྭཱ རཱཛཱནཾ ཁམཱཔེཏྭཱ མཧཱསཡནེ ནིཔཛྫཱཔེཏྭཱ ཨཏྟནཱ ཁུདྡཀམཉྩཀེ ནིཔཛྫིཏྭཱ པབྷཱཏཱཡ རཏྟིཡཱ ཨུཊྛིཏེ སཱུརིཡེ བྷེརིཾ ཙརཱཔེཏྭཱ སབྦསེནིཡོ ཙ ཨམཙྩབྲཱཧྨཎགཧཔཏིཀེ ཙ སནྣིཔཱཏཱཔེཏྭཱ ཏེསཾ པུརཏོ ཨཱཀཱསེ པུཎྞཙནྡཾ ཨུཀྑིཔནྟོ ཝིཡ སཱིལཝརཉྙོ གུཎེ ཀཐེཏྭཱ པརིསམཛ྄ཛྷེཡེཝ པུན རཱཛཱནཾ ཁམཱཔེཏྭཱ རཛྫཾ པཊིཙྪཱཔེཏྭཱ ‘‘མཧཱརཱཛ, ཨིཏོ པཊྛཱཡ ཏུམྷཱཀཾ ཨུཔྤནྣོ ཙོརཱུཔདྡཝོ མཡ྄ཧཾ བྷཱརོ, མཡཱ གཧིཏཱརཀྑཱ ཏུམྷེ རཛྫཾ ཀརོཐཱ’’ཏི ཝཏྭཱ པེསུཉྙཀཱརཀསྶ ཨཱཎཾ ཀཱརེཏྭཱ ཨཏྟནོ བལཝཱཧནཾ ཨཱདཱཡ སཀརཊྛམེཝ གཏོ.

སཱིལཝརཱཛཱཔི ཁོ ཨལངྐཏཔཊིཡཏྟོ སེཏཙྪཏྟསྶ ཧེཊྛཱ སརབྷཔཱདཀེ ཀཉྩནཔལླངྐེ ནིསིནྣོ ཨཏྟནོ སམྤཏྟིཾ ཨོལོཀེཏྭཱ ‘‘ཨཡཉྩ ཨེཝརཱུཔཱ སམྤཏྟི ཨམཙྩསཧསྶསྶ ཙ ཛཱིཝིཏཔཊིལཱབྷོ མཡི ཝཱིརིཡཾ ཨཀརོནྟེ ན ཀིཉྩི ཨབྷཝིསྶ, ཝཱིརིཡབལེན པནཱཧཾ ནཊྛཉྩ ཨིམཾ ཡསཾ པཊིལབྷིཾ, ཨམཙྩསཧསྶསྶ ཙ ཛཱིཝིཏདཱནཾ ཨདཱསིཾ, ཨཱསཙྪེདཾ ཝཏ ཨཀཏྭཱ ཝཱིརིཡམེཝ ཀཏྟབྦཾ. ཀཏཝཱིརིཡསྶ ཧི ཕལཾ ནཱམ ཨེཝཾ སམིཛ྄ཛྷཏཱི’’ཏི ཙིནྟེཏྭཱ ཨུདཱནཝསེན ཨིམཾ གཱཐམཱཧ –

༥༡.

‘‘ཨཱསཱིསེཐེཝ པུརིསོ, ན ནིབྦིནྡེཡྻ པཎྜིཏོ;

པསྶཱམི ཝོཧཾ ཨཏྟཱནཾ, ཡཐཱ ཨིཙྪིཾ ཏཐཱ ཨཧཱུ’’ཏི.

ཏཏྠ ཨཱསཱིསེཐེཝཱཏི ‘‘ཨེཝཱཧཾ ཝཱིརིཡཾ ཨཱརབྷནྟོ ཨིམམྷཱ དུཀྑཱ མུཙྩིསྶཱམཱི’’ཏི ཨཏྟནོ ཝཱིརིཡབལེན ཨཱསཾ ཀརོཐེཝ. ན ནིབྦིནྡེཡྻ པཎྜིཏོཏི པཎྜིཏོ ཨུཔཱཡཀུསལོ ཡུཏྟཊྛཱནེ ཝཱིརིཡཾ ཀརོནྟོ ‘‘ཨཧཾ ཨིམསྶ ཝཱིརིཡསྶ ཕལཾ ན ལབྷིསྶཱམཱི’’ཏི ན ཨུཀྐཎྛེཡྻ, ཨཱསཙྪེདཾ ཀརེཡྻཱཏི ཨཏྠོ. པསྶཱམི ཝོཧཾ ཨཏྟཱནནྟི ཨེཏྠ ཝོཏི ནིཔཱཏམཏྟཾ ¶ , ཨཧཾ ཨཛྫ ཨཏྟཱནཾ པསྶཱམི. ཡཐཱ ཨིཙྪིཾ ཏཐཱ ཨཧཱུཏི ཨཧཉྷི ཨཱཝཱཊེ ནིཁཱཏོ ཏམྷཱ དུཀྑཱ མུཙྩིཏྭཱ པུན ཨཏྟནོ རཛྫསམྤཏྟིཾ ཨིཙྪིཾ, སོ ཨཧཾ ཨིམཾ སམྤཏྟིཾ པཏྟཾ ཨཏྟཱནཾ པསྶཱམི. ཡཐེཝཱཧཾ པུབྦེ ཨིཙྪིཾ, ཏཐེཝ མེ ཨཏྟཱ ཛཱཏོཏི. ཨེཝཾ བོདྷིསཏྟོ ‘‘ཨཧོ ཝཏ བྷོ སཱིལསམྤནྣཱནཾ ཝཱིརིཡཕལཾ ནཱམ སམིཛ྄ཛྷཏཱི’’ཏི ཨིམཱཡ གཱཐཱཡ ཨུདཱནཾ ཨུདཱནེཏྭཱ ཡཱཝཛཱིཝཾ པུཉྙཱནི ཀཏྭཱ ཡཐཱཀམྨཾ གཏོ.

སཏྠཱཔི ¶ ¶ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེསི, སཙྩཔརིཡོསཱནེ ཨོསྶཊྛཝཱིརིཡོ བྷིཀྑུ ཨརཧཏྟེ པཏིཊྛཱསི. སཏྠཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ པདུཊྛཱམཙྩོ དེཝདཏྟོ ཨཧོསི, ཨམཙྩསཧསྶཾ བུདྡྷཔརིསཱ, སཱིལཝམཧཱརཱཛཱ པན ཨཧམེཝ ཨཧོསི’’ནྟི.

མཧཱསཱིལཝཛཱཏཀཝཎྞནཱ པཋམཱ.

[༥༢] ༢. ཙཱུལ༹ཛནཀཛཱཏཀཝཎྞནཱ

ཝཱཡམེཐེཝ པུརིསོཏི ཨིདཾ སཏྠཱ ཛེཏཝནེ ཝིཧརནྟོ ཨོསྶཊྛཝཱིརིཡམེཝཱརབྦྷ ཀཐེསི. ཏཏྠ ཡཾ ཝཏྟབྦཾ, ཏཾ སབྦཾ མཧཱཛནཀཛཱཏཀེ (ཛཱ. ༢.༢༢.༡༢༣ ཨཱདཡོ) ཨཱཝི བྷཝིསྶཏི. ཛནཀརཱཛཱ པན སེཏཙྪཏྟསྶ ཧེཊྛཱ ནིསིནྣོ ཨིམཾ གཱཐམཱཧ –

༥༢.

‘‘ཝཱཡམེཐེཝ པུརིསོ, ན ནིབྦིནྡེཡྻ པཎྜིཏོ;

པསྶཱམི ཝོཧཾ ཨཏྟཱནཾ, ཨུདཀཱ ཐལམུབྦྷཏ’’ནྟི.

ཏཏྠ ཝཱཡམེཐེཝཱཏི ཝཱཡཱམཾ ཀརོཐེཝ. ཨུདཀཱ ཐལམུབྦྷཏནྟི ཨུདཀཏོ ཐལམུཏྟིཎྞཾ ཐལེ པཏིཊྛིཏཾ ཨཏྟཱནཾ པསྶཱམཱིཏི. ཨིདྷཱཔི ཨོསྶཊྛཝཱིརིཡོ བྷིཀྑུ ཨརཧཏྟཾ པཏྟོ, ཛནཀརཱཛཱ སམྨཱསམྦུདྡྷོཝ ཨཧོསཱིཏི.

ཙཱུལ༹ཛནཀཛཱཏཀཝཎྞནཱ དུཏིཡཱ.

[༥༣] ༣. པུཎྞཔཱཏིཛཱཏཀཝཎྞནཱ

ཏཐེཝ ¶ པུཎྞཱ པཱཏིཡོཏི ཨིདཾ སཏྠཱ ཛེཏཝནེ ཝིཧརནྟོ ཝིསཝཱརུཎིཾ ཨཱརབྦྷ ཀཐེསི. ཨེཀཾ སམཡཾ སཱཝཏྠིཡཾ སུརཱདྷུཏྟཱ སནྣིཔཏིཏྭཱ མནྟཡིཾསུ – ‘‘སུརཱམཱུལཾ ནོ ཁཱིཎཾ, ཀཧཾ ནུ ཁོ ལབྷིསྶཱམཱ’’ཏི. ཨཐེཀོ ཀཀྑལ༹དྷུཏྟོ ཨཱཧ ‘‘མཱ ཙིནྟཡིཏྠ, ཨཏྠེཀོ ཨུཔཱཡོ’’ཏི. ‘‘ཀཏརོ ཨུཔཱཡོ ནཱམཱ’’ཏི? ‘‘ཨནཱཐཔིཎྜིཀོ ཨངྒུལིམུདྡིཀཱ པིལ༹ནྡྷིཏྭཱ མཊྛསཱཊཀནིཝཏྠོ རཱཛུཔཊྛཱནཾ གཙྪཏི, མཡཾ སུརཱཔཱཏིཡཾ ཝིསཉྙཱིཀརཎཾ བྷེསཛྫཾ པཀྑིཔིཏྭཱ ཨཱཔཱནཾ སཛྫེཏྭཱ ནིསཱིདིཏྭཱ ཨནཱཐཔིཎྜིཀསྶ ཨཱགམནཀཱལེ ‘ཨིཏོ ཨེཧི མཧཱསེཊྛཱི’ཏི པཀྐོསིཏྭཱ ཏཾ སུརཾ པཱཡེཏྭཱ ཝིསཉྙཱིབྷཱུཏསྶ ¶ ཨངྒུལིམུདྡིཀཱ ཙ སཱཊཀེ ཙ གཧེཏྭཱ སུརཱམཱུལཾ ཀརིསྶཱམཱ’’ཏི. ཏེ ‘‘སཱདྷཱུ’’ཏི སམྤཊིཙྪིཏྭཱ ཏཐཱ ཀཏྭཱ སེཊྛིསྶ ཨཱགམནཀཱལེ པཊིམགྒཾ གནྟྭཱ ‘‘སཱམི, ཨིཏོ ཏཱཝ ཨཱགཙྪཐ ¶ , ཨཡཾ ཨམྷཱཀཾ སནྟིཀེ ཨཏིམནཱཔཱ སུརཱ, ཐོཀཾ པིཝིཏྭཱ གཙྪཐཱ’’ཏི ཝདིཾསུ. སོཏཱཔནྣོ ཨརིཡསཱཝཀོ ཀིཾ སུརཾ པིཝིསྶཏི, ཨནཏྠིཀོ སམཱནོཔི པན ‘‘ཨིམེ དྷུཏྟེ པརིགྒཎྷིསྶཱམཱི’’ཏི ཏེསཾ ཨཱཔཱནབྷཱུམིཾ གནྟྭཱ ཏེསཾ ཀིརིཡཾ ཨོལོཀེཏྭཱ ‘‘ཨཡཾ སུརཱ ཨིམེཧི ཨིམིནཱ ནཱམ ཀཱརཎེན ཡོཛིཏཱ’’ཏི ཉཏྭཱ ‘‘ཨིཏོ དཱནི པཊྛཱཡ ཨིམེ ཨིཏོ པལཱཔེསྶཱམཱི’’ཏི ཙིནྟེཏྭཱ ཨཱཧ – ‘‘ཧརེ དུཊྛདྷུཏྟཱ, ཏུམྷེ ‘སུརཱཔཱཏིཡཾ བྷེསཛྫཾ པཀྑིཔིཏྭཱ ཨཱགཏཱགཏེ པཱཡེཏྭཱ ཝིསཉྙཱི ཀཏྭཱ ཝིལུམྤིསྶཱམཱ’ཏི ཨཱཔཱནམཎྜལཾ སཛྫེཏྭཱ ནིསིནྣཱ ཀེཝལཾ ཨིམཾ སུརཾ ཝཎྞེཐ, ཨེཀོཔི ཏཾ ཨུཀྑིཔིཏྭཱ པིཝིཏུཾ ན ཨུསྶཧཏི. སཙེ ཨཡཾ ཨཡོཛིཏཱ ཨསྶ, ཨིམཾ ཏུམྷེཝ པིཝེཡྻཱཐཱ’’ཏི ཏེ དྷུཏྟེ ཏཛྫེཏྭཱ ཏཏོ པལཱཔེཏྭཱ ཨཏྟནོ གེཧཾ གནྟྭཱ ‘‘དྷུཏྟེཧི ཀཏཀཱརཎཾ ཏཐཱགཏསྶ ཨཱརོཙེསྶཱམཱི’’ཏི ཙིནྟེནྟོ ཛེཏཝནཾ གནྟྭཱ ཨཱརོཙེསི. སཏྠཱ ‘‘ཨིདཱནི ཏཱཝ གཧཔཏི ཏེ དྷུཏྟཱ ཏཾ ཝཉྩེཏུཀཱམཱ ཛཱཏཱ, པུབྦེ པན པཎྜིཏེཔི ཝཉྩེཏུཀཱམཱ ཨཧེསུ’’ནྟི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ བཱརཱཎསིསེཊྛི ཨཧོསི. ཏདཱཔེཏེ དྷུཏྟཱ ཨེཝམེཝ སམྨནྟེཏྭཱ སུརཾ ཡོཛེཏྭཱ བཱརཱཎསིསེཊྛིསྶ ཨཱགམནཀཱལེ པཊིམགྒཾ གནྟྭཱ ཨེཝམེཝ ཀཐཡིཾསུ. སེཊྛི ཨནཏྠིཀོཔི ཧུཏྭཱ ཏེ པརིགྒཎྷིཏུཀཱམོ གནྟྭཱ ཏེསཾ ¶ ཀིརིཡཾ ཨོལོཀེཏྭཱ ‘‘ཨིདཾ ནཱམེཏེ ཀཱཏུཀཱམཱ, པལཱཔེསྶཱམི ནེ ཨིཏོ’’ཏི ཙིནྟེཏྭཱ ཨེཝམཱཧ ‘‘བྷོནྟོ, དྷུཏྟཱ སུརཾ པིཝིཏྭཱ རཱཛཀུལཾ གནྟུཾ ནཱམ ཨཡུཏྟཾ, རཱཛཱནཾ དིསྭཱ པུན ཨཱགཙྪནྟོ ཛཱནིསྶཱམི, ཏུམྷེ ཨིདྷེཝ ནིསཱིདཐཱ’’ཏི རཱཛུཔཊྛཱནཾ གནྟྭཱ པཙྩཱགཉྪི. དྷུཏྟཱ ‘‘ཨིཏོ ཨེཐ, སཱམཱི’’ཏི. སོཔི ཏཏྠ གནྟྭཱ བྷེསཛྫེན སཾཡོཛིཏཱ སུརཱཔཱཏིཡོ ཨོལོཀེཏྭཱ ཨེཝམཱཧ ‘‘བྷོནྟོ དྷུཏྟཱ ཏུམྷཱཀཾ ཀིརིཡཱ མཡ྄ཧཾ ན རུཙྩཏི, ཏུམྷཱཀཾ སུརཱཔཱཏིཡོ ཡཐཱཔཱུརིཏཱཝ ཋིཏཱ, ཏུམྷེ ཀེཝལཾ སུརཾ ཝཎྞེཐ, ན པན པིཝཐ. སཙཱཡཾ མནཱཔཱ ཨསྶ, ཏུམྷེཔི པིཝེཡྻཱཐ, ཨིམཱཡ པན ཝིསསཾཡུཏྟཱཡ བྷཝིཏབྦ’’ནྟི ཏེསཾ མནོརཐཾ བྷིནྡནྟོ ཨིམཾ གཱཐམཱཧ –

༥༣.

‘‘ཏཐེཝ པུཎྞཱ པཱཏིཡོ, ཨཉྙཱཡཾ ཝཏྟཏེ ཀཐཱ;

ཨཱཀཱརཎེན ཛཱནཱམི, ན ཙཱཡཾ བྷདྡིཀཱ སུརཱ’’ཏི.

ཏཏྠ ¶ ཏཐེཝཱཏི ཡཐཱ མཡཱ གམནཀཱལེ དིཊྛཱ, ཨིདཱནིཔི ཨིམཱ སུརཱཔཱཏིཡོ ཏཐེཝ པུཎྞཱ. ཨཉྙཱཡཾ ཝཏྟཏེ ཀཐཱཏི ཡཱ ཨཡཾ ཏུམྷཱཀཾ སུརཱཝཎྞནཀཐཱ ཝཏྟཏི, སཱ ཨཉྙཱཝ ཨབྷཱུཏཱ ¶ ཨཏཙྪཱ. ཡདི ཧི ཨེསཱ སུརཱ མནཱཔཱ ཨསྶ, ཏུམྷེཔི པིཝེཡྻཱཐ, ཨུཔཌྜྷཔཱཏིཡོ ཨཝསིསྶེཡྻུཾ. ཏུམྷཱཀཾ པན ཨེཀེནཱཔི སུརཱ ན པཱིཏཱ. ཨཱཀཱརཎེན ཛཱནཱམཱིཏི ཏསྨཱ ཨིམིནཱ ཀཱརཎེན ཛཱནཱམི. ན ཙཱཡཾ བྷདྡིཀཱ སུརཱཏི ‘‘ནེཝཱཡཾ བྷདྡིཀཱ སུརཱ, ཝིསསཾཡོཛིཏཱཡ ཨེཏཱཡ བྷཝིཏབྦ’’ནྟི དྷུཏྟེ ནིགྒཎྷིཏྭཱ ཡཐཱ ན པུན ཨེཝརཱུཔཾ ཀརོནྟི, ཏཐཱ ཏེ ཏཛྫེཏྭཱ ཝིསྶཛྫེསི. སོ ཡཱཝཛཱིཝཾ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ དྷུཏྟཱ ཨེཏརཧི དྷུཏྟཱ, བཱརཱཎསིསེཊྛི པན ཨཧམེཝ ཨཧོསི’’ནྟི.

པུཎྞཔཱཏིཛཱཏཀཝཎྞནཱ ཏཏིཡཱ.

[༥༤] ༤. ཀིཾཕལཛཱཏཀཝཎྞནཱ

ནཱཡཾ ¶ རུཀྑོ དུརཱརུཧཱཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཕལཀུསལཾ ཨུཔཱསཀཾ ཨཱརབྦྷ ཀཐེསི. ཨེཀོ ཀིར སཱཝཏྠིཝཱསཱི ཀུཊུམྦིཀོ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ ཨཏྟནོ ཨཱརཱམེ ནིསཱིདཱཔེཏྭཱ ཡཱགུཁཛྫཀཾ དཏྭཱ ཨུཡྻཱནཔཱལཾ ཨཱཎཱཔེསི ‘‘བྷིཀྑཱུཧི སདྡྷིཾ ཨུཡྻཱནེ ཝིཙརིཏྭཱ ཨཡྻཱནཾ ཨམྦཱདཱིནི ནཱནཱཕལཱནི དེཧཱི’’ཏི. སོ ‘‘སཱདྷཱུ’’ཏི པཊིསྶུཎིཏྭཱ བྷིཀྑཱུསངྒྷམཱདཱཡ ཨུཡྻཱནེ ཝིཙརནྟོ རུཀྑཾ ཨུལློཀེཏྭཱཝ ‘‘ཨེཏཾ ཕལཾ ཨཱམཾ, ཨེཏཾ ན སུཔཀྐཾ, ཨེཏཾ སུཔཀྐ’’ནྟི ཛཱནཱཏི. ཡཾ སོ ཝདཏི, ཏཾ ཏཐེཝ ཧོཏི. བྷིཀྑཱུ གནྟྭཱ ཏཐཱགཏསྶ ཨཱརོཙེསུཾ ‘‘བྷནྟེ, ཨཡཾ ཨུཡྻཱནཔཱལོ ཕལཀུསལོ བྷཱུམིཡཾ ཋིཏོཝ རུཀྑཾ ཨུལློཀེཏྭཱ ‘ཨེཏཾ ཕལཾ ཨཱམཾ, ཨེཏཾ ན སུཔཀྐཾ, ཨེཏཾ སུཔཀྐ’ནྟི ཛཱནཱཏི. ཡཾ སོ ཝདཏི, ཏཾ ཏཐེཝ ཧོཏཱི’’ཏི. སཏྠཱ ‘‘ན, བྷིཀྑཝེ, ཨཡམེཝ ཨུཡྻཱནཔཱལོ ཕལཀུསལོ, པུབྦེ པཎྜིཏཱཔི ཕལཀུསལཱཡེཝ ཨཧེསུ’’ནྟི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ སཏྠཝཱཧཀུལེ ནིབྦཏྟིཏྭཱ ཝཡཔྤཏྟོ པཉྩཧི སཀཊསཏེཧི ཝཎིཛྫཾ ཀརོནྟོ ཨེཀསྨིཾ ཀཱལེ མཧཱཝཏྟནིཨཊཝིཾ པཏྭཱ ¶ ཨཊཝིམུཁེ ཋཏྭཱ སབྦེ མནུསྶེ སནྣིཔཱཏཱཔེཏྭཱ ‘‘ཨིམིསྶཱ ཨཊཝིཡཱ ཝིསརུཀྑཱ ནཱམ ཧོནྟི, ཝིསཔཏྟཱནི, ཝིསཔུཔྥཱནི, ཝིསཕལཱནི, ཝིསམདྷཱུནི ཧོནྟིཡེཝ, པུབྦེ ཏུམྷེཧི ཨཔརིབྷུཏྟཾ, ཡཾ ཀིཉྩི པཏྟཾ ཝཱ པུཔྥཾ ཝཱ ཕལཾ ཝཱ པལླཝཾ ཝཱ མཾ ཨཔརིཔུཙྪིཏྭཱ མཱ ཁཱདཐཱ’’ཏི ཨཱཧ. ཏེ ‘‘སཱདྷཱུ’’ཏི སམྤཊིཙྪིཏྭཱ ཨཊཝིཾ ཨོཏརིཾསུ. ཨཊཝིམུཁེ ཙ ཨེཀསྨིཾ གཱམདྭཱརེ ¶ ཀིཾཕལརུཀྑོ ནཱམ ཨཏྠི, ཏསྶ ཁནྡྷསཱཁཱཔལཱསཔུཔྥཕལཱནི སབྦཱནི ཨམྦསདིསཱནེཝ ཧོནྟི. ན ཀེཝལཾ ཝཎྞསཎྛཱནཏོཝ, གནྡྷརསེཧིཔིསྶ ཨཱམཔཀྐཱནི ཕལཱནི ཨམྦཕལསདིསཱནེཝ, ཁཱདིཏཱནི པན ཧལཱཧལཝིསཾ ཝིཡ ཏངྑཎཉྙེཝ ཛཱིཝིཏཀྑཡཾ པཱཔེནྟི. པུརཏོ གཙྪནྟཱ ཨེཀཙྩེ ལོལཔུརིསཱ ‘‘ཨམྦུརུཀྑོ ཨཡ’’ནྟི སཉྙཱཡ ཕལཱནི ཁཱདིཾསུ, ཨེཀཙྩེ ‘‘སཏྠཝཱཧཾ པུཙྪིཏྭཱཝ ཁཱདིསྶཱམཱ’’ཏི ཧཏྠེན གཧེཏྭཱ ཨཊྛཾསུ. ཏེ སཏྠཝཱཧེ ཨཱགཏེ ‘‘ཨཡྻ, ཨིམཱནི ཨམྦཕལཱནི ཁཱདཱམཱ’’ཏི པུཙྪིཾསུ. བོདྷིསཏྟོ ‘‘ནཱཡཾ ¶ ཨམྦརུཀྑོ’’ཏི ཉཏྭཱ ‘‘ཀིཾ ཕལརུཀྑོ ནཱམེས, ནཱཡཾ ཨམྦརུཀྑོ, མཱ ཁཱདིཏྠཱ’’ཏི ཝཱརེཏྭཱ ཡེ ཁཱདིཾསུ. ཏེཔི ཝམཱཔེཏྭཱ ཙཏུམདྷུརཾ པཱཡེཏྭཱ ནིརོགེ ཨཀཱསི.

པུབྦེ པན ཨིམསྨིཾ རུཀྑམཱུལེ མནུསྶཱ ནིཝཱསཾ ཀཔྤེཏྭཱ ‘‘ཨམྦཕལཱནཱི’’ཏི སཉྙཱཡ ཨིམཱནི ཝིསཕལཱནི ཁཱདིཏྭཱ ཛཱིཝིཏཀྑཡཾ པཱཔུཎནྟི. པུནདིཝསེ གཱམཝཱསིནོ ནིཀྑམིཏྭཱ མཏམནུསྶེ དིསྭཱ པཱདེ གཎྷིཏྭཱ པཊིཙྪནྣཊྛཱནེ ཚཌྜེཏྭཱ སཀཊེཧི སདྡྷིཾཡེཝ སབྦཾ ཏེསཾ སནྟཀཾ གཧེཏྭཱ གཙྪནྟི. ཏེ ཏཾ དིཝསམྤི ཨརུཎུགྒམནཀཱལེཡེཝ ‘‘མཡ྄ཧཾ བལིབདྡོ བྷཝིསྶཏི, མཡ྄ཧཾ སཀཊཾ, མཡ྄ཧཾ བྷཎྜ’’ནྟི ཝེགེན ཏཾ རུཀྑམཱུལཾ གནྟྭཱ མནུསྶེ ནིརོགེ དིསྭཱ ‘‘ཀཐཾ ཏུམྷེ ཨིམཾ རུཀྑཾ ‘ནཱཡཾ ཨམྦརུཀྑོ’ཏི ཛཱནིཏྠཱ’’ཏི པུཙྪིཾསུ. ཏེ ‘‘མཡཾ ན ཛཱནཱམ, སཏྠཝཱཧཛེཊྛཀོ ནོ ཛཱནཱཏཱི’’ཏི ཨཱཧཾསུ. མནུསྶཱ བོདྷིསཏྟཾ པུཙྪིཾསུ ‘‘པཎྜིཏ, ཀིནྟི ཀཏྭཱ ཏྭཾ ཨིམསྶ རུཀྑསྶ ཨནམྦརུཀྑབྷཱཝཾ ཨཉྙཱསཱི’’ཏི? སོ ‘‘དྭཱིཧི ཀཱརཎེཧི ཨཉྙཱསི’’ནྟི ཝཏྭཱ ཨིམཾ གཱཐམཱཧ –

༥༤.

‘‘ནཱཡཾ ¶ རུཀྑོ དུརཱརུཧོ, ནཔི གཱམཏོ ཨཱརཀཱ;

ཨཱཀཱརཎེན ཛཱནཱམི, ནཱཡཾ སཱདུཕལོ དུམོ’’ཏི.

ཏཏྠ ནཱཡཾ རུཀྑོ དུརཱརུཧོཏི ཨཡཾ ཝིསརུཀྑོ ན དུཀྑཱརུཧོ, ཨུཀྑིཔིཏྭཱ ཋཔིཏནིསྶེཎཱི ཝིཡ སུཁེནཱརོཧིཏུཾ སཀྐཱཏི ཝདཏི. ནཔི གཱམཏོ ཨཱརཀཱཏི གཱམཏོ དཱུརེ ཋིཏོཔི ན ཧོཏི, གཱམདྭཱརེ ཋིཏོཡེཝཱཏི དཱིཔེཏི. ཨཱཀཱརཎེན ཛཱནཱམཱིཏི ཨིམིནཱ དུཝིདྷེན ཀཱརཎེནཱཧཾ ཨིམཾ རུཀྑཾ ཛཱནཱམི. ཀིནྟི? ནཱཡཾ སཱདུཕལོ དུམོཏི. སཙེ ཧི ཨཡཾ མདྷུརཕལོ ཨམྦརུཀྑོ ཨབྷཝིསྶ, ཨེཝཾ སུཁཱརུལ༹ྷེ ཨཝིདཱུརེ ཋིཏེ ཨེཏསྨིཾ ཨེཀམྤི ཕལཾ ན ཏིཊྛེཡྻ, ཕལཁཱདཀམནུསྶེཧི ནིཙྩཾ པརིཝུཏོཝ ཨསྶ. ཨེཝཾ ཨཧཾ ཨཏྟནོ ཉཱཎེན པརིཙྪིནྡིཏྭཱ ཨིམསྶ ཝིསརུཀྑབྷཱཝཾ ཨཉྙཱསིནྟི མཧཱཛནསྶ དྷམྨཾ དེསེཏྭཱ སོཏྠིགམནཾ གཏོ.

སཏྠཱཔི ¶ ‘‘ཨེཝཾ, བྷིཀྑཝེ, པུབྦེ པཎྜིཏཱཔི ཕལཀུསལཱ ཨཧེསུ’’ནྟི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ པརིསཱ བུདྡྷཔརིསཱ ཨཧེསུཾ, སཏྠཝཱཧོ པན ཨཧམེཝ ཨཧོསི’’ནྟི.

ཀིཾཕལཛཱཏཀཝཎྞནཱ ཙཏུཏྠཱ.

[༥༥] ༥. པཉྩཱཝུདྷཛཱཏཀཝཎྞནཱ

ཡོ ¶ ཨལཱིནེན ཙིཏྟེནཱཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཨོསྶཊྛཝཱིརིཡཾ བྷིཀྑུཾ ཨཱརབྦྷ ཀཐེསི. ཏཉྷི བྷིཀྑུཾ སཏྠཱ ཨཱམནྟེཏྭཱ ‘‘སཙྩཾ ཀིར ཏྭཾ བྷིཀྑུ ཨོསྶཊྛཝཱིརིཡོསཱི’’ཏི པུཙྪིཏྭཱ ‘‘སཙྩཾ, བྷགཝཱ’’ཏི ཝུཏྟེ ‘‘བྷིཀྑུ པུབྦེ པཎྜིཏཱ ཝཱིརིཡཾ ཀཱཏུཾ ཡུཏྟཊྛཱནེ ཝཱིརིཡཾ ཀཏྭཱ རཛྫསམྤཏྟིཾ པཱཔུཎིཾསཱུ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཏསྶ རཉྙོ ཨགྒམཧེསིཡཱ ཀུཙྪིསྨིཾ ནིབྦཏྟི. ཏསྶ ནཱམགྒཧཎདིཝསེ ཨཊྛསཏེ བྲཱཧྨཎེ སབྦཀཱམེཧི སནྟཔྤེཏྭཱ ལཀྑཎཱནི པུཙྪིཾསུ. ལཀྑཎཀུསལཱ བྲཱཧྨཎཱ ལཀྑཎསམྤཏྟིཾ དིསྭཱ ‘‘པུཉྙསམྤནྣོ, མཧཱརཱཛ, ཀུམཱརོ ཏུམྷཱཀཾ ཨཙྩཡེན རཛྫཾ པཱཔུཎིསྶཏི, པཉྩཱཝུདྷཀམྨེ པཉྙཱཏོ པཱཀཊོ ཛམྦུདཱིཔེ ཨགྒཔུརིསོ བྷཝིསྶཏཱི’’ཏི བྱཱཀརིཾསུ. རཱཛཱ བྲཱཧྨཎཱནཾ ¶ ཝཙནཾ སུཏྭཱ ཀུམཱརསྶ ནཱམཾ གཎྷནྟོ ‘‘པཉྩཱཝུདྷཀུམཱརོ’’ཏི ནཱམཾ ཨཀཱསི. ཨཐ ནཾ ཝིཉྙུཏཾ པཏྭཱ སོལ༹སཝསྶུདྡེསེ ཋིཏཾ རཱཛཱ ཨཱམནྟེཏྭཱ ‘‘ཏཱཏ, སིཔྤཾ ཨུགྒཎྷཱཧཱི’’ཏི ཨཱཧ. ‘‘ཀསྶ སནྟིཀེ ཨུགྒཎྷཱམི, དེཝཱ’’ཏི? ‘‘གཙྪ, ཏཱཏ, གནྡྷཱརརཊྛེ ཏཀྐསིལནགརེ དིསཱཔཱམོཀྑསྶ ཨཱཙརིཡསྶ སནྟིཀེ ཨུགྒཎྷ, ཨིདཉྩསྶ ཨཱཙརིཡབྷཱགཾ དཛྫེཡྻཱསཱི’’ཏི སཧསྶཾ དཏྭཱ ཨུཡྻོཛེསི. སོ ཏཏྠ གནྟྭཱ སིཔྤཾ སིཀྑིཏྭཱ ཨཱཙརིཡེན དིནྣཾ པཉྩཱཝུདྷཾ གཧེཏྭཱ ཨཱཙརིཡཾ ཝནྡིཏྭཱ ཏཀྐསིལནགརཏོ ནིཀྑམིཏྭཱ སནྣདྡྷཔཉྩཱཝུདྷོ བཱརཱཎསིམགྒཾ པཊིཔཛྫི.

སོ ཨནྟརཱམགྒེ སིལེསལོམཡཀྑེན ནཱམ ཨདྷིཊྛིཏཾ ཨེཀཾ ཨཊཝིཾ པཱཔུཎི. ཨཐ ནཾ ཨཊཝིམུཁེ མནུསྶཱ དིསྭཱ ‘‘བྷོ མཱཎཝ, མཱ ཨིམཾ ཨཊཝིཾ པཝིས, སིལེསལོམཡཀྑོ ནཱམེཏྠ ཨཏྠི, སོ དིཊྛདིཊྛེ མནུསྶེ ཛཱིཝིཏཀྑཡཾ པཱཔེཏཱི’’ཏི ཝཱརཡིཾསུ. བོདྷིསཏྟོ ཨཏྟཱནཾ ཏཀྐེནྟོ ཨསམྦྷཱིཏཀེསརསཱིཧོ ཝིཡ ཨཊཝིཾ པཱཝིསིཡེཝ. ཏསྨིཾ ཨཊཝིམཛ྄ཛྷཾ སམྤཏྟེ སོ ཡཀྑོ ཏཱལམཏྟོ ཧུཏྭཱ ཀཱུཊཱགཱརམཏྟཾ སཱིསཾ པཏྟཔྤམཱཎཱནི ཨཀྑཱིནི, དཀལིམཀུལ༹མཏྟཱ དྭེ དཱཋཱ ¶ ཙ མཱཔེཏྭཱ སེཏམུཁོ ཀབརཀུཙྪི ནཱིལཧཏྠཔཱདོ ཧུཏྭཱ བོདྷིསཏྟསྶ ཨཏྟཱནཾ དསྶེཏྭཱ ‘‘ཀཧཾ ཡཱསི, ཏིཊྛ བྷཀྑོསི མེ’’ཏི ཨཱཧ. ཨཐ ནཾ བོདྷིསཏྟོ ¶ ‘‘ཡཀྑ, ཨཧཾ ཨཏྟཱནཾ ཏཀྐེཏྭཱ ཨིདྷ པཝིཊྛོ, ཏྭཾ ཨཔྤམཏྟོ ཧུཏྭཱ མཾ ཨུཔགཙྪེཡྻཱསི. ཝིསཔཱིཏེན ཧི སརེན ཏཾ ཝིཛ྄ཛྷིཏྭཱ ཨེཏྠེཝ པཱཏེསྶཱམཱི’’ཏི སནྟཛྫེཏྭཱ ཧལཱཧལཝིསཔཱིཏཾ སརཾ སནྣཡ྄ཧིཏྭཱ མུཉྩི, སོ ཡཀྑསྶ ལོམེསུཡེཝ ཨལླཱིཡི. ཏཏོ ཨཉྙཾ, ཏཏོ ཨཉྙནྟི ཨེཝཾ པཉྙཱས སརེ མུཉྩི, སབྦེ ཏསྶ ལོམེསུཡེཝ ཨལླཱིཡིཾསུ. ཡཀྑོ སབྦེཔི ཏེ སརེ ཕོཊེཏྭཱ ཨཏྟནོ པཱདམཱུལེཡེཝ པཱཏེཏྭཱ བོདྷིསཏྟཾ ཨུཔསངྐམི.

བོདྷིསཏྟོ པུནཔི ཏཾ ཏཛྫེཏྭཱ ཁགྒཾ ཀཌྜྷིཏྭཱ པཧརི, ཏེཏྟིཾསངྒུལཱཡཏོ ཁགྒོ ལོམེསུཡེཝ ཨལླཱིཡི. ཨཐ ནཾ ཀཎཡེན པཧརི, སོཔི ལོམེསུཡེཝ ཨལླཱིཡི. ཏསྶ ཨལླཱིནབྷཱཝཾ ཉཏྭཱ མུགྒརེན པཧརི, སོཔི ལོམེསུཡེཝ ཨལླཱིཡི. ཏསྶ ཨལླཱིནབྷཱཝཾ ཉཏྭཱ ཀུནྟེན པཧརི, སོཔི ལོམེསུཡེཝ ཨལླཱིཡི. ཏསྶ ཨལླཱིནབྷཱཝཾ ཉཏྭཱ ‘‘བྷོ ཡཀྑན, ཏེ ཨཧཾ ‘པཉྩཱཝུདྷཀུམཱརོ ¶ ནཱམཱ’ཏི སུཏཔུབྦོ, ཨཧཾ ཏཡཱ ཨདྷིཊྛིཏཾ ཨཊཝིཾ པཝིསནྟོ ན དྷནུཨཱདཱིནི ཏཀྐེཏྭཱ པཝིཊྛོ, ཨཏྟཱནཾཡེཝ པན ཏཀྐེཏྭཱ པཝིཊྛོ, ཨཛྫ ཏཾ པོཐེཏྭཱ ཙུཎྞཝིཙུཎྞཾ ཀརིསྶཱམཱི’’ཏི ཨུནྣཱདེནྟོ ཨཏྟཱནཾ ཏཀྐེཏྭཱ དཀྑིཎཧཏྠེན ཡཀྑཾ པཧརི, ཧཏྠོ ལོམེསུཡེཝ ཨལླཱིཡི. ཝཱམཧཏྠེན པཧརི, སོཔི ཨལླཱིཡི. དཀྑིཎཔཱདེན པཧརི, སོཔི ཨལླཱིཡི. ཝཱམཔཱདེན པཧརི, སོཔི ཨལླཱིཡི. ‘‘སཱིསེན ཏཾ པོཐེཏྭཱ ཙུཎྞཝིཙུཎྞཾ ཀརིསྶཱམཱི’’ཏི སཱིསེན པཧརི, ཏམྤི ལོམེསུཡེཝ ཨལླཱིཡི. སོ པཉྩོཌྜིཏོ པཉྩསུ ཋཱནེསུ བདྡྷོ ཨོལམྦནྟོཔི ནིབྦྷཡོ ནིསྶཱརཛྫོཝ ཨཧོསི.

ཡཀྑོ ཙིནྟེསི ‘‘ཨཡཾ ཨེཀོ པུརིསསཱིཧོ པུརིསཱཛཱནཱིཡོ, ན པུརིསམཏྟོཝ, མཱདིསེན ནཱམསྶ ཡཀྑེན གཧིཏསྶ སནྟཱསམཏྟམྤི ན བྷཝིསྶཏི, མཡཱ ཨིམཾ མགྒཾ ཧནནྟེན ཨེཀོཔི ཨེཝརཱུཔོ པུརིསོ ན དིཊྛཔུབྦོ, ཀསྨཱ ནུ ཁོ ཨེས ན བྷཱཡཏཱི’’ཏི. སོ ཏཾ ཁཱདིཏུཾ ཨཝིསཧནྟོ ‘‘ཀསྨཱ ནུ ཁོ, ཏྭཾ མཱཎཝ, མརཎབྷཡཾ ན བྷཱཡསཱི’’ཏི པུཙྪི. ‘‘ཀིཾཀཱརཎཱ, ཡཀྑ, བྷཱཡིསྶཱམི. ཨེཀསྨིཉྷི ཨཏྟབྷཱཝེ ཨེཀཾ མརཎཾ ནིཡཏམེཝ, ཨཔིཙ མཡ྄ཧཾ ཀུཙྪིམྷི ཝཛིརཱཝུདྷཾ ཨཏྠི. སཙེ མཾ ཁཱདིསྶསི, ཏཾ ཨཱཝུདྷཾ ཛཱིརཱཔེཏུཾ ན སཀྑིསྶསི, ཏཾ ཏེ ཨནྟཱནི ཁཎྜཱཁཎྜིཀཾ ཚིནྡིཏྭཱ ཛཱིཝིཏཀྑཡཾ ¶ པཱཔེསྶཏི. ཨིཏི ཨུབྷོཔི ནསྶིསྶཱམ, ཨིམིནཱ ཀཱརཎེནཱཧཾ ན བྷཱཡཱམཱི’’ཏི. ཨིདཾ ཀིར བོདྷིསཏྟོ ཨཏྟནོ ཨབྦྷནྟརེ ཉཱཎཱཝུདྷཾ སནྡྷཱཡ ཀཐེསི. ཏཾ སུཏྭཱ ཡཀྑོ ཙིནྟེསི ‘‘ཨཡཾ མཱཎཝོ སཙྩམེཝ བྷཎཏི, ཨིམསྶ པུརིསསཱིཧསྶ སརཱིརཏོ མུགྒབཱིཛམཏྟམྤི མཾསཁཎྜཾ མཡ྄ཧཾ ཀུཙྪི ཛཱིརེཏུཾ ན སཀྑིསྶཏི, ཝིསྶཛྫེསྶཱམི ན’’ནྟི ¶ མརཎབྷཡཏཛྫིཏོ བོདྷིསཏྟཾ ཝིསྶཛྫེཏྭཱ ‘‘མཱཎཝ, པུརིསསཱིཧོ ཏྭཾ, ན ཏེ ཨཧཾ མཾསཾ ཁཱདིསྶཱམི, ཏྭཾ ཨཛྫ རཱཧུམུཁཱ མུཏྟཙནྡོ ཝིཡ མམ ཧཏྠཏོ མུཙྩིཏྭཱ ཉཱཏིསུཧཛྫམཎྜལཾ ཏོསེནྟོ ཡཱཧཱི’’ཏི ཨཱཧ.

ཨཐ ནཾ བོདྷིསཏྟོ ཨཱཧ – ‘‘ཡཀྑ, ཨཧཾ ཏཱཝ གཙྪིསྶཱམི, ཏྭཾ པན པུབྦེཔི ཨཀུསལཾ ཀཏྭཱ ལུདྡོ ལོཧིཏཔཱཎི པརརུཧིརམཾསབྷཀྑོ ཡཀྑོ ཧུཏྭཱ ནིབྦཏྟོ. སཙེ ཨིདྷཱཔི ¶ ཋཏྭཱ ཨཀུསལམེཝ ཀརིསྶསི, ཨནྡྷཀཱརཱ ཨནྡྷཀཱརམེཝ གམིསྶསི, མཾ དིཊྛཀཱལཏོ པཊྛཱཡ པན ན སཀྐཱ ཏཡཱ ཨཀུསལཾ ཀཱཏུཾ, པཱཎཱཏིཔཱཏཀམྨཾ ནཱམ ནིརཡེ ཏིརཙྪཱནཡོནིཡཾ པེཏྟིཝིསཡེ ཨསུརཀཱཡེ ཙ ནིབྦཏྟེཏི, མནུསྶེསུ ནིབྦཏྟནིབྦཏྟཊྛཱནེ ཨཔྤཱཡུཀསཾཝཏྟནིཀཾ ཧོཏཱི’’ཏི ཨེཝམཱདིནཱ ནཡེན པཉྩནྣཾ དུསྶཱིལྱཀམྨཱནཾ ཨཱདཱིནཝཾ, པཉྩནྣཾ སཱིལཱནཾ ཨཱནིསཾསཉྩ ཀཐེཏྭཱ ནཱནཱཀཱརཎེཧི ཡཀྑཾ ཏཛྫེཏྭཱ དྷམྨཾ དེསེཏྭཱ དམེཏྭཱ ནིབྦིསེཝནཾ ཀཏྭཱ པཉྩསུ སཱིལེསུ པཏིཊྛཱཔེཏྭཱ ཏསྶཱཡེཝ ནཾ ཨཊཝིཡཱ བལིཔཊིགྒཱཧཀཾ དེཝཏཾ ཀཏྭཱ ཨཔྤམཱདེན ཨོཝདིཏྭཱ ཨཊཝིཏོ ནིཀྑམིཏྭཱ ཨཊཝིམུཁེ མནུསྶཱནཾ ཨཱཙིཀྑིཏྭཱ སནྣདྡྷཔཉྩཱཝུདྷོ བཱརཱཎསིཾ གནྟྭཱ མཱཏཱཔིཏརོ དིསྭཱ ཨཔརབྷཱགེ རཛྫེ པཏིཊྛཱཡ དྷམྨེན རཛྫཾ ཀཱརེནྟོ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱཔི ཨིམཾ དྷམྨདེསནཾ ཨཱཧརིཏྭཱ ཨབྷིསམྦུདྡྷོ ཧུཏྭཱ ཨིམཾ གཱཐམཱཧ –

༥༥.

‘‘ཡོ ཨལཱིནེན ཙིཏྟེན, ཨལཱིནམནསོ ནརོ;

བྷཱཝེཏི ཀུསལཾ དྷམྨཾ, ཡོགཀྑེམསྶ པཏྟིཡཱ;

པཱཔུཎེ ཨནུཔུབྦེན, སབྦསཾཡོཛནཀྑཡ’’ནྟི.

ཏཏྲཱཡཾ པིཎྜཏྠོ – ཡོ པུརིསོ ཨལཱིནེན ཨསཾཀུཊིཏེན ཙིཏྟེན པཀཏིཡཱཔི ཨལཱིནམནོ ཨལཱིནཛ྄ཛྷཱསཡོཝ ཧུཏྭཱ ཨནཝཛྫཊྛེན ཀུསལཾ སཏྟཏིཾ སབོདྷིཔཀྑིཡབྷེདཾ དྷམྨཾ བྷཱཝེཏི ཝཌྜྷེཏི, ཝིསཱལེན ཙིཏྟེན ཝིཔསྶནཾ ¶ ཨནུཡུཉྫཏི ཙཏཱུཧི ཡོགེཧི ཁེམསྶ ནིབྦཱནསྶ པཏྟིཡཱ, སོ ཨེཝཾ སབྦསངྑཱརེསུ ‘‘ཨནིཙྩཾ དུཀྑཾ ཨནཏྟཱ’’ཏི ཏིལཀྑཎཾ ཨཱརོཔེཏྭཱ ཏརུཎཝིཔསྶནཏོ པཊྛཱཡ ཨུཔྤནྣེ བོདྷིཔཀྑིཡདྷམྨེ བྷཱཝེནྟོ ཨནུཔུབྦེན ཨེཀསཾཡོཛནམྤི ཨནཝསེསེཏྭཱ སབྦསཾཡོཛནཀྑཡཀརསྶ ཙཏུཏྠམགྒསྶ པརིཡོསཱནེ ཨུཔྤནྣཏྟཱ ‘‘སབྦསཾཡོཛནཀྑཡོ’’ཏི སངྑྱཾ གཏཾ ཨརཧཏྟཾ པཱཔུཎེཡྻཱཏི.

ཨེཝཾ ¶ སཏྠཱ ཨརཧཏྟེན དྷམྨདེསནཱཡ ཀཱུཊཾ གཧེཏྭཱ མཏྠཀེ ཙཏྟཱརི སཙྩཱནི པཀཱསེསི, སཙྩཔརིཡོསཱནེ སོ བྷིཀྑུ ཨརཧཏྟཾ པཱཔུཎི. སཏྠཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཡཀྑོ ཨངྒུལིམཱལོ ཨཧོསི, པཉྩཱཝུདྷཀུམཱརོ པན ཨཧམེཝ ཨཧོསི’’ནྟི.

པཉྩཱཝུདྷཛཱཏཀཝཎྞནཱ པཉྩམཱ.

[༥༦] ༦. ཀཉྩནཀྑནྡྷཛཱཏཀཝཎྞནཱ

ཡོ ¶ པཧཊྛེན ཙིཏྟེནཱཏི ཨིདཾ སཏྠཱ ཛེཏཝནེ ཝིཧརནྟོ ཨཉྙཏརཾ བྷིཀྑུཾ ཨཱརབྦྷ ཀཐེསི. ཨེཀོ ཀིར སཱཝཏྠིཝཱསཱི ཀུལཔུཏྟོ སཏྠུ དྷམྨདེསནཾ སུཏྭཱ རཏནསཱསནེ ཨུརཾ དཏྭཱ པབྦཛི. ཨཐསྶ ཨཱཙརིཡུཔཛ྄ཛྷཱཡཱ ‘‘ཨཱཝུསོ, ཨེཀཝིདྷེན སཱིལཾ ནཱམ, དུཝིདྷེན, ཏིཝིདྷེན, ཙཏུབྦིདྷེན, པཉྩཝིདྷེན, ཚབྦིདྷེན, སཏྟཝིདྷེན, ཨཊྛཝིདྷེན, ནཝཝིདྷེན, དསཝིདྷེན, བཧུཝིདྷེན སཱིལཾ ནཱམ. ཨིདཾ ཙཱུལ༹སཱིལཾ ནཱམ, ཨིདཾ མཛ྄ཛྷིམསཱིལཾ ནཱམ, ཨིདཾ མཧཱསཱིལཾ ནཱམ. ཨིདཾ པཱཏིམོཀྑསཾཝརསཱིལཾ ནཱམ, ཨིདཾ ཨིནྡྲིཡསཾཝརསཱིལཾ ནཱམ, ཨིདཾ ཨཱཛཱིཝཔཱརིསུདྡྷིསཱིལཾ ནཱམ, ཨིདཾ པཙྩཡཔཊིསེཝནསཱིལཾ ནཱམཱ’’ཏི སཱིལཾ ཨཱཙིཀྑནྟི. སོ ཙིནྟེསི ‘‘ཨིདཾ སཱིལཾ ནཱམ ཨཏིབཧུ, ཨཧཾ ཨེཏྟཀཾ སམཱདཱཡ ཝཏྟིཏུཾ ན སཀྑིསྶཱམི, སཱིལཾ པཱུརེཏུཾ ཨསཀྐོནྟསྶ ཙ ནཱམ པབྦཛྫཱཡ ཀོ ཨཏྠོ, ཨཧཾ གིཧཱི ཧུཏྭཱ དཱནཱདཱིནི པུཉྙཱནི ཙ ཀརིསྶཱམི, པུཏྟདཱརཉྩ པོསེསྶཱམཱི’’ཏི. ཨེཝཉྩ པན ཙིནྟེཏྭཱ ‘‘བྷནྟེ, ཨཧཾ སཱིལཾ རཀྑིཏུཾ ན སཀྑིསྶཱམི, ཨསཀྐོནྟསྶ ཙ ནཱམ པབྦཛྫཱཡ ཀོ ཨཏྠོ, ཨཧཾ ཧཱིནཱཡཱཝཏྟིསྶཱམི, ཏུམྷཱཀཾ པཏྟཙཱིཝརཾ གཎྷཐཱ’’ཏི ཨཱཧ.

ཨཐ ¶ ནཾ ཨཱཧཾསུ ‘‘ཨཱཝུསོ ཨེཝཾ སནྟེ དསབལཾ ཝནྡིཏྭཱཝ ཡཱཧཱི’’ཏི ཏེ ཏཾ ཨཱདཱཡ སཏྠུ སནྟིཀཾ དྷམྨསབྷཾ ཨགམཾསུ. སཏྠཱ དིསྭཱཝ ‘‘ཀིཾ, བྷིཀྑཝེ, ཨནཏྠིཀཾ བྷིཀྑུཾ ཨཱདཱཡ ཨཱགཏཏྠཱ’’ཏི ཨཱཧ. བྷནྟེ, ཨཡཾ བྷིཀྑུ ‘‘ཨཧཾ སཱིལཾ རཀྑིཏུཾ ན སཀྑིསྶཱམཱི’’ཏི པཏྟཙཱིཝརཾ ནིཡྻཱདེཏི, ཨཐ ནཾ མཡཾ གཧེཏྭཱ ཨཱགཏམྷཱཏི. ‘‘ཀསྨཱ པན ཏུམྷེ, བྷིཀྑཝེ, ཨིམསྶ བྷིཀྑུནོ བཧུཾ སཱིལཾ ཨཱཙིཀྑཐ. ཡཏྟཀཾ ཨེས རཀྑིཏུཾ སཀྐོཏི, ཏཏྟཀམེཝ རཀྑིསྶཏི. ཨིཏོ པཊྛཱཡ ཏུམྷེ ཨེཏཾ མཱ ཀིཉྩི ཨཝཙུཏྠ, ཨཧམེཏྠ ཀཏྟབྦཾ ཛཱནིསྶཱམི, ཨེཧི ཏྭཾ བྷིཀྑུ, ཀིཾ ཏེ བཧུནཱ སཱིལེན, ཏཱིཎིཡེཝ སཱིལཱནི རཀྑིཏུཾ སཀྑིསྶསཱི’’ཏི? ‘‘རཀྑིསྶཱམི, བྷནྟེ’’ཏི. ཏེན ཧི ཏྭཾ ཨིཏོ པཊྛཱཡ ཀཱཡདྭཱརཾ ཝཙཱིདྭཱརཾ མནོདྭཱརནྟི ཏཱིཎི དྭཱརཱནི ¶ རཀྑ, མཱ ཀཱཡེན པཱཔཀམྨཾ ཀརི, མཱ ཝཱཙཱཡ, མཱ མནསཱ. ‘‘གཙྪ མཱ ཧཱིནཱཡཱཝཏྟི, ཨིམཱནི ཏཱིཎིཡེཝ སཱིལཱནི རཀྑཱ’’ཏི. ཨེཏྟཱཝཏཱ སོ བྷིཀྑུ ཏུཊྛམཱནསོ ‘‘སཱདྷུ, བྷནྟེ, རཀྑིསྶཱམི ཨིམཱནི ཏཱིཎི སཱིལཱནཱི’’ཏི སཏྠཱརཾ ཝནྡིཏྭཱ ཨཱཙརིཡུཔཛ྄ཛྷཱཡེཧི སདྡྷིཾཡེཝ ཨགམཱསི. སོ ཏཱནི ཏཱིཎི སཱིལཱནི པཱུརེནྟོཝ ཨཉྙཱསི ‘‘ཨཱཙརིཡུཔཛ྄ཛྷཱཡེཧི མཡ྄ཧཾ ཨཱཙིཀྑིཏཾ སཱིལམྤི ཨེཏྟཀམེཝ, ཏེ པན ཨཏྟནོ ཨབུདྡྷབྷཱཝེན མཾ བུཛ྄ཛྷཱཔེཏུཾ ནཱསཀྑིཾསུ, སམྨཱསམྦུདྡྷོ ¶ ཨཏྟནོ བུདྡྷསུབུདྡྷཏཱཡ ཨནུཏྟརདྷམྨརཱཛཏཱཡ ཨེཏྟཀཾ སཱིལཾ ཏཱིསུཡེཝ དྭཱརེསུ པཀྑིཔིཏྭཱ མཾ གཎྷཱཔེསི, ཨཝསྶཡོ ཝཏ མེ སཏྠཱ ཛཱཏོ’’ཏི ཝིཔསྶནཾ ཝཌྜྷེཏྭཱ ཀཏིཔཱཧེནེཝ ཨརཧཏྟེ པཏིཊྛཱསི.

ཏཾ པཝཏྟིཾ ཉཏྭཱ དྷམྨསབྷཱཡཾ སནྣིཔཏིཏཱ བྷིཀྑཱུ ‘‘ཨཱཝུསོ, ཏཾ ཀིར བྷིཀྑུཾ ‘བཧུསཱིལཱནི རཀྑིཏུཾ ན སཀྐོམཱི’ཏི ཧཱིནཱཡཱཝཏྟནྟཾ སབྦཱནི སཱིལཱནི ཏཱིཧི ཀོཊྛཱསེཧི སངྑིཔིཏྭཱ གཱཧཱཔེཏྭཱ སཏྠཱ ཨརཧཏྟཾ པཱཔེསི, ཨཧོ བུདྡྷཱནཾ བལཾ ནཱམ ཨཙྪརིཡ’’ནྟི བུདྡྷགུཎེ ཀཐེནྟཱ ནིསཱིདིཾསུ. ཨཐ སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘བྷིཀྑཝེ, ཨཏིགརུཀོཔི བྷཱརོ ཀོཊྛཱསཝསེན བྷཱཛེཏྭཱ དིནྣོ ལཧུཀོ ཝིཡ ཧོཏི, པུབྦེཔི པཎྜིཏཱ མཧནྟཾ ཀཉྩནཀྑནྡྷཾ ལབྷིཏྭཱ ཨུཀྑིཔིཏུཾ ཨསཀྐོནྟཱ ཝིབྷཱགཾ ཀཏྭཱ ཨུཀྑིཔིཏྭཱ ཨགམཾསཱུ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨེཀསྨིཾ གཱམཀེ ཀསྶཀོ ཨཧོསི. སོ ཨེཀདིཝསཾ ཨཉྙཏརསྨིཾ ཚཌྜིཏགཱམཀེ ཁེཏྟེ ཀསིཾ ཀསཏི. པུབྦེ ཙ ཏསྨིཾ གཱམེ ཨེཀོ ཝིབྷཝསམྤནྣོ སེཊྛི ཨཱུརུམཏྟཔརིཎཱཧཾ ཙཏུཧཏྠཱཡཱམཾ ཀཉྩནཀྑནྡྷཾ ནིདཧིཏྭཱ ཀཱལམཀཱསི. ཏསྨིཾ བོདྷིསཏྟསྶ ནངྒལཾ ལགིཏྭཱ ཨཊྛཱསི. སོ ‘‘མཱུལསནྟཱནཀཾ བྷཝིསྶཏཱི’’ཏི པཾསུཾ ཝིཡཱུཧནྟོ ཏཾ དིསྭཱ པཾསུནཱ པཊིཙྪཱདེཏྭཱ དིཝསཾ ཀསིཏྭཱ ཨཏྠངྒཏེ སཱུརིཡེ ཡུགནངྒལཱདཱིནི ཨེཀམནྟེ ནིཀྑིཔིཏྭཱ ‘‘ཀཉྩནཀྑནྡྷཾ གཎྷིཏྭཱ གཙྪིསྶཱམཱི’’ཏི ཏཾ ཨུཀྑིཔིཏུཾ ནཱསཀྑི. ཨསཀྐོནྟོ ནིསཱིདིཏྭཱ ‘‘ཨེཏྟཀཾ ཀུཙྪིབྷརཎཱཡ བྷཝིསྶཏི, ཨེཏྟཀཾ ནིདཧིཏྭཱ ཋཔེསྶཱམི, ཨེཏྟཀེན ཀམྨནྟེ པཡོཛེསྶཱམི, ཨེཏྟཀཾ དཱནཱདིཔུཉྙཀིརིཡཱཡ བྷཝིསྶཏཱི’’ཏི ཙཏྟཱརོ ཀོཊྛཱསེ ཨཀཱསི. ཏསྶེཝཾ ཝིབྷཏྟཀཱལེ སོ ཀཉྩནཀྑནྡྷོ སལླཧུཀོ ཝིཡ ཨཧོསི. སོ ཏཾ ཨུཀྑིཔིཏྭཱ གྷརཾ ནེཏྭཱ ཙཏུདྷཱ ཝིབྷཛིཏྭཱ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

ཨིཏི ¶ བྷགཝཱ ཨིམཾ དྷམྨདེསནཾ ཨཱཧརིཏྭཱ ཨབྷིསམྦུདྡྷོ ཧུཏྭཱ ཨིམཾ གཱཐམཱཧ –

༥༦.

‘‘ཡོ ¶ པཧཊྛེན ཙིཏྟེན, པཧཊྛམནསོ ནརོ;

བྷཱཝེཏི ཀུསལཾ དྷམྨཾ, ཡོགཀྑེམསྶ པཏྟིཡཱ;

པཱཔུཎེ ཨནུཔུབྦེན, སབྦསཾཡོཛནཀྑཡ’’ནྟི.

ཏཏྠ པཧཊྛེནཱཏི ཝིནཱིཝརཎེན. པཧཊྛམནསོཏི ཏཱཡ ཨེཝ ཝིནཱིཝརཎཏཱཡ པཧཊྛམཱནསོ, སུཝཎྞཾ ཝིཡ པཧཾསིཏྭཱ སམུཛྫོཏིཏསཔྤབྷཱསཙིཏྟོ ཧུཏྭཱཏི ཨཏྠོ.

ཨེཝཾ སཏྠཱ ཨརཧཏྟཀཱུཊེན དེསནཾ ནིཊྛཱཔེཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཀཉྩནཀྑནྡྷལདྡྷཔུརིསོ ཨཧམེཝ ཨཧོསི’’ནྟི.

ཀཉྩནཀྑནྡྷཛཱཏཀཝཎྞནཱ ཚཊྛཱ.

[༥༧] ༧. ཝཱནརིནྡཛཱཏཀཝཎྞནཱ

ཡསྶེཏེ ¶ ཙཏུརོ དྷམྨཱཏི ཨིདཾ སཏྠཱ ཝེལུ༹ཝནེ ཝིཧརནྟོ དེཝདཏྟསྶ ཝདྷཱཡ པརིསཀྐནཾ ཨཱརབྦྷ ཀཐེསི. ཏསྨིཉྷི སམཡེ སཏྠཱ ‘‘དེཝདཏྟོ ཝདྷཱཡ པརིསཀྐཏཱི’’ཏི སུཏྭཱ ‘‘ན, བྷིཀྑཝེ, ཨིདཱནེཝ དེཝདཏྟོ མཡ྄ཧཾ ཝདྷཱཡ པརིསཀྐཏི, པུབྦེཔི པརིསཀྐིཡེཝ, ཏཱསམཏྟམྤི པན ཀཱཏུཾ ནཱསཀྑཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཀཔིཡོནིཡཾ ནིབྦཏྟིཏྭཱ ཝུཌྜྷིམནྭཱཡ ཨསྶཔོཏཀཔྤམཱཎོ ཐཱམསམྤནྣོ ཨེཀཙརོ ཧུཏྭཱ ནདཱིཏཱིརེ ཝིཧརཏི. ཏསྶཱ པན ནདིཡཱ ཝེམཛ྄ཛྷེ ཨེཀོ དཱིཔཀོ ནཱནཔྤཀཱརེཧི ཨམྦཔནསཱདཱིཧི ཕལརུཀྑེཧི སམྤནྣོ. བོདྷིསཏྟོ ནཱགབལོ ཐཱམསམྤནྣོ ནདིཡཱ ཨོརིམཏཱིརཏོ ཨུཔྤཏིཏྭཱ དཱིཔཀསྶ ཨོརཏོ ནདཱིམཛ྄ཛྷེ ཨེཀོ པིཊྛིཔཱསཱཎོ ཨཏྠི, ཏསྨིཾ ནིཔཏཏི, ཏཏོ ཨུཔྤཏིཏྭཱ ཏསྨིཾ དཱིཔཀེ པཏཏི. ཏཏྠ ནཱནཔྤཀཱརཱནི ཕལཱནི ཁཱདིཏྭཱ སཱཡཾ ཏེནེཝ ཨུཔཱཡེན པཙྩཱགནྟྭཱ ཨཏྟནོ ཝསནཊྛཱནེ ཝསིཏྭཱ པུནདིཝསེཔི ཏཐེཝ ཀརོཏི. ཨིམིནཱ ནིཡཱམེན ཏཏྠ ཝཱསཾ ཀཔྤེཏི.

ཏསྨིཾ པན ཀཱལེ ཨེཀོ ཀུམྦྷཱིལོ སཔཛཱཔཏིཀོ ཏསྶཱ ནདིཡཱ ཝསཏི. ཏསྶ བྷརིཡཱ བོདྷིསཏྟཾ ཨཔརཱཔརཾ གཙྪནྟཾ དིསྭཱ བོདྷིསཏྟསྶ ཧདཡམཾསེ དོཧལ༹ཾ ¶ ཨུཔྤཱདེཏྭཱ ཀུམྦྷཱིལཾ ཨཱཧ ¶ – ‘‘མཡ྄ཧཾ ཁོ, ཨཡྻ, ཨིམསྶ ཝཱནརིནྡསྶ ཧདཡམཾསེ དོཧལོ༹ ཨུཔྤནྣོ’’ཏི. ཀུམྦྷཱིལོ ‘‘སཱདྷུ, བྷདྡེ, ལཙྪསཱི’’ཏི ཝཏྭཱ ‘‘ཨཛྫ ཏཾ སཱཡཾ དཱིཔཀཏོ ཨཱགཙྪནྟམེཝ གཎྷིསྶཱམཱི’’ཏི གནྟྭཱ པིཊྛིཔཱསཱཎེ ནིཔཛྫི.

བོདྷིསཏྟོ དིཝསཾ ཙརིཏྭཱ སཱཡནྷསམཡེ དཱིཔཀེ ཋིཏོཝ པཱསཱཎཾ ཨོལོཀེཏྭཱ – ‘‘ཨཡཾ པཱསཱཎོ ཨིདཱནི ཨུཙྩཏརོ ཁཱཡཏི, ཀིཾ ནུ ཁོ ཀཱརཎ’’ནྟི ཙིནྟེསི. ཏསྶ ཀིར ཨུདཀཔྤམཱཎཉྩ པཱསཱཎཔྤམཱཎཉྩ སུཝཝཏྠཱཔིཏམེཝ ཧོཏི. ཏེནསྶ ཨེཏདཧོསི ‘‘ཨཛྫ ཨིམིསྶཱ ནདིཡཱ ཨུདཀཾ ནེཝ ཧཱཡཏི, ན ཙ ཝཌྜྷཏི, ཨཐ ཙ པནཱཡཾ པཱསཱཎོ མཧཱ ཧུཏྭཱ པཉྙཱཡཏི, ཀཙྩི ནུ ཁོ ཨེཏྠ མཡ྄ཧཾ གཧཎཏྠཱཡ ཀུམྦྷཱིལོ ནིཔནྣོ’’ཏི. སོ ‘‘ཝཱིམཾསཱམི ཏཱཝ ན’’ནྟི ཏཏྠེཝ ¶ ཋཏྭཱ པཱསཱཎེན སདྡྷིཾ ཀཐེནྟོ ཝིཡ ‘‘བྷོ པཱསཱཎཱ’’ཏི ཝཏྭཱ པཊིཝཙནཾ ཨལབྷནྟོ ཡཱཝཏཏིཡཾ ‘‘བྷོ པཱསཱཎཱ’’ཏི ཨཱཧ. པཱསཱཎོ ཀིཾ པཊིཝཙནཾ དསྶཏི. པུནཔི ཝཱནརོ ‘‘ཀིཾ བྷོ པཱསཱཎ, ཨཛྫ མཡ྄ཧཾ པཊིཝཙནཾ ན དེསཱི’’ཏི ཨཱཧ. ཀུམྦྷཱིལོ ‘‘ཨདྡྷཱ ཨཉྙེསུ དིཝསེསུ ཨཡཾ པཱསཱཎོ ཝཱནརིནྡསྶ པཊིཝཙནཾ ཨདཱསི, དསྶཱམི དཱནིསྶ པཊིཝཙན’’ནྟི ཙིནྟེཏྭཱ ‘‘ཀིཾ, བྷོ ཝཱནརིནྡཱ’’ཏི ཨཱཧ. ‘‘ཀོསི ཏྭ’’ནྟི? ‘‘ཨཧཾ ཀུམྦྷཱིལོ’’ཏི. ‘‘ཀིམཏྠཾ ཨེཏྠ ནིཔནྣོསཱི’’ཏི? ‘‘ཏཝ ཧདཡམཾསཾ པཏྠཡམཱནོ’’ཏི. བོདྷིསཏྟོ ཙིནྟེསི ‘‘ཨཉྙོ མེ གམནམགྒོ ནཏྠི, ཨཛྫ མཡཱ ཨེས ཀུམྦྷཱིལོ ཝཉྩེཏབྦོ’’ཏི. ཨཐ ནཾ ཨེཝམཱཧ ‘‘སམྨ ཀུམྦྷཱིལ, ཨཧཾ ཨཏྟཱནཾ ཏུཡ྄ཧཾ པརིཙྩཛིསྶཱམི, ཏྭཾ མུཁཾ ཝིཝརིཏྭཱ མཾ ཏཝ སནྟིཀཾ ཨཱགཏཀཱལེ གཎྷཱཧཱི’’ཏི. ཀུམྦྷཱིལཱནཉྷི མུཁེ ཝིཝཊེ ཨཀྑཱིནི ནིམྨཱིལནྟི. སོ ཏཾ ཀཱརཎཾ ཨསལླཀྑེཏྭཱ མུཁཾ ཝིཝརི, ཨཐསྶ ཨཀྑཱིནི པིཐཱིཡིཾསུ. སོ མུཁཾ ཝིཝརིཏྭཱ ཨཀྑཱིནི ནིམྨཱིལེཏྭཱ ནིཔཛྫི. བོདྷིསཏྟོ ཏཐཱབྷཱཝཾ ཉཏྭཱ དཱིཔཀཱ ཨུཔྤཏིཏོ གནྟྭཱ ཀུམྦྷཱིལསྶ མཏྠཀེ ཨཀྐམིཏྭཱ ཏཏོ ཨུཔྤཏིཏོ ཝིཛྫུལཏཱ ཝིཡ ཝིཛྫོཏམཱནོ པརཏཱིརེ ཨཊྛཱསི.

ཀུམྦྷཱིལོ ཏཾ ཨཙྪརིཡཾ དིསྭཱ ‘‘ཨིམིནཱ ཝཱནརིནྡེན ཨཏིཨཙྪེརཀཾ ཀཏ’’ནྟི ཙིནྟེཏྭཱ ‘‘བྷོ ཝཱནརིནྡ, ཨིམསྨིཾ ལོཀེ ཙཏཱུཧི དྷམྨེཧི སམནྣཱགཏོ ¶ པུགྒལོ པཙྩཱམིཏྟེ ཨདྷིབྷཝཏི. ཏེ སབྦེཔི ཏུཡ྄ཧཾ ཨབྦྷནྟརེ ཨཏྠི མཉྙེ’’ཏི ཝཏྭཱ ཨིམཾ གཱཐམཱཧ –

༥༧.

‘‘ཡསྶེཏེ ཙཏུརོ དྷམྨཱ, ཝཱནརིནྡ ཡཐཱ ཏཝ;

སཙྩཾ དྷམྨོ དྷིཏི ཙཱགོ, དིཊྛཾ སོ ཨཏིཝཏྟཏཱི’’ཏི.

ཏཏྠ ¶ ཡསྶཱཏི ཡསྶ ཀསྶཙི པུགྒལསྶ. ཨེཏེཏི ཨིདཱནི ཝཏྟབྦེ པཙྩཀྑཏོ ནིདྡིསཏི. ཙཏུརོ དྷམྨཱཏི ཙཏྟཱརོ གུཎཱ. སཙྩནྟི ཝཙཱིསཙྩཾ, ‘‘མམ སནྟིཀཾ ཨཱགམིསྶཱམཱི’’ཏི ཝཏྭཱ མུསཱཝཱདཾ ཨཀཏྭཱ ཨཱགཏོཡེཝཱཏི ཨེཏཾ ཏེ ཝཙཱིསཙྩཾ. དྷམྨོཏི ཝིཙཱརཎཔཉྙཱ, ‘‘ཨེཝཾ ཀཏེ ཨིདཾ ནཱམ བྷཝིསྶཏཱི’’ཏི ཨེསཱ ཏེ ཝིཙཱརཎཔཉྙཱ ཨཏྠི. དྷིཏཱིཏི ཨབྦོཙྪིནྣཾ ཝཱིརིཡཾ ཝུཙྩཏི, ཨེཏམྤི ཏེ ཨཏྠི. ཙཱགོཏི ཨཏྟཔརིཙྩཱགོ, ཏྭཾ ཨཏྟཱནཾ པརིཙྩཛིཏྭཱ ¶ མམ སནྟིཀཾ ཨཱགཏོ. ཡཾ པནཱཧཾ གཎྷིཏུཾ ནཱསཀྑིཾ, མཡ྄ཧམེཝེས དོསོ. དིཊྛནྟི པཙྩཱམིཏྟཾ. སོ ཨཏིཝཏྟཏཱིཏི ཡསྶ པུགྒལསྶ ཡཐཱ ཏཝ, ཨེཝཾ ཨེཏེ ཙཏྟཱརོ དྷམྨཱ ཨཏྠི, སོ ཡཐཱ མཾ ཨཛྫ ཏྭཾ ཨཏིཀྐནྟོ, ཏཐེཝ ཨཏྟནོ པཙྩཱམིཏྟཾ ཨཏིཀྐམཏི ཨབྷིབྷཝཏཱིཏི. ཨེཝཾ ཀུམྦྷཱིལོ བོདྷིསཏྟཾ པསཾསིཏྭཱ ཨཏྟནོ ཝསཊྛཱནཾ གཏོ.

སཏྠཱཔི ‘‘ན, བྷིཀྑཝེ, དེཝདཏྟོ ཨིདཱནེཝ མཡ྄ཧཾ ཝདྷཱཡ པརིསཀྐཏི, པུབྦེཔི པརིསཀྐིཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཀུམྦྷཱིལོ དེཝདཏྟོ ཨཧོསི, བྷརིཡཱསྶ ཙིཉྩམཱཎཝིཀཱ, ཝཱནརིནྡོ པན ཨཧམེཝ ཨཧོསི’’ནྟི.

ཝཱནརིནྡཛཱཏཀཝཎྞནཱ སཏྟམཱ.

[༥༨] ༨. ཏཡོདྷམྨཛཱཏཀཝཎྞནཱ

ཡསྶ ཨེཏེ ཏཡོ དྷམྨཱཏི ཨིདཾ སཏྠཱ ཝེལུ༹ཝནེ ཝིཧརནྟོ དེཝདཏྟསྶ ཝདྷཱཡ པརིསཀྐནམེཝཱརབྦྷ ཀཐེསི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ དེཝདཏྟོ ཝཱནརཡོནིཡཾ ནིབྦཏྟིཏྭཱ ཧིམཝནྟཔྤདེསེ ཡཱུཐཾ པརིཧརནྟོ ཨཏྟཱནཾ པཊིཙྩ ཛཱཏཱནཾ ཝཱནརཔོཏཀཱནཾ ‘‘ཝུཌྜྷིཔྤཏྟཱ ཨིམེ ཡཱུཐཾ པརིཧརེཡྻུ’’ནྟི བྷཡེན དནྟེཧི ཌཾསིཏྭཱ ཏེསཾ ¶ བཱིཛཱནི ཨུཔྤཱཊེཏི. ཏདཱ བོདྷིསཏྟོཔི ཏཉྙེཝ པཊིཙྩ ཨེཀིསྶཱ ཝཱནརིཡཱ ཀུཙྪིསྨིཾ པཊིསནྡྷིཾ གཎྷི. ཨཐ སཱ ཝཱནརཱི གབྦྷསྶ པཏིཊྛིཏབྷཱཝཾ ཉཏྭཱ ཨཏྟནོ གབྦྷཾ ཨནུརཀྑམཱནཱ ཨཉྙཾ པབྦཏཔཱདཾ ཨགམཱསི. སཱ པརིཔཀྐགབྦྷཱ བོདྷིསཏྟཾ ཝིཛཱཡི. སོ ཝུཌྜྷིམནྭཱཡ ཝིཉྙུཏཾ པཏྟོ ཐཱམསམྤནྣོ ཨཧོསི. སོ ཨེཀདིཝསཾ མཱཏརཾ པུཙྪི ‘‘ཨམྨ, མཡ྄ཧཾ པིཏཱ ཀཧ’’ནྟི? ‘‘ཏཱཏ, ཨསུཀསྨིཾ ནཱམ པབྦཏཔཱདེ ཡཱུཐཾ པརིཧརནྟོ ཝསཏཱི’’ཏི. ‘‘ཨམྨ, ཏསྶ མཾ སནྟིཀཾ ནེཧཱི’’ཏི. ‘‘ཏཱཏ, ན སཀྐཱ ¶ ཏཡཱ པིཏུ སནྟིཀཾ གནྟུཾ. པིཏཱ ཧི ཏེ ཨཏྟཱནཾ པཊིཙྩ ཛཱཏཱནཾ ཝཱནརཔོཏཀཱནཾ ཡཱུཐཔརིཧརཎབྷཡེན དནྟེཧི ཌཾསིཏྭཱ བཱིཛཱནི ཨུཔྤཱཊེཏཱི’’ཏི. ‘‘ཨམྨ, ནེཧི མཾ ཏཏྠ, ཨཧཾ ཛཱནིསྶཱམཱི’’ཏི. སཱ པུཏྟཾ ཨཱདཱཡ ཏསྶ སནྟིཀཾ ཨགམཱསི.

སོ ¶ ཝཱནརོ ཨཏྟནོ པུཏྟཾ དིསྭཱཝ ‘‘ཨཡཾ ཝཌྜྷནྟོ མཡ྄ཧཾ ཡཱུཐཾ པརིཧརིཏུཾ ན དསྶཏི, ཨིདཱནེཝ མཱརེཏབྦོ’’ཏི ‘‘ཨེཏཾ ཨཱལིངྒནྟོ ཝིཡ གཱལ༹ྷཾ པཱིལེ༹ཏྭཱ ཛཱིཝིཏཀྑཡཾ པཱཔེསྶཱམཱི’’ཏི ཙིནྟེཏྭཱ ‘‘ཨེཧི, ཏཱཏ, ཨེཏྟཀཾ ཀཱལཾ ཀཧཾ གཏོསཱི’’ཏི བོདྷིསཏྟཾ ཨཱལིངྒནྟོ ཝིཡ ནིཔྤཱིལེ༹སི. བོདྷིསཏྟོ པན ནཱགབལོ ཐཱམསམྤནྣོ, སོཔི ནཾ ནིཔྤཱིལེ༹སི, ཨཐསྶ ཨཊྛཱིནི བྷིཛྫནཱཀཱརཔྤཏྟཱནི ཨཧེསུཾ. ཨཐསྶ ཨེཏདཧོསི ‘‘ཨཡཾ ཝཌྜྷནྟོ མཾ མཱརེསྶཏི, ཀེན ནུ ཁོ ཨུཔཱཡེན པུརེཏརཉྙེཝ མཱརེཡྻ’’ནྟི. ཏཏོ ཙིནྟེསི ‘‘ཨཡཾ ཨཝིདཱུརེ རཀྑསཔརིགྒཧིཏོ སརོ ཨཏྠི, ཏཏྠ ནཾ རཀྑསེན ཁཱདཱཔེསྶཱམཱི’’ཏི. ཨཐ ནཾ ཨེཝམཱཧ ‘‘ཏཱཏ, ཨཧཾ མཧལླཀོ, ཨིམཾ ཡཱུཐཾ ཏུཡ྄ཧཾ ནིཡྻཱདེམི, ཨཛྫེཝ ཏཾ རཱཛཱནཾ ཀརོམི, ཨསུཀསྨིཾ ནཱམ ཋཱནེ སརོ ཨཏྠི, ཏཏྠ དྭེ ཀུམུདིནིཡོ, ཏིསྶོ ཨུཔྤལིནིཡོ, པཉྩ པདུམིནིཡོ ཙ པུཔྥནྟི, གཙྪ, ཏཏོ པུཔྥཱནི ཨཱཧརཱ’’ཏི. སོ ‘‘སཱདྷུ, ཏཱཏ, ཨཱཧརིསྶཱམཱི’’ཏི གནྟྭཱ སཧསཱ ཨནོཏརིཏྭཱ སམནྟཱ པདཾ པརིཙྪིནྡནྟོ ཨོཏིཎྞཔདཉྙེཝ ཨདྡས, ན ཨུཏྟིཎྞཔདཾ. སོ ‘‘ཨིམིནཱ སརེན རཀྑསཔརིགྒཧིཏེན བྷཝིཏབྦཾ, མཡ྄ཧཾ པིཏཱ ཨཏྟནཱ མཱརེཏུཾ ཨསཀྐོནྟོ རཀྑསེན མཾ ཁཱདཱཔེཏུཀཱམོ བྷཝིསྶཏི ¶ , ཨཧཾ ཨིམཉྩ སརཾ ན ཨོཏརིསྶཱམི, པུཔྥཱནི ཙ གཧེསྶཱམཱི’’ཏི ནིརུདཀཊྛཱནཾ གནྟྭཱ ཝེགཾ གཧེཏྭཱ ཨུཔྤཏིཏྭཱ པརཏོ གཙྪནྟོ ནིརུདཀེ ཨོཀཱསེ ཋིཏཱནེཝ དྭེ པུཔྥཱནི གཧེཏྭཱ པརཏཱིརེ པཏི. པརཏཱིརཏོཔི ཨོརིམཏཱིརཾ ཨཱགཙྪནྟོ ཏེནེཝུཔཱཡེན དྭེ གཎྷི. ཨེཝཾ ཨུབྷོསུ པསྶེསུ རཱསིཾ ཀརོནྟོ པུཔྥཱནི ཙ གཎྷི, རཀྑསསྶ ཙ ཨཱཎཊྛཱནཾ ན ཨོཏརི.

ཨཐསྶ ‘‘ཨིཏོ ཨུཏྟརི ཨུཀྑིཔིཏུཾ ན སཀྑིསྶཱམཱི’’ཏི ཏཱནི པུཔྥཱནི གཧེཏྭཱ ཨེཀསྨིཾ ཋཱནེ རཱསིཾ ཀརོནྟསྶ སོ རཀྑསོ ‘‘མཡཱ ཨེཏྟཀཾ ཀཱལཾ ཨེཝརཱུཔོ པཉྙཝཱ ཨཙྪརིཡཔུརིསོ ན དིཊྛཔུབྦོ, པུཔྥཱནི ཙ ནཱམ ཡཱཝདིཙྪཀཾ གཧིཏཱནི, མཡ྄ཧཉྩ ཨཱཎཊྛཱནཾ ན ཨོཏརཱི’’ཏི ཨུདཀཾ དྭིདྷཱ བྷིནྡནྟོ ཨུདཀཏོ ཨུཊྛཱཡ བོདྷིསཏྟཾ ཨུཔསངྐམིཏྭཱ ‘‘ཝཱནརིནྡ, ཨིམསྨིཾ ལོཀེ ཡསྶ ཏཡོ དྷམྨཱ ཨཏྠི, སོ པཙྩཱམིཏྟཾ ཨབྷིབྷཝཏི, ཏེ སབྦེཔི ཏཝ ཨབྦྷནྟརེ ཨཏྠི མཉྙེ’’ཏི ཝཏྭཱ བོདྷིསཏྟསྶ ཐུཏིཾ ཀརོནྟོ ཨིམཾ གཱཐམཱཧ –

༥༨.

‘‘ཡསྶ ¶ ¶ ཨེཏེ ཏཡོ དྷམྨཱ, ཝཱནརིནྡ ཡཐཱ ཏཝ;

དཀྑིཡཾ སཱུརིཡཾ པཉྙཱ, དིཊྛཾ སོ ཨཏིཝཏྟཏཱི’’ཏི.

ཏཏྠ དཀྑིཡནྟི དཀྑབྷཱཝོ, སམྤཏྟབྷཡཾ ཝིདྷམིཏུཾ ཛཱནནཔཉྙཱཡ སམྤཡུཏྟཨུཏྟམཝཱིརིཡསྶེཏཾ ནཱམཾ. སཱུརིཡནྟི སཱུརབྷཱཝོ, ནིབྦྷཡབྷཱཝསྶེཏཾ ནཱམཾ. པཉྙཱཏི པཉྙཱཔདཊྛཱནཱཡ ཨུཔཱཡཔཉྙཱཡེཏཾ ནཱམཾ.

ཨེཝཾ སོ དཀརཀྑསོ ཨིམཱཡ གཱཐཱཡ བོདྷིསཏྟསྶ ཐུཏིཾ ཀཏྭཱ ‘‘ཨིམཱནི པུཔྥཱནི ཀིམཏྠཾ ཧརསཱི’’ཏི པུཙྪི. ‘‘པིཏཱ མཾ རཱཛཱནཾ ཀཱཏུཀཱམོ, ཏེན ཀཱརཎེན ཧརཱམཱི’’ཏི. ‘‘ན སཀྐཱ ཏཱདིསེན ཨུཏྟམཔུརིསེན པུཔྥཱནི ཝཧིཏུཾ ཨཧཾ ཝཧིསྶཱམཱི’’ཏི ཨུཀྑིཔིཏྭཱ ཏསྶ པཙྪཏོ པཙྪཏོ ཨགམཱསི. ཨཐསྶ པིཏཱ དཱུརཏོཝ ཏཾ དིསྭཱ ‘‘ཨཧཾ ཨིམཾ ‘རཀྑསབྷཏྟཾ བྷཝིསྶཏཱི’ཏི པཧིཎིཾ, སོ དཱནེས རཀྑསཾ པུཔྥཱནི གཱཧཱཔེནྟོ ཨཱགཙྪཏི, ཨིདཱནིམྷི ནཊྛོ’’ཏི ཙིནྟེནྟོ སཏྟདྷཱ ཧདཡཕཱལནཾ ¶ པཏྭཱ ཏཏྠེཝ ཛཱིཝིཏཀྑཡཾ པཏྟོ. སེསཝཱནརཱ སནྣིཔཏིཏྭཱ བོདྷིསཏྟཾ རཱཛཱནཾ ཨཀཾསུ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཡཱུཐཔཏི དེཝདཏྟོ ཨཧོསི, ཡཱུཐཔཏིཔུཏྟོ པན ཨཧམེཝ ཨཧོསི’’ནྟི.

ཏཡོདྷམྨཛཱཏཀཝཎྞནཱ ཨཊྛམཱ.

[༥༩] ༩. བྷེརིཝཱདཀཛཱཏཀཝཎྞནཱ

དྷམེ དྷམེཏི ཨིདཾ སཏྠཱ ཛེཏཝནེ ཝིཧརནྟོ ཨཉྙཏརཾ དུབྦཙབྷིཀྑུཾ ཨཱརབྦྷ ཀཐེསི. ཏཉྷི བྷིཀྑུཾ སཏྠཱ ‘‘སཙྩཾ ཀིར ཏྭཾ བྷིཀྑུ དུབྦཙོསཱི’’ཏི པུཙྪིཏྭཱ ‘‘སཙྩཾ, བྷགཝཱ’’ཏི ཝུཏྟེ ‘‘ན ཏྭཾ བྷིཀྑུ ཨིདཱནེཝ དུབྦཙོ, པུབྦེཔི དུབྦཙོཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ བྷེརིཝཱདཀཀུལེ ནིབྦཏྟིཏྭཱ གཱམཀེ ཝསཏི. སོ ‘‘བཱརཱཎསིཡཾ ནཀྑཏྟཾ ¶ གྷུཊྛ’’ནྟི སུཏྭཱ ‘‘སམཛྫམཎྜལེ བྷེརིཾ ཝཱདེཏྭཱ དྷནཾ ཨཱཧརིསྶཱམཱི’’ཏི པུཏྟཾ ཨཱདཱཡ ཏཏྠ གནྟྭཱ བྷེརིཾ ཝཱདེཏྭཱ བཧུདྷནཾ ལབྷི. སོ ཏཾ ཨཱདཱཡ ཨཏྟནོ གཱམཾ གཙྪནྟོ ཙོརཱཊཝིཾ པཏྭཱ པུཏྟཾ ནིརནྟརཾ བྷེརིཾ ཝཱདེནྟཾ ཝཱརེསི ‘‘ཏཱཏ, ནིརནྟརཾ ¶ ཨཝཱདེཏྭཱ མགྒཔཊིཔནྣསྶ ཨིསྶརསྶ བྷེརིཾ ཝིཡ ཨནྟརནྟརཱ ཝཱདེཧཱི’’ཏི སོ པིཏརཱ ཝཱརིཡམཱནོཔི ‘‘བྷེརིསདྡེནེཝ ཙོརེ པལཱཔེསྶཱམཱི’’ཏི ཝཏྭཱ ནིརནྟརམེཝ ཝཱདེསི. ཙོརཱ པཋམཉྙེཝ བྷེརིསདྡཾ སུཏྭཱ ‘‘ཨིསྶརབྷེརཱི བྷཝིསྶཏཱི’’ཏི པལཱཡིཏྭཱ ཨཏི ཝིཡ ཨེཀཱབདྡྷཾ སདྡཾ སུཏྭཱ ‘‘ནཱཡཾ ཨིསྶརབྷེརཱི བྷཝིསྶཏཱི’’ཏི ཨཱགནྟྭཱ ཨུཔདྷཱརེནྟཱ དྭེཡེཝ ཛནེ དིསྭཱ པོཐེཏྭཱ ཝིལུམྤིཾསུ. བོདྷིསཏྟོ ‘‘ཀིཙྪེན ཝཏ ནོ ལདྡྷཾ དྷནཾ ཨེཀཱབདྡྷཾ ཀཏྭཱ ཝཱདེནྟོ ནཱསེསཱི’’ཏི ཝཏྭཱ ཨིམཾ གཱཐམཱཧ –

༥༩.

‘‘དྷམེ དྷམེ ནཱཏིདྷམེ, ཨཏིདྷནྟཉྷི པཱཔཀཾ;

དྷནྟེན ཧི སཏཾ ལདྡྷཾ, ཨཏིདྷནྟེན ནཱསིཏ’’ནྟི.

ཏཏྠ ¶ དྷམེ དྷམེཏི དྷམེཡྻ ནོ ན དྷམེཡྻ, བྷེརིཾ ཝཱདེཡྻ ནོ ན ཝཱདེཡྻཱཏི ཨཏྠོ. ནཱཏིདྷམེཏི ཨཏིཀྐམིཏྭཱ པན ནིརནྟརམེཝ ཀཏྭཱ ན ཝཱདེཡྻ. ཀིཾཀཱརཎཱ? ཨཏིདྷནྟཉྷི པཱཔཀཾ, ནིརནྟརཾ བྷེརིཝཱདནཾ ཨིདཱནི ཨམྷཱཀཾ པཱཔཀཾ ལཱམཀཾ ཛཱཏཾ. དྷནྟེན ཧི སཏཾ ལདྡྷནྟི ནགརེ དྷམནྟེན བྷེརིཝཱདནེན ཀཧཱཔཎསཏཾ ལདྡྷཾ. ཨཏིདྷནྟེན ནཱསིཏནྟི ཨིདཱནི པན མེ པུཏྟེན ཝཙནཾ ཨཀཏྭཱ ཡདིདཾ ཨཊཝིཡཾ ཨཏིདྷནྟཾ, ཏེན ཨཏིདྷནྟེན སབྦཾ ནཱསིཏནྟི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ པུཏྟོ དུབྦཙབྷིཀྑུ ཨཧོསི, པིཏཱ པན ཨཧམེཝ ཨཧོསི’’ནྟི.

བྷེརིཝཱདཀཛཱཏཀཝཎྞནཱ ནཝམཱ.

[༦༠] ༡༠. སངྑདྷམཛཱཏཀཝཎྞནཱ

དྷམེ ¶ དྷམེཏི ཨིདཾ སཏྠཱ ཛེཏཝནེ ཝིཧརནྟོ དུབྦཙམེཝཱརབྦྷ ཀཐེསི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ སངྑདྷམཀཀུལེ ནིབྦཏྟིཏྭཱ བཱརཱཎསིཡཾ ནཀྑཏྟེ གྷུཊྛེ པིཏརཾ ཨཱདཱཡ སངྑདྷམནཀམྨེན དྷནཾ ལབྷིཏྭཱ ཨཱགམནཀཱལེ ཙོརཱཊཝིཡཾ པིཏརཾ ནིརནྟརཾ སངྑཾ དྷམནྟཾ ཝཱརེསི. སོ ‘‘སངྑསདྡེན ཙོརེ པལཱཔེསྶཱམཱི’’ཏི ནིརནྟརམེཝ དྷམི, ཙོརཱ པུརིམནཡེནེཝ ཨཱགནྟྭཱ ཝིལུམྤིཾསུ. བོདྷིསཏྟོ པུརིམནཡེནེཝ གཱཐཾ ཨབྷཱསི –

༦༠.

‘‘དྷམེ ¶ དྷམེ ནཱཏིདྷམེ, ཨཏིདྷནྟཉྷི པཱཔཀཾ;

དྷནྟེནཱདྷིགཏཱ བྷོགཱ, ཏེ ཏཱཏོ ཝིདྷམཱི དྷམ’’ནྟི.

ཏཏྠ ཏེ ཏཱཏོ ཝིདྷམཱི དྷམནྟི ཏེ སངྑཾ དྷམིཏྭཱ ལདྡྷབྷོགེ མམ པིཏཱ པུནཔྤུནཾ དྷམནྟོ ཝིདྷམི ཝིདྡྷཾསེསི ཝིནཱསེསཱིཏི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ པིཏཱ དུབྦཙབྷིཀྑུ ཨཧོསི, པུཏྟོ པནསྶ ཨཧམེཝ ཨཧོསི’’ནྟི.

སངྑདྷམཛཱཏཀཝཎྞནཱ དསམཱ.

ཨཱསཱིསཝགྒོ ཚཊྛོ.

ཏསྶུདྡཱནཾ –

མཧཱསཱིལཝཛནཀཾ, པུཎྞཔཱཏི ཙ ཀིཾཕལཾ;

པཉྩཱཝུདྷཀཉྩནཀྑནྡྷཾ, ཝཱནརིནྡཾ ཏཡོདྷམྨཾ;

བྷེརིཝཱདསངྑདྷམནྟི.

༧. ཨིཏྠིཝགྒོ

[༦༡] ༡. ཨསཱཏམནྟཛཱཏཀཝཎྞནཱ

ཨསཱ ¶ ¶ ¶ ལོཀིཏྠིཡོ ནཱམཱཏི ཨིདཾ སཏྠཱ ཛེཏཝནེ ཝིཧརནྟོ ཨུཀྐཎྛིཏཾ བྷིཀྑུཾ ཨཱརབྦྷ ཀཐེསི. ཏསྶ ཝཏྠུ ཨུམྨཱདནྟིཛཱཏཀེ ཨཱཝི བྷཝིསྶཏི. ཏཾ པན བྷིཀྑུཾ སཏྠཱ ‘‘བྷིཀྑུ ཨིཏྠིཡོ ནཱམ ཨསཱཏཱ ཨསཏིཡོ ལཱམིཀཱ པཙྪིམིཀཱ, ཏྭཾ ཨེཝརཱུཔཾ ལཱམིཀཾ ཨིཏྠིཾ ནིསྶཱཡ ཀསྨཱ ཨུཀྐཎྛིཏོསཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ གནྡྷཱརརཊྛེ ཏཀྐསིལཱཡཾ བྲཱཧྨཎཀུལེ ནིབྦཏྟིཏྭཱ ཝིཉྙུཏཾ པཏྟོ ཏཱིསུ ཝེདེསུ སབྦསིཔྤེསུ ཙ ནིཔྥཏྟིཾ པཏྟོ དིསཱཔཱམོཀྑོ ཨཱཙརིཡོ ཨཧོསི. ཏདཱ བཱརཱཎསིཡཾ ཨེཀསྨིཾ བྲཱཧྨཎཀུལེ པུཏྟསྶ ཛཱཏདིཝསེ ཨགྒིཾ གཧེཏྭཱ ཨནིབྦཱཡནྟཾ ཋཔཡིཾསུ. ཨཐ ནཾ བྲཱཧྨཎཀུམཱརཾ སོལ༹སཝསྶཀཱལེ མཱཏཱཔིཏརོ ཨཱཧཾསུ ‘‘པུཏྟ, མཡཾ ཏཝ ཛཱཏདིཝསེ ཨགྒིཾ གཧེཏྭཱ ཋཔཡིམྷ. སཙེ བྲཧྨལོཀཔརཱཡཎོ བྷཝིཏུཀཱམོ, ཏྭཾ ཨགྒིཾ ཨཱདཱཡ ཨརཉྙཾ པཝིསིཏྭཱ ཨགྒིཾ བྷགཝནྟཾ ནམསྶམཱནོ བྲཧྨལོཀཔརཱཡཎོ ཧོཧི. སཙེ ཨགཱརཾ ཨཛ྄ཛྷཱཝསིཏུཀཱམོ, ཏཀྐསིལཾ གནྟྭཱ དིསཱཔཱམོཀྑསྶ ཨཱཙརིཡསྶ སནྟིཀེ སིཔྤཾ ཨུགྒཎྷིཏྭཱ ཀུཊུམྦཾ སཎྛཔེཧཱི’’ཏི. མཱཎཝོ ‘‘ནཱཧཾ སཀྑིསྶཱམི ཨརཉྙེ ཨགྒིཾ པརིཙརིཏུཾ, ཀུཊུམྦམེཝ སཎྛཔེསྶཱམཱི’’ཏི མཱཏཱཔིཏརོ ཝནྡིཏྭཱ ཨཱཙརིཡབྷཱགཾ སཧསྶཾ གཧེཏྭཱ ཏཀྐསིལཾ གནྟྭཱ སིཔྤཾ ཨུགྒཎྷིཏྭཱ པཙྩཱགམཱསི.

མཱཏཱཔིཏརོ པནསྶ ཨནཏྠིཀཱ གྷརཱཝཱསེན, ཨརཉྙེ ཨགྒིཾ པརིཙརཱཔེཏུཀཱམཱ ཧོནྟི. ཨཐ ནཾ མཱཏཱ ཨིཏྠཱིནཾ དོསཾ དསྶེཏྭཱ ཨརཉྙཾ པེསེཏུཀཱམཱ ‘‘སོ ཨཱཙརིཡོ པཎྜིཏོ བྱཏྟོ སཀྑིསྶཏི མེ པུཏྟསྶ ཨིཏྠཱིནཾ དོསཾ ཀཐེཏུ’’ནྟི ཙིནྟེཏྭཱ ཨཱཧ – ‘‘ཨུགྒཧིཏཾ ཏེ, ཏཱཏ, སིཔྤ’’ནྟི. ‘‘ཨཱམ, ཨམྨཱ’’ཏི. ‘‘ཨསཱཏམནྟོཔི ¶ ཏེ ཨུགྒཧིཏོ’’ཏི. ‘‘ན ཨུགྒཧིཏོ, ཨམྨཱ’’ཏི. ‘‘ཏཱཏ, ཡདི ཏེ ཨསཱཏམནྟོ ན ཨུགྒཧིཏོ, ཀིཾ ནཱམ ཏེ སིཔྤཾ ཨུགྒཧིཏཾ, གཙྪ, ཨུགྒཎྷིཏྭཱ ཨེཧཱི’’ཏི. སོ ‘‘སཱདྷཱུ’’ཏི པུན ཏཀྐསིལཱབྷིམུཁོ པཱཡཱསི. ཏསྶཔི ཨཱཙརིཡསྶ མཱཏཱ མཧལླིཀཱ ཝཱིསཏིཝསྶསཏིཀཱ ¶ . སོ ཏཾ སཧཏྠཱ ནྷཱཔེནྟོ བྷོཛེནྟོ པཱཡེནྟོ ¶ པཊིཛགྒཏི. ཨཉྙེ མནུསྶཱ ནཾ ཏཐཱ ཀརོནྟཾ ཛིགུཙྪནྟི. སོ ཙིནྟེསི ‘‘ཡཾནཱུནཱཧཾ ཨརཉྙཾ པཝིསིཏྭཱ ཏཏྠ མཱཏརཾ པཊིཛགྒནྟོ ཝིཧརེཡྻ’’ནྟི. ཨཐེཀསྨིཾ ཝིཝིཏྟེ ཨརཉྙེ ཨུདཀཕཱསུཀཊྛཱནེ པཎྞསཱལཾ ཀཱརེཏྭཱ སཔྤིཏཎྜུལཱདཱིནི ཨཱཧརཱཔེཏྭཱ མཱཏརཾ ཨུཀྑིཔིཏྭཱ ཏཏྠ གནྟྭཱ མཱཏརཾ པཊིཛགྒནྟོ ཝཱསཾ ཀཔྤེསི.

སོཔི ཁོ མཱཎཝོ ཏཀྐསིལཾ གནྟྭཱ ཨཱཙརིཡཾ ཨཔསྶནྟོ ‘‘ཀཧཾ ཨཱཙརིཡོ’’ཏི པུཙྪིཏྭཱ ཏཾ པཝཏྟིཾ སུཏྭཱ ཏཏྠ གནྟྭཱ ཝནྡིཏྭཱ ཨཊྛཱསི. ཨཐ ནཾ ཨཱཙརིཡོ ‘‘ཀིཾ ནུ ཁོ, ཏཱཏ, ཨཏིསཱིགྷཾ ཨཱགཏོསཱི’’ཏི? ‘‘ནནུ ཨཧཾ ཏུམྷེཧི ཨསཱཏམནྟོ ནཱམ ན ཨུགྒཎྷཱཔིཏོ’’ཏི? ‘‘ཀོ པན ཏེ ཨསཱཏམནྟེ ཨུགྒཎྷིཏབྦེ ཀཏྭཱ ཀཐེསཱི’’ཏི? ‘‘མཡ྄ཧཾ མཱཏཱ ཨཱཙརིཡཱ’’ཏི. བོདྷིསཏྟོ ཙིནྟེསི ‘‘ཨསཱཏམནྟོ ནཱམ ཀོཙི ནཏྠི, ཨིམསྶ པན མཱཏཱ ཨིམཾ ཨིཏྠིདོསེ ཛཱནཱཔེཏུཀཱམཱ བྷཝིསྶཏཱི’’ཏི. ཨཐ ནཾ ‘‘སཱདྷུ, ཏཱཏ, དསྶཱམི ཏེ ཨསཱཏམནྟེ, ཏྭཾ ཨཛྫ ཨཱདིཾ ཀཏྭཱ མམ ཋཱནེ ཋཏྭཱ མམ མཱཏརཾ སཧཏྠཱ ནྷཱཔེནྟོ བྷོཛེནྟོ པཱཡེནྟོ པཊིཛགྒཱཧི, ཧཏྠཔཱདསཱིསཔིཊྛིསམྦཱཧནཱདཱིནི ཙསྶཱ ཀརོནྟོ ‘ཨཡྻེ ཛརཾ པཏྟཀཱལེཔི ཏཱཝ ཏེ ཨེཝརཱུཔཾ སརཱིརཾ, དཧརཀཱལེ ཀཱིདིསཾ ཨཧོསཱི’ཏི ཧཏྠཔཱདཔརིཀམྨཱདིཀརཎཀཱལེ ཧཏྠཔཱདཱདཱིནཾ ཝཎྞཾ ཀཐེཡྻཱསི. ཡཉྩ ཏེ མམ མཱཏཱ ཀཐེཏི, ཏཾ ཨལཛྫནྟོ ཨནིགུཧནྟོ མཡ྄ཧཾ ཨཱརོཙེཡྻཱསི, ཨེཝཾ ཀརོནྟོ ཨསཱཏམནྟེ ལཙྪསི, ཨཀརོནྟོ ན ལཙྪསཱི’’ཏི ཨཱཧ. སོ ‘‘སཱདྷུ ཨཱཙརིཡཱ’’ཏི ཏསྶ ཝཙནཾ སམྤཊིཙྪིཏྭཱ ཏཏོ པཊྛཱཡ སབྦཾ ཡཐཱཝུཏྟཝིདྷཱནཾ ཨཀཱསི.

ཨཐསྶཱ ཏསྨིཾ མཱཎཝེ པུནཔྤུནཾ ཝཎྞཡམཱནེ ‘‘ཨཡཾ མཡཱ སདྡྷིཾ ཨབྷིརམིཏུཀཱམོ བྷཝིསྶཏཱི’’ཏི ཨནྡྷཱཡ ཛརཱཛིཎྞཱཡ ཨབྦྷནྟརེ ཀིལེསོ ཨུཔྤཛྫི ¶ . སཱ ཨེཀདིཝསཾ ཨཏྟནོ སརཱིརཝཎྞཾ ཀཐཡམཱནཾ མཱཎཝཾ ཨཱཧ ‘‘མཡཱ སདྡྷིཾ ཨབྷིརམིཏུཾ ཨིཙྪསཱི’’ཏི? ‘‘ཨཡྻེ, ཨཧཾ ཏཱཝ ཨིཙྪེཡྻཾ, ཨཱཙརིཡོ པན གརུཀོ’’ཏི. ‘‘སཙེ མཾ ཨིཙྪསི, པུཏྟཾ མེ མཱརེཧཱི’’ཏི. ‘‘ཨཧཾ ཨཱཙརིཡསྶ སནྟིཀེ ཨེཏྟཀཾ སིཔྤཾ ཨུགྒཎྷིཏྭཱ ཀིལེསམཏྟཾ ནིསྶཱཡ ཀིནྟི ཀཏྭཱ ཨཱཙརིཡཾ མཱརེསྶཱམཱི’’ཏི. ‘‘ཏེན ཧི སཙེ ཏྭཾ མཾ ན པརིཙྩཛསི, ཨཧམེཝ ནཾ མཱརེསྶཱམཱི’’ཏི. ཨེཝཾ ཨིཏྠིཡོ ནཱམ ཨསཱཏཱ ¶ ལཱམིཀཱ པཙྪིམིཀཱ, ཏཐཱརཱུཔེ ནཱམ ཝཡེ ཋིཏཱ རཱགཙིཏྟཾ ཨུཔྤཱདེཏྭཱ ཀིལེསཾ ཨནུཝཏྟམཱནཱ ཨེཝཾ ཨུཔཀཱརཀཾ པུཏྟཾ མཱརེཏུཀཱམཱ ཛཱཏཱ. མཱཎཝོ སབྦཾ ཏཾ ཀཐཾ བོདྷིསཏྟསྶ ཨཱརོཙེསི.

བོདྷིསཏྟོ ¶ ‘‘སུཊྛུ ཏེ, མཱཎཝ, ཀཏཾ མཡ྄ཧཾ ཨཱརོཙེནྟེནཱ’’ཏི ཝཏྭཱ མཱཏུ ཨཱཡུསངྑཱརཾ ཨོལོཀེནྟོ ‘‘ཨཛྫེཝ མརིསྶཏཱི’’ཏི ཉཏྭཱ ‘‘ཨེཧི, མཱཎཝ, ཝཱིམཾསིསྶཱམ ན’’ནྟི ཨེཀཾ ཨུདུམྦརརུཀྑཾ ཚིནྡིཏྭཱ ཨཏྟནོ པམཱཎེན ཀཊྛརཱུཔཀཾ ཀཏྭཱ སསཱིསཾ པཱརུཔིཏྭཱ ཨཏྟནོ སཡནཊྛཱནེ ཨུཏྟཱནཾ ནིཔཛྫཱཔེཏྭཱ རཛྫུཀཾ བནྡྷིཏྭཱ ཨནྟེཝཱསིཀཾ ཨཱཧ – ‘‘ཏཱཏ, ཕརསུཾ ཨཱདཱཡ གནྟྭཱ མམ མཱཏུ སཉྙཾ དེཧཱི’’ཏི. མཱཎཝོ གནྟྭཱ ‘‘ཨཡྻེ, ཨཱཙརིཡོ པཎྞསཱལཱཡཾ ཨཏྟནོ སཡནཊྛཱནེ ནིཔནྣོ, རཛྫུསཉྙཱ མེ བདྡྷཱ, ཨིམཾ ཕརསུཾ ཨཱདཱཡ གནྟྭཱ སཙེ སཀྐོསི, མཱརེཧི ན’’ནྟི ཨཱཧ. ‘‘ཏྭཾ པན མཾ ན པརིཙྩཛིསྶསཱི’’ཏི? ‘‘ཀིཾཀཱརཎཱ པརིཙྩཛིསྶཱམཱི’’ཏི? སཱ ཕརསུཾ ཨཱདཱཡ པཝེདྷམཱནཱ ཨུཊྛཱཡ རཛྫུསཉྙཱཡ གནྟྭཱ ཧཏྠེན པརཱམསིཏྭཱ ‘‘ཨཡཾ མེ པུཏྟོ’’ཏི སཉྙཱཡ ཀཊྛརཱུཔཀསྶ མུཁཏོ སཱཊཀཾ ཨཔནེཏྭཱ ཕརསུཾ ཨཱདཱཡ ‘‘ཨེཀཔྤཧཱརེནེཝ མཱརེསྶཱམཱི’’ཏི གཱིཝཱཡམེཝ པཧརིཏྭཱ ‘‘དྷ’’ནྟི སདྡེ ཨུཔྤནྣེ རུཀྑབྷཱཝཾ ཨཉྙཱསི. ཨཐ བོདྷིསཏྟེན ‘‘ཀིཾ ཀརོསི, ཨམྨཱ’’ཏི ཝུཏྟེ སཱ ‘‘ཝཉྩིཏཱམྷཱི’’ཏི ཏཏྠེཝ མརིཏྭཱ པཏིཏཱ. ཨཏྟནོ ཀིར པཎྞསཱལཱཡ ནིཔནྣཱཡཔི ཏངྑཎཉྙེཝ ཏཱཡ མརིཏབྦམེཝ.

སོ ཏསྶཱ མཏབྷཱཝཾ ཉཏྭཱ སརཱིརཀིཙྩཾ ཀཏྭཱ ཨཱལཱ༹ཧནཾ ནིབྦཱཔེཏྭཱ ཝནཔུཔྥེཧི པཱུཛེཏྭཱ མཱཎཝཾ ཨཱདཱཡ པཎྞསཱལདྭཱརེ ནིསཱིདིཏྭཱ ‘‘ཏཱཏ, པཱཊིཡེཀྐོ ཨསཱཏམནྟོ ¶ ནཱམ ནཏྠི, ཨིཏྠིཡོ ཨསཱཏཱ ནཱམ, ཏཝ མཱཏཱ ‘ཨསཱཏམནྟཾ ཨུགྒཎྷཱ’ཏི མམ སནྟིཀཾ པེསཡམཱནཱ ཨིཏྠཱིནཾ དོསཾ ཛཱནནཏྠཾ པེསེསི. ཨིདཱནི པན ཏེ པཙྩཀྑམེཝ མམ མཱཏུ དོསོ དིཊྛོ, ཨིམིནཱ ཀཱརཎེན ‘ཨིཏྠིཡོ ནཱམ ཨསཱཏཱ ལཱམིཀཱ པཙྪིམིཀཱ’ཏི ཛཱནེཡྻཱསཱི’’ཏི ཏཾ ཨོཝདིཏྭཱ ཨུཡྻོཛེསི. སོཔི ཨཱཙརིཡཾ ཝནྡིཏྭཱ མཱཏཱཔིཏཱུནཾ སནྟིཀཾ ཨགམཱསི. ཨཐ ནཾ མཱཏཱ པུཙྪི ‘‘ཏཱཏ, ཨུགྒཧིཏོ ཏེ ཨསཱཏམནྟོ’’ཏི? ‘‘ཨཱམ, ཨམྨཱ’’ཏི. ‘‘ཨིདཱནི ཀིཾ ཀརིསྶསི, པབྦཛིཏྭཱ ཨགྒིཾ ཝཱ པརིཙརིསྶསི, ཨགཱརམཛ྄ཛྷེ ཝཱ ཝསིསྶསཱི’’ཏི? མཱཎཝོ ‘‘མཡཱ, ཨམྨ, པཙྩཀྑཏོ ཨིཏྠཱིནཾ དོསཱ དིཊྛཱ ¶ , ཨགཱརེན མེ ཀིཙྩཾ ནཏྠི, པབྦཛིསྶཱམཧ’’ནྟི ཨཏྟནོ ཨདྷིཔྤཱཡཾ པཀཱསེནྟོ ཨིམཾ གཱཐམཱཧ –

༦༡.

‘‘ཨསཱ ལོཀིཏྠིཡོ ནཱམ, ཝེལཱ ཏཱསཾ ན ཝིཛྫཏི;

སཱརཏྟཱ ཙ པགབྦྷཱ ཙ, སིཁཱི སབྦགྷསོ ཡཐཱ;

ཏཱ ཧིཏྭཱ པབྦཛིསྶཱམི, ཝིཝེཀམནུབྲཱུཧཡ’’ནྟི.

ཏཏྠ ¶ ཨསཱཏི ཨསཏིཡོ ལཱམིཀཱ. ཨཐ ཝཱ སཱཏཾ ཝུཙྩཏི སུཁཾ, ཏཾ ཏཱསུ ནཏྠི. ཨཏྟནི པཊིབདྡྷཙིཏྟཱནཾ ཨསཱཏམེཝ དེནྟཱིཏིཔི ཨསཱ, དུཀྑཱ དུཀྑཝཏྠུབྷཱུཏཱཏི ཨཏྠོ. ཨིམསྶ པནཏྠསྶ སཱདྷནཏྠཱཡ ཨིདཾ སུཏྟཾ ཨཱཧརིཏབྦཾ –

‘‘མཱཡཱ ཙེཏཱ མརཱིཙཱི ཙ, སོཀོ རོགོ ཙུཔདྡཝོ;

ཁརཱ ཙ བནྡྷནཱ ཙེཏཱ, མཙྩུཔཱསཱ གུཧཱསཡཱ;

ཏཱསུ ཡོ ཝིསྶསེ པོསོ, སོ ནརེསུ ནརཱདྷམོ’’ཏི. (ཛཱ. ༢.༢༡.༡༡༨);

ལོཀིཏྠིཡོཏི ལོཀེ ཨིཏྠིཡོ. ཝེལཱ ཏཱསཾ ན ཝིཛྫཏཱིཏི ཨམྨ, ཏཱསཾ ཨིཏྠཱིནཾ ཀིལེསུཔྤཏྟིཾ པཏྭཱ ཝེལཱ སཾཝརོ མརིཡཱདཱ པམཱཎཾ ནཱམ ནཏྠི. སཱརཏྟཱ ཙ པགབྦྷཱ ཙཱཏི ཝེལཱ ཙ ཨེཏཱསཾ ནཏྠི, པཉྩསུ ཀཱམགུཎེསུ སཱརཏྟཱ ཨལླཱིནཱ, ཏཐཱ ཀཱཡཔཱགབྦྷིཡེན, ཝཱཙཱཔཱགབྦྷིཡེན, མནོཔཱགབྦྷིཡེནཱཏི ཏིཝིདྷེན པཱགབྦྷིཡེན སམནྣཱགཏཏྟཱ པགབྦྷཱ ཙེཏཱ. ཨེཏཱསཉྷི ཨབྦྷནྟརེ ཀཱཡདྭཱརཱདཱིནི པཏྭཱ སཾཝརོ ནཱམ ནཏྠི, ལོལཱ ཀཱཀཔཊིབྷཱགཱཏི དསྶེཏི. སིཁཱི སབྦགྷསོ ཡཐཱཏི ཨམྨ, ཡཐཱ ཛཱལསིཁཱཡ ‘‘སིཁཱི’’ཏི སངྑཾ གཏོ ཨགྒི ནཱམ གཱུཐགཏཱདིབྷེདཾ ཨསུཙིམྤི, སཔྤིམདྷུཕཱཎིཏཱདིབྷེདཾ སུཙིམྤི, ཨིཊྛམྤི ཨནིཊྛམྤི ཡཾ ཡདེཝ ལབྷཏི, སབྦཾ གྷསཏི ཁཱདཏི, ཏསྨཱ ‘‘སབྦགྷསོ’’ཏི ཝུཙྩཏི. ཏཐེཝ ཏཱ ཨིཏྠིཡོཔི ཧཏྠིམེཎྜགོམེཎྜཱདཡོ ཝཱ ཧོནྟུ ཧཱིནཛཙྩཱ ཧཱིནཀམྨནྟཱ, ཁཏྟིཡཱདཡོ ཝཱ ཧོནྟུ ཨུཏྟམཀམྨནྟཱ, ཧཱིནུཀྐཊྛབྷཱཝཾ ཨཙིནྟེཏྭཱ ལོཀསྶཱདཝསེན ¶ ཀིལེསསནྠཝེ ཨུཔྤནྣེ ཡཾ ཡཾ ལབྷནྟི, སབྦམེཝ སེཝནྟཱིཏི སབྦགྷསསིཁིསདིསཱ ཧོནྟི. ཏསྨཱ སིཁཱི སབྦགྷསོ ཡཐཱ, ཏཐེཝེཏཱཏི ཝེདིཏབྦཱ.

ཏཱ ¶ ཧིཏྭཱ པབྦཛིསྶཱམཱིཏི ཨཧཾ ཏཱ ལཱམིཀཱ དུཀྑཝཏྠུབྷཱུཏཱ ཨིཏྠིཡོ ཧིཏྭཱ ཨརཉྙཾ པཝིསིཏྭཱ ཨིསིཔབྦཛྫཾ པབྦཛིསྶཱམི. ཝིཝེཀམནུབྲཱུཧཡནྟི ཀཱཡཝིཝེཀོ ཙིཏྟཝིཝེཀོ ཨུཔདྷིཝིཝེཀོཏི ཏཡོ ཝིཝེཀཱ, ཏེསུ ཨིདྷ ཀཱཡཝིཝེཀོཔི ཝཊྚཏི ཙིཏྟཝིཝེཀོཔི. ཨིདཾ ཝུཏྟཾ ཧོཏི – ཨཧཾ, ཨམྨ, པབྦཛིཏྭཱ ཀསིཎཔརིཀམྨཾ ཀཏྭཱ ཨཊྛ སམཱཔཏྟིཡོ ཙ པཉྩཱབྷིཉྙཱ ཙ ཨུཔྤཱདེཏྭཱ གཎཏོ ཀཱཡཾ, ཀིལེསེཧི ཙ ཙིཏྟཾ ཝིཝེཙེཏྭཱ ཨིམཾ ཝིཝེཀཾ བྲཱུཧེནྟོ ཝཌྜྷེནྟོ བྲཧྨལོཀཔརཱཡཎོ བྷཝིསྶཱམི, ཨལཾ མེ ཨགཱརེནཱཏི. ཨེཝཾ ཨིཏྠིཡོ གརཧིཏྭཱ མཱཏཱཔིཏརོ ཝནྡིཏྭཱ ཧིམཝནྟཾ པཝིསིཏྭཱ པབྦཛིཏྭཱ ཝུཏྟཔྤཀཱརཾ ཝིཝེཀཾ བྲཱུཧེནྟོ བྲཧྨལོཀཔརཱཡཎོ ཨཧོསི.

སཏྠཱཔི ¶ ‘‘ཨེཝཾ བྷིཀྑུ ཨིཏྠིཡོ ནཱམ ཨསཱཏཱ ལཱམིཀཱ པཙྪིམིཀཱ དུཀྑདཱཡིཀཱ’’ཏི ཨིཏྠཱིནཾ ཨགུཎཾ ཀཐེཏྭཱ སཙྩཱནི པཀཱསེསི, སཙྩཔརིཡོསཱནེ སོ བྷིཀྑུ སོཏཱཔཏྟིཕལེ པཏིཊྛཱསི. སཏྠཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ མཱཏཱ བྷདྡཀཱཔིལཱནཱི, པིཏཱ མཧཱཀསྶཔོ ཨཧོསི, ཨནྟེཝཱསིཀོ ཨཱནནྡོ, ཨཱཙརིཡོ པན ཨཧམེཝ ཨཧོསི’’ནྟི.

ཨསཱཏམནྟཛཱཏཀཝཎྞནཱ པཋམཱ.

[༦༢] ༢. ཨཎྜབྷཱུཏཛཱཏཀཝཎྞནཱ

ཡཾ བྲཱཧྨཎོ ཨཝཱདེསཱིཏི ཨིདཾ སཏྠཱ ཛེཏཝནེ ཝིཧརནྟོ ཨུཀྐཎྛིཏམེཝཱརབྦྷ ཀཐེསི. ཏཉྷི སཏྠཱ ‘‘སཙྩཾ ཀིར ཏྭཾ བྷིཀྑུ ཨུཀྐཎྛིཏོསཱི’’ཏི པུཙྪིཏྭཱ ‘‘སཙྩ’’ནྟི ཝུཏྟེ ‘‘བྷིཀྑུ ཨིཏྠིཡོ ནཱམ ཨརཀྑིཡཱ, པུབྦེ པཎྜིཏཱ ཨིཏྠིཾ གབྦྷཏོ པཊྛཱཡ རཀྑནྟཱཔི རཀྑིཏུཾ ནཱསཀྑིཾསཱུ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཏསྶ ཨགྒམཧེསིཡཱ ཀུཙྪིསྨིཾ ནིབྦཏྟིཏྭཱ ཝཡཔྤཏྟོ སབྦསིཔྤེསུ ནིཔྥཏྟིཾ པཏྭཱ པིཏུ ཨཙྩཡེན རཛྫེ པཏིཊྛཱཡ དྷམྨེན རཛྫཾ ཀཱརེསི. སོ པུརོཧིཏེན སདྡྷིཾ ཛཱུཏཾ ཀཱིལ༹ཏི. ཀཱིལ༹ནྟོ པན –

‘‘སབྦཱ ¶ ནདཱི ཝངྐགཏཱི, སབྦེ ཀཊྛམཡཱ ཝནཱ;

སབྦིཏྠིཡོ ཀརེ པཱཔཾ, ལབྷམཱནེ ནིཝཱཏཀེ’’ཏི. (ཛཱ. ༢.༢༡.༣༠༨) –

ཨིམཾ ¶ ཛཱུཏགཱིཏཾ གཱཡནྟོ རཛཏཕལཀེ སུཝཎྞཔཱསཀེ ཁིཔཏི. ཨེཝཾ ཀཱིལ༹ནྟོ པན རཱཛཱ ནིཙྩཾ ཛིནཱཏི, པུརོཧིཏོ པརཱཛཱིཡཏི.

སོ ཨནུཀྐམེན གྷརེ ཝིབྷཝེ པརིཀྑཡཾ གཙྪནྟེ ཙིནྟེསི ‘‘ཨེཝཾ སནྟེ སབྦཾ ཨིམསྨིཾ གྷརེ དྷནཾ ཁཱིཡིསྶཏི, པརིཡེསིཏྭཱ པུརིསནྟརཾ ཨགཏཾ ཨེཀཾ མཱཏུགཱམཾ གྷརེ ཀརིསྶཱམཱི’’ཏི. ཨཐསྶ ཨེཏདཧོསི ‘‘ཨཉྙཾ པུརིསཾ དིཊྛཔུབྦཾ ཨིཏྠིཾ རཀྑིཏུཾ ན སཀྑིསྶཱམི, གབྦྷཏོ པཊྛཱཡེཀཾ མཱཏུགཱམཾ རཀྑིཏྭཱ ཏཾ ཝཡཔྤཏྟཾ ཝསེ ཋཔེཏྭཱ ཨེཀཔུརིསིཀཾ ཀཏྭཱ གཱལ༹ྷཾ ཨཱརཀྑཾ སཾཝིདཧིཏྭཱ རཱཛཀུལཏོ དྷནཾ ཨཱཧརིསྶཱམཱི’’ཏི. སོ ཙ ཨངྒཝིཛྫཱཡ ཚེཀོ ཧོཏི, ཨཐེཀཾ དུགྒཏིཏྠིཾ གབྦྷིནིཾ དིསྭཱ ‘‘དྷཱིཏརཾ ཝིཛཱཡིསྶཏཱི’’ཏི ཉཏྭཱ ཏཾ པཀྐོསཱཔེཏྭཱ པརིབྦཡཾ དཏྭཱ ¶ གྷརེཡེཝ ཝསཱཔེཏྭཱ ཝིཛཱཏཀཱལེ དྷནཾ དཏྭཱ ཨུཡྻོཛེཏྭཱ ཏཾ ཀུམཱརིཀཾ ཨཉྙེསཾ པུརིསཱནཾ དཊྛུཾ ཨདཏྭཱ ཨིཏྠཱིནཾཡེཝ ཧཏྠེ དཏྭཱ པོསཱཔེཏྭཱ ཝཡཔྤཏྟཀཱལེ ཏཾ ཨཏྟནོ ཝསེ ཋཔེསི. ཡཱཝ ཙེསཱ ཝཌྜྷཏི, ཏཱཝ རཉྙཱ སདྡྷིཾ ཛཱུཏཾ ན ཀཱིལི༹. ཏཾ པན ཝསེ ཋཔེཏྭཱ བྲཱཧྨཎོ ‘‘མཧཱརཱཛ, ཛཱུཏཾ ཀཱིལཱ༹མཱ’’ཏི ཨཱཧ. རཱཛཱ ‘‘སཱདྷཱུ’’ཏི པུརིམནིཡཱམེནེཝ ཀཱིལི༹. པུརོཧིཏོ རཉྙོ གཱཡིཏྭཱ པཱསཀཾ ཁིཔནཀཱལེ ‘‘ཋཔེཏྭཱ མམ མཱཎཝིཀ’’ནྟི ཨཱཧ. ཏཏོ པཊྛཱཡ པུརོཧིཏོ ཛིནཱཏི, རཱཛཱ པརཱཛཱིཡཏི.

བོདྷིསཏྟོ ‘‘ཨིམསྶ གྷརེ ཨེཀཔུརིསིཀཱཡ ཨེཀཱཡ ཨིཏྠིཡཱ བྷཝིཏབྦ’’ནྟི པརིགྒཎྷཱཔེནྟོ ཨཏྠིབྷཱཝཾ ཉཏྭཱ ‘‘སཱིལམསྶཱ བྷིནྡཱཔེསྶཱམཱི’’ཏི ཨེཀཾ དྷུཏྟཾ པཀྐོསཱཔེཏྭཱ ‘‘སཀྑིསྶསི པུརོཧིཏསྶ ཨིཏྠིཡཱ སཱིལཾ བྷིནྡིཏུ’’ནྟི ཨཱཧ. ‘‘སཀྐོམི, དེཝཱ’’ཏི. ཨཐསྶ རཱཛཱ དྷནཾ དཏྭཱ ‘‘ཏེན ཧི ཁིཔྤཾ ནིཊྛཱཔེཧཱི’’ཏི ཏཾ པཧིཎི. སོ རཉྙོ སནྟིཀཱ དྷནཾ ཨཱདཱཡ གནྡྷདྷཱུམཙུཎྞཀཔྤཱུརཱདཱིནི གཧེཏྭཱ ཏསྶ གྷརཏོ ཨཝིདཱུརེ སབྦགནྡྷཱཔཎཾ པསཱརེསི. པུརོཧིཏསྶཔི གེཧཾ སཏྟབྷཱུམཀཾ སཏྟདྭཱརཀོཊྛཀཾ ཧོཏི, སབྦེསུ དྭཱརཀོཊྛཀེསུ ཨིཏྠཱིནཾཡེཝ ཨཱརཀྑཱ. ཋཔེཏྭཱ པན བྲཱཧྨཎཾ ཨཉྙོ པུརིསོ གེཧཾ པཝིསིཏུཾ ལབྷནྟོ ནཱམ ¶ ནཏྠི, ཀཙཝརཚཌྜནཔཙྪིམྤི ¶ སོདྷེཏྭཱཡེཝ པཝེསེནྟི. ཏཾ མཱཎཝིཀཾ པུརོཧིཏོཡེཝ དཊྛུཾ ལབྷཏི. ཏསྶཱ ཙ ཨེཀཱ པརིཙཱརིཀཱ ཨིཏྠཱི ཨཏྠི. ཨཐསྶཱ སཱ པརིཙཱརིཀཱ གནྡྷཔུཔྥམཱུལཾ གཧེཏྭཱ གཙྪནྟཱི ཏསྶ དྷུཏྟསྶ ཨཱཔཎསམཱིཔེན གཙྪཏི. སོ ‘‘ཨཡཾ ཏསྶཱ པརིཙཱརིཀཱ’’ཏི སུཊྛུ ཉཏྭཱ ཨེཀདིཝསཾ ཏཾ ཨཱགཙྪནྟིཾ དིསྭཱ ཨཱཔཎཱ ཨུཊྛཱཡ གནྟྭཱ ཏསྶཱ པཱདམཱུལེ པཏིཏྭཱ ཨུབྷོཧི ཧཏྠེཧི པཱདེ གཱལ༹ྷཾ གཧེཏྭཱ ‘‘ཨམྨ, ཨེཏྟཀཾ ཀཱལཾ ཀཧཾ གཏཱསཱི’’ཏི པརིདེཝི, ཨཝསེསཱཔི པཡུཏྟཀདྷུཏྟཱ ཨེཀམནྟཾ ཋཏྭཱ ‘‘ཧཏྠཔཱདམུཁསཎྛཱནེཧི ཙ ཨཱཀཔྤེན ཙ མཱཏཱཔུཏྟཱ ཨེཀསདིསཱཡེཝཱ’’ཏི ཨཱཧཾསུ. སཱ ཨིཏྠཱི ཏེསུ ཏེསུ ཀཐེནྟེསུ ཨཏྟནོ ཨསདྡཧིཏྭཱ ‘‘ཨཡཾ མེ པུཏྟོ བྷཝིསྶཏཱི’’ཏི སཡམྤི རོདིཏུཾ ཨཱརབྷི. ཏེ ཨུབྷོཔི ཀནྡིཏྭཱ རོདིཏྭཱ ཨཉྙམཉྙཾ ཨཱལིངྒེཏྭཱ ཨཊྛཾསུ.

ཨཐ སོ དྷུཏྟོ ཨཱཧ ‘‘ཨམྨ, ཀཧཾ ཝསསཱི’’ཏི? ‘‘ཀིནྣརིལཱིལཱཡ ཝསམཱནཱཡ རཱུཔསོབྷགྒཔྤཏྟཱཡ པུརོཧིཏསྶ དཧརིཏྠིཡཱ ཨུཔཊྛཱནཾ ཀུརུམཱནཱ ཝསཱམི, ཏཱཏཱ’’ཏི. ‘‘ཨིདཱནི ཀཧཾ ཡཱསི, ཨམྨཱ’’ཏི? ‘‘ཏསྶཱ གནྡྷམཱལཱདཱིནཾ ཨཏྠཱཡཱ’’ཏི. ‘‘ཨམྨ, ཀིཾ ཏེ ཨཉྙཏྠ གཏཱཡ, ཨིཏོ པཊྛཱཡ མམེཝ སནྟིཀཱ ཧརཱ’’ཏི མཱུལཾ ཨགྒཧེཏྭཱཝ བཧཱུནི ཏམྦཱུལཏཀྐོལཀཱདཱིནི ཙེཝ ནཱནཱཔུཔྥཱནི ཙ ཨདཱསི. མཱཎཝིཀཱ བཧཱུནི གནྡྷཔུཔྥཱདཱིནི དིསྭཱ ‘‘ཀིཾ, ཨམྨ, ཨཛྫ ཨམྷཱཀཾ བྲཱཧྨཎོ པསནྣོ’’ཏི ཨཱཧ. ‘‘ཀསྨཱ ཨེཝཾ ཝདསཱི’’ཏི? ‘‘ཨིམེསཾ བཧུབྷཱཝཾ དིསྭཱ’’ཏི. ན བྲཱཧྨཎོ བཧུམཱུལཾ ཨདཱསི, མཡཱ པནེཏཾ མཡ྄ཧཾ པུཏྟསྶ ¶ སནྟིཀཱ ཨཱབྷཏནྟི. ཏཏོ པཊྛཱཡ སཱ བྲཱཧྨཎེན དིནྣམཱུལཾ ཨཏྟནཱ གཧེཏྭཱ ཏསྶེཝ སནྟིཀཱ གནྡྷཔུཔྥཱདཱིནི ཨཱཧརཏི. དྷུཏྟོ ཀཏིཔཱཧཙྩཡེན གིལཱནཱལཡཾ ཀཏྭཱ ནིཔཛྫི. སཱ ཏསྶ ཨཱཔཎདྭཱརཾ གནྟྭཱ ཏཾ ཨདིསྭཱ ‘‘ཀཧཾ མེ པུཏྟོ’’ཏི པུཙྪི. ‘‘པུཏྟསྶ ཏེ ཨཕཱསུཀཾ ཛཱཏ’’ནྟི? སཱ ཏསྶ ནིཔནྣཊྛཱནཾ གནྟྭཱ ནིསཱིདིཏྭཱ པིཊྛིཾ པརིམཛྫནྟཱི ‘‘ཀིཾ ཏེ, ཏཱཏ, ཨཕཱསུཀ’’ནྟི པུཙྪི. སོ ཏུཎྷཱི ཨཧོསི. ‘‘ཀིཾ ན ཀཐེསི པུཏྟཱ’’ཏི? ‘‘ཨམྨ, མརནྟེནཱཔི ཏུཡ྄ཧཾ ཀཐེཏུཾ ན སཀྐཱ’’ཏི. ‘‘ཏཱཏ, མཡ྄ཧཾ ཨཀཐེཏྭཱ ¶ ཀསྶ ཀཐེཡྻཱསི, ཀཐེཧི, ཏཱཏཱ’’ཏི. ‘‘ཨམྨ, མཡ྄ཧཾ ཨཉྙཾ ཨཕཱསུཀཾ ནཏྠི, ཏསྶཱ པན མཱཎཝིཀཱཡ ཝཎྞཾ སུཏྭཱ པཊིབདྡྷཙིཏྟོསྨི ¶ , ཏཾ ལབྷནྟོ ཛཱིཝིསྶཱམི, ཨལབྷནྟོ ཨིདྷེཝ མརིསྶཱམཱི’’ཏི. ‘‘ཏཱཏ, མཡ྄ཧཾ ཨེས བྷཱརོ, མཱ ཏྭཾ ཨེཏཾ ནིསྶཱཡ ཙིནྟཡཱི’’ཏི ཏཾ ཨསྶཱསེཏྭཱ བཧཱུནི གནྡྷཔུཔྥཱདཱིནི ཨཱདཱཡ མཱཎཝིཀཱཡ སནྟིཀཾ གནྟྭཱ ‘‘པུཏྟོ མེ, ཨམྨ, མམ སནྟིཀཱ ཏཝ ཝཎྞཾ སུཏྭཱ པཊིབདྡྷཙིཏྟོ ཛཱཏོ, ཀིཾ ཀཱཏབྦ’’ནྟི? ‘‘སཙེ ཨཱནེཏུཾ སཀྐོཐ, མཡཱ ཀཏོཀཱསོཡེཝཱ’’ཏི.

སཱ ཏསྶཱ ཝཙནཾ སུཏྭཱ ཏཏོ པཊྛཱཡ ཏསྶ གེཧསྶ ཀཎྞཀཎྞེཧི བཧུཾ ཀཙཝརཾ སངྐཌྜྷིཏྭཱ ཨཱརཀྑིཏྠིཡཱ ཨུཔརི ཚཌྜེསི. སཱ ཏེན ཨཊྚཱིཡམཱནཱ ཨཔེཏི. ཨིཏརཱ ཏེནེཝ ནིཡཱམེན ཡཱ ཡཱ ཀིཉྩི ཀཐེཏི, ཏསྶཱ ཏསྶཱ ཨུཔརི ཀཙཝརཾ ཚཌྜེསི. ཏཏོ པཊྛཱཡ པན སཱ ཡཾ ཡཾ ཨཱཧརཏི ཝཱ ཧརཏི ཝཱ, ཏཾ ཏཾ ན ཀཱཙི སོདྷེཏུཾ ཨུསྶཧཏི. ཏསྨིཾ ཀཱལེ སཱ ཏཾ དྷུཏྟཾ པུཔྥཔཙྪིཡཾ ནིཔཛྫཱཔེཏྭཱ མཱཎཝིཀཱཡ སནྟིཀཾ ཨབྷིཧརི. དྷུཏྟོ མཱཎཝིཀཱཡ སཱིལཾ བྷིནྡིཏྭཱ ཨེཀཱཧདྭཱིཧཾ པཱསཱདེཡེཝ ཨཧོསི. པུརོཧིཏེ བཧི ནིཀྑནྟེ ཨུབྷོ ཨབྷིརམནྟི. ཏསྨིཾ ཨཱགཏེ དྷུཏྟོ ནིལཱིཡཏི.

ཨཐ ནཾ སཱ ཨེཀཱཧདྭཱིཧཙྩཡེན ‘‘སཱམི, ཨིདཱནི ཏཡཱ གནྟུཾ ཝཊྚཏཱི’’ཏི ཨཱཧ. ‘‘ཨཧཾ བྲཱཧྨཎཾ པཧརིཏྭཱ གནྟུཀཱམོ’’ཏི. སཱ ‘‘ཨེཝཾ ཧོཏཱུ’’ཏི དྷུཏྟཾ ནིལཱིཡཱཔེཏྭཱ བྲཱཧྨཎེ ཨཱགཏེ ཨེཝམཱཧ ‘‘ཨཧཾ, ཨཡྻ, ཏུམྷེསུ ཝཱིཎཾ ཝཱདེནྟེསུ ནཙྩིཏུཾ ཨིཙྪཱམཱི’’ཏི. ‘‘སཱདྷུ, བྷདྡེ, ནཙྩསྶཱུ’’ཏི ཝཱིཎཾ ཝཱདེསི. ‘‘ཏུམྷེསུ ཨོལོཀེནྟེསུ ལཛྫཱམི, མུཁཾ པན ཝོ སཱཊཀེན བནྡྷིཏྭཱ ནཙྩིསྶཱམཱི’’ཏི. ‘‘སཙེ ལཛྫསི, ཨེཝཾ ཀརོཧཱི’’ཏི. མཱཎཝིཀཱ གྷནསཱཊཀཾ གཧེཏྭཱ ཏསྶ ཨཀྑཱིནི པིདཧམཱནཱ མུཁཾ བནྡྷི. བྲཱཧྨཎོ མུཁཾ བནྡྷཱཔེཏྭཱ ཝཱིཎཾ ཝཱདེསི. སཱ མུཧུཏྟཾ ནཙྩིཏྭཱ ‘‘ཨཡྻ, ཨཧཾ ཏེ ཨེཀཝཱརཾ སཱིསེ པཧརིཏུཀཱམཱ’’ཏི ཨཱཧ. ཨིཏྠིལོལོ བྲཱཧྨཎོ ཀིཉྩི ཀཱརཎཾ ཨཛཱནནྟོ ‘‘པཧརཱཧཱི’’ཏི ཨཱཧ, མཱཎཝིཀཱ དྷུཏྟསྶ སཉྙཾ ཨདཱསི. སོ སཎིཀཾ ཨཱགནྟྭཱ བྲཱཧྨཎསྶ པིཊྛིཔསྶེ ཋཏྭཱ ¶ སཱིསེ ཀཔྤརེན པཧརི, ཨཀྑཱིནི ¶ པཏནཱཀཱརཔྤཏྟཱནི ཨཧེསུཾ, སཱིསེ གཎྜོ ཨུཊྛཧི. སོ ཝེདནཱཊྚོ ཧུཏྭཱ ‘‘ཨཱཧར ཏེ ཧཏྠ’’ནྟི ཨཱཧ. མཱཎཝིཀཱ ཨཏྟནོ ཧཏྠཾ ཨུཀྑིཔིཏྭཱ ཏསྶ ཧཏྠེ ཋཔེསི. བྲཱཧྨཎོ ‘‘ཧཏྠོ མུདུཀོ, པཧཱརོ པན ཐདྡྷོ’’ཏི ཨཱཧ ¶ . དྷུཏྟོ བྲཱཧྨཎཾ པཧརིཏྭཱ ནིལཱིཡི. མཱཎཝིཀཱ ཏསྨིཾ ནིལཱིནེ བྲཱཧྨཎསྶ མུཁཏོ སཱཊཀཾ མོཙེཏྭཱ ཏེལཾ ཨཱདཱཡ སཱིསཾ པརིསམྦཱཧི. བྲཱཧྨཎེ བཧི ནིཀྑནྟེ པུན སཱ ཨིཏྠཱི དྷུཏྟཾ པཙྪིཡཾ ནིཔཛྫཱཔེཏྭཱ ནཱིཧརི.

སོ རཉྙོ སནྟིཀཾ གནྟྭཱ སབྦཾ ཏཾ པཝཏྟིཾ ཨཱརོཙེསི. རཱཛཱ ཨཏྟནོ ཨུཔཊྛཱནཾ ཨཱགཏཾ བྲཱཧྨཎཾ ཨཱཧ ‘‘ཛཱུཏཾ ཀཱིལཱ༹མ བྲཱཧྨཎཱ’’ཏི? ‘‘སཱདྷུ, མཧཱརཱཛཱ’’ཏི. རཱཛཱ ཛཱུཏམཎྜལཾ སཛྫཱཔེཏྭཱ པུརིམནཡེནེཝ ཛཱུཏགཱིཏཾ གཱཡིཏྭཱ པཱསཀེ ཁིཔཏི. བྲཱཧྨཎོ མཱཎཝིཀཱཡ ཏཔསྶ བྷིནྣབྷཱཝཾ ཨཛཱནནྟོ ‘‘ཋཔེཏྭཱ མམ མཱཎཝིཀ’’ནྟི ཨཱཧ. ཨེཝཾ ཝདནྟོཔི པརཱཛིཏོཡེཝ. རཱཛཱ ཛིནིཏྭཱ ‘‘བྲཱཧྨཎ, ཀིཾ ཝདེསི, མཱཎཝིཀཱཡ ཏེ ཏཔོ བྷིནྣོ, ཏྭཾ ‘མཱཏུགཱམཾ གབྦྷཏོ པཊྛཱཡ རཀྑནྟོ སཏྟསུ ཋཱནེསུ ཨཱརཀྑཾ ཀརོནྟོ རཀྑིཏུཾ སཀྑིསྶཱམཱི’ཏི མཉྙསི, མཱཏུགཱམོ ནཱམ ཀུཙྪིཡཾ པཀྑིཔིཏྭཱ ཙརནྟེནཱཔི རཀྑིཏུཾ ན སཀྐཱ, ཨེཀཔུརིསིཀཱ ཨིཏྠཱི ནཱམ ནཏྠི, ཏཝ མཱཎཝིཀཱ ‘ནཙྩིཏུཀཱམཱམྷཱི’ཏི ཝཏྭཱ ཝཱིཎཾ ཝཱདེནྟསྶ ཏཝ སཱཊཀེན མུཁཾ བནྡྷིཏྭཱ ཨཏྟནོ ཛཱརཾ ཏཝ སཱིསེ ཀཔྤརེན པཧརཱཔེཏྭཱ ཨུཡྻོཛེསི, ཨིདཱནི ཀིཾ ཀཐེསཱི’’ཏི ཝཏྭཱ ཨིམཾ གཱཐམཱཧ –

༦༢.

‘‘ཡཾ བྲཱཧྨཎོ ཨཝཱདེསི, ཝཱིཎཾ སམུཁཝེཋིཏོ;

ཨཎྜབྷཱུཏཱབྷཏཱ བྷརིཡཱ, ཏཱསུ ཀོ ཛཱཏུ ཝིསྶསེ’’ཏི.

ཏཏྠ ཡཾ བྲཱཧྨཎོ ཨཝཱདེསི, ཝཱིཎཾ སམུཁཝེཋིཏོཏི ཡེན ཀཱརཎེན བྲཱཧྨཎོ གྷནསཱཊཀེན སཧ མུཁེན ཝེཋིཏོ ཧུཏྭཱ ཝཱིཎཾ ཝཱདེསི, ཏཾ ཀཱརཎཾ ན ཛཱནཱཏཱིཏི ཨཏྠོ. ཏཉྷི སཱ ཝཉྩེཏུཀཱམཱ ཨེཝམཀཱསི. བྲཱཧྨཎོ པན ཏཾ ཨིཏྠིཾ བཧུམཱཡཱབྷཱཝཾ ཨཛཱནནྟོ མཱཏུགཱམསྶ སདྡཧིཏྭཱ ‘‘མཾ ཨེསཱ ལཛྫཏཱི’’ཏི ཨེཝཾསཉྙཱི ཨཧོསི, ཏེནསྶ ཨཉྙཱཎབྷཱཝཾ པཀཱསེནྟོ རཱཛཱ ཨེཝམཱཧ, ཨཡམེཏྠཱདྷིཔྤཱཡོ ¶ . ཨཎྜབྷཱུཏཱབྷཏཱ བྷརིཡཱཏི ཨཎྜཾ ཝུཙྩཏི བཱིཛཾ, བཱིཛབྷཱུཏཱ མཱཏུཀུཙྪིཏོ ཨནིཀྑནྟཀཱལེཡེཝ ཨཱབྷཏཱ ཨཱནཱིཏཱ, བྷཏཱཏི ཝཱ པུཊྛཱཏི ཨཏྠོ. ཀཱ སཱ? བྷརིཡཱ པཛཱཔཏི པཱདཔརིཙཱརིཀཱ. སཱ ཧི བྷཏྟཝཏྠཱདཱིཧི ¶ བྷརིཏབྦཏཱཡ, བྷིནྣསཾཝརཏཱཡ, ལོཀདྷམྨེཧི བྷརིཏཏཱཡ ཝཱ ‘‘བྷརིཡཱ’’ཏི ཝུཙྩཏི. ཏཱསུ ཀོ ཛཱཏུ ཝིསྶསེཏི ཛཱཏཱུཏི ཨེཀཾསཱདྷིཝཙནཾ, ཏཱསུ མཱཏུཀུཙྪིཏོ པཊྛཱཡ རཀྑིཡམཱནཱསུཔི ཨེཝཾ ཝིཔྤཀཱརཾ ཨཱཔཛྫནྟཱིསུ བྷརིཡཱསུ ཀོ ནཱམ པཎྜིཏོ པུརིསོ ཨེཀཾསེན ཝིསྶསེ, ‘‘ནིབྦིཀཱརཱ ཨེསཱ མཡཱི’’ཏི ཀོ སདྡཧེཡྻཱཏི ¶ ཨཏྠོ. ཨསདྡྷམྨཝསེན ཧི ཨཱམནྟཀེསུ ནིམནྟཀེསུ ཝིཛྫམཱནེསུ མཱཏུགཱམོ ནཱམ ན སཀྐཱ རཀྑིཏུནྟི.

ཨེཝཾ བོདྷིསཏྟོ བྲཱཧྨཎསྶ དྷམྨཾ དེསེསི. བྲཱཧྨཎོ བོདྷིསཏྟསྶ དྷམྨདེསནཾ སུཏྭཱ ནིཝེསནཾ གནྟྭཱ ཏཾ མཱཎཝིཀཾ ཨཱཧ – ‘‘ཏཡཱ ཀིར ཨེཝརཱུཔཾ པཱཔཀམྨཾ ཀཏ’’ནྟི? ‘‘ཨཡྻ, ཀོ ཨེཝམཱཧ, ན ཀརོམི, ‘ཨཧམེཝ པཧརིཾ, ན ཨཉྙོ ཀོཙི’. སཙེ ན སདྡཧཐ, ཨཧཾ ‘ཏུམྷེ ཋཔེཏྭཱ ཨཉྙསྶ པུརིསསྶ ཧཏྠསམྥསྶཾ ན ཛཱནཱམཱི’ཏི སཙྩཀིརིཡཾ ཀཏྭཱ ཨགྒིཾ པཝིསིཏྭཱ ཏུམྷེ སདྡཧཱཔེསྶཱམཱི’’ཏི. བྲཱཧྨཎོ ‘‘ཨེཝཾ ཧོཏཱུ’’ཏི མཧནྟཾ དཱརུརཱསིཾ ཀཱརེཏྭཱ ཨགྒིཾ ཀཏྭཱ ཏཾ པཀྐོསཱཔེཏྭཱ ‘‘སཙེ ཨཏྟནོ སདྡཧསི, ཨགྒིཾ པཝིསཱཧཱི’’ཏི ཨཱཧ.

མཱཎཝིཀཱ ཨཏྟནོ པརིཙཱརིཀཾ པཋམམེཝ སིཀྑཱཔེསི ‘‘ཨམྨ, ཏཝ པུཏྟཾ ཏཏྠ གནྟྭཱ མམ ཨགྒིཾ པཝིསནཀཱལེ ཧཏྠགྒཧཎཾ ཀཱཏུཾ ཝདེཧཱི’’ཏི. སཱ གནྟྭཱ ཏཐཱ ཨཝཙ. དྷུཏྟོ ཨཱགནྟྭཱ པརིསམཛ྄ཛྷེ ཨཊྛཱསི. སཱ མཱཎཝིཀཱ བྲཱཧྨཎཾ ཝཉྩེཏུཀཱམཱ མཧཱཛནམཛ྄ཛྷེ ཋཏྭཱ ‘‘བྲཱཧྨཎ, ཏཾ ཋཔེཏྭཱ ཨཉྙསྶ པུརིསསྶ ཧཏྠསམྥསྶཾ ནཱམ ན ཛཱནཱམི, ཨིམིནཱ སཙྩེན ཨཡཾ ཨགྒི མཱ མཾ ཛྷཱཔེསཱི’’ཏི ཨགྒིཾ པཝིསིཏུཾ ཨཱརདྡྷཱ. ཏསྨིཾ ཁཎེ དྷུཏྟོ ‘‘པསྶཐ བྷོ པུརོཧིཏབྲཱཧྨཎསྶ ཀམྨཾ, ཨེཝརཱུཔཾ མཱཏུགཱམཾ ཨགྒིཾ པཝེསཱཔེཏཱི’’ཏི གནྟྭཱ ཏཾ མཱཎཝིཀཾ ཧཏྠེ གཎྷི. སཱ ཧཏྠཾ ཝིསྶཛྫཱཔེཏྭཱ པུརོཧིཏཾ ཨཱཧ – ‘‘ཨཡྻ, མམ སཙྩཀིརིཡཱ བྷིནྣཱ, ན སཀྐཱ ཨགྒིཾ པཝིསིཏུ’’ནྟི. ‘‘ཀིཾཀཱརཎཱ’’ཏི? ‘‘ཨཛྫ མཡཱ ཨེཝརཱུཔཱ སཙྩཀིརིཡཱ ཀཏཱ ‘ཋཔེཏྭཱ མམ སཱམིཀཾ ཨཉྙསྶ པུརིསསྶ ཧཏྠསམྥསྶཾ ན ཛཱནཱམཱི’ཏི ¶ , ཨིདཱནི ཙམྷི ཨིམིནཱ པུརིསེན ཧཏྠེ གཧིཏཱ’’ཏི. བྲཱཧྨཎོ ‘‘ཝཉྩིཏོ ཨཧཾ ཨིམཱཡཱ’’ཏི ཉཏྭཱ ཏཾ པོཐེཏྭཱ ནཱིཧརཱཔེསི. ཨེཝཾ ཨསདྡྷམྨསམནྣཱགཏཱ ཀིརེཏཱ ཨིཏྠིཡོ ཏཱཝ མཧནྟམྤི པཱཔཀམྨཾ ཀཏྭཱ ཨཏྟནོ སཱམིཀཾ ཝཉྩེཏུཾ ‘‘ནཱཧཾ ཨེཝརཱུཔཾ ཀམྨཾ ཀརོམཱི’’ཏི དིཝསམྤི སཔཐཾ ཀུརུམཱནཱ ནཱནཱཙིཏྟཱཝ ཧོནྟི. ཏེན ཝུཏྟཾ –

‘‘ཙོརཱིནཾ ¶ བཧུབུདྡྷཱིནཾ, ཡཱསུ སཙྩཾ སུདུལླབྷཾ;

ཐཱིནཾ བྷཱཝོ དུརཱཛཱནོ, མཙྪསྶེཝོདཀེ གཏཾ. (ཛཱ. ༢.༢༡.༣༤༧);

‘‘མུསཱ ཏཱསཾ ཡཐཱ སཙྩཾ, སཙྩཾ ཏཱསཾ ཡཐཱ མུསཱ;

གཱཝོ བཧི ཏིཎསྶེཝ, ཨོམསནྟི ཝརཾ ཝརཾ.

‘‘ཙོརིཡོ ¶ ཀཐིནཱ ཧེཏཱ, ཝཱལཱ༹ ཙ ལཔསཀྑརཱ;

ན ཏཱ ཀིཉྩི ན ཛཱནནྟི, ཡཾ མནུསྶེསུ ཝཉྩན’’ནྟི. (ཛཱ. ༢.༢༡.༣༣༢, ༣༣༤);

སཏྠཱ ‘‘ཨེཝཾ ཨརཀྑིཡོ མཱཏུགཱམོ’’ཏི ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེསི, སཙྩཔརིཡོསཱནེ ཨུཀྐཎྛིཏབྷིཀྑུ སོཏཱཔཏྟིཕལེ པཏིཊྛཧི. སཏྠཱཔི ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི ‘‘ཏདཱ བཱརཱཎསིརཱཛཱ ཨཧམེཝ ཨཧོསི’’ནྟི.

ཨཎྜབྷཱུཏཛཱཏཀཝཎྞནཱ དུཏིཡཱ.

[༦༣] ༣. ཏཀྐཔཎྜིཏཛཱཏཀཝཎྞནཱ

ཀོདྷནཱ ཨཀཏཉྙཱུ ཙཱཏི ཨིདཾ སཏྠཱ ཛེཏཝནེ ཝིཧརནྟོ ཨུཀྐཎྛིཏབྷིཀྑུཉྙེཝཱརབྦྷ ཀཐེསི. ཏཉྷི སཏྠཱ ‘‘སཙྩཾ ཀིར ཏྭཾ བྷིཀྑུ ཨུཀྐཎྛིཏོསཱི’’ཏི པུཙྪིཏྭཱ ‘‘སཙྩ’’ནྟི ཝུཏྟེ ‘‘ཨིཏྠིཡོ ནཱམ བྷིཀྑུ ཨཀཏཉྙཱུ མིཏྟདུབྦྷཱ, ཀསྨཱ ཏཱ ནིསྶཱཡ ཨུཀྐཎྛིཏོསཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨིསིཔབྦཛྫཾ པབྦཛིཏྭཱ གངྒཱཏཱིརེ ཨསྶམཾ མཱཔེཏྭཱ སམཱཔཏྟིཡོ ཙེཝ ཨབྷིཉྙཱཡོ ཙ ནིབྦཏྟེཏྭཱ ཛྷཱནསུཁེན ཝིཧརཏི. ཏསྨིཾ སམཡེ བཱརཱཎསིསེཊྛིནོ དྷཱིཏཱ དུཊྛཀུམཱརཱི ནཱམ ཙཎྜཱ ཨཧོསི ཕརུསཱ, དཱསཀམྨཀརེ ཨཀྐོསཏི པརིབྷཱསཏི པཧརཏི. ཨཐ ནཾ ཨེཀདིཝསཾ པརིཝཱརམནུསྶཱ གཧེཏྭཱ ‘‘གངྒཱཡ ཀཱིལི༹སྶཱམཱ’’ཏི ¶ ཨགམཾསུ. ཏེསཾ ཀཱིལ༹ནྟཱནཉྙེཝ སཱུརིཡཏྠངྒམནཝེལཱ ཛཱཏཱ, མེགྷོ ཨུཊྛཧི, མནུསྶཱ མེགྷཾ དིསྭཱ ¶ ཨིཏོ ཙིཏོ ཙ ཝེགེན པལཱཡིཾསུ. སེཊྛིདྷཱིཏཱཡཔི དཱསཀམྨཀརཱ ‘‘ཨཛྫ ཨམྷེཧི ཨེཏིསྶཱ པིཊྛིཾ པསྶིཏུཾ ཝཊྚཏཱི’’ཏི ཏཾ ཨནྟོཨུདཀསྨིཾཡེཝ ཚཌྜེཏྭཱ ཨུཏྟརིཾསུ. དེཝོ པཱཝསྶི, སཱུརིཡོཔི ཨཏྠངྒཏོ, ཨནྡྷཀཱརོ ཛཱཏོ. ཏེ ཏཱཡ ཝིནཱཝ གེཧཾ གནྟྭཱ ‘‘ཀཧཾ སཱ’’ཏི ཝུཏྟེ ‘‘གངྒཱཏོ ཏཱཝ ཨུཏྟིཎྞཱ, ཨཐ ནཾ ན ཛཱནཱམ ཀཧཾ གཏཱ’’ཏི. ཉཱཏཀཱ ཝིཙིནིཏྭཱཔི ན པསྶིཾསུ.

སཱ མཧཱཝིརཝཾ ཝིརཝནྟཱི ཨུདཀེན ཝུཡ྄ཧམཱནཱ ཨཌྜྷརཏྟསམཡེ བོདྷིསཏྟསྶ པཎྞསཱལཱསམཱིཔཾ པཱཔུཎི. སོ ཏསྶཱ སདྡཾ སུཏྭཱ ‘‘མཱཏུགཱམསྶ སདྡོ ཨེསོ, པརིཏྟཱཎམསྶཱ ཀརིསྶཱམཱི’’ཏི ཏིཎུཀྐཾ ཨཱདཱཡ ནདཱིཏཱིརཾ གནྟྭཱ ཏཾ དིསྭཱ ‘‘མཱ བྷཱཡི, མཱ བྷཱཡཱི’’ཏི ཨསྶཱསེཏྭཱ ¶ ནཱགབལོ ཐཱམསམྤནྣོ བོདྷིསཏྟོ ནདིཾ ཏརམཱནོ གནྟྭཱ ཏཾ ཨུཀྑིཔིཏྭཱ ཨསྶམཔདཾ ཨཱནེཏྭཱ ཨགྒིཾ ཀཏྭཱ ཨདཱསི. སཱིཏེ ཝིགཏེ མདྷུརཱནི ཕལཱཕལཱནི ཨུཔནཱམེསི. ཏཱནི ཁཱདིཏྭཱ ཋིཏཾ ‘‘ཀཏྠ ཝཱསིཀཱསི, ཀཐཉྩ གངྒཱཡ པཏིཏཱསཱི’’ཏི པུཙྪི. སཱ ཏཾ པཝཏྟིཾ ཨཱརོཙེསི. ཨཐ ནཾ ‘‘ཏྭཾ ཨིདྷེཝ ཝསཱ’’ཏི པཎྞསཱལཱཡ ཝསཱཔེནྟོ དྭཱིཧཏཱིཧཾ སཡཾ ཨབྦྷོཀཱསེ ཝསིཏྭཱ ‘‘ཨིདཱནི གཙྪཱ’’ཏི ཨཱཧ. སཱ ‘‘ཨིམཾ ཏཱཔསཾ སཱིལབྷེདཾ པཱཔེཏྭཱ གཧེཏྭཱ གམིསྶཱམཱི’’ཏི ན གཙྪཏི. ཨཐ གཙྪནྟེ ཀཱལེ ཨིཏྠིཀུཏྟཾ ཨིཏྠིལཱིལཾ དསྶེཏྭཱ ཏསྶ སཱིལབྷེདཾ ཀཏྭཱ ཛྷཱནཾ ཨནྟརདྷཱཔེསི. སོ ཏཾ གཧེཏྭཱ ཨརཉྙེཡེཝ ཝསཏི. ཨཐ ནཾ སཱ ཨཱཧ ‘‘ཨཡྻ, ཀིཾ ནོ ཨརཉྙཝཱསེན, མནུསྶཔཐཾ གམིསྶཱམཱ’’ཏི? སོ ཏཾ ཨཱདཱཡ ཨེཀཾ པཙྩནྟགཱམཀཾ གནྟྭཱ ཏཀྐབྷཏིཡཱ ཛཱིཝིཀཾ ཀཔྤེཏྭཱ ཏཾ པོསེཏི. ཏསྶ ཏཀྐཾ ཝིཀྐིཎིཏྭཱ ཛཱིཝཏཱིཏི ‘‘ཏཀྐཔཎྜིཏོ’’ཏི ནཱམཾ ཨཀཾསུ. ཨཐསྶ གཱམཝཱསིནོ པརིབྦཡཾ དཏྭཱ ‘‘ཨམྷཱཀཾ སུཡུཏྟདུཡུཏྟཀཾ ཨཱཙིཀྑནྟོ ཨེཏྠ ཝསཱ’’ཏི གཱམདྭཱརེ ཀུཊིཡཾ ཝཱསེསུཾ.

ཏེན ཙ སམཡེན ཙོརཱ པབྦཏཱ ཨོརུཡ྄ཧ པཙྩནྟཾ པཧརནྟི. ཏེ ཨེཀདིཝསཾ ཏཾ གཱམཾ པཧརིཏྭཱ ¶ གཱམཝཱསིཀེཧིཡེཝ བྷཎྜིཀཱ ཨུཀྑིཔཱཔེཏྭཱ གཙྪནྟཱ ཏམྤི སེཊྛིདྷཱིཏརཾ གཧེཏྭཱ ཨཏྟནོ ཝསནཊྛཱནཾ གནྟྭཱ སེསཛནེ ཝིསྶཛྫེསུཾ. ཙོརཛེཊྛཀོ པན ཏསྶཱ རཱུཔེ བཛ྄ཛྷིཏྭཱ ཏཾ ཨཏྟནོ བྷརིཡཾ ཨཀཱསི. བོདྷིསཏྟོ ‘‘ཨིཏྠནྣཱམཱ ཀཧ’’ནྟི པུཙྪི. ‘‘ཙོརཛེཊྛཀེན གཧེཏྭཱ ཨཏྟནོ བྷརིཡཱ ཀཏཱ’’ཏི ཙ སུཏྭཱཔི ‘‘ན སཱ ¶ ཏཏྠ མཡཱ ཝིནཱ ཝསིསྶཏི, པལཱཡིཏྭཱ ཨཱགཙྪིསྶཏཱི’’ཏི ཏསྶཱ ཨཱགམནཾ ཨོལོཀེནྟོ ཏཏྠེཝ ཝསི.

སེཊྛིདྷཱིཏཱཔི ཙིནྟེསི ‘‘ཨཧཾ ཨིདྷ སུཁཾ ཝསཱམི, ཀདཱཙི མཾ ཏཀྐཔཎྜིཏོ ཀིཉྩིདེཝ ནིསྶཱཡ ཨཱགནྟྭཱ ཨིཏོ ཨཱདཱཡ གཙྪེཡྻ, ཨཐ ཨེཏསྨཱ སུཁཱ པརིཧཱཡིསྶཱམི, ཡནྣཱུནཱཧཾ སམྤིཡཱཡམཱནཱ ཝིཡ ཏཾ པཀྐོསཱཔེཏྭཱ གྷཱཏཱཔེཡྻ’’ནྟི. སཱ ཨེཀཾ མནུསྶཾ པཀྐོསིཏྭཱ ‘‘ཨཧཾ ཨིདྷ དུཀྑཾ ཛཱིཝཱམི, ཏཀྐཔཎྜིཏོ ཨཱགནྟྭཱ མཾ ཨཱདཱཡ གཙྪཏཱུ’’ཏི སཱསནཾ པེསེསི. སོ ཏཾ སཱསནཾ སུཏྭཱ སདྡཧིཏྭཱ ཏཏྠ གནྟྭཱ གཱམདྭཱརེ ཋཏྭཱ སཱསནཾ པེསེསི. སཱ ནིཀྑམིཏྭཱ ཏཾ དིསྭཱ ‘‘ཨཡྻ, སཙེ མཡཾ ཨིདཱནི གཙྪིསྶཱམ, ཙོརཛེཊྛཀོ ཨནུབནྡྷིཏྭཱ ཨུབྷོཔི ཨམྷེ གྷཱཏེསྶཏི, རཏྟིབྷཱགེ གཙྪིསྶཱམཱ’’ཏི ཏཾ ཨཱནེཏྭཱ བྷོཛེཏྭཱ ཀོཊྛཀེ ནིསཱིདཱཔེཏྭཱ སཱཡཾ ཙོརཛེཊྛཀསྶ ཨཱགནྟྭཱ སུརཾ པིཝིཏྭཱ མཏྟཀཱལེ ‘‘སཱམི, སཙེ ཨིམཱཡ ཝེལཱཡ ཏཝ སཏྟུཾ པསྶེཡྻཱསི, ཀིནྟི ནཾ ཀརེཡྻཱསཱི’’ཏི ཨཱཧ. ‘‘ཨིདཉྩིདཉྩ ཀརིསྶཱམཱིཏི’’. ‘‘ཀིཾ པན སོ དཱུརེ, ནནུ ཀོཊྛཀེ ནིསིནྣོ’’ཏི? ཙོརཛེཊྛཀོ ཨུཀྐཾ ཨཱདཱཡ ཏཏྠ གནྟྭཱ ཏཾ དིསྭཱ གཧེཏྭཱ གེཧམཛ྄ཛྷེ པཱཏེཏྭཱ ཀཔྤརཱདཱིཧི ཡཐཱརུཙིཾ པོཐེསི. སོ ¶ པོཐིཡམཱནོཔི ཨཉྙཾ ཀིཉྩི ཨཝཏྭཱ ‘‘ཀོདྷནཱ ཨཀཏཉྙཱུ ཙ, པིསུཎཱ མིཏྟབྷེདིཀཱ’’ཏི ཨེཏྟཀམེཝ ཝདཏི. ཙོརོ ཏཾ པོཐེཏྭཱ བནྡྷིཏྭཱ ནིཔཛྫཱཔེཏྭཱ སཱཡམཱསཾ བྷུཉྫིཏྭཱ སཡི. པབུདྡྷོ ཛིཎྞཱཡ སུརཱཡ པུན ཏཾ པོཐེཏུཾ ཨཱརབྷི, སོཔི ཏཱནེཝ ཙཏྟཱརི པདཱནི ཝདཏི.

ཙོརོ ཙིནྟེསི ‘‘ཨཡཾ ཨེཝཾ པོཐིཡམཱནོཔི ཨཉྙཾ ཀིཉྩི ཨཝཏྭཱ ཨིམཱནེཝ ཙཏྟཱརི པདཱནི ཝདཏི, པུཙྪིསྶཱམི ན’’ནྟི ཏསྶཱ སུཏྟབྷཱཝཾ ཉཏྭཱ ཏཾ པུཙྪི ‘‘ཨམྦྷོ ཏྭཾ ཨེཝཾ པོཐིཡམཱནོཔི ཀསྨཱ ¶ ཨེཏཱནེཝ པདཱནི ཝདསཱི’’ཏི? ཏཀྐཔཎྜིཏོ ‘‘ཏེན ཧི སུཎཱཧཱི’’ཏི ཏཾ ཀཱརཎཾ ཨཱདིཏོ པཊྛཱཡ ཀཐེསི. ‘‘ཨཧཾ པུབྦེ ཨརཉྙཝཱསིཀོ ཨེཀོ ཏཱཔསོ ཛྷཱནལཱབྷཱི, སྭཱཧཾ ཨེཏཾ གངྒཱཡ ཝུཡ྄ཧམཱནཾ ཨུཏྟཱརེཏྭཱ པཊིཛགྒིཾ. ཨཐ མཾ ཨེསཱ པལོབྷེཏྭཱ ཛྷཱནཱ པརིཧཱཔེསི, སྭཱཧཾ ཨརཉྙཾ པཧཱཡ ཨེཏཾ པོསེནྟོ པཙྩནྟགཱམཀེ ཝསཱམི, ཨཐེསཱ ཙོརེཧི ཨིདྷཱནཱིཏཱ ‘ཨཧཾ དུཀྑཾ ཝསཱམི, ཨཱགནྟྭཱ མཾ ནེཏཱུ’ཏི མཡ྄ཧཾ སཱསནཾ པེསེཏྭཱ ཨིདཱནི ¶ ཏཝ ཧཏྠེ པཱཏེསི, ཨིམིནཱ ཀཱརཎེནཱཧཾ ཨེཝཾ ཀཐེམཱི’’ཏི. ཙོརོ ཙིནྟེསི ‘‘ཡཱ ཨེསཱ ཨེཝརཱུཔེ གུཎསམྤནྣེ ཨུཔཀཱརཀེ ཨེཝཾ ཝིཔྤཊིཔཛྫི, སཱ མཡ྄ཧཾ ཀཏརཾ ནཱམ ཨུཔདྡཝཾ ན ཀརེཡྻ, མཱརེཏབྦཱ ཨེསཱ’’ཏི སོ ཏཀྐཔཎྜིཏཾ ཨསྶཱསེཏྭཱ ཏཾ པབོདྷེཏྭཱ ཁགྒཾ ཨཱདཱཡ ནིཀྑམྨ ‘‘ཨེཏཾ པུརིསཾ གཱམདྭཱརེ གྷཱཏེསྶཱམཱི’’ཏི ཝཏྭཱ ཏཱཡ སདྡྷིཾ བཧིགཱམཾ གནྟྭཱ ‘‘ཨེཏཾ ཧཏྠེ གཎྷཱ’’ཏི ཏཾ ཏཱཡ ཧཏྠེ གཱཧཱཔེཏྭཱ ཁགྒཾ ཨཱདཱཡ ཏཀྐཔཎྜིཏཾ པཧརནྟོ ཝིཡ ཏཾ དྭིདྷཱ ཚིནྡིཏྭཱ སསཱིསཾ ནྷཱཔེཏྭཱ ཏཀྐཔཎྜིཏཾ ཀཏིཔཱཧཾ པཎཱིཏེན བྷོཛནེན སནྟཔྤེཏྭཱ ཨིདཱནི ཀཧཾ གམིསྶསཱི’’ཏི ཨཱཧ. ཏཀྐཔཎྜིཏོ ‘‘གྷརཱཝཱསེན མེ ཀིཙྩཾ ནཏྠི, ཨིསིཔབྦཛྫཾ པབྦཛིཏྭཱ ཏཏྠེཝ ཨརཉྙེ ཝསིསྶཱམཱི’’ཏི ཨཱཧ. ‘‘ཏེན ཧི ཨཧམྤི པབྦཛིསྶཱམཱི’’ཏི ཨུབྷོཔི པབྦཛིཏྭཱ ཏཾ ཨརཉྙཱཡཏནཾ གནྟྭཱ པཉྩ ཨབྷིཉྙཱ ཨཊྛ ཙ སམཱཔཏྟིཡོ ནིབྦཏྟེཏྭཱ ཛཱིཝིཏཔརིཡོསཱནེ བྲཧྨལོཀཱུཔགཱ ཨཧེསུཾ.

སཏྠཱ ཨིམཱནི དྭེ ཝཏྠཱུནི ཀཐེཏྭཱ ཨནུསནྡྷིཾ གྷཊེཏྭཱ ཨབྷིསམྦུདྡྷོ ཧུཏྭཱ ཨིམཾ གཱཐམཱཧ –

༦༣.

‘‘ཀོདྷནཱ ཨཀཏཉྙཱུ ཙ, པིསུཎཱ མིཏྟབྷེདིཀཱ;

བྲཧྨཙརིཡཾ ཙར བྷིཀྑུ, སོ སུཁཾ ན ཝིཧཱཧིསཱི’’ཏི.

ཏཏྲཱཡཾ པིཎྜཏྠོ – བྷིཀྑུ ཨིཏྠིཡོ ནཱམེཏཱ ཀོདྷནཱ, ཨུཔྤནྣཾ ཀོདྷཾ ནིཝཱརེཏུཾ ན སཀྐོནྟི. ཨཀཏཉྙཱུ ཙ, ཨཏིམཧནྟམྤི ཨུཔཀཱརཾ ན ཛཱནནྟི. པིསུཎཱ ¶ ཙ, པིཡསུཉྙབྷཱཝཀརཎམེཝ ཀཐཾ ཀཐེནྟི. མིཏྟབྷེདིཀཱ, མིཏྟེ བྷིནྡནྟི, མིཏྟབྷེདནཀཐཾ ཀཐནསཱིལཱཡེཝ ¶ , ཨེཝརཱུཔེཧི པཱཔདྷམྨེཧི སམནྣཱགཏཱ ཨེཏཱ. ཀིཾ ཏེ ཨེཏཱཧི, བྲཧྨཙརིཡཾ ཙར བྷིཀྑུ, ཨཡཉྷི མེཐུནཝིརཏི པརིསུདྡྷཊྛེན བྲཧྨཙརིཡཾ ནཱམ, ཏཾ ཙར. སོ སུཁཾ ན ཝིཧཱཧིསཱིཏི སོ ཏྭཾ ཨེཏཾ བྲཧྨཙརིཡཝཱསཾ ཝསནྟོ ཛྷཱནསུཁཾ མགྒསུཁཾ ཕལསུཁཉྩ ན ཝིཧཱཧིསི, ཨེཏཾ སུཁཾ ན ཝིཛཧིསྶཏི, ཨེཏསྨཱ སུཁཱ ན པརིཧཱཡིསྶསཱིཏི ཨཏྠོ. ‘‘ན པརིཧཱཧིསཱི’’ཏིཔི པཱཋོ, ཨཡམེཝཏྠོ.

སཏྠཱ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེསི, སཙྩཔརིཡོསཱནེ ཨུཀྐཎྛིཏབྷིཀྑུ སོཏཱཔཏྟིཕལེ པཏིཊྛཧི. སཏྠཱ ཛཱཏཀཾ ¶ སམོདྷཱནེསི – ‘‘ཏདཱ ཙོརཛེཊྛཀོ ཨཱནནྡོ ཨཧོསི, ཏཀྐཔཎྜིཏོ པན ཨཧམེཝ ཨཧོསི’’ནྟི.

ཏཀྐཔཎྜིཏཛཱཏཀཝཎྞནཱ ཏཏིཡཱ.

[༦༤] ༤. དུརཱཛཱནཛཱཏཀཝཎྞནཱ

མཱསུ ནནྡི ཨིཙྪཏི མནྟི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཨུཔཱསཀཾ ཨཱརབྦྷ ཀཐེསི. ཨེཀོ ཀིར སཱཝཏྠིཝཱསཱི ཨུཔཱསཀོ ཏཱིསུ སརཎེསུ པཉྩསུ ཙ སཱིལེསུ པཏིཊྛིཏོ བུདྡྷམཱམཀོ, དྷམྨམཱམཀོ, སངྒྷམཱམཀོ, བྷརིཡཱ པནསྶ དུསྶཱིལཱ པཱཔདྷམྨཱ. ཡཾ དིཝསཾ མིཙྪཱཙཱརཾ ཙརཏི, ཏཾ དིཝསཾ སཏཀཱིཏདཱསཱི ཝིཡ ཧོཏི, མིཙྪཱཙཱརསྶ པན ཨཀཏདིཝསེ སཱམིནཱི ཝིཡ ཧོཏི ཙཎྜཱ ཕརུསཱ. སོ ཏསྶཱ བྷཱཝཾ ཛཱནིཏུཾ ན སཀྐོཏི, ཨཐ ཏཱཡ ཨུབྦཱལ༹ྷོ བུདྡྷཱུཔཊྛཱནཾ ན གཙྪཏི. ཨཐ ནཾ ཨེཀདིཝསཾ གནྡྷཔུཔྥཱདཱིནི ཨཱདཱཡ ཨཱགནྟྭཱ ཝནྡིཏྭཱ ནིསིནྣཾ སཏྠཱ ཨཱཧ – ‘‘ཀིཾ ནུ ཁོ ཏྭཾ, ཨུཔཱསཀ, སཏྟཊྛ དིཝསེ བུདྡྷཱུཔཊྛཱནཾ ནཱགཙྪསཱི’’ཏི. གྷརཎཱི མེ, བྷནྟེ, ཨེཀསྨིཾ དིཝསེ སཏཀཱིཏདཱསཱི ཝིཡ ཧོཏི, ཨེཀསྨིཾ དིཝསེ སཱམིནཱི ཝིཡ ཙཎྜཱ ཕརུསཱ. ཨཧཾ ཏསྶཱ བྷཱཝཾ ཛཱནིཏུཾ ན སཀྐོམི, སྭཱཧཾ ཏཱཡ ཨུབྦཱལ༹ྷོ བུདྡྷཱུཔཊྛཱནཾ ནཱགཙྪཱམཱིཏི. ཨཐསྶ ཝཙནཾ སུཏྭཱ སཏྠཱ ‘‘ཨུཔཱསཀ, ‘མཱཏུགཱམསྶ བྷཱཝོ ནཱམ དུཛྫཱནོ’ཏི པུབྦེཔི ཏེ པཎྜིཏཱ ཀཐཡིཾསུ, ཏྭཾ པན ཏཾ བྷཝསངྑེཔགཏཏྟཱ སལླཀྑེཏུཾ ན སཀྐོསཱི’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ དིསཱཔཱམོཀྑོ ཨཱཙརིཡོ ཧུཏྭཱ པཉྩ མཱཎཝཀསཏཱནི ¶ སིཔྤཾ སིཀྑཱཔེཏི. ཨཐེཀོ ཏིརོརཊྛཝཱསིཀོ བྲཱཧྨཎམཱཎཝཀོ ཨཱགནྟྭཱ ཏསྶ སནྟིཀེ སིཔྤཾ ཨུགྒཎྷནྟོ ཨེཀཱཡ ཨིཏྠིཡཱ པཊིབདྡྷཙིཏྟོ ཧུཏྭཱ ཏཾ བྷརིཡཾ ཀཏྭཱ ¶ ཏསྨིཾཡེཝ བཱརཱཎསིནགརེ ཝསནྟོ དྭེ ཏིསྶོ ཝེལཱཡོ ཨཱཙརིཡསྶ ཨུཔཊྛཱནཾ ན གཙྪཏི. སཱ པནསྶ བྷརིཡཱ དུསྶཱིལཱ པཱཔདྷམྨཱ. མིཙྪཱཙཱརཾ ཙིཎྞདིཝསེ དཱསཱི ཝིཡ ཧོཏི, ཨཙིཎྞདིཝསེ སཱམིནཱི ཝིཡ ཧོཏི ཙཎྜཱ ཕརུསཱ. སོ ཏསྶཱ བྷཱཝཾ ཛཱནིཏུཾ ཨསཀྐོནྟོ ཏཱཡ ཨུབྦཱལ༹ྷོ ཨཱཀུལཙིཏྟོ ཨཱཙརིཡསྶ ཨུཔཊྛཱནཾ ན གཙྪཏི. ཨཐ ནཾ སཏྟཊྛ དིཝསེ ཨཏིཀྐམིཏྭཱ ཨཱགཏཾ ‘‘ཀིཾ, མཱཎཝ ¶ , ན པཉྙཱཡསཱི’’ཏི ཨཱཙརིཡོ པུཙྪི. སོ ‘‘བྷརིཡཱ མཾ, ཨཱཙརིཡ, ཨེཀདིཝསཾ ཨིཙྪཏི པཏྠེཏི, དཱསཱི ཝིཡ ནིཧཏམཱནཱ ཧོཏི. ཨེཀདིཝསཾ སཱམིནཱི ཝིཡ ཐདྡྷཱ ཙཎྜཱ ཕརུསཱ, ཨཧཾ ཏསྶཱ བྷཱཝཾ ཛཱནིཏུཾ ན སཀྐོམི, ཏཱཡ ཨུབྦཱལ༹ྷོ ཨཱཀུལཙིཏྟོ ཏུམྷཱཀཾ ཨུཔཊྛཱནཾ ནཱགཏོམྷཱི’’ཏི. ཨཱཙརིཡོ ‘‘ཨེཝམེཏཾ, མཱཎཝ, ཨིཏྠིཡོ ནཱམ ཨནཱཙཱརཾ ཙིཎྞདིཝསེ སཱམིཀཾ ཨནུཝཏྟནྟི, དཱསཱི ཝིཡ ནིཧཏམཱནཱ ཧོནྟི. ཨནཱཙིཎྞདིཝསེ པན མཱནཏྠདྡྷཱ ཧུཏྭཱ སཱམིཀཾ ན གཎེནྟི. ཨེཝཾ ཨིཏྠིཡོ ནཱམེཏཱ ཨནཱཙཱརཱ དུསྶཱིལཱ, ཏཱསཾ བྷཱཝོ ནཱམ དུཛྫཱནོ, ཏཱསུ ཨིཙྪནྟཱིསུཔི ཨནིཙྪནྟཱིསུཔི མཛ྄ཛྷཏྟེནེཝ བྷཝིཏབྦ’’ནྟི ཝཏྭཱ ཏསྶོཝཱདཝསེན ཨིམཾ གཱཐམཱཧ –

༦༤.

‘‘མཱ སུ ནནྡི ཨིཙྪཏི མཾ, མཱ སུ སོཙི ན མིཙྪཏི;

ཐཱིནཾ བྷཱཝོ དུརཱཛཱནོ, མཙྪསྶེཝོདཀེ གཏ’’ནྟི.

ཏཏྠ མཱ སུ ནནྡི ཨིཙྪཏི མནྟི སུ-ཀཱརོ ནིཔཱཏམཏྟཾ, ‘‘ཨཡཾ ཨིཏྠཱི མཾ ཨིཙྪཏི པཏྠེཏི, མཡི སིནེཧཾ ཀརོཏཱི’’ཏི མཱ ཏུསྶི. མཱ སུ སོཙི ན མིཙྪཏཱིཏི ‘‘ཨཡཾ མཾ ན ཨིཙྪཏཱི’’ཏིཔི མཱ སོཙི, ཏསྶཱ ཨིཙྪམཱནཱཡ ནནྡིཾ, ན ཨིཙྪམཱནཱཡ ཙ སོཀཾ ཨཀཏྭཱ མཛ྄ཛྷཏྟོཝ ཧོཧཱིཏི དཱིཔེཏི. ཐཱིནཾ བྷཱཝོ དུརཱཛཱནོཏི ཨིཏྠཱིནཾ བྷཱཝོ ནཱམ ཨིཏྠིམཱཡཱཡ པཊིཙྪནྣཏྟཱ དུརཱཛཱནོ. ཡཐཱ ཀིཾ? མཙྪསྶེཝོདཀེ གཏནྟི ཡཐཱ མཙྪསྶ གམནཾ ཨུདཀེན པཊིཙྪནྣཏྟཱ དུཛྫཱནཾ, ཏེནེཝ སོ ཀེཝཊྚེ ཨཱགཏེ ཨུདཀེན གམནཾ པཊིཙྪཱདེཏྭཱ པལཱཡཏི, ཨཏྟཱནཾ གཎྷིཏུཾ ན དེཏི, ཨེཝམེཝ ཨིཏྠིཡོ མཧནྟམྤི དུསྶཱིལཀམྨཾ ཀཏྭཱ ‘‘མཡཾ ཨེཝརཱུཔཾ ན ཀརོམཱ’’ཏི ཨཏྟནཱ ཀཏཀམྨཾ ཨིཏྠིམཱཡཱཡ པཊིཙྪཱདེཏྭཱ སཱམིཀེ ཝཉྩེནྟི ¶ . ཨེཝཾ ཨིཏྠིཡོ ནཱམེཏཱ པཱཔདྷམྨཱ དུརཱཛཱནཱ, ཏཱསུ མཛ྄ཛྷཏྟོཡེཝ སུཁིཏོ ཧོཏཱིཏི.

ཨེཝཾ བོདྷིསཏྟོ ཨནྟེཝཱསིཀསྶ ཨོཝཱདཾ ཨདཱསི. ཏཏོ པཊྛཱཡ སོ ཏསྶཱ ཨུཔརི མཛ྄ཛྷཏྟོཝ ཨཧོསི. སཱཔིསྶ བྷརིཡཱ ‘‘ཨཱཙརིཡེན ཀིར མེ དུསྶཱིལབྷཱཝོ ཉཱཏོ’’ཏི ཏཏོ པཊྛཱཡ ན ཨནཱཙཱརཾ ཙརི. སཱཔི ཏསྶ ཨུཔཱསཀསྶ ཨིཏྠཱི ‘‘སམྨཱསམྦུདྡྷེན ཀིར མཡ྄ཧཾ དུརཱཙཱརབྷཱཝོ ཉཱཏོ’’ཏི ཏཏོ པཊྛཱཡ པཱཔཀམྨཾ ནཱམ ན ཨཀཱསི.

སཏྠཱཔི ¶ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེསི, སཙྩཔརིཡོསཱནེ སོ ཨུཔཱསཀོ སོཏཱཔཏྟིཕལེ པཏིཊྛཧི, སཏྠཱ ཨནུསནྡྷིཾ གྷཊེཏྭཱ ¶ ཛཱཏཀཾ སམོདྷཱནེསི – ‘‘ཏདཱ ཛཡམྤཏིཀཱཡེཝ ཨིདཱནི ཛཡམྤཏིཀཱ, ཨཱཙརིཡོ པན ཨཧམེཝ ཨཧོསི’’ནྟི.

དུརཱཛཱནཛཱཏཀཝཎྞནཱ ཙཏུཏྠཱ.

[༦༥] ༥. ཨནབྷིརཏིཛཱཏཀཝཎྞནཱ

ཡཐཱ ནདཱི ཙ པནྠོ ཙཱཏི ཨིདཾ སཏྠཱ ཛེཏཝནེ ཝིཧརནྟོ ཏཐཱརཱུཔཾཡེཝ ཨུཔཱསཀཾ ཨཱརབྦྷ ཀཐེསི. སོ པན པརིགྒཎྷནྟོ ཏསྶཱ དུསྶཱིལབྷཱཝཾ ཉཏྭཱ བྷཎྜིཏོ ཙིཏྟབྱཱཀུལཏཱཡ སཏྟཊྛ དིཝསེ ཨུཔཊྛཱནཾ ནཱགམཱསི. སོ ཨེཀདིཝསཾ ཝིཧཱརཾ གནྟྭཱ ཏཐཱགཏཾ ཝནྡིཏྭཱ ནིསིནྣོ ‘‘ཀསྨཱ སཏྟཊྛ དིཝསཱནི ནཱགཏོསཱི’’ཏི ཝུཏྟེ ‘‘བྷརིཡཱ མེ, བྷནྟེ, དུསྶཱིལཱ, ཏསྶཱ ཨུཔརི བྱཱཀུལཙིཏྟཏཱཡ ནཱགཏོམྷཱི’’ཏི ཨཱཧ. སཏྠཱ ‘‘ཨུཔཱསཀ, ཨིཏྠཱིསུ ‘ཨནཱཙཱརཱ ཨེཏཱ’ཏི ཀོཔཾ ཨཀཏྭཱ མཛ྄ཛྷཏྟེནེཝ བྷཝིཏུཾ ཝཊྚཏཱིཏི པུབྦེཔི ཏེ པཎྜིཏཱ ཀཐཡིཾསུ, ཏྭཾ པན བྷཝནྟརེན པཊིཙྪནྣཏྟཱ ཏཾ ཀཱརཎཾ ན སལླཀྑེསཱི’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ པུརིམནཡེནེཝ དིསཱཔཱམོཀྑོ ཨཱཙརིཡོ ཨཧོསི. ཨཐསྶ ཨནྟེཝཱསིཀོ བྷརིཡཱཡ དོསཾ དིསྭཱ བྱཱཀུལཙིཏྟཏཱཡ ཀཏིཔཱཧཾ ཨནཱགནྟྭཱ ཨེཀདིཝསཾ ཨཱཙརིཡེན པུཙྪིཏོ ཏཾ ཀཱརཎཾ ནིཝེདེསི. ཨཐསྶ ཨཱཙརིཡོ ‘‘ཏཱཏ, ཨིཏྠིཡོ ནཱམ སབྦསཱདྷཱརཎཱ ¶ , ཏཱསུ ‘དུསྶཱིལཱ ཨེཏཱ’ཏི པཎྜིཏཱ ཀོཔཾ ན ཀརོནྟཱི’’ཏི ཝཏྭཱ ཨོཝཱདཝསེན ཨིམཾ གཱཐམཱཧ –

༦༥.

‘‘ཡཐཱ ནདཱི ཙ པནྟོ ཙ, པཱནཱགཱརཾ སབྷཱ པཔཱ;

ཨེཝཾ ལོཀིཏྠིཡོ ནཱམ, ནཱསཾ ཀུཛ྄ཛྷནྟི པཎྜིཏཱ’’ཏི.

ཏཏྠ ཡཐཱ ནདཱིཏི ཡཐཱ ཨནེཀཏིཏྠཱ ནདཱི ནྷཱནཏྠཱཡ སམྤཏྟསམྤཏྟཱནཾ ཙཎྜཱལཱདཱིནམྤི ཁཏྟིཡཱདཱིནམྤི སཱདྷཱརཎཱ, ན ཏཏྠ ཀོཙི ནྷཱཡིཏུཾ ན ལབྷཏི ནཱམ. ‘‘པནྠོ’’ཏིཨཱདཱིསུཔི ཡཐཱ མཧཱམགྒོཔི སབྦེསཾ སཱདྷཱརཎོ ¶ , ན ཀོཙི ཏེན གནྟུཾ ན ལབྷཏི. པཱནཱགཱརམྤི སུརཱགེཧཾ སབྦེསཾ སཱདྷཱརཎཾ, ཡོ ཡོ པཱཏུཀཱམོ, སབྦོ ཏཏྠ པཝིསཏེཝ. པུཉྙཏྠིཀེཧི ཏཏྠ ཏཏྠ མནུསྶཱནཾ ནིཝཱསཏྠཱཡ ཀཏཱ སབྷཱཔི སཱདྷཱརཎཱ, ན ཏཏྠ ཀོཙི པཝིསིཏུཾ ན ལབྷཏི. མཧཱམགྒེ ¶ པཱནཱིཡཙཱཊིཡོ ཋཔེཏྭཱ ཀཏཱ པཔཱཔི སབྦེསཾ སཱདྷཱརཎཱ, ན ཏཏྠ ཀོཙི པཱནཱིཡཾ པིཝིཏུཾ ན ལབྷཏི. ཨེཝཾ ལོཀིཏྠིཡོ ནཱམཱཏི ཨེཝམེཝ ཏཱཏ མཱཎཝ ཨིམསྨིཾ ལོཀེ ཨིཏྠིཡོཔི སབྦསཱདྷཱརཎཱཝ, ཏེནེཝ ཙ སཱདྷཱརཎཊྛེན ནདཱིཔནྠཔཱནཱགཱརསབྷཱཔཔཱསདིསཱ. ཏསྨཱ ནཱསཾ ཀུཛ྄ཛྷནྟི པཎྜིཏཱ, ཨེཏཱསཾ ཨིཏྠཱིནཾ ‘‘ལཱམིཀཱ ཨེཏཱ ཨནཱཙཱརཱ དུསྶཱིལཱ སབྦསཱདྷཱརཎཱ’’ཏི ཙིནྟེཏྭཱ པཎྜིཏཱ ཚེཀཱ བུདྡྷིསམྤནྣཱ ན ཀུཛ྄ཛྷནྟཱིཏི.

ཨེཝཾ བོདྷིསཏྟོ ཨནྟེཝཱསིཀསྶ ཨོཝཱདཾ ཨདཱསི, སོ ཏཾ ཨོཝཱདཾ སུཏྭཱ མཛ྄ཛྷཏྟོ ཨཧོསི. བྷརིཡཱཔིསྶ ‘‘ཨཱཙརིཡེན ཀིརམྷི ཉཱཏཱ’’ཏི ཏཏོ པཊྛཱཡ པཱཔཀམྨཾ ན ཨཀཱསི. ཏསྶཔི ཨུཔཱསཀསྶ བྷརིཡཱ ‘‘སཏྠཱརཱ ཀིརམྷི ཉཱཏཱ’’ཏི ཏཏོ པཊྛཱཡ པཱཔཀམྨཾ ན ཨཀཱསི.

སཏྠཱ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེསི, སཙྩཔརིཡོསཱནེ ཨུཔཱསཀོ སོཏཱཔཏྟིཕལེ པཏིཊྛཧི. སཏྠཱཔི ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཛཡམྤཏིཀཱཝ ཨེཏརཧི ཛཡམྤཏིཀཱ, ཨཱཙརིཡབྲཱཧྨཎོ པན ཨཧམེཝ ཨཧོསི’’ནྟི.

ཨནབྷིརཏིཛཱཏཀཝཎྞནཱ པཉྩམཱ.

[༦༦] ༦. མུདུལཀྑཎཛཱཏཀཝཎྞནཱ

ཨེཀཱ ཨིཙྪཱ པུརེ ཨཱསཱིཏི ཨིདཾ སཏྠཱ ཛེཏཝནེ ཝིཧརནྟོ སཾཀིལེསཾ ཨཱརབྦྷ ཀཐེསི. ཨེཀོ ཀིར སཱཝཏྠིཝཱསཱི ཀུལཔུཏྟོ སཏྠུ དྷམྨདེསནཾ ¶ སུཏྭཱ རཏནསཱསནེ ཨུརཾ དཏྭཱ པབྦཛིཏྭཱ པཊིཔནྣཀོ ཡོགཱཝཙརོ ཨཝིསྶཊྛཀམྨཊྛཱནོ ཧུཏྭཱ ཨེཀདིཝསཾ སཱཝཏྠིཡཾ པིཎྜཱཡ ཙརནྟོ ཨེཀཾ ཨལངྐཏཔཊིཡཏྟཾ ཨིཏྠིཾ དིསྭཱ སུབྷཝསེན ཨིནྡྲིཡཱནི བྷིནྡིཏྭཱ ཨོལོཀེསི. ཏསྶ ཨབྦྷནྟརེ ཀིལེསོ ཙལི, ཝཱསིཡཱ ཨཱཀོཊིཏཁཱིརརུཀྑོ ཝིཡ ཨཧོསི. སོ ཏཏོ པཊྛཱཡ ¶ ཀིལེསཝསིཀོ ཧུཏྭཱ ནེཝ ཀཱཡསྶཱདཾ ན ཙིཏྟསྶཱདཾ ལབྷཏི, བྷནྟམིགསཔྤཊིབྷཱགོ སཱསནེ ཨནབྷིརཏོ པརཱུལ༹ྷཀེསལོམནཁོ ཀིལིཊྛཙཱིཝརོ ཨཧོསི. ཨཐསྶ ཨིནྡྲིཡཝིཀཱརཾ དིསྭཱ སཧཱཡཀཱ བྷིཀྑཱུ ‘‘ཀིཾ ནུ ཁོ ཏེ, ཨཱཝུསོ, ན ཡཐཱ པོརཱཎཱནི ཨིནྡྲིཡཱནཱི’’ཏི པུཙྪིཾསུ. ཨནབྷིརཏོསྨི, ཨཱཝུསོཏི.

ཨཐ ¶ ནཾ ཏེ སཏྠུ སནྟིཀཾ ནཡིཾསུ. སཏྠཱ ‘‘ཀིཾ, བྷིཀྑཝེ, ཨནིཙྪམཱནཾ བྷིཀྑུཾ ཨཱདཱཡ ཨཱགཏཏྠཱ’’ཏི པུཙྪི. ‘‘ཨཡཾ, བྷནྟེ, བྷིཀྑུ ཨནབྷིརཏོ’’ཏི? ‘‘སཙྩཾ བྷིཀྑཱུ’’ཏི. ‘‘སཙྩཾ བྷགཝཱ’’ཏི. ‘‘ཀོ ཏཾ ཨུཀྐཎྛཱཔེསཱི’’ཏི? ‘‘ཨཧཾ, བྷནྟེ, པིཎྜཱཡ ཙརནྟོ ཨེཀཾ ཨིཏྠིཾ དིསྭཱ ཨིནྡྲིཡཱནི བྷིནྡིཏྭཱ ཨོལོཀེསིཾ, ཨཐ མེ ཀིལེསོ ཙལི, ཏེནམྷི ཨུཀྐཎྛིཏོ’’ཏི. ཨཐ ནཾ སཏྠཱ ‘‘ཨནཙྪརིཡམེཏཾ བྷིཀྑུ, ཡཾ ཏྭཾ ཨིནྡྲིཡཱནི བྷིནྡིཏྭཱ ཝིསབྷཱགཱརམྨཎཾ སུབྷཝསེན ཨོལོཀེནྟོ ཀིལེསེཧི ཀམྤིཏོ, པུབྦེ པཉྩཱབྷིཉྙཱ ཨཊྛསམཱཔཏྟིལཱབྷིནོ ཛྷཱནབལེན ཀིལེསེ ཝིཀྑམྦྷེཏྭཱ ཝིསུདྡྷཙིཏྟཱ གགནཏལཙརཱ བོདྷིསཏྟཱཔི ཨིནྡྲིཡཱནི བྷིནྡིཏྭཱ ཝིསབྷཱགཱརམྨཎཾ ཨོལོཀཡམཱནཱ ཛྷཱནཱ པརིཧཱཡིཏྭཱ ཀིལེསེཧི ཀམྤིཏཱ མཧཱདུཀྑཾ ཨནུབྷཝིཾསུ. ན ཧི སིནེརུཨུཔྤཱཊནཀཝཱཏོ ཧཏྠིམཏྟཾ མུཎྜཔབྦཏཾ, མཧཱཛམྦུཨུམྨཱུལཀཝཱཏོ ཚིནྣཏཊེ ཝིརཱུལ༹ྷགཙྪཀཾ, མཧཱསམུདྡཾ ཝཱ པན སོསནཀཝཱཏོ ཁུདྡཀཏལཱ༹ཀཾ ཀིསྨིཉྩིདེཝ གཎེཏི, ཨེཝཾ ཨུཏྟམབུདྡྷཱིནཾ ནཱམ ཝིསུདྡྷཙིཏྟཱནཾ བོདྷིསཏྟཱནཾ ཨཉྙཱཎབྷཱཝཀརཱ ཀིལེསཱ ཏཡི ཀིཾ ལཛྫིསྶནྟི, ཝིསུདྡྷཱཔི སཏྟཱ སཾཀིལིསྶནྟི, ཨུཏྟམཡསསམངྒིནོཔི ཨཱཡསཀྱཾ པཱཔུཎནྟཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཀཱསིརཊྛེ ཨེཀསྶ མཧཱཝིབྷཝསྶ བྲཱཧྨཎསྶ ཀུལེ ནིབྦཏྟིཏྭཱ ཝིཉྙུཏཾ པཏྟོ སབྦསིཔྤཱནཾ པཱརཾ གནྟྭཱ ཀཱམེ པཧཱཡ ཨིསིཔབྦཛྫཾ པབྦཛིཏྭཱ ཀསིཎཔརིཀམྨཾ ཀཏྭཱ པཉྩ ཨབྷིཉྙཱ ཙ ཨཊྛ སམཱཔཏྟིཡོ ཙ ཨུཔྤཱདེཏྭཱ ཛྷཱནསུཁེན ཝཱིཏིནཱམེནྟོ ཧིམཝནྟཔྤདེསེ ཝཱསཾ ཀཔྤེསི. སོ ཨེཀསྨིཾ ཀཱལེ ལོཎམྦིལསེཝནཏྠཱཡ ¶ ཧིམཝནྟཱ ཨོཏརིཏྭཱ བཱརཱཎསིཾ པཏྭཱ རཱཛུཡྻཱནེ ཝསིཏྭཱ པུནདིཝསེ ཀཏསརཱིརཔཊིཛགྒནོ རཏྟཝཱཀམཡཾ ནིཝཱསནཔཱརུཔནཾ སཎྛཱཔེཏྭཱ ཨཛིནཙམྨཾ ཨེཀསྨིཾ ཨཾསེ ཀཏྭཱ ཛཊཱམཎྜལཾ བནྡྷིཏྭཱ བྷིཀྑཱབྷཱཛནམཱདཱཡ བཱརཱཎསིཡཾ བྷིཀྑཱཡ ཙརམཱནོ རཉྙོ གྷརདྭཱརཾ སམྤཱཔུཎི. རཱཛཱ ཏསྶ ཨིརིཡཱཔཐེཡེཝ པསཱིདིཏྭཱ ¶ པཀྐོསཱཔེཏྭཱ མཧཱརཧེ ཨཱསནེ ནིསཱིདཱཔེཏྭཱ པཎཱིཏེན ཁཱདནཱིཡབྷོཛནཱིཡེན སནྟཔྤེཏྭཱ ཀཏཱནུམོདནཾ ཨུཡྻཱནེ ཝསནཏྠཱཡ ཡཱཙི. སོ སམྤཊིཙྪིཏྭཱ རཱཛགེཧེ བྷུཉྫིཏྭཱ རཱཛཀུལཾ ཨོཝདམཱནོ ཏསྨིཾ ཨུཡྻཱནེ སོལ༹ས ཝསྶཱནི ཝསི.

ཨཐེཀདིཝསཾ རཱཛཱ ཀུཔིཏཾ པཙྩནྟཾ ཝཱུཔསམེཏུཾ གཙྪནྟོ མུདུལཀྑཎཾ ནཱམ ཨགྒམཧེསིཾ ‘‘ཨཔྤམཏྟཱ ཨཡྻསྶ ཨུཔཊྛཱནཾ ཀརོཧཱི’’ཏི ཝཏྭཱ ཨགམཱསི. བོདྷིསཏྟོ རཉྙོ གཏཀཱལཏོ པཊྛཱཡ ཨཏྟནོ རུཙྩནཝེལཱཡ རཱཛགེཧཾ གཙྪཏི. ཨཐེཀདིཝསཾ མུདུལཀྑཎཱ བོདྷིསཏྟསྶ ཨཱཧཱརཾ སམྤཱདེཏྭཱ – ‘‘ཨཛྫ ཨཡྻོ ཙིརཱཡཏཱི’’ཏི གནྡྷོདཀེན ནྷཱཡིཏྭཱ སབྦཱལངྐཱརཔཊིམཎྜིཏཱ ¶ མཧཱཏལེ ཙཱུལ༹སཡནཾ པཉྙཱཔེཏྭཱ བོདྷིསཏྟསྶ ཨཱགམནཾ ཨོལོཀཡམཱནཱ ནིཔཛྫི. བོདྷིསཏྟོཔི ཨཏྟནོ ཝེལཾ སལླཀྑེཏྭཱ ཛྷཱནཱ ཝུཊྛཱཡ ཨཱཀཱསེནེཝ རཱཛནིཝེསནཾ ཨགམཱསི. མུདུལཀྑཎཱ ཝཱཀཙཱིརསདྡཾ སུཏྭཱཝ ‘‘ཨཡྻོ, ཨཱགཏོ’’ཏི ཝེགེན ཨུཊྛཧི, ཏསྶཱ ཝེགེན ཨུཊྛཧནྟིཡཱ མཊྛསཱཊཀོ བྷསྶི. ཏཱཔསོཔི སཱིཧཔཉྫརེན པཝིསནྟོ དེཝིཡཱ ཝིསབྷཱགརཱུཔཱརམྨཎཾ ཨིནྡྲིཡཱནི བྷིནྡིཏྭཱ སུབྷཝསེན ཨོལོཀེསི. ཨཐསྶ ཨབྦྷནྟརེ ཀིལེསོ ཙལི, ཝཱསིཡཱ པཧཊཁཱིརརུཀྑོ ཝིཡ ཨཧོསི. ཏཱཝདེཝསྶ ཛྷཱནཾ ཨནྟརདྷཱཡི, ཚིནྣཔཀྑོ ཀཱཀོ ཝིཡ ཨཧོསི. སོ ཋིཏཀོཝ ཨཱཧཱརཾ གཧེཏྭཱ ཨབྷུཉྫིཏྭཱཝ ཀིལེསཀམྤིཏོ པཱསཱདཱ ཨོརུཡ྄ཧ ཨུཡྻཱནཾ གནྟྭཱ པཎྞསཱལཾ པཝིསིཏྭཱ ཕལཀཏྠརཎསཡནསྶ ཧེཊྛཱ ཨཱཧཱརཾ ཋཔེཏྭཱ ཝིསབྷཱགཱརམྨཎེན བདྡྷོ ཀིལེསགྒིནཱ ཌཡ྄ཧམཱནོ ནིརཱཧཱརཏཱཡ སུསྶམཱནོ སཏྟ དིཝསཱནི ཕལཀཏྠརཎེ ནིཔཛྫི.

སཏྟམེ དིཝསེ རཱཛཱ པཙྩནྟཾ ཝཱུཔསམེཏྭཱ ཨཱགཏོ ནགརཾ པདཀྑིཎཾ ཀཏྭཱ ནིཝེསནཾ ཨགནྟྭཱཝ ‘‘ཨཡྻཾ ¶ པསྶིསྶཱམཱི’’ཏི ཨུཡྻཱནཾ གནྟྭཱ པཎྞསཱལཾ པཝིསིཏྭཱ ཏཾ ནིཔནྣཀཾ དིསྭཱ ‘‘ཨེཀཾ ཨཕཱསུཀཾ ཛཱཏཾ མཉྙེ’’ཏི པཎྞསཱལཾ སོདྷཱཔེཏྭཱ པཱདེ པརིམཛྫནྟོ ‘‘ཀིཾ, ཨཡྻ, ཨཕཱསུཀ’’ནྟི པུཙྪི. ‘‘མཧཱརཱཛ ཨཉྙཾ མེ ཨཕཱསུཀཾ ནཏྠི, ཀིལེསཝསེན པནམྷི པཊིབདྡྷཙིཏྟོ ཛཱཏོ’’ཏི. ‘‘ཀཧཾ པཊིབདྡྷཾ ཏེ, ཨཡྻ, ཙིཏྟ’’ནྟི? ‘‘མུདུལཀྑཎཱཡ, མཧཱརཱཛཱ’’ཏི. ‘‘སཱདྷུ ཨཡྻ, ཨཧཾ མུདུལཀྑཎཾ ཏུམྷཱཀཾ དམྨཱི’’ཏི ¶ ཏཱཔསཾ ཨཱདཱཡ ནིཝེསནཾ པཝིསིཏྭཱ དེཝིཾ སབྦཱལངྐཱརཔཊིམཎྜིཏཾ ཀཏྭཱ ཏཱཔསསྶ ཨདཱསི. དདམཱནོཡེཝ ཙ མུདུལཀྑཎཱཡ སཉྙམདཱསི ‘‘ཏཡཱ ཨཏྟནོ བལེན ཨཡྻཾ རཀྑིཏུཾ ཝཱཡམིཏབྦ’’ནྟི. ‘‘སཱདྷུ, དེཝ, རཀྑིསྶཱམཱི’’ཏི. ཏཱཔསོ དེཝིཾ གཧེཏྭཱ རཱཛནིཝེསནཱ ཨོཏརི.

ཨཐ ནཾ མཧཱདྭཱརཏོ ནིཀྑནྟཀཱལེ ‘‘ཨཡྻ, ཨམྷཱཀཾ ཨེཀཾ གེཧཾ ལདྡྷུཾ ཝཊྚཏི, གཙྪ, རཱཛཱནཾ གེཧཾ ཡཱཙཱཧཱི’’ཏི ཨཱཧ. ཏཱཔསོ གནྟྭཱ གེཧཾ ཡཱཙི. རཱཛཱ མནུསྶཱནཾ ཝཙྩཀུཊིཀིཙྩཾ སཱདྷཡམཱནཾ ཨེཀཾ ཚཌྜིཏགེཧཾ དཱཔེསི. སོ དེཝིཾ གཧེཏྭཱ ཏཏྠ ཨགམཱསི, སཱ པཝིསིཏུཾ ན ཨིཙྪཏི. ‘‘ཀིཾཀཱརཎཱ ན པཝིསསཱི’’ཏི? ‘‘ཨསུཙིབྷཱཝེནཱ’’ཏི. ཨིདཱནི ‘‘ཀིཾ ཀརོམཱི’’ཏི. ‘‘པཊིཛགྒཱཧི ན’’ནྟི ཝཏྭཱ རཉྙོ སནྟིཀཾ པེསེཏྭཱ ‘‘གཙྪ, ཀུདྡཱལཾ ཨཱཧར, པཙྪིཾ ཨཱཧརཱ’’ཏི ཨཱཧརཱཔེཏྭཱ ཨསུཙིཉྩ སངྐཱརཉྩ ཚཌྜཱཔེཏྭཱ གཱམཡཾ ཨཱཧརཱཔེཏྭཱ ལིམྤཱཔེཏྭཱ པུནཔི ‘‘གཙྪ, མཉྩཾ ཨཱཧར, པཱིཋཾ ཨཱཧར, ཨཏྠརཎཾ ཨཱཧར, ཙཱཊིཾ ཨཱཧར, གྷཊཾ ཨཱཧརཱ’’ཏི ཨེཀམེཀཾ ཨཱཧརཱཔེཏྭཱ པུན ཨུདཀཱཧརཎཱདཱིནཾ ཨཏྠཱཡ ཨཱཎཱཔེསི. སོ གྷཊཾ ཨཱདཱཡ ཨུདཀཾ ཨཱཧརིཏྭཱ ཙཱཊིཾ པཱུརེཏྭཱ ནྷཱནོདཀཾ སཛྫེཏྭཱ སཡནཾ ཨཏྠརི. ཨཐ ནཾ སཡནེ ཨེཀཏོ ¶ ནིསིནྣཾ དཱཋིཀཱསུ གཧེཏྭཱ ‘‘ཏཝ སམཎབྷཱཝཾ ཝཱ བྲཱཧྨཎབྷཱཝཾ ཝཱ ན ཛཱནཱསཱི’’ཏི ཨོཎམེཏྭཱ ཨཏྟནོ ཨབྷིམུཁཾ ཨཱཀཌྜྷི. སོ ཏསྨིཾ ཀཱལེ སཏིཾ པཊིལབྷི, ཨེཏྟཀཾ པན ཀཱལཾ ཨཉྙཱཎཱི ཨཧོསི. ཨེཝཾ ཨཉྙཱཎཀརཎཱ ཀིལེསཱ ནཱམ. ‘‘ཀཱམཙྪནྡནཱིཝརཎཾ, བྷིཀྑཝེ, ཨནྡྷཀརཎཾ ¶ ཨཉྙཱཎཀརཎ’’ནྟིཨཱདི (སཾ. ནི. ༥.༢༢༡) ཙེཏྠ ཝཏྟབྦཾ.

སོ སཏིཾ པཊིལབྷིཏྭཱ ཙིནྟེསི ‘‘ཨཡཾ ཏཎྷཱ ཝཌྜྷམཱནཱ མམ ཙཏཱུཧི ཨཔཱཡེཧི སཱིསཾ ཨུཀྑིཔིཏུཾ ན དསྶཏི, ཨཛྫེཝ མཡཱ ཨིམཾ རཉྙོ ནིཡྻཱདེཏྭཱ ཧིམཝནྟཾ པཝིསིཏུཾ ཝཊྚཏཱི’’ཏི. སོ ཏཾ ཨཱདཱཡ རཱཛཱནཾ ཨུཔསངྐམིཏྭཱ ‘‘མཧཱརཱཛ, ཏཝ དེཝིཡཱ མཡ྄ཧཾ ཨཏྠོ ནཏྠི, ཀེཝལཾ མེ ཨིམཾ ནིསྶཱཡ ཏཎྷཱ ཝཌྜྷིཏཱ’’ཏི ཝཏྭཱ ཨིམཾ གཱཐམཱཧ –

༦༦.

‘‘ཨེཀཱ ཨིཙྪཱ པུརེ ཨཱསི, ཨལདྡྷཱ མུདུལཀྑཎཾ;

ཡཏོ ལདྡྷཱ ཨལཱ༹རཀྑཱི, ཨིཙྪཱ ཨིཙྪཾ ཝིཛཱཡཐཱ’’ཏི.

ཏཏྲཱཡཾ ¶ པིཎྜཏྠོ – མཧཱརཱཛ, མཡ྄ཧཾ ཨིམཾ ཏཝ དེཝིཾ མུདུལཀྑཎཾ ཨལབྷིཏྭཱ པུརེ ‘‘ཨཧོ ཝཏཱཧཾ ཨེཏཾ ལབྷེཡྻ’’ནྟི ཨེཀཱ ཨིཙྪཱ ཨཱསི, ཨེཀཱཝ ཏཎྷཱ ཨུཔྤཛྫི. ཡཏོ པན མེ ཨཡཾ ཨལཱ༹རཀྑཱི ཝིསཱལནེཏྟཱ སོབྷནལོཙནཱ ལདྡྷཱ, ཨཐ མེ སཱ པུརིམིཀཱ ཨིཙྪཱ གེཧཏཎྷཾ ཨུཔཀརཎཏཎྷཾ ཨུཔབྷོགཏཎྷནྟི ཨུཔརཱུཔརི ཨཉྙཾ ནཱནཔྤཀཱརཾ ཨིཙྪཾ ཝིཛཱཡཐ ཛནེསི ཨུཔྤཱདེསི. སཱ ཁོ པན མེ ཨེཝཾ ཝཌྜྷམཱནཱ ཨིཙྪཱ ཨཔཱཡཏོ སཱིསཾ ཨུཀྑིཔིཏུཾ ན དསྶཏི, ཨལཾ མེ ཨིམཱཡ, ཏྭཉྙེཝ ཏཝ བྷརིཡཾ གཎྷ, ཨཧཾ པན ཧིམཝནྟཾ གམིསྶཱམཱིཏི ཏཱཝདེཝ ནཊྛཾ ཛྷཱནཾ ཨུཔྤཱདེཏྭཱ ཨཱཀཱསེ ནིསིནྣོ དྷམྨཾ དེསེཏྭཱ རཉྙོ ཨོཝཱདཾ དཏྭཱ ཨཱཀཱསེནེཝ ཧིམཝནྟཾ གནྟྭཱ པུན མནུསྶཔཐཾ ནཱམ ནཱགམཱསི, བྲཧྨཝིཧཱརེ པན བྷཱཝེཏྭཱ ཨཔརིཧཱིནཛ྄ཛྷཱནོ བྲཧྨལོཀེ ནིབྦཏྟི.

སཏྠཱ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེསི, སཙྩཔརིཡོསཱནེ སོ བྷིཀྑུ ཨརཧཏྟཕལེ པཏིཊྛཧི. སཏྠཱཔི ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ རཱཛཱ ཨཱནནྡོ ཨཧོསི, མུདུལཀྑཎཱ ཨུཔྤལཝཎྞཱ, ཨིསི པན ཨཧམེཝ ཨཧོསི’’ནྟི.

མུདུལཀྑཎཛཱཏཀཝཎྞནཱ ཚཊྛཱ.

[༦༧] ༧. ཨུཙྪངྒཛཱཏཀཝཎྞནཱ

ཨུཙྪངྒེ ¶ དེཝ མེ པུཏྟོཏི ཨིདཾ སཏྠཱ ཛེཏཝནེ ཝིཧརནྟོ ཨཉྙཏརཾ ཛཱནཔདིཏྠིཾ ཨཱརབྦྷ ཀཐེསི. ཨེཀསྨིཉྷི སམཡེ ཀོསལརཊྛེ ཏཡོ ཛནཱ ཨཉྙཏརསྨིཾ ཨཊཝིམུཁེ ཀསནྟི. ཏསྨིཾ སམཡེ ཨནྟོཨཊཝིཡཾ ཙོརཱ མནུསྶེ ཝིལུམྤིཏྭཱ པལཱཡིཾསུ. མནུསྶཱ ཏེ ¶ ཙོརེ པརིཡེསིཏྭཱ ཨཔསྶནྟཱ ཏཾ ཋཱནཾ ཨཱགམྨ ‘‘ཏུམྷེ ཨཊཝིཡཾ ཝིལུམྤིཏྭཱ ཨིདཱནི ཀསྶཀཱ ཝིཡ ཧོཐཱ’’ཏི ‘‘ཏེ ཙོརཱ ཨིམེ’’ཏི བནྡྷིཏྭཱ ཨཱནེཏྭཱ ཀོསལརཉྙོ ཨདཾསུ. ཨཐེཀཱ ཨིཏྠཱི ཨཱགནྟྭཱ ‘‘ཨཙྪཱདནཾ མེ དེཐ, ཨཙྪཱདནཾ མེ དེཐཱ’’ཏི པརིདེཝནྟཱི པུནཔྤུནཾ རཱཛནིཝེསནཾ པརིཡཱཏི. རཱཛཱ ཏསྶཱ སདྡཾ སུཏྭཱ ‘‘གཙྪཐ, དེཐ ཨིམིསྶཱ ཨཙྪཱདན’’ནྟི ཨཱཧ. མནུསྶཱ སཱཊཀཾ གཧེཏྭཱ ཨདཾསུ. སཱ ཏཾ དིསྭཱ ‘‘ནཱཧཾ ཨེཏཾ ཨཙྪཱདནཾ ཡཱཙཱམི ¶ , སཱམིཀཙྪཱདནཾ ཡཱཙཱམཱི’’ཏི ཨཱཧ. མནུསྶཱ གནྟྭཱ རཉྙོ ཨཱརོཙཡིཾསུ ‘‘ན ཀིརེསཱ ཨིདཾ ཨཙྪཱདནཾ ཀཐེཏི, སཱམིཀཙྪཱདནཾ ཀཐེཏཱི’’ཏི. ཨཐ ནཾ རཱཛཱ པཀྐོསཱཔེཏྭཱ ‘‘ཏྭཾ ཀིར སཱམིཀཙྪཱདནཾ ཡཱཙསཱི’’ཏི པུཙྪི. ཨཱམ, དེཝ, ཨིཏྠིཡཱ ཧི སཱམིཀོ ཨཙྪཱདནཾ ནཱམ, སཱམིཀེ ཧི ཨསཏི སཧསྶམཱུལམྤི སཱཊཀཾ ནིཝཏྠཱ ཨིཏྠཱི ནགྒཱཡེཝ ནཱམ. ཨིམསྶ པནཏྠསྶ སཱདྷནཏྠཾ –

‘‘ནགྒཱ ནདཱི ཨནཱུདཀཱ, ནགྒཾ རཊྛཾ ཨརཱཛཀཾ;

ཨིཏྠཱིཔི ཝིདྷཝཱ ནགྒཱ, ཡསྶཱཔི དས བྷཱཏརོ’’ཏི. (ཛཱ. ༢.༢༢.༡༨༤༠) –

ཨིདཾ སུཏྟཾ ཨཱཧརིཏབྦཾ.

རཱཛཱ ཏསྶཱ པསནྣོ ‘‘ཨིམེ ཏེ ཏཡོ ཛནཱ ཀེ ཧོནྟཱི’’ཏི པུཙྪི. ‘‘ཨེཀོ མེ, དེཝ, སཱམིཀོ, ཨེཀོ བྷཱཏཱ, ཨེཀོ པུཏྟོ’’ཏི. རཱཛཱ ‘‘ཨཧཾ ཏེ ཏུཊྛོ, ཨིམེསུ ཏཱིསུ ཨེཀཾ དེམི, ཀཏརཾ ཨིཙྪསཱི’’ཏི པུཙྪི. སཱ ཨཱཧ ‘‘ཨཧཾ, དེཝ, ཛཱིཝམཱནཱ ཨེཀཾ སཱམིཀཾ ལབྷིསྶཱམི, པུཏྟམྤི ལབྷིསྶཱམིཡེཝ, མཱཏཱཔིཏཱུནཾ པན མེ མཏཏྟཱ བྷཱཏཱཝ དུལླབྷོ, བྷཱཏརཾ མེ དེཧི, དེཝཱ’’ཏི. རཱཛཱ ཏུསྶིཏྭཱ ཏཡོཔི ཝིསྶཛྫེསི. ཨེཝཾ ཏཾ ཨེཀིཀཾ ནིསྶཱཡ ཏེ ཏཡོ ཛནཱ དུཀྑཏོ མུཏྟཱ. ཏཾ ཀཱརཎཾ བྷིཀྑུསངྒྷེ པཱཀཊཾ ཛཱཏཾ. ཨཐེཀདིཝསཾ བྷིཀྑཱུ དྷམྨསབྷཱཡཾ སནྣིཔཏིཏཱ ‘‘ཨཱཝུསོ, ཨེཀཾ ཨིཏྠིཾ ནིསྶཱཡ ཏཡོ ཛནཱ དུཀྑཏོ མུཏྟཱ’’ཏི ཏསྶཱ གུཎཀཐཱཡ ནིསཱིདིཾསུ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ¶ ནཱམཱ’’ཏི ཝུཏྟེ ‘‘ན, བྷིཀྑཝེ, ཨེསཱ ཨིཏྠཱི ཨིདཱནེཝ ཏེ ཏཡོ ཛནེ དུཀྑཱ མོཙེཏི, པུབྦེཔི མོཙེསིཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ ཏཡོ ཛནཱ ཨཊཝིམུཁེ ཀསནྟཱིཏི སབྦཾ པུརིམསདིསམེཝ. ཏདཱ པན རཉྙཱ ‘‘ཏཱིསུ ཛནེསུ ཀཾ ཨིཙྪསཱི’’ཏི ཝུཏྟེ སཱ ཨཱཧ – ‘‘ཏཡོཔི དཱཏུཾ ན སཀྐོཐ, དེཝཱ’’ཏི? ‘‘ཨཱམ, ན སཀྐོམཱི’’ཏི. ‘‘སཙེ ¶ ཏཡོ དཱཏུཾ ན སཀྐོཐ, བྷཱཏརཾ མེ དེཐཱ’’ཏི. ‘‘པུཏྟཾ ཝཱ སཱམིཀཾ ཝཱ གཎྷ, ཀིཾ ཏེ བྷཱཏརཱ’’ཏི ཙ ཝུཏྟཱ ‘‘ཨེཏེ ནཱམ དེཝ སུལབྷཱ, བྷཱཏཱ པན དུལླབྷོ’’ཏི ཝཏྭཱ ཨིམཾ གཱཐམཱཧ –

༦༧.

‘‘ཨུཙྪངྒེ ¶ དེཝ མེ པུཏྟོ, པཐེ དྷཱཝནྟིཡཱ པཏི;

ཏཉྩ དེསཾ ན པསྶཱམི, ཡཏོ སོདརིཡམཱནཡེ’’ཏི.

ཏཏྠ ཨུཙྪངྒེ, དེཝ, མེ པུཏྟོཏི དེཝ, མཡ྄ཧཾ པུཏྟོ ཨུཙྪངྒེཡེཝ. ཡཐཱ ཧི ཨརཉྙཾ པཝིསིཏྭཱ ཨུཙྪངྒེ ཀཏྭཱ ཌཱཀཾ ཨུཙྩིནིཏྭཱ ཏཏྠ པཀྑིཔནྟིཡཱ ཨུཙྪངྒེ ཌཱཀཾ ནཱམ སུལབྷཾ ཧོཏི, ཨེཝཾ ཨིཏྠིཡཱ པུཏྟོཔི སུལབྷོ ཨུཙྪངྒེ ཌཱཀསདིསོཝ. ཏེན ཝུཏྟཾ ‘‘ཨུཙྪངྒེ, དེཝ, མེ པུཏྟོ’’ཏི. པཐེ དྷཱཝནྟིཡཱ པཏཱིཏི མགྒཾ ཨཱརུཡ྄ཧ ཨེཀིཀཱཡ གཙྪམཱནཱཡཔི ཧི ཨིཏྠིཡཱ པཏི ནཱམ སུལབྷོ, དིཊྛདིཊྛོཡེཝ ཧོཏི. ཏེན ཝུཏྟཾ ‘‘པཐེ དྷཱཝནྟིཡཱ པཏཱི’’ཏི. ཏཉྩ དེསཾ ན པསྶཱམི, ཡཏོ སོདརིཡམཱནཡེཏི ཡསྨཱ པན མེ མཱཏཱཔིཏརོ ནཏྠི, ཏསྨཱ ཨིདཱནི ཏཾ མཱཏུཀུཙྪིསངྑཱཏཾ ཨཉྙཾ དེསཾ ན པསྶཱམི. ཡཏོ ཨཧཾ སམཱནེ ཨུདརེ ཛཱཏཏྟཱ སཨུདརིཡསངྑཱཏཾ བྷཱཏརཾ ཨཱནེཡྻཾ, ཏསྨཱ བྷཱཏརཾཡེཝ མེ དེཐཱཏི.

རཱཛཱ ‘‘སཙྩཾ ཨེསཱ ཝདཏཱི’’ཏི ཏུཊྛཙིཏྟོ ཏཡོཔི ཛནེ བནྡྷནཱགཱརཏོ ཨཱནེཏྭཱ ཨདཱསི, སཱ ཏཡོཔི ཏེ གཧེཏྭཱ གཏཱ.

སཏྠཱཔི ‘‘ན, བྷིཀྑཝེ, ཨིདཱནེཝ, པུབྦེཔེསཱ ཨིམེ ཏཡོ ཛནེ དུཀྑཏོ མོཙེསིཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཨཏཱིཏེ ཙཏྟཱརོཝ ཨེཏརཧི ཙཏྟཱརོ, རཱཛཱ པན ཨཧམེཝ ཨཧོསི’’ནྟི.

ཨུཙྪངྒཛཱཏཀཝཎྞནཱ སཏྟམཱ.

[༦༨] ༨. སཱཀེཏཛཱཏཀཝཎྞནཱ

ཡསྨིཾ ¶ མནོ ནིཝིསཏཱིཏི ཨིདཾ སཏྠཱ སཱཀེཏཾ ནིསྶཱཡ ཨཉྫནཝནེ ཝིཧརནྟོ ཨེཀཾ བྲཱཧྨཎཾ ཨཱརབྦྷ ཀཐེསི. བྷགཝཏོ ཀིར བྷིཀྑུསངྒྷཔརིཝུཏསྶ སཱཀེཏཾ པིཎྜཱཡ པཝིསནཀཱལེ ཨེཀོ སཱཀེཏནགརཝཱསཱི མཧལླཀབྲཱཧྨཎོ ནགརཏོ བཧི གཙྪནྟོ ཨནྟརདྭཱརེ དསབལཾ དིསྭཱ པཱདེསུ པཏིཏྭཱ གོཔྥཀེསུ གཱལ༹ྷཾ གཧེཏྭཱ ‘‘ཏཱཏ, ནནུ ནཱམ པུཏྟེཧི ཛིཎྞཀཱལེ མཱཏཱཔིཏརོ པཊིཛགྒིཏབྦཱ, ཀསྨཱ ཨེཏྟཀཾ ¶ ¶ ཀཱལཾ ཨམྷཱཀཾ ཨཏྟཱནཾ ན དསྶེསི? མཡཱ ཏཱཝ དིཊྛོསི, མཱཏརཾ པན པསྶིཏུཾ ཨེཧཱི’’ཏི སཏྠཱརཾ གཧེཏྭཱ ཨཏྟནོ གེཧཾ ཨགམཱསི. སཏྠཱ ཏཏྠ གནྟྭཱ ནིསཱིདི པཉྙཏྟེ ཨཱསནེ སདྡྷིཾ བྷིཀྑུསངྒྷེན. བྲཱཧྨཎཱིཔི ཨཱགནྟྭཱ སཏྠུ པཱདེསུ པཏིཏྭཱ ‘‘ཏཱཏ, ཨེཏྟཀཾ ཀཱལཾ ཀཧཾ གཏོསི, ནནུ ནཱམ མཱཏཱཔིཏརོ མཧལླཀཀཱལེ ཨུཔཊྛཱཏབྦཱ’’ཏི པརིདེཝི. པུཏྟདྷཱིཏརོཔི ‘‘ཨེཐ, བྷཱཏརཾ ཝནྡཐཱ’’ཏི ཝནྡཱཔེསི. ཨུབྷོ ཏུཊྛམཱནསཱ མཧཱདཱནཾ ཨདཾསུ. སཏྠཱ བྷཏྟཀིཙྩཾ ནིཊྛཱཔེཏྭཱ ཏེསཾ དྭིནྣམྤི ཛནཱནཾ ཛརཱསུཏྟཾ (སུ. ནི. ༨༡༠ ཨཱདཡོ) ཀཐེསི. སུཏྟཔརིཡོསཱནེ ཨུབྷོཔི ཨནཱགཱམིཕལེ པཏིཊྛཧིཾསུ. སཏྠཱ ཨུཊྛཱཡཱསནཱ ཨཉྫནཝནམེཝ ཨགམཱསི.

བྷིཀྑཱུ དྷམྨསབྷཱཡཾ སནྣིསིནྣཱ ཀཐཾ སམུཊྛཱཔེསུཾ ‘‘ཨཱཝུསོ, བྲཱཧྨཎོ ‘ཏཐཱགཏསྶ པིཏཱ སུདྡྷོདནོ, མཱཏཱ མཧཱམཱཡཱ’ཏི ཛཱནཱཏི, ཛཱནནྟོཝ སདྡྷིཾ བྲཱཧྨཎིཡཱ ཏཐཱགཏཾ ‘ཨམྷཱཀཾ པུཏྟོ’ཏི ཝདཏི, སཏྠཱཔི ཨདྷིཝཱསེཏི. ཀིཾ ནུ ཁོ ཀཱརཎ’’ནྟི? སཏྠཱ ཏེསཾ ཀཐཾ སུཏྭཱ ‘‘བྷིཀྑཝེ, ཨུབྷོཔི ཏེ ཨཏྟནོ པུཏྟམེཝ ‘པུཏྟོ’ཏི ཝདནྟཱི’’ཏི ཝཏྭཱ ཨཏཱིཏཾ ཨཱཧརི.

བྷིཀྑཝེ, ཨཡཾ བྲཱཧྨཎོ ཨཏཱིཏེ ནིརནྟརཾ པཉྩ ཛཱཏིསཏཱནི མཡ྄ཧཾ པིཏཱ ཨཧོསི, པཉྩ ཛཱཏིསཏཱནི ཙཱུལ༹པིཏཱ, པཉྩ ཛཱཏིསཏཱནི མཧཱཔིཏཱ. ཨེསཱཔི བྲཱཧྨཎཱི ནིརནྟརམེཝ པཉྩ ཛཱཏིསཏཱནི མཱཏཱ ཨཧོསི, པཉྩ ཛཱཏིསཏཱནི ཙཱུལ༹མཱཏཱ, པཉྩ ཛཱཏིསཏཱནི མཧཱམཱཏཱ. ཨེཝཱཧཾ དིཡཌྜྷཛཱཏིསཧསྶཾ བྲཱཧྨཎསྶ ཧཏྠེ སཾཝཌྜྷོ, དིཡཌྜྷཛཱཏིསཧསྶཾ བྲཱཧྨཎིཡཱ ཧཏྠེ སཾཝཌྜྷོཏི ཏཱིཎི ཛཱཏིསཧསྶཱནི ཀཐེཏྭཱ ཨབྷིསམྦུདྡྷོ ཧུཏྭཱ ཨིམཾ གཱཐམཱཧ –

༦༨.

‘‘ཡསྨིཾ མནོ ནིཝིསཏི, ཙིཏྟཉྩཱཔི པསཱིདཏི;

ཨདིཊྛཔུབྦཀེ པོསེ, ཀཱམཾ ཏསྨིམྤི ཝིསྶསེ’’ཏི.

ཏཏྠ ¶ ཡསྨིཾ མནོ ནིཝིསཏཱིཏི ཡསྨིཾ པུགྒལེ དིཊྛམཏྟེཡེཝ ཙིཏྟཾ པཏིཊྛཱཏི. ཙིཏྟཉྩཱཔི པསཱིདཏཱིཏི ཡསྨིཾ དིཊྛམཏྟེ ཙིཏྟཾ པསཱིདཏི, མུདུཀཾ ཧོཏི. ཨདིཊྛཔུབྦཀེ པོསེཏི པཀཏིཡཱ ཏསྨིཾ ཨཏྟབྷཱཝེ ཨདིཊྛཔུབྦེཔི ¶ པུགྒལེ. ཀཱམཾ ཏསྨིམྤི ཝིསྶསེཏི ཨནུབྷཱུཏཔུབྦསིནེཧེནེཝ ཏསྨིམྤི པུགྒལེ ཨེཀཾསེན ཝིསྶསེ, ཝིསྶཱསཾ ཨཱཔཛྫཏིཡེཝཱཏི ཨཏྠོ.

ཨེཝཾ ¶ སཏྠཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ བྲཱཧྨཎོ ཙ བྲཱཧྨཎཱི ཙ ཨེཏེ ཨེཝ ཨཧེསུཾ, པུཏྟོ པན ཨཧམེཝ ཨཧོསི’’ནྟི.

སཱཀེཏཛཱཏཀཝཎྞནཱ ཨཊྛམཱ.

[༦༩] ༩. ཝིསཝནྟཛཱཏཀཝཎྞནཱ

དྷིརཏྠུ ཏཾ ཝིསཾ ཝནྟནྟི ཨིདཾ སཏྠཱ ཛེཏཝནེ ཝིཧརནྟོ དྷམྨསེནཱཔཏིཾ ཨཱརབྦྷ ཀཐེསི. ཐེརསྶ ཀིར པིཊྛཁཛྫཀཁཱདནཀཱལེ མནུསྶཱ སངྒྷསྶ བཧུཾ པིཊྛཁཱདནཱིཡཾ གཧེཏྭཱ ཝིཧཱརཾ ཨགམཾསུ, བྷིཀྑུསངྒྷསྶ གཧིཏཱཝསེསཾ བཧུ ཨཏིརིཏྟཾ ཨཧོསི. མནུསྶཱ ‘‘བྷནྟེ, ཨནྟོགཱམགཏཱནམྤི གཎྷཐཱ’’ཏི ཨཱཧཾསུ. ཏསྨིཾ ཁཎེ ཐེརསྶ སདྡྷིཝིཧཱརིཀོ དཧརོ ཨནྟོགཱམེ ཧོཏི, ཏསྶ ཀོཊྛཱསཾ གཧེཏྭཱ ཏསྨིཾ ཨནཱགཙྪནྟེ ‘‘ཨཏིདིཝཱ ཧོཏཱི’’ཏི ཐེརསྶ ཨདཾསུ. ཐེརེན ཏསྨིཾ པརིབྷུཏྟེ དཧརོ ཨགམཱསི. ཨཐ ནཾ ཐེརོ ‘‘མཡཾ, ཨཱཝུསོ, ཏུཡ྄ཧཾ ཋཔིཏཁཱདནཱིཡཾ པརིབྷུཉྫིམྷཱ’’ཏི ཨཱཧ. སོ ‘‘མདྷུརཾ ནཱམ, བྷནྟེ, ཀསྶ ཨཔྤིཡ’’ནྟི ཨཱཧ. མཧཱཐེརསྶ སཾཝེགོ ཨུཔྤཛྫི. སོ ཨིཏོ པཊྛཱཡ ‘‘པིཊྛཁཱདནཱིཡཾ ན ཁཱདིསྶཱམཱི’’ཏི ཨདྷིཊྛཱསི. ཏཏོ པཊྛཱཡ ཀིར སཱརིཔུཏྟཏྠེརེན པིཊྛཁཱདནཱིཡཾ ནཱམ ན ཁཱདིཏཔུབྦཾ. ཏསྶ པིཊྛཁཱདནཱིཡཾ ཨཁཱདནབྷཱཝོ བྷིཀྑུསངྒྷེ པཱཀཊོ ཛཱཏོ. བྷིཀྑཱུ ཏཾ ཀཐཾ ཀཐེནྟཱ དྷམྨསབྷཱཡཾ ནིསཱིདིཾསུ. ཨཐ སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘བྷིཀྑཝེ, སཱརིཔུཏྟོ ཨེཀཝཱརཾ ཛཧིཏཀཾ ཛཱིཝིཏཾ པརིཙྩཛནྟོཔི པུན ན གཎྷཱཏིཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཝིསཝེཛྫཀུལེ ནིབྦཏྟིཏྭཱ ཝེཛྫཀམྨེན ཛཱིཝིཀཾ ཀཔྤེསི. ཨཐེཀཾ ཛནཔདམནུསྶཾ སཔྤོ ཌཾསི, ཏསྶ ཉཱཏཀཱ པམཱདཾ ཨཀཏྭཱ ཁིཔྤཾ ཝེཛྫཾ ཨཱནཡིཾསུ ¶ . ཝེཛྫོ ཨཱཧ ‘‘ཀིཾ ཏཱཝ ཨོསདྷེན, པརིབྷཱཝེཏྭཱ ཝིསཾ ཧརཱམི, དཊྛསཔྤཾ ཨཱཝཱཧེཏྭཱ དཊྛཊྛཱནཏོ ཏེནེཝ ཝིསཾ ཨཱཀཌྜྷཱཔེམཱི’’ཏི. ‘‘སཔྤཾ ཨཱཝཱཧེཏྭཱ ཝིསཾ ¶ ཨཱཀཌྜྷཱཔེཧཱི’’ཏི. སོ སཔྤཾ ཨཱཝཱཧེཏྭཱ ‘‘ཏཡཱ ཨཡཾ དཊྛོ’’ཏི ཨཱཧ. ‘‘ཨཱམ, མཡཱ’’ཏི ¶ . ‘‘ཏཡཱ དཊྛཊྛཱནཏོ ཏྭཉྙེཝ མུཁེན ཝིསཾ ཨཱཀཌྜྷཱཧཱི’’ཏི. ‘‘མཡཱ ཨེཀཝཱརཾ ཛཧིཏཀཾ པུན ན གཧིཏཔུབྦཾ, ནཱཧཾ མཡཱ ཛཧིཏཝིསཾ ཨཱཀཌྜྷིསྶཱམཱི’’ཏི. སོ དཱརཱུནི ཨཱཧརཱཔེཏྭཱ ཨགྒིཾ ཀཏྭཱ ཨཱཧ ‘‘སཙེ ཨཏྟནོ ཝིསཾ ནཱཀཌྜྷསི, ཨིམཾ ཨགྒིཾ པཝིསཱ’’ཏི. སཔྤོ ‘‘ཨཔི ཨགྒིཾ པཝིསིསྶཱམི, ནེཝཏྟནཱ ཨེཀཝཱརཾ ཛཧིཏཝིསཾ པཙྩཱཧརིསྶཱམཱི’’ཏི ཝཏྭཱ ཨིམཾ གཱཐམཱཧ –

༦༩.

‘‘དྷིརཏྠུ ཏཾ ཝིསཾ ཝནྟཾ, ཡམཧཾ ཛཱིཝིཏཀཱརཎཱ;

ཝནྟཾ པཙྩཱཧརིསྶཱམི, མཏཾ མེ ཛཱིཝིཏཱ ཝར’’ནྟི.

ཏཏྠ དྷིརཏྠཱུཏི གརཧཏྠེ ནིཔཱཏོ. ཏཾ ཝིསནྟི ཡམཧཾ ཛཱིཝིཏཀཱརཎཱ ཝནྟཾ ཝིསཾ པཙྩཱཧརིསྶཱམི, ཏཾ ཝནྟཾ ཝིསཾ དྷིརཏྠུ. མཏཾ མེ ཛཱིཝིཏཱ ཝརནྟི ཏསྶ ཝིསསྶ ཨཔཙྩཱཧརཎཀཱརཎཱ ཡཾ ཨགྒིཾ པཝིསིཏྭཱ མརཎཾ, ཏཾ མམ ཛཱིཝིཏཏོ ཝརནྟི ཨཏྠོ.

ཨེཝཉྩ པན ཝཏྭཱ ཨགྒིཾ པཝིསིཏུཾ པཱཡཱསི. ཨཐ ནཾ ཝེཛྫོ ནིཝཱརེཏྭཱ ཏཾ པུརིསཾ ཨོསདྷེཧི ཙ མནྟེཧི ཙ ནིབྦིསཾ ཨརོགཾ ཀཏྭཱ སཔྤསྶ སཱིལཱནི དཏྭཱ ‘‘ཨིཏོ པཊྛཱཡ མཱ ཀཉྩི ཝིཧེཋེསཱི’’ཏི ཝཏྭཱ ཝིསྶཛྫེསི.

སཏྠཱཔི ‘‘ན, བྷིཀྑཝེ, སཱརིཔུཏྟོ ཨེཀཝཱརཾ ཛཧིཏཀཾ ཛཱིཝིཏམྤི པརིཙྩཛནྟོ པུན གཎྷཱཏཱི’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི ‘‘ཏདཱ སཔྤོ སཱརིཔུཏྟོ ཨཧོསི, ཝེཛྫོ པན ཨཧམེཝ ཨཧོསི’’ནྟི.

ཝིསཝནྟཛཱཏཀཝཎྞནཱ ནཝམཱ.

[༧༠] ༡༠. ཀུདྡཱལཛཱཏཀཝཎྞནཱ

ན ¶ ཏཾ ཛིཏཾ སཱདྷུ ཛིཏནྟི ཨིདཾ སཏྠཱ ཛེཏཝནེ ཝིཧརནྟོ ཙིཏྟཧཏྠསཱརིཔུཏྟཾ ཨཱརབྦྷ ཀཐེསི. སོ ཀིར སཱཝཏྠིཡཾ ཨེཀོ ཀུལདཱརཀོ. ཨཐེཀདིཝསཾ ཀསིཏྭཱ ཨཱགཙྪནྟོ ཝིཧཱརཾ པཝིསིཏྭཱ ཨེཀསྶ ཐེརསྶ པཏྟཏོ སིནིདྡྷཾ མདྷུརཾ པཎཱིཏབྷོཛནཾ ལབྷིཏྭཱ ཙིནྟེསི ‘‘མཡཾ རཏྟིནྡིཝཾ སཧཏྠེན ནཱནཱཀམྨཱནི ཀུརུམཱནཱཔི ཨེཝརཱུཔཾ མདྷུརཱཧཱརཾ ན ལབྷཱམ, མཡཱཔི སམཎེན བྷཝིཏབྦ’’ནྟི ¶ . སོ པབྦཛིཏྭཱ མཱསཌྜྷམཱསཙྩཡེན ཨཡོནིསོ མནསིཀརོནྟོ ཀིལེསཝསིཀོ ཧུཏྭཱ ཝིབྦྷམིཏྭཱ པུན བྷཏྟེན ཀིལམནྟོ ¶ ཨཱགནྟྭཱ པབྦཛིཏྭཱ ཨབྷིདྷམྨཾ ཨུགྒཎྷི. ཨིམིནཱཝ ཨུཔཱཡེན ཚ ཝཱརེ ཝིབྦྷམིཏྭཱ པབྦཛིཏོ. ཏཏོ སཏྟམེ བྷིཀྑུབྷཱཝེ སཏྟཔྤཀརཎིཀོ ཧུཏྭཱ བཧཱུ བྷིཀྑཱུ དྷམྨཾ ཝཱཙེནྟོ ཝིཔསྶནཾ ཝཌྜྷེཏྭཱ ཨརཧཏྟཾ པཱཔུཎི. ཨཐསྶ སཧཱཡཀཱ བྷིཀྑཱུ ‘‘ཀིཾ ནུ ཁོ, ཨཱཝུསོ ཙིཏྟཧཏྠ, པུབྦེ ཝིཡ ཏེ ཨེཏརཧི ཀིལེསཱ ན ཝཌྜྷནྟཱི’’ཏི པརིཧཱསཾ ཀརིཾསུ. ‘‘ཨཱཝུསོ, ཨབྷབྦོ དཱནི ཨཧཾ ཨིཏོ པཊྛཱཡ གིཧིབྷཱཝཱཡཱ’’ཏི.

ཨེཝཾ ཏསྨིཾ ཨརཧཏྟཾ པཏྟེ དྷམྨསབྷཱཡཾ ཀཐཱ ཨུདཔཱདི ‘‘ཨཱཝུསོ, ཨེཝརཱུཔསྶ ནཱམ ཨརཧཏྟསྶ ཨུཔནིསྶཡེ སཏི ཨཱཡསྨཱ ཙིཏྟཧཏྠསཱརིཔུཏྟོ ཚཀྑཏྟུཾ ཨུཔྤབྦཛིཏོ, ཨཧོ མཧཱདོསོ པུཐུཛྫནབྷཱཝོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘བྷིཀྑཝེ, པུཐུཛྫནཙིཏྟཾ ནཱམ ལཧུཀཾ དུནྣིགྒཧཾ, ཨཱརམྨཎཝསེན གནྟྭཱ ཨལླཱིཡཏི, ཨེཀཝཱརཾ ཨལླཱིནཾ ན སཀྐཱ ཧོཏི ཁིཔྤཾ མོཙེཏུཾ, ཨེཝརཱུཔསྶ ཙིཏྟསྶ དམཐོ སཱདྷུ. དནྟམེཝ ཧི ཏཾ སུཁཾ ཨཱཝཧཏི.

‘‘དུནྣིགྒཧསྶ ལཧུནོ, ཡཏྠཀཱམནིཔཱཏིནོ;

ཙིཏྟསྶ དམཐོ སཱདྷུ, ཙིཏྟཾ དནྟཾ སུཁཱཝཧཾ’’. (དྷ. པ. ༣༥);

ཏསྶ པན དུནྣིགྒཧཏཱཡ པུབྦེ པཎྜིཏཱ ཨེཀཾ ཀུདྡཱལཀཾ ནིསྶཱཡ ཏཾ ཛཧིཏུཾ ཨསཀྐོནྟཱ ལོབྷཝསེན ཚཀྑཏྟུཾ ཨུཔྤབྦཛིཏྭཱ སཏྟམེ པབྦཛིཏབྷཱཝེ ཛྷཱནཾ ཨུཔྤཱདེཏྭཱ ཏཾ ལོབྷཾ ནིགྒཎྷིཾསཱུ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ པཎྞིཀཀུལེ ནིབྦཏྟིཏྭཱ ཝིཉྙུཏཾ པཱཔུཎི, ‘‘ཀུདྡཱལཔཎྜིཏོ’’ཏིསྶ ནཱམཾ ཨཧོསི. སོ ཀུདྡཱལཀེན བྷཱུམིཔརིཀམྨཾ ཀཏྭཱ ཌཱཀཉྩེཝ ཨལཱབུཀུམྦྷཎྜཨེལཱ༹ལུཀཱདཱིནི ཙ ཝཔིཏྭཱ ཏཱནི ཝིཀྐིཎནྟོ ཀཔཎཛཱིཝིཀཾ ཀཔྤེསི. ཏཉྷིསྶ ཨེཀཾ ཀུདྡཱལཀཾ ཋཔེཏྭཱ ཨཉྙཾ དྷནཾ ནཱམ ནཏྠི. སོ ཨེཀདིཝསཾ ཙིནྟེསི ‘‘ཀིཾ མེ གྷརཱཝཱསེན, ནིཀྑམིཏྭཱ པབྦཛིསྶཱམཱི’’ཏི. ཨཐེཀདིཝསཾ ཀུདྡཱལཀཾ པཊིཙྪནྣཊྛཱནེ ཋཔེཏྭཱ ཨིསིཔབྦཛྫཾ པབྦཛིཏྭཱ ཏཾ ཀུདྡཱལཀཾ ཨནུསྶརིཏྭཱ ལོབྷཾ ཚིནྡིཏུཾ ཨསཀྐོནྟོ ཀུཎྛཀུདྡཱལཀཾ ¶ ནིསྶཱཡ ཨུཔྤབྦཛི. ཨེཝཾ དུཏིཡམྤི, ཏཏིཡམྤཱིཏི ཚ ཝཱརེ ཏཾ ཀུདྡཱལཀཾ པཊིཙྪནྣཊྛཱནེ ནིཀྑིཔིཏྭཱ པབྦཛིཏོ ཙེཝ ཨུཔྤབྦཛིཏོ ཙ.

སཏྟམེ ¶ པན ཝཱརེ ཙིནྟེསི ‘‘ཨཧཾ ཨིམཾ ཀུཎྛཀུདྡཱལཀཾ ནིསྶཱཡ པུནཔྤུནཾ ཨུཔྤབྦཛིཏོ, ཨིདཱནི ནཾ མཧཱནདིཡཾ པཀྑིཔིཏྭཱ པབྦཛིསྶཱམཱི’’ཏི ནདཱིཏཱིརཾ གནྟྭཱ ‘‘སཙསྶ པཏིཏཊྛཱནཾ པསྶིསྶཱམི, པུནཱགནྟྭཱ ཨུདྡྷརིཏུཀཱམཏཱ བྷཝེཡྻཱ’’ཏི ཏཾ ཀུདྡཱལཀཾ དཎྜེ གཧེཏྭཱ ནཱགབལོ ཐཱམསམྤནྣོ སཱིསསྶ ཨུཔརིབྷཱགེ ཏིཀྑཏྟུཾ ཨཱཝིཛ྄ཛྷིཏྭཱ ཨཀྑཱིནི ནིམྨཱིལེཏྭཱ ནདཱིམཛ྄ཛྷེ ཁིཔིཏྭཱ ‘‘ཛིཏཾ མེ ཛིཏཾ མེ’’ཏི ཏིཀྑཏྟུཾ སཱིཧནཱདཾ ནདི. ཏསྨིཾ ཁཎེ བཱརཱཎསིརཱཛཱ པཙྩནྟཾ ཝཱུཔསམེཏྭཱ ཨཱགཏོ ནདིཡཱ སཱིསཾ ནྷཱཡིཏྭཱ སབྦཱལངྐཱརཔཊིམཎྜིཏོ ཧཏྠིཀྑནྡྷེན གཙྪམཱནོ ཏཾ བོདྷིསཏྟསྶ སདྡཾ སུཏྭཱ ‘‘ཨཡཾ པུརིསོ ‘ཛིཏཾ མེ ཛིཏཾ མེ’ཏི ཝདཏི, ཀོ ནུ ཁོ ཨེཏེན ཛིཏོ, པཀྐོསཐ ན’’ནྟི པཀྐོསཱཔེཏྭཱ ‘‘བྷོ པུརིས, ཨཧཾ ཏཱཝ ཝིཛིཏསངྒཱམོ ཨིདཱནི ཛཡཾ གཧེཏྭཱ ཨཱགཙྪཱམི, ཏཡཱ པན ཀོ ཛིཏོ’’ཏི པུཙྪི. བོདྷིསཏྟོ ‘‘མཧཱརཱཛ, ཏཡཱ སངྒཱམསཏམྤི སངྒཱམསཧསྶམྤི སངྒཱམསཏསཧསྶམྤི ཛིནནྟེན དུཛྫིཏམེཝ ཀིལེསཱནཾ ཨཛིཏཏྟཱ. ཨཧཾ པན མམ ཨབྦྷནྟརེ ལོབྷཾ ནིགྒཎྷནྟོ ཀིལེསེ ཛིནི’’ནྟི ཀཐེནྟོཡེཝ མཧཱནདིཾ ཨོལོཀེཏྭཱ ཨཱཔོཀསིཎཱརམྨཎཾ ཛྷཱནཾ ནིབྦཏྟེཏྭཱ སམྤཏྟཱནུབྷཱཝོ ཨཱཀཱསེ ནིསཱིདིཏྭཱ རཉྙོ དྷམྨཾ དེསེནྟོ ཨིམཾ གཱཐམཱཧ –

༧༠.

‘‘ན ཏཾ ཛིཏཾ སཱདྷུ ཛིཏཾ, ཡཾ ཛིཏཾ ཨཝཛཱིཡཏི;

ཏཾ ཁོ ཛིཏཾ སཱདྷུ ཛིཏཾ, ཡཾ ཛིཏཾ ནཱཝཛཱིཡཏཱི’’ཏི.

ཏཏྠ ¶ ན ཏཾ ཛིཏཾ སཱདྷུ ཛིཏཾ, ཡཾ ཛིཏཾ ཨཝཛཱིཡཏཱིཏི ཡཾ པཙྩཱམིཏྟེ པརཱཛིནིཏྭཱ རཊྛཾ ཛིཏཾ པཊིལདྡྷཾ པུནཔི ཏེཧི པཙྩཱམིཏྟེཧི ཨཝཛཱིཡཏི, ཏཾ ཛིཏཾ སཱདྷུཛིཏཾ ནཱམ ན ཧོཏི. ཀསྨཱ? པུན ཨཝཛཱིཡནཏོ. ཨཔརོ ནཡོ – ཛིཏཾ ཝུཙྩཏི ཛཡོ. ཡོ པཙྩཱམིཏྟེཧི སདྡྷིཾ ཡུཛ྄ཛྷིཏྭཱ ཨདྷིགཏོ ཛཡོ པུན ཏེསུ ཛིནནྟེསུ ¶ , པརཱཛཡོ ཧོཏི, སོ ན སཱདྷུ ན སོབྷནོ. ཀསྨཱ? ཡསྨཱ པུན པརཱཛཡོཝ ཧོཏི. ཏཾ ཁོ ཛིཏཾ སཱདྷུ ཛིཏཾ, ཡཾ ཛིཏཾ ནཱཝཛཱིཡཏཱིཏི ཡཾ ཁོ པན པཙྩཱམིཏྟེ ནིམྨཐེཏྭཱ ཛིཏཾ པུན ཏེཧི ནཱཝཛཱིཡཏི, ཡོ ཝཱ ཨེཀཝཱརཾ ལདྡྷོ ཛཡོ ན པུན པརཱཛཡོ ཧོཏི, ཏཾ ཛིཏཾ སཱདྷུ ཛིཏཾ སོབྷནཾ, སོ ཛཡོ སཱདྷུ སོབྷནོ ནཱམ ཧོཏི. ཀསྨཱ? པུན ནཱཝཛཱིཡནཏོ. ཏསྨཱ, ཏྭཾ མཧཱརཱཛ, སཏཀྑཏྟུམྤི སཧསྶཀྑཏྟུམྤི སཏསཧསྶཀྑཏྟུམྤི སངྒཱམསཱིསཾ ཛིནིཏྭཱཔི སངྒཱམཡོདྷོ ནཱམ ན ཧོསི. ཀིཾཀཱརཎཱ? ཨཏྟནོ ཀིལེསཱནཾ ཨཛིཏཏྟཱ. ཡོ པན ཨེཀཝཱརམྤི ཨཏྟནོ ཨབྦྷནྟརེ ཀིལེསེ ཛིནཱཏི, ཨཡཾ ཨུཏྟམོ སངྒཱམསཱིསཡོདྷོཏི ཨཱཀཱསེ ནིསིནྣཀོཝ བུདྡྷལཱིལཱཡ རཉྙོ དྷམྨཾ དེསེསི. ཨུཏྟམསངྒཱམཡོདྷབྷཱཝོ པནེཏྠ –

‘‘ཡོ ¶ སཧསྶཾ སཧསྶེན, སངྒཱམེ མཱནུསེ ཛིནེ;

ཨེཀཉྩ ཛེཡྻམཏྟཱནཾ, ས ཝེ སངྒཱམཛུཏྟམོ’’ཏི. (དྷ. པ. ༡༠༣) –

ཨིདཾ སུཏྟཾ སཱདྷཀཾ.

རཉྙོ པན དྷམྨཾ སུཎནྟསྶེཝ ཏདངྒཔྤཧཱནཝསེན ཀིལེསཱ པཧཱིནཱ, པབྦཛྫཱཡ ཙིཏྟཾ ནམི. རཱཛབལསྶཔི ཏཐེཝ ཀིལེསཱ པཧཱིཡིཾསུ. རཱཛཱ ‘‘ཨིདཱནི ཏུམྷེ ཀཧཾ གམིསྶཐཱ’’ཏི བོདྷིསཏྟཾ པུཙྪི. ‘‘ཧིམཝནྟཾ པཝིསིཏྭཱ ཨིསིཔབྦཛྫཾ པབྦཛིསྶཱམི, མཧཱརཱཛཱ’’ཏི. ‘‘ཏེན ཧི ཨཧམྤི པབྦཛིསྶཱམཱི’’ཏི བོདྷིསཏྟེནེཝ སདྡྷིཾ ནིཀྑམི, བལཀཱཡོ བྲཱཧྨཎགཧཔཏིཀཱ སབྦཱ སེནིཡོཏི སབྦོཔི ཏསྨིཾ ཋཱནེ སནྣིཔཏིཏོ མཧཱཛནཀཱཡོ རཉྙཱ སདྡྷིཾཡེཝ ནིཀྑམི. བཱརཱཎསིཝཱསིནོཔི ‘‘ཨམྷཱཀཾ ཀིར རཱཛཱ ཀུདྡཱལཔཎྜིཏསྶ དྷམྨདེསནཾ སུཏྭཱ པབྦཛྫཱབྷིམུཁོ ཧུཏྭཱ སདྡྷིཾ བལཀཱཡེན ནིཀྑནྟོ, མཡཾ ཨིདྷ ཀིཾ ཀརིསྶཱམཱ’’ཏི དྭཱདསཡོཛནིཀཱཡ བཱརཱཎསིཡཱ སཀལནགརཝཱསིནོ ནིཀྑམིཾསུ. དྭཱདསཡོཛནིཀཱ པརིསཱ ཨཧོསི. ཏཾ ཨཱདཱཡ བོདྷིསཏྟོ ཧིམཝནྟཾ པཱཝིསི.

ཏསྨིཾ ¶ ཁཎེ སཀྐསྶ དེཝརཉྙོ ནིསིནྣཱསནཾ ཨུཎྷཱཀཱརཾ དསྶེསི. སོ ཨཱཝཛྫམཱནོ ‘‘ཀུདྡཱལཔཎྜིཏོ མཧཱབྷིནིཀྑམནཾ ནིཀྑནྟོ’’ཏི དིསྭཱ ‘‘མཧཱསམཱགམོ བྷཝིསྶཏི, ཝསནཊྛཱནཾ ལདྡྷུཾ ཝཊྚཏཱི’’ཏི ཝིསྶཀམྨཾ ཨཱམནྟེཏྭཱ ‘‘ཏཱཏ, ཀུདྡཱལཔཎྜིཏོ མཧཱབྷིནིཀྑམནཾ ནིཀྑནྟོ ¶ , ཝསནཊྛཱནཾ ལདྡྷུཾ ཝཊྚཏི, ཏྭཾ ཧིམཝནྟཔྤདེསཾ གནྟྭཱ སམེ བྷཱུམིབྷཱགེ དཱིགྷཏོ ཏིཾསཡོཛནཾ ཝིཏྠཱརཏོ པནྣརསཡོཛནཾ ཨསྶམཔདཾ མཱཔེཧཱི’’ཏི ཨཱཧ. སོ ‘‘སཱདྷུ, དེཝཱ’’ཏི པཊིསྶུཎིཏྭཱ གནྟྭཱ ཏཐཱ ཨཀཱསི. ཨཡམེཏྠ སངྑེཔོ, ཝིཏྠཱརོ པན ཧཏྠིཔཱལཛཱཏཀེ ཨཱཝི བྷཝིསྶཏི. ཨིདཉྩ ཧི ཏཉྩ ཨེཀཔརིཙྪེདམེཝ. ཝིསྶཀམྨོཔི ཨསྶམཔདེ པཎྞསཱལཾ མཱཔེཏྭཱ དུསྶདྡེ མིགེ ཙ སཀུཎེ ཙ ཨམནུསྶེ ཙ པཊིཀྐམཱཔེཏྭཱ ཏེན ཏེན དིསཱབྷཱགེན ཨེཀཔདིཀམགྒཾ མཱཔེཏྭཱ ཨཏྟནོ ཝསནཊྛཱནམེཝ ཨགམཱསི. ཀུདྡཱལཔཎྜིཏོཔི ཏཾ པརིསཾ ཨཱདཱཡ ཧིམཝནྟཾ པཝིསིཏྭཱ སཀྐདཏྟིཡཾ ཨསྶམཔདཾ གནྟྭཱ ཝིསྶཀམྨེན མཱཔིཏཾ པབྦཛིཏཔརིཀྑཱརཾ གཧེཏྭཱ པཋམཾ ཨཏྟནཱ པབྦཛིཏྭཱ པཙྪཱ པརིསཾ པབྦཱཛེཏྭཱ ཨསྶམཔདཾ བྷཱཛེཏྭཱ ཨདཱསི. སཏྟ རཱཛཱནོ སཏྟ རཛྫཱནི ཚཌྜཡིཾསུ. ཏིཾསཡོཛནཾ ཨསྶམཔདཾ པཱུརི. ཀུདྡཱལཔཎྜིཏོ སེསཀསིཎེསུཔི པརིཀམྨཾ ཀཏྭཱ བྲཧྨཝིཧཱརེ བྷཱཝེཏྭཱ པརིསཱཡ ཀམྨཊྛཱནཾ ཨཱཙིཀྑི. སབྦེ སམཱཔཏྟིལཱབྷིནོ ཧུཏྭཱ བྲཧྨཝིཧཱརེ བྷཱཝེཏྭཱ བྲཧྨལོཀཔརཱཡཎཱ ཨཧེསུཾ. ཡེ པན ཏེསཾ པཱརིཙརིཡཾ ཨཀཾསུ, ཏེ དེཝལོཀཔརཱཡཎཱ ཨཧེསུཾ.

སཏྠཱ ¶ ‘‘ཨེཝཾ, བྷིཀྑཝེ, ཙིཏྟཾ ནཱམེཏཾ ཀིལེསཝསེན ཨལླཱིནཾ དུམྨོཙཡཾ ཧོཏི, ཨུཔྤནྣཱ ལོབྷདྷམྨཱ དུཔྤཛཧཱ, ཨེཝརཱུཔེཔི པཎྜིཏེ ཨཉྙཱཎེ ཀརོནྟཱི’’ཏི ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེསི, སཙྩཔརིཡོསཱནེ ཀེཙི སོཏཱཔནྣཱ ཨཧེསུཾ, ཀེཙི སཀདཱགཱམིནོ, ཀེཙི ཨནཱགཱམིནོ, ཀེཙི ཨརཧཏྟཾ པཱཔུཎིཾསུ. སཏྠཱཔི ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ རཱཛཱ ཨཱནནྡོ ཨཧོསི, པརིསཱ བུདྡྷཔརིསཱ, ཀུདྡཱལཔཎྜིཏོ པན ཨཧམེཝ ཨཧོསི’’ནྟི.

ཀུདྡཱལཛཱཏཀཝཎྞནཱ དསམཱ.

ཨིཏྠིཝགྒོ སཏྟམོ.

ཏསྶུདྡཱནཾ –

ཨསཱཏམནྟཎྜབྷཱུཏཾ ¶ , ཏཀྐཔཎྜི དུརཱཛཱནཾ;

ཨནབྷིརཏི མུདུལཀྑཎཾ, ཨུཙྪངྒམྤི ཙ སཱཀེཏཾ;

ཝིསཝནྟཾ ཀུདྡཱལཀནྟི.

༨. ཝརུཎཝགྒོ

[༧༡] ༡. ཝརུཎཛཱཏཀཝཎྞནཱ

ཡོ ¶ ¶ ¶ པུབྦེ ཀརཎཱིཡཱནཱིཏི ཨིདཾ སཏྠཱ ཛེཏཝནེ ཝིཧརནྟོ ཀུཊུམྦིཀཔུཏྟཏིསྶཏྠེརཾ ཨཱརབྦྷ ཀཐེསི. ཨེཀསྨིཾ ཀིར དིཝསེ སཱཝཏྠིཝཱསིནོ ཨཉྙམཉྙསཧཱཡཀཱ ཏིཾསམཏྟཱ ཀུལཔུཏྟཱ གནྡྷཔུཔྥཝཏྠཱདཱིནི གཧེཏྭཱ ‘‘སཏྠུ དྷམྨདེསནཾ སུཎིསྶཱམཱ’’ཏི མཧཱཛནཔརིཝུཏཱ ཛེཏཝནཾ གནྟྭཱ ནཱགམཱལ༹ཀསཱལམཱལ༹ཀཱདཱིསུ ཐོཀཾ ནིསཱིདིཏྭཱ སཱཡནྷསམཡེ སཏྠརི སུརབྷིགནྡྷཝཱསིཏཱཡ གནྡྷཀུཊིཏོ ནིཀྑམིཏྭཱ དྷམྨསབྷཾ གནྟྭཱ ཨལངྐཏབུདྡྷཱསནེ ནིསིནྣེ སཔརིཝཱརཱ དྷམྨསབྷཾ གནྟྭཱ སཏྠཱརཾ གནྡྷཔུཔྥེཧི པཱུཛེཏྭཱ ཙཀྐངྐིཏཏལེསུ ཕུལླཔདུམསསྶིརིཀེསུ པཱདེསུ ཝནྡིཏྭཱ ཨེཀམནྟཾ ནིསིནྣཱ དྷམྨཾ སུཎིཾསུ.

ཨཐ ནེསཾ ཨེཏདཧོསི ‘‘ཡཐཱ ཡཐཱ ཁོ མཡཾ བྷགཝཏཱ དྷམྨཾ དེསིཏཾ ཨཱཛཱནཱམ, པབྦཛེཡྻཱམཱ’’ཏི. ཏེ ཏཐཱགཏསྶ དྷམྨསབྷཱཏོ ནིཀྑནྟཀཱལེ ཏཐཱགཏཾ ཨུཔསངྐམིཏྭཱ ཝནྡིཏྭཱ པབྦཛྫཾ ཡཱཙིཾསུ, སཏྠཱ ཏེསཾ པབྦཛྫཾ ཨདཱསི. ཏེ ཨཱཙརིཡུཔཛ྄ཛྷཱཡེ ཨཱརཱདྷེཏྭཱ ཨུཔསམྤདཾ ལབྷིཏྭཱ པཉྩ ཝསྶཱནི ཨཱཙརིཡུཔཛ྄ཛྷཱཡཱནཾ སནྟིཀེ ཝསིཏྭཱ དྭེ མཱཏིཀཱ པགུཎཾ ཀཏྭཱ ཀཔྤིཡཱཀཔྤིཡཾ ཉཏྭཱ ཏིསྶོ ཨནུམོདནཱ ཨུགྒཎྷིཏྭཱ ཙཱིཝརཱནི སིབྦེཏྭཱ རཛིཏྭཱ ‘‘སམཎདྷམྨཾ ཀརིསྶཱམཱ’’ཏི ཨཱཙརིཡུཔཛ྄ཛྷཱཡེ ཨཱཔུཙྪིཏྭཱ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསཱིདིཏྭཱ ‘‘མཡཾ, བྷནྟེ, བྷཝེསུ ཨུཀྐཎྛིཏཱ ཛཱཏིཛརཱབྱཱདྷིམརཎབྷཡབྷཱིཏཱ, ཏེསཾ ནོ སཾསཱརཔརིམོཙནཏྠཱཡ ཀམྨཊྛཱནཾ ཀཐེཐཱ’’ཏི ཡཱཙིཾསུ. སཏྠཱ ཏེསཾ ཨཊྛཏིཾསཱཡ ཀམྨཊྛཱནེསུ སཔྤཱཡཾ ཝིཙིནིཏྭཱ ཀམྨཊྛཱནཾ ཀཐེསི. ཏེ སཏྠུ སནྟིཀེ ཀམྨཊྛཱནཾ གཧེཏྭཱ སཏྠཱརཾ ཝནྡིཏྭཱ པདཀྑིཎཾ ཀཏྭཱ པརིཝེཎཾ གནྟྭཱ ཨཱཙརིཡུཔཛ྄ཛྷཱཡེ ཨོལོཀེཏྭཱ པཏྟཙཱིཝརམཱདཱཡ ‘‘སམཎདྷམྨཾ ཀརིསྶཱམཱ’’ཏི ནིཀྑམིཾསུ.

ཨཐ ནེསཾ ཨབྦྷནྟརེ ཨེཀོ བྷིཀྑུ ནཱམེན ཀུཊུམྦིཀཔུཏྟཏིསྶཏྠེརོ ནཱམ ཀུསཱིཏོ ཧཱིནཝཱིརིཡོ རསགིདྡྷོ. སོ ཨེཝཾ ཙིནྟེསི ‘‘ཨཧཾ ནེཝ ཨརཉྙེ ཝསིཏུཾ, ན པདྷཱནཾ པདཧིཏུཾ, ན བྷིཀྑཱཙརིཡཱཡ ཡཱཔེཏུཾ སཀྑིསྶཱམི, ཀོ མེ གམནེན ཨཏྠོ, ནིཝཏྟིསྶཱམཱི’’ཏི སོ ཝཱིརིཡཾ ¶ ཨོསྶཛིཏྭཱ ཏེ བྷིཀྑཱུ ཨནུགནྟྭཱ ནིཝཏྟི. ཏེཔི ཁོ བྷིཀྑཱུ ཀོསལེསུ ཙཱརིཀཾ ཙརམཱནཱ ཨཉྙཏརཾ པཙྩནྟགཱམཾ ¶ གནྟྭཱ ཏཾ ཨུཔནིསྶཱཡ ཨེཀསྨིཾ ཨརཉྙཱཡཏནེ ཝསྶཾ ཨུཔགནྟྭཱ ཨནྟོཏེམཱསཾ ཨཔྤམཏྟཱ གྷཊེནྟཱ ཝཱཡམནྟཱ ཝིཔསྶནཱགབྦྷཾ གཱཧཱཔེཏྭཱ པཐཝིཾ ཨུནྣཱདཡམཱནཱ ཨརཧཏྟཾ པཏྭཱ ཝུཏྠཝསྶཱ པཝཱརེཏྭཱ ‘‘པཊིལདྡྷགུཎཾ སཏྠུ ཨཱརོཙེསྶཱམཱ’’ཏི ཏཏོ ནིཀྑམིཏྭཱ ཨནུཔུབྦེན ཛེཏཝནཾ པཏྭཱ པཏྟཙཱིཝརཾ པཊིསཱམེཏྭཱ ཨཱཙརིཡུཔཛ྄ཛྷཱཡེ དིསྭཱ ཏཐཱགཏཾ དཊྛུཀཱམཱ སཏྠུ སནྟིཀཾ གནྟྭཱ ཝནྡིཏྭཱ ནིསཱིདིཾསུ. སཏྠཱ ཏེཧི སདྡྷིཾ མདྷུརཔཊིསནྠཱརཾ ཨཀཱསི. ཏེ ཀཏཔཊིསནྠཱརཱ ཨཏྟནཱ པཊིལདྡྷགུཎཾ ཏཐཱགཏསྶ ཨཱརོཙེསུཾ, སཏྠཱ ཏེ བྷིཀྑཱུ པསཾསི. ཀུཊུམྦིཀཔུཏྟཏིསྶཏྠེརོ སཏྠཱརཾ ཏེསཾ གུཎཀཐཾ ཀཐེནྟཾ དིསྭཱ སཡམྤི སམཎདྷམྨཾ ཀཱཏུཀཱམོ ཛཱཏོ. ཏེཔི ཁོ བྷིཀྑཱུ ‘‘མཡཾ, བྷནྟེ, ཏམེཝ ཨརཉྙཝཱསཾ གནྟྭཱ ཝསིསྶཱམཱ’’ཏི སཏྠཱརཾ ཨཱཔུཙྪིཾསུ. སཏྠཱ ‘‘སཱདྷཱུ’’ཏི ཨནུཛཱནི. ཏེ སཏྠཱརཾ ཝནྡིཏྭཱ པརིཝེཎཾ ཨགམཾསུ.

ཨཐ སོ ཀུཊུམྦིཀཔུཏྟཏིསྶཏྠེརོ རཏྟིབྷཱགསམནནྟརེ ཨཙྩཱརདྡྷཝཱིརིཡོ ཧུཏྭཱ ཨཏིཝེགེན སམཎདྷམྨཾ ཀརོནྟོ མཛ྄ཛྷིམཡཱམསམནནྟརེ ཨཱལམྦནཕལཀཾ ནིསྶཱཡ ཋིཏཀོཝ ནིདྡཱཡནྟོ པརིཝཏྟིཏྭཱ པཏི, ཨཱུརུཊྛིཀཾ བྷིཛྫི, ཝེདནཱ མཧནྟཱ ཛཱཏཱ. ཏེསཾ བྷིཀྑཱུནཾ ཏཾ པཊིཛགྒནྟཱནཾ གམནཾ ན སམྤཛྫི. ཨཐ ནེ ཨུཔཊྛཱནཝེལཱཡཾ ཨཱགཏེ སཏྠཱ པུཙྪི ‘‘ནནུ ཏུམྷེ, བྷིཀྑཝེ, ‘སྭེ གམིསྶཱམཱ’ཏི ཧིཡྻོ ཨཱཔུཙྪིཏྠཱ’’ཏི? ‘‘ཨཱམ, བྷནྟེ, ཨཔིཙ ཁོ པན ཨམྷཱཀཾ སཧཱཡཀོ ཀུཊུམྦིཀཔུཏྟཏིསྶཏྠེརོ ཨཀཱལེ ཨཏིཝེགེན སམཎདྷམྨཾ ཀརོནྟོ ནིདྡཱབྷིབྷཱུཏོ པརིཝཏྟིཏྭཱ པཏིཏོ, ཨཱུརུཊྛིསྶ བྷིནྣཾ, ཏཾ ནིསྶཱཡ ཨམྷཱཀཾ གམནཾ ན སམྤཛྫཱི’’ཏི. སཏྠཱ ‘‘ན, བྷིཀྑཝེ, ཨིདཱནེཝེས ཨཏྟནོ ཧཱིནཝཱིརིཡབྷཱཝེན ཨཀཱལེ ¶ ཨཏིཝེགེན ཝཱིརིཡཾ ཀརོནྟོ ཏུམྷཱཀཾ གམནནྟརཱཡཾ ཀརོཏི, པུབྦེཔེས ཏུམྷཱཀཾ གམནནྟརཱཡཾ ཨཀཱསིཡེཝཱ’’ཏི ཝཏྭཱ ཏེཧི ཡཱཙིཏོ ཨཏཱིཏཾ ཨཱཧརི.

ཨཏཱིཏེ གནྡྷཱརརཊྛེ ཏཀྐསིལཱཡཾ བོདྷིསཏྟོ དིསཱཔཱམོཀྑོ ཨཱཙརིཡོ ཧུཏྭཱ པཉྩ མཱཎཝཀསཏཱནི སིཔྤཾ ཨུགྒཎྷཱཔེསི. ཨཐསྶ ཏེ མཱཎཝཱ ཨེཀདིཝསཾ དཱརུཾ ཨཱཧརཎཏྠཱཡ ཨརཉྙཾ གནྟྭཱ དཱརཱུནི ཨུདྡྷརིཾསུ. ཏེསཾ ཨནྟརེ ཨེཀོ ཀུསཱིཏམཱཎཝོ མཧནྟཾ ཝརུཎརུཀྑཾ དིསྭཱ ‘‘སུཀྑརུཀྑོ ཨེསོ’’ཏི སཉྙཱཡ ‘‘མུཧུཏྟཾ ཏཱཝ ནིཔཛྫིཏྭཱ པཙྪཱ རུཀྑཾ ཨབྷིརུཧིཏྭཱ ¶ དཱརཱུནི པཱཏེཏྭཱ ཨཱདཱཡ གམིསྶཱམཱི’’ཏི ཨུཏྟརིསཱཊཀཾ པཏྠརིཏྭཱ ནིཔཛྫིཏྭཱ ཀཱཀཙྪམཱནོ ནིདྡཾ ཨོཀྐམི. ཨིཏརེ མཱཎཝཀཱ དཱརུཀལཱཔེ བནྡྷིཏྭཱ ཨཱདཱཡ གཙྪནྟཱ ཏཾ པཱདེན པིཊྛིཡཾ པཧརིཏྭཱ པབོདྷེཏྭཱ ཨགམཾསུ. ཀུསཱིཏམཱཎཝོ ཨུཊྛཱཡ ཨཀྑཱིནི པུཉྪིཏྭཱ པུཉྪིཏྭཱ ¶ ཨཝིགཏནིདྡོཝ ཝརུཎརུཀྑཾ ཨབྷིརུཧིཏྭཱ སཱཁཾ གཧེཏྭཱ ཨཏྟནོ ཨབྷིམུཁཾ ཨཱཀཌྜྷིཏྭཱ བྷཉྫནྟོ བྷིཛྫིཏྭཱ ཨུཊྛིཏཀོཊིཡཱ ཨཏྟནོ ཨཀྑིཾ བྷིནྡཱཔེཏྭཱ ཨེཀེན ཧཏྠེན ཏཾ པིདྷཱཡ ཨེཀེན ཧཏྠེན ཨལླདཱརཱུནི བྷཉྫིཏྭཱ རུཀྑཏོ ཨོརུཡ྄ཧ དཱརུཀལཱཔཾ བནྡྷིཏྭཱ ཨུཀྑིཔིཏྭཱ ཝེགེན གནྟྭཱ ཏེཧི པཱཏིཏཱནཾ དཱརཱུནཾ ཨུཔརི པཱཏེསི.

ཏཾ དིཝསཉྩ ཛནཔདགཱམཀེ ཨེཀཾ ཀུལཾ ‘‘སྭེ བྲཱཧྨཎཝཱཙནཀཾ ཀརིསྶཱམཱ’’ཏི ཨཱཙརིཡཾ ནིམནྟེསི. ཨཱཙརིཡོ མཱཎཝཀེ ཨཱཧ ‘‘ཏཱཏཱ, སྭེ ཨེཀཾ གཱམཀཾ གནྟབྦཾ, ཏུམྷེ པན ནིརཱཧཱརཱ ན སཀྑིསྶཐ གནྟུཾ, པཱཏོཝ ཡཱགུཾ པཙཱཔེཏྭཱ ཏཏྠ གནྟྭཱ ཨཏྟནཱ ལདྡྷཀོཊྛཱསཉྩ ཨམྷཱཀཾ པཏྟཀོཊྛཱསཉྩ སབྦམཱདཱཡ ཨཱགཙྪཐཱ’’ཏི. ཏེ པཱཏོཝ ཡཱགུཔཙནཏྠཱཡ དཱསིཾ ཨུཊྛཱཔེཏྭཱ ‘‘ཁིཔྤཾ ནོ ཡཱགུཾ པཙཱཧཱི’’ཏི ཨཱཧཾསུ. སཱ དཱརཱུནི གཎྷནྟཱི ཨུཔརི ཋིཏཱནི ཨལླཝརུཎདཱརཱུནི གཧེཏྭཱ པུནཔྤུནཾ མུཁཝཱཏཾ དདམཱནཱཔི ཨགྒིཾ ཨུཛྫཱལེཏུཾ ཨསཀྐོནྟཱི སཱུརིཡཾ ཨུཊྛཱཔེསི. མཱཎཝཀཱ ‘‘ཨཏིདིཝཱ ཛཱཏོ, ཨིདཱནི ན སཀྐཱ གནྟུ’’ནྟི ཨཱཙརིཡསྶ སནྟིཀཾ ཨགམིཾསུ. ཨཱཙརིཡོ ‘‘ཀིཾ, ཏཱཏཱ, ན གཏཏྠཱ’’ཏི? ‘‘ཨཱམ, ཨཱཙརིཡ ན གཏམྷཱ’’ཏི. ‘‘ཀིཾཀཱརཎཱ’’ཏི? ‘‘ཨསུཀོ ནཱམ ཀུསཱིཏམཱཎཝོ ཨམྷེཧི སདྡྷིཾ དཱརཱུནམཏྠཱཡ ཨརཉྙཾ གནྟྭཱ ཝརུཎརུཀྑམཱུལེ ནིདྡཱཡིཏྭཱ པཙྪཱ ¶ ཝེགེན རུཀྑཾ ཨཱརུཡ྄ཧ ཨཀྑིཾ བྷིནྡཱཔེཏྭཱ ཨལླཝརུཎདཱརཱུནི ཨཱཧརིཏྭཱ ཨམྷེཧི ཨཱནཱིཏདཱརཱུནཾ ཨུཔརི པཀྑིཔི. ཡཱགུཔཱཙིཀཱ ཏཱནི སུཀྑདཱརུསཉྙཱཡ གཧེཏྭཱ ཡཱཝ སཱུརིཡུགྒམནཱ ཨུཛྫཱལེཏུཾ ནཱསཀྑི. ཨིམིནཱ ནོ ཀཱརཎེན གམནནྟརཱཡོ ཛཱཏོ’’ཏི. ཨཱཙརིཡོ མཱཎཝེན ཀཏཀམྨཾ སུཏྭཱ ‘‘ཨནྡྷབཱལཱནཾ ཀམྨཾ ནིསྶཱཡ ཨེཝརཱུཔཱ པརིཧཱནི ཧོཏཱི’’ཏི ཝཏྭཱ ཨིམཾ གཱཐཾ སམུཊྛཱཔེསི –

༧༡.

‘‘ཡོ ¶ པུབྦེ ཀརཎཱིཡཱནི, པཙྪཱ སོ ཀཱཏུམིཙྪཏི;

ཝརུཎཀཊྛབྷཉྫོཝ, ས པཙྪཱ མནུཏཔྤཏཱི’’ཏི.

ཏཏྠ ས པཙྪཱ མནུཏཔྤཏཱིཏི ཡོ ཀོཙི པུགྒལོ ‘‘ཨིདཾ པུབྦེ ཀཏྟབྦཾ, ཨིདཾ པཙྪཱ’’ཏི ཨཝཱིམཾསིཏྭཱ པུབྦེ ཀརཎཱིཡཱནི པཋམམེཝ ཀཏྟབྦཀམྨཱནི པཙྪཱ ཀརོཏི, ཨཡཾ ཝརུཎཀཊྛབྷཉྫོ ཨམྷཱཀཾ མཱཎཝཀོ ཝིཡ སོ བཱལཔུགྒལོ པཙྪཱ ཨནུཏཔྤཏི སོཙཏི པརིདེཝཏཱིཏི ཨཏྠོ.

ཨེཝཾ བོདྷིསཏྟོ ཨནྟེཝཱསིཀཱནཾ ཨིམཾ ཀཱརཎཾ ཀཐེཏྭཱ དཱནཱདཱིནི པུཉྙཱནི ཀརིཏྭཱ ཛཱིཝིཏཔརིཡོསཱནེ ཡཐཱཀམྨཾ གཏོ.

སཏྠཱ ¶ ‘‘ན, བྷིཀྑཝེ, ཨིདཱནེཝེས ཏུམྷཱཀཾ ཨནྟརཱཡཾ ཀརོཏི, པུབྦེཔི ཨཀཱསིཡེཝཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི ‘‘ཏདཱ ཨཀྑིབྷེདཾ པཏྟོ མཱཎཝོ ཨཱུརུབྷེདཾ པཏྟབྷིཀྑུ ཨཧོསི, སེསམཱཎཝཱ བུདྡྷཔརིསཱ, ཨཱཙརིཡབྲཱཧྨཎོ པན ཨཧམེཝ ཨཧོསི’’ནྟི.

ཝརུཎཛཱཏཀཝཎྞནཱ པཋམཱ.

[༧༢] ༢. སཱིལཝནཱགརཱཛཛཱཏཀཝཎྞནཱ

ཨཀཏཉྙུསྶ པོསསྶཱཏི ཨིདཾ སཏྠཱ ཝེལུ༹ཝནེ ཝིཧརནྟོ དེཝདཏྟཾ ཨཱརབྦྷ ཀཐེསི. དྷམྨསབྷཱཡཉྷི བྷིཀྑཱུ ‘‘ཨཱཝུསོ, དེཝདཏྟོ ཨཀཏཉྙཱུ ཏཐཱགཏསྶ གུཎེ ན ཛཱནཱཏཱི’’ཏི ཀཐེནྟཱ ནིསཱིདིཾསུ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ དེཝདཏྟོ ¶ ཨཀཏཉྙཱུ, པུབྦེཔི ཨཀཏཉྙཱུཡེཝ, ན ཀདཱཙི མཡ྄ཧཾ གུཎཾ ཛཱནཱཏཱི’’ཏི ཝཏྭཱ ཏེཧི ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཧིམཝནྟཔྤདེསེ ཧཏྠིཡོནིཡཾ ནིབྦཏྟི. སོ མཱཏུཀུཙྪིཏོ ནིཀྑནྟོ སབྦསེཏོ ཨཧོསི རཛཏཔུཉྫསནྣིབྷོ, ཨཀྑཱིནི པནསྶ མཎིགུལ༹སདིསཱནི, པཉྙཱཡམཱནཱནི པཉྩ པསཱདཱནི ཨཧེསུཾ, མུཁཾ རཏྟཀམྦལསདིསཾ, སོཎྜཱ རཏྟསུཝཎྞབིནྡུཔཊིམཎྜིཏཾ རཛཏདཱམཾ ཝིཡ, ཙཏྟཱརོ པཱདཱ ཀཏལཱཁཱརསཔརིཀམྨཱ ཝིཡ. ཨེཝམསྶ དསཧི པཱརམཱིཧི ཨལངྐཏོ རཱུཔསོབྷགྒཔྤཏྟོ ཨཏྟབྷཱཝོ ཨཧོསི. ཨཐ ནཾ ཝིཉྙུཏཾ པཏྟཾ སཀལཧིམཝནྟེ ¶ ཝཱརཎཱ སནྣིཔཏིཏྭཱ ཨུཔཊྛཧནྟཱ ཝིཙརིཾསུ. ཨེཝཾ སོ ཨསཱིཏིསཧསྶཝཱརཎཔརིཝཱརོ ཧིམཝནྟཔྤདེསེ ཝསམཱནོ ཨཔརབྷཱགེ གཎེ དོསཾ དིསྭཱ གཎམྷཱ ཀཱཡཝིཝེཀཱཡ ཨེཀཀོཝ ཨརཉྙེ ཝཱསཾ ཀཔྤེསི. སཱིལཝནྟཏཱཡ ཙ པནསྶ ‘‘སཱིལཝནཱགརཱཛཱ’’ ཏྭེཝ ནཱམཾ ཨཧོསི.

ཨཐེཀོ བཱརཱཎསིཝཱསིཀོ ཝནཙརཀོ ཧིམཝནྟཾ པཝིསིཏྭཱ ཨཏྟནོ ཨཱཛཱིཝབྷཎྜཀཾ གཝེསམཱནོ དིསཱ ཝཝཏྠཱཔེཏུཾ ཨསཀྐོནྟོ མགྒམཱུལ༹ྷོ ཧུཏྭཱ མརཎབྷཡབྷཱིཏོ བཱཧཱ པགྒཡ྄ཧ པརིདེཝམཱནོ ཝིཙརཏི. བོདྷིསཏྟོ ཏསྶ ཏཾ བལཝཔརིདེཝིཏཾ སུཏྭཱ ‘‘ཨིམཾ པུརིསཾ དུཀྑཱ མོཙེསྶཱམཱི’’ཏི ཀཱརུཉྙེན ཙོདིཏོ ཏསྶ སནྟིཀཾ ཨགམཱསི. སོ ཏཾ དིསྭཱཝ བྷཱིཏོ པལཱཡི. བོདྷིསཏྟོ ཏཾ པལཱཡནྟཾ དིསྭཱ ཏཏྠེཝ ཨཊྛཱསི. སོ པུརིསོ བོདྷིསཏྟཾ ཋིཏཾ དིསྭཱ ཨཊྛཱསི ¶ . བོདྷིསཏྟོ པུན ཨགམཱསི, སོ པུན པལཱཡིཏྭཱ ཏསྶ ཋིཏཀཱལེ ཋཏྭཱ ཙིནྟེསི ‘‘ཨཡཾ ཝཱརཎོ མམ པལཱཡནཀཱལེ ཏིཊྛཏི, ཋིཏཀཱལེ ཨཱགཙྪཏི, ནཱཡཾ མཡ྄ཧཾ ཨནཏྠཀཱམོ, ཨིམམྷཱ པན མཾ དུཀྑཱ མཱཙེཏུཀཱམོ བྷཝིསྶཏཱི’’ཏི སཱུརོ ཧུཏྭཱ ཨཊྛཱསི. བོདྷིསཏྟོ ཏཾ ཨུཔསངྐམིཏྭཱ ‘‘ཀསྨཱ བྷོ ཏྭཾ པུརིས, པརིདེཝམཱནོ ཝིཙརསཱི’’ཏི པུཙྪི. ‘‘སཱམི, དིསཱ ཝཝཏྠཱཔེཏུཾ ཨསཀྐོནྟོ མགྒམཱུལ༹ྷོ ཧུཏྭཱ མརཎབྷཡེནཱ’’ཏི. ཨཐ ནཾ བོདྷིསཏྟོ ཨཏྟནོ ཝསནཊྛཱནཾ ནེཏྭཱ ཀཏིཔཱཧཾ ཕལཱཕལེཧི སནྟཔྤེཏྭཱ ‘‘བྷོ, པུརིས, མཱ བྷཱཡི, ཨཧཾ ཏཾ མནུསྶཔཐཾ ¶ ནེསྶཱམཱི’’ཏི ཨཏྟནོ པིཊྛེ ནིསཱིདཱཔེཏྭཱ མནུསྶཔཐཾ པཱཡཱསི.

ཨཐ ཁོ སོ མིཏྟདུབྦྷཱི པུརིསོ ‘‘སཙེ ཀོཙི པུཙྪིསྶཏི, ཨཱཙིཀྑིཏབྦཾ བྷཝིསྶཏཱི’’ཏི བོདྷིསཏྟསྶ པིཊྛེ ནིསིནྣོཡེཝ རུཀྑནིམིཏྟཾ པབྦཏནིམིཏྟཾ ཨུཔདྷཱརེནྟོཝ གཙྪཏི. ཨཐ ནཾ བོདྷིསཏྟོ ཨརཉྙཱ ནཱིཧརིཏྭཱ བཱརཱཎསིགཱམིམཧཱམགྒེ ཋཔེཏྭཱ ‘‘བྷོ པུརིས, ཨིམིནཱ མགྒེན གཙྪ, མཡ྄ཧཾ པན ཝསནཊྛཱནཾ པུཙྪིཏོཔི ཨཔུཙྪིཏོཔི མཱ ཀསྶཙི ཨཱཙིཀྑཱི’’ཏི ཏཾ ཨུཡྻོཛེཏྭཱ ཨཏྟནོ ཝསནཊྛཱནཾཡེཝ ཨགམཱསི. ཨཐ སོ པུརིསོ བཱརཱཎསིཾ གནྟྭཱ ཨནུཝིཙརནྟོ དནྟཀཱརཝཱིཐིཾ པཏྭཱ དནྟཀཱརེ དནྟཝིཀཏིཡོ ཀུརུམཱནེ དིསྭཱ ‘‘ཀིཾ པན བྷོ, ཛཱིཝདནྟམྤི ¶ ལབྷིཏྭཱ གཎྷེཡྻཱཐཱ’’ཏི? ‘‘བྷོ, ཀིཾ ཝདེསི, ཛཱིཝདནྟོ ནཱམ མཏཧཏྠིདནྟཏོ མཧགྒྷཏརོ’’ཏི. ‘‘ཏེན ཧི ཨཧཾ ཝོ ཛཱིཝདནྟཾ ཨཱཧརིསྶཱམཱི’’ཏི པཱཐེཡྻཾ གཧེཏྭཱ ཁརཀཀཙཾ ཨཱདཱཡ བོདྷིསཏྟསྶ ཝསནཊྛཱནཾ ཨགམཱསི.

བོདྷིསཏྟོ ཏཾ དིསྭཱ ‘‘ཀིམཏྠཾ ཨཱགཏོསཱི’’ཏི པུཙྪི. ‘‘ཨཧཾ, སཱམི, དུགྒཏོ ཀཔཎོ ཛཱིཝིཏུཾ ཨསཀྐོནྟོ ཏུམྷེ དནྟཁཎྜཾ ཡཱཙིཏྭཱ སཙེ དསྶཐ, ཏཾ ཨཱདཱཡ གནྟྭཱ ཝིཀྐིཎིཏྭཱ ཏེན མཱུལེན ཛཱིཝིསྶཱམཱི’’ཏི ཨཱགཏོཏི. ‘‘ཧོཏུ བྷོ, དནྟཾ ཏེ དསྶཱམི, སཙེ དནྟཀཔྤནཏྠཱཡ ཀཀཙཾ ཨཏྠཱི’’ཏི. ‘‘ཀཀཙཾ གཧེཏྭཱ ཨཱགཏོམྷི སཱམཱི’’ཏི. ‘‘ཏེན ཧི དནྟེ ཀཀཙེན ཀནྟིཏྭཱ ཨཱདཱཡ གཙྪཱ’’ཏི བོདྷིསཏྟོ པཱདེ སམིཉྫིཏྭཱ གོནིསིནྣཀཾ ནིསཱིདི. སོ དྭེཔི ཨགྒདནྟེ ཚིནྡི. བོདྷིསཏྟོ ཏེ དནྟེ སོཎྜཱཡ གཧེཏྭཱ ‘‘བྷོ པུརིས, ནཱཧཾ ‘ཨེཏེ དནྟཱ མཡ྄ཧཾ ཨཔྤིཡཱ ཨམནཱཔཱ’ཏི དམྨི, ཨིམེཧི པན མེ དནྟེཧི སཏགུཎེན སཧསྶགུཎེན སཏསཧསྶགུཎེན སབྦདྷམྨཔཊིཝེདྷནསམཏྠཱ སབྦཉྙུཏཉྙཱཎདནྟཱཝ པིཡཏརཱ, ཏསྶ མེ ཨིདཾ དནྟདཱནཾ སབྦཉྙུཏཉྙཱཎཔཊིཝིཛ྄ཛྷནཏྠཱཡ ཧོཏཱུ’’ཏི སབྦཉྙུཏཉྙཱཎསྶ ཨཱརཱདྷནཾ ཀཏྭཱ དནྟཡུགལཾ ཨདཱསི.

སོ ¶ ཏཾ ཨཱདཱཡ གནྟྭཱ ཝིཀྐིཎིཏྭཱ ཏསྨིཾ མཱུལེ ཁཱིཎེ པུན བོདྷིསཏྟསྶ སནྟིཀཾ གནྟྭཱ ‘‘སཱམི, ཏུམྷཱཀཾ དནྟེ ཝིཀྐིཎིཏྭཱ ལདྡྷམཱུལཾ མཡ྄ཧཾ ¶ ཨིཎསོདྷནམཏྟམེཝ ཛཱཏཾ, ཨཝསེསདནྟེ དེཐཱ’’ཏི ཨཱཧ. བོདྷིསཏྟོ ‘‘སཱདྷཱུ’’ཏི པཊིསྶུཎིཏྭཱ པུརིམནཡེནེཝ ཀཔྤཱཔེཏྭཱ ཨཝསེསདནྟེ ཨདཱསི. སོ ཏེཔི ཝིཀྐིཎིཏྭཱ པུན ཨཱགནྟྭཱ ‘‘སཱམི, ཛཱིཝིཏུཾ ན སཀྐོམི, མཱུལདཱཋཱ མེ དེཐཱ’’ཏི ཨཱཧ. བོདྷིསཏྟོ ‘‘སཱདྷཱུ’’ཏི པཊིསྶུཎིཏྭཱ པུརིམནཡེནེཝ ནིསཱིདི. སོ པཱཔཔུརིསོ མཧཱསཏྟསྶ རཛཏདཱམསདིསཾ སོཎྜཾ མདྡམཱནོ ཀེལཱསཀཱུཊསདིསཾ ཀུམྦྷཾ ཨབྷིརུཧིཏྭཱ ཨུབྷོ དནྟཀོཊིཡོ པཎྷིཡཱ པཧརནྟོ མཾསཾ ཝིཡཱུཧིཏྭཱ ཀུམྦྷཾ ཨཱརུཡ྄ཧ ཁརཀཀཙེན མཱུལདཱཋཱ ཀཔྤེཏྭཱ པཀྐཱམི. བོདྷིསཏྟསྶ དསྶནཱུཔཙཱརཾ ཝིཛཧནྟེཡེཝ པན ཏསྨིཾ པཱཔཔུརིསེ ཙཏུནཧུཏཱདྷིཀདྭིཡོཛནསཏསཧསྶབཧལཱ གྷནཔཐཝཱི ¶ སིནེརུཡུགནྡྷརཱདཡོ མཧཱབྷཱརེ དུགྒནྡྷཛེགུཙྪཱནི གཱུཐམུཏྟཱདཱིནི ཙ དྷཱརེཏུཾ སམཏྠཱཔི ཏསྶ ཨགུཎརཱསིཾ དྷཱརེཏུཾ ཨསཀྐོནྟཱི ཝིཡ བྷིཛྫིཏྭཱ ཝིཝརཾ ཨདཱསི. ཏཱཝདེཝ ཨཝཱིཙིམཧཱནིརཡཏོ ཨགྒིཛཱལཱ ནིཀྑམིཏྭཱ ཏཾ མིཏྟདུབྦྷིཔུརིསཾ ཀུལསནྟཀེན ཀམྦལེན པཱརུཔནྟཱི ཝིཡ པརིཀྑིཔིཏྭཱ གཎྷི.

ཨེཝཾ ཏསྶ པཱཔཔུགྒལསྶ པཐཝིཾ པཝིཊྛཀཱལེ ཏསྨིཾ ཝནསཎྜེ ཨདྷིཝཏྠཱ རུཀྑདེཝཏཱ ‘‘ཨཀཏཉྙཱུ མིཏྟདུབྦྷཱི པུགྒལོ ཙཀྐཝཏྟིརཛྫཾ དཏྭཱཔི ཏོསེཏུཾ ན སཀྐཱ’’ཏི ཝནཾ ཨུནྣཱདེཏྭཱ དྷམྨཾ དེསཡམཱནཱ ཨིམཾ གཱཐམཱཧ –

༧༢.

‘‘ཨཀཏཉྙུསྶ པོསསྶ, ནིཙྩཾ ཝིཝརདསྶིནོ;

སབྦཾ ཙེ པཐཝིཾ དཛྫཱ, ནེཝ ནཾ ཨབྷིརཱདྷཡེ’’ཏི.

ཏཏྠ ཨཀཏཉྙུསྶཱཏི ཨཏྟནོ ཀཏགུཎཾ ཨཛཱནནྟསྶ. པོསསྶཱཏི པུརིསསྶ. ཝིཝརདསྶིནོཏི ཚིདྡམེཝ ཨོཀཱསམེཝ ཨོལོཀེནྟསྶ. སབྦཾ ཙེ པཐཝིཾ དཛྫཱཏི སཙེཔི ཏཱདིསསྶ པུགྒལསྶ སཀལཾ ཙཀྐཝཏྟིརཛྫཾ, ཨིམཾ ཝཱ པན མཧཱཔཐཝིཾ པརིཝཏྟེཏྭཱ པཐཝོཛཾ དདེཡྻ. ནེཝ ནཾ ཨབྷིརཱདྷཡེཏི ཨེཝཾ ཀརོནྟོཔི ཨེཝརཱུཔཾ ཀཏགུཎཝིདྡྷཾསཀཾ ཀོཙི པརིཏོསེཏུཾ ཝཱ པསཱདེཏུཾ ཝཱ ན སཀྐུཎེཡྻཱཏི ཨཏྠོ.

ཨེཝཾ སཱ དེཝཏཱ ཝནཾ ཨུནྣཱདེཏྭཱ དྷམྨཾ དེསེསི. བོདྷིསཏྟོ ཡཱཝཏཱཡུཀཾ ཋཏྭཱ ཡཐཱཀམྨཾ ཨགམཱསི.

སཏྠཱ ¶ ¶ ‘‘ན, བྷིཀྑཝེ, དེཝདཏྟོ ཨིདཱནེཝ ཨཀཏཉྙཱུ, པུབྦེཔི ཨཀཏཉྙཱུཡེཝཱ’’ཏི ཝཏྭཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི ‘‘ཏདཱ མིཏྟདུབྦྷཱི པུགྒལོ དེཝདཏྟོ ཨཧོསི, རུཀྑདེཝཏཱ སཱརིཔུཏྟོ, སཱིལཝནཱགརཱཛཱ པན ཨཧམེཝ ཨཧོསི’’ནྟི.

སཱིལཝནཱགརཱཛཛཱཏཀཝཎྞནཱ དུཏིཡཱ.

[༧༣] ༣. སཙྩཾཀིརཛཱཏཀཝཎྞནཱ

སཙྩཾ ཀིརེཝམཱཧཾསཱུཏི ཨིདཾ སཏྠཱ ཝེལུ༹ཝནེ ཝིཧརནྟོ དེཝདཏྟསྶ ཝདྷཱཡ པརིསཀྐནཾ ཨཱརབྦྷ ཀཐེསི. བྷིཀྑུསངྒྷསྨིཉྷི དྷམྨསབྷཱཡཾ ནིསཱིདིཏྭཱ ‘‘ཨཱཝུསོ, དེཝདཏྟོ སཏྠུ གུཎཾ ན ཛཱནཱཏི, ཝདྷཱཡཡེཝ པརིསཀྐཏཱི’’ཏི དེཝདཏྟསྶ ཨགུཎཾ ཀཐེནྟེ སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི ¶ པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ དེཝདཏྟོ མཡ྄ཧཾ ཝདྷཱཡ པརིསཀྐཏི, པུབྦེཔི པརིསཀྐིཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ ཏསྶ དུཊྛཀུམཱརོ ནཱམ པུཏྟོ ཨཧོསི ཀཀྑལོ༹ ཕརུསོ པཧཊཱསཱིཝིསཱུཔམོ, ཨནཀྐོསིཏྭཱ ཝཱ ཨཔཧརིཏྭཱ ཝཱ ཀེནཙི སདྡྷིཾ ན ཀཐེཏི. སོ ཨནྟོཛནསྶ ཙ བཧིཛནསྶ ཙ ཨཀྑིམྷི པཏིཏརཛཾ ཝིཡ, ཁཱདིཏུཾ ཨཱགཏཔིསཱཙོ ཝིཡ ཙ ཨམནཱཔོ ཨཧོསི ཨུབྦེཛནཱིཡོ. སོ ཨེཀདིཝསཾ ནདཱིཀཱིལ༹ཾ ཀཱིལི༹ཏུཀཱམོ མཧནྟེན པརིཝཱརེན ནདཱིཏཱིརཾ ཨགམཱསི. ཏསྨིཾ ཁཎེ མཧཱམེགྷོ ཨུཊྛཧི, དིསཱ ཨནྡྷཀཱརཱ ཛཱཏཱ. སོ དཱསཔེསྶཛནཾ ཨཱཧ ‘‘ཨེཐ བྷཎེ, མཾ གཧེཏྭཱ ནདཱིམཛ྄ཛྷཾ ནེཏྭཱ ནྷཱཔེཏྭཱ ཨཱནེཐཱ’’ཏི. ཏེ ཏཾ ཏཏྠ ནེཏྭཱ ‘‘ཀིཾ ནོ རཱཛཱ ཀརིསྶཏི, ཨིམཾ པཱཔཔུརིསཾ ཨེཏྠེཝ མཱརེམཱ’’ཏི མནྟཡིཏྭཱ ‘‘ཨེཏྠ གཙྪ ཀཱལ༹ཀཎྞཱི’’ཏི ཨུདཀེ ནཾ ཨོཔིལཱཔེཏྭཱ པཙྩུཏྟརིཏྭཱ ཏཱིརེ ཨཊྛཾསུ. ‘‘ཀཧཾ ཀུམཱརོ’’ཏི ཙ ཝུཏྟེ ‘‘ན མཡཾ ཀུམཱརཾ པསྶཱམ, མེགྷཾ ཨུཊྛིཏཾ དིསྭཱ ཨུདཀེ ནིམུཛྫིཏྭཱ པུརཏོ ཨཱགཏོ ¶ བྷཝིསྶཏཱི’’ཏི. ཨམཙྩཱ རཉྙོ སནྟིཀཾ ཨགམཾསུ. རཱཛཱ ‘‘ཀཧཾ མེ པུཏྟོ’’ཏི པུཙྪི. ན ཛཱནཱམ དེཝ, མེགྷེ ཨུཊྛིཏེ ‘‘པུརཏོ ཨཱགཏོ བྷཝིསྶཏཱི’’ཏི སཉྙཱཡ ཨཱགཏམྷཱཏི. རཱཛཱ དྭཱརཾ ཝིཝརཱཔེཏྭཱ ‘‘ནདཱིཏཱིརཾ གནྟྭཱ ཝིཙིནཐཱ’’ཏི ཏཏྠ ཏཏྠ ཝིཙིནཱཔེསི, ཀོཙི ཀུམཱརཾ ནཱདྡས.

སོཔི ཁོ མེགྷནྡྷཀཱརེ དེཝེ ཝསྶནྟེ ནདིཡཱ ཝུཡ྄ཧམཱནོ ཨེཀཾ དཱརུཀྑནྡྷཾ དིསྭཱ ཏཏྠ ནིསཱིདིཏྭཱ ¶ མརཎབྷཡཏཛྫིཏོ པརིདེཝམཱནོ གཙྪཏི. ཏསྨིཾ པན ཀཱལེ བཱརཱཎསིཝཱསཱི ཨེཀོ སེཊྛི ནདཱིཏཱིརེ ཙཏྟཱལཱིསཀོཊིདྷནཾ ནིདཧིཏྭཱཝ མརནྟོ དྷནཏཎྷཱཡ དྷནཔིཊྛེ སཔྤོ ཧུཏྭཱ ནིབྦཏྟི. ཨཔརོ ཏསྨིཾཡེཝ པདེསེ ཏིཾས ཀོཊིཡོ ནིདཧིཏྭཱ དྷནཏཎྷཱཡ ཏཏྠེཝ ཨུནྡཱུརོ ཧུཏྭཱ ནིབྦཏྟི. ཏེསཾ ཝསནཊྛཱནཾ ཨུདཀཾ པཱཝིསི. ཏེ ཨུདཀསྶ པཝིཊྛམགྒེནེཝ ནིཀྑམིཏྭཱ སོཏཾ ཚིནྡནྟཱ གནྟྭཱ ཏཾ རཱཛཀུམཱརེན ཨབྷིནིསིནྣཾ ¶ དཱརུཀྑནྡྷཾ པཏྭཱ ཨེཀོ ཨེཀཾ ཀོཊིཾ, ཨིཏརོ ཨིཏརཾ ཨཱརུཡ྄ཧ ཁནྡྷཔིཊྛེཡེཝ ནིཔཛྫིཾསུ. ཏསྶཱཡེཝ ཁོ པན ནདིཡཱ ཏཱིརེ ཨེཀོ སིམྦལིརུཀྑོ ཨཏྠི, ཏཏྠེཀོ སུཝཔོཏཀོ ཝསཏི. སོཔི རུཀྑོ ཨུདཀེན དྷོཏམཱུལོ ནདཱིཔིཊྛེ པཏི, སུཝཔོཏཀོ དེཝེ ཝསྶནྟེ ཨུཔྤཏིཏྭཱ གནྟུཾ ཨསཀྐོནྟོ གནྟྭཱ ཏསྶེཝ ཁནྡྷསྶ ཨེཀཔསྶེ ནིལཱིཡི. ཨེཝཾ ཏེ ཙཏྟཱརོ ཛནཱ ཨེཀཏོ ཝུཡ྄ཧམཱནཱ གཙྪནྟི.

བོདྷིསཏྟོཔི ཁོ ཏསྨིཾ ཀཱལེ ཀཱསིརཊྛེ ཨུདིཙྩབྲཱཧྨཎཀུལེ ནིབྦཏྟིཏྭཱ ཝུཌྜྷིཔྤཏྟོ ཨིསིཔབྦཛྫཾ པབྦཛིཏྭཱ ཨེཀསྨིཾ ནདཱིནིཝཏྟནེ པཎྞསཱལཾ མཱཔེཏྭཱ ཝསཏི. སོ ཨཌྜྷརཏྟསམཡེ ཙངྐམམཱནོ ཏསྶ རཱཛཀུམཱརསྶ བལཝཔརིདེཝནསདྡཾ སུཏྭཱ ཙིནྟེསི ‘‘མཱདིསེ ནཱམ མེཏྟཱནུདྡཡསམྤནྣེ ཏཱཔསེ པསྶནྟེ ཨེཏསྶ པུརིསསྶ མརཎཾ ཨཡུཏྟཾ, ཨུདཀཏོ ཨུདྡྷརིཏྭཱ ཏསྶ ཛཱིཝིཏདཱནཾ དསྶཱམཱི’’ཏི. སོ ཏཾ ‘‘མཱ བྷཱཡི, མཱ བྷཱཡཱི’’ཏི ཨསྶཱསེཏྭཱ ཨུདཀསོཏཾ ཚིནྡནྟོ གནྟྭཱ ཏཾ དཱརུཀྑནྡྷཾ ཨེཀཱཡ ཀོཊིཡཱ གཧེཏྭཱ ཨཱཀཌྜྷནྟོ ནཱགབལོ ཐཱམསམྤནྣོ ཨེཀཝེགེན ཏཱིརཾ པཏྭཱ ཀུམཱརཾ ཨུཀྑིཔིཏྭཱ ཏཱིརེ པཏིཊྛཱཔེསི. ཏེཔི སཔྤཱདཡོ དིསྭཱ ཨུཀྑིཔིཏྭཱ ཨསྶམཔདཾ ནེཏྭཱ ཨགྒིཾ ཛཱལེཏྭཱ ‘‘ཨིམེ དུབྦལཏརཱ’’ཏི པཋམཾ སཔྤཱདཱིནཾ སརཱིརཾ སེདེཏྭཱ པཙྪཱ རཱཛཀུམཱརསྶ སརཱིརཾ སེདེཏྭཱ ཏམྤི ཨརོགཾ ཀཏྭཱ ཨཱཧཱརཾ དེནྟོཔི པཋམཾ སཔྤཱདཱིནཾཡེཝ དཏྭཱ པཙྪཱ ཏསྶ ཕལཱཕལཱནི ཨུཔནཱམེསི. རཱཛཀུམཱརོ ‘‘ཨཡཾ ཀཱུཊཏཱཔསོ མཾ རཱཛཀུམཱརཾ ཨགཎེཏྭཱ ཏིརཙྪཱནགཏཱནཾ སམྨཱནཾ ཀརོཏཱི’’ཏི བོདྷིསཏྟེ ཨཱགྷཱཏཾ བནྡྷི.

ཏཏོ ¶ ཀཏིཔཱཧཙྩཡེན སབྦེསུཔི ཏེསུ ཐཱམབལཔྤཏྟེསུ ནདིཡཱ ཨོགྷེ པཙྪིནྣེ སཔྤོ ཏཱཔསཾ ཝནྡིཏྭཱ ཨཱཧ ‘‘བྷནྟེ, ཏུམྷེཧི མཡ྄ཧཾ མཧཱཨུཔཀཱརོ ཀཏོ, ན ཁོ པནཱཧཾ དལིདྡོ, ཨསུཀཊྛཱནེ མེ ཙཏྟཱལཱིས ཧིརཉྙཀོཊིཡོ ནིདཧིཏྭཱ ཋཔིཏཱ, ཏུམྷཱཀཾ དྷནེན ཀིཙྩེ སཏི སབྦམྤེཏཾ དྷནཾ ཏུམྷཱཀཾ དཱཏུཾ སཀྐོམི, ཏཾ ཋཱནཾ ཨཱགནྟྭཱ ‘དཱིགྷཱ’ཏི པཀྐོསེཡྻཱཐཱ’’ཏི ཝཏྭཱ པཀྐཱམི. ཨུནྡཱུརོཔི ཏཐེཝ ཏཱཔསཾ ནིམནྟེཏྭཱ ‘‘ཨསུཀཊྛཱནེ ཋཏྭཱ ‘ཨུནྡཱུརཱ’ཏི པཀྐོསེཡྻཱཐཱ’’ཏི ¶ ཝཏྭཱ པཀྐཱམི. སུཝཔོཏཀོ པན ཏཱཔསཾ ཝནྡིཏྭཱ ‘‘བྷནྟེ, མཡ྄ཧཾ དྷནཾ ནཏྠི, རཏྟསཱལཱིཧི པན ཝོ ཨཏྠེ སཏི ཨསུཀཾ ནཱམ མཡ྄ཧཾ ཝསནཊྛཱནཾ, ཏཏྠ གནྟྭཱ ‘སུཝཱ’ཏི པཀྐོསེཡྻཱཐ, ཨཧཾ ཉཱཏཀཱནཾ ཨཱརོཙེཏྭཱ ཨནེཀསཀཊཔཱུརམཏྟཱ རཏྟསཱལིཡོ ཨཱཧརཱཔེཏྭཱ དཱཏུཾ སཀྐོམཱི’’ཏི ¶ ཝཏྭཱ པཀྐཱམི. ཨིཏརོ པན མིཏྟདུབྦྷཱི ‘‘དྷམྨསུདྷམྨཏཱཡ ཀིཉྩི ཨཝཏྭཱ གནྟུཾ ཨཡུཏྟཾ, ཨེཝཾ ཏཾ ཨཏྟནོ སནྟིཀཾ ཨཱགཏཾ མཱརེསྶཱམཱི’’ཏི ཙིནྟེཏྭཱ ‘‘བྷནྟེ, མཡི རཛྫེ པཏིཊྛིཏེ ཨཱགཙྪེཡྻཱཐ, ཨཧཾ ཝོ ཙཏཱུཧི པཙྩཡེཧི ཨུཔཊྛཧིསྶཱམཱི’’ཏི ཝཏྭཱ པཀྐཱམི. སོ གནྟྭཱ ན ཙིརསྶེཝ རཛྫེ པཏིཊྛཱསི.

བོདྷིསཏྟོ ‘‘ཝཱིམཾསིསྶཱམི ཏཱཝ ནེ’’ཏི པཋམཾ སཔྤསྶ སནྟིཀཾ གནྟྭཱ ཨཝིདཱུརེ ཋཏྭཱ ‘‘དཱིགྷཱ’’ཏི པཀྐོསི. སོ ཨེཀཝཙནེནེཝ ནིཀྑམིཏྭཱ བོདྷིསཏྟཾ ཝནྡིཏྭཱ ‘‘བྷནྟེ, ཨིམསྨིཾ ཋཱནེ ཙཏྟཱལཱིས ཧིརཉྙཀོཊིཡོ, ཏཱ སབྦཱཔི ནཱིཧརིཏྭཱ གཎྷཐཱ’’ཏི ཨཱཧ. བོདྷིསཏྟོ ‘‘ཨེཝམཏྠུ, ཨུཔྤནྣེ ཀིཙྩེ ཛཱནིསྶཱམཱི’’ཏི ཏཾ ནིཝཏྟེཏྭཱ ཨུནྡཱུརསྶ སནྟིཀཾ གནྟྭཱ སདྡམཀཱསི. སོཔི ཏཐེཝ པཊིཔཛྫི. བོདྷིསཏྟོ ཏམྤི ནིཝཏྟེཏྭཱ སུཝསྶ སནྟིཀཾ གནྟྭཱ ‘‘སུཝཱ’’ཏི པཀྐོསི. སོཔི ཨེཀཝཙནེནེཝ རུཀྑགྒཏོ ཨོཏརིཏྭཱ བོདྷིསཏྟཾ ཝནྡིཏྭཱ ‘‘ཀིཾ, བྷནྟེ, མཡ྄ཧཾ ཉཱཏཀཱནཾ སནྟིཀཾ གནྟྭཱ ཧིམཝནྟཔྤདེསཏོ ཏུམྷཱཀཾ སཡཾཛཱཏསཱལཱི ཨཱཧརཱཔེམཱི’’ཏི པུཙྪི. བོདྷིསཏྟོ ‘‘ཨཏྠེ སཏི ཛཱནིསྶཱམཱི’’ཏི ཏམྤི ནིཝཏྟེཏྭཱ ‘‘ཨིདཱནི རཱཛཱནཾ པརིགྒཎྷིསྶཱམཱི’’ཏི གནྟྭཱ རཱཛུཡྻཱནེ ཝསིཏྭཱ པུནདིཝསེ ཨཱཀཔྤསམྤཏྟིཾ ཀཏྭཱ བྷིཀྑཱཙཱརཝཏྟེན ནགརཾ པཱཝིསི. ཏསྨིཾ ཁཎེ སོ མིཏྟདུབྦྷཱི རཱཛཱ ཨལངྐཏཧཏྠིཀྑནྡྷཝརགཏོ མཧནྟེན པརིཝཱརེན ¶ ནགརཾ པདཀྑིཎཾ ཀརོཏི. སོ བོདྷིསཏྟཾ དཱུརཏོཝ དིསྭཱ ‘‘ཨཡཾ སོ ཀཱུཊཏཱཔསོ མམ སནྟིཀེ བྷུཉྫིཏྭཱ ཝསིཏུཀཱམོ ཨཱགཏོ, ཡཱཝ པརིསམཛ྄ཛྷེ ཨཏྟནོ མཡ྄ཧཾ ཀཏགུཎཾ ནཔྤཀཱསེཏི, ཏཱཝདེཝསྶ སཱིསཾ ཚིནྡཱཔེསྶཱམཱི’’ཏི པུརིསེ ཨོལོཀེསི. ‘‘ཀིཾ ཀརོམ, དེཝཱ’’ཏི ཙ ཝུཏྟེ ‘‘ཨེས ཀཱུཊཏཱཔསོ མཾ ཀིཉྩི ཡཱཙིཏུཀཱམོ ཨཱགཙྪཏི མཉྙེ, ཨེཏསྶ ཀཱལ༹ཀཎྞིཏཱཔསསྶ མཾ པསྶིཏུཾ ཨདཏྭཱཝ ཨེཏཾ གཧེཏྭཱ པཙྪཱབཱཧཾ ¶ བནྡྷིཏྭཱ ཙཏུཀྐེ ཙཏུཀྐེ པཧརནྟཱ ནགརཱ ནིཀྑཱམེཏྭཱ ཨཱགྷཱཏནེ སཱིསམསྶ ཚིནྡིཏྭཱ སརཱིརཾ སཱུལེ ཨུཏྟཱསེཐཱ’’ཏི ཨཱཧ. ཏེ ‘‘སཱདྷཱུ’’ཏི སམྤཊིཙྪིཏྭཱ གནྟྭཱ ནིརཔརཱདྷཾ མཧཱསཏྟཾ བནྡྷིཏྭཱ ཙཏུཀྐེ ཙཏུཀྐེ པཧརནྟཱ ཨཱགྷཱཏནཾ ནེཏུཾ ཨཱརབྷིཾསུ. བོདྷིསཏྟོ པཧཊཔཧཊཊྛཱནེ ‘‘ཨམྨ, ཏཱཏཱ’’ཏི ཨཀནྡིཏྭཱ ནིབྦིཀཱརོ ཨིམཾ གཱཐམཱཧ –

༧༣.

‘‘སཙྩཾ ཀིརེཝམཱཧཾསུ, ནརཱ ཨེཀཙྩིཡཱ ཨིདྷ;

ཀཊྛཾ ནིཔླཝིཏཾ སེཡྻོ, ན ཏྭེཝེཀཙྩིཡོ ནརོ’’ཏི.

ཏཏྠ ¶ སཙྩཾ ཀིརེཝམཱཧཾསཱུཏི ཨཝིཏཐམེཝ ཀིར ཨེཝཾ ཝདནྟི. ནརཱ ཨེཀཙྩིཡཱ ཨིདྷཱཏི ཨིདྷེཀཙྩེ པཎྜིཏཔུརིསཱ. ཀཊྛཾ ནིཔླཝིཏཾ སེཡྻོཏི ནདིཡཱ ཝུཡ྄ཧམཱནཾ སུཀྑདཱརུཾ ནིཔླཝིཏཾ ཨུཏྟཱརེཏྭཱ ཐལེ ཋཔིཏཾ སེཡྻོ སུནྡརཏརོ. ཨེཝཉྷི ཝདམཱནཱ ཏེ པུརིསཱ སཙྩཾ ཀིར ཝདནྟི. ཀིཾཀཱརཎཱ? ཏཉྷི ཡཱགུབྷཏྟཱདཱིནཾ པཙནཏྠཱཡ, སཱིཏཱཏུརཱནཾ ཝིསིབྦནཏྠཱཡ, ཨཉྙེསམྤི ཙ པརིསྶཡཱནཾ ཧརཎཏྠཱཡ ཨུཔཀཱརཾ ཧོཏི. ན ཏྭེཝེཀཙྩིཡོ ནརོཏི ཨེཀཙྩོ པན མིཏྟདུབྦྷཱི ཨཀཏཉྙཱུ པཱཔཔུརིསོ ཨོགྷེན ཝུཡ྄ཧམཱནོ ཧཏྠེན གཧེཏྭཱ ཨུཏྟཱརིཏོ ན ཏྭེཝ སེཡྻོ. ཏཐཱ ཧི ཨཧཾ ཨིམཾ པཱཔཔུརིསཾ ཨུཏྟཱརེཏྭཱ ཨིམཾ ཨཏྟནོ དུཀྑཾ ཨཱཧརིནྟི. ཨེཝཾ པཧཊཔཧཊཊྛཱནེ ཨིམཾ གཱཐམཱཧ.

ཏཾ སུཏྭཱ ཡེ ཏཏྠ པཎྜིཏཔུརིསཱ, ཏེ ཨཱཧཾསུ ‘‘ཀིཾ པན, བྷོ པབྦཛིཏ, ཏཡཱ ཨམྷཱཀཾ རཉྙོ ཨཏྠི ཀོཙི གུཎོ ཀཏོ’’ཏི? བོདྷིསཏྟོ ཏཾ པཝཏྟིཾ ཨཱརོཙེཏྭཱ ‘‘ཨེཝམིམཾ མཧོགྷཏོ ཨུཏྟཱརེནྟོ ཨཧམེཝ ཨཏྟནོ དུཀྑཾ ཨཀཱསིཾ, ‘ན ཝཏ མེ པོརཱཎཀཔཎྜིཏཱནཾ ཝཙནཾ ཀཏ’ནྟི ཨནུསྶརིཏྭཱ ཨེཝཾ ཝདཱམཱི’’ཏི ཨཱཧ. ཏཾ ¶ སུཏྭཱ ཁཏྟིཡབྲཱཧྨཎཱདཡོ ནགརཝཱསིནོ ‘‘སྭཱཡཾ མིཏྟདུབྦྷཱི རཱཛཱ ཨེཝཾ གུཎསམྤནྣསྶ ཨཏྟནོ ཛཱིཝིཏདཱཡཀསྶ གུཎམཏྟམྤི ན ཛཱནཱཏི, ཏཾ ནིསྶཱཡ ཀུཏོ ཨམྷཱཀཾ ཝུཌྜྷི, གཎྷཐ ན’’ནྟི ཀུཔིཏཱ སམནྟཏོ ཨུཊྛཧིཏྭཱ ཨུསུསཏྟིཔཱསཱཎམུགྒརཱདིཔྤཧཱརེཧི ཧཏྠིཀྑནྡྷགཏམེཝ ནཾ གྷཱཏེཏྭཱ པཱདེ གཧེཏྭཱ ཀཌྜྷིཏྭཱ པརིཁཱཔིཊྛེ ཚཌྜེཏྭཱ བོདྷིསཏྟཾ ཨབྷིསིཉྩིཏྭཱ རཛྫེ པཏིཊྛཱཔེསུཾ.

སོ དྷམྨེན རཛྫཾ ཀཱརེནྟོ པུན ཨེཀདིཝསཾ སཔྤཱདཡོ ¶ པརིགྒཎྷིཏུཀཱམོ མཧནྟེན པརིཝཱརེན སཔྤསྶ ཝསནཊྛཱནཾ གནྟྭཱ ‘‘དཱིགྷཱ’’ཏི པཀྐོསི. སཔྤོ ཨཱགནྟྭཱ ཝནྡིཏྭཱ ‘‘ཨིདཾ ཏེ སཱམི དྷནཾ གཎྷཱ’’ཏི ཨཱཧ. རཱཛཱ ཙཏྟཱལཱིསཧིརཉྙཀོཊིདྷནཾ ཨམཙྩེ པཊིཙྪཱཔེཏྭཱ ཨུནྡཱུརསྶ སནྟིཀཾ གནྟྭཱ ‘‘ཨུནྡཱུརཱ’’ཏི པཀྐོསི. སོཔི ཨཱགནྟྭཱ ཝནྡིཏྭཱ ཏིཾསཀོཊིདྷནཾ ནིཡྻཱདེསི. རཱཛཱ ཏམྤི ཨམཙྩེ པཊིཙྪཱཔེཏྭཱ སུཝསྶ ཝསནཊྛཱནཾ གནྟྭཱ ‘‘སུཝཱ’’ཏི པཀྐོསི. སོཔི ཨཱགནྟྭཱ པཱདེ ཝནྡིཏྭཱ ‘‘ཀིཾ, སཱམི, སཱལིཾ ཨཱཧརཱམཱི’’ཏི ཨཱཧ. རཱཛཱ ‘‘སཱལཱིཧི ཨཏྠེ སཏི ཨཱཧརིསྶསི, ཨེཧི གཙྪཱམཱ’’ཏི སཏྟཏིཡཱ ཧིརཉྙཀོཊཱིཧི སདྡྷིཾ ཏེ ཏཡོཔི ཛནེ གཱཧཱཔེཏྭཱ ནགརཾ གནྟྭཱ པཱསཱདཝརེ མཧཱཏལཾ ཨཱརུཡ྄ཧཾ དྷནཾ སངྒོཔེཏྭཱ སཔྤསྶ ཝསནཏྠཱཡ སུཝཎྞནཱལི༹ཾ, ཨུནྡཱུརསྶ ཕལིཀགུཧཾ, སུཝསྶ སུཝཎྞཔཉྫརཾ ཀཱརཱཔེཏྭཱ སཔྤསྶ ཙ སུཝསྶ ཙ བྷོཛནཏྠཱཡ དེཝསིཀཾ ཀཉྩནཏཊྚཀེ མདྷུལཱཛེ, ཨུནྡཱུརསྶ གནྡྷསཱལིཏཎྜུལེ དཱཔེསི, དཱནཱདཱིནི ཙ པུཉྙཱནི ཀརོཏི. ཨེཝཾ ཏེ ཙཏྟཱརོཔི ཛནཱ ཡཱཝཛཱིཝཾ སམགྒཱ སམྨོདམཱནཱ ཝིཧརིཏྭཱ ཛཱིཝིཏཀྑཡེ ཡཐཱཀམྨཾ ཨགམཾསུ.

སཏྠཱ ¶ ‘‘ན, བྷིཀྑཝེ, དེཝདཏྟོ ཨིདཱནེཝ མཡ྄ཧཾ ཝདྷཱཡ པརིསཀྐཏི, པུབྦེཔི པརིསཀྐིཡེཝཱ’’ཏི ཝཏྭཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ དུཊྛརཱཛཱ དེཝདཏྟོ ཨཧོསི, སཔྤོ སཱརིཔུཏྟོ, ཨུནྡཱུརོ མོགྒལླཱནོ, སུཝོ ཨཱནནྡོ, པཙྪཱ རཛྫཔྤཏྟོ དྷམྨརཱཛཱ པན ཨཧམེཝ ཨཧོསི’’ནྟི.

སཙྩཾཀིརཛཱཏཀཝཎྞནཱ ཏཏིཡཱ.

[༧༤] ༤. རུཀྑདྷམྨཛཱཏཀཝཎྞནཱ

སཱདྷཱུ ¶ སམྦཧུལཱ ཉཱཏཱིཏི ཨིདཾ སཏྠཱ ཛེཏཝནེ ཝིཧརནྟོ ཨུདཀཀལཧེ ཨཏྟནོ ཉཱཏཀཱནཾ མཧཱཝིནཱསཾ པཙྩུཔཊྛིཏཾ ཉཏྭཱ ཨཱཀཱསེན གནྟྭཱ རོཧིཎཱིནདིཡཱ ཨུཔརི པལླངྐེན ནིསཱིདིཏྭཱ ནཱིལརཾསིཾ ཝིསྶཛྫེཏྭཱ ཉཱཏཀེ སཾཝེཛེཏྭཱ ཨཱཀཱསཱ ཨོརུཡ྄ཧ ནདཱིཏཱིརེ ནིསིནྣོ ཏཾ ཀལཧཾ ཨཱརབྦྷ ཀཐེསི. ཨཡམེཏྠ སངྑེཔོ, ཝིཏྠཱརོ པན ཀུཎཱལཛཱཏཀེ (ཛཱ. ༢.༢༡.ཀུཎཱལཛཱཏཀ) ཨཱཝི བྷཝིསྶཏི. ཏདཱ པན སཏྠཱ ཉཱཏཀེ ཨཱམནྟེཏྭཱ ‘‘མཧཱརཱཛཱ ¶ , ཏུམྷེ ཉཱཏཀཱ, ཉཱཏཀེཧི ནཱམ སམགྒེཧི སམྨོདམཱནེཧི བྷཝིཏུཾ ཝཊྚཏི. ཉཱཏཀཱནཉྷི སཱམགྒིཡཱ སཏི པཙྩཱམིཏྟཱ ཨོཀཱསཾ ན ལབྷནྟི, ཏིཊྛནྟུ ཏཱཝ མནུསྶབྷཱུཏཱ, ཨཙེཏནཱནཾ རུཀྑཱནམྤི སཱམགྒིཾ ལདྡྷུཾ ཝཊྚཏི. ཨཏཱིཏསྨིཉྷི ཧིམཝནྟཔྤདེསེ མཧཱཝཱཏོ སཱལཝནཾ པཧརི, ཏསྶ པན སཱལཝནསྶ ཨཉྙམཉྙཾ རུཀྑགཙྪགུམྦལཏཱཧི སམྦནྡྷཏྟཱ ཨེཀརུཀྑམྤི པཱཏེཏུཾ ཨསཀྐོནྟོ མཏྠཀམཏྠཀེནེཝ ཨགམཱསི. ཨེཀཾ པན ཨངྒཎེ ཋིཏཾ སཱཁཱཝིཊཔསམྤནྣམྤི མཧཱརུཀྑཾ ཨཉྙེཧི རུཀྑེཧི ཨསམྦནྡྷཏྟཱ ཨུམྨཱུལེཏྭཱ བྷཱུམིཡཾ པཱཏེསི, ཨིམིནཱ ཀཱརཎེན ཏུམྷེཧིཔི སམགྒེཧི སམྨོདམཱནེཧི བྷཝིཏུཾ ཝཊྚཏཱི’’ཏི ཝཏྭཱ ཏེཧི ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ པཋམཾ ཨུཔྤནྣོ ཝེསྶཝཎོ མཧཱརཱཛཱ ཙཝི, སཀྐོ ཨཉྙཾ ཝེསྶཝཎཾ ཋཔེསི. ཨེཏསྨིཾ ཝེསྶཝཎེ པརིཝཏྟེ པཙྪཱ ནིབྦཏྟཝེསྶཝཎོ ‘‘རུཀྑགཙྪགུམྦལཏཱནཾ ཨཏྟནོ ཨཏྟནོ རུཙྩནཊྛཱནེ ཝིམཱནཾ གཎྷནྟཱུ’’ཏི སཱསནཾ པེསེསི. ཏདཱ བོདྷིསཏྟོ ཧིམཝནྟཔྤདེསེ ཨེཀསྨིཾ སཱལཝནེ རུཀྑདེཝཏཱ ཧུཏྭཱ ནིབྦཏྟི. སོ ཉཱཏཀེ ཨཱཧ ‘‘ཏུམྷེ ཝིམཱནཱནི གཎྷནྟཱ ཨངྒཎེ ཋིཏརུཀྑེསུ མཱ གཎྷཐ, ཨིམསྨིཾ པན སཱལཝནེ མཡཱ གཧིཏཝིམཱནཾ པརིཝཱརེཏྭཱ ཋིཏཝིམཱནཱནི གཎྷཐཱ’’ཏི. ཏཏྠ བོདྷིསཏྟསྶ ཝཙནཀརཱ པཎྜིཏདེཝཏཱ བོདྷིསཏྟསྶ ཝིམཱནཾ པརིཝཱརེཏྭཱ ཋིཏཝིམཱནཱནི གཎྷིཾསུ. ཨཔཎྜིཏཱ པན དེཝཏཱ ‘‘ཀིཾ ཨམྷཱཀཾ ཨཏྠོ ཨརཉྙཝིམཱནེཧི, མཡཾ མནུསྶཔཐེ གཱམནིགམརཱཛདྷཱནིདྭཱརེསུ ཝིམཱནཱནི ¶ གཎྷིསྶཱམ. གཱམཱདཡོ ཧི ཨུཔནིསྶཱཡ ཝསམཱནཱ དེཝཏཱ ལཱབྷགྒཡསགྒཔྤཏྟཱ ཧོནྟཱི’’ཏི མནུསྶཔཐེ ཨངྒཎཊྛཱནེ ནིབྦཏྟམཧཱརུཀྑེསུ ཝིམཱནཱནི གཎྷིཾསུ.

ཨཐེཀསྨིཾ ¶ དིཝསེ མཧཏཱི ཝཱཏཝུཊྛི ཨུཔྤཛྫི. ཝཱཏསྶ ཨཏིབལཝཏཱཡ དལ༹ྷམཱུལཱ ཝནཛེཊྛཀརུཀྑཱཔི སཾབྷགྒསཱཁཱཝིཊཔཱ སམཱུལཱ ནིཔཏིཾསུ. ཏཾ པན ཨཉྙམཉྙཾ སམྦནྡྷནེན ཋིཏཾ སཱལཝནཾ པཏྭཱ ཨིཏོ ཙིཏོ ཙ པཧརནྟོ ཨེཀརུཀྑམྤི པཱཏེཏུཾ ནཱསཀྑི. བྷགྒཝིམཱནཱ དེཝཏཱ ནིཔྤཊིསརཎཱ དཱརཀེ ཧཏྠེསུ གཧེཏྭཱ ཧིམཝནྟཾ གནྟྭཱ ཨཏྟནོ པཝཏྟིཾ སཱལཝནདེཝཏཱནཾ ¶ ཀཐཡིཾསུ. ཏཱ ཏཱསཾ ཨེཝཾ ཨཱགཏབྷཱཝཾ བོདྷིསཏྟསྶ ཨཱརོཙེསུཾ. བོདྷིསཏྟོ ‘‘པཎྜིཏཱནཾ ཝཙནཾ ཨགྒཧེཏྭཱ ནིཔྤཙྩཡཊྛཱནཾ གཏཱ ནཱམ ཨེཝརཱུཔཱཝ ཧོནྟཱི’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

༧༤.

‘‘སཱདྷཱུ སམྦཧུལཱ ཉཱཏཱི, ཨཔི རུཀྑཱ ཨརཉྙཛཱ;

ཝཱཏོ ཝཧཏི ཨེཀཊྛཾ, བྲཧནྟམྤི ཝནཔྤཏི’’ནྟི.

ཏཏྠ སམྦཧུལཱ ཉཱཏཱིཏི ཙཏྟཱརོ ཨུཔཱདཱཡ ཏཏུཏྟརི སཏསཧསྶམྤི སམྦཧུལཱ ནཱམ, ཨེཝཾ སམྦཧུལཱ ཨཉྙམཉྙཾ ནིསྶཱཡ ཝསནྟཱ ཉཱཏཀཱ. སཱདྷཱུཏི སོབྷནཱ པསཏྠཱ, པརེཧི ཨཔྤདྷཾསིཡཱཏི ཨཏྠོ. ཨཔི རུཀྑཱ ཨརཉྙཛཱཏི ཏིཊྛནྟུ མནུསྶབྷཱུཏཱ, ཨརཉྙེ ཛཱཏརུཀྑཱཔི སམྦཧུལཱ ཨཉྙམཉྙཱུཔཏྠམྦྷེན ཋིཏཱ སཱདྷུཡེཝ. རུཀྑཱནམྤི ཧི སཔཙྩཡབྷཱཝོ ལདྡྷུཾ ཝཊྚཏི. ཝཱཏོ ཝཧཏི ཨེཀཊྛནྟི པུརཏྠིམཱདིབྷེདོ ཝཱཏོ ཝཱཡནྟོ ཨངྒཎཊྛཱནེ ཋིཏཾ ཨེཀཊྛཾ ཨེཀཀམེཝ ཋིཏཾ བྲཧནྟམྤི ཝནཔྤཏིཾ སཱཁཱཝིཊཔསམྤནྣཾ མཧཱརུཀྑམྤི ཝཧཏི, ཨུམྨཱུལེཏྭཱ པཱཏེཏཱིཏི ཨཏྠོ. བོདྷིསཏྟོ ཨིམཾ ཀཱརཎཾ ཀཐེཏྭཱ ཨཱཡུཀྑཡེ ཡཐཱཀམྨཾ གཏོ.

སཏྠཱཔི ‘‘ཨེཝཾ, མཧཱརཱཛཱ, ཉཱཏཀཱནཾ ཏཱཝ སཱམགྒིཡེཝ ལདྡྷུཾ ཝཊྚཏི, སམགྒཱ སམྨོདམཱནཱ པིཡསཾཝཱསམེཝ ཝསཐཱ’’ཏི ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ དེཝཏཱ བུདྡྷཔརིསཱ ཨཧེསུཾ, པཎྜིཏདེཝཏཱ པན ཨཧམེཝ ཨཧོསི’’ནྟི.

རུཀྑདྷམྨཛཱཏཀཝཎྞནཱ ཙཏུཏྠཱ.

[༧༥] ༥. མཙྪཛཱཏཀཝཎྞནཱ

ཨབྷིཏྠནཡ ¶ ¶ པཛྫུནྣཱཏི ཨིདཾ སཏྠཱ ཛེཏཝནེ ཝིཧརནྟོ ཨཏྟནཱ ཝསྶཱཔིཏཝསྶཾ ཨཱརབྦྷ ཀཐེསི. ཨེཀསྨིཾ ཀིར སམཡེ ཀོསལརཊྛེ དེཝོ ན ཝསྶི, སསྶཱནི མིལཱཡནྟི, ཏེསུ ཏེསུ ཋཱནེསུ ཏལཱ༹ཀཔོཀྑརཎིསརཱནི སུསྶནྟི. ཛེཏཝནདྭཱརཀོཊྛཀསམཱིཔེ ཛེཏཝནཔོཀྑརཎིཡཱཔི ཨུདཀཾ ཚིཛྫི. ཀལལགཧནཾ པཝིསིཏྭཱ ནིཔནྣེ མཙྪཀཙྪཔེ ཀཱཀཀུལལཱདཡོ ཀཎཡགྒསདིསེཧི ཏུཎྜེཧི ཀོཊྚེཏྭཱ ནཱིཧརིཏྭཱ ནཱིཧརིཏྭཱ ཝིཔྥནྡམཱནེ ཁཱདནྟི.

སཏྠཱ མཙྪཀཙྪཔཱནཾ ཏཾ བྱསནཾ དིསྭཱ མཧཱཀརུཎཱཡ ཨུསྶཱཧིཏཧདཡོ ‘‘ཨཛྫ མཡཱ དེཝཾ ¶ ཝསྶཱཔེཏུཾ ཝཊྚཏཱི’’ཏི པབྷཱཏཱཡ རཏྟིཡཱ སརཱིརཔཊིཛགྒནཾ ཀཏྭཱ བྷིཀྑཱཙཱརཝེལཾ སལླཀྑེཏྭཱ མཧཱབྷིཀྑུསངྒྷཔརིཝུཏོ བུདྡྷལཱིལཱཡ སཱཝཏྠིཡཾ པིཎྜཱཡ པཝིསིཏྭཱ པཙྪཱབྷཏྟཾ པིཎྜཔཱཏཔཊིཀྐནྟོ སཱཝཏྠིཏོ ཝིཧཱརཾ གཙྪནྟོ ཛེཏཝནཔོཀྑརཎིཡཱ སོཔཱནེ ཋཏྭཱ ཨཱནནྡཏྠེརཾ ཨཱམནྟེསི ‘‘ཨཱནནྡ, ཨུདཀསཱཊིཀཾ ཨཱཧར, ཛེཏཝནཔོཀྑརཎིཡཾ ནྷཱཡིསྶཱམཱི’’ཏི. ‘‘ནནུ, བྷནྟེ, ཛེཏཝནཔོཀྑརཎིཡཾ ཨུདཀཾ ཚིནྣཾ, ཀལལམཏྟམེཝ ཨཝསིཊྛ’’ནྟི? ‘‘ཨཱནནྡ, བུདྡྷབལཾ ནཱམ མཧནྟཾ, ཨཱཧར ཏྭཾ ཨུདཀསཱཊིཀ’’ནྟི. ཐེརོ ཨཱཧརིཏྭཱ ཨདཱསི. སཏྠཱ ཨེཀེནནྟེན ཨུདཀསཱཊིཀཾ ནིཝཱསེཏྭཱ ཨེཀེནནྟེན སརཱིརཾ པཱརུཔིཏྭཱ ‘‘ཛེཏཝནཔོཀྑརཎིཡཾ ནྷཱཡིསྶཱམཱི’’ཏི སོཔཱནེ ཨཊྛཱསི. ཏངྑཎཉྙེཝ སཀྐསྶ པཎྜུཀམྦལསིལཱསནཾ ཨུཎྷཱཀཱརཾ དསྶེསི. སོ ‘‘ཀིཾ ནུ ཁོ’’ཏི ཨཱཝཛྫེནྟོ ཏཾ ཀཱརཎཾ ཉཏྭཱ ཝསྶཝལཱཧཀདེཝརཱཛཱནཾ པཀྐོསཱཔེཏྭཱ ‘‘ཏཱཏ, སཏྠཱ ‘ཛེཏཝནཔོཀྑརཎིཡཾ ནྷཱཡིསྶཱམཱི’ཏི དྷུརསོཔཱནེ ཋིཏོ, ཁིཔྤཾ སཀལཀོསལརཊྛཾ ཨེཀམེགྷཾ ཀཏྭཱ ཝསྶཱཔེཧཱི’’ཏི. སོ ‘‘སཱདྷཱུ’’ཏི སམྤཊིཙྪིཏྭཱ ཨེཀཾ ཝལཱཧཀཾ ནིཝཱསེཏྭཱ ཨེཀཾ པཱརུཔིཏྭཱ མེགྷགཱིཏཾ གཱཡནྟོ པཱཙཱིནལོཀདྷཱཏུཨབྷིམུཁོ པཀྑནྡི. པཱཙཱིནདིསཱབྷཱགེ ཁལམཎྜལམཏྟཾ ཨེཀཾ མེགྷཔཊལཾ ཨུཊྛཱཡ སཏཔཊལཾ སཧསྶཔཊལཾ ཧུཏྭཱ ཨབྷིཏྠནནྟཾ ཝིཛྫུལཏཱ ནིཙྪཱརེནྟཾ ཨདྷོམུཁཾ ཋཔིཏཨུདཀཀུམྦྷཱཀཱརེན ཝསྶམཱནཾ སཀལཀོསལརཊྛཾ མཧོགྷེན ཝིཡ ཨཛ྄ཛྷོཏྠརི. དེཝོ ཨཙྪིནྣདྷཱརཾ ཝསྶནྟོ མུཧུཏྟེནེཝ ¶ ཛེཏཝནཔོཀྑརཎིཾ པཱུརེསི, དྷུརསོཔཱནཾ ཨཱཧཙྩ ཨུདཀཾ ཨཊྛཱསི.

སཏྠཱ པོཀྑརཎིཡཾ ནྷཱཡིཏྭཱ སུརཏྟདུཔཊྚཾ ནིཝཱསེཏྭཱ ཀཱཡབནྡྷནཾ བནྡྷིཏྭཱ སུགཏམཧཱཙཱིཝརཾ ཨེཀཾསཾ ཀཏྭཱ བྷིཀྑུསངྒྷཔརིཝུཏོ གནྟྭཱ གནྡྷཀུཊིཔརིཝེཎེ པཉྙཏྟཝརབུདྡྷཱསནེ ནིསཱིདིཏྭཱ བྷིཀྑུསངྒྷེན ཝཏྟེ དསྶིཏེ ཨུཊྛཱཡ མཎིསོཔཱནཕལཀེ ཋཏྭཱ བྷིཀྑུསངྒྷསྶ ཨོཝཱདཾ དཏྭཱ ¶ ཨུཡྻོཛེཏྭཱ སུརབྷིགནྡྷཀུཊིཾ པཝིསིཏྭཱ དཀྑིཎེན པསྶེན སཱིཧསེཡྻཾ ཀཔྤེཏྭཱ སཱཡནྷསམཡེ དྷམྨསབྷཱཡཾ སནྣིཔཏིཏཱནཾ བྷིཀྑཱུནཾ ‘‘པསྶཐཱཝུསོ, དསབལསྶ ཁནྟིམེཏྟཱནུདྡཡསམྤཏྟིཾ, ཝིཝིདྷསསྶེསུ མིལཱཡནྟེསུ ནཱནཱཛལཱསཡེསུ སུསྶནྟེསུ མཙྪཀཙྪཔེསུ མཧཱདུཀྑཾ པཱཔུཎནྟེསུ ཀཱརུཉྙཾ པཊིཙྩ ‘མཧཱཛནཾ དུཀྑཱ མོཙེསྶཱམཱི’ཏི ཨུདཀསཱཊིཀཾ ནིཝཱསེཏྭཱ ཛེཏཝནཔོཀྑརཎིཡཱ དྷུརསོཔཱནེ ཋཏྭཱ མུཧུཏྟེན སཀལཀོསལརཊྛཾ མཧོགྷེན ཨོཔིལཱཔེནྟོ ཝིཡ དེཝཾ ཝསྶཱཔེཏྭཱ མཧཱཛནཾ ཀཱཡིཀཙེཏསིཀདུཀྑཏོ མོཙེཏྭཱ ¶ ཝིཧཱརཾ པཝིཊྛོ’’ཏི ཀཐཱཡ ཝཏྟམཱནཱཡ གནྡྷཀུཊིཏོ ནིཀྑམིཏྭཱ དྷམྨསབྷཾ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཏཐཱགཏོ ཨིདཱནེཝ མཧཱཛནེ ཀིལམནྟེ དེཝཾ ཝསྶཱཔེཏི, པུབྦེ ཏིརཙྪཱནཡོནིཡཾ ནིབྦཏྟིཏྭཱ མཙྪརཱཛཀཱལེཔི ཝསྶཱཔེསིཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ཨིམསྨིཾཡེཝ ཀོསལརཊྛེ ཨིམིསྶཱ སཱཝཏྠིཡཱ ཨིམསྨིཾཡེཝ ཛེཏཝནཔོཀྑརཎིཊྛཱནེ ཨེཀཱ ཝལླིགཧནཔརིཀྑིཏྟཱ ཀནྡརཱ ཨཧོསི. ཏདཱ བོདྷིསཏྟོ མཙྪཡོནིཡཾ ནིབྦཏྟིཏྭཱ མཙྪགཎཔརིཝུཏོ ཏཏྠ པཊིཝསཏི. ཡཐཱ པན ཨིདཱནི, ཨེཝམེཝ ཏདཱཔི ཏསྨིཾ རཊྛེ དེཝོ ན ཝསྶི, མནུསྶཱནཾ སསྶཱནི མིལཱཡིཾསུ, ཝཱཔིཏལཱ༹ཀཀནྡརཱདཱིསུ ཨུདཀཾ ཚིཛྫི, མཙྪཀཙྪཔཱ ཀལལགཧནཾ པཝིསིཾསུ. ཨིམིསྶཱཔི ཀནྡརཱཡ མཙྪཀཙྪཔཱ ཀལལགཧནཾ པཝིསིཏྭཱ ཏསྨིཾ ཏསྨིཾ ཋཱནེ ནིལཱིཡིཾསུ. ཀཱཀཱདཡོ ཏུཎྜེན ཀོཊྚེཏྭཱ ནཱིཧརིཏྭཱ ཁཱདིཾསུ.

བོདྷིསཏྟོ ཉཱཏིསངྒྷསྶ ཏཾ བྱསནཾ དིསྭཱ ‘‘ཨིམཾ ཏེསཾ དུཀྑཾ ཋཔེཏྭཱ མཾ ཨཉྙོ མོཙེཏུཾ སམཏྠོ ནཱམ ནཏྠི, སཙྩཀིརིཡཾ ཀཏྭཱ དེཝཾ ¶ ཝསྶཱཔེཏྭཱ ཉཱཏཀེ མརཎདུཀྑཱ མོཙེསྶཱམཱི’’ཏི ཀཱལ༹ཝཎྞཾ ཀདྡམཾ དྭིདྷཱ ཝིཡཱུཧིཏྭཱ ནིཀྑམིཏྭཱ ཨཉྫནརུཀྑསཱརགྷཊིཀཝཎྞོ མཧཱམཙྪོ སུདྷོཏལོཧིཏངྒམཎིགུལ༹སདིསཱནི ཨཀྑཱིནི ཨུམྨཱིལེཏྭཱ ཨཱཀཱསཾ ཨུལློཀེཏྭཱ པཛྫུནྣདེཝརཱཛསྶ སདྡཾ དཏྭཱ ‘‘བྷོ པཛྫུནྣ, ཨཧཾ ཉཱཏཀེ ནིསྶཱཡ དུཀྑིཏོ, ཏྭཾ མཡི སཱིལཝནྟེ ཀིལམནྟེ ཀསྨཱ དེཝཾ ན ཝསྶཱཔེསི? མཡཱ སམཱནཛཱཏིཀཱནཾ ཁཱདནཊྛཱནེ ནིབྦཏྟིཏྭཱ ཏཎྜུལཔྤམཱཎམྤི མཙྪཾ ཨཱདིཾ ཀཏྭཱ ཁཱདིཏཔུབྦོ ནཱམ ནཏྠི, ཨཉྙོཔི མེ པཱཎོ ཛཱིཝིཏཱ ན ཝོརོཔིཏཔུབྦོ, ཨིམིནཱ སཙྩེན དེཝཾ ཝསྶཱཔེཏྭཱ ཉཱཏིསངྒྷཾ མེ དུཀྑཱ མོཙེཧཱི’’ཏི ཝཏྭཱ པརིཙཱརཀཙེཊཀཾ ཨཱཎཱཔེནྟོ ཝིཡ པཛྫུནྣདེཝརཱཛཱནཾ ཨཱལཔནྟོ ཨིམཾ གཱཐམཱཧ –

༧༥.

‘‘ཨབྷིཏྠནཡ ¶ ¶ པཛྫུནྣ, ནིདྷིཾ ཀཱཀསྶ ནཱསཡ;

ཀཱཀཾ སོཀཱཡ རནྡྷེཧི, མཉྩ སོཀཱ པམོཙཡཱ’’ཏི.

ཏཏྠ ཨབྷིཏྠནཡ པཛྫུནྣཱཏི པཛྫུནྣོ ཝུཙྩཏི མེགྷོ, ཨཡཾ པན མེགྷཝསེན ལདྡྷནཱམཾ ཝསྶཝལཱཧཀདེཝརཱཛཱནཾ ཨཱལཔཏི. ཨཡཾ ཀིརསྶ ཨདྷིཔྤཱཡོ – དེཝོ ནཱམ ཨནབྷིཏྠནནྟོ ཝིཛྫུལཏཱ ཨནིཙྪཱརེནྟོ ཝསྶནྟོཔི ན སོབྷཏི, ཏསྨཱ ཏྭཾ ཨབྷིཏྠནནྟོ ཝིཛྫུལཏཱ ནིཙྪཱརེནྟོ ཝསྶཱཔེཧཱིཏི. ནིདྷིཾ ཀཱཀསྶ ནཱསཡཱཏི ཀཱཀཱ ཀལལཾ པཝིསིཏྭཱ ཋིཏེ མཙྪེ ཏུཎྜེན ཀོཊྚེཏྭཱ ནཱིཧརིཏྭཱ ཁཱདནྟི, ཏསྨཱ ཏེསཾ ཨནྟོཀལལེ མཙྪཱ ‘‘ནིདྷཱི’’ཏི ཝུཙྩནྟི, ཏཾ ཀཱཀསངྒྷསྶ ནིདྷིཾ དེཝཾ ཝསྶཱཔེནྟོ ཨུདཀེན པཊིཙྪཱདེཏྭཱ ནཱསེཧཱིཏི. ཀཱཀཾ སོཀཱཡ རནྡྷེཧཱིཏི ཀཱཀསངྒྷོ ཨིམིསྶཱ ཀནྡརཱཡ ཨུདཀེན པུཎྞཱཡ མཙྪེ ཨལབྷམཱནོ སོཙིསྶཏི, ཏཾ ཀཱཀགཎཾ ཏྭཾ ཨིམཾ ཀནྡརཾ པཱུརེནྟོ སོཀཱཡ རནྡྷེཧི, སོཀསྶཏྠཱཡ མཙྪསྶ ཨསྶཱསཏྠཱཡ དེཝཾ ཝསྶཱཔེཧི. ཡཐཱ ཨནྟོནིཛ྄ཛྷཱནལཀྑཎཾ སོཀཾ པཱཔུཎཱཏི, ཨེཝཾ ཀརོཧཱིཏི ཨཏྠོ, མཉྩ སོཀཱ པམོཙཡཱཏི ཨེཏྠ ཙ-ཀཱརོ སམྤིཎྜནཏྠོ, མཉྩ མམ ཉཱཏཀེ ཙ སབྦེཝ ཨིམམྷཱ མརཎསོཀཱ མོཙེཧཱིཏི.

ཨེཝཾ ¶ བོདྷིསཏྟོ པརིཙཱརཀཙེཊཀཾ ཨཱཎཱཔེནྟོ ཝིཡ པཛྫུནྣཾ ཨཱལཔིཏྭཱ སཀལཀོསལརཊྛེ མཧཱཝསྶཾ ཝསྶཱཔེཏྭཱ མཧཱཛནཾ མརཎདུཀྑཱ མོཙེཏྭཱ ཛཱིཝིཏཔརིཡོསཱནེ ཡཐཱཀམྨཾ གཏོ.

སཏྠཱ ‘‘ན, བྷིཀྑཝེ, ཏཐཱགཏོ ཨིདཱནེཝ དེཝཾ ཝསྶཱཔེཏི, པུབྦེ མཙྪཡོནིཡཾ ནིབྦཏྟོཔི ཝསྶཱཔེསིཡེཝཱ’’ཏི ཝཏྭཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ མཙྪགཎཱ བུདྡྷཔརིསཱ ཨཧེསུཾ, པཛྫུནྣདེཝརཱཛཱ ཨཱནནྡོ, མཙྪརཱཛཱ པན ཨཧམེཝ ཨཧོསི’’ནྟི.

མཙྪཛཱཏཀཝཎྞནཱ པཉྩམཱ.

[༧༦] ༦. ཨསངྐིཡཛཱཏཀཝཎྞནཱ

ཨསངྐིཡོམྷི ¶ གཱམམྷཱིཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ སཱཝཏྠིཝཱསིཾ ཨུཔཱསཀཾ ཨཱརབྦྷ ཀཐེསི. སོ ཀིར སོཏཱཔནྣོ ཨརིཡསཱཝཀོ ཀེནཙིདེཝ ཀརཎཱིཡེན ཨེཀེན སཀཊསཏྠཝཱཧེན སདྡྷིཾ མགྒཾ པཊིཔཛྫིཏྭཱ ཨེཀསྨིཾ ཨརཉྙཊྛཱནེ སཀཊཱནི མོཙེཏྭཱ ཁནྡྷཱཝཱརབནྡྷེ ཀཏེ སཏྠཝཱཧསྶ ཨཝིདཱུརེ ཨཉྙཏརསྨིཾ རུཀྑམཱུལེ ཙངྐམཏི. ཨཐཏྟནོ ཀཱལཾ སལླཀྑེཏྭཱ པཉྩསཏཱ ཙོརཱ ‘‘ཁནྡྷཱཝཱརཾ ཝིལུམྤིསྶཱམཱ’’ཏི དྷནུམུགྒརཱདིཧཏྠཱ ཏཾ ཋཱནཾ ¶ པརིཝཱརཡིཾསུ. ཨུཔཱསཀོཔི ཙངྐམཏིཡེཝ. ཙོརཱ ནཾ དིསྭཱ ‘‘ཨདྡྷཱ ཨེས ཁནྡྷཱཝཱརརཀྑཀོ བྷཝིསྶཏི, ཨིམསྶ ནིདྡཾ ཨོཀྐནྟཀཱལེ ཝིལུམྤིསྶཱམཱ’’ཏི ཨཛ྄ཛྷོཏྠརིཏུཾ ཨསཀྐོནྟཱ ཏཏྠ ཏཏྠེཝ ཨཊྛཾསུ. སོཔི ཨུཔཱསཀོ པཋམཡཱམེཔི མཛ྄ཛྷིམཡཱམེཔི པཙྪིམཡཱམེཔི ཙངྐམནྟོཡེཝ ཨཊྛཱསི. པཙྩཱུསཀཱལེ ཛཱཏེ ཙོརཱ ཨོཀཱསཾ ཨལབྷནྟཱ གཧིཏེ པཱསཱཎམུགྒརཱདཡོ ཚཌྜེཏྭཱ པལཱཡིཾསུ.

ཨུཔཱསཀོཔི ཨཏྟནོ ཀམྨཾ ནིཊྛཱཔེཏྭཱ པུན སཱཝཏྠིཾ ཨཱགནྟྭཱ སཏྠཱརཾ ཨུཔསངྐམིཏྭཱ ‘‘བྷནྟེ, ཨཏྟཱནཾ རཀྑམཱནཱ པརརཀྑཀཱ ཧོནྟཱི’’ཏི པུཙྪི. ‘‘ཨཱམ, ཨུཔཱསཀ, ཨཏྟཱནཾ རཀྑནྟོ པརམྤི རཀྑཏི, པརཾ རཀྑནྟོ ཨཏྟཱནམྤི རཀྑཏཱི’’ཏི. སོ ‘‘ཡཱཝ སུབྷཱསིཏཉྩིདཾ, བྷནྟེ, བྷགཝཏཱ, ཨཧཾ ཨེཀེན ¶ སཏྠཝཱཧེན སདྡྷིཾ མགྒཾ པཊིཔནྣོ རུཀྑམཱུལེ ཙངྐམནྟོ ‘མཾ རཀྑིསྶཱམཱི’ཏི སཀལསཏྠཾ རཀྑི’’ནྟི ཨཱཧ. སཏྠཱ ‘‘ཨུཔཱསཀ, པུབྦེཔི པཎྜིཏཱ ཨཏྟཱནཾ རཀྑནྟཱ པརཾ རཀྑིཾསཱུ’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ བྲཱཧྨཎཀུལེ ནིབྦཏྟིཏྭཱ ཝཡཔྤཏྟོ ཀཱམེསུ ཨཱདཱིནཝཾ དིསྭཱ ཨིསིཔབྦཛྫཾ པབྦཛིཏྭཱ ཧིམཝནྟེ ཝསནྟོ ལོཎམྦིལསེཝནཏྠཱཡ ཛནཔདཾ ཨཱགནྟྭཱ ཛནཔདཙཱརིཀཾ ཙརནྟོ ཨེཀེན སཏྠཝཱཧེན སདྡྷིཾ མགྒཾ པཊིཔཛྫིཏྭཱ ཨེཀསྨིཾ ཨརཉྙཊྛཱནེ སཏྠེ ནིཝིཊྛེ སཏྠཏོ ཨཝིདཱུརེ ཛྷཱནསུཁེན ཝཱིཏིནཱམེནྟོ ཨཉྙཏརསྨིཾ རུཀྑམཱུལེ ཙངྐམནྟོ ཨཊྛཱསི. ཨཐ ཁོ པཉྩསཏཱ ཙོརཱ ‘‘སཱཡམཱསབྷཏྟསྶ བྷུཏྟཀཱལེ ཏཾ སཀཊསཏྠཾ ཝིལུམྤིསྶཱམཱ’’ཏི ཨཱགནྟྭཱ པརིཝཱརཡིཾསུ. ཏེ ཏཾ ཏཱཔསཾ དིསྭཱ ‘‘སཙེ ཨཡཾ ཨམྷེ པསྶིསྶཏི, སཏྠཝཱསིཀཱནཾ ཨཱརོཙེསྶཏི, ཨེཏསྶ ནིདྡཱུཔགཏཝེལཱཡ ཝིལུམྤིསྶཱམཱ’’ཏི ཏཏྠེཝ ཨཊྛཾསུ. ཏཱཔསོ སཀལམྤི རཏྟིཾ ཙངྐམིཡེཝ. ཙོརཱ ཨོཀཱསཾ ཨལབྷིཏྭཱ གཧིཏགཧིཏེ མུགྒརཔཱསཱཎེ ཚཌྜེཏྭཱ སཀཊསཏྠཝཱསཱིནཾ སདྡཾ དཏྭཱ ‘‘བྷོནྟོ, སཏྠཝཱསིནོ ¶ སཙེ ཨེས རུཀྑམཱུལེ ཙངྐམནཀཏཱཔསོ ཨཛྫ ནཱབྷཝིསྶ, སབྦེ མཧཱཝིལོཔཾ པཏྟཱ ཨབྷཝིསྶཐ, སྭེ ཏཱཔསསྶ མཧཱསཀྐཱརཾ ཀརེཡྻཱཐཱ’’ཏི ཝཏྭཱ པཀྐམིཾསུ.

ཏེ པབྷཱཏཱཡ རཏྟིཡཱ ཙོརེཧི ཚཌྜིཏེ མུགྒརཔཱསཱཎཱདཡོ ¶ དིསྭཱ བྷཱིཏཱ བོདྷིསཏྟསྶ སནྟིཀཾ གནྟྭཱ ཝནྡིཏྭཱ ‘‘བྷནྟེ, དིཊྛཱ ཝོ ཙོརཱ’’ཏི པུཙྪིཾསུ. ‘‘ཨཱམཱཝུསོ, དིཊྛཱ’’ཏི. ‘‘བྷནྟེ, ཨེཏྟཀེཝོ ཙོརེ དིསྭཱ བྷཡཾ ཝཱ སཱརཛྫཾ ཝཱ ན ཨུཔྤཛྫཱི’’ཏི? བོདྷིསཏྟོ ‘‘ཨཱཝུསོ ཙོརེ དིསྭཱ བྷཡཾ ནཱམ སདྷནསྶ ཧོཏི, ཨཧཾ པན ནིདྡྷནོ, སྭཱཧཾ ཀིཾ བྷཱཡིསྶཱམི. མཡ྄ཧཉྷི གཱམེཔི ཨརཉྙེཔི ཝསནྟསྶ བྷཡཾ ཝཱ སཱརཛྫཾ ཝཱ ནཏྠཱི’’ཏི ཝཏྭཱ ཏེསཾ དྷམྨཾ དེསེནྟོ ཨིམཾ གཱཐམཱཧ –

༧༦.

‘‘ཨསངྐིཡོམྷི གཱམམྷི, ཨརཉྙེ ནཏྠི མེ བྷཡཾ;

ཨུཛུམགྒཾ སམཱརུལ༹ྷོ, མེཏྟཱཡ ཀརུཎཱཡ ཙཱ’’ཏི.

ཏཏྠ ¶ ཨསངྐིཡོམྷི གཱམམྷཱིཏི སངྐཱཡ ནིཡུཏྟོ པཏིཊྛིཏོཏི སངྐིཡོ, ན སངྐིཡོ ཨསངྐིཡོ. ཨཧཾ གཱམེ ཝསནྟོཔི སངྐཱཡ ཨཔྤཏིཊྛིཏཏྟཱ ཨསངྐིཡོ ནིབྦྷཡོ ནིརཱསངྐོཏི དཱིཔེཏི. ཨརཉྙེཏི གཱམགཱམཱུཔཙཱརཝིནིམུཏྟེ ཋཱནེ. ཨུཛུམགྒཾ སམཱརུལ༹ྷོ, མེཏྟཱཡ ཀརུཎཱཡ ཙཱཏི ཨཧཾ ཏིཀཙཏུཀྐཛ྄ཛྷཱནིཀཱཧི མེཏྟཱཀརུཎཱཧི ཀཱཡཝངྐཱདིཝིརཧིཏཾ ཨུཛུཾ བྲཧྨལོཀགཱམིམགྒཾ ཨཱརུལ༹ྷོཏི ཝདཏི. ཨཐ ཝཱ པརིསུདྡྷསཱིལཏཱཡ ཀཱཡཝཙཱིམནོཝངྐཝིརཧིཏཾ ཨུཛུཾ དེཝལོཀམགྒཾ ཨཱརུལ༹ྷོམྷཱིཏི དསྶེཏྭཱ ཏཏོ ཨུཏྟརི མེཏྟཱཡ ཀརུཎཱཡ ཙ པཏིཊྛིཏཏྟཱ ཨུཛུཾ བྲཧྨལོཀམགྒམྤི ཨཱརུལ༹ྷོམྷཱིཏིཔི དསྶེཏི. ཨཔརིཧཱིནཛ྄ཛྷཱནསྶ ཧི ཨེཀནྟེན བྲཧྨལོཀཔརཱཡཎཏྟཱ མེཏྟཱཀརུཎཱདཡོ ཨུཛུམགྒཱ ནཱམ.

ཨེཝཾ བོདྷིསཏྟོ ཨིམཱཡ གཱཐཱཡ དྷམྨཾ དེསེཏྭཱ ཏུཊྛཙིཏྟེཧི ཏེཧི མནུསྶེཧི སཀྐཏོ པཱུཛིཏོ ཡཱཝཛཱིཝཾ ཙཏྟཱརོ བྲཧྨཝིཧཱརེ བྷཱཝེཏྭཱ བྲཧྨལོཀེ ནིབྦཏྟི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ སཏྠཝཱསིནོ བུདྡྷཔརིསཱ ཨཧེསུཾ, ཏཱཔསོ པན ཨཧམེཝ ཨཧོསི’’ནྟི.

ཨསངྐིཡཛཱཏཀཝཎྞནཱ ཚཊྛཱ.

[༧༧] ༧. མཧཱསུཔིནཛཱཏཀཝཎྞནཱ

ལཱབཱུནི ¶ སཱིདནྟཱིཏི ཨིདཾ སཏྠཱ ཛེཏཝནེ ཝིཧརནྟོ སོལ༹ས མཧཱསུཔིནེ ཨཱརབྦྷ ཀཐེསི. ཨེཀདིཝསཾ ཀིར ཀོསལམཧཱརཱཛཱ རཏྟིཾ ནིདྡཱུཔགཏོ པཙྪིམཡཱམེ སོལ༹ས མཧཱསུཔིནེ དིསྭཱ བྷཱིཏཏསིཏོ ¶ པབུཛ྄ཛྷིཏྭཱ ‘‘ཨིམེསཾ སུཔིནཱནཾ དིཊྛཏྟཱ ཀིཾ ནུ ཁོ མེ བྷཝིསྶཏཱི’’ཏི མརཎབྷཡཏཛྫིཏོ སཡནཔིཊྛེ ནིསིནྣཀོཝ རཏྟིཾ ཝཱིཏིནཱམེསི.

ཨཐ ནཾ པབྷཱཏཱཡ རཏྟིཡཱ བྲཱཧྨཎཔུརོཧིཏཱ ཨུཔསངྐམིཏྭཱ ‘‘སུཁཾ སཡིཏྠ, མཧཱརཱཛཱ’’ཏི པུཙྪིཾསུ. ‘‘ཀུཏོ མེ ཨཱཙརིཡཱ སུཁཾ, ཨཛྫཱཧཾ པཙྩཱུསསམཡེ སོལ༹ས མཧཱསུཔིནེ པསྶིཾ, སོམྷི ཏེསཾ དིཊྛཀཱལཏོ པཊྛཱཡ བྷཡཔྤཏྟོ’’ཏི. ‘‘ཝདེཐ, མཧཱརཱཛ, སུཏྭཱ ཛཱནིསྶཱམཱ’’ཏི ཝུཏྟཾ ¶ བྲཱཧྨཎཱནཾ དིཊྛསུཔིནེ ཀཐེཏྭཱ ‘‘ཀིཾ ནུ ཁོ མེ ཨིམེསཾ དིཊྛཀཱརཎཱ བྷཝིསྶཏཱི’’ཏི པུཙྪི. བྲཱཧྨཎཱ ཧཏྠེ ཝིདྷུནིཾསུ. ‘‘ཀསྨཱ ཧཏྠེ ཝིདྷུནཐཱ’’ཏི ཙ ཝུཏྟེ ‘‘ཀཀྑལཱ༹, མཧཱརཱཛ, སུཔིནཱ’’ཏི. ‘‘ཀཱ ཏེསཾ ནིཔྥཏྟི བྷཝིསྶཏཱི’’ཏི? ‘‘རཛྫནྟརཱཡོ ཛཱིཝིཏནྟརཱཡོ བྷོགནྟརཱཡོཏི ཨིམེསཾ ཏིཎྞཾ ཨནྟརཱཡཱནཾ ཨཉྙཏརོ’’ཏི. ‘‘སཔྤཊིཀམྨཱ, ཨཔྤཊིཀམྨཱ’’ཏི? ‘‘ཀཱམཾ ཨེཏེ སུཔིནཱ ཨཏིཕརུསཏྟཱ ཨཔྤཊིཀམྨཱ, མཡཾ པན ཏེ སཔྤཊིཀམྨེ ཀརིསྶཱམ, ཨེཏེ པཊིཀྐམཱཔེཏུཾ ཨསཀྐོནྟཱནཾ ཨམྷཱཀཾ སིཀྑིཏབྷཱཝོ ནཱམ ཀིཾ ཀརིསྶཏཱི’’ཏི. ‘‘ཀིཾ པན ཀཏྭཱ པཊིཀྐམཱཔེསྶཐཱ’’ཏི? ‘‘སབྦཙཏུཀྐེན ཡཉྙཾ ཡཛིསྶཱམ, མཧཱརཱཛཱ’’ཏི. རཱཛཱ བྷཱིཏཏསིཏོ ‘‘ཏེན ཧི ཨཱཙརིཡཱ མམ ཛཱིཝིཏཾ ཏུམྷཱཀཾ ཧཏྠེ ཧོཏུ, ཁིཔྤཾ མེ སོཏྠིཾ ཀརོཐཱ’’ཏི ཨཱཧ. བྲཱཧྨཎཱ ‘‘བཧུཾ དྷནཾ ལབྷིསྶཱམ, བཧུཾ ཁཛྫབྷོཛྫཾ ཨཱཧརཱཔེསྶཱམཱ’’ཏི ཧཊྛཏུཊྛཱ ‘‘མཱ ཙིནྟཡིཏྠ, མཧཱརཱཛཱ’’ཏི རཱཛཱནཾ སམསྶཱསེཏྭཱ རཱཛནིཝེསནཱ ནིཀྑམིཏྭཱ བཧིནགརེ ཡཉྙཱཝཱཊཾ ཀཏྭཱ བཧཱུ ཙཏུཔྤདགཎེ ཐཱུཎཱུཔནཱིཏེ ཀཏྭཱ པཀྑིགཎེ སམཱཧརིཏྭཱ ‘‘ཨིདཉྩིདཉྩ ལདྡྷུཾ ཝཊྚཏཱི’’ཏི པུནཔྤུནཾ སཉྩརནྟི.

ཨཐ ཁོ མལླིཀཱ དེཝཱི ཏཾ ཀཱརཎཾ ཉཏྭཱ རཱཛཱནཾ ཨུཔསངྐམིཏྭཱ པུཙྪི ‘‘ཀིཾ ནུ ཁོ, མཧཱརཱཛ, བྲཱཧྨཎཱ པུནཔྤུནཾ སཉྩརནྟཱི’’ཏི? ‘‘སུཁིཏཱ, ཏྭཾ བྷདྡེ, ཨམྷཱཀཾ ཀཎྞམཱུལེ ཨཱསཱིཝིསཾ ཙརནྟཾ ན ཛཱནཱསཱི’’ཏི. ‘‘ཀིཾ ཨེཏཾ, མཧཱརཱཛཱ’’ཏི? མཡཱ ཨེཝརཱུཔཱ དུསྶུཔིནཱ དིཊྛཱ, བྲཱཧྨཎཱ ‘‘ཏིཎྞཾ ཨནྟརཱཡཱནཾ ཨཉྙཏརོ པཉྙཱཡཏཱི’’ཏི ཝཏྭཱ ‘‘‘ཏེསཾ པཊིགྷཱཏཱཡ ཡཉྙཾ ཡཛིསྶཱམཱ’ཏི ཝཏྭཱ པུནཔྤུནཾ སཉྩརནྟཱི’’ཏི. ‘‘ཀིཾ པན ཏེ, མཧཱརཱཛ, སདེཝཀེ ལོཀེ ཨགྒབྲཱཧྨཎོ སུཔིནཔཊིཀམྨཾ པུཙྪིཏོ’’ཏི? ‘‘ཀཏརོ པནེས, བྷདྡེ, སདེཝཀེ ལོཀེ ཨགྒབྲཱཧྨཎོ’’ཏི. ‘‘སདེཝཀེ ལོཀེ ཨགྒཔུགྒལཾ སབྦཉྙུཾ ཝིསུདྡྷཾ ནིཀྐིལེསཾ མཧཱབྲཱཧྨཎཾ ན ¶ ཛཱནཱསི. སོ ཧི བྷགཝཱ སུཔིནནྟརཾ ཛཱནེཡྻ, གཙྪ ཏྭཾ པུཙྪ ཏཾ, མཧཱརཱཛཱ’’ཏི. ‘‘སཱདྷུ, དེཝཱི’’ཏི རཱཛཱ ཝིཧཱརཾ གནྟྭཱ སཏྠཱརཾ ཝནྡིཏྭཱ ནིསཱིདི.

སཏྠཱ མདྷུརསྶརཾ ནིཙྪཱརེཏྭཱ ‘‘ཀིཾ ནུ ཁོ, མཧཱརཱཛ, ཨཏིཔྤགོཝ ཨཱགཏོསཱི’’ཏི ཨཱཧ. ཨཧཾ, བྷནྟེ, པཙྩཱུསསམཡེ སོལ༹ས མཧཱསུཔིནེ ¶ དིསྭཱ བྷཱིཏོ བྲཱཧྨཎཱནཾ ཨཱརོཙེསིཾ. བྲཱཧྨཎཱ ‘‘ཀཀྑལཱ༹, མཧཱརཱཛ ¶ , སུཔིནཱ, ཨེཏེསཾ པཊིགྷཱཏཏྠཱཡ སབྦཙཏུཀྐེན ཡཉྙཾ ཡཛིསྶཱམཱ’’ཏི ཡཉྙཾ སཛྫེནྟི, བཧཱུ པཱཎཱ མརཎབྷཡཏཛྫིཏཱ, ཏུམྷེ ཙ སདེཝཀེ ལོཀེ ཨགྒཔུགྒལཱ, ཨཏཱིཏཱནཱགཏཔཙྩུཔྤནྣཾ ཨུཔཱདཱཡ ནཏྠི སོ ཉེཡྻདྷམྨོ, ཡོ ཝོ ཉཱཎམུཁེ ཨཱཔཱཐཾ ནཱགཙྪཏི. ‘‘ཨེཏེསཾ མེ སུཔིནཱནཾ ནིཔྥཏྟིཾ ཀཐེཐ བྷགཝཱ’’ཏི. ‘‘ཨེཝམེཏཾ, མཧཱརཱཛ, སདེཝཀེ ལོཀེ མཾ ཋཔེཏྭཱ ཨཉྙོ ཨེཏེསཾ སུཔིནཱནཾ ཨནྟརཾ ཝཱ ནིཔྥཏྟིཾ ཝཱ ཛཱནིཏུཾ སམཏྠོ ནཱམ ནཏྠི, ཨཧཾ ཏེ ཀཐེསྶཱམི, ཨཔིཙ ཁོ ཏྭཾ དིཊྛདིཊྛནིཡཱམེནེཝ སུཔིནེ ཀཐེཧཱི’’ཏི. ‘‘སཱདྷུ, བྷནྟེ’’ཏི རཱཛཱ དིཊྛནིཡཱམེནེཝ ཀཐེནྟོ –

‘‘ཨུསབྷཱ རུཀྑཱ གཱཝིཡོ གཝཱ ཙ,

ཨསྶོ ཀཾསོ སིངྒཱལཱི ཙ ཀུམྦྷོ;

པོཀྑརཎཱི ཙ ཨཔཱཀཙནྡནཾ.

‘‘ལཱབཱུནི སཱིདནྟི སིལཱ པླཝནྟི, མཎྜཱུཀིཡོ ཀཎྷསཔྤེ གིལནྟི;

ཀཱཀཾ སུཝཎྞཱ པརིཝཱརཡནྟི, ཏསཱ ཝཀཱ ཨེལ༹ཀཱནཾ བྷཡཱ ཧཱི’’ཏི. –

ཨིམཾ མཱཏིཀཾ ནིཀྑིཔིཏྭཱ ཀཐེསི.

(༡) ཨཧཾ, བྷནྟེ, ཨེཀཾ ཏཱཝ སུཔིནཾ ཨེཝཾ ཨདྡསཾ – ཙཏྟཱརོ ཨཉྫནཝཎྞཱ ཀཱལ༹ཨུསབྷཱ ‘‘ཡུཛ྄ཛྷིསྶཱམཱ’’ཏི ཙཏཱུཧི དིསཱཧི རཱཛངྒཎཾ ཨཱགནྟྭཱ ‘‘ཨུསབྷཡུདྡྷཾ པསྶིསྶཱམཱ’’ཏི མཧཱཛནེ སནྣིཔཏིཏེ ཡུཛ྄ཛྷནཱཀཱརཾ དསྶེཏྭཱ ནདིཏྭཱ གཛྫིཏྭཱ ཨཡུཛ྄ཛྷིཏྭཱཝ པཊིཀྐནྟཱ. ཨིམཾ པཋམཾ སུཔིནཾ ཨདྡསཾ, ཨིམསྶ ཀོ ཝིཔཱཀོཏི? ‘‘མཧཱརཱཛ, ཨིམསྶ ཝིཔཱཀོ ནེཝ ཏཝ, ན མམ ཀཱལེ བྷཝིསྶཏི, ཨནཱགཏེ པན ཨདྷམྨིཀཱནཾ ཀཔཎརཱཛཱུནཾ ཨདྷམྨིཀཱནཉྩ མནུསྶཱནཾ ཀཱལེ ལོཀེ ཝིཔརིཝཏྟམཱནེ ཀུསལེ ཨོསྶནྣེ, ཨཀུསལེ ཨུསྶནྣེ, ལོཀསྶ པརིཧཱཡནཀཱལེ དེཝོ ན སམྨཱ ཝསྶིསྶཏི, མེགྷཔཱདཱ པཙྪིཛྫིསྶནྟི, སསྶཱནི མིལཱཡིསྶནྟི, དུབྦྷིཀྑཾ བྷཝིསྶཏི, ཝསྶིཏུཀཱམཱ ཝིཡ ཙཏཱུཧི དིསཱཧི མེགྷཱ ཨུཊྛཧིཏྭཱ ཨིཏྠིཀཱཧི ¶ ཨཱཏཔེ པཏྠཊཱནཾ ཝཱིཧིཨཱདཱིནཾ ཏེམནབྷཡེན ཨནྟོཔཝེསིཏཀཱལེ པུརིསེསུ ཀུདྡཱལཔིཊཀཧཏྠེསུ ཨཱལི༹བནྡྷནཏྠཱཡ ནིཀྑནྟེསུ ཝསྶནཱཀཱརཾ ¶ དསྶེཏྭཱ གཛྫིཏྭཱ ཝིཛྫུལཏཱ ནིཙྪཱརེཏྭཱ ཏེ ཨུསབྷཱ ཝིཡ ཨཡུཛ྄ཛྷིཏྭཱ ཨཝསྶིཏྭཱཝ པལཱཡིསྶནྟི. ཨཡམེཏསྶ ཝིཔཱཀོ. ཏུཡ྄ཧཾ པན ཏཔྤཙྩཡཱ ཀོཙི ཨནྟརཱཡོ ནཏྠི, ཨནཱགཏཾ ¶ ཨཱརབྦྷ དིཊྛོ སུཔིནོ ཨེས, བྲཱཧྨཎཱ པན ཨཏྟནོ ཛཱིཝིཏཝུཏྟིཾ ནིསྶཱཡ ཀཐཡིཾསཱུ’’ཏི ཨེཝཾ སཏྠཱ སུཔིནསྶ ནིཔྥཏྟིཾ ཀཐེཏྭཱ ཨཱཧ ‘‘དུཏིཡཾ ཀཐེཧི, མཧཱརཱཛཱ’’ཏི.

(༢) དུཏིཡཱཧཾ, བྷནྟེ, ཨེཝཾ ཨདྡསཾ – ཁུདྡཀཱ རུཀྑཱ ཙེཝ གཙྪཱ ཙ པཐཝིཾ བྷིནྡིཏྭཱ ཝིདཏྠིམཏྟམྤི རཏནམཏྟམྤི ཨནུགྒནྟྭཱཝ པུཔྥནྟི ཙེཝ ཕལནྟི ཙ. ཨིམཾ དུཏིཡཾ ཨདྡསཾ, ཨིམསྶ ཀོ ཝིཔཱཀོཏི? མཧཱརཱཛ, ཨིམསྶཱཔི ཝིཔཱཀོ ལོཀསྶ པརིཧཱཡནཀཱལེ མནུསྶཱནཾ པརིཏྟཱཡུཀཀཱལེ བྷཝིསྶཏི. ཨནཱགཏསྨིཉྷི སཏྟཱ ཏིབྦརཱགཱ བྷཝིསྶནྟི, ཨསམྤཏྟཝཡཱཝ ཀུམཱརིཡོ པུརིསནྟརཾ གནྟྭཱ ཨུཏུནིཡོ ཙེཝ གབྦྷིནིཡོ ཙ ཧུཏྭཱ པུཏྟདྷཱིཏཱཧི ཝཌྜྷིསྶནྟི. ཁུདྡཀརུཀྑཱནཾ པུཔྥཾ ཝིཡ ཧི ཏཱསཾ ཨུཏུནིབྷཱཝོ, ཕལཾ ཝིཡ ཙ པུཏྟདྷཱིཏརོ བྷཝིསྶནྟི. ཨིཏོནིདཱནམྤི ཏེ བྷཡཾ ནཏྠི, ཏཏིཡཾ ཀཐེཧི, མཧཱརཱཛཱཏི.

(༣) གཱཝིཡོ, བྷནྟེ, ཏདཧུཛཱཏཱནཾ ཝཙྪཀཱནཾ ཁཱིརཾ པིཝནྟིཡོ ཨདྡསཾ. ཨཡཾ མེ ཏཏིཡོ སུཔིནོ, ཨིམསྶ ཀོ ཝིཔཱཀོཏི? ཨིམསྶཱཔི ཝིཔཱཀོ ཨནཱགཏེ ཨེཝ མནུསྶཱནཾ ཛེཊྛཱཔཙཱཡིཀཀམྨསྶ ནཊྛཀཱལེ བྷཝིསྶཏི. ཨནཱགཏསྨིཉྷི སཏྟཱ མཱཏཱཔིཏཱུསུ ཝཱ སསྶུསསུརེསུ ཝཱ ལཛྫཾ ཨནུཔཊྛཱཔེཏྭཱ སཡམེཝ ཀུཊུམྦཾ སཾཝིདཧནྟཱཝ གྷཱསཙྪཱདནམཏྟམྤི མཧལླཀཱནཾ དཱཏུཀཱམཱ དསྶནྟི, ཨདཱཏུཀཱམཱ ན དསྶནྟི. མཧལླཀཱ ཨནཱཐཱ ཨསཡཾཝསཱི དཱརཀེ ཨཱརཱདྷེཏྭཱ ཛཱིཝིསྶནྟི ཏདཧུཛཱཏཱནཾ ཝཙྪཀཱནཾ ཁཱིརཾ པིཝནྟིཡོ མཧཱགཱཝིཡོ ཝིཡ. ཨིཏོནིདཱནམྤི ཏེ བྷཡཾ ནཏྠི, ཙཏུཏྠཾ ཀཐེཧི, མཧཱརཱཛཱཏི.

(༤) དྷུརཝཱཧེ, བྷནྟེ, ཨཱརོཧཔརིཎཱཧསམྤནྣེ མཧཱགོཎེཡུགཔརམྤརཱཡ ཨཡོཛེཏྭཱ ཏརུཎེ གོདམྨེ དྷུརེ ཡོཛེནྟེ ཨདྡསཾ. ཏེ དྷུརཾ ཝཧིཏུཾ ཨསཀྐོནྟཱ ཚཌྜེཏྭཱ ཨཊྛཾསུ, སཀཊཱནི ནཔྤཝཊྚིཾསུ. ཨཡཾ མེ ཙཏུཏྠོ སུཔིནོ, ཨིམསྶ ཀོ ཝིཔཱཀོཏི? ཨིམསྶཱཔི ཝིཔཱཀོ ¶ ཨནཱགཏེ ཨེཝ ཨདྷམྨིཀརཱཛཱུནཾ ཀཱལེ བྷཝིསྶཏི. ཨནཱགཏསྨིཉྷི ཨདྷམྨིཀཀཔཎརཱཛཱནོ པཎྜིཏཱནཾ པཝེཎིཀུསལཱནཾ ཀམྨཾ ནིཏྠརཎསམཏྠཱནཾ མཧཱམཏྟཱནཾ ཡསཾ ན དསྶནྟི. དྷམྨསབྷཱཡཾ ཝིནིཙྪཡཊྛཱནེཔི པཎྜིཏེ ཝོཧཱརཀུསལེ མཧལླཀེ ཨམཙྩེ ན ཋཔེསྶནྟི, ཏབྦིཔརཱིཏཱནཾ པན ཏརུཎཏརུཎཱནཾ ཡསཾ དསྶནྟི, ཏཐཱརཱུཔེ ཨེཝ ཝིནིཙྪཡཊྛཱནེ ཋཔེསྶནྟི, ཏེ རཱཛཀམྨཱནི ཙེཝ ཡུཏྟཱཡུཏྟཉྩ ¶ ཨཛཱནནྟཱ ནེཝ ཏཾ ཡསཾ ཨུཀྑིཔིཏུཾ སཀྑིསྶནྟི, ན རཱཛཀམྨཱནི ནིཏྠརིཏུཾ. ཏེ ཨསཀྐོནྟཱ ཀམྨདྷུརཾ ཚཌྜེསྶནྟི, མཧལླཀཱཔི པཎྜིཏཱམཙྩཱ ཡསཾ ཨལབྷནྟཱ ཀིཙྩཱནི ནིཏྠརིཏུཾ སམཏྠཱཔི ‘‘ཀིཾ ཨམྷཱཀཾ ཨེཏེཧི, མཡཾ བཱཧིརཀཱ ཛཱཏཱ, ཨབྦྷནྟརིཀཱ ཏརུཎདཱརཀཱ ཛཱནིསྶནྟཱི’’ཏི ¶ ཨུཔྤནྣཱནི ཀམྨཱནི ན ཀརིསྶནྟི, ཨེཝཾ སབྦཐཱཔི ཏེསཾ རཱཛཱུནཾ ཧཱནིཡེཝ བྷཝིསྶཏི, དྷུརཾ ཝཧིཏུཾ ཨསམཏྠཱནཾ ཝཙྪདམྨཱནཾ དྷུརེ ཡོཛིཏཀཱལོ ཝིཡ, དྷུརཝཱཧཱནཉྩ མཧཱགོཎཱནཾ ཡུགཔརམྤརཱཡ ཨཡོཛིཏཀཱལོ ཝིཡ བྷཝིསྶཏི. ཨིཏོནིདཱནམྤི ཏེ བྷཡཾ ནཏྠི, པཉྩམཾ ཀཐེཧི, མཧཱརཱཛཱཏི.

(༥) བྷནྟེ, ཨེཀཾ ཨུབྷཏོམུཁཾ ཨསྶཾ ཨདྡསཾ, ཏསྶ དྭཱིསུ པསྶེསུ ཡཝསཾ དེནྟི, སོ དྭཱིཧི མུཁེཧི ཁཱདཏི. ཨཡཾ མེ པཉྩམོ སུཔིནོ, ཨིམསྶ ཀོ ཝིཔཱཀོཏི? ཨིམསྶཱཔི ཨནཱགཏེ ཨདྷམྨིཀརཱཛཀཱལེཡེཝ ཝིཔཱཀོ བྷཝིསྶཏི. ཨནཱགཏསྨིཉྷི ཨདྷམྨིཀཱ བཱལརཱཛཱནོ ཨདྷམྨིཀེ ལོལམནུསྶེ ཝིནིཙྪཡེ ཋཔེསྶནྟི, ཏེ པཱཔཔུཉྙེསུ ཨནཱདརཱ བཱལཱ སབྷཱཡཾ ནིསཱིདིཏྭཱ ཝིནིཙྪཡཾ དེནྟཱ ཨུབྷིནྣམྤི ཨཏྠཔཙྩཏྠིཀཱནཾ ཧཏྠཏོ ལཉྫཾ གཧེཏྭཱ ཁཱདིསྶནྟི ཨསྶོ ཝིཡ དྭཱིཧི མུཁེཧི ཡཝསཾ. ཨིཏོནིདཱནམྤི ཏེ བྷཡཾ ནཏྠི, ཚཊྛཾ ཀཐེཧི, མཧཱརཱཛཱཏི.

(༦) བྷནྟེ, མཧཱཛནོ སཏསཧསྶགྒྷནིཀཾ སུཝཎྞཔཱཏིཾ སམྨཛྫིཏྭཱ ‘‘ཨིདྷ པསྶཱཝཾ ཀརོཧཱི’’ཏི ཨེཀསྶ ཛརསིངྒཱལསྶ ཨུཔནཱམེསི, ཏཾ ཏཏྠ པསྶཱཝཾ ཀརོནྟཾ ཨདྡསཾ. ཨཡཾ མེ ཚཊྛོ སུཔིནོ, ཨིམསྶ ཀོ ཝིཔཱཀོཏི? ཨིམསྶཱཔི ཝིཔཱཀོ ཨནཱགཏེཡེཝ བྷཝིསྶཏི. ཨནཱགཏསྨིཉྷི ¶ ཨདྷམྨིཀཱ ཝིཛཱཏིརཱཛཱནོ ཛཱཏིསམྤནྣཱནཾ ཀུལཔུཏྟཱནཾ ཨཱསངྐཱཡ ཡསཾ ན དསྶནྟི, ཨཀུལཱིནཱནཾཡེཝ དསྶནྟི. ཨེཝཾ མཧཱཀུལཱནི དུགྒཏཱནི བྷཝིསྶནྟི, ལཱམཀཀུལཱནི ཨིསྶརཱནི. ཏེ ཙ ཀུལཱིནཔུརིསཱ ཛཱིཝིཏུཾ ཨསཀྐོནྟཱ ‘‘ཨིམེ ནིསྶཱཡ ཛཱིཝིསྶཱམཱ’’ཏི ཨཀུལཱིནཱནཾ དྷཱིཏརོ དསྶནྟི, ཨིཏི ཏཱསཾ ཀུལདྷཱིཏཱནཾ ཨཀུལཱིནེཧི སདྡྷིཾ སཾཝཱསོ ཛརསིངྒཱལསྶ སུཝཎྞཔཱཏིཡཾ པསྶཱཝཀརཎསདིསོ བྷཝིསྶཏི. ཨིཏོནིདཱནམྤི ཏེ བྷཡཾ ནཏྠི, སཏྟམཾ ཀཐེཧཱིཏི.

(༧) བྷནྟེ, ཨེཀོ པུརིསོ རཛྫུཾ ཝཊྚེཏྭཱ ཝཊྚེཏྭཱ པཱདམཱུལེ ནིཀྑིཔཏི, ཏེན ནིསིནྣཔཱིཋསྶ ཧེཊྛཱ སཡིཏཱ ཨེཀཱ ཚཱཏསིངྒཱལཱི ཏསྶ ཨཛཱནནྟསྶེཝ ཏཾ ཁཱདཏི, ཨེཝཱཧཾ ཨདྡསཾ. ཨཡཾ མེ སཏྟམོ སུཔིནོ, ཨིམསྶ ཀོ ཝིཔཱཀོཏི? ཨིམསྶཱཔི ཨནཱགཏེཡེཝ ཝིཔཱཀོ བྷཝིསྶཏི. ཨནཱགཏསྨིཉྷི ཨིཏྠིཡོ པུརིསལོལཱ སུརཱལོལཱ ཨལངྐཱརལོལཱ ཝིསིཁཱལོལཱ ཨཱམིསལོལཱ བྷཝིསྶནྟི དུསྶཱིལཱ དུརཱཙཱརཱ, ཏཱ སཱམིཀེཧི ཀསིགོརཀྑཱདཱིནི ཀམྨཱནི ཀཏྭཱ ¶ ཀིཙྪེན ཀསིརེན སམྦྷཏཾ དྷནཾ ཛཱརེཧི སདྡྷིཾ སུརཾ པིཝནྟིཡོ མཱལཱགནྡྷཝིལེཔནཾ དྷཱརཡམཱནཱ ཨནྟོགེཧེ ཨཙྩཱཡིཀམྤི ཀིཙྩཾ ཨནོལོཀེཏྭཱ གེཧེ པརིཀྑེཔསྶ ཨུཔརིབྷཱགེནཔི ཚིདྡཊྛཱནེཧིཔི ཛཱརེ ཨུཔདྷཱརཡམཱནཱ སྭེ ཝཔིཏབྦཡུཏྟཀཾ བཱིཛམྤི ཀོཊྚེཏྭཱ ཡཱགུབྷཏྟཁཛྫཀཱདཱིནི སམྤཱདེཏྭཱ ཁཱདམཱནཱ ཝིལུམྤིསྶནྟི ཧེཊྛཱཔཱིཋཀེ ནིཔནྣཚཱཏསིངྒཱལཱི ཝིཡ ཝཊྚེཏྭཱ ཝཊྚེཏྭཱ ¶ པཱདམཱུལེ ནིཀྑིཏྟརཛྫུཾ. ཨིཏོནིདཱནམྤི ཏེ བྷཡཾ ནཏྠི, ཨཊྛམཾ ཀཐེཧཱིཏི.

(༨) བྷནྟེ, རཱཛདྭཱརེ བཧཱུཧི ཏུཙྪཀུམྦྷེཧི པརིཝཱརེཏྭཱ ཋཔིཏཾ ཨེཀཾ མཧནྟཾ པཱུརིཏཀུམྦྷཾ ཨདྡསཾ. ཙཏྟཱརོཔི པན ཝཎྞཱ ཙཏཱུཧི དིསཱཧི ཙཏཱུཧི ཨནུདིསཱཧི ཙ གྷཊེཧི ཨུདཀཾ ཨཱཧརིཏྭཱ ཨཱཧརིཏྭཱ པཱུརིཏཀུམྦྷམེཝ པཱུརེནྟི, པཱུརིཏཔཱུརིཏཾ ཨུདཀཾ ཨུཏྟརིཏྭཱ པལཱཡཏི, ཏེཔི པུནཔྤུནཾ ཏཏྠེཝ ཨུདཀཾ ཨཱསིཉྩནྟི, ཏུཙྪཀུམྦྷེ པན ཨོལོཀེནྟཱཔི ནཏྠི. ཨཡཾ མེ ཨཊྛམོ སུཔིནོ, ཨིམསྶ ཀོ ཝིཔཱཀོཏི? ཨིམསྶཱཔི ཨནཱགཏེཡེཝ ཝིཔཱཀོ བྷཝིསྶཏི. ཨནཱགཏསྨིཉྷི ལོཀོ པརིཧཱཡིསྶཏི, རཊྛཾ ¶ ནིརོཛཾ བྷཝིསྶཏི, རཱཛཱནོ དུགྒཏཱ ཀཔཎཱ བྷཝིསྶནྟི. ཡོ ཨིསྶརོ བྷཝིསྶཏི, ཏསྶ བྷཎྜཱགཱརེ སཏསཧསྶམཏྟཱ ཀཧཱཔཎཱ བྷཝིསྶནྟི, ཏེ ཨེཝཾ དུགྒཏཱ སབྦེ ཛཱནཔདེ ཨཏྟནོཝ ཀམྨེ ཀཱརེསྶནྟི, ཨུཔདྡུཏཱ མནུསྶཱ སཀེ ཀམྨནྟེ ཚཌྜེཏྭཱ རཱཛཱུནཉྙེཝ ཨཏྠཱཡ པུབྦཎྞཱཔརཎྞཱནི ཝཔནྟཱ རཀྑནྟཱ ལཱཡནྟཱ མདྡནྟཱ པཝེསེནྟཱ ཨུཙྪུཁེཏྟཱནི ཀརོནྟཱ ཡནྟཱནི ཀརོནྟཱ ཡནྟཱནི ཝཱཧེནྟཱ ཕཱཎིཏཱདཱིནི པཙནྟཱ པུཔྥཱརཱམེ ཙ ཕལཱརཱམེ ཙ ཀརོནྟཱ ཏཏྠ ཏཏྠ ནིཔྥནྣཱནི པུབྦཎྞཱདཱིནི ཨཱཧརིཏྭཱ རཉྙོ ཀོཊྛཱགཱརམེཝ པཱུརེསྶནྟི, ཨཏྟནོ གེཧེསུ ཏུཙྪཀོཊྛེ ཨོལོཀེནྟཱཔི ན བྷཝིསྶནྟི, ཏུཙྪཀུམྦྷེ ཨནོལོཀེཏྭཱ པཱུརིཏཀུམྦྷེ པཱུརཎསདིསམེཝ བྷཝིསྶཏི. ཨིཏོནིདཱནམྤི ཏེ བྷཡཾ ནཏྠི, ནཝམཾ ཀཐེཧཱིཏི.

(༩) བྷནྟེ, ཨེཀཾ པཉྩཝཎྞཔདུམསཉྪནྣཾ གམྦྷཱིརཾ སབྦཏོ ཏིཏྠཾ པོཀྑརཎིཾ ཨདྡསཾ. སམནྟཏོ དྭིཔདཙཏུཔྤདཱ ཨོཏརིཏྭཱ ཏཏྠ པཱནཱིཡཾ པིཝནྟི. ཏསྶཱ མཛ྄ཛྷེ གམྦྷཱིརཊྛཱནེ ཨུདཀཾ ཨཱཝིལཾ, ཏཱིརཔྤདེསེསུ དྭིཔདཙཏུཔྤདཱནཾ ཨཀྐམཊྛཱནེ ཨཙྪཾ ཝིཔྤསནྣཾ ཨནཱཝིལཾ. ཨེཝཱཧཾ ཨདྡསཾ. ཨཡཾ མེ ནཝམོ སུཔིནོ, ཨིམསྶ ཀོ ཝིཔཱཀོཏི? ཨིམསྶཱཔི ཨནཱགཏེཡེཝ ཝིཔཱཀོ བྷཝིསྶཏི. ཨནཱགཏསྨིཉྷི རཱཛཱནོ ཨདྷམྨིཀཱ བྷཝིསྶནྟི, ཚནྡཱདིཝསེན ཨགཏིཾ གཙྪནྟཱ རཛྫཾ ཀཱརེསྶནྟི, དྷམྨེན ཝིནིཙྪཡཾ ནཱམ ན དསྶནྟི, ལཉྫཝིཏྟཀཱ བྷཝིསྶནྟི དྷནལོལཱ, རཊྛཝཱསིཀེསུ ནེསཾ ཁནྟིམེཏྟཱནུདྡཡཱ ནཱམ ན བྷཝིསྶནྟི, ཀཀྑལཱ༹ ཕརུསཱ ཨུཙྪུཡནྟེ ཨུཙྪུགཎྛིཀཱ ཝིཡ མནུསྶེ པཱིལེ༹ནྟཱ ནཱནཔྤཀཱརེན བལིཾ ཨུཔྤཱདེནྟཱ དྷནཾ གཎྷིསྶནྟི. མནུསྶཱ བལིཔཱིལི༹ཏཱ ཀིཉྩི དཱཏུཾ ཨསཀྐོནྟཱ གཱམནིགམཱདཡོ ཚཌྜེཏྭཱ པཙྩནྟཾ གནྟྭཱ ཝཱསཾ ¶ ཀཔྤེསྶནྟི, མཛ྄ཛྷིམཛནཔདོ སུཉྙོ བྷཝིསྶཏི, པཙྩནྟོ གྷནཝཱསོ སེཡྻཐཱཔི པོཀྑརཎིཡཱ མཛ྄ཛྷེ ཨུདཀཾ ཨཱཝིལཾ པརིཡནྟེ ཝིཔྤསནྣཾ. ཨིཏོནིདཱནམྤི ཏེ བྷཡཾ ནཏྠི, དསམཾ ¶ ཀཐེཧཱིཏི.

(༡༠) བྷནྟེ, ཨེཀིསྶཱཡེཝ ཀུམྦྷིཡཱ པཙྩམཱནཾ ཨོདནཾ ཨཔཱཀཾ ཨདྡསཾ ‘‘ཨཔཱཀ’’ནྟི ཝིཙཱརེཏྭཱ ཝིབྷཛིཏྭཱ ཋཔིཏཾ ཝིཡ ཏཱིཧཱཀཱརེཧི པཙྩམཱནཾ, ཨེཀསྨིཾ ¶ པསྶེ ཨཏིཀིལིནྣོ ཧོཏི, ཨེཀསྨིཾ ཨུཏྟཎྜུལོ, ཨེཀསྨིཾ སུཔཀྐོཏི. ཨཡཾ མེ དསམོ སུཔིནོ, ཨིམསྶ ཀོ ཝིཔཱཀོཏི? ཨིམསྶཱཔི ཨནཱགཏེཡེཝ ཝིཔཱཀོ བྷཝིསྶཏི. ཨནཱགཏསྨིཉྷི རཱཛཱནོ ཨདྷམྨིཀཱ བྷཝིསྶནྟི, ཏེསུ ཨདྷམྨིཀེསུ རཱཛཡུཏྟཱཔི བྲཱཧྨཎགཧཔཏིཀཱཔི ནེགམཛཱནཔདཱཔཱིཏི སམཎབྲཱཧྨཎེ ཨུཔཱདཱཡ སབྦེ མནུསྶཱ ཨདྷམྨིཀཱ བྷཝིསྶནྟི, ཏཏོ ཏེསཾ ཨཱརཀྑདེཝཏཱ, བལིཔཊིགྒཱཧིཀཱ དེཝཏཱ, རུཀྑདེཝཏཱ, ཨཱཀཱསཊྛདེཝཏཱཏི ཨེཝཾ དེཝཏཱཔི ཨདྷམྨིཀཱ བྷཝིསྶནྟི. ཨདྷམྨིཀརཱཛཱུནཉྩ རཛྫེ ཝཱཏཱ ཝིསམཱ ཁརཱ ཝཱཡིསྶནྟི, ཏེ ཨཱཀཱསཊྛཝིམཱནཱནི ཀམྤེསྶནྟི, ཏེསུ ཀམྤིཏེསུ དེཝཏཱ ཀུཔིཏཱ དེཝཾ ཝསྶིཏུཾ ན དསྶནྟི, ཝསྶམཱནོཔི སཀལརཊྛེ ཨེཀཔྤཧཱརེན ན ཝསྶིསྶཏི, ཝསྶམཱནོཔི སབྦཏྠ ཀསིཀམྨསྶ ཝཱ ཝཔྤཀམྨསྶ ཝཱ ཨུཔཀཱརཀོ ཧུཏྭཱ ན ཝསྶིསྶཏི. ཡཐཱ ཙ རཊྛེ, ཨེཝཾ ཛནཔདེཔི གཱམེཔི ཨེཀཏལཱ༹ཀེཔི ཨེཀསརེཔི ཨེཀཔྤཧཱརེནེཝ ན ཝསྶིསྶཏི, ཏལཱ༹ཀསྶ ཨུཔརིབྷཱགེ ཝསྶནྟོ ཧེཊྛཱབྷཱགེ ན ཝསྶིསྶཏི, ཧེཊྛཱ ཝསྶནྟོ ཨུཔརི ན ཝསྶིསྶཏི. ཨེཀསྨིཾ བྷཱགེ སསྶཾ ཨཏིཝསྶེན ནསྶིསྶཏི, ཨེཀསྨིཾ ཨཝསྶནེན མིལཱཡིསྶཏི, ཨེཀསྨིཾ སམྨཱ ཝསྶམཱནོ སམྤཱདེསྶཏི. ཨེཝཾ ཨེཀསྶ རཉྙོ རཛྫེ ཝུཏྟསསྶཱ ཏིཔྤཀཱརཱ བྷཝིསྶནྟི ཨེཀཀུམྦྷིཡཱ ཨོདནོ ཝིཡ. ཨིཏོནིདཱནམྤི ཏེ བྷཡཾ ནཏྠི, ཨེཀཱདསམཾ ཀཐེཧཱིཏི.

(༡༡) བྷནྟེ, སཏསཧསྶགྒྷནིཀཾ ཙནྡནསཱརཾ པཱུཏིཏཀྐེན ཝིཀྐིཎནྟེ ཨདྡསཾ. ཨཡཾ མེ ཨེཀཱདསམོ སུཔིནོ, ཨིམསྶ ཀོ ཝིཔཱཀོཏི? ཨིམསྶཱཔི ཨནཱགཏེཡེཝ མཡ྄ཧཾ སཱསནེ པརིཧཱཡནྟེ ཝིཔཱཀོ བྷཝིསྶཏི. ཨནཱགཏསྨིཉྷི པཙྩཡལོལཱ ཨལཛྫཱི བྷིཀྑཱུ བཧཱུ བྷཝིསྶནྟི, ཏེ མཡཱ པཙྩཡལོལུཔྤཾ ནིམྨཐེཏྭཱ ཀཐིཏདྷམྨདེསནཾ ཙཱིཝརཱདིཙཏུཔཙྩཡཧེཏུ པརེསཾ དེསེསྶནྟི, པཙྩཡེཧི མུཙྪིཏཱ ནིསྶརཎཔཀྑེ ཋིཏཱ ནིབྦཱནཱབྷིམུཁཾ ཀཏྭཱ དེསེཏུཾ ན སཀྑིསྶནྟི, ཀེཝལཾ ‘‘པདབྱཉྫནསམྤཏྟིཉྩེཝ མདྷུརསདྡཉྩ སུཏྭཱ མཧགྒྷཱནི ཙཱིཝརཱདཱིནི དསྶནྟི’’ ཨིཙྩེཝཾ དེསེསྶནྟི. ཨཔརེ ¶ ཨནྟརཝཱིཐིཙཏུཀྐརཱཛདྭཱརཱདཱིསུ ནིསཱིདིཏྭཱ ཀཧཱཔཎཨཌྜྷཀཧཱཔཎཔཱདམཱསཀརཱུཔཱདཱིནིཔི ནིསྶཱཡ དེསེསྶནྟི. ཨིཏི མཡཱ ནིབྦཱནགྒྷནཀཾ ཀཏྭཱ དེསིཏཾ དྷམྨཾ ཙཏུཔཙྩཡཏྠཱཡ ཙེཝ ཀཧཱཔཎཌྜྷཀཧཱཔཎཱདཱིནཾ ཨཏྠཱཡ ཙ ཝིཀྐིཎིཏྭཱ དེསེནྟཱ ¶ སཏསཧསྶགྒྷནཀཾ ཙནྡནསཱརཾ པཱུཏིཏཀྐེན ཝིཀྐིཎནྟཱ ¶ ཝིཡ བྷཝིསྶནྟི. ཨིཏོནིདཱནམྤི ཏེ བྷཡཾ ནཏྠི, དྭཱདསམཾ ཀཐེཧཱིཏི.

(༡༢) བྷནྟེ, ཏུཙྪལཱབཱུནི ཨུདཀེ སཱིདནྟཱནི ཨདྡསཾ, ཨིམསྶ ཀོ ཝིཔཱཀོཏི? ཨིམསྶཔི ཨནཱགཏེ ཨདྷམྨིཀརཱཛཀཱལེ ལོཀེ ཝིཔརིཝཏྟནྟེཡེཝ ཝིཔཱཀོ བྷཝིསྶཏི. ཏདཱ ཧི རཱཛཱནོ ཛཱཏིསམྤནྣཱནཾ ཀུལཔུཏྟཱནཾ ཡསཾ ན དསྶནྟི, ཨཀུལཱིནཱནཾཡེཝ དསྶནྟི, ཏེ ཨིསྶརཱ བྷཝིསྶནྟི, ཨིཏརེ དལིདྡཱ. རཱཛསམྨུཁེཔི རཱཛདྭཱརེཔི ཨམཙྩསམྨུཁེཔི ཝིནིཙྪཡཊྛཱནེཔི ཏུཙྪལཱབུསདིསཱནཾ ཨཀུལཱིནཱནཾཡེཝ ཀཐཱ ཨོསཱིདིཏྭཱ ཋིཏཱ ཝིཡ ནིཙྩལཱ སུཔྤཏིཊྛིཏཱ བྷཝིསྶཏི. སངྒྷསནྣིཔཱཏེསུཔི སངྒྷཀམྨགཎཀམྨཊྛཱནེསུ ཙེཝ པཏྟཙཱིཝརཔརིཝེཎཱདིཝིནིཙྪཡཊྛཱནེསུ ཙ དུསྶཱིལཱནཾ པཱཔཔུགྒལཱནཾཡེཝ ཀཐཱ ནིཡྻཱནིཀཱ བྷཝིསྶཏི, ན ལཛྫིབྷིཀྑཱུནནྟི ཨེཝཾ སབྦཐཱཔི ཏུཙྪལཱབུསཱིདནཀཱལོ ཝིཡ བྷཝིསྶཏི. ཨིཏོནིདཱནམྤི ཏེ བྷཡཾ ནཏྠི, ཏེརསམཾ ཀཐེཧཱིཏི.

(༡༣) བྷནྟེ, མཧནྟམཧནྟཱ ཀཱུཊཱགཱརཔྤམཱཎཱ གྷནསིལཱ ནཱཝཱ ཝིཡ ཨུདཀེ པླཝམཱནཱ ཨདྡསཾ, ཨིམསྶ ཀོ ཝིཔཱཀོཏི? ཨིམསྶཔི ཏཱདིསེཡེཝ ཀཱལེ ཝིཔཱཀོ བྷཝིསྶཏི. ཏདཱ ཧི ཨདྷམྨིཀརཱཛཱནོ ཨཀུལཱིནཱནཾ ཡསཾ དསྶནྟི, ཏེ ཨིསྶརཱ བྷཝིསྶནྟི, ཀུལཱིནཱ དུགྒཏཱ. ཏེསུ ན ཀེཙི གཱརཝཾ ཀརིསྶནྟི, ཨིཏརེསུཡེཝ ཀརིསྶནྟི. རཱཛསམྨུཁེ ཝཱ ཨམཙྩསམྨུཁེ ཝཱ ཝིནིཙྪཡཊྛཱནེ ཝཱ ཝིནིཙྪཡཀུསལཱནཾ གྷནསིལཱསདིསཱནཾ ཀུལཔུཏྟཱནཾ ཀཐཱ ན ཨོགཱཧིཏྭཱ པཏིཊྛཧིསྶཏི. ཏེསུ ཀཐེནྟེསུ ‘‘ཀིཾ ཨིམེ ཀཐེནྟཱི’’ཏི ཨིཏརེ པརིཧཱསམེཝ ཀརིསྶནྟི. བྷིཀྑུསནྣིཔཱཏེསུཔི ཝུཏྟཔྤཀཱརེསུ ཋཱནེསུ ནེཝ པེསལེ བྷིཀྑཱུ གརུཀཱཏབྦེ མཉྙིསྶནྟི, ནཱཔི ཏེསཾ ཀཐཱ པརིཡོགཱཧིཏྭཱ པཏིཊྛཧིསྶཏི, སིལཱནཾ པླཝནཀཱལོ ཝིཡ བྷཝིསྶཏི. ཨིཏོནིདཱནམྤི ཏེ བྷཡཾ ནཏྠི, ཙུདྡསམཾ ཀཐེཧཱིཏི.

(༡༤) བྷནྟེ ¶ , ཁུདྡཀམདྷུཀཔུཔྥཔྤམཱཎཱ མཎྜཱུཀིཡོ མཧནྟམཧནྟེ ཀཎྷསཔྤེ ཝེགེན ཨནུབནྡྷིཏྭཱ ཨུཔྤལནཱལེ༹ ཝིཡ ཚིནྡིཏྭཱ ཚིནྡིཏྭཱ མཾསཾ ཁཱདིཏྭཱ གིལནྟིཡོ ཨདྡསཾ, ཨིམསྶ ཀོ ཝིཔཱཀོཏི? ཨིམསྶཔི ལོཀེ པརིཧཱཡནྟེ ཨནཱགཏེ ཨེཝ ཝིཔཱཀོ བྷཝིསྶཏི. ཏདཱ ཧི མནུསྶཱ ཏིབྦརཱགཛཱཏིཀཱ ཀིལེསཱནུཝཏྟཀཱ ཧུཏྭཱ ཏརུཎཏརུཎཱནཾ ཨཏྟནོ བྷརིཡཱནཾ ཝསེ ཝཏྟིསྶནྟི, གེཧེ དཱསཀམྨཀརཱདཡོཔི གོམཧིཾསཱདཡོཔི ཧིརཉྙསུཝཎྞམྤི སབྦཾ ཏཱསཉྙེཝ ཨཱཡཏྟཾ བྷཝིསྶཏི. ‘‘ཨསུཀཾ ཧིརཉྙསུཝཎྞཾ ཝཱ པརིཙྪདཱདིཛཱཏཾ ཝཱ ཀཧ’’ནྟི ཝུཏྟེ ‘‘ཡཏྠ ཝཱ ཏཏྠ ཝཱ ཧོཏུ, ཀིཾ ཏུཡ྄ཧིམིནཱ བྱཱཔཱརེན, ཏྭཾ མཡ྄ཧཾ གྷརེ སནྟཾ ཝཱ ཨསནྟཾ ཝཱ ཛཱནིཏུཀཱམོ ¶ ཛཱཏོ’’ཏི ཝཏྭཱ ནཱནཔྤཀཱརེཧི ཨཀྐོསིཏྭཱ མུཁསཏྟཱིཧི ཀོཊྚེཏྭཱ དཱསཙེཊཀེ ཝིཡ ཨཏྟནོ ཝསེ ཀཏྭཱ ཨཏྟནོ ཨིསྶརིཡཾ པཝཏྟེསྶནྟི. ཨེཝཾ མདྷུཀཔུཔྥཔྤམཱཎཱནཾ ¶ མཎྜཱུཀཔོཏིཀཱནཾ ཨཱསཱིཝིསེ ཀཎྷསཔྤེ གིལནཀཱལོ ཝིཡ བྷཝིསྶཏི. ཨིཏོནིདཱནམྤི ཏེ བྷཡཾ ནཏྠི, པནྣརསམཾ ཀཐེཧཱིཏི.

(༡༥) བྷནྟེ, དསཧི ཨསདྡྷམྨེཧི སམནྣཱགཏཾ གཱམགོཙརཾ ཀཱཀཾ ཀཉྩནཝཎྞཏཱཡ ‘‘སུཝཎྞཱ’’ཏི ལདྡྷནཱམེ སུཝཎྞརཱཛཧཾསེ པརིཝཱརེནྟེ ཨདྡསཾ, ཨིམསྶ ཀོ ཝིཔཱཀོཏི? ཨིམསྶཱཔི ཨནཱགཏེ དུབྦལརཱཛཀཱལེཡེཝ ཝིཔཱཀོ བྷཝིསྶཏི. ཨནཱགཏསྨིཉྷི རཱཛཱནོ ཧཏྠིསིཔྤཱདཱིསུ ཨཀུསལཱ ཡུདྡྷེསུ ཨཝིསཱརདཱ བྷཝིསྶནྟི, ཏེ ཨཏྟནོ རཛྫཝིཔཏྟིཾ ཨཱསངྐམཱནཱ སམཱནཛཱཏིཀཱནཾ ཀུལཔུཏྟཱནཾ ཨིསྶརིཡཾ ཨདཏྭཱ ཨཏྟནོ པཱདམཱུལིཀནྷཱཔཀཀཔྤཀཱདཱིནཾ དསྶནྟི, ཛཱཏིགོཏྟསམྤནྣཱ ཀུལཔུཏྟཱ རཱཛཀུལེ པཏིཊྛཾ ཨལབྷམཱནཱ ཛཱིཝིཀཾ ཀཔྤེཏུཾ ཨསམཏྠཱ ཧུཏྭཱ ཨིསྶརིཡེ ཋིཏེ ཛཱཏིགོཏྟཧཱིནེ ཨཀུལཱིནེ ཨུཔཊྛཧནྟཱ ཝིཙརིསྶནྟི, སུཝཎྞརཱཛཧཾསེཧི ཀཱཀསྶ པརིཝཱརིཏཀཱལོ ཝིཡ བྷཝིསྶཏི. ཨིཏོནིདཱནམྤི ཏེ བྷཡཾ ནཏྠི, སོལ༹སམཾ ཀཐེཧཱིཏི.

(༡༦) བྷནྟེ, པུབྦེ དཱིཔིནོ ཨེལ༹ཀེ ཁཱདནྟི, ཨཧཾ པན ཨེལ༹ཀེ དཱིཔིནོ ཨནུབནྡྷིཏྭཱ མུརུམུརཱུཏི ཁཱདནྟེ ཨདྡསཾ. ཨཐཉྙེ ཏསཱ ཝཀཱ ཨེལ༹ཀེ དཱུརཏོཝ དིསྭཱ ཏསིཏཱ ཏཱསཔྤཏྟཱ ཧུཏྭཱ ཨེལ༹ཀཱནཾ བྷཡཱཔལཱཡིཏྭཱ གུམྦགཧནཱདཱིནི ¶ པཝིསིཏྭཱ ནིལཱིཡིཾསུ, ཨེཝཱཧཾ ཨདྡསཾ, ཨིམསྶ ཀོ ཝིཔཱཀོཏི? ཨིམསྶཔི ཨནཱགཏེ ཨདྷམྨིཀརཱཛཀཱལེཡེཝ ཝིཔཱཀོ བྷཝིསྶཏི. ཏདཱ ཧི ཨཀུལཱིནཱ རཱཛཝལླབྷཱ ཨིསྶརཱ བྷཝིསྶནྟི, ཀུལཱིནཱ ཨཔཉྙཱཏཱ དུགྒཏཱ. ཏེ རཱཛཝལླབྷཱ རཱཛཱནཾ ཨཏྟནོ ཀཐཾ གཱཧཱཔེཏྭཱ ཝིནིཙྪཡཊྛཱནཱདཱིསུ བལཝནྟོ ཧུཏྭཱ ཀུལཱིནཱནཾ པཝེཎིཨཱགཏཱནི ཁེཏྟཝཏྠཱདཱིནི ‘‘ཨམྷཱཀཾ སནྟཀཱནི ཨེཏཱནཱི’’ཏི ཨབྷིཡུཉྫིཏྭཱ ཏེསུ ‘‘ན ཏུམྷཱཀཾ, ཨམྷཱཀ’’ནྟི ཨཱགནྟྭཱ ཝིནིཙྪཡཊྛཱནཱདཱིསུ ཝིཝདནྟེསུ ཝེཏྟལཏཱདཱིཧི པཧརཱཔེཏྭཱ གཱིཝཱཡཾ གཧེཏྭཱ ཨཔཀཌྜྷཱཔེཏྭཱ ‘‘ཨཏྟནོ པམཱཎཾ ན ཛཱནཱཐ, ཨམྷེཧི སདྡྷིཾ ཝིཝདཐ, ཨིདཱནི ཝོ རཉྙོ ཀཐེཏྭཱ ཧཏྠཔཱདཙྪེདནཱདཱིནི ཀཱརེསྶཱམཱ’’ཏི སནྟཛྫེསྶནྟི. ཏེ ཏེསཾ བྷཡེན ཨཏྟནོ སནྟཀཱནི ཝཏྠཱུནི ‘‘ཏུམྷཱཀཾཡེཝེཏཱནི གཎྷཐཱ’’ཏི ནིཡྻཱདེཏྭཱ ཨཏྟནོ གེཧཱནི པཝིསིཏྭཱ བྷཱིཏཱ ནིཔཛྫིསྶནྟི. པཱཔབྷིཀྑཱུཔི པེསལེ བྷིཀྑཱུ ཡཐཱརུཙི ཝིཧེཋེསྶནྟི, ཏེ པེསལཱ བྷིཀྑཱུ པཊིསརཎཾ ཨལབྷམཱནཱ ཨརཉྙཾ པཝིསིཏྭཱ གཧནཊྛཱནེསུ ནིལཱིཡིསྶནྟི. ཨེཝཾ ཧཱིནཛཙྩེཧི ཙེཝ པཱཔབྷིཀྑཱུཧི ཙ ཨུཔདྡུཏཱནཾ ཛཱཏིམནྟཀུལཔུཏྟཱནཉྩེཝ པེསལབྷིཀྑཱུནཉྩ ཨེལ༹ཀཱནཾ བྷཡེན ཏསཝཀཱནཾ པལཱཡནཀཱལོ ཝིཡ བྷཝིསྶཏི. ཨིཏོནིདཱནམྤི ཏེ བྷཡཾ ནཏྠི. ཨཡམྤི ཧི སུཔིནོ ཨནཱགཏཾཡེཝ ¶ ཨཱརབྦྷ དིཊྛོ. བྲཱཧྨཎཱ པན ན ¶ དྷམྨསུདྷམྨཏཱཡ ཏཡི སིནེཧེན ཀཐཡིཾསུ, ‘‘བཧུདྷནཾ ལབྷིསྶཱམཱ’’ཏི ཨཱམིསཱཔེཀྑཏཱཡ ཛཱིཝིཏཝུཏྟིཾ ནིསྶཱཡ ཀཐཡིཾསཱུཏི.

ཨེཝཾ སཏྠཱ སོལ༹སནྣཾ མཧཱསུཔིནཱནཾ ནིཔྥཏྟིཾ ཀཐེཏྭཱ ‘‘ན ཁོ, མཧཱརཱཛ, ཨེཏརཧི ཏྭཉྙེཝ ཨིམེ སུཔིནེ ཨདྡས, པོརཱཎཀརཱཛཱནོཔི ཨདྡསཾསུ. བྲཱཧྨཎཱཔི ནེསཾ ཨེཝམེཝ ཨིམེ སུཔིནེ གཧེཏྭཱ ཡཉྙམཏྠཀེ ཁིཔིཾསུ, ཏཏོ པཎྜིཏེཧི དིནྣནཡེན གནྟྭཱ བོདྷིསཏྟཾ པུཙྪིཾསུ. པོརཱཎཀཱ པཎྜིཏཱཔི ནེསཾ ཨིམེ སུཔིནེ ཀཐེནྟཱ ཨིམིནཱཝ ནིཡཱམེན ཀཐེསུ’’ནྟི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨུདིཙྩབྲཱཧྨཎཀུལེ ནིབྦཏྟིཏྭཱ ཝཡཔྤཏྟོ ཨིསིཔབྦཛྫཾ པབྦཛིཏྭཱ ཨབྷིཉྙཱ ཙེཝ ¶ སམཱཔཏྟིཡོ ཙ ནིབྦཏྟེཏྭཱ ཧིམཝནྟཔྤདེསེ ཛྷཱནཀཱིལ༹ཾ ཀཱིལ༹ནྟོ ཝིཧརཏི. ཏདཱ བཱརཱཎསིཡཾ བྲཧྨདཏྟོ ཨིམིནཱཝ ནིཡཱམེན ཨིམེ སུཔིནེ དིསྭཱ བྲཱཧྨཎེ པུཙྪི. བྲཱཧྨཎཱ ཨེཝམེཝ ཡཉྙཾ ཡཛིཏུཾ ཨཱརབྷིཾསུ. ཏེསུ པུརོཧིཏསྶ ཨནྟེཝཱསིཀམཱཎཝོ པཎྜིཏོ བྱཏྟོ ཨཱཙརིཡཾ ཨཱཧ – ‘‘ཨཱཙརིཡ, ཏུམྷེཧི མཡཾ ཏཡོ ཝེདེ ཨུགྒཎྷཱཔིཏཱ, ནནུ ཏེསུ ཨེཀཾ མཱརེཏྭཱ ཨེཀསྶ སོཏྠིཀམྨསྶ ཀཱརཎཾ ནཱམ ནཏྠཱི’’ཏི. ཏཱཏ, ཨིམིནཱ ཨུཔཱཡེན ཨམྷཱཀཾ བཧུདྷནཾ ཨུཔྤཛྫིསྶཏི, ཏྭཾ པན རཉྙོ དྷནཾ རཀྑིཏུཀཱམོ མཉྙེཏི. མཱཎཝོ ‘‘ཏེན ཧི, ཨཱཙརིཡ, ཏུམྷེ ཏུམྷཱཀཾ ཀམྨཾ ཀརོཐ, ཨཧཾ ཏུམྷཱཀཾ སནྟིཀེ ཀིཾ ཀརིསྶཱམཱི’’ཏི ཝིཙརནྟོ རཉྙོ ཨུཡྻཱནཾ ཨགམཱསི.

ཏཾ དིཝསམེཝ བོདྷིསཏྟོཔི ཏཾ ཀཱརཎཾ ཉཏྭཱ ‘‘ཨཛྫ མཡི མནུསྶཔཐཾ གཏེ མཧཱཛནསྶ བནྡྷནཱ མོཀྑོ བྷཝིསྶཏཱི’’ཏི ཨཱཀཱསེན གནྟྭཱ ཨུཡྻཱནེ ཨོཏརིཏྭཱ སུཝཎྞཔཊིམཱ ཝིཡ མངྒལསིལཱཏལེ ནིསཱིདི. མཱཎཝོ བོདྷིསཏྟཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསཱིདིཏྭཱ པཊིསནྠཱརམཀཱསི. བོདྷིསཏྟོཔི ཏེན སདྡྷིཾ མདྷུརཔཊིསནྠཱརཾ ཀཏྭཱ ‘‘ཀིཾ ནུ ཁོ, མཱཎཝ, རཱཛཱ དྷམྨེན རཛྫཾ ཀཱརེཏཱི’’ཏི པུཙྪི. ‘‘བྷནྟེ, རཱཛཱ ནཱམ དྷམྨིཀོ, ཨཔིཙ ཁོ ཏཾ བྲཱཧྨཎཱ ཨཏིཏྠེ པཀྑནྡཱཔེ’’ནྟི. རཱཛཱ སོལ༹ས སུཔིནེ དིསྭཱ བྲཱཧྨཎཱནཾ ཨཱརོཙེསི. བྲཱཧྨཎཱ ‘‘ཡཉྙཾ ཡཛིསྶཱམཱ’’ཏི ¶ ཨཱརདྡྷཱ. ཀིཾ ནུ ཁོ, བྷནྟེ, ‘‘ཨཡཾ ནཱམ ཨིམེསཾ སུཔིནཱནཾ ནིཔྥཏྟཱི’’ཏི རཱཛཱནཾ སཉྙཱཔེཏྭཱ ཏུམྷཱཀཾ མཧཱཛནཾ བྷཡཱ མོཙེཏུཾ ན ཝཊྚཏཱིཏི. མཡཾ ཁོ, མཱཎཝ, རཱཛཱནཾ ན ཛཱནཱམ, རཱཛཱཔི ཨམྷེ ན ཛཱནཱཏི. སཙེ པན ཨིདྷཱགནྟྭཱ པུཙྪེཡྻ, ཀཐེཡྻཱམསྶ མཡནྟི. མཱཎཝོ ‘‘ཨཧཾ, བྷནྟེ, ཏཾ ཨཱནེསྶཱམི, ཏུམྷེ མམཱགམནཾ ཨུདིཀྑནྟཱ མུཧུཏྟཾ ནིསཱིདཐཱ’’ཏི བོདྷིསཏྟཾ པཊིཛཱནཱཔེཏྭཱ རཉྙོ སནྟིཀཾ གནྟྭཱ ‘‘མཧཱརཱཛ, ཨེཀོ ¶ ཨཱཀཱསཙཱརིཀོ ཏཱཔསོ ཏུམྷཱཀཾ ཨུཡྻཱནེ ཨོཏརིཏྭཱ ‘ཏུམྷེཧི དིཊྛསུཔིནཱནཾ ནིཔྥཏྟིཾ ཀཐེསྶཱམཱི’ཏི ཏུམྷེ པཀྐོསཏཱི’’ཏི ཨཱཧ.

རཱཛཱ ཏསྶ ཀཐཾ སུཏྭཱ ཏཱཝདེཝ མཧནྟེན པརིཝཱརེན ཨུཡྻཱནཾ གནྟྭཱ ཏཱཔསཾ ཝནྡིཏྭཱ ཨེཀམནྟཾ ནིསིནྣོ པུཙྪི ‘‘ཏུམྷེ ཀིར, བྷནྟེ, མཡཱ དིཊྛསུཔིནཱནཾ ནིཔྥཏྟིཾ ཛཱནཱཐཱ’’ཏི? ‘‘ཨཱམ, མཧཱརཱཛཱ’’ཏི. ‘‘ཏེན ཧི ཀཐེཐཱ’’ཏི. ‘‘ཀཐེམི, མཧཱརཱཛ, ཡཐཱདིཊྛེ ཏཱཝ སུཔིནེ མཾ སཱཝེཧཱི’’ཏི. ‘‘སཱདྷུ, བྷནྟེ’’ཏི རཱཛཱ –

༧༧.

‘‘ཨུསབྷཱ ¶ རུཀྑཱ གཱཝིཡོ གཝཱ ཙ,

ཨསྶོ ཀཾསོ སིངྒཱལཱི ཙ ཀུམྦྷོ;

པོཀྑརཎཱི ཙ ཨཔཱཀཙནྡནཾ.

‘‘ལཱབཱུནི སཱིདནྟི སིལཱ པླཝནྟི, མཎྜཱུཀིཡོ ཀཎྷསཔྤེ གིལནྟི;

ཀཱཀཾ སུཝཎྞཱ པརིཝཱརཡནྟི, ཏསཱ ཝཀཱ ཨེལ༹ཀཱནཾ བྷཡཱ ཧཱི’’ཏི. –

ཝཏྭཱ པསེནདིརཉྙཱ ཀཐིཏནིཡཱམེནེཝ སུཔིནེ ཀཐེསི.

བོདྷིསཏྟོཔི ཏེསཾ ཨིདཱནི སཏྠཱརཱ ཀཐིཏནིཡཱམེནེཝ ཝིཏྠཱརཏོ ནིཔྥཏྟིཾ ཀཐེཏྭཱ པརིཡོསཱནེ སཡཾ ཨིདཾ ཀཐེསི –

‘‘ཝིཔརིཡཱསོ ཝཏྟཏི ནཡིདྷ མཏྠཱི’’ཏི;

ཏཏྲཱཡམཏྠོ – ཨཡཾ, མཧཱརཱཛ, ཨིམེསཾ སུཔིནཱནཾ ནིཔྥཏྟི. ཡཾ པནེཏཾ ཏེསཾ པཊིགྷཱཏཏྠཱཡ ཡཉྙཀམྨཾ ཝཏྟཏི, ཏཾ ཝིཔརིཡཱསོ ཝཏྟཏི ཝིཔརཱིཏཏོ ཝཏྟཏི, ཝིཔལླཱསེན ཝཏྟཏཱིཏི ཝུཏྟཾ ཧོཏི. ཀིཾཀཱརཎཱ? ཨིམེསཉྷི ནིཔྥཏྟི ནཱམ ལོཀསྶ ཝིཔརིཝཏྟནཀཱལེ, ཨཀཱརཎསྶ ཀཱརཎནྟི གཧཎཀཱལེ, ཀཱརཎསྶ ཨཀཱརཎནྟི ཚཌྜནཀཱལེ, ཨབྷཱུཏསྶ བྷཱུཏནྟི གཧཎཀཱལེ, བྷཱུཏསྶ ཨབྷཱུཏནྟི ཛཧནཀཱལེ, ཨལཛྫཱིནཾ ཨུསྶནྣཀཱལེ, ལཛྫཱིནཉྩ པརིཧཱིནཀཱལེ བྷཝིསྶཏི. ནཡིདྷ མཏྠཱིཏི ཨིདཱནི པན ཏཝ ཝཱ མམ ¶ ཝཱ ཀཱལེ ཨིདྷ ཨིམསྨིཾ པུརིསཡུགེ ཝཏྟམཱནེ ཨེཏེསཾ ནིཔྥཏྟི ནཏྠི. ཏསྨཱ ཨེཏེསཾ པཊིགྷཱཏཱཡ ཝཏྟམཱནཾ ཡཉྙཀམྨཾ ཝིཔལླཱསེན ཝཏྟཏི, ཨལཾ ཏེན. ནཏྠི ཏེ ཨིཏོནིདཱནཾ བྷཡཾ ཝཱ ཚམྦྷིཏཏྟཾ ཝཱཏི མཧཱཔུརིསོ རཱཛཱནཾ སམསྶཱསེཏྭཱ མཧཱཛནཾ ¶ བནྡྷནཱ མོཙེཏྭཱ པུན ཨཱཀཱསེ ཋཏྭཱ རཉྙོ ཨོཝཱདཾ དཏྭཱ པཉྩསུ སཱིལེསུ པཏིཊྛཱཔེཏྭཱ ‘‘ཨིཏོ པཊྛཱཡ, མཧཱརཱཛ, བྲཱཧྨཎེཧི སདྡྷིཾ ཨེཀཏོ ཧུཏྭཱ པསུགྷཱཏཡཉྙཾ མཱ ཡཛཱི’’ཏི དྷམྨཾ དེསེཏྭཱ ཨཱཀཱསེནེཝ ཨཏྟནོ ཝསནཊྛཱནཾ ཨགམཱསི. རཱཛཱཔི ཏསྶ ཨོཝཱདེ ཋིཏོ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ ‘‘སུཔིནཔཙྩཡཱ ཏེ བྷཡཾ ནཏྠི, ཧརེཏཾ ཡཉྙ’’ནྟི ཡཉྙཾ ཧཱརེཏྭཱ མཧཱཛནསྶ ཛཱིཝིཏདཱནཾ དཏྭཱ ཨནུསནྡྷིཾ ¶ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ རཱཛཱ ཨཱནནྡོ ཨཧོསི, མཱཎཝོ སཱརིཔུཏྟོ, ཏཱཔསོ པན ཨཧམེཝ ཨཧོསི’’ནྟི.

པརིནིབྦུཏེ པན བྷགཝཏི སངྒཱིཏིཀཱརཀཱ ‘‘ཨུསབྷཱ’’ཏིཨཱདཱིནི ཏཱིཎི པདཱནི ཨཊྛཀཐཾ ཨཱརོཔེཏྭཱ ‘‘ལཱབཱུནཱི’’ཏིཨཱདཱིནི ཙཏྟཱརི པདཱནི ཨེཀཾ གཱཐཾ ཀཏྭཱ ཨེཀཀནིཔཱཏཔཱལི༹ཾ ཨཱརོཔེསུནྟི.

མཧཱསུཔིནཛཱཏཀཝཎྞནཱ སཏྟམཱ.

[༧༨] ༨. ཨིལླིསཛཱཏཀཝཎྞནཱ

ཨུབྷོ ཁཉྫཱཏི ཨིདཾ སཏྠཱ ཛེཏཝནེ ཝིཧརནྟོ མཙྪརིཡཀོསིཡསེཊྛིཾ ཨཱརབྦྷ ཀཐེསི. རཱཛགཧནགརསྶ ཀིར ཨཝིདཱུརེ སཀྐཱརཾ ནཱམ ནིགམོ ཨཧོསི, ཏཏྠེཀོ མཙྪརིཡཀོསིཡོ ནཱམ སེཊྛི ཨསཱིཏིཀོཊིཝིབྷཝོ པཊིཝསཏི. སོ ཏིཎགྒེན ཏེལབིནྡུམཏྟམྤི ནེཝ པརེསཾ དེཏི, ན ཨཏྟནཱ པརིབྷུཉྫཏི. ཨིཏི ཏསྶ ཏཾ ཝིབྷཝཛཱཏཾ ནེཝ པུཏྟདཱརཱདཱིནཾ, ན སམཎབྲཱཧྨཎཱནཾ ཨཏྠཾ ཨནུབྷོཏི, རཀྑསཔརིགྒཧིཏཔོཀྑརཎཱི ཝིཡ ཨཔརིབྷོགཾ ཏིཊྛཏི.

སཏྠཱ ཨེཀདིཝསཾ པཙྩཱུསསམཡེ མཧཱཀརུཎཱསམཱཔཏྟིཏོ ཝུཊྛཱཡ སཀལལོཀདྷཱཏུཡཾ བོདྷནེཡྻབནྡྷཝེ ཨོལོཀེནྟོ པཉྩཙཏྟཱལཱིསཡོཛནམཏྠཀེ ཝསནྟསྶ ཏསྶ སེཊྛིནོ སཔཛཱཔཏིཀསྶ སོཏཱཔཏྟིཕལསྶ ཨུཔནིསྶཡཾ ཨདྡས. ཏཏོ པུརིམདིཝསེ པན རཱཛཱནཾ ཨུཔཊྛཱཏུཾ རཱཛགེཧཾ གནྟྭཱ རཱཛཱུཔཊྛཱནཾ ཀཏྭཱ ཨཱགཙྪནྟོ ཨེཀཾ ཚཱཏཛ྄ཛྷཏྟཾ ཛནཔདམནུསྶཾ ཀུམྨཱསཔཱུརཾ ཀཔལླཔཱུཝཾ ཁཱདནྟཾ དིསྭཱ ཏཏྠ པིཔཱསཾ ཨུཔྤཱདེཏྭཱ ཨཏྟནོ གྷརཾ ¶ གནྟྭཱ ཙིནྟེསི ‘‘སཙཱཧཾ ‘ཀཔལླཔཱུཝཾ ཁཱདིཏུཀཱམོམྷཱི’ཏི ཝཀྑཱམི, བཧཱུ མཡཱ སདྡྷིཾ ཁཱདིཏུཀཱམཱ བྷཝིསྶནྟི, ཨེཝཾ མེ བཧཱུནི ཏཎྜུལསཔྤིམདྷུཕཱཎིཏཱདཱིནི པརིཀྑཡཾ གམིསྶནྟི, ན ཀསྶཙི ཀཐེསྶཱམཱི’’ཏི ¶ ཏཎྷཾ ཨདྷིཝཱསེནྟོ ཝིཙརཏི. སོ གཙྪནྟེ གཙྪནྟེ ཀཱལེ ཨུཔྤཎྜུཔཎྜུཀཛཱཏོ དྷམནིསནྠཏགཏྟོ ཛཱཏོ ¶ . ཏཏོ ཏཎྷཾ ཨདྷིཝཱསེཏུཾ ཨསཀྐོནྟོ གབྦྷཾ པཝིསིཏྭཱ མཉྩཀཾ ཨུཔགཱུཧིཏྭཱ ནིཔཛྫི. ཨེཝཾགཏོཔི དྷནཧཱནིབྷཡེན ཀསྶཙི ཀིཉྩི ན ཀཐེསི.

ཨཐ ནཾ བྷརིཡཱ ཨུཔསངྐམིཏྭཱ པིཊྛིཾ པརིམཛྫིཏྭཱ ‘‘ཀིཾ ཏེ སཱམི, ཨཕཱསུཀ’’ནྟི པུཙྪི. ‘‘ན མེ ཀིཉྩི ཨཕཱསུཀཾ ཨཏྠཱི’’ཏི. ‘‘ཀིཾ ནུ ཁོ ཏེ རཱཛཱ ཀུཔིཏོ’’ཏི? ‘‘རཱཛཱཔི མེ ན ཀུཔྤཏཱི’’ཏི. ‘‘ཨཐ ཀིཾ ཏེ པུཏྟདྷཱིཏཱཧི ཝཱ དཱསཀམྨཀརཱདཱིཧི ཝཱ ཀིཉྩི ཨམནཱཔཾ ཀཏཾ ཨཏྠཱི’’ཏི? ‘‘ཨེཝརཱུཔམྤི ནཏྠཱི’’ཏི. ‘‘ཀིསྨིཉྩི པན ཏེ ཏཎྷཱ ཨཏྠཱི’’ཏི? ཨེཝཾ ཝུཏྟེཔི དྷནཧཱནིབྷཡེན ཀིཉྩི ཨཝཏྭཱ ནིསྶདྡོཝ ནིཔཛྫི. ཨཐ ནཾ བྷརིཡཱ ‘‘ཀཐེཧི, སཱམི, ཀིསྨིཾ ཏེ ཏཎྷཱ’’ཏི ཨཱཧ. སོ ཝཙནཾ པརིགིལནྟོ ཝིཡ ‘‘ཨཏྠི མེ ཨེཀཱ ཏཎྷཱ’’ཏི ཨཱཧ. ‘‘ཀིཾ ཏཎྷཱ, སཱམཱི’’ཏི? ‘‘ཀཔལླཔཱུཝཾ ཁཱདིཏུཀཱམོམྷཱི’’ཏི. ‘‘ཨཐ ཀིམཏྠཾ ན ཀཐེསི, ཀིཾ ཏྭཾ དལིདྡོ, ཨིདཱནི སཀལསཀྐཱརནིགམཝཱསཱིནཾ པཧོནཀེ ཀཔལླཔཱུཝེ པཙིསྶཱམཱི’’ཏི? ‘‘ཀིཾ ཏེ ཨེཏེཧི, ཏེ ཨཏྟནོ ཀམྨཾ ཀཏྭཱ ཁཱདིསྶནྟཱི’’ཏི? ‘‘ཏེན ཧི ཨེཀརཙྪཝཱསཱིནཾ པཧོནཀེ པཙཱམཱི’’ཏི. ཛཱནཱམཧཾ ཏཝ མཧདྡྷནབྷཱཝནྟི. ‘‘ཏེན ཧི ཨིམསྨིཾ གེཧམཏྟེ སབྦེསཾ པཧོནཀཾ ཀཏྭཱ པཙཱམཱི’’ཏི. ‘‘ཛཱནཱམཧཾ ཏཝ མཧཛ྄ཛྷཱསཡབྷཱཝ’’ནྟི. ‘‘ཏེན ཧི ཏེ པུཏྟདཱརམཏྟསྶེཝ པཧོནཀཾ ཀཏྭཱ པཙཱམཱི’’ཏི. ‘‘ཀིཾ པན ཏེ ཨེཏེཧཱི’’ཏི? ‘‘ཏེན ཧི ཏུཡ྄ཧཉྩ མཡ྄ཧཉྩ པཧོནཀཾ ཀཏྭཱ པཙཱམཱི’’ཏི. ‘‘ཏྭཾ ཀིཾ ཀརིསྶསཱི’’ཏི? ‘‘ཏེན ཧི ཨེཀསྶེཝ ཏེ པཧོནཀཾ ཀཏྭཱ པཙཱམཱི’’ཏི. ‘‘ཨིམསྨིཾ ཋཱནེ པཙྩམཱནཾ བཧཱུ པཙྩཱསཱིསནྟི, སཀལཏཎྜུལེ ཋཔེཏྭཱ བྷིནྣཏཎྜུལེ ཙ ཨུདྡྷནཀཔལླཱདཱིནི ཙ ཨཱདཱཡ ཐོཀཾ ཁཱིརསཔྤིམདྷུཕཱཎིཏཉྩ གཧེཏྭཱ སཏྟབྷཱུམིཀསྶ པཱསཱདསྶ ཨུཔརིམཏལཾ ཨཱརུཡ྄ཧ པཙ, ཏཏྠཱཧཾ ཨེཀཀོཝ ནིསཱིདིཏྭཱ ཁཱདིསྶཱམཱི’’ཏི. སཱ ‘‘སཱདྷཱུ’’ཏི པཊིསྶུཎིཏྭཱ གཧེཏབྦཾ གཱཧཱཔེཏྭཱ པཱསཱདཾ ཨཱརུཡ྄ཧ དཱསིཡོ ཝིསྶཛྫེཏྭཱ སེཊྛིཾ པཀྐོསཱཔེསི. སོ ཨཱདིཏོ པཊྛཱཡ དྭཱརཱནི པིདཧནྟོ སབྦདྭཱརེསུ སཱུཙིགྷཊིཀཱནི དཏྭཱ སཏྟམཏལཾ ཨབྷིརུཧིཏྭཱ ཏཏྠཔི དྭཱརཾ པིདཧིཏྭཱ ནིསཱིདི. བྷརིཡཱཔིསྶ ཨུདྡྷནེ ཨགྒིཾ ཛཱལེཏྭཱ ཀཔལླཀཾ ཨཱརོཔེཏྭཱ པཱུཝེ པཙིཏུཾ ཨཱརབྷི.

ཨཐ ¶ སཏྠཱ པཱཏོཝ མཧཱམོགྒལླཱནཏྠེརཾ ཨཱམནྟེསི, ‘‘ཨེསོ, མོགྒལླཱན, རཱཛགཧནགརསྶ ཨཝིདཱུརེ ¶ སཀྐཱརནིགམེ མཙྪརིཡཀོསིཡསེཊྛི ‘ཀཔལླཔཱུཝེ ཁཱདིསྶཱམཱི’ཏི ཨཉྙེསཾ དསྶནབྷཡེན སཏྟབྷཱུམིཀེ པཱསཱདེ ཀཔལླཔཱུཝེ པཙཱཔེཏི. ཏྭཾ ཏཏྠ གནྟྭཱ ཏཾ སེཊྛིཾ དམེཏྭཱ ནིབྦིསེཝནཾ ཀཏྭཱ ཨུབྷོཔི ཛཡམྤཏིཀེ པཱུཝེ ཙ ཁཱིརསཔྤིམདྷུཕཱཎིཏཱདཱིནི ཙ གཱཧཱཔེཏྭཱ ¶ ཨཏྟནོ བལེན ཛེཏཝནཾ ཨཱནེཧི. ཨཛྫཱཧཾ པཉྩཧི བྷིཀྑུསཏེཧི སདྡྷིཾ ཝིཧཱརེཡེཝ ནིསཱིདིསྶཱམི, པཱུཝེཧེཝ བྷཏྟཀིཙྩཾ ཀརིསྶཱམཱི’’ཏི. ཐེརོ ‘‘སཱདྷུ, བྷནྟེ’’ཏི སཏྠུ ཝཙནཾ སམྤཊིཙྪིཏྭཱ ཏཱཝདེཝ ཨིདྡྷིབལེན ཏཾ ནིགམཾ གནྟྭཱ ཏསྶ པཱསཱདསྶ སཱིཧཔཉྫརདྭཱརེ སུནིཝཏྠོ སུཔཱརུཏོ ཨཱཀཱསེཡེཝ མཎིརཱུཔཀཾ ཝིཡ ཨཊྛཱསི.

མཧཱསེཊྛིནོ ཐེརཾ དིསྭཱཝ ཧདཡམཾསཾ ཀམྤི. སོ ‘‘ཨཧཾ ཨེཝརཱུཔཱནཉྙེཝ བྷཡེན ཨིམཾ ཋཱནཾ ཨཱགཏོ, ཨཡཉྩ ཨཱགནྟྭཱ ཝཱཏཔཱནདྭཱརེ ཋིཏོ’’ཏི གཧེཏབྦགཧཎཾ ཨཔསྶནྟོ ཨགྒིམྷི པཀྑིཏྟལོཎསཀྑརཱ ཝིཡ དོསེན ཏཊཏཊཱཡནྟོ ཨེཝམཱཧ ‘‘སམཎ, ཨཱཀཱསེ ཋཏྭཱ ཏྭཾ ཀིཾ ལབྷིསྶསི, ཨཱཀཱསེ ཨཔདེ པདཾ དསྶེཏྭཱ ཙངྐམནྟོཔི ནེཝ ལབྷིསྶསཱི’’ཏི. ཐེརོ ཏསྨིཾཡེཝ ཋཱནེ ཨཔརཱཔརཾ ཙངྐམི. སེཊྛི ‘‘ཙངྐམནྟོ ཀིཾ ལབྷིསྶསི, ཨཱཀཱསེ པལླངྐེན ནིསཱིདམཱནོཔི ན ལབྷིསྶསིཡེཝཱ’’ཏི ཨཱཧ. ཐེརོ པལླངྐཾ ཨཱབྷུཛིཏྭཱ ནིསཱིདི. ཨཐ ནཾ ‘‘ནིསིནྣོ ཀིཾ ལབྷིསྶསི, ཨཱགནྟྭཱ ཝཱཏཔཱནཨུམྨཱརེ ཋིཏོཔི ན ལབྷིསྶསཱི’’ཏི ཨཱཧ. ཨཐ ཐེརོ ཨུམྨཱརེ ཨཊྛཱསི. ཨཐ ནཾ ‘‘ཨུམྨཱརེ ཋིཏོ ཀིཾ ལབྷིསྶསི, དྷཱུམཱཡནྟོཔི ན ལབྷིསྶསིཡེཝཱ’’ཏི ཨཱཧ. ཐེརོ དྷཱུམཱཡི, སཀལཔཱསཱདོ ཨེཀདྷཱུམོ ཨཧོསི, སེཊྛིནོ ཨཀྑཱིནཾ སཱུཙིཡཱ ཝིཛ྄ཛྷནཀཱལོ ཝིཡ ཛཱཏོ. གེཧཛ྄ཛྷཱཡནབྷཡེན པན ནཾ ‘‘པཛྫལནྟོཔི ན ལབྷིསྶསཱི’’ཏི ཨཝཏྭཱ ཙིནྟེསི ‘‘ཨཡཾ སམཎོ སུཊྛུ ལགྒོ, ཨལདྡྷཱ ན གམིསྶཏི, ཨེཀམསྶ པཱུཝཾ དཱཔེསྶཱམཱི’’ཏི བྷརིཡཾ ཨཱཧ – ‘‘བྷདྡེ, ཨེཀཾ ཁུདྡཀཔཱུཝཾ པཙིཏྭཱ སམཎསྶ དཏྭཱ ཨུཡྻོཛེཧི ན’’ནྟི. སཱ ཐོཀཉྙེཝ པིཊྛཾ ཀཔལླཔཱཏིཡཾ པཀྑིཔི, མཧཱཔཱུཝོ ཧུཏྭཱ སཀལཔཱཏིཾ པཱུརེཏྭཱ ཨུདྡྷུམཱཏོ ཨཊྛཱསི.

སེཊྛི ཏཾ དིསྭཱ ‘‘བཧུ ཏཡཱ པིཊྛཾ གཧིཏཾ བྷཝིསྶཏཱི’’ཏི སཡམེཝ དབྦིཀཎྞེན ཐོཀཏརཾ པིཊྛཾ གཧེཏྭཱ པཀྑིཔི, པཱུཝོ པུརིམཔཱུཝཏོ མཧནྟཏརོ ¶ ཛཱཏོ. ཨེཝཾ ཡཾ ཡཾ པཙཏི, སོ སོ མཧནྟམཧནྟོཝ ཧོཏི. སོ ནིབྦིནྣོ བྷརིཡཾ ཨཱཧ ‘‘བྷདྡེ, ཨིམསྶ ཨེཀཾ པཱུཝཾ དེཧཱི’’ཏི. ཏསྶཱ པཙྪིཏོ ཨེཀཾ པཱུཝཾ གཎྷནྟིཡཱ སབྦེ ཨེཀཱབདྡྷཱ ཨལླཱིཡིཾསུ. སཱ སེཊྛིཾ ཨཱཧ ‘‘སཱམི, སབྦེ པཱུཝཱ ཨེཀཏོ ལགྒཱ, ཝིསུཾ ཀཱཏུཾ ན སཀྐོམཱི’’ཏི. ‘‘ཨཧཾ ཀརིསྶཱམཱི’’ཏི སོཔི ཀཱཏུཾ ནཱསཀྑི. ཨུབྷོ ཛནཱ ཀོཊིཡཾ གཧེཏྭཱ ཀཌྜྷནྟཱཔི ཝིཡོཛེཏུཾ ནཱསཀྑིཾསུཡེཝ. ཨཐསྶ པཱུཝེཧི སདྡྷིཾ ཝཱཡམནྟསྶེཝ སརཱིརཏོ སེདཱ མུཙྩིཾསུ, པིཔཱསཱ ཙ པཙྪིཛྫི. ཏཏོ བྷརིཡཾ ཨཱཧ ‘‘བྷདྡེ, ན མེ པཱུཝེཧི ཨཏྠོ ¶ , པཙྪིཡཱ སདྡྷིཾཡེཝ ཨིམསྶ བྷིཀྑུསྶ དེཧཱི’’ཏི. སཱ པཙྪིཾ ཨཱདཱཡ ཐེརཾ ཨུཔསངྐམིཏྭཱ སབྦེ པཱུཝེ ཐེརསྶ ཨདཱསི. ཐེརོ ¶ ཨུབྷིནྣམྤི དྷམྨཾ དེསེསི, ཏིཎྞཾ རཏནཱནཾ གུཎེ ཀཐེསི, ‘‘ཨཏྠི དིནྣཾ, ཨཏྠི ཡིཊྛ’’ནྟི དཱནཱདཱིནཾ ཕལཾ གགནཏལེ པུཎྞཙནྡཾ ཝིཡ དསྶེསི.

ཏཾ སུཏྭཱ པསནྣཙིཏྟོ སེཊྛི ‘‘བྷནྟེ, ཨཱགནྟྭཱ ཨིམསྨིཾ པལླངྐེ ནིསཱིདིཏྭཱ པཱུཝེ པརིབྷུཉྫཐཱ’’ཏི ཨཱཧ. ཐེརོ ‘‘མཧཱསེཊྛི, སམྨཱསམྦུདྡྷོ ‘པཱུཝེ ཁཱདིསྶཱམཱི’ཏི པཉྩཧི བྷིཀྑུསཏེཧི སདྡྷིཾ ཝིཧཱརེ ནིསིནྣོ, ཏུམྷཱཀཾ རུཙིཡཱ སཏི སེཊྛིབྷརིཡཾ པཱུཝེ ཙ ཁཱིརཱདཱིནི ཙ གཎྷཱཔེཐ, སཏྠུ སནྟིཀཾ གམིསྶཱམཱ’’ཏི ཨཱཧ. ‘‘ཀཧཾ པན, བྷནྟེ, ཨེཏརཧི སཏྠཱ’’ཏི? ‘‘ཨིཏོ པཉྩཙཏྟཱལཱིསཡོཛནམཏྠཀེ ཛེཏཝནམཧཱཝིཧཱརེ’’ཏི. ‘‘བྷནྟེ, ཀཱལཾ ཨནཏིཀྐམིཏྭཱ ཨེཏྟཀཾ ཨདྡྷཱནཾ ཀཐཾ གམིསྶཱམཱ’’ཏི? ‘‘མཧཱསེཊྛི ཏུམྷཱཀཾ རུཙིཡཱ སཏི ཨཧཾ ཝོ ཨཏྟནོ ཨིདྡྷིབལེན ནེསྶཱམི, ཏུམྷཱཀཾ པཱསཱདེ སོཔཱནསཱིསཾ ཨཏྟནོ ཋཱནེཡེཝ བྷཝིསྶཏི, སོཔཱནཔརིཡོསཱནཾ པན ཛེཏཝནདྭཱརཀོཊྛཀེ བྷཝིསྶཏི, ཨུཔརིཔཱསཱདཱ ཧེཊྛཱཔཱསཱདཾ ཨོཏརཎཀཱལམཏྟེན ཝོ ཛེཏཝནཾ ནེསྶཱམཱི’’ཏི. སོ ‘‘སཱདྷུ, བྷནྟེ’’ཏི སམྤཊིཙྪི. ཐེརོ སོཔཱནསཱིསཾ ཏཏྠེཝ ཀཏྭཱ ‘‘སོཔཱནཔཱདམཱུལཾ ཛེཏཝནདྭཱརཀོཊྛཀེ ཧོཏཱུ’’ཏི ཨདྷིཊྛཱསི, ཏཐེཝཱཧོསི.

ཨིཏི ཐེརོ སེཊྛིཉྩ སེཊྛིབྷརིཡཉྩ ཨུཔརིཔཱསཱདཱ ཧེཊྛཱཨོཏརཎཀཱལཏོ ཁིཔྤཏརཾ ཛེཏཝནཾ སམྤཱཔེསི. ཏེ ཨུབྷོཔི སཏྠཱརཾ ཨུཔསངྐམིཏྭཱ ཝནྡིཏྭཱ ཀཱལཾ ཨཱརོཙེསུཾ. སཏྠཱ བྷཏྟགྒཾ པཝིསིཏྭཱ པཉྙཏྟཝརབུདྡྷཱསནེ ནིསཱིདི སདྡྷིཾ བྷིཀྑུསངྒྷེན. མཧཱསེཊྛི བུདྡྷཔྤམུཁསྶ བྷིཀྑུསངྒྷསྶ ¶ དཀྑིཎོདཀཾ ཨདཱསི, སེཊྛིབྷརིཡཱ ཏཐཱགཏསྶ པཏྟེ པཱུཝེ པཏིཊྛཱཔེསི. སཏྠཱ ཨཏྟནོ ཡཱཔནམཏྟཾ གཎྷི, པཉྩསཏཱ བྷིཀྑཱུཔི ཏཐེཝ གཎྷིཾསུ. སེཊྛི ཁཱིརསཔྤིམདྷུཕཱཎིཏསཀྑརཱདཱིནི དདམཱནོ ཨགམཱསི. སཏྠཱ པཉྩཧི བྷིཀྑུསཏེཧི སདྡྷིཾ བྷཏྟཀིཙྩཾ ནིཊྛཱཔེསི. མཧཱསེཊྛིཔི སདྡྷིཾ བྷརིཡཱཡ ཡཱཝདཏྠཾ ཁཱདི, པཱུཝཱནཾ པརིཡོསཱནམེཝ ན པཉྙཱཡཏི, སཀལཝིཧཱརེ བྷིཀྑཱུནཉྩ ཝིགྷཱསཱདཱནཉྩ དིནྣེཔི ན པརིཡནྟོ པཉྙཱཡཏི. ‘‘བྷནྟེ, པཱུཝཱ པརིཀྑཡཾ ན གཙྪནྟཱི’’ཏི བྷགཝཏོ ཨཱརོཙེསུཾ. ཏེན ཧི ཛེཏཝནདྭཱརཀོཊྛཀེ ཚཌྜེཐཱཏི. ཨཐ ནེ དྭཱརཀོཊྛཀསྶ ཨཝིདཱུརེ པབྦྷཱརཊྛཱནེ ཚཌྜཡིཾསུ. ཨཛྫཏནཱཔི ཏཾ ཋཱནཾ ‘‘ཀཔལླཔཱུཝཔབྦྷཱརོ’’ཏྭེཝ པཉྙཱཡཏི. མཧཱསེཊྛི སདྡྷིཾ བྷརིཡཱཡ བྷགཝནྟཾ ཨུཔསངྐམིཏྭཱ ཨེཀམནྟཾ ཨཊྛཱསི. བྷགཝཱ ཨནུམོདནཾ ཨཀཱསི. ཨནུམོདནཱཔརིཡོསཱནེ ཨུབྷོཔི སོཏཱཔཏྟིཕལེ པཏིཊྛཱཡ སཏྠཱརཾ ཝནྡིཏྭཱ དྭཱརཀོཊྛཀེ སོཔཱནཾ ཨཱརུཡ྄ཧ ཨཏྟནོ པཱསཱདེཡེཝ པཏིཊྛཧིཾསུ ¶ . ཏཏོ པཊྛཱཡ མཧཱསེཊྛི ཨསཱིཏིཀོཊིདྷནཾ བུདྡྷསཱསནེཡེཝ ཝིཀིརི.

པུནདིཝསེ ¶ སམྨཱསམྦུདྡྷེ སཱཝཏྠིཡཾ པིཎྜཱཡ ཙརིཏྭཱ ཛེཏཝནཾ ཨཱགམྨ བྷིཀྑཱུནཾ སུགཏོཝཱདཾ དཏྭཱ གནྡྷཀུཊིཾ པཝིསིཏྭཱ པཊིསལླཱིནེ སཱཡནྷསམཡེ དྷམྨསབྷཱཡཾ སནྣིཔཏིཏཱ བྷིཀྑཱུ ‘‘པསྶཐཱཝུསོ, མཧཱམོགྒལླཱནཏྠེརསྶཱནུབྷཱཝཾ, ཨནུཔཧཙྩ སདྡྷཾ ཨནུཔཧཙྩ བྷོགེ མཙྪརིཡསེཊྛིཾ མུཧུཏྟེནེཝ དམེཏྭཱ ནིབྦིསེཝནཾ ཀཏྭཱ པཱུཝེ གཱཧཱཔེཏྭཱ ཛེཏཝནཾ ཨཱནེཏྭཱ སཏྠུ སམྨུཁཾ ཀཏྭཱ སོཏཱཔཏྟིཕལེ པཏིཊྛཱཔེསི, ཨཧོ མཧཱནུབྷཱཝོ ཐེརོ’’ཏི ཐེརསྶ གུཎཀཐཾ ཀཐེནྟཱ ནིསཱིདིཾསུ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘བྷིཀྑཝེ, ཀུལདམཀེན ནཱམ བྷིཀྑུནཱ ཀུལེ ཨཝིཧེཋེཏྭཱ ཨཀིལམེཏྭཱ པུཔྥཏོ རེཎུཾ གཎྷནྟེན བྷམརེན ཝིཡ ཨུཔསངྐམིཏྭཱ བུདྡྷགུཎེ ཛཱནཱཔེཏབྦ’’ནྟི ཝཏྭཱ ཐེརཾ པསཾསནྟོ –

‘‘ཡཐཱཔི བྷམརོ པུཔྥཾ, ཝཎྞགནྡྷམཧེཋཡཾ;

པལེཏི རསམཱདཱཡ, ཨེཝཾ གཱམེ མུནཱི ཙརེ’’ཏི. (དྷ. པ. ༤༩) –

ཨིམཾ ¶ དྷམྨཔདེ གཱཐཾ ཝཏྭཱ ཨུཏྟརིཔི ཐེརསྶ གུཎཾ པཀཱསེཏུཾ ‘‘ན བྷིཀྑཝེ, ཨིདཱནེཝ མོགྒལླཱནེན མཙྪརིཡསེཊྛི དམིཏོ, པུབྦེཔི ཏཾ དམེཏྭཱ ཀམྨཕལསམྦནྡྷཾ ཛཱནཱཔེསིཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བཱརཱཎསིཡཾ ཨིལླིསོ ནཱམ སེཊྛི ཨཧོསི ཨསཱིཏིཀོཊིཝིབྷཝོ པུརིསདོསསམནྣཱགཏོ ཁཉྫོ ཀུཎཱི ཝིསམཀྑིམཎྜལོ ཨསྶདྡྷོ ཨཔྤསནྣོ མཙྪརཱི, ནེཝ ཨཉྙེསཾ དེཏི, ན སཡཾ པརིབྷུཉྫཏི. རཀྑསཔརིགྒཧིཏཔོཀྑརཎཱི ཝིཡསྶ གེཧཾ ཨཧོསི. མཱཏཱཔིཏརོ པནསྶ ཡཱཝ སཏྟམཱ ཀུལཔརིཝཊྚཱ དཱཡཀཱ དཱནཔཏིནོ. སོ སེཊྛིཊྛཱནཾ ལབྷིཏྭཱཡེཝ ཀུལཝཾསཾ ནཱསེཏྭཱ དཱནསཱལཾ ཛྷཱཔེཏྭཱ ཡཱཙཀེ པོཐེཏྭཱ ནིཀྐཌྜྷིཏྭཱ དྷནམེཝ སཎྛཱཔེསི.

སོ ཨེཀདིཝསཾ རཱཛཱུཔཊྛཱནཾ གནྟྭཱ ཨཏྟནོ གྷརཾ ཨཱགཙྪནྟོ ཨེཀཾ མགྒཀིལནྟཾ ཛཱནཔདམནུསྶཾ, ཨེཀཾ སུརཱཝཱརཀཾ, ཨཱདཱཡ པཱིཋཀེ ནིསཱིདིཏྭཱ ཨམྦིལསུརཱཡ ཀོསཀཾ པཱུརེཏྭཱ པཱུརེཏྭཱ པཱུཏིམཙྪཀེན ཨུཏྟརིབྷངྒེན པིཝནྟཾ དིསྭཱ སུརཾ པཱཏུཀཱམོ ¶ ཧུཏྭཱ ཙིནྟེསི ‘‘སཙཱཧཾ སུརཾ པིཝིསྶཱམི, མཡི པིཝནྟེ བཧཱུ པིཝིཏུཀཱམཱ བྷཝིསྶནྟི, ཨེཝཾ མེ དྷནཔརིཀྑཡོ བྷཝིསྶཏཱི’’ཏི. སོ ཏཎྷཾ ཨདྷིཝཱསེནྟོ ཝིཙརིཏྭཱ གཙྪནྟེ གཙྪནྟེ ཀཱལེ ཨདྷིཝཱསེཏུཾ ཨསཀྐོནྟོ ཝིཧཏཀཔྤཱསོ ཝིཡ པཎྜུསརཱིརོ ཨཧོསི དྷམྨནིསནྠཏགཏྟོ ཛཱཏོ. ཨཐེཀདིཝསཾ གབྦྷཾ ¶ པཝིསིཏྭཱ མཉྩཀཾ ཨུཔགཱུཧིཏྭཱ ནིཔཛྫི. ཏམེནཾ བྷརིཡཱ ཨུཔསངྐམིཏྭཱ པིཊྛིཾ པརིམཛྫིཏྭཱ ‘‘ཀིཾ ཏེ, སཱམི, ཨཕཱསུཀ’’ནྟི པུཙྪི. སབྦཾ ཧེཊྛཱ ཀཐིཏནིཡཱམེནེཝ ཝེདིཏབྦཾ. ‘‘ཏེན ཧི ཨེཀསྶེཝ ཏེ པཧོནཀཾ སུརཾ ཀརོམཱི’’ཏི པན ཝུཏྟེ ‘‘གེཧེ སུརཱཡ ཀཱརིཡམཱནཱཡ བཧཱུ པཙྩཱསཱིསནྟི, ཨནྟརཱཔཎཏོ ཨཱཧརཱཔེཏྭཱཔི ན སཀྐཱ ཨིདྷ ནིསིནྣེན པིཝིཏུ’’ནྟི མཱསཀམཏྟཾ དཏྭཱ ཨནྟརཱཔཎཏོ སུརཱཝཱརཀཾ ཨཱཧརཱཔེཏྭཱ ཙེཊཀེན གཱཧཱཔེཏྭཱ ནགརཱ ནིཀྑམྨ ནདཱིཏཱིརཾ གནྟྭཱ མཧཱམགྒསམཱིཔེ ཨེཀཾ གུམྦཾ པཝིསིཏྭཱ སུརཱཝཱརཀཾ ཋཔཱཔེཏྭཱ ‘‘གཙྪ ཏྭ’’ནྟི ཙེཊཀཾ དཱུརེ ནིསཱིདཱཔེཏྭཱ ཀོསཀཾ པཱུརེཏྭཱ སུརཾ པཱཏུཾ ཨཱརབྷི.

པིཏཱ ¶ པནསྶ དཱནཱདཱིནཾ པུཉྙཱནཾ ཀཏཏྟཱ དེཝལོཀེ སཀྐོ ཧུཏྭཱ ནིབྦཏྟི. སོ ཏསྨིཾ ཁཎེ ‘‘པཝཏྟཏི ནུ ཁོ མེ དཱནགྒཾ, ཨུདཱཧུ ནོ’’ཏི ཨཱཝཛྫེནྟོ ཏསྶ ཨཔྤཝཏྟིཾ ཉཏྭཱ, པུཏྟསྶ ཀུལཝཾསཾ ནཱསེཏྭཱ དཱནསཱལཾ ཛྷཱཔེཏྭཱ ཡཱཙཀེ ནིཀྐཌྜྷིཏྭཱ མཙྪརིཡབྷཱཝེ པཏིཊྛཱཡ ‘‘ཨཉྙེསཾ དཱཏབྦཾ བྷཝིསྶཏཱི’’ཏི བྷཡེན གུམྦཾ པཝིསིཏྭཱ ཨེཀཀསྶེཝ སུརཾ པིཝནབྷཱཝཉྩ དིསྭཱ ‘‘གཙྪཱམི, ནཾ སངྑོབྷེཏྭཱ དམེཏྭཱ ཀམྨཕལསམྦནྡྷཾ ཛཱནཱཔེཏྭཱ དཱནཾ དཱཔེཏྭཱ དེཝལོཀེ ནིབྦཏྟནཱརཧཾ ཀརོམཱི’’ཏི མནུསྶཔཐཾ ཨོཏརིཏྭཱ ཨིལླིསསེཊྛིནཱ སདིསཾ ཁཉྫཾ ཀུཎིཾ ཝིསམཙཀྑུམཎྜལཾ ཨཏྟབྷཱཝཾ ནིམྨིནིཏྭཱ བཱརཱཎསིནགརཾ པཝིསིཏྭཱ རཉྙོ ནིཝེསནདྭཱརེ ཋཏྭཱ ཨཏྟནོ ཨཱགཏབྷཱཝཾ ཨཱརོཙཱཔེཏྭཱ ‘‘པཝིསཏཱུ’’ཏི ཝུཏྟེ པཝིསིཏྭཱ རཱཛཱནཾ ཝནྡིཏྭཱ ཨཊྛཱསི. རཱཛཱ ‘‘ཀིཾ, མཧཱསེཊྛི, ཨཝེལཱཡ ཨཱགཏོསཱི’’ཏི ཨཱཧ. ‘‘ཨཱམ, ཨཱགཏོམྷི, དེཝ གྷརེ མེ ཨསཱིཏིཀོཊིམཏྟཾ དྷནཾ ཨཏྠི, ཏཾ དེཝོ ཨཱཧརཱཔེཏྭཱ ཨཏྟནོ བྷཎྜཱགཱརཾ པཱུརཱཔེཏཱུ’’ཏི. ‘‘ཨལཾ མཧཱསེཊྛི, ཏཝ དྷནཏོ ¶ ཨམྷཱཀཾ གེཧེ བཧུཏརཾ དྷན’’ནྟི. ‘‘སཙེ, དེཝ, ཏུམྷཱཀཾ ཀམྨཾ ནཏྠི, ཡཐཱརུཙིཡཱ དྷནཾ གཧེཏྭཱ དཱནཾ དམྨཱི’’ཏི. ‘‘དེཧི, མཧཱསེཊྛཱི’’ཏི. སོ ‘‘སཱདྷུ, དེཝཱ’’ཏི རཱཛཱནཾ ཝནྡིཏྭཱ ནིཀྑམིཏྭཱ ཨིལླིསསེཊྛིནོ གེཧཾ ཨགམཱསི, སབྦེ ཨུཔཊྛཱཀམནུསྶཱ པརིཝཱརེསུཾ, ཨེཀོཔི ‘‘ནཱཡཾ, ཨིལླིསོ’’ཏི ཛཱནིཏུཾ སམཏྠོ ནཱམ ནཏྠི.

སོ གེཧཾ པཝིསིཏྭཱ ཨནྟོཨུམྨཱརེ ཋཏྭཱ དོཝཱརིཀཾ པཀྐོསཱཔེཏྭཱ ‘‘ཡོ ཨཉྙོ མཡཱ སམཱནརཱུཔོ ཨཱགནྟྭཱ ‘མམེཏཾ གེཧ’ནྟི པཝིསིཏུཾ ཨཱགཙྪཏི, ཏཾ པིཊྛིཡཾ པཧརིཏྭཱ ནཱིཧརེཡྻཱཐཱ’’ཏི ཝཏྭཱ པཱསཱདཾ ཨཱརུཡ྄ཧ མཧཱརཧེ ཨཱསནེ ནིསཱིདིཏྭཱ སེཊྛིབྷརིཡཾ པཀྐོསཱཔེཏྭཱ སིཏཱཀཱརཾ དསྶེཏྭཱ ‘‘བྷདྡེ, དཱནཾ དེམཱ’’ཏི ཨཱཧ. ཏསྶ ཏཾ ཝཙནཾ སུཏྭཱཝ སེཊྛིབྷརིཡཱ ཙ པུཏྟདྷཱིཏརོ ཙ དཱསཀམྨཀརཱ ཙ ‘‘ཨེཏྟཀཾ ཀཱལཾ དཱནཾ དཱཏུཾ ཙིཏྟམེཝ ནཏྠི, ཨཛྫ པན སུརཾ པིཝིཏྭཱ མུདུཙིཏྟོ ཧུཏྭཱ དཱཏུཀཱམོ ཛཱཏོ བྷཝིསྶཏཱི’’ཏི ཝདིཾསུ. ཨཐ ནཾ སེཊྛིབྷརིཡཱ ‘‘ཡཐཱརུཙིཡཱ ¶ དེཐ, སཱམཱི’’ཏི ཨཱཧ. ཏེན ཧི བྷེརིཝཱདཀཾ པཀྐོསཱཔེཏྭཱ ‘‘‘སུཝཎྞརཛཏམཎིམུཏྟཱདཱིཧི ཨཏྠིཀཱ ཨིལླིསསེཊྛིསྶ གྷརཾ གཙྪནྟཱུ’ནྟི སཀལནགརེ བྷེརིཾ ཙརཱཔེཧཱི’’ཏི. སཱ ཙ ཏཐཱ ཀཱརེསི. མཧཱཛནོ པཙྪིཔསིབྦཀཱདཱིནི གཧེཏྭཱ གེཧདྭཱརེ སནྣིཔཏི. སཀྐོ སཏྟརཏནཔཱུརེ ¶ གབྦྷེ ཝིཝརཱཔེཏྭཱ ‘‘ཏུམྷཱཀཾ དམྨི, ཡཱཝདིཙྪཀཾ གཧེཏྭཱ གཙྪཐཱ’’ཏི ཨཱཧ. མཧཱཛནོ དྷནཾ ནཱིཧརིཏྭཱ མཧཱཏལེ རཱསིཾ ཀཏྭཱ ཨཱབྷཏབྷཱཛནཱནི པཱུརེཏྭཱ གཙྪཏི.

ཨཉྙཏརོ ཛནཔདམནུསྶོ ཨིལླིསསེཊྛིནོ གོཎེ ཏསྶེཝ རཐེ ཡོཛེཏྭཱ སཏྟཧི རཏནེཧི པཱུརེཏྭཱ ནགརཱ ནིཀྑམྨ མཧཱམགྒཾ པཊིཔཛྫིཏྭཱ ཏསྶ གུམྦསྶ ཨཝིདཱུརེན རཐཾ པེསེནྟོ ‘‘ཝསྶསཏཾ ཛཱིཝ, སཱམི, ཨིལླིསསེཊྛི, ཏཾ ནིསྶཱཡ ཨིདཱནི མེ ཡཱཝཛཱིཝཾ ཀམྨཾ ཨཀཏྭཱ ཛཱིཝིཏབྦཾ ཛཱཏཾ, ཏཝེཝ རཐོ, ཏཝེཝ གོཎཱ, ཏཝེཝ གེཧེ སཏྟ རཏནཱནི, ནེཝ མཱཏརཱ དིནྣཱནི, ན པིཏརཱ, ཏཾ ནིསྶཱཡ ལདྡྷཱནི, སཱམཱི’’ཏི སེཊྛིནོ གུཎཀཐཾ ཀཐེནྟོ གཙྪཏི. སོ ཏཾ སདྡཾ སུཏྭཱ བྷཱིཏཏསིཏོ ཙིནྟེསི ‘‘ཨཡཾ མམ ནཱམཾ གཧེཏྭཱ ¶ ཨིདཉྩིདཉྩ ཝདཏི, ཀཙྩི ནུ ཁོ མམ དྷནཾ རཉྙཱ ལོཀསྶ དིནྣ’’ནྟི གུམྦཱ ནིཀྑམིཏྭཱ གོཎེ ཙ རཐཉྩ སཉྫཱནིཏྭཱ ‘‘ཨརེ, ཙེཊཀ, མཡ྄ཧཾ གོཎཱ, མཡ྄ཧཾ རཐོ’’ཏི ཝཏྭཱ གནྟྭཱ གོཎེ ནཱསཱརཛྫུཡཾ གཎྷི, གཧཔཏིཀོ རཐཱ ཨོརུཡ྄ཧ ‘‘ཨརེ, དུཊྛཙེཊཀ, ཨིལླིསམཧཱསེཊྛི སཀལནགརསྶ དཱནཾ དེཏི, ཏྭཾ ཀིཾ ཨཧོསཱི’’ཏི པཀྑནྡིཏྭཱ ཨསནིཾ པཱཏེནྟོ ཝིཡ ཁནྡྷེ པཧརིཏྭཱ རཐཾ ཨཱདཱཡ ཨགམཱསི. སོ པུན ཀམྤམཱནོ ཨུཊྛཱཡ པཾསུཾ པུཉྪིཏྭཱ པུཉྪིཏྭཱ ཝེགེན གནྟྭཱ རཐཾ གཎྷི, གཧཔཏིཀོ རཐཱ ཨོཏརིཏྭཱ ཀེསེསུ གཧེཏྭཱ ཨོཎཱམེཏྭཱ ཀཔྤརཔཧཱརེཧི ཀོཊྚེཏྭཱ གལེ གཧེཏྭཱ ཨཱགཏམགྒཱབྷིམུཁཾ ཁིཔིཏྭཱ པཀྐཱམི. ཨེཏྟཱཝཏཱསྶ སུརཱམདོ ཚིཛྫི. སོ ཀམྤམཱནོ ཝེགེན ནིཝེསནདྭཱརཾ གནྟྭཱ དྷནཾ ཨཱདཱཡ གཙྪནྟེ མཧཱཛནེ དིསྭཱ ‘‘ཨམྦྷོ ཀིཾ ནཱམེཏཾ, ཀིཾ རཱཛཱ མམ དྷནཾ ཝིལུམྤཱཔེཏཱི’’ཏི ཏཾ ཏཾ གནྟྭཱ གཎྷཱཏི, གཧིཏགཧིཏཱ པཧརིཏྭཱ པཱདམཱུལེཡེཝ པཱཏེནྟི. སོ ཝེདནཱཔྤཏྟོ གེཧཾ པཝིསིཏུཾ ཨཱརབྷི. དྭཱརཔཱལཱ ‘‘ཨརེ, དུཊྛགཧཔཏི, ཀཧཾ པཝིསསཱི’’ཏི ཝཾསཔེསིཀཱཧི པོཐེཏྭཱ གཱིཝཱཡཾ གཧེཏྭཱ ནཱིཧརིཾསུ.

སོ ‘‘ཋཔེཏྭཱ ཨིདཱནི རཱཛཱནཾ ནཏྠི མེ ཨཉྙོ ཀོཙི པཊིསརཎོ’’ཏི རཉྙོ སནྟིཀཾ གནྟྭཱ ‘‘དེཝ, མམ གེཧཾ ཏུམྷེ ཝིལུམྤཱཔེཐཱ’’ཏི ཨཱཧ. ནཱཧཾ སེཊྛི ཝིལུམྤཱཔེམི, ནནུ ཏྭམེཝ ཨཱགནྟྭཱ ‘‘སཙེ ཏུམྷེ ན གཎྷཐ, ཨཧཾ མམ དྷནཾ དཱནཾ དསྶཱམཱི’’ཏི ནགརེ བྷེརིཾ ཙརཱཔེཏྭཱ དཱནཾ ཨདཱསཱིཏི. ནཱཧཾ ¶ , དེཝ, ཏུམྷཱཀཾ སནྟིཀཾ ཨཱགཙྪཱམི, ཀིཾ ཏུམྷེ མཡ྄ཧཾ མཙྪརིཡབྷཱཝཾ ན ཛཱནཱཐ, ཨཧཾ ཏིཎགྒེན ཏེལབིནྡུམྤི ན ཀསྶཙི དེམི. ཡོ དཱནཾ དེཏི, ཏཾ པཀྐོསཱཔེཏྭཱ ¶ ཝཱིམཾསཐ, དེཝཱཏི. རཱཛཱ སཀྐཾ པཀྐོསཱཔེསི, དྭིནྣཾ ཛནཱནཾ ཝིསེསཾ ནེཝ རཱཛཱ ཛཱནཱཏི, ན ཨམཙྩཱ. མཙྪརིཡསེཊྛི ‘‘ཀིཾ, དེཝ, ཨཡཾ སེཊྛི, ཨཧཾ སེཊྛཱི’’ཏི ཨཱཧ. ‘‘མཡཾ ན སཉྫཱནཱམ, ཨཏྠི ཏེ ཀོཙི སཉྫཱནནཀོ’’ཏི? ‘‘བྷརིཡཱ མེ, དེཝཱ’’ཏི. བྷརིཡཾ པཀྐོསཱཔེཏྭཱ ‘‘ཀཏརོ ཏེ སཱམིཀོ’’ཏི པུཙྪིཾསུ. སཱ ‘‘ཨཡ’’ནྟི སཀྐསྶེཝ སནྟིཀེ ཨཊྛཱསི. པུཏྟདྷཱིཏརོ དཱསཀམྨཀརེ ¶ ཙ པཀྐོསཱཔེཏྭཱ པུཙྪིཾསུ, སབྦེཔི སཀྐསྶེཝ སནྟིཀེ ཏིཊྛནྟི.

པུན སེཊྛི ཙིནྟེསི ‘‘མཡ྄ཧཾ སཱིསེ པིལ༹ཀཱ ཨཏྠི, ཀེསེཧི པཊིཙྪནྣཱ, ཏཾ ཁོ པན ཀཔྤཀོ ཨེཝ ཛཱནཱཏི, ཏཾ པཀྐོསཱཔེསྶཱམཱི’’ཏི. སོ ‘‘ཀཔྤཀོ མཾ, དེཝ, སཉྫཱནཱཏི, ཏཾ པཀྐོསཱཔེཐཱ’’ཏི ཨཱཧ. ཏསྨིཾ པན ཀཱལེ བོདྷིསཏྟོ ཏསྶ ཀཔྤཀོ ཨཧོསི. རཱཛཱ ཏཾ པཀྐོསཱཔེཏྭཱ ‘‘ཨིལླིསསེཊྛིཾ ཛཱནཱསཱི’’ཏི པུཙྪི. ‘‘སཱིསཾ ཨོལོཀེཏྭཱ ཛཱནིསྶཱམི, དེཝཱ’’ཏི. ‘‘ཏེན ཧི དྭིནྣམྤི སཱིསཾ ཨོལོཀེཧཱི’’ཏི. ཏསྨིཾ ཁཎེ སཀྐོ སཱིསེ པིལ༹ཀཾ མཱཔེསི. བོདྷིསཏྟོ དྭིནྣམྤི སཱིསཾ ཨོལོཀེནྟོ པིལ༹ཀཱ དིསྭཱ ‘‘མཧཱརཱཛ, དྭིནྣམྤི སཱིསེ པིལ༹ཀཱ ཨཏྠེཝ, ནཱཧཾ ཨེཏེསུ ཨེཀསྶཱཔི ཨིལླིསབྷཱཝཾ སཉྫཱནིཏུཾ སཀྐོམཱི’’ཏི ཝཏྭཱ ཨིམཾ གཱཐམཱཧ –

༧༨.

‘‘ཨུབྷོ ཁཉྫཱ ཨུབྷོ ཀུཎཱི, ཨུབྷོ ཝིསམཙཀྑུཀཱ;

ཨུབྷིནྣཾ པིལ༹ཀཱ ཛཱཏཱ, ནཱཧཾ པསྶཱམི ཨིལླིས’’ནྟི.

ཏཏྠ ཨུབྷོཏི དྭེཔི ཛནཱ. ཁཉྫཱཏི ཀུཎྛཔཱདཱ. ཀུཎཱིཏི ཀུཎྛཧཏྠཱ. ཝིསམཙཀྑུཀཱཏི ཝིསམཀྑིམཎྜལཱ ཀེཀརཱ. པིལ༹ཀཱཏི དྭིནྣམྤི ཨེཀསྨིཾཡེཝ སཱིསཔདེསེ ཨེཀསཎྛཱནཱཝ པིལ༹ཀཱ ཛཱཏཱ. ནཱཧཾ པསྶཱམཱིཏི ཨཧཾ ‘‘ཨིམེསུ ཨཡཾ ནཱམ ཨིལླིསོ’’ཏི ན པསྶཱམི, ཨེཀསྶཱཔི ཨིལླིསབྷཱཝཾ ན ཛཱནཱམཱིཏི ཨཝོཙ.

བོདྷིསཏྟསྶ ཝཙནཾ སུཏྭཱ སེཊྛི ཀམྤམཱནོ དྷནསོཀེན སཏིཾ པཙྩུཔཊྛཱཔེཏུཾ ཨསཀྐོནྟོ ཏཏྠེཝ པཏི. ཏསྨིཾ ཁཎེ སཀྐོ ‘‘ནཱཧཾ, མཧཱརཱཛ ¶ , ཨིལླིསོ, སཀྐོཧམསྨཱི’’ཏི མཧཏིཡཱ སཀྐལཱིལཱཡ ཨཱཀཱསེ ཨཊྛཱསི. ཨིལླིསསྶ མུཁཾ པུཉྪིཏྭཱ ཨུདཀེན སིཉྩིཾསུ, སོ ཨུཊྛཱཡ སཀྐཾ དེཝརཱཛཱནཾ ཝནྡིཏྭཱ ཨཊྛཱསི. ཨཐ ནཾ སཀྐོ ཨཱཧ ‘‘ཨིལླིས, ཨིདཾ དྷནཾ མམ སནྟཀཾ, ན ཏཝ. ཨཧཉྷི ཏེ པིཏཱ, ཏྭཾ མམ པུཏྟོ. ཨཧཾ དཱནཱདཱིནི པུཉྙཱནི ཀཏྭཱ སཀྐཏྟཾ པཏྟོ, ཏྭཾ པན མེ ཝཾསཾ ཨུཔཙྪིནྡིཏྭཱ ཨདཱནསཱིལོ ཧུཏྭཱ མཙྪརིཡེ པཏིཊྛཱཡ དཱནསཱལཱཡོ ཛྷཱཔེཏྭཱ ཡཱཙཀེ ནིཀྐཌྜྷིཏྭཱ དྷནམེཝ སཎྛཱཔེསི. ཏཾ ནེཝ ཏྭཾ པརིབྷུཉྫསི, ན ¶ ཨཉྙེསཾ དེསི, རཀྑསཔརིགྒཧིཏཾ ཝིཡ ¶ ཏིཊྛཏི. སཙེ མེ དཱནསཱལཱ པཱཀཏིཀཱ ཀཏྭཱ དཱནཾ དསྶསི, ཨིཙྩེཏཾ ཀུསལཾ. ནོ ཙེ དསྶསི, སབྦཾ ཏེ དྷནཾ ཨནྟརདྷཱཔེཏྭཱ ཨིམིནཱ ཨིནྡཝཛིརེན ཏེ སཱིསཾ ཚིནྡིཏྭཱ ཛཱིཝིཏཀྑཡཾ པཱཔེསྶཱམཱི’’ཏི. ཨིལླིསསེཊྛི མརཎབྷཡེན སནྟཛྫིཏོ ‘‘ཨིཏོ པཊྛཱཡ དཱནཾ དསྶཱམཱི’’ཏི པཊིཉྙཾ ཨདཱསི. སཀྐོ ཏསྶ པཊིཉྙཾ གཧེཏྭཱ ཨཱཀཱསེ ནིསིནྣོཝ དྷམྨཾ དེསེཏྭཱ ཏཾ སཱིལེསུ པཏིཊྛཱཔེཏྭཱ སཀཊྛཱནམེཝ ཨགམཱསི. ཨིལླིསོཔི དཱནཱདཱིནི པུཉྙཱནི ཀཏྭཱ སགྒཔརཱཡཎོ ཨཧོསི.

སཏྠཱ ‘‘ན, བྷིཀྑཝེ, ཨིདཱནེཝ མོགྒལླཱནོ མཙྪརིཡསེཊྛིཾ དམེཏི, པུབྦེཔེས ཨིམིནཱ དམིཏོཡེཝཱ’’ཏི ཝཏྭཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཨིལླིསོ མཙྪརིཡསེཊྛི ཨཧོསི, སཀྐོ དེཝརཱཛཱ མཧཱམོགྒལླཱནོ, རཱཛཱ ཨཱནནྡོ, ཀཔྤཀོ པན ཨཧམེཝ ཨཧོསི’’ནྟི.

ཨིལླིསཛཱཏཀཝཎྞནཱ ཨཊྛམཱ.

[༧༩] ༩. ཁརསྶརཛཱཏཀཝཎྞནཱ

ཡཏོ ཝིལུཏྟཱ ཙ ཧཏཱ ཙ གཱཝོཏི ཨིདཾ སཏྠཱ ཛེཏཝནེ ཝིཧརནྟོ ཨཉྙཏརཾ ཨམཙྩཾ ཨཱརབྦྷ ཀཐེསི. ཀོསལརཉྙོ ཀིར ཨེཀོ ཨམཙྩོ རཱཛཱནཾ ཨཱརཱདྷེཏྭཱ པཙྩནྟགཱམེ རཱཛབལིཾ ལབྷིཏྭཱ ཙོརེཧི སདྡྷིཾ ཨེཀཏོ ཧུཏྭཱ ‘‘ཨཧཾ མནུསྶེ ཨཱདཱཡ ཨརཉྙཾ པཝིསིསྶཱམི, ཏུམྷེ གཱམཾ ཝིལུམྤིཏྭཱ ཨུཔཌྜྷཾ མཡ྄ཧཾ དདེཡྻཱཐཱ’’ཏི ཝཏྭཱ པགེཝ མནུསྶེ སནྣིཔཱཏེཏྭཱ ཨརཉྙཾ གནྟྭཱ ཙོརེསུ ཨཱགནྟྭཱ གཱཝིཡོ གྷཱཏེཏྭཱ ¶ མཾསཾ ཁཱདིཏྭཱ གཱམཾ ཝིལུམྤིཏྭཱ གཏེསུ སཱཡནྷསམཡེ མཧཱཛནཔརིཝུཏོ ཨཱགཙྪཏི. ཏསྶ ན ཙིརསྶེཝ ཏཾ ཀམྨཾ པཱཀཊཾ ཛཱཏཾ. མནུསྶཱ རཉྙོ ཨཱརོཙེསུཾ. རཱཛཱ ཏཾ པཀྐོསཱཔེཏྭཱ དོསཾ པཏིཊྛཱཔེཏྭཱ སུནིགྒཧིཏཾ ནིགྒཧེཏྭཱ ཨཉྙཾ གཱམབྷོཛཀཾ པེསེཏྭཱ ཛེཏཝནཾ གནྟྭཱ བྷགཝཏོ ཨེཏམཏྠཾ ཨཱརོཙེསི. བྷགཝཱ ‘‘ན, མཧཱརཱཛ, ཨིདཱནེཝ ཨེས ཨེཝཾསཱིལོ, པུབྦེཔི ཨེཝཾསཱིལོཡེཝཱ’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ ཨེཀསྶ ཨམཙྩསྶ པཙྩནྟགཱམཾ ཨདཱསི. སབྦཾ པུརིམསདིསམེཝ. ཏདཱ པན བོདྷིསཏྟོ ཝཎིཛྫཱཡ པཙྩནྟེ ཝིཙརནྟོ ¶ ཏསྨིཾ གཱམཀེ ནིཝཱསཾ ཀཔྤེསི. སོ ཏསྨིཾ གཱམབྷོཛཀེ སཱཡནྷསམཡེ མཧཱཛནཔརིཝཱརེན བྷེརིཡཱ ཝཛྫམཱནཱཡ ¶ ཨཱགཙྪནྟེ ‘‘ཨཡཾ དུཊྛགཱམབྷོཛཀོ ཙོརེཧི སདྡྷིཾ ཨེཀཏོ ཧུཏྭཱ གཱམཾ ཝིལུམྤཱཔེཏྭཱ ཙོརེསུ པལཱཡིཏྭཱ ཨཊཝིཾ པཝིཊྛེསུ ཨིདཱནི ཨུཔསནྟཱུཔསནྟོ ཝིཡ བྷེརིཡཱ ཝཛྫམཱནཱཡ ཨཱགཙྪཏཱི’’ཏི ཝཏྭཱ ཨིམཾ གཱཐམཱཧ –

༧༩.

‘‘ཡཏོ ཝིལུཏྟཱ ཙ ཧཏཱ ཙ གཱཝོ, དཌྜྷཱནི གེཧཱནི ཛནོ ཙ ནཱིཏོ;

ཨཐཱགམཱ པུཏྟཧཏཱཡ པུཏྟོ, ཁརསྶརཾ ཌིཎྜིམཾ ཝཱདཡནྟོ’’ཏི.

ཏཏྠ ཡཏོཏི ཡདཱ. ཝིལུཏྟཱ ཙ ཧཏཱ ཙཱཏི ཝིལུམྤིཏྭཱ བནྡྷིཏྭཱ ཙ ནཱིཏཱ, མཾསཾ ཁཱདནཏྠཱཡ ཙ ཧཏཱ. གཱཝོཏི གོརཱུཔཱནི. དཌྜྷཱནཱིཏི ཨགྒིཾ དཏྭཱ ཛྷཱཔིཏཱནི. ཛནོ ཙ ནཱིཏོཏི ཀརམརགྒཱཧཾ གཧེཏྭཱ ནཱིཏོ. པུཏྟཧཏཱཡ པུཏྟོཏི ཧཏཔུཏྟཱཡ པུཏྟོ, ནིལླཛྫོཏི ཨཏྠོ. ཚིནྣཧིརོཏྟཔྤསྶ ཧི མཱཏཱ ནཱམ ནཏྠི, ཨིཏི སོ ཏསྶཱ ཛཱིཝནྟོཔི ཧཏཔུཏྟཊྛཱནེ ཏིཊྛཏཱིཏི ཧཏཔུཏྟཱཡ པུཏྟོ ནཱམ ཧོཏི. ཁརསྶརནྟི ཐདྡྷསདྡཾ. ཌིཎྜིམནྟི པཊཧབྷེརིཾ.

ཨེཝཾ བོདྷིསཏྟོ ཨིམཱཡ གཱཐཱཡ ཏཾ པརིབྷཱསི. ན ཙིརེནེཝ ཙ ཏསྶ ཏཾ ཀམྨཾ པཱཀཊཾ ཛཱཏཾ, ཨཐསྶ རཱཛཱ དོསཱནུརཱུཔཾ ནིགྒཧཾ ཨཀཱསི.

སཏྠཱ ¶ ‘‘ན, མཧཱརཱཛ, ཨིདཱནེཝེས ཨེཝཾསཱིལོ, པུབྦེཔི ཨེཝཾསཱིལོཡེཝཱ’’ཏི ཝཏྭཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ ཨམཙྩོ ཨིདཱནི ཨམཙྩོཡེཝ, གཱཐཱཡ ཨུདཱཧཱརཀཔཎྜིཏམནུསྶོ པན ཨཧམེཝ ཨཧོསི’’ནྟི.

ཁརསྶརཛཱཏཀཝཎྞནཱ ནཝམཱ.

[༨༠] ༡༠. བྷཱིམསེནཛཱཏཀཝཎྞནཱ

ཡཾ ཏེ པཝིཀཏྠིཏཾ པུརེཏི ཨིདཾ སཏྠཱ ཛེཏཝནེ ཝིཧརནྟོ ཨཉྙཏརཾ ཝིཀཏྠིཏཾ བྷིཀྑུཾ ཨཱརབྦྷ ཀཐེསི. ཨེཀོ ཀིར བྷིཀྑུ ‘‘ཨཱཝུསོ, ཨམྷཱཀཾ ཛཱཏིསམཱ ཛཱཏི, གོཏྟསམཾ གོཏྟཾ ནཱམ ནཏྠི, མཡཾ ཨེཝརཱུཔེ ནཱམ མཧཱཁཏྟིཡཀུལེ ཛཱཏཱ, གོཏྟེན ཝཱ དྷནེན ཝཱ ཀུལཔྤདེསེན ཝཱ ཨམྷེཧི སདིསོ ནཱམ ནཏྠི, ཨམྷཱཀཾ སུཝཎྞརཛཏཱདཱིནཾ ཨནྟོ ནཏྠི, དཱསཀམྨཀརཱཔི ནོ སཱལིམཾསོདནཾ བྷུཉྫནྟི, ཀཱསིཀཝཏྠཾ ནིཝཱསེནྟི, ཀཱསིཀཝིལེཔནཾ ཝིལིམྤནྟི. མཡཾ པབྦཛིཏབྷཱཝེན ཨེཏརཧི ¶ ཨེཝརཱུཔཱནི ལཱུཁཱནི བྷོཛནཱནི བྷུཉྫཱམ, ལཱུཁཱནི ཙཱིཝརཱནི དྷཱརེམཱ’’ཏི ¶ ཐེརནཝམཛ྄ཛྷིམཱནཾ བྷིཀྑཱུནཾ ཨནྟརེ ཝིཀཏྠེནྟོ ཛཱཏིཨཱདིཝསེན ཝམྦྷེནྟོ ཁུཾསེནྟོ ཝིཙརཏི. ཨཐསྶ ཨེཀོ བྷིཀྑུ ཀུལཔྤདེསཾ པརིགྒཎྷིཏྭཱ ཏཾ ཝིཀཏྠནབྷཱཝཾ བྷིཀྑཱུནཾ ཨཱརོཙེསི. བྷིཀྑཱུ དྷམྨསབྷཱཡཾ སནྣིཔཏིཏཱ ‘‘ཨཱཝུསོ, ཨསུཀོ ནཱམ བྷིཀྑུ ཨེཝརཱུཔེ ནིཡྻཱནིཀསཱསནེ པབྦཛིཏྭཱ ཝིཀཏྠེནྟོ ཝམྦྷེནྟོ ཁུཾསེནྟོ ཝིཙརཏཱི’’ཏི ཨེཏསྶ ཨགུཎཾ ཀཐཡིཾསུ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, སོ བྷིཀྑུ ཨིདཱནེཝ ཝིཀཏྠེནྟོ ཝམྦྷེནྟོ ཁུཾསེནྟོ ཝིཙརཏི, པུབྦེཔི ཝིཀཏྠེནྟོ ཝམྦྷེནྟོ ཁུཾསེནྟོ ཝིཙརཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨེཀསྨིཾ ནིགམགཱམེ ཨུདིཙྩབྲཱཧྨཎཀུལེ ནིབྦཏྟིཏྭཱ ཝཡཔྤཏྟོ ཏཀྐསིལཱཡཾ དིསཱཔཱམོཀྑསྶ ཨཱཙརིཡསྶ སནྟིཀེ ཏཡོ ཝེདེ ཨཊྛཱརས ཝིཛྫཊྛཱནཱནི ཨུགྒཧེཏྭཱ སབྦསིཔྤེསུ ནིཔྥཏྟིཾ པཏྭཱ ཙཱུལ༹དྷནུགྒཧཔཎྜིཏོ ནཱམ ¶ ཨཧོསི. སོ ཏཀྐསིལཱཏོ ནིཀྑམིཏྭཱ སབྦསམཡསིཔྤཱནི པརིཡེསམཱནོ མཧིཾསཀརཊྛཾ ཨགམཱསི. ཨིམསྨིཾ པན ཛཱཏཀེ བོདྷིསཏྟོ ཐོཀཾ རསྶོ ཨོཎཏཱཀཱརོ ཨཧོསི. སོ ཙིནྟེསི ‘‘སཙཱཧཾ ཀཉྩི རཱཛཱནཾ ཨུཔསངྐམིསྶཱམི, སོ ‘ཨེཝཾ རསྶསརཱིརོ ཏྭཾ ཀིཾ ཨམྷཱཀཾ ཀམྨཾ ཀརིསྶསཱི’ཏི ཝཀྑཏི, ཡཾནཱུནཱཧཾ ཨཱརོཧཔརིཎཱཧསམྤནྣཾ ཨབྷིརཱུཔཾ ཨེཀཾ པུརིསཾ ཕལཀཾ ཀཏྭཱ ཏསྶ པིཊྛིཙྪཱཡཱཡ ཛཱིཝིཀཾ ཀཔྤེཡྻ’’ནྟི. སོ ཏཐཱརཱུཔཾ པུརིསཾ པརིཡེསམཱནོ བྷཱིམསེནསྶ ནཱམེཀསྶ ཏནྟཝཱཡསྶ ཏནྟཝཱིཏཊྛཱནཾ གནྟྭཱ ཏེན སདྡྷིཾ པཊིསནྠཱརཾ ཀཏྭཱ ‘‘སམྨ, ཏྭཾ ཀིནྣཱམོསཱི’’ཏི པུཙྪི. ‘‘ཨཧཾ བྷཱིམསེནོ ནཱམཱ’’ཏི? ‘‘ཀིཾ པན ཏྭཾ ཨེཝཾ ཨབྷིརཱུཔོ ཨུཔདྷིསམྤནྣོ ཧུཏྭཱ ཨིམཾ ལཱམཀཀམྨཾ ཀརོསཱི’’ཏི? ‘‘ཛཱིཝིཏུཾ ཨསཀྐོནྟོ’’ཏི. ‘‘སམྨ, མཱ ཨེཏཾ ཀམྨཾ ཀརི, སཀལཛམྦུདཱིཔེ མཡཱ སདིསོ དྷནུགྒཧོ ནཱམ ནཏྠི. སཙེ པནཱཧཾ ཀཉྩི རཱཛཱནཾ པསྶེཡྻཾ, སོ མཾ ‘ཨེཝཾརསྶོ ཨཡཾ ཀིཾ ཨམྷཱཀཾ ཀམྨཾ ཀརིསྶཏཱི’ཏི ཀོཔེཡྻ, ཏྭཾ རཱཛཱནཾ དིསྭཱ ‘ཨཧཾ དྷནུགྒཧོ’ཏི ཝཀྑསི. རཱཛཱ ཏེ པརིབྦཡཾ དཏྭཱ ཝུཏྟིཾ ¶ ནིབདྡྷཾ དསྶཏི. ཨཧཾ ཏེ ཨུཔྤནྣཀམྨཾ ཀརོནྟོ ཏཝ པིཊྛིཙྪཱཡཱཡ ཛཱིཝིསྶཱམི. ཨེཝཾ ཨུབྷོཔི སུཁིཏཱ བྷཝིསྶཱམ. ཀརོཧི མམ ཝཙན’’ནྟི ཨཱཧ. སོ ‘‘སཱདྷཱུ’’ཏི སམྤཊིཙྪི.

ཨཐ ནཾ ཨཱདཱཡ བཱརཱཎསིཾ གནྟྭཱ སཡཾ ཙཱུལཱུ༹པཊྛཱཀོ ཧུཏྭཱ ཏཾ པུརཏོ ཀཏྭཱ རཱཛདྭཱརེ ཋཏྭཱ རཉྙོ ཨཱརོཙཱཔེསི. ‘‘ཨཱགཙྪནྟཱུ’’ཏི ཝུཏྟེ ཨུབྷོཔི པཝིསིཏྭཱ རཱཛཱནཾ ཝནྡིཏྭཱ ཨཊྛཾསུ. ‘‘ཀིཾཀཱརཎཱ ཨཱགཏཏྠཱ’’ཏི ཙ ཝུཏྟེ བྷཱིམསེནོ ཨཱཧ – ‘‘ཨཧཾ དྷནུགྒཧོ, མཡཱ སདིསོ སཀལཛམྦུདཱིཔེ དྷནུགྒཧོ ནཏྠཱི’’ཏི. ‘‘ཀིཾ པན ལབྷནྟོ མཾ ཨུཔཊྛཧིསྶསཱི’’ཏི? ‘‘ཨཌྜྷམཱསེ ¶ སཧསྶཾ ལབྷནྟོ ཨུཔཊྛཧིསྶཱམི, དེཝཱ’’ཏི. ‘‘ཨཡཾ ཏེ པུརིསོ ཀིཾ ཧོཏཱི’’ཏི? ‘‘ཙཱུལཱུ༹པཊྛཱཀོ, དེཝཱ’’ཏི. ‘‘སཱདྷུ ཨུཔཊྛཧཱ’’ཏི. ཏཏོ པཊྛཱཡ བྷཱིམསེནོ རཱཛཱནཾ ཨུཔཊྛཧཏི. ཨུཔྤནྣཀིཙྩཾ པནསྶ བོདྷིསཏྟོཝ ནིཏྠརཏི.

ཏེན ཁོ པན སམཡེན ཀཱསིརཊྛེ ཨེཀསྨིཾ ཨརཉྙེ བཧཱུནཾ མནུསྶཱནཾ སཉྩརཎམགྒཾ བྱགྒྷོ ཚཌྜཱཔེཏི, བཧཱུ མནུསྶེ གཧེཏྭཱ གཧེཏྭཱ ཁཱདཏི. ཏཾ པཝཏྟིཾ རཉྙོ ཨཱརོཙེསུཾ. རཱཛཱ བྷཱིམསེནཾ པཀྐོསཱཔེཏྭཱ ‘‘སཀྑིསྶསི, ཏཱཏ, ནཾ བྱགྒྷཾ གཎྷིཏུ’’ནྟི ཨཱཧ. ‘‘དེཝ, ཀིཾ དྷནུགྒཧོ ནཱམཱཧཾ ¶ , ཡདི བྱགྒྷཾ གཧེཏུཾ ན སཀྐོམཱི’’ཏི. རཱཛཱ ཏསྶ པརིབྦཡཾ དཏྭཱ ཨུཡྻོཛེསི. སོ གྷརཾ གནྟྭཱ བོདྷིསཏྟསྶ ཀཐེསི. བོདྷིསཏྟོ ‘‘སཱདྷུ, སམྨ, གཙྪཱ’’ཏི ཨཱཧ. ‘‘ཏྭཾ པན ན གམིསྶསཱི’’ཏི? ‘‘ཨཱམ ན གམིསྶཱམི, ཨུཔཱཡཾ པན ཏེ ཨཱཙིཀྑིསྶཱམཱི’’ཏི. ‘‘ཨཱཙིཀྑ, སམྨཱ’’ཏི. ཏྭཾ བྱགྒྷསྶ ཝསནཊྛཱནཾ སཧསཱ ཨེཀཀོཝ མཱ ཨགམཱསི, ཛནཔདམནུསྶེ པན སནྣིཔཱཏེཏྭཱ ཨེཀཾ ཝཱ དྭེ ཝཱ དྷནུསཧསྶཱནི གཱཧཱཔེཏྭཱ ཏཏྠ གནྟྭཱ བྱགྒྷསྶ ཨུཊྛིཏབྷཱཝཾ ཉཏྭཱ པལཱཡིཏྭཱ ཨེཀཾ གུམྦཾ པཝིསིཏྭཱ ཨུརེན ནིཔཛྫེཡྻཱསི, ཛཱནཔདཱཝ བྱགྒྷཾ པོཐེཏྭཱ གཎྷིསྶནྟི, ཏེཧི བྱགྒྷེ གཧིཏེ ཏྭཾ དནྟེཧི ཨེཀཾ ཝལླིཾ ཚིནྡིཏྭཱ ཀོཊིཡཾ གཧེཏྭཱ མཏབྱགྒྷསྶ སནྟིཀཾ གནྟྭཱ ‘‘བྷོ, ཀེནེས, བྱགྒྷོ མཱརིཏོ, ཨཧཾ ཨིམཾ བྱགྒྷཾ གོཎཾ ཝིཡ ¶ ཝལླིཡཱ བནྡྷིཏྭཱ རཉྙོ སནྟིཀཾ ནེསྶཱམཱི’ཏི ཝལླིཨཏྠཱཡ གུམྦཾ པཝིཊྛོ, མཡཱ ཝལླིཡཱ ཨནཱབྷཏཱཡ ཨེཝ ཀེནེས མཱརིཏོ’’ཏི ཀཐེཡྻཱསི. ཨཐ ཏེ ཛཱནཔདཱ བྷཱིཏཏསིཏཱ ‘‘སཱམི, མཱ རཉྙོ ཨཱཙིཀྑཱི’’ཏི བཧུཾ དྷནཾ དསྶནྟི, བྱགྒྷོ ཏཡཱ གཧིཏོ བྷཝིསྶཏི, རཉྙོཔི སནྟིཀཱ བཧུཾ དྷནཾ ལབྷིསྶསཱིཏི. སོ ‘‘སཱདྷཱུ’’ཏི སམྤཊིཙྪིཏྭཱ བོདྷིསཏྟེན ཀཐིཏནིཡཱམེནེཝ བྱགྒྷཾ གཧེཏྭཱ ཨརཉྙཾ ཁེམཾ ཀཏྭཱ མཧཱཛནཔརིཝུཏོ བཱརཱཎསིཾ ཨཱགནྟྭཱ རཱཛཱནཾ དིསྭཱ ‘‘གཧིཏོ མེ, དེཝ, བྱགྒྷོ, ཨརཉྙཾ ཁེམཾ ཀཏ’’ནྟི ཨཱཧ. རཱཛཱ ཏུཊྛོ བཧུཾ དྷནཾ ཨདཱསི. པུནེཀདིཝསཾ ‘‘ཨེཀམགྒཾ མཧིཾསོ ཚཌྜཱཔེཏཱི’’ཏི ཨཱརོཙེསུཾ, རཱཛཱ ཏཐེཝ བྷཱིམསེནཾ པེསེསི. སོཔི བོདྷིསཏྟེན དིནྣནཡེན བྱགྒྷཾ ཝིཡ ཏམྤི གཧེཏྭཱ ཨཱགཉྪི, རཱཛཱ པུན བཧུཾ དྷནཾ ཨདཱསི, མཧནྟཾ ཨིསྶརིཡཾ ཛཱཏཾ. སོ ཨིསྶརིཡམདམཏྟོ བོདྷིསཏྟཾ ཨཝམཉྙཾ ཀཏྭཱ ཏསྶ ཝཙནཾ ན གཎྷཱཏི, ‘‘ནཱཧཾ ཏཾ ནིསྶཱཡ ཛཱིཝཱམི, ཀིཾ ཏྭཉྙེཝ པུརིསོ’’ཏིཨཱདཱིནི ཕརུསཝཙནཱནི ཝདཏི.

ཨཐ ¶ ཀཏིཔཱཧཙྩཡེན ཨེཀོ སཱམནྟརཱཛཱ ཨཱགནྟྭཱ བཱརཱཎསིཾ ཨུཔརུནྡྷིཏྭཱ ‘‘རཛྫཾ ཝཱ དེཏུ, ཡུདྡྷཾ ཝཱ’’ཏི རཉྙོ སཱསནཾ པེསེསི. རཱཛཱ ‘‘ཡུཛ྄ཛྷཱཧཱི’’ཏི བྷཱིམསེནཾ པེསེསི. སོ སབྦསནྣཱཧསནྣདྡྷོ རཱཛཝེསཾ གཧེཏྭཱ སུསནྣདྡྷསྶ ཝཱརཎསྶ པིཊྛེ ནིསཱིདི. བོདྷིསཏྟོཔི ཏསྶ མརཎབྷཡེན སབྦསནྣཱཧསནྣདྡྷོ བྷཱིམསེནསྶེཝ པཙྪིམཱསནེ ནིསཱིདི. ཝཱརཎོ མཧཱཛནཔརིཝུཏོ ནགརདྭཱརེན ནིཀྑམིཏྭཱ སངྒཱམསཱིསཾ པཱཔུཎི. བྷཱིམསེནོ ཡུདྡྷབྷེརིསདྡཾ སུཏྭཱཝ ཀམྤིཏུཾ ཨཱརདྡྷོ. བོདྷིསཏྟོ ‘‘ཨིདཱནེས ¶ ཧཏྠིཔིཊྛིཏོ པཏིཏྭཱ མརིསྶཏཱི’’ཏི ཧཏྠིཀྑནྡྷཏོ ཨཔཏནཏྠཾ བྷཱིམསེནཾ ཡོཏྟེན པརིཀྑིཔིཏྭཱ གཎྷི, བྷཱིམསེནོ སམྤཧཱརཊྛཱནཾ དིསྭཱ མརཎབྷཡཏཛྫིཏོ སརཱིརཝལ༹ཉྫེན ཧཏྠིཔིཊྛིཾ དཱུསེསི. བོདྷིསཏྟོ ‘‘ན ཁོ ཏེ བྷཱིམསེན པུརིམེན པཙྪིམཾ སམེཏི, ཏྭཾ པུབྦེ སངྒཱམཡོདྷོ ཝིཡ ཨཧོསི, ཨིདཱནི ཧཏྠིཔིཊྛིཾ དཱུསེསཱི’’ཏི ཝཏྭཱ ཨིམཾ གཱཐམཱཧ –

༨༠.

‘‘ཡཾ ¶ ཏེ པཝིཀཏྠིཏཾ པུརེ, ཨཐ ཏེ པཱུཏིསརཱ སཛནྟི པཙྪཱ;

ཨུབྷཡཾ ན སམེཏི བྷཱིམསེན, ཡུདྡྷཀཐཱ ཙ ཨིདཉྩ ཏེ ཝིཧཉྙ’’ནྟི.

ཏཏྠ ཡཾ ཏེ པཝིཀཏྠིཏཾ པུརེཏི ཡཾ ཏཡཱ པུབྦེ ‘‘ཀིཾ ཏྭཾཡེཝ པུརིསོ, ནཱཧཾ པུརིསོ, ཨཧམྤི སངྒཱམཡོདྷོ’’ཏི ཝིཀཏྠིཏཾ ཝམྦྷནཝཙནཾ ཝུཏྟཾ, ཨིདཾ ཏཱཝ ཨེཀཾ. ཨཐ ཏེ པཱུཏིསརཱ སཛནྟི པཙྪཱཏི ཨཐ ཏེ ཨིམེ པཱུཏིབྷཱཝེན སརཎབྷཱཝེན ཙ ‘‘པཱུཏིསརཱ’’ཏི ལདྡྷནཱམཱ སརཱིརཝལ༹ཉྫདྷཱརཱ སཛནྟི ཝལ༹ཉྫནྟི པགྒྷརནྟི. པཙྪཱཏི ཏཏོ པུརེ ཝིཀཏྠིཏཏོ ཨཔརབྷཱགེ, ཨིདཱནི ཨིམསྨིཾ སངྒཱམསཱིསེཏི ཨཏྠོ. ཨུབྷཡཾ ན སམེཏི བྷཱིམསེནཱཏི ཨིདཾ བྷཱིམསེན ཨུབྷཡཾ ན སམེཏི. ཀཏརཾ? ཡུདྡྷཀཐཱ ཙ ཨིདཉྩ ཏེ ཝིཧཉྙནྟི, ཡཱ ཙ པུརེ ཀཐིཏཱ ཡུདྡྷཀཐཱ, ཡཉྩ ཏེ ཨིདཱནི ཝིཧཉྙཾ ཀིལམཐོ ཧཏྠིཔིཊྛིདཱུསནཱཀཱརཔྤཏྟོ ཝིགྷཱཏོཏི ཨཏྠོ.

ཨེཝཾ བོདྷིསཏྟོ ཏཾ གརཧིཏྭཱ ‘‘མཱ བྷཱཡི, སམྨ, ཀསྨཱ མཡི ཋིཏེ ཝིཧཉྙསཱི’’ཏི བྷཱིམསེནཾ ཧཏྠིཔིཊྛིཏོ ཨོཏཱརེཏྭཱ ‘‘ནྷཱཡིཏྭཱ གེཧམེཝ གཙྪཱ’’ཏི ཨུཡྻོཛེཏྭཱ ‘‘ཨཛྫ མཡཱ པཱཀཊེན བྷཝིཏུཾ ཝཊྚཏཱི’’ཏི སངྒཱམཾ པཝིསིཏྭཱ ཨུནྣདིཏྭཱ བལཀོཊྛཀཾ བྷིནྡིཏྭཱ སཔཏྟརཱཛཱནཾ ཛཱིཝགྒཱཧཾ གཱཧཱཔེཏྭཱ བཱརཱཎསིརཉྙོ སནྟིཀཾ ཨགམཱསི. རཱཛཱ ཏུཊྛོ བོདྷིསཏྟསྶ མཧནྟཾ ཡསཾ ཨདཱསི. ཏཏོ པཊྛཱཡ ‘‘ཙཱུལ༹དྷནུགྒཧཔཎྜིཏོ’’ཏི སཀལཛམྦུདཱིཔེ པཱཀཊོ ཨཧོསི. སོ བྷཱིམསེནསྶ པརིབྦཡཾ དཏྭཱ སཀཊྛཱནམེཝ པེསེཏྭཱ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ¶ ¶ ‘‘ན, བྷིཀྑཝེ, ཨིདཱནེཝེས བྷིཀྑུ ཝིཀཏྠེཏི, པུབྦེཔི ཝིཀཏྠིཡེཝཱ’’ཏི ཝཏྭཱ ཨིམཾ དྷམྨདེསནཾ ཨཱཧརིཏྭཱ ཨནུསནྡྷིཾ གྷཊེཏྭཱ ཛཱཏཀཾ སམོདྷཱནེསི – ‘‘ཏདཱ བྷཱིམསེནོ ཝིཀཏྠིཏབྷིཀྑུ ཨཧོསི, ཙཱུལ༹དྷནུགྒཧཔཎྜིཏོ པན ཨཧམེཝ ཨཧོསི’’ནྟི.

བྷཱིམསེནཛཱཏཀཝཎྞནཱ དསམཱ.

ཝརུཎཝགྒོ ཨཊྛམོ.

ཏསྶུདྡཱནཾ –

ཝརུཎཾ སཱིལཝནཱགཾ, སཙྩཾཀིར རུཀྑདྷམྨཾ;

མཙྪརཱཛཱ ཨསངྐིཡཾ, མཧཱསུཔིནཨིལླིསཾ;

ཁརསྶརཾ བྷཱིམསེནནྟི.

༩. ཨཔཱཡིམྷཝགྒོ

[༨༡] ༡. སུརཱཔཱནཛཱཏཀཝཎྞནཱ

ཨཔཱཡིམྷ ¶ ¶ ཨནཙྩིམྷཱཏི ཨིདཾ སཏྠཱ ཀོསམྦིཾ ཨུཔནིསྶཱཡ གྷོསིཏཱརཱམེ ཝིཧརནྟོ སཱགཏཏྠེརཾ ཨཱརབྦྷ ཀཐེསི. བྷགཝཏི ཧི སཱཝཏྠིཡཾ ཝསྶཾ ཝསིཏྭཱ ཙཱརིཀཱགམནེན བྷདྡཝཏིཀཾ ནཱམ ནིགམཾ སམྤཏྟེ གོཔཱལཀཱ པསུཔཱལཀཱ ཀསྶཀཱ པཐཱཝིནོ ཙ སཏྠཱརཾ དིསྭཱ ཝནྡིཏྭཱ ‘‘མཱ, བྷནྟེ, བྷགཝཱ ཨམྦཏིཏྠཾ ཨགམཱསི, ཨམྦཏིཏྠེ ཛཊིལསྶ ཨསྶམེ ཨམྦཏིཏྠཀོ ནཱམ ནཱགོ ཨཱསཱིཝིསོ གྷོརཝིསོ, སོ བྷགཝནྟཾ ཝིཧེཋེཡྻཱ’’ཏི ཝཱརཡིཾསུ. བྷགཝཱཔི ཏེསཾ ཀཐཾ ཨསུཎནྟོ ཝིཡ ཏེསུ ཡཱཝཏཏིཡཾ ཝཱརཡམཱནེསུཔི ཨགམཱསིཡེཝ.

ཏཏྲ སུདཾ བྷགཝཱ བྷདྡཝཏིཀཱཡ ཨཝིདཱུརེ ཨཉྙཏརསྨིཾ ཝནསཎྜེ ཝིཧརཏི. ཏེན ཁོ པན སམཡེན བུདྡྷཱུཔཊྛཱཀོ སཱགཏོ ནཱམ ཐེརོ པོཐུཛྫནིཀཱཡ ཨིདྡྷིཡཱ སམནྣཱགཏོ ཏཾ ཨསྶམཾ ཨུཔསངྐམིཏྭཱ ཏསྶ ནཱགརཱཛསྶ ཝསནཊྛཱནེ ཏིཎསནྠཱརཀཾ པཉྙཱཔེཏྭཱ པལླངྐེན ནིསཱིདི. ནཱགོ མཀྑཾ ཨསཧམཱནོ དྷཱུམཱཡི, ཐེརོཔི དྷཱུམཱཡི. ནཱགོ པཛྫལི, ཐེརོཔི པཛྫལི. ནཱགསྶ ཏེཛོ ཐེརཾ ན བཱདྷཏི, ཐེརསྶ ཏེཛོ ནཱགཾ ¶ བཱདྷཏི. ཨེཝཾ སོ ཁཎེན ཏཾ ནཱགརཱཛཱནཾ དམེཏྭཱ སརཎེསུ ཙ སཱིལེསུ ཙ པཏིཊྛཱཔེཏྭཱ སཏྠུ སནྟིཀཾ ཨགམཱསི.

སཏྠཱ བྷདྡཝཏིཀཱཡཾ ཡཐཱབྷིརནྟཾ ཝིཧརིཏྭཱ ཀོསམྦིཾ ཨགམཱསི. སཱགཏཏྠེརེན ནཱགསྶ དམིཏབྷཱཝོ སཀལཛནཔདཾ པཏྠརི. ཀོསམྦིནགརཝཱསིནོ སཏྠུ པཙྩུགྒམནཾ ཀཏྭཱ སཏྠཱརཾ ཝནྡིཏྭཱ སཱགཏཏྠེརསྶ སནྟིཀཾ གནྟྭཱ ཝནྡིཏྭཱ ཨེཀམནྟཾ ཋིཏཱ ཨེཝམཱཧཾསུ ‘‘བྷནྟེ, ཡཾ ཏུམྷཱཀཾ དུལླབྷཾ, ཏཾ ཝདེཡྻཱཐ, ཏདེཝ མཡཾ པཊིཡཱདེསྶཱམཱ’’ཏི. ཐེརོ ཏུཎྷཱི ཨཧོསི. ཚབྦགྒིཡཱ པནཱཧཾསུ ‘‘ཨཱཝུསོ, པབྦཛིཏཱནཾ ནཱམ ཀཱཔོཏིཀཱ སུརཱ དུལླབྷཱ ཙེཝ མནཱཔཱ ཙ. སཙེ ཏུམྷེ ཐེརསྶ པསནྣཱ, ཀཱཔོཏིཀཾ སུརཾ པཊིཡཱདེཐཱ’’ཏི. ཏེ ‘‘སཱདྷཱུ’’ཏི སམྤཊིཙྪིཏྭཱ སཏྠཱརཾ སྭཱཏནཱཡ ནིམནྟེཏྭཱ ནགརཾ པཝིསིཏྭཱ ཨཏྟནོ ཨཏྟནོ གེཧེ ‘‘ཐེརསྶ དསྶཱམཱ’’ཏི ཀཱཔོཏིཀཾ སུརཾ པསནྣཾ པཊིཡཱདེཏྭཱ ཐེརཾ ནིམནྟེཏྭཱ གྷརེ གྷརེ པསནྣཾ སུརཾ ཨདཾསུ. ཐེརོ པིཝིཏྭཱ སུརཱམདམཏྟོ ནགརཏོ ནིཀྑམནྟོ དྭཱརནྟརེ པཏིཏྭཱ ཝིལཔམཱནོ ནིཔཛྫི.

སཏྠཱ ¶ ཀཏབྷཏྟཀིཙྩོ ནགརཱ ནིཀྑམནྟོ ཐེརཾ ཏེནཱཀཱརེན ནིཔནྣཾ དིསྭཱ ‘‘གཎྷཐ, བྷིཀྑཝེ, སཱགཏ’’ནྟི གཱཧཱཔེཏྭཱ ཨཱརཱམཾ ཨགམཱསི ¶ . བྷིཀྑཱུ ཐེརསྶ སཱིསཾ ཏཐཱགཏསྶ པཱདམཱུལེ ཀཏྭཱ ཏཾ ནིཔཛྫཱཔེསུཾ, སོ པརིཝཏྟིཏྭཱ པཱདེ ཏཐཱགཏཱབྷིམུཁེ ཀཏྭཱ ནིཔཛྫི. སཏྠཱ བྷིཀྑཱུ པཊིཔུཙྪི ‘‘ཀིཾ ནུ ཁོ, བྷིཀྑཝེ, ཡཾ པུབྦེ སཱགཏསྶ མཡི གཱརཝཾ, ཏཾ ཨིདཱནི ཨཏྠཱི’’ཏི? ‘‘ནཏྠི, བྷནྟེ’’ཏི. ‘‘བྷིཀྑཝེ, ཨམྦཏིཏྠཀཾ ནཱགརཱཛཱནཾ ཀོ དམེསཱི’’ཏི. ‘‘སཱགཏོ, བྷནྟེ’’ཏི. ‘‘ཀིཾ པནེཏརཧི, བྷིཀྑཝེ, སཱགཏོ ཨུདཀདེཌྜཱུབྷཀམྤི དམེཏུཾ སཀྐུཎེཡྻཱ’’ཏི. ‘‘ནོ ཧེཏཾ, བྷནྟེ’’. ‘‘ཨཔི ནུ ཁོ, བྷིཀྑཝེ, ཨེཝརཱུཔཾ པཱཏུཾ ཡུཏྟཾ, ཡཾ པིཝིཏྭཱ ཨེཝཾཝིསཉྙཱི ཧོཏཱི’’ཏི. ‘‘ཨཡུཏྟཾ, བྷནྟེ’’ཏི. ཨཐ ཁོ བྷགཝཱ ཐེརཾ གརཧིཏྭཱ བྷིཀྑཱུ ཨཱམནྟེཏྭཱ ‘‘སུརཱམེརཡཔཱནེ པཱཙིཏྟིཡ’’ནྟི (པཱཙི. ༣༢༧) སིཀྑཱཔདཾ པཉྙཱཔེཏྭཱ ཨུཊྛཱཡཱསནཱ གནྡྷཀུཊིཾ པཱཝིསི.

དྷམྨསབྷཱཡཾ སནྣིཔཏིཏཱ བྷིཀྑཱུ སུརཱཔཱནསྶ ཨཝཎྞཾ ཀཐཡིཾསུ ‘‘ཡཱཝ མཧཱདོསཉྩེཏཾ, ཨཱཝུསོ, སུརཱཔཱནཾ ནཱམ, ཏཱཝ པཉྙཱསམྤནྣཾ ནཱམ ཨིདྡྷིམནྟཾ ¶ སཱགཏཾ ཡཐཱ སཏྠུ གུཎམཏྟམྤི ན ཛཱནཱཏི, ཏཐཱ ཨཀཱསཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ སུརཾ པིཝིཏྭཱ པབྦཛིཏཱ ཝིསཉྙིནོ ཧོནྟི, པུབྦེཔི ཨཧེསུཾཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཀཱསིརཊྛེ ཨུདིཙྩབྲཱཧྨཎཀུལེ ནིབྦཏྟིཏྭཱ ཝཡཔྤཏྟོ ཨིསིཔབྦཛྫཾ པབྦཛིཏྭཱ ཨབྷིཉྙཱ ཙ སམཱཔཏྟིཡོ ཙ ཨུཔྤཱདེཏྭཱ ཛྷཱནཀཱིལ༹ཾ ཀཱིལ༹ནྟོ ཧིམཝནྟཔྤདེསེ ཝསཏི པཉྩཧི ཨནྟེཝཱསིཀསཏེཧི པརིཝུཏོ. ཨཐ ནཾ ཝསྶཱནསམཡེ སམྤཏྟེ ཨནྟེཝཱསིཀཱ ཨཱཧཾསུ ‘‘ཨཱཙརིཡ, མནུསྶཔཐཾ གནྟྭཱ ལོཎམྦིལཾ སེཝིཏྭཱ ཨཱགཙྪཱམཱ’’ཏི. ‘‘ཨཱཝུསོ, ཨཧཾ ཨིདྷེཝ ཝསིསྶཱམི, ཏུམྷེ པན གནྟྭཱ སརཱིརཾ སནྟཔྤེཏྭཱ ཝསྶཾ ཝཱིཏིནཱམེཏྭཱ ཨཱགཙྪཐཱ’’ཏི. ཏེ ‘‘སཱདྷཱུ’’ཏི ཨཱཙརིཡཾ ཝནྡིཏྭཱ བཱརཱཎསིཾ གནྟྭཱ རཱཛུཡྻཱནེ ཝསིཏྭཱ པུནདིཝསེ བཧིདྭཱརགཱམེཡེཝ བྷིཀྑཱཡ ཙརིཏྭཱ སུཧིཏཱ ཧུཏྭཱ པུནདིཝསེ ནགརཾ པཝིསིཾསུ. མནུསྶཱ སམྤིཡཱཡམཱནཱ བྷིཀྑཾ ཨདཾསུ. ཀཏིཔཱཧཙྩཡེན ཙ རཉྙོཔི ཨཱརོཙེསུཾ ‘‘དེཝ, ཧིམཝནྟཏོ པཉྩསཏཱ ཨིསཡོ ཨཱགནྟྭཱ ཨུཡྻཱནེ ཝསནྟི གྷོརཏཔཱ པརམདྷིཏིནྡྲིཡཱ སཱིལཝནྟོ’’ཏི. རཱཛཱ ཏེསཾ གུཎེ སུཏྭཱ ཨུཡྻཱནཾ གནྟྭཱ ཝནྡིཏྭཱ ཀཏཔཊིསནྠཱརོ ཝསྶཱནཾ ¶ ཙཏུམཱསཾ ཏཏྠེཝ ཝསནཏྠཱཡ པཊིཉྙཾ གཧེཏྭཱ ནིམནྟེསི, ཏེ ཏཏོ པཊྛཱཡ རཱཛགེཧེཡེཝ བྷུཉྫིཏྭཱ ཨུཡྻཱནེ ཝསནྟི.

ཨཐེཀདིཝསཾ ¶ ནགརེ སུརཱནཀྑཏྟཾ ནཱམ ཨཧོསི. རཱཛཱ ‘‘པབྦཛིཏཱནཾ སུརཱ དུལླབྷཱ’’ཏི བཧུཾ ཨུཏྟམསུརཾ དཱཔེསི. ཏཱཔསཱ སུརཾ པིཝིཏྭཱ ཨུཡྻཱནཾ གནྟྭཱ སུརཱམདམཏྟཱ ཧུཏྭཱ ཨེཀཙྩེ ཨུཊྛཱཡ ནཙྩིཾསུ, ཨེཀཙྩེ གཱཡིཾསུ, ནཙྩིཏྭཱ གཱཡིཏྭཱ ཁཱརིཀཱདཱིནི ཨཝཏྠརིཏྭཱ ནིདྡཱཡིཏྭཱ སུརཱམདེ ཚིནྣེ པབུཛ྄ཛྷིཏྭཱ ཏཾ ཨཏྟནོ ཝིཔྤཀཱརཾ དིསྭཱ ‘‘ན ཨམྷེཧི པབྦཛིཏསཱརུཔྤཾ ཀཏ’’ནྟི རོདིཏྭཱ པརིདེཝིཏྭཱ ‘‘མཡཾ ཨཱཙརིཡེན ཝིནཱབྷཱུཏཏྟཱ ཨེཝརཱུཔཾ པཱཔཀམྨཾ ཀརིམྷཱ’’ཏི ཏངྑཎཉྙེཝ ཨུཡྻཱནཾ པཧཱཡ ཧིམཝནྟཾ གནྟྭཱ པཊིསཱམིཏཔརིཀྑཱརཱ ཨཱཙརིཡཾ ཝནྡིཏྭཱ ནིསཱིདིཏྭཱ ‘‘ཀིཾ ནུ ཁོ, ཏཱཏཱ, མནུསྶཔཐེ བྷིཀྑཱཡ ཨཀིལམམཱནཱ སུཁཾ ཝསིཏྠ, སམགྒཝཱསཉྩ པན ཝསིཏྠཱ’’ཏི ¶ པུཙྪིཏཱ ‘‘ཨཱཙརིཡ, སུཁཾ ཝསིམྷ, ཨཔིཙ ཁོ པན མཡཾ ཨཔཱཏབྦཡུཏྟཀཾ པིཝིཏྭཱ ཝིསཉྙཱིབྷཱུཏཱ སཏིཾ པཙྩུཔཊྛཱཔེཏུཾ ཨསཀྐོནྟཱ ནཙྩིམྷ ཙེཝ གཱཡིམྷ ཙཱ’’ཏི ཨེཏམཏྠཾ ཨཱརོཙེནྟཱ ཨིམཾ གཱཐཾ སམུཊྛཱཔེཏྭཱ ཨཱཧཾསུ –

༨༡.

‘‘ཨཔཱཡིམྷ ཨནཙྩིམྷ, ཨགཱཡིམྷ རུདིམྷ ཙ;

ཝིསཉྙཱིཀརཎིཾ པིཏྭཱ, དིཊྛཱ ནཱཧུམྷ ཝཱནརཱ’’ཏི.

ཏཏྠ ཨཔཱཡིམྷཱཏི སུརཾ པིཝིམྷ. ཨནཙྩིམྷཱཏི ཏཾ པིཝིཏྭཱ ཧཏྠཔཱདེ ལཱལེ༹ནྟཱ ནཙྩིམྷ. ཨགཱཡིམྷཱཏི མུཁཾ ཝིཝརིཏྭཱ ཨཱཡཏཀེན སརེན གཱཡིམྷ. རུདིམྷ ཙཱཏི པུན ཝིཔྤཊིསཱརིནོ ‘‘ཨེཝརཱུཔཾ ནཱམ ཨམྷེཧི ཀཏ’’ནྟི རོདིམྷ ཙ. ཝིསཉྙཱིཀརཎིཾ པིཏྭཱ, དིཊྛཱ ནཱཧུམྷ ཝཱནརཱཏི ཨེཝརཱུཔཾ སཉྙཱཝིནཱསནཏོ ཝིསཉྙཱིཀརཎིཾ སུརཾ པིཝིཏྭཱ ‘‘ཨེཏདེཝ སཱདྷུ, ཡཾ ཝཱནརཱ ནཱཧུམྷཱ’’ཏི. ཨེཝཾ ཏེ ཨཏྟནོ ཨགུཎཾ ཀཐེསུཾ.

བོདྷིསཏྟོ ‘‘གརུསཾཝཱསརཧིཏཱནཾ ནཱམ ཨེཝརཱུཔཾ ཧོཏིཡེཝཱ’’ཏི ཏེ ཏཱཔསེ གརཧིཏྭཱ ‘‘པུན ཨེཝརཱུཔཾ མཱཀརིཏྠཱ’’ཏི ཏེསཾ ཨོཝཱདཾ དཏྭཱ ཨཔརིཧཱིནཛ྄ཛྷཱནོ བྲཧྨལོཀཔརཱཡཎོ ཨཧོསི.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི. ཨིཏོ པཊྛཱཡ ཧི ‘‘ཨནུསནྡྷིཾ གྷཊེཏྭཱ’’ཏི ཨིདམྤི ན ཝཀྑཱམ. ཏདཱ ཨིསིགཎོ བུདྡྷཔརིསཱ ཨཧོསི, གཎསཏྠཱ པན ཨཧམེཝ ཨཧོསིནྟི.

སུརཱཔཱནཛཱཏཀཝཎྞནཱ པཋམཱ.

[༨༢] ༢. མིཏྟཝིནྡཀཛཱཏཀཝཎྞནཱ

ཨཏིཀྐམྨ ¶ རམཎཀནྟི ཨིདཾ སཏྠཱ ཛེཏཝནེ ཝིཧརནྟོ ཨེཀཾ དུབྦཙབྷིཀྑུཾ ཨཱརབྦྷ ཀཐེསི. ཨིམསྶ པན ཛཱཏཀསྶ ཀསྶཔསམྨཱསམྦུདྡྷཀཱལིཀཾ ཝཏྠུ, ཏཾ དསཀནིཔཱཏེ མཧཱམིཏྟཝིནྡཀཛཱཏཀེ (ཛཱ. ༡.༡.༨༢; ༡.༥.༡༠༠ ཨཱདཡོ) ཨཱཝི བྷཝིསྶཏི. ཏདཱ པན བོདྷིསཏྟོ ཨིམཾ གཱཐམཱཧ –

༨༢.

‘‘ཨཏིཀྐམྨ ¶ རམཎཀཾ, སདཱམཏྟཉྩ དཱུབྷཀཾ;

སྭཱསི པཱསཱཎམཱསཱིནོ, ཡསྨཱ ཛཱིཝཾ ན མོཀྑསཱི’’ཏི.

ཏཏྠ རམཎཀནྟི ཏསྨིཾ ཀཱལེ ཕལིཀསྶ ནཱམཾ, ཕལིཀཔཱསཱདཉྩ ཨཏིཀྐནྟོསཱིཏི དཱིཔེཏི. སདཱམཏྟཉྩཱཏི རཛཏསྶ ནཱམཾ, རཛཏཔཱསཱདཉྩ ཨཏིཀྐནྟོསཱིཏི དཱིཔེཏི. དཱུབྷཀནྟི མཎིནོ ནཱམཾ, མཎིཔཱསཱདཉྩ ཨཏིཀྐནྟོསཱིཏི དཱིཔེཏི. སྭཱསཱིཏི སོ ཨསི ཏྭཾ. པཱསཱཎམཱསཱིནོཏི ཁུརཙཀྐཾ ནཱམ པཱསཱཎམཡཾ ཝཱ ཧོཏི རཛཏམཡཾ ཝཱ མཎིམཡཾ ཝཱ, ཏཾ པན པཱསཱཎམཡམེཝ. སོ ཙ ཏེན ཨཱསཱིནོ ཨཏིནིཝིཊྛོ ཨཛ྄ཛྷོཏྠཊོ. ཏསྨཱ པཱསཱཎེན ཨཱསཱིནཏྟཱ ‘‘པཱསཱཎཱསཱིནོ’’ཏི ཝཏྟབྦེ བྱཉྫནསནྡྷིཝསེན མཀཱརཾ ཨཱདཱཡ ‘‘པཱསཱཎམཱསཱིནོ’’ཏི ཝུཏྟཾ. པཱསཱཎཾ ཝཱ ཨཱསཱིནོ, ཏཾ ཁུརཙཀྐཾ ཨཱསཛྫ པཱཔུཎིཏྭཱ ཋིཏོཏི ཨཏྠོ. ཡསྨཱ ཛཱིཝཾ ན མོཀྑསཱིཏི ཡསྨཱ ཁུརཙཀྐཱ ཡཱཝ ཏེ པཱཔཾ ན ཁཱིཡཏི, ཏཱཝ ཛཱིཝནྟོཡེཝ ན མུཙྩིསྶསི, ཏཾ ཨཱསཱིནོསཱིཏི.

ཨིམཾ གཱཐཾ ཝཏྭཱ བོདྷིསཏྟོ ཨཏྟནོ ཝསནཊྛཱནཾཡེཝ གཏོ. མིཏྟཝིནྡཀོཔི ཁུརཙཀྐཾ ཨུཀྑིཔིཏྭཱ མཧཱདུཀྑཾ ཨནུབྷཝམཱནོ པཱཔཀམྨེ པརིཀྑཱིཎེ ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ མིཏྟཝིནྡཀོ དུབྦཙབྷིཀྑུ ཨཧོསི, དེཝརཱཛཱ པན ཨཧམེཝ ཨཧོསི’’ནྟི.

མིཏྟཝིནྡཀཛཱཏཀཝཎྞནཱ དུཏིཡཱ.

[༨༣] ༣. ཀཱལ༹ཀཎྞིཛཱཏཀཝཎྞནཱ

མིཏྟོ ¶ ¶ ཧཝེ སཏྟཔདེན ཧོཏཱིཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཨནཱཐཔིཎྜིཀསྶ མིཏྟཾ ཨཱརབྦྷ ཀཐེསི. སོ ཀིར ཨནཱཐཔིཎྜིཀེན སདྡྷིཾ སཧཔཾསུཀཱིལི༹ཀོ ཨེཀཱཙརིཡསྶེཝ སནྟིཀེ ཨུགྒཧིཏསིཔྤོ ནཱམེན ཀཱལ༹ཀཎྞཱི ནཱམ. སོ གཙྪནྟེ ཀཱལེ དུགྒཏོ ཧུཏྭཱ ¶ ཛཱིཝིཏུཾ ཨསཀྐོནྟོ སེཊྛིསྶ སནྟིཀཾ ཨགམཱསི. སོ ཏཾ སམསྶཱསེཏྭཱ པརིབྦཡཾ དཏྭཱ ཨཏྟནོ ཀུཊུམྦཾ པཊིཙྪཱཔེསི. སོ སེཊྛིནོ ཨུཔཀཱརཀོ ཧུཏྭཱ སབྦཀིཙྩཱནི ཀརོཏི. ཏཾ སེཊྛིསྶ སནྟིཀཾ ཨཱགཏཀཱལེ ‘‘ཏིཊྛ, ཀཱལ༹ཀཎྞི, ནིསཱིད, ཀཱལ༹ཀཎྞི, བྷུཉྫ ཀཱལ༹ཀཎྞཱི’’ཏི ཝདནྟི. ཨཐེཀདིཝསཾ སེཊྛིནོ མིཏྟཱམཙྩཱ སེཊྛིཾ ཨུཔསངྐམིཏྭཱ ཨེཝམཱཧཾསུ ‘‘མཧཱསེཊྛི, མཱ ཨེཏཾ ཏཝ སནྟིཀེ ཀརི, ‘ཏིཊྛ, ཀཱལ༹ཀཎྞི, ནིསཱིད ཀཱལ༹ཀཎྞི, བྷུཉྫ ཀཱལ༹ཀཎྞཱི’ཏི ཧི ཨིམིནཱ སདྡེན ཡཀྑོཔི པལཱཡེཡྻ, ན ཙེས ཏཡཱ སམཱནོ, དུགྒཏོ དུརཱུཔེཏོ, ཀིཾ ཏེ ཨིམིནཱ’’ཏི. ཨནཱཐཔིཎྜིཀོ ‘‘ནཱམཾ ནཱམ ཝོཧཱརམཏྟཾ, ན ཏཾ པཎྜིཏཱ པམཱཎཾ ཀརོནྟི, སུཏམངྒལིཀེན ནཱམ བྷཝིཏུཾ ན ཝཊྚཏི, ན སཀྐཱ མཡཱ ནཱམམཏྟཾ ནིསྶཱཡ སཧཔཾསུཀཱིལི༹ཀཾ སཧཱཡཾ པརིཙྩཛིཏུ’’ནྟི ཏེསཾ ཝཙནཾ ཨནཱདཱཡ ཨེཀདིཝསཾ ཨཏྟནོ བྷོགགཱམཾ གཙྪནྟོ ཏཾ གེཧརཀྑཀཾ ཀཏྭཱ ཨགམཱསི.

ཙོརཱ ‘‘སེཊྛི ཀིར བྷོགགཱམཾ གཏོ, གེཧམསྶ ཝིལུམྤིསྶཱམཱ’’ཏི ནཱནཱཝུདྷཧཏྠཱ རཏྟིབྷཱགེ ཨཱགནྟྭཱ གེཧཾ པརིཝཱརེསུཾ. ཨིཏརོཔི ཙོརཱནཉྙེཝ ཨཱགམནཾ ཨཱསངྐམཱནོ ཨནིདྡཱཡནྟོཝ ནིསཱིདི. སོ ཙོརཱནཾ ཨཱགཏབྷཱཝཾ ཉཏྭཱ མནུསྶེ པབོདྷེཏུཾ ‘‘ཏྭཾ སངྑཾ དྷམ, ཏྭཾ མུདིངྒཾ ཝཱདེཧཱི’’ཏི མཧཱསམཛྫཾ ཀརོནྟོ ཝིཡ སཀལནིཝེསནཾ ཨེཀསདྡཾ ཀཱརེསི. ཙོརཱ ‘‘སུཉྙཾ གེཧནྟི དུསྶུཏཾ ཨམྷེཧི, ཨཏྠེཝ ཨིདྷ མཧཱསེཊྛཱི’’ཏི པཱསཱཎམུགྒརཱདཱིནི ཏཏྠེཝ ཚཌྜེཏྭཱ པལཱཡིཾསུ.

པུནདིཝསེ མནུསྶཱ ཏཏྠ ཏཏྠ ཚཌྜིཏེ པཱསཱཎམུགྒརཱདཡོ དིསྭཱ སཾཝེགཔྤཏྟཱ ཧུཏྭཱ ‘‘སཙེ ཨཛྫ ཨེཝརཱུཔོ བུདྡྷིསམྤནྣོ གྷརཝིཙཱརཀོ ནཱབྷཝིསྶ, ཙོརེཧི ཡཐཱརུཙིཡཱ པཝིསིཏྭཱ སབྦཾ གེཧཾ ཝིལུཏྟཾ ཨསྶ, ཨིམཾ དལ༹ྷམིཏྟཾ ནིསྶཱཡ སེཊྛིནོ ཝུཌྜྷི ཛཱཏཱ’’ཏི ཏཾ པསཾསིཏྭཱ སེཊྛིསྶ བྷོགགཱམཏོ ཨཱགཏཀཱལེ སབྦཾ ཏཾ པཝཏྟིཾ ཨཱརོཙཡིཾསུ. ཨཐ ནེ སེཊྛི ཨཝོཙ ‘‘ཏུམྷེ ཨེཝརཱུཔཾ མམ གེཧརཀྑཀཾ མིཏྟཾ ནིཀྐཌྜྷཱཔེཐ, སཙཱཡཾ ཏུམྷཱཀཾ ཝཙནེན མཡཱ ནིཀྐཌྜྷིཏོ ཨསྶ, ཨཛྫ མེ ཀུཊུམྦཾ ཀིཉྩི ནཱབྷཝིསྶ, ནཱམཾ ནཱམ ཨཔྤམཱཎཾ, ཧིཏཙིཏྟམེཝ པམཱཎ’’ནྟི ཏསྶ ཨུཏྟརིཏརཾ པརིབྦཡཾ དཏྭཱ ‘‘ཨཏྠི དཱནི མེ ཨིདཾ ཀཐཱཔཱབྷཏ’’ནྟི ¶ ¶ སཏྠུ སནྟིཀཾ གནྟྭཱ ཨཱདིཏོ ¶ པཊྛཱཡ སབྦཾ ཏཾ པཝཏྟིཾ ཨཱརོཙེསི. སཏྠཱ ‘‘ན ཁོ, གཧཔཏི, ཨིདཱནེཝ ཀཱལ༹ཀཎྞིམིཏྟོ ཨཏྟནོ མིཏྟསྶ གྷརེ ཀུཊུམྦཾ རཀྑཏི, པུབྦེཔི རཀྑིཡེཝཱ’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ མཧཱཡསོ སེཊྛི ཨཧོསི. ཏསྶ ཀཱལ༹ཀཎྞཱི ནཱམ མིཏྟོཏི སབྦཾ པཙྩུཔྤནྣཝཏྠུསདིསམེཝ. བོདྷིསཏྟོ བྷོགགཱམཏོ ཨཱགཏོ ཏཾ པཝཏྟིཾ སུཏྭཱ ‘‘སཙེ མཡཱ ཏུམྷཱཀཾ ཝཙནེན ཨེཝརཱུཔོ མིཏྟོ ནིཀྐཌྜྷིཏོ ཨསྶ, ཨཛྫ མེ ཀུཊུམྦཾ ཀིཉྩི ནཱབྷཝིསྶཱ’’ཏི ཝཏྭཱ ཨིམཾ གཱཐམཱཧ –

༨༣.

‘‘མིཏྟོ ཧཝེ སཏྟཔདེན ཧོཏི, སཧཱཡོ པན དྭཱདསཀེན ཧོཏི;

མཱསཌྜྷམཱསེན ཙ ཉཱཏི ཧོཏི, ཏཏུཏྟརིཾ ཨཏྟསམོཔི ཧོཏི;

སོཧཾ ཀཐཾ ཨཏྟསུཁསྶ ཧེཏུ, ཙིརསནྠུཏཾ ཀཱལ༹ཀཎྞིཾ ཛཧེཡྻ’’ནྟི.

ཏཏྠ ཧཝེཏི ནིཔཱཏམཏྟཾ. མེཏྟཱཡཏཱིཏི མིཏྟོ, མེཏྟཾ པཙྩུཔཊྛཱཔེཏི, སིནེཧཾ ཀརོཏཱིཏི ཨཏྠོ. སོ པནེས སཏྟཔདེན ཧོཏི, ཨེཀཏོ སཏྟཔདཝཱིཏིཧཱརགམནམཏྟེན ཧོཏཱིཏི ཨཏྠོ. སཧཱཡོ པན དྭཱདསཀེན ཧོཏཱིཏི སབྦཀིཙྩཱནི ཨེཀཏོ ཀརཎཝསེན སབྦིརིཡཱཔཐེསུ སཧ གཙྪཏཱིཏི སཧཱཡོ. སོ པནེས དྭཱདསཀེན ཧོཏི, དྭཱདསཱཧཾ ཨེཀཏོ ནིཝཱསེན ཧོཏཱིཏི ཨཏྠོ. མཱསཌྜྷམཱསེན ཙཱཏི མཱསེན ཝཱ ཨཌྜྷམཱསེན ཝཱ. ཉཱཏི ཧོཏཱིཏི ཉཱཏིསམོ ཧོཏི. ཏཏུཏྟརིནྟི ཏཏོ ཨུཏྟརིཾ ཨེཀཏོ ཝཱསེན ཨཏྟསམོཔི ཧོཏིཡེཝ. ཛཧེཡྻནྟི ‘‘ཨེཝརཱུཔཾ སཧཱཡཾ ཀཐཾ ཛཧེཡྻ’’ནྟི མིཏྟསྶ གུཎཾ ཀཐེསི. ཏཏོ པཊྛཱཡ པུན ཀོཙི ཏསྶ ཨནྟརེ ཝཏྟཱ ནཱམ ནཱཧོསཱིཏི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཀཱལ༹ཀཎྞཱི ཨཱནནྡོ ཨཧོསི, བཱརཱཎསིསེཊྛི པན ཨཧམེཝ ཨཧོསི’’ནྟི.

ཀཱལ༹ཀཎྞིཛཱཏཀཝཎྞནཱ ཏཏིཡཱ.

[༨༤] ༤. ཨཏྠསྶདྭཱརཛཱཏཀཝཎྞནཱ

ཨཱརོགྱམིཙྪེ ¶ ¶ ¶ པརམཉྩ ལཱབྷནྟི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཨཏྠཀུསལཾ ཀུལཔུཏྟཾ ཨཱརབྦྷ ཀཐེསི. སཱཝཏྠིཡཉྷི ཨེཀསྶ མཧཱཝིབྷཝསྶ སེཊྛིནོ པུཏྟོ ཛཱཏིཡཱ སཏྟཝསྶོ པཉྙཝཱ ཨཏྠཀུསལོ. སོ ཨེཀདིཝསཾ པིཏརཾ ཨུཔསངྐམིཏྭཱ ཨཏྠསྶ དྭཱརཔཉྷཾ ནཱམ པུཙྪི, སོ ཏཾ ན ཛཱནཱཏི. ཨཐསྶ ཨེཏདཧོསི ‘‘ཨཡཾ པཉྷོ ཨཏིསུཁུམོ, ཋཔེཏྭཱ སབྦཉྙུབུདྡྷཾ ཨཉྙོ ཨུཔརི བྷཝགྒེན, ཧེཊྛཱ ཙ ཨཝཱིཙིནཱ པརིཙྪིནྣེ ལོཀསནྣིཝཱསེ ཨེཏཾ པཉྷཾ ཀཐེཏུཾ སམཏྠོ ནཱམ ནཏྠཱི’’ཏི. སོ པུཏྟམཱདཱཡ བཧུཾ མཱལཱགནྡྷཝིལེཔནཾ གཱཧཱཔེཏྭཱ ཛེཏཝནཾ གནྟྭཱ སཏྠཱརཾ པཱུཛེཏྭཱ ཝནྡིཏྭཱ ཨེཀམནྟཾ ནིསིནྣོ བྷགཝནྟཾ ཨེཏདཝོཙ ‘‘ཨཡཾ, བྷནྟེ, དཱརཀོ པཉྙཝཱ ཨཏྠཀུསལོ མཾ ཨཏྠསྶ དྭཱརཔཉྷཾ ནཱམ པུཙྪི, ཨཧཾ ཏཾ པཉྷཾ ཨཛཱནནྟོ ཏུམྷཱཀཾ སནྟིཀཾ ཨཱགཏོ, སཱདྷུ མེ, བྷནྟེ, བྷགཝཱ ཏཾ པཉྷཾ ཀཐེཏཱུ’’ཏི. སཏྠཱ ‘‘པུབྦེཔཱཧཾ, ཨུཔཱསཀ, ཨིམིནཱ ཀུམཱརཀེནེཏཾ པཉྷཾ པུཊྛོ, མཡཱ ཙསྶ ཀཐིཏོ, ཏདཱ ནཾ ཨེས ཛཱནཱཏི, ཨིདཱནི པན བྷཝསངྑེཔགཏཏྟཱ ན སལླཀྑེཏཱི’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ མཧཱཝིབྷཝོ སེཊྛི ཨཧོསི. ཨཐསྶ པུཏྟོ སཏྟཝསྶིཀོ ཛཱཏིཡཱ པཉྙཝཱ ཨཏྠཀུསལོ. སོ ཨེཀདིཝསཾ པིཏརཾ ཨུཔསངྐམིཏྭཱ ‘‘ཏཱཏ, ཨཏྠསྶ དྭཱརཾ ནཱམ ཀི’’ནྟི ཨཏྠསྶ དྭཱརཔཉྷཾ པུཙྪི. ཨཐསྶ པིཏཱ ཏཾ པཉྷཾ ཀཐེནྟོ ཨིམཾ གཱཐམཱཧ –

༨༤.

‘‘ཨཱརོགྱམིཙྪེ པརམཉྩ ལཱབྷཾ, སཱིལཉྩ ཝུདྡྷཱནུམཏཾ སུཏཉྩ;

དྷམྨཱནུཝཏྟཱི ཙ ཨལཱིནཏཱ ཙ, ཨཏྠསྶ དྭཱརཱ པམུཁཱ ཚལེ༹ཏེ’’ཏི.

ཏཏྠ ཨཱརོགྱམིཙྪེ པརམཉྩ ལཱབྷནྟི ཙ-ཀཱརོ ནིཔཱཏམཏྟཾ. ཏཱཏ, པཋམམེཝ ཨཱརོགྱསངྑཱཏཾ པརམཾ ལཱབྷཾ ཨིཙྪེཡྻཱཏི ཨིམམཏྠཾ དཱིཔེནྟོ ཨེཝམཱཧ. ཏཏྠ ཨཱརོགྱཾ ནཱམ སརཱིརསྶ ཙེཝ ཙིཏྟསྶ ཙ ཨརོགབྷཱཝོ ཨནཱཏུརཏཱ. སརཱིརེ ཧི རོགཱཏུརེ ནེཝ ཨལདྡྷཾ བྷོགལཱབྷཾ ཨུཔྤཱདེཏུཾ སཀྐོཏི, ན ¶ ལདྡྷཾ པརིབྷུཉྫིཏུཾ, ཨནཱཏུརེ པན ཨུབྷཡམྤེཏཾ སཀྐོཏི. ཙིཏྟེ ཙ ཀིལེསཱཏུརེ ནེཝ ཨལདྡྷཾ ཛྷཱནཱདིབྷེདཾ ལཱབྷཾ ཨུཔྤཱདེཏུཾ ¶ སཀྐོཏི, ན ལདྡྷཾ པུན སམཱཔཏྟིཝསེན པརིབྷུཉྫིཏུཾ. ཨེཏསྨིཾ ཨནཱརོགྱེ སཏི ཨལདྡྷོཔི ལཱབྷོ ན ལབྦྷཏི, ལདྡྷོཔི ནིརཏྠཀོ ཧོཏི, ཨསཏི པནེཏསྨིཾ ཨལདྡྷོཔི ལཱབྷོ ལབྦྷཏི, ལདྡྷོཔི སཱཏྠཀོ ཧོཏཱིཏི ཨཱརོགྱཾ ¶ པརམོ ལཱབྷོ ནཱམ. ཏཾ སབྦཔཋམཾ ཨིཙྪིཏབྦཾ. ཨིདམེཀཾ ཨཏྠསྶ དྭཱརནྟི ཨཡམེཏྠ ཨཏྠོ. སཱིལཉྩཱཏི ཨཱཙཱརསཱིལཾ. ཨིམིནཱ ལོཀཙཱརིཏྟཾ དསྶེཏི. ཝུདྡྷཱནུམཏནྟི གུཎཝུདྡྷཱནཾ པཎྜིཏཱནཾ ཨནུམཏཾ. ཨིམིནཱ ཉཱཎསམྤནྣཱནཾ གརཱུནཾ ཨོཝཱདཾ དསྶེཏི. སུཏཉྩཱཏི ཀཱརཎནིསྶིཏཾ སུཏཾ. ཨིམིནཱ ཨིམསྨིཾ ལོཀེ ཨཏྠནིསྶིཏཾ བཱཧུསཙྩཾ དསྶེཏི. དྷམྨཱནུཝཏྟཱི ཙཱཏི ཏིཝིདྷསྶ སུཙརིཏདྷམྨསྶ ཨནུཝཏྟནཾ. ཨིམིནཱ དུཙྩརིཏདྷམྨཾ ཝཛྫེཏྭཱ སུཙརིཏདྷམྨསྶ ཨནུཝཏྟནབྷཱཝཾ དསྶེཏི. ཨལཱིནཏཱ ཙཱཏི ཙིཏྟསྶ ཨལཱིནཏཱ ཨནཱིཙཏཱ. ཨིམིནཱ ཙིཏྟསྶ ཨསངྐོཙཏཾ པཎཱིཏབྷཱཝཾ ཨུཏྟམབྷཱཝཾ དསྶེཏི. ཨཏྠསྶ དྭཱརཱ པམུཁཱ ཚལེ༹ཏེཏི ཨཏྠོ ནཱམ ཝུཌྜྷི, ཏསྶ ཝུཌྜྷིསངྑཱཏསྶ ལོཀིཡལོཀུཏྟརསྶ ཨཏྠསྶ ཨེཏེ པམུཁཱ ཨུཏྟམཱ ཚ དྭཱརཱ ཨུཔཱཡཱ ཨདྷིགམམུཁཱནཱིཏི.

ཨེཝཾ བོདྷིསཏྟོ པུཏྟསྶ ཨཏྠསྶ དྭཱརཔཉྷཾ ཀཐེསི. སོ ཏཏོ པཊྛཱཡ ཏེསུ ཚསུ དྷམྨེསུ ཝཏྟི. བོདྷིསཏྟོཔི དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ པུཏྟོཝ པཙྩུཔྤནྣཔུཏྟོ, མཧཱསེཊྛི པན ཨཧམེཝ ཨཧོསི’’ནྟི.

ཨཏྠསྶདྭཱརཛཱཏཀཝཎྞནཱ ཙཏུཏྠཱ.

[༨༥] ༥. ཀིཾཔཀྐཛཱཏཀཝཎྞནཱ

ཨཱཡཏིཾ དོསཾ ནཱཉྙཱཡཱཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཨུཀྐཎྛིཏབྷིཀྑུཾ ཨཱརབྦྷ ཀཐེསི. ཨཉྙཏརོ ཀིར ཀུལཔུཏྟོ བུདྡྷསཱསནེ ཨུརཾ དཏྭཱ པབྦཛིཏོ ཨེཀདིཝསཾ སཱཝཏྠིཡཾ པིཎྜཱཡ ཙརནྟོ ཨེཀཾ ཨལངྐཏཨིཏྠིཾ དིསྭཱ ཨུཀྐཎྛི. ཨཐ ནཾ ཨཱཙརིཡུཔཛ྄ཛྷཱཡཱ སཏྠུ སནྟིཀཾ ཨཱནཡིཾསུ. སཏྠཱ ‘‘སཙྩཾ ཀིར ཏྭཾ བྷིཀྑུ ཨུཀྐཎྛིཏོསཱི’’ཏི པུཙྪིཏྭཱ ¶ ‘‘སཙྩ’’ནྟི ཝུཏྟེ ‘‘པཉྩ ཀཱམགུཎཱ ནཱམེཏེ བྷིཀྑུ པརིབྷོགཀཱལེ རམཎཱིཡཱ. སོ པན ཏེསཾ པརིབྷོགོ ནིརཡཱདཱིསུ པཊིསནྡྷིདཱཡཀཏྟཱ ཀིཾཔཀྐཕལཔརིབྷོགསདིསོ ཧོཏི. ཀིཾཔཀྐཕལཾ ནཱམ ཝཎྞགནྡྷརསསམྤནྣཾ, ཁཱདིཏཾ པན ཨནྟཱནི ཁཎྜིཏྭཱ ཛཱིཝིཏཀྑཡཾ པཱཔེཏི. པུབྦེ བཧཱུ བཱལཛནཱ ཏསྶ དོསཾ ཨདིསྭཱ ¶ ཝཎྞགནྡྷརསེསུ བཛ྄ཛྷིཏྭཱ ཏཾ ཕལཾ པརིབྷུཉྫིཏྭཱ ཛཱིཝིཏཀྑཡཾ པཱཔུཎིཾསཱུ’’ཏི ཝཏྭཱ ཏེཧི ཡཱཙིཏོ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ སཏྠཝཱཧོ ཧུཏྭཱ པཉྩཧི སཀཊསཏེཧི པུབྦནྟཱཔརནྟཾ གཙྪནྟོ ཨཊཝིམུཁཾ པཏྭཱ མནུསྶེ སནྣིཔཱཏེཏྭཱ ‘‘ཨིམིསྶཱ ཨཊཝིཡཱ ཝིསརུཀྑཱ ནཱམ ཨཏྠི, མཱ ཁོ མཾ ཨནཱཔུཙྪཱ པུབྦེ ཨཁཱདིཏཔུབྦཱནི ཕལཱཕལཱནི ཁཱདིཏྠཱ’’ཏི ཨོཝདི. མནུསྶཱ ཨཊཝིཾ ཨཏིཀྐམིཏྭཱ ཨཊཝིམུཁེ ཨེཀཾ ཀིཾཔཀྐརུཀྑཾ ཕལབྷཱརཨོཎམིཏསཱཁཾ ཨདྡསཾསུ. ཏསྶ ཁནྡྷསཱཁཱཔཏྟཕལཱནི སཎྛཱནཝཎྞརསགནྡྷེཧི ཨམྦསདིསཱནེཝ. ཏེསུ ཨེཀཙྩེ ཝཎྞགནྡྷརསེསུ བཛ྄ཛྷིཏྭཱ ཨམྦཕལསཉྙཱཡ ཕལཱནི ཁཱདིཾསུ, ཨེཀཙྩེ ‘‘སཏྠཝཱཧཾ པུཙྪིཏྭཱ ཁཱདིསྶཱམཱ’’ཏི གཧེཏྭཱ ཨཊྛཾསུ. བོདྷིསཏྟོ ཏཾ ཋཱནཾ པཏྭཱ ཡེ གཧེཏྭཱ ཋིཏཱ, ཏེ ཕལཱནི ཚཌྜཱཔེཏྭཱ, ཡེ ཁཱདམཱནཱ ཨཊྛཾསུ, ཏེ ཝམནཾ ཀཱརེཏྭཱ ཏེསཾ བྷེསཛྫཾ ཨདཱསི. ཏེསུ ཨེཀཙྩེ ཨརོགཱ ཛཱཏཱ, པཋམམེཝ ཁཱདིཏྭཱ ཋིཏཱ པན ཛཱིཝིཏཀྑཡཾ པཏྟཱ. བོདྷིསཏྟོཔི ཨིཙྪིཏཊྛཱནཾ སོཏྠིནཱ གནྟྭཱ ལཱབྷཾ ལབྷིཏྭཱ པུན སཀཊྛཱནམེཝ ཨཱགནྟྭཱ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ཏཾ ཝཏྠུཾ ཀཐེཏྭཱ ཨབྷིསམྦུདྡྷོ ཧུཏྭཱ ཨིམཾ གཱཐམཱཧ –

༨༥.

‘‘ཨཱཡཏིཾ དོསཾ ནཱཉྙཱཡ, ཡོ ཀཱམེ པཊིསེཝཏི;

ཝིཔཱཀནྟེ ཧནནྟི ནཾ, ཀིཾཔཀྐམིཝ བྷཀྑིཏ’’ནྟི.

ཏཏྠ ཨཱཡཏིཾ དོསཾ ནཱཉྙཱཡཱཏི ཨནཱགཏེ དོསཾ ན ཨཉྙཱཡ, ཨཛཱནིཏྭཱཏི ཨཏྠོ. ཡོ ཀཱམེ པཊིསེཝཏཱིཏི ཡོ ཝཏྠུཀཱམེ ཙ ཀིལེསཀཱམེ ཙ པཊིསེཝཏི. ཝིཔཱཀནྟེ ཧནནྟི ནནྟི ཏེ ཀཱམཱ ཏཾ པུརིསཾ ཨཏྟནོ ཝིཔཱཀསངྑཱཏེ ཨནྟེ ནིརཡཱདཱིསུ ཨུཔྤནྣཾ ནཱནཔྤཀཱརེན དུཀྑེན སཾཡོཛཡམཱནཱ ཧནནྟི. ཀཐཾ? ཀིཾཔཀྐམིཝ བྷཀྑིཏནྟི, ཡཐཱ པརིབྷོགཀཱལེ ¶ ཝཎྞགནྡྷརསསམྤཏྟིཡཱ མནཱཔཾ ཀིཾཔཀྐཕལཾ ཨནཱགཏདོསཾ ཨདིསྭཱ བྷཀྑིཏཾ ཨནྟེ ཧནཏི, ཛཱིཝིཏཀྑཡཾ པཱཔེཏི, ཨེཝཾ པརིབྷོགཀཱལེ མནཱཔཱཔི ཀཱམཱ ཝིཔཱཀཀཱལེ ཧནནྟཱིཏི དེསནཾ ཡཐཱནུསནྡྷིཾ པཱཔེཏྭཱ སཙྩཱནི པཀཱསེསི, སཙྩཔརིཡོསཱནེ ཨུཀྐཎྛིཏབྷིཀྑུ སོཏཱཔཏྟིཕལཾ ¶ པཱཔུཎི. སེསཔརིསཱཡཔི ཀེཙི སོཏཱཔནྣཱ, ཀེཙི སཀདཱགཱམིནོ, ཀེཙི ཨནཱགཱམིནོ, ཀེཙི ཨརཧནྟོ ཨཧེསུཾ.

སཏྠཱཔི ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ པརིསཱ བུདྡྷཔརིསཱ ཨཧོསི, སཏྠཝཱཧོ པན ཨཧམེཝ ཨཧོསི’’ནྟི.

ཀིཾཔཀྐཛཱཏཀཝཎྞནཱ པཉྩམཱ.

[༨༦] ༦. སཱིལཝཱིམཾསཀཛཱཏཀཝཎྞནཱ

སཱིལཾ ¶ ཀིརེཝ ཀལྱཱཎནྟི ཨིདཾ སཏྠཱ ཛེཏཝནེ ཝིཧརནྟོ ཨེཀཾ སཱིལཝཱིམཾསཀཾ བྲཱཧྨཎཾ ཨཱརབྦྷ ཀཐེསི. སོ ཀིར ཀོསལརཱཛཱནཾ ནིསྶཱཡ ཛཱིཝཏི ཏིསརཎཾ གཏོ ཨཁཎྜཔཉྩསཱིལོ ཏིཎྞཾ ཝེདཱནཾ པཱརགཱུ. རཱཛཱ ‘‘ཨཡཾ སཱིལཝཱ’’ཏི ཏསྶ ཨཏིརེཀསམྨཱནཾ ཀརོཏི. སོ ཙིནྟེསི ‘‘ཨཡཾ རཱཛཱ མཡ྄ཧཾ ཨཉྙེཧི བྲཱཧྨཎེཧི ཨཏིརེཀསམྨཱནཾ ཀརོཏི, ཨཏིཝིཡ མཾ གརུཾ ཀཏྭཱ པསྶཏི, ཀིཾ ནུ ཁོ ཨེས མམ ཛཱཏིགོཏྟཀུལཔྤདེསསིཔྤསམྤཏྟིཾ ནིསྶཱཡ ཨིམཾ སམྨཱནཾ ཀརོཏི, ཨུདཱཧུ སཱིལསམྤཏྟིཾ, ཝཱིམཾསིསྶཱམི ཏཱཝཱ’’ཏི. སོ ཨེཀདིཝསཾ རཱཛཱུཔཊྛཱནཾ གནྟྭཱ གྷརཾ ཨཱགཙྪནྟོ ཨེཀསྶ ཧེརཉྙིཀསྶ ཕལཀཏོ ཨནཱཔུཙྪིཏྭཱ ཨེཀཾ ཀཧཱཔཎཾ གཧེཏྭཱ ཨགམཱསི, ཧེརཉྙིཀོ བྲཱཧྨཎེ གརུབྷཱཝེན ཀིཉྩི ཨཝཏྭཱ ནིསཱིདི. པུནདིཝསེ དྭེ ཀཧཱཔཎེ གཎྷི, ཧེརཉྙིཀོ ཏཐེཝ ཨདྷིཝཱསེསི. ཏཏིཡདིཝསེ ཀཧཱཔཎམུཊྛིཾ ཨགྒཧེསི, ཨཐ ནཾ ཧེརཉྙིཀོ ‘‘ཨཛྫ ཏེ ཏཏིཡོ དིཝསོ རཱཛཀུཊུམྦཾ ཝིལུམྤནྟསྶཱ’’ཏི ‘‘རཱཛཀུཊུམྦཝིལུམྤཀཙོརོ མེ གཧིཏོ’’ཏི ཏིཀྑཏྟུཾ ཝིརཝི. ཨཐ ནཾ མནུསྶཱ ཨིཏོ ཙིཏོ ཙ ཨཱགནྟྭཱ ‘‘ཙིརཾདཱནི ཏྭཾ སཱིལཝཱ ཝིཡ ཝིཙརཱི’’ཏི དྭེ ཏཡོ པཧཱརེ དཏྭཱ བནྡྷིཏྭཱ རཉྙོ དསྶེསུཾ.

རཱཛཱ ¶ ཝིཔྤཊིསཱརཱི ཧུཏྭཱ ‘‘ཀསྨཱ, བྲཱཧྨཎ, ཨེཝརཱུཔཾ དུསྶཱིལཀམྨཾ ཀརོསཱི’’ཏི ཝཏྭཱ ‘‘གཙྪཐ, ཏསྶ རཱཛཱཎཾ ཀརོཐཱ’’ཏི ཨཱཧ. བྲཱཧྨཎོ ‘‘ནཱཧཾ, མཧཱརཱཛ, ཙོརོ’’ཏི ཨཱཧ. ཨཐ ‘‘ཀསྨཱ རཱཛཀུཊུམྦིཀསྶ ཕལཀཏོ ཀཧཱཔཎེ གཎྷཱི’’ཏི? ‘‘ཨེཏཾ མཡཱ ཏཡི མམ ཨཏིསམྨཱནཾ ཀརོནྟེ ‘ཀིཾ ནུ ཁོ རཱཛཱ མམ ཛཱཏིཨཱདཱིནི ནིསྶཱཡ ཨཏིསམྨཱནཾ ཀརོཏི, ཨུདཱཧུ སཱིལཾ ནིསྶཱཡཱ’ཏི ཝཱིམཾསནཏྠཱཡ ཀཏཾ, ཨིདཱནི པན མཡཱ ཨེཀཾསེན ཉཱཏཾ. ཡཐཱ སཱིལམེཝ ནིསྶཱཡ ཏཡཱ མམ སམྨཱནོ ཀཏོ, ན ཛཱཏིཨཱདཱིནི. ཏཐཱ ཧི མེ ཨིདཱནི རཱཛཱཎཾ ཀཱརེསི, སྭཱཧཾ ཨིམིནཱ ཀཱརཎེན ‘ཨིམསྨིཾ ལོཀེ སཱིལམེཝ ཨུཏྟམཾ སཱིལཾ པམུཁ’ནྟི སནྣིཊྛཱནཾ གཏོ. ཨིམསྶ པནཱཧཾ སཱིལསྶ ཨནུཙྪཝིཀཾ ¶ ཀརོནྟོ གེཧེ ཋིཏོ ཀིལེསེ པརིབྷུཉྫནྟོ ན སཀྑིསྶཱམི ཀཱཏུཾ, ཨཛྫེཝ ཛེཏཝནཾ གནྟྭཱ སཏྠུ སནྟིཀེ པབྦཛིསྶཱམི, པབྦཛྫཾ མེ དེཐ, དེཝཱ’’ཏི ཝཏྭཱ རཱཛཱནཾ ཨནུཛཱནཱཔེཏྭཱ ཛེཏཝནཱབྷིམུཁོ པཱཡཱསི.

ཨཐ ནཾ ཉཱཏིསུཧཛྫབནྡྷཝཱ སནྣིཔཏིཏྭཱ ནིཝཱརེཏུཾ ཨསཀྐོནྟཱ ནིཝཏྟིཾསུ. སོ སཏྠུ སནྟིཀཾ གནྟྭཱ པབྦཛྫཾ ཡཱཙིཏྭཱ པབྦཛྫཉྩ ཨུཔསམྤདཉྩ ལབྷིཏྭཱ ཨཝིསྶཊྛཀམྨཊྛཱནོ ཝིཔསྶནཾ ཝཌྜྷེཏྭཱ ཨརཧཏྟཾ པཏྭཱ སཏྠཱརཾ ཨུཔསངྐམིཏྭཱ ‘‘བྷནྟེ, མཡ྄ཧཾ པབྦཛྫཱ མཏྠཀཾ པཏྟཱ’’ཏི ¶ ཨཉྙཾ བྱཱཀཱསི. ཏསྶ ཏཾ ཨཉྙབྱཱཀརཎཾ བྷིཀྑུསངྒྷེ པཱཀཊཾ ཛཱཏཾ. ཨཐེཀདིཝསཾ དྷམྨསབྷཱཡཾ སནྣིཔཏིཏཱ བྷིཀྑཱུ ‘‘ཨཱཝུསོ, ཨསུཀོ ནཱམ རཉྙོ ཨུཔཊྛཱཀབྲཱཧྨཎོ ཨཏྟནོ སཱིལཾ ཝཱིམཾསིཏྭཱ རཱཛཱནཾ ཨཱཔུཙྪིཏྭཱ པབྦཛིཏྭཱ ཨརཧཏྟེ པཏིཊྛིཏོ’’ཏི ཏསྶ གུཎཾ ཀཐཡམཱནཱ ནིསཱིདིཾསུ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནི ཨཡམེཝ བྲཱཧྨཎོ ཨཏྟནོ སཱིལཾ ཝཱིམཾསིཏྭཱ པབྦཛིཏྭཱ ཨཏྟནོ པཏིཊྛཾ ཨཀཱསི, པུབྦེཔི པཎྜིཏཱ ཨཏྟནོ སཱིལཾ ཝཱིམཾསིཏྭཱ པབྦཛིཏྭཱ ཨཏྟནོ པཏིཊྛཾ ཀརིཾསཱུ’’ཏི ཝཏྭཱ ཏེཧི ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཏསྶ པུརོཧིཏོ ཨཧོསི དཱནཱདྷིམུཏྟོ སཱིལཛ྄ཛྷཱསཡོ ཨཁཎྜཔཉྩསཱིལོ. རཱཛཱ སེསབྲཱཧྨཎེཧི ཨཏིརེཀཾ ཏསྶ སམྨཱནཾ ཀརོཏཱིཏི སབྦཾ པུརིམསདིསམེཝ. བོདྷིསཏྟེ པན བནྡྷིཏྭཱ རཉྙོ སནྟིཀཾ ནཱིཡམཱནེ ¶ ཨཧིཏུཎྜིཀཱ ཨནྟརཝཱིཐིཡཾ སཔྤཾ ཀཱིལཱ༹པེནྟཱ ནངྒུཊྛེ གཎྷནྟི, གཱིཝཱཡ གཎྷནྟི, གལེ ཝེཋེནྟི. བོདྷིསཏྟོ ཏེ དིསྭཱ ‘‘མཱ, ཏཱཏཱ, ཨེཝཾ སཔྤཾ ནངྒུཊྛེ གཎྷཐ, མཱ གཱིཝཱཡ གཎྷཐ, མཱ གལེ ཝེཋེཐ. ཨཡཉྷི ཝོ ཌཾསིཏྭཱ ཛཱིཝིཏཀྑཡཾ པཱཔེཡྻཱ’’ཏི ཨཱཧ. ཨཧིཏུཎྜིཀཱ ‘‘ཨཡཾ, བྲཱཧྨཎ, སཔྤོ སཱིལཝཱ ཨཱཙཱརསམྤནྣོ ཏཱདིསོ དུསྶཱིལོ ན ཧོཏི, ཏྭཾ པན ཨཏྟནོ དུསྶཱིལཏཱཡ ཨནཱཙཱརེན རཱཛཀུཊུམྦཝིལུམྤཀཙོརོཏི བནྡྷིཏྭཱ ནཱིཡསཱི’’ཏི ཨཱཧཾསུ.

སོ ཙིནྟེསི ‘‘སཔྤཱཔི ཏཱཝ ཨཌཾསནྟཱ ཨཝིཧེཋེནྟཱ ‘སཱིལཝནྟོ’ཏི ནཱམཾ ལབྷནྟི, ཀིམངྒཾ པན མནུསྶབྷཱུཏཱ. སཱིལམེཝ ཨིམསྨིཾ ལོཀེ ཨུཏྟམཾ, ནཏྠི ¶ ཏཏོ ཨུཏྟརིཏར’’ནྟི. ཨཐ ནཾ ནེཏྭཱ རཉྙོ དསྶེསུཾ. རཱཛཱ ‘‘ཀིཾ ཨིདཾ, ཏཱཏཱ’’ཏི པུཙྪི. ‘‘རཱཛཀུཊུམྦཝིལུམྤཀོ ཙོརོ, དེཝཱ’’ཏི. ‘‘ཏེན ཧིསྶ རཱཛཱཎཾ ཀརོཐཱ’’ཏི. བྲཱཧྨཎོ ‘‘ནཱཧཾ, མཧཱརཱཛ, ཙོརོ’’ཏི ཨཱཧ. ‘‘ཨཐ ཀསྨཱ ཀཧཱཔཎེ ཨགྒཧེསཱི’’ཏི ཙ ཝུཏྟེ པུརིམནཡེནེཝ སབྦཾ ཨཱརོཙེནྟོ ‘‘སྭཱཧཾ ཨིམིནཱ ཀཱརཎེན ‘ཨིམསྨིཾ ལོཀེ སཱིལམེཝ ཨུཏྟམཾ, སཱིལཾ པཱམོཀྑ’ནྟི སནྣིཊྛཱནཾ གཏོ’’ཏི ཝཏྭཱ ‘‘ཏིཊྛཏུ ཏཱཝ ཨིདཾ, ཨཱསཱིཝིསོཔི ཏཱཝ ཨཌཾསནྟོ ཨཝིཧེཋེནྟོ ‘སཱིལཝཱ’ཏི ཝཏྟབྦཏཾ ལབྷཏི. ཨིམིནཱཔི ཀཱརཎེན སཱིལམེཝ ཨུཏྟམཾ, སཱིལཾ པཝར’’ནྟི སཱིལཾ ཝཎྞེནྟོ ཨིམཾ གཱཐམཱཧ –

༨༦.

‘‘སཱིལཾ ཀིརེཝ ཀལྱཱཎཾ, སཱིལཾ ལོཀེ ཨནུཏྟརཾ;

པསྶ གྷོརཝིསོ ནཱགོ, སཱིལཝཱཏི ན ཧཉྙཏཱི’’ཏི.

ཏཏྠ ¶ སཱིལཾ ཀིརེཝཱཏི ཀཱཡཝཱཙཱཙིཏྟེཧི ཨཝཱིཏིཀྐམསངྑཱཏཾ ཨཱཙཱརསཱིལམེཝ. ཀིརཱཏི ཨནུསྶཝཝསེན ཝདཏི. ཀལྱཱཎནྟི སུནྡརཏརཾ. ཨནུཏྟརནྟི ཛེཊྛཀཾ སབྦགུཎདཱཡཀཾ. པསྶཱཏི ཨཏྟནཱ དིཊྛཀཱརཎཾ ཨབྷིམུཁཾ ཀརོནྟོ ཀཐེཏི. སཱིལཝཱཏི ན ཧཉྙཏཱིཏི གྷོརཝིསོཔི སམཱནོ ཨཌཾསནཨཝིཧེཋནམཏྟཀེན སཱིལཝཱཏི པསཾསཾ ལབྷཏི, ན ཧཉྙཏི ན ཝིཧཉྙཏཱིཏི. ཨིམིནཱཔི ཀཱརཎེན སཱིལམེཝ ཨུཏྟམནྟི.

ཨེཝཾ བོདྷིསཏྟོ ཨིམཱཡ གཱཐཱཡ རཉྙོ དྷམྨཾ དེསེཏྭཱ ཀཱམེ པཧཱཡ ཨིསིཔབྦཛྫཾ པབྦཛིཏྭཱ ཧིམཝནྟཾ པཝིསིཏྭཱ པཉྩཱབྷིཉྙཱ ཨཊྛ སམཱཔཏྟིཡོ ནིབྦཏྟེཏྭཱ བྲཧྨལོཀཔརཱཡཎོ ཨཧོསི.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ རཱཛཱ ཨཱནནྡོ ཨཧོསི, རཱཛཔརིསཱ བུདྡྷཔརིསཱ, པུརོཧིཏོ པན ཨཧམེཝ ཨཧོསི’’ནྟི.

སཱིལཝཱིམཾསཀཛཱཏཀཝཎྞནཱ ཚཊྛཱ.

[༨༧] ༧. མངྒལཛཱཏཀཝཎྞནཱ

ཡསྶ མངྒལཱ སམཱུཧཏཱཏི ཨིདཾ སཏྠཱ ཝེལུ༹ཝནེ ཝིཧརནྟོ ཨེཀཾ སཱཊཀལཀྑཎབྲཱཧྨཎཾ ཨཱརབྦྷ ཀཐེསི. རཱཛགཧཝཱསིཀོ ¶ ཀིརེཀོ བྲཱཧྨཎོ ཀོཏུཧལམངྒལིཀོ ཏཱིསུ རཏནེསུ ཨཔྤསནྣོ མིཙྪཱདིཊྛིཀོ ཨཌྜྷོ མཧདྡྷནོ མཧཱབྷོགོ, ཏསྶ སམུགྒེ ཋཔིཏཾ སཱཊཀཡུགཾ མཱུསིཀཱ ཁཱདིཾསུ. ཨཐསྶ སཱིསཾ ནྷཱཡིཏྭཱ ‘‘སཱཊཀེ ཨཱཧརཐཱ’’ཏི ཝུཏྟཀཱལེ མཱུསིཀཱཡ ཁཱདིཏབྷཱཝཾ ཨཱརོཙཡིཾསུ. སོ ཙིནྟེསི ‘‘སཙེ ཨིདཾ མཱུསིཀཱདཊྛཾ སཱཊཀཡུགཾ ཨིམསྨིཾ གེཧེ བྷཝིསྶཏི, མཧཱཝིནཱསོ བྷཝིསྶཏི. ཨིདཉྷི ཨཝམངྒལཾ ཀཱལ༹ཀཎྞིསདིསཾ པུཏྟདྷཱིཏཱདཱིནཾ ཝཱ དཱསཀམྨཀརཱདཱིནཾ ཝཱ ན སཀྐཱ དཱཏུཾ. ཡོ ཧི ཨིདཾ གཎྷིསྶཏི, སབྦསྶ མཧཱཝིནཱསོ བྷཝིསྶཏི, ཨཱམཀསུསཱནེ ཏཾ ཚཌྜཱཔེསྶཱམི, ན ཁོ པན སཀྐཱ དཱསཀམྨཀརཱདཱིནཾ ཧཏྠེ དཱཏུཾ. ཏེ ཧི ཨེཏྠ ལོབྷཾ ཨུཔྤཱདེཏྭཱ ཨིམཾ གཧེཏྭཱ ཝིནཱསཾ པཱཔུཎེཡྻུཾ, པུཏྟསྶ ཏཾ ཧཏྠེ དསྶཱམཱི’’ཏི. སོ པུཏྟཾ པཀྐོསཱཔེཏྭཱ ཏམཏྠཾ ཨཱརོཙེཏྭཱ ‘‘ཏྭམྤི ནཾ, ཏཱཏ, ཧཏྠེན ཨཕུསིཏྭཱ དཎྜཀེན གཧེཏྭཱ ཨཱམཀསུསཱནེ ཚཌྜེཏྭཱ སཱིསཾ ནྷཱཡིཏྭཱ ཨེཧཱི’’ཏི པེསེསི.

སཏྠཱཔི ¶ ཁོ ཏཾ དིཝསཾ པཙྩཱུསསམཡེ བོདྷནེཡྻབནྡྷཝེ ཨོལོཀེནྟོ ཨིམེསཾ པིཏཱཔུཏྟཱནཾ སོཏཱཔཏྟིཕལསྶ ཨུཔནིསྶཡཾ དིསྭཱ མིགཝཱིཐིཾ གཧེཏྭཱ མིགལུདྡཀོ ཝིཡ གནྟྭཱ ཨཱམཀསུསཱནདྭཱརེ ནིསཱིདི ཚབྦཎྞབུདྡྷརསྨིཡོ ཝིསྶཛྫེནྟོ. མཱཎཝོཔི པིཏུ ཝཙནཾ སམྤཊིཙྪིཏྭཱ ཨཛགརསཔྤཾ ཝིཡ ཏཾ ཡུགསཱཊཀཾ ཡཊྛིཀོཊིཡཱ གཧེཏྭཱ ཨཱམཀསུསཱནདྭཱརཾ པཱཔུཎི. ཨཐ ནཾ སཏྠཱ ‘‘ཀིཾ ཀརོསི མཱཎཝཱ’’ཏི ཨཱཧ. ‘‘བྷོ གོཏམ, ཨིདཾ སཱཊཀཡུགཾ མཱུསིཀཱདཊྛཾ ཀཱལ༹ཀཎྞིསདིསཾ ཧལཱཧལཝིསཱུཔམཾ, མམ པིཏཱ ‘ཨཉྙོ ཨེཏཾ ཚཌྜེནྟོ ལོབྷཾ ཨུཔྤཱདེཏྭཱ གཎྷེཡྻཱ’ཏི ¶ བྷཡེན མཾ པཧིཎི, ཨཧམེཏཾ ཚཌྜེཏྭཱ སཱིསཾ ནྷཱཡིསྶཱམཱིཏི ཨཱགཏོམྷི, བྷོ གོཏམཱ’’ཏི. ‘‘ཏེན ཧི ཚཌྜེཧཱི’’ཏི. མཱཎཝོ ཚཌྜེསི, སཏྠཱ ‘‘ཨམྷཱཀཾ དཱནི ཝཊྚཏཱི’’ཏི ཏསྶ སམྨུཁཱཝ གཎྷི. ‘‘ཨཝམངྒལཾ, བྷོ གོཏམ, ཨེཏཾ ཀཱལ༹ཀཎྞིསདིསཾ, མཱ གཎྷི མཱ གཎྷཱི’’ཏི ཏསྨིཾ ཝཱརཡམཱནེཡེཝ ཏཾ གཧེཏྭཱ ཝེལུ༹ཝནཱབྷིམུཁོ པཱཡཱསི.

མཱཎཝོ ཝེགེན གནྟྭཱ པིཏུ ཨཱརོཙེསི ‘‘ཏཱཏ, མཡཱ ཨཱམཀསུསཱནེ ཚཌྜིཏཾ སཱཊཀཡུགཾ སམཎོ གོཏམོ ‘ཨམྷཱཀཾ ཝཊྚཏཱི’ཏི མཡཱ ཝཱརིཡམཱནོཔི གཧེཏྭཱ ཝེལུ༹ཝནཾ གཏོ’’ཏི. བྲཱཧྨཎོ ཙིནྟེསི ‘‘ཏཾ སཱཊཀཡུགཾ ཨཝམངྒལཾ ཀཱལ༹ཀཎྞིསདིསཾ, ཏཾ ཝལ༹ཉྫེནྟོ སམཎོཔི གོཏམོ ནསྶིསྶཏི, ཝིཧཱརོཔི ནསྶིསྶཏི, ཏཏོ ཨམྷཱཀཾ གརཧཱ བྷཝིསྶཏི, སམཎསྶ གོཏམསྶ ཨཉྙེ བཧཱུ སཱཊཀེ དཏྭཱ ཏཾ ཚཌྜཱཔེསྶཱམཱི’’ཏི. སོ བཧཱུ སཱཊཀེ གཱཧཱཔེཏྭཱ པུཏྟེན སདྡྷིཾ ཝེལུ༹ཝནཾ གནྟྭཱ སཏྠཱརཾ དིསྭཱ ཨེཀམནྟཾ ཋིཏོ ཨེཝམཱཧ ‘‘སཙྩཾ ཀིར ཝོ, བྷོ གོཏམ, ཨཱམཀསུསཱནེ ¶ སཱཊཀཡུགཾ གཧིཏ’’ནྟི? ‘‘སཙྩཾ, བྲཱཧྨཎཱ’’ཏི. ‘‘བྷོ གོཏམ, ཏཾ སཱཊཀཡུགཾ ཨཝམངྒལཾ, ཏུམྷེ ཏཾ པརིབྷུཉྫམཱནཱ ནསྶིསྶཐ, སཀལཝིཧཱརོཔི ནསྶིསྶཏི. སཙེ ཝོ ནིཝཱསནཾ ཝཱ པཱརུཔནཾ ཝཱ ནཔྤཧོཏི, ཨིམེ སཱཊཀེ གཧེཏྭཱ ཏཾ ཚཌྜཱཔེཐཱ’’ཏི. ཨཐ ནཾ སཏྠཱ ‘‘མཡཾ བྲཱཧྨཎ པབྦཛིཏཱ ནཱམ, ཨམྷཱཀཾ ཨཱམཀསུསཱནེ ཨནྟརཝཱིཐིཡཾ སངྐཱརཊྛཱནེ ནྷཱནཏིཏྠེ མཧཱམགྒེཏི ཨེཝརཱུཔེསུ ཋཱནེསུ ཚཌྜིཏཱ ཝཱ པཏིཏཱ ཝཱ པིལོཏིཀཱ ཝཊྚཏི, ཏྭཾ པན ན ཨིདཱནེཝ ཨེཝཾལདྡྷིཀོ, པུབྦེཔི ཨེཝཾལདྡྷིཀོཡེཝཱ’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ མགདྷརཊྛེ རཱཛགཧནགརེ དྷམྨིཀོ མགདྷརཱཛཱ རཛྫཾ ཀཱརེསི. ཏདཱ བོདྷིསཏྟོ ཨེཀསྨིཾ ཨུདིཙྩབྲཱཧྨཎཀུལེ ནིབྦཏྟིཏྭཱ ཝིཉྙུཏཾ པཏྟོ ཨིསིཔབྦཛྫཾ པབྦཛིཏྭཱ ཨབྷིཉྙཱ ཙ སམཱཔཏྟིཡོ ཙ ནིབྦཏྟེཏྭཱ ཧིམཝནྟེ ཝསམཱནོ ཨེཀསྨིཾ ཀཱལེ ཧིམཝནྟཏོ ནིཀྑམིཏྭཱ རཱཛགཧནགརེ རཱཛུཡྻཱནཾ པཏྭཱ ཏཏྠ ཝསིཏྭཱ དུཏིཡདིཝསེ བྷིཀྑཱཙཱརཏྠཱཡ ནགརཾ པཱཝིསི. རཱཛཱ ¶ ཏཾ དིསྭཱ པཀྐོསཱཔེཏྭཱ པཱསཱདེ ནིསཱིདཱཔེཏྭཱ བྷོཛེཏྭཱ ཨུཡྻཱནེཡེཝ ཝསནཏྠཱཡ པཊིཉྙཾ གཎྷི. བོདྷིསཏྟོ རཉྙོ ནིཝེསནེ བྷུཉྫིཏྭཱ ཨུཡྻཱནེ ཝསཏི. ཏསྨིཾ ཀཱལེ རཱཛགཧནགརེ དུསྶལཀྑཎབྲཱཧྨཎོ ¶ ནཱམ ཨཧོསི. ཏསྶ སམུགྒེ ཋཔིཏཾ སཱཊཀཡུགནྟི སབྦཾ པུརིམསདིསམེཝ.

མཱཎཝེ པན སུསཱནཾ གཙྪནྟེ བོདྷིསཏྟོ པཋམཏརཾ གནྟྭཱ སུསཱནདྭཱརེ ནིསཱིདིཏྭཱ ཏེན ཚཌྜིཏཾ སཱཊཀཡུགཾ གཧེཏྭཱ ཨུཡྻཱནཾ ཨགམཱསི. མཱཎཝོ གནྟྭཱ པིཏུ ཨཱརོཙེསི. པིཏཱ ‘‘རཱཛཀུལཱུཔཀོ ཏཱཔསོ ནསྶེཡྻཱ’’ཏི བོདྷིསཏྟསྶ སནྟིཀཾ གནྟྭཱ ‘‘ཏཱཔས, ཏཡཱ གཧིཏསཱཊཀེ ཚཌྜེཧི, མཱ ནསྶཱི’’ཏི ཨཱཧ. ཏཱཔསོ ‘‘ཨམྷཱཀཾ སུསཱནེ ཚཌྜིཏཔིལོཏིཀཱ ཝཊྚཏི, ན མཡཾ ཀོཏུཧལམངྒལིཀཱ, ཀོཏུཧལམངྒལཾ ནཱམེཏཾ ན བུདྡྷཔཙྩེཀབུདྡྷབོདྷིསཏྟེཧི ཝཎྞིཏཾ, ཏསྨཱ པཎྜིཏེན ནཱམ ཀོཏུཧལམངྒལིཀེན ན བྷཝིཏབྦ’’ནྟི བྲཱཧྨཎསྶ དྷམྨཾ དེསེསི. བྲཱཧྨཎོ དྷམྨཾ སུཏྭཱ དིཊྛིཾ བྷིནྡིཏྭཱ བོདྷིསཏྟཾ སརཎཾ གཏོ. བོདྷིསཏྟོཔི ཨཔརིཧཱིནཛ྄ཛྷཱནོ བྲཧྨལོཀཔརཱཡཎོ ཨཧོསི.

སཏྠཱཔི ¶ ཨིམཾ ཨཏཱིཏཾ ཨཱཧརིཏྭཱ ཨབྷིསམྦུདྡྷོ ཧུཏྭཱ བྲཱཧྨཎསྶ དྷམྨཾ དེསེནྟོ ཨིམཾ གཱཐམཱཧ –

༨༧.

‘‘ཡསྶ མངྒལཱ སམཱུཧཏཱ, ཨུཔྤཱཏཱ སུཔིནཱ ཙ ལཀྑཎཱ ཙ;

སོ མངྒལདོསཝཱིཏིཝཏྟོ, ཡུགཡོགཱདྷིགཏོ ན ཛཱཏུམེཏཱི’’ཏི.

ཏཏྠ ཡསྶ མངྒལཱ སམཱུཧཏཱཏི ཡསྶ ཨརཧཏོ ཁཱིཎཱསཝསྶ དིཊྛམངྒལཾ, སུཏམངྒལཾ, མུཏམངྒལནྟི ཨེཏེ མངྒལཱ སམུཙྪིནྣཱ. ཨུཔྤཱཏཱ སུཔིནཱ ཙ ལཀྑཎཱ ཙཱཏི ‘‘ཨེཝརཱུཔོ ཙནྡགྒཱཧོ བྷཝིསྶཏི, ཨེཝརཱུཔོ སཱུརིཡགྒཱཧོ བྷཝིསྶཏི, ཨེཝརཱུཔོ ནཀྑཏྟགྒཱཧོ བྷཝིསྶཏི, ཨེཝརཱུཔོ ཨུཀྐཱཔཱཏོ བྷཝིསྶཏི, ཨེཝརཱུཔོ དིསཱཌཱཧོ བྷཝིསྶཏཱི’’ཏི ཨིམེ པཉྩ མཧཱཨུཔྤཱཏཱ, ནཱནཔྤཀཱརཱ སུཔིནཱ, སུབྷགལཀྑཎཾ, དུབྦྷགལཀྑཎཾ, ཨིཏྠིལཀྑཎཾ, པུརིསལཀྑཎཾ, དཱསིལཀྑཎཾ, དཱསལཀྑཎཾ, ཨསིལཀྑཎཾ, ཧཏྠིལཀྑཎཾ, ཨསྶལཀྑཎཾ, ཨུསབྷལཀྑཎཾ, ཨཱཝུདྷལཀྑཎཾ, ཝཏྠལཀྑཎནྟི ཨེཝམཱདིཀཱནི ལཀྑཎཱནི ཨིམེ ཙ དིཊྛིཊྛཱནཱ ཡསྶ སམཱུཧཏཱ, ན ཨེཏེཧི ཨུཔྤཱཏཱདཱིཧི ཨཏྟནོ མངྒལཾ ཝཱ ཨཝམངྒལཾ ཝཱ པཙྩེཏི. སོ མངྒལདོསཝཱིཏིཝཏྟོཏི ¶ སོ ཁཱིཎཱསཝོ སབྦམངྒལདོསེ ཝཱིཏིཝཏྟོ ཨཏིཀྐནྟོ པཛཧིཏྭཱ ཋིཏོ. ཡུགཡོགཱདྷིགཏོཏི ‘‘ཀོདྷོ ཙ ཨུཔནཱཧོ ཙ, མཀྑོ ཙ པལཱ༹སོ ཙཱ’’ཏིཨཱདིནཱ ¶ (ཝིབྷ. ༨༣༣) ནཡེན དྭེ དྭེ ཨེཀཏོ ཨཱགཏཀིལེསཱ ཡུགཱ ནཱམ. ཀཱམཡོགོ, བྷཝཡོགོ, དིཊྛིཡོགོ, ཨཝིཛྫཱཡོགོཏི ཨིམེ སཾསཱརེ ཡོཛནབྷཱཝཏོ ཙཏྟཱརོ ཡོགཱ ནཱམ. ཏེ ཡུགེ ཙ ཡོགེ ཙཱཏི ཡུགཡོགེ ཨདྷིགཏོ ཨབྷིབྷཝིཏྭཱ གཏོ ཝཱིཏིཝཏྟོ སམཏིཀྐནྟོ ཁཱིཎཱསཝོ བྷིཀྑུ. ན ཛཱཏུམེཏཱིཏི པུན པཊིསནྡྷིཝསེན ཨེཀཾསེནེཝ ཨིམཾ ལོཀཾ ན ཨེཏི ནཱགཙྪཏཱིཏི.

ཨེཝཾ སཏྠཱ ཨིམཱཡ གཱཐཱཡ བྲཱཧྨཎསྶ དྷམྨཾ དེསེཏྭཱ སཙྩཱནི པཀཱསེསི, སཙྩཔརིཡོསཱནེ བྲཱཧྨཎོ སདྡྷིཾ པུཏྟེན སོཏཱཔཏྟིཕལེ པཏིཊྛཧི. སཏྠཱ ཛཱཏཀཾ སམོདྷཱནེསི – ‘‘ཏདཱ ཨེཏེཝ པིཏཱཔུཏྟཱ ཨིདཱནི པིཏཱཔུཏྟཱ ཨཧེསུཾ, ཏཱཔསོ པན ཨཧམེཝ ཨཧོསི’’ནྟི.

མངྒལཛཱཏཀཝཎྞནཱ སཏྟམཱ.

[༨༨] ༨. སཱརམྦྷཛཱཏཀཝཎྞནཱ

ཀལྱཱཎིམེཝ མུཉྩེཡྻཱཏི ཨིདཾ སཏྠཱ ཛེཏཝནེ ཝིཧརནྟོ ཨོམསཝཱདསིཀྑཱཔདཾ (པཱཙི. ༡༥) ཨཱརབྦྷ ཀཐེསི. དྭེཔི ཝཏྠཱུནི ཧེཊྛཱ ནནྡིཝིསཱལཛཱཏཀེ ཝུཏྟསདིསཱནེཝ. ཨིམསྨིཾ པན ཛཱཏཀེ བོདྷིསཏྟོ ¶ གནྡྷཱརརཊྛེ ཏཀྐསིལཱཡཾ ཨཉྙཏརསྶ བྲཱཧྨཎསྶ སཱརམྦྷོ ནཱམ བལིབདྡོ ཨཧོསི. སཏྠཱ ཨིདཾ ཨཏཱིཏཝཏྠུཾ ཀཐེཏྭཱ ཨབྷིསམྦུདྡྷོ ཧུཏྭཱ ཨིམཾ གཱཐམཱཧ –

༨༨.

‘‘ཀལྱཱཎིམེཝ མུཉྩེཡྻ, ན ཧི མུཉྩེཡྻ པཱཔིཀཾ;

མོཀྑོ ཀལྱཱཎིཡཱ སཱདྷུ, མུཏྭཱ ཏཔྤཏི པཱཔིཀ’’ནྟི.

ཏཏྠ ཀལྱཱཎིམེཝ མུཉྩེཡྻཱཏི ཙཏུདོསཝིནིམུཏྟཾ ཀལྱཱཎིཾ སུནྡརཾ ཨནཝཛྫཾ ཝཱཙམེཝ མུཉྩེཡྻ ཝིསྶཛྫེཡྻ ཀཐེཡྻ. ན ཧི མུཉྩེཡྻ པཱཔིཀནྟི པཱཔིཀཾ ལཱམིཀཾ པརེསཾ ཨཔྤིཡཾ ཨམནཱཔཾ ན མུཉྩེཡྻ ན ཀཐེཡྻ. མོཀྑོ ¶ ཀལྱཱཎིཡཱ སཱདྷཱུཏི ཀལྱཱཎཝཱཙཱཡ ཝིསྶཛྫནམེཝ ཨིམསྨིཾ ལོཀེ སཱདྷུ སུནྡརཾ བྷདྡཀཾ. མུཏྭཱ ཏཔྤཏི པཱཔིཀནྟི པཱཔིཀཾ ཕརུསཝཱཙཾ མུཉྩིཏྭཱ ཝིསྶཛྫེཏྭཱ ཀཐེཏྭཱ སོ པུགྒལོ ཏཔྤཏི སོཙཏི ཀིལམཏཱིཏི.

ཨེཝཾ སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ བྲཱཧྨཎོ ཨཱནནྡོ ཨཧོསི, བྲཱཧྨཎཱི ཨུཔྤལཝཎྞཱ, སཱརམྦྷོ པན ཨཧམེཝ ཨཧོསི’’ནྟི.

སཱརམྦྷཛཱཏཀཝཎྞནཱ ཨཊྛམཱ.

[༨༩] ༩. ཀུཧཀཛཱཏཀཝཎྞནཱ

ཝཱཙཱཝ ¶ ཀིར ཏེ ཨཱསཱིཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཀུཧཀབྷིཀྑུཾ ཨཱརབྦྷ ཀཐེསི. ཀུཧཀཝཏྠུ ཨུདྡཱལཀཛཱཏཀེ ཨཱཝི བྷཝིསྶཏི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ ཨེཀཾ གཱམཀཾ ཨུཔནིསྶཱཡ ཨེཀོ ཀཱུཊཛཊིལོ ཀུཧཀཏཱཔསོ ཝསཏི. ཨེཀོ ཀུཊུམྦིཀོ ཏསྶ ཨརཉྙེ པཎྞསཱལཾ ཀཱརེཏྭཱ ཏཏྠ ནཾ ཝཱསེནྟོ ཨཏྟནོ གེཧེ པཎཱིཏཱཧཱརེན པཊིཛགྒཏི. སོ ཏཾ ཀཱུཊཛཊིལཾ ‘‘སཱིལཝཱ ཨེསོ’’ཏི སདྡཧིཏྭཱ ཙོརབྷཡེན སུཝཎྞནིཀྑསཏཾ ཏསྶ པཎྞསཱལཾ ནེཏྭཱ བྷཱུམིགཏཾ ཀཏྭཱ ‘‘ཨིདཾ ཨོལོཀེཡྻཱསི, བྷནྟེ’’ཏི ཨཱཧ. ཨཐ ནཾ ཏཱཔསོ ‘‘པབྦཛིཏཱནཾ ནཱམ, ཨཱཝུསོ, ཨེཝརཱུཔཾ ཀཐེཏུཾ, ན ཝཊྚཏི, ཨམྷཱཀཾ པན པརསནྟཀེ ལོབྷོ ནཱམ ནཏྠཱི’’ཏི ཨཱཧ. སོ ‘‘སཱདྷུ, བྷནྟེ’’ཏི ཏསྶ ཝཙནཾ སདྡཧིཏྭཱ པཀྐཱམི. དུཊྛཏཱཔསོ ‘‘སཀྐཱ ཨེཏྟཀེན ཛཱིཝིཏུ’’ནྟི ¶ ཀཏིཔཱཧཾ ཨཏིཀྐམིཏྭཱ ཏཾ སུཝཎྞཾ གཧེཏྭཱ ཨནྟརཱམགྒེ ཨེཀསྨིཾ ཋཱནེ ཋཔེཏྭཱ ཨཱགནྟྭཱ པཎྞསཱལཱཡམེཝ ཝསིཏྭཱ པུནདིཝསེ ཏསྶ གེཧེ བྷཏྟཀིཙྩཾ ཀཏྭཱ ཨེཝམཱཧ ‘‘ཨཱཝུསོ, མཡཾ ཏུམྷེ ནིསྶཱཡ ཙིརཾ ཝསིམྷ, ཨཏིཙིརཾ ཨེཀསྨིཾ ཋཱནེ ཝསནྟཱནཾ མནུསྶེཧི སདྡྷིཾ སཾསགྒོ ཧོཏི, སཾསགྒོ ཙ ནཱམ པབྦཛིཏཱནཾ མལཾ, ཏསྨཱ གཙྪཱམཧ’’ནྟི ཝཏྭཱ ཏེན པུནཔྤུནཾ ཡཱཙིཡམཱནོཔི ནིཝཏྟིཏུཾ ན ཨིཙྪི. ཨཐ ནཾ སོ ‘‘ཨེཝཾ སནྟེ གཙྪཐ, བྷནྟེ’’ཏི ཡཱཝ གཱམདྭཱརཾ ཨནུགནྟྭཱ ནིཝཏྟི. ཏཱཔསོཔི ཐོཀཾ གནྟྭཱཝ ‘‘ཨིམཾ ཀུཊུམྦིཀཾ མཡཱ ཝཉྩེཏུཾ ཝཊྚཏཱི’’ཏི ཙིནྟེཏྭཱ ¶ ཛཊཱནཾ ཨནྟརེ ཏིཎཾ ཋཔེཏྭཱ པཊིནིཝཏྟི. ཀུཊུམྦིཀོ ‘‘ཀིཾ, བྷནྟེ, ནིཝཏྟིཏྠཱ’’ཏི པུཙྪི. ཨཱཝུསོ ཏུམྷཱཀཾ གེཧཙྪདནཏོ མེ ཛཊཱསུ ཨེཀཏིཎཾ ལགྒཾ, ཨདིནྣཱདཱནཉྩ ནཱམ པབྦཛིཏཱནཾ ན ཝཊྚཏི, ཏཾ ཨཱདཱཡ ཨཱགཏོམྷཱིཏི. ཀུཊུམྦིཀོ ‘‘ཚཌྜེཏྭཱ གཙྪཐ, བྷནྟེ’’ཏི ཝཏྭཱ ‘‘ཏིཎསལཱཀམྤི ནཱམ པརསནྟཀཾ ན གཎྷཱཏི, ཨཧོ ཀུཀྐུཙྩཀོ མེ ཨཡྻོ’’ཏི པསཱིདིཏྭཱ ཝནྡིཏྭཱ ཨུཡྻོཛེསི.

ཏདཱ པན བོདྷིསཏྟེན བྷཎྜཏྠཱཡ པཙྩནྟཾ གཙྪནྟེན ཏསྨིཾ ནིཝེསནེ ནིཝཱསོ གཧིཏོ ཧོཏི. སོ ཏཱཔསསྶ ཝཙནཾ སུཏྭཱཝ ‘‘ཨདྡྷཱ ཨིམིནཱ དུཊྛཏཱཔསེན ཨིམསྶ ཀིཉྩི གཧིཏཾ བྷཝིསྶཏཱི’’ཏི ཀུཊུམྦིཀཾ པུཙྪི ‘‘ཨཏྠི པན ཏེ, སམྨ, ཀིཉྩི ཨེཏསྶ ཏཱཔསསྶ སནྟིཀེ ནིཀྑིཏྟ’’ནྟི? ‘‘ཨཏྠི, སམྨ, སུཝཎྞནིཀྑསཏ’’ནྟི. ‘‘ཏེན ཧི གཙྪ, ཏཾ ཨུཔདྷཱརེཧཱི’’ཏི ¶ . སོ པཎྞསཱལཾ གནྟྭཱ ཏཾ ཨདིསྭཱ ཝེགེནཱགནྟྭཱ ‘‘ནཏྠི, སམྨཱ’’ཏི ཨཱཧ. ‘‘ན ཏེ སུཝཎྞཾ ཨཉྙེན གཧིཏཾ, ཏེནེཝ ཀུཧཀཏཱཔསེན གཧིཏཾ, ཨེཧི, ཏཾ ཨནུབནྡྷིཏྭཱ གཎྷཱམཱ’’ཏི ཝེགེན གནྟྭཱ ཀཱུཊཏཱཔསཾ གཎྷིཏྭཱ ཧཏྠེཧི ཙ པཱདེཧི ཙ པོཐེཏྭཱ སུཝཎྞཾ ཨཱཧརཱཔེཏྭཱ གཎྷིཾསུ. བོདྷིསཏྟོ སུཝཎྞཾ དིསྭཱ ‘‘ནིཀྑསཏཾ ཧརམཱནོ ཨསཛྫིཏྭཱ ཏིཎམཏྟེ སཏྟོསཱི’’ཏི ཝཏྭཱ ཏཾ གརཧནྟོ ཨིམཾ གཱཐམཱཧ –

༨༩.

‘‘ཝཱཙཱཝ ཀིར ཏེ ཨཱསི, སཎྷཱ སཁིལབྷཱཎིནོ;

ཏིཎམཏྟེ ཨསཛྫིཏྠོ, ནོ ཙ ནིཀྑསཏཾ ཧར’’ནྟི.

ཏཏྠ ¶ ཝཱཙཱཝ ཀིར ཏེ ཨཱསི, སཎྷཱ སཁིལབྷཱཎིནོཏི ‘‘པབྦཛིཏཱནཾ ཏིཎམཏྟམྤི ཨདིནྣཾ ཨཱདཱཏུཾ ན ཝཊྚཏཱི’’ཏི ཨེཝཾ སཁིལཾ མུདུཝཙནཾ ཝདནྟསྶ ཝཱཙཱ ཨེཝ ཀིར ཏེ སཎྷཱ ཨཱསི, ཝཙནམཏྟམེཝ མཊྛཾ ཨཧོསཱིཏི ཨཏྠོ. ཏིཎམཏྟེ ཨསཛྫིཏྠོཏི ཀཱུཊཛཊིལ ཨེཀིསྶཱ ཏིཎསལཱཀཱཡ ཀུཀྐུཙྩཾ ཀུརུམཱནོ ཏྭཾ སཏྟོ ཨཱསཏྟོ ལགྒོ ཨཧོསི. ནོ ཙ ནིཀྑསཏཾ ཧརནྟི ཨིམཾ པན ནིཀྑསཏཾ ཧརནྟོ ཨསཏྟོ ནིལླགྒོཝ ཛཱཏོསཱིཏི.

ཨེཝཾ བོདྷིསཏྟོ ཏཾ གརཧིཏྭཱ ‘‘མཱ པུན, ཀཱུཊཛཊིལ, ཨེཝརཱུཔམཀཱསཱི’’ཏི ཨོཝཱདཾ དཏྭཱ ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ ‘‘ན, བྷིཀྑཝེ, ཨིདཱནེཝེས བྷིཀྑུ ཀུཧཀོ, པུབྦེཔི ཀུཧཀོཡེཝཱ’’ཏི ཝཏྭཱ ཛཱཏཀཾ སམོདྷཱནེསི – ‘‘ཏདཱ ¶ ཀཱུཊཏཱཔསོ ཀུཧཀབྷིཀྑུ ཨཧོསི, པཎྜིཏཔུརིསོ པན ཨཧམེཝ ཨཧོསི’’ནྟི.

ཀུཧཀཛཱཏཀཝཎྞནཱ ནཝམཱ.

[༩༠] ༡༠. ཨཀཏཉྙུཛཱཏཀཝཎྞནཱ

ཡོ པུབྦེ ཀཏཀལྱཱཎོཏི ཨིདཾ སཏྠཱ ཛེཏཝནེ ཝིཧརནྟོ ཨནཱཐཔིཎྜིཀཾ ཨཱརབྦྷ ཀཐེསི. ཏསྶ ཀིརེཀོ པཙྩནྟཝཱསིཀོ སེཊྛི ཨདིཊྛསཧཱཡོ ཨཧོསི. སོ ཨེཀདཱ པཙྩནྟེ ཨུཊྛཱནཀབྷཎྜསྶ པཉྩ སཀཊསཏཱནི པཱུརེཏྭཱ ཀམྨནྟིཀམནུསྶེ ཨཱཧ – ‘‘གཙྪཐ, བྷོ, ཨིམཾ བྷཎྜཾ སཱཝཏྠིཾ ནེཏྭཱ ཨམྷཱཀཾ སཧཱཡཀསྶ ཨནཱཐཔིཎྜིཀམཧཱསེཊྛིསྶ པཙྩགྒྷེན ཝིཀྐིཎིཏྭཱ པཊིབྷཎྜཾ ¶ ཨཱཧརཐཱ’’ཏི. ཏེ ‘‘སཱདྷཱུ’’ཏི ཏསྶ ཝཙནཾ སམྤཊིཙྪིཏྭཱ སཱཝཏྠིཾ གནྟྭཱ མཧཱསེཊྛིཾ དིསྭཱ པཎྞཱཀཱརཾ དཏྭཱ ཏཾ པཝཏྟིཾ ཨཱརོཙེསུཾ. མཧཱསེཊྛི ‘‘སྭཱགཏཾ ཝོ’’ཏི ཏེསཾ ཨཱཝཱསཉྩ པརིབྦཡཉྩ དཱཔེཏྭཱ སཧཱཡཀསྶ སུཁཾ པུཙྪིཏྭཱ བྷཎྜཾ ཝིཀྐིཎིཏྭཱ པཊིབྷཎྜཾ དཱཔེསི. ཏེ པཙྩནྟཾ གནྟྭཱ ཏམཏྠཾ ཨཏྟནོ སེཊྛིསྶ ཨཱརོཙེསུཾ.

ཨཔརབྷཱགེ ཨནཱཐཔིཎྜིཀོཔི ཏཐེཝ པཉྩ སཀཊསཏཱནི ཏཏྠ པེསེསི. མནུསྶཱ ཏཏྠ གནྟྭཱ པཎྞཱཀཱརཾ ཨཱདཱཡ པཙྩནྟཝཱསིཀསེཊྛིཾ པསྶིཾསུ. སོ ‘‘ཀུཏོ ཨཱགཙྪཐཱ’’ཏི པུཙྪིཏྭཱ ‘‘སཱཝཏྠིཏོ ཏུམྷཱཀཾ སཧཱཡཀསྶ ཨནཱཐཔིཎྜིཀསྶ སནྟིཀཱ’’ཏི ཝུཏྟེ ‘‘ཨནཱཐཔིཎྜིཀོཏི ཀསྶཙི པུརིསསྶ ནཱམཾ བྷཝིསྶཏཱི’’ཏི པརིཧཱསཾ ཀཏྭཱ པཎྞཱཀཱརཾ གཧེཏྭཱ ‘‘གཙྪཐ ཏུམྷེ’’ཏི ཨུཡྻོཛེསི, ནེཝ ནིཝཱསཾ, ན པརིབྦཡཾ དཱཔེསི. ཏེ སཡམེཝ བྷཎྜཾ ཝིཀྐིཎིཏྭཱ པཊིབྷཎྜཾ ཨཱདཱཡ སཱཝཏྠིཾ ཨཱགནྟྭཱ སེཊྛིསྶ ཏཾ པཝཏྟིཾ ཨཱརོཙེསུཾ.

ཨཐ སོ པཙྩནྟཝཱསཱི ¶ པུནཔི ཨེཀཝཱརཾ ཏཐེཝ པཉྩ སཀཊསཏཱནི སཱཝཏྠིཾ པེསེསི, མནུསྶཱ པཎྞཱཀཱརཾ ཨཱདཱཡ མཧཱསེཊྛིཾ པསྶིཾསུ. ཏེ ¶ པན དིསྭཱ ཨནཱཐཔིཎྜིཀསྶ མནུསྶཱ ‘‘མཡཾ, སཱམི, ཨེཏེསཾ ནིཝཱསཉྩ བྷཏྟཉྩ པརིབྦཡཉྩ ཛཱནིསྶཱམཱ’’ཏི ཝཏྭཱ ཏེསཾ སཀཊཱནི བཧིནགརེ ཏཐཱརཱུཔེ ཋཱནེ མོཙཱཔེཏྭཱ ‘‘ཏུམྷེ ཨིདྷེཝ ཝསཐ, ཨམྷཱཀཾ ཝོ གྷརེ ཡཱགུབྷཏྟཉྩ པརིབྦཡོ ཙ བྷཝིསྶཏཱི’’ཏི གནྟྭཱ དཱསཀམྨཀརེ སནྣིཔཱཏེཏྭཱ མཛ྄ཛྷིམཡཱམསམནནྟརེ པཉྩ སཀཊསཏཱནི ཝིལུམྤིཏྭཱ ནིཝཱསནཔཱརུཔནཱནིཔི ནེསཾ ཨཙྪིནྡིཏྭཱ གོཎེ པལཱཔེཏྭཱ སཀཊཱནི ཝིཙཀྐཱནི ཀཏྭཱ བྷཱུམིཡཾ ཋཔེཏྭཱ ཙཀྐཱནིཔི གཎྷིཏྭཱཝ ཨགམཾསུ. པཙྩནྟཝཱསིནོ ནིཝཱསནམཏྟསྶཔི སཱམིཀཱ ཨཧུཏྭཱ བྷཱིཏཱ ཝེགེན པལཱཡིཏྭཱ པཙྩནྟམེཝ གཏཱ. སེཊྛིམནུསྶཱཔི ཏམཏྠཾ མཧཱསེཊྛིནོ ཨཱརོཙེསུཾ. སོ ‘‘ཨཏྠི དཱནིདཾ ཀཐཱཔཱབྷཏ’’ནྟི སཏྠུ སནྟིཀཾ གནྟྭཱ ཨཱདིཏོ པཊྛཱཡ སབྦཾ ཏཾ པཝཏྟིཾ ཨཱརོཙེསི. སཏྠཱ ‘‘ན ཁོ, གཧཔཏི, སོ པཙྩནྟཝཱསཱི ཨིདཱནེཝ ཨེཝཾསཱིལོ, པུབྦེཔི ཨེཝཾསཱིལོཡེཝ ཨཧོསཱི’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ བཱརཱཎསིཡཾ མཧཱཝིབྷཝོ སེཊྛི ཨཧོསི. ཏསྶེཀོ པཙྩནྟཝཱསིཀོ སེཊྛི ཨདིཊྛསཧཱཡོ ཨཧོསི. སབྦཾ ཨཏཱིཏཝཏྠུ པཙྩུཔྤནྣཝཏྠུསདིསམེཝ བོདྷིསཏྟོ པན ཨཏྟནོ མནུསྶེཧི ‘‘ཨཛྫ ཨམྷེཧི ཨིདཾ ནཱམ ཀཏ’’ནྟི ཨཱརོཙིཏེ ‘‘པཋམཾ ཨཏྟནོ ཀཏཾ ཨུཔཀཱརཾ ཨཛཱནནྟཱ པཙྪཱ ཨེཝརཱུཔཾ ལབྷནྟིཡེཝཱ’’ཏི ཝཏྭཱ སམྤཏྟཔརིསཱཡ དྷམྨཾ དེསེནྟོ ཨིམཾ གཱཐམཱཧ –

༩༠.

‘‘ཡོ ¶ པུབྦེ ཀཏཀལྱཱཎོ, ཀཏཏྠོ ནཱཝབུཛ྄ཛྷཏི;

པཙྪཱ ཀིཙྩེ སམུཔྤནྣེ, ཀཏྟཱརཾ ནཱདྷིགཙྪཏཱི’’ཏི.

ཏཏྲཱཡཾ པིཎྜཏྠོ – ཁཏྟིཡཱདཱིསུ ཡོ ཀོཙི པུརིསོ པུབྦེ པཋམཏརཾ ཨཉྙེན ཀཏཀལྱཱཎོ ཀཏཱུཔཀཱརོ ཀཏཏྠོ ནིཔྥཱདིཏཀིཙྩོ ཧུཏྭཱ ཏཾ པརེན ཨཏྟནི ཀཏཾ ཀལྱཱཎཉྩེཝ ཨཏྠཉྩ ན ཛཱནཱཏི, སོ པཙྪཱ ཨཏྟནོ ཀིཙྩེ སམུཔྤནྣེ ཏསྶ ཀིཙྩསྶ ཀཏྟཱརཾ ནཱདྷིགཙྪཏི ན ལབྷཏཱིཏི.

ཨེཝཾ བོདྷིསཏྟོ ཨིམཱཡ གཱཐཱཡ དྷམྨཾ དེསེཏྭཱ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ¶ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ པཙྩནྟཝཱསཱི ཨིདཱནཱིཔི པཙྩནྟཝཱསཱིཡེཝ, བཱརཱཎསིསེཊྛི པན ཨཧམེཝ ཨཧོསི’’ནྟི.

ཨཀཏཉྙུཛཱཏཀཝཎྞནཱ དསམཱ.

ཨཔཱཡིམྷཝགྒོ ནཝམོ.

ཏསྶུདྡཱནཾ –

སུརཱཔཱནཾ མིཏྟཝིནྡཾ, ཀཱལ༹ཀཎྞཱི ཨཏྠདྭཱརཾ;

ཀིཾཔཀྐསཱིལཝཱིམཾསཾ, མངྒལཉྩཱཔི སཱརམྦྷཾ;

ཀུཧཀཾ ཨཀཏཉྙཱུ ཙཱཏི.

༡༠. ལིཏྟཝགྒོ

[༩༡] ༡. ལིཏྟཛཱཏཀཝཎྞནཱ

ལིཏྟཾ ¶ པརམེན ཏེཛསཱཏི ཨིདཾ སཏྠཱ ཛེཏཝནེ ཝིཧརནྟོ ཨཔཙྩཝེཀྑིཏཔརིབྷོགཾ ཨཱརབྦྷ ཀཐེསི. ཏསྨིཾ ཀིར ཀཱལེ བྷིཀྑཱུ ཙཱིཝརཱདཱིནི ལབྷིཏྭཱ ཡེབྷུཡྻེན ཨཔཙྩཝེཀྑིཏྭཱ པརིབྷུཉྫནྟི. ཏེ ཙཏྟཱརོ པཙྩཡེ ཨཔཙྩཝེཀྑིཏྭཱ པརིབྷུཉྫམཱནཱ ཡེབྷུཡྻེན ནིརཡཏིརཙྪཱནཡོནིཏོ ན མུཙྩནྟི. སཏྠཱ ཏཾ ཀཱརཎཾ ཉཏྭཱ བྷིཀྑཱུནཾ ཨནེཀཔརིཡཱཡེན དྷམྨིཾ ཀཐཾ ཀཐེཏྭཱ ཨཔཙྩཝེཀྑིཏཔརིབྷོགེ ཨཱདཱིནཝཾ དསྶེཏྭཱ ‘‘བྷིཀྑཝེ, བྷིཀྑུནཱ ནཱམ ཙཏྟཱརོ པཙྩཡེ ལབྷིཏྭཱ ཨཔཙྩཝེཀྑིཏྭཱ པརིབྷུཉྫིཏུཾ ན ཝཊྚཏི, ཏསྨཱ ཨིཏོ པཊྛཱཡ ཙཏྟཱརོ པཙྩཡེ པཙྩཝེཀྑིཏྭཱ པརིབྷུཉྫེཡྻཱཐཱ’’ཏི པཙྩཝེཀྑནཝིདྷིཾ དསྶེནྟོ ‘‘ཨིདྷ པན, བྷིཀྑཝེ, བྷིཀྑུ པཊིསངྑཱ ཡོནིསོ ཙཱིཝརཾ པཊིསེཝཏི སཱིཏསྶ པཊིགྷཱཏཱཡཱ’’ཏིཨཱདིནཱ (མ. ནི. ༡.༢༣; ཨ. ནི. ༦.༥༨) ནཡེན ཏནྟིཾ ཋཔེཏྭཱ ‘‘བྷིཀྑཝེ, ཙཏྟཱརོ པཙྩཡེ ཨེཝཾ པཙྩཝེཀྑིཏྭཱ པརིབྷུཉྫིཏུཾ ཝཊྚཏི, ཨཔཙྩཝེཀྑིཏྭཱ པརིབྷོགོ ནཱམ ཧལཱཧལཝིསཔརིབྷོགསདིསོ. པོརཱཎཀཱ ཧི ཨཔཙྩཝེཀྑིཏྭཱ དོསཾ ཨཛཱནིཏྭཱ ཝིསཾ པརིབྷུཉྫིཏྭཱ ཝིཔཱཀནྟེ མཧཱདུཀྑཾ ཨནུབྷཝིཾསཱུ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨཉྙཏརསྨིཾ མཧཱབྷོགཀུལེ ནིབྦཏྟིཏྭཱ ཝཡཔྤཏྟོ ཨཀྑདྷུཏྟོ ཨཧོསི. ཨཐཱཔརོ ཀཱུཊཀྑདྷུཏྟོ བོདྷིསཏྟེན སདྡྷིཾ ཀཱིལ༹ནྟོ ཨཏྟནོ ཛཡེ ཝཏྟམཱནེ ཀེལི༹མཎྜལཾ ན བྷིནྡཏི, པརཱཛཡཀཱལེ པན ཨཀྑཾ མུཁེ པཀྑིཔིཏྭཱ ‘‘ཨཀྑོ ནཊྛོ’’ཏི ཀེལི༹མཎྜལཾ བྷིནྡིཏྭཱ པཀྐམཏི. བོདྷིསཏྟོ ¶ ཏསྶ ཏཾ ཀཱརཎཾ ཉཏྭཱ ‘‘ཧོཏུ, ཛཱནིསྶཱམེཏྠ པཏིརཱུཔཀཱརཎ’’ནྟི ཨཀྑེ ཨཱདཱཡ ཨཏྟནོ གྷརེ ཧལཱཧལཝིསེན རཉྫིཏྭཱ པུནཔྤུནཾ སུཀྑཱཔེཏྭཱ ཏེ ཨཱདཱཡ ཏསྶ སནྟིཀཾ གནྟྭཱ ‘‘ཨེཧི, སམྨ, ཨཀྑེཧི ཀཱིལཱ༹མཱ’’ཏི ཨཱཧ. སོ ‘‘སཱདྷུ, སམྨཱ’’ཏི ཀེལི༹མཎྜལཾ སཛྫེཏྭཱ ཏེན སདྡྷིཾ ཀཱིལ༹ནྟོ ཨཏྟནོ པརཱཛཡཀཱལེ ཨེཀཾ ཨཀྑཾ མུཁེ པཀྑིཔི. ཨཐ ནཾ བོདྷིསཏྟོ ཏཐཱ ཀརོནྟཾ དིསྭཱ ‘‘གིལཱཧི ཏཱཝ, པཙྪཱ ཨིདཾ ནཱམེཏནྟི ཛཱནིསྶསཱི’’ཏི ཙོདེཏུཾ ཨིམཾ གཱཐམཱཧ –

༩༡.

‘‘ལིཏྟཾ ¶ པརམེན ཏེཛསཱ, གིལམཀྑཾ པུརིསོ ན བུཛ྄ཛྷཏི;

གིལ རེ གིལ པཱཔདྷུཏྟཀ, པཙྪཱ ཏེ ཀཊུཀཾ བྷཝིསྶཏཱི’’ཏི.

ཏཏྠ ལིཏྟནྟི མཀྑིཏཾ རཉྫིཏཾ. པརམེན ཏེཛསཱཏི ཨུཏྟམཏེཛསམྤནྣེན ཧལཱཧལཝིསེན. གིལནྟི གིལནྟོ. ཨཀྑནྟི གུལ༹ཀཾ. ན བུཛ྄ཛྷཏཱིཏི ‘‘ཨཡཾ མེ གིལཏོ ཨིདཾ ནཱམ ཀརིསྶཏཱི’’ཏི ན ཛཱནཱཏི. གིལ རེཏི གིལཱཧི ཨརེ. གིལཱཏི པུནཔི ཙོདེནྟོ ཝདཏི. པཙྪཱ ཏེ ཀཊུཀཾ བྷཝིསྶཏཱིཏི ཨིམསྨིཾ ཏེ ཨཀྑེ གིལིཏེ པཙྪཱ ཨེཏཾ ཝིསཾ ཏིཁིཎཾ བྷཝིསྶཏཱིཏི ཨཏྠོ.

སོ བོདྷིསཏྟསྶ ཀཐེནྟསྶེཝ ཝིསཝེགེན མུཙྪིཏོ ཨཀྑཱིནི པརིཝཏྟེཏྭཱ ཁནྡྷཾ ནཱམེཏྭཱ པཏི. བོདྷིསཏྟོ ‘‘ཨིདཱནིསྶ ཛཱིཝིཏདཱནཾ དཱཏུཾ ཝཊྚཏཱི’’ཏི ཨོསདྷཔརིབྷཱཝིཏཾ ཝམནཡོགཾ དཏྭཱ ཝམེཏྭཱ སཔྤིཕཱཎིཏམདྷུསཀྐརཱདཡོ ཁཱདཱཔེཏྭཱ ཨརོགཾ ཀཏྭཱ ‘‘པུན ཨེཝརཱུཔཾ མཱ ཨཀཱསཱི’’ཏི ཨོཝདིཏྭཱ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ ‘‘བྷིཀྑཝེ, ཨཔཙྩཝེཀྑིཏཔརིབྷོགོ ནཱམ ཨཔཙྩཝེཀྑིཏྭཱ ཀཏཝིསཔརིབྷོགསདིསོ ཧོཏཱི’’ཏི ཝཏྭཱ ཛཱཏཀཾ སམོདྷཱནེསི – ‘‘ཏདཱ པཎྜིཏདྷུཏྟོ ཨཧམེཝ ཨཧོསིཾ, ཀཱུཊདྷུཏྟོ ¶ པནེཏྠ ན ཀཐཱིཡཏི, ཡཐཱ ཙ ཨེཏྠ, ཨེཝཾ སབྦཏྠ. ཡོ པན ཨིམསྨིཾ ཀཱལེ ན པཉྙཱཡཏི, སོ ན ཀཐཱིཡཏེཝཱ’’ཏི.

ལིཏྟཛཱཏཀཝཎྞནཱ པཋམཱ.

[༩༢] ༢. མཧཱསཱརཛཱཏཀཝཎྞནཱ

ཨུཀྐཊྛེ ¶ སཱུརམིཙྪནྟཱིཏི ཨིདཾ སཏྠཱ ཛེཏཝནེ ཝིཧརནྟོ ཨཱཡསྨནྟཾ ཨཱནནྡཏྠེརཾ ཨཱརབྦྷ ཀཐེསི. ཨེཀསྨིཉྷི སམཡེ ཀོསལརཉྙོ ཨིཏྠིཡོ ཙིནྟཡིཾསུ ‘‘བུདྡྷུཔྤཱདོ ནཱམ དུལླབྷོ, ཏཐཱ མནུསྶཔཊིལཱབྷོ, པརིཔུཎྞཱཡཏནཏཱ ཙ. མཡཉྩ ཨིམཾ དུལླབྷཾ ཁཎསམཝཱཡཾ ལབྷིཏྭཱཔི ཨཏྟནོ རུཙིཡཱ ཝིཧཱརཾ གནྟྭཱ དྷམྨཾ ཝཱ སོཏུཾ བུདྡྷཔཱུཛཾ ཝཱ ཀཱཏུཾ དཱནཾ ཝཱ དཱཏུཾ ན ལབྷཱམ, མཉྫཱུསཱཡ པཀྑིཏྟཱ ཝིཡ ཝསཱམ, རཉྙོ ཀཐེཏྭཱ ཨམྷཱཀཾ དྷམྨཾ དེསེཏུཾ ཨནུཙྪཝིཀཾ ཨེཀཾ བྷིཀྑུཾ པཀྐོསཱཔེཏྭཱ ཏསྶ སནྟིཀེ དྷམྨཾ སོསྶཱམ, ཏཏོ ཡཾ སཀྑིསྶཱམ, ཏཾ ཨུགྒཎྷིསྶཱམ, དཱནཱདཱིནི ཙ པུཉྙཱནི ཀརིསྶཱམ. ཨེཝཾ ནོ ཨཡཾ ཁཎཔཊིལཱབྷོ སཕལོ བྷཝིསྶཏཱི’’ཏི. ཏཱ སབྦཱཔི རཱཛཱནཾ ཨུཔསངྐམིཏྭཱ ཨཏྟནཱ ཙིནྟིཏཀཱརཎཾ ཀཐཡིཾསུ. རཱཛཱ ‘‘སཱདྷཱུ’’ཏི སམྤཊིཙྪི.

ཨཐེཀདིཝསཾ ¶ རཱཛཱ ཨུཡྻཱནཀཱིལ༹ཾ ཀཱིལི༹ཏུཀཱམོ ཨུཡྻཱནཔཱལཾ པཀྐོསཱཔེཏྭཱ ‘‘ཨུཡྻཱནཾ སོདྷེཧཱི’’ཏི ཨཱཧ. ཨུཡྻཱནཔཱལོ ཨུཡྻཱནཾ སོདྷེནྟོ སཏྠཱརཾ ཨཉྙཏརསྨིཾ རུཀྑམཱུལེ ནིསིནྣཾ དིསྭཱ རཉྙོ སནྟིཀཾ གནྟྭཱ ‘‘སུདྡྷཾ, དེཝ, ཨུཡྻཱནཾ, ཨཔིཙེཏྠ ཨཉྙཏརསྨིཾ རུཀྑམཱུལེ བྷགཝཱ ནིསིནྣོ’’ཏི ཨཱཧ. རཱཛཱ ‘‘སཱདྷུ, སམྨ, སཏྠུ སནྟིཀེ དྷམྨམྤི སོསྶཱམཱ’’ཏི ཨལངྐཏརཐཾ ཨབྷིརུཧིཏྭཱ ཨུཡྻཱནཾ གནྟྭཱ སཏྠུ སནྟིཀཾ ཨགམཱསི.

ཏསྨིཉྩ སམཡེ ཚཏྟཔཱཎི ནཱམེཀོ ཨནཱགཱམཱི ཨུཔཱསཀོ སཏྠུ སནྟིཀེ དྷམྨཾ སུཎམཱནོ ནིསིནྣོ ཧོཏི. རཱཛཱ ཏཾ དིསྭཱ ཨཱསངྐམཱནོ མུཧུཏྟཾ ཋཏྭཱ པུན ‘‘སཙཱཡཾ པཱཔཀོ བྷཝེཡྻ, ན སཏྠུ སནྟིཀེ ནིསཱིདིཏྭཱ དྷམྨཾ སུཎེཡྻ, ཨཔཱཔཀེན ཨིམིནཱ བྷཝིཏབྦ’’ནྟི ཙིནྟེཏྭཱ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསཱིདི. ཨུཔཱསཀོ བུདྡྷགཱརཝེན རཉྙོ ¶ པཙྩུཊྛཱནཾ ཝཱ ཝནྡནཾ ཝཱ ན ཨཀཱསི, ཏེནསྶ རཱཛཱ ཨནཏྟམནོ ཨཧོསི. སཏྠཱ ཏསྶ ཨནཏྟམནབྷཱཝཾ ཉཏྭཱ ཨུཔཱསཀསྶ གུཎཾ ཀཐེསི ‘‘ཨཡཾ, མཧཱརཱཛ, ཨུཔཱསཀོ བཧུསྶུཏོ ཨཱགཏཱགམོ ཀཱམེསུ ཝཱིཏརཱགོ’’ཏི རཱཛཱ ‘‘ན ཨིམིནཱ ཨོརཀེན བྷཝིཏབྦཾ, ཡསྶ སཏྠཱ གུཎཾ ཝཎྞེཏཱི’’ཏི ཙིནྟེཏྭཱ ‘‘ཨུཔཱསཀ, ཝདེཡྻཱསི ཡེན ཏེ ཨཏྠོ’’ཏི ཨཱཧ. ཨུཔཱསཀོ ‘‘སཱདྷཱུ’’ཏི སམྤཊིཙྪི. རཱཛཱ སཏྠུ སནྟིཀེ དྷམྨཾ སུཏྭཱ སཏྠཱརཾ པདཀྑིཎཾ ཀཏྭཱ པཀྐཱམི.

སོ ཨེཀདིཝསཾ ཨུཔརིཔཱསཱདེ མཧཱཝཱཏཔཱནཾ ཝིཝརིཏྭཱ ཋིཏོ ཏཾ ཨུཔཱསཀཾ བྷུཏྟཔཱཏརཱསཾ ཚཏྟམཱདཱཡ ཛེཏཝནཾ གཙྪནྟཾ དིསྭཱ པཀྐོསཱཔེཏྭཱ ཨེཝམཱཧ ‘‘ཏྭཾ ཀིར, ཨུཔཱསཀ, བཧུསྶུཏོ, ཨམྷཱཀཉྩ ཨིཏྠིཡོ དྷམྨཾ སོཏུཀཱམཱ ཙེཝ ཨུགྒཧེཏུཀཱམཱ ཙ, སཱདྷུ ཝཏསྶ སཙེ ཏཱསཾ དྷམྨཾ ཝཱཙེཡྻཱསཱི’’ཏི. ‘‘དེཝ, གིཧཱིནཾ ནཱམ རཱཛནྟེཔུརེ ¶ དྷམྨཾ དེསེཏུཾ ཝཱ ཝཱཙེཏུཾ ཝཱ ནཔྤཏིརཱུཔཾ, ཨཡྻཱནཾ ཨེཝ པཏིརཱུཔ’’ནྟི. རཱཛཱ ‘‘སཙྩཾ ཨེས ཝདཏཱི’’ཏི ཨུཡྻོཛེཏྭཱ ཨིཏྠིཡོ པཀྐོསཱཔེཏྭཱ ‘‘བྷདྡེ, ཨཧཾ ཏུམྷཱཀཾ དྷམྨདེསནཏྠཱཡ ཙ དྷམྨཝཱཙནཏྠཱཡ ཙ སཏྠུ སནྟིཀཾ གནྟྭཱ ཨེཀཾ བྷིཀྑུཾ ཡཱཙཱམི, ཨསཱིཏིཡཱ མཧཱསཱཝཀེསུ ཀཏརཾ ཡཱཙཱམཱི’’ཏི ཨཱཧ. ཏཱ སབྦཱཔི མནྟེཏྭཱ དྷམྨབྷཎྜཱགཱརིཀཾ ཨཱནནྡཏྠེརམེཝ ཨཱརོཙེསུཾ. རཱཛཱ སཏྠུ སནྟིཀཾ གནྟྭཱ ཝནྡིཏྭཱ ཨེཀམནྟཾ ནིསིནྣོ ཨེཝམཱཧ ‘‘བྷནྟེ, ཨམྷཱཀཾ གེཧེ ཨིཏྠིཡོ ཨཱནནྡཏྠེརསྶ སནྟིཀེ དྷམྨཾ སོཏུཉྩ ཨུགྒཎྷིཏུཉྩ ཨིཙྪནྟི, སཱདྷུ ཝཏ སཙེ ཐེརོ ཨམྷཱཀཾ གེཧེ དྷམྨཾ དེསེཡྻ ཙེཝ ཝཱཙེཡྻ ཙཱ’’ཏི. སཏྠཱ ‘‘སཱདྷཱུ’’ཏི སམྤཊིཙྪིཏྭཱ ཐེརཾ ཨཱཎཱཔེསི. ཏཏོ པཊྛཱཡ རཉྙོ ཨིཏྠིཡོ ཐེརསྶ སནྟིཀེ དྷམྨཾ སུཎནྟི ཙེཝ ཨུགྒཎྷནྟི ཙ.

ཨཐེཀདིཝསཾ རཉྙོ ཙཱུལཱ༹མཎི ནཊྛོ. རཱཛཱ ཏསྶ ནཊྛབྷཱཝཾ སུཏྭཱ ཨམཙྩེ ཨཱཎཱཔེསི ‘‘སབྦེ ¶ ཨནྟོཝལ༹ཉྫནཀེ མནུསྶེ གཧེཏྭཱ ཙཱུལཱ༹མཎིཾ ཨཱཧརཱཔེཐཱ’’ཏི. ཨམཙྩཱ མཱཏུགཱམེ ཨཱདིཾ ཀཏྭཱ ཙཱུལཱ༹མཎིཾ པརིཔུཙྪནྟཱ ཨདིསྭཱ མཧཱཛནཾ ཀིལམེནྟི. ཏཾ དིཝསཾ ཨཱནནྡཏྠེརོ རཱཛནིཝེསནཾ པཝིཊྛོ. ཡཐཱ ཏཱ ཨིཏྠིཡོ པུབྦེ ཐེརཾ དིསྭཱཝ ཧཊྛཏུཊྛཱ དྷམྨཾ སུཎནྟི ཙེཝ ཨུགྒཎྷནྟི ཙ, ཏཐཱ ཨཀཏྭཱ སབྦཱ དོམནསྶཔྤཏྟཱཝ ཨཧེསུཾ. ཏཏོ ཐེརེན ‘‘ཀསྨཱ ཏུམྷེ ཨཛྫ ཨེཝརཱུཔཱ ¶ ཛཱཏཱ’’ཏི པུཙྪིཏཱ ཨེཝམཱཧཾསུ ‘‘བྷནྟེ, རཉྙོ ཙཱུལཱ༹མཎིཾ པརིཡེསཱམཱཏི ཨམཙྩཱ མཱཏུགཱམེ ཨུཔཱདཱཡ ཨནྟོཝལ༹ཉྫནཀེ ཀིལམེནྟི, ན ཛཱནཱམ ཀསྶ ‘ཀིཾ བྷཝིསྶཏཱི’ཏི, ཏེནམྷ དོམནསྶཔྤཏྟཱ’’ཏི. ཐེརོ ‘‘མཱ ཙིནྟཡིཏྠཱ’’ཏི ཏཱ སམསྶཱསེཏྭཱ རཉྙོ སནྟིཀཾ གནྟྭཱ པཉྙཏྟཱསནེ ནིསཱིདིཏྭཱ ‘‘མཎི ཀིར ཏེ, མཧཱརཱཛ, ནཊྛོ’’ཏི པུཙྪི. ‘‘ཨཱམ, བྷནྟེ’’ཏི. ‘‘ཨསཀྑི པན ཏཾ ཨཱཧརཱཔེཏུ’’ནྟི. ‘‘བྷནྟེ, སབྦཾ ཨནྟོཛནཾ གཧེཏྭཱ ཀིལམེནྟོཔི ན སཀྐོམི ཨཱཧརཱཔེཏུ’’ནྟི. ‘‘མཧཱརཱཛ, མཧཱཛནཾ ཨཀིལམེཏྭཱཝ ཨཱཧརཎཱུཔཱཡོ ཨཏྠཱི’’ཏི. ‘‘ཀཏརོ, བྷནྟེ’’ཏི? ‘‘པིཎྜདཱནཾ, མཧཱརཱཛཱ’’ཏི. ‘‘ཀཏརཾ པིཎྜདཱནཾ, བྷནྟེ’’ཏི? ‘‘མཧཱརཱཛ, ཡཏྟཀེསུ ཨཱསངྐཱ ཨཏྠི, ཏེ གཧེཏྭཱ ཨེཀེཀསྶ ཨེཀེཀཾ པལཱལཔིཎྜཾ ཝཱ མཏྟིཀཱཔིཎྜཾ ཝཱ དཏྭཱ ‘ཨིམཾ པཙྩཱུསཀཱལེ ཨཱཧརིཏྭཱ ཨསུཀཊྛཱནེ ནཱམ པཱཏེཐཱ’ཏི ཝཏྟབྦཾ. ཡེན གཧིཏོ བྷཝིསྶཏི, སོ ཏསྨིཾ པཀྑིཔིཏྭཱ ཨཱཧརིསྶཏི. སཙེ པཋམདིཝསེཡེཝ པཱཏེནྟི, ཨིཙྩེཏཾ ཀུསལཾ. ནོ ཙེ པཱཏེནྟི, དུཏིཡདིཝསེཔི ཏཏིཡདིཝསེཔི ཏཐེཝ ཀཱཏབྦཾ. ཨེཝཾ མཧཱཛནོ ཙ ན ཀིལམིསྶཏི, མཎིཉྩ ལབྷིསྶསཱི’’ཏི ཨེཝཾ ཝཏྭཱ ཐེརོ ཨགམཱསི.

རཱཛཱ ཝུཏྟནཡེནེཝ ཏཡོ དིཝསེ དཱཔེསི, ནེཝ མཎིཾ ཨཱཧརིཾསུ. ཐེརོ ¶ ཏཏིཡདིཝསེ ཨཱགནྟྭཱ ‘‘ཀིཾ, མཧཱརཱཛ, པཱཏིཏོ མཎཱི’’ཏི པུཙྪི. ‘‘ན པཱཏེནྟི, བྷནྟེ’’ཏི. ‘‘ཏེན ཧི, མཧཱརཱཛ, མཧཱཏལསྨིཾཡེཝ པཊིཙྪནྣཊྛཱནེ མཧཱཙཱཊིཾ ཋཔཱཔེཏྭཱ ཨུདཀསྶ པཱུརཱཔེཏྭཱ སཱཎིཾ པརིཀྑིཔཱཔེཏྭཱ ‘སབྦེ ཨནྟོཝལ༹ཉྫནཀམནུསྶཱ ཙ ཨིཏྠིཡོ ཙ ཨུཏྟརཱསངྒཾ ཀཏྭཱ ཨེཀེཀོཝ ཨནྟོསཱཎིཾ པཝིསིཏྭཱ ཧཏྠཾ དྷོཝིཏྭཱ ཨཱགཙྪནྟཱུ’ཏི ཝདེཧཱི’’ཏི ཐེརོ ཨིམཾ ཨུཔཱཡཾ ཨཱཙིཀྑིཏྭཱ པཀྐཱམི. རཱཛཱ ཏཐཱ ཀཱརེསི. མཎིཙོརོ ཙིནྟེསི ‘‘དྷམྨབྷཎྜཱགཱརིཀོ ཨིམཾ ཨདྷིཀརཎཾ ཨཱདཱཡ མཎིཾ ཨདསྶེཏྭཱ ཨོསཀྐིསྶཏཱིཏི ཨཊྛཱནམེཏཾ, པཱཏེཏུཾ དཱནི ཝཊྚཏཱི’’ཏི མཎིཾ པཊིཙྪནྣཾ ཀཏྭཱ ཨཱདཱཡ ཨནྟོསཱཎིཾ པཝིསིཏྭཱ ཙཱཊིཡཾ པཱཏེཏྭཱ ནིཀྑམི. སབྦེསཾ ནིཀྑནྟཀཱལེ ཨུདཀཾ ཚཌྜེཏྭཱ མཎིཾ ཨདྡསཾསུ. རཱཛཱ ‘‘ཐེརཾ ནིསྶཱཡ མཧཱཛནཾ ཨཀིལམེཏྭཱཝ མེ མཎི ལདྡྷོ’’ཏི ཏུསྶི, ཨནྟོཝལ༹ཉྫནཀམནུསྶཱཔི ‘‘ཐེརཾ ནིསྶཱཡ མཧཱདུཀྑཏོ མུཏྟམྷཱ’’ཏི ཏུསྶིཾསུ. ‘‘ཐེརསྶཱནུབྷཱཝེན རཉྙོ ¶ ཙཱུལཱ༹མཎི ལདྡྷོ’’ཏི ཐེརསྶཱནུབྷཱཝོ སཀལནགརེ ཙེཝ བྷིཀྑུསངྒྷེ ཙ པཱཀཊོ ཛཱཏོ.

དྷམྨསབྷཱཡཾ ¶ སནྣིསིནྣཱ བྷིཀྑཱུ ཐེརསྶ གུཎཾ ཝཎྞཡིཾསུ ‘‘ཨཱཝུསོ, ཨཱནནྡཏྠེརོ ཨཏྟནོ བཧུསྶུཏཏཱཡ པཎྜིཙྩེན ཨུཔཱཡཀུསལཏཱཡ མཧཱཛནཾ ཨཀིལམེཏྭཱ ཨུཔཱཡེནེཝ རཉྙོ མཎིཾ དསྶེསཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནི ཨཱནནྡེནེཝ པརཧཏྠགཏཾ བྷཎྜཾ དསྶིཏཾ, པུབྦེཔི པཎྜིཏཱ མཧཱཛནཾ ཨཀིལམེཏྭཱ ཨུཔཱཡེནེཝ ཏིརཙྪཱནཧཏྠགཏཾ བྷཎྜཾ དསྶཡིཾསཱུ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ སབྦསིཔྤེསུ ནིཔྥཏྟིཾ པཏྟོ ཏསྶེཝ ཨམཙྩོ ཨཧོསི. ཨཐེཀདིཝསཾ རཱཛཱ མཧནྟེན པརིཝཱརེན ཨུཡྻཱནཾ གནྟྭཱ ཝནནྟརཱནི ཝིཙརིཏྭཱ ཨུདཀཀཱིལ༹ཾ ཀཱིལི༹ཏུཀཱམོ མངྒལཔོཀྑརཎིཾ ཨོཏརིཏྭཱ ཨིཏྠཱགཱརམྤི པཀྐོསི. ཨིཏྠིཡོ ཨཏྟནོ ཨཏྟནོ སཱིསཱུཔགགཱིཝཱུཔགཱདཱིནི ཨཱབྷརཎཱནི ཨོམུཉྩིཏྭཱ ཨུཏྟརཱསངྒེསུ པཀྑིཔིཏྭཱ སམུགྒཔིཊྛེསུ ཋཔེཏྭཱ དཱསིཡོ པཊིཙྪཱཔེཏྭཱ པོཀྑརཎིཾ ཨོཏརིཾསུ. ཨཐེཀཱ ཨུཡྻཱནམཀྐཊཱི སཱཁནྟརེ ནིསིནྣཱ དེཝིཾ པིལ༹ནྡྷནཱནི ཨོམུཉྩིཏྭཱ ཨུཏྟརཱསངྒེ པཀྑིཔིཏྭཱ སམུགྒཔིཊྛེ ཋཔཡམཱནཾ དིསྭཱ ཏསྶཱ མུཏྟཱཧཱརཾ པིལ༹ནྡྷིཏུཀཱམཱ ཧུཏྭཱ དཱསིཡཱ ¶ པམཱདཾ ཨོལོཀཡམཱནཱ ནིསཱིདི, དཱསཱིཔི ཏཾ རཀྑམཱནཱ ཏཧཾ ཏཧཾ ཨོལོཀེཏྭཱ ནིསིནྣཱཡེཝ ནིདྡཱཡིཏུཾ ཨཱརབྷི. མཀྐཊཱི ཏསྶཱ པམཱདབྷཱཝཾ ཉཏྭཱ ཝཱཏཝེགེན ཨོཏརིཏྭཱ མཧཱམུཏྟཱཧཱརཾ གཱིཝཱཡ པཊིམུཉྩིཏྭཱ ཝཱཏཝེགེན ཨུཔྤཏིཏྭཱ སཱཁནྟརེ ནིསཱིདིཏྭཱ ཨཉྙཱསཾ མཀྐཊཱིནཾ དསྶནབྷཡེན ཨེཀསྨིཾ རུཀྑསུསིརཊྛཱནེ ཋཔེཏྭཱ ཨུཔསནྟཱུཔསནྟཱ ཝིཡ ཏཾ རཀྑམཱནཱ ནིསཱིདི.

སཱཔི ཁོ དཱསཱི པཊིབུཛ྄ཛྷིཏྭཱ མུཏྟཱཧཱརཾ ཨཔསྶནྟཱི ཀམྤམཱནཱ ཨཉྙཾ ཨུཔཱཡཾ ཨདིསྭཱ ‘‘པུརིསོ དེཝིཡཱ མུཏྟཱཧཱརཾ གཧེཏྭཱ པལཱཏོ’’ཏི མཧཱཝིརཝཾ ཝིརཝི. ཨཱརཀྑམནུསྶཱ ཏཏོ ཏཏོ སནྣིཔཏིཏྭཱ ཏསྶཱ ཝཙནཾ སུཏྭཱ རཉྙོ ཨཱརོཙཡིཾསུ. རཱཛཱ ‘‘ཙོརཾ གཎྷཐཱ’’ཏི ཨཱཧ. པུརིསཱ ཨུཡྻཱནཱ ¶ ནིཀྑམིཏྭཱ ‘‘ཙོརཾ གཎྷཐ, ཙོརཾ གཎྷཐཱ’’ཏི ཨིཏོ ཙིཏོ ཙ ཨོལོཀེནྟི. ཨཐེཀོ ཛཱནཔདོ བལིཀཱརཀཔུརིསོ ཏཾ སདྡཾ སུཏྭཱ ཀམྤམཱནོ པལཱཡི. ཏཾ དིསྭཱ རཱཛཔུརིསཱ ‘‘ཨཡཾ ཙོརོ བྷཝིསྶཏཱི’’ཏི ཨནུབནྡྷིཏྭཱ ཏཾ གཧེཏྭཱ པོཐེཏྭཱ ‘‘ཨརེ, དུཊྛཙོར, ཨེཝཾ མཧཱསཱརཾ ནཱམ པིལ༹ནྡྷནཾ ཨཝཧརིསྶསཱི’’ཏི པརིབྷཱསིཾསུ. སོ ཙིནྟེསི ‘‘སཙཱཧཾ ‘ན གཎྷཱམཱི’ཏི ཝཀྑཱམི, ཨཛྫ མེ ཛཱིཝིཏཾ ནཏྠི, པོཐེནྟཱཡེཝ མཾ མཱརེསྶནྟི, སམྤཊིཙྪཱམི ན’’ནྟི. སོ ‘‘ཨཱམ, སཱམི, གཧིཏཾ མེ’’ཏི ཨཱཧ. ཨཐ ནཾ བནྡྷིཏྭཱ རཉྙོ སནྟིཀཾ ཨཱནཡིཾསུ. རཱཛཱཔི ནཾ པུཙྪི ‘‘གཧིཏཾ ཏེ མཧཱསཱརཔིལ༹ནྡྷན’’ནྟི? ‘‘ཨཱམ, དེཝཱ’’ཏི ¶ . ‘‘ཨིདཱནི ཏཾ ཀཧ’’ནྟི. ‘‘དེཝ, མཡཱ མཧཱསཱརཾ ནཱམ མཉྩཔཱིཋམྤི ན དིཊྛཔུབྦཾ, སེཊྛི པན མཾ མཧཱསཱརཔིལ༹ནྡྷནཾ གཎྷཱཔེསི, སོཧཾ ཏཾ གཧེཏྭཱཝ ཏསྶ ཨདཱསིཾ, སོ ནཾ ཛཱནཱཏཱི’’ཏི.

རཱཛཱ སེཊྛིཾ པཀྐོསཱཔེཏྭཱ ‘‘གཧིཏཾ ཏེ ཨིམསྶ ཧཏྠཏོ མཧཱསཱརཔིལ༹ནྡྷན’’ནྟི པུཙྪི. ‘‘ཨཱམ, དེཝཱ’’ཏི. ‘‘ཀཧཾ ཏ’’ནྟི. ‘‘པུརོཧིཏསྶ མེ དིནྣ’’ནྟི. པུརོཧིཏམྤི པཀྐོསཱཔེཏྭཱ ཏཐེཝ པུཙྪི, སོཔི སམྤཊིཙྪིཏྭཱ ‘‘གནྡྷབྦསྶ མེ དིནྣ’’ནྟི ཨཱཧ. ཏམྤི པཀྐོསཱཔེཏྭཱ ‘‘པུརོཧིཏསྶ ཧཏྠཏོ ཏེ མཧཱསཱརཔིལ༹ནྡྷནཾ གཧིཏ’’ནྟི པུཙྪི. ‘‘ཨཱམ, དེཝཱ’’ཏི. ‘‘ཀཧཾ ཏ’’ནྟི. ‘‘ཀིལེསཝསེན མེ ཝཎྞདཱསིཡཱ ¶ དིནྣ’’ནྟི. ཏམྤི པཀྐོསཱཔེཏྭཱ པུཙྪི, སཱ ‘‘ན གཎྷཱམཱི’’ཏི ཨཱཧ. ཏེ པཉྩ ཛནེ པུཙྪནྟཱནཉྙེཝ སཱུརིཡོ ཨཏྠཾ གཏོ. རཱཛཱ ‘‘ཨིདཱནི ཝིཀཱལོ ཛཱཏོ, སྭེ ཛཱནིསྶཱམཱ’’ཏི ཏེ པཉྩ ཛནེ ཨམཙྩཱནཾ དཏྭཱ ནགརཾ པཱཝིསི.

བོདྷིསཏྟོ ཙིནྟེསི – ‘‘ཨིདཾ པིལ༹ནྡྷནཾ ཨནྟོཝལ༹ཉྫེ ནཊྛཾ, ཨཡཉྩ གཧཔཏིཀོ བཧིཝལ༹ཉྫོ, དྭཱརེཔི བལཝཱརཀྑོ, ཏསྨཱ ཨནྟོཝལ༹ཉྫནཀཱནམྤི ཏཾ གཧེཏྭཱ པལཱཡིཏུཾ ན སཀྐཱ. ཨེཝཾ ནེཝ བཧིཝལ༹ཉྫནཀཱནཾ, ན ཨནྟོ, ཨུཡྻཱནེ ཝལ༹ཉྫནཀཱནཾ གཧཎཱུཔཱཡོ དིསྶཏི. ཨིམིནཱ དུགྒཏམནུསྶེན ‘སེཊྛིསྶ མེ དིནྣ’ནྟི ཀཐེནྟེན ཨཏྟནོ མོཀྑཏྠཱཡ ཀཐིཏཾ བྷཝིསྶཏི, སེཊྛིནཱཔི ‘པུརོཧིཏསྶ མེ དིནྣ’ནྟི ཀཐེནྟེན ‘ཨེཀཏོ ཧུཏྭཱ ནིཏྠརིསྶཱམཱི’ཏི ཙིནྟེཏྭཱ ཀཐིཏཾ བྷཝིསྶཏི, པུརོཧིཏེནཱཔི ‘གནྡྷབྦསྶ མེ དིནྣ’ནྟི ཀཐེནྟེན ‘བནྡྷནཱགཱརེ གནྡྷབྦཾ ནིསྶཱཡ སུཁེན ཝསིསྶཱམཱ’ཏི ཙིནྟེཏྭཱ ¶ ཀཐིཏཾ བྷཝིསྶཏི, གནྡྷབྦེནཱཔི ‘ཝཎྞདཱསིཡཱ མེ དིནྣ’ནྟི ཀཐེནྟེན ‘ཨེཀནྟེན ཨནུཀྐཎྛིཏཱ བྷཝིསྶཱམཱ’ཏི ཙིནྟེཏྭཱ ཀཐིཏཾ བྷཝིསྶཏི, ཨིམེཧི པཉྩཧིཔི ཙོརེཧི ན བྷཝིཏབྦཾ, ཨུཡྻཱནེ མཀྐཊཱ བཧཱུ, པིལ༹ནྡྷནེན ཨེཀིསྶཱ མཀྐཊིཡཱ ཧཏྠེ ཨཱརུལ༹ྷེན བྷཝིཏབྦ’’ནྟི. སོ རཱཛཱནཾ ཨུཔསངྐམིཏྭཱ ‘‘མཧཱརཱཛ, ཙོརེ ཨམྷཱཀཾ ནིཡྻཱདེཐ, མཡཾ ཏཾ ཀིཙྩཾ སོདྷེསྶཱམཱ’’ཏི ཨཱཧ. རཱཛཱ ‘‘སཱདྷུ, པཎྜིཏ, སོདྷེཧཱི’’ཏི ཏསྶ ནིཡྻཱདེསི.

བོདྷིསཏྟོ ཨཏྟནོ དཱསཔུརིསེ པཀྐོསཱཔེཏྭཱ ཏེ པཉྩ ཛནེ ཨེཀསྨིཾཡེཝ ཋཱནེ ཝསཱཔེཏྭཱ སམནྟཱ ཨཱརཀྑཾ ཀཏྭཱ ཀཎྞཾ དཏྭཱ ‘‘ཡཾ ཏེ ཨཉྙམཉྙཾ ཀཐེནྟི, ཏཾ མཡ྄ཧཾ ཨཱརོཙེཐཱ’’ཏི ཝཏྭཱ པཀྐཱམི. ཏེ ཏཐཱ ཨཀཾསུ. ཏཏོ མནུསྶཱནཾ སནྣིསིནྣཝེལཱཡ སེཊྛི ཏཾ གཧཔཏིཀཾ ཨཱཧ – ‘‘ཨརེ, དུཊྛགཧཔཏི, ཏཡཱ ཨཧཾ, མཡཱ ཝཱ ཏྭཾ ཀཧཾ དིཊྛཔུབྦོ, ཀདཱ ཏེ མཡ྄ཧཾ ¶ པིལ༹ནྡྷནཾ དིནྣ’’ནྟི ཨཱཧ. སོ ‘‘སཱམི མཧཱསེཊྛི, ཨཧཾ མཧཱསཱརཾ ནཱམ རུཀྑསཱརཔཱདཀཾ མཉྩཔཱིཋམྤི ན ཛཱནཱམི, ‘ཏཾ ནིསྶཱཡ པན མོཀྑཾ ལབྷིསྶཱམཱི’ཏི ཨེཝཾ ཨཝཙཾ, མཱ མེ ཀུཛ྄ཛྷ, སཱམཱི’’ཏི ཨཱཧ. པུརོཧིཏོཔི ¶ སེཊྛིཾ ཨཱཧ ‘‘མཧཱསེཊྛི, ཏྭཾ ཨིམིནཱ ཨཏྟནོ ཨདིནྣཀམེཝ མཡ྄ཧཾ ཀཐཾ ཨདཱསཱི’’ཏི? ‘‘མཡམྤི དྭེ ཨིསྶརཱ, ཨམྷཱཀཾ ཨེཀཏོ ཧུཏྭཱ ཋིཏཀཱལེ ཀམྨཾ ཁིཔྤཾ ནིཔྥཛྫིསྶཏཱི’’ཏི ཀཐེསིནྟི. གནྡྷབྦོཔི པུརོཧིཏཾ ཨཱཧ ‘‘བྲཱཧྨཎ, ཀདཱ ཏཡཱ མཡ྄ཧཾ པིལ༹ནྡྷནཾ དིནྣ’’ནྟི? ‘‘ཨཧཾ ཏཾ ནིསྶཱཡ ཝསནཊྛཱནེ སུཁཾ ཝསིསྶཱམཱི’’ཏི ཀཐེསིནྟི. ཝཎྞདཱསཱིཔི གནྡྷབྦཾ ཨཱཧ ‘‘ཨརེ དུཊྛགནྡྷབྦ, ཨཧཾ ཀདཱ ཏཝ སནྟིཀཾ གཏཔུབྦཱ, ཏྭཾ ཝཱ མམ སནྟིཀཾ ཨཱགཏཔུབྦོ, ཀདཱ ཏེ མཡ྄ཧཾ པིལ༹ནྡྷནཾ དིནྣ’’ནྟི? བྷགིནི ཀིཾཀཱརཎཱ ཀུཛ྄ཛྷསི, ‘‘ཨམྷེསུ པཉྩསུ ཨེཀཏོ ཝསནྟེསུ གྷརཱཝཱསོ བྷཝིསྶཏི, ཨནུཀྐཎྛམཱནཱ སུཁཾ ཝསིསྶཱམཱ’’ཏི ཀཐེསིནྟི. བོདྷིསཏྟོ པཡོཛིཏམནུསྶཱནཾ སནྟིཀཱ ཏཾ ཀཐཾ སུཏྭཱ ཏེསཾ ཏཐཏོ ཨཙོརབྷཱཝཾ ཉཏྭཱ ‘‘མཀྐཊིཡཱ གཧིཏཔིལ༹ནྡྷནཾ ཨུཔཱཡེནེཝ པཱཏེསྶཱམཱི’’ཏི གེཎྜུམཡཱནི བཧཱུནི པིལ༹ནྡྷནཱནི ཀཱརེཏྭཱ ཨུཡྻཱནེ མཀྐཊིཡོ གཱཧཱཔེཏྭཱ ཧཏྠཔཱདགཱིཝཱསུ གེཎྜུཔིལ༹ནྡྷནཱནི པིལ༹ནྡྷཱཔེཏྭཱ ཝིསྶཛྫེསི. ཨིཏརཱ མཀྐཊཱི པིལ༹ནྡྷནཾ རཀྑམཱནཱ ཨུཡྻཱནེ ཨེཝ ནིསཱིདི.

བོདྷིསཏྟོ མནུསྶེ ཨཱཎཱཔེསི ‘‘གཙྪཐ ཏུམྷེ, ཨུཡྻཱནེ སབྦཱ མཀྐཊིཡོ ཨུཔདྷཱརེཐ, ཡསྶཱ ཏཾ པིལ༹ནྡྷནཾ པསྶཐ, ཏཾ ཨུཏྟཱསེཏྭཱ པིལ༹ནྡྷནཾ གཎྷཐཱ’’ཏི. ཏཱཔི ཁོ མཀྐཊིཡོ ‘‘པིལ༹ནྡྷནཾ ནོ ལདྡྷ’’ནྟི ཏུཊྛཔཧཊྛཱ ¶ ཨུཡྻཱནེ ཝིཙརནྟིཡོ ཏསྶཱ སནྟིཀཾ གནྟྭཱ ‘‘པསྶ ཨམྷཱཀཾ པིལ༹ནྡྷན’’ནྟི ཨཱཧཾསུ. སཱ མཀྐཊཱི ཨསཧམཱནཱ ‘‘ཀིཾ ཨིམིནཱ གེཎྜུཔིལ༹ནྡྷནེནཱ’’ཏི མུཏྟཱཧཱརཾ པིལ༹ནྡྷིཏྭཱ ནིཀྑམི. ཨཐ ནཾ ཏེ པུརིསཱ དིསྭཱ པིལ༹ནྡྷནཾ ཚཌྜཱཔེཏྭཱ ཨཱཧརིཏྭཱ བོདྷིསཏྟསྶ ཨདཾསུ. སོ ཏཾ ཨཱདཱཡ རཉྙོ དསྶེཏྭཱ ‘‘ཨིདཾ ཏེ དེཝ པིལ༹ནྡྷནཾ, ཏེ པཉྩཔི ཨཙོརཱ, ཨིདཾ པན ཨུཡྻཱནེ མཀྐཊིཡཱ ཨཱབྷཏ’’ནྟི ཨཱཧ. ‘‘ཀཐཾ པན ཏེ, པཎྜིཏ, མཀྐཊིཡཱ ཧཏྠཾ ཨཱརུལ༹ྷབྷཱཝོ ཉཱཏོ, ཀཐཾ ཏེ གཧིཏ’’ནྟི? སོ སབྦཾ ཨཱཙིཀྑི. རཱཛཱ ཏུཊྛམཱནསོ ‘‘སངྒཱམསཱིསཱདཱིསུ ¶ ནཱམ སཱུརཱདཡོ ཨིཙྪིཏབྦཱ ཧོནྟཱི’’ཏི བོདྷིསཏྟསྶ ཐུཏིཾ ཀརོནྟོ ཨིམཾ གཱཐམཱཧ –

༩༢.

‘‘ཨུཀྐཊྛེ སཱུརམིཙྪནྟི, མནྟཱིསུ ཨཀུཏཱུཧལཾ;

པིཡཉྩ ཨནྣཔཱནམྷི, ཨཏྠེ ཛཱཏེ ཙ པཎྜིཏ’’ནྟི.

ཏཏྠ ཨུཀྐཊྛེཏི ཨུཔཀཊྛེ, ཨུབྷཏོབྱཱུལ༹ྷེ སངྒཱམེ སམྤཧཱརེ ཝཏྟམཱནེཏི ཨཏྠོ. སཱུརམིཙྪནྟཱིཏི ¶ ཨསནིཡཱཔི མཏྠཀེ པཏམཱནཱཡ ཨཔལཱཡིནཾ སཱུརཾ ཨིཙྪནྟི, ཏསྨིཾ ཁཎེ ཨེཝརཱུཔོ སངྒཱམཡོདྷོ པཏྠེཏབྦོ ཧོཏི. མནྟཱིསུ ཨཀུཏཱུཧལནྟི ཀཏྟབྦཱཀཏྟབྦཀིཙྩཾ སམྨནྟནཀཱལེ ཨུཔྤནྣེ མནྟཱིསུ ཡོ ཨཀུཏཱུཧལོ ཨཝིཀིཎྞཝཱཙོ མནྟཾ ན བྷིནྡཏི, ཏཾ ཨིཙྪནྟི, ཏཱདིསོ ཏེསུ ཋཱནེསུ པཏྠེཏབྦོ ཧོཏི. པིཡཉྩ ཨནྣཔཱནམྷཱིཏི མདྷུརེ ཨནྣཔཱནེ པཙྩུཔཊྛིཏེ སཧཔརིབྷུཉྫནཏྠཱཡ པིཡཔུགྒལཾ པཏྠེནྟི, ཏཱདིསོ ཏསྨིཾ ཀཱལེ པཏྠེཏབྦོ ཧོཏི. ཨཏྠེ ཛཱཏེ ཙ པཎྜིཏནྟི ཨཏྠགམྦྷཱིརེ དྷམྨགམྦྷཱིརེ ཀིསྨིཉྩིདེཝ ཀཱརཎེ ཝཱ པཉྷེ ཝཱ ཨུཔྤནྣེ པཎྜིཏཾ ཝིཙཀྑཎཾ ཨིཙྪནྟི. ཏཐཱརཱུཔོ ཧི ཏསྨིཾ སམཡེ པཏྠེཏབྦོ ཧོཏཱིཏི.

ཨེཝཾ རཱཛཱ བོདྷིསཏྟཾ ཝཎྞེཏྭཱ ཐོམེཏྭཱ གྷནཝསྶཾ ཝསྶེནྟོ མཧཱམེགྷོ ཝིཡ སཏྟཱཧི རཏནེཧི པཱུཛེཏྭཱ ཏསྶོཝཱདེ ཋཏྭཱ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ, བོདྷིསཏྟོཔི ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཐེརསྶ གུཎཾ ཀཐེཏྭཱ ཛཱཏཀཾ སམོདྷཱནེསི – ‘‘ཏདཱ རཱཛཱ ཨཱནནྡོ ཨཧོསི, པཎྜིཏཱམཙྩོ པན ཨཧམེཝ ཨཧོསི’’ནྟི.

མཧཱསཱརཛཱཏཀཝཎྞནཱ དུཏིཡཱ.

[༩༣] ༣. ཝིསྶཱསབྷོཛནཛཱཏཀཝཎྞནཱ

ན ¶ ཝིསྶསེ ཨཝིསྶཏྠེཏི ཨིདཾ སཏྠཱ ཛེཏཝནེ ཝིཧརནྟོ ཝིསྶཱསབྷོཛནཾ ཨཱརབྦྷ ཀཐེསི. ཏསྨིཾ ཀིར སམཡེ ཡེབྷུཡྻེན བྷིཀྑཱུ ‘‘མཱཏརཱ ནོ དིནྣཾ, པིཏརཱ ནོ དིནྣཾ, བྷཱཏརཱ, བྷགིནིཡཱ, ཙཱུལ༹མཱཏརཱ, ཙཱུལ༹པིཏརཱ, མཱཏུལེན, མཱཏུལཱནིཡཱ དིནྣཾ. ཨམྷཱཀཾ གིཧིཀཱལེཔི བྷིཀྑུཀཱལེཔི ཨེཏེ དཱཏུཾ ཡུཏྟརཱུཔཱཝཱ’’ཏི ཉཱཏཱིཧི དིནྣེ ཙཏྟཱརོ པཙྩཡེ ཝིསྶཏྠཱ ཧུཏྭཱ ཨཔཙྩཝེཀྑིཏྭཱ པརིབྷུཉྫནྟི. སཏྠཱ ཏཾ ཀཱརཎཾ ཉཏྭཱ ‘‘བྷིཀྑཱུནཾ མཡཱ དྷམྨདེསནཾ ཀཱཏུཾ ཝཊྚཏཱི’’ཏི བྷིཀྑཱུ སནྣིཔཱཏཱཔེཏྭཱ ‘‘བྷིཀྑཝེ, བྷིཀྑུནཱ ནཱམ ཉཱཏཱིཧིཔི ཨཉྙཱཏཱིཧིཔི ¶ དིནྣཀེ ཙཏྟཱརོ པཙྩཡེ པཙྩཝེཀྑིཏྭཱཝ པརིབྷོགོ ཀཱཏབྦོ. ཨཔཙྩཝེཀྑིཏྭཱ པརིབྷོགཾ ཀཏྭཱ ཧི ཀཱལཾ ཀུརུམཱནོ བྷིཀྑུ ཡཀྑཔེཏཨཏྟབྷཱཝཏོ ན མུཙྩཏི, ཨཔཙྩཝེཀྑིཏཔརིབྷོགོ ནཱམེས ཝིསཔརིབྷོགསདིསོ. ཝིསཉྷི ཝིསྶཱསིཀེན དིནྣཀམྤི ཨཝིསྶཱསིཀེན དིནྣཀམྤི མཱརེཏིཡེཝ. པུབྦེཔི ཝིསྶཱསེན དིནྣཾ ཝིསཾ པརིབྷུཉྫིཏྭཱ ཛཱིཝིཏཀྑཡཾ པཏྟཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ མཧཱཝིབྷཝོ སེཊྛི ཨཧོསི. ཏསྶེཀོ གོཔཱལཀོ ཀིཊྛསམྦཱདྷསམཡེ གཱཝོ གཧེཏྭཱ ཨརཉྙཾ པཝིསིཏྭཱ ཏཏྠ གོསཱལཾ ཀཏྭཱ རཀྑནྟོ ཝསཏི. སེཊྛིནོ ཙ ཀཱལེན ཀཱལཾ གོརསཾ ཨཱཧརཏི. ཨཐསྶ གོསཱལཱཡ ཨཝིདཱུརེ སཱིཧོ ནིཝཱསཾ གཎྷི. གཱཝཱིནཾ སཱིཧསནྟཱསེན མིལཱཏཱནཾ ཁཱིརཾ མནྡཾ ཨཧོསི. ཨཐ ནཾ ཨེཀདིཝསཾ སཔྤིཾ ཨཱདཱཡ ཨཱགཏཾ སེཊྛི པུཙྪི ‘‘ཀིཾ ནུ ཁོ, སམྨ གོཔཱལཀ, མནྡཾ སཔྤཱི’’ཏི? སོ ཏཾ ཀཱརཎཾ ཨཱཙིཀྑི. ‘‘ཨཏྠི པན, སམྨ, ཏསྶ སཱིཧསྶ ཀཏྠཙི པཊིབནྡྷོ’’ཏི? ‘‘ཨཏྠིསྶ སཱམི, ཨེཀཱཡ མིགམཱཏུཀཱཡ སདྡྷིཾ སཾསགྒོ’’ཏི. ‘‘སཀྐཱ པན ཏཾ གཱཧཱཔེཏུ’’ནྟི? ‘‘སཀྐཱ, སཱམཱི’’ཏི. ‘‘ཏེན ཧི ཏཾ གཧེཏྭཱ ཏསྶཱ ནལཱཊཏོ པཊྛཱཡ སརཱིརེ ལོམཱནི ཝིསེན པུནཔྤུནཾ རཛིཏྭཱ སུཀྑཱཔེཏྭཱ དྭེ ཏཡོ དིཝསེ ཨཏིཀྐཱམེཏྭཱ ཏཾ མིགམཱཏུཀཾ ཝིསྶཛྫེཧི, སོ ཏསྶཱ སིནེཧེན སརཱིརཾ ལེཧིཏྭཱ ཛཱིཝིཏཀྑཡཾ པཱཔུཎིསྶཏི. ཨཐསྶ ཙམྨནཁདཱཋཱ ཙེཝ ཝསཉྩ མཾསཉྩ གཧེཏྭཱ ཨཱགཙྪེཡྻཱསཱི’’ཏི ཧལཱཧལཝིསཾ དཏྭཱ ཨུཡྻོཛེསི.

སོ ¶ གོཔཱལཀོ ཛཱལཾ ཁིཔིཏྭཱ ཨུཔཱཡེན ཏཾ མིགམཱཏུཀཾ གཎྷིཏྭཱ ཏཐཱ ཨཀཱསི. སཱིཧོ ཏཾ དིསྭཱཝ བལཝསིནེཧེན ཏསྶཱ སརཱིརཾ ལེཧིཏྭཱ ཛཱིཝིཏཀྑཡཾ པཱཔུཎི. གོཔཱལཀོཔི ཙམྨཱདཱིནི གཧེཏྭཱ བོདྷིསཏྟསྶ སནྟིཀཾ ཨགམཱསི. བོདྷིསཏྟོ ཏཾ ཀཱརཎཾ ཉཏྭཱ ‘‘པརེསུ སིནེཧོ ནཱམ ན ཀཱཏབྦོ, ཨེཝཾ བལསམྤནྣོཔི སཱིཧོ མིགརཱཛཱ ཀིལེསཝསེན སཾསགྒཾ ནིསྶཱཡ མིགམཱཏུཀཱཡ སརཱིརཾ ལེཧནྟོ ཝིསཔརིབྷོགཾ ཀཏྭཱ ཛཱིཝིཏཀྑཡཾ པཏྟོ’’ཏི ཝཏྭཱ སམྤཏྟཔརིསཱཡ དྷམྨཾ དེསེནྟོ ཨིམཾ གཱཐམཱཧ –

༩༣.

‘‘ན ¶ ཝིསྶསེ ཨཝིསྶཏྠེ, ཝིསྶཏྠེཔི ན ཝིསྶསེ;

ཝིསྶཱསཱ བྷཡམནྭེཏི, སཱིཧཾཝ མིགམཱཏུཀཱ’’ཏི.

ཏཏྲཱཡཾ སངྑེཔཏྠོ – ཡོ པུབྦེ སབྷཡོ ཨཏྟནི ཨཝིསྶཏྠོ ཨཧོསི, ཏསྨིཾ ཨཝིསྶཏྠེ, ཡོ པུབྦེཔི ནིབྦྷཡོ ཨཏྟནི ཝིསྶཱསིཀོཡེཝ, ཏསྨིཾ ཝིསྶཏྠེཔི ན ཝིསྶསེ, ནེཝ ཝིསྶཱསཾ ཀརེཡྻ. ཀིཾཀཱརཎཱ? ཝིསྶཱསཱ བྷཡམནྭེཏི, ཡོ ཧི མིཏྟེཔི ཨམིཏྟེཔི ཝིསྶཱསོ, ཏཏོ བྷཡམེཝ ཨཱགཙྪཏི. ཀཐཾ? སཱིཧཾཝ མིགམཱཏུཀཱ, ཡཐཱ མིཏྟསནྠཝཝསེན ཀཏཝིསྶཱསཱཡ མིགམཱཏུཀཱཡ སནྟིཀཱ སཱིཧསྶ བྷཡཾ ཨནྭེཏི, ཨུཔགཏཾ སམྤཏྟནྟི ཨཏྠོ. ཡཐཱ ཝཱ ཝིསྶཱསཝསེན སཱིཧཾ མིགམཱཏུཀཱ ཨནྭེཏཱ ཨུཔགཏཱཏིཔི ཨཏྠོ.

ཨེཝཾ ¶ བོདྷིསཏྟོ སམྤཏྟཔརིསཱཡ དྷམྨཾ དེསེཏྭཱ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ མཧཱསེཊྛི ཨཧམེཝ ཨཧོསི’’ནྟི.

ཝིསྶཱསབྷོཛནཛཱཏཀཝཎྞནཱ ཏཏིཡཱ.

[༩༤] ༤. ལོམཧཾསཛཱཏཀཝཎྞནཱ

སོཏཏྟོ ¶ སོསིནྣོ ཙེཝཱཏི ཨིདཾ སཏྠཱ ཝེསཱལིཾ ཨུཔནིསྶཱཡ པཱཊིཀཱརཱམེ ཝིཧརནྟོ སུནཀྑཏྟཾ ཨཱརབྦྷ ཀཐེསི. ཨེཀསྨིཉྷི སམཡེ སུནཀྑཏྟོ སཏྠུ ཨུཔཊྛཱཀོ ཧུཏྭཱ པཏྟཙཱིཝརམཱདཱཡ ཝིཙརམཱནོ ཀོརཀྑཏྟིཡསྶ དྷམྨཾ རོཙེནྟོ དསབལསྶ པཏྟཙཱིཝརཾ ནིཡྻཱདེཏྭཱ ཀོརཀྑཏྟིཡཾ ནིསྶཱཡ ཝསཏི. ཏསྶ ཀཱལཀཉྫིཀཨསུརཡོནིཡཾ ནིབྦཏྟཀཱལེ གིཧི ཧུཏྭཱ ‘‘ནཏྠི སམཎསྶ གོཏམསྶ ཨུཏྟརི མནུསྶདྷམྨཱ ཨལམརིཡཉཱཎདསྶནཝིསེསོ, ཏཀྐཔརིཡཱཧཏཾ སམཎོ གོཏམོ དྷམྨཾ དེསེཏི ཝཱིམཾསཱནུཙརིཏཾ སཡཾཔཊིབྷཱནཾ. ཡསྶ ཙ ཁྭཱསྶ ཨཏྠཱཡ དྷམྨོ དེསིཏོ, ན སོ ནིཡྻཱཏི ཏཀྐརསྶ སམྨཱ དུཀྑཀྑཡཱཡཱ’’ཏི (མ. ནི. ༡.༡༤༦) ཝེསཱལིཡཾ ཏིཎྞཾ པཱཀཱརཱནཾ ཨནྟརེ ཝིཙརནྟོ སཏྠུ ཨཝཎྞཾ བྷཱསཏི.

ཨཐཱཡསྨཱ སཱརིཔུཏྟོ པིཎྜཱཡ ཙརནྟོ ཏསྶེཝཾ ཨཝཎྞཾ བྷཱསནྟསྶ སུཏྭཱ པིཎྜཔཱཏཔཊིཀྐནྟོ ཏམཏྠཾ བྷགཝཏོ ཨཱརོཙེསི. བྷགཝཱ ‘‘ཀོདྷནོ, སཱརིཔུཏྟ, སུནཀྑཏྟོ མོགྷཔུརིསོ, ཀོདྷཝསེནེཝམཱཧ, ཀོདྷཝསེནཱཔི པན ‘ན སོ ནིཡྻཱཏི ཏཀྐརསྶ སམྨཱ དུཀྑཀྑཡཱཡཱ’ཏི ཝདནྟོ ཨཛཱནིཏྭཱཔི མཡ྄ཧཾ གུཎམེཝ བྷཱསཏི. ན ཁོ པན སོ མོགྷཔུརིསོ མཡ྄ཧཾ གུཎཾ ¶ ཛཱནཱཏི. མཡ྄ཧཉྷི, སཱརིཔུཏྟ, ཚ ཨབྷིཉྙཱ ནཱམ ཨཏྠི, ཨཡམྤི མེ ཨུཏྟརིམནུསྶདྷམྨོཝ. དསབལཉཱཎཱནི ཨཏྠི, ཙཏུཝེསཱརཛྫཉཱཎཾ ཨཏྠི, ཙཏུཡོནིཔརིཙྪེདཀཉཱཎཾ ཨཏྠི, པཉྩགཏིཔརིཙྪེདཀཉཱཎཾ ཨཏྠི, ཨཡམྤི མེ ཨུཏྟརིམནུསྶདྷམྨོཝ. ཨེཝཾ ཨུཏྟརིམནུསྶདྷམྨསམནྣཱགཏཾ པན མཾ ཡོ ཨེཝཾ ཝདེཡྻ ‘ནཏྠི སམཎསྶ གོཏམསྶ ཨུཏྟརིམནུསྶདྷམྨོ’ཏི, སོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ ཡཐཱབྷཏཾ ནིཀྑིཏྟོ ཨེཝཾ ནིརཡེ’’ཏི ཨེཝཾ ཨཏྟནོ ཝིཛྫམཱནཾ ཨུཏྟརིམནུསྶདྷམྨསྶ གུཎཾ ཀཐེཏྭཱ ‘‘སུནཀྑཏྟོ ཀིར, སཱརིཔུཏྟ, ཀོརཀྑཏྟིཡསྶ དུཀྐརཀཱརིཀཱཡ ¶ མིཙྪཱཏཔེ པསནྣོ, མིཙྪཱཏཔེ པསཱིདནྟེན པན མཡི ཨེཝ པསཱིདིཏུཾ ཝཊྚཏི. ཨཧཉྷི ཨིཏོ ཨེཀནཝུཏིཀཔྤམཏྠཀེ ‘ཨཏྠི ནུ ཁོ ཨེཏྠ སཱརོ’ཏི བཱཧིརཀཾ མིཙྪཱཏཔཾ ཝཱིམཾསནྟོ ཙཏུརངྒསམནྣཱགཏཾ བྲཧྨཙརིཡཝཱསཾ ཝསིཾ, ཏཔསྶཱི སུདཾ ཧོམི པརམཏཔསྶཱི, ལཱུཁོ ¶ སུདཾ ཧོམི པརམལཱུཁོ, ཛེགུཙྪཱི སུདཾ ཧོམི པརམཛེགུཙྪཱི, པཝིཝིཏྟོ སུདཾ ཧོམི པརམཔཝིཝིཏྟོ’’ཏི ཝཏྭཱ ཐེརེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ ཨེཀནཝུཏིཀཔྤམཏྠཀེ བོདྷིསཏྟོ ‘‘བཱཧིརཀཏཔཾ ཝཱིམཾསིསྶཱམཱི’’ཏི ཨཱཛཱིཝཀཔབྦཛྫཾ པབྦཛིཏྭཱ ཨཙེལཀོ ཨཧོསི རཛོཛལླིཀོ, པཝིཝིཏྟོ ཨཧོསི ཨེཀཝིཧཱརཱི. མནུསྶེ དིསྭཱ མིགོ ཝིཡ པལཱཡི, མཧཱཝིཀཏིབྷོཛནོ ཨཧོསི, ཝཙྪཀགོམཡཱདཱིནི པརིབྷུཉྫི, ཨཔྤམཱདཝིཧཱརཏྠཱཡ ཨརཉྙེ ཨེཀསྨིཾ བྷིཾསནཀེ ཝནསཎྜེ ཝིཧཱསི. ཏསྨིམྤི ཝིཧརནྟོ ཧིམཔཱཏསམཡེ ཨནྟརཊྛཀེ རཏྟིཾ ཝནསཎྜཱ ནིཀྑམིཏྭཱ ཨབྦྷོཀཱསེ ཝིཧརིཏྭཱ སཱུརིཡེ ཨུགྒཏེ ཝནསཎྜཾ པཝིསཏི. སོ ཡཐཱ རཏྟིཾ ཨབྦྷོཀཱསེ ཧིམོདཀེན ཏིནྟོ, ཏཐེཝ དིཝཱ ཝནསཎྜཏོ པགྒྷརནྟེཧི ཨུདཀབིནྡཱུཧི ཏེམཡི. ཨེཝཾ ཨཧོརཏྟཾ སཱིཏདུཀྑཾ ཨནུབྷོཏི. གིམྷཱནཾ པན པཙྪིམེ མཱསེ དིཝཱ ཨབྦྷོཀཱསེ ཝིཧརིཏྭཱ རཏྟིཾ ཝནསཎྜཾ པཝིསཏི. སོ ཡཐཱ དིཝཱ ཨབྦྷོཀཱསེ ཨཱཏཔེན པརིལཱ༹ཧཔྤཏྟོ, ཏཐེཝ རཏྟིཾ ནིཝཱཏེ ཝནསཎྜེ པརིལཱ༹ཧཾ པཱཔུཎཱཏི, སརཱིརཱ སེདདྷཱརཱ མུཙྩནྟི. ཨཐསྶ པུབྦེ ཨསྶུཏཔུབྦཱ ཨཡཾ གཱཐཱ པཊིབྷཱསི –

༩༤.

‘‘སོཏཏྟོ སོསིནྣོ ཙེཝ, ཨེཀོ བྷིཾསནཀེ ཝནེ;

ནགྒོ ན ཙགྒིམཱསཱིནོ, ཨེསནཱཔསུཏོ མུནཱི’’ཏི.

ཏཏྠ ¶ སོཏཏྟོཏི སཱུརིཡསནྟཱཔེན སུཊྛུ ཏཏྟོ. སོསིནྣོཏི ཧིམོདཀེན སུསིནྣོ སུཊྛུ ཏིནྟོ. ཨེཀོ བྷིཾསནཀེ ཝནེཏི ཡཏྠ པཝིཊྛཱནཾ ཡེབྷུཡྻེན ལོམཱནི ཧཾསནྟི, ཏཐཱརཱུཔེ བྷིཾསནཀེཝནསཎྜེ ཨེཀོ ཨདུཏིཡོཝ ཨཧོསིནྟི དཱིཔེཏི. ནགྒོ ན ཙགྒིམཱསཱིནོཏི ནགྒོ ཙ ན ཙ ཨགྒིམཱསཱིནོ. ཏཐཱ སཱིཏེན པཱིལི༹ཡམཱནོཔི ནེཝ ནིཝཱསནཔཱརུཔནཾ ཝཱ ཨཱདིཡིཾ, ན ཙ ཨགྒིཾ ཨཱགམྨ ནིསཱིདིནྟི དཱིཔེཏི. ཨེསནཱཔསུཏོཏི ཨབྲཧྨཙརིཡེཔི ཏསྨིཾ བྲཧྨཙརིཡསཉྙཱི ཧུཏྭཱ ‘‘བྲཧྨཙརིཡམེཝེཏཾ ཨེསནཱ གཝེསནཱ ཨུཔཱཡོ བྲཧྨལོཀསྶཱ’’ཏི ཨེཝཾ ཏཱཡ བྲཧྨཙརིཡེསནཱཡ པསུཏོ ཨནུཡུཏྟོ ཨུསྶུཀྐཾ ཨཱཔནྣོ ཨཧོསིནྟི དསྶེཏི. མུནཱིཏི ¶ ‘‘མུནི ཁོ ཨེས མོནཏྠཱཡ པཊིཔནྣོ’’ཏི ཨེཝཾ ལོཀེན སམྦྷཱཝིཏོ ཨཧོསིནྟི དཱིཔེཏི.

ཨེཝཾ ¶ ཙཏུརངྒསམནྣཱགཏཾ བྲཧྨཙརིཡཾ ཙརིཏྭཱ བོདྷིསཏྟོ མརཎཀཱལེ ཨུཔཊྛིཏཾ ནིརཡནིམིཏྟཾ དིསྭཱ ‘‘ཨིདཾ ཝཏསམཱདཱནཾ ནིརཏྠཀ’’ནྟི ཉཏྭཱ ཏངྑཎཉྙེཝ ཏཾ ལདྡྷིཾ བྷིནྡིཏྭཱ སམྨཱདིཊྛིཾ གཧེཏྭཱ དེཝལོཀེ ནིབྦཏྟི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཨཧཾ ཏེན སམཡེན སོ ཨཱཛཱིཝཀོ ཨཧོསི’’ནྟི.

ལོམཧཾསཛཱཏཀཝཎྞནཱ ཙཏུཏྠཱ.

[༩༥] ༥. མཧཱསུདསྶནཛཱཏཀཝཎྞནཱ

ཨནིཙྩཱ ཝཏ སངྑཱརཱཏི ཨིདཾ སཏྠཱ པརིནིབྦཱནམཉྩེ ནིཔནྣོ ཨཱནནྡཏྠེརསྶ ‘‘མཱ, བྷནྟེ, བྷགཝཱ ཨིམསྨིཾ ཁུདྡཀནགརཀེ’’ཏྱཱདིཝཙནཾ (དཱི. ནི. ༢.༢༡༠) ཨཱརབྦྷ ཀཐེསི. ཏཐཱགཏེ ཧི ཛེཏཝནེ ཝིཧརནྟེ སཱརིཔུཏྟཏྠེརོ ཀཏྟིཀཔུཎྞམཱཡཾ ནཱལ༹ཀགཱམཀེ ཛཱཏོཝརཀེ པརིནིབྦཱཡི, མཧཱམོགྒལླཱནོ ཀཏྟིཀམཱསསྶེཝ ཀཱལ༹པཀྑཨམཱཝསིཡཾ. ཨེཝཾ པརིནིབྦུཏེ ཨགྒསཱཝཀཡུགེ ‘‘ཨཧམྤི ཀུསིནཱརཱཡཾ པརིནིབྦཱཡིསྶཱམཱི’’ཏི ཨནུཔུབྦེན ཙཱརིཀཾ ཙརམཱནོ ཏཏྠ གནྟྭཱ ཡམཀསཱལཱནམནྟརེ ཨུཏྟརསཱིསཀེ མཉྩཀེ ཨནུཊྛཱནསེཡྻཱཡ ནིཔཛྫི. ཨཐ ནཾ ཨཱཡསྨཱ ཨཱནནྡཏྠེརོ ‘‘མཱ, བྷནྟེ, བྷགཝཱ ཨིམསྨིཾ ཁུདྡཀནགརཀེ ཝིསམེ ཨུཛྫངྒལནགརཀེ, སཱཁཱནགརཀེ པརིནིབྦཱཡི, ཨཉྙེསཾ ཙམྤཱརཱཛགཧཱདཱིནཾ མཧཱནགརཱནཾ ཨཉྙཏརསྨིཾ བྷགཝཱ པརིནིབྦཱཡཏཱུ’’ཏི ཡཱཙི. སཏྠཱ ‘‘མཱ, ཨཱནནྡ, ཨིམཾ ‘ཁུདྡཀནགརཀཾ, ཨུཛྫངྒལནགརཀཾ སཱཁཱནགརཀ’ནྟི ཝདེཧི, ཨཧཉྷི པུབྦེ སུདསྶནཙཀྐཝཏྟིརཱཛཀཱལེ ཨིམསྨིཾ ནགརེ ཝསིཾ, ཏདཱ ཨིདཾ དྭཱདསཡོཛནིཀེན རཏནཔཱཀཱརེན པརིཀྑིཏྟཾ ¶ མཧཱནགརཾ ཨཧོསཱི’’ཏི ཝཏྭཱ ཐེརེན ཡཱཙིཏོ ཨཏཱིཏཾ ཨཱཧརནྟོ མཧཱསུདསྶནསུཏྟཾ (དཱི. ནི. ༢.༢༤༡ ཨཱདཡོ) ཀཐེསི.

ཏདཱ པན མཧཱསུདསྶནཾ སུདྷམྨཔཱསཱདཱ ཨོཏརིཏྭཱ ཨཝིདཱུརེ སཏྟརཏནམཡེ ཏཱལཝནེ པཉྙཏྟསྨིཾ ཀཔྤིཡམཉྩཀེ དཀྑིཎེན པསྶེན ¶ ཨནུཊྛཱནསེཡྻཱཡ ནིཔནྣཾ དིསྭཱ ‘‘ཨིམཱནི ཏེ, དེཝ, ཙཏུརཱསཱིཏི ནགརསཧསྶཱནི ཀུསཱཝཏིརཱཛདྷཱནིཔྤམུཁཱནི, ཨེཏྠ ཚནྡཾ ཀརོཧཱི’’ཏི སུབྷདྡཱཡ དེཝིཡཱ ཝུཏྟེ མཧཱསུདསྶནོ ‘‘མཱ དེཝི ཨེཝཾ ཨཝཙ, ཨཐ ཁོ ‘ཨེཏྠ ཚནྡཾ ཝིནེཧི, མཱ ཨཔེཀྑཾ ཨཀཱསཱི’ཏི ཨེཝཾ མཾ ཨོཝདཱ’’ཏི ཝཏྭཱ ‘‘ཀིཾཀཱརཎཱ, དེཝཱ’’ཏི པུཙྪིཏོ ‘‘ཨཛྫཱཧཾ ཀཱལཀིརིཡཾ ཀརིསྶཱམཱི’’ཏི. ཨཐ ནཾ དེཝཱི རོདམཱནཱ ཨཀྑཱིནི པུཉྪིཏྭཱ ཀིཙྪེན ¶ ཀསིརེན ཏཐཱ ཝཏྭཱ རོདི པརིདེཝི. སེསཱཔི ཙཏུརཱསཱིཏིསཧསྶཨིཏྠིཡོ རོདིཾསུ པརིདེཝིཾསུ. ཨམཙྩཱདཱིསུཔི ཨེཀོཔི ཨདྷིཝཱསེཏུཾ ནཱསཀྑི, སབྦེཔི རོདིཾསུ. བོདྷིསཏྟོ ‘‘ཨལཾ, བྷཎེ, མཱ སདྡམཀཏྠཱ’’ཏི སབྦེ ནིཝཱརེཏྭཱ དེཝིཾ ཨཱམནྟེཏྭཱ ‘‘མཱ ཏྭཾ དེཝི རོདི, མཱ པརིདེཝི. ཏིལཕལམཏྟོཔི ཧི སངྑཱརོ ནིཙྩོ ནཱམ ནཏྠི, སབྦེཔི ཨནིཙྩཱ བྷེདནདྷམྨཱ ཨེཝཱ’’ཏི ཝཏྭཱ དེཝིཾ ཨོཝདནྟོ ཨིམཾ གཱཐམཱཧ –

༩༥.

‘‘ཨནིཙྩཱ ཝཏ སངྑཱརཱ, ཨུཔྤཱདཝཡདྷམྨིནོ;

ཨུཔྤཛྫིཏྭཱ ནིརུཛ྄ཛྷནྟི, ཏེསཾ ཝཱུཔསམོ སུཁོ’’ཏི.

ཏཏྠ ཨནིཙྩཱ ཝཏ སངྑཱརཱཏི བྷདྡེ སུབྷདྡཱདེཝི, ཡཏྟཀཱ ཀེཧིཙི པཙྩཡེཧི སམཱགནྟྭཱ ཀཏཱ ཁནྡྷཱཡཏནཱདཡོ སངྑཱརཱ, སབྦེ ཏེ ཨནིཙྩཱཡེཝ ནཱམ. ཨེཏེསུ ཧི རཱུཔཾ ཨནིཙྩཾ…པེ… ཝིཉྙཱཎཾ ཨནིཙྩཾ. ཙཀྑུ ཨནིཙྩཾ…པེ… དྷམྨཱ ཨནིཙྩཱ. ཡཾཀིཉྩི སཝིཉྙཱཎཀཾ ཨཝིཉྙཱཎཀཾ རཏནཾ, སབྦཾ ཏཾ ཨནིཙྩམེཝ. ཨིཏི ‘‘ཨནིཙྩཱ ཝཏ སངྑཱརཱ’’ཏི གཎྷ. ཀསྨཱ? ཨུཔྤཱདཝཡདྷམྨིནོཏི, སབྦེ ཧེཏེ ཨུཔྤཱདདྷམྨིནོ ཙེཝ ཝཡདྷམྨིནོ ཙ ཨུཔྤཛྫནབྷིཛྫནསབྷཱཝཱཡེཝ, ཏསྨཱ ‘‘ཨནིཙྩཱ’’ཏི ཝེདིཏབྦཱ. ཡསྨཱ ཙ ཨནིཙྩཱ, ཏསྨཱ ཨུཔྤཛྫིཏྭཱ ནིརུཛ྄ཛྷནྟི, ཨུཔྤཛྫིཏྭཱ ཋིཏིཾ པཏྭཱཔི ནིརུཛ྄ཛྷནྟིཡེཝ. སབྦེཝ ཧེཏེ ནིབྦཏྟམཱནཱ ཨུཔྤཛྫནྟི ནཱམ, བྷིཛྫམཱནཱ ནིརུཛ྄ཛྷནྟི ནཱམ. ཏེསཾ ཨུཔྤཱདེ སཏིཡེཝ ཙ ཋིཏི ནཱམ ཧོཏི, ཋིཏིཡཱ སཏིཡེཝ བྷངྒོ ནཱམ ཧོཏི, ན ཧི ཨནུཔྤནྣསྶ ཋིཏི ནཱམ ¶ , ནཱཔི ཋིཏཾ ཨབྷིཛྫནཀཾ ནཱམ ཨཏྠི. ཨིཏི སབྦེཔི སངྑཱརཱ ཏཱིཎི ལཀྑཎཱནི པཏྭཱ ཏཏྠ ཏཏྠེཝ ནིརུཛ྄ཛྷནྟི, ཏསྨཱ སབྦེཔིམེ ཨནིཙྩཱ ཁཎིཀཱ ཨིཏྟརཱ ཨདྷུཝཱ པབྷངྒུནོ ཙལིཏཱ སམཱིརིཏཱ ཨནདྡྷནིཡཱ པཡཱཏཱ ཏཱཝཀཱལིཀཱ ནིསྶཱརཱ, ཏཱཝཀཱལིཀཊྛེན མཱཡཱམརཱིཙིཕེཎསདིསཱ. ཏེསུ བྷདྡེ སུབྷདྡཱདེཝི, ཀསྨཱ སུཁསཉྙཾ ཨུཔྤཱདེསི, ཨེཝཾ པན གཎྷ ཏེསཾ ཝཱུཔསམོ སུཁོཏི, སབྦཝཊྚཝཱུཔསམནཏོ ཏེསཾ ཝཱུཔསམོ ནཱམ ནིབྦཱནཾ, ཏདེཝེཀཾ ཨེཀནྟཏོ སུཁཾ, ཏཏོ ཨཉྙཾ སུཁཾ ནཱམ ནཏྠཱིཏི.

ཨེཝཾ ¶ མཧཱསུདསྶནོ ཨམཏམཧཱནིབྦཱནེན དེསནཱཡ ཀཱུཊཾ གཧེཏྭཱ ཨཝསེསསྶཔི མཧཱཛནསྶ ‘‘དཱནཾ དེཐ, སཱིལཾ རཀྑཐ, ཨུཔོསཐཀམྨཾ ཀརོཐཱ’’ཏི ཨོཝཱདཾ དཏྭཱ དེཝལོཀཔརཱཡཎོ ཨཧོསི.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ སུབྷདྡཱ དེཝཱི རཱཧུལམཱཏཱ ཨཧོསི, པརིཎཱཡཀརཏནཾ རཱཧུལོ, སེསཔརིསཱ བུདྡྷཔརིསཱ, མཧཱསུདསྶནོ པན ཨཧམེཝ ཨཧོསི’’ནྟི.

མཧཱསུདསྶནཛཱཏཀཝཎྞནཱ པཉྩམཱ.

[༩༦] ༦. ཏེལཔཏྟཛཱཏཀཝཎྞནཱ

སམཏིཏྟིཀཾ ཨནཝསེསཀནྟི ཨིདཾ སཏྠཱ སུམྦྷརཊྛེ སེདཀཾ ནཱམ ནིགམཾ ཨུཔནིསྶཱཡ ཨཉྙཏརསྨིཾ ཝནསཎྜེ ཝིཧརནྟོ ཛནཔདཀལྱཱཎིསུཏྟཾ ཨཱརབྦྷ ཀཐེསི. ཏཏྲ ཧི བྷགཝཱ –

‘‘སེཡྻཐཱཔི, བྷིཀྑཝེ, ‘ཛནཔདཀལྱཱཎཱི ཛནཔདཀལྱཱཎཱི’ཏི ཁོ, བྷིཀྑཝེ, མཧཱཛནཀཱཡོ སནྣིཔཏེཡྻ, སཱ ཁོ པནསྶ ཛནཔདཀལྱཱཎཱི པརམཔཱསཱཝིནཱི ནཙྩེ, པརམཔཱསཱཝིནཱི གཱིཏེ. ‘ཛནཔདཀལྱཱཎཱི ནཙྩཏི གཱཡཏཱི’ཏི ཁོ, བྷིཀྑཝེ, བྷིཡྻོསོམཏྟཱཡ མཧཱཛནཀཱཡོ སནྣིཔཏེཡྻ. ཨཐ པུརིསོ ཨཱགཙྪེཡྻ ཛཱིཝིཏུཀཱམོ ཨམརིཏུཀཱམོ སུཁཀཱམོ དུཀྑཔཊིཀཱུལོ. ཏམེནཾ ཨེཝཾ ཝདེཡྻ ‘‘ཨཡཾ ཏེ, ཨམྦྷོ པུརིས, སམཏིཏྟིཀོ ཏེལཔཏྟོ ཨནྟརེན ཙ མཧཱཛནཀཱཡསྶ ཨནྟརེན ཙ ཛནཔདཀལྱཱཎིཡཱ པརིཧརིཏབྦོ, པུརིསོ ཙ ཏཾ ཨུཀྑིཏྟཱསིཀོ པིཊྛིཏོ པིཊྛིཏོ ཨནུབནྡྷིསྶཏི ‘ཡཏྠེཝ ནཾ ཐོཀམྤི ཚཌྜེསྶསི, ཏཏྠེཝ ཏེ སཱིསཾ པཱཏེསྶཱམཱི’’’ཏི. ‘‘ཏཾ ཀིཾ མཉྙཐ, བྷིཀྑཝེ, ཨཔི ནུ སོ པུརིསོ ཨམུཾ ཏེལཔཏྟཾ ཨམནསིཀརིཏྭཱ བཧིདྡྷཱ པམཱདཾ ཨཱཧརེཡྻཱ’’ཏི? ‘‘ནོ ཧེཏཾ, བྷནྟེ’’. ཨུཔམཱ ཁོ མྱཱཡཾ, བྷིཀྑཝེ, ¶ ཀཏཱ ཨཏྠསྶ ཝིཉྙཱཔནཱཡ. ཨཡམེཝེཏྠ ཨཏྠོ – ‘སམཏིཏྟིཀོ ཏེལཔཏྟོ’ཏི ཁོ, བྷིཀྑཝེ, ཀཱཡགཏཱཡེཏཾ སཏིཡཱ ཨདྷིཝཙནཾ. ཏསྨཱཏིཧ ¶ , བྷིཀྑཝེ, ཨེཝཾ སིཀྑིཏབྦཾ ‘ཀཱཡགཏཱ ནོ སཏི བྷཱཝིཏཱ བྷཝིསྶཏི སུསམཱརདྡྷཱ’ཏི ཨེཝཉྷི ཝོ, བྷིཀྑཝེ, སིཀྑིཏབྦ’’ནྟི (སཾ. ནི. ༥.༣༨༦) –

ཨིདཾ ཛནཔདཀལྱཱཎིསུཏྟཾ སཱཏྠཾ སབྱཉྫནཾ ཀཐེསི.

ཏཏྲཱཡཾ ¶ སངྑེཔཏྠོ – ཛནཔདཀལྱཱཎཱིཏི ཛནཔདམྷི ཀལྱཱཎཱི ཨུཏྟམཱ ཚསརཱིརདོསརཧིཏཱ པཉྩཀལྱཱཎསམནྣཱགཏཱ. སཱ ཧི ཡསྨཱ ནཱཏིདཱིགྷཱ, ནཱཏིརསྶཱ, ནཱཏིཀིསཱ, ནཱཏིཐཱུལཱ, ནཱཏིཀཱལཱ༹, ནཱཙྩོདཱཏཱ, ཨཏིཀྐནྟཱ མཱནུསཀཝཎྞཾ, ཨཔཏྟཱ དིབྦཝཎྞཾ, ཏསྨཱ ཚསརཱིརདོསརཧིཏཱ. ཚཝིཀལྱཱཎཾ, མཾསཀལྱཱཎཾ, ནྷཱརུཀལྱཱཎཾ, ཨཊྛིཀལྱཱཎཾ, ཝཡོཀལྱཱཎནྟི ཨིམེཧི པན པཉྩཧི ཀལྱཱཎེཧི སམནྣཱགཏཏྟཱ པཉྩཀལྱཱཎསམནྣཱགཏཱ ནཱམ. ཏསྶཱ ཧི ཨཱགནྟུཀོབྷཱསཀིཙྩཾ ནཱམ ནཏྠི, ཨཏྟནོ སརཱིརོབྷཱསེནེཝ དྭཱདསཧཏྠེ ཋཱནེ ཨཱལོཀཾ ཀརོཏི, པིཡངྒུསཱམཱ ཝཱ ཧོཏི སུཝཎྞསཱམཱ ཝཱ. ཨཡམསྶཱ ཚཝིཀལྱཱཎཏཱ. ཙཏྟཱརོ པནསྶཱ ཧཏྠཔཱདཱ མུཁཔརིཡོསཱནཉྩ ལཱཁཱརསཔརིཀམྨཀཏཾ ཝིཡ རཏྟཔཝཱལ༹རཏྟཀམྦལསདིསཾ ཧོཏི. ཨཡམསྶཱ མཾསཀལྱཱཎཏཱ. ཝཱིསཏི ནཁཔཏྟཱནི མཾསཏོ ཨམུཏྟཊྛཱནེ ལཱཁཱརསཔཱུརིཏཱནི ཝིཡ, མུཏྟཊྛཱནེ ཁཱིརདྷཱརཱསདིསཱནི. ཨཡམསྶཱ ནྷཱརུཀལྱཱཎཏཱ. དྭཏྟིཾས དནྟཱ སུཕུསིཏཱ སུདྷོཏཝཛིརཔནྟི ཝིཡ ཁཱཡནྟི. ཨཡམསྶཱ ཨཊྛིཀལྱཱཎཏཱ. ཝཱིསཏིཝསྶསཏིཀཱཔི པན སམཱནཱ སོལ༹སཝསྶུདྡེསིཀཱ ཝིཡ ཧོཏི ནིབྦལིཔལིཏཱ. ཨཡམསྶཱ ཝཡོཀལྱཱཎཏཱ.

པརམཔཱསཱཝིནཱིཏི ཨེཏྠ པན པསཝནཾ པསཝོ, པཝཏྟཱིཏི ཨཏྠོ. པསཝོ ཨེཝ པཱསཱཝོ, པརམོ པཱསཱཝོ པརམཔཱསཱཝོ, སོ ཨསྶཱ ཨཏྠཱིཏི པརམཔཱསཱཝིནཱི. ནཙྩེ ཙ གཱིཏེ ཙ ཨུཏྟམཔྤཝཏྟི སེཊྛཀིརིཡཱ. ཨུཏྟམམེཝ ནཙྩཾ ནཙྩཏི, གཱིཏཉྩ གཱཡཏཱིཏི ཝུཏྟཾ ཧོཏི.

ཨཐ པུརིསོ ཨཱགཙྪེཡྻཱཏི ན ཨཏྟནོ རུཙིཡཱ ཨཱགཙྪེཡྻ, ཨཡཾ པནེཏྠ ཨདྷིཔྤཱཡོ – ཨཐེཝཾ མཧཱཛནམཛ྄ཛྷེ ཛནཔདཀལྱཱཎིཡཱ ནཙྩམཱནཱཡ ‘‘སཱདྷུ སཱདྷཱུ’’ཏི སཱདྷུཀཱརེསུ ཨངྒུལིཕོཊནེསུ ཙེལུཀྑེཔེསུ ཙ པཝཏྟམཱནེསུ ཏཾ པཝཏྟིཾ སུཏྭཱ རཱཛཱ བནྡྷནཱགཱརཏོ ཨེཀཾ ཙོརཔུརིསཾ པཀྐོསཱཔེཏྭཱ ¶ ནིགལཱ༹ནི ཚིནྡིཏྭཱ སམཏིཏྟིཀཾ སུཔརིཔུཎྞཾ ཏེལཔཏྟཾ ཏསྶ ཧཏྠེ དཏྭཱ ཨུབྷོཧི ཧཏྠེཧི དལ༹ྷཾ གཱཧཱཔེཏྭཱ ཨེཀཾ ཨསིཧཏྠཾ པུརིསཾ ཨཱཎཱཔེསི ‘‘ཨེཏཾ གཧེཏྭཱ ཛནཔདཀལྱཱཎིཡཱ སམཛྫཊྛཱནཾ གཙྪ. ཡཏྠེཝ ཙེས པམཱདཾ ཨཱགམྨ ཨེཀམྤི ཏེལབིནྡུཾ ཚཌྜེཏི, ཏཏྠེཝསྶ སཱིསཾ ཚིནྡཱ’’ཏི. སོ པུརིསོ ཨསིཾ ཨུཀྑིཔིཏྭཱ ཏཾ ཏཛྫེནྟོ ཏཏྠ ནེསི. སོ མརཎབྷཡཏཛྫིཏོ ཛཱིཝིཏུཀཱམཏཱཡ པམཱདཝསེན ཏཾ ཨམནསིཀརིཏྭཱ སཀིམྤི ཨཀྑཱིནི ཨུམྨཱིལེཏྭཱ ཏཾ ཛནཔདཀལྱཱཎིཾ ན ཨོལོཀེསི. ཨེཝཾ བྷཱུཏཔུབྦམེཝེཏཾ ཝཏྠུ, སུཏྟེ པན པརིཀཔྤཝསེནེཏཾ ཝུཏྟནྟི ཝེདིཏབྦཾ.

ཨུཔམཱ ¶ ཁོ མྱཱཡནྟི ཨེཏྠ པན ཏེལཔཏྟསྶ ཏཱཝ ཀཱཡགཏཱསཏིཡཱ ཨོཔམྨསཾསནྡནཾ ཀཏམེཝ. ཨེཏྠ པན རཱཛཱ ཝིཡ ཀམྨཾ དཊྛབྦཾ, ཨསི ཝིཡ ཀིལེསཱ, ཨུཀྑིཏྟཱསིཀཔུརིསོ ཝིཡ མཱརོ, ཏེལཔཏྟཧཏྠོ པུརིསོ ཝིཡ ཀཱཡགཏཱསཏིབྷཱཝཀོ ཝིཔསྶཀཡོགཱཝཙརོ. ཨིཏི ¶ བྷགཝཱ ‘‘ཀཱཡགཏཱསཏིཾ བྷཱཝེཏུཀཱམེན བྷིཀྑུནཱ ཏེལཔཏྟཧཏྠེན ཏེན པུརིསེན ཝིཡ སཏིཾ ཨཝིསྶཛྫེཏྭཱ ཨཔྤམཏྟེན ཀཱཡགཏཱསཏི བྷཱཝེཏབྦཱ’’ཏི ཨིམཾ སུཏྟཾ ཨཱཧརིཏྭཱ དསྶེསི.

བྷིཀྑཱུ ཨིམཾ སུཏྟཉྩ ཨཏྠཉྩ སུཏྭཱ ཨེཝམཱཧཾསུ – ‘‘དུཀྐརཾ, བྷནྟེ, ཏེན པུརིསེན ཀཏཾ ཏཐཱརཱུཔིཾ ཛནཔདཀལྱཱཎིཾ ཨནོལོཀེཏྭཱ ཏེལཔཏྟཾ ཨཱདཱཡ གཙྪནྟེནཱ’’ཏི. སཏྠཱ ‘‘ན, བྷིཀྑཝེ, ཏེན དུཀྐརཾ ཀཏཾ, སུཀརམེཝེཏཾ. ཀསྨཱ? ཨུཀྑིཏྟཱསིཀེན པུརིསེན སནྟཛྫེཏྭཱ ནཱིཡམཱནཏཱཡ. ཡཾ པན པུབྦེ པཎྜིཏཱ ཨཔྤམཱདེན སཏིཾ ཨཝིསྶཛྫེཏྭཱ ཨབྷིསངྑཏཾ དིབྦརཱུཔམྤི ཨིནྡྲིཡཱནི བྷིནྡིཏྭཱ ཨནོལོཀེཏྭཱཝ གནྟྭཱ རཛྫཾ པཱཔུཎིཾསུ, ཨེཏཾ དུཀྐར’’ནྟི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཏསྶ རཉྙོ པུཏྟསཏསྶ སབྦཀནིཊྛོ ཧུཏྭཱ ནིབྦཏྟི, སོ ཨནུཔུབྦེན ཝིཉྙུཏཾ པཱཔུཎི. ཏདཱ ཙ རཉྙོ གེཧེ པཙྩེཀབུདྡྷཱ བྷུཉྫནྟི, བོདྷིསཏྟོ ཏེསཾ ཝེཡྻཱཝཙྩཾ ཀརོཏི. སོ ཨེཀདིཝསཾ ཙིནྟེསི ‘‘མམ བཧཱུ བྷཱཏརོ, ལཙྪཱམི ནུ ཁོ ཨཧཾ ཨིམསྨིཾ ནགརེ ཀུལསནྟཀཾ རཛྫཾ, ཨུདཱཧུ ནོ’’ཏི? ཨཐསྶ ཨེཏདཧོསི ‘‘པཙྩེཀབུདྡྷེ པུཙྪིཏྭཱ ཛཱནིསྶཱམཱི’’ཏི. སོ དུཏིཡདིཝསེ པཙྩེཀབུདྡྷེསུ ཨཱགཏེསུ དྷམཀརཎཾ ཨཱདཱཡ པཱནཱིཡཾ པརིསྶཱཝེཏྭཱ པཱདེ དྷོཝིཏྭཱ ཏེལེན མཀྑེཏྭཱ ཏེསཾ ཨནྟརཁཛྫཀཾ ཁཱདིཏྭཱ ¶ ནིསིནྣཀཱལེ ཝནྡིཏྭཱ ཨེཀམནྟཾ ནིསིནྣོ ཏམཏྠཾ པུཙྪི. ཨཐ ནཾ ཏེ ཨཝོཙུཾ – ཀུམཱར, ན ཏྭཾ ཨིམསྨིཾ ནགརེ རཛྫཾ ལབྷིསྶསི, ཨིཏོ པན ཝཱིསཡོཛནསཏམཏྠཀེ གནྡྷཱརརཊྛེ ཏཀྐསིལཱནགརཾ ནཱམ ཨཏྠི, ཏཏྠ གནྟུཾ སཀྐོནྟོ ཨིཏོ སཏྟམེ དིཝསེ རཛྫཾ ལཙྪསི. ཨནྟརཱམགྒེ པན མཧཱཝཏྟནིཨཊཝིཡཾ པརིཔནྠོ ཨཏྠི, ཏཾ ཨཊཝིཾ པརིཧརིཏྭཱ གཙྪནྟསྶ ཡོཛནསཏིཀོ མགྒོ ཧོཏི, ཨུཛུཀཾ གཙྪནྟསྶ པཉྙཱས ཡོཛནཱནི ཧོནྟི. སོ ཧི ཨམནུསྶཀནྟཱརོ ནཱམ. ཏཏྠ ཡཀྑིནིཡོ ཨནྟརཱམགྒེ གཱམེ ཙ སཱལཱཡོ ཙ མཱཔེཏྭཱ ཨུཔརི སུཝཎྞཏཱརཀཝིཙིཏྟཝིཏཱནཾ མཧཱརཧསེཡྻཾ པཉྙཱཔེཏྭཱ ནཱནཱཝིརཱགཔཊསཱཎིཡོ པརིཀྑིཔིཏྭཱ དིབྦཱལངྐཱརེཧི ཨཏྟབྷཱཝཾ མཎྜེཏྭཱ སཱལཱསུ ནིསཱིདིཏྭཱ ཨཱགཙྪནྟེ པུརིསེ མདྷུརཱཧི ཝཱཙཱཧི ¶ སངྒཎྷིཏྭཱ ‘‘ཀིལནྟརཱུཔཱ ཝིཡ པཉྙཱཡཐ, ཨིདྷཱགནྟྭཱ ནིསཱིདིཏྭཱ པཱནཱིཡཾ པིཝིཏྭཱ གཙྪཐཱ’’ཏི པཀྐོསིཏྭཱ ཨཱགཏཱགཏཱནཾ ཨཱསནཱནི དཏྭཱ ཨཏྟནོ རཱུཔལཱིལཱཝིལཱསེཧི པལོབྷེཏྭཱ ཀིལེསཝསིཀེ ཀཏྭཱ ཨཏྟནཱ སདྡྷིཾ ཨཛ྄ཛྷཱཙཱརེ ཀཏེ ཏཏྠེཝ ¶ ནེ ལོཧིཏེན པགྒྷརནྟེན ཁཱདིཏྭཱ ཛཱིཝིཏཀྑཡཾ པཱཔེནྟི. རཱུཔགོཙརཾ སཏྟཾ རཱུཔེནེཝ གཎྷནྟི, སདྡགོཙརཾ མདྷུརེན གཱིཏཝཱདིཏསདྡེན, གནྡྷགོཙརཾ དིབྦགནྡྷེཧི, རསགོཙརཾ དིབྦེན ནཱནགྒརསབྷོཛནེན, ཕོཊྛབྦགོཙརཾ ཨུབྷཏོལོཧིཏཀཱུཔདྷཱནེཧི དིབྦསཡནེཧི གཎྷནྟི. སཙེ ཨིནྡྲིཡཱནི བྷིནྡིཏྭཱ ཏཱ ཨནོལོཀེཏྭཱ སཏིཾ པཙྩུཔཊྛཱཔེཏྭཱ གམིསྶསི, སཏྟམེ དིཝསེ ཏཏྠ རཛྫཾ ལཙྪསཱིཏི.

བོདྷིསཏྟོ ‘‘ཧོཏུ, བྷནྟེ, ཏུམྷཱཀཾ ཨོཝཱདཾ གཧེཏྭཱ ཀིཾ ཏཱ ཨོལོཀེསྶཱམཱི’’ཏི པཙྩེཀབུདྡྷེཧི པརིཏྟཾ ཀཱརཱཔེཏྭཱ པརིཏྟཝཱལུཀཉྩེཝ པརིཏྟསུཏྟཉྩ ཨཱདཱཡ པཙྩེཀབུདྡྷེ ཙ མཱཏཱཔིཏརོ ཙ ཝནྡིཏྭཱ ནིཝེསནཾ གནྟྭཱ ཨཏྟནོ པུརིསེ ཨཱཧ – ‘‘ཨཧཾ ཏཀྐསིལཱཡཾ རཛྫཾ གཧེཏུཾ གཙྪཱམི, ཏུམྷེ ཨིདྷེཝ ཏིཊྛཐཱ’’ཏི. ཨཐ ནཾ པཉྩ ཛནཱ ཨཱཧཾསུ ‘‘མཡམྤི ཨནུགཙྪཱམཱ’’ཏི. ‘‘ན སཀྐཱ ཏུམྷེཧི ཨནུགནྟུཾ, ཨནྟརཱམགྒེ ཀིར ཡཀྑིནིཡོ རཱུཔཱདིགོཙརེ མནུསྶེ ཨེཝཉྩེཝཉྩ རཱུཔཱདཱིཧི པལོབྷེཏྭཱ གཎྷནྟི, མཧཱ པརིཔནྠོ, ཨཧཾ པན ཨཏྟཱནཾ ཏཀྐེཏྭཱ གཙྪཱམཱི’’ཏི. ‘‘ཀིཾ པན, དེཝ, མཡཾ ཏུམྷེཧི སདྡྷིཾ གཙྪནྟཱ ཨཏྟནོ པིཡཱནི རཱུཔཱདཱིནི ཨོལོཀེསྶཱམ, མཡམྤི ¶ ཏཐེཝ གམིསྶཱམཱ’’ཏི. བོདྷིསཏྟོ ‘‘ཏེན ཧི ཨཔྤམཏྟཱ ཧོཐཱ’’ཏི ཏེ པཉྩ ཛནེ ཨཱདཱཡ མགྒཾ པཊིཔཛྫི.

ཡཀྑིནིཡོ གཱམཱདཱིནི མཱཔེཏྭཱ ནིསཱིདིཾསུ. ཏེསུ རཱུཔགོཙརོ པུརིསོ ཏཱ ཡཀྑིནིཡོ ཨོལོཀེཏྭཱ རཱུཔཱརམྨཎེ པཊིབདྡྷཙིཏྟོ ཐོཀཾ ཨོཧཱིཡི. བོདྷིསཏྟོ ‘‘ཀིཾ བྷོ, ཐོཀཾ ཨོཧཱིཡསཱི’’ཏི ཨཱཧ. ‘‘དེཝ, པཱདཱ མེ རུཛྫནྟི, ཐོཀཾ སཱལཱཡཾ ནིསཱིདིཏྭཱ ཨཱགཙྪཱམཱི’’ཏི. ‘‘ཨམྦྷོ, ཨེཏཱ ཡཀྑིནིཡོ, མཱ ཁོ པཏྠེསཱི’’ཏི. ‘‘ཡཾ ཧོཏི, ཏཾ ཧོཏུ, ན སཀྐོམི, དེཝཱ’’ཏི. ‘‘ཏེན ཧི པཉྙཱཡིསྶསཱི’’ཏི ཨིཏརེ ཙཏྟཱརོ ཨཱདཱཡ ཨགམཱསི. སོཔི རཱུཔགོཙརཀོ ཏཱསཾ སནྟིཀཾ ཨགམཱསི. ཏཱ ཨཏྟནཱ སདྡྷིཾ ¶ ཨཛ྄ཛྷཱཙཱརེ ཀཏེ ཏཾ ཏཏྠེཝ ཛཱིཝིཏཀྑཡཾ པཱཔེཏྭཱ པུརཏོ གནྟྭཱ ཨཉྙཾ སཱལཾ མཱཔེཏྭཱ ནཱནཱཏཱུརིཡཱནི གཧེཏྭཱ གཱཡམཱནཱ ནིསཱིདིཾསུ, ཏཏྠ སདྡགོཙརཀོ ཨོཧཱིཡི. པུརིམནཡེནེཝ ཏམྤི ཁཱདིཏྭཱ པུརཏོ གནྟྭཱ ནཱནཔྤཀཱརེ གནྡྷཀརཎྜཀེ པཱུརེཏྭཱ ཨཱཔཎཾ པསཱརེཏྭཱ ནིསཱིདིཾསུ, ཏཏྠ གནྡྷགོཙརཀོ ཨོཧཱིཡི. ཏམྤི ཁཱདིཏྭཱ པུརཏོ གནྟྭཱ ནཱནགྒརསཱནཾ དིབྦབྷོཛནཱནཾ བྷཱཛནཱནི པཱུརེཏྭཱ ཨོདནིཀཱཔཎཾ པསཱརེཏྭཱ ནིསཱིདིཾསུ, ཏཏྠ རསགོཙརཀོ ཨོཧཱིཡི. ཏམྤི ཁཱདིཏྭཱ པུརཏོ གནྟྭཱ དིབྦསཡནཱནི པཉྙཱཔེཏྭཱ ནིསཱིདིཾསུ, ཏཏྠ ཕོཊྛབྦགོཙརཀོ ཨོཧཱིཡི. ཏམྤི ཁཱདིཾསུ, བོདྷིསཏྟོ ཨེཀཀོཝ ཨཧོསི.

ཨཐེཀཱ ¶ ཡཀྑིནཱི ‘‘ཨཏིཁརམནྟོ ཝཏཱཡཾ, ཨཧཾ ཏཾ ཁཱདིཏྭཱཝ ནིཝཏྟིསྶཱམཱི’’ཏི བོདྷིསཏྟསྶ པཙྪཏོ པཙྪཏོ ཨགམཱསི. ཨཊཝིཡཱ པརབྷཱགེ ཝནཀམྨིཀཱདཡོ ཡཀྑིནིཾ དིསྭཱ ‘‘ཨཡཾ ཏེ པུརཏོ གཙྪནྟོ པུརིསོ ཀིཾ ཧོཏཱི’’ཏི པུཙྪིཾསུ. ‘‘ཀོམཱརསཱམིཀོ མེ, ཨཡྻཱ’’ཏི. ‘‘ཨམྦྷོ, ཨཡཾ ཨེཝཾ སུཀུམཱལཱ པུཔྥདཱམསདིསཱ སུཝཎྞཝཎྞཱ ཀུམཱརིཀཱ ཨཏྟནོ ཀུལཾ ཚཌྜེཏྭཱ བྷཝནྟཾ ཏཀྐེཏྭཱ ནིཀྑནྟཱ, ཀསྨཱ ཨེཏཾ ཨཀིལམེཏྭཱ ཨཱདཱཡ ན གཙྪསཱི’’ཏི? ‘‘ནེསཱ, ཨཡྻཱ, མཡ྄ཧཾ པཛཱཔཏི, ཡཀྑིནཱི ཨེསཱ, ཨེཏཱཡ མེ པཉྩ མནུསྶཱ ཁཱདིཏཱ’’ཏི. ‘‘ཨཡྻཱ, པུརིསཱ ནཱམ ཀུདྡྷཀཱལེ ཨཏྟནོ པཛཱཔཏིཡོ ཡཀྑིནིཡོཔི ཀརོནྟི པེཏིནིཡོཔཱི’’ཏི. སཱ གཙྪམཱནཱ གབྦྷིནིཝཎྞཾ དསྶེཏྭཱ པུན སཀིཾ ཝིཛཱཏཝཎྞཾ ཀཏྭཱ པུཏྟཾ ཨངྐེན ཨཱདཱཡ བོདྷིསཏྟཾ ཨནུབནྡྷི, དིཊྛདིཊྛཱ ¶ པུརིམནཡེནེཝ པུཙྪནྟི. བོདྷིསཏྟོཔི ཏཐེཝ ཝཏྭཱ གཙྪནྟོ ཏཀྐསིལཾ པཱཔུཎི. སཱ པུཏྟཾ ཨནྟརདྷཱཔེཏྭཱ ཨེཀིཀཱཝ ཨནུབནྡྷི. བོདྷིསཏྟོ ནགརདྭཱརཾ གནྟྭཱ ཨེཀིསྶཱ སཱལཱཡ ནིསཱིདི. སཱ བོདྷིསཏྟསྶ ཏེཛེན པཝིསིཏུཾ ཨསཀྐོནྟཱི དིབྦརཱུཔཾ མཱཔེཏྭཱ སཱལཱདྭཱརེ ཨཊྛཱསི.

ཏསྨིཾ སམཡེ ཏཀྐསིལརཱཛཱ ཨུཡྻཱནཾ གཙྪནྟོ ཏཾ དིསྭཱ པཊིབདྡྷཙིཏྟོ ཧུཏྭཱ ‘‘གཙྪ, ཨིམིསྶཱ སསྶཱམིཀཨསྶཱམིཀབྷཱཝཾ ཛཱནཱཧཱི’’ཏི ¶ མནུསྶཾ པེསེསི. སོ ཏཾ ཨུཔསངྐམིཏྭཱ ‘‘སསྶཱམིཀཱསཱི’’ཏི པུཙྪི. ‘‘ཨཱམ, ཨཡྻ, ཨཡཾ མེ སཱལཱཡ ནིསིནྣོ སཱམིཀོ’’ཏི. བོདྷིསཏྟོ ‘‘ནེསཱ མཡ྄ཧཾ པཛཱཔཏི, ཡཀྑིནཱི ཨེསཱ, ཨེཏཱཡ མེ པཉྩ མནུསྶཱ ཁཱདིཏཱ’’ཏི ཨཱཧ. སཱཔི ‘‘པུརིསཱ ནཱམ ཨཡྻཱ ཀུདྡྷཀཱལེ ཡཾ ཨིཙྪནྟི, ཏཾ ཝདནྟཱི’’ཏི ཨཱཧ. སོ ཨུབྷིནྣམྤི ཝཙནཾ རཉྙོ ཨཱརོཙེསི. རཱཛཱ ‘‘ཨསྶཱམིཀབྷཎྜཾ ནཱམ རཱཛསནྟཀཾ ཧོཏཱི’’ཏི ཡཀྑིནིཾ པཀྐོསཱཔེཏྭཱ ཨེཀཧཏྠིཔིཊྛེ ནིསཱིདཱཔེཏྭཱ ནགརཾ པདཀྑིཎཾ ཀཏྭཱ པཱསཱདཾ ཨབྷིརུཡ྄ཧ ཏཾ ཨགྒམཧེསིཊྛཱནེ ཋཔེསི.

སོ ནྷཱཏཝིལིཏྟོ སཱཡམཱསཾ བྷུཉྫིཏྭཱ སིརཱིསཡནཾ ཨབྷིརུཧི. སཱཔི ཡཀྑིནཱི ཨཏྟནོ ཨུཔཀཔྤནཀཾ ཨཱཧཱརཾ ཨཱཧརིཏྭཱ ཨལངྐཏཔཊིཡཏྟཱ སིརིསཡནེ རཉྙཱ སདྡྷིཾ ནིཔཛྫིཏྭཱ རཉྙོ རཏིཝསེན སུཁཾ སམཔྤིཏསྶ ནིཔནྣཀཱལེ ཨེཀེན པསྶེན པརིཝཏྟིཏྭཱ པརོདི. ཨཐ ནཾ རཱཛཱ ‘‘ཀིཾ, བྷདྡེ, རོདསཱི’’ཏི པུཙྪི. ‘‘དེཝ, ཨཧཾ ཏུམྷེཧི མགྒེ དིསྭཱ ཨཱནཱིཏཱ, ཏུམྷཱཀཉྩ གེཧེ བཧཱུ ཨིཏྠིཡོ, ཨཧཾ སཔཏྟཱིནཾ ཨནྟརེ ཝསམཱནཱ ཀཐཱཡ ཨུཔྤནྣཱཡ ‘ཀོ ཏུཡ྄ཧཾ མཱཏརཾ ཝཱ པིཏརཾ ཝཱ གོཏྟཾ ཝཱ ཛཱཏིཾ ཝཱ ཛཱནཱཏི, ཏྭཾ ཨནྟརཱམགྒེ དིསྭཱ ཨཱནཱིཏཱ ནཱམཱ’ཏི སཱིསེ གཧེཏྭཱ ནིཔྤཱིལི༹ཡམཱནཱ ཝིཡ མངྐུ བྷཝིསྶཱམི. སཙེ ཏུམྷེ སཀལརཛྫེ ཨིསྶརིཡཉྩ ཨཱཎཉྩ མཡ྄ཧཾ དདེཡྻཱཐ, ཀོཙི མཡ྄ཧཾ ཙིཏྟཾ ཀོཔེཏྭཱ ཀཐེཏུཾ ན སཀྑིསྶཏཱི’’ཏི ¶ . ‘‘བྷདྡེ, མཡ྄ཧཾ སཀལརཊྛཝཱསིནོ ན ཀིཉྩི ཧོནྟི, ནཱཧཾ ཨེཏེསཾ སཱམིཀོ. ཡེ པན རཱཛཱཎཾ ཀོཔེཏྭཱ ཨཀཏྟབྦཾ ཀརོནྟི, ཏེསཉྙེཝཱཧཾ སཱམིཀོ. ཨིམིནཱ ཀཱརཎེན ན སཀྐཱ ཏུཡ྄ཧཾ སཀལརཊྛེ ཝཱ ནགརེ ཝཱ ཨིསྶརིཡཉྩ ཨཱཎཉྩ དཱཏུ’’ནྟི. ‘‘ཏེན ཧི, དེཝ, སཙེ རཊྛེ ཝཱ ནགརེ ཝཱ ཨཱཎཾ དཱཏུཾ ན སཀྐོཐ, ཨནྟོནིཝེསནེ ¶ ཨནྟོཝལ༹ཉྫནཀཱནཾ ཨུཔརི མམ ཝསཾ ཝཏྟནཏྠཱཡ ཨཱཎཾ དེཐཱ’’ཏི. རཱཛཱ དིབྦཕོཊྛབྦེན བདྡྷོ ཏསྶཱ ཝཙནཾ ཨཏིཀྐམིཏུཾ ཨསཀྐོནྟོ ‘‘སཱདྷུ, བྷདྡེ, ཨནྟོཝལ༹ཉྫནཀེསུ ཏུཡ྄ཧཾ ཨཱཎཾ དམྨི, ཏྭཾ ཨེཏེ ཨཏྟནོ ཝསེ ཝཏྟཱཔེཧཱི’’ཏི ¶ ཨཱཧ. སཱ ‘‘སཱདྷཱུ’’ཏི སམྤཊིཙྪིཏྭཱ རཉྙོ ནིདྡཾ ཨོཀྐནྟཀཱལེ ཡཀྑནགརཾ གནྟྭཱ ཡཀྑེ པཀྐོསིཏྭཱ ཨཏྟནཱ རཱཛཱནཾ ཛཱིཝིཏཀྑཡཾ པཱཔེཏྭཱ ཨཊྛིམཏྟཾ སེསེཏྭཱ སབྦཾ ནྷཱརུཙམྨམཾསལོཧིཏཾ ཁཱདི, ཨཝསེསཱ ཡཀྑཱ མཧཱདྭཱརཏོ པཊྛཱཡ ཨནྟོནིཝེསནེ ཀུཀྐུཊཀུཀྐུརེ ཨཱདིཾ ཀཏྭཱ སབྦེ ཁཱདིཏྭཱ ཨཊྛིམཏྟསེསེ ཨཀཾསུ.

པུནདིཝསེ དྭཱརཾ ཡཐཱཔིཧིཏམེཝ དིསྭཱ མནུསྶཱ ཕརསཱུཧི ཀཝཱཊཱནི ཀོཊྚེཏྭཱ ཨནྟོ པཝིསིཏྭཱ སབྦཾ ནིཝེསནཾ ཨཊྛིཀཔརིཀིཎྞཾ དིསྭཱ ‘‘སཙྩཾ ཝཏ སོ པུརིསོ ཨཱཧ ‘ནཱཡཾ མཡ྄ཧཾ པཛཱཔཏི, ཡཀྑིནཱི ཨེསཱ’ཏི. རཱཛཱ པན ཀིཉྩི ཨཛཱནིཏྭཱ ཏཾ གཧེཏྭཱ ཨཏྟནོ བྷརིཡཾ ཨཀཱསི, སཱ ཡཀྑེ པཀྐོསིཏྭཱ སབྦཾ ཛནཾ ཁཱདིཏྭཱ གཏཱ བྷཝིསྶཏཱི’’ཏི ཨཱཧཾསུ. བོདྷིསཏྟོཔི ཏཾ དིཝསཾ ཏསྶཱཡེཝ སཱལཱཡཾ པརིཏྟཝཱལུཀཾ སཱིསེ ཀཏྭཱ པརིཏྟསུཏྟཉྩ པརིཀྑིཔིཏྭཱ ཁགྒཾ གཧེཏྭཱ ཋིཏཀོཝ ཨརུཎཾ ཨུཊྛཱཔེསི. མནུསྶཱ སཀལརཱཛནིཝེསནཾ སོདྷེཏྭཱ ཧརིཏཱུཔལིཏྟཾ ཀཏྭཱ ཨུཔརི གནྡྷེཧི ཝིལིམྤིཏྭཱ པུཔྥཱནི ཝིཀིརིཏྭཱ པུཔྥདཱམཱནི ཨོསཱརེཏྭཱ དྷཱུམཾ དཏྭཱ ནཝམཱལཱ བནྡྷིཏྭཱ སམྨནྟཡིཾསུ ‘‘ཨམྦྷོ, ཡོ པུརིསོ དིབྦརཱུཔཾ མཱཔེཏྭཱ པཙྪཏོ ཨཱགཙྪནྟིཾ ཡཀྑིནིཾ ཨིནྡྲིཡཱནི བྷིནྡིཏྭཱ ཨོལོཀནམཏྟམྤི ན ཨཀཱསི, སོ ཨཏིཝིཡ ཨུལཱ༹རསཏྟོ དྷིཏིམཱ ཉཱཎསམྤནྣོ, ཏཱདིསེ པུརིསེ རཛྫཾ ཨནུསཱསནྟེ སབྦརཊྛཾ སུཁིཏཾ བྷཝིསྶཏི, ཏཾ རཱཛཱནཾ ཀརོམཱ’’ཏི. ཨཐ སབྦེ ཨམཙྩཱ ཙ ནཱགརཱ ཙ ཨེཀཙྪནྡཱ ཧུཏྭཱ བོདྷིསཏྟཾ ཨུཔསངྐམིཏྭཱ ‘‘དེཝ, ཏུམྷེ ཨིམཾ རཛྫཾ ཀཱརེཐཱ’’ཏི ནགརཾ པཝེསེཏྭཱ རཏནརཱསིམྷི ཋཔེཏྭཱ ཨབྷིསིཉྩིཏྭཱ ཏཀྐསིལརཱཛཱནཾ ཨཀཾསུ. སོ ཙཏྟཱརི ཨགཏིགམནཱནི ཝཛྫེཏྭཱ དས རཱཛདྷམྨེ ཨཀོཔེཏྭཱ དྷམྨེན རཛྫཾ ཀཱརེནྟོ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ཨིམཾ ཨཏཱིཏཾ ཨཱཧརིཏྭཱ ཨབྷིསམྦུདྡྷོ ཧུཏྭཱ ཨིམཾ གཱཐམཱཧ –

༩༦.

‘‘སམཏིཏྟིཀཾ ¶ ¶ ¶ ཨནཝསེསཀཾ, ཏེལཔཏྟཾ ཡཐཱ པརིཧརེཡྻ;

ཨེཝཾ སཙིཏྟམནུརཀྑེ, པཏྠཡཱནོ དིསཾ ཨགཏཔུབྦ’’ནྟི.

ཏཏྠ སམཏིཏྟིཀནྟི ཨནྟོམུཁཝཊྚིལེཁཾ པཱཔེཏྭཱ སམབྷརིཏཾ. ཨནཝསེསཀནྟི ཨནཝསིཉྩནཀཾ ཨཔརིསྶཱཝནཀཾ ཀཏྭཱ. ཏེལཔཏྟནྟི པཀྑིཏྟཏིལཏེལཔཏྟཾ. པརིཧརེཡྻཱཏི ཧརེཡྻ, ཨཱདཱཡ གཙྪེཡྻ. ཨེཝཾ སཙིཏྟམནུརཀྑེཏི ཏཾ ཏེལབྷརིཏཾ པཏྟཾ ཝིཡ ཨཏྟནོ ཙིཏྟཾ ཀཱཡགཏཱསཏིཡཱ གོཙརེ ཙེཝ སམྤཡུཏྟསཏིཡཱ ཙཱཏི ཨུབྷིནྣཾ ཨནྟརེ པཀྑིཔིཏྭཱ ཡཐཱ མུཧུཏྟམྤི བཧིདྡྷཱ གོཙརེ ན ཝིཀྑིཔཏི, ཏཐཱ པཎྜིཏོ ཡོགཱཝཙརོ རཀྑེཡྻ གོཔེཡྻ. ཀིཾཀཱརཎཱ? ཨེཏསྶ ཧི –

‘‘དུནྣིགྒཧསྶ ལཧུནོ, ཡཏྠཀཱམནིཔཱཏིནོ;

ཙིཏྟསྶ དམཐོ སཱདྷུ, ཙིཏྟཾ དནྟཾ སུཁཱཝཧ’’ནྟི. (དྷ. པ. ༣༥);

ཏསྨཱ –

‘‘སུདུདྡསཾ སུནིཔུཎཾ, ཡཏྠཀཱམནིཔཱཏིནཾ;

ཙིཏྟཾ རཀྑེཐ མེདྷཱཝཱི, ཙིཏྟཾ གུཏྟཾ སུཁཱཝཧཾ’’. (དྷ. པ. ༣༦);

ཨིདཉྷི –

‘‘དཱུརངྒམཾ ཨེཀཙརཾ, ཨསརཱིརཾ གུཧཱསཡཾ;

ཡེ ཙིཏྟཾ སཾཡམེསྶནྟི, མོཀྑནྟི མཱརབནྡྷནཱ’’. (དྷ. པ. ༣༧);

ཨིཏརསྶ པན –

‘‘ཨནཝཊྛིཏཙིཏྟསྶ, སདྡྷམྨཾ ཨཝིཛཱནཏོ;

པརིཔླཝཔསཱདསྶ, པཉྙཱ ན པརིཔཱུརཏི’’. (དྷ. པ. ༣༨);

ཐིརཀམྨཊྛཱནསཧཱཡསྶ པན –

‘‘ཨནཝསྶུཏཙིཏྟསྶ ¶ , ཨནནྭཱཧཏཙེཏསོ;

པུཉྙཔཱཔཔཧཱིནསྶ, ནཏྠི ཛཱགརཏོ བྷཡཾ’’. (དྷ. པ. ༣༩);

ཏསྨཱ ཨེཏཾ –

‘‘ཕནྡནཾ ཙཔལཾ ཙིཏྟཾ, དཱུརཀྑཾ དུནྣིཝཱརཡཾ;

ཨུཛུཾ ཀརོཏི མེདྷཱཝཱི, ཨུསུཀཱརོཝ ཏེཛནཾ’’. (དྷ. པ. ༣༣);

ཨེཝཾ ¶ ཨུཛུཾ ཀརོནྟོ སཙིཏྟམནུརཀྑེ.

པཏྠཡཱནོ ¶ དིསཾ ཨགཏཔུབྦནྟི ཨིམསྨིཾ ཀཱཡགཏཱསཏིཀམྨཊྛཱནེ ཀམྨཾ ཨཱརབྷིཏྭཱ ཨནམཏགྒེ སཾསཱརེ ཨགཏཔུབྦཾ དིསཾ པཏྠེནྟོ པིཧེནྟོ ཝུཏྟནཡེན སཀཾ ཙིཏྟཾ རཀྑེཡྻཱཏི ཨཏྠོ. ཀཱ པནེསཱ དིསཱ ནཱམ? –

‘‘མཱཏཱཔིཏཱ དིསཱ པུབྦཱ, ཨཱཙརིཡཱ དཀྑིཎཱ དིསཱ;

པུཏྟདཱརཱ དིསཱ པཙྪཱ, མིཏྟཱམཙྩཱ ཙ ཨུཏྟརཱ.

‘‘དཱསཀམྨཀརཱ ཧེཊྛཱ, ཨུདྡྷཾ སམཎབྲཱཧྨཎཱ;

ཨེཏཱ དིསཱ ནམསྶེཡྻ, ཨལམཏྟོ ཀུལེ གིཧཱི’’ཏི. (དཱི. ནི. ༣.༢༧༣) –

ཨེཏྠ ཏཱཝ པུཏྟདཱརཱདཡོ ‘‘དིསཱ’’ཏི ཝུཏྟཱ.

‘‘དིསཱ ཙཏསྶོ ཝིདིསཱ ཙཏསྶོ, ཨུདྡྷཾ ཨདྷོ དས དིསཱ ཨིམཱཡོ;

ཀཏམཾ དིསཾ ཏིཊྛཏི ནཱགརཱཛཱ, ཡམདྡསཱ སུཔིནེ ཚབྦིསཱཎ’’ནྟི. (ཛཱ. ༡.༡༦.༡༠༤) –

ཨེཏྠ པུརཏྠིམཱདིབྷེདཱ དིསཱཝ ‘‘དིསཱ’’ཏི ཝུཏྟཱ.

‘‘ཨགཱརིནོ ¶ ཨནྣདཔཱནཝཏྠདཱ, ཨཝ྄ཧཱཡིཀཱ ཏམྤི དིསཾ ཝདནྟི;

ཨེསཱ དིསཱ པརམཱ སེཏཀེཏུ, ཡཾ པཏྭཱ དུཀྑཱི སུཁིནོ བྷཝནྟཱི’’ཏི. (ཛཱ. ༡.༦.༩) –

ཨེཏྠ པན ནིབྦཱནཾ ‘‘དིསཱ’’ཏི ཝུཏྟཾ. ཨིདྷཱཔི ཏདེཝ ཨདྷིཔྤེཏཾ. ཏཉྷི ‘‘ཁཡཾ ཝིརཱག’’ནྟིཨཱདཱིཧི དིསྶཏི ཨཔདིསྶཏི, ཏསྨཱ ‘‘དིསཱ’’ཏི ཝུཙྩཏི. ཨནམཏགྒེ པན སཾསཱརེ ཀེནཙི བཱལཔུཐུཛྫནེན སུཔིནེནཔི ཨགཏཔུབྦཏཱཡ ཨགཏཔུབྦཱ དིསཱ ནཱམཱཏི ཝུཏྟཾ. ཏཾ པཏྠཡནྟེན ཀཱཡགཏཱསཏིཡཱ ཡོགོ ཀརཎཱིཡོཏི.

ཨེཝཾ སཏྠཱ ནིབྦཱནེན དེསནཱཡ ཀཱུཊཾ གཧེཏྭཱ ཛཱཏཀཾ སམོདྷཱནེསི – ‘‘ཏདཱ རཱཛཔརིསཱ བུདྡྷཔརིསཱ ཨཧོསི, རཛྫཔྤཏྟཀུམཱརོ པན ཨཧམེཝ ཨཧོསི’’ནྟི.

ཏེལཔཏྟཛཱཏཀཝཎྞནཱ ཚཊྛཱ.

[༩༧] ༧. ནཱམསིདྡྷིཛཱཏཀཝཎྞནཱ

ཛཱིཝཀཉྩ ¶ མཏཾ དིསྭཱཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ནཱམསིདྡྷིཀཾ བྷིཀྑུཾ ཨཱརབྦྷ ཀཐེསི. ཨེཀོ ཀིར ཀུལཔུཏྟོ ནཱམེན པཱཔཀོ ནཱམ. སོ སཱསནེ ཨུརཾ དཏྭཱ པབྦཛིཏོ བྷིཀྑཱུཧི ¶ ‘‘ཨེཧཱཝུསོ, པཱཔཀ, ཏིཊྛཱཝུསོ, པཱཔཀཱ’’ཏི ཝུཙྩམཱནོ ཙིནྟེསི ‘‘ལོཀེ པཱཔཀཾ ནཱམ ལཱམཀཾ ཀཱལ༹ཀཎྞིབྷཱུཏཾ ཝུཙྩཏི, ཨཉྙཾ མངྒལཔཊིསཾཡུཏྟཾ ནཱམཾ ཨཱཧརཱཔེསྶཱམཱི’’ཏི. སོ ཨཱཙརིཡུཔཛ྄ཛྷཱཡེ ཨུཔསངྐམིཏྭཱ ‘‘བྷནྟེ, མཡ྄ཧཾ ནཱམཾ ཨཝམངྒལཾ, ཨཉྙཾ མེ ནཱམཾ ཀརོཐཱ’’ཏི ཨཱཧ. ཨཐ ནཾ ཏེ ཨེཝམཱཧཾསུ – ‘‘ཨཱཝུསོ, ནཱམཾ ནཱམ པཎྞཏྟིམཏྟཾ, ནཱམེན ཀཱཙི ཨཏྠསིདྡྷི ནཱམ ནཏྠི, ཨཏྟནོ ནཱམེནེཝ སནྟུཊྛོ ཧོཧཱི’’ཏི. སོ པུནཔྤུནཾ ཡཱཙིཡེཝ. ཏསྶཱཡཾ ནཱམསིདྡྷིཀབྷཱཝོ བྷིཀྑུསངྒྷེ པཱཀཊོ ཛཱཏོ. ཨཐེཀདིཝསཾ དྷམྨསབྷཱཡཾ སནྣིསིནྣཱ བྷིཀྑཱུ ཀཐཾ སམུཊྛཱཔེསུཾ ‘‘ཨཱཝུསོ, ཨསུཀོ ཀིར བྷིཀྑུ ནཱམསིདྡྷིཀོ མངྒལཾ ནཱམཾ ཨཱཧརཱཔེཏཱི’’ཏི. ཨཐ སཏྠཱ དྷམྨསབྷཾ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, སོ ཨིདཱནེཝ, པུབྦེཔི ནཱམསིདྡྷིཀོཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ ཏཀྐསིལཱཡཾ བོདྷིསཏྟོ དིསཱཔཱམོཀྑོ ཨཱཙརིཡོ ཧུཏྭཱ པཉྩ མཱཎཝཀསཏཱནི མནྟེ ཝཱཙེསི. ཏསྶེཀོ མཱཎཝོ པཱཔཀོ ནཱམ ནཱམེན. སོ ‘‘ཨེཧི, པཱཔཀ, ཡཱཧི, པཱཔཀཱ’’ཏི ཝུཙྩམཱནོ ཙིནྟེསི ‘‘མཡ྄ཧཾ ནཱམཾ ཨཝམངྒལཾ, ཨཉྙཾ ནཱམཾ ཨཱཧརཱཔེསྶཱམཱི’’ཏི. སོ ཨཱཙརིཡཾ ཨུཔསངྐམིཏྭཱ ‘‘ཨཱཙརིཡ, མཡ྄ཧཾ ནཱམཾ ཨཝམངྒལཾ, ཨཉྙཾ མེ ནཱམཾ ཀརོཐཱ’’ཏི ཨཱཧ. ཨཐ ནཾ ཨཱཙརིཡོ ཨཝོཙ ‘‘གཙྪ, ཏཱཏ, ཛནཔདཙཱརིཀཾ ཙརིཏྭཱ ཨཏྟནོ ཨབྷིརུཙིཏཾ ཨེཀཾ མངྒལནཱམཾ གཧེཏྭཱ ཨེཧི, ཨཱགཏསྶ ཏེ ནཱམཾ པརིཝཏྟེཏྭཱ ཨཉྙཾ ནཱམཾ ཀརིསྶཱམཱི’’ཏི. སོ ‘‘སཱདྷཱུ’’ཏི པཱཐེཡྻཾ གཧེཏྭཱ ནིཀྑནྟོ གཱམེན གཱམཾ ཙརནྟོ ཨེཀཾ ནགརཾ པཱཔུཎི. ཏཏྠ ཙེཀོ པུརིསོ ཀཱལཀཏོ ཛཱིཝཀོ ནཱམ ནཱམེན. སོ ཏཾ ཉཱཏིཛནེན ཨཱལཱ༹ཧནཾ ནཱིཡམཱནཾ དིསྭཱ ‘‘ཀིཾ ནཱམཀོ ཨེས པུརིསོ’’ཏི པུཙྪི. ‘‘ཛཱིཝཀོ ནཱམེསོ’’ཏི. ‘‘ཛཱིཝཀོཔི མརཏཱི’’ཏི? ‘‘ཛཱིཝཀོཔི མརཏི, ཨཛཱིཝཀོཔི མརཏི, ནཱམཾ ནཱམ པཎྞཏྟིམཏྟཾ, ཏྭཾ བཱལོ མཉྙེ’’ཏི. སོ ཏཾ ཀཐཾ སུཏྭཱ ནཱམེ མཛ྄ཛྷཏྟོ ཧུཏྭཱ ཨནྟོནགརཾ པཱཝིསི.

ཨཐེཀཾ ¶ དཱསིཾ བྷཏིཾ ཨདདམཱནཾ སཱམིཀཱ དྭཱརེ ནིསཱིདཱཔེཏྭཱ རཛྫུཡཱ པཧརནྟི, ཏསྶཱ ཙ ‘‘དྷནཔཱལཱི’’ཏི ནཱམཾ ཧོཏི. སོ ཨནྟརཝཱིཐིཡཱ ¶ གཙྪནྟོ ཏཾ པོཐིཡམཱནཾ དིསྭཱ ‘‘ཀསྨཱ ཨིམཾ པོཐེཐཱ’’ཏི པུཙྪི. ‘‘བྷཏིཾ དཱཏུཾ ན སཀྐོཏཱི’’ཏི. ‘‘ཀིཾ པནསྶཱ ནཱམ’’ནྟི? ‘‘དྷནཔཱལཱི ནཱམཱ’’ཏི. ནཱམེན དྷནཔཱལཱི སམཱནཱཔི བྷཏིམཏྟཾ དཱཏུཾ ན སཀྐོཏཱིཏི དྷནཔཱལིཡོཔི ཨདྷནཔཱལིཡོཔི དུགྒཏཱ ཧོནྟི, ནཱམཾ ནཱམ པཎྞཏྟིམཏྟཾ, ཏྭཾ བཱལོ མཉྙེཏི. སོ ནཱམེ མཛ྄ཛྷཏྟཏརོ ཧུཏྭཱ ནགརཱ ནིཀྑམྨ མགྒཾ པཊིཔནྣོ ཨནྟརཱམགྒེ མགྒམཱུལ༹ྷཔུརིསཾ དིསྭཱ ‘‘ཨམྦྷོ ཀིཾ ཀརོནྟོ ཝིཙརསཱི’’ཏི པུཙྪི. ‘‘མགྒམཱུལ༹ྷོམྷི, སཱམཱི’’ཏི. ‘‘ཀིཾ པན ཏེ ནཱམ’’ནྟི? ‘‘པནྠཀོ ནཱམཱ’’ཏི. ‘‘པནྠཀོཔི མགྒམཱུལ༹ྷོ ཧོཏཱི’’ཏི? ‘‘པནྠཀོཔི ཨཔནྠཀོཔི མགྒམཱུལ༹ྷོ ཧོཏི, ནཱམཾ ནཱམ པཎྞཏྟིམཏྟཾ ཏྭཾ པན བཱལོ མཉྙེཏི’’. སོ ནཱམེ ཨཏིམཛ྄ཛྷཏྟོ ཧུཏྭཱ བོདྷིསཏྟསྶ སནྟིཀཾ གནྟྭཱ ‘‘ཀིཾ, ཏཱཏ, ནཱམཾ རོཙེཏྭཱ ཨཱགཏོསཱི’’ཏི ཝུཏྟེ ‘‘ཨཱཙརིཡ, ཛཱིཝཀཱཔི ནཱམ མརནྟི ཨཛཱིཝཀཱཔི, དྷནཔཱལིཡོཔི དུགྒཏཱ ཧོནྟི ཨདྷནཔཱལིཡོཔི, པནྠཀཱཔི མགྒམཱུལ༹ྷཱ ཧོནྟི ཨཔནྠཀཱཔི, ནཱམཾ ནཱམ པཎྞཏྟིམཏྟཾ, ནཱམེན སིདྡྷི ནཏྠི, ཀམྨེནེཝ སིདྡྷི. ཨལཾ མཡ྄ཧཾ ཨཉྙེན ནཱམེན, ཏདེཝ མེ ནཱམཾ ཧོཏཱུ’’ཏི ཨཱཧ. བོདྷིསཏྟོ ཏེན དིཊྛཉྩ ཀཏཉྩ སཾསནྡེཏྭཱ ཨིམཾ གཱཐམཱཧ –

༩༧.

‘‘ཛཱིཝཀཉྩ ¶ མཏཾ དིསྭཱ, དྷནཔཱལིཉྩ དུགྒཏཾ;

པནྠཀཉྩ ཝནེ མཱུལ༹ྷཾ, པཱཔཀོ པུནརཱགཏོ’’ཏི.

ཏཏྠ པུནརཱགཏོཏི ཨིམཱནི ཏཱིཎི ཀཱརཎཱནི དིསྭཱ པུན ཨཱགཏོ, ར-ཀཱརོ སནྡྷིཝསེན ཝུཏྟོ.

སཏྠཱ ཨིམཾ དྷམྨདེསནཾ ཨཱཧརིཏྭཱ ‘‘ན, བྷིཀྑཝེ, ཨིདཱནེཝ, པུབྦེཔེས ནཱམསིདྡྷིཀོཡེཝཱ’’ཏི ཝཏྭཱ ཛཱཏཀཾ སམོདྷཱནེསི – ‘‘ཏདཱ ནཱམསིདྡྷིཀོ ཨིདཱནིཔི ནཱམསིདྡྷིཀོཡེཝ, ཨཱཙརིཡཔརིསཱ བུདྡྷཔརིསཱ, ཨཱཙརིཡོ པན ཨཧམེཝ ཨཧོསི’’ནྟི.

ནཱམསིདྡྷིཛཱཏཀཝཎྞནཱ སཏྟམཱ.

[༩༨] ༨. ཀཱུཊཝཱཎིཛཛཱཏཀཝཎྞནཱ

སཱདྷུ ¶ ¶ ཁོ པཎྜིཏོ ནཱམཱཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཀཱུཊཝཱཎིཛཾ ཨཱརབྦྷ ཀཐེསི. སཱཝཏྠིཡཉྷི དྭེ ཛནཱ ཨེཀཏོ ཝཎིཛྫཾ ཀརོནྟཱ བྷཎྜཾ སཀཊེནཱདཱཡ ཛནཔདཾ གནྟྭཱ ལདྡྷལཱབྷཱ པཙྩཱགམིཾསུ. ཏེསུ ཀཱུཊཝཱཎིཛོ ཙིནྟེསི ‘‘ཨཡཾ བཧཱུ དིཝསེ དུབྦྷོཛནེན དུཀྑསེཡྻཱཡ ཀིལནྟོ, ཨིདཱནི ཨཏྟནོ གྷརེ ནཱནགྒརསེཧི ཡཱཝདཏྠཾ སུབྷོཛནཾ བྷུཉྫིཏྭཱ ཨཛཱིརཀེན མརིསྶཏི. ཨཐཱཧཾ ཨིམཾ བྷཎྜཾ ཏཡོ ཀོཊྛཱསེ ཀཏྭཱ ཨེཀཾ ཏསྶ དཱརཀཱནཾ དསྶཱམི, དྭེ ཀོཊྛཱསེ ཨཏྟནཱ གཧེསྶཱམཱི’’ཏི. སོ ‘‘ཨཛྫ བྷཱཛེསྶཱམ, སྭེ བྷཱཛེསྶཱམཱ’’ཏི བྷཎྜཾ བྷཱཛེཏུཾ ན ཨིཙྪི. ཨཐ ནཾ པཎྜིཏཝཱཎིཛོ ཨཀཱམཀཾ ནིཔྤཱིལེ༹ཏྭཱ བྷཱཛཱཔེཏྭཱ ཝིཧཱརཾ གནྟྭཱ སཏྠཱརཾ ཝནྡིཏྭཱ ཀཏཔཊིསནྠཱརོ ‘‘ཨཏིཔཔཉྩོ ཏེ ཀཏོ, ཨིདྷཱགནྟྭཱཔི ཙིརེན བུདྡྷུཔཊྛཱནཾ ཨཱགཏོསཱི’’ཏི ཝུཏྟེ ཏཾ པཝཏྟིཾ བྷགཝཏོ ཨཱརོཙེསི. སཏྠཱ ‘‘ན ཁོ སོ, ཨུཔཱསཀ, ཨིདཱནེཝ ཀཱུཊཝཱཎིཛོ, པུབྦེཔི ཀཱུཊཝཱཎིཛོཡེཝ. ཨིདཱནི པན ཏཾ ཝཉྩེཏུཀཱམོ ཛཱཏོ, པུབྦེ པཎྜིཏེཔི ཝཉྩེཏུཾ ཨུསྶཧཱི’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ བཱརཱཎསིཡཾ ཝཱཎིཛཀུལེ ནིབྦཏྟི, ནཱམགྒཧཎདིཝསེ ཙསྶ ‘‘པཎྜིཏོ’’ཏི ནཱམཾ ཨཀཾསུ. སོ ཝཡཔྤཏྟོ ཨཉྙེན ཝཱཎིཛེན སདྡྷིཾ ཨེཀཏོ ཧུཏྭཱ ཝཎིཛྫཾ ཀརོཏི, ཏསྶ ‘‘ཨཏིཔཎྜིཏོ’’ཏི ནཱམཾ ཨཧོསི. ཏེ བཱརཱཎསིཏོ པཉྩཧི སཀཊསཏེཧི བྷཎྜཾ ཨཱདཱཡ ཛནཔདཾ གནྟྭཱ ཝཎིཛྫཾ ཀཏྭཱ ལདྡྷལཱབྷཱ པུན བཱརཱཎསིཾ ཨཱགམིཾསུ. ཨཐ ནེསཾ བྷཎྜབྷཱཛནཀཱལེ ཨཏིཔཎྜིཏོ ཨཱཧ ‘‘མཡཱ དྭེ ཀོཊྛཱསཱ ལདྡྷབྦཱ’’ཏི. ‘‘ཀིཾཀཱརཎཱ’’ཏི? ‘‘ཏྭཾ པཎྜིཏོ, ཨཧཾ ཨཏིཔཎྜིཏོ. པཎྜིཏོ ཨེཀཾ ལདྡྷུཾ ཨརཧཏི, ཨཏིཔཎྜིཏོ དྭེ’’ཏི. ‘‘ནནུ ཨམྷཱཀཾ དྭིནྣཾ བྷཎྜམཱུལཀམྤི གོཎཱདཡོཔི སམསམཱཡེཝ, ཏྭཾ ཀསྨཱ དྭེ ཀོཊྛཱསེ ལདྡྷུཾ ཨརཧསཱི’’ཏི. ‘‘ཨཏིཔཎྜིཏབྷཱཝེནཱ’’ཏི. ཨེཝཾ ཏེ ཀཐཾ ཝཌྜྷེཏྭཱ ཀལཧཾ ཨཀཾསུ.

ཏཏོ ཨཏིཔཎྜིཏོ ‘‘ཨཏྠེཀོ ཨུཔཱཡོ’’ཏི ཙིནྟེཏྭཱ ཨཏྟནོ པིཏརཾ ཨེཀསྨིཾ སུསིརརུཀྑེ ¶ པཝེསེཏྭཱ ‘‘ཏྭཾ ཨམྷེསུ ཨཱགཏེསུ ¶ ‘ཨཏིཔཎྜིཏོ དྭེ ཀོཊྛཱསེ ལདྡྷུཾ ཨརཧཏཱི’ཏི ཝདེཡྻཱསཱི’’ཏི ཝཏྭཱ བོདྷིསཏྟཾ ཨུཔསངྐམིཏྭཱ ‘‘སམྨ, མཡ྄ཧཾ དྭིནྣཾ ཀོཊྛཱསཱནཾ ཡུཏྟབྷཱཝཾ ཝཱ ཨཡུཏྟབྷཱཝཾ ཝཱ ཨེསཱ རུཀྑདེཝཏཱ ཛཱནཱཏི, ཨེཧི, ཏཾ པུཙྪིསྶཱམཱ’’ཏི ཏཾ ཏཏྠ ནེཏྭཱ ‘‘ཨཡྻེ རུཀྑདེཝཏེ, ཨམྷཱཀཾ ཨཊྚཾ པཙྪིནྡཱ’’ཏི ཨཱཧ. ཨཐསྶ པིཏཱ སརཾ པརིཝཏྟེཏྭཱ ‘‘ཏེན ཧི ཀཐེཐཱ’’ཏི ཨཱཧ. ‘‘ཨཡྻེ, ཨཡཾ པཎྜིཏོ, ཨཧཾ ཨཏིཔཎྜིཏོ. ཨམྷེཧི ཨེཀཏོ ཝོཧཱརོ ཀཏོ, ཏཏྠ ཀེན ཀིཾ ལདྡྷབྦནྟི. པཎྜིཏེན ཨེཀོ ཀོཊྛཱསོ, ཨཏིཔཎྜིཏེན པན དྭེ ཀོཊྛཱསཱ ལདྡྷབྦཱ’’ཏི. བོདྷིསཏྟོ ཨེཝཾ ཝིནིཙྪིཏཾ ཨཊྚཾ སུཏྭཱ ‘‘ཨིདཱནི དེཝཏཱབྷཱཝཾ ཝཱ ཨདེཝཏཱབྷཱཝཾ ཝཱ ཛཱནིསྶཱམཱི’’ཏི པལཱལཾ ཨཱཧརིཏྭཱ སུསིརཾ པཱུརེཏྭཱ ཨགྒིཾ ཨདཱསི, ཨཏིཔཎྜིཏསྶ པིཏཱ ཛཱལཱཡ ཕུཊྛཀཱལེ ཨཌྜྷཛ྄ཛྷཱམེན སརཱིརེན ཨུཔརི ཨཱརུཡ྄ཧ སཱཁཾ གཧེཏྭཱ ཨོལམྦནྟོ བྷཱུམིཡཾ པཏིཏྭཱ ཨིམཾ གཱཐམཱཧ –

༩༨.

‘‘སཱདྷུ ཁོ པཎྜིཏོ ནཱམ, ན ཏྭེཝ ཨཏིཔཎྜིཏོ;

ཨཏིཔཎྜིཏེན པུཏྟེན, མནམྷི ཨུཔཀཱུལི༹ཏོ’’ཏི.

ཏཏྠ སཱདྷུ ཁོ པཎྜིཏོ ནཱམཱཏི ཨིམསྨིཾ ལོཀེ པཎྜིཙྩེན སམནྣཱགཏོ ཀཱརཎཱཀཱརཎཉྙཱུ པུགྒལོ སཱདྷུ སོབྷནོ. ཨཏིཔཎྜིཏོཏི ནཱམམཏྟེན ཨཏིཔཎྜིཏོ ཀཱུཊཔུརིསོ ན ཏྭེཝ ཝརཾ. མནམྷི ཨུཔཀཱུལི༹ཏོཏི ཐོཀེནམྷི ཛྷཱམོ, ཨཌྜྷཛ྄ཛྷཱམཀོཝ མུཏྟོཏི ཨཏྠོ. ཏེ ཨུབྷོཔི མཛ྄ཛྷེ བྷིནྡིཏྭཱ སམཉྙེཝ ཀོཊྛཱསཾ གཎྷིཏྭཱ ཡཐཱཀམྨཾ གཏཱ.

སཏྠཱ ¶ ‘‘པུབྦེཔི ཨེས ཀཱུཊཝཱཎིཛོཡེཝཱ’’ཏི ཨིམཾ ཨཏཱིཏཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཀཱུཊཝཱཎིཛོ པཙྩུཔྤནྣེཔི ཀཱུཊཝཱཎིཛོཡེཝ, པཎྜིཏཝཱཎིཛོ པན ཨཧམེཝ ཨཧོསི’’ནྟི.

ཀཱུཊཝཱཎིཛཛཱཏཀཝཎྞནཱ ཨཊྛམཱ.

[༩༩] ༩. པརོསཧསྶཛཱཏཀཝཎྞནཱ

པརོསཧསྶམྤི ¶ སམཱགཏཱནནྟི ཨིདཾ སཏྠཱ ཛེཏཝནེ ཝིཧརནྟོ པུཐུཛྫནཔུཙྪཱཔཉྩཀཾ ཨཱརབྦྷ ཀཐེསི ¶ . ཝཏྠུ སརབྷཛཱཏཀེ (ཛཱ. ༡.༡༣.༡༣༤ ཨཱདཡོ) ཨཱཝི བྷཝིསྶཏི. ཨེཀསྨིཾ པན སམཡེ བྷིཀྑཱུ དྷམྨསབྷཱཡཾ སནྣིཔཏིཏྭཱ ‘‘ཨཱཝུསོ, དསབལེན སཾཁིཏྟེན ཀཐིཏཾ དྷམྨསེནཱཔཏི སཱརིཔུཏྟོ ཝིཏྠཱརེན བྱཱཀཱསཱི’’ཏི ཐེརསྶ གུཎཾ ཀཐཡམཱནཱ ནིསཱིདིཾསུ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, སཱརིཔུཏྟོ ཨིདཱནེཝ མཡཱ སཾཁིཏྟེན བྷཱསིཏཾ ཝིཏྠཱརེན བྱཱཀརོཏི, པུབྦེཔི བྱཱཀཱསིཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨུདིཙྩབྲཱཧྨཎཀུལེ ནིབྦཏྟིཏྭཱ ཏཀྐསིལཱཡཾ སབྦསིཔྤཱནི ཨུགྒཎྷིཏྭཱ ཀཱམེ པཧཱཡ ཨིསིཔབྦཛྫཾ པབྦཛིཏྭཱ པཉྩཱབྷིཉྙཱ ཨཊྛ སམཱཔཏྟིཡོ ནིབྦཏྟེཏྭཱ ཧིམཝནྟེ ཝིཧཱསི. པརིཝཱརོཔིསྶ པཉྩ ཏཱཔསསཏཱནི ཨཧེསུཾ. ཨཐསྶ ཛེཊྛནྟེཝཱསིཀོ ཝསྶཱརཏྟསམཡེ ཨུཔཌྜྷཾ ཨིསིགཎཾ ཨཱདཱཡ ལོཎམྦིལསེཝནཏྠཱཡ མནུསྶཔཐཾ ཨགམཱསི. ཏདཱ བོདྷིསཏྟསྶ ཀཱལཀིརིཡཱསམཡོ ཛཱཏོ. ཨཐ ནཾ ཨནྟེཝཱསིཀཱ ‘‘ཨཱཙརིཡ, ཀཏརོ ཝོ གུཎོ ལདྡྷོ’’ཏི ཨདྷིགམཾ པུཙྪིཾསུ. སོ ‘‘ནཏྠི ཀིཉྩཱི’’ཏི ཝཏྭཱ ཨཱབྷསྶརབྲཧྨལོཀེ ནིབྦཏྟི. བོདྷིསཏྟཱ ཧི ཨརཱུཔསམཱཔཏྟིལཱབྷིནོ ཧུཏྭཱཔི ཨབྷབྦཊྛཱནཏྟཱ ཨཱརུཔྤེ ན ནིབྦཏྟནྟི. ཨནྟེཝཱསིཀཱ ‘‘ཨཱཙརིཡསྶ ཨདྷིགམོ ནཏྠཱི’’ཏི ཨཱལཱ༹ཧནེ སཀྐཱརཾ ན ཀརིཾསུ.

ཛེཊྛནྟེཝཱསིཀོ ཨཱགནྟྭཱ ‘‘ཀཧཾ ཨཱཙརིཡོ’’ཏི པུཙྪིཏྭཱ ‘‘ཀཱལཀཏོ’’ཏི སུཏྭཱ ‘‘ཨཔི ཨཱཙརིཡཾ ཨདྷིགམཾ པུཙྪིཏྠཱ’’ཏི ཨཱཧ. ‘‘ཨཱམ, པུཙྪིམྷཱ’’ཏི. ‘‘ཀིཾ ཀཐེསཱི’’ཏི? ‘‘ནཏྠི ཀིཉྩཱིཏི ཏེན ཝུཏྟཾ, ཨཐསྶ ཨམྷེཧི སཀྐཱརོ ན ཀཏོ’’ཏི ཨཱཧཾསུ. ཛེཊྛནྟེཝཱསིཀོ ‘‘ཏུམྷེ ཨཱཙརིཡསྶ ཝཙནཏྠཾ ན ཛཱནཱཐ, ཨཱཀིཉྩཉྙཱཡཏནསམཱཔཏྟིལཱབྷཱི ཨཱཙརིཡོ’’ཏི ¶ ཨཱཧ. ཏེ ཏསྨིཾ པུནཔྤུནཾ ཀཐེནྟེཔི ན སདྡཧིཾསུ. བོདྷིསཏྟོ ཏཾ ཀཱརཎཾ ཉཏྭཱ ‘‘ཨནྡྷབཱལཱ མམ ཛེཊྛནྟེཝཱསིཀསྶ ཝཙནཾ ན སདྡཧནྟི. ཨིམཾ ¶ ཏེསཾ ཀཱརཎཾ པཱཀཊཾ ཀརིསྶཱམཱི’’ཏི བྲཧྨལོཀཱ ཨཱགནྟྭཱ ཨསྶམཔདམཏྠཀེ མཧནྟེནཱནུབྷཱཝེན ཨཱཀཱསེ ཋཏྭཱ ཛེཊྛནྟེཝཱསིཀསྶ པཉྙཱནུབྷཱཝཾ ཝཎྞེནྟོ ཨིམཾ གཱཐམཱཧ –

༩༩.

‘‘པརོསཧསྶམྤི ¶ སམཱགཏཱནཾ, ཀནྡེཡྻུཾ ཏེ ཝསྶསཏཾ ཨཔཉྙཱ;

ཨེཀོཝ སེཡྻོ པུརིསོ སཔཉྙོ, ཡོ བྷཱསིཏསྶ ཝིཛཱནཱཏི ཨཏྠ’’ནྟི.

ཏཏྠ པརོསཧསྶམྤཱིཏི ཨཏིརེཀསཧསྶམྤི. སམཱགཏཱནནྟི སནྣིཔཏིཏཱནཾ བྷཱསིཏསྶ ཨཏྠཾ ཛཱནིཏུཾ ཨསཀྐོནྟཱནཾ བཱལཱནཾ. ཀནྡེཡྻུཾ ཏེ ཝསྶསཏཾ ཨཔཉྙཱཏི ཏེ ཨེཝཾ སམཱགཏཱ ཨཔཉྙཱ ཨིམེ བཱལཏཱཔསཱ ཝིཡ ཝསྶསཏམྤི ཝསྶསཧསྶམྤི རོདེཡྻུཾ པརིདེཝེཡྻུཾ, རོདམཱནཱཔི པན ཨཏྠཾ ཝཱ ཀཱརཎཾ ཝཱ ནེཝ ཛཱནེཡྻུནྟི དཱིཔེཏི. ཨེཀོཝ སེཡྻོ པུརིསོ སཔཉྙོཏི ཨེཝརཱུཔཱནཾ བཱལཱནཾ པརོསཧསྶཏོཔི ཨེཀོ པཎྜིཏཔུརིསོཝ སེཡྻོ ཝརཏརོཏི ཨཏྠོ. ཀཱིདིསོ སཔཉྙོཏི? ཡོ བྷཱསིཏསྶ ཝིཛཱནཱཏི ཨཏྠཾ ཨཡཾ ཛེཊྛནྟེཝཱསིཀོ ཝིཡཱཏི.

ཨེཝཾ མཧཱསཏྟོ ཨཱཀཱསེ ཋིཏོཝ དྷམྨཾ དེསེཏྭཱ ཏཱཔསགཎཾ བུཛ྄ཛྷཱཔེཏྭཱ བྲཧྨལོཀམེཝ གཏོ. ཏེཔི ཏཱཔསཱ ཛཱིཝིཏཔརིཡོསཱནེ བྲཧྨལོཀཔརཱཡཎཱ ཨཧེསུཾ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཛེཊྛནྟེཝཱསིཀོ སཱརིཔུཏྟོ ཨཧོསི, མཧཱབྲཧྨཱ པན ཨཧམེཝ ཨཧོསི’’ནྟི.

པརོསཧསྶཛཱཏཀཝཎྞནཱ ནཝམཱ.

[༡༠༠] ༡༠. ཨསཱཏརཱུཔཛཱཏཀཝཎྞནཱ

ཨསཱཏཾ སཱཏརཱུཔེནཱཏི ཨིདཾ སཏྠཱ ཀུཎྜིཡནགརཾ ཨུཔནིསྶཱཡ ཀུཎྜདྷཱནཝནེ ཝིཧརནྟོ ཀོལིཡརཱཛདྷཱིཏརཾ སུཔྤཝཱསཾ ཨུཔཱསིཀཾ ཨཱརབྦྷ ཀཐེསི. སཱ ཧི ཏསྨིཾ སམཡེ སཏྟ ཝསྶཱནི ཀུཙྪིནཱ གབྦྷཾ པརིཧརིཏྭཱ སཏྟཱཧཾ མཱུལ༹ྷགབྦྷཱ ཨཧོསི, ཨདྷིམཏྟཱ ཝེདནཱ པཝཏྟིཾསུ. སཱ ¶ ཨེཝཾ ཨདྷིམཏྟཝེདནཱབྷིབྷཱུཏཱཔི ‘‘སམྨཱསམྦུདྡྷོ ཝཏ སོ བྷགཝཱ, ཡོ ཨེཝརཱུཔསྶ དུཀྑསྶ པཧཱནཱཡ དྷམྨཾ དེསེཏི. སུཔྤཊིཔནྣོ ཝཏ ཏསྶ བྷགཝཏོ སཱཝཀསངྒྷོ, ཡོ ཨེཝརཱུཔསྶ དུཀྑསྶ ¶ པཧཱནཱཡ པཊིཔནྣོ. སུསུཁཾ ཝཏ ནིབྦཱནཾ, ཡཏྠེཝ རཱུཔཾ དུཀྑཾ ནཏྠཱི’’ཏི (ཨུདཱ. ༡༨) ཨིམེཧི ཏཱིཧི ཝིཏཀྐེཧི ཨདྷིཝཱསེསི. སཱ སཱམིཀཾ པཀྐོསེཏྭཱ ཏཉྩ ཨཏྟནོ པཝཏྟིཾ ཝནྡནསཱསནཉྩ ཨཱརོཙེཏུཾ སཏྠུ སནྟིཀཾ པེསེསི. སཏྠཱ ཝནྡནསཱསནཾ སུཏྭཱཝ ‘‘སུཁིནཱི ¶ ཧོཏུ སུཔྤཝཱསཱ ཀོལིཡདྷཱིཏཱ, སུཁིནཱི ཨརོགཱ ཨརོགཾ པུཏྟཾ ཝིཛཱཡཏཱུ’’ཏི ཨཱཧ. སཧ ཝཙནེནེཝ པན བྷགཝཏོ སུཔྤཝཱསཱ ཀོལིཡདྷཱིཏཱ སུཁིནཱི ཨརོགཱ ཨརོགཾ པུཏྟཾ ཝིཛཱཡི. ཨཐསྶཱ སཱམིཀོ གེཧཾ གནྟྭཱ ཏཾ ཝིཛཱཏཾ དིསྭཱ ‘‘ཨཙྪརིཡཾ ཝཏ, བྷོ’’ཏི ཨཏིཝིཡ ཏཐཱགཏསྶ ཨཱནུབྷཱཝེན ཨཙྪརིཡབྦྷུཏཙིཏྟཛཱཏོ ཨཧོསི.

སུཔྤཝཱསཱཔི པུཏྟཾ ཝིཛཱཡིཏྭཱ སཏྟཱཧཾ བུདྡྷཔྤམུཁསྶ སངྒྷསྶ དཱནཾ དཱཏུཀཱམཱ པུན ནིམནྟནཏྠཱཡ ཏཾ པེསེསི. ཏེན ཁོ པན སམཡེན མཧཱམོགྒལླཱནསྶ ཨུཔཊྛཱཀེན བུདྡྷཔྤམུཁོ སངྒྷོ ནིམནྟིཏོ ཧོཏི. སཏྠཱ སུཔྤཝཱསཱཡ དཱནསྶ ཨོཀཱསདཱནཏྠཱཡ ཐེརཾ ཏསྶ སནྟིཀཾ པེསེཏྭཱ ཏཾ སཉྙཱཔེཏྭཱ སཏྟཱཧཾ ཏསྶཱ དཱནཾ པཊིགྒཧེསི སདྡྷིཾ བྷིཀྑུསངྒྷེན. སཏྟམེ པན དིཝསེ སུཔྤཝཱསཱ པུཏྟཾ སཱིཝལིཀུམཱརཾ མཎྜེཏྭཱ སཏྠཱརཉྩེཝ བྷིཀྑུསངྒྷཉྩ ཝནྡཱཔེསི. ཏསྨིཾ པཊིཔཱཊིཡཱ སཱརིཔུཏྟཏྠེརསྶ སནྟིཀཾ ནཱིཏེ ཐེརོ ཏེན སདྡྷིཾ ‘‘ཀཙྩི ཏེ, སཱིཝལི, ཁམནཱིཡ’’ནྟི པཊིསནྠཱརམཀཱསི. སོ ‘‘ཀུཏོ མེ, བྷནྟེ, སུཁཾ, སྭཱཧཾ སཏྟ ཝསྶཱནི ལོཧིཏཀུམྦྷིཡཾ ཝསི’’ནྟི ཐེརེན སདྡྷིཾ ཨེཝརཱུཔཾ ཀཐཾ ཀཐེསི. སུཔྤཱཝཱསཱ ཏསྶ ཝཙནཾ སུཏྭཱ ‘‘སཏྟཱཧཛཱཏོ མེ པུཏྟོ ཨནུབུདྡྷེན དྷམྨསེནཱཔཏིནཱ སདྡྷིཾ མནྟེཏཱི’’ཏི སོམནསྶཔྤཏྟཱ ཨཧོསི. སཏྠཱ ‘‘ཨཔི ནུ སུཔྤཝཱསེ ཨཉྙེཔི ཨེཝརཱུཔེ པུཏྟེ ཨིཙྪསཱི’’ཏི ཨཱཧ. ‘‘སཙེ, བྷནྟེ, ཨེཝརཱུཔེ ཨཉྙེ སཏྟ པུཏྟེ ལབྷེཡྻཾ, ཨིཙྪེཡྻམེཝཱཧ’’ནྟི. སཏྠཱ ཨུདཱནཾ ཨུདཱནེཏྭཱ ཨནུམོདནཾ ཀཏྭཱ པཀྐཱམི. སཱིཝལིཀུམཱརོཔི ཁོ སཏྟཝསྶིཀཀཱལེཡེཝ སཱསནེ ཨུརཾ དཏྭཱ པབྦཛིཏྭཱ པརིཔུཎྞཝསྶོ ཨུཔསམྤདཾ ལབྷིཏྭཱ པུཉྙཝཱ ལཱབྷགྒཔྤཏྟོ ཧུཏྭཱ པཐཝིཾ ཨུནྣཱདེཏྭཱ ཨརཧཏྟཾ པཏྭཱ པུཉྙཝནྟཱནཾ ཨནྟརེ ཨེཏདགྒཊྛཱནཾ པཱཔུཎི.

ཨཐེཀདིཝསཾ ¶ བྷིཀྑཱུ དྷམྨསབྷཱཡཾ སནྣིཔཏིཏྭཱ ‘‘ཨཱཝུསོ, སཱིཝལིཏྠེརོ ནཱམ ཨེཝརཱུཔོ མཧཱཔུཉྙོ པཏྠིཏཔཏྠནོ པཙྪིམབྷཝིཀསཏྟོ སཏྟ ཝསྶཱནི ལོཧིཏཀུམྦྷིཡཾ ཝསིཏྭཱ སཏྟཱཧཾ མཱུལ༹ྷགབྦྷབྷཱཝཾ ཨཱཔཛྫི, ཨཧོ མཱཏཱཔུཏྟཱ མཧནྟཾ དུཀྑཾ ཨནུབྷཝིཾསུ, ཀིཾ ནུ ཁོ ཀམྨཾ ཨཀཾསཱུ’’ཏི ཀཐཾ སམུཊྛཱཔེསུཾ. སཏྠཱ ཏཏྠཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘བྷིཀྑཝེ, སཱིཝལིནོ མཧཱཔུཉྙཏོཝ སཏྟ ཝསྶཱནི ¶ ལོཧིཏཀུམྦྷིཡཾ ནིཝཱསོ ཙ སཏྟཱཧཾ མཱུལ༹ྷགབྦྷབྷཱཝཔྤཏྟི ཙ ཨཏྟནཱ ཀཏཀམྨམཱུལཀཱཝ, སུཔྤཝཱསཱཡཔི སཏྟ ཝསྶཱནི ཀུཙྪིནཱ གབྦྷཔརིཧརཎདུཀྑཉྩ སཏྟཱཧཾ ¶ མཱུལ༹ྷགབྦྷདུཀྑཉྩ ཨཏྟནཱ ཀཏཀམྨམཱུལཀམེཝཱ’’ཏི ཝཏྭཱ ཏེཧི ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཏསྶ ཨགྒམཧེསིཡཱ ཀུཙྪིསྨིཾ པཊིསནྡྷིཾ གཎྷིཏྭཱ ཝཡཔྤཏྟོ ཏཀྐསིལཱཡཾ སབྦསིཔྤཱནི ཨུགྒཎྷིཏྭཱ པིཏུ ཨཙྩཡེན རཛྫཾ པཏྭཱ དྷམྨེན རཛྫཾ ཀཱརེསི. ཏསྨིཾ སམཡེ ཀོསལམཧཱརཱཛཱ མཧནྟེན བལེནཱགནྟྭཱ བཱརཱཎསིཾ གཧེཏྭཱ རཱཛཱནཾ མཱརེཏྭཱ ཏསྶེཝ ཨགྒམཧེསིཾ ཨཏྟནོ ཨགྒམཧེསིཾ ཨཀཱསི. བཱརཱཎསིརཉྙོ པན པུཏྟོ པིཏུ མརཎཀཱལེ ནིདྡྷམནདྭཱརེན པལཱཡིཏྭཱ བལཾ སཾཧརིཏྭཱ བཱརཱཎསིཾ ཨཱགནྟྭཱ ཨཝིདཱུརེ ནིསཱིདིཏྭཱ ཏསྶ རཉྙོ པཎྞཾ པེསེསི ‘‘རཛྫཾ ཝཱ དེཏུ ཡུདྡྷཾ ཝཱ’’ཏི. སོ ‘‘ཡུདྡྷཾ དེམཱི’’ཏི པཊིཔཎྞཾ པེསེསི. རཱཛཀུམཱརསྶ པན མཱཏཱ ཏཾ སཱསནཾ སུཏྭཱ ‘‘ཡུདྡྷེན ཀམྨཾ ནཏྠི, སབྦདིསཱསུ སཉྩཱརཾ པཙྪིནྡིཏྭཱ བཱརཱཎསིནགརཾ པརིཝཱརེཏུ, ཏཏོ དཱརཱུདཀབྷཏྟཔརིཀྑཡེན ཀིལནྟམནུསྶཾ ནགརཾ ཝིནཱཝ ཡུདྡྷེན གཎྷིསྶསཱི’’ཏི པཎྞཾ པེསེསི. སོ མཱཏུ སཱསནཾ སུཏྭཱ སཏྟ དིཝསཱནི སཉྩཱརཾ པཙྪིནྡིཏྭཱ ནགརཾ རུནྡྷི, ནཱགརཱ སཉྩཱརཾ ཨལབྷམཱནཱ སཏྟམེ དིཝསེ ཏསྶ རཉྙོ སཱིསཾ གཧེཏྭཱ ཀུམཱརསྶ ཨདཾསུ. ཀུམཱརོ པན ནགརཾ པཝིསིཏྭཱ རཛྫཾ གཧེཏྭཱ ཛཱིཝིཏཔརིཡོསཱནེ ཡཐཱཀམྨཾ གཏོ.

སོ ཨེཏརཧི སཏྟ དིཝསཱནི སཉྩཱརཾ པཙྪིནྡིཏྭཱ ནགརཾ རུནྡྷིཏྭཱ གཧིཏཀམྨནིསྶནྡེན སཏྟ ཝསྶཱནི ལོཧིཏཀུམྦྷིཡཾ ཝསིཏྭཱ སཏྟཱཧཾ མཱུལ༹ྷགབྦྷབྷཱཝཾ ཨཱཔཛྫི. ཡཾ པན སོ པདུམུཏྟརསྶ བྷགཝཏོ པཱདམཱུལེ ‘‘ལཱབྷཱིནཾ ཨགྒོ བྷཝེཡྻ’’ནྟི མཧཱདཱནཾ དཏྭཱ པཏྠནཾ ཨཀཱསི, ཡཉྩ ཝིཔསྶིབུདྡྷཀཱལེ ¶ ནཱགརེཧི སདྡྷིཾ སཧསྶགྒྷནཀཾ གུལ༹དདྷིཾ ¶ དཏྭཱ པཏྠནམཀཱསི, ཏསྶཱནུབྷཱཝེན ལཱབྷཱིནཾ ཨགྒོ ཛཱཏོ. སུཔྤཝཱསཱཔི ‘‘ནགརཾ རུནྡྷིཏྭཱ གཎྷ, ཏཱཏཱ’’ཏི པེསིཏབྷཱཝེན སཏྟ ཝསྶཱནི ཀུཙྪིནཱ གབྦྷཾ པརིཧརིཏྭཱ སཏྟཱཧཾ མཱུལ༹ྷགབྦྷཱ ཛཱཏཱ.

སཏྠཱ ཨིམཾ ཨཏཱིཏཾ ཨཱཧརིཏྭཱ ཨབྷིསམྦུདྡྷོ ཧུཏྭཱ ཨིམཾ གཱཐམཱཧ –

༡༠༠.

‘‘ཨསཱཏཾ སཱཏརཱུཔེན, པིཡརཱུཔེན ཨཔྤིཡཾ;

དུཀྑཾ སུཁསྶ རཱུཔེན, པམཏྟམཏིཝཏྟཏཱི’’ཏི.

ཏཏྠ ཨསཱཏཾ སཱཏརཱུཔེནཱཏི ཨམདྷུརམེཝ མདྷུརཔཏིརཱུཔཀེན. པམཏྟམཏིཝཏྟཏཱིཏི ཨསཱཏཾ ཨཔྤིཡཾ དུཀྑནྟི ཨེཏཾ ཏིཝིདྷམྤི ཨེཏེན སཱཏརཱུཔཱདིནཱ ཨཱཀཱརེན སཏིཝིཔྤཝཱསཝསེན པམཏྟཾ པུགྒལཾ ¶ ཨཏིཝཏྟཏི ཨབྷིབྷཝཏི ཨཛ྄ཛྷོཏྠརཏཱིཏི ཨཏྠོ. ཨིདཾ བྷགཝཏཱ ཡཉྩ ཏེ མཱཏཱཔུཏྟཱ ཨིམིནཱ གབྦྷཔརིཧརཎགབྦྷཝཱསསངྑཱཏེན ཨསཱཏཱདིནཱ པུབྦེ ནགརརུནྡྷནསཱཏཱདིཔཏིརཱུཔཀེན ཨཛ྄ཛྷོཏྠཊཱ, ཡཉྩ ཨིདཱནི སཱ ཨུཔཱསིཀཱ པུནཔི སཏྟཀྑཏྟུཾ ཨེཝརཱུཔཾ ཨསཱཏཾ ཨཔྤིཡཾ དུཀྑཾ པེམཝཏྠུབྷཱུཏེན པུཏྟསངྑཱཏེན སཱཏཱདིཔཏིརཱུཔཀེན ཨཛ྄ཛྷོཏྠཊཱ ཧུཏྭཱ ཏཐཱ ཨཝཙ, ཏཾ སབྦམྤི སནྡྷཱཡ ཝུཏྟནྟི ཝེདིཏབྦཾ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ནགརཾ རུནྡྷིཏྭཱ རཛྫཔྤཏྟཀུམཱརོ སཱིཝལི ཨཧོསི, མཱཏཱ སུཔྤཝཱསཱ, པིཏཱ པན བཱརཱཎསིརཱཛཱ ཨཧམེཝ ཨཧོསི’’ནྟི.

ཨསཱཏརཱུཔཛཱཏཀཝཎྞནཱ དསམཱ.

ལིཏྟཝགྒོ དསམོ.

ཏསྶུདྡཱནཾ –

ལིཏྟཏེཛཾ མཧཱསཱརཾ, ཝིསྶཱས ལོམཧཾསནཾ;

སུདསྶན ཏེལཔཏྟཾ, ནཱམསིདྡྷི ཀཱུཊཝཱཎིཛཾ;

པརོསཧསྶ ཨསཱཏརཱུཔནྟི.

མཛ྄ཛྷིམཔཎྞཱསཀོ ནིཊྛིཏོ.

༡༡. པརོསཏཝགྒོ

[༡༠༡] ༡. པརོསཏཛཱཏཀཝཎྞནཱ

༡༠༡.

‘‘པརོསཏཉྩེཔི ¶ ¶ སམཱགཏཱནཾ, ཛྷཱཡེཡྻུཾ ཏེ ཝསྶསཏཾ ཨཔཉྙཱ;

ཨེཀོཝ སེཡྻོ པུརིསོ སཔཉྙོ, ཡོ བྷཱསིཏསྶ ཝིཛཱནཱཏི ཨཏྠ’’ནྟི. –

ཨིདཾ ¶ ཛཱཏཀཾ ཝཏྠུཏོ ཙ ཝེཡྻཱཀརཎཏོ ཙ སམོདྷཱནཏོ ཙ པརོསཧསྶཛཱཏཀསདིསམེཝ. ཀེཝལཉྷེཏྠ ‘‘ཛྷཱཡེཡྻུ’’ནྟི པདམཏྟམེཝ ཝིསེསོ. ཏསྶཏྠོ – ཝསྶསཏམྤི ཨཔཉྙཱ ཛྷཱཡེཡྻུཾ ཨོལོཀེཡྻུཾ ཨུཔདྷཱརེཡྻུཾ, ཨེཝཾ ཨོལོཀེནྟཱཔི པན ཨཏྠཾ ཝཱ ཀཱརཎཾ ཝཱ ན པསྶནྟི, ཏསྨཱ ཡོ བྷཱསིཏསྶ ཨཏྠཾ ཛཱནཱཏི, སོ ཨེཀོཝ སཔཉྙོ སེཡྻོཏི.

པརོསཏཛཱཏཀཝཎྞནཱ པཋམཱ.

[༡༠༢] ༢. པཎྞིཀཛཱཏཀཝཎྞནཱ

ཡོ དུཀྑཕུཊྛཱཡ བྷཝེཡྻ ཏཱཎནྟི ཨིདཾ སཏྠཱ ཛེཏཝནེ ཝིཧརནྟོ ཨེཀཾ པཎྞིཀཾ ཨུཔཱསཀཾ ཨཱརབྦྷ ཀཐེསི. སོ ཀིར སཱཝཏྠིཝཱསཱི ཨུཔཱསཀོ ནཱནཔྤཀཱརཱནི མཱུལཔཎྞཱདཱིནི ཙེཝ ལཱབུཀུམྦྷཎྜཱདཱིནི ཙ ཝིཀྐིཎིཏྭཱ ཛཱིཝིཀཾ ཀཔྤེཏི. ཏསྶེཀཱ དྷཱིཏཱ ཨབྷིརཱུཔཱ པཱསཱདིཀཱ ཨཱཙཱརསཱིལསམྤནྣཱ ཧིརོཏྟཔྤསམནྣཱགཏཱ ཀེཝལཾ ནིཙྩཔྤཧསིཏམུཁཱ. ཏསྶཱ སམཱནཀུལེསུ ཝཱརེཡྻཏྠཱཡ ཨཱགཏེསུ སོ ཙིནྟེསི ‘‘ཨིམིསྶཱ ཝཱརེཡྻཾ ཝཏྟཏི, ཨཡཉྩ ནིཙྩཔྤཧསིཏམུཁཱ. ཀུམཱརིཀཱདྷམྨེ པན ཨསཏི ཀུམཱརིཀཱཡ པརཀུལཾ གཏཱཡ མཱཏཱཔིཏཱུནཾ གརཧཱ ཧོཏི, ‘ཨཏྠི ནུ ཁོ ཨིམིསྶཱ ཀུམཱརིཀཱདྷམྨོ, ནཏྠཱི’ཏི ཝཱིམཾསིསྶཱམི ན’’ནྟི. སོ ཨེཀདིཝསཾ དྷཱིཏརཾ པཙྪིཾ གཱཧཱཔེཏྭཱ པཎྞཏྠཱཡ ཨརཉྙཾ གནྟྭཱ ཝཱིམཾསནཝསེན ཀིལེསསནྣིསྶིཏོ ཝིཡ ཧུཏྭཱ རཧསྶཀཐཾ ཀཐེཏྭཱ ཏཾ ཧཏྠེ གཎྷི. སཱ གཧིཏམཏྟཱཝ རོདནྟཱི ཀནྡནྟཱི ‘‘ཨཡུཏྟམེཏཾ, ཏཱཏ, ཨུདཀཏོ ཨགྒིཔཱཏུབྷཱཝསདིསཾ, མཱ ཨེཝརཱུཔཾ ཀརོཐཱ’’ཏི ཨཱཧ. ‘‘ཨམྨ, མཡཱ ཝཱིམཾསནཏྠཱཡ ¶ ཏྭཾ ཧཏྠེ གཧིཏཱ, ན ཙ ཀིལེསཝསེན. ཝདེཧི, ཨཏྠི དཱནི ཏེ ཀུམཱརིཀཱདྷམྨོ’’ཏི. ‘‘ཨཱམ, ཏཱཏ, ཨཏྠི ¶ . མཡཱ ཧི ལོབྷཝསེན ན ཀོཙི པུརིསོ ཨོལོཀིཏཔུབྦོ’’ཏི. སོ དྷཱིཏརཾ ཨསྶཱསེཏྭཱ གྷརཾ ནེཏྭཱ མངྒལཾ ཀཏྭཱ པརཀུལཾ པེསེཏྭཱ ‘‘སཏྠཱརཾ ཝནྡིསྶཱམཱི’’ཏི གནྡྷམཱལཱདིཧཏྠོ ཛེཏཝནཾ གནྟྭཱ སཏྠཱརཾ ཝནྡིཏྭཱ པཱུཛེཏྭཱ ཨེཀམནྟཾ ནིསཱིདི, ‘‘ཙིརསྶམཱགཏོསཱི’’ཏི ཙ ཝུཏྟེ ཏམཏྠཾ བྷགཝཏོ ཨཱརོཙེསི. སཏྠཱ ‘‘ཨུཔཱསཀ, ཀུམཱརིཀཱ ཙིརཾ པཊྛཱཡ ཨཱཙཱརསཱིལསམྤནྣཱཝ, ཏྭཾ པན ན ཨིདཱནེཝ ཨེཝཾ ཝཱིམཾསསི, པུབྦེཔི ཝཱིམཾསིཡེཝཱ’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ¶ ཨརཉྙེ རུཀྑདེཝཏཱ ཧུཏྭཱ ནིབྦཏྟི. ཨཐེཀོ བཱརཱཎསིཡཾ པཎྞིཀཨུཔཱསཀོཏི ཨཏཱིཏཝཏྠུ པཙྩུཔྤནྣསདིསམེཝ. ཏེན པན སཱ ཝཱིམཾསནཏྠཱཡ ཧཏྠེ གཧིཏམཏྟཱ པརིདེཝམཱནཱ ཨིམཾ གཱཐམཱཧ –

༡༠༢.

‘‘ཡོ དུཀྑཕུཊྛཱཡ བྷཝེཡྻ ཏཱཎཾ, སོ མེ པིཏཱ དུབྦྷི ཝནེ ཀརོཏི;

སཱ ཀསྶ ཀནྡཱམི ཝནསྶ མཛ྄ཛྷེ, ཡོ ཏཱཡིཏཱ སོ སཧསཾ ཀརོཏཱི’’ཏི.

ཏཏྠ ཡོ དུཀྑཕུཊྛཱཡ བྷཝེཡྻ ཏཱཎནྟི ཀཱཡིཀཙེཏསིཀེཧི དུཀྑེཧི ཕུཊྛཱཡ ཏཱཡིཏཱ པརིཏཱཡིཏཱ པཏིཊྛཱ བྷཝེཡྻ. སོ མེ པིཏཱ དུབྦྷི ཝནེ ཀརོཏཱིཏི སོ མཡ྄ཧཾ དུཀྑཔརིཏཱཡཀོ པིཏཱཝ ཨིམསྨིཾ ཝནེ ཨེཝརཱུཔཾ མིཏྟདུབྦྷི ཀམྨཾ ཀརོཏི, ཨཏྟནོ ཛཱཏཱཡ དྷཱིཏརི ཝཱིཏིཀྐམཾ ཀཱཏུཾ མཉྙཏཱིཏི ཨཏྠོ. སཱ ཀསྶ ཀནྡཱམཱིཏི ཀསྶ རོདཱམི, ཀོ མེ པཏིཊྛཱ བྷཝིསྶཏཱིཏི དཱིཔེཏི. ཡོ ཏཱཡིཏཱ སོ སཧསཾ ཀརོཏཱིཏི ཡོ མཡ྄ཧཾ ཏཱཡིཏཱ རཀྑིཏཱ ཨཝསྶཡོ བྷཝིཏུཾ ཨརཧཏི, སོ པིཏཱཡེཝ སཱཧསིཀཀམྨཾ ཀརོཏཱིཏི ཨཏྠོ.

ཨཐ ནཾ པིཏཱ ཨསྶཱསེཏྭཱ ‘‘ཨམྨ, རཀྑིཏཏྟཱསཱི’’ཏི པུཙྪི. ‘‘ཨཱམ, ཏཱཏ རཀྑིཏོ མེ ཨཏྟཱ’’ཏི. སོ ཏཾ གྷརཾ ནེཏྭཱ མཎྜེཏྭཱ མངྒལཾ ཀཏྭཱ པརཀུལཾ པེསེསི.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེཏྭཱ ཛཱཏཀཾ སམོདྷཱནེསི, སཙྩཔརིཡོསཱནེ ཨུཔཱསཀོ སོཏཱཔཏྟིཕལེ པཏིཊྛཧི.

ཏདཱ ¶ པིཏཱ ཨེཏརཧི པིཏཱཝ, དྷཱིཏཱ ཙ ཨེཏརཧི དྷཱིཏཱཝ, ཏཾ ཀཱརཎཾ པཙྩཀྑཏོ དིཊྛརུཀྑདེཝཏཱ པན ཨཧམེཝ ཨཧོསིནྟི.

པཎྞིཀཛཱཏཀཝཎྞནཱ དུཏིཡཱ.

[༡༠༣] ༣. ཝེརིཛཱཏཀཝཎྞནཱ

ཡཏྠ ཝེརཱི ནིཝིསཏཱིཏི ཨིདཾ སཏྠཱ ཛེཏཝནེ ཝིཧརནྟོ ཨནཱཐཔིཎྜིཀཾ ཨཱརབྦྷ ཀཐེསི. ཨནཱཐཔིཎྜིཀོ ཀིར བྷོགགཱམཾ གནྟྭཱ ཨཱགཙྪནྟོ ཨནྟརཱམགྒེ ཙོརེ དིསྭཱ ‘‘ཨནྟརཱམགྒེ ཝསིཏུཾ ན ཡུཏྟཾ, སཱཝཏྠིམེཝ གམིསྶཱམཱི’’ཏི ཝེགེན གོཎེ པཱཛེཏྭཱ སཱཝཏྠིམེཝ ¶ ཨཱགནྟྭཱ པུནདིཝསེ ཝིཧཱརཾ གཏོ སཏྠུ ཨེཏམཏྠཾ ཨཱརོཙེསི. སཏྠཱ ‘‘པུབྦེཔི གཧཔཏི པཎྜིཏཱ ཨནྟརཱམགྒེ ཙོརེ དིསྭཱ ཨནྟརཱ ཨཝིལམྦམཱནཱ ཨཏྟནོ ཝསནཊྛཱནམེཝ གམིཾསཱུ’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ མཧཱཝིབྷཝོ སེཊྛི ཧུཏྭཱ ཨེཀཾ གཱམཀཾ ནིམནྟནཾ བྷུཉྫནཏྠཱཡ གནྟྭཱ པཙྩཱགཙྪནྟོ ཨནྟརཱམགྒེ ཙོརེ དིསྭཱ ཨནྟརཱམགྒེ ཨཝསིཏྭཱཝ ཝེགེན གོཎེ པཱཛེནྟོ ཨཏྟནོ གེཧམེཝ ཨཱགནྟྭཱ ནཱནགྒརསེཧི བྷུཉྫིཏྭཱ མཧཱསཡནེ ནིསིནྣོ ‘‘ཙོརཱནཾ ཧཏྠཏོ མུཙྩིཏྭཱ ནིབྦྷཡཊྛཱནཾ ཨཏྟནོ གེཧཾ ཨཱགཏོམྷཱི’’ཏི ཨུདཱནཝསེན ཨིམཾ གཱཐམཱཧ –

༡༠༣.

‘‘ཡཏྠ ཝེརཱི ནིཝིསཏི, ན ཝསེ ཏཏྠ པཎྜིཏོ;

ཨེཀརཏྟཾ དིརཏྟཾ ཝཱ, དུཀྑཾ ཝསཏི ཝེརིསཱུ’’ཏི.

ཏཏྠ ཝེརཱིཏི ཝེརཙེཏནཱསམངྒིཔུགྒལོ. ནིཝིསཏཱིཏི པཏིཊྛཱཏི. ན ཝསེ ཏཏྠ པཎྜིཏོཏི སོ ཝེརཱིཔུགྒལོ ཡསྨིཾ ཋཱནེ པཏིཊྛིཏོ ཧུཏྭཱ ཝསཏི, ཏཏྠ པཎྜིཏོ པཎྜིཙྩེན སམནྣཱགཏོ ན ཝསེཡྻ. ཀིཾཀཱརཎཱ? ཨེཀརཏྟཾ དིརཏྟཾ ཝཱ, དུཀྑཾ ཝསཏི ཝེརིསཱུཏི, ཝེརཱིནཉྷི ཨནྟརེ ཝསནྟོ ཨེཀཱཧམྤི དྭཱིཧམྤི དུཀྑམེཝ ཝསཏཱིཏི ཨཏྠོ.

ཨེཝཾ ¶ མཧཱསཏྟོ ཨུདཱནཾ ཨུདཱནེཏྭཱ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཨཧམེཝ བཱརཱཎསིསེཊྛི ཨཧོསི’’ནྟི.

ཝེརིཛཱཏཀཝཎྞནཱ ཏཏིཡཱ.

[༡༠༤] ༤. མིཏྟཝིནྡཀཛཱཏཀཝཎྞནཱ

ཙཏུབྦྷི ཨཊྛཛ྄ཛྷགམཱཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ དུབྦཙབྷིཀྑུཾ ཨཱརབྦྷ ཀཐེསི. ཝཏྠུ ཧེཊྛཱ མིཏྟཝིནྡཀཛཱཏཀེ ཝུཏྟནཡེན ཝིཏྠཱརེཏབྦཾ. ཨིདཾ པན ཛཱཏཀཾ ཀསྶཔབུདྡྷཀཱལིཀཾ. ཏསྨིཉྷི ¶ ཀཱལེ ཨུརཙཀྐཾ ཨུཀྑིཔིཏྭཱ ནིརཡེ པཙྩམཱནོ ཨེཀོ ནེརཡིཀསཏྟོ ‘‘བྷནྟེ, ཀིཾ ནུ ཁོ པཱཔཀམྨཾ ཨཀཱསི’’ནྟི བོདྷིསཏྟཾ པུཙྪི. བོདྷིསཏྟོ ‘‘ཏཡཱ ཨིདཉྩིདཉྩ པཱཔཀམྨཾ ཀཏ’’ནྟི ཝཏྭཱ ཨིམཾ གཱཐམཱཧ –

༡༠༤.

‘‘ཙཏུབྦྷི ཨཊྛཛ྄ཛྷགམཱ, ཨཊྛཱཧིཔི ཙ སོལ༹ས;

སོལ༹སཱཧི ཙ བཱཏྟིཾས, ཨཏྲིཙྪཾ ཙཀྐམཱསདོ;

ཨིཙྪཱཧཏསྶ པོསསྶ, ཙཀྐཾ བྷམཏི མཏྠཀེ’’ཏི.

ཏཏྠ ཙཏུབྦྷི ཨཊྛཛ྄ཛྷགམཱཏི སམུདྡནྟརེ ཙཏསྶོ ཝིམཱནཔེཏིཡོ ལབྷིཏྭཱ ཏཱཧི ཨསནྟུཊྛོ ཨཏྲིཙྪཏཱཡ པརཏོ གནྟྭཱ ཨཔརཱ ཨཊྛ ཨདྷིགཏོསཱིཏི ཨཏྠོ. སེསཔདདྭཡེཔི ཨེསེཝ ནཡོ. ཨཏྲིཙྪཾ ཙཀྐམཱསདོཏི ཨེཝཾ སཀལཱབྷེན ཨསནྟུཊྛོ ཨཏྲ ཨཏྲ ཨིཙྪནྟོ པརཏོ པརཏོ ལཱབྷཾ པཏྠེནྟོ ཨིདཱནི ཙཀྐམཱསདོ ཨིདཾ ཨུརཙཀྐཾ པཏྟོསི. ཏསྶ ཏེ ཨེཝཾ ཨིཙྪཱཧཏསྶ པོསསྶ ཏཎྷཱཡ ཧཏསྶ ཨུཔཧཏསྶ ཏཝ ཙཀྐཾ བྷམཏི མཏྠཀེ. པཱསཱཎཙཀྐཾ, ཨཡཙཀྐནྟི ཨིམེསུ དྭཱིསུ ཁུརདྷཱརཾ ཨཡཙཀྐཾ ཏསྶ མཏྠཀེ པུནཔྤུནཾ པཏནཝསེན བྷམནྟཾ དིསྭཱ ཨེཝམཱཧ. ཝཏྭཱ ཙ པན ཨཏྟནོ དེཝལོཀམེཝ གཏོ. སོཔི ནེརཡིཀསཏྟོ ཨཏྟནོ པཱཔེ ཁཱིཎེ ཡཐཱཀམྨཾ གཏོ.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ མིཏྟཝིནྡཀོ དུབྦཙབྷིཀྑུ ཨཧོསི, དེཝཔུཏྟོ པན ཨཧམེཝ ཨཧོསི’’ནྟི.

མིཏྟཝིནྡཀཛཱཏཀཝཎྞནཱ ཙཏུཏྠཱ.

[༡༠༥] ༥. དུབྦལཀཊྛཛཱཏཀཝཎྞནཱ

བཧུམྤེཏཾ ¶ ཝནེ ཀཊྛནྟི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཨུཏྟསིཏབྷིཀྑུཾ ཨཱརབྦྷ ཀཐེསི. སོ ཀིར སཱཝཏྠིཝཱསཱི ཨེཀོ ཀུལཔུཏྟོ སཏྠུ དྷམྨདེསནཾ སུཏྭཱ པབྦཛིཏྭཱ མརཎབྷཱིརུཀོ ཨཧོསི, རཏྟིཊྛཱནདིཝཱཊྛཱནེསུ ཝཱཏསྶ ཝཱ ཝཱིཛནྟསྶ སུཀྑདཎྜཀསྶ ཝཱ པཏནྟསྶ པཀྑིཙཏུཔྤདཱནཾ ཝཱ སདྡཾ སུཏྭཱ མརཎབྷཡཏཛྫིཏོ མཧཱརཝཾ རཝནྟོ པལཱཡཏི. ཏསྶ ཧི ‘‘མརིཏབྦཾ མཡཱ’’ཏི སཏིམཏྟམྤི ནཏྠི. སཙེ ཧི སོ ‘‘ཨཧཾ མརིསྶཱམཱི’’ཏི ཛཱནེཡྻ, ན མརཎཾ བྷཱཡེཡྻ. མརཎསྶཏིཀམྨཊྛཱནསྶ པན ཏསྶ ཨབྷཱཝིཏཏྟཱཝ བྷཱཡཏི ¶ . ཏསྶ སོ མརཎབྷཱིརུཀབྷཱཝོ བྷིཀྑུསངྒྷེ པཱཀཊོ ཛཱཏོ.

ཨཐེཀདིཝསཾ དྷམྨསབྷཱཡཾ བྷིཀྑཱུ ཀཐཾ སམུཊྛཱཔེསུཾ ‘‘ཨཱཝུསོ, ཨསུཀོ ནཱམ བྷིཀྑུ མརཎབྷཱིརུཀོ མརཎཾ བྷཱཡཏི, བྷིཀྑུནཱ ནཱམ ‘ཨཝསྶཾ མཡཱ མརིཏབྦ’ནྟི མརཎསྶཏིཀམྨཊྛཱནཾ བྷཱཝེཏུཾ ཝཊྚཏཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ཏཾ བྷིཀྑུཾ པཀྐོསཱཔེཏྭཱ ‘‘སཙྩཾ ཀིར ཏྭཾ མརཎབྷཱིརུཀོ’’ཏི པུཙྪིཏྭཱ ‘‘སཙྩཾ, བྷནྟེ’’ཏི ཝུཏྟེ ‘‘བྷིཀྑཝེ, མཱ ཨེཏསྶ བྷིཀྑུནོ ཨནཏྟམནཱ ཧོཐ, ནཱཡཾ ཨིདཱནེཝ མརཎབྷཱིརུཀོ, པུབྦེཔི མརཎབྷཱིརུཀོཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཧིམཝནྟེ རུཀྑདེཝཏཱ ཧུཏྭཱ ནིབྦཏྟི. ཏསྨིཾ ཀཱལེ བཱརཱཎསིརཱཛཱ ཨཏྟནོ མངྒལཧཏྠིཾ ཨཱནེཉྫཀཱརཎཾ སིཀྑཱཔེཏུཾ ཧཏྠཱཙརིཡཱནཾ ཨདཱསི. ཏཾ ཨཱལཱ༹ནེ ནིཙྩལཾ བནྡྷིཏྭཱ ཏོམརཧཏྠཱ མནུསྶཱ པརིཝཱརེཏྭཱ ཨཱནེཉྫཀཱརཎཾ ཀཱརེནྟི. སོ ཏཾ ཀཱརཎཾ ཀཱརིཡམཱནོ ཝེདནཾ ཨདྷིཝཱསེཏུཾ ཨསཀྐོནྟོ ཨཱལཱ༹ནཾ བྷིནྡིཏྭཱ མནུསྶེ པལཱཔེཏྭཱ ཧིམཝནྟཾ ¶ པཱཝིསི. མནུསྶཱ ཏཾ གཧེཏུཾ ཨསཀྐོནྟཱ ནིཝཏྟིཾསུ. སོ ཏཏྠ མརཎབྷཱིརུཀོ ཨཧོསི, ཝཱཏསདྡཱནི སུཏྭཱ ཀམྤམཱནོ མརཎབྷཡཏཛྫིཏོ སོཎྜཾ ཝིདྷུནིཏྭཱ ཝེགེན པལཱཡཏི, ཨཱལཱ༹ནེ བནྡྷིཏྭཱ ཨཱནེཉྫཀཱརཎཾ ཀརཎཀཱལོ ཝིཡསྶ ཧོཏི, ཀཱཡསྶཱདཾ ཝཱ ཙིཏྟསྶཱདཾ ཝཱ ཨལབྷནྟོ ཀམྤམཱནོ ཝིཙརཏི.

རུཀྑདེཝཏཱ ཏཾ དིསྭཱ ཁནྡྷཝིཊཔེ ཋཏྭཱ ཨིམཾ གཱཐམཱཧ –

༡༠༥.

‘‘བཧུམྤེཏཾ ¶ ཝནེ ཀཊྛཾ, ཝཱཏོ བྷཉྫཏི དུབྦལཾ;

ཏསྶ ཙེ བྷཱཡསི ནཱག, ཀིསོ ནཱུན བྷཝིསྶསཱི’’ཏི.

ཏཏྠཱཡཾ པིཎྜཏྠོ – ཡཾ ཨེཏཾ དུབྦལཾ ཀཊྛཾ པུརཏྠིམཱདིབྷེདོ ཝཱཏོ བྷཉྫཏི, ཏཾ ཨིམསྨིཾ ཝནེ བཧུཾ སུལབྷཾ, ཏཏྠ ཏཏྠ སཾཝིཛྫཏི. སཙེ ཏྭཾ ཏསྶ བྷཱཡསི, ཨེཝཾ སནྟེ ནིཙྩཾ བྷཱིཏོ མཾསལོཧིཏཀྑཡཾ པཏྭཱ ཀིསོ ནཱུན བྷཝིསྶསི, ཨིམསྨིཾ པན ཝནེ ཏཝ བྷཡཾ ནཱམ ནཏྠི, ཏསྨཱ ཨིཏོ པཊྛཱཡ མཱ བྷཱཡཱིཏི.

ཨེཝཾ ¶ དེཝཏཱ ཏསྶ ཨོཝཱདཾ ཨདཱསི, སོཔི ཏཏོ པཊྛཱཡ ནིབྦྷཡོ ཨཧོསི.

སཏྠཱ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེཏྭཱ ཛཱཏཀཾ སམོདྷཱནེསི, སཙྩཔརིཡོསཱནེ སོ བྷིཀྑུ སོཏཱཔཏྟིཕལེ པཏིཊྛཧི. ‘‘ཏདཱ ནཱགོ ཨཡཾ བྷིཀྑུ ཨཧོསི, རུཀྑདེཝཏཱ པན ཨཧམེཝ ཨཧོསི’’ནྟི.

དུབྦལཀཊྛཛཱཏཀཝཎྞནཱ པཉྩམཱ.

[༡༠༦] ༦. ཨུདཉྩནཱིཛཱཏཀཝཎྞནཱ

སུཁཾ ཝཏ མཾ ཛཱིཝནྟནྟི ཨིདཾ སཏྠཱ ཛེཏཝནེ ཝིཧརནྟོ ཐུལླཀུམཱརིཀཱཔལོབྷནཾ ཨཱརབྦྷ ཀཐེསི. ཝཏྠུ ཏེརསཀནིཔཱཏེ ཙཱུལ༹ནཱརདཀསྶཔཛཱཏཀེ (ཛཱ. ༡.༡༣.༤༠ ཨཱདཡོ) ཨཱཝི བྷཝིསྶཏི. ཏཾ པན བྷིཀྑུཾ སཏྠཱ ‘‘སཙྩཾ ཀིར ཏྭཾ བྷིཀྑུ ཨུཀྐཎྛིཏོསཱི’’ཏི པུཙྪིཏྭཱ ‘‘སཙྩཾ, བྷགཝཱ’’ཏི ཝུཏྟེ ‘‘ཀཏྠ ཏེ ཙིཏྟཾ པཊིབདྡྷ’’ནྟི པུཙྪི. སོ ‘‘ཨེཀིསྶཱ ཐུལླཀུམཱརིཀཱཡཱ’’ཏི ཨཱཧ. ཨཐ ¶ ནཾ སཏྠཱ ‘‘ཨཡཾ ཏེ བྷིཀྑུ ཨནཏྠཀཱརིཀཱ, པུབྦེཔི ཏྭཾ ཨེཏཾ ནིསྶཱཡ སཱིལབྱསནཾ པཏྭཱ ཀམྤནྟོ ཝིཙརམཱནོ པཎྜིཏེ ནིསྶཱཡ སུཁཾ ལབྷཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེཏི ཨཏཱིཏཝཏྠུཔི ཙཱུལ༹ནཱརདཀསྶཔཛཱཏཀེཡེཝ ཨཱཝི བྷཝིསྶཏི. ཏདཱ པན བོདྷིསཏྟོ སཱཡཾ ཕལཱཕལེ ཨཱདཱཡ ཨཱགནྟྭཱ པཎྞསཱལཱདྭཱརཾ ཝིཝརིཏྭཱ པཝིསིཏྭཱ པུཏྟཾ ཙཱུལ༹ཏཱཔསཾ ཨེཏདཝོཙ ‘‘ཏཱཏ, ཏྭཾ ཨཉྙེསུ དིཝསེསུ དཱརཱུནི ཨཱཧརསི, པཱནཱིཡཾ པརིབྷོཛནཱིཡཾ ཨཱཧརསི, ཨགྒིཾ ཀརོསི, ཨཛྫ པན ཨེཀམྤི ཨཀཏྭཱ ཀསྨཱ ¶ དུམྨུཁོ པཛ྄ཛྷཱཡནྟོ ནིཔནྣོསཱི’’ཏི? ‘‘ཏཱཏ, ཏུམྷེསུ ཕལཱཕལཏྠཱཡ གཏེསུ ཨེཀཱ ཨིཏྠཱི ཨཱགནྟྭཱ མཾ པལོབྷེཏྭཱ ཨཱདཱཡ གནྟུཾ ཨཱརབྷི, ཨཧཾ པན ‘ཏུམྷེཧི ཝིསྶཛྫིཏོ གམིསྶཱམཱི’ཏི ན གཙྪིཾ, ཨསུཀཊྛཱནེ པན ནཾ ནིསཱིདཱཔེཏྭཱ ཨཱགཏོམྷི, ཨིདཱནི གཙྪཱམཧཾ ཏཱཏཱ’’ཏི. བོདྷིསཏྟོ ‘‘ན སཀྐཱ ཨེཏཾ ནིཝཏྟེཏུ’’ནྟི ཉཏྭཱ ‘‘ཏེན ཧི, ཏཱཏ, གཙྪ, ཨེསཱ པན ཏཾ ནེཏྭཱ ཡདཱ མཙྪམཾསཱདཱིནི ¶ ཝཱ ཁཱདིཏུཀཱམཱ བྷཝིསྶཏི, སཔྤིལོཎཏཎྜུལཱདཱིཧི ཝཱ པནསྶཱ ཨཏྠོ བྷཝིསྶཏི, ཏདཱ ‘ཨིདཉྩིདཉྩཱཧརཱ’ཏི ཏཾ ཀིལམེསྶཏི. ཏདཱ མཡ྄ཧཾ གུཎཾ སརིཏྭཱ པལཱཡིཏྭཱ ཨིདྷེཝ ཨཱགཙྪེཡྻཱསཱི’’ཏི ཝིསྶཛྫེསི. སོ ཏཱཡ སདྡྷིཾ མནུསྶཔཐཾ ཨགམཱསི. ཨཐ ནཾ སཱ ཨཏྟནོ ཝསཾ གམེཏྭཱ ‘‘མཾསཾ ཨཱཧར, མཙྪཾ ཨཱཧརཱ’’ཏི ཡེན ཡེན ཨཏྠིཀཱ ཧོཏི, ཏཾ ཏཾ ཨཱཧརཱཔེཏི. ཏདཱ སོ ‘‘ཨཡཾ མཾ ཨཏྟནོ དཱསཾ ཝིཡ ཀམྨཀཱརཾ ཝིཡ ཙ ཀཏྭཱ པཱིལེ༹ཏཱི’’ཏི པལཱཡིཏྭཱ པིཏུ སནྟིཀཾ ཨཱགནྟྭཱ པིཏརཾ ཝནྡིཏྭཱ ཋིཏཀོཝ ཨིམཾ གཱཐམཱཧ –

༡༠༦.

‘‘སུཁཾ ཝཏ མཾ ཛཱིཝནྟཾ, པཙམཱནཱ ཨུདཉྩནཱི;

ཙོརཱི ཛཱཡཔྤཝཱདེན, ཏེལཾ ལོཎཉྩ ཡཱཙཏཱི’’ཏི.

ཏཏྠ སུཁཾ ཝཏ མཾ ཛཱིཝནྟནྟི ཏཱཏ, ཏུམྷཱཀཾ སནྟིཀེ མཾ སུཁཾ ཛཱིཝནྟཾ. པཙམཱནཱཏི ཏཱཔཡམཱནཱ པཱིལ༹ཡམཱནཱ, ཡཾ ཡཾ ཝཱ ཁཱདིཏུཀཱམཱ ཧོཏི, ཏཾ ཏཾ པཙམཱནཱ. ཨུདཀཾ ཨཉྩནྟི ཨེཏཱཡཱཏི ཨུདཉྩནཱི, ཙཱཊིཏོ ཝཱ ཀཱུཔཏོ ཝཱ ཨུདཀཨུསྶིཉྩནགྷཊིཀཱཡེཏཾ ནཱམཾ. སཱ པན ཨུདཉྩནཱི ཝིཡ, ཨུདཀཾ ཝིཡ གྷཊིཀཱ, ཡེན ཡེནཏྠིཀཱ ཧོཏི, ཏཾ ཏཾ ཨཱཀཌྜྷཏིཡེཝཱཏི ཨཏྠོ ¶ . ཙོརཱི ཛཱཡཔྤཝཱདེནཱཏི ‘‘བྷརིཡཱ’’ཏི ནཱམེན ཨེཀཱ ཙོརཱི མཾ མདྷུརཝཙནེན ཨུཔལཱཔེཏྭཱ ཏཏྠ ནེཏྭཱ ཏེལཾ ལོཎཉྩ ཡཉྩ ཨཉྙཾ ཨིཙྪཏི, ཏཾ སབྦཾ ཡཱཙཏི, དཱསཾ ཝིཡ ཀམྨཀཱརཾ ཝིཡ ཙ ཀཏྭཱ ཨཱཧརཱཔེཏཱིཏི ཏསྶཱ ཨགུཎཾ ཀཐེསི.

ཨཐ ནཾ བོདྷིསཏྟོ ཨསྶཱསེཏྭཱ ‘‘ཧོཏུ, ཏཱཏ, ཨེཧི ཏྭཾ མེཏྟཾ བྷཱཝེཧི, ཀརུཎཾ བྷཱཝེཧཱི’’ཏི ཙཏྟཱརོ བྲཧྨཝིཧཱརེ ཨཱཙིཀྑི, ཨཱཙིཀྑིཏྭཱ ཀསིཎཔརིཀམྨཾ ཨཱཙིཀྑི. སོ ན ཙིརསྶེཝ ཨབྷིཉྙཱ ཙ སམཱཔཏྟིཡོ ཙ ཨུཔྤཱདེཏྭཱ བྲཧྨཝིཧཱརེ བྷཱཝེཏྭཱ སདྡྷིཾ པིཏརཱ བྲཧྨལོཀེ ནིབྦཏྟི.

སཏྠཱ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེཏྭཱ ཛཱཏཀཾ སམོདྷཱནེསི, སཙྩཔརིཡོསཱནེ སོ བྷིཀྑུ སོཏཱཔཏྟིཕལེ པཏིཊྛཧི.

‘‘ཏདཱ ¶ ཐུལླཀུམཱརིཀཱཝ ཨེཏརཧི ཐུལླཀུམཱརིཀཱ. ཙཱུལ༹ཏཱཔསོ ཨུཀྐཎྛིཏབྷིཀྑུ ཨཧོསི, པིཏཱ པན ཨཧམེཝ ཨཧོསི’’ནྟི.

ཨུདཉྩནཱིཛཱཏཀཝཎྞནཱ ཚཊྛཱ.

[༡༠༧] ༧. སཱལིཏྟཀཛཱཏཀཝཎྞནཱ

སཱདྷཱུ ¶ ཁོ སིཔྤཀཾ ནཱམཱཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཧཾསཔཧརནཀཾ བྷིཀྑུཾ ཨཱརབྦྷ ཀཐེསི. སོ ཀིརེཀོ སཱཝཏྠིཝཱསཱི ཀུལཔུཏྟོ སཱལིཏྟཀསིཔྤེ ནིཔྥཏྟིཾ པཏྟོ. ‘‘སཱལིཏྟཀསིཔྤ’’ནྟི སཀྑརཱཁིཔནསིཔྤཾ ཝུཙྩཏི. སོ ཨེཀདིཝསཾ དྷམྨཾ སུཏྭཱ སཱསནེ ཨུརཾ དཏྭཱ པབྦཛིཏྭཱ ཨུཔསམྤདཾ ལབྷི, ན པན སིཀྑཱཀཱམོ, ན པཊིཔཏྟིསཱདྷཀོ ཨཧོསི. སོ ཨེཀདིཝསཾ ཨེཀཾ དཧརབྷིཀྑུཾ ཨཱདཱཡ ཨཙིརཝཏིཾ གནྟྭཱ ནྷཱཡིཏྭཱ ནདཱིཏཱིརེ ཨཊྛཱསི. ཏསྨིཾ སམཡེ དྭེ སེཏཧཾསཱ ཨཱཀཱསེན གཙྪནྟི. སོ ཏཾ དཧརཾ ཨཱཧ ‘‘ཨིམཾ པཙྪིམཧཾསཾ སཀྑརཱཡ ཨཀྑིམྷི པཧརིཏྭཱ པཱདམཱུལེ པཱཏེམཱི’’ཏི. ཨིཏརོ ‘‘ཀཐཾ པཱཏེསྶསི, ན སཀྑིསྶསི པཧརིཏུ’’ནྟི ཨཱཧ. ཨིཏརོ ‘‘ཏིཊྛཏུ ཏཱཝསྶ ཨོརཏོ ཨཀྑི, པརཏོ ཨཀྑིམྷི ཏཾ པཧརཱམཱི’’ཏི. ཨིདཱནི པན ཏྭཾ ཨསནྟཾ ཀཐེསཱིཏི. ‘‘ཏེན ཧི ཨུཔདྷཱརེཧཱི’’ཏི ཨེཀཾ ཏིཁིཎསཀྑརཾ གཧེཏྭཱ ཨངྒུལིཡཱ པརིཡནྟེ ཀཏྭཱ ཏསྶ ¶ ཧཾསསྶ པཙྪཏོ ཁིཔི. སཱ ‘‘རུ’’ནྟི སདྡཾ ཨཀཱསི, ཧཾསོ ‘‘པརིསྶཡེན བྷཝིཏབྦ’’ནྟི ནིཝཏྟིཏྭཱ སདྡཾ སོཏུཾ ཨཱརབྷི. ཨིཏརོ ཏསྨིཾ ཁཎེ ཨེཀཾ ཝཊྚསཀྑརཾ གཧེཏྭཱ ཏསྶ ནིཝཏྟིཏྭཱ ཨོལོཀེནྟསྶ པརབྷཱགེ ཨཀྑིཾ པཧརི. སཀྑརཱ ཨིཏརམྤི ཨཀྑིཾ ཝིནིཝིཛ྄ཛྷིཏྭཱ གཏཱ. ཧཾསོ མཧཱརཝཾ རཝནྟོ པཱདམཱུལེཡེཝ པཏི. ཏཏོ ཏཏོ བྷིཀྑཱུ ཨཱགནྟྭཱ གརཧིཏྭཱ ‘‘ཨནནུཙྪཝིཀཾ ཏེ ཀཏ’’ནྟི སཏྠུ སནྟིཀཾ ནེཏྭཱ ‘‘བྷནྟེ, ཨིམིནཱ ཨིདཾ ནཱམ ཀཏ’’ནྟི ཏམཏྠཾ ཨཱརོཙེསུཾ. སཏྠཱ ཏཾ བྷིཀྑུཾ གརཧིཏྭཱ ‘‘ན, བྷིཀྑཝེ, ཨིདཱནེཝེས ཨེཏསྨིཾ སིཔྤེ ཀུསལོ, པུབྦེཔི ཀུསལོཡེཝ ཨཧོསཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཏསྶ ཨམཙྩོ ཨཧོསི. ཏསྨིཾ ཀཱལེ རཉྙོ པུརོཧིཏོ ཨཏིམུཁརོ ཧོཏི བཧུབྷཱཎཱི, ཏསྨིཾ ཀཐེཏུཾ ཨཱརདྡྷེ ཨཉྙེ ཨོཀཱསམེཝ ན ལབྷནྟི. རཱཛཱ ཙིནྟེསི ‘‘ཀདཱ ནུ ཁོ ཨེཏསྶ ཝཙནུཔཙྪེདཀཾ ཀཉྩི ལབྷིསྶཱམཱི’’ཏི. སོ ཏཏོ པཊྛཱཡ ཏཐཱརཱུཔཾ ཨེཀཾ ཨུཔདྷཱརེནྟོ ཝིཙརཏི. ཏསྨིཾ ཀཱལེ བཱརཱཎསིཡཾ ཨེཀོ པཱིཋསཔྤཱི སཀྑརཱཁིཔནསིཔྤེ ནིཔྥཏྟིཾ པཏྟོ ཧོཏི. གཱམདཱརཀཱ ཏཾ རཐཀཾ ཨཱརོཔེཏྭཱ ¶ ཨཱཀཌྜྷམཱནཱ བཱརཱཎསིནགརདྭཱརམཱུལེ ¶ ཨེཀོ ཝིཊཔསམྤནྣོ མཧཱནིགྲོདྷོ ཨཏྠི, ཏཏྠ ཨཱནེཏྭཱ སམྤརིཝཱརེཏྭཱ ཀཱཀཎིཀཱདཱིནི དཏྭཱ ‘‘ཧཏྠིརཱུཔཀཾ ཀར, ཨསྶརཱུཔཀཾ ཀརཱ’’ཏི ཝདནྟི. སོ སཀྑརཱ ཁིཔིཏྭཱ ཁིཔིཏྭཱ ནིགྲོདྷཔཎྞེསུ ནཱནཱརཱུཔཱནི དསྶེཏི, སབྦཱནི པཎྞཱནི ཚིདྡཱཝཚིདྡཱནེཝ ཨཧེསུཾ.

ཨཐ བཱརཱཎསིརཱཛཱ ཨུཡྻཱནཾ གཙྪནྟོ ཏཾ ཋཱནཾ པཱཔུཎི. ཨུསྶཱརཎཱབྷཡེན སབྦེ དཱརཀཱ པལཱཡིཾསུ, པཱིཋསཔྤཱི ཏཏྠེཝ ནིཔཛྫི. རཱཛཱ ནིགྲོདྷམཱུལཾ པཏྭཱ རཐེ ནིསིནྣོ པཏྟཱནཾ ཚིདྡཏཱཡ ཚཱཡཾ ཀབརཀབརཾ དིསྭཱ ཨོལོཀེནྟོ སབྦེསཾ པཏྟཱནཾ ཚིདྡབྷཱཝཾ དིསྭཱ ‘‘ཀེནེཏཱནི ཨེཝཾ ཀཏཱནཱི’’ཏི པུཙྪི. ‘‘པཱིཋསཔྤིནཱ, དེཝཱ’’ཏི. རཱཛཱ ‘‘ཨིམཾ ནིསྶཱཡ བྲཱཧྨཎསྶ ཝཙནུཔཙྪེདཾ ཀཱཏུཾ སཀྐཱ བྷཝིསྶཏཱི’’ཏི ཙིནྟེཏྭཱ ‘‘ཀཧཾ, བྷཎེ, པཱིཋསཔྤཱི’’ཏི པུཙྪི. ཝིཙིནནྟཱ མཱུལནྟརེ ནིཔནྣཾ དིསྭཱ ‘‘ཨཡཾ, དེཝཱ’’ཏི ཨཱཧཾསུ. རཱཛཱ ནཾ པཀྐོསཱཔེཏྭཱ པརིསཾ ཨུསྶཱརེཏྭཱ པུཙྪི ‘‘ཨམྷཱཀཾ སནྟིཀེ ཨེཀོ མུཁརབྲཱཧྨཎོ ཨཏྠི, སཀྑིསྶསི ཏཾ ནིསྶདྡཾ ཀཱཏུ’’ནྟི. ནཱལི༹མཏྟཱ ཨཛལཎྜིཀཱ ལབྷནྟོ སཀྑིསྶཱམི, དེཝཱཏི. རཱཛཱ པཱིཋསཔྤིཾ གྷརཾ ནེཏྭཱ ཨནྟོསཱཎིཡཾ ནིསཱིདཱཔེཏྭཱ སཱཎིཡཾ ཚིདྡཾ ཀཱརེཏྭཱ བྲཱཧྨཎསྶ ཚིདྡཱབྷིམུཁཾ ¶ ཨཱསནཾ པཉྙཔེཏྭཱ ནཱལི༹མཏྟཱ སུཀྑཱ ཨཛལཎྜིཀཱ པཱིཋསཔྤིསྶ སནྟིཀེ ཋཔཱཔེཏྭཱ བྲཱཧྨཎཾ ཨུཔཊྛཱནཀཱལེ ཨཱགཏཾ ཏསྨིཾ ཨཱསནེ ནིསཱིདཱཔེཏྭཱ ཀཐཾ སམུཊྛཱཔེསི. བྲཱཧྨཎོ ཨཉྙེསཾ ཨོཀཱསཾ ཨདཏྭཱ རཉྙཱ སདྡྷིཾ ཀཐེཏུཾ ཨཱརབྷི. ཨཐསྶ སོ པཱིཋསཔྤཱི སཱཎིཙྪིདྡེན ཨེཀེཀཾ ཨཛལཎྜིཀཾ པཙྪིཡཾ པཝེསེནྟོ ཝིཡ ཏཱལུཏལམྷིཡེཝ པཱཏེཏི, བྲཱཧྨཎོ ཨཱགཏཱགཏཾ ནཱལི༹ཡཾ ཏེལཾ པཝེསེནྟོ ཝིཡ གིལཏི, སབྦཱ པརིཀྑཡཾ གམིཾསུ. ཏསྶེཏཱ ནཱལི༹མཏྟཱ ཨཛལཎྜིཀཱ ཀུཙྪིཾ པཝིཊྛཱ ཨཌྜྷཱལ༹ྷཀམཏྟཱ ཨཧེསུཾ.

རཱཛཱ ཏཱསཾ པརིཀྑཱིཎབྷཱཝཾ ཉཏྭཱ ཨཱཧ – ‘‘ཨཱཙརིཡ, ཏུམྷེ ཨཏིམུཁརཏཱཡ ནཱལི༹མཏྟཱ ཨཛལཎྜིཀཱ གིལནྟཱ ཀིཉྩི ན ཛཱནིཏྠ, ཨིཏོ དཱནི ཨུཏྟརི ཛཱིརཱཔེཏུཾ ན སཀྑིསྶཐ. གཙྪཐ, པིཡངྒུདཀཾ པིཝིཏྭཱ ཚཌྜེཏྭཱ ཨཏྟཱནཾ ཨརོགཾ ཀརོཐཱ’’ཏི བྲཱཧྨཎོ ཏཏོ པཊྛཱཡ ¶ པིཧིཏམུཁོ ཝིཡ ཧུཏྭཱ ཀཐེནྟེནཱཔི སདྡྷིཾ ཨཀཐནསཱིལོ ཨཧོསི. རཱཛཱ ‘‘ཨིམིནཱ མེ ཀཎྞསུཁཾ ཀཏ’’ནྟི པཱིཋསཔྤིསྶ སཏསཧསྶུཊྛཱནཀེ ཙཏཱུསུ དིསཱསུ ཙཏྟཱརོ གཱམེ ཨདཱསི. བོདྷིསཏྟོ རཱཛཱནཾ ཨུཔསངྐམིཏྭཱ ‘‘དེཝ, སིཔྤཾ ནཱམ ལོཀེ པཎྜིཏེཧི ཨུགྒཧིཏབྦཾ, པཱིཋསཔྤིནཱ སཱལིཏྟཀམཏྟེནཱཔི ཨཡཾ སམྤཏྟི ལདྡྷཱ’’ཏི ཝཏྭཱ ཨིམཾ གཱཐམཱཧ –

༡༠༧.

‘‘སཱདྷུཾ ¶ ཁོ སིཔྤཀཾ ནཱམ, ཨཔི ཡཱདིས ཀཱིདིསཾ;

པསྶ ཁཉྫཔྤཧཱརེན, ལདྡྷཱ གཱམཱ ཙཏུདྡིསཱ’’ཏི.

ཏཏྠ པསྶ ཁཉྫཔྤཧཱརེནཱཏི པསྶ, མཧཱརཱཛ, ཨིམིནཱ ཁཉྫཔཱིཋསཔྤིནཱ ཨཛལཎྜིཀཱཔཧཱརེན ཙཏུདྡིསཱ ཙཏྟཱརོ གཱམཱ ལདྡྷཱ, ཨཉྙེསཾ སིཔྤཱནཾ ཀོ ཨཱནིསཾསཔརིཙྪེདོཏི སིཔྤགུཎཾ ཀཐེསི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ པཱིཋསཔྤཱི ཨཡཾ བྷིཀྑུ ཨཧོསི, རཱཛཱ ཨཱནནྡོ, པཎྜིཏཱམཙྩོ པན ཨཧམེཝ ཨཧོསི’’ནྟི.

སཱལིཏྟཀཛཱཏཀཝཎྞནཱ སཏྟམཱ.

[༡༠༨] ༨. བཱཧིཡཛཱཏཀཝཎྞནཱ

སིཀྑེཡྻ ¶ སིཀྑིཏབྦཱནཱིཏི ཨིདཾ སཏྠཱ ཝེསཱལིཾ ཨུཔནིསྶཱཡ མཧཱཝནེ ཀཱུཊཱགཱརསཱལཱཡཾ ཝིཧརནྟོ ཨེཀཾ ལིཙྪཝིཾ ཨཱརབྦྷ ཀཐེསི. སོ ཀིར ལིཙྪཝིརཱཛཱ སདྡྷོ པསནྣོ བུདྡྷཔྤམུཁཾ བྷིཀྑུསངྒྷཾ ནིམནྟེཏྭཱ ཨཏྟནོ ནིཝེསནེ མཧཱདཱནཾ པཝཏྟེསི. བྷརིཡཱ པནསྶ ཐཱུལངྒཔཙྩངྒཱ ཨུདྡྷུམཱཏཀནིམིཏྟསདིསཱ ཨནཱཀཔྤསམྤནྣཱ ཨཧོསི. སཏྠཱ བྷཏྟཀིཙྩཱཝསཱནེ ཨནུམོདནཾ ཀཏྭཱ ཝིཧཱརཾ གནྟྭཱ བྷིཀྑཱུནཾ ཨོཝཱདཾ དཏྭཱ གནྡྷཀུཊིཾ པཱཝིསི. བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཨཱཝུསོ, ཏསྶ ནཱམ ལིཙྪཝིརཉྙོ ཏཱཝ ཨབྷིརཱུཔསྶ ཏཱདིསཱ བྷརིཡཱ ཐཱུལངྒཔཙྩངྒཱ ཨནཱཀཔྤསམྤནྣཱ, ཀཐཾ སོ ཏཱཡ སདྡྷིཾ ཨབྷིརམཏཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨེས ཨིདཱནེཝ, པུབྦེཔི ཐཱུལསརཱིརཱཡ ཨེཝ ཨིཏྠིཡཱ སདྡྷིཾ ཨབྷིརམཱི’’ཏི ཝཏྭཱ ཏེཧི ཡཱཙིཏོ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཏསྶ ཨམཙྩོ ཨཧོསི. ཨཐེཀཱ ཛནཔདིཏྠཱི ཐཱུལསརཱིརཱ ཨནཱཀཔྤསམྤནྣཱ བྷཏིཾ ཀུརུམཱནཱ རཱཛངྒཎསྶ ཨཝིདཱུརེན གཙྪམཱནཱ སརཱིརཝལ༹ཉྫཔཱིལི༹ཏཱ ཧུཏྭཱ ནིཝཏྠསཱཊཀེན སརཱིརཾ པཊིཙྪཱདེཏྭཱ ནིསཱིདིཏྭཱ སརཱིརཝལ༹ཉྫཾ མུཉྩིཏྭཱ ཁིཔྤམེཝ ཨུཊྛཱསི. ཏསྨིཾ ཁཎེ བཱརཱཎསིརཱཛཱ ཝཱཏཔཱནེན རཱཛངྒཎཾ ཨོལོཀེནྟོ ཏཾ དིསྭཱ ཙིནྟེསི ‘‘ཨཡཾ ཨེཝརཱུཔེ ཨངྒཎཊྛཱནེ སརཱིརཝལ༹ཉྫཾ མུཉྩམཱནཱ ཧིརོཏྟཔྤཾ ¶ ཨཔྤཧཱཡ ནིཝཱསནེནེཝ པཊིཙྪནྣཱ ཧུཏྭཱ སརཱིརཝལ༹ཉྫཾ མོཙེཏྭཱ ཁིཔྤཾ ཨུཊྛིཏཱ, ཨིམཱཡ ནིརོགཱཡ བྷཝིཏབྦཾ, ཨེཏིསྶཱ ཝཏྠུ ཝིསདཾ བྷཝིསྶཏི, ཝིསདེ པན ཝཏྠུསྨིཾ ཨེཀོ པུཏྟོ ལབྦྷམཱནོ ཝིསདོ པུཉྙཝཱ བྷཝིསྶཏི, ཨིམཾ མཡཱ ཨགྒམཧེསིཾ ཀཱཏུཾ ཝཊྚཏཱི’’ཏི. སོ ཏསྶཱ ཨཔརིགྒཧིཏབྷཱཝཾ ཉཏྭཱ ཨཱཧརཱཔེཏྭཱ ཨགྒམཧེསིཊྛཱནཾ ཨདཱསི. སཱ ཏསྶ པིཡཱ ཨཧོསི མནཱཔཱ, ན ཙིརསྶེཝ ཨེཀཾ པུཏྟཾ ཝིཛཱཡི. སོ པནསྶཱ པུཏྟོ ཙཀྐཝཏྟཱི རཱཛཱ ཨཧོསི.

བོདྷིསཏྟོ ཏསྶཱ སམྤཏྟིཾ དིསྭཱ ཏཐཱརཱུཔཾ ཝཙནོཀཱསཾ ལབྷིཏྭཱ ‘‘དེཝ, སིཀྑིཏབྦཡུཏྟཀཾ ནཱམ སིཔྤཾ ཀསྨཱ ན སིཀྑིཏབྦཾ, ཡཏྲ ཧི ནཱམཱཡཾ མཧཱཔུཉྙཱ ཧིརོཏྟཔྤཾ ཨཔྤཧཱཡ པཊིཙྪནྣཱཀཱརེན སརཱིརཝལ༹ཉྫཾ ཀུརུམཱནཱ ཏུམྷེ ¶ ཨཱརཱདྷེཏྭཱ ཨེཝརཱུཔཾ སམྤཏྟིཾ པཏྟཱ’’ཏི ཝཏྭཱ སིཀྑིཏབྦཡུཏྟཀཱནཾ སིཔྤཱནཾ ཝཎྞཾ ཀཐེནྟོ ཨིམཾ གཱཐམཱཧ –

༡༠༨.

‘‘སིཀྑེཡྻ སིཀྑིཏབྦཱནི, སནྟི སཙྪནྡིནོ ཛནཱ;

བཱཧིཡཱ ཧི སུཧནྣེན, རཱཛཱནམབྷིརཱདྷཡཱི’’ཏི.

ཏཏྠ སནྟི སཙྪནྡིནོ ཛནཱཏི ཏེསུ ཏེསུ སིཔྤེསུ སཙྪནྡཱ ཛནཱ ཨཏྠིཡེཝ. བཱཧིཡཱཏི བཧིཛནཔདེ ཛཱཏཱ སཾཝཌྜྷཱ ཨིཏྠཱི. སུཧནྣེནཱཏི ཧིརོཏྟཔྤཾ ཨཔྤཧཱཡ པཊིཙྪནྣེནཱཀཱརེན ཧནྣཾ སུཧནྣཾ ནཱམ, ཏེན སུཧནྣེན. རཱཛཱནམབྷིརཱདྷཡཱིཏི དེཝཾ ཨབྷིརཱདྷཡིཏྭཱ ཨིམཾ སམྤཏྟིཾ པཏྟཱཏི. ཨེཝཾ མཧཱསཏྟོ སིཀྑིཏབྦཡུཏྟཀཱནཾ སིཔྤཱནཾ གུཎཾ ཀཐེསི.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཛཡམྤཏིཀཱ ཨེཏརཧིཔི ཛཡམྤཏིཀཱཝ, པཎྜིཏཱམཙྩོ པན ཨཧམེཝ ཨཧོསི’’ནྟི.

བཱཧིཡཛཱཏཀཝཎྞནཱ ཨཊྛམཱ.

[༡༠༩] ༩. ཀུཎྜཀཔཱུཝཛཱཏཀཝཎྞནཱ

ཡཐནྣོ པུརིསོ ཧོཏཱིཏི ཨིདཾ སཏྠཱ སཱཝཏྠིཡཾ ཝིཧརནྟོ མཧཱདུགྒཏཾ ཨཱརབྦྷ ཀཐེསི. སཱཝཏྠིཡཉྷི ཀདཱཙི ཨེཀམེཝ ཀུལཾ བུདྡྷཔྤམུཁསྶ བྷིཀྑུསངྒྷསྶ དཱནཾ དེཏི, ཀདཱཙི ཏཱིཎི ཙཏྟཱརི ཨེཀཏོ ཧུཏྭཱ, ཀདཱཙི གཎབནྡྷནེན, ཀདཱཙི ཝཱིཐིསབྷཱགེན, ཀདཱཙི སཀལནགརཾ ཚནྡཀཾ ¶ སཾཧརིཏྭཱ. ཏདཱ པན ཝཱིཐིབྷཏྟཾ ནཱམ ཨཧོསི. ཨཐ མནུསྶཱ བུདྡྷཔྤམུཁསྶ བྷིཀྑུསངྒྷསྶ ཡཱགུཾ དཏྭཱ ‘‘ཁཛྫཀཾ ཨཱཧརཐཱ’’ཏི ཨཱཧཾསུ. ཏདཱ པནེཀོ པརེསཾ བྷཏིཀཱརཀོ དུགྒཏམནུསྶོ ཏསྶཾ ཝཱིཐིཡཾ ཝསམཱནོ ཙིནྟེསི ‘‘ཨཧཾ ཡཱགུཾ དཱཏུཾ ན སཀྑིསྶཱམི, ཁཛྫཀཾ པན དསྶཱམཱི’’ཏི སཎྷསཎྷཾ ཀུཎྜཀཾ ཝཌྜྷཱཔེཏྭཱ ཨུདཀེན ཏེམེཏྭཱ ཨཀྐཔཎྞེན ཝེཋེཏྭཱ ཀུཀྐུལེ༹ པཙིཏྭཱ ‘‘ཨིདཾ བུདྡྷསྶ དསྶཱམཱི’’ཏི ཏཾ ཨཱདཱཡ གནྟྭཱ སཏྠུ སནྟིཀེ ཋིཏོ ‘‘ཁཛྫཀཾ ཨཱཧརཐཱ’’ཏི ཨེཀསྨིཾ ཝཙནེ ཝུཏྟམཏྟེ སབྦཔཋམཾ གནྟྭཱ ཏཾ པཱུཝཾ སཏྠུ པཏྟེ པཏིཊྛཱཔེསི, སཏྠཱ ཨཉྙེཧི དཱིཡམཱནཾ ཁཛྫཀཾ ཨགྒཧེཏྭཱ ཏམེཝ པཱུཝཁཛྫཀཾ པརིབྷུཉྫི.

ཏསྨིཾཡེཝ ¶ པན ཁཎེ ‘‘སམྨཱསམྦུདྡྷེན ཀིར མཧཱདུགྒཏསྶ ཀུཎྜཀཁཛྫཀཾ ཨཛིགུཙྪིཏྭཱ ཨམཏཾ ཝིཡ པརིབྷུཏྟ’’ནྟི སཀལནགརཾ ཨེཀཀོལཱཧལཾ ཨཧོསི. རཱཛརཱཛམཧཱམཏྟཱདཡོ ཨནྟམསོ དོཝཱརིཀེ ཨུཔཱདཱཡ སབྦེཝ སནྣིཔཏིཏྭཱ སཏྠཱརཾ ཝནྡིཏྭཱ མཧཱདུགྒཏཾ ཨུཔསངྐམིཏྭཱ ‘‘ཧནྡ བྷོ, སཏཾ གཧེཏྭཱ, དྭེ སཏཱནི གཧེཏྭཱ, པཉྩ སཏཱནི གཧེཏྭཱ ཨམྷཱཀཾ པཏྟིཾ དེཧཱི’’ཏི ཝདིཾསུ. སོ ‘‘སཏྠཱརཾ པཊིཔུཙྪིཏྭཱ ཛཱནིསྶཱམཱི’’ཏི སཏྠུ སནྟིཀཾ གནྟྭཱ ཏམཏྠཾ ཨཱརོཙེསི. སཏྠཱ ‘‘དྷནཾ གཧེཏྭཱ ཝཱ ཨགྒཧེཏྭཱ ཝཱ སབྦསཏྟཱནཾ པཏྟིཾ དེཧཱི’’ཏི ཨཱཧ. སོ དྷནཾ གཧེཏུཾ ཨཱརབྷི. མནུསྶཱ དིགུཎཙཏུགྒུཎཨཊྛགུཎཱདིཝསེན དདནྟཱ ནཝ ཧིརཉྙཀོཊིཡོ ཨདཾསུ. སཏྠཱ ཨནུམོདནཾ ཀཏྭཱ ཝིཧཱརཾ གནྟྭཱ བྷིཀྑཱུཧི ཝཏྟེ དསྶིཏེ སུགཏོཝཱདཾ དཏྭཱ གནྡྷཀུཊིཾ པཱཝིསི. རཱཛཱ སཱཡནྷསམཡེ མཧཱདུགྒཏཾ པཀྐོསཱཔེཏྭཱ སེཊྛིཊྛཱནེན པཱུཛེསི.

བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཨཱཝུསོ, སཏྠཱ མཧཱདུགྒཏེན དིནྣཾ ཀུཎྜཀཔཱུཝཾ ཨཛིགུཙྪནྟོ ཨམཏཾ ཝིཡ པརིབྷུཉྫི, མཧཱདུགྒཏོཔི བཧུདྷནཉྩ སེཊྛིཊྛཱནཉྩ ¶ ལབྷིཏྭཱ མཧཱསམྤཏྟིཾ པཏྟོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ མཡཱ ཨཛིགུཙྪནྟེན ཏསྶ ཀུཎྜཀཔཱུཝོ པརིབྷུཏྟོ, པུབྦེཔི རུཀྑདེཝཏཱཡ ཧུཏྭཱ པརིབྷུཏྟོཡེཝ, ཏདཱཔི ཙེས མཾ ནིསྶཱཡ སེཊྛིཊྛཱནཾ ཨལཏྠེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨེཀསྨིཾ ཋཱནེ ཨེརཎྜརུཀྑེ རུཀྑདེཝཏཱ ཧུཏྭཱ ནིབྦཏྟི. ཏདཱ ཏསྨིཾ གཱམཀེ མནུསྶཱ དེཝཏཱམངྒལིཀཱ ཧོནྟི. ཨཐེཀསྨིཾ ཚཎེ སམྤཏྟེ མནུསྶཱ ཨཏྟནོ ཨཏྟནོ རུཀྑདེཝཏཱནཾ བལིཀམྨཾ ཨཀཾསུ. ཨཐེཀོ དུགྒཏམནུསྶོ ཏེ མནུསྶེ རུཀྑདེཝཏཱ པཊིཛགྒནྟེ དིསྭཱ ཨེཀཾ ཨེརཎྜརུཀྑཾ པཊིཛགྒི. ཏེ མནུསྶཱ ¶ ཨཏྟནོ ཨཏྟནོ དེཝཏཱནཾ ནཱནཔྤཀཱརཱནི མཱལཱགནྡྷཝིལེཔནཱདཱིནི ཙེཝ ཁཛྫབྷོཛྫཱནི ཙ ཨཱདཱཡ གཙྪིཾསུ. སོ པན ཀུཎྜཀཔཱུཝཉྩེཝ ཨུལུ༹ངྐེན ཙ ཨུདཀཾ ཨཱདཱཡ གནྟྭཱ ཨེརཎྜརུཀྑསྶ ཨཝིདཱུརེ ཋཏྭཱ ཙིནྟེསི ‘‘དེཝཏཱ ནཱམ དིབྦཁཛྫཀཱནི ཁཱདནྟི, མཡ྄ཧཾ དེཝཏཱ ཨིམཾ ¶ ཀུཎྜཀཔཱུཝཾ ན ཁཱདིསྶཏི, ཀིཾ ཨིམཾ ཨཀཱརཎེན ནཱསེམི, ཨཧམེཝ ནཾ ཁཱདིསྶཱམཱི’’ཏི ཏཏོཝ ནིཝཏྟི. བོདྷིསཏྟོ ཁནྡྷཝིཊཔེ ཋཏྭཱ ‘‘བྷོ པུརིས, སཙེ ཏྭཾ ཨིསྶརོ བྷཝེཡྻཱསི, མཡ྄ཧཾ མདྷུརཁཛྫཀཾ དདེཡྻཱསི. ཏྭཾ པན དུགྒཏོ, ཨཧཾ ཏཝ པཱུཝཾ ན ཁཱདིཏྭཱ ཨཉྙཾ ཀིཾ ཁཱདིསྶཱམི, མཱ མེ ཀོཊྛཱསཾ ནཱསེཧཱི’’ཏི ཝཏྭཱ ཨིམཾ གཱཐམཱཧ –

༡༠༩.

‘‘ཡཐནྣོ པུརིསོ ཧོཏི, ཏཐནྣཱ ཏསྶ དེཝཏཱ;

ཨཱཧརེཏཾ ཀུཎྜཔཱུཝཾ, མཱ མེ བྷཱགཾ ཝིནཱསཡཱ’’ཏི.

ཏཏྠ ཡཐནྣོཏི ཡཐཱརཱུཔབྷོཛནོ ཧོཏི. ཏཐནྣཱཏི ཏསྶ པུརིསསྶ དེཝཏཱཔི ཏཐཱརཱུཔབྷོཛནཱཝ ཧོཏི. ཨཱཧརེཏཾ ཀུཎྜཔཱུཝནྟི ཨེཏཾ ཀུཎྜཀེན པཀྐཔཱུཝཾ ཨཱནེཧི, མཡ྄ཧཾ བྷཱགཾ མཱ ཝིནཱསེཧཱིཏི.

སོ ནིཝཏྟིཏྭཱ བོདྷིསཏྟཾ ཨོལོཀེཏྭཱ བལིཀམྨམཀཱསི. བོདྷིསཏྟོ ཏཏོ ཨོཛཾ པརིབྷུཉྫིཏྭཱ ‘‘པུརིས, ཏྭཾ ཀིམཏྠཾ མཾ པཊིཛགྒསཱི’’ཏི ཨཱཧ. ‘‘དུགྒཏོམྷི, སཱམི, ཏཾ ནིསྶཱཡ དུགྒཏབྷཱཝཏོ མུཙྩིཏུཀཱམཏཱཡ པཊིཛགྒཱམཱི’’ཏི. ‘‘བྷོ པུརིས, མཱ ¶ ཙིནྟཡི, ཏཡཱ ཀཏཉྙུསྶ ཀཏཝེདིནོ པཱུཛཱ ཀཏཱ, ཨིམཾ ཨེརཎྜཾ པརིཀྑིཔིཏྭཱ ནིདྷིཀུམྦྷིཡོ གཱིཝཱཡ གཱིཝཾ ཨཱཧཙྩཋིཏཱ. ཏྭཾ རཉྙོ ཨཱཙིཀྑིཏྭཱ སཀཊེཧི དྷནཾ ཨཱཧརཱཔེཏྭཱ རཱཛངྒཎེ རཱསིཾ ཀཱརེཧི, རཱཛཱ ཏེ ཏུསྶིཏྭཱ སེཊྛིཊྛཱནཾ དསྶཏཱི’’ཏི ཝཏྭཱ བོདྷིསཏྟོ ཨནྟརདྷཱཡི. སོ ཏཐཱ ཨཀཱསི. རཱཛཱཔི ཏསྶ སེཊྛིཊྛཱནཾ ཨདཱསི. ཨིཏི སོ བོདྷིསཏྟཾ ནིསྶཱཡ མཧཱསམྤཏྟིཾ པཏྭཱ ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ དུགྒཏོ ཨེཏརཧི དུགྒཏོཝ, ཨེརཎྜརུཀྑདེཝཏཱ པན ཨཧམེཝ ཨཧོསི’’ནྟི.

ཀུཎྜཀཔཱུཝཛཱཏཀཝཎྞནཱ ནཝམཱ.

[༡༡༠] ༡༠. སབྦསཾཧཱརཀཔཉྷཛཱཏཀཝཎྞནཱ

སབྦསཾཧཱརཀོ ¶ ནཏྠཱིཏི ¶ ཨཡཾ སབྦསཾཧཱརཀཔཉྷོ སབྦཱཀཱརེན ཨུམངྒཛཱཏཀེ ཨཱཝི བྷཝིསྶཏཱིཏི.

སབྦསཾཧཱརཀཔཉྷཛཱཏཀཝཎྞནཱ དསམཱ.

པརོསཏཝགྒོ ཨེཀཱདསམོ.

ཏསྶུདྡཱནཾ –

པརོསཏམྤི པཎྞིཀཾ, ཝེརཱི ཙ མིཏྟཝིནྡཀཾ;

དུབྦལཉྩ ཨུདཉྩནཱི, སཱལིཏྟམྤི ཙ བཱཧིཡཾ;

ཀུཎྜཀཔཱུཝསབྦསཾཧཱརཀནྟི.

༡༢. ཧཾཙིཝགྒོ

[༡༡༡] ༡. གདྲབྷཔཉྷཛཱཏཀཝཎྞནཱ

ཧཾཙི ¶ ཏུཝཾ ཨེཝམཉྙསཱིཏི ཨཡམྤི གདྲབྷཔཉྷོ མཧཱཨུམངྒཛཱཏཀེཡེཝ (ཛཱ. ༢.༢༢.༥༩༠ ཨཱདཡོ) ཨཱཝི བྷཝིསྶཏི.

གདྲབྷཔཉྷཛཱཏཀཝཎྞནཱ པཋམཱ.

[༡༡༢] ༢. ཨམརཱདེཝཱིཔཉྷཛཱཏཀཝཎྞནཱ

ཡེན སཏྟུབིལངྒཱ ཙཱཏི ཨཡམྤི ཨམརཱདེཝིཔཉྷོ ནཱམ ཏཏྠེཝ ཨཱཝི བྷཝིསྶཏི.

ཨམརཱདེཝཱིཔཉྷཛཱཏཀཝཎྞནཱ དུཏིཡཱ.

[༡༡༣] ༣. སིངྒཱལཛཱཏཀཝཎྞནཱ

སདྡཧཱསི ¶ སིངྒཱལསྶཱཏི ཨིདཾ སཏྠཱ ཝེལུ༹ཝནེ ཝིཧརནྟོ དེཝདཏྟཾ ཨཱརབྦྷ ཀཐེསི. ཏསྨིཉྷི སམཡེ བྷིཀྑཱུ དྷམྨསབྷཱཡཾ ¶ སནྣིཔཏིཏྭཱ ‘‘ཨཱཝུསོ, དེཝདཏྟེན པཉྩ བྷིཀྑུསཏཱནི ཨཱདཱཡ གཡཱསཱིསཾ གནྟྭཱ ‘ཡཾ སམཎོ གོཏམོ ཀརོཏི, ན སོ དྷམྨོ. ཡམཧཾ ཀརོམི, ཨཡམེཝ དྷམྨོ’ཏི ཏེ བྷིཀྑཱུ ཨཏྟནོ ལདྡྷིཾ གཱཧཱཔེཏྭཱ ཋཱནཔྤཏྟཾ མུསཱཝཱདཾ ཀཏྭཱ སངྒྷཾ བྷིནྡིཏྭཱ ཨེཀསཱིམཱཡ དྭེ ཨུཔོསཐཱ ཀཏཱ’’ཏི དེཝདཏྟསྶ ཨགུཎཀཐཾ ཀཐེནྟཱ ནིསཱིདིཾསུ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, དེཝདཏྟོ ཨིདཱནེཝ མུསཱཝཱདཱི, པུབྦེཔི མུསཱཝཱདཱིཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ སུསཱནཝནེ རུཀྑདེཝཏཱ ཧུཏྭཱ ནིབྦཏྟི. ཏདཱ བཱརཱཎསིཡཾ ནཀྑཏྟཾ གྷུཊྛཾ ཨཧོསི. མནུསྶཱ ‘‘ཡཀྑབལིཀམྨཾ ཀརོམཱ’’ཏི ཏེསུ ཏེསུ ཙཙྩརརཙྪཱདིཊྛཱནེསུ མཙྪམཾསཱདཱིནི ཝིཔྤཀིརིཏྭཱ ཀཔཱལཀེསུ བཧུཾ སུརཾ ཋཔཡིཾསུ. ཨཐེཀོ སིངྒཱལོ ཨཌྜྷརཏྟསམཡེ ནིདྡྷམནེན ནགརཾ པཝིསིཏྭཱ མཙྪམཾསཾ ཁཱདིཏྭཱ སུརཾ པིཝིཏྭཱ པུནྣཱགགཙྪནྟརཾ པཝིསིཏྭཱ ཡཱཝ ཨརུཎུགྒམནཱ ནིདྡཾ ཨོཀྐམི. སོ པབུཛ྄ཛྷིཏྭཱ ཨཱལོཀཾ དིསྭཱ ‘‘ཨིདཱནི ནིཀྑམིཏུཾ ན སཀྐཱ’’ཏི མགྒསམཱིཔཾ གནྟྭཱ ཨདིསྶམཱནོ ནིཔཛྫིཏྭཱ ཨཉྙེ མནུསྶེ དིསྭཱཔི ཀིཉྩི ཨཝཏྭཱ ཨེཀཾ བྲཱཧྨཎཾ མུཁདྷོཝནཏྠཱཡ གཙྪནྟཾ དིསྭཱ ཙིནྟེསི ‘‘བྲཱཧྨཎཱ ནཱམ དྷནལོལཱ ཧོནྟི, ཨིམཾ དྷནེན པལོབྷེཏྭཱ ཡཐཱ མཾ ཨུཔཀཙྪཀནྟརེ ཀཏྭཱ ཨུཏྟརཱསངྒེན པཊིཙྪཱདེཏྭཱ ནགརཱ ནཱིཧརཏི, ཏཐཱ ཀརིསྶཱམཱི’’ཏི. སོ མནུསྶབྷཱསཱཡ ‘‘བྲཱཧྨཎཱ’’ཏི ཨཱཧ. སོ ནིཝཏྟིཏྭཱ ‘‘ཀོ མཾ པཀྐོསཏཱི’’ཏི ཨཱཧ. ‘‘ཨཧཾ, བྲཱཧྨཎཱ’’ཏི. ‘‘ཀིཾཀཱརཎཱ’’ཏི. ‘‘བྲཱཧྨཎ, མཡ྄ཧཾ དྭེ ཀཧཱཔཎསཏཱནི ཨཏྠི. སཙེ མཾ ཨུཔཀཙྪཀནྟརེ ཀཏྭཱ ཨུཏྟརཱསངྒེན པཊིཙྪཱདེཏྭཱ ཡཐཱ ན ཀོཙི པསྶཏི, ཏཐཱ ནགརཱ ནིཀྑཱམེཏུཾ སཀྐོསི, ཏུཡ྄ཧཾ ཏེ ཀཧཱཔཎེ དསྶཱམཱི’’ཏི. བྲཱཧྨཎོ དྷནལོབྷེན ‘‘སཱདྷཱུ’’ཏི སམྤཊིཙྪིཏྭཱ ཏཾ ཏཐཱ ཀཏྭཱ ཨཱདཱཡ ནགརཱ ནིཀྑམིཏྭཱ ཐོཀཾ ཨགམཱསི. ཨཐ ནཾ སིངྒཱལོ པུཙྪི ‘‘ཀཏརཊྛཱནཾ, བྲཱཧྨཎཱ’’ཏི? ‘‘ཨསུཀཾ ནཱམཱ’’ཏི. ‘‘ཨཉྙཾ ཐོཀཾ ཋཱནཾ གཙྪཱ’’ཏི. ཨེཝཾ པུནཔྤུནཾ ཝདནྟོ མཧཱསུསཱནཾ པཏྭཱ ‘‘ཨིདྷ ¶ མཾ ཨོཏཱརེཧཱི’’ཏི ¶ ཨཱཧ. ཏཏྠ ནཾ ཨོཏཱརེསི. ཨཐ སིངྒཱལོ ‘‘ཏེན ཧི, བྲཱཧྨཎ, ཨུཏྟརིསཱཊཀཾ པཏྠརཱ’’ཏི ཨཱཧ. སོ དྷནལོབྷེན ‘‘སཱདྷཱུ’’ཏི པཏྠརི. ཨཐ ནཾ ‘‘ཨིམཾ རུཀྑམཱུལཾ ཁཎཱཧཱི’’ཏི པཐཝིཁཎནེ ཡོཛེཏྭཱ བྲཱཧྨཎསྶ ཨུཏྟརིསཱཊཀཾ ཨབྷིརུཡ྄ཧ ཙཏཱུསུ ཀཎྞེསུ ཙ མཛ྄ཛྷེ ཙཱཏི པཉྩསུ ཋཱནེསུ སརཱིརནིསྶནྡཾ པཱཏེཏྭཱ མཀྑེཏྭཱ ཙེཝ ཏེམེཏྭཱ ཙ སུསཱནཝནཾ པཱཝིསི. བོདྷིསཏྟོ རུཀྑཝིཊཔེ ཋཏྭཱ ཨིམཾ གཱཐམཱཧ –

༡༡༣.

‘‘སདྡཧཱསི སིངྒཱལསྶ, སུརཱཔཱིཏསྶ བྲཱཧྨཎ;

སིཔྤིཀཱནཾ སཏཾ ནཏྠི, ཀུཏོ ཀཾསསཏཱ དུཝེ’’ཏི.

ཏཏྠ སདྡཧཱསཱིཏི སདྡཧསི, ཨཡམེཝ ཝཱ པཱཋོ, པཏྟིཡཱཡསཱིཏི ཨཏྠོ. སིཔྤིཀཱནཾ སཏཾ ནཏྠཱིཏི ཨེཏསྶ ཧི སིཔྤིཀཱསཏམྤི ནཏྠི. ཀུཏོ ཀཾསསཏཱ དུཝེཏི དྭེ ཀཧཱཔཎསཏཱནི པནསྶ ཀུཏོ ཨེཝཱཏི.

བོདྷིསཏྟོ ¶ ཨིམཾ གཱཐཾ ཝཏྭཱ ‘‘གཙྪ, བྲཱཧྨཎ, ཏཝ སཱཊཀཾ དྷོཝིཏྭཱ ནྷཱཡིཏྭཱ ཨཏྟནོ ཀམྨཾ ཀརོཧཱི’’ཏི ཝཏྭཱ ཨནྟརདྷཱཡི. བྲཱཧྨཎོ ཏཐཱ ཀཏྭཱ ‘‘ཝཉྩིཏོ ཝཏམྷཱི’’ཏི དོམནསྶཔྤཏྟོ པཀྐཱམི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ སིངྒཱལོ དེཝདཏྟོ ཨཧོསི, རུཀྑདེཝཏཱ པན ཨཧམེཝ ཨཧོསི’’ནྟི.

སིངྒཱལཛཱཏཀཝཎྞནཱ ཏཏིཡཱ.

[༡༡༤] ༤. མིཏཙིནྟཱིཛཱཏཀཝཎྞནཱ

བཧུཙིནྟཱི ཨཔྤཙིནྟཱིཏི ཨིདཾ སཏྠཱ ཛེཏཝནེ ཝིཧརནྟོ དྭེ མཧལླཀཏྠེརེ ཨཱརབྦྷ ཀཐེསི. ཏེ ཀིར ཛནཔདེ ཨེཀསྨིཾ ཨརཉྙཱཝཱསེ ཝསྶཾ ཝསིཏྭཱ ‘‘སཏྠུ དསྶནཏྠཱཡ གཙྪིསྶཱམཱ’’ཏི པཱཐེཡྻཾ སཛྫེཏྭཱ ‘‘ཨཛྫ གཙྪཱམ, སྭེ གཙྪཱམཱ’’ཏི མཱསཾ ཨཏིཀྐཱམེཏྭཱ པུན པཱཐེཡྻཾ སཛྫེཏྭཱ ཏཐེཝ མཱསཾ, པུན མཱསནྟི ཨེཝཾ ཨཏྟནོ ཀུསཱིཏབྷཱཝེན ཙེཝ ནིཝཱསཊྛཱནེ ཙ ཨཔེཀྑཱཡ ཏཡོ མཱསེ ཨཏིཀྐཱམེཏྭཱ ¶ ཏཏོ ནིཀྑམྨ ཛེཏཝནཾ གནྟྭཱ སབྷཱགཊྛཱནེ པཏྟཙཱིཝརཾ པཊིསཱམེཏྭཱ སཏྠཱརཾ པསྶིཾསུ. ཨཐ ནེ བྷིཀྑཱུ པུཙྪིཾསུ ‘‘ཙིརཾ ཝོ, ཨཱཝུསོ, བུདྡྷུཔཊྛཱནཾ ཨཀརོནྟཱནཾ, ཀསྨཱ ཨེཝཾ ཙིརཱཡིཏྠཱ’’ཏི? ཏེ ཏམཏྠཾ ཨཱརོཙེསུཾ. ཨཐ ནེསཾ སོ ཨཱལསིཡཀུསཱིཏབྷཱཝོ ¶ བྷིཀྑུསངྒྷེ པཱཀཊོ ཛཱཏོ. དྷམྨསབྷཱཡམྤི ཏེསཾ བྷིཀྑཱུནམེཝ ཨཱལསིཡབྷཱཝཾ ནིསྶཱཡ ཀཐཾ སམུཊྛཱཔེསུཾ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ཏེ པཀྐོསཱཔེཏྭཱ ‘‘སཙྩཾ ཀིར ཏུམྷེ, བྷིཀྑཝེ, ཨལསཱ ཀུསཱིཏཱ’’ཏི པུཙྪིཏྭཱ ‘‘སཙྩཾ, བྷནྟེ’’ཏི ཝུཏྟེ ‘‘ན, བྷིཀྑཝེ, ཨིདཱནེཝེཏེ ཨལསཱ, པུབྦེཔི ཨལསཱ ཙེཝ ནིཝཱསཊྛཱནེ ཙ སཱལཡཱ སཱཔེཀྑཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བཱརཱཎསིནདིཡཾ ཏཡོ མཙྪཱ ཨཧེསུཾ, བཧུཙིནྟཱི, ཨཔྤཙིནྟཱི, མིཏཙིནྟཱིཏི ཏེསཾ ནཱམཱནི. ཏེ ཨརཉྙཏོ མནུསྶཔཐཾ ཨཱགམིཾསུ. ཏཏྠ མིཏཙིནྟཱི ཨིཏརེ དྭེ ཨེཝམཱཧ ‘‘ཨཡཾ མནུསྶཔཐོ ནཱམ སཱསངྐོ སཔྤཊིབྷཡོ, ཀེཝཊྚཱ ནཱནཔྤཀཱརཱནི ཛཱལཀུམིནཱདཱིནི ཁིཔིཏྭཱ མཙྪེ གཎྷནྟི, མཡཾ ཨརཉྙམེཝ གཙྪཱམཱ’’ཏི. ཨིཏརེ དྭེ ཛནཱ ཨལསཏཱཡ ཙེཝ ཨཱམིསགིདྡྷཏཱཡ ཙ ‘‘ཨཛྫ གཙྪཱམ, སྭེ གཙྪཱམཱ’’ཏི ཏཡོ ¶ མཱསེ ཨཏིཀྐཱམེསུཾ. ཨཐ ཀེཝཊྚཱ ནདིཡཾ ཛཱལཾ ཁིཔིཾསུ. བཧུཙིནྟཱི ཙ ཨཔྤཙིནྟཱི ཙ གོཙརཾ གཎྷནྟཱ པུརཏོ གཙྪནྟི. ཏེ ཨཏྟནོ ཨནྡྷབཱལཏཱཡ ཛཱལགནྡྷཾ ཨསལླཀྑེཏྭཱ ཛཱལཀུཙྪིམེཝ པཝིསིཾསུ. མིཏཙིནྟཱི པཙྪཏོ ཨཱགཙྪནྟོ ཛཱལགནྡྷཾ སལླཀྑེཏྭཱ ཏེསཉྩ ཛཱལཀུཙྪིཾ པཝིཊྛབྷཱཝཾ ཉཏྭཱ ‘‘ཨིམེསཾ ཀུསཱིཏཱནཾ ཨནྡྷབཱལཱནཾ ཛཱིཝིཏདཱནཾ དསྶཱམཱི’’ཏི ཙིནྟེཏྭཱ བཧིཔསྶེན ཛཱལཀུཙྪིཊྛཱནཾ གནྟྭཱ ཛཱལཀུཙྪིཾ ཕཱལེཏྭཱ ནིཀྑནྟསདིསོ ཧུཏྭཱ ཨུདཀཾ ཨཱལུལེ༹ནྟོ ཛཱལསྶ པུརཏོ པཏིཏྭཱ པུན ཛཱལཀུཙྪིཾ པཝིསིཏྭཱ པཙྪིམབྷཱགེན ཕཱལེཏྭཱ ནིཀྑནྟསདིསོ ཨུདཀཾ ཨཱལུལེ༹ནྟོ པཙྪིམབྷཱགེ པཏི. ཀེཝཊྚཱ ‘‘མཙྪཱ ཛཱལཾ ཕཱལེཏྭཱ གཏཱ’’ཏི མཉྙམཱནཱ ཛཱལཀོཊིཡཾ གཧེཏྭཱ ཨུཀྑིཔིཾསུ. ཏེ དྭེཔི མཙྪཱ ཛཱལཏོ མུཙྩིཏྭཱ ཨུདཀེ པཏིཾསུ. ཨིཏི ཏེཧི མིཏཙིནྟིཾ ནིསྶཱཡ ཛཱིཝིཏཾ ལདྡྷཾ.

སཏྠཱ ¶ ཨིམཾ ཨཏཱིཏཾ ཨཱཧརིཏྭཱ ཨབྷིསམྦུདྡྷོ ཧུཏྭཱ ཨིམཾ གཱཐམཱཧ –

༡༡༤.

‘‘བཧུཙིནྟཱི ¶ ཨཔྤཙིནྟཱི, ཨུབྷོ ཛཱལེ ཨབཛ྄ཛྷརེ;

མིཏཙིནྟཱི པམོཙེསི, ཨུབྷོ ཏཏྠ སམཱགཏཱ’’ཏི.

ཏཏྠ བཧུཙིནྟཱིཏི བཧུཙིནྟནཏཱཡ ཝིཏཀྐབཧུལཏཱཡ ཨེཝཾལདྡྷནཱམོ. ཨིཏརེསུཔི དྭཱིསུ ཨཡམེཝ ནཡོ. ཨུབྷོ ཏཏྠ སམཱགཏཱཏི མིཏཙིནྟིཾ ནིསྶཱཡ ལདྡྷཛཱིཝིཏཱ ཏཏྠ ཨུདཀེ པུན ཨུབྷོཔི ཛནཱ མིཏཙིནྟིནཱ སདྡྷིཾ སམཱགཏཱཏི ཨཏྠོ.

ཨེཝཾ སཏྠཱ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེཏྭཱ ཛཱཏཀཾ སམོདྷཱནེསི, སཙྩཔརིཡོསཱནེ མཧལླཀཱ བྷིཀྑཱུ སོཏཱཔཏྟིཕལེ པཏིཊྛཧིཾསུ. ཏདཱ བཧུཙིནྟཱི ཙ ཨཔྤཙིནྟཱི ཙ ཨིམེ དྭེ ཨཧེསུཾ, མིཏཙིནྟཱི པན ཨཧམེཝ ཨཧོསིནྟི.

མིཏཙིནྟཱིཛཱཏཀཝཎྞནཱ ཙཏུཏྠཱ.

[༡༡༥] ༥. ཨནུསཱསིཀཛཱཏཀཝཎྞནཱ

ཡཱཡཉྙེ མནུསཱསཏཱིཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཨནུསཱསིཀཾ བྷིཀྑུནིཾ ཨཱརབྦྷ ཀཐེསི. སཱ ཀིར སཱཝཏྠིཝཱསིནཱི ཨེཀཱ ཀུལདྷཱིཏཱ པབྦཛིཏྭཱ ཨུཔསམྤནྣཀཱལཏོ པཊྛཱཡ སམཎདྷམྨེ ཨནནུཡུཏྟཱ ཨཱམིསགིདྡྷཱ ཧུཏྭཱ ཡཏྠ ཨཉྙཱ བྷིཀྑུནིཡོ ན གཙྪནྟི, ཏཱདིསེ ¶ ནགརསྶ ཨེཀདེསེ པིཎྜཱཡ ཙརཏི. ཨཐསྶཱ མནུསྶཱ པཎཱིཏཔིཎྜཔཱཏཾ དེནྟི. སཱ རསཏཎྷཱཡ བཛ྄ཛྷིཏྭཱ ‘‘སཙེ ཨིམསྨིཾ པདེསེ ཨཉྙཱཔི བྷིཀྑུནིཡོ པིཎྜཱཡ ཙརིསྶནྟི, མཡ྄ཧཾ ལཱབྷོ པརིཧཱཡིསྶཏི. ཡཐཱ ཨེཏཾ པདེསཾ ཨཉྙཱ ནཱགཙྪནྟི, ཨེཝཾ མཡཱ ཀཱཏུཾ ཝཊྚཏཱི’’ཏི ཙིནྟེཏྭཱ བྷིཀྑུནཱུཔསྶཡཾ གནྟྭཱ ‘‘ཨཡྻེ, ཨསུཀཊྛཱནེ ཙཎྜོ ཧཏྠཱི, ཙཎྜོ ཨསྶོ, ཙཎྜོ མེཎྜོ, ཙཎྜོ ཀུཀྐུརོ ཙརཏི, སཔརིསྶཡཊྛཱནཾ, མཱ ཏཏྠ པིཎྜཱཡ ཙརིཏྠཱ’’ཏི བྷིཀྑུནིཡོ ཨནུསཱསཏི. ཏསྶཱ ཝཙནཾ སུཏྭཱ ཨེཀཱ བྷིཀྑུནཱིཔི ཏཾ པདེསཾ གཱིཝཾ པརིཝཏྟེཏྭཱ ན ཨོལོཀེསི. ཏསྶཱ ཨེཀསྨིཾ དིཝསེ ཏསྨིཾ པདེསེ པིཎྜཱཡ ཙརནྟིཡཱ ཝེགེནེཀཾ ¶ གེཧཾ པཝིསནྟིཡཱ ཙཎྜོ མེཎྜཀོ པཧརིཏྭཱ ཨཱུརུཊྛིཀཾ བྷིནྡི. མནུསྶཱ ཝེགེན ཨུཔདྷཱཝིཏྭཱ དྭིདྷཱ བྷིནྣཾ ཨཱུརུཊྛིཀཾ ཨེཀཏོ བནྡྷིཏྭཱ ཏཾ བྷིཀྑུནིཾ མཉྩེནཱདཱཡ བྷིཀྑུནཱུཔསྶཡཾ ནཡིཾསུ. བྷིཀྑུནིཡོ ‘‘ཨཡཾ ཨཉྙཱ བྷིཀྑུནིཡོ ཨནུསཱསིཏྭཱ སཡཾ ཏསྨིཾ པདེསེ ཙརནྟཱི ཨཱུརུཊྛིཀཾ བྷིནྡཱཔེཏྭཱ ཨཱགཏཱ’’ཏི པརིཧཱསཾ ཨཀཾསུ. ཏམྤི ཏཱཡ ཀཏཀཱརཎཾ ན ཙིརསྶེཝ བྷིཀྑུསངྒྷེ པཱཀཊཾ ཨཧོསི.

ཨཐེཀདིཝསཾ དྷམྨསབྷཱཡཾ བྷིཀྑཱུ ¶ ‘‘ཨཱཝུསོ, ཨསུཀཱ ཨནུསཱསིཀཱ བྷིཀྑུནཱི ཨཉྙཾ ཨནུསཱསིཏྭཱ སཡཾ ཏསྨིཾ པདེསེ ཙརམཱནཱ ཙཎྜེན མེཎྜཀེན ཨཱུརུཾ བྷིནྡཱཔེསཱི’’ཏི ཏསྶཱ ཨགུཎཀཐཾ ཀཐེསུཾ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ, པུབྦེཔེསཱ ཨཉྙེ ཨནུསཱསཏིཡེཝ, སཡཾ པན ན ཝཏྟཏི, ནིཙྩཀཱལཾ དུཀྑམེཝ ཨནུབྷོཏཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨརཉྙེ སཀུཎཡོནིཡཾ ནིབྦཏྟིཏྭཱ ཝཡཔྤཏྟོ སཀུཎཛེཊྛཀོ ཧུཏྭཱ ཨནེཀསཀུཎསཧསྶཔརིཝཱརོ ཧིམཝནྟཾ པཱཝིསི. ཏསྶ ཏཏྠ ཝསནཀཱལེ ཨེཀཱ ཙཎྜསཀུཎིཀཱ མཧཱཝཏྟནིམགྒཾ གནྟྭཱ གོཙརཾ གཎྷཱཏི. སཱ ཏཏྠ སཀཊེཧི པཏིཏཱནི ཝཱིཧིམུགྒབཱིཛཱདཱིནི ལབྷིཏྭཱ ‘‘ཡཐཱ ཨིདཱནི ཨིམཾ པདེསཾ ཨཉྙེ སཀུཎཱ ནཱགཙྪནྟི, ཏཐཱ ཀརིསྶཱམཱི’’ཏི ཙིནྟེཏྭཱ སཀུཎསངྒྷསྶ ཨོཝཱདཾ དེཏི ‘‘ཝཏྟནིམཧཱམགྒོ ནཱམ སཔྤཊིབྷཡོ, ཧཏྠིཨསྶཱདཡོ ཙེཝ ཙཎྜགོཎཡུཏྟཡཱནཱདཱིནི ཙ སཉྩརནྟི, སཧསཱ ཨུཔྤཏིཏུམྤི ན སཀྐཱ ཧོཏི, ན ཏཏྠ གནྟབྦ’’ནྟི. སཀུཎསངྒྷོ ཏསྶཱ ‘‘ཨནུསཱསིཀཱ’’ཏེཝ ནཱམཾ ཨཀཱསི.

སཱ ཨེཀདིཝསཾ ཝཏྟནིམཧཱམགྒེ ཙརནྟཱི ཨཏིམཧཱཝེགེན ཨཱགཙྪནྟསྶ ཡཱནསྶ སདྡཾ སུཏྭཱ ¶ ནིཝཏྟིཏྭཱ ཨོལོཀེཏྭཱ ‘‘དཱུརེ ཏཱཝཱ’’ཏི ཙརཏིཡེཝ. ཨཐ ནཾ ཡཱནཾ ཝཱཏཝེགེན སཱིགྷམེཝ སམྤཱཔུཎི, སཱ ཨུཊྛཱཏུཾ ནཱསཀྑི, ཙཀྐེན དྭིདྷཱ ཚིནྡིཏྭཱ གཏཱ. སཀུཎཛེཊྛཀོ སཀུཎེ སམཱནེནྟོ ཏཾ ཨདིསྭཱ ‘‘ཨནུསཱསིཀཱ ན དིསྶཏི, ཨུཔདྷཱརེཐ ན’’ནྟི ཨཱཧ. སཀུཎཱ ཨུཔདྷཱརེནྟཱ ཏཾ མཧཱམགྒེ དྭིདྷཱ ཚིནྣཾ དིསྭཱ སཀུཎཛེཊྛཀསྶ ཨཱརོཙེསུཾ. སཀུཎཛེཊྛཀོ ‘‘སཱ ཨཉྙཱ སཀུཎིཀཱ ཝཱརེཏྭཱ སཡཾ ཏཏྠ ཙརམཱནཱ དྭིདྷཱ ཚིནྣཱ’’ཏི ཝཏྭཱ ཨིམཾ གཱཐམཱཧ –

༡༡༥.

‘‘ཡཱཡཉྙེ ¶ མནུསཱསཏི, སཡཾ ལོལུཔྤཙཱརིནཱི;

སཱཡཾ ཝིཔཀྑིཀཱ སེཏི, ཧཏཱ ཙཀྐེན སཱསིཀཱ’’ཏི.

ཏཏྠ ¶ ཡཱཡཉྙེ མནུསཱསཏཱིཏི ཡཀཱརོ པདསནྡྷིཀརོ, ཡཱ ཨཉྙེ ཨནུསཱསཏཱིཏི ཨཏྠོ. སཡཾ ལོལུཔྤཙཱརིནཱིཏི ཨཏྟནཱ ལོལུཔྤཙཱརིནཱི སམཱནཱ. སཱཡཾ ཝིཔཀྑིཀཱ སེཏཱིཏི སཱ ཨེསཱ ཝིཧཏཔཀྑཱ ཧུཏྭཱ མཧཱམགྒེ སཡཏི. ཧཏཱ ཙཀྐེན སཱསིཀཱཏི ཡཱནཙཀྐེན ཧཏཱ སཱསིཀཱ སཀུཎིཀཱཏི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཨནུསཱསིཀཱ སཀུཎིཀཱ ཨཡཾ ཨནུསཱསིཀཱ བྷིཀྑུནཱི ཨཧོསི, སཀུཎཛེཊྛཀོ པན ཨཧམེཝ ཨཧོསི’’ནྟི.

ཨནུསཱསིཀཛཱཏཀཝཎྞནཱ པཉྩམཱ.

[༡༡༦] ༦. དུབྦཙཛཱཏཀཝཎྞནཱ

ཨཏིཀརམཀརཱཙརིཡཱཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ དུབྦཙབྷིཀྑུཾ ཨཱརབྦྷ ཀཐེསི. ཏསྶ ཝཏྠུ ནཝཀནིཔཱཏེ གིཛ྄ཛྷཛཱཏཀེ (ཛཱ. ༡.༩.༡ ཨཱདཡོ) ཨཱཝི བྷཝིསྶཏི. སཏྠཱ པན ཏཾ བྷིཀྑུཾ ཨཱམནྟེཏྭཱ ‘‘བྷིཀྑུ ན ཏྭཾ ཨིདཱནེཝ དུབྦཙོ, པུབྦེཔི དུབྦཙོཡེཝ. དུབྦཙབྷཱཝེནེཝ པཎྜིཏཱནཾ ཨོཝཱདཾ ཨཀརོནྟོ སཏྟིཔྤཧཱརེན ཛཱིཝིཏཀྑཡཾ པཏྟོསཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ལངྒྷནཊཀཡོནིཡཾ པཊིསནྡྷིཾ གཧེཏྭཱ ཝཡཔྤཏྟོ པཉྙཝཱ ཨུཔཱཡཀུསལོ ཨཧོསི. སོ ཨེཀསྶ ལངྒྷནཀསྶ སནྟིཀེ སཏྟིལངྒྷནསིཔྤཾ སིཀྑིཏྭཱ ཨཱཙརིཡེན སདྡྷིཾ སིཔྤཾ དསྶེནྟོ ཝིཙརཏི. ཨཱཙརིཡོ པནསྶ ཙཏུནྣཾཡེཝ ¶ སཏྟཱིནཾ ལངྒྷནསིཔྤཾ ཛཱནཱཏི, ན པཉྩནྣཾ. སོ ཨེཀདིཝསཾ ཨེཀསྨིཾ གཱམཀེ སིཔྤཾ དསྶེནྟོ སུརཱམདམཏྟོ ‘‘པཉྩ སཏྟིཡོ ལངྒྷིསྶཱམཱི’’ཏི པཊིཔཱཊིཡཱ ཋཔེསི. ཨཐ ནཾ བོདྷིསཏྟོ ཨཱཧ ‘‘ཨཱཙརིཡ, ཏྭཾ པཉྩསཏྟིལངྒྷནསིཔྤཾ ན ཛཱནཱསི, ཨེཀཾ སཏྟིཾ ཧར. སཙེ ལངྒྷིསྶསི, པཉྩམཱཡ སཏྟིཡཱ ཝིདྡྷོ མརིསྶསཱི’’ཏི. སོ སུཊྛུ མཏྟཏཱཡ ‘‘ཏྭཉྷི མཡ྄ཧཾ པམཱཎཾ ན ཛཱནཱསཱི’’ཏི ཏསྶ ཝཙནཾ ཨནཱདིཡིཏྭཱ ཙཏསྶོ ལངྒྷིཏྭཱ པཉྩམཱཡ ¶ སཏྟིཡཱ དཎྜཀེ མདྷུཀཔུཔྥཾ ཝིཡ ཨཱཝུཏོ པརིདེཝམཱནོ ནིཔཛྫི. ཨཐ ནཾ བོདྷིསཏྟོ ‘‘པཎྜིཏཱནཾ ཝཙནཾ ཨཀཏྭཱ ཨིམཾ བྱསནཾ པཏྟོསཱི’’ཏི ཨིམཾ གཱཐམཱཧ –

༡༡༦.

‘‘ཨཏིཀརམཀརཱཙརིཡ ¶ , མཡ྄ཧམྤེཏཾ ན རུཙྩཏི;

ཙཏུཏྠེ ལངྒྷཡིཏྭཱན, པཉྩམཱཡསི ཨཱཝུཏོ’’ཏི.

ཏཏྠ ཨཏིཀརམཀརཱཙརིཡཱཏི ཨཱཙརིཡ ཨཛྫ ཏྭཾ ཨཏིཀརཾ ཨཀརི, ཨཏྟནོ ཀརཎཏོ ཨཏིརེཀཾ ཀརཎཾ ཨཀརཱིཏི ཨཏྠོ. མཡ྄ཧམྤེཏཾ ན རུཙྩཏཱིཏི མཡ྄ཧཾ ཨནྟེཝཱསིཀསྶཔི སམཱནསྶ ཨེཏཾ ཏཝ ཀརཎཾ ན རུཙྩཏི, ཏེན ཏེ ཨཧཾ པཋམམེཝ ཀཐེསིནྟི དཱིཔེཏི. ཙཏུཏྠེ ལངྒྷཡིཏྭཱནཱཏི ཙཏུཏྠེ སཏྟིཐལེ ཨཔཏིཏྭཱ ཨཏྟཱནཾ ལངྒྷཡིཏྭཱ. པཉྩམཱཡསི ཨཱཝུཏོཏི པཎྜིཏཱནཾ ཝཙནཾ ཨགྒཎྷནྟོ ཨིདཱནི པཉྩམཱཡ སཏྟིཡཱ ཨཱཝུཏོསཱིཏི. ཨིདཾ ཝཏྭཱ ཨཱཙརིཡཾ སཏྟིཏོ ཨཔནེཏྭཱ ཀཏྟབྦཡུཏྟཀཾ ཨཀཱསི.

སཏྠཱ ཨིམཾ ཨཏཱིཏཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཨཱཙརིཡོ ཨཡཾ དུབྦཙོ ཨཧོསི, ཨནྟེཝཱསིཀོ པན ཨཧམེཝ ཨཧོསི’’ནྟི.

དུབྦཙཛཱཏཀཝཎྞནཱ ཚཊྛཱ.

[༡༡༧] ༧. ཏིཏྟིརཛཱཏཀཝཎྞནཱ

ཨཙྩུགྒཏཱཏིབལཏཱཏི ཨིདཾ སཏྠཱ ཛེཏཝནེ ཝིཧརནྟོ ཀོཀཱལིཀཾ ཨཱརབྦྷ ཀཐེསི. ཏསྶ ཝཏྠུ ཏེརསཀནིཔཱཏེ ཏཀྐཱརིཡཛཱཏཀེ (ཛཱ. ༡.༡༣.༡༠༤ ཨཱདཡོ) ཨཱཝི བྷཝིསྶཏི. སཏྠཱ པན ‘‘ན, བྷིཀྑཝེ, ཀོཀཱལིཀོ ཨིདཱནེཝ ཨཏྟནོ ཝཱཙཾ ནིསྶཱཡ ནཊྛོ, པུབྦེཔི ནཊྛོཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨུདིཙྩབྲཱཧྨཎཀུལེ ནིབྦཏྟིཏྭཱ ཝཡཔྤཏྟོ ཏཀྐསིལཱཡཾ སབྦསིཔྤཱནི ཨུགྒཎྷིཏྭཱ ཀཱམེ པཧཱཡ ཨིསིཔབྦཛྫཾ པབྦཛིཏྭཱ པཉྩཱབྷིཉྙཱ ཨཊྛ སམཱཔཏྟིཡོ ནིབྦཏྟེསི. ཧིམཝནྟཔྤདེསེ སབྦོ ཨིསིགཎོ སནྣིཔཏིཏྭཱ ཏཾ ཨོཝཱདཱཙརིཡཾ ཀཏྭཱ པརིཝཱརེསི. སོ པཉྩནྣཾ ཨིསིསཏཱནཾ ཨོཝཱདཱཙརིཡོ ཧུཏྭཱ ཛྷཱནཀཱིལ༹ཾ ཀཱིལ༹ནྟོ ཧིམཝནྟེ ཝསཏི. ཏདཱ ཨེཀོ ཙེཏྠ པཎྜུརོགཱི ཏཱཔསོ ཀུཋཱརིཾ གཧེཏྭཱ ཀཊྛཾ ཕཱལེཏི. ཨཐེཀོ མུཁརཏཱཔསོ ཏསྶ སནྟིཀེ ནིསཱིདིཏྭཱ ‘‘ཨིདྷ པཧཱརཾ དེཧི, ཨིདྷ པཧཱརཾ དེཧཱི’’ཏི ¶ ཏཾ ཏཱཔསཾ རོསེསི. སོ ཀུཛ྄ཛྷིཏྭཱ ‘‘ན དཱནི མེ ཏྭཾ དཱརུཕཱལནསིཔྤཾ སིཀྑཱཔནཀཱཙརིཡོ’’ཏི ཏིཎྷཾ ཀུཋཱརིཾ ཨུཀྑིཔིཏྭཱ ནཾ ཨེཀཔྤཧཱརེནེཝ ཛཱིཝིཏཀྑཡཾ པཱཔེསི. བོདྷིསཏྟོ ཏསྶ སརཱིརཀིཙྩཾ ཀཱརེསི. ཏདཱ ཨསྶམཏོ ཨཝིདཱུརེ ཨེཀསྨིཾ ཝམྨིཀཔཱདེ ཨེཀོ ཏིཏྟིརོ ཝསཏི. སོ སཱཡཾ པཱཏཾ ཏསྨིཾ ཝམྨིཀམཏྠཀེ ཋཏྭཱ མཧཱཝསྶིཏཾ ཝསྶཏི. ཏཾ སུཏྭཱ ཨེཀོ ལུདྡཀོ ‘‘ཏིཏྟིརེན བྷཝིཏབྦ’’ནྟི ཙིནྟེཏྭཱ སདྡསཉྙཱཡ ཏཏྠ གནྟྭཱ ཏཾ ཝདྷིཏྭཱ ཨཱདཱཡ གཏོ.

བོདྷིསཏྟོ ཏསྶ སདྡཾ ཨསུཎནྟོ ‘‘ཨསུཀཊྛཱནེ ཏིཏྟིརོ ཝསཏི, ཀིཾ ནུ ཁོ ཏསྶ སདྡོ ན སཱུཡཏཱི’’ཏི ཏཱཔསེ པུཙྪི. ཏེ ཏསྶ ཏམཏྠཾ ཨཱརོཙེསུཾ. སོ ཨུབྷོཔི ཏཱནི ཀཱརཎཱནི སཾསནྡེཏྭཱ ཨིསིགཎམཛ྄ཛྷེ ཨིམཾ གཱཐམཱཧ –

༡༡༧.

‘‘ཨཙྩུགྒཏཱཏིབལཏཱ, ཨཏིཝེལཾ པབྷཱསིཏཱ;

ཝཱཙཱ ཧནཏི དུམྨེདྷཾ, ཏིཏྟིརཾ ཝཱཏིཝསྶིཏ’’ནྟི.

ཏཏྠ ཨཙྩུགྒཏཱཏི ཨཏིཨུགྒཏཱ. ཨཏིབལཏཱཏི པུནཔྤུནཾ བྷཱསནེན ཨཏིབལསབྷཱཝཱ. ཨཏིཝེལཾ པབྷཱསིཏཱཏི ཨཏིཀྐནྟཝེལཱ པམཱཎཱཏིཀྐམེན བྷཱསིཏཱ. ཏིཏྟིརཾ ཝཱཏིཝསྶིཏནྟི ཡཐཱ ཏིཏྟིརཾ ཨཏིཝསྶིཏཾ ཧནཏི, ཏཐཱ ཨེཝརཱུཔཱ ཝཱཙཱ དུམྨེདྷཾ བཱལཔུགྒལཾ ཧནཏཱིཏི.

ཨེཝཾ བོདྷིསཏྟོ ཨིསིགཎསྶ ཨོཝཱདཾ དཏྭཱ ཙཏྟཱརོ བྲཧྨཝིཧཱརེ བྷཱཝེཏྭཱ བྲཧྨལོཀཔརཱཡཎོ ཨཧོསི.

སཏྠཱ ¶ ‘‘ན, བྷིཀྑཝེ, ཀོཀཱལིཀོ ཨིདཱནེཝ ཨཏྟནོ ཝཙནཾ ནིསྶཱཡ ནཊྛོ, པུབྦེཔི ནཊྛོཡེཝཱ’’ཏི ཝཏྭཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ མུཁརཏཱཔསོ ཀོཀཱལིཀོ ཨཧོསི, ཨིསིགཎོ བུདྡྷཔརིསཱ, གཎསཏྠཱ པན ཨཧམེཝ ཨཧོསི’’ནྟི.

ཏིཏྟིརཛཱཏཀཝཎྞནཱ སཏྟམཱ.

[༡༡༨] ༨. ཝཊྚཛཱཏཀཝཎྞནཱ

ནཱཙིནྟཡནྟོ ¶ པུརིསོཏི ཨིདཾ སཏྠཱ ཛེཏཝནེ ཝིཧརནྟོ ཨུཏྟརསེཊྛིཔུཏྟཾ ཨཱརབྦྷ ཀཐེསི. སཱཝཏྠིཡཾ ཀིར ཨུཏྟརསེཊྛི ནཱམ ཨཧོསི མཧཱཝིབྷཝོ. ཏསྶ བྷརིཡཱཡ ཀུཙྪིཡཾ ཨེཀོ པུཉྙཝཱ སཏྟོ བྲཧྨལོཀཱ ཙཝིཏྭཱ པཊིསནྡྷིཾ གཧེཏྭཱ ཝཡཔྤཏྟོ ཨབྷིརཱུཔོ པཱསཱདིཀོ ཨཧོསི ¶ བྲཧྨཝཎྞཱི. ཨཐ ཨེཀདིཝསཾ སཱཝཏྠིཡཾ ཀཏྟིཀཚཎེ ནཀྑཏྟེ གྷུཊྛེ སབྦོ ལོཀོ ནཀྑཏྟནིསྶིཏོ ཨཧོསི. ཏསྶ སཧཱཡཀཱ ཨཉྙེ སེཊྛིཔུཏྟཱ སཔཛཱཔཏིཀཱ ཨཧེསུཾ. ཨུཏྟརསེཊྛིཔུཏྟསྶ པན དཱིགྷརཏྟཾ བྲཧྨལོཀེ ཝསིཏཏྟཱ ཀིལེསེསུ ཙིཏྟཾ ན ཨལླཱིཡཏི. ཨཐསྶ སཧཱཡཀཱ ‘‘ཨུཏྟརསེཊྛིཔུཏྟསྶཔི ཨེཀཾ ཨིཏྠིཾ ཨཱནེཏྭཱ ནཀྑཏྟཾ ཀཱིལི༹སྶཱམཱ’’ཏི སམྨནྟཡིཏྭཱ ཏཾ ཨུཔསངྐམིཏྭཱ ‘‘སམྨ, ཨིམསྨིཾ ནགརེ ཀཏྟིཀཚཎོ གྷུཊྛོ, ཏུཡ྄ཧམྤི ཨེཀཾ ཨིཏྠིཾ ཨཱནེཏྭཱ ནཀྑཏྟཾ ཀཱིལི༹སྶཱམཱ’’ཏི ཨཱཧཾསུ. ‘‘ན མེ ཨཏྠོ ཨིཏྠིཡཱ’’ཏི ཙ ཝུཏྟེཔི པུནཔྤུནཾ ནིབནྡྷིཏྭཱ སམྤཊིཙྪཱཔེཏྭཱ ཨེཀཾ ཝཎྞདཱསིཾ སབྦཱལངྐཱརཔཊིམཎྜིཏཾ ཀཏྭཱ ཏསྶ གྷརཾ ནེཏྭཱ ‘‘ཏྭཾ སེཊྛིཔུཏྟསྶ སནྟིཀཾ གཙྪཱ’’ཏི སཡནིགྷརཾ པེསེཏྭཱ ནིཀྑམིཾསུ. ཏཾ སཡནིགྷརཾ པཝིཊྛམྤི སེཊྛིཔུཏྟོ ནེཝ ཨོལོཀེཏི, ནཱལཔཏི. སཱ ཙིནྟེསི ‘‘ཨཡཾ ཨེཝཾ རཱུཔསོབྷགྒཔྤཏྟཾ ཨུཏྟམཝིལཱསསམྤནྣཾ མཾ ནེཝ ཨོལོཀེཏི, ནཱལཔཏི, ཨིདཱནི ནཾ ཨཏྟནོ ཨིཏྠིཀུཏྟལཱིལཱཡ ཨོལོཀཱཔེསྶཱམཱི’’ཏི ཨིཏྠིལཱིལཾ དསྶེནྟཱི པཧཊྛཱཀཱརེན ཨགྒདནྟེ ཝིཝརིཏྭཱ ཧསིཏཾ ཨཀཱསི. སེཊྛིཔུཏྟོ ཨོལོཀེཏྭཱ དནྟཊྛིཀེ ནིམིཏྟཾ གཎྷི. ཨཐསྶ ཨཊྛིཀསཉྙཱ ཨུཔྤཛྫི, སཀལམྤི ཏཾ སརཱིརཾ ཨཊྛིཀསངྑལིཀཱ ཝིཡ པཉྙཱཡི. སོ ཏསྶཱ པརིབྦཡཾ དཏྭཱ ‘‘གཙྪཱ’’ཏི ཨུཡྻོཛེསི.

ཏཾ ཏསྶ གྷརཱ ཨོཏིཎྞཾ ཨེཀོ ཨིསྶརོ ཨནྟརཝཱིཐིཡཾ དིསྭཱ པརིབྦཡཾ དཏྭཱ ཨཏྟནོ གྷརཾ ནེསི, སཏྟཱཧེ ཝཱིཏིཝཏྟེ ནཀྑཏྟཾ ཨོསིཏཾ. ཝཎྞདཱསིཡཱ ¶ མཱཏཱ དྷཱིཏུ ཨཱགམནཾ ཨདིསྭཱ སེཊྛིཔུཏྟཱནཾ སནྟིཀཾ གནྟྭཱ ‘‘ཀཧཾ སཱ’’ཏི པུཙྪི. ཏེ ཨུཏྟརསེཊྛིཔུཏྟསྶ གྷརཾ གནྟྭཱ ‘‘ཀཧཾ སཱ’’ཏི པུཙྪིཾསུ. ‘‘ཏངྑཎཉྙེཝ ཏསྶཱ པརིབྦཡཾ དཏྭཱ ཨུཡྻོཛེསི’’ནྟི. ཨཐསྶཱ མཱཏཱ རོདནྟཱི ‘‘དྷཱིཏརཾ མེ ན པསྶཱམི, དྷཱིཏརཾ མེ སམཱནེཐཱ’’ཏི ཨུཏྟརསེཊྛིཔུཏྟཾ ཨཱདཱཡ རཉྙོ སནྟིཀཾ ཨགམཱསི. རཱཛཱ ཨཊྚཾ ཝིནིཙྪིནནྟོ ‘‘ཨིམེ ཏེ སེཊྛིཔུཏྟཱ ཝཎྞདཱསིཾ ཨཱནེཏྭཱ ཏུཡ྄ཧཾ ཨདཾསཱུ’’ཏི པུཙྪི. ‘‘ཨཱམ, དེཝཱ’’ཏི. ‘‘ཨིདཱནི སཱ ཀཧ’’ནྟི? ‘‘ན ཛཱནཱམི, ཏངྑཎཉྙེཝ ནཾ ཨུཡྻོཛེསི’’ནྟི. ‘‘ཨིདཱནི ཏཾ སམཱནེཏུཾ སཀྐོསཱི’’ཏི? ‘‘ན སཀྐོམི, དེཝཱ’’ཏི. རཱཛཱ ‘‘སཙེ སམཱནེཏུཾ ན སཀྐོཏི, རཱཛཱཎམསྶ ཀརོཐཱ’’ཏི ཨཱཧ. ཨཐ ནཾ པཙྪཱབཱཧཾ བནྡྷིཏྭཱ ‘‘རཱཛཱཎཾ ཀརིསྶཱམཱ’’ཏི གཧེཏྭཱ པཀྐམིཾསུ. ‘‘སེཊྛིཔུཏྟཾ ཀིར ཝཎྞདཱསིཾ ¶ སམཱནེཏུཾ ཨསཀྐོནྟཾ རཱཛཱ རཱཛཱཎཾ ཀཱརེཏཱི’’ཏི སཀལནགརཾ ཨེཀཀོལཱཧལཾ ཨཧོསི. མཧཱཛནོ ཨུརེ ཧཏྠེ ཋཔེཏྭཱ ‘‘ཀིཾ ནཱམེཏཾ, སཱམི, ཨཏྟནོ ཏེ ཨནནུཙྪཝིཀཾ ལདྡྷ’’ནྟི པརིདེཝཏི. སེཊྛིཔི པུཏྟསྶ པཙྪཏོ པཙྪཏོ པརིདེཝནྟོ གཙྪཏི.

སེཊྛིཔུཏྟོ ཙིནྟེསི ‘‘ཨིདཾ མཡ྄ཧཾ ཨེཝརཱུཔཾ ¶ དུཀྑཾ ཨགཱརེ ཝསནབྷཱཝེན ཨུཔྤནྣཾ. སཙེ ཨིཏོ མུཙྩིསྶཱམི, མཧཱགོཏམསམྨཱསམྦུདྡྷསྶ སནྟིཀེ པབྦཛིསྶཱམཱི’’ཏི. སཱཔི ཁོ ཝཎྞདཱསཱི ཏཾ ཀོལཱཧལསདྡཾ སུཏྭཱ ‘‘ཀིཾསདྡོ ནཱམེསོ’’ཏི པུཙྪིཏྭཱ ཏཾ པཝཏྟིཾ སུཏྭཱ ཝེགེན ཨོཏརིཏྭཱ ‘‘ཨུསྶརཐ, ཨུསྶརཐ, སཱམཱི, མཾ རཱཛཔུརིསཱནཾ དཊྛུཾ དེཐཱ’’ཏི ཨཏྟཱནཾ དསྶེསི. རཱཛཔུརིསཱ ཏཾ དིསྭཱ མཱཏརཾ པཊིཙྪཱཔེཏྭཱ སེཊྛིཔུཏྟཾ མུཉྩིཏྭཱ པཀྐམིཾསུ. སོ སཧཱཡཀཔརིཝུཏོཝ ནདིཾ གནྟྭཱ སསཱིསཾ ནྷཱཡིཏྭཱ གེཧཾ གནྟྭཱ བྷུཏྟཔཱཏརཱསོ མཱཏཱཔིཏརོ ཝནྡིཏྭཱ པབྦཛྫཾ ཨནུཛཱནཱཔེཏྭཱ ཙཱིཝརསཱཊཀེ ཨཱདཱཡ མཧནྟེན པརིཝཱརེན སཏྠུ སནྟིཀཾ གནྟྭཱ ཝནྡིཏྭཱ པབྦཛྫཾ ཡཱཙིཏྭཱ པབྦཛྫཉྩ ཨུཔསམྤདཉྩ ལབྷིཏྭཱ ཨཝིསྶཊྛཀམྨཊྛཱནོ ཝིཔསྶནཾ ཝཌྜྷེཏྭཱ ན ཙིརསྶེཝ ཨརཧཏྟེ པཏིཊྛཱསི.

ཨཐེཀདིཝསཾ དྷམྨསབྷཱཡཾ སནྣིཔཏིཏཱ བྷིཀྑཱུ ‘‘ཨཱཝུསོ, ཨུཏྟརསེཊྛིཔུཏྟོ ཨཏྟནོ བྷཡེ ཨུཔྤནྣེ སཱསནསྶ གུཎཾ ཛཱནིཏྭཱ ‘ཨིམམྷཱ དུཀྑཱ མུཙྩམཱནོ པབྦཛིསྶཱམཱི’ཏི ཙིནྟེཏྭཱ ཏེན སུཙིནྟིཏེན མརཎམུཏྟོ ཙེཝ, པབྦཛིཏོ ཙ ཨགྒཕལེ པཏིཊྛིཏོ’’ཏི ཏསྶ གུཎཀཐཾ ཀཐེསུཾ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི ¶ པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨུཏྟརསེཊྛིཔུཏྟོཝ ཨཏྟནོ བྷཡེ ཨུཔྤནྣེ ‘ཨིམིནཱ ཨུཔཱཡེན ཨིམམྷཱ དུཀྑཱ མུཙྩིསྶཱམཱི’ཏི ཙིནྟེཏྭཱ མརཎབྷཡཱ མུཏྟོ, ཨཏཱིཏེ པཎྜིཏཱཔི ཨཏྟནོ བྷཡེ ཨུཔྤནྣེ ‘ཨིམིནཱ ཨུཔཱཡེན ཨིམམྷཱ དུཀྑཱ མུཙྩིསྶཱམཱ’ཏི ཙིནྟེཏྭཱ མརཎབྷཡཏོ མུཙྩིཾསུཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཙུཏིཔཊིསནྡྷིཝསེན པརིཝཏྟནྟོ ཝཊྚཀཡོནིཡཾ ནིབྦཏྟི. ཏདཱ ཨེཀོ ཝཊྚཀལུདྡཀོ ཨརཉྙཱ བཧཱུ ཝཊྚཀེ ཨཱཧརིཏྭཱ གེཧེ ཋཔེཏྭཱ གོཙརཾ དཏྭཱ མཱུལཾ གཧེཏྭཱ ཨཱགཏཱགཏཱནཾ ཧཏྠེ ཝཊྚཀེ ཝིཀྐིཎནྟོ ཛཱིཝིཀཾ ཀཔྤེཏི. སོ ཨེཀདིཝསཾ བཧཱུཧི ཝཊྚཀེཧི སདྡྷིཾ བོདྷིསཏྟམྤི གཧེཏྭཱ ཨཱནེསི. བོདྷིསཏྟོ ཙིནྟེསི ‘‘སཙཱཧཾ ཨིམིནཱ དིནྣཾ གོཙརཉྩ པཱནཱིཡཉྩ པརིབྷུཉྫིསྶཱམི, ཨཡཾ མཾ གཧེཏྭཱ ཨཱགཏཱནཾ མནུསྶཱནཾ དསྶཏི. སཙེ པན ན པརིབྷུཉྫིསྶཱམི, ཨཧཾ མིལཱཡིསྶཱམི, ཨཐ མཾ མིལཱཡནྟཾ དིསྭཱ མནུསྶཱ ན གཎྷིསྶནྟི. ཨེཝཾ མེ སོཏྠི བྷཝིསྶཏི, ཨིམཾ ཨུཔཱཡཾ ཀརིསྶཱམཱི’’ཏི. སོ ¶ ཏཐཱ ཀརོནྟོ མིལཱཡིཏྭཱ ཨཊྛིཙམྨམཏྟོ ཨཧོསི. མནུསྶཱ ཏཾ དིསྭཱ ན གཎྷིཾསུ. ལུདྡཀོ བོདྷིསཏྟཾ ཋཔེཏྭཱ ¶ སེསེསུ ཝཊྚཀེསུ པརིཀྑཱིཎེསུ པཙྪིཾ ནཱིཧརིཏྭཱ དྭཱརེ ཋཔེཏྭཱ བོདྷིསཏྟཾ ཧཏྠཏལེ ཀཏྭཱ ‘‘ཀིཾ ནུ ཁོ ཨཡཾ ཝཊྚཀོ’’ཏི ཙིནྟེཏྭཱ ཨོལོཀེཏུཾ ཨཱརདྡྷོ. ཨཐསྶ པམཏྟབྷཱཝཾ ཉཏྭཱ བོདྷིསཏྟོ པཀྑེ པསཱརེཏྭཱ ཨུཔྤཏིཏྭཱ ཨརཉྙམེཝ གཏོ. ཨཉྙེ ཝཊྚཀཱ ཏཾ དིསྭཱ ‘‘ཀིཾ ནུ ཁོ ན པཉྙཱཡསི, ཀཧཾ གཏོསཱི’’ཏི པུཙྪིཏྭཱ ‘‘ལུདྡཀེན གཧིཏོམྷཱི’’ཏི ཝུཏྟེ ‘‘ཀིནྟི ཀཏྭཱ མུཏྟོསཱི’’ཏི པུཙྪིཾསུ. བོདྷིསཏྟོ ‘‘ཨཧཾ ཏེན དིནྣཾ གོཙརཾ ཨགྒཧེཏྭཱ པཱནཱིཡཾ ཨཔིཝིཏྭཱ ཨུཔཱཡཙིནྟཱཡ མུཏྟོ’’ཏི ཝཏྭཱ ཨིམཾ གཱཐམཱཧ –

༡༡༨.

‘‘ནཱཙིནྟཡནྟོ པུརིསོ, ཝིསེསམདྷིགཙྪཏི;

ཙིནྟིཏསྶ ཕལཾ པསྶ, མུཏྟོསྨི ཝདྷབནྡྷནཱ’’ཏི.

ཏཏྠཱཡཾ པིཎྜཏྠོ – པུརིསོ དུཀྑཾ པཏྭཱ ‘‘ཨིམིནཱ ནཱམ ཨུཔཱཡེན ཨིམམྷཱ དུཀྑཱ མུཙྩིསྶཱམཱི’’ཏི ཨཙིནྟཡནྟོ ཨཏྟནོ དུཀྑཱ མོཀྑསངྑཱཏཾ ཝིསེསཾ ནཱདྷིགཙྪཏི. ཨིདཱནི པན མཡཱ ཙིནྟིཏཀམྨསྶ ཕལཾ པསྶ. ཏེནེཝ ཨུཔཱཡེན ¶ མུཏྟོསྨི ཝདྷབནྡྷནཱ, མརཎཏོ ཙ བནྡྷནཏོ ཙ མུཏྟོསྨི ཨཧནྟི. ཨེཝཾ བོདྷིསཏྟོ ཨཏྟནཱ ཀཏཀཱརཎཾ ཨཱཙིཀྑི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ མརཎམུཏྟོ ཝཊྚཀོ ཨཧམེཝ ཨཧོསི’’ནྟི.

ཝཊྚཛཱཏཀཝཎྞནཱ ཨཊྛམཱ.

[༡༡༩] ༩. ཨཀཱལརཱཝིཛཱཏཀཝཎྞནཱ

ཨམཱཏཱཔིཏརསཾཝདྡྷོཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཨཀཱལརཱཝིཾ བྷིཀྑུཾ ཨཱརབྦྷ ཀཐེསི. སོ ཀིར སཱཝཏྠིཝཱསཱི ཀུལཔུཏྟོ སཱསནེ པབྦཛིཏྭཱ ཝཏྟཾ ཝཱ སིཀྑཾ ཝཱ ན ཨུགྒཎྷི. སོ ‘‘ཨིམསྨིཾ ཀཱལེ མཡཱ ཝཏྟཾ ཀཱཏབྦཾ, ཨིམསྨིཾ ཀཱལེ ཨུཔཊྛཱཏབྦཾ, ཨིམསྨིཾ ཀཱལེ ཨུགྒཧེཏབྦཾ, ཨིམསྨིཾ ཀཱལེ སཛ྄ཛྷཱཡིཏབྦ’’ནྟི ན ཛཱནཱཏི, པཋམཡཱམེཔི མཛ྄ཛྷིམཡཱམེཔི པཙྪིམཡཱམེཔི པབུདྡྷཔབུདྡྷཀྑཎེཡེཝ མཧཱསདྡཾ ཀརོཏི, བྷིཀྑཱུ ནིདྡཾ ན ལབྷནྟི. དྷམྨསབྷཱཡཾ བྷིཀྑཱུ ‘‘ཨཱཝུསོ, ཨསུཀོ ནཱམ བྷིཀྑུ ཨེཝརཱུཔེ རཏནསཱསནེ པབྦཛིཏྭཱ ཝཏྟཾ ཝཱ སིཀྑཾ ཝཱ ཀཱལཾ ཝཱ ཨཀཱལཾ ཝཱ ན ཛཱནཱཏཱི’’ཏི ཏསྶ ཨགུཎཀཐཾ ཀཐེསུཾ. སཏྠཱ ཨཱགནྟྭཱ ‘‘ཀཱཡ ནུཏྠ ¶ , བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝེས ཨཀཱལརཱཝཱི, པུབྦེཔི ཨཀཱལརཱཝཱིཡེཝ, ཀཱལཱཀཱལཾ ཨཛཱནནབྷཱཝེན ཙ གཱིཝཱཡ ཝཊྚིཏཱཡ ཛཱིཝིཏཀྑཡཾ པཏྟོ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨུདིཙྩབྲཱཧྨཎཀུལེ ནིབྦཏྟིཏྭཱ ཝཡཔྤཏྟོ སབྦསིཔྤེསུ པཱརཾ གནྟྭཱ བཱརཱཎསིཡཾ དིསཱཔཱམོཀྑོ ཨཱཙརིཡོ ཧུཏྭཱ པཉྩསཏེ མཱཎཝེ སིཔྤཾ ཝཱཙེཏི. ཏེསཾ མཱཎཝཱནཾ ཨེཀོ ཀཱལརཱཝཱི ཀུཀྐུཊོ ཨཏྠི, ཏེ ཏསྶ ཝསྶིཏསདྡེན ཨུཊྛཱཡ སིཔྤཾ སིཀྑནྟི. སོ ཀཱལམཀཱསི. ཏེ ཨཉྙཾ ཀུཀྐུཊཾ པརིཡེསནྟཱ ཙརནྟི. ཨཐེཀོ མཱཎཝཀོ སུསཱནཝནེ དཱརཱུནི ཨུདྡྷརནྟོ ཨེཀཾ ཀུཀྐུཊཾ དིསྭཱ ཨཱནེཏྭཱ པཉྫརེ ཋཔེཏྭཱ པཊིཛགྒཏི. སོ སུསཱནེ ཝཌྜྷིཏཏྟཱ ‘‘ཨསུཀཝེལཱཡ ནཱམ ཝསྶིཏབྦ’’ནྟི ཨཛཱནནྟོ ཀདཱཙི ཨཏིརཏྟིཾ ཝསྶཏི, ཀདཱཙི ཨརུཎུགྒམནེ. མཱཎཝཱ ¶ ཏསྶ ཨཏིརཏྟིཾ ཝསྶིཏཀཱལེ སིཔྤཾ སིཀྑནྟཱ ཡཱཝ ཨརུཎུགྒམནཱ སིཀྑིཏུཾ ན སཀྐོནྟི, ནིདྡཱཡམཱནཱ གཧིཏཊྛཱནམྤི ན པསྶནྟི. ཨཏིཔབྷཱཏེ ཝསྶིཏཀཱལེ སཛ྄ཛྷཱཡསྶ ཨོཀཱསམེཝ ན ལབྷནྟི. མཱཎཝཱ ‘‘ཨཡཾ ཨཏིརཏྟིཾ ཝཱ ཝསྶཏི ཨཏིཔབྷཱཏེ ཝཱ, ཨིམཾ ནིསྶཱཡ ཨམྷཱཀཾ སིཔྤཾ ན ནིཊྛཱཡིསྶཏཱི’’ཏི ཏཾ གཧེཏྭཱ གཱིཝཾ ཝཊྚེཏྭཱ ཛཱིཝིཏཀྑཡཾ པཱཔེཏྭཱ ‘‘ཨཀཱལརཱཝཱི ཀུཀྐུཊོ ཨམྷེཧི གྷཱཏིཏོ’’ཏི ཨཱཙརིཡསྶ ཀཐེསུཾ. ཨཱཙརིཡོ ‘‘ཨོཝཱདཾ ཨགྒཧེཏྭཱ སཾཝཌྜྷིཏབྷཱཝེན མརཎཾ པཏྟོ’’ཏི ཝཏྭཱ ཨིམཾ གཱཐམཱཧ –

༡༡༩.

‘‘ཨམཱཏཱཔིཏར-སཾཝདྡྷོ, ཨནཱཙེརཀུལེ ཝསཾ;

ནཱཡཾ ཀཱལཾ ཨཀཱལཾ ཝཱ, ཨབྷིཛཱནཱཏི ཀུཀྐུཊོ’’ཏི.

ཏཏྠ ཨམཱཏཱཔིཏརསཾཝདྡྷོཏི མཱཏཱཔིཏརོ ནིསྶཱཡ ཏེསཾ ཨོཝཱདཾ ཨགྒཧེཏྭཱ སཾཝཌྜྷོ. ཨནཱཙེརཀུལེ ཝསནྟི ཨཱཙརིཡཀུལེཔི ཨཝསམཱནོ, ཨཱཙཱརསིཀྑཱཔཀཾ ཀཉྩི ནིསྶཱཡ ཨཝསིཏཏྟཱཏི ཨཏྠོ. ནཱཡཾ ཀཱལཾ ཨཀཱལཾ ཝཱཏི ‘‘ཨིམསྨིཾ ཀཱལེ ཝསྶིཏབྦཾ, ཨིམསྨིཾ ན ཝསྶིཏབྦ’’ནྟི ཨེཝཾ ཝསྶིཏབྦཡུཏྟཀཾ ཀཱལཾ ཝཱ ཨཀཱལཾ ཝཱ ཨེས ཀུཀྐུཊོ ན ཛཱནཱཏི, ཨཛཱནནབྷཱཝེནེཝ ཛཱིཝིཏཀྑཡཾ པཏྟོཏི. ཨིདཾ ཀཱརཎཾ དསྶེཏྭཱ བོདྷིསཏྟོ ཡཱཝཏཱཡུཀཾ ཋཏྭཱ ཡཐཱཀམྨཾ གཏོ.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཨཀཱལརཱཝཱི ཀུཀྐུཊོ ཨཡཾ བྷིཀྑུ ཨཧོསི, ཨནྟེཝཱསིཀཱ བུདྡྷཔརིསཱ, ཨཱཙརིཡོ པན ཨཧམེཝ ཨཧོསི’’ནྟི.

ཨཀཱལརཱཝིཛཱཏཀཝཎྞནཱ ནཝམཱ.

[༡༢༠] ༡༠. བནྡྷནམོཀྑཛཱཏཀཝཎྞནཱ

ཨབདྡྷཱ ¶ ཏཏྠ བཛ྄ཛྷནྟཱིཏི ཨིདཾ སཏྠཱ ཛེཏཝནེ ཝིཧརནྟོ ཙིཉྩམཱཎཝིཀཾ ཨཱརབྦྷ ཀཐེསི. ཏསྶཱ ཝཏྠུ དྭཱདསཀནིཔཱཏེ མཧཱཔདུམཛཱཏཀེ (ཛཱ. ༡.༡༢.༡༠༦ ཨཱདཡོ) ཨཱཝི བྷཝིསྶཏི. ཏདཱ པན སཏྠཱ ‘‘ན, བྷིཀྑཝེ, ཙིཉྩམཱཎཝིཀཱ ཨིདཱནེཝ མཾ ཨབྷཱུཏེན ཨབྦྷཱཙིཀྑཏི, པུབྦེཔི ཨབྦྷཱཙིཀྑིཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ པུརོཧིཏསྶ གེཧེ ནིབྦཏྟིཏྭཱ ཝཡཔྤཏྟོ པིཏུ ཨཙྩཡེན ཏསྶེཝ པུརོཧིཏོ ཨཧོསི. ཏེན ཨགྒམཧེསིཡཱ ཝརོ དིནྣོ ཧོཏི ‘‘བྷདྡེ, ཡཾ ཨིཙྪསི, ཏཾ ཝདེཡྻཱསཱི’’ཏི. སཱ ཨེཝམཱཧ ‘‘ན མཡ྄ཧཾ ཨཉྙོ ཝརོ ནཱམ དུལླབྷོ, ཨིཏོ པན ཏེ པཊྛཱཡ ཨཉྙཱ ཨིཏྠཱི ཀིལེསཝསེན ན ཨོལོཀེཏབྦཱ’’ཏི. སོ པཊིཀྑིཔིཏྭཱ པུནཔྤུནཾ ནིཔྤཱིལི༹ཡམཱནོ ཏསྶཱ ཝཙནཾ ཨཏིཀྐམིཏུཾ ཨསཀྐོནྟོ སམྤཊིཙྪིཏྭཱ ཏཏོ པཊྛཱཡ སོལ༹སསུ ནཱཊཀིཏྠིསཧསྶེསུ ཀིལེསཝསེན ཨེཀིཏྠིམྤི ན ཨོལོཀེསི.

ཨཐསྶ པཙྩནྟོ ཀུཔྤི, པཙྩནྟེ ཋིཏཱ ཡོདྷཱ ཙོརེཧི སདྡྷིཾ དྭེ ཏཡོ སངྒཱམེ ཀཏྭཱ ‘‘ཨིཏོ ཨུཏྟརི མཡཾ ན སཀྐོམཱ’’ཏི རཉྙོ པཎྞཾ པེསེསུཾ. རཱཛཱ ཏཏྠ གནྟུཀཱམོ བལཀཱཡཾ སཾཧརིཏྭཱ ཏཾ པཀྐོསཱཔེཏྭཱ ‘‘བྷདྡེ, ཨཧཾ པཙྩནྟཾ གཙྪཱམི, ཏཏྠ ནཱནཔྤཀཱརཱནི ཡུདྡྷཱནི ཧོནྟི, ཛཡཔརཱཛཡོཔི ཨནིབདྡྷོ, ཏཱདིསེསུ ཋཱནེསུ མཱཏུགཱམོ དུཔྤརིཧཱརོ, ཏྭཾ ཨིདྷེཝ ནིཝཏྟཱཧཱི’’ཏི ཨཱཧ. སཱ ‘‘ན སཀྐཱ, དེཝ, མཡཱ ནིཝཏྟིཏུ’’ནྟི པུནཔྤུནཾ རཉྙཱ པཊིཀྑིཏྟཱ ཨཱཧ ‘‘ཏེན ཧི ཨེཀེཀཾ ཡོཛནཾ གནྟྭཱ མཡ྄ཧཾ སུཁདུཀྑཛཱནནཏྠཾ ཨེཀེཀཾ མནུསྶཾ པེསེཡྻཱཐཱ’’ཏི. རཱཛཱ ‘‘སཱདྷཱུ’’ཏི སམྤཊིཙྪིཏྭཱ བོདྷིསཏྟཾ ནགརེ ཋཔེཏྭཱ མཧནྟེན བལཀཱཡེན ནིཀྑམིཏྭཱ གཙྪནྟོ ཡོཛནེ ཡོཛནེ ཨེཀེཀཾ པུརིསཾ ‘‘ཨམྷཱཀཾ ཨཱརོགྱཾ ཨཱརོཙེཏྭཱ དེཝིཡཱ སུཁདུཀྑཾ ཛཱནིཏྭཱ ཨཱགཙྪཱ’’ཏི པེསེསི. སཱ ཨཱགཏཱགཏཾ པུརིསཾ ‘‘རཱཛཱ ཀིམཏྠཾ ཏཾ པེསེཏཱི’’ཏི པུཙྪིཏྭཱ ‘‘ཏུམྷཱཀཾ སུཁདུཀྑཛཱནནཏྠཱཡཱ’’ཏི ཝུཏྟེ ‘‘ཏེན ཧི ཨེཧཱི’’ཏི ཏེན སདྡྷིཾ ¶ ཨསདྡྷམྨཾ པཊིསེཝཏི. རཱཛཱ དྭཏྟིཾསཡོཛནམགྒཾ གཙྪནྟོ དྭཏྟིཾས ཛནེ པེསེསི, སཱ ¶ སབྦེཧིཔི ཏེཧི སདྡྷིཾ ཏཐེཝ ཨཀཱསི.

རཱཛཱ པཙྩནྟཾ ཝཱུཔསམེཏྭཱ ཛནཔདཾ སམསྶཱསེཏྭཱ པུན ཨཱགཙྪནྟོཔི ཏཐེཝ དྭཏྟིཾས ཛནེ པེསེསི, སཱ ཏེཧིཔི སདྡྷིཾ ཏཐེཝ ཝིཔྤཊིཔཛྫིཡེཝ. རཱཛཱ ཨཱགནྟྭཱ ཛཡཀྑནྡྷཱཝཱརཊྛཱནེ ཋཏྭཱ ‘‘ནགརཾ པཊིཛགྒཱཔེཏཱུ’’ཏི བོདྷིསཏྟསྶ པཎྞཾ པེསེསི. བོདྷིསཏྟོ སཀལནགརཾ པཊིཛགྒཱཔེཏྭཱ རཱཛནིཝེསནཾ པཊིཛགྒཱཔེནྟོ དེཝིཡཱ ཝསནཊྛཱནཾ ཨགམཱསི. སཱ བོདྷིསཏྟསྶ རཱུཔསོབྷགྒཔྤཏྟཾ ཀཱཡཾ དིསྭཱ སཎྛཱཏུཾ ཨསཀྐོནྟཱི ‘‘ཨེཧི ¶ , བྲཱཧྨཎ, སཡནཾ ཨབྷིརུཧཱ’’ཏི ཨཱཧ. བོདྷིསཏྟོ ‘‘མཱ ཨེཝཾ ཨཝཙ, རཱཛཱཔི གརུ, ཨཀུསལམྤི བྷཱཡཱམི, ན སཀྐཱ མཡཱ ཨེཝཾ ཀཱཏུ’’ནྟི ཨཱཧ. ‘‘ཙཏུསཊྛིཡཱ པཱདམཱུལིཀཱནཾ ནེཝ རཱཛཱ གརུ, ན ཨཀུསལཾ བྷཱཡནྟི. ཏཝེཝ རཱཛཱ གརུ, ཏྭཾཡེཝ ཙ ཨཀུསལཾ བྷཱཡསཱི’’ཏི. ‘‘ཨཱམ, དེཝི, སཙེ ཏེསམྤི ཨེཝཾ བྷཝེཡྻ, ན ཨེཝརཱུཔཾ ཀརེཡྻུཾ’’. ‘‘ཨཧཾ པན ཛཱནམཱནོ ཨེཝརཱུཔཾ སཱཧསིཡཀམྨཾ ན ཀརིསྶཱམཱི’’ཏི. ‘‘ཀིཾ བཧུཾ ཝིཔྤལཔསི, སཙེ མེ ཝཙནཾ ན ཀརོསི, སཱིསཾ ཏེ ཚིནྡཱཔེསྶཱམཱི’’ཏི. ‘‘ཏིཊྛཏུ ཏཱཝ ཨེཀསྨིཾ ཨཏྟབྷཱཝེ སཱིསཾ, ཨཏྟབྷཱཝསཧསྶེཔི སཱིསེ ཚིཛྫནྟེ ན སཀྐཱ མཡཱ ཨེཝརཱུཔཾ ཀཱཏུ’’ནྟི. སཱ ‘‘ཧོཏུ, ཛཱནིསྶཱམཱི’’ཏི བོདྷིསཏྟཾ ཏཛྫེཏྭཱ ཨཏྟནོ གབྦྷཾ པཝིསིཏྭཱ སརཱིརེ ནཁཝལ༹ཉྫཾ དསྶེཏྭཱ ཏེལེན གཏྟཱནི ཨབྦྷཉྫིཏྭཱ ཀིལིཊྛཝཏྠཾ ནིཝཱསེཏྭཱ གིལཱནཱལཡཾ ཀཏྭཱ དཱསིཡོ ཨཱཎཱཔེསི ‘རཉྙཱ ཀཧཾ དེཝཱི’ཏི ཝུཏྟེ ‘གིལཱནཱ’ཏི ཀཐེཡྻཱཐཱ’’ཏི.

བོདྷིསཏྟོཔི རཉྙོ པཊིཔཐཾ ཨགམཱསི. རཱཛཱ ནགརཾ པདཀྑིཎཾ ཀཏྭཱ པཱསཱདཾ ཨཱརུཡ྄ཧ དེཝིཾ ཨཔསྶནྟོ ‘‘ཀཧཾ, དེཝཱི’’ཏི པུཙྪི. ‘‘གིལཱནཱ, དེཝཱ’’ཏི. སོཔི སིརིགབྦྷཾ པཝིསིཏྭཱ ཏསྶཱ པིཊྛིཾ པརིམཛྫནྟོ ‘‘ཀིཾ ཏེ, བྷདྡེ, ཨཕཱསུཀ’’ནྟི པུཙྪི. སཱ ཏུཎྷཱི ཨཧོསི. ཏཏིཡཝཱརེ རཱཛཱནཾ ཨོལོཀེཏྭཱ ‘‘ཏྭམྤི, མཧཱརཱཛ, ཛཱིཝསི ནཱམ, མཱདིསཱཔི ཨིཏྠིཡོ སསྶཱམིཀཱཡེཝ ནཱམཱ’’ཏི ཨཱཧ. ‘‘ཀིཾ ཨེཏཾ, བྷདྡེ’’ཏི? ཏུམྷེཧི ནགརཾ རཀྑནཏྠཱཡ ཋཔིཏོ པུརོཧིཏོ ‘‘ཏུམྷཱཀཾ ནིཝེསནཾ པཊིཛགྒཱམཱི’’ཏི ཨིདྷཱགནྟྭཱ ཨཏྟནོ ཝཙནཾ ཨཀརོནྟིཾ ¶ མཾ པཧརིཏྭཱ ཨཏྟནོ མནཾ པཱུརེཏྭཱ གཏོཏི. རཱཛཱ ཨགྒིམྷི པཀྑིཏྟལོཎསཀྑརཱ ཝིཡ ཀོདྷེན ཏཊཏཊཱཡནྟོ སིརིགབྦྷཱ ནིཀྑམིཏྭཱ དོཝཱརིཀཔཱདམཱུལིཀཱདཡོ པཀྐོསཱཔེཏྭཱ ‘‘གཙྪཐ, བྷཎེ, པུརོཧིཏཾ པཙྪཱབཱཧཾ བནྡྷིཏྭཱ ཝཛ྄ཛྷབྷཱཝཔྤཏྟཾ ཀཏྭཱ ནགརཱ ནཱིཧརིཏྭཱ ཨཱགྷཱཏནཾ ནེཏྭཱ སཱིསམསྶ ཚིནྡཐཱ’’ཏི ཨཱཧ. ཏེ ཝེགེན གནྟྭཱ ཏཾ པཙྪཱབཱཧཾ བནྡྷིཏྭཱ ཝཛ྄ཛྷབྷེརིཾ ཙརཱཔེསུཾ.

བོདྷིསཏྟོ ¶ ཙིནྟེསི – ‘‘ཨདྡྷཱ ཏཱཡ དུཊྛདེཝིཡཱ རཱཛཱ པུརེཏརམེཝ པརིབྷིནྣོ, ཨཛྫ དཱནཱཧཾ ཨཏྟནོ བལེནེཝ ཨཏྟཱནཾ མོཙེསྶཱམཱི’’ཏི. སོ ཏེ པུརིསེ ཨཱཧ ‘‘བྷོ, ཏུམྷེ མཾ མཱརེནྟཱ རཉྙོ དསྶེཏྭཱཝ མཱརེཐཱ’’ཏི. ‘‘ཀིཾཀཱརཎཱ’’ཏི? ‘‘ཨཧཾ རཱཛཀམྨིཀོ, བཧུ མེ ཀམྨཾ ཀཏཾ, བཧཱུནི མཧཱནིདྷིཊྛཱནཱནི ཛཱནཱམི, རཱཛཀུཊུམྦཾ མཡཱ ཝིཙཱརིཏཾ. སཙེ མཾ རཉྙོ ¶ ན དསྶེསྶཐ, བཧུདྷནཾ ནསྶིསྶཏི, མཡཱ རཉྙོ སཱཔཏེཡྻེ ཨཱཙིཀྑིཏེ པཙྪཱ ཀཱཏབྦཾ ཀརོཐཱ’’ཏི. ཏེ ཏཾ རཉྙོ དསྶཡིཾསུ. རཱཛཱ ཏཾ དིསྭཱཝ ‘‘ཀསྨཱ བྷོ, བྲཱཧྨཎ, མཡི ལཛྫཾ ན ཨཀཱསི, ཀསྨཱ ཏེ ཨེཝརཱུཔཾ པཱཔཀམྨཾ ཀཏ’’ནྟི ཨཱཧ. ‘‘མཧཱརཱཛ, ཨཧཾ སོཏྠིཡཀུལེ ཛཱཏོ, མཡཱ ཀུནྠཀིཔིལླིཀམཏྟོཔི པཱཎཱཏིཔཱཏོ ན ཀཏཔུབྦོ, ཏིཎསལཱཀམཏྟམྤི ཨདིནྣཾ ནཱདིནྣཔུབྦཾ, ལོབྷཝསེན པརེསཾ ཨིཏྠཱི ཨཀྑཱིནི ཨུམྨཱིལེཏྭཱཔི ན ཨོལོཀིཏཔུབྦཱ, ཧསྶཝསེནཱཔི མུསཱ ན བྷཱསིཏཔུབྦཱ, ཀུསགྒེནཱཔི མཛྫཾ ན པཱིཏཔུབྦཾ, ཨཧཾ ཏུམྷེསུ ནིརཔརཱདྷོ. སཱ པན བཱལཱ ལོབྷཝསེན མཾ ཧཏྠེ གཧེཏྭཱ མཡཱ པཊིཀྑིཏྟཱ མཾ ཏཛྫེཏྭཱ ཨཏྟནཱ ཀཏཾ པཱཔཾ ཨུཏྟཱནཾ ཀཏྭཱ མམ ཨཱཙིཀྑིཏྭཱ ཨནྟོགབྦྷཾ པཝིཊྛཱ. ཨཧཾ ནིརཔརཱདྷོ, པཎྞཾ གཧེཏྭཱ པན ཨཱགཏཱ ཙཏུསཊྛི ཛནཱ སཱཔརཱདྷཱ, ཏེ པཀྐོསཱཔེཏྭཱ ‘‘ཏཱཡ ཝོ ཝཙནཾ ཀཏཾ, ན ཀཏ’’ནྟི པུཙྪ, དེཝཱཏི. རཱཛཱ ཏེ ཙཏུསཊྛི ཛནེ བནྡྷཱཔེཏྭཱ དེཝིཾ པཀྐོསཱཔེཏྭཱ ‘‘ཏཡཱ ཨེཏེཧི སདྡྷིཾ པཱཔཾ ཀཏཾ, ན ཀཏ’’ནྟི པུཙྪི. ‘‘ཀཏཾ, དེཝཱ’’ཏི ཝུཏྟེ ཏེ པཙྪཱབཱཧཾ བནྡྷཱཔེཏྭཱ ‘‘ཨིམེསཾ ཙཏུསཊྛིཛནཱནཾ སཱིསཱནི ཚིནྡཐཱ’’ཏི ཨཱཎཱཔེསི.

ཨཐ ནཾ ¶ བོདྷིསཏྟོ ཨཱཧ – ‘‘ནཏྠི, མཧཱརཱཛ, ཨེཏེསཾ དོསོ, དེཝཱི ཨཏྟནོ རུཙིཾ ཀཱརཱཔེསི. ནིརཔརཱདྷཱ ཨེཏེ, ཏསྨཱ ནེསཾ ཁམཐ. ཏསྶཱཔི དོསོ ནཏྠི, ཨིཏྠིཡོ ནཱམ མེཐུནདྷམྨེན ཨཏིཏྟཱ. ཛཱཏིསབྷཱཝོ ཧི ཨེས. ཨེཏཱསཾ ཁམིཏབྦཡུཏྟམེཝ ཧོཏི. ཏསྨཱ ཨེཏིསྶཱཔི ཁམཐཱ’’ཏི ནཱནཔྤཀཱརེན རཱཛཱནཾ སཉྙཱཔེཏྭཱ ཏེ ཙཏུསཊྛིཔི ཛནེ ཏཉྩ བཱལཾ མོཙཱཔེཏྭཱ སབྦེསཾ ཡཐཱསཀཱནི ཋཱནཱནི དཱཔེསི. ཨེཝཾ ཏེ སབྦེ མོཙེཏྭཱ སཀཊྛཱནེ པཏིཊྛཱཔེཏྭཱ བོདྷིསཏྟོ རཱཛཱནཾ ཨུཔསངྐམིཏྭཱ ‘‘མཧཱརཱཛ, ཨནྡྷབཱལཱནཾ ནཱམ ཨཝཏྠུཀེན ཝཙནེན ཨབནྡྷིཏབྦཡུཏྟཀཱཔི པཎྜིཏཱ པཙྪཱབཱཧཾ བདྡྷཱ, པཎྜིཏཱནཾ ཀཱརཎཡུཏྟེན ཝཙནེན པཙྪཱབཱཧཾ བདྡྷཱཔི མུཏྟཱ. ཨེཝཾ བཱལཱ ནཱམ ཨབནྡྷིཏབྦཡུཏྟཀེཔི བནྡྷཱཔེནྟི, པཎྜིཏཱ བདྡྷེཔི མོཙེནྟཱི’’ཏི ཝཏྭཱ ཨིམཾ གཱཐམཱཧ –

༡༢༠.

‘‘ཨབདྡྷཱ ཏཏྠ བཛ྄ཛྷནྟི, ཡཏྠ བཱལཱ པབྷཱསརེ;

བདྡྷཱཔི ཏཏྠ མུཙྩནྟི, ཡཏྠ དྷཱིརཱ པབྷཱསརེ’’ཏི.

ཏཏྠ ¶ ¶ ཨབདྡྷཱཏི ཨབནྡྷིཏབྦཡུཏྟཱ. པབྷཱསརེཏི པབྷཱསནྟི ཝདནྟི ཀཐེནྟི.

ཨེཝཾ མཧཱསཏྟོ ཨིམཱཡ གཱཐཱཡ རཉྙོ དྷམྨཾ དེསེཏྭཱ ‘‘མཡཱ ཨིམཾ དུཀྑཾ ཨགཱརེ ཝསནབྷཱཝེན ལདྡྷཾ, ཨིདཱནི མེ ཨགཱརེན ཀིཙྩཾ ནཏྠི, པབྦཛྫཾ མེ ཨནུཛཱན, དེཝཱ’’ཏི པབྦཛྫཾ ཨནུཛཱནཱཔེཏྭཱ ཨསྶུམུཁཾ ཉཱཏིཛནཾ མཧནྟཉྩ ཝིབྷཝཾ པཧཱཡ ཨིསིཔབྦཛྫཾ པབྦཛིཏྭཱ ཧིམཝནྟེ ཝསནྟོ ཨབྷིཉྙཱ ཙ སམཱཔཏྟིཡོ ཙ ནིབྦཏྟེཏྭཱ བྲཧྨལོཀཔརཱཡཎོ ཨཧོསི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ དུཊྛདེཝཱི ཙིཉྩམཱཎཝིཀཱ ཨཧོསི, རཱཛཱ ཨཱནནྡོ, པུརོཧིཏོ པན ཨཧམེཝ ཨཧོསི’’ནྟི.

བནྡྷནམོཀྑཛཱཏཀཝཎྞནཱ དསམཱ.

ཧཾཙིཝགྒོ དྭཱདསམོ.

ཏསྶུདྡཱནཾ –

གདྲབྷཔཉྷཱ ཨམརཱ, སིངྒཱལཾ མིཏཙིནྟི ཙ;

ཨནུསཱསིཀདུབྦཙཾ, ཏིཏྟིརཾ ཝཊྚཀཾ པུན;

ཨཀཱལརཱཝི བནྡྷནནྟི.

༡༣. ཀུསནཱལི༹ཝགྒོ

[༡༢༡] ༡. ཀུསནཱལི༹ཛཱཏཀཝཎྞནཱ

ཀརེ ¶ ¶ སརིཀྑོཏི ཨིདཾ སཏྠཱ ཛེཏཝནེ ཝིཧརནྟོ ཨནཱཐཔིཎྜིཀསྶ མིཏྟཾ ཨཱརབྦྷ ཀཐེསི. ཨནཱཐཔིཎྜིཀསྶ ཧི མིཏྟསུཧཛྫཉཱཏིབནྡྷཝཱ ཨེཀཏོ ཧུཏྭཱ ‘‘མཧཱསེཊྛི ཨཡཾ ཏཡཱ ཛཱཏིགོཏྟདྷནདྷཉྙཱདཱིཧི ནེཝ སདིསོ, ན ཨུཏྟརིཏརོ, ཀསྨཱ ཨེཏེན སདྡྷིཾ སནྠཝཾ ཀརོསི, མཱ ཀརོཧཱི’’ཏི པུནཔྤུནཾ ནིཝཱརེསུཾ. ཨནཱཐཔིཎྜིཀོ པན ‘‘མིཏྟསནྠཝོ ནཱམ ཧཱིནེཧིཔི སམེཧིཔི ཨཏིརེཀེཧིཔི ཀཏྟབྦོཡེཝཱ’’ཏི ཏེསཾ ¶ ཝཙནཾ ཨགྒཧེཏྭཱ བྷོགགཱམཾ གཙྪནྟོ ཏཾ ཀུཊུམྦརཀྑཀཾ ཀཏྭཱ ཨགམཱསཱིཏི སབྦཾ ཀཱལ༹ཀཎྞིཝཏྠུསྨིཾ ཝུཏྟནཡེནེཝ ཝེདིཏབྦཾ. ཨིདྷ པན ཨནཱཐཔིཎྜིཀེན ཨཏྟནོ གྷརེ པཝཏྟིཡཱ ཨཱརོཙིཏཱཡ སཏྠཱ ‘‘གཧཔཏི, མིཏྟོ ནཱམ ཁུདྡཀོ ནཏྠི, མིཏྟདྷམྨཾ རཀྑིཏུཾ སམཏྠབྷཱཝོཝེཏྠ པམཱཎཾ, མིཏྟོ ནཱམ ཨཏྟནཱ སམོཔི ཧཱིནོཔི སེཊྛོཔི གཧེཏབྦོ. སབྦེཔི ཧེཏེ ཨཏྟནོ པཏྟབྷཱརཾ ནིཏྠརནྟིཡེཝ, ཨིདཱནི ཏཱཝ ཏྭཾ ཨཏྟནོ ནཱིཙམིཏྟཾ ནིསྶཱཡ ཀུཊུམྦསྶ སཱམིཀོ ཛཱཏོ, པོརཱཎཱ པན ནཱིཙམིཏྟཾ ནིསྶཱཡ ཝིམཱནསཱམིཀཱ ཛཱཏཱ’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ རཉྙོ ཨུཡྻཱནེ ཀུསནཱལི༹གཙྪེ དེཝཏཱ ཧུཏྭཱ ནིབྦཏྟི. ཏསྨིཾཡེཝ ཙ ཨུཡྻཱནེ མངྒལསིལཾ ནིསྶཱཡ ཨུཛུགཏཀྑནྡྷོ པརིམཎྜལསཱཁཱཝིཊཔསམྤནྣོ རཉྙོ སནྟིཀཱ ལདྡྷསམྨཱནོ རུཙམངྒལརུཀྑོ ཨཏྠི, ‘‘མུཁཀོ’’ཏིཔི ཝུཙྩཏི. ཏསྨིཾ ཨེཀོ མཧེསཀྑོ དེཝརཱཛཱ ནིབྦཏྟི. བོདྷིསཏྟསྶ ཏེན སདྡྷིཾ མིཏྟསནྠཝོ ཨཧོསི. ཏདཱ རཱཛཱ ཨེཀསྨིཾ ཨེཀཏྠམྦྷཀེ པཱསཱདེ ཝསཏི, ཏསྶ སོ ཐམྦྷོ ཙལི. ཨཐསྶ ཙལིཏབྷཱཝཾ རཉྙོ ཨཱརོཙེསུཾ. རཱཛཱ ཝཌྜྷཀཱི པཀྐོསཱཔེཏྭཱ ‘‘ཏཱཏཱ, མམ ཨེཀཏྠམྦྷཀསྶ མངྒལཔཱསཱདསྶ ཐམྦྷོ ཙལིཏོ, ཨེཀཾ སཱརཏྠམྦྷཾ ཨཱཧརིཏྭཱ ཏཾ ནིཙྩལཾ ཀརོཐཱ’’ཏི ཨཱཧ. ཏེ ‘‘སཱདྷུ, དེཝཱ’’ཏི རཉྙོ ཝཙནཾ སམྤཊིཙྪིཏྭཱ ཏདནུཙྪཝིཀཾ ¶ རུཀྑཾ པརིཡེསམཱནཱ ཨཉྙཏྠ ཨདིསྭཱ ཨུཡྻཱནཾ པཝིསིཏྭཱ ཏཾ མུཁཀརུཀྑཾ དིསྭཱ རཉྙོ སནྟིཀཾ གནྟྭཱ ‘‘ཀིཾ, ཏཱཏཱ, དིཊྛོ ཝོ ཏདནུཙྪཝིཀོ རུཀྑོ’’ཏི ཝུཏྟེ ‘‘དིཊྛོ, དེཝ, ཨཔིཙ ཏཾ ཚིནྡིཏུཾ ན ཝིསཧཱམཱ’’ཏི ཨཱཧཾསུ. ‘‘ཀིཾཀཱརཎཱ’’ཏི? མཡཉྷི ཨཉྙཏྠ རུཀྑཾ ཨཔསྶནྟཱ ཨུཡྻཱནཾ ¶ པཝིསིམྷ, ཏཏྲཔི ཋཔེཏྭཱ མངྒལརུཀྑཾ ཨཉྙཾ ན པསྶཱམ. ཨིཏི ནཾ མངྒལརུཀྑཏཱཡ ཚིནྡིཏུཾ ན ཝིསཧཱམཱཏི. གཙྪཐ, ཏཾ ཚིནྡིཏྭཱ པཱསཱདཾ ཐིརཾ ཀརོཐ, མཡཾ ཨཉྙཾ མངྒལརུཀྑཾ ཀརིསྶཱམཱཏི. ཏེ ‘‘སཱདྷཱུ’’ཏི བལིཀམྨཾ གཧེཏྭཱ ཨུཡྻཱནཾ གནྟྭཱ ‘‘སྭེ ཚིནྡིསྶཱམཱ’’ཏི རུཀྑསྶ བལིཀམྨཾ ཀཏྭཱ ནིཀྑམིཾསུ.

རུཀྑདེཝཏཱ ཏཾ ཀཱརཎཾ ཉཏྭཱ ‘‘སྭེ མཡ྄ཧཾ ཝིམཱནཾ ནཱསེསྶནྟི, དཱརཀེ གཧེཏྭཱ ཀུཧིཾ གམིསྶཱམཱི’’ཏི གནྟབྦཊྛཱནཾ ཨཔསྶནྟཱི པུཏྟཀེ གཱིཝཱཡ ¶ གཧེཏྭཱ པརོདི. ཏསྶཱ སནྡིཊྛསམྦྷཏྟཱ རུཀྑདེཝཏཱ ཨཱགནྟྭཱ ‘‘ཀིཾ ཨེཏ’’ནྟི པུཙྪིཏྭཱ ཏཾ ཀཱརཎཾ སུཏྭཱ སཡམྤི ཝཌྜྷཀཱིནཾ པཊིཀྐམནཱུཔཱཡཾ ཨཔསྶནྟིཡོ ཏཾ པརིསྶཛིཏྭཱ རོདིཏུཾ ཨཱརབྷིཾསུ. ཏསྨིཾ སམཡེ བོདྷིསཏྟོ ‘‘རུཀྑདེཝཏཾ པསྶིསྶཱམཱི’’ཏི ཏཏྠ གནྟྭཱ ཏཾ ཀཱརཎཾ སུཏྭཱ ‘‘ཧོཏུ, མཱ ཙིནྟཡིཏྠ, ཨཧཾ རུཀྑཾ ཚིནྡིཏུཾ ན དསྶཱམི, སྭེ ཝཌྜྷཀཱིནཾ ཨཱགཏཀཱལེ མམ ཀཱརཎཾ པསྶཐཱ’’ཏི ཏཱ དེཝཏཱ སམསྶཱསེཏྭཱ པུནདིཝསེ ཝཌྜྷཀཱིནཾ ཨཱགཏཝེལཱཡ ཀཀཎྚཀཝེསཾ གཧེཏྭཱ ཝཌྜྷཀཱིནཾ པུརཏོ གནྟྭཱ མངྒལརུཀྑསྶ མཱུལནྟརཾ པཝིསིཏྭཱ ཏཾ རུཀྑཾ སུསིརཾ ཝིཡ ཀཏྭཱ རུཀྑམཛ྄ཛྷེན ཨབྷིརུཧིཏྭཱ ཁནྡྷམཏྠཀེན ནིཀྑམིཏྭཱ སཱིསཾ ཀམྤཡམཱནོ ནིཔཛྫི. མཧཱཝཌྜྷཀཱི ཏཾ ཀཀཎྚཀཾ དིསྭཱ རུཀྑཾ ཧཏྠེན པཧརིཏྭཱ ‘‘སུསིརརུཀྑོ ཨེསོ ནིསྶཱརོ, ཧིཡྻོ ཨནུཔདྷཱརེཏྭཱཝ བལིཀམྨཾ ཀརིམྷཱ’’ཏི ཨེཀགྷནཾ མཧཱརུཀྑཾ གརཧིཏྭཱ པཀྐཱམི. རུཀྑདེཝཏཱ བོདྷིསཏྟཾ ནིསྶཱཡ ཝིམཱནསྶ སཱམིནཱི ཛཱཏཱ.

ཏསྶཱ པཊིསནྠཱརཏྠཱཡ སནྡིཊྛསམྦྷཏྟཱ ¶ བཧཱུ དེཝཏཱ སནྣིཔཏིཾསུ. རུཀྑདེཝཏཱ ‘‘ཝིམཱནཾ མེ ལདྡྷ’’ནྟི ཏུཊྛཙིཏྟཱ ཏཱསཾ དེཝཏཱནཾ མཛ྄ཛྷེ བོདྷིསཏྟསྶ གུཎཾ ཀཐཡམཱནཱ ‘‘བྷོ, དེཝཏཱ, མཡཾ མཧེསཀྑཱ ཧུཏྭཱཔི དནྡྷཔཉྙཏཱཡ ཨིམཾ ཨུཔཱཡཾ ན ཛཱནིམྷ, ཀུསནཱལི༹དེཝཏཱ པན ཨཏྟནོ ཉཱཎསམྤཏྟིཡཱ ཨམྷེ ཝིམཱནསཱམིཀེ ཨཀཱསི, མིཏྟོ ནཱམ སདིསོཔི ཨདྷིཀོཔི ཧཱིནོཔི ཀཏྟབྦོཝ. སབྦེཔི ཧི ཨཏྟནོ ཐཱམེན སཧཱཡཀཱནཾ ཨུཔྤནྣཾ དུཀྑཾ ནིཏྠརིཏྭཱ སུཁེ པཏིཊྛཱཔེནྟིཡེཝཱ’’ཏི མིཏྟདྷམྨཾ ཝཎྞེཏྭཱ ཨིམཾ གཱཐམཱཧ –

༡༢༡.

‘‘ཀརེ སརིཀྑོ ཨཐ ཝཱཔི སེཊྛོ, ནིཧཱིནཀོ ཝཱཔི ཀརེཡྻ ཨེཀོ;

ཀརེཡྻུམེཏེ བྱསནེ ཨུཏྟམཏྠཾ, ཡཐཱ ཨཧཾ ཀུསནཱལི༹ རུཙཱཡ’’ནྟི.

ཏཏྠ ¶ ཀརེ སརིཀྑོཏི ཛཱཏིཨཱདཱིཧི སདིསོཔི མིཏྟདྷམྨཾ ཀརེཡྻ. ཨཐ ཝཱཔི སེཊྛོཏི ཛཱཏིཨཱདཱིཧི ཨདྷིཀོཔི ཀརེཡྻ. ནིཧཱིནཀོ ཝཱཔི ཀརེཡྻ ཨེཀོཏི ཨེཀོ ཛཱཏིཨཱདཱིཧི ཧཱིནོཔི མིཏྟདྷམྨཾ ཀརེཡྻ. ཏསྨཱ སབྦེཔི ཨེཏེ མིཏྟཱ ཀཱཏབྦཱཡེཝཱཏི དཱིཔེཏི. ཀིཾཀཱརཎཱ? ཀརེཡྻུམེཏེ ¶ བྱསནེ ཨུཏྟམཏྠནྟི སབྦེཔེཏེ སཧཱཡསྶ བྱསནེ ཨུཔྤནྣེ ཨཏྟནོ ཨཏྟནོ པཏྟབྷཱརཾ ཝཧམཱནཱ ཨུཏྟམཏྠཾ ཀརེཡྻུཾ, ཀཱཡིཀཙེཏསིཀདུཀྑཏོ ཏཾ སཧཱཡཀཾ མོཙེཡྻུམེཝཱཏི ཨཏྠོ. ཏསྨཱ ཧཱིནོཔི མིཏྟོ ཀཱཏབྦོཡེཝ, པགེཝ ཨིཏརེ. ཏཏྲིདཾ ཨོཔམྨཾ – ཡཐཱ ཨཧཾ ཀུསནཱལི༹ རུཙཱཡནྟི, ཡཐཱ ཨཧཾ རུཙཱཡཾ ནིབྦཏྟདེཝཏཱ ཨཡཉྩ ཀུསནཱལི༹དེཝཏཱ, ཨཔྤེསཀྑཱཔི མིཏྟསནྠཝཾ ཀརིམྷ, ཏཏྲཔཱཧཾ མཧེསཀྑཱཔི སམཱནཱ ཨཏྟནོ ཨུཔྤནྣདུཀྑཾ བཱལཏཱཡ ཨནུཔཱཡཀུསལཏཱཡ ཧརིཏུཾ ནཱསཀྑིཾ, ཨིམཾ པན ཨཔྤེསཀྑམྤི སམཱནཾ པཎྜིཏདེཝཏཾ ནིསྶཱཡ དུཀྑཏོ མུཏྟོམྷི. ཏསྨཱ ཨཉྙེཧིཔི དུཀྑཱ མུཙྩིཏུཀཱམེཧི སམཝིསིཊྛབྷཱཝཾ ཨནོལོཀེཏྭཱ ཧཱིནོཔི པཎྜིཏོ མིཏྟོ ཀཱཏབྦོཏི.

རུཙཱདེཝཏཱ ཨིམཱཡ གཱཐཱཡ དེཝསངྒྷསྶ དྷམྨཾ དེསེཏྭཱ ཡཱཝཏཱཡུཀཾ ཋཏྭཱ སདྡྷིཾ ཀུསནཱལི༹དེཝཏཱཡ ཡཐཱཀམྨཾ གཏཱ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ རུཙཱདེཝཏཱ ཨཱནནྡོ ཨཧོསི, ཀུསནཱལི༹དེཝཏཱ པན ཨཧམེཝ ཨཧོསི’’ནྟི.

ཀུསནཱལི༹ཛཱཏཀཝཎྞནཱ པཋམཱ.

[༡༢༢] ༢. དུམྨེདྷཛཱཏཀཝཎྞནཱ

ཡསཾ ¶ ལདྡྷཱན དུམྨེདྷོཏི ཨིདཾ སཏྠཱ ཝེལུ༹ཝནེ ཝིཧརནྟོ དེཝདཏྟཾ ཨཱརབྦྷ ཀཐེསི. དྷམྨསབྷཱཡཉྷི བྷིཀྑཱུ ‘‘ཨཱཝུསོ དེཝདཏྟོ, ཏཐཱགཏསྶ པུཎྞཙནྡསསྶིརིཀམུཁཾ ཨསཱིཏཱནུབྱཉྫནདྭཏྟིཾསམཧཱཔུརིསལཀྑཎཔཊིམཎྜིཏཾ བྱཱམཔྤབྷཱཔརིཀྑིཏྟཾ ཨཱཝེལཱ༹ཝེལཱ༹བྷཱུཏཱ ཡམཀཡམཀབྷཱུཏཱ གྷནབུདྡྷརསྨིཡོ ཝིསྶཛྫེནྟཾ པརམསོབྷགྒཔྤཏྟཾ ཨཏྟབྷཱཝཉྩ ཨོལོཀེཏྭཱ ཙིཏྟཾ པསཱདེཏུཾ ན སཀྐོཏི, ཨུསཱུཡམེཝ ཀརོཏི. ‘བུདྡྷཱ ནཱམ ཨེཝརཱུཔེན སཱིལེན སམཱདྷིནཱ པཉྙཱཡ ཝིམུཏྟིཡཱ ཝིམུཏྟིཉཱཎདསྶནེན སམནྣཱགཏཱ’ཏི ཝུཙྩམཱནེ ཝཎྞཾ སཧིཏུཾ ན སཀྐོཏི, ཨུསཱུཡམེཝ ཀརོཏཱི’’ཏི དེཝདཏྟསྶ ཨགུཎཀཐཾ ཀཐཡིཾསུ. སཏྠཱ ཨཱགནྟྭཱ ¶ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ ¶ , ཨིདཱནེཝ དེཝདཏྟོ མམ ཝཎྞེ བྷཉྙམཱནེ ཨུསཱུཡཾ ཀརོཏི, པུབྦེཔི ཨཀཱསིཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ མགདྷརཊྛེ རཱཛགཧནགརེ ཨེཀསྨིཾ མགདྷརཱཛེ རཛྫཾ ཀཱརེནྟེ བོདྷིསཏྟོ ཧཏྠིཡོནིཡཾ ནིབྦཏྟིཏྭཱ སབྦསེཏོ ཨཧོསི ཧེཊྛཱ ཝཎྞིཏསདིསཱཡ རཱུཔསམྤཏྟིཡཱ སམནྣཱགཏོ. ཨཐ ནཾ ‘‘ལཀྑཎསམྤནྣོ ཨཡ’’ནྟི སོ རཱཛཱ མངྒལཧཏྠིཾ ཨཀཱསི. ཨཐེཀསྨིཾ ཚཎདིཝསེ སཀལནགརཾ དེཝནགརཾ ཝིཡ ཨལངྐཱརཱཔེཏྭཱ སབྦཱལངྐཱརཔཊིམཎྜིཏཾ མངྒལཧཏྠིཾ ཨབྷིརུཧིཏྭཱ མཧནྟེན རཱཛཱནུབྷཱཝེན ནགརཾ པདཀྑིཎཾ ཨཀཱསི. མཧཱཛནོ ཏཏྠ ཏཏྠ ཋཏྭཱ མངྒལཧཏྠིནོ རཱུཔསོབྷགྒཔྤཏྟཾ སརཱིརཾ དིསྭཱ ‘‘ཨཧོ རཱུཔཾ, ཨཧོ གཏི, ཨཧོ ལཱིལཱ༹, ཨཧོ ལཀྑཎསམྤཏྟི, ཨེཝརཱུཔོ ནཱམ སབྦསེཏཝརཝཱརཎོ ཙཀྐཝཏྟིརཉྙོ ཨནུཙྪཝིཀོ’’ཏི མངྒལཧཏྠིམེཝ ཝཎྞེསི.

རཱཛཱ མངྒལཧཏྠིསྶ ཝཎྞཾ སུཏྭཱ སཧིཏུཾ ཨསཀྐོནྟོ ཨུསཱུཡཾ ཨུཔྤཱདེཏྭཱ ‘‘ཨཛྫེཝ ཏཾ པབྦཏཔཱདེ པཱཏེཏྭཱ ཛཱིཝིཏཀྑཡཾ པཱཔེསྶཱམཱི’’ཏི ཧཏྠཱཙརིཡཾ པཀྐོསཱཔེཏྭཱ ‘‘ཀིནྟི ཀཏྭཱ ཏཡཱ ཨཡཾ ནཱགོ སིཀྑཱཔིཏོ’’ཏི ཨཱཧ. ‘‘སུསིཀྑཱཔིཏོ, དེཝཱ’’ཏི. ‘‘ན སུསིཀྑིཏོ, དུསིཀྑིཏོ’’ཏི. ‘‘སུསིཀྑིཏོ, དེཝཱ’’ཏི. ‘‘ཡདི སུསིཀྑིཏོ ¶ , སཀྑིསྶསི ནཾ ཝེཔུལླཔབྦཏམཏྠཀཾ ཨཱརོཔེཏུ’’ནྟི. ‘‘ཨཱམ, དེཝཱ’’ཏི. ‘‘ཏེན ཧི ཨེཧཱི’’ཏི སཡཾ ཨོཏརིཏྭཱ ཧཏྠཱཙརིཡཾ ཨཱརོཔེཏྭཱ པབྦཏཔཱདཾ གནྟྭཱ ཧཏྠཱཙརིཡེན ཧཏྠིཔིཊྛིཡཾ ནིསཱིདིཏྭཱཝ ཧཏྠིམྷི ཝེཔུལླཔབྦཏམཏྠཀཾ ཨཱརོཔིཏེ སཡམྤི ཨམཙྩགཎཔརིཝུཏོ པབྦཏམཏྠཀཾ ཨབྷིརུཧིཏྭཱ ཧཏྠིཾ པཔཱཏཱབྷིམུཁཾ ཀཱརེཏྭཱ ‘‘ཏྭཾ ‘མཡཱ ཨེས སུསིཀྑཱཔིཏོ’ཏི ཝདེསི, ཏཱིཧིཡེཝ ཏཱཝ ནཾ པཱདེཧི ཋཔེཧཱི’’ཏི ཨཱཧ. ཧཏྠཱཙརིཡོ པིཊྛིཡཾ ནིསཱིདིཏྭཱཝ ‘‘བྷོ ཏཱིཧི པཱདེཧི ཏིཊྛཱ’’ཏི ཧཏྠིསྶ པཎྷིཀཱཡ སཉྙཾ ཨདཱསི, མཧཱསཏྟོ ཏཐཱ ཨཀཱསི. པུན རཱཛཱ ‘‘དྭཱིཧི པུརིམཔཱདེཧིཡེཝ ཋཔེཧཱི’’ཏི ཨཱཧ, མཧཱསཏྟོ དྭེ པཙྪིམཔཱདེ ཨུཀྑིཔིཏྭཱ པུརིམཔཱདེཧི ཨཊྛཱསི. ‘‘པཙྪིམཔཱདེཧིཡེཝཱ’’ཏི ཝུཏྟེཔི དྭེ པུརིམཔཱདེ ཨུཀྑིཔིཏྭཱ པཙྪིམཔཱདེཧི ཨཊྛཱསི, ‘‘ཨེཀེནཱ’’ཏི ཝུཏྟེཔི ཏཡོ པཱདེ ཨུཀྑིཔིཏྭཱ ཨེཀེནེཝ ¶ ཨཊྛཱསི. ཨཐསྶ ཨཔཏནབྷཱཝཾ ཉཏྭཱ ‘‘སཙེ པཧོསི, ཨཱཀཱསེ ནཾ ཋཔེཧཱི’’ཏི ཨཱཧ.

ཨཱཙརིཡོ ཙིནྟེསི – ‘‘སཀལཛམྦུདཱིཔེ ཨིམིནཱ སདིསོ སུསིཀྑིཏོ ཧཏྠཱི ནཱམ ནཏྠི, ནིསྶཾསཡཾ པནེཏཾ ཨེས པཔཱཏེ པཱཏེཏྭཱ མཱརེཏུཀཱམོ བྷཝིསྶཏཱི’’ཏི. སོ ཏསྶ ཀཎྞམཱུལེ མནྟེསི ‘‘ཏཱཏ, ཨཡཾ རཱཛཱ ཏཾ པཔཱཏེ པཱཏེཏྭཱ མཱརེཏུཀཱམོ, ན ཏྭཾ ཨེཏསྶ ཨནུཙྪཝིཀོ. སཙེ ཏེ ཨཱཀཱསེན གནྟུཾ བལཾ ཨཏྠི, མཾ ཡཐཱནིསིནྣཾཡེཝ ཨཱདཱཡ ཝེཧཱསཾ ཨབྦྷུགྒནྟྭཱ བཱརཱཎསིཾ ¶ གཙྪཱ’’ཏི. པུཉྙིདྡྷིཡཱ སམནྣཱགཏོ མཧཱསཏྟོ ཏངྑཎཉྙེཝ ཨཱཀཱསེ ཨཊྛཱསི. ཧཏྠཱཙརིཡོ ‘‘མཧཱརཱཛ, ཨཡཾ ཧཏྠཱི པུཉྙིདྡྷིཡཱ སམནྣཱགཏོ, ན ཏཱདིསསྶ མནྡཔུཉྙསྶ དུབྦུདྡྷིནོ ཨནུཙྪཝིཀོ, པཎྜིཏསྶ པུཉྙསམྤནྣསྶ རཉྙོ ཨནུཙྪཝིཀོ, ཏཱདིསཱ ནཱམ མནྡཔུཉྙཱ ཨེཝརཱུཔཾ ཝཱཧནཾ ལབྷིཏྭཱ ཏསྶ གུཎཾ ཨཛཱནནྟཱ ཏཉྩེཝ ཝཱཧནཾ ཨཝསེསཉྩ ཡསསམྤཏྟིཾ ནཱསེནྟིཡེཝཱ’’ཏི ཝཏྭཱ ཧཏྠིཀྑནྡྷེ ནིསིནྣོཝ ཨིམཾ གཱཐམཱཧ –

༡༢༢.

‘‘ཡསཾ ལདྡྷཱན དུམྨེདྷོ, ཨནཏྠཾ ཙརཏི ཨཏྟནོ;

ཨཏྟནོ ཙ པརེསཉྩ, ཧིཾསཱཡ པཊིཔཛྫཏཱི’’ཏི.

ཏཏྲཱཡཾ ¶ སངྑེཔཏྠོ – མཧཱརཱཛ, ཏཱདིསོ དུམྨེདྷོ ནིཔྤཉྙོ པུགྒལོ པརིཝཱརསམྤཏྟིཾ ལབྷིཏྭཱ ཨཏྟནོ ཨནཏྠཾ ཙརཏི. ཀིཾཀཱརཎཱ? སོ ཧི ཡསམདམཏྟོ ཀཏྟབྦཱཀཏྟབྦཾ ཨཛཱནནྟོ ཨཏྟནོ ཙ པརེསཉྩ ཧིཾསཱཡ པཊིཔཛྫཏི. ཧིཾསཱ ཝུཙྩཏི ཀིལམནཾ དུཀྑུཔྤཱདནཾ, ཏདཏྠཱཡ ཨེཝ པཊིཔཛྫཏཱིཏི.

ཨེཝཾ ཨིམཱཡ གཱཐཱཡ རཉྙོ དྷམྨཾ དེསེཏྭཱ ‘‘ཏིཊྛ དཱནི ཏྭ’’ནྟི ཝཏྭཱ ཨཱཀཱསེ ཨུཔྤཏིཏྭཱ བཱརཱཎསིནགརཾ གནྟྭཱ རཱཛངྒཎེ ཨཱཀཱསེ ཨཊྛཱསི. སཀལནགརཾ སངྑུབྷིཏྭཱ ‘‘ཨམྷཱཀཾ རཉྙོ ཨཱཀཱསེན སེཏཝརཝཱརཎོ ཨཱགནྟྭཱ རཱཛངྒཎེ ཋིཏོ’’ཏི ཨེཀཀོལཱཧལཾ ཨཧོསི. ཝེགེན རཉྙོཔི ཨཱརོཙེསུཾ. རཱཛཱ ནིཀྑམིཏྭཱ ‘‘སཙེ མཡ྄ཧཾ ཨུཔབྷོགཏྠཱཡ ཨཱགཏོསི, བྷཱུམིཡཾ པཏིཊྛཱཧཱི’’ཏི ཨཱཧ. བོདྷིསཏྟོ བྷཱུམིཡཾ པཏིཊྛཱསི, ཨཱཙརིཡོ ཨོཏརིཏྭཱ རཱཛཱནཾ ཝནྡིཏྭཱ ‘‘ཀུཏོ ཨཱགཏོསི, ཏཱཏཱ’’ཏི ཝུཏྟེ ‘‘རཱཛགཧཏོ’’ཏི ཝཏྭཱ སབྦཾ པཝཏྟིཾ ཨཱརོཙེསི. རཱཛཱ ‘‘མནཱཔཾ ཏེ, ཏཱཏ, ཀཏཾ ཨིདྷཱགཙྪནྟེནཱ’’ཏི ཏུཊྛཧཊྛོ ¶ ནགརཾ སཛྫཱཔེཏྭཱ ཝཱརཎཾ མངྒལཧཏྠིཊྛཱནེ ཋཔེཏྭཱ སཀལརཛྫཾ ཏཡོ ཀོཊྛཱསེ ཀཏྭཱ ཨེཀཾ བོདྷིསཏྟསྶ ཨདཱསི, ཨེཀཾ ཨཱཙརིཡསྶ, ཨེཀཾ ཨཏྟནཱ ཨགྒཧེསི. བོདྷིསཏྟསྶ ཨཱགཏཀཱལཏོ པཊྛཱཡེཝ པན རཉྙོ སཀལཛམྦུདཱིཔེ རཛྫཾ ཧཏྠགཏམེཝ ཛཱཏཾ. སོ ཛམྦུདཱིཔེ ཨགྒརཱཛཱ ཧུཏྭཱ དཱནཱདཱིནི པུཉྙཱནི ཀཏྭཱ ཡཐཱཀམྨཾ ཨགམཱསི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ མགདྷརཱཛཱ དེཝདཏྟོ ཨཧོསི, བཱརཱཎསིརཱཛཱ སཱརིཔུཏྟོ, ཧཏྠཱཙརིཡོ ཨཱནནྡོ, ཧཏྠཱི པན ཨཧམེཝ ཨཧོསི’’ནྟི.

དུམྨེདྷཛཱཏཀཝཎྞནཱ དུཏིཡཱ.

[༡༢༣] ༣. ནངྒལཱིསཛཱཏཀཝཎྞནཱ

ཨསབྦཏྠགཱམིཾ ¶ ཝཱཙནྟི ཨིདཾ སཏྠཱ ཛེཏཝནེ ཝིཧརནྟོ ལཱལུ༹དཱཡིཏྠེརཾ ཨཱརབྦྷ ཀཐེསི. སོ ཀིར དྷམྨཾ ཀཐེནྟོ ‘‘ཨིམསྨིཾ ཋཱནེ ཨིདཾ ཀཐེཏབྦཾ, ཨིམསྨིཾ ཋཱནེ ཨིདཾ ན ཀཐེཏབྦ’’ནྟི ཡུཏྟཱཡུཏྟཾ ན ཛཱནཱཏི, མངྒལེ ཨཝམངྒལཾ ཝདནྟོ ‘‘ཏིརོཀུཊྚེསུ ཏིཊྛནྟི, སནྡྷིསིངྒྷཱཊཀེསུ ཙཱ’’ཏི ཨིདཾ ཨཝམངྒལཾ མངྒལཾ ཀཏྭཱ ཨནུམོདནཾ ཀཐེཏི. ཨཝམངྒལེསུ ཨནུམོདནཾ ཀརོནྟོ ‘‘བཧཱུ དེཝཱ མནུསྶཱ ཙ, མངྒལཱནི ཨཙིནྟཡུ’’ནྟི ཝཏྭཱ ‘‘ཨེཝརཱུཔཱནཾ མངྒལཱནཾ སཏམྤི ¶ སཧསྶམྤི ཀཱཏུཾ སམཏྠཱ ཧོཐཱ’’ཏི ཝདཏི. ཨཐེཀདིཝསཾ དྷམྨསབྷཱཡཾ བྷིཀྑཱུ ‘‘ཨཱཝུསོ, ལཱལུ༹དཱཡཱི ཡུཏྟཱཡུཏྟཾ ན ཛཱནཱཏི, སབྦཏྠ ཨབྷཱསིཏབྦཝཱཙཾ བྷཱསཏཱི’’ཏི ཀཐཾ སམུཊྛཱཔེསུཾ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ལཱལུ༹དཱཡཱི ཨིདཱནེཝ དནྡྷཔརིསཀྐནོ ཡུཏྟཱཡུཏྟཾ ན ཛཱནཱཏི, པུབྦེཔི ཨེཝརཱུཔོ ཨཧོསི, ནིཙྩཾ ལཱལ༹ཀོཡེཝ ཨེསོ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ བྲཱཧྨཎམཧཱསཱལཀུལེ ནིབྦཏྟིཏྭཱ ཝཡཔྤཏྟོ ཏཀྐསིལཱཡཾ སབྦསིཔྤཱནི ཨུགྒཎྷིཏྭཱ བཱརཱཎསིཡཾ དིསཱཔཱམོཀྑོ ཨཱཙརིཡོ ཧུཏྭཱ པཉྩ ¶ མཱཎཝཀསཏཱནི སིཔྤཾ ཝཱཙེསི. ཏདཱ ཏེསུ མཱཎཝེསུ ཨེཀོ དནྡྷཔརིསཀྐནོ ལཱལ༹ཀོ མཱཎཝོ དྷམྨནྟེཝཱསིཀོ ཧུཏྭཱ སིཔྤཾ ཨུགྒཎྷཱཏི, དནྡྷབྷཱཝེན པན ཨུགྒཎྷིཏུཾ ན སཀྐོཏི. བོདྷིསཏྟསྶ པན ཨུཔཀཱརོ ཧོཏི, དཱསོ ཝིཡ སབྦཀིཙྩཱནི ཀརོཏི. ཨཐེཀདིཝསཾ བོདྷིསཏྟོ སཱཡམཱསཾ བྷུཉྫིཏྭཱ སཡནེ ནིཔནྣོ ཏཾ མཱཎཝཾ ཧཏྠཔཱདཔིཊྛིཔརིཀམྨཱནི ཀཏྭཱ གཙྪནྟཾ ཨཱཧ ‘‘ཏཱཏ, མཉྩཔཱདེ ཨུཔཏྠམྦྷེཏྭཱ ཡཱཧཱི’’ཏི. མཱཎཝོ ཨེཀཾ པཱདཾ ཨུཔཏྠམྦྷེཏྭཱ ཨེཀསྶ ཨུཔཏྠམྦྷཀཾ ཨལབྷནྟོ ཨཏྟནོ ཨཱུརུམྷི ཋཔེཏྭཱ རཏྟིཾ ཁེཔེསི.

བོདྷིསཏྟོ པཙྩཱུསསམཡེ ཨུཊྛཱཡ ཏཾ དིསྭཱ ‘‘ཀིཾ, ཏཱཏ, ནིསིནྣོསཱི’’ཏི པུཙྪི. ‘‘ཨཱཙརིཡ, ཨེཀསྶ མཉྩཔཱདསྶ ཨུཔཏྠམྦྷཀཾ ཨལབྷནྟོ ཨཱུརུམྷི ཋཔེཏྭཱ ནིསིནྣོམྷཱི’’ཏི. བོདྷིསཏྟོ སཾཝིགྒམཱནསོ ཧུཏྭཱ ‘‘ཨཡཾ ཨཏི ཝིཡ མཡ྄ཧཾ ཨུཔཀཱརོ, ཨེཏྟཀཱནཾ པན མཱཎཝཀཱནཾ ཨནྟརེ ཨཡམེཝ དནྡྷོ སིཔྤཾ སིཀྑིཏུཾ ན སཀྐོཏི, ཀཐཾ ནུ ཁོ ཨཧཾ ཨིམཾ པཎྜིཏཾ ཀརེཡྻ’’ནྟི ཙིནྟེསི. ཨཐསྶ ཨེཏདཧོསི ‘‘ཨཏྠེཀོ ཨུཔཱཡོ, ཨཧཾ ཨིམཾ མཱཎཝཾ དཱརུཨཏྠཱཡ པཎྞཏྠཱཡ ཙ ཝནཾ གནྟྭཱ ཨཱགཏཾ ‘ཨཛྫ ཏེ ཀིཾ དིཊྛཾ, ཀིཾ ཀཏ’ནྟི པུཙྪིསྶཱམི. ཨཐ མེ ‘ཨིདཾ ནཱམ ཨཛྫ མཡཱ དིཊྛཾ, ཨིདཾ ཀཏ’ནྟི ཨཱཙིཀྑིསྶཏི. ཨཐ ནཾ ¶ ‘ཏཡཱ དིཊྛཉྩ ཀཏཉྩ ཀཱིདིས’ནྟི པུཙྪིསྶཱམི, སོ ‘ཨེཝརཱུཔཾ ནཱམཱ’ཏི ¶ ཨུཔམཱཡ ཙ ཀཱརཎེན ཙ ཀཐེསྶཏི. ཨིཏི ནཾ ནཝཾ ནཝཾ ཨུཔམཉྩ ཀཱརཎཉྩ ཀཐཱཔེཏྭཱ ཨིམིནཱ ཨུཔཱཡེན པཎྜིཏཾ ཀརིསྶཱམཱི’’ཏི. སོ ཏཾ པཀྐོསཱཔེཏྭཱ ‘‘ཏཱཏ མཱཎཝ, ཨིཏོ པཊྛཱཡ དཱརུཨཏྠཱཡ ཝཱ པཎྞཏྠཱཡ ཝཱ གཏཊྛཱནེ ཡཾ ཏེ ཏཏྠ དིཊྛཾ ཝཱ སུཏཾ ཝཱ བྷུཏྟཾ ཝཱ པཱིཏཾ ཝཱ ཁཱདིཏཾ ཝཱ ཧོཏི, ཏཾ ཨཱགནྟྭཱ མཡ྄ཧཾ ཨཱརོཙེཡྻཱསཱི’’ཏི ཨཱཧ.

སོ ‘‘སཱདྷཱུ’’ཏི པཊིསྶུཎིཏྭཱ ཨེཀདིཝསཾ མཱཎཝེཧི སདྡྷིཾ དཱརུཨཏྠཱཡ ཨརཉྙཾ གཏོ ཏཏྠ སཔྤཾ དིསྭཱ ཨཱགནྟྭཱ ‘‘ཨཱཙརིཡ, སཔྤོ མེ དིཊྛོ’’ཏི ཨཱརོཙེསི. ‘‘སཔྤོ ནཱམ, ཏཱཏ, ཀཱིདིསོ ཧོཏཱི’’ཏི? ‘‘སེཡྻཐཱཔི ནངྒལཱིསཱ’’ཏི. ‘‘སཱདྷུ, ཏཱཏ, མནཱཔཱ ཏེ ཨུཔམཱ ཨཱཧཊཱ, སཔྤཱ ནཱམ ནངྒལཱིསསདིསཱཝ ཧོནྟཱི’’ཏི. ཨཐ བོདྷིསཏྟོ ‘‘མཱཎཝཀེན མནཱཔཱ ཨུཔམཱ ཨཱཧཊཱ, སཀྑིསྶཱམི ནཾ པཎྜིཏཾ ཀཱཏུ’’ནྟི ཙིནྟེསི. མཱཎཝོ པུན ཨེཀདིཝསཾ ཨརཉྙེ ཧཏྠིཾ དིསྭཱ ‘‘ཧཏྠཱི མེ ཨཱཙརིཡ དིཊྛོ’’ཏི ཨཱཧ. ‘‘ཧཏྠཱི ནཱམ, ཏཱཏ, ཀཱིདིསོ’’ཏི? ‘‘སེཡྻཐཱཔི, ནངྒལཱིསཱ’’ཏི. བོདྷིསཏྟོ ‘‘ཧཏྠིསྶ ¶ སོཎྜཱ ནངྒལཱིསསདིསཱ ཧོནྟི, དནྟཱདཡོ ཨེཝརཱུཔཱ ཙ ཨེཝརཱུཔཱ ཙ. ཨཡཾ པན བཱལཏཱཡ ཝིབྷཛིཏྭཱ ཀཐེཏུཾ ཨསཀྐོནྟོ སོཎྜཾ སནྡྷཱཡ ཀཐེསི མཉྙེ’’ཏི ཏུཎྷཱི ཨཧོསི. ཨཐེཀདིཝསཾ ནིམནྟནེ ཨུཙྪུཾ ལབྷིཏྭཱ ‘‘ཨཱཙརིཡ, ཨཛྫ མཡཾ ཨུཙྪུ ཁཱདིམྷཱ’’ཏི ཨཱཧ. ‘‘ཨུཙྪུ ནཱམ ཀཱིདིསོ’’ཏི ཝུཏྟེ ‘‘སེཡྻཐཱཔི ནངྒལཱིསཱ’’ཏི ཨཱཧ. ཨཱཙརིཡོ ‘‘ཐོཀཾ པཏིརཱུཔཾ ཀཱརཎཾ ཀཐེསཱི’’ཏི ཏུཎྷཱི ཛཱཏོ.

པུནེཀདིཝསཾ ནིམནྟནེ ཨེཀཙྩེ མཱཎཝཱ གུལ༹ཾ དདྷིནཱ བྷུཉྫིཾསུ, ཨེཀཙྩེ ཁཱིརེན. སོ ཨཱགནྟྭཱ ‘‘ཨཱཙརིཡ, ཨཛྫ མཡཾ དདྷིནཱ ཁཱིརེན ཙ བྷུཉྫིམྷཱ’’ཏི ཝཏྭཱ ‘‘དདྷིཁཱིརཾ ནཱམ ཀཱིདིསཾ ཧོཏཱི’’ཏི ཝུཏྟེ ‘‘སེཡྻཐཱཔི ནངྒལཱིསཱ’’ཏི ཨཱཧ. ཨཱཙརིཡོ ‘‘ཨཡཾ མཱཎཝོ ‘སཔྤོ ནངྒལཱིསསདིསོ’ཏི ཀཐེནྟོ ཏཱཝ སུཀཐིཏཾ ཀཐེསི, ‘ཧཏྠཱི ནངྒལཱིསསདིསོ’ཏི ཀཐེནྟེནཱཔི སོཎྜཾ སནྡྷཱཡ ལེསེན ཀཐིཏཾ. ‘ཨུཙྪུ ནངྒལཱིསསདིས’ནྟི ཀཐནེཔི ལེསོ ཨཏྠི, ‘དདྷིཁཱིརཱནི པན ནིཙྩཾ པཎྜརཱནི པཀྑིཏྟབྷཱཛནསཎྛཱནཱནཱི’ཏི ཨིདྷ ¶ སབྦེན སབྦཾ ཨུཔམཾ ན ཀཐེསི, ན སཀྐཱ ཨིམཾ ལཱལ༹ཀཾ སིཀྑཱཔེཏུ’’ནྟི ཝཏྭཱ ཨིམཾ གཱཐམཱཧ –

༡༢༣.

‘‘ཨསབྦཏྠགཱམིཾ ཝཱཙཾ, བཱལོ སབྦཏྠ བྷཱསཏི;

ནཱཡཾ དདྷིཾ ཝེདི ན ནངྒལཱིསཾ, དདྷིཔྤཡཾ མཉྙཏི ནངྒལཱིས’’ནྟི.

ཏཏྲཱཡཾ ¶ སངྑེཔཏྠོ – ཡཱ ཝཱཙཱ ཨོཔམྨཝསེན སབྦཏྠ ན གཙྪཏི, ཏཾ ཨསབྦཏྠགཱམིཾ ཝཱཙཾ བཱལོ དནྡྷཔུགྒལོ སབྦཏྠ བྷཱསཏི, ‘‘དདྷི ནཱམ ཀཱིདིས’’ནྟི པུཊྛོཔི ‘‘སེཡྻཐཱཔི, ནངྒལཱིསཱ’’ཏི ཝདཏེཝ. ཨེཝཾ ཝདནྟོ ནཱཡཾ དདྷིཾ ཝེདི ན ནངྒལཱིསཾ. ཀིཾཀཱརཎཱ? དདྷིཔྤཡཾ མཉྙཏི ནངྒལཱིསཾ, ཡསྨཱ ཨཡཾ དདྷིམྤི ནངྒལཱིསམེཝ མཉྙཏི. ཨཐ ཝཱ དདྷཱིཏི དདྷིམེཝ, པཡནྟི ཁཱིརཾ, དདྷི ཙ པཡཉྩ དདྷིཔྤཡཾ. ཡསྨཱ དདྷིཁཱིརཱནིཔི ཨཡཾ ནངྒལཱིསམེཝ མཉྙཏི, ཨེདིསོ ཙཱཡཾ བཱལོ, ཀིཾ ཨིམིནཱཏི ཨནྟེཝཱསིཀཱནཾ དྷམྨཀཐཾ ཀཐེཏྭཱ པརིབྦཡཾ དཏྭཱ ཏཾ ཨུཡྻོཛེསི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ལཱལ༹ཀམཱཎཝོ ལཱལུ༹དཱཡཱི ཨཧོསི, དིསཱཔཱམོཀྑོ ཨཱཙརིཡོ པན ཨཧམེཝ ཨཧོསི’’ནྟི.

ནངྒལཱིསཛཱཏཀཝཎྞནཱ ཏཏིཡཱ.

[༡༢༤] ༤. ཨམྦཛཱཏཀཝཎྞནཱ

ཝཱཡམེཐེཝ ¶ པུརིསོཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཝཏྟསམྤནྣཾ བྷིཀྑུཾ ཨཱརབྦྷ ཀཐེསི. སོ ཀིར སཱཝཏྠིཝཱསཱི ཀུལཔུཏྟོ སཱསནེ ཨུརཾ དཏྭཱ པབྦཛིཏོ ཝཏྟསམྤནྣོ ཨཧོསི, ཨཱཙརིཡུཔཛ྄ཛྷཱཡཝཏྟཱནི པཱནཱིཡཔརིབྷོཛནཱིཡཨུཔོསཐཱགཱརཛནྟཱགྷརཱདིཝཏྟཱནི ཙ སཱདྷུཀཾ ཀརོཏི, ཙུདྡསསུ མཧཱཝཏྟེསུ ཨསཱིཏིཁནྡྷཀཝཏྟེསུ ཙ པརིཔཱུརཀཱརཱིཡེཝ ཧོཏི, ཝིཧཱརཾ སམྨཛྫཏི, པརིཝེཎཾ ཝིཏཀྐམཱལ༹ཀཾ ཝིཧཱརམགྒཾ སམྨཛྫཏི, མནུསྶཱནཾ པཱནཱིཡཾ དེཏི. མནུསྶཱ ཏསྶ ཝཏྟསམྤཏྟིཡཾ པསཱིདིཏྭཱ པཉྩསཏམཏྟཱནི དྷུཝབྷཏྟཱནི ཨདཾསུ, མཧཱལཱབྷསཀྐཱརོ ཨུཔྤཛྫི. ཏཾ ནིསྶཱཡ བཧཱུནཾ ཕཱསུཝིཧཱརོ ཛཱཏོ. ཨཐེཀདིཝསཾ དྷམྨསབྷཱཡཾ བྷིཀྑཱུ ཀཐཾ སམུཊྛཱཔེསུཾ ‘‘ཨཱཝུསོ, ཨསུཀོ ནཱམ བྷིཀྑུ ཨཏྟནོ ཝཏྟསམྤཏྟིཡཱ མཧནྟཾ ལཱབྷསཀྐཱརཾ ནིབྦཏྟེསི, ཨེཏཾ ཨེཀཾ ནིསྶཱཡ བཧཱུནཾ ཕཱསུཝིཧཱརོ ཛཱཏོ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ ¶ , ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ, པུབྦེཔཱཡཾ བྷིཀྑུ ཝཏྟསམྤནྣོ, པུབྦེཔེཏཾ ཨེཀཾ ནིསྶཱཡ པཉྩ ཨིསིསཏཱནི ཕལཱཕལཏྠཱཡ ཨརཉྙཾ ཨགནྟྭཱ ཨེཏེནེཝ ཨཱནཱིཏཕལཱཕལེཧི ཡཱཔེསུ’’ནྟི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨུདིཙྩབྲཱཧྨཎཀུལེ ནིབྦཏྟིཏྭཱ ཝཡཔྤཏྟོ ཨིསིཔབྦཛྫཾ པབྦཛིཏྭཱ པཉྩསཏཨིསིཔརིཝཱརོ པབྦཏཔཱདེ ཝིཧཱསི. ཏདཱ ཧིམཝནྟེ ཙཎྜོ ནིདཱགྷོ ཨཧོསི, ཏཏྠ ཏཏྠ པཱནཱིཡཱནི ཚིཛྫིཾསུ, ཏིརཙྪཱནཱ པཱནཱིཡཾ ཨལབྷམཱནཱ ཀིལམནྟི. ཨཐ ཏེསུ ཏཱཔསེསུ ཨེཀོ ཏཱཔསོ ཏེསཾ པིཔཱསདུཀྑཾ དིསྭཱ ཨེཀཾ རུཀྑཾ ཚིནྡིཏྭཱ དོཎིཾ ཀཏྭཱ པཱནཱིཡཾ ཨུསྶིཉྩིཏྭཱ དོཎིཾ པཱུརེཏྭཱ ཏེསཾ པཱནཱིཡཾ ཨདཱསི. བཧཱུསུ སནྣིཔཏིཏྭཱ པཱནཱིཡཾ པིཝནྟེསུ ཏཱཔསསྶ ཕལཱཕལཏྠཱཡ གམནོཀཱསོ ནཱཧོསི. སོ ནིརཱཧཱརོཔི པཱནཱིཡཾ དེཏིཡེཝ. མིགགཎཱ ཙིནྟེསུཾ ‘‘ཨཡཾ ཨམྷཱཀཾ པཱནཱིཡཾ དེནྟོ ཕལཱཕལཏྠཱཡ གནྟུཾ ཨོཀཱསཾ ན ལབྷཏི, ནིརཱཧཱརཏཱཡ ཨཏིཝིཡ ཀིལམཏི, ཧནྡམཡཾ ཀཏིཀཾ ཀརོམཱ’’ཏི. ཏེ ཀཏིཀཾ ཨཀཾསུ ‘‘ཨིཏོ པཊྛཱཡ པཱནཱིཡཾ པིཝནཏྠཱཡ ཨཱགཙྪནྟེན ཨཏྟནོ བལཱནུརཱུཔེན ཕལཱཕལཾ གཧེཏྭཱཝ ཨཱགནྟབྦ’’ནྟི. ཏེ ཏཏོ པཊྛཱཡ ཨེཀེཀོ ཏིརཙྪཱནོ ¶ ཨཏྟནོ ཨཏྟནོ བལཱནུརཱུཔེན མདྷུརམདྷུརཱནི ཨམྦཛམྦུཔནསཱདཱིནིགཧེཏྭཱཝ ཨཱགཙྪཏི. ཨེཀསྶ ཨཏྠཱཡ ཨཱབྷཏཾ ཕལཱཕལཾ ཨཌྜྷཏེཡྻསཀཊབྷཱརཔྤམཱཎཾ ཨཧོསི. པཉྩསཏཏཱཔསཱ ཏདེཝ པརིབྷུཉྫནྟི. ཨཏིརེཀཾ ཚཌྜིཡིཏྠ.

བོདྷིསཏྟོ ཏཾ དིསྭཱ ‘‘ཨེཀཾ ནཱམ ཝཏྟསམྤནྣཾ ནིསྶཱཡ ཨེཏྟཀཱནཾ ཏཱཔསཱནཾ ཕལཱཕལཏྠཱཡ ཨགནྟྭཱ ཡཱཔནཾ ཨུཔྤནྣཾ, ཝཱིརིཡཾ ནཱམ ཀཱཏབྦམེཝཱ’’ཏི ཝཏྭཱ ཨིམཾ གཱཐམཱཧ –

༡༢༤.

‘‘ཝཱཡམེཐེཝ པུརིསོ, ན ནིབྦིནྡེཡྻ པཎྜིཏོ;

ཝཱཡཱམསྶ ཕལཾ པསྶ, བྷུཏྟཱ ཨམྦཱ ཨནཱིཏིཧ’’ནྟི.

ཏཏྲཱཡཾ སངྑེཔཏྠོ – པཎྜིཏོ ཨཏྟནོ ཝཏྟཔཱུརཎཱདིཀེ ཀམྨསྨིཾ ཝཱཡམེཐེཝ, ན ཨུཀྐཎྛེཡྻ. ཀིཾཀཱརཎཱ? ཝཱཡཱམསྶ ནིཔྥལཏཱཡ ཨབྷཱཝཏོ. ཨིཏི མཧཱསཏྟོ ¶ ‘‘ཝཱཡཱམོ ནཱམེས སཕལོཝ ཧོཏཱི’’ཏི ཨིསིགཎཾ ཨཱལཔནྟོ ‘‘ཝཱཡཱམསྶ ཕལཾ པསྶཱ’’ཏི ཨཱཧ. ཀཱིདིསཾ? བྷུཏྟཱ ཨམྦཱ ཨནཱིཏིཧཾ. ཏཏྠ ཨམྦཱཏི དེསནཱམཏྟཾ, ཏེཧི པན ནཱནཔྤཀཱརཱནི ཕལཱཕལཱནི ཨཱབྷཏཱནི. ཏེསུ སམྤནྣཏརཱནཾ ཨུསྶནྣཏརཱནཾ ཝཱ ཝསེན ‘‘ཨམྦཱ’’ཏི ཝུཏྟཾ. ཡེ ཨིམེཧི པཉྩཧི ཨིསིསཏེཧི སཡཾ ཨརཉྙཾ ཨགནྟྭཱ ཨེཀསྶ ཨཏྠཱཡ ཨཱནཱིཏཱ ཨམྦཱ བྷུཏྟཱ, ཨིདཾ ཝཱཡཱམསྶ ཕལཾ. ཏཉྩ ཁོ པན ཨནཱིཏིཧཾ, ‘‘ཨིཏི ཨཱཧ ཨིཏི ཨཱཧཱ’’ཏི ཨེཝཾ ཨིཏིཧཱིཏིཧེན གཧེཏབྦཾ ན ཧོཏི, པཙྩཀྑམེཝ ཏཾ ཕལཾ པསྶཱཏི. ཨེཝཾ མཧཱསཏྟོ ཨིསིགཎསྶ ཨོཝཱདཾ ཨདཱསི.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཝཏྟསམྤནྣོ ཏཱཔསོ ཨཡཾ བྷིཀྑུ ཨཧོསི, གཎསཏྠཱ པན ཨཧམེཝ ཨཧོསི’’ནྟི.

ཨམྦཛཱཏཀཝཎྞནཱ ཙཏུཏྠཱ.

[༡༢༥] ༥. ཀཊཱཧཀཛཱཏཀཝཎྞནཱ

བཧུམྤི ¶ སོ ཝིཀཏྠེཡྻཱཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཝིཀཏྠཀབྷིཀྑུཾ ཨཱརབྦྷ ཀཐེསི. ཏསྶ ཝཏྠུ ཧེཊྛཱ ཀཐིཏསདིསམེཝ.

ཨཏཱིཏེ པན བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ མཧཱཝིབྷཝོ སེཊྛི ཨཧོསི. ཏསྶ བྷརིཡཱ པུཏྟཾ ཝིཛཱཡི, དཱསཱིཔིསྶ ཏཾ དིཝསཉྙེཝ པུཏྟཾ ཝིཛཱཡི. ཏེ ཨེཀཏོཝ ཝཌྜྷིཾསུ. སེཊྛིཔུཏྟེ ལེཁཾ སིཀྑནྟེ དཱསོཔིསྶ ཕལཀཾ ཝཧམཱནོ གནྟྭཱ ཏེནེཝ སདྡྷིཾ ལེཁཾ སིཀྑི, གཎནཾ སིཀྑི, དྭེ ཏཡོ ཝོཧཱརེ ཨཀཱསི. སོ ཨནུཀྐམེན ཝཙནཀུསལོ ཝོཧཱརཀུསལོ ཡུཝཱ ཨབྷིརཱུཔོ ཨཧོསི, ནཱམེན ཀཊཱཧེཀོ ནཱམ. སོ སེཊྛིགྷརེ བྷཎྜཱགཱརིཀཀམྨཾ ཀརོནྟོ ཙིནྟེསི ‘‘ན མཾ ཨིམེ སབྦཀཱལཾ བྷཎྜཱགཱརིཀཀམྨཾ ཀཱརེསྶནྟི, ཀིཉྩིདེཝ དོསཾ དིསྭཱ ཏཱལེ༹ཏྭཱ བནྡྷིཏྭཱ ལཀྑཎེན ཨངྐེཏྭཱ དཱསཔརིབྷོགེནཔི པརིབྷུཉྫིསྶནྟི. པཙྩནྟེ ཁོ པན སེཊྛིསྶ སཧཱཡཀོ སེཊྛི ཨཏྠི, ཡཾནཱུནཱཧཾ སེཊྛིསྶ ཝཙནེན ལེཁཾ ཨཱདཱཡ ཏཏྠ གནྟྭཱ ‘ཨཧཾ སེཊྛིཔུཏྟོ’ཏི ཝཏྭཱ ཏཾ སེཊྛིཾ ཝཉྩེཏྭཱ ཏསྶ དྷཱིཏརཾ གཧེཏྭཱ སུཁཾ ཝསེཡྻ’’ནྟི. སོ སཡམེཝ པཎྞཾ གཧེཏྭཱ ¶ ‘‘ཨཧཾ ཨསུཀཾ ནཱམ མམ པུཏྟཾ ཏཝ སནྟིཀཾ པཧིཎིཾ, ཨཱཝཱཧཝིཝཱཧསམྦནྡྷོ ནཱམ མཡ྄ཧཉྩ ཏཡཱ, ཏུཡ྄ཧཉྩ མཡཱ སདྡྷིཾ པཏིརཱུཔོ, ཏསྨཱ ཏྭཾ ཨིམསྶ དཱརཀསྶ ཨཏྟནོ དྷཱིཏརཾ དཏྭཱ ཨེཏཾ ཏཏྠེཝ ཝསཱཔེཧི, ཨཧམྤི ཨོཀཱསཾ ལབྷིཏྭཱ ཨཱགམིསྶཱམཱི’’ཏི ལིཁིཏྭཱ སེཊྛིསྶེཝ མུདྡིཀཱཡ ལཉྫེཏྭཱ ཡཐཱརུཙིཏཾ པརིབྦཡཉྩེཝ གནྡྷཝཏྠཱདཱིནི ཙ གཧེཏྭཱ པཙྩནྟཾ གནྟྭཱ སེཊྛིཾ དིསྭཱ ཝནྡིཏྭཱ ཨཊྛཱསི.

ཨཐ ནཾ སེཊྛི ‘‘ཀུཏོ ཨཱགཏོསི, ཏཱཏཱ’’ཏི པུཙྪི. ‘‘བཱརཱཎསིཏོ’’ཏི. ‘‘ཀསྶ པུཏྟོསཱི’’ཏི? ‘‘བཱརཱཎསིསེཊྛིསྶཱ’’ཏི. ‘‘ཀེནཏྠེནཱགཏོསཱི’’ཏི? ཏསྨིཾ ཁཎེ ཀཊཱཧཀོ ‘‘ཨིདཾ དིསྭཱ ཛཱནིསྶཐཱ’’ཏི པཎྞཾ ཨདཱསི. སེཊྛི པཎྞཾ ཝཱཙེཏྭཱ ‘‘ཨིདཱནཱཧཾ ཛཱིཝཱམི ནཱམཱ’’ཏི ཏུཊྛཙིཏྟོ དྷཱིཏརཾ དཏྭཱ པཏིཊྛཱཔེསི. ཏསྶ པརིཝཱརོ མཧནྟོ ཨཧོསི. སོ ཡཱགུཁཛྫཀཱདཱིསུ ཝཱ ཝཏྠགནྡྷཱདཱིསུ ¶ ཝཱ ཨུཔནཱིཏེསུ ‘‘ཨེཝམྤི ནཱམ ཡཱགུཾ ¶ པཙནྟི, ཨེཝཾ ཁཛྫཀཾ, ཨེཝཾ བྷཏྟཾ, ཨཧོ པཙྩནྟཝཱསིཀཱ ནཱམཱ’’ཏི ཡཱགུཨཱདཱིནི གརཧཏི. ‘‘ཨིམེ པཙྩནྟཝཱསིབྷཱཝེནེཝ ཨཧཏསཱཊཀེ ཝལ༹ཉྫིཏུཾ ན ཛཱནནྟི, གནྡྷེ པིསིཏུཾ, པུཔྥཱནི གནྠིཏུཾ ན ཛཱནནྟཱི’’ཏི ཝཏྠཀམྨནྟིཀཱདཡོ གརཧཏི.

བོདྷིསཏྟོཔི དཱསཾ ཨཔསྶནྟོ ‘‘ཀཊཱཧཀོ ན དིསྶཏི, ཀཧཾ གཏོ, པརིཡེསཐ ན’’ནྟི སམནྟཱ མནུསྶེ པཡོཛེསི. ཏེསུ ཨེཀོ ཏཏྠ གནྟྭཱ ཏཾ དིསྭཱ སཉྫཱནིཏྭཱ ཨཏྟཱནཾ ཨཛཱནཱཔེཏྭཱ ཨཱགནྟྭཱ བོདྷིསཏྟསྶ ཨཱརོཙེསི. བོདྷིསཏྟོ ཏཾ པཝཏྟིཾ སུཏྭཱ ‘‘ཨཡུཏྟཾ ཏེན ཀཏཾ, གནྟྭཱ ནཾ གཧེཏྭཱ ཨཱགཙྪིསྶཱམཱི’’ཏི རཱཛཱནཾ ཨཱཔུཙྪིཏྭཱ མཧནྟེན པརིཝཱརེན ནིཀྑམི. ‘‘སེཊྛི ཀིར པཙྩནྟཾ གཙྪཏཱི’’ཏི སབྦཏྠ པཱཀཊོ ཛཱཏོ. ཀཊཱཧཀོ ‘‘སེཊྛི ཀིར ཨཱགཙྪཏཱི’’ཏི སུཏྭཱ ཙིནྟེསི ‘‘ན སོ ཨཉྙེན ཀཱརཎེན ཨཱགཙྪིསྶཏི, མཾ ནིསྶཱཡེཝསྶ ཨཱགམནེན བྷཝིཏབྦཾ. སཙེ པནཱཧཾ པལཱཡིསྶཱམི, པུན ཨཱགནྟུཾ ན སཀྐཱ བྷཝིསྶཏི. ཨཏྠི པནེས ཨུཔཱཡོ. མམ སཱམིཀསྶ པཊིཔཐཾ གནྟྭཱ དཱསཀམྨཾ ཀཏྭཱ ཏམེཝ ཨཱརཱདྷེསྶཱམཱི’’ཏི. སོ ཏཏོ པཊྛཱཡ པརིསམཛ྄ཛྷེ ཨེཝཾ བྷཱསཏི ‘‘ཨཉྙེ བཱལམནུསྶཱ ཨཏྟནོ བཱལབྷཱཝེན མཱཏཱཔིཏཱུནཾ ¶ གུཎཾ ཨཛཱནནྟཱ ཏེསཾ བྷོཛནཝེལཱཡ ཨཔཙིཏིཀམྨཾ ཨཀཏྭཱ ཏེཧི སདྡྷིཾཡེཝ བྷུཉྫནྟི, མཡཾ པན མཱཏཱཔིཏཱུནཾ བྷོཛནཀཱལེ པཊིགྒཧཾ ཨུཔནེམ, ཁེལ༹མལླཀཾ ཨུཔནེམ, བྷཱཛནཱནི ཨུཔནེམ, པཱནཱིཡམྤི བཱིཛནིམྤི གཧེཏྭཱ ཨུཔཏིཊྛཱམཱ’’ཏི ཡཱཝ སརཱིརཝལ༹ཉྫནཀཱལེ ཨུདཀཀལསཾ ཨཱདཱཡ པཊིཙྪནྣཊྛཱནགམནཱ སབྦཾ དཱསེཧི སཱམིཀཱནཾ ཀཏྟབྦཀིཙྩཾ པཀཱསེསི.

སོ ཨེཝཾ པརིསཾ ཨུགྒཎྷཱཔེཏྭཱ བོདྷིསཏྟསྶ པཙྩནྟསམཱིཔཾ ཨཱགཏཀཱལེ སསུརཾ ཨཝོཙ ‘‘ཏཱཏ, མམ ཀིར པིཏཱ ཏུམྷཱཀཾ དསྶནཏྠཱཡ ཨཱགཙྪཏི, ཏུམྷེ ཁཱདནཱིཡབྷོཛནཱིཡཾ པཊིཡཱདཱཔེཐ, ཨཧཾ པཎྞཱཀཱརཾ གཧེཏྭཱ པཊིཔཐཾ གམིསྶཱམཱི’’ཏི. སོ ‘‘སཱདྷུ, ཏཱཏཱ’’ཏི སམྤཊིཙྪི. ཀཊཱཧཀོ བཧུཾ པཎྞཱཀཱརམཱདཱཡ མཧནྟེན པརིཝཱརེན གནྟྭཱ བོདྷིསཏྟཾ ཝནྡིཏྭཱ པཎྞཱཀཱརཾ ཨདཱསི. བོདྷིསཏྟོཔི པཎྞཱཀཱརཾ གཧེཏྭཱ ཏེན སདྡྷིཾ པཊིསནྠཱརཾ ཀཏྭཱ པཱཏརཱསཀཱལེ ཁནྡྷཱཝཱརཾ ནིཝཱསེཏྭཱ སརཱིརཝལ༹ཉྫནཏྠཱཡ པཊིཙྪནྣཊྛཱནཾ པཱཝིསི. ཀཊཱཧཀོ ཨཏྟནོ པརིཝཱརཾ ¶ ནིཝཏྟེཏྭཱ ཀལསཾ ཨཱདཱཡ བོདྷིསཏྟསྶ སནྟིཀཾ གནྟྭཱ ཨུདཀཀིཙྩཔརིཡོསཱནེ པཱདེསུ པཏིཏྭཱ ‘‘སཱམི, ཨཧཾ ཏུམྷཱཀཾ ཡཏྟཀཾ ཨིཙྪཐ, ཏཏྟཀཾ དྷནཾ དསྶཱམི, མཱ མེ ཡསཾ ཨནྟརདྷཱཔཡིཏྠཱ’’ཏི ཨཱཧ. བོདྷིསཏྟོ ཏསྶ ཝཏྟསམྤདཱཡ པསཱིདིཏྭཱ ‘‘མཱ བྷཱཡི, ནཏྠི ཏེ མམ སནྟིཀཱ ཨནྟརཱཡོ’’ཏི སམསྶཱསེཏྭཱ པཙྩནྟནགརཾ པཱཝིསི. མཧནྟོ ¶ སཀྐཱརོ ཨཧོསི, ཀཊཱཧཀོཔིསྶ ནིརནྟརཾ དཱསེན ཀཏྟབྦཀིཙྩཾ ཀརོཏི. ཨཐ ནཾ ཨེཀཱཡ ཝེལཱཡ སུཁནིསིནྣཾ པཙྩནྟསེཊྛི ཨཱཧ ‘‘མཧཱསེཊྛི, མཡཱ ཏུམྷཱཀཾ པཎྞཾ དིསྭཱཝ ཏུམྷཱཀཾ པུཏྟསྶ དཱརིཀཱ དིནྣཱ’’ཏི བོདྷིསཏྟོ ཀཊཱཧཀཾ པུཏྟམེཝ ཀཏྭཱ ཏདནུཙྪཝིཀཾ པིཡཝཙནཾ ཝཏྭཱ སེཊྛིཾ ཏོསེསི. ཏཏོ པཊྛཱཡ ཀཊཱཧཀསྶ མུཁཾ ཨུལློཀེཏུཾ སམཏྠོ ནཱམ ནཱཧོསི.

ཨཐེཀདིཝསཾ མཧཱསཏྟོ སེཊྛིདྷཱིཏརཾ པཀྐོསིཏྭཱ ‘‘ཨེཧི, ཨམྨ, སཱིསེ མེ ཨཱུཀཱ ཝིཙིནཱཧཱི’’ཏི ཝཏྭཱ ཏཾ ཨཱགནྟྭཱ ཨཱུཀཱ གཧེཏྭཱ ཋིཏཾ པིཡཝཙནཾ ཝཏྭཱ ‘‘ཀཐེཧི, ཨམྨ, ཀཙྩི ཏེ མམ པུཏྟོ སུཁདུཀྑེསུ ཨཔྤམཏྟོ ¶ , ཨུབྷོ ཛནཱ སམྨོདམཱནཱ སམགྒཝཱསཾ ཝསཐཱ’’ཏི པུཙྪི. ‘‘ཏཱཏ, མཧཱསེཊྛི ཏུམྷཱཀཾ པུཏྟསྶ ཨཉྙོ དོསོ ནཏྠི, ཀེཝལཾ ཨཱཧཱརཾ གརཧཏཱི’’ཏི. ‘‘ཨམྨ, ནིཙྩཀཱལམེས དུཀྑསཱིལོཝ, ཨཔིཙ ཏེ ཨཧཾ ཏསྶ མུཁབནྡྷནམནྟཾ དསྶཱམི, ཏཾ ཏྭཾ སཱདྷུཀཾ ཨུགྒཎྷིཏྭཱ མམ པུཏྟསྶ བྷོཛནཀཱལེ གརཧནྟསྶ ཨུགྒཧིཏནིཡཱམེནེཝ པུརཏོ ཋཏྭཱ ཝདེཡྻཱསཱི’’ཏི གཱཐཾ ཨུགྒཎྷཱཔེཏྭཱ ཀཏིཔཱཧཾ ཝསིཏྭཱ བཱརཱཎསིམེཝ ཨགམཱསི. ཀཊཱཧཀོཔི བཧུཾ ཁཱདནཱིཡབྷོཛནཱིཡཾ ཨཱདཱཡ ཨནུམགྒཾ གནྟྭཱ བཧུདྷནཾ དཏྭཱ ཝནྡིཏྭཱ ནིཝཏྟི. སོ བོདྷིསཏྟསྶ གཏཀཱལཏོ པཊྛཱཡ ཨཏིརེཀམཱནཱི ཨཧོསི. སོ ཨེཀདིཝསཾ སེཊྛིདྷཱིཏཱཡ ནཱནགྒརསབྷོཛནཾ ཨུཔནེཏྭཱ ཀཊཙྪུཾ ཨཱདཱཡ པརིཝིསནྟིཡཱ བྷཏྟཾ གརཧིཏུཾ ཨཱརབྷི. སེཊྛིདྷཱིཏཱ བོདྷིསཏྟསྶ སནྟིཀེ ཨུགྒཧིཏནིཡཱམེནེཝ ཨིམཾ གཱཐམཱཧ –

༡༢༥.

‘‘བཧུམྤི སོ ཝིཀཏྠེཡྻ, ཨཉྙཾ ཛནཔདཾ གཏོ;

ཨནྭཱགནྟྭཱན དཱུསེཡྻ, བྷུཉྫ བྷོགེ ཀཊཱཧཀཱ’’ཏི.

ཏཏྠ བཧུམྤི སོ ཝིཀཏྠེཡྻ, ཨཉྙཾ ཛནཔདཾ གཏོཏི ཡོ ཨཏྟནོ ཛཱཏིབྷཱུམིཏོ ཨཉྙཾ ཛནཔདཾ གཏོ ཧོཏི, ཡཏྠསྶ ཛཱཏིཾ ན ཛཱནནྟི, སོ ¶ བཧུམྤི ཝིཀཏྠེཡྻ, ཝམྦྷནཝཙནཾ ཝཉྩནཝཙནཾ ཝདེཡྻ. ཨནྭཱགནྟྭཱན དཱུསེཡྻཱཏི ཨིམཾ ཏཱཝ ཝཱརཾ སཱམིཀསྶ པཊིཔཐཾ གནྟྭཱ དཱསཀིཙྩསྶ ཀཏཏྟཱ ཀསཱཧི པཧརིཏྭཱ པིཊྛིཙམྨུཔྤཱཊནཏོ ཙ ལཀྑཎཱཧནནཏོ ཙ མུཏྟོསི. སཙེ ཨནཱཙཱརཾ ཀརོསི, པུན ཨཉྙསྨིཾ ཨཱགམནཝཱརེ ཏཝ སཱམིཀོ ཨནྭཱགནྟྭཱན དཱུསེཡྻ, ཨིམཾ གེཧཾ ཨནུཨཱགནྟྭཱ ཀསཱབྷིགྷཱཏེཧི ཙེཝ ལཀྑཎཱཧནནེན ཙ ཛཱཏིཔྤཀཱསནེན ཙ ཏཾ དཱུསེཡྻ ཨུཔཧནེཡྻ. ཏསྨཱ ཨིམཾ ཨནཱཙཱརཾ པཧཱཡ བྷུཉྫ བྷོགེ ཀཊཱཧཀ, མཱ པཙྪཱ ཨཏྟནོ དཱསབྷཱཝཾ པཱཀཊཾ ཀཱརེཏྭཱ ཝིཔྤཊིསཱརཱི ཨཧོསཱིཏི ཨཡམེཏྠ སེཊྛིནོ ཨདྷིཔྤཱཡོ.

སེཊྛིདྷཱིཏཱ ¶ པན ཨེཏམཏྠཾ ཨཛཱནནྟཱི ཨུགྒཧིཏནིཡཱམེན བྱཉྫནམེཝ པཡིརུདཱཧཱསི. ཀཊཱཧཀོ ‘‘ཨདྡྷཱ སེཊྛིནཱ མམ ཀུལཾ ཨཱཙིཀྑིཏྭཱ ཨེཏིསྶཱ སབྦཾ ཀཐིཏཾ བྷཝིསྶཏཱི’’ཏི ཏཏོ པཊྛཱཡ པུན བྷཏྟཾ གརཧིཏུཾ ན ཝིསཧི, ནིཧཏམཱནོ ཡཐཱལདྡྷཾ བྷུཉྫིཏྭཱ ཡཐཱཀམྨཾ གཏོ.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི ‘‘ཏདཱ ཀཊཱཧཀོ ཝིཀཏྠཀབྷིཀྑུ ཨཧོསི, བཱརཱཎསིསེཊྛི པན ཨཧམེཝ ཨཧོསི’’ནྟི.

ཀཊཱཧཀཛཱཏཀཝཎྞནཱ པཉྩམཱ.

[༡༢༦] ༦. ཨསིལཀྑཎཛཱཏཀཝཎྞནཱ

ཏཐེཝེཀསྶ ཀལྱཱཎནྟི ཨིདཾ སཏྠཱ ཛེཏཝནེ ཝིཧརནྟོ ཀོསལརཉྙོ ཨསིལཀྑཎཔཱཋཀཾ བྲཱཧྨཎཾ ཨཱརབྦྷ ཀཐེསི. སོ ཀིར ཀམྨཱརེཧི རཉྙོ ཨསཱིནཾ ཨཱཧཊཀཱལེ ཨསིཾ ཨུཔསིངྒྷིཏྭཱ ཨསིལཀྑཎཾ ཨུདཱཧརཏི. སོ ཡེསཾ ཧཏྠཏོ ལཱབྷཾ ལབྷཏི, ཏེསཾ ཨསིཾ ‘‘ལཀྑཎསམྤནྣོ མངྒལསཾཡུཏྟོ’’ཏི ཝདཏི. ཡེསཾ ཧཏྠཏོ ལཱབྷཾ ན ལབྷཏི, ཏེསཾ ཨསིཾ ‘‘ཨཝལཀྑཎོ’’ཏི གརཧཏི. ཨཐེཀོ ཀམྨཱརོ ཨསིཾ ཀཏྭཱ ཀོསིཡཾ སུཁུམཾ མརིཙཙུཎྞཾ པཀྑིཔིཏྭཱ རཉྙོ ཨསིཾ ཨཱཧརི. རཱཛཱ བྲཱཧྨཎཾ པཀྐོསཱཔེཏྭཱ ‘‘ཨསིཾ ཝཱིམཾསཱ’’ཏི ཨཱཧ. བྲཱཧྨཎསྶ ཨསིཾ ཨཱཀཌྜྷིཏྭཱ ཨུཔསིངྒྷནྟསྶ མརིཙཙུཎྞཱནི ནཱསཾ པཝིསིཏྭཱ ¶ ཁིཔིཏུཀཱམཏཾ ཨུཔྤཱདེསུཾ. ཏསྶ ཁིཔནྟསྶ ནཱསིཀཱ ཨསིདྷཱརཱཡ པཊིཧཏཱ དྭིདྷཱ ཚིཛྫི. ཏསྶེཝཾ ནཱསིཀཱཡ ཚིནྣབྷཱཝོ བྷིཀྑུསངྒྷེ པཱཀཊོ ཛཱཏོ. ཨཐེཀདིཝསཾ དྷམྨསབྷཱཡཾ བྷིཀྑཱུ ཀཐཾ སམུཊྛཱཔེསུཾ ‘‘ཨཱཝུསོ, རཉྙོ ཀིར ཨསིལཀྑཎཔཱཋཀོ ཨསིཾ ཨུཔསིངྒྷནྟོ ནཱསིཀཾ ཚིནྡཱཔེསཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ སོ བྲཱཧྨཎོ ཨསིཾ ཨུཔསིངྒྷནྟོ ནཱསིཀཱཚེདཾ པཏྟོ, པུབྦེཔི པཏྟོཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ ཏསྶ ཨསིལཀྑཎཔཱཋཀོ བྲཱཧྨཎོ ཨཧོསཱིཏི སབྦཾ པཙྩུཔྤནྣཝཏྠུསདིསམེཝ. རཱཛཱ པན ཏསྶ ཝེཛྫེ དཏྭཱ ནཱསིཀཱཀོཊིཾ ཕཱསུཀཾ ཀཱརཱཔེཏྭཱ ལཱཁཱཡ པཊིནཱསིཀཾ ཀཱརེཏྭཱ པུན ཏཾ ཨུཔཊྛཱཀམེཝ ཨཀཱསི. བཱརཱཎསིརཉྙོ པན པུཏྟོ ནཏྠི, ཨེཀཱ དྷཱིཏཱ ཙེཝ བྷཱགིནེཡྻོ ཙ ཨཧེསུཾ. སོ ཨུབྷོཔི ཏེ ཨཏྟནོ སནྟིཀེཡེཝ ཝཌྜྷཱཔེསི. ཏེ ཨེཀཏོ ཝཌྜྷནྟཱ ཨཉྙམཉྙཾ པཊིབདྡྷཙིཏྟཱ ཨཧེསུཾ. རཱཛཱཔི ¶ ཨམཙྩེ པཀྐོསཱཔེཏྭཱ ‘‘མཡ྄ཧཾ བྷཱགིནེཡྻོཔི ཨིམསྶ རཛྫསྶ སཱམིཀོཝ, དྷཱིཏརཾ ཨེཏསྶེཝ དཏྭཱ ཨབྷིསེཀམསྶ ཀརོམཱི’’ཏི ཝཏྭཱ པུན ཙིནྟེསི ¶ ‘‘མཡ྄ཧཾ བྷཱགིནེཡྻོ སབྦཐཱཔི ཉཱཏཀོཡེཝ, ཨེཏསྶ ཨཉྙཾ རཱཛདྷཱིཏརཾ ཨཱནེཏྭཱ ཨབྷིསེཀཾ ཀཏྭཱ དྷཱིཏརཾ ཨཉྙསྶ རཉྙོ དསྶཱམི, ཨེཝཾ ནོ ཉཱཏཀཱ བཧཱུ བྷཝིསྶནྟི, དྭིནྣམྤི རཛྫཱནཾ མཡམེཝ སཱམིཀཱ བྷཝིསྶཱམཱ’’ཏི. སོ ཨམཙྩེཧི སདྡྷིཾ སམྨནྟེཏྭཱ ‘‘ཨུབྷོཔེཏེ ཝིསུཾ ཀཱཏུཾ ཝཊྚཏཱི’’ཏི བྷཱགིནེཡྻཾ ཨཉྙསྨིཾ ནིཝེསནེ, དྷཱིཏརཾ ཨཉྙསྨིཾ ཝཱསེསི.

ཏེ སོལ༹སཝསྶུདྡེསིཀབྷཱཝཾ པཏྟཱ ཨཏིཝིཡ པཊིབདྡྷཙིཏྟཱ ཨཧེསུཾ. རཱཛཀུམཱརོ ‘‘ཀེན ནུ ཁོ ཨུཔཱཡེན མཱཏུལདྷཱིཏརཾ རཱཛགེཧཱ ནཱིཧརཱཔེཏུཾ སཀྐཱ བྷཝེཡྻཱ’’ཏི ཙིནྟེནྟོ ‘‘ཨཏྠེཀོ ཨུཔཱཡོ’’ཏི མཧཱཨིཀྑཎིཀཾ པཀྐོསཱཔེཏྭཱ ཏསྶཱ སཧསྶབྷཎྜིཀཾ དཏྭཱ ‘‘ཀིཾ མཡཱ ཀཏྟབྦ’’ནྟི ཝུཏྟེ ‘‘ཨམྨ, ཏཡི ཀརོནྟིཡཱ ཨནིཔྥཏྟི ནཱམ ནཏྠི, ཀིཉྩིདེཝ ཀཱརཎཾ ཝཏྭཱ ཡཐཱ མམ མཱཏུལོ རཱཛཱ དྷཱིཏརཾ ཨནྟོགེཧཱ ནཱིཧརཱཔེཏི, ཏཐཱ ཀརོཧཱི’’ཏི ཨཱཧ. སཱདྷུ, སཱམི, ཨཧཾ རཱཛཱནཾ ཨུཔསངྐམིཏྭཱ ཨེཝཾ ཝཀྑཱམི ‘‘དེཝ, རཱཛདྷཱིཏཱཡ ཨུཔརི ཀཱལ༹ཀཎྞཱི ཨཏྠི, ཨེཏྟཀཾ ཀཱལཾ ནིཝཏྟིཏྭཱ ཨོལོཀེནྟོཔི ནཏྠི, ཨཧཾ རཱཛདྷཱིཏརཾ ཨསུཀདིཝསེ ¶ ནཱམ རཐཾ ཨཱརོཔེཏྭཱ བཧུཨཱཝུདྷཧཏྠེ པུརིསེ ཨཱདཱཡ མཧནྟེན པརིཝཱརེན སུསཱནཾ གནྟྭཱ མཎྜལཔཱིཋིཀཱཡ ཧེཊྛཱམཉྩེ མཏམནུསྶཾ ནིཔཛྫཱཔེཏྭཱ ཨུཔརིམཉྩེ རཱཛདྷཱིཏརཾ ཋཔེཏྭཱ གནྡྷོདཀགྷཊཱནཾ ཨཊྛུཏྟརསཏེན ནྷཱཔེཏྭཱ ཀཱལ༹ཀཎྞིཾ པཝཱཧེསྶཱམཱི’’ཏི ཨེཝཾ ཝཏྭཱ རཱཛདྷཱིཏརཾ སུསཱནཾ ནེསྶཱམི, ཏྭཾ ཨམྷཱཀཾ ཏཏྠ གམནདིཝསེ ཨམྷེཧི པུརེཏརམེཝ ཐོཀཾ མརིཙཙུཎྞཾ ཨཱདཱཡ ཨཱཝུདྷཧཏྠེཧི ཨཏྟནོ མནུསྶེཧི པརིཝུཏོ རཐཾ ཨབྷིརུཡ྄ཧ སུསཱནཾ གནྟྭཱ རཐཾ སུསཱནདྭཱརེ ཨེཀཔདེསེ ཋཔེཏྭཱ ཨཱཝུདྷཧཏྠེ མནུསྶེ སུསཱནཝནཾ པེསེཏྭཱ སཡཾ སུསཱནེ མཎྜལཔཱིཋིཀཾ པསཱརེཏྭཱ མཏཀོ ཝིཡ པཊིཀུཛྫོ ཧུཏྭཱ ནིཔཛྫ. ཨཧཾ ཏཏྠ ཨཱགནྟྭཱ ཏཝ ཨུཔརི མཉྩཀཾ ཨཏྠརིཏྭཱ རཱཛདྷཱིཏརཾ ཨུཀྑིཔིཏྭཱ མཉྩེ སཡཱཔེསྶཱམི, ཏྭཾ ཏསྨིཾ ཁཎེ མརིཙཙུཎྞཾ ནཱསིཀཱཡ པཀྑིཔིཏྭཱ དྭེ ཏཡོ ཝཱརེ ཁིཔེཡྻཱསི. ཏཡཱ ཁིཔིཏཀཱལེ ¶ མཡཾ རཱཛདྷཱིཏརཾ པཧཱཡ པལཱཡིསྶཱམ. ཨཐ ཏྭཾ རཱཛདྷཱིཏརཾ སཱིསཾ ནྷཱཔེཏྭཱ སཡམྤི སཱིསཾ ནྷཱཡིཏྭཱ ཏཾ ཨཱདཱཡ ཨཏྟནོ ནིཝེསནཾ གཙྪེཡྻཱསཱིཏི. སོ ‘‘སཱདྷུ སུནྡརོ ཨུཔཱཡོ’’ཏི སམྤཊིཙྪི.

སཱཔི གནྟྭཱ རཉྙོ ཏམཏྠཾ ཨཱརོཙེསི, རཱཛཱཔི སམྤཊིཙྪི. རཱཛདྷཱིཏཱཡཔི ཏཾ ཨནྟརཾ ཨཱཙིཀྑི, སཱཔི སམྤཊིཙྪི. སཱ ནིཀྑམནདིཝསེ ཀུམཱརསྶ སཉྙཾ དཏྭཱ མཧནྟེན པརིཝཱརེན སུསཱནཾ གཙྪནྟཱི ཨཱརཀྑམནུསྶཱནཾ བྷཡཛནནཏྠཾ ཨཱཧ – ‘‘མཡཱ རཱཛདྷཱིཏཱཡ མཉྩེ ཋཔིཏཀཱལེ ཧེཊྛཱམཉྩེ མཏཔུརིསོ ཁིཔིསྶཏི, ཁིཔིཏྭཱ ཙ ཧེཊྛཱམཉྩཱ ནིཀྑམིཏྭཱ ཡཾ པཋམཾ པསྶིསྶཏི ¶ , ཏམེཝ གཧེསྶཏི, ཨཔྤམཏྟཱ བྷཝེཡྻཱཐཱ’’ཏི. རཱཛཀུམཱརོ པུརེཏརཾ གནྟྭཱ ཝུཏྟནཡེནེཝ ཏཏྠ ནིཔཛྫི. མཧཱཨིཀྑཎིཀཱ རཱཛདྷཱིཏརཾ ཨུཀྑིཔིཏྭཱ མཎྜལཔཱིཋིཀཱཋཱནཾ གཙྪནྟཱི ‘‘མཱ བྷཱཡཱི’’ཏི སཉྙཱཔེཏྭཱ མཉྩེ ཋཔེསི. ཏསྨིཾ ཁཎེ ཀུམཱརོ མརིཙཙུཎྞཾ ནཱསཱཡ པཀྑིཔིཏྭཱ ཁིཔི. ཏེན ཁིཔིཏམཏྟེཡེཝ མཧཱཨིཀྑཎིཀཱ རཱཛདྷཱིཏརཾ པཧཱཡ མཧཱརཝཾ རཝམཱནཱ སབྦཔཋམཾ པལཱཡི, ཏསྶཱ པལཱཏཀཱལཏོ པཊྛཱཡ ཨེཀོཔི ཋཱཏུཾ སམཏྠོ ནཱམ ནཱཧོསི, གཧིཏགཧིཏཱནི ཨཱཝུདྷཱནི ཚཌྜེཏྭཱ སབྦེ པལཱཡིཾསུ. ཀུམཱརོ ཡཐཱསམྨནྟིཏཾ སབྦཾ ཀཏྭཱ རཱཛདྷཱིཏརཾ ཨཱདཱཡ ཨཏྟནོ ནིཝེསནཾ ཨགམཱསི.

ཨིཀྑཎིཀཱ ¶ གནྟྭཱ ཏཾ ཀཱརཎཾ རཉྙོ ཨཱརོཙེསི. རཱཛཱ ‘‘པཀཏིཡཱཔི སཱ མཡཱ ཏསྶེཝཏྠཱཡ པུཊྛཱ, པཱཡཱསེ ཚཌྜིཏསཔྤི ཝིཡ ཛཱཏ’’ནྟི སམྤཊིཙྪིཏྭཱ ཨཔརབྷཱགེ བྷཱགིནེཡྻསྶ རཛྫཾ དཏྭཱ དྷཱིཏརཾ མཧཱདེཝིཾ ཀཱརེསི. སོ ཏཱཡ སདྡྷིཾ སམགྒཝཱསཾ ཝསམཱནོ དྷམྨེན རཛྫཾ ཀཱརེསི. སོཔི ཨསིལཀྑཎཔཱཋཀོ ཏསྶེཝ ཨུཔཊྛཱཀོ ཨཧོསི. ཏསྶེཀདིཝསཾ རཱཛཱུཔཊྛཱནཾ ཨཱགནྟྭཱ པཊིསཱུརིཡཾ ཋཏྭཱ ཨུཔཊྛཧནྟསྶ ལཱཁཱ ཝིལཱིཡི, པཊིནཱསིཀཱ བྷཱུམིཡཾ པཏི. སོ ལཛྫཱཡ ཨདྷོམུཁོ ཨཊྛཱསི. ཨཐ ནཾ རཱཛཱ པརིཧསནྟོ ‘‘ཨཱཙརིཡ, མཱ ཙིནྟཡིཏྠ, ཁིཔིཏཾ ནཱམ ཨེཀསྶ ཀལྱཱཎཾ ཧོཏི, ཨེཀསྶ པཱཔཀཾ. ཏུམྷེཧི ཁིཔིཏེན ནཱསིཀཱ ¶ ཚིཛྫཱིཡིཏྠ, མཡཾ པན ཁིཔནྟཱ མཱཏུལདྷཱིཏརཾ ལབྷིཏྭཱ རཛྫཾ པཱཔུཎིམྷཱ’’ཏི ཝཏྭཱ ཨིམཾ གཱཐམཱཧ –

༡༢༦.

‘‘ཏཐེཝེཀསྶ ཀལྱཱཎཾ, ཏཐེཝེཀསྶ པཱཔཀཾ;

ཏསྨཱ སབྦཾ ན ཀལྱཱཎཾ, སབྦཾ ཝཱཔི ན པཱཔཀ’’ནྟི.

ཏཏྠ ཏཐེཝེཀསྶཱཏི ཏདེཝེཀསྶ. ཨཡམེཝ ཝཱ པཱཋོ. དུཏིཡཔདེཔི ཨེསེཝ ནཡོ.

ཨིཏི སོ ཨིམཱཡ གཱཐཱཡ ཏཾ ཀཱརཎཾ ཨཱཧརིཏྭཱ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ཨིམཱཡ དེསནཱཡ ལོཀསམྨཏཱནཾ ཀལྱཱཎཔཱཔཀཱནཾ ཨནེཀཾསིཀབྷཱཝཾ པཀཱསེཏྭཱ ཛཱཏཀཾ སམོདྷཱནེསི – ‘‘ཏདཱ ཨསིལཀྑཎཔཱཋཀོཝ ཨེཏརཧི ཨསིལཀྑཎཔཱཋཀོ, བྷཱགིནེཡྻརཱཛཱ པན ཨཧམེཝ ཨཧོསི’’ནྟི.

ཨསིལཀྑཎཛཱཏཀཝཎྞནཱ ཚཊྛཱ.

[༡༢༧] ༧. ཀལཎྜུཀཛཱཏཀཝཎྞནཱ

ཏེ ¶ དེསཱ ཏཱནི ཝཏྠཱུནཱིཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཝིཀཏྠཀབྷིཀྑུཾ ཨཱརབྦྷ ཀཐེསི. ཏཏྠ དྭེཔི ཝཏྠཱུནི ཀཊཱཧཀཛཱཏཀསདིསཱནེཝ.

ཨིདྷ ¶ པནེས བཱརཱཎསིསེཊྛིནོ དཱསོ ཀལཎྜུཀོ ནཱམ ཨཧོསི. ཏསྶ པལཱཡིཏྭཱ པཙྩནྟཝཱསིསེཊྛིནོ དྷཱིཏརཾ གཧེཏྭཱ མཧནྟེན པརིཝཱརེན ཝསནཀཱལེ བཱརཱཎསིསེཊྛི པརིཡེསཱཔེཏྭཱཔི ཏསྶ གཏཊྛཱནཾ ཨཛཱནནྟོ ‘‘གཙྪ, ཀལཎྜུཀཾ པརིཡེསཱ’’ཏི ཨཏྟནཱ པུཊྛཾ སུཀཔོཏཀཾ པེསེསི. སུཀཔོཏཀོ ཨིཏོ ཙིཏོ ཙ ཝིཙརནྟོ ཏཾ ནགརཾ པཱཔུཎི. ཏསྨིཉྩ ཀཱལེ ཀལཎྜུཀོ ནདཱིཀཱིལ༹ཾ ཀཱིལི༹ཏུཀཱམོ བཧུཾ མཱལཱགནྡྷཝིལེཔནཉྩེཝ ཁཱདནཱིཡབྷོཛནཱིཡཱནི ཙ གཱཧཱཔེཏྭཱ ནདིཾ གནྟྭཱ སེཊྛིདྷཱིཏཱཡ སདྡྷིཾ ནཱཝཾ ཨཱརུཡ྄ཧ ཨུདཀེ ཀཱིལ༹ཏི. ཏསྨིཉྩ པདེསེ ནདཱིཀཱིལ༹ཾ ཀཱིལ༹ནྟཱ ཨིསྶརཛཱཏིཀཱ ཏིཁིཎབྷེསཛྫཔརིབྷཱཝིཏཾ ཁཱིརཾ པིཝནྟི, ཏེན ཏེསཾ དིཝསབྷཱགམྤི ཨུདཀེ ཀཱིལ༹ནྟཱནཾ སཱིཏཾ ན ¶ བཱདྷཏི. ཨཡཾ པན ཀལཎྜུཀོ ཁཱིརགཎྜཱུསཾ གཧེཏྭཱ མུཁཾ ཝིཀྑཱལེཏྭཱ ཏཾ ཁཱིརཾ ནུཊྛུབྷཏི. ནུཊྛུབྷནྟོཔི ཨུདཀེ ཨནུཊྛུབྷིཏྭཱ སེཊྛིདྷཱིཏཱཡ སཱིསེ ནུཊྛུབྷཏི. སུཀཔོཏཀོཔི ནདཱིཏཱིརཾ གནྟྭཱ ཨེཀིསྶཱ ཨུདུམྦརསཱཁཱཡ ནིསཱིདིཏྭཱ ཨོལོཀེཏྭཱ ཀལཎྜུཀཾ སཉྫཱནིཏྭཱ སེཊྛིདྷཱིཏཱཡ སཱིསེ ནུཊྛུབྷནྟཾ དིསྭཱ ‘‘ཨརེ, ཀལཎྜུཀ དཱས, ཨཏྟནོ ཛཱཏིཉྩ ཝསནཊྛཱནཉྩ ཨནུསྶར, ཁཱིརགཎྜཱུསཾ གཧེཏྭཱ མུཁཾ ཝིཀྑཱལེཏྭཱ ཛཱཏིསམྤནྣཱཡ སུཁསཾཝཌྜྷཱཡ སེཊྛིདྷཱིཏཱཡ སཱིསེ མཱ ནུཊྛུབྷི, ཨཏྟནོ པམཱཎཾ ན ཛཱནཱསཱི’’ཏི ཝཏྭཱ ཨིམཾ གཱཐམཱཧ –

༡༢༧.

‘‘ཏེ དེསཱ ཏཱནི ཝཏྠཱུནི, ཨཧཉྩ ཝནགོཙརོ;

ཨནུཝིཙྩ ཁོ ཏཾ གཎྷེཡྻུཾ, པིཝ ཁཱིརཾ ཀལཎྜུཀཱ’’ཏི.

ཏཏྠ ཏེ དེསཱ ཏཱནི ཝཏྠཱུནཱིཏི མཱཏུཀུཙྪིཾ སནྡྷཱཡ ཝདཏི. ཨཡམེཏྠཱདྷིཔྤཱཡོ – ཡཏྠ ཏེ ཝསིཏཾ, ན ཏེ ཁཏྟིཡདྷཱིཏཱདཱིནཾ ཀུཙྪིདེསཱ. ཡཏྠ ཝཱསི པཏིཊྛིཏོ, ན ཏཱནི ཁཏྟིཡདྷཱིཏཱདཱིནཾ ཀུཙྪིཝཏྠཱུནི. ཨཐ ཁོ དཱསིཀུཙྪིཡཾ ཏྭཾ ཝསི ཙེཝ པཏིཊྛིཏོ ཙཱཏི. ཨཧཉྩ ཝནགོཙརོཏི ཏིརཙྪཱནབྷཱུཏོཔི ཨེཏམཏྠཾ ཛཱནཱམཱིཏི དཱིཔེཏི. ཨནུཝིཙྩ ཁོ ཏཾ གཎྷེཡྻུནྟི ཨེཝཾ ཨནཱཙཱརཾ ཙརམཱནཾ མཡཱ གནྟྭཱ ཨཱརོཙིཏེ ཨནུཝིཙྩ ཛཱནིཏྭཱ ཏཝ སཱམིཀཱ ཏཱལེ༹ཏྭཱ ཙེཝ ལཀྑཎཱཧཏཉྩ ཀཏྭཱ ཏཾ གཎྷེཡྻུཾ, གཧེཏྭཱ གམིསྶནྟི, ཏསྨཱ ཨཏྟནོ པམཱཎཾ ཉཏྭཱ སེཊྛིདྷཱིཏཱཡ སཱིསེ ཨནུཊྛུབྷིཏྭཱ པིཝ ཁཱིརཾ. ཀལཎྜུཀཱཏི ཏཾ ནཱམེནཱལཔཏི.

ཀལཎྜུཀོཔི ¶ ¶ སུཝཔོཏཀཾ སཉྫཱནིཏྭཱ ‘‘མཾ པཱཀཊཾ ཀརེཡྻཱ’’ཏི བྷཡེན ‘‘ཨེཧི, སཱམི, ཀདཱ ཨཱགཏོསཱི’’ཏི ཨཱཧ. སུཀོ ‘‘ན ཨེས མཾ ཧིཏཀཱམཏཱཡ པཀྐོསཏི, གཱིཝཾ པན མེ ཝཊྚེཏྭཱ མཱརེཏུཀཱམོ’’ཏི ཉཏྭཱཝ ‘‘ན མེ ཏཡཱ ཨཏྠོ’’ཏི ཏཏོ ཨུཔྤཏིཏྭཱ བཱརཱཎསིཾ གནྟྭཱ ཡཐཱདིཊྛཾ སེཊྛིནོ ཝིཏྠཱརེན ཀཐེསི. སེཊྛི ‘‘ཨཡུཏྟཾ ཏེན ཀཏ’’ནྟི ཝཏྭཱ གནྟྭཱ ཏསྶ ཨཱཎཾ ཀཱརེཏྭཱ བཱརཱཎསིམེཝ ནཾ ཨཱནེཏྭཱ དཱསཔརིབྷོགེན པརིབྷུཉྫི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཀལཎྜུཀོ ཨཡཾ བྷིཀྑུ ཨཧོསི, བཱརཱཎསིསེཊྛི པན ཨཧམེཝ ཨཧོསི’’ནྟི.

ཀལཎྜུཀཛཱཏཀཝཎྞནཱ སཏྟམཱ.

[༡༢༨] ༨. བིལཱ༹རཝཏཛཱཏཀཝཎྞནཱ

ཡོ ¶ ཝེ དྷམྨཾ དྷཛཾ ཀཏྭཱཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཀུཧཀབྷིཀྑུཾ ཨཱརབྦྷ ཀཐེསི. ཏདཱ ཧི སཏྠཱ ཏསྶ ཀུཧཀབྷཱཝེ ཨཱརོཙིཏེ ‘‘ན, བྷིཀྑཝེ, ཨིདཱནེཝ, པུབྦེཔེས ཀུཧཀོཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ མཱུསིཀཡོནིཡཾ པཊིསནྡྷིཾ གཧེཏྭཱ ཝུཌྜྷིམནྭཱཡ མཧཱསརཱིརོ སཱུཀརཙྪཱཔཀསདིསོ ཧུཏྭཱ ཨནེཀསཏམཱུསིཀཱཧི པརིཝུཏོ ཨརཉྙེ ཝིཧརཏི. ཨཐེཀོ སིངྒཱལོ ཨིཏོ ཙིཏོ ཙ ཝིཙརནྟོ ཏཾ མཱུསིཀཡཱུཐཾ དིསྭཱ ‘‘ཨིམཱ མཱུསིཀཱ ཝཉྩེཏྭཱ ཁཱདིསྶཱམཱི’’ཏི ཙིནྟེཏྭཱ མཱུསིཀཱནཾ ཨཱསཡསྶ ཨཝིདཱུརེ སཱུརིཡཱབྷིམུཁོ ཝཱཏཾ པིཝནྟོ ཨེཀེན པཱདེན ཨཊྛཱསི. བོདྷིསཏྟོ གོཙརཱཡ ཙརམཱནོ ཏཾ དིསྭཱ ‘‘སཱིལཝཱ ཨེསོ བྷཝིསྶཏཱི’’ཏི ཏསྶ སནྟིཀཾ གནྟྭཱ ‘‘བྷནྟེ, ཏྭཾ ཀོ ནཱམོ’’ཏི པུཙྪི. ‘‘དྷམྨིཀོ ནཱམཱ’’ཏི. ‘‘ཙཏྟཱརོ པཱདེ བྷཱུམིཡཾ ཨཋཔེཏྭཱ ཀསྨཱ ཨེཀེནེཝ ཋིཏོསཱི’’ཏི. ‘‘མཡི ཙཏྟཱརོ པཱདེ པཐཝིཡཾ ཋཔེནྟེ པཐཝཱི ཝཧིཏུཾ ན སཀྐོཏི, ཏསྨཱ ཨེཀེནེཝ ཏིཊྛཱམཱི’’ཏི. ‘‘མུཁཾ ཝིཝརིཏྭཱ ཀསྨཱ ཋིཏོསཱི’’ཏི? ‘‘མཡཾ ཨཉྙཾ ན བྷཀྑཡཱམ, ཝཱཏམེཝ བྷཀྑཡཱམཱ’’ཏི. ‘‘ཨཐ ཀསྨཱ སཱུརིཡཱབྷིམུཁོ ¶ ཏིཊྛསཱི’’ཏི? ‘‘སཱུརིཡཾ ནམསྶཱམཱི’’ཏི. བོདྷིསཏྟོ ཏསྶ ཝཙནཾ སུཏྭཱ ‘‘སཱིལཝཱ ཨེསོ བྷཝིསྶཏཱི’’ཏི ཏཏོ པཊྛཱཡ མཱུསིཀགཎེན སདྡྷིཾ སཱཡཾ པཱཏཾ ཏསྶ ཨུཔཊྛཱནཾ གཙྪཏི.

ཨཐསྶ ¶ ཨུཔཊྛཱནཾ ཀཏྭཱ གམནཀཱལེ སིངྒཱལོ སབྦཔཙྪིམཾ མཱུསིཀཾ གཧེཏྭཱ མཾསཾ ཁཱདིཏྭཱ ཨཛ྄ཛྷོཧརིཏྭཱ མུཁཾ པུཉྪིཏྭཱ ཏིཊྛཏི. ཨནུཔུབྦེན མཱུསིཀགཎོ ཏནུཀོ ཛཱཏོ. མཱུསིཀཱ ‘‘པུབྦེ ཨམྷཱཀཾ ཨཡཾ ཨཱསཡོ ནཔྤཧོཏི, ནིརནྟརཱ ཏིཊྛཱམ. ཨིདཱནི སིཐིལཱ, ཨེཝམྤི ཨཱསཡོ ན པཱུརཏེཝ, ཀིཾ ནུ ཁོ ཨེཏ’’ནྟི བོདྷིསཏྟསྶ ཏཾ པཝཏྟིཾ ཨཱརོཙེསུཾ. བོདྷིསཏྟོ ‘‘ཀེན ནུ ཁོ ཀཱརཎེན མུསིཀཱ ཏནུཏྟཾ གཏཱ’’ཏི ཙིནྟེནྟོ སིངྒཱལེ ཨཱསངྐཾ ཋཔེཏྭཱ ‘‘ཝཱིམཾསིསྶཱམི ¶ ན’’ནྟི ཨུཔཊྛཱནཀཱལེ སེསམཱུསིཀཱ པུརཏོ ཀཏྭཱ སཡཾ པཙྪཏོ ཨཧོསི. སིངྒཱལོ ཏསྶ ཨུཔརི པཀྑནྡི, བོདྷིསཏྟོ ཨཏྟནོ གཧཎཏྠཱཡ ཏཾ པཀྑནྡནྟཾ དིསྭཱ ནིཝཏྟིཏྭཱ ‘‘བྷོ སིངྒཱལ, ཨིདཾ ཏེ ཝཏསམཱདཱནཾ ན དྷམྨསུདྷམྨཏཱཡ, པརེསཾ པན ཝིཧིཾསནཏྠཱཡ དྷམྨཾ དྷཛཾ ཀཏྭཱ ཙརསཱི’’ཏི ཝཏྭཱ ཨིམཾ གཱཐམཱཧ –

༡༢༨.

‘‘ཡོ ཝེ དྷམྨཾ དྷཛཾ ཀཏྭཱ, ནིགཱུལ༹ྷོ པཱཔམཱཙརེ;

ཝིསྶཱསཡིཏྭཱ བྷཱུཏཱནི, བིལཱ༹རཾ ནཱམ ཏཾ ཝཏ’’ནྟི.

ཏཏྠ ཡོ ཝེཏི ཁཏྟིཡཱདཱིསུ ཡོ ཀོཙིདེཝ. དྷམྨཾ དྷཛཾ ཀཏྭཱཏི དསཀུསལཀམྨཔཐདྷམྨཾ དྷཛཾ ཀརིཏྭཱ, ཀཱུཊཾ ཀརོནྟོ ཝིཡ ཨུསྶཱཔེཏྭཱ དསྶེནྟོཏི ཨཏྠོ. ཝིསྶཱསཡིཏྭཱཏི ‘‘སཱིལཝཱ ཨཡ’’ནྟི སཉྙཱཡ སཉྫཱཏཝིསྶཱསཱནི ཀཏྭཱ. བིལཱ༹རཾ ནཱམ ཏཾ ཝཏནྟི ཏཾ ཨེཝཾ དྷམྨཾ དྷཛཾ ཀཏྭཱ རཧོ པཱཔཱནི ཀརོནྟསྶ ཝཏཾ ཀེརཱཊིཀཝཏཾ ནཱམ ཧོཏཱིཏི ཨཏྠོ.

མཱུསིཀརཱཛཱ ཀཐེནྟོཝ ཨུཔྤཏིཏྭཱ ཏསྶ གཱིཝཱཡཾ པཏིཏྭཱ ཧནུཀསྶ ཧེཊྛཱ ཨནྟོགལནཱལི༹ཡཾ ཌཾསིཏྭཱ གལནཱལི༹ཾ ཕཱལེཏྭཱ ཛཱིཝིཏཀྑཡཾ པཱཔེསི. མཱུསིཀགཎོ ནིཝཏྟིཏྭཱ སིངྒཱལཾ ‘‘མུརུ མུརཱུ’’ཏི ཁཱདིཏྭཱ ཨགམཱསི. པཋམཱགཏཱཝ ཀིརསྶ མཾསཾ ལབྷིཾསུ, པཙྪཱ ཨཱགཏཱ ན ལབྷིཾསུ. ཏཏོ པཊྛཱཡ མཱུསིཀགཎོ ནིབྦྷཡོ ཛཱཏོ.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ སིངྒཱལོ ཀུཧཀབྷིཀྑུ ཨཧོསི, མཱུསིཀརཱཛཱ པན ཨཧམེཝ ཨཧོསི’’ནྟི.

བིལཱ༹རཝཏཛཱཏཀཝཎྞནཱ ཨཊྛམཱ.

[༡༢༩] ༩. ཨགྒིཀབྷཱརདྭཱཛཛཱཏཀཝཎྞནཱ

ནཱཡཾ ¶ སིཁཱ པུཉྙཧེཏཱུཏི ཨིདཾ སཏྠཱ ཛེཏཝནེ ཝིཧརནྟོ ཀུཧཀཉྙེཝ བྷིཀྑུཾ ཨཱརབྦྷ ཀཐེསི.

ཨཏཱིཏསྨིཉྷི བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ མཱུསིཀརཱཛཱ ཧུཏྭཱ ཨརཉྙེ ཝསཏི. ཨཐེཀོ སིངྒཱལོ དཝཌཱཧེ ཨུཊྛིཏེ པལཱཡིཏུཾ ཨསཀྐོནྟོ ཨེཀསྨིཾ རུཀྑེ སཱིསཾ ¶ ཨཱཧཙྩ ཨཊྛཱསི. ཏསྶ སཀལསརཱིརེ ལོམཱནི ཛྷཱཡིཾསུ, རུཀྑཾ ཨཱཧཙྩ ཋིཏཊྛཱནེ པན མཏྠཀེ ཙཱུལཱ༹ ཝིཡ ཐོཀཱནི ལོམཱནི ཨཊྛཾསུ. སོ ཨེཀདིཝསཾ སོཎྜིཡཾ པཱནཱིཡཾ པིཝནྟོ ཚཱཡཾ ཨོལོཀེནྟོ ཙཱུལ༹ཾ དིསྭཱ ‘‘ཨུཔྤནྣཾ དཱནི མེ བྷཎྜམཱུལ’’ནྟི ཨརཉྙེ ཝིཙརནྟོ ཏཾ མཱུསིཀཱདརིཾ དིསྭཱ ‘‘ཨིམཱ མཱུསིཀཱ ཝཉྩེཏྭཱ ཁཱདིསྶཱམཱི’’ཏི ཧེཊྛཱ ཝུཏྟནཡེནེཝ ཨཝིདཱུརེ ཨཊྛཱསི. ཨཐ ནཾ བོདྷིསཏྟོ གོཙརཱཡ ཙརནྟོ དིསྭཱ ‘‘སཱིལཝཱ ཨཡ’’ནྟི སཉྙཱཡ ཨུཔསངྐམིཏྭཱ ‘‘ཏྭཾ ཀིནྣཱམོསཱི’’ཏི པུཙྪི. ‘‘ཨཧཾ ཨགྒིཀབྷཱརདྭཱཛོ ནཱམཱ’’ཏི. ‘‘ཨཐ ཀསྨཱ ཨཱགཏོསཱི’’ཏི? ‘‘ཏུམྷཱཀཾ རཀྑནཏྠཱཡཱ’’ཏི. ‘‘ཀིནྟི ཀཏྭཱ ཨམྷེ རཀྑིསྶསཱི’’ཏི? ‘‘ཨཧཾ ཨངྒུཊྛགཎནཾ ནཱམ ཛཱནཱམི, ཏུམྷཱཀཾ པཱཏོཝ ནིཀྑམིཏྭཱ གོཙརཱཡ གམནཀཱལེ ‘ཨེཏྟཀཱ’ཏི གཎེཏྭཱ པཙྩཱགམནཀཱལེཔི གཎེསྶཱམི, ཨེཝཾ སཱཡཾ པཱཏཾ གཎེནྟོ རཀྑིསྶཱམཱི’’ཏི. ‘‘ཏེན ཧི རཀྑ མཱཏུལཱ’’ཏི. སོ ‘‘སཱདྷཱུ’’ཏི སམྤཊིཙྪིཏྭཱ ནིཀྑམནཀཱལེ ‘‘ཨེཀོ དྭེ ཏཡོ’’ཏི གཎེཏྭཱ པཙྩཱགམནཀཱལེཔི ཏཐེཝ གཎེཏྭཱ སབྦཔཙྪིམཾ གཧེཏྭཱ ཁཱདཏི. སེསཾ པུརིམསདིསམེཝ.

ཨིདྷ པན མཱུསིཀརཱཛཱ ནིཝཏྟིཏྭཱ ཋིཏོ ‘‘བྷོ ཨགྒིཀབྷཱརདྭཱཛ, ནཱཡཾ ཏཝ དྷམྨསུདྷམྨཏཱཡ མཏྠཀེ ཙཱུལཱ༹ ཋཔིཏཱ, ཀུཙྪིཀཱརཎཱ པན ཋཔིཏཱ’’ཏི ཝཏྭཱ ཨིམཾ གཱཐམཱཧ –

༡༢༩.

‘‘ནཱཡཾ ¶ སིཁཱ པུཉྙཧེཏུ, གྷཱསཧེཏུ ཨཡཾ སིཁཱ;

ནཱགུཊྛིགཎནཾ ཡཱཏི, ཨལཾ ཏེ ཧོཏུ ཨགྒིཀཱ’’ཏི.

ཏཏྠ ནཱགུཊྛིགཎནཾ ཡཱཏཱིཏི ‘‘ཨངྒུཊྛིགཎནཱ’’ཏི ཨངྒུཊྛགཎནཱ ཝུཙྩཏི, ཨཡཾ མཱུསིཀགཎོ ཨངྒུཊྛགཎནཾ ན གཙྪཏི ན ཨུཔེཏི ན པཱུརེཏི, པརིཀྑཡཾ གཙྪཏཱིཏི ཨཏྠོ. ཨལཾ ཏེ ཧོཏུ ཨགྒིཀཱཏི སིངྒཱལཾ ནཱམེན ཨཱལཔནྟོ ཨཱཧ. ཨེཏྟཱཝཏཱ ཏེ ཨལཾ ཧོཏུ, ན ཨིཏོ པརཾ མཱུསིཀེ ཁཱདིསྶསི ¶ . ཨམྷེཧི ཝཱ ཏཡཱ སདྡྷིཾ སཾཝཱསོ ཨལཾ ཧོཏུ, ན མཡཾ ཨིདཱནི ཏཡཱ སདྡྷིཾ ཝསིསྶཱམཱཏིཔི ཨཏྠོ. སེསཾ པུརིམསདིསམེཝ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི ‘‘ཏདཱ སིངྒཱལོ ཨཡཾ བྷིཀྑུ ཨཧོསི, མཱུསིཀརཱཛཱ པན ཨཧམེཝ ཨཧོསི’’ནྟི.

ཨགྒིཀབྷཱརདྭཱཛཛཱཏཀཝཎྞནཱ ནཝམཱ.

[༡༣༠] ༡༠. ཀོསིཡཛཱཏཀཝཎྞནཱ

ཡཐཱ ¶ ཝཱཙཱ ཙ བྷུཉྫསྶཱུཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ སཱཝཏྠིཡཾ མཱཏུགཱམཾ ཨཱརབྦྷ ཀཐེསི. སཱ ཀིརེཀསྶ སདྡྷཱསམྤནྣསྶ ཨུཔཱསཀབྲཱཧྨཎསྶ བྲཱཧྨཎཱི དུསྶཱིལཱ པཱཔདྷམྨཱ རཏྟིཾ ཨཏིཙརིཏྭཱ དིཝཱ ཀིཉྩི ཀམྨཾ ཨཀཏྭཱ གིལཱནཱལཡཾ དསྶེཏྭཱ ནིཏྠུནམཱནཱ ནིཔཛྫཏི. ཨཐ ནཾ བྲཱཧྨཎོ ‘‘ཀིཾ ཏེ བྷདྡེ ཨཕཱསུཀ’’ནྟི པུཙྪི. ‘‘ཝཱཏཱ མེ ཝིཛ྄ཛྷནྟཱི’’ཏི. ‘‘ཨཐ ཀིཾ ལདྡྷུཾ ཝཊྚཏཱི’’ཏི? ‘‘སིནིདྡྷམདྷུརཱནི པཎཱིཏཔཎཱིཏཱནི ཡཱགུབྷཏྟཏེལཱདཱིནཱི’’ཏི. བྲཱཧྨཎོ ཡཾ ཡཾ སཱ ཨིཙྪཏི, ཏཾ ཏཾ ཨཱཧརིཏྭཱ དེཏི, དཱསོ ཝིཡ སབྦཀིཙྩཱནི ཀརོཏི. སཱ པན བྲཱཧྨཎསྶ གེཧཾ པཝིཊྛཀཱལེ ནིཔཛྫཏི, བཧི ནིཀྑནྟཀཱལེ ཛཱརེཧི སདྡྷིཾ ཝཱིཏིནཱམེཏི.

ཨཐ བྲཱཧྨཎོ ‘‘ཨིམིསྶཱ སརཱིརེ ཝིཛ྄ཛྷནཝཱཏཱནཾ པརིཡནྟོ ན པཉྙཱཡཏཱི’’ཏི ཨེཀདིཝསཾ གནྡྷམཱལཱདཱིནི ཨཱདཱཡ ཛེཏཝནཾ གནྟྭཱ སཏྠཱརཾ པཱུཛེཏྭཱ ཝནྡིཏྭཱ ཨེཀམནྟཾ ནིསཱིདིཏྭཱ ‘‘ཀིཾ, བྲཱཧྨཎ, ན པཉྙཱཡསཱི’’ཏི ཝུཏྟེ ‘‘བྷནྟེ, བྲཱཧྨཎིཡཱ ཀིར མེ སརཱིརེ ཝཱཏཱ ཝིཛ྄ཛྷནྟི, སྭཱཧཾ ཏསྶཱ ¶ སཔྤིཏེལཱདཱིནི ཙེཝ པཎཱིཏཔཎཱིཏབྷོཛནཱནི ཙ པརིཡེསཱམི, སརཱིརམསྶཱ གྷནཾ ཝིཔྤསནྣཙྪཝིཝཎྞཾ ཛཱཏཾ, ཝཱཏརོགསྶ པན པརིཡནྟོ ན པཉྙཱཡཏི. ཨཧཾ ཏཾ པཊིཛགྒནྟོཝ ཨིདྷཱགམནསྶ ཨོཀཱསཾ ན ལབྷཱམཱི’’ཏི ཨཱཧ. སཏྠཱ བྲཱཧྨཎིཡཱ པཱཔབྷཱཝཾ ཉཏྭཱ ‘‘བྲཱཧྨཎ, ‘ཨེཝཾ ནིཔནྣསྶ མཱཏུགཱམསྶ རོགེ ཨཝཱུཔསམནྟེ ཨིདཉྩིདཉྩ བྷེསཛྫཾ ཀཱཏུཾ ཝཊྚཏཱི’ཏི པུབྦེཔི ཏེ པཎྜིཏེཧི ཀཐིཏཾ, བྷཝསངྑེཔགཏཏྟཱ པན ན སལླཀྑེསཱི’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ བྲཱཧྨཎམཧཱསཱལཀུལེ ནིབྦཏྟིཏྭཱ ཝཡཔྤཏྟོ ¶ ཏཀྐསིལཱཡཾ སབྦསིཔྤཱནི ཨུགྒཎྷིཏྭཱ བཱརཱཎསིཡཾ དིསཱཔཱམོཀྑོ ཨཱཙརིཡོ ཨཧོསི. ཨེཀསཏརཱཛདྷཱནཱིསུ ཁཏྟིཡཀུམཱརཱ ཙ བྲཱཧྨཎཀུམཱརཱ ཙ ཡེབྷུཡྻེན ཏསྶེཝ སནྟིཀེ སིཔྤཾ ཨུགྒཎྷནྟི. ཨཐེཀོ ཛནཔདཝཱསཱི བྲཱཧྨཎམཱཎཝོ བོདྷིསཏྟསྶ སནྟིཀེ ཏཡོ ཝེདེ ཨཊྛཱརས ཙ ཝིཛྫཱཊྛཱནཱནི ཨུགྒཎྷིཏྭཱ བཱརཱཎསིཡཾཡེཝ ཀུཊུམྦཾ སཎྛཔེཏྭཱ དིཝསེ དིཝསེ དྭཏྟིཀྑཏྟུཾ བོདྷིསཏྟསྶ སནྟིཀཾ ཨཱགཙྪཏི ¶ . ཏསྶ བྲཱཧྨཎཱི དུསྶཱིལཱ ཨཧོསི པཱཔདྷམྨཱཏི སབྦཾ པཙྩུཔྤནྣཝཏྠུསདིསམེཝ.

བོདྷིསཏྟོ པན ‘‘ཨིམིནཱ ཀཱརཎེན ཨོཝཱདགཧཎཱཡ ཨོཀཱསཾ ན ལབྷཱམཱི’’ཏི ཝུཏྟེ ‘‘སཱ མཱཎཝིཀཱ ཨིམཾ ཝཉྩེཏྭཱ ནིཔཛྫཏཱི’’ཏི ཉཏྭཱ ‘‘ཏསྶཱ རོགཱནུཙྪཝིཀཾ བྷེསཛྫཾ ཨཱཙིཀྑིསྶཱམཱི’’ཏི ཙིནྟེཏྭཱ ཨཱཧ ‘‘ཏཱཏ, ཏྭཾ ཨིཏོ པཊྛཱཡ ཏསྶཱ སཔྤིཁཱིརརསཱདཱིནི མཱ ཨདཱསི, གོམུཏྟེ པན པཉྩཔཎྞཱནི ཕལཱདཱིནི ཙ པཀྑིཔིཏྭཱ ཀོཊྚེཏྭཱ ནཝཏམྦལོཧབྷཱཛནེ པཀྑིཔིཏྭཱ ལོཧགནྡྷཾ གཱཧཱཔེཏྭཱ རཛྫུཾ ཝཱ ཡོཏྟཾ ཝཱ རུཀྑཾ ཝཱ ལཏཾ ཝཱ གཧེཏྭཱ ‘ཨིདཾ ཏེ རོགསྶ ཨནུཙྪཝིཀབྷེསཛྫཾ, ཨིདཾ ཝཱ པིཝ, ཨུཊྛཱཡ ཝཱ ཏཡཱ བྷུཏྟབྷཏྟསྶ ཨནུཙྪཝིཀཾ ཀམྨཾ ཀརོཧཱི’’ཏི ཝཏྭཱ ཨིམཾ གཱཐཾ ཝདེཡྻཱསི. ‘‘སཙེ བྷེསཛྫཾ ན པིཝཏི, ཨཐ ནཾ རཛྫུཡཱ ཝཱ ཡོཏྟེན ཝཱ རུཀྑེན ཝཱ ལཏཱཡ ཝཱ ཀཏིཙི པཧཱརེ པཧརིཏྭཱ ཀེསེསུ གཧེཏྭཱ ཨཱཀཌྜྷིཏྭཱ ཀཔྤརེན པོཐེཡྻཱསི, སཱ ཏངྑཎཉྙེཝ ཨུཊྛཱཡ ཀམྨཾ ཀརིསྶཏཱི’’ཏི. སོ ‘‘སཱདྷཱུ’’ཏི སམྤཊིཙྪིཏྭཱ ཝུཏྟནིཡཱམེནེཝ བྷེསཛྫཾ ཀཏྭཱ ‘‘བྷདྡེ, ཨིམཾ བྷེསཛྫཾ པིཝཱ’’ཏི ཨཱཧ. ‘‘ཀེན ཏེ ཨིདཾ ཨཱཙིཀྑིཏ’’ནྟི? ¶ ‘‘ཨཱཙརིཡེན, བྷདྡེ’’ཏི. ‘‘ཨཔནེཧི ཏཾ, ན པིཝིསྶཱམཱི’’ཏི. མཱཎཝོ ‘‘ན ཏྭཾ ཨཏྟནོ རུཙིཡཱ པིཝིསྶསཱི’’ཏི རཛྫུཾ གཧེཏྭཱ ‘‘ཨཏྟནོ རོགསྶ ཨནུཙྪཝིཀཾ བྷེསཛྫཾ ཝཱ པིཝ, ཡཱགུབྷཏྟཱནུཙྪཝིཀཾ ཀམྨཾ ཝཱ ཀརོཧཱི’’ཏི ཝཏྭཱ ཨིམཾ གཱཐམཱཧ –

༡༣༠.

‘‘ཡཐཱཝཱཙཱ ཙ བྷུཉྫསྶུ, ཡཐཱབྷུཏྟཉྩ བྱཱཧར;

ཨུབྷཡཾ ཏེ ན སམེཏི, ཝཱཙཱ བྷུཏྟཉྩ ཀོསིཡེ’’ཏི.

ཏཏྠ ཡཐཱཝཱཙཱ ཙ བྷུཉྫསྶཱུཏི ཡཐཱ ཏེ ཝཱཙཱ, ཏཐཱ བྷུཉྫསྶུ, ‘‘ཝཱཏཱ མེ ཝིཛ྄ཛྷནྟཱི’’ཏི ཝཱཙཱཡ ཨནུཙྪཝིཀམེཝ ཀཏྭཱ བྷུཉྫསྶཱུཏི ཨཏྠོ. ‘‘ཡཐཱཝཱཙཾ ཝཱ’’ཏིཔི པཱཋོ ཡུཛྫཏི, ‘‘ཡཐཱཝཱཙཱཡཱ’’ཏིཔི པཋནྟི, སབྦཏྠ ཨཡམེཝ ཨཏྠོ. ཡཐཱབྷུཏྟཉྩ བྱཱཧརཱཏི ཡཾ ཡཐཱ ཏེ བྷུཏྟཾ, ཏསྶ ཨནུཙྪཝིཀམེཝ ¶ བྱཱཧར, ‘‘ཨརོགམྷཱི’’ཏི ཝཏྭཱ གེཧེ ཀཏྟབྦཾ ཀརོསཱིཏི ཨཏྠོ. ‘‘ཡཐཱབྷཱུཏཉྩཱ’’ཏིཔི པཱཋོ, ཨཐ ཝཱ ཨརོགམྷཱིཏི ཡཐཱབྷཱུཏམེཝ ཝཏྭཱ ཀམྨཾ ཀརོཧཱིཏི ¶ ཨཏྠོ. ཨུབྷཡཾ ཏེ ན སམེཏི, ཝཱཙཱབྷུཏྟཉྩ ཀོསིཡེཏི ཡཱ ཙ ཏེ ཨཡཾ ཝཱཙཱ ‘‘ཝཱཏཱ མཾ ཝིཛ྄ཛྷནྟཱི’’ཏི ཡཉྩ ཏེ ཨིདཾ པཎཱིཏབྷོཛནཾ བྷུཏྟཾ, ཨིདཾ ཨུབྷཡམྤི ཏུཡ྄ཧཾ ན སམེཏི, ཏསྨཱ ཨུཊྛཱཡ ཀམྨཾ ཀརོཧི. ‘‘ཀོསིཡེ’’ཏི ཏཾ གོཏྟེནཱལཔཏི.

ཨེཝཾ ཝུཏྟེ ཀོསིཡབྲཱཧྨཎདྷཱིཏཱ ‘‘ཨཱཙརིཡེན ཨུསྶུཀྐཾ ཨཱཔནྣཀཱལཏོ པཊྛཱཡ ན སཀྐཱ མཡཱ ཨེས ཝཉྩེཏུཾ, ཨུཊྛཱཡ ཀམྨཾ ཀརིསྶཱམཱི’’ཏི ཨུཊྛཱཡ ཀམྨཾ ཨཀཱསི. ‘‘ཨཱཙརིཡེན མེ དུསྶཱིལབྷཱཝོ ཉཱཏོ, ཨིདཱནི ན སཀྐཱ ཨིཏོ པཊྛཱཡ པུན ཨེཝརཱུཔཾ ཀཱཏུ’’ནྟི ཨཱཙརིཡེ གཱརཝེན པཱཔཀམྨཏོཔི ཝིརམིཏྭཱ སཱིལཝཏཱི ཨཧོསི. སཱཔི བྲཱཧྨཎཱི ‘‘སམྨཱསམྦུདྡྷེན ཀིརམྷི ཉཱཏཱ’’ཏི སཏྠརིཔི གཱརཝེན ན པུན ཨནཱཙཱརཾ ཨཀཱསི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཛཡམྤཏིཀཱ ཨིདཱནི ཛཡམྤཏིཀཱཝ, ཨཱཙརིཡོ པན ཨཧམེཝ ཨཧོསི’’ནྟི.

ཀོསིཡཛཱཏཀཝཎྞནཱ དསམཱ.

ཀུསནཱལི༹ཝགྒོ ཏེརསམོ.

ཏསྶུདྡཱནཾ –

ཀུསནཱལི༹ ¶ ཙ དུམྨེདྷཾ, ནངྒལཱིསམྦཀཊཱཧཾ;

ཨསིལཀྑཎཀལཎྜུཀཾ, བིལཱ༹རགྒིཀཀོསིཡནྟི.

༡༤. ཨསམྤདཱནཝགྒོ

[༡༣༡] ༡. ཨསམྤདཱནཛཱཏཀཝཎྞནཱ

ཨསམྤདཱནེནིཏརཱིཏརསྶཱཏི ¶ ཨིདཾ སཏྠཱ ཝེལུ༹ཝནེ ཝིཧརནྟོ དེཝདཏྟཾ ཨཱརབྦྷ ཀཐེསི. ཏསྨིཉྷི ཀཱལེ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཨཱཝུསོ དེཝདཏྟོ, ཨཀཏཉྙཱུ ཏཐཱགཏསྶ གུཎཾ ན ཛཱནཱཏཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ དེཝདཏྟོ ཨཀཏཉྙཱུ, པུབྦེཔི ཨཀཏཉྙཱུཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ མགདྷརཊྛེ རཱཛགཧེ ཨེཀསྨིཾ མགདྷརཉྙེ རཛྫཾ ཀཱརེནྟེ བོདྷིསཏྟོ ཏསྶེཝ སེཊྛི ཨཧོསི ཨསཱིཏིཀོཊིཝིབྷཝོ སངྑསེཊྛཱིཏི ནཱམེན. བཱརཱཎསིཡཾ པཱིལི༹ཡསེཊྛི ནཱམ ཨསཱིཏིཀོཊིཝིབྷཝོཝ ཨཧོསི. ཏེ ཨཉྙམཉྙཾ སཧཱཡཀཱ ཨཧེསུཾ. ཏེསུ བཱརཱཎསིཡཾ པཱིལི༹ཡསེཊྛིསྶ ཀེནཙིདེཝ ཀཱརཎེན མཧནྟཾ བྷཡཾ ཨུཔྤཛྫི, སབྦཾ སཱཔཏེཡྻཾ པརིཧཱཡི. སོ དལིདྡོ ཨཔྤཊིསརཎོ ཧུཏྭཱ བྷརིཡཾ ཨཱདཱཡ སངྑསེཊྛིཾ པཙྩཡཾ ཀཏྭཱ བཱརཱཎསིཏོ ནིཀྑམིཏྭཱ པདསཱཝ རཱཛགཧཾ པཏྭཱ སངྑསེཊྛིསྶ ནིཝེསནཾ ཨགམཱསི. སོ ཏཾ དིསྭཱཝ ‘‘སཧཱཡོ མེ ཨཱགཏོ’’ཏི པརིསྶཛིཏྭཱ སཀྐཱརསམྨཱནཾ ཀཏྭཱ ཀཏིཔཱཧཾ ཝཱིཏིནཱམེཏྭཱ ཨེཀདིཝསཾ ‘‘སམྨ, ཀེནཊྛེན ཨཱགཏོསཱི’’ཏི པུཙྪི. ‘‘བྷཡཾ མེ, སམྨ, ཨུཔྤནྣཾ, སབྦཾ དྷནཾ པརིཀྑཱིཎཾ, ཨུཔཏྠམྦྷོ མེ ཧོཧཱི’’ཏི. ‘‘སཱདྷུ སམྨ, མཱ བྷཱཡཱི’’ཏི བྷཎྜཱགཱརཾ ཝིཝརཱཔེཏྭཱ ཙཏྟཱལཱིས ཧིརཉྙཀོཊིཡོ དཱཔེཏྭཱ སེསམྤི པརིཙྪདཔརིཝཱརཾ སབྦཾ ཨཏྟནོ སནྟཀཾ སཝིཉྙཱཎཀཾ ཨཝིཉྙཱཎཀཾ མཛ྄ཛྷེ བྷིནྡིཏྭཱ ཨུཔཌྜྷམེཝ ཨདཱསི. སོ ཏཾ ཝིབྷཝཾ ཨཱདཱཡ པུན བཱརཱཎསིཾ གནྟྭཱ ནིཝཱསཾ ཀཔྤེསི.

ཨཔརབྷཱགེ ¶ སངྑསེཊྛིསྶཔི ཏཱདིསམེཝ བྷཡཾ ཨུཔྤཛྫི. སོ ཨཏྟནོ པཊིསརཎཾ ཨུཔདྷཱརེནྟོ ‘‘སཧཱཡསྶ མེ མཧཱཨུཔཀཱརོ ཀཏོ, ཨུཔཌྜྷཝིབྷཝོ དིནྣོ. ན སོ མཾ དིསྭཱ པརིཙྩཛིསྶཏི, ཏསྶ སནྟིཀཾ གམིསྶཱམཱི’’ཏི ཙིནྟེཏྭཱ བྷརིཡཾ ཨཱདཱཡ པདསཱཝ བཱརཱཎསིཾ གནྟྭཱ བྷརིཡཾ ཨཱཧ ‘‘བྷདྡེ, ཏཝ མཡཱ སདྡྷིཾ ཨནྟརཝཱིཐིཡཱ གམནཾ ནཱམ ན ཡུཏྟཾ, མཡཱ པེསིཏཡཱནམཱརུཡ྄ཧ ¶ མཧནྟེན པརིཝཱརེན པཙྪཱ ཨཱགམིསྶསི. ཡཱཝ ཡཱནཾ པེསེམི, ཏཱཝ ཨིདྷེཝ ཧོཧཱི’’ཏི ཝཏྭཱ ཏཾ སཱལཱཡ ཋཔེཏྭཱ སཡཾ ནགརཾ པཝིསིཏྭཱ སེཊྛིསྶ གྷརཾ གནྟྭཱ ‘‘རཱཛགཧནགརཏོ ཏུམྷཱཀཾ སཧཱཡོ སངྑསེཊྛི ནཱམ ཨཱགཏོ’’ཏི ཨཱརོཙཱཔེསི. སོ ‘‘ཨཱགཙྪཏཱུ’’ཏི པཀྐོསཱཔེཏྭཱ ཏཾ དིསྭཱ ནེཝ ཨཱསནཱ ཝུཊྛཱསི, ན པཊིསནྠཱརཾ ཨཀཱསི, ཀེཝལཾ ‘‘ཀིམཏྠཾ ཨཱགཏོསཱི’’ཏི པུཙྪི. ‘‘ཏུམྷཱཀཾ དསྶནཏྠཾ ཨཱགཏོམྷཱི’’ཏི. ‘‘ནིཝཱསོ ¶ ཏེ ཀཧཾ གཧིཏོ’’ཏི? ‘‘ན ཏཱཝ ནིཝཱསཊྛཱནཾ ཨཏྠི, སེཊྛིགྷརཎིམྤི སཱལཱཡ ཋཔེཏྭཱཝ ཨཱགཏོམྷཱི’’ཏི. ‘‘ཏུམྷཱཀཾ ཨིདྷ ནིཝཱསཊྛཱནཾ ནཏྠི, ནིཝཱཔཾ གཧེཏྭཱ ཨེཀསྨིཾ ཋཱནེ པཙཱཔེཏྭཱ བྷུཉྫིཏྭཱ གཙྪཐ, པུན ཨམྷཱཀཾ གྷརཾ མཱ པཝིསཐཱ’’ཏི ཝཏྭཱ ‘‘མཡ྄ཧཾ སཧཱཡསྶ དུསྶནྟེ བནྡྷིཏྭཱ ཨེཀཾ བཧལཔལཱཔཏུམྦཾ དེཧཱི’’ཏི དཱསཾ ཨཱཎཱཔེསི. ཏཾ དིཝསཾ ཀིར སོ རཏྟསཱལཱིནཾ སཀཊསཧསྶམཏྟཾ ཨོཕུནཱཔེཏྭཱ ཀོཊྛཱགཱརཾ པཱུརཱཔེསི, ཙཏྟཱལཱིསཀོཊིདྷནཾ གཧེཏྭཱ ཨཱགཏོ ཨཀཏཉྙཱུ མཧཱཙོརོ སཧཱཡཀསྶ ཏུམྦམཏྟེ པལཱཔེ དཱཔེསི. དཱསོ པཙྪིཡཾ ཨེཀཾ པལཱཔཏུམྦཾ པཀྑིཔིཏྭཱ བོདྷིསཏྟསྶ སནྟིཀཾ ཨགམཱསི.

བོདྷིསཏྟོ ཙིནྟེསི – ‘‘ཨཡཾ ཨསཔྤུརིསོ མམ སནྟིཀཱ ཙཏྟཱལཱིསཀོཊིདྷནཾ ལབྷིཏྭཱ ཨིདཱནི པལཱཔཏུམྦཾ དཱཔེསི, གཎྷཱམི ནུ ཁོ, ན གཎྷཱམཱི’’ཏི? ཨཐསྶ ཨེཏདཧོསི ‘‘ཨཡཾ ཏཱཝ ཨཀཏཉྙཱུ མིཏྟདུབྦྷཱི ཀཏཝིནཱསཀབྷཱཝེན མཡཱ སདྡྷིཾ མིཏྟབྷཱཝཾ བྷིནྡི. སཙཱཧཾ ཨེཏེན དིནྣཾ པལཱཔཏུམྦཾ ལཱམཀཏྟཱ ན གཎྷིསྶཱམི, ཨཧམྤི མིཏྟབྷཱཝཾ བྷིནྡིསྶཱམི. ཨནྡྷབཱལཱ པརིཏྟཀཾ ལདྡྷཾ ཨགྒཎྷནྟཱ མིཏྟབྷཱཝཾ ཝིནཱསེནྟི, ཨཧཾ པན ཨེཏེན དིནྣཾ པལཱཔཏུམྦཾ གཧེཏྭཱ མམ ཝསེན མིཏྟབྷཱཝཾ པཏིཊྛཱཔེསྶཱམཱི’’ཏི. སོ པལཱཔཏུམྦཾ དུསྶནྟེ བནྡྷིཏྭཱ པཱསཱདཱ ཨོརུཡ྄ཧ སཱལཾ ཨགམཱསི. ཨཐ ནཾ བྷརིཡཱ ‘‘ཀིཾ ཏེ, ཨཡྻ, ལདྡྷ’’ནྟི པུཙྪི. ‘‘བྷདྡེ ཨམྷཱཀཾ སཧཱཡོ པཱིལི༹ཡསེཊྛི པལཱཔཏུམྦཾ དཏྭཱ ཨམྷེ ཨཛྫེཝ ¶ ཝིསྶཛྫེསཱི’’ཏི. སཱ ‘‘ཨཡྻ, ཀིམཏྠཾ ཨགྒཧེསི, ཀིཾ ཨེཏཾ ཙཏྟཱལཱིསཀོཊིདྷནསྶ ཨནུཙྪཝིཀ’’ནྟི རོདིཏུཾ ཨཱརབྷི. བོདྷིསཏྟོཔི ‘‘བྷདྡེ, མཱ རོདི, ཨཧཾ ཏེན སདྡྷིཾ མིཏྟབྷཱཝབྷེདནབྷཡེན མམ ཝསེན མིཏྟབྷཱཝཾ པཏིཊྛཱཔེཏུཾ གཎྷིཾ, ཏྭཾ ཀིཾཀཱརཎཱ རོདསཱི’’ཏི ཝཏྭཱ ཨིམཾ གཱཐམཱཧ –

༡༣༡.

‘‘ཨསམྤདཱནེནིཏརཱིཏརསྶ, བཱལསྶ མིཏྟཱནི ཀལཱིབྷཝནྟི;

ཏསྨཱ ¶ ཧརཱམི བྷུསཾ ཨཌྜྷམཱནཾ, མཱ མེ མིཏྟི ཛཱིཡིཏྠ སསྶཏཱཡ’’ནྟི.

ཏཏྠ ¶ ཨསམྤདཱནེནཱཏི ཨསམྤཱདཱནེན. ཨཀཱརལོཔེ སནྡྷི, ཨགྒཧཎེནཱཏི ཨཏྠོ. ཨིཏརཱིཏརསྶཱཏི ཡསྶ ཀསྶཙི ལཱམཀཱལཱམཀསྶ. བཱལསྶ མིཏྟཱནི ཀལཱིབྷཝནྟཱིཏི དནྡྷསྶ ཨཔཉྙསྶ མིཏྟཱནི ཀལཱིནི ཀཱལ༹ཀཎྞིསདིསཱནི ཧོནྟི, བྷིཛྫནྟཱིཏི ཨཏྠོ. ཏསྨཱ ཧརཱམི བྷུསཾ ཨཌྜྷམཱནནྟི ཏེན ཀཱརཎེན ཨཧཾ སཧཱཡེན དིནྣཾ ཨེཀཔལཱཔཏུམྦཾ ཧརཱམི གཎྷཱམཱིཏི དསྶེཏི. ‘‘མཱན’’ནྟི ཧི ཨཊྛནྣཾ ནཱལཱི༹ནཾ ནཱམཾ, ཙཏུནྣཾ ཨཌྜྷམཱནཾ, ཙཏསྶོ ཙ ནཱལི༹ཡོ ཏུམྦོ ནཱམ. ཏེན ཝུཏྟཾ ‘‘པལཱཔཏུམྦ’’ནྟི. མཱ མེ མིཏྟི ཛཱིཡིཏྠ སསྶཏཱཡནྟི མམ སཧཱཡེན སདྡྷིཾ མིཏྟི མཱ བྷིཛྫིཏྠ, སསྶཏཱཝ ཨཡཾ ཧོཏཱུཏི ཨཏྠོ.

ཨེཝཾ ཝུཏྟེཔི སེཊྛིབྷརིཡཱ རོདཏེཝ. ཏསྨིཾ ཁཎེ སངྑསེཊྛིནཱ པཱིལི༹ཡསེཊྛིསྶ དིནྣོ ཀམྨནྟདཱསོ སཱལཱདྭཱརེན ཨཱགཙྪནྟོ སེཊྛིབྷརིཡཱཡ རོདནསདྡཾ སུཏྭཱ སཱལཾ པཝིསིཏྭཱ ཨཏྟནོ སཱམིཀེ དིསྭཱ པཱདེསུ ནིཔཏིཏྭཱ རོདིཏྭཱ ཀནྡིཏྭཱ ‘‘ཀིམཏྠཾ ཨིདྷཱགཏཏྠ, སཱམཱི’’ཏི པུཙྪི. སེཊྛི སབྦཾ ཨཱརོཙེསི. ཀམྨནྟདཱསོ ‘‘ཧོཏུ, སཱམི, མཱ ཙིནྟཡིཏྠཱ’’ཏི ཨུབྷོཔི ཨསྶཱསེཏྭཱ ཨཏྟནོ གེཧཾ ནེཏྭཱ གནྡྷོདཀེན ནྷཱཔེཏྭཱ བྷོཛེཏྭཱ ‘‘སཱམིཀཱ, ཝོ ཨཱགཏཱ’’ཏི སེསདཱསེ སནྣིཔཱཏེཏྭཱ དསྶེཏྭཱ ཀཏིཔཱཧཾ ཝཱིཏིནཱམེཏྭཱ སབྦེ དཱསེ གཧེཏྭཱ རཱཛངྒཎཾ གནྟྭཱ ཨུཔརཝཾ ཨཀཱསི. རཱཛཱ པཀྐོསཱཔེཏྭཱ ‘‘ཀིཾ ཨེཏ’’ནྟི པུཙྪི, ཏེ སབྦཾ ཏཾ པཝཏྟིཾ རཉྙོ ཨཱརོཙེསུཾ.

རཱཛཱ ¶ ཏེསཾ ཝཙནཾ སུཏྭཱ ཨུབྷོཔི སེཊྛཱི པཀྐོསཱཔེཏྭཱ སངྑསེཊྛིཾ པུཙྪི ‘‘སཙྩཾ ཀིར ཏཡཱ མཧཱསེཊྛི པཱིལི༹ཡསེཊྛིསྶ ཙཏྟཱལཱིསཀོཊིདྷནཾ དིནྣ’’ནྟི? ‘‘ཨཱམ, མཧཱརཱཛ, མམ སཧཱཡསྶ མཾ ཏཀྐེཏྭཱ རཱཛགཧཾ ཨཱགཏསྶ ན ཀེཝལཾ དྷནཾ, སབྦཾ ཝིབྷཝཛཱཏཾ སཝིཉྙཱཎཀཾ ཨཝིཉྙཱཎཀཾ དྭེ ཀོཊྛཱསེ ཀཏྭཱ སམབྷཱགེ ཨདཱསིནྟི. རཱཛཱ ‘‘སཙྩམེཏ’’ནྟི པཱིལི༹ཡསེཊྛིཾ པུཙྪི. ‘‘ཨཱམ, དེཝཱ’’ཏི. ‘‘ཏཡཱ པནསྶ ཏཉྙེཝ ཏཀྐེཏྭཱ ཨཱགཏསྶ ཨཏྠི ཀོཙི སཀྐཱརོ ཝཱ སམྨཱནོ ཝཱ ཀཏོ’’ཏི. སོ ཏུཎྷཱི ཨཧོསི. ཨཔི པན ཏེ ཨེཏསྶ པལཱཔཏུམྦམཏྟཾ དུསྶནྟེ པཀྑིཔཱཔེཏྭཱ དཱཔིཏཾ ¶ ཨཏྠཱིཏི. ཏམྤི སུཏྭཱ ཏུཎྷཱིཡེཝ ཨཧོསི. རཱཛཱ ‘‘ཀིཾ ཀཱཏབྦ’’ནྟི ཨམཙྩེཧི སདྡྷིཾ མནྟེཏྭཱ ཏཾ པརིབྷཱསིཏྭཱ ‘‘གཙྪཐ, པཱིལི༹ཡསེཊྛིསྶ གྷརེ སབྦཾ ཝིབྷཝཾ སངྑསེཊྛིསྶ དེཐཱ’’ཏི ཨཱཧ. བོདྷིསཏྟོ ‘‘མཧཱརཱཛ, མཡ྄ཧཾ པརསནྟཀེན ཨཏྠོ ནཏྠི, མཡཱ དིནྣམཏྟམེཝ པན དཱཔེཐཱ’’ཏི ཨཱཧ. རཱཛཱ བོདྷིསཏྟསྶ སནྟཀཾ དཱཔེསི. བོདྷིསཏྟོ སབྦཾ ཨཏྟནོ དིནྣཝིབྷཝཾ པཊིལབྷིཏྭཱ དཱསཔརིཝུཏོ རཱཛགཧམེཝ གནྟྭཱ ཀུཊུམྦཾ སཎྛཔེཏྭཱ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ པཱིལི༹ཡསེཊྛི དེཝདཏྟོ ཨཧོསི, སངྑསེཊྛི པན ཨཧམེཝ ཨཧོསི’’ནྟི.

ཨསམྤདཱནཛཱཏཀཝཎྞནཱ པཋམཱ.

[༡༣༢] ༢. བྷཱིརུཀཛཱཏཀཝཎྞནཱ

ཀུསལཱུཔདེསེ དྷིཏིཡཱ དལ༹ྷཱཡ ཙཱཏི ཨིདཾ སཏྠཱ ཛེཏཝནེ ཝིཧརནྟོ ཨཛཔཱལནིགྲོདྷེ མཱརདྷཱིཏཱནཾ པལོབྷནསུཏྟནྟཾ ཨཱརབྦྷ ཀཐེསི. བྷགཝཏཱ ཧི ཨཱདིཏོ པཊྛཱཡ ཝུཏྟཾ –

‘‘དདྡལླམཱནཱ ཨཱགཉྪུཾ, ཏཎྷཱ ཙ ཨརཏཱི རགཱ;

ཏཱ ཏཏྠ པནུདཱི སཏྠཱ, ཏཱུལཾ བྷཊྛཾཝ མཱལུཏོ’’ཏི. (སཾ. ནི. ༡.༡༦༡);

ཨེཝཾ ཡཱཝ པརིཡོསཱནཱ ཏསྶ སུཏྟནྟསྶ ཀཐིཏཀཱལེ དྷམྨསབྷཱཡཾ སནྣིཔཏིཏཱ བྷིཀྑཱུ ཀཐཾ སམུཊྛཱཔེསུཾ ‘‘ཨཱཝུསོ, སམྨཱསམྦུདྡྷོ མཱརདྷཱིཏརོ ¶ ཨནེཀསཏཱནིཔི དིབྦརཱུཔཱནི མཱཔེཏྭཱ པལོབྷནཏྠཱཡ ཨུཔསངྐམནྟིཡོ ཨཀྑཱིནིཔི ཨུམྨཱིལེཏྭཱ ན ཨོལོཀེསི, ཨཧོ བུདྡྷབལཾ ནཱམ ཨཙྪརིཡ’’ནྟི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ མཡ྄ཧཾ སབྦཱསཝེ ཁེཔེཏྭཱ སབྦཉྙུཏཾ སམྤཏྟསྶ མཱརདྷཱིཏཱནཾ ཨནོལོཀནཾ ནཱམ ཨཙྪརིཡཾ, ཨཧཉྷི པུབྦེ བོདྷིཉཱཎཾ པརིཡེསམཱནོ སཀིལེསཀཱལེཔི ཨབྷིསངྑཏཾ དིབྦརཱུཔཾ ཨིནྡྲིཡཱནི བྷིནྡིཏྭཱ ཀིལེསཝསེན ཨནོལོཀེཏྭཱཝ གནྟྭཱ མཧཱརཛྫཾ པཱཔུཎི’’ནྟི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ བྷཱཏིཀསཏསྶ ཀནིཊྛོ ཨཧོསཱིཏི སབྦཾ ཧེཊྛཱ ཏཀྐསིལཱཛཱཏཀེ ¶ ཝུཏྟནཡེནེཝ ཝིཏྠཱརེཏབྦཾ. ཏདཱ པན ཏཀྐསིལཱནགརཝཱསཱིཧི བཧིནགརེ སཱལཱཡཾ བོདྷིསཏྟཾ ཨུཔསངྐམིཏྭཱ ཡཱཙིཏྭཱ རཛྫཾ པཊིཙྪཱཔེཏྭཱ ཨབྷིསེཀེ ཀཏེ ཏཀྐསིལཱནགརཝཱསིནོ ནགརཾ དེཝནགརཾ ཝིཡ, རཱཛབྷཝནཉྩ ཨིནྡབྷཝནཾ ཝིཡ ཨལངྐརིཾསུ. ཏདཱ བོདྷིསཏྟོ ནགརཾ པཝིསིཏྭཱ རཱཛབྷཝནེ པཱསཱདེ མཧཱཏལེ སམུསྶིཏསེཏཙྪཏྟཾ རཏནཝརཔལླངྐཾ ཨབྷིརུཡ྄ཧ དེཝརཱཛལཱིལཱཡ ནིསཱིདི, ཨམཙྩཱ ཙ བྲཱཧྨཎགཧཔཏིཀཱདཡོ ཙ ཁཏྟིཡཀུམཱརཱ ཙ སབྦཱལངྐཱརཔཊིམཎྜིཏཱ པརིཝཱརེཏྭཱ ཨཊྛཾསུ, དེཝཙྪརཱཔཊིབྷཱགཱ སོལ༹སསཧསྶནཱཊཀིཏྠིཡོ ནཙྩགཱིཏཝཱདིཏཀུསལཱ ཨུཏྟམཝིལཱསསམྤནྣཱ ནཙྩགཱིཏཝཱདིཏཱནི ¶ པཡོཛེསུཾ. གཱིཏཝཱདིཏསདྡེན རཱཛབྷཝནཾ མེགྷཏྠནིཏཔཱུརིཏཱ མཧཱསམུདྡཀུཙྪི ཝིཡ ཨེཀནིནྣཱདཾ ཨཧོསི. བོདྷིསཏྟོ ཏཾ ཨཏྟནོ སིརིསོབྷགྒཾ ཨོལོཀཡམཱནོཝ ཙིནྟེསི ‘‘སཙཱཧཾ ཏཱསཾ ཡཀྑིནཱིནཾ ཨབྷིསངྑཏཾ དིབྦརཱུཔཾ ཨོལོཀེསྶཾ, ཛཱིཝིཏཀྑཡཾ པཏྟོ ཨབྷཝིསྶཾ, ཨིམཾ སིརིསོབྷགྒཾ ན ཨོལོཀེསྶཾ. པཙྩེཀབུདྡྷཱནཾ པན ཨོཝཱདེ ཋིཏབྷཱཝེན ཨིདཾ མཡཱ སམྤཏྟ’’ནྟི. ཨེཝཉྩ པན ཙིནྟེཏྭཱ ཨུདཱནཾ ཨུདཱནེནྟོ ཨིམཾ གཱཐམཱཧ –

༡༣༢.

‘‘ཀུསལཱུཔདེསེ དྷིཏིཡཱ དལ༹ྷཱཡ ཙ, ཨནིཝཏྟིཏཏྟཱ བྷཡབྷཱིརུཏཱཡ ཙ;

ན རཀྑསཱིནཾ ཝསམཱགམིམྷསེ, ས སོཏྠིབྷཱཝོ མཧཏཱ བྷཡེན མེ’’ཏི.

ཏཏྠ ¶ ཀུསལཱུཔདེསེཏི ཀུསལཱནཾ ཨུཔདེསེ, པཙྩེཀབུདྡྷཱནཾ ཨོཝཱདེཏི ཨཏྠོ. དྷིཏིཡཱ དལ༹ྷཱཡ ཙཱཏི དལ༹ྷཱཡ དྷིཏིཡཱ ཙ, ཐིརེན ཨབྦོཙྪིནྣནིརནྟརཝཱིརིཡེན ཙཱཏི ཨཏྠོ. ཨནིཝཏྟིཏཏྟཱ བྷཡབྷཱིརུཏཱཡ ཙཱཏི བྷཡབྷཱིརུཏཱཡ ཨནིཝཏྟིཏཏཱཡ ཙ. ཏཏྠ བྷཡནྟི ཙིཏྟུཏྲཱསམཏྟཾ པརིཏྟབྷཡཾ. བྷཱིརུཏཱཏི སརཱིརཀམྤནཔྤཏྟཾ མཧཱབྷཡཾ. ཨིདཾ ཨུབྷཡམྤི མཧཱསཏྟསྶ ‘‘ཡཀྑིནིཡོ ནཱམེཏཱ མནུསྶཁཱདིཀཱ’’ཏི བྷེརཝཱརམྨཎཾ དིསྭཱཔི ནཱཧོསི. ཏེནཱཧ ‘‘ཨནིཝཏྟིཏཏྟཱ བྷཡབྷཱིརུཏཱཡ ཙཱ’’ཏི. བྷཡབྷཱིརུཏཱཡ ཨབྷཱཝེནེཝ བྷེརཝཱརམྨཎཾ དིསྭཱཔི ཨནིཝཏྟནབྷཱཝེནཱཏི ཨཏྠོ. ན རཀྑསཱིནཾ ཝསམཱགམིམྷསེཏི ཡཀྑཀནྟཱརེ ཏཱསཾ རཀྑསཱིནཾ ཝསཾ ན ཨགམིམྷ. ཡསྨཱ ཨམྷཱཀཾ ཀུསལཱུཔདེསེ དྷིཏི ཙ དལ༹ྷཱ ཨཧོསི, བྷཡབྷཱིརུཏཱབྷཱཝེན ཙ ཨནིཝཏྟནསབྷཱཝཱ ཨཧུམྷཱ, ཏསྨཱ རཀྑསཱིནཾ ཝསཾ ¶ ན ཨགམིམྷཱཏི ཝུཏྟཾ ཧོཏི. ས སོཏྠིབྷཱཝོ མཧཏཱ བྷཡེན མེཏི སོ མཡ྄ཧཾ ཨཡཾ ཨཛྫ མཧཏཱ བྷཡེན རཀྑསཱིནཾ སནྟིཀཱ པཏྟབྦེན དུཀྑདོམནསྶེན སོཏྠིབྷཱཝོ ཁེམབྷཱཝོ པཱིཏིསོམནསྶབྷཱཝོཡེཝ ཛཱཏོཏི.

ཨེཝཾ མཧཱསཏྟོ ཨིམཱཡ གཱཐཱཡ དྷམྨཾ དེསེཏྭཱ དྷམྨེན རཛྫཾ ཀཱརེཏྭཱ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཨཧཾ ཏེན སམཡེན ཏཀྐསིལཾ གནྟྭཱ རཛྫཔྤཏྟཀུམཱརོ ཨཧོསི’’ནྟི.

བྷཱིརུཀཛཱཏཀཝཎྞནཱ དུཏིཡཱ.

[༡༣༣] ༣. གྷཏཱསནཛཱཏཀཝཎྞནཱ

ཁེམཾ ¶ ཡཧིནྟི ཨིདཾ སཏྠཱ ཛེཏཝནེ ཝིཧརནྟོ ཨཉྙཏརཾ བྷིཀྑུཾ ཨཱརབྦྷ ཀཐེསི. སོ ཧི བྷིཀྑུ སཏྠུ སནྟིཀེ ཀམྨཊྛཱནཾ གཧེཏྭཱ པཙྩནྟཾ གནྟྭཱ ཨེཀཾ གཱམཀཾ ཨུཔནིསྶཱཡ ཨརཉྙསེནཱསནེ ཝསྶཾ ཨུཔགཉྪི. ཏསྶ པཋམམཱསེཡེཝ པིཎྜཱཡ པཝིཊྛསྶ པཎྞསཱལཱ ཛྷཱཡིཏྠ. སོ ཝསནཊྛཱནཱབྷཱཝེན ཀིལམནྟོ ཨུཔཊྛཱཀཱནཾ ཨཱཙིཀྑི. ཏེ ‘‘ཧོཏུ, བྷནྟེ, པཎྞསཱལཾ ཀརིསྶཱམ, ཀསཱམ ཏཱཝ, ཝཔཱམ ཏཱཝཱ’’ཏིཨཱདཱིནི ཝདནྟཱ ¶ ཏེམཱསཾ ཝཱིཏིནཱམེསུཾ. སོ སེནཱསནསཔྤཱཡཱབྷཱཝེན ཀམྨཊྛཱནཾ མཏྠཀཾ པཱཔེཏུཾ ནཱསཀྑི. སོ ནིམིཏྟམཏྟམྤི ཨནུཔྤཱདེཏྭཱ ཝུཏྠཝསྶོ ཛེཏཝནཾ གནྟྭཱ སཏྠཱརཾ ཝནྡིཏྭཱ ཨེཀམནྟཾ ནིསཱིདི. སཏྠཱ ཏེན སདྡྷིཾ པཊིསནྠཱརཾ ཀཏྭཱ ‘‘ཀིཾ ནུ ཁོ ཏེ, བྷིཀྑུ, ཀམྨཊྛཱནཾ སཔྤཱཡཾ ཛཱཏ’’ནྟི པུཙྪི. སོ ཨཱདིཏོ པཊྛཱཡ ཨསཔྤཱཡབྷཱཝཾ ཀཐེསི. སཏྠཱ ‘‘པུབྦེ ཁོ, བྷིཀྑུ, ཏིརཙྪཱནཱཔི ཨཏྟནོ སཔྤཱཡཱསཔྤཱཡཾ ཉཏྭཱ སཔྤཱཡཀཱལེ ཝསིཏྭཱ ཨསཔྤཱཡཀཱལེ ཝསནཊྛཱནཾ པཧཱཡ ཨཉྙཏྠ ཨགམཾསུ, ཏྭཾ ཀསྨཱ ཨཏྟནོ སཔྤཱཡཱསཔྤཱཡཾ ན ཨཉྙཱསཱི’’ཏི ཝཏྭཱ ཏེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ སཀུཎཡོནིཡཾ ནིབྦཏྟིཏྭཱ ཝིཉྙུཏཾ པཏྭཱ སོབྷགྒཔྤཏྟོ སཀུཎརཱཛཱ ཧུཏྭཱ ཨེཀསྨིཾ ཨརཉྙཱཡཏནེ ཛཱཏསྶརཏཱིརེ སཱཁཱཝིཊཔསམྤནྣཾ བཧལཔཏྟཔལཱསཾ མཧཱརུཀྑཾ ཨུཔནིསྶཱཡ སཔརིཝཱརོ ཝཱསཾ ཀཔྤེསི. བཧཱུ སཀུཎཱ ཏསྶ རུཀྑསྶ ¶ ཨུདཀམཏྠཀེ པཏྠཊསཱཁཱསུ ཝསནྟཱ སརཱིརཝལ༹ཉྫཾ ཨུདཀེ པཱཏེནྟི. ཏསྨིཉྩ ཛཱཏསྶརེ ཙཎྜོ ནཱགརཱཛཱ ཝསཏི. ཏསྶ ཨེཏདཧོསི ‘‘ཨིམེ སཀུཎཱ མཡ྄ཧཾ ནིཝཱསེ ཛཱཏསྶརེ སརཱིརཝལ༹ཉྫཾ པཱཏེནྟི, ཡཾནཱུནཱཧཾ ཨུདཀཏོ ཨགྒིཾ ཨུཊྛཱཔེཏྭཱ རུཀྑཾ ཛྷཱཔེཏྭཱ ཨེཏེ པལཱཔེཡྻ’’ནྟི. སོ ཀུདྡྷམཱནསོ རཏྟིབྷཱགེ སབྦེསཾ སཀུཎཱནཾ སནྣིཔཏིཏྭཱ རུཀྑསཱཁཱསུ ནིཔནྣཀཱལེ པཋམཾ ཏཱཝ ཨུདྡྷནཱརོཔིཏཾ ཝིཡ ཨུདཀཾ པཀྐུདྷཱཔེཏྭཱ དུཏིཡཝཱརེ དྷཱུམཾ ཨུཊྛཱཔེཏྭཱ ཏཏིཡཝཱརེ ཏཱལཀྑནྡྷཔྤམཱཎཾ ཛཱལཾ ཨུཊྛཱཔེསི. བོདྷིསཏྟོ ཨུདཀཏོ ཛཱལཾ ཨུཊྛཧམཱནཾ དིསྭཱ ‘‘བྷོ, སཀུཎཱ, ཨགྒིནཱ ཨཱདིཏྟཾ ནཱམ ཨུདཀེན ནིབྦཱཔེནྟི, ཨིདཱནི པན ཨུདཀམེཝ ཨཱདིཏྟཾ. ན སཀྐཱ ཨམྷེཧི ཨིདྷ ཝསིཏུཾ, ཨཉྙཏྠ གམིསྶཱམཱ’’ཏི ཝཏྭཱ ཨིམཾ གཱཐམཱཧ –

༡༣༣.

‘‘ཁེམཾ ཡཧིཾ ཏཏྠ ཨརཱི ཨུདཱིརིཏོ, དཀསྶ མཛ྄ཛྷེ ཛལཏེ གྷཏཱསནོ;

ན ཨཛྫ ཝཱསོ མཧིཡཱ མཧཱིརུཧེ, དིསཱ བྷཛཝ྄ཧོ སརཎཱཛྫ ནོབྷཡ’’ནྟི.

ཏཏྠ ¶ ཁེམཾ ཡཧིཾ ཏཏྠ ཨརཱི ཨུདཱིརིཏོཏི ཡསྨིཾ ཨུདཀཔིཊྛེ ཁེམབྷཱཝོ ནིབྦྷཡབྷཱཝོ, ཏསྨིཾ ཨཏྟཔཙྩཏྠིཀོ སཔཏྟོ ཨུཊྛིཏོ. དཀསྶཱཏི ཨུདཀསྶ. གྷཏཱསནོཏི ཨགྒི. སོ ཧི གྷཏཾ ཨསྣཱཏི, ཏསྨཱ ‘‘གྷཏཱསནོ’’ཏི ¶ ཝུཙྩཏི. ན ཨཛྫ ཝཱསོཏི ཨཛྫ ནོ ཝཱསོ ནཏྠི. མཧིཡཱ མཧཱིརུཧེཏི མཧིརུཧོ ཝུཙྩཏི རུཀྑོ, ཏསྨིཾ ཨིམིསྶཱ མཧིཡཱ ཛཱཏེ རུཀྑེཏི ཨཏྠོ. དིསཱ བྷཛཝ྄ཧོཏི དིསཱ བྷཛཐ གཙྪཐ. སརཎཱཛྫ ནོ བྷཡནྟི ཨཛྫ ཨམྷཱཀཾ སརཎཏོ བྷཡཾ ཛཱཏཾ, པཊིསརཎཊྛཱནཏོ བྷཡཾ ཨུཔྤནྣནྟི ཨཏྠོ.

ཨེཝཾ ཝཏྭཱ བོདྷིསཏྟོ ཨཏྟནོ ཝཙནཀརེ སཀུཎེ ཨཱདཱཡ ཨུཔྤཏིཏྭཱ ཨཉྙཏྠ གཏོ. བོདྷིསཏྟསྶ ཝཙནཾ ཨགྒཧེཏྭཱ ཋིཏསཀུཎཱ ཛཱིཝིཏཀྑཡཾ པཏྟཱ.

སཏྠཱ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེཏྭཱ ཛཱཏཀཾ སམོདྷཱནེསི, སཙྩཔརིཡོསཱནེ སོ བྷིཀྑུ ཨརཧཏྟེ པཏིཊྛཱསི.

ཏདཱ བོདྷིསཏྟསྶ ཝཙནཀརཱ སཀུཎཱ བུདྡྷཔརིསཱ ཨཧེསུཾ, སཀུཎརཱཛཱ པན ཨཧམེཝ ཨཧོསིནྟི.

གྷཏཱསནཛཱཏཀཝཎྞནཱ ཏཏིཡཱ.

[༡༣༤] ༤. ཛྷཱནསོདྷནཛཱཏཀཝཎྞནཱ

ཡེ ¶ སཉྙིནོཏི ཨིདཾ སཏྠཱ ཛེཏཝནེ ཝིཧརནྟོ སངྐསྶནགརདྭཱརེ ཨཏྟནཱ སཾཁིཏྟེན པུཙྪིཏཔཉྷསྶ དྷམྨསེནཱཔཏིནོ ཝིཏྠཱརབྱཱཀརཎཾ ཨཱརབྦྷ ཀཐེསི. ཏཏྲིདཾ ཨཏཱིཏཝཏྠུ – ཨཏཱིཏེ ཀིར བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨརཉྙཱཡཏནེ ཀཱལཾ ཀརོནྟོ ཨནྟེཝཱསིཀེཧི པུཙྪིཏོ ‘‘ནེཝསཉྙཱིནཱསཉྙཱི’’ཏི ཨཱཧ…པེ… ཏཱཔསཱ ཛེཊྛནྟེཝཱསིཀསྶ ཀཐཾ ན གཎྷིཾསུ. བོདྷིསཏྟོ ཨཱབྷསྶརཏོ ཨཱགནྟྭཱ ཨཱཀཱསེ ཋཏྭཱ ཨིམཾ གཱཐམཱཧ –

༡༣༤.

‘‘ཡེ སཉྙིནོ ཏེཔི དུགྒཏཱ, ཡེཔི ཨསཉྙིནོ ཏེཔི དུགྒཏཱ;

ཨེཏཾ ཨུབྷཡཾ ཝིཝཛྫཡ, ཏཾ སམཱཔཏྟིསུཁཾ ཨནངྒཎ’’ནྟི.

ཏཏྠ ¶ ཡེ སཉྙིནོཏི ཋཔེཏྭཱ ནེཝསཉྙཱནཱསཉྙཱཡཏནལཱབྷིནོ ཨཝསེསེ སཙིཏྟཀསཏྟེ དསྶེཏི. ཏེཔི དུགྒཏཱཏི ཏསྶཱ སམཱཔཏྟིཡཱ ཨལཱབྷཏོ ཏེཔི དུགྒཏཱ ནཱམ. ཡེཔི ཨསཉྙིནོཏི ཨསཉྙབྷཝེ ¶ ནིབྦཏྟེ ཨཙིཏྟཀསཏྟེ དསྶེཏི. ཏེཔི དུགྒཏཱཏི ཏེཔི ཨིམིསྶཱཡེཝ སམཱཔཏྟིཡཱ ཨལཱབྷཏོ དུགྒཏཱཡེཝ ནཱམ. ཨེཏཾ ཨུབྷཡཾ ཝིཝཛྫཡཱཏི ཨེཏཾ ཨུབྷཡམྤི སཉྙིབྷཝཉྩ ཨསཉྙིབྷཝཉྩ ཝིཝཛྫཡ པཛཧཱཏི ཨནྟེཝཱསིཀཾ ཨོཝདཏི. ཏཾ སམཱཔཏྟིསུཁཾ ཨནངྒཎནྟི ཏཾ ནེཝསཉྙཱནཱསཉྙཱཡཏནསམཱཔཏྟིལཱབྷིནོ སནྟཊྛེན ‘‘སུཁ’’ནྟི སངྑཾ གཏཾ ཛྷཱནསུཁཾ ཨནངྒཎཾ ནིདྡོསཾ བལཝཙིཏྟེཀགྒཏཱསབྷཱཝེནཔི ཏཾ ཨནངྒཎཾ ནཱམ ཛཱཏཾ.

ཨེཝཾ བོདྷིསཏྟོ དྷམྨཾ དེསེཏྭཱ ཨནྟེཝཱསིཀསྶ གུཎཾ ཀཐེཏྭཱ བྲཧྨལོཀམེཝ ཨགམཱསི. ཏདཱ སེསཏཱཔསཱ ཛེཊྛནྟེཝཱསིཀསྶ སདྡཧིཾསུ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཛེཊྛནྟེཝཱསིཀོ སཱརིཔུཏྟོ, མཧཱབྲཧྨཱ པན ཨཧམེཝ ཨཧོསི’’ནྟི.

ཛྷཱནསོདྷནཛཱཏཀཝཎྞནཱ ཙཏུཏྠཱ.

[༡༣༥] ༥. ཙནྡཱབྷཛཱཏཀཝཎྞནཱ

ཙནྡཱབྷནྟི ¶ ཨིདཾ སཏྠཱ ཛེཏཝནེ ཝིཧརནྟོ སངྐསྶནགརདྭཱརེ ཐེརསྶེཝ པཉྷབྱཱཀརཎཾ ཨཱརབྦྷ ཀཐེསི. ཨཏཱིཏེ ཀིར བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨརཉྙཱཡཏནེ ཀཱལཾ ཀརོནྟོ ཨནྟེཝཱསིཀེཧི པུཙྪིཏོ ‘‘ཙནྡཱབྷཾ སཱུརིཡཱབྷ’’ནྟི ཝཏྭཱ ཨཱབྷསྶརེ ནིབྦཏྟོ. ཏཱཔསཱ ཛེཊྛནྟེཝཱསིཀསྶ ན སདྡཧིཾསུ. བོདྷིསཏྟོ ཨཱབྷསྶརཏོ ཨཱགནྟྭཱ ཨཱཀཱསེ ཋིཏོ ཨིམཾ གཱཐམཱཧ –

༡༣༥.

‘‘ཙནྡཱབྷཾ སཱུརིཡཱབྷཉྩ, ཡོདྷ པཉྙཱཡ གཱདྷཏི;

ཨཝིཏཀྐེན ཛྷཱནེན, ཧོཏི ཨཱབྷསྶརཱུཔགོ’’ཏི.

ཏཏྠ ཙནྡཱབྷནྟི ཨོདཱཏཀསིཎཾ དསྶེཏི. སཱུརིཡཱབྷནྟི པཱིཏཀསིཎཾ. ཡོདྷ པཉྙཱཡ གཱདྷཏཱིཏི ཡོ པུགྒལོ ཨིདྷ སཏྟལོཀེ ཨིདཾ ཀསིཎདྭཡཾ པཉྙཱཡ གཱདྷཏི, ཨཱརམྨཎཾ ཀཏྭཱ ཨནུཔཝིསཏི, ཏཏྠེཝ པཏིཊྛཧཏི ¶ . ཨཐ ཝཱ ཙནྡཱབྷཾ སཱུརིཡཱབྷཉྩ, ཡོདྷ པཉྙཱཡ གཱདྷཏཱིཏི ཡཏྟཀཾ ¶ ཋཱནཾ ཙནྡཱབྷཱ ཙ སཱུརིཡཱབྷཱ ཙ པཏྠཊཱ, ཏཏྠཀེ ཋཱནེ པཊིབྷཱགཀསིཎཾ ཝཌྜྷེཏྭཱ ཏཾ ཨཱརམྨཎཾ ཀཏྭཱ ཛྷཱནཾ ནིབྦཏྟེནྟོ ཨུབྷཡམྤེཏཾ ཨཱབྷཾ པཉྙཱཡ གཱདྷཏི ནཱམ. ཏསྨཱ ཨཡམྤེཏྠ ཨཏྠོཡེཝ. ཨཝིཏཀྐེན ཛྷཱནེན, ཧོཏི ཨཱབྷསྶརཱུཔགོཏི སོ པུགྒལོ ཏཐཱ ཀཏྭཱ པཊིལདྡྷེན དུཏིཡེན ཛྷཱནེན ཨཱབྷསྶརབྲཧྨལོཀཱུཔགོ ཧོཏཱིཏི.

ཨེཝཾ བོདྷིསཏྟོ ཏཱཔསེ བོདྷེཏྭཱ ཛེཊྛནྟེཝཱསིཀསྶ གུཎཾ ཀཐེཏྭཱ བྲཧྨལོཀམེཝ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཛེཊྛནྟེཝཱསིཀོ སཱརིཔུཏྟོ, མཧཱབྲཧྨཱ པན ཨཧམེཝ ཨཧོསི’’ནྟི.

ཙནྡཱབྷཛཱཏཀཝཎྞནཱ པཉྩམཱ.

[༡༣༦] ༦. སུཝཎྞཧཾསཛཱཏཀཝཎྞནཱ

ཡཾ ལདྡྷཾ ཏེན ཏུཊྛབྦནྟི ཨིདཾ སཏྠཱ ཛེཏཝནེ ཝིཧརནྟོ ཐུལླནནྡཾ བྷིཀྑུནིཾ ཨཱརབྦྷ ཀཐེསི. སཱཝཏྠིཡཉྷི ཨཉྙཏརོ ཨུཔཱསཀོ བྷིཀྑུནིསངྒྷཾ ལསུཎེན པཝཱརེཏྭཱ ཁེཏྟཔཱལཾ ཨཱཎཱཔེསི ‘‘སཙེ བྷིཀྑུནིཡོ ཨཱགཙྪནྟི, ཨེཀེཀཱཡ བྷིཀྑུནིཡཱ དྭེ ཏཡོ བྷཎྜིཀེ དེཧཱི’’ཏི. ཏཏོ པཊྛཱཡ བྷིཀྑུནིཡོ ཏསྶ གེཧམྤི ¶ ཁེཏྟམྤི ལསུཎཏྠཱཡ གཙྪནྟི. ཨཐེཀསྨིཾ ཨུསྶཝདིཝསེ ཏསྶ གེཧེ ལསུཎཾ པརིཀྑཡཾ ཨགམཱསི. ཐུལླནནྡཱ བྷིཀྑུནཱི སཔརིཝཱརཱ གེཧཾ གནྟྭཱ ‘‘ལསུཎེནཱཝུསོ ཨཏྠོ’’ཏི ཝཏྭཱ ‘‘ནཏྠཡྻེ, ཡཐཱབྷཏཾ ལསུཎཾ པརིཀྑཱིཎཾ, ཁེཏྟཾ གཙྪཐཱ’’ཏི ཝུཏྟཱ ཁེཏྟཾ གནྟྭཱ ན མཏྟཾ ཛཱནིཏྭཱ ལསུཎཾ ཨཱཧརཱཔེསི. ཁེཏྟཔཱལོ ཨུཛ྄ཛྷཱཡི ‘‘ཀཐཉྷི ནཱམ བྷིཀྑུནིཡོ ན མཏྟཾ ཛཱནིཏྭཱ ལསུཎཾ ཧརཱཔེསྶནྟཱི’’ཏི? ཏསྶ ཀཐཾ སུཏྭཱ ཡཱ ཏཱ བྷིཀྑུནིཡོ ཨཔྤིཙྪཱ, ཏཱཔི, ཏཱསཾ སུཏྭཱ བྷིཀྑཱུཔི, ཨུཛ྄ཛྷཱཡིཾསུ. ཨུཛ྄ཛྷཱཡིཏྭཱ ཙ པན བྷགཝཏོ ཨེཏམཏྠཾ ཨཱརོཙེསུཾ. བྷགཝཱ ཐུལླནནྡཾ བྷིཀྑནིཾ གརཧིཏྭཱ ‘‘བྷིཀྑཝེ, མཧིཙྪོ པུགྒལོ ནཱམ ཝིཛཱཏམཱཏུཡཱཔི ཨཔྤིཡོ ཧོཏི ཨམནཱཔོ, ཨཔྤསནྣེ པསཱདེཏུཾ, པསནྣཱནཾ ཝཱ བྷིཡྻོསོམཏྟཱཡ པསཱདཾ ཛནེཏུཾ, ཨནུཔྤནྣཾ ཝཱ ལཱབྷཾ ཨུཔྤཱདེཏུཾ, ཨུཔྤནྣཾ ཝཱ ¶ པན ལཱབྷཾ ཐིརཾ ཀཱཏུཾ ན སཀྐོཏི. ཨཔྤིཙྪོ པན པུགྒལོ ཨཔྤསནྣེ པསཱདེཏུཾ, པསནྣཱནཾ ཝཱ བྷིཡྻོསོམཏྟཱཡ པསཱདཾ ཛནེཏུཾ, ཨནུཔྤནྣཾ ཝཱ ལཱབྷཾ ཨུཔྤཱདེཏུཾ, ཨུཔྤནྣཾ ཝཱ པན ལཱབྷཾ ཐིརཾ ཀཱཏུཾ སཀྐོཏཱི’’ཏིཨཱདིནཱ ནཡེན བྷིཀྑཱུནཾ ཏདནུཙྪཝིཀཾ ¶ དྷམྨཾ ཀཐེཏྭཱ ‘‘ན, བྷིཀྑཝེ, ཐུལླནནྡཱ ཨིདཱནེཝ མཧིཙྪཱ, པུབྦེཔི མཧིཙྪཱཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨཉྙཏརསྨིཾ བྲཱཧྨཎཀུལེ ནིབྦཏྟི. ཏསྶ ཝཡཔྤཏྟསྶ སམཱནཛཱཏིཀཱ ཀུལཱ པཛཱཔཏིཾ ཨཱཧརིཾསུ. ཏསྶཱ ནནྡཱ ནནྡཱཝཏཱི སུནྡརཱིནནྡཱཏི ཏིསྶོ དྷཱིཏརོ ཨཧེསུཾ. ཏཱསུ པཏིཀུལཾ ཨགཏཱསུཡེཝ བོདྷིསཏྟོ ཀཱལཾ ཀཏྭཱ སུཝཎྞཧཾསཡོནིཡཾ ནིབྦཏྟི, ཛཱཏིསྶརཉཱཎཉྩསྶ ཨུཔྤཛྫི. སོ ཝཡཔྤཏྟོ སུཝཎྞསཉྪནྣཾ སོབྷགྒཔྤཏྟཾ མཧནྟཾ ཨཏྟབྷཱཝཾ དིསྭཱ ‘‘ཀུཏོ ནུ ཁོ ཙཝིཏྭཱ ཨཧཾ ཨིདྷཱུཔཔནྣོ’’ཏི ཨཱཝཛྫེནྟོ ‘‘མནུསྶལོཀཏོ’’ཏི ཉཏྭཱ པུན ‘‘ཀཐཾ ནུ ཁོ མེ བྲཱཧྨཎཱི ཙ དྷཱིཏརོ ཙ ཛཱིཝནྟཱི’’ཏི ཨུཔདྷཱརེནྟོ ‘‘པརེསཾ བྷཏིཾ ཀཏྭཱ ཀིཙྪེན ཛཱིཝནྟཱི’’ཏི ཉཏྭཱ ཙིནྟེསི ‘‘མཡ྄ཧཾ སརཱིརེ སོཝཎྞམཡཱནི པཏྟཱནི ཀོཊྚནགྷཊྚནཁམཱནི, ཨིཏོ ཏཱསཾ ཨེཀེཀཾ པཏྟཾ དསྶཱམི, ཏེན མེ པཛཱཔཏི ཙ དྷཱིཏརོ ཙ སུཁཾ ཛཱིཝིསྶནྟཱི’’ཏི. སོ ཏཏྠ གནྟྭཱ པིཊྛིཝཾསཀོཊིཡཾ ནིལཱིཡི, བྲཱཧྨཎཱི ཙ དྷཱིཏརོ ཙ བོདྷིསཏྟཾ དིསྭཱ ‘‘ཀུཏོ ¶ ཨཱགཏོསི, སཱམཱི’’ཏི པུཙྪིཾསུ. ‘‘ཨཧཾ ཏུམྷཱཀཾ པིཏཱ ཀཱལཾ ཀཏྭཱ སུཝཎྞཧཾསཡོནིཡཾ ནིབྦཏྟོ ཏུམྷེ དཊྛུཾ ཨཱགཏོ. ཨིཏོ པཊྛཱཡ ཏུམྷཱཀཾ པརེསཾ བྷཏིཾ ཀཏྭཱ དུཀྑཛཱིཝིཀཱཡ ཛཱིཝནཀིཙྩཾ ནཏྠི, ཨཧཾ ཝོ ཨེཀེཀཾ པཏྟཾ དསྶཱམི, ཏཾ ཝིཀྐིཎིཏྭཱ སུཁེན ཛཱིཝཐཱ’’ཏི ཨེཀཾ པཏྟཾ དཏྭཱ ཨགམཱསི. སོ ཨེཏེནེཝ ནིཡཱམེན ཨནྟརནྟརཱ ཨཱགནྟྭཱ ཨེཀེཀཾ པཏྟཾ དེཏི, བྲཱཧྨཎཱི ཙ དྷཱིཏརོ ཙ ཨཌྜྷཱ སུཁིཏཱ ཨཧེསུཾ.

ཨཐེཀདིཝསཾ སཱ བྲཱཧྨཎཱི དྷཱིཏརོ ཨཱམནྟེསི ‘‘ཨམྨཱ, ཏིརཙྪཱནཱནཾ ནཱམ ཙིཏྟཾ དུཛྫཱནཾ. ཀདཱཙི ཝོ པིཏཱ ཨིདྷ ནཱགཙྪེཡྻ, ཨིདཱནིསྶ ཨཱགཏཀཱལེ སབྦཱནི པཏྟཱནིཔི ལུཉྩིཏྭཱ གཎྷཱམཱ’’ཏི. ཏཱ ‘‘ཨེཝཾ ནོ པིཏཱ ཀིལམིསྶཏཱི’’ཏི ན སམྤཊིཙྪིཾསུ. བྲཱཧྨཎཱི པན མཧིཙྪཏཱཡ པུན ཨེཀདིཝསཾ སུཝཎྞཧཾསརཱཛསྶ ཨཱགཏཀཱལེ ‘‘ཨེཧི ཏཱཝ, སཱམཱི’’ཏི ཝཏྭཱ ཏཾ ཨཏྟནོ སནྟིཀཾ ཨུཔགཏཾ ཨུབྷོཧི ཧཏྠེཧི གཧེཏྭཱ ¶ སབྦཔཏྟཱནི ལུཉྩི. ཏཱནི པན བོདྷིསཏྟསྶ རུཙིཾ ཝིནཱ བལཀྐཱརེན གཧིཏཏྟཱ སབྦཱནི བཀཔཏྟསདིསཱནི ཨཧེསུཾ. བོདྷིསཏྟོ པཀྑེ པསཱརེཏྭཱ གནྟུཾ ནཱསཀྑི. ཨཐ ནཾ སཱ མཧཱཙཱཊིཡཾ པཀྑིཔིཏྭཱ པོསེསི. ཏསྶ པུན ཨུཊྛཧནྟཱནི པཏྟཱནི སེཏཱནི སམྤཛྫིཾསུ. སོ སཉྫཱཏཔཏྟོ ཨུཔྤཏིཏྭཱ ཨཏྟནོ ཝསནཊྛཱནམེཝ གནྟྭཱ ན པུན ཨཱགམཱསི.

སཏྠཱ ཨིམཾ ཨཏཱིཏཾ ཨཱཧརིཏྭཱ ‘‘ན, བྷིཀྑཝེ, ཐུལླནནྡཱ ཨིདཱནེཝ མཧིཙྪཱ, པུབྦེཔི མཧིཙྪཱཡེཝ ¶ , མཧིཙྪཏཱཡ ཙ པན སུཝཎྞམྷཱ པརིཧཱིནཱ. ཨིདཱནི པན ཨཏྟནོ མཧིཙྪཏཱཡ ཨེཝ ལསུཎམྷཱཔི པརིཧཱཡིསྶཏི, ཏསྨཱ ཨིཏོ པཊྛཱཡ ལསུཎཾ ཁཱདིཏུཾ ན ལབྷིསྶཏི. ཡཐཱ ཙ ཐུལླནནྡཱ, ཨེཝཾ ཏཾ ནིསྶཱཡ སེསབྷིཀྑུནིཡོཔི. ཏསྨཱ བཧུཾ ལབྷིཏྭཱཔི པམཱཎམེཝ ཛཱནིཏབྦཾ, ཨཔྤཾ ལབྷིཏྭཱ པན ཡཐཱལདྡྷེནེཝ སནྟོསོ ཀཱཏབྦོ, ཨུཏྟརི ན པཏྠེཏབྦ’’ནྟི ཝཏྭཱ ཨིམཾ གཱཐམཱཧ –

༡༣༦.

‘‘ཡཾ ལདྡྷཾ ཏེན ཏུཊྛབྦཾ, ཨཏིལོབྷོ ཧི པཱཔཀོ;

ཧཾསརཱཛཾ གཧེཏྭཱན, སུཝཎྞཱ པརིཧཱཡཐཱ’’ཏི.

ཏཏྠ ཏུཊྛབྦནྟི ཏུསྶིཏབྦཾ.

ཨིདཾ པན ཝཏྭཱ སཏྠཱ ཨནེཀཔརིཡཱཡེན གརཧིཏྭཱ ‘‘ཡཱ པན བྷིཀྑུནཱི ལསུཎཾ ཁཱདེཡྻ, པཱཙིཏྟིཡ’’ནྟི (པཱཙི. ༧༩༤) སིཀྑཱཔདཾ པཉྙཱཔེཏྭཱ ཛཱཏཀཾ ¶ སམོདྷཱནེསི – ‘‘ཏདཱ བྲཱཧྨཎཱི ཨཡཾ ཐུལླནནྡཱ ཨཧོསི, ཏིསྶོ དྷཱིཏརོ ཨིདཱནི ཏིསྶོཡེཝ བྷགིནིཡོ, སུཝཎྞཧཾསརཱཛཱ པན ཨཧམེཝ ཨཧོསི’’ནྟི.

སུཝཎྞཧཾསཛཱཏཀཝཎྞནཱ ཚཊྛཱ.

[༡༣༧] ༧. བབྦུཛཱཏཀཝཎྞནཱ

ཡཏྠེཀོ ལབྷཏེ བབྦཱུཏི ཨིདཾ སཏྠཱ ཛེཏཝནེ ཝིཧརནྟོ ཀཱཎམཱཏུསིཀྑཱཔདཾ (པཱཙི. ༢༣༠ ཨཱདཡོ) ཨཱརབྦྷ ཀཐེསི. སཱཝཏྠིཡཉྷི ཀཱཎམཱཏཱ ནཱམ ¶ དྷཱིཏུཝསེན པཱཀཊནཱམཱ ཨུཔཱསིཀཱ ཨཧོསི སོཏཱཔནྣཱ ཨརིཡསཱཝིཀཱ. སཱ དྷཱིཏརཾ ཀཱཎཾ ཨཉྙཏརསྨིཾ གཱམཀེ སམཱནཛཱཏིཀསྶ པུརིསསྶ ཨདཱསི. ཀཱཎཱ ཀེནཙིདེཝ ཀརཎཱིཡེན མཱཏུ གྷརཾ ཨགམཱསི. ཨཐསྶཱ སཱམིཀོ ཀཏིཔཱཧཙྩཡེན དཱུཏཾ པཱཧེསི ‘‘ཨཱགཙྪཏུ ཀཱཎཱ, ཨིཙྪཱམི ཀཱཎཱཡ ཨཱགམན’’ནྟི. ཀཱཎཱ དཱུཏསྶ ཝཙནཾ སུཏྭཱ ‘‘ཨམྨ, གམིསྶཱམཱི’’ཏི མཱཏརཾ ཨཱཔུཙྪི. ཀཱཎམཱཏཱ ‘‘ཨེཏྟཀཾ ཀཱལཾ ཝསིཏྭཱ ཀཐཾ ཏུཙྪཧཏྠཱཝ གམིསྶསཱི’’ཏི པཱུཝཾ པཙི. ཏསྨིཾཡེཝ ཁཎེ ཨེཀོ པིཎྜཙཱརིཀོ བྷིཀྑུ ཏསྶཱ ནིཝེསནཾ ཨགམཱསི, ཨུཔཱསིཀཱ ཏཾ ནིསཱིདཱཔེཏྭཱ པཏྟཔཱུརཾ པཱུཝཾ དཱཔེསི. སོ བྷིཀྑུ ནིཀྑམིཏྭཱ ཨཉྙསྶ ཨཱཙིཀྑི, ཏསྶཔི ཏཐེཝ དཱཔེསི. སོཔི ནིཀྑམིཏྭཱ ཨཉྙསྶ ཨཱཙིཀྑི, ཏསྶཔི ཏཐེཝཱཏི ཨེཝཾ ཙཏུནྣཾ ཛནཱནཾ དཱཔེསི ¶ . ཡཐཱཔཊིཡཏྟཾ པཱུཝཾ པརིཀྑཡཾ ཨགམཱསི, ཀཱཎཱཡ གམནཾ ན སམྤཛྫི. ཨཐསྶཱ སཱམིཀོ དུཏིཡམྤི, ཏཏིཡམྤི དཱུཏཾ པཱཧེསི. ཏཏིཡཾ པཱཧེནྟོ ཙ ‘‘སཙེ ཀཱཎཱ ནཱགཙྪིསྶཏི, ཨཧཾ ཨཉྙཾ པཛཱཔཏིཾ ཨཱནེསྶཱམཱི’’ཏི པཱཧེསི. ཏཡོཔི ཝཱརེ ཏེནེཝ ཨུཔཱཡེན གམནཾ ན སམྤཛྫི, ཀཱཎཱཡ སཱམིཀོ ཨཉྙཾ པཛཱཔཏིཾ ཨཱནེསི. ཀཱཎཱ ཏཾ པཝཏྟིཾ སུཏྭཱ རོདམཱནཱ ཨཊྛཱསི.

སཏྠཱ ཏཾ ཀཱརཎཾ ཉཏྭཱ པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ ཀཱཎམཱཏཱཡ ནིཝེསནཾ གནྟྭཱ པཉྙཏྟཱསནེ ནིསཱིདིཏྭཱ ཀཱཎམཱཏརཾ པུཙྪི ‘‘ཀིསྶཱཡཾ ཀཱཎཱ རོདཏཱི’’ཏི? ‘‘ཨིམིནཱ ནཱམ ཀཱརཎེནཱ’’ཏི ཙ སུཏྭཱ ཀཱཎམཱཏརཾ སམསྶཱསེཏྭཱ དྷམྨིཾ ཀཐཾ ཀཐེཏྭཱ ཨུཊྛཱཡཱསནཱ ཝིཧཱརཾ ཨགམཱསི. ཨཐ ཏེསཾ ཙཏུནྣཾ བྷིཀྑཱུནཾ ཏཡོ ཝཱརེ ཡཐཱཔཊིཡཏྟཔཱུཝཾ གཧེཏྭཱ ཀཱཎཱཡ གམནསྶ ཨུཔཙྪིནྣབྷཱཝོ བྷིཀྑུསངྒྷེ པཱཀཊོ ཛཱཏོ. ཨཐེཀདིཝསཾ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཨཱཝུསོ, ཙཏཱུཧི ནཱམ བྷིཀྑཱུཧི ཏཡོ ཝཱརེ ཀཱཎམཱཏཱཡ པཀྐཔཱུཝཾ ཁཱདིཏྭཱ ཀཱཎཱཡ གམནནྟརཱཡཾ ཀཏྭཱ སཱམིཀེན པརིཙྩཏྟཾ དྷཱིཏརཾ ནིསྶཱཡ མཧཱཨུཔཱསིཀཱཡ དོམནསྶཾ ཨུཔྤཱདིཏ’’ནྟི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ ¶ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ ཏེ ཙཏྟཱརོ བྷིཀྑཱུ ཀཱཎམཱཏཱཡ སནྟཀཾ ཁཱདིཏྭཱ ཏསྶཱ དོམནསྶཾ ཨུཔྤཱདེསུཾ, པུབྦེཔི ཨུཔྤཱདེསུཾཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ པཱསཱཎཀོཊྚཀཀུལེ ནིབྦཏྟིཏྭཱ ཝཡཔྤཏྟོ པརིཡོདཱཏསིཔྤོ ཨཧོསི. ཀཱསིརཊྛེ ཨེཀསྨིཾ ནིགམེ ཨེཀོ མཧཱཝིབྷཝོ སེཊྛི ཨཧོསི, ཏསྶ ནིདྷཱནགཏཱཡེཝ ཙཏྟཱལཱིས ཧིརཉྙཀོཊིཡོ ཨཧེསུཾ. ཨཐསྶ བྷརིཡཱ ཀཱལཾ ཀཏྭཱ དྷནསིནེཧེན གནྟྭཱ དྷནཔིཊྛིཡཾ མཱུསིཀཱ ཧུཏྭཱ ནིབྦཏྟི. ཨེཝཾ ཨནུཀྐམེན སབྦམྤི ཏཾ ཀུལཾ ཨབྦྷཏྠཾ ཨགམཱསི, ཝཾསོ ཨུཔཙྪིཛྫི. སོ གཱམོཔི ཚཌྜིཏོ ཨཔཎྞཏྟིཀབྷཱཝཾ ཨགམཱསི. ཏདཱ བོདྷིསཏྟོ ཏསྨིཾ པུརཱཎགཱམཊྛཱནེ པཱསཱཎེ ཨུཔྤཱཊེཏྭཱ ཀོཊྚེཏི. ཨཐ སཱ མཱུསིཀཱ གོཙརཱཡ ཙརམཱནཱ བོདྷིསཏྟཾ པུནཔྤུནཾ པསྶནྟཱི ཨུཔྤནྣསིནེཧཱ ཧུཏྭཱ ཙིནྟེསི ‘‘མཡ྄ཧཾ དྷནཾ བཧུ ནིཀྐཱརཎེན ནསྶིསྶཏི, ཨིམིནཱ སདྡྷིཾ ཨེཀཏོ ཧུཏྭཱ ཨིདཾ དྷནཾ དཏྭཱ མཾསཾ ཝིཀྐིཎཱཔེཏྭཱ ཁཱདིསྶཱམཱི’’ཏི. སཱ ཨེཀདིཝསཾ ཨེཀཾ ཀཧཱཔཎཾ མུཁེན ཌཾསིཏྭཱ བོདྷིསཏྟསྶ སནྟིཀཾ ཨགམཱསི. སོ ཏཾ དིསྭཱ པིཡཝཱཙཱཡ སམཱལཔནྟོ ‘‘ཀིཾ ནུ ཁོ, ཨམྨ, ཀཧཱཔཎཾ གཧེཏྭཱ ཨཱགཏཱསཱི’’ཏི ཨཱཧ. ཏཱཏ, ཨིམཾ གཧེཏྭཱ ཨཏྟནཱཔི པརིབྷུཉྫ, མཡ྄ཧམྤི མཾསཾ ཨཱཧརཱཏི. སོ ‘‘སཱདྷཱུ’’ཏི སམྤཊིཙྪིཏྭཱ ཀཧཱཔཎཾ ཨཱདཱཡ གྷརཾ གནྟྭཱ ཨེཀེན མཱསཀེན མཾསཾ ¶ ཀིཎིཏྭཱ ཨཱཧརིཏྭཱ ཏསྶཱ ཨདཱསི. སཱ ཏཾ གཧེཏྭཱ ཨཏྟནོ ནིཝཱསཊྛཱནཾ གནྟྭཱ ཡཐཱརུཙིཡཱ ཁཱདི. ཏཏོ པཊྛཱཡ ཨིམིནཱཝ ནིཡཱམེན དིཝསེ དིཝསེ བོདྷིསཏྟསྶ ཀཧཱཔཎཾ དེཏི, སོཔིསྶཱ མཾསཾ ཨཱཧརཏི.

ཨཐེཀདིཝསཾ ཏཾ མཱུསིཀཾ བིལཱ༹རོ ཨགྒཧེསི. ཨཐ ནཾ སཱ ཨེཝམཱཧ ‘‘མཱ, སམྨ, མཾ མཱརེསཱི’’ཏི. ཀིཾཀཱརཎཱ ན མཱརེསྶཱམི? ཨཧཉྷི ཚཱཏོ མཾསཾ ཁཱདིཏུཀཱམོ, ན སཀྐཱ མཡཱ ན མཱརེཏུནྟི. ཀིཾ པན ཨེཀདིཝསམེཝ མཾསཾ ཁཱདིཏུཀཱམོསི, ཨུདཱཧུ ནིཙྩཀཱལནྟི? ‘‘ལབྷམཱནོ ནིཙྩཀཱལམྤི ཁཱདིཏུཀཱམོམྷཱི’’ཏི. ‘‘ཡདི ཨེཝཾ ཨཧཾ ཏེ ནིཙྩཀཱལཾ མཾསཾ དསྶཱམི, ཝིསྶཛྫེཧི ¶ མ’’ནྟི. ཨཐ ནཾ བིལཱ༹རོ ‘‘ཏེན ཧི ཨཔྤམཏྟཱ ཧོཧཱི’’ཏི ཝིསྶཛྫེསི. ཏཏོ པཊྛཱཡ སཱ ཨཏྟནོ ཨཱབྷཏཾ མཾསཾ དྭེ ཀོཊྛཱསེ ཀཏྭཱ ཨེཀཾ བིལཱ༹རསྶ དེཏི, ཨེཀཾ སཡཾ ཁཱདཏི. ཨཐ ནཾ ཨེཀདིཝསཾ ཨཉྙོཔི བིལཱ༹རོ ཨགྒཧེསི, ཏམྤི ཏཐེཝ སཉྙཱཔེཏྭཱ ཨཏྟཱནཾ ཝིསྶཛྫཱཔེསི. ཏཏོ པཊྛཱཡ ཏཡོ ཀོཊྛཱསེ ཀཏྭཱ ཁཱདནྟི. པུན ཨཉྙོ ཨགྒཧེསི, ཏམྤི ཏཐེཝ སཉྙཱཔེཏྭཱ ¶ ཨཏྟཱནཾ མོཙཱཔེསི. ཏཏོ པཊྛཱཡ ཙཏྟཱརོ ཀོཊྛཱསེ ཀཏྭཱ ཁཱདནྟི. པུན ཨཉྙོ ཨགྒཧེསི, ཏམྤི ཏཐེཝ སཉྙཱཔེཏྭཱ ཨཏྟཱནཾ མོཙཱཔེསི. ཏཏོ པཊྛཱཡ པཉྩ ཀོཊྛཱསེ ཀཏྭཱ ཁཱདནྟི. སཱ པཉྩམཾ ཀོཊྛཱསཾ ཁཱདམཱནཱ ཨཔྤཱཧཱརཏཱཡ ཀིལནྟཱ ཀིསཱ ཨཧོསི ཨཔྤམཾསལོཧིཏཱ

བོདྷིསཏྟོ ཏཾ དིསྭཱ ‘‘ཨམྨ, ཀསྨཱ མིལཱཏཱསཱི’’ཏི ཝཏྭཱ ‘‘ཨིམིནཱ ནཱམ ཀཱརཎེནཱ’’ཏི ཝུཏྟེ ‘‘ཏྭཾ ཨེཏྟཀཾ ཀཱལཾ ཀསྨཱ མཡ྄ཧཾ ནཱཙིཀྑི, ཨཧམེཏྠ ཀཱཏབྦཾ ཛཱནིསྶཱམཱི’’ཏི ཏཾ སམསྶཱསེཏྭཱ སུདྡྷཕལིཀཔཱསཱཎེན གུཧཾ ཀཏྭཱ ཨཱཧརིཏྭཱ ‘‘ཨམྨ, ཏྭཾ ཨིམཾ གུཧཾ པཝིསིཏྭཱ ནིཔཛྫིཏྭཱ ཨཱགཏཱགཏཱནཾ ཕརུསཱཧི ཝཱཙཱཧི སནྟཛྫེཡྻཱསཱི’’ཏི ཨཱཧ. སཱ གུཧཾ པཝིསིཏྭཱ ནིཔཛྫི. ཨཐེཀོ བིལཱ༹རོ ཨཱགནྟྭཱ ‘‘དེཧི, ཨཛྫ མེ མཾས’’ནྟི ཨཱཧ. ཨཐ ནཾ མཱུསིཀཱ ‘‘ཨརེ, དུཊྛབིལཱ༹ར, ཀིཾ ཏེ ཨཧཾ མཾསཧཱརིཀཱ, ཨཏྟནོ པུཏྟཱནཾ མཾསཾ ཁཱདཱ’’ཏི ཏཛྫེསི. བིལཱ༹རོ ཕལིཀགུཧཱཡ ནིཔནྣབྷཱཝཾ ཨཛཱནནྟོ ཀོདྷཝསེན མཱུསིཀཾ གཎྷིསྶཱམཱི’’ཏི སཧསཱཝ པཀྑནྡིཏྭཱ ཧདཡེན ཕལིཀགུཧཱཡཾ པཧརི. ཏཱཝདེཝསྶ ཧདཡཾ བྷིཛྫི, ཨཀྑཱིནི ནིཀྑམནཱཀཱརཔྤཏྟཱནི ཛཱཏཱནི. སོ ཏཏྠེཝ ཛཱིཝིཏཀྑཡཾ པཏྭཱ ཨེཀམནྟཾ པཊིཙྪནྣཊྛཱནེ པཏི. ཨེཏེནཱུཔཱཡེན ཨཔརོཔི ཨཔརོཔཱིཏི ཙཏྟཱརོཔི ཛནཱ ཛཱིཝིཏཀྑཡཾ པཱཔུཎིཾསུ. ཏཏོ པཊྛཱཡ མཱུསིཀཱ ནིབྦྷཡཱ ཧུཏྭཱ བོདྷིསཏྟསྶ དེཝསིཀཾ དྭེ ཏཡོ ཀཧཱཔཎེ དེཏི. ཨེཝཾ ཨནུཀྐམེན སབྦམྤི དྷནཾ བོདྷིསཏྟསྶེཝ ཨདཱསི. ཏེ ཨུབྷོཔི ཡཱཝཛཱིཝཾ མེཏྟིཾ ཨབྷིནྡིཏྭཱ ཡཐཱཀམྨཾ གཏཱ.

སཏྠཱ ¶ ཨིམཾ ཨཏཱིཏཾ ཨཱཧརིཏྭཱ ཨབྷིསམྦུདྡྷོ ཧུཏྭཱ ཨིམཾ གཱཐམཱཧ –

༡༣༧.

‘‘ཡཏྠེཀོ ¶ ལབྷཏེ བབྦུ, དུཏིཡོ ཏཏྠ ཛཱཡཏི;

ཏཏིཡོ ཙ ཙཏུཏྠོ ཙ, ཨིདཾ ཏེ བབྦུཀཱ བིལ’’ནྟི.

ཏཏྠ ཡཏྠཱཏི ཡསྨིཾ ཋཱནེ. བབྦཱུཏི བིལཱ༹རོ. དུཏིཡོ ཏཏྠ ཛཱཡཏཱིཏི ཡཏྠ ཨེཀོ མཱུསིཀཾ ཝཱ མཾསཾ ཝཱ ལབྷཏི, དུཏིཡོཔི ཏཏྠ བིལཱ༹རོ ཛཱཡཏི ཨུཔྤཛྫཏི, ཏཐཱ ཏཏིཡོ ཙ ཙཏུཏྠོ ཙ. ཨེཝཾ ཏེ ཏདཱ ཙཏྟཱརོ བིལཱ༹རཱ ཨཧེསུཾ. ཧུཏྭཱ ཙ པན དིཝསེ དིཝསེ མཾསཾ ཁཱདནྟཱ ཏེ བབྦུཀཱ ཨིདཾ ཕལིཀམཡཾ བིལཾ ཨུརེན པཧརིཏྭཱ སབྦེཔི ཛཱིཝིཏཀྑཡཾ པཏྟཱཏི.

ཨེཝཾ ¶ སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཙཏྟཱརོ བིལཱ༹རཱ ཙཏྟཱརོ བྷིཀྑཱུ ཨཧེསུཾ, མཱུསིཀཱ ཀཱཎམཱཏཱ, པཱསཱཎཀོཊྚཀམཎིཀཱརོ པན ཨཧམེཝ ཨཧོསི’’ནྟི.

བབྦུཛཱཏཀཝཎྞནཱ སཏྟམཱ.

[༡༣༨] ༨. གོདྷཱཛཱཏཀཝཎྞནཱ

ཀིཾ ཏེ ཛཊཱཧི དུམྨེདྷཱཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཀུཧཀབྷིཀྑུཾ ཨཱརབྦྷ ཀཐེསི. པཙྩུཔྤནྣཝཏྠུ ཧེཊྛཱ ཀཐིཏསདིསམེཝ.

ཨཏཱིཏེ པན བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ གོདྷཱཡོནིཡཾ པཊིསནྡྷིཾ གཎྷི. ཏདཱ ཨེཀོ པཉྩཱབྷིཉྙོ ཨུགྒཏཔོ ཏཱཔསོ ཨེཀཾ པཙྩནྟགཱམཾ ནིསྶཱཡ ཨརཉྙཱཡཏནེ པཎྞསཱལཱཡཾ ཝསཏི, གཱམཝཱསིནོ ཏཱཔསཾ སཀྐཙྩཾ ཨུཔཊྛཧནྟི. བོདྷིསཏྟོ ཏསྶ ཙངྐམནཀོཊིཡཾ ཨེཀསྨིཾ ཝམྨིཀེ ཝསཏི, ཝསནྟོ ཙ པན དིཝསེ དིཝསེ དྭེ ཏཡོ ཝཱརེ ཏཱཔསཾ ཨུཔསངྐམིཏྭཱ དྷམྨཱུཔསཾཧིཏཾ ཨཏྠཱུཔསཾཧིཏཉྩ ཝཙནཾ སུཏྭཱ ཏཱཔསཾ ཝནྡིཏྭཱ ཝསནཊྛཱནམེཝ གཙྪཏི. ཨཔརབྷཱགེ ཏཱཔསོ གཱམཝཱསིནོ ཨཱཔུཙྪིཏྭཱ པཀྐཱམི. པཀྐམནྟེ ཙ པན ཏསྨིཾ སཱིལཝཏསམྤནྣེ ཏཱཔསེ ཨཉྙོ ཀཱུཊཏཱཔསོ ཨཱགནྟྭཱ ཏསྨིཾ ཨསྶམཔདེ ཝཱསཾ ཀཔྤེསི. བོདྷིསཏྟོ ‘‘ཨཡམྤི སཱིལཝཱ’’ཏི སལླཀྑེཏྭཱ པུརིམནཡེནེཝ ཏསྶ སནྟིཀཾ ཨགམཱསི.

ཨཐེཀདིཝསཾ ¶ ནིདཱགྷསམཡེ ཨཀཱལམེགྷེ ཝུཊྛེ ཝམྨིཀེཧི མཀྑིཀཱ ནིཀྑམིཾསུ, ཏཱསཾ ཁཱདནཏྠཾ གོདྷཱ ཨཱཧིཎྜིཾསུ. གཱམཝཱསིནོ ནིཀྑམིཏྭཱ མཀྑིཀཱཁཱདཀཱ གོདྷཱ ¶ གཧེཏྭཱ སིནིདྡྷསམྦྷཱརསཾཡུཏྟཾ ཨམྦིལཱནམྦིལཾ གོདྷཱམཾསཾ སམྤཱདེཏྭཱ ཏཱཔསསྶ ཨདཾསུ. ཏཱཔསོ གོདྷཱམཾསཾ ཁཱདིཏྭཱ རསཏཎྷཱཡ བདྡྷོ ‘‘ཨིདཾ མཾསཾ ཨཏིམདྷུརཾ, ཀིསྶ མཾསཾ ནཱམེཏ’’ནྟི པུཙྪིཏྭཱ ‘‘གོདྷཱམཾས’’ནྟི སུཏྭཱ ‘‘མམ སནྟིཀཾ མཧཱགོདྷཱ ཨཱགཙྪཏི, ཏཾ མཱརེཏྭཱ མཾསཾ ཁཱདིསྶཱམཱི’’ཏི ཙིནྟེསི. ཙིནྟེཏྭཱ ཙ པན བྷཱཛནཉྩ སཔྤིལོཎཱདཱིནི ཙ ཨཱཧརཱཔེཏྭཱ ཨེཀམནྟེ ཋཔེཏྭཱ མུགྒརམཱདཱཡ ཀཱསཱཝེན པཊིཙྪཱདེཏྭཱ པཎྞསཱལཱདྭཱརེ བོདྷིསཏྟསྶ ཨཱགམནཾ ཨོལོཀཡམཱནོ ཨུཔསནྟཱུཔསནྟོ ཝིཡ ཧུཏྭཱ ནིསཱིདི ¶ བོདྷིསཏྟོ སཱཡནྷསམཡེ ‘‘ཏཱཔསསྶ སནྟིཀཾ གམིསྶཱམཱི’’ཏི ནིཀྑམིཏྭཱ ཨུཔསངྐམནྟོཝ ཏསྶ ཨིནྡྲིཡཝིཔྤཀཱརཾ དིསྭཱ ཙིནྟེསི ‘‘ནཱཡཾ ཏཱཔསོ ཨཉྙེསུ དིཝསེསུ ནིསཱིདནཱཀཱརེན ནིསིནྣོ, ཨཛྫེས མཾ ཨོལོཀེནྟོཔི དུཊྛིནྡྲིཡོ ཧུཏྭཱ ཨོལོཀེཏི, པརིགྒཎྷིསྶཱམི ན’’ནྟི. སོ ཏཱཔསསྶ ཧེཊྛཱཝཱཏེ ཋཏྭཱ གོདྷཱམཾསགནྡྷཾ གྷཱཡིཏྭཱ ‘‘ཨིམིནཱ ཀཱུཊཏཱཔསེན ཨཛྫ གོདྷཱམཾསཾ ཁཱདིཏཾ བྷཝིསྶཏི, ཏེནེས རསཏཎྷཱཡ བདྡྷོ ཨཛྫ མཾ ཨཏྟནོ སནྟིཀཾ ཨུཔསངྐམནྟཾ མུགྒརེན པཧརིཏྭཱ མཾསཾ པཙིཏྭཱ ཁཱདིཏུཀཱམོ བྷཝིསྶཏཱི’’ཏི ཏསྶ སནྟིཀཾ ཨནུཔགནྟྭཱཝ པཊིཀྐམིཏྭཱ ཝིཙརཏི.

ཏཱཔསོ བོདྷིསཏྟསྶ ཨནཱགམནབྷཱཝཾ ཉཏྭཱ ‘‘ཨིམིནཱ ‘ཨཡཾ མཾ པཧརིཏུཀཱམོ’ཏི ཉཱཏཾ བྷཝིསྶཏི, ཏེན ཀཱརཎེན ནཱགཙྪཏི, ཨནཱགཙྪནྟསྶཱཔིསྶ ཀུཏོ མུཏྟཱི’’ཏི མུགྒརཾ ནཱིཧརིཏྭཱ ཁིཔི. སོ ཏསྶ ཨགྒནངྒུཊྛམེཝ ཨཱསཱདེསི. བོདྷིསཏྟོ ཝེགེན ཝམྨིཀཾ པཝིསིཏྭཱ ཨཉྙེན ཚིདྡེན སཱིསཾ ཨུཀྑིཔིཏྭཱ ‘‘ཨམྦྷོ ཀཱུཊཛཊིལ, ཨཧཾ ཏཝ སནྟིཀཾ ཨུཔསངྐམནྟོ ‘སཱིལཝཱ’ཏི སཉྙཱཡ ཨུཔསངྐམིཾ, ཨིདཱནི པན ཏེ མཡཱ ཀཱུཊབྷཱཝོ ཉཱཏོ, ཏཱདིསསྶ མཧཱཙོརསྶ ཀིཾ ཨིམིནཱ པབྦཛྫཱལིངྒེནཱ’’ཏི ཝཏྭཱ ཏཾ གརཧནྟོ ཨིམཾ གཱཐམཱཧ –

༡༣༨.

‘‘ཀིཾ ཏེ ཛཊཱཧི དུམྨེདྷ, ཀིཾ ཏེ ཨཛིནསཱཊིཡཱ;

ཨབྦྷནྟརཾ ཏེ གཧནཾ, བཱཧིརཾ པརིམཛྫསཱི’’ཏི.

ཏཏྠ ¶ ཀིཾ ཏེ ཛཊཱཧི དུམྨེདྷཱཏི ཨམྦྷོ དུམྨེདྷ, ནིཔྤཉྙ ཨེཏཱ པབྦཛིཏེན དྷཱརེཏབྦཱ ཛཊཱ, པབྦཛྫཱགུཎརཧིཏསྶ ཀིཾ ཏེ ཏཱཧི ཛཊཱཧཱིཏི ཨཏྠོ. ཀིཾ ཏེ ཨཛིནསཱཊིཡཱཏི ཨཛིནསཱཊིཡཱ ཨནུཙྪཝིཀསྶ སཾཝརསྶ ཨབྷཱཝཀཱལཏོ པཊྛཱཡ ཀིཾ ཏེ ཨཛིནསཱཊིཡཱ. ཨབྦྷནྟརཾ ཏེ གཧནནྟི ཏཝ ཨབྦྷནྟརཾ ཧདཡཾ རཱགདོསམོཧགཧནེན གཧནཾ པཊིཙྪནྣཾ. བཱཧིརཾ པརིམཛྫསཱིཏི སོ ཏྭཾ ཨབྦྷནྟརེ གཧནེ ནྷཱནཱདཱིཧི ཙེཝ ལིངྒགཧནེན ཙ བཱཧིརཾ པརིམཛྫསི, ཏཾ ¶ པརིམཛྫནྟོ ཀཉྫིཀཔཱུརིཏལཱབུ ཝིཡ ཝིསཔཱུརིཏཙཱཊི ཝིཡ ཨཱསཱིཝིསཔཱུརིཏཝམྨིཀོ ཝིཡ གཱུཐཔཱུརིཏཙིཏྟགྷཊོ ཝིཡ ཙ བཧིམཊྛོཝ ཧོསི, ཀིཾ ཏཡཱ ཙོརེན ཨིདྷ ཝསནྟེན, སཱིགྷཾ ཨིཏོ པལཱཡཱཧི, ནོ ¶ ཙེ པལཱཡསི, གཱམཝཱསཱིནཾ ཏེ ཨཱཙིཀྑིཏྭཱ ནིགྒཧཾ ཀཱརཱཔེསྶཱམཱིཏི.

ཨེཝཾ བོདྷིསཏྟོ ཀཱུཊཏཱཔསཾ ཏཛྫེཏྭཱ ཝམྨིཀམེཝ པཱཝིསི, ཀཱུཊཏཱཔསོཔི ཏཏོ པཀྐཱམི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཀཱུཊཏཱཔསོ ཨཡཾ ཀུཧཀོ ཨཧོསི, པུརིམོ སཱིལཝནྟཏཱཔསོ སཱརིཔུཏྟོ, གོདྷཱཔཎྜིཏོ པན ཨཧམེཝ ཨཧོསི’’ནྟི.

གོདྷཱཛཱཏཀཝཎྞནཱ ཨཊྛམཱ.

[༡༣༩] ༩. ཨུབྷཏོབྷཊྛཛཱཏཀཝཎྞནཱ

ཨཀྑཱི བྷིནྣཱ པཊོ ནཊྛོཏི ཨིདཾ སཏྠཱ ཝེལུ༹ཝནེ ཝིཧརནྟོ དེཝདཏྟཾ ཨཱརབྦྷ ཀཐེསི. ཏདཱ ཀིར དྷམྨསབྷཱཡཾ བྷིཀྑཱུ ཀཐཾ སམུཊྛཱཔེསུཾ ‘‘ཨཱཝུསོ, སེཡྻཐཱཔི ནཱམ ཚཝཱལཱཏཾ ཨུབྷཏོཔདིཏྟཾ མཛ྄ཛྷེ གཱུཐགཏཾ ནེཝཱརཉྙེ ཀཊྛཏྠཾ ཕརཏི, ན གཱམེ ཀཊྛཏྠཾ ཕརཏི, ཨེཝམེཝ དེཝདཏྟོ ཨེཝརཱུཔེ ནིཡྻཱནིཀསཱསནེ པབྦཛིཏྭཱ ཨུབྷཏོ བྷཊྛོ ཨུབྷཏོ པརིབཱཧིརོ ཛཱཏོ, གིཧིཔརིབྷོགཱ ཙ པརིཧཱིནོ, སཱམཉྙཏྠཉྩ ན པརིཔཱུརེཏཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, དེཝདཏྟོ ཨིདཱནེཝ ཨུབྷཏོ བྷཊྛོ ཧོཏི, ཨཏཱིཏེཔི ཨུབྷཏོ བྷཊྛོ ཨཧོསིཡེཝཱ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ རུཀྑདེཝཏཱ ཧུཏྭཱ ནིབྦཏྟི. ཏདཱ ཨེཀསྨིཾ གཱམཀེ བཱལི༹སིཀཱ ཝསནྟི. ཨཐེཀོ བཱལི༹སིཀོ བལི༹སཾ ཨཱདཱཡ དཧརེན པུཏྟེན སདྡྷིཾ ཡསྨིཾ སོབྦྷེ པཀཏིཡཱཔི བཱལི༹སིཀཱ མཙྪེ གཎྷནྟི, ཏཏྠ གནྟྭཱ བལི༹སཾ ཁིཔི. བལི༹སོ ཨུདཀཔཊིཙྪནྣེ ¶ ཨེཀསྨིཾ ཁཱཎུཀེ ལགྒི. བཱལི༹སིཀོ ཏཾ ཨཱཀཌྜྷིཏུཾ ཨསཀྐོནྟོ ཙིནྟེསི ‘‘ཨཡཾ བལི༹སོ མཧཱམཙྪེ ལགྒོ བྷཝིསྶཏི, པུཏྟཀཾ མཱཏུ སནྟིཀཾ པེསེཏྭཱ པཊིཝིསྶཀེཧི སདྡྷིཾ ཀལཧཾ ཀཱརཱཔེམི, ཨེཝཾ ཨིཏོ ན ཀོཙི ཀོཊྛཱསཾ པཙྩཱསཱིསིསྶཏཱི’’ཏི. སོ པུཏྟཾ ཨཱཧ ‘‘གཙྪ, ཏཱཏ, ཨམྷེཧི མཧཱམཙྪསྶ ལདྡྷབྷཱཝཾ མཱཏུ ཨཱཙིཀྑཱཧི, ‘པཊིཝིསྶཀེཧི ¶ ཀིར སདྡྷིཾ ཀལཧཾ ཀརོཧཱི’ཏི ཝདེཧཱི’’ཏི. སོ པུཏྟཾ པེསེཏྭཱ བལི༹སཾ ¶ ཨཱཀཌྜྷིཏུཾ ཨསཀྐོནྟོ རཛྫུཙྪེདནབྷཡེན ཨུཏྟརིསཱཊཀཾ ཐལེ ཋཔེཏྭཱ ཨུདཀཾ ཨོཏརིཏྭཱ མཙྪལོབྷེན མཙྪཾ ཨུཔདྷཱརེནྟོ ཁཱཎུཀེཧི པཧརིཏྭཱ དྭེཔི ཨཀྑཱིནི བྷིནྡི. ཐལེ ཋཔིཏསཱཊཀཾཔིསྶ ཙོརོ ཧརི. སོ ཝེདནཱཔྤཏྟོ ཧུཏྭཱ ཧཏྠེན ཨཀྑཱིནི ཨུཔྤཱིལ༹ཡམཱནོ གཧེཏྭཱ ཨུདཀཱ ཨུཏྟརིཏྭཱ ཀམྤམཱནོ སཱཊཀཾ པརིཡེསཏི.

སཱཔིསྶ བྷརིཡཱ ‘‘ཀལཧཾ ཀཏྭཱ ཀསྶཙི ཨཔཙྩཱསཱིསནབྷཱཝཾ ཀརིསྶཱམཱི’’ཏི ཨེཀསྨིཾཡེཝ ཀཎྞེ ཏཱལཔཎྞཾ པིལ༹ནྡྷིཏྭཱ ཨེཀཾ ཨཀྑིཾ ཨུཀྑལིམསིཡཱ ཨཉྫེཏྭཱ ཀུཀྐུརཾ ཨངྐེནཱདཱཡ པཊིཝིསྶཀགྷརཾ ཨགམཱསི. ཨཐ ནཾ ཨེཀཱ སཧཱཡིཀཱ ཨེཝམཱཧ ‘‘ཨེཀསྨིཾཡེཝ ཏེ ཀཎྞེ ཏཱལཔཎྞཾ པིལ༹ནྡྷིཏཾ, ཨེཀཾ ཨཀྑི ཨཉྫིཏཾ, པིཡཔུཏྟཾ ཝིཡ ཀུཀྐུརཾ ཨངྐེནཱདཱཡ གྷརཏོ གྷརཾ གཙྪསི, ཀིཾ ཨུམྨཏྟིཀཱསི ཛཱཏཱ’’ཏི. ‘‘ནཱཧཾ ཨུམྨཏྟིཀཱ, ཏྭཾ པན མཾ ཨཀཱརཎེན ཨཀྐོསསི པརིབྷཱསསི, ཨིདཱནི ཏཾ གཱམབྷོཛཀསྶ སནྟིཀཾ གནྟྭཱ ཨཊྛ ཀཧཱཔཎེ དཎྜཱཔེསྶཱམཱི’’ཏི ཨེཝཾ ཀལཧཾ ཀཏྭཱ ཨུབྷོཔི གཱམབྷོཛཀསྶ སནྟིཀཾ ཨགམཾསུ. ཀལཧེ ཝིསོདྷིཡམཱནེ ཏསྶཱཡེཝ མཏྠཀེ དཎྜོ པཏི. ཨཐ ནཾ བནྡྷིཏྭཱ ‘‘དཎྜཾ དེཧཱི’’ཏི པོཐེཏུཾ ཨཱརབྷིཾསུ.

རུཀྑདེཝཏཱ གཱམེ ཏསྶཱ ཨིམཾ པཝཏྟིཾ, ཨརཉྙེ ཙསྶཱ པཏིནོ ཏཾ བྱསནཾ དིསྭཱ ཁནྡྷནྟརེ ཋིཏཱ ‘‘བྷོ པུརིས, ཏུཡ྄ཧཾ ཨུདཀེཔི ཀམྨནྟོ པདུཊྛོ ཐལེཔི, ཨུབྷཏོབྷཊྛོ ཛཱཏོ’’ཏི ཝཏྭཱ ཨིམཾ གཱཐམཱཧ –

༡༣༩.

‘‘ཨཀྑཱི བྷིནྣཱ པཊོ ནཊྛོ, སཁིགེཧེ ཙ བྷཎྜནཾ;

ཨུབྷཏོ པདུཊྛཱ ཀམྨནྟཱ, ཨུདཀམྷི ཐལམྷི ཙཱ’’ཏི.

ཏཏྠ ¶ སཁིགེཧེ ཙ བྷཎྜནནྟི སཁཱི ནཱམ སཧཱཡིཀཱ, ཏསྶཱ ཙ གེཧེ ཏཝ བྷརིཡཱཡ བྷཎྜནཾ ཀཏཾ, བྷཎྜནཾ ཀཏྭཱ བནྡྷིཏྭཱ པོཐེཏྭཱ དཎྜཾ དཱཔིཡཏི. ཨུབྷཏོ པདུཊྛཱ ཀམྨནྟཱཏི ཨེཝཾ ཏཝ དྭཱིསུཔི ཋཱནེསུ ཀམྨནྟཱ པདུཊྛཱཡེཝ བྷིནྣཱཡེཝ. ཀཏརེསུ དྭཱིསུ? ཨུདཀམྷི ཐལམྷི ཙཱཏི, ཨཀྑིབྷེདེན པཊནཱསེན ཙ ཨུདཀེ ཀམྨནྟཱ པདུཊྛཱ, སཁིགེཧེ བྷཎྜནེན ཐལེ ཀམྨནྟཱ པདུཊྛཱཏི.

སཏྠཱ ¶ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི ‘‘ཏདཱ བཱལི༹སིཀོ དེཝདཏྟོ ཨཧོསི, རུཀྑདེཝཏཱ པན ཨཧམེཝ ཨཧོསི’’ནྟི.

ཨུབྷཏོབྷཊྛཛཱཏཀཝཎྞནཱ ནཝམཱ.

[༡༤༠] ༡༠. ཀཱཀཛཱཏཀཝཎྞནཱ

ནིཙྩཾ ཨུབྦིགྒཧདཡཱཏི ཨིདཾ སཏྠཱ ཛེཏཝནེ ཝིཧརནྟོ ཉཱཏཏྠཙརིཡཾ ཨཱརབྦྷ ཀཐེསི. པཙྩུཔྤནྣཝཏྠུ དྭཱདསཀནིཔཱཏེ བྷདྡསཱལཛཱཏཀེ (ཛཱ. ༡.༡༢.༡༣ ཨཱདཡོ) ཨཱཝི བྷཝིསྶཏི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཀཱཀཡོནིཡཾ ནིབྦཏྟི. ཨཐེཀདིཝསཾ རཉྙོ པུརོཧིཏོ བཧིནགརེ ནདིཡཾ ནྷཱཡིཏྭཱ གནྡྷེ ཝིལིམྤིཏྭཱ མཱལཾ པིལ༹ནྡྷིཏྭཱ ཝརཝཏྠནིཝཏྠོ ནགརཾ པཱཝིསི. ནགརདྭཱརཏོརཎེ དྭེ ཀཱཀཱ ནིསིནྣཱ ཧོནྟི. ཏེསུ ཨེཀོ ཨེཀཾ ཨཱཧ – ‘‘སམྨ, ཨཧཾ ཨིམསྶ བྲཱཧྨཎསྶ མཏྠཀེ སརཱིརཝལ༹ཉྫཾ པཱཏེསྶཱམཱི’’ཏི. ཨིཏརོ ‘‘མཱ ཏེ ཨེཏཾ རུཙྩི, ཨཡཾ བྲཱཧྨཎོ ཨིསྶརོ, ཨིསྶརཛནེན ཙ སདྡྷིཾ ཝེརཾ ནཱམ པཱཔཀཾ. ཨཡཉྷི ཀུདྡྷོ སབྦེཔི ཀཱཀེ ཝིནཱསེཡྻཱ’’ཏི. ‘‘ན སཀྐཱ མཡཱ ན ཀཱཏུ’’ནྟི. ‘‘ཏེན ཧི པཉྙཱཡིསྶསཱི’’ཏི ཝཏྭཱ ཨིཏརོ ཀཱཀོ པལཱཡི. སོ ཏོརཎསྶ ཧེཊྛཱབྷཱགཾ སམྤཏྟེ བྲཱཧྨཎེ ཨོལམྦཀཾ ཙཱལེནྟོ ཝིཡ ཏསྶ མཏྠཀེ ཝཙྩཾ པཱཏེསི. བྲཱཧྨཎོ ཀུཛ྄ཛྷིཏྭཱ ཀཱཀེསུ ཝེརཾ བནྡྷི.

ཏསྨིཾ ཀཱལེ ཨེཀཱ བྷཏིཡཱ ཝཱིཧིཀོཊྚིཀདཱསཱི ཝཱིཧིཾ གེཧདྭཱརེ ཨཱཏཔེ པཏྠརིཏྭཱ རཀྑནྟཱི ནིསིནྣཱཝ ནིདྡཾ ཨོཀྐམི. ཏསྶཱ པམཱདཾ ཉཏྭཱ ཨེཀོ དཱིགྷལོམཀོ ཨེལ༹ཀོ ཨཱགནྟྭཱ ཝཱིཧིཾ ཁཱདི, སཱ པབུཛ྄ཛྷིཏྭཱ ཏཾ དིསྭཱ པལཱཔེསི. ཨེལ༹ཀོ དུཏིཡམྤི, ཏཏིཡམྤི ཏསྶཱ ཏཐེཝ ནིདྡཱཡནཀཱལེ ཨཱགནྟྭཱ ཝཱིཧིཾ ཁཱདི. སཱཔི ¶ ཏཾ ཏིཀྑཏྟུཾ པལཱཔེཏྭཱ ཙིནྟེསི ‘‘ཨཡཾ པུནཔྤུནཾ ཁཱདནྟོ ཨུཔཌྜྷཝཱིཧིཾ ཁཱདིསྶཏི, བཧུ མེ ཚེདོ བྷཝིསྶཏི, ཨིདཱནིསྶ པུན ཨནཱགམནཀཱརཎཾ ཀརིསྶཱམཱི’’ཏི. སཱ ཨལཱཏཾ གཧེཏྭཱ ནིདྡཱཡམཱནཱ ཝིཡ ནིསཱིདིཏྭཱ ཝཱིཧིཁཱདནཏྠཱཡ ཨེལ༹ཀེ སམྤཏྟེ ཨུཊྛཱཡ ཨལཱཏེན ¶ ཨེལ༹ཀཾ པཧརི, ལོམཱནི ཨགྒིཾ གཎྷིཾསུ. སོ སརཱིརེ ཛྷཱཡནྟེ ‘‘ཨགྒིཾ ནིབྦཱཔེསྶཱམཱི’’ཏི ཝེགེན གནྟྭཱ ཧཏྠིསཱལཱཡ སམཱིཔེ ཨེཀིསྶཱ ཏིཎཀུཊིཡཱ སརཱིརཾ གྷཾསི, སཱ པཛྫལི. ཏཏོ ཨུཊྛིཏཱ ཛཱལཱ ཧཏྠིསཱལཾ གཎྷི. ཧཏྠིསཱལཱསུ ཛྷཱཡནྟཱིསུ ཧཏྠིཔིཊྛཱནི ཛྷཱཡིཾསུ, བཧཱུ ཧཏྠཱི ཝཎིཏསརཱིརཱ ཨཧེསུཾ. ཝེཛྫཱ ཧཏྠཱི ཨརོགེ ཀཱཏུཾ ཨསཀྐོནྟཱ ¶ རཉྙོ ཨཱརོཙེསུཾ. རཱཛཱ པུརོཧིཏཾ ཨཱཧ ‘‘ཨཱཙརིཡ, ཧཏྠིཝེཛྫཱ ཧཏྠཱི ཏིཀིཙྪིཏུཾ ན སཀྐོནྟི, ཨཔི ཀིཉྩི བྷེསཛྫཾ ཛཱནཱསཱི’’ཏི. ‘‘ཛཱནཱམི, མཧཱརཱཛཱ’’ཏི. ‘‘ཀིཾ ལདྡྷུཾ ཝཊྚཏཱི’’ཏི? ‘‘ཀཱཀཝསཱ, མཧཱརཱཛཱ’’ཏི. རཱཛཱ ‘‘ཏེན ཧི ཀཱཀེ མཱརེཏྭཱ ཝསཾ ཨཱཧརཐཱ’’ཏི ཨཱཧ. ཏཏོ པཊྛཱཡ ཀཱཀེ མཱརེཏྭཱ ཝསཾ ཨལབྷིཏྭཱ ཏཏྠ ཏཏྠེཝ རཱསིཾ ཀརོནྟི, ཀཱཀཱནཾ མཧཱབྷཡཾ ཨུཔྤཛྫི.

ཏདཱ བོདྷིསཏྟོ ཨསཱིཏིཀཱཀསཧསྶཔརིཝཱརོ མཧཱསུསཱནེ ཝསཏི. ཨཐེཀོ ཀཱཀོ གནྟྭཱ ཀཱཀཱནཾ ཨུཔྤནྣབྷཡཾ བོདྷིསཏྟསྶ ཨཱརོཙེསི. སོ ཙིནྟེསི ‘‘ཋཔེཏྭཱ མཾ ཨཉྙོ མཡ྄ཧཾ ཉཱཏཀཱནཾ ཨུཔྤནྣབྷཡཾ ཧརིཏུཾ སམཏྠོ ནཱམ ནཏྠི, ཧརིསྶཱམི ན’’ནྟི དས པཱརམིཡོ ཨཱཝཛྫེཏྭཱ མེཏྟཱཔཱརམིཾ པུརེཙཱརིཀཾ ཀཏྭཱ ཨེཀཝེགེན པཀྑནྡིཏྭཱ ཝིཝཊམཧཱཝཱཏཔཱནེན པཝིསིཏྭཱ རཉྙོ ཨཱསནསྶ ཧེཊྛཱ པཱཝིསི. ཨཐ ནཾ ཨེཀོ མནུསྶོ གཧིཏུཀཱམོ ཨཧོསི. རཱཛཱ ‘‘སརཎཾ པཝིཊྛོ, མཱ གཎྷཱི’’ཏི ཝཱརེསི. མཧཱསཏྟོ ཐོཀཾ ཝིསྶམིཏྭཱ མེཏྟཱཔཱརམིཾ ཨཱཝཛྫེཏྭཱ ཧེཊྛཱསནཱ ནིཀྑམིཏྭཱ རཱཛཱནཾ ཨཱཧ – ‘‘མཧཱརཱཛ, རཉྙཱ ནཱམ ཚནྡཱདིཝསེན ཨགནྟྭཱ རཛྫཾ ཀཱརེཏུཾ ཝཊྚཏི. ཡཾ ཡཾ ཀམྨཾ ཀཏྟབྦཾ ཧོཏི, སབྦཾ ནིསམྨ ཨུཔདྷཱརེཏྭཱ ཀཱཏུཾ ཝཊྚཏི. ཡཉྩ ཀཡིརམཱནཾ ནིཔྥཛྫཏི, ཏདེཝ ཀཱཏུཾ ཝཊྚཏི, ན ཨིཏརཾ. སཙེ ཧི རཱཛཱནོ ཡཾ ཀཡིརམཱནཾ ན ནིཔྥཛྫཏི, ཏཾ ཀརོནྟི, མཧཱཛནསྶ མརཎབྷཡཔརིཡོསཱནཾ མཧཱབྷཡཾ ཨུཔྤཛྫཏི ¶ . པུརོཧིཏོ ཝེརཝསིཀོ ཧུཏྭཱ མུསཱཝཱདཾ ཨབྷཱསི, ཀཱཀཱནཾ ཝསཱ ནཱམ ནཏྠཱི’’ཏི. ཏཾ སུཏྭཱ རཱཛཱ པསནྣཙིཏྟོ བོདྷིསཏྟསྶ ཀཉྩནབྷདྡཔཱིཋཾ དཱཔེཏྭཱ ཏཏྠ ནིསིནྣསྶ པཀྑནྟརཱནི སཏཔཱཀསཧསྶཔཱཀཏེལེཧི མཀྑཱཔེཏྭཱ ཀཉྩནཏཊྚཀེ རཱཛཱརཧཾ སུབྷོཛནཾ བྷོཛཱཔེཏྭཱ པཱནཱིཡཾ པཱཡེཏྭཱ སུཧིཏཾ ཝིགཏདརཐཾ མཧཱསཏྟཾ ཨེཏདཝོཙ ‘‘པཎྜིཏ, ཏྭཾ ‘ཀཱཀཱནཾ ཝསཱ ནཱམ ནཏྠཱི’ཏི ཝདེསི, ཀེན ཀཱརཎེན ནེསཾ ཝསཱ ན ཧོཏཱི’’ཏི བོདྷིསཏྟོ ‘‘ཨིམིནཱ ¶ ཙ ཨིམིནཱ ཙ ཀཱརཎེནཱ’’ཏི སཀལནིཝེསནཾ ཨེཀརཝཾ ཀཏྭཱ དྷམྨཾ དེསེནྟོ ཨིམཾ གཱཐམཱཧ –

༡༤༠.

‘‘ནིཙྩཾ ཨུབྦིགྒཧདཡཱ, སབྦལོཀཝིཧེསཀཱ;

ཏསྨཱ ནེསཾ ཝསཱ ནཏྠི, ཀཱཀཱནམྷཱཀ ཉཱཏིན’’ནྟི.

ཏཏྲཱཡཾ སངྑེཔཏྠོ – མཧཱརཱཛ, ཀཱཀཱ ནཱམ ནིཙྩཾ ཨུབྦིགྒམཱནསཱ བྷཡཔྤཏྟཱཝ ཝིཧརནྟི, སབྦལོཀསྶ ཙ ཝིཧེསཀཱ, ཁཏྟིཡཱདཡོ མནུསྶེཔི ཨིཏྠིཔུརིསེཔི ཀུམཱརཀུམཱརིཀཱདཡོཔི ཝིཧེཋེནྟཱ ཀིལམེནྟཱཝ ཝིཙརནྟི, ཏསྨཱ ཨིམེཧི དྭཱིཧི ཀཱརཎེཧི ནེསཾ ¶ ཨམྷཱཀཾ ཉཱཏཱིནཾ ཀཱཀཱནཾ ཝསཱ ནཱམ ནཏྠི. ཨཏཱིཏེཔི ན བྷཱུཏཔུབྦཱ, ཨནཱགཏེཔི ན བྷཝིསྶཏཱིཏི.

ཨེཝཾ མཧཱསཏྟོ ཨིམཾ ཀཱརཎཾ ཨུཏྟཱནཾ ཀཏྭཱ ‘‘མཧཱརཱཛ, རཉྙཱ ནཱམ ཨནིསམྨ ཨནུཔདྷཱརེཏྭཱ ཀམྨཾ ན ཀཏྟབྦ’’ནྟི རཱཛཱནཾ བོདྷེསི. རཱཛཱ ཏུསྶིཏྭཱ བོདྷིསཏྟཾ རཛྫེན པཱུཛེསི. བོདྷིསཏྟོ རཛྫཾ རཉྙོཡེཝ པཊིདཏྭཱ རཱཛཱནཾ པཉྩསུ སཱིལེསུ པཏིཊྛཱཔེཏྭཱ སབྦསཏྟཱནཾ ཨབྷཡཾ ཡཱཙི. རཱཛཱ ཏསྶ དྷམྨདེསནཾ སུཏྭཱ སབྦསཏྟཱནཾ ཨབྷཡཾ དཏྭཱ ཀཱཀཱནཾ ནིབདྡྷདཱནཾ པཊྛཔེསི. དིཝསེ དིཝསེ ཏཎྜུལམྦཎསྶ བྷཏྟཾ པཙིཏྭཱ ནཱནགྒརསེཧི ཨོམདྡིཏྭཱ ཀཱཀཱནཾ དཱིཡཏི, མཧཱསཏྟསྶ པན རཱཛབྷོཛནམེཝ དཱིཡིཏྠ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ བཱརཱཎསིརཱཛཱ ཨཱནནྡོ ཨཧོསི, ཀཱཀརཱཛཱ པན ཨཧམེཝ ཨཧོསི’’ནྟི.

ཀཱཀཛཱཏཀཝཎྞནཱ དསམཱ.

ཨསམྤདཱནཝགྒོ ཙུདྡསམོ.

ཏསྶུདྡཱནཾ –

ཨསམྤདཱནབྷཱིརུཀཾ, གྷཏཱསནཛྷཱནསོདྷཾ;

ཙནྡཱབྷཾ སུཝཎྞཧཾསཾ, བབྦུགོདྷུབྷཏོབྷཊྛཾ;

ཀཱཀརཱཛཱཏི ཏེ དསཱཏི.

༡༥. ཀཀཎྚཀཝགྒོ

[༡༤༡] ༡. གོདྷཱཛཱཏཀཝཎྞནཱ

ན ¶ ¶ ¶ པཱཔཛནསཾསེཝཱིཏི ཨིདཾ སཏྠཱ ཝེལུ༹ཝནེ ཝིཧརནྟོ ཨེཀཾ ཝིཔཀྑསེཝིཾ བྷིཀྑུཾ ཨཱརབྦྷ ཀཐེསི. པཙྩུཔྤནྣཝཏྠུ མཧིལཱ༹མུཁཛཱཏཀེ ཀཐིཏསདིསམེཝ.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ གོདྷཱཡོནིཡཾ པཊིསནྡྷིཾ གཎྷི. སོ ཝཡཔྤཏྟོ ནདཱིཏཱིརེ མཧཱབིལེ ཨནེཀགོདྷཱསཏཔརིཝཱརོ ཝཱསཾ ཀཔྤེསི. ཏསྶ པུཏྟོ གོདྷཱཔིལླཀོ ཨེཀེན ཀཀཎྚཀེན སདྡྷིཾ སནྠཝཾ ཀཏྭཱ ཏེན སདྡྷིཾ སམྨོདམཱནོ ཝིཧརནྟོ ‘‘ཀཀཎྚཀཾ པརིསྶཛིསྶཱམཱི’’ཏི ཨཝཏྠརཏི. ཏསྶ ཏེན སདྡྷིཾ ཝིསྶཱསཾ གོདྷཱརཱཛསྶ ཨཱརོཙེསུཾ. གོདྷཱརཱཛཱ པུཏྟཾ པཀྐོསཱཔེཏྭཱ ‘‘ཏཱཏ, ཏྭཾ ཨཊྛཱནེ ཝིསྶཱསཾ ཀརོསི, ཀཀཎྚཀཱ ནཱམ ནཱིཙཛཱཏིཀཱ, ཏེཧི སདྡྷིཾ ཝིསྶཱསོ ན ཀཏྟབྦོ. སཙེ ཏྭཾ ཏེན སདྡྷིཾ ཝིསྶཱསཾ ཀརིསྶསི, ཏཾ ཀཀཎྚཀཾ ནིསྶཱཡ སབྦམྤེཏཾ གོདྷཱཀུལཾ ཝིནཱསཾ པཱཔུཎིསྶཏི, ཨིཏོ པཊྛཱཡ ཨེཏེན སདྡྷིཾ ཝིསྶཱསཾ མཱ ཨཀཱསཱི’’ཏི ཨཱཧ. སོ ཀརོཏིཡེཝ. བོདྷིསཏྟོ པུནཔྤུནཾ ཀཐེནྟོཔི ཏསྶ ཏེན སདྡྷིཾ ཝིསྶཱསཾ ཝཱརེཏུཾ ཨསཀྐོནྟོ ‘‘ཨཝསྶཾ ཨམྷཱཀཾ ཨེཏཾ ཀཀཎྚཀཾ ནིསྶཱཡ བྷཡཾ ཨུཔྤཛྫིསྶཏི, ཏསྨིཾ ཨུཔྤནྣེ པལཱཡནམགྒཾ སམྤཱདེཏུཾ ཝཊྚཏཱི’’ཏི ཨེཀེན པསྶེན ཝཱཏབིལཾ ཀཱརཱཔེསི.

པུཏྟོཔིསྶ ཨནུཀྐམེན མཧཱསརཱིརོ ཨཧོསི, ཀཀཎྚཀོ པན པུརིམཔྤམཱཎོཡེཝ. ཨིཏརོ ‘‘ཀཀཎྚཀཾ པརིསྶཛིསྶཱམཱི’’ཏི ཨནྟརནྟརཱ ཨཝཏྠརཏིཡེཝ, ཀཀཎྚཀསྶ པབྦཏཀཱུཊེན ཨཝཏྠརཎཀཱལོ ཝིཡ ཧོཏི. སོ ཀིལམནྟོ ཙིནྟེསི ‘‘སཙེ ཨཡཾ ཨཉྙཱནི ཀཏིཔཡཱནི དིཝསཱནི མཾ ཨེཝཾ པརིསྶཛིསྶཏི, ཛཱིཝིཏཾ མེ ནཏྠི, ཨེཀེན ལུདྡཀེན སདྡྷིཾ ཨེཀཏོ ཧུཏྭཱ ཨིམཾ གོདྷཱཀུལཾ ཝིནཱསེསྶཱམཱི’’ཏི. ཨཐེཀདིཝསཾ ནིདཱགྷསམཡེ མེགྷེ ཝུཊྛེ ཝམྨིཀམཀྑིཀཱ ཨུཊྛཧིཾསུ, ཏཏོ ཏཏོ གོདྷཱ ¶ ནིཀྑམིཏྭཱ མཀྑིཀཱཡོ ཁཱདནྟི. ཨེཀོ གོདྷཱལུདྡཀོ གོདྷཱབིལཾ བྷིནྡནཏྠཱཡ ཀུདྡཱལཾ གཧེཏྭཱ སུནཁེཧི སདྡྷིཾ ཨརཉྙཾ པཱཝིསི. ཀཀཎྚཀོ ཏཾ དིསྭཱ ‘‘ཨཛྫ ཨཏྟནོ མནོརཐཾ པཱུརེསྶཱམཱི’’ཏི ཏཾ ཨུཔསངྐམིཏྭཱ ཨཝིདཱུརེ ནིཔཛྫིཏྭཱ ‘‘བྷོ པུརིས ¶ , ཀསྨཱ ཨརཉྙེ ཝིཙརསཱི’’ཏི པུཙྪི. སོ ‘‘གོདྷཱནཾ ¶ ཨཏྠཱཡཱ’’ཏི ཨཱཧ. ‘‘ཨཧཾ ཨནེཀསཏཱནཾ གོདྷཱནཾ ཨཱསཡཾ ཛཱནཱམི, ཨགྒིཉྩ པལཱལཉྩ ཨཱདཱཡ ཨེཧཱི’’ཏི ཏཾ ཏཏྠ ནེཏྭཱ ‘‘ཨིམསྨིཾ ཋཱནེ པལཱལཾ པཀྑིཔིཏྭཱ ཨགྒིཾ དཏྭཱ དྷཱུམཾ ཀཏྭཱ སམནྟཱ སུནཁེ ཋཔེཏྭཱ སཡཾ མཧཱམུགྒརཾ གཧེཏྭཱ ནིཀྑནྟཱ ནིཀྑནྟཱ གོདྷཱ པཧརིཏྭཱ མཱརེཏྭཱ རཱསིཾ ཀཏྭཱ ཡཱཧཱི’’ཏི ཨེཝཉྩ པན ཝཏྭཱ ‘‘ཨཛྫ པཙྩཱམིཏྟསྶ པིཊྛིཾ པསྶིསྶཱམཱི’’ཏི ཨེཀསྨིཾ ཋཱནེ སཱིསཾ ཨུཀྑིཔིཏྭཱ ནིཔཛྫི. ལུདྡཀོཔི པལཱལདྷཱུམཾ ཨཀཱསི, དྷཱུམོ བིལཾ པཱཝིསི, གོདྷཱ དྷཱུམནྡྷཱ མརཎབྷཡཏཛྫིཏཱ ནིཀྑམིཏྭཱ པལཱཡིཏུཾ ཨཱརདྡྷཱ. ལུདྡཀོ ནིཀྑནྟཾ ནིཀྑནྟཾ པཧརིཏྭཱ མཱརེསི, ཏསྶ ཧཏྠཏོ མུཏྟཱ སུནཁཱ གཎྷིཾསུ. གོདྷཱནཾ མཧཱཝིནཱསོ ཨུཔྤཛྫི.

བོདྷིསཏྟོ ‘‘ཀཀཎྚཀཾ ནིསྶཱཡ བྷཡཾ ཨུཔྤནྣ’’ནྟི ཉཏྭཱ ‘‘པཱཔཔུརིསསཾསགྒོ ནཱམ ན ཀཏྟབྦོ, པཱཔེ ནིསྶཱཡ ཧིཏསུཁཾ ནཱམ ནཏྠི, ཨེཀསྶ པཱཔཀཀཎྚཀསྶ ཝསེན ཨེཏྟཀཱནཾ གོདྷཱནཾ ཝིནཱསོ ཛཱཏོ’’ཏི ཝཱཏབིལེན པལཱཡནྟོ ཨིམཾ གཱཐམཱཧ –

༡༤༡.

‘‘ན པཱཔཛནསཾསེཝཱི, ཨཙྩནྟསུཁམེདྷཏི;

གོདྷཱཀུལཾ ཀཀཎྚཱཝ, ཀལིཾ པཱཔེཏི ཨཏྟཱན’’ནྟི.

ཏཏྲཱཡཾ སངྑེཔཏྠོ – པཱཔཛནསཾསེཝཱི པུགྒལོ ཨཙྩནྟསུཁཾ ཨེཀནྟསུཁཾ ནིརནྟརསུཁཾ ནཱམ ན ཨེདྷཏི ན ཝིནྡཏི ན པཊིལབྷཏི. ཡཐཱ ཀིཾ? གོདྷཱཀུལཾ ཀཀཎྚཱཝ. ཡཐཱ ཀཀཎྚཀཏོ གོདྷཱཀུལཾ སུཁཾ ན ལབྷཏི, ཨེཝཾ པཱཔཛནསཾསེཝཱི པུགྒལོ སུཁཾ ན ལབྷཏི. པཱཔཛནཾ པན སེཝནྟོ ཨེཀནྟེནེཝ ཀལིཾ པཱཔེཏི ཨཏྟཱནཾ, ཀལི ཝུཙྩཏི ཝིནཱསོ, ཨེཀནྟེནེཝ པཱཔསེཝཱི ཨཏྟཱནཉྩ ཨཉྙེ ཙ ཨཏྟནཱ སདྡྷིཾ ཝསནྟེ ཝིནཱསཾ པཱཔེཏི. པཱལི༹ཡཾ པན ‘‘ཕལཾ པཱཔེཡྻཱ’’ཏི ལིཁནྟི. ཏཾ བྱཉྫནཾ ཨཊྛཀཐཱཡཾ ནཏྠི, ཨཏྠོཔིསྶ ན ཡུཛྫཏི. ཏསྨཱ ཡཐཱཝུཏྟམེཝ གཧེཏབྦཾ.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཀཀཎྚཀོ དེཝདཏྟོ ཨཧོསི, བོདྷིསཏྟསྶ པུཏྟོ ཨནོཝཱདཀོ གོདྷཱཔིལླཀོ ཝིཔཀྑསེཝཱི བྷིཀྑུ, གོདྷཱརཱཛཱ པན ཨཧམེཝ ཨཧོསི’’ནྟི.

གོདྷཱཛཱཏཀཝཎྞནཱ པཋམཱ.

[༡༤༢] ༢. སིངྒཱལཛཱཏཀཝཎྞནཱ

ཨེཏཉྷི ¶ ¶ ཏེ དུརཱཛཱནནྟི ཨིདཾ སཏྠཱ ཝེལུ༹ཝནེ ཝིཧརནྟོ དེཝདཏྟསྶ ཝདྷཱཡ པརིསཀྐནཾ ཨཱརབྦྷ ཀཐེསི. དྷམྨསབྷཱཡཉྷི བྷིཀྑཱུནཾ ཀཐཾ སུཏྭཱ སཏྠཱ ‘‘ན, བྷིཀྑཝེ, དེཝདཏྟོ ཨིདཱནེཝ མཡ྄ཧཾ ཝདྷཱཡ པརིསཀྐཏི, པུབྦེཔི པརིསཀྐིཡེཝ, ན ཙ མཾ མཱརེཏུཾ ཨསཀྑི, སཡམེཝ པན ཀིལནྟོ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ སིངྒཱལཡོནིཡཾ ནིབྦཏྟིཏྭཱ སིངྒཱལརཱཛཱ ཧུཏྭཱ སིངྒཱལགཎཔརིཝུཏོ སུསཱནཝནེ ཝིཧཱསི. ཏེན སམཡེན རཱཛགཧེ ཨུསྶཝོ ཨཧོསི, ཡེབྷུཡྻེན མནུསྶཱ སུརཾ པིཝནྟི, སུརཱཚཎོཡེཝ ཀིརེསོ. ཨཐེཏྠ སམྦཧུལཱ དྷུཏྟཱ བཧུཾ སུརཉྩ མཾསཉྩ ཨཱཧརཱཔེཏྭཱ མཎྜིཏཔསཱདྷིཏཱ གཱཡིཏྭཱ གཱཡིཏྭཱ སུརཉྩ པིཝནྟི, མཾསཉྩ ཁཱདནྟི. ཏེསཾ པཋམཡཱམཱཝསཱནེ མཾསཾ ཁཱིཡི, སུརཱ པན བཧུཀཱཝ. ཨཐེཀོ དྷུཏྟོ ‘‘མཾསཁཎྜཾ དེཧཱི’’ཏི ཨཱཧ. ‘‘མཾསཾ ཁཱིཎ’’ནྟི ཙ ཝུཏྟེ ‘‘མཡི ཋིཏེ མཾསཀྑཡོ ནཱམ ནཏྠཱི’’ཏི ཝཏྭཱ ‘‘ཨཱམཀསུསཱནེ མཏམནུསྶམཾསཾ ཁཱདནཏྠཱཡ ཨཱགཏེ སིངྒཱལེ མཱརེཏྭཱ མཾསཾ ཨཱཧརིསྶཱམཱི’’ཏི མུགྒརཾ གཧེཏྭཱ ནིདྡྷམནམགྒེན ནགརཱ ནིཀྑམིཏྭཱ སུསཱནཾ གནྟྭཱ མུགྒརཾ གཧེཏྭཱ མཏཀོ ཝིཡ ཨུཏྟཱནོ ནིཔཛྫི. ཏསྨིཾ ཁཎེ བོདྷིསཏྟོ སིངྒཱལགཎཔརིཝུཏོ ཏཏྠ གཏོ ཏཾ དིསྭཱ ‘‘ནཱཡཾ མཏཀོ’’ཏི ཉཏྭཱཔི ‘‘སུཊྛུཏརཾ ཨུཔཔརིཀྑིསྶཱམཱི’’ཏི ཏསྶ ཨདྷོཝཱཏེན གནྟྭཱ སརཱིརགནྡྷཾ གྷཱཡིཏྭཱ ཏཐཏོཝསྶ ཨམཏཀབྷཱཝཾ ཉཏྭཱ ‘‘ལཛྫཱཔེཏྭཱ ནཾ ཨུཡྻོཛེསྶཱམཱི’’ཏི གནྟྭཱ མུགྒརཀོཊིཡཾ ཌཾསིཏྭཱ ཨཱཀཌྜྷི, དྷུཏྟོ མུགྒརཾ ན ཝིསྶཛི, ཨུཔསངྐམནྟམྤི ན ¶ ཨོལོཀེནྟོ ནཾ གཱལ༹ྷཏརཾ ཨགྒཧེསི. བོདྷིསཏྟོ པཊིཀྐམིཏྭཱ ‘‘བྷོ པུརིས, སཙེ ཏྭཾ མཏཀོ བྷཝེཡྻཱསི, ན མཡི མུགྒརཾ ཨཱཀཌྜྷནྟེ གཱལ༹ྷཏརཾ གཎྷེཡྻཱསི, ཨིམིནཱ ཀཱརཎེན ཏཝ མཏཀབྷཱཝོ ཝཱ ཨམཏཀབྷཱཝོ ཝཱ དུཛྫཱནོ’’ཏི ཝཏྭཱ ཨིམཾ གཱཐམཱཧ –

༡༤༢.

‘‘ཨེཏཉྷི ཏེ དུརཱཛཱནཾ, ཡཾ སེསི མཏསཱཡིཀཾ;

ཡསྶ ཏེ ཀཌྜྷམཱནསྶ, ཧཏྠཱ དཎྜོ ན མུཙྩཏཱི’’ཏི.

ཏཏྠ ¶ ཨེཏཉྷི ཏེ དུརཱཛཱནནྟི ཨེཏཾ ཀཱརཎཾ ཏཝ དུཝིཉྙེཡྻཾ. ཡཾ སེསི མཏསཱཡིཀནྟི ཡེན ཀཱརཎེན ཏྭཾ མཏསཱཡིཀཾ སེསི, མཏཀོ ཝིཡ ཧུཏྭཱ སཡསི. ཡསྶ ཏེ ཀཌྜྷམཱནསྶཱཏི ཡསྶ ཏཝ དཎྜཀོཊིཡཾ གཧེཏྭཱ ཀཌྜྷིཡམཱནསྶ ཧཏྠཏོ དཎྜོ ན མུཙྩཏི, སོ ཏྭཾ ཏཐཏོ མཏཀོ ནཱམ ན ཧོསཱིཏི.

ཨེཝཾ ¶ ཝུཏྟེ སོ དྷུཏྟོ ‘‘ཨཡཾ མམ ཨམཏཀབྷཱཝཾ ཛཱནཱཏཱི’’ཏི ཨུཊྛཱཡ དཎྜཾ ཁིཔི, དཎྜོ ཝིརཛ྄ཛྷི. དྷུཏྟོ ‘‘གཙྪ, ཝིརདྡྷོ དཱནིསི མཡཱ’’ཏི ཨཱཧ. བོདྷིསཏྟོ ནིཝཏྟིཏྭཱ ‘‘བྷོ པུརིས, མཾ ཝིརཛ྄ཛྷནྟོཔི ཏྭཾ ཨཊྛ མཧཱནིརཡེ སོལ༹ས ཙ ཨུསྶདནིརཡེ ཨཝིརདྡྷོཡེཝཱ’’ཏི ཝཏྭཱ པཀྐཱམི. དྷུཏྟོ ཀིཉྩི ཨལབྷིཏྭཱ སུསཱནཱ ནིཀྑམིཏྭཱ པརིཁཱཡཾ ནྷཱཡིཏྭཱ ཨཱགཏམགྒེནེཝ ནགརཾ པཱཝིསི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ དྷུཏྟོ དེཝདཏྟོ ཨཧོསི, སིངྒཱལརཱཛཱ པན ཨཧམེཝ ཨཧོསི’’ནྟི.

སིངྒཱལཛཱཏཀཝཎྞནཱ དུཏིཡཱ.

[༡༤༣] ༣. ཝིརོཙཛཱཏཀཝཎྞནཱ

ལསཱི ཙ ཏེ ནིཔྥལིཏཱཏི ཨིདཾ སཏྠཱ ཝེལུ༹ཝནེ ཝིཧརནྟོ དེཝདཏྟསྶ གཡཱསཱིསེ སུགཏཱལཡསྶ དསྶིཏབྷཱཝཾ ཨཱརབྦྷ ཀཐེསི. དེཝདཏྟོ ཧི པརིཧཱིནཛ྄ཛྷཱནོ ལཱབྷསཀྐཱརཔརིཧཱིནོ ‘‘ཨཏྠེཀོ ཨུཔཱཡོ’’ཏི ཙིནྟེཏྭཱ སཏྠཱརཾ པཉྩ ཝཏྠཱུནི ཡཱཙིཏྭཱ ཨལབྷམཱནོ དྭིནྣཾ ཨགྒསཱཝཀཱནཾ སདྡྷིཝིཧཱརིཀེ ཨདྷུནཱ པབྦཛིཏེ དྷམྨཝིནཡམྷི ཨཀོཝིདེ པཉྩསཏེ བྷིཀྑཱུ གཧེཏྭཱ གཡཱསཱིསཾ གནྟྭཱ སངྒྷཾ བྷིནྡིཏྭཱ ཨེཀསཱིམཱཡཾ ཨཱཝེཎིཀཾ སངྒྷཀམྨཾ ཨཀཱསི. སཏྠཱ ཏེསཾ བྷིཀྑཱུནཾ ཉཱཎཔརིཔཱཀཀཱལཾ ཉཏྭཱ དྭེ ཨགྒསཱཝཀེ པེསེསི. ཏེ དིསྭཱ དེཝདཏྟོ ¶ ཏུཊྛམཱནསོ རཏྟིཾ དྷམྨཾ དེསཡམཱནོ ‘‘བུདྡྷལཱིལཾ ཀརིསྶཱམཱི’’ཏི སུགཏཱལཡཾ དསྶེནྟོ ‘‘ཝིགཏཐིནམིདྡྷོ ཁོ, ཨཱཝུསོ སཱརིཔུཏྟ, བྷིཀྑུསངྒྷོ, པཊིབྷཱཏུ ཏཾ བྷིཀྑཱུནཾ དྷམྨཱིཀཐཱ, པིཊྛི མེ ཨཱགིལཱཡཏི, ཏམཧཾ ཨཱཡམིསྶཱམཱི’’ཏི ཝཏྭཱ ནིདྡཾ ཨུཔགཏོ ¶ . དྭེ ཨགྒསཱཝཀཱ ཏེསཾ བྷིཀྑཱུནཾ དྷམྨཾ དེསེཏྭཱ མགྒཕལེཧི པབོདྷེཏྭཱ སབྦེ ཨཱདཱཡ ཝེལུ༹ཝནམེཝ པཙྩཱགམིཾསུ.

ཀོཀཱལིཀོ ཝིཧཱརཾ ཏུཙྪཾ དིསྭཱ དེཝདཏྟསྶ སནྟིཀཾ གནྟྭཱ ‘‘ཨཱཝུསོ དེཝདཏྟ, པརིསཾ ཏེ བྷིནྡིཏྭཱ དྭེ ཨགྒསཱཝཀཱ ཝིཧཱརཾ ཏུཙྪཾ ཀཏྭཱ གཏཱ, ཏྭཾ པན ནིདྡཱཡསིཡེཝཱ’’ཏི ཝཏྭཱ ཨུཏྟརཱསངྒམསྶ ཨཔནེཏྭཱ བྷིཏྟིཡཾ པིཊྛིཀཎྚཀཾ ཕུསནྟོ ཝིཡ པཎྷིཡཱ ནཾ ཧདཡེ པཧརི. ཏཱཝདེཝསྶ མུཁཏོ ལོཧིཏཾ ཨུགྒཉྪི. སོ ཏཏོ པཊྛཱཡ གིལཱནོ ཨཧོསི. སཏྠཱ ཐེརཾ པུཙྪི ‘‘སཱརིཔུཏྟ, ཏུམྷཱཀཾ གཏཀཱལེ དེཝདཏྟོ ཀིཾ ཨཀཱསཱི’’ཏི? བྷནྟེ, དེཝདཏྟོ ཨམྷེ དིསྭཱ ¶ ‘‘བུདྡྷལཱིལཾ ཀརིསྶཱམཱི’’ཏི སུགཏཱལཡཾ དསྶེཏྭཱ མཧཱཝིནཱསཾ པཏྟོཏི. སཏྠཱ ‘‘ན ཁོ སཱརིཔུཏྟ, དེཝདཏྟོ ཨིདཱནེཝ མམ ཨནུཀརོནྟོ ཝིནཱསཾ པཏྟོ, པུབྦེཔི པཏྟོཡེཝཱ’’ཏི ཝཏྭཱ ཐེརེན ཡཱཙིཏོ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཀེསརསཱིཧོ ཧུཏྭཱ ཧིམཝནྟཔྤདེསེ ཀཉྩནགུཧཱཡཾ ཝཱསཾ ཀཔྤེསི. སོ ཨེཀདིཝསཾ ཀཉྩནགུཧཱཡ ནིཀྑམིཏྭཱ ཝིཛམྦྷིཏྭཱ ཙཏུདྡིསཾ ཨོལོཀེཏྭཱ སཱིཧནཱདཾ ནདིཏྭཱ གོཙརཱཡ པཀྐནྟོ མཧཱམཧིཾསཾ ཝདྷིཏྭཱ ཝརམཾསཾ ཁཱདིཏྭཱ ཨེཀཾ སརཾ ཨོཏརིཏྭཱ མཎིཝཎྞསྶ ཨུདཀསྶ ཀུཙྪིཾ པཱུརེཏྭཱ གུཧཾ སནྡྷཱཡ པཱཡཱསི. ཨཐེཀོ སིངྒཱལོ གོཙརཔྤསུཏོ སཧསཱཝ སཱིཧཾ དིསྭཱ པལཱཡིཏུཾ ཨསཀྐོནྟོ སཱིཧསྶ པུརཏོ པཱདེསུ པཏིཏྭཱ ནིཔཛྫི. ‘‘ཀིཾ, ཛམྦུཀཱ’’ཏི ཙ ཝུཏྟེ ‘‘ཨཧཾ ཏེ, སཱམི, པཱདེ ཨུཔཊྛཱཏུཀཱམོ’’ཏི ཨཱཧ. སཱིཧོ ‘‘སཱདྷུ ཨེཧི, མཾ ཨུཔཊྛཧ, ཝརམཾསཱནི ཏཾ ཁཱདཱཔེསྶཱམཱི’’ཏི ཝཏྭཱ སིངྒཱལཾ ཨཱདཱཡ ཀཉྩནགུཧཾ ཨགམཱསི. སིངྒཱལོ ཏཏོ པཊྛཱཡ སཱིཧཝིགྷཱསཾ ཁཱདཏི. སོ ཀཏིཔཱཧཙྩཡེནེཝ ཐཱུལསརཱིརོ ཨཧོསི.

ཨཐ ནཾ ཨེཀདིཝསཾ གུཧཱཡ ནིཔནྣཀོཝ སཱིཧོ ཨཱཧ ‘‘གཙྪ ཛམྦུཀ, པབྦཏསིཁརེ ཋཏྭཱ པབྦཏཔཱདེ སཉྩརནྟེསུ ཧཏྠིཨསྶམཧིཾསཱདཱིསུ ཡསྶ ¶ མཾསཾ ཁཱདིཏུཀཱམོསི, ཏཾ ཨོལོཀེཏྭཱ ཨཱགནྟྭཱ ‘ཨསུཀམཾསཾ ཁཱདིཏུཀཱམོམྷཱི’ཏི ཝཏྭཱ མཾ ཝནྡིཏྭཱ ‘ཝིརོཙ, སཱམཱི’ཏི ཝདཱཧི, ཨཧཾ ཏཾ ཝདྷིཏྭཱ མདྷུརམཾསཾ ཁཱདིཏྭཱ ཏུཡ྄ཧམྤི དསྶཱམཱི’’ཏི. སིངྒཱལོ པབྦཏསིཁརཾ ཨབྷིརུཧིཏྭཱ ནཱནཔྤཀཱརེ མིགེ ཨོལོཀེཏྭཱ ཡསྶེཝ མཾསཾ ཁཱདིཏུཀཱམོ ཧོཏི, ཀཉྩནགུཧཾ པཝིསིཏྭཱ ཏམེཝ སཱིཧསྶ ¶ ཨཱརོཙེཏྭཱ པཱདེསུ པཏིཏྭཱ ‘‘ཝིརོཙ, སཱམཱི’’ཏི ཝདཏི. སཱིཧོ ཝེགེན པཀྑནྡིཏྭཱ སཙེཔི མཏྟཝརཝཱརཎོ ཧོཏི, ཏཏྠེཝ ནཾ ཛཱིཝིཏཀྑཡཾ པཱཔེཏྭཱ སཡམྤི ཝརམཾསཾ ཁཱདཏི, སིངྒཱལསྶཔི དེཏི. སིངྒཱལོ ཀུཙྪིཔཱུརཾ མཾསཾ ཁཱདིཏྭཱ གུཧཾ པཝིསིཏྭཱ ནིདྡཱཡཏི. སོ གཙྪནྟེ གཙྪནྟེ ཀཱལེ མཱནཾ ཝཌྜྷེསི ‘‘ཨཧམྤི ཙཏུཔྤདོཝ, ཀིཾཀཱརཎཱ དིཝསེ དིཝསེ པརེཧི པོསིཡམཱནོ ཝིཧརཱམི, ཨིཏོ པཊྛཱཡ ཨཧམྤི ཧཏྠིཨཱདཡོ ཧནིཏྭཱ མཾསཾ ཁཱདིསྶཱམི, སཱིཧོཔི མིགརཱཛཱ ‘ཝིརོཙ, སཱམཱི’ཏི ཝུཏྟམེཝ པདཾ ནིསྶཱཡ ཝརཝཱརཎེ ཝདྷེཏི, ཨཧམྤི སཱིཧེན ‘ཝིརོཙ, ཛམྦུཀཱ’ཏི མཾ ཝདཱཔེཏྭཱ ཨེཀཾ ཝརཝཱརཎཾ ཝདྷིཏྭཱ མཾསཾ ཁཱདིསྶཱམཱི’’ཏི.

སོ སཱིཧཾ ཨུཔསངྐམིཏྭཱ ཨེཏདཝོཙ ‘‘སཱམི, མཡཱ དཱིགྷརཏྟཾ ཏུམྷེཧི ཝདྷིཏཝརཝཱརཎཱནཾ མཾསཾ ཁཱདིཏཾ, ཨཧམྤི ཨེཀཾ ཝརཝཱརཎཾ མཱརེཏྭཱ མཾསཾ ཁཱདིཏུཀཱམོ, ཏསྨཱ ཏུམྷེཧི ནིཔནྣཊྛཱནེ ཀཉྩནགུཧཱཡཾ ¶ ནིཔཛྫིསྶཱམི, ཏུམྷེ པབྦཏཔཱདེ ཝིཙརནྟཾ ཝརཝཱརཎཾ ཨོལོཀེཏྭཱ མམ སནྟིཀཾ ཨཱགནྟྭཱ ‘ཝིརོཙ, ཛམྦུཀཱ’ཏི ཝདེཐ, ཨེཏྟཀམཏྟསྨིཾ མཙྪེརཾ མཱ ཀརིཏྠཱ’’ཏི. ཨཐ ནཾ སཱིཧོ ཨཱཧ ‘‘ན, ཏྭཾ ཛམྦུཀ, ཝཱརཎེ ཝདྷིཏུཾ སམཏྠེ སཱིཧཀུལེ ཨུཔྤནྣོ, ཝཱརཎཾ ཝདྷིཏྭཱ མཾསཾ ཁཱདནསམཏྠོ སིངྒཱལོ ནཱམ ལོཀེ ནཏྠི, མཱ ཏེ ཨེཏཾ རུཙྩི, མཡཱ ཝདྷིཏཝརཝཱརཎཱནཉྙེཝ མཾསཾ ཁཱདིཏྭཱ ཝསཱ’’ཏི. སོ ཨེཝཾ ཝུཏྟེཔི ཝིརམིཏུཾ ན ཨིཙྪི, པུནཔྤུནཾ ཡཱཙིཡེཝ. སཱིཧོ ཏཾ ཝཱརེཏུཾ ཨསཀྐོནྟོ སམྤཊིཙྪིཏྭཱ ‘‘ཏེན ཧི མམ ཝསནཊྛཱནཾ པཝིསིཏྭཱ ནིཔཛྫཱ’’ཏི ཛམྦུཀཾ ཀཉྩནགུཧཱཡཾ ནིཔཛྫཱཔེཏྭཱ སཡཾ པབྦཏཔཱདེ མཏྟཝརཝཱརཎཾ ཨོལོཀེཏྭཱ གུཧཱདྭཱརཾ གནྟྭཱ ‘‘ཝིརོཙ, ཛམྦུཀཱ’’ཏི ཨཱཧ. སིངྒཱལོ ཀཉྩནགུཧཱཡ ནིཀྑམིཏྭཱ ¶ ཝིཛམྦྷིཏྭཱ ཙཏུདྡིསཾ ཨོལོཀེཏྭཱ ཏིཀྑཏྟུཾ ཝསྶིཏྭཱ ‘‘མཏྟཝརཝཱརཎསྶ ཀུམྦྷེ པཏིསྶཱམཱི’’ཏི པཀྑནྡིཏྭཱ ཝིརཛ྄ཛྷིཏྭཱ པཱདམཱུལེ པཏི. ཝཱརཎོ དཀྑིཎཔཱདཾ ཨུཀྑིཔིཏྭཱ ཏསྶ སཱིསཾ ཨཀྐམི, སཱིསཊྛཱིནི ཙུཎྞཝིཙུཎྞཱནི ཨཧེསུཾ. ཨཐསྶ སརཱིརཾ ཝཱརཎོ པཱདེན སངྒྷརིཏྭཱ རཱསིཾ ཀཏྭཱ ཨུཔརི ལཎྜཾ པཱཏེཏྭཱ ཀོཉྩནཱདཾ ནདནྟོ ཨརཉྙཾ པཱཝིསི.

བོདྷིསཏྟོ ཨིམཾ པཝཏྟིཾ དིསྭཱ ‘‘ཨིདཱནི ཝིརོཙ, ཛམྦུཀཱ’’ཏི ཝཏྭཱ ཨིམཾ གཱཐམཱཧ –

༡༤༣.

‘‘ལསཱི ¶ ཙ ཏེ ནིཔྥལིཏཱ, མཏྠཀོ ཙ པདཱལིཏོ;

སབྦཱ ཏེ ཕཱསུཀཱ བྷགྒཱ, ཨཛྫ ཁོ ཏྭཾ ཝིརོཙསཱི’’ཏི.

ཏཏྠ ལསཱིཏི མཏྠལུངྒཾ. ནིཔྥལིཏཱཏི ནིཀྑནྟཱ. ཨེཝཾ བོདྷིསཏྟོ ཨིམཾ གཱཐཾ ཝཏྭཱ ཡཱཝཏཱཡུཀཾ ཋཏྭཱ ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ སིངྒཱལོ དེཝདཏྟོ ཨཧོསི, སཱིཧོ པན ཨཧམེཝ ཨཧོསི’’ནྟི.

ཝིརོཙཛཱཏཀཝཎྞནཱ ཏཏིཡཱ.

[༡༤༤] ༤. ནངྒུཊྛཛཱཏཀཝཎྞནཱ

བཧུམྤེཏཾ ཨསབྦྷི ཛཱཏཝེདཱཏི ཨིདཾ སཏྠཱ ཛེཏཝནེ ཝིཧརནྟོ ཨཱཛཱིཝཀཱནཾ མིཙྪཱཏཔཾ ཨཱརབྦྷ ཀཐེསི. ཏདཱ ཀིར ཨཱཛཱིཝཀཱ ཛེཏཝནཔིཊྛིཡཾ ནཱནཔྤཀཱརཾ མིཙྪཱཏཔཾ ཙརནྟི. སམྦཧུལཱ ¶ བྷིཀྑཱུ ཏེསཾ ཨུཀྐུཊིཀཔྤདྷཱནཝགྒུལིཝཏཀཎྚཀཱཔསྶཡཔཉྩཱཏཔཏཔནཱདིབྷེདཾ མིཙྪཱཏཔཾ དིསྭཱ བྷགཝནྟཾ པུཙྪིཾསུ ‘‘ཨཏྠི ནུ ཁོ, བྷནྟེ, ཨིམཾ མིཙྪཱཏཔཾ ནིསྶཱཡ ཀུསལཾ ཝཱ ཝུཌྜྷི ཝཱ’’ཏི. སཏྠཱ ‘‘ན, བྷིཀྑཝེ, ཨེཝརཱུཔཾ མིཙྪཱཏཔཾ ནིསྶཱཡ ཀུསལཾ ཝཱ ཝུཌྜྷི ཝཱ ཨཏྠི, པུབྦེ པཎྜིཏཱ ‘ཨེཝརཱུཔཾ ཏཔཾ ནིསྶཱཡ ཀུསལཾ ཝཱ ཝུཌྜྷི ཝཱ བྷཝིསྶཏཱི’ཏི སཉྙཱཡ ཛཱཏགྒིཾ གཧེཏྭཱ ཨརཉྙཾ པཝིསིཏྭཱ ཨགྒིཛུཧནཱདིཝསེན ཀིཉྩི ཝུཌྜྷིཾ ཨཔསྶནྟཱ ཨགྒིཾ ཨུདཀེན ནིབྦཱཔེཏྭཱ ཀསིཎཔརིཀམྨཾ ཀཏྭཱ ཨབྷིཉྙཱ ཙ སམཱཔཏྟིཡོ ཙ ནིབྦཏྟེཏྭཱ བྲཧྨལོཀཔརཱཡཎཱ ཨཧེསུ’’ནྟི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨུདིཙྩབྲཱཧྨཎཀུལེ ནིབྦཏྟི. ཏསྶ ཛཱཏདིཝསེ མཱཏཱཔིཏརོ ཛཱཏགྒིཾ གཧེཏྭཱ ཋཔེསུཾ. ཨཐ ནཾ སོལ༹སཝསྶཀཱལེ ཨེཏདཝོཙུཾ ‘‘མཡཾ ཏེ, པུཏྟ, ཛཱཏདིཝསེ ཨགྒིཾ གཎྷིམྷ. སཙེསི ཨགཱརཾ ཨཛ྄ཛྷཱཝསིཏུཀཱམོ, ཏཡོ ཝེདེ ཨུགྒཎྷ. ཨཐ བྲཧྨལོཀཾ གནྟུཀཱམོ, ཨགྒིཾ གཧེཏྭཱ ཨརཉྙཾ པཝིསིཏྭཱ ཨགྒིཾ པརིཙརནྟོ མཧཱབྲཧྨཱནཾ ཨཱརཱདྷེཏྭཱ བྲཧྨལོཀཔརཱཡཎོ ཧོཧཱི’’ཏི. སོ ‘‘ན མཡ྄ཧཾ ཨགཱརེན ཨཏྠོ’’ཏི ཨགྒིཾ གཧེཏྭཱ ཨརཉྙཾ པཝིསིཏྭཱ ཨསྶམཔདཾ མཱཔེཏྭཱ ཨགྒིཾ པརིཙརནྟོ ཨརཉྙེ ཝིཧཱསི. སོ ཨེཀདིཝསཾ པཙྩནྟགཱམཀེ གོདཀྑིཎཾ ལབྷིཏྭཱ ཏཾ གོཎཾ ¶ ཨསྶམཔདཾ ནེཏྭཱ ཙིནྟེསི ‘‘ཨགྒིབྷགཝནྟཾ གོམཾསཾ ཁཱདཱཔེསྶཱམཱི’’ཏི. ཨཐསྶ ཨེཏདཧོསི ‘‘ཨིདྷ ལོཎཾ ནཏྠི, ཨགྒིབྷགཝཱ ཨལོཎཾ ཁཱདིཏུཾ ན སཀྑིསྶཏི, གཱམཏོ ལོཎཾ ཨཱཧརིཏྭཱ ཨགྒིབྷགཝནྟཾ སལོཎཀཾ ཁཱདཱཔེསྶཱམཱི’’ཏི. སོ ཏཾ ཏཏྠེཝ བནྡྷིཏྭཱ ལོཎཏྠཱཡ གཱམཀཾ ཨགམཱསི. ཏསྨིཾ གཏེ སམྦཧུལཱ ལུདྡཀཱ ཏཾ ཋཱནཾ ཨཱགཏཱ. གོཎཾ དིསྭཱ ཝདྷིཏྭཱ མཾསཾ པཙིཏྭཱ ཁཱདིཏྭཱ ནངྒུཊྛཉྩ ཛངྒྷཉྩ ཙམྨཉྩ ཏཏྠེཝ ཚཌྜེཏྭཱ ཨཝསེསམཾསཾ ཨཱདཱཡ ཨགམཾསུ.

བྲཱཧྨཎོ ཨཱགནྟྭཱ ནངྒུཊྛཱདིམཏྟམེཝ དིསྭཱ ཙིནྟེསི ‘‘ཨཡཾ ཨགྒིབྷགཝཱ ཨཏྟནོ སནྟཀམྤི རཀྑིཏུཾ ན སཀྐོཏི, མཾ པན ཀདཱ རཀྑིསྶཏི. ཨིམིནཱ ཨགྒིཔརིཙརཎེན ནིརཏྠཀེན བྷཝིཏབྦཾ, ནཏྠི ཨིཏོནིདཱནཾ ཀུསལཾ ཝཱ ཝུཌྜྷི ཝཱ’’ཏི. སོ ཨགྒིཔརིཙརིཡཱཡ ཝིགཏཙྪནྡོ ‘‘ཧམྦྷོ ཨགྒིབྷགཝཱ, ཏྭཾ ཨཏྟནོཔི སནྟཀཾ རཀྑིཏུཾ ཨསཀྐོནྟོ མཾ ཀདཱ རཀྑིསྶསི, མཾསཾ ནཏྠི, ཨེཏྟཀེནཔི ཏུསྶཱཧཱི’’ཏི ནངྒུཊྛཱདཱིནི ཨགྒིམྷི པཀྑིཔནྟོ ཨིམཾ གཱཐམཱཧ –

༡༤༤.

‘‘བཧུམྤེཏཾ ཨསབྦྷི ཛཱཏཝེད, ཡཾ ཏཾ ཝཱལདྷིནཱབྷིཔཱུཛཡཱམ;

མཾསཱརཧསྶ ¶ ནཏྠཛྫ མཾསཾ, ནངྒུཊྛམྤི བྷཝཾ པཊིགྒཧཱཏཱུ’’ཏི.

ཏཏྠ ¶ བཧུམྤེཏནྟི ཨེཏྟཀམྤི བཧུཾ. ཨསབྦྷཱིཏི ཨསཔྤུརིས ཨསཱདྷུཛཱཏིཀ. ཛཱཏཝེདཱཏི ཨགྒིཾ ཨཱལཔཏི. ཨགྒི ཧི ཛཱཏམཏྟོཝ ཝེདིཡཏི པཉྙཱཡཏི པཱཀཊོ ཧོཏི, ཏསྨཱ ‘‘ཛཱཏཝེདོ’’ཏི ཝུཙྩཏི. ཡཾ ཏཾ ཝཱལདྷིནཱབྷིཔཱུཛཡཱམཱཏི ཡཾ ཨཛྫ མཡཾ ཨཏྟནོཔི སནྟཀཾ རཀྑིཏུཾ ཨསམཏྠཾ བྷགཝནྟཾ ཝཱལདྷིནཱ ཨབྷིཔཱུཛཡཱམ, ཨེཏམྤི ཏཝ བཧུམེཝཱཏི དསྶེཏི. མཾསཱརཧསྶཱཏི མཾསཾ ཨརཧསྶ ཏུཡ྄ཧཾ ནཏྠི ཨཛྫ མཾསཾ. ནངྒུཊྛམྤི བྷཝཾ པཊིགྒཧཱཏཱུཏི ཨཏྟནོ སནྟཀཾ རཀྑིཏུཾ ཨསཀྐོནྟོ བྷཝཾ ཨིམཾ སཛངྒྷཙམྨཾ ནངྒུཊྛམྤི པཊིགྒཎྷཱཏཱུཏི.

ཨེཝཾ ཝཏྭཱ མཧཱསཏྟོ ཨགྒིཾ ཨུདཀེན ནིབྦཱཔེཏྭཱ ཨིསིཔབྦཛྫཾ པབྦཛིཏྭཱ ཨབྷིཉྙཱ ཙ སམཱཔཏྟིཡོ ཙ ནིབྦཏྟེཏྭཱ བྲཧྨལོཀཔརཱཡཎོ ཨཧོསི.

སཏྠཱ ¶ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ནིབྦུཏགྒིཏཱཔསོ ཨཧམེཝ ཏེན སམཡེནཱ’’ཏི.

ནངྒུཊྛཛཱཏཀཝཎྞནཱ ཙཏུཏྠཱ.

[༡༤༥] ༥. རཱདྷཛཱཏཀཝཎྞནཱ

ན ཏྭཾ རཱདྷ ཝིཛཱནཱསཱིཏི ཨིདཾ སཏྠཱ ཛེཏཝནེ ཝིཧརནྟོ པུརཱཎདུཏིཡིཀཱཔལོབྷནཾ ཨཱརབྦྷ ཀཐེསི. པཙྩུཔྤནྣཝཏྠུ ཨིནྡྲིཡཛཱཏཀེ ཨཱཝི བྷཝིསྶཏི. སཏྠཱ པན ཏཾ བྷིཀྑུཾ ཨཱམནྟེཏྭཱ ‘‘བྷིཀྑུ མཱཏུགཱམོ ནཱམ ཨརཀྑིཡོ, ཨཱརཀྑཾ ཋཔེཏྭཱ རཀྑནྟཱཔི རཀྑིཏུཾ ན སཀྐོནྟི. ཏྭམྤི པུབྦེ ཨེཏཾ ཨཱརཀྑཾ ཋཔེཏྭཱ རཀྑནྟོཔི རཀྑིཏུཾ ནཱསཀྑི, ཨིདཱནི ཀཐཾ རཀྑིསྶསཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ སུཀཡོནིཡཾ ནིབྦཏྟི. ཀཱསིརཊྛེ ཨེཀོ བྲཱཧྨཎོ བོདྷིསཏྟཉྩ ཀནིཊྛབྷཱཏརཉྩསྶ པུཏྟཊྛཱནེ ཋཔེཏྭཱ པོསེསི. ཏེསུ བོདྷིསཏྟསྶ ‘‘པོཊྛཔཱདོ’’ཏི ནཱམཾ ཨཧོསི, ཨིཏརསྶ ‘‘རཱདྷོ’’ཏི. ཏསྶ པན བྲཱཧྨཎསྶ བྷརིཡཱ ཨནཱཙཱརཱ ཧོཏི དུསྶཱིལཱ. སོ ཝོཧཱརཏྠཱཡ གཙྪནྟོ ཨུབྷོཔི བྷཱཏརོ ཨཱཧ – ‘‘ཏཱཏཱ, སཙེ ཝོ མཱཏཱ བྲཱཧྨཎཱི ཨནཱཙཱརཾ ཨཱཙརཏི, ཝཱརེཡྻཱཐ ན’’ནྟི. བོདྷིསཏྟོ ཨཱཧ ‘‘སཱདྷུ, ཏཱཏ, ཝཱརེཏུཾ སཀྐོནྟཱ ཝཱརེཡྻཱམ, ཨསཀྐོནྟཱ ¶ ཏུཎྷཱི བྷཝིསྶཱམཱ’’ཏི. ཨེཝཾ བྲཱཧྨཎོ བྲཱཧྨཎིཾ སུཀཱནཾ ནིཡྻཱདེཏྭཱ ཝོཧཱརཏྠཱཡ གཏོ.

ཏསྶ ¶ པན གཏདིཝསཏོ པཊྛཱཡ བྲཱཧྨཎཱི ཨཏིཙརིཏུཾ ཨཱརདྡྷཱ, པཝིསནྟཱནཉྩ ནིཀྑམནྟཱནཉྩ ཨནྟོ ནཏྠི, ཏསྶཱ ཀིརིཡཾ དིསྭཱ རཱདྷོ བོདྷིསཏྟཾ ཨཱཧ – ‘‘བྷཱཏིཀ, ཨམྷཱཀཾ པིཏཱ ‘སཙེ ཝོ མཱཏཱ ཨནཱཙཱརཾ ཨཱཙརཏི, ཝཱརེཡྻཱཐཱ’ཏི ཝཏྭཱ གཏོ, ཨིདཱནི ཙེསཱ ཨནཱཙཱརཾ ཨཱཙརཏི, ཝཱརེམ ན’’ནྟི. བོདྷིསཏྟོ ‘‘ཏཱཏ, ཏྭཾ ཨཏྟནོ ཨབྱཏྟཏཱཡ བཱལབྷཱཝེན ཨེཝཾ ཝདེསི, མཱཏུགཱམཾ ནཱམ ཨུཀྑིཔིཏྭཱ ཙརནྟཱཔི རཀྑིཏུཾ ན སཀྐོནྟི. ཡཾ ཀམྨཾ ཀཱཏུཾ ན སཀྐཱ, ན ཏཾ ཀཱཏུཾ ཝཊྚཏཱི’’ཏི ཝཏྭཱ ཨིམཾ གཱཐམཱཧ –

༡༤༥.

‘‘ན ¶ ཏྭཾ རཱདྷ ཝིཛཱནཱསི, ཨཌྜྷརཏྟེ ཨནཱགཏེ;

ཨབྱཡཏཾ ཝིལཔསི, ཝིརཏྟཱ ཀོསིཡཱཡནེ’’ཏི.

ཏཏྠ ན ཏྭཾ རཱདྷ ཝིཛཱནཱསི, ཨཌྜྷརཏྟེ ཨནཱགཏེཏི ཏཱཏ རཱདྷ, ཏྭཾ ན ཛཱནཱསི, ཨཌྜྷརཏྟེ ཨནཱགཏེ པཋམཡཱམེཡེཝ ཨེཏྟཀཱ ཛནཱ ཨཱགཏཱ, ཨིདཱནི ཀོ ཛཱནཱཏི, ཀིཏྟཀཱཔི ཨཱགམིསྶནྟི. ཨབྱཡཏཾ ཝིལཔསཱིཏི ཏྭཾ ཨབྱཏྟཝིལཱཔཾ ཝིལཔསི. ཝིརཏྟཱ ཀོསིཡཱཡནེཏི མཱཏཱ ནོ ཀོསིཡཱཡནཱི བྲཱཧྨཎཱི ཝིརཏྟཱ ཨམྷཱཀཾ པིཏརི ནིཔྤེམཱ ཛཱཏཱ. སཙསྶཱ ཏསྨིཾ སིནེཧོ ཝཱ པེམཾ ཝཱ བྷཝེཡྻ, ན ཨེཝརཱུཔཾ ཨནཱཙཱརཾ ཀརེཡྻཱཏི ཨིམམཏྠཾ ཨེཏེཧི བྱཉྫནེཧི པཀཱསེསི.

ཨེཝཾ པཀཱསེཏྭཱ ཙ པན བྲཱཧྨཎིཡཱ སདྡྷིཾ རཱདྷསྶ ཝཏྟུཾ ན ཨདཱསི. སཱཔི ཡཱཝ བྲཱཧྨཎསྶ ཨནཱགམནཱ ཡཐཱརུཙིཡཱ ཝིཙརི. བྲཱཧྨཎོ ཨཱགནྟྭཱ པོཊྛཔཱདཾ པུཙྪི – ‘‘ཏཱཏ, ཀཱིདིསཱི ཝོ མཱཏཱ’’ཏི. བོདྷིསཏྟོ བྲཱཧྨཎསྶ སབྦཾ ཡཐཱབྷཱུཏཾ ཀཐེཏྭཱ ‘‘ཀིཾ ཏེ, ཏཱཏ, ཨེཝརཱུཔཱཡ དུསྶཱིལཱཡཱ’’ཏི ཝཏྭཱ ‘‘ཏཱཏ, ཨམྷེཧི མཱཏུཡཱ དོསསྶ ཀཐིཏཀཱལཏོ པཊྛཱཡ ན སཀྐཱ ཨིདྷ ཝསིཏུ’’ནྟི བྲཱཧྨཎསྶ པཱདེ ཝནྡིཏྭཱ སདྡྷིཾ རཱདྷེན ཨུཔྤཏིཏྭཱ ཨརཉྙཾ ཨགམཱསི.

སཏྠཱ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེསི, སཙྩཔརིཡོསཱནེ ཨུཀྐཎྛིཏབྷིཀྑུ སོཏཱཔཏྟིཕལེ པཏིཊྛཧི. ‘‘ཏདཱ བྲཱཧྨཎོ ཙ བྲཱཧྨཎཱི ཙ ཨེཏེཡེཝ དྭེ ཛནཱ ཨཧེསུཾ, རཱདྷོ ཨཱནནྡོ, པོཊྛཔཱདོ པན ཨཧམེཝ ཨཧོསི’’ནྟི.

རཱདྷཛཱཏཀཝཎྞནཱ པཉྩམཱ.

[༡༤༦] ༦. སམུདྡཀཱཀཛཱཏཀཝཎྞནཱ

ཨཔི ¶ ¶ ནུ ཧནུཀཱ སནྟཱཏི ཨིདཾ སཏྠཱ ཛེཏཝནེ ཝིཧརནྟོ སམྦཧུལེ མཧལླཀེ བྷིཀྑཱུ ཨཱརབྦྷ ཀཐེསི. ཏེ ཀིར གིཧིཀཱལེ སཱཝཏྠིཡཾ ཀུཊུམྦིཀཱ ཨཌྜྷཱ མཧདྡྷནཱ ཨཉྙམཉྙསཧཱཡཀཱ ཨེཀཏོ ཧུཏྭཱ པུཉྙཱནི ཀརོནྟཱ སཏྠུ དྷམྨདེསནཾ སུཏྭཱ ‘‘མཡཾ མཧལླཀཱ, ཀིཾ ནོ གྷརཱཝཱསེན, སཏྠུ སནྟིཀེ རམཎཱིཡེ བུདྡྷསཱསནེ པབྦཛིཏྭཱ དུཀྑསྶནྟཾ ཀརིསྶཱམཱ’’ཏི ¶ སབྦཾ སཱཔཏེཡྻཾ པུཏྟདྷཱིཏཱདཱིནཾ དཏྭཱ ཨསྶུམུཁཾ ཉཱཏིསངྒྷཾ པཧཱཡ སཏྠཱརཾ པབྦཛྫཾ ཡཱཙིཏྭཱ པབྦཛིཾསུ. པབྦཛིཏྭཱ པན པབྦཛྫཱནུརཱུཔཾ སམཎདྷམྨཾ ན ཀརིཾསུ, མཧལླཀབྷཱཝེན དྷམྨམྤི ན པརིཡཱཔུཎིཾསུ, གིཧིཀཱལེ ཝིཡ པབྦཛིཏཀཱལེཔི ཝིཧཱརཔརིཡནྟེ པཎྞསཱལཾ ཀཱརེཏྭཱ ཨེཀཏོཝ ཝསིཾསུ. པིཎྜཱཡ ཙརནྟཱཔི ཨཉྙཏྠ ཨགནྟྭཱ ཡེབྷུཡྻེན ཨཏྟནོ པུཏྟདཱརསྶེཝ གེཧཾ གནྟྭཱ བྷུཉྫིཾསུ. ཏེསུ ཨེཀསྶ པུརཱཎདུཏིཡིཀཱ སབྦེསམྤི མཧལླཀཏྠེརཱནཾ ཨུཔཀཱརཱ ཨཧོསི, ཏསྨཱ སེསཱཔི ཨཏྟནཱ ལདྡྷཾ ཨཱཧཱརཾ གཧེཏྭཱ ཏསྶཱཡེཝ གེཧེ ནིསཱིདིཏྭཱ བྷུཉྫནྟི. སཱཔི ཏེསཾ ཡཐཱསནྣིཧིཏཾ སཱུཔབྱཉྫནཾ དེཏི. སཱ ཨཉྙཏརེན རོགེན ཕུཊྛཱ ཀཱལམཀཱསི. ཨཐ ཏེ མཧལླཀཏྠེརཱ ཝིཧཱརཾ གནྟྭཱ ཨཉྙམཉྙཾ གཱིཝཱསུ གཧེཏྭཱ ‘‘མདྷུརཧཏྠརསཱ ཨུཔཱསིཀཱ ཀཱལཀཏཱ’’ཏི ཝིཧཱརཔཙྩནྟེ རོདནྟཱ ཝིཙརིཾསུ. ཏེསཾ སདྡཾ སུཏྭཱ ཨིཏོ ཙིཏོ ཙ བྷིཀྑཱུ སནྣིཔཏིཏྭཱ ‘‘ཨཱཝུསོ, ཀསྨཱ རོདཐཱ’’ཏི པུཙྪིཾསུ. ཏེ ‘‘ཨམྷཱཀཾ སཧཱཡསྶ པུརཱཎདུཏིཡིཀཱ མདྷུརཧཏྠརསཱ ཀཱལཀཏཱ ཨམྷཱཀཾ ཨཏིཝིཡ ཨུཔཀཱརཱ, ‘ཨིདཱནི ཀུཏོ ཏཐཱརཱུཔིཾ ལབྷིསྶཱམཱ’ཏི ཨིམིནཱ ཀཱརཎེན རོདིམྷཱ’’ཏི ཨཱཧཾསུ.

ཏེསཾ ཏཾ ཝིཔྤཀཱརཾ དིསྭཱ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཨཱཝུསོ, ཨིམིནཱ ནཱམ ཀཱརཎེན མཧལླཀཏྠེརཱ ཨཉྙམཉྙཾ གཱིཝཱསུ གཧེཏྭཱ ཝིཧཱརཔཙྩནྟེ རོདནྟཱ ཝིཙརནྟཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝེཏེ ཏསྶཱ ཀཱལཀིརིཡཱཡ རོདནྟཱ ཝིཙརནྟི, པུབྦེཔེཏེ ཨིམཾ ཀཱཀཡོནིཡཾ ནིབྦཏྟིཏྭཱ སམུདྡེ མཏཾ ནིསྶཱཡ ‘སམུདྡཨུདཀཾ ཨུསྶིཉྩིཏྭཱ ཨེཏཾ ནཱིཧརིསྶཱམཱ’ཏི ཝཱཡམནྟཱ པཎྜིཏེ ནིསྶཱཡ ཛཱིཝིཏཾ ལབྷིཾསཱུ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ སམུདྡདེཝཏཱ ཧུཏྭཱ ནིབྦཏྟི. ཨཐེཀོ ཀཱཀོ ཨཏྟནོ བྷརིཡཾ ཀཱཀིཾ ཨཱདཱཡ གོཙརཾ པརིཡེསམཱནོ སམུདྡཏཱིརཾ ཨགམཱསི ¶ . ཏསྨིཾ ཀཱལེ མནུསྶཱ སམུདྡཏཱིརེ ཁཱིརཔཱཡཱསམཙྪམཾསསུརཱདཱིཧི ནཱགབལིཀམྨཾ ཀཏྭཱ པཀྐམིཾསུ. ཨཐ སོ ཀཱཀོ བལིཀམྨཊྛཱནཾ གནྟྭཱ ཁཱིརཱདཱིནི དིསྭཱ སདྡྷིཾ ཀཱཀིཡཱ ཁཱིརཔཱཡཱསམཙྪམཾསཱདཱིནི ¶ བྷུཉྫིཏྭཱ བཧུཾ སུརཾ པིཝི. ཏེ ཨུབྷོཔི སུརཱམདམཏྟཱ ‘‘སམུདྡཀཱིལ༹ཾ ཀཱིལི༹སྶཱམཱ’’ཏི ཝེལནྟེ ནིསཱིདིཏྭཱ ནྷཱཡིཏུཾ ཨཱརབྷིཾསུ ¶ ཨཐེཀཱ ཨཱུམི ཨཱགནྟྭཱ ཀཱཀིཾ གཧེཏྭཱ སམུདྡཾ པཝེསེསི. ཏམེཀོ མཙྪོ མཾསཾ ཁཱདིཏྭཱ ཨཛ྄ཛྷོཧརི. ཀཱཀོ ‘‘བྷརིཡཱ མེ མཏཱ’’ཏི རོདི པརིདེཝི. ཨཐསྶ པརིདེཝནསདྡཾ སུཏྭཱ བཧཱུ ཀཱཀཱ སནྣིཔཏིཏྭཱ ‘‘ཀིཾཀཱརཎཱ རོདསཱི’’ཏི པུཙྪིཾསུ. ‘‘སཧཱཡིཀཱ ཝོ ཝེལནྟེ ནྷཱཡམཱནཱ ཨཱུམིཡཱ ཧཊཱ’’ཏི. ཏེ སབྦེཔི ཨེཀརཝཾ རཝནྟཱ རོདིཾསུ. ཨཐ ནེསཾ ཨེཏདཧོསི ‘‘ཨིདཾ སམུདྡཨུདཀཾ ནཱམ ཨམྷཱཀཾ ཀིཾ པཧོསི, ཨུདཀཾ ཨུསྶིཉྩིཏྭཱ སམུདྡཾ ཏུཙྪཾ ཀཏྭཱ སཧཱཡིཀཾ ནཱིཧརིསྶཱམཱ’’ཏི. ཏེ མུཁཾ པཱུརེཏྭཱ པཱུརེཏྭཱ ཨུདཀཾ བཧི ཚཌྜེནྟི, ལོཎཱུདཀེན ཙ གལེ སུསྶམཱནེ ཨུཊྛཱཡུཊྛཱཡ ཐལཾ གནྟྭཱ ཝིསྶམནྟི.

ཏེ ཧནཱུསུ ཀིལནྟེསུ མུཁེསུ སུཀྑནྟེསུ ཨཀྑཱིསུ རཏྟེསུ དཱིནཱ ཀིལནྟཱ ཧུཏྭཱ ཨཉྙམཉྙཾ ཨཱམནྟེཏྭཱ ‘‘ཨམྦྷོ, མཡཾ སམུདྡཨུདཀཾ གཧེཏྭཱ བཧི པཱཏེམ, གཧིཏགཧིཏཊྛཱནཾ པུན ཨུདཀེན པཱུརཏི, སམུདྡཾ ཏུཙྪཾ ཀཱཏུཾ ན སཀྑིསྶཱམཱ’’ཏི ཝཏྭཱ ཨིམཾ གཱཐམཱཧཾསུ –

༡༤༦.

‘‘ཨཔི ནུ ཧནུཀཱ སནྟཱ, མུཁཉྩ པརིསུསྶཏི;

ཨོརམཱམ ན པཱརེམ, པཱུརཏེཝ མཧོདདྷཱི’’ཏི.

ཏཏྠ ཨཔི ནུ ཧནུཀཱ སནྟཱཏི ཨཔི ནོ ཧནུཀཱ སནྟཱ, ཨཔི ཨམྷཱཀཾ ཧནུཀཱ ཀིལནྟཱ. ཨོརམཱམ ན པཱརེམཱཏི མཡཾ ཨཏྟནོ བལེན མཧཱསམུདྡཨུདཀཾ ཨཱཀཌྜྷཱམ ཨོསཱརེམ, ཏུཙྪཾ པན ནཾ ཀཱཏུཾ ན སཀྐོམ. ཨཡཉྷི པཱུརཏེཝ མཧོདདྷཱིཏི.

ཨེཝཉྩ པན ཝཏྭཱ སབྦེཔི ཏེ ཀཱཀཱ ‘‘ཏསྶཱ ཀཱཀིཡཱ ཨེཝརཱུཔཾ ནཱམ ཏུཎྜཾ ཨཧོསི, ཨེཝརཱུཔཱནི ཝཊྚཀྑཱིནི, ཨེཝརཱུཔཾ ཚཝིསཎྛཱནཾ, ཨེཝརཱུཔོ མདྷུརསདྡོ. སཱ ནོ ཨིམཾ ཙོརསམུདྡཾ ནིསྶཱཡ ནཊྛཱ’’ཏི བཧུཾ ཝིཔྤལཔིཾསུ. ཏེ ཨེཝཾ ཝིཔྤལཔམཱནེ ¶ སམུདྡདེཝཏཱ བྷེརཝརཱུཔཾ དསྶེཏྭཱ པལཱཔེསི, ཨེཝཾ ཏེསཾ སོཏྠི ཨཧོསི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཀཱཀཱི ཨཡཾ པུརཱཎདུཏིཡིཀཱ ཨཧོསི, ཀཱཀོ མཧལླཀཏྠེརོ, སེསཀཱཀཱ སེསམཧལླཀཏྠེརཱ, སམུདྡདེཝཏཱ པན ཨཧམེཝ ཨཧོསི’’ནྟི.

སམུདྡཀཱཀཛཱཏཀཝཎྞནཱ ཚཊྛཱ.

[༡༤༧] ༧. པུཔྥརཏྟཛཱཏཀཝཎྞནཱ

ནཡིདཾ ¶ ¶ དུཀྑཾ ཨདུཾ དུཀྑནྟི ཨིདཾ སཏྠཱ ཛེཏཝནེ ཝིཧརནྟོ ཨེཀཾ ཨུཀྐཎྛིཏབྷིཀྑུཾ ཨཱརབྦྷ ཀཐེསི. སོ ཧི བྷགཝཏཱ ‘‘སཙྩཾ ཀིར ཏྭཾ བྷིཀྑུ ཨུཀྐཎྛིཏོ’’ཏི ཝུཏྟེ ‘‘སཙྩ’’ནྟི ཝཏྭཱ ‘‘ཀེན ཨུཀྐཎྛཱཔིཏོསཱི’’ཏི ཙ པུཊྛོ ‘‘པུརཱཎདུཏིཡིཀཱཡཱ’’ཏི ཝཏྭཱ ‘‘མདྷུརཧཏྠརསཱ, བྷནྟེ, སཱ ཨིཏྠཱི, ན སཀྐོམི ཏཾ ཝིནཱ ཝསིཏུ’’ནྟི ཨཱཧ. ཨཐ ནཾ སཏྠཱ ‘‘ཨེསཱ ཏེ བྷིཀྑུ ཨནཏྠཀཱརིཀཱ, པུབྦེཔི ཏྭཾ ཨེཏཾ ནིསྶཱཡ སཱུལེ ཨུཏྟཱསིཏོ ཨེཏཉྙེཝ པཏྠཡམཱནོ ཀཱལཾ ཀཏྭཱ ནིརཡེ ནིབྦཏྟོ, ཨིདཱནི ནཾ ཀསྨཱ པུན པཏྠེསཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨཱཀཱསཊྛདེཝཏཱ ཨཧོསི. ཨཐ བཱརཱཎསིཡཾ ཀཏྟིཀརཏྟིཝཱརཚཎོ སམྤཏྟོ ཧོཏི, ནགརཾ དེཝནགརཾ ཝིཡ ཨལངྐརིཾསུ. སབྦོ ཛནོ ཁཎཀཱིལཱ༹ནིསྶིཏོ ཨཧོསི. ཨེཀསྶ པན དུགྒཏམནུསྶསྶ ཨེཀམེཝ གྷནསཱཊཀཡུགཾ ཨཧོསི. སོ ཏཾ སུདྷོཏཾ དྷོཝཱཔེཏྭཱ ཨོབྷཉྫཱཔེཏྭཱ སཏཝལིཀཾ སཧསྶཝལིཀཾ ཀཱརེཏྭཱ ཋཔེསི. ཨཐ ནཾ བྷརིཡཱ ཨེཝམཱཧ ‘‘ཨིཙྪཱམཧཾ, སཱམི, ཨེཀཾ ཀུསུམྦྷརཏྟཾ ནིཝཱསེཏྭཱ ཨེཀཾ པཱརུཔིཏྭཱ ཏཝ ཀཎྛེ ལགྒཱ ཀཏྟིཀརཏྟིཝཱརཾ ཙརིཏུ’’ནྟི. ‘‘བྷདྡེ, ཀུཏོ ཨམྷཱཀཾ དལིདྡཱནཾ ཀུསུམྦྷཾ, སུདྡྷཝཏྠཾ ནིཝཱསེཏྭཱ ཀཱིལཱ༹ཧཱི’’ཏི? ‘‘ཀུསུམྦྷརཏྟཾ ཨལབྷམཱནཱ ཚཎཀཱིལ༹ཾ ན ཀཱིལི༹སྶཱམི, ཏྭཾ ཨཉྙཾ ཨིཏྠིཾ གཧེཏྭཱ ཀཱིལ༹སྶཱུ’’ཏི. ‘‘བྷདྡེ, ཀིཾ མཾ པཱིལེ༹སི, ཀུཏོ ཨམྷཱཀཾ ཀུསུམྦྷ’’ནྟི? ‘‘སཱམི, པུརིསསྶ ཨིཙྪཱཡ སཏི ཀིཾ ནཱམ ནཏྠི, ནནུ རཉྙོ ཀུསུམྦྷཝཏྠུསྨིཾ བཧུ ཀུསུམྦྷ’’ནྟི. ‘‘བྷདྡེ ¶ , ཏཾ ཋཱནཾ རཀྑསཔརིགྒཧིཏཔོཀྑརཎིསདིསཾ, བལཝཱརཀྑཱ, ན སཀྐཱ ཨུཔསངྐམིཏུཾ, མཱ ཏེ ཨེཏཾ རུཙྩི, ཡཐཱལདྡྷེནེཝ ཏུསྶསྶཱུ’’ཏི. ‘‘སཱམི, རཏྟིབྷཱགེ ཨནྡྷཀཱརེ སཏི པུརིསསྶ ཨགམནཱིཡཊྛཱནཾ ནཱམ ནཏྠཱི’’ཏི. ཨིཏི སོ ཏཱཡ པུནཔྤུནཾ ཀཐེནྟིཡཱ ཀིལེསཝསེན ཏསྶཱ ཝཙནཾ གཧེཏྭཱ ‘‘ཧོཏུ བྷདྡེ, མཱ ཙིནྟཡིཏྠཱ’’ཏི ཏཾ སམསྶཱསེཏྭཱ རཏྟིབྷཱགེ ཛཱིཝིཏཾ པརིཙྩཛིཏྭཱ ནགརཱ ནིཀྑམིཏྭཱ རཉྙོ ཀུསུམྦྷཝཏྠུཾ གནྟྭཱ ཝཏིཾ མདྡིཏྭཱ ཨནྟོཝཏྠུཾ པཱཝིསི. ཨཱརཀྑམནུསྶཱ ཝཏིསདྡཾ སུཏྭཱ ‘‘ཙོརོ ཙོརོ’’ཏི པརིཝཱརེཏྭཱ གཧེཏྭཱ པརིབྷཱསིཏྭཱ ཀོཊྚེཏྭཱ བནྡྷིཏྭཱ པབྷཱཏཱཡ རཏྟིཡཱ རཉྙོ དསྶེསུཾ. རཱཛཱ ¶ ‘‘གཙྪཐ, ནཾ སཱུལེ ཨུཏྟཱསེཐཱ’’ཏི ཨཱཧ. ཨཐ ནཾ པཙྪཱབཱཧཾ བནྡྷིཏྭཱ ཝཛ྄ཛྷབྷེརིཡཱ ཝཛྫམཱནཱཡ ནགརཱ ནིཀྑམཱཔེཏྭཱ སཱུལེ ཨུཏྟཱསེསུཾ. བལཝཝེདནཱ པཝཏྟནྟི, ཀཱཀཱ སཱིསེ ནིལཱིཡིཏྭཱ ཀཎཡགྒསདིསེཧི ཏུཎྷེཧི ཨཀྑཱིནི ཝིཛ྄ཛྷནྟི.

སོ ¶ ཏཐཱརཱུཔམྤི དུཀྑཾ ཨམནསིཀརིཏྭཱ ཏམེཝ ཨིཏྠིཾ ཨནུསྶརིཏྭཱ ‘‘ཏཱཡ ནཱམམྷི གྷནཔུཔྥརཏྟཝཏྠནིཝཏྠཱཡ ཀཎྛེ ཨཱསཏྟབཱཧུཡུགལཱ༹ཡ སདྡྷིཾ ཀཏྟིཀརཏྟིཝཱརཏོ པརིཧཱིནོ’’ཏི ཙིནྟེཏྭཱ ཨིམཾ གཱཐམཱཧ –

༡༤༧.

‘‘ནཡིདཾ དུཀྑཾ ཨདུཾ དུཀྑཾ, ཡཾ མཾ ཏུདཏི ཝཱཡསོ;

ཡཾ སཱམཱ པུཔྥརཏྟེན, ཀཏྟིཀཾ ནཱནུབྷོསྶཏཱི’’ཏི.

ཏཏྠ ནཡིདཾ དུཀྑཾ ཨདུཾ དུཀྑཾ, ཡཾ མཾ ཏུདཏི ཝཱཡསོཏི ཡཉྩ ཨིདཾ སཱུལེ ལགྒནཔཙྩཡཾ ཀཱཡིཀཙེཏསིཀདུཀྑཾ, ཡཉྩ ལོཧམཡེཧི ཝིཡ ཏུཎྜེཧི ཝཱཡསོ ཏུདཏི, ཨིདཾ སབྦམྤི མཡ྄ཧཾ ན དུཀྑཾ, ཨདུཾ དུཀྑཾ ཨེཏཾཡེཝ པན མེ དུཀྑནྟི ཨཏྠོ. ཀཏརཾ? ཡཾ སཱམཱ པུཔྥརཏྟེན, ཀཏྟིཀཾ ནཱནུབྷོསྶཏཱིཏི, ཡཾ སཱ པིཡངྒུསཱམཱ མམ བྷརིཡཱ ཨེཀཾ ཀུསུམྦྷརཏྟཾ ནིཝཱསེཏྭཱ ཨེཀཾ པཱརུཔིཏྭཱ ཨེཝཾ གྷནཔུཔྥརཏྟེན ཝཏྠཡུགེན ཨཙྪནྣཱ མམ ཀཎྛེ གཧེཏྭཱ ཀཏྟིཀརཏྟིཝཱརཾ ནཱནུབྷཝིསྶཏི, ཨིདཾ མཡ྄ཧཾ དུཀྑཾ, ཨེཏདེཝ ཧི མཾ བཱདྷཏཱིཏི? སོ ཨེཝཾ མཱཏུགཱམཾ ཨཱརབྦྷ ཝིཔྤལཔནྟོཡེཝ ཀཱལཾ ཀཏྭཱ ནིརཡེ ནིབྦཏྟི.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ ཛཡམྤཏིཀཱཝ ཨིདཱནི ཛཡམྤཏིཀཱ, ཏཾ ཀཱརཎཾ པཙྩཀྑཾ ཀཏྭཱ ཋིཏཱ ཨཱཀཱསཊྛདེཝཏཱ པན ཨཧམེཝ ཨཧོསི’’ནྟི.

པུཔྥརཏྟཛཱཏཀཝཎྞནཱ སཏྟམཱ.

[༡༤༨] ༨. སིངྒཱལཛཱཏཀཝཎྞནཱ

ནཱཧཾ ¶ པུནཾ ན ཙ པུནནྟི ཨིདཾ སཏྠཱ ཛེཏཝནེ ཝིཧརནྟོ ཀིལེསནིགྒཧཾ ཨཱརབྦྷ ཀཐེསི. སཱཝཏྠིཡཾ ཀིར པཉྩསཏམཏྟཱ སཧཱཡཀཱ མཧཱཝིབྷཝཱ སེཊྛིཔུཏྟཱ སཏྠུ དྷམྨདེསནཾ སུཏྭཱ སཱསནེ ཨུརཾ དཏྭཱ པབྦཛིཏྭཱ ཛེཏཝནེ ཨནྟོཀོཊིསནྠཱརེ ཝིཧརིཾསུ. ཨཐེཀདིཝསཾ ཏེསཾ ཨཌྜྷརཏྟསམཡེ ཀིལེསནིསྶིཏོ སངྐཔྤོ ཨུཔྤཛྫི. ཏེ ཨུཀྐཎྛིཏྭཱ ¶ ཨཏྟནཱ ཛཧིཏཀིལེསེ པུན གཎྷིཏུཾ ཙིཏྟཾ ཨུཔྤཱདཡིཾསུ. ཨཐ སཏྠཱ ཨཌྜྷརཏྟསམནནྟརེ སབྦཉྙུཏཉྙཱཎདཎྜདཱིཔཀཾ ཨུཀྑིཔིཏྭཱ ‘‘ཀཏརཱཡ ནུ ཁོ རཏིཡཱ ཛེཏཝནེ བྷིཀྑཱུ ཝིཧརནྟཱི’’ཏི བྷིཀྑཱུནཾ ཨཛ྄ཛྷཱསཡཾ ཨོལོཀེནྟོ ཏེསཾ བྷིཀྑཱུནཾ ཨབྦྷནྟརེ ཀཱམརཱགསངྐཔྤསྶ ཨུཔྤནྣབྷཱཝཾ ཨཉྙཱསི. སཏྠཱ ཙ ནཱམ ཨེཀཔུཏྟིཀཱ ཨིཏྠཱི ཨཏྟནོ པུཏྟཾ ཝིཡ, ཨེཀཙཀྑུཀོ པུརིསོ ཙཀྑུཾ ཝིཡ ཨཏྟནོ སཱཝཀེ ¶ རཀྑཏི. པུབྦཎྷཱདཱིསུ ཡསྨིཾ ཡསྨིཾ སམཡེ ཏེསཾ ཀིལེསཱ ཨུཔྤཛྫནྟི, ཏེ ཏེསཾ ཀིལེསེ ཏཏོ པརཾ ཝཌྜྷིཏུཾ ཨདཏྭཱ ཏསྨིཾ ཏསྨིཾཡེཝ སམཡེ ནིགྒཎྷཱཏི. ཏེནསྶ ཨེཏདཧོསི ‘‘ཨཡཾ ཙཀྐཝཏྟིརཉྙོ ཨནྟོནགརེཡེཝ ཙོརཱནཾ ཨུཔྤནྣཀཱལོ ཝིཡ ཝཏྟཏི, ཨིདཱནེཝ ཏེསཾ དྷམྨདེསནཾ ཀཏྭཱ ཏེ ཀིལེསེ ནིགྒཎྷིཏྭཱ ཨརཧཏྟཾ དསྶཱམཱི’’ཏི. སོ སུརབྷིགནྡྷཀུཊིཏོ ནིཀྑམིཏྭཱ མདྷུརསྶརེན ‘‘ཨཱནནྡཱ’’ཏི ཨཱཡསྨནྟཾ དྷམྨབྷཎྜཱགཱརིཀཾ ཨཱནནྡཏྠེརཾ ཨཱམནྟེསི. ཐེརོ ‘‘ཀིཾ, བྷནྟེ’’ཏི ཨཱགནྟྭཱ ཝནྡིཏྭཱ ཨཊྛཱསི. ‘‘ཨཱནནྡ, ཡཏྟཀཱ བྷིཀྑཱུ ཨནྟོཀོཊིསནྠཱརེ ཝིཧརནྟི, སབྦེཝ གནྡྷཀུཊིཔརིཝེཎེ སནྣིཔཱཏེཧཱི’’ཏི. ཨེཝཾ ཀིརསྶ ཨཧོསི ‘‘སཙཱཧཾ ཏེཡེཝ པཉྩསཏེ བྷིཀྑཱུ པཀྐོསཱཔེསྶཱམི. ‘སཏྠཱརཱ ནོ ཨབྦྷནྟརེ ཀིལེསཱནཾ ཨུཔྤནྣབྷཱཝོ ཉཱཏོ’ཏི སཾཝིགྒམཱནསཱ དྷམྨདེསནཾ སམྤཊིཙྪིཏུཾ ན སཀྑིསྶནྟཱི’’ཏི. ཏསྨཱ ‘‘སབྦེ སནྣིཔཱཏེཧཱི’’ཏི ཨཱཧ. ཐེརོ ‘‘སཱདྷུ, བྷནྟེ’’ཏི ཨཝཱཔུརཎཾ ཨཱདཱཡ པརིཝེཎེན པརིཝེཎཾ ཨཱཧིཎྜིཏྭཱ སབྦེ བྷིཀྑཱུ གནྡྷཀུཊིཔརིཝེཎེ སནྣིཔཱཏེཏྭཱ བུདྡྷཱསནཾ པཉྙཔེསི.

སཏྠཱ པལླངྐཾ ཨཱབྷུཛིཏྭཱ ཨུཛུཾ ཀཱཡཾ པཎིདྷཱཡ སིལཱཔཐཝིཡཾ པཏིཊྛཧམཱནོ སིནེརུ ཝིཡ པཉྙཏྟེ བུདྡྷཱསནེ ནིསཱིདི ཨཱཝེལཱ༹ཝེལཱ༹ ཡམཀཡམཀཱ ཚབྦཎྞགྷནབུདྡྷརསྨིཡོ ཝིསྶཛྫེནྟོ. ཏཱཔི རསྨིཡོ པཱཏིམཏྟཱ ཚཏྟམཏྟཱ ཀཱུཊཱགཱརཀུཙྪིམཏྟཱ ཚིཛྫིཏྭཱ ཚིཛྫིཏྭཱ གགནཏལེ ཝིཛྫུལཏཱ ཝིཡ སཉྩརིཾསུ, ཨཎྞཝཀུཙྪིཾ ཁོབྷེཏྭཱ བཱལསཱུརིཡུགྒམནཀཱལོ ཝིཡ ཨཧོསི. བྷིཀྑུསངྒྷོཔི སཏྠཱརཾ ཝནྡིཏྭཱ གརུཙིཏྟཾ པཙྩུཔཊྛཔེཏྭཱ རཏྟཀམྦལསཱཎིཡཱ པརིཀྑིཔནྟོ ཝིཡ པརིཝཱརེཏྭཱ ནིསཱིདི. སཏྠཱ བྲཧྨསྶརཾ ནིཙྪཱརེནྟོ བྷིཀྑཱུ ཨཱམནྟེཏྭཱ ¶ ‘‘ན, བྷིཀྑཝེ, བྷིཀྑུནཱ ནཱམ ཀཱམཝིཏཀྐཾ བྱཱཔཱདཝིཏཀྐཾ ཝིཧིཾསཱཝིཏཀྐནྟི ཨིམེ ¶ ཏཡོ ཨཀུསལཝིཏཀྐེ ཝིཏཀྐེཏུཾ ཝཊྚཏི. ཨནྟོ ཨུཔྤནྣཀིལེསོ ཧི ‘པརིཏྟཀོ’ཏི ཨཝམཉྙིཏུཾ ན ཝཊྚཏི, ཀིལེསོ ནཱམ པཙྩཱམིཏྟསདིསོ. པཙྩཱམིཏྟོ ཙ ཁུདྡཀོ ནཱམ ནཏྠི, ཨོཀཱསཾ ལབྷིཏྭཱ ཝིནཱསམེཝ པཱཔེཏི, ཨེཝམེཝ ཨཔྤམཏྟཀོཔི ཀིལེསོ ཨུཔྤཛྫིཏྭཱ ཝཌྜྷིཏུཾ ལབྷནྟོ མཧཱཝིནཱསཾ པཱཔེཏི. ཀིལེསོ ནཱམེས ཧལཱཧལཝིསཱུཔམོ ཨུཔྤཱཊིཏཙྪཝིགཎྜསདིསོ ཨཱསཱིཝིསཔཊིབྷཱགོ ཨསནིཨགྒིསདིསོ ཨལླཱིཡིཏུཾ ན ཡུཏྟོ ཨཱསངྐིཏབྦོ. ཨུཔྤནྣུཔྤནྣཀྑཎེཡེཝ པཊིསངྑཱནབལེན བྷཱཝནཱབལེན ཡཐཱ མུཧུཏྟམྤི ཧདཡེ ཨཊྛཏྭཱ པདུམིནིཔཏྟཱ ཨུདཀབིནྡུ ཝིཡ ཝིཝཊྚཏི, ཨེཝཾ པཛཧིཏབྦོ. པོརཱཎཀཔཎྜི ཏཱཔི ཨཔྤམཏྟཀམྤི ཀིལེསཾ གརཧིཏྭཱ ཡཐཱ པུན ཨབྦྷནྟརེ ནུཔྤཛྫཏི, ཨེཝཾ ནིགྒཎྷིཾསཱུ’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ སིངྒཱལཡོནིཡཾ པཊིསནྡྷིཾ གཧེཏྭཱ ཨརཉྙེ ¶ ནདཱིཏཱིརེ ནིཝཱསཾ ཀཔྤེསི. ཨཐེཀོ ཛརཧཏྠཱི གངྒཱཏཱིརེ ཀཱལམཀཱསི. སིངྒཱལོ གོཙརཔྤསུཏོ ཏཾ མཏཧཏྠིསརཱིརཾ དིསྭཱ ‘‘མཧཱ མེ གོཙརོ ཨུཔྤནྣོ’’ཏི གནྟྭཱ ཏཾ སོཎྜེ ཌཾསི, ནངྒལཱིསཱཡ དཊྛཀཱལོ ཝིཡ ཨཧོསི. སོ ‘‘ནཏྠེཏྠ ཁཱདིཏབྦཡུཏྟཀ’’ནྟི དནྟེསུ ཌཾསི, ཐམྦྷེ དཊྛཀཱལོ ཝིཡ ཨཧོསི. ཀཎྞེ ཌཾསི, སུཔྤཀོཊིཡཾ དཊྛཀཱལོ ཝིཡ ཨཧོསི. ཨུདརེ ཌཾསི, ཀུསཱུལེ དཊྛཀཱལོ ཝིཡ ཨཧོསི. པཱདེ ཌཾསི, ཨུདུཀྑལེ དཊྛཀཱལོ ཝིཡ ཨཧོསི. ནངྒུཊྛེ ཌཾསི, མུསལེ དཊྛཀཱལོ ཝིཡ ཨཧོསི. སོ ‘‘ཨེཏྠཱཔི ནཏྠི ཁཱདིཏབྦཡུཏྟཀ’’ནྟི སབྦཏྠ ཨསྶཱདཾ ཨལབྷནྟོ ཝཙྩམགྒེ ཌཾསི, མུདུཔཱུཝེ དཊྛཀཱལོ ཝིཡ ཨཧོསི. སོ ‘‘ལདྡྷཾ དཱནི མེ ཨིམསྨིཾ སརཱིརེ མུདུ ཁཱདིཏབྦཡུཏྟཀཊྛཱན’’ནྟི ཏཏོ པཊྛཱཡ ཁཱདནྟོ ཨནྟོཀུཙྪིཾ པཝིསིཏྭཱ ཝཀྐཧདཡཱདཱིནི ཁཱདིཏྭཱ པིཔཱསིཏཀཱལེ ལོཧིཏཾ པིཝིཏྭཱ ནིཔཛྫིཏུཀཱམཀཱལེ ཨུདརཾ པཏྠརིཏྭཱ ནིཔཛྫཏི.

ཨཐསྶ ཨེཏདཧོསི – ‘‘ཨིདཾ ཧཏྠིསརཱིརཾ མཡ྄ཧཾ ནིཝཱསསུཁཏཱཡ གེཧསདིསཾ, ཁཱདིཏུཀཱམཏཱཡ སཏི པཧཱུཏམཾསཾ, ཀིཾ དཱནི མེ ཨཉྙཏྠ ཀམྨ’’ནྟི ¶ སོ ཨཉྙཏྠ ཨགནྟྭཱ ཧཏྠིཀུཙྪིཡཾཡེཝ མཾསཾ ཁཱདིཏྭཱ ཝསཏི. གཙྪནྟེ གཙྪནྟེ ཀཱལེ ནིདཱགྷེ ཝཱཏསམྥསྶེན ཙེཝ སཱུརིཡརསྨིསནྟཱཔེན ཙ ཏཾ ཀུཎཔཾ སུསྶིཏྭཱ ¶ ཝལིཡོ གཎྷི, སིངྒཱལསྶ པཝིཊྛདྭཱརཾ པིཧིཏཾ, ཨནྟོཀུཙྪིཡཾ ཨནྡྷཀཱརོ ཨཧོསི. སིངྒཱལསྶ ལོཀནྟརིཀནིཝཱསོ ཝིཡ ཛཱཏོ. ཀུཎཔེ སུསྶནྟེ མཾསམྤི སུསྶི, ལོཧིཏམྤི པཙྪིཛྫི. སོ ནིཀྑམནདྭཱརཾ ཨལབྷནྟོ བྷཡཔྤཏྟོ ཧུཏྭཱ སནྡྷཱཝནྟོ ཨིཏོ ཙིཏོ ཙ པཧརིཏྭཱ ནིཀྑམནདྭཱརཾ པརིཡེསམཱནོ ཝིཙརཏི. ཨེཝཾ ཏསྨིཾ ཨུཀྑལིཡཾ པིཊྛཔིཎྜི ཝིཡ ཨནྟོཀུཙྪིཡཾ པཙྩམཱནེ ཀཏིཔཱཧཙྩཡེན མཧཱམེགྷོ པཱཝསྶི. ཨཐ ནཾ ཀུཎཔཾ ཏེམེཏྭཱ ཨུཊྛཱཡ པཀཏིསཎྛཱནེན ཨཊྛཱསི. ཝཙྩམགྒོ ཝིཝཊོ ཧུཏྭཱ ཏཱརཀཱ ཝིཡ པཉྙཱཡི. སིངྒཱལོ ཏཾ ཚིདྡཾ དིསྭཱ ‘‘ཨིདཱནི མེ ཛཱིཝིཏཾ ལདྡྷ’’ནྟི ཡཱཝ ཧཏྠིསཱིསཱ པཊིཀྐམིཏྭཱ ཝེགེན པཀྑནྡིཏྭཱ ཝཙྩམགྒཾ སཱིསེན པཧརིཏྭཱ ནིཀྑམི. ཏསྶ སཉྪནྣསརཱིརཏྟཱ སབྦལོམཱནི ཝཙྩམགྒེ ཨལླཱིཡིཾསུ. སོ ཏཱལཀྑནྡྷསདིསེན ནིལློམེན སརཱིརེན ཨུབྦིགྒཙིཏྟོ མུཧུཏྟཾ དྷཱཝིཏྭཱ ནིཝཏྟིཏྭཱ ནིསིནྣོ སརཱིརཾ ཨོལོཀེཏྭཱ ‘‘ཨིདཾ དུཀྑཾ མཡ྄ཧཾ ན ཨཉྙེན ཀཏཾ, ལོབྷཧེཏུ པན ལོབྷཀཱརཎཱ ལོབྷཾ ནིསྶཱཡ མཡཱ ཨེཏཾ ཀཏཾ, ཨིཏོ དཱནི པཊྛཱཡ ན ལོབྷཝསིཀོ བྷཝིསྶཱམི, པུན ཧཏྠིསརཱིརཾ ནཱམ ན པཝིསིསྶཱམཱི’’ཏི སཾཝིགྒཧདཡོ ཧུཏྭཱ ཨིམཾ གཱཐམཱཧ –

༡༤༨.

‘‘ནཱཧཾ པུནཾ ན ཙ པུནཾ, ན ཙཱཔི ཨཔུནཔྤུནཾ;

ཧཏྠིབོནྡིཾ པཝེཀྑཱམི, ཏཐཱ ཧི བྷཡཏཛྫིཏོ’’ཏི.

ཏཏྠ ¶ ན ཙཱཔི ཨཔུནཔྤུནནྟི ཨ-ཀཱརོ ནིཔཱཏམཏྟོ. ཨཡཾ པནེཏིསྶཱ སཀལཱཡཔི གཱཐཱཡ ཨཏྠོ – ཨཧཉྷི ཨིཏོ པུན, ཏཏོ ཙ པུནཱཏི ཝུཏྟཝཱརཏོ པུན ཏཏོཔི ཙ པུནཔྤུནཾ ཝཱརཎསརཱིརསངྑཱཏཾ ཧཏྠིབོནྡིཾ ན པཝེཀྑཱམི. ཀིཾཀཱརཎཱ? ཏཐཱ ཧི བྷཡཏཛྫིཏོ, ཏཐཱ ཧི ཨཧཾ ཨིམསྨིཉྙེཝ པཝེསནེ བྷཡཏཛྫིཏོ མརཎབྷཡེན སནྟཱསཾ སཾཝེགཾ ཨཱཔཱདིཏོཏི.

ཨེཝཉྩ ¶ པན ཝཏྭཱ ཏཏོཝ པལཱཡིཏྭཱ པུན ཏཾ ཝཱ ཨཉྙཾ ཝཱ ཧཏྠིསརཱིརཾ ནིཝཏྟིཏྭཱཔི ན ཨོལོཀེསི. ཏཏོ པཊྛཱཡ ན ལོབྷཝསིཀོ ཨཧོསི.

སཏྠཱ ཨིམཾ དྷམྨདེསནཾ ཨཱཧརིཏྭཱ ‘‘བྷིཀྑཝེ, ཨནྟོ ཨུཔྤནྣཀིལེསསྶ ནཱམ ཝཌྜྷིཏུཾ ཨདཏྭཱ ཏཏྠ ཏཏྠེཝ ནཾ ནིགྒཎྷིཏུཾ ཝཊྚཏཱི’’ཏི ¶ ཝཏྭཱ སཙྩཱནི པཀཱསེཏྭཱ ཛཱཏཀཾ སམོདྷཱནེསི. སཙྩཔརིཡོསཱནེ པཉྩསཏཱཔི ཏེ བྷིཀྑཱུ ཨརཧཏྟེ པཏིཊྛཧིཾསུ, ཨཝསེསེསུ ཀེཙི སོཏཱཔནྣཱ, ཀེཙི སཀདཱགཱམིནོ, ཀེཙི ཨནཱགཱམིནོ ཨཧེསུཾ. ཏདཱ སིངྒཱལོ ཨཧམེཝ ཨཧོསིནྟི.

སིངྒཱལཛཱཏཀཝཎྞནཱ ཨཊྛམཱ.

[༡༤༩] ༩. ཨེཀཔཎྞཛཱཏཀཝཎྞནཱ

ཨེཀཔཎྞོ ཨཡཾ རུཀྑོཏི ཨིདཾ སཏྠཱ ཝེསཱལིཾ ཨུཔནིསྶཱཡ མཧཱཝནེ ཀཱུཊཱགཱརསཱལཱཡཾ ཝིཧརནྟོ ཝེསཱལིཀཾ དུཊྛལིཙྪཝིཀུམཱརཾ ཨཱརབྦྷ ཀཐེསི. ཏསྨིཉྷི ཀཱལེ ཝེསཱལིནགརཾ གཱཝུཏགཱཝུཏནྟརེ ཏཱིཧི པཱཀཱརེཧི པརིཀྑིཏྟཾ ཏཱིསུ ཋཱནེསུ གོཔུརཊྚཱལཀཡུཏྟཾ པརམསོབྷགྒཔྤཏྟཾ. ཏཏྠ ནིཙྩཀཱལཾ རཛྫཾ ཀཱརེཏྭཱ ཝསནྟཱནཉྙེཝ རཱཛཱུནཾ སཏྟ སཧསྶཱནི སཏྟ སཏཱནི སཏྟ ཙ རཱཛཱནོ ཧོནྟི, ཏཏྟཀཱཡེཝ ཨུཔརཱཛཱནོ, ཏཏྟཀཱ སེནཱཔཏིནོ, ཏཏྟཀཱ བྷཎྜཱགཱརིཀཱ. ཏེསཾ རཱཛཀུམཱརཱནཾ ཨནྟརེ ཨེཀོ དུཊྛལིཙྪཝིཀུམཱརོ ནཱམ ཨཧོསི ཀོདྷནོ ཙཎྜོ ཕརུསོ སཱཧསིཀོ, དཎྜེན གྷཊྚིཏཨཱསཱིཝིསོ ཝིཡ ནིཙྩཾ པཛྫལིཏོ ཀོདྷེན. ཏསྶ པུརཏོ དྭེ ཏཱིཎི ཝཙནཱནི ཀཐེཏུཾ སམཏྠོ ནཱམ ནཏྠི. ཏཾ ནེཝ མཱཏཱཔིཏརོ, ན ཉཱཏཡོ, ན མིཏྟསུཧཛྫཱ སིཀྑཱཔེཏུཾ སཀྑིཾསུ. ཨཐསྶ མཱཏཱཔིཏཱུནཾ ཨེཏདཧོསི ‘‘ཨཡཾ ཀུམཱརོ ཨཏིཕརུསོ སཱཧསིཀོ, ཋཔེཏྭཱ སམྨཱསམྦུདྡྷཾ ཨཉྙོ ཨིམཾ ཝིནེཏུཾ སམཏྠོ ནཱམ ནཏྠི, བུདྡྷཝེནེཡྻེན བྷཝིཏབྦ’’ནྟི. ཏེ ཏཾ ཨཱདཱཡ སཏྠུ སནྟིཀཾ གནྟྭཱ ཝནྡིཏྭཱ ཨཱཧཾསུ ‘‘བྷནྟེ, ཨཡཾ ཀུམཱརོ ཙཎྜོ ཕརུསོ ཀོདྷེན པཛྫལཏི, ཨིམསྶ ཨོཝཱདཾ དེཐཱ’’ཏི.

སཏྠཱ ¶ ¶ ཏཾ ཀུམཱརཾ ཨོཝདི – ‘‘ཀུམཱར, ཨིམེསུ ནཱམ སཏྟེསུ ཙཎྜེན ཕརུསེན སཱཧསིཀེན ཝིཧེཋཀཛཱཏིཀེན ན བྷཝིཏབྦཾ, ཕརུསཝཱཙོ ཙ ནཱམ ཝིཛཱཏམཱཏུཡཱཔི པིཏུནོཔི པུཏྟདཱརསྶཔི བྷཱཏིབྷགིནཱིནམྤི པཛཱཔཏིཡཱཔི མིཏྟབནྡྷཝཱནམྤི ཨཔྤིཡོ ཧོཏི ཨམནཱཔོ, ཌཾསིཏུཾ ཨཱགཙྪནྟོ སཔྤོ ཝིཡ, ཨཊཝིཡཾ ཨུཊྛིཏཙོརོ ཝིཡ, ཁཱདིཏུཾ ཨཱགཙྪནྟོ ཡཀྑོ ཝིཡ ཙ ཨུབྦེཛནཱིཡོ ཧུཏྭཱ དུཏིཡཙིཏྟཝཱརེ ནིརཡཱདཱིསུ ནིབྦཏྟཏི. དིཊྛེཡེཝ ཙ དྷམྨེ ཀོདྷནོ པུགྒལོ མཎྜིཏཔསཱདྷིཏོཔི དུབྦཎྞོཝ ཧོཏི, པུཎྞཙནྡསསྶིརིཀམྤིསྶ མུཁཾ ཛཱལཱབྷིཧཏཔདུམཾ ཝིཡ མལགྒཧིཏཀཉྩནཱདཱསམཎྜལཾ ཝིཡ ཙ ཝིརཱུཔཾ ཧོཏི དུདྡསིཀཾ. ཀོདྷཾ ནིསྶཱཡ ཧི སཏྟཱ སཏྠཾ ཨཱདཱཡ ཨཏྟནཱཝ ཨཏྟཱནཾ པཧརནྟི, ཝིསཾ ཁཱདནྟི, རཛྫུཡཱ ཨུབྦནྡྷནྟི, པཔཱཏཱ པཔཏནྟི. ཨེཝཾ ཀོདྷཝསེན ཀཱལཾ ཀཏྭཱ ནིརཡཱདཱིསུ ཨུཔྤཛྫནྟི, ཝིཧེཋཀཛཱཏིཀཱཔི དིཊྛེཝ དྷམྨེ གརཧཾ ¶ པཏྭཱ ཀཱཡསྶ བྷེདཱ ནིརཡཱདཱིསུ ཨུཔྤཛྫནྟི, པུན མནུསྶཏྟཾ ལབྷིཏྭཱ ཝིཛཱཏཀཱལཏོ པཊྛཱཡ རོགབཧུལཱཝ ཧོནྟི. ཙཀྑུརོགོ སོཏརོགོཏིཨཱདཱིསུ ཙ རོགེསུ ཨེཀཏོ ཨུཊྛཱཡ ཨེཀསྨིཾ པཏནྟི, རོགེན ཨཔརིམུཏྟཱཝ ཧུཏྭཱ ནིཙྩཾ དུཀྑིཏཱཝ ཧོནྟི, ཏསྨཱ སབྦེསུ སཏྟེསུ མེཏྟཙིཏྟེན ཧིཏཙིཏྟེན མུདུཙིཏྟེན བྷཝིཏབྦཾ. ཨེཝརཱུཔོ ཧི པུགྒལོ ནིརཡཱདིབྷཡེཧི ན པརིམུཙྩཏཱི’’ཏི. སོ ཀུམཱརོ སཏྠུ ཨོཝཱདཾ སུཏྭཱ ཨེཀོཝཱདེནེཝ ནིཧཏམཱནོ དནྟོ ནིབྦིསེཝནོ མེཏྟཙིཏྟོ མུདུཙིཏྟོ ཨཧོསི. ཨཉྙཾ ཨཀྐོསནྟམྤི པཧརནྟམྤི ནིཝཏྟིཏྭཱ ན ཨོལོཀེསི, ཨུདྡྷཊདཱཋོ ཝིཡ སཔྤོ, ཨལ༹ཙྪིནྣོ ཝིཡ ཀཀྐཊཀོ, ཚིནྣཝིསཱཎོ ཝིཡ ཙ ཨུསབྷོ ཨཧོསི.

ཏསྶ ཏཾ པཝཏྟིཾ ཉཏྭཱ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཨཱཝུསོ, དུཊྛལིཙྪཝིཀུམཱརཾ སུཙིརམྤི ཨོཝདིཏྭཱ ནེཝ མཱཏཱཔིཏརོ, ན ཉཱཏིམིཏྟཱདཡོ དམེཏུཾ སཀྑིཾསུ, སམྨཱསམྦུདྡྷོ པན ཏཾ ཨེཀོཝཱདེནེཝ དམེཏྭཱ ནིབྦིསེཝནཾ ཀཏྭཱ མཏྟཝརཝཱརཎཾ ཝིཡ སམུགྒཧིཏཱནེཉྫཀཱརཎཾ ཨཀཱསི. ཡཱཝ སུབྷཱསིཏཾ ཙིདཾ – ‘ཧཏྠིདམཀེན, བྷིཀྑཝེ, ཧཏྠིདམྨོ སཱརིཏོ ཨེཀཾཡེཝ དིསཾ དྷཱཝཏི པུརཏྠིམཾ ཝཱ པཙྪིམཾ ཝཱ ཨུཏྟརཾ ཝཱ དཀྑིཎཾ ཝཱ. ཨསྶདམཀེན…པེ… གོདམཀེན…པེ… དཀྑིཎཾ ཝཱ. ཏཐཱགཏེན ཧི, བྷིཀྑཝེ, ཨརཧཏཱ སམྨཱསམྦུདྡྷེན པུརིསདམྨོ སཱརིཏོ ཨཊྛ དིསཱ ཝིདྷཱཝཏི, རཱུཔཱི རཱུཔཱནི པསྶཏི. ཨཡམེཀཱ དིསཱ…པེ… སོ ¶ ཝུཙྩཏི ‘ཡོགྒཱཙརིཡཱནཾ ཨནུཏྟརོ པུརིསདམྨསཱརཐཱི’ཏི (མ. ནི. ༣.༣༡༢). ན ཧི, ཨཱཝུསོ, སམྨཱསམྦུདྡྷེན སདིསོ པུརིསདམྨསཱརཐཱི ནཱམ ཨཏྠཱི’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝེས མཡཱ ཨེཀོཝཱདེནེཝ དམིཏོ, པུབྦེཔཱཧཾ ཨིམཾ ཨེཀོཝཱདེནེཝ དམེསི’’ནྟི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨུདིཙྩབྲཱཧྨཎཀུལེ ནིབྦཏྟིཏྭཱ ཝཡཔྤཏྟོ ཏཀྐསིལཱཡཾ ཏཡོ ཝེདེ སབྦསིཔྤཱནི ཙ ཨུགྒཧེཏྭཱ ཀིཉྩི ཀཱལཾ གྷརཱཝཱསཾ ཝསིཏྭཱ མཱཏཱཔིཏཱུནཾ ཨཙྩཡེན ཨིསིཔབྦཛྫཾ པབྦཛིཏྭཱ ཨབྷིཉྙཱ ཙ སམཱཔཏྟིཡོ ཙ ནིབྦཏྟེཏྭཱ ཧིམཝནྟེ ཝཱསཾ ཀཔྤེསི. ཏཏྠ ཙིརཾ ཝསིཏྭཱ ལོཎམྦིལསེཝནཏྠཱཡ ཛནཔདཾ གནྟྭཱ བཱརཱཎསིཾ པཏྭཱ རཱཛུཡྻཱནེ ཝསིཏྭཱ པུནདིཝསེ སུནིཝཏྠོ སུཔཱརུཏོ ཏཱཔསཱཀཔྤསམྤནྣོ བྷིཀྑཱཡ ནགརཾ པཝིསིཏྭཱ ¶ རཱཛངྒཎཾ པཱཔུཎི. རཱཛཱ སཱིཧཔཉྫརེན ཨོལོཀེནྟོ ཏཾ དིསྭཱ ཨིརིཡཱཔཐེ པསཱིདིཏྭཱ ‘‘ཨཡཾ ཏཱཔསོ སནྟིནྡྲིཡོ སནྟམཱནསོ ཡུགམཏྟདསོ, པདཝཱརེ པདཝཱརེ སཧསྶཏྠཝིཀཾ ཋཔེནྟོ ཝིཡ སཱིཧཝིཛམྦྷིཏེན ཨཱགཙྪཏི. སཙེ སནྟདྷམྨོ ནཱམེཀོ ཨཏྠི, ཨིམསྶ ཏེནབྦྷནྟརེ བྷཝིཏབྦ’’ནྟི ཙིནྟེཏྭཱ ཨེཀཾ ཨམཙྩཾ ཨོལོཀེསི. སོ ‘‘ཀིཾ ཀརོམི, དེཝཱ’’ཏི ཨཱཧ. ཨེཏཾ ‘‘ཏཱཔསཾ ཨཱནེཧཱི’’ཏི. སོ ‘‘སཱདྷུ, དེཝཱ’’ཏི བོདྷིསཏྟཾ ཨུཔསངྐམིཏྭཱ ཝནྡིཏྭཱ ཧཏྠཏོ བྷིཀྑཱབྷཱཛནཾ གཧེཏྭཱ ‘‘ཀིཾ, མཧཱཔུཉྙཱ’’ཏི ཝུཏྟེ ‘‘བྷནྟེ, རཱཛཱ ཏཾ པཀྐོསཏཱི’’ཏི ཨཱཧ. བོདྷིསཏྟོ ‘‘ན མཡཾ རཱཛཀུལཱུཔཀཱ, ཧེམཝནྟིཀཱ ནཱམམྷཱ’’ཏི ཨཱཧ. ཨམཙྩོ གནྟྭཱ ཏམཏྠཾ རཉྙོ ཨཱརོཙེསི. རཱཛཱ ‘‘ཨཉྙོ ཨམྷཱཀཾ ཀུལཱུཔཀོ ནཏྠི, ཨཱནེཧི ན’’ནྟི ཨཱཧ. ཨམཙྩོ གནྟྭཱ བོདྷིསཏྟཾ ཝནྡིཏྭཱ ཡཱཙིཏྭཱ རཱཛནིཝེསནཾ པཝེསེསི.

རཱཛཱ བོདྷིསཏྟཾ ཝནྡིཏྭཱ སམུསྶིཏསེཏཙྪཏྟེ ཀཉྩནཔལླངྐེ ནིསཱིདཱཔེཏྭཱ ཨཏྟནོ པཊིཡཏྟཾ ནཱནགྒརསབྷོཛནཾ བྷོཛེཏྭཱ ‘‘ཀཧཾ, བྷནྟེ, ཝསཐཱ’’ཏི པུཙྪི. ‘‘ཧེམཝནྟིཀཱ མཡཾ, མཧཱརཱཛཱ’’ཏི. ‘‘ཨིདཱནི ཀཧཾ གཙྪཐཱ’’ཏི? ‘‘ཝསྶཱརཏྟཱནུརཱུཔཾ སེནཱསནཾ ཨུཔདྷཱརེམ, མཧཱརཱཛཱ’’ཏི. ‘‘ཏེན ཧི, བྷནྟེ, ཨམྷཱཀཉྙེཝ ཨུཡྻཱནེ ཝསཐཱ’’ཏི པཊིཉྙཾ གཧེཏྭཱ སཡམྤི ¶ བྷུཉྫིཏྭཱ བོདྷིསཏྟཾ ཨཱདཱཡ ཨུཡྻཱནཾ གནྟྭཱ པཎྞསཱལཾ མཱཔེཏྭཱ རཏྟིཊྛཱནདིཝཱཊྛཱནཱཔི ཀཱརེཏྭཱ པབྦཛིཏཔརིཀྑཱརེ དཏྭཱ ཨུཡྻཱནཔཱལཾ པཊིཙྪཱཔེཏྭཱ ནགརཾ པཱཝིསི. ཏཏོ པཊྛཱཡ བོདྷིསཏྟོ ཨུཡྻཱནེ ཝསཏི. རཱཛཱཔིསྶ དིཝསེ དིཝསེ དྭཏྟིཀྑཏྟུཾ ཨུཔཊྛཱནཾ གཙྪཏི.

ཏསྶ པན རཉྙོ དུཊྛཀུམཱརོ ནཱམ པུཏྟོ ཨཧོསི ཙཎྜོ ཕརུསོ, ནེཝ ནཾ རཱཛཱ དམེཏུཾ ཨསཀྑི, ན སེསཉཱཏཀཱ. ཨམཙྩཱཔི བྲཱཧྨཎགཧཔཏིཀཱཔི ཨེཀཏོ ཧུཏྭཱ ‘‘སཱམི, མཱ ཨེཝཾ ཀརི, ཨེཝཾ ཀཱཏུཾ ན ལབྦྷཱ’’ཏི ཀུཛ྄ཛྷིཏྭཱ ཀཐེནྟཱཔི ཀཐཾ གཱཧཱཔེཏུཾ ནཱསཀྑིཾསུ. རཱཛཱ ཙིནྟེསི ‘‘ཋཔེཏྭཱ མམ ཨཡྻཾ ཧིམཝནྟཏཱཔསཾ ཨཉྙོ ཨིམཾ ཀུམཱརཾ དམེཏུཾ སམཏྠོ ནཱམ ནཏྠི, སོཡེཝ ནཾ དམེསྶཏཱི’’ཏི. སོ ཀུམཱརཾ ཨཱདཱཡ བོདྷིསཏྟསྶ སནྟིཀཾ གནྟྭཱ ‘‘བྷནྟེ, ཨཡཾ ཀུམཱརོ ཙཎྜོ ཕརུསོ ¶ , མཡཾ ཨིམཾ དམེཏུཾ ན སཀྐོམ, ཏུམྷེ ནཾ ཨེཀེན ཨུཔཱཡེན སིཀྑཱཔེཐཱ’’ཏི ¶ ཀུམཱརཾ བོདྷིསཏྟསྶ ནིཡྻཱདེཏྭཱ པཀྐཱམི. བོདྷིསཏྟོ ཀུམཱརཾ གཧེཏྭཱ ཨུཡྻཱནེ ཝིཙརནྟོ ཨེཀཏོ ཨེཀེན, ཨེཀཏོ ཨེཀེནཱཏི དྭཱིཧིཡེཝ པཏྟེཧི ཨེཀཾ ནིམྦཔོཏཀཾ དིསྭཱ ཀུམཱརཾ ཨཱཧ – ‘‘ཀུམཱར, ཨེཏསྶ ཏཱཝ རུཀྑཔོཏཀསྶ པཎྞཾ ཁཱདིཏྭཱ རསཾ ཛཱནཱཧཱི’’ཏི? སོ ཏསྶ ཨེཀཾ པཏྟཾ ཁཱདིཏྭཱ རསཾ ཉཏྭཱ ‘‘དྷཱི’’ཏི སཧ ཁེལེ༹ན བྷཱུམིཡཾ ནུཊྛཱབྷི. ‘‘ཀིཾ ཨེཏཾ, ཀུམཱརཱ’’ཏི ཝུཏྟེ ‘‘བྷནྟེ, ཨིདཱནེཝེས རུཀྑོ ཧལཱཧལཝིསཱུཔམོ, ཝཌྜྷནྟོ པན བཧཱུ མནུསྶེ མཱརེསྶཏཱི’’ཏི ཏཾ ནིམྦཔོཏཀཾ ཨུཔྤཱཊེཏྭཱ ཧཏྠེཧི པརིམདྡིཏྭཱ ཨིམཾ གཱཐམཱཧ –

༡༤༩.

‘‘ཨེཀཔཎྞོ ཨཡཾ རུཀྑོ, ན བྷཱུམྱཱ ཙཏུརངྒུལོ;

ཕལེན ཝིསཀཔྤེན, མཧཱཡཾ ཀིཾ བྷཝིསྶཏཱི’’ཏི.

ཏཏྠ ཨེཀཔཎྞོཏི ཨུབྷོསུ པསྶེསུ ཨེཀེཀཔཎྞོ. ན བྷཱུམྱཱ ཙཏུརངྒུལོཏི བྷཱུམིཏོ ཙཏུརངྒུལམཏྟམྤི ན ཝཌྜྷིཏོ. ཕལེནཱཏི ཕལརསེན. ཝིསཀཔྤེནཱཏི ཧལཱཧལཝིསསདིསེན. ཨེཝཾ ཁུདྡཀོཔི སམཱནོ ཨེཝརཱུཔེན ཏིཏྟཀེན པཎྞེན སམནྣཱགཏོཏི ཨཏྠོ. མཧཱཡཾ ཀིཾ བྷཝིསྶཏཱིཏི ཡདཱ པནཱཡཾ ཝུདྡྷིཔྤཏྟོ མཧཱ བྷཝིསྶཏི, ཏདཱ ཀིཾ ནཱམ བྷཝིསྶཏི, ཨདྡྷཱ མནུསྶམཱརཀོ བྷཝིསྶཏཱིཏི ཨེཏཾ ཨུཔྤཱཊེཏྭཱ མདྡིཏྭཱ ཚཌྜེསིནྟི ཨཱཧ.

ཨཐ ¶ ནཾ བོདྷིསཏྟོ ཨེཏདཝོཙ ‘‘ཀུམཱར, ཏྭཾ ཨིམཾ ནིམྦཔོཏཀཾ ‘ཨིདཱནེཝ ཨེཝཾཏིཏྟཀོ, མཧལླཀཀཱལེ ཀིཾ བྷཝིསྶཏི, ཀུཏོ ཨིམཾ ནིསྶཱཡ ཝུཌྜྷཱི’ཏི ཨུཔྤཱཊེཏྭཱ མདྡིཏྭཱ ཚཌྜེསི? ཡཐཱ ཏྭཾ ཨེཏསྨིཾ པཊིཔཛྫི, ཨེཝམེཝ ཏཝ རཊྛཝཱསིནོཔི ‘ཨཡཾ ཀུམཱརོ དཧརཀཱལེཡེཝ ཨེཝཾ ཙཎྜོ ཕརུསོ, མཧལླཀཀཱལེ རཛྫཾ པཏྭཱ ཀིཾ ནཱམ ཀརིསྶཏི, ཀུཏོ ཨམྷཱཀཾ ཨེཏཾ ནིསྶཱཡ ཝུཌྜྷཱི’ཏི ཏཝ ཀུལསནྟཀཾ རཛྫཾ ཨདཏྭཱ ནིམྦཔོཏཀཾ ཝིཡ ཏཾ ཨུཔྤཱཊེཏྭཱ རཊྛཱ པབྦཱཛནཱིཡཀམྨཾ ཀརིསྶནྟི, ཏསྨཱ ནིམྦརུཀྑཔཊིབྷཱགཏཾ ཧིཏྭཱ ཨིཏོ པཊྛཱཡ ཁནྟིམེཏྟཱནུདྡཡསམྤནྣོ ཧོཧཱི’’ཏི. སོ ཏཏོ པཊྛཱཡ ནིཧཏམཱནོ ནིབྦིསེཝནོ ཁནྟིམེཏྟཱནུདྡཡསམྤནྣོ ཧུཏྭཱ བོདྷིསཏྟསྶ ཨོཝཱདེ ཋཏྭཱ པིཏུ ¶ ཨཙྩཡེན རཛྫཾ པཏྭཱ དཱནཱདཱིནི པུཉྙཱནི ཀཏྭཱ ཡཐཱཀམྨཾ ཨགམཱསི.

སཏྠཱ ཨིམཾ དྷམྨདེསནཾ ཨཱཧརིཏྭཱ ‘‘ན, བྷིཀྑཝེ, ཨིདཱནེཝེས དུཊྛལིཙྪཝིཀུམཱརོ མཡཱ དམིཏོ, པུབྦེཔཱཧཾ ཨེཏཾ དམེསིཾཡེཝཱ’’ཏི ཝཏྭཱ ཛཱཏཀཾ སམོདྷཱནེསི – ‘‘ཏདཱ དུཊྛཀུམཱརོ ཨཡཾ ལིཙྪཝིཀུམཱརོ ཨཧོསི, རཱཛཱ ཨཱནནྡོ, ཨོཝཱདདཱཡཀཏཱཔསོ པན ཨཧམེཝ ཨཧོསི’’ནྟི.

ཨེཀཔཎྞཛཱཏཀཝཎྞནཱ ནཝམཱ.

[༡༥༠] ༡༠. སཉྫཱིཝཛཱཏཀཝཎྞནཱ

ཨསནྟཾ ¶ ཡོ པགྒཎྷཱཏཱིཏི ཨིདཾ སཏྠཱ ཝེལུ༹ཝནེ ཝིཧརནྟོ ཨཛཱཏསཏྟུསྶ རཉྙོ ཨསནྟཔགྒཧཾ ཨཱརབྦྷ ཀཐེསི. སོ ཧི བུདྡྷཱནཾ པཊིཀཎྚཀབྷཱུཏེ དུསྶཱིལེ པཱཔདྷམྨེ དེཝདཏྟེ པསཱིདིཏྭཱ ཏཾ ཨསནྟཾ ཨསཔྤུརིསཾ པགྒཡ྄ཧ ‘‘ཏསྶ སཀྐཱརཾ ཀརིསྶཱམཱི’’ཏི བཧུཾ དྷནཾ པརིཙྩཛིཏྭཱ གཡཱསཱིསེ ཝིཧཱརཾ ཀཱརེཏྭཱ ཏསྶེཝ ཝཙནཾ གཧེཏྭཱ པིཏརཾ དྷམྨརཱཛཱནཾ སོཏཱཔནྣཾ ཨརིཡསཱཝཀཾ གྷཱཏེཏྭཱ ཨཏྟནོ སོཏཱཔཏྟིམགྒསྶ ཨུཔནིསྶཡཾ བྷིནྡིཏྭཱ མཧཱཝིནཱསཾ པཏྟོ. སོ ཧི ‘‘དེཝདཏྟོ པཐཝིཡཾ པཝིཊྛོ’’ཏི སུཏྭཱ ‘‘ཀཙྩི ནུ ཁོ མམྤི པཐཝཱི གིལེཡྻཱ’’ཏི བྷཱིཏཏསིཏོ རཛྫསུཁཾ ན ལབྷཏི, སཡནེ ཨསྶཱདསུཁཾ ན ཝིནྡཏི, ཏིབྦཀཱརཎཱབྷིཏུནྣོ ཧཏྠིཔོཏོ ཝིཡ ཀམྤམཱནོ ཝིཙརཏི. སོ པཐཝིཾ ཕལམཱནཾ ¶ ཝིཡ, ཨཝཱིཙིཛཱལཾ ནིཀྑམནྟིཾ ཝིཡ, པཐཝིཡཱ ཨཏྟཱནཾ གིལིཡམཱནཾ ཝིཡ, ཨཱདིཏྟཱཡ ལོཧཔཐཝིཡཱ ཨུཏྟཱནཀཾ ནིཔཛྫཱཔེཏྭཱ ཨཡསཱུལེཧི ཀོཊིཡམཱནཾ ཝིཡ ཙ སམནུཔསྶི. ཏེནསྶ པཧཊཀུཀྐུཊསྶེཝ མུཧུཏྟམྤི ཀམྤམཱནསྶ ཨཝཏྠཱནཾ ནཱམ ནཱཧོསི. སོ སམྨཱསམྦུདྡྷཾ པསྶིཏུཀཱམོ ཁམཱཔེཏུཀཱམོ པཉྷཾ པུཙྪིཏུཀཱམོ ཨཧོསི, ཨཏྟནོ པན ཨཔརཱདྷམཧནྟཏཱཡ ཨུཔསངྐམིཏུཾ ན སཀྐོཏི.

ཨཐསྶ རཱཛགཧནགརེ ཀཏྟིཀརཏྟིཝཱརེ སམྤཏྟེ དེཝནགརཾ ཝིཡ ནགརེ ཨལངྐཏེ མཧཱཏལེ ཨམཙྩགཎཔརིཝུཏསྶ ཀཉྩནཱསནེ ནིསིནྣསྶ ཛཱིཝཀཾ ཀོམཱརབྷཙྩཾ ཨཝིདཱུརེ ནིསིནྣཾ དིསྭཱ ཨེཏདཧོསི ‘‘ཛཱིཝཀཾ གཧེཏྭཱ སམྨཱསམྦུདྡྷསྶ སནྟིཀཾ གམིསྶཱམི, ན ཁོ པན སཀྐཱ མཡཱ ཨུཛུཀམེཝ ཝཏྟུཾ ‘ཨཧཾ, སམྨ ཛཱིཝཀ, སཡཾ གནྟུཾ ན སཀྐོམི, ཨེཧི མཾ སཏྠུ སནྟིཀཾ ནེཧཱི’ཏི, པརིཡཱཡེན པན རཏྟིསམྤདཾ ཝཎྞེཏྭཱ ‘ཀཾ ནུ ཁྭཛྫ མཡཾ ¶ སམཎཾ ཝཱ བྲཱཧྨཎཾ ཝཱ པཡིརུཔཱསེཡྻཱམ, ཡཾ ནོ པཡིརུཔཱསཏཾ ཙིཏྟཾ པསཱིདེཡྻཱ’ཏི ཝཀྑཱམི, ཏཾ སུཏྭཱ ཨམཙྩཱ ཨཏྟནོ ཨཏྟནོ སཏྠཱརཱནཾ ཝཎྞཾ ཀཐེསྶནྟི, ཛཱིཝཀོཔི སམྨཱསམྦུདྡྷསྶ ཝཎྞཾ ཀཐེསྶཏི. ཨཐ ནཾ གཧེཏྭཱ སཏྠུ སནྟིཀཾ གམིསྶཱམཱི’’ཏི. སོ པཉྩཧི པདེཧི རཏྟིཾ ཝཎྞེསི ‘‘ལཀྑཉྙཱ ཝཏ བྷོ དོསིནཱ རཏྟི, ཨབྷིརཱུཔཱ ཝཏ བྷོ དོསིནཱ རཏྟི, དསྶནཱིཡཱ ཝཏ བྷོ དོསིནཱ རཏྟི, པཱསཱདིཀཱ ཝཏ བྷོ དོསིནཱ རཏྟི, རམཎཱིཡཱ ཝཏ བྷོ དོསིནཱ རཏྟི, ཀཾ ནུ ཁྭཛྫ མཡཾ སམཎཾ ཝཱ བྲཱཧྨཎཾ ཝཱ པཡིརུཔཱསེཡྻཱམ, ཡཾ ནོ པཡིརུཔཱསཏཾ ཙིཏྟཾ པསཱིདེཡྻཱ’’ཏི (དཱི. ནི. ༡.༡༥༠).

ཨཐེཀོ ཨམཙྩོ པཱུརཎཀསྶཔསྶ ཝཎྞཾ ཀཐེསི, ཨེཀོ མཀྑལིགོསཱལསྶ, ཨེཀོ ཨཛིཏཀེསཀམྦལསྶ, ཨེཀོ པཀུདྷཀཙྩཱཡནསྶ, ཨེཀོ སཉྩཡསྶ བེལཊྛཔུཏྟསྶ, ཨེཀོ ནཱཊཔུཏྟནིགཎྛསྶཱཏི ¶ . རཱཛཱ ཏེསཾ ཀཐཾ སུཏྭཱ ཏུཎྷཱི ཨཧོསི. སོ ཧི ཛཱིཝཀསྶེཝ མཧཱཨམཙྩསྶ ཀཐཾ པཙྩཱསཱིསཏི. ཛཱིཝཀོཔི ‘‘རཉྙཱ མཾ ཨཱརབྦྷ ཀཐིཏེཡེཝ ཛཱནིསྶཱམཱི’’ཏི ཨཝིདཱུརེ ཏུཎྷཱི ནིསཱིདི. ཨཐ ནཾ རཱཛཱ ཨཱཧ ‘‘ཏྭཾ པན, སམྨ ཛཱིཝཀ, ཀིཾ ཏུཎྷཱི’’ཏི? ཏསྨིཾ ཁཎེ ཛཱིཝཀོ ཨུཊྛཱཡཱསནཱ ཡེན བྷགཝཱ ཏེནཉྫལིཾ པཎཱམེཏྭཱ ‘‘ཨེསོ, དེཝ, བྷགཝཱ ¶ ཨརཧཾ སམྨཱསམྦུདྡྷོ ཨམྷཱཀཾ ཨམྦཝནེ ཝིཧརཏི སདྡྷིཾ ཨཌྜྷཏེལ༹སེཧི བྷིཀྑུསཏེཧི. ཏཾ ཁོ པན བྷགཝནྟཾ ཨེཝཾ ཀལྱཱཎོ ཀིཏྟིསདྡོ ཨབྦྷུགྒཏོ’’ཏི ནཝ ཨརཧཱདིགུཎེ ཝཏྭཱ ཛཱཏིཏོ པཊྛཱཡ པུབྦནིམིཏྟཱདིབྷེདཾ བྷགཝཏོ ཨཱནུབྷཱཝཾ པཀཱསེཏྭཱ ‘‘ཏཾ བྷགཝནྟཾ དེཝོ པཡིརུཔཱསཏུ, དྷམྨཾ སུཎཱཏུ, པཉྷཾ པུཙྪཏཱུ’’ཏི ཨཱཧ.

རཱཛཱ སམྤུཎྞམནོརཐོ ཧུཏྭཱ ‘‘ཏེན ཧི, སམྨ ཛཱིཝཀ, ཧཏྠིཡཱནཱནི ཀཔྤཱཔེཧཱི’’ཏི ཡཱནཱནི ཀཔྤཱཔེཏྭཱ མཧནྟེན རཱཛཱནུབྷཱཝེན ཛཱིཝཀམྦཝནཾ གནྟྭཱ ཏཏྠ མཎྜལམཱལེ༹ བྷིཀྑུསངྒྷཔརིཝུཏཾ ཏཐཱགཏཾ དིསྭཱ སནྟཝཱིཙིམཛ྄ཛྷེ མཧཱནཱཝཾ ཝིཡ ནིཙྩལཾ བྷིཀྑུསངྒྷཾ ཨིཏོ ཙིཏོ ཙ ཨནུཝིལོཀེཏྭཱ ‘‘ཨེཝརཱུཔཱ ནཱམ མེ པརིསཱ ན དིཊྛཔུབྦཱ’’ཏི ཨིརིཡཱཔཐེཡེཝ པསཱིདིཏྭཱ སངྒྷསྶ ཨཉྫལིཾ པགྒཎྷིཏྭཱ ཐུཏིཾ ཀཏྭཱ བྷགཝནྟཾ ཝནྡིཏྭཱ ཨེཀམནྟཾ ནིསིནྣོ སཱམཉྙཕལཔཉྷཾ པུཙྪི. ཨཐསྶ བྷགཝཱ དྭཱིཧི བྷཱཎཝཱརེཧི པཊིམཎྜིཏཾ སཱམཉྙཕལསུཏྟཾ (དཱི. ནི. ༡.༡༥༠ ཨཱདཡོ) ཀཐེསི. སོ སུཏྟཔརིཡོསཱནེ ཨཏྟམནོ བྷགཝནྟཾ ཁམཱཔེཏྭཱ ཨུཊྛཱཡཱསནཱ པདཀྑིཎཾ ཀཏྭཱ པཀྐཱམི. སཏྠཱ ཨཙིརཔཀྐནྟསྶ རཉྙོ བྷིཀྑཱུ ཨཱམནྟེཏྭཱ ‘‘ཁཏཱཡཾ, བྷིཀྑཝེ, རཱཛཱ, ཨུཔཧཏཱཡཾ, བྷིཀྑཝེ, རཱཛཱ. སཙཱཡཾ ¶ , བྷིཀྑཝེ, རཱཛཱ ཨིསྶརིཡསྶ ཀཱརཎཱ པིཏརཾ དྷམྨིཀཾ དྷམྨརཱཛཱནཾ ཛཱིཝིཏཱ ན ཝོརོཔེསྶཐ, ཨིམསྨིཾཡེཝ ཨཱསནེ ཝིརཛཾ ཝཱིཏམལཾ དྷམྨཙཀྑུཾ ཨུཔྤཛྫིསྶཐ. དེཝདཏྟཾ ནིསྶཱཡ ཨསནྟཔགྒཧཾ ཀཏྭཱ སོཏཱཔཏྟིཕལཱ པརིཧཱིནོ’’ཏི ཨཱཧ.

པུནདིཝསེ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཨཱཝུསོ, ཨཛཱཏསཏྟུ ཀིར ཨསནྟཔགྒཧཾ ཀཏྭཱ དུསྶཱིལཾ པཱཔདྷམྨཾ དེཝདཏྟཾ ནིསྶཱཡ པིཏུགྷཱཏཀཀམྨསྶ ཀཏཏྟཱ སོཏཱཔཏྟིཕལཱ པརིཧཱིནོ, དེཝདཏྟེན ནཱསིཏོ རཱཛཱ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨཛཱཏསཏྟུ ཨིདཱནེཝ ཨསནྟཔགྒཧཾ ཀཏྭཱ མཧཱཝིནཱསཾ པཏྟོ, པུབྦེཔེས ཨསནྟཔགྒཧེནེཝ ཨཏྟཱནཾ ནཱསེསཱི’’ཏི ཝཏྭཱ ཨཏཱིཏཾ ཨཱཧརི.

ཨཏཱིཏེ ¶ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ མཧཱཝིབྷཝེ བྲཱཧྨཎཀུལེ ནིབྦཏྟིཏྭཱ ཝཡཔྤཏྟོ ཏཀྐསིལཾ གནྟྭཱ སབྦསིཔྤཱནི ¶ ཨུགྒཎྷིཏྭཱ བཱརཱཎསིཡཾ དིསཱཔཱམོཀྑོ ཨཱཙརིཡོ ཧུཏྭཱ པཉྩ མཱཎཝཀསཏཱནི སིཔྤཾ ཝཱཙེསི. ཏེསུ མཱཎཝེསུ ཨེཀོ སཉྫཱིཝོ ནཱམ མཱཎཝོ ཨཏྠི, བོདྷིསཏྟོ ཏསྶ མཏཀུཊྛཱཔནཀམནྟཾ ཨདཱསི. སོ ཨུཊྛཱཔནཀམནྟམེཝ གཧེཏྭཱ པཊིབཱཧནམནྟཾ པན ཨགྒཧེཏྭཱཝ ཨེཀདིཝསཾ མཱཎཝེཧི སདྡྷིཾ དཱརུཨཏྠཱཡ ཨརཉྙཾ གནྟྭཱ ཨེཀཾ མཏབྱགྒྷཾ དིསྭཱ མཱཎཝེ ཨཱཧ ‘‘བྷོ, ཨིམཾ མཏབྱགྒྷཾ ཨུཊྛཱཔེསྶཱམཱི’’ཏི. མཱཎཝཱ ‘‘ན སཀྑིསྶསཱི’’ཏི ཨཱཧཾསུ. ‘‘པསྶནྟཱནཉྙེཝ ཝོ ཏཾ ཨུཊྛཱཔེསྶཱམཱི’’ཏི. ‘‘སཙེ, མཱཎཝ, སཀྐོསི, ཨུཊྛཱཔེཧཱི’’ཏི. ཨེཝཉྩ པན ཝཏྭཱ ཏེ མཱཎཝཱ རུཀྑཾ ཨབྷིརུཧིཾསུ. སཉྫཱིཝོ མནྟཾ པརིཝཏྟེཏྭཱ མཏབྱགྒྷཾ སཀྑརཱཧི པཧརི, བྱགྒྷོ ཨུཊྛཱཡ ཝེགེནཱགནྟྭཱ སཉྫཱིཝཾ གལནཱལི༹ཡཾ ཌཾསིཏྭཱ ཛཱིཝིཏཀྑཡཾ པཱཔེཏྭཱ ཏཏྠེཝ པཏི, སཉྫཱིཝོཔི ཏཏྠེཝ པཏི. ཨུབྷོཔི ཨེཀཊྛཱནེཡེཝ མཏཱ ནིཔཛྫིཾསུ.

མཱཎཝཱ དཱརཱུནི ཨཱདཱཡ ཨཱགནྟྭཱ ཏཾ པཝཏྟིཾ ཨཱཙརིཡསྶ ཨཱརོཙེསུཾ. ཨཱཙརིཡོ མཱཎཝེ ཨཱམནྟེཏྭཱ ‘‘ཏཱཏཱ, ཨསནྟཔགྒཧཀཱརཱ ནཱམ ཨཡུཏྟཊྛཱནེ སཀྐཱརསམྨཱནཾ ཀརོནྟཱ ཨེཝརཱུཔཾ དུཀྑཾ པཊིལབྷནྟིཡེཝཱ’’ཏི ཝཏྭཱ ཨིམཾ གཱཐམཱཧ –

༡༥༠.

‘‘ཨསནྟཾ ¶ ཡོ པགྒཎྷཱཏི, ཨསནྟཾ ཙཱུཔསེཝཏི;

ཏམེཝ གྷཱསཾ ཀུརུཏེ, བྱགྒྷོ སཉྫཱིཝིཀོ ཡཐཱ’’ཏི.

ཏཏྠ ཨསནྟནྟི ཏཱིཧི དུཙྩརིཏེཧི སམནྣཱགཏཾ དུསྶཱིལཾ པཱཔདྷམྨཾ. ཡོ པགྒཎྷཱཏཱིཏི ཁཏྟིཡཱདཱིསུ ཡོ ཀོཙི ཨེཝརཱུཔཾ དུསྶཱིལཾ པབྦཛིཏཾ ཝཱ ཙཱིཝརཱདིསམྤདཱནེན, གཧཊྛཾ ཝཱ ཨུཔརཛྫསེནཱཔཏིཊྛཱནཱདིསམྤདཱནེན པགྒཎྷཱཏི, སཀྐཱརསམྨཱནཾ ཀརོཏཱིཏི ཨཏྠོ. ཨསནྟཾ ཙཱུཔསེཝཏཱིཏི ཡོ ཙ ཨེཝརཱུཔཾ ཨསནྟཾ དུསྶཱིལཾ ཨུཔསེཝཏི བྷཛཏི པཡིརུཔཱསཏི. ཏམེཝ གྷཱསཾ ཀུརུཏེཏི ཏམེཝ ཨསནྟཔགྒཎྷཀཾ སོ དུསྶཱིལོ པཱཔཔུགྒལོ གྷསཏི སཾཁཱདཏི ཝིནཱསཾ པཱཔེཏི. ཀཐཾ? བྱགྒྷོ སཉྫཱིཝིཀོ ཡཐཱཏི, ཡཐཱ སཉྫཱིཝེན མཱཎཝེན མནྟཾ པརིཝཏྟེཏྭཱ མཏབྱགྒྷོ སཉྫཱིཝིཀོ ཛཱིཝིཏསམྤདཱནེན སམྤགྒཧིཏོ ཨཏྟནོ ཛཱིཝིཏདཱཡཀཾ སཉྫཱིཝམེཝ ཛཱིཝིཏཱ ཝོརོཔེཏྭཱ ཏཏྠེཝ པཱཏེསི, ཨེཝཾ ཨཉྙོཔི ཡོ ཨསནྟཔགྒཧཾ ཀརོཏི, སོ དུསྶཱིལོ ཏཾ ཨཏྟནོ སམྤགྒཱཧཀམེཝ ཝིནཱསེཏི. ཨེཝཾ ཨསནྟསམྤགྒཱཧཀཱ ཝིནཱསཾ པཱཔུཎནྟཱིཏི.

བོདྷིསཏྟོ ¶ ¶ ཨིམཱཡ གཱཐཱཡ མཱཎཝཱནཾ དྷམྨཾ དེསེཏྭཱ དཱནཱདཱིནི པུཉྙཱནི ཀཏྭཱ ཡཐཱཀམྨཾ གཏོ.

སཏྠཱ ཨིམཾ དྷམྨདེསནཾ ཨཱཧརིཏྭཱ ཛཱཏཀཾ སམོདྷཱནེསི – ‘‘ཏདཱ མཏབྱགྒྷུཊྛཱཔནཀོ མཱཎཝོ ཨཛཱཏསཏྟུ ཨཧོསི, དིསཱཔཱམོཀྑོ ཨཱཙརིཡོ པན ཨཧམེཝ ཨཧོསི’’ནྟི.

སཉྫཱིཝཛཱཏཀཝཎྞནཱ དསམཱ.

ཀཀཎྚཀཝགྒོ པནྣརསམོ.

ཏསྶུདྡཱནཾ –

གོདྷསིངྒཱལཝིརོཙཾ, ནངྒུཊྛརཱདྷཀཱཀཉྩ;

པུཔྥརཏྟཉྩ སིངྒཱལཾ, ཨེཀཔཎྞཉྩ སཉྫཱིཝཾ.

ཨཐ ཝགྒུདྡཱནཾ –

ཨཔཎྞཀོ སཱིལཝགྒོ, ཀུརུངྒོ ཙ ཀུལཱཝཀོ;

ཨཏྠཀཱམོ ཙ ཨཱསཱིསོ, ཨིཏྠཱིཝརུཎཔཱཡིམྷཱ.

ལིཏྟོ པརོསཏཾ ཧཾཙི, ཀུསནཱལཱ༹ སམྤདཱནོ;

ཀཀཎྚཀོ པནྣརས, སཏཔཎྞཱས ཛཱཏཀཱཏི.

ཨེཀཀནིཔཱཏཝཎྞནཱ ནིཊྛིཏཱ.

(པཋམོ བྷཱགོ ནིཊྛིཏོ).