📜
ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ
ཁུདྡཀནིཀཱཡེ
ཛཱཏཀ-ཨཊྛཀཐཱ
(ཚཊྛོ བྷཱགོ)
༢༢. མཧཱནིཔཱཏོ
[༥༣༨] ༡. མཱུགཔཀྑཛཱཏཀཝཎྞནཱ
མཱ ¶ ¶ ¶ པཎྜིཙྩཡཾ ཝིབྷཱཝཡཱཏི ཨིདཾ སཏྠཱ ཛེཏཝནེ ཝིཧརནྟོ མཧཱབྷིནིཀྑམནཾ ཨཱརབྦྷ ཀཐེསི. ཨེཀདིཝསཉྷི བྷིཀྑཱུ དྷམྨསབྷཱཡཾ སནྣིསིནྣཱ བྷགཝཏོ ནེཀྑམྨཔཱརམིཾ ཝཎྞཡནྟཱ ནིསཱིདིཾསུ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘བྷིཀྑཝེ, ཨིདཱནི མམ པཱུརིཏཔཱརམིསྶ རཛྫཾ ཚཌྜེཏྭཱ མཧཱབྷིནིཀྑམནཾ ¶ ནཱམ ཨནཙྪརིཡཾ. ཨཧཉྷི པུབྦེ ཨཔརིཔཀྐེ ཉཱཎེ པཱརམིཡོ པཱུརེནྟོཔི རཛྫཾ ཚཌྜེཏྭཱ ནིཀྑནྟོཡེཝཱ’’ཏི ཝཏྭཱ ཏེཧི ཡཱཙིཏོ ཨཏཱིཏཾ ཨཱཧརི.
ཨཏཱིཏེ ཀཱསིརཊྛེ བཱརཱཎསིཡཾ ཀཱསིརཱཛཱ ནཱམ དྷམྨེན རཛྫཾ ཀཱརེསི. ཏསྶ སོལ༹སསཧསྶཱ ཨིཏྠིཡོ ཨཧེསུཾ. ཏཱསུ ཨེཀཱཔི པུཏྟཾ ཝཱ དྷཱིཏརཾ ཝཱ ན ལབྷི. ནཱགརཱ ‘‘ཨམྷཱཀཾ རཉྙོ ཝཾསཱནུརཀྑཀོ ཨེཀོཔི པུཏྟོ ནཏྠཱི’’ཏི རཱཛངྒཎེ སནྣིཔཏིཏྭཱ ཀུསཛཱཏཀེ (ཛཱ. ༢.༢༠.༡ ཨཱདཡོ) ཨཱགཏནཡེནེཝ རཱཛཱནཾ ཨེཝམཱཧཾསུ ‘‘དེཝ, པུཏྟཾ པཏྠེཐཱ’’ཏི. རཱཛཱ ¶ ཏེསཾ ཝཙནཾ སུཏྭཱ སོལ༹སསཧསྶཱ ཨིཏྠིཡོ ‘‘ཏུམྷེ པུཏྟཾ པཏྠེཐཱ’’ཏི ཨཱཎཱཔེསི. ཏཱ ཙནྡཱདཱིནཾ དེཝཏཱནཾ ཨཱཡཱཙནཨུཔཊྛཱནཱདཱིནི ཀཏྭཱ པཏྠེནྟིཡོཔི པུཏྟཾ ཝཱ དྷཱིཏརཾ ཝཱ ན ལབྷིཾསུ. ཨགྒམཧེསཱི པནསྶ མདྡརཱཛདྷཱིཏཱ ཙནྡཱདེཝཱི ནཱམ སཱིལསམྤནྣཱ ཨཧོསི. རཱཛཱ ‘‘བྷདྡེ, ཏྭམྤི པུཏྟཾ པཏྠེཧཱི’’ཏི ཨཱཧ. སཱ པུཎྞམདིཝསེ ཨུཔོསཐཾ སམཱདིཡིཏྭཱ ཙཱུལ༹སཡནེ ནིཔནྣཱཝ ཨཏྟནོ སཱིལཾ ཨཱཝཛྫེཏྭཱ ‘‘སཙཱཧཾ ཨཁཎྜསཱིལཱ ཨིམིནཱ མེ སཙྩེན ¶ པུཏྟོ ཨུཔྤཛྫཏཱུ’’ཏི སཙྩཀིརིཡཾ ཨཀཱསི.
ཏསྶཱ སཱིལཏེཛེན སཀྐསྶ བྷཝནཾ ཨུཎྷཱཀཱརཾ དསྶེསི. སཀྐོ ཨཱཝཛྫེནྟོ ཏཾ ཀཱརཎཾ ཉཏྭཱ ‘‘ཙནྡཱདེཝཱི པུཏྟཾ པཏྠེཏི, ཧནྡཱཧཾ པུཏྟཾ དསྶཱམཱི’’ཏི ཏསྶཱནུཙྪཝིཀཾ པུཏྟཾ ཨུཔདྷཱརེནྟོ བོདྷིསཏྟཾ པསྶི. བོདྷིསཏྟོཔི ཏདཱཝཱིསཏིཝསྶཱནི བཱརཱཎསིཡཾ རཛྫཾ ཀཱརེཏྭཱ ཏཏོ ཙུཏོ ཨུསྶདནིརཡེ ནིབྦཏྟིཏྭཱ ཨསཱིཏིཝསྶསཧསྶཱནི ཏཏྠ པཙྩིཏྭཱ ཏཏོ ཙཝིཏྭཱ ཏཱཝཏིཾསབྷཝནེ ནིབྦཏྟི. ཏཏྠཱཔི ཡཱཝཏཱཡུཀཾ ཋཏྭཱ ཏཏོ ཙཝིཏྭཱ ཨུཔརིདེཝལོཀཾ གནྟུཀཱམོ ཨཧོསི. སཀྐོ ཏསྶ སནྟིཀཾ གནྟྭཱ ‘‘མཱརིས, ཏཡི མནུསྶལོཀེ ཨུཔྤནྣེ པཱརམིཡོ ཙ ཏེ པཱུརིསྶནྟི, མཧཱཛནསྶ ཝུཌྜྷི ཙ བྷཝིསྶཏི, ཨཡཾ ཀཱསིརཉྙོ ཙནྡཱདེཝཱི ནཱམ ཨགྒམཧེསཱི པུཏྟཾ པཏྠེཏི, ཏསྶཱ ཀུཙྪིཡཾ ཨུཔྤཛྫཱཧཱི’’ཏི ཝཏྭཱ ཨཉྙེསཉྩ ཙཝནདྷམྨཱནཾ པཉྩསཏཱནཾ དེཝཔུཏྟཱནཾ པཊིཉྙཾ གཧེཏྭཱ སཀཊྛཱནམེཝ ཨགམཱསི. སོ ‘‘སཱདྷཱུ’’ཏི སམྤཊིཙྪིཏྭཱ པཉྩཧི དེཝཔུཏྟསཏེཧི སདྡྷིཾ དེཝལོཀཏོ ཙཝིཏྭཱ སཡཾ ཙནྡཱདེཝིཡཱ ཀུཙྪིམྷི པཊིསནྡྷིཾ གཎྷི. ཨིཏརེ པན དེཝཔུཏྟཱ ཨམཙྩབྷརིཡཱནཾ ཀུཙྪཱིསུ པཊིསནྡྷིཾ གཎྷིཾསུ.
ཏདཱ ཙནྡཱདེཝིཡཱ ཀུཙྪི ཝཛིརཔུཎྞཱ ཝིཡ ཨཧོསི. སཱ གབྦྷསྶ པཏིཊྛིཏབྷཱཝཾ ཉཏྭཱ རཉྙོ ཨཱརོཙེསི. ཏཾ སུཏྭཱ རཱཛཱ གབྦྷསྶ པརིཧཱརཾ དཱཔེསི. སཱ པརིཔུཎྞགབྦྷཱ དསམཱསཙྩཡེན དྷཉྙཔུཉྙལཀྑཎསམྤནྣཾ པུཏྟཾ ཝིཛཱཡི. ཏཾ དིཝསམེཝ ཨམཙྩགེཧེསུ པཉྩ ཀུམཱརསཏཱནི ཛཱཡིཾསུ. ཏསྨིཾ ཁཎེ རཱཛཱ ཨམཙྩགཎཔརིཝུཏོ མཧཱཏལེ ནིསིནྣོ ཨཧོསི. ཨཐསྶ ¶ ‘‘པུཏྟོ, ཏེ དེཝ, ཛཱཏོ’’ཏི ཨཱརོཙཡིཾསུ. ཏེསཾ ཝཙནཾ སུཏྭཱ རཉྙོ པུཏྟཔེམཾ ཨུཔྤཛྫིཏྭཱ ཚཝིཡཱདཱིནི ཚིནྡིཏྭཱ ཨཊྛིམིཉྫཾ ¶ ཨཱཧཙྩ ཨཊྛཱསི, ཨབྦྷནྟརེ པཱིཏི ཨུཔྤཛྫི, ཧདཡཾ སཱིཏལཾ ཛཱཏཾ. སོ ཨམཙྩེ པུཙྪི ‘‘ཏུཊྛཱ ནུ ཁོ ཏུམྷེ, མམ པུཏྟོ ཛཱཏོ’’ཏི? ‘‘ཀིཾ ཀཐེཐ, དེཝ, མཡཾ པུབྦེ ཨནཱཐཱ, ཨིདཱནི པན སནཱཐཱ ཛཱཏཱ, སཱམིཀོ ནོ ལདྡྷོ’’ཏི ཨཱཧཾསུ. རཱཛཱ མཧཱསེནགུཏྟཾ པཀྐོསཱཔེཏྭཱ ཨཱཎཱཔེསི ‘‘མམ པུཏྟསྶ པརིཝཱརོ ལདྡྷུཾ ཝཊྚཏི, གཙྪ ཏྭཾ ཨམཙྩགེཧེསུ ཨཛྫ ཛཱཏཱ དཱརཀཱ ཀིཏྟཀཱ ནཱམཱཏི ཨོལོཀེཧཱི’’ཏི. སོ ‘‘སཱདྷཱུ’’ཏི སམྤཊིཙྪིཏྭཱ ཨམཙྩགེཧཱནི གནྟྭཱ ཨོལོཀེནྟོ པཉྩ ཀུམཱརསཏཱནི དིསྭཱ པུནཱགནྟྭཱ རཉྙོ ཨཱརོཙེསི.
རཱཛཱ པཉྩནྣཾ དཱརཀསཏཱནཾ ཀུམཱརཔསཱདྷནཱནི པེསེཏྭཱ པུན པཉྩ དྷཱཏིསཏཱནི ཙ དཱཔེསི. མཧཱསཏྟསྶ པན ཨཏིདཱིགྷཱདིདོསཝཛྫིཏཱ ¶ ཨལམྦཏྠནིཡོ མདྷུརཐཉྙཱཡོ ཙཏུསཊྛི དྷཱཏིཡོ ཨདཱསི. ཨཏིདཱིགྷཱཡ ཧི ཨིཏྠིཡཱ པསྶེ ནིསཱིདིཏྭཱ ཐཉྙཾ པིཝཏོ དཱརཀསྶ གཱིཝཱ དཱིགྷཱ ཧོཏི, ཨཏིརསྶཱཡ པསྶེ ནིསཱིདིཏྭཱ ཐཉྙཾ པིཝནྟོ དཱརཀོ ནིཔྤཱིལི༹ཏཁནྡྷཊྛིཀོ ཧོཏི, ཨཏིཀིསཱཡ པསྶེ ནིསཱིདིཏྭཱ ཐཉྙཾ པིཝཏོ དཱརཀསྶ ཨཱུརཱུ རུཛྫནྟི, ཨཏིཐཱུལཱཡ པསྶེ ནིསཱིདིཏྭཱ ཐཉྙཾ པིཝནྟོ དཱརཀོ པཀྑཔཱདོ ཧོཏི, ཨཏིཀཱལི༹ཀཱཡ ཁཱིརཾ ཨཏིསཱིཏལཾ ཧོཏི, ཨཏིཨོདཱཏཱཡ ཁཱིརཾ ཨཏིཨུཎྷཾ ཧོཏི, ལམྦཏྠནིཡཱ པསྶེ ནིསཱིདིཏྭཱ ཐཉྙཾ པིཝནྟོ དཱརཀོ ནིཔྤཱིལི༹ཏནཱསིཀོ ཧོཏི. ཀཱསཱནཉྩ པན ཨིཏྠཱིནཾ ཁཱིརཾ ཨཏིཨམྦིལཾ ཧོཏི, སཱསཱནཉྩ པན ཨིཏྠཱིནཾ ཁཱིརཾ ཨཏིཀཊུཀཱདིབྷེདཾ ཧོཏི, ཏསྨཱ ཏེ སབྦེཔི དོསེ ཝིཝཛྫེཏྭཱ ཨལམྦཏྠནིཡོ མདྷུརཐཉྙཱཡོ ཙཏུསཊྛི དྷཱཏིཡོ དཏྭཱ མཧནྟཾ སཀྐཱརཾ ཀཏྭཱ ཙནྡཱདེཝིཡཱཔི ཝརཾ ཨདཱསི. སཱཔི གཧིཏཀཾ ཀཏྭཱ ཋཔེསི.
རཱཛཱ ཀུམཱརསྶ ནཱམགྒཧཎདིཝསེ ལཀྑཎཔཱཋཀེ བྲཱཧྨཎེ པཀྐོསཱཔེཏྭཱ ཏེསཾ མཧནྟཾ སཀྐཱརཾ ཀཏྭཱ ཀུམཱརསྶ ཨནྟརཱཡཱབྷཱཝཾ པུཙྪི. ཏེ ཏསྶ ལཀྑཎསམྤཏྟིཾ དིསྭཱ ‘‘མཧཱརཱཛ, དྷཉྙཔུཉྙལཀྑཎསམྤནྣོ ཨཡཾ ཀུམཱརོ, ཏིཊྛཏུ ཨེཀདཱིཔོ, དྭིསཧསྶཔརིཝཱརཱནཾ ཙཏུནྣམྤི མཧཱདཱིཔཱནཾ རཛྫཾ ཀཱརེཏུཾ སམཏྠོ ཧོཏི, ནཱསྶ ཀོཙི ཨནྟརཱཡོ ¶ པཉྙཱཡཏཱི’’ཏི ཝདིཾསུ. རཱཛཱ ཏེསཾ ཝཙནཾ སུཏྭཱ ཏུསྶིཏྭཱ ཀུམཱརསྶ ནཱམཾ ཀརོནྟོ ཡསྨཱ ཀུམཱརསྶ ཛཱཏདིཝསེ སཀལཀཱསིརཊྛེ དེཝོ ཝསྶི, ཡསྨཱ ཙ རཉྙོ ཙེཝ ཨམཙྩཱནཉྩ ཧདཡཾ སཱིཏལཾ ཛཱཏཾ, ཡསྨཱ ཙ ཏེམཡམཱནོ ཛཱཏོ, ཏསྨཱ ‘‘ཏེམིཡཀུམཱརོ’’ཏིསྶ ནཱམཾ ཨཀཱསི. ཨཐ ནཾ དྷཱཏིཡོ ཨེཀམཱསིཀཾ ཨལངྐརིཏྭཱ རཉྙོ སནྟིཀཾ ཨཱནཡིཾསུ. རཱཛཱ པིཡཔུཏྟཾ ཨཱལིངྒིཏྭཱ སཱིསེ ཙུམྦིཏྭཱ ཨངྐེ ནིསཱིདཱཔེཏྭཱ རམཡམཱནོ ནིསཱིདི.
ཏསྨིཾ ¶ ཁཎེ ཙཏྟཱརོ ཙོརཱ ཨཱནཱིཏཱ. རཱཛཱ ཏེ དིསྭཱ ‘‘ཏེསུ ཨེཀསྶ ཙོརསྶ སཀཎྚཀཱཧི ཀསཱཧི པཧཱརསཧསྶཾ ཀརོཐ, ཨེཀསྶ སངྑལིཀཱཡ བནྡྷིཏྭཱ བནྡྷནཱགཱརཔཝེསནཾ ཀརོཐ, ཨེཀསྶ སརཱིརེ སཏྟིཔཧཱརཾ ཀརོཐ, ཨེཀསྶ སཱུལཱརོཔནཾ ཀརོཐཱ’’ཏི ཨཱཎཱཔེསི. ཨཐ མཧཱསཏྟོ པིཏུ ཝཙནཾ སུཏྭཱ བྷཱིཏཏསིཏོ ཧུཏྭཱ ‘‘ཨཧོ མམ པིཏཱ རཛྫཾ ནིསྶཱཡ ཨཏིབྷཱརིཡཾ ནིརཡགཱམིཀམྨཾ ཨཀཱསཱི’’ཏི ཙིནྟེསི. པུནདིཝསེ པན ཏཾ སེཏཙྪཏྟསྶ ཧེཊྛཱ ཨལངྐཏསིརིསཡནེ ནིཔཛྫཱཔེསུཾ. སོ ཐོཀཾ ནིདྡཱཡིཏྭཱ པབུདྡྷོ ཨཀྑཱིནི ཨུམྨཱིལེཏྭཱ སེཏཙྪཏྟཾ ཨོལོཀེནྟོ མཧནྟཾ སིརིཝིབྷཝཾ པསྶི. ཨཐསྶ པཀཏིཡཱཔི བྷཱིཏཏསིཏསྶ ཨཏིརེཀཏརཾ བྷཡཾ ཨུཔྤཛྫི. སོ ‘‘ཀུཏོ ནུ ¶ ཁོ ཨཧཾ ཨིམཾ ཙོརགེཧཾ ཨཱགཏོམྷཱི’’ཏི ཨུཔདྷཱརེནྟོ ཛཱཏིསྶརཉཱཎེན དེཝལོཀཏོ ཨཱགཏབྷཱཝཾ ཉཏྭཱ ཏཏོ པརཾ ཨོལོཀེནྟོ ཨུསྶདནིརཡེ པཀྐབྷཱཝཾ པསྶི, ཏཏོ པརཾ ཨོལོཀེནྟོ ཏསྨིཾཡེཝ ནགརེ རཱཛབྷཱཝཾ ཨཉྙཱསི.
ཨཐསྶ ‘‘ཨཧཾ ཝཱིསཏིཝསྶཱནི བཱརཱཎསིཡཾ རཛྫཾ ཀཱརེཏྭཱ ཨསཱིཏིཝསྶསཧསྶཱནི ཨུསྶདནིརཡེ པཙྩིཾ, ཨིདཱནི པུནཔི ཨིམསྨིཾཡེཝ ཙོརགེཧེ ནིབྦཏྟོམྷི, པིཏཱ མེ ཧིཡྻོ ཙཏཱུསུ ཙོརེསུ ཨཱནཱིཏེསུ ཏཐཱརཱུཔཾ ཕརུསཾ ནིརཡསཾཝཏྟནིཀཾ ཀཐཾ ཀཐེསི, སཙཱཧཾ རཛྫཾ ཀཱརེསྶཱམི, པུནཔི ནིརཡེ ནིབྦཏྟིཏྭཱ མཧཱདུཀྑཾ ཨནུབྷཝིསྶཱམཱི’’ཏི ཨཱཝཛྫེནྟསྶ མཧནྟཾ བྷཡཾ ཨུཔྤཛྫི. བོདྷིསཏྟསྶ ཀཉྩནཝཎྞཾ སརཱིརཾ ཧཏྠེན པརིམདྡིཏཾ པདུམཾ ཝིཡ མིལཱཏཾ དུབྦཎྞཾ ཨཧོསི. སོ ‘‘ཀཐཾ ནུ ཁོ ཨིམམྷཱ ཙོརགེཧཱ མུཙྩེཡྻ’’ནྟི ཙིནྟེནྟོ ནིཔཛྫི. ཨཐ ནཾ ཨེཀསྨིཾ ཨཏྟབྷཱཝེ མཱཏུབྷཱུཏཔུབྦཱ ཚཏྟེ ¶ ཨདྷིཝཏྠཱ དེཝདྷཱིཏཱ ཨསྶཱསེཏྭཱ ‘‘ཏཱཏ ཏེམིཡཀུམཱར, མཱ བྷཱཡི, མཱ སོཙི, མཱ ཙིནྟཡི. སཙེ ཨིཏོ མུཙྩིཏུཀཱམོསི, ཏྭཾ ཨཔཱིཋསཔྤཱིཔི པཱིཋསཔྤཱི ཝིཡ ཧོཧི, ཨབདྷིརོཔི བདྷིརོ ཝིཡ ཧོཧི, ཨམཱུགོཔི མཱུགོ ཝིཡ ཧོཧི, ཨིམཱནི ཏཱིཎི ཨངྒཱནི ཨདྷིཊྛཱཡ ཨཏྟནོ པཎྜིཏབྷཱཝཾ མཱ པཀཱསེཧཱི’’ཏི ཝཏྭཱ པཋམཾ གཱཐམཱཧ –
‘‘མཱ པཎྜིཙྩཡཾ ཝིབྷཱཝཡ, བཱལམཏོ བྷཝ སབྦཔཱཎིནཾ;
སབྦོ ཏཾ ཛནོ ཨོཙིནཱཡཏུ, ཨེཝཾ ཏཝ ཨཏྠོ བྷཝིསྶཏཱི’’ཏི.
ཏཏྠ པཎྜིཙྩཡནྟི པཎྜིཙྩཾ, ཨཡམེཝ ཝཱ པཱཋོ. བཱལམཏོཏི བཱལོ ཨིཏི སམྨཏོ. སབྦོ ཛནོཏི སཀལོ ཨནྟོཛནོ ཙེཝ བཧིཛནོ ཙ. ཨོཙིནཱཡཏཱུཏི ‘‘ནཱིཧརཐེཏཾ ཀཱལ༹ཀཎྞི’’ནྟི ཨཝམཉྙཏུ, ཨཝཛཱནཱཏཱུཏི ཨཏྠོ.
སོ ཏསྶཱ ཝཙནེན ཨསྶཱསཾ པཊིལབྷིཏྭཱ –
‘‘ཀརོམི ¶ ཏེ ཏཾ ཝཙནཾ, ཡཾ མཾ བྷཎསི དེཝཏེ;
ཨཏྠཀཱམཱསི མེ ཨམྨ, ཧིཏཀཱམཱསི དེཝཏེ’’ཏི. –
ཨིམཾ གཱཐཾ ཝཏྭཱ ཏཱནི ཏཱིཎི ཨངྒཱནི ཨདྷིཊྛཱསི. སཱ ཙ དེཝདྷཱིཏཱ ཨནྟརདྷཱཡི. རཱཛཱ པུཏྟསྶ ཨནུཀྐཎྛནཏྠཱཡ ཏཱནི པཉྩ ཀུམཱརསཏཱནི ཏསྶ སནྟིཀེཡེཝ ཋཔེསི. ཏེ དཱརཀཱ ཐཉྙཏྠཱཡ རོདནྟི པརིདེཝནྟི. མཧཱསཏྟོ པན ནིརཡབྷཡཏཛྫིཏོ ‘‘རཛྫཏོ མེ སུསྶིཏྭཱ མཏམེཝ སེཡྻོ’’ཏི ན རོདཏི ན པརིདེཝཏི. ཨཐསྶ དྷཱཏིཡོ ཏཾ པཝཏྟིཾ ཉཏྭཱ ཙནྡཱདེཝིཡཱ ¶ ཨཱརོཙཡིཾསུ. སཱཔི རཉྙོ ཨཱརོཙེསི. རཱཛཱ ནེམིཏྟཀེ བྲཱཧྨཎེ པཀྐོསཱཔེཏྭཱ པུཙྪི. ཨཐ བྲཱཧྨཎཱ ཨཱཧཾསུ ‘‘དེཝ, ཀུམཱརསྶ པཀཏིཝེལཾ ཨཏིཀྐམིཏྭཱ ཐཉྙཾ དཱཏུཾ ཝཊྚཏི, ཨེཝཾ སོ རོདམཱནོ ཐནཾ དལ༹ྷཾ གཧེཏྭཱ སཡམེཝ པིཝིསྶཏཱི’’ཏི. ཏཏོ པཊྛཱཡ དྷཱཏིཡོ ཀུམཱརསྶ པཀཏིཝེལཾ ཨཏིཀྐམིཏྭཱ ཐཉྙཾ དེནྟི. དདམཱནཱ ཙ ཀདཱཙི ཨེཀཝཱརཾ ཨཏིཀྐམིཏྭཱ དེནྟི, ཀདཱཙི སཀལདིཝསཾ ཁཱིརཾ ན དེནྟི.
ཝཱིམཾསནཀཎྜཾ
སོ ¶ ནིརཡབྷཡཏཛྫིཏོ སུསྶནྟོཔི ཐཉྙཏྠཱཡ ན རོདཏི, ན པརིདེཝཏི. ཨཐ ནཾ ཨརོདནྟམྤི དིསྭཱ ‘‘པུཏྟོ མེ ཚཱཏོ’’ཏི མཱཏཱ ཝཱ ཐཉྙཾ པཱཡེཏི, ཀདཱཙི དྷཱཏིཡོ ཝཱ པཱཡེནྟི. སེསདཱརཀཱ ཐཉྙཾ ཨལདྡྷཝེལཱཡམེཝ རོདནྟི པརིདེཝནྟི. མཧཱསཏྟོ པན ནིརཡབྷཡཏཛྫིཏོ ན རོདཏི, ན པརིདེཝཏི, ན ནིདྡཱཡཏི, ན ཧཏྠཔཱདེ སམིཉྫཏི, ན སདྡཾ ཀརོཏི. ཨཐསྶ དྷཱཏིཡོ ‘‘པཱིཋསཔྤཱིནཾ ཧཏྠཔཱདཱ ནཱམ ན ཨེཝརཱུཔཱ ཧོནྟི, མཱུགཱནཾ ཧནུཀཔརིཡོསཱནཾ ནཱམ ན ཨེཝརཱུཔཾ ཧོཏི, བདྷིརཱནཾ ཀཎྞསོཏཱནི ནཱམ ན ཨེཝརཱུཔཱནི ཧོནྟི, བྷཝིཏབྦམེཏྠ ཀཱརཎེན, ཝཱིམཾསིསྶཱམ ན’’ནྟི ཙིནྟེཏྭཱ ‘‘ཁཱིརེན ཏཱཝ ནཾ ཝཱིམཾསིསྶཱམཱ’’ཏི སཀལདིཝསཾ ཁཱིརཾ ན དེནྟི. སོ སུསྶནྟོཔི ཁཱིརཏྠཱཡ སདྡཾ ན ཀརོཏི. ཨཐསྶ མཱཏཱ ‘‘པུཏྟོ མེ ཚཱཏོ’’ཏི སཡམེཝ ཐཉྙཾ པཱཡེཏི. ཨེཝཾ ཨནྟརནྟརཱ ཁཱིརཾ ཨདཏྭཱ ཨེཀསཾཝཙྪརཾ ཝཱིམཾསནྟཱཔིསྶ ཨནྟརཾ ན པསྶིཾསུ.
ཏཏོ ཨམཙྩཱདཡོ རཉྙོ ཨཱརོཙེསུཾ ‘‘ཨེཀཝསྶིཀདཱརཀཱ ནཱམ པཱུཝཁཛྫཀཾ པིཡཱཡནྟི, ཏེན ནཾ ཝཱིམཾསིསྶཱམཱ’’ཏི པཉྩ ཀུམཱརསཏཱནི ཏསྶ སནྟིཀེཡེཝ ནིསཱིདཱཔེཏྭཱ ནཱནཱཔཱུཝཁཛྫཀཱནི ཨུཔནཱམེཏྭཱ བོདྷིསཏྟསྶ ཨཝིདཱུརེ ཋཔེཏྭཱ ‘‘ཡཐཱརུཙི ཏཱནི པཱུཝཁཛྫཀཱནི ¶ གཎྷཐཱ’’ཏི པཊིཙྪནྣཊྛཱནེ ཏིཊྛནྟི. སེསདཱརཀཱ ཀལཧཾ ཀརོནྟཱ ཨཉྙམཉྙཾ པཧརནྟཱ ཏཾ ཏཾ གཧེཏྭཱ ཁཱདནྟི. མཧཱསཏྟོ པན ཨཏྟཱནཾ ཨོཝདིཏྭཱ ‘‘ཏཱཏ ཏེམིཡཀུམཱར, ནིརཡབྷཡཾ ཨིཙྪནྟོ པཱུཝཁཛྫཀཾ ཨིཙྪཱཧཱི’’ཏི ནིརཡབྷཡཏཛྫིཏོ པཱུཝཁཛྫཀཾ ན ཨོལོཀེསི. ཨེཝཾ པཱུཝཁཛྫཀེནཔི ཨེཀསཾཝཙྪརཾ ཨནྟརནྟརཱ ཝཱིམཾསནྟཱཔིསྶ ནེཝ ཨནྟརཾ པསྶིཾསུ.
ཏཏོ ‘‘དྭིཝསྶིཀདཱརཀཱ ནཱམ ཕལཱཕལཾ པིཡཱཡནྟི, ཏེན ནཾ ཝཱིམཾསིསྶཱམཱ’’ཏི ནཱནཱཕལཱནི ཨུཔནཱམེཏྭཱ བོདྷིསཏྟསྶ ཨཝིདཱུརེ ཋཔེཏྭཱ ཝཱིམཾསིཾསུ. སེསདཱརཀཱ ¶ ཀལཧཾ ཀཏྭཱ ཡུཛ྄ཛྷནྟཱ ཏཾ ཏཾ གཧེཏྭཱ ཁཱདནྟི. སོ ནིརཡབྷཡཏཛྫིཏོ ཏམྤི ན ཨོལོཀེསི. ཨེཝཾ ཕལཱཕལེནཔི ཨེཀསཾཝཙྪརཾ ཨནྟརནྟརཱ ཝཱིམཾསནྟཱཔིསྶ ནེཝ ཨནྟརཾ པསྶིཾསུ.
ཏཏོ ‘‘ཏིཝསྶིཀདཱརཀཱ ནཱམ ཀཱིལ༹ནབྷཎྜཀཾ པིཡཱཡནྟི, ཏེན ནཾ ཝཱིམཾསིསྶཱམཱ’’ཏི ནཱནཱསུཝཎྞམཡཱནི ཧཏྠིཨསྶརཱུཔཀཱདཱིནི ཀཱརཱཔེཏྭཱ བོདྷིསཏྟསྶ ཨཝིདཱུརེ ཋཔེསུཾ. སེསདཱརཀཱ ཨཉྙམཉྙཾ ཝིལུམྤནྟཱ གཎྷིཾསུ. མཧཱསཏྟོ པན ན ཀིཉྩི ཨོལོཀེསི. ཨེཝཾ ཀཱིལ༹ནབྷཎྜཀེནཔི ཨེཀསཾཝཙྪརཾ ཨནྟརནྟརཱ ཝཱིམཾསནྟཱཔིསྶ ནེཝ ཨནྟརཾ པསྶིཾསུ.
ཏཏོ ¶ ‘‘ཙཏུཝསྶིཀདཱརཀཱ ནཱམ བྷོཛནཾ པིཡཱཡནྟི, ཏེན ནཾ ཝཱིམཾསིསྶཱམཱ’’ཏི ནཱནཱབྷོཛནཱནི ཨུཔནཱམེསུཾ. སེསདཱརཀཱ ཏཾ པིཎྜཾ པིཎྜཾ ཀཏྭཱ བྷུཉྫནྟི. མཧཱསཏྟོ པན ཨཏྟཱནཾ ཨོཝདིཏྭཱ ‘‘ཏཱཏ ཏེམིཡཀུམཱར, ཨལདྡྷབྷོཛནཱནཾ ཏེ ཨཏྟབྷཱཝཱནཾ གཎནཱ ནཱམ ནཏྠཱི’’ཏི ནིརཡབྷཡཏཛྫིཏོ ཏམྤི ན ཨོལོཀེསི. ཨཐསྶ མཱཏཱ སཡམེཝ ཧདཡེན བྷིཛྫམཱནེན ཝིཡ ཨསཧནྟེན སཧཏྠེན བྷོཛནཾ བྷོཛེསི. ཨེཝཾ བྷོཛནེནཔི ཨེཀསཾཝཙྪརཾ ཨནྟརནྟརཱ ཝཱིམཾསནྟཱཔིསྶ ནེཝ ཨནྟརཾ པསྶིཾསུ.
ཏཏོ ‘‘པཉྩཝསྶིཀདཱརཀཱ ནཱམ ཨགྒིནོ བྷཱཡནྟི, ཏེན ནཾ ཝཱིམཾསིསྶཱམཱ’’ཏི རཱཛངྒཎེ ཨནེཀདྭཱརཡུཏྟཾ མཧནྟཾ གེཧཾ ཀཱརེཏྭཱ ཏཱལཔཎྞེཧི ཚཱདེཏྭཱ ཏཾ སེསདཱརཀེཧི པརིཝུཏཾ ཏསྶ མཛ྄ཛྷེ ནིསཱིདཱཔེཏྭཱ ཨགྒིཾ དེནྟི. སེསདཱརཀཱ ཨགྒིཾ དིསྭཱ ཝིརཝནྟཱ པལཱཡིཾསུ. མཧཱསཏྟོ པན ཙིནྟེསི ‘‘ནིརཡཨགྒིསནྟཱཔནཏོ ཨིདམེཝ ཨགྒིསནྟཱཔནཾ སཏགུཎེན སཧསྶགུཎེན སཏསཧསྶགུཎེན ཝརཏར’’ནྟི ནིརོདྷསམཱཔནྣོ མཧཱཐེརོ ཝིཡ ནིཙྩལོཝ ཨཧོསི. ཨཐ ནཾ ཨགྒིམྷི ཨཱགཙྪནྟེ གཧེཏྭཱ ཨཔནེནྟི. ཨེཝཾ ཨགྒིནཱཔི ཨེཀསཾཝཙྪརཾ ཨནྟརནྟརཱ ཝཱིམཾསནྟཱཔིསྶ ནེཝ ཨནྟརཾ པསྶིཾསུ.
ཏཏོ ¶ ‘‘ཚཝསྶིཀདཱརཀཱ ནཱམ མཏྟཧཏྠིནོ བྷཱཡནྟི, ཏེན ནཾ ཝཱིམཾསིསྶཱམཱ’’ཏི ཨེཀཾ ཧཏྠིཾ སུསིཀྑིཏཾ སིཀྑཱཔེཏྭཱ བོདྷིསཏྟཾ སེསདཱརཀེཧི པརིཝུཏཾ རཱཛངྒཎེ ནིསཱིདཱཔེཏྭཱ ཏཾ ཧཏྠིཾ མུཉྩནྟི. སོ ཀོཉྩནཱདཾ ནདནྟོ སོཎྜཱཡ བྷཱུམིཡཾ པོཐེནྟོ བྷཡཾ དསྶེནྟོ ཨཱགཙྪཏི. སེསདཱརཀཱ ཏཾ དིསྭཱ མརཎབྷཡབྷཱིཏཱ དིསཱཝིདིསཱསུ པལཱཡིཾསུ. མཧཱསཏྟོ པན མཏྟཧཏྠིཾ ཨཱགཙྪནྟཾ དིསྭཱ ཙིནྟེསི ‘‘ཙཎྜནིརཡེ པཙྩནཏོ ཙཎྜཧཏྠིནོ ཧཏྠེ མརཎམེཝ སེཡྻོ’’ཏི ནིརཡབྷཡཏཛྫིཏོ ཏཏྠེཝ ནིསཱིདི. སུསིཀྑིཏོ ཧཏྠཱི མཧཱསཏྟཾ པུཔྥཀལཱཔཾ ཝིཡ ཨུཀྑིཔིཏྭཱ ཨཔརཱཔརཾ ཀཏྭཱ ཨཀིལམེཏྭཱཝ གཙྪཏི. ཨེཝཾ ཧཏྠིནཱཔི ཨེཀསཾཝཙྪརཾ ཨནྟརནྟརཱ ཝཱིམཾསནྟཱཔིསྶ ནེཝ ཨནྟརཾ པསྶིཾསུ.
ཏཏོ ‘‘སཏྟཝསྶིཀདཱརཀཱ ནཱམ སཔྤསྶ བྷཱཡནྟི, ཏེན ནཾ ཝཱིམཾསིསྶཱམཱ’’ཏི བོདྷིསཏྟཾ སེསདཱརཀེཧི སདྡྷིཾ རཱཛངྒཎེ ནིསཱིདཱཔེཏྭཱ ཨུདྡྷཊདཱཋེ ཀཏམུཁབནྡྷེ སཔྤེ ཝིསྶཛྫེསུཾ. སེསདཱརཀཱ ཏེ དིསྭཱ ཝིརཝནྟཱ པལཱཡིཾསུ. མཧཱསཏྟོ པན ནིརཡབྷཡཾ ཨཱཝཛྫེཏྭཱ ‘‘ཙཎྜསཔྤསྶ ¶ མུཁེ ཝིནཱསམེཝ ཝརཏར’’ནྟི ནིརོདྷསམཱཔནྣོ མཧཱཐེརོ ཝིཡ ནིཙྩལོཝ ཨཧོསི. ཨཐསྶ སཔྤོ སཀལསརཱིརཾ ཝེཋེཏྭཱ མཏྠཀེ ཕཎཾ ཀཏྭཱ ཨཙྪི. ཏདཱཔི སོ ནིཙྩལོཝ ཨཧོསི. ཨེཝཾ སཔྤེནཔི ཨེཀསཾཝཙྪརཾ ཨནྟརནྟརཱ ཝཱིམཾསནྟཱཔིསྶ ནེཝ ཨནྟརཾ པསྶིཾསུ ¶ .
ཏཏོ ‘‘ཨཊྛཝསྶིཀདཱརཀཱ ནཱམ ནཊསམཛྫཾ པིཡཱཡནྟི, ཏེན ནཾ ཝཱིམཾསིསྶཱམཱ’’ཏི ཏཾ པཉྩདཱརཀསཏེཧི སདྡྷིཾ རཱཛངྒཎེ ནིསཱིདཱཔེཏྭཱ ནཊསམཛྫཾ ཀཱརཱཔེསུཾ. སེསདཱརཀཱ ཏཾ ནཊསམཛྫཾ དིསྭཱ ‘‘སཱདྷུ སཱདྷཱུ’’ཏི ཝདནྟཱ མཧཱཧསིཏཾ ཧསནྟི. མཧཱསཏྟོ པན ‘‘ནིརཡེ ནིབྦཏྟཀཱལེ ཏཝ ཁཎམཏྟམྤི ཧཱསོ ཝཱ སོམནསྶཾ ཝཱ ནཏྠཱི’’ཏི ནིརཡབྷཡཾ ཨཱཝཛྫེཏྭཱ ནིཙྩལོཝ ཨཧོསི, ཏཾ ན ཨོལོཀེསི. ཨེཝཾ ནཊསམཛྫེནཔི ཨེཀསཾཝཙྪརཾ ཨནྟརནྟརཱ ཝཱིམཾསནྟཱཔིསྶ ནེཝ ཨནྟརཾ པསྶིཾསུ.
ཏཏོ ‘‘ནཝཝསྶིཀདཱརཀཱ ནཱམ ཨསིནོ བྷཱཡནྟི, ཏེན ནཾ ཝཱིམཾསིསྶཱམཱ’’ཏི ཏཾ པཉྩདཱརཀསཏེཧི སདྡྷིཾ རཱཛངྒཎེ ནིསཱིདཱཔེཏྭཱ དཱརཀཱནཾ ཀཱིལ༹ནཀཱལེ ཨེཀོ པུརིསོ ཕལིཀཝཎྞཾ ཨསིཾ གཧེཏྭཱ པརིབྦྷམནྟོ ནདནྟོ ཝགྒནྟོ ཏཱསེནྟོ ལངྒྷནྟོ ཨཔྥོཊེནྟོ མཧཱསདྡཾ ཀརོནྟོ ‘‘ཀཱསིརཉྙོ ཀིར ཀཱལ༹ཀཎྞཱི ཨེཀོ པུཏྟོ ཨཏྠི, སོ ཀུཧིཾ, སཱིསམསྶ ཚིནྡིསྶཱམཱི’’ཏི ཨབྷིདྷཱཝཏི. ཏཾ པུརིསཾ དིསྭཱ སེསདཱརཀཱ བྷཱིཏཏསིཏཱ ཧུཏྭཱ ཝིརཝནྟཱ དིསཱཝིདིསཱསུ པལཱཡིཾསུ. མཧཱསཏྟོ པན ནིརཡབྷཡཾ ཨཱཝཛྫེཏྭཱ ཨཛཱནནྟོ ཝིཡ ནིསཱིདི. ཨཐ ¶ ནཾ སོ པུརིསོ ཨསིནཱ སཱིསེ པརཱམསིཏྭཱ ‘‘སཱིསཾ ཏེ ཚིནྡིསྶཱམཱི’’ཏི ཏཱསེནྟོཔི ཏཱསེཏུཾ ཨསཀྐོནྟོ ཨཔགམི. ཨེཝཾ ཁགྒེནཔི ཨེཀསཾཝཙྪརཾ ཨནྟརནྟརཱ ཝཱིམཾསནྟཱཔིསྶ ནེཝ ཨནྟརཾ པསྶིཾསུ.
ཏཏོ དསཝསྶིཀཀཱལེ པནསྶ བདྷིརབྷཱཝཝཱིམཾསནཏྠཾ སིརིསཡནེ ནིསཱིདཱཔེཏྭཱ སཱཎིཡཱ པརིཀྑིཔཱཔེཏྭཱ ཙཏཱུསུ པསྶེསུ ཚིདྡཱནི ཀཏྭཱ ཏསྶ ཨདསྶེཏྭཱ ཧེཊྛཱསཡནེ སངྑདྷམཀེ ནིསཱིདཱཔེཏྭཱ ཨེཀཔྤཧཱརེནེཝ སངྑེ དྷམཱཔེནྟི, ཨེཀནིནྣཱདཾ ཨཧོསི. ཨམཙྩཱ ཙཏཱུསུ པསྶེསུ ཋཏྭཱ སཱཎིཡཱ ཚིདྡེཧི ཨོལོཀེནྟཱཔི མཧཱསཏྟསྶ ཨེཀདིཝསམྤི སཏིསམྨོསཾ ཝཱ ཧཏྠཔཱདཝིཀཱརཾ ཝཱ ཕནྡནམཏྟཾ ཝཱ ན པསྶིཾསུ. ཨེཝཾ ཨེཀསཾཝཙྪརཾ སངྑསདྡེནཔི ཨནྟརནྟརཱ ཝཱིམཾསནྟཱཔིསྶ ནེཝ ཨནྟརཾ པསྶིཾསུ.
ཏཏོ ¶ པརམྤི ཨེཀཱདསཝསྶིཀཀཱལེ ཨེཀསཾཝཙྪརཾ ཏཐེཝ བྷེརིསདྡེན ཝཱིམཾསནྟཱཔིསྶ ནེཝ ཨནྟརཾ པསྶིཾསུ.
ཏཏོ དྭཱདསཝསྶིཀཀཱལེ ‘‘དཱིཔེན ནཾ ཝཱིམཾསིསྶཱམཱ’’ཏི ‘‘རཏྟིབྷཱགེ ཨནྡྷཀཱརེ ཧཏྠཾ ཝཱ པཱདཾ ཝཱ ཕནྡཱཔེཏི ནུ ཁོ, ནོ’’ཏི གྷཊེསུ དཱིཔེ ཛཱལེཏྭཱ སེསདཱིཔེ ནིབྦཱཔེཏྭཱ ཐོཀཾ ཨནྡྷཀཱརེ སཡཱཔེཏྭཱ གྷཊེཧི དཱིཔེ ཨུཀྑིཔིཏྭཱ ཨེཀཔྤཧཱརེནེཝ ཨཱལོཀཾ ཀཏྭཱ ཨིརིཡཱཔཐཾ ཨུཔདྷཱརེནྟི. ཨེཝཾ དཱིཔེནཔི ཨེཀསཾཝཙྪརཾ ཨནྟརནྟརཱ ཝཱིམཾསནྟཱཔིསྶ ཀིཉྩི ཕནྡནམཏྟམྤི ན པསྶིཾསུ.
ཏཏོ ཏེརསཝསྶིཀཀཱལེ ‘‘ཕཱཎིཏེན ¶ ནཾ ཝཱིམཾསིསྶཱམཱ’’ཏི སཀལསརཱིརཾ ཕཱཎིཏེན མཀྑེཏྭཱ བཧུམཀྑིཀེ ཋཱནེ ནིཔཛྫཱཔེསུཾ. མཀྑིཀཱ ཨུཊྛཧནྟི, ཏཱ ཏསྶ སཀལསརཱིརཾ པརིཝཱརེཏྭཱ སཱུཙཱིཧི ཝིཛ྄ཛྷམཱནཱ ཝིཡ ཁཱདནྟི. སོ ནིརོདྷསམཱཔནྣོ མཧཱཐེརོ ཝིཡ ནིཙྩལོཝ ཨཧོསི. ཨེཝཾ ཕཱཎིཏེནཔི ཨེཀསཾཝཙྪརཾ ཨནྟརནྟརཱ ཝཱིམཾསནྟཱཔིསྶ ཀིཉྩི ཕནྡནམཏྟམྤི ན པསྶིཾསུ.
ཨཐསྶ ཙུདྡསཝསྶིཀཀཱལེ ‘‘ཨིདཱནི པནེས མཧལླཀོ ཛཱཏོ སུཙིཀཱམོ ཨསུཙིཛིགུཙྪཀོ, ཨསུཙིནཱ ནཾ ཝཱིམཾསིསྶཱམཱ’’ཏི ཏཏོ པཊྛཱཡ ནཾ ནེཝ ནྷཱཔེནྟི ན ཙ ཨཱཙམཱཔེནྟི. སོ ཨུཙྩཱརཔསྶཱཝཾ ཀཏྭཱ ཏཏྠེཝ པལིཔནྣོ སཡཏི. དུགྒནྡྷབྷཱཝེན པནསྶ ཨནྟརུདྷཱིནཾ ནིཀྑམནཀཱལོ ཝིཡ ཨཧོསི, ཨསུཙིགནྡྷེན མཀྑིཀཱ ཁཱདནྟི. སོ ནིཙྩལོཝ ཨཧོསི ¶ . ཨཐ ནཾ པརིཝཱརེཏྭཱ ཋིཏཱ དྷཱཏིཡོ ཨཱཧཾསུ ‘‘ཏཱཏ ཏེམིཡཀུམཱར, ཏྭཾ མཧལླཀོ ཛཱཏོ, ཀོ ཏཾ སབྦདཱ པཊིཛགྒིསྶཏི, ཀིཾ ན ལཛྫསི, ཀསྨཱ ནིཔནྣོསི, ཨུཊྛཱཡ ཏེ སརཱིརཾ པཊིཛགྒཱཧཱི’’ཏི ཨཀྐོསནྟི པརིབྷཱསནྟི. སོ ཏཐཱརཱུཔེ པཊིཀཱུལེ གཱུཐརཱསིམྷི ནིམུགྒོཔི དུགྒནྡྷབྷཱཝེན ཡོཛནསཏམཏྠཀེ ཋིཏཱནམྤི ཧདཡུཔྤཏནསམཏྠསྶ གཱུཐནིརཡསྶ དུགྒནྡྷབྷཱཝཾ ཨཱཝཛྫེཏྭཱ ནིཙྩལོཝ ཨཧོསི. ཨེཝཾ ཨསུཙིནཱཔི ཨེཀསཾཝཙྪརཾ ཨནྟརནྟརཱ ཝཱིམཾསནྟཱཔིསྶ ནེཝ ཨནྟརཾ པསྶིཾསུ.
ཏཏོ པནྣརསཝསྶིཀཀཱལེ ‘‘ཨངྒཱརེན ནཾ ཝཱིམཾསིསྶཱམཱ’’ཏི ཨཐསྶ ཧེཊྛཱམཉྩཀེ ཨགྒིཀཔལླཱནི ཋཔཡིཾསུ ‘‘ཨཔྤེཝ ནཱམ ཨུཎྷེན པཱིལི༹ཏོ ¶ དུཀྑཝེདནཾ ཨསཧནྟོ ཝིཔྥནྡནཱཀཱརཾ དསྶེཡྻཱ’’ཏི. ཨཐསྶ སརཱིརེ ཕོཊཱནི ཨུཊྛཧནྟི. མཧཱསཏྟོ ‘‘ཨཝཱིཙིནིརཡསནྟཱཔོ ཡོཛནསཏམཏྠཀེ ཕརཏི, ཏམྷཱ དུཀྑཏོ ཨིདཾ དུཀྑཾ སཏགུཎེན སཧསྶགུཎེན སཏསཧསྶགུཎེན ཝརཏར’’ནྟི ཨདྷིཝཱསེཏྭཱ ནིཙྩལོཝ ཨཧོསི. ཨཐསྶ མཱཏཱཔིཏརོ བྷིཛྫམཱནཧདཡཱ ཝིཡ མནུསྶེ པཊིཀྐམཱཔེཏྭཱ ཏཾ ཏཏོ ཨགྒིསནྟཱཔནཏོ ཨཔནེཏྭཱ ‘‘ཏཱཏ ཏེམིཡཀུམཱར, མཡཾ ཏཝ ཨཔཱིཋསཔྤིཨཱདིབྷཱཝཾ ཛཱནཱམ. ན ཧི ཨེཏེསཾ ཨེཝརཱུཔཱནི ཧཏྠཔཱདཀཎྞསོཏཱནི ཧོནྟི, ཏྭཾ ཨམྷེཧི པཏྠེཏྭཱ ལདྡྷཔུཏྟཀོ, མཱ ནོ ནཱསེཧི, སཀལཛམྦུདཱིཔེ ཝསནྟཱནཾ རཱཛཱུནཾ སནྟིཀེ གརཧཏོ ནོ མོཙེཧཱི’’ཏི ཡཱཙིཾསུ. ཨེཝཾ སོ ཏེཧི ཡཱཙིཏོཔི ཨསུཎནྟོ ཝིཡ ཧུཏྭཱ ནིཙྩལོཝ ནིཔཛྫི. ཨཐསྶ མཱཏཱཔིཏརོ རོདམཱནཱ པརིདེཝམཱནཱ པཊིཀྐམནྟི ¶ . ཨེཀདཱ མཱཏཱ ཨེཀིཀཱ ཨུཔསངྐམིཏྭཱ ཡཱཙཏི, ཨེཀདཱ པིཏཱ ཨེཀཀོཝ ཨུཔསངྐམིཏྭཱ ཡཱཙཏི. ཨེཝཾ ཨེཀསཾཝཙྪརཾ ཨནྟརནྟརཱ ཝཱིམཾསནྟཱཔིསྶ ནེཝ ཨནྟརཾ པསྶིཾསུ.
ཨཐསྶ སོལ༹སཝསྶིཀཀཱལེ ཨམཙྩབྲཱཧྨཎཱདཡོ ཙིནྟཡིཾསུ ‘‘པཱིཋསཔྤཱི ཝཱ ཧོཏུ, མཱུགོ ཝཱ བདྷིརོ ཝཱ ཧོཏུ, ཝཡེ པརིཎཏེ རཛནཱིཡེ ཨརཛྫནྟཱ ནཱམ ནཏྠི, དུསྶནཱིཡེ ཨདུསྶནྟཱ ནཱམ ནཏྠི, སམཡེ སམྤཏྟེ པུཔྥཝིཀསནཾ ཝིཡ ཧི དྷམྨཏཱ ཨེསཱ, ནཱཊཀཱནམྤིསྶ པཙྩུཔཊྛཱཔེཏྭཱ ཏཱཧི ནཾ ཝཱིམཾསིསྶཱམཱ’’ཏི. ཏཏོ ཨུཏྟམརཱུཔདྷརཱ དེཝཀཉྙཱཡོ ཝིཡ ཝིལཱསསམྤནྣཱ ནཱཊཀིཏྠིཡོ པཀྐོསཱཔེཏྭཱ ‘‘ཡཱ ཀུམཱརཾ ཧསཱཔེཏུཾ ཝཱ ཀིལེསེཧི བནྡྷིཏུཾ ཝཱ སཀྐོཏི, སཱ ཏསྶ ཨགྒམཧེསཱི བྷཝིསྶཏཱི’’ཏི ཝཏྭཱ ཀུམཱརཾ གནྡྷོདཀེན ནྷཱཔེཏྭཱ དེཝཔུཏྟཾ ཝིཡ ཨལངྐརིཏྭཱ དེཝཝིམཱནསདིསེ སིརིགབྦྷེ སུཔཉྙཏྟེ སིརིསཡནེ ཨཱརོཔེཏྭཱ གནྡྷདཱམཔུཔྥདཱམདྷཱུམཝཱསཙུཎྞཱདཱིཧི ཨནྟོགབྦྷཾ ཨེཀགནྡྷསམོདཀཾ ཀཏྭཱ པཊིཀྐམིཾསུ. ཨཐ ནཾ ཏཱ ཨིཏྠིཡོ པརིཝཱརེཏྭཱ ནཙྩགཱིཏེཧི ཙེཝ མདྷུརཝཙནཱདཱིཧི ཙ ནཱནཔྤཀཱརེཧི ཨབྷིརམཱཔེཏུཾ ཝཱཡམིཾསུ. སོ བུདྡྷིསམྤནྣཏཱཡ ཏཱ ཨིཏྠིཡོ ཨནོལོཀེཏྭཱ ‘‘ཨིམཱ ཨིཏྠིཡོ མམ སརཱིརསམྥསྶཾ མཱ ¶ ཝིནྡནྟཱུ’’ཏི ཨདྷིཊྛཧིཏྭཱ ཨསྶཱསཔསྶཱསེ སནྣིརུམྦྷི, ཨཐསྶ སརཱིརཾ ཐདྡྷཾ ཨཧོསི. ཏཱ ཏསྶ སརཱིརསམྥསྶཾ ཨཝིནྡནྟིཡོ ཧུཏྭཱ ‘‘ཐདྡྷསརཱིརོ ཨེས, ནཱཡཾ མནུསྶོ, ཡཀྑོ ¶ བྷཝིསྶཏཱི’’ཏི བྷཱིཏཏསིཏཱ ཧུཏྭཱ ཨཏྟཱནཾ སནྡྷཱརེཏུཾ ཨསཀྐོནྟིཡོ པལཱཡིཾསུ. ཨེཝཾ ནཱཊཀེནཔི ཨེཀསཾཝཙྪརཾ ཨནྟརནྟརཱ ཝཱིམཾསནྟཱཔིསྶ ནེཝ ཨནྟརཾ པསྶིཾསུ.
ཨེཝཾ སོལ༹ས སཾཝཙྪརཱནི སོལ༹སཧི མཧཱཝཱིམཾསཱཧི ཙེཝ ཨནེཀཱཧི ཁུདྡཀཝཱིམཾསཱཧི ཙ ཝཱིམཾསམཱནཱཔི ཏསྶ ཙིཏྟཾ པརིགྒཎྷིཏུཾ ནཱསཀྑིཾསུ.
ཝཱིམཾསནཀཎྜཾ ནིཊྛིཏཾ.
རཛྫཡཱཙནཀཎྜཾ
ཏཏོ རཱཛཱ ཝིཔྤཊིསཱརཱི ཧུཏྭཱ ལཀྑཎཔཱཋཀེ བྲཱཧྨཎེ པཀྐོསཱཔེཏྭཱ ‘‘ཏུམྷེ ཀུམཱརསྶ ཛཱཏཀཱལེ ‘དྷཉྙཔུཉྙལཀྑཎསམྤནྣོ ཨཡཾ ཀུམཱརོ, ནཱསྶ ཀོཙི ཨནྟརཱཡོ པཉྙཱཡཏཱི’ཏི མེ ཀཐཡིཏྠ, ཨིདཱནི པན སོ པཱིཋསཔྤཱི མཱུགབདྷིརོ ཛཱཏོ, ཀཐཱ ཝོ ན སམེཏཱི’’ཏི ཨཱཧ. བྲཱཧྨཎཱ ཝདིཾསུ ‘‘མཧཱརཱཛ, ཨཱཙརིཡེཧི ཨདིཊྛཀཾ ནཱམ ནཏྠི, ཨཔིཙ ཁོ པན, དེཝ, ‘རཱཛཀུལེཧི པཏྠེཏྭཱ ལདྡྷཔུཏྟཀོ ཀཱལ༹ཀཎྞཱི’ཏི ¶ ཝུཏྟེ ‘ཏུམྷཱཀཾ དོམནསྶཾ སིཡཱ’ཏི ན ཀཐཡིམྷཱ’’ཏི. ཨཐ ནེ རཱཛཱ ཨེཝམཱཧ ‘‘ཨིདཱནི པན ཀིཾ ཀཱཏུཾ ཝཊྚཏཱི’’ཏི? ‘‘མཧཱརཱཛ, ཨིམསྨིཾ ཀུམཱརེ ཨིམསྨིཾ གེཧེ ཝསནྟེ ཏཡོ ཨནྟརཱཡཱ པཉྙཱཡིསྶནྟི – ཛཱིཝིཏསྶ ཝཱ ཨནྟརཱཡོ, སེཏཙྪཏྟསྶ ཝཱ ཨནྟརཱཡོ, ཨགྒམཧེསིཡཱ ཝཱ ཨནྟརཱཡོ’’ཏི. ‘‘ཏསྨཱ, དེཝ, པཔཉྩཾ ཨཀཏྭཱ ཨཝམངྒལརཐེ ཨཝམངྒལཨསྶེ ཡོཛེཏྭཱ ཏཏྠ ནཾ ནིཔཛྫཱཔེཏྭཱ པཙྪིམདྭཱརེན ནཱིཧརིཏྭཱ ཨཱམཀསུསཱནེ ཙཏུབྦྷིཏྟིཀཾ ཨཱཝཱཊཾ ཁཎིཏྭཱ ནིཁཎིཏུཾ ཝཊྚཏཱི’’ཏི. རཱཛཱ ཨནྟརཱཡབྷཡེན བྷཱིཏོ ཏེསཾ ཝཙནཾ ‘‘སཱདྷཱུ’’ཏི སམྤཊིཙྪི.
ཏདཱ ཙནྡཱདེཝཱི ཏཾ པཝཏྟིཾ སུཏྭཱ ཏུརིཏཏུརིཏཱཝ ཨེཀིཀཱ རཱཛཱནཾ ཨུཔསངྐམིཏྭཱ ཝནྡིཏྭཱ ‘‘དེཝ, ཏུམྷེཧི མཡ྄ཧཾ ཝརོ དིནྣོ, མཡཱ ཙ གཧིཏཀོ ཀཏྭཱ ཋཔིཏོ, ཨིདཱནི ཏཾ མེ དེཐཱ’’ཏི ཡཱཙི. ‘‘གཎྷཱཧི, དེཝཱི’’ཏི. ‘‘དེཝ, པུཏྟསྶ མེ རཛྫཾ དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཀིཾཀཱརཎཱ, དེཝཱ’’ཏི. ‘‘པུཏྟོ, ཏེ དེཝི, ཀཱལ༹ཀཎྞཱི’’ཏི. ‘‘ཏེན ཧི, དེཝ, ཡཱཝཛཱིཝཾ ཨདདནྟཱཔི སཏྟ ཝསྶཱནི དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཏེན ཧི, དེཝ, ཚ ¶ ཝསྶཱནི དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཏེན ཧི, དེཝ, པཉྩ ཝསྶཱནི དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཏེན ཧི, དེཝ, ཙཏྟཱརི ཝསྶཱནི དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཏེན ཧི, དེཝ, ཏཱིཎི ཝསྶཱནི དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཏེན ཧི, དེཝ, དྭེ ཝསྶཱནི དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཏེན ¶ ཧི, དེཝ, ཨེཀཝསྶཾ རཛྫཾ དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཏེན ཧི, དེཝ, སཏྟ མཱསཱནི རཛྫཾ དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཏེན ཧི, དེཝ, ཚ མཱསཱནི རཛྫཾ དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཏེན ཧི, དེཝ, པཉྩ མཱསཱནི རཛྫཾ དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཏེན ཧི, དེཝ, ཙཏྟཱརི མཱསཱནི རཛྫཾ དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཏེན ཧི, དེཝ, ཏཱིཎི མཱསཱནི རཛྫཾ དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཏེན ཧི, དེཝ, དྭེ མཱསཱནི རཛྫཾ དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཏེན ཧི, དེཝ, ཨེཀམཱསཾ རཛྫཾ དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཏེན ཧི, དེཝ, ཨཌྜྷམཱསཾ རཛྫཾ དེཐཱ’’ཏི. ‘‘ན སཀྐཱ, དེཝཱི’’ཏི. ‘‘ཏེན ཧི, དེཝ, སཏྟ དིཝསཱནི རཛྫཾ དེཐཱ’’ཏི. རཱཛཱ ‘‘སཱདྷུ, དེཝི, གཎྷཱཧཱི’’ཏི ཨཱཧ. སཱ ཏསྨིཾ ཁཎེ པུཏྟཾ ཨལངྐཱརཱཔེཏྭཱ ‘‘ཏེམིཡཀུམཱརསྶ ཨིདཾ རཛྫ’’ནྟི ནགརེ བྷེརིཾ ཙརཱཔེཏྭཱ སཀལནགརཾ ཨལངྐཱརཱཔེཏྭཱ པུཏྟཾ ཧཏྠིཀྑནྡྷཾ ཨཱརོཔེཏྭཱ སེཏཙྪཏྟཾ ཏསྶ མཏྠཀེ ཀཱརཱཔེཏྭཱ ནགརཾ པདཀྑིཎཾ ཀཏྭཱ པུན ཨཱགནྟྭཱ ཨནྟོནགརཾ པཝེསེཏྭཱ ཏཾ སིརིསཡནེ ནིཔཛྫཱཔེཏྭཱ པིཡཔུཏྟཾ སབྦརཏྟིཾ ཡཱཙི ‘‘ཏཱཏ ཏེམིཡཀུམཱར, ཏཾ ནིསྶཱཡ སོལ༹ས ཝསྶཱནི ནིདྡཾ ཨལབྷིཏྭཱ རོདམཱནཱཡ མེ ཨཀྑཱིནི ཨུཔཀྐཱནི, སོཀེན མེ ཧདཡཾ བྷིཛྫམཱནཾ ཝིཡ ཨཧོསི, ཨཧཾ ཏཝ ཨཔཱིཋསཔྤིཨཱདིབྷཱཝཾ ཛཱནཱམི, མཱ མཾ ཨནཱཐཾ ཀརཱི’’ཏི. སཱ ཨིམིནཱ ཨུཔཱཡེནེཝ པུནདིཝསེཔི པུནདིཝསེཔཱིཏི པཉྩ དིཝསཱནི ཡཱཙི.
རཛྫཡཱཙནཀཎྜཾ ནིཊྛིཏཾ.
ཨཐ ཚཊྛེ དིཝསེ རཱཛཱ སུནནྡཾ ནཱམ སཱརཐིཾ པཀྐོསཱཔེཏྭཱ ‘‘ཏཱཏ, སུནནྡསཱརཐི སྭེ པཱཏོཝ ཨཝམངྒལརཐེ ཨཝམངྒལཨསྶེ ཡོཛེཏྭཱ ཀུམཱརཾ ཏཏྠ ནིཔཛྫཱཔེཏྭཱ པཙྪིམདྭཱརེན ནཱིཧརིཏྭཱ ཨཱམཀསུསཱནེ ཙཏུབྦྷིཏྟིཀཾ ཨཱཝཱཊཾ ཁཎིཏྭཱ ཏཏྠ ནཾ པཀྑིཔིཏྭཱ ཀུདྡཱལཔིཊྛེན མཏྠཀཾ བྷིནྡིཏྭཱ ཛཱིཝིཏཀྑཡཾ པཱཔེཏྭཱ ཨུཔརི པཾསུཾ དཏྭཱ པཐཝིཝཌྜྷནཀམྨཾ ¶ ཀཏྭཱ ནྷཏྭཱ ཨེཧཱི’’ཏི ཨཱཎཱཔེསི. སོ ‘‘སཱདྷུ, དེཝཱ’’ཏི སམྤཊིཙྪི. ཨཐ ཚཊྛམྤི རཏྟིཾ དེཝཱི ཀུམཱརཾ ཡཱཙིཏྭཱ ‘‘ཏཱཏ ཏེམིཡཀུམཱར, ཏཝ པིཏཱ ཀཱསིརཱཛཱ ཏཾ སྭེ པཱཏོཝ ཨཱམཀསུསཱནེ ནིཁཎིཏུཾ ཨཱཎཱཔེསི, སྭེ པཱཏོཝ མརཎཾ པཱཔུཎིསྶསི པུཏྟཱ’’ཏི ཨཱཧ. ཏཾ སུཏྭཱ མཧཱསཏྟསྶ ‘‘ཏཱཏ ཏེམིཡཀུམཱར, སོལ༹ས ཝསྶཱནི ཏཡཱ ཀཏོ ཝཱཡཱམོ ¶ ཨིདཱནི མཏྠཀཾ པཀྐོ’’ཏི ¶ ཙིནྟེནྟསྶ ཨབྦྷནྟརེ པཱིཏི ཨུཔྤཛྫི. མཱཏུཡཱ པནསྶ ཧདཡཾ བྷིཛྫམཱནཾ ཝིཡ ཨཧོསི, ཨེཝཾ སནྟེཔི ‘‘མནོརཐོ མཏྠཀཾ པཱཔུཎིསྶཏཱི’’ཏི མཱཏུཡཱ སདྡྷིཾ ནཱལཔི.
ཨཐསྶཱ རཏྟིཡཱ ཨཙྩཡེན པཱཏོཝ སུནནྡོ སཱརཐི རཐཾ ཡོཛེནྟོ དེཝཏཱནུབྷཱཝེན མཧཱསཏྟསྶ པཱརམིཏཱནུབྷཱཝེན ཙ མངྒལརཐེ མངྒལཨསྶེ ཡོཛེཏྭཱ རཐཾ རཱཛདྭཱརེ ཋཔེཏྭཱ མཧཱཏལཾ ཨབྷིརུཧིཏྭཱ སིརིགབྦྷཾ པཝིསིཏྭཱ དེཝིཾ ཝནྡིཏྭཱ ཨེཝམཱཧ – ‘‘དེཝི, མཡ྄ཧཾ མཱ ཀུཛ྄ཛྷ, རཉྙོ ཨཱཎཱ’’ཏི ཝཏྭཱ པུཏྟཾ ཨཱལིངྒིཏྭཱ ནིཔནྣཾ དེཝིཾ པིཊྛིཧཏྠེན ཨཔནེཏྭཱ པུཔྥཀལཱཔཾ ཝིཡ ཀུམཱརཾ ཨུཀྑིཔིཏྭཱ པཱསཱདཱ ཨོཏརི. ཏདཱ ཙནྡཱདེཝཱི ཨུརཾ པཧརིཏྭཱ མཧནྟེན སདྡེན པརིདེཝིཏྭཱ མཧཱཏལེ ཨོཧཱིཡི. ཨཐ ནཾ མཧཱསཏྟོ ཨོལོཀེཏྭཱ ‘‘མཡི ཨཀཐེནྟེ མཱཏཱ ཧདཡེན ཕལིཏེན མརིསྶཏཱི’’ཏི ཀཐེཏུཀཱམོ ཧུཏྭཱཔི ‘‘སཙེ ཨཧཾ ཀཐེསྶཱམི, སོལ༹ས ཝསྶཱནི ཀཏོ ཝཱཡཱམོ མེ མོགྷོ བྷཝིསྶཏི, ཨཀཐེནྟོ པནཱཧཾ ཨཏྟནོ ཙ མཱཏཱཔིཏཱུནཉྩ མཧཱཛནསྶ ཙ པཙྩཡོ བྷཝིསྶཱམཱི’’ཏི ཨདྷིཝཱསེསི.
ཨཐ ནཾ སཱརཐི རཐཾ ཨཱརོཔེཏྭཱ ‘‘པཙྪིམདྭཱརཱབྷིམུཁཾ རཐཾ པེསེསྶཱམཱི’’ཏི ཙིནྟེཏྭཱ རཐཾ པེསེསི. ཏདཱ མཧཱསཏྟསྶ པཱརམིཏཱནུབྷཱཝེན དེཝཏཱཝིགྒཧིཏོ ཧུཏྭཱ རཐཾ ནིཝཏྟཱཔེཏྭཱ པཱཙཱིནདྭཱརཱབྷིམུཁཾ རཐཾ པེསེསི, ཨཐ རཐཙཀྐཾ ཨུམྨཱརེ པཏིཧཉྙི. མཧཱསཏྟོཔི ཏསྶ སདྡཾ སུཏྭཱ ‘‘མནོརཐོ མེ མཏྠཀཾ པཏྟོ’’ཏི སུཊྛུཏརཾ ཏུཊྛཙིཏྟོ ཨཧོསི. རཐོ ནགརཱ ནིཀྑམིཏྭཱ དེཝཏཱནུབྷཱཝེན ཏིཡོཛནིཀཾ ཋཱནཾ གཏོ. ཏཏྠ ཝནགྷཊཾ སཱརཐིསྶ ཨཱམཀསུསཱནཾ ཝིཡ ཨུཔཊྛཱསི. སོ ‘‘ཨིདཾ ཋཱནཾ ཕཱསུཀ’’ནྟི སལླཀྑེཏྭཱ རཐཾ མགྒཱ ཨོཀྐམཱཔེཏྭཱ མགྒཔསྶེ ཋཔེཏྭཱ རཐཱ ཨོརུཡ྄ཧ མཧཱསཏྟསྶ ཨཱབྷརཎབྷཎྜཾ ཨོམུཉྩིཏྭཱ བྷཎྜིཀཾ ཀཏྭཱ ཨེཀམནྟཾ ཋཔེཏྭཱ ཀུདྡཱལཾ ཨཱདཱཡ རཐསྶ ཨཝིདཱུརེ ཋཱནེ ཙཏུབྦྷིཏྟིཀཾ ཨཱཝཱཊཾ ཁཎིཏུཾ ཨཱརབྷི.
ཏཏོ བོདྷིསཏྟོ ཙིནྟེསི ‘‘ཨཡཾ མེ ཝཱཡཱམཀཱལོ, ཨཧཉྷི སོལ༹ས ཝསྶཱནི ཧཏྠཔཱདེ ན ཙཱལེསིཾ, ཀིཾ ནུ ཁོ མེ བལཾ ཨཏྠི, ཨུདཱཧུ ནོ’’ཏི. སོ ཨུཊྛཱཡ ཝཱམཧཏྠེན དཀྑིཎཧཏྠཾ, དཀྑིཎཧཏྠེན ཝཱམཧཏྠཾ ¶ ¶ པརཱམསནྟོ ཨུབྷོཧི ཧཏྠེཧི པཱདེ སམྦཱཧིཏྭཱ རཐཱ ཨོཏརིཏུཾ ཙིཏྟཾ ཨུཔྤཱདེསི. ཏཱཝདེཝསྶ པཱདཔཏིཏཊྛཱནེ ཝཱཏཔུཎྞབྷསྟཙམྨཾ ཝིཡ མཧཱཔཐཝཱི ཨབྦྷུགྒནྟྭཱ རཐསྶ པཙྪིམནྟཾ ཨཱཧཙྩ ཨཊྛཱསི. མཧཱསཏྟོ རཐཱ ཨོཏརིཏྭཱ ཀཏིཔཡེ ཝཱརེ ཨཔརཱཔརཾ ཙངྐམིཏྭཱ ‘‘ཨིམིནཱཝ ནིཡཱམེན ཨེཀདིཝསཾ ཡོཛནསཏམྤི མེ གནྟུཾ བལཾ ཨཏྠཱི’’ཏི ཉཏྭཱ ‘‘སཙེ, སཱརཐི, མཡཱ སདྡྷིཾ ཝིརུཛ྄ཛྷེཡྻ, ཨཏྠི ནུ ཁོ མེ ཏེན སཧ པཊིཝིརུཛ྄ཛྷིཏུཾ བལ’’ནྟི ཨུཔདྷཱརེནྟོ རཐསྶ པཙྪིམནྟཾ ¶ གཧེཏྭཱ ཀུམཱརཀཱནཾ ཀཱིལ༹ནཡཱནཀཾ ཝིཡ ཨུཀྑིཔིཏྭཱ རཐཾ པརིབྦྷམེནྟོ ཨཊྛཱསི. ཨཐསྶ ‘‘ཨཏྠི མེ ཏེན སཧ པཊིཝིརུཛ྄ཛྷིཏུཾ བལ’’ནྟི སལླཀྑེཏྭཱ པསཱདྷནཏྠཱཡ ཙིཏྟཾ ཨུཔྤཛྫི.
ཏཾཁཎཉྙེཝ སཀྐསྶ བྷཝནཾ ཨུཎྷཱཀཱརཾ དསྶེསི. སཀྐོ ཨཱཝཛྫེནྟོ ཏཾ ཀཱརཎཾ ཉཏྭཱ ‘‘ཏེམིཡཀུམཱརསྶ མནོརཐོ མཏྠཀཾ པཏྟོ, ཨིདཱནི པསཱདྷནཏྠཱཡ ཙིཏྟཾ ཨུཔྤནྣཾ, ཀིཾ ཨེཏསྶ མཱནུསཀེན པསཱདྷནེནཱ’’ཏི དིབྦཔསཱདྷནཾ གཱཧཱཔེཏྭཱ ཝིསྶཀམྨདེཝཔུཏྟཾ པཀྐོསཱཔེཏྭཱ ‘‘ཏཱཏ ཝིསྶཀམྨ དེཝཔུཏྟ, ཏྭཾ གཙྪ, ཀཱསིརཱཛསྶ པུཏྟཾ ཏེམིཡཀུམཱརཾ ཨལངྐརོཧཱི’’ཏི ཨཱཎཱཔེསི. སོ ‘‘སཱདྷཱུ’’ཏི སམྤཊིཙྪིཏྭཱ ཏཱཝཏིཾསབྷཝནཏོ ཨོཏརིཏྭཱ ཏསྶ སནྟིཀཾ གནྟྭཱ དསཧི དུསྶསཧསྶེཧི ཝེཋནཾ ཀཏྭཱ དིབྦེཧི ཙེཝ མཱནུསཀེཧི ཙ ཨལངྐཱརེཧི སཀྐཾ ཝིཡ ཏཾ ཨལངྐརིཏྭཱ སཀཊྛཱནམེཝ གཏོ. སོ དེཝརཱཛལཱིལཱཡ སཱརཐིསྶ ཁཎནོཀཱསཾ གནྟྭཱ ཨཱཝཱཊཏཱིརེ ཋཏྭཱ པུཙྪནྟོ ཏཏིཡཾ གཱཐམཱཧ –
‘‘ཀིཾ ནུ སནྟརམཱནོཝ, ཀཱསུཾ ཁཎསི སཱརཐི;
པུཊྛོ མེ སམྨ ཨཀྑཱཧི, ཀིཾ ཀཱསུཡཱ ཀརིསྶསཱི’’ཏི.
ཏཏྠ ཀཱསུནྟི ཨཱཝཱཊཾ.
ཏཾ སུཏྭཱ སཱརཐི ཨཱཝཱཊཾ ཁཎནྟོ ཨུདྡྷཾ ཨནོལོཀེཏྭཱཝ ཙཏུཏྠཾ གཱཐཱམཱཧ –
‘‘རཉྙོ མཱུགོ ཙ པཀྑོ ཙ, པུཏྟོ ཛཱཏོ ཨཙེཏསོ;
སོམྷི རཉྙཱ སམཛ྄ཛྷིཊྛོ, པུཏྟཾ མེ ནིཁཎཾ ཝནེ’’ཏི.
ཏཏྠ པཀྑོཏི པཱིཋསཔྤཱི. ‘‘མཱུགོ’’ཏི ཝཙནེནེཝ པནསྶ བདྷིརབྷཱཝོཔི སིཛ྄ཛྷཏི བདྷིརསྶ ཧི པཊིཝཙནཾ ཀཐེཏུཾ ཨསཀྐུཎེཡྻཏྟཱ. ཨཙེཏསོཏི ཨཙིཏྟཀོ ཝིཡ ཛཱཏོ. སོལ༹ས ཝསྶཱནི ཨཀཐིཏཏྟཱ ཨེཝམཱཧ ¶ . སམཛ྄ཛྷིཊྛོཏི ཨཱཎཏྟོ, པེསིཏོཏི ཨཏྠོ. ནིཁཎཾ ཝནེཏི ཝནེ ནིཁཎེཡྻཱསི.
ཨཐ ནཾ མཧཱསཏྟོ ཨཱཧ –
‘‘ན ¶ བདྷིརོ ན མཱུགོསྨི, ན པཀྑོ ན ཙ ཝཱིཀལོ;
ཨདྷམྨཾ སཱརཐི ཀཡིརཱ, མཾ ཙེ ཏྭཾ ནིཁཎཾ ཝནེ.
‘‘ཨཱུརཱུ ¶ བཱཧུཉྩ མེ པསྶ, བྷཱསིཏཉྩ སུཎོཧི མེ;
ཨདྷམྨཾ སཱརཐི ཀཡིརཱ, མཾ ཙེ ཏྭཾ ནིཁཎཾ ཝནེ’’ཏི.
ཏཏྠ ན བདྷིརོཏི སམྨ སཱརཐི, སཙེ ཏཾ རཱཛཱ ཨེཝརཱུཔཾ པུཏྟཾ མཱརཱཔེཏུཾ ཨཱཎཱཔེསི, ཨཧཾ པན ཨེཝརཱུཔོ ན བྷཝཱམཱིཏི དཱིཔེཏུཾ ཨེཝམཱཧ. མཾ ཙེ ཏྭཾ ནིཁཎཾ ཝནེཏི སཙེ བདྷིརབྷཱཝཱདིཝིརཧིཏཾ ཨེཝརཱུཔཾ མཾ ཝནེ ནིཁཎེཡྻཱསི, ཨདྷམྨཾ ཀམྨཾ ཀརེཡྻཱསཱིཏི ཨཏྠོ. ‘‘ཨཱུརཱུ’’ཏི ཨིདཾ སོ པུརིམགཱཐཾ སུཏྭཱཔི ནཾ ཨནོལོཀེནྟམེཝ དིསྭཱ ‘‘ཨལངྐཏསརཱིརམསྶ དསྶེསྶཱམཱི’’ཏི ཙིནྟེཏྭཱ ཨཱཧ. ཏསྶཏྠོ – སམྨ སཱརཐི, ཨིམེ ཀཉྩནཀདལིཀྑནྡྷསདིསེ ཨཱུརཱུ, ཀནཀཙྪཝིཾ བཱཧུཉྩ མེ པསྶ, མདྷུརཝཙནཉྩ མེ སུཎཱཧཱིཏི.
ཏཏོ སཱརཐི ཨེཝཾ ཙིནྟེསི ‘‘ཀོ ནུ ཁོ ཨེས, ཨཱགཏཀཱལཏོ པཊྛཱཡ ཨཏྟཱནམེཝ ཝཎྞེཏཱི’’ཏི. སོ ཨཱཝཱཊཁཎནཾ པཧཱཡ ཨུདྡྷཾ ཨོལོཀེནྟོ ཏསྶ རཱུཔསམྤཏྟིཾ དིསྭཱ ‘‘ཨཡཾ པུརིསོ ཀོ ནུ ཁོ, མནུསྶོ ཝཱ དེཝོ ཝཱ’’ཏི ཨཛཱནནྟོ ཨིམཾ གཱཐམཱཧ –
‘‘དེཝཏཱ ནུསི གནྡྷབྦོ, ཨདུ སཀྐོ པུརིནྡདོ;
ཀོ ཝཱ ཏྭཾ ཀསྶ ཝཱ པུཏྟོ, ཀཐཾ ཛཱནེམུ ཏཾ མཡ’’ནྟི.
ཨཐསྶ མཧཱསཏྟོ ཨཏྟཱནཾ ཨཱཙིཀྑིཏྭཱ དྷམྨཾ དེསེནྟོ ཨཱཧ –
‘‘ནམྷི དེཝོ ན གནྡྷབྦོ, ནམྷི སཀྐོ པུརིནྡདོ;
ཀཱསིརཉྙོ ཨཧཾ པུཏྟོ, ཡཾ ཀཱསུཡཱ ནིཧཉྙསི.
‘‘ཏསྶ རཉྙོ ཨཧཾ པུཏྟོ, ཡཾ ཏྭཾ སམྨཱུཔཛཱིཝསི;
ཨདྷམྨཾ སཱརཐི ཀཡིརཱ, མཾ ཙེ ཏྭཾ ནིཁཎཾ ཝནེ.
‘‘ཡསྶ ¶ རུཀྑསྶ ཚཱཡཱཡ, ནིསཱིདེཡྻ སཡེཡྻ ཝཱ;
ན ཏསྶ སཱཁཾ བྷཉྫེཡྻ, མིཏྟདུབྦྷོ ཧི པཱཔཀོ.
‘‘ཡཐཱ ¶ རུཀྑོ ཏཐཱ རཱཛཱ, ཡཐཱ སཱཁཱ ཏཐཱ ཨཧཾ;
ཡཐཱ ཚཱཡཱུཔགོ པོསོ, ཨེཝཾ ཏྭམསི སཱརཐི;
ཨདྷམྨཾ སཱརཐི ཀཡིརཱ, མཾ ཙེ ཏྭཾ ནིཁཎཾ ཝནེ’’ཏི.
ཏཏྠ ནིཧཉྙསཱིཏི ནིཧནིསྶསི. ཡཾ ཏྭཾ ཨེཏྠ ནིཧནིསྶཱམཱིཏི སཉྙཱཡ ཀཱསུཾ ཁཎསི, སོ ཨཧནྟི དཱིཔེཏི. སོ ‘‘རཱཛཔུཏྟོ ཨཧ’’ནྟི ཝུཏྟེཔི ན སདྡཧཏིཡེཝ, མདྷུརཀཐཱཡ པནསྶ བཛ྄ཛྷིཏྭཱ དྷམྨཾ སུཎནྟོ ཨཊྛཱསི. མིཏྟདུབྦྷོཏི པརིབྷུཏྟཚཱཡསྶ རུཀྑསྶ པཏྟཾ ཝཱ སཱཁཾ ཝཱ ཨངྐུརཾ ཝཱ བྷཉྫནྟོ མིཏྟགྷཱཏཀོ ཧོཏི ལཱམཀཔུརིསོ, ཀིམངྒཾ པན སཱམིཔུཏྟགྷཱཏཀོ. ཚཱཡཱུཔགོཏི པརིབྷོགཏྠཱཡ ཚཱཡཾ ཨུཔགཏོ པུརིསོ ཝིཡ རཱཛཱནཾ ནིསྶཱཡ ཛཱིཝམཱནོ ཏྭནྟི ཝདཏི.
སོ ཨེཝཾ ¶ ཀཐེནྟེཔི བོདྷིསཏྟེ ན སདྡཧཏིཡེཝ. ཨཐ མཧཱསཏྟོ ‘‘སདྡཧཱཔེསྶཱམི ན’’ནྟི དེཝཏཱནཾ སཱདྷུཀཱརེན ཙེཝ ཨཏྟནོ གྷོསེན ཙ ཝནགྷཊཾ ཨུནྣཱདེནྟོ དས མིཏྟཔཱུཛགཱཐཱ ནཱམ ཨཱརབྷི –
‘‘པཧཱུཏབྷཀྑོ བྷཝཏི, ཝིཔྤཝུཊྛོ སཀཾགྷརཱ;
བཧཱུ ནཾ ཨུཔཛཱིཝནྟི, ཡོ མིཏྟཱནཾ ན དུབྦྷཏི.
‘‘ཡཾ ཡཾ ཛནཔདཾ ཡཱཏི, ནིགམེ རཱཛདྷཱནིཡོ;
སབྦཏྠ པཱུཛིཏོ ཧོཏི, ཡོ མིཏྟཱནཾ ན དུབྦྷཏི.
‘‘ནཱསྶ ཙོརཱ པསཱཧནྟི, ནཱཏིམཉྙནྟི ཁཏྟིཡཱ;
སབྦེ ཨམིཏྟེ ཏརཏི, ཡོ མིཏྟཱནཾ ན དུབྦྷཏི.
‘‘ཨཀྐུདྡྷོ སགྷརཾ ཨེཏི, སབྷཱཡཾ པཊིནནྡིཏོ;
ཉཱཏཱིནཾ ཨུཏྟམོ ཧོཏི, ཡོ མིཏྟཱནཾ ན དུབྦྷཏི.
‘‘སཀྐཏྭཱ སཀྐཏོ ཧོཏི, གརུ ཧོཏི སགཱརཝོ;
ཝཎྞཀིཏྟིབྷཏོ ཧོཏི, ཡོ མིཏྟཱནཾ ན དུབྦྷཏི.
‘‘པཱུཛཀོ ¶ ¶ ལབྷཏེ པཱུཛཾ, ཝནྡཀོ པཊིཝནྡནཾ;
ཡསོཀིཏྟིཉྩ པཔྤོཏི, ཡོ མིཏྟཱནཾ ན དུབྦྷཏི.
‘‘ཨགྒི ཡཐཱ པཛྫལཏི, དེཝཏཱཝ ཝིརོཙཏི;
སིརིཡཱ ཨཛཧིཏོ ཧོཏི, ཡོ མིཏྟཱནཾ ན དུབྦྷཏི.
‘‘གཱཝོ ཏསྶ པཛཱཡནྟི, ཁེཏྟེ ཝུཏྟཾ ཝིརཱུཧཏི;
ཝུཏྟཱནཾ ཕལམསྣཱཏི, ཡོ མིཏྟཱནཾ ན དུབྦྷཏི.
‘‘དརིཏོ པབྦཏཱཏོ ཝཱ, རུཀྑཏོ པཏིཏོ ནརོ;
ཙུཏོ པཏིཊྛཾ ལབྷཏི, ཡོ མིཏྟཱནཾ ན དུབྦྷཏི.
‘‘ཝིརཱུལ༹ྷམཱུལསནྟཱནཾ, ནིགྲོདྷམིཝ མཱལུཏོ;
ཨམིཏྟཱ ནཔྤསཱཧནྟི, ཡོ མིཏྟཱནཾ ན དུབྦྷཏཱི’’ཏི.
ཏཏྠ སཀཾ གྷརཱཏི སཀགྷརཱ, ཨཡམེཝ ཝཱ པཱཋོ. ན དུབྦྷཏཱིཏི ན དུསྶཏི. མིཏྟཱནནྟི བུདྡྷཱདཱིནཾ ཀལྱཱཎམིཏྟཱནཾ ན དུབྦྷཏི. ‘‘སབྦཏྠ པཱུཛིཏོ ཧོཏཱི’’ཏི ཨིདཾ སཱིཝལིཝཏྠུནཱ ཝཎྞེཏབྦཾ. ན པསཱཧནྟཱིཏི པསཡ྄ཧཀཱརཾ ཀཱཏུཾ ན སཀྐོནྟི. ཨིདཾ སཾཀིཙྩསཱམཎེརཝཏྠུནཱ དཱིཔེཏབྦཾ. ‘‘ནཱཏིམཉྙནྟི ཁཏྟིཡཱ’’ཏི ཨིདཾ ཛོཏིཀསེཊྛིཝཏྠུནཱ དཱིཔེཏབྦཾ. ཏརཏཱིཏི ཨཏིཀྐམཏི. སགྷརནྟི ཨཏྟགྷརཾ. མིཏྟཱནཾ དུབྦྷནྟོ ཨཏྟནོ གྷརཾ ཨཱགཙྪནྟོཔི གྷཊྚིཏཙིཏྟོ ཀུདྡྷོཝ ཨཱགཙྪཏི, ཨཡཾ པན ཨཀུདྡྷོཝ སཀགྷརཾ ཨེཏི. པཊིནནྡིཏོཏི ¶ བཧཱུནཾ སནྣིཔཱཏཊྛཱནེ ཨམིཏྟདུབྦྷིནོ གུཎཀཐཾ ཀཐེནྟི, ཏཱཡ སོ པཊིནནྡིཏོ ཧོཏི པམུདིཏཙིཏྟོ.
སཀྐཏྭཱ སཀྐཏོ ཧོཏཱིཏི པརཾ སཀྐཏྭཱ སཡམྤི པརེཧི སཀྐཏོ ཧོཏི. གརུ ཧོཏི སགཱརཝོཏི པརེསུ སགཱརཝོ སཡམྤི པརེཧི གརུཀོ ཧོཏི. ཝཎྞཀིཏྟིབྷཏོཏི བྷཏཝཎྞཀིཏྟི, གུཎཉྩེཝ ཀིཏྟིསདྡཉྩ ཨུཀྑིཔིཏྭཱ ཙརནྟོ ནཱམ ཧོཏཱིཏི ཨཏྠོ. པཱུཛཀོཏི མིཏྟཱནཾ པཱུཛཀོ ཧུཏྭཱ སཡམྤི པཱུཛཾ ལབྷཏི. ཝནྡཀོཏི བུདྡྷཱདཱིནཾ ཀལྱཱཎམིཏྟཱནཾ ཝནྡཀོ ཧུཏྭཱ པུནབྦྷཝེ པཊིཝནྡནཾ ལབྷཏི. ཡསོཀིཏྟིཉྩཱཏི ཨིསྶརིཡཔརིཝཱརཉྩེཝ གུཎཀིཏྟིཉྩ པཔྤོཏི. ཨིམཱཡ གཱཐཱཡ ཙིཏྟགཧཔཏིནོ ཝཏྠུ (དྷ. པ. ༧༣-༧༤) ཀཐེཏབྦཾ.
པཛྫལཏཱིཏི ¶ ¶ ཨིསྶརིཡཔརིཝཱརེན པཛྫལཏི. སིརིཡཱ ཨཛཧིཏོ ཧོཏཱིཏི ཨེཏྠ ཨནཱཐཔིཎྜིཀསྶ ཝཏྠུ (དྷ. པ. ༡༡༩-༡༢༠) ཀཐེཏབྦཾ. ཨསྣཱཏཱིཏི པརིབྷུཉྫཏི. ‘‘པཏིཊྛཾ ལབྷཏཱི’’ཏི ཨིདཾ ཙཱུལ༹པདུམཛཱཏཀེན (ཛཱ. ༡.༢.༨༥-༨༦) དཱིཔེཏབྦཾ. ཝིརཱུལ༹ྷམཱུལསནྟཱནནྟི ཝཌྜྷིཏམཱུལཔཱརོཧཾ. ཨམིཏྟཱ ནཔྤསཱཧནྟཱིཏི ཨེཏྠ ཀུརརགྷརིཡསོཎཏྠེརསྶ མཱཏུ གེཧཾ པཝིཊྛཙོརཝཏྠུ ཀཐེཏབྦཾ.
སུནནྡོ སཱརཐི ཨེཏྟཀཱཧི གཱཐཱཧི དྷམྨཾ དེསེནྟམྤི ཏཾ ཨསཉྫཱནིཏྭཱ ‘‘ཀོ ནུ ཁོ ཨཡ’’ནྟི ཨཱཝཱཊཁཎནཾ པཧཱཡ རཐསམཱིཔཾ གནྟྭཱ ཏཏྠ ཏཉྩ པསཱདྷནབྷཎྜཉྩ ཨུབྷཡཾ ཨདིསྭཱ པུན ཨཱགནྟྭཱ ཨོལོཀེནྟོ ཏཾ སཉྫཱནིཏྭཱ ཏསྶ པཱདེསུ པཏིཏྭཱ ཨཉྫལིཾ པགྒཡ྄ཧ ཡཱཙནྟོ ཨིམཾ གཱཐམཱཧ –
‘‘ཨེཧི ཏཾ པཊིནེསྶཱམི, རཱཛཔུཏྟ སཀཾ གྷརཾ;
རཛྫཾ ཀཱརེཧི བྷདྡནྟེ, ཀིཾ ཨརཉྙེ ཀརིསྶསཱི’’ཏི.
ཨཐ ནཾ མཧཱསཏྟོ ཨཱཧ –
‘‘ཨལཾ མེ ཏེན རཛྫེན, ཉཱཏཀེཧི དྷནེན ཝཱ;
ཡཾ མེ ཨདྷམྨཙརིཡཱཡ, རཛྫཾ ལབྦྷེཐ སཱརཐཱི’’ཏི.
ཏཏྠ ཨལནྟི པཊིཀྑེཔཝཙནཾ.
སཱརཐི ཨཱཧ –
‘‘པུཎྞཔཏྟཾ མཾ ལཱབྷེཧི, རཱཛཔུཏྟ ཨིཏོ གཏོ;
པིཏཱ མཱཏཱ ཙ མེ དཛྫུཾ, རཱཛཔུཏྟ ཏཡཱི གཏེ.
‘‘ཨོརོདྷཱ ཙ ཀུམཱརཱ ཙ, ཝེསིཡཱནཱ ཙ བྲཱཧྨཎཱ;
ཏེཔི ཨཏྟམནཱ དཛྫུཾ, རཱཛཔུཏྟ ཏཡཱི གཏེ.
‘‘ཧཏྠཱརོཧཱ ¶ ཨནཱིཀཊྛཱ, རཐིཀཱ པཏྟིཀཱརཀཱ;
ཏེཔི ཨཏྟམནཱ དཛྫུཾ, རཱཛཔུཏྟ ཏཡཱི གཏེ.
‘‘བཧུདྷཉྙཱ ཛཱནཔདཱ, ནེགམཱ ཙ སམཱགཏཱ;
ཨུཔཱཡནཱནི མེ དཛྫུཾ, རཱཛཔུཏྟ ཏཡཱི གཏེ’’ཏི.
ཏཏྠ ¶ པུཎྞཔཏྟནྟི ཏུཊྛིདཱཡཾ. དཛྫུནྟི སཏྟརཏནཝསྶཾ ཝསྶནྟཱ ཝིཡ མམ ཨཛ྄ཛྷཱསཡཔཱུརཎཾ ཏུཊྛིདཱཡཾ དདེཡྻུཾ. ཨིདཾ སོ ‘‘ཨཔྤེཝ ¶ ནཱམ མཡི ཨནུཀམྤཱཡ གཙྪེཡྻཱ’’ཏི ཙིནྟེཏྭཱ ཨཱཧ. ཝེསིཡཱནཱ ཙཱཏི ཝེསྶཱ ཙ. ཨུཔཱཡནཱནཱིཏི པཎྞཱཀཱརཱནི.
ཨཐ ནཾ མཧཱསཏྟོ ཨཱཧ –
‘‘པིཏུ མཱཏུ ཙཧཾ ཙཏྟོ, རཊྛསྶ ནིགམསྶ ཙ;
ཨཐོ སབྦཀུམཱརཱནཾ, ནཏྠི མཡ྄ཧཾ སཀཾ གྷརཾ.
‘‘ཨནུཉྙཱཏོ ཨཧཾ མཏྱཱ, སཉྩཏྟོ པིཏརཱ མཧཾ;
ཨེཀོརཉྙེ པབྦཛིཏོ, ན ཀཱམེ ཨབྷིཔཏྠཡེ’’ཏི.
ཏཏྠ པིཏུ མཱཏུ ཙཱཏི པིཏརཱ ཙ མཱཏརཱ ཙ ཨཧཾ ཙཏྟོ. ཨིཏརེསུཔི ཨེསེཝ ནཡོ. མཏྱཱཏི སམྨ སཱརཐི, ཨཧཾ སཏྟཱཧཾ རཛྫཾ པརིཙྪིནྡིཏྭཱ ཝརཾ གཎྷནྟིཡཱ མཱཏརཱ ཨནུཉྙཱཏོ ནཱམ. སཉྪཏྟོཏི སུཊྛུ ཙཏྟོ. པབྦཛིཏོཏི པབྦཛིཏྭཱ ཨརཉྙེ ཝསནཏྠཱཡ ནིཀྑནྟོཏི ཨཏྠོ.
ཨེཝཾ མཧཱསཏྟསྶ ཨཏྟནོ གུཎེ ཀཐེནྟསྶ པཱིཏི ཨུཔྤཛྫི, ཏཏོ པཱིཏིཝེགེན ཨུདཱནཾ ཨུདཱནེནྟོ ཨཱཧ –
‘‘ཨཔི ཨཏརམཱནཱནཾ, ཕལཱསཱཝ སམིཛ྄ཛྷཏི;
ཝིཔཀྐབྲཧྨཙརིཡོསྨི, ཨེཝཾ ཛཱནཱཧི སཱརཐི.
‘‘ཨཔི ¶ ཨཏརམཱནཱནཾ, སམྨདཏྠོ ཝིཔཙྩཏི;
ཝིཔཀྐབྲཧྨཙརིཡོསྨི, ནིཀྑནྟོ ཨཀུཏོབྷཡོ’’ཏི.
ཏཏྠ ཕལཱསཱཝཱཏི ཨཏརམཱནསྶ མམ སོལ༹སཝསྶེཧི ཀཏཝཱཡཱམསྶ སམིདྡྷཾ ཨཛ྄ཛྷཱསཡཕལཾ དསྶེཏུཾ ཨེཝམཱཧ. ཝིཔཀྐབྲཧྨཙརིཡོསྨཱིཏི ནིཊྛཔྤཏྟམནོརཐོ. སམྨདཏྠོ ཝིཔཙྩཏཱིཏི སམྨཱ ཨུཔཱཡེན ཀཱརཎེན ཀཏྟབྦཀིཙྩཾ སམྤཛྫཏི.
སཱརཐི ཨཱཧ –
‘‘ཨེཝཾ ཝགྒུཀཐོ སནྟོ, ཝིསཊྛཝཙནོ ཙསི;
ཀསྨཱ པིཏུ ཙ མཱཏུཙྩ, སནྟིཀེ ན བྷཎཱི ཏདཱ’’ཏི.
ཏཏྠ ཝགྒུཀཐོཏི སཁིལཀཐོ.
ཏཏོ ¶ མཧཱསཏྟོ ཨཱཧ –
‘‘ནཱཧཾ ཨསནྡྷིཏཱ པཀྑོ, ན བདྷིརོ ཨསོཏཏཱ;
ནཱཧཾ ཨཛིཝ྄ཧཏཱ མཱུགོ, མཱ མཾ མཱུགམདྷཱརཡི.
‘‘པུརིམཾ སརཱམཧཾ ཛཱཏིཾ, ཡཏྠ རཛྫམཀཱརཡིཾ;
ཀཱརཡིཏྭཱ ཏཧིཾ རཛྫཾ, པཱཔཏྠཾ ནིརཡཾ བྷུསཾ.
‘‘ཝཱིསཏིཉྩེཝ ཝསྶཱནི, ཏཧིཾ རཛྫམཀཱརཡིཾ;
ཨསཱིཏིཝསྶསཧསྶཱནི, ནིརཡམྷི ཨཔཙྩིསཾ.
‘‘ཏསྶ ¶ རཛྫསྶཧཾ བྷཱིཏོ, མཱ མཾ རཛྫཱབྷིསེཙཡུཾ;
ཏསྨཱ པིཏུ ཙ མཱཏུཙྩ, སནྟིཀེ ན བྷཎིཾ ཏདཱ.
‘‘ཨུཙྪངྒེ ¶ མཾ ནིསཱདེཏྭཱ, པིཏཱ ཨཏྠཱནུསཱསཏི;
ཨེཀཾ ཧནཐ བནྡྷཐ, ཨེཀཾ ཁཱརཱཔཏཙྪིཀཾ;
ཨེཀཾ སཱུལསྨིཾ ཨུཔྤེཐ, ཨིཙྩསྶ མནུསཱསཏི.
‘‘ཏཱཡཱཧཾ ཕརུསཾ སུཏྭཱ, ཝཱཙཱཡོ སམུདཱིརིཏཱ;
ཨམཱུགོ མཱུགཝཎྞེན, ཨཔཀྑོ པཀྑསམྨཏོ;
སཀེ མུཏྟཀརཱིསསྨིཾ, ཨཙྪཱཧཾ སམྤརིཔླུཏོ.
‘‘ཀསིརཉྩ པརིཏྟཉྩ, ཏཉྩ དུཀྑེན སཾཡུཏཾ;
ཀོམཾ ཛཱིཝིཏམཱགམྨ, ཝེརཾ ཀཡིརཱཐ ཀེནཙི.
‘‘པཉྙཱཡ ཙ ཨལཱབྷེན, དྷམྨསྶ ཙ ཨདསྶནཱ;
ཀོམཾ ཛཱིཝིཏམཱགམྨ, ཝེརཾ ཀཡིརཱཐ ཀེནཙི.
‘‘ཨཔི ཨཏརམཱནཱནཾ, ཕལཱསཱཝ སམིཛ྄ཛྷཏི;
ཝིཔཀྐབྲཧྨཙརིཡོསྨི, ཨེཝཾ ཛཱནཱཧི སཱརཐི.
‘‘ཨཔི ཨཏརམཱནཱནཾ, སམྨདཏྠོ ཝིཔཙྩཏི;
ཝིཔཀྐབྲཧྨཙརིཡོསྨི, ནིཀྑནྟོ ཨཀུཏོབྷཡོ’’ཏི.
ཏཏྠ ཨསནྡྷིཏཱཏི སནྡྷཱིནཾ ཨབྷཱཝེན. ཨསོཏཏཱཏི སོཏཱནཾ ཨབྷཱཝེན. ཨཛིཝ྄ཧཏཱཏི སམྤརིཝཏྟནཛིཝ྄ཧཱཡ ཨབྷཱཝེན མཱུགོ ཨཧཾ ན ¶ བྷཝཱམི. ཡཏྠཱཏི ཡཱཡ ཛཱཏིཡཱ བཱརཱཎསིནགརེ རཛྫཾ ཨཀཱརཡིཾ. པཱཔཏྠནྟི པཱཔཏཾ. པཏིཏོ ཨསྨཱིཏི ཝདཏི. རཛྫཱབྷིསེཙཡུནྟི རཛྫེ ཨབྷིསེཙཡུཾ. ནིསཱདེཏྭཱཏི ནིསཱིདཱཔེཏྭཱ. ཨཏྠཱནུསཱསཏཱིཏི ཨཏྠཾ ཨནུསཱསཏི. ཁཱརཱཔཏཙྪིཀནྟི སཏྟཱིཧི པཧརིཏྭཱ ཁཱརཱཧི པཏཙྪིཀཾ ཀརོཐ. ཨུཔྤེཐཱཏི ཨཱཝུནཐ. ཨིཙྩསྶ མནུསཱསཏཱིཏི ཨེཝམསྶ ཨཏྠཾ ཨནུསཱསཏི. ཏཱཡཱཧནྟི ཏཱཡོ ཝཱཙཱཡོ ཨཧཾ. པཀྑསམྨཏོཏི པཀྑོ ཨིཏི སམྨཏོ ཨཧོསིཾ. ཨཙྪཱཧནྟི ཨཙྪིཾ ཨཧཾ, ཨཝསིནྟི ཨཏྠོ. སམྤརིཔླུཏོཏི སམྤརིཀིཎྞོ, ནིམུགྒོ ཧུཏྭཱཏི ཨཏྠོ.
ཀསིརནྟི དུཀྑཾ. པརིཏྟནྟི ཨཔྤཾ. ཨིདཾ ཝུཏྟཾ ཧོཏི – སམྨསཱརཐི, སཙེཔི སཏྟཱནཾ ཛཱིཝིཏཾ ¶ དུཀྑམྤི སམཱནཾ བཧུཙིརཊྛིཏིཀཾ བྷཝེཡྻ, པཏྠེཡྻ, པརིཏྟམྤི སམཱནཾ སཙེ སུཁཾ བྷཝེཡྻ, པཏྠེཡྻ, ཨིདཾ པན ཀསིརཉྩ པརིཏྟཉྩ སཀལེན ཝཊྚདུཀྑེན སཾཡུཏྟཾ སནྣིཧིཏཾ ཨོམདྡིཏཾ. ཀོམནྟི ཀོ ཨིམཾ. ཝེརནྟི པཱཎཱཏིཔཱཏཱདིཔཉྩཝིདྷཾ ཝེརཾ. ཀེནཙཱིཏི ཀེནཙི ཀཱརཎེན ¶ . པཉྙཱཡཱཏི ཝིཔསྶནཱཔཉྙཱཡ ཨལཱབྷེན. དྷམྨསྶཱཏི སོཏཱཔཏྟིམགྒསྶ ཨདསྶནེན. པུན ཨུདཱནགཱཐཱཡོ ཨགནྟུཀཱམཏཱཡ ཐིརབྷཱཝདསྶནཏྠཾ ཀཐེསི.
ཏཾ སུཏྭཱ སུནནྡོ སཱརཐི ‘‘ཨཡཾ ཀུམཱརོ ཨེཝརཱུཔཾ རཛྫསིརིཾ ཀུཎཔཾ ཝིཡ ཚཌྜེཏྭཱ ཨཏྟནོ ཨདྷིཊྛཱནཾ ཨབྷིནྡིཏྭཱ ‘‘པབྦཛིསྶཱམཱིཏི ཨརཉྙཾ པཝིཊྛོ, མམ ཨིམིནཱ དུཛྫཱིཝིཏེན ཀོ ཨཏྠོ, ཨཧམྤི ཏེན སདྡྷིཾ པབྦཛིསྶཱམཱི’’ཏི ཙིནྟེཏྭཱ ཨིམཾ གཱཐམཱཧ –
‘‘ཨཧམྤི པབྦཛིསྶཱམི, རཱཛཔུཏྟ ཏཝནྟིཀེ;
ཨཝ྄ཧཱཡསྶུ མཾ བྷདྡནྟེ, པབྦཛྫཱ མམ རུཙྩཏཱི’’ཏི.
ཏཏྠ ཏཝནྟིཀེཏི ཏཝ སནྟིཀེ. ཨཝ྄ཧཱཡསྶཱུཏི ‘‘ཨེཧི པབྦཛཱཧཱི’’ཏི པཀྐོསསྶུ.
ཨེཝཾ ཏེན ཡཱཙིཏོཔི མཧཱསཏྟོ ‘‘སཙཱཧཾ ཨིདཱནེཝ ཏཾ པབྦཱཛེསྶཱམི, མཱཏཱཔིཏརོ ཨིདྷ ནཱགཙྪིསྶནྟི, ཨཐ ནེསཾ པརིཧཱནི བྷཝིསྶཏི, ཨིམེ ཨསྶཱ ཙ རཐོ ཙ པསཱདྷནབྷཎྜཉྩ ཨིདྷེཝ ནསྶིསྶནྟི, ‘ཡཀྑོ སོ, ཁཱདིཏོ ནུ ཁོ ཏེན སཱརཐཱི’ཏི གརཧཱཔི ¶ མེ ཨུཔྤཛྫིསྶཏཱི’’ཏི ཙིནྟེཏྭཱ ཨཏྟནོ ཙ གརཧཱམོཙནཏྠཾ མཱཏཱཔིཏཱུནཉྩ ཝུཌྜྷིཾ སམྤསྶནྟོ ཨསྶེ ཙ རཐཉྩ པསཱདྷནབྷཎྜཉྩ ཏསྶ ཨིཎཾ ཀཏྭཱ དསྶེནྟོ ཨིམཾ གཱཐམཱཧ –
‘‘རཐཾ ནིཡྻཱདཡིཏྭཱན, ཨནཎོ ཨེཧི སཱརཐི;
ཨནཎསྶ ཧི པབྦཛྫཱ, ཨེཏཾ ཨིསཱིཧི ཝཎྞིཏ’’ནྟི.
ཏཏྠ ཨེཏནྟི ཨེཏཾ པབྦཛྫཱཀརཎཾ བུདྡྷཱདཱིཧི ཨིསཱིཧི ཝཎྞིཏཾ པསཏྠཾ ཐོམིཏཾ.
ཏཾ སུཏྭཱ སཱརཐི ‘‘སཙེ མཡི ནགརཾ གཏེ ཨེས ཨཉྙཏྠ གཙྪེཡྻ, པིཏཱ ཙསྶ ཨིམཾ པཝཏྟིཾ སུཏྭཱ ‘པུཏྟཾ མེ དསྶེཧཱི’ཏི པུན ཨཱགཏོ ཨིམཾ ན པསྶེཡྻ, རཱཛདཎྜཾ མེ ཀརེཡྻ, ཏསྨཱ ཨཧཾ ཨཏྟནོ གུཎཾ ཀཐེཏྭཱ ཨཉྙཏྠཱགམནཏྠཱཡ པཊིཉྙཾ གཎྷིསྶཱམཱི’’ཏི ཙིནྟེནྟོ གཱཐཱདྭཡམཱཧ –
‘‘ཡདེཝ ¶ ཏྱཱཧཾ ཝཙནཾ, ཨཀརཾ བྷདྡམཏྠུ ཏེ;
ཏདེཝ མེ ཏྭཾ ཝཙནཾ, ཡཱཙིཏོ ཀཏྟུམརཧསི.
‘‘ཨིདྷེཝ ཏཱཝ ཨཙྪསྶུ, ཡཱཝ རཱཛཱནམཱནཡེ;
ཨཔྤེཝ ཏེ པིཏཱ དིསྭཱ, པཏཱིཏོ སུམནོ སིཡཱ’’ཏི.
ཏཏོ ¶ མཧཱསཏྟོ ཨཱཧ –
‘‘ཀརོམི ཏེ ཏཾ ཝཙནཾ, ཡཾ མཾ བྷཎསི སཱརཐི;
ཨཧམྤི དཊྛུཀཱམོསྨི, པིཏརཾ མེ ཨིདྷཱགཏཾ.
‘‘ཨེཧི སམྨ ནིཝཏྟསྶུ, ཀུསལཾ ཝཛྫཱསི ཉཱཏིནཾ;
མཱཏརཾ པིཏརཾ མཡ྄ཧཾ, ཝུཏྟོ ཝཛྫཱསི ཝནྡན’’ནྟི.
ཏཏྠ ཀརོམི ཏེཏནྟི ཀརོམི ཏེ ཨེཏཾ ཝཙནཾ. ཨེཧི སམྨ ནིཝཏྟསྶཱུཏི སམྨ སཱརཐི, ཏཏྠ གནྟྭཱ ཨེཧི, ཨེཏྟོཝ ཁིཔྤམེཝ ནིཝཏྟསྶུ. ཝུཏྟོ ཝཛྫཱསཱིཏི མཡཱ ཝུཏྟོ ཧུཏྭཱ ‘‘པུཏྟོ ཝོ ཏེམིཡཀུམཱརོ ཝནྡཏཱི’’ཏི ཝནྡནཾ ཝདེཡྻཱསཱིཏི ཨཏྠོ.
ཨིཏི ཝཏྭཱ མཧཱསཏྟོ སུཝཎྞཀདལི ཝིཡ ཨོནམིཏྭཱ པཉྩཔཏིཊྛིཏེན བཱརཱཎསིནགརཱབྷིམུཁོ མཱཏཱཔིཏརོ ཝནྡིཏྭཱ སཱརཐིསྶ སཱསནཾ ¶ ཨདཱསི. སོ སཱསནཾ གཧེཏྭཱ ཀུམཱརཾ པདཀྑིཎཾ ཀཏྭཱ རཐམཱརུཡ྄ཧ ནགརཱབྷིམུཁོ པཱཡཱསི. ཏམཏྠཾ པཀཱསེནྟོ སཏྠཱ ཨཱཧ –
‘‘ཏསྶ པཱདེ གཧེཏྭཱན, ཀཏྭཱ ཙ ནཾ པདཀྑིཎཾ;
སཱརཐི རཐམཱརུཡ྄ཧ, རཱཛདྭཱརཾ ཨུཔཱགམཱི’’ཏི.
ཏསྶཏྠོ – བྷིཀྑཝེ, ཨེཝཾ ཝུཏྟོ སོ སཱརཐི, ཏསྶ ཀུམཱརསྶ པཱདེ གཧེཏྭཱ ཏཾ པདཀྑིཎཾ ཀཏྭཱ རཐཾ ཨཱརུཡ྄ཧ རཱཛདྭཱརཾ ཨུཔཱགམཱིཏི.
ཏསྨིཾ ཁཎེ ཙནྡཱདེཝཱི སཱིཧཔཉྫརཾ ཝིཝརིཏྭཱ ‘‘ཀཱ ནུ ཁོ མེ པུཏྟསྶ པཝཏྟཱི’’ཏི སཱརཐིསྶ ¶ ཨཱགམནམགྒཾ ཨོལོཀེནྟཱི ཏཾ ཨེཀཀཾ ཨཱགཙྪནྟཾ དིསྭཱ ཨུརཾ པཧརིཏྭཱ པརིདེཝི. ཏམཏྠཾ པཀཱསེནྟོ སཏྠཱ ཨཱཧ –
‘‘སུཉྙཾ མཱཏཱ རཐཾ དིསྭཱ, ཨེཀཾ སཱརཐིམཱགཏཾ;
ཨསྶུཔུཎྞེཧི ནེཏྟེཧི, རོདནྟཱི ནཾ ཨུདིཀྑཏི.
‘‘ཨཡཾ སོ སཱརཐི ཨེཏི, ནིཧནྟྭཱ མམ ཨཏྲཛཾ;
ནིཧཏོ ནཱུན མེ པུཏྟོ, པཐབྱཱ བྷཱུམིཝཌྜྷནོ.
‘‘ཨམིཏྟཱ ནཱུན ནནྡནྟི, པཏཱིཏཱ ནཱུན ཝེརིནོ;
ཨཱགཏཾ སཱརཐིཾ དིསྭཱ, ནིཧནྟྭཱ མམ ཨཏྲཛཾ.
‘‘སུཉྙཾ མཱཏཱ རཐཾ དིསྭཱ, ཨེཀཾ སཱརཐིམཱགཏཾ;
ཨསྶུཔུཎྞེཧི ནེཏྟེཧི, རོདནྟཱི པརིཔུཙྪི ནཾ.
‘‘ཀིཾ ནུ མཱུགོ ཀིཾནུ པཀྑོ, ཀིཾནུ སོ ཝིལཔཱི ཏདཱ;
ནིཧཉྙམཱནོ བྷཱུམིཡཱ, ཏཾ མེ ཨཀྑཱཧི སཱརཐི.
‘‘ཀཐཾ ཧཏྠེཧི པཱདེཧི, མཱུགཔཀྑོ ཝིཝཛྫཡི;
ནིཧཉྙམཱནོ བྷཱུམིཡཱ, ཏཾ མེ ཨཀྑཱཧི པུཙྪིཏོ’’ཏི.
ཏཏྠ མཱཏཱཏི ཏེམིཡཀུམཱརསྶ མཱཏཱ. པཐབྱཱ བྷཱུམིཝཌྜྷནོཏི སོ མམ པུཏྟོ བྷཱུམིཝཌྜྷནོ ཧུཏྭཱ པཐབྱཱ ནིཧཏོ ནཱུན. རོདནྟཱི པརིཔུཙྪི ནནྟི ཏཾ རཐཾ ཨེཀམནྟཾ ཋཔེཏྭཱ མཧཱཏལཾ ¶ ཨབྷིརུཡ྄ཧ ཙནྡཱདེཝིཾ ཝནྡིཏྭཱ ཨེཀམནྟེ ཋིཏཾ སཱརཐིཾ པརིཔུཙྪི. ཀིནྣཱུཏི ཀིཾ ནུ སོ མམ ¶ པུཏྟོ མཱུགོ ཨེཝ པཀྑོ ཨེཝ. ཏདཱཏི ཡདཱ ནཾ ཏྭཾ ཀཱསུཡཾ པཀྑིཔིཏྭཱ ཀུདྡཱལེན མཏྠཀེ པཧརི, ཏདཱ. ནིཧཉྙམཱནོ བྷཱུམིཡཱཏི ཏཡཱ བྷཱུམིཡཾ ནིཧཉྙམཱནོ ཀིཾ ནུ ཝིལཔི. ཏཾ མེཏི ཏཾ སབྦཾ ཨཔརིཧཱཔེཏྭཱ མེ ཨཀྑཱཧི. ཝིཝཛྫཡཱིཏི ‘‘ཨཔེཧི སཱརཐི, མཱ མཾ མཱརེཧཱི’’ཏི ཀཐཾ ཧཏྠེཧི པཱདེཧི ཙ ཕནྡནྟོ ཏཾ ཨཔནུདི, ཏཾ མེ ཀཐེཧཱིཏི ཨཏྠོ.
ཏཏོ སཱརཐི ཨཱཧ –
‘‘ཨཀྑེཡྻཾ ¶ ཏེ ཨཧཾ ཨཡྻེ, དཛྫཱསི ཨབྷཡཾ མམ;
ཡཾ མེ སུཏཾ ཝཱ དིཊྛཾ ཝཱ, རཱཛཔུཏྟསྶ སནྟིཀེ’’ཏི.
ཏཏྠ དཛྫཱསཱིཏི སཙེ ཨབྷཡཾ དདེཡྻཱསི, སོ ཨིདཾ ‘‘སཙཱཧཾ ‘ཏཝ པུཏྟོ ནེཝ མཱུགོ ན པཀྑོ མདྷུརཀཐོ དྷམྨཀཐིཀོ’ཏི ཝཀྑཱམི, ཨཐ ‘ཀསྨཱ ཏཾ གཧེཏྭཱ ནཱགཏོསཱི’ཏི རཱཛཱ ཀུདྡྷོ རཱཛདཎྜམྤི མེ ཀརེཡྻ, ཨབྷཡཾ ཏཱཝ ཡཱཙིསྶཱམཱི’’ཏི ཙིནྟེཏྭཱ ཨཱཧ.
ཨཐ ནཾ ཙནྡཱདེཝཱི ཨཱཧ –
‘‘ཨབྷཡཾ སམྨ ཏེ དམྨི, ཨབྷཱིཏོ བྷཎ སཱརཐི;
ཡཾ ཏེ སུཏཾ ཝཱ དིཊྛཾ ཝཱ, རཱཛཔུཏྟསྶ སནྟིཀེ’’ཏི.
ཏཏོ སཱརཐི ཨཱཧ –
‘‘ན སོ མཱུགོ ན སོ པཀྑོ, ཝིསཊྛཝཙནོ ཙ སོ;
རཛྫསྶ ཀིར སོ བྷཱིཏོ, ཨཀརཱ ཨཱལཡེ བཧཱུ.
‘‘པུརིམཾ སརཏི སོ ཛཱཏིཾ, ཡཏྠ རཛྫམཀཱརཡི;
ཀཱརཡིཏྭཱ ཏཧིཾ རཛྫཾ, པཱཔཏྠ ནིརཡཾ བྷུསཾ.
‘‘ཝཱིསཏིཉྩེཝ ཝསྶཱནི, ཏཧིཾ རཛྫམཀཱརཡི;
ཨསཱིཏིཝསྶསཧསྶཱནི, ནིརཡམྷི ཨཔཙྩི སོ.
‘‘ཏསྶ རཛྫསྶ སོ བྷཱིཏོ, མཱ མཾ རཛྫཱབྷིསེཙཡུཾ;
ཏསྨཱ པིཏུ ཙ མཱཏུཙྩ, སནྟིཀེ ན བྷཎཱི ཏདཱ.
‘‘ཨངྒཔཙྩངྒསམྤནྣོ ¶ , ཨཱརོཧཔརིཎཱཧཝཱ;
ཝིསཊྛཝཙནོ པཉྙོ, མགྒེ སགྒསྶ ཏིཊྛཏི.
‘‘སཙེ ¶ ཏྭཾ དཊྛུཀཱམཱསི, རཱཛཔུཏྟཾ ཏཝཏྲཛཾ;
ཨེཧི ཏཾ པཱཔཡིསྶཱམི, ཡཏྠ སམྨཏི ཏེམིཡོ’’ཏི.
ཏཏྠ ཝིསཊྛཝཙནོཏི ཨཔལིབུདྡྷཀཐོ. ཨཀརཱ ཨཱལཡེ བཧཱུཏི ཏུམྷཱཀཾ ཝཉྩནཱནི བཧཱུནི ཨཀཱསི. པཉྙོཏི པཉྙཝཱ. སཙེ ཏྭནྟི རཱཛཱནཾ དྷུརཾ ཀཏྭཱ ཨུབྷོཔི ཏེ ཨེཝམཱཧ. ཡཏྠ སམྨཏི ཏེམིཡོཏི ཡཏྠ ཝོ པུཏྟོ མཡཱ གཧིཏཔཊིཉྙོ ཧུཏྭཱ ཨཙྪཏི, ཏཏྠ པཱཔཡིསྶཱམི, ཨིདཱནི པཔཉྩཾ ཨཀཏྭཱ ལཧུཾ གནྟུཾ ཝཊྚཏཱིཏི ཨཱཧ.
ཀུམཱརོ ¶ པན སཱརཐིཾ པེསེཏྭཱ པབྦཛིཏུཀཱམོ ཨཧོསི. ཏདཱ སཀྐོ ཏསྶ མནཾ ཉཏྭཱ ཏསྨིཾ ཁཎེ ཝིསྶཀམྨདེཝཔུཏྟཾ པཀྐོསཱཔེཏྭཱ ‘‘ཏཱཏ ཝིསྶཀམྨདེཝཔུཏྟ, ཏེམིཡཀུམཱརོ པབྦཛིཏུཀཱམོ, ཏྭཾ ཏསྶ པཎྞསཱལཉྩ པབྦཛིཏཔརིཀྑཱརཉྩ མཱཔེཏྭཱ ཨེཧཱི’’ཏི པེསེསི. སོ ‘‘སཱདྷཱུ’’ཏི སམྤཊིཙྪིཏྭཱ ཝེགེན གནྟྭཱ ཏིཡོཛནིཀེ ཝནསཎྜེ ཨཏྟནོ ཨིདྡྷིབལེན རམཎཱིཡཾ ཨསྶམཾ མཱཔེཏྭཱ རཏྟིཊྛཱནདིཝཱཊྛཱནཉྩ པོཀྑརཎིཉྩ ཨཱཝཱཊཉྩ ཨཀཱལཕལསམྤནྣཾ རུཀྑཉྩ ཀཏྭཱ པཎྞསཱལསམཱིཔེ ཙཏུཝཱིསཏིཧཏྠཔྤམཱཎཾ ཙངྐམཾ མཱཔེཏྭཱ ཨནྟོཙངྐམེ ཙ ཕལིཀཝཎྞཾ རུཙིརཾ ཝཱལུཀཾ ཨོཀིརིཏྭཱ སབྦེ པབྦཛིཏཔརིཀྑཱརེ མཱཔེཏྭཱ ‘‘ཡེ པབྦཛིཏུཀཱམཱ, ཏེ ཨིམེ གཧེཏྭཱ པབྦཛནྟཱུ’’ཏི བྷིཏྟིཡཾ ཨཀྑརཱནི ལིཁིཏྭཱ ཙཎྜཝཱལེ༹ ཙ ཨམནཱཔསདྡེ སབྦེ མིགཔཀྑིནོ ཙ པལཱཔེཏྭཱ སཀཊྛཱནམེཝ གཏོ.
ཏསྨིཾ ཁཎེ མཧཱསཏྟོ ཏཾ དིསྭཱ སཀྐདཏྟིཡབྷཱཝཾ ཉཏྭཱ, པཎྞསཱལཾ པཝིསིཏྭཱ ཝཏྠཱནི ཨཔནེཏྭཱ, རཏྟཝཱཀཙཱིརཾ ནིཝཱསེཏྭཱ ཨེཀཾ པཱརུཔིཏྭཱ ཨཛིནཙམྨཾ ཨེཀཾསེ ཀཏྭཱ ཛཊཱམཎྜལཾ བནྡྷིཏྭཱ ཀཱཛཾ ཨཾསེ ཀཏྭཱ ཀཏྟརདཎྜམཱདཱཡ པཎྞསཱལཏོ ནིཀྑམིཏྭཱ པབྦཛིཏསིརིཾ སམུབྦཧནྟོ ཨཔརཱཔརཾ ཙངྐམིཏྭཱ ‘‘ཨཧོ སུཁཾ, ཨཧོ སུཁ’’ནྟི ཨུདཱནཾ ཨུདཱནེནྟོ པཎྞསཱལཾ པཝིསིཏྭཱ ཀཊྛཏྠརཎེ ནིསིནྣོ པཉྩ ཨབྷིཉྙཱ ཨཊྛ སམཱཔཏྟིཡོ ཙ ནིབྦཏྟེཏྭཱ སཱཡནྷསམཡེ པཎྞསཱལཏོ ནིཀྑམིཏྭཱ ཙངྐམནཀོཊིཡཾ ཋིཏཀཱརརུཀྑཏོ པཎྞཱནི གཧེཏྭཱ ¶ , སཀྐདཏྟིཡབྷཱཛནེ ཨལོཎཀེ ཨཏཀྐེ ནིདྷཱུཔནེ ཨུདཀེ སེདེཏྭཱ ཨམཏཾ ཝིཡ པརིབྷུཉྫིཏྭཱ ཙཏྟཱརོ བྲཧྨཝིཧཱརེ བྷཱཝེཏྭཱ ཏཏྠ ཝཱསཾ ཀཔྤེསི.
ཀཱསིརཱཛཱཔི སུནནྡསཱརཐིསྶ ཝཙནཾ སུཏྭཱ མཧཱསེནགུཏྟཾ པཀྐོསཱཔེཏྭཱ ཏརམཱནརཱུཔོཝ གམནསཛྫཾ ཀཱརེཏུཾ ཨཱཧ –
‘‘ཡོཛཡནྟུ ¶ རཐེ ཨསྶེ, ཀཙྪཾ ནཱགཱན བནྡྷཐ;
ཨུདཱིརཡནྟུ སངྑཔཎཝཱ, ཝཱདནྟུ ཨེཀཔོཀྑརཱ.
‘‘ཝཱདནྟུ བྷེརཱི སནྣདྡྷཱ, ཝགྒཱུ ཝཱདནྟུ དུནྡུབྷཱི;
ནེགམཱ ཙ མཾ ཨནྭེནྟུ, གཙྪཾ པུཏྟནིཝེདཀོ.
‘‘ཨོརོདྷཱ ཙ ཀུམཱརཱ ཙ, ཝེསིཡཱནཱ ཙ བྲཱཧྨཎཱ;
ཁིཔྤཾ ཡཱནཱནི ཡོཛེནྟུ, གཙྪཾ པུཏྟནིཝེདཀོ.
‘‘ཧཏྠཱརོཧཱ ཨནཱིཀཊྛཱ, རཐིཀཱ པཏྟིཀཱརཀཱ;
ཁིཔྤཾ ཡཱནཱནི ཡོཛེནྟུ, གཙྪཾ པུཏྟནིཝེདཀོ.
‘‘སམཱགཏཱ ཛཱནཔདཱ, ནེགམཱ ཙ སམཱགཏཱ;
ཁིཔྤཾ ཡཱནཱནི ཡོཛེནྟུ, གཙྪཾ པུཏྟནིཝེདཀོ’’ཏི.
ཏཏྠ ¶ ཨུདཱིརཡནྟཱུཏི སདྡཾ མུཉྩནྟུ. ཝཱདནྟཱུཏི ཝཛྫནྟུ. ཨེཀཔོཀྑརཱཏི ཨེཀམུཁབྷེརིཡོ. སནྣདྡྷཱཏི སུཊྛུ ནདྡྷཱ. ཝགྒཱུཏི མདྷུརསྶརཱ. གཙྪནྟི གམིསྶཱམི. པུཏྟནིཝེདཀོཏི པུཏྟསྶ ནིཝེདཀོ ཨོཝཱདཀོ ཧུཏྭཱ གཙྪཱམི. ཏཾ ཨོཝདིཏྭཱ མམ ཝཙནཾ གཱཧཱཔེཏྭཱ ཏཏྠེཝ ཏཾ རཏནརཱསིམྷི ཋཔེཏྭཱ ཨབྷིསིཉྩིཏྭཱ ཨཱནེཏུཾ གཙྪཱམཱིཏི ཨདྷིཔྤཱཡེནེཝམཱཧ. ནེགམཱཏི ཀུཊུམྦིཀཛནཱ. སམཱགཏཱཏི སནྣིཔཏིཏཱ ཧུཏྭཱ.
ཨེཝཾ རཉྙཱ ཨཱཎཏྟཱ སཱརཐིནོ ཨསྶེ ཡོཛེཏྭཱ རཐེ རཱཛདྭཱརེ ཋཔེཏྭཱ རཉྙོ ཨཱརོཙེསུཾ. ཏམཏྠཾ པཀཱསེནྟོ སཏྠཱ ཨཱཧ –
‘‘ཨསྶེ ཙ སཱརཐཱི ཡུཏྟེ, སིནྡྷཝེ སཱིགྷཝཱཧནེ;
རཱཛདྭཱརཾ ཨུཔཱགཙྪུཾ, ཡུཏྟཱ དེཝ ཨིམེ ཧཡཱ’’ཏི.
ཏཏྠ ¶ ཨསྶེཏི སིནྡྷཝེ སིནྡྷཝཛཱཏིཀེ སཱིགྷཝཱཧནེ ཛཝསམྤནྣེ ཨསྶེ ཨཱདཱཡ. སཱརཐཱིཏི སཱརཐིནོ. ཡུཏྟེཏི རཐེསུ ཡོཛིཏེ. ཨུཔཱགཙྪུནྟི ཏེ རཐེསུ ཡུཏྟེ ཨསྶེ ཨཱདཱཡ ཨཱགམཾསུ, ཨཱགནྟྭཱ ཙ པན ‘‘ཡུཏྟཱ, དེཝ, ཨིམེ ཧཡཱ’’ཏི ཨཱརོཙེསུཾ.
ཏཏོ ¶ སཱརཐཱིནཾ ཝཙནཾ སུཏྭཱ རཱཛཱ ཨུཔཌྜྷགཱཐམཱཧ –
‘‘ཐཱུལཱ ཛཝེན ཧཱཡནྟི, ཀིསཱ ཧཱཡནྟི ཐཱམུནཱ’’ཏི.
ཏཾ སུཏྭཱ སཱརཐིནོཔི ཨུཔཌྜྷགཱཐམཱཧཾསུ –
‘‘ཀིསེ ཐཱུལེ ཝིཝཛྫེཏྭཱ, སཾསཊྛཱ ཡོཛིཏཱ ཧཡཱ’’ཏི.
ཏསྶཏྠོ – དེཝ, ཀིསེ ཙ ཐཱུལེ ཙ ཨེཝརཱུཔེ ཨསྶེ ཨགྒཎྷིཏྭཱ ཝཡེན ཝཎྞེན ཛཝེན བལེན སདིསཱ ཧཡཱ ཡོཛིཏཱཏི.
ཨཐ རཱཛཱ པུཏྟསྶ སནྟིཀཾ གཙྪནྟོ ཙཏྟཱརོ ཝཎྞེ ཨཊྛཱརས སེནིཡོ སབྦཉྩ བལཀཱཡཾ སནྣིཔཱཏཱཔེསི. ཏསྶ སནྣིཔཱཏེནྟསྶེཝ ཏཡོ དིཝསཱ ཨཏིཀྐནྟཱ. ཨཐ ཙཏུཏྠེ དིཝསེ ཀཱསིརཱཛཱ ནགརཏོ ནིཀྑམིཏྭཱ གཧེཏབྦཡུཏྟཀཾ གཱཧཱཔེཏྭཱ ཨསྶམཔདཾ གནྟྭཱ པུཏྟེན སདྡྷིཾ པཊིནནྡིཏོ པཊིསནྠཱརམཀཱསི. ཏམཏྠཾ པཀཱསེནྟོ སཏྠཱ ཨཱཧ –
‘‘ཏཏོ རཱཛཱ ཏརམཱནོ, ཡུཏྟམཱརུཡ྄ཧ སནྡནཾ;
ཨིཏྠཱགཱརཾ ཨཛ྄ཛྷབྷཱསི, སབྦཱཝ ཨནུཡཱཐ མཾ.
‘‘ཝཱལ༹བཱིཛནིམུཎྷཱིསཾ, ཁགྒཾ ཚཏྟཉྩ པཎྜརཾ;
ཨུཔཱདྷཱི རཐམཱརུཡ྄ཧ, སུཝཎྞེཧི ཨལངྐཏཱ.
‘‘ཏཏོ ས རཱཛཱ པཱཡཱསི, པུརཀྑཏྭཱན སཱརཐིཾ;
ཁིཔྤམེཝ ཨུཔཱགཙྪི, ཡཏྠ སམྨཏི ཏེམིཡོ.
‘‘ཏཉྩ ¶ དིསྭཱན ཨཱཡནྟཾ, ཛལནྟམིཝ ཏེཛསཱ;
ཁཏྟསངྒྷཔརིབྱཱུལ༹ྷཾ, ཏེམིཡོ ཨེཏདབྲཝི.
‘‘ཀཙྩི ནུ ཏཱཏ ཀུསལཾ, ཀཙྩི ཏཱཏ ཨནཱམཡཾ;
སབྦཱ ཙ རཱཛཀཉྙཱཡོ, ཨརོགཱ མཡ྄ཧ མཱཏརོ.
‘‘ཀུསལཉྩེཝ ¶ ¶ མེ པུཏྟ, ཨཐོ པུཏྟ ཨནཱམཡཾ;
སབྦཱ ཙ རཱཛཀཉྙཱཡོ, ཨརོགཱ ཏུཡ྄ཧ མཱཏརོ.
‘‘ཀཙྩི ཨམཛྫཔོ ཏཱཏ, ཀཙྩི ཏེ སུརམཔྤིཡཾ;
ཀཙྩི སཙྩེ ཙ དྷམྨེ ཙ, དཱནེ ཏེ རམཏེ མནོ.
‘‘ཨམཛྫཔོ ཨཧཾ པུཏྟ, ཨཐོ མེ སུརམཔྤིཡཾ;
ཨཐོ སཙྩེ ཙ དྷམྨེ ཙ, དཱནེ མེ རམཏེ མནོ.
‘‘ཀཙྩི ཨརོགཾ ཡོགྒཾ ཏེ, ཀཙྩི ཝཧཏི ཝཱཧནཾ;
ཀཙྩི ཏེ བྱཱདྷཡོ ནཏྠི, སརཱིརསྶུཔཏཱཔནཱ.
‘‘ཨཐོ ཨརོགཾ ཡོགྒཾ མེ, ཨཐོ ཝཧཏི ཝཱཧནཾ;
ཨཐོ མེ བྱཱདྷཡོ ནཏྠི, སརཱིརསྶུཔཏཱཔནཱ.
‘‘ཀཙྩི ཨནྟཱ ཙ ཏེ ཕཱིཏཱ, མཛ྄ཛྷེ ཙ བཧལཱ ཏཝ;
ཀོཊྛཱགཱརཉྩ ཀོསཉྩ, ཀཙྩི ཏེ པཊིསནྠཏཾ.
‘‘ཨཐོ ཨནྟཱ ཙ མེ ཕཱིཏཱ, མཛ྄ཛྷེ ཙ བཧལཱ མམ;
ཀོཊྛཱགཱརཉྩ ཀོསཉྩ, སབྦཾ མེ པཊིསནྠཏཾ.
‘‘སྭཱགཏཾ ཏེ མཧཱརཱཛ, ཨཐོ ཏེ ཨདུརཱགཏཾ;
པཏིཊྛཔེནྟུ པལླངྐཾ, ཡཏྠ རཱཛཱ ནིསཀྐཏཱི’’ཏི.
ཏཏྠ ཨུཔཱདྷཱི རཐམཱརུཡ྄ཧཱཏི སུཝཎྞཔཱདུཀཱ ཙ རཐཾ ཨཱརོཔེནྟཱུཏི ཨཏྠོ. ཨིམེ ཏཡོ པཱདེ པུཏྟསྶ ཏཏྠེཝ ཨབྷིསེཀཀརཎཏྠཱཡ ‘‘པཉྩ རཱཛཀཀུདྷབྷཎྜཱནི གཎྷཐཱ’’ཏི ཨཱཎཱཔེནྟོ རཱཛཱ ཨཱཧ. སུཝཎྞེཧི ཨལངྐཏཱཏི ཨིདཾ པཱདུཀཾ སནྡྷཱཡཱཧ. ཨུཔཱགཙྪཱིཏི ཨུཔཱགཏོ ཨཧོསི. ཀཱཡ ཝེལཱཡཱཏི? མཧཱསཏྟསྶ ཀཱརཔཎྞཱནི པཙིཏྭཱ ནིབྦཱཔེནྟསྶ ནིསིནྣཝེལཱཡ. ཛལནྟམིཝ ཏེཛསཱཏི རཱཛཏེཛེན ཛལནྟཾ ཝིཡ. ཁཏྟསངྒྷཔརིབྱཱུལ༹ྷནྟི ཀཐཱཕཱསུཀེན ཨམཙྩསངྒྷེན པརིཝུཏཾ, ཁཏྟིཡསམཱུཧེཧི ¶ ཝཱ པརིཝཱརིཏཾ. ཨེཏདབྲཝཱིཏི ཀཱསིརཱཛཱནཾ བཧི ཁནྡྷཱཝཱརཾ ནིཝཱསཱཔེཏྭཱ ¶ པདསཱཝ པཎྞསཱལཾ ཨཱགནྟྭཱ ཏཾ ཝནྡིཏྭཱ ནིསིནྣཾ པཊིསནྠཱརཾ ཀརོནྟོ ཨེཏཾ ཝཙནཾ ཨབྲཝི.
ཀུསལཾ ཨནཱམཡནྟི ཨུབྷཡེནཔི པདེན ཨཱརོགྱམེཝ པུཙྪཏི. ཀཙྩི ཨམཛྫཔོཏི ཀཙྩི མཛྫཾ ན པིཝསཱིཏི པུཙྪཏི. ‘‘ཨཔྤམཏྟོ’’ཏིཔི པཱཋོ, ཀུསལདྷམྨེསུ ནཔྤམཛྫསཱིཏི ཨཏྠོ. སུརམཔྤིཡནྟི སུརཱཔཱནཾ ཨཔྤིཡཾ. ‘‘སུརམཔྤིཡཱ’’ཏིཔི པཱཋོ, སུརཱ ཨཔྤིཡཱཏི ཨཏྠོ. དྷམྨེཏི དསཝིདྷེ རཱཛདྷམྨེ. ཡོགྒནྟི ཡུགེ ཡུཉྫིཏབྦཾ ཏེ ཏཝ ཨསྶགོཎཱདིཀཾ. ཀཙྩི ཝཧཏཱིཏི ཀཙྩི ཨརོགཾ ཧུཏྭཱ ཝཧཏི. ཝཱཧནནྟི ཧཏྠིཨསྶཱདི སབྦཾ ཝཱཧནཾ. སརཱིརསྶུཔཏཱཔནཱཏི སརཱིརསྶ ཨུཔཏཱཔཀརཱ. ཨནྟཱཏི པཙྩནྟཛནཔདཱ. ཕཱིཏཱཏི ཨིདྡྷཱ སུབྷིཀྑཱ, ཝཏྠཱབྷརཎེཧི ཝཱ ཨནྣཔཱནེཧི ཝཱ པརིཔུཎྞཱ གཱལ༹ྷཝཱསཱ. མཛ྄ཛྷེ ཙཱཏི རཊྛསྶ མཛ྄ཛྷེ. བཧལཱཏི གཱམནིགམཱ གྷནཝཱསཱ. པཊིསནྠཏནྟི པཊིཙྪཱདིཏཾ གུཏྟཾ, པརིཔུཎྞཾ ཝཱ. ཡཏྠ རཱཛཱ ནིསཀྐཏཱིཏི ཡསྨིཾ པལླངྐེ རཱཛཱ ནིསཱིདིསྶཏི, ཏཾ པཉྙཱཔེནྟཱུཏི ཝདཏི.
རཱཛཱ མཧཱསཏྟེ གཱརཝེན པལླངྐེ ན ནིསཱིདཏི. ཨཐ ¶ མཧཱསཏྟོ ‘‘སཙེ པལླངྐེ ན ནིསཱིདཏི, པཎྞསནྠཱརཾ པཉྙཱཔེཐཱ’’ཏི ཝཏྭཱ ཏསྨིཾ པཉྙཏྟེ ནིསཱིདནཏྠཱཡ རཱཛཱནཾ ནིམནྟེནྟོ གཱཐམཱཧ –
‘‘ཨིདྷེཝ ཏེ ནིསཱིདསྶུ, ནིཡཏེ པཎྞསནྠརེ;
ཨེཏྟོ ཨུདཀམཱདཱཡ, པཱདེ པཀྑཱལཡསྶུ ཏེ’’ཏི.
ཏཏྠ ནིཡཏེཏི སུསནྠཏེ. ཨེཏྟོཏི པརིབྷོགཨུདཀཾ དསྶེནྟོ ཨཱཧ.
རཱཛཱ མཧཱསཏྟེ གཱརཝེན པཎྞསནྠཱརེཔི ཨནིསཱིདིཏྭཱ བྷཱུམིཡཾ ཨེཝ ནིསཱིདི. མཧཱསཏྟོཔི པཎྞསཱལཾ པཝིསིཏྭཱ ཏཾ ཀཱརཔཎྞཀཾ ནཱིཧརིཏྭཱ རཱཛཱནཾ ཏེན ནིམནྟེནྟོ གཱཐམཱཧ –
‘‘ཨིདམྤི པཎྞཀཾ མཡ྄ཧཾ, རནྡྷཾ རཱཛ ཨལོཎཀཾ;
པརིབྷུཉྫ མཧཱརཱཛ, པཱཧུནོ མེསིདྷཱགཏོ’’ཏི.
ཨཐ ¶ ནཾ རཱཛཱ ཨཱཧ –
‘‘ན ¶ ཙཱཧཾ པཎྞཾ བྷུཉྫཱམི, ན ཧེཏཾ མཡ྄ཧ བྷོཛནཾ;
སཱལཱིནཾ ཨོདནཾ བྷུཉྫེ, སུཙིཾ མཾསཱུཔསེཙན’’ནྟི.
ཏཏྠ ན ཙཱཧནྟི པཊིཀྑེཔཝཙནཾ.
རཱཛཱ ཏཐཱརཱུཔཾ ཨཏྟནོ རཱཛབྷོཛནཾ ཝཎྞེཏྭཱ ཏསྨིཾ མཧཱསཏྟེ གཱརཝེན ཐོཀཾ པཎྞཀཾ ཧཏྠཏལེ ཋཔེཏྭཱ ‘‘ཏཱཏ, ཏྭཾ ཨེཝརཱུཔཾ བྷོཛནཾ བྷུཉྫསཱི’’ཏི པུཏྟེན སདྡྷིཾ པིཡཀཐཾ ཀཐེནྟོ ནིསཱིདི. ཏསྨིཾ ཁཎེ ཙནྡཱདེཝཱི ཨོརོདྷེན པརིཝུཏཱ ཨེཀམགྒེན ཨཱགནྟྭཱ བོདྷིསཏྟསྶ ཨསྶམཔདཾ པཏྭཱ པིཡཔུཏྟཾ དིསྭཱ ཏཏྠེཝ པཏིཏྭཱ ཝིསཉྙཱི ཨཧོསི. ཏཏོ པཊིལདྡྷསྶཱསཱ པཏིཏཊྛཱནཏོ ཨུཊྛཧིཏྭཱ ཨཱགནྟྭཱ བོདྷིསཏྟསྶ པཱདེ དལ༹ྷཾ གཧེཏྭཱ ཝནྡིཏྭཱ ཨསྶུཔུཎྞེཧི ནེཏྟེཧི རོདིཏྭཱ ཝནྡནཊྛཱནཏོ ཨུཊྛཱཡ ཨེཀམནྟཾ ནིསཱིདི. ཨཐ ནཾ རཱཛཱ ‘‘བྷདྡེ, ཏཝ པུཏྟསྶ བྷོཛནཾ པསྶཱཧཱི’’ཏི ཝཏྭཱ ཐོཀཾ པཎྞཀཾ ཏསྶཱ ཧཏྠེ ཋཔེཏྭཱ སེསཨིཏྠཱིནམྤི ཐོཀཾ ཐོཀཾ ཨདཱསི. ཏཱ སབྦཱཔི ‘‘སཱམི, ཨེཝརཱུཔཾ བྷོཛནཾ བྷུཉྫསཱི’’ཏི ཝདནྟིཡོ ཏཾ གཧེཏྭཱ ཨཏྟནོ ཨཏྟནོ སཱིསེ ཀཏྭཱ ‘‘ཨཏིདུཀྐརཾ ཀརོསི, སཱམཱི’’ཏི ཝཏྭཱ ནམསྶམཱནཱ ནིསཱིདིཾསུ. རཱཛཱ པུན ‘‘ཏཱཏ, ཨིདཾ མཡ྄ཧཾ ཨཙྪརིཡཾ ཧུཏྭཱ ཨུཔཊྛཱཏཱི’’ཏི ཝཏྭཱ ཨིམཾ གཱཐམཱཧ –
‘‘ཨཙྪེརཀཾ མཾ པཊིབྷཱཏི, ཨེཀཀམྤི རཧོགཏཾ;
ཨེདིསཾ བྷུཉྫམཱནཱནཾ, ཀེན ཝཎྞོ པསཱིདཏཱི’’ཏི.
ཏཏྠ ཨེཀཀནྟི ཏཱཏ, ཏཾ ཨེཀཀམྤི རཧོགཏཾ ཨིམིནཱ བྷོཛནེན ཡཱཔེནྟཾ དིསྭཱ མམ ཨཙྪརིཡཾ ཧུཏྭཱ ཨུཔཊྛཱཏི. ཨེདིསནྟི ཨེཝརཱུཔཾ ཨལོཎཀཾ ཨཏཀྐཾ ནིདྷཱུཔནཾ རནྡྷཾ པཏྟཾ བྷུཉྫནྟཱནཾ ཀེན ཀཱརཎེན ཝཎྞོ པསཱིདཏཱིཏི ནཾ པུཙྪི.
ཨཐསྶ ¶ སོ ཨཱཙིཀྑནྟོ ཨཱཧ –
‘‘ཨེཀོ རཱཛ ནིཔཛྫཱམི, ནིཡཏེ པཎྞསནྠརེ;
ཏཱཡ མེ ཨེཀསེཡྻཱཡ, རཱཛ ཝཎྞོ པསཱིདཏི.
‘‘ན ¶ ཙ ནེཏྟིཾསབནྡྷཱ མེ, རཱཛརཀྑཱ ཨུཔཊྛིཏཱ;
ཏཱཡ མེ སུཁསེཡྻཱཡ, རཱཛཝཎྞོ པསཱིདཏི.
‘‘ཨཏཱིཏཾ ¶ ནཱནུསོཙཱམི, ནཔྤཛཔྤཱམིནཱགཏཾ;
པཙྩུཔྤནྣེན ཡཱཔེམི, ཏེན ཝཎྞོ པསཱིདཏི.
‘‘ཨནཱགཏཔྤཛཔྤཱཡ, ཨཏཱིཏསྶཱནུསོཙནཱ;
ཨེཏེན བཱལཱ སུསྶནྟི, ནལོ༹ཝ ཧརིཏོ ལུཏོ’’ཏི.
ཏཏྠ ནེཏྟིཾསབནྡྷཱཏི ཁགྒབནྡྷཱ. རཱཛརཀྑཱཏི རཱཛཱནཾ རཀྑིཏཱ. ནཔྤཛཔྤཱམཱིཏི ན པཏྠེམི. ཧརིཏོཏི ཧརིཏཝཎྞོ. ལུཏོཏི ལུཉྩིཏྭཱ ཨཱཏཔེ ཁིཏྟནལོ༹ ཝིཡ.
ཨཐ རཱཛཱ ‘‘ཨིདྷེཝ ནཾ ཨབྷིསིཉྩིཏྭཱ ཨཱདཱཡ གམིསྶཱམཱི’’ཏི ཙིནྟེཏྭཱ རཛྫེན ནིམནྟེནྟོ ཨཱཧ –
‘‘ཧཏྠཱནཱིཀཾ རཐཱནཱིཀཾ, ཨསྶེ པཏྟཱི ཙ ཝམྨིནོ;
ནིཝེསནཱནི རམྨཱནི, ཨཧཾ པུཏྟ དདཱམི ཏེ.
‘‘ཨིཏྠཱགཱརམྤི ཏེ དམྨི, སབྦཱལངྐཱརབྷཱུསིཏཾ;
ཏཱ པུཏྟ པཊིཔཛྫསྶུ, ཏྭཾ ནོ རཱཛཱ བྷཝིསྶསི.
‘‘ཀུསལཱ ནཙྩགཱིཏསྶ, སིཀྑིཏཱ ཙཱཏུརིཏྠིཡོ;
ཀཱམེ ཏཾ རམཡིསྶནྟི, ཀིཾ ཨརཉྙེ ཀརིསྶསི.
‘‘པཊིརཱཛཱུཧི ཏེ ཀཉྙཱ, ཨཱནཡིསྶཾ ཨལངྐཏཱ;
ཏཱསུ པུཏྟེ ཛནེཏྭཱན, ཨཐ པཙྪཱ པབྦཛིསྶསི.
‘‘ཡུཝཱ ཙ དཧརོ ཙཱསི, པཋམུཔྤཏྟིཀོ སུསུ;
རཛྫཾ ཀཱརེཧི བྷདྡནྟེ, ཀིཾ ཨརཉྙེ ཀརིསྶསཱི’’ཏི.
ཏཏྠ ཧཏྠཱནཱིཀནྟི དསཧཏྠིཏོ པཊྛཱཡ ཧཏྠཱནཱིཀཾ ནཱམ, ཏཐཱ རཐཱནཱིཀཾ. ཝམྨིནོཏི ཝམྨབདྡྷསཱུརཡོདྷེ. ཀུསལཱཏི ཚེཀཱ. སིཀྑིཏཱཏི ཨཉྙེསུཔི ཨིཏྠིཀིཙྩེསུ སིཀྑིཏཱ. ཙཱཏུརིཏྠིཡོཏི ཙཏུརཱ ཝིལཱསཱ ཨིཏྠིཡོ, ཨཐ ཝཱ ཙཏུརཱ ནཱགརཱ ཨིཏྠིཡོ, ཨཐ ཝཱ ཙཏུརཱ ¶ ནཱམ ¶ ནཱཊཀིཏྠིཡོ. པཊིརཱཛཱུཧི ཏེ ཀཉྙཱཏི ཨཉྙེཧི རཱཛཱུཧི ཏཝ རཱཛཀཉྙཱཡོ ཨཱནཡིསྶཱམི. ཡུཝཱཏི ཡོབྦནཔྤཏྟོ. དཧརོཏི ཏརུཎོ. པཋམུཔྤཏྟིཀོཏི པཋམཝཡེན ཨུཔྤཏྟིཏོ སམུགྒཏོ. སུསཱུཏི ཨཏིཏརུཎོ.
ཨིཏོ པཊྛཱཡ བོདྷིསཏྟསྶ དྷམྨཀཐཱ ཧོཏི –
‘‘ཡུཝཱ ཙརེ བྲཧྨཙརིཡཾ, བྲཧྨཙཱརཱི ཡུཝཱ སིཡཱ;
དཧརསྶ ཧི པབྦཛྫཱ, ཨེཏཾ ཨིསཱིཧི ཝཎྞིཏཾ.
‘‘ཡུཝཱ ¶ ཙརེ བྲཧྨཙརིཡཾ, བྲཧྨཙཱརཱི ཡུཝཱ སིཡཱ;
བྲཧྨཙརིཡཾ ཙརིསྶཱམི, ནཱཧཾ རཛྫེན མཏྠིཀོ.
‘‘པསྶཱམི ཝོཧཾ དཧརཾ, ཨམྨ ཏཱཏ ཝདནྟརཾ;
ཀིཙྪཱལདྡྷཾ པིཡཾ པུཏྟཾ, ཨཔྤཏྭཱཝ ཛརཾ མཏཾ.
‘‘པསྶཱམི ཝོཧཾ དཧརིཾ, ཀུམཱརིཾ ཙཱརུདསྶནིཾ;
ནཝཝཾསཀལཱི༹རཾཝ, པལུགྒཾ ཛཱིཝིཏཀྑཡཾ.
‘‘དཧརཱཔི ཧི མཱིཡནྟི, ནརཱ ཙ ཨཐ ནཱརིཡོ;
ཏཏྠ ཀོ ཝིསྶསེ པོསོ, ‘དཧརོམྷཱི’ཏི ཛཱིཝིཏེ.
‘‘ཡསྶ རཏྱཱ ཝིཝསཱནེ, ཨཱཡུ ཨཔྤཏརཾ སིཡཱ;
ཨཔྤོདཀེཝ མཙྪཱནཾ, ཀིཾ ནུ ཀོམཱརཀཾ ཏཧིཾ.
‘‘ནིཙྩམབྦྷཱཧཏོ ལོཀོ, ནིཙྩཉྩ པརིཝཱརིཏོ;
ཨམོགྷཱསུ ཝཛནྟཱིསུ, ཀིཾ མཾ རཛྫེབྷིསིཉྩསཱི’’ཏི.
ཀཱསིརཱཛཱ ཨཱཧ –
‘‘ཀེན ¶ མབྦྷཱཧཏོ ལོཀོ, ཀེན ཙ པརིཝཱརིཏོ;
ཀཱཡོ ཨམོགྷཱ གཙྪནྟི, ཏཾ མེ ཨཀྑཱཧི པུཙྪིཏོ’’ཏི.
བོདྷིསཏྟོ ཨཱཧ –
‘‘མཙྩུནཱབྦྷཱཧཏོ ལོཀོ, ཛརཱཡ པརིཝཱརིཏོ;
རཏྱོ ཨམོགྷཱ གཙྪནྟི, ཨེཝཾ ཛཱནཱཧི ཁཏྟིཡ.
‘‘ཡཐཱཔི ¶ ཏནྟེ ཝིཏཏེ, ཡཾ ཡདེཝཱུཔཝཱིཡཏི;
ཨཔྤཀཾ ཧོཏི ཝེཏབྦཾ, ཨེཝཾ མཙྩཱན ཛཱིཝིཏཾ.
‘‘ཡཐཱ ཝཱརིཝཧོ པཱུརོ, གཙྪཾ ནུཔནིཝཏྟཏི;
ཨེཝམཱཡུ མནུསྶཱནཾ, གཙྪཾ ནུཔནིཝཏྟཏི.
‘‘ཡཐཱ ཝཱརིཝཧོ པཱུརོ, ཝཧེ རུཀྑེཔཀཱུལཛེ;
ཨེཝཾ ཛརཱམརཎེན, ཝུཡ྄ཧནྟེ སབྦཔཱཎིནོ’’ཏི.
ཏཏྠ བྲཧྨཙཱརཱི ཡུཝཱ སིཡཱཏི བྲཧྨཙརིཡཾ ཙརནྟོ ཡུཝཱ བྷཝེཡྻ. ཨིསཱིཧི ཝཎྞིཏནྟི བུདྡྷཱདཱིཧི ཨིསཱིཧི ཐོམིཏཾ པསཏྠཾ. ནཱཧཾ རཛྫེན མཏྠིཀོཏི ཨཧཾ རཛྫེན ཨཏྠིཀོ ན ཧོམི. ཨམྨ ཏཱཏ ཝདནྟརནྟི ‘‘ཨམྨ, ཏཱཏཱ’’ཏི ཝདནྟཾ. པལུགྒནྟི མཙྩུནཱ ལུཉྩིཏྭཱ གཧིཏཾ. ཡསྶ རཏྱཱ ཝིཝསཱནེཏི མཧཱརཱཛ, ཡསྶ མཱཏུཀུཙྪིམྷི པཊིསནྡྷིགྒཧཎཀཱལཏོ པཊྛཱཡ རཏྟིདིཝཱཏིཀྐམེན ཨཔྤཏརཾ ཨཱཡུ ཧོཏི. ཀོམཱརཀཾ ཏཧིནྟི ཏསྨིཾ ཝཡེ ཏརུཎབྷཱཝོ ཀིཾ ཀརིསྶཏི.
ཀེན མབྦྷཱཧཏོཏི ཀེན ཨབྦྷཱཧཏོ. ཨིདཾ རཱཛཱ སཾཁིཏྟེན བྷཱསིཏསྶ ཨཏྠཾ ཨཛཱནནྟོཝ པུཙྪཏི. རཏྱོཏི རཏྟིཡོ. ཏཱ ཧི ཨིམེསཾ སཏྟཱནཾ ཨཱཡུཉྩ ཝཎྞཉྩ བལཉྩ ཁེཔེནྟིཡོ ཨེཝ གཙྪནྟཱིཏི ཨམོགྷཱ གཙྪནྟི ནཱམཱཏི ཝེདིཏབྦཾ ¶ . ཡཾ ཡདེཝཱུཔཝཱིཡཏཱིཏི ཡཾ ཡཾ ཏནྟཾ ཨུཔཝཱིཡཏི. ཝེཏབྦནྟི ཏནྟསྨིཾ ཝཱིཏེ སེསཾ ཝེཏབྦཾ ཡཐཱ ཨཔྤཀཾ ཧོཏི, ཨེཝཾ སཏྟཱནཾ ཛཱིཝིཏཾ. ནུཔནིཝཏྟཏཱིཏི ཏསྨིཾ ཏསྨིཾ ཁཎེ གཏཾ གཏམེཝ ཧོཏི, ན ཨུཔནིཝཏྟཏི. ཝཧེ རུཀྑེཔཀཱུལཛེཏི ཨུཔཀཱུལཛེ རུཀྑེ ཝཧེཡྻ.
རཱཛཱ ¶ མཧཱསཏྟསྶ དྷམྨཀཐཾ སུཏྭཱ ‘‘ཀིཾ མེ གྷརཱཝཱསེནཱ’’ཏི ཨཏིཝིཡ ཨུཀྐཎྛིཏོ པབྦཛིཏུཀཱམོ ཧུཏྭཱ ‘‘ནཱཧཾ ཏཱཝ པུན ནགརཾ གམིསྶཱམི, ཨིདྷེཝ པབྦཛིསྶཱམི. སཙེ པན མེ པུཏྟོ ནགརཾ གཙྪེཡྻ, སེཏཙྪཏྟམསྶ དདེཡྻ’’ནྟི ཙིནྟེཏྭཱ ཏཾ ཝཱིམཾསིཏུཾ པུན རཛྫེན ནིམནྟེནྟོ ཨཱཧ –
‘‘ཧཏྠཱནཱིཀཾ རཐཱནཱིཀཾ, ཨསྶེ པཏྟཱི ཙ ཝམྨིནོ;
ནིཝེསནཱནི རམྨཱནི, ཨཧཾ པུཏྟ དདཱམི ཏེ.
‘‘ཨིཏྠཱགཱརམྤི ¶ ཏེ དམྨི, སབྦཱལངྐཱརབྷཱུསིཏཾ;
ཏཱ པུཏྟ པཊིཔཛྫསྶུ, ཏྭཾ ནོ རཱཛཱ བྷཝིསྶསི.
‘‘ཀུསལཱ ནཙྩགཱིཏསྶ, སིཀྑིཏཱ ཙཱཏུརིཏྠིཡོ;
ཀཱམེ ཏཾ རམཡིསྶནྟི, ཀིཾ ཨརཉྙེ ཀརིསྶསི.
‘‘པཊིརཱཛཱུཧི ཏེ ཀཉྙཱ, ཨཱནཡིསྶཾ ཨལངྐཏཱ;
ཏཱསུ པུཏྟེ ཛནེཏྭཱན, ཨཐ པཙྪཱ པབྦཛིསྶསི.
‘‘ཡུཝཱ ཙ དཧརོ ཙཱསི, པཋམུཔྤཏྟིཀོ སུསུ;
རཛྫཾ ཀཱརེཧི བྷདྡནྟེ, ཀིཾ ཨརཉྙེ ཀརིསྶསི.
‘‘ཀོཊྛཱགཱརཉྩ ཀོསཉྩ, ཝཱཧནཱནི བལཱནི ཙ;
ནིཝེསནཱནི རམྨཱནི, ཨཧཾ པུཏྟ དདཱམི ཏེ.
‘‘གོམཎྜལཔརིབྱཱུལ༹ྷོ, དཱསིསངྒྷཔུརཀྑཏོ;
རཛྫཾ ཀཱརེཧི བྷདྡནྟེ, ཀིཾ ཨརཉྙེ ཀརིསྶསཱི’’ཏི.
ཏཏྠ གོམཎྜལཔརིབྱཱུལ༹ྷོཏི སུབྷངྒཱིནཾ རཱཛཀཉྙཱནཾ མཎྜལེན པུརཀྑཏོ.
ཨཐ མཧཱསཏྟོ རཛྫེན ཨནཏྠིཀབྷཱཝཾ པཀཱསེནྟོ ཨཱཧ –
‘‘ཀིཾ ¶ དྷནེན ཡཾ ཁཱིཡེཐ, ཀིཾ བྷརིཡཱཡ མརིསྶཏི;
ཀིཾ ཡོབྦནེན ཛིཎྞེན, ཡཾ ཛརཱཡཱབྷིབྷུཡྻཏི.
‘‘ཏཏྠ ཀཱ ནནྡི ཀཱ ཁིཌྜཱ, ཀཱ རཏཱི ཀཱ དྷནེསནཱ;
ཀིཾ མེ པུཏྟེཧི དཱརེཧི, རཱཛ མུཏྟོསྨི བནྡྷནཱ.
‘‘ཡོཧཾ ཨེཝཾ པཛཱནཱམི, མཙྩུ མེ ནཔྤམཛྫཏི;
ཨནྟཀེནཱདྷིཔནྣསྶ, ཀཱ རཏཱི ཀཱ དྷནེསནཱ.
‘‘ཕལཱནམིཝ ¶ པཀྐཱནཾ, ནིཙྩཾ པཏནཏོ བྷཡཾ;
ཨེཝཾ ཛཱཏཱན མཙྩཱནཾ, ནིཙྩཾ མརཎཏོ བྷཡཾ.
‘‘སཱཡམེཀེ ན དིསྶནྟི, པཱཏོ དིཊྛཱ བཧཱུ ཛནཱ;
པཱཏོ ཨེཏེ ན དིསྶནྟི, སཱཡཾ དིཊྛཱ བཧཱུ ཛནཱ.
‘‘ཨཛྫེཝ ¶ ཀིཙྩཾ ཨཱཏཔཾ, ཀོ ཛཉྙཱ མརཎཾ སུཝེ;
ན ཧི ནོ སངྒརཾ ཏེན, མཧཱསེནེན མཙྩུནཱ.
‘‘ཙོརཱ དྷནསྶ པཏྠེནྟི, རཱཛ མུཏྟོསྨི བནྡྷནཱ;
ཨེཧི རཱཛ ནིཝཏྟསྶུ, ནཱཧཾ རཛྫེན མཏྠིཀོ’’ཏི.
ཏཏྠ ཡཾ ཁཱིཡེཐཱཏི མཧཱརཱཛ, ཀིཾ ཏྭཾ མཾ དྷནེན ནིམནྟེསི, ཡཾ ཁཱིཡེཐ ཁཡཾ གཙྪེཡྻ. དྷནཾ ཝཱ ཧི པུརིསཾ ཙཛཏི, པུརིསོ ཝཱ ཏཾ དྷནཾ ཙཛིཏྭཱ གཙྪཏཱིཏི སབྦཐཱཔི ཁཡགཱམཱིཡེཝ ཧོཏི, ཀིཾ ཏྭཾ མཾ ཏེན དྷནེན ནིམནྟེསི. ཀིཾ བྷརིཡཱཡཱཏི བྷརིཡཱཡ ཀིཾ ཀརིསྶཱམི, ཡཱ མཡི ཋིཏེཡེཝ མརིསྶཏི. ཛིཎྞེནཱཏི ཛརཱཡ ཨནུཔརིཏེན ཨནུབྷཱུཏེན. ཨབྷིབྷུཡྻཏཱིཏི ཨབྷིབྷཝིཡྻཏི. ཏཏྠཱཏི ཏསྨིཾ ཨེཝཾ ཛརཱམརཎདྷམྨེ ལོཀསནྣིཝཱསེ. ཀཱ ནནྡཱིཏི ཀཱ ནཱམ ཏུཊྛི. ཁིཌྜཱཏི ཀཱིལཱ༹. རཏཱིཏི པཉྩཀཱམགུཎརཏི. བནྡྷནཱཏི ཀཱམབནྡྷནཱ མུཏྟོ ཨསྨི, མཧཱརཱཛཱཏི ཛྷཱནེན ཝིཀྑམྦྷིཏཏྟཱ ཨེཝམཱཧ. མཙྩུ མེཏི མམ མཙྩུ ནཔྤམཛྫཏི, ནིཙྩཾ མམ ཝདྷཱཡ ཨཔྤམཏོཡེཝཱཏི. ཡོ ཨཧཾ ཨེཝཾ པཛཱནཱམི, ཏསྶ མམ ཨནྟཀེན ཨདྷིཔནྣསྶ ཝདྷིཏསྶ ¶ ཀཱ ནཱམ རཏི, ཀཱ དྷནེསནཱཏི. ནིཙྩནྟི ཛཱཏཀཱལཏོ པཊྛཱཡ སདཱ ཛརཱམརཎཏོ བྷཡམེཝ ཨུཔྤཛྫཏི.
ཨཱཏཔནྟི ཀུསལཀམྨཝཱིརིཡཾ. ཀིཙྩནྟི ཀཏྟབྦཾ. ཀོ ཛཉྙཱ མརཎཾ སུཝེཏི སུཝེ ཝཱ པརསུཝེ ཝཱ མརཎཾ ཝཱ ཛཱིཝིཏཾ ཝཱ ཀོ ཛཱནེཡྻ. སངྒརནྟི སངྐེཏཾ. མཧཱསེནེནཱཏི པཉྩཝཱིསཏིབྷཡབཱཏྟིཾསཀམྨཀརཎཚནྣཝུཏིརོགཔྤམུཁཱདིཝསེན པུཐུསེནེན. ཙོརཱ དྷནསྶཱཏི དྷནཏྠཱཡ ཛཱིཝིཏཾ ཙཛནྟཱ ཙོརཱ དྷནསྶ པཏྠེནྟི ནཱམ, ཨཧཾ པན དྷནཔཏྠནཱསངྑཱཏཱ བནྡྷནཱ མུཏྟོ ཨསྨི, ན མེ དྷནེནཏྠོཏི ཨཏྠོ. ནིཝཏྟསྶཱུཏི མམ ཝཙནེན སམྨཱ ནིཝཏྟསྶུ, རཛྫཾ པཧཱཡ ནེཀྑམྨཾ པཊིསརཎཾ ཀཏྭཱ པབྦཛསྶུ. ཡཾ པན ཙིནྟེསི ‘‘ཨིམཾ རཛྫེ པཏིཊྛཱཔེསྶཱམཱི’’ཏི, ཏཾ མཱ ཙིནྟཡི, ནཱཧཾ རཛྫེན ཨཏྠིཀོཏི. ཨིཏི མཧཱསཏྟསྶ དྷམྨདེསནཱ སཧཱནུསནྡྷིནཱ མཏྠཀཾ པཏྟཱ.
ཏཾ སུཏྭཱ རཱཛཱནཉྩ ཙནྡཱདེཝིཉྩ ཨཱདིཾ ཀཏྭཱ སོལ༹སསཧསྶཱ ཨོརོདྷཱ ཙ ཨམཙྩཱདཡོ ཙ སབྦེ པབྦཛིཏུཀཱམཱ ཨཧེསུཾ. རཱཛཱཔི ནགརེ ¶ བྷེརིཾ ཙརཱཔེསི ‘‘ཡེ མམ པུཏྟསྶ སནྟིཀེ པབྦཛིཏུཾ ཨིཙྪནྟི, ཏེ པབྦཛནྟཱུ’’ཏི ¶ . སབྦེསཉྩ སུཝཎྞཀོཊྛཱགཱརཱདཱིནཾ དྭཱརཱནི ཝིཝརཱཔེཏྭཱ ‘‘ཨསུཀཊྛཱནེ ཙ མཧཱནིདྷིཀུམྦྷིཡོ ཨཏྠི, ཨཏྠིཀཱ གཎྷནྟཱུ’’ཏི སུཝཎྞཔཊྚེ ཨཀྑརཱནི ལིཁཱཔེཏྭཱ མཧཱཐམྦྷེ བནྡྷཱཔེསི. ཏེ ནཱགརཱ ཡཐཱཔསཱརིཏེ ཨཱཔཎེ ཙ ཝིཝཊདྭཱརཱནི གེཧཱནི ཙ པཧཱཡ ནགརཏོ ནིཀྑམིཏྭཱ རཉྙོ སནྟིཀཾ ཨཱགམིཾསུ. རཱཛཱ མཧཱཛནེན སདྡྷིཾ མཧཱསཏྟསྶ སནྟིཀེ པབྦཛི. སཀྐདཏྟིཡཾ ཏིཡོཛནིཀཾ ཨསྶམཔདཾ པརིཔུཎྞཾ ཨཧོསི. མཧཱསཏྟོ པཎྞསཱལཱཡོ ཝིཙཱརེསི, མཛ྄ཛྷེ ཋིཏཱ པཎྞསཱལཱཡོ ཨིཏྠཱིནཾ དཱཔེསི. ཀིཾཀཱརཎཱ? བྷཱིརུཀཛཱཏིཀཱ ཨེཏཱཏི. པུརིསཱནཾ པན བཧིཔཎྞསཱལཱཡོ དཱཔེསི. ཏཱ སབྦཱཔི པཎྞསཱལཱཡོ ཝིསྶཀམྨདེཝཔུཏྟོཝ མཱཔེསི. ཏེ ཙ ཕལདྷརརུཀྑེ ཝིསྶཀམྨདེཝཔུཏྟོཡེཝ ཨཏྟནོ ཨིདྡྷིཡཱ མཱཔེསི. ཏེ སབྦེ ཝིསྶཀམྨེན ནིམྨིཏེསུ ཕལདྷརརུཀྑེསུ ཨུཔོསཐདིཝསེ བྷཱུམིཡཾ པཏིཏཔཏིཏཱནི ཕལཱནི གཧེཏྭཱ པརིབྷུཉྫིཏྭཱ སམཎདྷམྨཾ ཀརོནྟི. ཏེསུ ཡོ ཀཱམཝིཏཀྐཾ ཝཱ བྱཱཔཱདཝིཏཀྐཾ ཝཱ ཝིཧིཾསཱཝིཏཀྐཾ ཝཱ ཝིཏཀྐེཏི, ཏསྶ མནཾ ཛཱནིཏྭཱ མཧཱསཏྟོ ཨཱཀཱསེ ནིསཱིདིཏྭཱ མདྷུརདྷམྨཾ ཀཐེསི. ཏེ ཛནཱ བོདྷིསཏྟསྶ མདྷུརདྷམྨཾ སུཏྭཱ ཨེཀགྒཙིཏྟཱ ཧུཏྭཱ ཁིཔྤམེཝ ཨབྷིཉྙཱ ཙ སམཱཔཏྟིཡོ ཙ ནིབྦཏྟེསུཾ.
ཏདཱ ཨེཀོ སཱམནྟརཱཛཱ ‘‘ཀཱསིརཱཛཱ ཀིར བཱརཱཎསིནགརཏོ ནིཀྑམིཏྭཱ ཝནཾ པཝིསིཏྭཱ པབྦཛིཏོ’’ཏི སུཏྭཱ ‘‘བཱརཱཎསིཾ གཎྷིསྶཱམཱི’’ཏི ནགརཱ ནིཀྑམིཏྭཱ བཱརཱཎསིཾ པཏྭཱ ནགརཾ པཝིསིཏྭཱ ཨལངྐཏནགརཾ དིསྭཱ རཱཛནིཝེསནཾ ཨཱརུཡ྄ཧ སཏྟཝིདྷཾ ཝརརཏནཾ ཨོལོཀེཏྭཱ ¶ ‘‘ཀཱསིརཉྙོ ཨིམཾ དྷནཾ ནིསྶཱཡ ཨེཀེན བྷཡེན བྷཝིཏབྦ’’ནྟི ཙིནྟེནྟོ སུརཱསོཎྜེ པཀྐོསཱཔེཏྭཱ པུཙྪི ‘‘ཏུམྷཱཀཾ རཉྙོ ཨིདྷ ནགརེ བྷཡཾ ཨུཔྤནྣཾ ཨཏྠཱི’’ཏི? ‘‘ནཏྠི, དེཝཱ’’ཏི. ‘‘ཀིཾ ཀཱརཎཱ’’ཏི. ‘‘ཨམྷཱཀཾ རཉྙོ པུཏྟོ ཏེམིཡཀུམཱརོ ‘བཱརཱཎསིཾ རཛྫཾ ན ཀརིསྶཱམཱི’ཏི ཨམཱུགོཔི མཱུགོ ཝིཡ ཧུཏྭཱ ཨིམམྷཱ ནགརཱ ནིཀྑམིཏྭཱ ཝནཾ པཝིསིཏྭཱ ཨིསིཔབྦཛྫཾ པབྦཛི, ཏེན ཀཱརཎེན ཨམྷཱཀཾ རཱཛཱ མཧཱཛནེན སདྡྷིཾ ཨིམམྷཱ ནགརཱ ནིཀྑམིཏྭཱ ཏེམིཡཀུམཱརསྶ སནྟིཀཾ གནྟྭཱ པབྦཛིཏོ’’ཏི ཨཱརོཙེསུཾ. སཱམནྟརཱཛཱ ཏེསཾ ཝཙནཾ སུཏྭཱ ཏུསྶིཏྭཱ ‘‘ཨཧམྤི པབྦཛིསྶཱམཱི’’ཏི ཙིནྟེཏྭཱ ¶ ‘‘ཏཱཏ, ཏུམྷཱཀཾ རཱཛཱ ཀཏརདྭཱརེན ནིཀྑནྟོ’’ཏི པུཙྪི. ‘‘དེཝ, པཱཙཱིནདྭཱརེནཱ’’ཏི ཝུཏྟེ ཨཏྟནོ པརིསཱཡ སདྡྷིཾ ཏེནེཝ པཱཙཱིནདྭཱརེན ནིཀྑམིཏྭཱ ནདཱིཏཱིརེན པཱཡཱསི.
མཧཱསཏྟོཔི ཏསྶ ཨཱགམནཾ ཉཏྭཱ ཝནནྟརཾ ཨཱགནྟྭཱ ཨཱཀཱསེ ནིསཱིདིཏྭཱ མདྷུརདྷམྨཾ དེསེསི. སོ པརིསཱཡ སདྡྷིཾ ཏསྶ སནྟིཀེཡེཝ པབྦཛི. ཨེཝཾ ཨཔརེཔི སཏྟ རཱཛཱནོ ‘‘བཱརཱཎསིནགརཾ གཎྷིསྶཱམཱི’’ཏི ཨཱགཏཱ. ཏེཔི རཱཛཱནོ སཏྟ རཛྫཱནི ཚཌྜེཏྭཱ བོདྷིསཏྟསྶ སནྟིཀེཡེཝ པབྦཛིཾསུ. ཧཏྠཱིཔི ཨརཉྙཧཏྠཱི ཛཱཏཱ, ཨསྶཱཔི ཨརཉྙཨསྶཱ ཛཱཏཱ, རཐཱཔི ཨརཉྙེཡེཝ ཝིནཊྛཱ, བྷཎྜཱགཱརེསུ ཀཧཱཔཎེ ཨསྶམཔདེ ཝཱལུཀཾ ཀཏྭཱ ཝིཀིརིཾསུ. སབྦེཔི ཨབྷིཉྙཱསམཱཔཏྟིཡོ ནིབྦཏྟེཏྭཱ ཛཱིཝིཏཔརིཡོསཱནེ བྲཧྨལོཀཔརཱཡཎཱ ཨཧེསུཾ. ཏིརཙྪཱནགཏཱ ཧཏྠིཨསྶཱཔི ཨིསིགཎེ ཙིཏྟཾ པསཱདེཏྭཱ ཚཀཱམཱཝཙརལོཀེསུ ནིབྦཏྟིཾསུ.
སཏྠཱ ཨིམཾ དྷམྨདེསནཾ ཨཱཧརིཏྭཱ སཙྩཱནི པཀཱསེཏྭཱ ‘‘ན, བྷིཀྑཝེ, ཨིདཱནེཝ, པུབྦེཔི རཛྫཾ པཧཱཡ ནིཀྑནྟོཡེཝཱ’’ཏི ཝཏྭཱ ཛཱཏཀཾ སམོདྷཱནེསི – ‘‘ཏདཱ ཚཏྟེ ཨདྷིཝཏྠཱ དེཝདྷཱིཏཱ ཨུཔྤལཝཎྞཱ ¶ ཨཧོསི, སུནནྡོ སཱརཐི སཱརིཔུཏྟོ, མཱཏཱཔིཏརོ མཧཱརཱཛཀུལཱནི, སེསཔརིསཱ བུདྡྷཔརིསཱ, མཱུགཔཀྑཔཎྜིཏོ པན ཨཧམེཝ སམྨཱསམྦུདྡྷོ ཨཧོསི’’ནྟི.
མཱུགཔཀྑཛཱཏཀཝཎྞནཱ པཋམཱ.
[༥༣༩] ༢. མཧཱཛནཀཛཱཏཀཝཎྞནཱ
ཀོཡཾ ¶ ¶ མཛ྄ཛྷེ སམུདྡསྨིནྟི ཨིདཾ སཏྠཱ ཛེཏཝནེ ཝིཧརནྟོ མཧཱབྷིནིཀྑམནཾ ཨཱརབྦྷ ཀཐེསི. ཨེཀདིཝསཉྷི བྷིཀྑཱུ དྷམྨསབྷཱཡཾ སནྣིསིནྣཱ ཏཐཱགཏསྶ མཧཱབྷིནིཀྑམནཾ ཝཎྞཡནྟཱ ནིསཱིདིཾསུ. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ ‘‘ན, བྷིཀྑཝེ, ཨིདཱནེཝ, པུབྦེཔི ཏཐཱགཏོ མཧཱབྷིནིཀྑམནཾ ནིཀྑནྟོཡེཝཱ’’ཏི ཝཏྭཱ ཏེཧི ཡཱཙིཏོ ཨཏཱིཏཾ ཨཱཧརི.
ཨཏཱིཏེ ཝིདེཧརཊྛེ མིཐིལཱཡཾ མཧཱཛནཀོ ནཱམ རཱཛཱ རཛྫཾ ཀཱརེསི. ཏསྶ དྭེ པུཏྟཱ ཨཧེསུཾ ཨརིཊྛཛནཀོ ཙ པོལཛནཀོ ཙཱཏི. ཏེསུ རཱཛཱ ཛེཊྛཔུཏྟསྶ ཨུཔརཛྫཾ ཨདཱསི, ཀནིཊྛསྶ སེནཱཔཏིཊྛཱནཾ ཨདཱསི. ཨཔརབྷཱགེ མཧཱཛནཀོ ཀཱལམཀཱསི. ཏསྶ སརཱིརཀིཙྩཾ ཀཏྭཱ རཉྙོ ཨཙྩཡེན ཨརིཊྛཛནཀོ རཱཛཱ ཧུཏྭཱ ཨིཏརསྶ ཨུཔརཛྫཾ ཨདཱསི. ཏསྶེཀོ པཱདམཱུལིཀོ ཨམཙྩོ རཉྙོ སནྟིཀཾ གནྟྭཱ ‘‘དེཝ, ཨུཔརཱཛཱ ཏུམྷེ གྷཱཏེཏུཀཱམོ’’ཏི ཨཱཧ. རཱཛཱ ཏསྶ པུནཔྤུནཾ ཀཐཾ སུཏྭཱ ཀནིཊྛསྶ སིནེཧཾ བྷིནྡིཏྭཱ པོལཛནཀཾ སངྑལིཀཱཧི བནྡྷཱཔེཏྭཱ རཱཛནིཝེསནཏོ ཨཝིདཱུརེ ཨེཀསྨིཾ གེཧེ ཝསཱཔེཏྭཱ ཨཱརཀྑཾ ཋཔེསི. ཀུམཱརོ ‘‘སཙཱཧཾ བྷཱཏུ ཝེརཱིམྷི, སངྑལིཀཱཔི མེ ཧཏྠཔཱདཱ མཱ མུཙྩནྟུ, དྭཱརམྤི མཱ ཝིཝརཱིཡཏུ, སཙེ ནོ ཝེརཱིམྷི, སངྑལིཀཱཔི མེ ཧཏྠཔཱདཱ མུཙྩནྟུ, དྭཱརམྤི ཝིཝརཱིཡཏཱུ’’ཏི སཙྩཀིརིཡམཀཱསི. ཏཱཝདེཝ ¶ སངྑལིཀཱཔི ཁཎྜཱཁཎྜཾ ཚིཛྫིཾསུ, དྭཱརམྤི ཝིཝཊཾ. སོ ནིཀྑམིཏྭཱ ཨེཀཾ པཙྩནྟགཱམཾ གནྟྭཱ ཝཱསཾ ཀཔྤེསི.
པཙྩནྟགཱམཝཱསིནོ ཏཾ སཉྫཱནིཏྭཱ ཨུཔཊྛཧིཾསུ. རཱཛཱཔི ཏཾ གཱཧཱཔེཏུཾ ནཱསཀྑི. སོ ཨནུཔུབྦེན པཙྩནྟཛནཔདཾ ཧཏྠགཏཾ ཀཏྭཱ མཧཱཔརིཝཱརོ ཧུཏྭཱ ‘‘ཨཧཾ པུབྦེ བྷཱཏུ ན ཝེརཱི, ཨིདཱནི པན ཝེརཱིམྷཱི’’ཏི མཧཱཛནཔརིཝུཏོ མིཐིལཾ གནྟྭཱ བཧིནགརེ ཁནྡྷཱཝཱརཾ ཀཏྭཱ ཝཱསཾ ཀཔྤེསི. ནགརཝཱསིནོ ཡོདྷཱ ‘‘ཀུམཱརོ ཀིར ཨཱགཏོ’’ཏི སུཏྭཱ ཡེབྷུཡྻེན ཧཏྠིཨསྶཝཱཧནཱདཱིནི གཧེཏྭཱ ཏསྶེཝ སནྟིཀཾ ཨཱགམིཾསུ, ཨཉྙེཔི ནཱགརཱ ཨཱགམིཾསུ. སོ བྷཱཏུ སཱསནཾ པེསེསི ‘‘ནཱཧཾ པུབྦེ ཏུམྷཱཀཾ ཝེརཱི, ཨིདཱནི པན ཝེརཱིམྷི, ཚཏྟཾ ཝཱ མེ དེཐ, ཡུདྡྷཾ ཝཱ’’ཏི. རཱཛཱ ཏཾ སུཏྭཱ ¶ ཡུདྡྷཾ ཀཱཏུཾ ཨིཙྪནྟོ ཨགྒམཧེསིཾ ཨཱམནྟེཏྭཱ ‘‘བྷདྡེ, ཡུདྡྷེ ཛཡཔརཱཛཡོ ¶ ནཱམ ན སཀྐཱ ཉཱཏུཾ, སཙེ མམ ཨནྟརཱཡོ ཧོཏི, ཏྭཾ གབྦྷཾ རཀྑེཡྻཱསཱི’’ཏི ཝཏྭཱ མཧཏིཡཱ སེནཱཡ པརིཝུཏོ ནགརཱ ནིཀྑམི.
ཨཐ ནཾ ཡུདྡྷེ པོལཛནཀསྶ ཡོདྷཱ ཛཱིཝིཏཀྑཡཾ པཱཔེསུཾ. ཏདཱ ‘‘རཱཛཱ མཏོ’’ཏི སཀལནགརེ ཨེཀཀོལཱཧལཾ ཛཱཏཾ. དེཝཱིཔི ཏསྶ མཏབྷཱཝཾ ཉཏྭཱ སཱིགྷཾ སཱིགྷཾ སུཝཎྞསཱརཱདཱིནི གཧེཏྭཱ པཙྪིཡཾ པཀྑིཔིཏྭཱ མཏྠཀེ ཀིལིཊྛཔིལོཏིཀཾ ཨཏྠརིཏྭཱ ཨུཔརི ཏཎྜུལེ ཨོཀིརིཏྭཱ ཀིལིཊྛཔིལོཏིཀཾ ནིཝཱསེཏྭཱ སརཱིརཾ ཝིརཱུཔཾ ཀཏྭཱ པཙྪིཾ སཱིསེ ཋཔེཏྭཱ དིཝཱ དིཝསྶེཝ ནིཀྑམི, ན ཀོཙི ནཾ སཉྫཱནི. སཱ ཨུཏྟརདྭཱརེན ནིཀྑམིཏྭཱ ཀཏྠཙི ཨགཏཔུབྦཏྟཱ མགྒཾ ཨཛཱནནྟཱི དིསཾ ཝཝཏྠཱཔེཏུཾ ཨསཀྐོནྟཱི ཀེཝལཾ ‘‘ཀཱལཙམྤཱནགརཾ ནཱམ ཨཏྠཱི’’ཏི སུཏཏྟཱ ‘‘ཀཱལཙམྤཱནགརཾ གམིཀཱ ནཱམ ཨཏྠཱི’’ཏི པུཙྪམཱནཱ ཨེཀིཀཱ སཱལཱཡཾ ནིསཱིདི. ཀུཙྪིམྷི པནསྶཱ ནིབྦཏྟསཏྟོ ན ཡོ ཝཱ སོ ཝཱ, པཱུརིཏཔཱརམཱི མཧཱསཏྟོ ནིབྦཏྟི.
ཏསྶ ཏེཛེན སཀྐསྶ བྷཝནཾ ཀམྤི. སཀྐོ ཨཱཝཛྫེནྟོ ཏཾ ཀཱརཎཾ ཉཏྭཱ ‘‘ཏསྶཱ ཀུཙྪིཡཾ ནིབྦཏྟསཏྟོ མཧཱཔུཉྙོ, མཡཱ གནྟུཾ ཝཊྚཏཱི’’ཏི ཙིནྟེཏྭཱ པཊིཙྪནྣཡོགྒཾ མཱཔེཏྭཱ ཏཏྠ མཉྩཾ པཉྙཱཔེཏྭཱ མཧལླཀཔུརིསོ ཝིཡ ཡོགྒཾ པཱཛེནྟོ ཏཱཡ ནིསིནྣསཱལཱཡ དྭཱརེ ཋཏྭཱ ‘‘ཀཱལཙམྤཱནགརཾ གམིཀཱ ནཱམ ཨཏྠཱི’’ཏི པུཙྪི. ‘‘ཨཧཾ, ཏཱཏ, གམིསྶཱམཱི’’ཏི. ‘‘ཏེན ¶ ཧི ཡོགྒཾ ཨཱརུཡ྄ཧ ནིསཱིད, ཨམྨཱ’’ཏི. ‘‘ཏཱཏ, ཨཧཾ པརིཔུཎྞགབྦྷཱ, ན སཀྐཱ མཡཱ ཡོགྒཾ ཨབྷིརུཧིཏུཾ, པཙྪཏོ པཙྪཏོ གམིསྶཱམི, ཨིམིསྶཱ པན མེ པཙྪིཡཱ ཨོཀཱསཾ དེཧཱི’’ཏི. ‘‘ཨམྨ, ཀིཾ ཝདེསི, ཡོགྒཾ པཱཛེཏུཾ ཛཱནནསམཏྠོ ནཱམ མཡཱ སདིསོ ནཏྠི. ཨམྨ, མཱ བྷཱཡི, ཨཱརུཡ྄ཧ ནིསཱིདཱ’’ཏི. སཱ ‘‘ཏཱཏ, སཱདྷཱུ’’ཏི ཝདཏི. སོ ཏསྶཱ ཨཱརོཧནཀཱལེ ཨཏྟནོ ཨཱནུབྷཱཝེན ཝཱཏཔུཎྞབྷསྟཙམྨཾ ཝིཡ པཐཝིཾ ཨུནྣཱམེཏྭཱ ཡོགྒསྶ པཙྪིམནྟེ པཧརཱཔེསི. སཱ ཨབྷིརུཡ྄ཧ སཡནེ ནིཔཛྫིཏྭཱཝ ‘‘ཨཡཾ དེཝཏཱ བྷཝིསྶཏཱི’’ཏི ཨཉྙཱསི. སཱ དིབྦསཡནེ ནིཔནྣམཏྟཱཝ ནིདྡཾ ཨོཀྐམི.
ཨཐ ¶ ནཾ སཀྐོ ཏིཾསཡོཛནམཏྠཀེ ཨེཀཾ ནདིཾ པཏྭཱ པབོདྷེཏྭཱ ‘‘ཨམྨ, ཨོཏརིཏྭཱ ནདིཡཾ ནྷཱཡིཏྭཱ ཨུསྶཱིསཀེ སཱཊཀཡུགཾ ཨཏྠི, ཏཾ ནིཝཱསེཧི, ཨནྟོཡོགྒེ པུཊབྷཏྟཾ ཨཏྠི, ཏཾ བྷུཉྫཱཧཱི’’ཏི ཨཱཧ. སཱ ཏཐཱ ཀཏྭཱ པུན ནིཔཛྫིཏྭཱ སཱཡནྷསམཡེ ཀཱལཙམྤཱནགརཾ པཏྭཱ དྭཱརཊྚཱལཀཔཱཀཱརེ དིསྭཱ ‘‘ཏཱཏ, ཀིཾ ནཱམ ནགརམེཏ’’ནྟི པུཙྪི. ‘‘ཀཱལཙམྤཱནགརཾ, ཨམྨཱ’’ཏི. ‘‘ཀིཾ ཝདེསི, ཏཱཏ, ནནུ ཨམྷཱཀཾ ནགརཏོ ཀཱལཙམྤཱནགརཾ སཊྛིཡོཛནམཏྠཀེ ཧོཏཱི’’ཏི? ‘‘ཨེཝཾ, ཨམྨ, ཨཧཾ པན ཨུཛུམགྒཾ ཛཱནཱམཱི’’ཏི. ཨཐ ནཾ དཀྑིཎདྭཱརསམཱིཔེ ཨོཏཱརེཏྭཱ ¶ ‘‘ཨམྨ, ཨམྷཱཀཾ གཱམོ པུརཏོ ཨཏྠི, ཏྭཾ གནྟྭཱ ནགརཾ པཝིསཱཧཱི’’ཏི ཝཏྭཱ པུརཏོ གནྟྭཱ ཝིཡ སཀྐོ ཨནྟརདྷཱཡིཏྭཱ སཀཊྛཱནམེཝ གཏོ.
དེཝཱིཔི ཨེཀིཀཱཝ སཱལཱཡཾ ནིསཱིདི. ཏསྨིཾ ཁཎེ ཨེཀོ དིསཱཔཱམོཀྑོ ཨཱཙརིཡོ ཀཱལཙམྤཱནགརཝཱསཱི མནྟཛ྄ཛྷཱཡཀོ བྲཱཧྨཎོ པཉྩཧི མཱཎཝཀསཏེཧི པརིཝུཏོ ནྷཱནཏྠཱཡ གཙྪནྟོ དཱུརཏོཝ ཨོལོཀེཏྭཱ ཏཾ ཨབྷིརཱུཔཾ སོབྷགྒཔྤཏྟཾ ཏཏྠ ནིསིནྣཾ དིསྭཱ ཏསྶཱ ཀུཙྪིཡཾ མཧཱསཏྟསྶཱནུབྷཱཝེན སཧ དསྶནེནེཝ ཀནིཊྛབྷགིནིསིནེཧཾ ཨུཔྤཱདེཏྭཱ མཱཎཝཀེ བཧི ཋཔེཏྭཱ ཨེཀཀོཝ སཱལཾ པཝིསིཏྭཱ ‘‘བྷགིནི, ཀཏརགཱམཝཱསིཀཱ ཏྭ’’ནྟི པུཙྪི. ‘‘ཏཱཏ, མིཐིལཱཡཾ ཨརིཊྛཛནཀརཉྙོ ཨགྒམཧེསཱིམྷཱི’’ཏི. ‘‘ཨམྨ, ཨིདྷ ཀསྨཱ ཨཱགཏཱསཱི’’ཏི? ‘‘ཏཱཏ, པོལཛནཀེན རཱཛཱ མཱརིཏོ, ཨཐཱཧཾ བྷཱིཏཱ ‘གབྦྷཾ ཨནུརཀྑིསྶཱམཱི’ཏི ཨཱགཏཱ’’ཏི. ‘‘ཨམྨ, ཨིམསྨིཾ པན ཏེ ནགརེ ཀོཙི ཉཱཏཀོ ཨཏྠཱི’’ཏི? ‘‘ནཏྠི, ཏཱཏཱ’’ཏི. ཏེན ཧི མཱ ཙིནྟཡི, ཨཧཾ ཨུདིཙྩབྲཱཧྨཎོ མཧཱསཱལོ དིསཱཔཱམོཀྑཨཱཙརིཡོ, ཨཧཾ ཏཾ བྷགིནིཊྛཱནེ ཋཔེཏྭཱ པཊིཛགྒིསྶཱམི, ཏྭཾ ‘‘བྷཱཏིཀཱ’’ཏི མཾ ཝཏྭཱ པཱདེསུ གཧེཏྭཱ པརིདེཝཱཏི. སཱ མཧཱསདྡཾ ཀཏྭཱ ¶ ཏསྶ པཱདེསུ གཧེཏྭཱ པརིདེཝི. ཏེ དྭེཔི ཨཉྙམཉྙཾ པརིདེཝིཾསུ.
ཨཐསྶ ཨནྟེཝཱསིཀཱ མཧཱསདྡཾ སུཏྭཱ ཁིཔྤཾ ཨུཔདྷཱཝིཏྭཱ ‘‘ཨཱཙརིཡ, ཀིཾ ཏེ ཧོཏཱི’’ཏི པུཙྪིཾསུ. སོ ཨཱཧ – ‘‘ཀནིཊྛབྷགིནཱི མེ ཨེསཱ, ཨསུཀཀཱལེ ནཱམ མཡཱ ཝིནཱ ཛཱཏཱ’’ཏི. ཨཐ མཱཎཝཱ ‘‘ཏཝ བྷགིནིཾ དིཊྛཀཱལཏོ པཊྛཱཡ མཱ ཙིནྟཡིཏྠ ཨཱཙརིཡཱ’’ཏི ཨཱཧཾསུ. སོ མཱཎཝེ པཊིཙྪནྣཡོགྒཾ ཨཱཧརཱཔེཏྭཱ ཏཾ ཏཏྠ ནིསཱིདཱཔེཏྭཱ ‘‘ཏཱཏཱ, ཝོ ¶ གནྟྭཱ བྲཱཧྨཎིཡཱ མམ ཀནིཊྛབྷགིནིབྷཱཝཾ ཀཐེཏྭཱ སབྦཀིཙྩཱནི ཀཱཏུཾ ཝདེཐཱ’’ཏི ཝཏྭཱ གེཧཾ པེསེསི. ཏེ གནྟྭཱ བྲཱཧྨཎིཡཱ ཀཐེསུཾ. ཨཐ ནཾ བྲཱཧྨཎཱིཔི ཨུཎྷོདཀེན ནྷཱཔེཏྭཱ སཡནཾ པཉྙཱཔེཏྭཱ ནིཔཛྫཱཔེསི. ཨཐ བྲཱཧྨཎོཔི ནྷཱཏྭཱ ཨཱགཏོ བྷོཛནཀཱལེ ‘‘བྷགིནིཾ མེ པཀྐོསཐཱ’’ཏི པཀྐོསཱཔེཏྭཱ ཏཱཡ སདྡྷིཾ ཨེཀཏོ བྷུཉྫིཏྭཱ ཨནྟོནིཝེསནེཡེཝ ཏཾ པཊིཛགྒི.
སཱ ན ཙིརསྶེཝ སུཝཎྞཝཎྞཾ པུཏྟཾ ཝིཛཱཡི, ‘‘མཧཱཛནཀཀུམཱརོ’’ཏིསྶ ཨཡྻཀསནྟཀཾ ནཱམམཀཱསི. སོ ཝཌྜྷམཱནོ དཱརཀེཧི སདྡྷིཾ ཀཱིལ༹ནྟོ ཡེ ཏཾ རོསེནྟི, ཏེ ཨསམྦྷིནྣཁཏྟིཡཀུལེ ཛཱཏཏྟཱ མཧཱབལཝཏཱཡ ཙེཝ མཱནཐདྡྷཏཱཡ ཙ དལ༹ྷཾ གཧེཏྭཱ པཧརཏི. ཏདཱ ཏེ མཧཱསདྡེན རོདནྟཱ ‘‘ཀེན པཧཊཱ’’ཏི ཝུཏྟེ ‘‘ཝིདྷཝཱཔུཏྟེནཱ’’ཏི ཝདནྟི. ཨཐ ཀུམཱརོ ཙིནྟེསི ‘‘ཨིམེ མཾ ‘ཝིདྷཝཱཔུཏྟོ’ཏི ཨབྷིཎྷཾ ཝདནྟི, ཧོཏུ, མམ མཱཏརཾ པུཙྪིསྶཱམཱི’’ཏི. སོ ཨེཀདིཝསཾ ¶ མཱཏརཾ པུཙྪི ‘‘ཨམྨ, ཀོ མཡ྄ཧཾ པིཏཱ’’ཏི? ཨཐ ནཾ མཱཏཱ ‘‘ཏཱཏ, བྲཱཧྨཎོ ཏེ པིཏཱ’’ཏི ཝཉྩེསི. སོ པུནདིཝསེཔི དཱརཀེ པཧརནྟོ ‘‘ཝིདྷཝཱཔུཏྟོ’’ཏི ཝུཏྟེ ‘‘ནནུ བྲཱཧྨཎོ མེ པིཏཱ’’ཏི ཝཏྭཱ ‘‘བྲཱཧྨཎོ ཀིཾ ཏེ ཧོཏཱི’’ཏི ཝུཏྟེ ཙིནྟེསི ‘‘ཨིམེ མཾ, བྲཱཧྨཎོ ཏེ ཀིཾ ཧོཏཱི’ཏི ཨབྷིཎྷཾ ཝདནྟི, མཱཏཱ མེ ཨིདཾ ཀཱརཎཾ ཡཐཱབྷཱུཏཾ ན ཀཐེསི, སཱ ཨཏྟནོ མནེན མེ ན ཀཐེསྶཏི, ཧོཏུ, ཀཐཱཔེསྶཱམི ན’’ནྟི. སོ ཐཉྙཾ པིཝནྟོ ཐནཾ དནྟེཧི ཌཾསིཏྭཱ ‘‘ཨམྨ, མེ པིཏརཾ ཀཐེཧི, སཙེ ན ཀཐེསྶསི, ཐནཾ ཏེ ཚིནྡིསྶཱམཱི’’ཏི ཨཱཧ. སཱ པུཏྟཾ ཝཉྩེཏུཾ ཨསཀྐོནྟཱི ‘‘ཏཱཏ, ཏྭཾ མིཐིལཱཡཾ ཨརིཊྛཛནཀརཉྙོ པུཏྟོ, པིཏཱ ཏེ པོལཛནཀེན མཱརིཏོ, ཨཧཾ ཏཾ ཨནུརཀྑནྟཱི ཨིམཾ ནགརཾ ཨཱགཏཱ, ཨཡཾ བྲཱཧྨཎོ མཾ བྷགིནིཊྛཱནེ ཋཔེཏྭཱ པཊིཛགྒཏཱི’’ཏི ཀཐེསི. སོ ཏཾ སུཏྭཱ ཏཏོ པཊྛཱཡ ‘‘ཝིདྷཝཱཔུཏྟོ’’ཏི ཝུཏྟེཔི ན ཀུཛ྄ཛྷི.
སོ སོལ༹སཝསྶབྦྷནྟརེཡེཝ ཏཡོ ཝེདེ ཙ སབྦསིཔྤཱནི ཙ ཨུགྒཎྷི ¶ , སོལ༹སཝསྶིཀཀཱལེ པན ཨུཏྟམརཱུཔདྷརོ ཨཧོསི. ཨཐ སོ ‘‘པིཏུ སནྟཀཾ རཛྫཾ གཎྷིསྶཱམཱི’’ཏི ཙིནྟེཏྭཱ མཱཏརཾ པུཙྪི ‘‘ཨམྨ, ཀིཉྩི དྷནཾ ཏེ ཧཏྠེ ཨཏྠི, ཨུདཱཧུ ནོ, ཨཧཾ ཝོཧཱརཾ ཀཏྭཱ དྷནཾ ཨུཔྤཱདེཏྭཱ ¶ པིཏུ སནྟཀཾ རཛྫཾ གཎྷིསྶཱམཱི’’ཏི. ཨཐ ནཾ མཱཏཱ ཨཱཧ – ‘‘ཏཱཏ, ནཱཧཾ ཏུཙྪཧཏྠཱ ཨཱགཏཱ, ཏཡོ མེ ཧཏྠེ དྷནསཱརཱ ཨཏྠི, མུཏྟསཱརོ, མཎིསཱརོ, ཝཛིརསཱརོཏི, ཏེསུ ཨེཀེཀོ རཛྫགྒཧཎཔྤམཱཎོ, ཏཾ གཧེཏྭཱ རཛྫཾ གཎྷ, མཱ ཝོཧཱརཾ ཀརཱི’’ཏི. ‘‘ཨམྨ, ཨིདམྤི དྷནཾ མཡ྄ཧམེཝ ཨུཔཌྜྷཾ ཀཏྭཱ དེཧི, ཏཾ པན གཧེཏྭཱ སུཝཎྞབྷཱུམིཾ གནྟྭཱ བཧུཾ དྷནཾ ཨཱཧརིཏྭཱ རཛྫཾ གཎྷིསྶཱམཱི’’ཏི. སོ ཨུཔཌྜྷཾ ཨཱཧརཱཔེཏྭཱ བྷཎྜིཀཾ ཀཏྭཱ སུཝཎྞབྷཱུམིཾ གམིཀེཧི ཝཱཎིཛེཧི སདྡྷིཾ ནཱཝཱཡ བྷཎྜཾ ཨཱརོཔེཏྭཱ པུན ནིཝཏྟིཏྭཱ མཱཏརཾ ཝནྡིཏྭཱ ‘‘ཨམྨ, ཨཧཾ སུཝཎྞབྷཱུམིཾ གམིསྶཱམཱི’’ཏི ཨཱཧ. ཨཐ ནཾ མཱཏཱ ཨཱཧ – ‘‘ཏཱཏ, སམུདྡོ ནཱམ ཨཔྤསིདྡྷིཀོ བཧུཨནྟརཱཡོ, མཱ གཙྪ, རཛྫགྒཧཎཱཡ ཏེ དྷནཾ བཧཱུ’’ཏི. སོ ‘‘གཙྪིསྶཱམེཝ ཨམྨཱ’’ཏི མཱཏརཾ ཝནྡིཏྭཱ གེཧཱ ནིཀྑམྨ ནཱཝཾ ཨབྷིརུཧི.
ཏཾ དིཝསམེཝ པོལཛནཀསྶ སརཱིརེ རོགོ ཨུཔྤཛྫི, ཨནུཊྛཱནསེཡྻཾ སཡི. ཏདཱ སཏྟ ཛངྒྷསཏཱནི ནཱཝཾ ཨབྷིརུཧིཾསུ. ནཱཝཱ སཏྟདིཝསེཧི སཏྟ ཡོཛནསཏཱནི གཏཱ. སཱ ཨཏིཙཎྜཝེགེན གནྟྭཱ ཨཏྟཱནཾ ཝཧིཏུཾ ནཱསཀྑི, ཕལཀཱནི བྷིནྣཱནི, ཏཏོ ཏཏོ ཨུདཀཾ ཨུགྒཏཾ, ནཱཝཱ སམུདྡམཛ྄ཛྷེ ནིམུགྒཱ. མཧཱཛནཱ རོདནྟི པརིདེཝནྟི, ནཱནཱདེཝཏཱཡོ ནམསྶནྟི. མཧཱསཏྟོ པན ནེཝ རོདཏི ན པརིདེཝཏི, ན དེཝཏཱཡོ ནམསྶཏི, ནཱཝཱཡ པན ནིམུཛྫནབྷཱཝཾ ཉཏྭཱ སཔྤིནཱ སཀྑརཾ ཨོམདྡིཏྭཱ ཀུཙྪིཔཱུརཾ ཁཱདིཏྭཱ དྭེ མཊྛཀསཱཊཀེ ཏེལེན ཏེམེཏྭཱ དལ༹ྷཾ ནིཝཱསེཏྭཱ ཀཱུཔཀཾ ནིསྶཱཡ ཋིཏོ ནཱཝཱཡ ནིམུཛྫནསམཡེ ཀཱུཔཀཾ ཨབྷིརུཧི. མཧཱཛནཱ ¶ མཙྪཀཙྪཔབྷཀྑཱ ཛཱཏཱ, སམནྟཱ ཨུདཀཾ ཨཌྜྷཱུསབྷམཏྟཾ ལོཧིཏཾ ཨཧོསི. མཧཱསཏྟོ ཀཱུཔཀམཏྠཀེ ཋིཏོཝ ‘‘ཨིམཱཡ ནཱམ དིསཱཡ མིཐིལནགར’’ནྟི དིསཾ ཝཝཏྠཔེཏྭཱ ཀཱུཔཀམཏྠཀཱ ཨུཔྤཏིཏྭཱ མཙྪཀཙྪཔེ ཨཏིཀྐམྨ མཧཱབལཝཏཱཡ ཨུསབྷམཏྠཀེ པཏི. ཏཾ དིཝསམེཝ པོལཛནཀོ ཀཱལམཀཱསི. ཏཏོ པཊྛཱཡ མཧཱསཏྟོ མཎིཝཎྞཱསུ ཨཱུམཱིསུ པརིཝཏྟནྟོ སུཝཎྞཀྑནྡྷོ ཝིཡ སམུདྡཾ ¶ ཏརཏི. སོ ཡཐཱ ཨེཀདིཝསཾ, ཨེཝཾ སཏྟཱཧཾ ཏརཏི, ‘‘ཨིདཱནི པུཎྞམཱིདིཝསོ’’ཏི ཝེལཾ པན ཨོལོཀེཏྭཱ ལོཎོདཀེན མུཁཾ ཝིཀྑཱལེཏྭཱ ཨུཔོསཐིཀོ ཧོཏི.
ཏདཱ ¶ ཙ ‘‘ཡེ མཱཏུཔཊྛཱནཱདིགུཎཡུཏྟཱ སམུདྡེ མརིཏུཾ ཨནནུཙྪཝིཀཱ སཏྟཱ, ཏེ ཨུདྡྷཱརེཧཱི’’ཏི ཙཏཱུཧི ལོཀཔཱལེཧི མཎིམེཁལཱ ནཱམ དེཝདྷཱིཏཱ སམུདྡརཀྑིཀཱ ཋཔིཏཱ ཧོཏི. སཱ སཏྟ དིཝསཱནི སམུདྡཾ ན ཨོལོཀེསི, དིབྦསམྤཏྟིཾ ཨནུབྷཝནྟིཡཱ ཀིརསྶཱ སཏི པམུཊྛཱ. ‘‘དེཝསམཱགམཾ གཏཱ’’ཏིཔི ཝདནྟི. ཨཐ སཱ ‘‘ཨཛྫ མེ སཏྟམོ དིཝསོ སམུདྡཾ ཨནོལོཀེནྟིཡཱ, ཀཱ ནུ ཁོ པཝཏྟཱི’’ཏི ཨོལོཀེནྟཱི མཧཱསཏྟཾ དིསྭཱ ‘‘སཙེ མཧཱཛནཀཀུམཱརོ སམུདྡེ ནསྶིསྶ, དེཝསམཱགམཔཝེསནཾ ན ལབྷིསྶ’’ནྟི ཙིནྟེཏྭཱ མཧཱསཏྟསྶ ཨཝིདཱུརེ ཨལངྐཏེན སརཱིརེན ཨཱཀཱསེ ཋཏྭཱ མཧཱསཏྟཾ ཝཱིམཾསམཱནཱ པཋམཾ གཱཐམཱཧ –
‘‘ཀོཡཾ མཛ྄ཛྷེ སམུདྡསྨིཾ, ཨཔསྶཾ ཏཱིརམཱཡུཧེ;
ཀཾ ཏྭཾ ཨཏྠཝསཾ ཉཏྭཱ, ཨེཝཾ ཝཱཡམསེ བྷུས’’ནྟི.
ཏཏྠ ཨཔསྶཾ ཏཱིརམཱཡུཧེཏི ཏཱིརཾ ཨཔསྶནྟོཝ ཨཱཡཱུཧཏི ཝཱིརིཡཾ ཀརོཏི.
ཨཐ མཧཱསཏྟོ ཏསྶཱ ཝཙནཾ སུཏྭཱ ‘‘ཨཛྫ མེ སཏྟམོ དིཝསོ སམུདྡཾ ཏརནྟསྶ, ན མེ དུཏིཡོ སཏྟོ དིཊྛཔུབྦོ, ཀོ ནུ མཾ ཝདཏཱི’’ཏི ཨཱཀཱསཾ ཨོལོཀེནྟོ ཏཾ དིསྭཱ དུཏིཡཾ གཱཐམཱཧ –
‘‘ནིསམྨ ཝཏྟཾ ལོཀསྶ, ཝཱཡཱམསྶ ཙ དེཝཏེ;
ཏསྨཱ མཛ྄ཛྷེ སམུདྡསྨིཾ, ཨཔསྶཾ ཏཱིརམཱཡུཧེ’’ཏི.
ཏཏྠ ནིསམྨ ཝཏྟཾ ལོཀསྶཱཏི ཨཧཾ ལོཀསྶ ཝཏྟཀིརིཡཾ དིསྭཱ ཨུཔདྷཱརེཏྭཱ ཝིཧརཱམཱིཏི ཨཏྠོ. ཝཱཡཱམསྶ ཙཱཏི ཝཱཡཱམསྶ ཙ ཨཱནིསཾསཾ ནིསཱམེཏྭཱ ཝིཧརཱམཱིཏི དཱིཔེཏི. ཏསྨཱཏི ཡསྨཱ ¶ ནིསམྨ ཝིཧརཱམི, ‘‘པུརིསཀཱརོ ནཱམ ན ནསྶཏི, སུཁེ པཏིཊྛཱཔེཏཱི’’ཏི ཛཱནཱམི, ཏསྨཱ ཏཱིརཾ ཨཔསྶནྟོཔི ཨཱཡཱུཧཱམི ཝཱིརིཡཾ ཀརོམི, ན ཨུཀྐཎྛཱམཱིཏི.
སཱ ཏསྶ དྷམྨཀཐཾ སུཏྭཱ ཨུཏྟརི སོཏུཀཱམཱ ཧུཏྭཱ པུན གཱཐམཱཧ –
‘‘གམྦྷཱིརེ ¶ ཨཔྤམེཡྻསྨིཾ, ཏཱིརཾ ཡསྶ ན དིསྶཏི;
མོགྷོ ཏེ པུརིསཝཱཡཱམོ, ཨཔྤཏྭཱཝ མརིསྶསཱི’’ཏི.
ཏཏྠ ཨཔྤཏྭཱཏི ཏཱིརཾ ཨཔྤཏྭཱཡེཝ.
ཨཐ ནཾ མཧཱསཏྟོ ‘‘དེཝཏེ, ཀིཾ ནཱམེཏཾ ཀཐེསི, ཝཱཡཱམཾ ཀཏྭཱ མརནྟོཔི གརཧཏོ མུཙྩིསྶཱམཱི’’ཏི ཝཏྭཱ གཱཐམཱཧ –
‘‘ཨནཎོ ¶ ཉཱཏིནཾ ཧོཏི, དེཝཱནཾ པིཏུནཉྩ སོ;
ཀརཾ པུརིསཀིཙྩཱནི, ན ཙ པཙྪཱནུཏཔྤཏཱི’’ཏི.
ཏཏྠ ཨནཎོཏི ཝཱཡཱམཾ ཀརོནྟོ ཉཱཏཱིནཉྩེཝ དེཝཏཱནཉྩ བྲཧྨཱནཉྩ ཨནྟརེ ཨནཎོ ཧོཏི ཨགརཧིཏོ ཨནིནྡིཏོ. ཀརཾ པུརིསཀིཙྩཱནཱིཏི ཡཐཱ སོ པུགྒལོ པུརིསེཧི ཀཏྟབྦཱནི ཀམྨཱནི ཀརཾ པཙྪཱཀཱལེ ན ཙ ཨནུཏཔྤཏི, ཡཐཱ ནཱནུསོཙཏི, ཨེཝཱཧམྤི ཝཱིརིཡཾ ཀརོནྟོ པཙྪཱཀཱལེ ནཱནུཏཔྤཱམི ནཱནུསོཙཱམཱིཏི ཨཏྠོ.
ཨཐ ནཾ དེཝདྷཱིཏཱ གཱཐམཱཧ –
‘‘ཨཔཱརནེཡྻཾ ཡཾ ཀམྨཾ, ཨཕལཾ ཀིལམཐུདྡཡཾ;
ཏཏྠ ཀོ ཝཱཡཱམེནཏྠོ, མཙྩུ ཡསྶཱབྷིནིཔྤཏ’’ནྟི.
ཏཏྠ ཨཔཱརནེཡྻནྟི ཝཱཡཱམེན མཏྠཀཾ ཨཔཱཔེཏབྦཾ. མཙྩུ ཡསྶཱབྷིནིཔྤཏནྟི ཡསྶ ཨཊྛཱནེ ཝཱཡཱམཀརཎསྶ མརཎམེཝ ནིཔྥནྣཾ, ཏཏྠ ཀོ ཝཱཡཱམེནཏྠོཏི.
ཨེཝཾ དེཝདྷཱིཏཱཡ ཝུཏྟེ ཏཾ ཨཔྤཊིབྷཱནཾ ཀརོནྟོ མཧཱསཏྟོ ཨུཏྟརི གཱཐཱ ཨཱཧ –
‘‘ཨཔཱརནེཡྻམཙྩནྟཾ ¶ , ཡོ ཝིདིཏྭཱན དེཝཏེ;
ན རཀྑེ ཨཏྟནོ པཱཎཾ, ཛཉྙཱ སོ ཡདི ཧཱཔཡེ.
‘‘ཨདྷིཔྤཱཡཕལཾ ཨེཀེ, ཨསྨིཾ ལོཀསྨི དེཝཏེ;
པཡོཛཡནྟི ཀམྨཱནི, ཏཱནི ཨིཛ྄ཛྷནྟི ཝཱ ན ཝཱ.
‘‘སནྡིཊྛིཀཾ ཀམྨཕལཾ, ནནུ པསྶསི དེཝཏེ;
སནྣཱ ཨཉྙེ ཏརཱམཧཾ, ཏཉྩ པསྶཱམི སནྟིཀེ.
‘‘སོ ཨཧཾ ¶ ཝཱཡམིསྶཱམི, ཡཐཱསཏྟི ཡཐཱབལཾ;
གཙྪཾ པཱརཾ སམུདྡསྶ, ཀསྶཾ པུརིསཀཱརིཡ’’ནྟི.
ཏཏྠ ཨཙྩནྟནྟི ཡོ ‘‘ཨིདཾ ཀམྨཾ ཝཱིརིཡཾ ཀཏྭཱ ནིཔྥཱདེཏུཾ ན སཀྐཱ, ཨཙྩནྟམེཝ ཨཔཱརནེཡྻ’’ནྟི ཝིདིཏྭཱ ཙཎྜཧཏྠིཨཱདཡོ ཨཔརིཧརནྟོ ཨཏྟནོ པཱཎཾ ན རཀྑཏི. ཛཉྙཱ སོ ཡདི ཧཱཔཡེཏི སོ ཡདི ཏཱདིསེསུ ཋཱནེསུ ཝཱིརིཡཾ ཧཱཔེཡྻ, ཛཱནེཡྻ ཏསྶ ཀུསཱིཏབྷཱཝསྶ ཕལཾ. ཏྭཾ ཡཾ ཝཱ ཏཾ ཝཱ ནིརཏྠཀཾ ཝདསཱིཏི དཱིཔེཏི. པཱལི༹ཡཾ པན ‘‘ཛཉྙཱ སོ ཡདི ཧཱཔཡ’’ནྟི ལིཁིཏཾ, ཏཾ ཨཊྛཀཐཱསུ ནཏྠི. ཨདྷིཔྤཱཡཕལནྟི ཨཏྟནོ ཨདྷིཔྤཱཡཕལཾ སམྤསྶམཱནཱ ཨེཀཙྩེ པུརིསཱ ཀསིཝཎིཛྫཱདཱིནི ཀམྨཱནི པཡོཛཡནྟི, ཏཱནི ཨིཛ྄ཛྷནྟི ཝཱ ན ཝཱ ཨིཛ྄ཛྷནྟི. ‘‘ཨེཏྠ གམིསྶཱམི, ཨིདཾ ཨུགྒཧེསྶཱམཱི’’ཏི པན ཀཱཡིཀཙེཏསིཀཝཱིརིཡཾ ཀརོནྟསྶ ཏཾ ཨིཛ྄ཛྷཏེཝ, ཏསྨཱ ཏཾ ཀཱཏུཾ ཝཊྚཏིཡེཝཱཏི དསྶེཏི. སནྣཱ ཨཉྙེ ཏརཱམཧནྟི ཨཉྙེ ཛནཱ མཧཱསམུདྡེ སནྣཱ ནིམུགྒཱ ཝཱིརིཡཾ ཨཀརོནྟཱ མཙྪཀཙྪཔབྷཀྑཱ ཛཱཏཱ, ཨཧཾ པན ཨེཀཀོཝ ཏརཱམི. ཏཉྩ པསྶཱམི སནྟིཀེཏི ཨིདཾ མེ ཝཱིརིཡཕལཾ པསྶ, མཡཱ ཨིམིནཱ ཨཏྟབྷཱཝེན དེཝཏཱ ནཱམ ¶ ན དིཊྛཔུབྦཱ, སོཧཾ ཏཉྩ ཨིམིནཱ དིབྦརཱུཔེན མམ སནྟིཀེ ཋིཏཾ པསྶཱམི. ཡཐཱསཏྟི ཡཐཱབལནྟི ཨཏྟནོ སཏྟིཡཱ ཙ བལསྶ ཙ ཨནུརཱུཔཾ. ཀསྶནྟི ཀརིསྶཱམི.
ཏཏོ དེཝཏཱ ཏསྶ ཏཾ དལ༹ྷཝཙནཾ སུཏྭཱ ཐུཏིཾ ཀརོནྟཱི གཱཐམཱཧ –
‘‘ཡོ ཏྭཾ ཨེཝཾ གཏེ ཨོགྷེ, ཨཔྤམེཡྻེ མཧཎྞཝེ;
དྷམྨཝཱཡཱམསམྤནྣོ, ཀམྨུནཱ ནཱཝསཱིདསི;
སོ ཏྭཾ ཏཏྠེཝ གཙྪཱཧི, ཡཏྠ ཏེ ནིརཏོ མནོ’’ཏི.
ཏཏྠ ¶ ཨེཝཾ གཏེཏི ཨེཝརཱུཔེ གམྦྷཱིརེ ཝིཏྠཏེ མཧཱསམུདྡེ. དྷམྨཝཱཡཱམསམྤནྣོཏི དྷམྨཝཱཡཱམེན སམནྣཱགཏོ. ཀམྨུནཱཏི ཨཏྟནོ པུརིསཀཱརཀམྨེན. ནཱཝསཱིདསཱིཏི ན ཨཝསཱིདསི. ཡཏྠ ཏེཏི ཡསྨིཾ ཋཱནེ ཏཝ མནོ ནིརཏོ, ཏཏྠེཝ གཙྪཱཧཱིཏི.
སཱ ཨེཝཉྩ པན ཝཏྭཱ ‘‘པཎྜིཏ མཧཱཔརཀྐམ, ཀུཧིཾ ཏཾ ནེམཱི’’ཏི པུཙྪི. ‘‘མིཐིལནགར’’ནྟི ཝུཏྟེ སཱ མཧཱསཏྟཾ པུཔྥཀལཱཔཾ ཝིཡ ཨུཀྑིཔིཏྭཱ ཨུབྷོཧི ¶ ཧཏྠེཧི པརིགྒཡ྄ཧ ཨུརེ ནིཔཛྫཱཔེཏྭཱ པིཡཔུཏྟཾ ཨཱདཱཡ གཙྪནྟཱི ཝིཡ ཨཱཀཱསེ པཀྑནྡི. མཧཱསཏྟོ སཏྟཱཧཾ ལོཎོདཀེན ཨུཔཀྐསརཱིརོ ཧུཏྭཱ དིབྦཕསྶེན ཕུཊྛོ ནིདྡཾ ཨོཀྐམི. ཨཐ ནཾ སཱ མིཐིལཾ ནེཏྭཱ ཨམྦཝནུཡྻཱནེ མངྒལསིལཱཔཊྚེ དཀྑིཎཔསྶེན ནིཔཛྫཱཔེཏྭཱ ཨུཡྻཱནདེཝཏཱཧི ཏསྶ ཨཱརཀྑཾ གཱཧཱཔེཏྭཱ སཀཊྛཱནམེཝ གཏཱ.
ཏདཱ པོལཛནཀསྶ པུཏྟོ ནཏྠི. ཨེཀཱ པནསྶ དྷཱིཏཱ ཨཧོསི, སཱ སཱིཝལིདེཝཱི ནཱམ པཎྜིཏཱ བྱཏྟཱ. ཨམཙྩཱ ཏམེནཾ མརཎམཉྩེ ནིཔནྣཾ པུཙྪིཾསུ ‘‘མཧཱརཱཛ, ཏུམྷེསུ དིཝངྒཏེསུ རཛྫཾ ཀསྶ དསྶཱམཱ’’ཏི? ཨཐ ནེ རཱཛཱ ‘‘ཏཱཏཱ, མམ དྷཱིཏརཾ སཱིཝལིདེཝིཾ ཨཱརཱདྷེཏུཾ སམཏྠསྶ རཛྫཾ དེཐ, ཡོ ཝཱ པན ཙཏུརསྶཔལླངྐསྶ ཨུསྶཱིསཀཾ ཛཱནཱཏི, ཡོ ཝཱ པན སཧསྶཐཱམདྷནུཾ ཨཱརོཔེཏུཾ སཀྐོཏི, ཡོ ཝཱ པན སོལ༹ས མཧཱནིདྷཱི ནཱིཧརིཏུཾ སཀྐོཏི, ཏསྶ རཛྫཾ དེཐཱ’’ཏི ཨཱཧ. ཨམཙྩཱ ‘‘དེཝ, ཏེསཾ ནོ ནིདྷཱིནཾ ཨུདྡཱནཾ ཀཐེཐཱ’’ཏི ཨཱཧཾསུ. ཨཐ རཱཛཱ –
‘‘སཱུརིཡུགྒམནེ ནིདྷི, ཨཐོ ཨོཀྐམནེ ནིདྷི;
ཨནྟོ ནིདྷི བཧི ནིདྷི, ན ཨནྟོ ན བཧི ནིདྷི.
‘‘ཨཱརོཧནེ ¶ མཧཱནིདྷི, ཨཐོ ཨོརོཧནེ ནིདྷི;
ཙཏཱུསུ མཧཱསཱལེསུ, སམནྟཱ ཡོཛནེ ནིདྷི.
‘‘དནྟགྒེསུ མཧཱནིདྷི, ཝཱལགྒེསུ ཙ ཀེཔུཀེ;
རུཀྑགྒེསུ མཧཱནིདྷི, སོལ༹སེཏེ མཧཱནིདྷཱི.
‘‘སཧསྶཐཱམོ པལླངྐོ, སཱིཝལིཨཱརཱདྷནེན ཙཱ’’ཏི. –
མཧཱནིདྷཱིཧི སདྡྷིཾ ཨིཏརེསམྤི ཨུདྡཱནཾ ཀཐེསི. རཱཛཱ ཨིམཾ ཀཐཾ ཝཏྭཱ ཀཱལམཀཱསི.
ཨམཙྩཱ ¶ རཉྙོ ཨཙྩཡེན ཏསྶ མཏཀིཙྩཾ ཀཏྭཱ སཏྟམེ དིཝསེ སནྣིཔཏིཏྭཱ མནྟཡིཾསུ ‘‘ཨམྦྷོ རཉྙཱ ‘ཨཏྟནོ དྷཱིཏརཾ ཨཱརཱདྷེཏུཾ སམཏྠསྶ རཛྫཾ དཱཏབྦ’ནྟི ཝུཏྟཾ, ཀོ ཏཾ ཨཱརཱདྷེཏུཾ སཀྑིསྶཏཱི’’ཏི. ཏེ ‘‘སེནཱཔཏི ཝལླབྷོ’’ཏི ཝཏྭཱ ཏསྶ སཱསནཾ པེསེསུཾ. སོ སཱསནཾ སུཏྭཱ ‘‘སཱདྷཱུ’’ཏི སམྤཊིཙྪིཏྭཱ རཛྫཏྠཱཡ རཱཛདྭཱརཾ གནྟྭཱ ཨཏྟནོ ¶ ཨཱགཏབྷཱཝཾ རཱཛདྷཱིཏཱཡ ཨཱརོཙཱཔེསི. སཱ ཏསྶ ཨཱགཏབྷཱཝཾ ཉཏྭཱ ‘‘ཨཏྠི ནུ ཁྭསྶ སེཏཙྪཏྟསིརིཾ དྷཱརེཏུཾ དྷིཏཱི’’ཏི ཏསྶ ཝཱིམཾསནཏྠཱཡ ‘‘ཁིཔྤཾ ཨཱགཙྪཏཱུ’’ཏི ཨཱཧ. སོ ཏསྶཱ སཱསནཾ སུཏྭཱ ཏཾ ཨཱརཱདྷེཏུཀཱམོ སོཔཱནཔཱདམཱུལཏོ པཊྛཱཡ ཛཝེནཱགནྟྭཱ ཏསྶཱ སནྟིཀེ ཨཊྛཱསི. ཨཐ ནཾ སཱ ཝཱིམཾསམཱནཱ ‘‘མཧཱཏལེ ཛཝེན དྷཱཝཱ’’ཏི ཨཱཧ. སོ ‘‘རཱཛདྷཱིཏརཾ ཏོསེསྶཱམཱི’’ཏི ཝེགེན པཀྑནྡི. ཨཐ ནཾ ‘‘པུན ཨེཧཱི’’ཏི ཨཱཧ. སོ པུན ཝེགེན ཨཱགཏོ. སཱ ཏསྶ དྷིཏིཡཱ ཝིརཧིཏབྷཱཝཾ ཉཏྭཱ ‘‘ཨེཧི སམྨ, པཱདེ མེ སམྦཱཧཱ’’ཏི ཨཱཧ. སོ ཏསྶཱ ཨཱརཱདྷནཏྠཾ ནིསཱིདིཏྭཱ པཱདེ སམྦཱཧི. ཨཐ ནཾ སཱ ཨུརེ པཱདེན པཧརིཏྭཱ ཨུཏྟཱནཀཾ པཱཏེཏྭཱ ‘‘ཨིམཾ ཨནྡྷབཱལཔུརིསཾ དྷིཏིཝིརཧིཏཾ པོཐེཏྭཱ གཱིཝཱཡཾ གཧེཏྭཱ ནཱིཧརཐཱ’’ཏི དཱསཱིནཾ སཉྙཾ ཨདཱསི. ཏཱ ཏཐཱ ཀརིཾསུ. སོ ཏེཧི ‘‘ཀིཾ སེནཱཔཏཱི’’ཏི པུཊྛོ ‘‘མཱ ཀཐེཐ, སཱ ནེཝ མནུསྶིཏྠཱི, ཡཀྑིནཱི’’ཏི ཨཱཧ. ཏཏོ བྷཎྜཱགཱརིཀོ གཏོ, ཏམྤི ཏཐེཝ ལཛྫཱཔེསི. ཏཐཱ སེཊྛིཾ, ཚཏྟགྒཱཧཾ, ཨསིགྒཱཧནྟི སབྦེཔི ཏེ ལཛྫཱཔེསིཡེཝ.
ཨཐ ཨམཙྩཱ སནྣིཔཏིཏྭཱ ‘‘རཱཛདྷཱིཏརཾ ཨཱརཱདྷེཏུཾ སམཏྠོ ནཱམ ནཏྠི, སཧསྶཐཱམདྷནུཾ ཨཱརོཔེཏུཾ སམཏྠསྶ རཛྫཾ དེཐཱ’’ཏི ཨཱཧ, ཏམྤི ཀོཙི ཨཱརོཔེཏུཾ ནཱསཀྑི. ཏཏོ ‘‘ཙཏུརསྶཔལླངྐསྶ ཨུསྶཱིསཀཾ ཛཱནནྟསྶ རཛྫཾ དེཐཱ’’ཏི ཨཱཧ, ཏམྤི ཀོཙི ན ཛཱནཱཏི. ཏཏོ སོལ༹ས མཧཱནིདྷཱི ནཱིཧརིཏུཾ སམཏྠསྶ རཛྫཾ དེཐཱ’’ཏི ཨཱཧ, ཏེཔི ཀོཙི ནཱིཧརིཏུཾ ¶ ནཱསཀྑི. ཏཏོ ‘‘ཨམྦྷོ ཨརཱཛིཀཾ ནཱམ རཊྛཾ པཱལེཏུཾ ན སཀྐཱ, ཀིཾ ནུ ཁོ ཀཱཏབྦ’’ནྟི མནྟཡིཾསུ. ཨཐ ནེ པུརོཧིཏོ ཨཱཧ – ‘‘བྷོ ཏུམྷེ མཱ ཙིནྟཡིཏྠ, ཕུསྶརཐཾ ནཱམ ཝིསྶཛྫེཏུཾ ཝཊྚཏི, ཕུསྶརཐེན ཧི ལདྡྷརཱཛཱ སཀལཛམྦུདཱིཔེ རཛྫཾ ཀཱརེཏུཾ སམཏྠོ ཧོཏཱི’’ཏི. ཏེ ‘‘སཱདྷཱུ’’ཏི སམྤཊིཙྪིཏྭཱ ནགརཾ ཨལངྐཱརཱཔེཏྭཱ མངྒལརཐེ ཙཏྟཱརོ ཀུམུདཝཎྞེ ཨསྶེ ཡོཛེཏྭཱ ཨུཏྟམཔཙྩཏྠརཎཾ ཨཏྠརིཏྭཱ པཉྩ རཱཛཀཀུདྷབྷཎྜཱནི ཨཱརོཔེཏྭཱ ཙཏུརངྒིནིཡཱ སེནཱཡ པརིཝཱརེསུཾ. ‘‘སསཱམིཀསྶ རཐསྶ པུརཏོ ཏཱུརིཡཱནི ཝཛྫནྟི, ཨསཱམིཀསྶ པཙྪཏོ ཝཛྫནྟི, ཏསྨཱ སབྦཏཱུརིཡཱནི ¶ པཙྪཏོ ཝཱདེཐཱ’’ཏི ཝཏྭཱ སུཝཎྞབྷིངྐཱརེན རཐདྷུརཉྩ པཏོདཉྩ ཨབྷིསིཉྩིཏྭཱ ‘‘ཡསྶ རཛྫཾ ཀཱརེཏུཾ པུཉྙཾ ཨཏྠི, ཏསྶ སནྟིཀཾ གཙྪཏཱུ’’ཏི རཐཾ ཝིསྶཛྫེསུཾ. ཨཐ རཐོ རཱཛགེཧཾ པདཀྑིཎཾ ཀཏྭཱ ཝེགེན མཧཱཝཱིཐིཾ ཨབྷིརུཧི.
སེནཱཔཏིཨཱདཡོ ¶ ‘‘ཕུསྶརཐོ མམ སནྟིཀཾ ཨཱགཙྪཏཱུ’’ཏི ཙིནྟཡིཾསུ. སོ སབྦེསཾ གེཧཱནི ཨཏིཀྐམིཏྭཱ ནགརཾ པདཀྑིཎཾ ཀཏྭཱ པཱཙཱིནདྭཱརེན ནིཀྑམིཏྭཱ ཨུཡྻཱནཱབྷིམུཁོ པཱཡཱསི. ཨཐ ནཾ ཝེགེན གཙྪནྟཾ དིསྭཱ ‘‘ནིཝཏྟེཐཱ’’ཏི ཨཱཧཾསུ. པུརོཧིཏོ ‘‘མཱ ནིཝཏྟཡིཏྠ, ཨིཙྪནྟོ ཡོཛནསཏམྤི གཙྪཏུ, མཱ ནིཝཱརེཐཱ’’ཏི ཨཱཧ. རཐོ ཨུཡྻཱནཾ པཝིསིཏྭཱ མངྒལསིལཱཔཊྚཾ པདཀྑིཎཾ ཀཏྭཱ ཨཱརོཧནསཛྫོ ཧུཏྭཱ ཨཊྛཱསི. པུརོཧིཏོ མཧཱསཏྟཾ ནིཔནྣཀཾ དིསྭཱ ཨམཙྩེ ཨཱམནྟེཏྭཱ ‘‘ཨམྦྷོ ཨེཀོ སིལཱཔཊྚེ ནིཔནྣཀོ པུརིསོ དིསྶཏི, སེཏཙྪཏྟཱནུཙྪཝིཀཱ པནསྶ དྷིཏི ཨཏྠཱིཏི ཝཱ ནཏྠཱིཏི ཝཱ ན ཛཱནཱམ, སཙེ ཨེས པུཉྙཝཱ བྷཝིསྶཏི, ཨམྷེ ན ཨོལོཀེསྶཏི, ཀཱལ༹ཀཎྞིསཏྟོ སཙེ བྷཝིསྶཏི, བྷཱིཏཏསིཏོ ཨུཊྛཱཡ ཀམྤམཱནོ ཨོལོཀེསྶཏི, ཏསྨཱ ཁིཔྤཾ སབྦཏཱུརིཡཱནི པགྒཎྷཐཱ’’ཏི ཨཱཧ. ཏཱཝདེཝ ཨནེཀསཏཱནི ཏཱུརིཡཱནི པགྒཎྷིཾསུ. ཏདཱ ཏཱུརིཡསདྡོ སཱགརགྷོསོ ཝིཡ ཨཧོསི.
མཧཱསཏྟོ ཏེན སདྡེན པབུཛ྄ཛྷིཏྭཱ སཱིསཾ ཝིཝརིཏྭཱ ཨོལོཀེནྟོ མཧཱཛནཾ དིསྭཱ ‘‘སེཏཙྪཏྟེན མེ ཨཱགཏེན བྷཝིཏབྦ’’ནྟི ཙིནྟེཏྭཱ པུན སཱིསཾ པཱརུཔིཏྭཱ པརིཝཏྟིཏྭཱ ཝཱམཔསྶེན ནིཔཛྫི. པུརོཧིཏོ ཏསྶ པཱདེ ཝིཝརིཏྭཱ ལཀྑཎཱནི ཨོལོཀེནྟོ ‘‘ཏིཊྛཏུ ཨཡཾ ཨེཀོ དཱིཔོ, ཙཏུནྣམྤི མཧཱདཱིཔཱནཾ རཛྫཾ ཀཱརེཏུཾ སམཏྠོ ཧོཏཱི’’ཏི པུན ཏཱུརིཡཱནི པགྒཎྷཱཔེསི. ཨཐ མཧཱསཏྟོ ¶ མུཁཾ ཝིཝརིཏྭཱ པརིཝཏྟིཏྭཱ དཀྑིཎཔསྶེན ནིཔཛྫིཏྭཱ མཧཱཛནཾ ཨོལོཀེསི. ཏདཱ པུརོཧིཏོ པརིསཾ ཨུསྶཱརེཏྭཱ ཨཉྫལིཾ པགྒཡ྄ཧ ཨཝཀུཛྫོ ཧུཏྭཱ ‘‘ཨུཊྛེཧི, དེཝ, རཛྫཾ ཏེ པཱཔུཎཱཏཱི’’ཏི ཨཱཧ. ཨཐ ནཾ མཧཱསཏྟོ ‘‘རཱཛཱ ཝོ ཀུཧཱི’’ནྟི པུཙྪིཏྭཱ ‘‘ཀཱལཀཏོ དེཝཱ’’ཏི ཝུཏྟེ ‘‘ཏསྶ པུཏྟོ ཝཱ བྷཱཏཱ ཝཱ ནཏྠཱི’’ཏི པུཙྪིཏྭཱ ‘‘ནཏྠི དེཝཱ’’ཏི ཝུཏྟེ ‘‘ཏེན ཧི སཱདྷུ རཛྫཾ ཀཱརེསྶཱམཱི’’ཏི ཝཏྭཱ ཨུཊྛཱཡ སིལཱཔཊྚེ པལླངྐེན ནིསཱིདི. ཨཐ ནཾ ཏཏྠེཝ ཨབྷིསིཉྩིཾསུ. སོ མཧཱཛནཀོ ནཱམ རཱཛཱ ཨཧོསི. སོ རཐཝརཾ ཨབྷིརུཡ྄ཧ མཧནྟེན སིརིཝིབྷཝེན ནགརཾ པཝིསིཏྭཱ རཱཛནིཝེསནཾ ཨབྷིརུཧནྟོ ¶ ‘‘སེནཱཔཏིཨཱདཱིནཾ ཏཱནེཝ ཋཱནཱནི ཧོནྟཱུ’’ཏི ཝིཙཱརེཏྭཱ མཧཱཏལཾ ཨབྷིརུཧི.
རཱཛདྷཱིཏཱ པན པུརིམསཉྙཱཡ ཨེཝ ཏསྶ ཝཱིམཾསནཏྠཾ ཨེཀཾ པུརིསཾ ཨཱཎཱཔེསི ‘‘ཏཱཏ, ཏྭཾ གཙྪ, རཱཛཱནཾ ཨུཔསངྐམིཏྭཱ ཨེཝཾ ཝདེཧི ‘དེཝ, སཱིཝལིདེཝཱི ཏུམྷེ པཀྐོསཏི, ཁིཔྤཾ ཀིརཱགཙྪཏཱུ’’’ཏི. སོ གནྟྭཱ ཏཐཱ ཨཱརོཙེསི. རཱཛཱ པཎྜིཏོ ཏསྶ ཝཙནཾ སུཏྭཱཔི ཨསྶུཎནྟོ ཝིཡ ‘‘ཨཧོ སོབྷནོ ཝཏཱཡཾ པཱསཱདོ’’ཏི པཱསཱདམེཝ ཝཎྞེཏི. སོ ཏཾ སཱཝེཏུཾ ཨསཀྐོནྟོ གནྟྭཱ རཱཛདྷཱིཏཱཡ ཏཾ པཝཏྟིཾ ཨཱརོཙེསི ‘‘ཨཡྻེ, རཱཛཱ ཏུམྷཱཀཾ ཝཙནཾ ན སུཎཱཏི, པཱསཱདམེཝ ཝཎྞེཏི, ཏུམྷཱཀཾ ཝཙནཾ ཏིཎཾ ཝིཡ ན གཎེཏཱི’’ཏི. སཱ ཏསྶ ཝཙནཾ སུཏྭཱ ¶ ‘‘སོ མཧཛ྄ཛྷཱསཡོ པུརིསོ བྷཝིསྶཏཱི’’ཏི ཙིནྟེཏྭཱ དུཏིཡམྤི ཏཏིཡམྤི པེསེསི. རཱཛཱཔི ཨཏྟནོ རུཙིཡཱ པཀཏིགམནེན སཱིཧོ ཝིཡ ཝིཛམྦྷམཱནོ པཱསཱདཾ ཨབྷིརུཧི. ཏསྨིཾ ཨུཔསངྐམནྟེ རཱཛདྷཱིཏཱ ཏསྶ ཏེཛེན སཀབྷཱཝེན སཎྛཱཏུཾ ཨསཀྐོནྟཱི ཨཱགནྟྭཱ ཧཏྠཱལམྦཀཾ ཨདཱསི.
སོ ཏསྶཱ ཧཏྠཾ ཨོལམྦིཏྭཱ མཧཱཏལཾ ཨབྷིརུཧིཏྭཱ སམུསྶིཏསེཏཙྪཏྟེ རཱཛཔལླངྐེ ནིསཱིདིཏྭཱ ཨམཙྩེ ཨཱམནྟེཏྭཱ ‘‘ཨམྦྷོ, ཨཏྠི པན ཝོ རཉྙཱ ཀཱལཾ ཀརོནྟེན ཀོཙི ཨོཝཱདོ དིནྣོ’’ཏི པུཙྪིཏྭཱ ‘‘ཨཱམ, དེཝཱ’’ཏི ཝུཏྟེ ‘‘ཏེན ཧི ཝདེཐཱ’’ཏི ཨཱཧ. དེཝ ‘‘སཱིཝལིདེཝིཾ ཨཱརཱདྷེཏུཾ སམཏྠསྶ རཛྫཾ དེཐཱ’’ཏི ཏེན ཝུཏྟནྟི. སཱིཝལིདེཝིཡཱ ཨཱགནྟྭཱ ཧཏྠཱལམྦཀོ དིནྣོ, ཨཡཾ ཏཱཝ ཨཱརཱདྷིཏཱ ནཱམ, ཨཉྙཾ ཝདེཐཱཏི. དེཝ ‘‘ཙཏུརསྶཔལླངྐསྶ ཨུསྶཱིསཀཾ ཛཱནིཏུཾ སམཏྠསྶ རཛྫཾ དེཐཱ’’ཏི ཏེན ཝུཏྟནྟི. རཱཛཱ ‘‘ཨིདཾ དུཛྫཱནཾ, ཨུཔཱཡེན སཀྐཱ ཛཱནིཏུ’’ནྟི ཙིནྟེཏྭཱ སཱིསཏོ སུཝཎྞསཱུཙིཾ ནཱིཧརིཏྭཱ སཱིཝལིདེཝིཡཱ ཧཏྠེ ཋཔེསི ‘‘ཨིམཾ ཋཔེཧཱི’’ཏི ¶ . སཱ ཏཾ གཧེཏྭཱ པལླངྐསྶ ཨུསྶཱིསཀེ ཋཔེསི. ‘‘ཁགྒཾ ཨདཱསཱི’’ཏིཔི ཝདནྟིཡེཝ. སོ ཏཱཡ སཉྙཱཡ ‘‘ཨིདཾ ཨུསྶཱིསཀ’’ནྟི ཉཏྭཱ ཏེསཾ ཀཐཾ ཨསྶུཎནྟོ ཝིཡ ‘‘ཀིཾ ཀཐེཐཱ’’ཏི ཝཏྭཱ པུན ཏེཧི ཏཐཱ ཝུཏྟེ ‘‘ཨིདཾ ཛཱནིཏུཾ ན གརུ, ཨེཏཾ ཨུསྶཱིསཀ’’ནྟི ཝཏྭཱ ‘‘ཨཉྙཾ ཝདེཐཱ’’ཏི ཨཱཧ. དེཝ, ‘‘སཧསྶཐཱམདྷནུཾ ཨཱརོཔེཏུཾ སམཏྠསྶ རཛྫཾ དེཐཱ’’ཏི ཏེན ཝུཏྟནྟི. ‘‘ཏེན ཧི ཨཱཧརཐ ན’’ནྟི ཨཱཧརཱཔེཏྭཱ སོ དྷནུཾ པལླངྐེ ཡཐཱནིསིནྣོཝ ¶ ཨིཏྠཱིནཾ ཀཔྤཱསཕོཊནདྷནུཾ ཝིཡ ཨཱརོཔེཏྭཱ ‘‘ཨཉྙཾ ཝདེཐཱ’’ཏི ཨཱཧ. ‘‘དེཝ, སོལ༹ས མཧཱནིདྷཱི ནཱིཧརིཏུཾ སམཏྠསྶ རཛྫཾ དེཐཱ’’ཏི ཏེན ཝུཏྟནྟི. ‘‘ཏེསཾ ཀིཉྩི ཨུདྡཱནཾ ཨཏྠཱི’’ཏི པུཙྪིཏྭཱ ‘‘ཨཱམ, དེཝཱ’’ཏི ཝུཏྟེ ‘‘ཏེན ཧི ནཾ ཀཐེཐཱ’’ཏི ཨཱཧ. ཏེ ‘‘སཱུརིཡུགྒམནེ ནིདྷཱི’’ཏི ཨུདྡཱནཾ ཀཐཡིཾསུ. ཏསྶ ཏཾ སུཎནྟསྶེཝ གགནཏལེ པུཎྞཙནྡོ ཝིཡ སོ ཨཏྠོ པཱཀཊོ ཨཧོསི.
ཨཐ ནེ རཱཛཱ ཨཱཧ – ‘‘ཨཛྫ, བྷཎེ, ཝེལཱ ནཏྠི, སྭེ ནིདྷཱི གཎྷིསྶཱམཱི’’ཏི. སོ པུནདིཝསེ ཨམཙྩེ སནྣིཔཱཏེཏྭཱ པུཙྪི ‘‘ཏུམྷཱཀཾ རཱཛཱ པཙྩེཀབུདྡྷེ བྷོཛེསཱི’’ཏི? ‘‘ཨཱམ, དེཝཱ’’ཏི. སོ ཙིནྟེསི ‘‘སཱུརིཡོཏི ནཱཡཾ སཱུརིཡོ, སཱུརིཡསདིསཏྟཱ པན པཙྩེཀབུདྡྷཱ སཱུརིཡཱ ནཱམ, ཏེསཾ པཙྩུགྒམནཊྛཱནེ ནིདྷིནཱ བྷཝིཏབྦ’’ནྟི. ཏཏོ རཱཛཱ ‘‘ཏེསུ པཙྩེཀབུདྡྷེསུ ཨཱགཙྪནྟེསུ པཙྩུགྒམནཾ ཀརོནྟོ ཀཏརཾ ཋཱནཾ གཙྪཏཱི’’ཏི པུཙྪིཏྭཱ ‘‘ཨསུཀཊྛཱནཾ ནཱམ དེཝཱ’’ཏི ཝུཏྟེ ‘‘ཏཾ ཋཱནཾ ཁཎིཏྭཱ ནིདྷིཾ ནཱིཧརཐཱ’’ཏི ནིདྷིཾ ནཱིཧརཱཔེསི. ‘‘གམནཀཱལེ ཨནུགཙྪནྟོ ཀཏྠ ཋཏྭཱ ཨུཡྻོཛེསཱི’’ཏི པུཙྪིཏྭཱ ‘‘ཨསུཀཊྛཱནེ ནཱམཱ’’ཏི ཝུཏྟེ ‘‘ཏཏོཔི ནིདྷིཾ ནཱིཧརཐཱ’’ཏི ནིདྷིཾ ¶ ནཱིཧརཱཔེསི. ཨཐ མཧཱཛནཱ ཨུཀྐུཊྛིསཧསྶཱནི པཝཏྟེནྟཱ ‘‘སཱུརིཡུགྒམནེ ནིདྷཱི’’ཏི ཝུཏྟཏྟཱ སཱུརིཡུགྒམནདིསཱཡཾ ཁཎནྟཱ ཝིཙརིཾསུ. ཨཐོ ‘‘ཨོཀྐམནེ ནིདྷཱི’’ཏི ཝུཏྟཏྟཱ སཱུརིཡཏྠངྒམནདིསཱཡཾ ཁཎནྟཱ ཝིཙརིཾསུ. ‘‘ཨིདཾ པན དྷནཾ ཨིདྷེཝ ཧོཏི, ཨཧོ ཨཙྪརིཡ’’ནྟི པཱིཏིསོམནསྶཾ པཝཏྟཡིཾསུ. ཨནྟོནིདྷཱིཏི རཱཛགེཧེ མཧཱདྭཱརསྶ ཨནྟོཨུམྨཱརཱ ནིདྷིཾ ནཱིཧརཱཔེསི. བཧི ནིདྷཱིཏི བཧིཨུམྨཱརཱ ནིདྷིཾ ནཱིཧརཱཔེསི. ན ཨནྟོ ན བཧི ནིདྷཱིཏི ཧེཊྛཱཨུམྨཱརཏོ ནིདྷིཾ ནཱིཧརཱཔེསི ¶ . ཨཱརོཧནེ ནིདྷཱིཏི མངྒལཧཏྠིཾ ཨཱརོཧནཀཱལེ སུཝཎྞནིསྶེཎིཡཱ ཨཏྠརཎཊྛཱནཏོ ནིདྷིཾ ནཱིཧརཱཔེསི. ཨཐོ ཨོརོཧནེ ནིདྷཱིཏི ཧཏྠིཀྑནྡྷཏོ ཨོརོཧནཊྛཱནཏོ ནིདྷིཾ ནཱིཧརཱཔེསི. ཙཏཱུསུ མཧཱསཱལེསཱུཏི བྷཱུམིཡཾ ཀཏཨུཔཊྛཱནཊྛཱནེ སིརིསཡནསྶ ཙཏྟཱརོ མཉྩཔཱདཱ སཱལམཡཱ, ཏེསཾ ཧེཊྛཱ ཙཏསྶོ ནིདྷིཀུམྦྷིཡོ ནཱིཧརཱཔེསི. སམནྟཱཡོཛནེ ནིདྷཱིཏི ཡོཛནཾ ནཱམ རཐཡུགཔམཱཎཾ, སིརིསཡནསྶ སམནྟཱ རཐཡུགཔྤམཱཎཏོ ནིདྷིཾ ནཱིཧརཱཔེསི. དནྟགྒེསུ མཧཱནིདྷཱིཏི མངྒལཧཏྠིཊྛཱནེ ཏསྶ དྭིནྣཾ དནྟཱནཾ ཨབྷིམུཁཊྛཱནཏོ ¶ ནིདྷིཾ ནཱིཧརཱཔེསི. ཝཱལགྒེསཱུཏི མངྒལཧཏྠིཊྛཱནེ ཏསྶ ཝཱལདྷིསམྨུཁཊྛཱནཏོ ནིདྷིཾ ནཱིཧརཱཔེསི. ཀེཔུཀེཏི ཀེཔུཀཾ ཝུཙྩཏི ཨུདཀཾ, མངྒལཔོཀྑརཎིཏོ ཨུདཀཾ ནཱིཧརཱཔེཏྭཱ ནིདྷིཾ དསྶེསི. རུཀྑགྒེསུ མཧཱནིདྷཱིཏི ཨུཡྻཱནེ མཧཱསཱལརུཀྑམཱུལེ ཋིཏམཛ྄ཛྷནྷིཀསམཡེ པརིམཎྜལཱཡ རུཀྑཙྪཱཡཱཡ ཨནྟོ ནིདྷིཾ ནཱིཧརཱཔེསི. ཨེཝཾ སོལ༹ས མཧཱནིདྷཡོ ནཱིཧརཱཔེཏྭཱ ‘‘ཨཉྙཾ ཀིཉྩི ཨཏྠཱི’’ཏི པུཙྪི. ‘‘ནཏྠི དེཝཱ’’ཏི ཝདིཾསུ. མཧཱཛནོ ཧཊྛཏུཊྛོ ཨཧོསི.
ཨཐ རཱཛཱ ‘‘ཨིདཾ དྷནཾ དཱནམུཁེ ཝིཀིརིསྶཱམཱི’’ཏི ནགརམཛ྄ཛྷེ ཙེཝ ཙཏཱུསུ ནགརདྭཱརེསུ ཙཱཏི པཉྩསུ ཋཱནེསུ པཉྩ དཱནསཱལཱཡོ ཀཱརཱཔེཏྭཱ མཧཱདཱནཾ པཊྛཔེསི, ཀཱལཙམྤཱནགརཏོ ཨཏྟནོ མཱཏརཉྩ བྲཱཧྨཎཉྩ པཀྐོསཱཔེཏྭཱ མཧནྟཾ སཀྐཱརཾ ཨཀཱསི. ཏསྶ ཏརུཎརཛྫེཡེཝ སཀལཾ ཝིདེཧརཊྛཾ ‘‘ཨརིཊྛཛནཀརཉྙོ ཀིར པུཏྟོ མཧཱཛནཀོ ནཱམ རཱཛཱ རཛྫཾ ཀཱརེཏི, སོ ཀིར པཎྜིཏོ ཨུཔཱཡཀུསལོ, པསྶིསྶཱམ ན’’ནྟི དསྶནཏྠཱཡ སངྑུབྷིཏཾ ཨཧོསི. ཏཏོ ཏཏོ བཧུཾ པཎྞཱཀཱརཾ གཧེཏྭཱ ཨཱགམིཾསུ, ནཱགརཱཔི མཧཱཚཎཾ སཛྫཡིཾསུ. རཱཛནིཝེསནེ ཨཏྠརཎཱདཱིནི སནྠརིཏྭཱ གནྡྷདཱམམཱལཱདཱམཱདཱིནི ཨོསཱརེཏྭཱ ཝིཔྤཀིཎྞལཱཛཱཀུསུམཝཱསདྷཱུམགནྡྷཱཀཱརཾ ཀཱརེཏྭཱ ནཱནཔྤཀཱརཾ པཱནབྷོཛནཾ ཨུཔཊྛཱཔེསུཾ. རཉྙོ པཎྞཱཀཱརཏྠཱཡ རཛཏསུཝཎྞབྷཱཛནཱདཱིསུ ཨནེཀཔྤཀཱརཱནི ཁཱདནཱིཡབྷོཛནཱིཡམདྷུཕཱཎིཏཕལཱདཱིནི གཧེཏྭཱ ¶ ཏཏྠ ཏཏྠ པརིཝཱརེཏྭཱ ཨཊྛཾསུ. ཨེཀཏོ ཨམཙྩམཎྜལཾ ནིསཱིདི, ཨེཀཏོ བྲཱཧྨཎགཎོ, ཨེཀཏོ སེཊྛིཨཱདཡོ ནིསཱིདིཾསུ, ཨེཀཏོ ཨུཏྟམརཱུཔདྷརཱ ནཱཊཀིཏྠིཡོ ནིསཱིདིཾསུ, བྲཱཧྨཎཱཔི སོཏྠིཀཱརེན མུཁམངྒལིཀཱནི ཀཐེནྟི, ནཙྩགཱིཏཱདཱིསུ ཀུསལཱ ནཙྩགཱིཏཱདཱིནི པཝཏྟཡིཾསུ, ཨནེཀསཏཱནི ཏཱུརིཡཱནི ¶ པཝཛྫིཾསཱུ. ཏདཱ རཱཛནིཝེསནཾ ཡུགནྡྷརཝཱཏཝེགེན པཧཊཱ སཱགརཀུཙྪི ཝིཡ ཨེཀནིནྣཱདཾ ཨཧོསི. ཨོལོཀིཏོལོཀིཏཊྛཱནཾ ཀམྤཏི.
ཨཐ མཧཱསཏྟོ སེཏཙྪཏྟསྶ ཧེཊྛཱ རཱཛཱསནེ ནིསིནྣོཝ སཀྐསིརིསདིསཾ མཧནྟཾ སིརིཝིལཱསཾ ཨོལོཀེཏྭཱ ཨཏྟནོ མཧཱསམུདྡེ ཀཏཝཱཡཱམཾ ཨནུསྶརི. ཏསྶ ‘‘ཝཱིརིཡཾ ནཱམ ཀཏྟབྦཡུཏྟཀཾ, སཙཱཧཾ མཧཱསམུདྡེ ¶ ཝཱིརིཡཾ ནཱཀརིསྶཾ, ན ཨིམཾ སམྤཏྟིཾ ཨལབྷིསྶ’’ནྟི ཏཾ ཝཱཡཱམཾ ཨནུསྶརནྟསྶ པཱིཏི ཨུཔྤཛྫི. སོ པཱིཏིཝེགེན ཨུདཱནཾ ཨུདཱནེནྟོ ཨཱཧ –
‘‘ཨཱསཱིསེཐེཝ པུརིསོ, ན ནིབྦིནྡེཡྻ པཎྜིཏོ;
པསྶཱམི ཝོཧཾ ཨཏྟཱནཾ, ཡཐཱ ཨིཙྪིཾ ཏཐཱ ཨཧུ.
‘‘ཨཱསཱིསེཐེཝ པུརིསོ, ན ནིབྦིནྡེཡྻ པཎྜིཏོ;
པསྶཱམི ཝོཧཾ ཨཏྟཱནཾ, ཨུདཀཱ ཐལམུབྦྷཏཾ.
‘‘ཝཱཡམེཐེཝ པུརིསོ, ན ནིབྦིནྡེཡྻ པཎྜིཏོ;
པསྶཱམི ཝོཧཾ ཨཏྟཱནཾ, ཡཐཱ ཨིཙྪིཾ ཏཐཱ ཨཧུ.
‘‘ཝཱཡམེཐེཝ པུརིསོ, ན ནིབྦིནྡེཡྻ པཎྜིཏོ;
པསྶཱམི ཝོཧཾ ཨཏྟཱནཾ, ཨུདཀཱ ཐལམུབྦྷཏཾ.
‘‘དུཀྑཱུཔནཱིཏོཔི ནརོ སཔཉྙོ, ཨཱསཾ ན ཚིནྡེཡྻ སུཁཱགམཱཡ;
བཧཱུ ཧི ཕསྶཱ ཨཧིཏཱ ཧིཏཱ ཙ, ཨཝིཏཀྐིཏཱ མཙྩུམུཔབྦཛནྟི.
‘‘ཨཙིནྟིཏམྤི བྷཝཏི, ཙིནྟིཏམྤི ཝིནསྶཏི;
ན ཧི ཙིནྟཱམཡཱ བྷོགཱ, ཨིཏྠིཡཱ པུརིསསྶ ཝཱ’’ཏི.
ཏཏྠ ཨཱསཱིསེཐེཝཱཏི ཨཱསཱཚེདཀམྨཾ ཨཀཏྭཱ ཨཏྟནོ ཀམྨཾ ཨཱསཾ ཀརོཐེཝ. ན ནིབྦིནྡེཡྻཱཏི ཝཱིརིཡཾ ཀརོནྟོ ན ནིབྦིནྡེཡྻ ན ཨལསེཡྻ. ཡཐཱ ཨིཙྪིནྟི ཡཐཱ རཱཛབྷཱཝཾ ཨིཙྪིཾ, ཏཐེཝ རཱཛཱ ཛཱཏོམྷི. ཨུབྦྷཏནྟི ནཱིཧཊཾ. དུཀྑཱུཔནཱིཏོཏི ཀཱཡིཀཙེཏསིཀདུཀྑེན ཕུཊྛོཔཱིཏི ཨཏྠོ. ཨཧིཏཱ ཧིཏཱ ཙཱཏི དུཀྑཕསྶཱ ཨཧིཏཱ, སུཁཕསྶཱ ཧིཏཱ. ཨཝིཏཀྐིཏཱཏི ¶ ཨཝིཏཀྐིཏཱརོ ཨཙིནྟིཏཱརོ. ཨིདཾ ཝུཏྟཾ ཧོཏི – ཏེསུ ཕསྶེསུ ཨཧིཏཕསྶེན ཕུཊྛཱ སཏྟཱ ‘‘ཧིཏཕསྶོཔི ཨཏྠཱིཏི ཝཱིརིཡཾ ཀརོནྟཱ ཏཾ ¶ པཱཔུཎནྟཱི’’ཏི ཨཙིནྟེཏྭཱ ཝཱིརིཡཾ ན ཀརོནྟི, ཏེ ཨིམསྶ ཨཏྠསྶ ཨཝིཏཀྐིཏཱརོ ཧིཏཕསྶཾ ཨལབྷིཏྭཱཝ མཙྩུམུཔབྦཛནྟི མརཎཾ པཱཔུཎནྟི, ཏསྨཱ ཝཱིརིཡཾ ཀཏྟབྦམེཝཱཏི.
ཨཙིནྟིཏམྤཱིཏི ¶ ཨིམེསཾ སཏྟཱནཾ ཨཙིནྟིཏམྤི ཧོཏི, ཙིནྟིཏམྤི ཝིནསྶཏི. མཡཱཔི ཧི ‘‘ཨཡུཛ྄ཛྷིཏྭཱཝ རཛྫཾ ལབྷིསྶཱམཱི’’ཏི ཨིདཾ ཨཙིནྟིཏཾ, ‘‘སུཝཎྞབྷཱུམིཏོ དྷནཾ ཨཱཧརིཏྭཱ ཡུཛ྄ཛྷིཏྭཱ པིཏུ སནྟཀཾ རཛྫཾ གཎྷིསྶཱམཱི’’ཏི པན ཙིནྟིཏཾ, ཨིདཱནི མེ ཙིནྟིཏཾ ནཊྛཾ, ཨཙིནྟིཏཾ ཛཱཏཾ. ན ཧི ཙིནྟཱམཡཱ བྷོགཱཏི ཨིམེསཾ སཏྟཱནཉྷི བྷོགཱ ཙིནྟཱཡ ཨནིཔྥཛྫནཏོ ཙིནྟཱམཡཱ ནཱམ ན ཧོནྟི, ཏསྨཱ ཝཱིརིཡམེཝ ཀཏྟབྦཾ. ཝཱིརིཡཝཏོ ཧི ཨཙིནྟིཏམྤི ཧོཏཱིཏི.
སོ ཏཏོ པཊྛཱཡ དས རཱཛདྷམྨེ ཨཀོཔེཏྭཱ དྷམྨེན སམེན རཛྫཾ ཀཱརེསི, པཙྩེཀབུདྡྷེ ཙ ཨུཔཊྛཱསི. ཨཔརབྷཱགེ སཱིཝལིདེཝཱི དྷཉྙཔུཉྙལཀྑཎསམྤནྣཾ པུཏྟཾ ཝིཛཱཡི, ‘‘དཱིགྷཱཝུཀུམཱརོ’’ཏིསྶ ནཱམཾ ཀརིཾསུ. ཏསྶ ཝཡཔྤཏྟསྶ རཱཛཱ ཨུཔརཛྫཾ དཏྭཱ སཏྟཝསྶསཧསྶཱནི རཛྫཾ ཀཱརེསི. སོ ཨེཀདིཝསཾ ཨུཡྻཱནཔཱལེན ཕལཱཕལེསུ ཙེཝ ནཱནཱཔུཔྥེསུ ཙ ཨཱབྷཏེསུ ཏཱནི དིསྭཱ ཏུཊྛོ ཧུཏྭཱ ཏསྶ སམྨཱནཾ ཀཱརེཏྭཱ ‘‘སམྨ ཨུཡྻཱནཔཱལ, ཨཧཾ ཨུཡྻཱནཾ པསྶིསྶཱམི, ཏྭཾ ཨལངྐརོཧི ན’’ནྟི ཨཱཧ. སོ ‘‘སཱདྷུ, དེཝཱ’’ཏི སམྤཊིཙྪིཏྭཱ ཏཐཱ ཀཏྭཱ རཉྙོ པཊིཝེདེསི. སོ ཧཏྠིཀྑནྡྷཝརགཏོ མཧནྟེན པརིཝཱརེན ནགརཱ ནིཀྑམིཏྭཱ ཨུཡྻཱནདྭཱརཾ པཱཔུཎི. ཏཏྲ ཙ དྭེ ཨམྦཱ ཨཏྠི ནཱིལོབྷཱསཱ. ཨེཀོ ཨཕལོ, ཨེཀོ ཕལདྷརོ. སོ པན ཨཏིམདྷུརོ, རཉྙཱ ཨགྒཕལསྶ ཨཔརིབྷུཏྟཏྟཱ ཏཏོ ཀོཙི ཕལཾ གཧེཏུཾ ན ཨུསྶཧཏི. རཱཛཱ ཧཏྠིཀྑནྡྷཝརགཏོཝ ཏཏོ ཨེཀཾ ཕལཾ གཧེཏྭཱ པརིབྷུཉྫི, ཏསྶ ཏཾ ཛིཝ྄ཧགྒེ ཋཔིཏམཏྟམེཝ དིབྦོཛཾ ཝིཡ ཨུཔཊྛཱསི. སོ ‘‘ནིཝཏྟནཀཱལེ བཧཱུ ཁཱདིསྶཱམཱི’’ཏི ཙིནྟེསི. ‘‘རཉྙཱ ཨགྒཕལཾ པརིབྷུཏྟ’’ནྟི ཉཏྭཱ ཨུཔརཱཛཱནཾ ཨཱདིཾ ཀཏྭཱ ཨནྟམསོ ཧཏྠིམེཎྜཨསྶམེཎྜཱདཡོཔི ཕལཾ གཧེཏྭཱ པརིབྷུཉྫིཾསུ. ཨཉྙེ ཕལཾ ཨལབྷནྟཱ དཎྜེཧི སཱཁཾ བྷིནྡིཏྭཱ ནིཔཎྞམཀཾསུ. རུཀྑོ ཨོབྷགྒཝིབྷགྒོ ཨཊྛཱསི, ཨིཏརོ པན མཎིཔབྦཏོ ཝིཡ ཝིལཱསམཱནོ ཋིཏོ.
རཱཛཱ ཨུཡྻཱནཱ ནིཀྑནྟོ ཏཾ དིསྭཱ ‘‘ཨིདཾ ཀི’’ནྟི ཨམཙྩེ པུཙྪཏི. ‘‘དེཝེན ཨགྒཕལཾ པརིབྷུཏྟནྟི མཧཱཛནེན ཝིལུམྤིཏོ དེཝཱ’’ཏི ཨཱཧཾསུ. ‘‘ཀིཾ ནུ ཁོ བྷཎེ, ཨིམསྶ ¶ པན ནེཝ པཏྟཾ, ན ཝཎྞོ ཁཱིཎོ’’ཏི? ‘‘ནིཔྥལཏཱཡ ན ཁཱིཎོ, དེཝཱ’’ཏི. ཏཾ སུཏྭཱ རཱཛཱ སཾཝེགཾ པཊིལབྷིཏྭཱ ¶ ‘‘ཨཡཾ རུཀྑོ ནིཔྥལཏཱཡ ¶ ནཱིལོབྷཱསོ ཋིཏོ, ཨཡཾ པན སཕལཏཱཡ ཨོབྷགྒཝིབྷགྒོ ཋིཏོ. ཨིདམྤི རཛྫཾ སཕལརུཀྑསདིསཾ, པབྦཛྫཱ པན ནིཔྥལརུཀྑསདིསཱ. སཀིཉྩནསྶེཝ བྷཡཾ, ནཱཀིཉྩནསྶ. ཏསྨཱ ཨཧཾ ཕལརུཀྑོ ཝིཡ ཨཧུཏྭཱ ནིཔྥལརུཀྑསདིསོ བྷཝིསྶཱམི, ཨིམཾ སམྤཏྟིཾ ཙཛིཏྭཱ ནིཀྑམྨ པབྦཛིསྶཱམཱི’’ཏི དལ༹ྷཾ སམཱདཱནཾ ཀཏྭཱ མནཾ ཨདྷིཊྛཧིཏྭཱ ནགརཾ པཝིསིཏྭཱ པཱསཱདདྭཱརེ ཋིཏོཝ སེནཱཔཏིཾ པཀྐོསཱཔེཏྭཱ ‘‘མཧཱསེནཱཔཏི, ཨཛྫ མེ པཊྛཱཡ བྷཏྟཧཱརཀཉྩེཝ མུཁོདཀདནྟཀཊྛདཱཡཀཉྩ ཨེཀཾ ཨུཔཊྛཱཀཾ ཋཔེཏྭཱ ཨཉྙེ མཾ དཊྛུཾ མཱ ལབྷནྟུ, པོརཱཎཀཝིནིཙྪཡཱམཙྩེ གཧེཏྭཱ རཛྫཾ ཨནུསཱསཐ, ཨཧཾ ཨིཏོ པཊྛཱཡ ཨུཔརིཔཱསཱདཏལེ སམཎདྷམྨཾ ཀརིསྶཱམཱི’’ཏི ཝཏྭཱ པཱསཱདམཱརུཡ྄ཧ ཨེཀཀོཝ སམཎདྷམྨཾ ཨཀཱསི. ཨེཝཾ གཏེ ཀཱལེ མཧཱཛནོ རཱཛངྒཎེ སནྣིཔཏིཏྭཱ མཧཱསཏྟཾ ཨདིསྭཱ ‘‘ན ནོ རཱཛཱ པོརཱཎཀོ ཝིཡ ཧོཏཱི’’ཏི ཝཏྭཱ གཱཐཱདྭཡམཱཧ –
‘‘ཨཔོརཱཎཾ ཝཏ བྷོ རཱཛཱ, སབྦབྷུམྨོ དིསམྤཏི;
ནཛྫ ནཙྩེ ནིསཱམེཏི, ན གཱིཏེ ཀུརུཏེ མནོ.
‘‘ན མིགེ ནཔི ཨུཡྻཱནེ, ནཔི ཧཾསེ ཨུདིཀྑཏི;
མཱུགོཝ ཏུཎྷིམཱསཱིནོ, ན ཨཏྠམནུསཱསཏཱི’’ཏི.
ཏཏྠ མིགེཏི སབྦསངྒཱཧིཀཝཙནཾ, པུབྦེ ཧཏྠཱི ཡུཛ྄ཛྷཱཔེཏི, མེཎྜེ ཡུཛ྄ཛྷཱཔེཏི, ཨཛྫ ཏེཔི ན ཨོལོཀེཏཱིཏི ཨཏྠོ. ཨུཡྻཱནེཏི ཨུཡྻཱནཀཱིལ༹མྤི ནཱནུབྷོཏི. ཧཾསེཏི པཉྩཔདུམསཉྪནྣཱསུ ཨུཡྻཱནཔོཀྑརཎཱིསུ ཧཾསགཎཾ ན ཨོལོཀེཏི. མཱུགོཝཱཏི བྷཏྟཧཱརཀཉྩ ཨུཔཊྛཱཀཉྩ པུཙྪིཾསུ ‘‘བྷོ རཱཛཱ, ཏུམྷེཧི སདྡྷིཾ ཀིཉྩི ཨཏྠཾ མནྟེཏཱི’’ཏི. ཏེ ‘‘ན མནྟེཏཱི’’ཏི ཝདིཾསུ. ཏསྨཱ ཨེཝམཱཧཾསུ.
རཱཛཱ ཀཱམེསུ ཨནལླཱིཡནྟེན ཝིཝེཀནིནྣེན ཙིཏྟེན ཨཏྟནོ ཀུལཱུཔཀཔཙྩེཀབུདྡྷེ ཨནུསྶརིཏྭཱ ‘‘ཀོ ནུ ཁོ མེ ཏེསཾ སཱིལཱདིགུཎཡུཏྟཱནཾ ཨཀིཉྩནཱནཾ ཝསནཊྛཱནཾ ཨཱཙིཀྑིསྶཏཱི’’ཏི ཏཱིཧི གཱཐཱཧི ཨུདཱནཾ ཨུདཱནེསི –
‘‘སུཁཀཱམཱ ¶ རཧོསཱིལཱ, ཝདྷབནྡྷཱ ཨུཔཱརཏཱ;
ཀསྶ ནུ ཨཛྫ ཨཱརཱམེ, དཧརཱ ཝུདྡྷཱ ཙ ཨཙྪརེ.
‘‘ཨཏིཀྐནྟཝནཐཱ ¶ ¶ དྷཱིརཱ, ནམོ ཏེསཾ མཧེསིནཾ;
ཡེ ཨུསྶུཀམྷི ལོཀམྷི, ཝིཧརནྟི མནུསྶུཀཱ.
‘‘ཏེ ཚེཏྭཱ མཙྩུནོ ཛཱལཾ, ཏཏཾ མཱཡཱཝིནོ དལ༹ྷཾ;
ཚིནྣཱལཡཏྟཱ གཙྪནྟི, ཀོ ཏེསཾ གཏིམཱཔཡེ’’ཏི.
ཏཏྠ སུཁཀཱམཱཏི ནིབྦཱནསུཁཀཱམཱ. རཧོསཱིལཱཏི པཊིཙྪནྣསཱིལཱ ན ཨཏྟནོ གུཎཔྤཀཱསནཱ. དཧརཱ ཝུཌྜྷཱ ཙཱཏི དཧརཱ ཙེཝ མཧལླཀཱ ཙ. ཨཙྪརེཏི ཝསནྟི.
ཏསྶེཝཾ ཏེསཾ གུཎེ ཨནུསྶརནྟསྶ མཧཏཱི པཱིཏི ཨུཔྤཛྫི. ཨཐ མཧཱསཏྟོ པལླངྐཏོ ཨུཊྛཱཡ ཨུཏྟརསཱིཧཔཉྫརཾ ཝིཝརིཏྭཱ ཨུཏྟརདིསཱབྷིམུཁོ སིརསི ཨཉྫལིཾ པཏིཊྛཱཔེཏྭཱ ‘‘ཨེཝརཱུཔེཧི གུཎེཧི སམནྣཱགཏཱ པཙྩེཀབུདྡྷཱ’’ཏི ནམསྶམཱནོ ‘‘ཨཏིཀྐནྟཝནཐཱ’’ཏིཨཱདིམཱཧ. ཏཏྠ ཨཏིཀྐནྟཝནཐཱཏི པཧཱིནཏཎྷཱ. མཧེསིནནྟི མཧནྟེ སཱིལཀྑནྡྷཱདཡོ གུཎེ ཨེསིཏྭཱ ཋིཏཱནཾ. ཨུསྶུཀམྷཱིཏི རཱགཱདཱིཧི ཨུསྶུཀྐཾ ཨཱཔནྣེ ལོཀསྨིཾ. མཙྩུནོ ཛཱལནྟི ཀིལེསམཱརེན པསཱརིཏཾ ཏཎྷཱཛཱལཾ. ཏཏཾ མཱཡཱཝིནོཏི ཨཏིམཱཡཱཝིནོ. ཀོ ཏེསཾ གཏིམཱཔཡེཏི ཀོ མཾ ཏེསཾ པཙྩེཀབུདྡྷཱནཾ ནིཝཱསཊྛཱནཾ པཱཔེཡྻ, གཧེཏྭཱ གཙྪེཡྻཱཏི ཨཏྠོ.
ཏསྶ པཱསཱདེཡེཝ སམཎདྷམྨཾ ཀརོནྟསྶ ཙཏྟཱརོ མཱསཱ ཨཏཱིཏཱ. ཨཐསྶ ཨཏིཝིཡ པབྦཛྫཱཡ ཙིཏྟཾ ནམི, ཨགཱརཾ ལོཀནྟརིཀནིརཡོ ཝིཡ ཁཱཡི, ཏཡོ བྷཝཱ ཨཱདིཏྟཱ ཝིཡ ཨུཔཊྛཧིཾསུ. སོ པབྦཛྫཱབྷིམུཁེན ཙིཏྟེན ‘‘ཀདཱ ནུ ཁོ ཨིམཾ སཀྐབྷཝནཾ ཝིཡ ཨལངྐཏཔྤཊིཡཏྟཾ མིཐིལཾ པཧཱཡ ཧིམཝནྟཾ པཝིསིཏྭཱ པབྦཛིཏཝེསགཧཎཀཱལོ མཡ྄ཧཾ བྷཝིསྶཏཱི’’ཏི ཙིནྟེཏྭཱ མིཐིལཝཎྞནཾ ནཱམ ཨཱརབྷི –
‘‘ཀདཱཧཾ ¶ མིཐིལཾ ཕཱིཏཾ, ཝིབྷཏྟཾ བྷཱགསོ མིཏཾ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ¶ མིཐིལཾ ཕཱིཏཾ, ཝིསཱལཾ སབྦཏོཔབྷཾ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ མིཐིལཾ ཕཱིཏཾ, བཧུཔཱཀཱརཏོརཎཾ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ མིཐིལཾ ཕཱིཏཾ, དལ༹ྷམཊྚཱལཀོཊྛཀཾ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ མིཐིལཾ ཕཱིཏཾ, སུཝིབྷཏྟཾ མཧཱཔཐཾ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ མིཐིལཾ ཕཱིཏཾ, སུཝིབྷཏྟནྟརཱཔཎཾ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ མིཐིལཾ ཕཱིཏཾ, གཝཱསྶརཐཔཱིལི༹ཏཾ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ¶ མིཐིལཾ ཕཱིཏཾ, ཨཱརཱམཝནམཱལིནིཾ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ མིཐིལཾ ཕཱིཏཾ, ཨུཡྻཱནཝནམཱལིནིཾ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ མིཐིལཾ ཕཱིཏཾ, པཱསཱདཝནམཱལིནིཾ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ མིཐིལཾ ཕཱིཏཾ, ཏིཔུརཾ རཱཛབནྡྷུནིཾ;
མཱཔིཏཾ སོམནསྶེན, ཝེདེཧེན ཡསསྶིནཱ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ¶ ཝེདེཧེ ཕཱིཏེ, ནིཙིཏེ དྷམྨརཀྑིཏེ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཝེདེཧེ ཕཱིཏེ, ཨཛེཡྻེ དྷམྨརཀྑིཏེ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ¶ ཨནྟེཔུརཾ རམྨཾ, ཝིབྷཏྟཾ བྷཱགསོ མིཏཾ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཨནྟེཔུརཾ རམྨཾ, སུདྷཱམཏྟིཀལེཔནཾ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཨནྟེཔུརཾ རམྨཾ, སུཙིགནྡྷཾ མནོརམཾ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཀཱུཊཱགཱརེ ཙ, ཝིབྷཏྟེ བྷཱགསོ མིཏེ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཀཱུཊཱགཱརེ ཙ, སུདྷཱམཏྟིཀལེཔནེ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཀཱུཊཱགཱརེ ཙ, སུཙིགནྡྷེ མནོརམེ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཀཱུཊཱགཱརེ ཙ, ལིཏྟེ ཙནྡནཕོསིཏེ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ སོཎྞཔལླངྐེ, གོནཀེ ཙིཏྟསནྠཏེ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ¶ མཎིཔལླངྐེ, གོནཀེ ཙིཏྟསནྠཏེ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཀཔྤཱསཀོསེཡྻཾ, ཁོམཀོཊུམྦརཱནི ཙ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ པོཀྑརཎཱི རམྨཱ, ཙཀྐཝཱཀཔཀཱུཛིཏཱ;
མནྡཱལཀེཧི སཉྪནྣཱ, པདུམུཔྤལཀེཧི ཙ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཧཏྠིགུམྦེ ཙ, སབྦཱལངྐཱརབྷཱུསིཏེ;
སུཝཎྞཀཙྪེ མཱཏངྒེ, ཧེམཀཔྤནཝཱསསེ.
‘‘ཨཱརཱུལ༹ྷེ གཱམཎཱིཡེཧི, ཏོམརངྐུསཔཱཎིབྷི;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཨསྶགུམྦེ ཙ, སབྦཱལངྐཱརབྷཱུསིཏེ;
ཨཱཛཱནཱིཡེཝ ཛཱཏིཡཱ, སིནྡྷཝེ སཱིགྷཝཱཧནེ.
‘‘ཨཱརཱུལ༹ྷེ ¶ གཱམཎཱིཡེཧི, ཨིལླིཡཱཙཱཔདྷཱརིབྷི;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ¶ རཐསེནིཡོ, སནྣདྡྷེ ཨུསྶིཏདྡྷཛེ;
དཱིཔེ ཨཐོཔི ཝེཡྻགྒྷེ, སབྦཱལངྐཱརབྷཱུསིཏེ.
‘‘ཨཱརཱུལ༹ྷེ གཱམཎཱིཡེཧི, ཙཱཔཧཏྠེཧི ཝམྨིབྷི;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ སོཝཎྞརཐེ, སནྣདྡྷེ ཨུསྶིཏདྡྷཛེ;
དཱིཔེ ཨཐོཔི ཝེཡྻགྒྷེ, སབྦཱལངྐཱརབྷཱུསིཏེ.
‘‘ཨཱརཱུལ༹ྷེ ¶ གཱམཎཱིཡེཧི, ཙཱཔཧཏྠེཧི ཝམྨིབྷི;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ སཛ྄ཛྷུརཐེ ཙ, སནྣདྡྷེ ཨུསྶིཏདྡྷཛེ;
དཱིཔེ ཨཐོཔི ཝེཡྻགྒྷེ, སབྦཱལངྐཱརབྷཱུསིཏེ.
‘‘ཨཱརཱུལ༹ྷེ གཱམཎཱིཡེཧི, ཙཱཔཧཏྠེཧི ཝམྨིབྷི;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཨསྶརཐེ ཙ, སནྣདྡྷེ ཨུསྶིཏདྡྷཛེ;
དཱིཔེ ཨཐོཔི ཝེཡྻགྒྷེ, སབྦཱལངྐཱརབྷཱུསིཏེ.
‘‘ཨཱརཱུལ༹ྷེ གཱམཎཱིཡེཧི, ཙཱཔཧཏྠེཧི ཝམྨིབྷི;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཨོཊྛརཐེ ཙ, སནྣདྡྷེ ཨུསྶིཏདྡྷཛེ;
དཱིཔེ ཨཐོཔི ཝེཡྻགྒྷེ, སབྦཱལངྐཱརབྷཱུསིཏེ.
‘‘ཨཱརཱུལ༹ྷེ གཱམཎཱིཡེཧི, ཙཱཔཧཏྠེཧི ཝམྨིབྷི;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ གོཎརཐེ ཙ, སནྣདྡྷེ ཨུསྶིཏདྡྷཛེ;
དཱིཔེ ཨཐོཔི ཝེཡྻགྒྷེ, སབྦཱལངྐཱརབྷཱུསིཏེ.
‘‘ཨཱརཱུལ༹ྷེ གཱམཎཱིཡེཧི, ཙཱཔཧཏྠེཧི ཝམྨིབྷི;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ¶ ཨཛརཐེ ཙ, སནྣདྡྷེ ཨུསྶིཏདྡྷཛེ;
དཱིཔེ ཨཐོཔི ཝེཡྻགྒྷེ, སབྦཱལངྐཱརབྷཱུསིཏེ.
‘‘ཨཱརཱུལ༹ྷེ ¶ གཱམཎཱིཡེཧི, ཙཱཔཧཏྠེཧི ཝམྨིབྷི;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ མེཎྜརཐེ ཙ, སནྣདྡྷེ ཨུསྶིཏདྡྷཛེ;
དཱིཔེ ཨཐོཔི ཝེཡྻགྒྷེ, སབྦཱལངྐཱརབྷཱུསིཏེ.
‘‘ཨཱརཱུལ༹ྷེ གཱམཎཱིཡེཧི, ཙཱཔཧཏྠེཧི ཝམྨིབྷི;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ མིགརཐེ ཙ, སནྣདྡྷེ ཨུསྶིཏདྡྷཛེ;
དཱིཔེ ཨཐོཔི ཝེཡྻགྒྷེ, སབྦཱལངྐཱརབྷཱུསིཏེ.
‘‘ཨཱརཱུལ༹ྷེ གཱམཎཱིཡེཧི, ཙཱཔཧཏྠེཧི ཝམྨིབྷི;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཧཏྠཱརོཧེ ཙ, སབྦཱལངྐཱརབྷཱུསིཏེ;
ནཱིལཝམྨདྷརེ སཱུརེ, ཏོམརངྐུསཔཱཎིནེ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཨསྶཱརོཧེ ཙ, སབྦཱལངྐཱརབྷཱུསིཏེ;
ནཱིལཝམྨདྷརེ སཱུརེ, ཨིལླིཡཱཙཱཔདྷཱརིནེ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ རཐཱརོཧེ ཙ, སབྦཱལངྐཱརབྷཱུསིཏེ;
ནཱིལཝམྨདྷརེ སཱུརེ, ཙཱཔཧཏྠེ ཀལཱཔིནེ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ¶ དྷནུགྒཧེ ཙ, སབྦཱལངྐཱརབྷཱུསིཏེ;
ནཱིལཝམྨདྷརེ སཱུརེ, ཙཱཔཧཏྠེ ཀལཱཔིནེ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ¶ རཱཛཔུཏྟེ ཙ, སབྦཱལངྐཱརབྷཱུསིཏེ;
ཙིཏྲཝམྨདྷརེ སཱུརེ, ཀཉྩནཱཝེལ༹དྷཱརིནེ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ¶ ཨརིཡགཎེ ཙ, ཝཏཝནྟེ ཨལངྐཏེ;
ཧརིཙནྡནལིཏྟངྒེ, ཀཱསིཀུཏྟམདྷཱརིནེ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཨམཙྩགཎེ ཙ, སབྦཱལངྐཱརབྷཱུསིཏེ;
པཱིཏཝམྨདྷརེ སཱུརེ, པུརཏོ གཙྪམཱལིནེ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ སཏྟསཏཱ བྷརིཡཱ, སབྦཱལངྐཱརབྷཱུསིཏཱ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ སཏྟསཏཱ བྷརིཡཱ, སུསཉྙཱ ཏནུམཛ྄ཛྷིམཱ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ སཏྟསཏཱ བྷརིཡཱ, ཨསྶཝཱ པིཡབྷཱཎིནཱི;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ སཏཔལཾ ཀཾསཾ, སོཝཎྞཾ སཏརཱཛིཀཾ;
པཧཱཡ པབྦཛིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱསྶུ མཾ ཧཏྠིགུམྦཱ, སབྦཱལངྐཱརབྷཱུསིཏཱ;
སུཝཎྞཀཙྪཱ མཱཏངྒཱ, ཧེམཀཔྤནཝཱསསཱ.
‘‘ཨཱརཱུལ༹ྷཱ གཱམཎཱིཡེཧི, ཏོམརངྐུསཔཱཎིབྷི;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ ¶ མཾ ཨསྶགུམྦཱ, སབྦཱལངྐཱརབྷཱུསིཏཱ;
ཨཱཛཱནཱིཡཱཝ ཛཱཏིཡཱ, སིནྡྷཝཱ སཱིགྷཝཱཧནཱ.
‘‘ཨཱརཱུལ༹ྷཱ གཱམཎཱིཡེཧི, ཨིལླིཡཱཙཱཔདྷཱརིབྷི;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ མཾ རཐསེནཱི, སནྣདྡྷཱ ཨུསྶིཏདྡྷཛཱ;
དཱིཔཱ ཨཐོཔི ཝེཡྻགྒྷཱ, སབྦཱལངྐཱརབྷཱུསིཏཱ.
‘‘ཨཱརཱུལ༹ྷཱ གཱམཎཱིཡེཧི, ཙཱཔཧཏྠེཧི ཝམྨིབྷི;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ ¶ མཾ སོཎྞརཐཱ, སནྣདྡྷཱ ཨུསྶིཏདྡྷཛཱ;
དཱིཔཱ ཨཐོཔི ཝེཡྻགྒྷཱ, སབྦཱལངྐཱརབྷཱུསིཏཱ.
‘‘ཨཱརཱུལ༹ྷཱ གཱམཎཱིཡེཧི, ཙཱཔཧཏྠེཧི ཝམྨིབྷི;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ ¶ མཾ སཛ྄ཛྷུརཐཱ, སནྣདྡྷཱ ཨུསྶིཏདྡྷཛཱ;
དཱིཔཱ ཨཐོཔི ཝེཡྻགྒྷཱ, སབྦཱལངྐཱརབྷཱུསིཏཱ.
‘‘ཨཱརཱུལ༹ྷཱ གཱམཎཱིཡེཧི, ཙཱཔཧཏྠེཧི ཝམྨིབྷི;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ མཾ ཨསྶརཐཱ, སནྣདྡྷཱ ཨུསྶིཏདྡྷཛཱ;
དཱིཔཱ ཨཐོཔི ཝེཡྻགྒྷཱ, སབྦཱལངྐཱརབྷཱུསིཏཱ.
‘‘ཨཱརཱུལ༹ྷཱ གཱམཎཱིཡེཧི, ཙཱཔཧཏྠེཧི ཝམྨིབྷི;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ ¶ མཾ ཨོཊྛརཐཱ, སནྣདྡྷཱ ཨུསྶིཏདྡྷཛཱ;
དཱིཔཱ ཨཐོཔི ཝེཡྻགྒྷཱ, སབྦཱལངྐཱརབྷཱུསིཏཱ.
‘‘ཨཱརཱུལ༹ྷཱ གཱམཎཱིཡེཧི, ཙཱཔཧཏྠེཧི ཝམྨིབྷི;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ མཾ གོཎརཐཱ, སནྣདྡྷཱ ཨུསྶིཏདྡྷཛཱ;
དཱིཔཱ ཨཐོཔི ཝེཡྻགྒྷཱ, སབྦཱལངྐཱརབྷཱུསིཏཱ.
‘‘ཨཱརཱུལ༹ྷཱ གཱམཎཱིཡེཧི, ཙཱཔཧཏྠེཧི ཝམྨིབྷི;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ མཾ ཨཛརཐཱ, སནྣདྡྷཱ ཨུསྶིཏདྡྷཛཱ;
དཱིཔཱ ཨཐོཔི ཝེཡྻགྒྷཱ, སབྦཱལངྐཱརབྷཱུསིཏཱ.
‘‘ཨཱརཱུལ༹ྷཱ གཱམཎཱིཡེཧི, ཙཱཔཧཏྠེཧི ཝམྨིབྷི;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ མཾ མེཎྜརཐཱ, སནྣདྡྷཱ ཨུསྶིཏདྡྷཛཱ;
དཱིཔཱ ཨཐོཔི ཝེཡྻགྒྷཱ, སབྦཱལངྐཱརབྷཱུསིཏཱ.
‘‘ཨཱརཱུལ༹ྷཱ ¶ གཱམཎཱིཡེཧི, ཙཱཔཧཏྠེཧི ཝམྨིབྷི;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ མཾ མིགརཐཱ, སནྣདྡྷཱ ཨུསྶིཏདྡྷཛཱ;
དཱིཔཱ ཨཐོཔི ཝེཡྻགྒྷཱ, སབྦཱལངྐཱརབྷཱུསིཏཱ.
‘‘ཨཱརཱུལ༹ྷཱ གཱམཎཱིཡེཧི, ཙཱཔཧཏྠེཧི ཝམྨིབྷི;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ ¶ མཾ ཧཏྠཱརོཧཱ, སབྦཱལངྐཱརབྷཱུསིཏཱ;
ནཱིལཝམྨདྷརཱ སཱུརཱ, ཏོམརངྐུསཔཱཎིནོ;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ མཾ ཨསྶཱརོཧཱ, སབྦཱལངྐཱརབྷཱུསིཏཱ;
ནཱིལཝམྨདྷརཱ སཱུརཱ, ཨིལླིཡཱཙཱཔདྷཱརིནོ;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ མཾ རཐཱརོཧཱ, སབྦཱལངྐཱརབྷཱུསིཏཱ;
ནཱིལཝམྨདྷརཱ སཱུརཱ, ཙཱཔཧཏྠཱ ཀལཱཔིནོ;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ མཾ དྷནུགྒཧཱ, སབྦཱལངྐཱརབྷཱུསིཏཱ;
ནཱིལཝམྨདྷརཱ སཱུརཱ, ཙཱཔཧཏྠཱ ཀལཱཔིནོ;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ མཾ རཱཛཔུཏྟཱ, སབྦཱལངྐཱརབྷཱུསིཏཱ;
ཙིཏྲཝམྨདྷརཱ སཱུརཱ, ཀཉྩནཱཝེལ༹དྷཱརིནོ;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ མཾ ཨརིཡགཎཱ, ཝཏཝནྟཱ ཨལངྐཏཱ;
ཧརིཙནྡནལིཏྟངྒཱ, ཀཱསིཀུཏྟམདྷཱརིནོ;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ མཾ ཨམཙྩགཎཱ, སབྦཱལངྐཱརབྷཱུསིཏཱ;
པཱིཏཝམྨདྷརཱ སཱུརཱ, པུརཏོ གཙྪམཱལིནོ;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ ¶ མཾ སཏྟསཏཱ བྷརིཡཱ, སབྦཱལངྐཱརབྷཱུསིཏཱ;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ ¶ ¶ མཾ སཏྟསཏཱ བྷརིཡཱ, སུསཉྙཱ ཏནུམཛ྄ཛྷིམཱ;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱསྶུ མཾ སཏྟསཏཱ བྷརིཡཱ, ཨསྶཝཱ པིཡབྷཱཎིནཱི;
ཡནྟཾ མཾ ནཱནུཡིསྶནྟི, ཏཾ ཀུདཱསྶུ བྷཝིསྶཏི.
‘‘ཀདཱཧཾ པཏྟཾ གཧེཏྭཱན, མུཎྜོ སངྒྷཱཊིཔཱརུཏོ;
པིཎྜིཀཱཡ ཙརིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ པཾསུཀཱུལཱནཾ, ཨུཛ྄ཛྷིཏཱནཾ མཧཱཔཐེ;
སངྒྷཱཊིཾ དྷཱརཡིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ སཏྟཱཧསམྨེགྷེ, ཨོཝཊྛོ ཨལླཙཱིཝརོ;
པིཎྜིཀཱཡ ཙརིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ སབྦཏྠ གནྟྭཱ, རུཀྑཱ རུཀྑཾ ཝནཱ ཝནཾ;
ཨནཔེཀྑོ གམིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ གིརིདུགྒེསུ, པཧཱིནབྷཡབྷེརཝོ;
ཨདུཏིཡོ གམིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ ཝཱིཎཾཝ རུཛྫཀོ, སཏྟཏནྟིཾ མནོརམཾ;
ཙིཏྟཾ ཨུཛུཾ ཀརིསྶཱམི, ཏཾ ཀུདཱསྶུ བྷཝིསྶཏི.
‘‘ཀདཱཧཾ རཐཀཱརོཝ, པརིཀནྟཾ ཨུཔཱཧནཾ;
ཀཱམསཉྙོཛནེ ཚེཙྪཾ, ཡེ དིབྦེ ཡེ ཙ མཱནུསེ’’ཏི.
ཏཏྠ ཀདཱཏི ཀཱལཔརིཝིཏཀྐོ. ཕཱིཏནྟི ཝཏྠཱལངྐཱརཱདཱིཧི སུཔུཔྥིཏཾ. ཝིབྷཏྟཾ བྷཱགསོ མིཏནྟི ཚེཀེཧི ནགརམཱཔཀེཧི རཱཛནིཝེསནཱདཱིནཾ ཝསེན ཝིབྷཏྟཾ དྭཱརཝཱིཐཱིནཾ ཝསེན ཀོཊྛཱསཏོ མིཏཾ. ཏཾ ཀུདཱསྶུ བྷཝིསྶཏཱིཏི ཏཾ ཨེཝརཱུཔཾ ནགརཾ པཧཱཡ པབྦཛནཾ ཀུདཱ ནཱམ མེ བྷཝིསྶཏི ¶ . སབྦཏོཔབྷནྟི ¶ སམནྟཏོ ཨལངྐཱརོབྷཱསེན ཡུཏྟཾ. བཧུཔཱཀཱརཏོརཎནྟི བཧལེན པུཐུལེན པཱཀཱརེན ཙེཝ དྭཱརཏོརཎེཧི ཙ སམནྣཱགཏཾ. དལ༹ྷམཊྚཱལཀོཊྛཀནྟི དལ༹ྷེཧི ཨཊྚཱལཀེཧི དྭཱརཀོཊྛཀེཧི ཙ སམནྣཱགཏཾ. པཱིལི༹ཏནྟི སམཱཀིཎྞཾ. ཏིཔུརནྟི ཏཱིཧི པུརེཧི སམནྣཱགཏཾ, ཏིཔཱཀཱརནྟི ཨཏྠོ. ཨཐ ཝཱ ཏིཔུརནྟི ཏིཀྑཏྟུཾ པུཎྞཾ. རཱཛབནྡྷུནཱིནྟི རཱཛཉྙཏཀེཧེཝ པུཎྞཾ. སོམནསྶེནཱཏི ཨེཝཾནཱམཀེན ཝིདེཧརཱཛེན.
ནིཙིཏེཏི དྷནདྷཉྙནིཙཡཱདིནཱ སམྤནྣེ. ཨཛེཡྻེཏི པཙྩཱམིཏྟེཧི ཨཛེཏབྦེ. ཙནྡནཕོསིཏེཏི ལོཧིཏཙནྡནེན པརིཔྥོསིཏེ. ཀོཊུམྦརཱནཱིཏི ཀོཊུམྦརརཊྛེ ཨུཊྛིཏཝཏྠཱནི. ཧཏྠིགུམྦེཏི ཧཏྠིགྷཊཱཡོ. ཧེམཀཔྤནཝཱསསེཏི ཧེམམཡེན སཱིསཱལངྐཱརསངྑཱཏེན ཀཔྤནེན ཙ ཧེམཛཱལེན ཙ སམནྣཱགཏེ. གཱམཎཱིཡེཧཱིཏི ¶ ཧཏྠཱཙརིཡེཧི. ཨཱཛཱནཱིཡེཝ ཛཱཏིཡཱཏི ཛཱཏིཡཱ ཀཱརཎཱཀཱརཎཛཱནནཏཱཡ ཨཱཛཱནཱིཡེཝ, ཏཱདིསཱནཾ ཨསྶཱནཾ གུམྦེ. གཱམཎཱིཡེཧཱིཏི ཨསྶཱཙརིཡེཧི. ཨིལླིཡཱཙཱཔདྷཱརིབྷཱིཏི ཨིལླིཡཉྩ ཙཱཔཉྩ དྷཱརེནྟེཧི. རཐསེནིཡོཏི རཐགྷཊཱཡོ. སནྣནྡྷེཏི སུཊྛུ ནདྡྷེ. དཱིཔེ ཨཐོཔི ཝེཡྻགྒྷེཏི དཱིཔིབྱགྒྷཙམྨཔརིཀྑིཏྟེ. གཱམཎཱིཡེཧཱིཏི རཐཱཙརིཡེཧི. སཛ྄ཛྷུརཐེཏི རཛཏརཐེ. ཨཛརཐམེཎྜརཐམིགརཐེ སོབྷནཏྠཱཡ ཡོཛེནྟི.
ཨརིཡགཎེཏི བྲཱཧྨཎགཎེ. ཏེ ཀིར ཏདཱ ཨརིཡཱཙཱརཱ ཨཧེསུཾ, ཏེན ཏེ ཨེཝམཱཧ. ཧརིཙནྡནལིཏྟངྒེཏི ཀཉྩནཝཎྞེན ཙནྡནེན ལིཏྟསརཱིརེ. སཏྟསཏཱ བྷརིཡཱཏི པིཡབྷརིཡཱཡེཝ སནྡྷཱཡཱཧ. སུསཉྙཱཏི སུཊྛུ སཉྙིཏཱ. ཨསྶཝཱཏི སཱམིཀསྶ ཝཙནཀཱརིཀཱ. སཏཔལནྟི པལསཏེན སུཝཎྞེན ཀཱརིཏཾ. ཀཾསནྟི པཱཏིཾ. སཏརཱཛིཀནྟི པིཊྛིཔསྶེ རཱཛིསཏེན སམནྣཱགཏཾ. ཡནྟཾ མནྟི ཨནིཏྠིགནྡྷཝནསཎྜེ ཨེཀམེཝ གཙྪནྟཾ མཾ ཀདཱ ནུ ཏེ ནཱནུཡིསྶནྟི. སཏྟཱཧསམྨེགྷེཏི སཏྟཱཧཾ སམུཊྛིཏེ མཧཱམེགྷེ, སཏྟཱཧཝདྡལིཀེཏི ཨཏྠོ. ཨོཝཊྛོཏི ཨོནཏསཱིསོ. སབྦཏྠཱཏི སབྦདིསཾ. རུཛྫཀོཏི ཝཱིཎཱཝཱདཀོ. ཀཱམསཾཡོཛནེཏི ཀཱམསཾཡོཛནཾ. དིབྦེཏི དིབྦཾ. མཱནུསེཏི མཱནུསཾ.
སོ ¶ ཀིར དསཝསྶསཧསྶཱཡུཀཀཱལེ ནིབྦཏྟོ སཏྟཝསྶསཧསྶཱནི རཛྫཾ ཀཱརེཏྭཱ ཏིཝསྶསཧསྶཱཝསིཊྛེ ཨཱཡུམྷི པབྦཛིཏོ. པབྦཛནྟོ པནེས ཨུཡྻཱནདྭཱརེ ཨམྦརུཀྑསྶ དིཊྛཀཱལཏོ པཊྛཱཡ ཙཏྟཱརོ མཱསེ ཨགཱརེ ཝསིཏྭཱ ‘‘ཨིམམྷཱ རཱཛཝེསཱ པབྦཛིཏཝེསོ ཝརཏརོ, པབྦཛིསྶཱམཱི’’ཏི ཙིནྟེཏྭཱ ཨུཔཊྛཱཀཾ རཧསྶེན ཨཱཎཱཔེསི ‘‘ཏཱཏ, ཀཉྩི ཨཛཱནཱཔེཏྭཱ ཨནྟརཱཔཎཏོ ཀཱསཱཡཝཏྠཱནི ཙེཝ མཏྟིཀཱཔཏྟཉྩ ཀིཎིཏྭཱ ཨཱཧརཱ’’ཏི. སོ ཏཐཱ ཨཀཱསི. རཱཛཱ ཀཔྤཀཾ པཀྐོསཱཔེཏྭཱ ཀེསམསྶུཾ ཨོཧཱརཱཔེཏྭཱ ཀཔྤཀསྶ གཱམཝརཾ དཏྭཱ ཀཔྤཀཾ ¶ ཨུཡྻོཛེཏྭཱ ཨེཀཾ ཀཱསཱཝཾ ནིཝཱསེཏྭཱ ཨེཀཾ པཱརུཔིཏྭཱ ཨེཀཾ ཨཾསེ ཀཏྭཱ མཏྟིཀཱཔཏྟམྤི ཐཝིཀཱཡ ཨོསཱརེཏྭཱ ཨཾསེ ལགྒེསི. ཏཏོ ཀཏྟརདཎྜཾ གཧེཏྭཱ མཧཱཏལེ ཀཏིཔཡེ ཝཱརེ པཙྩེཀབུདྡྷལཱིལཱཡ ཨཔརཱཔརཾ ཙངྐམི. སོ ཏཾ དིཝསཾ ཏཏྠེཝ ཝསིཏྭཱ པུནདིཝསེ སཱུརིཡུགྒམནཝེལཱཡ པཱསཱདཱ ཨོཏརིཏུཾ ཨཱརབྷི.
ཏདཱ སཱིཝལིདེཝཱི ཏཱ སཏྟསཏཱ ཝལླབྷིཏྠིཡོ པཀྐོསཱཔེཏྭཱ ‘‘ཙིརཾ དིཊྛོ ནོ རཱཛཱ, ཙཏྟཱརོ མཱསཱ ཨཏཱིཏཱ, ཨཛྫ ནཾ པསྶིསྶཱམ, སབྦཱལངྐཱརེཧི ཨལངྐརིཏྭཱ ཡཐཱབལཾ ཨིཏྠིཀུཏྟཧཱསཝིལཱསེ དསྶེཏྭཱ ཀིལེསབནྡྷནེན བནྡྷིཏུཾ ཝཱཡམེཡྻཱཐཱ’’ཏི ཝཏྭཱ ཨལངྐཏཔྤཊིཡཏྟཱཧི ཏཱཧི སདྡྷིཾ ‘‘རཱཛཱནཾ པསྶིསྶཱམཱ’’ཏི པཱསཱདཾ ¶ ཨབྷིརུཧནྟཱི ཏཾ ཨོཏརནྟཾ དིསྭཱཔི ན སཉྫཱནི. ‘‘རཉྙོ ཨོཝཱདཾ དཱཏུཾ ཨཱགཏོ པཙྩེཀབུདྡྷོ བྷཝིསྶཏཱི’’ཏི སཉྙཱཡ ཝནྡིཏྭཱ ཨེཀམནྟཾ ཨཊྛཱསི. མཧཱསཏྟོཔི པཱསཱདཱ ཨོཏརི. ཨིཏརཱཔི པཱསཱདཾ ཨབྷིརུཧིཏྭཱ སིརིསཡནཔིཊྛེ བྷམརཝཎྞཀེསེ ཙ པསཱདྷནབྷཎྜཉྩ དིསྭཱ ‘‘ན སོ པཙྩེཀབུདྡྷོ, ཨམྷཱཀཾ པིཡསཱམིཀོ བྷཝིསྶཏི, ཨེཐ ནཾ ཡཱཙིཏྭཱ ནིཝཏྟཱཔེསྶཱམཱི’’ཏི མཧཱཏལཱ ཨོཏརིཏྭཱ རཱཛངྒཎཾ སམྤཱཔུཎི. པཱཔུཎིཏྭཱ ཙ པན སབྦཱཧི ཏཱཧི སདྡྷིཾ ཀེསེ མོཙེཏྭཱ པིཊྛིཡཾ ཝིཀིརིཏྭཱ ཨུབྷོཧི ཧཏྠེཧི ཨུརཾ སཾསུམྦྷིཏྭཱ ‘‘ཀསྨཱ ཨེཝརཱུཔཾ ཀམྨཾ ཀརོཐ, མཧཱརཱཛཱ’’ཏི ཨཏིཀརུཎཾ པརིདེཝམཱནཱ རཱཛཱནཾ ཨནུབནྡྷི, སཀལནགརཾ སངྑུབྷིཏཾ ཨཧོསི. ཏེཔི ‘‘རཱཛཱ ཀིར ནོ པབྦཛིཏོ, ཀུཏོ པན ཨེཝརཱུཔཾ དྷམྨིཀརཱཛཱནཾ ལབྷིསྶཱམཱ’’ཏི རོདམཱནཱ རཱཛཱནཾ ཨནུབནྡྷིཾསུ. ཏཏྲ ཏཱསཾ ཨིཏྠཱིནཾ པརིདེཝནཉྩེཝ པརིདེཝནྟིཡོཔི ཏཱ པཧཱཡ རཉྙོ གམནཉྩ ཨཱཝིཀརོནྟོ སཏྠཱ ཨཱཧ –
‘‘ཏཱ ¶ ཙ སཏྟསཏཱ བྷརིཡཱ, སབྦཱལངྐཱརབྷཱུསིཏཱ;
བཱཧཱ པགྒཡ྄ཧ པཀྐནྡུཾ, ཀསྨཱ ནོ ཝིཛཧིསྶསི.
‘‘ཏཱ ཙ སཏྟསཏཱ བྷརིཡཱ, སུསཉྙཱ ཏནུམཛ྄ཛྷིམཱ;
བཱཧཱ པགྒཡ྄ཧ པཀྐནྡུཾ, ཀསྨཱ ནོ ཝིཛཧིསྶསི.
‘‘ཏཱ ཙ སཏྟསཏཱ བྷརིཡཱ, ཨསྶཝཱ པིཡབྷཱཎིནཱི;
བཱཧཱ པགྒཡ྄ཧ པཀྐནྡུཾ, ཀསྨཱ ནོ ཝིཛཧིསྶསི.
‘‘ཏཱ ¶ ཙ སཏྟསཏཱ བྷརིཡཱ, སབྦཱལངྐཱརབྷཱུསིཏཱ;
ཧིཏྭཱ སམྤདྡཝཱི རཱཛཱ, པབྦཛྫཱཡ པུརཀྑཏོ.
‘‘ཏཱ ཙ སཏྟསཏཱ བྷརིཡཱ, སུསཉྙཱ ཏནུམཛ྄ཛྷིམཱ;
ཧིཏྭཱ སམྤདྡཝཱི རཱཛཱ, པབྦཛྫཱཡ པུརཀྑཏོ.
‘‘ཏཱ ཙ སཏྟསཏཱ བྷརིཡཱ, ཨསྶཝཱ པིཡབྷཱཎིནཱི;
ཧིཏྭཱ སམྤདྡཝཱི རཱཛཱ, པབྦཛྫཱཡ པུརཀྑཏོ.
‘‘ཧིཏྭཱ ¶ སཏཔལཾ ཀཾསཾ, སོཝཎྞཾ སཏརཱཛིཀཾ;
ཨགྒཧཱི མཏྟིཀཾ པཏྟཾ, ཏཾ དུཏིཡཱབྷིསེཙན’’ནྟི.
ཏཏྠ བཱཧཱ པགྒཡ྄ཧཱཏི བཱཧཱ ཨུཀྑིཔིཏྭཱ. སམྤདྡཝཱིཏི བྷིཀྑཝེ, སོ མཧཱཛནཀོ རཱཛཱ, ཏཱ ཙ སཏྟསཏཱ བྷརིཡཱ ‘‘ཀིཾ ནོ, དེཝ, པཧཱཡ གཙྪསི, ཀོ ཨམྷཱཀཾ དོསོ’’ཏི ཝིལཔནྟིཡོཝ ཚཌྜེཏྭཱ སམྤདྡཝཱི གཏོ, ‘‘པབྦཛྫཱཡ ཡཱཧཱི’’ཏི ཙོདིཡམཱནོ ཝིཡ པུརཀྑཏོ ཧུཏྭཱ གཏོཏི ཨཏྠོ. ཏཾ དུཏིཡཱབྷིསེཙནནྟི བྷིཀྑཝེ, ཏཾ མཏྟིཀཱཔཏྟགྒཧཎཾ དུཏིཡཱབྷིསེཙནཾ ཀཏྭཱ སོ རཱཛཱ ནིཀྑནྟོཏི.
སཱིཝལིདེཝཱིཔི པརིདེཝམཱནཱ རཱཛཱནཾ ནིཝཏྟེཏུཾ ཨསཀྐོནྟཱི ‘‘ཨཏྠེསོ ཨུཔཱཡོ’’ཏི ཙིནྟེཏྭཱ མཧཱསེནགུཏྟཾ པཀྐོསཱཔེཏྭཱ ‘‘ཏཱཏ, རཉྙོ པུརཏོ གམནདིསཱབྷཱགེ ཛིཎྞགྷརཛིཎྞསཱལཱདཱིསུ ཨགྒིཾ དེཧི, ཏིཎཔཎྞཱནི སཾཧརིཏྭཱ ཏསྨིཾ ཏསྨིཾ ཋཱནེ དྷཱུམཾ ཀཱརེཧཱི’’ཏི ཨཱཎཱཔེསི. སོ ཏཐཱ ཀཱརེསི. སཱ རཉྙོ སནྟིཀཾ གནྟྭཱ པཱདེསུ པཏིཏྭཱ མིཐིལཱཡ ཨཱདིཏྟབྷཱཝཾ ཨཱརོཙེནྟཱི གཱཐཱདྭཡམཱཧ –
‘‘བྷེསྨཱ ¶ ཨགྒིསམཱ ཛཱལཱ, ཀོསཱ ཌཡ྄ཧནྟི བྷཱགསོ;
རཛཏཾ ཛཱཏརཱུཔཉྩ, མུཏྟཱ ཝེལུ༹རིཡཱ བཧཱུ.
‘‘མཎཡོ སངྑམུཏྟཱ ཙ, ཝཏྠིཀཾ ཧརིཙནྡནཾ;
ཨཛིནཾ དནྟབྷཎྜཉྩ, ལོཧཾ ཀཱལཱ༹ཡསཾ བཧཱུ;
ཨེཧི རཱཛ ནིཝཏྟསྶུ, མཱ ཏེཏཾ ཝིནསཱ དྷན’’ནྟི.
ཏཏྠ ¶ བྷེསྨཱཏི བྷཡཱནཀཱ. ཨགྒིསམཱ ཛཱལཱཏི ཏེསཾ ཏེསཾ མནུསྶཱནཾ གེཧཱནི ཨགྒི གཎྷི, སོ ཨེས མཧཱཛཱལོཏི ཨཏྠོ. ཀོསཱཏི སུཝཎྞརཛཏཀོཊྛཱགཱརཱདཱིནི. བྷཱགསོཏི ཀོཊྛཱསཏོ སུཝིབྷཏྟཱཔི ནོ ཨེཏེ ཨགྒིནཱ ཌཡ྄ཧནྟི, དེཝཱཏི. ལོཧནྟི ཏམྦལོཧཱདིཀཾ. མཱ ཏེཏཾ ཝིནསཱ དྷནནྟི མཱ ཏེ ཨེཏཾ དྷནཾ ཝིནསྶཏུ, ཨེཧི ནཾ ནིབྦཱཔེཏི, པཙྪཱ གམིསྶསི, ‘‘མཧཱཛནཀོ ནགརཾ ཌཡ྄ཧམཱནཾ ཨནོལོཀེཏྭཱཝ ནིཀྑནྟོ’’ཏི ཏུམྷཱཀཾ གརཧཱ བྷཝིསྶཏི, ཏཱཡ ཏེ ལཛྫཱཔི ཝིཔྤཊིསཱརོཔི བྷཝིསྶཏི, ཨེཧི ཨམཙྩེ ཨཱཎཱཔེཏྭཱ ཨགྒིཾ ནིབྦཱཔེཧི, དེཝཱཏི.
ཨཐ མཧཱསཏྟོ ‘‘དེཝི, ཀིཾ ཀཐེསི, ཡེསཾ ཀིཉྩནཾ ཨཏྠི, ཏེསཾ ཏཾ ཌཡ྄ཧཏི, མཡཾ པན ཨཀིཉྩནཱ’’ཏི དཱིཔེནྟོ གཱཐམཱཧ –
‘‘སུསུཁཾ ཝཏ ཛཱིཝཱམ, ཡེསཾ ནོ ནཏྠི ཀིཉྩནཾ;
མིཐིལཱ ཌཡ྄ཧམཱནཱཡ, ན མེ ཀིཉྩི ཨཌཡ྄ཧཐཱ’’ཏི.
ཏཏྠ ¶ ཀིཉྩནནྟི ཡེསཾ ཨམྷཱཀཾ པལིབུདྡྷཀིལེསསངྑཱཏཾ ཀིཉྩནཾ ནཏྠི, ཏེ མཡཾ ཏེན ཨཀིཉྩནབྷཱཝེན སུསུཁཾ ཝཏ ཛཱིཝཱམ. ཏེནེཝ ཀཱརཎེན མིཐིལཱཡ ཌཡ྄ཧམཱནཱཡ ན མེ ཀིཉྩི ཨཌཡ྄ཧཐ, ཨཔྤམཏྟཀམྤི ཨཏྟནོ བྷཎྜཀཾ ཌཡ྄ཧམཱནཾ ན པསྶཱམཱིཏི ཝདཏི.
ཨེཝཉྩ པན ཝཏྭཱ མཧཱསཏྟོ ཨུཏྟརདྭཱརེན ནིཀྑམི. ཏཱཔིསྶ སཏྟསཏཱ བྷརིཡཱ ནིཀྑམིཾསུ. པུན སཱིཝལིདེཝཱི ཨེཀཾ ཨུཔཱཡཾ ཙིནྟེཏྭཱ ‘‘གཱམགྷཱཏརཊྛཝིལུམྤནཱཀཱརཾ ཝིཡ དསྶེཐཱ’’ཏི ཨམཙྩེ ཨཱཎཱཔེསི. ཏཾཁཎཾཡེཝ ཨཱཝུདྷཧཏྠེ པུརིསེ ཏཏོ ཏཏོ ཨཱདྷཱཝནྟེ པརིདྷཱཝནྟེ ཝིལུམྤནྟེ ཝིཡ ¶ སརཱིརེ ལཱཁཱརསཾ སིཉྩིཏྭཱ ལདྡྷཔྤཧཱརེ ཝིཡ ཕལཀེ ནིཔཛྫཱཔེཏྭཱ ཝུཡ྄ཧནྟེ མཏེ ཝིཡ ཙ རཉྙོ དསྶེསུཾ. མཧཱཛནོ ཨུཔཀྐོསི ‘‘མཧཱརཱཛ, ཏུམྷེསུ དྷརནྟེསུཡེཝ རཊྛཾ ཝིལུམྤནྟི, མཧཱཛནཾ གྷཱཏེནྟཱི’’ཏི. ཨཐ དེཝཱིཔི རཱཛཱནཾ ཝནྡིཏྭཱ ནིཝཏྟནཏྠཱཡ གཱཐམཱཧ –
‘‘ཨཊཝིཡོ སམུཔྤནྣཱ, རཊྛཾ ཝིདྡྷཾསཡནྟི ཏཾ;
ཨེཧི རཱཛ ནིཝཏྟསྶུ, མཱ རཊྛཾ ཝིནསཱ ཨིད’’ནྟི.
ཏཏྠ ¶ ཨཊཝིཡོཏི མཧཱརཱཛ, ཏུམྷེསུ དྷརནྟེསུཡེཝ ཨཊཝིཙོརཱ སམུཔྤནྣཱ སམུཊྛིཏཱ, ཏཾ ཏཡཱ དྷམྨརཀྑིཏཾ ཏཝ རཊྛཾ ཝིདྡྷཾསེནྟི.
ཏཾ སུཏྭཱ རཱཛཱ ‘‘མཡི དྷརནྟེཡེཝ ཙོརཱ ཨུཊྛཱཡ རཊྛཾ ཝིདྡྷཾསེནྟཱ ནཱམ ནཏྠི, སཱིཝལིདེཝིཡཱ ཀིརིཡཱ ཨེསཱ བྷཝིསྶཏཱི’’ཏི ཙིནྟེཏྭཱ ཏཾ ཨཔྤཊིབྷཱནཾ ཀརོནྟོ ཨཱཧ –
‘‘སུསུཁཾ ཝཏ ཛཱིཝཱམ, ཡེསཾ ནོ ནཏྠི ཀིཉྩནཾ;
རཊྛེ ཝིལུམྤམཱནམྷི, ན མེ ཀིཉྩི ཨཧཱིརཐ.
‘‘སུསུཁཾ ཝཏ ཛཱིཝཱམ, ཡེསཾ ནོ ནཏྠི ཀིཉྩནཾ;
པཱིཏིབྷཀྑཱ བྷཝིསྶཱམ, དེཝཱ ཨཱབྷསྶརཱ ཡཐཱ’’ཏི.
ཏཏྠ ཝིལུམྤམཱནམྷཱིཏི ཝིལུཔྤམཱནེ. ཨཱབྷསྶརཱ ཡཐཱཏི ཡཐཱ ཏེ བྲཧྨཱནོ པཱིཏིབྷཀྑཱ ཧུཏྭཱ སམཱཔཏྟིསུཁེན ཝཱིཏིནཱམེནྟི, ཏཐཱ ཝཱིཏིནཱམེསྶཱམཱཏི.
ཨེཝཾ ཝུཏྟེཔི མཧཱཛནོ རཱཛཱནཾ ཨནུབནྡྷིཡེཝ. ཨཐསྶ ཨེཏདཧོསི ‘‘ཨཡཾ མཧཱཛནོ ནིཝཏྟིཏུཾ ན ཨིཙྪཏི, ནིཝཏྟེསྶཱམི ན’’ནྟི. སོ ཨཌྜྷགཱཝུཏམཏྟཾ གཏཀཱལེ ནིཝཏྟིཏྭཱ མཧཱམགྒེ ཋིཏོཝ ཨམཙྩེ ‘‘ཀསྶིདཾ རཛྫ’’ནྟི པུཙྪིཏྭཱ ‘‘ཏུམྷཱཀཾ ¶ , དེཝཱ’’ཏི ཝུཏྟེ ‘‘ཏེན ཧི ཨིམཾ ལེཁཾ ཨནྟརཾ ཀརོནྟསྶ རཱཛདཎྜཾ ཀརོཐཱ’’ཏི ཀཏྟརདཎྜེན ཏིརིཡཾ ལེཁཾ ཨཱཀཌྜྷི. ཏེན ཏེཛཝཏཱ རཉྙཱ ཀཏཾ ལེཁཾ ཀོཙི ཨནྟརཾ ཀཱཏུཾ ནཱསཀྑི. མཧཱཛནོ ལེཁཾ ཨུསྶཱིསཀེ ཀཏྭཱ བཱལ༹ྷཔརིདེཝཾ པརིདེཝི. དེཝཱིཔི ཏཾ ལེཁཾ ཨནྟརཾ ཀཱཏུཾ ཨསཀྐོནྟཱི རཱཛཱནཾ པིཊྛིཾ ¶ དཏྭཱ གཙྪནྟཾ དིསྭཱ སོཀཾ སནྡྷཱརེཏུཾ ཨསཀྐོནྟཱི ཨུརཾ པཧརིཏྭཱ མཧཱམགྒེ ཏིརིཡཾ པཏིཏྭཱ པརིཝཏྟམཱནཱ ཨགམཱསི. མཧཱཛནོ ‘‘ལེཁསཱམིཀེཧི ལེཁཱ བྷིནྣཱ’’ཏི ཝཏྭཱ དེཝིཡཱ གཏམགྒེནེཝ གཏོ. ཨཐ མཧཱསཏྟོཔི ཨུཏྟརཧིམཝནྟཱབྷིམུཁོ ཨགམཱསི. དེཝཱིཔི སབྦཾ སེནཱཝཱཧནཾ ཨཱདཱཡ ཏེན སདྡྷིཾཡེཝ གཏཱ. རཱཛཱ མཧཱཛནཾ ནིཝཏྟེཏུཾ ཨསཀྐོནྟོཡེཝ སཊྛིཡོཛནམགྒཾ གཏོ.
ཏདཱ ནཱརདོ ནཱམ ཏཱཔསོ ཧིམཝནྟེ སུཝཎྞགུཧཱཡཾ ཝསིཏྭཱ པཉྩཱབྷིཉྙོ ཛྷཱནསུཁེན ཝཱིཏིནཱམེཏྭཱ སཏྟཱཧཾ ཨཏིཀྐཱམེཏྭཱ ཛྷཱནསུཁཏོ ཝུཊྛཱཡ ‘‘ཨཧོ སུཁཾ, ཨཧོ སུཁ’’ནྟི ཨུདཱནཾ ཨུདཱནེསི. སོ ‘‘ཨཏྠི ནུ ཁོ ཀོཙི ཛམྦུདཱིཔཏལེ ཨིདཾ སུཁཾ པརིཡེསནྟོ’’ཏི དིབྦཙཀྑུནཱ ཨོལོཀེནྟོ མཧཱཛནཀབུདྡྷངྐུརཾ དིསྭཱ ‘‘རཱཛཱ མཧཱབྷིནིཀྑམནཾ ནིཀྑནྟོཔི སཱིཝལིདེཝིཔྤམུཁཾ ¶ མཧཱཛནཾ ནིཝཏྟེཏུཾ ན སཀྐོཏི, ཨནྟརཱཡམྤིསྶ ཀརེཡྻ, ཨིདཱནི གནྟྭཱ བྷིཡྻོསོ མཏྟཱཡ དལ༹ྷསམཱདཱནཏྠཾ ཨོཝཱདཾ དསྶཱམཱི’’ཏི ཙིནྟེཏྭཱ ཨིདྡྷིབལེན གནྟྭཱ རཉྙོ པུརཏོ ཨཱཀཱསེ ཋིཏོཝ ཏསྶ ཨུསྶཱཧཾ ཛནེཏུཾ ཨིམཾ གཱཐམཱཧ –
‘‘ཀིམྷེསོ མཧཏོ གྷོསོ, ཀཱ ནུ གཱམེཝ ཀཱིལི༹ཡཱ;
སམཎ ཏེཝ པུཙྪཱམ, ཀཏྠེསོ ཨབྷིསཊོ ཛནོ’’ཏི.
ཏསྶ ཏཾ སུཏྭཱ རཱཛཱ ཨཱཧ –
‘‘མམཾ ཨོཧཱཡ གཙྪནྟཾ, ཨེཏྠེསོ ཨབྷིསཊོ ཛནོ;
སཱིམཱཏིཀྐམནཾ ཡནྟཾ, མུནིམོནསྶ པཏྟིཡཱ;
མིསྶཾ ནནྡཱིཧི གཙྪནྟཾ, ཀིཾ ཛཱནམནུཔུཙྪསཱི’’ཏི.
ཏཏྠ ཀིམྷེསོཏི ཀིམྷི ཀེན ཀཱརཎེན ཨེསོ ཧཏྠིཀཱཡཱདིཝསེན མཧཏོ སམཱུཧསྶ གྷོསོ. ཀཱ ནུ གཱམེཝ ཀཱིལི༹ཡཱཏི ཀཱ ནུ ཨེསཱ ཏཡཱ སདྡྷིཾ ཨཱགཙྪནྟཱནཾ ¶ གཱམེ ཝིཡ ཀཱིལི༹. ཀཏྠེསོཏི ཀིམཏྠཾ ཨེས མཧཱཛནོ ཨབྷིསཊོ སནྣིཔཏིཏོ, ཏཾ པརིཝཱརེཏྭཱ ཨཱགཙྪཏཱིཏི པུཙྪི. མམནྟི ཡོ ཨཧཾ ཨེཏཾ ཛནཾ ཨོཧཱཡ གཙྪཱམི, ཏཾ མཾ ཨོཧཱཡ གཙྪནྟཾ. ཨེཏྠཱཏི ཨེཏསྨིཾ ཋཱནེ ཨེསོ མཧཱཛནོ ཨབྷིསཊོ ཨནུབནྡྷནྟོ ཨཱགཏོ. སཱིམཱཏིཀྐམནཾ ཡནྟནྟི ཏྭཾ པན ཏཾ མཾ ཀིལེསསཱིམཾ ཨཏིཀྐམྨ ¶ ཨནགཱརིཡམུནིཉཱཎསངྑཱཏསྶ མོནསྶ པཏྟིཡཱ ཡནྟཾ, ‘‘པབྦཛིཏོ ཝཏམྷཱི’’ཏི ནནྡིཾ ཨཝིཛཧིཏྭཱ ཁཎེ ཁཎེ ཨུཔྤཛྫམཱནཱཧི ནནྡཱིཧི མིསྶམེཝ གཙྪནྟཾ ཀིཾ ཛཱནནྟོ པུཙྪསི, ཨུདཱཧུ ཨཛཱནནྟོ. མཧཱཛནཀོ ཀིར ཝིདེཧརཊྛཾ ཚཌྜེཏྭཱ པབྦཛིཏོཏི ཀིཾ ན སུཏཾ ཏཡཱཏི.
ཨཐསྶ སོ དལ༹ྷསམཱདཱནཏྠཱཡ པུན གཱཐམཱཧ –
‘‘མཱསྶུ ཏིཎྞོ ཨམཉྙིཏྠ, སརཱིརཾ དྷཱརཡཾ ཨིམཾ;
ཨཏཱིརཎེཡྻ ཡམིདཾ, བཧཱུ ཧི པརིཔནྠཡོ’’ཏི.
ཏཏྠ མཱསྶུ ཏིཎྞོ ཨམཉྙིཏྠཱཏི ཨིམཾ བྷཎྜུཀཱསཱཝནིཝཏྠཾ སརཱིརཾ དྷཱརེནྟོ ‘‘ཨིམིནཱ པབྦཛིཏལིངྒགྒཧཎམཏྟེནེཝ ཀིལེསསཱིམཾ ཏིཎྞོ ཨཏིཀྐནྟོསྨཱི’’ཏི མཱ ཨམཉྙིཏྠ. ཨཏཱིརཎེཡྻ ¶ ཡམིདནྟི ཨིདཾ ཀིལེསཛཱཏཾ ནཱམ ན ཨེཏྟཀེན ཏཱིརེཏབྦཾ. བཧཱུ ཧི པརིཔནྠཡོཏི སགྒམགྒཾ ཨཱཝརིཏྭཱ ཋིཏཱ ཏཝ བཧཱུ ཀིལེསཔརིཔནྠཱཏི.
ཏཏོ མཧཱསཏྟོ ཏསྶ ཝཙནཾ སུཏྭཱ པརིཔནྠེ པུཙྪནྟོ ཨཱཧ –
‘‘ཀོ ནུ མེ པརིཔནྠསྶ, མམཾ ཨེཝཾཝིཧཱརིནོ;
ཡོ ནེཝ དིཊྛེ ནཱདིཊྛེ, ཀཱམཱནམབྷིཔཏྠཡེ’’ཏི.
ཏཏྠ ཡོ ནེཝ དིཊྛེ ནཱདིཊྛེཏི ཡོ ཨཧཾ ནེཝ དིཊྛེ མནུསྶལོཀེ, ནཱདིཊྛེ དེཝལོཀེ ཀཱམཱནཾ ཨབྷིཔཏྠེམི, ཏསྶ མམ ཨེཝཾ ཨེཀཝིཧཱརིནོ ཀོ ནུ པརིཔནྠོ ཨསྶཱཏི ཝདཏི.
ཨཐསྶ སོ པརིཔནྠེ དསྶེནྟོ གཱཐམཱཧ –
‘‘ནིདྡཱ ཏནྡཱི ཝིཛམྦྷིཏཱ, ཨརཏཱི བྷཏྟསམྨདོ;
ཨཱཝསནྟི སརཱིརཊྛཱ, བཧཱུ ཧི པརིཔནྠཡོ’’ཏི.
ཏཏྠ ནིདྡཱཏི ཀཔིནིདྡཱ. ཏནྡཱིཏི ཨཱལསིཡཾ. ཨརཏཱིཏི ཨུཀྐཎྛིཏཱ. བྷཏྟསམྨདོཏི བྷཏྟཔརིལཱ༹ཧོ. ཨིདཾ ཝུཏྟཾ ཧོཏི – ‘‘སམཎ, ཏྭཾ པཱསཱདིཀོ སུཝཎྞཝཎྞོ རཛྫཾ པཧཱཡ པབྦཛིཏོ’’ཏི ཝུཏྟེ ཏུཡ྄ཧཾ པཎཱིཏཾ ཨོཛཝནྟཾ པིཎྜཔཱཏཾ དསྶནྟི, སོ ཏྭཾ པཏྟཔཱུརཾ ཨཱདཱཡ ཡཱཝདཏྠཾ པརིབྷུཉྫིཏྭཱ པཎྞསཱལཾ པཝིསིཏྭཱ ཀཊྛཏྠརཎེ ནིཔཛྫིཏྭཱ ཀཱཀཙྪམཱནོ ནིདྡཾ ¶ ཨོཀྐམིཏྭཱ ཨནྟརཱ པབུདྡྷོ ཨཔརཱཔརཾ པརིཝཏྟིཏྭཱ ཧཏྠཔཱདེ པསཱརེཏྭཱ ཨུཊྛཱཡ ཙཱིཝརཝཾསཾ གཧེཏྭཱ ལགྒཙཱིཝརཾ ནིཝཱསེཏྭཱ ཨཱལསིཡོ ཧུཏྭཱ ནེཝ སམྨཛྫནིཾ ཨཱདཱཡ སམྨཛྫིསྶསི, ན པཱནཱིཡཾ ཨཱཧརིསྶསི, པུན ནིཔཛྫིཏྭཱ ནིདྡཱཡིསྶསི ¶ , ཀཱམཝིཏཀྐཾ ཝིཏཀྐེསྶསི, ཏདཱ པབྦཛྫཱཡ ཨུཀྐཎྛིསྶསི, བྷཏྟཔརིལཱ༹ཧོ ཏེ བྷཝིསྶཏཱིཏི. ཨཱཝསནྟི སརཱིརཊྛཱཏི ཨིམེ ཨེཏྟཀཱ པརིཔནྠཱ ཏཝ སརཱིརཊྛཀཱ ཧུཏྭཱ ནིཝསནྟི, སརཱིརེཡེཝ ཏེ ནིབྦཏྟནྟཱིཏི དསྶེཏི.
ཨཐསྶ མཧཱསཏྟོ ཐུཏིཾ ཀརོནྟོ གཱཐམཱཧ –
‘‘ཀལྱཱཎཾ ཝཏ མཾ བྷཝཾ, བྲཱཧྨཎ མནུསཱསཏི;
བྲཱཧྨཎ ཏེཝ པུཙྪཱམི, ཀོ ནུ ཏྭམསི མཱརིསཱ’’ཏི.
ཏཏྠ ¶ བྲཱཧྨཎ མནུསཱསཏཱིཏི བྲཱཧྨཎ, ཀལྱཱཎཾ ཝཏ མཾ བྷཝཾ ཨནུསཱསཏི.
ཏཏོ ཏཱཔསོ ཨཱཧ –
‘‘ནཱརདོ ཨིཏི མེ ནཱམཾ, ཀསྶཔོ ཨིཏི མཾ ཝིདཱུ;
བྷོཏོ སཀཱསམཱགཙྪིཾ, སཱདྷུ སབྦྷི སམཱགམོ.
‘‘ཏསྶ ཏེ སབྦོ ཨཱནནྡོ, ཝིཧཱརོ ཨུཔཝཏྟཏུ;
ཡཾ ཨཱུནཾ ཏཾ པརིཔཱུརེཧི, ཁནྟིཡཱ ཨུཔསམེན ཙ.
‘‘པསཱརཡ སནྣཏཉྩ, ཨུནྣཏཉྩ པསཱརཡ;
ཀམྨཾ ཝིཛྫཉྩ དྷམྨཉྩ, སཀྐཏྭཱན པརིབྦཛཱ’’ཏི.
ཏཏྠ ཝིདཱུཏི གོཏྟེན མཾ ‘‘ཀསྶཔོ’’ཏི ཛཱནནྟི. སབྦྷཱིཏི པཎྜིཏེཧི སདྡྷིཾ སམཱགམོ ནཱམ སཱདྷུ ཧོཏཱིཏི ཨཱགཏོམྷི. ཨཱནནྡོཏི ཏསྶ ཏཝ ཨིམིསྶཱ པབྦཛྫཱཡ ཨཱནནྡོ ཏུཊྛི སོམནསྶམེཝ ཧོཏུ མཱ ཨུཀྐཎྛི. ཝིཧཱརོཏི ཙཏུབྦིདྷོ བྲཧྨཝིཧཱརོ. ཨུཔཝཏྟཏཱུཏི ནིབྦཏྟཏུ. ཡཾ ཨཱུནཾ ཏནྟི ཡཾ ཏེ སཱིལེན ཀསིཎཔརིཀམྨེན ཛྷཱནེན ཙ ཨཱུནཾ, ཏཾ ཨེཏེཧི སཱིལཱདཱིཧི པཱུརཡ. ཁནྟིཡཱ ཨུཔསམེན ཙཱཏི ‘‘ཨཧཾ རཱཛཔབྦཛིཏོ’’ཏི མཱནཾ ཨཀཏྭཱ ཨདྷིཝཱསནཁནྟིཡཱ ཙ ཀིལེསཱུཔསམེན ཙ སམནྣཱགཏོ ཧོཧི. པསཱརཡཱཏི མཱ ཨུཀྑིཔ མཱ པཏྠར, པཛཧཱཏི ཨཏྠོ. སནྣཏཉྩ ཨུནྣཏཉྩཱཏི ‘‘ཀོ ནཱམཱཧ’’ནྟིཨཱདིནཱ ནཡེན པཝཏྟཾ ཨོམཱནཉྩ ‘‘ཨཧམསྨི ¶ ཛཱཏིསམྤནྣོ’’ཏིཨཱདིནཱ ནཡེན པཝཏྟཾ ཨཏིམཱནཉྩ. ཀམྨནྟི དསཀུསལཀམྨཔཐཾ. ཝིཛྫནྟི པཉྩཨབྷིཉྙཱ-ཨཊྛསམཱཔཏྟིཉཱཎཾ. དྷམྨནྟི ཀསིཎཔརིཀམྨསངྑཱཏཾ སམཎདྷམྨཾ. སཀྐཏྭཱན པརིབྦཛཱཏི ཨེཏེ གུཎེ སཀྐཏྭཱ ཝཏྟསྶུ, ཨེཏེ ཝཱ གུཎེ སཀྐཏྭཱ དལ༹ྷཾ སམཱདཱཡ པརིབྦཛ, པབྦཛྫཾ པཱལེཧི, མཱ ཨུཀྐཎྛཱིཏི ཨཏྠོ.
ཨེཝཾ སོ མཧཱསཏྟཾ ཨོཝདིཏྭཱ ཨཱཀཱསེན སཀཊྛཱནམེཝ གཏོ. ཏསྨིཾ གཏེ ཨཔརོཔི མིགཱཛིནོ ནཱམ ཏཱཔསོ ཏཐེཝ སམཱཔཏྟིཏོ ཝུཊྛཱཡ ཨོལོཀེནྟོ བོདྷིསཏྟཾ དིསྭཱ ‘‘མཧཱཛནཾ ནིཝཏྟནཏྠཱཡ ཏསྶ ཨོཝཱདཾ དསྶཱམཱི’’ཏི ཏཏྠེཝཱགནྟྭཱ ཨཱཀཱསེ ཨཏྟཱནཾ དསྶེནྟོ ཨཱཧ –
‘‘བཧཱུ ¶ ¶ ཧཏྠཱི ཙ ཨསྶེ ཙ, ནགརེ ཛནཔདཱནི ཙ;
ཧིཏྭཱ ཛནཀ པབྦཛིཏོ, ཀཔཱལེ རཏིམཛ྄ཛྷགཱ.
‘‘ཀཙྩི ནུ ཏེ ཛཱནཔདཱ, མིཏྟཱམཙྩཱ ཙ ཉཱཏཀཱ;
དུབྦྷིམཀཾསུ ཛནཀ, ཀསྨཱ ཏེཏཾ ཨརུཙྩཐཱ’’ཏི.
ཏཏྠ ཀཔཱལེཏི མཏྟིཀཱཔཏྟཾ སནྡྷཱཡཱཧ. ཨིདཾ ཝུཏྟཾ ཧོཏི – མཧཱརཱཛ, ཏྭཾ ཨེཝརཱུཔཾ ཨིསྶརིཡཱདྷིཔཙྩཾ ཚཌྜེཏྭཱ པབྦཛིཏོ ཨིམསྨིཾ ཀཔཱལེ རཏིཾ ཨཛ྄ཛྷགཱ ཨདྷིགཏོཏི པབྦཛྫཱཀཱརཎཾ པུཙྪནྟོ ཨེཝམཱཧ. དུབྦྷིནྟི ཀིཾ ནུ ཨེཏེ ཏཝ ཨནྟརེ ཀིཉྩི ཨཔརཱདྷཾ ཀརིཾསུ, ཀསྨཱ ཏཝ ཨེཝརཱུཔཾ ཨིསྶརིཡསུཁཾ པཧཱཡ ཨེཏཾ ཀཔཱལམེཝ ཨརུཙྩིཏྠཱཏི.
ཏཏོ མཧཱསཏྟོ ཨཱཧ –
‘‘ན མིགཱཛིན ཛཱཏུཙྪེ, ཨཧཾ ཀཉྩི ཀུདཱཙནཾ;
ཨདྷམྨེན ཛིནེ ཉཱཏིཾ, ན ཙཱཔི ཉཱཏཡོ མམ’’ནྟི.
ཏཏྠ ན མིགཱཛིནཱཏི ཨམྦྷོ མིགཱཛིན ཛཱཏུཙྪེ ཨེཀཾསེནེཝ ཨཧཾ ཀཉྩི ཉཱཏིཾ ཀུདཱཙནཾ ཀིསྨིཉྩི ཀཱལེ ཨདྷམྨེན ན ཛིནཱམི. ཏེཔི ཙ ཉཱཏཡོ མཾ ཨདྷམྨེན ན ཛིནནྟེཝ, ཨིཏི ན ཀོཙི མཡི དུབྦྷིཾ ནཱམ ཨཀཱསཱིཏི ཨཏྠོ.
ཨེཝམསྶ ¶ པཉྷཾ པཊིཀྑིཔིཏྭཱ ཨིདཱནི ཡེན ཀཱརཎེན པབྦཛིཏོ, ཏཾ དསྶེནྟོ ཨཱཧ –
‘‘དིསྭཱན ལོཀཝཏྟནྟཾ, ཁཛྫནྟཾ ཀདྡམཱིཀཏཾ;
ཧཉྙརེ བཛ྄ཛྷརེ ཙེཏྠ, ཡཏྠ སནྣོ པུཐུཛྫནོ;
ཨེཏཱཧཾ ཨུཔམཾ ཀཏྭཱ, བྷིཀྑཀོསྨི མིགཱཛིནཱ’’ཏི.
ཏཏྠ དིསྭཱན ལོཀཝཏྟནྟནྟི ཝཊྚཱནུགཏསྶ བཱལལོཀསྶ ཝཏྟཾ ཏནྟིཾ པཝེཎིཾ ཨཧམདྡསཾ, ཏཾ དིསྭཱ པབྦཛིཏོམྷཱིཏི དཱིཔེཏི. ཁཛྫནྟཾ ཀདྡམཱིཀཏནྟི ཀིལེསེཧི ཁཛྫནྟཾ ཏེཧེཝ ཙ ཀདྡམཱིཀཏཾ ལོཀཾ དིསྭཱ. ཡཏྠ སནྣོ པུཐུཛྫནོཏི ཡམྷི ཀིལེསཝཏྠུམྷི སནྣོ ལགྒོ པུཐུཛྫནོ, ཏཏྠ ལགྒཱ བཧཱུ སཏྟཱ ཧཉྙནྟི ཙེཝ ཨནྡུབནྡྷནཱདཱིཧི ཙ བཛ྄ཛྷནྟི. ཨེཏཱཧནྟི ཨཧམྤི ¶ སཙེ ཨེཏྠ བཛ྄ཛྷིསྶཱམི, ཨིམེ སཏྟཱ ཝིཡ ཧཉྙིསྶཱམི ཙེཝ བཛ྄ཛྷིསྶཱམི ཙཱཏི ཨེཝཾ ཨེཏདེཝ ཀཱརཎཾ ཨཏྟནོ ཨུཔམཾ ཀཏྭཱ ཀདྡམཱིཀཏཾ ལོཀཾ དིསྭཱ བྷིཀྑཀོ ཛཱཏོཏི ཨཏྠོ. མིགཱཛིནཱཏི ཏཾ ནཱམེན ཨཱལཔཏི. ཀཐཾ པན ཏེན ཏསྶ ནཱམཾ ཉཱཏནྟི? པཊིསནྠཱརཀཱལེ པཋམམེཝ པུཙྪིཏཏྟཱ.
ཏཱཔསོ ¶ ཏཾ ཀཱརཎཾ ཝིཏྠཱརཏོ སོཏུཀཱམོ ཧུཏྭཱ གཱཐམཱཧ –
‘‘ཀོ ནུ ཏེ བྷགཝཱ སཏྠཱ, ཀསྶེཏཾ ཝཙནཾ སུཙི;
ན ཧི ཀཔྤཾ ཝཱ ཝིཛྫཾ ཝཱ, པཙྩཀྑཱཡ རཐེསབྷ;
སམཎཾ ཨཱཧུ ཝཏྟནྟཾ, ཡཐཱ དུཀྑསྶཏིཀྐམོ’’ཏི.
ཏཏྠ ཀསྶེཏནྟི ཨེཏཾ ཏཡཱ ཝུཏྟཾ སུཙིཝཙནཾ ཀསྶ ཝཙནཾ ནཱམ. ཀཔྤནྟི ཀཔྤེཏྭཱ ཀཔྤེཏྭཱ པཝཏྟིཏཱནཾ ཨབྷིཉྙཱསམཱཔཏྟཱིནཾ ལཱབྷིཾ ཀམྨཝཱདིཾ ཏཱཔསཾ. ཝིཛྫནྟི ཨཱསཝཀྑཡཉཱཎཝིཛྫཱཡ སམནྣཱགཏཾ པཙྩེཀབུདྡྷཾ. ཨིདཾ ཝུཏྟཾ ཧོཏི – རཐེསབྷ མཧཱརཱཛ, ན ཧི ཀཔྤསམཎཾ ཝཱ ཝིཛྫཱསམཎཾ ཝཱ པཙྩཀྑཱཡ ཏསྶོཝཱདཾ ཝིནཱ ཨེཝཾ པཊིཔཛྫིཏུཾ སཀྐཱ. ཡཐཱ དུཀྑསྶ ཨཏིཀྐམོ ཧོཏི, ཨེཝཾ ཝཏྟནྟཾ སམཎཾ ཨཱཧུ. ཏེསཾ པན ཝཙནཾ སུཏྭཱ སཀྐཱ ཨེཝཾ པཊིཔཛྫིཏུཾ, ཏསྨཱ ཝདེཧི, ཀོ ནུ ཏེ བྷགཝཱ སཏྠཱཏི.
མཧཱསཏྟོ ཨཱཧ –
‘‘ན མིགཱཛིན ཛཱཏུཙྪེ, ཨཧཾ ཀཉྩི ཀུདཱཙནཾ;
སམཎཾ བྲཱཧྨཎཾ ཝཱཔི, སཀྐཏྭཱ ཨནུཔཱཝིསི’’ནྟི.
ཏཏྠ ¶ སཀྐཏྭཱཏི པབྦཛྫཱཡ གུཎཔུཙྪནཏྠཱཡ པཱུཛེཏྭཱ. ཨནུཔཱཝིསིནྟི ན ཀཉྩི ཨནུཔཝིཊྛཔུབྦོསྨི, ན མཡཱ ཨཉྙོ ཀོཙི སམཎོ པུཙྪིཏཔུབྦོཏི ཝདཏི. ཨིམིནཱ ཧི པཙྩེཀབུདྡྷཱནཾ སནྟིཀེ དྷམྨཾ སུཎནྟེནཔི ན ཀདཱཙི ཨོདིསྶཀཝསེན པབྦཛྫཱཡ གུཎོ པུཙྪིཏཔུབྦོ, ཏསྨཱ ཨེཝམཱཧ.
ཨེཝཉྩ པན ཝཏྭཱ ཡེན ཀཱརཎེན པབྦཛིཏོ, ཏཾ ཨཱདིཏོ པཊྛཱཡ དཱིཔེནྟོ ཨཱཧ –
‘‘མཧཏཱ ¶ ཙཱནུབྷཱཝེན, གཙྪནྟོ སིརིཡཱ ཛལཾ;
གཱིཡམཱནེསུ གཱིཏེསུ, ཝཛྫམཱནེསུ ཝགྒུསུ.
‘‘ཏཱུརིཡཏཱལ༹སངྒྷུཊྛེ, སམྨཏཱལསམཱཧིཏེ;
ས མིགཱཛིན མདྡཀྑིཾ, ཕལིཾ ཨམྦཾ ཏིརོཙྪདཾ;
ཧཉྙམཱནཾ མནུསྶེཧི, ཕལཀཱམེཧི ཛནྟུབྷི.
‘‘སོ ཁོཧཾ ཏཾ སིརིཾ ཧིཏྭཱ, ཨོརོཧིཏྭཱ མིགཱཛིན;
མཱུལཾ ཨམྦསྶུཔཱགཙྪིཾ, ཕལིནོ ནིཔྥལསྶ ཙ.
‘‘ཕལིཾ ཨམྦཾ ཧཏཾ དིསྭཱ, ཝིདྡྷསྟཾ ཝིནལཱི༹ཀཏཾ;
ཨཐེཀཾ ཨིཏརཾ ཨམྦཾ, ནཱིལོབྷཱསཾ མནོརམཾ.
‘‘ཨེཝམེཝ ¶ ནཱུནམྷེཔི, ཨིསྶརེ བཧུཀཎྚཀེ;
ཨམིཏྟཱ ནོ ཝདྷིསྶནྟི, ཡཐཱ ཨམྦོ ཕལཱི ཧཏོ.
‘‘ཨཛིནམྷི ཧཉྙཏེ དཱིཔི, ནཱགོ དནྟེཧི ཧཉྙཏེ;
དྷནམྷི དྷནིནོ ཧནྟི, ཨནིཀེཏམསནྠཝཾ;
ཕལཱི ཨམྦོ ཨཕལོ ཙ, ཏེ སཏྠཱརོ ཨུབྷོ མམཱ’’ཏི.
ཏཏྠ ཝགྒུསཱུཏི མདྷུརསྶརེསུ ཏཱུརིཡེསུ ཝཛྫམཱནེསུ. ཏཱུརིཡཏཱལ༹སངྒྷུཊྛེཏི ཏཱུརིཡཱནཾ ཏཱལི༹ཏེཧི སངྒྷུཊྛེ ཨུཡྻཱནེ. སམྨཏཱལསམཱཧིཏེཏི སམྨེཧི ཙ ཏཱལེཧི ཙ སམནྣཱགཏེ. ས མིགཱཛིནཱཏི མིགཱཛིན, སོ ཨཧཾ ཨདཀྑིཾ. ཕལིཾ ཨམྦནྟི ཕལིཏཾ ཨམྦརུཀྑནྟི ཨཏྠོ. ཏིརོཙྪདནྟི ཏིརོཔཱཀཱརཾ ཨུཡྻཱནསྶ ཨནྟོཋིཏཾ བཧིཔཱཀཱརཾ ནིསྶཱཡ ཛཱཏཾ ཨམྦརུཀྑཾ. ཧཉྙམཱནནྟི པོཐིཡམཱནཾ. ཨོརོཧིཏྭཱཏི ཧཏྠིཀྑནྡྷཱ ཨོཏརིཏྭཱ. ཝིནལཱི༹ཀཏནྟི ནིཔཏྟནལ༹ཾ ཀཏཾ.
ཨེཝམེཝཱཏི ¶ ཨེཝཾ ཨེཝ. ཕལཱིཏི ཕལསམྤནྣོ. ཨཛིནམྷཱིཏི ཙམྨཏྠཱཡ ཙམྨཀཱརཎཱ. དནྟེཧཱིཏི ཨཏྟནོ དནྟེཧི, ཧཉྙཏེ དནྟནིམིཏྟཾ ཧཉྙཏེཏི ཨཏྠོ. ཧནྟཱིཏི ཧཉྙཏི. ཨནིཀེཏམསནྠཝནྟི ཡོ པན ནིཀེཏཾ པཧཱཡ པབྦཛིཏཏྟཱ ཨནིཀེཏོ ནཱམ སཏྟསངྑཱརཝཏྠུཀསྶ ཏཎྷཱསནྠཝསྶ ¶ ཨབྷཱཝཱ ཨསནྠཝོ ནཱམ, ཏཾ ཨནིཀེཏཾ ཨསནྠཝཾ ཀོ ཧནིསྶཏཱིཏི ཨདྷིཔྤཱཡོ. ཏེ སཏྠཱརོཏི ཏེ དྭེ རུཀྑཱ མམ སཏྠཱརོ ཨཧེསུནྟི ཝདཏི.
ཏཾ སུཏྭཱ མིགཱཛིནོ ‘‘ཨཔྤམཏྟོ ཧོཧཱི’’ཏི རཉྙོ ཨོཝཱདཾ དཏྭཱ སཀཊྛཱནམེཝ གཏོ. ཏསྨིཾ གཏེ སཱིཝལིདེཝཱི རཉྙོ པཱདམཱུལེ པཏིཏྭཱ ཨཱཧ –
‘‘སབྦོ ཛནོ པབྱཐིཏོ, རཱཛཱ པབྦཛིཏོ ཨིཏི;
ཧཏྠཱརོཧཱ ཨནཱིཀཊྛཱ, རཐིཀཱ པཏྟིཀཱརཀཱ.
‘‘ཨསྶཱསཡིཏྭཱ ཛནཏཾ, ཋཔཡིཏྭཱ པཊིཙྪདཾ;
པུཏྟཾ རཛྫེ ཋཔེཏྭཱན, ཨཐ པཙྪཱ པབྦཛིསྶསཱི’’ཏི.
ཏཏྠ པབྱཐིཏོཏི བྷཱིཏོ ཨུཏྲསྟོ. པཊིཙྪདནྟི ཨམྷེ ཌཡ྄ཧམཱནེཔི ཝིལུཔྤམཱནེཔི རཱཛཱ ན ཨོལོཀེཏཱིཏི པབྱཐིཏསྶ མཧཱཛནསྶ ཨཱཝརཎཾ རཀྑཾ ཋཔེཏྭཱ པུཏྟཾ དཱིགྷཱཝུཀུམཱརཾ རཛྫེ ཋཔེཏྭཱ ཨབྷིསིཉྩིཏྭཱ པཙྪཱ པབྦཛིསྶསཱིཏི ཨཏྠོ.
ཏཏོ བོདྷིསཏྟོ ཨཱཧ –
‘‘ཙཏྟཱ མཡཱ ཛཱནཔདཱ, མིཏྟཱམཙྩཱ ཙ ཉཱཏཀཱ;
སནྟི ¶ པུཏྟཱ ཝིདེཧཱནཾ, དཱིགྷཱཝུ རཊྛཝཌྜྷནོ;
ཏེ རཛྫཾ ཀཱརཡིསྶནྟི, མིཐིལཱཡཾ པཛཱཔཏཱི’’ཏི.
ཏཏྠ སནྟི པུཏྟཱཏི སཱིཝལི སམཎཱནཾ པུཏྟཱ ནཱམ ནཏྠི, ཝིདེཧརཊྛཝཱསཱིནཾ པན པུཏྟཱ དཱིགྷཱཝུ ཨཏྠི, ཏེ རཛྫཾ ཀཱརཡིསྶནྟི. པཛཱཔཏཱིཏི དེཝིཾ ཨཱལཔཏི.
དེཝཱི ¶ ཨཱཧ ‘‘དེཝ, ཏུམྷེསུ ཏཱཝ པབྦཛིཏེསུ ཨཧཾ ཀིཾ ཀརོམཱི’’ཏི. ཨཐ ནཾ སོ ‘‘བྷདྡེ, ཨཧཾ ཏཾ ཨནུསིཀྑཱམི, ཝཙནཾ མེ ཀརོཧཱི’’ཏི ཝཏྭཱ གཱཐམཱཧ –
‘‘ཨེཧི ¶ ཏཾ ཨནུསིཀྑཱམི, ཡཾ ཝཱཀྱཾ མམ རུཙྩཏི;
རཛྫཾ ཏུཝཾ ཀཱརཡསི, པཱཔཾ དུཙྩརིཏཾ བཧུཾ;
ཀཱཡེན ཝཱཙཱ མནསཱ, ཡེན གཙྪསི དུགྒཏིཾ.
‘‘པརདིནྣཀེན པརནིཊྛིཏེན, པིཎྜེན ཡཱཔེཧི ས དྷཱིརདྷམྨོ’’ཏི.
ཏཏྠ ཏུཝནྟི ཏྭཾ པུཏྟསྶ ཚཏྟཾ ཨུསྶཱཔེཏྭཱ ‘‘མམ པུཏྟསྶ རཛྫ’’ནྟི རཛྫཾ ཨནུསཱསམཱནཱ བཧུཾ པཱཔཾ ཀརིསྶསི. གཙྪསཱིཏི ཡེན ཀཱཡཱདཱིཧི ཀཏེན བཧུཔཱཔེན དུགྒཏིཾ གམིསྶསི. ས དྷཱིརདྷམྨོཏི པིཎྜིཡཱལོཔེན ཡཱཔེཏབྦཾ, ཨེས པཎྜིཏཱནཾ དྷམྨོཏི.
ཨེཝཾ མཧཱསཏྟོ ཏསྶཱ ཨོཝཱདཾ ཨདཱསི. ཏེསཾ ཨཉྙམཉྙཾ སལླཔནྟཱནཾ གཙྪནྟཱནཉྙེཝ སཱུརིཡོ ཨཏྠངྒཏོ. དེཝཱི པཏིརཱུཔེ ཋཱནེ ཁནྡྷཱཝཱརཾ ནིཝཱསཱཔེསི. མཧཱསཏྟོཔི ཨེཀཾ རུཀྑམཱུལཾ ཨུཔགཏོ. སོ ཏཏྠ རཏྟིཾ ཝསིཏྭཱ པུནདིཝསེ སརཱིརཔཊིཛགྒནཾ ཀཏྭཱ མགྒཾ པཊིཔཛྫི. དེཝཱིཔི ‘‘སེནཱ པཙྪཏོཝ ཨཱགཙྪཏཱུ’’ཏི ཝཏྭཱ ཏསྶ པཙྪཏོཝ ཨཧོསི. ཏེ བྷིཀྑཱཙཱརཝེལཱཡཾ ཐཱུཎཾ ནཱམ ནགརཾ པཱཔུཎིཾསུ. ཏསྨིཾ ཁཎེ ཨནྟོནགརེ ཨེཀོ པུརིསོ སཱུཎཏོ མཧནྟཾ མཾསཁཎྜཾ ཀིཎིཏྭཱ སཱུལེན ཨངྒཱརེསུ པཙཱཔེཏྭཱ ནིབྦཱཔནཏྠཱཡ ཕལཀཀོཊིཡཾ ཋཔེཏྭཱ ཨཊྛཱསི. ཏསྶ ཨཉྙཝིཧིཏསྶ ཨེཀོ སུནཁོ ཏཾ ཨཱདཱཡ པལཱཡི. སོ ཉཏྭཱ ཏཾ ཨནུབནྡྷནྟོ ཡཱཝ བཧིདཀྑིཎདྭཱརཾ གནྟྭཱ ནིབྦིནྡོ ནིཝཏྟི. རཱཛཱ ཙ དེཝཱི ཙ སུནཁསྶ པུརཏོ གཙྪནྟཱ དྭིདྷཱ ཨཧེསུཾ ¶ . སོ བྷཡེན མཾསཁཎྜཾ ཚཌྜེཏྭཱ པལཱཡི.
མཧཱསཏྟོ ཏཾ དིསྭཱ ཙིནྟེསི ‘‘ཨཡཾ སུནཁོ ཚཌྜེཏྭཱ ཨནཔེཀྑོ པལཱཏོ, ཨཉྙོཔིསྶ སཱམིཀོ ན པཉྙཱཡཏི, ཨེཝརཱུཔོ ཨནཝཛྫོ པཾསུཀཱུལཔིཎྜཔཱཏོ ནཱམ ནཏྠི, པརིབྷུཉྫིསྶཱམི ན’’ནྟི. སོ མཏྟིཀཱཔཏྟཾ ནཱིཧརིཏྭཱ ¶ ཏཾ མཾསཁཎྜཾ ཨཱདཱཡ པུཉྪིཏྭཱ པཏྟེ པཀྑིཔིཏྭཱ ཨུདཀཕཱསུཀཊྛཱནཾ གནྟྭཱ པརིབྷུཉྫིཏུཾ ཨཱརབྷི. ཏཏོ དེཝཱི ‘‘སཙེ ཨེས རཛྫེནཏྠིཀོ བྷཝེཡྻ, ཨེཝརཱུཔཾ ཛེགུཙྪཾ པཾསུམཀྑིཏཾ སུནཁུཙྪིཊྛཀཾ ན ཁཱདེཡྻ. སཙེ ཁཱདེཡྻ, ཨིདཱནེས ཨམྷཱཀཾ སཱམིཀོ ན བྷཝིསྶཏཱི’’ཏི ཙིནྟེཏྭཱ ‘‘མཧཱརཱཛ, ཨེཝརཱུཔཾ ཛེགུཙྪཾ ཁཱདསཱི’’ཏི ཨཱཧ. ‘‘དེཝི, ཏྭཾ ཨནྡྷབཱལཏཱཡ ཨིམསྶ པིཎྜཔཱཏསྶ ཝིསེསཾ ན ཛཱནཱསཱི’’ཏི ཝཏྭཱ ཏསྶེཝ པཏིཏཊྛཱནཾ པཙྩཝེཀྑིཏྭཱ ཨམཏཾ ཝིཡ པརིབྷུཉྫིཏྭཱ མུཁཾ ཝིཀྑཱལེཏྭཱ ཧཏྠེ དྷོཝཏི. ཏསྨིཾ ཁཎེ དེཝཱི ནིནྡམཱནཱ ཨཱཧ –
‘‘ཡོཔི ¶ ཙཏུཏྠེ བྷཏྟཀཱལེ ན བྷུཉྫེ, ཨཛུཊྛམཱརཱིཝ ཁུདཱཡ མིཡྻེ;
ན ཏྭེཝ པིཎྜཾ ལུལི༹ཏཾ ཨནརིཡཾ, ཀུལཔུཏྟརཱུཔོ སཔྤུརིསོ ན སེཝེ;
ཏཡིདཾ ན སཱདྷུ ཏཡིདཾ ན སུཊྛུ, སུནཁུཙྪིཊྛཀཾ ཛནཀ བྷུཉྫསེ ཏུཝ’’ནྟི.
ཏཏྠ ཨཛུཊྛམཱརཱིཝཱཏི ཨནཱཐམརཎམེཝ. ལུལི༹ཏནྟི པཾསུམཀྑིཏཾ. ཨནརིཡནྟི ཨསུནྡརཾ. ན སེཝེཏི ན-ཀཱརོ པརིཔུཙྪནཏྠེ ནིཔཱཏོ. ཨིདཾ ཝུཏྟཾ ཧོཏི – སཙེ ཙཏུཏྠེཔི བྷཏྟཀཱལེ ན བྷུཉྫེཡྻ, ཁུདཱཡ མརེཡྻ, ནནུ ཨེཝཾ སནྟེཔི ཀུལཔུཏྟརཱུཔོ སཔྤུརིསོ ཨེཝརཱུཔཾ པིཎྜཾ ན ཏྭེཝ སེཝེཡྻཱཏི. ཏཡིདནྟི ཏཾ ཨིདཾ.
མཧཱསཏྟོ ཨཱཧ –
‘‘ན ཙཱཔི མེ སཱིཝལི སོ ཨབྷཀྑོ, ཡཾ ཧོཏི ཙཏྟཾ གིཧིནོ སུནསྶ ཝཱ;
ཡེ ¶ ཀེཙི བྷོགཱ ཨིདྷ དྷམྨལདྡྷཱ, སབྦོ སོ བྷཀྑོ ཨནཝཡོཏི ཝུཏྟོ’’ཏི.
ཏཏྠ ཨབྷཀྑོཏི སོ པིཎྜཔཱཏོ མམ ཨབྷཀྑོ ནཱམ ན ཧོཏི. ཡཾ ཧོཏཱིཏི ཡཾ གིཧིནོ ཝཱ སུནསྶ ཝཱ ཙཏྟཾ ཧོཏི, ཏཾ པཾསུཀཱུལཾ ནཱམ ཨསཱམིཀཏྟཱ ཨནཝཛྫམེཝ ཧོཏི. ཡེ ཀེཙཱིཏི ཏསྨཱ ཨཉྙེཔི ཡེ ¶ ཀེཙི དྷམྨེན ལདྡྷཱ བྷོགཱ, སབྦོ སོ བྷཀྑོ. ཨནཝཡོཏི ཨནུཨཝཡོ, ཨནུཔུནཔྤུནཾ ཨོལོཀིཡམཱནོཔི ཨཝཡོ པརིཔུཎྞགུཎོ ཨནཝཛྫོ, ཨདྷམྨལདྡྷཾ པན སཧསྶགྒྷནཀམྤི ཛིགུཙྪནཱིཡམེཝཱཏི.
ཨེཝཾ ཏེ ཨཉྙམཉྙཾ ཀཐེནྟཱཝ ཐཱུཎནགརདྭཱརཾ སམྤཱཔུཎིཾསུ. ཏཏྲ དཱརིཀཱསུ ཀཱིལ༹ནྟཱིསུ ཨེཀཱ ཀུམཱརིཀཱ ཁུདྡཀཀུལླཀེན ཝཱལུཀཾ པཔྥོཊེཏི. ཏསྶཱ ཨེཀསྨིཾ ཧཏྠེ ཨེཀཾ ཝལཡཾ, ཨེཀསྨིཾ དྭེ ཝལཡཱནི. ཏཱནི ཨཉྙམཉྙཾ སངྒྷཊྚེནྟི, ཨིཏརཾ ནིསྶདྡཾ. རཱཛཱ ཏཾ ཀཱརཎཾ ཉཏྭཱ ‘‘སཱིཝལིདེཝཱི མམ པཙྪཏོ ཙརཏི, ཨིཏྠཱི ཙ ནཱམ པབྦཛིཏསྶ མལཾ, ‘ཨཡཾ པབྦཛིཏྭཱཔི བྷརིཡཾ ཛཧིཏུཾ ན སཀྐོཏཱི’ཏི གརཧིསྶནྟི མཾ. སཙཱཡཾ ཀུམཱརིཀཱ པཎྜིཏཱ བྷཝིསྶཏི, སཱིཝལིདེཝིཡཱ ནིཝཏྟནཀཱརཎཾ ཀཐེསྶཏི, ཨིམིསྶཱ ཀཐཾ སུཏྭཱ སཱིཝལིདེཝིཾ ཨུཡྻོཛེསྶཱམཱི’’ཏི ཙིནྟེཏྭཱ ཨཱཧ –
‘‘ཀུམཱརིཀེ ཨུཔསེནིཡེ, ནིཙྩཾ ནིགྒལ༹མཎྜིཏེ;
ཀསྨཱ ཏེ ཨེཀོ བྷུཛོ ཛནཏི, ཨེཀོ ཏེ ན ཛནཏཱི བྷུཛོ’’ཏི.
ཏཏྠ ¶ ཨུཔསེནིཡེཏི མཱཏརཾ ཨུཔགནྟྭཱ སེནིཀེ. ནིགྒལ༹མཎྜིཏེཏི ཨགལིཏམཎྜནེན མཎྜནསཱིལིཀེཏི ཝདཏི. ཛནཏཱིཏི སདྡཾ ཀརོཏི.
ཀུམཱརིཀཱ ཨཱཧ –
‘‘ཨིམསྨིཾ མེ སམཎ ཧཏྠེ, པཊིམུཀྐཱ དུནཱིཝརཱ;
སངྒྷཱཏཱ ཛཱཡཏེ སདྡོ, དུཏིཡསྶེཝ སཱ གཏི.
‘‘ཨིམསྨིཾ མེ སམཎ ཧཏྠེ, པཊིམུཀྐོ ཨེཀནཱིཝརོ;
སོ ཨདུཏིཡོ ན ཛནཏི, མུནིབྷཱུཏོཝ ཏིཊྛཏི.
‘‘ཝིཝཱདཔྤཏྟོ དུཏིཡོ, ཀེནེཀོ ཝིཝདིསྶཏི;
ཏསྶ ཏེ སགྒཀཱམསྶ, ཨེཀཏྟམུཔརོཙཏ’’ནྟི.
ཏཏྠ ¶ ¶ དུནཱིཝརཱཏི དྭེ ཝལཡཱནི. སངྒྷཱཏཱཏི སཾཧནནཏོ སངྒྷཊྚནཏོཏི ཨཏྠོ. གཏཱིཏི ནིབྦཏྟི. དུཏིཡསྶེཝ ཧི ཨེཝརཱུཔཱ ནིབྦཏྟི ཧོཏཱིཏི ཨཏྠོ. སོཏི སོ ནཱིཝརོ. མུནིབྷཱུཏོཝཱཏི པཧཱིནསབྦཀིལེསོ ཨརིཡཔུགྒལོ ཝིཡ ཏིཊྛཏི. ཝིཝཱདཔྤཏྟོཏི སམཎ དུཏིཡཀོ ནཱམ ཝིཝཱདམཱཔནྣོ ཧོཏི, ཀལཧཾ ཀརོཏི, ནཱནཱགཱཧཾ གཎྷཱཏི. ཀེནེཀོཏི ཨེཀཀོ པན ཀེན སདྡྷིཾ ཝིཝདིསྶཏི. ཨེཀཏྟམུཔརོཙཏནྟི ཨེཀཱིབྷཱཝོ ཏེ རུཙྩཏུ. སམཎཱ ནཱམ བྷགིནིམྤི ཨཱདཱཡ ན ཙརནྟི, ཀིཾ པན ཏྭཾ ཨེཝརཱུཔཾ ཨུཏྟམརཱུཔདྷརཾ བྷརིཡཾ ཨཱདཱཡ ཝིཙརསི, ཨཡཾ ཏེ ཨནྟརཱཡཾ ཀརིསྶཏི, ཨིམཾ ནཱིཧརིཏྭཱ ཨེཀཀོཝ སམཎཀམྨཾ ཀརོཧཱིཏི ནཾ ཨོཝདཏི.
སོ ཏསྶཱ ཀུམཱརིཀཱཡ ཝཙནཾ སུཏྭཱ པཙྩཡཾ ལབྷིཏྭཱ དེཝིཡཱ སདྡྷིཾ ཀཐེནྟོ ཨཱཧ –
‘‘སུཎཱསི སཱིཝལི ཀཐཱ, ཀུམཱརིཡཱ པཝེདིཏཱ;
པེསིཡཱ མཾ གརཧིཏྠོ, དུཏིཡསྶེཝ སཱ གཏི.
‘‘ཨཡཾ དྭེདྷཱཔཐོ བྷདྡེ, ཨནུཙིཎྞོ པཐཱཝིཧི;
ཏེསཾ ཏྭཾ ཨེཀཾ གཎྷཱཧི, ཨཧམེཀཾ པུནཱཔརཾ.
‘‘མཱཝཙ ¶ མཾ ཏྭཾ ‘པཏི མེ’ཏི, ནཱཧཾ ‘བྷརིཡཱ’ཏི ཝཱ པུནཱ’’ཏི.
ཏཏྠ ཀུམཱརིཡཱ པཝེདིཏཱཏི ཀུམཱརིཀཱཡ ཀཐིཏཱ. པེསིཡཱཏི སཙཱཧཾ རཛྫཾ ཀཱརེཡྻཾ, ཨེསཱ མེ པེསིཡཱ ཝཙནཀཱརིཀཱ བྷཝེཡྻ, ཨོལོཀེཏུམྤི མཾ ན ཝིསཧེཡྻ. ཨིདཱནི པན ཨཏྟནོ པེསིཡཾ ཝིཡ ཙ མཉྙཏི, ‘‘དུཏིཡསྶེཝ སཱ གཏཱི’’ཏི མཾ ཨོཝདཏི. ཨནུཙིཎྞོཏི ཨནུསཉྩརིཏོ. པཐཱཝིཧཱིཏི པཐིཀེཧི. ཨེཀནྟི ཏཝ རུཙྩནཀཾ ཨེཀཾ མགྒཾ གཎྷ, ཨཧཾ པན ཏཡཱ གཧིཏཱཝསེསཾ ཨཔརཾ གཎྷིསྶཱམི. མཱཝཙ མཾ ཏྭནྟི སཱིཝལི ཨིཏོ པཊྛཱཡ པུན མཾ ‘‘པཏི མེ’’ཏི མཱ ཨཝཙ, ཨཧཾ ཝཱ ཏྭཾ ‘‘བྷརིཡཱ མེ’’ཏི ནཱཝཙཾ.
སཱ ཏསྶ ཝཙནཾ སུཏྭཱ ‘‘དེཝ, ཏུམྷེ ཨུཏྟམཱ, དཀྑིཎམགྒཾ གཎྷཐ, ཨཧཾ ཝཱམམགྒཾ གཎྷིསྶཱམཱི’’ཏི ཝཏྭཱ ཐོཀཾ གནྟྭཱ སོཀཾ སནྡྷཱརེཏུཾ ཨསཀྐོནྟཱི པུནཱགནྟྭཱ རཉྙཱ སདྡྷིཾ ཀཐེནྟཱི ཨེཀཏོཝ ནགརཾ པཱཝིསི. ཏམཏྠཾ པཀཱསེནྟོ སཏྠཱ ཨུཔཌྜྷགཱཐམཱཧ –
‘‘ཨིམམེཝ ¶ ཀཐཡནྟཱ, ཐཱུཎཾ ནགརུཔཱགམུ’’ནྟི.
ཏཏྠ ¶ ནགརུཔཱགམུནྟི ནགརཾ པཝིཊྛཱ.
པཝིསིཏྭཱ ཙ པན མཧཱསཏྟོ པིཎྜཏྠཱཡ ཙརནྟོ ཨུསུཀཱརསྶ གེཧདྭཱརཾ པཏྟོ. སཱིཝལིདེཝཱིཔི ཨེཀམནྟཾ ཨཊྛཱསི. ཏསྨིཾ སམཡེ ཨུསུཀཱརོ ཨངྒཱརཀཔལླེ ཨུསུཾ ཏཱཔེཏྭཱ ཀཉྫིཡེན ཏེམེཏྭཱ ཨེཀཾ ཨཀྑིཾ ནིམཱིལེཏྭཱ ཨེཀེན ཨཀྑིནཱ ཨོལོཀེནྟོ ཨུཛུཾ ཀརོཏི. ཏཾ དིསྭཱ མཧཱསཏྟོ ཙིནྟེསི ‘‘སཙཱཡཾ པཎྜིཏོ བྷཝིསྶཏི, མཡ྄ཧཾ ཨེཀཾ ཀཱརཎཾ ཀཐེསྶཏི, པུཙྪིསྶཱམི ན’’ནྟི. སོ ཨུཔསངྐམིཏྭཱ པུཙྪཏི. ཏམཏྠཾ པཀཱསེནྟོ སཏྠཱ ཨཱཧ –
‘‘ཀོཊྛཀེ ཨུསུཀཱརསྶ, བྷཏྟཀཱལེ ཨུཔཊྛིཏེ;
ཏཏྲཱ ཙ སོ ཨུསུཀཱརོ, ཨེཀཾ དཎྜཾ ཨུཛུཾ ཀཏཾ;
ཨེཀཉྩ ཙཀྑུཾ ནིགྒཡ྄ཧ, ཛིམྷམེཀེན པེཀྑཏཱི’’ཏི.
ཏཏྠ ཀོཊྛཀེཏི བྷིཀྑཝེ, སོ རཱཛཱ ཨཏྟནོ བྷཏྟཀཱལེ ཨུཔཊྛིཏེ ཨུསུཀཱརསྶ ཀོཊྛཀེ ཨཊྛཱསི. ཏཏྲཱ ཙཱཏི ཏསྨིཉྩ ཀོཊྛཀེ. ནིགྒཡ྄ཧཱཏི ནིམཱིལེཏྭཱ. ཛིམྷམེཀེནཱཏི ཨེཀེན ཨཀྑིནཱ ཝངྐཾ སརཾ པེཀྑཏི.
ཨཐ ¶ ནཾ མཧཱསཏྟོ ཨཱཧ –
‘‘ཨེཝཾ ནོ སཱདྷུ པསྶསི, ཨུསུཀཱར སུཎོཧི མེ;
ཡདེཀཾ ཙཀྑུཾ ནིགྒཡ྄ཧ, ཛིམྷམེཀེན པེཀྑསཱི’’ཏི.
ཏསྶཏྠོ – སམྨ ཨུསུཀཱར, ཨེཝཾ ནུ ཏྭཾ སཱདྷུ པསྶསི, ཡཾ ཨེཀཾ ཙཀྑུཾ ནིམཱིལེཏྭཱ ཨེཀེན ཙཀྑུནཱ ཝངྐཾ སརཾ པེཀྑསཱིཏི.
ཨཐསྶ སོ ཀཐེནྟོ ཨཱཧ –
‘‘དྭཱིཧི སམཎ ཙཀྑཱུཧི, ཝིསཱལཾ ཝིཡ ཁཱཡཏི;
ཨསམྤཏྭཱ པརམཾ ལིངྒཾ, ནུཛུབྷཱཝཱཡ ཀཔྤཏི.
‘‘ཨེཀཉྩ ཙཀྑུཾ ནིགྒཡ྄ཧ, ཛིམྷམེཀེན པེཀྑཏོ;
སམྤཏྭཱ པརམཾ ལིངྒཾ, ཨུཛུབྷཱཝཱཡ ཀཔྤཏི.
‘‘ཝིཝཱདཔྤཏྟོ ¶ དུཏིཡོ, ཀེནེཀོ ཝིཝདིསྶཏི;
ཏསྶ ཏེ སགྒཀཱམསྶ, ཨེཀཏྟམུཔརོཙཏ’’ནྟི.
ཏཏྠ ཝིསཱལཾ ཝིཡཱཏི ཝིཏྠིཎྞཾ ཝིཡ ཧུཏྭཱ ཁཱཡཏི. ཨསམྤཏྭཱ པརམཾ ལིངྒནྟི པརཏོ ཝངྐཊྛཱནཾ ཨཔྤཏྭཱ. ནུཛུབྷཱཝཱཡཱཏི ན ཨུཛུབྷཱཝཱཡ. ཨིདཾ ཝུཏྟཾ ཧོཏི – ཝིསཱལེ ཁཱཡམཱནེ པརཏོ ཨུཛུཊྛཱནཾ ཝཱ ཝངྐཊྛཱནཾ ཝཱ ན པཱཔུཎེཡྻ, ཏསྨིཾ ཨསམྤཏྟེ ཨདིསྶམཱནེ ཨུཛུབྷཱཝཱཡ ཀིཙྩཾ ན ཀཔྤཏི ན སམྤཛྫཏཱིཏི. སམྤཏྭཱཏི ཙཀྑུནཱ པཏྭཱ ¶ , དིསྭཱཏི ཨཏྠོ. ཝིཝཱདཔྤཏྟོཏི ཡཐཱ དུཏིཡེ ཨཀྑིམྷི ཨུམྨཱིལིཏེ ལིངྒཾ ན པཉྙཱཡཏི, ཝངྐཊྛཱནམྤི ཨུཛུཀཾ པཉྙཱཡཏི, ཨུཛུཊྛཱནམྤི ཝངྐཾ པཉྙཱཡཏཱིཏི ཝིཝཱདོ ཧོཏི, ཨེཝཾ སམཎསྶཔི དུཏིཡོ ནཱམ ཝིཝཱདམཱཔནྣོ ཧོཏི, ཀལཧཾ ཀརོཏི, ནཱནཱགཱཧཾ གཎྷཱཏི. ཀེནེཀོཏི ཨེཀོ པན ཀེན སདྡྷིཾ ཝིཝདིསྶཏི. ཨེཀཏྟམུཔརོཙཏནྟི ཨེཀཱིབྷཱཝོ ཏེ རུཙྩཏུ. སམཎཱ ནཱམ བྷགིནིམྤི ཨཱདཱཡ ན ཙརནྟི, ཀིཾ པན ཏྭཾ ཨེཝརཱུཔཾ ཨུཏྟམརཱུཔདྷརཾ བྷརིཡཾ ཨཱདཱཡ ཝིཙརསི. ཨཡཾ ཏེ ཨནྟརཱཡཾ ཀརིསྶཏི, ཨིམཾ ནཱིཧརིཏྭཱ ཨེཀཀོཝ སམཎདྷམྨཾ ཀརོཧཱིཏི སོ ཏཾ ཨོཝདཏི.
ཨེཝམསྶ ¶ སོ ཨོཝཱདཾ དཏྭཱ ཏུཎྷཱི ཨཧོསི. མཧཱསཏྟོཔི པིཎྜཱཡ ཙརིཏྭཱ མིསྶཀབྷཏྟཾ སཾཀཌྜྷིཏྭཱ ནགརཱ ནིཀྑམིཏྭཱ ཨུདཀཕཱསུཀཊྛཱནེ ནིསཱིདིཏྭཱ ཀཏབྷཏྟཀིཙྩོ མུཁཾ ཝིཀྑཱལེཏྭཱ པཏྟཾ ཐཝིཀཱཡ ཨོསཱརེཏྭཱ སཱིཝལིདེཝིཾ ཨཱམནྟེཏྭཱ ཨཱཧ –
‘‘སུཎཱསི སཱིཝལི ཀཐཱ, ཨུསུཀཱརེན ཝེདིཏཱ;
པེསིཡཱ མཾ གརཧིཏྠོ, དུཏིཡསྶེཝ སཱ གཏི.
‘‘ཨཡཾ དྭེདྷཱཔཐོ བྷདྡེ, ཨནུཙིཎྞོ པཐཱཝིཧི;
ཏེསཾ ཏྭཾ ཨེཀཾ གཎྷཱཧི, ཨཧམེཀཾ པུནཱཔརཾ.
‘‘མཱཝཙ མཾ ཏྭཾ ‘པཏི མེ’ཏི, ནཱཧཾ ‘བྷརིཡཱ’ཏི ཝཱ པུནཱ’’ཏི.
ཏཏྠ སུཎཱསཱིཏི སུཎ, ཏྭཾ ཀཐཱ. ‘‘པེསིཡཱ མ’’ནྟི ཨིདཾ པན ཀུམཱརིཀཱཡ ཨོཝཱདམེཝ སནྡྷཱཡཱཧ.
སཱ ¶ ཀིར ‘‘མཱཝཙ མཾ ཏྭཾ ‘པཏི མེ’ཏི’’ ཝུཏྟཱཔི མཧཱསཏྟཾ ཨནུབནྡྷིཡེཝ. རཱཛཱ ནཾ ནིཝཏྟེཏུཾ ན སཀྐོཏི. མཧཱཛནོཔི ཨནུབནྡྷི. ཏཏོ པན ཨཊཝཱི ཨཝིདཱུརེ ཧོཏི. མཧཱསཏྟོ ནཱིལཝནརཱཛིཾ དིསྭཱ ཏཾ ནིཝཏྟེཏུཀཱམོ ཧུཏྭཱ གཙྪནྟོཡེཝ མགྒསམཱིཔེ མུཉྫཏིཎཾ ཨདྡས. སོ ཏཏོ ཨཱིསིཀཾ ལུཉྩིཏྭཱ ‘‘པསྶསི སཱིཝལི, ཨཡཾ ཨིདྷ པུན གྷཊེཏུཾ ན སཀྐཱ, ཨེཝམེཝ པུན མཡ྄ཧཾ ཏཡཱ སདྡྷིཾ སཾཝཱསོ ནཱམ གྷཊེཏུཾ ན སཀྐཱ’’ཏི ཝཏྭཱ ཨིམཾ ཨུཔཌྜྷགཱཐམཱཧ –
‘‘མུཉྫཱཝེསིཀཱ པཝཱལ༹ྷཱ, ཨེཀཱ ཝིཧར སཱིཝལཱི’’ཏི.
ཏཏྠ ཨེཀཱ ཝིཧརཱཏི ཨཧཾ ཨེཀཱིབྷཱཝེན ཝིཧརིསྶཱམི, ཏྭམྤི ཨེཀཱ ཝིཧརཱཧཱིཏི ཏསྶཱ ཨོཝཱདམདཱསི.
ཏཾ སུཏྭཱ སཱིཝལིདེཝཱི ‘‘ཨིཏོདཱནི པཊྛཱཡ ནཏྠི མཡ྄ཧཾ མཧཱཛནཀནརིནྡེན སདྡྷིཾ སཾཝཱསོ’’ཏི སོཀཾ སནྡྷཱརེཏུཾ ཨསཀྐོནྟཱི ཨུབྷོཧི ཧཏྠེཧི ཨུརཾ པཧརིཏྭཱ མཧཱམགྒེ ¶ པཏི. མཧཱསཏྟོ ཏསྶཱ ཝིསཉྙིབྷཱཝཾ ཉཏྭཱ པདཾ ཝིཀོཔེཏྭཱ ཨརཉྙཾ པཱཝིསི. ཨམཙྩཱ ཨཱགནྟྭཱ ཏསྶཱ སརཱིརཾ ཨུདཀེན སིཉྩིཏྭཱ ཧཏྠཔཱདེ པརིམཛྫིཏྭཱ སཉྙཾ ལབྷཱཔེསུཾ. སཱ ‘‘ཏཱཏཱ, ཀུཧིཾ རཱཛཱ’’ཏི ¶ པུཙྪི. ‘‘ནནུ ཏུམྷེཝ ཛཱནཱཐཱ’’ཏི? ‘‘ཨུཔདྷཱརེཐ ཏཱཏཱ’’ཏི. ཏེ ཨིཏོ ཙིཏོ དྷཱཝིཏྭཱ ཝིཙིནནྟཱཔི མཧཱསཏྟཾ ན པསྶིཾསུ. དེཝཱི མཧཱཔརིདེཝཾ པརིདེཝིཏྭཱ རཉྙོ ཋིཏཊྛཱནེ ཙེཏིཡཾ ཀཱརེཏྭཱ གནྡྷམཱལཱདཱིཧི པཱུཛེཏྭཱ ནིཝཏྟི. མཧཱསཏྟོཔི ཧིམཝནྟཾ པཝིསིཏྭཱ སཏྟཱཧབྦྷནྟརེཡེཝ པཉྩ ཨབྷིཉྙཱ ཙ, ཨཊྛ སམཱཔཏྟིཡོ ཙ ནིབྦཏྟེཏྭཱ པུན མནུསྶཔཐཾ ནཱགམི. དེཝཱིཔི ཨུསུཀཱརེན སདྡྷིཾ ཀཐིཏཊྛཱནེ, ཀུམཱརིཀཱཡ སདྡྷིཾ ཀཐིཏཊྛཱནེ, མཾསཔརིབྷོགཊྛཱནེ, མིགཱཛིནེན སདྡྷིཾ ཀཐིཏཊྛཱནེ, ནཱརདེན སདྡྷིཾ ཀཐིཏཊྛཱནེ ཙཱཏི སབྦཊྛཱནེསུ ཙེཏིཡཱནི ཀཱརེཏྭཱ གནྡྷམཱལཱདཱིཧི པཱུཛེཏྭཱ སེནངྒཔརིཝུཏཱ མིཐིལཾ པཏྭཱ ཨམྦཝནུཡྻཱནེ པུཏྟསྶ ཨབྷིསེཀཾ ཀཱརེཏྭཱ ཏཾ སེནངྒཔརིཝུཏཾ ནགརཾ པེསེཏྭཱ སཡཾ ཨིསིཔབྦཛྫཾ པབྦཛིཏྭཱ ཏཏྠེཝ ཨུཡྻཱནེ ཝསནྟཱི ཀསིཎཔརིཀམྨཾ ཀཏྭཱ ཛྷཱནཾ ནིབྦཏྟེཏྭཱ བྲཧྨལོཀཔརཱཡཎཱ ཨཧོསི. མཧཱསཏྟོཔི ཨཔརིཧཱིནཛ྄ཛྷཱནོ ཧུཏྭཱ བྲཧྨལོཀཔརཱཡཎོ ཨཧོསི.
སཏྠཱ ཨིམཾ དྷམྨདེསནཾ ཨཱཧརིཏྭཱ ‘‘ན, བྷིཀྑཝེ, ཨིདཱནེཝ, པུབྦེཔི ཏཐཱགཏོ མཧཱབྷིནིཀྑམནཾ ནིཀྑནྟོཡེཝཱ’’ཏི ཝཏྭཱ ཛཱཏཀཾ སམོདྷཱནེསི ¶ – ‘‘ཏདཱ སམུདྡརཀྑིཀཱ དེཝདྷཱིཏཱ ཨུཔྤལཝཎྞཱ ཨཧོསི, ནཱརདོ སཱརིཔུཏྟོ, མིགཱཛིནོ མོགྒལླཱནོ, ཀུམཱརིཀཱ ཁེམཱ བྷིཀྑུནཱི, ཨུསུཀཱརོ ཨཱནནྡོ, སཱིཝལིདེཝཱི རཱཧུལམཱཏཱ, དཱིགྷཱཝུཀུམཱརོ རཱཧུལོ, མཱཏཱཔིཏརོ མཧཱརཱཛཀུལཱནི, མཧཱཛནཀནརིནྡོ པན ཨཧམེཝ སམྨཱསམྦུདྡྷོ ཨཧོསི’’ནྟི.
མཧཱཛནཀཛཱཏཀཝཎྞནཱ དུཏིཡཱ.
[༥༤༠] ༣. སུཝཎྞསཱམཛཱཏཀཝཎྞནཱ
ཀོ ¶ ¶ ནུ མཾ ཨུསུནཱ ཝིཛ྄ཛྷཱིཏི ཨིདཾ སཏྠཱ ཛེཏཝནེ ཝིཧརནྟོ ཨེཀཾ མཱཏུཔོསཀབྷིཀྑུཾ ཨཱརབྦྷ ཀཐེསི. སཱཝཏྠིཡཾ ཀིར ཨཊྛཱརསཀོཊིཝིབྷཝསྶ ཨེཀསྶ སེཊྛིཀུལསྶ ཨེཀཔུཏྟཀོ ཨཧོསི མཱཏཱཔིཏཱུནཾ པིཡོ མནཱཔོ. སོ ཨེཀདིཝསཾ པཱསཱདཝརགཏོ སཱིཧཔཉྫརཾ ཨུགྒྷཱཊེཏྭཱ ཝཱིཐིཾ ཨོལོཀེནྟོ གནྡྷམཱལཱདིཧཏྠཾ མཧཱཛནཾ དྷམྨསྶཝནཏྠཱཡ ཛེཏཝནཾ གཙྪནྟཾ ¶ དིསྭཱ ‘‘ཨཧམྤི དྷམྨཾ སུཎིསྶཱམཱི’’ཏི མཱཏཱཔིཏརོ ཝནྡིཏྭཱ གནྡྷམཱལཱདཱིནི གཱཧཱཔེཏྭཱ ཝིཧཱརཾ གནྟྭཱ ཝཏྠབྷེསཛྫཔཱནཀཱདཱིནི བྷིཀྑུསངྒྷསྶ དཱཔེཏྭཱ གནྡྷམཱལཱདཱིཧི ཙ བྷགཝནྟཾ པཱུཛེཏྭཱ ཨེཀམནྟཾ ནིསིནྣོ དྷམྨཾ སུཏྭཱ ཀཱམེསུ ཨཱདཱིནཝཾ དིསྭཱ པབྦཛྫཱཡ ཙ ཨཱནིསཾསཾ སལླཀྑེཏྭཱ པརིསཱཡ ཝུཊྛིཏཱཡ བྷགཝནྟཾ པབྦཛྫཾ ཡཱཙིཏྭཱ ‘‘མཱཏཱཔིཏཱུཧི ཨནནུཉྙཱཏཾ པུཏྟཾ ཏཐཱགཏཱ ནཱམ ན པབྦཱཛེནྟཱི’’ཏི སུཏྭཱ བྷགཝནྟཾ ཝནྡིཏྭཱ པུན གེཧཾ གནྟྭཱ སགཱརཝེན མཱཏཱཔིཏརོ ཝནྡིཏྭཱ ཨེཝམཱཧ – ‘‘ཨམྨཏཱཏཱ, ཨཧཾ ཏཐཱགཏསྶ སནྟིཀེ པབྦཛིསྶཱམཱི’’ཏི. ཨཐསྶ མཱཏཱཔིཏརོ ཏསྶ ཝཙནཾ སུཏྭཱ ཨེཀཔུཏྟཀབྷཱཝེན སཏྟདྷཱ བྷིཛྫམཱནཧདཡཱ ཝིཡ པུཏྟསིནེཧེན ཀམྤམཱནཱ ཨེཝམཱཧཾསུ ‘‘ཏཱཏ པིཡཔུཏྟཀ, ཏཱཏ ཀུལངྐུར, ཏཱཏ ནཡན, ཏཱཏ ཧདཡ, ཏཱཏ པཱཎསདིས, ཏཡཱ ཝིནཱ ཀཐཾ ཛཱིཝཱམ, ཏཡི པཊིབདྡྷཾ ནོ ཛཱིཝིཏཾ. མཡཉྷི ཏཱཏ, ཛརཱཛིཎྞཱ ཝུཌྜྷཱ མཧལླཀཱ, ཨཛྫ ཝཱ སུཝེ ཝཱ པརསུཝེ ཝཱ མརཎཾ པཱཔུཎིསྶཱམ, ཏསྨཱ མཱ ཨམྷེ ཨོཧཱཡ གཙྪསི. ཏཱཏ, པབྦཛྫཱ ནཱམ ཨཏིདུཀྐརཱ, སཱིཏེན ཨཏྠེ སཏི ཨུཎྷཾ ལབྷཏི, ཨུཎྷེན ཨཏྠེ སཏི སཱིཏཾ ལབྷཏི, ཏསྨཱ ཏཱཏ, མཱ པབྦཛཱཧཱི’’ཏི.
ཏཾ སུཏྭཱ ཀུལཔུཏྟོ དུཀྑཱི དུམྨནོ ཨོནཏསཱིསོ པཛ྄ཛྷཱཡནྟོཝ ནིསཱིདི སཏྟཱཧཾ ནིརཱཧཱརོ. ཨཐསྶ མཱཏཱཔིཏརོ ཨེཝཾ ཙིནྟེསུཾ ‘‘སཙེ ནོ པུཏྟོ ཨནནུཉྙཱཏོ, ཨདྡྷཱ མརིསྶཏི, པུན ན པསྶིསྶཱམ, པབྦཛྫཱཡ ཛཱིཝམཱནཾ པུན ནཾ པསྶིསྶཱམཱ’’ཏི. ཙིནྟེཏྭཱ ཙ པན ‘‘ཏཱཏ པིཡཔུཏྟཀ, ཏཾ པབྦཛྫཱཡ ཨནུཛཱནཱམ, པབྦཛཱཧཱི’’ཏི ཨནུཛཱནིཾསུ. ཏཾ སུཏྭཱ ཀུལཔུཏྟོ ཏུཊྛམཱནསོ ཧུཏྭཱ ཨཏྟནོ སཀལསརཱིརཾ ཨོཎཱམེཏྭཱ ¶ མཱཏཱཔིཏརོ ཝནྡིཏྭཱ ཝིཧཱརཾ གནྟྭཱ བྷགཝནྟཾ པབྦཛྫཾ ཡཱཙི. སཏྠཱ ཨེཀཾ བྷིཀྑུཾ པཀྐོསཱཔེཏྭཱ ‘‘ཨིམཾ ཀུམཱརཾ པབྦཱཛེཧཱི’’ཏི ཨཱཎཱཔེསི. སོ ཏཾ པབྦཱཛེསི. ཏསྶ པབྦཛིཏཀཱལཏོ པཊྛཱཡ མཧཱལཱབྷསཀྐཱརོ ནིབྦཏྟི. སོ ཨཱཙརིཡུཔཛ྄ཛྷཱཡེ ཨཱརཱདྷེཏྭཱ ལདྡྷཱུཔསམྤདོ པཉྩ ཝསྶཱནི དྷམྨཾ པརིཡཱཔུཎིཏྭཱ ‘‘ཨཧཾ ཨིདྷ ཨཱཀིཎྞོ ¶ ཝིཧརཱམི, ན མེ ཨིདཾ པཏིརཱུཔ’’ནྟི ཝིཔསྶནཱདྷུརཾ པཱུརེཏུཀཱམོ ཧུཏྭཱ ཨུཔཛ྄ཛྷཱཡསྶ སནྟིཀེ ཀམྨཊྛཱནཾ གཧེཏྭཱ ཨུཔཛ྄ཛྷཱཡཾ ཝནྡིཏྭཱ ཛེཏཝནཱ ནིཀྑམིཏྭཱ ཨེཀཾ པཙྩནྟགཱམཾ ནིསྶཱཡ ཨརཉྙེ ཝིཧཱསི. སོ ཏཏྠ ཝིཔསྶནཾ ཝཌྜྷེཏྭཱ དྭཱདས ཝསྶཱནི གྷཊེནྟོ ཝཱཡམནྟོཔི ཝིསེསཾ ནིབྦཏྟེཏུཾ ནཱསཀྑི. མཱཏཱཔིཏརོཔིསྶ གཙྪནྟེ གཙྪནྟེ ཀཱལེ དུགྒཏཱ ཨཧེསུཾ. ཡེ ཧི ཏེསཾ ཁེཏྟཾ ཝཱ ཝཎིཛྫཾ ཝཱ པཡོཛེསུཾ, ཏེ ‘‘ཨིམསྨིཾ ཀུལེ པུཏྟོ ཝཱ བྷཱཏཱ ཝཱ ཨིཎཾ ཙོདེཏྭཱ གཎྷནྟོ ནཱམ ནཏྠཱི’’ཏི ཨཏྟནོ ཨཏྟནོ ཧཏྠགཏཾ གཧེཏྭཱ ཡཐཱརུཙི པལཱཡིཾསུ. གེཧེ དཱསཀམྨཀརཱདཡོཔི ཧིརཉྙསུཝཎྞཱདཱིནི གཧེཏྭཱ པལཱཡིཾསུ.
ཨཔརབྷཱགེ དྭེ ཛནཱ ཀཔཎཱ ཧུཏྭཱ ཧཏྠེ ཨུདཀསིཉྩནམྤི ཨལབྷིཏྭཱ གེཧཾ ཝིཀྐིཎིཏྭཱ ཨགྷརཱ ཧུཏྭཱ ཀཱརུཉྙབྷཱཝཾ པཏྟཱ པིལོཏིཀཾ ནིཝཱསེཏྭཱ ཀཔཱལཧཏྠཱ བྷིཀྑཱཡ ཙརིཾསུ. ཏསྨིཾ ཀཱལེ ཨེཀོ བྷིཀྑུ ཛེཏཝནཏོ ནིཀྑམིཏྭཱ ཨནུཔུབྦེན ཏསྶ ཝསནཊྛཱནཾ ཨགམཱསི. སོ ཏསྶ ཨཱགནྟུཀཝཏྟཾ ཀཏྭཱ སུཁནིསིནྣཀཱལེ ‘‘བྷནྟེ, ཀུཏོ ཨཱགཏཏྠཱ’’ཏི པུཙྪིཏྭཱ ‘‘ཛེཏཝནཱ ཨཱགཏོ ཨཱཝུསོ’’ཏི ཝུཏྟེ སཏྠུནོ ཙེཝ མཧཱསཱཝཀཱདཱིནཉྩ ཨཱརོགྱཾ པུཙྪིཏྭཱ མཱཏཱཔིཏཱུནཉྩ པཝཏྟིཾ པུཙྪི ‘‘ཀིཾ, བྷནྟེ, སཱཝཏྠིཡཾ ཨསུཀསྶ ནཱམ སེཊྛིཀུལསྶ ཨཱརོགྱ’’ནྟི? ‘‘ཨཱཝུསོ, མཱ ཏསྶ ཀུལསྶ པཝཏྟིཾ པུཙྪཱ’’ཏི. ‘‘ཀིཾ བྷནྟེ’’ཏི. ‘‘ཨཱཝུསོ, ཏསྶ ཀིར ཀུལསྶ ཨེཀོ པུཏྟོ ཨཏྠི, སོ བུདྡྷསཱསནེ པབྦཛིཏོ, ཏསྶ པབྦཛིཏཀཱལཏོ པཊྛཱཡ ཨེཏཾ ཀུལཾ པརིཀྑཱིཎཾ, ཨིདཱནི དྭེ ཛནཱ པརམཀཱརུཉྙབྷཱཝཾ པཏྟཱ བྷིཀྑཱཡ ཙརནྟཱི’’ཏི. སོ ཏསྶ ཝཙནཾ སུཏྭཱ སཀབྷཱཝེན སཎྛཱཏུཾ ཨསཀྐོནྟོ ཨསྶུཔུཎྞེཧི ནེཏྟེཧི རོདིཏུཾ ཨཱརབྷི. ‘‘ཨཱཝུསོ, ཀིཾ རོདསཱི’’ཏི? ‘‘བྷནྟེ, ཏེ མཡ྄ཧཾ མཱཏཱཔིཏརོ, ཨཧཾ ཏེསཾ པུཏྟོ’’ཏི. ‘‘ཨཱཝུསོ, ཏཝ མཱཏཱཔིཏརོ ཏཾ ནིསྶཱཡ ཝིནཱསཾ པཏྟཱ, གཙྪ, ཏེ པཊིཛགྒཱཧཱི’’ཏི.
སོ ¶ ‘‘ཨཧཾ དྭཱདས ཝསྶཱནི གྷཊེནྟོ ཝཱཡམནྟོཔི མགྒཾ ཝཱ ཕལཾ ཝཱ ནིབྦཏྟེཏུཾ ནཱསཀྑིཾ ¶ , ཨབྷབྦོ བྷཝིསྶཱམི, ཀིཾ མེ པབྦཛྫཱཡ, གིཧཱི ཧུཏྭཱ མཱཏཱཔིཏརོ པོསེཏྭཱ དཱནཾ དཏྭཱ སགྒཔརཱཡཎོ བྷཝིསྶཱམཱི’’ཏི ཙིནྟེཏྭཱ ཨརཉྙཱཝཱསཾ ཏསྶ ཐེརསྶ ནིཡྻཱདེཏྭཱ པུནདིཝསེ ཨརཉྙཱ ནིཀྑམིཏྭཱ ཨནུཔུབྦེན གཙྪནྟོ སཱཝཏྠིཏོ ཨཝིདཱུརེ ཛེཏཝནཔིཊྛིཝིཧཱརཾ པཱཔུཎི. ཏཏྠ དྭེ མགྒཱ ཨཧེསུཾ. ཏེསུ ཨེཀོ མགྒོ ཛེཏཝནཾ གཙྪཏི, ཨེཀོ སཱཝཏྠིཾ. སོ ཏཏྠེཝ ཋཏྭཱ ‘‘ཀིཾ ནུ ཁོ པཋམཾ མཱཏཱཔིཏརོ པསྶཱམི, ཨུདཱཧུ དསབལ’’ནྟི ཙིནྟེཏྭཱ ‘‘མཡཱ མཱཏཱཔིཏརོ ཙིརཾ དིཊྛཔུབྦཱ, ཨིཏོ པཊྛཱཡ པན མེ བུདྡྷདསྶནཾ དུལླབྷཾ བྷཝིསྶཏི, ཏསྨཱ ཨཛྫམེཝ སམྨཱསམྦུདྡྷཾ དིསྭཱ དྷམྨཾ སུཏྭཱ སྭེ པཱཏོཝ མཱཏཱཔིཏརོ པསྶིསྶཱམཱི’’ཏི སཱཝཏྠིམགྒཾ ¶ པཧཱཡ སཱཡནྷསམཡེ ཛེཏཝནཾ པཱཝིསི. ཏཾ དིཝསཾ པན སཏྠཱ པཙྩཱུསཀཱལེ ལོཀཾ ཨོལོཀེནྟོ ཨིམསྶ ཀུལཔུཏྟསྶ ཨུཔནིསྶཡསམྤཏྟིཾ ཨདྡས. སོ ཏསྶཱགམནཀཱལེ མཱཏུཔོསཀསུཏྟེན (སཾ. ནི. ༡.༢༠༥) མཱཏཱཔིཏཱུནཾ གུཎཾ ཝཎྞེསི. སོ པན བྷིཀྑུ པརིསཔརིཡནྟེ ཋཏྭཱ སཏྠུསྶ དྷམྨཀཐཾ སུཎནྟོ ཙིནྟེསི ‘‘ཨཧཾ གིཧཱི ཧུཏྭཱ མཱཏཱཔིཏརོ པཊིཛགྒིཏུཾ སཀྐོམཱིཏི ཙིནྟེསིཾ, སཏྠཱ པན ‘པབྦཛིཏོཝ སམཱནོ པཊིཛགྒིཏོ ཨུཔཀཱརཀོ མཱཏཱཔིཏཱུན’ནྟི ཝདཏི. སཙཱཧཾ སཏྠཱརཾ ཨདིསྭཱ གཏོ, ཨེཝརཱུཔཱཡ པབྦཛྫཱཡ པརིཧཱིནོ བྷཝེཡྻཾ. ཨིདཱནི པན གིཧཱི ཨཧུཏྭཱ པབྦཛིཏོཝ སམཱནོ མཱཏཱཔིཏརོ པོསེསྶཱམཱི’’ཏི.
སོ སལཱཀགྒཾ གནྟྭཱ སལཱཀབྷཏྟཉྩེཝ སལཱཀཡཱགུཉྩ གཎྷིཏྭཱ དྭཱདས ཝསྶཱནི ཨརཉྙེ ཝུཏྠབྷིཀྑུ པཱརཱཛིཀཔྤཏྟོ ཝིཡ ཨཧོསི. སོ པཱཏོཝ སཱཝཏྠིཡཾ པཝིསིཏྭཱ ‘‘ཀིཾ ནུ ཁོ པཋམཾ ཡཱགུཾ གཎྷིསྶཱམི, ཨུདཱཧུ མཱཏཱཔིཏརོ པསྶིསྶཱམཱི’’ཏི ཙིནྟེཏྭཱ ‘‘ཀཔཎཱནཾ མཱཏཱཔིཏཱུནཾ སནྟིཀཾ ཏུཙྪཧཏྠེན གནྟུཾ ཨཡུཏྟ’’ནྟི ཙིནྟེཏྭཱ ཡཱགུཾ གཧེཏྭཱ ཨེཏེསཾ པོརཱཎཀགེཧདྭཱརཾ གཏོ. མཱཏཱཔིཏརོཔིསྶ ཡཱགུབྷིཀྑཾ ཙརིཏྭཱ པརབྷིཏྟིཾ ནིསྶཱཡ ཝིཧརནྟི. སོ ཨུཔགནྟྭཱ ནིསིནྣཀེ དིསྭཱ ཨུཔྤནྣསོཀོ ཨསྶུཔུཎྞེཧི ནེཏྟེཧི ཏེསཾ ཨཝིདཱུརེ ཨཊྛཱསི. ཏེ ཏཾ དིསྭཱཔི ན སཉྫཱནིཾསུ. ཨཐ མཱཏཱ ‘‘བྷིཀྑཏྠཱཡ ཋིཏོ བྷཝིསྶཏཱི’’ཏི སཉྙཱཡ ‘‘བྷནྟེ, ཏུམྷཱཀཾ དཱཏབྦཡུཏྟཀཾ ནཏྠི, ཨཏིཙྪཐཱ’’ཏི ཨཱཧ. སོ ཏསྶཱ ¶ ཀཐཾ སུཏྭཱ ཧདཡཔཱུརཾ སོཀཾ གཧེཏྭཱ ཨསྶུཔུཎྞེཧི ནེཏྟེཧི ཏཏྠེཝ ཨཊྛཱསི. དུཏིཡམྤི ཏཏིཡམྤི ‘‘ཨཏིཙྪཐཱ’’ཏི ཝུཙྩམཱནོཔི ཨཊྛཱསིཡེཝ. ཨཐསྶ པིཏཱ མཱཏརཾ ཨཱཧ – ‘‘གཙྪ, བྷདྡེ, ཛཱནཱཧི, པུཏྟོ ནུ ཁོ ནོ ཨེསོ’’ཏི. སཱ ཨུཊྛཱཡ ཨུཔགནྟྭཱ ཨོལོཀེནྟཱི སཉྫཱནིཏྭཱ པཱདམཱུལེ པཏིཏྭཱ པརིདེཝི, པིཏཱཔིསྶ ཏཐེཝ ཨཀཱསི, མཧནྟཾ ཀཱརུཉྙཾ ཨཧོསི.
སོཔི མཱཏཱཔིཏརོ དིསྭཱ སཀབྷཱཝེན སཎྛཱཏུཾ ཨསཀྐོནྟོ ཨསྶཱུནི པཝཏྟེསི. སོ སོཀཾ ཨདྷིཝཱསེཏྭཱ ‘‘ཨམྨཏཱཏཱ, མཱ ཙིནྟཡིཏྠ, ཨཧཾ ཝོ པོསེསྶཱམཱི’’ཏི ¶ མཱཏཱཔིཏརོ ཨསྶཱསེཏྭཱ ཡཱགུཾ པཱཡེཏྭཱ ཨེཀམནྟེ ནིསཱིདཱཔེཏྭཱ པུན བྷིཀྑཾ ཨཱཧརིཏྭཱ ཏེ བྷོཛེཏྭཱ ཨཏྟནོ ཨཏྠཱཡ བྷིཀྑཾ པརིཡེསིཏྭཱ ཏེསཾ སནྟིཀཾ གནྟྭཱ པུན བྷཏྟེནཱཔུཙྪིཏྭཱ པཙྪཱ སཡཾ པརིབྷུཉྫཏི. སོ ཏཏོ པཊྛཱཡ ཨིམིནཱ ནིཡཱམེན མཱཏཱཔིཏརོ པཊིཛགྒཏི. ཨཏྟནཱ ལདྡྷཱནི པཀྑིཀབྷཏྟཱདཱིནི ཏེསཾཡེཝ དཏྭཱ སཡཾ པིཎྜཱཡ ཙརིཏྭཱ ལབྷམཱནོ བྷུཉྫཏི, ཨལབྷམཱནོ ན བྷུཉྫཏི, ཝསྶཱཝཱསིཀམྤི ཨཉྙམྤི ཡཾ ཀིཉྩི ལབྷིཏྭཱ ཏེསཾཡེཝ དེཏི. ཏེཧི པརིབྷུཏྟཾ ཛིཎྞཔིལོཏིཀཾ གཧེཏྭཱ ཨགྒལ༹ཾ དཏྭཱ རཛིཏྭཱ སཡཾ པརིབྷུཉྫཏི. བྷིཀྑལབྷནདིཝསེཧི པནསྶ ཨལབྷནདིཝསཱ བཧཱུ ཨཧེསུཾ. ཨཐསྶ ནིཝཱསནཔཱརུཔནཾ ཨཏིལཱུཁཾ ཧོཏི.
ཨིཏི ¶ སོ མཱཏཱཔིཏརོ པཊིཛགྒནྟོཡེཝ ཨཔརབྷཱགེ ཀིསོ ཨུཔྤཎྜུཔྤཎྜུཀཛཱཏོ དྷམནིསནྠཏགཏྟོ ཨཧོསི. ཨཐ ནཾ སནྡིཊྛསམྦྷཏྟཱ བྷིཀྑཱུ པུཙྪིཾསུ ‘‘ཨཱཝུསོ, པུབྦེ ཏཝ སརཱིརཝཎྞོ སོབྷཏི, ཨིདཱནི པན ཀིསོ ཨུཔྤཎྜུཔྤཎྜུཀཛཱཏོ དྷམནིསནྠཏགཏྟོ, བྱཱདྷི ཏེ ནུ ཁོ ཨུཔྤནྣོ’’ཏི. སོ ‘‘ནཏྠི མེ, ཨཱཝུསོ, བྱཱདྷི, ཨཔིཙ པན པལིབོདྷོ མེ ཨཏྠཱི’’ཏི ཏཾ པཝཏྟིཾ ཨཱརོཙེསི. ཨཐ ནཾ ཏེ བྷིཀྑཱུ ཨཱཧཾསུ ‘‘ཨཱཝུསོ, བྷགཝཱ སདྡྷཱདེཡྻཾ ཝིནིཔཱཏེཏུཾ ན དེཏི, ཏྭཾ པན སདྡྷཱདེཡྻཾ གཧེཏྭཱ གིཧཱིནཾ དདམཱནོ ཨཡུཏྟཾ ཀརོསཱི’’ཏི. སོ ཏེསཾ ཀཐཾ སུཏྭཱ ལཛྫིཏོ ཨོལཱིཡི. ཏེ ཨེཏྟཀེནཔི ཨསནྟུཊྛཱ བྷགཝཏོ སནྟིཀཾ གནྟྭཱ ‘‘བྷནྟེ, ཨསུཀོ ནཱམ བྷིཀྑུ སདྡྷཱདེཡྻཾ ཝིནིཔཱཏེཏྭཱ གིཧཱི པོསེཏཱི’’ཏི སཏྠུ ཨཱརོཙེསུཾ. སཏྠཱ ཏཾ བྷིཀྑུཾ པཀྐོསཱཔེཏྭཱ ‘‘སཙྩཾ ཀིར ཏྭཾ བྷིཀྑུ སདྡྷཱདེཡྻཾ གཧེཏྭཱ གིཧཱི པོསེསཱི’’ཏི ¶ པུཙྪིཏྭཱ ‘‘སཙྩཾ, བྷནྟེ’’ཏི ཝུཏྟེ ཏཾ ཀིརིཡཾ ཝཎྞེཏུཀཱམོ ཨཏྟནོ ཙ པུབྦཙརིཡཾ པཀཱསེཏུཀཱམོ ‘‘བྷིཀྑུ, གིཧཱི པོསེནྟོ ཀེ པོསེསཱི’’ཏི པུཙྪི. ‘‘མཱཏཱཔིཏརོ མེ, བྷནྟེ’’ཏི ཝུཏྟེ སཏྠཱ ཏསྶ ཨུསྶཱཧཾ ཛནེཏུཾ ‘‘སཱདྷུ སཱདྷུ, བྷིཀྑཱུ’’ཏི ཏིཀྑཏྟུཾ སཱདྷུཀཱརཾ དཏྭཱ ‘‘ཏྭཾ མམ གཏམགྒེ ཋིཏོ, ཨཧམྤི པུབྦཙརིཡཾ ཙརནྟོ མཱཏཱཔིཏརོ པོསེསི’’ནྟི ཨཱཧ. སོ ཨསྶཱསཾ པཊིལབྷི. སཏྠཱ ཏཱཡ པུབྦཙརིཡཱཡ ཨཱཝིཀརཎཏྠཾ ཏེཧི བྷིཀྑཱུཧི ཡཱཙིཏོ ཨཏཱིཏཾ ཨཱཧརི.
ཨཏཱིཏེ བཱརཱཎསིནགརཏོ ཨཝིདཱུརེ ནདིཡཱ ཨོརིམཏཱིརེ ཨེཀོ ནེསཱདགཱམོ ཨཧོསི, པཱརིམཏཱིརེ ཨེཀོ ནེསཱདགཱམོ. ཨེཀེཀསྨིཾ གཱམེ པཉྩ པཉྩ ཀུལསཏཱནི ཝསནྟི. དྭཱིསུཔི གཱམེསུ དྭེ ནེསཱདཛེཊྛཀཱ སཧཱཡཀཱ ཨཧེསུཾ. ཏེ དཧརཀཱལེཡེཝ ཀཏིཀཝཏྟཾ ཀརིཾསུ ‘‘སཙེ ཨམྷེསུ ཨེཀསྶ དྷཱིཏཱ ཧོཏི, ཨེཀསྶ པུཏྟོ ཧོཏི, ཏེསཾ ཨཱཝཱཧཝིཝཱཧཾ ཀརིསྶཱམཱ’’ཏི. ཨཐ ཨོརིམཏཱིརེ གཱམཛེཊྛཀསྶ ¶ གེཧེ པུཏྟོ ཛཱཡི, ཛཱཏཀྑཎེཡེཝ དུཀཱུལེན པཊིགྒཧིཏཏྟཱ ‘‘དུཀཱུལོ’’ཏྭེཝསྶ ནཱམཾ ཀརིཾསུ. ཨིཏརསྶ གེཧེ དྷཱིཏཱ ཛཱཡི, ཏསྶཱ པརཏཱིརེ ཛཱཏཏྟཱ ‘‘པཱརིཀཱ’’ཏི ནཱམཾ ཀརིཾསུ. ཏེ ཨུབྷོཔི ཨབྷིརཱུཔཱ པཱསཱདིཀཱ ཨཧེསུཾ སུཝཎྞཝཎྞཱ. ཏེ ནེསཱདཀུལེ ཛཱཏཱཔི པཱཎཱཏིཔཱཏཾ ནཱམ ན ཀརིཾསུ.
ཨཔརབྷཱགེ སོལ༹སཝསྶུདྡེསིཀཾ དུཀཱུལཀུམཱརཾ མཱཏཱཔིཏརོ ཨཱཧཾསུ ‘‘པུཏྟ, ཀུམཱརིཀཾ ཏེ ཨཱནཡིསྶཱམཱ’’ཏི. སོ པན བྲཧྨལོཀཏོ ཨཱགཏོ སུདྡྷསཏྟོ ཨུབྷོ ཀཎྞེ པིདྷཱཡ ‘‘ན མེ གྷརཱཝཱསེནཏྠོ ཨམྨཏཱཏཱ, མཱ ཨེཝརཱུཔཾ ཨཝཙུཏྠཱ’’ཏི ཝཏྭཱ ཡཱཝཏཏིཡཾ ཝུཙྩམཱནོཔི ན ཨིཙྪིཡེཝ. པཱརིཀཱཔི མཱཏཱཔིཏཱུཧི ‘‘ཨམྨ, ཨམྷཱཀཾ སཧཱཡཀསྶ པུཏྟོ ཨཏྠི, སོ ཨབྷིརཱུཔོ སུཝཎྞཝཎྞོ, ཏསྶ ཏཾ དསྶཱམཱ’’ཏི ཝུཏྟཱ ཏཐེཝ ཝཏྭཱ ཨུབྷོ ཀཎྞེ པིདཧི. སཱཔི བྲཱཧྨལོཀཏོ ཨཱགཏཱ གྷརཱཝཱསཾ ན ཨིཙྪི. དུཀཱུལཀུམཱརོ པན ཏསྶཱ རཧསྶེན སཱསནཾ པཧིཎི ‘‘སཙེ ¶ པཱརིཀེ མེཐུནདྷམྨེན ཨཏྠིཀཱ, ཨཉྙསྶ གེཧཾ གཙྪཏུ, མཡ྄ཧཾ མེཐུནདྷམྨེ ཚནྡོ ནཏྠཱི’’ཏི. སཱཔི ཏསྶ ཏཐེཝ སཱསནཾ པེསེསི.
ཨཐ ¶ མཱཏཱཔིཏརོ ཏེསཾ ཨནིཙྪམཱནཱནཉྙེཝ ཨཱཝཱཧཝིཝཱཧཾ ཀརིཾསུ. ཏེ ཨུབྷོཔི ཀིལེསསམུདྡཾ ཨནོཏརིཏྭཱ དྭེ མཧཱབྲཧྨཱནོ ཝིཡ ཨེཀཏོཝ ཝསིཾསུ. དུཀཱུལཀུམཱརོ པན མཙྪཾ ཝཱ མིགཾ ཝཱ ན མཱརེཏི, ཨནྟམསོ ཨཱཧཊམཾསམྤི ན ཝིཀྐིཎཱཏི. ཨཐ ནཾ མཱཏཱཔིཏརོ ཝདིཾསུ ‘‘ཏཱཏ, ཏྭཾ ནེསཱདཀུལེ ནིབྦཏྟིཏྭཱཔི ནེཝ གྷརཱཝཱསཾ ཨིཙྪསི, ན པཱཎཝདྷཾ ཀརོསི, ཀིཾ ནཱམ ཀམྨཾ ཀརིསྶསཱི’’ཏི? ‘‘ཨམྨཏཱཏཱ, ཏུམྷེསུ ཨནུཛཱནནྟེསུ མཡཾ པབྦཛིསྶཱམཱ’’ཏི. ཏཾ སུཏྭཱ མཱཏཱཔིཏརོ ‘‘ཏེན ཧི པབྦཛཐཱ’’ཏི དྭེ ཛནེ ཨནུཛཱནིཾསུ. ཏེ ཏུཊྛཧཊྛཱ མཱཏཱཔིཏརོ ཝནྡིཏྭཱ གཱམཏོ ནིཀྑམིཏྭཱ ཨནུཔུབྦེན གངྒཱཏཱིརེན ཧིམཝནྟཾ པཝིསིཏྭཱ ཡསྨིཾ ཋཱནེ མིགསམྨཏཱ ནཱམ ནདཱི ཧིམཝནྟཏོ ཨོཏརིཏྭཱ གངྒཾ པཏྟཱ, ཏཾ ཋཱནཾ གནྟྭཱ གངྒཾ པཧཱཡ མིགསམྨཏཱབྷིམུཁཱ ཨབྷིརུཧིཾསུ.
ཏསྨིཾ ཁཎེ སཀྐསྶ བྷཝནཾ ཨུཎྷཱཀཱརཾ དསྶེསི. སཀྐོ ཨོལོཀེནྟོ ཏཾ ཀཱརཎཾ ཉཏྭཱ ཝིསྶཀམྨཾ ཨཱམནྟེཏྭཱ ‘‘ཏཱཏ ཝིསྶཀམྨ, དྭེ མཧཱཔུརིསཱ གཱམཱ ནིཀྑམིཏྭཱ ཧིམཝནྟཾ པཝིཊྛཱ, ཏེསཾ ནིཝཱསཊྛཱནཾ ལདྡྷུཾ ཝཊྚཏི, མིགསམྨཏཱནདིཡཱ ཨཌྜྷཀོསནྟརེ ¶ ཨེཏེསཾ པཎྞསཱལཉྩ པབྦཛིཏཔརིཀྑཱརེ ཙ མཱཔེཏྭཱ ཨེཧཱི’’ཏི ཨཱཧ. སོ ‘‘སཱདྷཱུ’’ཏི སམྤཊིཙྪིཏྭཱ མཱུགཔཀྑཛཱཏཀེ (ཛཱ. ༢.༢༢.༡ ཨཱདཡོ) ཝུཏྟནཡེནེཝ སབྦཾ སཾཝིདཧིཏྭཱ ཨམནཱཔསདྡེ མིགཔཀྑིནོ པལཱཔེཏྭཱ ཨེཀཔདིཀཾ ཛངྒྷམགྒཾ མཱཔེཏྭཱ སཀཊྛཱནམེཝ གཏོ. ཏེཔི ཏཾ མགྒཾ དིསྭཱ ཏེན མགྒེན གནྟྭཱ ཏཾ ཨསྶམཔདཾ པཱཔུཎིཾསུ. དུཀཱུལཔཎྜིཏོ པཎྞསཱལཾ པཝིསིཏྭཱ པབྦཛིཏཔརིཀྑཱརེ དིསྭཱ ‘‘སཀྐེན མཡ྄ཧཾ དིནྣཱ’’ཏི སཀྐདཏྟིཡབྷཱཝཾ ཉཏྭཱ སཱཊཀཾ ཨོམུཉྩིཏྭཱ རཏྟཝཱཀཙཱིརཾ ནིཝཱསེཏྭཱ ཨེཀཾ པཱརུཔིཏྭཱ ཨཛིནཙམྨཾ ཨཾསེ ཀཏྭཱ ཛཊཱམཎྜལཾ བནྡྷིཏྭཱ ཨིསིཝེསཾ གཧེཏྭཱ པཱརིཀཱཡཔི པབྦཛྫཾ ཨདཱསི. ཨུབྷོཔི ཀཱམཱཝཙརམེཏྟཾ བྷཱཝེཏྭཱ ཏཏྠ ཝསིཾསུ. ཏེསཾ མེཏྟཱནུབྷཱཝེན སབྦེཔི མིགཔཀྑིནོ ཨཉྙམཉྙཾ མེཏྟཙིཏྟམེཝ པཊིལབྷིཾསུ, ན ཀོཙི ཀཉྩི ཝིཧེཋེསི. པཱརིཀཱ ཏཏོ པཊྛཱཡ པཱནཱིཡཾ པརིབྷོཛནཱིཡཾ ཨཱཧརཏི, ཨསྶམཔདཾ སམྨཛྫཏི, སབྦཀིཙྩཱནི ཀརོཏི. ཨུབྷོཔི ཕལཱཕལཱནི ཨཱཧརིཏྭཱ པརིབྷུཉྫིཏྭཱ ཨཏྟནོ ཨཏྟནོ པཎྞསཱལཾ པཝིསིཏྭཱ སམཎདྷམྨཾ ཀརོནྟཱ ཏཏྠ ཝཱསཾ ཀཔྤཡིཾསུ.
སཀྐོ ¶ ཏེསཾ ཨུཔཊྛཱནཾ ཨཱགཙྪཏི. སོ ཨེཀདིཝསཾ ཨནུཨོལོཀེནྟོ ‘‘ཨིམེསཾ ཙཀྑཱུནི པརིཧཱཡིསྶནྟཱི’’ཏི ཨནྟརཱཡཾ དིསྭཱ དུཀཱུལཔཎྜིཏཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ནིསཱིདིཏྭཱ ¶ ཨེཝམཱཧ – ‘‘བྷནྟེ, ཏུམྷཱཀཾ ཨནྟརཱཡོ པཉྙཱཡཏི, པཊིཛགྒནཀཾ པུཏྟཾ ལདྡྷུཾ ཝཊྚཏི, ལོཀདྷམྨཾ པཊིསེཝཐཱ’’ཏི. ཨཐ ནཾ དུཀཱུལཔཎྜིཏོ ཨཱཧ – ‘‘སཀྐ, ཀིནྣཱམེཏཾ ཀཐེསི, མཡཾ ཨགཱརམཛ྄ཛྷེ ཝསནྟཱཔི ཨེཏཾ ལོཀདྷམྨཾ པུལ༹ཝཀགཱུཐརཱསིཾ ཝིཡ ཛིགུཙྪིམྷཱ, ཨིདཱནི པན ཨརཉྙཾ པཝིསིཏྭཱ ཨིསིཔབྦཛྫཾ པབྦཛིཏྭཱ ཀཐཾ ཨེཝརཱུཔཾ ཀརིསྶཱམཱ’’ཏི. ཨཐ སཀྐོ ཏཾ ཨཱཧ – ‘‘བྷནྟེ, སཙེ ཨེཝཾ ན ཀརོཐ, པཱརིཀཱཡ ཏཱཔསིཡཱ ཨུཏུནིཀཱལེ ནཱབྷིཾ ཧཏྠེན པརཱམསེཡྻཱཐཱ’’ཏི. དུཀཱུལཔཎྜིཏོ ‘‘ཨིདཾ སཀྐཱ ཀཱཏུ’’ནྟི སམྤཊིཙྪི. སཀྐོ ཏཾ ཝནྡིཏྭཱ སཀཊྛཱནམེཝ གཏོ.
དུཀཱུལཔཎྜིཏོཔི ཏཾ ཀཱརཎཾ པཱརིཀཱཡ ཨཱཙིཀྑིཏྭཱ ཨསྶཱ ཨུཏུནིཀཱལེ ནཱབྷིཾ ཧཏྠེན པརཱམསི. ཏདཱ བོདྷིསཏྟོ དེཝལོཀཏོ ཙཝིཏྭཱ ཏསྶཱ ཀུཙྪིམྷི པཊིསནྡྷིཾ ¶ གཎྷི. སཱ དསམཱསཙྩཡེན སུཝཎྞཝཎྞཾ པུཏྟཾ ཝིཛཱཡི, ཏེནེཝསྶ ‘‘སུཝཎྞསཱམོ’’ཏི ནཱམཾ ཀརིཾསུ. པཱརིཀཱཡ ཕལཱཕལཏྠཱཡ ཝནཾ གཏཀཱལེ པབྦཏནྟརེ ཀིནྣརིཡོ དྷཱཏིཀིཙྩཾ ཀརིཾསུ. ཏེ ཨུབྷོཔི བོདྷིསཏྟཾ ནྷཱཔེཏྭཱ པཎྞསཱལཱཡཾ ནིཔཛྫཱཔེཏྭཱ ཕལཱཕལཏྠཱཡ ཨརཉྙཾ གཙྪནྟི. ཏསྨིཾ ཁཎེ ཀིནྣརཱ ཀུམཱརཾ གཧེཏྭཱ གིརིཀནྡརཱདཱིསུ ནྷཱཔེཏྭཱ པབྦཏམཏྠཀཾ ཨཱརུཡ྄ཧ ནཱནཱཔུཔྥེཧི ཨལངྐརིཏྭཱ ཧརིཏཱལམནོསིལཱདཱིནི སིལཱཡཾ གྷཾསིཏྭཱ ནལཱཊེ ཏིལཀེ ཀཏྭཱ པུན ཨཱནེཏྭཱ པཎྞསཱལཱཡཾ ནིཔཛྫཱཔེསུཾ. པཱརིཀཱཔི ཨཱགནྟྭཱ པུཏྟཾ ཐཉྙཾ པཱཡེསི. ཏཾ ཨཔརབྷཱགེ ཝཌྜྷིཏྭཱ སོལ༹སཝསྶུདྡེསིཀམྤི ཨནུརཀྑནྟཱ མཱཏཱཔིཏརོ པཎྞསཱལཱཡཾ ནིསཱིདཱཔེཏྭཱ སཡམེཝ ཝནམཱུལཕལཱཕལཏྠཱཡ ཝནཾ གཙྪནྟི. མཧཱསཏྟོ ‘‘མམ མཱཏཱཔིཏཱུནཾ ཀདཱཙི ཀོཙིདེཝ ཨནྟརཱཡོ བྷཝེཡྻཱ’’ཏི ཙིནྟེཏྭཱ ཏེསཾ གཏམགྒཾ སལླཀྑེསི.
ཨཐེཀདིཝསཾ ཏེསཾ ཝནམཱུལཕལཱཕལཾ ཨཱདཱཡ སཱཡནྷསམཡེ ནིཝཏྟནྟཱནཾ ཨསྶམཔདཏོ ཨཝིདཱུརེ མཧཱམེགྷོ ཨུཊྛཧི. ཏེ ཨེཀཾ རུཀྑམཱུལཾ པཝིསིཏྭཱ ཝམྨིཀམཏྠཀེ ཨཊྛཾསུ. ཏསྶ ཙ ཨབྦྷནྟརེ ཨཱསཱིཝིསོ ཨཏྠི. ཏེསཾ སརཱིརཏོ སེདགནྡྷམིསྶཀཾ ཨུདཀཾ ཨོཏརིཏྭཱ ཏསྶ ¶ ནཱསཱཔུཊཾ པཱཝིསི. སོ ཀུཛ྄ཛྷིཏྭཱ ནཱསཱཝཱཏེན པཧརི. དྭེཔི ཨནྡྷཱ ཧུཏྭཱ ཨཉྙམཉྙཾ ན པསྶིཾསུ. དུཀཱུལཔཎྜིཏོ པཱརིཀཾ ཨཱམནྟེཏྭཱ ‘‘པཱརིཀེ མམ ཙཀྑཱུནི པརིཧཱིནཱནི, ཨཧཾ ཏཾ ན པསྶཱམཱི’’ཏི ཨཱཧ. སཱཔི ཏཐེཝ ཨཱཧ. ཏེ ‘‘ནཏྠི ནོ ཨིདཱནི ཛཱིཝིཏ’’ནྟི མགྒཾ ཨཔསྶནྟཱ པརིདེཝམཱནཱ ཨཊྛཾསུ. ‘‘ཀིཾ པན ཏེསཾ པུབྦཀམྨ’’ནྟི? ཏེ ཀིར པུབྦེ ཝེཛྫཀུལེ ཨཧེསུཾ. ཨཐ སོ ཝེཛྫོ ཨེཀསྶ མཧཱདྷནསྶ པུརིསསྶ ཨཀྑིརོགཾ པཊིཛགྒི. སོ ཏསྶ ཀིཉྩི དྷནཾ ན ཨདཱསི. ཨཐ ཝེཛྫོ ཀུཛ྄ཛྷིཏྭཱ ཨཏྟནོ གེཧཾ གནྟྭཱ བྷརིཡཱཡ ཨཱརོཙེཏྭཱ ‘‘བྷདྡེ, ཨཧཾ ཏསྶ ཨཀྑིརོགཾ པཊིཛགྒཱམི, ཨིདཱནི མཡ྄ཧཾ དྷནཾ ན དེཏི, ཀིཾ ཀརོམཱ’’ཏི ཨཱཧ ¶ . སཱཔི ཀུཛ྄ཛྷིཏྭཱ ‘‘ན ནོ ཏསྶ སནྟཀེནཏྠོ, བྷེསཛྫཾ ཏསྶ ཨེཀཡོགཾ དཏྭཱ ཨཀྑཱིནི ཀཱཎཱནི ཀརོཧཱི’’ཏི ཨཱཧ. སོ ‘‘སཱདྷཱུ’’ཏི སམྤཊིཙྪིཏྭཱ ཏསྶ སནྟིཀཾ གནྟྭཱ ཏཐཱ ཨཀཱསི. སོ ནཙིརསྶེཝ ཨནྡྷོ ཧོཏི. ཏེསཾ ཨུབྷིནྣམྤི ཨིམིནཱ ཀམྨེན ཙཀྑཱུནི ཨནྡྷཱནི ཛཱཡིཾསུ.
ཨཐ མཧཱསཏྟོ ‘‘མམ མཱཏཱཔིཏརོ ¶ ཨཉྙེསུ དིཝསེསུ ཨིམཱཡ ཝེལཱཡ ཨཱགཙྪནྟི, ཨིདཱནི ཏེསཾ པཝཏྟིཾ ན ཛཱནཱམི, པཊིམགྒཾ གམིསྶཱམཱི’’ཏི ཙིནྟེཏྭཱ མགྒཾ གནྟྭཱ སདྡམཀཱསི. ཏེ ཏསྶ སདྡཾ སཉྫཱནིཏྭཱ པཊིསདྡཾ ཀརིཏྭཱ པུཏྟསིནེཧེན ‘‘ཏཱཏ སུཝཎྞསཱམ, ཨིདྷ པརིཔནྠོ ཨཏྠི, མཱ ཨཱགམཱི’’ཏི ཝདིཾསུ. ཨཐ ནེསཾ ‘‘ཏེན ཧི ཨིམཾ ལཊྛིཀོཊིཾ གཧེཏྭཱ མམ སནྟིཀཾ ཨེཐཱ’’ཏི དཱིགྷལཊྛིཾ ཨདཱསི. ཏེ ལཊྛིཀོཊིཾ གཧེཏྭཱ ཏསྶ སནྟིཀཾ ཨཱགམིཾསུ. ཨཐ ནེ ‘‘ཀེན ཀཱརཎེན ཝོ ཙཀྑཱུནི ཝིནཊྛཱནཱི’’ཏི པུཙྪི. ཨཐ ནཾ མཱཏཱཔིཏརོ ཨཱཧཾསུ ‘‘ཏཱཏ, མཡཾ དེཝེ ཝསྶནྟེ ཨིདྷ རུཀྑམཱུལེ ཝམྨིཀམཏྠཀེ ཋིཏཱ, ཏེན ཀཱརཎེནཱ’’ཏི. སོ མཱཏཱཔིཏཱུནཾ ཀཐཾ སུཏྭཱཝ ཨཉྙཱསི ‘‘ཏཏྠ ཨཱསཱིཝིསེན བྷཝིཏབྦཾ, ཏེན ཀུདྡྷེན ནཱསཱཝཱཏོ ཝིསྶཊྛོ བྷཝིསྶཏཱི’’ཏི. སོ མཱཏཱཔིཏརོ དིསྭཱ རོདི ཙེཝ ཧསི ཙ. ཨཐ ནཾ ཏེ པུཙྪིཾསུ ‘‘ཀསྨཱ, ཏཱཏ, རོདསི ཙེཝ ཧསསི ཙཱ’’ཏི? ཨམྨཏཱཏཱ, ‘‘ཏུམྷཱཀཾ དཧརཀཱལེཡེཝ ཨེཝཾ ཙཀྑཱུནི ཝིནཊྛཱནཱི’’ཏི རོདིཾ, ‘‘ཨིདཱནི པཊིཛགྒིཏུཾ ལབྷིསྶཱམཱི’’ཏི ཧསིཾ. ཨམྨཏཱཏཱ, ཏུམྷེ མཱ ཙིནྟཡིཏྠ, ཨཧཾ ཝོ པཊིཛགྒིསྶཱམཱིཏི.
སོ མཱཏཱཔིཏརོ ཨསྶཱསེཏྭཱ ཨསྶམཔདཾ ཨཱནེཏྭཱ ཏེསཾ རཏྟིཊྛཱནདིཝཱཊྛཱནེསུ ཙངྐམེ པཎྞསཱལཱཡཾ ཝཙྩཊྛཱནེ པསྶཱཝཊྛཱནེ ཙཱཏི ¶ སབྦཊྛཱནེསུ རཛྫུཀེ བནྡྷི, ཏཏོ པཊྛཱཡ ཏེ ཨསྶམཔདེ ཋཔེཏྭཱ སཡཾ ཝནམཱུལཕལཱདཱིནི ཨཱཧརིཏྭཱ པཎྞསཱལཱཡཾ ཋཔེཏྭཱ པཱཏོཝ ཏེསཾ ཝསནཊྛཱནཾ སམྨཛྫིཏྭཱ མཱཏཱཔིཏརོ ཝནྡིཏྭཱ གྷཊཾ ཨཱདཱཡ མིགསམྨཏཱནདིཾ གནྟྭཱ པཱནཱིཡཔརིབྷོཛནཱིཡཾ ཨཱཧརིཏྭཱ ཨུཔཊྛཱཔེཏི, དནྟཀཊྛམུཁོདཀཱདཱིནི དཏྭཱ མདྷུརཕལཱཕལཾ དེཏི, ཏེཧི བྷུཉྫིཏྭཱ མུཁེ ཝིཀྑཱལིཏེ སཡཾ ཁཱདིཏྭཱ མཱཏཱཔིཏརོ ཝནྡིཏྭཱ མིགགཎཔརིཝུཏོ ཕལཱཕལཏྠཱཡ ཨརཉྙཾ པཱཝིསི. པབྦཏཔཱདེ ཀིནྣརཔརིཝཱརོ ཕལཱཕལཾ གཧེཏྭཱ སཱཡནྷསམཡེ ཨཱགནྟྭཱ གྷཊེན ཨུདཀཾ ཨཱཧརིཏྭཱ ཨུཎྷོདཀེན ཏེསཾ ཡཐཱརུཙི ནྷཱཔནཾ པཱདདྷོཝནཾ ཝཱ ཀཏྭཱ ཨངྒཱརཀཔལླཾ ཨུཔནེཏྭཱ ཧཏྠཔཱདེ སེདེཏྭཱ ཏེསཾ ནིསིནྣཱནཾ ཕལཱཕལཾ དཏྭཱ ཁཱདཱཔེཏྭཱ པརིཡོསཱནེ སཡཾ ཁཱདིཏྭཱ སེསཀཾ ཋཔེསི. ཨིམིནཱ ནིཡཱམེནེཝ མཱཏཱཔིཏརོ པཊིཛགྒི.
ཏསྨིཾ སམཡེ བཱརཱཎསིཡཾ པཱིལི༹ཡཀྑོ ནཱམ རཱཛཱ རཛྫཾ ཀཱརེསི. སོ མིགམཾསལོབྷེན མཱཏརཾ ¶ རཛྫཾ པཊིཙྪཱཔེཏྭཱ སནྣདྡྷཔཉྩཱཝུདྷོ ཧིམཝནྟཾ པཝིསིཏྭཱ མིགེ ཝདྷིཏྭཱ མཾསཾ ཁཱདནྟོ ¶ མིགསམྨཏཱནདིཾ པཏྭཱ ཨནུཔུབྦེན སཱམསྶ པཱནཱིཡགྒཧཎཏིཏྠཾ སམྤཏྟོ མིགཔདཝལཉྫཾ དིསྭཱ མཎིཝཎྞཱཧི སཱཁཱཧི ཀོཊྛཀཾ ཀཏྭཱ དྷནུཾ ཨཱདཱཡ ཝིསཔཱིཏཾ སརཾ སནྣཧིཏྭཱ ནིལཱིནོཝ ཨཙྪི. མཧཱསཏྟོཔི སཱཡནྷསམཡེ ཕལཱཕལཾ ཨཱཧརིཏྭཱ ཨསྶམཔདེ ཋཔེཏྭཱ མཱཏཱཔིཏརོ ཝནྡིཏྭཱ ‘‘པཱནཱིཡཾ ཨཱཧརིསྶཱམཱི’’ཏི གྷཊཾ གཧེཏྭཱ མིགགཎཔརིཝུཏོ དྭེཔི མིགེ ཨེཀཏོ ཀཏྭཱ ཏེསཾ པིཊྛིཡཾ པཱནཱིཡགྷཊཾ ཋཔེཏྭཱ ཧཏྠེན གཧེཏྭཱ ནདཱིཏིཏྠཾ ཨགམཱསི. རཱཛཱ ཀོཊྛཀེ ཋིཏོཝ ཏཾ ཏཐཱ ཨཱགཙྪནྟཾ དིསྭཱ ‘‘མཡཱ ཨེཏྟཀཾ ཀཱལཾ ཨེཝཾ ཝིཙརནྟེནཔི མནུསྶོ ནཱམ ན དིཊྛཔུབྦོ, དེཝོ ནུ ཁོ ཨེས ནཱགོ ནུ ཁོ, སཙེ པནཱཧཾ ཨེཏཾ ཨུཔསངྐམིཏྭཱ པུཙྪིསྶཱམི. དེཝོ ཙེ བྷཝིསྶཏི, ཨཱཀཱསཾ ཨུཔྤཏིསྶཏི. ནཱགོ ཙེ, བྷཱུམིཡཾ པཝིསིསྶཏི. ན ཁོ པནཱཧཾ སབྦཀཱལཾ ཧིམཝནྟེཡེཝ ཝིཙརིསྶཱམི, བཱརཱཎསིཾ གམིསྶཱམི. ཏཏྲ མཾ པུཙྪིསྶནྟི ‘ཨཔི ནུ ཁོ ཏེ, མཧཱརཱཛ, ཧིམཝནྟེ ཝསནྟེན ཀིཉྩི ཨཚརིཡཾ དིཊྛཔུབྦ’ནྟི? ཏཏྲཱཧཾ ‘ཨེཝརཱུཔོ མེ སཏྟོ དིཊྛཔུབྦོ’ཏི ཝཀྑཱམི. ‘ཀོ ནཱམེསོ’ཏི ཝུཏྟེ སཙེ ‘ན ཛཱནཱམཱི’ཏི ཝཀྑཱམི ¶ , ཨཐ གརཧིསྶནྟི མཾ, ཏསྨཱ ཨེཏཾ ཝིཛ྄ཛྷིཏྭཱ དུབྦལཾ ཀཏྭཱ པུཙྪིསྶཱམཱི’’ཏི ཙིནྟེསི.
ཨཐ ཏེསུ མིགེསུ པཋམམེཝ ཨོཏརིཏྭཱ པཱནཱིཡཾ པིཝིཏྭཱ ཨུཏྟིཎྞེསུ བོདྷིསཏྟོ ཨུགྒཧིཏཝཏྟོ མཧཱཐེརོ ཝིཡ སཎིཀཾ ཨོཏརིཏྭཱ པསྶདྡྷདརཐོ པཙྩུཏྟརིཏྭཱ རཏྟཝཱཀཙཱིརཾ ནིཝཱསེཏྭཱ ཨེཀཾ པཱརུཔིཏྭཱ ཨཛིནཙམྨཾ ཨཾསེ ཀཏྭཱ པཱནཱིཡགྷཊཾ ཨུཀྑིཔིཏྭཱ ཨུདཀཾ པུཉྪིཏྭཱ ཝཱམཨཾསཀཱུཊེ ཋཔེསི. ཏསྨིཾ ཀཱལེ ‘‘ཨིདཱནི ཝིཛ྄ཛྷིཏུཾ སམཡོ’’ཏི རཱཛཱ ཝིསཔཱིཏཾ སརཾ ཨུཀྑིཔིཏྭཱ མཧཱསཏྟཾ དཀྑིཎཔསྶེ ཝིཛ྄ཛྷི, སརོ ཝཱམཔསྶེན ནིཀྑམི. ཏསྶ ཝིདྡྷབྷཱཝཾ ཉཏྭཱ མིགགཎཱ བྷཱིཏཱ པལཱཡིཾསུ. སུཝཎྞསཱམཔཎྜིཏོ པན ཝིདྡྷོཔི པཱནཱིཡགྷཊཾ ཡཐཱ ཝཱ ཏཐཱ ཝཱ ཨནཝསུམྦྷིཏྭཱ སཏིཾ པཙྩུཔཊྛཱཔེཏྭཱ སཎིཀཾ ཨོཏཱརེཏྭཱ ཝཱལུཀཾ ཝིཡཱུཧིཏྭཱ ཋཔེཏྭཱ དིསཾ ཝཝཏྠཔེཏྭཱ མཱཏཱཔིཏཱུནཾ ཝསནཊྛཱནདིསཱབྷཱགེན སཱིསཾ ཀཏྭཱ རཛཏཔཊྚཝཎྞཱཡ ཝཱལུཀཱཡ ¶ སུཝཎྞཔཊིམཱ ཝིཡ ནིཔཛྫིཏྭཱ སཏིཾ པཙྩུཔཊྛཱཔེཏྭཱ ‘‘ཨིམསྨིཾ ཧིམཝནྟཔྤདེསེ མམ ཝེརཱི ནཱམ ནཏྠི, མཡ྄ཧཾ མཱཏཱཔིཏཱུནཉྩ ཝེརཱི ནཱམ ནཏྠཱི’’ཏི མུཁེན ལོཧིཏཾ ཚཌྜེཏྭཱ རཱཛཱནཾ ཨདིསྭཱཝ པཋམཾ གཱཐམཱཧ –
‘‘ཀོ ནུ མཾ ཨུསུནཱ ཝིཛ྄ཛྷི, པམཏྟཾ ཨུདཧཱརཀཾ;
ཁཏྟིཡོ བྲཱཧྨཎོ ཝེསྶོ, ཀོ མཾ ཝིདྡྷཱ ནིལཱིཡསཱི’’ཏི.
ཏཏྠ ¶ པམཏྟནྟི མེཏྟཱབྷཱཝནཱཡ ཨནུཔཊྛིཏསཏིཾ. ཨིདཉྷི སོ སནྡྷཱཡ ཏསྨིཾ ཁཎེ ཨཏྟཱནཾ པམཏྟཾ ནཱམ ཨཀཱསི. ཝིདྡྷཱཏི ཝིཛ྄ཛྷིཏྭཱ.
ཨེཝཉྩ པན ཝཏྭཱ པུན ཨཏྟནོ སརཱིརམཾསསྶ ཨབྷཀྑསམྨཏབྷཱཝཾ དསྶེཏུཾ དུཏིཡཾ གཱཐམཱཧ –
‘‘ན མེ མཾསཱནི ཁཛྫཱནི, ཙམྨེནཏྠོ ན ཝིཛྫཏི;
ཨཐ ཀེན ནུ ཝཎྞེན, ཝིདྡྷེཡྻཾ མཾ ཨམཉྙཐཱ’’ཏི.
དུཏིཡགཱཐཾ ཝཏྭཱ ཏམེཝ ནཱམཱདིཝསེན པུཙྪནྟོ ཨཱཧ –
‘‘ཀོ ཝཱ ཏྭཾ ཀསྶ ཝཱ པུཏྟོ, ཀཐཾ ཛཱནེམུ ཏཾ མཡཾ;
པུཊྛོ མེ སམྨ ཨཀྑཱཧི, ཀིཾ མཾ ཝིདྡྷཱ ནིལཱིཡསཱི’’ཏི.
ཏཏྠ ¶ ཨམཉྙཐཱཏི ཨཡཾ པུརིསོ ཀེན ཀཱརཎེན མཾ ཝིཛ྄ཛྷིཏབྦནྟི ཨམཉྙིཏྠཱཏི ཨཏྠོ.
ཨེཝཉྩ པན ཝཏྭཱ ཏུཎྷཱི ཨཧོསི. ཏཾ སུཏྭཱ རཱཛཱ ‘‘ཨཡཾ མཡཱ ཝིསཔཱིཏེན སལླེན ཝིཛ྄ཛྷིཏྭཱ པཱཏིཏོཔི ནེཝ མཾ ཨཀྐོསཏི ན པརིབྷཱསཏི, མམ ཧདཡཾ སམྦཱཧནྟོ ཝིཡ པིཡཝཙནེན སམུདཱཙརཏི, གཙྪིསྶཱམིསྶ སནྟིཀ’’ནྟི ཙིནྟེཏྭཱ གནྟྭཱ ཏསྶ སནྟིཀེ ཋིཏོཝ དྭེ གཱཐཱ ཨབྷཱསི –
‘‘རཱཛཱཧམསྨི ཀཱསཱིནཾ, པཱིལི༹ཡཀྑོཏི མཾ ཝིདཱུ;
ལོབྷཱ རཊྛཾ པཧིཏྭཱན, མིགམེསཾ ཙརཱམཧཾ.
‘‘ཨིསྶཏྠེ ཙསྨི ཀུསལོ, དལ༹ྷདྷམྨོཏི ཝིསྶུཏོ;
ནཱགོཔི མེ ན མུཙྩེཡྻ, ཨཱགཏོ ཨུསུཔཱཏན’’ནྟི.
ཏཏྠ རཱཛཱཧམསྨཱིཏི ཨེཝཾ ཀིརསྶ ཝིཏཀྐོ ཨཧོསི ‘‘དེཝཱཔི ནཱགཱཔི མནུསྶབྷཱསཱཡ ཀཐེནྟིཡེཝ, ཨཧམེཏཾ དེཝོཏི ཝཱ ནཱགོཏི ཝཱ མནུསྶོཏི ཝཱ ན ཛཱནཱམི. སཙེ ཀུཛ྄ཛྷེཡྻ, ནཱསེཡྻ ¶ མཾ, ‘རཱཛཱ’ཏི ཝུཏྟེ པན ཨབྷཱཡནྟོ ནཱམ ནཏྠཱི’’ཏི. ཏསྨཱ ཨཏྟནོ རཱཛབྷཱཝཾ ཛཱནཱཔེཏུཾ པཋམཾ ‘‘རཱཛཱཧམསྨཱི’’ཏི ཨཱཧ. ལོབྷཱཏི མིགམཾསལོབྷེན. མིགམེསནྟི མིགཾ ཨེསནྟོ. ཙརཱམཧནྟི ཙརཱམི ཨཧཾ. དུཏིཡཾ གཱཐཾ པན ཨཏྟནོ ¶ བལཾ དཱིཔེཏུཀཱམོ ཨེཝམཱཧ. ཏཏྠ ཨིསྶཏྠེཏི དྷནུསིཔྤེ. དལ༹ྷདྷམྨོཏི དལ༹ྷདྷནུཾ སཧསྶཏྠཱམདྷནུཾ ཨོརོཔེཏུཉྩ ཨཱརོཔེཏུཉྩ སམཏྠོ.
ཨིཏི རཱཛཱ ཨཏྟནོ བལཾ ཝཎྞེཏྭཱ ཏསྶ ནཱམགོཏྟཾ པུཙྪནྟོ ཨཱཧ –
‘‘ཀོ ཝཱ ཏྭཾ ཀསྶ ཝཱ པུཏྟོ, ཀཐཾ ཛཱནེམུ ཏཾ མཡཾ;
པིཏུནོ ཨཏྟནོ ཙཱཔི, ནཱམགོཏྟཾ པཝེདཡཱ’’ཏི.
ཏཏྠ པཝེདཡཱཏི ཀཐཡ.
ཏཾ ¶ སུཏྭཱ མཧཱསཏྟོ ‘‘སཙཱཧཾ ‘དེཝནཱགཀིནྣརཁཏྟིཡཱདཱིསུ ཨཉྙཏརོཧམསྨཱི’ཏི ཀཐེཡྻཾ, སདྡཧེཡྻེཝ ཨེས, སཙྩམེཝ པནསྶ ཀཐེཏུཾ ཝཊྚཏཱི’’ཏི ཙིནྟེཏྭཱ ཨེཝམཱཧ –
‘‘ནེསཱདཔུཏྟོ བྷདྡནྟེ, སཱམོ ཨིཏི མཾ ཉཱཏཡོ;
ཨཱམནྟཡིཾསུ ཛཱིཝནྟཾ, སྭཛྫེཝཱཧཾ གཏོ སཡེ.
‘‘ཝིདྡྷོསྨི པུཐུསལླེན, སཝིསེན ཡཐཱ མིགོ;
སཀམྷི ལོཧིཏེ རཱཛ, པསྶ སེམི པརིཔླུཏོ.
‘‘པཊིཝཱམགཏཾ སལླཾ, པསྶ དྷིམྷཱམི ལོཧིཏཾ;
ཨཱཏུརོ ཏྱཱནུཔུཙྪཱམི, ཀིཾ མཾ ཝིདྡྷཱ ནིལཱིཡསི.
‘‘ཨཛིནམྷི ཧཉྙཏེ དཱིཔི, ནཱགོ དནྟེཧི ཧཉྙཏེ;
ཨཐ ཀེན ནུ ཝཎྞེན, ཝིདྡྷེཡྻཾ མཾ ཨམཉྙཐཱ’’ཏི.
ཏཏྠ ཛཱིཝནྟནྟི མཾ ཨིཏོ པུབྦེ ཛཱིཝམཱནཾ ‘‘ཨེཧི སཱམ, ཡཱཧི སཱམཱ’’ཏི ཉཱཏཡོ ཨཱམནྟཡིཾསུ. སྭཛྫེཝཱཧཾ གཏོཏི སོ ཨཧཾ ཨཛྫ ཨེཝཾ གཏོ མརཎམུཁེ སམྤཏྟོ, པཝིཊྛོཏི ཨཏྠོ ¶ . སཡེཏི སཡཱམི. པརིཔླུཏོཏི ནིམུགྒོ. པཊིཝཱམགཏནྟི དཀྑིཎཔསྶེན པཝིསིཏྭཱ ཝཱམཔསྶེན ནིགྒཏནྟི ཨཏྠོ. པསྶཱཏི ཨོལོཀེཧི མཾ. དྷིམྷཱམཱིཏི ནིཊྛུབྷཱམི, ཨིདཾ སོ སཏིཾ པཙྩུཔཊྛཱཔེཏྭཱ ཨཝིཀམྤམཱནོཝ ལོཧིཏཾ མུཁེན ཚཌྜེཏྭཱ ཨཱཧ. ཨཱཏུརོ ཏྱཱནུཔུཙྪཱམཱི’’ཏི བཱལ༹ྷགིལཱནོ ཧུཏྭཱ ཨཧཾ ཏཾ ཨནུཔུཙྪཱམི. ནིལཱིཡསཱིཏི ཨེཏསྨིཾ ཝནགུམྦེ ནིལཱིནོ ཨཙྪསི. ཝིདྡྷེཡྻནྟི ཝིཛ྄ཛྷིཏབྦཾ. ཨམཉྙཐཱཏི ཨམཉྙིཏྠ.
རཱཛཱ ཏསྶ ཝཙནཾ སུཏྭཱ ཡཐཱབྷཱུཏཾ ཨནཱཙིཀྑིཏྭཱ མུསཱཝཱདཾ ཀཐེནྟོ ཨཱཧ –
‘‘མིགོ ཨུཔཊྛིཏོ ཨཱསི, ཨཱགཏོ ཨུསུཔཱཏནཾ;
ཏཾ དིསྭཱ ཨུབྦིཛཱི སཱམ, ཏེན ཀོདྷོ མམཱཝིསཱི’’ཏི.
ཏཏྠ ཨཱཝིསཱིཏི ཨཛ྄ཛྷོཏྠརི. ཏེན ཀཱརཎེན མེ ཀོདྷོ ཨུཔྤནྣོཏི དཱིཔེཏི.
ཨཐ ¶ ¶ ནཾ མཧཱསཏྟོ ‘‘ཀིཾ ཝདེསི, མཧཱརཱཛ, ཨིམསྨིཾ ཧིམཝནྟེ མཾ དིསྭཱ པལཱཡནམིགོ ནཱམ ནཏྠཱི’’ཏི ཝཏྭཱ ཨཱཧ –
‘‘ཡཏོ སརཱམི ཨཏྟཱནཾ, ཡཏོ པཏྟོསྨི ཝིཉྙུཏཾ;
ན མཾ མིགཱ ཨུཏྟསནྟི, ཨརཉྙེ སཱཔདཱནིཔི.
‘‘ཡཏོ ནིདྷིཾ པརིཧརིཾ, ཡཏོ པཏྟོསྨི ཡོབྦནཾ;
ན མཾ མིགཱ ཨུཏྟསནྟི, ཨརཉྙེ སཱཔདཱནིཔི.
‘‘བྷཱིརཱུ ཀིམྤུརིསཱ རཱཛ, པབྦཏེ གནྡྷམཱདནེ;
སམྨོདམཱནཱ གཙྪཱམ, པབྦཏཱནི ཝནཱནི ཙ.
‘‘ན མཾ མིགཱ ཨུཏྟསནྟི, ཨརཉྙེ སཱཔདཱནིཔི;
ཨཐ ཀེན ནུ ཝཎྞེན, ཨུཏྲཱསནྟི མིགཱ མམ’’ནྟི.
ཏཏྠ ན མཾ མིགཱཏི བྷོ མཧཱརཱཛ, ཡཏོ ཀཱལཏོ པཊྛཱཡ ཨཧཾ ཨཏྟཱནཾ སརཱམི, ཡཏོ ཀཱལཏོ པཊྛཱཡ ཨཧཾ ཝིཉྙུབྷཱཝཾ པཏྟོ ཨསྨི བྷཝཱམི, ཏཏོ ཀཱལཏོ པཊྛཱཡ མཾ དིསྭཱ མིགཱ ¶ ནཱམ ན ཨུཏྟསནྟི. སཱཔདཱནིཔཱིཏི ཝཱལ༹མིགཱཔི. ཡཏོ ནིདྷིནྟི ཡཏོ ཀཱལཏོ པཊྛཱཡ ཨཧཾ ཝཱཀཙཱིརཾ པརིཧརིཾ. བྷཱིརཱུ ཀིམྤུརིསཱཏི མཧཱརཱཛ, མིགཱ ཏཱཝ ཏིཊྛནྟུ, ཀིམྤུརིསཱ ནཱམ ཨཏིབྷཱིརུཀཱ ཧོནྟི. ཡེ ཨིམསྨིཾ གནྡྷམཱདནཔབྦཏེ ཝིཧརནྟི, ཏེཔི མཾ དིསྭཱ ན ཨུཏྟསནྟི, ཨཐ ཁོ མཡཾ ཨཉྙམཉྙཾ སམྨོདམཱནཱ གཙྪཱམ. ཨུཏྲཱསནྟི མིགཱ མམནྟི མམཾ དིསྭཱ མིགཱ ཨུཏྲཱསེཡྻུཾ, ཀེན ཀཱརཎེན ཏྭཾ མཾ སདྡཧཱཔེསྶསཱིཏི དཱིཔེཏི.
ཏཾ སུཏྭཱ རཱཛཱ ‘‘མཡཱ ཨིམཾ ནིརཔརཱདྷཾ ཝིཛ྄ཛྷིཏྭཱ མུསཱཝཱདོ ཀཐིཏོ, སཙྩམེཝ ཀཐཡིསྶཱམཱི’’ཏི ཙིནྟེཏྭཱ ཨཱཧ –
‘‘ན ཏཾ ཏས མིགོ སཱམ, ཀིཾ ཏཱཧཾ ཨལིཀཾ བྷཎེ;
ཀོདྷལོབྷཱབྷིབྷཱུཏཱཧཾ, ཨུསུཾ ཏེ ཏཾ ཨཝསྶཛི’’ནྟི.
ཏཏྠ ན ཏཾ ཏསཱཏི ན ཏཾ དིསྭཱ མིགོ ཏས, ན བྷཱིཏོཏི ཨཏྠོ. ཀིཾ ཏཱཧནྟི ཀིཾ ཏེ ཨེཝཾ ཀལྱཱཎདསྶནསྶ སནྟིཀེ ཨཧཾ ཨལིཀཾ བྷཎིསྶཱམི ¶ . ཀོདྷལོབྷཱབྷིབྷཱུཏཱཧནྟི ཀོདྷེན ཙ ལོབྷེན ཙ ཨབྷིབྷཱུཏོ ཧུཏྭཱ ཨཧཾ. སོ ཧི པཋམམེཝ མིགེསུ ཨུཔྤནྣེན ཀོདྷེན ‘‘མིགེ ཝིཛ྄ཛྷིསྶཱམཱི’’ཏི དྷནུཾ ཨཱརོཔེཏྭཱ ཋིཏོ པཙྪཱ བོདྷིསཏྟཾ དིསྭཱ ཏསྶ དེཝཏཱདཱིསུ ཨཉྙཏརབྷཱཝཾ ཨཛཱནནྟོ ‘‘པུཙྪིསྶཱམི ན’’ནྟི ལོབྷཾ ཨུཔྤཱདེསི, ཏསྨཱ ཨེཝམཱཧ.
ཨེཝཉྩ པན ཝཏྭཱ ‘‘ནཱཡཾ སུཝཎྞསཱམོ ཨིམསྨིཾ ཨརཉྙེ ཨེཀཀོཝ ཝསིསྶཏི, ཉཱཏཀེཧིཔིསྶ བྷཝིཏབྦཾ, པུཙྪིསྶཱམི ན’’ནྟི ཙིནྟེཏྭཱ ཨིཏརཾ གཱཐམཱཧ –
‘‘ཀུཏོ ནུ སཱམ ཨཱགམྨ, ཀསྶ ཝཱ པཧིཏོ ཏུཝཾ;
‘ཨུདཧཱརོ ནདིཾ གཙྪ’, ཨཱགཏོ མིགསམྨཏ’’ནྟི.
ཏཏྠ སཱམཱཏི མཧཱསཏྟཾ ཨཱལཔཏི. ཨཱགམྨཱཏི ཀུཏོ དེསཱ ཨིམཾ ཝནཾ ཨཱགམིཏྭཱ ‘‘ཨམྷཱཀཾ ཨུདཧཱརོ ཨུདཀཾ ཨཱཧརིཏུཾ ནདིཾ གཙྪཱ’’ཏི ཀསྶ ཝཱ པཧིཏོཀེན པུགྒལེན པེསིཏོ ཧུཏྭཱ ཏུཝཾ ཨིམཾ མིགསམྨཏཾ ཨཱགཏོཏི ཨཏྠོ.
སོ ¶ ཏསྶ ཀཐཾ སུཏྭཱ མཧནྟཾ དུཀྑཝེདནཾ ཨདྷིཝཱསེཏྭཱ མུཁེན ལོཧིཏཾ ཚཌྜེཏྭཱ གཱཐམཱཧ –
‘‘ཨནྡྷཱ ¶ མཱཏཱཔིཏཱ མཡ྄ཧཾ, ཏེ བྷརཱམི བྲཧཱཝནེ;
ཏེསཱཧཾ ཨུདཀཱཧཱརོ, ཨཱགཏོ མིགསམྨཏ’’ནྟི.
ཏཏྠ བྷརཱམཱིཏི མཱུལཕལཱདཱིནི ཨཱཧརིཏྭཱ པོསེམི.
ཨེཝཉྩ པན ཝཏྭཱ མཧཱསཏྟོ མཱཏཱཔིཏརོ ཨཱརབྦྷ ཝིལཔནྟོ ཨཱཧ –
‘‘ཨཏྠི ནེསཾ ཨུསཱམཏྟཾ, ཨཐ སཱཧསྶ ཛཱིཝིཏཾ;
ཨུདཀསྶ ཨལཱབྷེན, མཉྙེ ཨནྡྷཱ མརིསྶརེ.
‘‘ན མེ ཨིདཾ ཏཐཱ དུཀྑཾ, ལབྦྷཱ ཧི པུམུནཱ ཨིདཾ;
ཡཉྩ ཨམྨཾ ན པསྶཱམི, ཏཾ མེ དུཀྑཏརཾ ཨིཏོ.
‘‘ན ¶ མེ ཨིདཾ ཏཐཱ དུཀྑཾ, ལབྦྷཱ ཧི པུམུནཱ ཨིདཾ;
ཡཉྩ ཏཱཏཾ ན པསྶཱམི, ཏཾ མེ དུཀྑཏརཾ ཨིཏོ.
‘‘སཱ ནཱུན ཀཔཎཱ ཨམྨཱ, ཙིརརཏྟཱཡ རུཙྪཏི;
ཨཌྜྷརཏྟེཝ རཏྟེ ཝཱ, ནདཱིཝ ཨཝསུཙྪཏི.
‘‘སོ ནཱུན ཀཔཎོ ཏཱཏོ, ཙིརརཏྟཱཡ རུཙྪཏི;
ཨཌྜྷརཏྟེཝ རཏྟེ ཝཱ, ནདཱིཝ ཨཝསུཙྪཏི.
‘‘ཨུཊྛཱནཔཱདཙརིཡཱཡ, པཱདསམྦཱཧནསྶ ཙ;
སཱམ ཏཱཏཝིལཔནྟཱ, ཧིཎྜིསྶནྟི བྲཧཱཝནེ.
ཨིདམྤི དུཏིཡཾ སལླཾ, ཀམྤེཏི ཧདཡཾ མམཾ;
ཡཉྩ ཨནྡྷེ ན པསྶཱམི, མཉྙེ ཧིསྶཱམི ཛཱིཝིཏ’’ནྟི.
ཏཏྠ ཨུསཱམཏྟནྟི བྷོཛནམཏྟཾ. ‘‘ཨུསཱ’’ཏི ཧི བྷོཛནསྶ ནཱམཾ ཏསྶ ཙ ཨཏྠིཏཱཡ. སཱཧསྶ ཛཱིཝིཏནྟི ཚདིཝསམཏྟཾ ཛཱིཝིཏནྟི ཨཏྠོ. ཨིདཾ ཨཱཧརིཏྭཱ ཋཔིཏཾ ཕལཱཕལཾ སནྡྷཱཡཱཧ ¶ . ཨཐ ཝཱ ཨུསཱཏི ཨུསྨཱ. ཏེནེཏཾ དསྶེཏི – ཏེསཾ སརཱིརེ ཨུསྨཱམཏྟཾ ཨཏྠི, ཨཐ མཡཱ ཨཱབྷཏེན ཕལཱཕལེན སཱཧསྶ ཛཱིཝིཏཾ ཨཏྠཱིཏི. མརིསྶརེཏི མརིསྶནྟཱིཏི མཉྙཱམི. པུམུནཱཏི པུརིསེན, ཨེཝརཱུཔཉྷི དུཀྑཾ པུརིསེན ལབྷིཏབྦམེཝཱཏི ཨཏྠོ. ཙིརརཏྟཱཡ རུཙྪཏཱིཏི ཙིརརཏྟཾ རོདིསྶཏི. ཨཌྜྷརཏྟེ ཝཱཏི མཛ྄ཛྷིམརཏྟེ ཝཱ. རཏྟེ ཝཱཏི པཙྪིམརཏྟེ ཝཱ. ཨཝསུཙྪཏཱིཏི ཀུནྣདཱི ཝིཡ སུསྶིསྶཏཱིཏི ཨཏྠོ. ཨུཊྛཱནཔཱདཙརིཡཱཡཱཏི མཧཱརཱཛ, ཨཧཾ རཏྟིམྤི དིཝཱཔི དྭེ ཏཡོ ཝཱརེ ཨུཊྛཱཡ ཨཏྟནོ ཨུཊྛཱནཝཱིརིཡེན ཏེསཾ པཱདཙརིཡཾ ཀརོམི, ཧཏྠཔཱདེ སམྦཱཧཱམི, ཨིདཱནི མཾ ཨདིསྭཱ མམཏྠཱཡ ཏེ པརིཧཱིནཙཀྑུཀཱ ‘‘སཱམཏཱཏཱ’’ཏི ཝིལཔནྟཱ ཀཎྚཀེཧི ཝིཛ྄ཛྷིཡམཱནཱ ཝིཡ ཨིམསྨིཾ ¶ ཝནཔྤདེསེ ཧིཎྜིསྶནྟི ཝིཙརིསྶནྟཱིཏི ཨཏྠོ. དུཏིཡཾ སལླནྟི པཋམཝིདྡྷཝིསཔཱིཏསལླཏོ སཏགུཎེན སཧསྶགུཎེན སཏསཧསྶགུཎེན དུཀྑཏརཾ ཨིདཾ དུཏིཡཾ ཏེསཾ ཨདསྶནསོཀསལླཾ.
རཱཛཱ ¶ ཏསྶ ཝིལཱཔཾ སུཏྭཱ ‘‘ཨཡཾ ཨཙྩནྟཾ བྲཧྨཙཱརཱི དྷམྨེ ཋིཏོ མཱཏཱཔིཏརོ བྷརཏི, ཨིདཱནི ཨེཝཾ དུཀྑཔྤཏྟོཔི ཏེསཾཡེཝ ཝིལཔཏི, ཨེཝཾ གུཎསམྤནྣེ ནཱམ མཡཱ ཨཔརཱདྷོ ཀཏོ, ཀཐཾ ནུ ཁོ ཨིམཾ སམསྶཱསེཡྻ’’ནྟི ཙིནྟེཏྭཱ ‘‘ནིརཡེ པཙྩནཀཱལེ རཛྫཾ ཀིཾ ཀརིསྶཏི, ཨིམིནཱ པཊིཛགྒིཏནིཡཱམེནེཝསྶ མཱཏཱཔིཏརོ པཊིཛགྒིསྶཱམི, ཨིམསྶ མརཎམྤི ཨམརཎཾ ཝིཡ བྷཝིསྶཏཱི’’ཏི སནྣིཊྛཱནཾ ཀཏྭཱ ཨཱཧ –
‘‘མཱ བཱལ༹ྷཾ པརིདེཝེསི, སཱམ ཀལྱཱཎདསྶན;
ཨཧཾ ཀམྨཀརོ ཧུཏྭཱ, བྷརིསྶཾ ཏེ བྲཧཱཝནེ.
‘‘ཨིསྶཏྠེ ཙསྨི ཀུསལོ, དལ༹ྷདྷམྨོཏི ཝིསྶུཏོ;
ཨཧཾ ཀམྨཀརོ ཧུཏྭཱ, བྷརིསྶཾ ཏེ བྲཧཱཝནེ.
‘‘མིགཱནཾ ཝིགྷཱསམནྭེསཾ, ཝནམཱུལཕལཱནི ཙ;
ཨཧཾ ཀམྨཀརོ ཧུཏྭཱ, བྷརིསྶཾ ཏེ བྲཧཱཝནེ.
‘‘ཀཏམཾ ཏཾ ཝནཾ སཱམ, ཡཏྠ མཱཏཱཔིཏཱ ཏཝ;
ཨཧཾ ཏེ ཏཐཱ བྷརིསྶཾ, ཡཐཱ ཏེ ཨབྷརཱི ཏུཝ’’ནྟི.
ཏཏྠ བྷརིསྶཾ ཏེཏི ཏེ ཏཝ མཱཏཱཔིཏརོ བྷརིསྶཱམི. མིགཱནནྟི སཱིཧཱདཱིནཾ མིགཱནཾ ཝིགྷཱསཾ ¶ ཨནྭེསནྟོ. ཨིདཾ སོ ‘‘ཨིསྶཏྠེ ཙསྨི ཀུསལོཏི ཐཱུལཐཱུལེ མིགེ ཝདྷིཏྭཱ མདྷུརམཾསེན ཏཝ མཱཏཱཔིཏརོ བྷརིསྶཱམཱི’’ཏི ཝཏྭཱ ‘‘མཱ, མཧཱརཱཛ, ཨམྷེ ནིསྶཱཡ པཱཎཝདྷཾ ཀརཱི’’ཏི ཝུཏྟེ ཨེཝམཱཧ. ཡཐཱ ཏེཏི ཡཐཱ ཏྭཾ ཏེ ཨབྷརི, ཏཐེཝཱཧམྤི བྷརིསྶཱམཱིཏི.
ཨཐསྶ མཧཱསཏྟོ ‘‘སཱདྷུ, མཧཱརཱཛ, ཏེན ཧི མེ མཱཏཱཔིཏརོ བྷརསྶཱུ’’ཏི ཝཏྭཱ མགྒཾ ཨཱཙིཀྑནྟོ ཨཱཧ –
‘‘ཨཡཾ ཨེཀཔདཱི རཱཛ, ཡོཡཾ ཨུསྶཱིསཀེ མམ;
ཨིཏོ གནྟྭཱ ཨཌྜྷཀོསཾ, ཏཏྠ ནེསཾ ཨགཱརཀཾ;
ཡཏྠ མཱཏཱཔིཏཱ མཡ྄ཧཾ, ཏེ བྷརསྶུ ཨིཏོ གཏོ’’ཏི.
ཏཏྠ ཨེཀཔདཱིཏི ཨེཀཔདམགྒོ. ཨུསྶཱིསཀེཏི ཡོ ཨེས མམ མཏྠཀཊྛཱནེ. ཨཌྜྷཀོསནྟི ཨཌྜྷཀོསནྟརེ.
ཨེཝཾ ¶ སོ ཏསྶ མགྒཾ ཨཱཙིཀྑིཏྭཱ མཱཏཱཔིཏཱུསུ བལཝསིནེཧེན ¶ ཏཐཱརཱུཔཾ ཝེདནཾ ཨདྷིཝཱསེཏྭཱ ཏེསཾ བྷརཎཏྠཱཡ ཨཉྫལིཾ པགྒཡ྄ཧ ཡཱཙནྟོ པུན ཨེཝམཱཧ –
‘‘ནམོ ཏེ ཀཱསིརཱཛཏྠུ, ནམོ ཏེ ཀཱསིཝཌྜྷན;
ཨནྡྷཱ མཱཏཱཔིཏཱ མཡ྄ཧཾ, ཏེ བྷརསྶུ བྲཧཱཝནེ.
‘‘ཨཉྫལིཾ ཏེ པགྒཎྷཱམི, ཀཱསིརཱཛ ནམཏྠུ ཏེ;
མཱཏརཾ པིཏརཾ མཡ྄ཧཾ, ཝུཏྟོ ཝཛྫཱསི ཝནྡན’’ནྟི.
ཏཏྠ ཝུཏྟོ ཝཛྫཱསཱིཏི ‘‘པུཏྟོ ཝོ སུཝཎྞསཱམོ ནདཱིཏཱིརེཝིསཔཱིཏེན སལླེན ཝིདྡྷོ རཛཏཔཊྚསདིསེ ཝཱལུཀཱཔུལིནེ དཀྑིཎཔསྶེན ནིཔནྣོ ཨཉྫལིཾ པགྒཡ྄ཧ ཏུམྷཱཀཾ པཱདེ ཝནྡཏཱི’’ཏི ཨེཝཾ མཧཱརཱཛ, མཡཱ ཝུཏྟོ ཧུཏྭཱ མཱཏཱཔིཏཱུནཾ མེ ཝནྡནཾ ཝདེཡྻཱསཱིཏི ཨཏྠོ.
རཱཛཱ ‘‘སཱདྷཱུ’’ཏི སམྤཊིཙྪི. མཧཱསཏྟོཔི མཱཏཱཔིཏཱུནཾ ཝནྡནཾ པེསེཏྭཱ ཝིསཉྙིཏཾ པཱཔུཎི. ཏམཏྠཾ པཀཱསེནྟོ སཏྠཱ ཨཱཧ –
‘‘ཨིདཾ ¶ ཝཏྭཱན སོ སཱམོ, ཡུཝཱ ཀལྱཱཎདསྶནོ;
མུཙྪིཏོ ཝིསཝེགེན, ཝིསཉྙཱི སམཔཛྫཐཱ’’ཏི.
ཏཏྠ སམཔཛྫཐཱཏི ཝིསཉྙཱི ཛཱཏོ.
སོ ཧི ཧེཊྛཱ ཨེཏྟཀཾ ཀཐེནྟོ ནིརསྶཱསོ ཝིཡ ཨཧོསི. ཨིདཱནི པནསྶ ཝིསཝེགེན མདྡིཏཱ བྷཝངྒཙིཏྟསནྟཏི ཧདཡརཱུཔཾ ནིསྶཱཡ པཝཏྟི, ཀཐཱ པཙྪིཛྫི, མུཁཾ པིཧིཏཾ, ཨཀྑཱིནི ནིམཱིལིཏཱནི, ཧཏྠཔཱདཱ ཐདྡྷབྷཱཝཾ པཏྟཱ, སཀལསརཱིརཾ ལོཧིཏེན མཀྑིཏཾ. རཱཛཱ ‘‘ཨཡཾ ཨིདཱནེཝ མཡཱ སདྡྷིཾ ཀཐེསི, ཀིཾ ནུ ཁོ’’ཏི ཏསྶ ཨསྶཱསཔསྶཱསེ ཨུཔདྷཱརེསི. ཏེ པན ནིརུདྡྷཱ, སརཱིརཾ ཐདྡྷཾ ཛཱཏཾ. སོ ཏཾ དིསྭཱ ‘‘ནིརུདྡྷོ དཱནི སཱམོ’’ཏི སོཀཾ སདྡྷཱརེཏུཾ ཨསཀྐོནྟོ ཨུབྷོ ཧཏྠེ མཏྠཀེ ཋཔེཏྭཱ མཧཱསདྡེན པརིདེཝི. ཏམཏྠཾ པཀཱསེནྟོ སཏྠཱ ཨཱཧ –
‘‘ས རཱཛཱ པརིདེཝེསི, བཧུཾ ཀཱརུཉྙསཉྷིཏཾ;
ཨཛརཱམརོཧཾ ཨཱསིཾ, ཨཛྫེཏཾ ཉཱམི ནོ པུརེ;
སཱམཾ ཀཱལངྐཏཾ དིསྭཱ, ནཏྠི མཙྩུསྶ ནཱགམོ.
‘‘ཡསྶུ ¶ མཾ པཊིམནྟེཏི, སཝིསེན སམཔྤིཏོ;
སྭཛྫ ¶ ཨེཝཾ གཏེ ཀཱལེ, ན ཀིཉྩི མབྷིབྷཱསཏི.
‘‘ནིརཡཾ ནཱུན གཙྪཱམི, ཨེཏྠ མེ ནཏྠི སཾསཡོ;
ཏདཱ ཧི པཀཏཾ པཱཔཾ, ཙིརརཏྟཱཡ ཀིབྦིསཾ.
‘‘བྷཝནྟི ཏསྶ ཝཏྟཱརོ, གཱམེ ཀིབྦིསཀཱརཀོ;
ཨརཉྙེ ནིམྨནུསྶམྷི, ཀོ མཾ ཝཏྟུམརཧཏི.
‘‘སཱརཡནྟི ཧི ཀམྨཱནི, གཱམེ སཾགཙྪ མཱཎཝཱ;
ཨརཉྙེ ནིམྨནུསྶམྷི, ཀོ ནུ མཾ སཱརཡིསྶཏཱི’’ཏི.
ཏཏྠ ཨཱསིནྟི ཨཧཾ ཨེཏྟཀཾ ཀཱལཾ ཨཛརཱམརོམྷཱིཏི སཉྙཱི ཨཧོསིཾ. ཨཛྫེཏནྟི ཨཛྫ ཨཧཾ ཨིམཾ སཱམཾ ཀཱལཀཏཾ དིསྭཱ མམཉྩེཝ ཨཉྙེསཉྩ ནཏྠི མཙྩུསྶ ནཱགམོཏི ཏཾ མཙྩུསྶ ཨཱགམནཾ ¶ ཨཛྫ ཛཱནཱམི, ཨིཏོ པུབྦེ ན ཛཱནཱམཱིཏི ཝིལཔཏི. སྭཛྫ ཨེཝཾ གཏེ ཀཱལེཏི ཡོ སཝིསེན སལླེན སམཔྤིཏོ ཨིདཱནེཝ མཾ པཊིམནྟེཏི, སོ ཨཛྫ ཨེཝཾ གཏེ ཀཱལེ ཨེཝཾ མརཎཀཱལེ སམྤཏྟེ ཀིཉྩི ཨཔྤམཏྟཀམྤི ན བྷཱསཏི. ཏདཱ ཧཱིཏི ཏསྨིཾ ཁཎེ སཱམཾ ཝིཛ྄ཛྷནྟེན མཡཱ པཱཔཾ ཀཏཾ. ཙིརརཏྟཱཡ ཀིབྦིསནྟི ཏཾ པན ཙིརརཏྟཾ ཝིཔཙྩནསམཏྠཾ དཱརུཎཾ ཕརུསཾ.
ཏསྶཱཏི ཏསྶ ཨེཝརཱུཔཾ པཱཔཀམྨཾ ཀཏྭཱ ཝིཙརནྟསྶ. ཝཏྟཱརོཏི ནིནྡིཏཱརོ བྷཝནྟི ‘‘ཀུཧིཾ གཱམེ ཀིནྟི ཀིབྦིསཀཱརཀོ’’ཏི. ཨིམསྨིཾ པན ཨརཉྙེ ནིམྨནུསྶམྷི ཀོ མཾ ཝཏྟུམརཧཏི, སཙེ ཧི བྷཝེཡྻ, ཝདེཡྻཱཏི ཝིལཔཏི. སཱརཡནྟཱིཏི གཱམེ ཝཱ ནིགམཱདཱིསུ ཝཱ སཾགཙྪ མཱཎཝཱ ཏཏྠ ཏཏྠ བཧཱུ པུརིསཱ སནྣིཔཏིཏྭཱ ‘‘ཨམྦྷོ པུརིསགྷཱཏཀ, དཱརུཎཾ ཏེ ཀམྨཾ ཀཏཾ, ཨསུཀདཎྜཾ པཏྟོ ནཱམ ཏྭ’’ནྟི ཨེཝཾ ཀམྨཱནི སཱརེནྟི ཙོདེནྟི. ཨིམསྨིཾ པན ནིམྨནུསྶེ ཨརཉྙེ མཾ ཀོ སཱརཡིསྶཏཱིཏི ཨཏྟཱནཾ ཙོདེནྟོ ཝིལཔཏི.
ཏདཱ བཧུསུནྡརཱི ནཱམ དེཝདྷཱིཏཱ གནྡྷམཱདནཝཱསིནཱི མཧཱསཏྟསྶ སཏྟམེ ཨཏྟབྷཱཝེ མཱཏུབྷཱུཏཔུབྦཱ. སཱ པུཏྟསིནེཧེན བོདྷིསཏྟཾ ནིཙྩཾ ཨཱཝཛྫེཏི, ཏཾ དིཝསཾ པན དིབྦསམྤཏྟིཾ ཨནུབྷཝམཱནཱ ན ཏཾ ཨཱཝཛྫེཏི. ‘‘དེཝསམཱགམཾ གཏཱ’’ཏིཔི ཝདནྟིཡེཝ. སཱ ཏསྶ ཝིསཉྙིབྷཱུཏཀཱལེ ‘‘ཀིཾ ¶ ནུ ཁོ མེ པུཏྟསྶ པཝཏྟཱི’’ཏི ཨཱཝཛྫམཱནཱ ཨདྡས ‘‘ཨཡཾ པཱིལི༹ཡཀྑོ ནཱམ རཱཛཱ མམ པུཏྟཾ ཝིསཔཱིཏེན སལླེན ཝིཛ྄ཛྷིཏྭཱ མིགསམྨཏཱནདཱིཏཱིརེ ཝཱལུཀཱཔུལིནེ གྷཱཏེཏྭཱ མཧནྟེན སདྡེན པརིདེཝཏི. སཙཱཧཾ ན གམིསྶཱམི, མམ པུཏྟོ སུཝཎྞསཱམོ ཨེཏྠེཝ མརིསྶཏི, རཉྙོཔི ཧདཡཾ ཕལིསྶཏི, སཱམསྶ མཱཏཱཔིཏརོཔི ནིརཱཧཱརཱ པཱནཱིཡམྤི ཨལབྷནྟཱ སུསྶིཏྭཱ མརིསྶནྟི. མཡི པན གཏཱཡ རཱཛཱ པཱནཱིཡགྷཊཾ ཨཱདཱཡ ཏསྶ མཱཏཱཔིཏཱུནཾ སནྟིཀཾ གམིསྶཏི, གནྟྭཱ ཙ པན ‘‘པུཏྟོ ཝོ མཡཱ ཧཏོ’ཏི ཀཐེསྶཏི. ཨེཝཉྩ ཝཏྭཱ ཏེསཾ ཝཙནཾ སུཏྭཱ ¶ ཏེ པུཏྟསྶ སནྟིཀཾ ཨཱནཡིསྶཏི. ཨཐ ཁོ ཏེ ཙ ཨཧཉྩ སཙྩཀིརིཡཾ ཀརིསྶཱམ, སཙྩབལེན སཱམསྶ ཝིསཾ ཝིནསྶིསྶཏི. ཨེཝཾ མེ པུཏྟོ ཛཱིཝིཏཾ ལབྷིསྶཏི, མཱཏཱཔིཏརོ ཙ ཙཀྑཱུནི ལབྷིསྶནྟི, རཱཛཱ ཙ སཱམསྶ དྷམྨདེསནཾ སུཏྭཱ ནགརཾ གནྟྭཱ མཧཱདཱནཾ དཏྭཱ སགྒཔརཱཡཎོ བྷཝིསྶཏི, ཏསྨཱ གཙྪཱམཧཾ ཏཏྠཱ’’ཏི. སཱ གནྟྭཱ མིགསམྨཏཱནདཱིཏཱིརེ ཨདིསྶམཱནེན ཀཱཡེན ཨཱཀཱསེ ཋཏྭཱ རཉྙཱ སདྡྷིཾ ཀཐེསི. ཏམཏྠཾ པཀཱསེནྟོ སཏྠཱ ཨཱཧ –
‘‘སཱ དེཝཏཱ ཨནྟརཧིཏཱ, པབྦཏེ གནྡྷམཱདནེ;
རཉྙོཝ ཨནུཀམྤཱཡ, ཨིམཱ གཱཐཱ ཨབྷཱསཐ.
‘‘ཨཱགུཾ ¶ ཀིར མཧཱརཱཛ, ཨཀརི ཀམྨདུཀྐཊཾ;
ཨདཱུསཀཱ པིཏཱཔུཏྟཱ, ཏཡོ ཨེཀཱུསུནཱ ཧཏཱ.
‘‘ཨེཧི ཏཾ ཨནུསིཀྑཱམི, ཡཐཱ ཏེ སུགཏཱི སིཡཱ;
དྷམྨེནནྡྷེ ཝནེ པོས, མཉྙེཧཾ སུགཏཱི ཏཡཱ’’ཏི.
ཏཏྠ རཉྙོཝཱཏི རཉྙོཡེཝ. ཨཱགུཾ ཀིརཱཏི མཧཱརཱཛ, ཏྭཾ མཧཱཔརཱདྷཾ མཧཱཔཱཔཾ ཨཀརི. དུཀྐཊནྟི ཡཾ ཀཏཾ དུཀྐཊཾ ཧོཏི, ཏཾ ལཱམཀཀམྨཾ ཨཀརི. ཨདཱུསཀཱཏི ནིདྡོསཱ. པིཏཱཔུཏྟཱཏི མཱཏཱ ཙ པིཏཱ ཙ པུཏྟོ ཙ ཨིམེ ཏཡོ ཛནཱ ཨེཀཨུསུནཱ ཧཏཱ. ཏསྨིཉྷི ཧཏེ ཏཔྤཊིབདྡྷཱ ཏསྶ མཱཏཱཔིཏརོཔི ཧཏཱཝ ཧོནྟི. ཨནུསིཀྑཱམཱིཏི སིཀྑཱཔེམི ཨནུསཱསཱམི. པོསཱཏི སཱམསྶ ཋཱནེ ཋཏྭཱ སིནེཧཾ པཙྩུཔཊྛཱཔེཏྭཱ སཱམོ ཝིཡ ཏེ ཨུབྷོ ཨནྡྷེ པོསེཧི. མཉྙེཧཾ སུགཏཱི ཏཡཱཏི ཨེཝཾ ཏཡཱ སུགཏིཡེཝ གནྟབྦཱ བྷཝིསྶཏཱིཏི ཨཧཾ མཉྙཱམི.
སོ ¶ དེཝཏཱཡ ཝཙནཾ སུཏྭཱ ‘‘ཨཧཾ ཀིར ཏསྶ མཱཏཱཔིཏརོ པོསེཏྭཱ སགྒཾ གམིསྶཱམཱི’’ཏི སདྡཧིཏྭཱ ‘‘ཀིཾ མེ རཛྫེན, ཏེཡེཝ པོསེསྶཱམཱི’’ཏི དལ༹ྷཾ ཨདྷིཊྛཱཡ བལཝཔརིདེཝཾ པརིདེཝནྟོ སོཀཾ ཏནུཀཾ ཀཏྭཱ ‘‘སུཝཎྞསཱམོ མཏོ བྷཝིསྶཏཱི’’ཏི ནཱནཱཔུཔྥེཧི ཏསྶ སརཱིརཾ པཱུཛེཏྭཱ ཨུདཀེན སིཉྩིཏྭཱ ཏིཀྑཏྟུཾ པདཀྑིཎཾ ཀཏྭཱ ཙཏཱུསུ ཋཱནེསུ ཝནྡིཏྭཱ ཏེན པཱུརིཏཾ ཨུདཀགྷཊཾ ཨཱདཱཡ དོམནསྶཔྤཏྟོ དཀྑིཎདིསཱབྷིམུཁོ ཨགམཱསི. ཏམཏྠཾ པཀཱསེནྟོ སཏྠཱ ཨཱཧ –
‘‘ས རཱཛཱ པརིདེཝིཏྭཱ, བཧུཾ ཀཱརུཉྙསཉྷིཏཾ;
ཨུདཀཀུམྦྷམཱདཱཡ, པཀྐཱམི དཀྑིཎཱམུཁོ’’ཏི.
པཀཏིཡཱཔི ¶ མཧཱཐཱམོ རཱཛཱ པཱནཱིཡགྷཊཾ ཨཱདཱཡ གཙྪནྟོ ཨསྶམཔདཾ ཀོཊྚེནྟོ ཝིཡ པཝིསིཏྭཱ དུཀཱུལཔཎྜིཏསྶ པཎྞསཱལཱདྭཱརཾ སམྤཱཔུཎི. དུཀཱུལཔཎྜིཏོ ཨནྟོ ནིསིནྣོཝ ཏསྶ པདསདྡཾ སུཏྭཱ ‘‘ནཱཡཾ སཱམསྶ པདསདྡོ, ཀསྶ ནུ ཁོ’’ཏི པུཙྪནྟོ གཱཐཱདྭཡམཱཧ –
‘‘ཀསྶ ནུ ཨེསོ པདསདྡོ, མནུསྶསྶེཝ ཨཱགཏོ;
ནེསོ སཱམསྶ ནིགྒྷོསོ, ཀོ ནུ ཏྭམསི མཱརིས.
‘‘སནྟཉྷི ¶ སཱམོ ཝཛཏི, སནྟཾ པཱདཱནི ནེཡཏི;
ནེསོ སཱམསྶ ནིགྒྷོསོ, ཀོ ནུ ཏྭམསི མཱརིསཱ’’ཏི.
ཏཏྠ མནུསྶསྶེཝཱཏི ནཱཡཾ སཱིཧབྱགྒྷདཱིཔིཡཀྑནཱགཀིནྣརཱནཾ, ཨཱགཙྪཏོ པན མནུསྶསྶེཝཱཡཾ པདསདྡོ, ནེསོ སཱམསྶཱཏི. སནྟཾ ཧཱིཏི ཨུཔསམཡུཏྟཾ ཨེཝ. ཝཛཏཱིཏི ཙངྐམཏི. ནེཡཏཱིཏི པཏིཊྛཱཔེཏི.
ཏཾ སུཏྭཱ རཱཛཱ ‘‘སཙཱཧཾ ཨཏྟནོ རཱཛབྷཱཝཾ ཨཀཐེཏྭཱ ‘མཡཱ ཏུམྷཱཀཾ པུཏྟོ མཱརིཏོ’ཏི ཝཀྑཱམི, ཨིམེ ཀུཛ྄ཛྷིཏྭཱ མཡཱ སདྡྷིཾ ཕརུསཾ ཀཐེསྶནྟི. ཨེཝཾ མེ ཏེསུ ཀོདྷོ ཨུཔྤཛྫིསྶཏི, ཨཐ ནེ ཝིཧེཋེསྶཱམི, ཏཾ མམ ཨཀུསལཾ བྷཝིསྶཏི, ‘རཱཛཱ’ཏི པན ཝུཏྟེ ཨབྷཱཡནྟཱ ནཱམ ནཏྠི, ཏསྨཱ རཱཛབྷཱཝཾ ཏཱཝ ཀཐེསྶཱམཱི’’ཏི ཙིནྟེཏྭཱ པཱནཱིཡམཱལ༹ཀེ པཱནཱིཡགྷཊཾ ཋཔེཏྭཱ པཎྞསཱལཱདྭཱརེ ཋཏྭཱ ཨཱཧ –
‘‘རཱཛཱཧམསྨི ¶ ཀཱསཱིནཾ, པཱིལི༹ཡཀྑོཏི མཾ ཝིདཱུ;
ལོབྷཱ རཊྛཾ པཧིཏྭཱན, མིགམེསཾ ཙརཱམཧཾ.
‘‘ཨིསྶཏྠེ ཙསྨི ཀུསལོ, དལ༹ྷདྷམྨོཏི ཝིསྶུཏོ;
ནཱགོཔི མེ ན མུཙྩེཡྻ, ཨཱགཏོ ཨུསུཔཱཏན’’ནྟི.
དུཀཱུལཔཎྜིཏོཔི ཏེན སདྡྷིཾ པཊིསནྠཱརཾ ཀརོནྟོ ཨཱཧ –
‘‘སྭཱགཏཾ ཏེ མཧཱརཱཛ, ཨཐོ ཏེ ཨདུརཱགཏཾ;
ཨིསྶརོསི ཨནུཔྤཏྟོ, ཡཾ ཨིདྷཏྠི པཝེདཡ.
‘‘ཏིནྡུཀཱནི པིཡཱལཱནི, མདྷུཀེ ཀཱསུམཱརིཡོ;
ཕལཱནི ཁུདྡཀཔྤཱནི, བྷུཉྫ རཱཛ ཝརཾ ཝརཾ.
‘‘ཨིདམྤི པཱནཱིཡཾ སཱིཏཾ, ཨཱབྷཏཾ གིརིགབྦྷརཱ;
ཏཏོ པིཝ མཧཱརཱཛ, སཙེ ཏྭཾ ཨབྷིཀངྑསཱི’’ཏི;
ཏསྶཏྠོ ¶ ¶ སཏྟིགུམྦཛཱཏཀེ (ཛཱ. ༡.༡༥.༡༥༩ ཨཱདཡོ) ཀཐིཏོ. ཨིདྷ པན ‘‘གིརིགབྦྷརཱ’’ཏི མིགསམྨཏཾ སནྡྷཱཡ ཝུཏྟཾ. སཱ ཧི ནདཱི གིརིགབྦྷརཱ ནིཀྑནྟཏྟཱ ‘‘གིརིགབྦྷརཱ’’ ཏྭེཝ ཛཱཏཱ.
ཨེཝཾ ཏེན པཊིསནྠཱརེ ཀཏེ རཱཛཱ ‘‘པུཏྟོ ཝོ མཡཱ མཱརིཏོ’’ཏི པཋམམེཝ ཝཏྟུཾ ཨཡུཏྟཾ, ཨཛཱནནྟོ ཝིཡ ཀཐཾ སམུཊྛཱཔེཏྭཱ ཀཐེསྶཱམཱི’’ཏི ཙིནྟེཏྭཱ ཨཱཧ –
‘‘ནཱལཾ ཨནྡྷཱ ཝནེ དཊྛུཾ, ཀོ ནུ ཝོ ཕལམཱཧརི;
ཨནནྡྷསྶེཝཡཾ སམྨཱ, ནིཝཱཔོ མཡ྄ཧ ཁཱཡཏཱི’’ཏི.
ཏཏྠ ནཱལནྟི ཏུམྷེ ཨནྡྷཱ ཨིམསྨིཾ ཝནེ ཀིཉྩི དཊྛུཾ ན སམཏྠཱ. ཀོ ནུ ཝོ ཕལམཱཧརཱིཏི ཀོ ནུ ཏུམྷཱཀཾ ཨིམཱནི ཕལཱཕལཱནི ཨཱཧརི. ནིཝཱཔོཏི ཨཡཾ སམྨཱ ནཡེན ཨུཔཱཡེན ཀཱརཎེན ཀཏོ ཁཱདིཏབྦཡུཏྟཀཱནཾ པརིསུདྡྷཱནཾ ཕལཱཕལཱནཾ ནིཝཱཔོ སནྣིཙཡོ ཨནནྡྷསྶ ཝིཡ མཡ྄ཧཾ ཁཱཡཏི པཉྙཱཡཏི ཨུཔཊྛཱཏི.
ཏཾ སུཏྭཱ དུཀཱུལཔཎྜིཏོ ‘‘མཧཱརཱཛ, ན མཡཾ ཕལཱཕལཱནི ཨཱཧརཱམ, པུཏྟོ པན ནོ ཨཱཧརཏཱི’’ཏི དསྶེནྟོ གཱཐཱདྭཡམཱཧ –
‘‘དཧརོ ¶ ཡུཝཱ ནཱཏིབྲཧཱ, སཱམོ ཀལྱཱཎདསྶནོ;
དཱིགྷསྶ ཀེསཱ ཨསིཏཱ, ཨཐོ སཱུནགྒཝེལླིཏཱ.
‘‘སོ ཧཝེ ཕལམཱཧརིཏྭཱ, ཨིཏོ ཨཱདཱཡ ཀམཎྜལུཾ;
ནདིཾ གཏོ ཨུདཧཱརོ, མཉྙེ ན དཱུརམཱགཏོ’’ཏི.
ཏཏྠ ནཱཏིབྲཧཱཏི ནཱཏིདཱིགྷོ ནཱཏིརསྶོ. སཱུནགྒཝེལླིཏཱཏི སཱུནསངྑཱཏཱཡ མཾསཀོཊྚནཔོཏྠནིཡཱ ཨགྒཾ ཝིཡ ཝིནཏཱ. ཀམཎྜལུནྟི གྷཊཾ. ན དཱུརམཱགཏོཏི ཨིདཱནི ན དཱུརཾ ཨཱགཏོ, ཨཱསནྣཊྛཱནཾ ཨཱགཏོ བྷཝིསྶཏཱིཏི མཉྙཱམཱིཏི ཨཏྠོ.
ཏཾ སུཏྭཱ རཱཛཱ ཨཱཧ –
‘‘ཨཧཾ ¶ ཏཾ ཨཝདྷིཾ སཱམཾ, ཡོ ཏུཡ྄ཧཾ པརིཙཱརཀོ;
ཡཾ ཀུམཱརཾ པཝེདེཐ, སཱམཾ ཀལྱཱཎདསྶནཾ.
‘‘དཱིགྷསྶ ཀེསཱ ཨསིཏཱ, ཨཐོ སཱུནགྒཝེལླིཏཱ;
ཏེསུ ལོཧིཏལིཏྟེསུ, སེཏི སཱམོ མཧཱ ཧཏོ’’ཏི.
ཏཏྠ ཨཝདྷིནྟི ཝིསཔཱིཏེན སརེན ཝིཛ྄ཛྷིཏྭཱ མཱརེསིཾ. པཝེདེཐཱཏི ཀཐེཐ. སེཏཱིཏི མིགསམྨཏཱནདཱིཏཱིརེ ཝཱལུཀཱཔུལིནེ སཡཏི.
དུཀཱུལཔཎྜིཏསྶ པན ཨཝིདཱུརེ པཱརིཀཱཡ པཎྞསཱལཱ ཧོཏི. སཱ ཏཏྠ ནིསིནྣཱཝ རཉྙོ ཝཙནཾ སུཏྭཱ ཏཾ པཝཏྟིཾ སོཏུཀཱམཱ ¶ ཨཏྟནོ པཎྞསཱལཏོ ནིཀྑམིཏྭཱ རཛྫུཀསཉྙཱཡ དུཀཱུལཔཎྜིཏསྶ སནྟིཀཾ གནྟྭཱ ཨཱཧ –
‘‘ཀེན དུཀཱུལ མནྟེསི, ‘ཧཏོ སཱམོ’ཏི ཝཱདིནཱ;
‘ཧཏོ སཱམོ’ཏི སུཏྭཱན, ཧདཡཾ མེ པཝེདྷཏི.
‘‘ཨསྶཏྠསྶེཝ ཏརུཎཾ, པཝཱལ༹ཾ མཱལུཏེརིཏཾ;
‘ཧཏོ སཱམོ’ཏི སུཏྭཱན, ཧདཡཾ མེ པཝེདྷཏཱི’’ཏི.
ཏཏྠ ཝཱདིནཱཏི ‘‘མཡཱ སཱམོ ཧཏོ’’ཏི ཝདནྟེན. པཝཱལ༹ནྟི པལླཝཾ. མཱལུཏེརིཏནྟི ཝཱཏེན པཧཊཾ.
དུཀཱུལཔཎྜིཏོ ¶ ཨོཝདནྟོ ཨཱཧ –
‘‘པཱརིཀེ ཀཱསིརཱཛཱཡཾ, སོ སཱམཾ མིགསམྨཏེ;
ཀོདྷསཱ ཨུསུནཱ ཝིཛ྄ཛྷི, ཏསྶ མཱ པཱཔམིཙྪིམྷཱ’’ཏི.
ཏཏྠ མིགསམྨཏེཏི མིགསམྨཏཱནདཱིཏཱིརེ. ཀོདྷསཱཏི མིགེསུ ཨུཔྤནྣེན ཀོདྷེན. མཱ པཱཔམིཙྪིམྷཱཏི ཏསྶ མཡཾ ཨུབྷོཔི པཱཔཾ མཱ ཨིཙྪིམྷཱ.
པུན ¶ པཱརིཀཱ ཨཱཧ –
‘‘ཀིཙྪཱ ལདྡྷོ པིཡོ པུཏྟོ, ཡོ ཨནྡྷེ ཨབྷརཱི ཝནེ;
ཏཾ ཨེཀཔུཏྟཾ གྷཱཏིམྷི, ཀཐཾ ཙིཏྟཾ ན ཀོཔཡེ’’ཏི.
ཏཏྠ གྷཱཏིམྷཱིཏི གྷཱཏཀེ.
དུཀཱུལཔཎྜིཏོ ཨཱཧ –
‘‘ཀིཙྪཱ ལདྡྷོ པིཡོ པུཏྟོ, ཡོ ཨནྡྷེ ཨབྷརཱི ཝནེ;
ཏཾ ཨེཀཔུཏྟཾ གྷཱཏིམྷི, ཨཀྐོདྷཾ ཨཱཧུ པཎྜིཏཱ’’ཏི.
ཏཏྠ ཨཀྐོདྷནྟི ཀོདྷོ ནཱམ ནིརཡསཾཝཏྟནིཀོ, ཏསྨཱ ཏཾ ཀོདྷཾ ཨཀཏྭཱ པུཏྟགྷཱཏཀམྷི ཨཀྐོདྷོ ཨེཝ ཀཏྟབྦོཏི པཎྜིཏཱ ཨཱཧུ ཀཐེནྟི.
ཨེཝཉྩ པན ཝཏྭཱ ཏེ ཨུབྷོཧི ཧཏྠེཧི ཨུརཾ པཧརིཏྭཱ མཧཱསཏྟསྶ གུཎེ ཝཎྞེཏྭཱ བྷུསཾ པརིདེཝིཾསུ. ཨཐ ནེ རཱཛཱ སམསྶཱསེནྟོ ཨཱཧ –
‘‘མཱ བཱལ༹ྷཾ པརིདེཝེཐ, ‘ཧཏོ སཱམོ’ཏི ཝཱདིནཱ;
ཨཧཾ ཀམྨཀརོ ཧུཏྭཱ, བྷརིསྶཱམི བྲཧཱཝནེ.
‘‘ཨིསྶཏྠེ ཙསྨི ཀུསལོ, དལ༹ྷདྷམྨོཏི ཝིསྶུཏོ;
ཨཧཾ ཀམྨཀརོ ཧུཏྭཱ, བྷརིསྶཱམི བྲཧཱཝནེ.
‘‘མིགཱནཾ ཝིགྷཱསམནྭེསཾ, ཝནམཱུལཕལཱནི ཙ;
ཨཧཾ ཀམྨཀརོ ཧུཏྭཱ, བྷརིསྶཱམི བྲཧཱཝནེ’’ཏི.
ཏཏྠ ¶ ཝཱདིནཱཏི ཏུམྷེ ‘‘སཱམོ ཧཏོ’’ཏི ཝདནྟེན མཡཱ སདྡྷིཾ ‘‘ཏཡཱ ནོ ཨེཝཾ གུཎསམྤནྣོ པུཏྟོ མཱརིཏོ, ཨིདཱནི ཀོ ཨམྷེ བྷརིསྶཏཱི’’ཏིཨཱདཱིནི ¶ ཝཏྭཱ མཱ བཱལ༹ྷཾ པརིདེཝེཐ, ཨཧཾ ཏུམྷཱཀཾ ཀམྨཀརོ ཧུཏྭཱ སཱམོ ཝིཡ ཏུམྷེ བྷརིསྶཱམཱིཏི.
ཨེཝཾ ¶ རཱཛཱ ‘‘ཏུམྷེ མཱ ཙིནྟཡིཏྠ, ན མཡ྄ཧཾ རཛྫེནཏྠོ, ཨཧཾ ཝོ ཡཱཝཛཱིཝཾ བྷརིསྶཱམཱི’’ཏི ཏེ ཨསྶཱསེསི. ཏེ ཏེན སདྡྷིཾ སལླཔནྟཱ ཨཱཧཾསུ –
‘‘ནེས དྷམྨོ མཧཱརཱཛ, ནེཏཾ ཨམྷེསུ ཀཔྤཏི;
རཱཛཱ ཏྭམསི ཨམྷཱཀཾ, པཱདེ ཝནྡཱམ ཏེ མཡ’’ནྟི.
ཏཏྠ དྷམྨོཏི སབྷཱཝོ ཀཱརཎཾ ཝཱ. ནེཏཾ ཨམྷེསུ ཀཔྤཏཱིཏི ཨེཏཾ ཏཝ ཀམྨཀརཎཾ ཨམྷེསུ ན ཀཔྤཏི ན སོབྷཏི. ‘‘པཱདེ ཝནྡཱམ ཏེ མཡ’’ནྟི ཨིདཾ པན ཏེ པབྦཛིཏལིངྒེ ཋིཏཱཔི པུཏྟསོཀེན སམབྦྷཱཧཏཱཡ ཙེཝ ནིཧཏམཱནཏཱཡ ཙ ཝདིཾསུ. ‘‘རཉྙོ ཝིསྶཱསཾ ཨུཔྤཱདེཏུཾ ཨེཝམཱཧཾསཱུ’’ཏིཔི ཝདནྟི.
ཏཾ སུཏྭཱ རཱཛཱ ཨཏིཝིཡ ཏུསྶིཏྭཱ ‘‘ཨཧོ ཨཙྪརིཡཾ, ཨེཝཾ དོསཀཱརཀེ ནཱམ མཡི ཕརུསཝཙནམཏྟམྤི ནཏྠི, པགྒཎྷནྟིཡེཝ མམ’’ནྟི ཙིནྟེཏྭཱ གཱཐམཱཧ –
‘‘དྷམྨཾ ནེསཱདཱ བྷཎཐ, ཀཏཱ ཨཔཙིཏཱི ཏཡཱ;
པིཏཱ ཏྭམསི ཨམྷཱཀཾ, མཱཏཱ ཏྭམསི པཱརིཀེ’’ཏི.
ཏཏྠ ཏཡཱཏི ཨེཀེཀཾ ཝདནྟོ ཨེཝམཱཧ. པིཏཱཏི དུཀཱུལཔཎྜིཏ, ཨཛྫ པཊྛཱཡ ཏྭཾ མཡ྄ཧཾ པིཏུཊྛཱནེ ཏིཊྛ, ཨམྨ པཱརིཀེ, ཏྭམྤི མེ མཱཏུཊྛཱནེ ཏིཊྛ, ཨཧཾ པན ཝོ པུཏྟསྶ སཱམསྶ ཋཱནེ ཋཏྭཱ པཱདདྷོཝནཱདཱིནི སབྦཀིཙྩཱནི ཀརིསྶཱམི, མཾ རཱཛཱཏི ཨསལླཀྑེཏྭཱ སཱམོཏི སལླཀྑེཐཱཏི.
ཏེ ཨཉྫལིཾ པགྒཡ྄ཧ ཝནྡིཏྭཱ ‘‘མཧཱརཱཛ, ཏཝ ཨམྷཱཀཾ ཀམྨཀརཎཀིཙྩཾ ནཏྠི, ཨཔིཙ ཁོ པན ལཊྛིཀོཊིཡཱ ནོ གཧེཏྭཱ ཨཱནེཏྭཱ སཱམཾ དསྶེཧཱི’’ཏི ཡཱཙནྟཱ གཱཐཱདྭཡམཱཧཾསུ –
‘‘ནམོ ཏེ ཀཱསིརཱཛཏྠུ, ནམོ ཏེ ཀཱསིཝཌྜྷན;
ཨཉྫལིཾ ཏེ པགྒཎྷཱམ, ཡཱཝ སཱམཱནུཔཱཔཡ.
‘‘ཏསྶ ¶ ¶ པཱདེ སམཛྫནྟཱ, མུཁཉྩ བྷུཛདསྶནཾ;
སཾསུམྦྷམཱནཱ ཨཏྟཱནཾ, ཀཱལམཱགམཡཱམསེ’’ཏི.
ཏཏྠ ཡཱཝ སཱམཱནུཔཱཔཡཱཏི ཡཱཝ སཱམོ ཡཏྠ, ཏཏྠ ཨམྷེ ཨནུཔཱཔཡ. བྷུཛདསྶནནྟི ¶ ཀལྱཱཎདསྶནཾ ཨབྷིརཱུཔཾ. སཾསུམྦྷམཱནཱཏི པོཐེནྟཱ. ཀཱལམཱགམཡཱམསེཏི ཀཱལཀིརིཡཾ ཨཱགམེསྶཱམ.
ཏེསཾ ཨེཝཾ ཀཐེནྟཱནཉྙེཝ སཱུརིཡོ ཨཏྠངྒཏོ. ཨཐ རཱཛཱ ‘‘སཙཱཧཾ ཨིདཱནེཝ ཨིམེ ཏཏྠ ནེསྶཱམི, ཏཾ དིསྭཱཝ ནེསཾ ཧདཡཾ ཕལིསྶཏི, ཨིཏི ཏིཎྞམྤི ཨེཏེསཾ མཏཀཱལེ ཨཧཾ ནིརཡེ ཨུཔྤཛྫནྟོཡེཝ ནཱམ, ཏསྨཱ ཏེསཾ གནྟུཾ ན དསྶཱམཱི’’ཏི ཙིནྟེཏྭཱ ཙཏསྶོ གཱཐཱཡོ ཨཛ྄ཛྷབྷཱསི –
‘‘བྲཧཱ ཝཱལ༹མིགཱཀིཎྞཾ, ཨཱཀཱསནྟཾཝ དིསྶཏི;
ཡཏྠ སཱམོ ཧཏོ སེཏི, ཙནྡོཝ པཏིཏོ ཚམཱ.
‘‘བྲཧཱ ཝཱལ༹མིགཱཀིཎྞཾ, ཨཱཀཱསནྟཾཝ དིསྶཏི;
ཡཏྠ སཱམོ ཧཏོ སེཏི, སཱུརིཡོཝ པཏིཏོ ཚམཱ.
‘‘བྲཧཱ ཝཱལ༹མིགཱཀིཎྞཾ, ཨཱཀཱསནྟཾཝ དིསྶཏི;
ཡཏྠ སཱམོ ཧཏོ སེཏི, པཾསུནཱ པཏིཀུནྠིཏོ.
‘‘བྲཧཱ ཝཱལ༹མིགཱཀིཎྞཾ, ཨཱཀཱསནྟཾཝ དིསྶཏི;
ཡཏྠ སཱམོ ཧཏོ སེཏི, ཨིདྷེཝ ཝསཐསྶམེ’’ཏི.
ཏཏྠ བྲཧཱཏི ཨཙྩུགྒཏཾ. ཨཱཀཱསནྟཾཝཱཏི ཨེཏཾ ཝནཾ ཨཱཀཱསསྶ ཨནྟོ ཝིཡ ཧུཏྭཱ དིསྶཏི. ཨཐ ཝཱ ཨཱཀཱསནྟནྟི ཨཱཀཱསམཱནཾ, པཀཱསམཱནནྟི ཨཏྠོ. ཚམཱཏི ཚམཱཡཾ, པཐཝིཡནྟི ཨཏྠོ. ‘‘ཚམ’’ནྟིཔི པཱཋོ, པཐཝིཾ པཏིཏོ ཝིཡཱཏི ཨཏྠོ. པཏིཀུནྠིཏོཏི པརིཀིཎྞོ, པལིཝེཋིཏོཏི ཨཏྠོ.
ཨཐ ¶ ཏེ ཨཏྟནོ ཝཱལ༹མིགབྷཡཱབྷཱཝཾ དསྶེཏུཾ གཱཐམཱཧཾསུ –
‘‘ཡདི ¶ ཏཏྠ སཧསྶཱནི, སཏཱནི ནིཡུཏཱནི ཙ;
ནེཝམྷཱཀཾ བྷཡཾ ཀོཙི, ཝནེ ཝཱལེ༹སུ ཝིཛྫཏཱི’’ཏི.
ཏཏྠ ཀོཙཱིཏི ཨིམསྨིཾ ཝནེ ཀཏྠཙི ཨེཀསྨིཾ པདེསེཔི ཨམྷཱཀཾ ཝཱལེ༹སུ བྷཡཾ ནཱམ ནཏྠི.
རཱཛཱ ཏེ པཊིབཱཧིཏུཾ ཨསཀྐོནྟོ ཧཏྠེསུ གཧེཏྭཱ ཏཏྠ ནེསི. ཏམཏྠཾ པཀཱསེནྟོ སཏྠཱ ཨཱཧ –
‘‘ཏཏོ ཨནྡྷཱནམཱདཱཡ, ཀཱསིརཱཛཱ བྲཧཱཝནེ;
ཧཏྠེ གཧེཏྭཱ པཀྐཱམི, ཡཏྠ སཱམོ ཧཏོ ཨཧཱུ’’ཏི.
ཏཏྠ ¶ ཏཏོཏི ཏདཱ. ཨནྡྷཱནནྟི ཨནྡྷེ. ཨཧཱུཏི ཨཧོསི. ཡཏྠཱཏི ཡསྨིཾ ཋཱནེ སོ ནིཔནྣོ, ཏཏྠ ནེསཱིཏི ཨཏྠོ.
སོ ཨཱནེཏྭཱ ཙ པན སཱམསྶ སནྟིཀེ ཋཔེཏྭཱ ‘‘ཨཡཾ ཝོ པུཏྟོ’’ཏི ཨཱཙིཀྑི. ཨཐསྶ པིཏཱ སཱིསཾ ཨུཀྑིཔིཏྭཱ མཱཏཱ པཱདེ གཧེཏྭཱ ཨཱུརཱུསུ ཋཔེཏྭཱ ནིསཱིདིཏྭཱ ཝིལཔིཾསུ. ཏམཏྠཾ པཀཱསེནྟོ སཏྠཱ ཨཱཧ –
‘‘དིསྭཱན པཏིཏཾ སཱམཾ, པུཏྟཀཾ པཾསུཀུནྠིཏཾ;
ཨཔཝིདྡྷཾ བྲཧཱརཉྙེ, ཙནྡཾཝ པཏིཏཾ ཚམཱ.
‘‘དིསྭཱན པཏིཏཾ སཱམཾ, པུཏྟཀཾ པཾསུཀུནྠིཏཾ;
ཨཔཝིདྡྷཾ བྲཧཱརཉྙེ, སཱུརིཡཾཝ པཏིཏཾ ཚམཱ.
‘‘དིསྭཱན པཏིཏཾ སཱམཾ, པུཏྟཀཾ པཾསུཀུནྠིཏཾ;
ཨཔཝིདྡྷཾ བྲཧཱརཉྙེ, ཀལཱུནཾ པརིདེཝཡུཾ.
‘‘དིསྭཱན པཏིཏཾ སཱམཾ, པུཏྟཀཾ པཾསུཀུནྠིཏཾ;
བཱཧཱ པགྒཡ྄ཧ པཀྐནྡུཾ, ‘ཨདྷམྨོ ཀིར བྷོ’ཨིཏི.
‘‘བཱལ༹ྷཾ ¶ ཁོ ཏྭཾ པམཏྟོསི, སཱམ ཀལྱཱཎདསྶན;
ཡོ ཨཛྫེཝཾ གཏེ ཀཱལེ, ན ཀིཉྩི མབྷིབྷཱསསི.
‘‘བཱལ༹ྷཾ ¶ ཁོ ཏྭཾ པདིཏྟོསི, སཱམ ཀལྱཱཎདསྶན;
ཡོ ཨཛྫེཝཾ གཏེ ཀཱལེ, ན ཀིཉྩི མབྷིབྷཱསསི.
‘‘བཱལ༹ྷཾ ཁོ ཏྭཾ པཀུདྡྷོསི, སཱམ ཀལྱཱཎདསྶན;
ཡོ ཨཛྫེཝཾ གཏེ ཀཱལེ, ན ཀིཉྩི མབྷིབྷཱསཏི.
‘‘བཱལ༹ྷཾ ཁོ ཏྭཾ པསུཏྟོསི, སཱམ ཀལྱཱཎདསྶན;
ཡོ ཨཛྫེཝཾ གཏེ ཀཱལེ, ན ཀིཉྩི མབྷིབྷཱསསི.
‘‘བཱལ༹ྷཾ ཁོ ཏྭཾ ཝིམནོསི, སཱམ ཀལྱཱཎདསྶན;
ཡོ ཨཛྫེཝཾ གཏེ ཀཱལེ, ན ཀིཉྩི མབྷིབྷཱསསི.
‘‘ཛཊཾ ཝལིནཾ པཾསུགཏཾ, ཀོདཱནི སཎྛཔེསྶཏི;
སཱམོ ཨཡཾ ཀཱལཀཏོ, ཨནྡྷཱནཾ པརིཙཱརཀོ.
‘‘ཀོ མེ སམྨཛྫམཱདཱཡ, སམྨཛྫིསྶཏི ཨསྶམཾ;
སཱམོ ཨཡཾ ཀཱལཀཏོ, ཨནྡྷཱནཾ པརིཙཱརཀོ.
‘‘ཀོདཱནི ནྷཱཔཡིསྶཏི, སཱིཏེནུཎྷོདཀེན ཙ;
སཱམོ ཨཡཾ ཀཱལཀཏོ, ཨནྡྷཱནཾ པརིཙཱརཀོ.
‘‘ཀོདཱནི ¶ བྷོཛཡིསྶཏི, ཝནམཱུལཕལཱནི ཙ;
སཱམོ ཨཡཾ ཀཱལཀཏོ, ཨནྡྷཱནཾ པརིཙཱརཀོ’’ཏི.
ཏཏྠ ཨཔཝིདྡྷནྟི རཉྙཱ ནིརཏྠཀཾ ཚཌྜིཏཾ. ཨདྷམྨོ ཀིར བྷོ ཨིཏཱིཏི ཨཡུཏྟཾ ཀིར བྷོ, ཨཛྫ ཨིམསྨིཾ ལོཀེ ཝཏྟཏི. པམཏྟོཏི ཏིཁིཎསུརཾ པིཝིཏྭཱ ཝིཡ མཏྟོ པམཏྟོ པམཱདཾ ཨཱཔནྣོ. པདིཏྟོཏི དཔྤིཏོ. ‘‘པཀུདྡྷོསི ཝིམནོསཱི’’ཏི སབྦཾ ཝིལཱཔཝསེན བྷཎནྟི. ཛཊནྟི ཏཱཏ ¶ , ཨམྷཱཀཾ ཛཊཱམཎྜལཾ. ཝལིནཾ པཾསུགཏནྟི ཡདཱ ཨཱཀུལཾ མལགྒཧིཏཾ བྷཝིསྶཏི. ཀོདཱནཱིཏི ཨིདཱནི ཀོ སཎྛཔེསྶཏི, སོདྷེཏྭཱ ཨུཛུཾ ཀརིསྶཏཱིཏི.
ཨཐསྶ མཱཏཱ བཧུཾ ཝིལཔིཏྭཱ ཏསྶ ཨུརེ ཧཏྠཾ ཋཔེཏྭཱ སནྟཱཔཾ ཨུཔདྷཱརེནྟཱི ‘‘པུཏྟསྶ མེ སནྟཱཔོ པཝཏྟཏིཡེཝ, ཝིསཝེགེན ཝིསཉྙིཏཾ ཨཱཔནྣོ བྷཝིསྶཏི, ནིབྦིསབྷཱཝཏྠཱཡ ཙསྶ སཙྩཀིརིཡཾ ཀརིསྶཱམཱི’’ཏི ཙིནྟེཏྭཱ སཙྩཀིརིཡམཀཱསི. ཏམཏྠཾ པཀཱསེནྟོ སཏྠཱ ཨཱཧ –
‘‘དིསྭཱན ¶ པཏིཏཾ སཱམཾ, པུཏྟཀཾ པཾསུཀུནྠིཏཾ;
ཨཊྚིཏཱ པུཏྟསོཀེན, མཱཏཱ སཙྩཾ ཨབྷཱསཐ.
‘‘ཡེན སཙྩེནཡཾ སཱམོ, དྷམྨཙཱརཱི པུརེ ཨཧུ;
ཨེཏེན སཙྩཝཛྫེན, ཝིསཾ སཱམསྶ ཧཉྙཏུ.
‘‘ཡེན སཙྩེནཡཾ སཱམོ, བྲཧྨཙཱརཱི པུརེ ཨཧུ;
ཨེཏེན སཙྩཝཛྫེན, ཝིསཾ སཱམསྶ ཧཉྙཏུ.
‘‘ཡེན སཙྩེནཡཾ སཱམོ, སཙྩཝཱདཱི པུརེ ཨཧུ;
ཨེཏེན སཙྩཝཛྫེན, ཝིསཾ སཱམསྶ ཧཉྙཏུ.
‘‘ཡེན སཙྩེནཡཾ སཱམོ, མཱཏཱཔེཏྟིབྷརོ ཨཧུ;
ཨེཏེན སཙྩཝཛྫེན, ཝིསཾ སཱམསྶ ཧཉྙཏུ.
‘‘ཡེན སཙྩེནཡཾ སཱམོ, ཀུལེ ཛེཊྛཱཔཙཱཡིཀོ;
ཨེཏེན སཙྩཝཛྫེན, ཝིསཾ སཱམསྶ ཧཉྙཏུ.
‘‘ཡེན སཙྩེནཡཾ སཱམོ, པཱཎཱ པིཡཏརོ མམ;
ཨེཏེན སཙྩཝཛྫེན, ཝིསཾ སཱམསྶ ཧཉྙཏུ.
‘‘ཡཾ ཀིཉྩིཏྠི ཀཏཾ པུཉྙཾ, མཡ྄ཧཉྩེཝ པིཏུཙྩ ཏེ;
སབྦེན ཏེན ཀུསལེན, ཝིསཾ སཱམསྶ ཧཉྙཏཱུ’’ཏི.
ཏཏྠ ¶ ཡེན སཙྩེནཱཏི ཡེན བྷཱུཏེན སབྷཱཝེན. དྷམྨཙཱརཱིཏི དསཀུསལཀམྨཔཐདྷམྨཙཱརཱི. སཙྩཝཱདཱིཏི ཧསིཏཝསེནཔི མུསཱཝཱདཾ ན ཝདཏི. མཱཏཱཔེཏྟིབྷརོཏི ¶ ཨནལསོ ཧུཏྭཱ རཏྟིནྡིཝཾ མཱཏཱཔིཏརོ བྷརི. ཀུལེ ཛེཊྛཱཔཙཱཡིཀོཏི ཛེཊྛཱནཾ མཱཏཱཔིཏཱུནཾ སཀྐཱརཀཱརཀོ ཧོཏི.
ཨེཝཾ མཱཏརཱ སཏྟཧི གཱཐཱཧི སཙྩཀིརིཡཱཡ ཀཏཱཡ སཱམོ པརིཝཏྟིཏྭཱ ནིཔཛྫི. ཨཐསྶ པིཏཱ ‘‘ཛཱིཝཏི མེ པུཏྟོ, ཨཧམྤིསྶ སཙྩཀིརིཡཾ ཀརིསྶཱམཱི’’ཏི ཏཐེཝ སཙྩཀིརིཡམཀཱསི. ཏམཏྠཾ པཀཱསེནྟོ སཏྠཱ ཨཱཧ –
‘‘དིསྭཱན པཏིཏཾ སཱམཾ, པུཏྟཀཾ པཾསུཀུནྠིཏཾ;
ཨཊྚིཏོ པུཏྟསོཀེན, པིཏཱ སཙྩཾ ཨབྷཱསཐ.
‘‘ཡེན ¶ སཙྩེནཡཾ སཱམོ, དྷམྨཙཱརཱི པུརེ ཨཧུ;
ཨེཏེན སཙྩཝཛྫེན, ཝིསཾ སཱམསྶ ཧཉྙཏུ.
‘‘ཡེན སཙྩེནཡཾ སཱམོ, བྲཧྨཙཱརཱི པུརེ ཨཧུ;
ཨེཏེན སཙྩཝཛྫེན, ཝིསཾ སཱམསྶ ཧཉྙཏུ.
‘‘ཡེན སཙྩེནཡཾ སཱམོ, སཙྩཝཱདཱི པུརེ ཨཧུ;
ཨེཏེན སཙྩཝཛྫེན, ཝིསཾ སཱམསྶ ཧཉྙཏུ.
‘‘ཡེན སཙྩེནཡཾ སཱམོ, མཱཏཱཔེཏྟིབྷརོ ཨཧུ;
ཨེཏེན སཙྩཝཛྫེན, ཝིསཾ སཱམསྶ ཧཉྙཏུ.
‘‘ཡེན སཙྩེནཡཾ སཱམོ, ཀུལེ ཛེཊྛཱཔཙཱཡིཀོ;
ཨེཏེན སཙྩཝཛྫེན, ཝིསཾ སཱམསྶ ཧཉྙཏུ.
‘‘ཡེན སཙྩེནཡཾ སཱམོ, པཱཎཱ པིཡཏརོ མམ;
ཨེཏེན སཙྩཝཛྫེན, ཝིསཾ སཱམསྶ ཧཉྙཏུ.
‘‘ཡཾ ¶ ཀིཉྩིཏྠི ཀཏཾ པུཉྙཾ, མཡ྄ཧཉྩེཝ མཱཏུཙྩ ཏེ;
སབྦེན ཏེན ཀུསལེན, ཝིསཾ སཱམསྶ ཧཉྙཏཱུ’’ཏི.
ཨེཝཾ པིཏརི སཙྩཀིརིཡཾ ཀརོནྟེ མཧཱསཏྟོ པརིཝཏྟིཏྭཱ ཨིཏརེན པསྶེན ནིཔཛྫི. ཨཐསྶ ཏཏིཡཾ སཙྩཀིརིཡཾ དེཝཏཱ ཨཀཱསི. ཏམཏྠཾ པཀཱསེནྟོ སཏྠཱ ཨཧ –
‘‘སཱ དེཝཏཱ ཨནྟརཧིཏཱ, པབྦཏེ གནྡྷམཱདནེ;
སཱམསྶ ཨནུཀམྤཱཡ, ཨིམཾ སཙྩཾ ཨབྷཱསཐ.
‘‘པབྦཏྱཱཧཾ གནྡྷམཱདནེ, ཙིརརཏྟནིཝཱསིནཱི;
ན མེ པིཡཏརོ ཀོཙི, ཨཉྙོ སཱམེན ཝིཛྫཏི;
ཨེཏེན སཙྩཝཛྫེན, ཝིསཾ སཱམསྶ ཧཉྙཏུ.
‘‘སབྦེ ཝནཱ གནྡྷམཡཱ, པབྦཏེ གནྡྷམཱདནེ;
ཨེཏེན སཙྩཝཛྫེན, ཝིསཾ སཱམསྶ ཧཉྙཏུ.
‘‘ཏེསཾ ལཱལཔྤམཱནཱནཾ, བཧུཾ ཀཱརུཉྙསཉྷིཏཾ;
ཁིཔྤཾ སཱམོ སམུཊྛཱསི, ཡུཝཱ ཀལྱཱཎདསྶནོ’’ཏི.
ཏཏྠ ¶ པབྦཏྱཱཧནྟི པབྦཏེ ཨཧཾ. སབྦེ ཝནཱ གནྡྷམཡཱཏི སབྦེ རུཀྑཱ གནྡྷམཡཱ. ན ཧི ཏཏྠ ཨགནྡྷོ ནཱམ ཀོཙི རུཀྑོ ཨཏྠི. ཏེསནྟི བྷིཀྑཝེ, ཏེསཾ ཨུབྷིནྣཾ ལཱལཔྤམཱནཱནཉྙེཝ དེཝཏཱཡ སཙྩཀིརིཡཱཡ པརིཡོསཱནེ ཁིཔྤཾ སཱམོ ཨུཊྛཱསི, པདུམཔཏྟཏོ ཨུདཀཾ ཝིཡསྶ ཝིསཾ ཝིནིཝཏྟེཏྭཱ ཨཱབཱདྷོ ཝིགཏོ, ཨིདྷ ནུ ཁོ ཝིདྡྷོ, ཨེཏྠ ནུ ཁོ ཝིདྡྷོཏི ཝིདྡྷཊྛཱནམྤི ན པཉྙཱཡི.
ཨིཏི མཧཱསཏྟསྶ ནིརོགབྷཱཝོ, མཱཏཱཔིཏཱུནཉྩ ཙཀྑུཔཊིལཱབྷོ, ཨརུཎུགྒམནཉྩ, དེཝཏཱནུབྷཱཝེན ཏེསཾ ཙཏུནྣཾ ཨསྶམེཡེཝ པཱཀཊབྷཱཝོ ¶ ཙཱཏི སབྦཾ ཨེཀཀྑཎེཡེཝ ཨཧོསི. མཱཏཱཔིཏརོ ‘‘ཙཀྑཱུནི ནོ ལདྡྷཱནི, སུཝཎྞསཱམོ ཙ ཨརོགོ ཛཱཏོ’’ཏི ཨཏིརེཀཏརཾ ཏུསྶིཾསུ. ཨཐ ནེ སཱམཔཎྜིཏོ གཱཐཾ ཨབྷཱསི –
‘‘སཱམོཧམསྨི ¶ བྷདྡཾ ཝོ, སོཏྠིནཱམྷི སམུཊྛིཏོ;
མཱ བཱལ༹ྷཾ པརིདེཝེཐ, མཉྩུནཱབྷིཝདེཐ མ’’ནྟི.
ཏཏྠ སོཏྠིནཱམྷི སམུཊྛིཏོཏི སོཏྠིནཱ སུཁེན ཨུཊྛིཏོ ཨམྷི བྷཝཱམི. མཉྫུནཱཏི མདྷུརསྶརེན མཾ ཨབྷིཝདེཐ.
ཨཐ སོ རཱཛཱནཾ དིསྭཱ པཊིསནྠཱརཾ ཀརོནྟོ ཨཱཧ –
‘‘སྭཱགཏཾ ཏེ མཧཱརཱཛ, ཨཐོ ཏེ ཨདུརཱགཏཾ;
ཨིསྶརོསི ཨནུཔྤཏྟོ, ཡཾ ཨིདྷཏྠི པཝེདཡ.
‘‘ཏིནྡུཀཱནི པིཡཱལཱནི, མདྷུཀེ ཀཱསུམཱརིཡོ;
ཕལཱནི ཁུདྡཀཔྤཱནི, བྷུཉྫ རཱཛ ཝརཾ ཝརཾ.
‘‘ཨཏྠི མེ པཱནཱིཡཾ སཱིཏཾ, ཨཱབྷཏཾ གིརིགབྦྷརཱ;
ཏཏོ པིཝ མཧཱརཱཛ, སཙེ ཏྭཾ ཨབྷིཀངྑསཱི’’ཏི.
རཱཛཱཔི ཏཾ ཨཙྪརིཡཾ དིསྭཱ ཨཱཧ –
‘‘སམྨུཡ྄ཧཱམི པམུཡ྄ཧཱམི, སབྦཱ མུཡ྄ཧནྟི མེ དིསཱ;
པེཏཾ ཏཾ སཱམ མདྡཀྑིཾ, ཀོ ནུ ཏྭཾ སཱམ ཛཱིཝསཱི’’ཏི.
ཏཏྠ ¶ པེཏནྟི སཱམ ཨཧཾ ཏཾ མཏཾ ཨདྡསཾ. ཀོ ནུ ཏྭནྟི ཀཐཾ ནུ ཏྭཾ ཛཱིཝིཏཾ པཊིལབྷསཱིཏི པུཙྪི.
མཧཱསཏྟོ ‘‘ཨཡཾ རཱཛཱ མཾ ‘མཏོ’ཏི སལླཀྑེསི, ཨམཏབྷཱཝམསྶ པཀཱསེསྶཱམཱི’’ཏི ཙིནྟེཏྭཱ ཨཱཧ –
‘‘ཨཔི ཛཱིཝཾ མཧཱརཱཛ, པུརིསཾ གཱལ༹ྷཝེདནཾ;
ཨུཔནཱིཏམནསངྐཔྤཾ, ཛཱིཝནྟཾ མཉྙཏེ མཏཾ.
‘‘ཨཔི ¶ ཛཱིཝཾ མཧཱརཱཛ, པུརིསཾ གཱལ༹ྷཝེདནཾ;
ཏཾ ནིརོདྷགཏཾ སནྟཾ, ཛཱིཝནྟཾ མཉྙཏེ མཏ’’ནྟི.
ཏཏྠ ཨཔི ཛཱིཝནྟི ཛཱིཝམཱནཾ ཨཔི. ཨུཔནཱིཏམནསངྐཔྤནྟི བྷཝངྒཨོཏིཎྞཙིཏྟཱཙཱརཾ. ཛཱིཝནྟནྟི ཛཱིཝམཱནམེཝ ‘‘ཨེསོ མཏོ’’ཏི མཉྙཏི. ནིརོདྷགཏནྟི ཨསྶཱསཔསྶཱསནིརོདྷཾ སམཱཔནྣཾ སནྟཾ ཝིཛྫམཱནཾ མཾ ཨེཝཾ ལོཀོ མཏཾ ཝིཡ ཛཱིཝནྟམེཝ མཉྙཏི.
ཨེཝཉྩ པན ཝཏྭཱ མཧཱསཏྟོ རཱཛཱནཾ ཨཏྠེ ཡོཛེཏུཀཱམོ དྷམྨཾ དེསེནྟོ པུན དྭེ གཱཐཱ ཨབྷཱསི –
‘‘ཡོ ¶ མཱཏརཾ པིཏརཾ ཝཱ, མཙྩོ དྷམྨེན པོསཏི;
དེཝཱཔི ནཾ ཏིཀིཙྪནྟི, མཱཏཱཔེཏྟིབྷརཾ ནརཾ.
‘‘ཡོ མཱཏརཾ པིཏརཾ ཝཱ, མཙྩོ དྷམྨེན པོསཏི;
ཨིདྷེཝ ནཾ པསཾསནྟི, པེཙྩ སགྒེ པམོདཏཱི’’ཏི.
ཏཾ སུཏྭཱ རཱཛཱ ‘‘ཨཙྪརིཡཾ ཝཏ, བྷོ, མཱཏཱཔེཏྟིབྷརསྶ ཛནྟུནོ ཨུཔྤནྣརོགཾ དེཝཏཱཔི ཏིཀིཙྪནྟི, ཨཏིཝིཡ ཨཡཾ སཱམོ སོབྷཏཱི’’ཏི ཨཉྫལིཾ པགྒཡ྄ཧ ཡཱཙནྟོ ཨཱཧ –
‘‘ཨེས བྷིཡྻོ པམུཡ྄ཧཱམི, སབྦཱ མུཡ྄ཧནྟི མེ དིསཱ;
སརཎཾ ཏཾ སཱམ གཙྪཱམི, ཏྭཉྩ མེ སརཎཾ བྷཝཱ’’ཏི.
ཏཏྠ བྷིཡྻོཏི ཡསྨཱ ཏཱདིསེ པརིསུདྡྷསཱིལགུཎསམྤནྣེ ཏཡི ཨཔརཛ྄ཛྷིཾ, ཏསྨཱ ཨཏིརེཀཏརཾ སམྨུཡ྄ཧཱམི. ཏྭཉྩ མེ སརཎཾ བྷཝཱཏི སརཎཾ གཙྪནྟསྶ མེ ཏྭཾ སརཎཾ བྷཝ, པཏིཊྛཱ ཧོཧི, དེཝལོཀགཱམིམགྒཾ ཀརོཧཱིཏི.
ཨཐ ¶ ནཾ མཧཱསཏྟོ ‘‘སཙེཔི, མཧཱརཱཛ, དེཝལོཀཾ གནྟུཀཱམོསི, མཧནྟཾ དིབྦསམྤཏྟིཾ པརིབྷུཉྫིཏུཀཱམོསི, ཨིམཱསུ དསརཱཛདྷམྨཙརིཡཱསུ ཝཏྟསྶཱུ’’ཏི ཏསྶ དྷམྨཾ དེསེནྟོ དས རཱཛདྷམྨཙརིཡགཱཐཱ ཨབྷཱསི –
‘‘དྷམྨཾ ¶ ཙར མཧཱརཱཛ, མཱཏཱཔིཏཱུསུ ཁཏྟིཡ;
ཨིདྷ དྷམྨཾ ཙརིཏྭཱན, རཱཛ སགྒཾ གམིསྶསི.
‘‘དྷམྨཾ ཙར མཧཱརཱཛ, པུཏྟདཱརེསུ ཁཏྟིཡ;
ཨིདྷ དྷམྨཾ ཙརིཏྭཱན, རཱཛ སགྒཾ གམིསྶསི.
‘‘དྷམྨཾ ཙར མཧཱརཱཛ, མིཏྟཱམཙྩེསུ ཁཏྟིཡ;
ཨིདྷ དྷམྨཾ ཙརིཏྭཱན, རཱཛ སགྒཾ གམིསྶསི.
‘‘དྷམྨཾ ཙར མཧཱརཱཛ, ཝཱཧནེསུ བལེསུ ཙ;
ཨིདྷ དྷམྨཾ ཙརིཏྭཱན, རཱཛ སགྒཾ གམིསྶསི.
‘‘དྷམྨཾ ཙར མཧཱརཱཛ, གཱམེསུ ནིགམེསུ ཙ;
ཨིདྷ དྷམྨཾ ཙརིཏྭཱན, རཱཛ སགྒཾ གམིསྶསི.
‘‘དྷམྨཾ ཙར མཧཱརཱཛ, རཊྛེསུ ཛནཔདེསུ ཙ;
ཨིདྷ དྷམྨཾ ཙརིཏྭཱན, རཱཛ སགྒཾ གམིསྶསི.
‘‘དྷམྨཾ ཙར མཧཱརཱཛ, སམཎབྲཱཧྨཎེསུ ཙ;
ཨིདྷ དྷམྨཾ ཙརིཏྭཱན, རཱཛ སགྒཾ གམིསྶསི.
‘‘དྷམྨཾ ཙར མཧཱརཱཛ, མིགཔཀྑཱིསུ ཁཏྟིཡ;
ཨིདྷ དྷམྨཾ ཙརིཏྭཱན, རཱཛ སགྒཾ གམིསྶསི.
‘‘དྷམྨཾ ཙར མཧཱརཱཛ, དྷམྨོ ཙིཎྞོ སུཁཱཝཧོ;
ཨིདྷ དྷམྨཾ ཙརིཏྭཱན, རཱཛ སགྒཾ གམིསྶསི.
‘‘དྷམྨཾ ཙར མཧཱརཱཛ, སཨིནྡཱ དེཝཱ སབྲཧྨཀཱ;
སུཙིཎྞེན དིཝཾ པཏྟཱ, མཱ དྷམྨཾ རཱཛ པཱམདོ’’ཏི.
ཏཱསཾ ¶ ¶ ཨཏྠོ ཏེསཀུཎཛཱཏཀེ (ཛཱ. ༢.༡༧.༡ ཨཱདཡོ) ཝིཏྠཱརིཏོཝ. ཨེཝཾ ¶ མཧཱསཏྟོ ཏསྶ དས རཱཛདྷམྨེ དེསེཏྭཱ ཨུཏྟརིཔི ཨོཝདིཏྭཱ པཉྩ སཱིལཱནི ཨདཱསི. སོ ཏསྶ ཨོཝཱདཾ སིརསཱ སམྤཊིཙྪིཏྭཱ མཧཱསཏྟཾ ཝནྡིཏྭཱ ཁམཱཔེཏྭཱ བཱརཱཎསིཾ གནྟྭཱ དཱནཱདཱིནི པུཉྙཱནི ཀཏྭཱ སགྒཔརཱཡཎོ ཨཧོསི. བོདྷིསཏྟོཔི ཡཱཝཛཱིཝཾ མཱཏཱཔིཏརོ པརིཙརིཏྭཱ མཱཏཱཔིཏཱུཧི སདྡྷིཾ པཉྩ ཨབྷིཉྙཱ ཙ ཨཊྛ སམཱཔཏྟིཡོ ཙ ནིབྦཏྟེཏྭཱ བྲཧྨལོཀཱུཔགོ ཨཧོསི.
སཏྠཱ ཨིདཾ དྷམྨདེསནཾ ཨཱཧརིཏྭཱ ‘‘བྷིཀྑཝེ, མཱཏཱཔིཏཱུནཾ པོསནཾ ནཱམ པཎྜིཏཱནཾ ཝཾསོ’’ཏི ཝཏྭཱ སཙྩཱནི པཀཱསེཏྭཱ ཛཱཏཀཾ སམོདྷཱནེསི, སཙྩཔརིཡོསཱནེ མཱཏུཔོསཀབྷིཀྑུ སོཏཱཔཏྟིཕལཾ པཱཔུཎི.
ཏདཱ རཱཛཱ ཨཱནནྡོ ཨཧོསི, དེཝདྷཱིཏཱ ཨུཔྤལཝཎྞཱ, སཀྐོ ཨནུརུདྡྷོ, དུཀཱུལཔཎྜིཏོ མཧཱཀསྶཔོ, པཱརིཀཱ བྷདྡཀཱཔིལཱནཱི བྷིཀྑུནཱི, སུཝཎྞསཱམཔཎྜིཏོ པན ཨཧམེཝ སམྨཱསམྦུདྡྷོ ཨཧོསིནྟི.
སུཝཎྞསཱམཛཱཏཀཝཎྞནཱ ཏཏིཡཱ.
[༥༤༡] ༤. ནིམིཛཱཏཀཝཎྞནཱ
ཨཙྪེརཾ ¶ ¶ ཝཏ ལོཀསྨིནྟི ཨིདཾ སཏྠཱ མིཐིལཾ ཨུཔནིསྶཱཡ མགྷདེཝཨམྦཝནེ ཝིཧརནྟོ སིཏཔཱཏུཀམྨཾ ཨཱརབྦྷ ཀཐེསི. ཨེཀདིཝསཉྷི སཏྠཱ སཱཡནྷསམཡེ སམྦཧུལེཧི བྷིཀྑཱུཧི སདྡྷིཾ ཏསྨིཾ ཨམྦཝནེ ཙཱརིཀཾ ཙརམཱནོ ཨེཀཾ རམཎཱིཡཾ བྷཱུམིཔྤདེསཾ དིསྭཱ ཨཏྟནོ པུབྦཙརིཡཾ ཀཐེཏུཀཱམོ ཧུཏྭཱ སིཏཔཱཏུཀམྨཾ ཀཏྭཱ ཨཱཡསྨཏཱ ཨཱནནྡཏྠེརེན སིཏཔཱཏུཀམྨཀཱརཎཾ པུཊྛོ ‘‘ཨཱནནྡ, ཨཡཾ བྷཱུམིཔྤདེསོ པུབྦེ མཡཱ མགྷདེཝརཱཛཀཱལེ ཛྷཱནཀཱིལ༹ྷཾ ཀཱིལ༹ནྟེན ཨཛ྄ཛྷཱཝུཊྛཔུབྦོ’’ཏི ཝཏྭཱ ཏེན ཡཱཙིཏོ པཉྙཏྟཱསནེ ནིསཱིདིཏྭཱ ཨཏཱིཏཾ ཨཱཧརི.
ཨཏཱིཏེ ཝིདེཧརཊྛེ མིཐིལནགརེ མགྷདེཝོ ནཱམ རཱཛཱ རཛྫཾ ཀཱརེསི. སོ ཙཏུརཱསཱིཏིཝསྶསཧསྶཱནི ཀུམཱརཀཱིལ༹ྷཾ ཀཱིལི༹, ཙཏུརཱསཱིཏིཝསྶསཧསྶཱནི ཨུཔརཛྫཾ ཀཱརེསི, ཙཏུརཱསཱིཏིཝསྶསཧསྶཱནི རཛྫཾ ཀཱརེནྟོ ‘‘ཡདཱ མེ སམྨ ཀཔྤཀ, སིརསྨིཾ པལིཏཱནི པསྶེཡྻཱསི, ཏདཱ མེ ཨཱརོཙེཡྻཱསཱི’’ཏི ཨཱཧ. ཨཔརབྷཱགེ ཀཔྤཀོ པལིཏཱནི དིསྭཱ རཉྙོ ཨཱརོཙེསི. རཱཛཱ པལིཏཾ སུཝཎྞསཎྜཱསེན ཨུདྡྷརཱཔེཏྭཱ ཧཏྠཏལེ པཏིཊྛཱཔེཏྭཱ པལིཏཾ ཨོལོཀེཏྭཱ མཙྩུརཱཛེན ཨཱགནྟྭཱ ནལཱཊེ ལགྒཾ ཝིཡ མརཎཾ སམྤསྶམཱནོ ¶ ‘‘ཨིདཱནི མེ པབྦཛིཏཀཱལོ’’ཏི ཀཔྤཀསྶ གཱམཝརཾ དཏྭཱ ཛེཊྛཔུཏྟཾ པཀྐོསཱཔེཏྭཱ ‘‘ཏཱཏ, རཛྫཾ པཊིཙྪ, ཨཧཾ པབྦཛིསྶཱམཱི’’ཏི ཝཏྭཱ ‘‘ཀིཾ ཀཱརཎཱ དེཝཱ’’ཏི ཝུཏྟེ –
‘‘ཨུཏྟམངྒརུཧཱ མཡ྄ཧཾ, ཨིམེ ཛཱཏཱ ཝཡོཧརཱ;
པཱཏུབྷཱུཏཱ དེཝདཱུཏཱ, པབྦཛྫཱསམཡོ མམཱ’’ཏི. –
ཝཏྭཱ པུཏྟཾ རཛྫེ ཨབྷིསིཉྩིཏྭཱ ‘‘ཏཱཏ, ཏྭམྤི ཨེཝརཱུཔཾ པལིཏཾ དིསྭཱཝ པབྦཛེཡྻཱསཱི’’ཏི ཏཾ ཨོཝདིཏྭཱ ནགརཱ ནིཀྑམིཏྭཱ ཨམྦཝནེ ཨིསིཔབྦཛྫཾ པབྦཛིཏྭཱ ཙཏུརཱསཱིཏིཝསྶསཧསྶཱནི ཙཏྟཱརོ བྲཧྨཝིཧཱརེ བྷཱཝེཏྭཱ བྲཧྨལོཀེ ནིབྦཏྟི. པུཏྟོཔིསྶ ཨེཏེནེཝ ཨུཔཱཡེན པབྦཛིཏྭཱ བྲཧྨལོཀཔརཱཡཎོ ཨཧོསི. ཏཐཱ ཏསྶ པུཏྟོ, ཏཐཱ ཏསྶ པུཏྟོཏི ཨེཝཾ དྭཱིཧི ཨཱུནཱནི ཙཏུརཱསཱིཏིཁཏྟིཡསཧསྶཱནི སཱིསེ པལིཏཾ དིསྭཱཝ ཨིམསྨིཾ ཨམྦཝནེ ¶ པབྦཛིཏྭཱ ཙཏྟཱརོ བྲཧྨཝིཧཱརེ བྷཱཝེཏྭཱ བྲཧྨལོཀེ ནིབྦཏྟིཾསུ.
ཏེསཾ ¶ སབྦཔཋམཾ ནིབྦཏྟོ མགྷདེཝརཱཛཱ བྲཧྨལོཀེ ཋིཏོཝ ཨཏྟནོ ཝཾསཾ ཨོལོཀེནྟོ དྭཱིཧི ཨཱུནཱནི ཙཏུརཱསཱིཏིཁཏྟིཡསཧསྶཱནི པབྦཛིཏཱནི དིསྭཱ ཏུཊྛམཱནསོ ཧུཏྭཱ ‘‘ཨིཏོ ནུ ཁོ པརཾ པཝཏྟིསྶཏི, ན པཝཏྟིསྶཏཱི’’ཏི ཨོལོཀེནྟོ ཨཔྤཝཏྟནབྷཱཝཾ ཉཏྭཱ ‘‘མམ ཝཾསཾ ཨཧམེཝ གྷཊེསྶཱམཱི’’ཏི ཙིནྟེཏྭཱ ཏཏོ ཙཝིཏྭཱ མིཐིལནགརེ རཉྙོ ཨགྒམཧེསིཡཱ ཀུཙྪིམྷི པཊིསནྡྷིཾ གཎྷིཏྭཱ དསམཱསཙྩཡེན མཱཏུ ཀུཙྪིཏོ ནིཀྑམི. རཱཛཱ ཏསྶ ནཱམགྒཧཎདིཝསེ ནེམིཏྟཀེ བྲཱཧྨཎེ པཀྐོསཱཔེཏྭཱ པུཙྪི. ཏེ ཏསྶ ལཀྑཎཱནི ཨོལོཀེཏྭཱ ‘‘མཧཱརཱཛ, ཨཡཾ ཀུམཱརོ ཏུམྷཱཀཾ ཝཾསཾ གྷཊེནྟོ ཨུཔྤནྣོ. ཏུམྷཱཀཉྷི ཝཾསོ པབྦཛིཏཝཾསོ, ཨིམསྶ པརཏོ ནཱགམིསྶཏཱི’’ཏི ཝདིཾསུ. ཏཾ སུཏྭཱ རཱཛཱ ‘‘ཨཡཾ ཀུམཱརོ རཐཙཀྐནེམི ཝིཡ མམ ཝཾསཾ གྷཊེནྟོ ཛཱཏོ, ཏསྨཱ ཏསྶ ‘ནིམིཀུམཱརོ’ཏི ནཱམཾ ཀརིསྶཱམཱི’’ཏི ཙིནྟེཏྭཱ ‘‘ནིམིཀུམཱརོ’’ཏིསྶ ནཱམཾ ཨཀཱསི.
སོ དཧརཀཱལཏོ པཊྛཱཡ དཱནེ སཱིལེ ཨུཔོསཐཀམྨེ ཙ ཨབྷིརཏོ ཨཧོསི. ཨཐསྶ པིཏཱ པུརིམནཡེནེཝ པལིཏཾ དིསྭཱ ཀཔྤཀསྶ གཱམཝརཾ དཏྭཱ པུཏྟསྶ རཛྫཾ ནིཡྻཱདེཏྭཱ ཨམྦཝནེ པབྦཛིཏྭཱ བྲཧྨལོཀཔརཱཡཎོ ཨཧོསི. ནིམིརཱཛཱ པན དཱནཛ྄ཛྷཱསཡཏཱཡ ཙཏཱུསུ ནགརདྭཱརེསུ ནགརམཛ྄ཛྷེ ཙཱཏི པཉྩསུ ཋཱནེསུ པཉྩ དཱནསཱལཱཡོ ཀཱརཱཔེཏྭཱ མཧཱདཱནཾ ¶ པཝཏྟེསི. ཨེཀེཀཱཡ དཱནསཱལཱཡ སཏསཧསྶཾ སཏསཧསྶཾ ཀཏྭཱ དེཝསིཀཾ པཉྩ པཉྩ ཀཧཱཔཎསཏསཧསྶཱནི པརིཙྩཛི, ནིཙྩཾ པཉྩ སཱིལཱནི རཀྑི, པཀྑདིཝསེསུ ཨུཔོསཐཾ སམཱདིཡི, མཧཱཛནམྤི དཱནཱདཱིསུ པུཉྙེསུ སམཱདཔེསི, སགྒམགྒཾ ཨཱཙིཀྑིཏྭཱ ནིརཡབྷཡེན ཏཛྫེཏྭཱ དྷམྨཾ དེསེསི. ཏསྶ ཨོཝཱདེ ཋིཏཱ མནུསྶཱ དཱནཱདཱིནི པུཉྙཱནི ཀཏྭཱ ཏཏོ ཙུཏཱ དེཝལོཀེ ནིབྦཏྟིཾསུ, དེཝལོཀོ པརིཔཱུརི, ནིརཡོ ཏུཙྪོ ཝིཡ ཨཧོསི. ཏདཱ ཏཱཝཏིཾསབྷཝནེ དེཝསངྒྷཱ སུདྷམྨཱཡཾ དེཝསབྷཱཡཾ སནྣིཔཏིཏྭཱ ‘‘ཨཧོ, ཝཏ ཨམྷཱཀཾ ཨཱཙརིཡོ ནིམིརཱཛཱ, ཏཾ ནིསྶཱཡ མཡཾ ཨིམཾ བུདྡྷཉྙཎེནཔི ཨཔརིཙྪིནྡནཱིཡཾ དིབྦསམྤཏྟིཾ ཨནུབྷཝཱམཱ’’ཏི ཝཏྭཱ མཧཱསཏྟསྶ གུཎེ ཝཎྞཡིཾསུ ¶ . མནུསྶལོཀེཔི མཧཱསམུདྡཔིཊྛེ ཨཱསིཏྟཏེལཾ ཝིཡ མཧཱསཏྟསྶ གུཎཀཐཱ པཏྠརི. སཏྠཱ ཏམཏྠཾ ཨཱཝིབྷཱུཏཾ ཀཏྭཱ བྷིཀྑུསངྒྷསྶ ཀཐེནྟོ ཨཱཧ –
‘‘ཨཙྪེརཾ ཝཏ ལོཀསྨིཾ, ཨུཔྤཛྫནྟི ཝིཙཀྑཎཱ;
ཡདཱ ཨཧུ ནིམིརཱཛཱ, པཎྜིཏོ ཀུསལཏྠིཀོ.
‘‘རཱཛཱ ¶ སབྦཝིདེཧཱནཾ, ཨདཱ དཱནཾ ཨརིནྡམོ;
ཏསྶ ཏཾ དདཏོ དཱནཾ, སངྐཔྤོ ཨུདཔཛྫཐ;
དཱནཾ ཝཱ བྲཧྨཙརིཡཾ ཝཱ, ཀཏམཾ སུ མཧཔྥལ’’ནྟི.
ཏཏྠ ཡདཱ ཨཧཱུཏི བྷིཀྑཝེ, ཡདཱ པཎྜིཏོ ཨཏྟནོ ཙ པརེསཉྩ ཀུསལཏྠིཀོ ནིམིརཱཛཱ ཨཧོསི, ཏདཱ དེཝམནུསྶཱ ‘‘ཨཙྪེརཾ ཝཏ, བྷོ, ཨེཝརཱུཔཱཔི ནཱམ ཨནུཔྤནྣེ བུདྡྷཉཱཎེ མཧཱཛནསྶ བུདྡྷཀིཙྩཾ སཱདྷཡམཱནཱ ལོཀསྨིཾ ཝིཙཀྑཎཱ ཨུཔྤཛྫནྟཱི’’ཏི ཨེཝཾ ཏསྶ གུཎཀཐཾ ཀཐེསུནྟི ཨཏྠོ. ‘‘ཡཐཱ ཨཧཱུ’’ཏིཔི པཱཋོ. ཏསྶཏྠོ – ཡཐཱ ཨཧུ ནིམིརཱཛཱ པཎྜིཏོ ཀུསལཏྠིཀོཡེཝ, ཏཐཱརཱུཔཱ མཧཱཛནསྶ བུདྡྷཀིཙྩཾ སཱདྷཡམཱནཱ ཨུཔྤཛྫནྟི ཝིཙཀྑཎཱ. ཡཾ ཏེསཾ ཨུཔྤནྣཾ, ཏཾ ཨཙྪེརཾ ཝཏ ལོཀསྨིནྟི. ཨིཏི སཏྠཱ སཡམེཝ ཨཙྪརིཡཛཱཏོ ཨེཝམཱཧ. སབྦཝིདེཧཱནནྟི སབྦཝིདེཧརཊྛཝཱསཱིནཾ. ཀཏམཾ སཱུཏི ཨེཏེསུ དྭཱིསུ ཀཏམཾ ནུ ཁོ མཧཔྥལནྟི ཨཏྠོ.
སོ ཀིར པནྣརསཱིཨུཔོསཐདིཝསེ ཨུཔོསཐིཀོ ཧུཏྭཱ སབྦཱབྷརཎཱནི ཨོམུཉྩིཏྭཱ སིརིསཡནཔིཊྛེ ནིཔནྣོཝ དྭེ ཡཱམེ ནིདྡཾ ཨོཀྐམིཏྭཱ པཙྪིམཡཱམེ པབུདྡྷོ པལླངྐཾ ཨཱབྷུཛིཏྭཱ ‘‘ཨཧཾ མཧཱཛནསྶ ཨཔརིམཱཎཾ དཱནམྤི དེམི, སཱིལམྤི རཀྑཱམི, དཱནསྶ ནུ ཁོ མཧནྟཾ ཕལཾ, ཨུདཱཧུ བྲཧྨཙརིཡསྶཱ’’ཏི ཙིནྟེཏྭཱ ཨཏྟནོ ཀངྑཾ ཚིནྡིཏུཾ ནཱསཀྑི. ཏསྨིཾ ཁཎེ སཀྐསྶ བྷཝནཾ ཨུཎྷཱཀཱརཾ དསྶེསི. སཀྐོ ཨཱཝཛྫེནྟོ ཏཾ ཏཐཱ ཝིཏཀྐེནྟཾ དིསྭཱ ‘‘ཀངྑམསྶ ¶ ཚིནྡིསྶཱམཱི’’ཏི ཨེཀཀོཝ སཱིགྷཾ ཨཱགནྟྭཱ སཀལནིཝེསནཾ ཨེཀོབྷཱསཾ ཀཏྭཱ སིརིགབྦྷཾ པཝིསིཏྭཱ ཨོབྷཱསཾ ཕརིཏྭཱ ཨཱཀཱསེ ཋཏྭཱ ཏེན པུཊྛོ བྱཱཀཱསི. ཏམཏྠཾ པཀཱསེནྟོ སཏྠཱ ཨཱཧ –
‘‘ཏསྶ ¶ སངྐཔྤམཉྙཱཡ, མགྷཝཱ དེཝཀུཉྫརོ;
སཧསྶནེཏྟོ པཱཏུརཧུ, ཝཎྞེན ཝིཧནཾ ཏམཾ.
‘‘སལོམཧཊྛོ མནུཛིནྡོ, ཝཱསཝཾ ཨཝཙཱ ནིམི;
དེཝཏཱ ནུསི གནྡྷབྦོ, ཨདུ སཀྐོ པུརིནྡདོ.
‘‘ན ཙ མེ ཏཱདིསོ ཝཎྞོ, དིཊྛོ ཝཱ ཡདི ཝཱ སུཏོ;
ཨཱཙིཀྑ མེ ཏྭཾ བྷདྡནྟེ, ཀཐཾ ཛཱནེམུ ཏཾ མཡཾ.
‘‘སལོམཧཊྛཾ ¶ ཉཏྭཱན, ཝཱསཝོ ཨཝཙཱ ནིམིཾ;
སཀྐོཧམསྨི དེཝིནྡོ, ཨཱགཏོསྨི ཏཝནྟིཀེ;
ཨལོམཧཊྛོ མནུཛིནྡ, པུཙྪ པཉྷཾ ཡམིཙྪསི.
‘‘སོ ཙ ཏེན ཀཏོཀཱསོ, ཝཱསཝཾ ཨཝཙཱ ནིམི;
པུཙྪཱམི ཏཾ མཧཱརཱཛ, སབྦབྷཱུཏཱནམིསྶར;
‘དཱནཾ ཝཱ བྲཧྨཙརིཡཾ ཝཱ, ཀཏམཾསུ མཧཔྥལཾ’.
‘‘སོ པུཊྛོ ནརདེཝེན, ཝཱསཝོ ཨཝཙཱ ནིམིཾ;
ཝིཔཱཀཾ བྲཧྨཙརིཡསྶ, ཛཱནཾ ཨཀྑཱསིཛཱནཏོ.
‘‘ཧཱིནེན བྲཧྨཙརིཡེན, ཁཏྟིཡེ ཨུཔཔཛྫཏི;
མཛ྄ཛྷིམེན ཙ དེཝཏྟཾ, ཨུཏྟམེན ཝིསུཛ྄ཛྷཏི.
‘‘ན ཧེཏེ སུལབྷཱ ཀཱཡཱ, ཡཱཙཡོགེན ཀེནཙི;
ཡེ ཀཱཡེ ཨུཔཔཛྫནྟི, ཨནཱགཱརཱ ཏཔསྶིནོ’’ཏི.
ཏཏྠ སལོམཧཊྛོཏི བྷིཀྑཝེ, སོ ནིམིརཱཛཱ ཨོབྷཱསཾ དིསྭཱ ཨཱཀཱསཾ ཨོལོཀེནྟོ ཏཾ དིབྦཱབྷརཎཔཊིམཎྜིཏཾ དིསྭཱཝ བྷཡེན ལོམཧཊྛོ ཧུཏྭཱ ‘‘དེཝཏཱ ནུསི གནྡྷབྦོ’’ཏིཨཱདིནཱ པུཙྪི. ཨལོམཧཊྛོཏི ནིབྦྷཡོ ཨཧཊྛལོམོ ཧུཏྭཱ པུཙྪ, མཧཱརཱཛཱཏི. ཝཱསཝཾ ཨཝཙཱཏི ཏུཊྛམཱནསོ ཧུཏྭཱ སཀྐཾ ཨཝོཙ. ཛཱནཾ ཨཀྑཱསིཛཱནཏོཏི བྷིཀྑཝེ, སོ སཀྐོ ཨཏཱིཏེ ཨཏྟནཱ པཙྩཀྑཏོ དིཊྛཔུབྦཾ བྲཧྨཙརིཡསྶ ཝིཔཱཀཾ ཛཱནནྟོ ཏསྶ ཨཛཱནཏོ ཨཀྑཱསི.
ཧཱིནེནཱཏིཨཱདཱིསུ པུཐུཏིཏྠཱཡཏནེ མེཐུནཝིརཏིམཏྟཾ སཱིལཾ ཧཱིནཾ ནཱམ, ཏེན ཁཏྟིཡཀུལེ ཨུཔཔཛྫཏི. ཛྷཱནསྶ ཨུཔཙཱརམཏྟཾ མཛ྄ཛྷིམཾ ནཱམ, ཏེན ¶ དེཝཏྟཾ ཨུཔཔཛྫཏི. ཨཊྛསམཱཔཏྟིནིབྦཏྟནཾ པན ཨུཏྟམཾ ནཱམ, ཏེན བྲཧྨལོཀེ ནིབྦཏྟཏི, ཏཾ བཱཧིརཀཱ ནིབྦཱནནྟི ཀཐེནྟི. ཏེནཱཧ ‘‘ཝིསུཛ྄ཛྷཏཱི’’ཏི. ཨིམསྨིཾ པན བུདྡྷསཱསནེ པརིསུདྡྷསཱིལསྶ བྷིཀྑུནོ ཨཉྙཏརཾ དེཝནིཀཱཡཾ པཏྠེནྟསྶ བྲཧྨཙརིཡཙེཏནཱ ཧཱིནཏཱཡ ཧཱིནཾ ནཱམ, ཏེན ཡཐཱཔཏྠིཏེ དེཝལོཀེ ནིབྦཏྟཏི. པརིསུདྡྷསཱིལསྶ བྷིཀྑུནོ ཨཊྛསམཱཔཏྟིནིབྦཏྟནཾ མཛ྄ཛྷིམཾ ནཱམ, ཏེན བྲཧྨལོཀེ ནིབྦཏྟཏི ¶ . པརིསུདྡྷསཱིལསྶ ཝིཔསྶནཾ ཝཌྜྷེཏྭཱ ཨརཧཏྟུཔྤཏྟི ཨུཏྟམཾ ནཱམ, ཏེན ཝིསུཛ྄ཛྷཏཱིཏི ¶ . ཨིཏི སཀྐོ ‘‘མཧཱརཱཛ, དཱནཏོ སཏགུཎེན སཧསྶགུཎེན སཏསཧསྶགུཎེན བྲཧྨཙརིཡཝཱསོཝ མཧཔྥལོ’’ཏི ཝཎྞེཏི. ཀཱཡཱཏི བྲཧྨགྷཊཱ. ཡཱཙཡོགེནཱཏི ཡཱཙནཡུཏྟཀེན ཡཉྙཡུཏྟཀེན ཝཱཏི ཨུབྷཡཏྠཱཔི དཱཡཀསྶེཝེཏཾ ནཱམཾ. ཏཔསྶིནོཏི ཏཔནིསྶིཏཀཱ.
ཨིམཱཡ གཱཐཱཡ བྲཧྨཙརིཡཝཱསསྶེཝ མཧཔྥལབྷཱཝཾ དཱིཔེཏྭཱ ཨིདཱནི ཡེ ཨཏཱིཏེ མཧཱདཱནཾ དཏྭཱ ཀཱམཱཝཙརཾ ཨཏིཀྐམིཏུཾ ནཱསཀྑིཾསུ, ཏེ རཱཛཱནོ དསྶེནྟོ ཨཱཧ –
‘‘དུདཱིཔོ སཱགརོ སེལོ, མུཛཀིནྡོ བྷགཱིརསོ;
ཨུསིནྡརོ ཀསྶཔོ ཙ, ཨསཀོ ཙ པུཐུཛྫནོ.
‘‘ཨེཏེ ཙཉྙེ ཙ རཱཛཱནོ, ཁཏྟིཡཱ བྲཱཧྨཎཱ བཧཱུ;
པུཐུཡཉྙཾ ཡཛིཏྭཱན, པེཏཏྟཾ ནཱཏིཝཏྟིསུ’’ནྟི.
ཏསྶཏྠོ – མཧཱརཱཛ, པུབྦེ བཱརཱཎསིཡཾ དུདཱིཔོ ནཱམ རཱཛཱ དཱནཾ དཏྭཱ མརཎཙཀྐེན ཚིནྣོ ཀཱམཱཝཙརེཡེཝ ནིབྦཏྟི. ཏཐཱ སཱགརཱདཡོ ཨཊྛཱཏི ཨེཏེ ཙ ཨཉྙེ ཙ བཧཱུ རཱཛཱནོ ཙེཝ ཁཏྟིཡཱ བྲཱཧྨཎཱ ཙ པུཐུཡཉྙཾ ཡཛིཏྭཱན ཨནེཀཔྤཀཱརཾ དཱནཾ དཏྭཱ ཀཱམཱཝཙརབྷཱུམིསངྑཱཏཾ པེཏཏྟཾ ནཱཏིཝཏྟིཾསཱུཏི ཨཏྠོ. ཀཱམཱཝཙརདེཝཏཱ ཧི རཱུཔཱདིནོ ཀིལེསཝཏྠུསྶ ཀཱརཎཱ པརཾ པཙྩཱསཱིསནཏོ ཀཔཎཏཱཡ ‘‘པེཏཱ’’ཏི ཝུཙྩནྟི. ཝུཏྟམྤི ཙེཏཾ –
‘‘ཡེ ¶ ཨདུཏིཡཱ ན རམནྟི ཨེཀིཀཱ, ཝིཝེཀཛཾ ཡེ ན ལབྷནྟི པཱིཏིཾ;
ཀིཉྩཱཔི ཏེ ཨིནྡསམཱནབྷོགཱ, ཏེ ཝེ པརཱདྷཱིནསུཁཱ ཝརཱཀཱ’’ཏི.
ཨེཝམྤི དཱནཕལཏོ བྲཧྨཙརིཡཕལསྶེཝ མཧནྟབྷཱཝཾ དསྶེཏྭཱ ཨིདཱནི བྲཧྨཙརིཡཝཱསེན པེཏབྷཝནཾ ཨཏིཀྐམིཏྭཱ བྲཧྨལོཀེ ནིབྦཏྟཏཱཔསེ དསྶེནྟོ ཨཱཧ –
‘‘ཨཐ ཡཱིམེ ཨཝཏྟིཾསུ, ཨནཱགཱརཱ ཏཔསྶིནོ;
སཏྟིསཡོ ཡཱམཧནུ, སོམཡཱམོ མནོཛཝོ.
‘‘སམུདྡོ མཱགྷོ བྷརཏོ ཙ, ཨིསི ཀཱལཔུརཀྑཏོ;
ཨངྒཱིརསོ ཀསྶཔོ ཙ, ཀིསཝཙྪོ ཨཀཏྟི ཙཱ’’ཏི.
ཏཏྠ ¶ ཨཝཏྟིཾསཱུཏི ཀཱམཱཝཙརཾ ཨཏིཀྐམིཾསུ. ཏཔསྶིནོཏི སཱིལཏཔཉྩེཝ སམཱཔཏྟིཏཔཉྩ ནིསྶིཏཱ. སཏྟིསཡོཏི ཡཱམཧནུཨཱདཡོ སཏྟ བྷཱཏརོཝ སནྡྷཱཡཱཧ. ཨངྒཱིརསཱདཱིཧི ཙཏཱུཧི སདྡྷིཾ ཨེཀཱདསེཏེ ཨཝཏྟིཾསུ ཨཏིཀྐམིཾསཱུཏི ཨཏྠོ.
ཨེཝཾ ¶ ཏཱཝ སུཏཝསེནེཝ དཱནཕལཏོ བྲཧྨཙརིཡཝཱསསྶེཝ མཧཔྥལཏཾ ཝཎྞེཏྭཱ ཨིདཱནི ཨཏྟནཱ དིཊྛཔུབྦཾ ཨཱཧརནྟོ ཨཱཧ –
‘‘ཨུཏྟརེན ནདཱི སཱིདཱ, གམྦྷཱིརཱ དུརཏིཀྐམཱ;
ནལ༹གྒིཝཎྞཱ ཛོཏནྟི, སདཱ ཀཉྩནཔབྦཏཱ.
‘‘པརཱུལ༹ྷཀཙྪཱ ཏགརཱ, རཱུལ༹ྷཀཙྪཱ ཝནཱ ནགཱ;
ཏཏྲཱསུཾ དསསཧསྶཱ, པོརཱཎཱ ཨིསཡོ པུརེ.
‘‘ཨཧཾ སེཊྛོསྨི དཱནེན, སཾཡམེན དམེན ཙ;
ཨནུཏྟརཾ ཝཏཾ ཀཏྭཱ, པཀིརཙཱརཱི སམཱཧིཏེ.
‘‘ཛཱཏིམནྟཾ ཨཛཙྩཉྩ, ཨཧཾ ཨུཛུགཏཾ ནརཾ;
ཨཏིཝེལཾ ནམསྶིསྶཾ, ཀམྨབནྡྷཱུ ཧི མཱཎཝཱ.
‘‘སབྦེ ¶ ཝཎྞཱ ཨདྷམྨཊྛཱ, པཏནྟི ནིརཡཾ ཨདྷོ;
སབྦེ ཝཎྞཱ ཝིསུཛ྄ཛྷནྟི, ཙརིཏྭཱ དྷམྨམུཏྟམ’’ནྟི.
ཏཏྠ ཨུཏྟརེནཱཏི མཧཱརཱཛ, ཨཏཱིཏེ ཨུཏྟརཧིམཝནྟེ དྭིནྣཾ སུཝཎྞཔབྦཏཱནཾ ཨནྟརེ པཝཏྟཱ སཱིདཱ ནཱམ ནདཱི གམྦྷཱིརཱ ནཱཝཱཧིཔི དུརཏིཀྐམཱ ཨཧོསི. ཀིཾ ཀཱརཎཱ? སཱ ཧི ཨཏིསུཁུམོདཀཱ, སུཁུམཏྟཱ ཨུདཀསྶ ཨནྟམསོ མོརཔིཉྪ-མཏྟམྤི ཏཏྠ པཏིཏཾ ནཾ སཎྛཱཏི, ཨོསཱིདིཏྭཱ ཧེཊྛཱཏལམེཝ གཙྪཏི. ཏེནེཝ སཱ སཱིདཱ ནཱམ ཨཧོསི. ཏེ པན ཏསྶཱ ཏཱིརེསུ ཀཉྩནཔབྦཏཱ སདཱ ནལ༹གྒིཝཎྞཱ ཧུཏྭཱ ཛོཏནྟི ཨོབྷཱསནྟི. པརཱུལ༹ྷཀཙྪཱ ཏགརཱཏི ཏསྶཱ པན ནདིཡཱ ཏཱིརེ ཀཙྪཱ པརཱུལ༹ྷཏགརཱ ཨཧེསུཾ ཏགརགནྡྷསུགནྡྷིནོ. རཱུལ༹ྷཀཙྪཱ ཝནཱ ནགཱཏི ཡེ ཏཏྠ ཨཉྙེཔི པབྦཏཱ, ཏེསམྤི ཨནྟརེ ཀཙྪཱ རཱུལ༹ྷཝནཱ ཨཧེསུཾ, པུཔྥཕལཱུཔགརུཀྑསཉྪནྣཱཏི ཨཏྠོ. ཏཏྲཱསུནྟི ཏསྨིཾ ཨེཝཾ རམཎཱིཡེ བྷཱུམིབྷཱགེ དསསཧསྶཱ ཨིསཡོ ¶ ཨཧེསུཾ. ཏེ སབྦེཔི ཨབྷིཉྙཱསམཱཔཏྟིལཱབྷིནོཝ. ཏེསུ བྷིཀྑཱཙཱརཝེལཱཡ ཀེཙི ཨུཏྟརཀུརུཾ གཙྪནྟི, ཀེཙི མཧཱཛམྦུདཱིཔེ ཛམྦུཕལཾ ཨཱཧརནྟི, ཀེཙི ཧིམཝནྟེཡེཝ མདྷུརཕལཱཕལཱནི ཨཱཧརིཏྭཱ ཁཱདནྟི, ཀེཙི ཛམྦུདཱིཔཏལེ ཏཾ ཏཾ ནགརཾ གཙྪནྟི. ཨེཀོཔི རསཏཎྷཱབྷིབྷཱུཏོ ནཏྠི, ཛྷཱནསུཁེནེཝ ཝཱིཏིནཱམེནྟི. ཏདཱ ཨེཀོ ཏཱཔསོ ཨཱཀཱསེན བཱརཱཎསིཾ གནྟྭཱ སུནིཝཏྠོ སུཔཱརུཏོ པིཎྜཱཡ ཙརནྟོ པུརོཧིཏསྶ གེཧདྭཱརཾ པཱཔུཎི. སོ ཏསྶ ཨུཔསམེ པསཱིདིཏྭཱ ཨནྟོནིཝེསནཾ ཨཱནེཏྭཱ བྷོཛེཏྭཱ ཀཏིཔཱཧཾ པཊིཛགྒནྟོ ཝིསྶཱསེ ཨུཔྤནྣེ ‘‘བྷནྟེ, ཏུམྷེ ཀུཧིཾ ཝསཐཱ’’ཏི པུཙྪི. ‘‘ཨསུཀཊྛཱནེ ནཱམཱཝུསོ’’ཏི. ‘‘ཀིཾ པན ཏུམྷེ ཨེཀཀོཝ ཏཏྠ ཝསཐ, ཨུདཱཧུ ཨཉྙེཔི ཨཏྠཱི’’ཏི? ‘‘ཀིཾ ཝདེསི, ཨཱཝུསོ, ཏསྨིཾ པདེསེ དསསཧསྶཱ ཨིསཡོ ཝསནྟི, སབྦེཝ ཨབྷིཉྙཱསམཱཔཏྟིལཱབྷིནོ’’ཏི. ཏསྶ ཏེསཾ གུཎཾ སུཏྭཱ པབྦཛྫཱཡ ཙིཏྟཾ ནམི. ཨཐ ནཾ སོ ཨཱཧ – ‘‘བྷནྟེ, མམྤི ཏཏྠ ནེཏྭཱ པབྦཱཛེཐཱ’’ཏི. ‘‘ཨཱཝུསོ, ཏྭཾ རཱཛཔུརིསོ, ན ཏཾ སཀྐཱ པབྦཱཛེཏུ’’ནྟི. ‘‘ཏེན ཧི, བྷནྟེ, ཨཛྫཱཧཾ རཱཛཱནཾ ཨཱཔུཙྪིསྶཱམི, ཏུམྷེ སྭེཔི ཨཱགཙྪེཡྻཱཐཱ’’ཏི. སོ ཨདྷིཝཱསེསི.
ཨིཏརོཔི བྷུཏྟཔཱཏརཱསོ རཱཛཱནཾ ཨུཔསངྐམིཏྭཱ ‘‘ཨིཙྪཱམཧཾ, དེཝ ¶ , པབྦཛིཏུ’’ནྟི ཨཱཧ. ‘‘ཀིཾ ཀཱརཎཱ པབྦཛིསྶསཱི’’ཏི? ‘‘ཀཱམེསུ དོསཾ ནེཀྑམྨེ ཙ ¶ ཨཱནིསཾསཾ དིསྭཱ’’ཏི. ‘‘ཏེན ཧི པབྦཛཱཧི, པབྦཛིཏོཔི མཾ དསྶེཡྻཱསཱི’’ཏི. སོ ‘‘སཱདྷཱུ’’ཏི སམྤཊིཙྪིཏྭཱ ཨཏྟནོ གེཧཾ གནྟྭཱ པུཏྟདཱརཾ ཨནུསཱསིཏྭཱ སབྦཾ སཱཔཏེཡྻཾ དསྶེཏྭཱ ཨཏྟནོ པབྦཛིཏཔརིཀྑཱརཾ གཧེཏྭཱ ཏཱཔསསྶ ཨཱགམནམགྒཾ ཨོལོཀེནྟོཝ ནིསཱིདི. ཏཱཔསོཔི ཏཐེཝ ཨཱཀཱསེནཱགནྟྭཱ ཨནྟོནགརཾ པཝིསིཏྭཱ ཏསྶ གེཧཾ པཱཝིསི. སོ ཏཾ སཀྐཙྩཾ པརིཝིསིཏྭཱ ‘‘བྷནྟེ, མཡཱ ཀཐཾ ཀཱཏབྦ’’ནྟི ཨཱཧ. སོ ཏཾ བཧིནགརཾ ནེཏྭཱ ཧཏྠེ ཨཱདཱཡ ཨཏྟནོ ཨཱནུབྷཱཝེན ཏཏྠ ནེཏྭཱ པབྦཱཛེཏྭཱ པུནདིཝསེ ཏཾ ཏཏྠེཝ ཋཔེཏྭཱ བྷཏྟཾ ཨཱཧརིཏྭཱ དཏྭཱ ཀསིཎཔརིཀམྨཾ ཨཱཙིཀྑི. སོ ཀཏིཔཱཧེནེཝ ཨབྷིཉྙཱསམཱཔཏྟིཡོ ནིབྦཏྟེཏྭཱ སཡམེཝ པིཎྜཱཡ ཙརཏི.
སོ ཨཔརབྷཱགེ ‘‘ཨཧཾ རཉྙོ ཨཏྟཱནཾ དསྶེཏུཾ པཊིཉྙཾ ཨདཱསིཾ, དསྶེསྶཱམསྶ ཨཏྟཱན’’ནྟི ཙིནྟེཏྭཱ ཏཱཔསེ ཝནྡིཏྭཱ ཨཱཀཱསེན བཱརཱཎསིཾ གནྟྭཱ བྷིཀྑཾ ཙརནྟོ རཱཛདྭཱརཾ པཱཔུཎི. རཱཛཱ ཏཾ དིསྭཱ སཉྫཱནིཏྭཱ ཨནྟོནིཝེསནཾ པཝེསེཏྭཱ སཀྐཱརཾ ཀཏྭཱ ‘‘བྷནྟེ, ཀུཧིཾ ཝསཐཱ’’ཏི པུཙྪི. ‘‘ཨུཏྟརཧིམཝནྟཔདེསེ ཀཉྩནཔབྦཏནྟརེ པཝཏྟཱཡ སཱིདཱནདིཡཱ ཏཱིརེ, མཧཱརཱཛཱ’’ཏི. ‘‘ཀིཾ པན, བྷནྟེ, ཨེཀཀོཝ ཏཏྠ ཝསཐ, ཨུདཱཧུ ཨཉྙེཔི ཨཏྠཱི’’ཏི. ‘‘ཀིཾ ཝདེསི, མཧཱརཱཛ, ཏཏྠ དསསཧསྶཱ ཨིསཡོ ཝསནྟི, སབྦེཝ ཨབྷིཉྙཱསམཱཔཏྟིལཱབྷིནོ’’ཏི? རཱཛཱ ¶ ཏེསཾ གུཎཾ སུཏྭཱ སབྦེསཾ བྷིཀྑཾ དཱཏུཀཱམོ ཨཧོསི. ཨཐ ནཾ རཱཛཱ ཨཱཧ – ‘‘བྷནྟེ, ཨཧཾ ཏེསཾ ཨིསཱིནཾ བྷིཀྑཾ དཱཏུཀཱམོམྷི, ཀིཾ ཀརོམཱི’’ཏི? ‘‘མཧཱརཱཛ, ཏེ ཨིསཡོ ཛིཝ྄ཧཱཝིཉྙེཡྻརསེ ཨགིདྡྷཱ, ན སཀྐཱ ཨིདྷཱནེཏུ’’ནྟི. ‘‘བྷནྟེ, ཏུམྷེ ནིསྶཱཡ ཏེ བྷོཛེསྶཱམི, ཨུཔཱཡཾ མེ ཨཱཙིཀྑཐཱ’’ཏི. ‘‘ཏེན ཧི, མཧཱརཱཛ, སཙེ ཏེསཾ དཱནཾ དཱཏུཀཱམོསི, ཨིཏོ ནིཀྑམིཏྭཱ སཱིདཱནདཱིཏཱིརེ ཝསནྟོ ཏེསཾ དཱནཾ དེཧཱི’’ཏི.
སོ ‘‘སཱདྷཱུ’’ཏི སམྤཊིཙྪིཏྭཱ སབྦཱུཔཀརཎཱནི གཱཧཱཔེཏྭཱ ཙཏུརངྒིནིཡཱ སེནཱཡ སདྡྷིཾ ནིཀྑམིཏྭཱ ཨཏྟནོ རཛྫསཱིམཾ པཱཔུཎི. ཨཐ ནཾ ཏཱཔསོ ཨཏྟནོ ཨཱནུབྷཱཝེན སདྡྷིཾ སེནཱཡ སཱིདཱནདཱིཏཱིརཾ ནེཏྭཱ ནདཱིཏཱིརེ ཁནྡྷཱཝཱརཾ ཀཱརཱཔེཏྭཱ ཨཱཀཱསེན ཨཏྟནོ ཝསནཊྛཱནཾ གནྟྭཱ པུནདིཝསེ པཙྩཱགམི. ཨཐ ནཾ རཱཛཱ སཀྐཙྩཾ བྷོཛེཏྭཱ ‘‘སྭེ, བྷནྟེ, དསསཧསྶེ ཨིསཡོ ཨཱདཱཡ ཨིདྷེཝ ཨཱགཙྪཐཱ’’ཏི ཨཱཧ. སོ ‘‘སཱདྷཱུ’’ཏི ¶ སམྤཊིཙྪིཏྭཱ གནྟྭཱ པུནདིཝསེ བྷིཀྑཱཙཱརཝེལཱཡ ཏེསཾ ཨིསཱིནཾ ཨཱརོཙེསི ‘‘མཱརིསཱ, བཱརཱཎསིརཱཛཱ ‘ཏུམྷཱཀཾ བྷིཀྑཾ དསྶཱམཱི’ཏི ཨཱགནྟྭཱ སཱིདཱནདཱིཏཱིརེ ནིསིནྣོ སྭེ ཝོ ནིམནྟེཏི, ཏསྶཱནུཀམྤཱཡ ཁནྡྷཱཝཱརཾ གནྟྭཱ བྷིཀྑཾ གཎྷཐཱ’’ཏི. ཏེ ‘‘སཱདྷཱུ’’ཏི སམྤཊིཙྪིཏྭཱ ཨཱཀཱསེན གནྟྭཱ ཁནྡྷཱཝཱརསྶ ཨཝིདཱུརེ ཨོཏརིཾསུ. རཱཛཱ ཏེ དིསྭཱ པཙྩུགྒམནཾ ཀཏྭཱ ཁནྡྷཱཝཱརཾ པཝེསེཏྭཱ པཉྙཏྟཱསནེསུ ནིསཱིདཱཔེཏྭཱ ཨིསིགཎཾ པཎཱིཏེནཱཧཱརེན སནྟཔྤེཏྭཱ ཏེསཾ ཨིརིཡཱཔཐེ པསནྣོ སྭཱཏནཱཡཔི ནིམནྟེསི. ཨེཏེནུཔཱཡེན དསནྣཾ ཏཱཔསསཧསྶཱནཾ དསཝསྶསཧསྶཱནི དཱནཾ ཨདཱསི. དདནྟོ ཙ ཏསྨིཾཡེཝ པདེསེ ནགརཾ མཱཔེཏྭཱ སསྶཀམྨཾ ཀཱརེསི. ན ཁོ པན, མཧཱརཱཛ, ཏདཱ སོ རཱཛཱ ཨཉྙོ ཨཧོསི, ཨཐ ཁོ ཨཧཾ སེཊྛོསྨི དཱནེན, ཨཧམེཝ ཧི ཏདཱ དཱནེན སེཊྛོ ཧུཏྭཱ ཏཾ མཧཱདཱནཾ དཏྭཱ ཨིམཾ པེཏལོཀཾ ཨཏིཀྐམིཏྭཱ བྲཧྨལོཀེ ནིབྦཏྟིཏུཾ ནཱསཀྑིཾ. མཡཱ དིནྣཾ པན དཱནཾ བྷུཉྫིཏྭཱ སབྦེཝ ཏེ ཏཱཔསཱ ཀཱམཱཝཙརཾ ཨཏིཀྐམིཏྭཱ བྲཧྨལོཀེ ནིབྦཏྟཱ, ཨིམིནཱཔེཏཾ ཝེདིཏབྦཾ ‘‘བྲཧྨཙརིཡཝཱསོཝ མཧཔྥལོ’’ཏི.
ཨེཝཾ དཱནེན ཨཏྟནོ སེཊྛབྷཱཝཾ པཀཱསེཏྭཱ ¶ ཨིཏརེཧི ཏཱིཧི པདེཧི ཏེསཾ ཨིསཱིནཾ གུཎཾ པཀཱསེཏི. ཏཏྠ སཾཡམེནཱཏི སཱིལེན. དམེནཱཏི ཨིནྡྲིཡདམེན. ཨནུཏྟརནྟི ཨེཏེཧི གུཎེཧི ནིརནྟརཾ ཨུཏྟམཾ ཝཏཾ སམཱདཱནཾ ཙརིཏྭཱ. པཀིརཙཱརཱིཏི གཎཾ པཀིརིཏྭཱ པཊིཀྑིཔིཏྭཱ པཧཱཡ ཨེཀཙཱརིཀེ, ཨེཀཱིབྷཱཝཾ གཏེཏི ཨཏྠོ. སམཱཧིཏེཏི ཨུཔཙཱརཔྤནཱསམཱདྷཱིཧི སམཱཧིཏཙིཏྟེ. ཨེཝརཱུཔེ ཨཧཾ ཏཔསྶིནོ ཨུཔཊྛཧིནྟི དསྶེཏི. ཨཧཾ ཨུཛུགཏནྟི ཨཧཾ, མཧཱརཱཛ, ཏེསཾ དསསཧསྶཱནཾ ཨིསཱིནཾ ཨནྟརེ ཀཱཡཝངྐཱདཱིནཾ ཨབྷཱཝེན ཨུཛུགཏཾ ཨེཀམྤི ནརཾ ཧཱིནཛཙྩོ ཝཱ ཧོཏུ ཛཱཏིསམྤནྣོ ཝཱ, ཛཱཏིཾ ཨཝིཙཱརེཏྭཱ ཏེསཾ གུཎེསུ པསནྣམཱནསོ ཧུཏྭཱ སབྦམེཝ ཨཏིཝེལཾ ¶ ནམསྶིསྶཾ, ནིཙྩཀཱལམེཝ ནམསྶིསྶནྟི ཝདཏི. ཀིཾ ཀཱརཎཱ? ཀམྨབནྡྷཱུ ཧི མཱཎཝཱཏི, སཏྟཱ ཧི ནཱམེཏེ ཀམྨབནྡྷཱུ ཀམྨཔཊིསརཎཱ, ཏེནེཝ ཀཱརཎེན སབྦེ ཝཎྞཱཏི ཝེདིཏབྦཱ.
ཨེཝཉྩ ¶ པན ཝཏྭཱ ‘‘ཀིཉྩཱཔི, མཧཱརཱཛ, དཱནཏོ བྲཧྨཙརིཡམེཝ མཧཔྥལཾ, དྭེཔི པནེཏེ མཧཱཔུརིསཝིཏཀྐཱཝ, ཏསྨཱ དྭཱིསུཔི ཨཔྤམཏྟོཝ ཧུཏྭཱ དཱནཉྩ དེཧི, སཱིལཉྩ རཀྑཱཧཱི’’ཏི ཏཾ ཨོཝདིཏྭཱ སཀཊྛཱནམེཝ གཏོ. ཏམཏྠཾ པཀཱསེནྟོ སཏྠཱ ཨཱཧ –
‘‘ཨིདཾ ཝཏྭཱན མགྷཝཱ, དེཝརཱཛཱ སུཛམྤཏི;
ཝེདེཧམནུསཱསིཏྭཱ, སགྒཀཱཡཾ ཨཔཀྐམཱི’’ཏི.
ཏཏྠ ཨཔཀྐམཱིཏི པཀྐམི, སུདྷམྨཱདེཝསབྷཱཡཾ ནིསིནྣམེཝ ཨཏྟཱནཾ དསྶེསཱིཏི ཨཏྠོ.
ཨཐ ནཾ དེཝགཎཱ ཨཱཧཾསུ ‘‘མཧཱརཱཛ, ནནུ ན པཉྙཱཡིཏྠ, ཀུཧིཾ གཏཏྠཱ’’ཏི? ‘‘མཱརིསཱ མིཐིལཱཡཾ ནིམིརཉྙོ ཨེཀཱ ཀངྑཱ ཨུཔྤཛྫི, ཏསྶ པཉྷཾ ཀཐེཏྭཱ ཏཾ རཱཛཱནཾ ནིཀྐངྑཾ ཀཏྭཱ ཨཱགཏོམྷཱི’’ཏི ཝཏྭཱ པུན ཏཾ ཀཱརཎཾ གཱཐཱཡ ཀཐེཏུཾ ཨཱཧ –
‘‘ཨིམཾ བྷོནྟོ ནིསཱམེཐ, ཡཱཝནྟེཏྠ སམཱགཏཱ;
དྷམྨིཀཱནཾ མནུསྶཱནཾ, ཝཎྞཾ ཨུཙྩཱཝཙཾ བཧུཾ.
‘‘ཡཐཱ ཨཡཾ ནིམིརཱཛཱ, པཎྜིཏོ ཀུསལཏྠིཀོ;
རཱཛཱ སབྦཝིདེཧཱནཾ, ཨདཱ དཱནཾ ཨརིནྡམོ.
‘‘ཏསྶ ཏཾ དདཏོ དཱནཾ, སངྐཔྤོ ཨུདཔཛྫཐ;
དཱནཾ ཝཱ བྲཧྨཙརིཡཾ ཝཱ, ཀཏམཾ སུ མཧཔྥལ’’ནྟི.
ཏཏྠ ཨིམནྟི དྷམྨིཀཱནཾ ཀལྱཱཎདྷམྨཱནཾ མནུསྶཱནཾ མཡཱ ཝུཙྩམཱནཾ སཱིལཝསེན ཨུཙྩཾ དཱནཝསེན ཨཝཙཾ བཧུཾ ཨིམཾ ཝཎྞཾ ནིསཱམེཐ སུཎཱཐཱཏི ཨཏྠོ. ཡཐཱ ཨཡནྟི ཨཡཾ ནིམིརཱཛཱ ཡཐཱ ཨཏིཝིཡ པཎྜིཏོཏི.
ཨིཏི ¶ ¶ སོ ཨཔརིཧཱཔེཏྭཱ རཉྙོ ཝཎྞཾ ཀཐེསི. ཏཾ སུཏྭཱ དེཝསངྒྷཱ རཱཛཱནཾ དཊྛུཀཱམཱ ཧུཏྭཱ ‘‘ཨམྷཱཀཾ ནིམིརཱཛཱ ཨཱཙརིཡོ, ཏསྶོཝཱདེ ཋཏྭཱ ཏཾ ནིསྶཱཡ ཨམྷེཧི ཨཡཾ དིབྦསམྤཏྟི ལདྡྷཱ, མཡཾ དཊྛུཀཱམམྷཱ, ཏཾ པཀྐོསཱཔེཧི, མཧཱརཱཛཱ’’ཏི ཝདིཾསུ. སཀྐོ ‘‘སཱདྷཱུ’’ཏི སམྤཊིཙྪིཏྭཱ མཱཏལིཾ པཀྐོསཱཔེཏྭཱ ‘‘སམྨ མཱཏལི, ཝེཛཡནྟརཐཾ ཡོཛེཏྭཱ མིཐིལཾ གནྟྭཱ ནིམིརཱཛཱནཾ དིབྦཡཱནེ ཨཱརོཔེཏྭཱ ཨཱནེཧཱི’’ཏི ཨཱཧ. སོ ‘‘སཱདྷཱུ’’ཏི སམྤཊིཙྪིཏྭཱ རཐཾ ཡོཛེཏྭཱ པཱཡཱསི. སཀྐསྶ ¶ པན དེཝེཧི སདྡྷིཾ ཀཐེནྟསྶ མཱཏལིཾ ཨཱཎཱཔེནྟསྶ ཙ རཐཾ ཡོཛེནྟསྶ ཙ མནུསྶགཎནཱཡ མཱསོ ཨཏིཀྐནྟོ. ཨིཏི ནིམིརཉྙོ པུཎྞམཱཡཾ ཨུཔོསཐིཀསྶ པཱཙཱིནསཱིཧཔཉྫརཾ ཝིཝརིཏྭཱ མཧཱཏལེ ནིསཱིདིཏྭཱ ཨམཙྩགཎཔརིཝུཏསྶ སཱིལཾ པཙྩཝེཀྑནྟསྶ པཱཙཱིནལོཀདྷཱཏུཏོ ཨུགྒཙྪནྟེན ཙནྡམཎྜལེན སདྡྷིཾཡེཝ སོ རཐོ པཉྙཱཡཏི. མནུསྶཱ བྷུཏྟསཱཡམཱསཱ གྷརདྭཱརེསུ ནིསཱིདིཏྭཱ སུཁཀཐཾ ཀཐེནྟཱ ‘‘ཨཛྫ དྭེ ཙནྡཱ ཨུགྒཏཱ’’ཏི ཨཱཧཾསུ. ཨཐ ནེསཾ སལླཔནྟཱནཉྙེཝ རཐོ པཱཀཊོ ཨཧོསི. མཧཱཛནོ ‘‘ནཱཡཾ, ཙནྡོ, རཐོ’’ཏི ཝཏྭཱ ཨནུཀྐམེན སིནྡྷཝསཧསྶཡུཏྟེ མཱཏལིསངྒཱཧཀེ ཝེཛཡནྟརཐེ ཙ པཱཀཊེ ཛཱཏེ ‘‘ཀསྶ ནུ ཁོ ཨིདཾ དིབྦཡཱནཾ ཨཱགཙྪཏཱི’’ཏི ཙིནྟེཏྭཱ ‘‘ན ཀསྶཙི ཨཉྙསྶ, ཨམྷཱཀཾ རཱཛཱ དྷམྨིཀོ, སཀྐེན ཝེཛཡནྟརཐོ པེསིཏོ བྷཝིསྶཏི, ཨམྷཱཀཾ རཉྙོཝ ཨནུཙྪཝིཀོ’’ཏི ཏུཊྛཔྤཧཊྛོ གཱཐམཱཧ –
‘‘ཨབྦྷུཏོ ཝཏ ལོཀསྨིཾ, ཨུཔྤཛྫི ལོམཧཾསནོ;
དིབྦོ རཐོ པཱཏུརཧུ, ཝེདེཧསྶ ཡསསྶིནོ’’ཏི.
ཏཏྠ ཨབྦྷུཏོཏི ཨབྷཱུཏཔུབྦོ. ཨཙྪརིཡོཏི ཏེ ཝིམྷཡཝསེནེཝམཱཧཾསུ.
ཏསྶ པན མཧཱཛནསྶ ཨེཝཾ ཀཐེནྟསྶེཝ མཱཏལི ཝཱཏཝེགེན ཨཱགནྟྭཱ རཐཾ ནིཝཏྟེཏྭཱ སཱིཧཔཉྫརཨུམྨཱརེ པཙྪཱབྷཱགེན ཋཔེཏྭཱ ཨཱརོཧཎསཛྫཾ ཀཏྭཱ ཨཱརོཧཎཏྠཱཡ རཱཛཱནཾ ནིམནྟེསི ¶ . ཏམཏྠཾ པཀཱསེནྟོ སཏྠཱ ཨཱཧ –
‘‘དེཝཔུཏྟོ མཧིདྡྷིཀོ, མཱཏལི དེཝསཱརཐི;
ནིམནྟཡིཏྠ རཱཛཱནཾ, ཝེདེཧཾ མིཐིལགྒཧཾ.
‘‘ཨེཧིམཾ ¶ རཐམཱརུཡ྄ཧ, རཱཛསེཊྛ དིསམྤཏི;
དེཝཱ དསྶནཀཱམཱ ཏེ, ཏཱཝཏིཾསཱ སཨིནྡཀཱ;
སརམཱནཱ ཧི ཏེ དེཝཱ, སུདྷམྨཱཡཾ སམཙྪརེ’’ཏི.
ཏཏྠ མིཐིལགྒཧནྟི མིཐིལཱཡཾ པཏིཊྛིཏགེཧཾ, ཙཏཱུཧི ཝཱ སངྒཧཝཏྠཱུཧི མིཐིལཱཡཾ སངྒཱཧཀཾ. སམཙྪརེཏི ཏཝེཝ གུཎཀཐཾ ཀཐེནྟཱ ནིསིནྣཱཏི.
ཏཾ ¶ སུཏྭཱ རཱཛཱ ‘‘ཨདིཊྛཔུབྦཾ དེཝལོཀཉྩ པསྶིསྶཱམི, མཱཏལིསྶ ཙ མེ སངྒཧོ ཀཏོ བྷཝིསྶཏི, གཙྪིསྶཱམཱི’’ཏི ཙིནྟེཏྭཱ ཨནྟེཔུརཉྩ མཧཱཛནཉྩ ཨཱམནྟེཏྭཱ ‘‘ཨཧཾ ནཙིརསྶེཝ ཨཱགམིསྶཱམི, ཏུམྷེ ཨཔྤམཏྟཱ དཱནཱདཱིནི པུཉྙཱནི ཀརོཐཱ’’ཏི ཝཏྭཱ རཐཾ ཨབྷིརུཧི. ཏམཏྠཾ པཀཱསེནྟོ སཏྠཱ ཨཱཧ –
‘‘ཏཏོ རཱཛཱ ཏརམཱནོ, ཝེདེཧོ མིཐིལགྒཧོ;
ཨཱསནཱ ཝུཊྛཧིཏྭཱན, པམུཁོ རཐམཱརུཧི.
‘‘ཨབྷིརཱུལ༹ྷཾ རཐཾ དིབྦཾ, མཱཏལི ཨེཏདབྲཝི;
ཀེན ཏཾ ནེམི མགྒེན, རཱཛསེཊྛ དིསམྤཏི;
ཡེན ཝཱ པཱཔཀམྨནྟཱ, པུཉྙཀམྨཱ ཙ ཡེ ནརཱ’’ཏི.
ཏཏྠ པམུཁོཏི ཨུཏྟམོ, ཨབྷིམུཁོ ཝཱ, མཧཱཛནསྶ པིཊྛིཾ དཏྭཱ ཨཱརཱུལ༹ྷོཏི ཨཏྠོ. ཡེན ཝཱཏི ཡེན མགྒེན གནྟྭཱ ཡཏྠ པཱཔཀམྨནྟཱ ཝསནྟི, ཏཾ ཋཱནཾ སཀྐཱ དཊྛུཾ, ཡེན ཝཱ གནྟྭཱ ཡེ པུཉྙཀམྨཱ ནརཱ ཝསནྟི, ཏེསཾ ཋཱནཾ སཀྐཱ དཊྛུཾ, ཨེཏེསུ དྭཱིསུ ཀེན མགྒེན ཏཾ ནེམི. ཨིདཾ སོ སཀྐེན ཨནཱཎཏྟོཔི ཨཏྟནོ དཱུཏཝིསེསདསྶནཏྠཾ ཨཱཧ.
ཨཐ ནཾ རཱཛཱ ‘‘མཡཱ དྭེ ཋཱནཱནི ཨདིཊྛཔུབྦཱནི, དྭེཔི པསྶིསྶཱམཱི’’ཏི ཙིནྟེཏྭཱ ཨཱཧ –
‘‘ཨུབྷཡེནེཝ མཾ ནེཧི, མཱཏལི དེཝསཱརཐི;
ཡེན ཝཱ པཱཔཀམྨནྟཱ, པུཉྙཀམྨཱ ཙ ཡེ ནརཱ’’ཏི.
ཏཏོ ¶ མཱཏལི ‘‘དྭེཔི ཨེཀཔཧཱརེནེཝ ན སཀྐཱ དསྶེཏུཾ, པུཙྪིསྶཱམི ན’’ནྟི པུཙྪནྟོ པུན གཱཐམཱཧ –
‘‘ཀེན ཏཾ པཋམཾ ནེམི, རཱཛསེཊྛ དིསམྤཏི;
ཡེན ཝཱ པཱཔཀམྨནྟཱ, པུཉྙཀམྨཱ ཙ ཡེ ནརཱ’’ཏི.
ནིརཡཀཎྜཾ
ཏཏོ ¶ རཱཛཱ ‘‘ཨཧཾ ཨཝསྶཾ དེཝལོཀཾ གམིསྶཱམི, ནིརཡཾ ཏཱཝ པསྶིསྶཱམཱི’’ཏི ཙིནྟེཏྭཱ ཨནནྟརཾ གཱཐམཱཧ –
‘‘ནིརཡེ ཏཱཝ པསྶཱམི, ཨཱཝཱསེ པཱཔཀམྨིནཾ;
ཋཱནཱནི ལུདྡཀམྨཱནཾ, དུསྶཱིལཱནཉྩ ཡཱ གཏཱི’’ཏི.
ཏཏྠ ¶ ཡཱ གཏཱིཏི ཡཱ ཨེཏེསཾ ནིབྦཏྟི, ཏཉྩ པསྶཱམཱིཏི.
ཨཐསྶ ཝེཏརཎིཾ ནདིཾ ཏཱཝ དསྶེསི. ཏམཏྠཾ པཀཱསེནྟོ སཏྠཱ ཨཱཧ –
‘‘དསྶེསི མཱཏལི རཉྙོ, དུགྒཾ ཝེཏརཎིཾ ནདིཾ;
ཀུཐིཏཾ ཁཱརསཾཡུཏྟཾ, ཏཏྟཾ ཨགྒིསིཁཱུཔམ’’ནྟི.
ཏཏྠ ཝེཏརཎིནྟི བྷིཀྑཝེ, མཱཏལི རཉྙོ ཀཐཾ སུཏྭཱ ནིརཡཱབྷིམུཁཾ རཐཾ པེསེཏྭཱ ཀམྨཔཙྩཡེ ཨུཏུནཱ སམུཊྛིཏཾ ཝེཏརཎིཾ ནདིཾ ཏཱཝ དསྶེསི. ཏཏྠ ནིརཡཔཱལཱ ཛལིཏཱནི ཨསིསཏྟིཏོམརབྷིནྡིཝཱལམུགྒརཱདཱིནི ཨཱཝུདྷཱནི གཧེཏྭཱ ནེརཡིཀསཏྟེ པཧརནྟི ཝིཛ྄ཛྷནྟི ཝིཧེཋེནྟི. ཏེ ཏཾ དུཀྑཾ ཨསཧནྟཱ ཝེཏརཎིཡཾ པཏནྟི. སཱ ཨུཔརི བྷིནྡིཝཱལཔྤམཱཎཱཧི སཀཎྚཀཱཧི ཝེཏྟལཏཱཧི སཉྪནྣཱ. ཏེ ཏཏྠ བཧཱུནི ཝསྶསཧསྶཱནི པཙྩིཾསུ. ཏེསུ པཛྫལནྟེསུ ཁུརདྷཱརཱཏིཁིཎེསུ ཀཎྚཀེསུ ཁཎྜཱཁཎྜིཀཱ ཧོནྟི. ཏེསཾ ཧེཊྛཱ ཏཱལཀྑནྡྷཔྤམཱཎཱནི པཛྫལིཏཨཡསཱུལཱནི ཨུཊྛཧནྟི. ནེརཡིཀསཏྟཱ བཧུཾ ཨདྡྷཱནཾ ཝཱིཏིནཱམེཏྭཱ ཝེཏྟལཏཱཧི གལི༹ཏྭཱ སཱུལེསུ པཏིཏྭཱ ཝིདྡྷསརཱིརཱ སཱུལེསུ ཨཱཝུཎིཏམཙྪཱ ཝིཡ ཙིརཾ པཙྩནྟི. ཏཱནི སཱུལཱནིཔི པཛྫལནྟི, ནེརཡིཀསཏྟཱཔི པཛྫལནྟི. སཱུལཱནཾ ཧེཊྛཱ ཨུདཀཔིཊྛེ ཛལིཏཱནི ཁུརདྷཱརཱསདིསཱནི ¶ ཏིཁིཎཱནི ཨཡོཔོཀྑརཔཏྟཱནི ཧོནྟི. ཏེ སཱུལེཧི གལི༹ཏྭཱ ཨཡཔོཀྑརཔཏྟེསུ པཏིཏྭཱ ཙིརཾ དུཀྑཝེདནཾ ཨནུབྷཝནྟི. ཏཏོ ཁཱརོདཀེ པཏནྟི, ཨུདཀཾ པཛྫལཏི, ནེརཡིཀསཏྟཱཔི པཛྫལནྟི, དྷཱུམོཔི ཨུཊྛཧཏི. ཨུདཀསྶ པན ཧེཊྛཱ ནདཱིཏལཾ ཁུརདྷཱརཱཧི སཉྪནྣཾ. ཏེ ‘‘ཧེཊྛཱ ནུ ཁོ ཀཱིདིས’’ནྟི ཨུདཀེ ནིམུཛྫིཏྭཱ ཁུརདྷཱརཱསུ ཁཎྜཱཁཎྜིཀཱ ཧོནྟི. ཏེ ཏཾ མཧཱདུཀྑཾ ཨདྷིཝཱསེཏུཾ ཨསཀྐོནྟཱ མཧནྟཾ བྷེརཝཾ ཝིརཝནྟཱ ཝིཙརནྟི. ཀདཱཙི ཨནུསོཏཾ ཝུཡ྄ཧནྟི, ཀདཱཙི པཊིསོཏཾ. ཨཐ ནེ ཏཱིརེ ཋིཏཱ ནིརཡཔཱལཱ ཨུསུསཏྟིཏོམརཱདཱིནི ཨུཀྑིཔིཏྭཱ མཙྪེ ཝིཡ ཝིཛ྄ཛྷནྟི. ཏེ དུཀྑཝེདནཱཔྤཏྟཱ མཧཱཝིརཝཾ རཝནྟི. ཨཐ ནེ པཛྫལིཏེཧི ཨཡབལི༹སེཧི ཨུདྡྷརིཏྭཱ པརིཀཌྜྷིཏྭཱ པཛྫལིཏཨཡཔཐཝིཡཾ ནིཔཛྫཱཔེཏྭཱ ཏེསཾ མུཁེ ཏཏྟཾ ཨཡོགུལ༹ྷཾ པཀྑིཔནྟི.
ཨིཏི ནིམིརཱཛཱ ཝེཏརཎིཡཾ མཧཱདུཀྑཔཱིལི༹ཏེ ནེརཡིཀསཏྟེ དིསྭཱ བྷཱིཏཏསིཏོ སངྐམྤིཏཧདཡོ ཧུཏྭཱ ‘‘ཀིཾ ནཱམེཏེ སཏྟཱ པཱཔཀམྨཾ ¶ ཨཀཾསཱུ’’ཏི མཱཏལིཾ པུཙྪི. སོཔིསྶ བྱཱཀཱསི. ཏམཏྠཾ པཀཱསེནྟོ ཨཱཧ –
‘‘ནིམཱི ཧཝེ མཱཏལིམཛ྄ཛྷབྷཱསཐ, དིསྭཱ ཛནཾ པཏམཱནཾ ཝིདུགྒེ;
བྷཡཉྷི ¶ མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམེ ནུ མཙྩཱ ཀིམཀཾསུ པཱཔཾ, ཡེམེ ཛནཱ ཝེཏརཎིཾ པཏནྟི.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པཱཔཀམྨཱནཾ, ཛཱནཾ ཨཀྑཱསིཛཱནཏོ.
‘‘ཡེ དུབྦལེ བལཝནྟཱ ཛཱིཝལོཀེ, ཧིཾ སནྟི རོསེནྟི སུཔཱཔདྷམྨཱ;
ཏེ ལུདྡཀམྨཱ པསཝེཏྭ པཱཔཾ, ཏེམེ ཛནཱ ཝེཏརཎིཾ པཏནྟཱི’’ཏི.
ཏཏྠ ཝིནྡཏཱིཏི ཨཧཾ ཨཏྟནོ ཨནིསྶརོ ཧུཏྭཱ བྷཡསནྟཀོ ཝིཡ ཛཱཏོ. དིསྭཱཏི པཏམཱནཾ དིསྭཱ. ཛཱནནྟི བྷིཀྑཝེ, སོ མཱཏལི སཡཾ ཛཱནནྟོ ཏསྶ ཨཛཱནཏོ ཨཀྑཱསི. དུབྦལེཏི སརཱིརབལབྷོགབལཨཱཎཱབལཝིརཧིཏེ. བལཝནྟཱཏི ཏེཧི བལེཧི སམནྣཱགཏཱ. ཧིཾསནྟཱིཏི པཱཎིཔྤཧཱརཱདཱིཧི ཀིལམེནྟི. རོསེནྟཱིཏི ནཱནཔྤཀཱརེཧི ཨཀྐོསཝཏྠཱུཧི ཨཀྐོསནྟི གྷཊེནྟི. པསཝེཏྭཱཏི ཛནེཏྭཱ, ཀཏྭཱཏི ཨཏྠོ.
ཨེཝཾ ¶ མཱཏལི ཏསྶ པཉྷཾ བྱཱཀརིཏྭཱ རཉྙཱ ཝེཏརཎིནིརཡེ དིཊྛེ ཏཾ པདེསཾ ཨནྟརདྷཱཔེཏྭཱ པུརཏོ རཐཾ པེསེཏྭཱ སུནཁཱདཱིཧི ཁཱདནཊྛཱནཾ དསྶེཏྭཱ ཏཾ དིསྭཱ བྷཱིཏེན རཉྙཱ པཉྷཾ པུཊྛོ བྱཱཀཱསི. ཏམཏྠཾ པཀཱསེནྟོ སཏྠཱ ཨཱཧ –
‘‘སཱམཱ ¶ ཙ སོཎཱ སབལཱ ཙ གིཛ྄ཛྷཱ, ཀཱཀོལསངྒྷཱ ཨདནྟི བྷེརཝཱ;
བྷཡཉྷི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམེ ནུ མཙྩཱ ཀིཾམཀཾསུ པཱཔཾ, ཡེམེ ཛནེ ཀཱཀོལསངྒྷཱ ཨདནྟི.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པཱཔཀམྨཱནཾ, ཛཱནཾ ཨཀྑཱསིཛཱནཏོ.
‘‘ཡེ ཀེཙིམེ མཙྪརིནོ ཀདརིཡཱ, པརིབྷཱསཀཱ སམཎབྲཱཧྨཎཱནཾ;
ཧིཾ སནྟི རོསེནྟི སུཔཱཔདྷམྨཱ, ཏེ ལུདྡཀམྨཱ པསཝེཏྭ པཱཔཾ;
ཏེམེ ཛནེ ཀཱཀོལསངྒྷཱ ཨདནྟཱི’’ཏི.
ཨིཏོ ¶ པརེསུ པཉྷེསུ ཙེཝ བྱཱཀརཎེསུ ཙ ཨེསེཝ ནཡོ. ཏཏྠ སཱམཱཏི རཏྟཝཎྞཱ. སོཎཱཏི སུནཁཱ. སབལཱ ཙཱཏི ཀབརཝཎྞཱ ཙ, སེཏཀཱལ༹པཱིཏལོཧིཏཝཎྞཱ ཙཱཏི ཨེཝཾ པཉྩཝཎྞསུནཁེ དསྶེཏི. ཏེ ཀིར མཧཱཧཏྠིཔྤམཱཎཱ ཛལིཏཨཡཔཐཝིཡཾ ནེརཡིཀསཏྟེ མིགེ ཝིཡ ཨནུབནྡྷིཏྭཱ པིཎྜིཀམཾསེསུ ཌཾསིཏྭཱ ཏེསཾ ཏིགཱཝུཏཔྤམཱཎཾ སརཱིརཾ ཛལིཏཨཡཔཐཝིཡཾ པཱཏེཏྭཱ མཧཱརཝཾ རཝནྟཱནཾ དྭཱིཧི པུརིམཔཱདེཧི ཨུརཾ ཨཀྐམིཏྭཱ ཨཊྛིམེཝ སེསེཏྭཱ མཾསཾ ལུཉྩིཏྭཱ ཁཱདནྟི. གིཛ྄ཛྷཱཏི མཧཱབྷཎྜསཀཊཔྤམཱཎཱ ལོཧཏུཎྜཱ གིཛ྄ཛྷཱ. ཨེཏེ ཏེསཾ ཀཎཡསདིསེཧི ཏུཎྜེཧི ཨཊྛཱིནི བྷིནྡིཏྭཱ ཨཊྛིམིཉྫཾ ཁཱདནྟི. ཀཱཀོལསངྒྷཱཏི ལོཧཏུཎྜཀཱཀགཎཱ. ཏེ ཨཏིཝིཡ བྷཡཱནཀཱ དིཊྛེ དིཊྛེ ཁཱདནྟི. ཡེམེ ཛནེཏི ཡེ ཨིམེ ནེརཡིཀསཏྟེ ཀཱཀོལསངྒྷཱ ཁཱདནྟི, ཨིམེ ནུ མཙྩཱ ཀིཾ ནཱམ པཱཔཾ ཨཀཾསཱུཏི པུཙྪི. མཙྪརིནོཏི ཨཉྙེསཾ ཨདཱཡཀཱ. ཀདརིཡཱཏི པརེ དེནྟེཔི པཊིསེདྷཀཱ ཐདྡྷམཙྪརིནོ. སམཎབྲཱཧྨཎཱནནྟི སམིཏབཱཧིཏཔཱཔཱནཾ.
‘‘སཛོཏིབྷཱུཏཱ ¶ པཐཝིཾ ཀམནྟི, ཏཏྟེཧི ཁནྡྷེཧི ཙ པོཐཡནྟི;
བྷཡཉྷི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམེ ནུ མཙྩཱ ཀིམཀཾསུ པཱཔཾ, ཡེམེ ཛནཱ ཁནྡྷཧཏཱ སཡནྟི.
‘‘ཏསྶ ¶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པཱཔཀམྨཱནཾ, ཛཱནཾ ཨཀྑཱསིཛཱནཏོ.
‘‘ཡེ ཛཱིཝལོཀསྨི སུཔཱཔདྷམྨིནོ, ནརཉྩ ནཱརིཉྩ ཨཔཱཔདྷམྨཾ;
ཧིཾ སནྟི རོསེནྟི སུཔཱཔདྷམྨཱ, ཏེ ལུདྡཀམྨཱ པསཝེཏྭ པཱཔཾ;
ཏེམེ ཛནཱ ཁནྡྷཧཏཱ སཡནྟཱི’’ཏི.
ཏཏྠ སཛོཏིབྷཱུཏཱཏི པཛྫལིཏསརཱིརཱ. པཐཝིནྟི པཛྫལིཏཾ ནཝཡོཛནབཧལཾ ཨཡཔཐཝིཾ. ཀམནྟཱིཏི ཨཀྐམནྟི. ཁནྡྷེཧི ཙ པོཐཡནྟཱིཏི ནིརཡཔཱལཱ ཨནུབནྡྷིཏྭཱ ཏཱལཔྤམཱཎེཧི ཛལིཏཨཡཀྑནྡྷེཧི ཛངྒྷཱདཱིསུ པཧརིཏྭཱ པཱཏེཏྭཱ ཏེཧེཝ ཁནྡྷེཧི པོཐཡནྟི, ཙུཎྞཝིཙུཎྞཾ ཀརོནྟི. སུཔཱཔདྷམྨིནོཏི ཨཏྟནཱ སུཊྛུ པཱཔདྷམྨཱ ཧུཏྭཱ. ཨཔཱཔདྷམྨནྟི སཱིལཱཙཱརཱདིསམྤནྣཾ, ནིརཔརཱདྷཾ ཝཱ.
‘‘ཨངྒཱརཀཱསུཾ ཨཔརེ ཕུཎནྟི, ནརཱ རུདནྟཱ པརིདཌྜྷགཏྟཱ;
བྷཡཉྷི ¶ མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམེ ནུ མཙྩཱ ཀིཾ མཀཾསུ པཱཔཾ, ཡེམེ ཛནཱ ཨངྒཱརཀཱསུཾ ཕུཎནྟི.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པཱཔཀམྨཱནཾ, ཛཱནཾ ཨཀྑཱསིཛཱནཏོ.
‘‘ཡེ ཀེཙི ¶ པཱུགཱཡ དྷནསྶ ཧེཏུ, སཀྑིཾ ཀརིཏྭཱ ཨིཎཾ ཛཱཔཡནྟི;
ཏེ ཛཱཔཡིཏྭཱ ཛནཏཾ ཛནིནྡ, ཏེ ལུདྡཀམྨཱ པསཝེཏྭ པཱཔཾ;
ཏེམེ ཛནཱ ཨངྒཱརཀཱསུཾ ཕུཎནྟཱི’’ཏི.
ཏཏྠ ཨངྒཱརཀཱསུནྟི སམྨ མཱཏལི, ཀེ ནཱམེཏེ ཨཔརེ ཝཛཾ ཨཔཝིསནྟིཡོ གཱཝོ ཝིཡ སམྤརིཝཱརེཏྭཱ ནིརཡཔཱལེཧི ཛལིཏཨཡགུལེ༹ཧི པོཐིཡམཱནཱ ཨངྒཱརཀཱསུཾ པཏནྟི. ཏཏྲ ཙ ནེསཾ ཡཱཝ ཀཊིཔྤམཱཎཱ ནིམུགྒཱནཾ མཧཏཱིཧི ཨཡཔཙྪཱིཧི ཨཱདཱཡ ཨུཔརིཨངྒཱརེ ཨོཀིརནྟི, ཨཐ ནེ ཨངྒཱརེ སམྤཊིཙྪིཏུཾ ཨསཀྐོནྟཱ རོདནྟཱ དཌྜྷགཏྟཱ ཕུཎནྟི ཝིདྷུནནྟི, ཀམྨབལེན ཝཱ ཨཏྟནོ སཱིསེ ཨངྒཱརེ ཕུཎནྟི ཨོཀིརནྟཱིཏི ཨཏྠོ. པཱུགཱཡ དྷནསྶཱཏི ཨོཀཱསེ སཏི དཱནཾ ཝཱ དསྶཱམ, པཱུཛཾ ཝཱ པཝཏྟེསྶཱམ, ཝིཧཱརཾ ཝཱ ཀརིསྶཱམཱཏི སཾཀཌྜྷིཏྭཱ ཋཔིཏསྶ པཱུགསནྟཀསྶ ¶ དྷནསྶ ཧེཏུ. ཛཱཔཡནྟཱིཏི ཏཾ དྷནཾ ཡཐཱརུཙི ཁཱདིཏྭཱ གཎཛེཊྛཀཱནཾ ལཉྫཾ དཏྭཱ ‘‘ཨསུཀཊྛཱནེ ཨེཏྟཀཾ ཝཡཀརཎཾ གཏཾ, ཨསུཀཊྛཱནེ ཨམྷེཧི ཨེཏྟཀཾ དིནྣ’’ནྟི ཀཱུཊསཀྑིཾ ཀརིཏྭཱ ཏཾ ཨིཎཾ ཛཱཔཡནྟི ཝིནཱསེནྟི.
‘‘སཛོཏིབྷཱུཏཱ ཛལིཏཱ པདིཏྟཱ, པདིསྶཏི མཧཏཱི ལོཧཀུམྦྷཱི;
བྷཡཉྷི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམེ ནུ མཙྩཱ ཀིམཀཾསུ པཱཔཾ, ཡེམེ ཛནཱ ཨཝཾསིརཱ ལོཧཀུམྦྷིཾ པཏནྟི.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པཱཔཀམྨཱནཾ, ཛཱནཾ ཨཀྑཱསིཛཱནཏོ.
‘‘ཡེ སཱིལཝནྟཾ སམཎཾ བྲཱཧྨཎཾ ཝཱ, ཧིཾསནྟི རོསེནྟི སུཔཱཔདྷམྨཱ;
ཏེ ལུདྡཀམྨཱ པསཝེཏྭ པཱཔཾ, ཏེམེ ཛནཱ ཨཝཾསིརཱ ལོཧཀུམྦྷིཾ པཏནྟཱི’’ཏི.
ཏཏྠ ¶ ¶ པདིཏྟཱཏིཨཱདིཏྟཱ. མཧཏཱིཏི པབྦཏཔྤམཱཎཱ ཀཔྤེན སཎྛིཏལོཧརསེན སམྤུཎྞཱ. ཨཝཾསིརཱཏི བྷཡཱནཀེཧི ནིརཡཔཱལེཧི ཨུདྡྷཾཔཱདེ ཨདྷོསིརེ ཀཏྭཱ ཁིཔིཡམཱནཱ ཏཾ ལོཧཀུམྦྷིཾ པཏནྟི. སཱིལཝནྟནྟི སཱིལཨཱཙཱརགུཎསམྤནྣཾ.
‘‘ལུཉྩནྟི གཱིཝཾ ཨཐ ཝེཋཡིཏྭཱ, ཨུཎྷོདཀསྨིཾ པཀིལེདཡིཏྭཱ;
བྷཡཉྷི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམེ ནུ མཙྩཱ ཀིམཀཾསུ པཱཔཾ, ཡེམེ ཛནཱ ལུཏྟསིརཱ སཡནྟི.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པཱཔཀམྨཱནཾ, ཛཱནཾ ཨཀྑཱསིཛཱནཏོ.
‘‘ཡེ ཛཱིཝལོཀསྨི སུཔཱཔདྷམྨིནོ, པཀྑཱི གཧེཏྭཱན ཝིཧེཋཡནྟི ཏེ;
ཝིཧེཋཡིཏྭཱ སཀུཎཾ ཛནིནྡ, ཏེ ལུདྡཀམྨཱ པསཝེཏྭ པཱཔཾ;
ཏེམེ ཛནཱ ལུཏྟསིརཱ སཡ’’ནྟི.
ཏཏྠ ལུཉྩནྟཱིཏི ཨུཔྤཱཊེནྟི. ཨཐ ཝེཋཡིཏྭཱཏི ཛལིཏལོཧཡོཏྟེཧི ཨདྷོམུཁཾ ཝེཋཡིཏྭཱ. ཨུཎྷོདཀསྨིནྟི ¶ ཀཔྤེན སཎྛིཏལོཧཨུདཀསྨིཾ. པཀིལེདཡིཏྭཱཏི ཏེམེཏྭཱ ཁིཔིཏྭཱ. ཨིདཾ ཝུཏྟཾ ཧོཏི – སམྨ མཱཏལི, ཡེསཾ ཨིམེ ནིརཡཔཱལཱ ཛལིཏལོཧཡོཏྟེཧི གཱིཝཾ ཝེཋེཏྭཱ ཏིགཱཝུཏཔྤམཱཎཾ སརཱིརཾ ཨོནཱམེཏྭཱ ཏཾ གཱིཝཾ སམྤརིཝཏྟཀཾ ལུཉྩིཏྭཱ ཛལིཏཨཡདཎྜེཧི ཨཱདཱཡ ཨེཀསྨིཾ ཛལིཏལོཧརསེ པཀྑིཔིཏྭཱ ཏུཊྛཧཊྛཱ ཧོནྟི, ཏཱཡ ཙ གཱིཝཱཡ ལུཉྩིཏཱཡ པུན སཱིསེན སདྡྷིཾ གཱིཝཱ ཨུཔྤཛྫཏིཡེཝ. ཀིཾ ནཱམེཏེ ཀམྨཾ ཀརིཾསུ? ཨེཏེ ཧི མེ དིསྭཱ བྷཡཾ ཨུཔྤཛྫཏཱིཏི. པཀྑཱི གཧེཏྭཱན ཝིཧེཋཡནྟཱིཏི མཧཱརཱཛ, ཡེ ཛཱིཝལོཀསྨིཾ སཀུཎེ གཧེཏྭཱ པཀྑེ ལུཉྩིཏྭཱ གཱིཝཾ ཝེཋེཏྭཱ ཛཱིཝིཏཀྑཡཾ པཱཔེཏྭཱ ཁཱདནྟི ཝཱ ཝིཀྐིཎནྟི ཝཱ, ཏེ ཨིམེ ལུཏྟསིརཱ སཡནྟཱིཏི.
‘‘པཧཱུཏཏོཡཱ ¶ ཨནིགཱདྷཀཱུལཱ, ནདཱི ཨཡཾ སནྡཏི སུཔྤཏིཏྠཱ;
གྷམྨཱབྷིཏཏྟཱ མནུཛཱ པིཝནྟི, པཱིཏཉྩ ཏེསཾ བྷུས ཧོཏི པཱནི.
‘‘བྷཡཉྷི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམེ ནུ མཙྩཱ ཀིམཀཾསུ པཱཔཾ, པཱིཏཉྩ ཏེསཾ བྷུས ཧོཏི པཱནི.
‘‘ཏསྶ ¶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པཱཔཀམྨཱནཾ, ཛཱནཾ ཨཀྑཱསིཛཱནཏོ.
‘‘ཡེ སུདྡྷདྷཉྙཾ པལཱསེན མིསྶཾ, ཨསུདྡྷཀམྨཱ ཀཡིནོ དདནྟི;
གྷམྨཱབྷིཏཏྟཱན པིཔཱསིཏཱནཾ, པཱིཏཉྩ ཏེསཾ བྷུས ཧོཏི པཱནཱི’’ཏི.
ཏཏྠ ཨནིགཱདྷཀཱུལཱཏི ཨགམྦྷཱིརཏཱིརཱ. སུཔྤཏིཏྠཱཏི སོབྷནེཧི ཏིཏྠེཧི ཨུཔེཏཱ. བྷུས ཧོཏཱིཏི ཝཱིཧིབྷུསཾ སམྤཛྫཏི. པཱནཱིཏི པཱནཱིཡཾ. ཏསྨིཾ ཀིར པདེསེ པཧཱུཏསལིལཱ རམཎཱིཡཱ ནདཱི སནྡཏི, ནེརཡིཀསཏྟཱ ཨགྒིསནྟཱཔེན ཏཏྟཱ པིཔཱསཾ སནྡྷཱརེཏུཾ ཨསཀྐོནྟཱ བཱཧཱ པགྒཡ྄ཧ ཛལིཏལོཧཔཐཝིཾ མདྡནྟཱ ཏཾ ནདིཾ ཨོཏརནྟི, ཏངྑཎཉྙེཝ ཏཱིརཱ པཛྫལནྟི, པཱནཱིཡཾ བྷུསཔལཱསབྷཱཝཾ ཨཱཔཛྫིཏྭཱ པཛྫལཏི. ཏེ པིཔཱསཾ སནྡྷཱརེཏུཾ ཨསཀྐོནྟཱ ཏཾ ཛལིཏཾ བྷུསཔལཱསཾ ཁཱདནྟི. ཏཾ ཏེསཾ སཀལསརཱིརཾ ཛྷཱཔེཏྭཱ ཨདྷོབྷཱགེན ནིཀྑམཏི. ཏེ ཏཾ དུཀྑཾ ཨདྷིཝཱསེཏུཾ ཨསཀྐོནྟཱ བཱཧཱ པགྒཡ྄ཧ ཀནྡནྟི. སུདྡྷདྷཉྙནྟི ཝཱིཧིཨཱདིསཏྟཝིདྷཾ པརིསུདྡྷདྷཉྙཾ. པལཱསེན མིསྶནྟི པལཱསེན ཝཱ བྷུསེན ཝཱ ཝཱལུཀཱམཏྟིཀཱདཱིཧི ཝཱ མིསྶཀཾ ཀཏྭཱ ¶ . ཨསུདྡྷཀམྨཱཏི ཀིལིཊྛཀཱཡཝཙཱིམནོཀམྨཱ. ཀཡིནོཏི ‘‘སུདྡྷདྷཉྙཾ དསྶཱམཱི’’ཏི ཀཡིཀསྶ ཧཏྠཏོ མཱུལཾ གཧེཏྭཱ ཏཐཱརཱུཔཾ ཨསུདྡྷདྷཉྙཾ དདནྟི.
‘‘ཨུསཱུཧི ¶ སཏྟཱིཧི ཙ ཏོམརེཧི, དུབྷཡཱནི པསྶཱནི ཏུདནྟི ཀནྡཏཾ;
བྷཡཉྷི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམེ ནུ མཙྩཱ ཀིམཀཾསུ པཱཔཾ, ཡེམེ ཛནཱ སཏྟིཧཏཱ སཡནྟི.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པཱཔཀམྨཱནཾ, ཛཱནཾ ཨཀྑཱསིཛཱནཏོ.
‘‘ཡེ ཛཱིཝལོཀསྨིཾ ཨསཱདྷུཀམྨིནོ, ཨདིནྣམཱདཱཡ ཀརོནྟི ཛཱིཝིཀཾ;
དྷཉྙཾ དྷནཾ རཛཏཾ ཛཱཏརཱུཔཾ, ཨཛེལ༹ཀཉྩཱཔི པསུཾ མཧིཾསཾ;
ཏེ ལུདྡཀམྨཱ པསཝེཏྭ པཱཔཾ, ཏེམེ ཛནཱ སཏྟིཧཏཱ སཡནྟཱི’’ཏི.
ཏཏྠ དུབྷཡཱནཱིཏི ཨུབྷཡཱནི. ཏུདནྟཱིཏི ཝིཛ྄ཛྷནྟི. ཀནྡཏནྟི ཀནྡནྟཱནཾ. ཕརུསཱ ནིརཡཔཱལཱ ཨརཉྙེ ལུདྡཱ མིགཾ ཝིཡ སམྤརིཝཱརེཏྭཱ ཨུསུཨཱདཱིཧི ནཱནཱཝུདྷེཧི ¶ དྭེ པསྶཱནི ཏུདནྟི, སརཱིརཾ ཚིདྡཱཝཚིདྡཾ པུརཱཎཔཎྞཾ ཝིཡ ཁཱཡཏི. ཨདིནྣམཱདཱཡཱཏིཔརསནྟཀཾ སཝིཉྙཱཎཀཱཝིཉྙཱཎཀཾ སནྡྷིཙྪེདཱདཱིཧི ཙེཝ ཝཉྩནཱཡ ཙ གཧེཏྭཱ ཛཱིཝིཀཾ ཀཔྤེནྟི.
‘‘གཱིཝཱཡ བདྡྷཱ ཀིསྶ ཨིམེ པུནེཀེ, ཨཉྙེ ཝིཀནྟཱ བིལཀཏཱ སཡནྟི;
བྷཡཉྷི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམེ ནུ མཙྩཱ ཀིམཀཾསུ པཱཔཾ, ཡེམེ ཛནཱ བིལཀཏཱ སཡནྟི.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པཱཔཀམྨཱནཾ, ཛཱནཾ ཨཀྑཱསིཛཱནཏོ.
‘‘ཨོརབྦྷིཀཱ ¶ སཱུཀརིཀཱ ཙ མཙྪིཀཱ, པསུཾ མཧིཾསཉྩ ཨཛེལ༹ཀཉྩ;
ཧནྟྭཱན སཱུནེསུ པསཱརཡིཾསུ, ཏེ ལུདྡཀམྨཱ པསཝེཏྭ པཱཔཾ;
ཏེམེ ཛནཱ བིལཀཏཱ སཡནྟཱི’’ཏི.
ཏཏྠ ¶ གཱིཝཱཡ བདྡྷཱཏི མཧནྟེཧི ཛལིཏལོཧཡོཏྟེཧི གཱིཝཱཡ བནྡྷིཏྭཱ ཨཱཀཌྜྷིཏྭཱ ཨཡཔཐཝིཡཾ པཱཏེཏྭཱ ནཱནཱཝུདྷེཧི ཀོཊྚིཡམཱནེ དིསྭཱ པུཙྪི. ཨཉྙེ ཝིཀནྟཱཏི ཨཉྙེ པན ཁཎྜཱཁཎྜིཀཾ ཚིནྣཱ. བིལཀཏཱཏི ཛལིཏེསུ ཨཡཕལཀེསུ ཋཔེཏྭཱ མཾསཾ ཝིཡ པོཏྠནིཡཱ ཀོཊྚེཏྭཱ པུཉྫཀཏཱ ཧུཏྭཱ སཡནྟི. མཙྪིཀཱཏི མཙྪགྷཱཏཀཱ. པསུནྟི གཱཝིཾ. སཱུནེསུ པསཱརཡིཾསཱུཏི མཾསཾ ཝིཀྐིཎིཏྭཱ ཛཱིཝིཀཀཔྤནཏྠཾ སཱུནཱཔཎེསུ ཋཔེསུཾ.
‘‘རཧདོ ཨཡཾ མུཏྟཀརཱིསཔཱུརོ, དུགྒནྡྷརཱུཔོ ཨསུཙི པཱུཏི ཝཱཏི;
ཁུདཱཔརེཏཱ མནུཛཱ ཨདནྟི, བྷཡཉྷི མཾ ཝིནྡཏི སཱུཏ དིསྭཱ;
པུཙྪཱམི ཏཾ མཱཏལི དེཝསཱརཐི, ཨིམེ ནུ མཙྩཱ ཀིམཀཾསུ པཱཔཾ;
ཡེམེ ཛནཱ མུཏྟཀརཱིསབྷཀྑཱ.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པཱཔཀམྨཱནཾ, ཛཱནཾ ཨཀྑཱསི ཛཱནཏོ.
‘‘ཡེ ཀེཙིམེ ཀཱརཎིཀཱ ཝིརོསཀཱ, པརེསཾ ཧིཾསཱཡ སདཱ ནིཝིཊྛཱ;
ཏེ ¶ ལུདྡཀམྨཱ པསཝེཏྭ པཱཔཾ, མིཏྟདྡུནོ མཱིལ༹ྷམདནྟི བཱལཱ’’ཏི;
ཏཏྠ ཁུདཱཔརེཏཱ མནུཛཱ ཨདནྟཱིཏི ཨེཏེ ནེརཡིཀཱ སཏྟཱ ཚཱཏཀེན ཕུཊྛཱ ཁུདཾ སཧིཏུཾ ཨསཀྐོནྟཱ པཀྐུཐིཏཾ དྷཱུམཱཡནྟཾ པཛྫལནྟཾ ཀཔྤེན སཎྛིཏཾ པུརཱཎམཱིལ༹ྷཾ པིཎྜཾ པིཎྜཾ ཀཏྭཱ ཨདནྟི ཁཱདནྟི. ཀཱརཎིཀཱཏི ¶ ཀཱརཎཀཱརཀཱ. ཝིརོསཀཱཏི མིཏྟསུཧཛྫཱནམྤི ཝིཧེཋཀཱ. མིཏྟདྡུནོཏི ཡེ ཏེསཉྙེཝ གེཧེ ཁཱདིཏྭཱ བྷུཉྫིཏྭཱ པཉྙཏྟཱསནེ ནིསཱིདིཏྭཱ སཡིཏྭཱ པུན མཱསཀཧཱཔཎཾ ནཱམ ཨཱཧརཱཔེནྟི, ལཉྫཾ གཎྷནྟི, ཏེ མིཏྟདཱུསཀཱ བཱལཱ ཨེཝརཱུཔཾ མཱིལ༹ྷཾ ཁཱདནྟི, མཧཱརཱཛཱཏི.
‘‘རཧདོ ཨཡཾ ལོཧིཏཔུབྦཔཱུརོ, དུགྒནྡྷརཱུཔོ ཨསུཙི པཱུཏི ཝཱཏི;
གྷམྨཱབྷིཏཏྟཱ མནུཛཱ པིཝནྟི, བྷཡཉྷི མཾ ཝིནྡཏི སཱུཏ དིསྭཱ;
པུཙྪཱམི ཏཾ མཱཏལི དེཝསཱརཐི, ཨིམེ ནུ མཙྩཱ ཀིམཀཾསུ པཱཔཾ;
ཡེམེ ཛནཱ ལོཧིཏཔུབྦབྷཀྑཱ.
‘‘ཏསྶ ¶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པཱཔཀམྨཱནཾ, ཛཱནཾ ཨཀྑཱསིཛཱནཏོ.
‘‘ཡེ མཱཏརཾ ཝཱ པིཏརཾ ཝཱ ཛཱིཝལོཀེ, པཱརཱཛིཀཱ ཨརཧནྟེ ཧནནྟི;
ཏེ ལུདྡཀམྨཱ པསཝེཏྭ པཱཔཾ, ཏེམེ ཛནཱ ལོཧིཏཔུབྦབྷཀྑཱ’’ཏི.
ཏཏྠ གྷམྨཱབྷིཏཏྟཱཏི སནྟཱཔེན པཱིལི༹ཏཱ. པཱརཱཛིཀཱཏི པརཱཛིཏཱ ཛརཱཛིཎྞེ མཱཏཱཔིཏརོ གྷཱཏེཏྭཱ གིཧིབྷཱཝེཡེཝ པཱརཱཛིཀཾ པཏྟཱ. ཨརཧནྟེཏི པཱུཛཱཝིསེསསྶ ཨནུཙྪཝིཀེ. ཧནནྟཱིཏི དུཀྐརཀཱརཀེ མཱཏཱཔིཏརོ མཱརེནྟི. ཨཔིཙ ‘‘ཨརཧནྟེ’’ཏི པདེན བུདྡྷསཱཝཀེཔི སངྒཎྷཱཏི.
ཨཔརསྨིམྤི ཨུསྶདནིརཡེ ནིརཡཔཱལཱ ནེརཡིཀཱནཾ ཏཱལཔྤམཱཎེན ཛལིཏཨཡབལི༹སེན ཛིཝ྄ཧཾ ཝིཛ྄ཛྷིཏྭཱ ཨཱཀཌྜྷིཏྭཱ ཏེ སཏྟེ ཛལིཏཨཡཔཐཝིཡཾ པཱཏེཏྭཱ ཨུསབྷཙམྨཾ ཝིཡ པཏྠརིཏྭཱ སངྐུསཏེན ཧནནྟི. ཏེ ཐལེ ཁིཏྟམཙྪཱ ཝིཡ ཕནྡནྟི, ཏཉྩ དུཀྑཾ སཧིཏུཾ ཨསཀྐོནྟཱ རོདནྟཱ པརིདེཝནྟཱ མུཁེན ཁེལ༹ཾ མུཉྩནྟི. ཏསྨིཾ རཱཛཱ མཱཏལིནཱ དསྶིཏེ ཨཱཧ –
‘‘ཛིཝ྄ཧ ¶ ཙ པསྶ བལི༹སེན ཝིདྡྷཾ, ཝིཧཏཾ ཡཐཱ སངྐུསཏེན ཙམྨཾ;
ཕནྡནྟི ¶ མཙྪཱཝ ཐལམྷི ཁིཏྟཱ, མུཉྩནྟི ཁེལ༹ཾ རུདམཱནཱ ཀིམེཏེ.
‘‘བྷཡཉྷི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམེ ནུ མཙྩཱ ཀིམཀཾསུ པཱཔཾ, ཡེམེ ཛནཱ ཝངྐགྷསྟཱ སཡནྟཱི’’ཏི.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པཱཔཀམྨཱནཾ, ཛཱནཾ ཨཀྑཱསིཛཱནཏོ.
‘‘ཡེ ཀེཙི སནྡྷཱནགཏཱ མནུསྶཱ, ཨགྒྷེན ཨགྒྷཾ ཀཡཾ ཧཱཔཡནྟི;
ཀཱུཊེན ཀཱུཊཾ དྷནལོབྷཧེཏུ, ཚནྣཾ ཡཐཱ ཝཱརིཙརཾ ཝདྷཱཡ.
‘‘ན ཧི ཀཱུཊཀཱརིསྶ བྷཝནྟི ཏཱཎཱ, སཀེཧི ཀམྨེཧི པུརཀྑཏསྶ;
ཏེ ལུདྡཀམྨཱ པསཝེཏྭ པཱཔཾ, ཏེམེ ཛནཱ ཝངྐགྷསྟཱ སཡནྟཱི’’ཏི.
ཏཏྠ ¶ ཀིམེཏེཏི ཀིཾཀཱརཎཱ ཨེཏེ. ཝངྐགྷསྟཱཏི གིལིཏབལི༹སཱ. སནྡྷཱནགཏཱཏི སནྡྷཱནཾ མརིཡཱདཾ གཏཱ, ཨགྒྷཱཔནཀཊྛཱནེ ཋིཏཱཏི ཨཏྠོ. ཨགྒྷེན ཨགྒྷནྟི ཏཾ ཏཾ ཨགྒྷཾ ལཉྫཾ གཧེཏྭཱ ཧཏྠིཨསྶཱདཱིནཾ ཝཱ ཛཱཏརཱུཔརཛཏཱདཱིནཾ ཝཱ ཏེསཾ ཏེསཾ སཝིཉྙཱཎཀཱཝིཉྙཱཎཀཱནཾ ཨགྒྷཾ ཧཱཔེནྟི. ཀཡནྟི ཏཾ ཧཱཔེནྟཱ ཀཱཡིཀཱནཾ ཀཡཾ ཧཱཔེནྟི, སཏེ དཱཏབྦེ པཎྞཱསཾ དཱཔེནྟི, ཨིཏརཾ ཏེཧི སདྡྷིཾ ཝིབྷཛིཏྭཱ གཎྷནྟི. ཀཱུཊེན ཀཱུཊནྟི ཏུལཱཀཱུཊཱདཱིསུ ཏཾ ཏཾ ཀཱུཊཾ. དྷནལོབྷཧེཏཱུཏི དྷནལོབྷེན ཨེཏཾ ཀཱུཊཀམྨཾ ཀརོནྟི. ཚནྣཾ ཡཐཱ ཝཱརིཙརཾ ཝདྷཱཡཱཏི ཏཾ པན ཀམྨཾ ཀརོནྟཱཔི མདྷུརཝཱཙཱཡ ཏཐཱ ཀཏབྷཱཝཾ པཊིཙྪནྣཾ ཀཏྭཱ ཡཐཱ ¶ ཝཱརིཙརཾ མཙྪཾ ཝདྷཱཡ ཨུཔགཙྪནྟཱ བལི༹སཾ ཨཱམིསེན པཊིཙྪནྣཾ ཀཏྭཱ ཏཾ ཝདྷེནྟི, ཨེཝཾ པཊིཙྪནྣཾ ཀཏྭཱ ཏཾ ཀམྨཾ ཀརོནྟི. ན ཧི ཀཱུཊཀཱརིསྶཱཏི པཊིཙྪནྣཾ མམ ཀམྨཾ, ན ཏཾ ཀོཙི ཛཱནཱཏཱིཏི མཉྙམཱནསྶ ཧི ཀཱུཊཀཱརིསྶ ཏཱཎཱ ནཱམ ན ཧོནྟི. སོ ཏེཧི ཀམྨེཧི པུརཀྑཏོ པཏིཊྛཾ ན ལབྷཏི.
‘‘ནཱརཱི ཨིམཱ སམྤརིབྷིནྣགཏྟཱ, པགྒཡ྄ཧ ཀནྡནྟི བྷུཛེ དུཛཙྩཱ;
སམྨཀྑིཏཱ ལོཧིཏཔུབྦལིཏྟཱ, གཱཝོ ཡཐཱ ཨཱགྷཱཏནེ ཝིཀནྟཱ;
ཏཱ བྷཱུམིབྷཱགསྨིཾ སདཱ ནིཁཱཏཱ, ཁནྡྷཱཏིཝཏྟནྟི སཛོཏིབྷཱུཏཱ.
‘‘བྷཡཉྷི ¶ མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམཱ ནུ ནཱརིཡོ ཀིམཀཾསུ པཱཔཾ, ཡཱ བྷཱུམིབྷཱགསྨིཾ སདཱ ནིཁཱཏཱ;
ཁནྡྷཱཏིཝཏྟནྟི སཛོཏིབྷཱུཏཱ.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པཱཔཀམྨཱནཾ, ཛཱནཾ ཨཀྑཱསིཛཱནཏོ.
‘‘ཀོལིཏྠིཡཱཡོ ཨིདྷ ཛཱིཝལོཀེ, ཨསུདྡྷཀམྨཱ ཨསཏཾ ཨཙཱརུཾ;
ཏཱ དིཏྟརཱུཔཱ པཏི ཝིཔྤཧཱཡ, ཨཉྙཾ ཨཙཱརུཾ རཏིཁིཌྜཧེཏུ;
ཏཱ ཛཱིཝལོཀསྨིཾ རམཱཔཡིཏྭཱ, ཁནྡྷཱཏིཝཏྟནྟི སཛོཏིབྷཱུཏཱ’’ཏི.
ཏཏྠ ནཱརཱིཏི ཨིཏྠིཡོ. སམྤརིབྷིནྣགཏྟཱཏི སུཊྛུ སམནྟཏོ བྷིནྣསརཱིརཱ. དུཛཙྩཱཏི དུཛྫཱཏིཀཱ ཝིརཱུཔཱ ཛེགུཙྪཱ. ཨཱགྷཱཏནེཏི གཱཝགྷཱཏཊྛཱནེ. ཝིཀནྟཱཏི ཚིནྣསཱིསཱ གཱཝོ ཝིཡ པུབྦལོཧིཏལིཏྟཱ ཧུཏྭཱ ¶ . སདཱ ནིཁཱཏཱཏི ནིཙྩཾ ཛལིཏཨཡཔཐཝིཡཾ ཀཊིམཏྟཾ པཝེསེཏྭཱ ནིཁཎིཏྭཱ ¶ ཋཔིཏཱ ཝིཡ ཋིཏཱ. ཁནྡྷཱཏིཝཏྟནྟཱིཏི སམྨ མཱཏལི, ཏཱ ནཱརིཡོ ཨེཏེ པབྦཏཀྑནྡྷཱ ཨཏིཀྐམནྟི. ཏཱསཾ ཀིར ཨེཝཾ ཀཊིཔྤམཱཎཾ པཝིསིཏྭཱ ཋིཏཀཱལེ པུརཏྠིམཱཡ དིསཱཡ ཛལིཏཨཡཔབྦཏོ སམུཊྛཧིཏྭཱ ཨསནི ཝིཡ ཝིརཝནྟོ ཨཱགནྟྭཱ སརཱིརཾ སཎྷཀརཎཱི ཝིཡ པིསནྟོ གཙྪཏི. ཏསྨིཾ ཨཏིཝཏྟིཏྭཱ པཙྪིམཔསྶེ ཋིཏེ པུན ཙ ཏཱསཾ སརཱིརཾ པཱཏུ བྷཝཏི. ཏཱ དུཀྑཾ ཨདྷིཝཱསེཏུཾ ཨསཀྐོནྟིཡོ བཱཧཱ པགྒཡ྄ཧ ཀནྡནྟི. སེསདིསཱསུ ཝུཊྛིཏེསུ ཛལིཏཔབྦཏེསུཔི ཨེསེཝ ནཡོ. དྭེ པབྦཏཱ སམུཊྛཱཡ ཨུཙྪུགྷཊིཀཾ ཝིཡ པཱིལེ༹ནྟི, ལོཧིཏཾ པཀྐུཐིཏཾ སནྡཏི. ཀདཱཙི ཏཡོ པབྦཏཱ སམུཊྛཱཡ པཱིལེ༹ནྟི. ཀདཱཙི ཙཏྟཱརོ པབྦཏཱ སམུཊྛཱཡ ཏཱསཾ སརཱིརཾ པཱིལེ༹ནྟི. ཏེནཱཧ ‘‘ཁནྡྷཱཏིཝཏྟནྟཱི’’ཏི.
ཀོལིཏྠིཡཱཡོཏི ཀུལེ པཏིཊྛིཏཱ ཀུལདྷཱིཏརོ. ཨསཏཾ ཨཙཱརུནྟི ཨསཉྙཏཀམྨཾ ཀརིཾསུ. དིཏྟརཱུཔཱཏི སཋརཱུཔཱ དྷུཏྟཛཱཏིཀཱ ཧུཏྭཱ. པཏི ཝིཔྤཧཱཡཱཏི ཨཏྟནོ པཏིཾ པཛཧིཏྭཱ. ཨཙཱརུནྟི ཨགམཾསུ. རཏིཁིཌྜཧེཏཱུཏི ཀཱམརཏིཧེཏུ ཙེཝ ཁིཌྜཱཧེཏུ ཙ. རམཱཔཡིཏྭཱཏི པརཔུརིསེཧི སདྡྷིཾ ཨཏྟནོ ཙིཏྟཾ རམཱཔཡིཏྭཱ ཨིདྷ ཨུཔཔནྣཱ. ཨཐ ཏཱསཾ སརཱིརཾ ཨིམེ ཁནྡྷཱཏིཝཏྟནྟི སཛོཏིབྷཱུཏཱཏི.
‘‘པཱདེ གཧེཏྭཱ ཀིསྶ ཨིམེ པུནེཀེ, ཨཝཾསིརཱ ནརཀེ པཱཏཡནྟི;
བྷཡཉྷི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམེ ¶ ནུ མཙྩཱ ཀིམཀཾསུ པཱཔཾ, ཡེམེ ཛནཱ ཨཝཾསིརཱ ནརཀེ པཱཏཡནྟི.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པཱཔཀམྨཱནཾ, ཛཱནཾ ཨཀྑཱསིཛཱནཏོ.
‘‘ཡེ ¶ ཛཱིཝལོཀསྨིཾ ཨསཱདྷུཀམྨིནོ, པརསྶ དཱརཱནི ཨཏིཀྐམནྟི;
ཏེ ཏཱདིསཱ ཨུཏྟམབྷཎྜཐེནཱ, ཏེམེ ཛནཱ ཨཝཾསིརཱ ནརཀེ པཱཏཡནྟི.
‘‘ཏེ ཝསྶཔཱུགཱནི བཧཱུནི ཏཏྠ, ནིརཡེསུ དུཀྑཾ ཝེདནཾ ཝེདཡནྟི;
ན ཧི པཱཔཀཱརིསྶ བྷཝནྟི ཏཱཎཱ, སཀེཧི ཀམྨེཧི པུརཀྑཏསྶ;
ཏེ ལུདྡཀམྨཱ པསཝེཏྭ པཱཔཾ, ཏེམེ ཛནཱ ཨཝཾསིརཱ ནརཀེ པཱཏཡནྟཱི’’ཏི.
ཏཏྠ ནརཀེཏི ཛལིཏཨངྒཱརཔུཎྞེ མཧཱཨཱཝཱཊེ. ཏེ ཀིར ཝཛཾ ཨཔཝིསནྟིཡོ གཱཝོ ཝིཡ ¶ ནིརཡཔཱལེཧི ནཱནཱཝུདྷཱནི གཧེཏྭཱ ཝིཛ྄ཛྷིཡམཱནཱ པོཐིཡམཱནཱ ཡདཱ ཏཾ ནརཀཾ ཨུཔགཙྪནྟི, ཨཐ ཏེ ནིརཡཔཱལཱ ཨུདྡྷཾཔཱདེ ཀཏྭཱ ཏཏྠ པཱཏཡནྟི ཁིཔནྟི. ཨེཝཾ ཏེ པཱཏིཡམཱནེ དིསྭཱ པུཙྪནྟོ ཨེཝམཱཧ. ཨུཏྟམབྷཎྜཐེནཱཏི མནུསྶེཧི པིཡཱཡིཏསྶ ཝརབྷཎྜསྶ ཐེནཀཱ.
ཨེཝཉྩ པན ཝཏྭཱ མཱཏལིསངྒཱཧཀོ ཏཾ ནིརཡཾ ཨནྟརདྷཱཔེཏྭཱ རཐཾ པུརཏོ པེསེཏྭཱ མིཙྪཱདིཊྛིཀཱནཾ པཙྩནཊྛཱནཾ ནིརཡཾ དསྶེསི. ཏེན པུཊྛོ ཙསྶ ཝིཡཱཀཱསི.
‘‘ཨུཙྩཱཝཙཱམེ ཝིཝིདྷཱ ཨུཔཀྐམཱ, ནིརཡེསུ དིསྶནྟི སུགྷོརརཱུཔཱ;
བྷཡཉྷི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམེ ནུ མཙྩཱ ཀིམཀཾསུ པཱཔཾ, ཡེམེ ཛནཱ ཨདྷིམཏྟཱ དུཀྑཱ ཏིབྦཱ;
ཁརཱ ཀཊུཀཱ ཝེདནཱ ཝེདཡནྟི.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པཱཔཀམྨཱནཾ, ཛཱནཾ ཨཀྑཱསིཛཱནཏོ.
‘‘ཡེ ¶ ཛཱིཝལོཀསྨིཾ སུཔཱཔདིཊྛིནོ, ཝིསྶཱསཀམྨཱནི ཀརོནྟི མོཧཱ;
པརཉྩ དིཊྛཱིསུ སམཱདཔེནྟི, ཏེ ¶ པཱཔདིཊྛིཾ པསཝེཏྭ པཱཔཾ;
ཏེམེ ཛནཱ ཨདྷིམཏྟཱ དུཀྑཱ ཏིབྦཱ, ཁརཱ ཀཊུཀཱ ཝེདནཱ ཝེདཡནྟཱི’’ཏི.
ཏཏྠ ཨུཙྩཱཝཙཱམེཏི ཨུཙྩཱ ཨཝཙཱ ཨིམེ, ཁུདྡཀཱ ཙ མཧནྟཱ ཙཱཏི ཨཏྠོ. ཨུཔཀྐམཱཏི ཀཱརཎཔྤཡོགཱ. སུཔཱཔདིཊྛིནོཏི ‘‘ནཏྠི དིནྣ’’ནྟིཨཱདིཀཱཡ དསཝཏྠུཀཱཡ མིཙྪཱདིཊྛིཡཱ སུཊྛུ པཱཔདིཊྛིནོ. ཝིསྶཱསཀམྨཱནཱིཏི ཏཱཡ དིཊྛིཡཱ ཝིསྶཱསེན ཏནྣིསྶིཏཱ ཧུཏྭཱ ནཱནཱཝིདྷཱནི པཱཔཀམྨཱནི ཀརོནྟི. ཏེམེཏི ཏེ ཨིམེ ཛནཱ ཨེཝརཱུཔཾ དུཀྑཾ ཨནུབྷཝནྟི.
ཨིཏི རཉྙོ མིཙྪཱདིཊྛིཀཱནཾ པཙྩནནིརཡཾ ཨཱཙིཀྑི. དེཝལོཀེཔི དེཝགཎཱ རཉྙོ ཨཱགམནམགྒཾ ཨོལོཀཡམཱནཱ སུདྷམྨཱཡཾ དེཝསབྷཱཡཾ ནིསཱིདིཾསུཡེཝ. སཀྐོཔི ‘‘ཀིཾ ནུ ཁོ, མཱཏལི, ཙིརཱཡཏཱི’’ཏི ཨུཔདྷཱརེནྟོ ཏཾ ཀཱརཎཾ ཉཏྭཱ ‘‘མཱཏལི, ཨཏྟནོ དཱུཏཝིསེསཾ དསྶེཏུཾ ‘མཧཱརཱཛ, ཨསུཀཀམྨཾ ཀཏྭཱ ཨསུཀནིརཡེ ནཱམ པཙྩནྟཱི’ཏི ནིརཡེ དསྶེནྟོ ཝིཙརཏི, ནིམིརཉྙོ པན ཨཔྤམེཝ ཨཱཡུ ཁཱིཡེཐ, ནིརཡདསྶནཾ ནཱསྶ པརིཡནྟཾ གཙྪེཡྻཱ’’ཏི ཨེཀཾ མཧཱཛཝཾ ¶ དེཝཔུཏྟཾ པེསེསི ‘‘ཏྭཾ ‘སཱིགྷཾ རཱཛཱནཾ གཧེཏྭཱ ཨཱགཙྪཏཱུ’ཏི མཱཏལིསྶ ཝདེཧཱི’’ཏི. སོ ‘‘སཱདྷཱུ’’ཏི སམྤཊིཙྪིཏྭཱ ཛཝེན གནྟྭཱ ཨཱརོཙེསི. མཱཏལི, ཏསྶ ཝཙནཾ སུཏྭཱ ‘‘ན སཀྐཱ ཙིརཱཡིཏུ’’ནྟི རཉྙོ ཨེཀཔཧཱརེནེཝ ཙཏཱུསུ དིསཱསུ བཧཱུ ནིརཡེ དསྶེཏྭཱ གཱཐམཱཧ –
‘‘ཝིདིཏཱནི ཏེ མཧཱརཱཛ, ཨཱཝཱསཾ པཱཔཀམྨིནཾ;
ཋཱནཱནི ལུདྡཀམྨཱནཾ, དུསྶཱིལཱནཉྩ ཡཱ གཏི;
ཨུཡྻཱཧི དཱནི རཱཛཱིསི, དེཝརཱཛསྶ སནྟིཀེ’’ཏི.
ཏསྶཏྠོ – མཧཱརཱཛ, ཨིམཾ པཱཔཀམྨཱིནཾ སཏྟཱནཾ ཨཱཝཱསཾ དིསྭཱ ལུདྡཀམྨཱནཉྩ ཋཱནཱནི ཏཡཱ ཝིདིཏཱནི. དུསྶཱིལཱནཉྩ ཡཱ གཏི ནིབྦཏྟི, སཱཔི ཏེ ¶ ཝིདིཏཱ. ཨིདཱནི དེཝརཱཛསྶ སནྟིཀེ དིབྦསམྤཏྟིཾ དསྶནཏྠཾ ཨུཡྻཱཧི གཙྪཱཧི, མཧཱརཱཛཱཏི.
ནིརཡཀཎྜཾ ནིཊྛིཏཾ.
སགྒཀཎྜཾ
ཨེཝཉྩ པན ཝཏྭཱ མཱཏལི དེཝལོཀཱབྷིམུཁཾ རཐཾ པེསེསི. རཱཛཱ དེཝལོཀཾ གཙྪནྟོ དྭཱདསཡོཛནིཀཾ མཎིམཡཾ པཉྩཐཱུཔིཀཾ སབྦཱལངྐཱརཔཊིམཎྜིཏཾ ཨུཡྻཱནཔོཀྑརཎིསམྤནྣཾ ¶ ཀཔྤརུཀྑཔརིཝུཏཾ བཱིརཎིཡཱ དེཝདྷཱིཏཱཡ ཨཱཀཱསཊྛཀཝིམཱནཾ དིསྭཱ, ཏཉྩ དེཝདྷཱིཏརཾ ཨནྟོཀཱུཊཱགཱརེ སཡནཔིཊྛེ ནིསིནྣཾ ཨཙྪརཱསཧསྶཔརིཝུཏཾ མཎིསཱིཧཔཉྫརཾ ཝིཝརིཏྭཱ ཨོལོཀེནྟིཾ དིསྭཱ མཱཏལིཾ པུཙྪནྟོ གཱཐམཱཧ. ཨིཏརོཔིསྶ བྱཱཀཱསི.
‘‘པཉྩཐཱུཔཾ དིསྶཏིདཾ ཝིམཱནཾ, མཱལཱཔིལ༹ནྡྷཱ སཡནསྶ མཛ྄ཛྷེ;
ཏཏྠཙྪཏི ནཱརཱི མཧཱནུབྷཱཝཱ, ཨུཙྩཱཝཙཾ ཨིདྡྷི ཝིཀུབྦམཱནཱ.
‘‘ཝིཏྟཱི ཧི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨཡཾ ནུ ནཱརཱི ཀིམཀཱསི སཱདྷུཾ, ཡཱ མོདཏི སགྒཔཏྟཱ ཝིམཱནེ.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པུཉྙཀམྨཱནཾ, ཛཱནཾ ཨཀྑཱསིཛཱནཏོ.
‘‘ཡདི ¶ ཏེ སུཏཱ བཱིརཎཱི ཛཱིཝལོཀེ, ཨཱམཱཡདཱསཱི ཨཧུ བྲཱཧྨཎསྶ;
སཱ པཏྟཀཱལཾ ཨཏིཐིཾ ཝིདིཏྭཱ, མཱཏཱཝ པུཏྟཾ སཀིམཱབྷིནནྡཱི;
སཾཡམཱ སཾཝིབྷཱགཱ ཙ, སཱ ཝིམཱནསྨི མོདཏཱི’’ཏི.
ཏཏྠ པཉྩཐཱུཔནྟི པཉྩཧི ཀཱུཊཱགཱརེཧི སམནྣཱགཏཾ. མཱལཱཔིལ༹ནྡྷཱཏི མཱལཱདཱིཧི སབྦཱབྷརཎེཧི པཊིམཎྜིཏཱཏི ཨཏྠོ. ཏཏྠཙྪཏཱིཏི ཏསྨིཾ ¶ ཝིམཱནེ ཨཙྪཏི. ཨུཙྩཱཝཙཾ ཨིདྡྷི ཝིཀུབྦམཱནཱཏི ནཱནཔྤཀཱརཾ དེཝིདྡྷིཾ དསྶཡམཱནཱ. དིསྭཱཏི ཨེཏཾ དིསྭཱ ཋིཏཾ མཾ ཝིཏྟི ཝིནྡཏི པཊིལབྷཏི, ཝིཏྟིསནྟཀོ ཝིཡ ཧོམི ཏུཊྛིཡཱ ཨཏིབྷཱུཏཏྟཱཏི ཨཏྠོ. ཨཱམཱཡདཱསཱིཏི གེཧདཱསིཡཱ ཀུཙྪིམྷི ཛཱཏདཱསཱི. ཨཧུ བྲཱཧྨཎསྶཱཏི སཱ ཀིར ཀསྶཔདསབལསྶ ཀཱལེ ཨེཀསྶ བྲཱཧྨཎསྶ དཱསཱི ཨཧོསི. སཱ པཏྟཀཱལནྟི ཏེན བྲཱཧྨཎེན ཨཊྛ སལཱཀབྷཏྟཱནི སངྒྷསྶ པརིཙྩཏྟཱནི ཨཧེསུཾ. སོ གེཧཾ གནྟྭཱ ‘‘སྭེ པཊྛཱཡ ཨེཀེཀསྶ བྷིཀྑུསྶ ཨེཀེཀཾ ཀཧཱཔཎགྒྷནཀཾ ཀཏྭཱ ཨཊྛ སལཱཀབྷཏྟཱནི སམྤཱདེཡྻཱསཱི’’ཏི བྲཱཧྨཎིཾ ཨཱཧ. སཱ ‘‘སཱམི, བྷིཀྑུ ནཱམ དྷུཏྟོ, ནཱཧཾ སཀྑིསྶཱམཱི’’ཏི པཊིཀྑིཔི. དྷཱིཏརོཔིསྶ པཊིཀྑིཔིཾསུ. སོ དཱསིཾ ‘‘སཀྑིསྶསི ཨམྨཱ’’ཏི ཨཱཧ. སཱ ‘‘སཀྑིསྶཱམི ཨཡྻཱ’’ཏི སམྤཊིཙྪིཏྭཱ སཀྐཙྩཾ ཡཱགུཁཛྫཀབྷཏྟཱདཱིནི སམྤཱདེཏྭཱ སལཱཀཾ ལབྷིཏྭཱ ཨཱགཏཾ པཏྟཀཱལཾ ཨཏིཐིཾ ཝིདིཏྭཱ ཧརིཏགོམཡུཔལིཏྟེ ཀཏཔུཔྥུཔཧཱརེ སུཔཉྙཏྟཱསནེ ནིསཱིདཱཔེཏྭཱ ཡཐཱ ནཱམ ཝིཔྤཝཱསཱ ཨཱགཏཾ པུཏྟཾ མཱཏཱ སཀིཾ ཨབྷིནནྡཏི, ཏཐཱ ནིཙྩཀཱལཾ ཨབྷིནནྡཏི, སཀྐཙྩཾ པརིཝིསཏི, ཨཏྟནོ སནྟཀམྤི ཀིཉྩི ¶ དེཏི. སཾཡམཱ སཾཝིབྷཱགཱ ཙཱཏི སཱ སཱིལཝཏཱི ཨཧོསི ཙཱགཝཏཱི ཙ, ཏསྨཱ ཏེན སཱིལེན ཙེཝ ཙཱགེན ཙ ཨིམསྨིཾ ཝིམཱནེ མོདཏི. ཨཐ ཝཱ སཾཡམཱཏི ཨིནྡྲིཡདམནཱ.
ཨེཝཉྩ པན ཝཏྭཱ མཱཏལི པུརཏོ རཐཾ པེསེཏྭཱ སོཎདིནྣདེཝཔུཏྟསྶ སཏྟ ཀནཀཝིམཱནཱནི དསྶེསི. སོ ཏཱནི ཙ ཏསྶ ཙ སིརིསམྤཏྟིཾ དིསྭཱ ཏེན ཀཏཀམྨཾ པུཙྪི. ཨིཏརོཔིསྶ བྱཱཀཱསི.
‘‘དདྡལླམཱནཱ ཨཱབྷེནྟི, ཝིམཱནཱ སཏྟ ནིམྨིཏཱ;
ཏཏྠ ཡཀྑོ མཧིདྡྷིཀོ, སབྦཱབྷརཎབྷཱུསིཏོ;
སམནྟཱ ཨནུཔརིཡཱཏི, ནཱརཱིགཎཔུརཀྑཏོ.
‘‘ཝིཏྟཱི ¶ ཧི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨཡཾ ནུ མཙྩོ ཀིམཀཱསི སཱདྷུཾ, ཡོ མོདཏི སགྒཔཏྟོ ཝིམཱནེ.
‘‘ཏསྶ ¶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པུཉྙཀམྨཱནཾ, ཛཱནཾ ཨཀྑཱསིཛཱནཏོ.
‘‘སོཎདིནྣོ གཧཔཏི, ཨེས དཱནཔཏཱི ཨཧུ;
ཨེས པབྦཛིཏུདྡིསྶ, ཝིཧཱརེ སཏྟ ཀཱརཡི.
‘‘སཀྐཙྩཾ ཏེ ཨུཔཊྛཱསི, བྷིཀྑཝོ ཏཏྠ ཝཱསིཀེ;
ཨཙྪཱདནཉྩ བྷཏྟཉྩ, སེནཱསནཾ པདཱིཔིཡཾ;
ཨདཱསི ཨུཛུབྷཱུཏེསུ, ཝིཔྤསནྣེན ཙེཏསཱ.
‘‘ཙཱཏུདྡསིཾ པཉྩདསིཾ, ཡཱ ཙ པཀྑསྶ ཨཊྛམཱི;
པཱཊིཧཱརིཡཔཀྑཉྩ, ཨཊྛངྒསུསམཱགཏཾ.
‘‘ཨུཔོསཐཾ ཨུཔཝསཱི, སདཱ སཱིལེསུ སཾཝུཏོ;
སཾཡམཱ སཾཝིབྷཱགཱ ཙ, སོ ཝིམཱནསྨི མོདཏཱི’’ཏི.
ཏཏྠ དདྡལླམཱནཱཏི ཛལམཱནཱ. ཨཱབྷེནྟཱིཏི ཏརུཎསཱུརིཡོ ཝིཡ ཨོབྷཱསནྟི. ཏཏྠཱཏི ཏེསུ པཊིཔཱཊིཡཱ ཋིཏེསུ སཏྟསུ ཝིམཱནེསུ. ཡཀྑོཏི ཨེཀོ དེཝཔུཏྟོ. སོཎདིནྣོཏི མཧཱརཱཛ, ཨཡཾ པུབྦེ ཀསྶཔདསབལསྶ ཀཱལེ ཀཱསིརཊྛེ ཨཉྙཏརསྨིཾ ནིགམེ སོཎདིནྣོ ནཱམ གཧཔཏི དཱནཔཏི ཨཧོསི. སོ པབྦཛིཏེ ཨུདྡིསྶ སཏྟ ཝིཧཱརཀུཊིཡོ ཀཱརེཏྭཱ ཏཏྠ ཝཱསིཀེ བྷིཀྑཱུ ཙཏཱུཧི པཙྩཡེཧི སཀྐཙྩཾ ཨུཔཊྛཱསི, ཨུཔོསཐཉྩ ཨུཔཝསི, ནིཙྩཾ སཱིལེསུ ཙ སཾཝུཏོ ཨཧོསི. སོ ཏཏོ ཙཝིཏྭཱ ཨིདྷཱུཔཔནྣོ མོདཏཱིཏི ཨཏྠོ. ཨེཏྠ ཙ པཱཊིཧཱརིཡཔཀྑནྟི ཨིདཾ པན ཨཊྛམཱིཨུཔོསཐསྶ པཙྩུགྒམནཱནུགམནཝསེན སཏྟམིནཝམིཡོ, ཙཱཏུདྡསཱིཔནྣརསཱིནཾ པཙྩུགྒམནཱནུགམནཝསེན ཏེརསཱིཔཱཊིཔདེ ཙ སནྡྷཱཡ ཝུཏྟཾ.
ཨེཝཾ ¶ སོཎདིནྣསྶ ཀཏཀམྨཾ ཀཐེཏྭཱ པུརཏོ རཐཾ པེསེཏྭཱ ཕལིཀཝིམཱནཾ དསྶེསི. ཏཾ ཨུབྦེདྷཏོ པཉྩཝཱིསཏིཡོཛནཾ ཨནེཀསཏེཧི སཏྟརཏནམཡཏྠམྦྷེཧི སམནྣཱགཏཾ, ཨནེཀསཏཀཱུཊཱགཱརཔཊིམཎྜིཏཾ ¶ , ཀིངྐིཎིཀཛཱལཱཔརིཀྑིཏྟཾ, སམུསྶིཏསུཝཎྞརཛཏམཡདྷཛཾ, ནཱནཱཔུཔྥཝིཙིཏྟཨུཡྻཱནཝནཝིབྷཱུསིཏཾ, རམཎཱིཡཔོཀྑརཎིསམནྣཱགཏཾ, ནཙྩགཱིཏཝཱདིཏཱདཱིསུ ཚེཀཱཧི ཨཙྪརཱཧི སམྤརིཀིཎྞཾ. ཏཾ དིསྭཱ རཱཛཱ ཏཱསཾ ཨཙྪརཱནཾ ཀཏཀམྨཾ པུཙྪི, ཨིཏརོཔིསྶ བྱཱཀཱསི.
‘‘པབྷཱསཏི ¶ མིདཾ བྱམྷཾ, ཕལིཀཱསུ སུནིམྨིཏཾ;
ནཱརཱིཝརགཎཱཀིཎྞཾ, ཀཱུཊཱགཱརཝརོཙིཏཾ;
ཨུཔེཏཾ ཨནྣཔཱནེཧི, ནཙྩགཱིཏེཧི ཙཱུབྷཡཾ.
‘‘ཝིཏྟཱི ཧི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམེ ནུ མཙྩཱ ཀིམཀཾསུ སཱདྷུཾ, ཡཱ མོདརེ སགྒཔཏྟཱ ཝིམཱནེ.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པུཉྙཀམྨཱནཾ, ཛཱནཾ ཨཀྑཱསིཛཱནཏོ.
‘‘ཡཱ ཀཱཙི ནཱརིཡོ ཨིདྷ ཛཱིཝལོཀེ, སཱིལཝནྟིཡོ ཨུཔཱསིཀཱ;
དཱནེ རཏཱ ནིཙྩཾ པསནྣཙིཏྟཱ, སཙྩེ ཋིཏཱ ཨུཔོསཐེ ཨཔྤམཏྟཱ;
སཾཡམཱ སཾཝིབྷཱགཱ ཙ, ཏཱ ཝིམཱནསྨི མོདརེ’’ཏི.
ཏཏྠ བྱམྷནྟི ཝིམཱནཾ, པཱསཱདོཏི ཝུཏྟཾ ཧོཏི. ཕལིཀཱསཱུཏི ཕལིཀབྷིཏྟཱིསུ. ནཱརཱིཝརགཎཱཀིཎྞནྟི ཝརནཱརིགཎེཧི ཨཱཀིཎྞཾ. ཀཱུཊཱགཱརཝརོཙིཏནྟི ཝརཀཱུཊཱགཱརེཧི ཨོཙིཏཾ སམོཙིཏཾ, ཝཌྜྷིཏནྟི ཨཏྠོ. ཨུབྷཡནྟི ཨུབྷཡེཧི. ‘‘ཡཱ ཀཱཙཱི’’ཏི ཨིདཾ ཀིཉྩཱཔི ཨནིཡམེཏྭཱ ཝུཏྟཾ, ཏཱ པན ཀསྶཔབུདྡྷསཱསནེ བཱརཱཎསིཡཾ ཨུཔཱསིཀཱ ཧུཏྭཱ གཎབནྡྷནེན ཨེཏཱནི ཝུཏྟཔྤཀཱརཱནི པུཉྙཱནི ཀཏྭཱ ཏཾ དིབྦསམྤཏྟིཾ པཏྟཱཏི ཝེདིཏབྦཱ.
ཨཐསྶ སོ པུརཏོ རཐཾ པེསེཏྭཱ ཨེཀཾ རམཎཱིཡཾ མཎིཝིམཱནཾ དསྶེསི. ཏཾ སམེ བྷཱུམིབྷཱགེ པཏིཊྛིཏཾ ཨུབྦེདྷསམྤནྣཾ མཎིཔབྦཏོ ཝིཡ ཨོབྷཱསམཱནཾ ཏིཊྛཏི, དིབྦགཱིཏཝཱདིཏནིནྣཱདིཏཾ བཧཱུཧི དེཝཔུཏྟེཧི སམྤརིཀིཎྞཾ. ཏཾ དིསྭཱ རཱཛཱ ཏེསཾ དེཝཔུཏྟཱནཾ ཀཏཀམྨཾ པུཙྪི, ཨིཏརོཔིསྶ བྱཱཀཱསི.
‘‘པབྷཱསཏི ¶ ¶ མིདཾ བྱམྷཾ, ཝེལུ༹རིཡཱསུ ནིམྨིཏཾ;
ཨུཔེཏཾ བྷཱུམིབྷཱགེཧི, ཝིབྷཏྟཾ བྷཱགསོ མིཏཾ.
‘‘ཨཱལ༹མྦརཱ ¶ མུདིངྒཱ ཙ, ནཙྩགཱིཏཱ སུཝཱདིཏཱ;
དིབྦཱ སདྡཱ ནིཙྪརནྟི, སཝནཱིཡཱ མནོརམཱ.
‘‘ནཱཧཾ ཨེཝཾགཏཾ ཛཱཏུ, ཨེཝཾསུརུཙིརཾ པུརེ;
སདྡཾ སམབྷིཛཱནཱམི, དིཊྛཾ ཝཱ ཡདི ཝཱ སུཏཾ.
‘‘ཝིཏྟཱི ཧི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམེ ནུ མཙྩཱ ཀིམཀཾསུ སཱདྷུཾ, ཡེ མོདརེ སགྒཔཏྟཱ ཝིམཱནེ.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པུཉྙཀམྨཱནཾ, ཛཱནཾ ཨཀྑཱསིཛཱནཏོ.
‘‘ཡེ ཀེཙི མཙྩཱ ཨིདྷ ཛཱིཝལོཀེ, སཱིལཝནྟཱ ཨུཔཱསཀཱ;
ཨཱརཱམེ ཨུདཔཱནེ ཙ, པཔཱ སངྐམནཱནི ཙ;
ཨརཧནྟེ སཱིཏིབྷཱུཏེ, སཀྐཙྩཾ པཊིཔཱདཡུཾ.
‘‘ཙཱིཝརཾ པིཎྜཔཱཏཉྩ, པཙྩཡཾ སཡནཱསནཾ;
ཨདཾསུ ཨུཛུབྷཱུཏེསུ, ཝིཔྤསནྣེན ཙེཏསཱ.
‘‘ཙཱཏུདྡསིཾ པཉྩདསིཾ, ཡཱ ཙ པཀྑསྶ ཨཊྛམཱི;
པཱཊིཧཱརིཡཔཀྑཉྩ, ཨཊྛངྒསུསམཱགཏཾ.
‘‘ཨུཔོསཐཾ ཨུཔཝསུཾ, སདཱ སཱིལེསུ སཾཝུཏཱ;
སཾཡམཱ སཾཝིབྷཱགཱ ཙ, ཏེ ཝིམཱནསྨི མོདརེ’’ཏི.
ཏཏྠ ཝེལུ༹རིཡཱསཱུཏི ཝེལུ༹རིཡབྷིཏྟཱིསུ. བྷཱུམིབྷཱགེཧཱིཏི རམཎཱིཡེཧི བྷཱུམིབྷཱགེཧི ཨུཔེཏཾ. ཨཱལ༹མྦརཱ མུདིངྒཱ ཙཱཏི ཨེཏེ དྭེ ཨེཏྠ ཝཛྫནྟི. ནཙྩགཱིཏཱ སུཝཱདིཏཱཏི ནཱནཔྤཀཱརཱནི ནཙྩཱནི ¶ ཙེཝ གཱིཏཱནི ཙ ཨཔརེསམྤི ཏཱུརིཡཱནཾ སུཝཱདིཏཱནི ཙེཏྠ པཝཏྟནྟི. ཨེཝཾགཏནྟི ཨེཝཾ མནོརམབྷཱཝཾ གཏཾ. ‘‘ཡེ ཀེཙཱི’’ཏི ཨིདམྤི ཀཱམཾ ཨནིཡམེཏྭཱ ཝུཏྟཾ, ཏེ པན ཀསྶཔབུདྡྷཀཱལེ བཱརཱཎསིཝཱསིནོ ཨུཔཱསཀཱ ཧུཏྭཱ གཎབནྡྷནེན ཨེཏཱནི པུཉྙཱནི ཀཏྭཱ ཏཾ སམྤཏྟིཾ པཏྟཱཏི ཝེདིཏབྦཱ. ཏཏྠ པཊིཔཱདཡུནྟི ¶ པཊིཔཱདཡིཾསུ, ཏེསཾ ཨདཾསཱུཏི ཨཏྠོ. པཙྩཡནྟི གིལཱནཔཙྩཡཾ. ཨདཾསཱུཏི ཨེཝཾ ནཱནཔྤཀཱརཀཾ དཱནཾ ཨདཾསཱུཏི.
ཨིཏིསྶ སོ ཏེསཾ ཀཏཀམྨཾ ཨཱཙིཀྑིཏྭཱ པུརཏོ རཐཾ པེསེཏྭཱ ཨཔརམྤི ཕལིཀཝིམཱནཾ དསྶེསི. ཏཾ ཨནེཀཀཱུཊཱགཱརཔཊིམཎྜིཏཾ, ནཱནཱཀུསུམསཉྪནྣདིབྦཏརུཎཝནཔཊིམཎྜིཏཏཱིརཱཡ, ཝིཝིདྷཝིཧངྒམནིནྣཱདིཏཱཡ ནིམྨལསལིལཱཡ ནདིཡཱ པརིཀྑིཏྟཾ ¶ , ཨཙྪརཱགཎཔརིཝུཏསྶེཀསྶ པུཉྙཝཏོ ནིཝཱསབྷཱུཏཾ. ཏཾ དིསྭཱ རཱཛཱ ཏསྶ ཀཏཀམྨཾ པུཙྪི, ཨིཏརོཔིསྶ བྱཱཀཱསི.
‘‘པབྷཱསཏི མིདཾ བྱམྷཾ, ཕལིཀཱསུ སུནིམྨིཏཾ;
ནཱརཱིཝརགཎཱཀིཎྞཾ, ཀཱུཊཱགཱརཝརོཙིཏཾ.
‘‘ཨུཔེཏཾ ཨནྣཔཱནེཧི, ནཙྩགཱིཏེཧི ཙཱུབྷཡཾ;
ནཛྫོ ཙཱནུཔརིཡཱཏི, ནཱནཱཔུཔྥདུམཱཡུཏཱ.
‘‘ཝིཏྟཱི ཧི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨཡཾ ནུ མཙྩོ ཀིཾམཀཱསི སཱདྷུཾ, ཡོ མོདཏཱི སགྒཔཏྟོ ཝིམཱནེ.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པུཉྙཀམྨཱནཾ, ཛཱནཾ ཨཀྑཱསིཛཱནཏོ.
‘‘མིཐིལཱཡཾ གཧཔཏི, ཨེས དཱནཔཏཱི ཨཧུ;
ཨཱརཱམེ ཨུདཔཱནེ ཙ, པཔཱ སངྐམནཱནི ཙ;
ཨརཧནྟེ སཱིཏིབྷཱུཏེ, སཀྐཙྩཾ པཊིཔཱདཡི.
‘‘ཙཱིཝརཾ པིཎྜཔཱཏཉྩ, པཙྩཡཾ སཡནཱསནཾ;
ཨདཱསི ཨུཛུབྷཱུཏེསུ, ཝིཔྤསནྣེན ཙེཏསཱ.
‘‘ཙཱཏུདྡསིཾ ¶ པཉྩདསིཾ, ཡཱ ཙ པཀྑསྶ ཨཊྛམཱི;
པཱཊིཧཱརིཡཔཀྑཉྩ, ཨཊྛངྒསུསམཱགཏཾ.
‘‘ཨུཔོསཐཾ ¶ ཨུཔཝསཱི, སདཱ སཱིལེསུ སཾཝུཏོ;
སཾཡམཱ སཾཝིབྷཱགཱ ཙ, སོ ཝིམཱནསྨི མོདཏཱི’’ཏི.
ཏཏྠ ནཛྫོཏི ཝཙནཝིཔལླཱསོ, ཨེཀཱ ནདཱི ཏཾ ཝིམཱནཾ པརིཀྑིཔིཏྭཱ གཏཱཏི ཨཏྠོ. ནཱནཱཔུཔྥདུམཱཡུཏཱཏི སཱ ནདཱི ནཱནཱཔུཔྥེཧི དུམེཧི ཨཱཡུཏཱ. མིཐིལཱཡནྟི ཨེས མཧཱརཱཛ, ཀསྶཔབུདྡྷཀཱལེ མིཐིལནགརེ ཨེཀོ གཧཔཏི དཱནཔཏི ཨཧོསི. སོ ཨེཏཱནི ཨཱརཱམརོཔནཱདཱིནི པུཉྙཱནི ཀཏྭཱ ཨིམཾ སམྤཏྟིཾ པཏྟོཏི.
ཨེཝམསྶ ཏེན ཀཏཀམྨཾ ཨཱཙིཀྑིཏྭཱ པུརཏོ རཐཾ པེསེཏྭཱ ཨཔརམྤི ཕལིཀཝིམཱནཾ དསྶེསི. ཏཾ པུརིམཝིམཱནཏོ ཨཏིརེཀཱཡ ནཱནཱཔུཔྥཕལསཉྪནྣཱཡ ཏརུཎཝནགྷཊཱཡ སམནྣཱགཏཾ. ཏཾ དིསྭཱ རཱཛཱ ཏཱཡ སམྤཏྟིཡཱ སམནྣཱགཏསྶ དེཝཔུཏྟསྶ ཀཏཀམྨཾ པུཙྪི, ཨིཏརོཔིསྶ བྱཱཀཱསི.
‘‘པབྷཱསཏི མིདཾ བྱམྷཾ, ཕལིཀཱསུ སུནིམྨིཏཾ;
ནཱརཱིཝརགཎཱཀིཎྞཾ, ཀཱུཊཱགཱརཝརོཙིཏཾ.
‘‘ཨུཔེཏཾ ¶ ཨནྣཔཱནེཧི, ནཙྩགཱིཏེཧི ཙཱུབྷཡཾ;
ནཛྫོ ཙཱནུཔརིཡཱཏི, ནཱནཱཔུཔྥདུམཱཡུཏཱ.
‘‘རཱཛཱཡཏནཱ ཀཔིཏྠཱ ཙ, ཨམྦཱ སཱལཱ ཙ ཛམྦུཡོ;
ཏིནྡུཀཱ ཙ པིཡཱལཱ ཙ, དུམཱ ནིཙྩཕལཱ བཧཱུ.
‘‘ཝིཏྟཱི ཧི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨཡཾ ནུ མཙྩོ ཀིམཀཱསི སཱདྷུཾ, ཡོ མོདཏཱི སགྒཔཏྟོ ཝིམཱནེ.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པུཉྙཀམྨཱནཾ, ཛཱནཾ ཨཀྑཱསིཛཱནཏོ.
‘‘མིཐིལཱཡཾ ¶ གཧཔཏི, ཨེས དཱནཔཏཱི ཨཧུ;
ཨཱརཱམེ ཨུདཔཱནེ ཙ, པཔཱ སངྐམནཱནི ཙ;
ཨརཧནྟེ སཱིཏིབྷཱུཏེ, སཀྐཙྩཾ པཊིཔཱདཡི.
‘‘ཙཱིཝརཾ ¶ པིཎྜཔཱཏཉྩ, པཙྩཡཾ སཡནཱསནཾ;
ཨདཱསི ཨུཛུབྷཱུཏེསུ, ཝིཔྤསནྣེན ཙེཏསཱ.
‘‘ཙཱཏུདྡསིཾ པཉྩདསིཾ, ཡཱ ཙ པཀྑསྶ ཨཊྛམཱི;
པཱཊིཧཱརིཡཔཀྑཉྩ, ཨཊྛངྒསུསམཱགཏཾ.
‘‘ཨུཔོསཐཾ ཨུཔཝསཱི, སདཱ སཱིལེསུ སཾཝུཏོ;
སཾཡམཱ སཾཝིབྷཱགཱ ཙ, སོ ཝིམཱནསྨི མོདཏཱི’’ཏི.
ཏཏྠ མིཐིལཱཡནྟི ཨེས, མཧཱརཱཛ, ཀསྶཔབུདྡྷཀཱལེ ཝིདེཧརཊྛེ མིཐིལནགརེ ཨེཀོ གཧཔཏི དཱནཔཏི ཨཧོསི. སོ ཨེཏཱནི པུཉྙཱནི ཀཏྭཱ ཨིམཾ སམྤཏྟིཾ པཏྟོཏི.
ཨེཝམསྶ ཏེན ཀཏཀམྨཾ ཨཱཙིཀྑིཏྭཱ པུརཏོ རཐཾ པེསེཏྭཱ པུརིམསདིསམེཝ ཨཔརམྤི ཝེལུ༹རིཡཝིམཱནཾ དསྶེཏྭཱ ཏཏྠ སམྤཏྟིཾ ཨནུབྷཝནྟསྶ དེཝཔུཏྟསྶ ཀཏཀམྨཾ པུཊྛོ ཨཱཙིཀྑི.
‘‘པབྷཱསཏི མིདཾ བྱམྷཾ, ཝེལུ༹རིཡཱསུ ནིམྨིཏཾ;
ཨུཔེཏཾ བྷཱུམིབྷཱགེཧི, ཝིབྷཏྟཾ བྷཱགསོ མིཏཾ.
‘‘ཨཱལ༹མྦརཱ མུདིངྒཱ ཙ, ནཙྩགཱིཏཱ སུཝཱདིཏཱ;
དིབྱཱ སདྡཱ ནིཙྪརནྟི, སཝནཱིཡཱ མནོརམཱ.
‘‘ནཱཧཾ ཨེཝཾགཏཾ ཛཱཏུ, ཨེཝཾསུརུཙིརཾ པུརེ;
སདྡཾ སམབྷིཛཱནཱམི, དིཊྛཾ ཝཱ ཡདི ཝཱ སུཏཾ.
‘‘ཝིཏྟཱི ཧི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨཡཾ ¶ ནུ མཙྩོ ཀིམཀཱསི སཱདྷུཾ, ཡོ མོདཏཱི སགྒཔཏྟོ ཝིམཱནེ.
‘‘ཏསྶ ¶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པུཉྙཀམྨཱནཾ, ཛཱནཾ ཨཀྑཱསིཛཱནཏོ.
‘‘བཱརཱཎསིཡཾ གཧཔཏི, ཨེས དཱནཔཏཱི ཨཧུ;
ཨཱརཱམེ ཨུདཔཱནེ ཙ, པཔཱ སངྐམནཱནི ཙ;
ཨརཧནྟེ སཱིཏིབྷཱུཏེ, སཀྐཙྩཾ པཊིཔཱདཡི.
‘‘ཙཱིཝརཾ ¶ པིཎྜཔཱཏཉྩ, པཙྩཡཾ སཡནཱསནཾ;
ཨདཱསི ཨུཛུབྷཱུཏེསུ, ཝིཔྤསནྣེན ཙེཏསཱ.
‘‘ཙཱཏུདྡསིཾ པཉྩདསིཾ, ཡཱ ཙ པཀྑསྶ ཨཊྛམཱི;
པཱཊིཧཱརིཡཔཀྑཉྩ, ཨཊྛངྒསུསམཱགཏཾ.
‘‘ཨུཔོསཐཾ ཨུཔཝསཱི, སདཱ སཱིལེསུ སཾཝུཏོ;
སཾཡམཱ སཾཝིབྷཱགཱ ཙ, སོ ཝིམཱནསྨི མོདཏཱི’’ཏི.
ཨཐསྶ པུརཏོ རཐཾ པེསེཏྭཱ བཱལསཱུརིཡསནྣིབྷཾ ཀནཀཝིམཱནཾ དསྶེཏྭཱ ཏཏྠ ནིཝཱསིནོ དེཝཔུཏྟསྶ སམྤཏྟིཾ པུཊྛོ ཨཱཙིཀྑི.
‘‘ཡཐཱ ཨུདཡམཱདིཙྩོ, ཧོཏི ལོཧིཏཀོ མཧཱ;
ཏཐཱུཔམཾ ཨིདཾ བྱམྷཾ, ཛཱཏརཱུཔསྶ ནིམྨིཏཾ.
‘‘ཝིཏྟཱི ཧི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨཡཾ ནུ མཙྩོ ཀིམཀཱསི སཱདྷུཾ, ཡོ མོདཏཱི སགྒཔཏྟོ ཝིམཱནེ.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པུཉྙཀམྨཱནཾ, ཛཱནཾ ཨཀྑཱསིཛཱནཏོ.
‘‘སཱཝཏྠིཡཾ ¶ གཧཔཏི, ཨེས དཱནཔཏཱི ཨཧུ;
ཨཱརཱམེ ཨུདཔཱནེ ཙ, པཔཱ སངྐམནཱནི ཙ;
ཨརཧནྟེ སཱིཏིབྷཱུཏེ, སཀྐཙྩཾ པཊིཔཱདཡི.
‘‘ཙཱིཝརཾ པིཎྜཔཱཏཉྩ, པཙྩཡཾ སཡནཱསནཾ;
ཨདཱསི ཨུཛུབྷཱུཏེསུ, ཝིཔྤསནྣེན ཙེཏསཱ.
‘‘ཙཱཏུདྡསིཾ པཉྩདསིཾ, ཡཱ ཙ པཀྑསྶ ཨཊྛམཱི;
པཱཊིཧཱརིཡཔཀྑཉྩ, ཨཊྛངྒསུསམཱགཏཾ.
‘‘ཨུཔོསཐཾ ཨུཔཝསཱི, སདཱ སཱིལེསུ སཾཝུཏོ;
སཾཡམཱ སཾཝིབྷཱགཱ ཙ, སོ ཝིམཱནསྨི མོདཏཱི’’ཏི.
ཏཏྠ ¶ ཨུདཡམཱདིཙྩོཏི ཨུགྒཙྪནྟོ ཨཱདིཙྩོ. སཱཝཏྠིཡནྟི ཀསྶཔབུདྡྷཀཱལེ སཱཝཏྠིནགརེ ཨེཀོ གཧཔཏི དཱནཔཏི ཨཧོསི. སོ ཨེཏཱནི པུཉྙཱནི ཀཏྭཱ ཨིམཾ སམྤཏྟིཾ པཏྟོཏི.
ཨེཝཾ ¶ ཏེན ཨིམེསཾ ཨཊྛནྣཾ ཝིམཱནཱནཾ ཀཐིཏཀཱལེ སཀྐོ དེཝརཱཛཱ ‘‘མཱཏལི, ཨཏིཝིཡ ཙིརཱཡཏཱི’’ཏི ཨཔརམྤི ཛཝནདེཝཔུཏྟཾ པེསེསི. སོ ཝེགེན གནྟྭཱ ཨཱརོཙེསི. སོ ཏསྶ ཝཙནཾ སུཏྭཱ ‘‘ན སཀྐཱ ཨིདཱནི ཙིརཱཡིཏུ’’ནྟི ཙཏཱུསུ དིསཱསུ ཨེཀཔྤཧཱརེནེཝ བཧཱུནི ཝིམཱནཱནི དསྶེསི. རཉྙཱ ཙ ཏཏྠ སམྤཏྟིཾ ཨནུབྷཝནྟཱནཾ དེཝཔུཏྟཱནཾ ཀཏཀམྨཾ པུཊྛོ ཨཱཙིཀྑི.
‘‘ཝེཧཱཡསཱམེ བཧུཀཱ, ཛཱཏརཱུཔསྶ ནིམྨིཏཱ;
དདྡལླམཱནཱ ཨཱབྷེནྟི, ཝིཛྫུཝབྦྷགྷནནྟརེ.
‘‘ཝིཏྟཱི ཧི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམེ ནུ མཙྩཱ ཀིམཀཾསུ སཱདྷུཾ, ཡེ མོདརེ སགྒཔཏྟཱ ཝིམཱནེ.
‘‘ཏསྶ ¶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པུཉྙཀམྨཱནཾ, ཛཱནཾ ཨཀྑཱསིཛཱནཏོ.
‘‘སདྡྷཱཡ སུནིཝིཊྛཱཡ, སདྡྷམྨེ སུཔྤཝེདིཏེ;
ཨཀཾསུ སཏྠུ ཝཙནཾ, སམྨཱསམྦུདྡྷསཱསནེ;
ཏེསཾ ཨེཏཱནི ཋཱནཱནི, ཡཱནི ཏྭཾ རཱཛ པསྶསཱི’’ཏི.
ཏཏྠ ཝེཧཱཡསཱམེཏི ཝེཧཱཡསཱ ཨིམེ ཨཱཀཱསེཡེཝ སཎྛིཏཱ. ཨཱཀཱསཊྛཀཝིམཱནཱ ཨིམེཏི ཝདཏི. ཝིཛྫུཝབྦྷགྷནནྟརེཏི གྷནཝལཱཧཀནྟརེ ཛལམཱནཱ ཝིཛྫུ ཝིཡ. སུནིཝིཊྛཱཡཱཏི མགྒེན ཨཱགཏཏྟཱ སུཔྤཏིཊྛིཏཱཡ. ཨིདཾ ཝུཏྟཾ ཧོཏི – མཧཱརཱཛ, ཨེཏེ པུརེ ནིཡྻཱནིཀེ ཀསྶཔབུདྡྷསཱསནེ པབྦཛིཏྭཱ པརིསུདྡྷསཱིལཱ སམཎདྷམྨཾ ཀརོནྟཱ སོཏཱཔཏྟིཕལཾ སཙྪིཀཏྭཱ ཨརཧཏྟཾ ནིབྦཏྟེཏུཾ ཨསཀྐོནྟཱ ཏཏོ ཙུཏཱ ཨིམེསུ ཀནཀཝིམཱནེསུ ཨུཔྤནྣཱ. ཨེཏེསཾ ཀསྶཔབུདྡྷསཱཝཀཱནཾ ཏཱནི ཋཱནཱནི, ཡཱནི ཏྭཾ, མཧཱརཱཛ, པསྶསཱིཏི.
ཨེཝམསྶ ¶ ཨཱཀཱསཊྛཀཝིམཱནཱནི དསྶེཏྭཱ སཀྐསྶ སནྟིཀཾ གམནཏྠཱཡ ཨུསྶཱཧཾ ཀརོནྟོ ཨཱཧ –
‘‘ཝིདིཏཱནི ཏེ མཧཱརཱཛ, ཨཱཝཱསཾ པཱཔཀམྨིནཾ;
ཨཐོ ཀལྱཱཎཀམྨཱནཾ, ཋཱནཱནི ཝིདིཏཱནི ཏེ;
ཨུཡྻཱཧི དཱནི རཱཛཱིསི, དེཝརཱཛསྶ སནྟིཀེ’’ཏི.
ཏཏྠ ཨཱཝཱསནྟི མཧཱརཱཛ, ཏཡཱ པཋམམེཝ ནེརཡིཀཱནཾ ཨཱཝཱསཾ དིསྭཱ པཱཔཀམྨཱནཾ ཋཱནཱནི ཝིདིཏཱནི, ཨིདཱནི པན ཨཱཀཱསཊྛཀཝིམཱནཱནི པསྶནྟེན ཨཐོ ཀལྱཱཎཀམྨཱནཾ ཋཱནཱནི ཝིདིཏཱནི, ཨིདཱནི དེཝརཱཛསྶ སནྟིཀེ སམྤཏྟིཾ དཊྛུཾ ཨུཡྻཱཧི གཙྪཱཧཱིཏི.
ཨེཝཉྩ ¶ པན ཝཏྭཱ པུརཏོ རཐཾ པེསེཏྭཱ སིནེརུཾ པརིཝཱརེཏྭཱ ཋིཏེ སཏྟ པརིབྷཎྜཔབྦཏེ དསྶེསི. ཏེ དིསྭཱ རཉྙཱ མཱཏལིསྶ པུཊྛབྷཱཝཾ ཨཱཝིཀརོནྟོ སཏྠཱ ཨཱཧ –
‘‘སཧསྶཡུཏྟཾ ¶ ཧཡཝཱཧིཾ, དིབྦཡཱནམདྷིཊྛིཏོ;
ཡཱཡམཱནོ མཧཱརཱཛཱ, ཨདྡཱ སཱིདནྟརེ ནགེ;
དིསྭཱནཱམནྟཡཱི སཱུཏཾ, ཨིམེ ཀེ ནཱམ པབྦཏཱ’’ཏི.
ཏཏྠ ཧཡཝཱཧིནྟི ཧཡེཧི ཝཱཧིཡམཱནཾ. དིབྦཡཱནམདྷིཊྛིཏོཏི དིབྦཡཱནེ ཋིཏོ ཧུཏྭཱ. ཨདྡཱཏི ཨདྡས. སཱིདནྟརེཏི སཱིདཱམཧཱསམུདྡསྶ ཨནྟརེ. ཏསྨིཾ ཀིར མཧཱསམུདྡེ ཨུདཀཾ སུཁུམཾ, མོརཔིཉྪམཏྟམྤི པཀྑིཏྟཾ པཏིཊྛཱཏུཾ ན སཀྐོཏི སཱིདཏེཝ, ཏསྨཱ སོ ‘‘སཱིདཱམཧཱསམུདྡོ’’ཏི ཝུཙྩཏི. ཏསྶ ཨནྟརེ. ནགེཏི པབྦཏེ. ཀེ ནཱམཱཏི ཀེ ནཱམ ནཱམེན ཨིམེ པབྦཏཱཏི.
ཨེཝཾ ནིམིརཉྙཱ པུཊྛོ མཱཏལི དེཝཔུཏྟོ ཨཱཧ –
‘‘སུདསྶནོ ཀརཝཱིཀོ, ཨཱིསདྷརོ ཡུགནྡྷརོ;
ནེམིནྡྷརོ ཝིནཏཀོ, ཨསྶཀཎྞོ གིརཱི བྲཧཱ.
‘‘ཨེཏེ སཱིདནྟརེ ནགཱ, ཨནུཔུབྦསམུགྒཏཱ;
མཧཱརཱཛཱནམཱཝཱསཱ, ཡཱནི ཏྭཾ རཱཛ པསྶསཱི’’ཏི.
ཏཏྠ སུདསྶནོཏི ཨཡཾ, མཧཱརཱཛ, ཨེཏེསཾ སབྦབཱཧིརོ སུདསྶནོ པབྦཏོ ནཱམ, ཏདནནྟརེ ཀརཝཱིཀོ ནཱམ, སོ སུདསྶནཏོ ཨུཙྩཏརོ ¶ . ཨུབྷིནྣམྤི པན ཏེསཾ ཨནྟརེ ཨེཀོཔི སཱིདནྟརམཧཱསམུདྡོ. ཀརཝཱིཀསྶ ཨནནྟརེ ཨཱིསདྷརོ ནཱམ, སོ ཀརཝཱིཀཏོ ཨུཙྩཏརོ. ཏེསམྤི ཨནྟརེ ཨེཀོ སཱིདནྟརམཧཱསམུདྡོ. ཨཱིསདྷརསྶ ཨནནྟརེ ཡུགནྡྷརོ ནཱམ, སོ ཨཱིསདྷརཏོ ཨུཙྩཏརོ. ཏེསམྤི ཨནྟརེ ཨེཀོ སཱིདནྟརམཧཱསམུདྡོ. ཡུགནྡྷརསྶ ཨནནྟརེ ནེམིནྡྷརོ ནཱམ, སོ ཡུགནྡྷརཏོ ཨུཙྩཏརོ. ཏེསམྤི ཨནྟརེ ཨེཀོ སཱིདནྟརམཧཱསམུདྡོ. ནེམིནྡྷརསྶ ཨནནྟརེ ཝིནཏཀོ ནཱམ, སོ ནེམིནྡྷརཏོ ཨུཙྩཏརོ. ཏེསམྤི ཨནྟརེ ཨེཀོ སཱིདནྟརམཧཱསམུདྡོ. ཝིནཏཀསྶ ཨནནྟརེ ཨསྶཀཎྞོ ནཱམ, སོ ཝིནཏཀཏོ ཨུཙྩཏརོ. ཏེསམྤི ཨནྟརེ ཨེཀོ སཱིདནྟརམཧཱསམུདྡོ. ཨནུཔུབྦསམུགྒཏཱཏི ཨེཏེ སཱིདནྟརམཧཱསམུདྡེ སཏྟ པབྦཏཱ ཨནུཔཊིཔཱཊིཡཱ སམུགྒཏཱ སོཔཱནསདིསཱ ཧུཏྭཱ ཋིཏཱ. ཡཱནཱིཏི ཡེ ཏྭཾ, མཧཱརཱཛ, ཨིམེ པབྦཏེ པསྶསི, ཨེཏེ ཙཏུཎྞཾ མཧཱརཱཛཱནཾ ཨཱཝཱསཱཏི.
ཨེཝམསྶ ¶ ཙཱཏུམཧཱརཱཛིཀདེཝལོཀཾ དསྶེཏྭཱ པུརཏོ རཐཾ པེསེཏྭཱ ཏཱཝཏིཾསབྷཝནསྶ ཙིཏྟཀཱུཊདྭཱརཀོཊྛཀཾ པརིཝཱརེཏྭཱ ཋིཏཱ ཨིནྡཔཊིམཱ དསྶེསི. ཏཾ དིསྭཱ རཱཛཱ པུཙྪི, ཨིཏརོཔིསྶ བྱཱཀཱསི.
‘‘ཨནེཀརཱུཔཾ རུཙིརཾ, ནཱནཱཙིཏྲཾ པཀཱསཏི;
ཨཱཀིཎྞཾ ཨིནྡསདིསེཧི, བྱགྒྷེཧེཝ སུརཀྑིཏཾ.
‘‘ཝིཏྟཱི ¶ ཧི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམཾ ནུ དྭཱརཾ ཀིམབྷཉྙམཱཧུ, མནོརམཾ དིསྶཏི དཱུརཏོཝ.
‘‘ཏསྶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པུཉྙཀམྨཱནཾ, ཛཱནཾ ཨཀྑཱསིཛཱནཏོ.
‘‘‘ཙིཏྲཀཱུཊོ’ཏི ཡཾ ཨཱཧུ, དེཝརཱཛཔཝེསནཾ;
སུདསྶནསྶ གིརིནོ, དྭཱརཉྷེཏཾ པཀཱསཏི.
‘‘ཨནེཀརཱུཔཾ ¶ རུཙིརཾ, ནཱནཱཙིཏྲཾ པཀཱསཏི;
ཨཱཀིཎྞཾ ཨིནྡསདིསེཧི, བྱགྒྷེཧེཝ སུརཀྑིཏཾ;
པཝིསེཏེན རཱཛཱིསི, ཨརཛཾ བྷཱུམིམཀྐམཱ’’ཏི.
ཏཏྠ ཨནེཀརཱུཔནྟི ཨནེཀཛཱཏིཀཾ. ནཱནཱཙིཏྲནྟི ནཱནཱརཏནཙིཏྲཾ. པཀཱསཏཱིཏི ཀིཾ ནཱམ ཨེཏཾ པཉྙཱཡཏི. ཨཱཀིཎྞནྟི སམྤརིཔུཎྞཾ. བྱགྒྷེཧེཝ སུརཀྑིཏནྟི ཡཐཱ ནཱམ བྱགྒྷེཧི ཝཱ སཱིཧེཧི ཝཱ མཧཱཝནཾ, ཨེཝཾ ཨིནྡསདིསེཧེཝ སུརཀྑིཏཾ. ཏཱསཉྩ པན ཨིནྡཔཊིམཱནཾ ཨཱརཀྑཎཏྠཱཡ ཋཔིཏབྷཱཝོ ཨེཀཀནིཔཱཏེ ཀུལཱཝཀཛཱཏཀེ (ཛཱ. ༡.༡.༣༡) ཝུཏྟནཡེན གཧེཏབྦོ. ཀིཾམབྷཉྙམཱཧཱུཏི ཀིནྣཱམཾ ཝདནྟི. པཝེསནནྟི ནིཀྑམནཔྤཝེསནཏྠཱཡ ནིམྨིཏཾ. སུདསྶནསྶཱཏི སོབྷནདསྶནསྶ སིནེརུགིརིནོ. དྭཱརཾ ཧེཏནྟི ཨེཏཾ སིནེརུམཏྠཀེ པཏིཊྛིཏསྶ དསསཧསྶཡོཛནིཀསྶ དེཝནགརསྶ དྭཱརཾ པཀཱསཏི, དྭཱརཀོཊྛཀོ པཉྙཱཡཏཱིཏི ཨཏྠོ. པཝིསེཏེནཱཏི ཨེཏེན དྭཱརེན དེཝནགརཾ པཝིས. ཨརཛཾ བྷཱུམིམཀྐམཱཏི ཨརཛཾ སུཝཎྞརཛཏམཎིམཡཾ ནཱནཱཔུཔྥེཧི སམཱཀིཎྞཾ དིབྦབྷཱུམིཾ དིབྦཡཱནེན ཨཀྐམ, མཧཱརཱཛཱཏི.
ཨེཝཉྩ ¶ པན ཝཏྭཱ མཱཏལི རཱཛཱནཾ དེཝནགརཾ པཝེསེསི. ཏེན ཝུཏྟཾ –
‘‘སཧསྶཡུཏྟཾ ཧཡཝཱཧིཾ, དིབྦཡཱནམདྷིཊྛིཏོ;
ཡཱཡམཱནོ མཧཱརཱཛཱ, ཨདྡཱ དེཝསབྷཾ ཨིད’’ནྟི.
སོ དིབྦཡཱནེ ཋིཏོཝ གཙྪནྟོ སུདྷམྨཱདེཝསབྷཾ དིསྭཱ མཱཏལིཾ པུཙྪི, སོཔིསྶ ཨཱཙིཀྑི.
‘‘ཡཐཱ སརདེ ཨཱཀཱསེ, ནཱིལོབྷཱསོ པདིསྶཏི;
ཏཐཱུཔམཾ ཨིདཾ བྱམྷཾ, ཝེལུ༹རིཡཱསུ ནིམྨིཏཾ.
‘‘ཝིཏྟཱི ཧི མཾ ཝིནྡཏི སཱུཏ དིསྭཱ, པུཙྪཱམི ཏཾ མཱཏལི དེཝསཱརཐི;
ཨིམཾ ནུ བྱམྷཾ ཀིམབྷཉྙམཱཧུ, མནོརམཾ དིསྶཏི དཱུརཏོཝ.
‘‘ཏསྶ ¶ པུཊྛོ ཝིཡཱཀཱསི, མཱཏལི དེཝསཱརཐི;
ཝིཔཱཀཾ པུཉྙཀམྨཱནཾ, ཛཱནཾ ཨཀྑཱསིཛཱནཏོ.
‘‘‘སུདྷམྨཱ’ ¶ ཨིཏི ཡཾ ཨཱཧུ, པསྶེསཱ དིསྶཏེ སབྷཱ;
ཝེལུ༹རིཡཱརུཙིརཱ ཙིཏྲཱ, དྷཱརཡནྟི སུནིམྨིཏཱ.
‘‘ཨཊྛཾསཱ སུཀཏཱ ཐམྦྷཱ, སབྦེ ཝེལུ༹རིཡཱམཡཱ;
ཡཏྠ དེཝཱ ཏཱཝཏིཾསཱ, སབྦེ ཨིནྡཔུརོཧིཏཱ.
‘‘ཨཏྠཾ དེཝམནུསྶཱནཾ, ཙིནྟཡནྟཱ སམཙྪརེ;
པཝིསེཏེན རཱཛཱིསི, དེཝཱནཾ ཨནུམོདནནྟི.
ཏཏྠ ཨིདནྟི ནིཔཱཏམཏྟཾ, དེཝསབྷཾ ཨདྡསཱཏི ཨཏྠོ. པསྶེསཱཏི པསྶ ཨེསཱ. ཝེལུ༹རིཡཱ རུཙིརཱཏི རུཙིརཝེལུ༹རིཡཱ. ཙིཏྲཱཏི ནཱནཱརཏནཝིཙིཏྲཱ. དྷཱརཡནྟཱིཏི ཨིམཾ སབྷཾ ཨེཏེ ཨཊྛཾསཱདིབྷེདཱ སུཀཏཱ ཐམྦྷཱ དྷཱརཡནྟི. ཨིནྡཔུརོཧིཏཱཏི ཨིནྡཾ པུརོཧིཏཾ པུརེཙཱརིཀཾ ཀཏྭཱ པརིཝཱརེཏྭཱ ¶ ཋིཏཱ དེཝམནུསྶཱནཾ ཨཏྠཾ ཙིནྟཡནྟཱ ཨཙྪནྟི. པཝིསེཏེནཱཏི ཨིམིནཱ མགྒེན ཡཏྠ དེཝཱ ཨཉྙམཉྙཾ ཨནུམོདནྟཱ ཨཙྪནྟི, ཏཾ ཋཱནཾ དེཝཱནཾ ཨནུམོདནཾ པཝིས.
དེཝཱཔི ཁོ ཏསྶཱགམནམགྒཾ ཨོལོཀེནྟཱཝ ནིསཱིདིཾསུ. ཏེ ‘‘རཱཛཱ ཨཱགཏོ’’ཏི སུཏྭཱ དིབྦགནྡྷཝཱསཔུཔྥཧཏྠཱ ཡཱཝ ཙིཏྟཀཱུཊདྭཱརཀོཊྛཀཱ པཊིམགྒཾ གནྟྭཱ མཧཱསཏྟཾ དིབྦགནྡྷམཱལཱདཱིཧི པཱུཛཡནྟཱ སུདྷམྨཱདེཝསབྷཾ ཨཱནཡིཾསུ. རཱཛཱ རཐཱ ཨོཏརིཏྭཱ དེཝསབྷཾ པཱཝིསི. དེཝཱ ཨཱསནེན ནིམནྟཡིཾསུ. སཀྐོཔི ཨཱསནེན ཙེཝ ཀཱམེཧི ཙ ནིམནྟེསི. ཏམཏྠཾ པཀཱསེནྟོ སཏྠཱ ཨཱཧ –
‘‘ཏཾ དེཝཱ པཊིནནྡིཾསུ, དིསྭཱ རཱཛཱནམཱགཏཾ;
སྭཱགཏཾ ཏེ མཧཱརཱཛ, ཨཐོ ཏེ ཨདུརཱགཏཾ;
ནིསཱིད དཱནི རཱཛཱིསི, དེཝརཱཛསྶ སནྟིཀེ.
‘‘སཀྐོཔི པཊིནནྡིཏྠ, ཝེདེཧཾ མིཐིལགྒཧཾ;
ནིམནྟཡིཏྠ ཀཱམེཧི, ཨཱསནེན ཙ ཝཱསཝོ.
‘‘སཱདྷུ ¶ ཁོསི ཨནུཔྤཏྟོ, ཨཱཝཱསཾ ཝསཝཏྟིནཾ;
ཝས དེཝེསུ རཱཛཱིསི, སབྦཀཱམསམིདྡྷིསུ;
ཏཱཝཏིཾསེསུ དེཝེསུ, བྷུཉྫ ཀཱམེ ཨམཱནུསེ’’ཏི.
ཏཏྠ པཊིནནྡིཾསཱུཏི སམྤིཡཱཡིཾསུ, ཧཊྛཏུཊྛཱཝ ཧུཏྭཱ སམྤཊིཙྪིཾསུ. སབྦཀཱམསམིདྡྷིསཱུཏི སབྦེསཾ ཀཱམཱནཾ སམིདྡྷིཡུཏྟེསུ.
ཨེཝཾ སཀྐེན དིབྦཀཱམེཧི ཙེཝ ཨཱསནེན ཙ ནིམནྟིཏོ རཱཛཱ པཊིཀྑིཔནྟོ ཨཱཧ –
‘‘ཡཐཱ ཡཱཙིཏཀཾ ཡཱནཾ, ཡཐཱ ཡཱཙིཏཀཾ དྷནཾ;
ཨེཝཾ སམྤདམེཝེཏཾ, ཡཾ པརཏོ དཱནཔཙྩཡཱ.
‘‘ན ¶ ཙཱཧམེཏམིཙྪཱམི, ཡཾ པརཏོ དཱནཔཙྩཡཱ;
སཡཾཀཏཱནི པུཉྙཱནི, ཏཾ མེ ཨཱཝེཎིཀཾ དྷནཾ.
‘‘སོཧཾ ¶ གནྟྭཱ མནུསྶེསུ, ཀཱཧཱམི ཀུསལཾ བཧུཾ;
དཱནེན སམཙརིཡཱཡ, སཾཡམེན དམེན ཙ;
ཡཾ ཀཏྭཱ སུཁིཏོ ཧོཏི, ན ཙ པཙྪཱནུཏཔྤཏཱི’’ཏི.
ཏཏྠ ཡཾ པརཏོ དཱནཔཙྩཡཱཏི ཡཾ པརཏོ ཏསྶ པརསྶ དཱནཔཙྩཡཱ ཏེན དིནྣཏྟཱ ལབྦྷཏི, ཏཾ ཡཱཙིཏཀསདིསཾ ཧོཏི, ཏསྨཱ ནཱཧཾ ཨེཏཾ ཨིཙྪཱམི. སཡཾཀཏཱནཱིཏི ཡཱནི པན མཡཱ ཨཏྟནཱ ཀཏཱནི པུཉྙཱནི, ཏམེཝ མམ པརེཧི ཨསཱདྷཱརཎཏྟཱ ཨཱཝེཎིཀཾ དྷནཾ ཨནུགཱམིཡདྷནཾ. སམཙརིཡཱཡཱཏི ཏཱིཧི དྭཱརེཧི སམཙརིཡཱཡ. སཾཡམེནཱཏི སཱིལརཀྑཎེན. དམེནཱཏི ཨིནྡྲིཡདམེན.
ཨེཝཾ མཧཱསཏྟོ དེཝཱནཾ མདྷུརསདྡེན དྷམྨཾ དེསེསི. དྷམྨཾ དེསེནྟོཡེཝ མནུསྶགཎནཱཡ སཏྟ དིཝསཱནི ཋཏྭཱ དེཝགཎཾ ཀོསེཏྭཱ དེཝགཎམཛ྄ཛྷེ ཋིཏོཝ མཱཏལིསྶ གུཎཾ ཀཐེནྟོ ཨཱཧ –
‘‘བཧཱུཔཀཱརོ ནོ བྷཝཾ, མཱཏལི དེཝསཱརཐི;
ཡོ མེ ཀལྱཱཎཀམྨཱནཾ, པཱཔཱནཾ པཊིདསྶཡཱི’’ཏི.
ཏཏྠ ¶ ཡོ མེ ཀལྱཱཎཀམྨཱནཾ, པཱཔཱནཾ པཊིདསྶཡཱིཏི ཡོ ཨེས མཡ྄ཧཾ ཀལྱཱཎཀམྨཱནཾ དེཝཱནཉྩ ཋཱནཱནི པཱཔཀམྨཱནཾ ནེརཡིཀཱནཉྩ པཱཔཱནི ཋཱནཱནི དསྶེསཱིཏི ཨཏྠོ.
སགྒཀཎྜཾ ནིཊྛིཏཾ.
ཨཐ རཱཛཱ སཀྐཾ ཨཱམནྟེཏྭཱ ‘‘ཨིཙྪཱམཧཾ, མཧཱརཱཛ, མནུསྶལོཀཾ གནྟུ’’ནྟི ཨཱཧ. སཀྐོ ‘‘ཏེན ཧི, སམྨ མཱཏལི, ནིམིརཱཛཱནཾ ཏཏྠེཝ མིཐིལཾ ནེཧཱི’’ཏི ཨཱཧ. སོ ‘‘སཱདྷཱུ’’ཏི སམྤཊིཙྪིཏྭཱ རཐཾ ཨུཔཊྛཱཔེསི. རཱཛཱ དེཝགཎེཧི སདྡྷིཾ སམྨོདིཏྭཱ དེཝེ ནིཝཏྟཱཔེཏྭཱ རཐཾ ཨབྷིརུཧི. མཱཏལི རཐཾ པེསེནྟོ པཱཙཱིནདིསཱབྷཱགེན མིཐིལཾ པཱཔུཎི. མཧཱཛནོ དིབྦརཐཾ དིསྭཱ ‘‘རཱཛཱ ནོ ཨཱགཏོ’’ཏི པམུདིཏོ ཨཧོསི. མཱཏལི མིཐིལཾ པདཀྑིཎཾ ཀཏྭཱ ཏསྨིཾཡེཝ སཱིཧཔཉྫརེ མཧཱསཏྟཾ ཨོཏཱརེཏྭཱ ‘‘གཙྪཱམཧཾ, མཧཱརཱཛཱ’’ཏི ཨཱཔུཙྪིཏྭཱ སཀཊྛཱནམེཝ གཏོ. མཧཱཛནོཔི རཱཛཱནཾ པརིཝཱརེཏྭཱ ‘‘ཀཱིདིསོ, དེཝ, དེཝལོཀོ’’ཏི པུཙྪི. རཱཛཱ དེཝཏཱནཉྩ སཀྐསྶ ཙ དེཝརཉྙོ སམྤཏྟིཾ ཝཎྞེཏྭཱ ‘‘ཏུམྷེཔི དཱནཱདཱིནི ¶ པུཉྙཱནི ཀརོཐ, ཨེཝཾ ཏསྨིཾ དེཝལོཀེ ནིབྦཏྟིསྶཐཱ’’ཏི མཧཱཛནསྶ དྷམྨཾ དེསེསི.
སོ ཨཔརབྷཱགེ ཀཔྤཀེན པལིཏསྶ ཛཱཏབྷཱཝེ ཨཱརོཙིཏེ པལིཏཾ སུཝཎྞསཎྜཱསེན ཨུདྡྷརཱཔེཏྭཱ ཧཏྠེ ཋཔེཏྭཱ ཀཔྤཀསྶ ¶ གཱམཝརཾ དཏྭཱ པབྦཛིཏུཀཱམོ ཧུཏྭཱ པུཏྟསྶ རཛྫཾ པཊིཙྪཱཔེསི. ཏེན ཙ ‘‘ཀསྨཱ, དེཝ, པབྦཛིསྶསཱི’’ཏི ཝུཏྟེ –
‘‘ཨུཏྟམངྒརུཧཱ མཡ྄ཧཾ, ཨིམེ ཛཱཏཱ ཝཡོཧརཱ;
པཱཧུབྷཱུཏཱ དེཝདཱུཏཱ, པབྦཛྫཱསམཡོ མམཱ’’ཏི. –
གཱཐཾ ཝཏྭཱ པུརིམརཱཛཱནོ ཝིཡ པབྦཛིཏྭཱ ཏསྨིཾཡེཝ ཨམྦཝནེ ཝིཧརནྟོ ཙཏྟཱརོ བྲཧྨཝིཧཱརེ བྷཱཝེཏྭཱ བྲཧྨལོཀཱུཔགོ ཨཧོསི. ཏསྶེཝཾ པབྦཛིཏབྷཱཝཾ ཨཱཝིཀརོནྟོ སཏྠཱ ཨོསཱནགཱཐམཱཧ –
‘‘ཨིདཾ ཝཏྭཱ ནིམིརཱཛཱ, ཝེདེཧོ མིཐིལགྒཧོ;
པུཐུཡཉྙཾ ཡཛིཏྭཱན, སཾཡམཾ ཨཛ྄ཛྷུཔཱགམཱི’’ཏི.
ཏཏྠ ¶ ཨིདཾ ཝཏྭཱཏི ‘‘ཨུཏྟམངྒརུཧཱ མཡ྄ཧ’’ནྟི ཨིམཾ གཱཐཾ ཝཏྭཱ. པུཐུཡཉྙཾ ཡཛིཏྭཱནཱཏི མཧཱདཱནཾ དཏྭཱ. སཾཡམཾ ཨཛ྄ཛྷུཔཱགམཱིཏི སཱིལསཾཡམཾ ཨུཔགཏོ.
པུཏྟོ པནསྶ ཀཱལཱ༹རཛནཀོ ནཱམ ཏཾ ཝཾསཾ ཨུཔཙྪིནྡི.
སཏྠཱ ཨིམཾ དྷམྨདེསནཾ ཨཱཧརིཏྭཱ ‘‘ན, བྷིཀྑཝེ, ཨིདཱནེཝ, པུབྦེཔི ཏཐཱགཏོ མཧཱབྷིནིཀྑམནཾ ནིཀྑནྟོཡེཝཱ’’ཏི ཝཏྭཱ ཛཱཏཀཾ སམོདྷཱནེསི ‘‘ཏདཱ སཀྐོ ཨནུརུདྡྷོ ཨཧོསི, མཱཏལི ཨཱནནྡོ, ཙཏུརཱསཱིཏི ཁཏྟིཡསཧསྶཱནི བུདྡྷཔརིསཱ, ནིམིརཱཛཱ པན ཨཧམེཝ སམྨཱསམྦུདྡྷོ ཨཧོསི’’ནྟི.
ནིམིཛཱཏཀཝཎྞནཱ ཙཏུཏྠཱ.
[༥༤༢] ༥. ཨུམངྒཛཱཏཀཝཎྞནཱ
པཉྩཱལོ ¶ ¶ སབྦསེནཱཡཱཏི ཨིདཾ སཏྠཱ ཛེཏཝནེ ཝིཧརནྟོ པཉྙཱཔཱརམིཾ ཨཱརབྦྷ ཀཐེསི. ཨེཀདིཝསཉྷི བྷིཀྑཱུ དྷམྨསབྷཱཡཾ སནྣིསིནྣཱ ཏཐཱགཏསྶ པཉྙཱཔཱརམིཾ ཝཎྞཡནྟཱ ནིསཱིདིཾསུ ‘‘མཧཱཔཉྙོ, ཨཱཝུསོ, ཏཐཱགཏོ པུཐུཔཉྙོ གམྦྷཱིརཔཉྙོ ཧཱསཔཉྙོ ཛཝནཔཉྙོ ཏིཀྑཔཉྙོ ནིབྦེདྷིཀཔཉྙོ པརཔྤཝཱདམདྡནོ, ཨཏྟནོ པཉྙཱནུབྷཱཝེན ཀཱུཊདནྟཱདཡོ བྲཱཧྨཎེ, སབྷིཡཱདཡོ པརིབྦཱཛཀེ, ཨངྒུལིམཱལཱདཡོ ཙོརེ, ཨཱལ༹ཝཀཱདཡོ ཡཀྑེ, སཀྐཱདཡོ དེཝེ, བཀཱདཡོ བྲཧྨཱནོ ཙ དམེཏྭཱ ནིབྦིསེཝནེ ཨཀཱསི, བཧུཛནཀཱཡེ པབྦཛྫཾ དཏྭཱ མགྒཕལེསུ པཏིཊྛཱཔེསི, ཨེཝཾ མཧཱཔཉྙོ, ཨཱཝུསོ, སཏྠཱ’’ཏི. སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ¶ ཝུཏྟེ ‘‘ན, བྷིཀྑཝེ, ཏཐཱགཏོ ཨིདཱནེཝ པཉྙཝཱ, ཨཏཱིཏེཔི ཨཔརིཔཀྐེ ཉཱཎེ བོདྷིཉཱཎཏྠཱཡ ཙརིཡཾ ཙརནྟོཔི པཉྙཝཱཡེཝཱ’’ཏི ཝཏྭཱ ཏེཧི ཡཱཙིཏོ ཨཏཱིཏཾ ཨཱཧརི.
ཨཏཱིཏེ ཝིདེཧརཊྛེ མིཐིལཱཡཾ ཝེདེཧོ ནཱམ རཱཛཱ རཛྫཾ ཀཱརེསི. ཏསྶ ཨཏྠདྷམྨཱནུསཱསཀཱ ཙཏྟཱརོ པཎྜིཏཱ ཨཧེསུཾ སེནཀོ, པུཀྐུསོ, ཀཱམིནྡོ, དེཝིནྡོ ཙཱཏི. ཏདཱ རཱཛཱ བོདྷིསཏྟསྶ པཊིསནྡྷིགྒཧཎདིཝསེ པཙྩཱུསཀཱལེ ཨེཝརཱུཔཾ སུཔིནཾ ཨདྡས – རཱཛངྒཎེ ཙཏཱུསུ ཀོཎེསུ ཙཏྟཱརོ ཨགྒིཀྑནྡྷཱ མཧཱཔཱཀཱརཔྤམཱཎཱ ཨུཊྛཱཡ པཛྫལནྟི. ཏེསཾ མཛ྄ཛྷེ ཁཛྫོཔནཀཔྤམཱཎོ ཨགྒིཀྑནྡོ ཨུཊྛཧིཏྭཱ ཏངྑཎཉྙེཝ ཙཏྟཱརོ ཨགྒིཀྑནྡྷེ ཨཏིཀྐམིཏྭཱ ཡཱཝ བྲཧྨལོཀཱ ཨུཊྛཱཡ སཀལཙཀྐཝཱལ༹ཾ ཨོབྷཱསེཏྭཱ ཋིཏོ, བྷཱུམིཡཾ པཏིཏོ སཱསཔབཱིཛམཏྟམྤི པཉྙཱཡཏི. ཏཾ སདེཝཀཱ ལོཀཱ སམཱརཀཱ སབྲཧྨཀཱ གནྡྷམཱལཱདཱིཧི པཱུཛེནྟི, མཧཱཛནོ ཛཱལནྟརེནེཝ ཙརཏི, ལོམཀཱུཔམཏྟམྤི ཨུཎྷཾ ན གཎྷཱཏི. རཱཛཱ ཨིམཾ སུཔིནཾ དིསྭཱ བྷཱིཏཏསིཏོ ཨུཊྛཱཡ ‘‘ཀིཾ ནུ ཁོ མེ བྷཝིསྶཏཱི’’ཏི ཙིནྟེནྟོ ནིསིནྣཀོཝ ཨརུཎཾ ཨུཊྛཱཔེསི.
ཙཏྟཱརོཔི པཎྜིཏཱ པཱཏོཝཱགནྟྭཱ ‘‘ཀཙྩི, དེཝ, སུཁཾ སཡིཏྠཱ’’ཏི སུཁསེཡྻཾ པུཙྪིཾསུ. སོ ‘‘ཀུཏོ མེ སུཁསེཡྻཾ ལདྡྷ’’ནྟི ཝཏྭཱ ‘‘ཨེཝརཱུཔོ ¶ མེ སུཔིནོ དིཊྛོ’’ཏི སབྦཾ ཀཐེསི. ཨཐ ནཾ སེནཀཔཎྜིཏོ ‘‘མཱ བྷཱཡི, མཧཱརཱཛ, མངྒལསུཔིནོ ཨེས, ཝུདྡྷི ཝོ བྷཝིསྶཏཱི’’ཏི ¶ ཝཏྭཱ ‘‘ཀིཾ ཀཱརཎཱ ཨཱཙརིཡཱ’’ཏི ཝུཏྟེ ‘‘མཧཱརཱཛ, ཨམྷེ ཙཏྟཱརོ པཎྜིཏེ ཨབྷིབྷཝིཏྭཱ ཨཉྙོ ཝོ པཉྩམོ པཎྜིཏོ ཨུཔྤཛྫིསྶཏི, མཡཉྷི ཙཏྟཱརོ པཎྜིཏཱ ཙཏྟཱརོ ཨགྒིཀྑནྡྷཱ ཝིཡ, ཏེསཾ མཛ྄ཛྷེ ཨུཔྤནྣོ ཨགྒིཀྑནྡྷོ ཝིཡ ཨཉྙོ པཉྩམོ པཎྜིཏོ ཨུཔྤཛྫིསྶཏི, སོ སདེཝཀེ ལོཀེ ཨསདིསོ བྷཝིསྶཏཱི’’ཏི ཝཏྭཱ ‘‘ཨིདཱནི པནེས ཀུཧི’’ནྟི ཝུཏྟེ ‘‘མཧཱརཱཛ, ཨཛྫ ཏསྶ པཊིསནྡྷིགྒཧཎེན ཝཱ མཱཏུཀུཙྪིཏོ ནིཀྑམནེན ཝཱ བྷཝིཏབྦ’’ནྟི ཨཏྟནོ སིཔྤབལེན དིབྦཙཀྑུནཱ དིཊྛོ ཝིཡ བྱཱཀཱསི. རཱཛཱཔི ཏཏོ པཊྛཱཡ ཏཾ ཝཙནཾ ཨནུསྶརི.
མིཐིལཱཡཾ པན ཙཏཱུསུ དྭཱརེསུ པཱཙཱིནཡཝམཛ྄ཛྷཀོ, དཀྑིཎཡཝམཛ྄ཛྷཀོ, པཙྪིམཡཝམཛ྄ཛྷཀོ, ཨུཏྟརཡཝམཛ྄ཛྷཀོཏི ཙཏྟཱརོ གཱམཱ ཨཧེསུཾ. ཏེསུ པཱཙཱིནཡཝམཛ྄ཛྷཀེ ¶ སིརིཝཌྜྷནོ ནཱམ སེཊྛི པཊིཝསཏི, སུམནདེཝཱི ནཱམསྶ བྷརིཡཱ ཨཧོསི. མཧཱསཏྟོ ཏཾ དིཝསཾ རཉྙཱ སུཔིནསྶ དིཊྛཝེལཱཡ ཏཱཝཏིཾསབྷཝནཏོ ཙཝིཏྭཱ ཏསྶཱ ཀུཙྪིམྷི པཊིསནྡྷིཾ གཎྷི. ཏསྨིཾཡེཝ ཀཱལེ ཨཔརེཔི དེཝཔུཏྟསཧསྶཱ ཏཱཝཏིཾསབྷཝནཏོ ཙཝིཏྭཱ ཏསྨིཾཡེཝ གཱམེ སེཊྛཱནུསེཊྛཱིནཾ ཀུལེསུ པཊིསནྡྷིཾ གཎྷིཾསུ. སུམནདེཝཱིཔི དསམཱསཙྩཡེན སུཝཎྞཝཎྞཾ པུཏྟཾ ཝིཛཱཡི. ཏསྨིཾ ཁཎེ སཀྐོ མནུསྶལོཀཾ ཨོལོཀེནྟོ མཧཱསཏྟསྶ མཱཏུཀུཙྪིཏོ ནིཀྑམནབྷཱཝཾ ཉཏྭཱ ‘‘ཨིམཾ བུདྡྷངྐུརཾ སདེཝཀེ ལོཀེ པཱཀཊཾ ཀཱཏུཾ ཝཊྚཏཱི’’ཏི མཧཱསཏྟསྶ མཱཏུཀུཙྪིཏོ ནིཀྑནྟཀྑཎེ ཨདིསྶམཱནཀཱཡེན གནྟྭཱ ཏསྶ ཧཏྠེ ཨེཀཾ ཨོསདྷགྷཊིཀཾ ཋཔེཏྭཱ སཀཊྛཱནམེཝ གཏོ. མཧཱསཏྟོ ཏཾ མུཊྛིཾ ཀཏྭཱ གཎྷི. ཏསྨིཾ པན མཱཏུཀུཙྪིཏོ ནིཀྑནྟེ མཱཏུ ཨཔྤམཏྟཀམྤི དུཀྑཾ ནཱཧོསི, དྷམཀརཎཏོ ཨུདཀམིཝ སུཁེན ནིཀྑམི.
སཱ ཏསྶ ཧཏྠེ ཨོསདྷགྷཊིཀཾ དིསྭཱ ‘‘ཏཱཏ, ཀིཾ ཏེ ལདྡྷ’’ནྟི ཨཱཧ. ‘‘ཨོསདྷཾ, ཨམྨཱ’’ཏི དིབྦོསདྷཾ མཱཏུ ཧཏྠེ ཋཔེསི. ཋཔེཏྭཱ ཙ པན ‘‘ཨམྨ, ཨིདཾ ཨོསདྷཾ ཡེན ཀེནཙི ཨཱབཱདྷེན ཨཱབཱདྷིཀཱནཾ དེཐཱ’’ཏི ཨཱཧ. སཱ ཏུཊྛཔཧཊྛཱ སིརིཝཌྜྷནསེཊྛིནོ ཨཱརོཙེསི. ཏསྶ པན སཏྟཝསྶིཀོ སཱིསཱབཱདྷོ ཨཏྠི. སོ ཏུཊྛཔཧཊྛོ ཧུཏྭཱ ‘‘ཨཡཾ མཱཏུཀུཙྪིཏོ ¶ ཛཱཡམཱནོ ཨོསདྷཾ གཧེཏྭཱ ཨཱགཏོ, ཛཱཏཀྑཎེཡེཝ མཱཏརཱ སདྡྷིཾ ཀཐེསི, ཨེཝརཱུཔེན པུཉྙཝཏཱ དིནྣཾ ཨོསདྷཾ མཧཱནུབྷཱཝཾ བྷཝིསྶཏཱི’’ཏི ཙིནྟེཏྭཱ ཏཾ ཨོསདྷཾ གཧེཏྭཱ ནིསདཱཡཾ གྷཾསིཏྭཱ ཐོཀཾ ནལཱཊེ མཀྑེསི. ཏསྨིཾ ཁཎེ ཏསྶ སཏྟཝསྶིཀོ སཱིསཱབཱདྷོ པདུམཔཏྟཏོ ཨུདཀཾ ཝིཡ ནིཝཏྟིཏྭཱ གཏོ. སོ ‘‘མཧཱནུབྷཱཝཾ ཨོསདྷ’’ནྟི སོམནསྶཔྤཏྟོ ཨཧོསི. མཧཱསཏྟསྶ ཨོསདྷཾ གཧེཏྭཱ ཨཱགཏབྷཱཝོ སབྦཏྠ པཱཀཊོ ཛཱཏོ. ཡེ ཀེཙི ཨཱབཱདྷིཀཱ, སབྦེ སེཊྛིསྶ གེཧཾ གནྟྭཱ ཨོསདྷཾ ཡཱཙནྟི. སབྦེསཾ ནིསདཱཡཾ གྷཾསིཏྭཱ ཐོཀཾ གཧེཏྭཱ ཨུདཀེན ཨཱལོ༹ལེཏྭཱ དེཏི ¶ . དིབྦོསདྷེན སརཱིརེ མཀྑིཏམཏྟེཡེཝ སབྦཱབཱདྷཱ ཝཱུཔསམྨནྟི. སུཁིཏཱ མནུསྶཱ ‘‘སིརིཝཌྜྷནསེཊྛིནོ གེཧེ ཨོསདྷསྶ མཧནྟོ ཨཱནུབྷཱཝོ’’ཏི ཝཎྞཡནྟཱ པཀྐམིཾསུ. མཧཱསཏྟསྶ པན ནཱམགྒཧཎདིཝསེ ¶ མཧཱསེཊྛི ‘‘མམ པུཏྟསྶ ཨཡྻཀཱདཱིནཾ ན ནཱམེན ཨཏྠོ ཨཏྠི, ཛཱཡམཱནསྶ ཨོསདྷཾ གཧེཏྭཱ ཨཱགཏཏྟཱ ཨོསདྷནཱམཀོཝ ཧོཏཱུ’’ཏི ཝཏྭཱ ‘‘མཧོསདྷཀུམཱརོ’’ཏྭེཝསྶ ནཱམམཀཱསི.
ཨིདཉྩསྶ ཨཧོསི ‘‘མམ པུཏྟོ མཧཱཔུཉྙོ, ན ཨེཀཀོཝ ནིབྦཏྟིསྶཏི, ཨིམིནཱ སདྡྷིཾ ཛཱཏདཱརཀེཧི བྷཝིཏབྦ’’ནྟི. སོ ཨོལོཀཱཔེནྟོ དཱརཀསཧསྶཱནཾ ནིབྦཏྟབྷཱཝཾ སུཏྭཱ སབྦེསམྤི ཀུམཱརཀཱནཾ པིལ༹ནྡྷནཱནི དཏྭཱ དྷཱཏིཡོ དཱཔེསི ‘‘པུཏྟསྶ མེ ཨུཔཊྛཱཀཱ བྷཝིསྶནྟཱི’’ཏི. བོདྷིསཏྟེན སདྡྷིཾཡེཝ ཏེསཾ མངྒལཊྛཱནེ མངྒལཾ ཀཱརེསི. དཱརཀེ ཨལངྐརིཏྭཱ མཧཱསཏྟསྶ ཨུཔཊྛཱཏུཾ ཨཱནེནྟི. བོདྷིསཏྟོ ཏེཧི སདྡྷིཾ ཀཱིལ༹ནྟོ ཝཌྜྷིཏྭཱ སཏྟཝསྶིཀཀཱལེ སུཝཎྞཔཊིམཱ ཝིཡ ཨབྷིརཱུཔོ ཨཧོསི. ཨཐསྶ གཱམམཛ྄ཛྷེ ཏེཧི སདྡྷིཾ ཀཱིལ༹ནྟསྶ ཧཏྠིཨསྶཱདཱིསུ ཨཱགཙྪནྟེསུ ཀཱིལཱ༹མཎྜལཾ བྷིཛྫཏི. ཝཱཏཱཏཔཔཧརཎཀཱལེ དཱརཀཱ ཀིལམནྟི. ཨེཀདིཝསཉྩ ཏེསཾ ཀཱིལ༹ནྟཱནཾཡེཝ ཨཀཱལམེགྷོ ཨུཊྛཧི. ཏཾ དིསྭཱ ནཱགབལོ བོདྷིསཏྟོ དྷཱཝིཏྭཱ ཨེཀསཱལཾ པཱཝིསི. ཨིཏརེ དཱརཀཱ པཙྪཏོ དྷཱཝནྟཱ ཨཉྙམཉྙསྶ པཱདེསུ པཧརིཏྭཱ ཨུཔཀྑལིཏྭཱ པཏིཏཱ ཛཎྞུཀབྷེདཱདཱིནི པཱཔུཎིཾསུ. བོདྷིསཏྟོཔི ‘‘ཨིམསྨིཾ ཋཱནེ ཀཱིལཱ༹སཱལཾ ཀཱཏུཾ ཝཊྚཏི, ཨེཝཾ ཝཱཏེ ཝཱ ཝསྶེ ¶ ཝཱ ཨཱཏཔེ ཝཱ ཨཱགཏེ ན ཀིལམིསྶཱམཱ’’ཏི ཙིནྟེཏྭཱ ཏེ དཱརཀེ ཨཱཧ – ‘‘སམྨཱ, ཨིམསྨིཾ ཋཱནེ ཝཱཏེ ཝཱ ཝསྶེ ཝཱ ཨཱཏཔེ ཝཱ ཨཱགཏེ ཋཱནནིསཛྫསཡནཀྑམཾ ཨེཀཾ སཱལཾ ཀཱརེསྶཱམ, ཨེཀེཀཾ ཀཧཱཔཎཾ ཨཱཧརཐཱ’’ཏི. ཏེ ཏཐཱ ཀརིཾསུ.
མཧཱསཏྟོ མཧཱཝཌྜྷཀིཾ པཀྐོསཱཔེཏྭཱ ‘‘ཨིམསྨིཾ ཋཱནེ སཱལཾ ཀརོཧཱི’’ཏི སཧསྶཾ ཨདཱསི. སོ ‘‘སཱདྷཱུ’’ཏི སམྤཊིཙྪིཏྭཱ སཧསྶཾ གཧེཏྭཱ ཁཱཎུཀཎྚཀེ ཀོཊྚེཏྭཱ བྷཱུམིཾ སམཾ ཀཱརེཏྭཱ སུཏྟཾ པསཱརེསི. མཧཱསཏྟོ ཏསྶ སུཏྟཔསཱརཎཝིདྷཱནཾ ཨནཱརཱདྷེནྟོ ‘‘ཨཱཙརིཡ, ཨེཝཾ ཨཔསཱརེཏྭཱ སཱདྷུཀཾ པསཱརེཧཱི’’ཏི ཨཱཧ. སཱམི, ཨཧཾ ཨཏྟནོ སིཔྤཱནུརཱུཔེན པསཱརེསིཾ, ཨིཏོ ཨཉྙཾ ན ཛཱནཱམཱིཏི. ‘ཨེཏྟཀཾ ཨཛཱནནྟོ ཏྭཾ ཨམྷཱཀཾ དྷནཾ གཧེཏྭཱ སཱལཾ ཀཐཾ ཀརིསྶསི, ཨཱཧར, སུཏྟཾ པསཱརེཏྭཱ ཏེ དསྶཱམཱི’’ཏི ཨཱཧརཱཔེཏྭཱ སཡཾ སུཏྟཾ པསཱརེསི. ཏཾ ཝིསྶཀམྨདེཝཔུཏྟསྶ པསཱརིཏཾ ཝིཡ ¶ ཨཧོསི. ཏཏོ ཝཌྜྷཀིཾ ཨཱཧ ‘‘ཨེཝཾ པསཱརེཏུཾ སཀྑིསྶསཱི’’ཏི? ‘‘ན སཀྑིསྶཱམཱི’’ཏི. ‘‘མམ ཝིཙཱརཎཱཡ པན ཀཱཏུཾ སཀྑིསྶསཱི’’ཏི. ‘‘སཀྑིསྶཱམི, སཱམཱི’’ཏི. མཧཱསཏྟོ ཡཐཱ ཏསྶཱ སཱལཱཡ ཨེཀསྨིཾ པདེསེ ཨནཱཐཱནཾ ཝསནཊྛཱནཾ ¶ ཧོཏི, ཨེཀསྨིཾ ཨནཱཐཱནཾ ཨིཏྠཱིནཾ ཝིཛཱཡནཊྛཱནཾ, ཨེཀསྨིཾ ཨཱགནྟུཀསམཎབྲཱཧྨཎཱནཾ ཝསནཊྛཱནཾ, ཨེཀསྨིཾ ཨཱགནྟུཀམནུསྶཱནཾ ཝསནཊྛཱནཾ, ཨེཀསྨིཾ ཨཱགནྟུཀཝཱཎིཛཱནཾ བྷཎྜཊྛཔནཊྛཱནཾ ཧོཏི, ཏཐཱ སབྦཱནི ཋཱནཱནི བཧིམུཁཱནི ཀཏྭཱ སཱལཾ ཝིཙཱརེསི. ཏཏྠེཝ ཀཱིལཱ༹མཎྜལཾ, ཏཏྠེཝ ཝིནིཙྪཡཾ, ཏཏྠེཝ དྷམྨསབྷཾ ཀཱརེསི. ཀཏིཔཱཧེནེཝ ནིཊྛིཏཱཡ སཱལཱཡ ཙིཏྟཀཱརེ པཀྐོསཱཔེཏྭཱ སཡཾ ཝིཙཱརེཏྭཱ རམཎཱིཡཾ ཙིཏྟཀམྨཾ ཀཱརེསི. སཱལཱ སུདྷམྨཱདེཝསབྷཱཔཊིབྷཱགཱ ཨཧོསི.
ཏཏོ ‘‘ན ཨེཏྟཀེན སཱལཱ སོབྷཏི, པོཀྑརཎིཾ པན ཀཱརེཏུཾ ཝཊྚཏཱི’’ཏི པོཀྑརཎིཾ ཁཎཱཔེཏྭཱ ཨིཊྛཀཝཌྜྷཀིཾ པཀྐོསཱཔེཏྭཱ སཡཾ ཝིཙཱརེཏྭཱ སཧསྶཝངྐཾ སཏཏིཏྠཾ པོཀྑརཎིཾ ཀཱརེསི. སཱ པཉྩཝིདྷཔདུམསཉྪནྣཱ ནནྡཱཔོཀྑརཎཱི ཝིཡ ཨཧོསི. ཏསྶཱ ཏཱིརེ པུཔྥཕལདྷརེ ནཱནཱརུཀྑེ རོཔཱཔེཏྭཱ ནནྡནཝནཀཔྤཾ ཨུཡྻཱནཾ ཀཱརེསི. ཏམེཝ ཙ སཱལཾ ནིསྶཱཡ དྷམྨིཀསམཎབྲཱཧྨཎཱནཉྩེཝ ཨཱགནྟུཀགམིཀཱདཱིནཉྩ དཱནཝཏྟཾ པཊྛཔེསི. ཏསྶ སཱ ཀིརིཡཱ སབྦཏྠ པཱཀཊཱ ཨཧོསི ¶ . བཧཱུ མནུསྶཱ ཨོསརནྟི. མཧཱསཏྟོ སཱལཱཡ ནིསཱིདིཏྭཱ སམྤཏྟསམྤཏྟཱནཾ ཀཱརཎཱཀཱརཎཾ ཡུཏྟཱཡུཏྟཾ ཀཐེསི, ཝིནིཙྪཡཾ ཋཔེསི, བུདྡྷུཔྤཱདཀཱལོ ཝིཡ ཨཧོསི.
ཝེདེཧརཱཛཱཔི སཏྟཝསྶཙྩཡེན ‘‘ཙཏྟཱརོ པཎྜིཏཱ ‘ཨམྷེ ཨབྷིབྷཝིཏྭཱ པཉྩམོ པཎྜིཏོ ཨུཔྤཛྫིསྶཏཱི’ཏི མེ ཀཐཡིཾསུ, ཀཏྠ སོ ཨེཏརཧཱི’’ཏི སརིཏྭཱ ‘‘ཏསྶ ཝསནཊྛཱནཾ ཛཱནཱཐཱ’’ཏི ཙཏཱུཧི དྭཱརེཧི ཙཏྟཱརོ ཨམཙྩེ པེསེསི. སེསདྭཱརེཧི ནིཀྑནྟཱ ཨམཙྩཱ མཧཱསཏྟཾ ན པསྶིཾསུ. པཱཙཱིནདྭཱརེན ནིཀྑནྟོ ཨམཙྩོ པན སཱལཱདཱིནི དིསྭཱ ‘‘པཎྜིཏེན ནཱམ ཨིམིསྶཱ སཱལཱཡ ཀཱརཀེན ཝཱ ཀཱརཱཔཀེན ཝཱ བྷཝིཏབྦ’’ནྟི ¶ ཙིནྟེཏྭཱ མནུསྶེ པུཙྪི ‘‘ཨཡཾ སཱལཱ ཀཏརཝཌྜྷཀིནཱ ཀཏཱ’’ཏི? མནུསྶཱ ‘‘ནཱཡཾ ཝཌྜྷཀིནཱ ཀཏཱ, སིརིཝཌྜྷནསེཊྛིཔུཏྟེན མཧོསདྷཔཎྜིཏེན ཨཏྟནོ པཉྙཱབལེན ཝིཙཱརེཏྭཱ ཀཏཱ’’ཏི ཝདིཾསུ. ‘‘ཀཏིཝསྶོ པན པཎྜིཏོ’’ཏི? ‘‘པརིཔུཎྞསཏྟཝསྶོ’’ཏི. ཨམཙྩོ རཉྙཱ དིཊྛསུཔིནདིཝསཏོ པཊྛཱཡ ཝསྶཾ གཎེཏྭཱ ‘‘རཉྙོ དིཊྛསུཔིནེན སམེཏི, ཨཡམེཝ སོ པཎྜིཏོ’’ཏི རཉྙོ དཱུཏཾ པེསེསི ‘‘དེཝ, པཱཙཱིནཡཝམཛ྄ཛྷཀགཱམེ སིརིཝཌྜྷནསེཊྛིཔུཏྟོ མཧོསདྷཔཎྜིཏོ ནཱམ སཏྟཝསྶིཀོཝ སམཱནོ ཨེཝརཱུཔཾ ནཱམ སཱལཾ ཝིཙཱརེསི, པོཀྑརཎིཾ ཨུཡྻཱནཉྩ ཀཱརེསི, ཨིམཾ པཎྜིཏཾ གཧེཏྭཱ ཨཱནེམཱི’’ཏི. རཱཛཱ ཏཾ ཀཐཾ སུཏྭཱཝ ཏུཊྛཙིཏྟོ ཧུཏྭཱ སེནཀཾ པཀྐོསཱཔེཏྭཱ ཏམཏྠཾ ཨཱརོཙེཏྭཱ ‘‘ཀིཾ, ཨཱཙརིཡ, ཨཱནེམ པཎྜིཏ’’ནྟི པུཙྪི. སོ ལཱབྷཾ མཙྪརཱཡནྟོ ‘‘མཧཱརཱཛ, སཱལཱདཱིནཾ ཀཱརཱཔིཏམཏྟེན པཎྜིཏོ ནཱམ ན ཧོཏི, ཡོ ཀོཙི ཨེཏཱནི ཀཱརེཏི, ཨཔྤམཏྟཀཾ ཨེཏ’’ནྟི ཨཱཧ. སོ ཏསྶ ཀཐཾ སུཏྭཱ ‘‘བྷཝིཏབྦམེཏྠ ¶ ཀཱརཎེནཱ’’ཏི ཏུཎྷཱི ཧུཏྭཱ ‘‘ཏཏྠེཝ ཝསནྟོ པཎྜིཏཾ ཝཱིམཾསཏཱུ’’ཏི ཨམཙྩསྶ དཱུཏཾ པཊིཔེསེསི. ཏཾ སུཏྭཱ ཨམཙྩོ ཏཏྠེཝ ཝསནྟོ པཎྜིཏཾ ཝཱིམཾསི.
སཏྟདཱརཀཔཉྷོ
ཏཏྲིདཾ ཝཱིམཾསནུདྡཱནཾ –
‘‘མཾསཾ གོཎོ གནྠི སུཏྟཾ, པུཏྟོ གོཏོ རཐེན ཙ;
དཎྜོ སཱིསཾ ཨཧཱི ཙེཝ, ཀུཀྐུཊོ མཎི ཝིཛཱཡནཾ;
ཨོདནཾ ཝཱལུཀཉྩཱཔི, ཏལཱ༹ཀུཡྻཱནཾ གདྲབྷོ མཎཱི’’ཏི.
ཏཏྠ ¶ མཾསནྟི ཨེཀདིཝསཾ བོདྷིསཏྟེ ཀཱིལཱ༹མཎྜལཾ གཙྪནྟེ ཨེཀོ སེནོ སཱུནཕལཀཏོ མཾསཔེསིཾ གཧེཏྭཱ ཨཱཀཱསཾ པཀྑནྡི. ཏཾ དིསྭཱ དཱརཀཱ ‘‘མཾསཔེསིཾ ཚཌྜཱཔེསྶཱམཱ’’ཏི སེནཾ ཨནུབནྡྷིཾསུ. སེནོ ཨིཏོ ཙིཏོ ཙ དྷཱཝཏི. ཏེ ཨུདྡྷཾ ཨོལོཀེཏྭཱ ཏསྶ པཙྪཏོ པཙྪཏོ གཙྪནྟཱ པཱསཱཎཱདཱིསུ ཨུཔཀྑལིཏྭཱ ཀིལམནྟི. ཨཐ ནེ པཎྜིཏོ ཨཱཧ ‘‘ཚཌྜཱཔེསྶཱམི ན’’ནྟི. ‘‘ཚཌྜཱཔེཧི སཱམཱི’’ཏི. ‘‘ཏེན ཧི པསྶཐཱ’’ཏི སོ ཨུདྡྷཾ ཨནོལོཀེཏྭཱཝ ཝཱཏཝེགེན དྷཱཝིཏྭཱ སེནསྶ ཚཱཡཾ ཨཀྐམིཏྭཱ པཱཎིཾ པཧརིཏྭཱ མཧཱརཝཾ རཝི. ཏསྶ ཏེཛེན སོ སདྡོ སེནསྶ ཀུཙྪིཡཾ ཝིནིཝིཛ྄ཛྷིཏྭཱ ནིཙྪཱརིཏོ ཝིཡ ཨཧོསི. སོ བྷཱིཏོ མཾསཾ ཚཌྜེསི. མཧཱསཏྟོ ཚཌྜིཏབྷཱཝཾ ཉཏྭཱ ཚཱཡཾ ཨོལོཀེནྟོཝ བྷཱུམིཡཾ པཏིཏུཾ ¶ ཨདཏྭཱ ཨཱཀཱསེཡེཝ སམྤཊིཙྪི. ཏཾ ཨཙྪརིཡཾ དིསྭཱ མཧཱཛནོ ནདནྟོ ཝགྒནྟོ ཨཔྥོཊེནྟོ མཧཱསདྡཾ ཨཀཱསི. ཨམཙྩོ ཏཾ པཝཏྟིཾ ཉཏྭཱ རཉྙོ དཱུཏཾ པེསེསི ‘‘པཎྜིཏོ ཨིམིནཱ ཨུཔཱཡེན མཾསཔེསིཾ ཚཌྜཱཔེསི, ཨིདཾ དེཝོ ཛཱནཱཏཱུ’’ཏི. ཏཾ སུཏྭཱ རཱཛཱ སེནཀཾ པུཙྪི ‘‘ཀིཾ, སེནཀ, ཨཱནེམ པཎྜིཏ’’ནྟི? སོ ཙིནྟེསི ‘‘ཏསྶ ཨིདྷཱགཏཀཱལཏོ པཊྛཱཡ མཡཾ ནིཔྤབྷཱ བྷཝིསྶཱམ, ཨཏྠིབྷཱཝམྤི ནོ རཱཛཱ ན ཛཱནིསྶཏི, ན ཏཾ ཨཱནེཏུཾ ཝཊྚཏཱི’’ཏི. སོ བལཝལཱབྷམཙྪརིཡཏཱཡ ‘‘མཧཱརཱཛ, ཨེཏྟཀེན པཎྜིཏོ ནཱམ ན ཧོཏི, ཨཔྤམཏྟཀཾ ཀིཉྩི ཨེཏ’’ནྟི ཨཱཧ. རཱཛཱ མཛ྄ཛྷཏྟོཝ ཧུཏྭཱ ‘‘ཏཏྠེཝ ནཾ ཝཱིམཾསཏཱུ’’ཏི པུན པེསེསི.
གོཎོཏི ཨེཀོ པཱཙཱིནཡཝམཛ྄ཛྷཀགཱམཝཱསཱི པུརིསོ ‘‘ཝསྶེ པཏིཏེ ཀསིསྶཱམཱི’’ཏི གཱམནྟརཏོ གོཎེ ཀིཎིཏྭཱ ཨཱནེཏྭཱ གེཧེ ཝསཱཔེཏྭཱ པུནདིཝསེ གོཙརཏྠཱཡ ཏིཎབྷཱུམིཾ ཨཱནེཏྭཱ གོཎཔིཊྛེ ནིསིནྣོ ཀིལནྟརཱུཔོ ཨོཏརིཏྭཱ རུཀྑམཱུལེ ནིཔནྣོཝ ནིདྡཾ ཨོཀྐམི. ཏསྨིཾ ཁཎེ ཨེཀོ ཙོརོ གོཎེ གཧེཏྭཱ པལཱཡི. སོ པབུཛ྄ཛྷིཏྭཱ གོཎེ ཨཔསྶནྟོ ཨིཏོ ཙིཏོ ¶ ཙ ཨོལོཀེཏྭཱ གོཎེ གཧེཏྭཱ པལཱཡནྟཾ ཙོརཾ དིསྭཱ ཝེགེན པཀྑནྡིཏྭཱ ‘‘ཀུཧིཾ མེ གོཎེ ནེསཱི’’ཏི ཨཱཧ. ‘‘མམ གོཎེ ཨཏྟནོ ཨིཙྪིཏཊྛཱནཾ ནེམཱི’’ཏི. ཏེསཾ ཝིཝཱདཾ སུཏྭཱ མཧཱཛནོ སནྣིཔཏི. པཎྜིཏོ ཏེསཾ སཱལཱདྭཱརེན གཙྪནྟཱནཾ སདྡཾ སུཏྭཱ ཨུབྷོཔི པཀྐོསཱཔེཏྭཱ ཏེསཾ ཀིརིཡཾ དིསྭཱཝ ‘‘ཨཡཾ ¶ ཙོརོ, ཨཡཾ གོཎསཱམིཀོ’’ཏི ཛཱནཱཏི. ཛཱནནྟོཔི ‘‘ཀསྨཱ ཝིཝདཐཱ’’ཏི པུཙྪི. གོཎསཱམིཀོ ཨཱཧ – ‘‘སཱམི, ཨིམེ ཨཧཾ ཨསུཀགཱམཏོ ཨསུཀསྶ ནཱམ ཧཏྠཏོ ཀིཎིཏྭཱ ཨཱནེཏྭཱ གེཧེ ཝསཱཔེཏྭཱ གོཙརཏྠཱཡ ཏིཎབྷཱུམིཾ ནེསིཾ, ཏཏྠ མམ པམཱདཾ དིསྭཱ ཨཡཾ གོཎེ གཧེཏྭཱ པལཱཡི. སྭཱཧཾ ཨིཏོ ཙིཏོ ཙ ཨོལོཀེནྟོ ཨིམཾ དིསྭཱ ཨནུབནྡྷིཏྭཱ གཎྷིཾ, ཨསུཀགཱམཝཱསིནོ མཡཱ ཨེཏེསཾ ཀིཎིཏྭཱ གཧིཏབྷཱཝཾ ཛཱནནྟཱི’’ཏི. ཙོརོ པན ‘‘མམེཏེ གྷརཛཱཏིཀཱ, ཨཡཾ མུསཱ བྷཎཏཱི’’ཏི ཨཱཧ.
ཨཐ ནེ པཎྜིཏོ ‘‘ཨཧཾ ཝོ ཨཌྜཾ དྷམྨེན ཝིནིཙྪིནིསྶཱམི, ཋསྶཐ མེ ཝིནིཙྪཡེ’’ཏི པུཙྪིཏྭཱ ‘‘ཨཱམ, སཱམི, ཋསྶཱམཱ’’ཏི ཝུཏྟེ ‘‘མཧཱཛནསྶ མནཾ གཎྷིཏུཾ ཝཊྚཏཱི’’ཏི པཋམཾ ཙོརཾ པུཙྪི ‘‘ཏཡཱ ཨིམེ གོཎཱ ཀིཾ ཁཱདཱཔིཏཱ ཀིཾ པཱཡིཏཱ’’ཏི? ‘‘ཡཱགུཾ པཱཡིཏཱ ཏིལཔིཊྛཉྩ མཱསེ ཙ ཁཱདཱཔིཏཱ’’ཏི. ཏཏོ གོཎསཱམིཀཾ པུཙྪི. སོ ཨཱཧ – ‘‘སཱམི, ཀུཏོ མེ དུགྒཏསྶ ཡཱགུཨཱདཱིནི ལདྡྷཱནི, ཏིཎམེཝ ཁཱདཱཔིཏཱ’’ཏི. པཎྜིཏོ ཏེསཾ ཀཐཾ པརིསཾ གཱཧཱཔེཏྭཱ པིཡངྒུཔཏྟཱནི ཨཱཧརཱཔེཏྭཱ ཀོཊྚཱཔེཏྭཱ ཨུདཀེན མདྡཱཔེཏྭཱ གོཎེ པཱཡེསི. གོཎཱ ཏིཎམེཝ ཚཌྜཡིཾསུ. པཎྜིཏོ ‘‘པསྶཐེཏ’’ནྟི མཧཱཛནསྶ དསྶེཏྭཱ ཙོརཾ པུཙྪི ‘‘ཏྭཾ ཙོརོསི, ན ཙོརོསཱི’’ཏི? སོ ‘‘ཙོརོམྷཱི’’ཏི ཨཱཧ. ‘‘ཏེན ཧི ཏྭཾ ཨིཏོ པཊྛཱཡ མཱ ཨེཝརཱུཔམཀཱསཱི’’ཏི ཨོཝདི. བོདྷིསཏྟསྶ པརིསཱ པན ཏཾ ཧཏྠཔཱདེཧི ཀོཊྚེཏྭཱ དུབྦལམཀཱསི. ཨཐ ནཾ པཎྜིཏོ ‘‘དིཊྛདྷམྨེཡེཝ ཏཱཝ ཨིམཾ དུཀྑཾ ལབྷསི, སམྤརཱཡེ པན ནིརཡཱདཱིསུ མཧཱདུཀྑཾ ཨནུབྷཝིསྶསི, སམྨ, ཏྭཾ ཨིཏོ པཊྛཱཡ པཛཧེཏཾ ཀམྨ’’ནྟི ཝཏྭཱ ཏསྶ པཉྩ སཱིལཱནི ཨདཱསི. ཨམཙྩོ ཏཾ པཝཏྟིཾ ཡཐཱབྷཱུཏཾ རཉྙོ ཨཱརོཙཱཔེསི. རཱཛཱ སེནཀཾ པུཙྪི ‘‘ཀིཾ, སེནཀ, ཨཱནེམ པཎྜིཏ’’ནྟི. ‘‘གོཎཨཌྜཾ ནཱམ, མཧཱརཱཛ, ཡེ ཀེཙི ཝིནིཙྪིནནྟི, ཨཱགམེཧི ཏཱཝཱ’’ཏི ཝུཏྟེ རཱཛཱ མཛ྄ཛྷཏྟོ ཧུཏྭཱ པུན ཏཐེཝ སཱསནཾ པེསེསི. སབྦཊྛཱནེསུཔི ཨེཝཾ ཝེདིཏབྦཾ. ཨིཏོ པརཾ པན ཨུདྡཱནམཏྟམེཝ ཝིབྷཛིཏྭཱ དསྶཡིསྶཱམཱཏི.
གནྠཱིཏི ཨེཀཱ དུགྒཏིཏྠཱི ནཱནཱཝཎྞེཧི སུཏྟེཧི གནྠིཀེ བནྡྷིཏྭཱ ཀཏཾ སུཏྟགནྠིཏཔིལ༹ནྡྷནཾ གཱིཝཏོ མོཙེཏྭཱ སཱཊཀསྶ ཨུཔརི ཋཔེཏྭཱ ནྷཱཡིཏུཾ ¶ པཎྜིཏེན ཀཱརིཏཔོཀྑརཎིཾ ཨོཏརི. ཨཔརཱ ཏརུཎིཏྠཱི ཏཾ དིསྭཱ ལོབྷཾ ཨུཔྤཱདེཏྭཱ ཨུཀྑིཔིཏྭཱ ‘‘ཨམྨ, ཨཏིཝིཡ སོབྷནཾ ཨིདཾ ཀིཏྟཀེན ཏེ ཀཏཾ, ཨཧམྤི ཨཏྟནོ ཨེཝརཱུཔཾ ¶ ཀརིསྶཱམི, གཱིཝཱཡ ¶ པིལ༹ནྡྷིཏྭཱ པམཱཎཾ ཏཱཝསྶ ཨུཔདྷཱརེམཱི’’ཏི ཝཏྭཱ ཏཱཡ ཨུཛུཙིཏྟཏཱཡ ‘‘ཨུཔདྷཱརེཧཱི’’ཏི ཝུཏྟེ གཱིཝཱཡ པིལ༹ནྡྷིཏྭཱ པཀྐཱམི. ཨིཏརཱ ཏཾ དིསྭཱ སཱིགྷཾ ཨུཏྟརིཏྭཱ སཱཊཀཾ ནིཝཱསེཏྭཱ ཨུཔདྷཱཝིཏྭཱ ‘‘ཀཧཾ མེ པིལ༹ནྡྷནཾ གཧེཏྭཱ པལཱཡིསྶསཱི’’ཏི སཱཊཀེ གཎྷི. ཨིཏརཱ ‘‘ནཱཧཾ ཏཝ སནྟཀཾ གཎྷཱམི, མམ གཱིཝཱཡམེཝ པིལ༹ནྡྷན’’ནྟི ཨཱཧ. མཧཱཛནོ ཏཾ སུཏྭཱ སནྣིཔཏི. པཎྜིཏོ དཱརཀེཧི སདྡྷིཾ ཀཱིལ༹ནྟོ ཏཱསཾ ཀལཧཾ ཀཏྭཱ སཱལཱདྭཱརེན གཙྪནྟཱིནཾ སདྡཾ སུཏྭཱ ‘‘ཀིཾ སདྡོ ཨེསོ’’ཏི པུཙྪིཏྭཱ ཨུབྷིནྣཾ ཀལཧཀཱརཎཾ སུཏྭཱ པཀྐོསཱཔེཏྭཱ ཨཱཀཱརེནེཝ ཙོརིཉྩ ཨཙོརིཉྩ ཉཏྭཱཔི ཏམཏྠཾ པུཙྪིཏྭཱ ‘‘ཨཧཾ ཝོ དྷམྨེན ཝིནིཙྪིནིསྶཱམི, མམ ཝིནིཙྪཡེ ཋསྶཐཱ’’ཏི ཝཏྭཱ ‘‘ཨཱམ, ཋསྶཱམ, སཱམཱི’’ཏི ཝུཏྟེ པཋམཾ ཙོརིཾ པུཙྪི ‘‘ཏྭཾ ཨིམཾ པིལ༹ནྡྷནཾ པིལ༹ནྡྷནྟཱི ཀཏརགནྡྷཾ ཝིལིམྤསཱི’’ཏི? ‘‘ཨཧཾ ནིཙྩཾ སབྦསཾཧཱརཀཾ ཝིལིམྤཱམཱི’’ཏི. སབྦསཾཧཱརཀོ ནཱམ སབྦགནྡྷེཧི ཡོཛེཏྭཱ ཀཏགནྡྷོ. ཏཏོ ཨིཏརཾ པུཙྪི. སཱ ཨཱཧ ‘‘ཀུཏོ, སཱམི, ལདྡྷོ དུགྒཏཱཡ མཡ྄ཧཾ སབྦསཾཧཱརཀོ, ཨཧཾ ནིཙྩཾ པིཡངྒུཔུཔྥགནྡྷམེཝ ཝིལིམྤཱམཱི’’ཏི. པཎྜིཏོ ཨུདཀཔཱཏིཾ ཨཱཧརཱཔེཏྭཱ ཏཾ པིལ༹ནྡྷནཾ ཏཏྠ པཀྑིཔཱཔེཏྭཱ གནྡྷིཀཾ པཀྐོསཱཔེཏྭཱ ‘‘ཨེཏཾ གནྡྷཾ ཨུཔསིངྒྷིཏྭཱ ཨསུཀགནྡྷབྷཱཝཾ ཛཱནཱཧཱི’’ཏི ཨཱཧ. སོ ཨུཔསིངྒྷནྟོ པིཡངྒུཔུཔྥབྷཱཝཾ ཉཏྭཱ ཨིམཾ ཨེཀཀནིཔཱཏེ གཱཐམཱཧ –
‘‘སབྦསཾཧཱརཀོ ནཏྠི, སུདྡྷཾ ཀངྒུ པཝཱཡཏི;
ཨལིཀཾ བྷཱསཏིཡཾ དྷུཏྟཱི, སཙྩམཱཧུ མཧལླིཀཱ’’ཏི. (ཛཱ. ༡.༡.༡༡༠);
ཏཏྠ དྷུཏྟཱིཏི དྷུཏྟིཀཱ. ཨཱཧཱུཏི ཨཱཧ, ཨཡམེཝ ཝཱ པཱཋོ.
ཨེཝཾ མཧཱསཏྟོ ཏཾ ཀཱརཎཾ མཧཱཛནཾ ཛཱནཱཔེཏྭཱ ‘‘ཏྭཾ ཙོརཱིསི, ན ཙོརཱིསཱི’’ཏི པུཙྪིཏྭཱ ཙོརིབྷཱཝཾ པཊིཛཱནཱཔེསི. ཏཏོ པཊྛཱཡ མཧཱསཏྟསྶ པཎྜིཏབྷཱཝོ པཱཀཊོ ཛཱཏོ.
སུཏྟནྟི ཨེཀཱ ཀཔྤཱསཀྑེཏྟརཀྑིཀཱ ཨིཏྠཱི ཀཔྤཱསཀྑེཏྟཾ རཀྑནྟཱི ཏཏྠེཝ པརིསུདྡྷཾ ཀཔྤཱསཾ གཧེཏྭཱ སུཁུམསུཏྟཾ ཀནྟིཏྭཱ གུལ༹ཾ ཀཏྭཱ ཨུཙྪངྒེ ¶ ཋཔེཏྭཱ གཱམཾ ཨཱགཙྪནྟཱི ‘‘པཎྜིཏསྶ པོཀྑརཎིཡཾ ནྷཱཡིསྶཱམཱི’’ཏི ཏཱིརཾ གནྟྭཱ སཱཊཀཾ མུཉྩིཏྭཱ སཱཊཀསྶ ཨུཔརི སུཏྟགུལ༹ཾ ཋཔེཏྭཱ ཨོཏརིཏྭཱ པོཀྑརཎིཡཾ ནྷཱཡཏི. ཨཔརཱ ཏཾ དིསྭཱ ལུདྡྷཙིཏྟཏཱཡ ཏཾ གཧེཏྭཱ ‘‘ཨཧོ མནཱཔཾ སུཏྟཾ, ཨམྨ, ཏཡཱ ཀཏ’’ནྟི ཨཙྪརཾ པཧརིཏྭཱ ཨོལོཀེནྟཱི ཝིཡ ཨུཙྪངྒེ ཀཏྭཱ པཀྐཱམི. སེསཾ པུརིམནཡེནེཝ ཝིཏྠཱརེཏབྦཾ. པཎྜིཏོ པཋམཾ ཙོརིཾ པུཙྪི ‘‘ཏྭཾ གུལ༹ཾ ཀརོནྟཱི ཨནྟོ ཀིཾ པཀྑིཔིཏྭཱ ཨཀཱསཱི’’ཏི? ‘‘ཀཔྤཱསཕལཊྛིམེཝ སཱམཱི’’ཏི. ཏཏོ ཨིཏརཾ ¶ པུཙྪི. སཱ ‘‘སཱམི ཏིམྦརུཨཊྛི’’ནྟི ཨཱཧ. སོ ཨུབྷིནྣཾ ཝཙནཾ པརིསཾ གཱཧཱཔེཏྭཱ སུཏྟགུལ༹ཾ ནིབྦེཋཱཔེཏྭཱ ཏིམྦརུཨཊྛིཾ དིསྭཱ ཏཾ ཙོརིབྷཱཝཾ སཾཔཊིཙྪཱཔེསི. མཧཱཛནོ ཧཊྛཏུཊྛོ ‘‘སུཝིནིཙྪིཏོ ཨཌྜོ’’ཏི སཱདྷུཀཱརསཧསྶཱནི པཝཏྟེསི.
པུཏྟོཏི ཨེཀདིཝསཾ ཨེཀཱ ཨིཏྠཱི པུཏྟཾ ཨཱདཱཡ མུཁདྷོཝནཏྠཱཡ པཎྜིཏསྶ པོཀྑརཎིཾ གནྟྭཱ པུཏྟཾ ནྷཱཔེཏྭཱ ཨཏྟནོ སཱཊཀེ ནིསཱིདཱཔེཏྭཱ ཨཏྟནོ མུཁཾ དྷོཝིཏུཾ ཨོཏརི. ཏསྨིཾ ཁཎེ ཨེཀཱ ཡཀྑིནཱི ཏཾ དཱརཀཾ དིསྭཱ ཁཱདིཏུཀཱམཱ ཧུཏྭཱ ཨིཏྠིཝེསཾ གཧེཏྭཱ ‘‘སཧཱཡིཀེ, སོབྷཏི ཝཏཱཡཾ དཱརཀོ, ཏཝེསོ པུཏྟོ’’ཏི པུཙྪིཏྭཱ ‘‘ཨཱམཱ’’ཏི ཝུཏྟེ ‘‘པཱཡེམི ན’’ནྟི ཝཏྭཱ ‘‘པཱཡེཧཱི’’ཏི ཝུཏྟཱ ཏཾ གཧེཏྭཱ ཐོཀཾ ཀཱིལཱ༹པེཏྭཱ ཨཱདཱཡ པལཱཡི. ཨིཏརཱ ཏཾ དིསྭཱ དྷཱཝིཏྭཱ ‘‘ཀུཧིཾ མེ པུཏྟཾ ནེསཱི’’ཏི གཎྷི. ཡཀྑིནཱི ‘‘ཀུཏོ ཏཡཱ པུཏྟོ ལདྡྷོ, མམེསོ པུཏྟོ’’ཏི ཨཱཧ. ཏཱ ཀལཧཾ ཀརོནྟིཡོ སཱལཱདྭཱརེན གཙྪནྟི. པཎྜིཏོ ཏཾ ཀལཧསདྡཾ སུཏྭཱ པཀྐོསཱཔེཏྭཱ ‘‘ཀིམེཏ’’ནྟི པུཙྪི. ཏཱ ཏསྶ ཨེཏམཏྠཾ ཨཱརོཙེསུཾ. ཏཾ སུཏྭཱ མཧཱསཏྟོ ཨཀྑཱིནཾ ཨནིམིསཏཱཡ ཙེཝ ¶ རཏྟཏཱཡ ཙ ནིརཱསངྐཏཱཡ ཙ ཚཱཡཱཡ ཨབྷཱཝཏཱཡ ཙ ‘‘ཨཡཾ ཡཀྑིནཱི’’ཏི ཉཏྭཱཔི ‘‘མམ ཝིནིཙྪཡེ ཋསྶཐཱ’’ཏི ཝཏྭཱ ‘‘ཨཱམ, ཋསྶཱམཱ’’ཏི ཝུཏྟེ བྷཱུམིཡཾ ལེཁཾ ཀཌྜྷཡིཏྭཱ ལེཁཱམཛ྄ཛྷེ དཱརཀཾ ནིཔཛྫཱཔེཏྭཱ ཡཀྑིནིཾ ཧཏྠེསུ, མཱཏརཾ པཱདེསུ གཱཧཱཔེཏྭཱ ‘‘དྭེཔི ཀཌྜྷིཏྭཱ གཎྷཐ, ཀཌྜྷིཏུཾ སཀྐོནྟིཡཱ ཨེཝ པུཏྟོ’’ཏི ཨཱཧ.
ཏཱ ཨུབྷོཔི ཀཌྜྷིཾསུ. དཱརཀོ ཀཌྜྷིཡམཱནོ དུཀྑཔྤཏྟོ ཧུཏྭཱ ཝིརཝི. མཱཏཱ ཧདཡེན ཕལིཏེན ཝིཡ ཧུཏྭཱ པུཏྟཾ མུཉྩིཏྭཱ རོདམཱནཱ ཨཊྛཱསི. པཎྜིཏོ མཧཱཛནཾ པུཙྪི ‘‘ཨམྦྷོ, དཱརཀེ, མཱཏུ ཧདཡཾ མུདུཀཾ ཧོཏི, ཨུདཱཧུ ཨམཱཏཱུ’’ཏི. ‘‘མཱཏུ ཧདཡཾ མུདུཀཾ ཧོཏཱི’’ཏི. ‘‘ཀིཾ དཱནི དཱརཀཾ ¶ གཧེཏྭཱ ཋིཏཱ མཱཏཱ ཧོཏི, ཨུདཱཧུ ཝིསྶཛྫེཏྭཱ ཋིཏཱ’’ཏི? ‘‘ཝིསྶཛྫེཏྭཱ ཋིཏཱ པཎྜིཏཱ’’ཏི. ‘‘ཨིམཾ པན དཱརཀཙོརིཾ ཏུམྷེ ཛཱནཱཐཱ’’ཏི? ‘‘ན ཛཱནཱམ, པཎྜིཏཱ’’ཏི. ཨཐ ནེ པཎྜིཏོ ཨཱཧ – ‘‘ཡཀྑིནཱི ཨེསཱ, ཨེཏཾ ཁཱདིཏུཾ གཎྷཱི’’ཏི. ‘‘ཀཐཾ ཛཱནཱསི, པཎྜིཏཱ’’ཏི. ‘‘ཨཀྑཱིནཾ ཨནིམིསཏཱཡ ཙེཝ རཏྟཏཱཡ ཙ ནིརཱསངྐཏཱཡ ཙ ཚཱཡཱཡ ཨབྷཱཝེན ཙ ནིཀྐརུཎཏཱཡ ཙཱ’’ཏི. ཨཐ ནཾ པུཙྪི ‘‘ཀཱསི ཏྭ’’ནྟི? ‘‘ཡཀྑིནཱིམྷི སཱམཱི’’ཏི. ‘‘ཀསྨཱ ཨིམཾ དཱརཀཾ གཎྷཱི’’ཏི? ‘‘ཁཱདིཏུཾ གཎྷཱམི, སཱམཱི’’ཏི. ‘‘ཨནྡྷབཱལེ, ཏྭཾ པུབྦེཔི པཱཔཀམྨཾ ཀཏྭཱ ཡཀྑིནཱི ཛཱཏཱསི, ཨིདཱནི པུནཔི པཱཔཾ ཀརོསི, ཨཧོ ཨནྡྷབཱལཱསཱི’’ཏི ཝཏྭཱ ཏཾ པཉྩསཱིལེསུ པཏིཊྛཱཔེཏྭཱ ‘‘ཨིཏོ པཊྛཱཡ ཨེཝརཱུཔཾ པཱཔཀམྨཾ མཱ ཨཀཱསཱི’’ཏི ཝཏྭཱ ཏཾ ཨུཡྻོཛེསི. དཱརཀམཱཏཱཔི དཱརཀཾ ལབྷིཏྭཱ ‘‘ཙིརཾ ཛཱིཝཏུ སཱམཱི’’ཏི པཎྜིཏཾ ཐོམེཏྭཱ པུཏྟཾ ཨཱདཱཡ པཀྐཱམི.
གོཏོཏི ¶ ཨེཀོ ཀིར ལཀུཎྜཀཏྟཱ གོཏོ, ཀཱལ༹ཝཎྞཏཱ ཙ ཀཱལོ༹ཏི གོཏཀཱལོ༹ ནཱམ པུརིསོ སཏྟསཾཝཙྪརཱནི ཀམྨཾ ཀཏྭཱ བྷརིཡཾ ལབྷི. སཱ ནཱམེན དཱིགྷཏཱལཱ ནཱམ. སོ ཨེཀདིཝསཾ ཏཾ ཨཱམནྟེཏྭཱ ‘‘བྷདྡེ, པཱུཝཁཱདནཱིཡཾ པཙཱཧི, མཱཏཱཔིཏརོ དཊྛུཾ གམིསྶཱམཱ’’ཏི ཝཏྭཱ ‘‘ཀིཾ ཏེ མཱཏཱཔིཏཱུཧཱི’’ཏི ཏཱཡ པཊིཀྑིཏྟོཔི ཡཱཝཏཏིཡཾ ཝཏྭཱ པཱུཝཁཱདནཱིཡཾ པཙཱཔེཏྭཱ པཱཐེཡྻཉྩེཝ པཎྞཱཀཱརཉྩ ཨཱདཱཡ ཏཱཡ སདྡྷིཾ མགྒཾ པཊིཔནྣོ ཨནྟརཱམགྒེ ཨུཏྟཱནཝཱཧིནིཾ ཨེཀཾ ནདིཾ ཨདྡས. ཏེ པན དྭེཔི ཨུདཀབྷཱིརུཀཛཱཏིཀཱཝ, ཏསྨཱ ཏཾ ཨུཏྟརིཏུཾ ཨཝིསཧནྟཱ ཏཱིརེ ཨཊྛཾསུ. ཏདཱ དཱིགྷཔིཊྛི ནཱམེཀོ དུགྒཏཔུརིསོ ཨནུཝིཙརནྟོ ཏཾ ཋཱནཾ པཱཔུཎི. ཨཐ ནཾ ཏེ དིསྭཱ པུཙྪིཾསུ ‘‘སམྨ, ཨཡཾ ནདཱི གམྦྷཱིརཱ ཨུཏྟཱནཱ’’ཏི. སོ ཏེསཾ ཀཐཾ སུཏྭཱ ཨུདཀབྷཱིརུཀབྷཱཝཾ ཉཏྭཱ ‘‘སམྨ, ཨཡཾ ནདཱི གམྦྷཱིརཱ བཧུཙཎྜམཙྪཱཀིཎྞཱ’’ཏི ཨཱཧ. ‘‘སམྨ, ཀཐཾ ཏྭཾ གམིསྶསཱི’’ཏི? སོ ཨཱཧ – ‘‘སཾསུམཱརམཀརཱནཾ ཨམྷེཧི པརིཙཡོ ཨཏྠི, ཏེན ཏེ ཨམྷེ ན ཝིཧེཋེནྟཱི’’ཏི. ‘‘ཏེན ཧི, སམྨ, ཨམྷེཔི ནེཧཱི’’ཏི. སོ ‘‘སཱདྷཱུ’’ཏི སམྤཊིཙྪི. ཨཐསྶ ཏེ ཁཛྫབྷོཛནཾ ཨདཾསུ. སོ ཀཏབྷཏྟཀིཙྩོ ‘‘སམྨ, ཀཾ པཋམཾ ནེམཱི’’ཏི པུཙྪི. སོ ཨཱཧ – ‘‘ཏཝ སཧཱཡིཀཾ པཋམཾ ནེཧི, མཾ པཙྪཱ ནེཧཱི’’ཏི. སོ ‘‘སཱདྷཱུ’’ཏི སམྤཊིཙྪིཏྭཱ ཏཾ ཁནྡྷེ ཀཏྭཱ པཱཐེཡྻཉྩེཝ པཎྞཱཀཱརཉྩ གཧེཏྭཱ ནདིཾ ཨོཏརིཏྭཱ ཐོཀཾ གནྟྭཱ ཨུཀྐུཊིཀོ ནིསཱིདིཏྭཱ པཀྐཱམི.
གོཏཀཱལོ༹ ¶ ཏཱིརེ ཋིཏོཝ ‘‘གམྦྷཱིརཱཝཏཱཡཾ ནདཱི, ཨེཝཾ དཱིགྷསྶཔི ནཱམ ཨེཝརཱུཔཱ, མཡ྄ཧཾ པན ཨཔསཡ྄ཧཱཝ བྷཝིསྶཏཱི’’ཏི ཙིནྟེསི. ཨིཏརོཔི ཏཾ ནདཱིམཛ྄ཛྷཾ ནེཏྭཱ ‘‘བྷདྡེ, ཨཧཾ ཏཾ པོསེསྶཱམི, སམྤནྣཝཏྠཱལངྐཱརཱ དཱསིདཱསཔརིཝུཏཱ ཝིཙརིསྶསི, ཀིཾ ཏེ ཨཡཾ ལཀུཎྜཀཝཱམནཀོ ཀརིསྶཏི, མམ ཝཙནཾ ཀརོཧཱི’’ཏི ཨཱཧ. སཱ ཏསྶ ཝཙནཾ སུཏྭཱཝ ཨཏྟནོ སཱམིཀེ སིནེཧཾ བྷིནྡིཏྭཱ ཏཾཁཎཉྙེཝ ཏསྨིཾ པཊིབདྡྷཙིཏྟཱ ཧུཏྭཱ ‘‘སཱམི, སཙེ མཾ ན ཚཌྜེསྶསི, ཀརིསྶཱམི ཏེ ཝཙན’’ནྟི སམྤཊིཙྪི. ‘‘བྷདྡེ, ཀིཾ ཝདེསི, ཨཧཾ ཏཾ པོསེསྶཱམཱི’’ཏི. ཏེ པརཏཱིརཾ གནྟྭཱ ཨུབྷོཔི སམགྒཱ སམྨོདམཱནཱ ‘‘གོཏཀཱལ༹ཾ པཧཱཡ ཏིཊྛ ཏྭ’’ནྟི ཝཏྭཱ ཏསྶ པསྶནྟསྶེཝ ཁཱདནཱིཡཾ ཁཱདནྟཱ པཀྐམིཾསུ. སོ དིསྭཱ ‘‘ཨིམེ ཨེཀཏོ ཧུཏྭཱ མཾ ཚཌྜེཏྭཱ པལཱཡནྟི ¶ མཉྙེ’’ཏི ཨཔརཱཔརཾ དྷཱཝནྟོ ཐོཀཾ ཨོཏརིཏྭཱ བྷཡེན ནིཝཏྟིཏྭཱ པུན ཏེསུ ཀོཔེན ‘‘ཛཱིཝཱམི ཝཱ མརཱམི ཝཱ’’ཏི ཨུལླངྒྷིཏྭཱ ནདིཡཾ པཏིཏོ ཨུཏྟཱནབྷཱཝཾ ཉཏྭཱ ནདིཾ ཨུཏྟརིཏྭཱ ཝེགེན ཏཾ པཱཔུཎིཏྭཱ ‘‘ཨམྦྷོ དུཊྛཙོར, ཀུཧིཾ མེ བྷརིཡཾ ནེསཱི’’ཏི ཨཱཧ. ཨིཏརོཔི ཏཾ ‘‘ཨརེ དུཊྛཝཱམནཀ, ཀུཏོ ཏཝ བྷརིཡཱ, མམེསཱ བྷརིཡཱ’’ཏི ཝཏྭཱ གཱིཝཱཡཾ གཧེཏྭཱ ཁིཔི. སོ དཱིགྷཏཱལཾ ཧཏྠེ གཧེཏྭཱ’’ཏིཊྛ ཏྭཾ ཀུཧིཾ གཙྪསི, སཏྟ སཾཝཙྪརཱནི ¶ ཀམྨཾ ཀཏྭཱ ལདྡྷབྷརིཡཱ མེསཱི’’ཏི ཝཏྭཱ ཏེན སདྡྷིཾ ཀལཧཾ ཀརོནྟོ སཱལཱཡ སནྟིཀཾ པཱཔུཎི. མཧཱཛནོ སནྣིཔཏི.
པཎྜིཏོ ‘‘ཀིཾ སདྡོ ནཱམེསོ’’ཏི པུཙྪིཏྭཱ ཏེ ཨུབྷོཔི པཀྐོསཱཔེཏྭཱ ཝཙནཔྤཊིཝཙནཾ སུཏྭཱ ‘‘མམ ཝིནིཙྪཡེ ཋསྶཐཱ’’ཏི ཝཏྭཱ ‘‘ཨཱམ, ཋསྶཱམཱ’’ཏི ཝུཏྟེ པཋམཾ དཱིགྷཔིཊྛིཾ པཀྐོསཱཔེཏྭཱ ‘‘ཏྭཾ ཀོནཱམོསཱི’’ཏི པུཙྪི. ‘‘དཱིགྷཔིཊྛིཀོ ནཱམ, སཱམཱི’’ཏི. ‘‘བྷརིཡཱ ཏེ ཀཱ ནཱམཱ’’ཏི? སོ ཏསྶཱ ནཱམཾ ཨཛཱནནྟོ ཨཉྙཾ ཀཐེསི. ‘‘མཱཏཱཔིཏརོ ཏེ ཀེ ནཱམཱ’’ཏི? ‘‘ཨསུཀཱ ནཱམཱ’’ཏི. ‘‘བྷརིཡཱཡ པན ཏེ མཱཏཱཔིཏརོ ཀེ ནཱམཱ’’ཏི? སོ ཨཛཱནིཏྭཱ ཨཉྙཾ ཀཐེསི. ཏསྶ ཀཐཾ པརིསཾ གཱཧཱཔེཏྭཱ ཏཾ ཨཔནེཏྭཱ ཨིཏརཾ པཀྐོསཱཔེཏྭཱ པུརིམནཡེནེཝ སབྦེསཾ ནཱམཱནི པུཙྪི. སོ ཡཐཱབྷཱུཏཾ ཛཱནནྟོ ཨཝིརཛ྄ཛྷིཏྭཱ ཀཐེསི. ཏམྤི ཨཔནེཏྭཱ དཱིགྷཏཱལཾ པཀྐོསཱཔེཏྭཱ ‘‘ཏྭཾ ཀཱ ནཱམཱ’’ཏི པུཙྪི. ‘‘དཱིགྷཏཱལཱ ནཱམ སཱམཱི’’ཏི. ‘‘སཱམིཀོ ཏེ ཀོནཱམོ’’ཏི? སཱ ཨཛཱནནྟཱི ཨཉྙཾ ཀཐེསི. ‘‘མཱཏཱཔིཏརོ ཏེ ཀེ ནཱམཱ’’ཏི. ‘‘ཨསུཀཱ ནཱམ སཱམཱི’’ཏི. ‘‘སཱམིཀསྶ པན ཏེ མཱཏཱཔིཏརོ ཀེ ནཱམཱ’’ཏི? སཱཔི ཝིལཔནྟཱི ཨཉྙཾ ཀཐེསི ¶ . ཨིཏརེ དྭེ པཀྐོསཱཔེཏྭཱ མཧཱཛནཾ པུཙྪི ‘‘ཀིཾ ཨིམིསྶཱ དཱིགྷཔིཊྛིསྶ ཝཙནེན སམེཏི, ཨུདཱཧུ གོཏཀཱལ༹སྶཱ’’ཏི. ‘‘གོཏཀཱལ༹སྶ པཎྜིཏཱ’’ཏི. ‘‘ཨཡཾ ཨེཏིསྶཱ སཱམིཀོ, ཨིཏརོ ཙོརོ’’ཏི. ཨཐ ནཾ ‘‘ཙོརོསི, ན ཙོརོསཱི’’ཏི པུཙྪི. ‘‘ཨཱམ, སཱམི, ཙོརོམྷཱི’’ཏི ཙོརབྷཱཝཾ སམྤཊིཙྪི. པཎྜིཏསྶ ཝིནིཙྪཡེན གོཏཀཱལོ༹ ཨཏྟནོ བྷརིཡཾ ལབྷིཏྭཱ མཧཱསཏྟཾ ཐོམེཏྭཱ ཏཾ ཨཱདཱཡ པཀྐཱམི. པཎྜིཏོ དཱིགྷཔིཊྛིམཱཧ ‘‘མཱ པུན ཨེཝམཀཱསཱི’’ཏི.
རཐེན ཙཱཏི ཨེཀདིཝསཾ ཨེཀོ པན པུརིསོ རཐེ ནིསཱིདིཏྭཱ མུཁདྷོཝནཏྠཱཡ ནིཀྑམི. ཏསྨིཾ ཁཎེ སཀྐོ ཨཱཝཛྫེནྟོ པཎྜིཏཾ དིསྭཱ ‘‘མཧོསདྷབུདྡྷངྐུརསྶ པཉྙཱནུབྷཱཝཾ པཱཀཊཾ ཀརིསྶཱམཱི’’ཏི ཙིནྟེཏྭཱ མནུསྶཝེསེནཱགནྟྭཱ རཐསྶ པཙྪཱབྷཱགཾ གཧེཏྭཱ པཱཡཱསི. རཐེ ནིསིནྣོ པུརིསོ ‘‘ཏཱཏ, ཀེནཏྠེནཱགཏོསཱི’’ཏི པུཙྪིཏྭཱ ‘‘ཏུམྷེ ཨུཔཊྛཱཏུ’’ནྟི ཝུཏྟེ ‘‘སཱདྷཱུ’’ཏི སམྤཊིཙྪིཏྭཱ ཡཱནཱ ཨོརུཡ྄ཧ སརཱིརཀིཙྩཏྠཱཡ གཏོ. ཏསྨིཾ ཁཎེ སཀྐོ རཐཾ ཨབྷིརུཧིཏྭཱ ཝེགེན པཱཛེསི. རཐསཱམིཀོ པན སརཱིརཀིཙྩཾ ཀཏྭཱ ནིཀྑནྟོ སཀྐཾ རཐཾ གཧེཏྭཱ པལཱཡནྟཾ དིསྭཱ ཝེགེན གནྟྭཱ ‘‘ཏིཊྛ ཏིཊྛ, ཀུཧིཾ མེ རཐཾ ནེསཱི’’ཏི ཝཏྭཱ ‘‘ཏཝ རཐོ ཨཉྙོ བྷཝིསྶཏི, ཨཡཾ པན མམ རཐོ’’ཏི ཝུཏྟེ ཏེན སདྡྷིཾ ཀལཧཾ ཀརོནྟོ སཱལཱདྭཱརཾ པཏྟོ. པཎྜིཏོ ‘‘ཀིཾ ནཱམེཏ’’ནྟི པུཙྪིཏྭཱ ཏེ པཀྐོསཱཔེཏྭཱ ཨཱགཙྪནྟེ དིསྭཱ ནིབྦྷཡཏཱཡ ཙེཝ ཨཀྑཱིནཾ ཨནིམིསཏཱཡ ཙ ‘‘ཨཡཾ སཀྐོ, ཨཡཾ རཐསཱམིཀོ’’ཏི ཨཉྙཱསི, ཨེཝཾ སནྟེཔི ཝིཝཱདཀཱརཎཾ ¶ པུཙྪིཏྭཱ ‘‘མམ ཝིནིཙྪཡེ ཋསྶཐཱ’’ཏི ཝཏྭཱ ‘‘ཨཱམ, ཋསྶཱམཱ’’ཏི ཝུཏྟེ ‘‘ཨཧཾ རཐཾ པཱཛེསྶཱམི, ཏུམྷེ དྭེཔི རཐཾ པཙྪཏོ གཧེཏྭཱ གཙྪཐ, རཐསཱམིཀོ ན ཝིསྶཛྫེསྶཏི, ཨིཏརོ ཝིསྶཛྫེསྶཏཱི’’ཏི ཝཏྭཱ པུརིསཾ ཨཱཎཱཔེསི ‘‘རཐཾ པཱཛེཧཱི’’ཏི. སོ ཏཐཱ ཨཀཱསི.
ཨིཏརེཔི དྭེ པཙྪཏོ གཧེཏྭཱ གཙྪནྟི. རཐསཱམིཀོ ཐོཀཾ གནྟྭཱ ཝིསྶཛྫེཏྭཱ ཋིཏོ, སཀྐོ པན རཐེན སདྡྷིཾ གནྟྭཱ རཐེནེཝ སདྡྷིཾ ནིཝཏྟི. པཎྜིཏོ མནུསྶེ ཨཱཙིཀྑི ‘‘ཨཡཾ པུརིསོ ཐོཀཾ གནྟྭཱ རཐཾ ¶ ཝིསྶཛྫེཏྭཱ ཋིཏོ, ཨཡཾ པན རཐེན སདྡྷིཾ དྷཱཝིཏྭཱ རཐེནེཝ སདྡྷིཾ ནིཝཏྟི, ནེཝསྶ སརཱིརེ སེདབིནྡུམཏྟམྤི ཨཏྠི, ཨསྶཱསཔསྶཱསོཔི ནཏྠི, ¶ ཨབྷཱིཏོ ཨནིམིསནེཏྟོ, ཨེས སཀྐོ དེཝརཱཛཱ’’ཏི. ཨཐ ནཾ ‘‘སཀྐོ དེཝརཱཛཱསཱི’’ཏི པུཙྪིཏྭཱ ‘‘ཨཱམ, པཎྜིཏཱ’’ཏི ཝུཏྟེ ‘‘ཀསྨཱ ཨཱགཏོསཱི’’ཏི ཝཏྭཱ ‘‘ཏཝེཝ པཉྙཱཔཀཱསནཏྠཾ པཎྜིཏཱ’’ཏི ཝུཏྟེ ‘‘ཏེན ཧི མཱ པུན ཨེཝམཀཱསཱི’’ཏི ཨོཝདཏི. སཀྐོཔི སཀྐཱནུབྷཱཝཾ དསྶེནྟོ ཨཱཀཱསེ ཋཏྭཱ ‘‘སུཝིནིཙྪིཏོ པཎྜིཏེན ཨཌྜོ’’ཏི པཎྜིཏསྶ ཐུཏིཾ ཀཏྭཱ སཀཊྛཱནམེཝ གཏོ. ཏདཱ སོ ཨམཙྩོ སཡམེཝ རཉྙོ སནྟིཀཾ གནྟྭཱ ‘‘མཧཱརཱཛ, པཎྜིཏེན ཨེཝཾ རཐཨཌྜོ སུཝིནིཙྪིཏོ, སཀྐོཔི ཏེན པརཱཛིཏོ, ཀསྨཱ པུརིསཝིསེསཾ ན ཛཱནཱསི, དེཝཱ’’ཏི ཨཱཧ. རཱཛཱ སེནཀཾ པུཙྪི ‘‘ཀིཾ, སེནཀ, ཨཱནེམ པཎྜིཏ’’ནྟི. སོ ལཱབྷམཙྪརེན ‘‘མཧཱརཱཛ, ཨེཏྟཀེན པཎྜིཏོ ནཱམ ན ཧོཏི, ཨཱགམེཐ ཏཱཝ ཝཱིམཾསིཏྭཱ ཛཱནིསྶཱམཱ’’ཏི ཨཱཧ.
སཏྟདཱརཀཔཉྷོ ནིཊྛིཏོ.
གདྲབྷཔཉྷོ
དཎྜོཏི ཨཐེཀདིཝསཾ རཱཛཱ ‘‘པཎྜིཏཾ ཝཱིམཾསིསྶཱམཱ’’ཏི ཁདིརདཎྜཾ ཨཱཧརཱཔེཏྭཱ ཏཏོ ཝིདཏྠིཾ གཧེཏྭཱ ཙུནྡཀཱརེ པཀྐོསཱཔེཏྭཱ སུཊྛུ ལིཁཱཔེཏྭཱ པཱཙཱིནཡཝམཛ྄ཛྷཀགཱམཾ པེསེསི ‘‘པཱཙཱིནཡཝམཛ྄ཛྷཀགཱམཝཱསིནོ ཀིར པཎྜིཏཱ, ‘ཨིམསྶ ཁདིརདཎྜསྶ ཨིདཾ ཨགྒཾ, ཨིདཾ མཱུལ’ནྟི ཛཱནནྟུ, ཨཛཱནནྟཱནཾ སཧསྶདཎྜོ’’ཏི. གཱམཝཱསིནོ སནྣིཔཏིཏྭཱ ཛཱནིཏུཾ ཨསཀྐོནྟཱ སེཊྛིནོ ཀཐཡིཾསུ ‘‘ཀདཱཙི མཧོསདྷཔཎྜིཏོ ཛཱནེཡྻ, པཀྐོསཱཔེཏྭཱ ཏཾ པུཙྪཐཱ’’ཏི. སེཊྛི པཎྜིཏཾ ཀཱིལཱ༹མཎྜལཱ པཀྐོསཱཔེཏྭཱ ཏམཏྠཾ ཨཱརོཙེཏྭཱ ‘‘ཏཱཏ, མཡཾ ཛཱནིཏུཾ ན སཀྐོམ, ཨཔི ནུ ཏྭཾ སཀྑིསྶསཱི’’ཏི པུཙྪི. ཏཾ སུཏྭཱ པཎྜིཏོ ཙིནྟེསི ‘‘རཉྙོ ¶ ཨིམསྶ ཨགྒེན ཝཱ མཱུལེན ཝཱ པཡོཛནཾ ནཏྠི, མམ ཝཱིམཾསནཏྠཱཡ པེསིཏཾ བྷཝིསྶཏཱི’’ཏི. ཙིནྟེཏྭཱ ཙ པན ‘‘ཨཱཧརཐ, ཏཱཏ, ཛཱནིསྶཱམཱི’’ཏི ཨཱཧརཱཔེཏྭཱ ཧཏྠེན གཧེཏྭཱཝ ‘‘ཨིདཾ ཨགྒཾ ཨིདཾ མཱུལ’’ནྟི ཉཏྭཱཔི མཧཱཛནསྶ ཧདཡགྒཧཎཏྠཾ ཨུདཀཔཱཏིཾ ཨཱཧརཱཔེཏྭཱ ཁདིརདཎྜཀསྶ མཛ྄ཛྷེ སུཏྟེན བནྡྷིཏྭཱ སུཏྟཀོཊིཡཾ གཧེཏྭཱ ཁདིརདཎྜཀཾ ཨུདཀཔིཊྛེ ཋཔེསི. མཱུལཾ བྷཱརིཡཏཱཡ པཋམཾ ཨུདཀེ ནིམུཛྫི. ཏཏོ མཧཱཛནཾ པུཙྪི ‘‘རུཀྑསྶ ནཱམ མཱུལཾ བྷཱརིཡཾ ཧོཏི, ཨུདཱཧུ ཨགྒ’’ནྟི? ‘‘མཱུལཾ པཎྜིཏཱ’’ཏི. ཏེན ཧི ཨིམསྶ པཋམཾ ནིམུགྒཾ པསྶཐ, ཨེཏཾ མཱུལནྟི ཨིམཱཡ སཉྙཱཡ ¶ ཨགྒཉྩ མཱུལཉྩ ཨཱཙིཀྑི. གཱམཝཱསིནོ ‘‘ཨིདཾ ཨགྒཾ ཨིདཾ མཱུལ’’ནྟི རཉྙོ པཧིཎིཾསུ. རཱཛཱ ‘‘ཀོ ཨིམཾ ཛཱནཱཏཱི’’ཏི པུཙྪིཏྭཱ ‘‘སིརིཝཌྜྷནསེཊྛིནོ པུཏྟོ མཧོསདྷཔཎྜིཏོ’’ཏི སུཏྭཱ ‘‘ཀིཾ, སེནཀ, ཨཱནེམ པཎྜིཏ’’ནྟི པུཙྪི. ཨདྷིཝཱསེཧི, དེཝ, ཨཉྙེནཔི ཨུཔཱཡེན ནཾ ཝཱིམཾསིསྶཱམཱཏི.
སཱིསནྟི ཨཐེཀདིཝསཾ ཨིཏྠིཡཱ ཙ པུརིསསྶ ཙཱཏི དྭེ སཱིསཱནི ཨཱཧརཱཔེཏྭཱ ‘‘ཨིདཾ ཨིཏྠིསཱིསཾ, ཨིདཾ པུརིསསཱིསནྟི ཛཱནནྟུ, ཨཛཱནནྟཱནཾ སཧསྶདཎྜོ’’ཏི པཧིཎིཾསུ. གཱམཝཱསིནོ ཨཛཱནནྟཱ པཎྜིཏཾ པུཙྪིཾསུ. སོ དིསྭཱཝ ཨཉྙཱསི. ཀཐཾ ཛཱནཱཏི? པུརིསསཱིསེ ཀིར སིབྦིནཱི ཨུཛུཀཱཝ ཧོཏི, ཨིཏྠིསཱིསེ སིབྦིནཱི ཝངྐཱ ཧོཏི, པརིཝཏྟིཏྭཱ གཙྪཏི. སོ ཨིམིནཱ ཨབྷིཉྙཱཎེན ‘‘ཨིདཾ ཨིཏྠིཡཱ སཱིསཾ, ཨིདཾ པུརིསསྶ སཱིས’’ནྟི ཨཱཙིཀྑི. གཱམཝཱསིནོཔི རཉྙོ པཧིཎིཾསུ. སེསཾ པུརིམསདིསམེཝ.
ཨཧཱིཏི ཨཐེཀདིཝསཾ སཔྤཉྩ སཔྤིནིཉྩ ཨཱཧརཱཔེཏྭཱ ‘‘ཨཡཾ སཔྤོ, ཨཡཾ སཔྤིནཱིཏི ཛཱནནྟུ, ཨཛཱནནྟཱནཾ སཧསྶདཎྜོ’’ཏི ཝཏྭཱ གཱམཝཱསཱིནཾ པེསེསུཾ. གཱམཝཱསིནོ ཨཛཱནནྟཱ པཎྜིཏཾ པུཙྪིཾསུ. སོ དིསྭཱཝ ཛཱནཱཏི. སཔྤསྶ ཧི ནངྒུཊྛཾ ཐཱུལཾ ཧོཏི, སཔྤིནིཡཱ ཏནུཀཾ ཧོཏི, སཔྤསྶ སཱིསཾ པུཐུལཾ ཧོཏི, སཔྤིནིཡཱ ཏནུཀཾ ཧོཏི, སཔྤསྶ ཨཀྑཱིནི མཧནྟཱནི, སཔྤིནིཡཱ ཁུདྡཀཱནི, སཔྤསྶ སོཝཏྟིཀོ པརཱབདྡྷོ ཧོཏི, སཔྤིནིཡཱ ཝིཙྪིནྣཀོ. སོ ཨིམེཧི ཨབྷིཉྙཱཎེཧི ‘‘ཨཡཾ ¶ སཔྤོ, ཨཡཾ སཔྤིནཱི’’ཏི ཨཱཙིཀྑི. སེསཾ ཝུཏྟནཡམེཝ.
ཀུཀྐུཊོཏི ཨཐེཀདིཝསཾ ‘‘པཱཙཱིནཡཝམཛ྄ཛྷཀགཱམཝཱསིནོ ཨམྷཱཀཾ སབྦསེཏཾ པཱདཝིསཱཎཾ སཱིསཀཀུདྷཾ ཏཡོ ཀཱལེ ཨནཏིཀྐམིཏྭཱ ནདནྟཾ ཨུསབྷཾ པེསེནྟུ, ནོ ཙེ པེསེནྟི, སཧསྶདཎྜོ’’ཏི པཧིཎིཾསུ. ཏེ ཨཛཱནནྟཱ པཎྜིཏཾ པུཙྪིཾསུ. སོ ཨཱཧ – ‘‘རཱཛཱ ཝོ སབྦསེཏཾ ཀུཀྐུཊཾ ཨཱཧརཱཔེསི, སོ ཧི པཱདནཁསིཁཏཱཡ པཱདཝིསཱཎོ ནཱམ, སཱིསཙཱུལ༹ཏཱཡ སཱིསཀཀུདྷོ ¶ ནཱམ, ཏིཀྑཏྟུཾ ཝསྶནཏོ ཏཡོ ཀཱལེ ཨནཏིཀྐམིཏྭཱ ནདཏི ནཱམ, ཏསྨཱ ཨེཝརཱུཔཾ ཀུཀྐུལ༹ཾ པེསེཐཱ’’ཏི ཨཱཧ. ཏེ པེསཡིཾསུ.
མཎཱིཏི ¶ སཀྐེན ཀུསརཉྙོ དིནྣོ མཎིཀྑནྡྷོ ཨཊྛསུ ཋཱནེསུ ཝངྐོ ཧོཏི. ཏསྶ པུརཱཎསུཏྟཾ ཚིནྣཾ, ཀོཙི པུརཱཎསུཏྟཾ ནཱིཧརིཏྭཱ ནཝསུཏྟཾ པཝེསེཏུཾ ན སཀྐོཏི, ཏསྨཱ ཨེཀདིཝསཾ ‘‘ཨིམསྨཱ མཎིཀྑནྡྷཱ པུརཱཎསུཏྟཾ ནཱིཧརིཏྭཱ ནཝསུཏྟཾ པཝེསེནྟཱུ’’ཏི པེསཡིཾསུ. གཱམཝཱསིནོ པུརཱཎསུཏྟཾ ནཱིཧརིཏྭཱ ནཝསུཏྟཾ པཝེསེཏུཾ ཨསཀྐོནྟཱ པཎྜིཏསྶ ཨཱཙིཀྑིཾསུ. སོ ‘‘མཱ ཙིནྟཡིཏྠ, མདྷུཾ ཨཱཧརཐཱ’’ཏི ཨཱཧརཱཔེཏྭཱ མཎིནོ དྭཱིསུ པསྶེསུ མདྷུནཱ ཚིདྡཾ མཀྑེཏྭཱ ཀམྦལསུཏྟཾ ཝཊྚེཏྭཱ ཀོཊིཡཾ མདྷུནཱ མཀྑེཏྭཱ ཐོཀཾ ཚིདྡེ པཝེསེཏྭཱ ཀིཔིལླིཀཱནཾ ནིཀྑམནཊྛཱནེ ཋཔེསི. ཀིཔིལླིཀཱ མདྷུགནྡྷེན ནིཀྑམིཏྭཱ མཎིམྷི པུརཱཎསུཏྟཾ ཁཱདམཱནཱ གནྟྭཱ ཀམྦལསུཏྟཀོཊིཡཾ ཌཾསིཏྭཱ ཀཌྜྷནྟཱ ཨེཀེན པསྶེན ནཱིཧརིཾསུ. པཎྜིཏོ པཝེསིཏབྷཱཝཾ ཉཏྭཱ ‘‘རཉྙོ དེཐཱ’’ཏི གཱམཝཱསཱིནཾ ཨདཱསི. ཏེ རཉྙོ པེསཡིཾསུ. སོ པཝེསིཏཨུཔཱཡཾ སུཏྭཱ ཏུསྶི.
ཝིཛཱཡནནྟི ཨཐེཀདིཝསཾ རཉྙོ མངྒལཨུསབྷཾ བཧཱུ མཱསེ ཁཱདཱཔེཏྭཱ མཧོདརཾ ཀཏྭཱ ཝིསཱཎཱནི དྷོཝིཏྭཱ ཏེལེན མཀྑེཏྭཱ ཧལིདྡིཡཱ ནྷཱཔེཏྭཱ གཱམཝཱསཱིནཾ པཧིཎིཾསུ ‘‘ཏུམྷེ ཀིར པཎྜིཏཱ, ཨཡཉྩ རཉྙོ མངྒལཨུསབྷོ པཏིཊྛིཏགབྦྷོ, ཨེཏཾ ཝིཛཱཡཱཔེཏྭཱ སཝཙྪཀཾ པེསེཐ, ཨཔེསེནྟཱནཾ སཧསྶདཎྜོ’’ཏི. གཱམཝཱསིནོ ‘‘ན སཀྐཱ ཨིདཾ ཀཱཏུཾ, ཀིཾ ནུ ཁོ ཀརིསྶཱམཱ’’ཏི པཎྜིཏཾ པུཙྪིཾསུ. སོ ‘‘ཨིམིནཱ ཨེཀེན པཉྷཔཊིབྷཱགེན བྷཝིཏབྦ’’ནྟི ཙིནྟེཏྭཱ ‘‘སཀྑིསྶཐ པནེཀཾ རཉྙཱ སདྡྷིཾ ཀཐནསམཏྠཾ ཝིསཱརདཾ པུརིསཾ ལདྡྷུ’’ནྟི པུཙྪི. ‘‘ན གརུ ཨེཏཾ, པཎྜིཏཱ’’ཏི. ‘‘ཏེན ཧི ནཾ པཀྐོསཐཱ’’ཏི. ཏེ པཀྐོསིཾསུ. ཨཐ ནཾ མཧཱསཏྟོ ‘‘ཨེཧི, བྷོ པུརིས, ཏྭཾ ཏཝ ཀེསེ པིཊྛིཡཾ ཝིཀིརིཏྭཱ ནཱནཔྤཀཱརཾ བལཝཔརིདེཝཾ པརིདེཝནྟོ རཱཛདྭཱརཾ གཙྪ, ཨཉྙེཧི པུཙྪིཏོཔི ཀིཉྩི ཨཝཏྭཱཝ པརིདེཝ, རཉྙཱ པན པཀྐོསཱཔེཏྭཱ པརིདེཝཀཱརཎཾ པུཙྪིཏོཝ སམཱནོ ‘པིཏཱ མེ དེཝ ཝིཛཱཡིཏུཾ ན སཀྐོཏི, ཨཛྫ སཏྟམོ དིཝསོ, པཊིསརཎཾ མེ ཧོཧི, ཝིཛཱཡནུཔཱཡམསྶ ཀརོཧཱི’ཏི ཝཏྭཱ རཉྙཱ ‘ཀིཾ ཝིལཔསི ཨཊྛཱནམེཏཾ, པུརིསཱ ནཱམ ཝིཛཱཡནྟཱ ནཏྠཱི’ཏི ཝུཏྟེ ‘སཙེ དེཝ, ཨེཝཾ ནཏྠི, ཨཐ ཀསྨཱ ¶ པཱཙཱིནཡཝམཛ྄ཛྷཀགཱམཝཱསིནོ ཀཐཾ མངྒལཨུསབྷཾ ཝིཛཱཡཱཔེསྶནྟཱི’ཏི ཝདེཡྻཱསཱི’’ཏི ཨཱཧ. སོ ‘‘སཱདྷཱུ’’ཏི སམྤཊིཙྪིཏྭཱ ཏཐཱ ཨཀཱསི. རཱཛཱ ‘‘ཀེནིདཾ པཉྷཔཊིབྷཱགཾ ཙིནྟིཏ’’ནྟི པུཙྪིཏྭཱ ‘‘མཧོསདྷཔཎྜིཏེནཱ’’ཏི སུཏྭཱ ཏུསྶི.
ཨོདནནྟི ¶ ཨཔརསྨིཾ དིཝསེ ‘‘པཎྜིཏཾ ཝཱིམཾསིསྶཱམཱ’’ཏི ‘‘པཱཙཱིནཡཝམཛ྄ཛྷཀགཱམཝཱསིནོ ཨམྷཱཀཾ ཨཊྛངྒསམནྣཱགཏཾ ཨམྦིལོདནཾ པཙིཏྭཱ པེསེནྟུ. ཏཏྲིམཱནི ཨཊྛངྒཱནི ¶ – ན ཏཎྜུལེཧི, ན ཨུདཀེན, ན ཨུཀྑལིཡཱ, ན ཨུདྡྷནེན, ན ཨགྒིནཱ, ན དཱརཱུཧི, ན ཨིཏྠིཡཱ ན པུརིསེན, ན མགྒེནཱཏི. ཨཔེསེནྟཱནཾ སཧསྶདཎྜོ’’ཏི པཧིཎིཾསུ. གཱམཝཱསིནོ ཏཾ ཀཱརཎཾ ཨཛཱནནྟཱ པཎྜིཏཾ པུཙྪིཾསུ. སོ ‘‘མཱ ཙིནྟཡིཏྠཱ’’ཏི ཝཏྭཱ ‘‘ན ཏཎྜུལེཧཱིཏི ཀཎིཀཾ གཱཧཱཔེཏྭཱ, ན ཨུདཀེནཱཏི ཧིམཾ གཱཧཱཔེཏྭཱ, ན ཨུཀྑལིཡཱཏི ཨཉྙཾ ནཝམཏྟིཀཱབྷཱཛནཾ གཱཧཱཔེཏྭཱ, ན ཨུདྡྷནེནཱཏི ཁཱཎུཀེ ཀོཊྚཱཔེཏྭཱ, ན ཨགྒིནཱཏི པཀཏིཨགྒིཾ པཧཱཡ ཨརཎིཨགྒིཾ གཱཧཱཔེཏྭཱ, ན དཱརཱུཧཱིཏི པཎྞཱནི གཱཧཱཔེཏྭཱ ཨམྦིལོདནཾ པཙཱཔེཏྭཱ ནཝབྷཱཛནེ པཀྑིཔིཏྭཱ ལཉྪིཏྭཱ, ན ཨིཏྠིཡཱ ན པུརིསེནཱཏི པཎྜཀེན ཨུཀྑིཔཱཔེཏྭཱ, ན མགྒེནཱཏི མཧཱམགྒཾ པཧཱཡ ཛངྒྷམགྒེན རཉྙོ པེསེཐཱ’’ཏི ཨཱཧ. ཏེ ཏཐཱ ཀརིཾསུ. རཱཛཱ ‘‘ཀེན པནེས པཉྷོ ཉཱཏོ’’ཏི པུཙྪིཏྭཱ ‘‘མཧོསདྷཔཎྜིཏེནཱ’’ཏི སུཏྭཱ ཏུསྶི.
ཝཱལུཀནྟི ཨཔརསྨིཾ དིཝསེ པཎྜིཏསྶ ཝཱིམཾསནཏྠཾ གཱམཝཱསཱིནཾ པཧིཎིཾསུ ‘‘རཱཛཱ དོལཱཡ ཀཱིལི༹ཏུཀཱམོ, རཱཛཀུལེ པུརཱཎཡོཏྟཾ ཚིནྣཾ, ཨེཀཾ ཝཱལུཀཡོཏྟཾ ཝཊྚེཏྭཱ པེསེནྟུ, ཨཔེསེནྟཱནཾ སཧསྶདཎྜོ’’ཏི. ཏེ པཎྜིཏཾ པུཙྪིཾསུ. པཎྜིཏོ ‘‘ཨིམིནཱཔི པཉྷཔཊིབྷཱགེནེཝ བྷཝིཏབྦ’’ནྟི གཱམཝཱསིནོ ཨསྶཱསེཏྭཱ ཝཙནཀུསལེ དྭེ ཏཡོ པུརིསེ པཀྐོསཱཔེཏྭཱ ‘‘གཙྪཐ ཏུམྷེ, རཱཛཱནཾ ཝདེཐ ‘དེཝ, གཱམཝཱསིནོ ཏསྶ ཡོཏྟསྶ ཏནུཀཾ ཝཱ ཐཱུལཾ ཝཱ པམཱཎཾ ན ཛཱནནྟི, པུརཱཎཝཱལུཀཡོཏྟཏོ ཝིདཏྠིམཏྟཾ ཝཱ ཙཏུརངྒུལམཏྟཾ ཝཱ ཁཎྜཾ པེསེཐ, ཏཾ ཨོལོཀེཏྭཱ ཏེན པམཱཎེན ཝཊྚེསྶནྟཱི’ཏི. སཙེ, ཝོ རཱཛཱ ‘ཨམྷཱཀཾ གྷརེ ཝཱལུཀཡོཏྟཾ ནཱམ ན ཀདཱཙི སུཏཔུབྦ’ནྟི ཝདཏི, ཨཐ ནཾ ‘སཙེ, མཧཱརཱཛ, ཝོ ཨེཝརཱུཔཾ ན སཀྐཱ ཀཱཏུཾ, པཱཙཱིནཡཝམཛ྄ཛྷཀགཱམཝཱསིནོ ཀཐཾ ཀརིསྶནྟཱི’ཏི ཝདེཡྻཱཐཱ’’ཏི པེསེསི. ཏེ ཏཐཱ ཀརིཾསུ. རཱཛཱ ‘‘ཀེན ¶ ཙིནྟིཏཾ པཉྷཔཊིབྷཱག’’ནྟི པུཙྪིཏྭཱ ‘‘མཧོསདྷཔཎྜིཏེནཱ’’ཏི སུཏྭཱ ཏུསྶི.
ཏལཱ༹ཀནྟི ཨཔརསྨིཾ དིཝསེ པཎྜིཏསྶ ཝཱིམཾསནཏྠཾ ‘‘རཱཛཱ ཨུདཀཀཱིལ༹ཾ ཀཱིལི༹ཏུཀཱམོ, པཉྩཝིདྷཔདུམསཙྪནྣཾ པོཀྑརཎིཾ པེསེནྟུ, ཨཔེསེནྟཱནཾ སཧསྶདཎྜོ’’ཏི གཱམཝཱསཱིནཾ པེསཡིཾསུ. ཏེ པཎྜིཏསྶ ཨཱརོཙེསུཾ. སོ ‘‘ཨིམིནཱཔི པཉྷཔཊིབྷཱགེནེཝ བྷཝིཏབྦ’’ནྟི ཙིནྟེཏྭཱ ཝཙནཀུསལེ ཀཏིཔཡེ མནུསྶེ པཀྐོསཱཔེཏྭཱ ‘‘ཨེཐ ཏུམྷེ ཨུདཀཀཱིལ༹ཾ ཀཱིལི༹ཏྭཱ ཨཀྑཱིནི རཏྟཱནི ཀཏྭཱ ཨལླཀེསཱ ཨལླཝཏྠཱ ཀདྡམམཀྑིཏསརཱིརཱ ཡོཏྟདཎྜལེཌྜུཧཏྠཱ རཱཛདྭཱརཾ གནྟྭཱ དྭཱརེ ཋིཏབྷཱཝཾ རཉྙོ ཨཱརོཙཱཔེཏྭཱ ཀཏོཀཱསཱ པཝིསིཏྭཱ ‘མཧཱརཱཛ, ཏུམྷེཧི ཀིར པཱཙཱིནཡཝམཛ྄ཛྷཀགཱམཝཱསིནོ ¶ པོཀྑརཎིཾ པེསེནྟཱུཏི པཧིཏཱ མཡཾ ཏུམྷཱཀཾ ཨནུཙྪཝིཀཾ མཧནྟཾ པོཀྑརཎིཾ ཨཱདཱཡ ཨཱགཏཱ. སཱ པན ཨརཉྙཝཱསིཀཏྟཱ ནགརཾ དིསྭཱ དྭཱརཔཱཀཱརཔརིཁཱཨཊྚཱལཀཱདཱིནི ཨོལོཀེཏྭཱ བྷཱིཏཏསིཏཱ ཡོཏྟཱནི ཚིནྡིཏྭཱ པལཱཡིཏྭཱ ཨརཉྙམེཝ པཝིཊྛཱ, མཡཾ ལེཌྜུདཎྜཱདཱིཧི པོཐེནྟཱཔི ནིཝཏྟེཏུཾ ན སཀྑིམྷཱ, ཏུམྷཱཀཾ ཨརཉྙཱ ཨཱནཱིཏཾ པུརཱཎཔོཀྑརཎིཾ པེསེཐ, ཏཱཡ སདྡྷིཾ ཡོཛེཏྭཱ ཧརིསྶཱམཱ’ཏི ཝཏྭཱ རཉྙཱན ཀདཱཙི མམ ཨརཉྙཏོ ཨཱནཱིཏཔོཀྑརཎཱི ནཱམ ¶ བྷཱུཏཔུབྦཱ, ན ཙ མཡཱ ཀསྶཙི ཡོཛེཏྭཱ ཨཱཧརཎཏྠཱཡ པོཀྑརཎཱི པེསིཏཔུབྦཱ’ཏི ཝུཏྟེ ‘སཙེ, དེཝ, ཝོ ཨེཝཾ ན སཀྐཱ ཀཱཏུཾ, པཱཙཱིནཡཝམཛ྄ཛྷཀགཱམཝཱསིནོ ཀཐཾ པོཀྑརཎིཾ པེསེསྶནྟཱི’ཏི ཝདེཡྻཱཐཱ’’ཏི ཝཏྭཱ པེསེསི. ཏེ ཏཐཱ ཀརིཾསུ. རཱཛཱ པཎྜིཏེན ཉཱཏབྷཱཝཾ སུཏྭཱ ཏུསྶི.
ཨུཡྻཱནནྟི པུནེཀདིཝསཾ ‘‘མཡཾ ཨུཡྻཱནཀཱིལ༹ཾ ཀཱིལི༹ཏུཀཱམཱ, ཨམྷཱཀཉྩ པུརཱཎཨུཡྻཱནཾ པརིཛིཎྞཾ, ཨོབྷགྒཾ ཛཱཏཾ, པཱཙཱིནཡཝམཛ྄ཛྷཀགཱམཝཱསིནོ སུཔུཔྥིཏཏརུཎརུཀྑསཉྪནྣཾ ནཝཨུཡྻཱནཾ པེསེནྟཱུ’’ཏི པཧིཎིཾསུ. གཱམཝཱསིནོ པཎྜིཏསྶ ཨཱརོཙེསུཾ. པཎྜིཏོ ‘‘ཨིམིནཱཔི པཉྷཔཊིབྷཱགེནེཝ བྷཝིཏབྦ’’ནྟི ཏེ སམསྶཱསེཏྭཱ མནུསྶེ པེསེཏྭཱ པུརིམནཡེནེཝ ཀཐཱཔེསི.
ཏདཱཔི ¶ རཱཛཱ ཏུསྶིཏྭཱ སེནཀཾ པུཙྪི ‘‘ཀིཾ, སེནཀ, ཨཱནེམ པཎྜིཏ’’ནྟི. སོ ལཱབྷམཙྪརིཡེན ‘‘ཨེཏྟཀེན པཎྜིཏོ ནཱམ ན ཧོཏི, ཨཱགམེཐ, དེཝཱ’’ཏི ཨཱཧ. ཏསྶ ཏཾ ཝཙནཾ སུཏྭཱ རཱཛཱ ཙིནྟེསི ‘‘མཧོསདྷཔཎྜིཏོ སཏྟདཱརཀཔཉྷེཧི མམ མནཾ གཎྷི, ཨེཝརཱུཔེསུཔིསྶ གུཡ྄ཧཔཉྷཝིསྶཛྫནེསུ ཙེཝ པཉྷཔཊིབྷཱགེསུ ཙ བུདྡྷསྶ ཝིཡ བྱཱཀརཎཾ, སེནཀོ ཨེཝརཱུཔཾ པཎྜིཏཾ ཨཱནེཏུཾ ན དེཏི, ཀིཾ མེ སེནཀེན, ཨཱནེསྶཱམི ན’’ནྟི. སོ མཧནྟེན པརིཝཱརེན ཏཾ གཱམཾ པཱཡཱསི. ཏསྶ མངྒལཨསྶཾ ཨབྷིརུཧིཏྭཱ གཙྪནྟསྶ ཨསྶསྶ པཱདོ ཕལིཏབྷཱུམིཡཱ ཨནྟརཾ པཝིསིཏྭཱ བྷིཛྫི. རཱཛཱ ཏཏོཝ ནིཝཏྟིཏྭཱ ནགརཾ པཱཝིསི. ཨཐ ནཾ སེནཀོ ཨུཔསངྐམིཏྭཱ པུཙྪི ‘‘མཧཱརཱཛ, པཎྜིཏཾ ཀིཾ ཨཱནེཏུཾ པཱཙཱིནཡཝམཛ྄ཛྷཀགཱམཾ ཨགམིཏྠཱ’’ཏི. ‘‘ཨཱམ, པཎྜིཏཱ’’ཏི. ‘‘མཧཱརཱཛ, ཏུམྷེ མཾ ཨནཏྠཀཱམཾ ཀཏྭཱ པསྶཐ, ‘ཨཱགམེཐ ཏཱཝཱ’ཏི ཝུཏྟེཔི ཨཏིཏུརིཏཱ ནིཀྑམིཏྠ, པཋམགམནེནེཝ མངྒལཨསྶསྶ པཱདོ བྷིནྣོ’’ཏི.
སོ ཏསྶ ཝཙནཾ སུཏྭཱ ཏུཎྷཱི ཧུཏྭཱ པུནེཀདིཝསཾ ཏེན སདྡྷིཾ མནྟེསི ‘‘ཀིཾ, སེནཀ, ཨཱནེམ པཎྜིཏ’’ནྟི. དེཝ, སཡཾ ཨགནྟྭཱ དཱུཏཾ པེསེཐ ‘‘པཎྜིཏ, ཨམྷཱཀཾ ཏཝ སནྟིཀཾ ཨཱགཙྪནྟཱནཾ ཨསྶསྶ པཱདོ བྷིནྣོ, ཨསྶཏརཾ ཝཱ ནོ པེསེཏུ སེཊྛཏརཾ ཝཱ’’ཏི. ‘‘ཡདི ཨསྶཏརཾ ¶ པེསེསྶཏི, སཡཾ ཨཱགམིསྶཏི. སེཊྛཏརཾ པེསེནྟོ པིཏརཾ པེསེསྶཏི, ཨཡམེཀོ ནོ པཉྷོ བྷཝིསྶཏཱི’’ཏི. རཱཛཱ ‘‘སཱདྷཱུ’’ཏི སམྤཊིཙྪིཏྭཱ ཏཐཱ ཀཏྭཱ དཱུཏཾ པེསེསི. པཎྜིཏོ དཱུཏསྶ ཝཙནཾ སུཏྭཱ ‘‘རཱཛཱ མམཉྩེཝ པིཏརཉྩ པསྶིཏུཀཱམོ’’ཏི ཙིནྟེཏྭཱ པིཏུ སནྟིཀཾ གནྟྭཱ ཝནྡིཏྭཱ ‘‘ཏཱཏ, རཱཛཱ ཏུམྷེ ཙེཝ མམཉྩ དཊྛུཀཱམོ, ཏུམྷེ པཋམཏརཾ སེཊྛིསཧསྶཔརིཝུཏཱ གཙྪཐ, གཙྪནྟཱ ཙ ཏུཙྪཧཏྠཱ ཨགནྟྭཱ ནཝསཔྤིཔཱུརཾ ཙནྡནཀརཎྜཀཾ ཨཱདཱཡ གཙྪཐ. རཱཛཱ ཏུམྷེཧི སདྡྷིཾ པཊིསནྠཱརཾ ཀཏྭཱ ‘གཧཔཏི པཏིརཱུཔཾ ཨཱསནཾ ཉཏྭཱ ནིསཱིདཱཧཱི’ཏི ཝཀྑཏི, ཨཐ ཏུམྷེ ཏཐཱརཱུཔཾ ཨཱསནཾ ཉཏྭཱ ནིསཱིདེཡྻཱཐ. ཏུམྷཱཀཾ ནིསིནྣཀཱལེ ཨཧཾ ཨཱགམིསྶཱམི, རཱཛཱ མཡཱཔི སདྡྷིཾ པཊིསནྠཱརཾ ཀཏྭཱ ‘པཎྜིཏ, ཏཝཱནུརཱུཔཾ ཨཱསནཾ ཉཏྭཱ ནིསཱིདཱ’ཏི ཝཀྑཏི, ཨཐཱཧཾ ཏུམྷེ ཨོལོཀེསྶཱམི, ཏུམྷེ ཏཱཡ སཉྙཱཡ ཨཱསནཱ ཝུཊྛཱཡ ‘ཏཱཏ མཧོསདྷ, ཨིམསྨིཾ ཨཱསནེ ནིསཱིདཱ’ཏི ཝདེཡྻཱཐ, ཨཛྫ ནོ ཨེཀོ པཉྷོ མཏྠཀཾ པཱཔུཎིསྶཏཱི’’ཏི ¶ ཨཱཧ. སོ ‘‘སཱདྷཱུ’’ཏི སམྤཊིཙྪིཏྭཱ ཝུཏྟནཡེནེཝ གནྟྭཱ ཨཏྟནོ དྭཱརེ ཋིཏབྷཱཝཾ རཉྙོ ཨཱརོཙཱཔེཏྭཱ ‘‘པཝིསཏཱུ’’ཏི ཝུཏྟེ པཝིསིཏྭཱ རཱཛཱནཾ ཝནྡིཏྭཱ ཨེཀམནྟཾ ཨཊྛཱསི.
རཱཛཱ ཏེན སདྡྷིཾ པཊིསནྠཱརཾ ཀཏྭཱ ‘‘གཧཔཏི, ཏཝཔུཏྟོ མཧོསདྷཔཎྜིཏོ ཀུཧི’’ནྟི པུཙྪི. ‘‘པཙྪཏོ ཨཱགཙྪཏི, དེཝཱ’’ཏི. རཱཛཱ ‘‘པཙྪཏོ ཨཱགཙྪཏཱི’’ཏི སུཏྭཱ ཏུཊྛམཱནསོ ཧུཏྭཱ ‘‘མཧཱསེཊྛི ཨཏྟནོ ཡུཏྟཱསནཾ ཉཏྭཱ ནིསཱིདཱ’’ཏི ཨཱཧ. སོ ཨཏྟནོ ཡུཏྟཱསནཾ ཉཏྭཱ ¶ ཨེཀམནྟཾ ནིསཱིདི. མཧཱསཏྟོཔི ཨལངྐཏཔཊིཡཏྟོ དཱརཀསཧསྶཔརིཝུཏོ ཨལངྐཏརཐེ ནིསཱིདིཏྭཱ ནགརཾ པཝིསནྟོ པརིཁཱཔིཊྛེ ཙརམཱནཾ ཨེཀཾ གདྲབྷཾ དིསྭཱ ཐཱམསམྤནྣེ མཱཎཝེ པེསེསི ‘‘ཨམྦྷོ, ཨེཏཾ གདྲབྷཾ ཨནུབནྡྷིཏྭཱ ཡཐཱ སདྡཾ ན ཀརོཏི, ཨེཝམསྶ མུཁབནྡྷནཾ ཀཏྭཱ ཀིལཉྫེན ཝེཋེཏྭཱ ཏསྨིཾ ཨེཀེནཏྠརཎེན པཊིཙྪཱདེཏྭཱ ཨཾསེནཱདཱཡ ཨཱགཙྪཐཱ’’ཏི. ཏེ ཏཐཱ ཀརིཾསུ. བོདྷིསཏྟོཔི མཧནྟེན པརིཝཱརེན ནགརཾ པཱཝིསི. མཧཱཛནོ ‘‘ཨེས ཀིར སིརིཝཌྜྷནསེཊྛིནོ པུཏྟོ མཧོསདྷཔཎྜིཏོ ནཱམ, ཨེས ཀིར ཛཱཡམཱནོ ཨོསདྷགྷཊིཀཾ ཧཏྠེན གཧེཏྭཱ ཛཱཏོ, ཨིམིནཱ ཀིར ཨེཏྟཀཱནཾ ཝཱིམཾསནཔཉྷཱནཾ པཉྷཔཊིབྷཱགོ ཉཱཏོ’’ཏི མཧཱསཏྟཾ ཨབྷིཏྠཝནྟོ ཨོལོཀེནྟོཔི ཏིཏྟིཾ ན གཙྪཏི. སོ རཱཛདྭཱརཾ གནྟྭཱ པཊིཝེདེསི. རཱཛཱ སུཏྭཱཝ ཧཊྛཏུཊྛོ ‘‘མམ པུཏྟོ མཧོསདྷཔཎྜིཏོ ཁིཔྤཾ ཨཱགཙྪཏཱུ’’ཏི ཨཱཧ. སོ དཱརཀསཧསྶཔརིཝུཏོ པཱསཱདཾ ཨབྷིརུཧིཏྭཱ རཱཛཱནཾ ཝནྡིཏྭཱ ཨེཀམནྟཾ ཨཊྛཱསི. རཱཛཱ ཏཾ དིསྭཱཝ སོམནསྶཔྤཏྟོ ཧུཏྭཱ མདྷུརཔཊིསནྠཱརཾ ཀཏྭཱ ‘‘པཎྜིཏ, པཏིརཱུཔཾ ཨཱསནཾ ཉཏྭཱ ནིསཱིདཱ’’ཏི ཨཱཧ. ཨཐ སོ པིཏརཾ ཨོལོཀེསི. ཨཐསྶ པིཏཱཔི ཨོལོཀིཏསཉྙཱཡ ཨུཊྛཱཡ ‘‘པཎྜིཏ, ཨིམསྨིཾ ཨཱསནེ ནིསཱིདཱ’’ཏི ཨཱཧ. སོ ཏསྨིཾ ཨཱསནེ ནིསཱིདི.
ཏཾ ¶ ཏཏྠ ནིསིནྣཾ དིསྭཱཝ སེནཀཔུཀྐུསཀཱམིནྡདེཝིནྡཱ ཙེཝ ཨཉྙེ ཙ ཨནྡྷབཱལཱ པཱཎིཾ པཧརིཏྭཱ མཧཱཧསིཏཾ ཧསིཏྭཱ ‘‘ཨིམཾ ཨནྡྷབཱལཾ ‘པཎྜིཏོ’ཏི ཝདིཾསུ, སོ པིཏརཾ ཨཱསནཱ ཝུཊྛཱཔེཏྭཱ སཡཾ ནིསཱིདཏི, ཨིམཾ ‘པཎྜིཏོ’ཏི ཝཏྟུཾ ཨཡུཏྟ’’ནྟི པརིཧཱསཾ ཀརིཾསུ. རཱཛཱཔི དུམྨུཁོ ཨནཏྟམནོ ཨཧོསི. ཨཐ ནཾ མཧཱསཏྟོ པུཙྪི ‘‘ཀིཾ, མཧཱརཱཛ, དུམྨུཁཏྠཱ’’ཏི ¶ ? ‘‘ཨཱམ པཎྜིཏ, དུམྨུཁོམྷི, སཝནམེཝ ཏེ མནཱཔཾ, དསྶནཾ པན ཨམནཱཔཾ ཛཱཏ’’ནྟི. ‘‘ཀིཾ ཀཱརཎཱ, མཧཱརཱཛཱ’’ཏི? ‘‘པིཏརཾ ཨཱསནཱ ཝུཊྛཱཔེཏྭཱ ནིསིནྣཏྟཱ’’ཏི. ‘‘ཀིཾ པན ཏྭཾ, མཧཱརཱཛ, ‘སབྦཊྛཱནེསུ པུཏྟེཧི པིཏརོཝ ཨུཏྟམཱ’ཏི མཉྙསཱི’’ཏི. ‘‘ཨཱམ, པཎྜིཏཱ’’ཏི. ཨཐ མཧཱསཏྟོ ‘‘ནནུ, མཧཱརཱཛ, ཏུམྷེཧི ཨམྷཱཀཾ ‘ཨསྶཏརཾ ཝཱ པེསེཏུ སེཊྛཏརཾ ཝཱ’ཏི སཱསནཾ པཧིཏ’’ནྟི ཝཏྭཱ ཨཱསནཱ ཝུཊྛཱཡ ཏེ མཱཎཝེ ཨོལོཀེཏྭཱ ‘‘ཏུམྷེཧི གཧིཏཾ གདྲབྷཾ ཨཱནེཐཱ’’ཏི ཨཱཎཱཔེཏྭཱ རཉྙོ པཱདམཱུལེ ནིཔཛྫཱཔེཏྭཱ ‘‘མཧཱརཱཛ, ཨཡཾ གདྲབྷོ ཀིཾ ཨགྒྷཏཱི’’ཏི པུཙྪི. ‘‘པཎྜིཏ, སཙེ ཨུཔཀཱརཀོ, ཨཊྛ ཀཧཱཔཎེ ཨགྒྷཏཱི’’ཏི. ‘‘ཨིམཾ པཊིཙྩ ཛཱཏོ ཨཱཛཱནཱིཡཝལ༹ཝཱཡ ཀུཙྪིམྷི ཝུཊྛཨསྶཏརོ ཀིཾ ཨགྒྷཏཱི’’ཏི? ‘‘ཨནགྒྷོ པཎྜིཏཱ’’ཏི. ‘‘དེཝ, ཀསྨཱ ཨེཝཾ ཀཐེཐ, ནནུ ཏུམྷེཧི ཨིདཱནེཝ ཝུཏྟཾ ‘སབྦཊྛཱནེསུ པུཏྟེཧི པིཏརོཝ ཨུཏྟམཱ’ཏི. སཙེ ཏཾ སཙྩཾ, ཏུམྷཱཀཾ ཝཱདེ ཨསྶཏརཏོ གདྲབྷོཝ ཨུཏྟམོ ཧོཏི, ཀིཾ པན, མཧཱརཱཛ, ཏུམྷཱཀཾ པཎྜིཏཱ ཨེཏྟཀམྤི ཛཱནིཏུཾ ཨསཀྐོནྟཱ པཱཎིཾ པཧརིཏྭཱ ཧསནྟི, ཨཧོ ཏུམྷཱཀཾ པཎྜིཏཱནཾ པཉྙཱསམྤཏྟི, ཀུཏོ ཝོ ཨེཏེ ལདྡྷཱ’’ཏི ཙཏྟཱརོ པཎྜིཏེ པརིཧསིཏྭཱ རཱཛཱནཾ ཨིམཱཡ ཨེཀཀནིཔཱཏེ གཱཐཱཡ ཨཛ྄ཛྷབྷཱསི –
‘‘ཧཾཙི ཏུཝཾ ཨེཝམཉྙསི ‘སེཡྻོ, པུཏྟེན པིཏཱ’ཏི རཱཛསེཊྛ;
ཧནྡསྶཏརསྶ ཏེ ཨཡཾ, ཨསྶཏརསྶ ཧི གདྲབྷོ པིཏཱ’’ཏི. (ཛཱ. ༡.༡.༡༡༡);
ཏསྶཏྠོ – ཡདི, ཏྭཾ རཱཛསེཊྛ, སབྦཊྛཱནེསུ སེཡྻོ པུཏྟེན པིཏཱཏི ཨེཝཾ མཉྙསི, ཏཝ ཨསྶཏརཏོཔི ཨཡཾ གདྲབྷོ སེཡྻོ ཧོཏུ. ཀིཾ ཀཱརཎཱ? ཨསྶཏརསྶ ཧི གདྲབྷོ པིཏཱཏི.
ཨེཝཉྩ པན ཝཏྭཱ མཧཱསཏྟོ ཨཱཧ – ‘‘མཧཱརཱཛ ¶ , སཙེ པུཏྟཏོ པིཏཱ སེཡྻོ, མམ པིཏརཾ གཎྷཐ. སཙེ པིཏིཏོ པུཏྟོ སེཡྻོ, མཾ གཎྷཐ ཏུམྷཱཀཾ ཨཏྠཱཡཱ’’ཏི. རཱཛཱ སོམནསྶཔྤཏྟོ ཨཧོསི. སབྦཱ རཱཛཔརིསཱཔི ‘‘སུཀཐིཏོ པཎྜིཏེན པཉྷོ’’ཏི ཨུནྣདནྟཱ སཱདྷུཀཱརསཧསྶཱནི ཨདཾསུ, ཨངྒུལིཕོཊཱ ཙེཝ ཙེལུཀྑེཔཱ ཙ པཝཏྟིཾསུ ¶ . ཙཏྟཱརོ པཎྜིཏཱཔི དུམྨུཁཱ པཛ྄ཛྷཱཡནྟཱཝ ཨཧེསུཾ. ནནུ མཱཏཱཔིཏཱུནཾ གུཎཾ ཛཱནནྟོ བོདྷིསཏྟེན སདིསོ ནཱམ ནཏྠི ¶ , ཨཐ སོ ཀསྨཱ ཨེཝམཀཱསཱིཏི? ན སོ པིཏུ ཨཝམཱནནཏྠཱཡ, རཉྙཱ པན ‘‘ཨསྶཏརཾ ཝཱ པེསེཏུ སེཊྛཏརཾ ཝཱ’’ཏི པེསིཏཾ, ཏསྨཱ ཏསྶེཝ པཉྷསྶ ཨཱཝིབྷཱཝཏྠཾ ཨཏྟནོ ཙ པཎྜིཏབྷཱཝསྶ ཉཱཔནཏྠཾ ཙཏུནྣཉྩ པཎྜིཏཱནཾ ཨཔྤཊིབྷཱནཀརཎཏྠཾ ཨེཝམཀཱསཱིཏི.
གདྲབྷཔཉྷོ ནིཊྛིཏོ.
ཨེཀཱུནཝཱིསཏིམཔཉྷོ
རཱཛཱ ཏུསྶིཏྭཱ གནྡྷོདཀཔུཎྞཾ སུཝཎྞབྷིངྐཱརཾ ཨཱདཱཡ ‘‘པཱཙཱིནཡཝམཛ྄ཛྷཀགཱམཾ རཱཛབྷོགེན པརིབྷུཉྫཏཱུ’’ཏི སེཊྛིསྶ ཧཏྠེ ཨུདཀཾ པཱཏེཏྭཱ ‘‘སེསསེཊྛིནོ ཨེཏསྶེཝ ཨུཔཊྛཱཀཱ ཧོནྟཱུ’’ཏི ཝཏྭཱ བོདྷིསཏྟསྶ མཱཏུ ཙ སབྦཱལངྐཱརེ པེསེཏྭཱ གདྲབྷཔཉྷེ པསནྣོ བོདྷིསཏྟཾ པུཏྟཾ ཀཏྭཱ གཎྷིཏུཾ སེཊྛིཾ ཨཝོཙ – ‘‘གཧཔཏི, མཧོསདྷཔཎྜིཏཾ མམ པུཏྟཾ ཀཏྭཱ དེཧཱི’’ཏི. ‘‘དེཝ, ཨཏིཏརུཎོ ཨཡཾ, ཨཛྫཱཔིསྶ མུཁེ ཁཱིརགནྡྷོ ཝཱཡཏི, མཧལླཀཀཱལེ ཏུམྷཱཀཾ སནྟིཀེ བྷཝིསྶཏཱི’’ཏི. ‘‘གཧཔཏི, ཏྭཾ ཨིཏོ པཊྛཱཡ ཨེཏསྨིཾ ནིརཱལཡོ ཧོཧི, ཨཡཾ ཨཛྫཏགྒེ མམ པུཏྟོ, ཨཧཾ མམ པུཏྟཾ པོསེཏུཾ སཀྑིསྶཱམི, གཙྪ ཏྭ’’ནྟི ཏཾ ཨུཡྻོཛེསི. སོ རཱཛཱནཾ ཝནྡིཏྭཱ པཎྜིཏཾ ཨཱལིངྒིཏྭཱ ཨུརེ ནིཔཛྫཱཔེཏྭཱ སཱིསེ ཙུམྦིཏྭཱ ‘‘ཏཱཏ, ཨཔྤམཏྟོ ཧོཧཱི’’ཏི ཨོཝཱདམསྶ ཨདཱསི. སོཔི པིཏརཾ ཝནྡིཏྭཱ ‘‘ཏཱཏ, མཱ ཙིནྟཡིཏྠཱ’’ཏི ཨསྶཱསེཏྭཱ པིཏརཾ ཨུཡྻོཛེསི. རཱཛཱ པཎྜིཏཾ པུཙྪི ‘‘ཏཱཏ, ཨནྟོབྷཏྟིཀོ བྷཝིསྶསི, ཨུདཱཧུ བཧིབྷཏྟིཀོ’’ཏི. སོ ‘‘མཧཱ མེ པརིཝཱརོ, ཏསྨཱ བཧིབྷཏྟིཀེན མཡཱ བྷཝིཏུཾ ཝཊྚཏཱི’’ཏི ཙིནྟེཏྭཱ ‘‘བཧིབྷཏྟིཀོ བྷཝིསྶཱམི, དེཝཱ’’ཏི ཨཱཧ. ཨཐསྶ རཱཛཱ ཨནུརཱུཔཾ གེཧཾ དཱཔེཏྭཱ དཱརཀསཧསྶཾ ཨཱདིཾ ཀཏྭཱ པརིབྦཡཾ དཱཔེཏྭཱ སབྦཔརིབྷོགེ དཱཔེསི. སོ ཏཏོ པཊྛཱཡ རཱཛཱནཾ ཨུཔཊྛཱསི.
རཱཛཱཔི ནཾ ཝཱིམཾསིཏུཀཱམོ ཨཧོསི. ཏདཱ ཙ ནགརསྶ དཀྑིཎདྭཱརཏོ ཨཝིདཱུརེ པོཀྑརཎིཏཱིརེ ཨེཀསྨིཾ ཏཱལརུཀྑེ ཀཱཀཀུལཱཝཀེ མཎིརཏནཾ ཨཧོསི. ཏསྶ ཚཱཡཱ པོཀྑརཎིཡཾ པཉྙཱཡི. མཧཱཛནོ ‘‘པོཀྑརཎིཡཾ ¶ མཎི ཨཏྠཱི’’ཏི རཉྙོ ཨཱརོཙེསི. སོ སེནཀཾ ཨཱམནྟེཏྭཱ ‘‘པོཀྑརཎིཡཾ ¶ ཀིར མཎིརཏནཾ པཉྙཱཡཏི, ཀཐཾ ཏཾ གཎྷཱཔེསྶཱམཱ’’ཏི པུཙྪིཏྭཱ ‘‘མཧཱརཱཛ, ཨུདཀཾ ནཱིཧརཱཔེཏྭཱ གཎྷིཏུཾ ཝཊྚཏཱི’’ཏི ཝུཏྟེ ‘‘ཏེན ཧི, ཨཱཙརིཡ, ཨེཝཾ ཀརོཧཱི’’ཏི ཏསྶེཝ བྷཱརམཀཱསི. སོ བཧཱུ མནུསྶེ སནྣིཔཱཏཱཔེཏྭཱ ཨུདཀཉྩ ཀདྡམཉྩ ནཱིཧརཱཔེཏྭཱ བྷཱུམིཾ བྷིནྡིཏྭཱཔི མཎིཾ ནཱདྡས. པུན པུཎྞཱཡ པོཀྑརཎིཡཱ མཎིཙྪཱཡཱ པཉྙཱཡི ¶ . སོ པུནཔི ཏཐཱ ཀཏྭཱ ན ཙ ཨདྡས. ཏཏོ རཱཛཱ པཎྜིཏཾ ཨཱམནྟེཏྭཱ ‘‘ཏཱཏ, པོཀྑརཎིཡཾ ཨེཀོ མཎི པཉྙཱཡཏི, སེནཀོ ཨུདཀཉྩ ཀདྡམཉྩ ནཱིཧརཱཔེཏྭཱ བྷཱུམིཾ བྷིནྡིཏྭཱཔི ནཱདྡས, པུན པུཎྞཱཡ པོཀྑརཎིཡཱ པཉྙཱཡཏི, སཀྑིསྶསི ཏཾ མཎིཾ གཎྷཱཔེཏུ’’ནྟི པུཙྪི. སོ ‘‘ནེཏཾ, མཧཱརཱཛ, གརུ, ཨེཐ དསྶེསྶཱམཱི’’ཏི ཨཱཧ. རཱཛཱ ཏསྶ ཝཙནཾ ཏུསྶིཏྭཱ ‘‘པསྶིསྶཱམི ཨཛྫ པཎྜིཏསྶ ཉཱཎབལ’’ནྟི མཧཱཛནཔརིཝུཏོ པོཀྑརཎིཏཱིརཾ གཏོ.
མཧཱསཏྟོ ཏཱིརེ ཋཏྭཱ མཎིཾ ཨོལོཀེནྟོ ‘‘ནཱཡཾ མཎི པོཀྑརཎིཡཾ, ཏཱལརུཀྑེ ཀཱཀཀུལཱཝཀེ མཎིནཱ བྷཝིཏབྦ’’ནྟི ཉཏྭཱ ‘‘ནཏྠི, དེཝ, པོཀྑརཎིཡཾ མཎཱི’’ཏི ཝཏྭཱ ‘‘ནནུ ཨུདཀེ པཉྙཱཡཏཱི’’ཏི ཝུཏྟེ ‘‘ཏེན ཧི ཨུདཀཔཱཏིཾ ཨཱཧརཱ’’ཏི ཨུདཀཔཱཏིཾ ཨཱཧརཱཔེཏྭཱ ‘‘པསྶཐ, དེཝ, ནཱཡཾ མཎི པོཀྑརཎིཡཾཡེཝ པཉྙཱཡཏི, པཱཏིཡམྤི པཉྙཱཡཏཱི’’ཏི ཝཏྭཱ ‘‘པཎྜིཏ, ཀཏྠ པན མཎིནཱ བྷཝིཏབྦ’’ནྟི ཝུཏྟེ ‘‘དེཝ, པོཀྑརཎིཡམྤི པཱཏིཡམྤི ཚཱཡཱཝ པཉྙཱཡཏི, ན མཎི, མཎི པན ཏཱལརུཀྑེ ཀཱཀཀུལཱཝཀེ ཨཏྠི, པུརིསཾ ཨཱཎཱཔེཏྭཱ ཨཱཧརཱཔེཧཱི’’ཏི ཨཱཧ. རཱཛཱ ཏཐཱ ཀཏྭཱ མཎིཾ ཨཱཧརཱཔེསི. སོ ཨཱཧརིཏྭཱ པཎྜིཏསྶ ཨདཱསི. པཎྜིཏོ ཏཾ གཧེཏྭཱ རཉྙོ ཧཏྠེ ཋཔེསི. ཏཾ དིསྭཱ མཧཱཛནོ པཎྜིཏསྶ སཱདྷུཀཱརཾ དཏྭཱ སེནཀཾ པརིབྷཱསནྟོ ‘‘མཎིརཏནཾ ཏཱལརུཀྑེ ཀཱཀཀུལཱཝཀེ ཨཏྠི, སེནཀབཱལོ བཧཱུ མནུསྶེ པོཀྑརཎིམེཝ བྷིནྡཱཔེསི, པཎྜིཏེན ནཱམ མཧོསདྷསདིསེན བྷཝིཏབྦ’’ནྟི མཧཱསཏྟསྶ ཐུཏིམཀཱསི. རཱཛཱཔིསྶ ཏུཊྛོ ཨཏྟནོ གཱིཝཱཡ པིལ༹ནྡྷནཾ མུཏྟཱཧཱརཾ དཏྭཱ དཱརཀསཧསྶཱནམྤི མུཏྟཱཝལིཡོ དཱཔེསི. བོདྷིསཏྟསྶ ཙ པརིཝཱརསྶ ཙ ཨིམིནཱ པརིཧཱརེན ཨུཔཊྛཱནཾ ཨནུཛཱནཱིཏི.
ཨེཀཱུནཝཱིསཏིམཔཉྷོ ནིཊྛིཏོ.
ཀཀཎྚཀཔཉྷོ
པུནེཀདིཝསཾ ¶ རཱཛཱ པཎྜིཏེན སདྡྷིཾ ཨུཡྻཱནཾ ཨགམཱསི. ཏདཱ ¶ ཨེཀོ ཀཀཎྚཀོ ཏོརཎགྒེ ཝསཏི. སོ རཱཛཱནཾ ཨཱགཙྪནྟཾ དིསྭཱ ཨོཏརིཏྭཱ བྷཱུམིཡཾ ནིཔཛྫི. རཱཛཱ ཏསྶ ཏཾ ཀིརིཡཾ ཨོལོཀེཏྭཱ ‘‘པཎྜིཏ, ཨཡཾ ཀཀཎྚཀོ ཀིཾ ཀརོཏཱི’’ཏི པུཙྪི. མཧཱསཏྟོ ‘‘མཧཱརཱཛ, ཏུམྷེ སེཝཏཱི’’ཏི ཨཱཧ. ‘‘སཙེ ཨེཝཾ ཨམྷཱཀཾ སེཝཏི, ཨེཏསྶ མཱ ནིཔྥལོ ཧོཏུ, བྷོགམསྶ དཱཔེཧཱི’’ཏི. ‘‘དེཝ, ཏསྶ བྷོགེན ཀིཙྩཾ ནཏྠི, ཁཱདནཱིཡམཏྟཾ ཨལམེཏསྶཱ’’ཏི ¶ . ‘‘ཀིཾ པནེས, ཁཱདཏཱི’’ཏི? ‘‘མཾསཾ དེཝཱ’’ཏི. ‘‘ཀིཏྟཀཾ ལདྡྷུཾ ཝཊྚཏཱི’’ཏི? ‘‘ཀཱཀཎིཀམཏྟགྒྷནཀཾ དེཝཱ’’ཏི. རཱཛཱ ཨེཀཾ པུརིསཾ ཨཱཎཱཔེསི ‘‘རཱཛདཱཡོ ནཱམ ཀཱཀཎིཀམཏྟཾ ན ཝཊྚཏི, ཨིམསྶ ནིབདྡྷཾ ཨཌྜྷམཱསགྒྷནཀཾ མཾསཾ ཨཱཧརིཏྭཱ དེཧཱི’’ཏི. སོ ‘‘སཱདྷཱུ’’ཏི སམྤཊིཙྪིཏྭཱ ཏཏོ པཊྛཱཡ ཏཐཱ ཨཀཱསི. སོ ཨེཀདིཝསཾ ཨུཔོསཐེ མཱགྷཱཏེ མཾསཾ ཨལབྷིཏྭཱ ཏམེཝ ཨཌྜྷམཱསཀཾ ཝིཛ྄ཛྷིཏྭཱ སུཏྟེན ཨཱཝུནིཏྭཱ ཏསྶ གཱིཝཱཡཾ པིལ༹ནྡྷི. ཨཐསྶ ཏཾ ནིསྶཱཡ མཱནོ ཨུཔྤཛྫི. ཏཾ དིཝསམེཝ རཱཛཱ པུན མཧོསདྷེན སདྡྷིཾ ཨུཡྻཱནཾ ཨགམཱསི. སོ རཱཛཱནཾ ཨཱགཙྪནྟཾ དིསྭཱཔི དྷནཾ ནིསྶཱཡ ཨུཔྤནྣམཱནཝསེན ‘‘ཝེདེཧ, ཏྭཾ ནུ ཁོ མཧདྡྷནོ, ཨཧཾ ནུ ཁོ’’ཏི རཉྙཱ སདྡྷིཾ ཨཏྟཱནཾ སམཾ ཀརོནྟོ ཨནོཏརིཏྭཱ ཏོརཎགྒེཡེཝ སཱིསཾ ཙཱལེནྟོ ནིཔཛྫི. རཱཛཱ ཏསྶ ཏཾ ཀིརིཡཾ ཨོལོཀེཏྭཱ ‘‘པཎྜིཏ, ཨེས པུབྦེ ཝིཡ ཨཛྫ ན ཨོཏརཏི, ཀིཾ ནུ ཁོ ཀཱརཎ’’ནྟི པུཙྪནྟོ ཨིམཾ གཱཐམཱཧ –
‘‘ནཱཡཾ པུརེ ཨུནྣམཏི, ཏོརཎགྒེ ཀཀཎྚཀོ;
མཧོསདྷ ཝིཛཱནཱཧི, ཀེན ཐདྡྷོ ཀཀཎྚཀོ’’ཏི. (ཛཱ. ༡.༢.༣༩);
ཏཏྠ ཨུནྣམཏཱིཏི ཡཐཱ ཨཛྫ ཨནོཏརིཏྭཱ ཏོརཎགྒེཡེཝ སཱིསཾ ཙཱལེནྟོ ཨུནྣམཏི, ཨེཝཾ པུརེ ན ཨུནྣམཏི. ཀེན ཐདྡྷོཏི ཀེན ཀཱརཎེན ཐདྡྷབྷཱཝཾ ཨཱཔནྣོཏི.
པཎྜིཏོ ཏསྶ ཝཙནཾ སུཏྭཱ ‘‘མཧཱརཱཛ, ཨུཔོསཐེ མཱགྷཱཏེ མཾསཾ ཨལབྷནྟེན རཱཛཔུརིསེན གཱིཝཱཡ བདྡྷཾ ཨཌྜྷམཱསཀཾ ནིསྶཱཡ ཏསྶ མཱནེན བྷཝིཏབྦ’’ནྟི ཉཏྭཱ ཨིམཾ གཱཐམཱཧ –
‘‘ཨལདྡྷཔུབྦཾ ལདྡྷཱན, ཨཌྜྷམཱསཾ ཀཀཎྚཀོ;
ཨཏིམཉྙཏི རཱཛཱནཾ, ཝེདེཧཾ མིཐིལགྒཧ’’ནྟི. (ཛཱ. ༡.༢.༤༠);
རཱཛཱ ¶ ¶ ཏསྶ ཝཙནཾ སུཏྭཱ ཏཾ པུརིསཾ པཀྐོསཱཔེཏྭཱ པུཙྪི. སོ ཡཐཱབྷཱུཏཾ རཉྙོ ཨཱརོཙེསི. རཱཛཱ ཏཾ ཀཐཾ སུཏྭཱ ‘‘ཀཉྩི ཨཔུཙྪིཏྭཱཝ སབྦཉྙུབུདྡྷེན ཝིཡ པཎྜིཏེན ཀཀཎྚཀསྶ ཨཛ྄ཛྷཱསཡོ ཉཱཏོ’’ཏི ཨཏིཝིཡ པསཱིདིཏྭཱ པཎྜིཏསྶ ཙཏཱུསུ དྭཱརེསུ སུངྐཾ དཱཔེསི. ཀཀཎྚཀསྶ པན ཀུཛ྄ཛྷིཏྭཱ ཝཏྟཾ ཧཱརེཏུཾ ཨཱརབྷི. པཎྜིཏོ པན ‘‘མཱ ཧཱརེཧི མཧཱརཱཛཱ’’ཏི ཏཾ ནིཝཱརེསི.
ཀཀཎྚཀཔཉྷོ ནིཊྛིཏོ.
སིརིཀཱལ༹ཀཎྞིཔཉྷོ
ཨཐེཀོ ¶ མིཐིལཝཱསཱི པིངྒུཏྟརོ ནཱམ མཱཎཝོ ཏཀྐསིལཾ གནྟྭཱ དིསཱཔཱམོཀྑཱཙརིཡསྶ སནྟིཀེ སིཔྤཾ སིཀྑནྟོ ཁིཔྤམེཝ སིཀྑི. སོ ཨནུཡོགཾ དཏྭཱ ‘‘གཙྪཱམཧ’’ནྟི ཨཱཙརིཡཾ ཨཱཔུཙྪི. ཏསྨིཾ པན ཀུལེ ‘‘སཙེ ཝཡཔྤཏྟཱ དྷཱིཏཱ ཧོཏི, ཛེཊྛནྟེཝཱསིཀསྶ དཱཏབྦཱ’’ཏི ཝཏྟཾཝ, ཏསྨཱ ཏསྶ ཨཱཙརིཡསྶ ཝཡཔྤཏྟཱ ཨེཀཱ དྷཱིཏཱ ཨཏྠི, སཱ ཨབྷིརཱུཔཱ དེཝཙྪརཱཔཊིབྷཱགཱ. ཨཐ ནཾ ཨཱཙརིཡོ ‘‘དྷཱིཏརཾ ཏེ, ཏཱཏ, དསྶཱམི, ཏཾ ཨཱདཱཡ གམིསྶསཱི’’ཏི ཨཱཧ. སོ པན མཱཎཝོ དུབྦྷགོ ཀཱལ༹ཀཎྞཱི, ཀུམཱརིཀཱ པན མཧཱཔུཉྙཱ. ཏསྶ ཏཾ དིསྭཱ ཙིཏྟཾ ན ཨལླཱིཡཏི. སོ ཏཾ ཨརོཙེནྟོཔི ‘‘ཨཱཙརིཡསྶ ཝཙནཾ ན བྷིནྡིསྶཱམཱི’’ཏི སམྤཊིཙྪི. ཨཱཙརིཡོ དྷཱིཏརཾ ཏསྶ ཨདཱསི. སོ རཏྟིབྷཱགེ ཨལངྐཏསིརིསཡནེ ནིཔནྣོ ཏཱཡ ཨཱགནྟྭཱ སཡནཾ ཨབྷིརུལ༹ྷམཏྟཱཡ ཨཊྚཱིཡམཱནོ ཧརཱཡམཱནོ ཛིགུཙྪམཱནོ པཀམྤམཱནོ ཨོཏརིཏྭཱ བྷཱུམིཡཾ ནིཔཛྫི. སཱཔི ཨོཏརིཏྭཱ ཏསྶ སནྟིཀཾ གནྟྭཱ ནིཔཛྫི, སོ ཨུཊྛཱཡ སཡནཾ ཨབྷིརུཧི. སཱཔི པུན སཡནཾ ཨབྷིརུཧི, སོ པུན སཡནཱ ཨོཏརིཏྭཱ བྷཱུམིཡཾ ནིཔཛྫི. ཀཱལ༹ཀཎྞཱི ནཱམ སིརིཡཱ སདྡྷིཾ ན སམེཏི. ཀུམཱརིཀཱ སཡནེཡེཝ ནིཔཛྫི, སོ བྷཱུམིཡཾ སཡི.
ཨེཝཾ སཏྟཱཧཾ ཝཱིཏིནཱམེཏྭཱ ཏཾ ཨཱདཱཡ ཨཱཙརིཡཾ ཝནྡིཏྭཱ ནིཀྑམི, ཨནྟརཱམགྒེ ཨཱལཱཔསལླཱཔམཏྟམྤི ནཏྠི. ཨནིཙྪམཱནཱཝ ཨུབྷོཔི མིཐིལཾ སམྤཏྟཱ. ཨཐ པིངྒུཏྟརོ ནགརཱ ཨཝིདཱུརེ ཕལསམྤནྣཾ ཨུདུམྦརརུཀྑཾ དིསྭཱ ཁུདཱཡ པཱིལི༹ཏོ ཏཾ ཨབྷིརུཧིཏྭཱ ཕལཱནི ཁཱདི. སཱཔི ཚཱཏཛ྄ཛྷཏྟཱ རུཀྑམཱུལཾ གནྟྭཱ ‘‘སཱམི, མཡ྄ཧམྤི ཕལཱནི པཱཏེཐཱ’’ཏི ཨཱཧ. ཀིཾ ཏཝ ཧཏྠཔཱདཱ ནཏྠི, སཡཾ ཨབྷིརུཧིཏྭཱ ཁཱདཱཏི. སཱ ཨབྷིརུཧིཏྭཱ ཁཱདི. སོ ཏསྶཱ ཨབྷིརུལ༹ྷབྷཱཝཾ ¶ ཉཏྭཱ ཁིཔྤཾ ཨོཏརིཏྭཱ རུཀྑཾ ¶ ཀཎྚཀེཧི པརིཀྑིཔིཏྭཱ ‘‘མུཏྟོམྷི ཀཱལ༹ཀཎྞིཡཱ’’ཏི ཝཏྭཱ པལཱཡི. སཱཔི ཨོཏརིཏུཾ ཨསཀྐོནྟཱི ཏཏྠེཝ ནིསཱིདི. ཨཐ རཱཛཱ ཨུཡྻཱནེ ཀཱིལི༹ཏྭཱ ཧཏྠིཀྑནྡྷེ ནིསིནྣོ སཱཡནྷསམཡེ ནགརཾ པཝིསནྟོ ཏཾ དིསྭཱ པཊིབདྡྷཙིཏྟོ ཧུཏྭཱ ‘‘སཔརིགྒཧཱ, ཨཔརིགྒཧཱ’’ཏི པུཙྪཱཔེསི. སཱཔི ‘‘ཨཏྠི མེ, སཱམི, ཀུལདཏྟིཀོ པཏི, སོ པན མཾ ཨིདྷ ནིསཱིདཱཔེཏྭཱ ཚཌྜེཏྭཱ པལཱཏོ’’ཏི ཨཱཧ. ཨམཙྩོ ཏཾ ཀཱརཎཾ རཉྙོ ཨཱརོཙེསི. རཱཛཱ ‘‘ཨསཱམིཀབྷཎྜཾ ནཱམ རཉྙོ པཱཔུཎཱཏཱི’’ཏི ཏཾ ཨོཏཱརེཏྭཱ ཧཏྠིཀྑནྡྷཾ ཨཱརོཔེཏྭཱ ནིཝེསནཾ ནེཏྭཱ ཨབྷིསིཉྩིཏྭཱ ཨགྒམཧེསིཊྛཱནེ ཋཔེསི. སཱ ཏསྶ པིཡཱ ཨཧོསི མནཱཔཱ. ཨུདུམྦརརུཀྑེ ལདྡྷཏྟཱ ‘‘ཨུདུམྦརདེཝཱི’’ཏྭེཝསྶཱ ནཱམཾ སཉྫཱནིཾསུ.
ཨཐེཀདིཝསཾ ¶ རཉྙོ ཨུཡྻཱནགམནཏྠཱཡ དྭཱརགཱམཝཱསིཀེཧི མགྒཾ པཊིཛགྒཱཔེསུཾ. པིངྒུཏྟརོཔི བྷཏིཾ ཀརོནྟོ ཀཙྪཾ བནྡྷིཏྭཱ ཀུདྡཱལེན མགྒཾ ཏཙྪི. མགྒེ ཨནིཊྛིཏེཡེཝ རཱཛཱ ཨུདུམྦརདེཝིཡཱ སདྡྷིཾ རཐེ ནིསཱིདིཏྭཱ ནིཀྑམི. ཨུདུམྦརདེཝཱི ཀཱལ༹ཀཎྞིཾ མགྒཾ ཏཙྪནྟཾ དིསྭཱ ‘‘ཨེཝརཱུཔཾ སིརིཾ དྷཱརེཏུཾ ནཱསཀྑི ཨཡཾ ཀཱལ༹ཀཎྞཱི’’ཏི ཏཾ ཨོལོཀེནྟཱི ཧསི. རཱཛཱ ཧསམཱནཾ དིསྭཱ ཀུཛ྄ཛྷིཏྭཱ ‘‘ཀསྨཱ ཧསཱི’’ཏི པུཙྪི. དེཝ, ཨཡཾ མགྒཏཙྪཀོ པུརིསོ མཡ྄ཧཾ པོརཱཎཀསཱམིཀོ, ཨེས མཾ ཨུདུམྦརརུཀྑཾ ཨཱརོཔེཏྭཱ ཀཎྚཀེཧི པརིཀྑིཔིཏྭཱ གཏོ, ཨིམཱཧཾ ཨོལོཀེཏྭཱ ‘‘ཨེཝརཱུཔཾ སིརིཾ དྷཱརེཏུཾ ནཱསཀྑི ཀཱལ༹ཀཎྞཱི ཨཡ’’ནྟི ཙིནྟེཏྭཱ ཧསིནྟི. རཱཛཱ ‘‘ཏྭཾ མུསཱཝཱདཾ ཀཐེསི, ཨཉྙཾ ཀཉྩི པུརིསཾ དིསྭཱ ཏཡཱ ཧསིཏཾ བྷཝིསྶཏི, ཏཾ མཱརེསྶཱམཱི’’ཏི ཨསིཾ ཨགྒཧེསི. སཱ བྷཡཔྤཏྟཱ ‘‘དེཝ, པཎྜིཏེ ཏཱཝ པུཙྪཐཱ’’ཏི ཨཱཧ. རཱཛཱ སེནཀཾ པུཙྪི ‘‘སེནཀ, ཨིམིསྶཱ ཝཙནཾ ཏྭཾ སདྡཧསཱི’’ཏི. ‘‘ན སདྡཧཱམི, དེཝ, ཀོ ནཱམ ཨེཝརཱུཔཾ ཨིཏྠིརཏནཾ པཧཱཡ གམིསྶཏཱི’’ཏི. སཱ ཏསྶ ཀཐཾ སུཏྭཱ ཨཏིརེཀཏརཾ བྷཱིཏཱ ཨཧོསི. ཨཐ རཱཛཱ ‘‘སེནཀོ ཀིཾ ཛཱནཱཏི, པཎྜིཏཾ པུཙྪིསྶཱམཱི’’ཏི ཙིནྟེཏྭཱ ཏཾ པུཙྪནྟོ ཨིམཾ གཱཐམཱཧ –
‘‘ཨིཏྠཱི སིཡཱ རཱུཔཝཏཱི, སཱ ཙ སཱིལཝཏཱི སིཡཱ;
པུརིསོ ཏཾ ན ཨིཙྪེཡྻ, སདྡཧཱསི མཧོསདྷཱ’’ཏི. (ཛཱ. ༡.༢.༨༣);
ཏཏྠ ¶ སཱིལཝཏཱིཏི ཨཱཙཱརགུཎསམྤནྣཱ.
ཏཾ ¶ སུཏྭཱ པཎྜིཏོ གཱཐམཱཧ –
‘‘སདྡཧཱམི མཧཱརཱཛ, པུརིསོ དུབྦྷགོ སིཡཱ;
སིརཱི ཙ ཀཱལ༹ཀཎྞཱི ཙ, ན སམེནྟི ཀུདཱཙན’’ནྟི. (ཛཱ. ༡.༢.༨༤);
ཏཏྠ ན སམེནྟཱིཏི སམུདྡསྶ ཨོརིམཏཱིརཔཱརིམཏཱིརཱནི ཝིཡ ཙ གགནཏལཔཐཝིཏལཱནི ཝིཡ ཙ ན སམཱགཙྪནྟི.
རཱཛཱ ཏསྶ ཝཙནེན ཏཾ ཀཱརཎཾ སུཏྭཱ ཏསྶཱ ན ཀུཛ྄ཛྷི, ཧདཡམསྶ ནིབྦཱཡི. སོ ཏསྶ ཏུསྶིཏྭཱ ‘‘སཙེ པཎྜིཏོ ནཱབྷཝིསྶ, ཨཛྫཱཧཾ བཱལསེནཀསྶ ཀཐཱཡ ཨེཝརཱུཔཾ ཨིཏྠིརཏནཾ ཧཱིནོ ཨསྶཾ, ཏཾ ནིསྶཱཡ མཡཱ ཨེསཱ ལདྡྷཱ’’ཏི སཏསཧསྶེན པཱུཛཾ ཀཱརེསི. དེཝཱིཔི ¶ རཱཛཱནཾ ཝནྡིཏྭཱ ‘‘དེཝ, པཎྜིཏཾ ནིསྶཱཡ མཡཱ ཛཱིཝིཏཾ ལདྡྷཾ, ཨིམཱཧཾ ཀནིཊྛབྷཱཏིཀཊྛཱནེ ཋཔེཏུཾ ཝརཾ ཡཱཙཱམཱི’’ཏི ཨཱཧ. ‘‘སཱདྷུ, དེཝི, གཎྷཱཧི, དམྨི ཏེ ཝར’’ནྟི. ‘‘དེཝ, ཨཛྫ པཊྛཱཡ མམ ཀནིཊྛཾ ཝིནཱ ཀིཉྩི མདྷུརརསཾ ན ཁཱདིསྶཱམི, ཨིཏོ པཊྛཱཡ ཝེལཱཡ ཝཱ ཨཝེལཱཡ ཝཱ དྭཱརཾ ཝིཝརཱཔེཏྭཱ ཨིམསྶ མདྷུརརསཾ པེསེཏུཾ ལབྷནཀཝརཾ གཎྷཱམཱི’’ཏི. ‘‘སཱདྷུ, བྷདྡེ, ཨིམཉྩ ཝརཾ གཎྷཱཧཱི’’ཏི.
སིརིཀཱལ༹ཀཎྞིཔཉྷོ ནིཊྛིཏོ.
མེཎྜཀཔཉྷོ
ཨཔརསྨིཾ དིཝསེ རཱཛཱ ཀཏཔཱཏརཱསོ པཱསཱདསྶ དཱིགྷནྟརེ ཙངྐམནྟོ ཝཱཏཔཱནནྟརེན ཨོལོཀེནྟོ ཨེཀཾ ཨེལ༹ཀཉྩ སུནཁཉྩ མིཏྟསནྠཝཾ ཀརོནྟཾ ཨདྡས. སོ ཀིར ཨེལ༹ཀོ ཧཏྠིསཱལཾ གནྟྭཱ ཧཏྠིསྶ པུརཏོ ཁིཏྟཾ ཨནཱམཊྛཏིཎཾ ཁཱདི. ཨཐ ནཾ ཧཏྠིགོཔཀཱ པོཐེཏྭཱ ནཱིཧརིཾསུ. སོ ཝིརཝིཏྭཱ པལཱཡི. ཨཐ ནཾ ཨེཀོ པུརིསོ ཝེགེནཱགནྟྭཱ པིཊྛིཡཾ དཎྜེན ཏིརིཡཾ པཧརི. སོ པིཊྛིཾ ཨོནཱམེཏྭཱ ཝེདནཱཔྤཏྟོ ཧུཏྭཱ གནྟྭཱ རཱཛགེཧསྶ མཧཱབྷིཏྟིཾ ནིསྶཱཡ པིཊྛིཀཱཡ ནིཔཛྫི. ཏཾ དིཝསམེཝ རཉྙོ མཧཱནསེ ཨཊྛིཙམྨཱདཱིནི ཁཱདིཏྭཱ ཝཌྜྷིཏསུནཁོ བྷཏྟཀཱརཀེ བྷཏྟཾ སམྤཱདེཏྭཱ བཧི ཋཏྭཱ སརཱིརེ སེདཾ ནིབྦཱཔེནྟེ མཙྪམཾསགནྡྷཾ གྷཱཡིཏྭཱ ཏཎྷཾ ཨདྷིཝཱསེཏུཾ ཨསཀྐོནྟོ མཧཱནསཾ ¶ པཝིསིཏྭཱ བྷཱཛནཔིདྷཱནཾ པཱཏེཏྭཱ མཾསཾ ¶ ཁཱདི. ཨཐ བྷཏྟཀཱརཀོ བྷཱཛནསདྡེན པཝིསིཏྭཱ ཏཾ དིསྭཱ དྭཱརཾ པིདཧིཏྭཱ ཏཾ ལེཌྜུདཎྜཱདཱིཧི པོཐེསི. སོ ཁཱདིཏམཾསཾ མུཁེནེཝ ཚཌྜེཏྭཱ ཝིརཝིཏྭཱ ནིཀྑམི. བྷཏྟཀཱརཀོཔི ཏསྶ ནིཀྑནྟབྷཱཝཾ ཉཏྭཱ ཨནུབནྡྷིཏྭཱ པིཊྛིཡཾ དཎྜེན ཏིརིཡཾ པཧརི. སོ ཝེདནཱཔྤཏྟོ པིཊྛིཾ ཨོནཱམེཏྭཱ ཨེཀཾ པཱདཾ ཨུཀྑིཔིཏྭཱ ཨེལ༹ཀསྶ ནིཔནྣཊྛཱནམེཝ པཱཝིསི. ཨཐ ནཾ ཨེལ༹ཀོ ‘‘སམྨ, ཀིཾ པིཊྛིཾ ཨོནཱམེཏྭཱ ཨཱགཙྪསི, ཀིཾ ཏེ ཝཱཏོ ཝིཛ྄ཛྷཏཱི’’ཏི པུཙྪི. སུནཁོཔི ‘‘ཏྭམྤི པིཊྛིཾ ཨོནཱམེཏྭཱ ནིཔནྣོསི, ཀིཾ ཏེ ཝཱཏོ ཝིཛ྄ཛྷཏཱི’’ཏི པུཙྪི. ཏེ ཨཉྙམཉྙཾ ཨཏྟནོ པཝཏྟིཾ ཨཱརོཙེསུཾ.
ཨཐ ནཾ ཨེལ༹ཀོ པུཙྪི ‘‘ཀིཾ པན ཏྭཾ པུན བྷཏྟགེཧཾ གནྟུཾ སཀྑིསྶསི སམྨཱ’’ཏི? ‘‘ན སཀྑིསྶཱམི, སམྨ, གཏསྶ མེ ཛཱིཝིཏཾ ནཏྠཱི’’ཏི. ‘‘ཏྭཾ པན པུན ཧཏྠིསཱལཾ གནྟུཾ སཀྑིསྶསཱི’’ཏི. ‘‘མཡཱཔི ཏཏྠ གནྟུཾ ན སཀྐཱ, གཏསྶ མེ ཛཱིཝིཏཾ ནཏྠཱི’’ཏི. ཏེ ‘‘ཀཐཾ ནུ ཁོ མཡཾ ཨིདཱནི ཛཱིཝིསྶཱམཱ’’ཏི ཨུཔཱཡཾ ཙིནྟེསུཾ. ཨཐ ནཾ ཨེལ༹ཀོ ཨཱཧ – ‘‘སཙེ མཡཾ སམགྒཝཱསཾ ¶ ཝསིཏུཾ སཀྐོམ, ཨཏྠེཀོ ཨུཔཱཡོ’’ཏི. ‘‘ཏེན ཧི ཀཐེཧཱི’’ཏི. ‘‘སམྨ, ཏྭཾ ཨིཏོ པཊྛཱཡ ཧཏྠིསཱལཾ ཡཱཧི, ‘‘ནཱཡཾ ཏིཎཾ ཁཱདཏཱི’’ཏི ཏཡི ཧཏྠིགོཔཀཱ ཨཱསངྐཾ ན ཀརིསྶནྟི, ཏྭཾ མམ ཏིཎཾ ཨཱཧརེཡྻཱསི. ཨཧམྤི བྷཏྟགེཧཾ པཝིསིསྶཱམི, ‘‘ནཱཡཾ མཾསཁཱདཀོ’’ཏི བྷཏྟཀཱརཀོ མཡི ཨཱསངྐཾ ན ཀརིསྶཏི, ཨཧཾ ཏེ མཾསཾ ཨཱཧརིསྶཱམཱི’’ཏི. ཏེ ‘‘སུནྡརོ ཨུཔཱཡོ’’ཏི ཨུབྷོཔི སམྤཊིཙྪིཾསུ. སུནཁོ ཧཏྠིསཱལཾ གནྟྭཱ ཏིཎཀལཱཔཾ ཌཾསིཏྭཱ ཨཱགནྟྭཱ མཧཱབྷིཏྟིཔིཊྛིཀཱཡ ཋཔེསི. ཨིཏརོཔི བྷཏྟགེཧཾ གནྟྭཱ མཾསཁཎྜཾ མུཁཔཱུརཾ ཌཾསིཏྭཱ ཨཱནེཏྭཱ ཏཏྠེཝ ཋཔེསི. སུནཁོ མཾསཾ ཁཱདི, ཨེལ༹ཀོ ཏིཎཾ ཁཱདི. ཏེ ཨིམིནཱ ཨུཔཱཡེན སམགྒཱ སམྨོདམཱནཱ མཧཱབྷིཏྟིཔིཊྛིཀཱཡ ཝསནྟི. རཱཛཱ ཏེསཾ མིཏྟསནྠཝཾ དིསྭཱ ཙིནྟེསི ‘‘ཨདིཊྛཔུབྦཾ ཝཏ མེ ཀཱརཎཾ དིཊྛཾ, ཨིམེ པཙྩཱམིཏྟཱ ཧུཏྭཱཔི སམགྒཝཱསཾ ཝསནྟི. ཨིདཾ ཀཱརཎཾ གཧེཏྭཱ པཉྷཾ ཀཏྭཱ པཉྩ པཎྜིཏེ པུཙྪིསྶཱམི, ཨིམཾ པཉྷཾ ཨཛཱནནྟཾ རཊྛཱ པབྦཱཛེསྶཱམི, ཏཾ ཛཱནནྟསྶ ‘ཨེཝརཱུཔོ པཎྜིཏོ ནཏྠཱི’ཏི ¶ མཧཱསཀྐཱརཾ ཀརིསྶཱམི. ཨཛྫ ཏཱཝ ཨཝེལཱ, སྭེ ཨུཔཊྛཱནཾ ཨཱགཏཀཱལེ པུཙྪིསྶཱམཱི’’ཏི. སོ པུནདིཝསེ པཎྜིཏེསུ ཨཱགནྟྭཱ ནིསིནྣེསུ པཉྷཾ པུཙྪནྟོ ཨིམཾ གཱཐམཱཧ –
‘‘ཡེསཾ ¶ ན ཀདཱཙི བྷཱུཏཔུབྦཾ, སཁྱཾ སཏྟཔདམྤིམསྨི ལོཀེ;
ཛཱཏཱ ཨམིཏྟཱ དུཝེ སཧཱཡཱ, པཊིསནྡྷཱཡ ཙརནྟི ཀིསྶ ཧེཏཱུ’’ཏི. (ཛཱ. ༡.༡༢.༩༤);
ཏཏྠ པཊིསནྡྷཱཡཱཏི སདྡཧིཏྭཱ གྷཊིཏཱ ཧུཏྭཱ.
ཨིདཉྩ པན ཝཏྭཱ པུན ཨེཝམཱཧ –
‘‘ཡདི མེ ཨཛྫ པཱཏརཱསཀཱལེ, པཉྷཾ ན སཀྐུཎེཡྻཱཐ ཝཏྟུམེཏཾ;
རཊྛཱ པབྦཱཛཡིསྶཱམི ཝོ སབྦེ, ན ཧི མཏྠོ དུཔྤཉྙཛཱཏིཀེཧཱི’’ཏི. (ཛཱ. ༡.༡༢.༩༥);
ཏདཱ པན སེནཀོ ཨགྒཱསནེ ནིསིནྣོ ཨཧོསི, པཎྜིཏོ པན པརིཡནྟེ ནིསིནྣོ. སོ ཏཾ པཉྷཾ ཨུཔདྷཱརེནྟོ ཏམཏྠཾ ཨདིསྭཱ ཙིནྟེསི ‘‘ཨཡཾ རཱཛཱ དནྡྷདྷཱཏུཀོ ཨིམཾ པཉྷཾ ཙིནྟེཏྭཱ སངྑརིཏུཾ ཨསམཏྠོ, ཀིཉྩིདེཝ, ཏེན དིཊྛཾ བྷཝིསྶཏི, ཨེཀདིཝསཾ ཨོཀཱསཾ ལབྷནྟོ ཨིམཾ པཉྷཾ ནཱིཧརིསྶཱམི, སེནཀོ ཀེནཙི ཨུཔཱཡེན ཨཛྫེཀདིཝསམཏྟཾ ཨདྷིཝཱསཱཔེཏཱུ’’ཏི. ཨིཏརེཔི ཙཏྟཱརོ ¶ པཎྜིཏཱ ཨནྡྷཀཱརགབྦྷཾ པཝིཊྛཱ ཝིཡ ན ཀིཉྩི པསྶིཾསུ. སེནཀོ ‘‘ཀཱ ནུ ཁོ མཧོསདྷསྶ པཝཏྟཱི’’ཏི བོདྷིསཏྟཾ ཨོལོཀེསི. སོཔི ཏཾ ཨོལོཀེསི. སེནཀོ བོདྷིསཏྟསྶ ཨོལོཀིཏཱཀཱརེནེཝ ཏསྶ ཨདྷིཔྤཱཡཾ ཉཏྭཱ ‘‘པཎྜིཏསྶཔི ན ཨུཔཊྛཱཏི, ཏེནེཀདིཝསཾ ཨོཀཱསཾ ཨིཙྪཏི, པཱུརེསྶཱམིསྶ མནོརཐ’’ནྟི ཙིནྟེཏྭཱ རཉྙཱ སདྡྷིཾ ཝིསྶཱསེན མཧཱཧསིཏཾ ཧསིཏྭཱ ‘‘ཀིཾ, མཧཱརཱཛ, སབྦེཝ ཨམྷེ པཉྷཾ ཀཐེཏུཾ ཨསཀྐོནྟེ རཊྛཱ པབྦཱཛེསྶསི, ཨེཏམྤི ‘ཨེཀོ གཎྛིཔཉྷོ’ཏི ཏྭཾ སལླཀྑེསི, ན མཡཾ ཨེཏཾ ཀཐེཏུཾ ན སཀྐོམ, ཨཔིཙ ཁོ ཐོཀཾ ཨདྷིཝཱསེཧི. གཎྛིཔཉྷོ ཨེས, ན སཀྐོམ མཧཱཛནམཛ྄ཛྷེ ཀཐེཏུཾ, ཨེཀམནྟེ ཙིནྟེཏྭཱ པཙྪཱ ཏུམྷཱཀཾ ཀཐེསྶཱམ ¶ , ཨོཀཱསཾ ནོ དེཧཱི’’ཏི མཧཱསཏྟཾ ཨོལོཀེཏྭཱ ཨིམཾ གཱཐཱདྭཡམཱཧ –
‘‘མཧཱཛནསམཱགམམྷི ¶ གྷོརེ, ཛནཀོལཱཧལསངྒམམྷི ཛཱཏེ;
ཝིཀྑིཏྟམནཱ ཨནེཀཙིཏྟཱ, པཉྷཾ ན སཀྐུཎོམ ཝཏྟུམེཏཾ.
‘‘ཨེཀགྒཙིཏྟཱཝ ཨེཀམེཀཱ, རཧསི གཏཱ ཨཏྠཾ ནིཙིནྟཡིཏྭཱ;
པཝིཝེཀེ སམྨསིཏྭཱན དྷཱིརཱ, ཨཐ ཝཀྑནྟི ཛནིནྡ ཨེཏམཏྠ’’ནྟི. (ཛཱ. ༡.༡༢.༩༦-༩༧);
ཏཏྠ སམྨསིཏྭཱནཱཏི ཀཱཡཙིཏྟཝིཝེཀེ ཋིཏཱ ཨིམེ དྷཱིརཱ ཨིམཾ པཉྷཾ སམྨསིཏྭཱ ཨཐ ཝོ ཨེཏཾ ཨཏྠཾ ཝཀྑནྟི.
རཱཛཱ ཏསྶ ཀཐཾ སུཏྭཱ ཨནཏྟམནོ ཧུཏྭཱཔི ‘‘སཱདྷུ ཙིནྟེཏྭཱ ཀཐེཐ, ཨཀཐེནྟེ པན ཝོ པབྦཱཛེསྶཱམཱི’’ཏི ཏཛྫེསིཡེཝ. ཙཏྟཱརོ པཎྜིཏཱ པཱསཱདཱ ཨོཏརིཾསུ. སེནཀོ ཨིཏརེ ཨཱཧ – ‘‘སམྨཱ, རཱཛཱ སུཁུམཔཉྷཾ པུཙྪི, ཨཀཐིཏེ མཧནྟཾ བྷཡཾ བྷཝིསྶཏི, སཔྤཱཡབྷོཛནཾ བྷུཉྫིཏྭཱ སམྨཱ ཨུཔདྷཱརེཐཱ’’ཏི. ཏེ ཨཏྟནོ ཨཏྟནོ གེཧཾ གཏཱ. པཎྜིཏོཔི ཨུཊྛཱཡ ཨུདུམྦརདེཝིཡཱ སནྟིཀཾ གནྟྭཱ ‘‘དེཝི, ཨཛྫ ཝཱ ཧིཡྻོ ཝཱ རཱཛཱ ཀཏྠ ཙིརཾ ཨཊྛཱསཱི’’ཏི པུཙྪི. ‘‘ཏཱཏ, དཱིགྷནྟརེ ཝཱཏཔཱནེན ཨོལོཀེནྟོ ཙངྐམཏཱི’’ཏི. ཏཏོ པཎྜིཏོ ཙིནྟེསི ‘‘རཉྙཱ ཨིམིནཱ པསྶེན ཀིཉྩི དིཊྛཾ བྷཝིསྶཏཱི’’ཏི. སོ ཏཏྠ གནྟྭཱ བཧི ཨོལོཀེནྟོ ཨེལ༹ཀསུནཁཱནཾ ཀིརིཡཾ དིསྭཱ ‘‘ཨིམེ དིསྭཱ རཉྙཱ པཉྷོ ཨབྷིསངྑཏོ’’ཏི སནྣིཊྛཱནཾ ཀཏྭཱ གེཧཾ གཏོ. ཨིཏརེཔི ཏཡོ ཙིནྟེཏྭཱ ཀིཉྩི ཨདིསྭཱ སེནཀསྶ སནྟིཀཾ ཨགམཾསུ. སོ ཏེ པུཙྪི ‘‘དིཊྛོ ཝོ པཉྷོ’’ཏི. ‘‘ན དིཊྛོ ཨཱཙརིཡཱ’’ཏི. ‘‘ཡདི ཨེཝཾ རཱཛཱ ཝོ པབྦཱཛེསྶཏི, ཀིཾ ཀརིསྶཐཱ’’ཏི? ‘‘ཏུམྷེཧི པན དིཊྛོ’’ཏི? ‘‘ཨཧམྤི ན པསྶཱམཱི’’ཏི. ‘‘ཏུམྷེསུ ¶ ཨཔསྶནྟེསུ མཡཾ ཀིཾ པསྶཱམ, རཉྙོ པན སནྟིཀེ ‘ཙིནྟེཏྭཱ ཀཐེསྶཱམཱ’ཏི སཱིཧནཱདཾ ནདིཏྭཱ ཨཱགཏམྷཱ, ཨཀཐིཏེ ཨམྷེ རཱཛཱ ཀུཛ྄ཛྷིསྶཏི, ཀིཾ ཀརོམ, ཨཡཾ པཉྷོ ན སཀྐཱ ཨམྷེཧི དཊྛུཾ ¶ , པཎྜིཏེན པན སཏགུཎཾ སཧསྶགུཎཾ སཏསཧསྶགུཎཾ ཀཏྭཱ ཙིནྟིཏོ བྷཝིསྶཏི, ཨེཐ ཏསྶ སནྟིཀཾ གཙྪཱམཱ’’ཏི ཏེ ཙཏྟཱརོ པཎྜིཏཱ བོདྷིསཏྟསྶ གྷརདྭཱརཾ ཨཱགཏབྷཱཝཾ ¶ ཨཱརོཙཱཔེཏྭཱ ‘‘པཝིསནྟུ པཎྜིཏཱ’’ཏི ཝུཏྟེ གེཧཾ པཝིསིཏྭཱ པཊིསནྠཱརཾ ཀཏྭཱ ཨེཀམནྟཾ ཋིཏཱ མཧཱསཏྟཾ པུཙྪིཾསུ ‘‘ཀིཾ པན, པཎྜིཏ, ཙིནྟིཏོ པཉྷོ’’ཏི? ‘‘ཨཱམ, ཙིནྟིཏོ, མཡི ཨཙིནྟེནྟེ ཨཉྙོ ཀོ ཙིནྟཡིསྶཏཱི’’ཏི. ‘‘ཏེན ཧི པཎྜིཏ ཨམྷཱཀམྤི ཀཐེཐཱ’’ཏི.
པཎྜིཏོ ‘‘སཙཱཧཾ ཨེཏེསཾ ན ཀཐེསྶཱམི, རཱཛཱ ཏེ རཊྛཱ པབྦཱཛེསྶཏི, མཾ པན སཏྟཧི རཏནེཧི པཱུཛེསྶཏི, ཨིམེ ཨནྡྷབཱལཱ མཱ ཝིནསྶནྟུ, ཀཐེསྶཱམི ཏེས’’ནྟི ཙིནྟེཏྭཱ ཏེ ཙཏྟཱརོཔི ནཱིཙཱསནེ ནིསཱིདཱཔེཏྭཱ ཨཉྫལིཾ པགྒཎྷཱཔེཏྭཱ རཉྙཱ དིཊྛཏཾ ཨཛཱནཱཔེཏྭཱ ‘‘རཉྙཱ པུཙྪིཏཀཱལེ ཨེཝཾ ཀཐེཡྻཱཐཱ’’ཏི ཙཏུནྣམྤི ཙཏསྶོ གཱཐཱཡོ བནྡྷིཏྭཱ པཱལི༹མེཝ ཨུགྒཎྷཱཔེཏྭཱ ཨུཡྻོཛེསི. ཏེ དུཏིཡདིཝསེ རཱཛུཔཊྛཱནཾ གནྟྭཱ པཉྙཏྟཱསནེ ནིསཱིདིཾསུ. རཱཛཱ སེནཀཾ པུཙྪི ‘‘ཉཱཏོ ཏེ, སེནཀ, པཉྷོ’’ཏི? ‘‘མཧཱརཱཛ, མཡི ཨཛཱནནྟེ ཨཉྙོ ཀོ ཛཱནིསྶཏཱི’’ཏི. ‘‘ཏེན ཧི ཀཐེཧཱི’’ཏི. ‘‘སུཎཱཐ དེཝཱ’’ཏི སོ ཨུགྒཧིཏནིཡཱམེནེཝ གཱཐམཱཧ –
‘‘ཨུགྒཔུཏྟརཱཛཔུཏྟིཡཱནཾ, ཨུརབྦྷསྶ མཾསཾ པིཡཾ མནཱཔཾ;
ན སུནཁསྶ ཏེ ཨདེནྟི མཾསཾ, ཨཐ མེཎྜསྶ སུཎེན སཁྱམསྶཱ’’ཏི. (ཛཱ. ༡.༡༢.༩༨);
ཏཏྠ ཨུགྒཔུཏྟརཱཛཔུཏྟིཡཱནནྟི ཨུགྒཏཱནཾ ཨམཙྩཔུཏྟཱནཉྩེཝ རཱཛཔུཏྟཱནཉྩ.
གཱཐཾ ཝཏྭཱཔི སེནཀོ ཨཏྠཾ ན ཛཱནཱཏི. རཱཛཱ པན ཨཏྟནོ དིཊྛབྷཱཝེན པཛཱནཱཏི, ཏསྨཱ ‘‘སེནཀེན ཏཱཝ ཉཱཏོ’’ཏི པུཀྐུསཾ པུཙྪི. སོཔིསྶ ‘‘ཀིཾ ཨཧམྤི ཨཔཎྜིཏོ’’ཏི ཝཏྭཱ ཨུགྒཧིཏནིཡཱམེནེཝ གཱཐམཱཧ –
‘‘ཙམྨཾ ཝིཧནནྟི ཨེལ༹ཀསྶ, ཨསྶཔིཊྛཏྠརསྶུཁསྶ ཧེཏུ;
ན ཙ ཏེ སུནཁསྶ ཨཏྠརནྟི, ཨཐ མེཎྜསྶ སུཎེན སཁྱམསྶཱ’’ཏི. (ཛཱ. ༡.༡༢.༩༩);
ཏསྶཔི ¶ ¶ ¶ ཨཏྠོ ཨཔཱཀཊོཡེཝ. རཱཛཱ པན ཨཏྟནོ པཱཀཊཏྟཱ ‘‘ཨིམིནཱཔི པུཀྐུསེན ཉཱཏོ’’ཏི ཀཱམིནྡཾ པུཙྪི. སོཔི ཨུགྒཧིཏནིཡཱམེནེཝ གཱཐམཱཧ –
‘‘ཨཱཝེལླིཏསིངྒིཀོ ཧི མེཎྜོ, ན ཙ སུནཁསྶ ཝིསཱཎཀཱནི ཨཏྠི;
ཏིཎབྷཀྑོ མཾསབྷོཛནོ ཙ, ཨཐ མེཎྜསྶ སུཎེན སཁྱམསྶཱ’’ཏི. (ཛཱ. ༡.༡༢.༡༠༠);
རཱཛཱ ‘‘ཨིམིནཱཔི ཉཱཏོ’’ཏི དེཝིནྡཾ པུཙྪི. སོཔི ཨུགྒཧིཏནིཡཱམེནེཝ གཱཐམཱཧ –
‘‘ཏིཎམཱསི པལཱསམཱསི མེཎྜོ, ན ཙ སུནཁོ ཏིཎམཱསི ནོ པལཱསཾ;
གཎྷེཡྻ སུཎོ སསཾ བིལཱ༹རཾ, ཨཐ མེཎྜསྶ སུཎེན སཁྱམསྶཱ’’ཏི. (ཛཱ. ༡.༡༢.༡༠༡);
ཏཏྠ ཏིཎམཱསི པལཱསམཱསཱིཏི ཏིཎཁཱདཀོ ཙེཝ པཎྞཁཱདཀོ ཙ. ནོ པལཱསནྟི པཎྞམྤི ན ཁཱདཏི.
ཨཐ རཱཛཱ པཎྜིཏཾ པུཙྪི – ‘‘ཏཱཏ, ཏྭམྤི ཨིམཾ པཉྷཾ ཛཱནཱསཱི’’ཏི? ‘‘མཧཱརཱཛ, ཨཝཱིཙིཏོ ཡཱཝ བྷཝགྒཱ མཾ ཋཔེཏྭཱ ཀོ ཨཉྙོ ཨེཏཾ ཛཱནིསྶཏཱི’’ཏི. ‘‘ཏེན ཧི ཀཐེཧཱི’’ཏི. ‘‘སུཎ མཧཱརཱཛཱ’’ཏི ཏསྶ པཉྷསྶ ཨཏྟནོ པཱཀཊབྷཱཝཾ པཀཱསེནྟོ གཱཐཱདྭཡམཱཧ –
‘‘ཨཊྛཌྜྷཔདོ ཙཏུཔྤདསྶ, མེཎྜོ ཨཊྛནཁོ ཨདིསྶམཱནོ;
ཚཱདིཡམཱཧརཏཱི ཨཡཾ ཨིམསྶ, མཾསཾ ཨཱཧརཏཱི ཨཡཾ ཨམུསྶ.
‘‘པཱསཱདཝརགཏོ ཝིདེཧསེཊྛོ, ཝཱིཏིཧཱརཾ ཨཉྙམཉྙབྷོཛནཱནཾ;
ཨདྡཀྑི ཀིར སཀྑིཀཾ ཛནིནྡོ, བུབྷུཀྐསྶ པུཎྞཾམུཁསྶ ཙེཏ’’ནྟི. (ཛཱ. ༡.༡༢.༡༠༢-༡༠༣);
ཏཏྠ ¶ ཨཊྛཌྜྷཔདོཏི བྱཉྫནཀུསལཏཱཡ ཨེལ༹ཀསྶ ཙཏུཔྤཱདཾ སནྡྷཱཡཱཧ. མེཎྜོཏི ཨེལ༹ཀོ. ཨཊྛནཁོཏི ཨེཀེཀསྨིཾ པཱདེ དྭིནྣཾ དྭིནྣཾ ཁུརཱནཾ ཝསེནེཏཾ ཝུཏྟཾ. ཨདིསྶམཱནོཏི མཾསཾ ཨཱཧརཎཀཱལེ ཨཔཉྙཱཡམཱནོ. ཚཱདིཡནྟི གེཧཙྪདནཾ. ཏིཎནྟི ཨཏྠོ. ཨཡཾ ཨིམསྶཱཏི ¶ སུནཁོ ¶ ཨེལ༹ཀསྶ. ཝཱིཏིཧཱརནྟི ཝཱིཏིཧརཎཾ. ཨཉྙམཉྙབྷོཛནཱནནྟི ཨཉྙམཉྙསྶ བྷོཛནཱནཾ. མེཎྜོ ཧི སུནཁསྶ བྷོཛནཾ ཧརཏི, སོ ཏསྶ ཝཱིཏིཧརཏི, སུནཁོཔི ཏསྶ ཧརཏི, ཨིཏརོ ཝཱིཏིཧརཏི. ཨདྡཀྑཱིཏི ཏཾ ཏེསཾ ཨཉྙམཉྙབྷོཛནཱནཾ ཝཱིཏིཧརཎཾ སཀྑིཀཾ ཨཏྟནོ པཙྩཀྑཾ ཀཏྭཱ ཨདྡས. བུབྷུཀྐསྶཱཏི བྷུབྷཱུཏི སདྡཀརཎསུནཁསྶ. པུཎྞཾམུཁསྶཱཏི མེཎྜསྶ. ཨིམེསཾ ཨེཏཾ མིཏྟསནྠཝཾ རཱཛཱ སཡཾ པསྶཱིཏི.
རཱཛཱ ཨིཏརེཧི བོདྷིསཏྟཾ ནིསྶཱཡ ཉཱཏབྷཱཝཾ ཨཛཱནནྟོ ‘‘པཉྩ པཎྜིཏཱ ཨཏྟནོ ཨཏྟནོ ཉཱཎབལེན ཛཱནིཾསཱུ’’ཏི མཉྙམཱནོ སོམནསྶཔྤཏྟོ ཧུཏྭཱ ཨིམཾ གཱཐམཱཧ –
‘‘ལཱབྷཱ ཝཏ མེ ཨནཔྤརཱུཔཱ, ཡསྶ མེདིསཱ པཎྜིཏཱ ཀུལམྷི;
པཉྷསྶ གམྦྷཱིརགཏཾ ནིཔུཎམཏྠཾ, པཊིཝིཛ྄ཛྷནྟི སུབྷཱསིཏེན དྷཱིརཱ’’ཏི. (ཛཱ. ༡.༡༢.༡༠༤);
ཏཏྠ པཊིཝིཛ྄ཛྷནྟཱིཏི སུབྷཱསིཏེན ཏེ ཝིདིཏྭཱ ཀཐེནྟི.
ཨཐ ནེསཾ ‘‘ཏུཊྛེན ནཱམ ཏུཊྛཱཀཱརོ ཀཏྟབྦོ’’ཏི ཏཾ ཀརོནྟོ ཨིམཾ གཱཐམཱཧ –
‘‘ཨསྶཏརིརཐཉྩ ཨེཀམེཀཾ, ཕཱིཏཾ གཱམཝརཉྩ ཨེཀམེཀཾ;
སབྦེསཾ ཝོ དམྨི པཎྜིཏཱནཾ, པརམཔྤཏཱིཏམནོ སུབྷཱསིཏེནཱ’’ཏི. (ཛཱ. ༡.༡༢.༡༠༥);
ཨིཏི ཝཏྭཱ ཏེསཾ ཏཾ སབྦཾ དཱཔེསི.
དྭཱདསནིཔཱཏེ མེཎྜཀཔཉྷོ ནིཊྛིཏོ.
སིརིམནྟཔཉྷོ
ཨུདུམྦརདེཝཱི ¶ པན ཨིཏརེཧི པཎྜིཏཾ ནིསྶཱཡ པཉྷསྶ ཉཱཏབྷཱཝཾ ཉཏྭཱ ‘‘རཉྙཱ མུགྒཾ མཱསེན ནིབྦིསེསཀཾ ཀརོནྟེན ཝིཡ པཉྩནྣཾ སམཀོཝ སཀྐཱརོ ཀཏོ, ནནུ མཡ྄ཧཾ ཀནིཊྛསྶ ཝིསེསཾ སཀྐཱརཾ ཀཱཏུཾ ཝཊྚཏཱི’’ཏི ཙིནྟེཏྭཱ རཉྙོ སནྟིཀཾ གནྟྭཱ པུཙྪི ‘‘དེཝ, ཀེན ཝོ པཉྷོ ¶ ཀཐིཏོ’’ཏི? ‘‘པཉྩཧི པཎྜིཏེཧི, བྷདྡེ’’ཏི. ‘‘དེཝ, ཙཏྟཱརོ ཛནཱ ཏཾ པཉྷཾ ཀཾ ནིསྶཱཡ ཛཱནིཾསཱུ’’ཏི? ‘‘ན ཛཱནཱམི, བྷདྡེ’’ཏི. ‘‘མཧཱརཱཛ, ཀིཾ ཏེ ཛཱནནྟི, པཎྜིཏོ པན ‘མཱ ནསྶནྟུ ཨིམེ བཱལཱ’ཏི པཉྷཾ ཨུགྒཎྷཱཔེསི, ཏུམྷེ སབྦེསཾ ¶ སམཀཾ སཀྐཱརཾ ཀརོཐ, ཨཡུཏྟམེཏཾ, པཎྜིཏསྶ ཝིསེསཀཾ ཀཱཏུཾ ཝཊྚཏཱི’’ཏི. རཱཛཱ ‘‘ཨཏྟཱནཾ ནིསྶཱཡ ཉཱཏབྷཱཝཾ ན ཀཐེསཱི’’ཏི པཎྜིཏསྶ ཏུསྶིཏྭཱ ཨཏིརེཀཏརཾ སཀྐཱརཾ ཀཱཏུཀཱམོ ཙིནྟེསི ‘‘ཧོཏུ མམ པུཏྟཾ ཨེཀཾ པཉྷཾ པུཙྪིཏྭཱ ཀཐིཏཀཱལེ མཧནྟཾ སཀྐཱརཾ ཀརིསྶཱམཱི’’ཏི. སོ པཉྷཾ ཙིནྟེནྟོ སིརིམནྟཔཉྷཾ ཙིནྟེཏྭཱ ཨེཀདིཝསཾ པཉྩནྣཾ པཎྜིཏཱནཾ ཨུཔཊྛཱནཾ ཨཱགནྟྭཱ སུཁནིསིནྣཀཱལེ སེནཀཾ ཨཱཧ – ‘‘སེནཀ, པཉྷཾ པུཙྪིསྶཱམཱི’’ཏི. ‘‘པུཙྪ དེཝཱ’’ཏི. རཱཛཱ སིརིམནྟཔཉྷེ པཋམཾ གཱཐམཱཧ –
‘‘པཉྙཱཡུཔེཏཾ སིརིཡཱ ཝིཧཱིནཾ, ཡསསྶིནཾ ཝཱཔི ཨཔེཏཔཉྙཾ;
པུཙྪཱམི ཏཾ སེནཀ ཨེཏམཏྠཾ, ཀམེཏྠ སེཡྻོ ཀུསལཱ ཝདནྟཱི’’ཏི. (ཛཱ. ༡.༡༥.༨༣);
ཏཏྠ ཀམེཏྠ སེཡྻོཏི ཨིམེསུ དྭཱིསུ ཀཏརཾ པཎྜིཏཱ སེཡྻོཏི ཝདནྟི.
ཨཡཉྩ ཀིར པཉྷོ སེནཀསྶ ཝཾསཱནུགཏོ, ཏེན ནཾ ཁིཔྤམེཝ ཀཐེསི –
‘‘དྷཱིརཱ ཙ བཱལཱ ཙ ཧཝེ ཛནིནྡ, སིཔྤཱུཔཔནྣཱ ཙ ཨསིཔྤིནོ ཙ;
སུཛཱཏིམནྟོཔི ཨཛཱཏིམསྶ, ཡསསྶིནོ པེསཀརཱ བྷཝནྟི;
ཨེཏམྤི དིསྭཱན ཨཧཾ ཝདཱམི, པཉྙོ ནིཧཱིནོ སིརཱིམཱཝ སེཡྻོ’’ཏི. (ཛཱ. ༡.༡༥.༨༤);
ཏཏྠ ¶ པཉྙོ ནིཧཱིནོཏི པཉྙཝཱ ནིཧཱིནོ, ཨིསྶརོཝ ཨུཏྟམོཏི ཨཏྠོ.
རཱཛཱ ཏསྶ ཝཙནཾ སུཏྭཱ ཨིཏརེ ཏཡོ ཨཔུཙྪིཏྭཱ སངྒྷནཝཀཾ ཧུཏྭཱ ནིསིནྣཾ མཧོསདྷཔཎྜིཏཾ ཨཱཧ –
‘‘ཏུཝམྤི པུཙྪཱམི ཨནོམཔཉྙ, མཧོསདྷ ཀེཝལདྷམྨདསྶི;
བཱལཾ ཡསསྶིཾ པཎྜིཏཾ ཨཔྤབྷོགཾ, ཀམེཏྠ སེཡྻོ ཀུསལཱ ཝདནྟཱི’’ཏི. (ཛཱ. ༡.༡༥.༨༥);
ཏཏྠ ¶ ཀེཝལདྷམྨདསྶཱིཏི སབྦདྷམྨདསྶི.
ཨཐསྶ ¶ མཧཱསཏྟོ ‘‘སུཎ, མཧཱརཱཛཱ’’ཏི ཝཏྭཱ ཀཐེསི –
‘‘པཱཔཱནི ཀམྨཱནི ཀརོཏི བཱལོ, ཨིདྷམེཝ སེཡྻོ ཨིཏི མཉྙམཱནོ;
ཨིདྷལོཀདསྶཱི པརལོཀམདསྶཱི, ཨུབྷཡཏྠ བཱལོ ཀལིམགྒཧེསི;
ཨེཏམྤི དིསྭཱན ཨཧཾ ཝདཱམི, པཉྙོཝ སེཡྻོ ན ཡསསྶི བཱལོ’’ཏི. (ཛཱ. ༡.༡༥.༨༦);
ཏཏྠ ཨིདྷམེཝ སེཡྻོཏི ཨིདྷལོཀེ ཨིསྶརིཡམེཝ མཡ྄ཧཾ སེཊྛནྟི མཉྙམཱནོ. ཀལིམགྒཧེསཱིཏི བཱལོ ཨིསྶརིཡམཱནེན པཱཔཀམྨཾ ཀཏྭཱ ནིརཡཱདིཾ ཨུཔཔཛྫནྟོ པརལོཀེ ཙ པུན ཏཏོ ཨཱགནྟྭཱ ནཱིཙཀུལེ དུཀྑབྷཱཝཾ པཏྭཱ ནིབྦཏྟམཱནོ ཨིདྷལོཀེ ཙཱཏི ཨུབྷཡཏྠ པརཱཛཡམེཝ གཎྷཱཏི. ཨེཏམྤི ཀཱརཎཾ ཨཧཾ དིསྭཱ པཉྙཱསམྤནྣོཝ ཨུཏྟམོ, ཨིསྶརོ པན བཱལོ ན ཨུཏྟམོཏི ཝདཱམི.
ཨེཝཾ ཝུཏྟེ རཱཛཱ སེནཀཾ ཨོལོཀེཏྭཱ ‘‘ནནུ མཧོསདྷོ པཉྙཝནྟམེཝ ཨུཏྟམོཏི ཝདཏཱི’’ཏི ཨཱཧ. སེནཀོ ‘‘མཧཱརཱཛ, མཧོསདྷོ དཧརོ, ཨཛྫཱཔིསྶ མུཁེ ཁཱིརགནྡྷོ ཝཱཡཏི, ཀིམེས ཛཱནཱཏཱི’’ཏི ཝཏྭཱ ཨིམཾ གཱཐམཱཧ –
‘‘ནིསིཔྤམེཏཾ ¶ ཝིདདྷཱཏི བྷོགཾ, ན བནྡྷུཝཱ ན སརཱིརཝཎྞོ ཡོ;
པསྶེལ༹མཱུགཾ སུཁམེདྷམཱནཾ, སིརཱི ཧི ནཾ བྷཛཏེ གོརཝིནྡཾ;
ཨེཏམྤི དིསྭཱན ཨཧཾ ཝདཱམི, པཉྙོ ནིཧཱིནོ སིརཱིམཱཝ སེཡྻོ’’ཏི.
ཏཏྠ ཨེལ༹མཱུགནྟི པགྒྷརིཏལཱལམུཁཾ. གོརཝིནྡནྟི སོ ཀིར ཏསྨིཾཡེཝ ནགརེ ཨསཱིཏིཀོཊིཝིབྷཝོ སེཊྛི ཝིརཱུཔོ. ནཱསྶ པུཏྟོ ན ཙ དྷཱིཏཱ, ན ཀིཉྩི སིཔྤཾ ཛཱནཱཏི. ཀཐེནྟསྶཔིསྶ ཧནུཀསྶ ཨུབྷོཧིཔི པསྶེཧི ལཱལཱདྷཱརཱ པགྒྷརཏི. དེཝཙྪརཱ ཝིཡ དྭེ ཨིཏྠིཡོ སབྦཱལངྐཱརེཧི ཝིབྷཱུསིཏཱ སུཔུཔྥིཏཱནི ནཱིལུཔྤལཱནི གཧེཏྭཱ ཨུབྷོསུ པསྶེསུ ཋིཏཱ ཏཾ ལཱལཾ ནཱིལུཔྤལེཧི སམྤཊིཙྪིཏྭཱ ནཱིལུཔྤལཱནི ཝཱཏཔཱནེན ཚཌྜེནྟི. སུརཱསོཎྜཱཔི པཱནཱགཱརཾ པཝིསནྟཱ ནཱིལུཔྤལེཧི ཨཏྠེ སཏི ཏསྶ གེཧདྭཱརཾ གནྟྭཱ ‘‘སཱམི གོརཝིནྡ, སེཊྛཱི’’ཏི ཝདནྟི. སོ ཏེསཾ སདྡཾ སུཏྭཱ ཝཱཏཔཱནེ ཋཏྭཱ ‘‘ཀིཾ, ཏཱཏཱ’’ཏི ཝདཏི. ཨཐསྶ ལཱལཱདྷཱརཱ པགྒྷརཏི ¶ . ཏཱ ཨིཏྠིཡོ ཏཾ ནཱིལུཔྤལེཧི སམྤཊིཙྪིཏྭཱ ནཱིལུཔྤལཱནི ཨནྟརཝཱིཐིཡཾ ཁིཔནྟི. སུརཱདྷུཏྟཱ ཏཱནི གཧེཏྭཱ ¶ ཨུདཀེན ཝིཀྑཱལེཏྭཱ པིལ༹ནྡྷིཏྭཱ པཱནཱགཱརཾ པཝིསནྟི. ཨེཝཾ སིརིསམྤནྣོ ཨཧོསི. སེནཀོ ཏཾ ཨུདཱཧརཎཾ ཀཏྭཱ དསྶེནྟོ ཨེཝམཱཧ.
ཏཾ སུཏྭཱ རཱཛཱ ‘‘ཀཱིདིསཾ, ཏཱཏ, མཧོསདྷཔཎྜིཏཱ’’ཏི ཨཱཧ. པཎྜིཏོ ‘‘དེཝ, ཀིཾ སེནཀོ ཛཱནཱཏི, ཨོདནསིཏྠཊྛཱནེ ཀཱཀོ ཝིཡ དདྷིཾ པཱཏུཾ ཨཱརདྡྷསུནཁོ ཝིཡ ཙ ཡསམེཝ པསྶཏི, སཱིསེ པཏནྟཾ མཧཱམུགྒརཾ ན པསྶཏི, སུཎ, དེཝཱ’’ཏི ཝཏྭཱ ཨིམཾ གཱཐམཱཧ –
‘‘ལདྡྷཱ སུཁཾ མཛྫཏི ཨཔྤཔཉྙོ, དུཀྑེན ཕུཊྛོཔི པམོཧམེཏི;
ཨཱགནྟུནཱ དུཀྑསུཁེན ཕུཊྛོ, པཝེདྷཏི ཝཱརིཙརོཝ གྷམྨེ;
ཨེཏམྤི དིསྭཱན ཨཧཾ ཝདཱམི, པཉྙོཝ སེཡྻོ ན ཡསསྶི བཱལོ’’ཏི. (ཛཱ. ༡.༡༥.༨༨);
ཏཏྠ ¶ སུཁནྟི ཨིསྶརིཡསུཁཾ ལབྷིཏྭཱ བཱལོ པམཛྫཏི, པམཏྟོ སམཱནོ པཱཔཾ ཀརོཏི. དུཀྑེནཱཏི ཀཱཡིཀཙེཏསིཀདུཀྑེན. ཨཱགནྟུནཱཏི ན ཨཛ྄ཛྷཏྟིཀེན. སཏྟཱནཉྷི སུཁམྤི དུཀྑམྤི ཨཱགནྟུཀམེཝ, ན ནིཙྩཔཝཏྟཾ. གྷམྨེཏི ཨུདཀཱ ཨུདྡྷརིཏྭཱ ཨཱཏཔེ ཁིཏྟམཙྪོ ཝིཡ.
ཏཾ སུཏྭཱ རཱཛཱ ‘‘ཀཱིདིསཾ ཨཱཙརིཡཱ’’ཏི ཨཱཧ. སེནཀོ ‘‘དེཝ, ཀིམེས ཛཱནཱཏི, ཏིཊྛནྟུ ཏཱཝ མནུསྶཱ, ཨརཉྙེ ཛཱཏརུཀྑེསུཔི ཕལསམྤནྣམེཝ བཧཱུ ཝིཧངྒམཱ བྷཛནྟཱི’’ཏི ཝཏྭཱ ཨིམཾ གཱཐམཱཧ –
‘‘དུམཾ ཡཐཱ སཱདུཕལཾ ཨརཉྙེ, སམནྟཏོ སམབྷིསརནྟི པཀྑཱི;
ཨེཝམྤི ཨཌྜྷཾ སདྷནཾ སབྷོགཾ, བཧུཛྫནོ བྷཛཏི ཨཏྠཧེཏུ;
ཨེཏམྤི དིསྭཱན ཨཧཾ ཝདཱམི, པཉྙོ ནིཧཱིནོ སིརཱིམཱཝ སེཡྻོ’’ཏི. (ཛཱ. ༡.༡༥.༨༩);
ཏཏྠ བཧུཛྫནོཏི མཧཱཛནོ.
ཏཾ སུཏྭཱ རཱཛཱ ‘‘ཀཱིདིསཾ ཏཱཏཱ’’ཏི ཨཱཧ. པཎྜིཏོ ‘‘ཀིམེས མཧོདརོ ཛཱནཱཏི, སུཎ, དེཝཱ’’ཏི ཝཏྭཱ ཨིམཾ གཱཐམཱཧ –
‘‘ན ¶ སཱདྷུ བལཝཱ བཱལོ, སཱཧསཱ ཝིནྡཏེ དྷནཾ;
ཀནྡནྟམེཏཾ དུམྨེདྷཾ, ཀཌྜྷནྟི ནིརཡཾ བྷུསཾ;
ཨེཏམྤི ¶ དིསྭཱན ཨཧཾ ཝདཱམི, པཉྙོཝ སེཡྻོ ན ཡསསྶི བཱལོ’’ཏི. (ཛཱ. ༡.༡༥.༩༠);
ཏཏྠ སཱཧསཱཏི སཱཧསེན སཱཧསིཀཀམྨཾ ཀཏྭཱ ཛནཾ པཱིལེ༹ཏྭཱ དྷནཾ ཝིནྡཏི. ཨཐ ནཾ ནིརཡཔཱལཱ ཀནྡནྟམེཝ དུམྨེདྷཾ བལཝཝེདནཾ ནིརཡཾ ཀཌྜྷནྟི.
པུན ¶ རཉྙཱ ‘‘ཀིཾ སེནཀཱ’’ཏི ཝུཏྟེ སེནཀོ ཨིམཾ གཱཐམཱཧ –
‘‘ཡཱ ཀཱཙི ནཛྫོ གངྒམབྷིསྶཝནྟི, སབྦཱཝ ཏཱ ནཱམགོཏྟཾ ཛཧནྟི;
གངྒཱ སམུདྡཾ པཊིཔཛྫམཱནཱ, ན ཁཱཡཏེ ཨིདྡྷིཾ པཉྙོཔི ལོཀེ;
ཨེཏམྤི དིསྭཱན ཨཧཾ ཝདཱམི, པཉྙོ ནིཧཱིནོ སིརཱིམཱཝ སེཡྻོ’’ཏི. (ཛཱ. ༡.༡༥.༩༡);
ཏཏྠ ནཛྫོཏི ནིནྣཱ ཧུཏྭཱ སནྡམཱནཱ ཨནྟམསོ ཀུནྣདིཡོཔི གངྒཾ ཨབྷིསྶཝནྟི. ཛཧནྟཱིཏི གངྒཱཏྭེཝ སངྑྱཾ གཙྪནྟི, ཨཏྟནོ ནཱམགོཏྟཾ ཛཧནྟི. ན ཁཱཡཏེཏི སཱཔི གངྒཱ སམུདྡཾ པཊིཔཛྫམཱནཱ ན པཉྙཱཡཏི, སམུདྡོཏྭེཝ ནཱམཾ ལབྷཏི. ཨེཝམེཝ མཧཱཔཉྙོཔི ཨིསྶརསནྟིཀཾ པཏྟོ ན ཁཱཡཏི ན པཉྙཱཡཏི,སམུདྡཾ པཝིཊྛགངྒཱ ཝིཡ ཧོཏི.
པུན རཱཛཱ ‘‘ཀིཾ པཎྜིཏཱ’’ཏི ཨཱཧ. སོ ‘‘སུཎ, མཧཱརཱཛཱ’’ཏི ཝཏྭཱ ཨིམཾ གཱཐཱདྭཡམཱཧ –
‘‘ཡམེཏམཀྑཱ ཨུདདྷིཾ མཧནྟཾ, སཝནྟི ནཛྫོ སབྦཀཱལམསངྑྱཾ;
སོ སཱགརོ ནིཙྩམུལཱ༹རཝེགོ, ཝེལཾ ན ཨཙྩེཏི མཧཱསམུདྡོ.
‘‘ཨེཝམྤི བཱལསྶ པཛཔྤིཏཱནི, པཉྙཾ ན ཨཙྩེཏི སིརཱི ཀདཱཙི;
ཨེཏམྤི དིསྭཱན ཨཧཾ ཝདཱམི, པཉྙོཝ སེཡྻོ ན ཡསསྶི བཱལོ’’ཏི. (ཛཱ. ༡.༡༥.༩༢-༩༣);
ཏཏྠ ¶ ཡམེཏམཀྑཱཏི ཡཾ ཨེཏཾ ཨཀྑཱསི ཝདེསི. ཨསངྑྱནྟི ཨགཎནཾ. ཝེལཾ ན ཨཙྩེཏཱིཏི ཨུལཱ༹རཝེགོཔི ཧུཏྭཱ ཨཱུམིསཧསྶཾ ཨུཀྑིཔིཏྭཱཔི ཝེལཾ ཨཏིཀྐམིཏུཾ ན སཀྐོཏི, ཝེལཾ པཏྭཱ ཨཝསྶཾ སབྦཱ ཨཱུམིཡོ བྷིཛྫནྟི. ཨེཝམྤི བཱལསྶ པཛཔྤིཏཱནཱིཏི བཱལསྶ ཝཙནཱནིཔི ཨེཝམེཝ པཉྙཝནྟཾ ཨཏིཀྐམིཏུཾ ན ¶ སཀྐོནྟི, ཏཾ པཏྭཱཝ བྷིཛྫནྟི. པཉྙཾ ན ཨཙྩེཏཱིཏི པཉྙཝནྟཾ སིརིམཱ ནཱམ ནཱཏིཀྐམཏི. ན ཧི ཀོཙི མནུཛོ ཨཏྠཱནཏྠེ ཨུཔྤནྣཀངྑོ ཏཾཚིནྡནཏྠཱཡ ¶ པཉྙཝནྟཾ ཨཏིཀྐམིཏྭཱ བཱལསྶ ཨིསྶརསྶ པཱདམཱུལཾ གཙྪཏི, པཉྙཝནྟསྶ པན པཱདམཱུལེཡེཝ ཝིནིཙྪཡོ ནཱམ ལབྦྷཏཱིཏི.
ཏཾ སུཏྭཱ རཱཛཱ ‘‘ཀཐཾ སེནཀཱ’’ཏི ཨཱཧ. སོ ‘‘སུཎ, དེཝཱ’’ཏི ཝཏྭཱ ཨིམཾ གཱཐམཱཧ –
‘‘ཨསཉྙཏོ ཙེཔི པརེསམཏྠཾ, བྷཎཱཏི སནྡྷཱནགཏོ ཡསསྶཱི;
ཏསྶེཝ ཏཾ རཱུཧཏི ཉཱཏིམཛ྄ཛྷེ, སིརཱི ཧི ནཾ ཀཱརཡཏེ ན པཉྙཱ;
ཨེཏམྤི དིསྭཱན ཨཧཾ ཝདཱམི, པཉྙོ ནིཧཱིནོ སིརཱིམཱཝ སེཡྻོ’’ཏི. (ཛཱ. ༡.༡༥.༩༤);
ཏཏྠ ཨསཉྙཏོ ཙེཔཱིཏི ཨིསྶརོ ཧི སཙེཔི ཀཱཡཱདཱིཧི ཨསཉྙཏོ དུསྶཱིལོ. སནྡྷཱནགཏོཏི ཝིནིཙྪཡེ ཋིཏོ ཧུཏྭཱ པརེསཾ ཨཏྠཾ བྷཎཏི, ཏསྨིཾ ཝིནིཙྪཡམཎྜལེ མཧཱཔརིཝཱརཔརིཝུཏསྶ མུསཱཝཱདཾ ཝཏྭཱ སཱམིཀམྤི ཨསྶཱམིཀཾ ཀརོནྟསྶ ཏསྶེཝ ཏཾ ཝཙནཾ རུཧཏི. སིརཱི ཧི ནཾ ཏཐཱ ཀཱརཡཏེ ན པཉྙཱ, ཏསྨཱ པཉྙོ ནིཧཱིནོ, སིརིམཱཝ སེཡྻོཏི ཝདཱམི.
པུན རཉྙཱ ‘‘ཀིཾ, ཏཱཏཱ’’ཏི ཝུཏྟེ པཎྜིཏོ ‘‘སུཎ, དེཝ, བཱལསེནཀོ ཀིཾ ཛཱནཱཏཱི’’ཏི ཝཏྭཱ ཨིམཾ གཱཐམཱཧ –
‘‘པརསྶ ཝཱ ཨཏྟནོ ཝཱཔི ཧེཏུ, བཱལོ མུསཱ བྷཱསཏི ཨཔྤཔཉྙོ;
སོ ནིནྡིཏོ ཧོཏི སབྷཱཡ མཛ྄ཛྷེ, པཙྪཱཔི སོ དུགྒཏིགཱམཱི ཧོཏི;
ཨེཏམྤི དིསྭཱན ཨཧཾ ཝདཱམི, པཉྙོཝ སེཡྻོ ན ཡསསྶི བཱལོ’’ཏི. (ཛཱ. ༡.༡༥.༩༥);
ཏཏོ ¶ སེནཀོ ཨིམཾ གཱཐམཱཧ –
‘‘ཨཏྠམྤི ¶ ཙེ བྷཱསཏི བྷཱུརིཔཉྙོ, ཨནཱལ༹ྷིཡོ ཨཔྤདྷནོ དལིདྡོ;
ན ཏསྶ ཏཾ རཱུཧཏི ཉཱཏིམཛ྄ཛྷེ, སིརཱི ¶ ཙ པཉྙཱཎཝཏོ ན ཧོཏི;
ཨེཏམྤི དིསྭཱན ཨཧཾ ཝདཱམི, པཉྙོ ནིཧཱིནོ སིརཱིམཱཝ སེཡྻོ’’ཏི. (ཛཱ. ༡.༡༥.༩༦);
ཏཏྠ ཨཏྠམྤཱིཏི ཀཱརཎམྤི ཙེ བྷཱསཏི. ཉཱཏིམཛ྄ཛྷེཏི པརིསམཛ྄ཛྷེ. པཉྙཱཎཝཏོཏི མཧཱརཱཛ, པཉྙཱཎཝནྟསྶ སིརིསོབྷགྒཔྤཏྟསྶ སནྟིཀཾ གནྟྭཱ པཀཏིཡཱ ཝིཛྫམཱནཱཔི སིརཱི ནཱམ ན ཧོཏི. སོ ཧི ཏསྶ སནྟིཀེ སཱུརིཡུགྒམནེ ཁཛྫོཔནཀོ ཝིཡ ཁཱཡཏཱིཏི དསྶེཏི.
པུན རཉྙཱ ‘‘ཀཱིདིསཾ, ཏཱཏཱ’’ཏི ཝུཏྟེ པཎྜིཏོ ‘‘ཀིཾ ཛཱནཱཏི, སེནཀོ, ཨིདྷལོཀམཏྟམེཝ ཨོལོཀེཏི, ན པརལོཀ’’ནྟི ཝཏྭཱ ཨིམཾ གཱཐམཱཧ –
‘‘པརསྶ ཝཱ ཨཏྟནོ ཝཱཔི ཧེཏུ, ན བྷཱསཏི ཨལིཀཾ བྷཱུརིཔཉྙོ;
སོ པཱུཛིཏོ ཧོཏི སབྷཱཡ མཛ྄ཛྷེ, པཙྪཱཔི སོ སུགྒཏིགཱམཱི ཧོཏི;
ཨེཏམྤི དིསྭཱན ཨཧཾ ཝདཱམི, པཉྙོཝ སེཡྻོ ན ཡསསྶི བཱལོ’’ཏི. (ཛཱ. ༡.༡༥.༩༧);
ཏཏོ སེནཀོ གཱཐམཱཧ –
‘‘ཧཏྠཱི གཝཱསྶཱ མཎིཀུཎྜལཱ ཙ, ཐིཡོ ཙ ཨིདྡྷེསུ ཀུལེསུ ཛཱཏཱ;
སབྦཱཝ ཏཱ ཨུཔབྷོགཱ བྷཝནྟི, ཨིདྡྷསྶ པོསསྶ ཨནིདྡྷིམནྟོ;
ཨེཏམྤི དིསྭཱན ཨཧཾ ཝདཱམི, པཉྙོ ནིཧཱིནོ སིརཱིམཱཝ སེཡྻོ’’ཏི. (ཛཱ. ༡.༡༥.༩༨);
ཏཏྠ ¶ ཨིདྡྷསྶཱཏི ཨིསྶརསྶ. ཨནིདྡྷིམནྟོཏི ན ཀེཝལཾ ཏཱ ནཱརིཡོཝ, ཨཐ ཁོ སབྦེ ཨནིདྡྷིམནྟོཔི སཏྟཱ ཏསྶ ཨུཔབྷོགཱ བྷཝནྟི.
ཏཏོ པཎྜིཏོ ‘‘ཀིཾ ཨེས ཛཱནཱཏཱི’’ཏི ཝཏྭཱ ཨེཀཾ ཀཱརཎཾ ཨཱཧརིཏྭཱ དསྶེནྟོ ཨིམཾ གཱཐམཱཧ –
‘‘ཨསཾཝིཧིཏཀམྨནྟཾ ¶ , བཱལཾ དུམྨེདྷམནྟིནཾ;
སིརཱི ཛཧཏི དུམྨེདྷཾ, ཛིཎྞཾཝ ཨུརགོ ཏཙཾ;
ཨེཏམྤི དིསྭཱན ཨཧཾ ཝདཱམི;
པཉྙོཝ སེཡྻོ ན ཡསསྶི བཱལོ’’ཏི. (ཛཱ. ༡.༡༥.༩༩);
ཏཏྠ ¶ ‘‘སིརཱི ཛཧཏཱི’’ཏི པདསྶ ཙེཏིཡཛཱཏཀེན (ཛཱ. ༡.༨.༤༥ ཨཱདཡོ) ཨཏྠོ ཝཎྞེཏབྦོ.
ཨཐ སེནཀོ རཉྙཱ ‘‘ཀཱིདིས’’ནྟི ཝུཏྟེ ‘‘དེཝ, ཀིཾ ཨེས ཏརུཎདཱརཀོ ཛཱནཱཏི, སུཎཱཐཱ’’ཏི ཝཏྭཱ ‘‘པཎྜིཏཾ ཨཔྤཊིབྷཱནཾ ཀརིསྶཱམཱི’’ཏི ཙིནྟེཏྭཱ ཨིམཾ གཱཐམཱཧ –
‘‘པཉྩ པཎྜིཏཱ མཡཾ བྷདྡནྟེ, སབྦེ པཉྫལིཀཱ ཨུཔཊྛིཏཱ;
ཏྭཾ ནོ ཨབྷིབྷུཡྻ ཨིསྶརོསི, སཀྐོཝ བྷཱུཏཔཏི དེཝརཱཛཱ;
ཨེཏམྤི དིསྭཱན ཨཧཾ ཝདཱམི, པཉྙོ ནིཧཱིནོ སིརཱིམཱཝ སེཡྻོ’’ཏི. (ཛཱ. ༡.༡༥.༡༠༠);
ཨིདཾ ཀིར སུཏྭཱ རཱཛཱ ‘‘སཱདྷུརཱུཔཾ སེནཀེན ཀཱརཎཾ ཨཱབྷཏཾ, སཀྑིསྶཏི ནུ ཁོ མེ པུཏྟོ ཨིམསྶ ཝཱདཾ བྷིནྡིཏྭཱ ཨཉྙཾ ཀཱརཎཾ ཨཱཧརིཏུ’’ནྟི ཙིནྟེཏྭཱ ‘‘ཀཱིདིསཾ པཎྜིཏཱ’’ཏི ཨཱཧ. སེནཀེན ཀིར ཨིམསྨིཾ ཀཱརཎེ ཨཱབྷཏེ ཋཔེཏྭཱ བོདྷིསཏྟཾ ཨཉྙོ ཏཾ ཝཱདཾ བྷིནྡིཏུཾ སམཏྠོ ནཱམ ནཏྠི, ཏསྨཱ མཧཱསཏྟོ ཨཏྟནོ ཉཱཎབལེན ཏསྶ ཝཱདཾ བྷིནྡནྟོ ‘‘མཧཱརཱཛ, ཀིམེས བཱལོ ཛཱནཱཏི, ཡསམེཝ ཨོལོཀེཏི, པཉྙཱཡ ཝིསེསཾ ན ཛཱནཱཏི, སུཎཱཐཱ’’ཏི ཝཏྭཱ ཨིམཾ གཱཐམཱཧ –
‘‘དཱསོཝ ¶ པཉྙསྶ ཡསསྶི བཱལོ, ཨཏྠེསུ ཛཱཏེསུ ཏཐཱཝིདྷེསུ;
ཡཾ པཎྜིཏོ ནིཔུཎཾ སཾཝིདྷེཏི, སམྨོཧམཱཔཛྫཏི ཏཏྠ བཱལོ;
ཨེཏམྤི དིསྭཱན ཨཧཾ ཝདཱམི, པཉྙོཝ སེཡྻོ ན ཡསསྶི བཱལོ’’ཏི. (ཛཱ. ༡.༡༥.༡༠༡);
ཏཏྠ ཨཏྠེསཱུཏི ཀིཙྩེསུ ཛཱཏེསུ. སཾཝིདྷེཏཱིཏི སཾཝིདཧཏི.
ཨིཏི ¶ མཧཱསཏྟོ སིནེརུཔཱདཏོ སུཝཎྞཝཱལུཀཾ ཨུདྡྷརནྟོ ཝིཡ གགནཏལེ པུཎྞཙནྡཾ ཨུཊྛཱཔེནྟོ ཝིཡ ཙ ནཡཀཱརཎཾ དསྶེསི. ཨེཝཾ མཧཱསཏྟེན པཉྙཱནུབྷཱཝཾ དསྶེཏྭཱ ཀཐིཏེ རཱཛཱ སེནཀཾ ཨཱཧ – ‘‘ཀཱིདིསཾ, སེནཀ, སཀྐོནྟོ ཨུཏྟརིཔི ཀཐེཧཱི’’ཏི. སོ ཀོཊྛེ ཋཔིཏདྷཉྙཾ ཝིཡ ཨུགྒཧིཏཀཾ ཁེཔེཏྭཱ ཨཔྤཊིབྷཱནོ མངྐུབྷཱུཏོ པཛ྄ཛྷཱཡནྟོ ¶ ནིསཱིདི. སཙེ ཧི སོ ཨཉྙཾ ཀཱརཎཾ ཨཱཧརེཡྻ, ན གཱཐཱསཧསྶེནཔི ཨིམཾ ཛཱཏཀཾ ནིཊྛཱཡེཐ. ཏསྶ པན ཨཔྤཊིབྷཱནསྶ ཋིཏཀཱལེ གམྦྷཱིརཾ ཨོགྷཾ ཨཱནེནྟོ ཝིཡ མཧཱསཏྟོ ཨུཏྟརིཔི པཉྙམེཝ ཝཎྞེནྟོ ཨིམཾ གཱཐམཱཧ –
‘‘ཨདྡྷཱ ཧི པཉྙཱཝ སཏཾ པསཏྠཱ, ཀནྟཱ སིརཱི བྷོགརཏཱ མནུསྶཱ;
ཉཱཎཉྩ བུདྡྷཱནམཏུལྱརཱུཔཾ, པཉྙཾ ན ཨཙྩེཏི སིརཱི ཀདཱཙཱི’’ཏི. (ཛཱ. ༡.༡༥.༡༠༢);
ཏཏྠ སཏནྟི བུདྡྷཱདཱིནཾ སཔྤུརིསཱནཾ. བྷོགརཏཱཏི མཧཱརཱཛ, ཡསྨཱ ཨནྡྷབཱལམནུསྶཱ བྷོགརཏཱཝ, ཏསྨཱ ཏེསཾ སིརཱི ཀནྟཱ. ཡསོ ནཱམེས པཎྜིཏེཧི གརཧིཏོ བཱལཱནཾ ཀནྟོཏི ཙཱཡཾ ཨཏྠོ བྷིསཛཱཏཀེན (ཛཱ. ༡.༡༤.༧༨ ཨཱདཡོ) ཝཎྞེཏབྦོ. བུདྡྷཱནནྟི སབྦཉྙུབུདྡྷཱནཉྩ ཉཱཎཾ. ཀདཱཙཱིཏི ཀིསྨིཉྩི ཀཱལེ ཉཱཎཝནྟཾ སིརཱི ནཱམ ནཱཏིཀྐམཏི, དེཝཱཏི.
ཏཾ སུཏྭཱ རཱཛཱ མཧཱསཏྟསྶ པཉྷབྱཱཀརཎེན ཏུཊྛོ གྷནཝསྶཾ ཝསྶེནྟོ ཝིཡ མཧཱསཏྟཾ དྷནེན པཱུཛེནྟོ ཨིམཾ གཱཐམཱཧ –
‘‘ཡཾ ¶ ཏཾ ཨཔུཙྪིམྷ ཨཀིཏྟཡཱི ནོ, མཧོསདྷ ཀེཝལདྷམྨདསྶཱི;
གཝཾ སཧསྶཾ ཨུསབྷཉྩ ནཱགཾ, ཨཱཛཉྙཡུཏྟེ ཙ རཐེ དས ཨིམེ;
པཉྷསྶ ཝེཡྻཱཀརཎེན ཏུཊྛོ, དདཱམི ཏེ གཱམཝརཱནི སོལ༹སཱ’’ཏི. (ཛཱ. ༡.༡༥.༡༠༣);
ཏཏྠ ཨུསབྷཉྩ ནཱགནྟི ཏསྶ གཝཾ སཧསྶསྶ ཨུསབྷཾ ཀཏྭཱ ཨལངྐཏཔཊིཡཏྟཾ ཨཱརོཧནཱིཡཾ ནཱགཾ དམྨཱིཏི.
ཝཱིསཏིནིཔཱཏེ སིརིམནྟཔཉྷོ ནིཊྛིཏོ.
ཚནྣཔཐཔཉྷོ
ཏཏོ ¶ པཊྛཱཡ བོདྷིསཏྟསྶ ཡསོ མཧཱ ཨཧོསི. ཏཾ སབྦཾ ཨུདུམྦརདེཝཱིཡེཝ ཝིཙཱརེསི. སཱ ཏསྶ སོལ༹སཝསྶིཀཀཱལེ ཙིནྟེསི ‘‘མམ ཀནིཊྛོ མཧལླཀོ ཛཱཏོ, ཡསོཔིསྶ མཧཱ ཨཧོསི, ཨཱཝཱཧམསྶ ཀཱཏུཾ ཝཊྚཏཱི’’ཏི. སཱ རཉྙོ ཏམཏྠཾ ཨཱརོཙེསི. རཱཛཱ ‘‘སཱདྷུ ཛཱནཱཔེཧི ན’’ནྟི ཨཱཧ. སཱ ཏཾ ཛཱནཱཔེཏྭཱ ¶ ཏེན སམྤཊིཙྪིཏེ ‘‘ཏེན ཧི, ཏཱཏ, ཏེ ཀུམཱརིཀཾ ཨཱནེམཱི’’ཏི ཨཱཧ. ཨཐ མཧཱསཏྟོ ‘‘ཀདཱཙི ཨིམེཧི ཨཱནཱིཏཱ མམ ན རུཙྩེཡྻ, སཡམེཝ ཏཱཝ ཨུཔདྷཱརེམཱི’’ཏི ཙིནྟེཏྭཱ ཨེཝམཱཧ – ‘‘དེཝི, ཀཏིཔཱཧཾ མཱ ཀིཉྩི རཉྙོ ཝདེཐ, ཨཧཾ ཨེཀཾ ཀུམཱརིཀཾ སཡཾ པརིཡེསིཏྭཱ མམ ཙིཏྟརུཙིཏཾ ཏུམྷཱཀཾ ཨཱཙིཀྑིསྶཱམཱི’’ཏི. ‘‘ཨེཝཾ ཀརོཧི, ཏཱཏཱ’’ཏི. སོ དེཝིཾ ཝནྡིཏྭཱ ཨཏྟནོ གྷརཾ གནྟྭཱ སཧཱཡཀཱནཾ སཉྙཾ དཏྭཱ ཨཉྙཱཏཀཝེསེན ཏུནྣཝཱཡཨུཔཀརཎཱནི གཧེཏྭཱ ཨེཀཀོཝ ཨུཏྟརདྭཱརེན ནིཀྑམིཏྭཱ ཨུཏྟརཡཝམཛ྄ཛྷཀཾ པཱཡཱསི. ཏདཱ པན ཏཏྠ ཨེཀཾ པོརཱཎསེཊྛིཀུལཾ པརིཀྑཱིཎཾ ཨཧོསི. ཏསྶ ཀུལསྶ དྷཱིཏཱ ཨམརཱདེཝཱི ནཱམ ཨབྷིརཱུཔཱ དསྶནཱིཡཱ པཱསཱདིཀཱ སབྦལཀྑཎསམྤནྣཱ པུཉྙཝཏཱི. སཱ ཏཾ དིཝསཾ པཱཏོཝ ཡཱགུཾ པཙིཏྭཱ ཨཱདཱཡ ‘‘པིཏུ ཀསནཊྛཱནཾ གམིསྶཱམཱི’’ཏི ནིཀྑམིཏྭཱ ཏམེཝ མགྒཾ པཊིཔཛྫི. མཧཱསཏྟོ ཏཾ ཨཱགཙྪནྟིཾ དིསྭཱ ‘‘སབྦལཀྑཎསམྤནྣཱཡཾ ཨིཏྠཱི, སཙེ ཨཔརིགྒཧཱ, ཨིམཱཡ མེ པཱདཔརིཙཱརིཀཱཡ བྷཝིཏུཾ ཝཊྚཏཱི’’ཏི ཙིནྟེསི.
སཱཔི ¶ ཏཾ དིསྭཱཝ ‘‘སཙེ ཨེཝརཱུཔསྶ པུརིསསྶ གེཧེ བྷཝེཡྻཾ, སཀྐཱ མཡཱ ཀུཊུམྦཾ སཎྛཱཔེཏུ’’ནྟི ཙིནྟེསི.
ཨཐ མཧཱསཏྟོ – ‘‘ཨིམིསྶཱ སཔརིགྒཧཱཔརིགྒཧབྷཱཝཾ ན ཛཱནཱམི, ཧཏྠམུཊྛིཡཱ ནཾ པུཙྪིསྶཱམི, སཙེ ཨེསཱ པཎྜིཏཱ བྷཝིསྶཏི, ཛཱནིསྶཏི. ནོ ཙེ, ན ཛཱནིསྶཏི, ཨིདྷེཝ ནཾ ཚཌྜེཏྭཱ གཙྪཱམཱི’’ཏི ཙིནྟེཏྭཱ དཱུརེ ཋིཏོཝ ཧཏྠམུཊྛིམཀཱསི. སཱཔི ‘‘ཨཡཾ མམ སསཱམིཀཱསཱམིཀབྷཱཝཾ པུཙྪཏཱི’’ཏི ཉཏྭཱ ཧཏྠཾ པསཱརེསི. སོ ཨཔརིགྒཧབྷཱཝཾ ཉཏྭཱ སམཱིཔཾ གནྟྭཱ ‘‘བྷདྡེ, ཀཱ ནཱམ ཏྭ’’ནྟི པུཙྪི. ‘‘སཱམི, ཨཧཾ ཨཏཱིཏེ ཝཱ ཨནཱགཏེ ཝཱ ཨེཏརཧི ཝཱ ཡཾ ནཏྠི, ཏནྣཱམིཀཱ’’ཏི. ‘‘བྷདྡེ, ལོཀེ ཨམརཱ ནཱམ ནཏྠི, ཏྭཾ ཨམརཱ ནཱམ བྷཝིསྶསཱི’’ཏི. ‘‘ཨེཝཾ, སཱམཱི’’ཏི. ‘‘བྷདྡེ, ཀསྶ ཡཱགུཾ ཧརིསྶསཱི’’ཏི? ‘‘པུབྦདེཝཏཱཡ, སཱམཱི’’ཏི. ‘‘བྷདྡེ, པུབྦདེཝཏཱ ནཱམ མཱཏཱཔིཏརོ, ཏཝ པིཏུ ཡཱགུཾ ཧརིསྶསི མཉྙེ’’ཏི. ‘‘ཨེཝཾ, སཱམཱི’’ཏི. ‘‘བྷདྡེ, ཏཝ པིཏཱ ཀིཾ ཀརོཏཱི’’ཏི? ‘‘སཱམི, ཨེཀཾ དྭིདྷཱ ཀརོཏཱི’’ཏི. ‘‘ཨེཀསྶ ¶ དྭིདྷཱཀརཎཾ ནཱམ ཀསནཾ, ཏཝ པིཏཱ ཀསཏཱི’’ཏི ¶ . ‘‘ཨེཝཾ, སཱམཱི’’ཏི. ‘‘ཀཏརསྨིཾ པན ཋཱནེ ཏེ པིཏཱ ཀསཏཱི’’ཏི? ‘‘ཡཏྠ སཀིཾ གཏཱ ན ཨེནྟི, ཏསྨིཾ ཋཱནེ, སཱམཱི’’ཏི. ‘‘སཀིཾ གཏཱནཾ ན པཙྩཱགམནཊྛཱནཾ ནཱམ སུསཱནཾ, སུསཱནསནྟིཀེ ཀསཏི, བྷདྡེ’’ཏི. ‘‘ཨེཝཾ, སཱམཱི’’ཏི. ‘‘བྷདྡེ, ཨཛྫེཝ ཨེསྶསཱི’’ཏི. ‘‘སཙེ ཨེསྶཏི, ན ཨེསྶཱ’’མི. ‘‘ནོ ཙེ ཨེསྶཏི, ཨེསྶཱམི, སཱམཱི’’ཏི. ‘‘བྷདྡེ, པིཏཱ ཏེ མཉྙེ ནདཱིཔཱརེ ཀསཏི, ཨུདཀེ ཨེནྟེ ན ཨེསྶསི, ཨནེནྟེ ཨེསྶསཱི’’ཏི. ‘‘ཨེཝཾ, སཱམཱི’’ཏི. ཨེཏྟཀཾ ནཱམ མཧཱསཏྟོ ཨཱལཱཔསལླཱཔཾ ཀརོཏི.
ཨཐ ནཾ ཨམརཱདེཝཱི ‘‘ཡཱགུཾ པིཝིསྶསི, སཱམཱི’’ཏི ནིམནྟེསི. མཧཱསཏྟོ ‘‘པཋམམེཝ པཊིཀྑིཔནཾ ནཱམ ཨཝམངྒལ’’ནྟི ཙིནྟེཏྭཱ ‘‘ཨཱམ, པིཝིསྶཱམཱི’’ཏི ཨཱཧ. སཱ པན ཡཱགུགྷཊཾ ཨོཏཱརེསི. མཧཱསཏྟོ ཙིནྟེསི ‘‘སཙེ པཱཏིཾ ཨདྷོཝིཏྭཱ ཧཏྠདྷོཝནཾ ཨདཏྭཱ དསྶཏི, ཨེཏྠེཝ ནཾ པཧཱཡ གམིསྶཱམཱི’’ཏི. སཱ པན པཱཏིཾ དྷོཝིཏྭཱ པཱཏིཡཱ ཨུདཀཾ ཨཱཧརིཏྭཱ ཧཏྠདྷོཝནཾ དཏྭཱ ཏུཙྪཔཱཏིཾ ཧཏྠེ ཨཊྛཔེཏྭཱ བྷཱུམིཡཾ ཋཔེཏྭཱ གྷཊཾ ཨཱལུལེ༹ཏྭཱ ཡཱགུཡཱ པཱུརེསི, ཏཏྠ པན སིཏྠཱནི མཧནྟཱནི. ཨཐ ནཾ མཧཱསཏྟོ ཨཱཧ ‘‘ཀིཾ, བྷདྡེ, ཨཏིབཧལཱ ཡཱགཱུ’’ཏི. ‘‘ཨུདཀཾ ན ལདྡྷཾ, སཱམཱི’’ཏི ¶ . ‘‘ཀེདཱརེ ཨུདཀཾ ན ལདྡྷཾ བྷཝིསྶཏི མཉྙེ’’ཏི. ‘‘ཨེཝཾ, སཱམཱི’’ཏི. སཱ པིཏུ ཡཱགུཾ ཋཔེཏྭཱ བོདྷིསཏྟསྶ ཨདཱསི. སོ ཡཱགུཾ པིཝིཏྭཱ མུཁཾ ཝིཀྑཱལེཏྭཱ ‘‘བྷདྡེ, ཏུཡ྄ཧཾ མཱཏུ གེཧཾ གམིསྶཱམི, མགྒཾ མེ ཨཱཙིཀྑཱ’’ཏི ཨཱཧ. སཱ ‘‘སཱདྷཱུ’’ཏི ཝཏྭཱ མགྒཾ ཨཱཙིཀྑནྟཱི ཨེཀཀནིཔཱཏེ ཨིམཾ གཱཐམཱཧ –
‘‘ཡེན སཏྟུབིལངྒཱ ཙ, དིགུཎཔལཱསོ ཙ པུཔྥིཏོ;
ཡེན དདཱམི ཏེན ཝདཱམི, ཡེན ན དདཱམི ན ཏེན ཝདཱམི;
ཨེས མགྒོ ཡཝམཛ྄ཛྷཀསྶ, ཨེཏཾ ཨནྣཔཐཾ ཝིཛཱནཱཧཱི’’ཏི. (ཛཱ. ༡.༡.༡༡༢);
ཏསྶཏྠོ – ‘‘སཱམི, ཨནྟོགཱམཾ པཝིསིཏྭཱ ཨེཀཾ སཏྟུཨཱཔཎཾ པསྶིསྶསི, ཏཏོ ཀཉྫིཀཱཔཎཾ, ཏེསཾ པུརཏོ དིགུཎཔཎྞོ ཀོཝིལཱ༹རོ སུཔུཔྥིཏོ, ཏསྨཱ ཏྭཾ ཡེན སཏྟུབིལངྒཱ ¶ ཙ ཀོཝིལཱ༹རོ ཙ པུཔྥིཏོ, ཏེན གནྟྭཱ ཀོཝིལཱ༹རམཱུལེ ཋཏྭཱ དཀྑིཎཾ གཎྷ ཝཱམཾ མུཉྩ, ཨེས མགྒོ ཡཝམཛ྄ཛྷཀསྶ ཡཝམཛ྄ཛྷཀགཱམེ ཋིཏསྶ ཨམྷཱཀཾ གེཧསྶ, ཨེཏཾ ཨེཝཾ པཊིཙྪཱདེཏྭཱ མཡཱ ཝུཏྟཾ ཚནྣཔཐཾ པཊིཙྪནྣཔཐཾ ཚནྣཔཐཾ ཝཱ པཊིཙྪནྣཀཱརཎཾ ཝིཛཱནཱཧཱི’’ཏི. ཨེཏྠ ཧི ཡེན དདཱམཱིཏི ¶ ཡེན ཧཏྠེན དདཱམི, ཨིདཾ དཀྑིཎཧཏྠཾ སནྡྷཱཡ ཝུཏྟཾ, ཨིཏརཾ ཝཱམཧཏྠཾ. ཨེཝཾ སཱ ཏསྶ མགྒཾ ཨཱཙིཀྑིཏྭཱ པིཏུ ཡཱགུཾ གཧེཏྭཱ ཨགམཱསི.
ཚནྣཔཐཔཉྷོ ནིཊྛིཏོ.
ཨམརཱདེཝིཔརིཡེསནཱ
སོཔི ཏཱཡ ཀཐིཏམགྒེནེཝ ཏཾ གེཧཾ གཏོ. ཨཐ ནཾ ཨམརཱདེཝིཡཱ མཱཏཱ དིསྭཱ ཨཱསནཾ དཏྭཱ ‘‘ཡཱགུཾ པིཝིསྶསི, སཱམཱི’’ཏི ཨཱཧ. ‘‘ཨམྨ, ཀནིཊྛབྷགིནིཡཱ མེ ཨམརཱདེཝིཡཱ ཐོཀཱ ཡཱགུ མེ དིནྣཱ’’ཏི. ཏཾ སུཏྭཱ སཱ ‘‘དྷཱིཏུ མེ ཨཏྠཱཡ ཨཱགཏོ བྷཝིསྶཏཱི’’ཏི ཨཉྙཱསི. མཧཱསཏྟོ ཏེསཾ དུགྒཏབྷཱཝཾ ཛཱནནྟོཔི ‘‘ཨམྨ, ཨཧཾ ཏུནྣཝཱཡོ, ཀིཉྩི སིབྦིཏབྦཡུཏྟཀཾ ཨཏྠཱི’’ཏི པུཙྪི. ‘‘ཨཏྠི, སཱམི, མཱུལཾ པན ནཏྠཱི’’ཏི? ‘‘ཨམྨ མཱུལེན ཀམྨཾ ནཏྠི, ཨཱནེཧི, སིབྦིསྶཱམི ན’’ནྟི. སཱ ཛིཎྞསཱཊཀཱནི ཨཱཧརིཏྭཱ ཨདཱསི. བོདྷིསཏྟོ ཨཱཧཊཱཧཊཾ ནིཊྛཱཔེསིཡེཝ. པུཉྙཝཏོ ཧི ཀིརིཡཱ ནཱམ སམིཛ྄ཛྷཏིཡེཝ. ཨཐ ནཾ ཨཱཧ ‘‘ཨམྨ, ཝཱིཐིབྷཱགེན ¶ ཨཱརོཙེཡྻཱསཱི’’ཏི. སཱ སཀལགཱམཾ ཨཱརོཙེསི. མཧཱསཏྟོ ཏུནྣཝཱཡཀམྨཾ ཀཏྭཱ ཨེཀཱཧེནེཝ སཧསྶཾ ཀཧཱཔཎཾ ཨུཔྤཱདེསི. མཧལླིཀཱཔིསྶ པཱཏརཱསབྷཏྟཾ པཙིཏྭཱ དཏྭཱ ‘‘ཏཱཏ, སཱཡམཱསཾ ཀིཏྟཀཾ པཙཱམཱི’’ཏི ཨཱཧ. ‘‘ཨམྨ, ཡཏྟཀཱ ཨིམསྨིཾ གེཧེ བྷུཉྫནྟི, ཏེསཾ པམཱཎེནཱ’’ཏི. སཱ ཨནེཀསཱུཔབྱཉྫནཾ བཧུབྷཏྟཾ པཙི. ཨམརཱདེཝཱིཔི སཱཡཾ སཱིསེན དཱརུཀལཱཔཾ, ཨུཙྪངྒེན པཎྞཾ ཨཱདཱཡ ཨརཉྙཏོ ཨཱགནྟྭཱ པུརགེཧདྭཱརེ དཱརུཀལཱཔཾ ནིཀྑིཔིཏྭཱ པཙྪིམདྭཱརེན གེཧཾ པཱཝིསི. པིཏཱཔིསྶཱ སཱཡཏརཾ ཨཱགམཱསི. མཧཱསཏྟོ ནཱནགྒརསབྷོཛནཾ བྷུཉྫི. ཨིཏརཱ མཱཏཱཔིཏརོ བྷོཛེཏྭཱ པཙྪཱ སཡཾ བྷུཉྫིཏྭཱ མཱཏཱཔིཏཱུནཾ པཱདེ དྷོཝིཏྭཱ མཧཱསཏྟསྶ པཱདེ དྷོཝི.
སོ ཏཾ པརིགྒཎྷནྟོ ཀཏིཔཱཧཾ ཏཏྠེཝ ཝསི. ཨཐ ནཾ ཝཱིམཾསནྟོ ཨེཀདིཝསཾ ཨཱཧ – ‘‘བྷདྡེ, ཨཌྜྷནཱལི༹ཀཏཎྜུལེ གཧེཏྭཱ ཏཏོ མཡ྄ཧཾ ཡཱགུཉྩ པཱུཝཉྩ བྷཏྟཉྩ པཙཱཧཱི’’ཏི. སཱ ‘‘སཱདྷཱུ’’ཏི སམྤཊིཙྪིཏྭཱ ཏཎྜུལེ ཀོཊྚེཏྭཱ མཱུལཏཎྜུལེཧི བྷཏྟཾ, མཛ྄ཛྷིམཏཎྜུལེཧི ཡཱགུཾ, ཀཎཀཱཧི པཱུཝཾ པཙིཏྭཱ ཏདནུརཱུཔཾ སཱུཔབྱཉྫནཾ སམྤཱདེཏྭཱ མཧཱསཏྟསྶ སབྱཉྫནཾ ཡཱགུཾ ཨདཱསི. སཱ ཡཱགུ མུཁེ ཋཔིཏམཏྟཱཝ ¶ སཏྟ རསཧརཎིསཧསྶཱནི ཕརིཏྭཱ ཨཊྛཱསི. སོ ཏསྶཱ ཝཱིམཾསནཏྠམེཝ ‘‘བྷདྡེ, ཡཱགུཾ པཙིཏུཾ ཨཛཱནནྟཱི ཀིམཏྠཾ མམ ཏཎྜུལེ ནཱསེསཱི’’ཏི ཀུདྡྷོ ཝིཡ སཧ ཁེལེ༹ན ནིཊྛུབྷིཏྭཱ བྷཱུམིཡཾ པཱཏེསི. སཱ ཏསྶ ཨཀུཛ྄ཛྷིཏྭཱཝ ‘‘སཱམི, སཙེ ¶ ཡཱགུ ན སུནྡརཱ, པཱུཝཾ ཁཱདཱ’’ཏི པཱུཝཾ ཨདཱསི. ཏམྤི ཏཐེཝ ཨཀཱསི. ‘‘སཙེ, སཱམི, པཱུཝཾ ན སུནྡརཾ, བྷཏྟཾ བྷུཉྫཱ’’ཏི བྷཏྟཾ ཨདཱསི. བྷཏྟམྤི ཏཐེཝ ཀཏྭཱ ‘‘བྷདྡེ, ཏྭཾ པཙིཏུཾ ཨཛཱནནྟཱི མམ སནྟཀཾ ཀིམཏྠཾ ནཱསེསཱི’’ཏི ཀུདྡྷོ ཝིཡ ཏཱིཎིཔི ཨེཀཏོ མདྡིཏྭཱ སཱིསཏོ པཊྛཱཡ སཀལསརཱིརཾ ལིམྤིཏྭཱ ‘‘གཙྪ, དྭཱརེ ནིསཱིདཱཧཱི’’ཏི ཨཱཧ. སཱ ཨཀུཛ྄ཛྷིཏྭཱཝ ‘‘སཱདྷུ, སཱམཱི’’ཏི གནྟྭཱ ཏཐཱ ཨཀཱསི. སོ ཏསྶཱ ནིཧཏམཱནབྷཱཝཾ ཉཏྭཱ ‘‘བྷདྡེ, ཨེཧཱི’’ཏི ཨཱཧ. སཱ ཨཀུཛ྄ཛྷིཏྭཱ ཨེཀཝཙནེནེཝ ཨཱགཏཱ. མཧཱསཏྟོ པན ཨཱགཙྪནྟོ ཀཧཱཔཎསཧསྶེན སདྡྷིཾ ཨེཀསཱཊཀཡུགཾ ཏམྦཱུལཔསིབྦཀེ ཋཔེཏྭཱ ཨཱགཏོ. ཨཐ ¶ སོ ཏཾ སཱཊཀཾ ནཱིཧརིཏྭཱ ཏསྶཱ ཧཏྠེ ཋཔེཏྭཱ ‘‘བྷདྡེ, ཏཝ སཧཱཡིཀཱཧི སདྡྷིཾ ནྷཱཡིཏྭཱ ཨིམཾ སཱཊཀཾ ནིཝཱསེཏྭཱ ཨེཧཱི’’ཏི ཨཱཧ. སཱ ཏཐཱ ཨཀཱསི.
པཎྜིཏོ ཨུཔྤཱདིཏདྷནཉྩ, ཨཱབྷཏདྷནཉྩ སབྦཾ ཏསྶཱ མཱཏཱཔིཏཱུནཾ དཏྭཱ སམསྶཱསེཏྭཱ སསུརེ ཨཱཔུཙྪིཏྭཱ ཏཾ ཨཱདཱཡ ནགརཱབྷིམུཁོ ཨགམཱསི. ཨནྟརཱམགྒེ ཏསྶཱ ཝཱིམཾསནཏྠཱཡ ཚཏྟཉྩ ཨུཔཱཧནཉྩ དཏྭཱ ཨེཝམཱཧ – ‘‘བྷདྡེ, ཨིམཾ ཚཏྟཾ གཧེཏྭཱ ཨཏྟཱནཾ དྷཱརེཧི, ཨུཔཱཧནཾ ཨབྷིརུཧིཏྭཱ ཡཱཧཱི’’ཏི. སཱ ཏཾ གཧེཏྭཱ ཏཐཱ ཨཀཏྭཱ ཨབྦྷོཀཱསེ སཱུརིཡསནྟཱཔེ ཚཏྟཾ ཨདྷཱརེཏྭཱ ཝནནྟེ དྷཱརེཏྭཱ གཙྪཏི, ཐལཊྛཱནེ ཨུཔཱཧནཾ པཊིམུཉྩིཏྭཱ ཨུདཀཊྛཱནཾ སམྤཏྟཀཱལེ ཨབྷིརུཧིཏྭཱ གཙྪཏི. བོདྷིསཏྟོ ཏཾ ཀཱརཎཾ དིསྭཱ པུཙྪི ‘‘ཀིཾ, བྷདྡེ, ཐལཊྛཱནེ ཨུཔཱཧནཾ པཊིམུཉྩིཏྭཱ ཨུདཀཊྛཱནེ ཨབྷིརུཧིཏྭཱ གཙྪསི, སཱུརིཡསནྟཱཔེ ཚཏྟཾ ཨདྷཱརེཏྭཱ ཝནནྟེ དྷཱརེཏྭཱ’’ཏི? སཱ ཨཱཧ – ‘‘སཱམི, ཐལཊྛཱནེ ཀཎྚཀཱདཱིནི པསྶཱམི, ཨུདཀཊྛཱནེ མཙྪཀཙྪཔཀཎྚཀཱདཱིནི ན པསྶཱམི, ཏེསུ པཱདེ པཝིཊྛེསུ དུཀྑཝེདནཱ བྷཝེཡྻ, ཨབྦྷོཀཱསེ སུཀྑརུཀྑཀཎྚཀཱདཱིནི ནཏྠི, ཝནནྟརཾ པཝིཊྛཱནཾ པན སུཀྑརུཀྑདཎྜཱདིཀེསུ མཏྠཀེ པཏིཏེསུ དུཀྑཝེདནཱ བྷཝེཡྻ, ཏསྨཱ ཏཱནི པཊིགྷཱཏནཏྠཱཡ ཨེཝཾ ཀརོམཱི’’ཏི.
བོདྷིསཏྟོ དྭཱིཧི ཀཱརཎེཧི ཏསྶཱ ཀཐཾ སུཏྭཱ ཏུསྶིཏྭཱ གཙྪནྟོ ཨེཀསྨིཾ ཋཱནེ ཕལསམྤནྣཾ ཨེཀཾ བདརརུཀྑཾ དིསྭཱ བདརརུཀྑམཱུལེ ནིསཱིདི. སཱ བདརརུཀྑམཱུལེ ནིསིནྣཾ མཧཱསཏྟཾ དིསྭཱ ‘‘སཱམི, ཨབྷིརུཧིཏྭཱ བདརཕལཾ གཧེཏྭཱ ཁཱདཱཧི, མཡ྄ཧམྤི དེཧཱི’’ཏི ཨཱཧ. ‘‘བྷདྡེ, ཨཧཾ ཀིལམཱམི, ཨབྷིརུཧིཏུཾ ན སཀྐོམི, ཏྭམེཝ ཨབྷིརུཧཱ’’ཏི. སཱ ཏསྶ ཝཙནཾ སུཏྭཱ བདརརུཀྑཾ ཨབྷིརུཡ྄ཧ སཱཁནྟརེ ནིསཱིདིཏྭཱ ཕལཾ ཨོཙིནི. བོདྷིསཏྟོ ཏཾ ཨཱཧ – ‘‘བྷདྡེ, ཕལཾ མཡ྄ཧཾ དེཧཱི’’ཏི. སཱ ‘‘ཨཡཾ པུརིསོ པཎྜིཏོ ཝཱ ཨཔཎྜིཏོ ཝཱ ཝཱིམཾསིསྶཱམཱི’’ཏི ཙིནྟེཏྭཱ ཏཾ ཨཱཧ ‘‘སཱམི, ཨུཎྷཕལཾ ཁཱདིསྶསི, ཨུདཱཧུ སཱིཏཕལ’’ནྟི? སོ ཏཾ ཀཱརཎཾ ཨཛཱནནྟོ ཝིཡ ཨེཝམཱཧ – ‘‘བྷདྡེ, ཨུཎྷཕལེན མེ ཨཏྠོ’’ཏི ¶ . སཱ ཕལཱནི བྷཱུམིཡཾ ཁིཔིཏྭཱ ‘‘སཱམི, ཁཱདཱ’’ཏི ཨཱཧ. བོདྷིསཏྟོ ཏཾ གཧེཏྭཱ དྷམེནྟོ ཁཱདི. པུན ཝཱིམཾསམཱནོ ནཾ ཨེཝམཱཧ – ‘‘བྷདྡེ, སཱིཏལཾ མེ དེཧཱི’’ཏི. ཨཐ སཱ ¶ བདརཕལཱནི ཏིཎབྷཱུམིཡཱ ཨུཔརི ཁིཔི. སོ ཏཾ གཧེཏྭཱ ཁཱདིཏྭཱ ‘‘ཨཡཾ དཱརིཀཱ ཨཏིཝིཡ པཎྜིཏཱ’’ཏི ཙིནྟེཏྭཱ ཏུསྶི. ཨཐ མཧཱསཏྟོ ཏཾ ཨཱཧ – ‘‘བྷདྡེ, བདརརུཀྑཏོ ཨོཏརཱཧཱི’’ཏི. སཱ མཧཱསཏྟསྶ ཝཙནཾ སུཏྭཱ རུཀྑཏོ ཨོཏརིཏྭཱ གྷཊཾ གཧེཏྭཱ ནདིཾ གནྟྭཱ ཨུདཀཾ ཨཱནེཏྭཱ མཧཱསཏྟསྶ ཨདཱསི. མཧཱསཏྟོ པིཝིཏྭཱ མུཁཾ ཝིཀྑཱལེཏྭཱ ཏཏོ ཨུཊྛཱཡ གཙྪནྟོ ནགརམེཝ སམྤཏྟོ.
ཨཐ སོ ཏཾ ཝཱིམཾསནཏྠཱཡ དོཝཱརིཀསྶ གེཧེ ཋཔེཏྭཱ དོཝཱརིཀསྶ བྷརིཡཱཡ ཨཱཙིཀྑིཏྭཱ ཨཏྟནོ ནིཝེསནཾ གནྟྭཱ པུརིསེ ཨཱམནྟེཏྭཱ ‘‘ཨསུཀགེཧེ ཨིཏྠིཾ ཋཔེཏྭཱ ཨཱགཏོམྷི, ཨིམཾ སཧསྶཾ ཨཱདཱཡ གནྟྭཱ ཏཾ ཝཱིམཾསཐཱ’’ཏི སཧསྶཾ དཏྭཱ པེསེསི. ཏེ ཏཐཱ ཀརིཾསུ. སཱ ཨཱཧ – ‘‘ཨིདཾ མམ སཱམིཀསྶ པཱདརཛམྤི ན ཨགྒྷཏཱི’’ཏི. ཏེ ཨཱགནྟྭཱ པཎྜིཏསྶ ཨཱརོཙེསུཾ. པུནཔི ཡཱཝཏཏིཡཾ པེསེཏྭཱ ཙཏུཏྠེ ཝཱརེ མཧཱསཏྟོ ཏེཡེཝ ‘‘ཏེན ཧི ནཾ ཧཏྠེ གཧེཏྭཱ ཀཌྜྷནྟཱ ཨཱནེཐཱ’’ཏི ཨཱཧ. ཏེ ཏཐཱ ཀརིཾསུ. སཱ མཧཱསཏྟཾ མཧཱསམྤཏྟིཡཾ ཋིཏཾ ན སཉྫཱནི, ནཾ ཨོལོཀེཏྭཱ ཙ པན ཧསི ཙེཝ རོདི ཙ. སོ ཨུབྷཡཀཱརཎཾ པུཙྪི. ཨཐ ནཾ སཱ ཨཱཧ – ‘‘སཱམི, ཨཧཾ ཧསམཱནཱ ཏཝ སམྤཏྟིཾ ཨོལོཀེཏྭཱ ‘ཨཡཾ ཨཀཱརཎེན ན ལདྡྷཱ, པུརིམབྷཝེ ཀུསལཾ ཀཏྭཱ ལདྡྷཱ, ཨཧོ པུཉྙཱནཾ ཕལཾ ནཱམཱ’ཏི ཧསིཾ. རོདམཱནཱ པན ‘ཨིདཱནི པརསྶ རཀྑིཏགོཔིཏཝཏྠུམྷི ཨཔརཛ྄ཛྷིཏྭཱ ¶ ནིརཡཾ གམིསྶཏཱི’ཏི ཏཡི ཀཱརུཉྙེན རོདི’’ནྟི.
སོ ཏཾ ཝཱིམཾསིཏྭཱ སུདྡྷབྷཱཝཾ ཉཏྭཱ ‘‘གཙྪཐ ནཾ ཏཏྠེཝ ནེཐཱ’’ཏི ཝཏྭཱ པེསེཏྭཱ པུན ཏུནྣཝཱཡཝེསཾ གཧེཏྭཱ གནྟྭཱ ཏཱཡ སདྡྷིཾ སཡིཏྭཱ པུནདིཝསེ པཱཏོཝ རཱཛཀུལཾ པཝིསིཏྭཱ ཨུདུམྦརདེཝིཡཱ ཨཱརོཙེསི. སཱ རཉྙོ ཨཱརོཙེཏྭཱ ཨམརཱདེཝིཾ སབྦཱལངྐཱརེཧི ཨལངྐརིཏྭཱ མཧཱཡོགྒེ ནིསཱིདཱཔེཏྭཱ མཧནྟེན སཀྐཱརེན མཧཱསཏྟསྶ གེཧཾ ནེཏྭཱ མངྒལཾ ཀཱརེསི. རཱཛཱ བོདྷིསཏྟསྶ སཧསྶམཱུལཾ པཎྞཱཀཱརཾ པེསེསི. དོཝཱརིཀེ ཨཱདིཾ ཀཏྭཱ སཀལནགརཝཱསིནོ པཎྞཱཀཱརེ པཧིཎིཾསུ. ཨམརཱདེཝཱིཔི རཉྙཱ པཧིཏཾ པཎྞཱཀཱརཾ དྭིདྷཱ ¶ བྷིནྡིཏྭཱ ཨེཀཾ ཀོཊྛཱསཾ རཉྙོ པེསེསི. ཨེཏེནུཔཱཡེན སཀལནགརཝཱསཱིནམྤི པཎྞཱཀཱརཾ པེསེཏྭཱ ནགརཾ སངྒཎྷི. ཏཏོ པཊྛཱཡ མཧཱསཏྟོ ཏཱཡ སདྡྷིཾ སམགྒཝཱསཾ ཝསནྟོ རཉྙོ ཨཏྠཉྩ དྷམྨཉྩ ཨནུསཱསི.
ཨམརཱདེཝིཔརིཡེསནཱ ནིཊྛིཏཱ.
སབྦརཏནཐེནཝཎྞནཱ
ཨཐེཀདིཝསཾ ¶ སེནཀོ ཨིཏརེ ཏཡོ ཨཏྟནོ སནྟིཀཾ ཨཱགཏེ ཨཱམནྟེསི ‘‘ཨམྦྷོ, མཡཾ གཧཔཏིཔུཏྟསྶ མཧོསདྷསྶེཝ ནཔྤཧོམ, ཨིདཱནི པན ཏེན ཨཏྟནཱ བྱཏྟཏརཱ བྷརིཡཱ ཨཱནཱིཏཱ, ཀིནྟི ནཾ རཉྙོ ཨནྟརེ པརིབྷིནྡེཡྻཱམཱ’’ཏི. ‘‘ཨཱཙརིཡ, མཡཾ ཀིཾ ཛཱནཱམ, ཏྭཾཡེཝ ཛཱནཱཧཱི’’ཏི. ‘‘ཧོཏུ མཱ ཙིནྟཡིཏྠ, ཨཏྠེཀོ ཨུཔཱཡོ, ཨཧཾ རཉྙོ ཙཱུལཱ༹མཎིཾ ཐེནེཏྭཱ ཨཱཧརིསྶཱམི, པུཀྐུས, ཏྭཾ སུཝཎྞམཱལཾ ཨཱཧར, ཀཱམིནྡ, ཏྭཾ ཀམྦལཾ, དེཝིནྡ, ཏྭཾ སུཝཎྞཔཱདུཀནྟི ཨེཝཾ མཡཾ ཙཏྟཱརོཔི ཨུཔཱཡེན ཏཱནི ཨཱཧརིསྶཱམ, ཏཏོ ཨམྷཱཀཾ གེཧེ ཨཊྛཔེཏྭཱ གཧཔཏིཔུཏྟསྶ གེཧཾ པེསེསྶཱམཱ’’ཏི. ཨཐ ཁོ ཏེ ཙཏྟཱརོཔི ཏཐཱ ཀརིཾསུ. ཏེསུ སེནཀོ ཏཱཝ ཙཱུལཱ༹མཎིཾ ཏཀྐགྷཊེ པཀྑིཔིཏྭཱ དཱསིཡཱ ཧཏྠེ ཋཔེཏྭཱ པེསེསི ‘‘ཨིམཾ ཏཀྐགྷཊཾ ཨཉྙེསཾ གཎྷནྟཱནཾ ཨདཏྭཱ སཙེ མཧོསདྷསྶ གེཧེ གཎྷཱཏི, གྷཊེནེཝ སདྡྷིཾ དེཧཱི’’ཏི. སཱ པཎྜིཏསྶ གྷརདྭཱརཾ གནྟྭཱ ‘‘ཏཀྐཾ གཎྷཐ, ཏཀྐཾ གཎྷཐཱ’’ཏི ཨཔརཱཔརཾ ཙརཏི.
ཨམརཱདེཝཱི དྭཱརེ ཋིཏཱ ཏསྶཱ ཀིརིཡཾ དིསྭཱ ‘‘ཨཡཾ ཨཉྙཏྠ ན གཙྪཏི, བྷཝིཏབྦམེཏྠ ཀཱརཎེནཱ’’ཏི ཨིངྒིཏསཉྙཱཡ དཱསིཡོ པཊིཀྐམཱཔེཏྭཱ སཡམེཝ ‘‘ཨམྨ, ཨེཧི ཏཀྐཾ གཎྷིསྶཱམཱི’’ཏི ¶ པཀྐོསིཏྭཱ ཏསྶཱ ཨཱགཏཀཱལེ དཱསཱིནཾ སཉྙཾ དཏྭཱ ཏཱསུ ཨནཱགཙྪནྟཱིསུ ‘‘གཙྪ, ཨམྨ, དཱསིཡོ པཀྐོསཱཧཱི’’ཏི ཏམེཝ པེསེཏྭཱ ཏཀྐགྷཊེ ཧཏྠཾ ཨོཏཱརེཏྭཱ མཎིཾ དིསྭཱ ཏཾ དཱསིཾ པུཙྪི ‘‘ཨམྨ, ཏྭཾ ཀསྶ སནྟཀཱ’’ཏི? ‘‘ཨཡྻེ, སེནཀཔཎྜིཏསྶ དཱསཱིམྷཱི’’ཏི. ཏཏོ ཏསྶཱ ནཱམཾ ཏསྶཱ ཙ མཱཏུཡཱ ནཱམཾ པུཙྪིཏྭཱ ‘‘ཨསུཀཱ ནཱམཱ’’ཏི ཝུཏྟེ ‘‘ཨམྨ, ཨིམཾ ཏཀྐཾ ཀཏིམཱུལ’’ནྟི པུཙྪི. ‘‘ཨཡྻེ, ཙཏུནཱལི༹ཀ’’ནྟི. ‘‘ཏེན ཧི, ཨམྨ, ཨིམཾ ཏཀྐཾ མེ དེཧཱི’’ཏི ཝཏྭཱ ‘‘ཨཡྻེ, ཏུམྷེསུ གཎྷནྟཱིསུ མཱུལེན མེ ཀོ ཨཏྠོ, གྷཊེནེཝ སདྡྷིཾ གཎྷཐཱ’’ཏི ཝུཏྟེ ‘‘ཏེན ཧི ཡཱཧཱི’’ཏི ཏཾ ཨུཡྻོཛེཏྭཱ སཱ ‘‘ཨསུཀམཱསེ ཨསུཀདིཝསེ ¶ སེནཀཱཙརིཡོ ཨསུཀཱཡ ནཱམ དཱསིཡཱ དྷཱིཏཱཡ ཨསུཀཱཡ ནཱམ ཧཏྠེ རཉྙོ ཙཱུལཱ༹མཎིཾ པཧེནཀཏྠཱཡ པཧིཎཱི’’ཏི པཎྞེ ལིཁིཏྭཱ ཏཀྐཾ གཎྷི. པུཀྐུསོཔི སུཝཎྞམཱལཾ སུམནཔུཔྥཙངྐོཊཀེ ཋཔེཏྭཱ སུམནཔུཔྥེན པཊིཙྪཱདེཏྭཱ ཏཐེཝ པེསེསི. ཀཱམིནྡོཔི ཀམྦལཾ པཎྞཔཙྪིཡཾ ཋཔེཏྭཱ པཎྞེཧི ཚཱདེཏྭཱ པེསེསི. དེཝིནྡོཔི སུཝཎྞཔཱདུཀཾ ཡཝཀལཱཔནྟརེ བནྡྷིཏྭཱ པེསེསི. སཱ སབྦཱནིཔི ཏཱནི གཧེཏྭཱ པཎྞེ ཨཀྑརཱནི ཨཱརོཔེཏྭཱ མཧཱསཏྟསྶ ཨཱཙིཀྑིཏྭཱ ཋཔེསི.
ཏེཔི ¶ ཙཏྟཱརོ པཎྜིཏཱ རཱཛཀུལཾ གནྟྭཱ ‘‘ཀིཾ, དེཝ, ཏུམྷེ ཙཱུལཱ༹མཎིཾ ན པིལ༹ནྡྷཐཱ’’ཏི ཨཱཧཾསུ. རཱཛཱ ‘‘པིལ༹ནྡྷིསྶཱམི ཨཱཧརཐཱ’’ཏི པུརིསེ ཨཱཧ. ཏེ མཎིཾ ན པསྶིཾསུ, ཨིཏརཱནིཔི ན པསྶིཾསུཡེཝ. ཨཐ ཏེ ཙཏྟཱརོ པཎྜིཏཱ ‘‘དེཝ, ཏུམྷཱཀཾ ཨཱབྷརཎཱནི མཧོསདྷསྶ གེཧེ ཨཏྠི, སོ ཏཱནི སཡཾ ཝལ༹ཉྫེཏི, པཊིསཏྟུ ཏེ མཧཱརཱཛ, གཧཔཏིཔུཏྟོ’’ཏི ཏཾ བྷིནྡིཾསུ. ཨཐསྶ ཨཏྠཙརཀཱ མནུསྶཱ སཱིགྷཾ གནྟྭཱ ཨཱརོཙེསུཾ. སོ ‘‘རཱཛཱནཾ དིསྭཱ ཛཱནིསྶཱམཱི’’ཏི རཱཛུཔཊྛཱནཾ ཨགམཱསི. རཱཛཱ ཀུཛ྄ཛྷིཏྭཱ ‘‘ཀོ ཛཱནིསྶཏི, ཀིཾ བྷཝིསྶཏི ཀིཾ ཀརིསྶཏཱི’’ཏི ཨཏྟཱནཾ པསྶིཏུཾ ནཱདཱསི. པཎྜིཏོ རཉྙོ ཀུདྡྷབྷཱཝཾ ཉཏྭཱ ཨཏྟནོ ནིཝེསནམེཝ གཏོ. རཱཛཱ ‘‘ནཾ གཎྷཐཱ’’ཏི ཨཱཎཱཔེསི. པཎྜིཏོ ཨཏྠཙརཀཱནཾ ཝཙནཾ སུཏྭཱ ‘‘མཡཱ ཨཔགནྟུཾ ཝཊྚཏཱི’’ཏི ཨམརཱདེཝིཡཱ སཉྙཾ དཏྭཱ ཨཉྙཱཏཀཝེསེན ནགརཱ ནིཀྑམིཏྭཱ དཀྑིཎཡཝམཛ྄ཛྷཀགཱམཾ གནྟྭཱ ཏསྨིཾ ཀུམྦྷཀཱརཀམྨཾ ཨཀཱསི. ནགརེ ‘‘པཎྜིཏོ པལཱཏོ’’ཏི ཨེཀཀོལཱཧལཾ ཛཱཏཾ.
སེནཀཱདཡོཔི ཙཏྟཱརོ ཛནཱ ཏསྶ པལཱཏབྷཱཝཾ ཉཏྭཱ ‘‘མཱ ཙིནྟཡིཏྠ, མཡཾ ཀིཾ ཨཔཎྜིཏཱ’’ཏི ཨཉྙམཉྙཾ ཨཛཱནཱཔེཏྭཱཝ ཨམརཱདེཝིཡཱ པཎྞཱཀཱརཾ པཧིཎིཾསུ ¶ སཱ ཏེཧི ཙཏཱུཧི པེསིཏཔཎྞཱཀཱརཾ གཧེཏྭཱ ‘‘ཨསུཀ-ཨསུཀཝེལཱཡ ཨཱགཙྪཏཱུ’’ཏི ཝཏྭཱ ཨེཀཾ ཀཱུཔཾ ཁཎཱཔེཏྭཱ གཱུཐརཱསིནོ སཧ ཨུདཀེན ཏཏྠ པཱུརེཏྭཱ གཱུཐཀཱུཔསྶ ཨུཔརིཏལེ ཡནྟཕལཀཱཧི པིདཧིཏྭཱ ཀིལ༹ཉྫེན པཊིཙྪཱདེཏྭཱ སབྦཾ ནིཊྛཱཔེསི. ཨཐ སེནཀོ སཱཡནྷསམཡེ ནྷཏྭཱ ཨཏྟཱནཾ ཨལངྐརིཏྭཱ ནཱནགྒརསབྷོཛནཾ བྷུཉྫིཏྭཱ བོདྷིསཏྟསྶ གེཧཾ ཨགམཱསི. སོ གྷརདྭཱརེ ཋཏྭཱ ¶ ཨཏྟནོ ཨཱགཏབྷཱཝཾ ཛཱནཱཔེསི. སཱ ‘‘ཨེཧི, ཨཱཙརིཡཱ’’ཏི ཨཱཧ. སོ གནྟྭཱ ཏསྶཱ སནྟིཀེ ཨཊྛཱསི. སཱ ཨེཝམཱཧ – ‘‘སཱམི, ཨིདཱནི ཨཧཾ ཏཝ ཝསཾ གཏཱ, ཨཏྟནོ སརཱིརཾ ཨནྷཱཡིཏྭཱ སཡིཏུཾ ཨཡུཏྟ’’ནྟི. སོ ཏསྶཱ ཝཙནཾ སུཏྭཱ ‘‘སཱདྷཱུ’’ཏི སམྤཊིཙྪི. སཱ ནིཀྑམིཏྭཱ ཨུདཀཔཱུརཾ གྷཊཾ གཧེཏྭཱ ཨཱསིཏྟཱ ཝིཡ ‘‘ཨེཧི, ཨཱཙརིཡ, ནྷཱནཏྠཱཡ ཕལཀཱནི ཨཱརུཧཱ’’ཏི ཝཏྭཱ ཏསྶ ཕལཀཱནི ཨབྷིརུཡ྄ཧ ཋིཏཀཱལེ གེཧཾ པཝིསིཏྭཱ ཕལཀཀོཊིཡཾ ཨཀྐམིཏྭཱ གཱུཐཀཱུཔེ པཱཏེསི.
པུཀྐུསོཔི སཱཡནྷསམཡེ ནྷཏྭཱ ཨལངྐརིཏྭཱ ནཱནགྒརསབྷོཛནཾ བྷུཉྫིཏྭཱ བོདྷིསཏྟསྶ གེཧཾ གནྟྭཱ གྷརདྭཱརེ ཋཏྭཱ ཨཏྟནོ ཨཱགཏབྷཱཝཾ ཛཱནཱཔེསི. ཨེཀཱ པརིཙཱརིཀཱ ཨིཏྠཱི ཨམརཱདེཝིཡཱ ཨཱརོཙེསི. སཱ ཏསྶཱ ཝཙནཾ སུཏྭཱ ‘‘ཨེཧི, ཨཱཙརིཡ, ཨཏྟནོ སརཱིརཾ ཨནྷཱཡིཏྭཱ སཡིཏུཾ ཨཡུཏྟ’’ནྟི ཨཱཧ. སོ ‘‘སཱདྷཱུ’’ཏི སམྤཊིཙྪི. སཱ ནིཀྑམིཏྭཱ ཨུདཀཔཱུརཾ གྷཊཾ གཧེཏྭཱ ཨཱསིཉྩམཱནཱ ཝིཡ ‘‘ཨེཧི, ཨཱཙརིཡ, ནྷཱནཏྠཱཡ ཕལཀཱནི ཨབྷིརུཧཱ’’ཏི ཨཱཧ. ཏསྶ ཕལཀཱནི ཨབྷིརུཡ྄ཧ ཋིཏཀཱལེ སཱ གེཧཾ པཝིསིཏྭཱ ཕལཀཱནི ཨཱཀཌྜྷིཏྭཱ ¶ གཱུཐཀཱུཔེ པཱཏེསི. པུཀྐུསཾ སེནཀོ ‘‘ཀོ ཨེསོ’’ཏི པུཙྪི. ‘‘ཨཧཾ པུཀྐུསོ’’ཏི. ‘‘ཏྭཾ ཀོ ནཱམ མནུསྶོ’’ཏི? ‘‘ཨཧཾ སེནཀོ’’ཏི ཨཉྙམཉྙཾ པུཙྪིཏྭཱ ཨཊྛཾསུ. ཏཐཱ ཨིཏརེ དྭེཔི ཏཏྠེཝ པཱཏེསི. སབྦེཔི ཏེ ཛེགུཙྪེ གཱུཐཀཱུཔེ ཨཊྛཾསུ. སཱ ཝིབྷཱཏཱཡ རཏྟིཡཱ ཏཏོ ཨུཀྑིཔཱཔེཏྭཱ, ཙཏྟཱརོཔི ཛནེ ཁུརམུཎྜེ ཀཱརཱཔེཏྭཱ ཏཎྜུལཱནི གཱཧཱཔེཏྭཱ ཨུདཀེན ཏེམེཏྭཱ ཀོཊྚཱཔེཏྭཱ ཙུཎྞཾ བཧལཡཱགུཾ པཙཱཔེཏྭཱ མདྡིཏྭཱ སཱིསཏོ པཊྛཱཡ སཀལསརཱིརཾ ཝིལིམྤཱཔེཏྭཱ ཏཱུལཔིཙཱུནི གཱཧཱཔེཏྭཱ ཏཐེཝ སཱིསཏོ པཊྛཱཡ ཨོཀིརཱཔེཏྭཱ མཧཱདུཀྑཾ པཱཔེཏྭཱ ཀིལཉྫཀུཙྪིཡཾ ནིཔཛྫཱཔེཏྭཱ ཝེཋེཏྭཱ རཉྙོ ཨཱརོཙེཏུཀཱམཱ ཧུཏྭཱ ཏེཧི སདྡྷིཾ ཙཏྟཱརི རཏནཱནི གཱཧཱཔེཏྭཱ རཉྙོ སནྟིཀཾ གནྟྭཱ རཱཛཱནཾ ཝནྡིཏྭཱ ཨེཀམནྟཾ ནིསཱིདིཏྭཱ – ‘‘དེཝ, སེཏཝཱནརཾ ནཱམ མཧཱཔཎྞཱཀཱརཾ པཊིགྒཎྷཐཱ’’ཏི ཝཏྭཱ ཙཏྟཱརི ཀིལཉྫཱནི རཉྙོ པཱདམཱུལེ ཋཔཱཔེསི. ཨཐ རཱཛཱ ཝིཝརཱཔེཏྭཱ སེཏམཀྐཊསདིསེ ཙཏྟཱརོཔི ཛནེ པསྶི. ཨཐ སབྦེ མནུསྶཱ ‘‘ཨཧོ ཨདིཊྛཔུབྦཱ, ཨཧོ མཧཱསེཏཝཱནརཱ’’ཏི ཝཏྭཱ མཧཱཧསིཏཾ ཧསིཾསུ. ཏེ ཙཏྟཱརོཔི མཧཱལཛྫཱ ཨཧེསུཾ.
ཨཐ ¶ ཨམརཱདེཝཱི ཨཏྟནོ སཱམིནོ ནིདྡོསབྷཱཝཾ ཀཐེནྟཱི རཱཛཱནཾ ཨཱཧ – ‘‘དེཝ, མཧོསདྷཔཎྜིཏོ ན ཙོརོ, ཨིམེ ཙཏྟཱརོཝ ཙོརཱ. ཨེཏེསུ ཧི སེནཀོ མཎིཙོརོ, པུཀྐུསོ སུཝཎྞམཱལཱཙོརོ, ཀཱམིནྡོ ཀམྦལཙོརོ, དེཝིནྡོ སུཝཎྞཔཱདུཀཱཙོརོ. ཨིམེ ཙོརཱ ཨསུཀམཱསེ ཨསུཀདིཝསེ ཨསུཀདཱསིདྷཱིཏཱནཾ ཨསུཀདཱསཱིནཾ ཧཏྠེ ཨིམཱནི རཏནཱནི པཧིཎནྟི. ཨིམཾ པཎྞཾ པསྶཐ, ཨཏྟནོ སནྟཀཉྩ གཎྷཐ, ཙོརེ ཙ, དེཝ, པཊིཙྪཐཱ’’ཏི. སཱ ཙཏྟཱརོཔི ཛནེ མཧཱཝིཔྤཀཱརཾ པཱཔེཏྭཱ རཱཛཱནཾ ཝནྡིཏྭཱ ཨཏྟནོ གེཧམེཝ གཏཱ. རཱཛཱ བོདྷིསཏྟསྶ པལཱཏབྷཱཝེན ཏསྨིཾ ཨཱསངྐཱཡ ཙ ཨཉྙེསཾ པཎྜིཏཔཏིམནྟཱིནཾ ཨབྷཱཝེན ཙ ཏེསཾ ཀིཉྩི ཨཝཏྭཱ ‘‘པཎྜིཏཱ ནྷཱཔེཏྭཱ ཨཏྟནོ གེཧཱནི གཙྪཐཱ’’ཏི པེསེསི. ཙཏྟཱརོ ཛནཱ མཧཱཝིཔྤཀཱརཾ པཏྭཱ རཱཛཱནཾ ཝནྡིཏྭཱ ཨཏྟནོ གེཧམེཝ གཏཱ.
སབྦརཏནཐེནཱ ནིཊྛིཏཱ.
ཁཛྫོཔནཀཔཉྷོ
ཨཐསྶ ཚཏྟེ ཨདྷིཝཏྠཱ དེཝཏཱ བོདྷིསཏྟསྶ དྷམྨདེསནཾ ཨསྶུཎནྟཱི ‘‘ཀིཾ ནུ ཁོ ཀཱརཎ’’ནྟི ཨཱཝཛྫམཱནཱ ཏཾ ཀཱརཎཾ ཉཏྭཱ ‘‘པཎྜིཏསྶ ཨཱནཡནཀཱརཎཾ ཀརིསྶཱམཱི’’ཏི ཙིནྟེཏྭཱ རཏྟིབྷཱགེ ཚཏྟཔིཎྜིཀཾ ཝིཝརིཏྭཱ རཱཛཱནཾ ཙཏུཀྐནིཔཱཏེ དེཝཏཱཡ པུཙྪིཏཔཉྷེ ཨཱགཏེ ¶ ‘‘ཧནྟི ཧཏྠེཧི པཱདེཧཱི’’ཏིཨཱདིཀེ ཙཏྟཱརོ པཉྷེ པུཙྪི. རཱཛཱ ཨཛཱནནྟོ ‘‘ཨཧཾ ན ཛཱནཱམི, ཨཉྙེ པཎྜིཏེ པུཙྪིསྶཱམཱི’’ཏི ཨེཀདིཝསཾ ཨོཀཱསཾ ཡཱཙིཏྭཱ པུནདིཝསེ ‘‘ཨཱགཙྪནྟཱུ’’ཏི ཙཏུནྣཾ པཎྜིཏཱནཾ སཱསནཾ པེསེསི. ཏེཧི ‘‘མཡཾ ཁུརམུཎྜཱ ཝཱིཐིཾ ཨོཏརནྟཱ ལཛྫཱམཱ’’ཏི ཝུཏྟེ རཱཛཱ ཙཏྟཱརོ ནཱལི༹པཊྚེ པེསེསི ‘‘ཨིམེ སཱིསེསུ ཀཏྭཱ ཨཱགཙྪནྟཱུ’’ཏི. ཏདཱ ཀིར ཏེ ནཱལི༹པཊྚཱ ཨུཔྤནྣཱ. ཏེ ཨཱགནྟྭཱ པཉྙཏྟཱསནེ ནིསཱིདིཾསུ. ཨཐ རཱཛཱ ‘‘སེནཀ, ཨཛྫ རཏྟིབྷཱགེ ཚཏྟེ ཨདྷིཝཏྠཱ དེཝཏཱ མཾ ཙཏྟཱརོ པཉྷེ པུཙྪི, ཨཧཾ པན ཨཛཱནནྟོ ‘པཎྜིཏེ པུཙྪིསྶཱམཱི’ཏི ཨཝཙཾ, ཀཐེཧི མེ ཏེ པཉྷེ’’ཏི ཝཏྭཱ ཨིམཾ གཱཐམཱཧ –
‘‘ཧནྟི ཧཏྠེཧི པཱདེཧི, མུཁཉྩ པརིསུམྦྷཏི;
ས ཝེ རཱཛ པིཡོ ཧོཏི, ཀཾ ཏེན ཏྭཱབྷིཔསྶསཱི’’ཏི. (ཛཱ. ༡.༤.༡༩༧);
སེནཀོ ¶ ཨཛཱནནྟོ ‘‘ཀིཾ ཧནྟི, ཀཐཾ ཧནྟཱི’’ཏི ཏཾ ཏཾ ཝིལཔིཏྭཱ ནེཝ ཨནྟཾ ¶ པསྶི, ན ཀོཊིཾ པསྶི. སེསཱཔི ཨཔྤཊིབྷཱནཱ ཨཧེསུཾ. ཨཐ རཱཛཱ ཝིཔྤཊིསཱརཱི ཧུཏྭཱ པུན རཏྟིབྷཱགེ དེཝཏཱཡ ‘‘པཉྷོ ཏེ ཉཱཏོ’’ཏི པུཊྛོ ‘‘མཡཱ ཙཏྟཱརོ པཎྜིཏཱ པུཊྛཱ, ཏེཔི ན ཛཱནིཾསཱུ’’ཏི ཨཱཧ. དེཝཏཱ ‘‘ཀིཾ ཏེ ཛཱནིསྶནྟི, ཋཔེཏྭཱ མཧོསདྷཔཎྜིཏཾ ཨཉྙོ ཀོཙི ཨེཏེ པཉྷེ ཀཐེཏུཾ སམཏྠོ ནཱམ ནཏྠི. སཙེ ཏཾ པཀྐོསཱཔེཏྭཱ ཨེཏེ པཉྷེ ན ཀཐཱཔེསྶསི, ཨིམིནཱ ཏེ ཛལིཏེན ཨཡཀཱུཊེན སཱིསཾ བྷིནྡིསྶཱམཱི’’ཏི རཱཛཱནཾ ཏཛྫེཏྭཱ ‘‘མཧཱརཱཛ, ཨགྒིནཱ ཨཏྠེ སཏི ཁཛྫོཔནཀཾ དྷམིཏུཾ ན ཝཊྚཏི, ཁཱིརེན ཨཏྠེ སཏི ཝིསཱཎཾ དུཧིཏུཾ ན ཝཊྚཏཱི’’ཏི ཝཏྭཱ ཨིམཾ པཉྩཀནིཔཱཏེ ཁཛྫོཔནཀཔཉྷཾ ཨུདཱཧརི –
‘‘ཀོ ནུ སནྟམྷི པཛྫོཏེ, ཨགྒིཔརིཡེསནཾ ཙརཾ;
ཨདྡཀྑི རཏྟི ཁཛྫོཏཾ, ཛཱཏཝེདཾ ཨམཉྙཐ.
‘‘སྭསྶ གོམཡཙུཎྞཱནི, ཨབྷིམཏྠཾ ཏིཎཱནི ཙ;
ཝིཔརཱིཏཱཡ སཉྙཱཡ, ནཱསཀྑི པཛྫལེཏཝེ.
‘‘ཨེཝམྤི ཨནུཔཱཡེན, ཨཏྠཾ ན ལབྷཏེ མིགོ;
ཝིསཱཎཏོ གཝཾ དོཧཾ, ཡཏྠ ཁཱིརཾ ན ཝིནྡཏི.
‘‘ཝིཝིདྷེཧི ¶ ཨུཔཱཡེཧི, ཨཏྠཾ པཔྤོནྟི མཱཎཝཱ;
ནིགྒཧེན ཨམིཏྟཱནཾ, མིཏྟཱནཾ པགྒཧེན ཙ.
‘‘སེནཱམོཀྑཔལཱབྷེན, ཝལླབྷཱནཾ ནཡེན ཙ;
ཛགཏིཾ ཛགཏིཔཱལཱ, ཨཱཝསནྟི ཝསུནྡྷར’’ནྟི. (ཛཱ. ༡.༥.༧༥-༧༩);
ཏཏྠ སནྟམྷི པཛྫོཏེཏི ཨགྒིམྷི སནྟེ. ཙརནྟི ཙརནྟོ. ཨདྡཀྑཱིཏི པསྶི, དིསྭཱ ཙ པན ཝཎྞསཱམཉྙཏཱཡ ཁཛྫོཔནཀཾ ‘‘ཛཱཏཝེདོ ཨཡཾ བྷཝིསྶཏཱི’’ཏི ཨམཉྙིཏྠ. སྭསྶཱཏི སོ ཨསྶ ཁཛྫོཔནཀསྶ ཨུཔརི སུཁུམཱནི གོམཡཙུཎྞཱནི ཙེཝ ཏིཎཱནི ཙ. ཨབྷིམཏྠནྟི ཧཏྠེཧི གྷཾསིཏྭཱ ཨཱཀིརནྟོ ཛཎྞུཀེཧི བྷཱུམིཡཾ པཏིཊྛཱཡ མུཁེན དྷམནྟོ ཛཱལེསྶཱམི ནནྟི ཝིཔརཱིཏཱཡ སཉྙཱཡ ཝཱཡམནྟོཔི ཛཱལེཏུཾ ནཱསཀྑི. མིགོཏི མིགསདིསོ ཨནྡྷབཱལོ ཨེཝཾ ཨནུཔཱཡེན པརིཡེསནྟོ ཨཏྠཾ ན ལབྷཏི. ཡཏྠཱཏི ཡསྨིཾ ཝིསཱཎེ ཁཱིརམེཝ ནཏྠི, ཏཏོ གཱཝིཾ དུཧནྟོ ¶ ཝིཡ ཙ ཨཏྠཾ ན ཝིནྡཏི. སེནཱམོཀྑཔལཱབྷེནཱཏི སེནཱམོཀྑཱནཾ ཨམཙྩཱནཾ ལཱབྷེན. ཝལླབྷཱནནྟི པིཡམནཱཔཱནཾ ¶ ཝིསྶཱསིཀཱནཾ ཨམཙྩཱནཾ ནཡེན ཙ. ཝསུནྡྷརནྟི ཝསུསངྑཱཏཱནཾ རཏནཱནཾ དྷཱརཎཏོ ཝསུནྡྷརནྟི ལདྡྷནཱམཾ ཛགཏིཾ ཛགཏིཔཱལཱ རཱཛཱནོ ཨཱཝསནྟི.
ན ཏེ ཏཡཱ སདིསཱ ཧུཏྭཱ ཨགྒིམྷི ཝིཛྫམཱནེཡེཝ ཁཛྫོཔནཀཾ དྷམནྟི. མཧཱརཱཛ, ཏྭཾ པན ཨགྒིམྷི སཏི ཁཛྫོཔནཀཾ དྷམནྟོ ཝིཡ, ཏུལཾ ཚཌྜེཏྭཱ ཧཏྠེན ཏུལཡནྟོ ཝིཡ, ཁཱིརེན ཨཏྠེ ཛཱཏེ ཝིསཱཎཏོ དུཧནྟོ ཝིཡ ཙ, སེནཀཱདཡོ པུཙྪསི, ཨེཏེ ཀིཾ ཛཱནནྟི. ཁཛྫོཔནཀསདིསཱ ཧེཏེ. ཨགྒིཀྑནྡྷསདིསོ མཧོསདྷོ པཉྙཱཡ ཛལཏི, ཏཾ པཀྐོསཱཔེཏྭཱ པུཙྪ. ཨིམེ ཏེ པཉྷེ ཨཛཱནནྟསྶ ཛཱིཝིཏཾ ནཏྠཱིཏི རཱཛཱནཾ ཏཛྫེཏྭཱ ཨནྟརདྷཱཡི.
ཁཛྫོཔནཀཔཉྷོ ནིཊྛིཏོ.
བྷཱུརིཔཉྷོ
ཨཐ རཱཛཱ མརཎབྷཡཏཛྫིཏོ པུནདིཝསེ ཙཏྟཱརོ ཨམཙྩེ པཀྐོསཱཔེཏྭཱ ‘‘ཏཱཏཱ, ཏུམྷེ ཙཏྟཱརོ ཙཏཱུསུ རཐེསུ ཋཏྭཱ ཙཏཱུཧི ནགརདྭཱརེཧི ནིཀྑམིཏྭཱ ཡཏྠ མམ པུཏྟཾ མཧོསདྷཔཎྜིཏཾ པསྶཐ, ཏཏྠེཝསྶ སཀྐཱརཾ ཀཏྭཱ ཁིཔྤཾ ཨཱནེཐཱ’’ཏི ཨཱཎཱཔེསི. ཏེཔི ཙཏྟཱརོ ཨེཀེཀེན དྭཱརེན ¶ ནིཀྑམིཾསུ. ཏེསུ ཏཡོ ཛནཱ པཎྜིཏཾ ན པསྶིཾསུ. དཀྑིཎདྭཱརེན ནིཀྑནྟོ པན དཀྑིཎཡཝམཛ྄ཛྷཀགཱམེ མཧཱསཏྟཾ མཏྟིཀཾ ཨཱཧརིཏྭཱ ཨཱཙརིཡསྶ ཙཀྐཾ ཝཊྚེཏྭཱ མཏྟིཀཱམཀྑིཏསརཱིརཾ པལཱལཔིཊྛཀེ ནིསཱིདིཏྭཱ མུཊྛིཾ མུཊྛིཾ ཀཏྭཱ ཨཔྤསཱུཔཾ ཡཝབྷཏྟཾ བྷུཉྫམཱནཾ པསྶི. ཀསྨཱ པནེས ཨེཏཾ ཀམྨཾ ཨཀཱསཱིཏི? རཱཛཱ ཀིར ‘‘ནིསྶཾསཡཾ པཎྜིཏོ རཛྫཾ གཎྷིསྶཏཱི’’ཏི ཨཱསངྐཏི. ‘‘སོ ‘ཀུམྦྷཀཱརཀམྨེན ཛཱིཝཏཱི’ཏི སུཏྭཱ ནིརཱསངྐོ བྷཝིསྶཏཱི’’ཏི ཙིནྟེཏྭཱ ཨེཝམཀཱསཱིཏི. སོ ཨམཙྩཾ དིསྭཱ ཨཏྟནོ སནྟིཀཾ ཨཱགཏབྷཱཝཾ ཉཏྭཱ ‘‘ཨཛྫ མཡ྄ཧཾ ཡསོ པུན པཱཀཏིཀོ བྷཝིསྶཏི, ཨམརཱདེཝིཡཱ སམྤཱདིཏཾ ནཱནགྒརསབྷོཛནམེཝ བྷུཉྫིསྶཱམཱི’’ཏི ཙིནྟེཏྭཱ གཧིཏཾ ཡཝབྷཏྟཔིཎྜཾ ཚཌྜེཏྭཱ ཨུཊྛཱཡ མུཁཾ ཝིཀྑཱལེཏྭཱ ནིསཱིདི. ཏསྨིཾ ཁཎེ སོ ཨམཙྩོ ཏཾ ཨུཔསངྐམི. སོ པན སེནཀཔཀྑིཀོ, ཏསྨཱ ནཾ གྷཊེནྟོ ‘‘པཎྜིཏ, ཨཱཙརིཡསེནཀསྶ ཝཙནཾ ནིཡྻཱནིཀཾ, ཏཝ ནཱམ ཡསེ པརིཧཱིནེ ཏཐཱརཱུཔཱ ¶ པཉྙཱ པཏིཊྛཱ ཧོཏུཾ ནཱསཀྑི, ཨིདཱནི མཏྟིཀཱམཀྑིཏོ པལཱལཔིཊྛེ ནིསཱིདིཏྭཱ ཨེཝརཱུཔཾ བྷཏྟཾ བྷུཉྫསཱི’’ཏི ཝཏྭཱ དསཀནིཔཱཏེ བྷཱུརིཔཉྷེ པཋམཾ གཱཐམཱཧ –
‘‘སཙྩཾ ¶ ཀིར, ཏྭཾ ཨཔི བྷཱུརིཔཉྙ, ཡཱ ཏཱདིསཱི སིརཱི དྷིཏཱི མཏཱི ཙ;
ན ཏཱཡཏེབྷཱཝཝསཱུཔནིཏཾ, ཡོ ཡཝཀཾ བྷུཉྫསི ཨཔྤསཱུཔ’’ནྟི. (ཛཱ. ༡.༡༠.༡༤༥);
ཏཏྠ སཙྩཾ ཀིརཱཏི ཡཾ ཨཱཙརིཡསེནཀོ ཨཱཧ, ཏཾ ཀིར སཙྩམེཝ. སིརཱིཏི ཨིསྶརིཡཾ. དྷིཏཱིཏི ཨབྦྷོཙྪིནྣཝཱིརིཡཾ. ན ཏཱཡཏེབྷཱཝཝསཱུཔནིཏནྟི ཨབྷཱཝསྶ ཨཝུཌྜྷིཡཱ ཝསཾ ཨུཔནཱིཏཾ ཏཾ ན རཀྑཏི ན གོཔེཏི, པཏིཊྛཱ ཧོཏུཾ ན སཀྐོཏི. ཡཝཀནྟི ཡཝབྷཏྟཾ.
ཨཐ ནཾ མཧཱསཏྟོ ‘‘ཨནྡྷབཱལ, ཨཧཾ ཨཏྟནོ པཉྙཱབལེན པུན ཏཾ ཡསཾ པཱཀཏིཀཾ ཀཱཏུཀཱམོ ཨེཝཾ ཀརོམཱི’’ཏི ཝཏྭཱ ཨིམཾ གཱཐཱདྭཡམཱཧ –
‘‘སུཁཾ དུཀྑེན པརིཔཱཙཡནྟོ, ཀཱལཱཀཱལཾ ཝིཙིནཾ ཚནྡཚནྣོ;
ཨཏྠསྶ དྭཱརཱནི ཨཝཱཔུརནྟོ, ཏེནཱཧཾ ཏུསྶཱམི ཡཝོདནེན.
‘‘ཀཱལཉྩ ཉཏྭཱ ཨབྷིཛཱིཧནཱཡ, མནྟེཧི ཨཏྠཾ པརིཔཱཙཡིཏྭཱ;
ཝིཛམྦྷིསྶཾ སཱིཧཝིཛམྦྷིཏཱནི, ཏཱཡིདྡྷིཡཱ དཀྑསི མཾ པུནཱཔཱི’’ཏི. (ཛཱ. ༡.༡༠.༡༤༦-༡༤༧);
ཏཏྠ ¶ དུཀྑེནཱཏི ཨིམིནཱ ཀཱཡིཀཙེཏསིཀདུཀྑེན ཨཏྟནོ པོརཱཎཀསུཁཾ པཊིཔཱཀཏིཀཀརཎེན པརིཔཱཙཡནྟོཝཌྜྷེནྟོ. ཀཱལཱཀཱལནྟི ཨཡཾ པཊིཙྪནྣོ ཧུཏྭཱ ཙརཎཀཱལོ, ཨཡཾ ཨཔྤཊིཙྪནྣོཏི ཨེཝཾ ཀཱལཉྩ ཨཀཱལཉྩ ཝིཙིནནྟོ རཉྙོ ཀུདྡྷཀཱལེ ཚནྣེན ཙརིཏབྦནྟི ཉཏྭཱ ཚནྡེན ཨཏྟནོ རུཙིཡཱ ཚནྣོ པཊིཙྪནྣོ ཧུཏྭཱ ཀུམྦྷཀཱརཀམྨེན ཛཱིཝནྟོ ཨཏྟནོ ཨཏྠསྶ ཀཱརཎསངྑཱཏཱནི དྭཱརཱནི ¶ ཨཝཱཔུརནྟོ ཝིཧརཱམི, ཏེན ཀཱརཎེནཱཧཾ ཡཝོདནེན ཏུསྶཱམཱིཏི ཨཏྠོ. ཨབྷིཛཱིཧནཱཡཱཏི ཝཱིརིཡཀརཎསྶ. མནྟེཧི ཨཏྠཾ པརིཔཱཙཡིཏྭཱཏི ཨཏྟནོ ཉཱཎབལེན མམ ཡསཾ ཝཌྜྷེཏྭཱ མནོསིལཱཏལེ ཝིཛམྦྷམཱནོ སཱིཧོ ཝིཡ ཝིཛམྦྷིསྶཾ, ཏཱཡ ཨིདྡྷིཡཱ མཾ པུནཔི ཏྭཾ པསྶིསྶསཱིཏི.
ཨཐ ནཾ ཨམཙྩོ ཨཱཧ – ‘‘པཎྜིཏ, ཚཏྟེ ཨདྷིཝཏྠཱ དེཝཏཱ རཱཛཱནཾ པཉྷཾ པུཙྪི. རཱཛཱ ཙཏྟཱརོ པཎྜིཏེ པུཙྪི. ཏེསུ ཨེཀོཔི ཏཾ པཉྷཾ ཀཐེཏུཾ ནཱསཀྑི, ཏསྨཱ རཱཛཱ ཏཝ སནྟིཀཾ མཾ པཧིཎཱི’’ཏི. ‘‘ཨེཝཾ ¶ སནྟེ པཉྙཱཡ ཨཱནུབྷཱཝཾ ཀསྨཱ ན པསྶསི, ཨེཝརཱུཔེ ཧི ཀཱལེ ན ཨིསྶརིཡཾ པཏིཊྛཱ ཧོཏི, པཉྙཱསམྤནྣོཝ པཏིཊྛཱ ཧོཏཱི’’ཏི མཧཱསཏྟོ པཉྙཱཡ ཨཱནུབྷཱཝཾ ཝཎྞེསི. ཨམཙྩོ རཉྙཱ ‘‘པཎྜིཏཾ དིཊྛཊྛཱནེཡེཝ སཀྐཱརཾ ཀཏྭཱ ཨཱནེཐཱ’’ཏི དིནྣཾ ཀཧཱཔཎསཧསྶཾ མཧཱསཏྟསྶ ཧཏྠེ ཋཔེསི. ཀུམྦྷཀཱརོ ‘‘མཧོསདྷཔཎྜིཏོ ཀིར མཡཱ པེསཀཱརཀམྨཾ ཀཱརིཏོ’’ཏི བྷཡཾ ཨཱཔཛྫི. ཨཐ ནཾ མཧཱསཏྟོ ‘‘མཱ བྷཱཡི, ཨཱཙརིཡ, བཧཱུཔཀཱརོ ཏྭཾ ཨམྷཱཀ’’ནྟི ཨསྶཱསེཏྭཱ སཧསྶཾ དཏྭཱ མཏྟིཀཱམཀྑིཏེནེཝ སརཱིརེན རཐེ ནིསཱིདིཏྭཱ ནགརཾ པཱཝིསི. ཨམཙྩོ རཉྙོ ཨཱརོཙེཏྭཱ ‘‘ཏཱཏ, ཀུཧིཾ པཎྜིཏོ དིཊྛོ’’ཏི ཝུཏྟེ ‘‘དེཝ, དཀྑིཎཡཝམཛ྄ཛྷཀགཱམེ ཀུམྦྷཀཱརཀམྨཾ ཀཏྭཱ ཛཱིཝཏི, ཏུམྷེ པཀྐོསཐཱཏི སུཏྭཱཝ ཨནྷཱཡིཏྭཱ མཏྟིཀཱམཀྑིཏེནེཝ སརཱིརེན ཨཱགཏོ’’ཏི ཨཱཧ. རཱཛཱ ‘‘སཙེ མཡ྄ཧཾ པཙྩཏྠིཀོ ཨསྶ, ཨིསྶརིཡཝིདྷིནཱ ཙརེཡྻ, ནཱཡཾ མམ པཙྩཏྠིཀོ’’ཏི ཙིནྟེཏྭཱ ‘‘མམ པུཏྟསྶ ‘ཨཏྟནོ གྷརཾ གནྟྭཱ ནྷཏྭཱ ཨལངྐརིཏྭཱ མཡཱ དིནྣཝིདྷཱནེན ཨཱགཙྪཏཱུ’ཏི ཝདེཡྻཱཐཱ’’ཏི ཨཱཧ. ཏཾ སུཏྭཱ པཎྜིཏོ ཏཐཱ ཀཏྭཱ ཨཱགནྟྭཱ ‘‘པཝིསཏཱུ’’ཏི ཝུཏྟེ པཝིསིཏྭཱ རཱཛཱནཾ ཝནྡིཏྭཱ ཨེཀམནྟཾ ཨཊྛཱསི. རཱཛཱ པཊིསནྠཱརཾ ཀཏྭཱ པཎྜིཏཾ ཝཱིམཾསནྟོ ཨིམཾ གཱཐམཱཧ –
‘‘སུཁཱིཔི ཧེཀེ ན ཀརོནྟི པཱཔཾ, ཨཝཎྞསཾསགྒབྷཡཱ པུནེཀེ;
པཧཱུ སམཱནོ ཝིཔུལཏྠཙིནྟཱི, ཀིཾ ཀཱརཎཱ མེ ན ཀརོསི དུཀྑ’’ནྟི. (ཛཱ. ༡.༡༠.༡༤༨);
ཏཏྠ ¶ ¶ སུཁཱིཏི པཎྜིཏ, ཨེཀཙྩེ ‘‘མཡཾ སུཁིནོ སམྤནྣཨིསྶརིཡཱ, ཨལཾ ནོ ཨེཏྟཀེནཱ’’ཏི ཨུཏྟརི ཨིསྶརིཡཀཱརཎཱ པཱཔཾ ན ཀརོནྟི, ཨེཀཙྩེ ‘‘ཨེཝརཱུཔསྶ ནོ ཡསདཱཡཀསྶ སཱམིཀསྶ ཨཔརཛ྄ཛྷནྟཱནཾ ཨཝཎྞོ བྷཝིསྶཏཱི’’ཏི ཨཝཎྞསཾསགྒབྷཡཱ ན ཀརོནྟི. ཨེཀོ ན སམཏྠོ ཧོཏི, ཨེཀོ མནྡཔཉྙོ, ཏྭཾ པན སམཏྠོ ཙ ཝིཔུལཏྠཙིནྟཱི ཙ, ཨིཙྪནྟོ པན སཀལཛམྦུདཱིཔེ རཛྫམྤི ཀཱརེཡྻཱསི. ཀིཾ ཀཱརཎཱ མམ རཛྫཾ གཧེཏྭཱ དུཀྑཾ ན ཀརོསཱིཏི.
ཨཐ ནཾ བོདྷིསཏྟོ ཨཱཧ –
‘‘ན པཎྜིཏཱ ཨཏྟསུཁསྶ ཧེཏུ, པཱཔཱནི ཀམྨཱནི སམཱཙརནྟི;
དུཀྑེན ¶ ཕུཊྛཱ ཁལིཏཱཔི སནྟཱ, ཚནྡཱ ཙ དོསཱ ན ཛཧནྟི དྷམྨ’’ནྟི. (ཛཱ. ༡.༡༠.༡༤༩);
ཏཏྠ ཁལིཏཱཔཱིཏི སམྤཏྟིཏོ ཁལིཏྭཱ ཝིཔཏྟིཡཾ ཋིཏསབྷཱཝཱ ཧུཏྭཱཔི. ན ཛཧནྟི དྷམྨནྟི པཝེཎིཡདྷམྨམྤི སུཙརིཏདྷམྨམྤི ན ཛཧནྟི.
པུན རཱཛཱ ཏསྶ ཝཱིམཾསནཏྠཾ ཁཏྟིཡམཱཡཾ ཀཐེནྟོ ཨིམཾ གཱཐམཱཧ –
‘‘ཡེན ཀེནཙི ཝཎྞེན, མུདུནཱ དཱརུཎེན ཝཱ;
ཨུདྡྷརེ དཱིནམཏྟཱནཾ, པཙྪཱ དྷམྨཾ སམཱཙརེ’’ཏི. (ཛཱ. ༡.༡༠.༡༥༠);
ཏཏྠ དཱིནནྟི དུགྒཏཾ ཨཏྟཱནཾ ཨུདྡྷརིཏྭཱ སམྤཏྟིཡཾ ཋཔེཡྻཱཏི.
ཨཐསྶ མཧཱསཏྟོ རུཀྑཱུཔམཾ དསྶེནྟོ ཨིམཾ གཱཐམཱཧ –
‘‘ཡསྶ རུཀྑསྶ ཚཱཡཱཡ, ནིསཱིདེཡྻ སཡེཡྻ ཝཱ;
ན ཏསྶ སཱཁཾ བྷཉྫེཡྻ, མིཏྟདུབྦྷོ ཧི པཱཔཀོ’’ཏི. (ཛཱ. ༡.༡༠.༡༥༡);
ཨེཝཉྩ པན ཝཏྭཱ – ‘‘མཧཱརཱཛ, ཡདི པརིབྷུཏྟརུཀྑསྶ སཱཁཾ བྷཉྫནྟོཔི མིཏྟདུབྦྷཱི ཧོཏི ¶ , ཡེཧི ཏུམྷེཧི མམ པིཏཱ ཨུལཱ༹རེ ཨིསྶརིཡེ པཏིཊྛཱཔིཏོ, ཨཧཉྩ མཧནྟེན ཨནུགྒཧེན ཨནུགྒཧིཏོ, ཏེསུ ཏུམྷེསུ ཨཔརཛ྄ཛྷནྟོ ཨཧཾ ཀཐཾ ནཱམ མིཏྟདུབྦྷོ ན བྷཝེཡྻ’’ནྟི སབྦཐཱཔི ཨཏྟནོ ཨམིཏྟདུབྦྷིབྷཱཝཾ ཀཐེཏྭཱ རཉྙོ ཙིཏྟཱཙཱརཾ ཙོདེནྟོ ཨིམཾ གཱཐམཱཧ –
‘‘ཡསྶཱཔི ¶ དྷམྨཾ པུརིསོ ཝིཛཉྙཱ, ཡེ ཙསྶ ཀངྑཾ ཝིནཡནྟི སནྟོ;
ཏཾ ཧིསྶ དཱིཔཉྩ པརཱཡཎཉྩ, ན ཏེན མེཏྟིཾ ཛརཡེཐ པཉྙོ’’ཏི. (ཛཱ. ༡.༡༠.༡༥༢);
ཏསྶཏྠོ – མཧཱརཱཛ, ཡསྶ ཨཱཙརིཡསྶ སནྟིཀཱ ཡོ པུརིསོ ཨཔྤམཏྟཀམྤི དྷམྨཾ ཀཱརཎཾ ཛཱནེཡྻ, ཡེ ཙསྶ སནྟོ ཨུཔྤནྣཾ ཀངྑཾ ཝིནཡནྟི, ཏཾ ཏསྶ པཏིཊྛཱནཊྛེན དཱིཔཉྩེཝ པརཱཡཎཉྩ, ཏཱདིསེན ཨཱཙརིཡེན སདྡྷིཾ པཎྜིཏོ མིཏྟབྷཱཝཾ ནཱམ ན ཛཱིརེཡྻ ན ནཱསེཡྻ.
ཨིདཱནི ཏཾ ཨོཝདནྟོ ཨིམཾ གཱཐཱདྭཡམཱཧ –
‘‘ཨལསོ གིཧཱི ཀཱམབྷོགཱི ན སཱདྷུ, ཨསཉྙཏོ པབྦཛིཏོ ན སཱདྷུ;
རཱཛཱ ན སཱདྷུ ཨནིསམྨཀཱརཱི, ཡོ པཎྜིཏོ ཀོདྷནོ ཏཾ ན སཱདྷུ.
‘‘ནིསམྨ ¶ ཁཏྟིཡོ ཀཡིརཱ, ནཱནིསམྨ དིསམྤཏི;
ནིསམྨཀཱརིནོ རཱཛ, ཡསོ ཀིཏྟི ཙ ཝཌྜྷཏཱི’’ཏི. (ཛཱ. ༡.༡༠.༡༥༣-༡༥༤);
ཏཏྠ ན སཱདྷཱུཏི ན སུནྡརོ. ཨནིསམྨཀཱརཱིཏི ཀིཉྩི སུཏྭཱ ཨནུཔདྷཱརེཏྭཱ ཨཏྟནོ པཙྩཀྑཾ ཨཀཏྭཱ ཀཱརཀོ. ཡསོ ཀིཏྟི ཙཱཏི ཨིསྶརིཡཔརིཝཱརོ ཙ གུཎཀིཏྟི ཙ ཨེཀནྟེན ཝཌྜྷཏཱིཏི.
བྷཱུརིཔཉྷོ ནིཊྛིཏོ.
དེཝཏཱཔཉྷོ
ཨེཝཾ ¶ ཝུཏྟེ རཱཛཱ མཧཱསཏྟཾ སམུསྶིཏསེཏཙྪཏྟེ རཱཛཔལླངྐེ ནིསཱིདཱཔེཏྭཱ སཡཾ ནཱིཙཱསནེ ནིསཱིདིཏྭཱ ཨཱཧ – ‘‘པཎྜིཏ, སེཏཙྪཏྟེ ཨདྷིཝཏྠཱ དེཝཏཱ མཾ ཙཏྟཱརོ པཉྷེ པུཙྪི, ཏེ ཨཧཾ ན ཛཱནཱམི. ཙཏྟཱརོཔི པཎྜིཏཱ ན ཛཱནིཾསུ, ཀཐེཧི མེ, ཏཱཏ, ཏེ པཉྷེ’’ཏི. མཧཱརཱཛ, ཚཏྟེ ཨདྷིཝཏྠཱ དེཝཏཱ ཝཱ ཧོཏུ, ཙཱཏུམཧཱརཱཛིཀཱདཡོ ཝཱ ཧོནྟུ, ཡེན ཀེནཙི པུཙྪིཏཔཉྷཾ ཨཧཾ ཀཐེཏུཾ སཀྐོམི. ཝད, མཧཱརཱཛ, དེཝཏཱཡ པུཙྪིཏཔཉྷེཏི. ཨཐ རཱཛཱ དེཝཏཱཡ པུཙྪིཏནིཡཱམེནེཝ ཀཐེནྟོ པཋམཾ གཱཐམཱཧ –
‘‘ཧནྟི ¶ ཧཏྠེཧི པཱདེཧི, མུཁཉྩ པརིསུམྦྷཏི;
ས ཝེ རཱཛ པིཡོ ཧོཏི, ཀཾ ཏེན ཏྭཱབྷིཔསྶསཱི’’ཏི. (ཛཱ. ༡.༤.༡༩༧);
ཏཏྠ ཧནྟཱིཏི པཧརཏི. པརིསུམྦྷཏཱིཏི པཧརཏིཡེཝ. ས ཝེཏི སོ ཨེཝཾ ཀརོནྟོ པིཡོ ཧོཏི. ཀཾ ཏེན ཏྭཱབྷིཔསྶསཱིཏི ཏེན པཧརཎཀཱརཎེན པིཡཾ ཀཏམཾ པུགྒལཾ ཏྭཾ, རཱཛ, ཨབྷིཔསྶསཱིཏི.
མཧཱསཏྟསྶ ཏཾ ཀཐཾ སུཏྭཱཝ གགནཏལེ པུཎྞཙནྡོ ཝིཡ ཨཏྠོ པཱཀཊོ ཨཧོསི. ཨཐ མཧཱསཏྟོ ‘‘སུཎ, མཧཱརཱཛ, ཡདཱ ཧི མཱཏུཨངྐེ ནིཔནྣོ དཧརཀུམཱརོ ཧཊྛཏུཊྛོ ཀཱིལ༹ནྟོ མཱཏརཾ ཧཏྠཔཱདེཧི པཧརཏི, ཀེསེ ལུཉྩཏི, མུཊྛིནཱ མུཁཾ པཧརཏི, ཏདཱ ནཾ མཱཏཱ ‘ཙོརཔུཏྟཀ, ཀཐཾ ཏྭཾ ནོ ཨེཝཾ པཧརསཱི’ཏིཨཱདཱིནི པེམསིནེཧཝསེནེཝ ཝཏྭཱ པེམཾ སནྡྷཱརེཏུཾ ཨསཀྐོནྟཱི ཨཱལིངྒིཏྭཱ ཐནནྟརེ ནིཔཛྫཱཔེཏྭཱ མུཁཾ པརིཙུམྦཏི. ཨིཏི སོ ཏསྶཱ ཨེཝརཱུཔེ ཀཱལེ པིཡཏརོ ཧོཏི, ཏཐཱ པིཏུནོཔཱི’’ཏི ཨེཝཾ གགནམཛ྄ཛྷེ སཱུརིཡཾ ཨུཊྛཱཔེནྟོ ཝིཡ པཱཀཊཾ ཀཏྭཱ པཉྷཾ ཀཐེསི. ཏཾ སུཏྭཱ དེཝཏཱ ཚཏྟཔིཎྜིཀཾ ཝིཝརིཏྭཱ ནིཀྑམིཏྭཱ ཨུཔཌྜྷཾ སརཱིརཾ དསྶེཏྭཱ ‘‘སུཀཐིཏོ པཎྜིཏེན པཉྷོ’’ཏི མདྷུརསྶརེན སཱདྷུཀཱརཾ དཏྭཱ རཏནཙངྐོཊཀཾ པཱུརེཏྭཱ དིབྦཔུཔྥགནྡྷཝཱསེཧི བོདྷིསཏྟཾ པཱུཛེཏྭཱ ཨནྟརདྷཱཡི. རཱཛཱཔི པཎྜིཏཾ པུཔྥཱདཱིཧི པཱུཛེཏྭཱ ¶ ཨིཏརཾ པཉྷཾ ཡཱཙིཏྭཱ ‘‘ཝད, མཧཱརཱཛཱ’’ཏི ཝུཏྟེ དུཏིཡཾ གཱཐམཱཧ –
‘‘ཨཀྐོསཏི ཡཐཱཀཱམཾ, ཨཱགམཉྩསྶ ཨིཙྪཏི;
ས ཝེ རཱཛ པིཡོ ཧོཏི, ཀཾ ཏེན ཏྭཱབྷིཔསྶསཱི’’ཏི. (ཛཱ. ༡.༤.༡༩༨);
ཨཐསྶ ¶ མཧཱསཏྟོ – ‘‘མཧཱརཱཛ, མཱཏཱ ཝཙནཔེསནཾ ཀཱཏུཾ སམཏྠཾ སཏྟཊྛཝསྶིཀཾ པུཏྟཾ ‘ཏཱཏ, ཁེཏྟཾ གཙྪ, ཨནྟརཱཔཎཾ གཙྪཱ’ཏིཨཱདཱིནི ཝཏྭཱ ‘ཨམྨ, སཙེ ཨིདཉྩིདཉྩ ཁཱདནཱིཡཾ བྷོཛནཱིཡཾ དསྶསི, གམིསྶཱམཱི’ཏི ཝུཏྟེ ‘སཱདྷུ, པུཏྟ, གཎྷཱཧཱི’ཏི ཝཏྭཱ དེཏི. སོ དཱརཀོ ཏཾ ཁཱདིཏྭཱ བཧི གནྟྭཱ དཱརཀེཧི སདྡྷིཾ ཀཱིལི༹ཏྭཱ མཱཏུཔེསནཾ ན གཙྪཏི. མཱཏརཱ ‘‘ཏཱཏ, གཙྪཱཧཱི’ཏི ཝུཏྟེ སོ མཱཏརཾ ‘ཨམྨ, ཏྭཾ སཱིཏཱཡ གྷརཙྪཱཡཱཡ ནིསཱིདསི, ཀིཾ པན ཨཧཾ ཏཝ བཧི ¶ པེསནཀམྨཾ ཀརིསྶཱམི, ཨཧཾ ཏཾ ཝཉྩེམཱི’ཏི ཝཏྭཱ ཧཏྠཝིཀཱརམུཁཝིཀཱརེ ཀཏྭཱ གཏོ. སཱ གཙྪནྟཾ དིསྭཱ ཀུཛ྄ཛྷིཏྭཱ དཎྜཀཾ གཧེཏྭཱ ‘ཏྭཾ མམ སནྟཀཾ ཁཱདིཏྭཱ ཁེཏྟེ ཀིཙྩཾ ཀཱཏུཾ ན ཨིཙྪསཱི’ཏི ཏཛྫེནྟཱི ཝེགེན པལཱཡནྟཾ ཨནུབནྡྷིཏྭཱ པཱཔུཎིཏུཾ ཨསཀྐོནྟཱི ‘ཙོརཱ ཏཾ ཁཎྜཱཁཎྜཾ ཚིནྡནྟཱུ’ཏིཨཱདཱིནི ཝཏྭཱ ཡཐཱཀཱམཾ ཨཀྐོསཏི པརིབྷཱསཏི. ཡཾ པན མུཁེན བྷཎཏི, ཏཐཱ ཧདཡེ ཨཔྤམཏྟཀམྤི ན ཨིཙྪཏི, ཨཱགམནཉྩསྶ ཨིཙྪཏི, སོ དིཝསབྷཱགཾ ཀཱིལི༹ཏྭཱ སཱཡཾ གེཧཾ པཝིསིཏུཾ ཨཝིསཧནྟོ ཉཱཏཀཱནཾ སནྟིཀཾ གཙྪཏི. མཱཏཱཔིསྶ ཨཱགམནམགྒཾ ཨོལོཀེནྟཱི ཨནཱགཙྪནྟཾ དིསྭཱ ‘པཝིསིཏུཾ ན ཝིསཧཏི མཉྙེ’ཏི སོཀསྶ ཧདཡཾ པཱུརེཏྭཱ ཨསྶུཔུཎྞེཧི ནེཏྟེཧི ཉཱཏིགྷརེ ཨུཔདྷཱརེནྟཱི པུཏྟཾ དིསྭཱ ཨཱལིངྒིཏྭཱ སཱིསེ ཙུམྦིཏྭཱ ཨུབྷོཧི ཧཏྠེཧི དལ༹ྷཾ གཧེཏྭཱ ‘ཏཱཏ པིཡཔུཏྟཀ, མམ ཝཙནཾ ཧདཡེ ཋཔེསཱི’ཏི ཨཏིརེཀཏརཾ པེམཾ ཨུཔྤཱདེསི. ཨེཝཾ, མཧཱརཱཛ, མཱཏུཡཱ ཀུདྡྷཀཱལེ པུཏྟོ པིཡཏརོ ནཱམ ཧོཏཱི’’ཏི དུཏིཡཾ པཉྷཾ ཀཐེསི. དེཝཏཱ ཏཐེཝ པཱུཛེསི.
རཱཛཱཔི པཱུཛེཏྭཱ ཏཏིཡཾ པཉྷཾ ཡཱཙིཏྭཱ ‘‘ཝད, མཧཱརཱཛཱ’’ཏི ཝུཏྟེ ཏཏིཡཾ གཱཐམཱཧ –
‘‘ཨབྦྷཀྑཱཏི ཨབྷཱུཏེན, ཨལིཀེནཱབྷིསཱརཡེ;
ས ཝེ རཱཛ པིཡོ ཧོཏི, ཀཾ ཏེན ཏྭཱབྷིཔསྶསཱི’’ཏི. (ཛཱ. ༡.༤.༡༩༩);
ཨཐསྶ མཧཱསཏྟོ ‘‘རཱཛ, ཡདཱ ཨུབྷོ ཛཡམྤཏིཀཱ རཧོགཏཱ ལོཀསྶཱདརཏིཡཱ ¶ ཀཱིལ༹ནྟཱ ‘བྷདྡེ, ཏཝ མཡི པེམཾ ནཏྠི, ཧདཡཾ ཏེ བཧི གཏ’ནྟི ཨེཝཾ ཨཉྙམཉྙཾ ཨབྷཱུཏེན ཨབྦྷཱཙིཀྑནྟི, ཨལིཀེན སཱརེནྟི ཙོདེནྟི, ཏདཱ ཏེ ཨཏིརེཀཏརཾ ཨཉྙམཉྙཾ པིཡཱཡནྟི. ཨེཝམསྶ པཉྷསྶ ཨཏྠཾ ཛཱནཱཧཱི’’ཏི ཀཐེསི. དེཝཏཱ ཏཐེཝ པཱུཛེསི.
རཱཛཱཔི པཱུཛེཏྭཱ ཨིཏརཾ པཉྷཾ ཡཱཙིཏྭཱ ‘‘ཝད, མཧཱརཱཛཱ’’ཏི ཝུཏྟེ ཙཏུཏྠཾ གཱཐམཱཧ –
‘‘ཧརཾ ¶ ¶ ཨནྣཉྩ པཱནཉྩ, ཝཏྠསེནཱསནཱནི ཙ;
ཨཉྙདཏྠུཧརཱ སནྟཱ, ཏེ ཝེ རཱཛ པིཡཱ ཧོནྟི;
ཀཾ ཏེན ཏྭཱབྷིཔསྶསཱི’’ཏི. (ཛཱ. ༡.༤.༢༠༠);
ཨཐསྶ མཧཱསཏྟོ ‘‘མཧཱརཱཛ, ཨཡཾ པཉྷོ དྷམྨིཀསམཎབྲཱཧྨཎེ སནྡྷཱཡ ཝུཏྟོ. སདྡྷཱནི ཧི ཀུལཱནི ཨིདྷལོཀཔརལོཀཾ སདྡཧིཏྭཱ དེནྟི ཙེཝ དཱཏུཀཱམཱནི ཙ ཧོནྟི, ཏཱནི ཏཐཱརཱུཔེ སམཎབྲཱཧྨཎེ ཡཱཙནྟེཔི ལདྡྷཾ ཧརནྟེ བྷུཉྫནྟེཔི དིསྭཱ ‘ཨམྷེཡེཝ ཡཱཙནྟི, ཨམྷཱཀཾཡེཝ སནྟཀཱནི ཨནྣཔཱནཱདཱིནི པརིབྷུཉྫནྟཱི’ཏི ཏེསུ ཨཏིརེཀཏརཾ པེམཾ ཀརོནྟི. ཨེཝཾ ཁོ, མཧཱརཱཛ, ཨཉྙདཏྠུཧརཱ སནྟཱ ཨེཀཾསེན ཡཱཙནྟཱ ཙེཝ ལདྡྷཾ ཧརནྟཱ ཙ སམཱནཱ པིཡཱ ཧོནྟཱི’’ཏི ཀཐེསི. ཨིམསྨིཾ པན པཉྷེ ཀཐིཏེ དེཝཏཱ ཏཐེཝ པཱུཛེཏྭཱ སཱདྷུཀཱརཾ དཏྭཱ སཏྟརཏནཔཱུརཾ རཏནཙངྐོཊཀཾ ‘‘གཎྷ, མཧཱཔཎྜིཏཱ’’ཏི མཧཱསཏྟསྶ པཱདམཱུལེ ཁིཔི. རཱཛཱཔིསྶ ཨཏིརེཀཏརཾ པཱུཛཾ ཀརོནྟོ ཨཏིཝིཡ པསཱིདིཏྭཱ སེནཱཔཏིཊྛཱནཾ ཨདཱསི. ཏཏོ པཊྛཱཡ མཧཱསཏྟསྶ ཡསོ མཧཱ ཨཧོསི.
དེཝཏཱཔཉྷོ ནིཊྛིཏོ.
པཉྩཔཎྜིཏཔཉྷོ
པུན ཏེ ཙཏྟཱརོ པཎྜིཏཱ ‘‘ཨམྦྷོ, གཧཔཏིཔུཏྟོ ཨིདཱནི མཧནྟཏརོ ཛཱཏོ, ཀིཾ ཀརོམཱ’’ཏི མནྟཡིཾསུ. ཨཐ ནེ སེནཀོ ཨཱཧ – ‘‘ཧོཏུ དིཊྛོ མེ ཨུཔཱཡོ, མཡཾ གཧཔཏིཔུཏྟཾ ཨུཔསངྐམིཏྭཱ ‘རཧསྶཾ ནཱམ ཀསྶ ཀཐེཏུཾ ཝཊྚཏཱི’ཏི པུཙྪིསྶཱམ, སོ ‘ན ཀསྶཙི ཀཐེཏབྦ’ནྟི ཝཀྑཏི. ཨཐ ནཾ ‘གཧཔཏིཔུཏྟོ ཏེ, དེཝ, པཙྩཏྠིཀོ ཛཱཏོ’ཏི པརིབྷིནྡིསྶཱམཱ’’ཏི. ཏེ ཙཏྟཱརོཔི པཎྜིཏཱ ཏསྶ གྷརཾ གནྟྭཱ པཊིསནྠཱརཾ ཀཏྭཱ ‘‘པཎྜིཏ, པཉྷཾ པུཙྪིཏུཀཱམམྷཱ’’ཏི ཝཏྭཱ ‘‘པུཙྪཐཱ’’ཏི ཝུཏྟེ སེནཀོ པུཙྪི ‘‘པཎྜིཏ, པུརིསེན ནཱམ ཀཏྠ པཏིཊྛཱཏབྦ’’ནྟི? ‘‘སཙྩེ པཏིཊྛཱཏབྦ’’ནྟི. ‘‘སཙྩེ པཏིཊྛིཏེན ¶ ཀིཾ ཨུཔྤཱདེཏབྦ’’ནྟི? ‘‘དྷནཾ ཨུཔྤཱདེཏབྦ’’ནྟི. ‘‘དྷནཾ ཨུཔྤཱདེཏྭཱ ཀིཾ ཀཱཏབྦ’’ནྟི? ‘‘མནྟོ གཧེཏབྦོ’’ཏི. ‘‘མནྟཾ གཧེཏྭཱ ཀིཾ ཀཱཏབྦ’’ནྟི? ‘‘ཨཏྟནོ རཧསྶཾ པརསྶ ན ཀཐེཏབྦ’’ནྟི. ཏེ ‘‘སཱདྷུ པཎྜིཏཱ’’ཏི ཝཏྭཱ ཏུཊྛམཱནསཱ ཧུཏྭཱ ‘‘ཨིདཱནི གཧཔཏིཔུཏྟསྶ པིཊྛིཾ པསྶིསྶཱམཱ’’ཏི རཉྙོ སནྟིཀཾ གནྟྭཱ ‘‘མཧཱརཱཛ, གཧཔཏིཔུཏྟོ ¶ ཏེ པཙྩཏྠིཀོ ཛཱཏོ’’ཏི ཝདིཾསུ. ‘‘ནཱཧཾ ཏུམྷཱཀཾ ཝཙནཾ སདྡཧཱམི, ན སོ མཡ྄ཧཾ པཙྩཏྠིཀོ བྷཝིསྶཏཱི’’ཏི ¶ . སཙྩཾ, མཧཱརཱཛ, སདྡཧཐ, ཨསདྡཧནྟོ པན ཏམེཝ པུཙྪཐ ‘‘པཎྜིཏ, ཨཏྟནོ རཧསྶཾ ནཱམ ཀསྶ ཀཐེཏབྦ’’ནྟི? སཙེ པཙྩཏྠིཀོ ན བྷཝིསྶཏི, ‘‘ཨསུཀསྶ ནཱམ ཀཐེཏབྦ’’ནྟི ཝཀྑཏི. སཙེ པཙྩཏྠིཀོ བྷཝིསྶཏི, ‘‘ཀསྶཙི ན ཀཐེཏབྦཾ, མནོརཐེ པརིཔུཎྞེ ཀཐེཏབྦ’’ནྟི ཝཀྑཏི. ཏདཱ ཨམྷཱཀཾ ཝཙནཾ སདྡཧིཏྭཱ ནིཀྐངྑཱ བྷཝེཡྻཱཐཱཏི. སོ ‘‘སཱདྷཱུ’’ཏི སམྤཊིཙྪིཏྭཱ ཨེཀདིཝསཾ སབྦེསུ སམཱགནྟྭཱ ནིསིནྣེསུ ཝཱིསཏིནིཔཱཏེ པཉྩཔཎྜིཏཔཉྷེ པཋམཾ གཱཐམཱཧ –
‘‘པཉྩ པཎྜིཏཱ སམཱགཏཱཏྠ, པཉྷཱ མེ པཊིབྷཱཏི ཏཾ སུཎཱཐ;
ནིནྡིཡམཏྠཾ པསཾསིཡཾ ཝཱ, ཀསྶེཝཱཝིཀརེཡྻ གུཡ྄ཧམཏྠ’’ནྟི. (ཛཱ. ༡.༡༥.༣༡༥);
ཨེཝཾ ཝུཏྟེ སེནཀོ ‘‘རཱཛཱནམྤི ཨམྷཱཀཾཡེཝ ཨབྦྷནྟརེ པཀྑིཔིསྶཱམཱི’’ཏི ཙིནྟེཏྭཱ ཨིམཾ གཱཐམཱཧ –
‘‘ཏྭཾ ཨཱཝིཀརོཧི བྷཱུམིཔཱལ, བྷཏྟཱ བྷཱརསཧོ ཏུཝཾ ཝདེཏཾ;
ཏཝ ཚནྡརུཙཱིནི སམྨསིཏྭཱ, ཨཐ ཝཀྑནྟི ཛནིནྡ པཉྩ དྷཱིརཱ’’ཏི. (ཛཱ. ༡.༡༥.༣༡༦);
ཏཏྠ བྷཏྟཱཏི ཏྭཾ ཨམྷཱཀཾ སཱམིཀོ ཙེཝ ཨུཔྤནྣསྶ ཙ བྷཱརསྶ སཧོ, པཋམཾ ཏཱཝ ཏྭམེཝ ཨེཏཾ ཝདེཧི. ཏཝ ཚནྡརུཙཱིནཱིཏི པཙྪཱ ཏཝ ཚནྡཉྩེཝ རུཙྩནཀཱརཎཱནི ཙ སམྨསིཏྭཱ ཨིམེ པཉྩ པཎྜིཏཱ ཝཀྑནྟི.
ཨཐ རཱཛཱ ཨཏྟནོ ཀིལེསཝསིཀཏཱཡ ཨིམཾ གཱཐམཱཧ –
‘‘ཡཱ སཱིལཝཏཱི ཨནཉྙཐེཡྻཱ, བྷཏྟུཙྪནྡཝསཱནུགཱ པིཡཱ མནཱཔཱ;
ནིནྡིཡམཏྠཾ ¶ པསཾསིཡཾ ཝཱ, བྷརིཡཱཡཱཝིཀརེཡྻ གུཡ྄ཧམཏྠ’’ནྟི. (ཛཱ. ༡.༡༥.༣༡༧);
ཏཏྠ ཨནཉྙཐེཡྻཱཏི ཀིལེསཝསེན ཨཉྙེན ན ཐེནིཏབྦཱ.
ཏཏོ ¶ ¶ སེནཀོ ‘‘ཨིདཱནི རཱཛཱནཾ ཨམྷཱཀཾ ཨབྦྷནྟརེ པཀྑིཔིམྷཱ’’ཏི ཏུསྶིཏྭཱ སཡཾཀཏཀཱརཎམེཝ དཱིཔེནྟོ ཨིམཾ གཱཐམཱཧ –
‘‘ཡོ ཀིཙྪགཏསྶ ཨཱཏུརསྶ, སརཎཾ ཧོཏི གཏཱི པརཱཡཎཉྩ;
ནིནྡིཡམཏྠཾ པསཾསིཡཾ ཝཱ, སཁིནོཝཱཝིཀརེཡྻ གུཡ྄ཧམཏྠ’’ནྟི. (ཛཱ. ༡.༡༥.༣༡༨);
ཨཐ རཱཛཱ པུཀྐུསཾ པུཙྪི ‘‘ཀཐཾ, པུཀྐུས, པསྶསི, ནིནྡིཡཾ ཝཱ པསཾསིཡཾ ཝཱ རཧསྶཾ ཀསྶ ཀཐེཏབྦ’’ནྟི? སོ ཀཐེནྟོ ཨིམཾ གཱཐམཱཧ –
‘‘ཛེཊྛོ ཨཐ མཛ྄ཛྷིམོ ཀནིཊྛོ, ཡོ ཙེ སཱིལསམཱཧིཏོ ཋིཏཏྟོ;
ནིནྡིཡམཏྠཾ པསཾསིཡཾ ཝཱ, བྷཱཏུཝཱཝིཀརེཡྻ གུཡ྄ཧམཏྠ’’ནྟི. (ཛཱ. ༡.༡༥.༣༡༩);
ཏཏྠ ཋིཏཏྟོཏི ཋིཏསབྷཱཝོ ནིབྦིསེཝནོ.
ཏཏོ རཱཛཱ ཀཱམིནྡཾ པུཙྪི ‘‘ཀཐཾ ཀཱམིནྡ པསྶསི, རཧསྶཾ ཀསྶ ཀཐེཏབྦ’’ནྟི? སོ ཀཐེནྟོ ཨིམཾ གཱཐམཱཧ –
‘‘ཡོ ཝེ པིཏུཧདཡསྶ པདྡྷགཱུ, ཨནུཛཱཏོ པིཏརཾ ཨནོམཔཉྙོ;
ནིནྡིཡམཏྠཾ པསཾསིཡཾ ཝཱ, པུཏྟསྶཱཝིཀརེཡྻ གུཡ྄ཧམཏྠ’’ནྟི. (ཛཱ. ༡.༡༥.༣༢༠);
ཏཏྠ པདྡྷགཱུཏི པེསནཀཱརཀོ ཡོ པིཏུསྶ པེསནཾ ཀརོཏི, པིཏུ ཙིཏྟསྶ ཝསེ ཝཏྟཏི, ཨོཝཱདཀྑམོ ཧོཏཱིཏི ཨཏྠོ. ཨནུཛཱཏོཏི ཏཡོ པུཏྟཱ ཨཏིཛཱཏོ ཙ ཨནུཛཱཏོ ཙ ཨཝཛཱཏོ ཙཱཏི. ཨནུཔྤནྣཾ ཡསཾ ཨུཔྤཱདེནྟོ ཨཏིཛཱཏོ, ཀུལབྷཱརོ ཨཝཛཱཏོ, ཀུལཔཝེཎིརཀྑཀོ པན ཨནུཛཱཏོ. ཏཾ སནྡྷཱཡ ཨེཝམཱཧ.
ཏཏོ ¶ རཱཛཱ དེཝིནྡཾ པུཙྪི – ‘‘ཀཐཾ དེཝིནྡ, པསྶསི, རཧསྶཾ ཀསྶ ཀཐེཏབྦ’’ནྟི? སོ ཨཏྟནོ ཀཏཀཱརཎམེཝ ཀཐེནྟོ ཨིམཾ གཱཐམཱཧ –
‘‘མཱཏཱ ¶ དྭིཔདཱཛནིནྡསེཊྛ, ཡཱ ནཾ པོསེཏི ཚནྡསཱ པིཡེན;
ནིནྡིཡམཏྠཾ པསཾསིཡཾ ཝཱ, མཱཏུཡཱཝིཀརེཡྻ གུཡ྄ཧམཏྠ’’ནྟི. (ཛཱ. ༡.༡༥.༣༢༡);
ཏཏྠ ¶ དྭིཔདཱཛནིནྡསེཊྛཱཏི དྭིཔདཱནཾ སེཊྛ, ཛནིནྡ. ཚནྡསཱ པིཡེནཱཏི ཚནྡེན ཙེཝ པེམེན ཙ.
ཨེཝཾ ཏེ པུཙྪིཏྭཱ རཱཛཱ པཎྜིཏཾ པུཙྪི ‘‘ཀཐཾ པསྶསི, པཎྜིཏ, རཧསྶཾ ཀསྶ ཀཐེཏབྦ’’ནྟི. ‘‘མཧཱརཱཛ, ཡཱཝ ཨཏྟནོ ཨིཙྪིཏཾ ན ནིཔྥཛྫཏི, ཏཱཝ པཎྜིཏོ ཨདྷིཝཱསེཡྻ, ཀསྶཙི ན ཀཐེཡྻཱ’’ཏི སོ ཨིམཾ གཱཐམཱཧ –
‘‘གུཡ྄ཧསྶ ཧི གུཡ྄ཧམེཝ སཱདྷུ, ན ཧི གུཡ྄ཧསྶ པསཏྠམཱཝིཀམྨཾ;
ཨནིཔྥནྣཏཱ སཧེཡྻ དྷཱིརོ, ནིཔྥནྣོཝ ཡཐཱསུཁཾ བྷཎེཡྻཱ’’ཏི. (ཛཱ. ༡.༡༥.༣༢༢);
ཏཏྠ ཨནིཔྥནྣཏཱཏི མཧཱརཱཛ, ཡཱཝ ཨཏྟནོ ཨིཙྪིཏཾ ན ནིཔྥཛྫཏི, ཏཱཝ པཎྜིཏོ ཨདྷིཝཱསེཡྻ, ན ཀསྶཙི ཀཐེཡྻཱཏི.
པཎྜིཏེན པན ཨེཝཾ ཝུཏྟེ རཱཛཱ ཨནཏྟམནོ ཨཧོསི. སེནཀོ རཱཛཱནཾ ཨོལོཀེསི, རཱཛཱཔི སེནཀམུཁཾ ཨོལོཀེསི. བོདྷིསཏྟོ ཏེསཾ ཀིརིཡཾ དིསྭཱཝ ཛཱནི ‘‘ཨིམེ ཙཏྟཱརོ ཛནཱ པཋམམེཝ མཾ རཉྙོ ཨནྟརེ པརིབྷིནྡིཾསུ, ཝཱིམཾསནཝསེན པཉྷོ པུཙྪིཏོ བྷཝིསྶཏཱི’’ཏི. ཏེསཾ པན ཀཐེནྟཱནཉྙེཝ སཱུརིཡོ ཨཏྠངྒཏོ, དཱིཔཱ ཛལིཏཱ. པཎྜིཏོ ‘‘རཱཛཀམྨཱནི ནཱམ བྷཱརིཡཱནི, ན པཉྙཱཡཏི ‘ཀིཾ བྷཝིསྶཏཱི’ཏི, ཁིཔྤམེཝ གནྟུཾ ཝཊྚཏཱི’’ཏི ཨུཊྛཱཡཱསནཱ རཱཛཱནཾ ཝནྡིཏྭཱ ནིཀྑམིཏྭཱ ཙིནྟེསི ‘‘ཨིམེསུ ཨེཀོ ‘སཧཱཡཀསྶ ཀཐེཏུཾ ཝཊྚཏཱི’ཏི ཨཱཧ ¶ , ཨེཀོ ‘བྷཱཏུསྶ, ཨེཀོ པུཏྟསྶ, ཨེཀོ མཱཏུ ཀཐེཏུཾ ཝཊྚཏཱི’ཏི ཨཱཧ. ཨིམེཧི ཨེཏཾ ཀཏམེཝ བྷཝིསྶཏི, དིཊྛམེཝ ཀཐིཏནྟི མཉྙཱམི, ཧོཏུ ཨཛྫེཝ ཨེཏཾ ཛཱནིསྶཱམཱི’’ཏི. ཏེ པན ཙཏྟཱརོཔི ཨཉྙེསུ དིཝསེསུ རཱཛཀུལཱ ནིཀྑམིཏྭཱ རཱཛནིཝེསནདྭཱརེ ཨེཀསྶ བྷཏྟཨམྦཎསྶ པིཊྛེ ནིསཱིདིཏྭཱ ཀིཙྩཀརཎཱིཡཱནི མནྟེཏྭཱ གྷརཱནི གཙྪནྟི. ཏསྨཱ པཎྜིཏོ ‘‘ཨཧཾ ཨེཏེསཾ ཙཏུནྣཾ རཧསྶཾ ཨམྦཎསྶ ཧེཊྛཱ ནིཔཛྫིཏྭཱ ཛཱནིཏུཾ སཀྐུཎེཡྻ’’ནྟི ཙིནྟེཏྭཱ ཏཾ ཨམྦཎཾ ཨུཀྑིཔཱཔེཏྭཱ ཨཏྠརཎཾ ཨཏྠརཱཔེཏྭཱ ཨམྦཎསྶ ཧེཊྛཱ པཝིསིཏྭཱ པུརིསཱནཾ སཉྙཾ ཨདཱསི ‘‘ཏུམྷེ ¶ ཙཏཱུསུ པཎྜིཏེསུ མནྟེཏྭཱ གཏེསུ ཨཱགནྟྭཱ མཾ ཨཱནེཡྻཱཐཱ’’ཏི. ཏེ ‘‘སཱདྷཱུ’’ཏི སམྤཊིཙྪིཏྭཱ པཀྐམིཾསུ. སེནཀོཔི རཱཛཱནཾ ཨཱཧ – ‘‘མཧཱརཱཛ, ཨམྷཱཀཾ ཝཙནཾ ན སདྡཧཐ, ཨིདཱནི ¶ ཀིཾ ཀརིསྶཐཱ’’ཏི. སོ ཏསྶ ཝཙནཾ གཧེཏྭཱ ཨནིསཱམེཏྭཱཝ བྷཱིཏཏསིཏོ ཧུཏྭཱ ‘‘ཨིདཱནི ཀིཾ ཀརོམ, སེནཀ པཎྜིཏཱ’’ཏི པུཙྪི. ‘‘མཧཱརཱཛ, པཔཉྩཾ ཨཀཏྭཱ ཀཉྩི ཨཛཱནཱཔེཏྭཱ གཧཔཏིཔུཏྟཾ མཱརེཏུཾ ཝཊྚཏཱི’’ཏི. རཱཛཱ ‘‘སེནཀ, ཋཔེཏྭཱ ཏུམྷེ ཨཉྙོ མམ ཨཏྠཀཱམོ ནཱམ ནཏྠི, ཏུམྷེ ཨཏྟནོ སུཧདེ གཧེཏྭཱ དྭཱརནྟརེ ཋཏྭཱ གཧཔཏིཔུཏྟསྶ པཱཏོཝ ཨུཔཊྛཱནཾ ཨཱགཙྪནྟསྶ ཁགྒེན སཱིསཾ ཚིནྡཐཱ’’ཏི ཨཏྟནོ ཁགྒརཏནཾ ཨདཱསི. ཏེ ‘‘སཱདྷུ, དེཝ, མཱ བྷཱཡི, མཡཾ ཏཾ མཱརེསྶཱམཱ’’ཏི ཝཏྭཱ ནིཀྑམིཏྭཱ ‘‘དིཊྛཱ ནོ པཙྩཱམིཏྟསྶ པིཊྛཱི’’ཏི བྷཏྟཨམྦཎསྶ པིཊྛེ ནིསཱིདིཾསུ. ཏཏོ སེནཀོ ཨཱཧ ‘‘ཨམྦྷོ, ཀོ གཧཔཏིཔུཏྟཾ མཱརེསྶཏཱི’’ཏི. ཨིཏརེ ‘‘ཏུམྷེཡེཝ ཨཱཙརིཡ, མཱརེཐཱ’’ཏི ཏསྶེཝ བྷཱརཾ ཀརིཾསུ.
ཨཐ ནེ སེནཀོ པུཙྪི ‘‘ཏུམྷེ ‘རཧསྶཾ ནཱམ ཨསུཀསྶ ཨསུཀསྶ ཀཐེཏབྦ’ནྟི ཝདཐ, ཀིཾ ཝོ ཨེཏཾ ཀཏཾ, ཨུདཱཧུ དིཊྛཾ སུཏ’’ནྟི? ‘‘ཀཏཾ ཨེཏཾ, ཨཱཙརིཡཱ’’ཏི. ཏུམྷེ ‘‘རཧསྶཾ ནཱམ སཧཱཡཀསྶ ཀཐེཏབྦ’’ནྟི ཝདཐ, ‘‘ཀིཾ ཝོ ཨེཏཾ ཀཏཾ, ཨུདཱཧུ དིཊྛཾ སུཏ’’ནྟི? ‘‘ཀཏཾ ཨེཏཾ མཡཱ’’ཏི? ‘‘ཀཐེཐ, ཨཱཙརིཡཱ’’ཏི. ‘‘ཨིམསྨིཾ རཧསྶེ རཉྙཱ ཉཱཏེ ཛཱིཝིཏཾ མེ ནཏྠཱི’’ཏི. ‘‘མཱ བྷཱཡཐ ཨཱཙརིཡ, ཨིདྷ ཏུམྷཱཀཾ རཧསྶབྷེདཀོ ནཏྠི, ཀཐེཐཱ’’ཏི. སོ ནཁེན ཨམྦཎཾ ཀོཊྚེཏྭཱ ‘‘ཨཏྠི ནུ ཁོ ཨིམསྶ ཧེཊྛཱ གཧཔཏིཔུཏྟོ’’ཏི ཨཱཧ. ‘‘ཨཱཙརིཡ, གཧཔཏིཔུཏྟོ ཨཏྟནོ ཨིསྶརིཡེན ཨེཝརཱུཔཾ ཋཱནཾ ན པཝིསིསྶཏི, ཨིདཱནི ཡསེན མཏྟོ བྷཝིསྶཏི, ཀཐེཐ ¶ ¶ ཏུམྷེ’’ཏི. སེནཀོ ཏཱཝ ཨཏྟནོ རཧསྶཾ ཀཐེནྟོ ཨཱཧ – ‘‘ཏུམྷེ ཨིམསྨིཾ ནགརེ ཨསུཀཾ ནཱམ ཝེསིཾ ཛཱནཱཐཱ’’ཏི? ‘‘ཨཱམ, ཨཱཙརིཡཱ’’ཏི. ‘‘ཨིདཱནི སཱ པཉྙཱཡཏཱི’’ཏི. ‘‘ན པཉྙཱཡཏི, ཨཱཙརིཡཱ’’ཏི. ‘‘ཨཧཾ སཱལཝནུཡྻཱནེ ཏཱཡ སདྡྷིཾ པུརིསཀིཙྩཾ ཀཏྭཱ ཏསྶཱ པིལ༹ནྡྷནེསུ ལོབྷེན ཏཾ མཱརེཏྭཱ ཏསྶཱཡེཝ སཱཊཀེན བྷཎྜིཀཾ ཀཏྭཱ ཨཱཧརིཏྭཱ ཨམྷཱཀཾ གྷརེ ཨསུཀབྷཱུམིཀཱཡ ཨསུཀེ ནཱམ གབྦྷེ ནཱགདནྟཀེ ལགྒེསིཾ, ཝལ༹ཉྫེཏུཾ ༣ ཝིསཧཱམི, པུརཱཎབྷཱཝམསྶ ཨོལོཀེམི, ཨེཝརཱུཔཾ ཨཔརཱདྷཀམྨཾ ཀཏྭཱ མཡཱ ཨེཀསྶ སཧཱཡཀསྶ ཀཐིཏཾ, ན ཏེན ཀསྶཙི ཀཐིཏཔུབྦཾ, ཨིམིནཱ ཀཱརཎེན ‘སཧཱཡཀསྶ གུཡ྄ཧཾ ཀཐེཏབྦ’ནྟི མཡཱ ཀཐིཏ’’ནྟི. པཎྜིཏོ ཏསྶ རཧསྶཾ སཱདྷུཀཾ ཝཝཏྠཔེཏྭཱ སལླཀྑེསི.
པུཀྐུསོཔི ཨཏྟནོ རཧསྶཾ ཀཐེནྟོ ཨཱཧ – ‘‘མམ ཨཱུརུཡཱ ཀུཊྛཾ ཨཏྠི, ཀནིཊྛོ མེ པཱཏོཝ ཀཉྩི ཨཛཱནཱཔེཏྭཱ ཏཾ དྷོཝིཏྭཱ བྷེསཛྫེན མཀྑེཏྭཱ ཨུཔརི པིལོཏིཀཾ དཏྭཱ བནྡྷཏི. རཱཛཱ མཡི མུདུཙིཏྟོ ‘ཨེཧི པུཀྐུསཱ’ཏི མཾ པཀྐོསིཏྭཱ ཡེབྷུཡྻེན མམ ཨཱུརུཡཱཡེཝ སཡཏི ¶ , སཙེ པན ཨེཏཾ རཱཛཱ ཛཱནེཡྻ, མཾ མཱརེཡྻ. ཏཾ མམ ཀནིཊྛཾ ཋཔེཏྭཱ ཨཉྙོ ཛཱནནྟོ ནཱམ ནཏྠི, ཏེན ཀཱརཎེན ‘རཧསྶཾ ནཱམ བྷཱཏུ ཀཐེཏབྦ’ནྟི མཡཱ ཝུཏྟ’’ནྟི. ཀཱམིནྡོཔི ཨཏྟནོ རཧསྶཾ ཀཐེནྟོ ཨཱཧ – ‘‘མཾ ཀཱལ༹པཀྑེ ཨུཔོསཐདིཝསེ ནརདེཝོ ནཱམ ཡཀྑོ གཎྷཱཏི, ཨཧཾ ཨུམྨཏྟཀསུནཁོ ཝིཡ ཝིརཝཱམི, སྭཱཧཾ ཏམཏྠཾ པུཏྟསྶ ཀཐེསིཾ. སོ མམ ཡཀྑེན གཧིཏབྷཱཝཾ ཉཏྭཱ མཾ ཨནྟོགེཧགབྦྷེ ནིཔཛྫཱཔེཏྭཱ དྭཱརཾ པིདཧིཏྭཱ ནིཀྑམིཏྭཱ མམ སདྡཾ པཊིཙྪཱདནཏྠཾ དྭཱརེ སམཛྫཾ ཀཱརེསི, ཨིམིནཱ ཀཱརཎེན ‘རཧསྶཾ ནཱམ པུཏྟསྶ ཀཐེཏབྦ’ནྟི མཡཱ ཝུཏྟ’’ནྟི. ཏཏོ ཏཡོཔི དེཝིནྡཾ པུཙྪིཾསུ. སོ ཨཏྟནོ རཧསྶཾ ཀཐེནྟོ ཨཱཧ – ‘‘མཡཱ མཎིཔཧཾསནཀམྨཾ ཀརོནྟེན རཉྙོ སནྟཀཾ སཀྐེན ཀུསརཉྙོ དིནྣཾ, སིརིཔཝེསནཾ མངྒལམཎིརཏནཾ ཐེནེཏྭཱ མཱཏུཡཱ དིནྣཾ. སཱ ཀཉྩི ཨཛཱནཱཔེཏྭཱ མམ རཱཛཀུལཾ པཝིསནཀཱལེ ཏཾ མཡ྄ཧཾ དེཏི, ཨཧཾ ཏེན མཎིནཱ སིརིཾ པཝེསེཏྭཱ རཱཛནིཝེསནཾ གཙྪཱམི. རཱཛཱ ཏུམྷེཧི སདྡྷིཾ ཨཀཐེཏྭཱ པཋམཏརཾ མཡཱ སདྡྷིཾ ཀཐེསི. དེཝསིཀཾ ཨཊྛ, སོལ༹ས, དྭཏྟིཾས, ཙཏུསཊྛི ཀཧཱཔཎེ མམ པརིབྦཡཏྠཱཡ དེཏི ¶ . སཙེ ཏསྶ མཎིརཏནསྶ ཚནྣབྷཱཝཾ རཱཛཱ ཛཱནེཡྻ, མཡ྄ཧཾ ཛཱིཝིཏཾ ནཏྠི, ཨིམིནཱ ཀཱརཎེན ‘རཧསྶཾ ནཱམ མཱཏུ ཀཐེཏབྦ’ནྟི མཡཱ ཝུཏྟ’’ནྟི.
མཧཱསཏྟོ སབྦེསམྤི གུཡ྄ཧཾ ཨཏྟནོ པཙྩཀྑཾ ཨཀཱསི ¶ . ཏེ པན ཨཏྟནོ ཨུདརཾ ཕཱལེཏྭཱ ཨནྟཾ བཱཧིརཾ ཀརོནྟཱ ཝིཡ རཧསྶཾ ཨཉྙམཉྙཾ ཀཐེཏྭཱ ‘‘ཏུམྷེ ཨཔྤམཏྟཱ པཱཏོཝ ཨཱགཙྪཐ, གཧཔཏིཔུཏྟཾ མཱརེསྶཱམཱ’’ཏི ཨུཊྛཱཡ པཀྐམིཾསུ. ཏེསཾ གཏཀཱལེ པཎྜིཏསྶ པུརིསཱ ཨཱགནྟྭཱ ཨམྦཎཾ ཨུཀྑིཔིཏྭཱ མཧཱསཏྟཾ ཨཱདཱཡ པཀྐམིཾསུ. སོ གྷརཾ གནྟྭཱ ནྷཏྭཱ ཨལངྐརིཏྭཱ སུབྷོཛནཾ བྷུཉྫིཏྭཱ ‘‘ཨཛྫ མེ བྷགིནཱི ཨུདུམྦརདེཝཱི རཱཛགེཧཏོ སཱསནཾ པེསེསྶཏཱི’’ཏི ཉཏྭཱ དྭཱརེ པཙྩཱཡིཀཾ པུརིསཾ ཋཔེསི ‘‘རཱཛགེཧཏོ ཨཱགཏཾ སཱིགྷཾ པཝེསེཏྭཱ མམ དསྶེཡྻཱསཱི’’ཏི. ཨེཝཉྩ པན ཝཏྭཱ སཡནཔིཊྛེ ནིཔཛྫི. ཏསྨིཾ ཁཎེ རཱཛཱཔི སཡནཔིཊྛེ ནིཔནྣོཝ པཎྜིཏསྶ གུཎཾ སརིཏྭཱ ‘‘མཧོསདྷཔཎྜིཏོ སཏྟཝསྶིཀཀཱལཏོ པཊྛཱཡ མཾ ཨུཔཊྛཧནྟོ ན ཀིཉྩི མཡ྄ཧཾ ཨནཏྠཾ ཨཀཱསི, དེཝཏཱཡ པུཙྪིཏཔཉྷེཔི པཎྜིཏེ ཨསཏི ཛཱིཝིཏཾ མེ ལདྡྷཾ ན སིཡཱ. ཝེརིཔཙྩཱམིཏྟཱནཾ ཝཙནཾ གཧེཏྭཱ ‘ཨསམདྷུརཾ པཎྜིཏཾ མཱརེཐཱ’ཏི ཁགྒཾ དེནྟེན ཨཡུཏྟཾ མཡཱ ཀཏཾ, སྭེ དཱནི ནཾ པསྶིཏུཾ ན ལབྷིསྶཱམཱི’’ཏི སོཀཾ ཨུཔྤཱདེསི. སརཱིརཏོ སེདཱ མུཙྩིཾསུ. སོ སོཀསམཔྤིཏོ ཙིཏྟསྶཱདཾ ན ལབྷི. ཨུདུམྦརདེཝཱིཔི ཏེན སདྡྷིཾ ཨེཀསཡནགཏཱ ཏཾ ཨཱཀཱརཾ དིསྭཱ ‘‘ཀིཾ ནུ ཁོ མཡ྄ཧཾ ཀོཙི ཨཔརཱདྷོ ཨཏྠི, ཨུདཱཧུ དེཝསྶ ཀིཉྩི སོཀཀཱརཎཾ ཨུཔྤནྣཾ, པུཙྪིསྶཱམི ཏཱཝ ན’’ནྟི ཨིམཾ གཱཐམཱཧ –
‘‘ཀིཾ ¶ ཏྭཾ ཝིམནོསི རཱཛསེཊྛ, དྭིཔདཛནིནྡ ཝཙནཾ སུཎོམ མེཏཾ;
ཀིཾ ཙིནྟཡམཱནོ དུམྨནོསི, ནཱུན དེཝ ཨཔརཱདྷོ ཨཏྠི མཡ྄ཧ’’ནྟི. (ཛཱ. ༡.༡༥.༣༢༣);
ཨཐ རཱཛཱ ཀཐེནྟོ གཱཐམཱཧ –
‘‘པཎྷེ ཝཛ྄ཛྷོ མཧོསདྷོཏི, ཨཱཎཏྟོ མེ ཝམཱཡ བྷཱུརིཔཉྙོ;
ཏཾ ཙིནྟཡམཱནོ དུམྨནོསྨི, ན ཧི དེཝཱི ཨཔརཱདྷོ ཨཏྠི ཏུཡ྄ཧ’’ནྟི. (ཛཱ. ༡.༡༥.༣༢༤);
ཏཏྠ ¶ ཨཱཎཏྟོཏི བྷདྡེ, ཙཏྟཱརོ པཎྜིཏཱ ‘‘མཧོསདྷོ མམ པཙྩཏྠིཀོ’’ཏི ཀཐཡིཾསུ. མཡཱ ཏཐཏོ ཨཝིཙིནིཏྭཱ ‘‘ཝདྷེཐ ན’’ནྟི བྷཱུརིཔཉྙོ ཝདྷཱཡ ཨཱཎཏྟོ. ཏཾ ཀཱརཎཾ ཙིནྟཡམཱནོ དུམྨནོསྨཱིཏི.
ཏསྶཱ ¶ ཏསྶ ཝཙནཾ སུཏྭཱཝ མཧཱསཏྟེ སིནེཧེན པབྦཏམཏྟོ སོཀོ ཨུཔྤཛྫི. ཏཏོ སཱ ཙིནྟེསི ‘‘ཨེཀེན ཨུཔཱཡེན རཱཛཱནཾ ཨསྶཱསེཏྭཱ རཉྙོ ནིདྡཾ ཨོཀྐམནཀཱལེ མམ ཀནིཊྛསྶ སཱསནཾ པཧིཎིསྶཱམཱི’’ཏི. ཨཐ སཱ ‘‘མཧཱརཱཛ, ཏཡཱཝེཏཾ ཀཏཾ གཧཔཏིཔུཏྟཾ མཧནྟེ ཨིསྶརིཡེ པཏིཊྛཱཔེནྟེན, ཏུམྷེཧི སོ སེནཱཔཏིཊྛཱནེ ཋཔིཏོ, ཨིདཱནི ཀིར སོ ཏུམྷཱཀཾཡེཝ པཙྩཏྠིཀོ ཛཱཏོ, ན ཁོ པན པཙྩཏྠིཀོ ཁུདྡཀོ ནཱམ ཨཏྠི, མཱརེཏབྦོཝ, ཏུམྷེ མཱ ཙིནྟཡིཏྠཱ’’ཏི རཱཛཱནཾ ཨསྶཱསེསི. སོ ཏནུབྷཱུཏསོཀོ ནིདྡཾ ཨོཀྐམི. དེཝཱི ཨུཊྛཱཡ གབྦྷཾ པཝིསིཏྭཱ ‘‘ཏཱཏ མཧོསདྷ, ཙཏྟཱརོ པཎྜིཏཱ ཏཾ པརིབྷིནྡིཾསུ, རཱཛཱ ཀུདྡྷོ སྭེ དྭཱརནྟརེ ཏཾ ཝདྷཱཡ ཨཱཎཱཔེསི, སྭེ རཱཛཀུལཾ མཱ ཨཱགཙྪེཡྻཱསི, ཨཱགཙྪནྟོ པན ནགརཾ ཧཏྠགཏཾ ཀཏྭཱ སམཏྠོ ཧུཏྭཱ ཨཱགཙྪེཡྻཱསཱི’’ཏི པཎྞཾ ལིཁིཏྭཱ མོདཀསྶ ཨནྟོ པཀྑིཔིཏྭཱ མོདཀཾ སུཏྟེན ཝེཋེཏྭཱ ནཝབྷཱཛནེ ཀཏྭཱ ཚཱདེཏྭཱ ལཉྪེཏྭཱ ཨཏྠཙཱརིཀཱཡ དཱསིཡཱ ཨདཱསི ‘‘ཨིམཾ མོདཀཾ གཧེཏྭཱ མམ ཀནིཊྛསྶ དེཧཱི’’ཏི. སཱ ཏཐཱ ཨཀཱསི. ‘‘རཏྟིཾ ཀཐཾ ནིཀྑནྟཱ’’ཏི ན ཙིནྟེཏབྦཾ. རཉྙཱ པཋམམེཝ དེཝིཡཱ ཝརོ དིནྣོ, ཏེན ན ནཾ ཀོཙི ནིཝཱརེསི. བོདྷིསཏྟོ པཎྞཱཀཱརཾ གཧེཏྭཱ ནཾ ཨུཡྻོཛེསི. སཱ པུན ཨཱགནྟྭཱ དིནྣབྷཱཝཾ ཨཱརོཙེསི. ཏསྨིཾ ཁཎེ དེཝཱི ཨཱགནྟྭཱ རཉྙཱ སདྡྷིཾ ནིཔཛྫི. མཧཱསཏྟོཔི མོདཀཾ བྷིནྡིཏྭཱ པཎྞཾ ཝཱཙེཏྭཱ ཏམཏྠཾ ཉཏྭཱ ཀཏྟབྦཀིཙྩཾ ཝིཙཱརེཏྭཱ སཡནེ ནིཔཛྫི.
ཨིཏརེཔི ¶ ཙཏྟཱརོ ཛནཱ པཱཏོཝ ཁགྒཾ གཧེཏྭཱ དྭཱརནྟརེ ཋཏྭཱ པཎྜིཏཾ ཨཔསྶནྟཱ དུམྨནཱ ཧུཏྭཱ རཉྙོ སནྟིཀཾ གནྟྭཱ ‘‘ཀིཾ པཎྜིཏཱ མཱརིཏོ ཝོ གཧཔཏིཔུཏྟོ’’ཏི ཝུཏྟེ ‘‘ན པསྶཱམ, དེཝཱ’’ཏི ཨཱཧཾསུ. མཧཱསཏྟོཔི ཨརུཎུགྒམནེཡེཝ ནགརཾ ཨཏྟནོ ཧཏྠགཏཾ ཀཏྭཱ ཏཏྠ ཏཏྠ ཨཱརཀྑཾ ཋཔེཏྭཱ མཧཱཛནཔརིཝུཏོ རཐཾ ཨཱརུཡ྄ཧ མཧནྟེན པརིཝཱརེན རཱཛདྭཱརཾ ཨགམཱསི. རཱཛཱ སཱིཧཔཉྫརཾ ཨུགྒྷཱཊེཏྭཱ བཧི ཨོལོཀེནྟོ ཨཊྛཱསི. ཨཐ མཧཱསཏྟོ རཐཱ ཨོཏརིཏྭཱ རཱཛཱནཾ ཝནྡིཏྭཱ ཨཊྛཱསི. རཱཛཱ ཏཾ དིསྭཱ ཙིནྟེསི ‘‘སཙེ ཨཡཾ མམ པཙྩཏྠིཀོ བྷཝེཡྻ ¶ ¶ , ན མཾ ཝནྡེཡྻཱ’’ཏི. ཨཐ ནཾ པཀྐོསཱཔེཏྭཱ རཱཛཱ ཨཱསནེ ནིསཱིདི. མཧཱསཏྟོཔི ཨེཀམནྟཾ ནིསཱིདི. ཙཏྟཱརོཔི པཎྜིཏཱ ཏཏྠེཝ ནིསཱིདིཾསུ. ཨཐ ནཾ རཱཛཱ ཀིཉྩི ཨཛཱནནྟོ ཝིཡ ‘‘ཏཱཏ, ཏྭཾ ཧིཡྻོ གནྟྭཱ ཨིདཱནི ཨཱགཙྪསི, ཀིཾ མཾ པརིཙྩཛསཱི’’ཏི ཝཏྭཱ ཨིམཾ གཱཐམཱཧ –
‘‘ཨབྷིདོསགཏོ དཱནི ཨེཧིསི, ཀིཾ སུཏྭཱ ཀིཾ སངྐཏེ མནོ ཏེ;
ཀོ ཏེ ཀིམཝོཙ བྷཱུརིཔཉྙ, ཨིངྒྷ ཝཙནཾ སུཎོམ བྲཱུཧི མེཏ’’ནྟི. (ཛཱ. ༡.༡༥.༣༢༥);
ཏཏྠ ཨབྷིདོསགཏོཏི ཧིཡྻོ པཋམཡཱམེ གཏོ ཨིདཱནི ཨཱགཏོ. ཀིཾ སངྐཏེཏི ཀིཾ ཨཱསངྐཏེ. ཀིམཝོཙཱཏི ཀིཾ རཉྙོ སནྟིཀཾ མཱ གམཱིཏི ཏཾ ཀོཙི ཨཝོཙ.
ཨཐ ནཾ མཧཱསཏྟོ ‘‘མཧཱརཱཛ, ཏཡཱ མེ ཙཏུནྣཾ པཎྜིཏཱནཾ ཝཙནཾ གཧེཏྭཱ ཝདྷོ ཨཱཎཏྟོ, ཏེནཱཧཾ ན ཨེམཱི’’ཏི ཙོདེནྟོ ཨིམཾ གཱཐམཱཧ –
‘‘པཎྷེ ཝཛ྄ཛྷོ མཧོསདྷོཏི, ཡདི ཏེ མནྟཡིཏཾ ཛནིནྡ དོསཾ;
བྷརིཡཱཡ རཧོགཏོ ཨསཾསི, གུཡ྄ཧཾ པཱཏུཀཏཾ སུཏཾ མམེཏ’’ནྟི. (ཛཱ. ༡.༡༥.༣༢༦);
ཏཏྠ ཡདི ཏེཏི ཡསྨཱ ཏཡཱ. མནྟཡིཏནྟི ཀཐིཏཾ. དོསནྟི ཨབྷིདོསཾ, རཏྟིབྷཱགེཏི ཨཏྠོ. ཀསྶ ཀཐིཏནྟི? བྷརིཡཱཡ. ཏྭཉྷི ཧིཡྻོ ཏསྶཱ ཨིམམཏྠཾ རཧོགཏོ ཨསཾསི. གུཡ྄ཧཾ པཱཏུཀཏནྟི ཏསྶཱ ཨེཝརཱུཔཾ ཨཏྟནོ རཧསྶཾ པཱཏུཀཏཾ. སུཏཾ མམེཏནྟི མཡཱ པནེཏཾ ཏསྨིཾ ཁཎེཡེཝ སུཏཾ.
རཱཛཱ ¶ ཏཾ སུཏྭཱ ‘‘ཨིམཱཡ ཏངྑཎཉྙེཝ སཱསནཾ པཧིཏཾ བྷཝིསྶཏཱི’’ཏི ཀུདྡྷོ དེཝིཾ ཨོལོཀེསི. ཏཾ ཉཏྭཱ མཧཱསཏྟོ ‘‘ཀིཾ, དེཝ, དེཝིཡཱ ཀུཛ྄ཛྷཐ, ཨཧཾ ཨཏཱིཏཱནཱགཏཔཙྩུཔྤནྣཾ སབྦཾ ཛཱནཱམི. དེཝ, ཏུམྷཱཀཾ ཏཱཝ རཧསྶཾ དེཝིཡཱ ཀཐིཏཾ ཧོཏུ, ཨཱཙརིཡསེནཀསྶ པུཀྐུསཱདཱིནཾ ཝཱ རཧསྶཾ མམ ཀེན ཀཐིཏཾ, ཨཧཾ ཨེཏེསམྤི རཧསྶཾ ཛཱནཱམིཡེཝཱ’’ཏི ¶ སེནཀསྶ ཏཱཝ རཧསྶཾ ཀཐེནྟོ ཨིམཾ གཱཐམཱཧ –
‘‘ཡཾ སཱལཝནསྨིཾ སེནཀོ, པཱཔཀམྨཾ ཨཀཱསི ཨསབྦྷིརཱུཔཾ;
སཁིནོཝ ¶ རཧོགཏོ ཨསཾསི, གུཡ྄ཧཾ པཱཏུཀཏཾ སུཏཾ མམེཏ’’ནྟི. (ཛཱ. ༡.༡༥.༣༢༧);
ཏཏྠ ཨསབྦྷིརཱུཔནྟི ཨསཱདྷུཛཱཏིཀཾ ལཱམཀཾ ཨཀུསལཀམྨཾ ཨཀཱསི. ཨིམསྨིཾཡེཝ ཧི ནགརེ ཨསུཀཾ ནཱམ ཝེསིཾ སཱལཝནུཡྻཱནེ པུརིསཀིཙྩཾ ཀཏྭཱ ཏཾ མཱརེཏྭཱ ཨལངྐཱརཾ གཧེཏྭཱ ཏསྶཱཡེཝ སཱཊཀེན བྷཎྜིཀཾ ཀཏྭཱ ཨཏྟནོ གྷརེ ཨསུཀཊྛཱནེ ནཱགདནྟཀེ ལགྒེཏྭཱ ཋཔེསི. སཁིནོཝཱཏི ཨཐ ནཾ, མཧཱརཱཛ, ཨེཀསྶ སཧཱཡཀསྶ རཧོགཏོ ཧུཏྭཱ ཨཀྑཱསི, ཏམྤི མཡཱ སུཏཾ. ནཱཧཾ དེཝསྶ པཙྩཏྠིཀོ, སེནཀོཡེཝ. ཡདི ཏེ པཙྩཏྠིཀེན ཀམྨཾ ཨཏྠི, སེནཀཾ གཎྷཱཔེཧཱིཏི.
རཱཛཱ སེནཀཾ ཨོལོཀེཏྭཱ ‘‘སཙྩཾ, སེནཀཱ’’ཏི པུཙྪིཏྭཱ ‘‘སཙྩཾ, དེཝཱ’’ཏི ཝུཏྟེ ཏསྶ བནྡྷནཱགཱརཔྤཝེསནཾ ཨཱཎཱཔེསི. པཎྜིཏོ པུཀྐུསསྶ རཧསྶཾ ཀཐེནྟོ ཨིམཾ གཱཐམཱཧ –
‘‘པུཀྐུསཔུརིསསྶ ཏེ ཛནིནྡ, ཨུཔྤནྣོ རོགོ ཨརཱཛཡུཏྟོ;
བྷཱཏུཙྩ རཧོགཏོ ཨསཾསི, གུཡ྄ཧཾ པཱཏུཀཏཾ སུཏཾ མམེཏ’’ནྟི. (ཛཱ. ༡.༡༥.༣༢༨);
ཏཏྠ ཨརཱཛཡུཏྟོཏི མཧཱརཱཛ, ཨེཏསྶ ཀུཊྛརོགོ ཨུཔྤནྣོ, སོ རཱཛཱནཾ པཏྟུཾ ཨཡུཏྟོ, ཚུཔནཱནུཙྪཝིཀོ ན ཧོཏི. ཏུམྷེ ཙ ‘‘པུཀྐུསསྶ ཨཱུརུ མུདུཀོ’’ཏི ཡེབྷུཡྻེན ཏསྶ ཨཱུརུམྷི ནིཔཛྫཐ. སོ པནེས ཝཎབནྡྷཔིལོཏིཀཱཡ ཕསྶོ, དེཝཱཏི.
རཱཛཱ ཏམྤི ཨོལོཀེཏྭཱ ‘‘སཙྩཾ པུཀྐུསཱ’’ཏི པུཙྪིཏྭཱ ‘‘སཙྩཾ དེཝཱ’’ཏི ཝུཏྟེ ཏམྤི བནྡྷནཱགཱརཾ པཝེསཱཔེསི. པཎྜིཏོ ཀཱམིནྡསྶཔི རཧསྶཾ ཀཐེནྟོ ཨིམཾ གཱཐམཱཧ –
‘‘ཨཱབཱདྷོཡཾ ¶ ¶ ཨསབྦྷིརཱུཔོ, ཀཱམིནྡོ ནརདེཝེན ཕུཊྛོ;
པུཏྟསྶ རཧོགཏོ ཨསཾསི, གུཡ྄ཧཾ པཱཏུཀཏཾ སུཏཾ མམེཏ’’ནྟི. (ཛཱ. ༡.༡༥.༣༢༩);
ཏཏྠ ཨསབྦྷིརཱུཔོཏི ཡེན སོ ཨཱབཱདྷེན ཕུཊྛོ ཨུམྨཏྟཀསུནཁོ ཝིཡ ཝིརཝཏི, སོ ནརདེཝཡཀྑཱབཱདྷོ ཨསབྦྷིཛཱཏིཀོ ལཱམཀོ, རཱཛཀུལཾ པཝིསིཏུཾ ན ཡུཏྟོ, མཧཱརཱཛཱཏི ཝདཏི.
རཱཛཱ ¶ ཏམྤི ཨོལོཀེཏྭཱ ‘‘སཙྩཾ ཀཱམིནྡཱ’’ཏི པུཙྪིཏྭཱ ‘‘སཙྩཾ དེཝཱ’’ཏི ཝུཏྟེ ཏམྤི བནྡྷནཱགཱརཾ པཝེསཱཔེསི. པཎྜིཏོ དེཝིནྡསྶཔི རཧསྶཾ ཀཐེནྟོ ཨིམཾ གཱཐམཱཧ –
‘‘ཨཊྛཝངྐཾ མཎིརཏནཾ ཨུལཱ༹རཾ, སཀྐོ ཏེ ཨདདཱ པིཏཱམཧསྶ;
དེཝིནྡསྶ གཏཾ ཏདཛྫ ཧཏྠཾ, མཱཏུཙྩ རཧོགཏོ ཨསཾསི;
གུཡ྄ཧཾ པཱཏུཀཏཾ སུཏཾ མམེཏ’’ནྟི. (ཛཱ. ༡.༡༥.༣༣༠);
ཏཏྠ པིཏཱམཧསྶཱཏི ཏཝ པིཏཱམཧསྶ ཀུསརཱཛསྶ. ཏདཛྫ ཧཏྠནྟི ཏཾ མངྒལསམྨཏཾ མཎིརཏནཾ ཨཛྫ དེཝིནྡསྶ ཧཏྠགཏཾ, མཧཱརཱཛཱཏི.
རཱཛཱ ཏམྤི ཨོལོཀེཏྭཱ ‘‘སཙྩཾ དེཝིནྡཱ’’ཏི པུཙྪིཏྭཱ ‘‘སཙྩཾ དེཝཱ’’ཏི ཝུཏྟེ ཏམྤི བནྡྷནཱགཱརཾ པཝེསཱཔེསི. ཨེཝཾ ‘‘བོདྷིསཏྟཾ ཝདྷིསྶཱམཱ’’ཏི ཙིནྟེཏྭཱ སབྦེཔི ཏེ བནྡྷནཱགཱརཾ པཝིཊྛཱ. བོདྷིསཏྟོ ‘‘མཧཱརཱཛ, ཨིམིནཱ ཀཱརཎེནཱཧཾ ‘ཨཏྟནོ གུཡ྄ཧཾ པརསྶ ན ཀཐེཏབྦ’ནྟི ཝདཱམི, ཝདནྟཱ པན མཧཱཝིནཱསཾ པཏྟཱ’’ཏི ཝཏྭཱ ཨུཏྟརི དྷམྨཾ དེསེནྟོ ཨིམཱ གཱཐཱ ཨབྷཱསི –
‘‘གུཡ྄ཧསྶ ཧི གུཡ྄ཧམེཝ སཱདྷུ, ན གུཡ྄ཧསྶ པསཏྠམཱཝིཀམྨཾ;
ཨནིཔྥནྣཏཱ སཧེཡྻ དྷཱིརོ, ནིཔྥནྣོཝ ཡཐཱསུཁཾ བྷཎེཡྻ.
‘‘ན ¶ གུཡ྄ཧམཏྠཾ ཝིཝརེཡྻ, རཀྑེཡྻ ནཾ ཡཐཱ ནིདྷིཾ;
ན ཧི པཱཏུཀཏོ སཱདྷུ, གུཡ྄ཧོ ཨཏྠོ པཛཱནཏཱ.
‘‘ཐིཡཱ ¶ གུཡ྄ཧཾ ན སཾསེཡྻ, ཨམིཏྟསྶ ཙ པཎྜིཏོ;
ཡོ ཙཱམིསེན སཾཧཱིརོ, ཧདཡཏྠེནོ ཙ ཡོ ནརོ.
‘‘གུཡ྄ཧམཏྠཾ ཨསམྦུདྡྷཾ, སམྦོདྷཡཏི ཡོ ནརོ;
མནྟབྷེདབྷཡཱ ཏསྶ, དཱསབྷཱུཏོ ཏིཏིཀྑཏི.
‘‘ཡཱཝནྟོ པུརིསསྶཏྠཾ, གུཡ྄ཧཾ ཛཱནནྟི མནྟིནཾ;
ཏཱཝནྟོ ཏསྶ ཨུབྦེགཱ, ཏསྨཱ གུཡ྄ཧཾ ན ཝིསྶཛེ.
‘‘ཝིཝིཙྩ བྷཱསེཡྻ དིཝཱ རཧསྶཾ, རཏྟིཾ གིརཾ ནཱཏིཝེལཾ པམུཉྩེ;
ཨུཔསྶུཏིཀཱ ¶ ཧི སུཎནྟི མནྟཾ, ཏསྨཱ མནྟོ ཁིཔྤམུཔེཏི བྷེད’’ནྟི. (ཛཱ. ༡.༡༥.༣༣༡-༣༣༦);
ཏཏྠ ཨམིཏྟསྶ ཙཱཏི ཨིཏྠིཡཱ ཙ པཙྩཏྠིཀསྶ ཙ ན ཀཐེཡྻ. སཾཧཱིརོཏི ཡོ ཙ ཡེན ཀེནཙི ཨཱམིསེན སཾཧཱིརཏི ཨུཔལཱཔཏི སངྒཧཾ གཙྪཏི, ཏསྶཔི ན སཾསེཡྻ. ཧདཡཏྠེནོཏི ཡོ ཙ ཨམིཏྟོ མིཏྟཔཏིརཱུཔཀོ མུཁེན ཨཉྙཾ ཀཐེཏི, ཧདཡེན ཨཉྙཾ ཙིནྟེཏི, ཏསྶཔི ན སཾསེཡྻ. ཨསམྦུདྡྷནྟི པརེཧི ཨཉྙཱཏཾ. ‘‘ཨསམྦོདྷ’’ནྟིཔི པཱཋོ, པརེསཾ བོདྷེཏུཾ ཨཡུཏྟནྟི ཨཏྠོ. ཏིཏིཀྑཏཱིཏི ཏསྶ ཨཀྐོསམྤི པརིབྷཱསམྤི པཧཱརམྤི དཱསོ ཝིཡ ཧུཏྭཱ ཨདྷིཝཱསེཏི. མནྟིནནྟི མནྟིཏཾ, མནྟཱིནཾ ཝཱ ཨནྟརེ ཡཱཝནྟོ ཛཱནནྟཱིཏི ཨཏྠོ. ཏཱཝནྟོཏི ཏེ གུཡ྄ཧཛཱནནཀེ པཊིཙྩ ཏཏྟཀཱ ཏསྶ ཨུབྦེགཱ སནྟཱསཱ ཨུཔྤཛྫནྟི. ན ཝིསྶཛེཏི ན ཝིསྶཛྫེཡྻ པརཾ ན ཛཱནཱཔེཡྻ. ཝིཝིཙྩཱཏི སཙེ དིཝཱ རཧསྶཾ མནྟེཏུཀཱམོ ཧོཏི, ཝིཝིཏྟཾ ཨོཀཱསཾ ཀཱརེཏྭཱ སུཔྤཊིཙྪནྣཊྛཱནེ མནྟེཡྻ. ནཱཏིཝེལནྟི རཏྟིཾ རཧསྶཾ ཀཐེནྟོ པན ཨཏིཝེལཾ མརིཡཱདཱཏིཀྐནྟཾ མཧཱསདྡཾ ཀརོནྟོ གིརཾ ནཔྤམུཉྩེཡྻ. ཨུཔསྶུཏིཀཱ ཧཱིཏི མནྟནཊྛཱནཾ ཨུཔགནྟྭཱ ཏིརོཀུཊྚཱདཱིསུ ཋཏྭཱ སོཏཱརོ. ཏསྨཱཏི མཧཱརཱཛ, ཏེན ཀཱརཎེན སོ མནྟོ ཁིཔྤམེཝ བྷེདམུཔཱགམཱིཏི.
རཱཛཱ ¶ མཧཱསཏྟསྶ ཀཐཾ སུཏྭཱ ‘‘ཨེཏེ སཡཾ རཱཛཝེརིནོ ཧུཏྭཱ པཎྜིཏཾ མམ ཝེརིཾ ཀརོནྟཱི’’ཏི ཀུཛ྄ཛྷིཏྭཱ ‘‘གཙྪཐ ནེ ནགརཱ ནིཀྑམཱཔེཏྭཱ སཱུལེསུ ཝཱ ཨུཏྟཱསེཐ, སཱིསཱནི ཝཱ ཏེསཾ ཚིནྡཐཱ’’ཏི ཨཱཎཱཔེསི. ཏེསུ པཙྪཱབཱཧཾ བནྡྷིཏྭཱ ཙཏུཀྐེ ཙཏུཀྐེ ཀསཱཧི པཧཱརསཧསྶཾ དཏྭཱ ནཱིཡམཱནེསུ པཎྜིཏོ ‘‘དེཝ, ཨིམེ ཏུམྷཱཀཾ པོརཱཎཀཱ ཨམཙྩཱ, ཁམཐ ནེསཾ ཨཔརཱདྷ’’ནྟི ¶ རཱཛཱནཾ ཁམཱཔེསི. རཱཛཱ ཏསྶ ཝཙནཾ སུཏྭཱ ‘‘སཱདྷཱུ’’ཏི ཏེ པཀྐོསཱཔེཏྭཱ ཏསྶེཝ དཱསེ ཀཏྭཱ ཨདཱསི. སོ པན ཏེ ཏཏྠེཝ བྷུཛིསྶེ ཨཀཱསི. རཱཛཱ ‘‘ཏེན ཧི མམ ཝིཛིཏེ མཱ ཝསནྟཱུ’’ཏི པབྦཱཛནཱིཡཀམྨཾ ཨཱཎཱཔེསི. པཎྜིཏོ ‘‘ཁམཐ, དེཝ, ཨེཏེསཾ ཨནྡྷབཱལཱནཾ དོས’’ནྟི ཁམཱཔེཏྭཱ ཏེསཾ ཋཱནནྟརཱནི པུན པཱཀཏིཀཱནི ཀཱརེསི. རཱཛཱ ‘‘པཙྩཱམིཏྟེསུཔི ཏཱཝསྶ ཨེཝརཱུཔཱ མེཏྟཱ བྷཝཏི, ཨཉྙེསུ ཛནེསུ ཀཐཾ ན བྷཝིསྶཏཱི’’ཏི པཎྜིཏསྶ ཨཏིཝིཡ པསནྣོ ཨཧོསི. ཏཏོ པཊྛཱཡ ཙཏྟཱརོ པཎྜིཏཱ ཨུདྡྷཏདཱཋཱ ཝིཡ སཔྤཱ ནིབྦིསཱ ཧུཏྭཱ ཀིཉྩི ཀཐེཏུཾ ནཱསཀྑིཾསུ.
པཉྩཔཎྜིཏཔཉྷོ ནིཊྛིཏོ.
ནིཊྛིཏཱ ཙ པརིབྷིནྡཀཐཱ.
ཡུདྡྷཔརཱཛཡཀཎྜཾ
ཏཏོ ¶ པཊྛཱཡ པཎྜིཏོཝ རཉྙོ ཨཏྠཉྩ དྷམྨཉྩ ཨནུསཱསཏི. སོ ཙིནྟེསི ‘‘རཉྙོ སེཏཚཏྟམཏྟམེཝ, རཛྫཾ པན ཨཧམེཝ ཝིཙཱརེམི ¶ , མཡཱ ཨཔྤམཏྟེན བྷཝིཏུཾ ཝཊྚཏཱི’’ཏི. སོ ནགརེ མཧཱཔཱཀཱརཾ ནཱམ ཀཱརེསི, ཏཐཱ ཨནུཔཱཀཱརཉྩ དྭཱརཊྚཱལཀེ ཨནྟརཊྚཱལཀེ ཨུདཀཔརིཁཾ ཀདྡམཔརིཁཾ སུཀྑཔརིཁནྟི ཏིསྶོ པརིཁཱཡོ ཀཱརེསི, ཨནྟོནགརེ ཛིཎྞགེཧཱནི པཊིསངྑརཱཔེསི, མཧཱཔོཀྑརཎིཡོ ཀཱརེཏྭཱ ཏཱསུ ཨུདཀནིདྷཱནཾ ཀཱརེསི, ནགརེ སབྦཀོཊྛཱགཱརཱནི དྷཉྙསྶ པཱུརཱཔེསི, ཧིམཝནྟཔྤདེསཏོ ཀུལུཔཀཏཱཔསེཧི ཀུདྲཱུསཀུམུདབཱིཛཱནི ཨཱཧརཱཔེསི, ཨུདཀནིདྡྷམནཱནི སོདྷཱཔེཏྭཱ ཏཏྠ རོཔཱཔེསི, བཧིནགརེཔི ཛིཎྞསཱལཱཔཊིསངྑརཎཀམྨཾ ཀཱརེསི. ཀིཾ ཀཱརཎཱ? ཨནཱགཏབྷཡཔཊིབཱཧནཏྠཾ. ཏཏོ ཏཏོ ཨཱགཏཝཱཎིཛཀེཔི ‘‘སམྨཱ, ཏུམྷེ ཀུཏོ ཨཱགཏཏྠཱ’’ཏི པུཙྪིཏྭཱ ‘‘ཨསུཀཊྛཱནཏོ’’ཏི ཝུཏྟེ ‘‘ཏུམྷཱཀཾ རཉྙཱ ཀིཾ པིཡ’’ནྟི པུཙྪིཏྭཱ ‘‘ཨསུཀཾ ནཱམཱ’’ཏི ཝུཏྟེ ཏེསཾ སམྨཱནཾ ཀཱརེཏྭཱ ཨུཡྻོཛེཏྭཱ ¶ ཨཏྟནོ ཨེཀསཏེ ཡོདྷེ པཀྐོསཱཔེཏྭཱ ‘‘སམྨཱ, མཡཱ དིནྣེ པཎྞཱཀཱརེ གཧེཏྭཱ ཨེཀསཏརཱཛདྷཱནིཡོ གནྟྭཱ ཨིམེ པཎྞཱཀཱརེ ཨཏྟནོ པིཡཀཱམཏཱཡ ཏེསཾ རཱཛཱུནཾ དཏྭཱ ཏེཡེཝ ཨུཔཊྛཧནྟཱ ཏེསཾ ཀིརིཡཾ ཝཱ མནྟཾ ཝཱ ཉཏྭཱ མཡ྄ཧཾ སཱསནཾ པེསེནྟཱ ཏཏྠེཝ ཝསཐ, ཨཧཾ ཝོ པུཏྟདཱརཾ པོསེསྶཱམཱི’’ཏི ཝཏྭཱ ཀེསཉྩི ཀུཎྜལེ, ཀེསཉྩི པཱདུཀཱཡོ, ཀེསཉྩི ཁགྒེ, ཀེསཉྩི སུཝཎྞམཱལཱཡོ ཨཀྑརཱནི ཚིནྡིཏྭཱ ‘‘ཡདཱ མམ ཀིཙྩཾ ཨཏྠི, ཏདཱ པཉྙཱཡནྟཱུ’’ཏི ཨདྷིཊྛཧིཏྭཱ ཏེསཾ ཧཏྠེ དཏྭཱ པེསེསི. ཏེ ཏཏྠ ཏཏྠ གནྟྭཱ ཏེསཾ ཏེསཾ རཱཛཱུནཾ པཎྞཱཀཱརཾ དཏྭཱ ‘‘ཀེནཏྠེནཱགཏཱ’’ཏི ཝུཏྟེ ‘‘ཏུམྷེཝ ཨུཔཊྛཱཏུཾ ཨཱགཏམྷཱ’’ཏི ཝཏྭཱ ‘‘ཀུཏོ ཨཱགཏཏྠཱ’’ཏི པུཊྛཱ ཨཱགཏཊྛཱནཾ ཨཝཏྭཱ ཨཉྙཱནི ཋཱནཱནི ཨཱཙིཀྑིཏྭཱ ‘‘ཏེན ཧི སཱདྷཱུ’’ཏི སམྤཊིཙྪིཏེ ཨུཔཊྛཧནྟཱ ཏེསཾ ཨབྦྷནྟརིཀཱ ཨཧེསུཾ.
ཏདཱ ཀཔིལརཊྛེ སངྑབལཀོ ནཱམ རཱཛཱ ཨཱཝུདྷཱནི སཛྫཱཔེསི, སེནཾ སངྐཌྜྷི. ཏསྶ སནྟིཀེ ཨུཔནིཀྑིཏྟཀཔུརིསོ པཎྜིཏསྶ སཱསནཾ པེསེསི ‘‘སཱམི, མཡཾ ཨིདྷ པཝཏྟིཾ ‘ཨིདཾ ནཱམ ཀརིསྶཏཱི’ཏི ན ཛཱནཱམ, ཨཱཝུདྷཱནི སཛྫཱཔེཏི, སེནཾ སངྐཌྜྷཏི, ཏུམྷེ པུརིསཝིསེསེ པེསེཏྭཱ ཨིདཾ པཝཏྟིཾ ཏཐཏོ ཛཱནཱཐཱ’’ཏི. ཨཐ མཧཱསཏྟོ སུཝཔོཏཀཾ ཨཱམནྟེཏྭཱ ‘‘སམྨ, ཀཔིལརཊྛེ སངྑབལཀོ ནཱམ རཱཛཱ ཨཱཝུདྷཱནི སཛྫཱཔེསི, ཏྭཾ ཏཏྠ གནྟྭཱ ‘ཨིམཾ ནཱམ ཀརོཏཱི’ཏི ཏཐཏོ ཉཏྭཱ སཀལཛམྦུདཱིཔཾ ¶ ཨཱཧིཎྜིཏྭཱ མཡ྄ཧཾ པཝཏྟིཾ ཨཱཧརཱཧཱི’’ཏི ཝཏྭཱ མདྷུལཱཛེ ཁཱདཱཔེཏྭཱ མདྷུཔཱནཱིཡཾ པཱཡེཏྭཱ སཏཔཱཀསཧསྶཔཱཀེཧི ཏེལེཧི པཀྑནྟརཾ མཀྑེཏྭཱ པཱཙཱིནསཱིཧཔཉྫརེ ¶ ཋཏྭཱ ཝིསྶཛྫེསི. སོཔི ཏཏྠ གནྟྭཱ ཏསྶ པུརིསསྶ སནྟིཀཱ ཏསྶ རཉྙོ པཝཏྟིཾ ཏཐཏོ ཉཏྭཱ སཀལཛམྦུདཱིཔཾ པརིགྒཎྷནྟོ ཀཔིལརཊྛེ ཨུཏྟརཔཉྩཱལནགརཾ པཱཔུཎི. ཏདཱ ཏཏྠ ཙཱུལ༹ནིབྲཧྨདཏྟོ ནཱམ རཱཛཱ རཛྫཾ ཀཱརེསི. ཏསྶ ཀེཝཊྚོ ནཱམ བྲཱཧྨཎོ ཨཏྠཉྩ དྷམྨཉྩ ཨནུསཱསཏི, པཎྜིཏོ བྱཏྟོ. སོ པཙྩཱུསཀཱལེ པབུཛ྄ཛྷིཏྭཱ དཱིཔཱལོཀེན ཨལངྐཏཔྤཊིཡཏྟཾ སིརིགབྦྷཾ ཨོལོཀེནྟོ ཨཏྟནོ མཧནྟཾ ཡསཾ དིསྭཱ ‘‘ཨཡཾ མམ ཡསོ, ཀསྶ སནྟཀོ’’ཏི ཙིནྟེཏྭཱ ‘‘ན ཨཉྙསྶ སནྟཀོ ཙཱུལ༹ནིབྲཧྨདཏྟསྶ ¶ , ཨེཝརཱུཔཾ པན ཡསདཱཡཀཾ རཱཛཱནཾ སཀལཛམྦུདཱིཔེ ཨགྒརཱཛཱནཾ ཀཱཏུཾ ཝཊྚཏི, ཨཧཉྩ ཨགྒཔུརོཧིཏོ བྷཝིསྶཱམཱི’’ཏི ཙིནྟེཏྭཱ པཱཏོཝ ནྷཏྭཱ བྷུཉྫིཏྭཱ ཨལངྐརིཏྭཱ རཉྙོ སནྟིཀཾ གནྟྭཱ ‘‘མཧཱརཱཛ, སུཁཾ སཡཐཱ’’ཏི སུཁསེཡྻཾ པུཙྪིཏྭཱ ‘‘ཨཱམ, པཎྜིཏཱ’’ཏི ཝུཏྟེ རཱཛཱནཾ ‘‘དེཝ, མནྟེཏབྦཾ ཨཏྠཱི’’ཏི ཨཱཧ. ‘‘ཝད, ཨཱཙརིཡཱ’’ཏི. ‘‘དེཝ, ཨནྟོནགརེ རཧོ ནཱམ ན སཀྐཱ ལདྡྷུཾ, ཨུཡྻཱནཾ གཙྪཱམཱ’’ཏི. ‘‘སཱདྷུ, ཨཱཙརིཡཱ’’ཏི རཱཛཱ ཏེན སདྡྷིཾ ཨུཡྻཱནཾ གནྟྭཱ བལཀཱཡཾ བཧི ཋཔེཏྭཱ ཨཱརཀྑཾ ཀཱརེཏྭཱ བྲཱཧྨཎེན སདྡྷིཾ ཨུཡྻཱནཾ པཝིསིཏྭཱ མངྒལསིལཱཔཊྚེ ནིསཱིདི.
ཏདཱ སུཝཔོཏཀོཔི ཏཾ ཀིརིཡཾ དིསྭཱ ‘‘བྷཝིཏབྦམེཏྠ ཀཱརཎེན, ཨཛྫ པཎྜིཏསྶ ཨཱཙིཀྑིཏབྦཡུཏྟཀཾ ཀིཉྩི སུཎིསྶཱམཱི’’ཏི ཨུཡྻཱནཾ པཝིསིཏྭཱ མངྒལསཱལརུཀྑསྶ པཏྟནྟརེ ནིལཱིཡིཏྭཱ ནིསཱིདི. རཱཛཱ ‘‘ཀཐེཐ, ཨཱཙརིཡཱ’’ཏི ཨཱཧ. ‘‘མཧཱརཱཛ, ཏཝ ཀཎྞེ ཨིཏོ ཀརོཧི, ཙཏུཀྐཎྞོཝ མནྟོ བྷཝིསྶཏི. སཙེ, མཧཱརཱཛ, མམ ཝཙནཾ ཀརེཡྻཱསི, སཀལཛམྦུདཱིཔེ ཏཾ ཨགྒརཱཛཱནཾ ཀརོམཱི’’ཏི. སོ མཧཱཏཎྷཏཱཡ ཏསྶ ཝཙནཾ སུཏྭཱ སོམནསྶཔྤཏྟོ ཧུཏྭཱ ‘‘ཀཐེཐ, ཨཱཙརིཡ, ཀརིསྶཱམི ཏེ ཝཙན’’ནྟི ཨཱཧ. ‘‘དེཝ, མཡཾ སེནཾ སངྐཌྜྷིཏྭཱ པཋམཾ ཁུདྡཀནགརཾ རུམྦྷིཏྭཱ གཎྷིསྶཱམ, ཨཧཉྷི ཙཱུལ༹དྭཱརེན ནགརཾ པཝིསིཏྭཱ རཱཛཱནཾ ཝཀྑཱམི – མཧཱརཱཛ, ཏཝ ཡུདྡྷེན ཀིཙྩཾ ནཏྠི, ཀེཝལཾ ཨམྷཱཀཾ རཉྙོ སནྟཀོ ཧོཧི, ཏཝ རཛྫཾ ཏཝེཝ བྷཝིསྶཏི, ཡུཛ྄ཛྷནྟོ པན ཨམྷཱཀཾ བལཝཱཧནསྶ མཧནྟཏཱཡ ¶ ཨེཀནྟེན པརཱཛིསྶསཱི’’ཏི. ‘‘སཙེ མེ ཝཙནཾ ཀརིསྶཏི, སངྒཎྷིསྶཱམ ནཾ. ནོ ཙེ, ཡུཛ྄ཛྷིཏྭཱ ཛཱིཝིཏཀྑཡཾ པཱཔེཏྭཱ དྭེ སེནཱ གཧེཏྭཱ ཨཉྙཾ ནགརཾ གཎྷིསྶཱམ, ཏཏོ ཨཉྙནྟི ཨེཏེནུཔཱཡེན སཀལཛམྦུདཱིཔེ རཛྫཾ གཧེཏྭཱ ‘ཛཡཔཱནཾ པིཝིསྶཱམཱ’ཏི ཝཏྭཱ ཨེཀསཏརཱཛཱནོ ཨམྷཱཀཾ ནགརཾ ཨཱནེཏྭཱ ཨུཡྻཱནེ ཨཱཔཱནམཎྜཔཾ ཀཱརེཏྭཱ ཏཏྠ ནིསིནྣེ ཝིསམིསྶཀཾ སུརཾ པཱཡེཏྭཱ སབྦེཔི ཏེ རཱཛཱནོ ཛཱིཝིཏཀྑཡཾ པཱཔེཏྭཱ ཨེཀསཏརཱཛདྷཱནཱིསུ རཛྫཾ ཨམྷཱཀཾ ཧཏྠགཏཾ ཀརིསྶཱམ. ཨེཝཾ ཏྭཾ སཀལཛམྦུདཱིཔེ ཨགྒརཱཛཱ བྷཝིསྶསཱི’’ཏི. སོཔི ‘‘སཱདྷུ, ཨཱཙརིཡ, ཨེཝཾ ཀརིསྶཱམཱི’’ཏི ཝདཏི. ‘‘མཧཱརཱཛ, ཙཏུཀྐཎྞོ མནྟོ ནཱམ, ཨཡཉྷི མནྟོ ¶ ན སཀྐཱ ཨཉྙེན ཛཱནིཏུཾ, ཏསྨཱ ¶ པཔཉྩཾ ཨཀཏྭཱ སཱིགྷཾ ནིཀྑམཐཱ’’ཏི. རཱཛཱ ཏུསྶིཏྭཱ ‘‘སཱདྷཱུ’’ཏི སམྤཊིཙྪི.
སུཝཔོཏཀོ ཏཾ སུཏྭཱ ཏེསཾ མནྟཔརིཡོསཱནེ སཱཁཱཡཾ ཨོལམྦཀཾ ཨོཏཱརེནྟོ ཝིཡ ཀེཝཊྚསྶ སཱིསེ ཚཀཎཔིཎྜཾ པཱཏེཏྭཱ ‘‘ཀིམེཏ’’ནྟི མུཁཾ ཝིཝརིཏྭཱ ཨུདྡྷཾ ཨོལོཀེནྟསྶ ཨཔརམྤི མུཁེ པཱཏེཏྭཱ ‘‘ཀིརི ཀིརཱི’’ཏི སདྡཾ ཝིརཝནྟོ སཱཁཏོ ཨུཔྤཏིཏྭཱ ‘‘ཀེཝཊྚ, ཏྭཾ ཙཏུཀྐཎྞམནྟོཏི མཉྙསི, ཨིདཱནེཝ ཚཀྐཎྞོ ཛཱཏོ, པུན ཨཊྛཀཎྞོ བྷཝིཏྭཱ ཨནེཀསཏཀཎྞོཔི བྷཝིསྶཏཱི’’ཏི ཝཏྭཱ ‘‘གཎྷཐ, གཎྷཐཱ’’ཏི ཝདནྟཱནཉྙེཝ ཝཱཏཝེགེན མིཐིལཾ གནྟྭཱ པཎྜིཏསྶ ནིཝེསནཾ པཱཝིསི. ཏསྶ པན ཨིདཾ ཝཏྟཾ – སཙེ ཀུཏོཙི ཨཱབྷཏསཱསནཾ པཎྜིཏསྶེཝ ཀཐེཏབྦཾ ཧོཏི, ཨཐསྶ ཨཾསཀཱུཊེ ཨོཏརཏི, སཙེ ཨམརཱདེཝིཡཱཔི སོཏུཾ ཝཊྚཏི, ཨུཙྪངྒེ ཨོཏརཏི, སཙེ མཧཱཛནེན སོཏབྦཾ, བྷཱུམིཡཾ ཨོཏརཏི. ཏདཱ སོ པཎྜིཏསྶ ཨཾསཀཱུཊེ ཨོཏརི. ཏཱཡ སཉྙཱཡ ‘‘རཧསྶེན བྷཝིཏབྦ’’ནྟི མཧཱཛནོ པཊིཀྐམི. པཎྜིཏོ ཏཾ གཧེཏྭཱ ཨུཔརིཔཱསཱདཏལཾ ཨབྷིརུཡ྄ཧ ‘‘ཀིཾ ཏེ, ཏཱཏ, དིཊྛཾ སུཏ’’ནྟི པུཙྪི. ཨཐསྶ སོ ‘‘ཨཧཾ, དེཝ, སཀལཛམྦུདཱིཔེ ཝིཙརནྟོ ཨཉྙསྶ རཉྙོ སནྟིཀེ ཀིཉྩི གུཡ྄ཧཾ ན པསྶཱམི, ཨུཏྟརཔཉྩཱལནགརེ པན ཙཱུལ༹ནིབྲཧྨདཏྟསྶ པུརོཧིཏོ ཀེཝཊྚོ ནཱམ བྲཱཧྨཎོ རཱཛཱནཾ ཨུཡྻཱནཾ ནེཏྭཱ ཙཏུཀྐཎྞམནྟཾ གཎྷི. ཨཐཱཧཾ སཱཁནྟརེ ནིསཱིདིཏྭཱ ཏེསཾ མནྟཾ སུཎིཏྭཱ མནྟཔརིཡོསཱནེ ཏསྶ སཱིསེ ཙ མུཁེ ཙ ཚཀཎཔིཎྜཾ པཱཏེཏྭཱ ཨཱགཏོམྷཱི’’ཏི ཝཏྭཱ སབྦཾ ཀཐེསི. ‘རཉྙཱ སམྤཊིཙྪིཏ’’ནྟི ¶ ཝུཏྟེ ‘‘སམྤཊིཙྪི, དེཝཱ’’ཏི ཨཱཧ.
ཨཐསྶ པཎྜིཏོ ཀཏྟབྦཡུཏྟཀཾ སཀྐཱརཾ ཀརིཏྭཱ ཏཾ མུདུཔཙྩཏྠརཎེ སུཝཎྞཔཉྫརེ སུཊྛུ སཡཱཔེཏྭཱ ‘‘ཀེཝཊྚོ མམ མཧོསདྷསྶ པཎྜིཏབྷཱཝཾ ན ཛཱནཱཏི མཉྙེ, ཨཧཾ ན དཱནིསྶ མནྟསྶ མཏྠཀཾ པཱཔུཎིཏུཾ དསྶཱམཱི’’ཏི ཙིནྟེཏྭཱ ནགརཏོ དུགྒཏཀུལཱནི ནཱིཧརཱཔེཏྭཱ བཧི ནིཝཱསཱཔེསི, རཊྛཛནཔདདྭཱརགཱམེསུ སམིདྡྷཱནི ཨིསྶརིཡཀུལཱནི ཨཱཧརིཏྭཱ ཨནྟོནགརེ ནིཝཱསཱཔེསི, བཧུཾ དྷནདྷཉྙཾ ཀཱརེསི. ཙཱུལ༹ནིབྲཧྨདཏྟོཔི ཀེཝཊྚསྶ ཝཙནཾ གཧེཏྭཱ སེནངྒཔརིཝུཏོ གནྟྭཱ ཨེཀཾ ཁུདྡཀནགརཾ པརིཀྑིཔི. ཀེཝཊྚོཔི ཝུཏྟནཡེནེཝ ཏཏྠ ¶ པཝིསིཏྭཱ ཏཾ རཱཛཱནཾ སཉྙཱཔེཏྭཱ ཨཏྟནོ སནྟཀམཀཱསི. དྭེ སེནཱ ཨེཀཏོ ཀཏྭཱ ཏཏོ ཨཉྙཾ ནགརཾ རུམྦྷཏི. ཨེཏེནུཔཱཡེན པཊིཔཱཊིཡཱ སབྦཱནི ཏཱནི ནགརཱནི གཎྷི. ཨེཝཾ ཙཱུལ༹ནིབྲཧྨདཏྟོ ཀེཝཊྚསྶ ཨོཝཱདེ ཋིཏོ, ཋཔེཏྭཱ ཝེདེཧརཱཛཱནཾ སེསརཱཛཱནོ སཀལཛམྦུདཱིཔེ ཨཏྟནོ སནྟཀེ ཨཀཱསི. བོདྷིསཏྟསྶ པན ཨུཔནིཀྑིཏྟཀཔུརིསཱ ‘‘ཙཱུལ༹ནིབྲཧྨདཏྟེན ཨེཏྟཀཱནི ནགརཱནི གཧིཏཱནི ¶ , ཨཔྤམཏྟོ ཧོཏཱུ’’ཏི ནིཙྩཾ སཱསནཾ པཧིཎིཾསུ. སོཔི ཏེསཾ ‘‘ཨཧཾ ཨིདྷ ཨཔྤམཏྟོ ཝསཱམི, ཏུམྷེཔི ཨནུཀྐཎྛནྟཱ ཨཔྤམཏྟོ ཧུཏྭཱ ཝསཐཱ’’ཏི པཊིཔེསེསི.
ཙཱུལ༹ནིབྲཧྨདཏྟོ སཏྟདིཝསསཏྟམཱསཱདྷིཀེཧི སཏྟསཾཝཙྪརེཧི ཝིདེཧརཛྫཾ ཝཛྫེཏྭཱ སེསཾ སཀལཛམྦུདཱིཔེ རཛྫཾ གཧེཏྭཱ ཀེཝཊྚཾ ཨཱཧ – ‘‘ཨཱཙརིཡ, མིཐིལཱཡཾ ཝིདེཧརཛྫཾ གཎྷཱམཱ’’ཏི. ‘‘མཧཱརཱཛ, མཧོསདྷཔཎྜིཏསྶ ཝསནནགརེ རཛྫཾ གཎྷིཏུཾ ན སཀྑིསྶཱམ. སོ ཧི ཨེཝཾ ཉཱཎསམྤནྣོ ཨེཝཾ ཨུཔཱཡཀུསལོ’’ཏི སོ ཝིཏྠཱརེཏྭཱ ཙནྡམཎྜལཾ ཨུཊྛཱཔེནྟོ ཝིཡ མཧོསདྷསྶ གུཎེ ཀཐེསི. ཨཡཉྷི སཡམྤི ཨུཔཱཡཀུསལོཝ, ཏསྨཱ ‘‘མིཐིལནགརཾ ནཱམ དེཝ ཨཔྤམཏྟཀཾ, སཀལཛམྦུདཱིཔེ རཛྫཾ ཨམྷཱཀཾ པཧོཏི, ཀིཾ ནོ ཨེཏེནཱ’’ཏི ཨུཔཱཡེནེཝ རཱཛཱནཾ སལླཀྑཱཔེསི. སེསརཱཛཱནོཔི ‘‘མཡཾ མིཐིལརཛྫཾ གཧེཏྭཱཝ ཛཡཔཱནཾ པིཝིསྶཱམཱ’’ཏི ཝདནྟི. ཀེཝཊྚོ ཏེཔི ནིཝཱརེཏྭཱ ‘‘ཝིདེཧརཛྫཾ གཧེཏྭཱ ཀིཾ ཀརིསྶཱམ, སོཔི རཱཛཱ ཨམྷཱཀཾ སནྟཀོཝ, ཏསྨཱ ནིཝཏྟཐཱ’’ཏི ཏེ ཨུཔཱཡེནེཝ བོདྷེསི. ཏེ ཏསྶ ཝཙནཾ སུཏྭཱ ནིཝཏྟིཾསུ. མཧཱསཏྟསྶ ཨུཔནིཀྑིཏྟཀཔུརིསཱ སཱསནཾ པེསཡིཾསུ ‘‘བྲཧྨདཏྟོ ཨེཀསཏརཱཛཔརིཝུཏོ མིཐིལཾ ཨཱགཙྪནྟོཝ ནིཝཏྟིཏྭཱ ཨཏྟནོ ནགརམེཝ ¶ གཏོ’’ཏི. སོཔི ཏེསཾ ‘‘ཨིཏོ པཊྛཱཡ ཏསྶ ཀིརིཡཾ ཛཱནནྟཱུ’’ཏི པཊིཔེསེསི. བྲཧྨདཏྟོཔི ཀེཝཊྚེན སདྡྷིཾ ‘‘ཨིདཱནི ཀིཾ ཀརིསྶཱམཱི’’ཏི མནྟེཏྭཱ ‘‘ཛཡཔཱནཾ པིཝིསྶཱམཱ’’ཏི ཝུཏྟེ ཨུཡྻཱནཾ ཨལངྐརིཏྭཱ ཙཱཊིསཏེསུ ཙཱཊིསཧསྶེསུ སུརཾ ཋཔེཐ, ནཱནཱཝིདྷཱནི ཙ མཙྪམཾསཱདཱིནི ཨུཔནེཐཱ’’ཏི སེཝཀེ ཨཱཎཱཔེསི. ཨུཔནིཀྑིཏྟཀཔུརིསཱ ཏཾ པཝཏྟིཾ པཎྜིཏསྶ ཨཱརོཙེསུཾ. ཏེ པན ‘‘ཝིསེན སུརཾ ཡོཛེཏྭཱ རཱཛཱནོ མཱརེཏུཀཱམོ’’ཏི ན ཛཱནིཾསུ. མཧཱསཏྟོ པན སུཝཔོཏཀསྶ སནྟིཀཱ སུཏཏྟཱ ¶ ཏཐཏོ ཛཱནིཏྭཱ ‘‘ནེསཾ སུརཱཔཱནདིཝསཾ ཏཐཏོ ཛཱནིཏྭཱ མམ པེསེཐཱ’’ཏི པཊིསཱསནཾ པེསེསི. ཏེ ཏཐཱ ཀརིཾསུ.
པཎྜིཏོ ‘‘མཱདིསེ དྷརམཱནེ ཨེཏྟཀཱནཾ རཱཛཱུནཾ མརཎཾ ཨཡུཏྟཾ, ཨཝསྶཡོ ནེསཾ བྷཝིསྶཱམཱི’’ཏི ཙིནྟེཏྭཱ སཧཛཱཏཾ ཡོདྷསཧསྶཾ པཀྐོསཱཔེཏྭཱ ‘‘སམྨཱ, ཙཱུལ༹ནིབྲཧྨདཏྟོ ཀིར ཨུཡྻཱནཾ ཨལངྐཱརཱཔེཏྭཱ ཨེཀསཏརཱཛཔརིཝུཏོ སུརཾ པཱཏུཀཱམོ, ཏུམྷེ ཏཏྠ གནྟྭཱ རཱཛཱུནཾ ཨཱསནེསུ པཉྙཏྟེསུ ཀིསྨིཉྩི ཨནིསིནྣེཡེཝ ‘ཙཱུལ༹ནིབྲཧྨདཏྟསྶ ཨནནྟརཾ མཧཱརཧཾ ཨཱསནཾ ཨམྷཱཀཾ རཉྙོཝ དེཐཱ’ཏི ཝདནྟཱ གཧེཏྭཱ ཏེསཾ པུརིསེཧི ‘ཏུམྷེ ཀསྶ པུརིསཱ’ཏི ཝུཏྟེ ‘ཝིདེཧརཱཛསྶཱ’ཏི ཝདེཡྻཱཐ. ཏེ ཏུམྷེཧི སདྡྷིཾ ‘མཡཾ སཏྟདིཝསསཏྟམཱསཱདྷིཀཱནི སཏྟཝསྶཱནི རཛྫཾ གཎྷནྟཱ ཨེཀདིཝསམྤི ཝིདེཧརཱཛཱནཾ ན པསྶཱམ, ཀིཾ རཱཛཱ ནཱམེས, གཙྪཐ པརིཡནྟེ ཨཱསནཾ གཎྷཐཱ’ཏི ཝདནྟཱ ཀལཧཾ ཀརིསྶནྟི. ཨཐ ཏུམྷེ ‘ཋཔེཏྭཱ བྲཧྨདཏྟཾ ཨཉྙོ ཨམྷཱཀཾ རཉྙོ ཨུཏྟརིཏརོ ཨིདྷ ནཏྠཱི’ཏི ཀལཧཾ ཝཌྜྷེཏྭཱ ཨམྷཱཀཾ རཉྙོ ཨཱསནམཏྟམྤི ཨལབྷནྟཱ ‘ན དཱནི ¶ ཝོ སུརཾ པཱཏུཾ མཙྪམཾསཾ ཁཱདིཏུཾ དསྶཱམཱ’ཏི ནདནྟཱ ཝགྒནྟཱ མཧཱགྷོསཾ ཀརོནྟཱ ཏེསཾ སནྟཱསཾ ཛནེནྟཱ མཧནྟེཧི ལེཌྜུདཎྜེཧི སབྦཙཱཊིཡོ བྷིནྡིཏྭཱ མཙྪམཾསཾ ཝིཔྤཀིརིཏྭཱ ཨཔརིབྷོགཾ ཀཏྭཱ ཛཝེན སེནཱཡ ཨནྟརཾ པཝིསིཏྭཱ དེཝནགརཾ པཝིཊྛཱ ཨསུརཱ ཝིཡ ཨུལློལ༹ཾ ཨུཊྛཱཔེཏྭཱ ‘མཡཾ མིཐིལནགརེ མཧོསདྷཔཎྜིཏསྶ པུརིསཱ, སཀྐོནྟཱ ཨམྷེ གཎྷཐཱ’ཏི ཏུམྷཱཀཾ ཨཱགཏབྷཱཝཾ ཛཱནཱཔེཏྭཱ ཨཱགཙྪཐཱ’’ཏི པེསེསི. ཏེ ‘‘སཱདྷཱུ’’ཏི ཏསྶ ཝཙནཾ སམྤཊིཙྪིཏྭཱ ¶ ཝནྡིཏྭཱ སནྣདྡྷཔཉྩཱཝུདྷཱ ནིཀྑམིཏྭཱ ཏཏྠ གནྟྭཱ ནནྡནཝནམིཝ ཨལངྐཏཨུཡྻཱནཾ པཝིསིཏྭཱ སམུསྶིཏསེཏཙྪཏྟེ ཨེཀསཏརཱཛཔལླངྐེ ཨཱདིཾ ཀཏྭཱ ཨལངྐཏཔྤཊིཡཏྟཾ སིརིཝིབྷཝཾ དིསྭཱ མཧཱསཏྟེན ཝུཏྟནིཡཱམེནེཝ སབྦཾ ཀཏྭཱ མཧཱཛནཾ སངྑོབྷེཏྭཱ མིཐིལཱབྷིམུཁཱ པཀྐམིཾསུ. རཱཛཔུརིསཱཔི ཏཾ པཝཏྟིཾ ཏེསཾ རཱཛཱུནཾ ཨཱརོཙེསུཾ. ཙཱུལ༹ནིབྲཧྨདཏྟོཔི ‘‘ཨེཝརཱུཔསྶ ནཱམ མེ ཝིསཡོགསྶ ཨནྟརཱཡོ ཀཏོ’’ཏི ཀུཛ྄ཛྷི. རཱཛཱནོཔི ‘‘ཨམྷཱཀཾ ཛཡཔཱནཾ པཱཏུཾ ནཱདཱསཱི’’ཏི ཀུཛ྄ཛྷིཾསུ. བལཀཱཡཱཔི ‘‘མཡཾ ཨམཱུལཀཾ སུརཾ པཱཏུཾ ན ལབྷིམྷཱ’’ཏི ཀུཛ྄ཛྷིཾསུ.
ཙཱུལ༹ནིབྲཧྨདཏྟོ ¶ ཏེ རཱཛཱནོ ཨཱམནྟེཏྭཱ ‘‘ཨེཐ, བྷོ, མིཐིལཾ གནྟྭཱ ཝིདེཧརཱཛསྶ ཁགྒེན སཱིསཾ ཚིནྡིཏྭཱ པཱདེཧི ཨཀྐམིཏྭཱ ནིསིནྣཱ ཛཡཔཱནཾ པིཝིསྶཱམ, སེནཾ གམནསཛྫཾ ཀརོཐཱ’’ཏི ཝཏྭཱ པུན རཧོགཏོ ཀེཝཊྚསྶཔི ཨེཏམཏྠཾ ཀཐེཏྭཱ ‘‘ཨམྷཱཀཾ ཨེཝརཱུཔསྶ མནྟསྶ ཨནྟརཱཡཀརཾ པཙྩཱམིཏྟཾ གཎྷིསྶཱམ, ཨེཀསཏརཱཛཱུནཾ ཨཊྛཱརསཨཀྑོབྷཎིསངྑཱཡ སེནཱཡ པརིཝུཏཱ གཙྪཱམ, ཨེཐ, ཨཱཙརིཡཱ’’ཏི ཨཱཧ. བྲཱཧྨཎོ ཨཏྟནོ པཎྜིཏབྷཱཝེན ཙིནྟེསི ‘‘མཧོསདྷཔཎྜིཏཾ ཛིནིཏུཾ ནཱམ ན སཀྐཱ, ཨམྷཱཀཾཡེཝ ལཛྫིཏབྦཾ བྷཝིསྶཏི, ནིཝཏྟཱཔེསྶཱམི ན’’ནྟི. ཨཐ ནཾ ཨེཝམཱཧ – ‘‘མཧཱརཱཛ, ན ཨེས ཝིདེཧརཱཛསྶ ཐཱམོ, མཧོསདྷཔཎྜིཏསྶ སཾཝིདྷཱནམེཏཾ, མཧཱནུབྷཱཝོ པནེས, ཏེན རཀྑིཏཱ མིཐིལཱ སཱིཧརཀྑིཏགུཧཱ ཝིཡ ན སཀྐཱ ཀེནཙི གཧེཏུཾ, ཀེཝལཾ ཨམྷཱཀཾ ལཛྫནཀཾ བྷཝིསྶཏི, ཨལཾ ཏཏྠ གམནེནཱ’’ཏི. རཱཛཱ པན ཁཏྟིཡམཱནེན ཨིསྶརིཡམདེན མཏྟོ ཧུཏྭཱ ‘‘ཀིཾ སོ ཀརིསྶཏཱི’’ཏི ཝཏྭཱ ཨེཀསཏརཱཛཔརིཝུཏོ ཨཊྛཱརསཨཀྑོབྷཎིསངྑཱཡ སེནཱཡ སདྡྷིཾ ནིཀྑམི. ཀེཝཊྚོཔི ཨཏྟནོ ཀཐཾ གཎྷཱཔེཏུཾ ཨསཀྐོནྟོ ‘‘རཉྙོ པཙྩནཱིཀཝུཏྟི ནཱམ ཨཡུཏྟཱ’’ཏི ཏེན སདྡྷིཾཡེཝ ནིཀྑམི. ཏེཔི ཡོདྷཱ ཨེཀརཏྟེནེཝ མིཐིལཾ པཏྭཱ ཨཏྟནཱ ཀཏཀིཙྩཾ པཎྜིཏསྶ ཀཐཡིཾསུ. པཋམཾ ཨུཔནིཀྑིཏྟཀཔུརིསཱཔིསྶ སཱསནཾ པཧིཎིཾསུ. ‘‘ཙཱུལ༹ནིབྲཧྨདཏྟོ ‘ཝིདེཧརཱཛཱནཾ གཎྷིསྶཱམཱི’ཏི ཨེཀསཏརཱཛཔརིཝུཏོ ཨཱགཙྪཏི, པཎྜིཏོ ཨཔྤམཏྟོ ཧོཏུ, ཨཛྫ ཨསུཀཊྛཱནཾ ནཱམ ཨཱགཏོ, ཨཛྫ ¶ ཨསུཀཊྛཱནཾ, ཨཛྫ ནགརཾ པཱཔུཎིསྶཏཱི’’ཏི པཎྜིཏསྶ ནིབདྡྷཾ པེསེནྟིཡེཝ. ཏཾ སུཏྭཱ མཧཱསཏྟོ ཨཔྤམཏྟོ ཨཧོསི. ཝིདེཧརཱཛཱ པན ‘‘བྲཧྨདཏྟོ ཀིར ཨིམཾ ནགརཾ གཧེཏུཾ ཨཱགཙྪཏཱི’’ཏི པརམྤརགྷོསེན ཨསྶོསི.
ཨཐ ¶ བྲཧྨདཏྟོ ཨགྒཔདོསེཡེཝ ཨུཀྐཱསཏསཧསྶེན དྷཱརིཡམཱནེན ཨཱགནྟྭཱ སཀལནགརཾ པརིཝཱརེསི. ཨཐ ནཾ ཧཏྠིཔཱཀཱརརཐཔཱཀཱརཱདཱིཧི པརིཀྑིཔཱཔེཏྭཱ ཏེསུ ཏེསུ ཋཱནེསུ བལགུམྦཾ ཋཔེསི. མནུསྶཱ ཨུནྣཱདེནྟཱ ཨཔྥོཊེནྟཱ སེལེ༹ནྟཱ ནཙྩནྟཱ གཛྫནྟཱ ཏཛྫེནྟཱ མཧཱགྷོསཾ ཀརོནྟཱ ཨཊྛཾསུ. དཱིཔོབྷཱསེན ཙེཝ ཨལངྐཱརོབྷཱསེན ཙ སཀལསཏྟཡོཛནིཀཱ མིཐིལཱ ཨེཀོབྷཱསཱ ཨཧོསི. ཧཏྠིཨསྶརཐཏཱུརིཡཱནཾ ¶ སདྡེན པཐཝིཡཱ བྷིཛྫནཀཱལོ ཝིཡ ཨཧོསི. ཙཏྟཱརོ པཎྜིཏཱ ཨུལློལ༹སདྡཾ སུཏྭཱ ཨཛཱནནྟཱ རཉྙོ སནྟིཀཾ གནྟྭཱ ‘‘མཧཱརཱཛ, ཨུལློལ༹སདྡོ ཛཱཏོ, ན ཁོ པན མཡཾ ཛཱནཱམ, ཀིཾ ནཱམེཏཾ, ཝཱིམཾསིཏུཾ ཝཊྚཏཱི’’ཏི ཨཱཧཾསུ. ཏཾ སུཏྭཱ རཱཛཱ ‘‘ཙཱུལ༹ནིབྲཧྨདཏྟོ ནུ ཁོ ཨཱགཏོ བྷཝེཡྻཱ’’ཏི སཱིཧཔཉྫརཾ ཝིཝརིཏྭཱ ཨོལོཀེནྟོ ཏསྶཱགམནབྷཱཝཾ ཉཏྭཱ བྷཱིཏཏསིཏོ ‘‘ནཏྠི ཨམྷཱཀཾ ཛཱིཝིཏཾ, སབྦེ ནོ ཛཱིཝིཏཀྑཡཾ པཱཔེསྶཏཱི’’ཏི ཏེཧི སདྡྷིཾ སལླཔནྟོ ནིསཱིདི. མཧཱསཏྟོ པན ཏསྶཱགཏབྷཱཝཾ ཉཏྭཱ སཱིཧོ ཝིཡ ཨཚམྦྷིཏོ སཀལནགརེ ཨཱརཀྑཾ སཾཝིདཧིཏྭཱ ‘‘རཱཛཱནཾ ཨསྶཱསེསྶཱམཱི’’ཏི རཱཛནིཝེསནཾ ཨབྷིརུཧིཏྭཱ ཨེཀམནྟཾ ཨཊྛཱསི. རཱཛཱ ཏཾ དིསྭཱཝ པཊིལདྡྷསྶཱསོ ཧུཏྭཱ ‘‘ཋཔེཏྭཱ མམ པུཏྟཾ མཧོསདྷཔཎྜིཏཾ ཨཉྙོ མཾ ཨིམམྷཱ དུཀྑཱ མོཙེཏུཾ སམཏྠོ ནཱམ ནཏྠཱི’’ཏི ཙིནྟེཏྭཱ ཏེན སདྡྷིཾ སལླཔནྟོ ཨཱཧ –
‘‘པཉྩཱལོ སབྦསེནཱཡ, བྲཧྨདཏྟོཡམཱགཏོ;
སཱཡཾ པཉྩཱལིཡཱ སེནཱ, ཨཔྤམེཡྻོ མཧོསདྷ.
‘‘ཝཱིཐིམཏཱི པཏྟིམཏཱི, སབྦསངྒཱམཀོཝིདཱ;
ཨོཧཱརིནཱི སདྡཝཏཱི, བྷེརིསངྑཔྤབོདྷནཱ.
‘‘ལོཧཝིཛྫཱལངྐཱརཱབྷཱ, དྷཛིནཱི ཝཱམརོཧིནཱི;
སིཔྤིཡེཧི སུསམྤནྣཱ, སཱུརེཧི སུཔྤཏིཊྛིཏཱ.
‘‘དསེཏྠ པཎྜིཏཱ ཨཱཧུ, བྷཱུརིཔཉྙཱ རཧོགམཱ;
མཱཏཱ ཨེཀཱདསཱི རཉྙོ, པཉྩཱལིཡཾ པསཱསཏི.
‘‘ཨཐེཏྠེཀསཏཾ ¶ ཁཏྱཱ, ཨནུཡནྟཱ ཡསསྶིནོ;
ཨཙྪིནྣརཊྛཱ བྱཐིཏཱ, པཉྩཱལིཡཾ ཝསཾ གཏཱ.
‘‘ཡཾཝདཱ ¶ ཏཀྐརཱ རཉྙོ, ཨཀཱམཱ པིཡབྷཱཎིནོ;
པཉྩཱལམནུཡཱཡནྟི, ཨཀཱམཱ ཝསིནོ གཏཱ.
‘‘ཏཱཡ སེནཱཡ མིཐིལཱ, ཏིསནྡྷིཔརིཝཱརིཏཱ;
རཱཛདྷཱནཱི ཝིདེཧཱནཾ, སམནྟཱ པརིཁཉྙཏི.
‘‘ཨུདྡྷཾ ¶ ཏཱརཀཛཱཏཱཝ, སམནྟཱ པརིཝཱརིཏཱ;
མཧོསདྷ ཝིཛཱནཱཧི, ཀཐཾ མོཀྑོ བྷཝིསྶཏཱི’’ཏི.
ཏཏྠ སབྦསེནཱཡཱཏི སབྦཱཡ ཨེཀསཏརཱཛནཱཡིཀཱཡ ཨཊྛཱརསཨཀྑོབྷཎིསངྑཱཡ སེནཱཡ སདྡྷིཾ ཨཱགཏོ ཀིར, ཏཱཏཱཏི ཝདཏི. པཉྩཱལིཡཱཏི པཉྩཱལརཉྙོ སནྟཀཱ. ཝཱིཐིམཏཱིཏི ཝཱིཐིཡཱ ཨཱནཱིཏེ དབྦསམྦྷཱརེ གཧེཏྭཱ ཝིཙརནྟེན ཝཌྜྷཀིགཎེན སམནྣཱགཏཱ. པཏྟིམཏཱིཏི པདསཉྩརེན བལཀཱཡེན སམནྣཱགཏཱ. སབྦསངྒཱམཀོཝིདཱཏི སབྦསངྒཱམེ ཀུསལཱ. ཨོཧཱརིནཱིཏི པརསེནཱཡ ཨནྟརཾ པཝིསིཏྭཱ ཨཔཉྙཱཡནྟཱཝ པརསཱིསཾ ཨཱཧརིཏུཾ སམཏྠཱ. སདྡཝཏཱིཏི དསཧི སདྡེཧི ཨཝིཝིཏྟཱ. བྷེརིསངྑཔྤབོདྷནཱཏི ‘‘ཨེཐ ཡཱཐ ཡུཛ྄ཛྷཐཱ’’ཏིཨཱདཱིནི ཏཏྠ ཝཙཱིབྷེདེན ཛཱནཱཔེཏུཾ ན སཀྐཱ, ཏཱདིསཱནི པནེཏྠ ཀིཙྩཱནི བྷེརིསངྑསདྡེཧེཝ བོདྷེནྟཱིཏི བྷེརིསངྑཔྤབོདྷནཱ. ལོཧཝིཛྫཱལངྐཱརཱབྷཱཏི ཨེཏྠ ལོཧཝིཛྫཱཏི ལོཧསིཔྤཱནི. སཏྟརཏནཔཊིམཎྜིཏཱནཾ ཀཝཙཙམྨཛཱལིཀཱསཱིསཀརེཎིཀཱདཱིནཾ ཨེཏཾ ནཱམཾ. ཨལངྐཱརཱཏི རཱཛམཧཱམཏྟཱདཱིནཾ ཨལངྐཱརཱ. ཏསྨཱ ལོཧཝིཛྫཱཧི ཙེཝ ཨལངྐཱརེཧི ཙ བྷཱསཏཱིཏི ལོཧཝིཛྫཱལངྐཱརཱབྷཱཏི ཨཡམེཏྠ ཨཏྠོ. དྷཛིནཱིཏི སུཝཎྞཱདིཔཊིམཎྜིཏེཧི ནཱནཱཝཏྠསམུཛྫལེཧི རཐཱདཱིསུ སམུསྶིཏདྷཛེཧི སམནྣཱགཏཱ. ཝཱམརོཧིནཱིཏི ཧཏྠཱི ཙ ཨསྶེ ཙ ཨཱརོཧནྟཱ ཝཱམཔསྶེན ཨཱརོཧནྟི, ཏེན ‘‘ཝཱམརོཧིནཱི’’ཏི ཝུཙྩནྟི, ཏེཧི སམནྣཱགཏཱ, ཨཔརིམིཏཧཏྠིཨསྶསམཱཀིཎྞཱཏི ཨཏྠོ. སིཔྤིཡེཧཱིཏི ཧཏྠིསིཔྤཨསྶསིཔྤཱདཱིསུ ཨཊྛཱརསསུ སིཔྤེསུ ནིཔྥཏྟིཾ པཏྟེཧི སུཊྛུ སམནྣཱགཏཱ སུསམཱཀིཎྞཱ. སཱུརེཧཱིཏི ཏཱཏ, ཨེསཱ ཀིར སེནཱ སཱིཧསམཱནཔརཀྐམེཧི སཱུརཡོདྷེཧི སུཔྤཏིཊྛིཏཱ.
ཨཱཧཱུཏི དས ཀིརེཏྠ སེནཱཡ པཎྜིཏཱཏི ཝདནྟི. བྷཱུརིཔཉྙཱཏི པཐཝིསམཱཡ ཝིཔུལཱཡ པཉྙཱཡ སམནྣཱགཏཱ. རཧོགམཱཏི རཧོ གམནསཱིལཱ རཧོ ནིསཱིདིཏྭཱ མནྟནསཱིལཱ. ཏེ ཀིར ཨེཀཱཧདྭཱིཧཾ ཙིནྟེཏུཾ ལབྷནྟཱ པཐཝིཾ པརིཝཏྟེཏུཾ ཨཱཀཱསེ གཎྷིཏུཾ སམཏྠཱ. ཨེཀཱདསཱིཏི ཏེཧི ¶ ཀིར ¶ པཎྜིཏེཧི ཨཏིརེཀཏརཔཉྙཱ པཉྩཱལརཉྙོ མཱཏཱ. སཱ ཏེསཾ ཨེཀཱདསཱི ཧུཏྭཱ པཉྩཱལིཡཾ སེནཾ པསཱསཏི ཨནུསཱསཏི.
ཨེཀདིཝསཾ ཀིརེཀོ པུརིསོ ཨེཀཾ ཏཎྜུལནཱལི༹ཉྩ པུཊཀབྷཏྟཉྩ ཀཧཱཔཎསཧསྶཉྩ གཧེཏྭཱ ‘‘ནདིཾ ཏརིསྶཱམཱི’’ཏི ཨོཏིཎྞོ ནདིམཛ྄ཛྷཾ པཏྭཱ ཏརིཏུཾ ཨསཀྐོནྟོ ཏཱིརེ ཋིཏེ མནུསྶེ ཨེཝམཱཧ – ‘‘ཨམྦྷོ, མམ ཧཏྠེ ཨེཀཱ ཏཎྜུལནཱལི༹ པུཊཀབྷཏྟཾ ཀཧཱཔཎསཧསྶཉྩ ཨཏྠི, ཨིཏོ ཡཾ མཡ྄ཧཾ རུཙྩཏི, ཏཾ དསྶཱམི. ཡོ སཀྐོཏི, སོ མཾ ཨུཏྟཱརེཏཱུ’’ཏི. ཨཐེཀོ ཐཱམསམྤནྣོ པུརིསོ གཱལ༹ྷཾ ནིཝཱསེཏྭཱ ནདིཾ ཨོགཱཧེཏྭཱ ཏཾ ཧཏྠེ གཧེཏྭཱ པརཏཱིརཾ ཨུཏྟཱརེཏྭཱ ‘‘དེཧི མེ དཱཏབྦ’’ནྟི ཨཱཧ. ‘‘སོ ཏཎྜུལནཱལི༹ཾ ཝཱ པུཊཀབྷཏྟཾ ཝཱ གཎྷཱཧཱི’’ཏི ¶ . ‘‘སམྨ, ཨཧཾ ཛཱིཝིཏཾ ཨགཎེཏྭཱ ཏཾ ཨུཏྟཱརེསིཾ, ན མེ ཨེཏེཧི ཨཏྠོ, ཀཧཱཔཎཾ མེ དེཧཱི’’ཏི. ཨཧཾ ‘‘ཨིཏོ མཡ྄ཧཾ ཡཾ རུཙྩཏི, ཏཾ དསྶཱམཱི’’ཏི ཨཝཙཾ, ཨིདཱནི མཡ྄ཧཾ ཡཾ རུཙྩཏི, ཏཾ དམྨི, ཨིཙྪནྟོ གཎྷཱཏི. སོ སམཱིཔེ ཋིཏསྶ ཨེཀསྶ ཀཐེསི. སོཔི ཏཾ ‘‘ཨེས ཨཏྟནོ རུཙྩནཀཾ ཏཝ དེཏི, གཎྷཱ’’ཏི ཨཱཧ. སོ ‘‘ཨཧཾ ན གཎྷིསྶཱམཱི’’ཏི ཏཾ ཨཱདཱཡ ཝིནིཙྪཡཾ གནྟྭཱ ཝིནིཙྪཡཱམཙྩཱནཾ ཨཱརོཙེསི. ཏེཔི སབྦཾ སུཏྭཱ ཏཐེཝཱཧཾསུ. སོ ཏེསཾ ཝིནིཙྪཡེན ཨཏུཊྛོ རཉྙོ སནྟིཀཾ གནྟྭཱ ཏམཏྠཾ ཨཱརོཙེསི. རཱཛཱཔི ཝིནིཙྪཡཱམཙྩེ པཀྐོསཱཔེཏྭཱ ཏེསཾ སནྟིཀེ ཨུབྷིནྣཾ ཝཙནཾ སུཏྭཱ ཝིནིཙྪིནིཏུཾ ཨཛཱནནྟོ ཨཏྟནོ ཛཱིཝིཏཾ པཧཱཡ ནདིཾ ཨོཏིཎྞཾ པརཛྫཱཔེསི.
ཏསྨིཾ ཁཎེ རཉྙོ མཱཏཱ ཙལཱཀདེཝཱི ནཱམ ཨཝིདཱུརེ ནིསིནྣཱ ཨཧོསི. སཱ རཉྙོ དུབྦིནིཙྪིཏབྷཱཝཾ ཉཏྭཱ ‘‘ཏཱཏ, ཨིམཾ ཨཌྜཾ ཉཏྭཱཝ སུཊྛུ ཝིནིཙྪིཏ’’ནྟི ཨཱཧ. ‘‘ཨམྨ, ཨཧཾ ཨེཏྟཀཾ ཛཱནཱམི. སཙེ ཏུམྷེ ཨུཏྟརིཏརཾ ཛཱནཱཐ, ཏུམྷེཝ ཝིནིཙྪིནཐཱ’’ཏི. སཱ ‘‘ཨེཝཾ ཀརིསྶཱམཱི’’ཏི ཝཏྭཱ ཏཾ པུརིསཾ པཀྐོསཱཔེཏྭཱ ‘‘ཨེཧི, ཏཱཏ, ཏཝ ཧཏྠགཏཱནི ཏཱིཎིཔི བྷཱུམིཡཾ ཋཔེཧཱི’’ཏི པཊིཔཱཊིཡཱ ཋཔཱཔེཏྭཱ ‘‘ཏཱཏ, ཏྭཾ ཨུདཀེ ཝུཡ྄ཧམཱནོ ཨིམསྶ ཀིཾ ཀཐེསཱི’’ཏི པུཙྪིཏྭཱ ‘‘ཨིདཾ ནཱམཡྻེ’’ཏི ཝུཏྟེ ‘‘ཏེན ཧི ཏཝ རུཙྩནཀཾ གཎྷཱ’’ཏི ཨཱཧ. སོ སཧསྶཏྠཝིཀཾ གཎྷི. ཨཐ ནཾ སཱ ཐོཀཾ གཏཀཱལེ པཀྐོསཱཔེཏྭཱ ‘‘ཏཱཏ, སཧསྶཾ ཏེ རུཙྩཏཱི’’ཏི པུཙྪིཏྭཱ ‘‘ཨཱམ, རུཙྩཏཱི’’ཏི ཝུཏྟེ ‘‘ཏཱཏ, ཏཡཱ ‘ཨིཏོ ¶ ཡཾ མཡ྄ཧཾ རུཙྩཏི, ཏཾ དསྶཱམཱི’ཏི ཨིམསྶ ཝུཏྟཾ, ན ཝུཏྟ’’ནྟི པུཙྪིཏྭཱ ‘‘ཝུཏྟཾ དེཝཱི’’ཏི ཝུཏྟེ ‘‘ཏེན ཧི ཨིམཾ སཧསྶཾ ཨེཏསྶ དེཧཱི’’ཏི ཝཏྭཱ དཱཔེསི. སོ རོདནྟོ པརིདེཝནྟོ ཨདཱསི. ཏསྨིཾ ཁཎེ རཱཛཱ ཨམཙྩཱ ཙ ཏུསྶིཏྭཱ སཱདྷུཀཱརཾ པཝཏྟཡིཾསུ. ཏཏོ པཊྛཱཡ ཏསྶཱ པཎྜིཏབྷཱཝོ སབྦཏྠ པཱཀཊོ ཛཱཏོ. ཏཾ སནྡྷཱཡ ཝིདེཧརཱཛཱ ‘‘མཱཏཱ ཨེཀཱདསཱི རཉྙོ’’ཏི ཨཱཧ.
ཁཏྱཱཏི ¶ ཁཏྟིཡཱ. ཨཙྪིནྣརཊྛཱཏི ཙཱུལ༹ནིབྲཧྨདཏྟེན ཨཙྪིནྡིཏྭཱ གཧིཏརཊྛཱ. བྱཐིཏཱཏི མརཎབྷཡབྷཱིཏཱ ཨཉྙཾ གཧེཏབྦགཧཎཾ ཨཔསྶནྟཱ. པཉྩཱལིཡཾ ཝསཾ གཏཱཏི ཨེཏསྶ པཉྩཱལརཉྙོ ཝསཾ གཏཱཏི ཨཏྠོ. སཱམིཝཙནཏྠེ ཧི ཨེཏཾ ཨུཔཡོགཝཙནཾ. ཡཾཝདཱ ཏཀྐརཱཏི ཡཾ མུཁེན ཝདནྟི, ཏཾ རཉྙོ ཀཱཏུཾ སཀྐོནྟཱཝ. ཝསིནོ གཏཱཏི པུབྦེ སཡཾཝསིནོ ཨིདཱནི པནསྶ ཝསཾ གཏཱཏི ཨཏྠོ. ཏིསནྡྷཱིཏི པཋམཾ ཧཏྠིཔཱཀཱརེན པརིཀྑིཏྟཱ, ཏཏོ རཐཔཱཀཱརེན, ཏཏོ ཨསྶཔཱཀཱརེན, ཏཏོ ཡོདྷཔཏྟིཔཱཀཱརེན པརིཀྑིཏྟཱཏི ཨིམེཧི ཙཏཱུཧི སངྑེཔེཧི ཏིསནྡྷཱིཧི པརིཝཱརིཏཱ. ཧཏྠིརཐཱནཉྷི ཨནྟརཾ ཨེཀོ སནྡྷི, རཐཨསྶཱནཾ ཨནྟརཾ ཨེཀོ སནྡྷི, ཨསྶཔཏྟཱིནཾ ཨནྟརཾ ཨེཀོ སནྡྷི. པརིཁཉྙཏཱིཏི ཁནཱིཡཏི. ཨིམཉྷི ཨིདཱནི ཨུཔྤཱཊེཏྭཱ གཎྷིཏུཀཱམཱ ཝིཡ སམནྟཏོ ཁནནྟི. ཨུདྡྷཾ ཏཱརཀཛཱཏཱཝཱཏི ཏཱཏ, ཡཱཡ སེནཱཡ སམནྟཱ པརིཝཱརིཏཱ, སཱ ཨནེཀསཏསཧསྶདཎྜདཱིཔིཀཱཧི ཨུདྡྷཾ ཏཱརཀཛཱཏཱ ཝིཡ ཁཱཡཏི. ཝིཛཱནཱཧཱིཏི ཏཱཏ མཧོསདྷཔཎྜིཏ, ཨཝཱིཙིཏོ ཡཱཝ བྷཝགྒཱ ཨཉྙོ ཏཡཱ སདིསོ ཨུཔཱཡཀུསལོ པཎྜིཏོ ནཱམ ནཏྠི, པཎྜིཏབྷཱཝོ ནཱམ ཨེཝརཱུཔེསུ ཋཱནེསུ པཉྙཱཡཏི, ཏསྨཱ ཏྭམེཝ ཛཱནཱཧི, ཀཐཾ ཨམྷཱཀཾ ཨིཏོ དུཀྑཱ པམོཀྑོ བྷཝིསྶཏཱིཏི.
ཨིམཾ རཉྙོ ཀཐཾ སུཏྭཱ མཧཱསཏྟོ ཙིནྟེསི ‘‘ཨཡཾ རཱཛཱ ཨཏིཝིཡ མརཎབྷཡབྷཱིཏོ, གིལཱནསྶ ཁོ པན ཝེཛྫོ པཊིསརཎཾ, ཚཱཏསྶ ¶ བྷོཛནཾ, པིཔཱསིཏསྶ པཱནཱིཡཾ, ཨིམསྶཔི མཾ ཋཔེཏྭཱ ཨཉྙཾ པཊིསརཎཾ ནཏྠི, ཨསྶཱསེསྶཱམི ན’’ནྟི. ཨཐ མཧཱསཏྟོ མནོསིལཱཏལེ ནདནྟོ སཱིཧོ ཝིཡ ‘‘མཱ བྷཱཡི, མཧཱརཱཛ, རཛྫསུཁཾ ཨནུབྷཝ, ཨཧཾ ལེཌྜུཾ
གཧེཏྭཱ ¶ ཀཱཀཾ ཝིཡ, དྷནུཾ གཧེཏྭཱ མཀྐཊཾ ཝིཡ ཙ, ཨིམཾ ཨཊྛཱརསཨཀྑོབྷཎིསངྑཾ སེནཾ ཨུདརེ བནྡྷསཱཊཀཱནམྤི ཨསྶཱམིཀཾ ཀཏྭཱ པལཱཔེསྶཱམཱི’’ཏི ཝཏྭཱ ནཝམཾ གཱཐམཱཧ –
‘‘པཱདེ དེཝ པསཱརེཧི, བྷུཉྫ ཀཱམེ རམསྶུ ཙ;
ཧིཏྭཱ པཉྩཱལིཡཾ སེནཾ, བྲཧྨདཏྟོ པལཱཡིཏཱི’’ཏི.
ཏསྶཏྠོ – ‘‘དེཝ, ཏྭཾ ཡཐཱསུཁཾ ཨཏྟནོ རཛྫསུཁསངྑཱཏེ ཏེ པཱདེ པསཱརེཧི, པསཱརེནྟོ ཙ སངྒཱམེ ཙིཏྟཾ ཨཀཏྭཱ བྷུཉྫ, ཀཱམེ རམསྶུ ཙ, ཨེས བྲཧྨདཏྟོ ཨིམཾ སེནཾ ཚཌྜེཏྭཱ པལཱཡིསྶཏཱི’’ཏི.
ཨེཝཾ པཎྜིཏོ རཱཛཱནཾ སམསྶཱསེཏྭཱ ཝནྡིཏྭཱ རཱཛནིཝེསནཱ ནིཀྑམིཏྭཱ ནགརེ ཚཎབྷེརིཾ ¶ ཙརཱཔེཏྭཱ ནཱགརེ ཨཱཧ – ‘‘ཨམྦྷོ, ཏུམྷེ མཱ ཙིནྟཡིཏྠ, སཏྟཱཧཾ མཱལཱགནྡྷཝིལེཔནཔཱནབྷོཛནཱདཱིནི སམྤཱདེཏྭཱ ཚཎཀཱིལ༹ཾ པཊྛཔེཐ. ཏཏྠ ཏཏྠ མནུསྶཱ ཡཐཱརཱུཔཾ མཧཱཔཱནཾ པིཝནྟུ, གནྡྷབྦཾ ཀརོནྟུ, ཝཱདེནྟུ ཝགྒནྟུ སེལེ༹ནྟུ ནདནྟུ ནཙྩནྟུ གཱཡནྟུ ཨཔྥོཊེནྟུ, པརིབྦཡོ པན ཝོ མམ སནྟཀོཝ ཧོཏུ, ཨཧཾ མཧོསདྷཔཎྜིཏོ ནཱམ, པསྶིསྶཐ མེ ཨཱནུབྷཱཝ’’ནྟི. ཏེ ཏཐཱ ཀརིཾསུ. ཏདཱ གཱིཏཝཱདིཏཱདིསདྡཾ བཧིནགརེ ཋིཏཱ སུཎནྟི, ཙཱུལ༹དྭཱརེན མནུསྶཱ ནགརཾ པཝིསནྟི. ཋཔེཏྭཱ པཊིསཏྟུཾ དིཊྛཾ དིཊྛཾ ན གཎྷནྟི, ཏསྨཱ སཉྩཱརོ ན ཚིཛྫཏི, ནགརཾ པཝིཊྛམནུསྶཱ ཚཎཀཱིལ༹ནིསྶིཏཾ ཛནཾ པསྶནྟི.
ཙཱུལ༹ནིབྲཧྨདཏྟོཔི ནགརེ ཀོལཱཧལཾ སུཏྭཱ ཨམཙྩེ ཨེཝམཱཧ – ‘‘ཨམྦྷོ, ཨམྷེསུ ཨཊྛཱརསཨཀྑོབྷཎིཡཱ སེནཱཡ ནགརཾ པརིཝཱརེཏྭཱ ཋིཏེསུ ནགརཝཱསཱིནཾ བྷཡཾ ཝཱ སཱརཛྫཾ ཝཱ ནཏྠི, ཨཱནནྡིཏཱ སོམནསྶཔྤཏྟཱ ཨཔྥོཊེནྟི ནདནྟི སེལེ༹ནྟི ནཙྩནྟི གཱཡནྟི, ཀིཾ ནཱམེཏ’’ནྟི? ཨཐ ནཾ ཨུཔནིཀྑིཏྟཀཔུརིསཱ མུསཱཝཱདཾ ཀཏྭཱ ཨེཝམཱཧཾསུ ‘‘དེཝ, མཡཾ ཨེཀེན ཀམྨེན ཙཱུལ༹དྭཱརེན ནགརཾ པཝིསིཏྭཱ ཚཎནིསྶིཏཾ མཧཱཛནཾ དིསྭཱ པུཙྪིམྷཱ ‘ཨམྦྷོ ¶ , སཀལཛམྦུདཱིཔརཱཛཱནོ ཨཱགནྟྭཱ ཏུམྷཱཀཾ ནགརཾ པརིཀྑིཔིཏྭཱ ཋིཏཱ, ཏུམྷེ པན ཨཏིཔམཏྟཱ, ཀིཾ ནཱམེཏ’ནྟི? ཏེ ཨེཝམཱཧཾསུ ‘ཨམྦྷོ, ཨམྷཱཀཾ རཉྙོ ཀུམཱརཀཱལེ ཨེཀོ མནོརཐོ ཨཧོསི སཀལཛམྦུདཱིཔརཱཛཱུཧི ནགརེ པརིཝཱརིཏེ ཚཎཾ ཀརིསྶཱམཱིཏི, ཏསྶ ཨཛྫ མནོརཐོ མཏྠཀཾ པཏྟོ, ཏསྨཱ ཚཎབྷེརིཾ ཙརཱཔེཏྭཱ སཡཾ མཧཱཏལེ མཧཱཔཱནཾ པིཝཏཱི’’’ཏི.
རཱཛཱ ¶ ཏེསཾ ཀཐཾ སུཏྭཱ ཀུཛ྄ཛྷིཏྭཱ སེནཾ ཨཱཎཱཔེསི – ‘‘བྷོནྟོ, གཙྪཐ, ཁིཔྤཾ ཨིཏོ ཙིཏོ ཙ ནགརཾ ཨཝཏྠརིཏྭཱ པརིཁཾ བྷིནྡིཏྭཱ པཱཀཱརཾ མདྡནྟཱ དྭཱརཊྚཱལཀེ བྷིནྡནྟཱ ནགརཾ པཝིསིཏྭཱ སཀཊེཧི ཀུམྦྷཎྜཱནི ཝིཡ མཧཱཛནསྶ སཱིསཱནི གཎྷཐ, ཝིདེཧརཉྙོ སཱིསཾ ཨཱཧརཐཱ’’ཏི. ཏཾ སུཏྭཱ སཱུརཡོདྷཱ ནཱནཱཝུདྷཧཏྠཱ དྭཱརསམཱིཔཾ གནྟྭཱ པཎྜིཏསྶ པུརིསེཧི སཀྑརཝཱལུཀཀལལསིཉྩནཔཱསཱཎཔཏནཱདཱིཧི ཨུཔདྡུཏཱ པཊིཀྐམནྟི. ‘‘པཱཀཱརཾ བྷིནྡིསྶཱམཱ’’ཏི པརིཁཾ ཨོཏིཎྞེཔི ཨནྟརཊྚཱལཀེསུ ཋིཏཱ ཨུསུསཏྟིཏོམརཱདཱིཧི ཝིཛ྄ཛྷནྟཱ མཧཱཝིནཱསཾ པཱཔེནྟི. པཎྜིཏསྶ ཡོདྷཱ ཙཱུལ༹ནིབྲཧྨདཏྟསྶ ཡོདྷེ ཧཏྠཝིཀཱརཱདཱིནི དསྶེཏྭཱ ནཱནཔྤཀཱརེཧི ཨཀྐོསནྟི པརིབྷཱསནྟི ཏཛྫེནྟི. ‘‘ཏུམྷེ ཀིལམནྟཱ བྷཏྟཾ ཨལབྷནྟཱ ཐོཀཾ པིཝིསྶཐ ཁཱདིསྶཐཱ’’ཏི སུརཱཔིཊྛཀཱནི ཙེཝ མཙྪམཾསསཱུལཱནི ཙ པསཱརེཏྭཱ སཡམེཝ པིཝནྟི ཁཱདནྟི, ཨནུཔཱཀཱརེ ཙངྐམནྟི. ཨིཏརེ ཀིཉྩི ཀཱཏུཾ ཨསཀྐོནྟཱ ཙཱུལ༹ནིབྲཧྨདཏྟསྶ སནྟིཀཾ གནྟྭཱ ‘‘དེཝ, ཋཔེཏྭཱ ཨིདྡྷིམནྟེ ཨཉྙེཧི ནིདྡྷརིཏུཾ ན སཀྐཱ’’ཏི ཝདིཾསུ.
རཱཛཱ ¶ ཙཏུཔཉྩཱཧཾ ཝསིཏྭཱ གཧེཏབྦཡུཏྟཀཾ ཨཔསྶནྟོ ཀེཝཊྚཾ པུཙྪི ‘‘ཨཱཙརིཡ, ནགརཾ གཎྷིཏུཾ ན སཀྐོམ, ཨེཀོཔི ཨུཔསངྐམིཏུཾ སམཏྠོ ནཏྠི, ཀིཾ ཀཱཏབྦ’’ནྟི. ཀེཝཊྚོ ‘‘ཧོཏུ, མཧཱརཱཛ, ནགརཾ ནཱམ བཧིཨུདཀཾ ཧོཏི, ཨུདཀཀྑཡེན ནཾ གཎྷིསྶཱམ, མནུསྶཱ ཨུདཀེན ཀིལམནྟཱ དྭཱརཾ ཝིཝརིསྶནྟཱི’’ཏི ཨཱཧ. སོ ‘‘ཨཏྠེསོ ཨུཔཱཡོ’’ཏི སམྤཊིཙྪི. ཏཏོ པཊྛཱཡ ཨུདཀཾ པཝེསེཏུཾ ན དེནྟི. པཎྜིཏསྶ ཨུཔནིཀྑིཏྟཀཔུརིསཱ པཎྞཾ ལིཁིཏྭཱ ཀཎྜེ བནྡྷིཏྭཱ ཏཾ པཝཏྟིཾ པེསེསུཾ. ཏེནཔི པཋམམེཝ ཨཱཎཏྟཾ ‘‘ཡོ ཡོ ཀཎྜེ པཎྞཾ པསྶཏི, སོ ¶ སོ མེ ཨཱཧརཏཱུ’’ཏི. ཨཐེཀོ པུརིསོ ཏཾ དིསྭཱ པཎྜིཏསྶ དསྶེསི. སོ ཏཾ པཝཏྟིཾ ཉཏྭཱ ‘‘ན མེ པཎྜིཏབྷཱཝཾ ཛཱནནྟཱི’’ཏི སཊྛིཧཏྠཾ ཝེལུ༹ཾ དྭིདྷཱ ཕཱལེཏྭཱ པརིསུདྡྷཾ སོདྷཱཔེཏྭཱ པུན ཨེཀཏོ ཀཏྭཱ ཙམྨེན བནྡྷིཏྭཱ ཨུཔརི ཀལལེན མཀྑེཏྭཱ ཧིམཝནྟཏོ ཨིདྡྷིམནྟཏཱཔསེཧི ཨཱནཱིཏཾ ཀུདྲཱུསཀུམུདབཱིཛཾ པོཀྑརཎིཏཱིརེ ཀལལེསུ རོཔཱཔེཏྭཱ ཨུཔརི ཝེལུ༹ཾ ཋཔཱཔེཏྭཱ ཨུདཀསྶ པཱུརཱཔེསི. ཨེཀརཏྟེནེཝ ཝཌྜྷིཏྭཱ པུཔྥཾ ཝེལུ༹མཏྠཀཏོ ཨུགྒནྟྭཱ རཏནམཏྟཾ ཨཊྛཱསི.
ཨཐ ¶ ནཾ ཨུཔྤཱཊེཏྭཱ ‘‘ཨིདཾ ཙཱུལ༹ནིབྲཧྨདཏྟསྶ དེཐཱ’’ཏི ཨཏྟནོ པུརིསཱནཾ དཱཔེསི. ཏེ ཏསྶ དཎྜཀཾ ཝལཡཾ ཀཏྭཱ ‘‘ཨམྦྷོ, བྲཧྨདཏྟསྶ པཱདམཱུལིཀཱ ཚཱཏཀེན མཱ མརིཏྠ, གཎྷཐེཏཾ ཨུཔྤལཾ པིལ༹ནྡྷིཏྭཱ དཎྜཀཾ ཀུཙྪིཔཱུརཾ ཁཱདཐཱ’’ཏི ཝཏྭཱ ཁིཔིཾསུ. ཏམེཀོ པཎྜིཏསྶ ཨུཔནིཀྑིཏྟཀཔུརིསོ ཨུཊྛཱཡ གཎྷི, ཨཐ ཏཾ རཉྙོ སནྟིཀཾ ཨཱཧརིཏྭཱ ‘‘པསྶཐ, དེཝ, ཨིམསྶ དཎྜཀཾ, ན ནོ ཨིཏོ པུབྦེ ཨེཝཾ དཱིགྷདཎྜཀོ དིཊྛཔུབྦོ’’ཏི ཝཏྭཱ ‘‘མིནཐ ན’’ནྟི ཝུཏྟེ པཎྜིཏསྶ པུརིསཱ སཊྛིཧཏྠཾ དཎྜཀཾ ཨསཱིཏིཧཏྠཾ ཀཏྭཱ མིནིཾསུ. པུན རཉྙཱ ‘‘ཀཏྠེཏཾ ཛཱཏ’’ནྟི ཝུཏྟེ ཨེཀོ མུསཱཝཱདཾ ཀཏྭཱ ཨེཝམཱཧ – ‘‘དེཝ, ཨཧཾ ཨེཀདིཝསཾ པིཔཱསིཏོ ཧུཏྭཱ ‘སུརཾ པིཝིསྶཱམཱི’ཏི ཙཱུལ༹དྭཱརེན ནགརཾ པཝིཊྛོ, ནཱགརཱནཾ ཨུདཀཀཱིལ༹ཏྠཱཡ ཀཏཾ མཧཱཔོཀྑརཎིཾ པསྶིཾ, མཧཱཛནོ ནཱཝཱཡ ནིསཱིདིཏྭཱ པུཔྥཱནི གཎྷཱཏི. ཏཏྠ ཨིདཾ ཏཱིརཔྤདེསེ ཛཱཏཾ, གམྦྷཱིརཊྛཱནེ ཛཱཏསྶ པན དཎྜཀོ སཏཧཏྠོ བྷཝིསྶཏཱི’’ཏི.
ཏཾ སུཏྭཱ རཱཛཱ ཀེཝཊྚཾ ཨཱཧ – ‘‘ཨཱཙརིཡ, ན སཀྐཱ ཨུདཀཀྑཡེན ཨིདཾ གཎྷིཏུཾ, ཧརཐེཀཾ ཨུཔཱཡ’’ནྟི. ‘‘ཏེན ཧི, དེཝ, དྷཉྙཀྑཡེན གཎྷིསྶཱམ, ནགརཾ ནཱམ བཧིདྷཉྙཾ ཧོཏཱི’’ཏི. ཨེཝཾ ཧོཏུ ཨཱཙརིཡཱཏི, པཎྜིཏོ པུརིམནཡེནེཝ ཏཾ པཝཏྟིཾ ཉཏྭཱ ‘‘ན མེ ཀེཝཊྚབྲཱཧྨཎོ པཎྜིཏབྷཱཝཾ ཛཱནཱཏཱི’’ཏི ཨནུཔཱཀཱརམཏྠཀེ ཀལལཾ ཀཏྭཱ ཝཱིཧིཾ ཏཏྠ རོཔཱཔེསི. བོདྷིསཏྟཱནཾ ཨདྷིཔྤཱཡོ ནཱམ སམིཛ྄ཛྷཏཱིཏི ཝཱིཧཱི ཨེཀརཏྟེནེཝ ཝུཊྛཱཡ པཱཀཱརམཏྠཀེ ནཱིལཱ ཧུཏྭཱ པཉྙཱཡནྟི. ཏཾ ¶ དིསྭཱ ཙཱུལ༹ནིབྲཧྨདཏྟོ ‘‘ཨམྦྷོ, ཀིམེཏཾ པཱཀཱརམཏྠཀེ ནཱིལཾ ཧུཏྭཱ པཉྙཱཡཏཱི’’ཏི པུཙྪི. པཎྜིཏསྶ ཨུཔནིཀྑིཏྟཀཔུརིསོ རཉྙོ ཝཙནཾ མུཁཏོ ཛིཝ྄ཧཾ ལུཉྩནྟོ ¶ ཝིཡ གཧེཏྭཱ ‘‘དེཝ, གཧཔཏིཔུཏྟོ མཧོསདྷཔཎྜིཏོ ཨནཱགཏབྷཡཾ དིསྭཱ པུབྦེཝ རཊྛཏོ དྷཉྙཾ ཨཱཧརཱཔེཏྭཱ ཀོཊྛཱགཱརཱདཱིནི པཱུརཱཔེཏྭཱ སེསདྷཉྙཾ པཱཀཱརཔསྶེ ནིཀྑིཔཱཔེསི. ཏེ ཀིར ཝཱིཧཡོ ཨཱཏཔེན སུཀྑནྟཱ ཝསྶེན ཏེམེནྟཱ ཏཏྠེཝ སསྶཾ ཛནེསུཾ. ཨཧཾ ཨེཀདིཝསཾ ཨེཀེན ཀམྨེན ཙཱུལ༹དྭཱརེན པཝིསིཏྭཱ པཱཀཱརམཏྠཀེ ཝཱིཧིརཱསིཏོ ཝཱིཧིཾ ཧཏྠེན གཧེཏྭཱ ཝཱིཐིཡཾ ཚཌྜེནྟེ པསྶིཾ. ཨཐ ཏེ མཾ པརིཧཱསནྟཱ ‘ཚཱཏོསི མཉྙེ, ཝཱིཧིཾསཱཊཀདསནྟེ ¶ བནྡྷིཏྭཱ ཏཝ གེཧཾ ཧརིཏྭཱ ཀོཊྚེཏྭཱ པཙཱཔེཏྭཱ བྷུཉྫཱཧཱི’ཏི ཝདིཾསཱུ’’ཏི ཨཱརོཙེསི.
ཏཾ སུཏྭཱ རཱཛཱ ཀེཝཊྚཾ ‘‘ཨཱཙརིཡ, དྷཉྙཀྑཡེནཔི གཎྷིཏུཾ ན སཀྐཱ, ཨཡམྤི ཨནུཔཱཡོ’’ཏི ཨཱཧ. ‘‘ཏེན ཧི, དེཝ, དཱརུཀྑཡེན གཎྷིསྶཱམ, ནགརཾ ནཱམ བཧིདཱརུཀཾ ཧོཏཱི’’ཏི. ‘‘ཨེཝཾ ཧོཏུ, ཨཱཙརིཡཱ’’ཏི. པཎྜིཏོ པུརིམནཡེནེཝ ཏཾ པཝཏྟིཾ ཉཏྭཱ པཱཀཱརམཏྠཀེ ཝཱིཧིཾ ཨཏིཀྐམིཏྭཱ པཉྙཱཡམཱནཾ དཱརུརཱསིཾ ཀཱརེསི. པཎྜིཏསྶ མནུསྶཱ ཙཱུལ༹ནིབྲཧྨདཏྟསྶ པུརིསེཧི སདྡྷིཾ པརིཧཱསཾ ཀརོནྟཱ ‘‘སཙེ ཚཱཏཏྠ, ཡཱགུབྷཏྟཾ པཙིཏྭཱ བྷུཉྫཐཱ’’ཏི མཧནྟམཧནྟཱནི དཱརཱུནི ཁིཔིཾསུ. རཱཛཱ ‘‘པཱཀཱརམཏྠཀེན དཱརཱུནི པཉྙཱཡནྟི, ཀིམེཏ’’ནྟི པུཙྪིཏྭཱ ‘‘དེཝ, གཧཔཏིཔུཏྟོ ཀིར མཧོསདྷཔཎྜིཏོ ཨནཱགཏབྷཡཾ དིསྭཱ དཱརཱུནི ཨཱཧརཱཔེཏྭཱ ཀུལཱནཾ པཙྪཱགེཧེསུ ཋཔཱཔེཏྭཱ ཨཏིརེཀཱནི པཱཀཱརཾ ནིསྶཱཡ ཋཔཱཔེསཱི’’ཏི ཨུཔནིཀྑིཏྟཀཱནཉྙེཝ སནྟིཀཱ ཝཙནཾ སུཏྭཱ ཀེཝཊྚཾ ཨཱཧ – ‘‘ཨཱཙརིཡ, དཱརུཀྑཡེནཔི ན སཀྐཱ ཨམྷེཧི གཎྷིཏུཾ, ཨཱཧརཐེཀཾ ཨུཔཱཡ’’ནྟི. ‘‘མཱ ཙིནྟཡིཏྠ, མཧཱརཱཛ, ཨཉྙོ ཨུཔཱཡོ ཨཏྠཱི’’ཏི. ‘‘ཨཱཙརིཡ, ཀིཾ ཨུཔཱཡོ ནཱམེས, ནཱཧཾ ཏཝ ཨུཔཱཡསྶ ཨནྟཾ པསྶཱམི, ན སཀྐཱ ཨམྷེཧི ཝེདེཧཾ གཎྷིཏུཾ, ཨམྷཱཀཾ ནགརམེཝ གམིསྶཱམཱ’’ཏི. ‘‘དེཝ, ‘ཙཱུལ༹ནིབྲཧྨདཏྟོ ཨེཀསཏཁཏྟིཡེཧི སདྡྷིཾ ཝེདེཧཾ གཎྷིཏུཾ ནཱསཀྑཱི’ཏི ཨམྷཱཀཾ ལཛྫནཀཾ བྷཝིསྶཏི, ཀིཾ པན མཧོསདྷོཝ པཎྜིཏོ, ཨཧམྤི པཎྜིཏོཡེཝ, ཨེཀཾ ལེསཾ ཀརིསྶཱམཱི’’ཏི. ‘‘ཀིཾ ལེསོ ནཱམ, ཨཱཙརིཡཱ’’ཏི. ‘‘དྷམྨཡུདྡྷཾ ནཱམ ཀརིསྶཱམ, དེཝཱ’’ཏི. ‘‘ཀིམེཏཾ ¶ དྷམྨཡུདྡྷཾ ནཱམཱ’’ཏི? ‘‘མཧཱརཱཛ ན སེནཱ ཡུཛ྄ཛྷིསྶནྟི, དྭིནྣཾ པན རཱཛཱུནཾ དྭེ པཎྜིཏཱ ཨེཀཊྛཱནེ བྷཝིསྶནྟི. ཏེསུ ཡོ ཝནྡིསྶཏི, ཏསྶ པརཱཛཡོ བྷཝིསྶཏི. མཧོསདྷོ པན ཨིམཾ མནྟཾ ན ཛཱནཱཏི, ཨཧཾ མཧལླཀོ, སོ དཧརོ, མཾ དིསྭཱཝ ཝནྡིསྶཏི, ཏདཱ ཝིདེཧོ པརཱཛིཏོ ནཱམ བྷཝིསྶཏི, ཨཐ མཡཾ ཝིདེཧཾ པརཱཛེཏྭཱ ཨཏྟནོ ནགརམེཝ གམིསྶཱམ, ཨེཝཾ ནོ ལཛྫནཀཾ ན བྷཝིསྶཏི. ཨིདཾ དྷམྨཡུདྡྷཾ ནཱམཱ’’ཏི.
པཎྜིཏོ ཏམྤི རཧསྶཾ པུརིམནཡེནེཝ ཉཏྭཱ ‘‘སཙེ ཀེཝཊྚསྶ པརཛྫཱམི, ནཱཧཾ པཎྜིཏོསྨཱི’’ཏི ཙིནྟེསི. ཙཱུལ༹ནིབྲཧྨདཏྟོཔི ‘‘སོབྷནོ, ཨཱཙརིཡ, ཨུཔཱཡོ’’ཏི ཝཏྭཱ ‘‘སྭེ དྷམྨཡུདྡྷཾ ¶ བྷཝིསྶཏི, དྭིནྣམྤི པཎྜིཏཱནཾ དྷམྨེན ¶ ཛཡཔརཱཛཡོ བྷཝིསྶཏི. ཡོ དྷམྨཡུདྡྷཾ ན ཀརིསྶཏི, སོཔི པརཱཛིཏོ ནཱམ བྷཝིསྶཏཱི’’ཏི པཎྞཾ ལིཁཱཔེཏྭཱ ཙཱུལ༹དྭཱརེན ཝེདེཧསྶ པེསེསི. ཏཾ སུཏྭཱ ཝེདེཧོ པཎྜིཏཾ པཀྐོསཱཔེཏྭཱ ཏམཏྠཾ ཨཱཙིཀྑི. ཏཾ པཝཏྟིཾ སུཏྭཱ པཎྜིཏོ ‘‘སཱདྷུ, དེཝ, སྭེ པཱཏོཝ པཙྪིམདྭཱརེ དྷམྨཡུདྡྷམཎྜལཾ སཛྫེསྶནྟི, ‘དྷམྨཡུདྡྷམཎྜལཾ ཨཱགཙྪཏཱུ’ཏི པེསེཐཱ’’ཏི ཨཱཧ. ཏཾ སུཏྭཱ རཱཛཱ ཨཱགཏདཱུཏསྶེཝ ཧཏྠེ པཎྞཀཾ ཨདཱསི. པཎྜིཏོ པུནདིཝསེ ‘‘ཀེཝཊྚསྶེཝ པརཱཛཡོ ཧོཏཱུ’’ཏི པཙྪིམདྭཱརེ དྷམྨཡུདྡྷམཎྜལཾ སཛྫཱཔེསི. ཏེཔི ཁོ ཨེཀསཏཔུརིསཱ ‘‘ཀོ ཛཱནཱཏི, ཀིཾ བྷཝིསྶཏཱི’’ཏི པཎྜིཏསྶ ཨཱརཀྑཏྠཱཡ ཀེཝཊྚཾ པརིཝཱརཡིཾསུ. ཏེཔི ཨེཀསཏརཱཛཱནོ དྷམྨཡུདྡྷམཎྜལཾ གནྟྭཱ པཱཙཱིནདིསཾ ཨོལོཀེནྟཱ ཨཊྛཾསུ, ཏཐཱ ཀེཝཊྚབྲཱཧྨཎོཔི.
བོདྷིསཏྟོ པན པཱཏོཝ གནྡྷོདཀེན ནྷཏྭཱ སཏསཧསྶགྒྷནཀཾ ཀཱསིཀཝཏྠཾ ནིཝཱསེཏྭཱ སབྦཱལངྐཱརཔཊིམཎྜིཏོ ནཱནགྒརསབྷོཛནཾ བྷུཉྫིཏྭཱ མཧནྟེན པརིཝཱརེན རཱཛདྭཱརཾ གནྟྭཱ ‘‘པཝིསཏུ མེ པུཏྟོ’’ཏི ཝུཏྟེ པཝིསིཏྭཱ རཱཛཱནཾ ཝནྡིཏྭཱ ཨེཀམནྟཾ ཋཏྭཱ ‘‘ཀུཧིཾ གམིསྶསི, ཏཱཏཱ’’ཏི ཝུཏྟེ ‘‘དྷམྨཡུདྡྷམཎྜལཾ གམིསྶཱམཱི’’ཏི ཨཱཧ. ‘‘ཀིཾ ལདྡྷུཾ ཝཊྚཏཱི’’ཏི? ‘‘དེཝ, ཀེཝཊྚབྲཱཧྨཎཾ མཎིརཏནེན ཝཉྩེཏུཀཱམོམྷི, ཨཊྛཝངྐཾ མཎིརཏནཾ ལདྡྷུཾ ཝཊྚཏཱི’’ཏི. ‘‘གཎྷ, ཏཱཏཱ’’ཏི. སོ ཏཾ གཧེཏྭཱ རཱཛཱནཾ ཝནྡིཏྭཱ རཱཛནིཝེསནཱ ཨོཏིཎྞོ སཧཛཱཏེཧི ཡོདྷསཧསྶེཧི པརིཝུཏོ ནཝུཏིཀཧཱཔཎསཧསྶགྒྷནཀཾ ¶ སེཏསིནྡྷཝཡུཏྟཾ རཐཝརམཱརུཡ྄ཧ པཱཏརཱསཝེལཱཡ དྭཱརསམཱིཔཾ པཱཔུཎི. ཀེཝཊྚོ པན ‘‘ཨིདཱནི ཨཱགམིསྶཏི, ཨིདཱནི ཨཱགམིསྶཏཱི’’ཏི ཏསྶཱགམནཾ ཨོལོཀེནྟོཡེཝ ཨཊྛཱསི, ཨོལོཀནེན དཱིགྷགཱིཝཏཾ པཏྟོ ཝིཡ ཨཧོསི, སཱུརིཡཏེཛེན སེདཱ མུཙྩནྟི. མཧཱསཏྟོཔི མཧཱཔརིཝཱརཏཱཡ མཧཱསམུདྡོ ཝིཡ ཨཛ྄ཛྷོཏྠརནྟོ ཀེསརསཱིཧོ ཝིཡ ཨཚམྦྷིཏོ ཝིགཏལོམཧཾསོ དྭཱརཾ ཝིཝརཱཔེཏྭཱ ནགརཱ ནིཀྑམྨ རཐཱ ཨོརུཡ྄ཧ སཱིཧོ ཝིཡ ཝིཛམྦྷམཱནོ པཱཡཱསི. ཨེཀསཏརཱཛཱནོཔི ཏསྶ རཱུཔསིརིཾ དིསྭཱ ‘‘ཨེས ཀིར སིརིཝཌྜྷནསེཊྛིཔུཏྟོ མཧོསདྷཔཎྜིཏོ པཉྙཱཡ སཀལཛམྦུདཱིཔེ ཨདུཏིཡོ’’ཏི ཨུཀྐུཊྛིསཧསྶཱནི པཝཏྟཡིཾསུ.
སོཔི མརུགཎཔརིཝུཏོ ཝིཡ སཀྐོ ཨནོམེན སིརིཝིབྷཝེན ཏཾ མཎིརཏནཾ ཧཏྠེན གཧེཏྭཱ ཀེཝཊྚཱབྷིམུཁོ ཨགམཱསི. ཀེཝཊྚོཔི ཏཾ དིསྭཱཝ ¶ སཀབྷཱཝེན སཎྛཱཏུཾ ཨསཀྐོནྟོ པཙྩུགྒམནཾ ཀཏྭཱ ཨེཝམཱཧ – ‘‘པཎྜིཏ མཧོསདྷ, མཡཾ དྭེ པཎྜིཏཱ, ཨམྷཱཀཾ ཏུམྷེ ནིསྶཱཡ ཨེཏྟཀཾ ཀཱལཾ ཝསནྟཱནཾ ཏུམྷེཧི པཎྞཱཀཱརམཏྟམྤི ན པེསིཏཔུབྦཾ, ཀསྨཱ ཨེཝམཀཏྠཱ’’ཏི? ཨཐ ནཾ མཧཱསཏྟོ ‘‘པཎྜིཏ, ཏུམྷཱཀཾ ཨནུཙྪཝིཀཾ པཎྞཱཀཱརཾ ཨོལོཀེནྟཱ ཨཛྫ མཡཾ ཨིམཾ མཎིརཏནཾ ¶ ལབྷིམྷཱ, ཧནྡ, ཨིམཾ མཎིརཏནཾ གཎྷཐ, ཨེཝརཱུཔཾ ནཱམ ཨཉྙཾ མཎིརཏནཾ ནཏྠཱི’’ཏི ཨཱཧ. སོ ཏསྶ ཧཏྠེ ཛལམཱནཾ མཎིརཏནཾ དིསྭཱ ‘‘དཱཏུཀཱམོ མེ བྷཝིསྶཏཱི’’ཏི ཙིནྟེཏྭཱ ‘‘ཏེན ཧི, པཎྜིཏ, དེཧཱི’’ཏི ཧཏྠཾ པསཱརེསི. མཧཱསཏྟོ ‘‘གཎྷཱཧི, ཨཱཙརིཡཱ’’ཏི ཁིཔིཏྭཱ པསཱརིཏཧཏྠསྶ ཨངྒུལཱིསུ པཱཏེསི. བྲཱཧྨཎོ གརུཾ མཎིརཏནཾ ཨངྒུལཱིཧི དྷཱརེཏུཾ ནཱསཀྑི. མཎིརཏནཾ པརིགལི༹ཏྭཱ མཧཱསཏྟསྶ པཱདམཱུལེ པཏི. བྲཱཧྨཎོ ལོབྷེན ‘‘གཎྷིསྶཱམི ན’’ནྟི ཏསྶ པཱདམཱུལེ ཨོཎཏོ ཨཧོསི. ཨཐསྶ མཧཱསཏྟོ ཨུཊྛཱཏུཾ ཨདཏྭཱ ཨེཀེན ཧཏྠེན ཁནྡྷཊྛིཀེ, ཨེཀེན པིཊྛིཀཙྪཱཡཾ གཧེཏྭཱ ‘‘ཨུཊྛེཐ ཨཱཙརིཡ, ཨུཊྛེཐ ཨཱཙརིཡ, ཨཧཾ ཨཏིདཧརོ ཏུམྷཱཀཾ ནཏྟུམཏྟོ, མཱ མཾ ཝནྡཐཱ’’ཏི ཝདནྟོ ཨཔརཱཔརཾ ཀཏྭཱ མུཁཾ བྷཱུམིཡཾ གྷཾསིཏྭཱ ལོཧིཏམཀྑིཏཾ ཀཏྭཱ ‘‘ཨནྡྷབཱལ, ཏྭཾ མམ སནྟིཀཱ ཝནྡནཾ པཙྩཱསཱིསསཱི’’ཏི གཱིཝཱཡཾ ¶ གཧེཏྭཱ ཁིཔི. སོ ཨུསབྷམཏྟེ ཋཱནེ པཏིཏྭཱ ཨུཊྛཱཡ པལཱཡི. མཎིརཏནཾ པན མཧཱསཏྟསྶ མནུསྶཱཡེཝ གཎྷིཾསུ.
བོདྷིསཏྟསྶ པན ‘‘ཨུཊྛེཐ ཨཱཙརིཡ, ཨུཊྛེཐ ཨཱཙརིཡ, མཱ མཾ ཝནྡཐཱ’’ཏི ཝཙཱིགྷོསོ སཀལཔརིསཾ ཚཱདེཏྭཱ ཨཊྛཱསི. ‘‘ཀེཝཊྚབྲཱཧྨཎོ མཧོསདྷསྶ པཱདེ ཝནྡཏཱི’’ཏི པུརིསཱཔིསྶ ཨེཀཔྤཧཱརེནེཝ ཨུནྣཱདཱདཱིནི ཨཀཾསུ. བྲཧྨདཏྟཾ ཨཱདིཾ ཀཏྭཱ སབྦེཔི ཏེ རཱཛཱནོ ཀེཝཊྚཾ མཧཱསཏྟསྶ པཱདམཱུལེ ཨོཎཏཾ ཨདྡསཾསུཡེཝ. ཏེ ‘‘ཨམྷཱཀཾ པཎྜིཏེན མཧོསདྷོ ཝནྡིཏོ, ཨིདཱནི པརཱཛིཏམྷཱ, ན ནོ ཛཱིཝིཏཾ དསྶཏཱི’’ཏི ཨཏྟནོ ཨཏྟནོ ཨསྶེ ཨབྷིརུཧིཏྭཱ ཨུཏྟརཔཉྩཱལཱབྷིམུཁཱ པལཱཡིཏུཾ ཨཱརབྷིཾསུ. ཏེ པལཱཡནྟེ དིསྭཱ བོདྷིསཏྟསྶ པུརིསཱ ‘‘ཙཱུལ༹ནིབྲཧྨདཏྟོ ཨེཀསཏཁཏྟིཡེ གཧེཏྭཱ པལཱཡཏཱི’’ཏི པུན ཨུཀྐུཊྛིམཀཾསུ. ཏཾ སུཏྭཱ ཏེ རཱཛཱནོ མརཎབྷཡབྷཱིཏཱ བྷིཡྻོསོམཏྟཱཡ པལཱཡནྟཱ སེནངྒཾ བྷིནྡིཾསུ. བོདྷིསཏྟསྶ པུརིསཱཔི ནདནྟཱ ཝགྒནྟཱ སུཊྛུཏརཾ ཀོལཱཧལམཀཾསུ ¶ . མཧཱསཏྟོ སེནངྒཔརིཝུཏོ ནགརམེཝ པཱཝིསི. ཙཱུལ༹ནིབྲཧྨདཏྟསྶ སེནཱཔི ཏིཡོཛནམཏྟཾ པཀྑནྡི.
ཀེཝཊྚོ ཨསྶཾ ཨབྷིརུཡ྄ཧ ནལཱཊེ ལོཧིཏཾ པུཉྪམཱནོ སེནཾ པཏྭཱ ཨསྶཔིཊྛིཡཾ ནིསིནྣོཝ ‘‘བྷོནྟོ མཱ པལཱཡཐ, བྷོནྟོ མཱ པལཱཡཐ, ནཱཧཾ གཧཔཏིཔུཏྟཾ ཝནྡཱམི, ཏིཊྛཐ ཏིཊྛཐཱ’’ཏི ཨཱཧ. སེནཱ ཨསདྡཧནྟཱ ཨཊྛཏྭཱ ཨཱགཙྪནྟཾ ཀེཝཊྚཾ ཨཀྐོསནྟཱ པརིབྷཱསནྟཱ ‘‘པཱཔདྷམྨ དུཊྛབྲཱཧྨཎ, ‘དྷམྨཡུདྡྷཾ ནཱམ ཀརིསྶཱམཱི’ཏི ཝཏྭཱ ནཏྟུམཏྟཾ ཨཔྤཧོནྟམྤི ཝནྡཏི, ནཏྠི ཏཝ ཀཏྟབྦ’’ནྟི ཀཐཾ ཨསུཎནྟཱ ཝིཡ གཙྪནྟེཝ. སོ ཝེགེན གནྟྭཱ སེནཾ པཱཔུཎིཏྭཱ ‘‘བྷོནྟོ ཝཙནཾ སདྡཧཐ མཡ྄ཧཾ, ནཱཧཾ ཏཾ ཝནྡཱམི, མཎིརཏནེན མཾ ཝཉྩེསཱི’’ཏི སབྦེཔི ཏེ རཱཛཱནོ ནཱནཱཀཱརཎེཧི སམྦོདྷེཏྭཱ ཨཏྟནོ ཀཐཾ གཎྷཱཔེཏྭཱ ཏཐཱ བྷིནྣཾ སེནཾ པཊིནིཝཏྟེསི. སཱ པན ཏཱཝ ¶ མཧཏཱི སེནཱ སཙེ ཨེཀེཀཔཾསུམུཊྛིཾ ཝཱ ཨེཀེཀལེཌྜུཾ ཝཱ གཧེཏྭཱ ནགརཱབྷིམུཁཱ ཁིཔེཡྻ, པརིཁཾ པཱུརེཏྭཱ པཱཀཱརཔྤམཱཎཱ རཱསི བྷཝེཡྻ. བོདྷིསཏྟཱནཾ པན ཨདྷིཔྤཱཡོ ནཱམ སམིཛ྄ཛྷཏིཡེཝ, ཏསྨཱ ཨེཀོཔི པཾསུམུཊྛིཾ ཝཱ ལེཌྜུཾ ཝཱ ནགརཱབྷིམུཁཾ ཁིཔནྟོ ནཱམ ནཱཧོསི. སབྦེཔི ཏེ ནིཝཏྟིཏྭཱ ཨཏྟནོ ཨཏྟནོ ཁནྡྷཱཝཱརཊྛཱནམེཝ པཙྩཱགམིཾསུ ¶ .
རཱཛཱ ཀེཝཊྚཾ པུཙྪི ‘‘ཀིཾ ཀརོམ, ཨཱཙརིཡཱ’’ཏི. ‘‘དེཝ, ཀསྶཙི ཙཱུལ༹དྭཱརེན ནིཀྑམིཏུཾ ཨདཏྭཱ སཉྩཱརཾ ཚིནྡཱམ, མནུསྶཱ ནིཀྑམིཏུཾ ཨལབྷནྟཱ ཨུཀྐཎྛིཏྭཱ དྭཱརཾ ཝིཝརིསྶནྟི, ཨཐ མཡཾ པཙྩཱམིཏྟཾ གཎྷིསྶཱམཱ’’ཏི. པཎྜིཏོ ཏཾ པཝཏྟིཾ པུརིམནཡེནེཝ ཉཏྭཱ ཙིནྟེསི ‘‘ཨིམེསུ ཙིརཾ ཨིདྷེཝ ཝསནྟེསུ ཕཱསུཀཾ ནཱམ ནཏྠི. ཨུཔཱཡེནེཝ ཏེ པལཱཔེཏུཾ ཝཊྚཏཱི’’ཏི. སོ ‘‘མནྟེན ཏེ པལཱཔེསྶཱམཱི’’ཏི ཨེཀཾ མནྟཀུསལཾ ཨུཔདྷཱརེནྟོ ཨནུཀེཝཊྚཾ ནཱམ བྲཱཧྨཎཾ དིསྭཱ ཏཾ པཀྐོསཱཔེཏྭཱ ‘‘ཨཱཙརིཡ, ཨམྷཱཀཾ ཨེཀཾ ཀམྨཾ ནིདྡྷརིཏུཾ ཝཊྚཏཱི’’ཏི ཨཱཧ. ‘‘ཀིཾ ཀརོམ, པཎྜིཏ, ཝདེཧཱི’’ཏི. ‘‘ཨཱཙརིཡ, ཏུམྷེ ཨནུཔཱཀཱརེ ཋཏྭཱ ཨམྷཱཀཾ མནུསྶཱནཾ པམཱདཾ ཨོལོཀེཏྭཱ ཨནྟརནྟརཱ བྲཧྨདཏྟསྶ མནུསྶཱནཾ པཱུཝམཙྪམཾསཱདཱིནི ཁིཔིཏྭཱ ‘‘ཨམྦྷོ, ཨིདཉྩིདཉྩ ཁཱདཐ མཱ ཨུཀྐཎྛཐ, ཨཉྙཾ ཀཏིཔཱཧཾ ཝསིཏུཾ ཝཱཡམཐ, ནགརཝཱསིནོ པཉྫརེ བདྡྷཀུཀྐུཊཱ ཝིཡ ཨུཀྐཎྛིཏཱ ནཙིརསྶེཝ ཝོ དྭཱརཾ ཝིཝརིསྶནྟི. ཨཐ ཏུམྷེ ཝེདེཧཉྩ དུཊྛགཧཔཏིཔུཏྟཉྩ གཎྷིསྶཐཱ’’ཏི ཝདེཡྻཱཐ ¶ . ཨམྷཱཀཾ མནུསྶཱ ཏཾ ཀཐཾ སུཏྭཱ ཏུམྷེ ཨཀྐོསིཏྭཱ ཏཛྫེཏྭཱ བྲཧྨདཏྟསྶ མནུསྶཱནཾ པསྶནྟཱནཉྙེཝ ཏུམྷེ ཧཏྠཔཱདེསུ གཧེཏྭཱ ཝེལུ༹པེསིཀཱདཱིཧི པཧརནྟཱ ཝིཡ ཧུཏྭཱ ཀེསེ ཨོཧཱརེཏྭཱ པཉྩ ཙཱུལཱ༹ གཱཧཱཔེཏྭཱ ཨིཊྛཀཙུཎྞེན ཨོཀིརཱཔེཏྭཱ ཀཎཝཱིརམཱལཾ ཀཎྞེ ཀཏྭཱ ཀཏིཔཡཔཧཱརེ དཏྭཱ པིཊྛིཡཾ རཱཛིཡོ དསྶེཏྭཱ པཱཀཱརཾ ཨཱརོཔེཏྭཱ སིཀྐཱཡ པཀྑིཔིཏྭཱ ཡོཏྟེན ཨོཏཱརེཏྭཱ ‘‘གཙྪ མནྟབྷེདཀ, ཙོརཱ’’ཏི ཙཱུལ༹ནིབྲཧྨདཏྟསྶ མནུསྶཱནཾ དསྶནྟི. ཏེ ཏཾ རཉྙོ སནྟིཀཾ ཨཱནེསྶནྟི. རཱཛཱ ཏཾ དིསྭཱ ‘‘ཀོ ཏེ ཨཔརཱདྷོ’’ཏི པུཙྪིསྶཏི. ཨཐསྶ ཨེཝཾ ཝདེཡྻཱཐ ‘‘མཧཱརཱཛ, མཡ྄ཧཾ པུབྦེ ཡསོ མཧནྟོ, གཧཔཏིཔུཏྟོ མནྟབྷེདཀོ’’ཏི མཾ ཀུཛ྄ཛྷིཏྭཱ རཉྙོ ཀཐེཏྭཱ སབྦཾ མེ ཝིབྷཝཾ ཨཙྪིནྡི, ‘‘ཨཧཾ མམ ཡསབྷེདཀསྶ གཧཔཏིཔུཏྟསྶ སཱིསཾ གཎྷཱཔེསྶཱམཱི’’ཏི ཏུམྷཱཀཾ མནུསྶཱནཾ ཨུཀྐཎྛིཏམོཙནེན ཨེཏེསཾ ¶ ཋིཏཱནཾ ཁཱདནཱིཡཾ ཝཱ བྷོཛནཱིཡཾ ཝཱ དེམི. ཨེཏྟཀེན མཾ པོརཱཎཝེརཾ ཧདཡེ ཀཏྭཱ ཨིམཾ བྱསནཾ པཱཔེསི. ‘‘ཏཾ སབྦཾ ཏུམྷཱཀཾ མནུསྶཱ ཛཱནནྟི, མཧཱརཱཛཱ’’ཏི ནཱནཔྤཀཱརེཧི ཏཾ སདྡཧཱཔེཏྭཱ ཝིསྶཱསེ ཨུཔྤནྣེ ཝདེཡྻཱཐ ‘‘མཧཱརཱཛ, ཏུམྷེ མམཾ ལདྡྷཀཱལཏོ པཊྛཱཡ མཱ ཙིནྟཡིཏྠ. ཨིདཱནི ཝེདེཧསྶ ཙ གཧཔཏིཔུཏྟསྶ ཙ ཛཱིཝིཏཾ ནཏྠི, ཨཧཾ ཨིམསྨིཾ ནགརེ པཱཀཱརསྶ ཐིརཊྛཱནདུབྦལཊྛཱནཉྩ པརིཁཱཡཾ ཀུམྦྷཱིལཱདཱིནཾ ཨཏྠིཊྛཱནཉྩ ནཏྠིཊྛཱནཉྩ ཛཱནཱམི, ན ཙིརསྶེཝ ཝོ ནགརཾ གཧེཏྭཱ དསྶཱམཱི’’ཏི. ཨཐ སོ རཱཛཱ སདྡཧིཏྭཱ ¶ ཏུམྷཱཀཾ སཀྐཱརཾ ཀརིསྶཏི, སེནཱཝཱཧནཉྩ པཊིཙྪཱཔེསྶཏི. ཨཐསྶ སེནཾ ཝཱལ༹ཀུམྦྷཱིལཊྛཱནེསུཡེཝ ཨོཏཱརེཡྻཱཐ. ཏསྶ སེནཱ ཀུམྦྷཱིལབྷཡེན ན ཨོཏརིསྶཏི, ཏདཱ ཏུམྷེ རཱཛཱནཾ ཨུཔསངྐམིཏྭཱ ‘‘ཏུམྷཱཀཾ སེནཱཡ, དེཝ, གཧཔཏིཔུཏྟེན ལཉྫོ དིནྣོ, སབྦེ རཱཛཱནོ ཙ ཨཱཙརིཡཀེཝཊྚཉྩ ཨཱདིཾ ཀཏྭཱ ན ཀེནཙི ལཉྫོ ཨགྒཧིཏོ ནཱམ ཨཏྠི. ཀེཝལཾ ཨེཏེ ཏུམྷེ པརིཝཱརེཏྭཱ ཙརནྟི, སབྦེ པན གཧཔཏིཔུཏྟསྶ སནྟཀཱཝ, ཨཧམེཀོཝ ཏུམྷཱཀཾ པུརིསོ. སཙེ མེ ན སདྡཧཐ, སབྦེ རཱཛཱནོ ཨལངྐརིཏྭཱ མཾ དསྶནཱཡ ཨཱགཙྪནྟཱུ’’ཏི པེསེཐ. ‘‘ཨཐ ནེསཾ གཧཔཏིཔུཏྟེན ཨཏྟནོ ནཱམརཱུཔཾ ལིཁིཏྭཱ དིནྣེསུ ཝཏྠཱལངྐཱརཁགྒཱདཱིསུ ཨཀྑརཱནི དིསྭཱ ནིཊྛཾ གཙྪེཡྻཱཐཱ’’ཏི ཝདེཡྻཱཐ. སོ ཏཐཱ ཀཏྭཱ ཏཱནི ¶ དིསྭཱ ནིཊྛཾ གནྟྭཱ བྷཱིཏཏསིཏོ ཏེ རཱཛཱནོ ཨུཡྻོཛེཏྭཱ ‘‘ཨིདཱནི ཀིཾ ཀརོམ པཎྜིཏཱ’’ཏི ཏུམྷེ པུཙྪིསྶཏི. ཏམེནཾ ཏུམྷེ ཨེཝཾ ཝདེཡྻཱཐ ‘‘མཧཱརཱཛ, གཧཔཏིཔུཏྟོ བཧུམཱཡོ. སཙེ ཨཉྙཱནི ཀཏིཔཡདིཝསཱནི ཝསིསྶཐ, སབྦཾ ཝོ སེནཾ ཨཏྟནོ ཧཏྠགཏཾ ཀཏྭཱ ཏུམྷེ གཎྷིསྶཏི. ཏསྨཱ པཔཉྩཾ ཨཀཏྭཱ ཨཛྫེཝ མཛ྄ཛྷིམཡཱམཱནནྟརེ ཨསྶཔིཊྛིཡཾ ནིསཱིདིཏྭཱ པལཱཡིསྶཱམ, མཱ ནོ པརཧཏྠེ མརཎཾ ཧོཏཱུ’’ཏི. སོ ཏུམྷཱཀཾ ཝཙནཾ སུཏྭཱ ཏཐཱ ཀརིསྶཏི. ཏུམྷེ ཏསྶ པལཱཡནཝེལཱཡ ནིཝཏྟིཏྭཱ ཨམྷཱཀཾ མནུསྶེ ཛཱནཱཔེཡྻཱཐཱཏི.
ཏཾ སུཏྭཱ ཨནུཀེཝཊྚབྲཱཧྨཎོ ‘‘སཱདྷུ པཎྜིཏ, ཀརིསྶཱམི ཏེ ཝཙན’’ནྟི ཨཱཧ. ‘‘ཏེན ཧི ཀཏིཔཡཔཧཱརེ སཧིཏུཾ ཝཊྚཏཱི’’ཏི. ‘‘པཎྜིཏ ¶ , མམ ཛཱིཝིཏཉྩ ཧཏྠཔཱདེ ཙ ཋཔེཏྭཱ སེསཾ ཨཏྟནོ རུཙིཝསེན ཀརོཧཱི’’ཏི. སོ ཏསྶ གེཧེ མནུསྶཱནཾ སཀྐཱརཾ ཀཱརེཏྭཱ ཨནུཀེཝཊྚཾ ཝུཏྟནཡེན ཝིཔྤཀཱརཾ པཱཔེཏྭཱ ཡོཏྟེན ཨོཏཱརེཏྭཱ བྲཧྨདཏྟམནུསྶཱནཾ དཱཔེསི. ཨཐ ཏེ ཏཾ གཧེཏྭཱ ཏསྶ དསྶེསུཾ. རཱཛཱ ཏཾ ཝཱིམཾསིཏྭཱ སདྡཧིཏྭཱ སཀྐཱརམསྶ ཀཏྭཱ སེནཾ པཊིཙྪཱཔེསི. སོཔི ཏཾ ཝཱལ༹ཀུམྦྷཱིལཊྛཱནེསུཡེཝ ཨོཏཱརེཏི. མནུསྶཱ ཀུམྦྷཱིལེཧི ཁཛྫམཱནཱ ཨཊྚཱལཀཊྛིཏེཧི མནུསྶེཧི ཨུསུསཏྟིཏོམརེཧི ཝིཛ྄ཛྷིཡམཱནཱ མཧཱཝིནཱསཾ པཱཔུཎནྟི. ཏཏོ པཊྛཱཡ ཀོཙི བྷཡེན ཨུཔགནྟུཾ ན སཀྐོཏི. ཨནུཀེཝཊྚོ རཱཛཱནཾ ཨུཔསངྐམིཏྭཱ ‘‘ཏུམྷཱཀཾ ཨཏྠཱཡ ཡུཛ྄ཛྷནཀཱ ནཱམ ནཏྠི, སབྦེཧི ལཉྫོ གཧིཏོ, ཨསདྡཧནྟོ པཀྐོསཱཔེཏྭཱ ནིཝཏྠཝཏྠཱདཱིསུ ཨཀྑརཱནི ཨོལོཀེཐཱ’’ཏི ཨཱཧ. རཱཛཱ ཏཐཱ ཀཏྭཱ སབྦེསཾ ཝཏྠཱདཱིསུ ཨཀྑརཱནི དིསྭཱ ‘‘ཨདྡྷཱ ཨིམེཧི ལཉྫོ གཧིཏོ’’ཏི ནིཊྛཾ གནྟྭཱ ‘‘ཨཱཙརིཡ, ཨིདཱནི ཀིཾ ཀཏྟབྦ’’ནྟི པུཙྪིཏྭཱ ‘‘དེཝ, ཨཉྙཾ ཀཱཏབྦཾ ནཏྠི. སཙེ པཔཉྩཾ ཀརིསྶཐ, གཧཔཏིཔུཏྟོ ཝོ གཎྷིསྶཏི, ཨཱཙརིཡཀེཝཊྚོཔི ཀེཝལཾ ནལཱཊེ ཝཎཾ ཀཏྭཱ ཙརཏི, ལཉྫོ པན ཨེཏེནཔི གཧིཏོ. ཨཡཉྷི མཎིརཏནཾ གཧེཏྭཱ ཏུམྷེ ཏིཡོཛནཾ པལཱཔེསི, པུན སདྡཧཱཔེཏྭཱ ནིཝཏྟེསི, ཨཡམྤི པརིབྷིནྡཀོཝ. ཨེཀརཏྟིཝཱསོཔི མཡ྄ཧཾ ན རུཙྩཏི, ཨཛྫེཝ མཛ྄ཛྷིམཡཱམསམནནྟརེ པལཱཡིཏུཾ ¶ ཝཊྚཏི, མཾ ཋཔེཏྭཱ ཨཉྙོ ཏཝ སུཧདཡོ ནཱམ ནཏྠཱི’’ཏི ཝུཏྟེ ¶ ‘‘ཏེན ཧི ཨཱཙརིཡ ཏུམྷེཡེཝ མེ ཨསྶཾ ཀཔྤེཏྭཱ ཡཱནསཛྫཾ ཀརོཐཱ’’ཏི ཨཱཧ.
བྲཱཧྨཎོ ཏསྶ ནིཙྪཡེན པལཱཡནབྷཱཝཾ ཉཏྭཱ ‘‘མཱ བྷཱཡི, མཧཱརཱཛཱ’’ཏི ཨསྶཱསེཏྭཱ བཧི ནིཀྑམིཏྭཱ ཨུཔནིཀྑིཏྟཀཔུརིསཱནཾ ‘‘ཨཛྫ རཱཛཱ པལཱཡིསྶཏི, མཱ ནིདྡཱཡིཏྠཱ’’ཏི ཨོཝཱདཾ དཏྭཱ རཉྙོ ཨསྶོ ཡཐཱ ཨཱཀཌྜྷིཏོ སུཊྛུཏརཾ པལཱཡཏི, ཨེཝཾ ཨཝཀཔྤནཱཡ ཀཔྤེཏྭཱ མཛ྄ཛྷིམཡཱམསམནནྟརེ ‘‘ཀཔྤིཏོ, དེཝ, ཨསྶོ, ཝེལཾ ཛཱནཱཧཱི’’ཏི ཨཱཧ. རཱཛཱ ཨསྶཾ ཨབྷིརུཧིཏྭཱ པལཱཡི. ཨནུཀེཝཊྚོཔི ཨསྶཾ ཨབྷིརུཧིཏྭཱ ཏེན སདྡྷིཾ གཙྪནྟོ ཝིཡ ཐོཀཾ གནྟྭཱ ནིཝཏྟོ. ཨཝཀཔྤནཱཡ ཀཔྤིཏཨསྶོ ¶ ཨཱཀཌྜྷིཡམཱནོཔི རཱཛཱནཾ གཧེཏྭཱ པལཱཡི. ཨནུཀེཝཊྚོ སེནཱཡ ཨནྟརཾ པཝིསིཏྭཱ ‘‘ཙཱུལ༹ནིབྲཧྨདཏྟོ པལཱཏོ’’ཏི ཨུཀྐུཊྛིམཀཱསི. ཨུཔནིཀྑིཏྟཀཔུརིསཱཔི ཨཏྟནོ མནུསྶེཧི སདྡྷིཾ ཨུཔགྷོསིཾསུ. སེསརཱཛཱནོ ཏཾ སུཏྭཱ ‘‘མཧོསདྷཔཎྜིཏོ དྭཱརཾ ཝིཝརིཏྭཱ ནིཀྑནྟོ བྷཝིསྶཏི, ན ནོ དཱནི ཛཱིཝིཏཾ དསྶཏཱི’’ཏི བྷཱིཏཏསིཏཱ ཨུཔབྷོགཔརིབྷོགབྷཎྜཱནིཔི ཨནོལོཀེཏྭཱ ཨིཏོ ཙིཏོ ཙ པལཱཡིཾསུ. མནུསྶཱ ‘‘རཱཛཱནོ པལཱཡནྟཱི’’ཏི སུཊྛུཏརཾ ཨུཔགྷོསིཾསུ. ཏཾ སུཏྭཱ དྭཱརཊྚཱལཀཱདཱིསུ ཋིཏཱཔི ཨུནྣཱདིཾསུ ཨཔྥོཊཡིཾསུ. ཨིཏི ཏསྨིཾ ཁཎེ པཐཝཱི ཝིཡ བྷིཛྫམཱནཱ སམུདྡོ ཝིཡ སངྑུབྷིཏོ སཀལནགརཾ ཨནྟོ ཙ བཧི ཙ ཨེཀནིནྣཱདཾ ཨཧོསི. ཨཊྛཱརསཨཀྑོབྷཎིསངྑཱ མནུསྶཱ ‘‘མཧོསདྷཔཎྜིཏེན ཀིར བྲཧྨདཏྟོ ཨེཀསཏརཱཛཱནོ ཙ གཧིཏཱ’’ཏི མརཎབྷཡབྷཱིཏཱ ཨཏྟནོ ཨཏྟནོ ཨུདརབདྡྷསཱཊཀམྤི ཚཌྜེཏྭཱ པལཱཡིཾསུ. ཁནྡྷཱཝཱརཊྛཱནཾ ཏུཙྪཾ ཨཧོསི. ཙཱུལ༹ནིབྲཧྨདཏྟོ ཨེཀསཏེ ཁཏྟིཡེ གཧེཏྭཱ ཨཏྟནོ ནགརམེཝ གཏོ. པུནདིཝསེ པན པཱཏོཝ ནགརདྭཱརཱནི ཝིཝརིཏྭཱ བལཀཱཡཱ ནགརཱ ནིཀྑམིཏྭཱ མཧཱཝིལོཔཾ དིསྭཱ ‘‘ཀིཾ ཀརོམ, པཎྜིཏཱ’’ཏི མཧཱསཏྟསྶ ཨཱརོཙཡིཾསུ. སོ ཨཱཧ – ‘‘ཨེཏེཧི ཚཌྜིཏཾ དྷནཾ ཨམྷཱཀཾ པཱཔུཎཱཏི, སབྦེསཾ རཱཛཱུནཾ སནྟཀཾ ཨམྷཱཀཾ རཉྙོ, དེཐ, སེཊྛཱིནཉྩ ཀེཝཊྚབྲཱཧྨཎསྶ ཙ སནྟཀཾ ཨམྷཱཀཾ ཨཱཧརཐ, ཨཝསེསཾ པན ནགརཝཱསིནོ གཎྷནྟཱུ’’ཏི. ཏེསཾ མཧགྒྷརཏནབྷཎྜམེཝ ཨཱཧརནྟཱནཾ ཨཌྜྷམཱསོ ཝཱིཏིཝཏྟོ. སེསཾ པན ཙཏཱུཧི མཱསེཧི ¶ ཨཱཧརིཾསུ. མཧཱསཏྟོ ཨནུཀེཝཊྚསྶ མཧནྟཾ སཀྐཱརམཀཱསི. ཏཏོ པཊྛཱཡ ཙ ཀིར མིཐིལཝཱསིནོ བཧཱུ ཧིརཉྙསུཝཎྞཱ ཛཱཏཱ. བྲཧྨདཏྟསྶཔི ཏེཧི རཱཛཱུཧི སདྡྷིཾ ཨུཏྟརཔཉྩཱལནགརེ ཝསནྟསྶ ཨེཀཝསྶཾ ཨཏཱིཏཾ.
བྲཧྨདཏྟསྶ ཡུདྡྷཔརཱཛཡཀཎྜཾ ནིཊྛིཏཾ.
སུཝཀཎྜཾ
ཨཐེཀདིཝསཾ ¶ ཀེཝཊྚོ ཨཱདཱསེ མུཁཾ ཨོལོཀེནྟོ ནལཱཊེ ཝཎཾ དིསྭཱ ‘‘ཨིདཾ གཧཔཏིཔུཏྟསྶ ཀམྨཾ, ཏེནཱཧཾ ཨེཏྟཀཱནཾ རཱཛཱུནཾ ཨནྟརེ ལཛྫཱཔིཏོ’’ཏི ཙིནྟེཏྭཱ སམུཔྤནྣཀོདྷོ ཧུཏྭཱ ‘‘ཀདཱ ནུ ཁྭསྶ པིཊྛིཾ པསྶིཏུཾ སམཏྠོ བྷཝིསྶཱམཱི’’ཏི ཙིནྟེནྟོ ‘‘ཨཏྠེསོ ཨུཔཱཡོ, ཨམྷཱཀཾ རཉྙོ དྷཱིཏཱ པཉྩཱལཙནྡཱི ནཱམ ཨུཏྟམརཱུཔདྷརཱ ¶ དེཝཙྪརཱཔཊིབྷཱགཱ, ཏཾ ཝིདེཧརཉྙོ དསྶཱམཱ’’ཏི ཝཏྭཱ ‘‘ཝེདེཧཾ ཀཱམེན པལོབྷེཏྭཱ གིལིཏབལི༹སཾ ཝིཡ མཙྪཾ སདྡྷིཾ མཧོསདྷེན ཨཱནེཏྭཱ ཨུབྷོ ཏེ མཱརེཏྭཱ ཛཡཔཱནཾ པིཝིསྶཱམཱ’’ཏི སནྣིཊྛཱནཾ ཀཏྭཱ རཱཛཱནཾ ཨུཔསངྐམིཏྭཱ ཨཱཧ – ‘‘དེཝ, ཨེཀོ མནྟོ ཨཏྠཱི’’ཏི. ‘‘ཨཱཙརིཡ, ཏཝ མནྟཾ ནིསྶཱཡ ཨུདརབདྡྷསཱཊཀསྶཔི ཨསྶཱམིནོ ཛཱཏམྷཱ, ཨིདཱནི ཀིཾ ཀརིསྶསི, ཏུཎྷཱི ཧོཧཱི’’ཏི. ‘‘མཧཱརཱཛ, ཨིམིནཱ ཨུཔཱཡེན སདིསོ ཨཉྙོ ནཏྠཱི’’ཏི. ‘‘ཏེན ཧི བྷཎཱཧཱི’’ཏི. ‘‘མཧཱརཱཛ, ཨམྷེཧི དྭཱིཧིཡེཝ ཨེཀཏོ བྷཝིཏུཾ ཝཊྚཏཱི’’ཏི. ‘‘ཨེཝཾ ཧོཏཱུ’’ཏི. ཨཐ ནཾ བྲཱཧྨཎོ ཨུཔརིཔཱསཱདཏལཾ ཨཱརོཔེཏྭཱ ཨཱཧ – ‘‘མཧཱརཱཛ, ཝིདེཧརཱཛཱནཾ ཀིལེསེན པལོབྷེཏྭཱ ཨིདྷཱནེཏྭཱ སདྡྷིཾ གཧཔཏིཔུཏྟེན མཱརེསྶཱམཱ’’ཏི. ‘‘སུནྡརོ, ཨཱཙརིཡ, ཨུཔཱཡོ, ཀཐཾ པན ཏཾ པལོབྷེཏྭཱ ཨཱནེསྶཱམཱ’’ཏི? ‘‘མཧཱརཱཛ, དྷཱིཏཱ ཝོ པཉྪཱལཙནྡཱི ཨུཏྟམརཱུཔདྷརཱ, ཏསྶཱ རཱུཔསམྤཏྟིཾ ཙཱཏུརིཡཝིལཱསེན ཀཝཱིཧི གཱིཏཾ བནྡྷཱཔེཏྭཱ ཏཱནི ཀབྦཱནི མིཐིལཱཡཾ གཱཡཱཔེཏྭཱ ‘ཨེཝརཱུཔཾ ཨིཏྠིརཏནཾ ཨལབྷནྟསྶ ཝིདེཧནརིནྡསྶ ཀིཾ རཛྫེནཱ’ཏི ཏསྶ སཝནསཾསགྒེནེཝ པཊིབདྡྷབྷཱཝཾ ཉཏྭཱ ཨཧཾ ཏཏྠ གནྟྭཱ དིཝསཾ ཝཝཏྠཔེསྶཱམི. སོ མཡི དིཝསཾ ཝཝཏྠཔེཏྭཱ ཨཱགཏེ གིལིཏབལི༹སོ ཝིཡ མཙྪོ གཧཔཏིཔུཏྟཾ གཧེཏྭཱ ཨཱགམིསྶཏི, ཨཐ ནེ མཱརེསྶཱམཱ’’ཏི.
རཱཛཱ ཏསྶ ཝཙནཾ སུཏྭཱ ཏུསྶིཏྭཱ ‘‘སུནྡརོ ཨུཔཱཡོ, ཨཱཙརིཡ, ཨེཝཾ ཀརིསྶཱམཱ’’ཏི སམྤཊིཙྪི. ཏཾ པན མནྟཾ ཙཱུལ༹ནིབྲཧྨདཏྟསྶ སཡནཔཱལིཀཱ སཱལི༹ཀཱ ¶ སུཏྭཱ པཙྩཀྑམཀཱསི. རཱཛཱ ནིཔུཎེ ཀབྦཀཱརེ པཀྐོསཱཔེཏྭཱ བཧུཾ དྷནཾ དཏྭཱ དྷཱིཏརཾ ཏེསཾ དསྶེཏྭཱ ‘‘ཏཱཏཱ, ཨེཏིསྶཱ རཱུཔསམྤཏྟིཾ ནིསྶཱཡ ཀབྦཾ ཀརོཐཱ’’ཏི ཨཱཧ. ཏེ ཨཏིམནོཧརཱནི གཱིཏཱནི བནྡྷིཏྭཱ རཱཛཱནཾ སཱཝཡིཾསུ. རཱཛཱ ཏུསྶིཏྭཱ བཧུཾ དྷནཾ ཏེསཾ ཨདཱསི. ཀཝཱིནཾ སནྟིཀཱ ནཊཱ སིཀྑིཏྭཱ སམཛྫམཎྜལེ གཱཡིཾསུ. ཨིཏི ཏཱནི ཝིཏྠཱརིཏཱནི ཨཧེསུཾ. ཏེསུ མནུསྶཱནཾ ཨནྟརེ ཝིཏྠཱརིཏཏྟཾ གཏེསུ རཱཛཱ གཱཡཀེ པཀྐོསཱཔེཏྭཱ ཨཱཧ – ‘‘ཏཱཏཱ, ཏུམྷེ མཧཱསཀུཎེ གཧེཏྭཱ རཏྟིབྷཱགེ རུཀྑཾ ཨབྷིརུཡ྄ཧ ཏཏྠ ནིསིནྣཱ གཱཡིཏྭཱ པཙྩཱུསཀཱལེ ཏེསཾ གཱིཝཱསུ ¶ ཀཾསཏཱལེ བནྡྷིཏྭཱ ཏེ ཨུཔྤཱཏེཏྭཱ ཨོཏརཐཱ’’ཏི. སོ ཀིར ¶ ‘‘པཉྩཱལརཉྙོ དྷཱིཏུ སརཱིརཝཎྞཾ དེཝཏཱཔི གཱཡནྟཱི’’ཏི པཱཀཊབྷཱཝཀརཎཏྠཾ ཏཐཱ ཀཱརེསི. པུན རཱཛཱ ཀཝཱི པཀྐོསཱཔེཏྭཱ ‘‘ཏཱཏཱ, ཨིདཱནི ཏུམྷེ ‘ཨེཝརཱུཔཱ ཀུམཱརིཀཱ ཛམྦུདཱིཔཏལེ ཨཉྙསྶ རཉྙོ ནཱནུཙྪཝིཀཱ, མིཐིལཱཡཾ ཝེདེཧརཉྙོ ཨནུཙྪཝིཀཱ’ཏི རཉྙོ ཙ ཨིསྶརིཡཾ ཨིམཱཡ ཙ རཱུཔཾ ཝཎྞེཏྭཱ གཱིཏཱནི བནྡྷཐཱ’’ཏི ཨཱཧ. ཏེ ཏཐཱ ཀཏྭཱ རཉྙོ ཨཱརོཙཡིཾསུ.
རཱཛཱ ཏེསཾ དྷནཾ དཏྭཱ པུན གཱཡཀེ པཀྐོསཱཔེཏྭཱ ‘‘ཏཱཏཱ, མིཐིལཾ གནྟྭཱ ཏཏྠ ཨིམིནཱཝ ཨུཔཱཡེན གཱཡཐཱ’’ཏི པེསེསི. ཏེ ཏཱནི གཱཡནྟཱ ཨནུཔུབྦེན མིཐིལཾ གནྟྭཱ སམཛྫམཎྜལེ གཱཡིཾསུ. ཏཱནི སུཏྭཱ མཧཱཛནོ ཨུཀྐུཊྛིསཧསྶཱནི པཝཏྟེཏྭཱ ཏེསཾ བཧུཾ དྷནཾ ཨདཱསི. ཏེ རཏྟིསམཡེ རུཀྑེསུཔི གཱཡིཏྭཱ པཙྩཱུསཀཱལེ སཀུཎཱནཾ གཱིཝཱསུ ཀཾསཏཱལེ བནྡྷིཏྭཱ ཨོཏརནྟི. ཨཱཀཱསེ ཀཾསཏཱལསདྡཾ སུཏྭཱ ‘‘པཉྩཱལརཱཛདྷཱིཏུ སརཱིརཝཎྞཾ དེཝཏཱཔི གཱཡནྟཱི’’ཏི སཀལནགརེ ཨེཀཀོལཱཧལཾ ཨཧོསི. རཱཛཱ སུཏྭཱ གཱཡཀེ པཀྐོསཱཔེཏྭཱ ཨནྟོནིཝེསནེ སམཛྫཾ ཀཱརེཏྭཱ ‘‘ཨེཝརཱུཔཾ ཀིར ཨུཏྟམརཱུཔདྷརཾ དྷཱིཏརཾ ཙཱུལ༹ནིརཱཛཱ མཡ྄ཧཾ དཱཏུཀཱམོ’’ཏི ཏུསྶིཏྭཱ ཏེསཾ བཧུཾ དྷནཾ ཨདཱསི. ཏེ ཨཱགནྟྭཱ བྲཧྨདཏྟསྶ ཨཱརོཙེསུཾ. ཨཐ ནཾ ཀེཝཊྚོ ཨཱཧ – ‘‘ཨིདཱནི, མཧཱརཱཛ, དིཝསཾ ཝཝཏྠཔནཏྠཱཡ གམིསྶཱམཱི’’ཏི. ‘‘སཱདྷུ, ཨཱཙརིཡ, ཀིཾ ལདྡྷུཾ ཝཊྚཏཱི’’ཏི? ‘‘ཐོཀཾ པཎྞཱཀཱར’’ནྟི. ‘‘ཏེན ཧི གཎྷཱ’’ཏི དཱཔེསི. སོ ཏཾ ཨཱདཱཡ མཧནྟེན པརིཝཱརེན ཝེདེཧརཊྛཾ པཱཔུཎི. ཏསྶཱགམནཾ སུཏྭཱ ནགརེ ཨེཀཀོལཱཧལཾ ཛཱཏཾ ‘‘ཙཱུལ༹ནིརཱཛཱ ཀིར ཝེདེཧོ ཙ མིཏྟསནྠཝཾ ཀརིསྶནྟི, ཙཱུལ༹ནིརཱཛཱ ཨཏྟནོ དྷཱིཏརཾ ཨམྷཱཀཾ རཉྙོ དསྶཏི ¶ , ཀེཝཊྚོ དིཝསཾ ཝཝཏྠཔེཏུཾ ཨེཏཱི’’ཏི. ཝེདེཧརཱཛཱཔི སུཎི, མཧཱསཏྟོཔི, སུཏྭཱན པནསྶ ཨེཏདཧོསི ‘‘ཏསྶཱགམནཾ མཡ྄ཧཾ ན རུཙྩཏི, ཏཐཏོ ནཾ ཛཱནིསྶཱམཱི’’ཏི. སོ ཙཱུལ༹ནིསནྟིཀེ ཨུཔནིཀྑིཏྟཀཔུརིསཱནཾ སཱསནཾ པེསེསི ‘‘ཨིམམཏྠཾ ཏཐཏོ ཛཱནིཏྭཱ པེསེནྟཱུ’’ཏི. ཨཐ ཏེ ‘‘མཡམེཏཾ ཏཐཏོ ན ཛཱནཱམ, རཱཛཱ ཙ ཀེཝཊྚོ ཙ སཡནགབྦྷེ ནིསཱིདིཏྭཱ མནྟེནྟི, རཉྙོ པན སཡནཔཱལིཀཱ སཱལི༹ཀཱ སཀུཎིཀཱ ཨེཏམཏྠཾ ཛཱནེཡྻཱ’’ཏི པཊིཔེསཡིཾསུ.
ཏཾ སུཏྭཱ མཧཱསཏྟོ ཙིནྟེསི ‘‘ཡཐཱ པཙྩཱམིཏྟཱནཾ ཨོཀཱསོ ¶ ན ཧོཏི, ཨེཝཾ སུཝིབྷཏྟཾ ཀཏྭཱ སུསཛྫིཏཾ ནགརཾ ཨཧཾ ཀེཝཊྚསྶ དཊྛུཾ ན དསྶཱམཱི’’ཏི. སོ ནགརདྭཱརཏོ ཡཱཝ རཱཛགེཧཱ, རཱཛགེཧཏོ ཙ ཡཱཝ ཨཏྟགེཧཱ, གམནམགྒཾ ཨུབྷོསུ པསྶེསུ ཀིལཉྫེཧི པརིཀྑིཔཱཔེཏྭཱ མཏྠཀེཔི ཀིལཉྫེཧི པཊིཙྪཱདཱཔེཏྭཱ ཙིཏྟཀམྨཾ ཀཱརཱཔེཏྭཱ བྷཱུམིཡཾ པུཔྥཱནི ཝིཀིརིཏྭཱ པུཎྞགྷཊེ ཋཔཱཔེཏྭཱ ཀདལིཡོ བནྡྷཱཔེཏྭཱ དྷཛེ པགྒཎྷཱཔེསི. ཀེཝཊྚོ ནགརཾ པཝིསིཏྭཱ ¶ སུཝིབྷཏྟཾ ནགརཾ ཨཔསྶནྟོ ‘‘རཉྙཱ མེ མགྒོ ཨལངྐཱརཱཔིཏོ’’ཏི ཙིནྟེཏྭཱ ནགརསྶ ཨདསྶནཏྠཾ ཀཏབྷཱཝཾ ན ཛཱནི. སོ གནྟྭཱ རཱཛཱནཾ དིསྭཱ པཎྞཱཀཱརཾ པཊིཙྪཱཔེཏྭཱ པཊིསནྠཱརཾ ཀཏྭཱ ཨེཀམནྟཾ ནིསཱིདིཏྭཱ རཉྙཱ ཀཏསཀྐཱརསམྨཱནོ ཨཱགཏཀཱརཎཾ ཨཱརོཙེནྟོ དྭེ གཱཐཱ ཨབྷཱསི –
‘‘རཱཛཱ སནྠཝཀཱམོ ཏེ, རཏནཱནི པཝེཙྪཏི;
ཨཱགཙྪནྟུ ཨིཏོ དཱུཏཱ, མཉྫུཀཱ པིཡབྷཱཎིནོ.
‘‘བྷཱསནྟུ མུདུཀཱ ཝཱཙཱ, ཡཱ ཝཱཙཱ པཊིནནྡིཏཱ;
པཉྩཱལོ ཙ ཝིདེཧོ ཙ, ཨུབྷོ ཨེཀཱ བྷཝནྟུ ཏེ’’ཏི.
ཏཏྠ སནྠཝཀཱམོཏི མཧཱརཱཛ, ཨམྷཱཀཾ རཱཛཱ ཏཡཱ སདྡྷིཾ མིཏྟསནྠཝཾ ཀཱཏུཀཱམོ. རཏནཱནཱིཏི ཨིཏྠིརཏནཾ ཨཏྟནོ དྷཱིཏརཾ ཨཱདིཾ ཀཏྭཱ ཏུམྷཱཀཾ སབྦརཏནཱནི དསྶཏི. ཨཱགཙྪནྟཱུཏི ཨིཏོ པཊྛཱཡ ཀིར ཨུཏྟརཔཉྩཱལནགརཏོ པཎྞཱཀཱརཾ གཧེཏྭཱ མདྷུརཝཙནཱ པིཡབྷཱཎིནོ དཱུཏཱ ཨིདྷ ཨཱགཙྪནྟུ, ཨིཏོ ཙ ཏཏྠ གཙྪནྟུ. ཨེཀཱ བྷཝནྟཱུཏི གངྒོདཀཾ ཝིཡ ཡམུནོདཀེན སདྡྷིཾ སཾསནྡནྟཱ ཨེཀསདིསཱཝ ཧོནྟཱུཏི.
ཨེཝཉྩ ¶ པན ཝཏྭཱ ‘‘མཧཱརཱཛ, ཨམྷཱཀཾ རཱཛཱ ཨཉྙཾ མཧཱམཏྟཾ པེསེཏུཀཱམོ ཧུཏྭཱཔི ‘ཨཉྙོ མནཱཔཾ ཀཏྭཱ སཱསནཾ ཨཱརོཙེཏུཾ ན སཀྑིསྶཏཱི’ཏི མཾ པེསེསི ‘ཨཱཙརིཡ, ཏུམྷེ རཱཛཱནཾ སཱདྷུཀཾ པབོདྷེཏྭཱ ཨཱདཱཡ ཨཱགཙྪཐཱ’ཏི, གཙྪཐ རཱཛསེཊྛ ཨབྷིརཱུཔཉྩ ཀུམཱརིཀཾ ལབྷིསྶཐ, ཨམྷཱཀཉྩ རཉྙཱ སདྡྷིཾ མིཏྟབྷཱཝོ པཏིཊྛཧིསྶཏཱི’’ཏི ཨཱཧ. སོ ཏསྶ ཝཙནཾ སུཏྭཱ ཏུཊྛམཱནསོ ‘‘ཨུཏྟམརཱུཔདྷརཾ ཀིར ཀུམཱརིཀཾ ལབྷིསྶཱམཱི’’ཏི སཝནསཾསགྒེན བཛ྄ཛྷིཏྭཱ ‘‘ཨཱཙརིཡ, ཏུམྷཱཀཉྩ ཀིར མཧོསདྷཔཎྜིཏསྶ ཙ དྷམྨཡུདྡྷེ ཝིཝཱདོ ཨཧོསི, གཙྪཐ པུཏྟཾ མེ པསྶཐ, ཨུབྷོཔི པཎྜིཏཱ ཨཉྙམཉྙཾ ¶ ཁམཱཔེཏྭཱ མནྟེཏྭཱ ཨེཐཱ’’ཏི ཨཱཧ. ཏཾ སུཏྭཱ ཀེཝཊྚོ ‘‘པསྶིསྶཱམི པཎྜིཏ’’ནྟི ཏཾ པསྶིཏུཾ ཨགམཱསི. མཧཱསཏྟོཔི ཏཾ དིཝསཾ ‘‘ཏེན མེ པཱཔདྷམྨེན སདྡྷིཾ སལླཱཔོ མཱ ཧོཏཱུ’’ཏི པཱཏོཝ ཐོཀཾ སཔྤིཾ པིཝི, གེཧམྤིསྶ བཧལེན ཨལླགོམཡེན ལེཔཱཔེསི, ཐམྦྷེ ཏེལེན མཀྑེསི, ཏསྶ ནིཔནྣམཉྩཀཾ ཋཔེཏྭཱ སེསཱནི མཉྩཔཱིཋཱདཱིནི ནཱིཧརཱཔེསི.
སོ མནུསྶཱནཾ སཉྙམདཱསི ‘‘ཏཱཏཱ, བྲཱཧྨཎེ ཀཐེཏུཾ ཨཱརདྡྷེ ཨེཝཾ ཝདེཡྻཱཐ ‘བྲཱཧྨཎ, མཱ ¶ པཎྜིཏེན སདྡྷིཾ ཀཐཡིཏྠ, ཨཛྫ ཏེན ཏིཁིཎསཔྤི པིཝིཏ’ནྟི. མཡི ཙ ཏེན སདྡྷིཾ ཀཐནཱཀཱརཾ ཀརོནྟེཔི ‘དེཝ ཏིཁིཎསཔྤི ཏེ པིཝིཏཾ, མཱ ཀཐེཐཱ’ཏི མཾ ནིཝཱརེཐཱ’’ཏི. ཨེཝཾ ཝིཙཱརེཏྭཱ མཧཱསཏྟོ རཏྟཔཊཾ ནིཝཱསེཏྭཱ སཏྟསུ དྭཱརཀོཊྛཀེསུ མནུསྶེ ཋཔེཏྭཱ སཏྟམེ དྭཱརཀོཊྛཀེ པཊམཉྩཀེ ནིཔཛྫི. ཀེཝཊྚོཔིསྶ པཋམདྭཱརཀོཊྛཀེ ཋཏྭཱ ‘‘ཀཧཾ པཎྜིཏོ’’ཏི པུཙྪི. ཨཐ ནཾ ཏེ མནུསྶཱ ‘‘བྲཱཧྨཎ, མཱ སདྡམཀརི, སཙེཔི ཨཱགཙྪིཏུཀཱམོ, ཏུཎྷཱི ཧུཏྭཱ ཨེཧི, ཨཛྫ པཎྜིཏེན ཏིཁིཎསཔྤི པཱིཏཾ, མཧཱསདྡཾ ཀཱཏུཾ ན ལབྦྷཏཱི’’ཏི ཨཱཧཾསུ. སེསདྭཱརཀོཊྛཀེསུཔི ནཾ ཏཐེཝ ཨཱཧཾསུ. སོ སཏྟམདྭཱརཀོཊྛཀཾ ཨཏིཀྐམིཏྭཱ པཎྜིཏསྶ སནྟིཀཾ ཨགམཱསི. པཎྜིཏོ ཀཐནཱཀཱརཾ དསྶེསི. ཨཐ ནཾ མནུསྶཱ ‘‘དེཝ, མཱ ཀཐཡིཏྠ, ཏིཁིཎསཔྤི ཏེ པཱིཏཾ, ཀིཾ ཏེ ཨིམིནཱ དུཊྛབྲཱཧྨཎེན སདྡྷིཾ ཀཐིཏེནཱ’’ཏི ཝཏྭཱ ཝཱརཡིཾསུ. ཨིཏི སོ ཏསྶ སནྟིཀཾ གནྟྭཱ ནེཝ ནིསཱིདིཏུཾ, ན ཨཱསནཾ ནིསྶཱཡ ཋིཏཊྛཱནཾ ལབྷི, ཨལླགོམཡཾ ཨཀྐམིཏྭཱ ཨཊྛཱསི.
ཨཐ ¶ ནཾ ཨོལོཀེཏྭཱ ཨེཀོ ཨཀྑཱིནི ནིམཱིལི, ཨེཀོ བྷམུཀཾ ཨུཀྑིཔི, ཨེཀོ ཀཔྤརཾ ཀཎྜཱུཡི. སོ ཏེསཾ ཀིརིཡཾ ཨོལོཀེཏྭཱ མངྐུབྷཱུཏོ ‘‘གཙྪཱམཧཾ པཎྜིཏཱ’’ཏི ཝཏྭཱ ཨཔརེན ‘‘ཨརེ དུཊྛབྲཱཧྨཎ, ‘མཱ སདྡམཀཱསཱི’ཏི ཝུཏྟོ སདྡམེཝ ཀརོསི, ཨཊྛཱིནི ཏེ བྷིནྡིསྶཱམཱི’’ཏི ཝུཏྟེ བྷཱིཏཏསིཏོ ཧུཏྭཱ ནིཝཏྟིཏྭཱ ཨོལོཀེསི. ཨཐ ནཾ ཨཉྙོ ཝེལུ༹པེསིཀཱཡ པིཊྛིཡཾ ཏཱལེསི, ཨཉྙོ གཱིཝཱཡཾ གཧེཏྭཱ ཁིཔི, ཨཉྙོ པིཊྛིཡཾ ཧཏྠཏལེན པཧརི. སོ དཱིཔིམུཁཱ མུཏྟམིགོ ཝིཡ བྷཱིཏཏསིཏོ ནིཀྑམིཏྭཱ རཱཛགེཧཾ གཏོ. རཱཛཱ ཙིནྟེསི ‘‘ཨཛྫ ¶ མམ པུཏྟོ ཨིམཾ པཝཏྟིཾ སུཏྭཱ ཏུཊྛོ བྷཝིསྶཏི, དྭིནྣཾ པཎྜིཏཱནཾ མཧཏིཡཱ དྷམྨསཱཀཙྪཱཡ བྷཝིཏབྦཾ, ཨཛྫ ཨུབྷོ ཨཉྙམཉྙཾ ཁམཱཔེསྶནྟི, ལཱབྷཱ ཝཏ མེ’’ཏི. སོ ཀེཝཊྚཾ དིསྭཱ པཎྜིཏེན སདྡྷིཾ སཾསནྡནཱཀཱརཾ པུཙྪནྟོ གཱཐམཱཧ –
‘‘ཀཐཾ ནུ ཀེཝཊྚ མཧོསདྷེན, སམཱགམོ ཨཱསི ཏདིངྒྷ བྲཱུཧི;
ཀཙྩི ཏེ པཊིནིཛ྄ཛྷཏྟོ, ཀཙྩི ཏུཊྛོ མཧོསདྷོ’’ཏི.
ཏཏྠ པཊིནིཛ྄ཛྷཏྟོཏི དྷམྨཡུདྡྷམཎྜལེ པཝཏྟཝིགྒཧསྶ ཝཱུཔསམནཏྠཾ ཀཙྩི ཏྭཾ ཏེན, སོ ཙ ཏཡཱ ནིཛ྄ཛྷཏྟོ ཁམཱཔིཏོ. ཀཙྩི ཏུཊྛོཏི ཀཙྩི ཏུམྷཱཀཾ རཉྙཱ པེསིཏཾ པཝཏྟིཾ སུཏྭཱ ཏུཊྛོཏི.
ཏཾ སུཏྭཱ ཀེཝཊྚོ ‘‘མཧཱརཱཛ, ཏུམྷེ ‘པཎྜིཏོ’ཏི ཏཾ གཧེཏྭཱ ཝིཙརཐ, ཏཏོ ཨསཔྤུརིསཏརོ ནཱམ ནཏྠཱི’’ཏི གཱཐམཱཧ –
‘‘ཨནརིཡརཱུཔོ ¶ པུརིསོ ཛནིནྡ, ཨསམྨོདཀོ ཐདྡྷོ ཨསབྦྷིརཱུཔོ;
ཡཐཱ མཱུགོ ཙ བདྷིརོ ཙ, ན ཀིཉྩིཏྠཾ ཨབྷཱསཐཱ’’ཏི.
ཏཏྠ ཨསབྦྷིརཱུཔོཏི ཨཔཎྜིཏཛཱཏིཀོ. ན ཀིཉྩིཏྠནྟི མཡཱ སཧ ཀིཉྩི ཨཏྠཾ ན བྷཱསིཏྠ, ཏེནེཝ ནཾ ཨཔཎྜིཏོཏི མཉྙཱམཱིཏི བོདྷིསཏྟསྶ ཨགུཎཾ ཀཐེསི.
རཱཛཱ ¶ ཏསྶ ཝཙནཾ ཨནབྷིནནྡིཏྭཱ ཨཔྤཊིཀྐོསིཏྭཱ ཏསྶ ཙ ཏེན སདྡྷིཾ ཨཱགཏཱནཉྩ པརིབྦཡཉྩེཝ ནིཝཱསགེཧཉྩ དཱཔེཏྭཱ ‘‘གཙྪཐཱཙརིཡ, ཝིསྶམཐཱ’’ཏི ཏཾ ཨུཡྻོཛེཏྭཱ ‘‘མམ པུཏྟོ པཎྜིཏོ པཊིསནྠཱརཀུསལོ, ཨིམིནཱ ཀིར སདྡྷིཾ ནེཝ པཊིསནྠཱརཾ ཨཀཱསི, ན ཏུཊྛིཾ པཝེདེསི. ཀིཉྩི ཏེན ཨནཱགཏབྷཡཾ དིཊྛཾ བྷཝིསྶཏཱི’’ཏི སཡམེཝ ཀཐཾ སམུཊྛཱཔེསི –
‘‘ཨདྡྷཱ ཨིདཾ མནྟཔདཾ སུདུདྡསཾ, ཨཏྠོ སུདྡྷོ ནརཝིརིཡེན དིཊྛོ;
ཏཐཱ ཧི ཀཱཡོ མམ སམྤཝེདྷཏི, ཧིཏྭཱ སཡཾ ཀོ པརཧཏྠམེསྶཏཱི’’ཏི.
ཏཏྠ ཨིདནྟི ཡཾ མམ པུཏྟེན དིཊྛཾ, ཨདྡྷཱ ཨིདཾ མནྟཔདཾ ཨཉྙེན ཨིཏརཔུརིསེན སུདུདྡསཾ. ནརཝིརིཡེནཱཏི ཝཱིརིཡཝནྟེན མཧོསདྷཔཎྜིཏེན སུདྡྷོ ཨཏྠོ དིཊྛོ བྷཝིསྶཏི. སཡནྟི སཀཾ རཊྛཾ ཧིཏྭཱ ཀོ པརཧཏྠཾ གམིསྶཏི.
‘‘མམ ¶ པུཏྟེན བྲཱཧྨཎསྶ ཨཱགམནེ དོསོ དིཊྛོ བྷཝིསྶཏི. ཨཡཉྷི ཨཱགཙྪནྟོ ན མིཏྟསནྠཝཏྠཱཡ ཨཱགམིསྶཏི, མཾ པན ཀཱམེན པལོབྷེཏྭཱ ནགརཾ ནེཏྭཱ གཎྷནཏྠཱཡ ཨཱགཏེན བྷཝིཏབྦཾ. ཏཾ ཨནཱགཏབྷཡཾ དིཊྛཾ བྷཝིསྶཏི པཎྜིཏེནཱ’’ཏི ཏསྶ ཏམཏྠཾ ཨཱཝཛྫེཏྭཱ བྷཱིཏཏསིཏསྶ ནིསིནྣཀཱལེ ཙཏྟཱརོ པཎྜིཏཱ ཨཱགམིཾསུ. རཱཛཱ སེནཀཾ པུཙྪི ‘‘སེནཀ, རུཙྩཏི ཏེ ཨུཏྟརཔཉྩཱལནགརཾ གནྟྭཱ ཙཱུལ༹ནིརཱཛསྶ དྷཱིཏུ ཨཱནཡན’’ནྟི? ཀིཾ ཀཐེཐ མཧཱརཱཛ, ན ཧི སིརིཾ ཨཱགཙྪནྟིཾ དཎྜེན པཧརིཏྭཱ པལཱཔེཏུཾ ཝཊྚཏི. སཙེ ཏུམྷེ ཏཏྠ གནྟྭཱ ཏཾ གཎྷིསྶཐ, ཋཔེཏྭཱ ཙཱུལ༹ནིབྲཧྨདཏྟཾ ཨཉྙོ ཏུམྷེཧི སམོ ཛམྦུདཱིཔཏལེ ན བྷཝིསྶཏི. ཀིཾ ཀཱརཎཱ? ཛེཊྛརཱཛདྷཱིཏཱཡ གཧིཏཏྟཱ. སོ ཧི ‘‘སེསརཱཛཱནོ མམ མནུསྶཱ, ཝེདེཧོ ཨེཀོཝ མཡཱ སདིསོ’’ཏི སཀལཛམྦུདཱིཔེ ཨུཏྟམརཱུཔདྷརཾ དྷཱིཏརཾ ཏུམྷཱཀཾ དཱཏུཀཱམོ ཛཱཏོ, ཀརོཐསྶ ཝཙནཾ. མཡམྤི ཏུམྷེ ནིསྶཱཡ ཝཏྠཱལངྐཱརེ ལབྷིསྶཱམཱཏི. རཱཛཱ སེསེཔི པུཙྪི. ཏེཔི ཏཐེཝ ཀཐེསུཾ. ཏསྶ ཏེཧི སདྡྷིཾ ཀཐེནྟསྶེཝ ཀེཝཊྚབྲཱཧྨཎོ ཨཏྟནོ ནིཝཱསགེཧཱ ནིཀྑམིཏྭཱ ¶ ‘‘རཱཛཱནཾ ཨཱམནྟེཏྭཱ གམིསྶཱམཱི’’ཏི ཨཱགནྟྭཱ ‘‘མཧཱརཱཛ, ན སཀྐཱ ཨམྷེཧི པཔཉྩཾ ཀཱཏུཾ, གམིསྶཱམ མཡཾ ¶ ནརིནྡཱ’’ཏི ཨཱཧ. རཱཛཱ ཏསྶ སཀྐཱརཾ ཀཏྭཱ ཏཾ ཨུཡྻོཛེསི. མཧཱསཏྟོ ཏསྶ གམནབྷཱཝཾ ཉཏྭཱ ནྷཏྭཱ ཨལངྐརིཏྭཱ རཱཛུཔཊྛཱནཾ ཨཱགནྟྭཱ རཱཛཱནཾ ཝནྡིཏྭཱ ཨེཀམནྟཾ ནིསཱིདི. རཱཛཱ ཙིནྟེསི ‘‘པུཏྟོ མེ མཧོསདྷཔཎྜིཏོ མཧཱམནྟཱི མནྟཔཱརངྒཏོ ཨཏཱིཏཱནཱགཏཔཙྩུཔྤནྣཾ ཨཏྠཾ ཛཱནཱཏི. ཨམྷཱཀཾ ཏཏྠ གནྟུཾ ཡུཏྟབྷཱཝཾ ཝཱ ཨཡུཏྟབྷཱཝཾ ཝཱ པཎྜིཏོ ཛཱནིསྶཏཱི’’ཏི. སོ ཨཏྟནཱ པཋམཾ ཙིནྟིཏཾ ཨཝཏྭཱ རཱགརཏྟོ མོཧམཱུལ༹ྷོ ཧུཏྭཱ ཏཾ པུཙྪནྟོ གཱཐམཱཧ –
‘‘ཚནྣཉྷི ཨེཀཱཝ མཏཱི སམེཏི, ཡེ པཎྜིཏཱ ཨུཏྟམབྷཱུརིཔཏྟཱ;
ཡཱནཾ ཨཡཱནཾ ཨཐ ཝཱཔི ཋཱནཾ, མཧོསདྷ ཏྭམྤི མཏིཾ ཀརོཧཱི’’ཏི.
ཏཏྠ ཚནྣནྟི པཎྜིཏ, ཀེཝཊྚབྲཱཧྨཎསྶ ཙ མམ ཙ ཨིམེསཉྩ ཙཏུནྣནྟི ཚནྣཾ ཨམྷཱཀཾ ཨེཀཱཝ མཏི ཨེཀོཡེཝ ཨཛ྄ཛྷཱསཡོ གངྒོདཀཾ ཝིཡ ཡམུནོདཀེན ¶ སཾསནྡཏི སམེཏི. ཡེ མཡཾ ཚཔི ཛནཱ པཎྜིཏཱ ཨུཏྟམབྷཱུརིཔཏྟཱ, ཏེསཾ ནོ ཚནྣམྤི ཙཱུལ༹ནིརཱཛདྷཱིཏུ ཨཱནཡནཾ རུཙྩཏཱིཏི. ཋཱནནྟི ཨིདྷེཝ ཝཱསོ. མཏིཾ ཀརོཧཱིཏི ཨམྷཱཀཾ རུཙྩནཀཾ ནཱམ ཨཔྤམཱཎཾ, ཏྭམྤི ཙིནྟེཧི, ཀིཾ ཨམྷཱཀཾ ཨཱཝཱཧཏྠཱཡ ཏཏྠ ཡཱནཾ, ཨུདཱཧུ ཨཡཱནཾ, ཨདུ ཨིདྷེཝ ཝཱསོ རུཙྩཏཱིཏི.
ཏཾ སུཏྭཱ པཎྜིཏོ ‘‘ཨཡཾ རཱཛཱ ཨཏིཝིཡ ཀཱམགིདྡྷོ ཨནྡྷབཱལབྷཱཝེན ཨིམེསཾ ཙཏུནྣཾ ཝཙནཾ གཎྷཱཏི, གམནེ དོསཾ ཀཐེཏྭཱ ནིཝཏྟེསྶཱམི ན’’ནི ཙིནྟེཏྭཱ ཙཏསྶོ གཱཐཱཡོ ཨབྷཱསི –
‘‘ཛཱནཱསི ཁོ རཱཛ མཧཱནུབྷཱཝོ, མཧབྦལོ ཙཱུལ༹ནིབྲཧྨདཏྟོ;
རཱཛཱ ཙ ཏཾ ཨིཙྪཏི མཱརཎཏྠཾ, མིགཾ ཡཐཱ ཨོཀཙརེན ལུདྡོ.
‘‘ཡཐཱཔི མཙྪོ བལི༹སཾ, ཝངྐཾ མཾསེན ཚཱདིཏཾ;
ཨཱམགིདྡྷོ ན ཛཱནཱཏི, མཙྪོ མརཎམཏྟནོ.
‘‘ཨེཝམེཝ ཏུཝཾ རཱཛ, ཙཱུལ༹ནེཡྻསྶ དྷཱིཏརཾ;
ཀཱམགིདྡྷོ ན ཛཱནཱསི, མཙྪོཝ མརཎམཏྟནོ.
‘‘སཙེ ¶ ¶ གཙྪསི པཉྩཱལཾ, ཁིཔྤམཏྟཾ ཛཧིསྶསི;
མིགཾ པནྠཱནུབནྡྷཾཝ, མཧནྟཾ བྷཡམེསྶཏཱི’’ཏི.
ཏཏྠ རཱཛཱཏི ཝིདེཧཾ ཨཱལཔཏི. མཧཱནུབྷཱཝོཏི མཧཱཡསོ. མཧབྦལོཏི ཨཊྛརསཨཀྑོབྷཎིསངྑེན བལེན སམནྣཱགཏོ. མཱརཎཏྠནྟི མཱརཎསྶ ཨཏྠཱཡ. ཨོཀཙརེནཱཏི ཨོཀཙཱརིཀཱཡ མིགིཡཱ. ལུདྡོ ཧི ཨེཀཾ མིགིཾ སིཀྑཱཔེཏྭཱ རཛྫུཀེན བནྡྷིཏྭཱ ཨརཉྙཾ ནེཏྭཱ མིགཱནཾ གོཙརཊྛཱནེ ཋཔེསི. སཱ བཱལམིགཾ ཨཏྟནོ སནྟིཀཾ ཨཱནེཏུཀཱམཱ སཀསཉྙཱཡ རཱགཾ ཛནེནྟཱི ཝིརཝཏི. ཏསྶཱ སདྡཾ སུཏྭཱ བཱལམིགོ མིགགཎཔརིཝུཏོ ཝནགུམྦེ ནིཔནྣོ སེསམིགཱིསུ སཉྙཾ ཨཀཏྭཱ ཏསྶཱ སདྡསྶཝནསཾསགྒེན བདྡྷོ ཝུཊྛཱཡ ནིཀྑམིཏྭཱ གཱིཝཾ ཨུཀྑིཔིཏྭཱ ཀིལེསཝསེན ཏཾ མིགིཾ ཨུཔགནྟྭཱ ལུདྡསྶ པསྶཾ དཏྭཱ ཏིཊྛཏི. ཏམེནཾ སོ ཏིཁིཎཱཡ སཏྟིཡཱ ཝིཛ྄ཛྷིཏྭཱ ཛཱིཝིཏཀྑཡཾ པཱཔེཏི. ཏཏྠ ལུདྡོ ཝིཡ ཙཱུལ༹ནིརཱཛཱ, ཨོཀཙཱརིཀཱ ཝིཡ ཨསྶ དྷཱིཏཱ, ལུདྡསྶ ཧཏྠེ ཨཱཝུདྷཾ ཝིཡ ཀེཝཊྚབྲཱཧྨཎོ. ཨིཏི ཡཐཱ ཨོཀཙརེན ལུདྡོ མིགཾ མཱརཎཏྠཱཡ ཨིཙྪཏི, ཨེཝཾ སོཔི རཱཛཱ ཏཾ ཨིཙྪཏཱིཏི ཨཏྠོ.
ཨཱམགིདྡྷོཏི བྱཱམསཏགམྦྷཱིརེ ཨུདཀེ ཝསནྟོཔི ཏསྨིཾ བལི༹སསྶ ཝངྐཊྛཱནཾ ཚཱདེཏྭཱ ཋིཏེ ཨཱམསངྑཱཏེ ཨཱམིསེ གིདྡྷོ ཧུཏྭཱ བལི༹སཾ གིལཏི, ཨཏྟནོ མརཎཾ ན ཛཱནཱཏི. དྷཱིཏརནྟི ཙཱུལ༹ནིབཱལི༹སིཀསྶ ཀེཝཊྚབྲཱཧྨཎསྶ ཝཙནབལི༹སཾ ཚཱདེཏྭཱ ཋིཏཾ ཨཱམིསསདིསཾ. ཏསྶ རཉྙོ ¶ དྷཱིཏརཾ ཀཱམགིདྡྷོ ཧུཏྭཱ མཙྪོ ཨཏྟནོ མརཎསངྑཱཏཾ ཨཱམིསཾ ཝིཡ ན ཛཱནཱསི. པཉྩཱལནྟི ཨུཏྟརཔཉྩཱལནགརཾ. ཨཏྟནྟི ཨཏྟཱནཾ. པནྠཱནུབནྡྷནྟི ཡཐཱ གཱམདྭཱརམགྒཾ ཨནུབནྡྷམིགཾ མཧནྟཾ བྷཡམེསྶཏི, ཏཉྷི མིགཾ མཱརཎཏྠཱཡ ཨཱཝུདྷཱནི གཧེཏྭཱ ནིཀྑནྟེསུ མནུསྶེསུ ཡེ ཡེ པསྶནྟི, ཏེ ཏེ མཱརེནྟི, ཨེཝཾ ཨུཏྟརཔཉྩཱལནགརཾ གཙྪནྟམྤི ཏཾ མཧནྟཾ མརཎབྷཡཾ ཨེསྶཏི ཨུཔགམིསྶཏཱིཏི.
ཨེཝཾ མཧཱསཏྟོ ཙཏཱུཧི གཱཐཱཧི རཱཛཱནཾ ནིགྒཎྷིཏྭཱ ཀཐེསི. སོ རཱཛཱ ཏེན ཨཏིཝིཡ ནིགྒཧིཏོཝ ‘‘ཨཡཾ མཾ ཨཏྟནོ དཱསཾ ཝིཡ མཉྙཏི, རཱཛཱཏི ¶ སཉྙམྤི ན ཀརོཏི, ཨགྒརཱཛེན ‘དྷཱིཏརཾ དསྶཱམཱི’ཏི མམ སནྟིཀཾ པེསིཏཾ ཉཏྭཱ ཨེཀམྤི མངྒལཔཊིསཾཡུཏྟཾ ཀཐཾ ཨཀཐེཏྭཱ མཾ ‘བཱལམིགོ ཝིཡ, གིལིཏབལི༹སམཙྪོ ཝིཡ པནྠཱནུབནྡྷམིགོ ཝིཡ, མརཎཾ པཱཔུཎིསྶཏཱི’ཏི ཝདཏཱི’’ཏི ཀུཛ྄ཛྷིཏྭཱ ཨནནྟརཾ གཱཐམཱཧ –
‘‘མཡམེཝ ¶ བཱལམྷསེ ཨེལ༹མཱུགཱ, ཡེ ཨུཏྟམཏྠཱནི ཏཡཱི ལཔིམྷཱ;
ཀིམེཝ ཏྭཾ ནངྒལཀོཊིཝཌྜྷོ, ཨཏྠཱནི ཛཱནཱསི ཡཐཱཔི ཨཉྙེ’’ཏི.
ཏཏྠ བཱལམྷསེཏི བཱལཱམྷ. ཨེལ༹མཱུགཱཏི ལཱལམུཁཱ མཡམེཝ. ཨུཏྟམཏྠཱནཱིཏི ཨུཏྟམཨིཏྠིརཏནཔཊིལཱབྷཀཱརཎཱནི. ཏཡཱི ལཝིམྷཱཏི ཏཝ སནྟིཀེ ཀཐཡིམྷཱ. ཀིམེཝཱཏི གརཧཏྠེ ནིཔཱཏོ. ནངྒལཀོཊིཝཌྜྷོཏི གཧཔཏིཔུཏྟོ དཧརཀཱལཏོ པཊྛཱཡ ནངྒལཀོཊིཾ ཝཧནྟོཡེཝ ཝཌྜྷཏི, ཏམཏྠཾ སནྡྷཱཡ ‘‘ཏྭཾ གཧཔཏིཀམྨམེཝ ཛཱནཱསི, ན ཁཏྟིཡཱནཾ མངྒལཀམྨ’’ནྟི ཨིམིནཱ ཨདྷིཔྤཱཡེནེཝམཱཧ. ཨཉྙེཏི ཡཐཱ ཀེཝཊྚོ ཝཱ སེནཀཱདཡོ ཝཱ ཨཉྙེ པཎྜིཏཱ ཨིམཱནི ཁཏྟིཡཱནཾ མངྒལཏྠཱནི ཛཱནནྟི, ཏཐཱ ཏྭཾ ཏཱནི ཀིཾ ཛཱནཱསི, གཧཔཏིཀམྨཛཱནནམེཝ ཏཝཱནུཙྪཝིཀནྟི.
ཨིཏི ནཾ ཨཀྐོསིཏྭཱ པརིབྷཱསིཏྭཱ ‘‘གཧཔཏིཔུཏྟོ མམ མངྒལནྟརཱཡཾ ཀརོཏི, ནཱིཧརཐ ན’’ནྟི ནཱིཧརཱཔེཏུཾ གཱཐམཱཧ –
‘‘ཨིམཾ གལེ གཧེཏྭཱན, ནཱསེཐ ཝིཛིཏཱ མམ;
ཡོ མེ རཏནལཱབྷསྶ, ཨནྟརཱཡཱཡ བྷཱསཏཱི’’ཏི.
སོ རཉྙོ ཀུདྡྷབྷཱཝཾ ཉཏྭཱ ‘‘སཙེ ཁོ པན མཾ ཀོཙི རཉྙོ ཝཙནཾ གཧེཏྭཱ ཧཏྠེ ཝཱ གཱིཝཱཡ ཝཱ པརཱམསེཡྻ, ཏཾ མེ ཨལཾ ཨསྶ ཡཱཝཛཱིཝཾ ལཛྫིཏུཾ, ཏསྨཱ སཡམེཝ ནིཀྑམིསྶཱམཱི’’ཏི ¶ ཙིནྟེཏྭཱ རཱཛཱནཾ ཝནྡིཏྭཱ ཨཏྟནོ གེཧཾ གཏོ. རཱཛཱཔི ཀེཝལཾ ཀོདྷཝསེནེཝ ཝདཏི, བོདྷིསཏྟེ པན གརུཙིཏྟཏཱཡ ན ཀཉྩི ཏཐཱ ཀཱཏུཾ ཨཱཎཱཔེསི. ཨཐ མཧཱསཏྟོ ‘‘ཨཡཾ རཱཛཱ བཱལོ ཨཏྟནོ ཧིཏཱཧིཏཾ ན ཛཱནཱཏི ¶ , ཀཱམགིདྡྷོ ཧུཏྭཱ ‘ཏསྶ དྷཱིཏརཾ ལབྷིསྶཱམིཡེཝཱ’ཏི ཨནཱགཏབྷཡཾ ཨཛཱནིཏྭཱ གཙྪནྟོ མཧཱཝིནཱསཾ པཱཔུཎིསྶཏི. ནཱསྶ ཀཐཾ ཧདཡེ ཀཱཏུཾ ཝཊྚཏི, བཧུཔཀཱརོ མེ ཨེས མཧཱཡསདཱཡཀོ, ཨིམསྶ མཡཱ པཙྩཡེན བྷཝིཏུཾ ཝཊྚཏི. པཋམཾ ཁོ པན སུཝཔོཏཀཾ པེསེཏྭཱ ཏཐཏོ ཉཏྭཱ པཙྪཱ ཨཧཾ གམིསྶཱམཱི’’ཏི ཙིནྟེཏྭཱ སུཝཔོཏཀཾ པེསེསི. ཏམཏྠཾ པཀཱསེནྟོ སཏྠཱ ཨཱཧ –
‘‘ཏཏོ ཙ སོ ཨཔཀྐམྨ, ཝེདེཧསྶ ཨུཔནྟིཀཱ;
ཨཐ ཨཱམནྟཡཱི དཱུཏཾ, མཱདྷརཾ སུཝཔཎྜིཏཾ.
‘‘ཨེཧི ¶ སམྨ ཧརིཏཔཀྑ, ཝེཡྻཱཝཙྩཾ ཀརོཧི མེ;
ཨཏྠི པཉྩཱལརཱཛསྶ, སཱལི༹ཀཱ སཡནཔཱལིཀཱ.
‘‘ཏཾ བནྡྷནེན པུཙྪསྶུ, སཱ ཧི སབྦསྶ ཀོཝིདཱ;
སཱ ཏེསཾ སབྦཾ ཛཱནཱཏི, རཉྙོ ཙ ཀོསིཡསྶ ཙ.
‘‘ཨཱམོཏི སོ པཊིསྶུཏྭཱ, མཱདྷརོ སུཝཔཎྜིཏོ;
ཨགམཱསི ཧརིཏཔཀྑོ, སཱལི༹ཀཱཡ ཨུཔནྟིཀཾ.
‘‘ཏཏོ ཙ ཁོ སོ གནྟྭཱན, མཱདྷརོ སུཝཔཎྜིཏོ;
ཨཐཱམནྟཡི སུགྷརཾ, སཱལི༹ཀཾ མཉྫུབྷཱཎིཀཾ.
‘‘ཀཙྩི ཏེ སུགྷརེ ཁམནཱིཡཾ, ཀཙྩི ཝེསྶེ ཨནཱམཡཾ;
ཀཙྩི ཏེ མདྷུནཱ ལཱཛཱ, ལབྦྷཏེ སུགྷརེ ཏུཝཾ.
‘‘ཀུསལཉྩེཝ མེ སམྨ, ཨཐོ སམྨ ཨནཱམཡཾ;
ཨཐོ མེ མདྷུནཱ ལཱཛཱ, ལབྦྷཏེ སུཝཔཎྜིཏ.
‘‘ཀུཏོ ནུ སམྨ ཨཱགམྨ, ཀསྶ ཝཱ པཧིཏོ ཏུཝཾ;
ན ཙ མེསི ཨིཏོ པུབྦེ, དིཊྛོ ཝཱ ཡདི ཝཱ སུཏོ’’ཏི.
ཏཏྠ ཧརིཏཔཀྑཱཏི ཧརིཏཔཏྟསམཱནཔཀྑཱ. ཝེཡྻཱཝཙྩནྟི ‘‘ཨེཧི, སམྨཱ’’ཏི ཝུཏྟེ ཨཱགནྟྭཱ ཨངྐེ ནིསིནྣཾ ‘‘སམྨ, ཨཉྙེན མནུསྶབྷཱུཏེན ཀཱཏུཾ ཨསཀྐུཎེཡྻཾ མམེཀཾ ཝེཡྻཱཝཊིཀཾ ཀརོཧཱི’’ཏི ཨཱཧ.
‘‘ཀིཾ ¶ ཀརོམི, དེཝཱ’’ཏི ¶ ཝུཏྟེ ‘‘སམྨ, ཀེཝཊྚབྲཱཧྨཎསྶ དཱུཏེཡྻེནཱགཏཀཱརཎཾ ཋཔེཏྭཱ རཱཛཱནཉྩ ཀེཝཊྚཉྩ ཨཉྙེ ན ཛཱནནྟི, ཨུབྷོཝ རཉྙོ སཡནགབྦྷེ ནིསིནྣཱ མནྟཡིཾསུ. ཏསྶ པན ཨཏྠི པཉྩཱལརཱཛསྶ སཱལི༹ཀཱ སཡནཔཱལིཀཱ. སཱ ཀིར ཏཾ རཧསྶཾ ཛཱནཱཏི, ཏྭཾ ཏཏྠ གནྟྭཱ ཏཱཡ སདྡྷིཾ མེཐུནཔཊིསཾཡུཏྟཾ ཝིསྶཱསཾ ཀཏྭཱ ཏེསཾ ཏཾ རཧསྶཾ བནྡྷནེན པུཙྪསྶུ. ཏཾ སཱལི༹ཀཾ པཊིཙྪནྣེ པདེསེ ཡཐཱ ཏཾ ཀོཙི ན ཛཱནཱཏི, ཨེཝཾ པུཙྪ. སཙེ ཧི ཏེ ¶ ཀོཙི སདྡཾ སུཎཱཏི, ཛཱིཝིཏཾ ཏེ ནཏྠི, ཏསྨཱ པཊིཙྪནྣེ ཋཱནེ སཎིཀཾ པུཙྪཱ’’ཏི. སཱ ཏེསཾ སབྦནྟི སཱ ཏེསཾ རཉྙོ ཙ ཀོསིཡགོཏྟསྶ ཙ ཀེཝཊྚསྶཱཏི དྭིནྣམྤི ཛནཱནཾ སབྦཾ རཧསྶཾ ཛཱནཱཏི.
ཨཱམོཏཱིཏི བྷིཀྑཝེ, སོ སུཝཔོཏཀོ པཎྜིཏེན པུརིམནཡེནེཝ སཀྐཱརཾ ཀཏྭཱ པེསིཏོ ‘‘ཨཱམོ’’ཏི ཏསྶ པཊིསྶུཏྭཱ མཧཱསཏྟཾ ཝནྡིཏྭཱ པདཀྑིཎཾ ཀཏྭཱ ཝིཝཊསཱིཧཔཉྫརེན ནིཀྑམིཏྭཱ ཝཱཏཝེགེན སིཝིརཊྛེ ཨརིཊྛཔུརཾ ནཱམ གནྟྭཱ ཏཏྠ པཝཏྟིཾ སལླཀྑེཏྭཱ སཱལི༹ཀཱཡ སནྟིཀཾ གཏོ. ཀཐཾ? སོ ཧི རཱཛནིཝེསནསྶ ཀཉྩནཐུཔིཀཱཡ ནིསཱིདིཏྭཱ རཱགནིསྶིཏཾ མདྷུརརཝཾ རཝི. ཀིཾ ཀཱརཎཱ? ཨིམཾ སདྡཾ སུཏྭཱ སཱལི༹ཀཱ པཊིརཝིསྶཏི, ཏཱཡ སཉྙཱཡ ཏསྶཱ སནྟིཀཾ གམིསྶཱམཱིཏི. སཱཔི ཏསྶ སདྡཾ སུཏྭཱ རཱཛསཡནསྶ སནྟིཀེ སུཝཎྞཔཉྫརེ ནིསིནྣཱ རཱགརཏྟཙིཏྟཱ ཧུཏྭཱ ཏིཀྑཏྟུཾ པཊིརཝི. སོ ཐོཀཾ གནྟྭཱ པུནཔྤུནཾ སདྡཾ ཀཏྭཱ ཏཱཡ ཀཏསདྡཱནུསཱརེན ཀམེན སཱིཧཔཉྫརཨུམྨཱརེ ཋཏྭཱ པརིསྶཡཱབྷཱཝཾ ཨོལོཀེཏྭཱ ཏསྶཱ སནྟིཀཾ གཏོ. ཨཐ ནཾ སཱ ‘‘ཨེཧི, སམྨ, སུཝཎྞཔཉྫརེ ནིསཱིདཱ’’ཏི ཨཱཧ. སོ གནྟྭཱ ནིསཱིདི. ཨཱམནྟཡཱིཏི ཨེཝཾ སོ གནྟྭཱ མེཐུནཔཊིསཾཡུཏྟཾ ཝིསྶཱསཾ ཀཏྟུཀཱམོ ཧུཏྭཱ ཏཾ ཨཱམནྟེསི. སུགྷརནྟི ཀཉྩནཔཉྫརེ ཝསནཏཱཡ སུནྡརགྷརཾ. ཝེསྶེཏི ཝེསྶིཀེ ཝེསྶཛཱཏིཀེ. སཱལི༹ཀཱ ཀིར སཀུཎེསུ ཝེསྶཛཱཏིཀཱ ནཱམ, ཏེན ཏཾ ཨེཝཾ ཨཱལཔཏི. ཏུཝནྟི སུགྷརེ ཏཾ པུཙྪཱམི ‘‘ཀཙྩི ཏེ མདྷུནཱ སདྡྷིཾ ལཱཛཱ ལབྦྷཏཱི’’ཏི. ཨཱགམྨཱཏི སམྨ, ཀུཏོ ཨཱགནྟྭཱ ཨིདྷ པཝིཊྛོཏི པུཙྪཏི. ཀསྶ ཝཱཏི ཀེན ཝཱ པེསིཏོ ཏྭཾ ཨིདྷཱགཏོཏི.
སོ ¶ ཏསྶཱ ཝཙནཾ སུཏྭཱ ‘‘སཙཱཧཾ ‘མིཐིལཏོ ཨཱགཏོ’ཏི ཝཀྑཱམི, ཨེསཱ མརཎམཱཔནྣཱཔི མཡཱ སདྡྷིཾ ཝིསྶཱསཾ ན ཀརིསྶཏི. སིཝིརཊྛེ ཁོ པན ཨརིཊྛཔུརཾ སལླཀྑེཏྭཱ ཨཱགཏོ, ཏསྨཱ མུསཱཝཱདཾ ཀཏྭཱ སིཝིརཱཛེན པེསིཏོ ཧུཏྭཱ ཏཏོ ཨཱགཏབྷཱཝཾ ཀཐེསྶཱམཱི’’ཏི ཙིནྟེཏྭཱ ཨཱཧ –
‘‘ཨཧོསིཾ སིཝིརཱཛསྶ, པཱསཱདེ སཡནཔཱལཀོ;
ཏཏོ སོ དྷམྨིཀོ རཱཛཱ, བདྡྷེ མོཙེསི བནྡྷནཱ’’ཏི.
ཏཏྠ བདྡྷེཏི ཨཏྟནོ དྷམྨིཀཏཱཡ སབྦེ བདྡྷཀེ བནྡྷནཱ མོཙེསི. ཨེཝཾ མོཙེནྟོ མམྤི སདྡཧིཏྭཱ ‘‘མུཉྩཐ ན’’ནྟི མོཙཱཔེསི. སོཧཾ ཝིཝཊཱ སུཝཎྞཔཉྫརཱ ནིཀྑམིཏྭཱཔི བཧིཔཱསཱདེ ¶ ཡཏྠིཙྪཱམི, ཏཏྠ གོཙརཾ གཧེཏྭཱ སུཝཎྞཔཉྫརེཡེཝ ཝསཱམི. ཡཐཱ ཏྭཾ, ན ཨེཝཾ ནིཙྩཀཱལཾ པཉྫརེཡེཝ ཨཙྪཱམཱིཏི.
ཨཐསྶ ¶ སཱ ཨཏྟནོ ཨཏྠཱཡ སུཝཎྞཏཊྚཀེ ཋཔིཏེ མདྷུལཱཛེ ཙེཝ མདྷུརོདཀཉྩ དཏྭཱ ‘‘སམྨ, ཏྭཾ དཱུརཏོ ཨཱགཏོ, ཀེནཏྠེན ཨིདྷཱགཏོསཱི’’ཏི པུཙྪི. སོ ཏསྶཱ ཝཙནཾ སུཏྭཱ རཧསྶཾ སོཏུཀཱམོ མུསཱཝཱདཾ ཀཏྭཱ ཨཱཧ –
‘‘ཏསྶ མེཀཱ དུཏིཡཱསི, སཱལི༹ཀཱ མཉྫུབྷཱཎིཀཱ;
ཏཾ ཏཏྠ ཨཝདྷཱི སེནོ, པེཀྑཏོ སུགྷརེ མམཱ’’ཏི.
ཏཏྠ ཏསྶ མེཀཱཏི ཏསྶ མཡ྄ཧཾ ཨེཀཱ. དུཏིཡཱསཱིཏི པུརཱཎདུཏིཡིཀཱ ཨཧོསི.
ཨཐ ནཾ སཱ པུཙྪི ‘‘ཀཐཾ པན ཏེ བྷརིཡཾ སེནོ ཨཝདྷཱི’’ཏི? སོ ཏསྶཱ ཨཱཙིཀྑནྟོ ‘‘སུཎ བྷདྡེ, ཨེཀདིཝསཾ ཨམྷཱཀཾ རཱཛཱ ཨུདཀཀཱིལ༹ཾ གཙྪནྟོ མམྤི པཀྐོསི. ཨཐཱཧཾ བྷརིཡཾ ཨཱདཱཡ ཏེན སདྡྷིཾ གནྟྭཱ ཀཱིལི༹ཏྭཱ སཱཡནྷསམཡེ ཏེནེཝ སདྡྷིཾ པཙྩཱགནྟྭཱ རཉྙཱ སདྡྷིཾཡེཝ པཱསཱདཾ ཨབྷིརུཡ྄ཧ སརཱིརཾ སུཀྑཱཔནཏྠཱཡ བྷརིཡཾ ཨཱདཱཡ སཱིཧཔཉྫརེན ནིཀྑམིཏྭཱ ཀཱུཊཱགཱརཀུཙྪིཡཾ ནིསཱིདིཾ. ཏསྨིཾ ཁཎེ ཨེཀོ སེནོ ཀཱུཊཱགཱརཱ ནིཀྑནྟོ ཨམྷེ གཎྷིཏུཾ པཀྑནྡི. ཨཧཾ མརཎབྷཡབྷཱིཏོ ཝེགེན པལཱཡིཾ. སཱ པན ཏདཱ གརུགབྦྷཱ ཨཧོསི, ཏསྨཱ ཝེགེན པལཱཡིཏུཾ ནཱསཀྑི. ཨཐ སོ མཡ྄ཧཾ པསྶནྟསྶེཝ ཏཾ མཱརེཏྭཱ ཨཱདཱཡ ¶ གཏོ. ཨཐ མཾ ཏསྶཱ སོཀེན རོདམཱནཾ དིསྭཱ ཨམྷཱཀཾ རཱཛཱ ‘སམྨ, ཀིཾ རོདསཱི’ཏི པུཙྪིཏྭཱ ཏམཏྠཾ སུཏྭཱ ‘མཱ བཱལ༹ྷཾ, སམྨ, རོདསི, ཨཉྙཾ བྷརིཡཾ པརིཡེསཱཧཱི’ཏི ཝཏྭཱ ‘ཀིཾ, དེཝ, ཨཉྙཱཡ ཨནཱཙཱརཱཡ དུསྶཱིལཱཡ བྷརིཡཱཡ ཨཱནཱིཏཱཡ, ཏཏོཔི ཨེཀཀེནེཝ ཙརིཏུཾ ཝར’ནྟི ཝུཏྟེ ‘སམྨ, ཨཧཾ ཨེཀཾ སཀུཎིཀཾ སཱིལཱཙཱརསམྤནྣཾ ཨསྶོསིཾ, ཏཝ བྷརིཡཱཡ སདིསམེཝ. ཙཱུལ༹ནིརཱཛསྶ ཧི སཡནཔཱལིཀཱ སཱལི༹ཀཱ ཨེཝརཱུཔཱ, ཏྭཾ ཏཏྠ གནྟྭཱ ཏསྶཱ མནཾ པུཙྪིཏྭཱ ཨོཀཱསཾ ཀཱརེཏྭཱ སཙེ ཏེ རུཙྩཏི, ཨཱགནྟྭཱ ཨམྷཱཀཾ ཨཱཙིཀྑ. ཨཐཱཧཾ ཝོ ཝིཝཱཧཾ ཀཏྭཱ མཧནྟེན པརིཝཱརེན ཏཾ ཨཱནེསྶཱམཱ’ཏི ཝཏྭཱ མཾ ཨིདྷ པཧིཎི, ཏེནམྷི ཀཱརཎེནཱགཏོ’’ཏི ཝཏྭཱ གཱཐཾ ཨཱཧ –
‘‘ཏསྶཱ ཀཱམཱ ཧི སམྨཏྟོ, ཨཱགཏོསྨི ཏཝནྟི ཀེ;
སཙེ ཀརེཡྻ ཨོཀཱསཾ, ཨུབྷཡོཝ ཝསཱམསེ’’ཏི.
སཱ ¶ ¶ ཏསྶ ཝཙནཾ སུཏྭཱ སོམནསྶཔྤཏྟཱ ཨཧོསི. ཨེཝཾ སནྟེཔི ཨཏྟནོ པིཡབྷཱཝཾ ཨཛཱནཱཔེཏྭཱ ཨནིཙྪམཱནཱ ཝིཡ ཨཱཧ –
‘‘སུཝོཝ སུཝིཾ ཀཱམེཡྻ, སཱལི༹ཀོ པན སཱལི༹ཀཾ;
སུཝསྶ སཱལི༹ཀཱཡེཝ, སཾཝཱསོ ཧོཏི ཀཱིདིསོ’’ཏི.
ཏཏྠ སུཝོཏི སམྨ སུཝཔཎྜིཏ, སུཝོཝ སུཝིཾ ཀཱམེཡྻ. ཀཱིདིསོཏི ཨསམཱནཛཱཏིཀཱནཾ སཾཝཱསོ ནཱམ ཀཱིདིསོ ཧོཏི. སུཝོ ཧི སམཱནཛཱཏིཀཾ སུཝིཾ དིསྭཱ ཙིརསནྠཝམྤི སཱལི༹ཀཾ ཛཧིསྶཏི, སོ པིཡཝིཔྤཡོགོ མཧཏོ དུཀྑཱཡ བྷཝིསྶཏི, ཨསམཱནཛཱཏིཀཱནཾ སཾཝཱསོ ནཱམ ན སམེཏཱིཏི.
ཨིཏརོ ཏཾ སུཏྭཱ ‘‘ཨཡཾ མཾ ན པཊིཀྑིཔཏི, པརིཧཱརམེཝ ཀརོཏི, ཨདྡྷཱ མཾ ཨིཙྪིསྶཏི, ནཱནཱཝིདྷཱཧི ནཾ ཨུཔམཱཧི སདྡཧཱཔེསྶཱམཱི’’ཏི ཙིནྟེཏྭཱ ཨཱཧ –
‘‘ཡོཡཾ ཀཱམེ ཀཱམཡཏི, ཨཔི ཙཎྜཱལིཀཱམཔི;
སབྦོ ཧི སདིསོ ཧོཏི, ནཏྠི ཀཱམེ ཨསཱདིསོ’’ཏི.
ཏཏྠ ¶ ཙཎྜཱལིཀཱམཔཱིཏི ཙཎྜཱལིཀཾ ཨཔི. སདིསོཏི ཙིཏྟསདིསཏཱཡ སབྦོ སཾཝཱསོ སདིསོཝ ཧོཏི. ཀཱམསྨིཉྷི ཙིཏྟམེཝ པམཱཎཾ, ན ཛཱཏཱིཏི.
ཨེཝཉྩ པན ཝཏྭཱ མནུསྶེསུ ཏཱཝ ནཱནཱཛཱཏིཀཱནཾ སམཱནབྷཱཝདསྶནཏྠཾ ཨཏཱིཏཾ ཨཱཧརིཏྭཱ དསྶེནྟོ ཨནནྟརཾ གཱཐམཱཧ –
‘‘ཨཏྠི ཛམྤཱཝཏཱི ནཱམ, མཱཏཱ སིཝིསྶ རཱཛིནོ;
སཱ བྷརིཡཱ ཝཱསུདེཝསྶ, ཀཎྷསྶ མཧེསཱི པིཡཱ’’ཏི.
ཏཏྠ ཛམྤཱཝཏཱིཏི སིཝིརཉྙོ མཱཏཱ ཛམྤཱཝཏཱི ནཱམ ཙཎྜཱལཱི ཨཧོསི. སཱ ཀཎྷཱཡནགོཏྟསྶ དསབྷཱཏིཀཱནཾ ཛེཊྛཀསྶ ཝཱསུདེཝསྶ པིཡཱ མཧེསཱི ཨཧོསི. སོ ཀིརེཀདིཝསཾ དྭཱརཝཏིཏོ ནིཀྑམིཏྭཱ ཨུཡྻཱནཾ གཙྪནྟོ ནགརཾ པཝིསནྟིཾ ཨེཀམནྟེ ཋིཏཾ ཨབྷིརཱུཔཾ ཨེཀཾ ཙཎྜཱལིཀཾ དིསྭཱཝ པཊིབདྡྷཙིཏྟོ ཧུཏྭཱ ‘‘ཀིཾ ཛཱཏིཀཱ’’ཏི པུཙྪཱཔེཏྭཱ ‘‘ཙཎྜཱལཛཱཏིཀཱ’’ཏི ¶ སུཏྭཱཔི པཊིབདྡྷཙིཏྟཏཱཡ ཨསཱམིཀབྷཱཝཾ པུཙྪཱཔེཏྭཱ ‘‘ཨསཱམིཀཱ’’ཏི སུཏྭཱ ཏཾ ཨཱདཱཡ ཏཏོ ནིཝཏྟིཏྭཱ ནིཝེསནཾ ནེཏྭཱ ཨགྒམཧེསིཾ ཨཀཱསི. སཱ སིཝིཾ ནཱམ པུཏྟཾ ཝིཛཱཡི. སོ པིཏུ ཨཙྩཡེན དྭཱརཝཏིཡཾ རཛྫཾ ཀཱརེསི. ཏཾ སནྡྷཱཡེཏཾ ཝུཏྟཾ.
ཨིཏི ¶ སོ ཨིམཾ ཨུདཱཧརཎཾ ཨཱཧརིཏྭཱ ‘‘ཨེཝརཱུཔོཔི ནཱམ ཁཏྟིཡོ ཙཎྜཱལིཡཱ སདྡྷིཾ སཾཝཱསཾ ཀཔྤེསི, ཨམྷེསུ ཏིརཙྪཱནགཏེསུ ཀིཾ ཝཏྟབྦཾ, ཨཉྙམཉྙཾ སཾཝཱསརོཙནཾཡེཝ པམཱཎ’’ནྟི ཝཏྭཱ ཨཔརམྤི ཨུདཱཧརཎཾ ཨཱཧརནྟོ ཨཱཧ –
‘‘རཊྛཝཏཱི ཀིམྤུརིསཱི, སཱཔི ཝཙྪཾ ཨཀཱམཡི;
མནུསྶོ མིགིཡཱ སདྡྷིཾ, ནཏྠི ཀཱམེ ཨསཱདིསོ’’ཏི.
ཏཏྠ ཝཙྪནྟི ཨེཝཾནཱམཀཾ ཏཱཔསཾ. ཀཐཾ པན སཱ ཏཾ ཀཱམེསཱིཏི? ཨཏཱིཏསྨིཉྷི ཨེཀོ བྲཱཧྨཎོ ཀཱམེསུ ཨཱདཱིནཝཾ དིསྭཱ མཧནྟཾ ཡསཾ པཧཱཡ ཨིསིཔབྦཛྫཾ པབྦཛིཏྭཱ ཧིམཝནྟེ པཎྞསཱལཾ མཱཔེཏྭཱ ཝསི. ཏསྶ པཎྞསཱལཏོ ཨཝིདཱུརེ ཨེཀིསྶཱ གུཧཱཡ བཧཱུ ཀིནྣརཱ ཝསནྟི. ཏཏྠེཝ ཨེཀོ ¶ མཀྐཊཀོ དྭཱརེ ཝསཏི. སོ ཛཱལཾ ཝིནེཏྭཱ ཏེསཾ སཱིསཾ བྷིནྡིཏྭཱ ལོཧིཏཾ པིཝཏི. ཀིནྣརཱ ནཱམ དུབྦལཱ ཧོནྟི བྷཱིརུཀཛཱཏིཀཱ. སོཔི མཀྐཊཀོ ཨཏིཝིསཱལོ. ཏེ ཏསྶ ཀིཉྩི ཀཱཏུཾ ཨསཀྐོནྟཱ ཏཾ ཏཱཔསཾ ཨུཔསངྐམིཏྭཱ ཀཏཔཊིསནྠཱརཱ ཨཱགཏཀཱརཎཾ པུཊྛཱ ‘‘དེཝ, ཨེཀོ མཀྐཊཀོ ཛཱིཝིཏཾ ནོ ཧནཏི, ཏུམྷེ ཋཔེཏྭཱ ཨམྷཱཀཾ ཨཉྙཾ པཊིསརཎཾ ན པསྶཱམ, ཏཾ མཱརེཏྭཱ ཨམྷཱཀཾ སོཏྠིབྷཱཝཾ ཀརོཧཱི’’ཏི ཨཱཧཾསུ. ཏཾ སུཏྭཱ ཏཱཔསོ ‘‘ཨཔེཐ ན མཱདིསཱ པཱཎཱཏིཔཱཏཾ ཀརོནྟཱི’’ཏི ཨཔསཱདེསི. ཏེསུ རཊྛཝཏཱི ནཱམ ཀིནྣརཱི ཨབྷིརཱུཔཱ པཱསཱདིཀཱ ཨསཱམིཀཱ ཨཧོསི. ཏེ ཏཾ ཨལངྐརིཏྭཱ ཏཱཔསསྶ སནྟིཀཾ ནེཏྭཱ ‘‘དེཝ, ཨཡཾ ཏེ པཱདཔརིཙཱརིཀཱ ཧོཏུ, ཨམྷཱཀཾ པཙྩཱམིཏྟཾ ཝདྷེཧཱི’’ཏི ཨཱཧཾསུ. ཏཱཔསོ ཏཾ དིསྭཱཝ པཊིབདྡྷཙིཏྟོ ཧུཏྭཱ ཏཱཡ སདྡྷིཾ སཾཝཱསཾ ཀཔྤེཏྭཱ གུཧཱདྭཱརེ ཋཏྭཱ གོཙརཏྠཱཡ ནིཀྑནྟཾ མཀྐཊཀཾ མུགྒརེན པོཐེཏྭཱ ཛཱིཝིཏཀྑཡཾ པཱཔེསི. སོ ཏཱཡ སདྡྷིཾ སམགྒཝཱསཾ ཝསནྟོ པུཏྟདྷཱིཏཱཧི ཝཌྜྷིཏྭཱ ཏཏྠེཝ ཀཱལམཀཱསི. ཨེཝཾ སཱ ཏཾ ཀཱམེསི. སུཝཔོཏཀོ ཨིམཾ ཨུདཱཧརཎཾ ཨཱཧརིཏྭཱ ‘‘ཝཙྪཏཱཔསོ ཏཱཝ མནུསྶོ ཧུཏྭཱ ཏིརཙྪཱནགཏཱཡ ཀིནྣརིཡཱ སདྡྷིཾ སཾཝཱསཾ ཀཔྤེསི, ཀིམངྒཾ པན ཨམྷཱཀཾ? མཡཉྷི ཨུབྷོ པཀྑིནོཝ ཏིརཙྪཱནགཏཱཝཱ’’ཏི དཱིཔེནྟོ ‘‘མནུསྶོ མིགིཡཱ སདྡྷི’’ནྟི ཨཱཧ. ཨེཝཾ མནུསྶཱ ཏིརཙྪཱནགཏཱཧི སདྡྷིཾ སམགྒཝཱསཾ ཝསནྟི, ནཏྠི ཀཱམེ ཨསཱདིསོ ནཱམ, ཙིཏྟམེཝ པམཱཎནྟི ཀཐེསི.
སཱ ¶ ཏསྶ ཝཙནཾ སུཏྭཱ ‘‘སཱམི, ཙིཏྟཾ ནཱམ སབྦཀཱལཾ ཨེཀསདིསཾ ན ཧོཏི, པིཡཝིཔྤཡོགསྶ བྷཱཡཱམཱི’’ཏི ཨཱཧ. སོཔི སུཝཔོཏཀོ ཨིཏྠིམཱཡཱསུ ཀུསལོ, ཏེན ཏཾ ཝཱིམཾསནྟོ པུན གཱཐམཱཧ –
‘‘ཧནྡ ཁྭཱཧཾ གམིསྶཱམི, སཱལི༹ཀེ མཉྫུབྷཱཎིཀེ;
པཙྩཀྑཱནུཔདཉྷེཏཾ, ཨཏིམཉྙསི ནཱུན མ’’ནྟི.
ཏཏྠ པཙྩཀྑཱནུཔདཾ ཧེཏནྟི ཡཾ ཏྭཾ ཝདེསི, སབྦམེཏཾ པཙྩཀྑཱནསྶ ཨནུཔདཾ, པཙྩཀྑཱནཀཱརཎཾ པཙྩཀྑཱནཀོཊྛཱསོ པནེས. ཨཏིམཉྙསི ནཱུན མནྟི ‘‘ནཱུན མཾ ཨིཙྪཏི ཨཡ’’ནྟི ཏྭཾ མཾ ཨཏིཀྐམིཏྭཱ མཉྙསི, མཡ྄ཧཾ ¶ སཱརཾ ན ཛཱནཱསི ¶ . ཨཧཉྷི རཱཛཔཱུཛིཏོ, ན མཡ྄ཧཾ བྷརིཡཱ དུལླབྷཱ, ཨཉྙཾ བྷརིཡཾ པརིཡེསིསྶཱམཱིཏི.
སཱ ཏསྶ ཝཙནཾ སུཏྭཱཝ བྷིཛྫམཱནཧདཡཱ ཝིཡ ཏསྶ སཧ དསྶནེནེཝ ཨུཔྤནྣཀཱམརཏིཡཱ ཨནུཌཡ྄ཧམཱནཱ ཝིཡ ཧུཏྭཱཔི ཨཏྟནོ ཨིཏྠིམཱཡཱཡ ཨནིཙྪམཱནཱ ཝིཡ ཧུཏྭཱ དིཡཌྜྷཾ གཱཐམཱཧ –
‘‘ན སིརཱི ཏརམཱནསྶ, མཱདྷར སུཝཔཎྜིཏ;
ཨིདྷེཝ ཏཱཝ ཨཙྪསྶུ, ཡཱཝ རཱཛཱན དཀྑསི;
སོསྶི སདྡཾ མུདིངྒཱནཾ, ཨཱནུབྷཱཝཉྩ རཱཛིནོ’’ཏི.
ཏཏྠ ན སིརཱིཏི སམྨ སུཝཔཎྜིཏ, ཏརམཱནསྶ སིརཱི ནཱམ ན ཧོཏི, ཏརམཱནེན ཀཏཀམྨཾ ན སོབྷཏི, ‘‘གྷརཱཝཱསོ ཙ ནཱམེས ཨཏིགརུཀོ’’ཏི ཙིནྟེཏྭཱ ཏུལེཏྭཱ ཀཱཏབྦོ. ཨིདྷེཝ ཏཱཝ ཨཙྪསྶུ, ཡཱཝ མཧནྟེན ཡསེན སམནྣཱགཏཾ ཨམྷཱཀཾ རཱཛཱནཾ པསྶིསྶསི. སོསྶཱིཏི སཱཡནྷསམཡེ ཀིནྣརིསམཱནལཱིལཱཧི ཨུཏྟམརཱུཔདྷརཱཧི ནཱརཱིཧི ཝཛྫམཱནཱནཾ མུདིངྒཱནཾ ཨཉྙེསཉྩ གཱིཏཝཱདིཏཱནཾ སདྡཾ ཏྭཾ སུཎིསྶསི, རཉྙོ ཙ ཨཱནུབྷཱཝཾ མཧནྟཾ སིརིསོབྷགྒཾ པསྶིསྶསི. ‘‘སམྨ, ཀིཾ ཏྭཾ ཏུརིཏོསི, ཀིཾ ལེསམྤི ན ཛཱནཱསི, ཨཙྪསྶུ ཏཱཝ, པཙྪཱ ཛཱནིསྶཱམཱ’’ཏི.
ཨཐ ཏེ སཱཡནྷསམནནྟརེ མེཐུནསཾཝཱསཾ ཀརིཾསུ, སམགྒཱ སམྨོདམཱནཱ པིཡསཾཝཱསཾ ཝསིཾསུ. ཨཐ ནཾ སུཝཔོཏཀོ ‘‘ན ཨིདཱནེསཱ མཡ྄ཧཾ རཧསྶཾ གུཧིསྶཏི, ཨིདཱནི ནཾ པུཙྪིཏྭཱ གནྟུཾ ¶ ཝཊྚཏཱི’’ཏི ཙིནྟེཏྭཱ ‘‘སཱལི༹ཀེ’’ཏི ཨཱཧ. ‘‘ཀིཾ, སཱམཱི’’ཏི? ‘‘ཨཧཾ ཀིཉྩི ཏེ ཝཏྟུཀཱམོམྷཱི’’ཏི. ‘‘ཝད, སཱམཱི’’ཏི. ‘‘ཧོཏུ, ཨཛྫ ཨམྷཱཀཾ མངྒལདིཝསོ, ཨཉྙཏརསྨིཾ དིཝསེ ཛཱནིསྶཱམཱི’’ཏི. ‘‘སཙེ མངྒལཔཊིསཾཡུཏྟཱ ཀཐཱ བྷཝིསྶཏི, ཀཐེཧི. ནོ ཙེ, མཱ ཀཐེཧི སཱམཱི’’ཏི. ‘‘མངྒལཀཐཱཝེསཱ, བྷདྡེ’’ཏི. ‘‘ཏེན ཧི ཀཐེཧཱི’’ཏི. ཨཐ ནཾ ‘‘བྷདྡེ, སཙེ སོཏུཀཱམཱ བྷཝིསྶསི, ཀཐེསྶཱམི ཏེ’’ཏི ཝཏྭཱ ཏཾ རཧསྶཾ པུཙྪནྟོ དིཡཌྜྷཾ གཱཐམཱཧ –
‘‘ཡོ ནུ ཁྭཱཡཾ ཏིབྦོ སདྡོ, ཏིརོཛནཔདེ སུཏོ;
དྷཱིཏཱ པཉྩཱལརཱཛསྶ, ཨོསདྷཱི ཝིཡ ཝཎྞིནཱི;
ཏཾ དསྶཏི ཝིདེཧཱནཾ, སོ ཝིཝཱཧོ བྷཝིསྶཏཱི’’ཏི.
ཏསྶཏྠོ ¶ – ཡོ ནུ ཁོ ཨཡཾ སདྡོ ཏིབྦོ བཧལོ, ཏིརོཛནཔདེ སུཏོ པརརཊྛེསུ ཛནཔདེསུ ཝིསྶུཏོ པཉྙཱཏོ པཱཀཊོ པཏྠཊོ. ཀིནྟི? དྷཱིཏཱ པཉྩཱལརཱཛསྶ ཨོསདྷཱིཏཱརཀཱ ཝིཡ ཝིརོཙམཱནཱ ཏཱཡ ཨེཝ སམཱནཝཎྞིནཱི ཨཏྠི, ཏཾ སོ ཝིདེཧཱནཾ དསྶཏི, སོ ཝིཝཱཧོ བྷཝིསྶཏི. ཡོ སོ ཨེཝཾ པཏྠཊོ སདྡོ, ཨཧཾ ཏཾ སུཏྭཱ ཙིནྟེསིཾ ‘‘ཨཡཾ ¶ ཀུམཱརིཀཱ ཨུཏྟམརཱུཔདྷརཱ, ཝིདེཧརཱཛཱཔི ཙཱུལ༹ནིརཉྙོ པཊིསཏྟུ ཨཧོསི. ཨཉྙེ བཧཱུ རཱཛཱནོ ཙཱུལ༹ནིབྲཧྨདཏྟསྶ ཝསཝཏྟིནོ སནྟི, ཏེསཾ ཨདཏྭཱ ཀིཾ ཀཱརཎཱ ཝིདེཧསྶ དྷཱིཏརཾ དསྶཏཱི’’ཏི?
སཱ ཏསྶ ཝཙནཾ སུཏྭཱ ཨེཝམཱཧ – ‘‘སཱམི, ཀིཾ ཀཱརཎཱ མངྒལདིཝསེ ཨཝམངྒལཾ ཀཐེསཱི’’ཏི? ‘‘ཨཧཾ, བྷདྡེ, ‘མངྒལ’ནྟི ཀཐེམི, ཏྭཾ ‘ཨཝམངྒལ’ནྟི ཀཐེསི, ཀིཾ ནུ ཁོ ཨེཏ’’ནྟི? ‘‘སཱམི, ཨམིཏྟཱནམྤི ཏེསཾ ཨེཝརཱུཔཱ མངྒལཀིརིཡཱ མཱ ཧོཏཱུ’’ཏི. ‘‘ཀཐེཧི ཏཱཝ བྷདྡེ’’ཏི. ‘‘སཱམི, ན སཀྐཱ ཀཐེཏུ’’ནྟི. ‘‘བྷདྡེ, ཏཡཱ ཝིདིཏཾ རཧསྶཾ མམ ཨཀཐིཏཀཱལཏོ པཊྛཱཡ ནཏྠི ཨམྷཱཀཾ སམགྒསཾཝཱསོ’’ཏི. སཱ ཏེན ནིཔྤཱིལི༹ཡམཱནཱ ‘‘ཏེན ཧི, སཱམི, སུཎཱཧཱི’’ཏི ཝཏྭཱ ཨིམཾ གཱཐམཱཧ –
‘‘ཨེདིསོ མཱ ཨམིཏྟཱནཾ, ཝིཝཱཧོ ཧོཏུ མཱདྷར;
ཡཐཱ པཉྩཱལརཱཛསྶ, ཝེདེཧེན བྷཝིསྶཏཱི’’ཏི.
ཨིམཾ གཱཐཾ ཝཏྭཱ པུན ཏེན ‘‘བྷདྡེ, ཀསྨཱ ཨེཝརཱུཔཾ ཀཐཾ ཀཐེསཱི’’ཏི ཝུཏྟེ ‘‘ཏེན ཧི སུཎཱཧི, ཨེཏྠ དོསཾ ཏེ ཀཐེསྶཱམཱི’’ཏི ཝཏྭཱ ཨིམཾ གཱཐམཱཧ –
‘‘ཨཱནཡིཏྭཱན ¶ ཝེདེཧཾ, པཉྩཱལཱནཾ རཐེསབྷོ;
ཏཏོ ནཾ གྷཱཏཡིསྶཏི, ནསྶ སཁཱི བྷཝིསྶཏཱི’’ཏི.
ཏཏྠ ཏཏོ ནཾ གྷཱཏཡིསྶཏཱིཏི ཡདཱ སོ ཨིམཾ ནགརཾ ཨཱགཏོ བྷཝིསྶཏི, ཏདཱ ཏེན སདྡྷིཾ སཁིབྷཱཝཾ མིཏྟདྷམྨཾ ན ཀརིསྶཏི, དཊྛུམྤིསྶ དྷཱིཏརཾ ན དསྶཏི. ཨེཀོ ཀིརསྶ པན ཨཏྠདྷམྨཱནུསཱསཀོ མཧོསདྷཔཎྜིཏོ ནཱམ ཨཏྠི, ཏེན སདྡྷིཾ ཏཾ གྷཱཏེསྶཏི. ཏེ ཨུབྷོ ཛནེ གྷཱཏེཏྭཱ ཛཡཔཱནཾ པིཝིསྶཱམཱཏི ཀེཝཊྚོ རཉྙཱ སདྡྷིཾ མནྟེཏྭཱ ཏཾ གཎྷིཏྭཱ ཨཱགནྟུཾ གཏོཏི.
ཨེཝཾ ¶ སཱ གུཡ྄ཧམནྟཾ ནིསྶེསཾ ཀཏྭཱ སུཝཔཎྜིཏསྶ ཀཐེསི. ཏཾ སུཏྭཱ སུཝཔཎྜིཏོ ‘‘ཨཱཙརིཡོ ཀེཝཊྚོ ཨུཔཱཡཀུསལོ, ཨཙྪརིཡཾ ཏསྶ རཉྙོ ཨེཝརཱུཔེན ཨུཔཱཡེན གྷཱཏན’’ནྟི ཀེཝཊྚཾ ཝཎྞེཏྭཱ ‘‘ཨེཝརཱུཔེན ཨཝམངྒལེན ཨམྷཱཀཾ ཀོ ཨཏྠོ, ཏུཎྷཱིབྷཱུཏཱ སཡཱམཱ’’ཏི ཝཏྭཱ ཨཱགམནཀམྨསྶ ནིཔྥཏྟིཾ ཉཏྭཱ ཏཾ རཏྟིཾ ཏཱཡ སདྡྷིཾ ཝསིཏྭཱ ‘‘བྷདྡེ, ཨཧཾ སིཝིརཊྛཾ གནྟྭཱ མནཱཔཱཡ བྷརིཡཱཡ ལདྡྷབྷཱཝཾ སིཝིརཉྙོ དེཝིཡཱ ཙ ཨཱརོཙེསྶཱམཱི’’ཏི གམནཾ ཨནུཛཱནཱཔེཏུཾ ཨཱཧ –
‘‘ཧནྡ ¶ ཁོ མཾ ཨནུཛཱནཱཧི, རཏྟིཡོ སཏྟམཏྟིཡོ;
ཡཱཝཱཧཾ སིཝིརཱཛསྶ, ཨཱརོཙེམི མཧེསིནོ;
ལདྡྷོ ཙ མེ ཨཱཝསཐོ, སཱལི༹ཀཱཡ ཨུཔནྟིཀ’’ནྟི.
ཏཏྠ མཧེསིནོཏི མཧེསིཡཱ ཙསྶ. ཨཱཝསཐོཏི ཝསནཊྛཱནཾ. ཨུཔནྟིཀནྟི ཨཐ ནེ ‘‘ཨེཐ ཏསྶཱ སནྟིཀཾ གཙྪཱམཱ’’ཏི ཝཏྭཱ ཨཊྛམེ དིཝསེ ཨིདྷཱནེཏྭཱ མཧནྟེན པརིཝཱརེན ཏཾ གཧེཏྭཱ གམིསྶཱམི, ཡཱཝ མམཱགམནཾ, ཏཱཝ མཱ ཨུཀྐཎྛཱིཏི.
ཏཾ སུཏྭཱ སཱལི༹ཀཱ ཏེན ཝིཡོགཾ ཨནིཙྪམཱནཱཔི ཏསྶ ཝཙནཾ པཊིཀྑིཔིཏུཾ ཨསཀྐོནྟཱི ཨནནྟརཾ གཱཐམཱཧ –
‘‘ཧནྡ ཁོ ཏཾ ཨནུཛཱནཱམི, རཏྟིཡོ སཏྟམཏྟིཡོ;
སཙེ ཏྭཾ སཏྟརཏྟེན, ནཱགཙྪསི མམནྟིཀེ;
མཉྙེ ཨོཀྐནྟསཏྟཾ མཾ, མཏཱཡ ཨཱགམིསྶསཱི’’ཏི.
ཏཏྠ ¶ མཉྙེ ཨོཀྐནྟསཏྟཾ མནྟི ཨེཝཾ སནྟེ ཨཧཾ མཾ ཨཔགཏཛཱིཝིཏཾ སལླཀྑེམི. སོ ཏྭཾ ཨཊྛམེ དིཝསེ ཨནཱགཙྪནྟོ མཡི མཏཱཡ ཨཱགམིསྶསི, ཏསྨཱ མཱ པཔཉྩཾ ཨཀཱསཱིཏི.
ཨིཏརོཔི ‘‘བྷདྡེ, ཀིཾ ཝདེསི, མཡ྄ཧམྤི ཨཊྛམེ དིཝསེ ཏཾ ཨཔསྶནྟསྶ ཀུཏོ ཛཱིཝིཏ’’ནྟི ཝཱཙཱཡ ཝཏྭཱ ཧདཡེན པན ‘‘ཛཱིཝ ཝཱ ཏྭཾ མར ཝཱ, ཀིཾ ཏཡཱ མཡ྄ཧ’’ནྟི ཙིནྟེཏྭཱ ཨུཊྛཱཡ ཐོཀཾ སིཝིརཊྛཱབྷིམུཁོ གནྟྭཱ ནིཝཏྟིཏྭཱ མིཐིལཾ གནྟྭཱ པཎྜིཏསྶ ཨཾསཀཱུཊེ ཨོཏརིཏྭཱ མཧཱསཏྟེན པན ཏཱཡ སཉྙཱཡ ཨུཔརིཔཱསཱདཾ ཨཱརོཔེཏྭཱ པུཊྛོ སབྦཾ ཏཾ པཝཏྟིཾ པཎྜིཏསྶ ¶ ཨཱརོཙེསི. སོཔིསྶ པུརིམནཡེནེཝ སབྦཾ སཀྐཱརམཀཱསི. ཏམཏྠཾ པཀཱསེནྟོ སཏྠཱ ཨཱཧ –
‘‘ཏཏོ ཙ ཁོ སོ གནྟྭཱན, མཱདྷརོ སུཝཔཎྜིཏོ;
མཧོསདྷསྶ ཨཀྑཱསི, སཱལི༹ཀཱཝཙནཾ ཨིད’’ནྟི.
ཏཏྠ སཱལི༹ཀཱཝཙནཾ ཨིདནྟི ཨིདཾ སཱལི༹ཀཱཡ ཝཙནནྟི སབྦཾ ཝིཏྠཱརེཏྭཱ ཀཐེསཱིཏི.
སུཝཁཎྜཾ ནིཊྛིཏཾ.
མཧཱཨུམངྒཀཎྜཾ
ཏཾ སུཏྭཱ མཧཱསཏྟོ ཙིནྟེསི ‘‘རཱཛཱ མམ ཨནིཙྪམཱནསྶེཝ གམིསྶཏི, གནྟྭཱ ཙ པན མཧཱཝིནཱསཾ པཱཔུཎིསྶཏི. ཨཐ མཡ྄ཧཾ ‘ཨེཝརཱུཔསྶ ¶ ནཱམ ཡསདཱཡཀསྶ རཉྙོ ཝཙནཾ ཧདཡེ ཀཏྭཱ ཏསྶ སངྒཧཾ ནཱཀཱསཱི’ཏི གརཧཱཔི ཨུཔྤཛྫིསྶཏི, མཱདིསེ པཎྜིཏེ ཝིཛྫམཱནེ ཀིཾཀཱརཎཱ ཨེས ནསྶིསྶཏི, ཨཧཾ རཉྙོ པུརེཏརམེཝ གནྟྭཱ ཙཱུལ༹ནིཾ དིསྭཱ སུཝིབྷཏྟཾ ཀཏྭཱ ཝིདེཧརཉྙོ ནིཝཱསཏྠཱཡ ནགརཾ མཱཔེཏྭཱ གཱཝུཏམཏྟཾ ཛངྒྷཨུམངྒཾ, ཨཌྜྷཡོཛནིཀཉྩ མཧཱཨུམངྒཾ, ཀཱརེཏྭཱ ཙཱུལ༹ནིརཉྙོ དྷཱིཏརཾ ཨབྷིསིཉྩིཏྭཱ ཨམྷཱཀཾ རཉྙོཔཱདཔརིཙཱརིཀཾ ཀཏྭཱ ཨཊྛཱརསཨཀྑོབྷཎིསངྑེཧི བལེཧི ཨེཀསཏརཱཛཱུསུ པརིཝཱརེཏྭཱ ཋིཏེསྭེཝ ཨམྷཱཀཾ རཱཛཱནཾ རཱཧུམུཁཏོ ཙནྡཾ ཝིཡ མོཙེཏྭཱ ཨཱདཱཡཱགམནཾ ནཱམ མམ བྷཱརོ’’ཏི. ཏསྶེཝཾ ཙིནྟེནྟསྶ སརཱིརེ པཱིཏི ཨུཔྤཛྫི. སོ པཱིཏིཝེགེན ཨུདཱནཾ ཨུདཱནེནྟོ ཨིམཾ ཨུཔཌྜྷགཱཐམཱཧ –
‘‘ཡསྶེཝ ¶ གྷརེ བྷུཉྫེཡྻ བྷོགཾ, ཏསྶེཝ ཨཏྠཾ པུརིསོ ཙརེཡྻཱ’’ཏི.
ཏསྶཏྠོ – ཡསྶ རཉྙོ སནྟིཀེ པུརིསོ མཧནྟཾ ཨིསྶརིཡཾ ལབྷིཏྭཱ བྷོགཾ བྷུཉྫེཡྻ, ཨཀྐོསནྟསྶཔི པཧརནྟསྶཔི གལེ གཧེཏྭཱ ནིཀྐཌྜྷནྟསྶཔི ཏསྶེཝ ཨཏྠཾ ཧིཏཾ ཝུཌྜྷིཾ པཎྜིཏོ ཀཱཡདྭཱརཱདཱིཧི ཏཱིཧི དྭཱརེཧི ཙརེཡྻ. ན ཧི མིཏྟདུབྦྷིཀམྨཾ པཎྜིཏེཧི ཀཱཏབྦནྟི.
ཨིཏི ¶ ཙིནྟེཏྭཱ སོ ནྷཏྭཱ ཨལངྐརིཏྭཱ མཧནྟེན ཡསེན རཱཛཀུལཾ གནྟྭཱ རཱཛཱནཾ ཝནྡིཏྭཱ ཨེཀམནྟཾ ཋིཏོ ཨཱཧ – ‘‘ཀིཾ, དེཝ, གཙྪིསྶཐ ཨུཏྟརཔཉྩཱལནགར’’ནྟི? ‘‘ཨཱམ, ཏཱཏ, པཉྩཱལཙནྡིཾ ཨལབྷནྟསྶ མམ ཀིཾ རཛྫེན, མཱ མཾ པརིཙྩཛི, མཡཱ སདྡྷིཾཡེཝ ཨེཧི. ཏཏྠ ཨམྷཱཀཾ གཏཀཱརཎཱ དྭེ ཨཏྠཱ ནིཔྥཛྫིསྶནྟི, ཨིཏྠིརཏནཉྩ ལཙྪཱམི, རཉྙཱ ཙ མེ སདྡྷིཾ མེཏྟི པཏིཊྛཧིསྶཏཱི’’ཏི. ཨཐ ནཾ པཎྜིཏོ ‘‘ཏེན ཧི, དེཝ, ཨཧཾ པུརེ གནྟྭཱ ཏུམྷཱཀཾ ནིཝེསནཱནི མཱཔེསྶཱམི, ཏུམྷེ མཡཱ པཧིཏསཱསནེན ཨཱགཙྪེཡྻཱཐཱ’’ཏི ཝདནྟོ དྭེ གཱཐཱ ཨབྷཱསི –
‘‘ཧནྡཱཧཾ གཙྪཱམི པུརེ ཛནིནྡ, པཉྩཱལརཱཛསྶ པུརཾ སུརམྨཾ;
ནིཝེསནཱནི མཱཔེཏུཾ, ཝེདེཧསྶ ཡསསྶིནོ.
‘‘ནིཝེསནཱནི མཱཔེཏྭཱ, ཝེདེཧསྶ ཡསསྶིནོ;
ཡདཱ ཏེ པཧིཎེཡྻཱམི, ཏདཱ ཨེཡྻཱསི ཁཏྟིཡཱ’’ཏི.
ཏཏྠ ¶ ཝེདེཧསྶཱཏི ཏཝ ཝིདེཧརཱཛསྶ. ཨེཡྻཱསཱིཏི ཨཱགཙྪེཡྻཱསཱིཏི.
ཏཾ སུཏྭཱ རཱཛཱ ‘‘ན ཀིར མཾ པཎྜིཏོ པརིཙྩཛཏཱི’’ཏི ཧཊྛཏུཊྛོ ཧུཏྭཱ ཨཱཧ – ‘‘ཏཱཏ, ཏཝ པུརེ གཙྪནྟསྶ ཀིཾ ལདྡྷུཾ ཝཊྚཏཱི’’ཏི? ‘‘བལཝཱཧནཾ, དེཝཱ’’ཏི. ‘‘ཡཏྟཀཾ ཨིཙྪསི, ཏཏྟཀཾ གཎྷ, ཏཱཏཱ’’ཏི. ‘‘ཙཏྟཱརི བནྡྷནཱགཱརཱནི ཝིཝརཱཔེཏྭཱ ཙོརཱནཾ སངྑལིཀབནྡྷནཱནི བྷིནྡཱཔེཏྭཱ ཏེཔི མཡཱ སདྡྷིཾ པེསེཐ དེཝཱ’’ཏི. ‘‘ཡཐཱརུཙི ཀརོཧི, ཏཱཏཱ’’ཏི. མཧཱསཏྟོ བནྡྷནཱགཱརདྭཱརཱནི ཝིཝརཱཔེཏྭཱ སཱུརེ མཧཱཡོདྷེ གཏཊྛཱནེ ཀམྨཾ ནིཔྥཱདེཏུཾ སམཏྠེ ནཱིཧརཱཔེཏྭཱ ‘‘མཾ ཨུཔཊྛཧཐཱ’’ཏི ཝཏྭཱ ཏེསཾ སཀྐཱརཾ ཀཱརེཏྭཱ ཝཌྜྷཀིཀམྨཱརཙམྨཀཱརཨིཊྛཀཔཱསཱཎཀཱརཙིཏྟཀཱརཱདཡོ ནཱནཱསིཔྤཀུསལཱ ཨཊྛཱརས སེནིཡོ ཨཱདཱཡ ¶ ཝཱསིཕརསུཀུདྡཱལཁཎིཏྟིཨཱདཱིནི བཧཱུནི ཨུཔཀརཎཱནི གཱཧཱཔེཏྭཱ མཧཱབལཀཱཡཔརིཝུཏོ ནགརཱ ནིཀྑམི. ཏམཏྠཾ པཀཱསེནྟོ སཏྠཱ ཨཱཧ –
‘‘ཏཏོ ¶ ཙ པཱཡཱསི པུརེ མཧོསདྷོ, པཉྩཱལརཱཛསྶ པུརཾ སུརམྨཾ;
ནིཝེསནཱནི མཱཔེཏུཾ, ཝེདེཧསྶ ཡསསྶིནོ’’ཏི.
མཧཱསཏྟོཔི གཙྪནྟོ ཡོཛནནྟརེ ཡོཛནནྟརེ ཨེཀེཀཾ གཱམཾ ནིཝེསེཏྭཱ ཨེཀེཀཾ ཨམཙྩཾ ‘‘ཏུམྷེ རཉྙོ པཉྩཱལཙནྡིཾ གཧེཏྭཱ ནིཝཏྟནཀཱལེ ཧཏྠིཨསྶརཐེ ཀཔྤེཏྭཱ རཱཛཱནཾ ཨཱདཱཡ པཙྩཱམིཏྟེ པཊིབཱཧནྟཱ ཁིཔྤཾ མིཐིལཾ པཱཔེཡྻཱཐཱ’’ཏི ཝཏྭཱ ཋཔེསི. གངྒཱཏཱིརཾ པན པཏྭཱ ཨཱནནྡཀུམཱརཾ པཀྐོསཱཔེཏྭཱ ‘‘ཨཱནནྡ, ཏྭཾ ཏཱིཎི ཝཌྜྷཀིསཏཱནི ཨཱདཱཡ ཨུདྡྷཾགངྒཾ གནྟྭཱ སཱརདཱརཱུནི གཱཧཱཔེཏྭཱ ཏིསཏམཏྟཱ ནཱཝཱ མཱཔེཏྭཱ ནགརསྶཏྠཱཡ ཏཏྠེཝ ཏཙྪཱཔེཏྭཱ སལླཧུཀཱནཾ དཱརཱུནཾ ནཱཝཱཡ པཱུརཱཔེཏྭཱ ཁིཔྤཾ ཨཱགཙྪེཡྻཱསཱི’’ཏི པེསེསི. སཡཾ པན ནཱཝཱཡ གངྒཾ ཏརིཏྭཱ ཨོཏིཎྞཊྛཱནཏོ པཊྛཱཡ པདསཉྙཱཡེཝ གཎེཏྭཱ ‘‘ཨིདཾ ཨཌྜྷཡོཛནཊྛཱནཾ, ཨེཏྠ མཧཱཨུམངྒོ བྷཝིསྶཏི, ཨིམསྨིཾ ཋཱནེ རཉྙོ ནིཝེསནནགརཾ བྷཝིསྶཏི, ཨིཏོ པཊྛཱཡ ཡཱཝ རཱཛགེཧཱ གཱཝུཏམཏྟེ ཋཱནེ ¶ ཛངྒྷཨུམངྒོ བྷཝིསྶཏཱི’’ཏི པརིཙྪིནྡིཏྭཱ ནགརཾ པཱཝིསི. ཙཱུལ༹ནིརཱཛཱ བོདྷིསཏྟསྶ ཨཱགམནཾ སུཏྭཱ ‘‘ཨིདཱནི མེ མནོརཐོ མཏྠཀཾ པཱཔུཎིསྶཏི, པཙྩཱམིཏྟཱནཾ པིཊྛིཾ པསྶིསྶཱམི, ཨིམསྨིཾ ཨཱགཏེ ཝེདེཧོཔི ན ཙིརསྶེཝ ཨཱགམིསྶཏི, ཨཐ ནེ ཨུབྷོཔི མཱརེཏྭཱ སཀལཛམྦུདཱིཔཏལེ ཨེཀརཛྫཾ ཀརིསྶཱམཱི’’ཏི པརམཏུཊྛིཾ པཏྟོ ཨཧོསི. སཀལནགརཾ སངྑུབྷི ‘‘ཨེས ཀིར མཧོསདྷཔཎྜིཏོ, ཨིམིནཱ ཀིར ཨེཀསཏརཱཛཱནོ ལེཌྜུནཱ ཀཱཀཱ ཝིཡ པལཱཔིཏཱ’’ཏི.
མཧཱསཏྟོ ནཱགརེསུ ཨཏྟནོ རཱུཔསམྤཏྟིཾ པསྶནྟེསུཡེཝ རཱཛདྭཱརཾ གནྟྭཱ རཉྙོ པཊིཝེདེཏྭཱ ‘‘པཝིསཏཱུ’’ཏི ཝུཏྟེ པཝིསིཏྭཱ རཱཛཱནཾ ཝནྡིཏྭཱ ཨེཀམནྟཾ ནིསཱིདི. ཨཐ ནཾ རཱཛཱ པཊིསནྠཱརཾ ཀཏྭཱ ‘‘ཏཱཏ, རཱཛཱ ཀདཱ ཨཱགམིསྶཏཱི’’ཏི པུཙྪི. ‘‘མཡཱ པེསིཏཀཱལེ, དེཝཱ’’ཏི. ‘‘ཏྭཾ པན ཀིམཏྠཾ ཨཱགཏོསཱི’’ཏི. ‘‘ཨམྷཱཀཾ རཉྙོ ནིཝེསནཾ མཱཔེཏུཾ, དེཝཱ’’ཏི. ‘‘སཱདྷུ, ཏཱཏཱ’’ཏི. ཨཐསྶ སེནཱཡ པརིབྦཡཾ དཱཔེཏྭཱ མཧཱསཏྟསྶ མཧནྟཾ སཀྐཱརཾ ཀཱརེཏྭཱ ནིཝེསནགེཧཾ དཱཔེཏྭཱ ‘‘ཏཱཏ, ཡཱཝ ཏེ རཱཛཱ ནཱགཙྪཏི, ཏཱཝ ཨནུཀྐཎྛམཱནོ ཨམྷཱཀམྤི ཀཏྟབྦཡུཏྟཀཾ ¶ ཀརོནྟོཝ ཝསཱཧི ཏྭ’’ནྟི ཨཱཧ. སོ ཀིར རཱཛནིཝེསནཾ ཨབྷིརུཧནྟོཝ མཧཱསོཔཱནཔཱདམཱུལེ ཋཏྭཱ ‘‘ཨིདྷ ཛངྒྷཨུམངྒདྭཱརཾ བྷཝིསྶཏཱི’’ཏི སལླཀྑེསི. ཨཐསྶ ཨེཏདཧོསི ‘‘རཱཛཱ ‘ཨམྷཱཀམྤི ཀཏྟབྦཡུཏྟཀཾ ཀརོཧཱི’ཏི ཝདཏི, ཨུམངྒེ ཁཎིཡམཱནེ ཡཐཱ ཨིདཾ སོཔཱནཾ ན ¶ ཨོསཀྐཏི, ཏཐཱ ཀཱཏུཾ ཝཊྚཏཱི’’ཏི. ཨཐ རཱཛཱནཾ ཨེཝམཱཧ – ‘‘དེཝ, ཨཧཾ པཝིསནྟོ སོཔཱནཔཱདམཱུལེ ཋཏྭཱ ནཝཀམྨཾ ཨོལོཀེནྟོ མཧཱསོཔཱནེ དོསཾ པསྶིཾ. སཙེ ཏེ རུཙྩཏི, ཨཧཾ དཱརཱུནི ལབྷནྟོ མནཱཔཾ ཀཏྭཱ ཨཏྠརེཡྻ’’ནྟི. ‘‘སཱདྷུ, པཎྜིཏ, ཨཏྠརཱཧཱི’’ཏི. སོ ‘‘ཨིདྷ ཨུམངྒདྭཱརཾ བྷཝིསྶཏཱི’’ཏི སལླཀྑེཏྭཱ ཏཾ པོརཱཎསོཔཱནཾ ཧརིཏྭཱ ཡཏྠ ཨུམངྒདྭཱརཾ བྷཝིསྶཏི, ཏཏྠ པཾསུནོ ཨཔཏནཏྠཱཡ ཕལཀསནྠཱརཾ ཀཱརེཏྭཱ ཡཐཱ སོཔཱནཾ ན ཨོསཀྐཏི, ཨེཝཾ ནིཙྩལཾ ཀཏྭཱ སོཔཱནཾ ཨཏྠརི. རཱཛཱ ཏཾ ཀཱརཎཾ ཨཛཱནནྟོ ‘‘མམ སིནེཧེན ཀརོཏཱི’’ཏི མཉྙི.
ཨེཝཾ ཏཾ དིཝསཾ ཏེནེཝ ནཝཀམྨེན ¶ ཝཱིཏིནཱམེཏྭཱ པུནདིཝསེ རཱཛཱནཾ ཨཱཧ – ‘‘དེཝ, སཙེ ཨམྷཱཀཾ རཉྙོ ཝསནཊྛཱནཾ ཛཱནེཡྻཱམ, མནཱཔཾ ཀཏྭཱ པཊིཛགྒེཡྻཱམཱ’’ཏི. སཱདྷུ, པཎྜིཏ, ཋཔེཏྭཱ མམ ནིཝེསནཾ སཀལནགརེ ཡཾ ནིཝེསནཾ ཨིཙྪསི, ཏཾ གཎྷཱཏི. མཧཱརཱཛ, མཡཾ ཨཱགནྟུཀཱ, ཏུམྷཱཀཾ བཧཱུ ཝལླབྷཱ ཡོདྷཱ, ཏེ ཨཏྟནོ ཨཏྟནོ གེཧེསུ གཡ྄ཧམཱནེསུ ཨམྷེཧི སདྡྷིཾ ཀལཧཾ ཀརིསྶནྟི. ‘‘ཏདཱ, དེཝ, ཏེཧི སདྡྷིཾ མཡཾ ཀིཾ ཀརིསྶཱམཱ’’ཏི? ‘‘ཏེསཾ ཝཙནཾ མཱ གཎྷ. ཡཾ ཨིཙྪསི, ཏཾ ཋཱནམེཝ གཎྷཱཔེཧཱི’’ཏི. ‘‘དེཝ, ཏེ པུནཔྤུནཾ ཨཱགནྟྭཱ ཏུམྷཱཀཾ ཀཐེསྶནྟི, ཏེན ཏུམྷཱཀཾ ཙིཏྟསུཁཾ ན ལབྷིསྶཏི. སཙེ པན ཨིཙྪེཡྻཱཐ, ཡཱཝ མཡཾ ནིཝེསནཱནི གཎྷཱམ, ཏཱཝ ཨམྷཱཀཾཡེཝ མནུསྶཱ དོཝཱརིཀཱ ཨསྶུ. ཏཏོ ཏེ དྭཱརཾ ཨལབྷིཏྭཱ ནཱགམིསྶནྟི. ཨེཝཾ སནྟེ ཏུམྷཱཀམྤི ཙིཏྟསུཁཾ ལབྷིསྶཏཱི’’ཏི. རཱཛཱ ‘‘སཱདྷཱུ’’ཏི སམྤཊིཙྪི.
མཧཱསཏྟོ སོཔཱནཔཱདམཱུལེ སོཔཱནསཱིསེ མཧཱདྭཱརེཏི སབྦཏྠ ཨཏྟནོ མནུསྶེཡེཝ ཋཔེཏྭཱ ‘‘ཀསྶཙི པཝིསིཏུཾ མཱ ཨདཏྠཱ’’ཏི ཝཏྭཱ ཨཐ རཉྙོ མཱཏུ ནིཝེསནཾ གནྟྭཱ ‘‘བྷིནྡནཱཀཱརཾ དསྶེཐཱ’’ཏི མནུསྶེ ཨཱཎཱཔེསི. ཏེ དྭཱརཀོཊྛཀཱལིནྡཏོ པཊྛཱཡ ཨིཊྛཀཱ ཙ མཏྟིཀཱ ཙ ཨཔནེཏུཾ ཨཱརབྷིཾསུ. རཱཛམཱཏཱ ཏཾ པཝཏྟིཾ སུཏྭཱ ཨཱགནྟྭཱ ‘‘ཀིསྶ, ¶ ཏཱཏཱ, མམ གེཧཾ བྷིནྡཐཱ’’ཏི ཨཱཧ. ‘‘མཧོསདྷཔཎྜིཏོ བྷིནྡཱཔེཏྭཱ ཨཏྟནོ རཉྙོ ནིཝེསནཾ ཀཱཏུཀཱམོ’’ཏི. ‘‘ཡདི ཨེཝཾ ཨིདྷེཝ ཝསཐཱ’’ཏི. ‘‘ཨམྷཱཀཾ རཉྙོ མཧནྟཾ བལཝཱཧནཾ, ཨིདཾ ནཔྤཧོཏི, ཨཉྙཾ མཧནྟཾ གེཧཾ ཀརིསྶཱམཱ’’ཏི. ‘‘ཏུམྷེ མཾ ན ཛཱནཱཐ, ཨཧཾ རཱཛམཱཏཱ, ཨིདཱནི པུཏྟསྶ སནྟིཀཾ གནྟྭཱ ཛཱནིསྶཱམཱི’’ཏི. ‘‘མཡཾ རཉྙོ ཝཙནེན བྷིནྡཱམ, སཀྐོནྟཱི ཝཱརེཧཱི’’ཏི. སཱ ཀུཛ྄ཛྷིཏྭཱ ‘‘ཨིདཱནི ཝོ ཀཏྟབྦཾ ཛཱནིསྶཱམཱི’’ཏི རཱཛདྭཱརཾ ཨགམཱསི. ཨཐ ནཾ ‘‘མཱ པཝིསཱ’’ཏི དོཝཱརིཀཱ ཝཱརཡིཾསུ. ‘‘ཨཧཾ རཱཛམཱཏཱ’’ཏི. ‘‘ན མཡཾ ཏཾ ཛཱནཱམ, མཡཾ རཉྙཱ ‘ཀསྶཙི པཝིསིཏུཾ མཱ ཨདཏྠཱ’ཏི ཨཱཎཏྟཱ, གཙྪ ཏྭ’’ནྟི. སཱ གཧེཏབྦགཧཎཾ ཨཔསྶནྟཱི ནིཝཏྟིཏྭཱ ¶ ཨཏྟནོ ནིཝེསནཾ ཨོལོཀེནྟཱི ཨཊྛཱསི. ཨཐ ནཾ ཨེཀོ པུརིསོ ‘‘ཀིཾ ཨིདྷ ¶ ཀརོསི, གཙྪསི, ན གཙྪསཱི’’ཏི གཱིཝཱཡ གཧེཏྭཱ བྷཱུམིཡཾ པཱཏེསི.
སཱ ཙིནྟེསི ‘‘ཨདྡྷཱ ཨིམེ རཉྙོ ཨཱཎཏྟཱ བྷཝིསྶནྟི, ཨིཏརཐཱ ཨེཝཾ ཀཱཏུཾ ན སཀྑིསྶནྟི, པཎྜིཏསྶེཝ སནྟིཀཾ གཙྪིསྶཱམཱི’’ཏི. སཱ གནྟྭཱ ‘‘ཏཱཏ མཧོསདྷ, ཀསྨཱ མམ ནིཝེསནཾ བྷིནྡཱཔེསཱི’’ཏི ཨཱཧ. སོ ཏཱཡ སདྡྷིཾ ན ཀཐེསི, སནྟིཀེ ཋིཏོ པུརིསོ པནསྶ ‘‘དེཝི, ཀིཾ ཀཐེསཱི’’ཏི ཨཱཧ. ‘‘ཏཱཏ, མཧོསདྷཔཎྜིཏོ ཀསྨཱ མམ གེཧཾ བྷིནྡཱཔེཏཱི’’ཏི? ‘‘ཝེདེཧརཉྙོ ཝསནཊྛཱནཾ ཀཱཏུ’’ནྟི. ‘‘ཀིཾ, ཏཱཏ, ཨེཝཾ མཧནྟེ ནགརེ ཨཉྙཏྠ ནིཝེསནཊྛཱནཾ ན ལབྦྷཏཱི’’ཏི མཉྙཏི. ‘‘ཨིམཾ སཏསཧསྶཾ ལཉྫཾ གཧེཏྭཱ ཨཉྙཏྠ གེཧཾ ཀཱརེཏཱུ’’ཏི. ‘‘སཱདྷུ, དེཝི, ཏུམྷཱཀཾ གེཧཾ ཝིསྶཛྫཱཔེསྶཱམི, ལཉྫསྶ གཧིཏབྷཱཝཾ མཱ ཀསྶཙི ཀཐཡིཏྠ. མཱ ནོ ཨཉྙེཔི ལཉྫཾ དཏྭཱ གེཧཱནི ཝིསྶཛྫཱཔེཏུཀཱམཱ ཨཧེསུ’’ནྟི. སཱདྷུ, ཏཱཏ, ‘‘རཉྙོ མཱཏཱ ལཉྫཾ ཨདཱསཱི’’ཏི མཡ྄ཧམྤི ལཛྫནཀམེཝ, ཏསྨཱ ན ཀསྶཙི ཀཐེསྶཱམཱིཏི. སོ ‘‘སཱདྷཱུ’’ཏི ཏསྶཱ སནྟིཀཱ སཏསཧསྶཾ གཧེཏྭཱ གེཧཾ ཝིསྶཛྫཱཔེཏྭཱ ཀེཝཊྚསྶ གེཧཾ ཨགམཱསི. སོཔི དྭཱརཾ གནྟྭཱ ཝེལུ༹པེསིཀཱཧི པིཊྛིཙམྨུཔྤཱཊནཾ ལབྷིཏྭཱ གཧེཏབྦགཧཎཾ ཨཔསྶནྟོ པུན གེཧཾ གནྟྭཱ སཏསཧསྶམེཝ ཨདཱསི. ཨེཏེནུཔཱཡེན སཀལནགརེ གེཧཊྛཱནཾ གཎྷནྟེན ལཉྫཾ གཧེཏྭཱ ལདྡྷཀཧཱཔཎཱནཉྙེཝ ནཝ ཀོཊིཡོ ཛཱཏཱ.
མཧཱསཏྟོ སཀལནགརཾ ཝིཙརིཏྭཱ རཱཛཀུལཾ ཨགམཱསི. ཨཐ ནཾ རཱཛཱ པུཙྪི ‘‘ཀིཾ, པཎྜིཏ, ལདྡྷཾ ཏེ ཝསནཊྛཱན’’ནྟི? ‘‘མཧཱརཱཛ, ཨདེནྟཱ ནཱམ ¶ ནཏྠི, ཨཔིཙ ཁོ པན གེཧེསུ གཡ྄ཧམཱནེསུ ཀིལམནྟི. ཏེསཾ པིཡཝིཔྤཡོགཾ ཀཱཏུཾ ཨམྷཱཀཾ ཨཡུཏྟཾ. བཧིནགརེ གཱཝུཏམཏྟེ ཋཱནེ གངྒཱཡ ཙ ནགརསྶ ཙ ཨནྟརེ ཨསུཀཊྛཱནེ ཨམྷཱཀཾ རཉྙོ ཝསནནགརཾ ཀརིསྶཱམཱི’’ཏི. ཏཾ སུཏྭཱ རཱཛཱ ‘‘ཨནྟོནགརེ ཡུཛ྄ཛྷིཏུམྤི དུཀྑཾ, ནེཝ སཀསེནཱ, ན པརསེནཱ ཉཱཏུཾ སཀྐཱ. བཧིནགརེ པན སུཁཾ ཡུདྡྷཾ ཀཱཏུཾ, ཏསྨཱ བཧིནགརེཡེཝ ཏེ ཀོཊྚེཏྭཱ ¶ མཱརེསྶཱམཱ’’ཏི ཏུསྶིཏྭཱ ‘‘སཱདྷུ, པཎྜིཏ, ཏཡཱ སལླཀྑིཏཊྛཱནེཡེཝ ཀཱརེཧཱི’’ཏི ཨཱཧ. ‘‘མཧཱརཱཛ, ཨཧཾ ཀཱརེསྶཱམི, ཏུམྷཱཀཾ པན མནུསྶེཧི དཱརུཔཎྞཱདཱིནཾ ཨཏྠཱཡ ཨམྷཱཀཾ ནཝཀམྨཊྛཱནཾ ནཱགནྟབྦཾ. ཨཱགཙྪནྟཱ ཧི ཀལཧཾ ཀརིསྶནྟི, ཏེནེཝ ཏུམྷཱཀཉྩ ཨམྷཱཀཉྩ ཙིཏྟསུཁཾ ན བྷཝིསྶཏཱི’’ཏི. ‘‘སཱདྷུ, པཎྜིཏ, ཏེན པསྶེན ནིསཉྩཱརཾ ཀཱརེཧཱི’’ཏི. ‘‘དེཝ, ཨམྷཱཀཾ ཧཏྠཱི ཨུདཀཱབྷིརཏཱ ཨུདཀེཡེཝ ཀཱིལི༹སྶནྟི. ཨུདཀེ ཨཱཝིལེ ཛཱཏེ ‘མཧོསདྷསྶ ཨཱགཏཀཱལཏོ པཊྛཱཡ པསནྣཾ ཨུདཀཾ པཱཏུཾ ན ལབྷཱམཱ’ཏི སཙེ ནཱགརཱ ཀུཛ྄ཛྷིསྶནྟི, ཏམྤི སཧིཏབྦ’’ནྟི ¶ . རཱཛཱ ‘‘ཝིསྶཏྠཱ ཏུམྷཱཀཾ ཧཏྠཱི ཀཱིལ༹ནྟཱུ’’ཏི ཝཏྭཱ ནགརེ བྷེརིཾ ཙརཱཔེསི – ‘‘ཡོ ཨིཏོ ནིཀྑམིཏྭཱ མཧོསདྷསྶ ནགརམཱཔིཏཊྛཱནཾ གཙྪཏི, ཏསྶ སཧསྶདཎྜོ’’ཏི.
མཧཱསཏྟོ རཱཛཱནཾ ཝནྡིཏྭཱ ཨཏྟནོ པརིསཾ ཨཱདཱཡ ནིཀྑམིཏྭཱ ཡཐཱཔརིཙྪིནྣཊྛཱནེ ནགརཾ མཱཔེཏུཾ ཨཱརབྷི. པཱརགངྒཱཡ ཝགྒུལིཾ ནཱམ གཱམཾ ཀཱརེཏྭཱ ཧཏྠིཨསྶརཐཝཱཧནཉྩེཝ གོབལིབདྡཉྩ ཏཏྠ ཋཔེཏྭཱ ནགརཀརཎཾ ཝིཙཱརེནྟོ ‘‘ཨེཏྟཀཱ ཨིདཾ ཀརོནྟཱུ’’ཏི སབྦཀམྨཱནི ཝིབྷཛིཏྭཱ ཨུམངྒཀམྨཾ པཊྛཔེསི. མཧཱཨུམངྒདྭཱརཾ གངྒཱཏིཏྠེ ཨཧོསི. སཊྛིམཏྟཱནི ཡོདྷསཏཱནི མཧཱཨུམངྒཾ ཁཎནྟི. མཧནྟེཧི ཙམྨཔསིབྦཀེཧི ཝཱལུཀཔཾསུཾ ཧརིཏྭཱ གངྒཱཡ པཱཏེནྟི. པཱཏིཏཔཱཏིཏཾ པཾསུཾ ཧཏྠཱི མདྡནྟི, གངྒཱ ཨཱལུ༹ལཱ སནྡཏི. ནགརཝཱསིནོ ‘‘མཧོསདྷསྶ ཨཱགཏཀཱལཏོ པཊྛཱཡ པསནྣཾ ཨུདཀཾ པཱཏུཾ ན ལབྷཱམ, གངྒཱ ཨཱལུ༹ལཱ སནྡཏི, ཀིཾ ནུ ཁོ ཨེཏ’’ནྟི ཝདནྟི. ཨཐ ནེསཾ པཎྜིཏསྶ ཨུཔནིཀྑིཏྟཀཔུརིསཱ ཨཱརོཙེནྟི ‘‘མཧོསདྷསྶ ཀིར ཧཏྠཱི ཨུདཀཾ ཀཱིལ༹ནྟཱ གངྒཱཡ ཀདྡམཾ ཀརོནྟི, ཏེན གངྒཱ ཨཱལུ༹ལཱ སནྡཏཱི’’ཏི.
བོདྷིསཏྟཱནཾ ¶ ཨདྷིཔྤཱཡོ ནཱམ སམིཛ྄ཛྷཏི, ཏསྨཱ ཨུམངྒེ མཱུལཱནི ཝཱ ཁཱཎུཀཱནི ཝཱ མརུམྦཱནི ཝཱ པཱསཱཎཱནི ཝཱ སབྦེཔི བྷཱུམིཡཾ པཝིསིཾསུ. ཛངྒྷཨུམངྒསྶ དྭཱརཾ ཏསྨིཾཡེཝ ནགརེ ཨཧོསི. ཏཱིཎི པུརིསསཏཱནི ཛངྒྷཨུམངྒཾ ཁཎནྟི ¶ , ཙམྨཔསིབྦཀེཧི པཾསུཾཧརིཏྭཱ ཏསྨིཾ ནགརེ པཱཏེནྟི. པཱཏིཏཔཱཏིཏཾ ཨུདཀེན མདྡཱཔེཏྭཱ པཱཀཱརཾ ཙིནནྟི, ཨཉྙཱནི ཝཱ ཀམྨཱནི ཀརོནྟི. མཧཱཨུམངྒསྶ པཝིསནདྭཱརཾ ནགརེ ཨཧོསི ཨཊྛཱརསཧཏྠུབྦེདྷེན ཡནྟཡུཏྟདྭཱརེན སམནྣཱགཏཾ. ཏཉྷི ཨེཀཱཡ ཨཱཎིཡཱ ཨཀྐནྟཱཡ པིདྷཱིཡཏི, ཨེཀཱཡ ཨཱཎིཡཱ ཨཀྐནྟཱཡ ཝིཝརཱིཡཏི. མཧཱཨུམངྒསྶ དྭཱིསུ པསྶེསུ ཨིཊྛཀཱཧི ཙིནིཏྭཱ སུདྷཱཀམྨཾ ཀཱརེསི, མཏྠཀེ ཕལཀེན ཚནྣཾ ཀཱརེཏྭཱ ཨུལློཀཾ མཏྟིཀཱཡ ལིམྤཱཔེཏྭཱ སེཏཀམྨཾ ཀཱརེཏྭཱ ཙིཏྟཀམྨཾ ཀཱརེསི. སབྦཱནི པནེཏྠ ཨསཱིཏི མཧཱདྭཱརཱནི ཙཏུསཊྛི ཙཱུལ༹དྭཱརཱནི ཨཧེསུཾ, སབྦཱནི ཡནྟཡུཏྟཱནེཝ. ཨེཀཱཡ ཨཱཎིཡཱ ཨཀྐནྟཱཡ སབྦཱནེཝ པིདྷཱིཡནྟི, ཨེཀཱཡ ཨཱཎིཡཱ ཨཀྐནྟཱཡ སབྦཱནེཝ ཝིཝརཱིཡནྟི. དྭཱིསུ པསྶེསུ ཨནེཀསཏདཱིཔཱལཡཱ ཨཧེསུཾ, ཏེཔི ཡནྟཡུཏྟཱཡེཝ. ཨེཀསྨིཾ ཝིཝརིཡམཱནེ སབྦེ ཝིཝརཱིཡནྟི, ཨེཀསྨིཾ པིདྷཱིཡམཱནེ སབྦེ པིདྷཱིཡནྟི. དྭཱིསུ པསྶེསུ ཨེཀསཏཱནཾ ཁཏྟིཡཱནཾ ཨེཀསཏསཡནགབྦྷཱ ཨཧེསུཾ. ཨེཀེཀསྨིཾ གབྦྷེ ནཱནཱཝཎྞཔཙྩཏྠརཎཏྠཏཾ ཨེཀེཀཾ མཧཱསཡནཾ སམུསྶིཏསེཏཙྪཏྟཾ, ཨེཀེཀཾ མཧཱསཡནཾ ནིསྶཱཡ ཨེཀེཀཾ མཱཏུགཱམརཱུཔཀཾ ཨུཏྟམརཱུཔདྷརཾ པཏིཊྛིཏཾ. ཏཾ ཧཏྠེན ཨཔརཱམསིཏྭཱ ‘‘མནུསྶརཱུཔ’’ནྟི ན སཀྐཱ ཉཱཏུཾ, ཨཔིཙ ཨུམངྒསྶ ཨུབྷོསུ པསྶེསུ ཀུསལཱ ཙིཏྟཀཱརཱ ནཱནཔྤཀཱརཾ ཙིཏྟཀམྨཾ ཀརིཾསུ. སཀྐཝིལཱསསིནེརུསཏྟཔརིབྷཎྜཙཀྐཝཱལ༹སཱགརསཏྟམཧཱསར- ཙཏུམཧཱདཱིཔ-ཧིམཝནྟ-ཨནོཏཏྟསར-མནོསིལཱཏལ ཙནྡིམསཱུརིཡ-ཙཱཏུམཧཱརཱཛིཀཱདིཚཀཱམཱཝཙརསམྤཏྟིཡོཔི ¶ སབྦཱ ཨུམངྒེཡེཝ དསྶཡིཾསུ. བྷཱུམིཡཾ རཛཏཔཊྚཝཎྞཱ ཝཱལུཀཱ ཨོཀིརིཾསུ, ཨུཔརི ཨུལློཀཔདུམཱནི དསྶེསུཾ. ཨུབྷོསུ པསྶེསུ ནཱནཔྤཀཱརེ ཨཱཔཎེཔི དསྶཡིཾསུ. ཏེསུ ཏེསུ ཋཱནེསུ གནྡྷདཱམཔུཔྥདཱམཱདཱིནི ཨོལམྦེཏྭཱ སུདྷམྨཱདེཝསབྷཾ ཝིཡ ཨུམངྒཾ ཨལངྐརིཾསུ.
ཏཱནིཔི ཁོ ཏཱིཎི ཝཌྜྷཀིསཏཱནི ཏཱིཎི ནཱཝཱསཏཱནི བནྡྷིཏྭཱ ནིཊྛིཏཔརིཀམྨཱནཾ དབྦསམྦྷཱརཱནཾ པཱུརེཏྭཱ གངྒཱཡ ཨཱཧརིཏྭཱ པཎྜིཏསྶ ཨཱརོཙེསུཾ ¶ . ཏཱནི སོ ནགརེ ཨུཔཡོགཾ ནེཏྭཱ ‘‘མཡཱ ཨཱཎཏྟདིཝསེཡེཝ ཨཱཧརེཡྻཱཐཱ’’ཏི ཝཏྭཱ ནཱཝཱ པཊིཙྪནྣཊྛཱནེ ཋཔཱཔེསི. ནགརེ ཨུདཀཔརིཁཱ, ཀདྡམཔརིཁཱ, སུཀྑཔརིཁཱཏི ཏིསྶོ པརིཁཱཡོ ཀཱརེསི. ཨཊྛཱརསཧཏྠོ པཱཀཱརོ གོཔུརཊྚཱལཀོ ¶ རཱཛནིཝེསནཱནི ཧཏྠིསཱལཱདཡོ པོཀྑརཎིཡོཏི སབྦམེཏཾ ནིཊྛཾ ཨགམཱསི. ཨིཏི མཧཱཨུམངྒོ ཛངྒྷཨུམངྒོ ནགརནྟི སབྦམེཏཾ ཙཏཱུཧི མཱསེཧི ནིཊྛིཏཾ. ཨཐ མཧཱསཏྟོ ཙཏུམཱསཙྩཡེན རཉྙོ ཨཱགམནཏྠཱཡ དཱུཏཾ པཱཧེསི. ཏམཏྠཾ པཀཱསེནྟོ སཏྠཱ ཨཱཧ –
‘‘ནིཝེསནཱནི མཱཔེཏྭཱ, ཝེདེཧསྶ ཡསསྶིནོ;
ཨཐསྶ པཱཧིཎཱི དཱུཏཾ, ཝེདེཧཾ མིཐིལགྒཧཾ;
ཨེཧི དཱནི མཧཱརཱཛ, མཱཔིཏཾ ཏེ ནིཝེསན’’ནྟི.
ཏཏྠ པཱཧིཎཱིཏི པེསེསི.
རཱཛཱ དཱུཏསྶ ཝཙནཾ སུཏྭཱ ཏུཊྛཙིཏྟོ ཧུཏྭཱ མཧནྟེན པརིཝཱརེན ནགརཱ ནིཀྑམི. ཏམཏྠཾ པཀཱསེནྟོ སཏྠཱ ཨཱཧ –
‘‘ཏཏོ ཙ རཱཛཱ པཱཡཱསི, སེནཱཡ ཙཏུརངྒིཡཱ;
ཨནནྟཝཱཧནཾ དཊྛུཾ, ཕཱིཏཾ ཀཔིལིཡཾ པུར’’ནྟི.
ཏཏྠ ཨནནྟཝཱཧནནྟི ཨཔརིམིཏཧཏྠིཨསྶཱདིཝཱཧནཾ. ཀཔིལིཡཾ པུརནྟི ཀཔིལརཊྛེ མཱཔིཏཾ ནགརཾ.
སོ ཨནུཔུབྦེན གནྟྭཱ གངྒཱཏཱིརཾ པཱཔུཎི. ཨཐ ནཾ མཧཱསཏྟོ པཙྩུགྒནྟྭཱ ཨཏྟནཱ ཀཏནགརཾ པཝེསེསི. སོ ཏཏྠ པཱསཱདཝརགཏོ ནཱནགྒརསབྷོཛནཾ བྷུཉྫིཏྭཱ ཐོཀཾ ཝིསྶམིཏྭཱ སཱཡནྷསམཡེ ¶ ཨཏྟནོ ཨཱགཏབྷཱཝཾ ཉཱཔེཏུཾ ཙཱུལ༹ནིརཉྙོ དཱུཏཾ པེསེསི. ཏམཏྠཾ པཀཱསེནྟོ སཏྠཱ ཨཱཧ –
‘‘ཏཏོ ཙ ཁོ སོ གནྟྭཱན, བྲཧྨདཏྟསྶ པཱཧིཎི;
ཨཱགཏོསྨི མཧཱརཱཛ, ཏཝ པཱདཱནི ཝནྡིཏུཾ.
‘‘དདཱཧི དཱནི མེ བྷརིཡཾ, ནཱརིཾ སབྦངྒསོབྷིནིཾ;
སུཝཎྞེན པཊིཙྪནྣཾ, དཱསཱིགཎཔུརཀྑཏ’’ནྟི.
ཏཏྠ ¶ ཝནྡིཏུནྟི ཝེདེཧོ མཧལླཀོ, ཙཱུལ༹ནིརཱཛཱ ཏསྶ པུཏྟནཏྟམཏྟོཔི ན ཧོཏི, ཀིལེསཝསེན མུཙྪིཏོ པན ཧུཏྭཱ ‘‘ཛཱམཱཏརེན ནཱམ སསུརོ ཝནྡནཱིཡོ’’ཏི ཙིནྟེཏྭཱ ཏསྶ ཙིཏྟཾ ཨཛཱནནྟོཝ ཝནྡནསཱསནཾ པཧིཎི. དདཱཧི དཱནཱིཏི ཨཧཾ ཏཡཱ ‘‘དྷཱིཏརཾ དསྶཱམཱི’’ཏི པཀྐོསཱཔིཏོ, ཏཾ མེ ཨིདཱནི དེཧཱིཏི པཧིཎི. སུཝཎྞེན པཊིཙྪནྣནྟི སུཝཎྞཱལངྐཱརེན པཊིམཎྜིཏཾ.
ཙཱུལ༹ནིརཱཛཱ ¶ དཱུཏསྶ ཝཙནཾ སུཏྭཱ སོམནསྶཔྤཏྟོ ‘‘ཨིདཱནི མེ པཙྩཱམིཏྟོ ཀུཧིཾ གམིསྶཏི, ཨུབྷིནྣམྤི ནེསཾ སཱིསཱནི ཚིནྡིཏྭཱ ཛཡཔཱནཾ པིཝིསྶཱམཱ’’ཏི ཙིནྟེཏྭཱ ཀེཝལཾ སོམནསྶཾ དསྶེནྟོ དཱུཏསྶ སཀྐཱརཾ ཀཏྭཱ ཨནནྟརཾ གཱཐམཱཧ –
‘‘སྭཱགཏཾ ཏེཝ ཝེདེཧ, ཨཐོ ཏེ ཨདུརཱགཏཾ;
ནཀྑཏྟཉྙེཝ པརིཔུཙྪ, ཨཧཾ ཀཉྙཾ དདཱམི ཏེ;
སུཝཎྞེན པཊིཙྪནྣཾ, དཱསཱིགཎཔུརཀྑཏ’’ནྟི.
ཏཏྠ ཝེདེཧཱཏི ཝེདེཧསྶ སཱསནཾ སུཏྭཱ ཏཾ པུརཏོ ཋིཏཾ ཝིཡ ཨཱལཔཏི. ཨཐ ཝཱ ‘‘ཨེཝཾ བྲཧྨདཏྟེན ཝུཏྟནྟི ཝདེཧཱི’’ཏི དཱུཏཾ ཨཱཎཱཔེནྟོ ཨེཝམཱཧ.
ཏཾ སུཏྭཱ དཱུཏོ ཝེདེཧསྶ སནྟིཀཾ གནྟྭཱ ‘‘དེཝ, མངྒལཀིརིཡཱཡ ཨནུཙྪཝིཀཾ ནཀྑཏྟཾ ཀིར ཛཱནཱཧི, རཱཛཱ ཏེ དྷཱིཏརཾ དེཏཱི’’ཏི ཨཱཧ. སོ ‘‘ཨཛྫེཝ ནཀྑཏྟཾ སོབྷན’’ནྟི པུན དཱུཏཾ པཧིཎི. ཏམཏྠཾ པཀཱསེནྟོ སཏྠཱ ཨཱཧ –
‘‘ཏཏོ ¶ ཙ རཱཛཱ ཝེདེཧོ, ནཀྑཏྟཾ པརིཔུཙྪཐ;
ནཀྑཏྟཾ པརིཔུཙྪིཏྭཱ, བྲཧྨདཏྟསྶ པཱཧིཎི.
‘‘དདཱཧི དཱནི མེ བྷརིཡཾ, ནཱརིཾ སབྦངྒསོབྷིནིཾ;
སུཝཎྞེན པཊིཙྪནྣཾ, དཱསཱིགཎཔུརཀྑཏ’’ནྟི.
ཙཱུལ༹ནིརཱཛཱཔི –
‘‘དདཱམི དཱནི ཏེ བྷརིཡཾ, ནཱརིཾ སབྦངྒསོབྷིནིཾ;
སུཝཎྞེན པཊིཙྪནྣཾ, དཱསཱིགཎཔུརཀྑཏ’’ནྟི. –
ཨིམཾ ¶ གཱཐཾ ཝཏྭཱ ‘‘ཨིདཱནི པེསེམི, ཨིདཱནི པེསེམཱི’’ཏི མུསཱཝཱདཾ ཀཏྭཱ ཨེཀསཏརཱཛཱུནཾ སཉྙཾ ཨདཱསི ‘‘ཨཊྛཱརསཨཀྑོབྷཎིསངྑཱཡ སེནཱཡ སདྡྷིཾ སབྦེ ཡུདྡྷསཛྫཱ ཧུཏྭཱ ནིཀྑམནྟུ, ཨཛྫ ཨུབྷིནྣམྤི པཙྩཏྠིཀཱནཾ སཱིསཱནི ཚིནྡིཏྭཱ སྭེ ཛཡཔཱནཾ པིཝིསྶཱམཱ’’ཏི. ཏེ སབྦེཔི ནིཀྑམིཾསུ. སཡཾ ནིཀྑནྟོ པན མཱཏརཾ ཙལཱཀདེཝིཉྩ ཨགྒམཧེསིཾ, ནནྡཱདེཝིཉྩ, པུཏྟཾ པཉྩཱལཙནྡཉྩ, དྷཱིཏརཾ པཉྩཱལཙནྡིཉྩཱཏི ཙཏྟཱརོ ཛནེ ཨོརོདྷེཧི སདྡྷིཾ པཱསཱདེ ནིཝཱསཱཔེཏྭཱ ནིཀྑམི. བོདྷིསཏྟོཔི ཝེདེཧརཉྙོ ཙེཝ ཏེན སདྡྷིཾ ཨཱགཏསེནཱཡ ཙ མཧནྟཾ སཀྐཱརཾ ཀཱརེསི ¶ . ཀེཙི མནུསྶཱ སུརཾ པིཝནྟི, ཀེཙི མཙྪམཾསཱདཱིནི ཁཱདནྟི, ཀེཙི དཱུརམགྒཱ ཨཱགཏཏྟཱ ཀིལནྟཱ སཡནྟི. ཝིདེཧརཱཛཱ པན སེནཀཱདཡོ ཙཏྟཱརོ པཎྜིཏེ གཧེཏྭཱ ཨམཙྩགཎཔརིཝུཏོ ཨལངྐཏམཧཱཏལེ ནིསཱིདི.
ཙཱུལ༹ནིརཱཛཱཔི ཨཊྛཱརསཨཀྑོབྷཎིསངྑཱཡ སེནཱཡ སབྦཾ ཏཾ ནགརཾ ཏིསནྟིཾ ཙཏུསངྑེཔཾ པརིཀྑིཔིཏྭཱ ཨནེཀསཏསཧསྶཱཧི ཨུཀྐཱཧི དྷཱརིཡམཱནཱཧི ཨརུཎེ ཨུགྒཙྪནྟེཡེཝ གཧཎསཛྫོ ཧུཏྭཱ ཨཊྛཱསི. ཏཾ ཉཏྭཱ མཧཱསཏྟོ ཨཏྟནོ ཡོདྷཱནཾ ཏཱིཎི སཏཱནི པེསེསི ‘‘ཏུམྷེ ཛངྒྷཨུམངྒེན གནྟྭཱ རཉྙོ མཱཏརཉྩ ཨགྒམཧེསིཉྩ པུཏྟཉྩ དྷཱིཏརཉྩ ཛངྒྷཨུམངྒེན ཨཱནེཏྭཱ མཧཱཨུམངྒེན ནེཏྭཱ ཨུམངྒདྭཱརཏོ བཧི ཨཀཏྭཱ ཨནྟོཨུམངྒེཡེཝ ཋཔེཏྭཱ ཡཱཝ ཨམྷཱཀཾ ཨཱགམནཱ རཀྑནྟཱ ཏཏྠ ཋཏྭཱ ཨམྷཱཀཾ ཨཱགམནཀཱལེ ཨུམངྒཱ ནཱིཧརིཏྭཱ ཨུམངྒདྭཱརེ མཧཱཝིསཱལམཱལ༹ཀེ ཋཔེཐཱ’’ཏི. ཏེ ཏསྶ ཝཙནཾ སམྤཊིཙྪིཏྭཱ ཛངྒྷཨུམངྒེན གནྟྭཱ སོཔཱནཔཱདམཱུལེ ཕལཀསནྠརཎཾ ཨུགྒྷཱཊེཏྭཱ སོཔཱནཔཱདམཱུལེ སོཔཱནསཱིསེ མཧཱཏལེཏི ཨེཏྟཀེ ཋཱནེ ཨཱརཀྑམནུསྶེ ཙ ཁུཛྫཱདིཔརིཙཱརིཀཱཡོ ཙ ཧཏྠཔཱདེསུ བནྡྷིཏྭཱ མུཁཉྩ པིདཧིཏྭཱ ཏཏྠ ཏཏྠ པཊིཙྪནྣཊྛཱནེ ¶ ཋཔེཏྭཱ རཉྙོ པཊིཡཏྟཾ ཁཱདནཱིཡབྷོཛནཱིཡཾ ཀིཉྩི ཁཱདིཏྭཱ ཀིཉྩི བྷིནྡིཏྭཱ ཙུཎྞཝིཙུཎྞཾ ཀཏྭཱ ཨཔརིབྷོགཾ ཀཏྭཱ ཚཌྜེཏྭཱ ཨུཔརིཔཱསཱདཾ ཨབྷིརུཧིཾསུ. ཏདཱ ཙལཱཀདེཝཱི ནནྡཱདེཝིཉྩ རཱཛཔུཏྟཉྩ རཱཛདྷཱིཏརཉྩ གཧེཏྭཱ ‘‘ཀོ ཛཱནཱཏི, ཀིཾ བྷཝིསྶཏཱི’’ཏི མཉྙམཱནཱ ཨཏྟནཱ སདྡྷིཾ ཨེཀསཡནེཡེཝ སཡཱཔེསི. ཏེ ཡོདྷཱ གབྦྷདྭཱརེ ཋཏྭཱ པཀྐོསིཾསུ. སཱ ནིཀྑམིཏྭཱ ‘‘ཀིཾ, ཏཱཏཱ’’ཏི ཨཱཧ. ‘‘དེཝི, ཨམྷཱཀཾ རཱཛཱ ཝེདེཧཉྩ མཧོསདྷཉྩ ཛཱིཝིཏཀྑཡཾ པཱཔེཏྭཱ སཀལཛམྦུདཱིཔེ ¶ ཨེཀརཛྫཾ ཀཏྭཱ ཨེཀསཏརཱཛཔརིཝུཏོ མཧནྟེན ཡསེན ཨཛྫ མཧཱཛཡཔཱནཾ པིཝནྟོ ཏུམྷེ ཙཏྟཱརོཔི ཛནེ གཧེཏྭཱ ཨཱནེཧཱི’’ཏི ཨམྷེ པཧིཎཱིཏི.
ཏེཔི ཏེསཾ ཝཙནཾ སདྡཧིཏྭཱ པཱསཱདཱ ཨོཏརིཏྭཱ སོཔཱནཔཱདམཱུལཾ ཨགམིཾསུ. ཨཐ ནེ གཧེཏྭཱ ཛངྒྷཨུམངྒཾ པཝིསིཾསུ. ཏེ ཨཱཧཾསུ ‘‘མཡཾ ཨེཏྟཀཾ ཀཱལཾ ཨིདྷ ཝསནྟཱ ཨིམཾ ཝཱིཐིཾ ན ཨོཏིཎྞཔུབྦཱ’’ཏི. ‘‘དེཝི, ཨིམཾ ཝཱིཐིཾ ན སབྦདཱ ཨོཏརནྟི, མངྒལཝཱིཐི ནཱམེསཱ, ཨཛྫ མངྒལདིཝསབྷཱཝེན རཱཛཱ ཨིམིནཱ མགྒེན ¶ ཨཱནེཏུཾ ཨཱཎཱཔེསཱི’’ཏི. ཏེ ཏེསཾ ཝཙནཾ སདྡཧིཾསུ. ཨཐེཀཙྩེ ཏེ ཙཏྟཱརོ གཧེཏྭཱ གཙྪིཾསུ. ཨེཀཙྩེ ནིཝཏྟིཏྭཱ རཱཛནིཝེསནེ རཏནགབྦྷེ ཝིཝརིཏྭཱ ཡཐིཙྪིཏཾ རཏནསཱརཾ གཧེཏྭཱ ཨཱགམིཾསུ. ཨིཏརེཔི ཙཏྟཱརོ ཁཏྟིཡཱ པུརཏོ མཧཱཨུམངྒཾ པཏྭཱ ཨལངྐཏདེཝསབྷཾ ཝིཡ ཨུམངྒཾ དིསྭཱ ‘‘རཉྙོ ཨཏྠཱཡ སཛྫིཏ’’ནྟི སཉྙཾ ཀརིཾསུ. ཨཐ ནེ གངྒཱཡ ཨཝིདཱུརཋཱནཾ ནེཏྭཱ ཨནྟོཨུམངྒེཡེཝ ཨལངྐཏགབྦྷེ ནིསཱིདཱཔེཏྭཱ ཨེཀཙྩེ ཨཱརཀྑཾ གཧེཏྭཱ ཨཙྪིཾསུ. ཨེཀཙྩེ ཏེསཾ ཨཱནཱིཏབྷཱཝཾ ཉཱཔེཏུཾ གནྟྭཱ བོདྷིསཏྟསྶ ཨཱརོཙེསུཾ. སོ ཏེསཾ ཀཐཾ སུཏྭཱ ‘‘ཨིདཱནི མེ མནོརཐོ མཏྠཀཾ པཱཔུཎིསྶཏཱི’’ཏི སོམནསྶཛཱཏོ རཉྙོ སནྟིཀཾ གནྟྭཱ ཨེཀམནྟཾ ཨཊྛཱསི. རཱཛཱཔི ཀིལེསཱཏུརཏཱཡ ‘‘ཨིདཱནི མེ དྷཱིཏརཾ པེསེསྶཏི, ཨིདཱནི མེ དྷཱིཏརཾ པེསེསྶཏཱི’’ཏི པལླངྐཏོ ཨུཊྛཱཡ ཝཱཏཔཱནེན ཨོལོཀེནྟོ ཨནེཀེཧི ཨུཀྐཱསཏསཧསྶེཧི ཨེཀོབྷཱསཾ ཛཱཏཾ ནགརཾ མཧཏིཡཱ སེནཱཡ པརིཝུཏཾ དིསྭཱ ཨཱསངྐིཏཔརིསངྐིཏོ ‘‘ཀིཾ ནུ ཁོ ཨེཏ’’ནྟི པཎྜིཏེཧི སདྡྷིཾ མནྟེནྟོ གཱཐམཱཧ –
‘‘ཧཏྠཱི ཨསྶཱ རཐཱ པཏྟཱི, སེནཱ ཏིཊྛནྟི ཝམྨིཏཱ;
ཨུཀྐཱ པདིཏྟཱ ཛྷཱཡནྟི, ཀིཾ ནུ མཉྙནྟི པཎྜིཏཱ’’ཏི.
ཏཏྠ ཀིཾ ནུ མཉྙནྟཱིཏི ཙཱུལ༹ནིརཱཛཱ ཨམྷཱཀཾ ཏུཊྛོ, ཨུདཱཧུ ཀུདྡྷོ, ཀིཾ ནུ པཎྜིཏཱ མཉྙནྟཱིཏི པུཙྪི.
ཏཾ སུཏྭཱ སེནཀོ ཨཱཧ – ‘‘མཱ ཙིནྟཡིཏྠ, མཧཱརཱཛ, ཨཏིབཧཱུ ཨུཀྐཱ པཉྙཱཡནྟི, རཱཛཱ ¶ ཏུམྷཱཀཾ དཱཏུཾ དྷཱིཏརཾ གཧེཏྭཱ ཨེཏི མཉྙེ’’ཏི. པུཀྐུསོཔི ¶ ‘‘ཏུམྷཱཀཾ ཨཱགནྟུཀསཀྐཱརཾ ཀཱཏུཾ ཨཱརཀྑཾ གཧེཏྭཱ ཋིཏོ བྷཝིསྶཏཱི’’ཏི ཨཱཧ. ཨེཝཾ ཏེསཾ ཡཾ ཡཾ རུཙྩཏི, ཏཾ ཏཾ ཀཐཡིཾསུ. རཱཛཱ པན ‘‘ཨསུཀཊྛཱནེ སེནཱ ཏིཊྛནྟུ, ཨསུཀཊྛཱནེ ཨཱརཀྑཾ གཎྷཐ, ཨཔྤམཏྟཱ ཧོཐཱ’’ཏི ཝདནྟཱནཾ སདྡཾ སུཏྭཱ ཨོལོཀེནྟོ སནྣདྡྷཔཉྩཱཝུདྷཾ སེནཾ པསྶིཏྭཱ མརཎབྷཡབྷཱིཏོ ཧུཏྭཱ མཧཱསཏྟསྶ ཀཐཾ པཙྩཱསཱིསནྟོ ཨིཏརཾ གཱཐམཱཧ –
‘‘ཧཏྠཱི ཨསྶཱ རཐཱ པཏྟཱི, སེནཱ ཏིཊྛནྟི ཝམྨིཏཱ;
ཨུཀྐཱ པདིཏྟཱ ཛྷཱཡནྟི, ཀིཾ ནུ ཀཱཧནྟི པཎྜིཏཱ’’ཏི.
ཏཏྠ ཀིཾ ནུ ཀཱཧནྟི པཎྜིཏཱཏི པཎྜིཏ, ཀིཾ ནཱམ ཙིནྟེསི, ཨིམཱ སེནཱ ཨམྷཱཀཾ ཀིཾ ཀརིསྶནྟཱིཏི.
ཏཾ ¶ སུཏྭཱ མཧཱསཏྟོ ‘‘ཨིམཾ ཨནྡྷབཱལཾ ཐོཀཾ སནྟཱསེཏྭཱ པཙྪཱ མམ པཉྙཱབལཾ དསྶེཏྭཱ ཨསྶཱསེསྶཱམཱི’’ཏི ཙིནྟེཏྭཱ ཨཱཧ –
‘‘རཀྑཏི ཏཾ མཧཱརཱཛ, ཙཱུལ༹ནེཡྻོ མཧབྦལོ;
པདུཊྛོ བྲཧྨདཏྟེན, པཱཏོ ཏཾ གྷཱཏཡིསྶཏཱི’’ཏི.
ཏཾ སུཏྭཱ སབྦེ མརཎབྷཡཏཛྫིཏཱ ཛཱཏཱ. རཉྙོ ཀཎྜོ སུསྶི མུཁེ ཁེལོ༹ པརིཚིཛྫི, སརཱིརེ དཱཧོ ཨུཔྤཛྫི. སོ མརཎབྷཡབྷཱིཏོ པརིདེཝནྟོ དྭེ གཱཐཱ ཨཱཧ –
‘‘ཨུབྦེདྷཏི མེ ཧདཡཾ, མུཁཉྩ པརིསུསྶཏི;
ནིབྦུཏིཾ ནཱདྷིགཙྪཱམི, ཨགྒིདཌྜྷོཝ ཨཱཏཔེ.
‘‘ཀམྨཱརཱནཾ ཡཐཱ ཨུཀྐཱ, ཨཏྠོ ཛྷཱཡཏི ནོ བཧི;
ཨེཝམྤི ཧདཡཾ མཡ྄ཧཾ, ཨནྟོ ཛྷཱཡཏི ནོ བཧཱི’’ཏི.
ཏཏྠ ཨུབྦེདྷཏཱིཏི ཏཱཏ མཧོསདྷཔཎྜིཏ, ཧདཡཾ མེ མཧཱཝཱཏཔྤཧརིཏཾ ཝིཡ པལླཝཾ ཀམྤཏི. ཨནྟོ ཛྷཱཡཏཱིཏི སོ ‘‘ཨུཀྐཱ ཝིཡ མཡ྄ཧཾ ཧདཡམཾསཾ ཨབྦྷནྟརེ ཛྷཱཡཏི, བཧི པན ན ཛྷཱཡཏཱི’’ཏི པརིདེཝཏི.
མཧཱསཏྟོ ¶ ཏསྶ པརིདེཝིཏསདྡཾ སུཏྭཱ ‘‘ཨཡཾ ཨནྡྷབཱལོ ཨཉྙེསུ དིཝསེསུ མམ ཝཙནཾ ན ཨཀཱསི, བྷིཡྻོ ནཾ ནིགྒཎྷིསྶཱམཱི’’ཏི ཙིནྟེཏྭཱ ཨཱཧ –
‘‘པམཏྟོ ¶ མནྟནཱཏཱིཏོ, བྷིནྣམནྟོསི ཁཏྟིཡ;
ཨིདཱནི ཁོ ཏཾ ཏཱཡནྟུ, པཎྜིཏཱ མནྟིནོ ཛནཱ.
‘‘ཨཀཏྭཱམཙྩསྶ ཝཙནཾ, ཨཏྠཀཱམཧིཏེསིནོ;
ཨཏྟཔཱིཏིརཏོ རཱཛཱ, མིགོ ཀཱུཊེཝ ཨོཧིཏོ.
‘‘ཡཐཱཔི མཙྪོ བལི༹སཾ, ཝངྐཾ མཾསེན ཚཱདིཏཾ;
ཨཱམགིདྡྷོ ན ཛཱནཱཏི, མཙྪོ མརཎམཏྟནོ.
‘‘ཨེཝམེཝ ཏུཝཾ རཱཛ, ཙཱུལ༹ནེཡྻསྶ དྷཱིཏརཾ;
ཀཱམགིདྡྷོ ན ཛཱནཱསི, མཙྪོཝ མརཎམཏྟནོ.
‘‘སཙེ གཙྪསི པཉྩཱལཾ, ཁིཔྤམཏྟཾ ཛཧིསྶསི;
མིགཾ པནྠཱནུབནྡྷཾཝ, མཧནྟཾ བྷཡམེསྶཏི.
‘‘ཨནརིཡརཱུཔོ པུརིསོ ཛནིནྡ, ཨཧཱིཝ ཨུཙྪངྒགཏོ ཌསེཡྻ;
ན ཏེན མིཏྟིཾ ཀཡིརཱཐ དྷཱིརོ, དུཀྑོ ཧཝེ ཀཱཔུརིསེན སངྒམོ.
‘‘ཡདེཝ ¶ ཛཉྙཱ པུརིསཾ ཛནིནྡ, སཱིལཝཱཡཾ བཧུསྶུཏོ;
ཏེནེཝ མིཏྟིཾ ཀཡིརཱཐ དྷཱིརོ, སུཁོ ཧཝེ སཔྤུརིསེན སངྒམོ’’ཏི.
ཏཏྠ པམཏྟོཏི མཧཱརཱཛ, ཏྭཾ ཀཱམེན པམཏྟོ. མནྟནཱཏཱིཏོཏི མཡཱ ཨནཱགཏབྷཡཾ དིསྭཱ པཉྙཱཡ པརིཙྪིནྡིཏྭཱ མནྟིཏམནྟནཾ ཨཏིཀྐམནྟོ. བྷིནྣམནྟོཏི མནྟནཱཏིཀྐནྟཏྟཱཡེཝ བྷིནྣམནྟོ, ཡོ ཝཱ ཏེ སེནཀཱདཱིཧི སདྡྷིཾ མནྟོ གཧིཏོ, ཨེསོ བྷིནྣོཏིཔི བྷིནྣམནྟོསི ཛཱཏོ. པཎྜིཏཱཏི ཨིམེ སེནཀཱདཡོ ཙཏྟཱརོ ཛནཱ ཨིདཱནི ཏཾ རཀྑནྟུ, པསྶཱམི ནེསཾ བལནྟི དཱིཔེཏི. ཨཀཏྭཱམཙྩསྶཱཏི མམ ཨུཏྟམཨམཙྩསྶ ཝཙནཾ ཨཀཏྭཱ. ཨཏྟཔཱིཏིརཏོཏི ཨཏྟནོ ཀིལེསཔཱིཏིཡཱ ཨབྷིརཏོ ཧུཏྭཱ. མིགོ ཀཱུཊེཝ ཨོཧིཏོཏི ཡཐཱ ནཱམ ནིཝཱཔལོབྷེན ཨཱགཏོ མིགོ ¶ ཀཱུཊཔཱསེ བཛ྄ཛྷཏི, ཨེཝཾ མམ ཝཙནཾ ཨགྒཧེཏྭཱ ‘‘པཉྩཱལཙནྡིཾ ¶ ལབྷིསྶཱམཱི’’ཏི ཀིལེསལོབྷེན ཨཱགནྟྭཱ ཨིདཱནི ཀཱུཊཔཱསེ བདྡྷོ མིགོ ཝིཡ ཛཱཏོསཱིཏི.
‘‘ཡཐཱཔི མཙྩོ’’ཏི གཱཐཱདྭཡཾ ‘‘ཏདཱ མཡཱ ཨཡཾ ཨུཔམཱ ཨཱབྷཏཱ’’ཏི དསྶེཏུཾ ཝུཏྟཾ. ‘‘སཙེ གཙྪསཱི’’ཏི གཱཐཱཔི ‘‘ན ཀེཝལཾ ཨེཏྟཀམེཝ, ཨིམམྤི ཨཧཾ ཨཱཧརི’’ནྟི དསྶེཏུཾ ཝུཏྟཱ. ཨནརིཡརཱུཔོཏི ཀེཝཊྚབྲཱཧྨཎསདིསོ ཨསཔྤུརིསཛཱཏིཀོ ནིལླཛྫཔུརིསོ. ན ཏེན མིཏྟིནྟི ཏཱདིསེན སདྡྷིཾ མིཏྟིདྷམྨཾ ན ཀཡིརཱཐ, ཏྭཾ པན ཀེཝཊྚེན སདྡྷིཾ མིཏྟིདྷམྨཾ ཀཏྭཱ ཏསྶ ཝཙནཾ གཎྷི. དུཀྑོཏི ཨེཝརཱུཔེན སདྡྷིཾ སངྒམོ ནཱམ ཨེཀཝཱརམྤི ཀཏོ ཨིདྷལོཀེཔི པརལོཀེཔི མཧཱདུཀྑཱཝཧནཏོ དུཀྑོ ནཱམ ཧོཏི. ཡདེཝཱཏི ཡཾ ཨེཝ, ཨཡམེཝ ཝཱ པཱཋོ. སུཁོཏི ཨིདྷལོཀེཔི པརལོཀེཔི སུཁོཡེཝ.
ཨཐ ནཾ ‘‘པུན ཨེཝརཱུཔཾ ཀརིསྶཏཱི’’ཏི སུཊྛུཏརཾ ནིགྒཎྷནྟོ པུབྦེ རཉྙཱ ཀཐིཏཀཐཾ ཨཱཧརིཏྭཱ དསྶེནྟོ –
‘‘བཱལོ ཏུཝཾ ཨེལ༹མཱུགོསི རཱཛ, ཡོ ཨུཏྟམཏྠཱནི མཡཱི ལཔིཏྠོ;
ཀིམེཝཧཾ ནངྒལཀོཊིཝཌྜྷོ, ཨཏྠཱནི ཛཱནཱམི ཡཐཱཔི ཨཉྙེ.
‘‘ཨིམཾ གལེ གཧེཏྭཱན, ནཱསེཐ ཝིཛིཏཱ མམ;
ཡོ མེ རཏནལཱབྷསྶ, ཨནྟརཱཡཱཡ བྷཱསཏཱི’’ཏི. –
ཨིམཱ དྭེ གཱཐཱ ཝཏྭཱ ‘‘མཧཱརཱཛ, ཨཧཾ གཧཔཏིཔུཏྟོ, ཡཐཱ ཏཝ ཨཉྙེ སེནཀཱདཡོ པཎྜིཏཱ ཨཏྠཱནི ཛཱནནྟི, ཏཐཱ ཀིམེཝ ཨཧཾ ཛཱནིསྶཾ, ཨགོཙརོ ཨེས མཡ྄ཧཾ, གཧཔཏིསིཔྤམེཝཱཧཾ ཛཱནཱམི, ཨཡཾ ཨཏྠོ སེནཀཱདཱིནཾ པཎྜིཏཱནཾ པཱཀཊོ ཧོཏི, ཨཛྫ ཏེ ཨཊྛཱརསཨཀྑོབྷཎིསངྑཱཡ ¶ སེནཱཡ པརིཝཱརིཏསྶ སེནཀཱདཡོ ཨཝསྶཡཱ ཧོནྟུ, མཾ པན གཱིཝཱཡཾ གཧེཏྭཱ ནིཀྐཌྜྷིཏུཾ ཨཱཎཱཔེསི, ཨིདཱནི མཾ ཀསྨཱ པུཙྪསཱི’’ཏི ཨེཝཾ སུནིགྒཧིཏཾ ནིགྒཎྷི.
ཏཾ སུཏྭཱ རཱཛཱ ཙིནྟེསི ‘‘པཎྜིཏོ མཡཱ ཀཐིཏདོསམེཝ ཀཐེཏི. པུབྦེཝ ཧི ཨིདཾ ཨནཱགཏབྷཡཾ ཛཱནི, ཏེན མཾ ཨཏིཝིཡ ནིགྒཎྷཱཏི, ན ཁོ ¶ པནཱཡཾ ཨེཏྟཀཾ ཀཱལཾ ནིཀྐམྨཀོཝ ¶ ཨཙྪིསྶཏི, ཨཝསྶཾ ཨིམིནཱ མཡ྄ཧཾ སོཏྠིབྷཱཝོ ཀཏོ བྷཝིསྶཏཱི’’ཏི. ཨཐ ནཾ པརིགྒཎྷནྟོ དྭེ གཱཐཱ ཨབྷཱསི –
‘‘མཧོསདྷ ཨཏཱིཏེན, ནཱནུཝིཛ྄ཛྷནྟི པཎྜིཏཱ,
ཀིཾ མཾ ཨསྶཾཝ སམྦདྡྷཾ, པཏོདེནེཝ ཝིཛ྄ཛྷསི.
‘‘སཙེ པསྶསི མོཀྑཾ ཝཱ, ཁེམཾ ཝཱ པན པསྶསི;
ཏེནེཝ མཾ ཨནུསཱས, ཀིཾ ཨཏཱིཏེན ཝིཛ྄ཛྷསཱི’’ཏི.
ཏཏྠ ནཱནུཝིཛ྄ཛྷནྟཱིཏི ཨཏཱིཏདོསཾ གཧེཏྭཱ མུཁསཏྟཱིཧི ན ཝིཛ྄ཛྷནྟི. ཨསྶཾཝ སམྦདྡྷནྟི སཏྟུསེནཱཡ པརིཝུཏཏྟཱ སུཊྛུ བནྡྷིཏྭཱ ཋཔིཏཾ ཨསྶཾ ཝིཡ ཀིཾ མཾ ཝིཛ྄ཛྷསི. ཏེནེཝ མནྟི ཨེཝཾ ཏེ མོཀྑོ བྷཝིསྶཏི, ཨེཝཾ ཁེམནྟི ཏེནེཝ སོཏྠིབྷཱཝེན མཾ ཨནུསཱས ཨསྶཱསེཧི, ཏཉྷི ཋཔེཏྭཱ ཨཉྙཾ མེ པཊིསརཎཾ ནཏྠཱིཏི.
ཨཐ ནཾ མཧཱསཏྟོ ‘‘ཨཡཾ རཱཛཱ ཨཏིཝིཡ ཨནྡྷབཱལོ, པུརིསཝིསེསཾ ན ཛཱནཱཏི, ཐོཀཾ ཀིལམེཏྭཱ པཙྪཱ ཏསྶ ཨཝསྶཡོ བྷཝིསྶམཱི’’ཏི ཙིནྟེཏྭཱ ཨཱཧ –
‘‘ཨཏཱིཏཾ མཱནུསཾ ཀམྨཾ, དུཀྐརཾ དུརབྷིསམྦྷཝཾ;
ན ཏཾ སཀྐོཔི མོཙེཏུཾ, ཏྭཾ པཛཱནསྶུ ཁཏྟིཡ.
‘‘སནྟི ཝེཧཱཡསཱ ནཱགཱ, ཨིདྡྷིམནྟོ ཡསསྶིནོ;
ཏེཔི ཨཱདཱཡ གཙྪེཡྻུཾ, ཡསྶ ཧོནྟི ཏཐཱཝིདྷཱ.
‘‘སནྟི ཝེཧཱཡསཱ ཨསྶཱ, ཨིདྡྷིམནྟོ ཡསསྶིནོ;
ཏེཔི ཨཱདཱཡ གཙྪེཡྻུཾ, ཡསྶ ཧོནྟི ཏཐཱཝིདྷཱ.
‘‘སནྟི ཝེཧཱཡསཱ པཀྑཱི, ཨིདྡྷིམནྟོ ཡསསྶིནོ;
ཏེཔི ཨཱདཱཡ གཙྪེཡྻུཾ, ཡསྶ ཧོནྟི ཏཐཱཝིདྷཱ.
‘‘སནྟི ཝེཧཱཡསཱ ཡཀྑཱ, ཨིདྡྷིམནྟོ ཡསསྶིནོ;
ཏེཔི ཨཱདཱཡ གཙྪེཡྻུཾ, ཡསྶ ཧོནྟི ཏཐཱཝིདྷཱ.
‘‘ཨཏཱིཏཾ ¶ མཱནུསཾ ཀམྨཾ, དུཀྐརཾ དུརབྷིསམྦྷཝཾ;
ན ཏཾ སཀྐོམི མོཙེཏུཾ, ཨནྟལིཀྑེན ཁཏྟིཡཱ’’ཏི.
ཏཏྠ ¶ ¶ ཀམྨནྟི མཧཱརཱཛ, ཨིདཾ ཨིཏོ ཏཝ མོཙནཾ ནཱམ ཨཏཱིཏཾ, མནུསྶེཧི ཀཏྟབྦཀམྨཾ ཨཏཱིཏཾ. དུཀྐརཾ དུརབྷིསམྦྷཝནྟི ནེཝ ཀཱཏུཾ, ན སམྦྷཝིཏུཾ སཀྐཱ. ན ཏཾ སཀྐོམཱིཏི ཨཧཾ ཏཾ ཨིཏོ མོཙེཏུཾ ན སཀྐོམི. ཏྭཾ པཛཱནསྶུ ཁཏྟིཡཱཏི མཧཱརཱཛ, ཏྭམེཝེཏྠ ཀཏྟབྦཾ ཛཱནསྶུ. ཝེཧཱཡསཱཏི ཨཱཀཱསེན གམནསམཏྠཱ. ནཱགཱཏི ཧཏྠིནོ. ཡསྶཱཏི ཡསྶ རཉྙོ. ཏཐཱཝིདྷཱཏི ཚདྡནྟཀུལེ ཝཱ ཨུཔོསཐཀུལེ ཝཱ ཛཱཏཱ ནཱགཱ ཧོནྟི, ཏཾ རཱཛཱནཾ ཏེ ཨཱདཱཡ གཙྪེཡྻུཾ. ཨསྶཱཏི ཝལཱཧཀཨསྶརཱཛཀུལེ ཛཱཏཱ ཨསྶཱ. པཀྑཱིཏི གརུལ༹ྷཾ སནྡྷཱཡཱཧ. ཡཀྑཱཏི སཱཏཱགིརཱདཡོ ཡཀྑཱ. ཨནྟལིཀྑེནཱཏི ཨནྟལིཀྑེན མོཙེཏུཾ ན སཀྐོམི, ཏཾ ཨཱདཱཡ ཨཱཀཱསེན མིཐིལཾ ནེཏུཾ ན སཀྐོམཱིཏི ཨཏྠོ.
རཱཛཱ ཏཾ སུཏྭཱ ཨཔྤཊིབྷཱནོ ནིསཱིདི. ཨཐ སེནཀོ ཙིནྟེསི ‘‘ཨིདཱནི རཉྙོ ཙེཝ ཨམྷཱཀཉྩ ཋཔེཏྭཱ པཎྜིཏཾ ཨཉྙཾ པཊིསརཎཾ ནཏྠི, རཱཛཱ པནསྶ ཀཐཾ སུཏྭཱ མརཎབྷཡཏཛྫིཏོ ཀིཉྩི ཝཏྟུཾ ན སཀྐོཏི, ཨཧཾ པཎྜིཏཾ ཡཱཙིསྶཱམཱི’’ཏི. སོ ཡཱཙནྟོ དྭེ གཱཐཱ ཨབྷཱསི –
‘‘ཨཏཱིརདསྶཱི པུརིསོ, མཧནྟེ ཨུདཀཎྞཝེ;
ཡཏྠ སོ ལབྷཏེ གཱདྷཾ, ཏཏྠ སོ ཝིནྡཏེ སུཁཾ.
‘‘ཨེཝཾ ཨམྷཉྩ རཉྙོ ཙ, ཏྭཾ པཏིཊྛཱ མཧོསདྷ;
ཏྭཾ ནོསི མནྟིནཾ སེཊྛོ, ཨམྷེ དུཀྑཱ པམོཙཡཱ’’ཏི.
ཏཏྠ ཨཏཱིརདསྶཱིཏི སམུདྡེ བྷིནྣནཱཝོ ཏཱིརཾ ཨཔསྶནྟོ. ཡཏྠཱཏི ཨཱུམིཝེགབྦྷཱཧཏོ ཝིཙརནྟོ ཡམྷི པདེསེ པཏིཊྛཾ ལབྷཏི. པམོཙཡཱཏི པུབྦེཔི མིཐིལཾ པརིཝཱརེཏྭཱ ཋིཏཀཱལེ ཏཡཱཝ པམོཙིཏམྷཱ, ཨིདཱནིཔི ཏྭམེཝ ཨམྷེ དུཀྑཱ མོཙེཧཱིཏི ཡཱཙི.
ཨཐ ནཾ ནིགྒཎྷནྟོ མཧཱསཏྟོ གཱཐཱཡ ཨཛ྄ཛྷབྷཱསི –
‘‘ཨཏཱིཏཾ ¶ མཱནུསཾ ཀམྨཾ, དུཀྐརཾ དུརབྷིསམྦྷཝཾ;
ན ཏཾ སཀྐོམི མོཙེཏུཾ, ཏྭཾ པཛཱནསྶུ སེནཀཱ’’ཏི.
ཏཏྠ ¶ པཛཱནསྶུ སེནཀཱཏི སེནཀ, ཨཧཾ ན སཀྐོམི, ཏྭཾ པན ཨིམཾ རཱཛཱནཾ ཨཱཀཱསེན མིཐིལཾ ནེཧཱིཏི.
རཱཛཱ གཧེཏབྦགཧཎཾ ཨཔསྶནྟོ མརཎབྷཡཏཛྫིཏོ མཧཱསཏྟེན སདྡྷིཾ ཀཐེཏུཾ ཨསཀྐོནྟོ ‘‘ཀདཱཙི སེནཀོཔི ཀིཉྩི ཨུཔཱཡཾ ཛཱནེཡྻ, པུཙྪིསྶཱམི ཏཱཝ ན’’ནྟི པུཙྪནྟོ གཱཐམཱཧ –
‘‘སུཎོཧི མེཏཾ ཝཙནཾ, པསྶ སེནཾ མཧབྦྷཡཾ;
སེནཀཾ དཱནི པུཙྪཱམི, ཀིཾ ཀིཙྩཾ ཨིདྷ མཉྙསཱི’’ཏི.
ཏཏྠ ¶ ཀིཾ ཀིཙྩནྟི ཀིཾ ཀཱཏབྦཡུཏྟཀཾ ཨིདྷ མཉྙསི, མཧོསདྷེནམྷི པརིཙྩཏྟོ, ཡདི ཏྭཾ ཛཱནཱསི, ཝདེཧཱིཏི.
ཏཾ སུཏྭཱ སེནཀོ ‘‘མཾ རཱཛཱ ཨུཔཱཡཾ པུཙྪཏི, སོབྷནོ ཝཱ ཧོཏུ མཱ ཝཱ, ཀཐེསྶཱམི ཨེཀཾ ཨུཔཱཡ’’ནྟི ཙིནྟེཏྭཱ གཱཐམཱཧ –
‘‘ཨགྒིཾ ཝཱ དྭཱརཏོ དེམ, གཎྷཱམསེ ཝིཀནྟནཾ;
ཨཉྙམཉྙཾ ཝདྷིཏྭཱན, ཁིཔྤཾ ཧིསྶཱམ ཛཱིཝིཏཾ;
མཱ ནོ རཱཛཱ བྲཧྨདཏྟོ, ཙིརཾ དུཀྑེན མཱརཡཱི’’ཏི.
ཏཏྠ དྭཱརཏོཏི དྭཱརཾ པིདཧིཏྭཱ ཏཏྠ ཨགྒིཾ དེམ. ཝིཀནྟནནྟི ཨཉྙམཉྙཾ ཝིཀནྟནཾ སཏྠཾ གཎྷཱམ. ཧིསྶཱམཱཏི ཛཱིཝིཏཾ ཁིཔྤཾ ཛཧིསྶཱམ, ཨལངྐཏཔཱསཱདོཡེཝ ནོ དཱརུཙིཏཀོ བྷཝིསྶཏི.
ཏཾ སུཏྭཱ རཱཛཱ ཨནཏྟམནོ ‘‘ཨཏྟནོ པུཏྟདཱརསྶ ཨེཝརཱུཔཾ ཙིཏཀཾ ཀརོཧཱི’’ཏི ཝཏྭཱ པུཀྐུསཱདཡོ པུཙྪི. ཏེཔི ཨཏྟནོ པཏིརཱུཔཱ བཱལཀཐཱཡེཝ ཀཐཡིཾསུ. ཏེན ཝུཏྟཾ –
‘‘སུཎོཧི ¶ མེཏཾ ཝཙནཾ, པསྶ སེནཾ མཧབྦྷཡཾ;
པུཀྐུསཾ དཱནི པུཙྪཱམི, ཀིཾ ཀིཙྩཾ ཨིདྷ མཉྙསི.
‘‘ཝིསཾ ཁཱདིཏྭཱ མཱིཡཱམ, ཁིཔྤཾ ཧིསྶཱམ ཛཱིཝིཏཾ;
མཱ ནོ རཱཛཱ བྲཧྨདཏྟོ, ཙིརཾ དུཀྑེན མཱརཡི.
‘‘སུཎོཧི མེཏཾ ཝཙནཾ, པསྶ སེནཾ མཧབྦྷཡཾ;
ཀཱམིནྡཾ དཱནི པུཙྪཱམི, ཀིཾ ཀིཙྩཾ ཨིདྷ མཉྙསི.
‘‘རཛྫུཡཱ ¶ བཛ྄ཛྷ མཱིཡཱམ, པཔཱཏཱ པཔཏཱམསེ;
མཱ ནོ རཱཛཱ བྲཧྨདཏྟོ, ཙིརཾ དུཀྑེན མཱརཡི.
‘‘སུཎོཧི མེཏཾ ཝཙནཾ, པསྶ སེནཾ མཧབྦྷཡཾ;
དེཝིནྡཾ དཱནི པུཙྪཱམི, ཀིཾ ཀིཙྩཾ ཨིདྷ མཉྙསི.
‘‘ཨགྒིཾ ཝཱ དྭཱརཏོ དེམ, གཎྷཱམསེ ཝིཀནྟནཾ;
ཨཉྙམཉྙཾ ཝདྷིཏྭཱན, ཁིཔྤཾ ཧིསྶཱམ ཛཱིཝིཏཾ;
ན ནོ སཀྐོཏི མོཙེཏུཾ, སུཁེནེཝ མཧོསདྷོ’’ཏི.
ཨཔིཙ ཨེཏེསུ དེཝིནྡོ ‘‘ཨཡཾ རཱཛཱ ཀིཾ ཀརོཏི, ཨགྒིམྷི སནྟེ ཁཛྫོཔནཀཾ དྷམཏི, ཋཔེཏྭཱ མཧོསདྷཾ ཨཉྙོ ཨིདྷ སོཏྠིབྷཱཝཾ ཀཱཏུཾ སམཏྠོ ནཱམ ནཏྠི, ཨཡཾ ཏཾ ཨཔུཙྪིཏྭཱ ¶ ཨམྷེ པུཙྪཏི, མཡཾ ཀིཾ ཛཱནཱམཱ’’ཏི ཙིནྟེཏྭཱ ཨཉྙཾ ཨུཔཱཡཾ ཨཔསྶནྟོ སེནཀེན ཀཐིཏམེཝ ཀཐེཏྭཱ མཧཱསཏྟཾ ཝཎྞེནྟོ དྭེ པཱདེ ཨཱཧ. ཏཏྲཱཡཾ ཨདྷིཔྤཱཡོ – ‘‘མཧཱརཱཛ, མཡཾ སབྦེཔི པཎྜིཏམེཝ ཡཱཙཱམ. སཙེ པན ཡཱཙིཡམཱནོཔི ན ནོ སཀྐོཏི མོཙེཏུཾ སུཁེནེཝ མཧོསདྷོ, ཨཐ སེནཀསྶ ཝཙནཾ ཀརིསྶཱམཱ’’ཏི.
ཏཾ སུཏྭཱ རཱཛཱ པུབྦེ བོདྷིསཏྟསྶ ཀཐིཏདོསཾ སརིཏྭཱ ཏེན སདྡྷིཾ ཀཐེཏུཾ ཨསཀྐོནྟོ ཏསྶ སུཎནྟསྶེཝ པརིདེཝནྟོ ཨཱཧ –
‘‘ཡཐཱ ¶ ཀདལིནོ སཱརཾ, ཨནྭེསཾ ནཱདྷིགཙྪཏི;
ཨེཝཾ ཨནྭེསམཱནཱ ནཾ, པཉྷཾ ནཛ྄ཛྷགམཱམསེ.
‘‘ཡཐཱ སིམྦལིནོ སཱརཾ, ཨནྭེསཾ ནཱདྷིགཙྪཏི;
ཨེཝཾ ཨནྭེསམཱནཱ ནཾ, པཉྷཾ ནཛ྄ཛྷགམཱམསེ.
‘‘ཨདེསེ ཝཏ ནོ ཝུཊྛཾ, ཀུཉྫརཱནཾ ཝནོདཀེ;
སཀཱསེ དུམྨནུསྶཱནཾ, བཱལཱནཾ ཨཝིཛཱནཏཾ.
‘‘ཨུབྦེདྷཏི མེ ཧདཡཾ, མུཁཉྩ པརིསུསྶཏི;
ནིབྦུཏིཾ ནཱདྷིགཙྪཱམི, ཨགྒིདཌྜྷོཝ ཨཱཏཔེ.
‘‘ཀམྨཱརཱནཾ ¶ ཡཐཱ ཨུཀྐཱ, ཨནྟོ ཛྷཱཡཏི ནོ བཧི;
ཨེཝམྤི ཧདཡཾ མཡ྄ཧཾ, ཨནྟོ ཛྷཱཡཏི ནོ བཧཱི’’ཏི.
ཏཏྠ ཀདལིནོཏི ཡཐཱ ཀདལིཀྑནྡྷསྶ ནིསྶཱརཏྟཱ སཱརཏྠིཀོ པུརིསོ ཨནྭེསནྟོཔི ཏཏོ སཱརཾ ནཱདྷིགཙྪཏི, ཨེཝཾ མཡཾ ཨིམམྷཱ དུཀྑཱ མུཙྩནུཔཱཡཾ པཉྷཾ པཉྩ པཎྜིཏེ པུཙྪིཏྭཱ ཨནྭེསམཱནཱཔི པཉྷཾ ནཛ྄ཛྷགམཱམསེ. ཨམྷེཧི པུཙྪིཏཾ ཨུཔཱཡཾ ཨཛཱནནྟཱ ཨསྶུཎནྟཱ ཝིཡ ཛཱཏཱ, མཡཾ ཏཾ པཉྷཾ ནཱདྷིགཙྪཱམ. དུཏིཡགཱཐཱཡཔི ཨེསེཝ ནཡོ. ཀུཉྫརཱནཾ ཝནོདཀེཏི ཡཐཱ ཀུཉྫརཱནཾ ནིརུདཀེ ཋཱནེ ཝུཊྛཾ ཨདེསེ ཝུཊྛཾ ནཱམ ཧོཏི, ཏེ ཧི ཏཐཱརཱུཔེ ནིརུདཀེ ཝནགཧནེ པདེསེ ཝསནྟཱ ཁིཔྤམེཝ པཙྩཱམིཏྟཱནཾ ཝསཾ གཙྪནྟི, ཨེཝཾ ཨམྷེཧིཔི ཨིམེསཾ དུམྨནུསྶཱནཾ བཱལཱནཾ སནྟིཀེ ཝསནྟེཧི ཨདེསེ ཝུཊྛཾ. ཨེཏྟཀེསུ ཧི པཎྜིཏེསུ ཨེཀོཔི མེ ཨིདཱནི པཊིསརཎཾ ནཏྠཱིཏི ནཱནཱཝིདྷེན ཝིལཔཏི.
ཏཾ སུཏྭཱ པཎྜིཏོ ‘‘ཨཡཾ རཱཛཱ ཨཏིཝིཡ ཀིལམཏི. སཙེ ནཾ ན ཨསྶཱསེསྶཱམི, ཧདཡེན ཕལིཏེན མརིསྶཏཱི’’ཏི ཙིནྟེཏྭཱ ཨསྶཱསེསི. ཏམཏྠཾ ¶ པཀཱསེནྟོ སཏྠཱ ཨཱཧ –
‘‘ཏཏོ སོ པཎྜིཏོ དྷཱིརོ, ཨཏྠདསྶཱི མཧོསདྷོ;
ཝེདེཧཾ དུཀྑིཏཾ དིསྭཱ, ཨིདཾ ཝཙནམབྲཝི.
‘‘མཱ ¶ ཏྭཾ བྷཱཡི མཧཱརཱཛ, མཱ ཏྭཾ བྷཱཡི རཐེསབྷ;
ཨཧཾ ཏཾ མོཙཡིསྶཱམི, རཱཧུགྒཧཾཝ ཙནྡིམཾ.
‘‘མཱ ཏྭཾ བྷཱཡི མཧཱརཱཛ, མཱ ཏྭཾ བྷཱཡི རཐེསབྷ;
ཨཧཾ ཏཾ མོཙཡིསྶཱམི, རཱཧུགྒཧཾཝ སཱུརིཡཾ.
‘‘མཱ ཏྭཾ བྷཱཡི མཧཱརཱཛ, མཱ ཏྭཾ བྷཱཡི རཐེསབྷ;
ཨཧཾ ཏཾ མོཙཡིསྶཱམི, པངྐེ སནྣཾཝ ཀུཉྫརཾ.
‘‘མཱ ཏྭཾ བྷཱཡི མཧཱརཱཛ, མཱ ཏྭཾ བྷཱཡི རཐེསབྷ;
ཨཧཾ ཏཾ མོཙཡིསྶཱམི, པེལཱ༹བདྡྷཾཝ པནྣགཾ.
‘‘མཱ ཏྭཾ བྷཱཡི མཧཱརཱཛ, མཱ ཏྭཾ བྷཱཡི རཐེསབྷ;
ཨཧཾ ཏཾ མོཙཡིསྶཱམི, པཀྑིཾ བདྡྷཾཝ པཉྫརེ.
‘‘མཱ ¶ ཏྭཾ བྷཱཡི མཧཱརཱཛ, མཱ ཏྭཾ བྷཱཡི རཐེསབྷ;
ཨཧཾ ཏཾ མོཙཡིསྶཱམི, མཙྪེ ཛཱལགཏེརིཝ.
‘‘མཱ ཏྭཾ བྷཱཡི མཧཱརཱཛ, མཱ ཏྭཾ བྷཱཡི རཐེསབྷ;
ཨཧཾ ཏཾ མོཙཡིསྶཱམི, སཡོགྒབལཝཱཧནཾ.
‘‘མཱ ཏྭཾ བྷཱཡི མཧཱརཱཛ, མཱ ཏྭཾ བྷཱཡི རཐེསབྷ;
པཉྩཱལཾ ཝཱཧཡིསྶཱམི, ཀཱཀསེནཾཝ ལེཌྜུནཱ.
‘‘ཨདུ པཉྙཱ ཀིམཏྠིཡཱ, ཨམཙྩོ ཝཱཔི ཏཱདིསོ;
ཡོ ཏཾ སམྦཱདྷཔཀྑནྡཾ, དུཀྑཱ ན པརིམོཙཡེ’’ཏི.
ཏཏྠ ཨིདནྟི དཝཌཱཧདཌྜྷེ ཨརཉྙེ གྷནཝསྶཾ ཝསྶཱཔེནྟོ ཝིཡ ནཾ ཨསྶཱསེནྟོ ཨིདཾ ‘‘མཱ ཏྭཾ བྷཱཡི, མཧཱརཱཛཱ’’ཏིཨཱདིཀཾ ཝཙནཾ ཨབྲཝི. ཏཏྠ སནྣནྟི ལགྒཾ. པེལཱ༹བདྡྷནྟི པེལཱ༹ཡ ཨབྦྷནྟརགཏཾ སཔྤཾ. པཉྩཱལནྟི ཨེཏཾ ཨེཝཾ མཧནྟིམྤི པཉྩཱལརཉྙོ སེནཾ. ཝཱཧཡིསྶཱམཱིཏི པལཱཔེསྶཱམི ¶ . ཨདཱུཏི ནཱམཏྠེ ནིཔཱཏོ, པཉྙཱ ནཱམ ཀིམཏྠིཡཱཏི ཨཏྠོ. ཨམཙྩོ ཝཱཔི ཏཱདིསོཏི ཏཱདིསོ པཉྙཱཡ སམྤནྣོ ཨམཙྩོ ཝཱཔི ཀིམཏྠིཡོ, ཡོ ཏཾ ཨེཝཾ མརཎསམྦཱདྷཔྤཏྟཾ དུཀྑཱ ན པརིམོཙཡེ. མཧཱརཱཛ, ཨཧཾ པཋམཏརཾ ཨཱགཙྪནྟོ ནཱམ ཀིམཏྠཾ ཨཱགཏོཏི མཉྙསི. མཱ བྷཱཡི, ཨཧཾ ཏཾ ཨིམམྷཱ དུཀྑཱ མོཙཡིསྶཱམཱིཏི ཨསྶཱསེསི.
སོཔི ཏསྶ ཝཙནཾ སུཏྭཱ ‘‘ཨིདཱནི མེ ཛཱིཝིཏཾ ལདྡྷ’’ནྟི ཨསྶཱསཾ པཊིལབྷི. བོདྷིསཏྟེན སཱིཧནཱདེ ཀཏེ སབྦེ ཙ ཏུསྶིཾསུ. ཨཐ ནཾ སེནཀོ པུཙྪི ‘‘པཎྜིཏ, ཏྭཾ སབྦེ ཨམྷེ གཧེཏྭཱ གཙྪནྟོ ཀེནུཔཱཡེན གམིསྶསཱི’’ཏི? ‘‘ཨལངྐཏཨུམངྒེན ནེསྶཱམི, ཏུམྷེ གམནསཛྫཱ ཧོཐཱ’’ཏི ཝཏྭཱ ཨུམངྒདྭཱརཝིཝརཎཏྠཾ ཡོདྷེ ཨཱཎཱཔེནྟོ གཱཐམཱཧ –
‘‘ཨེཐ ¶ མཱཎཝཱ ཨུཊྛེཐ, མུཁཾ སོདྷེཐ སནྡྷིནོ;
ཝེདེཧོ སཧམཙྩེཧི, ཨུམངྒེན གམིསྶཏཱི’’ཏི.
ཏཏྠ མཱཎཝཱཏི ཏརུཎཱདྷིཝཙནཾ. མུཁཾ སོདྷེཐཱཏི ཨུམངྒདྭཱརཾ ཝིཝརཐ. སནྡྷིནོཏི གྷརསནྡྷིནོ ཙ དྭཱརཾ སོདྷེཐ, ཨེཀསཏཱནཾ སཡནགབྦྷཱནཾ དྭཱརཾ ཝིཝརཐ, ཨནེཀསཏཱནཾ དཱིཔཱལཡཱནཾ དྭཱརཾ ཝིཝརཐཱཏི.
ཏེ ¶ ཨུཊྛཱཡ ཨུམངྒདྭཱརཾ ཝིཝརིཾསུ. སཀལོ ཨུམངྒོ ཨེཀོབྷཱསོ ཨལངྐཏདེཝསབྷཱ ཝིཡ ཝིརོཙི. ཏམཏྠཾ པཀཱསེནྟོ སཏྠཱ ཨཱཧ –
‘‘ཏསྶ ཏཾ ཝཙནཾ སུཏྭཱ, པཎྜིཏསྶཱནུཙཱརིནོ;
ཨུམངྒདྭཱརཾ ཝིཝརིཾསུ, ཡནྟཡུཏྟེ ཙ ཨགྒལེ༹’’ཏི.
ཏཏྠ ཨནུཙཱརིནོཏི ཝེཡྻཱཝཙྩཀརཱ. ཡནྟཡུཏྟེ ཙ ཨགྒལེ༹ཏི སཱུཙིགྷཊིཀསམྤནྣཱནི ཙ དྭཱརཀཝཱཊཱནི.
ཏེ ཨུམངྒདྭཱརཾ ཝིཝརིཏྭཱ མཧཱསཏྟསྶ ཨཱརོཙེསུཾ. སོ རཉྙོ སཉྙམདཱསི ‘‘ཀཱལོ, དེཝ, པཱསཱདཱ ཨོཏརཐཱ’’ཏི. ཏཾ སུཏྭཱ རཱཛཱ ཨོཏརི. ཨཐ སེནཀོ སཱིསཏོ ནཱལི༹པཊྚཾ ཨཔནེཏྭཱ སཱཊཀཾ ཨོམུཉྩིཏྭཱ ཀཙྪཾ དལ༹ྷཾ བནྡྷི. ཨཐ ནཾ མཧཱསཏྟོ དིསྭཱ ‘‘སེནཀ, ཀིཾ ཀརོསཱི’’ཏི པུཙྪི. ‘‘པཎྜིཏ, ཨུམངྒེན གཙྪནྟེཧི ནཱམ ཝེཋནཾ མོཙེཏྭཱ ཀཙྪཾ དལ༹ྷཾ བནྡྷིཏྭཱ གནྟབྦ’’ནྟི ¶ . ‘‘སེནཀ, ‘ཨུམངྒཾ པཝིསནྟོ ཨོནམིཏྭཱ ཛཎྞུཀེཧི པཏིཊྛཱཡ པཝིསིསྶཱམཱི’ཏི མཱ སཉྙམཀཱསི. སཙེ ཧཏྠིནཱ གནྟུཀཱམོསི, ཧཏྠིཾ ཨབྷིརུཡ྄ཧ གཙྪཱཧི. སཙེ ཨསྶེན གནྟུཀཱམོསི, ཨསྶཾ ཨབྷིརུཡ྄ཧ གཙྪཱཧི. ཨུཙྩོ ཨུམངྒོ ཨཊྛཱརསཧཏྠུབྦེདྷོ ཝིསཱལདྭཱརོ, ཏྭཾ ཡཐཱརུཙིཡཱ ཨལངྐཏཔྤཊིཡཏྟོ རཉྙོ པུརཏོ གཙྪཱཧཱི’’ཏི ཨཱཧ. བོདྷིསཏྟོ ཀིར སེནཀསྶ གམནཾ པུརཏོ ཝིཙཱརེཏྭཱ རཱཛཱནཾ མཛ྄ཛྷེ ཀཏྭཱ སཡཾ པཙྪཏོ ཨཧོསི. ཀིཾ ཀཱརཎཱ? རཱཛཱ ཨལངྐཏཨུམངྒཾ ཨོལོཀེནྟོ མཱ སཎིཀཾ ཨགམཱསཱིཏི. ཨུམངྒེ མཧཱཛནསྶ ཡཱགུབྷཏྟཁཱདནཱིཡཱདཱིནི ཨཔྤམཱཎཱནི ཨཧེསུཾ. ཏེ མནུསྶཱ ཁཱདནྟཱ པིཝནྟཱ ཨུམངྒཾ ཨོལོཀེནྟཱ གཙྪནྟི. མཧཱསཏྟོ ‘‘ཡཱཐ མཧཱརཱཛ, ཡཱཐ མཧཱརཱཛཱ’’ཏི ཙོདེནྟོ པཙྪཏོ ཡཱཏི. རཱཛཱ ཨལངྐཏདེཝསབྷཾ ཝིཡ ཨུམངྒཾ ཨོལོཀེནྟོ ཡཱཏི. ཏམཏྠཾ ¶ པཀཱསེནྟོ སཏྠཱ ཨཱཧ –
‘‘པུརཏོ སེནཀོ ཡཱཏི, པཙྪཏོ ཙ མཧོསདྷོ;
མཛ྄ཛྷེ ཙ རཱཛཱ ཝེདེཧོ, ཨམཙྩཔརིཝཱརིཏོ’’ཏི.
རཉྙོ ¶ ཨཱགཏབྷཱཝཾ ཉཏྭཱ ཏེ མཱཎཝཱ རཱཛམཱཏརཉྩ དེཝིཉྩ པུཏྟཉྩ དྷཱིཏརཉྩ ཨུམངྒཱ ནཱིཧརིཏྭཱ མཧཱཝིསཱལམཱལ༹ཀེ ཋཔེསུཾ. རཱཛཱཔི བོདྷིསཏྟེན སདྡྷིཾ ཨུམངྒཱ ནིཀྑམི. ཏེ རཱཛཱནཉྩ པཎྜིཏཉྩ དིསྭཱ ‘‘ནིསྶཾསཡཾ པརཧཏྠཾ གཏམྷཱ, ཨམྷེ གཧེཏྭཱ ཨཱགཏེཧི པཎྜིཏསྶ པུརིསེཧི བྷཝིཏབྦ’’ནྟི མརཎབྷཡཏཛྫིཏཱ མཧཱཝིརཝཾ ཝིརཝིཾསུ. ཙཱུལ༹ནིརཱཛཱཔི ཀིར ཝེདེཧརཉྙོ པལཱཡནབྷཡེན གངྒཱཏོ གཱཝུཏམཏྟཊྛཱནེ ཨཊྛཱསི. སོ སནྣིསིནྣཱཡ རཏྟིཡཱ ཏེསཾ ཝིརཝཾ སུཏྭཱ ‘‘ནནྡཱདེཝིཡཱ ཝིཡ སདྡོ’’ཏི ཝཏྟུཀཱམོཔི ‘‘ཀུཧིཾ ནནྡཱདེཝིཾ པསྶིསྶསཱི’’ཏི པརིཧཱསབྷཡེན ན ཀིཉྩི ཨཱཧ. མཧཱསཏྟོ པན ཏསྨིཾ ཋཱནེ པཉྩཱལཙནྡིཾ ཀུམཱརིཀཾ རཏནརཱསིམྷི ཋཔེཏྭཱ ཨབྷིསིཉྩིཏྭཱ ‘‘མཧཱརཱཛ, ཏྭཾ ཨིམིསྶཱ ཀཱརཎཱ ཨཱགཏོ, ཨཡཾ ཏེ ཨགྒམཧེསཱི ཧོཏཱུ’’ཏི ཨཱཧ. ཏཱིཎི ནཱཝཱསཏཱནི ཨུཔཊྛཱཔེསུཾ, རཱཛཱ ཝིསཱལམཱལ༹ཀཱ ཨོཏརིཏྭཱ ཨལངྐཏནཱཝཾ ཨབྷིརུཧི. ཏེཔི ཙཏྟཱརོ ཁཏྟིཡཱ ནཱཝཾ ཨབྷིརུཧིཾསུ. ཏམཏྠཾ པཀཱསེནྟོ སཏྠཱ ཨཱཧ –
‘‘ཨུམངྒཱ ནིཀྑམིཏྭཱན, ཝེདེཧོ ནཱཝམཱརུཧི;
ཨབྷིརུལ༹ྷཉྩ ཏཾ ཉཏྭཱ, ཨནུསཱསི མཧོསདྷོ.
‘‘ཨཡཾ ཏེ སསུརོ དེཝ, ཨཡཾ སསྶུ ཛནཱདྷིཔ;
ཡཐཱ མཱཏུ པཊིཔཏྟི, ཨེཝཾ ཏེ ཧོཏུ སསྶུཡཱ.
‘‘ཡཐཱཔི ¶ ནིཡཀོ བྷཱཏཱ, སཨུདརིཡོ ཨེཀམཱཏུཀོ;
ཨེཝཾ པཉྩཱལཙནྡོ ཏེ, དཡིཏབྦོ རཐེསབྷ.
‘‘ཨཡཾ པཉྩཱལཙནྡཱི ཏེ, རཱཛཔུཏྟཱི ཨབྷིཙྪིཏཱ;
ཀཱམཾ ཀརོཧི ཏེ ཏཱཡ, བྷརིཡཱ ཏེ རཐེསབྷཱ’’ཏི.
ཏཏྠ ཨནུསཱསཱིཏི ཨེཝཾ ཀིརསྶ ཨཧོསི ‘‘ཀདཱཙི ཨེསོ ཀུཛ྄ཛྷིཏྭཱ ཙཱུལ༹ནིརཉྙོ མཱཏརཾ མཱརེཡྻ, ཨབྷིརཱུཔཱཡ ནནྡཱདེཝིཡཱ སདྡྷིཾ སཾཝཱསཾ ཀཔྤེཡྻ, རཱཛཀུམཱརཾ ཝཱ མཱརེཡྻ, པཊིཉྙམསྶ གཎྷིསྶཱམཱི’’ཏི. ཏསྨཱ ‘‘ཨཡཾ ཏེ’’ཏིཨཱདཱིནི ཝདནྟོ ཨནུསཱསི. ཏཏྠ ཨཡཾ ཏེ སསུརོཏི ཨཡཾ ཏཝ སསུརསྶ ཙཱུལ༹ནིརཉྙོ པུཏྟོ པཉྩཱལཙནྡིཡཱ ཀནིཊྛབྷཱཏིཀོ, ཨཡཾ ཏེ ཨིདཱནི སསུརོ. ཨཡཾ སསྶཱུཏི ཨཡཾ ཨིམིསྶཱ མཱཏཱ ནནྡཱདེཝཱི ནཱམ ཏཝ སསྶུ. ཡཐཱམཱཏཱུཏི ཡཐཱ མཱཏུ པུཏྟཱ ཝཏྟཔྤཊིཝཏྟཾ ཀརོནྟི ¶ , ཨེཝཾ ¶ ཏེ ཨེཏིསྶཱ ཧོཏུ, བལཝཏིཾ མཱཏུསཉྙཾ པཙྩུཔཊྛཱཔེཏྭཱ མཱ ནཾ ཀདཱཙི ལོབྷཙིཏྟེན ཨོལོཀེཧི. ནིཡཀོཏི ཨཛ྄ཛྷཏྟིཀོ ཨེཀཔིཏརཱ ཛཱཏོ. ཨེཀམཱཏུཀོཏི ཨེཀམཱཏརཱ ཛཱཏོ. དཡིཏབྦོཏི པིཡཱཡིཏབྦོ. བྷརིཡཱཏི ཨཡཾ ཏེ བྷརིཡཱ, མཱ ཨེཏིསྶཱ ཨཝམཱནཾ ཨཀཱསཱིཏི རཉྙོ པཊིཉྙཾ གཎྷི.
རཱཛཱཔི ‘‘སཱདྷཱུ’’ཏི སམྤཊིཙྪི. རཱཛམཱཏརཾ པན ཨཱརབྦྷ ཀིཉྩི ན ཀཐེསི. ཀིཾ ཀཱརཎཱ? ཏསྶཱ མཧལླཀབྷཱཝེནེཝ. ཨིདཾ པན སབྦཾ བོདྷིསཏྟོ ཏཱིརེ ཋཏྭཱཝ ཀཐེསི. ཨཐ ནཾ རཱཛཱ མཧཱདུཀྑཏོ མུཏྟཏཱཡ གནྟུཀཱམོ ཧུཏྭཱ ‘‘ཏཱཏ, ཏྭཾ ཏཱིརེ ཋིཏོཝ ཀཐེསཱི’’ཏི ཝཏྭཱ གཱཐམཱཧ –
‘‘ཨཱརུཡ྄ཧ ནཱཝཾ ཏརམཱནོ, ཀིཾ ནུ ཏཱིརམྷི ཏིཊྛསི;
ཀིཙྪཱ མུཏྟཱམྷ དུཀྑཏོ, ཡཱམ དཱནི མཧོསདྷཱ’’ཏི.
མཧཱསཏྟོ ‘‘དེཝ, ཏུམྷེཧི སདྡྷིཾ གམནཾ ནཱམ མཡ྄ཧཾ ཨཡུཏྟ’’ནྟི ཝཏྭཱ ཨཱཧ –
‘‘ནེས དྷམྨོ མཧཱརཱཛ, ཡོཧཾ སེནཱཡ ནཱཡཀོ;
སེནངྒཾ པརིཧཱཔེཏྭཱ, ཨཏྟཱནཾ པརིམོཙཡེ.
‘‘ནིཝེསནམྷི ¶ ཏེ དེཝ, སེནངྒཾ པརིཧཱཔིཏཾ;
ཏཾ དིནྣཾ བྲཧྨདཏྟེན, ཨཱནཡིསྶཾ རཐེསབྷཱ’’ཏི.
ཏཏྠ དྷམྨོཏི སབྷཱཝོ. ནིཝེསནམྷཱིཏི ཏཾ ནགརཾ སནྡྷཱཡཱཧ. པརིམོཙཡེཏི པརིམོཙེཡྻཾ. པརིཧཱཔིཏནྟི ཚཌྜིཏཾ. ཏེསུ ཧི མནུསྶེསུ དཱུརམགྒཾ ཨཱགཏཏྟཱ ཀེཙི ཀིལནྟཱ ནིདྡཾ ཨོཀྐནྟཱ ཀེཙི ཁཱདནྟཱ པིཝནྟཱ ཨམྷཱཀཾ ནིཀྑནྟབྷཱཝམྤི ན ཛཱནིཾསུ, ཀེཙི གིལཱནཱ. མཡཱ སདྡྷིཾ ཙཏྟཱརོ མཱསེ ཀམྨཾ ཀཏྭཱ མམ ཨུཔཀཱརཀཱ མནུསྶཱ ཙེཏྠ བཧཱུ, ན སཀྐཱ མཡཱ ཨེཀམནུསྶམྤི ཚཌྜེཏྭཱ གནྟུཾ, ཨཧཾ པན ནིཝཏྟིཏྭཱ སབྦམྤི ཏཾ ཏཝ སེནཾ བྲཧྨདཏྟེན དིནྣཾ ཨཔྤཊིཝིདྡྷཾ ཨཱནེསྶཱམི. ཏུམྷེ, མཧཱརཱཛ, ཀཏྠཙི ཨཝིལམྦནྟཱ སཱིགྷཾ གཙྪཐ. མཡཱ ཨེཝཱ ཨནྟརཱམགྒེ ཧཏྠིཝཱཧནཱདཱིནི ཋཔིཏཱནི, ཀིལནྟཀིལནྟཱནི པཧཱཡ སམཏྠསམཏྠེཧི སཱིགྷཾ མིཐིལམེཝ པཝིསཐཱཏི.
ཏཏོ ¶ རཱཛཱ གཱཐམཱཧ –
‘‘ཨཔྤསེནོ མཧཱསེནཾ, ཀཐཾ ཝིགྒཡ྄ཧ ཋསྶསི;
དུབྦལོ བལཝནྟེན, ཝིཧཉྙིསྶསི པཎྜིཏཱ’’ཏི.
ཏཏྠ ¶ ཝིགྒཡ྄ཧཱཏི པརིཔྥརིཏྭཱ. ཝིཧཉྙིསྶསཱིཏི ཧཉྙིསྶསི.
ཏཏོ བོདྷིསཏྟོ ཨཱཧ –
‘‘ཨཔྤསེནོཔི ཙེ མནྟཱི, མཧཱསེནཾ ཨམནྟིནཾ;
ཛིནཱཏི རཱཛཱ རཱཛཱནོ, ཨཱདིཙྩོཝུདཡཾ ཏམ’’ནྟི.
ཏཏྠ མནྟཱིཏི མནྟཱཡ སམནྣཱགཏོ པཉྙཝཱ ཨུཔཱཡཀུསལོ. ཨམནྟིནནྟི ཨནུཔཱཡཀུསལཾ ཛིནཱཏི, པཉྙཝཱ དུཔྤཉྙཾ ཛིནཱཏི. རཱཛཱ རཱཛཱནོཏི ཨེཀོཔི ཙ ཨེཝརཱུཔོ རཱཛཱ བཧཱུཔི དུཔྤཉྙརཱཛཱནོ ཛིནཱཏིཡེཝ. ཡཐཱ ཀིནྟི? ཨཱདིཙྩོཝུདཡཾ ཏམནྟི, ཡཐཱ ཨཱདིཙྩོ ཨུདཡནྟོ ཏམཾ ཝིདྡྷཾསེཏྭཱ ཨཱལོཀཾ དསྶེཏི, ཨེཝཾ ཛིནཱཏི ཙེཝ སཱུརིཡོ ཝིཡ ཝིརོཙཏི ཙ.
ཨིདཾ ཝཏྭཱ མཧཱསཏྟོ རཱཛཱནཾ ‘‘གཙྪཐ ཏུམྷེ’’ཏི ཝནྡིཏྭཱ ཨུཡྻོཛེསི. སོ ‘‘མུཏྟོ ཝཏམྷི ¶ ཨམིཏྟཧཏྠཏོ, ཨིམིསྶཱ ཙ ལདྡྷཏྟཱ མནོརཐོཔི མེ མཏྠཀཾ པཏྟོ’’ཏི བོདྷིསཏྟསྶ གུཎེ ཨཱཝཛྫེཏྭཱ ཨུཔྤནྣཔཱིཏིཔཱམོཛྫོ པཎྜིཏསྶ གུཎེ སེནཀསྶ ཀཐེནྟོ གཱཐམཱཧ –
‘‘སུསུཁཾ ཝཏ སཾཝཱསོ, པཎྜིཏེཧཱིཏི སེནཀ;
པཀྑཱིཝ པཉྫརེ བདྡྷེ, མཙྪེ ཛཱལགཏེརིཝ;
ཨམིཏྟཧཏྠཏྟགཏེ, མོཙཡཱི ནོ མཧོསདྷོ’’ཏི.
ཏཏྠ སུསུཁཾ ཝཏཱཏི ཨཏིསུཁཾ ཝཏ ཨིདཾ, ཡོ སཾཝཱསོ པཎྜིཏེཧི. ཨིཏཱིཏི ཀཱརཎཏྠེ ནིཔཱཏོ. ཨིདཾ ཝུཏྟཾ ཧོཏི – ཡསྨཱ ཨམིཏྟཧཏྠགཏེ མོཙཡི ནོ མཧོསདྷོ, ཏསྨཱ, སེནཀ, ཝདཱམི. སུསུཁཾ ཝཏ ཨིདཾ, ཡོ ཨེས པཎྜིཏེཧི སཾཝཱསོཏི.
ཏཾ ¶ སུཏྭཱ སེནཀོཔི པཎྜིཏསྶ གུཎེ ཀཐེནྟོ ཨཱཧ –
‘‘ཨེཝམེཏཾ མཧཱརཱཛ, པཎྜིཏཱ ཧི སུཁཱཝཧཱ;
པཀྑཱིཝ པཉྫརེ བདྡྷེ, མཙྪེ ཛཱལགཏེརིཝ;
ཨམིཏྟཧཏྠཏྟགཏེ, མོཙཡཱི ནོ མཧོསདྷོ’’ཏི.
ཨཐ ཝེདེཧརཱཛཱ ནདིཾ ཨུཏྟརིཏྭཱ ཡོཛནནྟརེ ཡོཛནནྟརེ མཧཱསཏྟེན ཀཱརིཏགཱམཾ སམྤཏྟོ. ཏཏྲསྶ བོདྷིསཏྟེན ཋཔིཏམནུསྶཱ ཧཏྠིཝཱཧནཱདཱིནི ཙེཝ ཨནྣཔཱནཱདཱིནི ཙ ཨདཾསུ. སོ ཀིལནྟེ ཧཏྠིཨསྶརཐཱདཡོ ཋཔེཏྭཱ ཨིཏརེ ཨཱདཱཡ ཏེཧི སདྡྷིཾ ཨཉྙཾ གཱམཾ པཱཔུཎི. ཨེཏེནུཔཱཡེན ཡོཛནསཏིཀཾ མགྒཾ ཨཏིཀྐམིཏྭཱ པུནདིཝསེ པཱཏོཝ མིཐིལཾ པཱཝིསི. མཧཱསཏྟོཔི ཨུམངྒདྭཱརཾ གནྟྭཱ ¶ ཨཏྟནཱ སནྣདྡྷཁགྒཾ ཨོམུཉྩིཏྭཱ ཨུམངྒདྭཱརེ ཝཱལུཀཾ ཝིཡཱུཧིཏྭཱ ཋཔེསི. ཋཔེཏྭཱ ཙ པན ཨུམངྒཾ པཝིསིཏྭཱ ཨུམངྒེན གནྟྭཱ ནགརཾ པཝིསིཏྭཱ པཱསཱདཾ ཨབྷིརུཡ྄ཧ གནྡྷོདཀེན ནྷཏྭཱ ནཱནགྒརསབྷོཛནཾ བྷུཉྫིཏྭཱ སཡནཝརགཏོ ‘‘མནོརཐོ མེ མཏྠཀཾ པཏྟོ’’ཏི ཨཱཝཛྫེནྟོ ནིཔཛྫི. ཨཐ ཏསྶཱ རཏྟིཡཱ ཨཙྩཡེན ཙཱུལ༹ནིརཱཛཱ སེནངྒཾ ཝིཙཱརཡམཱནོ ཏཾ ནགརཾ ཨུཔཱགམི. ཏམཏྠཾ པཀཱསེནྟོ སཏྠཱ ཨཱཧ –
‘‘རཀྑིཏྭཱ ཀསིཎཾ རཏྟིཾ, ཙཱུལ༹ནེཡྻོ མཧབྦལོ;
ཨུདེནྟཾ ཨརུཎུགྒསྨིཾ, ཨུཔཀཱརིཾ ཨུཔཱགམི.
‘‘ཨཱརུཡ྄ཧ ¶ པཝརཾ ནཱགཾ, བལཝནྟཾ སཊྛིཧཱཡནཾ;
རཱཛཱ ཨཝོཙ པཉྩཱལོ, ཙཱུལ༹ནེཡྻོ མཧབྦལོ.
‘‘སནྣདྡྷོ མཎིཝམྨེན, སརམཱདཱཡ པཱཎིནཱ;
པེསིཡེ ཨཛ྄ཛྷབྷཱསིཏྠ, པུཐུགུམྦེ སམཱགཏེ’’ཏི.
ཏཏྠ ཀསིཎནྟི སཀལཾ ནིསྶེསཾ. ཨུདེནྟནྟི ཨུདེནྟེ. ཨུཔཀཱརིནྟི པཉྩཱལནགརཾ ཨུཔཱདཱཡ མཧཱསཏྟེནཀཱརིཏཏྟཱ ‘‘ཨུཔཀཱརཱི’’ཏི ལདྡྷནཱམཀཾ ཏཾ ནགརཾ ཨུཔཱགམི. ཨཝོཙཱཏི ཨཏྟནོ སེནཾ ཨཝོཙ. པེསིཡེཏི ཨཏྟནོ པེསནཀཱརཀེ. ཨཛ྄ཛྷབྷཱསིཏྠཱཏི ཨདྷིཨབྷཱསིཏྠ, པུརེཏརམེཝ ཨབྷཱསིཏྠ, པུཐུགུམྦེཏི བཧཱུསུ སིཔྤེསུ པཏིཊྛིཏེ ཨནེཀསིཔྤཛཱནནཀེཏི.
ཨིདཱནི ¶ ཏེ སརཱུཔཏོ དསྶེཏུམཱཧ –
‘‘ཧཏྠཱརོཧེ ཨནཱིཀཊྛེ, རཐིཀེ པཏྟིཀཱརཀེ;
ཨུཔཱསནམྷི ཀཏཧཏྠེ, ཝཱལཝེདྷེ སམཱགཏེ’’ཏི.
ཏཏྠ ཨུཔཱསནམྷཱིཏི དྷནུསིཔྤེ. ཀཏཧཏྠེཏི ཨཝིརཛ྄ཛྷནཝེདྷིཏཱཡ སམྤནྣཧཏྠེ.
ཨིདཱནི རཱཛཱ ཝེདེཧཾ ཛཱིཝགྒཱཧཾ གཎྷཱཔེཏུཾ ཨཱཎཱཔེནྟོ ཨཱཧ –
‘‘པེསེཐ ཀུཉྫརེ དནྟཱི, བལཝནྟེ སཊྛིཧཱཡནེ;
མདྡནྟུ ཀུཉྫརཱ ནགརཾ, ཝེདེཧེན སུམཱཔིཏཾ.
‘‘ཝཙྪདནྟམུཁཱ སེཏཱ, ཏིཀྑགྒཱ ཨཊྛིཝེདྷིནོ;
པཎུནྣཱ དྷནུཝེགེན, སམྤཏནྟུཏརཱིཏརཱ.
‘‘མཱཎཝཱ ཝམྨིནོ སཱུརཱ, ཙིཏྲདཎྜཡུཏཱཝུདྷཱ;
པཀྑནྡིནོ མཧཱནཱགཱ, ཧཏྠཱིནཾ ཧོནྟུ སམྨུཁཱ.
‘‘སཏྟིཡོ ¶ ཏེལདྷོཏཱཡོ, ཨཙྩིམནྟཱ པབྷསྶརཱ;
ཝིཛྫོཏམཱནཱ ཏིཊྛནྟུ, སཏརཾསཱིཝ ཏཱརཀཱ.
‘‘ཨཱཝུདྷབལཝནྟཱནཾ ¶ , གུཎིཀཱཡཱུརདྷཱརིནཾ;
ཨེཏཱདིསཱནཾ ཡོདྷཱནཾ, སངྒཱམེ ཨཔལཱཡིནཾ;
ཝེདེཧོ ཀུཏོ མུཙྩིསྶཏི, སཙེ པཀྑཱིཝ ཀཱཧིཏི.
‘‘ཏིཾས མེ པུརིསནཱཝུཏྱོ, སབྦེཝེཀེཀནིཙྩིཏཱ;
ཡེསཾ སམཾ ན པསྶཱམི, ཀེཝལཾ མཧཱིམཾ ཙརཾ.
‘‘ནཱགཱ ཙ ཀཔྤིཏཱ དནྟཱི, བལཝནྟོ སཊྛིཧཱཡནཱ;
ཡེསཾ ཁནྡྷེསུ སོབྷནྟི, ཀུམཱརཱ ཙཱརུདསྶནཱ.
‘‘པཱིཏཱལངྐཱརཱ པཱིཏཝསནཱ, པཱིཏུཏྟརནིཝཱསནཱ;
ནཱགཁནྡྷེསུ སོབྷནྟི, དེཝཔུཏྟཱཝ ནནྡནེ.
‘‘པཱཋཱིནཝཎྞཱ ནེཏྟིཾསཱ, ཏེལདྷོཏཱ པབྷསྶརཱ;
ནིཊྛིཏཱ ནརདྷཱིརེབྷི, སམདྷཱརཱ སུནིསྶིཏཱ.
‘‘ཝེལླཱལིནོ ¶ ཝཱིཏམལཱ, སིཀྐཱཡསམཡཱ དལཱ༹;
གཧིཏཱ བལཝནྟེབྷི, སུཔྤཧཱརཔྤཧཱརིབྷི.
‘‘སུཝཎྞཐརུསམྤནྣཱ, ལོཧིཏཀཙྪུཔདྷཱརིཏཱ;
ཝིཝཏྟམཱནཱ སོབྷནྟི, ཝིཛྫཱུཝབྦྷགྷནནྟརེ.
‘‘པཊཱཀཱ ཝམྨིནོ སཱུརཱ, ཨསིཙམྨསྶ ཀོཝིདཱ;
དྷནུགྒཧཱ སིཀྑིཏརཱ, ནཱགཁནྡྷེ ནིཔཱཏིནོ.
‘‘ཨེཏཱདིསེཧི པརིཀྑིཏྟོ, ནཏྠི མོཀྑོ ཨིཏོ ཏཝ;
པབྷཱཝཾ ཏེ ན པསྶཱམི, ཡེན ཏྭཾ མིཐིལཾ ཝཛེ’’ཏི.
ཏཏྠ ¶ དནྟཱིཏི སམྤནྣདནྟེ. ཝཙྪདནྟམུཁཱཏི ནིཁཱདནསདིསམུཁཱ. པཎུནྣཱཏི ཝིསྶཊྛཱ. སམྤཏནྟུཏརཱིཏརཱཏི ཨེཝརཱུཔཱ སརཱ ཨིཏརཱིཏརཱ སམྤཏནྟུ སམཱགཙྪནྟུ. གྷནམེགྷཝསྶཾ ཝིཡ སརཝསྶཾ ཝསྶཐཱཏི ཨཱཎཱཔེསི. མཱཎཝཱཏི ཏརུཎཡོདྷཱ. ཝམྨིནོཏི ཝམྨཧཏྠཱ. ཙིཏྲདཎྜཡུཏཱཝུདྷཱཏི ཙིཏྲདཎྜཡུཏྟེཧི ཨཱཝུདྷེཧི སམནྣཱགཏཱ. པཀྑནྡིནོཏི སངྒཱམཔཀྑནྡིཀཱ. མཧཱནཱགཱཏི མཧཱནཱགེསུ ཀོཉྩནཱདཾ ཀཏྭཱ ཨཱགཙྪནྟེསུཔི ནིཙྩལཱ ཋཏྭཱ ཏེསཾ དནྟེ གཧེཏྭཱ ལུཉྩིཏུཾ སམཏྠཱ ཡོདྷཱ. སཏརཾསཱིཝ ཏཱརཀཱཏི སཏརཾསཱི ཝིཡ ཨོསདྷིཏཱརཀཱ. ཨཱཝུདྷབལཝནྟཱནནྟི ཨཱཝུདྷབལེན ཡུཏྟཱནཾ སམནྣཱགཏཱནཾ. གུཎིཀཱཡཱུརདྷཱརིནནྟི གུཎི ཝུཙྩཏི ཀཝཙཾ, ཀཝཙཱནི ཙེཝ ཀཱཡཱུརཱབྷརཎཱནི ཙ དྷཱརེནྟཱནཾ, ཀཝཙསངྑཱཏཱནི ཝཱ ཀཱཡཱུརཱནི དྷཱརེནྟཱནཾ. སཙེ པཀྑཱིཝ ཀཱཧིཏཱིཏི སཙེཔི པཀྑཱི ཝིཡ ཨཱཀཱསེ པཀྑནྡནཾ ཀརིསྶཏི, ཏཐཱཔི ཀིཾ མུཙྩིསྶཏཱིཏི ཝདཏི.
ཏིཾས མེ པུརིསནཱཝུཏྱོཏི པུརིསཱནཾ ཏིཾསསཧསྶཱནི ནཝུཏིསཏཱནི ཏིཾསནཱཝུཏྱོཏི ཝུཙྩནྟི. སབྦེཝེཀེཀནིཙྩིཏཱཏི ¶ ཨེཏྟཀཱ མཡ྄ཧཾ པརེསཾ ཧཏྠཏོ ཨཱཝུདྷཾ གཧེཏྭཱ པཙྩཱམིཏྟཱནཾ སཱིསཔཱཏནསམཏྠཱ ཨེཀེཀཾ ཝིཙིནིཏྭཱ གཧིཏཱ ཨནིཝཏྟིནོ ཡོདྷཱཏི དསྶེཏི. ཀེཝལཾ མཧཱིམཾ ཙརནྟི སཀལམྤི ཨིམཾ མཧིཾ ཙརནྟོ ཡེསཾ སམཾ སདིསཾ ན པསྶཱམི, ཀུཏོ ཨུཏྟརིཏརཾ, ཏེཡེཝ མེ ཡོདྷཱ ཨེཏྟཀཱཏི དསྶེཏི. ཙཱརུདསྶནཱཏི ¶ ཙཱརུ ཝུཙྩཏི སུཝཎྞཾ, སུཝཎྞཝཎྞཱཏི ཨཏྠོ. པཱིཏཱལངྐཱརཱཏི པཱིཏཝཎྞསུཝཎྞཱལངྐཱརཱ. པཱིཏཝསནཱཏི པཱིཏཝཎྞསུཝཎྞཝཏྠཱ. པཱིཏུཏྟརནིཝཱསནཱཏི པཱིཏཨུཏྟརཱསངྒནིཝཏྠཱ. པཱཋཱིནཝཎྞཱཏི པཱསཱཎམཙྪསདིསཱ. ནེཏྟིཾསཱཏི ཁགྒཱ. ནརདྷཱིརེབྷཱིཏི པཎྜིཏཔུརིསེཧི. སུནིསྶིཏཱཏི སུནིསིཏཱ ཨཏིཏིཁིཎཱ.
ཝེལླཱལིནོཏི ཋིཏམཛ྄ཛྷནྷིཀེ སཱུརིཡོ ཝིཡ ཝིཛྫོཏམཱནཱ. སིཀྐཱཡསམཡཱཏི སཏྟ ཝཱརེ ཀོཉྩསཀུཎེ ཁཱདཱཔེཏྭཱ གཧིཏེན སིཀྐཱཡསེན ཀཏཱ. སུཔྤཧཱརཔྤཧཱརིབྷཱིཏི དལ༹ྷཔྤཧཱརེཧི ཡོདྷེཧི. ལོཧིཏཀཙྪུཔདྷཱརིཏཱཏི ལོཧིཏཝཎྞཱཡ ཀོསིཡཱ སམནྣཱགཏཱ. པཊཱཀཱཏི ཨཱཀཱསེ པརིཝཏྟནསམཏྠཱ. སཱུརཱཏི ཛཱཏིསཱུརཱ. ཨསིཙམྨསྶ ཀོཝིདཱཏི ཨེཏེསཾ གཧཎེ ཀུསལཱ. དྷནུགྒཧཱཏི དྷནུགྒཧཀཱ. སིཀྑིཏརཱཏི ཨེཏསྨིཾ དྷནུགྒཧཎེ ཨཏིཝིཡ སིཀྑིཏཱ. ནཱགཁནྡྷེ ནིཔཱཏིནོཏི ཧཏྠིཀྑནྡྷེ ཁགྒེན ཚིནྡིཏྭཱ ནིཔཱཏནསམཏྠཱ. ནཏྠི མོཀྑོཏི ཨམྦྷོ, ཝེདེཧ, ཏྭཾ པཋམཾ ཏཱཝ གཧཔཏིཔུཏྟསྶཱནུབྷཱཝེན མུཏྟོསི, ཨིདཱནི པན ནཏྠི ཏཝ མོཀྑོཏི ཝདཏི. པབྷཱཝཾ ཏེཏི ཨིདཱནི ཏེ རཱཛཱནུབྷཱཝཾ ན པསྶཱམི, ཡེན ཏྭཾ མིཐིལཾ གམིསྶསི ཁིཔྤཾ, ཛཱལེ པཝིཊྛམཙྪོ ཝིཡ ཛཱཏོསཱིཏི.
ཙཱུལ༹ནིརཱཛཱ ¶ ཝེདེཧཾ ཏཛྫེནྟོ ‘‘ཨིདཱནི ནཾ གཎྷིསྶཱམཱི’’ཏི ཝཛིརངྐུསེན ནཱགཾ ཙོདེནྟོ ‘‘གཎྷཐ, བྷིནྡཐ, ཝིཛ྄ཛྷཐཱ’’ཏི སེནཾ ཨཱཎཱཔེནྟོ ཨུཔཀཱརིནགརཾ ཨཝཏྠརནྟོ ཝིཡ ཨུཔཱགམི. ཨཐ ནཾ མཧཱསཏྟསྶ ཨུཔནིཀྑིཏྟཀཔུརིསཱ ‘‘ཀོ ཛཱནཱཏི, ཀིཾ བྷཝིསྶཏཱི’’ཏི ཨཏྟནོ ཨུཔཊྛཱཀེ གཧེཏྭཱ པརིཝཱརཡིཾསུ. ཏསྨིཾ ཁཎེ བོདྷིསཏྟོ སིརིསཡནཱ ཝུཊྛཱཡ ཀཏསརཱིརཔྤཊིཛགྒནོ བྷུཏྟཔཱཏརཱསོ ཨལངྐཏཔྤཊིཡཏྟོ སཏསཧསྶགྒྷནཀཾ ཀཱསིཀཝཏྠཾ ནིཝཱསེཏྭཱ རཏྟཀམྦལཾ ཨེཀཾསེ ཀརིཏྭཱ སཏྟརཏནཝིཙིཏྟཾ ཝལཉྫནདཎྜཀཾ ཨཱདཱཡ སུཝཎྞཔཱདུཀཾ ཨཱརུཡ྄ཧ དེཝཙྪརཱཡ ཝིཡ ཨལངྐཏཨིཏྠིཡཱ ཝཱལབཱིཛནིཡཱ བཱིཛིཡམཱནོ ཨལངྐཏཔཱསཱདེ སཱིཧཔཉྫརཾ ཝིཝརིཏྭཱ ཙཱུལ༹ནིརཉྙོ ཨཏྟཱནཾ དསྶེནྟོ སཀྐདེཝརཱཛལཱིལཱཡ ཨཔརཱཔརཾ ཙངྐམི. ཙཱུལ༹ནིརཱཛཱཔི ཏསྶ རཱུཔསིརིཾ ཨོལོཀེཏྭཱ ཙིཏྟཾ པསཱདེཏུཾ ནཱསཀྑི, ‘‘ཨིདཱནི ནཾ གཎྷིསྶཱམཱི’’ཏི ¶ ཏུརིཏཏུརིཏོཝ ¶ ཧཏྠིཾ པེསེསི. པཎྜིཏོ ཙིནྟེསི ‘‘ཨཡཾ ‘ཝེདེཧོ མེ ལདྡྷོ’ཏི སཉྙཱཡ ཏུརིཏཏུརིཏོཝ ཨཱགཙྪཏི, ན ཛཱནཱཏི ཨཏྟནོ པུཏྟདཱརཾ གཧེཏྭཱ ཨམྷཱཀཾ རཉྙོ གཏབྷཱཝཾ, སུཝཎྞཱདཱསསདིསཾ མམ མུཁཾ དསྶེཏྭཱ ཀཐེསྶཱམི ཏེན སདྡྷི’’ནྟི. སོ ཝཱཏཔཱནེ ཋིཏོཝ མདྷུརསྶརཾ ནིཙྪཱརེཏྭཱ ཏེན སདྡྷིཾ ཀཐེནྟོ ཨཱཧ –
‘‘ཀིཾ ནུ སནྟརམཱནོཝ, ནཱགཾ པེསེསི ཀུཉྫརཾ;
པཧཊྛརཱུཔོ ཨཱཔཏསི, སིདྡྷཏྠོསྨཱིཏི མཉྙསི.
‘‘ཨོཧརེཏཾ དྷནུཾ ཙཱཔཾ, ཁུརཔྤཾ པཊིསཾཧར;
ཨོཧརེཏཾ སུབྷཾ ཝམྨཾ, ཝེལུ༹རིཡམཎིསནྠཏ’’ནྟི.
ཏཏྠ ཀུཉྫརནྟི སེཊྛཾ. པཧཊྛརཱུཔོཏི ཧཊྛཏུཊྛཙིཏྟོ སོམནསྶཛཱཏོ. ཨཱཔཏསཱིཏི ཨཱགཙྪསི. སིདྡྷཏྠོསྨཱིཏི ནིཔྥནྣཏྠོསྨི, མནོརཐོ མེ མཏྠཀཾ པཏྟོཏི མཉྙསི. ཨོཧརེཏནྟི ཨིམཾ ཙཱཔསངྑཱཏཾ དྷནུཾ ཨོཧར, ཨཝཧར, ཚཌྜེཧི, ཀོ ནུ ཏེ ཨེཏེནཏྠོ. པཊིསཾཧརཱཏི ཨཔནེཏྭཱ ཨཉྙསྶ ཝཱ དེཧི, པཊིཙྪནྣེ ཝཱ ཋཱནེ ཋཔེཧི, ཀིཾ ཁུརཔྤེན ཀརིསྶསི. ཝམྨནྟི ཨེཏཾ ཝམྨམྤི ཨཔནེཧི. ཨིདཾ ཏཡཱ ཧིཡྻོ པཊིམུཀྐཾ བྷཝིསྶཏི, ཚཌྜེཧི ནཾ, མཱ ཏེ སརཱིརཾ ཨུཔྤཎྜུཀཾ ཨཧོསི, ཨཀིལམེཏྭཱ པཱཏོཝ ནགརཾ པཝིསཱཧཱིཏི རཉྙཱ སདྡྷིཾ ཀེལི༹མཀཱསི.
སོ ཏསྶ ཝཙནཾ སུཏྭཱ ‘‘གཧཔཏིཔུཏྟོ མཡཱ སདྡྷིཾ ཀེལི༹ཾ ཀརོཏི, ཨཛྫ ཏེ ཀཏྟབྦཾ ཛཱནིསྶཱམཱི’’ཏི ཏཾ ཏཛྫེནྟོ གཱཐམཱཧ –
‘‘པསནྣམུཁཝཎྞོསི ¶ , མྷིཏཔུབྦཉྩ བྷཱསསི;
ཧོཏི ཁོ མརཎཀཱལེ, ཨེདིསཱི ཝཎྞསམྤདཱ’’ཏི.
ཏཏྠ མྷིཏཔུབྦཉྩཱཏི པཋམཾ མྷིཏཾ ཀཏྭཱ པཙྪཱ བྷཱསནྟོ མྷིཏཔུབྦམེཝ བྷཱསསི, མཾ ཀིསྨིཉྩི ན གཎེསི. ཧོཏི ཁོཏི མརཎཀཱལེ ནཱམ ཝཎྞསམྤདཱ ཧོཏིཡེཝ, ཏསྨཱ ཏྭཾ ཝིརོཙསི, ཨཛྫ ཏེ སཱིསཾ ཚིནྡིཏྭཱ ཛཡཔཱནཾ པིཝིསྶཱམཱཏི.
ཨེཝཾ ཏསྶ ཏེན སདྡྷིཾ ཀཐནཀཱལེ མཧཱབལཀཱཡོ མཧཱསཏྟསྶ རཱུཔསིརིཾ དིསྭཱ ‘‘ཨམྦྷོ, ཨམྷཱཀཾ རཱཛཱ མཧོསདྷཔཎྜིཏེན སདྡྷིཾ མནྟེཏི ¶ , ཀིཾ ནུ ཁོ ཀཐེསི, ཨེཏེསཾ ཀཐཾ སུཎིསྶཱམཱ’’ཏི རཉྙོ སནྟིཀམེཝ ཨགམཱསི. པཎྜིཏོཔི ཏསྶ ཀཐཾ སུཏྭཱ ‘‘ན མཾ ‘མཧོསདྷཔཎྜིཏོ’ཏི ཛཱནཱསི. ནཱཧཾ ཨཏྟཱནཾ མཱརེཏུཾ དསྶཱམི, མནྟོ ཏེ ¶ , དེཝ, བྷིནྣོ, ཀེཝཊྚེན ཙ ཏཡཱ ཙ ཧདཡེན ཙིནྟིཏཾ ན ཛཱཏཾ, མུཁེན ཀཐིཏམེཝ ཛཱཏ’’ནྟི པཀཱསེནྟོ ཨཱཧ –
མོགྷཾ ཏེ གཛྫིཏཾ རཱཛ, བྷིནྣམནྟོསི ཁཏྟིཡ;
དུགྒཎྷོསི ཏཡཱ རཱཛཱ, ཁལུ༹ངྐེནེཝ སིནྡྷཝོ.
‘‘ཏིཎྞོ ཧིཡྻོ རཱཛཱ གངྒཾ, སཱམཙྩོ སཔརིཛྫནོ;
ཧཾསརཱཛཾ ཡཐཱ དྷངྐོ, ཨནུཛྫཝཾ པཏིསྶསཱི’’ཏི.
ཏཏྠ བྷིནྣམནྟོསཱིཏི ཡོ ཏཡཱ ཀེཝཊྚེན སདྡྷིཾ སཡནགབྦྷེ མནྟོ གཧིཏོ, ཏཾ མནྟཾ ན ཛཱནཱཏཱིཏི མཱ སཉྙཾ ཀརི, པགེཝ སོ མཡཱ ཉཱཏོ, བྷིནྣམནྟོ ཨསི ཛཱཏོ. དུགྒཎྷོསི ཏཡཱཏི མཧཱརཱཛ, ཏཡཱ ཨམྷཱཀཾ རཱཛཱ ཨསྶཁལུ༹ངྐེན སིནྡྷཝོ ཝིཡ དུགྒཎྷོསི, ཁལུ༹ངྐཾ ཨཱརུལ༹ྷེན ཛཝསམྤནྣཾ ཨཱཛཱནཱིཡཾ ཨཱརུཡ྄ཧ གཙྪནྟོ ཝིཡ གཧེཏུཾ ན སཀྐཱཏི ཨཏྠོ. ཁལུ༹ངྐོ ཝིཡ ཧི ཀེཝཊྚོ, ཏཾ ཨཱརུལ༹ྷཔུརིསོ ཝིཡ ཏྭཾ, ཛཝསམྤནྣོ སིནྡྷཝོ ཝིཡ ཨཧཾ, ཏཾ ཨཱརུལ༹ྷཔུརིསོ ཝིཡ ཨམྷཱཀཾ རཱཛཱཏི དསྶེཏི. ཏིཎྞོ ཧིཡྻོཏི ཧིཡྻོཝ ཨུཏྟིཎྞོ. སོ ཙ ཁོ སཱམཙྩོ སཔརིཛནོ, ན ཨེཀཀོཝ པལཱཡིཏྭཱ གཏོ. ཨནུཛྫཝནྟི སཙེ པན ཏྭཾ ཏཾ ཨནུཛཝིསྶསི ཨནུབནྡྷིསྶསི, ཨཐ ཡཐཱ སུཝཎྞཧཾསརཱཛཾ ཨནུཛཝནྟོ དྷངྐོ ཨནྟརཱཝ པཏིསྶཏི, ཨེཝཾ པཏིསྶསི, ཨནྟརཱཝ ཝིནཱསཾ པཱཔུཎིསྶསཱིཏི ཝདཏི.
ཨིདཱནི ¶ སོ ཨཚམྦྷིཏཀེསརསཱིཧོ ཝིཡ ཨུདཱཧརཎཾ ཨཱཧརནྟོ ཨཱཧ –
‘‘སིངྒཱལཱ རཏྟིབྷཱགེན, ཕུལླཾ དིསྭཱན ཀིཾསུཀཾ;
མཾསཔེསཱིཏི མཉྙནྟཱ, པརིབྱཱུལ༹ྷཱ མིགཱདྷམཱ.
‘‘ཝཱིཏིཝཏྟཱསུ ¶ རཏྟཱིསུ, ཨུགྒཏསྨིཾ དིཝཱཀརེ;
ཀིཾ སུཀཾ ཕུལླིཏཾ དིསྭཱ, ཨཱསཙྪིནྣཱ མིགཱདྷམཱ.
‘‘ཨེཝམེཝ ཏུཝཾ རཱཛ, ཝེདེཧཾ པརིཝཱརིཡ;
ཨཱསཙྪིནྣོ གམིསྶསི, སིངྒཱལཱ ཀིཾསུཀཾ ཡཐཱ’’ཏི.
ཏཏྠ དིསྭཱནཱཏི ཙནྡཱལོཀེན ཨོལོཀེཏྭཱ. པརིབྱཱུལ༹ྷཱཏི པཱཏོཝ མཾསཔེསིཾ ཁཱདིཏྭཱ གམིསྶཱམཱཏི པརིཝཱརེཏྭཱ ཨཊྛཾསུ. ཝཱིཏིཝཏྟཱསཱུཏི ཏེ ཡཱསུ ཡཱསུ རཏྟཱིསུ ཨེཝཾ ཨཊྛཾསུ, ཏཱསུ ཏཱསུ རཏྟཱིསུ ཨཏཱིཏཱསུ. དིསྭཱཏི སཱུརིཡཱལོཀེན ཀིཾསུཀཾ དིསྭཱ ‘‘ན ཨིདཾ མཾས’’ནྟི ཉཏྭཱ ཚིནྣཱསཱ ཧུཏྭཱ པལཱཡིཾསུ. སིངྒཱལཱཏི ཡཐཱ སིངྒཱལཱ ཀིཾསུཀཾ པརིཝཱརེཏྭཱ ཨཱསཙྪིནྣཱ གཏཱ, ཨེཝཾ ཏུཝམྤི ཨིདྷ ཝེདེཧརཉྙོ ནཏྠིབྷཱཝཾ ཉཏྭཱ ཨཱསཙྪིནྣོ ཧུཏྭཱ གམིསྶསི, སེནཾ གཧེཏྭཱ པལཱཡིསྶསཱིཏི དཱིཔེཏི.
རཱཛཱ ཏསྶ ཨཚམྦྷིཏཝཙནཾ སུཏྭཱ ཙིནྟེསི ‘‘ཨཡཾ གཧཔཏིཔུཏྟོ ཨཏིསཱུརོ ཧུཏྭཱ ཀཐེསི, ནིསྶཾསཡཾ ཝེདེཧོ པལཱཏོ བྷཝིསྶཏཱི’’ཏི. སོ ཨཏིཝིཡ ཀུཛ྄ཛྷིཏྭཱ ‘‘པུབྦེ མཡཾ གཧཔཏིཔུཏྟཾ ¶ ནིསྶཱཡ ཨུདརསཱཊཀསྶཔི ཨསྶཱམིཀཱ ཛཱཏཱ, ཨིདཱནི ཏེན ཨམྷཱཀཾ ཧཏྠགཏོ པཙྩཱམིཏྟོ པལཱཔིཏོ, བཧུསྶ ཝཏ ནོ ཨནཏྠསྶ ཀཱརཀོ, ཨུབྷིནྣཾ ཀཏྟབྦཀཱརཎཾ ཨིམསྶེཝ ཀརིསྶཱམཱི’’ཏི ཏསྶ ཀཱརཎཾ ཀཱཏུཾ ཨཱཎཱཔེནྟོ ཨཱཧ –
‘‘ཨིམསྶ ཧཏྠེ པཱདེ ཙ, ཀཎྞནཱསཉྩ ཚིནྡཐ;
ཡོ མེ ཨམིཏྟཾ ཧཏྠགཏཾ, ཝེདེཧཾ པརིམོཙཡི.
‘‘ཨིམཾ མཾསཾཝ པཱཏབྱཾ, སཱུལེ ཀཏྭཱ པཙནྟུ ནཾ;
ཡོ མེ ཨམིཏྟཾ ཧཏྠགཏཾ, ཝེདེཧཾ པརིམོཙཡི.
‘‘ཡཐཱཔི ¶ ཨཱསབྷཾ ཙམྨཾ, པཐབྱཱ ཝིཏནཱིཡཏི;
སཱིཧསྶ ཨཐོ བྱགྒྷསྶ, ཧོཏི སངྐུསམཱཧཏཾ.
‘‘ཨེཝཾ ཏཾ ཝིཏནིཏྭཱན, ཝེདྷཡིསྶཱམི སཏྟིཡཱ;
ཡོ མེ ཨམིཏྟཾ ཧཏྠགཏཾ, ཝེདེཧཾ པརིམོཙཡཱི’’ཏི.
ཏཏྠ ¶ པཱཏབྱནྟི པཱཙཡིཏབྦཾ པཙིཏབྦཡུཏྟཀཾ མིགཱདཱིནཾ མཾསཾ ཝིཡ ཨིམཾ གཧཔཏིཔུཏྟཾ སཱུལེ ཨཱཝུཎིཏྭཱ པཙནྟུ. སཱིཧསྶ ཨཐོ བྱགྒྷསྶཱཏི ཨེཏེསཉྩ ཡཐཱ ཙམྨཾ སངྐུསམཱཧཏཾ ཧོཏི, ཨེཝཾ ཧོཏུ. ཝེདྷཡིསྶཱམཱིཏི ཝིཛ྄ཛྷཱཔེསྶཱམི.
ཏཾ སུཏྭཱ མཧཱསཏྟོ ཧསིཏཾ ཀཏྭཱ ‘‘ཨཡཾ རཱཛཱ ཨཏྟནོ དེཝིཡཱ ཙ བནྡྷཝཱནཉྩ མཡཱ མིཐིལཾ པཧིཏབྷཱཝཾ ན ཛཱནཱཏི, ཏེན མེ ཨིམཾ ཀམྨཀཱརཎཾ ཝིཙཱརེཏི, ཀོདྷཝསེན ཁོ པན མཾ ཨུསུནཱ ཝཱ ཝིཛ྄ཛྷེཡྻ, ཨཉྙཾ ཝཱ ཨཏྟནོ རུཙྩནཀཾ ཀརེཡྻ, སོཀཱཏུརཾ ཨིམཾ ཝེདནཱཔྤཏྟཾ ཀཏྭཱ ཧཏྠིཔིཊྛེཡེཝ ཝིསཉྙིཾ ནཾ ནིཔཛྫཱཔེཏུཾ ཏཾ ཀཱརཎཾ ཨཱརོཙེསྶཱམཱི’’ཏི ཙིནྟེཏྭཱ ཨཱཧ –
‘‘སཙེ མེ ཧཏྠེ པཱདེ ཙ, ཀཎྞནཱསཉྩ ཚེཙྪསི;
ཨེཝཾ པཉྩཱལཙནྡསྶ, ཝེདེཧོ ཚེདཡིསྶཏི.
‘‘སཙེ མེ ཧཏྠེ པཱདེ ཙ, ཀཎྞནཱསཉྩ ཚེཙྪསི;
ཨེཝཾ པཉྩཱལཙནྡིཡཱ, ཝེདེཧོ ཚེདཡིསྶཏི.
‘‘སཙེ མེ ཧཏྠེ པཱདེ ཙ, ཀཎྞནཱསཉྩ ཚེཙྪསི;
ཨེཝཾ ནནྡཱཡ དེཝིཡཱ, ཝེདེཧོ ཚེདཡིསྶཏི.
‘‘སཙེ མེ ཧཏྠེ པཱདེ ཙ, ཀཎྞནཱསཉྩ ཚེཙྪསི;
ཨེཝཾ ཏེ པུཏྟདཱརསྶ, ཝེདེཧོ ཚེདཡིསྶཏི.
‘‘སཙེ ¶ མཾསཾཝ པཱཏབྱཾ, སཱུལེ ཀཏྭཱ པཙིསྶསི;
ཨེཝཾ པཉྩཱལཙནྡསྶ, ཝེདེཧོ པཱཙཡིསྶཏི.
‘‘སཙེ ¶ མཾསཾཝ པཱཏབྱཾ, སཱུལེ ཀཏྭཱ པཙིསྶསི;
ཨེཝཾ པཉྩཱལཙནྡིཡཱ, ཝེདེཧོ པཱཙཡིསྶཏི.
‘‘སཙེ མཾསཾཝ པཱཏབྱཾ, སཱུལེ ཀཏྭཱ པཙིསྶསི;
ཨེཝཾ ནནྡཱཡ དེཝིཡཱ, ཝེདེཧོ པཱཙཡིསྶཏི.
‘‘སཙེ མཾསཾཝ པཱཏབྱཾ, སཱུལེ ཀཏྭཱ པཙིསྶསི;
ཨེཝཾ ཏེ པུཏྟདཱརསྶ, ཝེདེཧོ པཱཙཡིསྶཏི.
‘‘སཙེ ¶ མཾ ཝིཏནིཏྭཱན, ཝེདྷཡིསྶསི སཏྟིཡཱ;
ཨེཝཾ པཉྩཱལཙནྡསྶ, ཝེདེཧོ ཝེདྷཡིསྶཏི.
‘‘སཙེ མཾ ཝིཏནིཏྭཱན, ཝེདྷཡིསྶསི སཏྟིཡཱ;
ཨེཝཾ པཉྩཱལཙནྡིཡཱ, ཝེདེཧོ ཝེདྷཡིསྶཏི.
‘‘སཙེ མཾ ཝིཏནིཏྭཱན, ཝེདྷཡིསྶསི སཏྟིཡཱ;
ཨེཝཾ ནནྡཱཡ དེཝིཡཱ, ཝེདེཧོ ཝེདྷཡིསྶཏི.
‘‘སཙེ མཾ ཝིཏནིཏྭཱན, ཝེདྷཡིསྶསི སཏྟིཡཱ;
ཨེཝཾ ཏེ པུཏྟདཱརསྶ, ཝེདེཧོ ཝེདྷཡིསྶཏི;
ཨེཝཾ ནོ མནྟིཏཾ རཧོ, ཝེདེཧེན མཡཱ སཧ.
‘‘ཡཐཱཔི པལསཏཾ ཙམྨཾ, ཀོནྟིམནྟཱསུནིཊྛིཏཾ;
ཨུཔེཏི ཏནུཏཱཎཱཡ, སརཱནཾ པཊིཧནྟཝེ.
‘‘སུཁཱཝཧོ དུཀྑནུདོ, ཝེདེཧསྶ ཡསསྶིནོ;
མཏིཾ ཏེ པཊིཧཉྙཱམི, ཨུསུཾ པལསཏེན ཝཱ’’ཏི.
ཏཏྠ ཚེདཡིསྶཏཱིཏི ‘‘པཎྜིཏསྶ ཀིར ཙཱུལ༹ནིནཱ ཧཏྠཔཱདཱ ཚིནྣཱ’’ཏི སུཏྭཱཝ ཚེདཡིསྶཏི. པུཏྟདཱརསྶཱཏི མམ ཨེཀསྶ ཚིནྡནཔཙྩཡཱ ཏཝ དྭིནྣཾ པུཏྟཱནཉྩེཝ ཨགྒམཧེསིཡཱ ¶ ཙཱཏི ཏིཎྞམྤི ཛནཱནཾ ཨམྷཱཀཾ རཱཛཱ ཚེདཡིསྶཏི. ཨེཝཾ ནོ མནྟིཏཾ རཧོཏི མཧཱརཱཛ, མཡཱ ཙ ཝེདེཧརཱཛེན ཙ ཨེཝཾ རཧསི མནྟིཏཾ ‘‘ཡཾ ཡཾ ཨིདྷ མཡ྄ཧཾ ཙཱུལ༹ནིརཱཛཱ ཀཱརེཏི, ཏཾ ཏཾ ཏཏྠ ཏསྶ པུཏྟདཱརཱནཾ ཀཱཏབྦ’’ནྟི. པལསཏནྟི པལསཏཔྤམཱཎཾ བཧཱུ ཁཱརེ ཁཱདཱཔེཏྭཱ མུདུབྷཱཝཾ ཨུཔནཱིཏཾ ཙམྨཾ. ཀོནྟིམནྟཱསུནིཊྛིཏནྟི ཀོནྟིམནྟཱ ཝུཙྩཏི ཙམྨཀཱརསཏྠཾ, ཏཱཡ ཀནྟནལིཁིཏཱནཾ ཝསེན ཀཏཏྟཱ སུཊྛུ ནིཊྛིཏཾ. ཏནུཏཱཎཱཡཱཏི ཡཐཱ ཏཾ ཙམྨཾ སངྒཱམེ སརཱནཾ པཊིཧནྟཝེ སརཱིརཏཱཎཾ ཨུཔེཏི, སརེ པཊིཧནིཏྭཱ སརཱིརཾ རཀྑཏི. སུཁཱཝཧོཏི མཧཱརཱཛ, ཨཧམྤི ཨམྷཱཀཾ ¶ རཉྙོ པཙྩཱམིཏྟཱནཾ ཝཱརཎཏྠེན ཏཾ སརཔརིཏྟཱཎཙམྨཾ ཝིཡ སུཁཱཝཧོ. དུཀྑནུདོཏི ཀཱཡིཀསུཁཙེཏསིཀསུཁཉྩ ཨཱཝཧཱམི, དུཀྑཉྩ ནུདེམི. མཏིནྟི ཏསྨཱ ཏཝ མཏིཾ པཉྙཾ ཨུསུཾ ཏེན པལསཏཙམྨེན ཝིཡ ཨཏྟནོ མཏིཡཱ པཊིཧནིསྶཱམཱིཏི.
ཏཾ ¶ སུཏྭཱ རཱཛཱ ཙིནྟེསི ‘‘གཧཔཏིཔུཏྟོ ཀིཾ ཀཐེཏི, ཡཐཱ ཀིར ཨཧཾ ཨེཏསྶ ཀརིསྶཱམི, ཨེཝཾ ཝེདེཧརཱཛཱ མམ པུཏྟདཱརཱནཾ ཀམྨཀཱརཎཾ ཀརིསྶཏི, ན ཛཱནཱཏི མམ པུཏྟདཱརཱནཾ ཨཱརཀྑསྶ སུསཾཝིཧིཏབྷཱཝཾ, ‘ཨིདཱནི མཱརེསྶཏཱི’ཏི མརཎབྷཡེན ཝིལཔཏི, ནཱསྶ ཝཙནཾ སདྡཧཱམཱི’’ཏི. མཧཱསཏྟོ ‘‘ཨཡཾ མཾ མརཎབྷཡེན ཀཐེཏཱིཏི མཉྙཏི, ཛཱནཱཔེསྶཱམི ན’’ནྟི ཙིནྟེཏྭཱ ཨཱཧ –
‘‘ཨིངྒྷ པསྶ མཧཱརཱཛ, སུཉྙཾ ཨནྟེཔུརཾ ཏཝ;
ཨོརོདྷཱ ཙ ཀུམཱརཱ ཙ, ཏཝ མཱཏཱ ཙ ཁཏྟིཡ;
ཨུམངྒཱ ནཱིཧརིཏྭཱན, ཝེདེཧསྶུཔནཱམིཏཱ’’ཏི.
ཏཏྠ ཨུམངྒཱཏི མཧཱརཱཛ, མཡཱ ཨཏྟནོ མཱཎཝེ པེསེཏྭཱ པཱསཱདཱ ཨོཏརཱཔེཏྭཱ ཛངྒྷཨུམངྒེན ཨཱཧརཱཔེཏྭཱ མཧཱཨུམངྒཱ ནཱིཧརིཏྭཱ བནྡྷཝཱ ཏེ ཝེདེཧསྶ ཨུཔནཱམིཏཱཏི.
ཏཾ སུཏྭཱ རཱཛཱ ཙིནྟེསི ‘‘པཎྜིཏོ ཨཏིཝིཡ དལ༹ྷཾ ཀཏྭཱ ཀཐེཏི, མཡཱ ཙ རཏྟིབྷཱགེ གངྒཱཔསྶེ ནནྡཱདེཝིཡཱ སདྡོ ཝིཡ སུཏོ, མཧཱཔཉྙོ པཎྜིཏོ ཀདཱཙི སཙྩཾ བྷཎེཡྻཱ’’ཏི. སོ ཨུཔྤནྣབལཝསོཀོཔི སཏིཾ ཨུཔཊྛཱཔེཏྭཱ ཨསོཙནྟོ ཝིཡ ཨེཀཾ ཨམཙྩཾ པཀྐོསཱཔེཏྭཱ ཛཱནནཏྠཱཡ པེསེནྟོ ཨིམཾ གཱཐམཱཧ –
‘‘ཨིངྒྷ ¶ ཨནྟེཔུརཾ མཡ྄ཧཾ, གནྟྭཱན ཝིཙིནཱཐ ནཾ;
ཡཐཱ ཨིམསྶ ཝཙནཾ, སཙྩཾ ཝཱ ཡདི ཝཱ མུསཱ’’ཏི.
སོ སཔརིཝཱརོ རཱཛནིཝེསནཾ གནྟྭཱ དྭཱརཾ ཝིཝརིཏྭཱ ཨནྟོ པཝིསིཏྭཱ ཧཏྠཔཱདེ བནྡྷིཏྭཱ མུཁཉྩ པིདཧིཏྭཱ ནཱགདནྟཀེསུ ཨོལགྒིཏེ ཨནྟེཔུརཔཱལཀེ ཙ ཁུཛྫཝཱམནཀཱདཡོ ཙ བྷཱཛནཱནི བྷིནྡིཏྭཱ ཏཏྠ ཏཏྠ ཝིཔྤཀིཎྞཁཱདནཱིཡབྷོཛནཱིཡཉྩ རཏནགྷརདྭཱརཱནི ཝིཝརིཏྭཱ ཀཏརཏནཝིལོཔཾ ཝིཝཊདྭཱརཾ སིརིགབྦྷཉྩ ཡཐཱཝིཝཊེཧི ཨེཝ ཝཱཏཔཱནེཧི པཝིསིཏྭཱ ཙརམཱནཾ ཀཱཀགཎཉྩ ¶ ཚཌྜིཏགཱམསདིསཾ སུསཱནབྷཱུམིཡཾ ཝིཡ ཙ ནིསྶིརིཀཾ རཱཛནིཝེསནཉྩ དིསྭཱ པུནཱགནྟྭཱ རཉྙོ ཨཱརོཙེནྟོ ཨཱཧ –
‘‘ཨེཝམེཏཾ མཧཱརཱཛ, ཡཐཱ ཨཱཧ མཧོསདྷོ;
སུཉྙཾ ཨནྟེཔུརཾ སབྦཾ, ཀཱཀཔཊྚནཀཾ ཡཐཱ’’ཏི.
ཏཏྠ ¶ ཀཱཀཔཊྚནཀཾ ཡཐཱཏི མཙྪགནྡྷེན ཨཱགཏེཧི ཀཱཀགཎེཧི སམཱཀིཎྞོ སམུདྡཏཱིརེ ཚཌྜིཏགཱམཀོ ཝིཡ.
ཏཾ སུཏྭཱ རཱཛཱ ཙཏུནྣཾ ཛནཱནཾ པིཡཝིཔྤཡོགསམྦྷཝེན སོཀེན ཀམྤམཱནོ ‘‘ཨིདཾ མམ དུཀྑཾ གཧཔཏིཔུཏྟཾ ནིསྶཱཡ ཨུཔྤནྣ’’ནྟི དཎྜེན གྷཊྚིཏོ ཨཱསཱིཝིསོ ཝིཡ བོདྷིསཏྟསྶ ཨཏིཝིཡ ཀུཛ྄ཛྷི. མཧཱསཏྟོ ཏསྶཱཀཱརཾ དིསྭཱ ‘‘ཨཡཾ རཱཛཱ མཧཱཡསོ ཀདཱཙི ཀོདྷཝསེན ‘ཀིཾ མམ ཨེཏེཧཱི’ཏི ཁཏྟིཡམཱནེན མཾ ཝིཧེཋེཡྻ, ཡཾནཱུནཱཧཾ ནནྡཱདེཝིཾ ཨིམིནཱ ཨདིཊྛཔུབྦཾ ཝིཡ ཀརོནྟོ ཏསྶཱ སརཱིརཝཎྞཾ ཝཎྞེཡྻཾ. ཨཐ སོ ཏཾ ཨནུསྶརིཏྭཱ ‘སཙཱཧཾ མཧོསདྷཾ མཱརེསྶཱམི, ཨེཝརཱུཔཾ ཨིཏྠིརཏནཾ ན ལབྷིསྶཱམི, ཨམཱརེནྟོ པུན ཏཾ ལབྷིསྶཱམཱི’ཏི ཨཏྟནོ བྷརིཡཱཡ སིནེཧེན ན ཀིཉྩི མཡ྄ཧཾ ཀརིསྶཏཱི’’ཏི ཙིནྟེཏྭཱ ཨཏྟནོ ཨནུརཀྑཎཏྠཾ པཱསཱདེ ཋིཏོཝ རཏྟཀམྦལནྟརཱ སུཝཎྞཝཎྞཾ བཱཧུཾ ནཱིཧརིཏྭཱ ཏསྶཱ གཏམགྒཱཙིཀྑནཝསེན ཝཎྞེནྟོ ཨཱཧ –
‘‘ཨིཏོ གཏཱ མཧཱརཱཛ, ནཱརཱི སབྦངྒསོབྷནཱ;
ཀོསམྦཕལཀསུསྶོཎཱི, ཧཾསགགྒརབྷཱཎིནཱི.
‘‘ཨིཏོ ནཱིཏཱ མཧཱརཱཛ, ནཱརཱི སབྦངྒསོབྷནཱ;
ཀོསེཡྻཝསནཱ སཱམཱ, ཛཱཏརཱུཔསུམེཁལཱ.
‘‘སུརཏྟཔཱདཱ ¶ ཀལྱཱཎཱི, སུཝཎྞམཎིམེཁལཱ;
པཱརེཝཏཀྑཱི སུཏནཱུ, བིམྦོཊྛཱ ཏནུམཛ྄ཛྷིམཱ.
‘‘སུཛཱཏཱ བྷུཛལཊྛཱིཝ, ཝེདཱིཝ ཏནུམཛ྄ཛྷིམཱ;
དཱིགྷསྶཱ ཀེསཱ ཨསིཏཱ, ཨཱིསཀགྒཔཝེལླིཏཱ.
‘‘སུཛཱཏཱ མིགཚཱཔཱཝ, ཧེམནྟགྒིསིཁཱརིཝ;
ནདཱིཝ གིརིདུགྒེསུ, སཉྪནྣཱ ཁུདྡཝེལུ༹བྷི.
‘‘ནཱགནཱསཱུརུ ¶ ཀལྱཱཎཱི, པརམཱ ཏིམྦརུཏྠནཱི;
ནཱཏིདཱིགྷཱ ནཱཏིརསྶཱ, ནཱལོམཱ ནཱཏིལོམསཱ’’ཏི.
ཏཏྠ ཨིཏོཏི ཨུམངྒཾ དསྶེཏི. ཀོསམྦཕལཀསུསྶོཎཱིཏི ཝིསཱལཀཉྩནཕལཀཾ ཝིཡ སུནྡརསོཎཱི. ཧཾསགགྒརབྷཱཎིནཱིཏི གོཙརཏྠཱཡ ཝིཙརནྟཱནཾ ¶ ཧཾསཔོཏཀཱནཾ ཝིཡ གགྒརེན མདྷུརེན སརེན སམནྣཱགཏཱ. ཀོསེཡྻཝསནཱཏི ཀཉྩནཁཙིཏཀོསེཡྻཝཏྠཝསནཱ. སཱམཱཏི སུཝཎྞསཱམཱ. པཱརེཝཏཀྑཱིཏི པཉྩསུ པསཱདེསུ རཏྟཊྛཱནེ པཱརེཝཏསཀུཎིསདིསཀྑཱི. སུཏནཱུཏི སོབྷནསརཱིརཱ. བིམྦོཊྛཱཏི བིམྦཕལཾ ཝིཡ སུརཛྫིཏམཊྛོཊྛཔརིཡོསཱནཱ. ཏནུམཛ྄ཛྷིམཱཏི ཀརམིཏཏནུམཛ྄ཛྷིམཱ. སུཛཱཏཱ བྷུཛལཊྛཱིཝཱཏི ཝིཛམྦྷནཀཱལེ ཝཱཏེརིཏརཏྟཔལླཝཝིལཱསིནཱི སུཛཱཏཱ བྷུཛལཏཱ ཝིཡ ཝིརོཙཏི. ཝེདཱིཝཱཏི ཀཉྩནཝེདི ཝིཡ ཏནུམཛ྄ཛྷིམཱ. ཨཱིསཀགྒཔཝེལླིཏཱཏི ཨཱིསཀཾ ཨགྒེསུ ཨོནཏཱ. ཨཱིསཀགྒཔཝེལླིཏཱ ཝཱ ནེཏྟིཾསཱཡ ཨགྒཾ ཝིཡ ཝིནཏཱ.
མིགཚཱཔཱཝཱཏི པབྦཏསཱནུམྷི སུཛཱཏཱ ཨེཀཝསྶིཀབྱགྒྷཔོཏིཀཱ ཝིཡ ཝིལཱསཀུཏྟིཡུཏྟཱ. ཧེམནྟགྒིསིཁཱརིཝཱཏི ཨོབྷཱསསམྤནྣཏཱཡ ཧེམནྟེ ཨགྒིསིཁཱ ཝིཡ སོབྷཏི. ཁུདྡཝེལུ༹བྷཱིཏི ཡཐཱ ཁུདྡཀེཧི ཨུདཀཝེལཱུ༹ཧི སཉྪནྣཱ ནདཱི སོབྷཏི, ཨེཝཾ ཏནུཀལོམཱཡ ལོམརཱཛིཡཱ སོབྷཏི. ཀལྱཱཎཱིཏི ཚཝིམཾསཀེསནྷཱརུཨཊྛཱིནཾ ཝསེན པཉྩཝིདྷེན ཀལྱཱཎེན སམནྣཱགཏཱ. པརམཱ ཏིམྦརུཏྠནཱིཏི ཏིམྦརུཏྠནཱི པརམཱ ཨུཏྟམཱ, སུཝཎྞཕལཀེ ཋཔིཏསུཝཎྞཝཎྞཏིམྦརུཕལདྭཡམིཝསྶཱ སུསཎྛཱནསམྤནྣཾ ནིརནྟརཾ ཐནཡུགལཾ.
ཨེཝཾ མཧཱསཏྟེ ཏསྶཱ རཱུཔསིརིཾ ཝཎྞེནྟེཝ ཏསྶ སཱ པུབྦེ ཨདིཊྛཔུབྦཱ ཝིཡ ཨཧོསི, བལཝསིནེཧཾ ཨུཔྤཱདེསི. ཨཐསྶ སིནེཧུཔྤཏྟིབྷཱཝཾ ཉཏྭཱ མཧཱསཏྟོ ཨནནྟརཾ གཱཐམཱཧ –
‘‘ནནྡཱཡ ¶ ནཱུན མརཎེན, ནནྡསི སིརིཝཱཧན;
ཨཧཉྩ ནཱུན ནནྡཱ ཙ, གཙྪཱམ སམསཱདྷན’’ནྟི.
ཏཏྠ སིརིཝཱཧནཱཏི སིརིསམྤནྣཝཱཧན མཧཱརཱཛ, ནཱུན ཏྭཾ ཨེཝཾ ཨུཏྟམརཱུཔདྷརཱཡ ནནྡཱཡ མརཎེན ནནྡསཱིཏི ཝདཏི. གཙྪཱམཱཏི སཙེ ཧི ཏྭཾ མཾ མཱརེསྶསི, ཨེཀཾསེནེཝ ཨམྷཱཀཾ རཱཛཱ ནནྡཾ མཱརེསྶཏི. ཨིཏི ནནྡཱ ཙ ཨཧཉྩ ཡམསྶ སནྟིཀཾ གམིསྶཱམ, ཡམོ ཨམྷེ ཨུབྷོ དིསྭཱ ནནྡཾ ¶ མཡ྄ཧམེཝ དསྶཏི, ཏསྶ ཏུཡ྄ཧཾ མཾ མཱརེཏྭཱ ཏཱདིསཾ ཨིཏྠིརཏནཾ ཨལབྷནྟསྶ ཀིཾ རཛྫེན, ནཱཧཾ ཨཏྟནོ མརཎེན པརིཧཱནིཾ པསྶཱམི, དེཝཱཏི.
ཨིཏི ¶ མཧཱསཏྟོ ཨེཏྟཀེ ཋཱནེ ནནྡམེཝ ཝཎྞེསི, ན ཨིཏརེ ཏཡོ ཛནེ. ཀིཾཀཱརཎཱ? སཏྟཱ ཧི ནཱམ པིཡབྷརིཡཱསུ ཝིཡ སེསེསུ ཨཱལཡཾ ན ཀརོནྟི, མཱཏརཾ ཝཱ སརནྟོ པུཏྟདྷཱིཏརོཔི སརིསྶཏཱིཏི ཏསྨཱ ཏམེཝ ཝཎྞེསི, རཱཛམཱཏརཾ པན མཧལླིཀཱབྷཱཝེན ན ཝཎྞེསི. ཉཱཎསམྤནྣེ མཧཱསཏྟེ མདྷུརསྶརེན ཝཎྞེནྟེཡེཝ ནནྡཱདེཝཱི ཨཱགནྟྭཱ རཉྙོ པུརཏོ ཋིཏཱ ཝིཡ ཨཧོསི. ཏཏོ རཱཛཱ ཙིནྟེསི ‘‘ཋཔེཏྭཱ མཧོསདྷཾ ཨཉྙོ མམ བྷརིཡཾ ཨཱནེཏུཾ སམཏྠོ ནཱམ ནཏྠཱི’’ཏི. ཨཐསྶ ནཾ སརནྟསྶ སོཀོ ཨུཔྤཛྫི. ཨཐ ནཾ མཧཱསཏྟོ ‘‘མཱ ཙིནྟཡིཏྠ, མཧཱརཱཛ, དེཝཱི ཙ ཏེ པུཏྟོ ཙ མཱཏཱ ཙ ཏཡོཔི ཨཱགཙྪིསྶནྟི, མམ གམནམེཝེཏྠ པམཱཎཾ, ཏསྨཱ ཏྭཾ ཨསྶཱསཾ པཊིལབྷ, ནརིནྡཱ’’ཏི རཱཛཱནཾ ཨསྶཱསེསི. ཨཐ རཱཛཱ ཙིནྟེསི ‘‘ཨཧཾ ཨཏྟནོ ནགརཾ སུརཀྑིཏཾ སུགོཔིཏཾ ཀཱརཱཔེཏྭཱ ཨིམཾ ཨུཔཀཱརིནགརཾ ཨེཏྟཀེན བལཝཱཧནེན པརིཀྑིཔིཏྭཱཝ ཋིཏོ. ཨཡཾ པན པཎྜིཏོ ཨེཝཾ སུགོཔིཏཱཔི མམ ནགརཱ དེཝིཉྩ མེ པུཏྟཉྩ མཱཏརཉྩ ཨཱནེཏྭཱ ཝེདེཧསྶ དཱཔེསི. ཨམྷེསུ ཙ ཨེཝཾ པརིཝཱརེཏྭཱ ཋིཏེསྭེཝ ཨེཀསྶཔི ཨཛཱནནྟསྶ ཝེདེཧཾ སསེནཱཝཱཧནཾ པལཱཔེསི. ཀིཾ ནུ ཁོ དིབྦམཱཡཾ ཛཱནཱཏི, ཨུདཱཧུ ཙཀྑུམོཧན’’ནྟི. ཨཐ ནཾ པུཙྪནྟོ ཨཱཧ –
‘‘དིབྦཾ ཨདྷཱིཡསེ མཱཡཾ, ཨཀཱསི ཙཀྑུམོཧནཾ;
ཡོ མེ ཨམིཏྟཾ ཧཏྠགཏཾ, ཝེདེཧཾ པརིམོཙཡཱི’’ཏི.
ཏཾ སུཏྭཱ མཧཱསཏྟོ ‘‘ཨཧཾ དིབྦམཱཡཾ ཛཱནཱམི, པཎྜིཏཱ ཧི ནཱམ དིབྦམཱཡཾ ཨུགྒཎྷིཏྭཱ བྷཡེ སམྤཏྟེ ཨཏྟཱནམྤི པརམྤི དུཀྑཏོ མོཙཡནྟིཡེཝཱ’’ཏི ཝཏྭཱ ཨཱཧ –
‘‘ཨདྷཱིཡནྟི ¶ མཧཱརཱཛ, དིབྦམཱཡིདྷ པཎྜིཏཱ;
ཏེ མོཙཡནྟི ཨཏྟཱནཾ, པཎྜིཏཱ མནྟིནོ ཛནཱ.
‘‘སནྟི ¶ མཱཎཝཔུཏྟཱ མེ, ཀུསལཱ སནྡྷིཚེདཀཱ;
ཡེསཾ ཀཏེན མགྒེན, ཝེདཧོ མིཐིལཾ གཏོ’’ཏི.
ཏཏྠ དིབྦམཱཡིདྷཱཏི དིབྦམཱཡཾ ཨིདྷ. མཱཎཝཔུཏྟཱཏི ཨུཔཊྛཱཀཏརུཎཡོདྷཱ. ཡེསཾ ཀཏེནཱཏི ཡེཧི ཀཏེན. མགྒེནཱཏི ཨལངྐཏཨུམངྒེན.
ཏཾ ¶ སུཏྭཱ རཱཛཱ ‘‘ཨལངྐཏཨུམངྒེན ཀིར གཏོ, ཀཱིདིསོ ནུ ཁོ ཨུམངྒོ’’ཏི ཨུམངྒཾ དཊྛུཀཱམོ ཨཧོསི. ཨཐསྶ ཨིཙྪིཏཾ ཉཏྭཱ མཧཱསཏྟོ ‘‘རཱཛཱ ཨུམངྒཾ དཊྛུཀཱམོ, དསྶེསྶཱམིསྶ ཨུམངྒ’’ནྟི དསྶེནྟོ ཨཱཧ –
‘‘ཨིངྒྷ པསྶ མཧཱརཱཛ, ཨུམངྒཾ སཱདྷུ མཱཔིཏཾ;
ཧཏྠཱིནཾ ཨཐ ཨསྶཱནཾ, རཐཱནཾ ཨཐ པཏྟིནཾ;
ཨཱལོཀབྷཱུཏཾ ཏིཊྛནྟཾ, ཨུམངྒཾ སཱདྷུ མཱཔིཏ’’ནྟི.
ཏཏྠ ཧཏྠཱིནནྟི ཨིཊྛཀཀམྨཙིཏྟཀམྨཝསེན ཀཏཱནཾ ཨེཏེསཾ ཧཏྠིཨཱདཱིནཾ པནྟཱིཧི ཨུཔསོབྷིཏཾ ཨལངྐཏདེཝསབྷཱསདིསཾ ཨེཀོབྷཱསཾ ཧུཏྭཱ ཏིཊྛནྟཾ ཨུམངྒཾ པསྶ, དེཝཱཏི.
ཨེཝཉྩ པན ཝཏྭཱ ‘‘མཧཱརཱཛ, མམ པཉྙཱཡ མཱཔིཏེ ཙནྡསྶ ཙ སཱུརིཡསྶ ཙ ཨུཊྛིཏཊྛཱནེ ཝིཡ པཱཀཊེ ཨལངྐཏཨུམངྒེ ཨསཱིཏིམཧཱདྭཱརཱནི ཙཏུསཊྛིཙཱུལ༹དྭཱརཱནི ཨེཀསཏསཡནགབྦྷེ ཨནེཀསཏདཱིཔགབྦྷེ ཙ པསྶ, མཡཱ སདྡྷིཾ སམགྒོ སམྨོདམཱནོ ཧུཏྭཱ ཨཏྟནོ བལེན སདྡྷིཾ ཨུཔཀཱརིནགརཾ པཝིས, དེཝཱ’’ཏི ནགརདྭཱརཾ ཝིཝརཱཔེསི. རཱཛཱ ཨེཀསཏརཱཛཔརིཝཱརོ ནགརཾ པཱཝིསི. མཧཱསཏྟོ པཱསཱདཱ ཨོརུཡ྄ཧ རཱཛཱནཾ ཝནྡིཏྭཱ སཔརིཝཱརཾ ཨཱདཱཡ ཨུམངྒཾ པཱཝིསི. རཱཛཱ ཨལངྐཏདེཝསབྷཾ ཝིཡ ཨུམངྒཾ དིསྭཱ བོདྷིསཏྟསྶ གུཎེ ཝཎྞེནྟོ ཨཱཧ –
‘‘ལཱབྷཱ ཝཏ ཝིདེཧཱནཾ, ཡསྶིམེདིསཱ པཎྜིཏཱ;
གྷརེ ཝསནྟི ཝིཛིཏེ, ཡཐཱ ཏྭཾསི མཧོསདྷཱ’’ཏི.
ཏཏྠ ¶ ཝིདེཧཱནནྟི ཨེཝརཱུཔཱནཾ པཎྜིཏཱནཾ ཨཱཀརསྶ ཨུཊྛཱནཊྛཱནབྷཱུཏསྶ ཝིདེཧཱནཾ ཛནཔདསྶ ལཱབྷཱ ཝཏ. ཡསྶིམེདིསཱཏི ཡསྶ ཨིམེ ¶ ཨེཝརཱུཔཱ པཎྜིཏཱ ཨུཔཱཡཀུསལཱ སནྟིཀེ ཝཱ ཨེཀགྷརེ ཝཱ ཨེཀཛནཔདེ ཝཱ ཨེཀརཊྛེ ཝཱ ཝསནྟི, ཏསྶཔི ལཱབྷཱ ཝཏ. ཡཐཱ ཏྭཾསཱིཏི ཡཐཱ ཏྭཾ ཨསི, ཏཱདིསེན པཎྜིཏེན སདྡྷིཾཡེཝ ཨེཀརཊྛེ ཝཱ ཨེཀཛནཔདེ ཝཱ ཨེཀནགརེ ཝཱ ཨེཀགྷརེ ཝཱ ཝསིཏུཾ ལབྷནྟི. ཏེསཾ ཝིདེཧརཊྛཝཱསཱིནཉྩེཝ མིཐིལནགརཝཱསཱིནཉྩ ཏཡཱ སདྡྷིཾ ཨེཀཏོ ཝསིཏུཾ ལབྷནྟཱནཾ ལཱབྷཱ ཝཏཱཏི ཝདཏི.
ཨཐསྶ ¶ མཧཱསཏྟོ ཨེཀསཏསཡནགབྦྷེ དསྶེཏི. ཨེཀསྶ དྭཱརེ ཝིཝཊེ སབྦེསཾ ཝིཝརཱིཡཏི. ཨེཀསྶ དྭཱརེ པིདཧིཏེ སབྦེསཾ པིདྷཱིཡཏི. རཱཛཱ ཨུམངྒཾ ཨོལོཀེནྟོ པུརཏོ གཙྪཏི, པཎྜིཏོ པན པཙྪཏོ. སབྦཱ སེནཱ ཨུམངྒམེཝ པཱཝིསི. རཱཛཱ ཨུམངྒཏོ ནིཀྑམི. པཎྜིཏོ ཏསྶ ནིཀྑནྟབྷཱཝཾ ཉཏྭཱ སཡཾ ནིཀྑམིཏྭཱ ཨཉྙེསཾ ནིཀྑམིཏུཾ ཨདཏྭཱ ཨུམངྒདྭཱརཾ པིདཧནྟོ ཨཱཎིཾ ཨཀྐམི. ཏཱཝདེཝ ཨསཱིཏིམཧཱདྭཱརཱནི ཙཏུསཊྛིཙཱུལ༹དྭཱརཱནི ཨེཀསཏསཡནགབྦྷདྭཱརཱནི ཨནེཀསཏདཱིཔགབྦྷདྭཱརཱནི ཙ ཨེཀཔྤཧཱརེནེཝ པིདཧིཾསུ. སཀལོ ཨུམངྒོ ལོཀནྟརིཡནིརཡོ ཝིཡ ཨནྡྷཀཱརོ ཨཧོསི. མཧཱཛནོ བྷཱིཏཏསིཏོ ཨཧོསི. མཧཱསཏྟོ ཧིཡྻོ ཨུམངྒཾ པཝིསནྟོ ཡཾ ཁགྒཾ ཝཱལུཀེ ཋཔེསི, ཏཾ གཧེཏྭཱ བྷཱུམིཏོ ཨཊྛཱརསཧཏྠུབྦེདྷཾ ཨཱཀཱསཾ ཨུལླངྒྷིཏྭཱ ཨོརུཡ྄ཧ རཱཛཱནཾ ཧཏྠེ གཧེཏྭཱ ཨསིཾ ཨུགྒིརིཏྭཱ ཏཱསེཏྭཱ ‘‘མཧཱརཱཛ, སཀལཛམྦུདཱིཔེ རཛྫཾ ཀསྶ རཛྫ’’ནྟི པུཙྪི. སོ བྷཱིཏོ ‘‘ཏུཡ྄ཧམེཝ པཎྜིཏཱ’’ཏི ཝཏྭཱ ‘‘ཨབྷཡཾ མེ དེཧཱི’’ཏི ཨཱཧ. ‘‘མཱ བྷཱཡིཏྠ, མཧཱརཱཛ, ནཱཧཾ ཏཾ མཱརེཏུཀཱམཏཱཡ ཁགྒཾ པརཱམསིཾ, མམ པཉྙཱནུབྷཱཝཾ དསྶེཏུཾ པརཱམསི’’ནྟི ཁགྒཾ རཉྙོ ཨདཱསི. ཨཐ ནཾ ཁགྒཾ གཧེཏྭཱ ཋིཏཾ ‘‘མཧཱརཱཛ, སཙེ མཾ མཱརེཏུཀཱམོསི, ཨིདཱནེཝ ཨིམིནཱ ཁགྒེན མཱརེཧི. ཨཐ ཨབྷཡཾ དཱཏུཀཱམོ, ཨབྷཡཾ དེཧཱི’’ཏི ཨཱཧ. ‘‘པཎྜིཏ, མཡཱ ཏུཡ྄ཧམྤི ཨབྷཡཾ དིནྣམེཝ, ཏྭཾ མཱ ཙིནྟཡཱི’’ཏི ཨསིཾ ཋཔེཏྭཱ ཨུབྷོཔི ཨཉྙམཉྙཾ ཨདུབྦྷཱཡ སཔཐཾ ཀརིཾསུ.
ཨཐ རཱཛཱ བོདྷིསཏྟཾ ཨཱཧ – ‘‘པཎྜིཏ, ཨེཝཾ ཉཱཎབལསམྤནྣོ ཧུཏྭཱ རཛྫཾ ཀསྨཱ ན གཎྷཱསཱི’’ཏི? ‘‘མཧཱརཱཛ, ཨཧཾ ཨིཙྪམཱནོ ཨཛྫེཝ སཀལཛམྦུདཱིཔེ རཱཛཱནོ མཱརེཏྭཱ རཛྫཾ གཎྷེཡྻཾ, པརཾ མཱརེཏྭཱ ཙ ཡསགྒཧཎཾ ནཱམ པཎྜིཏེཧི ན པསཏྠ’’ནྟི. ‘‘པཎྜིཏ, མཧཱཛནོ དྭཱརཾ ཨལབྷམཱནོ པརིདེཝཏི, ཨུམངྒདྭཱརཾ ཝིཝརིཏྭཱ མཧཱཛནསྶ ཛཱིཝིཏདཱནཾ དེཧཱི’’ཏི ¶ . སོ དྭཱརཾ ཝིཝརི, སཀལོ ཨུམངྒོ ཨེཀོབྷཱསོ ཨཧོསི. མཧཱཛནོ ཨསྶཱསཾ པཊིལབྷི. སབྦེ རཱཛཱནོ ཨཏྟནོ སེནཱཡ སདྡྷིཾ ནིཀྑམིཏྭཱ པཎྜིཏསྶ སནྟིཀཾ ཨཱགམིཾསུ. སོ རཉྙཱ སདྡྷིཾ ཝིསཱལམཱལ༹ཀེ ཨཊྛཱསི. ཨཐ ¶ ནཾ ཏེ རཱཛཱནོ ཨཱཧཾསུ ‘‘པཎྜིཏ, ཏཾ ནིསྶཱཡ ཛཱིཝིཏཾ ¶ ལདྡྷཾ, སཙེ མུཧུཏྟཾ ཨུམངྒདྭཱརཾ ན ཝིཝརིཏྠ, སབྦེསཾ ནོ ཏཏྠེཝ མརཎཾ ཨབྷཝིསྶཱ’’ཏི. ‘‘ན མཧཱརཱཛཱནོ ཨིདཱནེཝ ཏུམྷེཧི མཉྙེཝ ནིསྶཱཡ ཛཱིཝིཏཾ ལདྡྷཾ, པུབྦེཔི ལདྡྷཾཡེཝཱ’’ཏི. ‘‘ཀདཱ, པཎྜིཏཱ’’ཏི? ‘‘ཋཔེཏྭཱ ཨམྷཱཀཾ ནགརཾ སཀལཛམྦུདཱིཔེ རཛྫཾ གཧེཏྭཱ ཨུཏྟརཔཉྩཱལནགརཾ གནྟྭཱ ཨུཡྻཱནེ ཛཡཔཱནཾ པཱཏུཾ སུརཱཡ པཊིཡཏྟཀཱལཾ སརཐཱ’’ཏི? ‘‘ཨཱམ, པཎྜིཏཱ’’ཏི. ཏདཱ ཨེས རཱཛཱ ཀེཝཊྚེན སདྡྷིཾ དུམྨནྟིཏེན ཝིསཡོཛིཏཱཡ སུརཱཡ ཙེཝ མཙྪམཾསེཧི ཙ ཏུམྷེ མཱརེཏུཾ ཀིཙྩམཀཱསི. ཨཐཱཧཾ ‘‘མཱདིསེ པཎྜིཏེ དྷརམཱནེ ཨིམེ ཨནཱཐམརཎཾ མཱ མརནྟཱུ’’ཏི ཨཏྟནོ ཡོདྷེ པེསེཏྭཱ སབྦབྷཱཛནཱནི བྷིནྡཱཔེཏྭཱ ཨེཏེསཾ མནྟཾ བྷིནྡིཏྭཱ ཏུམྷཱཀཾ ཛཱིཝིཏདཱནཾ ཨདཱསིནྟི.
ཏེ སབྦེཔི ཨུབྦིགྒམཱནསཱ ཧུཏྭཱ ཙཱུལ༹ནིརཱཛཱནཾ པུཙྪིཾསུ ‘‘སཙྩཾ ཀིར, མཧཱརཱཛཱ’’ཏི? ‘‘ཨཱམ, མཡཱ ཀེཝཊྚསྶ ཀཐཾ གཧེཏྭཱ ཀཏཾ, སཙྩམེཝ པཎྜིཏོ ཀཐེཏཱི’’ཏི. ཏེ སབྦེཔི མཧཱསཏྟཾ ཨཱལིངྒིཏྭཱ ‘‘པཎྜིཏ, ཏྭཾ སབྦེསཾ ནོ པཏིཊྛཱ ཛཱཏོ, ཏཾ ནིསྶཱཡ མཡཾ ཛཱིཝིཏཾ ལབྷིམྷཱ’’ཏི སབྦཔསཱདྷནེཧི མཧཱསཏྟསྶ པཱུཛཾ ཀརིཾསུ. པཎྜིཏོ རཱཛཱནཾ ཨཱཧ – ‘‘མཧཱརཱཛ, ཏུམྷེ མཱ ཙིནྟཡིཏྠ, པཱཔམིཏྟསཾསགྒསྶེཝ ཨེས དོསོ, ཨིམེ རཱཛཱནོ ཁམཱཔེཐཱ’’ཏི. རཱཛཱ ‘‘མཡཱ དུཔྤུརིསཾ ནིསྶཱཡ ཏུམྷཱཀཾ ཨེཝརཱུཔཾ ཀཏཾ, ཨེས མཡ྄ཧཾ དོསོ, ཁམཐ མེ དོསཾ, པུན ཨེཝརཱུཔཾ ན ཀརིསྶཱམཱི’’ཏི ཁམཱཔེསི. ཏེ ཨཉྙམཉྙཾ ཨཙྩཡཾ དེསེཏྭཱ སམགྒཱ སམྨོདམཱནཱ ཨཧེསུཾ. ཨཐ རཱཛཱ བཧཱུནི ཁཱདནཱིཡབྷོཛནཱིཡགནྡྷམཱལཱདཱིནི ཨཱཧརཱཔེཏྭཱ སབྦེཧི སདྡྷིཾ སཏྟཱཧཾ ཨུམངྒེཡེཝ ཀཱིལི༹ཏྭཱ ནགརཾ པཝིསིཏྭཱ མཧཱསཏྟསྶ མཧཱསཀྐཱརཾ ཀཱརེཏྭཱ ཨེཀསཏརཱཛཔརིཝུཏོ མཧཱཏལེ ནིསཱིདིཏྭཱ པཎྜིཏཾ ཨཏྟནོ སནྟིཀེ ཝསཱཔེཏུཀཱམཏཱཡ ཨཱཧ –
‘‘ཝུཏྟིཉྩ ¶ པརིཧཱརཉྩ, དིགུཎཾ བྷཏྟཝེཏནཾ;
དདཱམི ཝིཔུལེ བྷོགེ, བྷུཉྫ ཀཱམེ རམསྶུ ཙ;
མཱ ཝིདེཧཾ པཙྩགམཱ, ཀིཾ ཝིདེཧོ ཀརིསྶཏཱི’’ཏི.
ཏཏྠ ཝུཏྟིནྟི ཡསནིསྶིཏཾ ཛཱིཝིཏཝུཏྟིཾ. པརིཧཱརནྟི གཱམནིགམདཱནཾ. བྷཏྟནྟི ནིཝཱཔཾ. ཝེཏནནྟི པརིབྦཡཾ. བྷོགེཏི ཨཉྙེཔི ཏེ ཝིཔུལེ བྷོགེ དདཱམི.
པཎྜིཏོ ¶ ཏཾ པཊིཀྑིཔནྟོ ཨཱཧ –
‘‘ཡོ ¶ ཙཛེཐ མཧཱརཱཛ, བྷཏྟཱརཾ དྷནཀཱརཎཱ;
ཨུབྷིནྣཾ ཧོཏི གཱརཡ྄ཧོ, ཨཏྟནོ ཙ པརསྶ ཙ;
ཡཱཝ ཛཱིཝེཡྻ ཝེདེཧོ, ནཱཉྙསྶ པུརིསོ སིཡཱ.
‘‘ཡོ ཙཛེཐ མཧཱརཱཛ, བྷཏྟཱརཾ དྷནཀཱརཎཱ;
ཨུབྷིནྣཾ ཧོཏི གཱརཡ྄ཧོ, ཨཏྟནོ ཙ པརསྶ ཙ;
ཡཱཝ ཏིཊྛེཡྻ ཝེདེཧོ, ནཱཉྙསྶ ཝིཛིཏེ ཝསེ’’ཏི.
ཏཏྠ ཨཏྟནོ ཙ པརསྶ ཙཱཏི ཨེཝརཱུཔཉྷི ‘‘དྷནཀཱརཎཱ མཡཱ ཨཏྟནོ བྷཏྟཱརཾ པརིཙྩཛནྟེན པཱཔཾ ཀཏ’’ནྟི ཨཏྟཱཔི ཨཏྟཱནཾ གརཧཏི, ‘‘ཨིམིནཱ དྷནཀཱརཎཱ ཨཏྟནོ བྷཏྟཱ པརིཙྩཏྟོ, པཱཔདྷམྨོ ཨཡ’’ནྟི པརོཔི གརཧཏི. ཏསྨཱ ན སཀྐཱ ཏསྨིཾ དྷརནྟེ མཡཱ ཨཉྙསྶ ཝིཛིཏེ ཝསིཏུནྟི.
ཨཐ ནཾ རཱཛཱ ཨཱཧ – ‘‘ཏེན ཧི, པཎྜིཏ, ཏཝ རཉྙོ དིཝངྒཏཀཱལེ ཨིདྷཱགནྟུཾ པཊིཉྙཾ དེཧཱི’’ཏི. སོ ‘‘སཱདྷུ, དེཝ, ཨཧཾ ཛཱིཝནྟོ ཨཱགམིསྶཱམཱི’’ཏི ཨཱཧ. ཨཐསྶ རཱཛཱ སཏྟཱཧཾ མཧཱསཀྐཱརཾ ཀཏྭཱ སཏྟཱཧཙྩཡེན པུན ཨཱཔུཙྪནཀཱལེ ‘‘ཨཧཾ ཏེ, པཎྜིཏ, ཨིདཉྩིདཉྩ དམྨཱི’’ཏི ཝདནྟོ གཱཐམཱཧ –
‘‘དམྨི ནིཀྑསཧསྶཾ ཏེ, གཱམཱསཱིཏིཉྩ ཀཱསིསུ;
དཱསིསཏཱནི ཙཏྟཱརི, དམྨི བྷརིཡཱསཏཉྩ ཏེ;
སབྦཾ སེནངྒམཱདཱཡ, སོཏྠིཾ གཙྪ མཧོསདྷཱ’’ཏི.
ཏཏྠ ནིཀྑསཧསྶནྟི པཉྩསུཝཎྞེན ནིཀྑེན ནིཀྑཱནཾ སཧསྶཾ. གཱམཱཏི ཡེ གཱམཱ སཾཝཙྪརེ སཾཝཙྪརེ སཧསྶསཧསྶུཊྛཱནཀཱ, ཏེ ཙ གཱམེ ¶ ཏེ དམྨི. ཀཱསིསཱུཏི ཀཱསིརཊྛེ. ཏཾ ཝིདེཧརཊྛསྶ ཨཱསནྣཾ, ཏསྨཱ ཏཏྠསྶ ཨསཱིཏིགཱམེ ཨདཱསི.
སོཔི རཱཛཱནཾ ཨཱཧ – ‘‘མཧཱརཱཛ, ཏུམྷེ བནྡྷཝཱནཾ མཱ ཙིནྟཡིཏྠ, ཨཧཾ མམ རཉྙོ གམནཀཱལེཡེཝ ‘མཧཱརཱཛ, ནནྡཱདེཝིཾ མཱཏུཊྛཱནེ ཋཔེཡྻཱསི, པཉྩཱལཙནྡཾ ཀནིཊྛཊྛཱནེ’ཏི ཝཏྭཱ དྷཱིཏཱཡ ཏེ ཨབྷིསེཀཾ དཱཔེཏྭཱ རཱཛཱནཾ ཨུཡྻོཛེསིཾ, མཱཏརཉྩ དེཝིཉྩ པུཏྟཉྩ སཱིགྷམེཝ པེསེསྶཱམཱི’’ཏི. སོ ‘‘སཱདྷུ, པཎྜིཏཱ’’ཏི ཨཏྟནོ དྷཱིཏུ དཱཏབྦཱནི དཱསིདཱསཝཏྠཱལངྐཱརསུཝཎྞཧིརཉྙཨལངྐཏཧཏྠིཨསྶརཐཱདཱིནི ¶ ‘‘ཨིམཱནི ཏསྶཱ དདེཡྻཱསཱི’’ཏི མཧཱསཏྟཾ པཊིཙྪཱཔེཏྭཱ སེནཱཝཱཧནསྶ ཀཏྟབྦཀིཙྩཾ ཝིཙཱརེནྟོ ཨཱཧ –
‘‘ཡཱཝ ¶ དདནྟུ ཧཏྠཱིནཾ, ཨསྶཱནཾ དིགུཎཾ ཝིདྷཾ;
ཏཔྤེནྟུ ཨནྣཔཱནེན, རཐིཀེ པཏྟིཀཱརཀེ’’ཏི.
ཏཏྠ ཡཱཝཱཏི ན ཀེཝལཾ དིགུཎམེཝ, ཡཱཝ པཧོཏི, ཏཱཝ ཧཏྠཱིནཉྩ ཨསྶཱནཉྩ ཡཝགོདྷུམཱདིཝིདྷཾ དེཐཱཏི ཝདཏི. ཏཔྤེནྟཱུཏི ཡཏྟཀེན ཏེ ཨནྟརཱམགྒེ ཨཀིལནྟཱ གཙྪནྟི, ཏཏྟཀཾ དེནྟཱ ཏཔྤེནྟུ.
ཨེཝཉྩ པན ཝཏྭཱ པཎྜིཏཾ ཨུཡྻོཛེནྟོ ཨཱཧ –
‘‘ཧཏྠཱི ཨསྶེ རཐེ པཏྟཱི, གཙྪེཝཱདཱཡ པཎྜིཏ;
པསྶཏུ ཏཾ མཧཱརཱཛཱ, ཝེདེཧོ མིཐིལཾ གཏ’’ནྟི.
ཏཏྠ མིཐིལཾ གཏནྟི སོཏྠིནཱ ཏཾ མིཐིལནགརཾ སམྤཏྟཾ པསྶཏུ.
ཨིཏི སོ པཎྜིཏསྶ མཧནྟཾ སཀྐཱརཾ ཀཏྭཱ ཨུཡྻོཛེསི. ཏེཔི ཨེཀསཏརཱཛཱནོ མཧཱསཏྟསྶ སཀྐཱརཾ ཀཏྭཱ བཧུཾ པཎྞཱཀཱརཾ ཨདཾསུ. ཏེསཾ སནྟིཀེ ཨུཔནིཀྑིཏྟཀཔུརིསཱཔི པཎྜིཏམེཝ པརིཝཱརཡིཾསུ. སོ མཧནྟེན པརིཝཱརེན པརིཝུཏོ མགྒཾ པཊིཔཛྫིཏྭཱ ཨནྟརཱམགྒེཡེཝ ཙཱུལ༹ནིརཉྙཱ དིནྣགཱམཏོ ཨཱཡཾ ཨཱཧརཱཔེཏུཾ པུརིསེ པེསེཏྭཱ ཝིདེཧརཊྛཾ སམྤཱཔུཎི. སེནཀོཔི ཀིནྟརཱམགྒེ ཨཏྟནོ པུརིསཾ ཋཔེསི ‘‘ཙཱུལ༹ནིརཉྙོ པུན ཨཱགམནཾ ཝཱ ཨནཱགམནཾ ཝཱ ཛཱནིཏྭཱ ཡསྶ ཀསྶཙི ཨཱགམནཉྩ མཡ྄ཧཾ ཨཱརོཙེཡྻཱསཱི’’ཏི. སོ ཏིཡོཛནམཏྠཀེཡེཝ མཧཱསཏྟཾ དིསྭཱ ཨཱགནྟྭཱ ‘‘པཎྜིཏོ མཧནྟེན པརིཝཱརེན ཨཱགཙྪཏཱི’’ཏི སེནཀསྶ ཨཱརོཙེསི. སོ ཏཾ སུཏྭཱ རཱཛཀུལཾ ཨགམཱསི ¶ . རཱཛཱཔི པཱསཱདཏལེ ཋིཏོ ཝཱཏཔཱནེན ཨོལོཀེནྟོ མཧཏིཾ སེནཾ དིསྭཱ ‘‘མཧོསདྷཔཎྜིཏསྶ སེནཱ མནྡཱ, ཨཡཾ ཨཏིཝིཡ མཧཏཱི སེནཱ དིསྶཏི, ཀིཾ ནུ ཁོ ཙཱུལ༹ནིརཱཛཱ ཨཱགཏོ སིཡཱ’’ཏི བྷཱིཏཏསིཏོ ཏམཏྠཾ པུཙྪནྟོ ཨཱཧ –
‘‘ཧཏྠཱི ¶ ཨསྶཱ རཐཱ པཏྟཱི, སེནཱ པདིསྶཏེ མཧཱ;
ཙཏུརངྒིནཱི བྷཱིསརཱུཔཱ, ཀིཾ ནུ མཉྙསི པཎྜིཏཱ’’ཏི.
ཨཐསྶ སེནཀོ ཏམཏྠཾ ཨཱརོཙེནྟོ ཨཱཧ –
‘‘ཨཱནནྡོ ཏེ མཧཱརཱཛ, ཨུཏྟམོ པཊིདིསྶཏི;
སབྦཾ སེནངྒམཱདཱཡ, སོཏྠིཾ པཏྟོ མཧོསདྷོ’’ཏི.
ཏཾ སུཏྭཱ རཱཛཱ ཨཱཧ – ‘‘སེནཀ, པཎྜིཏསྶ སེནཱ མནྡཱ, ཨཡཾ པན ¶ མཧཏཱི’’ཏི. ‘‘མཧཱརཱཛ, ཙཱུལ༹ནིརཱཛཱ ཏེན པསཱདིཏོ བྷཝིསྶཏི, ཏེནསྶ པསནྣེན དིནྣཱ བྷཝིསྶཏཱི’’ཏི. རཱཛཱ ནགརེ བྷེརིཾ ཙརཱཔེསི ‘‘ནགརཾ ཨལངྐརིཏྭཱ པཎྜིཏསྶ པཙྩུགྒམནཾ ཀརོནྟཱུ’’ཏི. ནཱགརཱ ཏཐཱ ཀརིཾསུ. པཎྜིཏོ ནགརཾ པཝིསིཏྭཱ རཱཛཀུལཾ གནྟྭཱ རཱཛཱནཾ ཝནྡིཏྭཱ ཨེཀམནྟཾ ནིསཱིདི. ཨཐ ནཾ རཱཛཱ ཨུཊྛཱཡ ཨཱལིངྒིཏྭཱ པལླངྐཝརགཏོ པཊིསནྠཱརཾ ཀརོནྟོ ཨཱཧ –
‘‘ཡཐཱ པེཏཾ སུསཱནསྨིཾ, ཚཌྜེཏྭཱ ཙཏུརོ ཛནཱ;
ཨེཝཾ ཀཔིལཡྻེ ཏྱམྷ, ཚཌྜཡིཏྭཱ ཨིདྷཱགཏཱ.
‘‘ཨཐ ཏྭཾ ཀེན ཝཎྞེན, ཀེན ཝཱ པན ཧེཏུནཱ;
ཀེན ཝཱ ཨཏྠཛཱཏེན, ཨཏྟཱནཾ པརིམོཙཡཱི’’ཏི.
ཏཏྠ ཙཏུརོ ཛནཱཏི པཎྜིཏ, ཡཐཱ ནཱམ ཀཱལཀཏཾ ཙཏུརོ ཛནཱ མཉྩཀེན སུསཱནཾ ནེཏྭཱ ཏཏྠ ཚཌྜེཏྭཱ ཨནཔེཀྑཱ གཙྪནྟི, ཨེཝཾ ཀཔིལཡྻེ རཊྛེ ཏཾ ཚཌྜེཏྭཱ མཡཾ ཨིམཱགཏཱཏི ཨཏྠོ. ཀེན ཝཎྞེནཱཏི ཀེན ཀཱརཎེན. ཧེཏུནཱཏི པཙྩཡེན. ཨཏྠཛཱཏེནཱཏི ཨཏྠེན. ཨཏྟཱནཾ པརིམོཙཡཱིཏི ཨམིཏྟཧཏྠགཏོ ཀེན ཀཱརཎེན པཙྩཡེན ཀེན ཨཏྠེན ཏྭཾ ཨཏྟཱནཾ པརིམོཙེསཱིཏི པུཙྪཏི.
ཏཏོ ¶ མཧཱསཏྟོ ཨཱཧ –
‘‘ཨཏྠཾ ཨཏྠེན ཝེདེཧ, མནྟཾ མནྟེན ཁཏྟིཡ;
པརིཝཱརཡིཾ རཱཛཱནཾ, ཛམྦུདཱིཔཾཝ སཱགརོ’’ཏི.
ཏསྶཏྠོ ¶ – ཨཧཾ, མཧཱརཱཛ, ཏེན ཙིནྟིཏཾ ཨཏྠཾ ཨཏྟནོ ཙིནྟིཏེན ཨཏྠེན, ཏེན ཙ མནྟིཏཾ མནྟཾ ཨཏྟནོ མནྟིཏེན མནྟེན པརིཝཱརེསིཾ. ན ཀེཝལཉྩ ཨེཏྟཀམེཝ, ཨེཀསཏརཱཛཔརིཝཱརཾ པན ཏཾ རཱཛཱནཾ ཛམྦུདཱིཔཾ སཱགརོ ཝིཡ པརིཝཱརཡིསྶནྟི. སབྦཾ ཨཏྟནོ ཀཏཀམྨཾ ཝིཏྠཱརེཏྭཱ ཀཐེསི.
ཏཾ སུཏྭཱ རཱཛཱ ཨཏིཝིཡ ཏུསྶི. ཨཐསྶ པཎྜིཏོ ཙཱུལ༹ནིརཉྙཱ ཨཏྟནོ དིནྣཾ པཎྞཱཀཱརཾ ཨཱཙིཀྑནྟོ ཨཱཧ –
‘‘དིནྣཾ ནིཀྑསཧསྶཾ མེ, གཱམཱསཱིཏི ཙ ཀཱསིསུ;
དཱསིསཏཱནི ཙཏྟཱརི, དིནྣཾ བྷརིཡཱསཏཉྩ མེ;
སབྦཾ སེནངྒམཱདཱཡ, སོཏྠིནཱམྷི ཨིདྷཱགཏོ’’ཏི.
ཏཏོ རཱཛཱ ཨཏིཝིཡ ཏུཊྛཔཧཊྛོ མཧཱསཏྟསྶ གུཎཾ ཝཎྞེནྟོ ཏམེཝ ཨུདཱནཾ ཨུདཱནེསི –
‘‘སུསུཁཾ ¶ ཝཏ སཾཝཱསོ, པཎྜིཏེཧཱིཏི སེནཀ;
པཀྑཱིཝ པཉྫརེ བདྡྷེ མཙྪེ ཛཱལགཏེརིཝ;
ཨམིཏྟཧཏྠཏྟགཏེ, མོཙཡཱི ནོ མཧོསདྷོ’’ཏི.
སེནཀོཔི ཏསྶ ཝཙནཾ སམྤཊིཙྪནྟོ ཏམེཝ གཱཐམཱཧ –
‘‘ཨེཝམེཏཾ མཧཱརཱཛ, པཎྜིཏཱ ཧི སུཁཱཝཧཱ;
པཀྑཱིཝ པཉྫརེ བདྡྷེ, མཙྪེ ཛཱལགཏེརིཝ;
ཨམིཏྟཧཏྠཏྟགཏེ, མོཙཡཱི ནོ མཧོསདྷོ’’ཏི.
ཨཐ རཱཛཱ ནགརེ ཚཎབྷེརིཾ ཙརཱཔེཏྭཱ ‘‘སཏྟཱཧཾ མཧཱཚཎཾ ཀརོནྟུ, ཡེསཾ མཡི སིནེཧོ ཨཏྠི, ཏེ སབྦེ པཎྜིཏསྶ སཀྐཱརཾ སམྨཱནཾ ཀརོནྟཱུ’’ཏི ཨཱཎཱཔེནྟོ ཨཱཧ –
‘‘ཨཱཧཉྙནྟུ ¶ སབྦཝཱིཎཱ, བྷེརིཡོ དིནྡིམཱནི ཙ;
དྷམེནྟུ མཱགདྷཱ སངྑཱ, ཝགྒཱུ ནདནྟུ དུནྡུབྷཱི’’ཏི.
ཏཏྠ ¶ ཨཱཧཉྙནྟཱུཏི ཝཱདིཡནྟུ. མཱགདྷཱ སངྑཱཏི མགདྷརཊྛེ སཉྫཱཏཱ སངྑཱ. དུནྡུབྷཱིཏི མཧཱབྷེརིཡོ.
ཨཐ ཏེ ནཱགརཱ ཙ ཛཱནཔདཱ ཙ པཀཏིཡཱཔི པཎྜིཏསྶ སཀྐཱརཾ ཀཱཏུཀཱམཱ བྷེརིསདྡཾ སུཏྭཱ ཨཏིརེཀཏརཾ ཨཀཾསུ. ཏམཏྠཾ པཀཱསེནྟོ སཏྠཱ ཨཱཧ –
‘‘ཨོརོདྷཱ ཙ ཀུམཱརཱ ཙ, ཝེསིཡཱནཱ ཙ བྲཱཧྨཎཱ;
བཧུཾ ཨནྣཉྩ པཱནཉྩ, པཎྜིཏསྶཱབྷིཧཱརཡུཾ.
‘‘ཧཏྠཱརོཧཱ ཨནཱིཀཊྛཱ, རཐིཀཱ པཏྟིཀཱརཀཱ;
བཧུཾ ཨནྣཉྩ པཱནཉྩ, པཎྜིཏསྶཱབྷིཧཱརཡུཾ.
‘‘སམཱགཏཱ ཛཱནཔདཱ, ནེགམཱ ཙ སམཱགཏཱ;
བཧུཾ ཨནྣཉྩ པཱནཉྩ, པཎྜིཏསྶཱབྷིཧཱརཡུཾ.
‘‘བཧུཛནོ པསནྣོསི, དིསྭཱ པཎྜིཏམཱགཏཾ;
པཎྜིཏམྷི ཨནུཔྤཏྟེ, ཙེལུཀྑེཔོ ཨཝཏྟཐཱ’’ཏི.
ཏཏྠ ཨོརོདྷཱཏི ཨུདུམྦརདེཝིཾ ཨཱདིཾ ཀཏྭཱ ཨནྟེཔུརིཀཱ. ཨབྷིཧཱརཡུནྟི ཨབྷིཧཱརཱཔེསུཾ, པཧིཎིཾསཱུཏི ཨཏྠོ. བཧུཛནོཏི བྷིཀྑཝེ, ནགརཝཱསིནོ ཙ ཙཏུདྭཱརགཱམཝཱསིནོ ཙ ཛནཔདཝཱསིནོ ཙཱཏི བཧུཛནོ པསནྣོ ཨཧོསི. དིསྭཱ པཎྜིཏམཱགཏནྟི པཎྜིཏཾ མིཐིལཾ ཨཱགཏཾ དིསྭཱ. ཨཝཏྟཐཱཏི པཎྜིཏམྷི མིཐིལཾ ཨནུཔྤཏྟེ ‘‘ཨཡཾ ནོ པཋམམེཝ པཙྩཱམིཏྟཝསཾ གཏཾ རཱཛཱནཾ ¶ མོཙེཏྭཱ པེསེཏྭཱ པཙྪཱ ཨེཀསཏརཱཛཱནོ ཨཉྙམཉྙཾ ཁམཱཔེཏྭཱ སམགྒེ ཀཏྭཱ ཙཱུལ༹ནིཾ པསཱདེཏྭཱ ཏེན དིནྣཾ མཧནྟཾ ཡསཾ ཨཱདཱཡ ཨཱགཏོ’’ཏི ཏུཊྛཙིཏྟེན ཛནེན པཝཏྟིཏོ ཙེལུཀྑེཔོ པཝཏྟཐ.
ཨཐ མཧཱསཏྟོ ཚཎཱཝསཱནེ རཱཛཀུལཾ ཨཱགནྟྭཱ ‘‘མཧཱརཱཛ, ཙཱུལ༹ནིརཉྙོ མཱཏརཉྩ དེཝིཉྩ པུཏྟཉྩ སཱིགྷཾ པེསེཏུཾ ཝཊྚཏཱི’’ཏི ཨཱཧ. ‘‘སཱདྷུ, ཏཱཏ, པེསེཧཱི’’ཏི. སོ ཏེསཾ ཏིཎྞཾ ཛནཱནཾ མཧནྟཾ སཀྐཱརཾ ཀཏྭཱ ¶ ཨཏྟནཱ སདྡྷིཾ ཨཱགཏསེནཱཡཔི སཀྐཱརཾ སམྨཱནཾ ཀཱརེཏྭཱ ཏེ ཏཡོ ཛནེ མཧནྟེན པརིཝཱརེན ཨཏྟནོ པུརིསེཧི སདྡྷིཾ པེསེསི. རཉྙཱ ཨཏྟནོ དིནྣཱ སཏབྷརིཡཱ ¶ ཙ ཙཏྟཱརི དཱསིསཏཱནི ཙ ནནྡཱདེཝིཡཱ སདྡྷིཾ པེསེསི, ཨཏྟནཱ སདྡྷིཾ ཨཱགཏསེནམྤི ཏེཧི སདྡྷིཾཡེཝ པེསེསི. ཏེ མཧནྟེན པརིཝཱརེན ཨུཏྟརཔཉྩཱལནགརཾ པཱཔུཎིཾསུ. ཨཐ རཱཛཱ མཱཏརཾ པུཙྪི ‘‘ཀིཾ, ཨམྨ, ཝེདེཧརཱཛེན ཏེ སངྒཧོ ཀཏོ’’ཏི? ‘‘ཀིཾ ཏཱཏ, ཀཐེསི, མཾ དེཝཏཱཋཱནེ ཋཔེཏྭཱ སཀྐཱརམཀཱསི, ནནྡཱདེཝིམྤི མཱཏུཊྛཱནེ ཋཔེསི, པཉྩཱལཙནྡཾ ཀནིཊྛབྷཱཏིཀཊྛཱནེ ཋཔེསཱི’’ཏི. ཏཾ སུཏྭཱ རཱཛཱ ཨཏིཝིཡ ཏུསྶིཏྭཱ བཧུཾ པཎྞཱཀཱརཾ པེསེསི. ཏཏོ པཊྛཱཡ ཏེ ཨུབྷོཔི སམགྒཱ སམྨོདམཱནཱ ཝསིཾསཱུཏི.
མཧཱཨུམངྒཁཎྜཾ ནིཊྛིཏཾ.
དཀརཀྑསཔཉྷོ
པཉྩཱལཙནྡཱི ཝིདེཧརཉྙཱ པིཡཱ ཨཧོསི མནཱཔཱ. སཱ དུཏིཡེ སཾཝཙྪརེ པུཏྟཾ ཝིཛཱཡི. ཏསྶ དསམེ སཾཝཙྪརེ ཝེདེཧརཱཛཱ ཀཱལམཀཱསི. བོདྷིསཏྟོ ཏསྶ ཚཏྟཾ ཨུསྶཱཔེཏྭཱ ‘‘དེཝ, ཨཧཾ ཏཝ ཨཡྻཀསྶ ཙཱུལ༹ནིརཉྙོ སནྟིཀཾ གམིསྶཱམཱི’’ཏི ཨཱཔུཙྪི. པཎྜིཏ, མཱ མཾ དཧརཾ ཚཌྜེཏྭཱ གམིཏྠ, ཨཧཾ ཏཾ པིཏུཊྛཱནེ ཋཔེཏྭཱ སཀྐཱརཾ ཀརིསྶཱམཱིཏི. པཉྩཱལཙནྡཱིཔི ནཾ ‘‘པཎྜིཏ, ཏུམྷཱཀཾ གཏཀཱལེ ཨཉྙཾ པཊིསརཎཾ ནཏྠི, མཱ གམིཏྠཱ’’ཏི ཡཱཙི. སོཔི ‘‘མཡཱ རཉྙོ པཊིཉྙཱ དིནྣཱ, ན སཀྐཱ ཨགནྟུ’’ནྟི མཧཱཛནསྶ ཀལུནཾ པརིདེཝནྟསྶེཝ ཨཏྟནོ ཨུཔཊྛཱཀེ གཧེཏྭཱ ནགརཱ ནིཀྑམིཏྭཱ ཨུཏྟརཔཉྩཱལནགརཾ གཏོ. རཱཛཱ ཏསྶཱགམནཾ སུཏྭཱ པཙྩུགྒནྟྭཱ མཧནྟེན སཀྐཱརེན ནགརཾ པཝེསེཏྭཱ མཧནྟཾ གེཧཾ དཏྭཱ ཋཔེཏྭཱ པཋམདིནྣེ ¶ ཨསཱིཏིགཱམེ ན ཨཉྙཾ བྷོགཾ ཨདཱསི. སོ ཏཾ རཱཛཱནཾ ཨུཔཊྛཱསི.
ཏདཱ བྷེརཱི ནཱམ པརིབྦཱཛིཀཱ རཱཛགེཧེ བྷུཉྫཏི, སཱ པཎྜིཏཱ བྱཏྟཱ. ཏཱཡ མཧཱསཏྟོ ན དིཊྛཔུབྦོ, ‘‘མཧོསདྷཔཎྜིཏོ ཀིར རཱཛཱནཾ ཨུཔཊྛཱཏཱི’’ཏི སདྡམེཝ སུཎཱཏི. ཏེནཔི སཱ ན དིཊྛཔུབྦཱ, ‘‘བྷེརཱི ནཱམ པརིབྦཱཛིཀཱ རཱཛགེཧེ བྷུཉྫཏཱི’’ཏི སདྡམེཝ སུཎཱཏི. ནནྡཱདེཝཱི པན ‘‘པིཡཝིཔྤཡོགཾ ཀཏྭཱ ཨམྷེ ཀིལམཱཔེསཱི’’ཏི བོདྷིསཏྟེ ཨནཏྟམནཱ ཨཧོསི. སཱ པཉྩསཏཱ ཝལླབྷིཏྠིཡོ ཨཱཎཱཔེསི ‘‘མཧོསདྷསྶ ཨེཀཾ དོསཾ ཨུཔདྷཱརེཏྭཱ ¶ རཉྙོ ཨནྟརེ པརིབྷིནྡིཏུཾ ཝཱཡམཐཱ’’ཏི. ཏཱ ཏསྶ ཨནྟརཾ ཨོལོཀེནྟིཡོ ཝིཙརནྟི.
ཨཐེཀདིཝསཾ སཱ པརིབྦཱཛིཀཱ བྷུཉྫིཏྭཱ རཱཛགེཧཱ ནིཀྑནྟཱི བོདྷིསཏྟཾ རཱཛུཔཊྛཱནཾ ཨཱགཙྪནྟཾ རཱཛངྒཎེ པསྶི. སོ ཏཾ ཝནྡིཏྭཱ ཨཊྛཱསི. སཱ ‘‘ཨཡཾ ཀིར པཎྜིཏོ, ཛཱནིསྶཱམི ¶ ཏཱཝསྶ པཎྜིཏབྷཱཝཾ ཝཱ ཨཔཎྜིཏབྷཱཝཾ ཝཱ’’ཏི ཧཏྠམུདྡཱཡ པཉྷཾ པུཙྪནྟཱི བོདྷིསཏྟཾ ཨོལོཀེཏྭཱ ཧཏྠཾ པསཱརེསི. སཱ ཀིར ‘‘ཀཱིདིསཾ, པཎྜིཏ, རཱཛཱ ཏཾ པརདེསཏོ ཨཱནེཏྭཱ ཨིདཱནི པཊིཛགྒཏི, ན པཊིཛགྒཏཱི’’ཏི མནསཱཝ པཉྷཾ པུཙྪི. བོདྷིསཏྟོ ‘‘ཨཡཾ ཧཏྠམུདྡཱཡ མཾ པཉྷཾ པུཙྪཏཱི’’ཏི ཉཏྭཱ པཉྷཾ ཝིསྶཛྫེནྟོ ཧཏྠམུཊྛིཾ ཨཀཱསི. སོ ཀིར ‘‘ཨཡྻེ, མམ པཊིཉྙཾ གཧེཏྭཱ པཀྐོསིཏྭཱ ཨིདཱནི རཱཛཱ གཱལ༹ྷམུཊྛིཝ ཛཱཏོ, ན མེ ཨཔུབྦཾ ཀིཉྩི དེཏཱི’’ཏི མནསཱཝ པཉྷཾ ཝིསྶཛྫེསི. སཱ ཏཾ ཀཱརཎཾ ཉཏྭཱ ཧཏྠཾ ཨུཀྑིཔིཏྭཱ ཨཏྟནོ སཱིསཾ པརཱམསི. ཏེན ཨིདཾ དསྶེཏི ‘‘པཎྜིཏ, སཙེ ཀིལམསི, མཡཾ ཝིཡ ཀསྨཱ ན པབྦཛསཱི’’ཏི? ཏཾ ཉཏྭཱ མཧཱསཏྟོ ཨཏྟནོ ཀུཙྪིཾ པརཱམསི. ཏེན ཨིདཾ དསྶེཏི ‘‘ཨཡྻེ, མམ པོསིཏབྦཱ པུཏྟདཱརཱ བཧུཏརཱ, ཏེན ན པབྦཛཱམཱི’’ཏི. ཨིཏི སཱ ཧཏྠམུདྡཱཡ པཉྷཾ པུཙྪིཏྭཱ ཨཏྟནོ ཨཱཝཱསམེཝ ཨགམཱསི. མཧཱསཏྟོཔི ཏཾ ཝནྡིཏྭཱ རཱཛུཔཊྛཱནཾ གཏོ.
ནནྡཱདེཝིཡཱ པཡུཏྟཱ ཝལླབྷིཏྠིཡོ སཱིཧཔཉྫརེ ཋིཏཱ ཏཾ ཀིརིཡཾ དིསྭཱ ཙཱུལ༹ནིརཉྙོ སནྟིཀཾ གནྟྭཱ ‘‘དེཝ, མཧོསདྷོ བྷེརིཔརིབྦཱཛིཀཱཡ སདྡྷིཾ ཨེཀཏོ ཧུཏྭཱ ཏུམྷཱཀཾ རཛྫཾ གཎྷིཏུཀཱམོ, ཏུམྷཱཀཾ པཙྩཏྠིཀོ ཧོཏཱི’’ཏི པརིབྷིནྡིཾསུ. རཱཛཱ ཨཱཧ – ‘‘ཀིཾ ཝོ དིཊྛཾ ཝཱ སུཏཾ ཝཱ’’ཏི? མཧཱརཱཛ ¶ , པརིབྦཱཛིཀཱ བྷུཉྫིཏྭཱ ཨོཏརནྟཱི མཧོསདྷཾ དིསྭཱ རཱཛཱནཾ ཧཏྠཏལཾ ཝིཡ ཁལམཎྜལཾ ཝིཡ ཙ སམཾ ཀཏྭཱ ‘‘རཛྫཾ ཨཏྟནོ ཧཏྠགཏཾ ཀཱཏུཾ སཀྐོསཱི’’ཏི ཧཏྠཾ པསཱརེསི. མཧོསདྷོཔི ཁགྒགྒཧཎཱཀཱརཾ དསྶེནྟོ ‘‘ཀཏིཔཱཧཙྩཡེན སཱིསཾ ཚིནྡིཏྭཱ རཛྫཾ ཨཏྟནོ ཧཏྠགཏཾ ཀརིསྶཱམཱི’’ཏི མུཊྛིཾ ཨཀཱསི. སཱ ‘‘སཱིསམེཝ ཚིནྡཱཧཱི’’ཏི ཨཏྟནོ ཧཏྠཾ ཨུཀྑིཔིཏྭཱ སཱིསཾ པརཱམསི. མཧོསདྷོ ‘‘མཛ྄ཛྷེཡེཝ ནཾ ཚིནྡིསྶཱམཱི’’ཏི ཀུཙྪིཾ པརཱམསི. ཨཔྤམཏྟཱ, མཧཱརཱཛ, ཧོཐ, མཧོསདྷཾ གྷཱཏེཏུཾ ཝཊྚཏཱིཏི. སོ ཏཱསཾ ཀཐཾ སུཏྭཱ ཙིནྟེསི ‘‘ན སཀྐཱ པཎྜིཏེན མཡི དུསྶིཏུཾ, པརིབྦཱཛིཀཾ པུཙྪིསྶཱམཱི’’ཏི.
སོ ¶ པུནདིཝསེ པརིབྦཱཛིཀཱཡ བྷུཏྟཀཱལེ ཏཾ ཨུཔསངྐམིཏྭཱ པུཙྪི ‘‘ཨཡྻེ, ཀཙྩི ཏེ མཧོསདྷཔཎྜིཏོ དིཊྛོ’’ཏི? ‘‘ཨཱམ, མཧཱརཱཛ, ཧིཡྻོ ཨིཏོ བྷུཉྫིཏྭཱ ནིཀྑནྟིཡཱ དིཊྛོ’’ཏི. ‘‘ཀོཙི པན ཝོ ཀཐཱསལླཱཔོ ཨཧོསཱི’’ཏི. ‘‘མཧཱརཱཛ, སལླཱཔོ ནཏྠི, ‘སོ པན པཎྜིཏོ’ཏི སུཏྭཱ ‘སཙེ པཎྜིཏོ, ཨིདཾ ཛཱནིསྶཏཱི’ཏི ཧཏྠམུདྡཱཡ ནཾ པཉྷཾ པུཙྪནྟཱི ‘‘པཎྜིཏ, ཀཙྩི ཏེ རཱཛཱ པསཱརིཏཧཏྠོ, ན སངྐུཙིཏཧཏྠོ, ཀཙྩི ཏེ སངྒཎྷཱཏཱི’’ཏི ཧཏྠཾ པསཱརེསིཾ. པཎྜིཏོ – ‘‘རཱཛཱ མམ པཊིཉྙཾ གཧེཏྭཱ པཀྐོསིཏྭཱ ཨིདཱནི ཀིཉྩི ན དེཏཱི’’ཏི མུཊྛིམཀཱསི. ཨཐཱཧཾ – ‘‘སཙེ ཀིལམསི, མཡཾ ཝིཡ ཀསྨཱ ན པབྦཛསཱི’’ཏི སཱིསཾ པརཱམསིཾ. སོ – ‘‘མམ པོསེཏབྦཱ པུཏྟདཱརཱ བཧུཏརཱ, ཏེན ན པབྦཛཱམཱི’’ཏི ཨཏྟནོ ཀུཙྪིཾ ¶ པརཱམསཱིཏི. ‘‘པཎྜིཏོ, ཨཡྻེ, མཧོསདྷོ’’ཏི? ‘‘ཨཱམ, མཧཱརཱཛ, པཐཝིཏལེ པཉྙཱཡ ཏེན སདིསོ ནཱམ ནཏྠཱི’’ཏི. རཱཛཱ ཏསྶཱ ཀཐཾ སུཏྭཱ ཏཾ ཝནྡིཏྭཱ ཨུཡྻོཛེསི. ཏསྶཱ གཏཀཱལེ པཎྜིཏོ རཱཛུཔཊྛཱནཾ པཝིཊྛོ. ཨཐ ནཾ པུཙྪི ‘‘ཀཙྩི ཏེ, པཎྜིཏ, བྷེརཱི ནཱམ པརིབྦཱཛིཀཱ དིཊྛཱ’’ཏི? ‘‘ཨཱམ, མཧཱརཱཛ, ཧིཡྻོ ཨིཏོ ནིཀྑནྟིཾ པསྶིཾ, སཱ ཧཏྠམུདྡཱཡ ཨེཝཾ མཾ པཉྷཾ པུཙྪི, ཨཧཉྩསྶཱ ཏཐེཝ ཝིསྶཛྫེསི’’ནྟི ཏཱཡ ཀཐིཏནིཡཱམེནེཝ ཀཐེསི. རཱཛཱ ཏཾ དིཝསཾ པསཱིདིཏྭཱ པཎྜིཏསྶ སེནཱཔཏིཊྛཱནཾ ཨདཱསི, སབྦཀིཙྩཱནི ཏམེཝ པཊིཙྪཱཔེསི. ཏསྶ ཡསོ མཧཱ ཨཧོསི.
རཉྙོ དིནྣཡསཱནནྟརམེཝ སོ ཙིནྟེསི ‘‘རཉྙཱ ཨེཀཔྤཧཱརེནེཝ ¶ མཡ྄ཧཾ ཨཏིམཧནྟཾ ཨིསྶརིཡཾ དིནྣཾ, རཱཛཱནོ ཁོ པན མཱརེཏུཀཱམཱཔི ཨེཝཾ ཀརོནྟིཡེཝ, ཡཾནཱུནཱཧཾ ‘མམ སུཧདཡོ ཝཱ ནོ ཝཱ’ཏི རཱཛཱནཾ ཝཱིམཾསེཡྻཾ, ན ཁོ པནཉྙོ ཛཱནིཏུཾ སཀྑིསྶཏི, བྷེརཱི པརིབྦཱཛིཀཱ ཉཱཎསམྤནྣཱ, སཱ ཨེཀེནུཔཱཡེན ཛཱནིསྶཏཱི’’ཏི. སོ བཧཱུནི གནྡྷམཱལཱདཱིནི གཧེཏྭཱ པརིབྦཱཛིཀཱཡ ཨཱཝཱསཾ གནྟྭཱ ཏཾ པཱུཛཡིཏྭཱ ཝནྡིཏྭཱ ‘‘ཨཡྻེ, ཏུམྷེཧི རཉྙོ མམ གུཎཀཐཱཡ ཀཐིཏདིཝསཏོ པཊྛཱཡ རཱཛཱ ཨཛ྄ཛྷོཏྠརིཏྭཱ མཡ྄ཧཾ ཨཏིམཧནྟཾ ཡསཾ དེཏི, ཏཾ ཁོ པན ‘སབྷཱཝེན ཝཱ དེཏི, ནོ ཝཱ’ཏི ན ཛཱནཱམི, སཱདྷུ ཝཏསྶ, སཙེ ཨེཀེནུཔཱཡེན རཉྙོ མཡི སིནེཧབྷཱཝཾ ཛཱནེཡྻཱཐཱ’’ཏི ཨཱཧ. སཱ ‘‘སཱདྷཱུ’’ཏི པཊིསྶུཎིཏྭཱ པུནདིཝསེ རཱཛགེཧཾ གཙྪམཱནཱ དཀརཀྑསཔཉྷཾ ནཱམ ཙིནྟེསི. ཨེཝཾ ཀིརསྶཱ ཨཧོསི ‘‘ཨཧཾ ཙརཔུརིསོ ཝིཡ ཧུཏྭཱ ཨུཔཱཡེན ¶ རཱཛཱནཾ པཉྷཾ པུཙྪིཏྭཱ ‘པཎྜིཏསྶ སུཧདཡོ ཝཱ, ནོ ཝཱ’ཏི ཛཱནིསྶཱམཱི’’ཏི. སཱ གནྟྭཱ ཀཏབྷཏྟཀིཙྩཱ ནིསཱིདི. རཱཛཱཔི ནཾ ཝནྡིཏྭཱ ཨེཀམནྟཾ ནིསཱིདི. ཏསྶཱ ཨེཏདཧོསི ‘‘སཙེ རཱཛཱ པཎྜིཏསྶ ཨུཔརི དུཧདཡོ བྷཝིསྶཏི, པཉྷཾ པུཊྛོ ཨཏྟནོ དུཧདཡབྷཱཝཾ མཧཱཛནམཛ྄ཛྷེཡེཝ ཀཐེསྶཏི, ཏཾ ཨཡུཏྟཾ, ཨེཀམནྟེ ནཾ པཉྷཾ པུཙྪིསྶཱམཱི’’ཏི. སཱ ‘‘རཧོ པཙྩཱསཱིསཱམི, མཧཱརཱཛཱ’’ཏི ཨཱཧ. རཱཛཱ མནུསྶེ པཊིཀྐམཱཔེསི. ཨཐ ནཾ སཱ ཨཱཧ – ‘‘མཧཱརཱཛ, ཏཾ པཉྷཾ པུཙྪཱམཱི’’ཏི. ‘‘པུཙྪ, ཨཡྻེ, ཛཱནནྟོ ཀཐེསྶཱམཱི’’ཏི. ཨཐ སཱ དཀརཀྑསཔཉྷེ པཋམཾ གཱཐམཱཧ –
‘‘སཙེ ཝོ ཝུཡ྄ཧམཱནཱནཾ, སཏྟནྣཾ ཨུདཀཎྞཝེ;
མནུསྶབལིམེསཱནོ, ནཱཝཾ གཎྷེཡྻ རཀྑསོ;
ཨནུཔུབྦཾ ཀཐཾ དཏྭཱ, མུཉྩེསི དཀརཀྑསཱ’’ཏི. (ཛཱ. ༡.༡༦.༢༢༤);
ཏཏྠ སཏྟནྣནྟི ཏུམྷཱཀཾ མཱཏཱ ཙ ནནྡཱདེཝཱི ཙ ཏིཁིཎམནྟིཀུམཱརོ ཙ དྷནུསེཁསཧཱཡོ ཙ ¶ པུརོཧིཏོ ཙ མཧོསདྷོ ཙ ཏུམྷེ ཙཱཏི ཨིམེསཾ སཏྟནྣཾ. ཨུདཀཎྞཝེཏི གམྦྷཱིརཝིཏྠཏེ ཨུདཀེ. མནུསྶབལིམེསཱནོཏི མནུསྶབལིཾ གཝེསནྟོ. གཎྷེཡྻཱཏི ཐཱམསམྤནྣོ དཀརཀྑསོ ཨུདཀཾ དྭིདྷཱ ཀཏྭཱ ནིཀྑམིཏྭཱ ཏཾ ནཱཝཾ གཎྷེཡྻ, གཧེཏྭཱ ཙ པན ‘‘མཧཱརཱཛ, ཨིམེ ཚ ཛནེ མམ ཨནུཔཊིཔཱཊིཡཱ དེཧི, ཏཾ ཝིསྶཛྫེསྶཱམཱི’’ཏི ཝདེཡྻ. ཨཐ ཏྭཾ ཨནུཔུབྦཾ ཀཐཾ དཏྭཱ མུཉྩེསི དཀརཀྑསཱ, ཀཾ པཋམཾ དཏྭཱ…པེ… ཀཾ ཚཊྛཾ དཏྭཱ དཀརཀྑསཏོ མུཉྩེཡྻཱསཱིཏི?
ཏཾ ¶ སུཏྭཱ རཱཛཱ ཨཏྟནོ ཡཐཱཛ྄ཛྷཱསཡཾ ཀཐེནྟོ ཨིམཾ གཱཐམཱཧ –
‘‘མཱཏརཾ པཋམཾ དཛྫཾ, བྷརིཡཾ དཏྭཱན བྷཱཏརཾ;
ཏཏོ སཧཱཡཾ དཏྭཱན, པཉྩམཾ དཛྫཾ བྲཱཧྨཎཾ;
ཚཊྛཱཧཾ དཛྫམཏྟཱནཾ, ནེཝ དཛྫཾ མཧོསདྷ’’ནྟི. (ཛཱ. ༡.༡༦.༢༢༥);
ཏཏྠ ཚཊྛཱཧནྟི ཨཡྻེ, པཉྩམེ ཁཱདིཏེ ཨཐཱཧཾ ‘‘བྷོ དཀརཀྑས, མུཁཾ ཝིཝརཱ’’ཏི ཝཏྭཱ ཏེན མུཁེ ཝིཝཊེ དལ༹ྷཾ ཀཙྪཾ བནྡྷིཏྭཱ ཨིམཾ རཛྫསིརིཾ ཨགཎེཏྭཱ ‘‘ཨིདཱནི མཾ ཁཱདཱ’’ཏི ཏསྶ མུཁེ པཏེཡྻཾ, ན ཏྭེཝ ཛཱིཝམཱནོ མཧོསདྷཔཎྜིཏཾ དདེཡྻནྟི, ཨེཏྟཀེན ཨཡཾ པཉྷོ ནིཊྛིཏོ.
ཨེཝཾ ¶ ཉཱཏཾ པརིབྦཱཛིཀཱཡ རཉྙོ མཧཱསཏྟེ སུཧདཡཏཾ, ན པན ཨེཏྟཀེནེཝ པཎྜིཏསྶ གུཎོ ཙནྡོ ཝིཡ པཱཀཊོ ཧོཏི. ཏེནསྶཱ ཨེཏདཧོསི ‘‘ཨཧཾ མཧཱཛནམཛ྄ཛྷེ ཨེཏེསཾ གུཎཾ ཀཐཡིསྶཱམི, རཱཛཱ ཏེསཾ ཨགུཎཾ ཀཐེཏྭཱ པཎྜིཏསྶ གུཎཾ ཀཐེསྶཏི, ཨེཝཾ པཎྜིཏསྶ གུཎོ ནབྷེ པུཎྞཙནྡོ ཝིཡ པཱཀཊོ བྷཝིསྶཏཱི’’ཏི. སཱ སབྦཾ ཨནྟེཔུརཛནཾ སནྣིཔཱཏཱཔེཏྭཱ ཨཱདིཏོ པཊྛཱཡ པུན རཱཛཱནཾ ཏམེཝ པཉྷཾ པུཙྪིཏྭཱ ཏེན ཏཐེཝ ཝུཏྟེ ‘‘མཧཱརཱཛ, ཏྭཾ ‘མཱཏརཾ པཋམཾ དསྶཱམཱི’ཏི ཝདསི, མཱཏཱ ནཱམ མཧཱགུཎཱ, ཏུཡ྄ཧཉྩ མཱཏཱ ན ཨཉྙེསཾ མཱཏུསདིསཱ. བཧཱུཔཀཱརཱ ཏེ ཨེསཱ’’ཏི ཏསྶཱ གུཎཾ ཀཐེནྟཱི གཱཐཱདྭཡམཱཧ –
‘‘པོསེཏཱ ཏེ ཛནེཏྟཱི ཙ, དཱིགྷརཏྟཱནུཀམྤིཀཱ;
ཚབྦྷཱི ཏཡི པདུསྶཏི, པཎྜིཏཱ ཨཏྠདསྶིནཱི;
ཨཉྙཾ ཨུཔནིསཾ ཀཏྭཱ, ཝདྷཱ ཏཾ པརིམོཙཡི.
‘‘ཏཾ ¶ ཏཱདིསིཾ པཱཎདདིཾ, ཨོརསཾ གབྦྷདྷཱརིནིཾ;
མཱཏརཾ ཀེན དོསེན, དཛྫཱསི དཀརཀྑིནོ’’ཏི. (ཛཱ. ༡.༡༦.༢༢༦-༢༢༧);
ཏཏྠ པོསེཏཱཏི དཧརཀཱལེ དྭེ ཏཡོ ཝཱརེ ནྷཱཔེཏྭཱ པཱཡེཏྭཱ བྷོཛེཏྭཱ ཏཾ པོསེསི. དཱིགྷརཏྟཱནུཀམྤིཀཱཏི ཙིརཀཱལཾ མུདུནཱ ཧིཏཙིཏྟེན ཨནུཀམྤིཀཱ. ཚམྦྷཱི ཏཡི པདུསྶཏཱིཏི ཡདཱ ཏཡི ཚམྦྷཱི ནཱམ བྲཱཧྨཎོ པདུསྶི, ཏདཱ སཱ པཎྜིཏཱ ཨཏྠདསྶིནཱི ཨཉྙཾ ཏཝ པཊིརཱུཔཀཾ ཀཏྭཱ ཏཾ ཝདྷཱ པརིམོཙཡི.
ཙཱུལ༹ནིསྶ ཀིར མཧཱཙཱུལ༹ནཱི ནཱམ པིཏཱ ཨཧོསི. སཱ ཨིམསྶ དཧརཀཱལེ པུརོཧིཏེན སདྡྷིཾ མེཐུནཾ པཊིསེཝིཏྭཱ རཱཛཱནཾ ཝིསེན མཱརཱཔེཏྭཱ བྲཱཧྨཎསྶ ཚཏྟཾ ཨུསྶཱཔེཏྭཱ ཏསྶ ཨགྒམཧེསཱི ཧུཏྭཱ ཨེཀདིཝསཾ ‘‘ཨམྨ, ཚཱཏོམྷཱི’’ཏི ¶ ཝུཏྟེ པུཏྟསྶ ཕཱཎིཏེན སདྡྷིཾ པཱུཝཁཛྫཀཾ དཱཔེསི. ཨཐ ནཾ མཀྑིཀཱ པརིཝཱརཡིཾསུ, སོ ‘‘ཨིམཾ ནིམྨཀྑིཀཾ ཀཏྭཱ ཁཱདིསྶཱམཱི’’ཏི ཐོཀཾ པཊིཀྐམིཏྭཱ བྷཱུམིཡཾ ཕཱཎིཏབིནྡཱུནི པཱཏེཏྭཱ ཨཏྟནོ སནྟིཀེ མཀྑིཀཱ པོཐེཏྭཱ པལཱཔེསི. ཏཱ གནྟྭཱ ཨིཏརཾ ཕཱཎིཏཾ པརིཝཱརཡིཾསུ. སོ ནིམྨཀྑིཀཾ ཀཏྭཱ ཁཛྫཀཾ ཁཱདིཏྭཱ ཧཏྠཾ ¶ དྷོཝིཏྭཱ མུཁཾ ཝིཀྑཱལེཏྭཱ པཀྐཱམི. བྲཱཧྨཎོ ཏསྶ ཏཾ ཀིརིཡཾ དིསྭཱ ཙིནྟེསི ‘‘ཨཡཾ དཱརཀོ ཨིདཱནེཝ ནིམྨཀྑིཀཾ ཕཱཎིཏཾ ཁཱདཏི, ཝུཌྜྷིཔྤཏྟོ མམ རཛྫཾ ན དསྶཏི, ཨིདཱནེཝ ནཾ མཱརེསྶཱམཱི’’ཏི. སོ དེཝིཡཱ ཏམཏྠཾ ཨཱརོཙེསི.
སཱ ‘‘སཱདྷཱུ, དེཝ, ཨཧཾ ཏཡི སིནེཧེན ཨཏྟནོ སཱམིཀམྤི མཱརེསིཾ, ཨིམིནཱ མེ ཀོ ཨཏྠོ, མཧཱརཱཛ, ཨེཀམྤི ཨཛཱནཱཔེཏྭཱ རཧསྶེན ནཾ མཱརེསྶཱམཱི’’ཏི བྲཱཧྨཎཾ ཝཉྩེཏྭཱ ‘‘ཨཏྠེསོ ཨུཔཱཡོ’’ཏི པཎྜིཏཾ ཨུཔཱཡཀུསལཾ བྷཏྟཀཱརཀཾ པཀྐོསཱཔེཏྭཱ ‘‘སམྨ, མམ པུཏྟོ ཙཱུལ༹ནིཀུམཱརོ ཙ ཏཝ པུཏྟོ དྷནུསེཁཀུམཱརོ ཙ ཨེཀདིཝསཾ ཛཱཏཱ ཨེཀཏོ ཀུམཱརཔརིཧཱརེན ཝཌྜྷིཏཱ པིཡསཧཱཡཀཱ, ཚབྦྷིབྲཱཧྨཎོ མམ པུཏྟཾ མཱརེཏུཀཱམོ, ཏྭཾ ཏསྶ ཛཱིཝིཏདཱནཾ དེཧཱི’’ཏི ཝཏྭཱ ‘‘སཱདྷུ, དེཝི, ཀིཾ ཀརོམཱི’’ཏི ཝུཏྟེ ‘‘མམ པུཏྟོ ཨབྷིཎྷཾ ཏཝ གེཧེ ཧོཏུ, ཏྭཉྩ ཏེ ཙ ཀཏིཔཱཧཾ ནིརཱསངྐབྷཱཝཏྠཱཡ མཧཱནསེཡེཝ སུཔཐ. ཏཏོ ནིརཱསངྐབྷཱཝཾ ཉཏྭཱ ཏུམྷཱཀཾ སཡནཊྛཱནེ ཨེལ༹ཀཊྛཱིནི ཋཔེཏྭཱ མནུསྶཱནཾ སཡནཝེལཱཡ མཧཱནསེ ཨགྒིཾ དཏྭཱ ཀཉྩི ཨཛཱནཱཔེཏྭཱ མམ པུཏྟཉྩ ཏཝ པུཏྟཉྩ གཧེཏྭཱ ཨགྒདྭཱརེནེཝ ནིཀྑམིཏྭཱ ཏིརོརཊྛཾ གནྟྭཱ མམ པུཏྟསྶ རཱཛཔུཏྟབྷཱཝཾ ཨནཱཙིཀྑིཏྭཱ ཛཱིཝིཏཾ ཨནུརཀྑཱཧཱི’’ཏི ཨཱཧ.
སོ ¶ ‘‘སཱདྷཱུ’’ཏི སམྤཊིཙྪི. ཨཐསྶ སཱ རཏནསཱརཾ ཨདཱསི. སོ ཏཐཱ ཀཏྭཱ ཀུམཱརཉྩ པུཏྟཉྩ ཨཱདཱཡ མདྡརཊྛེ སཱགལནགརཾ གནྟྭཱ རཱཛཱནཾ ཨུཔཊྛཱསི. སོ པོརཱཎབྷཏྟཀཱརཀཾ ཨཔནེཏྭཱ ཏསྶ ཏཾ ཋཱནཾ ཨདཱསི. དྭེཔི ཀུམཱརཱ ཏེན སདྡྷིཾཡེཝ རཱཛནིཝེསནཾ གཙྪནྟི. རཱཛཱ ‘‘ཀསྶེཏེ པུཏྟཱ ཀུམཱརཱ’’ཏི པུཙྪི. བྷཏྟཀཱརཀོ ‘‘མཡ྄ཧཾ པུཏྟཱ’’ཏི ཨཱཧ. ‘‘ནནུ དྭེ ཨསདིསཱ’’ཏི? ‘‘དྭིནྣཾ ཨིཏྠཱིནཾ པུཏྟཱ, དེཝཱ’’ཏི. ཏེ གཙྪནྟེ ཀཱལེ ཝིསྶཱསིཀཱ ཧུཏྭཱ མདྡརཉྙོ དྷཱིཏཱཡ སདྡྷིཾ རཱཛནིཝེསནེཡེཝ ཀཱིལ༹ནྟི. ཨཐ ཙཱུལ༹ནིཀུམཱརོ ཙ རཱཛདྷཱིཏཱ ཙ ཨབྷིཎྷདསྶནེན ཨཉྙམཉྙཾ པཊིབདྡྷཙིཏྟཱ ཨཧེསུཾ. ཀཱིལ༹ནཊྛཱནེ ཀུམཱརོ རཱཛདྷཱིཏརཾ གེཎྜུཀམྤི པཱསཀམྤི ཨཱཧརཱཔེཏི. ཨནཱཧརནྟིཾ སཱིསེ པཧརཏི, སཱ རོདཏི. ཨཐསྶཱ སདྡཾ སུཏྭཱ རཱཛཱ ‘‘ཀེན མེ དྷཱིཏཱ པཧཊཱ’’ཏི ཝདཏི. དྷཱཏིཡོ ཨཱགནྟྭཱ པུཙྪནྟི. ཀུམཱརིཀཱ ‘‘སཙཱཧཾ ‘ཨིམིནཱ པཧཊཱམྷཱི’ཏི ཝཀྑཱམི ¶ , པིཏཱ མེ ཨེཏསྶ རཱཛདཎྜཾ ཀརིསྶཏཱི’’ཏི སིནེཧེན ན ཀཐེཏི, ‘‘ནཱཧཾ ཀེནཙི པཧཊཱ’’ཏི ཝདཏི.
ཨཐེཀདིཝསཾ མདྡརཱཛཱ ནཾ པཧརནྟཾ ཨདྡས. དིསྭཱནསྶ ཨེཏདཧོསི ‘‘ཨཡཾ ཀུམཱརོ ན ཙ བྷཏྟཀཱརཀེན སདིསོ ཨབྷིརཱུཔོ པཱསཱདིཀོ ཨཏིཝིཡ ཨཚམྦྷིཏོ, ན ཨིམིནཱ ཨེཏསྶ པུཏྟེན བྷཝིཏབྦ’’ནྟི. སོ ཏཏོ པཊྛཱཡ ཏཾ པརིགྒཎྷི. དྷཱཏིཡོ ཀཱིལ༹ནཊྛཱནེ ཁཱདནཱིཡཾ ཨཱཧརིཏྭཱ རཱཛདྷཱིཏཱཡ དེནྟི, སཱ ཨཉྙེསམྤི དཱརཀཱནཾ དེཏི. ཏེ ཛཎྞུནཱ པཏིཊྛཱཡ ཨོནཏཱ གཎྷནྟི. ཙཱུལ༹ནིཀུམཱརོ པན ཋིཏཀོཝ ཏསྶཱ ཧཏྠཏོ ཨཙྪིནྡིཏྭཱ གཎྷཱཏི. རཱཛཱཔི ཏཾ ཀིརིཡཾ ཨདྡས. ཨཐེཀདིཝསཾ ཙཱུལ༹ནིཀུམཱརསྶ གེཎྜུཀོ རཉྙོ ཙཱུལ༹སཡནསྶ ཧེཊྛཱ པཱཝིསི. ཀུམཱརོ ཏཾ གཎྷནྟོ ཨཏྟནོ ཨིསྶརམཱནེན ‘‘ཨིམསྶ པཙྩནྟརཉྙོ ཧེཊྛཱསཡནེ ན པཝིསཱམཱི’’ཏི ¶ ཏཾ དཎྜཀེན ནཱིཧརིཏྭཱ གཎྷི. རཱཛཱ ཏམྤི ཀིརིཡཾ དིསྭཱ ‘‘ནིཙྪཡེནེས ན བྷཏྟཀཱརཀསྶ པུཏྟོ’’ཏི ཏཾ པཀྐོསཱཔེཏྭཱ ‘‘ཀསྶེསོ པུཏྟོ’’ཏི པུཙྪི. ‘‘མཡ྄ཧཾ པུཏྟོ, དེཝཱ’’ཏི. ‘‘ཨཧཾ ཏཝ པུཏྟཉྩ ཨཔུཏྟཉྩ ཛཱནཱམི, སབྷཱཝཾ མེ ཀཐེཧི, ནོ ཙེ ཀཐེསི, ཛཱིཝིཏཾ ཏེ ནཏྠཱི’’ཏི ཁགྒཾ ཨུགྒིརི. སོ མརཎབྷཡབྷཱིཏོ ‘‘ཀཐེམི, དེཝ, རཧོ པན པཙྩཱསཱིསཱམཱི’’ཏི ཝཏྭཱ རཉྙཱ ཨོཀཱསེ ཀཏེ ཨབྷཡཾ ཡཱཙིཏྭཱ ཡཐཱབྷཱུཏཾ ཨཱརོཙེསི. རཱཛཱ ཏཐཏོ ཉཏྭཱ ཨཏྟནོ དྷཱིཏརཾ ཨལངྐརིཏྭཱ ཏསྶ པཱདཔརིཙཱརིཀཾ ཀཏྭཱ ཨདཱསི.
ཨིམེསཾ པན པལཱཏདིཝསེ ‘‘བྷཏྟཀཱརཀོ ཙ ཙཱུལ༹ནིཀུམཱརོ ཙ བྷཏྟཀཱརཀསྶ པུཏྟོ ཙ མཧཱནསེ པདིཏྟེཡེཝ དཌྜྷཱ’’ཏི སཀལནགརེ ཨེཀཀོལཱཧལཾ ཨཧོསི. ཙལཱཀདེཝཱིཔི ཏཾ པཝཏྟིཾ སུཏྭཱ བྲཱཧྨཎསྶ ཨཱརོཙེསི ‘‘དེཝ, ཏུམྷཱཀཾ མནོརཐོ མཏྠཀཾ པཏྟོ, ཏེ ཀིར ཏཡོཔི བྷཏྟགེཧེཡེཝ དཌྜྷཱ’’ཏི. སོ ཏུཊྛཧཊྛོ ཨཧོསི. ཙལཱཀདེཝཱིཔི ‘‘ཙཱུལ༹ནིཀུམཱརསྶ ཨཊྛཱིནཱི’’ཏི ཨེལ༹ཀསྶ ¶ ཨཊྛཱིནི ཨཱཧརཱཔེཏྭཱ བྲཱཧྨཎསྶ དསྶེཏྭཱ ཚཌྜཱཔེསི. ཨིམམཏྠཾ སནྡྷཱཡ པརིབྦཱཛིཀཱ ‘‘ཨཉྙཾ ཨུཔནིསཾ ཀཏྭཱ, ཝདྷཱ ཏཾ པརིམོཙཡཱི’’ཏི ཨཱཧ. སཱ ཧི ཨེལ༹ཀསྶ ཨཊྛཱིནི ‘‘མནུསྶཨཊྛཱིནཱི’’ཏི དསྶེཏྭཱ ཏཾ ཝདྷཱ མོཙེསི. ཨོརསནྟི ཡཱཡ ཏྭཾ ཨུརེ ཀཏྭཱ ཝཌྜྷིཏོ, ཏཾ ཨོརསཾ པིཡཾ མནཱཔཾ. གབྦྷདྷཱརིནིནྟི ཡཱཡ ཏྭཾ ཀུཙྪིནཱ དྷཱརིཏོ, ཏཾ ཨེཝརཱུཔཾ མཱཏརཾ ཀེན དོསེན དཀརཀྑསསྶ དསྶསཱིཏི.
ཏཾ ¶ སུཏྭཱ རཱཛཱ ‘‘ཨཡྻེ, བཧཱུ མམ མཱཏུ གུཎཱ, ཨཧཉྩསྶཱ མམ ཨུཔཀཱརབྷཱཝཾ ཛཱནཱམི, ཏཏོཔི པན མམེཝ གུཎཱ བཧུཏརཱ’’ཏི མཱཏུ ཨགུཎཾ ཀཐེནྟོ ཨིམཾ གཱཐཱདྭཡམཱཧ –
‘‘དཧརཱ ཝིཡལངྐཱརཾ, དྷཱརེཏི ཨཔིལ༹ནྡྷནཾ;
དོཝཱརིཀེ ཨནཱིཀཊྛེ, ཨཏིཝེལཾ པཛགྒྷཏི.
‘‘ཨཐོཔི པཊིརཱཛཱུནཾ, སཡཾ དཱུཏཱནི སཱསཏི;
མཱཏརཾ ཏེན དོསེན, དཛྫཱཧཾ དཀརཀྑིནོ’’ཏི. (ཛཱ. ༡.༡༦.༢༢༨-༢༢༩);
ཏཏྠ དཧརཱ ཝིཡཱཏི མཧལླིཀཱཔི ཧུཏྭཱ ཏརུཎཱི ཝིཡ. དྷཱརེཏི ཨཔིལ༹ནྡྷནནྟི པིལ༹ནྡྷིཏུཾ ཨཡུཏྟཾ ཨལངྐཱརཾ དྷཱརེཏི. སཱ ཀིར ཝཛིརཔཱུརིཏཾ ཀཉྩནམེཁལཾ པིལ༹ནྡྷིཏྭཱ རཉྙོ ཨམཙྩེཧི སདྡྷིཾ མཧཱཏལེ ནིསིནྣཀཱལེ ཨཔརཱཔརཾ ཙངྐམཏི, མེཁལཱསདྡེན རཱཛནིཝེསནཾ ཨེཀནིནྣཱདཾ ཧོཏི. པཛགྒྷཏཱིཏི ཨེསཱ དོཝཱརིཀེ ཙ ཧཏྠིཨཱཙརིཡཱདིཀེ ཨནཱིཀཊྛེ ཙ, ཡེ ཨེཏིསྶཱ ཨུཙྪིཊྛཀམྤི བྷུཉྫིཏུཾ ཨཡུཏྟརཱུཔཱ, ཏེཔི ཨཱམནྟེཏྭཱ ཏེཧི སདྡྷིཾ ཨཏིཝེལཾ མཧཱཧསིཏཾ ཧསཏི. པཊིརཱཛཱུནནྟི ཨཉྙེསཾ རཱཛཱུནཾ. སཡཾ དཱུཏཱནི སཱསཏཱིཏི མམ ཝཙནེན སཡཾ པཎྞཾ ལིཁིཏྭཱ དཱུཏེཔི པེསེཏི ‘‘མམ མཱཏཱ ཀཱམེ པརིབྷུཉྫནཝཡསྨིཾཡེཝ ཋིཏཱ, ཨསུཀརཱཛཱ ཀིར ཨཱགནྟྭཱ ཏཾ ཨཱནེཏཱུ’’ཏི. ཏེ ‘‘མཡཾ རཉྙོ ཨུཔཊྛཱཀཱ, ཀསྨཱ ནོ ཨེཝཾ ཝདེསཱི’’ཏི པཊིཔཎྞཱནི པེསེནྟི. ཏེསུ པརིསམཛ྄ཛྷེ ཝཱཙིཡམཱནེསུ མམ སཱིསཾ ཚིནྡནཀཱལོ ཝིཡ ཧོཏི, མཱཏརཾ ཏེན དོསེན དཀརཀྑསསྶ དསྶཱམཱིཏི.
ཨཐ པརིབྦཱཛིཀཱ ‘‘མཧཱརཱཛ ¶ , མཱཏརཾ ཏཱཝ ཨིམིནཱ དོསེན དེཧི, བྷརིཡཱ པན ཏེ བཧཱུཔཀཱརཱ’’ཏི ཏསྶཱ གུཎཾ ཀཐེནྟཱི དྭེ གཱཐཱ ཨབྷཱསི –
‘‘ཨིཏྠིགུམྦསྶ ¶ པཝརཱ, ཨཙྩནྟཾ པིཡབྷཱཎིནཱི;
ཨནུགྒཏཱ སཱིལཝཏཱི, ཚཱཡཱཝ ཨནཔཱཡིནཱི.
‘‘ཨཀྐོདྷནཱ པུཉྙཝཏཱི, པཎྜིཏཱ ཨཏྠདསྶིནཱི;
ཨུབྦརིཾ ཀེན དོསེན, ཨཛྫཱསི དཀརཀྑིནོ’’ཏི. (ཛཱ. ༡.༡༦.༢༣༠-༢༣༡);
ཏཏྠ ¶ ཨིཏྠིགུམྦསྶཱཏི ཨིཏྠིགཎསྶ. ཨནུགྒཏཱཏི དཧརཀཱལཏོ པཊྛཱཡ ཨནུགཏཱ. ‘‘ཨཀྐོདྷནཱ’’ཏིཨཱདིཀེན པནསྶཱ གུཎེ ཀཐེཏི. མདྡརཊྛེ སཱགལནགརེ ཝསནཀཱལེ པཧཊཱཔི ཏཝ ཨཱཎཱཀརཎབྷཡེན ཏཡི སིནེཧེན མཱཏཱཔིཏཱུནཾ ན ཀཐེསི, ཨེཝམེསཱ ཨཀྐོདྷནཱ པུཉྙཝཏཱི པཎྜིཏཱ ཨཏྠདསྶིནཱིཏི. ཨིདཾ དཧརཀཱལེ ཨཀྐོདྷནཱདིབྷཱཝཾ སནྡྷཱཡཱཧ. ཨུབྦརིནྟི ཨོརོདྷཾ. ཨེཝཾ གུཎསམྤནྣཾ ནནྡཱདེཝིཾ ཀེན དོསེན དཀརཀྑསསྶ དསྶསཱིཏི ཝདཏི.
སོ ཏསྶཱ ཨགུཎཾ ཀཐེནྟོ ཨཱཧ –
‘‘ཁིཌྜཱརཏིསམཱཔནྣཾ, ཨནཏྠཝསམཱགཏཾ;
སཱ མཾ སཀཱན པུཏྟཱནཾ, ཨཡཱཙཾ ཡཱཙཏེ དྷནཾ.
‘‘སོཧཾ དདཱམི སཱརཏྟོ, བཧུཾ ཨུཙྩཱཝཙཾ དྷནཾ;
སུདུཙྩཛཾ ཙཛིཏྭཱན, པཙྪཱ སོཙཱམི དུམྨནོ;
ཨུབྦརིཾ ཏེན དོསེན, དཛྫཱཧཾ དཀརཀྑིནོ’’ཏི. (ཛཱ. ༡.༡༦.༢༣༢-༢༣༣);
ཏཏྠ ཨནཏྠཝསམཱགཏནྟི ཏཱཡ ཁིཌྜཱརཏིཡཱ ཀཱམཀཱིལཱ༹ཡ ཨནཏྠཀཱརཀཱནཾ ཀིལེསཱནཾ ཝསཾ ཨཱགཏཾ མཾ ཝིདིཏྭཱ. སཱ མནྟི སཱ ནནྡཱདེཝཱི མཾ. སཀཱན པུཏྟཱནནྟི ཡཾ མཡཱ ཨཏྟནོ པུཏྟདྷཱིཏཱནཉྩ བྷརིཡཱནཉྩ དིནྣཾ པིལ༹ནྡྷནཾ, ཏཾ ཨཡཱཙིཏབྦརཱུཔཾ ‘‘མཡ྄ཧཾ དེཧཱི’’ཏི ཡཱཙཏི. པཙྪཱ སོཙཱམཱིཏི སཱ དུཏིཡདིཝསེ ‘‘ཨིམཱནི པིལ༹ནྡྷནཱནི རཉྙཱ མེ དིནྣཱནི, ཨཱཧརཐེཏཱནཱི’’ཏི ཏེསཾ རོདནྟཱནཾ ཨོམུཉྩིཏྭཱ གཎྷཱཏི. ཨཐཱཧཾ ཏེ རོདམཱནེ མམ སནྟིཀཾ ཨཱགཏེ དིསྭཱ པཙྪཱ སོཙཱམི. ཨེཝཾ དོསཀཱརིཀཱ ཨེསཱ. ཨིམིནཱ ནཾ དོསེན དཀརཀྑསསྶ དསྶཱམཱིཏི.
ཨཐ ¶ ནཾ པརིབྦཱཛིཀཱ ‘‘ཨིམཾ ཏཱཝ ཨིམིནཱ དོསེན དེཧི, ཀནིཊྛོ པན ཏེ ཏིཁིཎམནྟིཀུམཱརོ ཨུཔཀཱརཀོ, ཏཾ ཀེན དོསེན དསྶཏཱི’’ཏི པུཙྪནྟཱི ཨཱཧ –
‘‘ཡེནོཙིཏཱ ¶ ཛནཔདཱ, ཨཱནཱིཏཱ ཙ པཊིགྒཧཾ;
ཨཱབྷཏཾ པརརཛྫེབྷི, ཨབྷིཊྛཱཡ བཧུཾ དྷནཾ.
དྷནུགྒཧཱནཾ པཝརཾ, སཱུརཾ ཏིཁིཎམནྟིནཾ;
བྷཱཏརཾ ཀེན དོསེན, དཛྫཱསི དཀརཀྑིནོ’’ཏི. (ཛཱ. ༡.༡༦.༢༣༤-༢༣༥);
ཏཏྠ ¶ ཨོཙིཏཱཏི ཝཌྜྷིཏཱ. པཊིགྒཧནྟི ཡེན ཙ ཏུམྷེ པརདེསེ ཝསནྟཱ པུན གེཧཾ ཨཱནཱིཏཱ. ཨབྷིཊྛཱཡཱཏི ཨབྷིབྷཝིཏྭཱ. ཏིཁིཎམནྟིནནྟི ཏིཁིཎཔཉྙཾ.
སོ ཀིར མཱཏུ བྲཱཧྨཎེན སདྡྷིཾ ཝསནཀཱལེ ཛཱཏོ. ཨཐསྶ ཝཡཔྤཏྟསྶ བྲཱཧྨཎོ ཁགྒཾ ཧཏྠེ དཏྭཱ ‘‘ཨིམཾ གཧེཏྭཱ མཾ ཨུཔཊྛཧཱ’’ཏི ཨཱཧ. སོ བྲཱཧྨཎཾ ‘‘པིཏཱ མེ’’ཏི སཉྙཱཡ ཨུཔཊྛཱསི. ཨཐ ནཾ ཨེཀོ ཨམཙྩོ ‘‘ཀུམཱར, ན ཏྭཾ ཨེཏསྶ པུཏྟོ, ཏཝ ཀུཙྪིགཏཀཱལེ ཙལཱཀདེཝཱི རཱཛཱནཾ མཱརེཏྭཱ ཨེཏསྶ ཚཏྟཾ ཨུསྶཱཔེསི, ཏྭཾ མཧཱཙཱུལ༹ནིརཉྙོ པུཏྟོ’’ཏི ཨཱཧ. སོ ཀུཛ྄ཛྷིཏྭཱ ‘‘ཨེཀེན ཨུཔཱཡེན ནཾ མཱརེསྶཱམཱི’’ཏི རཱཛཀུལཾ པཝིསནྟོ ཏཾ ཁགྒཾ ཨེཀསྶ པཱདམཱུལིཀསྶ དཏྭཱ ཨཔརཾ ‘‘ཏྭཾ རཱཛདྭཱརེ ‘མམེསོ ཁགྒོ’ཏི ཨིམིནཱ སདྡྷིཾ ཝིཝཱདཾ ཀརེཡྻཱསཱི’’ཏི ཝཏྭཱ པཱཝིསི. ཏེ ཀལཧཾ ཀརིཾསུ. སོ ‘‘ཀིཾ ཨེས ཀལཧོ’’ཏི ཨེཀཾ པུརིསཾ པེསེསི. སོ ཨཱགནྟྭཱ ‘‘ཁགྒཏྠཱཡཱ’’ཏི ཨཱཧ. བྲཱཧྨཎོ ཏཾ སུཏྭཱ ‘‘ཀིཾ ཨེཏ’’ནྟི པུཙྪི. སོ ཀིར ཏུམྷེཧི མམ དིནྣཁགྒོ པརསྶ སནྟཀོཏི. ‘‘ཀིཾ ཝདེསི, ཏཱཏ, ཏེན ཧི ཨཱཧརཱཔེཧི, སཉྫཱནིསྶཱམི ན’’ནྟི ཨཱཧ. སོ ཏཾ ཨཱཧརཱཔེཏྭཱ ཀོསཏོ ནིཀྐཌྜྷིཏྭཱ ‘‘པསྶཐཱ’’ཏི ཏཾ སཉྫྷཱནཱཔེནྟོ ཝིཡ ཨུཔགནྟྭཱ ཨེཀཔྤཧཱརེནེཝ ཏསྶ སཱིསཾ ཚིནྡིཏྭཱ ཨཏྟནོ པཱདམཱུལེ པཱཏེསི. ཏཏོ རཱཛགེཧཾ པཊིཛགྒིཏྭཱ ནགརཾ ཨལངྐརིཏྭཱ ཏསྶ ཨབྷིསེཀེ ཨུཔནཱིཏེ མཱཏཱ ཙཱུལ༹ནིཀུམཱརསྶ མདྡརཊྛེ ཝསནབྷཱཝཾ ཨཱཙིཀྑི. ཏཾ སུཏྭཱ ཀུམཱརོ སེནངྒཔརིཝུཏོ ཏཏྠ གནྟྭཱ བྷཱཏརཾ ཨཱནེཏྭཱ རཛྫཾ པཊིཙྪཱཔེསི. ཏཏོ པཊྛཱཡ ཏཾ ‘‘ཏིཁིཎམནྟཱི’’ཏི སཉྫཱནིཾསུ. པརིབྦཱཛིཀཱ ཏཾ ‘‘ཨེཝརཱུཔཾ བྷཱཏརཾ ཀེན དོསེན དཀརཀྑསསྶ དཛྫཱསཱི’’ཏི པུཙྪི.
རཱཛཱ ¶ ཏསྶ དོསཾ ཀཐེནྟོ ཨཱཧ –
‘‘ཡེནོཙིཏཱ ཛནཔདཱ, ཨཱནཱིཏཱ ཙ པཊིགྒཧཾ;
ཨཱབྷཏཾ པརརཛྫེབྷི, ཨབྷིཊྛཱཡ བཧུཾ དྷནཾ.
‘‘དྷནུགྒཧཱནཾ པཝརོ, སཱུརོ ཏིཁིཎམནྟི ཙ;
མཡཱཡཾ སུཁིཏོ རཱཛཱ, ཨཏིམཉྙཏི དཱརཀོ.
‘‘ཨུཔཊྛཱནམྤི ¶ མེ ཨཡྻེ, ན སོ ཨེཏི ཡཐཱ པུརེ;
བྷཱཏརཾ ཏེན དོསེན, དཛྫཱཧཾ དཀརཀྑིནོ’’ཏི. (ཛཱ. ༡.༡༦.༢༣༦-༢༣༨);
ཏཏྠ པརརཛྫེབྷཱིཏི ཨིམསྶ པརརཛྫཏོ ཙ བཧུ དྷནཾ ཨཱབྷཏཾ, ཨཡཉྩ པརརཛྫེ ཝསནྟོ པུན ཨིམཾ གེཧཾ ཨཱནེཏྭཱ ‘‘ཨེས མཡཱ མཧཏི ཡསེ པཏིཊྛཱཔིཏོ’’ཏི ¶ ཝདཏི. ཡཐཱ པུརེཏི པུབྦེ པཱཏོཝ ཨཱགཙྪཏི, ཨིདཱནི པན ན ཏཐཱ ཨེཏི. ཨིམིནཱ ནཾ དོསེན དཀརཀྑསསྶ དསྶཱམཱིཏི.
ཨཐ པརིབྦཱཛིཀཱ ‘‘བྷཱཏུ ཏཱཝ ཀོ དོསོ ཧོཏུ, དྷནུསེཁཀུམཱརོ པན ཏཡི སིནེཧགུཎཡུཏྟོ བཧཱུཔཀཱརོ’’ཏི ཏསྶ གུཎཾ ཀཐེནྟཱི ཨཱཧ –
‘‘ཨེཀརཏྟེན ཨུབྷཡོ, ཏྭཉྩེཝ དྷནུསེཁ ཙ;
ཨུབྷོ ཛཱཏེཏྠ པཉྩཱལཱ, སཧཱཡཱ སུསམཱཝཡཱ.
‘‘ཙརིཡཱ ཏཾ ཨནུབནྡྷིཏྠོ, ཨེཀདུཀྑསུཁོ ཏཝ;
ཨུསྶུཀྐོ ཏེ དིཝཱརཏྟིཾ, སབྦཀིཙྩེསུ བྱཱཝཊོ;
སཧཱཡཾ ཀེན དོསེན, དཛྫཱསི དཀརཀྑིནོ’’ཏི. (ཛཱ. ༡.༡༦.༢༣༩-༢༤༠);
ཏཏྠ དྷནུསེཁཙཱཏི དྷནུསེཁོ ཙ, དྷནུསེཁཀུམཱརོ ཙཱཏི ཨཏྠོ. ཨེཏྠཱཏི ཨིདྷེཝ ནགརེ. པཉྩཱལཱཏི ཨུཏྟརཔཉྩཱལནགརེ ཛཱཏཏྟཱ ཨེཝཾཝོཧཱརཱ. སུསམཱཝཡཱཏི སུཊྛུ སམཝཡཱ. ཙརིཡཱ ཏཾ ཨནུབནྡྷིཏྠོཏི དཧརཀཱལེ ཛནཔདཙཱརིཀཱཡ པཀྐནྟཾ ཏཾ ཨནུབནྡྷི, ཚཱཡཱཝ ན ཝིཛཧི. ཨུསྶུཀྐོཏི ¶ ཏཝ ཀིཙྩེསུ རཏྠིནྡིཝཾ ཨུསྶུཀྐོ ཚནྡཛཱཏོ ནིཙྩཾ བྱཱཝཊོ. ཏཾ ཀེན དོསེན དཀརཀྑསསྶ དསྶསཱིཏི.
ཨཐསྶ རཱཛཱ དོསཾ ཀཐེནྟོ ཨཱཧ –
‘‘ཙརིཡཱ མཾ ཨཡཾ ཨཡྻེ, པཛགྒྷིཏྠོ མཡཱ སཧ;
ཨཛྫཱཔི ཏེན ཝཎྞེན, ཨཏིཝེལཾ པཛགྒྷཏི.
‘‘ཨུབྦརིཡཱཔིཧཾ ཨཡྻེ, མནྟཡཱམི རཧོགཏོ;
ཨནཱམནྟོ པཝིསཏི, པུབྦེ ཨཔྤཊིཝེདིཏོ.
‘‘ལདྡྷདྭཱརོ ཀཏོཀཱསོ, ཨཧིརིཀཾ ཨནཱདརཾ;
སཧཱཡཾ ཏེན དོསེན, དཛྫཱཧཾ དཀརཀྑིནོ’’ཏི. (ཛཱ. ༡.༡༦.༢༤༡-༢༤༣);
ཏཏྠ ¶ ཨཛྫཱཔི ཏེན ཝཎྞེནཱཏི ཡཐཱ ཙརིཡཱཡ པུབྦེ མཾ ཨནུབནྡྷནྟོ མཡཱ ཨནཱཐེན སདྡྷིཾ ཨེཀཏོཝ བྷུཉྫནྟོ སཡནྟོ ཧཏྠཾ པཧརིཏྭཱ མཧཱཧསིཏཾ ཧསི, ཨཛྫཱཔི ཏཐེཝ ཧསཏི, དུགྒཏཀཱལེ ཝིཡ མཾ མཉྙཏི. ཨནཱམནྟོཏི རཧོ ནནྡཱདེཝིཡཱ སདྡྷིཾ མནྟེནྟེཔི མཡི ཨཛཱནཱཔེཏྭཱ སཧསཱཝ པཝིསཏི. ཨིམིནཱ དོསེན ཏཾ ཨཧིརིཀཾ ཨནཱདརཾ དཀརཀྑསསྶ དསྶཱམཱིཏི.
ཨཐ པརིབྦཱཛིཀཱ ‘‘མཧཱརཱཛ, ཏཝ སཧཱཡཀསྶ ཏཱཝ ཨེསོ དོསོ ཧོཏུ, པུརོཧིཏོ པན ཏཝ བཧཱུཔཀཱརོ’’ཏི ཏསྶ གུཎཾ ཀཐེནྟཱི ཨཱཧ –
‘‘ཀུསལོ སབྦནིམིཏྟཱནཾ, རུཏཉྙཱུ ཨཱགཏཱགམོ;
ཨུཔྤཱཏེ སུཔིནེ ཡུཏྟོ, ནིཡྻཱནེ ཙ པཝེསནེ.
‘‘པཊྛོ ¶ བྷཱུམནྟལིཀྑསྨིཾ, ནཀྑཏྟཔདཀོཝིདོ;
བྲཱཧྨཎཾ ཀེན དོསེན, དཛྫཱསི དཀརཀྑིནོ’’ཏི. (ཛཱ. ༡.༡༦.༢༤༤-༢༤༥);
ཏཏྠ ¶ སབྦནིམིཏྟཱནནྟི ‘‘ཨིམིནཱ ནིམིཏྟེན ཨིདཾ བྷཝིསྶཏི, ཨིམིནཱ ཨིད’’ནྟི ཨེཝཾ སབྦནིམིཏྟེསུ ཀུསལོ. རུཏཉྙཱུཏི སབྦརཝཾ ཛཱནཱཏི. ཨུཔྤཱཏེཏི ཙནྡགྒཱཧསཱུརིཡགྒཱཧཨུཀྐཱཔཱཏདིསཱཌཱཧཱདིཀེ ཨུཔྤཱཏེ. སུཔིནེ ཡུཏྟོཏི སུཔིནེ ཙ ཏསྶ ནིཔྥཏྟིཛཱནནཝསེན ཡུཏྟོ. ནིཡྻཱནེ ཙ པཝེསནེཏི ཨིམིནཱ ནཀྑཏྟེན ནིཡྻཱཡིཏབྦཾ, ཨིམིནཱ པཝིསིཏབྦནྟི ཛཱནཱཏི. པཊྛོཏི ཚེཀོ པཊིབལོ, བྷཱུམིཡཉྩ ཨནྟལིཀྑེ ཙ དོསགུཎེ ཛཱནིཏུཾ སམཏྠོ. ནཀྑཏྟཔདཀོཝིདོཏི ཨཊྛཝཱིསཏིཡཱ ནཀྑཏྟཀོཊྛཱསེསུ ཚེཀོ. ཏཾ ཀེན དོསེན དཀརཀྑསསྶ དསྶསཱིཏི.
རཱཛཱ ཏསྶ དོསཾ ཀཐེནྟོ ཨཱཧ –
‘‘པརིསཱཡམྤི མེ ཨཡྻེ, ཨུམྨཱིལེཏྭཱ ཨུདིཀྑཏི;
ཏསྨཱ ཨཙྩབྷམུཾ ལུདྡཾ, དཛྫཱཧཾ དཀརཀྑིནོ’’ཏི. (ཛཱ. ༡.༡༦.༢༤༦);
ཏསྶཏྠོ – ཨཡྻེ, ཨེས མཾ པརིསམཛ྄ཛྷེ ཨོལོཀེནྟོཔི ཨཀྑཱིནི ཨུམྨཱིལེཏྭཱ ཀུདྡྷོ ཝིཡ ཨུདིཀྑཏི, ཏསྨཱ ཨེཝཾ ཨཏིཀྐམིཏྭཱ ཋིཏབྷམུཾ ཨམནཱཔེན ཨུཀྑིཏྟབྷམུཀཾ ཝིཡ ལུདྡཾ བྷཡཱནཀཾ ཏཾ ཨཧཾ དཀརཀྑསསྶ དསྶཱམཱིཏི.
ཏཏོ ¶ པརིབྦཱཛིཀཱ ‘‘མཧཱརཱཛ, ཏྭཾ ‘མཱཏརཾ ཨཱདིཾ ཀཏྭཱ ཨིམེ པཉྩ དཀརཀྑསསྶ དམྨཱི’ཏི ཝདསི, ‘ཨེཝརཱུཔཉྩ སིརིཝིབྷཝཾ ཨགཎེཏྭཱ ཨཏྟནོ ཛཱིཝིཏམྤི མཧོསདྷསྶ དམྨཱི’ཏི ཝདསི, ཀཾ ཏསྶ གུཎཾ པསྶསཱི’’ཏི པུཙྪནྟཱི ཨིམཱ གཱཐཱཡོ ཨཱཧ –
‘‘སསམུདྡཔརིཡཱཡཾ, མཧིཾ སཱགརཀུཎྜལཾ;
ཝསུནྡྷརཾ ཨཱཝསཏི, ཨམཙྩཔརིཝཱརིཏོ.
‘‘ཙཱཏུརནྟོ མཧཱརཊྛོ, ཝིཛིཏཱཝཱི མཧབྦལོ;
པཐབྱཱ ཨེཀརཱཛཱསི, ཡསོ ཏེ ཝིཔུལཾ གཏོ.
‘‘སོལ༹སིཏྠིསཧསྶཱནི, ཨཱམུཏྟམཎིཀུཎྜལཱ;
ནཱནཱཛནཔདཱ ནཱརཱི, དེཝཀཉྙཱུཔམཱ སུབྷཱ.
‘‘ཨེཝཾ ¶ སབྦངྒསམྤནྣཾ, སབྦཀཱམསམིདྡྷིནཾ;
སུཁིཏཱནཾ པིཡཾ དཱིགྷཾ, ཛཱིཝིཏཾ ཨཱཧུ ཁཏྟིཡ.
‘‘ཨཐ ཏྭཾ ཀེན ཝཎྞེན, ཀེན ཝཱ པན ཧེཏུནཱ;
པཎྜིཏཾ ཨནུརཀྑནྟོ, པཱཎཾ ཙཛསི དུཙྩཛ’’ནྟི. (ཛཱ. ༡.༡༦.༢༤༧-༢༥༡);
ཏཏྠ ¶ སསམུདྡཔརིཡཱཡནྟི སམུདྡམརིཡཱདསངྑཱཏེན སམུདྡཔརིཀྑེཔེན སམནྣཱགཏཾ. སཱགརཀུཎྜལནྟི པརིཀྑིཔིཏྭཱ ཋིཏསྶ སཱགརསྶ ཀུཎྜལབྷཱུཏཾ. ཝིཛིཏཱཝཱིཏི ཝིཛིཏསངྒཱམོ. ཨེཀརཱཛཱཏི ཨཉྙསྶ ཨཏྟནོ སདིསསྶ རཉྙོ ཨབྷཱཝཏོ ཨེཀོཝ རཱཛཱ. སབྦཀཱམསམིདྡྷིནནྟི སབྦེསམྤི ཝཏྠུཀཱམཀིལེསཀཱམཱནཾ སམིདྡྷིཡཱ སམནྣཱགཏཱནཾ. སུཁིཏཱནནྟི ཨེཝརཱུཔཱནཾ སུཁིཏཱནཾ སཏྟཱནཾ ཨེཝཾ སབྦངྒསམྤནྣཾ ཛཱིཝིཏཾ དཱིགྷམེཝ པིཡཾ, ན ཏེ ཨཔྤཾ ཛཱིཝིཏམིཙྪནྟཱིཏི པཎྜིཏཱ ཝདནྟི. པཱཎནྟི ཨེཝརཱུཔཾ ཨཏྟནོ ཛཱིཝིཏཾ ཀསྨཱ པཎྜིཏཾ ཨནུརཀྑནྟོ ཙཛསཱིཏི.
རཱཛཱ ཏསྶཱ ཀཐཾ སུཏྭཱ པཎྜིཏསྶ གུཎཾ ཀཐེནྟོ ཨིམཱ གཱཐཱ ཨབྷཱསི –
‘‘ཡཏོཔི ཨཱགཏོ ཨཡྻེ, མམ ཧཏྠཾ མཧོསདྷོ;
ནཱབྷིཛཱནཱམི དྷཱིརསྶ, ཨཎུམཏྟམྤི དུཀྐཊཾ.
‘‘སཙེ ཙ ཀིསྨིཙི ཀཱལེ, མརཎཾ མེ པུརེ སིཡཱ;
སོ མེ པུཏྟེ པཔུཏྟེ ཙ, སུཁཱཔེཡྻ མཧོསདྷོ.
‘‘ཨནཱགཏཾ ¶ པཙྩུཔྤནྣཾ, སབྦམཏྠམྤི པསྶཏི;
ཨནཱཔརཱདྷཀམྨནྟཾ, ན དཛྫཾ དཀརཀྑིནོ’’ཏི. (ཛཱ. ༡.༡༦.༢༥༢-༢༥༤);
ཏཏྠ ཀིསྨིཙཱིཏི ཀིསྨིཉྩི ཀཱལེ. སུཁཱཔེཡྻཱཏི སུཁསྨིཾཡེཝ པཏིཊྛཱཔེཡྻ. སབྦམཏྠནྟི ཨེས ཨནཱགཏཉྩ པཙྩུཔྤནྣཉྩ ཨཏཱིཏཉྩ སབྦཾ ཨཏྠཾ སབྦཉྙུབུདྡྷོ ཝིཡ པསྶཏི. ཨནཱཔརཱདྷཀམྨནྟནྟི ཀཱཡཀམྨཱདཱིསུ ཨཔརཱདྷརཧིཏཾ. ན དཛྫནྟི ཨཡྻེ, ཨེཝཾ ཨསམདྷུརཾ ¶ པཎྜིཏཾ ནཱཧཾ དཀརཀྑསསྶ དསྶཱམཱིཏི ཨེཝཾ སོ མཧཱསཏྟསྶ གུཎེ ཙནྡམཎྜལཾ ཨུདྡྷརནྟོ ཝིཡ ཨུཀྑིཔིཏྭཱ ཀཐེསི.
ཨིཏི ཨིམཾ ཛཱཏཀཾ ཡཐཱནུསནྡྷིཔྤཏྟཾ. ཨཐ པརིབྦཱཛིཀཱ ཙིནྟེསི ‘‘ཨེཏྟཀེནཔི པཎྜིཏསྶ གུཎཱ པཱཀཊཱ ན ཧོནྟི, སཀལནགརཝཱསཱིནཾ མཛ྄ཛྷེ སཱགརཔིཊྛེ ཨཱསིཏྟཏེལཾ ཝིཔྤཀིརནྟཱི ཝིཡ ཏསྶ གུཎེ པཱཀཊེ ཀརིསྶཱམཱི’’ཏི རཱཛཱནཾ གཧེཏྭཱ པཱསཱདཱ ཨོརུཡ྄ཧ རཱཛངྒཎེ ཨཱསནཾ པཉྙཔེཏྭཱ ཏཏྠ ནིསཱིདཱཔེཏྭཱ ནཱགརེ སནྣིཔཱཏཱཔེཏྭཱ པུན རཱཛཱནཾ ཨཱདིཏོ པཊྛཱཡ དཀརཀྑསསྶ པཉྷཾ པུཙྪིཏྭཱ ཏེན ཧེཊྛཱ ཀཐིཏནིཡཱམེནེཝ ཀཐིཏཀཱལེ ནཱགརེ ཨཱམནྟེཏྭཱ ཨཱཧ –
‘‘ཨིདཾ སུཎཱཐ པཉྩཱལཱ, ཙཱུལ༹ནེཡྻསྶ བྷཱསིཏཾ;
པཎྜིཏཾ ཨནུརཀྑནྟོ, པཱཎཾ ཙཛཏི དུཙྩཛཾ.
‘‘མཱཏུ ¶ བྷརིཡཱཡ བྷཱཏུཙྩ, སཁིནོ བྲཱཧྨཎསྶ ཙ;
ཨཏྟནོ ཙཱཔི པཉྩཱལོ, ཚནྣཾ ཙཛཏི ཛཱིཝིཏཾ.
‘‘ཨེཝཾ མཧཏྠིཀཱ པཉྙཱ, ནིཔུཎཱ སཱདྷུཙིནྟིནཱི;
དིཊྛདྷམྨཧིཏཏྠཱཡ, སམྤརཱཡསུཁཱཡ ཙཱ’’ཏི. (ཛཱ. ༡.༡༦.༢༥༥-༢༥༧);
ཏཏྠ མཧཏྠིཀཱཏི མཧནྟཾ ཨཏྠཾ གཧེཏྭཱ ཋིཏཱ. དིཊྛདྷམྨཧིཏཏྠཱཡཱཏི ཨིམསྨིཾཡེཝ ཨཏྟབྷཱཝེ ཧིཏཏྠཱཡ ཙ པརལོཀེ སུཁཏྠཱཡ ཙ ཧོཏཱིཏི.
ཨིཏི སཱ རཏནགྷརསྶ མཎིཀྑནྡྷེན ཀཱུཊཾ གཎྷནྟཱི ཝིཡ མཧཱསཏྟསྶ གུཎེཧི དེསནཱཀཱུཊཾ གཎྷཱིཏི.
དཀརཀྑསཔཉྷོ ནིཊྛིཏོ.
སཏྠཱ ¶ ¶ ཨིམཾ དྷམྨདེསནཾ ཨཱཧརིཏྭཱ ‘‘ན, བྷིཀྑཝེ, ཨིདཱནེཝ ཏཐཱགཏོ པཉྙཝཱ, པུབྦེཔི པཉྙཝཱཡེཝཱ’’ཏི ཛཱཏཀཾ སམོདྷཱནེནྟོ ཨོསཱནགཱཐཱ ཨཱཧ –
‘‘བྷེརཱི ཨུཔྤལཝཎྞཱསི, པིཏཱ སུདྡྷོདནོ ཨཧུ;
མཱཏཱ ཨཱསི མཧཱམཱཡཱ, ཨམརཱ བིམྦསུནྡརཱི.
‘‘སུཝོ ཨཧོསི ཨཱནནྡོ, སཱརིཔུཏྟོ ཙ ཙཱུལ༹ནཱི;
དེཝདཏྟོ ཙ ཀེཝཊྚོ, ཙལཱཀཱ ཐུལླནནྡིནཱི.
‘‘པཉྩཱལཙནྡཱི སུནྡརཱི, སཱལི༹ཀཱ མལླིཀཱ ཨཧུ;
ཨམྦཊྛོ ཨཱསི ཀཱམིནྡོ, པོཊྛཔཱདོ ཙ པུཀྐུསོ.
‘‘པིལོཏིཀོ ཙ དེཝིནྡོ, སེནཀོ ཨཱསི ཀསྶཔོ;
ཨུདུམྦརཱ མངྒལིཀཱ, ཝེདེཧོ ཀཱལུ༹དཱཡཀོ;
མཧོསདྷོ ལོཀནཱཐོ, ཨེཝཾ དྷཱརེཐ ཛཱཏཀ’’ནྟི.
ཨུམངྒཛཱཏཀཝཎྞནཱ པཉྩམཱ.
(ཚཊྛོ བྷཱགོ ནིཊྛིཏོ.)